1.001.01a agním īḷe puróhitaṁ yajñásya devám r̥tvíjam |
1.001.01c hótāraṁ ratnadhā́tamam ||

1.001.02a agníḥ pū́rvebhir ŕ̥ṣibhir ī́ḍyo nū́tanair utá |
1.001.02c sá devā́m̐ éhá vakṣati ||

1.001.03a agnínā rayím aśnavat póṣam evá divé-dive |
1.001.03c yaśásaṁ vīrávattamam ||

1.001.04a ágne yáṁ yajñám adhvaráṁ viśvátaḥ paribhū́r ási |
1.001.04c sá íd devéṣu gacchati ||

1.001.05a agnír hótā kavíkratuḥ satyáś citráśravastamaḥ |
1.001.05c devó devébhir ā́ gamat ||

1.001.06a yád aṅgá dāśúṣe tvám ágne bhadráṁ kariṣyási |
1.001.06c távét tát satyám aṅgiraḥ ||

1.001.07a úpa tvāgne divé-dive dóṣāvastar dhiyā́ vayám |
1.001.07c námo bháranta émasi ||

1.001.08a rā́jantam adhvarā́ṇāṁ gopā́m r̥tásya dī́divim |
1.001.08c várdhamānaṁ své dáme ||

1.001.09a sá naḥ pitéva sūnávé 'gne sūpāyanó bhava |
1.001.09c sácasvā naḥ svastáye ||

1.002.01a vā́yav ā́ yāhi darśatemé sómā áraṁkr̥tāḥ |
1.002.01c téṣām pāhi śrudhī́ hávam ||

1.002.02a vā́ya ukthébhir jarante tvā́m ácchā jaritā́raḥ |
1.002.02c sutásomā aharvídaḥ ||

1.002.03a vā́yo táva prapr̥ñcatī́ dhénā jigāti dāśúṣe |
1.002.03c urūcī́ sómapītaye ||

1.002.04a índravāyū imé sutā́ úpa práyobhir ā́ gatam |
1.002.04c índavo vām uśánti hí ||

1.002.05a vā́yav índraś ca cetathaḥ sutā́nāṁ vājinīvasū |
1.002.05c tā́v ā́ yātam úpa dravát ||

1.002.06a vā́yav índraś ca sunvatá ā́ yātam úpa niṣkr̥tám |
1.002.06c makṣv ìtthā́ dhiyā́ narā ||

1.002.07a mitráṁ huve pūtádakṣaṁ váruṇaṁ ca riśā́dasam |
1.002.07c dhíyaṁ ghr̥tā́cīṁ sā́dhantā ||

1.002.08a r̥téna mitrāvaruṇāv r̥tāvr̥dhāv r̥taspr̥śā |
1.002.08c krátum br̥hántam āśāthe ||

1.002.09a kavī́ no mitrā́váruṇā tuvijātā́ urukṣáyā |
1.002.09c dákṣaṁ dadhāte apásam ||

1.003.01a áśvinā yájvarīr íṣo drávatpāṇī śúbhas patī |
1.003.01c púrubhujā canasyátam ||

1.003.02a áśvinā púrudaṁsasā nárā śávīrayā dhiyā́ |
1.003.02c dhíṣṇyā vánataṁ gíraḥ ||

1.003.03a dásrā yuvā́kavaḥ sutā́ nā́satyā vr̥ktábarhiṣaḥ |
1.003.03c ā́ yātaṁ rudravartanī ||

1.003.04a índrā́ yāhi citrabhāno sutā́ imé tvāyávaḥ |
1.003.04c áṇvībhis tánā pūtā́saḥ ||

1.003.05a índrā́ yāhi dhiyéṣitó víprajūtaḥ sutā́vataḥ |
1.003.05c úpa bráhmāṇi vāghátaḥ ||

1.003.06a índrā́ yāhi tū́tujāna úpa bráhmāṇi harivaḥ |
1.003.06c suté dadhiṣva naś cánaḥ ||

1.003.07a ómāsaś carṣaṇīdhr̥to víśve devāsa ā́ gata |
1.003.07c dāśvā́ṁso dāśúṣaḥ sutám ||

1.003.08a víśve devā́so aptúraḥ sutám ā́ ganta tū́rṇayaḥ |
1.003.08c usrā́ iva svásarāṇi ||

1.003.09a víśve devā́so asrídha éhimāyāso adrúhaḥ |
1.003.09c médhaṁ juṣanta váhnayaḥ ||

1.003.10a pāvakā́ naḥ sárasvatī vā́jebhir vājínīvatī |
1.003.10c yajñáṁ vaṣṭu dhiyā́vasuḥ ||

1.003.11a codayitrī́ sūnŕ̥tānāṁ cétantī sumatīnā́m |
1.003.11c yajñáṁ dadhe sárasvatī ||

1.003.12a mahó árṇaḥ sárasvatī prá cetayati ketúnā |
1.003.12c dhíyo víśvā ví rājati ||

1.004.01a surūpakr̥tnúm ūtáye sudúghām iva godúhe |
1.004.01c juhūmási dyávi-dyavi ||

1.004.02a úpa naḥ sávanā́ gahi sómasya somapāḥ piba |
1.004.02c godā́ íd reváto mádaḥ ||

1.004.03a áthā te ántamānāṁ vidyā́ma sumatīnā́m |
1.004.03c mā́ no áti khya ā́ gahi ||

1.004.04a párehi vígram ástr̥tam índram pr̥cchā vipaścítam |
1.004.04c yás te sákhibhya ā́ váram ||

1.004.05a utá bruvantu no nído nír anyátaś cid ārata |
1.004.05c dádhānā índra íd dúvaḥ ||

1.004.06a utá naḥ subhágām̐ arír vocéyur dasma kr̥ṣṭáyaḥ |
1.004.06c syā́méd índrasya śármaṇi ||

1.004.07a ém āśúm āśáve bhara yajñaśríyaṁ nr̥mā́danam |
1.004.07c patayán mandayátsakham ||

1.004.08a asyá pītvā́ śatakrato ghanó vr̥trā́ṇām abhavaḥ |
1.004.08c prā́vo vā́jeṣu vājínam ||

1.004.09a táṁ tvā vā́jeṣu vājínaṁ vājáyāmaḥ śatakrato |
1.004.09c dhánānām indra sātáye ||

1.004.10a yó rāyò 'vánir mahā́n supāráḥ sunvatáḥ sákhā |
1.004.10c tásmā índrāya gāyata ||

1.005.01a ā́ tv étā ní ṣīdaténdram abhí prá gāyata |
1.005.01c sákhāyaḥ stómavāhasaḥ ||

1.005.02a purūtámam purūṇā́m ī́śānaṁ vā́ryāṇām |
1.005.02c índraṁ sóme sácā suté ||

1.005.03a sá ghā no yóga ā́ bhuvat sá rāyé sá púraṁdhyām |
1.005.03c gámad vā́jebhir ā́ sá naḥ ||

1.005.04a yásya saṁsthé ná vr̥ṇváte hárī samátsu śátravaḥ |
1.005.04c tásmā índrāya gāyata ||

1.005.05a sutapā́vne sutā́ imé śúcayo yanti vītáye |
1.005.05c sómāso dádhyāśiraḥ ||

1.005.06a tváṁ sutásya pītáye sadyó vr̥ddhó ajāyathāḥ |
1.005.06c índra jyaíṣṭhyāya sukrato ||

1.005.07a ā́ tvā viśantv āśávaḥ sómāsa indra girvaṇaḥ |
1.005.07c śáṁ te santu prácetase ||

1.005.08a tvā́ṁ stómā avīvr̥dhan tvā́m ukthā́ śatakrato |
1.005.08c tvā́ṁ vardhantu no gíraḥ ||

1.005.09a ákṣitotiḥ saned imáṁ vā́jam índraḥ sahasríṇam |
1.005.09c yásmin víśvāni paúṁsyā ||

1.005.10a mā́ no mártā abhí druhan tanū́nām indra girvaṇaḥ |
1.005.10c ī́śāno yavayā vadhám ||

1.006.01a yuñjánti bradhnám aruṣáṁ cárantam pári tasthúṣaḥ |
1.006.01c rócante rocanā́ diví ||

1.006.02a yuñjánty asya kā́myā hárī vípakṣasā ráthe |
1.006.02c śóṇā dhr̥ṣṇū́ nr̥vā́hasā ||

1.006.03a ketúṁ kr̥ṇvánn aketáve péśo maryā apeśáse |
1.006.03c sám uṣádbhir ajāyathāḥ ||

1.006.04a ā́d áha svadhā́m ánu púnar garbhatvám eriré |
1.006.04c dádhānā nā́ma yajñíyam ||

1.006.05a vīḷú cid ārujatnúbhir gúhā cid indra váhnibhiḥ |
1.006.05c ávinda usríyā ánu ||

1.006.06a devayánto yáthā matím ácchā vidádvasuṁ gíraḥ |
1.006.06c mahā́m anūṣata śrutám ||

1.006.07a índreṇa sáṁ hí dŕ̥kṣase saṁjagmānó ábibhyuṣā |
1.006.07c mandū́ samānávarcasā ||

1.006.08a anavadyaír abhídyubhir makháḥ sáhasvad arcati |
1.006.08c gaṇaír índrasya kā́myaiḥ ||

1.006.09a átaḥ parijmann ā́ gahi divó vā rocanā́d ádhi |
1.006.09c sám asminn r̥ñjate gíraḥ ||

1.006.10a itó vā sātím ī́mahe divó vā pā́rthivād ádhi |
1.006.10c índram mahó vā rájasaḥ ||

1.007.01a índram íd gāthíno br̥hád índram arkébhir arkíṇaḥ |
1.007.01c índraṁ vā́ṇīr anūṣata ||

1.007.02a índra íd dháryoḥ sácā sámmiśla ā́ vacoyújā |
1.007.02c índro vajrī́ hiraṇyáyaḥ ||

1.007.03a índro dīrghā́ya cákṣasa ā́ sū́ryaṁ rohayad diví |
1.007.03c ví góbhir ádrim airayat ||

1.007.04a índra vā́jeṣu no 'va sahásrapradhaneṣu ca |
1.007.04c ugrá ugrā́bhir ūtíbhiḥ ||

1.007.05a índraṁ vayám mahādhaná índram árbhe havāmahe |
1.007.05c yújaṁ vr̥tréṣu vajríṇam ||

1.007.06a sá no vr̥ṣann amúṁ carúṁ sátrādāvann ápā vr̥dhi |
1.007.06c asmábhyam ápratiṣkutaḥ ||

1.007.07a tuñjé-tuñje yá úttare stómā índrasya vajríṇaḥ |
1.007.07c ná vindhe asya suṣṭutím ||

1.007.08a vŕ̥ṣā yūthéva váṁsagaḥ kr̥ṣṭī́r iyarty ójasā |
1.007.08c ī́śāno ápratiṣkutaḥ ||

1.007.09a yá ékaś carṣaṇīnā́ṁ vásūnām irajyáti |
1.007.09c índraḥ páñca kṣitīnā́m ||

1.007.10a índraṁ vo viśvátas pári hávāmahe jánebhyaḥ |
1.007.10c asmā́kam astu kévalaḥ ||

1.008.01a éndra sānasíṁ rayíṁ sajítvānaṁ sadāsáham |
1.008.01c várṣiṣṭham ūtáye bhara ||

1.008.02a ní yéna muṣṭihatyáyā ní vr̥trā́ ruṇádhāmahai |
1.008.02c tvótāso ny árvatā ||

1.008.03a índra tvótāsa ā́ vayáṁ vájraṁ ghanā́ dadīmahi |
1.008.03c jáyema sáṁ yudhí spŕ̥dhaḥ ||

1.008.04a vayáṁ śū́rebhir ástr̥bhir índra tváyā yujā́ vayám |
1.008.04c sāsahyā́ma pr̥tanyatáḥ ||

1.008.05a mahā́m̐ índraḥ paráś ca nú mahitvám astu vajríṇe |
1.008.05c dyaúr ná prathinā́ śávaḥ ||

1.008.06a samohé vā yá ā́śata náras tokásya sánitau |
1.008.06c víprāso vā dhiyāyávaḥ ||

1.008.07a yáḥ kukṣíḥ somapā́tamaḥ samudrá iva pínvate |
1.008.07c urvī́r ā́po ná kākúdaḥ ||

1.008.08a evā́ hy àsya sūnŕ̥tā virapśī́ gómatī mahī́ |
1.008.08c pakvā́ śā́khā ná dāśúṣe ||

1.008.09a evā́ hí te víbhūtaya ūtáya indra mā́vate |
1.008.09c sadyáś cit sánti dāśúṣe ||

1.008.10a evā́ hy àsya kā́myā stóma uktháṁ ca śáṁsyā |
1.008.10c índrāya sómapītaye ||

1.009.01a índréhi mátsy ándhaso víśvebhiḥ somapárvabhiḥ |
1.009.01c mahā́m̐ abhiṣṭír ójasā ||

1.009.02a ém enaṁ sr̥jatā suté mandím índrāya mandíne |
1.009.02c cákriṁ víśvāni cákraye ||

1.009.03a mátsvā suśipra mandíbhiḥ stómebhir viśvacarṣaṇe |
1.009.03c sácaiṣú sávaneṣv ā́ ||

1.009.04a ásr̥gram indra te gíraḥ práti tvā́m úd ahāsata |
1.009.04c ájoṣā vr̥ṣabhám pátim ||

1.009.05a sáṁ codaya citrám arvā́g rā́dha indra váreṇyam |
1.009.05c ásad ít te vibhú prabhú ||

1.009.06a asmā́n sú tátra codayéndra rāyé rábhasvataḥ |
1.009.06c túvidyumna yáśasvataḥ ||

1.009.07a sáṁ gómad indra vā́javad asmé pr̥thú śrávo br̥hát |
1.009.07c viśvā́yur dhehy ákṣitam ||

1.009.08a asmé dhehi śrávo br̥hád dyumnáṁ sahasrasā́tamam |
1.009.08c índra tā́ rathínīr íṣaḥ ||

1.009.09a vásor índraṁ vásupatiṁ gīrbhír gr̥ṇánta r̥gmíyam |
1.009.09c hóma gántāram ūtáye ||

1.009.10a suté-sute nyòkase br̥hád br̥hatá éd aríḥ |
1.009.10c índrāya śūṣám arcati ||

1.010.01a gā́yanti tvā gāyatríṇó 'rcanty arkám arkíṇaḥ |
1.010.01c brahmā́ṇas tvā śatakrata úd vaṁśám iva yemire ||

1.010.02a yát sā́noḥ sā́num ā́ruhad bhū́ry áspaṣṭa kártvam |
1.010.02c tád índro árthaṁ cetati yūthéna vr̥ṣṇír ejati ||

1.010.03a yukṣvā́ hí keśínā hárī vŕ̥ṣaṇā kakṣyaprā́ |
1.010.03c áthā na indra somapā girā́m úpaśrutiṁ cara ||

1.010.04a éhi stómām̐ abhí svarābhí gr̥ṇīhy ā́ ruva |
1.010.04c bráhma ca no vaso sácéndra yajñáṁ ca vardhaya ||

1.010.05a ukthám índrāya śáṁsyaṁ várdhanam puruniṣṣídhe |
1.010.05c śakró yáthā sutéṣu ṇo rāráṇat sakhyéṣu ca ||

1.010.06a tám ít sakhitvá īmahe táṁ rāyé táṁ suvī́rye |
1.010.06c sá śakrá utá naḥ śakad índro vásu dáyamānaḥ ||

1.010.07a suvivŕ̥taṁ sunirájam índra tvā́dātam íd yáśaḥ |
1.010.07c gávām ápa vrajáṁ vr̥dhi kr̥ṇuṣvá rā́dho adrivaḥ ||

1.010.08a nahí tvā ródasī ubhé r̥ghāyámāṇam ínvataḥ |
1.010.08c jéṣaḥ svàrvatīr apáḥ sáṁ gā́ asmábhyaṁ dhūnuhi ||

1.010.09a ā́śrutkarṇa śrudhī́ hávaṁ nū́ cid dadhiṣva me gíraḥ |
1.010.09c índra stómam imám máma kr̥ṣvā́ yujáś cid ántaram ||

1.010.10a vidmā́ hí tvā vŕ̥ṣantamaṁ vā́jeṣu havanaśrútam |
1.010.10c vŕ̥ṣantamasya hūmaha ūtíṁ sahasrasā́tamām ||

1.010.11a ā́ tū́ na indra kauśika mandasānáḥ sutám piba |
1.010.11c návyam ā́yuḥ prá sū́ tira kr̥dhī́ sahasrasā́m ŕ̥ṣim ||

1.010.12a pári tvā girvaṇo gíra imā́ bhavantu viśvátaḥ |
1.010.12c vr̥ddhā́yum ánu vŕ̥ddhayo júṣṭā bhavantu júṣṭayaḥ ||

1.011.01a índraṁ víśvā avīvr̥dhan samudrávyacasaṁ gíraḥ |
1.011.01c rathī́tamaṁ rathī́nāṁ vā́jānāṁ sátpatim pátim ||

1.011.02a sakhyé ta indra vājíno mā́ bhema śavasas pate |
1.011.02c tvā́m abhí prá ṇonumo jétāram áparājitam ||

1.011.03a pūrvī́r índrasya rātáyo ná ví dasyanty ūtáyaḥ |
1.011.03c yádī vā́jasya gómataḥ stotŕ̥bhyo máṁhate maghám ||

1.011.04a purā́m bhindúr yúvā kavír ámitaujā ajāyata |
1.011.04c índro víśvasya kármaṇo dhartā́ vajrī́ puruṣṭutáḥ ||

1.011.05a tváṁ valásya gómató 'pāvar adrivo bílam |
1.011.05c tvā́ṁ devā́ ábibhyuṣas tujyámānāsa āviṣuḥ ||

1.011.06a távāháṁ śūra rātíbhiḥ práty āyaṁ síndhum āvádan |
1.011.06c úpātiṣṭhanta girvaṇo vidúṣ ṭe tásya kārávaḥ ||

1.011.07a māyā́bhir indra māyínaṁ tváṁ śúṣṇam ávātiraḥ |
1.011.07c vidúṣ ṭe tásya médhirās téṣāṁ śrávāṁsy út tira ||

1.011.08a índram ī́śānam ójasābhí stómā anūṣata |
1.011.08c sahásraṁ yásya rātáya utá vā sánti bhū́yasīḥ ||

1.012.01a agníṁ dūtáṁ vr̥ṇīmahe hótāraṁ viśvávedasam |
1.012.01c asyá yajñásya sukrátum ||

1.012.02a agním-agniṁ hávīmabhiḥ sádā havanta viśpátim |
1.012.02c havyavā́ham purupriyám ||

1.012.03a ágne devā́m̐ ihā́ vaha jajñānó vr̥ktábarhiṣe |
1.012.03c ási hótā na ī́ḍyaḥ ||

1.012.04a tā́m̐ uśató ví bodhaya yád agne yā́si dūtyàm |
1.012.04c devaír ā́ satsi barhíṣi ||

1.012.05a ghŕ̥tāhavana dīdivaḥ práti ṣma ríṣato daha |
1.012.05c ágne tváṁ rakṣasvínaḥ ||

1.012.06a agnínāgníḥ sám idhyate kavír gr̥hápatir yúvā |
1.012.06c havyavā́ḍ juhvā̀syaḥ ||

1.012.07a kavím agním úpa stuhi satyádharmāṇam adhvaré |
1.012.07c devám amīvacā́tanam ||

1.012.08a yás tvā́m agne havíṣpatir dūtáṁ deva saparyáti |
1.012.08c tásya sma prāvitā́ bhava ||

1.012.09a yó agníṁ devávītaye havíṣmām̐ āvívāsati |
1.012.09c tásmai pāvaka mr̥ḷaya ||

1.012.10a sá naḥ pāvaka dīdivó 'gne devā́m̐ ihā́ vaha |
1.012.10c úpa yajñáṁ havíś ca naḥ ||

1.012.11a sá naḥ stávāna ā́ bhara gāyatréṇa návīyasā |
1.012.11c rayíṁ vīrávatīm íṣam ||

1.012.12a ágne śukréṇa śocíṣā víśvābhir deváhūtibhiḥ |
1.012.12c imáṁ stómaṁ juṣasva naḥ ||

1.013.01a súsamiddho na ā́ vaha devā́m̐ agne havíṣmate |
1.013.01c hótaḥ pāvaka yákṣi ca ||

1.013.02a mádhumantaṁ tanūnapād yajñáṁ devéṣu naḥ kave |
1.013.02c adyā́ kr̥ṇuhi vītáye ||

1.013.03a nárāśáṁsam ihá priyám asmín yajñá úpa hvaye |
1.013.03c mádhujihvaṁ haviṣkŕ̥tam ||

1.013.04a ágne sukhátame ráthe devā́m̐ īḷitá ā́ vaha |
1.013.04c ási hótā mánurhitaḥ ||

1.013.05a str̥ṇītá barhír ānuṣág ghr̥tápr̥ṣṭham manīṣiṇaḥ |
1.013.05c yátrāmŕ̥tasya cákṣaṇam ||

1.013.06a ví śrayantām r̥tāvŕ̥dho dvā́ro devī́r asaścátaḥ |
1.013.06c adyā́ nūnáṁ ca yáṣṭave ||

1.013.07a náktoṣā́sā supéśasāsmín yajñá úpa hvaye |
1.013.07c idáṁ no barhír āsáde ||

1.013.08a tā́ sujihvā́ úpa hvaye hótārā daívyā kavī́ |
1.013.08c yajñáṁ no yakṣatām imám ||

1.013.09a íḷā sárasvatī mahī́ tisró devī́r mayobhúvaḥ |
1.013.09c barhíḥ sīdantv asrídhaḥ ||

1.013.10a ihá tváṣṭāram agriyáṁ viśvárūpam úpa hvaye |
1.013.10c asmā́kam astu kévalaḥ ||

1.013.11a áva sr̥jā vanaspate déva devébhyo havíḥ |
1.013.11c prá dātúr astu cétanam ||

1.013.12a svā́hā yajñáṁ kr̥ṇotanéndrāya yájvano gr̥hé |
1.013.12c tátra devā́m̐ úpa hvaye ||

1.014.01a aíbhir agne dúvo gíro víśvebhiḥ sómapītaye |
1.014.01c devébhir yāhi yákṣi ca ||

1.014.02a ā́ tvā káṇvā ahūṣata gr̥ṇánti vipra te dhíyaḥ |
1.014.02c devébhir agna ā́ gahi ||

1.014.03a indravāyū́ bŕ̥haspátim mitrā́gním pūṣáṇam bhágam |
1.014.03c ādityā́n mā́rutaṁ gaṇám ||

1.014.04a prá vo bhriyanta índavo matsarā́ mādayiṣṇávaḥ |
1.014.04c drapsā́ mádhvaś camūṣádaḥ ||

1.014.05a ī́ḷate tvā́m avasyávaḥ káṇvāso vr̥ktábarhiṣaḥ |
1.014.05c havíṣmanto araṁkŕ̥taḥ ||

1.014.06a ghr̥tápr̥ṣṭhā manoyújo yé tvā váhanti váhnayaḥ |
1.014.06c ā́ devā́n sómapītaye ||

1.014.07a tā́n yájatrām̐ r̥tāvŕ̥dhó 'gne pátnīvatas kr̥dhi |
1.014.07c mádhvaḥ sujihva pāyaya ||

1.014.08a yé yájatrā yá ī́ḍyās té te pibantu jihváyā |
1.014.08c mádhor agne váṣaṭkr̥ti ||

1.014.09a ā́kīṁ sū́ryasya rocanā́d víśvān devā́m̐ uṣarbúdhaḥ |
1.014.09c vípro hótehá vakṣati ||

1.014.10a víśvebhiḥ somyám mádhv ágna índreṇa vāyúnā |
1.014.10c píbā mitrásya dhā́mabhiḥ ||

1.014.11a tváṁ hótā mánurhitó 'gne yajñéṣu sīdasi |
1.014.11c sémáṁ no adhvaráṁ yaja ||

1.014.12a yukṣvā́ hy áruṣī ráthe haríto deva rohítaḥ |
1.014.12c tā́bhir devā́m̐ ihā́ vaha ||

1.015.01a índra sómam píba r̥túnā́ tvā viśantv índavaḥ |
1.015.01c matsarā́sas tádokasaḥ ||

1.015.02a márutaḥ píbata r̥túnā potrā́d yajñám punītana |
1.015.02c yūyáṁ hí ṣṭhā́ sudānavaḥ ||

1.015.03a abhí yajñáṁ gr̥ṇīhi no gnā́vo néṣṭaḥ píba r̥túnā |
1.015.03c tváṁ hí ratnadhā́ ási ||

1.015.04a ágne devā́m̐ ihā́ vaha sādáyā yóniṣu triṣú |
1.015.04c pári bhūṣa píba r̥túnā ||

1.015.05a brā́hmaṇād indra rā́dhasaḥ píbā sómam r̥tū́m̐r ánu |
1.015.05c távéd dhí sakhyám ástr̥tam ||

1.015.06a yuváṁ dákṣaṁ dhr̥tavrata mítrāvaruṇa dūḷábham |
1.015.06c r̥túnā yajñám āśāthe ||

1.015.07a draviṇodā́ dráviṇaso grā́vahastāso adhvaré |
1.015.07c yajñéṣu devám īḷate ||

1.015.08a draviṇodā́ dadātu no vásūni yā́ni śr̥ṇviré |
1.015.08c devéṣu tā́ vanāmahe ||

1.015.09a draviṇodā́ḥ pipīṣati juhóta prá ca tiṣṭhata |
1.015.09c neṣṭrā́d r̥túbhir iṣyata ||

1.015.10a yát tvā turī́yam r̥túbhir dráviṇodo yájāmahe |
1.015.10c ádha smā no dadír bhava ||

1.015.11a áśvinā píbatam mádhu dī́dyagnī śucivratā |
1.015.11c r̥túnā yajñavāhasā ||

1.015.12a gā́rhapatyena santya r̥túnā yajñanī́r asi |
1.015.12c devā́n devayaté yaja ||

1.016.01a ā́ tvā vahantu hárayo vŕ̥ṣaṇaṁ sómapītaye |
1.016.01c índra tvā sū́racakṣasaḥ ||

1.016.02a imā́ dhānā́ ghr̥tasnúvo hárī ihópa vakṣataḥ |
1.016.02c índraṁ sukhátame ráthe ||

1.016.03a índram prātár havāmaha índram prayaty àdhvaré |
1.016.03c índraṁ sómasya pītáye ||

1.016.04a úpa naḥ sutám ā́ gahi háribhir indra keśíbhiḥ |
1.016.04c suté hí tvā hávāmahe ||

1.016.05a sémáṁ naḥ stómam ā́ gahy úpedáṁ sávanaṁ sutám |
1.016.05c gauró ná tr̥ṣitáḥ piba ||

1.016.06a imé sómāsa índavaḥ sutā́so ádhi barhíṣi |
1.016.06c tā́m̐ indra sáhase piba ||

1.016.07a ayáṁ te stómo agriyó hr̥dispŕ̥g astu śáṁtamaḥ |
1.016.07c áthā sómaṁ sutám piba ||

1.016.08a víśvam ít sávanaṁ sutám índro mádāya gacchati |
1.016.08c vr̥trahā́ sómapītaye ||

1.016.09a sémáṁ naḥ kā́mam ā́ pr̥ṇa góbhir áśvaiḥ śatakrato |
1.016.09c stávāma tvā svādhyàḥ ||

1.017.01a índrāváruṇayor aháṁ samrā́jor áva ā́ vr̥ṇe |
1.017.01c tā́ no mr̥ḷāta īdŕ̥śe ||

1.017.02a gántārā hí sthó 'vase hávaṁ víprasya mā́vataḥ |
1.017.02c dhartā́rā carṣaṇīnā́m ||

1.017.03a anukāmáṁ tarpayethām índrāvaruṇa rāyá ā́ |
1.017.03c tā́ vāṁ nédiṣṭham īmahe ||

1.017.04a yuvā́ku hí śácīnāṁ yuvā́ku sumatīnā́m |
1.017.04c bhūyā́ma vājadā́vnām ||

1.017.05a índraḥ sahasradā́vnāṁ váruṇaḥ śáṁsyānām |
1.017.05c krátur bhavaty ukthyàḥ ||

1.017.06a táyor íd ávasā vayáṁ sanéma ní ca dhīmahi |
1.017.06c syā́d utá prarécanam ||

1.017.07a índrāvaruṇa vām aháṁ huvé citrā́ya rā́dhase |
1.017.07c asmā́n sú jigyúṣas kr̥tam ||

1.017.08a índrāvaruṇa nū́ nú vāṁ síṣāsantīṣu dhīṣv ā́ |
1.017.08c asmábhyaṁ śárma yacchatam ||

1.017.09a prá vām aśnotu suṣṭutír índrāvaruṇa yā́ṁ huvé |
1.017.09c yā́m r̥dhā́the sadhástutim ||

1.018.01a somā́naṁ sváraṇaṁ kr̥ṇuhí brahmaṇas pate |
1.018.01c kakṣī́vantaṁ yá auśijáḥ ||

1.018.02a yó revā́n yó amīvahā́ vasuvít puṣṭivárdhanaḥ |
1.018.02c sá naḥ siṣaktu yás turáḥ ||

1.018.03a mā́ naḥ śáṁso áraruṣo dhūrtíḥ práṇaṅ mártyasya |
1.018.03c rákṣā ṇo brahmaṇas pate ||

1.018.04a sá ghā vīró ná riṣyati yám índro bráhmaṇas pátiḥ |
1.018.04c sómo hinóti mártyam ||

1.018.05a tváṁ tám brahmaṇas pate sóma índraś ca mártyam |
1.018.05c dákṣiṇā pātv áṁhasaḥ ||

1.018.06a sádasas pátim ádbhutam priyám índrasya kā́myam |
1.018.06c saním medhā́m ayāsiṣam ||

1.018.07a yásmād r̥té ná sídhyati yajñó vipaścítaś caná |
1.018.07c sá dhīnā́ṁ yógam invati ||

1.018.08a ā́d r̥dhnoti havíṣkr̥tim prā́ñcaṁ kr̥ṇoty adhvarám |
1.018.08c hótrā devéṣu gacchati ||

1.018.09a nárāśáṁsaṁ sudhŕ̥ṣṭamam ápaśyaṁ sapráthastamam |
1.018.09c divó ná sádmamakhasam ||

1.019.01a práti tyáṁ cā́rum adhvaráṁ gopīthā́ya prá hūyase |
1.019.01c marúdbhir agna ā́ gahi ||

1.019.02a nahí devó ná mártyo mahás táva krátum paráḥ |
1.019.02c marúdbhir agna ā́ gahi ||

1.019.03a yé mahó rájaso vidúr víśve devā́so adrúhaḥ |
1.019.03c marúdbhir agna ā́ gahi ||

1.019.04a yá ugrā́ arkám ānr̥cúr ánādhr̥ṣṭāsa ójasā |
1.019.04c marúdbhir agna ā́ gahi ||

1.019.05a yé śubhrā́ ghorávarpasaḥ sukṣatrā́so riśā́dasaḥ |
1.019.05c marúdbhir agna ā́ gahi ||

1.019.06a yé nā́kasyā́dhi rocané diví devā́sa ā́sate |
1.019.06c marúdbhir agna ā́ gahi ||

1.019.07a yá īṅkháyanti párvatān tiráḥ samudrám arṇavám |
1.019.07c marúdbhir agna ā́ gahi ||

1.019.08a ā́ yé tanvánti raśmíbhis tiráḥ samudrám ójasā |
1.019.08c marúdbhir agna ā́ gahi ||

1.019.09a abhí tvā pūrvápītaye sr̥jā́mi somyám mádhu |
1.019.09c marúdbhir agna ā́ gahi ||

1.020.01a ayáṁ devā́ya jánmane stómo víprebhir āsayā́ |
1.020.01c ákāri ratnadhā́tamaḥ ||

1.020.02a yá índrāya vacoyújā tatakṣúr mánasā hárī |
1.020.02c śámībhir yajñám āśata ||

1.020.03a tákṣan nā́satyābhyām párijmānaṁ sukháṁ rátham |
1.020.03c tákṣan dhenúṁ sabardúghām ||

1.020.04a yúvānā pitárā púnaḥ satyámantrā r̥jūyávaḥ |
1.020.04c r̥bhávo viṣṭy àkrata ||

1.020.05a sáṁ vo mádāso agmaténdreṇa ca marútvatā |
1.020.05c ādityébhiś ca rā́jabhiḥ ||

1.020.06a utá tyáṁ camasáṁ návaṁ tváṣṭur devásya níṣkr̥tam |
1.020.06c ákarta catúraḥ púnaḥ ||

1.020.07a té no rátnāni dhattana trír ā́ sā́ptāni sunvaté |
1.020.07c ékam-ekaṁ suśastíbhiḥ ||

1.020.08a ádhārayanta váhnayó 'bhajanta sukr̥tyáyā |
1.020.08c bhāgáṁ devéṣu yajñíyam ||

1.021.01a ihéndrāgnī́ úpa hvaye táyor ít stómam uśmasi |
1.021.01c tā́ sómaṁ somapā́tamā ||

1.021.02a tā́ yajñéṣu prá śaṁsatendrāgnī́ śumbhatā naraḥ |
1.021.02c tā́ gāyatréṣu gāyata ||

1.021.03a tā́ mitrásya práśastaya indrāgnī́ tā́ havāmahe |
1.021.03c somapā́ sómapītaye ||

1.021.04a ugrā́ sántā havāmaha úpedáṁ sávanaṁ sutám |
1.021.04c indrāgnī́ éhá gacchatām ||

1.021.05a tā́ mahā́ntā sádaspátī índrāgnī rákṣa ubjatam |
1.021.05c áprajāḥ santv atríṇaḥ ||

1.021.06a téna satyéna jāgr̥tam ádhi pracetúne padé |
1.021.06c índrāgnī śárma yacchatam ||

1.022.01a prātaryújā ví bodhayāśvínāv éhá gacchatām |
1.022.01c asyá sómasya pītáye ||

1.022.02a yā́ suráthā rathī́tamobhā́ devā́ divispŕ̥śā |
1.022.02c aśvínā tā́ havāmahe ||

1.022.03a yā́ vāṁ káśā mádhumaty áśvinā sūnŕ̥tāvatī |
1.022.03c táyā yajñám mimikṣatam ||

1.022.04a nahí vām ásti dūraké yátrā ráthena gácchathaḥ |
1.022.04c áśvinā somíno gr̥hám ||

1.022.05a híraṇyapāṇim ūtáye savitā́ram úpa hvaye |
1.022.05c sá céttā devátā padám ||

1.022.06a apā́ṁ nápātam ávase savitā́ram úpa stuhi |
1.022.06c tásya vratā́ny uśmasi ||

1.022.07a vibhaktā́raṁ havāmahe vásoś citrásya rā́dhasaḥ |
1.022.07c savitā́raṁ nr̥cákṣasam ||

1.022.08a sákhāya ā́ ní ṣīdata savitā́ stómyo nú naḥ |
1.022.08c dā́tā rā́dhāṁsi śumbhati ||

1.022.09a ágne pátnīr ihā́ vaha devā́nām uśatī́r úpa |
1.022.09c tváṣṭāraṁ sómapītaye ||

1.022.10a ā́ gnā́ agna ihā́vase hótrāṁ yaviṣṭha bhā́ratīm |
1.022.10c várūtrīṁ dhiṣáṇāṁ vaha ||

1.022.11a abhí no devī́r ávasā maháḥ śármaṇā nr̥pátnīḥ |
1.022.11c ácchinnapatrāḥ sacantām ||

1.022.12a ihéndrāṇī́m úpa hvaye varuṇānī́ṁ svastáye |
1.022.12c agnā́yīṁ sómapītaye ||

1.022.13a mahī́ dyaúḥ pr̥thivī́ ca na imáṁ yajñám mimikṣatām |
1.022.13c pipr̥tā́ṁ no bhárīmabhiḥ ||

1.022.14a táyor íd ghr̥távat páyo víprā rihanti dhītíbhiḥ |
1.022.14c gandharvásya dhruvé padé ||

1.022.15a syonā́ pr̥thivi bhavānr̥kṣarā́ nivéśanī |
1.022.15c yácchā naḥ śárma sapráthaḥ ||

1.022.16a áto devā́ avantu no yáto víṣṇur vicakramé |
1.022.16c pr̥thivyā́ḥ saptá dhā́mabhiḥ ||

1.022.17a idáṁ víṣṇur ví cakrame tredhā́ ní dadhe padám |
1.022.17c sámūḷham asya pāṁsuré ||

1.022.18a trī́ṇi padā́ ví cakrame víṣṇur gopā́ ádābhyaḥ |
1.022.18c áto dhármāṇi dhāráyan ||

1.022.19a víṣṇoḥ kármāṇi paśyata yáto vratā́ni paspaśé |
1.022.19c índrasya yújyaḥ sákhā ||

1.022.20a tád víṣṇoḥ paramám padáṁ sádā paśyanti sūráyaḥ |
1.022.20c divī̀va cákṣur ā́tatam ||

1.022.21a tád víprāso vipanyávo jāgr̥vā́ṁsaḥ sám indhate |
1.022.21c víṣṇor yát paramám padám ||

1.023.01a tīvrā́ḥ sómāsa ā́ gahy āśī́rvantaḥ sutā́ imé |
1.023.01c vā́yo tā́n prásthitān piba ||

1.023.02a ubhā́ devā́ divispŕ̥śendravāyū́ havāmahe |
1.023.02c asyá sómasya pītáye ||

1.023.03a indravāyū́ manojúvā víprā havanta ūtáye |
1.023.03c sahasrākṣā́ dhiyás pátī ||

1.023.04a mitráṁ vayáṁ havāmahe váruṇaṁ sómapītaye |
1.023.04c jajñānā́ pūtádakṣasā ||

1.023.05a r̥téna yā́v r̥tāvŕ̥dhāv r̥tásya jyótiṣas pátī |
1.023.05c tā́ mitrā́váruṇā huve ||

1.023.06a váruṇaḥ prāvitā́ bhuvan mitró víśvābhir ūtíbhiḥ |
1.023.06c káratāṁ naḥ surā́dhasaḥ ||

1.023.07a marútvantaṁ havāmaha índram ā́ sómapītaye |
1.023.07c sajū́r gaṇéna tr̥mpatu ||

1.023.08a índrajyeṣṭhā márudgaṇā dévāsaḥ pū́ṣarātayaḥ |
1.023.08c víśve máma śrutā hávam ||

1.023.09a hatá vr̥tráṁ sudānava índreṇa sáhasā yujā́ |
1.023.09c mā́ no duḥśáṁsa īśata ||

1.023.10a víśvān devā́n havāmahe marútaḥ sómapītaye |
1.023.10c ugrā́ hí pŕ̥śnimātaraḥ ||

1.023.11a jáyatām iva tanyatúr marútām eti dhr̥ṣṇuyā́ |
1.023.11c yác chúbhaṁ yāthánā naraḥ ||

1.023.12a haskārā́d vidyútas páry áto jātā́ avantu naḥ |
1.023.12c marúto mr̥ḷayantu naḥ ||

1.023.13a ā́ pūṣañ citrábarhiṣam ā́ghr̥ṇe dharúṇaṁ diváḥ |
1.023.13c ā́jā naṣṭáṁ yáthā paśúm ||

1.023.14a pūṣā́ rā́jānam ā́ghr̥ṇir ápagūḷhaṁ gúhā hitám |
1.023.14c ávindac citrábarhiṣam ||

1.023.15a utó sá máhyam índubhiḥ ṣáḍ yuktā́m̐ anuséṣidhat |
1.023.15c góbhir yávaṁ ná carkr̥ṣat ||

1.023.16a ambáyo yanty ádhvabhir jāmáyo adhvarīyatā́m |
1.023.16c pr̥ñcatī́r mádhunā páyaḥ ||

1.023.17a amū́r yā́ úpa sū́rye yā́bhir vā sū́ryaḥ sahá |
1.023.17c tā́ no hinvantv adhvarám ||

1.023.18a apó devī́r úpa hvaye yátra gā́vaḥ píbanti naḥ |
1.023.18c síndhubhyaḥ kártvaṁ havíḥ ||

1.023.19a apsv àntár amŕ̥tam apsú bheṣajám apā́m utá práśastaye |
1.023.19c dévā bhávata vājínaḥ ||

1.023.20a apsú me sómo abravīd antár víśvāni bheṣajā́ |
1.023.20c agníṁ ca viśváśambhuvam ā́paś ca viśvábheṣajīḥ ||

1.023.21a ā́paḥ pr̥ṇītá bheṣajáṁ várūthaṁ tanvè máma |
1.023.21c jyók ca sū́ryaṁ dr̥śé ||

1.023.22a idám āpaḥ prá vahata yát kíṁ ca duritám máyi |
1.023.22c yád vāhám abhidudróha yád vā śepá utā́nr̥tam ||

1.023.23a ā́po adyā́nv acāriṣaṁ rásena sám agasmahi |
1.023.23c páyasvān agna ā́ gahi tám mā sáṁ sr̥ja várcasā ||

1.023.24a sám māgne várcasā sr̥ja sám prajáyā sám ā́yuṣā |
1.023.24c vidyúr me asya devā́ índro vidyāt sahá ŕ̥ṣibhiḥ ||

1.024.01a kásya nūnáṁ katamásyāmŕ̥tānām mánāmahe cā́ru devásya nā́ma |
1.024.01c kó no mahyā́ áditaye púnar dāt pitáraṁ ca dr̥śéyam mātáraṁ ca ||

1.024.02a agnér vayám prathamásyāmŕ̥tānām mánāmahe cā́ru devásya nā́ma |
1.024.02c sá no mahyā́ áditaye púnar dāt pitáraṁ ca dr̥śéyam mātáraṁ ca ||

1.024.03a abhí tvā deva savitar ī́śānaṁ vā́ryāṇām |
1.024.03c sádāvan bhāgám īmahe ||

1.024.04a yáś cid dhí ta itthā́ bhágaḥ śaśamānáḥ purā́ nidáḥ |
1.024.04c adveṣó hástayor dadhé ||

1.024.05a bhágabhaktasya te vayám úd aśema távā́vasā |
1.024.05c mūrdhā́naṁ rāyá ārábhe ||

1.024.06a nahí te kṣatráṁ ná sáho ná manyúṁ váyaś canā́mī́ patáyanta āpúḥ |
1.024.06c némā́ ā́po animiṣáṁ cárantīr ná yé vā́tasya praminánty ábhvam ||

1.024.07a abudhné rā́jā váruṇo vánasyordhváṁ stū́paṁ dadate pūtádakṣaḥ |
1.024.07c nīcī́nāḥ sthur upári budhná eṣām asmé antár níhitāḥ ketávaḥ syuḥ ||

1.024.08a urúṁ hí rā́jā váruṇaś cakā́ra sū́ryāya pánthām ánvetavā́ u |
1.024.08c apáde pā́dā prátidhātave 'kar utā́pavaktā́ hr̥dayāvídhaś cit ||

1.024.09a śatáṁ te rājan bhiṣájaḥ sahásram urvī́ gabhīrā́ sumatíṣ ṭe astu |
1.024.09c bā́dhasva dūré nírr̥tim parācaíḥ kr̥táṁ cid énaḥ prá mumugdhy asmát ||

1.024.10a amī́ yá ŕ̥kṣā níhitāsa uccā́ náktaṁ dádr̥śre kúha cid díveyuḥ |
1.024.10c ádabdhāni váruṇasya vratā́ni vicā́kaśac candrámā náktam eti ||

1.024.11a tát tvā yāmi bráhmaṇā vándamānas tád ā́ śāste yájamāno havírbhiḥ |
1.024.11c áheḷamāno varuṇehá bodhy úruśaṁsa mā́ na ā́yuḥ prá moṣīḥ ||

1.024.12a tád ín náktaṁ tád dívā máhyam āhus tád ayáṁ kéto hr̥dá ā́ ví caṣṭe |
1.024.12c śúnaḥśépo yám áhvad gr̥bhītáḥ só asmā́n rā́jā váruṇo mumoktu ||

1.024.13a śúnaḥśépo hy áhvad gr̥bhītás triṣv ā̀dityáṁ drupadéṣu baddháḥ |
1.024.13c ávainaṁ rā́jā váruṇaḥ sasr̥jyād vidvā́m̐ ádabdho ví mumoktu pā́śān ||

1.024.14a áva te héḷo varuṇa námobhir áva yajñébhir īmahe havírbhiḥ |
1.024.14c kṣáyann asmábhyam asura pracetā rā́jann énāṁsi śiśrathaḥ kr̥tā́ni ||

1.024.15a úd uttamáṁ varuṇa pā́śam asmád ávādhamáṁ ví madhyamáṁ śrathāya |
1.024.15c áthā vayám āditya vraté távā́nāgaso áditaye syāma ||

1.025.01a yác cid dhí te víśo yathā prá deva varuṇa vratám |
1.025.01c minīmási dyávi-dyavi ||

1.025.02a mā́ no vadhā́ya hatnáve jihīḷānásya rīradhaḥ |
1.025.02c mā́ hr̥ṇānásya manyáve ||

1.025.03a ví mr̥ḷīkā́ya te máno rathī́r áśvaṁ ná sáṁditam |
1.025.03c gīrbhír varuṇa sīmahi ||

1.025.04a párā hí me vímanyavaḥ pátanti vásyaïṣṭaye |
1.025.04c váyo ná vasatī́r úpa ||

1.025.05a kadā́ kṣatraśríyaṁ náram ā́ váruṇaṁ karāmahe |
1.025.05c mr̥ḷīkā́yorucákṣasam ||

1.025.06a tád ít samānám āśāte vénantā ná prá yucchataḥ |
1.025.06c dhr̥távratāya dāśúṣe ||

1.025.07a védā yó vīnā́m padám antárikṣeṇa pátatām |
1.025.07c véda nāváḥ samudríyaḥ ||

1.025.08a véda māsó dhr̥távrato dvā́daśa prajā́vataḥ |
1.025.08c védā yá upajā́yate ||

1.025.09a véda vā́tasya vartaním urór r̥ṣvásya br̥hatáḥ |
1.025.09c védā yé adhyā́sate ||

1.025.10a ní ṣasāda dhr̥távrato váruṇaḥ pastyā̀sv ā́ |
1.025.10c sā́mrājyāya sukrátuḥ ||

1.025.11a áto víśvāny ádbhutā cikitvā́m̐ abhí paśyati |
1.025.11c kr̥tā́ni yā́ ca kártvā ||

1.025.12a sá no viśvā́hā sukrátur ādityáḥ supáthā karat |
1.025.12c prá ṇa ā́yūṁṣi tāriṣat ||

1.025.13a bíbhrad drāpíṁ hiraṇyáyaṁ váruṇo vasta nirṇíjam |
1.025.13c pári spáśo ní ṣedire ||

1.025.14a ná yáṁ dípsanti dipsávo ná drúhvāṇo jánānām |
1.025.14c ná devám abhímātayaḥ ||

1.025.15a utá yó mā́nuṣeṣv ā́ yáśaś cakré ásāmy ā́ |
1.025.15c asmā́kam udáreṣv ā́ ||

1.025.16a párā me yanti dhītáyo gā́vo ná gávyūtīr ánu |
1.025.16c icchántīr urucákṣasam ||

1.025.17a sáṁ nú vocāvahai púnar yáto me mádhv ā́bhr̥tam |
1.025.17c hóteva kṣádase priyám ||

1.025.18a dárśaṁ nú viśvádarśataṁ dárśaṁ rátham ádhi kṣámi |
1.025.18c etā́ juṣata me gíraḥ ||

1.025.19a imám me varuṇa śrudhī hávam adyā́ ca mr̥ḷaya |
1.025.19c tvā́m avasyúr ā́ cake ||

1.025.20a tváṁ víśvasya medhira diváś ca gmáś ca rājasi |
1.025.20c sá yā́mani práti śrudhi ||

1.025.21a úd uttamám mumugdhi no ví pā́śam madhyamáṁ cr̥ta |
1.025.21c ávādhamā́ni jīváse ||

1.026.01a vásiṣvā hí miyedhya vástrāṇy ūrjām pate |
1.026.01c sémáṁ no adhvaráṁ yaja ||

1.026.02a ní no hótā váreṇyaḥ sádā yaviṣṭha mánmabhiḥ |
1.026.02c ágne divítmatā vácaḥ ||

1.026.03a ā́ hí ṣmā sūnáve pitā́pír yájaty āpáye |
1.026.03c sákhā sákhye váreṇyaḥ ||

1.026.04a ā́ no barhī́ riśā́daso váruṇo mitró aryamā́ |
1.026.04c sī́dantu mánuṣo yathā ||

1.026.05a pū́rvya hotar asyá no mándasva sakhyásya ca |
1.026.05c imā́ u ṣú śrudhī gíraḥ ||

1.026.06a yác cid dhí śáśvatā tánā deváṁ-devaṁ yájāmahe |
1.026.06c tvé íd dhūyate havíḥ ||

1.026.07a priyó no astu viśpátir hótā mandró váreṇyaḥ |
1.026.07c priyā́ḥ svagnáyo vayám ||

1.026.08a svagnáyo hí vā́ryaṁ devā́so dadhiré ca naḥ |
1.026.08c svagnáyo manāmahe ||

1.026.09a áthā na ubháyeṣām ámr̥ta mártyānām |
1.026.09c mitháḥ santu práśastayaḥ ||

1.026.10a víśvebhir agne agníbhir imáṁ yajñám idáṁ vácaḥ |
1.026.10c cáno dhāḥ sahaso yaho ||

1.027.01a áśvaṁ ná tvā vā́ravantaṁ vandádhyā agníṁ námobhiḥ |
1.027.01c samrā́jantam adhvarā́ṇām ||

1.027.02a sá ghā naḥ sūnúḥ śávasā pr̥thúpragāmā suśévaḥ |
1.027.02c mīḍhvā́m̐ asmā́kam babhūyāt ||

1.027.03a sá no dūrā́c cāsā́c ca ní mártyād aghāyóḥ |
1.027.03c pāhí sádam íd viśvā́yuḥ ||

1.027.04a imám ū ṣú tvám asmā́kaṁ saníṁ gāyatráṁ návyāṁsam |
1.027.04c ágne devéṣu prá vocaḥ ||

1.027.05a ā́ no bhaja paraméṣv ā́ vā́jeṣu madhyaméṣu |
1.027.05c śíkṣā vásvo ántamasya ||

1.027.06a vibhaktā́si citrabhāno síndhor ūrmā́ upāká ā́ |
1.027.06c sadyó dāśúṣe kṣarasi ||

1.027.07a yám agne pr̥tsú mártyam ávā vā́jeṣu yáṁ junā́ḥ |
1.027.07c sá yántā śáśvatīr íṣaḥ ||

1.027.08a nákir asya sahantya paryetā́ káyasya cit |
1.027.08c vā́jo asti śravā́yyaḥ ||

1.027.09a sá vā́jaṁ viśvácarṣaṇir árvadbhir astu tárutā |
1.027.09c víprebhir astu sánitā ||

1.027.10a járābodha tád viviḍḍhi viśé-viśe yajñíyāya |
1.027.10c stómaṁ rudrā́ya dŕ̥śīkam ||

1.027.11a sá no mahā́m̐ animānó dhūmáketuḥ puruścandráḥ |
1.027.11c dhiyé vā́jāya hinvatu ||

1.027.12a sá revā́m̐ iva viśpátir daívyaḥ ketúḥ śr̥ṇotu naḥ |
1.027.12c ukthaír agnír br̥hádbhānuḥ ||

1.027.13a námo mahádbhyo námo arbhakébhyo námo yúvabhyo náma āśinébhyaḥ |
1.027.13c yájāma devā́n yádi śaknávāma mā́ jyā́yasaḥ śáṁsam ā́ vr̥kṣi devāḥ ||

1.028.01a yátra grā́vā pr̥thúbudhna ūrdhvó bhávati sótave |
1.028.01c ulū́khalasutānām ávéd v indra jalgulaḥ ||

1.028.02a yátra dvā́v iva jaghánādhiṣavaṇyā̀ kr̥tā́ |
1.028.02c ulū́khalasutānām ávéd v indra jalgulaḥ ||

1.028.03a yátra nā́ry apacyavám upacyaváṁ ca śíkṣate |
1.028.03c ulū́khalasutānām ávéd v indra jalgulaḥ ||

1.028.04a yátra mánthāṁ vibadhnáte raśmī́n yámitavā́ iva |
1.028.04c ulū́khalasutānām ávéd v indra jalgulaḥ ||

1.028.05a yác cid dhí tváṁ gr̥hé-gr̥ha úlūkhalaka yujyáse |
1.028.05c ihá dyumáttamaṁ vada jáyatām iva dundubhíḥ ||

1.028.06a utá sma te vanaspate vā́to ví vāty ágram ít |
1.028.06c átho índrāya pā́tave sunú sómam ulūkhala ||

1.028.07a āyajī́ vājasā́tamā tā́ hy ùccā́ vijarbhr̥táḥ |
1.028.07c hárī ivā́ndhāṁsi bápsatā ||

1.028.08a tā́ no adyá vanaspatī r̥ṣvā́v r̥ṣvébhiḥ sotŕ̥bhiḥ |
1.028.08c índrāya mádhumat sutam ||

1.028.09a úc chiṣṭáṁ camvòr bhara sómam pavítra ā́ sr̥ja |
1.028.09c ní dhehi gór ádhi tvací ||

1.029.01a yác cid dhí satya somapā anāśastā́ iva smási |
1.029.01c ā́ tū́ na indra śaṁsaya góṣv áśveṣu śubhríṣu sahásreṣu tuvīmagha ||

1.029.02a śíprin vājānām pate śácīvas táva daṁsánā |
1.029.02c ā́ tū́ na indra śaṁsaya góṣv áśveṣu śubhríṣu sahásreṣu tuvīmagha ||

1.029.03a ní ṣvāpayā mithūdŕ̥śā sastā́m ábudhyamāne |
1.029.03c ā́ tū́ na indra śaṁsaya góṣv áśveṣu śubhríṣu sahásreṣu tuvīmagha ||

1.029.04a sasántu tyā́ árātayo bódhantu śūra rātáyaḥ |
1.029.04c ā́ tū́ na indra śaṁsaya góṣv áśveṣu śubhríṣu sahásreṣu tuvīmagha ||

1.029.05a sám indra gardabhám mr̥ṇa nuvántam pāpáyāmuyā́ |
1.029.05c ā́ tū́ na indra śaṁsaya góṣv áśveṣu śubhríṣu sahásreṣu tuvīmagha ||

1.029.06a pátāti kuṇḍr̥ṇā́cyā dūráṁ vā́to vánād ádhi |
1.029.06c ā́ tū́ na indra śaṁsaya góṣv áśveṣu śubhríṣu sahásreṣu tuvīmagha ||

1.029.07a sárvam parikrośáṁ jahi jambháyā kr̥kadāśvàm |
1.029.07c ā́ tū́ na indra śaṁsaya góṣv áśveṣu śubhríṣu sahásreṣu tuvīmagha ||

1.030.01a ā́ va índraṁ kríviṁ yathā vājayántaḥ śatákratum |
1.030.01c máṁhiṣṭhaṁ siñca índubhiḥ ||

1.030.02a śatáṁ vā yáḥ śúcīnāṁ sahásraṁ vā sámāśirām |
1.030.02c éd u nimnáṁ ná rīyate ||

1.030.03a sáṁ yán mádāya śuṣmíṇa enā́ hy àsyodáre |
1.030.03c samudró ná vyáco dadhé ||

1.030.04a ayám u te sám atasi kapóta iva garbhadhím |
1.030.04c vácas tác cin na ohase ||

1.030.05a stotráṁ rādhānām pate gírvāho vīra yásya te |
1.030.05c víbhūtir astu sūnŕ̥tā ||

1.030.06a ūrdhvás tiṣṭhā na ūtáye 'smín vā́je śatakrato |
1.030.06c sám anyéṣu bravāvahai ||

1.030.07a yóge-yoge tavástaraṁ vā́je-vāje havāmahe |
1.030.07c sákhāya índram ūtáye ||

1.030.08a ā́ ghā gamad yádi śrávat sahasríṇībhir ūtíbhiḥ |
1.030.08c vā́jebhir úpa no hávam ||

1.030.09a ánu pratnásyaúkaso huvé tuvipratíṁ náram |
1.030.09c yáṁ te pū́rvam pitā́ huvé ||

1.030.10a táṁ tvā vayáṁ viśvavārā́ śāsmahe puruhūta |
1.030.10c sákhe vaso jaritŕ̥bhyaḥ ||

1.030.11a asmā́kaṁ śipríṇīnāṁ sómapāḥ somapā́vnām |
1.030.11c sákhe vajrin sákhīnām ||

1.030.12a táthā tád astu somapāḥ sákhe vajrin táthā kr̥ṇu |
1.030.12c yáthā ta uśmásīṣṭáye ||

1.030.13a revátīr naḥ sadhamā́da índre santu tuvívājāḥ |
1.030.13c kṣumánto yā́bhir mádema ||

1.030.14a ā́ gha tvā́vān tmánāptáḥ stotŕ̥bhyo dhr̥ṣṇav iyānáḥ |
1.030.14c r̥ṇór ákṣaṁ ná cakryòḥ ||

1.030.15a ā́ yád dúvaḥ śatakratav ā́ kā́maṁ jaritr̥̄ṇā́m |
1.030.15c r̥ṇór ákṣaṁ ná śácībhiḥ ||

1.030.16a śáśvad índraḥ pópruthadbhir jigāya nā́nadadbhiḥ śā́śvasadbhir dhánāni |
1.030.16c sá no hiraṇyaratháṁ daṁsánāvān sá naḥ sanitā́ sanáye sá no 'dāt ||

1.030.17a ā́śvināv áśvāvatyeṣā́ yātaṁ śávīrayā |
1.030.17c gómad dasrā híraṇyavat ||

1.030.18a samānáyojano hí vāṁ rátho dasrāv ámartyaḥ |
1.030.18c samudré aśvinéyate ||

1.030.19a ny àghnyásya mūrdháni cakráṁ ráthasya yemathuḥ |
1.030.19c pári dyā́m anyád īyate ||

1.030.20a kás ta uṣaḥ kadhapriye bhujé márto amartye |
1.030.20c káṁ nakṣase vibhāvari ||

1.030.21a vayáṁ hí te ámanmahy ā́ntād ā́ parākā́t |
1.030.21c áśve ná citre aruṣi ||

1.030.22a tváṁ tyébhir ā́ gahi vā́jebhir duhitar divaḥ |
1.030.22c asmé rayíṁ ní dhāraya ||

1.031.01a tvám agne prathamó áṅgirā ŕ̥ṣir devó devā́nām abhavaḥ śiváḥ sákhā |
1.031.01c táva vraté kaváyo vidmanā́pasó 'jāyanta marúto bhrā́jadr̥ṣṭayaḥ ||

1.031.02a tvám agne prathamó áṅgirastamaḥ kavír devā́nām pári bhūṣasi vratám |
1.031.02c vibhúr víśvasmai bhúvanāya médhiro dvimātā́ śayúḥ katidhā́ cid āyáve ||

1.031.03a tvám agne prathamó mātaríśvana āvír bhava sukratūyā́ vivásvate |
1.031.03c árejetāṁ ródasī hotr̥vū́ryé 'saghnor bhārám áyajo mahó vaso ||

1.031.04a tvám agne mánave dyā́m avāśayaḥ purūrávase sukŕ̥te sukŕ̥ttaraḥ |
1.031.04c śvātréṇa yát pitrór múcyase páry ā́ tvā pū́rvam anayann ā́param púnaḥ ||

1.031.05a tvám agne vr̥ṣabháḥ puṣṭivárdhana údyatasruce bhavasi śravā́yyaḥ |
1.031.05c yá ā́hutim pári védā váṣaṭkr̥tim ékāyur ágre víśa āvívāsasi ||

1.031.06a tvám agne vr̥jinávartaniṁ náraṁ sákman piparṣi vidáthe vicarṣaṇe |
1.031.06c yáḥ śū́rasātā páritakmye dháne dabhrébhiś cit sámr̥tā háṁsi bhū́yasaḥ ||

1.031.07a tváṁ tám agne amr̥tatvá uttamé mártaṁ dadhāsi śrávase divé-dive |
1.031.07c yás tātr̥ṣāṇá ubháyāya jánmane máyaḥ kr̥ṇóṣi práya ā́ ca sūráye ||

1.031.08a tváṁ no agne sanáye dhánānāṁ yaśásaṁ kārúṁ kr̥ṇuhi stávānaḥ |
1.031.08c r̥dhyā́ma kármāpásā návena devaír dyāvāpr̥thivī prā́vataṁ naḥ ||

1.031.09a tváṁ no agne pitrór upástha ā́ devó devéṣv anavadya jā́gr̥viḥ |
1.031.09c tanūkŕ̥d bodhi prámatiś ca kāráve tváṁ kalyāṇa vásu víśvam ópiṣe ||

1.031.10a tvám agne prámatis tvám pitā́si nas tváṁ vayaskŕ̥t táva jāmáyo vayám |
1.031.10c sáṁ tvā rā́yaḥ śatínaḥ sáṁ sahasríṇaḥ suvī́raṁ yanti vratapā́m adābhya ||

1.031.11a tvā́m agne prathamám āyúm āyáve devā́ akr̥ṇvan náhuṣasya viśpátim |
1.031.11c íḷām akr̥ṇvan mánuṣasya śā́sanīm pitúr yát putró mámakasya jā́yate ||

1.031.12a tváṁ no agne táva deva pāyúbhir maghóno rakṣa tanvàś ca vandya |
1.031.12c trātā́ tokásya tánaye gávām asy ánimeṣaṁ rákṣamāṇas táva vraté ||

1.031.13a tvám agne yájyave pāyúr ántaro 'niṣaṅgā́ya caturakṣá idhyase |
1.031.13c yó rātáhavyo 'vr̥kā́ya dhā́yase kīréś cin mántram mánasā vanóṣi tám ||

1.031.14a tvám agna uruśáṁsāya vāgháte spārháṁ yád rékṇaḥ paramáṁ vanóṣi tát |
1.031.14c ādhrásya cit prámatir ucyase pitā́ prá pā́kaṁ śā́ssi prá díśo vidúṣṭaraḥ ||

1.031.15a tvám agne práyatadakṣiṇaṁ náraṁ vármeva syūtám pári pāsi viśvátaḥ |
1.031.15c svādukṣádmā yó vasataú syonakŕ̥j jīvayājáṁ yájate sópamā́ diváḥ ||

1.031.16a imā́m agne śaráṇim mīmr̥ṣo na imám ádhvānaṁ yám ágāma dūrā́t |
1.031.16c āpíḥ pitā́ prámatiḥ somyā́nām bhŕ̥mir asy r̥ṣikŕ̥n mártyānām ||

1.031.17a manuṣvád agne aṅgirasvád aṅgiro yayātivát sádane pūrvavác chuce |
1.031.17c áccha yāhy ā́ vahā daívyaṁ jánam ā́ sādaya barhíṣi yákṣi ca priyám ||

1.031.18a eténāgne bráhmaṇā vāvr̥dhasva śáktī vā yát te cakr̥mā́ vidā́ vā |
1.031.18c utá prá ṇeṣy abhí vásyo asmā́n sáṁ naḥ sr̥ja sumatyā́ vā́javatyā ||

1.032.01a índrasya nú vīryā̀ṇi prá vocaṁ yā́ni cakā́ra prathamā́ni vajrī́ |
1.032.01c áhann áhim ánv apás tatarda prá vakṣáṇā abhinat párvatānām ||

1.032.02a áhann áhim párvate śiśriyāṇáṁ tváṣṭāsmai vájraṁ svaryàṁ tatakṣa |
1.032.02c vāśrā́ iva dhenávaḥ syándamānā áñjaḥ samudrám áva jagmur ā́paḥ ||

1.032.03a vr̥ṣāyámāṇo 'vr̥ṇīta sómaṁ tríkadrukeṣv apibat sutásya |
1.032.03c ā́ sā́yakam maghávādatta vájram áhann enam prathamajā́m áhīnām ||

1.032.04a yád indrā́han prathamajā́m áhīnām ā́n māyínām ámināḥ prótá māyā́ḥ |
1.032.04c ā́t sū́ryaṁ janáyan dyā́m uṣā́saṁ tādī́tnā śátruṁ ná kílā vivitse ||

1.032.05a áhan vr̥tráṁ vr̥tratáraṁ vyàṁsam índro vájreṇa mahatā́ vadhéna |
1.032.05c skándhāṁsīva kúliśenā vívr̥kṇā́hiḥ śayata upapŕ̥k pr̥thivyā́ḥ ||

1.032.06a ayoddhéva durmáda ā́ hí juhvé mahāvīráṁ tuvibādhám r̥jīṣám |
1.032.06c nā́tārīd asya sámr̥tiṁ vadhā́nāṁ sáṁ rujā́nāḥ pipiṣa índraśatruḥ ||

1.032.07a apā́d ahastó apr̥tanyad índram ā́sya vájram ádhi sā́nau jaghāna |
1.032.07c vŕ̥ṣṇo vádhriḥ pratimā́nam búbhūṣan purutrā́ vr̥tró aśayad vyàstaḥ ||

1.032.08a nadáṁ ná bhinnám amuyā́ śáyānam máno rúhāṇā áti yanty ā́paḥ |
1.032.08c yā́ś cid vr̥tró mahinā́ paryátiṣṭhat tā́sām áhiḥ patsutaḥśī́r babhūva ||

1.032.09a nīcā́vayā abhavad vr̥tráputréndro asyā áva vádhar jabhāra |
1.032.09c úttarā sū́r ádharaḥ putrá āsīd dā́nuḥ śaye sahávatsā ná dhenúḥ ||

1.032.10a átiṣṭhantīnām aniveśanā́nāṁ kā́ṣṭhānām mádhye níhitaṁ śárīram |
1.032.10c vr̥trásya niṇyáṁ ví caranty ā́po dīrgháṁ táma ā́śayad índraśatruḥ ||

1.032.11a dāsápatnīr áhigopā atiṣṭhan níruddhā ā́paḥ paṇíneva gā́vaḥ |
1.032.11c apā́m bílam ápihitaṁ yád ā́sīd vr̥tráṁ jaghanvā́m̐ ápa tád vavāra ||

1.032.12a áśvyo vā́ro abhavas tád indra sr̥ké yát tvā pratyáhan devá ékaḥ |
1.032.12c ájayo gā́ ájayaḥ śūra sómam ávāsr̥jaḥ sártave saptá síndhūn ||

1.032.13a nā́smai vidyún ná tanyatúḥ siṣedha ná yā́m míham ákirad dhrādúniṁ ca |
1.032.13c índraś ca yád yuyudhā́te áhiś cotā́parī́bhyo maghávā ví jigye ||

1.032.14a áher yātā́raṁ kám apaśya indra hr̥dí yát te jaghnúṣo bhī́r ágacchat |
1.032.14c náva ca yán navatíṁ ca srávantīḥ śyenó ná bhītó átaro rájāṁsi ||

1.032.15a índro yātó 'vasitasya rā́jā śámasya ca śr̥ṅgíṇo vájrabāhuḥ |
1.032.15c séd u rā́jā kṣayati carṣaṇīnā́m arā́n ná nemíḥ pári tā́ babhūva ||

1.033.01a étā́yāmópa gavyánta índram asmā́kaṁ sú prámatiṁ vāvr̥dhāti |
1.033.01c anāmr̥ṇáḥ kuvíd ā́d asyá rāyó gávāṁ kétam páram āvárjate naḥ ||

1.033.02a úpéd aháṁ dhanadā́m ápratītaṁ júṣṭāṁ ná śyenó vasatím patāmi |
1.033.02c índraṁ namasyánn upamébhir arkaír yáḥ stotŕ̥bhyo hávyo ásti yā́man ||

1.033.03a ní sárvasena iṣudhī́m̐r asakta sám aryó gā́ ajati yásya váṣṭi |
1.033.03c coṣkūyámāṇa indra bhū́ri vāmám mā́ paṇír bhūr asmád ádhi pravr̥ddha ||

1.033.04a vádhīr hí dásyuṁ dhanínaṁ ghanénam̐ ékaś cárann upaśākébhir indra |
1.033.04c dhánor ádhi viṣuṇák té vy ā̀yann áyajvānaḥ sanakā́ḥ prétim īyuḥ ||

1.033.05a párā cic chīrṣā́ vavr̥jus tá indrā́yajvāno yájvabhiḥ spárdhamānāḥ |
1.033.05c prá yád divó harivaḥ sthātar ugra nír avratā́m̐ adhamo ródasyoḥ ||

1.033.06a áyuyutsann anavadyásya sénām áyātayanta kṣitáyo návagvāḥ |
1.033.06c vr̥ṣāyúdho ná vádhrayo níraṣṭāḥ pravádbhir índrāc citáyanta āyan ||

1.033.07a tvám etā́n rudató jákṣataś cā́yodhayo rájasa indra pāré |
1.033.07c ávādaho divá ā́ dásyum uccā́ prá sunvatáḥ stuvatáḥ śáṁsam āvaḥ ||

1.033.08a cakrāṇā́saḥ parīṇáham pr̥thivyā́ híraṇyena maṇínā śúmbhamānāḥ |
1.033.08c ná hinvānā́sas titirus tá índram pári spáśo adadhāt sū́ryeṇa ||

1.033.09a pári yád indra ródasī ubhé ábubhojīr mahinā́ viśvátaḥ sīm |
1.033.09c ámanyamānām̐ abhí mányamānair nír brahmábhir adhamo dásyum indra ||

1.033.10a ná yé diváḥ pr̥thivyā́ ántam āpúr ná māyā́bhir dhanadā́m paryábhūvan |
1.033.10c yújaṁ vájraṁ vr̥ṣabháś cakra índro nír jyótiṣā támaso gā́ adukṣat ||

1.033.11a ánu svadhā́m akṣarann ā́po asyā́vardhata mádhya ā́ nāvyā̀nām |
1.033.11c sadhrīcī́nena mánasā tám índra ójiṣṭhena hánmanāhann abhí dyū́n ||

1.033.12a ny ā̀vidhyad ilībíśasya dr̥ḷhā́ ví śr̥ṅgíṇam abhinac chúṣṇam índraḥ |
1.033.12c yā́vat táro maghavan yā́vad ójo vájreṇa śátrum avadhīḥ pr̥tanyúm ||

1.033.13a abhí sidhmó ajigād asya śátrūn ví tigména vr̥ṣabhéṇā púro 'bhet |
1.033.13c sáṁ vájreṇāsr̥jad vr̥trám índraḥ prá svā́m matím atirac chā́śadānaḥ ||

1.033.14a ā́vaḥ kútsam indra yásmiñ cākán prā́vo yúdhyantaṁ vr̥ṣabháṁ dáśadyum |
1.033.14c śaphácyuto reṇúr nakṣata dyā́m úc chvaitreyó nr̥ṣā́hyāya tasthau ||

1.033.15a ā́vaḥ śámaṁ vr̥ṣabháṁ túgryāsu kṣetrajeṣé maghavañ chvítryaṁ gā́m |
1.033.15c jyók cid átra tasthivā́ṁso akrañ chatrūyatā́m ádharā védanākaḥ ||

1.034.01a tríś cin no adyā́ bhavataṁ navedasā vibhúr vāṁ yā́ma utá rātír aśvinā |
1.034.01c yuvór hí yantráṁ himyéva vā́saso 'bhyāyaṁsényā bhavatam manīṣíbhiḥ ||

1.034.02a tráyaḥ paváyo madhuvā́hane ráthe sómasya venā́m ánu víśva íd viduḥ |
1.034.02c tráyaḥ skambhā́saḥ skabhitā́sa ārábhe trír náktaṁ yāthás trír v aśvinā dívā ||

1.034.03a samāné áhan trír avadyagohanā trír adyá yajñám mádhunā mimikṣatam |
1.034.03c trír vā́javatīr íṣo aśvinā yuváṁ doṣā́ asmábhyam uṣásaś ca pinvatam ||

1.034.04a trír vartír yātaṁ trír ánuvrate jané tríḥ suprāvyè tredhéva śikṣatam |
1.034.04c trír nāndyàṁ vahatam aśvinā yuváṁ tríḥ pŕ̥kṣo asmé akṣáreva pinvatam ||

1.034.05a trír no rayíṁ vahatam aśvinā yuváṁ trír devátātā trír utā́vataṁ dhíyaḥ |
1.034.05c tríḥ saubhagatváṁ trír utá śrávāṁsi nas triṣṭháṁ vāṁ sū́re duhitā́ ruhad rátham ||

1.034.06a trír no aśvinā divyā́ni bheṣajā́ tríḥ pā́rthivāni trír u dattam adbhyáḥ |
1.034.06c omā́naṁ śaṁyór mámakāya sūnáve tridhā́tu śárma vahataṁ śubhas patī ||

1.034.07a trír no aśvinā yajatā́ divé-dive pári tridhā́tu pr̥thivī́m aśāyatam |
1.034.07c tisró nāsatyā rathyā parāváta ātméva vā́taḥ svásarāṇi gacchatam ||

1.034.08a trír aśvinā síndhubhiḥ saptámātr̥bhis tráya āhāvā́s tredhā́ havíṣ kr̥tám |
1.034.08c tisráḥ pr̥thivī́r upári pravā́ divó nā́kaṁ rakṣethe dyúbhir aktúbhir hitám ||

1.034.09a kvà trī́ cakrā́ trivŕ̥to ráthasya kvà tráyo vandhúro yé sánīḷāḥ |
1.034.09c kadā́ yógo vājíno rā́sabhasya yéna yajñáṁ nāsatyopayātháḥ ||

1.034.10a ā́ nāsatyā gácchataṁ hūyáte havír mádhvaḥ pibatam madhupébhir āsábhiḥ |
1.034.10c yuvór hí pū́rvaṁ savitóṣáso rátham r̥tā́ya citráṁ ghr̥távantam íṣyati ||

1.034.11a ā́ nāsatyā tribhír ekādaśaír ihá devébhir yātam madhupéyam aśvinā |
1.034.11c prā́yus tā́riṣṭaṁ nī́ rápāṁsi mr̥kṣataṁ sédhataṁ dvéṣo bhávataṁ sacābhúvā ||

1.034.12a ā́ no aśvinā trivŕ̥tā ráthenārvā́ñcaṁ rayíṁ vahataṁ suvī́ram |
1.034.12c śr̥ṇvántā vām ávase johavīmi vr̥dhé ca no bhavataṁ vā́jasātau ||

1.035.01a hváyāmy agním prathamáṁ svastáye hváyāmi mitrā́váruṇāv ihā́vase |
1.035.01c hváyāmi rā́trīṁ jágato nivéśanīṁ hváyāmi deváṁ savitā́ram ūtáye ||

1.035.02a ā́ kr̥ṣṇéna rájasā vártamāno niveśáyann amŕ̥tam mártyaṁ ca |
1.035.02c hiraṇyáyena savitā́ ráthenā́ devó yāti bhúvanāni páśyan ||

1.035.03a yā́ti deváḥ pravátā yā́ty udvátā yā́ti śubhrā́bhyāṁ yajató háribhyām |
1.035.03c ā́ devó yāti savitā́ parāvátó 'pa víśvā duritā́ bā́dhamānaḥ ||

1.035.04a abhī́vr̥taṁ kŕ̥śanair viśvárūpaṁ híraṇyaśamyaṁ yajató br̥hántam |
1.035.04c ā́sthād ráthaṁ savitā́ citrábhānuḥ kr̥ṣṇā́ rájāṁsi táviṣīṁ dádhānaḥ ||

1.035.05a ví jánāñ chyāvā́ḥ śitipā́do akhyan ráthaṁ híraṇyapraügaṁ váhantaḥ |
1.035.05c śáśvad víśaḥ savitúr daívyasyopásthe víśvā bhúvanāni tasthuḥ ||

1.035.06a tisró dyā́vaḥ savitúr dvā́ upásthām̐ ékā yamásya bhúvane virāṣā́ṭ |
1.035.06c āṇíṁ ná ráthyam amŕ̥tā́dhi tasthur ihá bravītu yá u tác cíketat ||

1.035.07a ví suparṇó antárikṣāṇy akhyad gabhīrávepā ásuraḥ sunītháḥ |
1.035.07c kvèdā́nīṁ sū́ryaḥ káś ciketa katamā́ṁ dyā́ṁ raśmír asyā́ tatāna ||

1.035.08a aṣṭaú vy àkhyat kakúbhaḥ pr̥thivyā́s trī́ dhánva yójanā saptá síndhūn |
1.035.08c hiraṇyākṣáḥ savitā́ devá ā́gād dádhad rátnā dāśúṣe vā́ryāṇi ||

1.035.09a híraṇyapāṇiḥ savitā́ vícarṣaṇir ubhé dyā́vāpr̥thivī́ antár īyate |
1.035.09c ápā́mīvām bā́dhate véti sū́ryam abhí kr̥ṣṇéna rájasā dyā́m r̥ṇoti ||

1.035.10a híraṇyahasto ásuraḥ sunītháḥ sumr̥ḷīkáḥ svávām̐ yātv arvā́ṅ |
1.035.10c apasédhan rakṣáso yātudhā́nān ásthād deváḥ pratidoṣáṁ gr̥ṇānáḥ ||

1.035.11a yé te pánthāḥ savitaḥ pūrvyā́so 'reṇávaḥ súkr̥tā antárikṣe |
1.035.11c tébhir no adyá pathíbhiḥ sugébhī rákṣā ca no ádhi ca brūhi deva ||

1.036.01a prá vo yahvám purūṇā́ṁ viśā́ṁ devayatī́nām |
1.036.01c agníṁ sūktébhir vácobhir īmahe yáṁ sīm íd anyá ī́ḷate ||

1.036.02a jánāso agníṁ dadhire sahovŕ̥dhaṁ havíṣmanto vidhema te |
1.036.02c sá tváṁ no adyá sumánā ihā́vitā́ bhávā vā́jeṣu santya ||

1.036.03a prá tvā dūtáṁ vr̥ṇīmahe hótāraṁ viśvávedasam |
1.036.03c mahás te sató ví caranty arcáyo diví spr̥śanti bhānávaḥ ||

1.036.04a devā́sas tvā váruṇo mitró aryamā́ sáṁ dūtám pratnám indhate |
1.036.04c víśvaṁ só agne jayati tváyā dhánaṁ yás te dadā́śa mártyaḥ ||

1.036.05a mandró hótā gr̥hápatir ágne dūtó viśā́m asi |
1.036.05c tvé víśvā sáṁgatāni vratā́ dhruvā́ yā́ni devā́ ákr̥ṇvata ||

1.036.06a tvé íd agne subháge yaviṣṭhya víśvam ā́ hūyate havíḥ |
1.036.06c sá tváṁ no adyá sumánā utā́paráṁ yákṣi devā́n suvī́ryā ||

1.036.07a táṁ ghem itthā́ namasvína úpa svarā́jam āsate |
1.036.07c hótrābhir agním mánuṣaḥ sám indhate titirvā́ṁso áti srídhaḥ ||

1.036.08a ghnánto vr̥trám ataran ródasī apá urú kṣáyāya cakrire |
1.036.08c bhúvat káṇve vŕ̥ṣā dyumny ā́hutaḥ krándad áśvo gáviṣṭiṣu ||

1.036.09a sáṁ sīdasva mahā́m̐ asi śócasva devavī́tamaḥ |
1.036.09c ví dhūmám agne aruṣám miyedhya sr̥já praśasta darśatám ||

1.036.10a yáṁ tvā devā́so mánave dadhúr ihá yájiṣṭhaṁ havyavāhana |
1.036.10c yáṁ káṇvo médhyātithir dhanaspŕ̥taṁ yáṁ vŕ̥ṣā yám upastutáḥ ||

1.036.11a yám agním médhyātithiḥ káṇva īdhá r̥tā́d ádhi |
1.036.11c tásya préṣo dīdiyus tám imā́ ŕ̥cas tám agníṁ vardhayāmasi ||

1.036.12a rāyás pūrdhi svadhāvó 'sti hí té 'gne devéṣv ā́pyam |
1.036.12c tváṁ vā́jasya śrútyasya rājasi sá no mr̥ḷa mahā́m̐ asi ||

1.036.13a ūrdhvá ū ṣú ṇa ūtáye tíṣṭhā devó ná savitā́ |
1.036.13c ūrdhvó vā́jasya sánitā yád añjíbhir vāghádbhir vihváyāmahe ||

1.036.14a ūrdhvó naḥ pāhy áṁhaso ní ketúnā víśvaṁ sám atríṇaṁ daha |
1.036.14c kr̥dhī́ na ūrdhvā́ñ caráthāya jīváse vidā́ devéṣu no dúvaḥ ||

1.036.15a pāhí no agne rakṣásaḥ pāhí dhūrtér árāvṇaḥ |
1.036.15c pāhí rī́ṣata utá vā jíghāṁsato bŕ̥hadbhāno yáviṣṭhya ||

1.036.16a ghanéva víṣvag ví jahy árāvṇas tápurjambha yó asmadhrúk |
1.036.16c yó mártyaḥ śíśīte áty aktúbhir mā́ naḥ sá ripúr īśata ||

1.036.17a agnír vavne suvī́ryam agníḥ káṇvāya saúbhagam |
1.036.17c agníḥ prā́van mitrótá médhyātithim agníḥ sātā́ upastutám ||

1.036.18a agnínā turváśaṁ yádum parāváta ugrā́devaṁ havāmahe |
1.036.18c agnír nayan návavāstvam br̥hádrathaṁ turvī́tiṁ dásyave sáhaḥ ||

1.036.19a ní tvā́m agne mánur dadhe jyótir jánāya śáśvate |
1.036.19c dīdétha káṇva r̥tájāta ukṣitó yáṁ namasyánti kr̥ṣṭáyaḥ ||

1.036.20a tveṣā́so agnér ámavanto arcáyo bhīmā́so ná prátītaye |
1.036.20c rakṣasvínaḥ sádam íd yātumā́vato víśvaṁ sám atríṇaṁ daha ||

1.037.01a krīḷáṁ vaḥ śárdho mā́rutam anarvā́ṇaṁ ratheśúbham |
1.037.01c káṇvā abhí prá gāyata ||

1.037.02a yé pŕ̥ṣatībhir r̥ṣṭíbhiḥ sākáṁ vā́śībhir añjíbhiḥ |
1.037.02c ájāyanta svábhānavaḥ ||

1.037.03a ihéva śr̥ṇva eṣāṁ káśā hásteṣu yád vádān |
1.037.03c ní yā́mañ citrám r̥ñjate ||

1.037.04a prá vaḥ śárdhāya ghŕ̥ṣvaye tveṣádyumnāya śuṣmíṇe |
1.037.04c deváttam bráhma gāyata ||

1.037.05a prá śaṁsā góṣv ághnyaṁ krīḷáṁ yác chárdho mā́rutam |
1.037.05c jámbhe rásasya vāvr̥dhe ||

1.037.06a kó vo várṣiṣṭha ā́ naro diváś ca gmáś ca dhūtayaḥ |
1.037.06c yát sīm ántaṁ ná dhūnuthá ||

1.037.07a ní vo yā́māya mā́nuṣo dadhrá ugrā́ya manyáve |
1.037.07c jíhīta párvato giríḥ ||

1.037.08a yéṣām ájmeṣu pr̥thivī́ jujurvā́m̐ iva viśpátiḥ |
1.037.08c bhiyā́ yā́meṣu réjate ||

1.037.09a sthiráṁ hí jā́nam eṣāṁ váyo mātúr níretave |
1.037.09c yát sīm ánu dvitā́ śávaḥ ||

1.037.10a úd u tyé sūnávo gíraḥ kā́ṣṭhā ájmeṣv atnata |
1.037.10c vāśrā́ abhijñú yā́tave ||

1.037.11a tyáṁ cid ghā dīrghám pr̥thúm mihó nápātam ámr̥dhram |
1.037.11c prá cyāvayanti yā́mabhiḥ ||

1.037.12a máruto yád dha vo bálaṁ jánām̐ acucyavītana |
1.037.12c girī́m̐r acucyavītana ||

1.037.13a yád dha yā́nti marútaḥ sáṁ ha bruvaté 'dhvann ā́ |
1.037.13c śr̥ṇóti káś cid eṣām ||

1.037.14a prá yāta śī́bham āśúbhiḥ sánti káṇveṣu vo dúvaḥ |
1.037.14c tátro ṣú mādayādhvai ||

1.037.15a ásti hí ṣmā mádāya vaḥ smási ṣmā vayám eṣām |
1.037.15c víśvaṁ cid ā́yur jīváse ||

1.038.01a kád dha nūnáṁ kadhapriyaḥ pitā́ putráṁ ná hástayoḥ |
1.038.01c dadhidhvé vr̥ktabarhiṣaḥ ||

1.038.02a kvà nūnáṁ kád vo árthaṁ gántā divó ná pr̥thivyā́ḥ |
1.038.02c kvà vo gā́vo ná raṇyanti ||

1.038.03a kvà vaḥ sumnā́ návyāṁsi márutaḥ kvà suvitā́ |
1.038.03c kvò víśvāni saúbhagā ||

1.038.04a yád yūyám pr̥śnimātaro mártāsaḥ syā́tana |
1.038.04c stotā́ vo amŕ̥taḥ syāt ||

1.038.05a mā́ vo mr̥gó ná yávase jaritā́ bhūd ájoṣyaḥ |
1.038.05c pathā́ yamásya gād úpa ||

1.038.06a mó ṣú ṇaḥ párā-parā nírr̥tir durháṇā vadhīt |
1.038.06c padīṣṭá tŕ̥ṣṇayā sahá ||

1.038.07a satyáṁ tveṣā́ ámavanto dhánvañ cid ā́ rudríyāsaḥ |
1.038.07c míhaṁ kr̥ṇvanty avātā́m ||

1.038.08a vāśréva vidyún mimāti vatsáṁ ná mātā́ siṣakti |
1.038.08c yád eṣāṁ vr̥ṣṭír ásarji ||

1.038.09a dívā cit támaḥ kr̥ṇvanti parjányenodavāhéna |
1.038.09c yát pr̥thivī́ṁ vyundánti ||

1.038.10a ádha svanā́n marútāṁ víśvam ā́ sádma pā́rthivam |
1.038.10c árejanta prá mā́nuṣāḥ ||

1.038.11a máruto vīḷupāṇíbhiś citrā́ ródhasvatīr ánu |
1.038.11c yātém ákhidrayāmabhiḥ ||

1.038.12a sthirā́ vaḥ santu nemáyo ráthā áśvāsa eṣām |
1.038.12c súsaṁskr̥tā abhī́śavaḥ ||

1.038.13a ácchā vadā tánā girā́ jarā́yai bráhmaṇas pátim |
1.038.13c agním mitráṁ ná darśatám ||

1.038.14a mimīhí ślókam āsyè parjánya iva tatanaḥ |
1.038.14c gā́ya gāyatrám ukthyàm ||

1.038.15a vándasva mā́rutaṁ gaṇáṁ tveṣám panasyúm arkíṇam |
1.038.15c asmé vr̥ddhā́ asann ihá ||

1.039.01a prá yád itthā́ parāvátaḥ śocír ná mā́nam ásyatha |
1.039.01c kásya krátvā marutaḥ kásya várpasā káṁ yātha káṁ ha dhūtayaḥ ||

1.039.02a sthirā́ vaḥ santv ā́yudhā parāṇúde vīḷū́ utá pratiṣkábhe |
1.039.02c yuṣmā́kam astu táviṣī pánīyasī mā́ mártyasya māyínaḥ ||

1.039.03a párā ha yát sthiráṁ hathá náro vartáyathā gurú |
1.039.03c ví yāthana vanínaḥ pr̥thivyā́ vy ā́śāḥ párvatānām ||

1.039.04a nahí vaḥ śátrur vividé ádhi dyávi ná bhū́myāṁ riśādasaḥ |
1.039.04c yuṣmā́kam astu táviṣī tánā yujā́ rúdrāso nū́ cid ādhŕ̥ṣe ||

1.039.05a prá vepayanti párvatān ví viñcanti vánaspátīn |
1.039.05c pró ārata maruto durmádā iva dévāsaḥ sárvayā viśā́ ||

1.039.06a úpo rátheṣu pŕ̥ṣatīr ayugdhvam práṣṭir vahati róhitaḥ |
1.039.06c ā́ vo yā́māya pr̥thivī́ cid aśrod ábībhayanta mā́nuṣāḥ ||

1.039.07a ā́ vo makṣū́ tánāya káṁ rúdrā ávo vr̥ṇīmahe |
1.039.07c gántā nūnáṁ nó 'vasā yáthā purétthā́ káṇvāya bibhyúṣe ||

1.039.08a yuṣméṣito maruto mártyeṣita ā́ yó no ábhva ī́ṣate |
1.039.08c ví táṁ yuyota śávasā vy ójasā ví yuṣmā́kābhir ūtíbhiḥ ||

1.039.09a ásāmi hí prayajyavaḥ káṇvaṁ dadá pracetasaḥ |
1.039.09c ásāmibhir maruta ā́ na ūtíbhir gántā vr̥ṣṭíṁ ná vidyútaḥ ||

1.039.10a ásāmy ójo bibhr̥thā sudānavó 'sāmi dhūtayaḥ śávaḥ |
1.039.10c r̥ṣidvíṣe marutaḥ parimanyáva íṣuṁ ná sr̥jata dvíṣam ||

1.040.01a út tiṣṭha brahmaṇas pate devayántas tvemahe |
1.040.01c úpa prá yantu marútaḥ sudā́nava índra prāśū́r bhavā sácā ||

1.040.02a tvā́m íd dhí sahasas putra mártya upabrūté dháne hité |
1.040.02c suvī́ryam maruta ā́ sváśvyaṁ dádhīta yó va ācaké ||

1.040.03a praítu bráhmaṇas pátiḥ prá devy ètu sūnŕ̥tā |
1.040.03c ácchā vīráṁ náryam paṅktírādhasaṁ devā́ yajñáṁ nayantu naḥ ||

1.040.04a yó vāgháte dádāti sūnáraṁ vásu sá dhatte ákṣiti śrávaḥ |
1.040.04c tásmā íḷāṁ suvī́rām ā́ yajāmahe suprátūrtim anehásam ||

1.040.05a prá nūnám bráhmaṇas pátir mántraṁ vadaty ukthyàm |
1.040.05c yásminn índro váruṇo mitró aryamā́ devā́ ókāṁsi cakriré ||

1.040.06a tám íd vocemā vidátheṣu śambhúvam mántraṁ devā anehásam |
1.040.06c imā́ṁ ca vā́cam pratiháryathā naro víśvéd vāmā́ vo aśnavat ||

1.040.07a kó devayántam aśnavaj jánaṁ kó vr̥ktábarhiṣam |
1.040.07c prá-pra dāśvā́n pastyā̀bhir asthitāntarvā́vat kṣáyaṁ dadhe ||

1.040.08a úpa kṣatrám pr̥ñcītá hánti rā́jabhir bhayé cit sukṣitíṁ dadhe |
1.040.08c nā́sya vartā́ ná tarutā́ mahādhané nā́rbhe asti vajríṇaḥ ||

1.041.01a yáṁ rákṣanti prácetaso váruṇo mitró aryamā́ |
1.041.01c nū́ cit sá dabhyate jánaḥ ||

1.041.02a yám bāhúteva píprati pā́nti mártyaṁ riṣáḥ |
1.041.02c áriṣṭaḥ sárva edhate ||

1.041.03a ví durgā́ ví dvíṣaḥ puró ghnánti rā́jāna eṣām |
1.041.03c náyanti duritā́ tiráḥ ||

1.041.04a sugáḥ pánthā anr̥kṣará ā́dityāsa r̥táṁ yaté |
1.041.04c nā́trāvakhādó asti vaḥ ||

1.041.05a yáṁ yajñáṁ náyathā nara ā́dityā r̥júnā pathā́ |
1.041.05c prá vaḥ sá dhītáye naśat ||

1.041.06a sá rátnam mártyo vásu víśvaṁ tokám utá tmánā |
1.041.06c ácchā gacchaty ástr̥taḥ ||

1.041.07a kathā́ rādhāma sakhāyaḥ stómam mitrásyāryamṇáḥ |
1.041.07c máhi psáro váruṇasya ||

1.041.08a mā́ vo ghnántam mā́ śápantam práti voce devayántam |
1.041.08c sumnaír íd va ā́ vivāse ||

1.041.09a catúraś cid dádamānād bibhīyā́d ā́ nídhātoḥ |
1.041.09c ná duruktā́ya spr̥hayet ||

1.042.01a sám pūṣann ádhvanas tira vy áṁho vimuco napāt |
1.042.01c sákṣvā deva prá ṇas puráḥ ||

1.042.02a yó naḥ pūṣann aghó vŕ̥ko duḥśéva ādídeśati |
1.042.02c ápa sma tám pathó jahi ||

1.042.03a ápa tyám paripanthínam muṣīvā́ṇaṁ huraścítam |
1.042.03c dūrám ádhi srutér aja ||

1.042.04a tváṁ tásya dvayāvíno 'gháśaṁsasya kásya cit |
1.042.04c padā́bhí tiṣṭha tápuṣim ||

1.042.05a ā́ tát te dasra mantumaḥ pū́ṣann ávo vr̥ṇīmahe |
1.042.05c yéna pitr̥̄́n ácodayaḥ ||

1.042.06a ádhā no viśvasaubhaga híraṇyavāśīmattama |
1.042.06c dhánāni suṣáṇā kr̥dhi ||

1.042.07a áti naḥ saścáto naya sugā́ naḥ supáthā kr̥ṇu |
1.042.07c pū́ṣann ihá krátuṁ vidaḥ ||

1.042.08a abhí sūyávasaṁ naya ná navajvāró ádhvane |
1.042.08c pū́ṣann ihá krátuṁ vidaḥ ||

1.042.09a śagdhí pūrdhí prá yaṁsi ca śiśīhí prā́sy udáram |
1.042.09c pū́ṣann ihá krátuṁ vidaḥ ||

1.042.10a ná pūṣáṇam methāmasi sūktaír abhí gr̥ṇīmasi |
1.042.10c vásūni dasmám īmahe ||

1.043.01a kád rudrā́ya prácetase mīḷhúṣṭamāya távyase |
1.043.01c vocéma śáṁtamaṁ hr̥dé ||

1.043.02a yáthā no áditiḥ kárat páśve nŕ̥bhyo yáthā gáve |
1.043.02c yáthā tokā́ya rudríyam ||

1.043.03a yáthā no mitró váruṇo yáthā rudráś cíketati |
1.043.03c yáthā víśve sajóṣasaḥ ||

1.043.04a gāthápatim medhápatiṁ rudráṁ jálāṣabheṣajam |
1.043.04c tác chaṁyóḥ sumnám īmahe ||

1.043.05a yáḥ śukrá iva sū́ryo híraṇyam iva rócate |
1.043.05c śréṣṭho devā́nāṁ vásuḥ ||

1.043.06a śáṁ naḥ karaty árvate sugám meṣā́ya meṣyè |
1.043.06c nŕ̥bhyo nā́ribhyo gáve ||

1.043.07a asmé soma śríyam ádhi ní dhehi śatásya nr̥ṇā́m |
1.043.07c máhi śrávas tuvinr̥mṇám ||

1.043.08a mā́ naḥ somaparibā́dho mā́rātayo juhuranta |
1.043.08c ā́ na indo vā́je bhaja ||

1.043.09a yā́s te prajā́ amŕ̥tasya párasmin dhā́mann r̥tásya |
1.043.09c mūrdhā́ nā́bhā soma vena ābhū́ṣantīḥ soma vedaḥ ||

1.044.01a ágne vívasvad uṣásaś citráṁ rā́dho amartya |
1.044.01c ā́ dāśúṣe jātavedo vahā tvám adyā́ devā́m̐ uṣarbúdhaḥ ||

1.044.02a júṣṭo hí dūtó ási havyavā́hanó 'gne rathī́r adhvarā́ṇām |
1.044.02c sajū́r aśvíbhyām uṣásā suvī́ryam asmé dhehi śrávo br̥hát ||

1.044.03a adyā́ dūtáṁ vr̥ṇīmahe vásum agním purupriyám |
1.044.03c dhūmáketum bhā́r̥jīkaṁ vyùṣṭiṣu yajñā́nām adhvaraśríyam ||

1.044.04a śréṣṭhaṁ yáviṣṭham átithiṁ svā̀hutaṁ júṣṭaṁ jánāya dāśúṣe |
1.044.04c devā́m̐ ácchā yā́tave jātávedasam agním īḷe vyùṣṭiṣu ||

1.044.05a staviṣyā́mi tvā́m aháṁ víśvasyāmr̥ta bhojana |
1.044.05c ágne trātā́ram amŕ̥tam miyedhya yájiṣṭhaṁ havyavāhana ||

1.044.06a suśáṁso bodhi gr̥ṇaté yaviṣṭhya mádhujihvaḥ svā̀hutaḥ |
1.044.06c práskaṇvasya pratiránn ā́yur jīváse namasyā́ daívyaṁ jánam ||

1.044.07a hótāraṁ viśvávedasaṁ sáṁ hí tvā víśa indháte |
1.044.07c sá ā́ vaha puruhūta prácetasó 'gne devā́m̐ ihá dravát ||

1.044.08a savitā́ram uṣásam aśvínā bhágam agníṁ vyùṣṭiṣu kṣápaḥ |
1.044.08c káṇvāsas tvā sutásomāsa indhate havyavā́haṁ svadhvara ||

1.044.09a pátir hy àdhvarā́ṇām ágne dūtó viśā́m ási |
1.044.09c uṣarbúdha ā́ vaha sómapītaye devā́m̐ adyá svardŕ̥śaḥ ||

1.044.10a ágne pū́rvā ánūṣáso vibhāvaso dīdétha viśvádarśataḥ |
1.044.10c ási grā́meṣv avitā́ puróhitó 'si yajñéṣu mā́nuṣaḥ ||

1.044.11a ní tvā yajñásya sā́dhanam ágne hótāram r̥tvíjam |
1.044.11c manuṣvád deva dhīmahi prácetasaṁ jīráṁ dūtám ámartyam ||

1.044.12a yád devā́nām mitramahaḥ puróhitó 'ntaro yā́si dūtyàm |
1.044.12c síndhor iva prásvanitāsa ūrmáyo 'gnér bhrājante arcáyaḥ ||

1.044.13a śrudhí śrutkarṇa váhnibhir devaír agne sayā́vabhiḥ |
1.044.13c ā́ sīdantu barhíṣi mitró aryamā́ prātaryā́vāṇo adhvarám ||

1.044.14a śr̥ṇvántu stómam marútaḥ sudā́navo 'gnijihvā́ r̥tāvŕ̥dhaḥ |
1.044.14c píbatu sómaṁ váruṇo dhr̥távrato 'śvíbhyām uṣásā sajū́ḥ ||

1.045.01a tvám agne vásūm̐r ihá rudrā́m̐ ādityā́m̐ utá |
1.045.01c yájā svadhvaráṁ jánam mánujātaṁ ghr̥taprúṣam ||

1.045.02a śruṣṭīvā́no hí dāśúṣe devā́ agne vícetasaḥ |
1.045.02c tā́n rohidaśva girvaṇas tráyastriṁśatam ā́ vaha ||

1.045.03a priyamedhavád atriváj jā́tavedo virūpavát |
1.045.03c aṅgirasván mahivrata práskaṇvasya śrudhī hávam ||

1.045.04a máhikerava ūtáye priyámedhā ahūṣata |
1.045.04c rā́jantam adhvarā́ṇām agníṁ śukréṇa śocíṣā ||

1.045.05a ghŕ̥tāhavana santyemā́ u ṣú śrudhī gíraḥ |
1.045.05c yā́bhiḥ káṇvasya sūnávo hávanté 'vase tvā ||

1.045.06a tvā́ṁ citraśravastama hávante vikṣú jantávaḥ |
1.045.06c śocíṣkeśam purupriyā́gne havyā́ya vóḷhave ||

1.045.07a ní tvā hótāram r̥tvíjaṁ dadhiré vasuvíttamam |
1.045.07c śrútkarṇaṁ sapráthastamaṁ víprā agne díviṣṭiṣu ||

1.045.08a ā́ tvā víprā acucyavuḥ sutásomā abhí práyaḥ |
1.045.08c br̥hád bhā́ bíbhrato havír ágne mártāya dāśúṣe ||

1.045.09a prātaryā́vṇaḥ sahaskr̥ta somapéyāya santya |
1.045.09c ihā́dyá daívyaṁ jánam barhír ā́ sādayā vaso ||

1.045.10a arvā́ñcaṁ daívyaṁ jánam ágne yákṣva sáhūtibhiḥ |
1.045.10c ayáṁ sómaḥ sudānavas tám pāta tiróahnyam ||

1.046.01a eṣó uṣā́ ápūrvyā vy ùcchati priyā́ diváḥ |
1.046.01c stuṣé vām aśvinā br̥hát ||

1.046.02a yā́ dasrā́ síndhumātarā manotárā rayīṇā́m |
1.046.02c dhiyā́ devā́ vasuvídā ||

1.046.03a vacyánte vāṁ kakuhā́so jūrṇā́yām ádhi viṣṭápi |
1.046.03c yád vāṁ rátho víbhiṣ pátāt ||

1.046.04a havíṣā jāró apā́m píparti pápurir narā |
1.046.04c pitā́ kúṭasya carṣaṇíḥ ||

1.046.05a ādāró vām matīnā́ṁ nā́satyā matavacasā |
1.046.05c pātáṁ sómasya dhr̥ṣṇuyā́ ||

1.046.06a yā́ naḥ pī́parad aśvinā jyótiṣmatī támas tiráḥ |
1.046.06c tā́m asmé rāsāthām íṣam ||

1.046.07a ā́ no nāvā́ matīnā́ṁ yātám pārā́ya gántave |
1.046.07c yuñjā́thām aśvinā rátham ||

1.046.08a arítraṁ vāṁ divás pr̥thú tīrthé síndhūnāṁ ráthaḥ |
1.046.08c dhiyā́ yuyujra índavaḥ ||

1.046.09a divás kaṇvāsa índavo vásu síndhūnām padé |
1.046.09c sváṁ vavríṁ kúha dhitsathaḥ ||

1.046.10a ábhūd u bhā́ u aṁśáve híraṇyam práti sū́ryaḥ |
1.046.10c vy àkhyaj jihváyā́sitaḥ ||

1.046.11a ábhūd u pārám étave pánthā r̥tásya sādhuyā́ |
1.046.11c ádarśi ví srutír diváḥ ||

1.046.12a tát-tad íd aśvínor ávo jaritā́ práti bhūṣati |
1.046.12c máde sómasya pípratoḥ ||

1.046.13a vāvasānā́ vivásvati sómasya pītyā́ girā́ |
1.046.13c manuṣvác chambhū ā́ gatam ||

1.046.14a yuvór uṣā́ ánu śríyam párijmanor upā́carat |
1.046.14c r̥tā́ vanatho aktúbhiḥ ||

1.046.15a ubhā́ pibatam aśvinobhā́ naḥ śárma yacchatam |
1.046.15c avidriyā́bhir ūtíbhiḥ ||

1.047.01a ayáṁ vām mádhumattamaḥ sutáḥ sóma r̥tāvr̥dhā |
1.047.01c tám aśvinā pibataṁ tiróahnyaṁ dhattáṁ rátnāni dāśúṣe ||

1.047.02a trivandhuréṇa trivŕ̥tā supéśasā ráthenā́ yātam aśvinā |
1.047.02c káṇvāso vām bráhma kr̥ṇvanty adhvaré téṣāṁ sú śr̥ṇutaṁ hávam ||

1.047.03a áśvinā mádhumattamam pātáṁ sómam r̥tāvr̥dhā |
1.047.03c áthādyá dasrā vásu bíbhratā ráthe dāśvā́ṁsam úpa gacchatam ||

1.047.04a triṣadhasthé barhíṣi viśvavedasā mádhvā yajñám mimikṣatam |
1.047.04c káṇvāso vāṁ sutásomā abhídyavo yuvā́ṁ havante aśvinā ||

1.047.05a yā́bhiḥ káṇvam abhíṣṭibhiḥ prā́vataṁ yuvám aśvinā |
1.047.05c tā́bhiḥ ṣv àsmā́m̐ avataṁ śubhas patī pātáṁ sómam r̥tāvr̥dhā ||

1.047.06a sudā́se dasrā vásu bíbhratā ráthe pŕ̥kṣo vahatam aśvinā |
1.047.06c rayíṁ samudrā́d utá vā divás páry asmé dhattam puruspŕ̥ham ||

1.047.07a yán nāsatyā parāváti yád vā sthó ádhi turváśe |
1.047.07c áto ráthena suvŕ̥tā na ā́ gataṁ sākáṁ sū́ryasya raśmíbhiḥ ||

1.047.08a arvā́ñcā vāṁ sáptayo 'dhvaraśríyo váhantu sávanéd úpa |
1.047.08c íṣam pr̥ñcántā sukŕ̥te sudā́nava ā́ barhíḥ sīdataṁ narā ||

1.047.09a téna nāsatyā́ gataṁ ráthena sū́ryatvacā |
1.047.09c yéna śáśvad ūháthur dāśúṣe vásu mádhvaḥ sómasya pītáye ||

1.047.10a ukthébhir arvā́g ávase purūvásū arkaíś ca ní hvayāmahe |
1.047.10c śáśvat káṇvānāṁ sádasi priyé hí kaṁ sómam papáthur aśvinā ||

1.048.01a sahá vāména na uṣo vy ùcchā duhitar divaḥ |
1.048.01c sahá dyumnéna br̥hatā́ vibhāvari rāyā́ devi dā́svatī ||

1.048.02a áśvāvatīr gómatīr viśvasuvído bhū́ri cyavanta vástave |
1.048.02c úd īraya práti mā sūnŕ̥tā uṣaś códa rā́dho maghónām ||

1.048.03a uvā́soṣā́ ucchā́c ca nú devī́ jīrā́ ráthānām |
1.048.03c yé asyā ācáraṇeṣu dadhriré samudré ná śravasyávaḥ ||

1.048.04a úṣo yé te prá yā́meṣu yuñjáte máno dānā́ya sūráyaḥ |
1.048.04c átrā́ha tát káṇva eṣāṁ káṇvatamo nā́ma gr̥ṇāti nr̥ṇā́m ||

1.048.05a ā́ ghā yóṣeva sūnáry uṣā́ yāti prabhuñjatī́ |
1.048.05c jaráyantī vŕ̥janam padvád īyata út pātayati pakṣíṇaḥ ||

1.048.06a ví yā́ sr̥játi sámanaṁ vy àrthínaḥ padáṁ ná vety ódatī |
1.048.06c váyo nákiṣ ṭe paptivā́ṁsa āsate vyùṣṭau vājinīvati ||

1.048.07a eṣā́yukta parāvátaḥ sū́ryasyodáyanād ádhi |
1.048.07c śatáṁ ráthebhiḥ subhágoṣā́ iyáṁ ví yāty abhí mā́nuṣān ||

1.048.08a víśvam asyā nānāma cákṣase jágaj jyótiṣ kr̥ṇoti sūnárī |
1.048.08c ápa dvéṣo maghónī duhitā́ divá uṣā́ ucchad ápa srídhaḥ ||

1.048.09a úṣa ā́ bhāhi bhānúnā candréṇa duhitar divaḥ |
1.048.09c āváhantī bhū́ry asmábhyaṁ saúbhagaṁ vyucchántī díviṣṭiṣu ||

1.048.10a víśvasya hí prā́ṇanaṁ jī́vanaṁ tvé ví yád ucchási sūnari |
1.048.10c sā́ no ráthena br̥hatā́ vibhāvari śrudhí citrāmaghe hávam ||

1.048.11a úṣo vā́jaṁ hí váṁsva yáś citró mā́nuṣe jáne |
1.048.11c ténā́ vaha sukŕ̥to adhvarā́m̐ úpa yé tvā gr̥ṇánti váhnayaḥ ||

1.048.12a víśvān devā́m̐ ā́ vaha sómapītaye 'ntárikṣād uṣas tvám |
1.048.12c sā́smā́su dhā gómad áśvāvad ukthyàm úṣo vā́jaṁ suvī́ryam ||

1.048.13a yásyā rúśanto arcáyaḥ práti bhadrā́ ádr̥kṣata |
1.048.13c sā́ no rayíṁ viśvávāraṁ supéśasam uṣā́ dadātu súgmyam ||

1.048.14a yé cid dhí tvā́m ŕ̥ṣayaḥ pū́rva ūtáye juhūré 'vase mahi |
1.048.14c sā́ naḥ stómām̐ abhí gr̥ṇīhi rā́dhasóṣaḥ śukréṇa śocíṣā ||

1.048.15a úṣo yád adyá bhānúnā ví dvā́rāv r̥ṇávo diváḥ |
1.048.15c prá no yacchatād avr̥kám pr̥thú cchardíḥ prá devi gómatīr íṣaḥ ||

1.048.16a sáṁ no rāyā́ br̥hatā́ viśvápeśasā mimikṣvā́ sám íḷābhir ā́ |
1.048.16c sáṁ dyumnéna viśvatúroṣo mahi sáṁ vā́jair vājinīvati ||

1.049.01a úṣo bhadrébhir ā́ gahi diváś cid rocanā́d ádhi |
1.049.01c váhantv aruṇápsava úpa tvā somíno gr̥hám ||

1.049.02a supéśasaṁ sukháṁ ráthaṁ yám adhyásthā uṣas tvám |
1.049.02c ténā suśrávasaṁ jánam prā́vādyá duhitar divaḥ ||

1.049.03a váyaś cit te patatríṇo dvipác cátuṣpad arjuni |
1.049.03c úṣaḥ prā́rann r̥tū́m̐r ánu divó ántebhyas pári ||

1.049.04a vyucchántī hí raśmíbhir víśvam ābhā́si rocanám |
1.049.04c tā́ṁ tvā́m uṣar vasūyávo gīrbhíḥ káṇvā ahūṣata ||

1.050.01a úd u tyáṁ jātávedasaṁ deváṁ vahanti ketávaḥ |
1.050.01c dr̥śé víśvāya sū́ryam ||

1.050.02a ápa tyé tāyávo yathā nákṣatrā yanty aktúbhiḥ |
1.050.02c sū́rāya viśvácakṣase ||

1.050.03a ádr̥śram asya ketávo ví raśmáyo jánām̐ ánu |
1.050.03c bhrā́janto agnáyo yathā ||

1.050.04a taráṇir viśvádarśato jyotiṣkŕ̥d asi sūrya |
1.050.04c víśvam ā́ bhāsi rocanám ||

1.050.05a pratyáṅ devā́nāṁ víśaḥ pratyáṅṅ úd eṣi mā́nuṣān |
1.050.05c pratyáṅ víśvaṁ svàr dr̥śé ||

1.050.06a yénā pāvaka cákṣasā bhuraṇyántaṁ jánām̐ ánu |
1.050.06c tváṁ varuṇa páśyasi ||

1.050.07a ví dyā́m eṣi rájas pr̥thv áhā mímāno aktúbhiḥ |
1.050.07c páśyañ jánmāni sūrya ||

1.050.08a saptá tvā haríto ráthe váhanti deva sūrya |
1.050.08c śocíṣkeśaṁ vicakṣaṇa ||

1.050.09a áyukta saptá śundhyúvaḥ sū́ro ráthasya naptyàḥ |
1.050.09c tā́bhir yāti sváyuktibhiḥ ||

1.050.10a úd vayáṁ támasas pári jyótiṣ páśyanta úttaram |
1.050.10c deváṁ devatrā́ sū́ryam áganma jyótir uttamám ||

1.050.11a udyánn adyá mitramaha āróhann úttarāṁ dívam |
1.050.11c hr̥drogám máma sūrya harimā́ṇaṁ ca nāśaya ||

1.050.12a śúkeṣu me harimā́ṇaṁ ropaṇā́kāsu dadhmasi |
1.050.12c átho hāridravéṣu me harimā́ṇaṁ ní dadhmasi ||

1.050.13a úd agād ayám ādityó víśvena sáhasā sahá |
1.050.13c dviṣántam máhyaṁ randháyan mó aháṁ dviṣaté radham ||

1.051.01a abhí tyám meṣám puruhūtám r̥gmíyam índraṁ gīrbhír madatā vásvo arṇavám |
1.051.01c yásya dyā́vo ná vicáranti mā́nuṣā bhujé máṁhiṣṭham abhí vípram arcata ||

1.051.02a abhī́m avanvan svabhiṣṭím ūtáyo 'ntarikṣaprā́ṁ táviṣībhir ā́vr̥tam |
1.051.02c índraṁ dákṣāsa r̥bhávo madacyútaṁ śatákratuṁ jávanī sūnŕ̥tā́ruhat ||

1.051.03a tváṁ gotrám áṅgirobhyo 'vr̥ṇor ápotā́traye śatádureṣu gātuvít |
1.051.03c saséna cid vimadā́yāvaho vásv ājā́v ádriṁ vāvasānásya nartáyan ||

1.051.04a tvám apā́m apidhā́nāvr̥ṇor ápā́dhārayaḥ párvate dā́numad vásu |
1.051.04c vr̥tráṁ yád indra śávasā́vadhīr áhim ā́d ít sū́ryaṁ divy ā́rohayo dr̥śé ||

1.051.05a tvám māyā́bhir ápa māyíno 'dhamaḥ svadhā́bhir yé ádhi śúptāv ájuhvata |
1.051.05c tvám pípror nr̥maṇaḥ prā́rujaḥ púraḥ prá r̥jíśvānaṁ dasyuhátyeṣv āvitha ||

1.051.06a tváṁ kútsaṁ śuṣṇahátyeṣv āvithā́randhayo 'tithigvā́ya śámbaram |
1.051.06c mahā́ntaṁ cid arbudáṁ ní kramīḥ padā́ sanā́d evá dasyuhátyāya jajñiṣe ||

1.051.07a tvé víśvā táviṣī sadhryàg ghitā́ táva rā́dhaḥ somapīthā́ya harṣate |
1.051.07c táva vájraś cikite bāhvór hitó vr̥ścā́ śátror áva víśvāni vŕ̥ṣṇyā ||

1.051.08a ví jānīhy ā́ryān yé ca dásyavo barhíṣmate randhayā śā́sad avratā́n |
1.051.08c śā́kī bhava yájamānasya coditā́ víśvét tā́ te sadhamā́deṣu cākana ||

1.051.09a ánuvratāya randháyann ápavratān ābhū́bhir índraḥ śnatháyann ánābhuvaḥ |
1.051.09c vr̥ddhásya cid várdhato dyā́m ínakṣataḥ stávāno vamró ví jaghāna saṁdíhaḥ ||

1.051.10a tákṣad yát ta uśánā sáhasā sáho ví ródasī majmánā bādhate śávaḥ |
1.051.10c ā́ tvā vā́tasya nr̥maṇo manoyúja ā́ pū́ryamāṇam avahann abhí śrávaḥ ||

1.051.11a mándiṣṭa yád uśáne kāvyé sácām̐ índro vaṅkū́ vaṅkutárā́dhi tiṣṭhati |
1.051.11c ugró yayíṁ nír apáḥ srótasāsr̥jad ví śúṣṇasya dr̥ṁhitā́ airayat púraḥ ||

1.051.12a ā́ smā ráthaṁ vr̥ṣapā́ṇeṣu tiṣṭhasi śāryātásya prábhr̥tā yéṣu mándase |
1.051.12c índra yáthā sutásomeṣu cākáno 'narvā́ṇaṁ ślókam ā́ rohase diví ||

1.051.13a ádadā árbhām mahaté vacasyáve kakṣī́vate vr̥cayā́m indra sunvaté |
1.051.13c ménābhavo vr̥ṣaṇaśvásya sukrato víśvét tā́ te sávaneṣu pravā́cyā ||

1.051.14a índro aśrāyi sudhyò nireké pajréṣu stómo dúryo ná yū́paḥ |
1.051.14c aśvayúr gavyū́ rathayúr vasūyúr índra íd rāyáḥ kṣayati prayantā́ ||

1.051.15a idáṁ námo vr̥ṣabhā́ya svarā́je satyáśuṣmāya taváse 'vāci |
1.051.15c asmínn indra vr̥jáne sárvavīrāḥ smát sūríbhis táva śárman syāma ||

1.052.01a tyáṁ sú meṣám mahayā svarvídaṁ śatáṁ yásya subhvàḥ sākám ī́rate |
1.052.01c átyaṁ ná vā́jaṁ havanasyádaṁ rátham éndraṁ vavr̥tyām ávase suvr̥ktíbhiḥ ||

1.052.02a sá párvato ná dharúṇeṣv ácyutaḥ sahásramūtis táviṣīṣu vāvr̥dhe |
1.052.02c índro yád vr̥trám ávadhīn nadīvŕ̥tam ubjánn árṇāṁsi járhr̥ṣāṇo ándhasā ||

1.052.03a sá hí dvaró dvaríṣu vavrá ū́dhani candrábudhno mádavr̥ddho manīṣíbhiḥ |
1.052.03c índraṁ tám ahve svapasyáyā dhiyā́ máṁhiṣṭharātiṁ sá hí páprir ándhasaḥ ||

1.052.04a ā́ yám pr̥ṇánti diví sádmabarhiṣaḥ samudráṁ ná subhvàḥ svā́ abhíṣṭayaḥ |
1.052.04c táṁ vr̥trahátye ánu tasthur ūtáyaḥ śúṣmā índram avātā́ áhrutapsavaḥ ||

1.052.05a abhí svávr̥ṣṭim máde asya yúdhyato raghvī́r iva pravaṇé sasrur ūtáyaḥ |
1.052.05c índro yád vajrī́ dhr̥ṣámāṇo ándhasā bhinád valásya paridhī́m̐r iva tritáḥ ||

1.052.06a párīṁ ghr̥ṇā́ carati titviṣé śávo 'pó vr̥tvī́ rájaso budhnám ā́śayat |
1.052.06c vr̥trásya yát pravaṇé durgŕ̥bhiśvano nijaghántha hánvor indra tanyatúm ||

1.052.07a hradáṁ ná hí tvā nyr̥ṣánty ūrmáyo bráhmāṇīndra táva yā́ni várdhanā |
1.052.07c tváṣṭā cit te yújyaṁ vāvr̥dhe śávas tatákṣa vájram abhíbhūtyojasam ||

1.052.08a jaghanvā́m̐ u háribhiḥ sambhr̥takratav índra vr̥trám mánuṣe gātuyánn apáḥ |
1.052.08c áyacchathā bāhvór vájram āyasám ádhārayo divy ā́ sū́ryaṁ dr̥śé ||

1.052.09a br̥hát sváścandram ámavad yád ukthyàm ákr̥ṇvata bhiyásā róhaṇaṁ diváḥ |
1.052.09c yán mā́nuṣapradhanā índram ūtáyaḥ svàr nr̥ṣā́co marútó 'madann ánu ||

1.052.10a dyaúś cid asyā́mavām̐ áheḥ svanā́d áyoyavīd bhiyásā vájra indra te |
1.052.10c vr̥trásya yád badbadhānásya rodasī máde sutásya śávasā́bhinac chíraḥ ||

1.052.11a yád ín nv ìndra pr̥thivī́ dáśabhujir áhāni víśvā tatánanta kr̥ṣṭáyaḥ |
1.052.11c átrā́ha te maghavan víśrutaṁ sáho dyā́m ánu śávasā barháṇā bhuvat ||

1.052.12a tvám asyá pāré rájaso vyòmanaḥ svábhūtyojā ávase dhr̥ṣanmanaḥ |
1.052.12c cakr̥ṣé bhū́mim pratimā́nam ójaso 'páḥ svàḥ paribhū́r eṣy ā́ dívam ||

1.052.13a tvám bhuvaḥ pratimā́nam pr̥thivyā́ r̥ṣvávīrasya br̥hatáḥ pátir bhūḥ |
1.052.13c víśvam ā́prā antárikṣam mahitvā́ satyám addhā́ nákir anyás tvā́vān ||

1.052.14a ná yásya dyā́vāpr̥thivī́ ánu vyáco ná síndhavo rájaso ántam ānaśúḥ |
1.052.14c nótá svávr̥ṣṭim máde asya yúdhyata éko anyác cakr̥ṣe víśvam ānuṣák ||

1.052.15a ā́rcann átra marútaḥ sásminn ājaú víśve devā́so amadann ánu tvā |
1.052.15c vr̥trásya yád bhr̥ṣṭimátā vadhéna ní tvám indra práty ānáṁ jaghántha ||

1.053.01a ny ū̀ ṣú vā́cam prá mahé bharāmahe gíra índrāya sádane vivásvataḥ |
1.053.01c nū́ cid dhí rátnaṁ sasatā́m ivā́vidan ná duṣṭutír draviṇodéṣu śasyate ||

1.053.02a duró áśvasya durá indra gór asi duró yávasya vásuna inás pátiḥ |
1.053.02c śikṣānaráḥ pradívo ákāmakarśanaḥ sákhā sákhibhyas tám idáṁ gr̥ṇīmasi ||

1.053.03a śácīva indra purukr̥d dyumattama távéd idám abhítaś cekite vásu |
1.053.03c átaḥ saṁgŕ̥bhyābhibhūta ā́ bhara mā́ tvāyató jaritúḥ kā́mam ūnayīḥ ||

1.053.04a ebhír dyúbhiḥ sumánā ebhír índubhir nirundhānó ámatiṁ góbhir aśvínā |
1.053.04c índreṇa dásyuṁ daráyanta índubhir yutádveṣasaḥ sám iṣā́ rabhemahi ||

1.053.05a sám indra rāyā́ sám iṣā́ rabhemahi sáṁ vā́jebhiḥ puruścandraír abhídyubhiḥ |
1.053.05c sáṁ devyā́ prámatyā vīráśuṣmayā góagrayā́śvāvatyā rabhemahi ||

1.053.06a té tvā mádā amadan tā́ni vŕ̥ṣṇyā té sómāso vr̥trahátyeṣu satpate |
1.053.06c yát kāráve dáśa vr̥trā́ṇy apratí barhíṣmate ní sahásrāṇi barháyaḥ ||

1.053.07a yudhā́ yúdham úpa ghéd eṣi dhr̥ṣṇuyā́ purā́ púraṁ sám idáṁ haṁsy ójasā |
1.053.07c námyā yád indra sákhyā parāváti nibarháyo námuciṁ nā́ma māyínam ||

1.053.08a tváṁ kárañjam utá parṇáyaṁ vadhīs téjiṣṭhayātithigvásya vartanī́ |
1.053.08c tváṁ śatā́ váṅgr̥dasyābhinat púro 'nānudáḥ páriṣūtā r̥jíśvanā ||

1.053.09a tvám etā́ñ janarā́jño dvír dáśābandhúnā suśrávasopajagmúṣaḥ |
1.053.09c ṣaṣṭíṁ sahásrā navatíṁ náva śrutó ní cakréṇa ráthyā duṣpádāvr̥ṇak ||

1.053.10a tvám āvitha suśrávasaṁ távotíbhis táva trā́mabhir indra tū́rvayāṇam |
1.053.10c tvám asmai kútsam atithigvám āyúm mahé rā́jñe yū́ne arandhanāyaḥ ||

1.053.11a yá udŕ̥cīndra devágopāḥ sákhāyas te śivátamā ásāma |
1.053.11c tvā́ṁ stoṣāma tváyā suvī́rā drā́ghīya ā́yuḥ prataráṁ dádhānāḥ ||

1.054.01a mā́ no asmín maghavan pr̥tsv áṁhasi nahí te ántaḥ śávasaḥ parīṇáśe |
1.054.01c ákrandayo nadyò róruvad vánā kathā́ ná kṣoṇī́r bhiyásā sám ārata ||

1.054.02a árcā śakrā́ya śākíne śácīvate śr̥ṇvántam índram maháyann abhí ṣṭuhi |
1.054.02c yó dhr̥ṣṇúnā śávasā ródasī ubhé vŕ̥ṣā vr̥ṣatvā́ vr̥ṣabhó nyr̥ñjáte ||

1.054.03a árcā divé br̥haté śūṣyàṁ vácaḥ svákṣatraṁ yásya dhr̥ṣató dhr̥ṣán mánaḥ |
1.054.03c br̥hácchravā ásuro barháṇā kr̥táḥ puró háribhyāṁ vr̥ṣabhó rátho hí ṣáḥ ||

1.054.04a tváṁ divó br̥hatáḥ sā́nu kopayó 'va tmánā dhr̥ṣatā́ śámbaram bhinat |
1.054.04c yán māyíno vrandíno mandínā dhr̥ṣác chitā́ṁ gábhastim aśánim pr̥tanyási ||

1.054.05a ní yád vr̥ṇákṣi śvasanásya mūrdháni śúṣṇasya cid vrandíno róruvad vánā |
1.054.05c prācī́nena mánasā barháṇāvatā yád adyā́ cit kr̥ṇávaḥ kás tvā pári ||

1.054.06a tvám āvitha náryaṁ turváśaṁ yáduṁ tváṁ turvī́tiṁ vayyàṁ śatakrato |
1.054.06c tváṁ rátham étaśaṁ kŕ̥tvye dháne tvám púro navatíṁ dambhayo náva ||

1.054.07a sá ghā rā́jā sátpatiḥ śūśuvaj jáno rātáhavyaḥ práti yáḥ śā́sam ínvati |
1.054.07c ukthā́ vā yó abhigr̥ṇā́ti rā́dhasā dā́nur asmā úparā pinvate diváḥ ||

1.054.08a ásamaṁ kṣatrám ásamā manīṣā́ prá somapā́ ápasā santu néme |
1.054.08c yé ta indra dadúṣo vardháyanti máhi kṣatráṁ stháviraṁ vŕ̥ṣṇyaṁ ca ||

1.054.09a túbhyéd eté bahulā́ ádridugdhāś camūṣádaś camasā́ indrapā́nāḥ |
1.054.09c vy àśnuhi tarpáyā kā́mam eṣām áthā máno vasudéyāya kr̥ṣva ||

1.054.10a apā́m atiṣṭhad dharúṇahvaraṁ támo 'ntár vr̥trásya jaṭháreṣu párvataḥ |
1.054.10c abhī́m índro nadyò vavríṇā hitā́ víśvā anuṣṭhā́ḥ pravaṇéṣu jighnate ||

1.054.11a sá śévr̥dham ádhi dhā dyumnám asmé máhi kṣatráṁ janāṣā́ḷ indra távyam |
1.054.11c rákṣā ca no maghónaḥ pāhí sūrī́n rāyé ca naḥ svapatyā́ iṣé dhāḥ ||

1.055.01a diváś cid asya varimā́ ví papratha índraṁ ná mahnā́ pr̥thivī́ caná práti |
1.055.01c bhīmás túviṣmāñ carṣaṇíbhya ātapáḥ śíśīte vájraṁ téjase ná váṁsagaḥ ||

1.055.02a só arṇavó ná nadyàḥ samudríyaḥ práti gr̥bhṇāti víśritā várīmabhiḥ |
1.055.02c índraḥ sómasya pītáye vr̥ṣāyate sanā́t sá yudhmá ójasā panasyate ||

1.055.03a tváṁ tám indra párvataṁ ná bhójase mahó nr̥mṇásya dhármaṇām irajyasi |
1.055.03c prá vīryèṇa devátā́ti cekite víśvasmā ugráḥ kármaṇe puróhitaḥ ||

1.055.04a sá íd váne namasyúbhir vacasyate cā́ru jáneṣu prabruvāṇá indriyám |
1.055.04c vŕ̥ṣā chándur bhavati haryató vŕ̥ṣā kṣémeṇa dhénām maghávā yád ínvati ||

1.055.05a sá ín mahā́ni samithā́ni majmánā kr̥ṇóti yudhmá ójasā jánebhyaḥ |
1.055.05c ádhā caná śrád dadhati tvíṣīmata índrāya vájraṁ nighánighnate vadhám ||

1.055.06a sá hí śravasyúḥ sádanāni kr̥trímā kṣmayā́ vr̥dhāná ójasā vināśáyan |
1.055.06c jyótīṁṣi kr̥ṇvánn avr̥kā́ṇi yájyavé 'va sukrátuḥ sártavā́ apáḥ sr̥jat ||

1.055.07a dānā́ya mánaḥ somapāvann astu te 'rvā́ñcā hárī vandanaśrud ā́ kr̥dhi |
1.055.07c yámiṣṭhāsaḥ sā́rathayo yá indra te ná tvā kétā ā́ dabhnuvanti bhū́rṇayaḥ ||

1.055.08a áprakṣitaṁ vásu bibharṣi hástayor áṣāḷhaṁ sáhas tanvì śrutó dadhe |
1.055.08c ā́vr̥tāso 'vatā́so ná kartŕ̥bhis tanū́ṣu te krátava indra bhū́rayaḥ ||

1.056.01a eṣá prá pūrvī́r áva tásya camríṣó 'tyo ná yóṣām úd ayaṁsta bhurváṇiḥ |
1.056.01c dákṣam mahé pāyayate hiraṇyáyaṁ rátham āvŕ̥tyā háriyogam ŕ̥bhvasam ||

1.056.02a táṁ gūrtáyo nemanníṣaḥ párīṇasaḥ samudráṁ ná saṁcáraṇe saniṣyávaḥ |
1.056.02c pátiṁ dákṣasya vidáthasya nū́ sáho giríṁ ná venā́ ádhi roha téjasā ||

1.056.03a sá turváṇir mahā́m̐ areṇú paúṁsye girér bhr̥ṣṭír ná bhrājate tujā́ śávaḥ |
1.056.03c yéna śúṣṇam māyínam āyasó máde dudhrá ābhū́ṣu rāmáyan ní dā́mani ||

1.056.04a devī́ yádi táviṣī tvā́vr̥dhotáya índraṁ síṣakty uṣásaṁ ná sū́ryaḥ |
1.056.04c yó dhr̥ṣṇúnā śávasā bā́dhate táma íyarti reṇúm br̥hád arhariṣváṇiḥ ||

1.056.05a ví yát tiró dharúṇam ácyutaṁ rájó 'tiṣṭhipo divá ā́tāsu barháṇā |
1.056.05c svàrmīḷhe yán máda indra hárṣyā́han vr̥tráṁ nír apā́m aubjo arṇavám ||

1.056.06a tváṁ divó dharúṇaṁ dhiṣa ójasā pr̥thivyā́ indra sádaneṣu mā́hinaḥ |
1.056.06c tváṁ sutásya máde ariṇā apó ví vr̥trásya samáyā pāṣyā̀rujaḥ ||

1.057.01a prá máṁhiṣṭhāya br̥haté br̥hádraye satyáśuṣmāya taváse matím bhare |
1.057.01c apā́m iva pravaṇé yásya durdháraṁ rā́dho viśvā́yu śávase ápāvr̥tam ||

1.057.02a ádha te víśvam ánu hāsad iṣṭáya ā́po nimnéva sávanā havíṣmataḥ |
1.057.02c yát párvate ná samáśīta haryatá índrasya vájraḥ śnáthitā hiraṇyáyaḥ ||

1.057.03a asmaí bhīmā́ya námasā sám adhvará úṣo ná śubhra ā́ bharā pánīyase |
1.057.03c yásya dhā́ma śrávase nā́mendriyáṁ jyótir ákāri haríto nā́yase ||

1.057.04a imé ta indra té vayám puruṣṭuta yé tvārábhya cárāmasi prabhūvaso |
1.057.04c nahí tvád anyó girvaṇo gíraḥ sághat kṣoṇī́r iva práti no harya tád vácaḥ ||

1.057.05a bhū́ri ta indra vīryàṁ táva smasy asyá stotúr maghavan kā́mam ā́ pr̥ṇa |
1.057.05c ánu te dyaúr br̥hatī́ vīryàm mama iyáṁ ca te pr̥thivī́ nema ójase ||

1.057.06a tváṁ tám indra párvatam mahā́m urúṁ vájreṇa vajrin parvaśáś cakartitha |
1.057.06c ávāsr̥jo nívr̥tāḥ sártavā́ apáḥ satrā́ víśvaṁ dadhiṣe kévalaṁ sáhaḥ ||

1.058.01a nū́ cit sahojā́ amŕ̥to ní tundate hótā yád dūtó ábhavad vivásvataḥ |
1.058.01c ví sā́dhiṣṭhebhiḥ pathíbhī rájo mama ā́ devátātā havíṣā vivāsati ||

1.058.02a ā́ svám ádma yuvámāno ajáras tr̥ṣv àviṣyánn ataséṣu tiṣṭhati |
1.058.02c átyo ná pr̥ṣṭhám pruṣitásya rocate divó ná sā́nu stanáyann acikradat ||

1.058.03a krāṇā́ rudrébhir vásubhiḥ puróhito hótā níṣatto rayiṣā́ḷ ámartyaḥ |
1.058.03c rátho ná vikṣv r̥̀ñjasāná āyúṣu vy ā̀nuṣág vā́ryā devá r̥ṇvati ||

1.058.04a ví vā́tajūto ataséṣu tiṣṭhate vŕ̥thā juhū́bhiḥ sŕ̥ṇyā tuviṣváṇiḥ |
1.058.04c tr̥ṣú yád agne vaníno vr̥ṣāyáse kr̥ṣṇáṁ ta éma rúśadūrme ajara ||

1.058.05a tápurjambho vána ā́ vā́tacodito yūthé ná sāhvā́m̐ áva vāti váṁsagaḥ |
1.058.05c abhivrájann ákṣitam pā́jasā rájaḥ sthātúś carátham bhayate patatríṇaḥ ||

1.058.06a dadhúṣ ṭvā bhŕ̥gavo mā́nuṣeṣv ā́ rayíṁ ná cā́ruṁ suhávaṁ jánebhyaḥ |
1.058.06c hótāram agne átithiṁ váreṇyam mitráṁ ná śévaṁ divyā́ya jánmane ||

1.058.07a hótāraṁ saptá juhvò yájiṣṭhaṁ yáṁ vāgháto vr̥ṇáte adhvaréṣu |
1.058.07c agníṁ víśveṣām aratíṁ vásūnāṁ saparyā́mi práyasā yā́mi rátnam ||

1.058.08a ácchidrā sūno sahaso no adyá stotŕ̥bhyo mitramahaḥ śárma yaccha |
1.058.08c ágne gr̥ṇántam áṁhasa uruṣyórjo napāt pūrbhír ā́yasībhiḥ ||

1.058.09a bhávā várūthaṁ gr̥ṇaté vibhāvo bhávā maghavan maghávadbhyaḥ śárma |
1.058.09c uruṣyā́gne áṁhaso gr̥ṇántam prātár makṣū́ dhiyā́vasur jagamyāt ||

1.059.01a vayā́ íd agne agnáyas te anyé tvé víśve amŕ̥tā mādayante |
1.059.01c vaíśvānara nā́bhir asi kṣitīnā́ṁ sthū́ṇeva jánām̐ upamíd yayantha ||

1.059.02a mūrdhā́ divó nā́bhir agníḥ pr̥thivyā́ áthābhavad aratī́ ródasyoḥ |
1.059.02c táṁ tvā devā́so 'janayanta deváṁ vaíśvānara jyótir íd ā́ryāya ||

1.059.03a ā́ sū́rye ná raśmáyo dhruvā́so vaiśvānaré dadhire 'gnā́ vásūni |
1.059.03c yā́ párvateṣv óṣadhīṣv apsú yā́ mā́nuṣeṣv ási tásya rā́jā ||

1.059.04a br̥hatī́ iva sūnáve ródasī gíro hótā manuṣyò ná dákṣaḥ |
1.059.04c svàrvate satyáśuṣmāya pūrvī́r vaiśvānarā́ya nŕ̥tamāya yahvī́ḥ ||

1.059.05a diváś cit te br̥ható jātavedo vaíśvānara prá ririce mahitvám |
1.059.05c rā́jā kr̥ṣṭīnā́m asi mā́nuṣīṇāṁ yudhā́ devébhyo várivaś cakartha ||

1.059.06a prá nū́ mahitváṁ vr̥ṣabhásya vocaṁ yám pūrávo vr̥traháṇaṁ sácante |
1.059.06c vaiśvānaró dásyum agnír jaghanvā́m̐ ádhūnot kā́ṣṭhā áva śámbaram bhet ||

1.059.07a vaiśvānaró mahimnā́ viśvákr̥ṣṭir bharádvājeṣu yajató vibhā́vā |
1.059.07c śātavaneyé śatínībhir agníḥ puruṇīthé jarate sūnŕ̥tāvān ||

1.060.01a váhniṁ yaśásaṁ vidáthasya ketúṁ suprāvyàṁ dūtáṁ sadyóartham |
1.060.01c dvijánmānaṁ rayím iva praśastáṁ rātím bharad bhŕ̥gave mātaríśvā ||

1.060.02a asyá śā́sur ubháyāsaḥ sacante havíṣmanta uśíjo yé ca mártāḥ |
1.060.02c diváś cit pū́rvo ny àsādi hótāpŕ̥cchyo viśpátir vikṣú vedhā́ḥ ||

1.060.03a táṁ návyasī hr̥dá ā́ jā́yamānam asmát sukīrtír mádhujihvam aśyāḥ |
1.060.03c yám r̥tvíjo vr̥jáne mā́nuṣāsaḥ práyasvanta āyávo jī́jananta ||

1.060.04a uśík pāvakó vásur mā́nuṣeṣu váreṇyo hótādhāyi vikṣú |
1.060.04c dámūnā gr̥hápatir dáma ā́m̐ agnír bhuvad rayipátī rayīṇā́m ||

1.060.05a táṁ tvā vayám pátim agne rayīṇā́m prá śaṁsāmo matíbhir gótamāsaḥ |
1.060.05c āśúṁ ná vājambharám marjáyantaḥ prātár makṣū́ dhiyā́vasur jagamyāt ||

1.061.01a asmā́ íd u prá taváse turā́ya práyo ná harmi stómam mā́hināya |
1.061.01c ŕ̥cīṣamāyā́dhrigava óham índrāya bráhmāṇi rātátamā ||

1.061.02a asmā́ íd u práya iva prá yaṁsi bhárāmy āṅgūṣám bā́dhe suvr̥ktí |
1.061.02c índrāya hr̥dā́ mánasā manīṣā́ pratnā́ya pátye dhíyo marjayanta ||

1.061.03a asmā́ íd u tyám upamáṁ svarṣā́m bhárāmy āṅgūṣám āsyèna |
1.061.03c máṁhiṣṭham ácchoktibhir matīnā́ṁ suvr̥ktíbhiḥ sūríṁ vāvr̥dhádhyai ||

1.061.04a asmā́ íd u stómaṁ sáṁ hinomi ráthaṁ ná táṣṭeva tátsināya |
1.061.04c gíraś ca gírvāhase suvr̥ktī́ndrāya viśvaminvám médhirāya ||

1.061.05a asmā́ íd u sáptim iva śravasyéndrāyārkáṁ juhvā̀ sám añje |
1.061.05c vīráṁ dānaúkasaṁ vandádhyai purā́ṁ gūrtáśravasaṁ darmā́ṇam ||

1.061.06a asmā́ íd u tváṣṭā takṣad vájraṁ svápastamaṁ svaryàṁ ráṇāya |
1.061.06c vr̥trásya cid vidád yéna márma tujánn ī́śānas tujatā́ kiyedhā́ḥ ||

1.061.07a asyéd u mātúḥ sávaneṣu sadyó maháḥ pitúm papivā́ñ cā́rv ánnā |
1.061.07c muṣāyád víṣṇuḥ pacatáṁ sáhīyān vídhyad varāháṁ tiró ádrim ástā ||

1.061.08a asmā́ íd u gnā́ś cid devápatnīr índrāyārkám ahihátya ūvuḥ |
1.061.08c pári dyā́vāpr̥thivī́ jabhra urvī́ nā́sya té mahimā́nam pári ṣṭaḥ ||

1.061.09a asyéd evá prá ririce mahitváṁ divás pr̥thivyā́ḥ páry antárikṣāt |
1.061.09c svarā́ḷ índro dáma ā́ viśvágūrtaḥ svarír ámatro vavakṣe ráṇāya ||

1.061.10a asyéd evá śávasā śuṣántaṁ ví vr̥ścad vájreṇa vr̥trám índraḥ |
1.061.10c gā́ ná vrāṇā́ avánīr amuñcad abhí śrávo dāváne sácetāḥ ||

1.061.11a asyéd u tveṣásā ranta síndhavaḥ pári yád vájreṇa sīm áyacchat |
1.061.11c īśānakŕ̥d dāśúṣe daśasyán turvī́taye gādháṁ turváṇiḥ kaḥ ||

1.061.12a asmā́ íd u prá bharā tū́tujāno vr̥trā́ya vájram ī́śānaḥ kiyedhā́ḥ |
1.061.12c gór ná párva ví radā tiraścéṣyann árṇāṁsy apā́ṁ carádhyai ||

1.061.13a asyéd u prá brūhi pūrvyā́ṇi turásya kármāṇi návya ukthaíḥ |
1.061.13c yudhé yád iṣṇāná ā́yudhāny r̥ghāyámāṇo niriṇā́ti śátrūn ||

1.061.14a asyéd u bhiyā́ giráyaś ca dr̥ḷhā́ dyā́vā ca bhū́mā janúṣas tujete |
1.061.14c úpo venásya jóguvāna oṇíṁ sadyó bhuvad vīryā̀ya nodhā́ḥ ||

1.061.15a asmā́ íd u tyád ánu dāyy eṣām éko yád vavné bhū́rer ī́śānaḥ |
1.061.15c praítaśaṁ sū́rye paspr̥dhānáṁ saúvaśvye súṣvim āvad índraḥ ||

1.061.16a evā́ te hāriyojanā suvr̥ktī́ndra bráhmāṇi gótamāso akran |
1.061.16c aíṣu viśvápeśasaṁ dhíyaṁ dhāḥ prātár makṣū́ dhiyā́vasur jagamyāt ||

1.062.01a prá manmahe śavasānā́ya śūṣám āṅgūṣáṁ gírvaṇase aṅgirasvát |
1.062.01c suvr̥ktíbhiḥ stuvatá r̥gmiyā́yā́rcāmārkáṁ náre víśrutāya ||

1.062.02a prá vo mahé máhi námo bharadhvam āṅgūṣyàṁ śavasānā́ya sā́ma |
1.062.02c yénā naḥ pū́rve pitáraḥ padajñā́ árcanto áṅgiraso gā́ ávindan ||

1.062.03a índrasyā́ṅgirasāṁ ceṣṭaú vidát sarámā tánayāya dhāsím |
1.062.03c bŕ̥haspátir bhinád ádriṁ vidád gā́ḥ sám usríyābhir vāvaśanta náraḥ ||

1.062.04a sá suṣṭúbhā sá stubhā́ saptá vípraiḥ svaréṇā́driṁ svaryò návagvaiḥ |
1.062.04c saraṇyúbhiḥ phaligám indra śakra valáṁ ráveṇa darayo dáśagvaiḥ ||

1.062.05a gr̥ṇānó áṅgirobhir dasma ví var uṣásā sū́ryeṇa góbhir ándhaḥ |
1.062.05c ví bhū́myā aprathaya indra sā́nu divó rája úparam astabhāyaḥ ||

1.062.06a tád u práyakṣatamam asya kárma dasmásya cā́rutamam asti dáṁsaḥ |
1.062.06c upahvaré yád úparā ápinvan mádhvarṇaso nadyàś cátasraḥ ||

1.062.07a dvitā́ ví vavre sanájā sánīḷe ayā́syaḥ stávamānebhir arkaíḥ |
1.062.07c bhágo ná méne paramé vyòmann ádhārayad ródasī sudáṁsāḥ ||

1.062.08a sanā́d dívam pári bhū́mā vírūpe punarbhúvā yuvatī́ svébhir évaiḥ |
1.062.08c kr̥ṣṇébhir aktóṣā́ rúśadbhir vápurbhir ā́ carato anyā́nyā ||

1.062.09a sánemi sakhyáṁ svapasyámānaḥ sūnúr dādhāra śávasā sudáṁsāḥ |
1.062.09c āmā́su cid dadhiṣe pakvám antáḥ páyaḥ kr̥ṣṇā́su rúśad róhiṇīṣu ||

1.062.10a sanā́t sánīḷā avánīr avātā́ vratā́ rakṣante amŕ̥tāḥ sáhobhiḥ |
1.062.10c purū́ sahásrā jánayo ná pátnīr duvasyánti svásāro áhrayāṇam ||

1.062.11a sanāyúvo námasā návyo arkaír vasūyávo matáyo dasma dadruḥ |
1.062.11c pátiṁ ná pátnīr uśatī́r uśántaṁ spr̥śánti tvā śavasāvan manīṣā́ḥ ||

1.062.12a sanā́d evá táva rā́yo gábhastau ná kṣī́yante nópa dasyanti dasma |
1.062.12c dyumā́m̐ asi krátumām̐ indra dhī́raḥ śíkṣā śacīvas táva naḥ śácībhiḥ ||

1.062.13a sanāyaté gótama indra návyam átakṣad bráhma hariyójanāya |
1.062.13c sunīthā́ya naḥ śavasāna nodhā́ḥ prātár makṣū́ dhiyā́vasur jagamyāt ||

1.063.01a tvám mahā́m̐ indra yó ha śúṣmair dyā́vā jajñānáḥ pr̥thivī́ áme dhāḥ |
1.063.01c yád dha te víśvā giráyaś cid ábhvā bhiyā́ dr̥ḷhā́saḥ kiráṇā naíjan ||

1.063.02a ā́ yád dhárī indra vívratā vér ā́ te vájraṁ jaritā́ bāhvór dhāt |
1.063.02c yénāviharyatakrato amítrān púra iṣṇā́si puruhūta pūrvī́ḥ ||

1.063.03a tváṁ satyá indra dhr̥ṣṇúr etā́n tvám r̥bhukṣā́ náryas tváṁ ṣā́ṭ |
1.063.03c tváṁ śúṣṇaṁ vr̥jáne pr̥kṣá āṇaú yū́ne kútsāya dyumáte sácāhan ||

1.063.04a tváṁ ha tyád indra codīḥ sákhā vr̥tráṁ yád vajrin vr̥ṣakarmann ubhnā́ḥ |
1.063.04c yád dha śūra vr̥ṣamaṇaḥ parācaír ví dásyūm̐r yónāv ákr̥to vr̥thāṣā́ṭ ||

1.063.05a tváṁ ha tyád indrā́riṣaṇyan dr̥ḷhásya cin mártānām ájuṣṭau |
1.063.05c vy àsmád ā́ kā́ṣṭhā árvate var ghanéva vajriñ chnathihy amítrān ||

1.063.06a tvā́ṁ ha tyád indrā́rṇasātau svàrmīḷhe nára ājā́ havante |
1.063.06c táva svadhāva iyám ā́ samaryá ūtír vā́jeṣv atasā́yyā bhūt ||

1.063.07a tváṁ ha tyád indra saptá yúdhyan púro vajrin purukútsāya dardaḥ |
1.063.07c barhír ná yát sudā́se vŕ̥thā várg aṁhó rājan várivaḥ pūráve kaḥ ||

1.063.08a tváṁ tyā́ṁ na indra deva citrā́m íṣam ā́po ná pīpayaḥ párijman |
1.063.08c yáyā śūra práty asmábhyaṁ yáṁsi tmánam ū́rjaṁ ná viśvádha kṣáradhyai ||

1.063.09a ákāri ta indra gótamebhir bráhmāṇy óktā námasā háribhyām |
1.063.09c supéśasaṁ vā́jam ā́ bharā naḥ prātár makṣū́ dhiyā́vasur jagamyāt ||

1.064.01a vŕ̥ṣṇe śárdhāya súmakhāya vedháse nódhaḥ suvr̥ktím prá bharā marúdbhyaḥ |
1.064.01c apó ná dhī́ro mánasā suhástyo gíraḥ sám añje vidátheṣv ābhúvaḥ ||

1.064.02a té jajñire divá r̥ṣvā́sa ukṣáṇo rudrásya máryā ásurā arepásaḥ |
1.064.02c pāvakā́saḥ śúcayaḥ sū́ryā iva sátvāno ná drapsíno ghorávarpasaḥ ||

1.064.03a yúvāno rudrā́ ajárā abhoggháno vavakṣúr ádhrigāvaḥ párvatā iva |
1.064.03c dr̥ḷhā́ cid víśvā bhúvanāni pā́rthivā prá cyāvayanti divyā́ni majmánā ||

1.064.04a citraír añjíbhir vápuṣe vy àñjate vákṣaḥsu rukmā́m̐ ádhi yetire śubhé |
1.064.04c áṁseṣv eṣāṁ ní mimr̥kṣur r̥ṣṭáyaḥ sākáṁ jajñire svadháyā divó náraḥ ||

1.064.05a īśānakŕ̥to dhúnayo riśā́daso vā́tān vidyútas táviṣībhir akrata |
1.064.05c duhánty ū́dhar divyā́ni dhū́tayo bhū́mim pinvanti páyasā párijrayaḥ ||

1.064.06a pínvanty apó marútaḥ sudā́navaḥ páyo ghr̥távad vidátheṣv ābhúvaḥ |
1.064.06c átyaṁ ná mihé ví nayanti vājínam útsaṁ duhanti stanáyantam ákṣitam ||

1.064.07a mahiṣā́so māyínaś citrábhānavo giráyo ná svátavaso raghuṣyádaḥ |
1.064.07c mr̥gā́ iva hastínaḥ khādathā vánā yád ā́ruṇīṣu táviṣīr áyugdhvam ||

1.064.08a siṁhā́ iva nānadati prácetasaḥ piśā́ iva supíśo viśvávedasaḥ |
1.064.08c kṣápo jínvantaḥ pŕ̥ṣatībhir r̥ṣṭíbhiḥ sám ít sabā́dhaḥ śávasā́himanyavaḥ ||

1.064.09a ródasī ā́ vadatā gaṇaśriyo nŕ̥ṣācaḥ śūrāḥ śávasā́himanyavaḥ |
1.064.09c ā́ vandhúreṣv amátir ná darśatā́ vidyún ná tasthau maruto rátheṣu vaḥ ||

1.064.10a viśvávedaso rayíbhiḥ sámokasaḥ sámmiślāsas táviṣībhir virapśínaḥ |
1.064.10c ástāra íṣuṁ dadhire gábhastyor anantáśuṣmā vŕ̥ṣakhādayo náraḥ ||

1.064.11a hiraṇyáyebhiḥ pavíbhiḥ payovŕ̥dha újjighnanta āpathyò ná párvatān |
1.064.11c makhā́ ayā́saḥ svasŕ̥to dhruvacyúto dudhrakŕ̥to marúto bhrā́jadr̥ṣṭayaḥ ||

1.064.12a ghŕ̥ṣum pāvakáṁ vanínaṁ vícarṣaṇiṁ rudrásya sūnúṁ havásā gr̥ṇīmasi |
1.064.12c rajastúraṁ tavásam mā́rutaṁ gaṇám r̥jīṣíṇaṁ vŕ̥ṣaṇaṁ saścata śriyé ||

1.064.13a prá nū́ sá mártaḥ śávasā jánām̐ áti tasthaú va ūtī́ maruto yám ā́vata |
1.064.13c árvadbhir vā́jam bharate dhánā nŕ̥bhir āpŕ̥cchyaṁ krátum ā́ kṣeti púṣyati ||

1.064.14a carkŕ̥tyam marutaḥ pr̥tsú duṣṭáraṁ dyumántaṁ śúṣmam maghávatsu dhattana |
1.064.14c dhanaspŕ̥tam ukthyàṁ viśvácarṣaṇiṁ tokám puṣyema tánayaṁ śatáṁ hímāḥ ||

1.064.15a nū́ ṣṭhirám maruto vīrávantam r̥tīṣā́haṁ rayím asmā́su dhatta |
1.064.15c sahasríṇaṁ śatínaṁ śūśuvā́ṁsam prātár makṣū́ dhiyā́vasur jagamyāt ||

1.065.01 paśvā́ ná tāyúṁ gúhā cátantaṁ námo yujānáṁ námo váhantam ||

1.065.02 sajóṣā dhī́rāḥ padaír ánu gmann úpa tvā sīdan víśve yájatrāḥ ||

1.065.03 r̥tásya devā́ ánu vratā́ gur bhúvat páriṣṭir dyaúr ná bhū́ma ||

1.065.04 várdhantīm ā́paḥ panvā́ súśiśvim r̥tásya yónā gárbhe sújātam ||

1.065.05 puṣṭír ná raṇvā́ kṣitír ná pr̥thvī́ girír ná bhújma kṣódo ná śambhú ||

1.065.06 átyo nā́jman sárgaprataktaḥ síndhur ná kṣódaḥ ká īṁ varāte ||

1.065.07 jāmíḥ síndhūnām bhrā́teva svásrām íbhyān ná rā́jā vánāny atti ||

1.065.08 yád vā́tajūto vánā vy ásthād agnír ha dāti rómā pr̥thivyā́ḥ ||

1.065.09 śvásity apsú haṁsó ná sī́dan krátvā cétiṣṭho viśā́m uṣarbhút ||

1.065.10 sómo ná vedhā́ r̥táprajātaḥ paśúr ná śíśvā vibhúr dūrébhāḥ ||

1.066.01 rayír ná citrā́ sū́ro ná saṁdŕ̥g ā́yur ná prāṇó nítyo ná sūnúḥ ||

1.066.02 tákvā ná bhū́rṇir vánā siṣakti páyo ná dhenúḥ śúcir vibhā́vā ||

1.066.03 dādhā́ra kṣémam óko ná raṇvó yávo ná pakvó jétā jánānām ||

1.066.04 ŕ̥ṣir ná stúbhvā vikṣú praśastó vājī́ ná prītó váyo dadhāti ||

1.066.05 durókaśociḥ krátur ná nítyo jāyéva yónāv áraṁ víśvasmai ||

1.066.06 citró yád ábhrāṭ chvetó ná vikṣú rátho ná rukmī́ tveṣáḥ samátsu ||

1.066.07 séneva sr̥ṣṭā́maṁ dadhāty ástur ná didyút tveṣápratīkā ||

1.066.08 yamó ha jātó yamó jánitvaṁ jāráḥ kanī́nām pátir jánīnām ||

1.066.09 táṁ vaś carā́thā vayáṁ vasatyā́staṁ ná gā́vo nákṣanta iddhám ||

1.066.10 síndhur ná kṣódaḥ prá nī́cīr ainon návanta gā́vaḥ svàr dŕ̥śīke ||

1.067.01 váneṣu jāyúr márteṣu mitró vr̥ṇīté śruṣṭíṁ rā́jevājuryám ||

1.067.02 kṣémo ná sādhúḥ krátur ná bhadró bhúvat svādhī́r hótā havyavā́ṭ ||

1.067.03 háste dádhāno nr̥mṇā́ víśvāny áme devā́n dhād gúhā niṣī́dan ||

1.067.04 vidántīm átra náro dhiyaṁdhā́ hr̥dā́ yát taṣṭā́n mántrām̐ áśaṁsan ||

1.067.05 ajó ná kṣā́ṁ dādhā́ra pr̥thivī́ṁ tastámbha dyā́m mántrebhiḥ satyaíḥ ||

1.067.06 priyā́ padā́ni paśvó ní pāhi viśvā́yur agne guhā́ gúhaṁ gāḥ ||

1.067.07 yá īṁ cikéta gúhā bhávantam ā́ yáḥ sasā́da dhā́rām r̥tásya ||

1.067.08 ví yé cr̥tánty r̥tā́ sápanta ā́d íd vásūni prá vavācāsmai ||

1.067.09 ví yó vīrútsu ródhan mahitvótá prajā́ utá prasū́ṣv antáḥ ||

1.067.10 cíttir apā́ṁ dáme viśvā́yuḥ sádmeva dhī́rāḥ sammā́ya cakruḥ ||

1.068.01 śrīṇánn úpa sthād dívam bhuraṇyúḥ sthātúś carátham aktū́n vy ū̀rṇot ||

1.068.02 pári yád eṣām éko víśveṣām bhúvad devó devā́nām mahitvā́ ||

1.068.03 ā́d ít te víśve krátuṁ juṣanta śúṣkād yád deva jīvó jániṣṭhāḥ ||

1.068.04 bhájanta víśve devatváṁ nā́ma r̥táṁ sápanto amŕ̥tam évaiḥ ||

1.068.05 r̥tásya préṣā r̥tásya dhītír viśvā́yur víśve ápāṁsi cakruḥ ||

1.068.06 yás túbhyaṁ dā́śād yó vā te śíkṣāt tásmai cikitvā́n rayíṁ dayasva ||

1.068.07 hótā níṣatto mánor ápatye sá cin nv ā̀sām pátī rayīṇā́m ||

1.068.08 icchánta réto mithás tanū́ṣu sáṁ jānata svaír dákṣair ámūrāḥ ||

1.068.09 pitúr ná putrā́ḥ krátuṁ juṣanta śróṣan yé asya śā́saṁ turā́saḥ ||

1.068.10 ví rā́ya aurṇod dúraḥ purukṣúḥ pipéśa nā́kaṁ stŕ̥bhir dámūnāḥ ||

1.069.01 śukráḥ śuśukvā́m̐ uṣó ná jāráḥ paprā́ samīcī́ divó ná jyótiḥ ||

1.069.02 pári prájātaḥ krátvā babhūtha bhúvo devā́nām pitā́ putráḥ sán ||

1.069.03 vedhā́ ádr̥pto agnír vijānánn ū́dhar ná gónāṁ svā́dmā pitūnā́m ||

1.069.04 jáne ná śéva āhū́ryaḥ sán mádhye níṣatto raṇvó duroṇé ||

1.069.05 putró ná jātó raṇvó duroṇé vājī́ ná prītó víśo ví tārīt ||

1.069.06 víśo yád áhve nŕ̥bhiḥ sánīḷā agnír devatvā́ víśvāny aśyāḥ ||

1.069.07 nákiṣ ṭa etā́ vratā́ minanti nŕ̥bhyo yád ebhyáḥ śruṣṭíṁ cakártha ||

1.069.08 tát tú te dáṁso yád áhan samānaír nŕ̥bhir yád yuktó vivé rápāṁsi ||

1.069.09 uṣó ná jāró vibhā́vosráḥ sáṁjñātarūpaś cíketad asmai ||

1.069.10 tmánā váhanto dúro vy ŕ̥ṇvan návanta víśve svàr dŕ̥śīke ||

1.070.01 vanéma pūrvī́r aryó manīṣā́ agníḥ suśóko víśvāny aśyāḥ ||

1.070.02 ā́ daívyāni vratā́ cikitvā́n ā́ mā́nuṣasya jánasya jánma ||

1.070.03 gárbho yó apā́ṁ gárbho vánānāṁ gárbhaś ca sthātā́ṁ gárbhaś caráthām ||

1.070.04 ádrau cid asmā antár duroṇé viśā́ṁ ná víśvo amŕ̥taḥ svādhī́ḥ ||

1.070.05 sá hí kṣapā́vām̐ agnī́ rayīṇā́ṁ dā́śad yó asmā áraṁ sūktaíḥ ||

1.070.06 etā́ cikitvo bhū́mā ní pāhi devā́nāṁ jánma mártām̐ś ca vidvā́n ||

1.070.07 várdhān yám pūrvī́ḥ kṣapó vírūpāḥ sthātúś ca rátham r̥tápravītam ||

1.070.08 árādhi hótā svàr níṣattaḥ kr̥ṇván víśvāny ápāṁsi satyā́ ||

1.070.09 góṣu práśastiṁ váneṣu dhiṣe bháranta víśve balíṁ svàr ṇaḥ ||

1.070.10 ví tvā náraḥ purutrā́ saparyan pitúr ná jívrer ví védo bharanta ||

1.070.11 sādhúr ná gr̥dhnúr ásteva śū́ro yā́teva bhīmás tveṣáḥ samátsu ||

1.071.01a úpa prá jinvann uśatī́r uśántam pátiṁ ná nítyaṁ jánayaḥ sánīḷāḥ |
1.071.01c svásāraḥ śyā́vīm áruṣīm ajuṣrañ citrám ucchántīm uṣásaṁ ná gā́vaḥ ||

1.071.02a vīḷú cid dr̥ḷhā́ pitáro na ukthaír ádriṁ rujann áṅgiraso ráveṇa |
1.071.02c cakrúr divó br̥ható gātúm asmé áhaḥ svàr vividuḥ ketúm usrā́ḥ ||

1.071.03a dádhann r̥táṁ dhanáyann asya dhītím ā́d íd aryó didhiṣvò víbhr̥trāḥ |
1.071.03c átr̥ṣyantīr apáso yanty ácchā devā́ñ jánma práyasā vardháyantīḥ ||

1.071.04a máthīd yád īṁ víbhr̥to mātaríśvā gr̥hé-gr̥he śyetó jényo bhū́t |
1.071.04c ā́d īṁ rā́jñe ná sáhīyase sácā sánn ā́ dūtyàm bhŕ̥gavāṇo vivāya ||

1.071.05a mahé yát pitrá īṁ rásaṁ divé kár áva tsarat pr̥śanyàś cikitvā́n |
1.071.05c sr̥jád ástā dhr̥ṣatā́ didyúm asmai svā́yāṁ devó duhitári tvíṣiṁ dhāt ||

1.071.06a svá ā́ yás túbhyaṁ dáma ā́ vibhā́ti námo vā dā́śād uśató ánu dyū́n |
1.071.06c várdho agne váyo asya dvibárhā yā́sad rāyā́ saráthaṁ yáṁ junā́si ||

1.071.07a agníṁ víśvā abhí pŕ̥kṣaḥ sacante samudráṁ ná sravátaḥ saptá yahvī́ḥ |
1.071.07c ná jāmíbhir ví cikite váyo no vidā́ devéṣu prámatiṁ cikitvā́n ||

1.071.08a ā́ yád iṣé nr̥pátiṁ téja ā́naṭ chúci réto níṣiktaṁ dyaúr abhī́ke |
1.071.08c agníḥ śárdham anavadyáṁ yúvānaṁ svādhyàṁ janayat sūdáyac ca ||

1.071.09a máno ná yó 'dhvanaḥ sadyá éty ékaḥ satrā́ sū́ro vásva īśe |
1.071.09c rā́jānā mitrā́váruṇā supāṇī́ góṣu priyám amŕ̥taṁ rákṣamāṇā ||

1.071.10a mā́ no agne sakhyā́ pítryāṇi prá marṣiṣṭhā abhí vidúṣ kavíḥ sán |
1.071.10c nábho ná rūpáṁ jarimā́ mināti purā́ tásyā abhíśaster ádhīhi ||

1.072.01a ní kā́vyā vedhásaḥ śáśvatas kar háste dádhāno náryā purū́ṇi |
1.072.01c agnír bhuvad rayipátī rayīṇā́ṁ satrā́ cakrāṇó amŕ̥tāni víśvā ||

1.072.02a asmé vatsám pári ṣántaṁ ná vindann icchánto víśve amŕ̥tā ámūrāḥ |
1.072.02c śramayúvaḥ padavyò dhiyaṁdhā́s tasthúḥ padé paramé cā́rv agnéḥ ||

1.072.03a tisró yád agne śarádas tvā́m íc chúciṁ ghr̥téna śúcayaḥ saparyā́n |
1.072.03c nā́māni cid dadhire yajñíyāny ásūdayanta tanvàḥ sújātāḥ ||

1.072.04a ā́ ródasī br̥hatī́ vévidānāḥ prá rudríyā jabhrire yajñíyāsaḥ |
1.072.04c vidán márto nemádhitā cikitvā́n agním padé paramé tasthivā́ṁsam ||

1.072.05a saṁjānānā́ úpa sīdann abhijñú pátnīvanto namasyàṁ namasyan |
1.072.05c ririkvā́ṁsas tanvàḥ kr̥ṇvata svā́ḥ sákhā sákhyur nimíṣi rákṣamāṇāḥ ||

1.072.06a tríḥ saptá yád gúhyāni tvé ít padā́vidan níhitā yajñíyāsaḥ |
1.072.06c tébhī rakṣante amŕ̥taṁ sajóṣāḥ paśū́ñ ca sthātr̥̄́ñ caráthaṁ ca pāhi ||

1.072.07a vidvā́m̐ agne vayúnāni kṣitīnā́ṁ vy ā̀nuṣák churúdho jīváse dhāḥ |
1.072.07c antarvidvā́m̐ ádhvano devayā́nān átandro dūtó abhavo havirvā́ṭ ||

1.072.08a svādhyò divá ā́ saptá yahvī́ rāyó dúro vy ŕ̥tajñā́ ajānan |
1.072.08c vidád gávyaṁ sarámā dr̥ḷhám ūrváṁ yénā nú kam mā́nuṣī bhójate víṭ ||

1.072.09a ā́ yé víśvā svapatyā́ni tasthúḥ kr̥ṇvānā́so amr̥tatvā́ya gātúm |
1.072.09c mahnā́ mahádbhiḥ pr̥thivī́ ví tasthe mātā́ putraír áditir dhā́yase véḥ ||

1.072.10a ádhi śríyaṁ ní dadhuś cā́rum asmin divó yád akṣī́ amŕ̥tā ákr̥ṇvan |
1.072.10c ádha kṣaranti síndhavo ná sr̥ṣṭā́ḥ prá nī́cīr agne áruṣīr ajānan ||

1.073.01a rayír ná yáḥ pitr̥vittó vayodhā́ḥ supráṇītiś cikitúṣo ná śā́suḥ |
1.073.01c syonaśī́r átithir ná prīṇānó hóteva sádma vidható ví tārīt ||

1.073.02a devó ná yáḥ savitā́ satyámanmā krátvā nipā́ti vr̥jánāni víśvā |
1.073.02c purupraśastó amátir ná satyá ātméva śévo didhiṣā́yyo bhūt ||

1.073.03a devó ná yáḥ pr̥thivī́ṁ viśvádhāyā upakṣéti hitámitro ná rā́jā |
1.073.03c puraḥsádaḥ śarmasádo ná vīrā́ anavadyā́ pátijuṣṭeva nā́rī ||

1.073.04a táṁ tvā náro dáma ā́ nítyam iddhám ágne sácanta kṣitíṣu dhruvā́su |
1.073.04c ádhi dyumnáṁ ní dadhur bhū́ry asmin bhávā viśvā́yur dharúṇo rayīṇā́m ||

1.073.05a ví pŕ̥kṣo agne maghávāno aśyur ví sūráyo dádato víśvam ā́yuḥ |
1.073.05c sanéma vā́jaṁ samithéṣv aryó bhāgáṁ devéṣu śrávase dádhānāḥ ||

1.073.06a r̥tásya hí dhenávo vāvaśānā́ḥ smádūdhnīḥ pīpáyanta dyúbhaktāḥ |
1.073.06c parāvátaḥ sumatím bhíkṣamāṇā ví síndhavaḥ samáyā sasrur ádrim ||

1.073.07a tvé agne sumatím bhíkṣamāṇā diví śrávo dadhire yajñíyāsaḥ |
1.073.07c náktā ca cakrúr uṣásā vírūpe kr̥ṣṇáṁ ca várṇam aruṇáṁ ca sáṁ dhuḥ ||

1.073.08a yā́n rāyé mártān súṣūdo agne té syāma maghávāno vayáṁ ca |
1.073.08c chāyéva víśvam bhúvanaṁ sisakṣy āpaprivā́n ródasī antárikṣam ||

1.073.09a árvadbhir agne árvato nŕ̥bhir nr̥̄́n vīraír vīrā́n vanuyāmā tvótāḥ |
1.073.09c īśānā́saḥ pitr̥vittásya rāyó ví sūráyaḥ śatáhimā no aśyuḥ ||

1.073.10a etā́ te agna ucáthāni vedho júṣṭāni santu mánase hr̥dé ca |
1.073.10c śakéma rāyáḥ sudhúro yámaṁ té 'dhi śrávo devábhaktaṁ dádhānāḥ ||

1.074.01a upaprayánto adhvarám mántraṁ vocemāgnáye |
1.074.01c āré asmé ca śr̥ṇvaté ||

1.074.02a yáḥ snī́hitīṣu pūrvyáḥ saṁjagmānā́su kr̥ṣṭíṣu |
1.074.02c árakṣad dāśúṣe gáyam ||

1.074.03a utá bruvantu jantáva úd agnír vr̥trahā́jani |
1.074.03c dhanaṁjayó ráṇe-raṇe ||

1.074.04a yásya dūtó ási kṣáye véṣi havyā́ni vītáye |
1.074.04c dasmát kr̥ṇóṣy adhvarám ||

1.074.05a tám ít suhavyám aṅgiraḥ sudeváṁ sahaso yaho |
1.074.05c jánā āhuḥ subarhíṣam ||

1.074.06a ā́ ca váhāsi tā́m̐ ihá devā́m̐ úpa práśastaye |
1.074.06c havyā́ suścandra vītáye ||

1.074.07a ná yór upabdír áśvyaḥ śr̥ṇvé ráthasya kác caná |
1.074.07c yád agne yā́si dūtyàm ||

1.074.08a tvóto vājy áhrayo 'bhí pū́rvasmād áparaḥ |
1.074.08c prá dāśvā́m̐ agne asthāt ||

1.074.09a utá dyumát suvī́ryam br̥hád agne vivāsasi |
1.074.09c devébhyo deva dāśúṣe ||

1.075.01a juṣásva sapráthastamaṁ váco devápsarastamam |
1.075.01c havyā́ júhvāna āsáni ||

1.075.02a áthā te aṅgirastamā́gne vedhastama priyám |
1.075.02c vocéma bráhma sānasí ||

1.075.03a kás te jāmír jánānām ágne kó dāśvàdhvaraḥ |
1.075.03c kó ha kásminn asi śritáḥ ||

1.075.04a tváṁ jāmír jánānām ágne mitró asi priyáḥ |
1.075.04c sákhā sákhibhya ī́ḍyaḥ ||

1.075.05a yájā no mitrā́váruṇā yájā devā́m̐ r̥tám br̥hát |
1.075.05c ágne yákṣi sváṁ dámam ||

1.076.01a kā́ ta úpetir mánaso várāya bhúvad agne śáṁtamā kā́ manīṣā́ |
1.076.01c kó vā yajñaíḥ pári dákṣaṁ ta āpa kéna vā te mánasā dāśema ||

1.076.02a éhy agna ihá hótā ní ṣīdā́dabdhaḥ sú puraetā́ bhavā naḥ |
1.076.02c ávatāṁ tvā ródasī viśvaminvé yájā mahé saumanasā́ya devā́n ||

1.076.03a prá sú víśvān rakṣáso dhákṣy agne bhávā yajñā́nām abhiśastipā́vā |
1.076.03c áthā́ vaha sómapatiṁ háribhyām ātithyám asmai cakr̥mā sudā́vne ||

1.076.04a prajā́vatā vácasā váhnir āsā́ ca huvé ní ca satsīhá devaíḥ |
1.076.04c véṣi hotrám utá potráṁ yajatra bodhí prayantar janitar vásūnām ||

1.076.05a yáthā víprasya mánuṣo havírbhir devā́m̐ áyajaḥ kavíbhiḥ kavíḥ sán |
1.076.05c evā́ hotaḥ satyatara tvám adyā́gne mandráyā juhvā̀ yajasva ||

1.077.01a kathā́ dāśemāgnáye kā́smai devájuṣṭocyate bhāmíne gī́ḥ |
1.077.01c yó mártyeṣv amŕ̥ta r̥tā́vā hótā yájiṣṭha ít kr̥ṇóti devā́n ||

1.077.02a yó adhvaréṣu śáṁtama r̥tā́vā hótā tám ū námobhir ā́ kr̥ṇudhvam |
1.077.02c agnír yád vér mártāya devā́n sá cā bódhāti mánasā yajāti ||

1.077.03a sá hí krátuḥ sá máryaḥ sá sādhúr mitró ná bhūd ádbhutasya rathī́ḥ |
1.077.03c tám médheṣu prathamáṁ devayántīr víśa úpa bruvate dasmám ā́rīḥ ||

1.077.04a sá no nr̥ṇā́ṁ nŕ̥tamo riśā́dā agnír gíró 'vasā vetu dhītím |
1.077.04c tánā ca yé maghávānaḥ śáviṣṭhā vā́japrasūtā iṣáyanta mánma ||

1.077.05a evā́gnír gótamebhir r̥tā́vā víprebhir astoṣṭa jātávedāḥ |
1.077.05c sá eṣu dyumnám pīpayat sá vā́jaṁ sá puṣṭíṁ yāti jóṣam ā́ cikitvā́n ||

1.078.01a abhí tvā gótamā girā́ jā́tavedo vícarṣaṇe |
1.078.01c dyumnaír abhí prá ṇonumaḥ ||

1.078.02a tám u tvā gótamo girā́ rāyáskāmo duvasyati |
1.078.02c dyumnaír abhí prá ṇonumaḥ ||

1.078.03a tám u tvā vājasā́tamam aṅgirasvád dhavāmahe |
1.078.03c dyumnaír abhí prá ṇonumaḥ ||

1.078.04a tám u tvā vr̥trahántamaṁ yó dásyūm̐r avadhūnuṣé |
1.078.04c dyumnaír abhí prá ṇonumaḥ ||

1.078.05a ávocāma ráhūgaṇā agnáye mádhumad vácaḥ |
1.078.05c dyumnaír abhí prá ṇonumaḥ ||

1.079.01a híraṇyakeśo rájaso visāré 'hir dhúnir vā́ta iva dhrájīmān |
1.079.01c śúcibhrājā uṣáso návedā yáśasvatīr apasyúvo ná satyā́ḥ ||

1.079.02a ā́ te suparṇā́ aminantam̐ évaiḥ kr̥ṣṇó nonāva vr̥ṣabhó yádīdám |
1.079.02c śivā́bhir ná smáyamānābhir ā́gāt pátanti míhaḥ stanáyanty abhrā́ ||

1.079.03a yád īm r̥tásya páyasā píyāno náyann r̥tásya pathíbhī rájiṣṭhaiḥ |
1.079.03c aryamā́ mitró váruṇaḥ párijmā tvácam pr̥ñcanty úparasya yónau ||

1.079.04a ágne vā́jasya gómata ī́śānaḥ sahaso yaho |
1.079.04c asmé dhehi jātavedo máhi śrávaḥ ||

1.079.05a sá idhānó vásuṣ kavír agnír īḷényo girā́ |
1.079.05c revád asmábhyam purvaṇīka dīdihi ||

1.079.06a kṣapó rājann utá tmánā́gne vástor utóṣásaḥ |
1.079.06c sá tigmajambha rakṣáso daha práti ||

1.079.07a ávā no agna ūtíbhir gāyatrásya prábharmaṇi |
1.079.07c víśvāsu dhīṣú vandya ||

1.079.08a ā́ no agne rayím bhara satrāsā́haṁ váreṇyam |
1.079.08c víśvāsu pr̥tsú duṣṭáram ||

1.079.09a ā́ no agne sucetúnā rayíṁ viśvā́yupoṣasam |
1.079.09c mārḍīkáṁ dhehi jīváse ||

1.079.10a prá pūtā́s tigmáśociṣe vā́co gotamāgnáye |
1.079.10c bhárasva sumnayúr gíraḥ ||

1.079.11a yó no agne 'bhidā́saty ánti dūré padīṣṭá sáḥ |
1.079.11c asmā́kam íd vr̥dhé bhava ||

1.079.12a sahasrākṣó vícarṣaṇir agnī́ rákṣāṁsi sedhati |
1.079.12c hótā gr̥ṇīta ukthyàḥ ||

1.080.01a itthā́ hí sóma ín máde brahmā́ cakā́ra várdhanam |
1.080.01c śáviṣṭha vajrinn ójasā pr̥thivyā́ níḥ śaśā áhim árcann ánu svarā́jyam ||

1.080.02a sá tvāmadad vŕ̥ṣā mádaḥ sómaḥ śyenā́bhr̥taḥ sutáḥ |
1.080.02c yénā vr̥tráṁ nír adbhyó jaghántha vajrinn ójasā́rcann ánu svarā́jyam ||

1.080.03a préhy abhī̀hi dhr̥ṣṇuhí ná te vájro ní yaṁsate |
1.080.03c índra nr̥mṇáṁ hí te śávo háno vr̥tráṁ jáyā apó 'rcann ánu svarā́jyam ||

1.080.04a nír indra bhū́myā ádhi vr̥tráṁ jaghantha nír diváḥ |
1.080.04c sr̥jā́ marútvatīr áva jīvádhanyā imā́ apó 'rcann ánu svarā́jyam ||

1.080.05a índro vr̥trásya dódhataḥ sā́nuṁ vájreṇa hīḷitáḥ |
1.080.05c abhikrámyā́va jighnate 'páḥ sármāya codáyann árcann ánu svarā́jyam ||

1.080.06a ádhi sā́nau ní jighnate vájreṇa śatáparvaṇā |
1.080.06c mandāná índro ándhasaḥ sákhibhyo gātúm icchaty árcann ánu svarā́jyam ||

1.080.07a índra túbhyam íd adrivó 'nuttaṁ vajrin vīryàm |
1.080.07c yád dha tyám māyínam mr̥gáṁ tám u tvám māyáyāvadhīr árcann ánu svarā́jyam ||

1.080.08a ví te vájrāso asthiran navatíṁ nāvyā̀ ánu |
1.080.08c mahát ta indra vīryàm bāhvós te bálaṁ hitám árcann ánu svarā́jyam ||

1.080.09a sahásraṁ sākám arcata pári ṣṭobhata viṁśatíḥ |
1.080.09c śataínam ánv anonavur índrāya bráhmódyatam árcann ánu svarā́jyam ||

1.080.10a índro vr̥trásya táviṣīṁ nír ahan sáhasā sáhaḥ |
1.080.10c mahát tád asya paúṁsyaṁ vr̥tráṁ jaghanvā́m̐ asr̥jad árcann ánu svarā́jyam ||

1.080.11a imé cit táva manyáve vépete bhiyásā mahī́ |
1.080.11c yád indra vajrinn ójasā vr̥trám marútvām̐ ávadhīr árcann ánu svarā́jyam ||

1.080.12a ná vépasā ná tanyaténdraṁ vr̥tró ví bībhayat |
1.080.12c abhy ènaṁ vájra āyasáḥ sahásrabhr̥ṣṭir āyatā́rcann ánu svarā́jyam ||

1.080.13a yád vr̥tráṁ táva cāśániṁ vájreṇa samáyodhayaḥ |
1.080.13c áhim indra jíghāṁsato diví te badbadhe śávó 'rcann ánu svarā́jyam ||

1.080.14a abhiṣṭané te adrivo yát sthā́ jágac ca rejate |
1.080.14c tváṣṭā cit táva manyáva índra vevijyáte bhiyā́rcann ánu svarā́jyam ||

1.080.15a nahí nú yā́d adhīmásī́ndraṁ kó vīryā̀ paráḥ |
1.080.15c tásmin nr̥mṇám utá krátuṁ devā́ ójāṁsi sáṁ dadhur árcann ánu svarā́jyam ||

1.080.16a yā́m átharvā mánuṣ pitā́ dadhyáṅ dhíyam átnata |
1.080.16c tásmin bráhmāṇi pūrváthéndra ukthā́ sám agmatā́rcann ánu svarā́jyam ||

1.081.01a índro mádāya vāvr̥dhe śávase vr̥trahā́ nŕ̥bhiḥ |
1.081.01c tám ín mahátsv ājíṣūtém árbhe havāmahe sá vā́jeṣu prá no 'viṣat ||

1.081.02a ási hí vīra sényó 'si bhū́ri parādadíḥ |
1.081.02c ási dabhrásya cid vr̥dhó yájamānāya śikṣasi sunvaté bhū́ri te vásu ||

1.081.03a yád udī́rata ājáyo dhr̥ṣṇáve dhīyate dhánā |
1.081.03c yukṣvā́ madacyútā hárī káṁ hánaḥ káṁ vásau dadho 'smā́m̐ indra vásau dadhaḥ ||

1.081.04a krátvā mahā́m̐ anuṣvadhám bhīmá ā́ vāvr̥dhe śávaḥ |
1.081.04c śriyá r̥ṣvá upākáyor ní śiprī́ hárivān dadhe hástayor vájram āyasám ||

1.081.05a ā́ paprau pā́rthivaṁ rájo badbadhé rocanā́ diví |
1.081.05c ná tvā́vām̐ indra káś caná ná jātó ná janiṣyaté 'ti víśvaṁ vavakṣitha ||

1.081.06a yó aryó martabhójanam parādádāti dāśúṣe |
1.081.06c índro asmábhyaṁ śikṣatu ví bhajā bhū́ri te vásu bhakṣīyá táva rā́dhasaḥ ||

1.081.07a máde-made hí no dadír yūthā́ gávām r̥jukrátuḥ |
1.081.07c sáṁ gr̥bhāya purū́ śatóbhayāhastyā́ vásu śiśīhí rāyá ā́ bhara ||

1.081.08a mādáyasva suté sácā śávase śūra rā́dhase |
1.081.08c vidmā́ hí tvā purūvásum úpa kā́mān sasr̥jmáhé 'thā no 'vitā́ bhava ||

1.081.09a eté ta indra jantávo víśvam puṣyanti vā́ryam |
1.081.09c antár hí khyó jánānām aryó védo ádāśuṣāṁ téṣāṁ no véda ā́ bhara ||

1.082.01a úpo ṣú śr̥ṇuhī́ gíro mághavan mā́tathā iva |
1.082.01c yadā́ naḥ sūnŕ̥tāvataḥ kára ā́d artháyāsa íd yójā nv ìndra te hárī ||

1.082.02a ákṣann ámīmadanta hy áva priyā́ adhūṣata |
1.082.02c ástoṣata svábhānavo víprā náviṣṭhayā matī́ yójā nv ìndra te hárī ||

1.082.03a susaṁdŕ̥śaṁ tvā vayám mághavan vandiṣīmáhi |
1.082.03c prá nūnám pūrṇávandhuraḥ stutó yāhi váśām̐ ánu yójā nv ìndra te hárī ||

1.082.04a sá ghā táṁ vŕ̥ṣaṇaṁ rátham ádhi tiṣṭhāti govídam |
1.082.04c yáḥ pā́traṁ hāriyojanám pūrṇám indra cíketati yójā nv ìndra te hárī ||

1.082.05a yuktás te astu dákṣiṇa utá savyáḥ śatakrato |
1.082.05c téna jāyā́m úpa priyā́m mandānó yāhy ándhaso yójā nv ìndra te hárī ||

1.082.06a yunájmi te bráhmaṇā keśínā hárī úpa prá yāhi dadhiṣé gábhastyoḥ |
1.082.06c út tvā sutā́so rabhasā́ amandiṣuḥ pūṣaṇvā́n vajrin sám u pátnyāmadaḥ ||

1.083.01a áśvāvati prathamó góṣu gacchati suprāvī́r indra mártyas távotíbhiḥ |
1.083.01c tám ít pr̥ṇakṣi vásunā bhávīyasā síndhum ā́po yáthābhíto vícetasaḥ ||

1.083.02a ā́po ná devī́r úpa yanti hotríyam aváḥ paśyanti vítataṁ yáthā rájaḥ |
1.083.02c prācaír devā́saḥ prá ṇayanti devayúm brahmapríyaṁ joṣayante varā́ iva ||

1.083.03a ádhi dváyor adadhā ukthyàṁ váco yatásrucā mithunā́ yā́ saparyátaḥ |
1.083.03c ásaṁyatto vraté te kṣeti púṣyati bhadrā́ śaktír yájamānāya sunvaté ||

1.083.04a ā́d áṅgirāḥ prathamáṁ dadhire váya iddhā́gnayaḥ śámyā yé sukr̥tyáyā |
1.083.04c sárvam paṇéḥ sám avindanta bhójanam áśvāvantaṁ gómantam ā́ paśúṁ náraḥ ||

1.083.05a yajñaír átharvā prathamáḥ pathás tate tátaḥ sū́ryo vratapā́ vená ā́jani |
1.083.05c ā́ gā́ ājad uśánā kāvyáḥ sácā yamásya jātám amŕ̥taṁ yajāmahe ||

1.083.06a barhír vā yát svapatyā́ya vr̥jyáte 'rkó vā ślókam āghóṣate diví |
1.083.06c grā́vā yátra vádati kārúr ukthyàs tásyéd índro abhipitvéṣu raṇyati ||

1.084.01a ásāvi sóma indra te śáviṣṭha dhr̥ṣṇav ā́ gahi |
1.084.01c ā́ tvā pr̥ṇaktv indriyáṁ rájaḥ sū́ryo ná raśmíbhiḥ ||

1.084.02a índram íd dhárī vaható 'pratidhr̥ṣṭaśavasam |
1.084.02c ŕ̥ṣīṇāṁ ca stutī́r úpa yajñáṁ ca mā́nuṣāṇām ||

1.084.03a ā́ tiṣṭha vr̥trahan ráthaṁ yuktā́ te bráhmaṇā hárī |
1.084.03c arvācī́naṁ sú te máno grā́vā kr̥ṇotu vagnúnā ||

1.084.04a imám indra sutám piba jyéṣṭham ámartyam mádam |
1.084.04c śukrásya tvābhy àkṣaran dhā́rā r̥tásya sā́dane ||

1.084.05a índrāya nūnám arcatokthā́ni ca bravītana |
1.084.05c sutā́ amatsur índavo jyéṣṭhaṁ namasyatā sáhaḥ ||

1.084.06a nákiṣ ṭvád rathī́taro hárī yád indra yácchase |
1.084.06c nákiṣ ṭvā́nu majmánā nákiḥ sváśva ānaśe ||

1.084.07a yá éka íd vidáyate vásu mártāya dāśúṣe |
1.084.07c ī́śāno ápratiṣkuta índro aṅgá ||

1.084.08a kadā́ mártam arādhásam padā́ kṣúmpam iva sphurat |
1.084.08c kadā́ naḥ śuśravad gíra índro aṅgá ||

1.084.09a yáś cid dhí tvā bahúbhya ā́ sutā́vām̐ āvívāsati |
1.084.09c ugráṁ tát patyate śáva índro aṅgá ||

1.084.10a svādór itthā́ viṣūváto mádhvaḥ pibanti gauryàḥ |
1.084.10c yā́ índreṇa sayā́varīr vŕ̥ṣṇā mádanti śobháse vásvīr ánu svarā́jyam ||

1.084.11a tā́ asya pr̥śanāyúvaḥ sómaṁ śrīṇanti pŕ̥śnayaḥ |
1.084.11c priyā́ índrasya dhenávo vájraṁ hinvanti sā́yakaṁ vásvīr ánu svarā́jyam ||

1.084.12a tā́ asya námasā sáhaḥ saparyánti prácetasaḥ |
1.084.12c vratā́ny asya saścire purū́ṇi pūrvácittaye vásvīr ánu svarā́jyam ||

1.084.13a índro dadhīcó asthábhir vr̥trā́ṇy ápratiṣkutaḥ |
1.084.13c jaghā́na navatī́r náva ||

1.084.14a icchánn áśvasya yác chíraḥ párvateṣv ápaśritam |
1.084.14c tád vidac charyaṇā́vati ||

1.084.15a átrā́ha gór amanvata nā́ma tváṣṭur apīcyàm |
1.084.15c itthā́ candrámaso gr̥hé ||

1.084.16a kó adyá yuṅkte dhurí gā́ r̥tásya śímīvato bhāmíno durhr̥ṇāyū́n |
1.084.16c āsánniṣūn hr̥tsváso mayobhū́n yá eṣām bhr̥tyā́m r̥ṇádhat sá jīvāt ||

1.084.17a ká īṣate tujyáte kó bibhāya kó maṁsate sántam índraṁ kó ánti |
1.084.17c kás tokā́ya ká íbhāyotá rāyé 'dhi bravat tanvè kó jánāya ||

1.084.18a kó agním īṭṭe havíṣā ghr̥téna srucā́ yajātā r̥túbhir dhruvébhiḥ |
1.084.18c kásmai devā́ ā́ vahān āśú hóma kó maṁsate vītíhotraḥ sudeváḥ ||

1.084.19a tvám aṅgá prá śaṁsiṣo deváḥ śaviṣṭha mártyam |
1.084.19c ná tvád anyó maghavann asti marḍiténdra brávīmi te vácaḥ ||

1.084.20a mā́ te rā́dhāṁsi mā́ ta ūtáyo vaso 'smā́n kádā canā́ dabhan |
1.084.20c víśvā ca na upamimīhí mānuṣa vásūni carṣaṇíbhya ā́ ||

1.085.01a prá yé śúmbhante jánayo ná sáptayo yā́man rudrásya sūnávaḥ sudáṁsasaḥ |
1.085.01c ródasī hí marútaś cakriré vr̥dhé mádanti vīrā́ vidátheṣu ghŕ̥ṣvayaḥ ||

1.085.02a tá ukṣitā́so mahimā́nam āśata diví rudrā́so ádhi cakrire sádaḥ |
1.085.02c árcanto arkáṁ janáyanta indriyám ádhi śríyo dadhire pŕ̥śnimātaraḥ ||

1.085.03a gómātaro yác chubháyante añjíbhis tanū́ṣu śubhrā́ dadhire virúkmataḥ |
1.085.03c bā́dhante víśvam abhimātínam ápa vártmāny eṣām ánu rīyate ghr̥tám ||

1.085.04a ví yé bhrā́jante súmakhāsa r̥ṣṭíbhiḥ pracyāváyanto ácyutā cid ójasā |
1.085.04c manojúvo yán maruto rátheṣv ā́ vŕ̥ṣavrātāsaḥ pŕ̥ṣatīr áyugdhvam ||

1.085.05a prá yád rátheṣu pŕ̥ṣatīr áyugdhvaṁ vā́je ádrim maruto raṁháyantaḥ |
1.085.05c utā́ruṣásya ví ṣyanti dhā́rāś cármevodábhir vy ùndanti bhū́ma ||

1.085.06a ā́ vo vahantu sáptayo raghuṣyádo raghupátvānaḥ prá jigāta bāhúbhiḥ |
1.085.06c sī́datā́ barhír urú vaḥ sádas kr̥tám mādáyadhvam maruto mádhvo ándhasaḥ ||

1.085.07a tè 'vardhanta svátavaso mahitvanā́ nā́kaṁ tasthúr urú cakrire sádaḥ |
1.085.07c víṣṇur yád dhā́vad vŕ̥ṣaṇam madacyútaṁ váyo ná sīdann ádhi barhíṣi priyé ||

1.085.08a śū́rā ivéd yúyudhayo ná jágmayaḥ śravasyávo ná pŕ̥tanāsu yetire |
1.085.08c bháyante víśvā bhúvanā marúdbhyo rā́jāna iva tveṣásaṁdr̥śo náraḥ ||

1.085.09a tváṣṭā yád vájraṁ súkr̥taṁ hiraṇyáyaṁ sahásrabhr̥ṣṭiṁ svápā ávartayat |
1.085.09c dhattá índro náry ápāṁsi kártavé 'han vr̥tráṁ nír apā́m aubjad arṇavám ||

1.085.10a ūrdhváṁ nunudre 'vatáṁ tá ójasā dādr̥hāṇáṁ cid bibhidur ví párvatam |
1.085.10c dhámanto vāṇám marútaḥ sudā́navo máde sómasya ráṇyāni cakrire ||

1.085.11a jihmáṁ nunudre 'vatáṁ táyā diśā́siñcann útsaṁ gótamāya tr̥ṣṇáje |
1.085.11c ā́ gacchantīm ávasā citrábhānavaḥ kā́maṁ víprasya tarpayanta dhā́mabhiḥ ||

1.085.12a yā́ vaḥ śárma śaśamānā́ya sánti tridhā́tūni dāśúṣe yacchatā́dhi |
1.085.12c asmábhyaṁ tā́ni maruto ví yanta rayíṁ no dhatta vr̥ṣaṇaḥ suvī́ram ||

1.086.01a máruto yásya hí kṣáye pāthā́ divó vimahasaḥ |
1.086.01c sá sugopā́tamo jánaḥ ||

1.086.02a yajñaír vā yajñavāhaso víprasya vā matīnā́m |
1.086.02c márutaḥ śr̥ṇutā́ hávam ||

1.086.03a utá vā yásya vājínó 'nu vípram átakṣata |
1.086.03c sá gántā gómati vrajé ||

1.086.04a asyá vīrásya barhíṣi sutáḥ sómo díviṣṭiṣu |
1.086.04c ukthám mádaś ca śasyate ||

1.086.05a asyá śroṣantv ā́ bhúvo víśvā yáś carṣaṇī́r abhí |
1.086.05c sū́raṁ cit sasrúṣīr íṣaḥ ||

1.086.06a pūrvī́bhir hí dadāśimá śarádbhir maruto vayám |
1.086.06c ávobhiś carṣaṇīnā́m ||

1.086.07a subhágaḥ sá prayajyavo máruto astu mártyaḥ |
1.086.07c yásya práyāṁsi párṣatha ||

1.086.08a śaśamānásya vā naraḥ svédasya satyaśavasaḥ |
1.086.08c vidā́ kā́masya vénataḥ ||

1.086.09a yūyáṁ tát satyaśavasa āvíṣ karta mahitvanā́ |
1.086.09c vídhyatā vidyútā rákṣaḥ ||

1.086.10a gū́hatā gúhyaṁ támo ví yāta víśvam atríṇam |
1.086.10c jyótiṣ kartā yád uśmási ||

1.087.01a prátvakṣasaḥ prátavaso virapśínó 'nānatā ávithurā r̥jīṣíṇaḥ |
1.087.01c júṣṭatamāso nŕ̥tamāso añjíbhir vy ā̀najre ké cid usrā́ iva stŕ̥bhiḥ ||

1.087.02a upahvaréṣu yád ácidhvaṁ yayíṁ váya iva marutaḥ kéna cit pathā́ |
1.087.02c ścótanti kóśā úpa vo rátheṣv ā́ ghr̥tám ukṣatā mádhuvarṇam árcate ||

1.087.03a praíṣām ájmeṣu vithuréva rejate bhū́mir yā́meṣu yád dha yuñjáte śubhé |
1.087.03c té krīḷáyo dhúnayo bhrā́jadr̥ṣṭayaḥ svayám mahitvám panayanta dhū́tayaḥ ||

1.087.04a sá hí svasŕ̥t pŕ̥ṣadaśvo yúvā gaṇò 'yā́ īśānás táviṣībhir ā́vr̥taḥ |
1.087.04c ási satyá r̥ṇayā́vā́nedyo 'syā́ dhiyáḥ prāvitā́thā vŕ̥ṣā gaṇáḥ ||

1.087.05a pitúḥ pratnásya jánmanā vadāmasi sómasya jihvā́ prá jigāti cákṣasā |
1.087.05c yád īm índraṁ śámy ŕ̥kvāṇa ā́śatā́d ín nā́māni yajñíyāni dadhire ||

1.087.06a śriyáse kám bhānúbhiḥ sám mimikṣire té raśmíbhis tá ŕ̥kvabhiḥ sukhādáyaḥ |
1.087.06c té vā́śīmanta iṣmíṇo ábhīravo vidré priyásya mā́rutasya dhā́mnaḥ ||

1.088.01a ā́ vidyúnmadbhir marutaḥ svarkaí ráthebhir yāta r̥ṣṭimádbhir áśvaparṇaiḥ |
1.088.01c ā́ várṣiṣṭhayā na iṣā́ váyo ná paptatā sumāyāḥ ||

1.088.02a tè 'ruṇébhir váram ā́ piśáṅgaiḥ śubhé káṁ yānti rathatū́rbhir áśvaiḥ |
1.088.02c rukmó ná citráḥ svádhitīvān pavyā́ ráthasya jaṅghananta bhū́ma ||

1.088.03a śriyé káṁ vo ádhi tanū́ṣu vā́śīr medhā́ vánā ná kr̥ṇavanta ūrdhvā́ |
1.088.03c yuṣmábhyaṁ kám marutaḥ sujātās tuvidyumnā́so dhanayante ádrim ||

1.088.04a áhāni gŕ̥dhrāḥ páry ā́ va ā́gur imā́ṁ dhíyaṁ vārkāryā́ṁ ca devī́m |
1.088.04c bráhma kr̥ṇvánto gótamāso arkaír ūrdhváṁ nunudra utsadhím píbadhyai ||

1.088.05a etát tyán ná yójanam aceti sasvár ha yán maruto gótamo vaḥ |
1.088.05c páśyan híraṇyacakrān áyodaṁṣṭrān vidhā́vato varā́hūn ||

1.088.06a eṣā́ syā́ vo maruto 'nubhartrī́ práti ṣṭobhati vāgháto ná vā́ṇī |
1.088.06c ástobhayad vŕ̥thāsām ánu svadhā́ṁ gábhastyoḥ ||

1.089.01a ā́ no bhadrā́ḥ krátavo yantu viśvátó 'dabdhāso áparītāsa udbhídaḥ |
1.089.01c devā́ no yáthā sádam íd vr̥dhé ásann áprāyuvo rakṣitā́ro divé-dive ||

1.089.02a devā́nām bhadrā́ sumatír r̥jūyatā́ṁ devā́nāṁ rātír abhí no ní vartatām |
1.089.02c devā́nāṁ sakhyám úpa sedimā vayáṁ devā́ na ā́yuḥ prá tirantu jīváse ||

1.089.03a tā́n pū́rvayā nivídā hūmahe vayám bhágam mitrám áditiṁ dákṣam asrídham |
1.089.03c aryamáṇaṁ váruṇaṁ sómam aśvínā sárasvatī naḥ subhágā máyas karat ||

1.089.04a tán no vā́to mayobhú vātu bheṣajáṁ tán mātā́ pr̥thivī́ tát pitā́ dyaúḥ |
1.089.04c tád grā́vāṇaḥ somasúto mayobhúvas tád aśvinā śr̥ṇutaṁ dhiṣṇyā yuvám ||

1.089.05a tám ī́śānaṁ jágatas tasthúṣas pátiṁ dhiyaṁjinvám ávase hūmahe vayám |
1.089.05c pūṣā́ no yáthā védasām ásad vr̥dhé rakṣitā́ pāyúr ádabdhaḥ svastáye ||

1.089.06a svastí na índro vr̥ddháśravāḥ svastí naḥ pūṣā́ viśvávedāḥ |
1.089.06c svastí nas tā́rkṣyo áriṣṭanemiḥ svastí no bŕ̥haspátir dadhātu ||

1.089.07a pŕ̥ṣadaśvā marútaḥ pŕ̥śnimātaraḥ śubhaṁyā́vāno vidátheṣu jágmayaḥ |
1.089.07c agnijihvā́ mánavaḥ sū́racakṣaso víśve no devā́ ávasā́ gamann ihá ||

1.089.08a bhadráṁ kárṇebhiḥ śr̥ṇuyāma devā bhadrám paśyemākṣábhir yajatrāḥ |
1.089.08c sthiraír áṅgais tuṣṭuvā́ṁsas tanū́bhir vy àśema deváhitaṁ yád ā́yuḥ ||

1.089.09a śatám ín nú śarádo ánti devā yátrā naś cakrā́ jarásaṁ tanū́nām |
1.089.09c putrā́so yátra pitáro bhávanti mā́ no madhyā́ rīriṣatā́yur gántoḥ ||

1.089.10a áditir dyaúr áditir antárikṣam áditir mātā́ sá pitā́ sá putráḥ |
1.089.10c víśve devā́ áditiḥ páñca jánā áditir jātám áditir jánitvam ||

1.090.01a r̥junītī́ no váruṇo mitró nayatu vidvā́n |
1.090.01c aryamā́ devaíḥ sajóṣāḥ ||

1.090.02a té hí vásvo vásavānās té ápramūrā máhobhiḥ |
1.090.02c vratā́ rakṣante viśvā́hā ||

1.090.03a té asmábhyaṁ śárma yaṁsann amŕ̥tā mártyebhyaḥ |
1.090.03c bā́dhamānā ápa dvíṣaḥ ||

1.090.04a ví naḥ patháḥ suvitā́ya ciyántv índro marútaḥ |
1.090.04c pūṣā́ bhágo vándyāsaḥ ||

1.090.05a utá no dhíyo góagrāḥ pū́ṣan víṣṇav évayāvaḥ |
1.090.05c kártā naḥ svastimátaḥ ||

1.090.06a mádhu vā́tā r̥tāyaté mádhu kṣaranti síndhavaḥ |
1.090.06c mā́dhvīr naḥ santv óṣadhīḥ ||

1.090.07a mádhu náktam utóṣáso mádhumat pā́rthivaṁ rájaḥ |
1.090.07c mádhu dyaúr astu naḥ pitā́ ||

1.090.08a mádhumān no vánaspátir mádhumām̐ astu sū́ryaḥ |
1.090.08c mā́dhvīr gā́vo bhavantu naḥ ||

1.090.09a śáṁ no mitráḥ śáṁ váruṇaḥ śáṁ no bhavatv aryamā́ |
1.090.09c śáṁ na índro bŕ̥haspátiḥ śáṁ no víṣṇur urukramáḥ ||

1.091.01a tváṁ soma prá cikito manīṣā́ tváṁ rájiṣṭham ánu neṣi pánthām |
1.091.01c táva práṇītī pitáro na indo devéṣu rátnam abhajanta dhī́rāḥ ||

1.091.02a tváṁ soma krátubhiḥ sukrátur bhūs tváṁ dákṣaiḥ sudákṣo viśvávedāḥ |
1.091.02c tváṁ vŕ̥ṣā vr̥ṣatvébhir mahitvā́ dyumnébhir dyumny àbhavo nr̥cákṣāḥ ||

1.091.03a rā́jño nú te váruṇasya vratā́ni br̥hád gabhīráṁ táva soma dhā́ma |
1.091.03c śúciṣ ṭvám asi priyó ná mitró dakṣā́yyo aryamévāsi soma ||

1.091.04a yā́ te dhā́māni diví yā́ pr̥thivyā́ṁ yā́ párvateṣv óṣadhīṣv apsú |
1.091.04c tébhir no víśvaiḥ sumánā áheḷan rā́jan soma práti havyā́ gr̥bhāya ||

1.091.05a tváṁ somāsi sátpatis tváṁ rā́jotá vr̥trahā́ |
1.091.05c tvám bhadró asi krátuḥ ||

1.091.06a tváṁ ca soma no váśo jīvā́tuṁ ná marāmahe |
1.091.06c priyástotro vánaspátiḥ ||

1.091.07a tváṁ soma mahé bhágaṁ tváṁ yū́na r̥tāyaté |
1.091.07c dákṣaṁ dadhāsi jīváse ||

1.091.08a tváṁ naḥ soma viśváto rákṣā rājann aghāyatáḥ |
1.091.08c ná riṣyet tvā́vataḥ sákhā ||

1.091.09a sóma yā́s te mayobhúva ūtáyaḥ sánti dāśúṣe |
1.091.09c tā́bhir no 'vitā́ bhava ||

1.091.10a imáṁ yajñám idáṁ váco jujuṣāṇá upā́gahi |
1.091.10c sóma tváṁ no vr̥dhé bhava ||

1.091.11a sóma gīrbhíṣ ṭvā vayáṁ vardháyāmo vacovídaḥ |
1.091.11c sumr̥ḷīkó na ā́ viśa ||

1.091.12a gayasphā́no amīvahā́ vasuvít puṣṭivárdhanaḥ |
1.091.12c sumitráḥ soma no bhava ||

1.091.13a sóma rārandhí no hr̥dí gā́vo ná yávaseṣv ā́ |
1.091.13c márya iva svá okyè ||

1.091.14a yáḥ soma sakhyé táva rāráṇad deva mártyaḥ |
1.091.14c táṁ dákṣaḥ sacate kavíḥ ||

1.091.15a uruṣyā́ ṇo abhíśasteḥ sóma ní pāhy áṁhasaḥ |
1.091.15c sákhā suśéva edhi naḥ ||

1.091.16a ā́ pyāyasva sám etu te viśvátaḥ soma vŕ̥ṣṇyam |
1.091.16c bhávā vā́jasya saṁgathé ||

1.091.17a ā́ pyāyasva madintama sóma víśvebhir aṁśúbhiḥ |
1.091.17c bhávā naḥ suśrávastamaḥ sákhā vr̥dhé ||

1.091.18a sáṁ te páyāṁsi sám u yantu vā́jāḥ sáṁ vŕ̥ṣṇyāny abhimātiṣā́haḥ |
1.091.18c āpyā́yamāno amŕ̥tāya soma diví śrávāṁsy uttamā́ni dhiṣva ||

1.091.19a yā́ te dhā́māni havíṣā yájanti tā́ te víśvā paribhū́r astu yajñám |
1.091.19c gayasphā́naḥ pratáraṇaḥ suvī́ró 'vīrahā prá carā soma dúryān ||

1.091.20a sómo dhenúṁ sómo árvantam āśúṁ sómo vīráṁ karmaṇyàṁ dadāti |
1.091.20c sādanyàṁ vidathyàṁ sabhéyam pitr̥śrávaṇaṁ yó dádāśad asmai ||

1.091.21a áṣāḷhaṁ yutsú pŕ̥tanāsu pápriṁ svarṣā́m apsā́ṁ vr̥jánasya gopā́m |
1.091.21c bhareṣujā́ṁ sukṣitíṁ suśrávasaṁ jáyantaṁ tvā́m ánu madema soma ||

1.091.22a tvám imā́ óṣadhīḥ soma víśvās tvám apó ajanayas tváṁ gā́ḥ |
1.091.22c tvám ā́ tatanthorv àntárikṣaṁ tváṁ jyótiṣā ví támo vavartha ||

1.091.23a devéna no mánasā deva soma rāyó bhāgáṁ sahasāvann abhí yudhya |
1.091.23c mā́ tvā́ tanad ī́śiṣe vīryàsyobháyebhyaḥ prá cikitsā gáviṣṭau ||

1.092.01a etā́ u tyā́ uṣásaḥ ketúm akrata pū́rve árdhe rájaso bhānúm añjate |
1.092.01c niṣkr̥ṇvānā́ ā́yudhānīva dhr̥ṣṇávaḥ práti gā́vó 'ruṣīr yanti mātáraḥ ||

1.092.02a úd apaptann aruṇā́ bhānávo vŕ̥thā svāyújo áruṣīr gā́ ayukṣata |
1.092.02c ákrann uṣā́so vayúnāni pūrváthā rúśantam bhānúm áruṣīr aśiśrayuḥ ||

1.092.03a árcanti nā́rīr apáso ná viṣṭíbhiḥ samānéna yójanenā́ parāvátaḥ |
1.092.03c íṣaṁ váhantīḥ sukŕ̥te sudā́nave víśvéd áha yájamānāya sunvaté ||

1.092.04a ádhi péśāṁsi vapate nr̥tū́r ivā́porṇute vákṣa usréva bárjaham |
1.092.04c jyótir víśvasmai bhúvanāya kr̥ṇvatī́ gā́vo ná vrajáṁ vy ùṣā́ āvar támaḥ ||

1.092.05a práty arcī́ rúśad asyā adarśi ví tiṣṭhate bā́dhate kr̥ṣṇám ábhvam |
1.092.05c sváruṁ ná péśo vidátheṣv añjáñ citráṁ divó duhitā́ bhānúm aśret ||

1.092.06a átāriṣma támasas pārám asyóṣā́ ucchántī vayúnā kr̥ṇoti |
1.092.06c śriyé chándo ná smayate vibhātī́ suprátīkā saumanasā́yājīgaḥ ||

1.092.07a bhā́svatī netrī́ sūnŕ̥tānāṁ diváḥ stave duhitā́ gótamebhiḥ |
1.092.07c prajā́vato nr̥váto áśvabudhyān úṣo góagrām̐ úpa māsi vā́jān ||

1.092.08a úṣas tám aśyāṁ yaśásaṁ suvī́raṁ dāsápravargaṁ rayím áśvabudhyam |
1.092.08c sudáṁsasā śrávasā yā́ vibhā́si vā́japrasūtā subhage br̥hántam ||

1.092.09a víśvāni devī́ bhúvanābhicákṣyā pratīcī́ cákṣur urviyā́ ví bhāti |
1.092.09c víśvaṁ jīváṁ caráse bodháyantī víśvasya vā́cam avidan manāyóḥ ||

1.092.10a púnaḥ-punar jā́yamānā purāṇī́ samānáṁ várṇam abhí śúmbhamānā |
1.092.10c śvaghnī́va kr̥tnúr víja āminānā́ mártasya devī́ jaráyanty ā́yuḥ ||

1.092.11a vyūrṇvatī́ divó ántām̐ abodhy ápa svásāraṁ sanutár yuyoti |
1.092.11c praminatī́ manuṣyā̀ yugā́ni yóṣā jārásya cákṣasā ví bhāti ||

1.092.12a paśū́n ná citrā́ subhágā prathānā́ síndhur ná kṣóda urviyā́ vy àśvait |
1.092.12c áminatī daívyāni vratā́ni sū́ryasya ceti raśmíbhir dr̥śānā́ ||

1.092.13a úṣas tác citrám ā́ bharāsmábhyaṁ vājinīvati |
1.092.13c yéna tokáṁ ca tánayaṁ ca dhā́mahe ||

1.092.14a úṣo adyéhá gomaty áśvāvati vibhāvari |
1.092.14c revád asmé vy ùccha sūnr̥tāvati ||

1.092.15a yukṣvā́ hí vājinīvaty áśvām̐ adyā́ruṇā́m̐ uṣaḥ |
1.092.15c áthā no víśvā saúbhagāny ā́ vaha ||

1.092.16a áśvinā vartír asmád ā́ gómad dasrā híraṇyavat |
1.092.16c arvā́g ráthaṁ sámanasā ní yacchatam ||

1.092.17a yā́v itthā́ ślókam ā́ divó jyótir jánāya cakráthuḥ |
1.092.17c ā́ na ū́rjaṁ vahatam aśvinā yuvám ||

1.092.18a éhá devā́ mayobhúvā dasrā́ híraṇyavartanī |
1.092.18c uṣarbúdho vahantu sómapītaye ||

1.093.01a ágnīṣomāv imáṁ sú me śr̥ṇutáṁ vr̥ṣaṇā hávam |
1.093.01c práti sūktā́ni haryatam bhávataṁ dāśúṣe máyaḥ ||

1.093.02a ágnīṣomā yó adyá vām idáṁ vácaḥ saparyáti |
1.093.02c tásmai dhattaṁ suvī́ryaṁ gávām póṣaṁ sváśvyam ||

1.093.03a ágnīṣomā yá ā́hutiṁ yó vāṁ dā́śād dhavíṣkr̥tim |
1.093.03c sá prajáyā suvī́ryaṁ víśvam ā́yur vy àśnavat ||

1.093.04a ágnīṣomā céti tád vīryàṁ vāṁ yád ámuṣṇītam avasám paṇíṁ gā́ḥ |
1.093.04c ávātiratam bŕ̥sayasya śéṣó 'vindataṁ jyótir ékam bahúbhyaḥ ||

1.093.05a yuvám etā́ni diví rocanā́ny agníś ca soma sákratū adhattam |
1.093.05c yuváṁ síndhūm̐r abhíśaster avadyā́d ágnīṣomāv ámuñcataṁ gr̥bhītā́n ||

1.093.06a ā́nyáṁ divó mātaríśvā jabhārā́mathnād anyám pári śyenó ádreḥ |
1.093.06c ágnīṣomā bráhmaṇā vāvr̥dhānórúṁ yajñā́ya cakrathur u lokám ||

1.093.07a ágnīṣomā havíṣaḥ prásthitasya vītáṁ háryataṁ vr̥ṣaṇā juṣéthām |
1.093.07c suśármāṇā svávasā hí bhūtám áthā dhattaṁ yájamānāya śáṁ yóḥ ||

1.093.08a yó agnī́ṣómā havíṣā saparyā́d devadrī́cā mánasā yó ghr̥téna |
1.093.08c tásya vratáṁ rakṣatam pātám áṁhaso viśé jánāya máhi śárma yacchatam ||

1.093.09a ágnīṣomā sávedasā sáhūtī vanataṁ gíraḥ |
1.093.09c sáṁ devatrā́ babhūvathuḥ ||

1.093.10a ágnīṣomāv anéna vāṁ yó vāṁ ghr̥téna dā́śati |
1.093.10c tásmai dīdayatam br̥hát ||

1.093.11a ágnīṣomāv imā́ni no yuváṁ havyā́ jujoṣatam |
1.093.11c ā́ yātam úpa naḥ sácā ||

1.093.12a ágnīṣomā pipr̥tám árvato na ā́ pyāyantām usríyā havyasū́daḥ |
1.093.12c asmé bálāni maghávatsu dhattaṁ kr̥ṇutáṁ no adhvaráṁ śruṣṭimántam ||

1.094.01a imáṁ stómam árhate jātávedase rátham iva sám mahemā manīṣáyā |
1.094.01c bhadrā́ hí naḥ prámatir asya saṁsády ágne sakhyé mā́ riṣāmā vayáṁ táva ||

1.094.02a yásmai tvám āyájase sá sādhaty anarvā́ kṣeti dádhate suvī́ryam |
1.094.02c sá tūtāva naínam aśnoty aṁhatír ágne sakhyé mā́ riṣāmā vayáṁ táva ||

1.094.03a śakéma tvā samídhaṁ sādháyā dhíyas tvé devā́ havír adanty ā́hutam |
1.094.03c tvám ādityā́m̐ ā́ vaha tā́n hy ùśmásy ágne sakhyé mā́ riṣāmā vayáṁ táva ||

1.094.04a bhárāmedhmáṁ kr̥ṇávāmā havī́ṁṣi te citáyantaḥ párvaṇā-parvaṇā vayám |
1.094.04c jīvā́tave prataráṁ sādhayā dhíyó 'gne sakhyé mā́ riṣāmā vayáṁ táva ||

1.094.05a viśā́ṁ gopā́ asya caranti jantávo dvipác ca yád utá cátuṣpad aktúbhiḥ |
1.094.05c citráḥ praketá uṣáso mahā́m̐ asy ágne sakhyé mā́ riṣāmā vayáṁ táva ||

1.094.06a tvám adhvaryúr utá hótāsi pūrvyáḥ praśāstā́ pótā janúṣā puróhitaḥ |
1.094.06c víśvā vidvā́m̐ ā́rtvijyā dhīra puṣyasy ágne sakhyé mā́ riṣāmā vayáṁ táva ||

1.094.07a yó viśvátaḥ suprátīkaḥ sadŕ̥ṅṅ ási dūré cit sán taḷíd ivā́ti rocase |
1.094.07c rā́tryāś cid ándho áti deva paśyasy ágne sakhyé mā́ riṣāmā vayáṁ táva ||

1.094.08a pū́rvo devā bhavatu sunvató rátho 'smā́kaṁ śáṁso abhy àstu dūḍhyàḥ |
1.094.08c tád ā́ jānītotá puṣyatā vácó 'gne sakhyé mā́ riṣāmā vayáṁ táva ||

1.094.09a vadhaír duḥśáṁsām̐ ápa dūḍhyò jahi dūré vā yé ánti vā ké cid atríṇaḥ |
1.094.09c áthā yajñā́ya gr̥ṇaté sugáṁ kr̥dhy ágne sakhyé mā́ riṣāmā vayáṁ táva ||

1.094.10a yád áyukthā aruṣā́ róhitā ráthe vā́tajūtā vr̥ṣabhásyeva te rávaḥ |
1.094.10c ā́d invasi vaníno dhūmáketunā́gne sakhyé mā́ riṣāmā vayáṁ táva ||

1.094.11a ádha svanā́d utá bibhyuḥ patatríṇo drapsā́ yát te yavasā́do vy ásthiran |
1.094.11c sugáṁ tát te tāvakébhyo ráthebhyó 'gne sakhyé mā́ riṣāmā vayáṁ táva ||

1.094.12a ayám mitrásya váruṇasya dhā́yase 'vayātā́m marútāṁ héḷo ádbhutaḥ |
1.094.12c mr̥ḷā́ sú no bhū́tv eṣām mánaḥ púnar ágne sakhyé mā́ riṣāmā vayáṁ táva ||

1.094.13a devó devā́nām asi mitró ádbhuto vásur vásūnām asi cā́rur adhvaré |
1.094.13c śárman syāma táva sapráthastamé 'gne sakhyé mā́ riṣāmā vayáṁ táva ||

1.094.14a tát te bhadráṁ yát sámiddhaḥ své dáme sómāhuto járase mr̥ḷayáttamaḥ |
1.094.14c dádhāsi rátnaṁ dráviṇaṁ ca dāśúṣé 'gne sakhyé mā́ riṣāmā vayáṁ táva ||

1.094.15a yásmai tváṁ sudraviṇo dádāśo 'nāgāstvám adite sarvátātā |
1.094.15c yám bhadréṇa śávasā codáyāsi prajā́vatā rā́dhasā té syāma ||

1.094.16a sá tvám agne saubhagatvásya vidvā́n asmā́kam ā́yuḥ prá tirehá deva |
1.094.16c tán no mitró váruṇo māmahantām áditiḥ síndhuḥ pr̥thivī́ utá dyaúḥ ||

1.095.01a dvé vírūpe carataḥ svárthe anyā́nyā vatsám úpa dhāpayete |
1.095.01c hárir anyásyām bhávati svadhā́vāñ chukró anyásyāṁ dadr̥śe suvárcāḥ ||

1.095.02a dáśemáṁ tváṣṭur janayanta gárbham átandrāso yuvatáyo víbhr̥tram |
1.095.02c tigmā́nīkaṁ sváyaśasaṁ jáneṣu virócamānam pári ṣīṁ nayanti ||

1.095.03a trī́ṇi jā́nā pári bhūṣanty asya samudrá ékaṁ divy ékam apsú |
1.095.03c pū́rvām ánu prá díśam pā́rthivānām r̥tū́n praśā́sad ví dadhāv anuṣṭhú ||

1.095.04a ká imáṁ vo niṇyám ā́ ciketa vatsó mātr̥̄́r janayata svadhā́bhiḥ |
1.095.04c bahvīnā́ṁ gárbho apásām upásthān mahā́n kavír níś carati svadhā́vān ||

1.095.05a āvíṣṭyo vardhate cā́rur āsu jihmā́nām ūrdhváḥ sváyaśā upásthe |
1.095.05c ubhé tváṣṭur bibhyatur jā́yamānāt pratīcī́ siṁhám práti joṣayete ||

1.095.06a ubhé bhadré joṣayete ná méne gā́vo ná vāśrā́ úpa tasthur évaiḥ |
1.095.06c sá dákṣāṇāṁ dákṣapatir babhūvāñjánti yáṁ dakṣiṇató havírbhiḥ ||

1.095.07a úd yaṁyamīti savitéva bāhū́ ubhé sícau yatate bhīmá r̥ñján |
1.095.07c úc chukrám átkam ajate simásmān návā mātŕ̥bhyo vásanā jahāti ||

1.095.08a tveṣáṁ rūpáṁ kr̥ṇuta úttaraṁ yát sampr̥ñcānáḥ sádane góbhir adbhíḥ |
1.095.08c kavír budhnám pári marmr̥jyate dhī́ḥ sā́ devátātā sámitir babhūva ||

1.095.09a urú te jráyaḥ páry eti budhnáṁ virócamānam mahiṣásya dhā́ma |
1.095.09c víśvebhir agne sváyaśobhir iddhó 'dabdhebhiḥ pāyúbhiḥ pāhy asmā́n ||

1.095.10a dhánvan srótaḥ kr̥ṇute gātúm ūrmíṁ śukraír ūrmíbhir abhí nakṣati kṣā́m |
1.095.10c víśvā sánāni jaṭháreṣu dhatte 'ntár návāsu carati prasū́ṣu ||

1.095.11a evā́ no agne samídhā vr̥dhānó revát pāvaka śrávase ví bhāhi |
1.095.11c tán no mitró váruṇo māmahantām áditiḥ síndhuḥ pr̥thivī́ utá dyaúḥ ||

1.096.01a sá pratnáthā sáhasā jā́yamānaḥ sadyáḥ kā́vyāni báḷ adhatta víśvā |
1.096.01c ā́paś ca mitráṁ dhiṣáṇā ca sādhan devā́ agníṁ dhārayan draviṇodā́m ||

1.096.02a sá pū́rvayā nivídā kavyátāyór imā́ḥ prajā́ ajanayan mánūnām |
1.096.02c vivásvatā cákṣasā dyā́m apáś ca devā́ agníṁ dhārayan draviṇodā́m ||

1.096.03a tám īḷata prathamáṁ yajñasā́dhaṁ víśa ā́rīr ā́hutam r̥ñjasānám |
1.096.03c ūrjáḥ putrám bharatáṁ sr̥prádānuṁ devā́ agníṁ dhārayan draviṇodā́m ||

1.096.04a sá mātaríśvā puruvā́rapuṣṭir vidád gātúṁ tánayāya svarvít |
1.096.04c viśā́ṁ gopā́ janitā́ ródasyor devā́ agníṁ dhārayan draviṇodā́m ||

1.096.05a náktoṣā́sā várṇam āmémyāne dhāpáyete śíśum ékaṁ samīcī́ |
1.096.05c dyā́vākṣā́mā rukmó antár ví bhāti devā́ agníṁ dhārayan draviṇodā́m ||

1.096.06a rāyó budhnáḥ saṁgámano vásūnāṁ yajñásya ketúr manmasā́dhano véḥ |
1.096.06c amr̥tatváṁ rákṣamāṇāsa enaṁ devā́ agníṁ dhārayan draviṇodā́m ||

1.096.07a nū́ ca purā́ ca sádanaṁ rayīṇā́ṁ jātásya ca jā́yamānasya ca kṣā́m |
1.096.07c satáś ca gopā́m bhávataś ca bhū́rer devā́ agníṁ dhārayan draviṇodā́m ||

1.096.08a draviṇodā́ dráviṇasas turásya draviṇodā́ḥ sánarasya prá yaṁsat |
1.096.08c draviṇodā́ vīrávatīm íṣaṁ no draviṇodā́ rāsate dīrghám ā́yuḥ ||

1.096.09a evā́ no agne samídhā vr̥dhānó revát pāvaka śrávase ví bhāhi |
1.096.09c tán no mitró váruṇo māmahantām áditiḥ síndhuḥ pr̥thivī́ utá dyaúḥ ||

1.097.01a ápa naḥ śóśucad aghám ágne śuśugdhy ā́ rayím |
1.097.01c ápa naḥ śóśucad aghám ||

1.097.02a sukṣetriyā́ sugātuyā́ vasūyā́ ca yajāmahe |
1.097.02c ápa naḥ śóśucad aghám ||

1.097.03a prá yád bhándiṣṭha eṣām prā́smā́kāsaś ca sūráyaḥ |
1.097.03c ápa naḥ śóśucad aghám ||

1.097.04a prá yát te agne sūráyo jā́yemahi prá te vayám |
1.097.04c ápa naḥ śóśucad aghám ||

1.097.05a prá yád agnéḥ sáhasvato viśváto yánti bhānávaḥ |
1.097.05c ápa naḥ śóśucad aghám ||

1.097.06a tváṁ hí viśvatomukha viśvátaḥ paribhū́r ási |
1.097.06c ápa naḥ śóśucad aghám ||

1.097.07a dvíṣo no viśvatomukhā́ti nāvéva pāraya |
1.097.07c ápa naḥ śóśucad aghám ||

1.097.08a sá naḥ síndhum iva nāváyā́ti parṣā svastáye |
1.097.08c ápa naḥ śóśucad aghám ||

1.098.01a vaiśvānarásya sumataú syāma rā́jā hí kam bhúvanānām abhiśrī́ḥ |
1.098.01c itó jātó víśvam idáṁ ví caṣṭe vaiśvānaró yatate sū́ryeṇa ||

1.098.02a pr̥ṣṭó diví pr̥ṣṭó agníḥ pr̥thivyā́m pr̥ṣṭó víśvā óṣadhīr ā́ viveśa |
1.098.02c vaiśvānaráḥ sáhasā pr̥ṣṭó agníḥ sá no dívā sá riṣáḥ pātu náktam ||

1.098.03a vaíśvānara táva tát satyám astv asmā́n rā́yo maghávānaḥ sacantām |
1.098.03c tán no mitró váruṇo māmahantām áditiḥ síndhuḥ pr̥thivī́ utá dyaúḥ ||

1.099.01a jātávedase sunavāma sómam arātīyató ní dahāti védaḥ |
1.099.01c sá naḥ parṣad áti durgā́ṇi víśvā nāvéva síndhuṁ duritā́ty agníḥ ||

1.100.01a sá yó vŕ̥ṣā vŕ̥ṣṇyebhiḥ sámokā mahó diváḥ pr̥thivyā́ś ca samrā́ṭ |
1.100.01c satīnásatvā hávyo bháreṣu marútvān no bhavatv índra ūtī́ ||

1.100.02a yásyā́nāptaḥ sū́ryasyeva yā́mo bháre-bhare vr̥trahā́ śúṣmo ásti |
1.100.02c vŕ̥ṣantamaḥ sákhibhiḥ svébhir évair marútvān no bhavatv índra ūtī́ ||

1.100.03a divó ná yásya rétaso dúghānāḥ pánthāso yánti śávasā́parītāḥ |
1.100.03c taráddveṣāḥ sāsahíḥ paúṁsyebhir marútvān no bhavatv índra ūtī́ ||

1.100.04a só áṅgirobhir áṅgirastamo bhūd vŕ̥ṣā vŕ̥ṣabhiḥ sákhibhiḥ sákhā sán |
1.100.04c r̥gmíbhir r̥gmī́ gātúbhir jyéṣṭho marútvān no bhavatv índra ūtī́ ||

1.100.05a sá sūnúbhir ná rudrébhir ŕ̥bhvā nr̥ṣā́hye sāsahvā́m̐ amítrān |
1.100.05c sánīḷebhiḥ śravasyā̀ni tū́rvan marútvān no bhavatv índra ūtī́ ||

1.100.06a sá manyumī́ḥ samádanasya kartā́smā́kebhir nŕ̥bhiḥ sū́ryaṁ sanat |
1.100.06c asmínn áhan sátpatiḥ puruhūtó marútvān no bhavatv índra ūtī́ ||

1.100.07a tám ūtáyo raṇayañ chū́rasātau táṁ kṣémasya kṣitáyaḥ kr̥ṇvata trā́m |
1.100.07c sá víśvasya karúṇasyeśa éko marútvān no bhavatv índra ūtī́ ||

1.100.08a tám apsanta śávasa utsavéṣu náro náram ávase táṁ dhánāya |
1.100.08c só andhé cit támasi jyótir vidan marútvān no bhavatv índra ūtī́ ||

1.100.09a sá savyéna yamati vrā́dhataś cit sá dakṣiṇé sáṁgr̥bhītā kr̥tā́ni |
1.100.09c sá kīríṇā cit sánitā dhánāni marútvān no bhavatv índra ūtī́ ||

1.100.10a sá grā́mebhiḥ sánitā sá ráthebhir vidé víśvābhiḥ kr̥ṣṭíbhir nv àdyá |
1.100.10c sá paúṁsyebhir abhibhū́r áśastīr marútvān no bhavatv índra ūtī́ ||

1.100.11a sá jāmíbhir yát samájāti mīḷhé 'jāmibhir vā puruhūtá évaiḥ |
1.100.11c apā́ṁ tokásya tánayasya jeṣé marútvān no bhavatv índra ūtī́ ||

1.100.12a sá vajrabhŕ̥d dasyuhā́ bhīmá ugráḥ sahásracetāḥ śatánītha ŕ̥bhvā |
1.100.12c camrīṣó ná śávasā pā́ñcajanyo marútvān no bhavatv índra ūtī́ ||

1.100.13a tásya vájraḥ krandati smát svarṣā́ divó ná tveṣó raváthaḥ śímīvān |
1.100.13c táṁ sacante sanáyas táṁ dhánāni marútvān no bhavatv índra ūtī́ ||

1.100.14a yásyā́jasraṁ śávasā mā́nam ukthám paribhujád ródasī viśvátaḥ sīm |
1.100.14c sá pāriṣat krátubhir mandasānó marútvān no bhavatv índra ūtī́ ||

1.100.15a ná yásya devā́ devátā ná mártā ā́paś caná śávaso ántam āpúḥ |
1.100.15c sá praríkvā tvákṣasā kṣmó diváś ca marútvān no bhavatv índra ūtī́ ||

1.100.16a rohíc chyāvā́ sumádaṁśur lalāmī́r dyukṣā́ rāyá r̥jrā́śvasya |
1.100.16c vŕ̥ṣaṇvantam bíbhratī dhūrṣú rátham mandrā́ ciketa nā́huṣīṣu vikṣú ||

1.100.17a etát tyát ta indra vŕ̥ṣṇa uktháṁ vārṣāgirā́ abhí gr̥ṇanti rā́dhaḥ |
1.100.17c r̥jrā́śvaḥ práṣṭibhir ambarī́ṣaḥ sahádevo bháyamānaḥ surā́dhāḥ ||

1.100.18a dásyūñ chímyūm̐ś ca puruhūtá évair hatvā́ pr̥thivyā́ṁ śárvā ní barhīt |
1.100.18c sánat kṣétraṁ sákhibhiḥ śvitnyébhiḥ sánat sū́ryaṁ sánad apáḥ suvájraḥ ||

1.100.19a viśvā́héndro adhivaktā́ no astv áparihvr̥tāḥ sanuyāma vā́jam |
1.100.19c tán no mitró váruṇo māmahantām áditiḥ síndhuḥ pr̥thivī́ utá dyaúḥ ||

1.101.01a prá mandíne pitumád arcatā váco yáḥ kr̥ṣṇágarbhā niráhann r̥jíśvanā |
1.101.01c avasyávo vŕ̥ṣaṇaṁ vájradakṣiṇam marútvantaṁ sakhyā́ya havāmahe ||

1.101.02a yó vyàṁsaṁ jāhr̥ṣāṇéna manyúnā yáḥ śámbaraṁ yó áhan píprum avratám |
1.101.02c índro yáḥ śúṣṇam aśúṣaṁ ny ā́vr̥ṇaṅ marútvantaṁ sakhyā́ya havāmahe ||

1.101.03a yásya dyā́vāpr̥thivī́ paúṁsyam mahád yásya vraté váruṇo yásya sū́ryaḥ |
1.101.03c yásyéndrasya síndhavaḥ sáścati vratám marútvantaṁ sakhyā́ya havāmahe ||

1.101.04a yó áśvānāṁ yó gávāṁ gópatir vaśī́ yá āritáḥ kármaṇi-karmaṇi sthiráḥ |
1.101.04c vīḷóś cid índro yó ásunvato vadhó marútvantaṁ sakhyā́ya havāmahe ||

1.101.05a yó víśvasya jágataḥ prāṇatás pátir yó brahmáṇe prathamó gā́ ávindat |
1.101.05c índro yó dásyūm̐r ádharām̐ avā́tiran marútvantaṁ sakhyā́ya havāmahe ||

1.101.06a yáḥ śū́rebhir hávyo yáś ca bhīrúbhir yó dhā́vadbhir hūyáte yáś ca jigyúbhiḥ |
1.101.06c índraṁ yáṁ víśvā bhúvanābhí saṁdadhúr marútvantaṁ sakhyā́ya havāmahe ||

1.101.07a rudrā́ṇām eti pradíśā vicakṣaṇó rudrébhir yóṣā tanute pr̥thú jráyaḥ |
1.101.07c índram manīṣā́ abhy àrcati śrutám marútvantaṁ sakhyā́ya havāmahe ||

1.101.08a yád vā marutvaḥ paramé sadhásthe yád vāvamé vr̥jáne mādáyāse |
1.101.08c áta ā́ yāhy adhvaráṁ no ácchā tvāyā́ havíś cakr̥mā satyarādhaḥ ||

1.101.09a tvāyéndra sómaṁ suṣumā sudakṣa tvāyā́ havíś cakr̥mā brahmavāhaḥ |
1.101.09c ádhā niyutvaḥ ságaṇo marúdbhir asmín yajñé barhíṣi mādayasva ||

1.101.10a mādáyasva háribhir yé ta indra ví ṣyasva śípre ví sr̥jasva dhéne |
1.101.10c ā́ tvā suśipra hárayo vahantūśán havyā́ni práti no juṣasva ||

1.101.11a marútstotrasya vr̥jánasya gopā́ vayám índreṇa sanuyāma vā́jam |
1.101.11c tán no mitró váruṇo māmahantām áditiḥ síndhuḥ pr̥thivī́ utá dyaúḥ ||

1.102.01a imā́ṁ te dhíyam prá bhare mahó mahī́m asyá stotré dhiṣáṇā yát ta ānajé |
1.102.01c tám utsavé ca prasavé ca sāsahím índraṁ devā́saḥ śávasāmadann ánu ||

1.102.02a asyá śrávo nadyàḥ saptá bibhrati dyā́vākṣā́mā pr̥thivī́ darśatáṁ vápuḥ |
1.102.02c asmé sūryācandramásābhicákṣe śraddhé kám indra carato vitarturám ||

1.102.03a táṁ smā rátham maghavan prā́va sātáye jaítraṁ yáṁ te anumádāma saṁgamé |
1.102.03c ājā́ na indra mánasā puruṣṭuta tvāyádbhyo maghavañ chárma yaccha naḥ ||

1.102.04a vayáṁ jayema tváyā yujā́ vŕ̥tam asmā́kam áṁśam úd avā bháre-bhare |
1.102.04c asmábhyam indra várivaḥ sugáṁ kr̥dhi prá śátrūṇām maghavan vŕ̥ṣṇyā ruja ||

1.102.05a nā́nā hí tvā hávamānā jánā imé dhánānāṁ dhartar ávasā vipanyávaḥ |
1.102.05c asmā́kaṁ smā rátham ā́ tiṣṭha sātáye jaítraṁ hī̀ndra níbhr̥tam mánas táva ||

1.102.06a gojítā bāhū́ ámitakratuḥ simáḥ kárman-karmañ chatámūtiḥ khajaṁkaráḥ |
1.102.06c akalpá índraḥ pratimā́nam ójasā́thā jánā ví hvayante siṣāsávaḥ ||

1.102.07a út te śatā́n maghavann úc ca bhū́yasa út sahásrād ririce kr̥ṣṭíṣu śrávaḥ |
1.102.07c amātráṁ tvā dhiṣáṇā titviṣe mahy ádhā vr̥trā́ṇi jighnase puraṁdara ||

1.102.08a triviṣṭidhā́tu pratimā́nam ójasas tisró bhū́mīr nr̥pate trī́ṇi rocanā́ |
1.102.08c átīdáṁ víśvam bhúvanaṁ vavakṣithāśatrúr indra janúṣā sanā́d asi ||

1.102.09a tvā́ṁ devéṣu prathamáṁ havāmahe tvám babhūtha pŕ̥tanāsu sāsahíḥ |
1.102.09c sémáṁ naḥ kārúm upamanyúm udbhídam índraḥ kr̥ṇotu prasavé rátham puráḥ ||

1.102.10a tváṁ jigetha ná dhánā rurodhithā́rbheṣv ājā́ maghavan mahátsu ca |
1.102.10c tvā́m ugrám ávase sáṁ śiśīmasy áthā na indra hávaneṣu codaya ||

1.102.11a viśvā́héndro adhivaktā́ no astv áparihvr̥tāḥ sanuyāma vā́jam |
1.102.11c tán no mitró váruṇo māmahantām áditiḥ síndhuḥ pr̥thivī́ utá dyaúḥ ||

1.103.01a tát ta indriyám paramám parācaír ádhārayanta kaváyaḥ purédám |
1.103.01c kṣamédám anyád divy ànyád asya sám ī pr̥cyate samanéva ketúḥ ||

1.103.02a sá dhārayat pr̥thivī́m papráthac ca vájreṇa hatvā́ nír apáḥ sasarja |
1.103.02c áhann áhim ábhinad rauhiṇáṁ vy áhan vyàṁsam maghávā śácībhiḥ ||

1.103.03a sá jātū́bharmā śraddádhāna ójaḥ púro vibhindánn acarad ví dā́sīḥ |
1.103.03c vidvā́n vajrin dásyave hetím asyā́ryaṁ sáho vardhayā dyumnám indra ||

1.103.04a tád ūcúṣe mā́nuṣemā́ yugā́ni kīrtényam maghávā nā́ma bíbhrat |
1.103.04c upaprayán dasyuhátyāya vajrī́ yád dha sūnúḥ śrávase nā́ma dadhé ||

1.103.05a tád asyedám paśyatā bhū́ri puṣṭáṁ śrád índrasya dhattana vīryā̀ya |
1.103.05c sá gā́ avindat só avindad áśvān sá óṣadhīḥ só apáḥ sá vánāni ||

1.103.06a bhū́rikarmaṇe vr̥ṣabhā́ya vŕ̥ṣṇe satyáśuṣmāya sunavāma sómam |
1.103.06c yá ādŕ̥tyā paripanthī́va śū́ró 'yajvano vibhájann éti védaḥ ||

1.103.07a tád indra préva vīryàṁ cakartha yát sasántaṁ vájreṇā́bodhayó 'him |
1.103.07c ánu tvā pátnīr hr̥ṣitáṁ váyaś ca víśve devā́so amadann ánu tvā ||

1.103.08a śúṣṇam pípruṁ kúyavaṁ vr̥trám indra yadā́vadhīr ví púraḥ śámbarasya |
1.103.08c tán no mitró váruṇo māmahantām áditiḥ síndhuḥ pr̥thivī́ utá dyaúḥ ||

1.104.01a yóniṣ ṭa indra niṣáde akāri tám ā́ ní ṣīda svānó nā́rvā |
1.104.01c vimúcyā váyo 'vasā́yā́śvān doṣā́ vástor váhīyasaḥ prapitvé ||

1.104.02a ó tyé nára índram ūtáye gur nū́ cit tā́n sadyó ádhvano jagamyāt |
1.104.02c devā́so manyúṁ dā́sasya ścamnan té na ā́ vakṣan suvitā́ya várṇam ||

1.104.03a áva tmánā bharate kétavedā áva tmánā bharate phénam udán |
1.104.03c kṣīréṇa snātaḥ kúyavasya yóṣe haté té syātām pravaṇé śíphāyāḥ ||

1.104.04a yuyópa nā́bhir úparasyāyóḥ prá pū́rvābhis tirate rā́ṣṭi śū́raḥ |
1.104.04c añjasī́ kuliśī́ vīrápatnī páyo hinvānā́ udábhir bharante ||

1.104.05a práti yát syā́ nī́thā́darśi dásyor óko nā́cchā sádanaṁ jānatī́ gāt |
1.104.05c ádha smā no maghavañ carkr̥tā́d ín mā́ no maghéva niṣṣapī́ párā dāḥ ||

1.104.06a sá tváṁ na indra sū́rye só apsv ànāgāstvá ā́ bhaja jīvaśaṁsé |
1.104.06c mā́ntarām bhújam ā́ rīriṣo naḥ śráddhitaṁ te mahatá indriyā́ya ||

1.104.07a ádhā manye śrát te asmā adhāyi vŕ̥ṣā codasva mahaté dhánāya |
1.104.07c mā́ no ákr̥te puruhūta yónāv índra kṣúdhyadbhyo váya āsutíṁ dāḥ ||

1.104.08a mā́ no vadhīr indra mā́ párā dā mā́ naḥ priyā́ bhójanāni prá moṣīḥ |
1.104.08c āṇḍā́ mā́ no maghavañ chakra nír bhen mā́ naḥ pā́trā bhet sahájānuṣāṇi ||

1.104.09a arvā́ṅ éhi sómakāmaṁ tvāhur ayáṁ sutás tásya pibā mádāya |
1.104.09c uruvyácā jaṭhára ā́ vr̥ṣasva pitéva naḥ śr̥ṇuhi hūyámānaḥ ||

1.105.01a candrámā apsv àntár ā́ suparṇó dhāvate diví |
1.105.01c ná vo hiraṇyanemayaḥ padáṁ vindanti vidyuto vittám me asyá rodasī ||

1.105.02a ártham íd vā́ u arthína ā́ jāyā́ yuvate pátim |
1.105.02c tuñjā́te vŕ̥ṣṇyam páyaḥ paridā́ya rásaṁ duhe vittám me asyá rodasī ||

1.105.03a mó ṣú devā adáḥ svàr áva pādi divás pári |
1.105.03c mā́ somyásya śambhúvaḥ śū́ne bhūma kádā caná vittám me asyá rodasī ||

1.105.04a yajñám pr̥cchāmy avamáṁ sá tád dūtó ví vocati |
1.105.04c kvà r̥tám pūrvyáṁ gatáṁ kás tád bibharti nū́tano vittám me asyá rodasī ||

1.105.05a amī́ yé devāḥ sthána triṣv ā́ rocané diváḥ |
1.105.05c kád va r̥táṁ kád ánr̥taṁ kvà pratnā́ va ā́hutir vittám me asyá rodasī ||

1.105.06a kád va r̥tásya dharṇasí kád váruṇasya cákṣaṇam |
1.105.06c kád aryamṇó mahás pathā́ti krāmema dūḍhyò vittám me asyá rodasī ||

1.105.07a aháṁ só asmi yáḥ purā́ suté vádāmi kā́ni cit |
1.105.07c tám mā vyanty ādhyò vŕ̥ko ná tr̥ṣṇájam mr̥gáṁ vittám me asyá rodasī ||

1.105.08a sám mā tapanty abhítaḥ sapátnīr iva párśavaḥ |
1.105.08c mū́ṣo ná śiśnā́ vy àdanti mādhyàḥ stotā́raṁ te śatakrato vittám me asyá rodasī ||

1.105.09a amī́ yé saptá raśmáyas tátrā me nā́bhir ā́tatā |
1.105.09c tritás tád vedāptyáḥ sá jāmitvā́ya rebhati vittám me asyá rodasī ||

1.105.10a amī́ yé páñcokṣáṇo mádhye tasthúr mahó diváḥ |
1.105.10c devatrā́ nú pravā́cyaṁ sadhrīcīnā́ ní vāvr̥tur vittám me asyá rodasī ||

1.105.11a suparṇā́ etá āsate mádhya āródhane diváḥ |
1.105.11c té sedhanti pathó vŕ̥kaṁ tárantaṁ yahvátīr apó vittám me asyá rodasī ||

1.105.12a návyaṁ tád ukthyàṁ hitáṁ dévāsaḥ supravācanám |
1.105.12c r̥tám arṣanti síndhavaḥ satyáṁ tātāna sū́ryo vittám me asyá rodasī ||

1.105.13a ágne táva tyád ukthyàṁ devéṣv asty ā́pyam |
1.105.13c sá naḥ sattó manuṣvád ā́ devā́n yakṣi vidúṣṭaro vittám me asyá rodasī ||

1.105.14a sattó hótā manuṣvád ā́ devā́m̐ ácchā vidúṣṭaraḥ |
1.105.14c agnír havyā́ suṣūdati devó devéṣu médhiro vittám me asyá rodasī ||

1.105.15a bráhmā kr̥ṇoti váruṇo gātuvídaṁ tám īmahe |
1.105.15c vy ū̀rṇoti hr̥dā́ matíṁ návyo jāyatām r̥táṁ vittám me asyá rodasī ||

1.105.16a asaú yáḥ pánthā ādityó diví pravā́cyaṁ kr̥táḥ |
1.105.16c ná sá devā atikráme tám martāso ná paśyatha vittám me asyá rodasī ||

1.105.17a tritáḥ kū́pé 'vahito devā́n havata ūtáye |
1.105.17c tác chuśrāva bŕ̥haspátiḥ kr̥ṇvánn aṁhūraṇā́d urú vittám me asyá rodasī ||

1.105.18a aruṇó mā sakŕ̥d vŕ̥kaḥ pathā́ yántaṁ dadárśa hí |
1.105.18c új jihīte nicā́yyā táṣṭeva pr̥ṣṭyāmayī́ vittám me asyá rodasī ||

1.105.19a enā́ṅgūṣéṇa vayám índravanto 'bhí ṣyāma vr̥jáne sárvavīrāḥ |
1.105.19c tán no mitró váruṇo māmahantām áditiḥ síndhuḥ pr̥thivī́ utá dyaúḥ ||

1.106.01a índram mitráṁ váruṇam agním ūtáye mā́rutaṁ śárdho áditiṁ havāmahe |
1.106.01c ráthaṁ ná durgā́d vasavaḥ sudānavo víśvasmān no áṁhaso níṣ pipartana ||

1.106.02a tá ādityā ā́ gatā sarvátātaye bhūtá devā vr̥tratū́ryeṣu śambhúvaḥ |
1.106.02c ráthaṁ ná durgā́d vasavaḥ sudānavo víśvasmān no áṁhaso níṣ pipartana ||

1.106.03a ávantu naḥ pitáraḥ supravācanā́ utá devī́ deváputre r̥tāvŕ̥dhā |
1.106.03c ráthaṁ ná durgā́d vasavaḥ sudānavo víśvasmān no áṁhaso níṣ pipartana ||

1.106.04a nárāśáṁsaṁ vājínaṁ vājáyann ihá kṣayádvīram pūṣáṇaṁ sumnaír īmahe |
1.106.04c ráthaṁ ná durgā́d vasavaḥ sudānavo víśvasmān no áṁhaso níṣ pipartana ||

1.106.05a bŕ̥haspate sádam ín naḥ sugáṁ kr̥dhi śáṁ yór yát te mánurhitaṁ tád īmahe |
1.106.05c ráthaṁ ná durgā́d vasavaḥ sudānavo víśvasmān no áṁhaso níṣ pipartana ||

1.106.06a índraṁ kútso vr̥traháṇaṁ śácīpátiṁ kāṭé níbāḷha ŕ̥ṣir ahvad ūtáye |
1.106.06c ráthaṁ ná durgā́d vasavaḥ sudānavo víśvasmān no áṁhaso níṣ pipartana ||

1.106.07a devaír no devy áditir ní pātu devás trātā́ trāyatām áprayucchan |
1.106.07c tán no mitró váruṇo māmahantām áditiḥ síndhuḥ pr̥thivī́ utá dyaúḥ ||

1.107.01a yajñó devā́nām práty eti sumnám ā́dityāso bhávatā mr̥ḷayántaḥ |
1.107.01c ā́ vo 'rvā́cī sumatír vavr̥tyād aṁhóś cid yā́ varivovíttarā́sat ||

1.107.02a úpa no devā́ ávasā́ gamantv áṅgirasāṁ sā́mabhiḥ stūyámānāḥ |
1.107.02c índra indriyaír marúto marúdbhir ādityaír no áditiḥ śárma yaṁsat ||

1.107.03a tán na índras tád váruṇas tád agnís tád aryamā́ tát savitā́ cáno dhāt |
1.107.03c tán no mitró váruṇo māmahantām áditiḥ síndhuḥ pr̥thivī́ utá dyaúḥ ||

1.108.01a yá indrāgnī citrátamo rátho vām abhí víśvāni bhúvanāni cáṣṭe |
1.108.01c ténā́ yātaṁ saráthaṁ tasthivā́ṁsā́thā sómasya pibataṁ sutásya ||

1.108.02a yā́vad idám bhúvanaṁ víśvam ásty uruvyácā varimátā gabhīrám |
1.108.02c tā́vām̐ ayám pā́tave sómo astv áram indrāgnī mánase yuvábhyām ||

1.108.03a cakrā́the hí sadhryàṅ nā́ma bhadráṁ sadhrīcīnā́ vr̥trahaṇā utá sthaḥ |
1.108.03c tā́v indrāgnī sadhryàñcā niṣádyā vŕ̥ṣṇaḥ sómasya vr̥ṣaṇā́ vr̥ṣethām ||

1.108.04a sámiddheṣv agníṣv ānajānā́ yatásrucā barhír u tistirāṇā́ |
1.108.04c tīvraíḥ sómaiḥ páriṣiktebhir arvā́g éndrāgnī saumanasā́ya yātam ||

1.108.05a yā́nīndrāgnī cakráthur vīryā̀ṇi yā́ni rūpā́ṇy utá vŕ̥ṣṇyāni |
1.108.05c yā́ vām pratnā́ni sakhyā́ śivā́ni tébhiḥ sómasya pibataṁ sutásya ||

1.108.06a yád ábravam prathamáṁ vāṁ vr̥ṇānò 'yáṁ sómo ásurair no vihávyaḥ |
1.108.06c tā́ṁ satyā́ṁ śraddhā́m abhy ā́ hí yātám áthā sómasya pibataṁ sutásya ||

1.108.07a yád indrāgnī mádathaḥ své duroṇé yád brahmáṇi rā́jani vā yajatrā |
1.108.07c átaḥ pári vr̥ṣaṇāv ā́ hí yātám áthā sómasya pibataṁ sutásya ||

1.108.08a yád indrāgnī yáduṣu turváśeṣu yád druhyúṣv ánuṣu pūrúṣu stháḥ |
1.108.08c átaḥ pári vr̥ṣaṇāv ā́ hí yātám áthā sómasya pibataṁ sutásya ||

1.108.09a yád indrāgnī avamásyām pr̥thivyā́m madhyamásyām paramásyām utá stháḥ |
1.108.09c átaḥ pári vr̥ṣaṇāv ā́ hí yātám áthā sómasya pibataṁ sutásya ||

1.108.10a yád indrāgnī paramásyām pr̥thivyā́m madhyamásyām avamásyām utá stháḥ |
1.108.10c átaḥ pári vr̥ṣaṇāv ā́ hí yātám áthā sómasya pibataṁ sutásya ||

1.108.11a yád indrāgnī diví ṣṭhó yát pr̥thivyā́ṁ yát párvateṣv óṣadhīṣv apsú |
1.108.11c átaḥ pári vr̥ṣaṇāv ā́ hí yātám áthā sómasya pibataṁ sutásya ||

1.108.12a yád indrāgnī úditā sū́ryasya mádhye diváḥ svadháyā mādáyethe |
1.108.12c átaḥ pári vr̥ṣaṇāv ā́ hí yātám áthā sómasya pibataṁ sutásya ||

1.108.13a evéndrāgnī papivā́ṁsā sutásya víśvāsmábhyaṁ sáṁ jayataṁ dhánāni |
1.108.13c tán no mitró váruṇo māmahantām áditiḥ síndhuḥ pr̥thivī́ utá dyaúḥ ||

1.109.01a ví hy ákhyam mánasā vásya icchánn índrāgnī jñāsá utá vā sajātā́n |
1.109.01c nā́nyā́ yuvát prámatir asti máhyaṁ sá vāṁ dhíyaṁ vājayántīm atakṣam ||

1.109.02a áśravaṁ hí bhūridā́vattarā vāṁ víjāmātur utá vā ghā syālā́t |
1.109.02c áthā sómasya práyatī yuvábhyām índrāgnī stómaṁ janayāmi návyam ||

1.109.03a mā́ cchedma raśmī́m̐r íti nā́dhamānāḥ pitr̥̄ṇā́ṁ śaktī́r anuyácchamānāḥ |
1.109.03c indrāgníbhyāṁ káṁ vŕ̥ṣaṇo madanti tā́ hy ádrī dhiṣáṇāyā upásthe ||

1.109.04a yuvā́bhyāṁ devī́ dhiṣáṇā mádāyéndrāgnī sómam uśatī́ sunoti |
1.109.04c tā́v aśvinā bhadrahastā supāṇī ā́ dhāvatam mádhunā pr̥ṅktám apsú ||

1.109.05a yuvā́m indrāgnī vásuno vibhāgé tavástamā śuśrava vr̥trahátye |
1.109.05c tā́v āsádyā barhíṣi yajñé asmín prá carṣaṇī mādayethāṁ sutásya ||

1.109.06a prá carṣaṇíbhyaḥ pr̥tanāháveṣu prá pr̥thivyā́ riricāthe diváś ca |
1.109.06c prá síndhubhyaḥ prá giríbhyo mahitvā́ préndrāgnī víśvā bhúvanā́ty anyā́ ||

1.109.07a ā́ bharataṁ śíkṣataṁ vajrabāhū asmā́m̐ indrāgnī avataṁ śácībhiḥ |
1.109.07c imé nú té raśmáyaḥ sū́ryasya yébhiḥ sapitvám pitáro na ā́san ||

1.109.08a púraṁdarā śíkṣataṁ vajrahastāsmā́m̐ indrāgnī avatam bháreṣu |
1.109.08c tán no mitró váruṇo māmahantām áditiḥ síndhuḥ pr̥thivī́ utá dyaúḥ ||

1.110.01a tatám me ápas tád u tāyate púnaḥ svā́diṣṭhā dhītír ucáthāya śasyate |
1.110.01c ayáṁ samudrá ihá viśvádevyaḥ svā́hākr̥tasya sám u tr̥pṇuta r̥bhavaḥ ||

1.110.02a ābhogáyam prá yád icchánta aítanā́pākāḥ prā́ñco máma ké cid āpáyaḥ |
1.110.02c saúdhanvanāsaś caritásya bhūmánā́gacchata savitúr dāśúṣo gr̥hám ||

1.110.03a tát savitā́ vo 'mr̥tatvám ā́suvad ágohyaṁ yác chraváyanta aítana |
1.110.03c tyáṁ cic camasám ásurasya bhákṣaṇam ékaṁ sántam akr̥ṇutā cáturvayam ||

1.110.04a viṣṭvī́ śámī taraṇitvéna vāgháto mártāsaḥ sánto amr̥tatvám ānaśuḥ |
1.110.04c saudhanvanā́ r̥bhávaḥ sū́racakṣasaḥ saṁvatsaré sám apr̥cyanta dhītíbhiḥ ||

1.110.05a kṣétram iva ví mamus téjanenam̐ ékam pā́tram r̥bhávo jéhamānam |
1.110.05c úpastutā upamáṁ nā́dhamānā ámartyeṣu śráva icchámānāḥ ||

1.110.06a ā́ manīṣā́m antárikṣasya nŕ̥bhyaḥ srucéva ghr̥táṁ juhavāma vidmánā |
1.110.06c taraṇitvā́ yé pitúr asya saścirá r̥bhávo vā́jam aruhan divó rájaḥ ||

1.110.07a r̥bhúr na índraḥ śávasā návīyān r̥bhúr vā́jebhir vásubhir vásur dadíḥ |
1.110.07c yuṣmā́kaṁ devā ávasā́hani priyè 'bhí tiṣṭhema pr̥tsutī́r ásunvatām ||

1.110.08a níś cármaṇa r̥bhavo gā́m apiṁśata sáṁ vatsénāsr̥jatā mātáram púnaḥ |
1.110.08c saúdhanvanāsaḥ svapasyáyā naro jívrī yúvānā pitárākr̥ṇotana ||

1.110.09a vā́jebhir no vā́jasātāv aviḍḍhy r̥bhumā́m̐ indra citrám ā́ darṣi rā́dhaḥ |
1.110.09c tán no mitró váruṇo māmahantām áditiḥ síndhuḥ pr̥thivī́ utá dyaúḥ ||

1.111.01a tákṣan ráthaṁ suvŕ̥taṁ vidmanā́pasas tákṣan hárī indravā́hā vŕ̥ṣaṇvasū |
1.111.01c tákṣan pitŕ̥bhyām r̥bhávo yúvad váyas tákṣan vatsā́ya mātáraṁ sacābhúvam ||

1.111.02a ā́ no yajñā́ya takṣata r̥bhumád váyaḥ krátve dákṣāya suprajā́vatīm íṣam |
1.111.02c yáthā kṣáyāma sárvavīrayā viśā́ tán naḥ śárdhāya dhāsathā sv ìndriyám ||

1.111.03a ā́ takṣata sātím asmábhyam r̥bhavaḥ sātíṁ ráthāya sātím árvate naraḥ |
1.111.03c sātíṁ no jaítrīṁ sám maheta viśváhā jāmím ájāmim pŕ̥tanāsu sakṣáṇim ||

1.111.04a r̥bhukṣáṇam índram ā́ huva ūtáya r̥bhū́n vā́jān marútaḥ sómapītaye |
1.111.04c ubhā́ mitrā́váruṇā nūnám aśvínā té no hinvantu sātáye dhiyé jiṣé ||

1.111.05a r̥bhúr bhárāya sáṁ śiśātu sātíṁ samaryajíd vā́jo asmā́m̐ aviṣṭu |
1.111.05c tán no mitró váruṇo māmahantām áditiḥ síndhuḥ pr̥thivī́ utá dyaúḥ ||

1.112.01a ī́ḷe dyā́vāpr̥thivī́ pūrvácittaye 'gníṁ gharmáṁ surúcaṁ yā́mann iṣṭáye |
1.112.01c yā́bhir bháre kārám áṁśāya jínvathas tā́bhir ū ṣú ūtíbhir aśvinā́ gatam ||

1.112.02a yuvór dānā́ya subhárā asaścáto rátham ā́ tasthur vacasáṁ ná mántave |
1.112.02c yā́bhir dhíyó 'vathaḥ kármann iṣṭáye tā́bhir ū ṣú ūtíbhir aśvinā́ gatam ||

1.112.03a yuváṁ tā́sāṁ divyásya praśā́sane viśā́ṁ kṣayatho amŕ̥tasya majmánā |
1.112.03c yā́bhir dhenúm asvàm pínvatho narā tā́bhir ū ṣú ūtíbhir aśvinā́ gatam ||

1.112.04a yā́bhiḥ párijmā tánayasya majmánā dvimātā́ tūrṣú taráṇir vibhū́ṣati |
1.112.04c yā́bhis trimántur ábhavad vicakṣaṇás tā́bhir ū ṣú ūtíbhir aśvinā́ gatam ||

1.112.05a yā́bhī rebháṁ nívr̥taṁ sitám adbhyá úd vándanam aírayataṁ svàr dr̥śé |
1.112.05c yā́bhiḥ káṇvam prá síṣāsantam ā́vataṁ tā́bhir ū ṣú ūtíbhir aśvinā́ gatam ||

1.112.06a yā́bhir ántakaṁ jásamānam ā́raṇe bhujyúṁ yā́bhir avyathíbhir jijinváthuḥ |
1.112.06c yā́bhiḥ karkándhuṁ vayyàṁ ca jínvathas tā́bhir ū ṣú ūtíbhir aśvinā́ gatam ||

1.112.07a yā́bhiḥ śucantíṁ dhanasā́ṁ suṣaṁsádaṁ taptáṁ gharmám omyā́vantam átraye |
1.112.07c yā́bhiḥ pŕ̥śnigum purukútsam ā́vataṁ tā́bhir ū ṣú ūtíbhir aśvinā́ gatam ||

1.112.08a yā́bhiḥ śácībhir vr̥ṣaṇā parāvŕ̥jam prā́ndháṁ śroṇáṁ cákṣasa étave kr̥tháḥ |
1.112.08c yā́bhir vártikāṁ grasitā́m ámuñcataṁ tā́bhir ū ṣú ūtíbhir aśvinā́ gatam ||

1.112.09a yā́bhiḥ síndhum mádhumantam ásaścataṁ vásiṣṭhaṁ yā́bhir ajarāv ájinvatam |
1.112.09c yā́bhiḥ kútsaṁ śrutáryaṁ náryam ā́vataṁ tā́bhir ū ṣú ūtíbhir aśvinā́ gatam ||

1.112.10a yā́bhir viśpálāṁ dhanasā́m atharvyàṁ sahásramīḷha ājā́v ájinvatam |
1.112.10c yā́bhir váśam aśvyám preṇím ā́vataṁ tā́bhir ū ṣú ūtíbhir aśvinā́ gatam ||

1.112.11a yā́bhiḥ sudānū auśijā́ya vaṇíje dīrgháśravase mádhu kóśo ákṣarat |
1.112.11c kakṣī́vantaṁ stotā́raṁ yā́bhir ā́vataṁ tā́bhir ū ṣú ūtíbhir aśvinā́ gatam ||

1.112.12a yā́bhī rasā́ṁ kṣódasodnáḥ pipinváthur anaśváṁ yā́bhī rátham ā́vataṁ jiṣé |
1.112.12c yā́bhis triśóka usríyā udā́jata tā́bhir ū ṣú ūtíbhir aśvinā́ gatam ||

1.112.13a yā́bhiḥ sū́ryam pariyātháḥ parāváti mandhātā́raṁ kṣaítrapatyeṣv ā́vatam |
1.112.13c yā́bhir vípram prá bharádvājam ā́vataṁ tā́bhir ū ṣú ūtíbhir aśvinā́ gatam ||

1.112.14a yā́bhir mahā́m atithigváṁ kaśojúvaṁ dívodāsaṁ śambarahátya ā́vatam |
1.112.14c yā́bhiḥ pūrbhídye trasádasyum ā́vataṁ tā́bhir ū ṣú ūtíbhir aśvinā́ gatam ||

1.112.15a yā́bhir vamráṁ vipipānám upastutáṁ kalíṁ yā́bhir vittájāniṁ duvasyáthaḥ |
1.112.15c yā́bhir vyàśvam utá pŕ̥thim ā́vataṁ tā́bhir ū ṣú ūtíbhir aśvinā́ gatam ||

1.112.16a yā́bhir narā śayáve yā́bhir átraye yā́bhiḥ purā́ mánave gātúm īṣáthuḥ |
1.112.16c yā́bhiḥ śā́rīr ā́jataṁ syū́maraśmaye tā́bhir ū ṣú ūtíbhir aśvinā́ gatam ||

1.112.17a yā́bhiḥ páṭharvā jáṭharasya majmánāgnír nā́dīdec citá iddhó ájmann ā́ |
1.112.17c yā́bhiḥ śáryātam ávatho mahādhané tā́bhir ū ṣú ūtíbhir aśvinā́ gatam ||

1.112.18a yā́bhir aṅgiro mánasā niraṇyáthó 'graṁ gácchatho vivaré góarṇasaḥ |
1.112.18c yā́bhir mánuṁ śū́ram iṣā́ samā́vataṁ tā́bhir ū ṣú ūtíbhir aśvinā́ gatam ||

1.112.19a yā́bhiḥ pátnīr vimadā́ya nyūháthur ā́ gha vā yā́bhir aruṇī́r áśikṣatam |
1.112.19c yā́bhiḥ sudā́sa ūháthuḥ sudevyàṁ tā́bhir ū ṣú ūtíbhir aśvinā́ gatam ||

1.112.20a yā́bhiḥ śáṁtātī bhávatho dadāśúṣe bhujyúṁ yā́bhir ávatho yā́bhir ádhrigum |
1.112.20c omyā́vatīṁ subhárām r̥tastúbhaṁ tā́bhir ū ṣú ūtíbhir aśvinā́ gatam ||

1.112.21a yā́bhiḥ kr̥śā́num ásane duvasyátho javé yā́bhir yū́no árvantam ā́vatam |
1.112.21c mádhu priyám bharatho yát saráḍbhyas tā́bhir ū ṣú ūtíbhir aśvinā́ gatam ||

1.112.22a yā́bhir náraṁ goṣuyúdhaṁ nr̥ṣā́hye kṣétrasya sātā́ tánayasya jínvathaḥ |
1.112.22c yā́bhī ráthām̐ ávatho yā́bhir árvatas tā́bhir ū ṣú ūtíbhir aśvinā́ gatam ||

1.112.23a yā́bhiḥ kútsam ārjuneyáṁ śatakratū prá turvī́tim prá ca dabhī́tim ā́vatam |
1.112.23c yā́bhir dhvasántim puruṣántim ā́vataṁ tā́bhir ū ṣú ūtíbhir aśvinā́ gatam ||

1.112.24a ápnasvatīm aśvinā vā́cam asmé kr̥táṁ no dasrā vr̥ṣaṇā manīṣā́m |
1.112.24c adyūtyé 'vase ní hvaye vāṁ vr̥dhé ca no bhavataṁ vā́jasātau ||

1.112.25a dyúbhir aktúbhiḥ pári pātam asmā́n áriṣṭebhir aśvinā saúbhagebhiḥ |
1.112.25c tán no mitró váruṇo māmahantām áditiḥ síndhuḥ pr̥thivī́ utá dyaúḥ ||

1.113.01a idáṁ śréṣṭhaṁ jyótiṣāṁ jyótir ā́gāc citráḥ praketó ajaniṣṭa víbhvā |
1.113.01c yáthā prásūtā savitúḥ savā́yam̐ evā́ rā́try uṣáse yónim āraik ||

1.113.02a rúśadvatsā rúśatī śvetyā́gād ā́raig u kr̥ṣṇā́ sádanāny asyāḥ |
1.113.02c samānábandhū amŕ̥te anūcī́ dyā́vā várṇaṁ carata āmināné ||

1.113.03a samānó ádhvā svásror anantás tám anyā́nyā carato deváśiṣṭe |
1.113.03c ná methete ná tasthatuḥ suméke náktoṣā́sā sámanasā vírūpe ||

1.113.04a bhā́svatī netrī́ sūnŕ̥tānām áceti citrā́ ví dúro na āvaḥ |
1.113.04c prā́rpyā jágad vy ù no rāyó akhyad uṣā́ ajīgar bhúvanāni víśvā ||

1.113.05a jihmaśyè cáritave maghóny ābhogáya iṣṭáye rāyá u tvam |
1.113.05c dabhrám páśyadbhya urviyā́ vicákṣa uṣā́ ajīgar bhúvanāni víśvā ||

1.113.06a kṣatrā́ya tvaṁ śrávase tvam mahīyā́ iṣṭáye tvam ártham iva tvam ityaí |
1.113.06c vísadr̥śā jīvitā́bhipracákṣa uṣā́ ajīgar bhúvanāni víśvā ||

1.113.07a eṣā́ divó duhitā́ práty adarśi vyucchántī yuvatíḥ śukrávāsāḥ |
1.113.07c víśvasyéśānā pā́rthivasya vásva úṣo adyéhá subhage vy ùccha ||

1.113.08a parāyatīnā́m ánv eti pā́tha āyatīnā́m prathamā́ śáśvatīnām |
1.113.08c vyucchántī jīvám udīráyanty uṣā́ mr̥táṁ káṁ caná bodháyantī ||

1.113.09a úṣo yád agníṁ samídhe cakártha ví yád ā́vaś cákṣasā sū́ryasya |
1.113.09c yán mā́nuṣān yakṣyámāṇām̐ ájīgas tád devéṣu cakr̥ṣe bhadrám ápnaḥ ||

1.113.10a kíyāty ā́ yát samáyā bhávāti yā́ vyūṣúr yā́ś ca nūnáṁ vyucchā́n |
1.113.10c ánu pū́rvāḥ kr̥pate vāvaśānā́ pradī́dhyānā jóṣam anyā́bhir eti ||

1.113.11a īyúṣ ṭé yé pū́rvatarām ápaśyan vyucchántīm uṣásam mártyāsaḥ |
1.113.11c asmā́bhir ū nú praticákṣyābhūd ó té yanti yé aparī́ṣu páśyān ||

1.113.12a yāvayáddveṣā r̥tapā́ r̥tejā́ḥ sumnāvárī sūnŕ̥tā īráyantī |
1.113.12c sumaṅgalī́r bíbhratī devávītim ihā́dyóṣaḥ śréṣṭhatamā vy ùccha ||

1.113.13a śáśvat puróṣā́ vy ùvāsa devy átho adyédáṁ vy ā̀vo maghónī |
1.113.13c átho vy ùcchād úttarām̐ ánu dyū́n ajárāmŕ̥tā carati svadhā́bhiḥ ||

1.113.14a vy àñjíbhir divá ā́tāsv adyaud ápa kr̥ṣṇā́ṁ nirṇíjaṁ devy ā̀vaḥ |
1.113.14c prabodháyanty aruṇébhir áśvair óṣā́ yāti suyújā ráthena ||

1.113.15a āváhantī póṣyā vā́ryāṇi citráṁ ketúṁ kr̥ṇute cékitānā |
1.113.15c īyúṣīṇām upamā́ śáśvatīnāṁ vibhātīnā́m prathamóṣā́ vy àśvait ||

1.113.16a úd īrdhvaṁ jīvó ásur na ā́gād ápa prā́gāt táma ā́ jyótir eti |
1.113.16c ā́raik pánthāṁ yā́tave sū́ryāyā́ganma yátra pratiránta ā́yuḥ ||

1.113.17a syū́manā vācá úd iyarti váhniḥ stávāno rebhá uṣáso vibhātī́ḥ |
1.113.17c adyā́ tád uccha gr̥ṇaté maghony asmé ā́yur ní didīhi prajā́vat ||

1.113.18a yā́ gómatīr uṣásaḥ sárvavīrā vyucchánti dāśúṣe mártyāya |
1.113.18c vāyór iva sūnŕ̥tānām udarké tā́ aśvadā́ aśnavat somasútvā ||

1.113.19a mātā́ devā́nām áditer ánīkaṁ yajñásya ketúr br̥hatī́ ví bhāhi |
1.113.19c praśastikŕ̥d bráhmaṇe no vy ùcchā́ no jáne janaya viśvavāre ||

1.113.20a yác citrám ápna uṣáso váhantījānā́ya śaśamānā́ya bhadrám |
1.113.20c tán no mitró váruṇo māmahantām áditiḥ síndhuḥ pr̥thivī́ utá dyaúḥ ||

1.114.01a imā́ rudrā́ya taváse kapardíne kṣayádvīrāya prá bharāmahe matī́ḥ |
1.114.01c yáthā śám ásad dvipáde cátuṣpade víśvam puṣṭáṁ grā́me asmínn anāturám ||

1.114.02a mr̥ḷā́ no rudrotá no máyas kr̥dhi kṣayádvīrāya námasā vidhema te |
1.114.02c yác cháṁ ca yóś ca mánur āyejé pitā́ tád aśyāma táva rudra práṇītiṣu ||

1.114.03a aśyā́ma te sumatíṁ devayajyáyā kṣayádvīrasya táva rudra mīḍhvaḥ |
1.114.03c sumnāyánn íd víśo asmā́kam ā́ carā́riṣṭavīrā juhavāma te havíḥ ||

1.114.04a tveṣáṁ vayáṁ rudráṁ yajñasā́dhaṁ vaṅkúṁ kavím ávase ní hvayāmahe |
1.114.04c āré asmád daívyaṁ héḷo asyatu sumatím íd vayám asyā́ vr̥ṇīmahe ||

1.114.05a divó varāhám aruṣáṁ kapardínaṁ tveṣáṁ rūpáṁ námasā ní hvayāmahe |
1.114.05c háste bíbhrad bheṣajā́ vā́ryāṇi śárma várma cchardír asmábhyaṁ yaṁsat ||

1.114.06a idám pitré marútām ucyate vácaḥ svādóḥ svā́dīyo rudrā́ya várdhanam |
1.114.06c rā́svā ca no amr̥ta martabhójanaṁ tmáne tokā́ya tánayāya mr̥ḷa ||

1.114.07a mā́ no mahā́ntam utá mā́ no arbhakám mā́ na úkṣantam utá mā́ na ukṣitám |
1.114.07c mā́ no vadhīḥ pitáram mótá mātáram mā́ naḥ priyā́s tanvò rudra rīriṣaḥ ||

1.114.08a mā́ nas toké tánaye mā́ na āyaú mā́ no góṣu mā́ no áśveṣu rīriṣaḥ |
1.114.08c vīrā́n mā́ no rudra bhāmitó vadhīr havíṣmantaḥ sádam ít tvā havāmahe ||

1.114.09a úpa te stómān paśupā́ ivā́karaṁ rā́svā pitar marutāṁ sumnám asmé |
1.114.09c bhadrā́ hí te sumatír mr̥ḷayáttamā́thā vayám áva ít te vr̥ṇīmahe ||

1.114.10a āré te goghnám utá pūruṣaghnáṁ kṣáyadvīra sumnám asmé te astu |
1.114.10c mr̥ḷā́ ca no ádhi ca brūhi devā́dhā ca naḥ śárma yaccha dvibárhāḥ ||

1.114.11a ávocāma námo asmā avasyávaḥ śr̥ṇótu no hávaṁ rudró marútvān |
1.114.11c tán no mitró váruṇo māmahantām áditiḥ síndhuḥ pr̥thivī́ utá dyaúḥ ||

1.115.01a citráṁ devā́nām úd agād ánīkaṁ cákṣur mitrásya váruṇasyāgnéḥ |
1.115.01c ā́prā dyā́vāpr̥thivī́ antárikṣaṁ sū́rya ātmā́ jágatas tasthúṣaś ca ||

1.115.02a sū́ryo devī́m uṣásaṁ rócamānām máryo ná yóṣām abhy èti paścā́t |
1.115.02c yátrā náro devayánto yugā́ni vitanvaté práti bhadrā́ya bhadrám ||

1.115.03a bhadrā́ áśvā harítaḥ sū́ryasya citrā́ étagvā anumā́dyāsaḥ |
1.115.03c namasyánto divá ā́ pr̥ṣṭhám asthuḥ pári dyā́vāpr̥thivī́ yanti sadyáḥ ||

1.115.04a tát sū́ryasya devatváṁ tán mahitvám madhyā́ kártor vítataṁ sáṁ jabhāra |
1.115.04c yadéd áyukta harítaḥ sadhásthād ā́d rā́trī vā́sas tanute simásmai ||

1.115.05a tán mitrásya váruṇasyābhicákṣe sū́ryo rūpáṁ kr̥ṇute dyór upásthe |
1.115.05c anantám anyád rúśad asya pā́jaḥ kr̥ṣṇám anyád dharítaḥ sám bharanti ||

1.115.06a adyā́ devā úditā sū́ryasya nír áṁhasaḥ pipr̥tā́ nír avadyā́t |
1.115.06c tán no mitró váruṇo māmahantām áditiḥ síndhuḥ pr̥thivī́ utá dyaúḥ ||

1.116.01a nā́satyābhyām barhír iva prá vr̥ñje stómām̐ iyarmy abhríyeva vā́taḥ |
1.116.01c yā́v árbhagāya vimadā́ya jāyā́ṁ senājúvā nyūhátū ráthena ||

1.116.02a vīḷupátmabhir āśuhémabhir vā devā́nāṁ vā jūtíbhiḥ śā́śadānā |
1.116.02c tád rā́sabho nāsatyā sahásram ājā́ yamásya pradháne jigāya ||

1.116.03a túgro ha bhujyúm aśvinodameghé rayíṁ ná káś cin mamr̥vā́m̐ ávāhāḥ |
1.116.03c tám ūhathur naubhír ātmanvátībhir antarikṣaprúdbhir ápodakābhiḥ ||

1.116.04a tisráḥ kṣápas trír áhātivrájadbhir nā́satyā bhujyúm ūhathuḥ pataṁgaíḥ |
1.116.04c samudrásya dhánvann ārdrásya pāré tribhī́ ráthaiḥ śatápadbhiḥ ṣáḷaśvaiḥ ||

1.116.05a anārambhaṇé tád avīrayethām anāsthāné agrabhaṇé samudré |
1.116.05c yád aśvinā ūháthur bhujyúm ástaṁ śatā́ritrāṁ nā́vam ātasthivā́ṁsam ||

1.116.06a yám aśvinā dadáthuḥ śvetám áśvam aghā́śvāya śáśvad ít svastí |
1.116.06c tád vāṁ dātrám máhi kīrtényam bhūt paidvó vājī́ sádam íd dhávyo aryáḥ ||

1.116.07a yuváṁ narā stuvaté pajriyā́ya kakṣī́vate aradatam púraṁdhim |
1.116.07c kārotarā́c chaphā́d áśvasya vŕ̥ṣṇaḥ śatáṁ kumbhā́m̐ asiñcataṁ súrāyāḥ ||

1.116.08a himénāgníṁ ghraṁsám avārayethām pitumátīm ū́rjam asmā adhattam |
1.116.08c r̥bī́se átrim aśvinā́vanītam ún ninyathuḥ sárvagaṇaṁ svastí ||

1.116.09a párāvatáṁ nāsatyānudethām uccā́budhnaṁ cakrathur jihmábāram |
1.116.09c kṣárann ā́po ná pāyánāya rāyé sahásrāya tŕ̥ṣyate gótamasya ||

1.116.10a jujurúṣo nāsatyotá vavrím prā́muñcataṁ drāpím iva cyávānāt |
1.116.10c prā́tirataṁ jahitásyā́yur dasrā́d ít pátim akr̥ṇutaṁ kanī́nām ||

1.116.11a tád vāṁ narā śáṁsyaṁ rā́dhyaṁ cābhiṣṭimán nāsatyā várūtham |
1.116.11c yád vidvā́ṁsā nidhím ivā́pagūḷham úd darśatā́d ūpáthur vándanāya ||

1.116.12a tád vāṁ narā sanáye dáṁsa ugrám āvíṣ kr̥ṇomi tanyatúr ná vr̥ṣṭím |
1.116.12c dadhyáṅ ha yán mádhv ātharvaṇó vām áśvasya śīrṣṇā́ prá yád īm uvā́ca ||

1.116.13a ájohavīn nāsatyā karā́ vām mahé yā́man purubhujā púraṁdhiḥ |
1.116.13c śrutáṁ tác chā́sur iva vadhrimatyā́ híraṇyahastam aśvināv adattam ||

1.116.14a āsnó vŕ̥kasya vártikām abhī́ke yuváṁ narā nāsatyāmumuktam |
1.116.14c utó kavím purubhujā yuváṁ ha kŕ̥pamāṇam akr̥ṇutaṁ vicákṣe ||

1.116.15a carítraṁ hí vér ivā́cchedi parṇám ājā́ khelásya páritakmyāyām |
1.116.15c sadyó jáṅghām ā́yasīṁ viśpálāyai dháne hité sártave práty adhattam ||

1.116.16a śatám meṣā́n vr̥kyè cakṣadānám r̥jrā́śvaṁ tám pitā́ndháṁ cakāra |
1.116.16c tásmā akṣī́ nāsatyā vicákṣa ā́dhattaṁ dasrā bhiṣajāv anarván ||

1.116.17a ā́ vāṁ ráthaṁ duhitā́ sū́ryasya kā́rṣmevātiṣṭhad árvatā jáyantī |
1.116.17c víśve devā́ ánv amanyanta hr̥dbhíḥ sám u śriyā́ nāsatyā sacethe ||

1.116.18a yád áyātaṁ dívodāsāya vartír bharádvājāyāśvinā háyantā |
1.116.18c revád uvāha sacanó rátho vāṁ vr̥ṣabháś ca śiṁśumā́raś ca yuktā́ ||

1.116.19a rayíṁ sukṣatráṁ svapatyám ā́yuḥ suvī́ryaṁ nāsatyā váhantā |
1.116.19c ā́ jahnā́vīṁ sámanasópa vā́jais trír áhno bhāgáṁ dádhatīm ayātam ||

1.116.20a páriviṣṭaṁ jāhuṣáṁ viśvátaḥ sīṁ sugébhir náktam ūhathū rájobhiḥ |
1.116.20c vibhindúnā nāsatyā ráthena ví párvatām̐ ajarayū́ ayātam ||

1.116.21a ékasyā vástor āvataṁ ráṇāya váśam aśvinā sanáye sahásrā |
1.116.21c nír ahataṁ ducchúnā índravantā pr̥thuśrávaso vr̥ṣaṇāv árātīḥ ||

1.116.22a śarásya cid ārcatkásyāvatā́d ā́ nīcā́d uccā́ cakrathuḥ pā́tave vā́ḥ |
1.116.22c śayáve cin nāsatyā śácībhir jásuraye staryàm pipyathur gā́m ||

1.116.23a avasyaté stuvaté kr̥ṣṇiyā́ya r̥jūyaté nāsatyā śácībhiḥ |
1.116.23c paśúṁ ná naṣṭám iva dárśanāya viṣṇāpvàṁ dadathur víśvakāya ||

1.116.24a dáśa rā́trīr áśivenā náva dyū́n ávanaddhaṁ śnathitám apsv àntáḥ |
1.116.24c víprutaṁ rebhám udáni právr̥ktam ún ninyathuḥ sómam iva sruvéṇa ||

1.116.25a prá vāṁ dáṁsāṁsy aśvināv avocam asyá pátiḥ syāṁ sugávaḥ suvī́raḥ |
1.116.25c utá páśyann aśnuván dīrghám ā́yur ástam ivéj jarimā́ṇaṁ jagamyām ||

1.117.01a mádhvaḥ sómasyāśvinā mádāya pratnó hótā́ vivāsate vām |
1.117.01c barhíṣmatī rātír víśritā gī́r iṣā́ yātaṁ nāsatyópa vā́jaiḥ ||

1.117.02a yó vām aśvinā mánaso jávīyān ráthaḥ sváśvo víśa ājígāti |
1.117.02c yéna gácchathaḥ sukŕ̥to duroṇáṁ téna narā vartír asmábhyaṁ yātam ||

1.117.03a ŕ̥ṣiṁ narāv áṁhasaḥ pā́ñcajanyam r̥bī́sād átrim muñcatho gaṇéna |
1.117.03c minántā dásyor áśivasya māyā́ anupūrváṁ vr̥ṣaṇā codáyantā ||

1.117.04a áśvaṁ ná gūḷhám aśvinā durévair ŕ̥ṣiṁ narā vr̥ṣaṇā rebhám apsú |
1.117.04c sáṁ táṁ riṇītho víprutaṁ dáṁsobhir ná vāṁ jūryanti pūrvyā́ kr̥tā́ni ||

1.117.05a suṣupvā́ṁsaṁ ná nírr̥ter upásthe sū́ryaṁ ná dasrā támasi kṣiyántam |
1.117.05c śubhé rukmáṁ ná darśatáṁ níkhātam úd ūpathur aśvinā vándanāya ||

1.117.06a tád vāṁ narā śáṁsyam pajriyéṇa kakṣī́vatā nāsatyā párijman |
1.117.06c śaphā́d áśvasya vājíno jánāya śatáṁ kumbhā́m̐ asiñcatam mádhūnām ||

1.117.07a yuváṁ narā stuvaté kr̥ṣṇiyā́ya viṣṇāpvàṁ dadathur víśvakāya |
1.117.07c ghóṣāyai cit pitr̥ṣáde duroṇé pátiṁ jū́ryantyā aśvināv adattam ||

1.117.08a yuváṁ śyā́vāya rúśatīm adattam maháḥ kṣoṇásyāśvinā káṇvāya |
1.117.08c pravā́cyaṁ tád vr̥ṣaṇā kr̥táṁ vāṁ yán nārṣadā́ya śrávo adhyádhattam ||

1.117.09a purū́ várpāṁsy aśvinā dádhānā ní pedáva ūhathur āśúm áśvam |
1.117.09c sahasrasā́ṁ vājínam ápratītam ahihánaṁ śravasyàṁ tárutram ||

1.117.10a etā́ni vāṁ śravasyā̀ sudānū bráhmāṅgūṣáṁ sádanaṁ ródasyoḥ |
1.117.10c yád vām pajrā́so aśvinā hávante yātám iṣā́ ca vidúṣe ca vā́jam ||

1.117.11a sūnór mā́nenāśvinā gr̥ṇānā́ vā́jaṁ víprāya bhuraṇā rádantā |
1.117.11c agástye bráhmaṇā vāvr̥dhānā́ sáṁ viśpálāṁ nāsatyāriṇītam ||

1.117.12a kúha yā́ntā suṣṭutíṁ kāvyásya dívo napātā vr̥ṣaṇā śayutrā́ |
1.117.12c híraṇyasyeva kaláśaṁ níkhātam úd ūpathur daśamé aśvinā́han ||

1.117.13a yuváṁ cyávānam aśvinā járantam púnar yúvānaṁ cakrathuḥ śácībhiḥ |
1.117.13c yuvó ráthaṁ duhitā́ sū́ryasya sahá śriyā́ nāsatyāvr̥ṇīta ||

1.117.14a yuváṁ túgrāya pūrvyébhir évaiḥ punarmanyā́v abhavataṁ yuvānā |
1.117.14c yuvám bhujyúm árṇaso níḥ samudrā́d víbhir ūhathur r̥jrébhir áśvaiḥ ||

1.117.15a ájohavīd aśvinā taugryó vām próḷhaḥ samudrám avyathír jaganvā́n |
1.117.15c níṣ ṭám ūhathuḥ suyújā ráthena mánojavasā vr̥ṣaṇā svastí ||

1.117.16a ájohavīd aśvinā vártikā vām āsnó yát sīm ámuñcataṁ vŕ̥kasya |
1.117.16c ví jayúṣā yayathuḥ sā́nv ádrer jātáṁ viṣvā́co ahataṁ viṣéṇa ||

1.117.17a śatám meṣā́n vr̥kyè māmahānáṁ támaḥ práṇītam áśivena pitrā́ |
1.117.17c ā́kṣī́ r̥jrā́śve aśvināv adhattaṁ jyótir andhā́ya cakrathur vicákṣe ||

1.117.18a śunám andhā́ya bháram ahvayat sā́ vr̥kī́r aśvinā vr̥ṣaṇā náréti |
1.117.18c jāráḥ kanī́na iva cakṣadāná r̥jrā́śvaḥ śatám ékaṁ ca meṣā́n ||

1.117.19a mahī́ vām ūtír aśvinā mayobhū́r utá srāmáṁ dhiṣṇyā sáṁ riṇīthaḥ |
1.117.19c áthā yuvā́m íd ahvayat púraṁdhir ā́gacchataṁ sīṁ vr̥ṣaṇāv ávobhiḥ ||

1.117.20a ádhenuṁ dasrā staryàṁ víṣaktām ápinvataṁ śayáve aśvinā gā́m |
1.117.20c yuváṁ śácībhir vimadā́ya jāyā́ṁ ny ū̀hathuḥ purumitrásya yóṣām ||

1.117.21a yávaṁ vŕ̥keṇāśvinā vápantéṣaṁ duhántā mánuṣāya dasrā |
1.117.21c abhí dásyum bákureṇā dhámantorú jyótiś cakrathur ā́ryāya ||

1.117.22a ātharvaṇā́yāśvinā dadhīcé 'śvyaṁ śíraḥ práty airayatam |
1.117.22c sá vām mádhu prá vocad r̥tāyán tvāṣṭráṁ yád dasrāv apikakṣyàṁ vām ||

1.117.23a sádā kavī sumatím ā́ cake vāṁ víśvā dhíyo aśvinā prā́vatam me |
1.117.23c asmé rayíṁ nāsatyā br̥hántam apatyasā́caṁ śrútyaṁ rarāthām ||

1.117.24a híraṇyahastam aśvinā rárāṇā putráṁ narā vadhrimatyā́ adattam |
1.117.24c trídhā ha śyā́vam aśvinā víkastam új jīvása airayataṁ sudānū ||

1.117.25a etā́ni vām aśvinā vīryā̀ṇi prá pūrvyā́ṇy āyávo 'vocan |
1.117.25c bráhma kr̥ṇvánto vr̥ṣaṇā yuvábhyāṁ suvī́rāso vidátham ā́ vadema ||

1.118.01a ā́ vāṁ rátho aśvinā śyenápatvā sumr̥ḷīkáḥ svávām̐ yātv arvā́ṅ |
1.118.01c yó mártyasya mánaso jávīyān trivandhuró vr̥ṣaṇā vā́taraṁhāḥ ||

1.118.02a trivandhuréṇa trivŕ̥tā ráthena tricakréṇa suvŕ̥tā́ yātam arvā́k |
1.118.02c pínvataṁ gā́ jínvatam árvato no vardháyatam aśvinā vīrám asmé ||

1.118.03a pravádyāmanā suvŕ̥tā ráthena dásrāv imáṁ śr̥ṇutaṁ ślókam ádreḥ |
1.118.03c kím aṅgá vām práty ávartiṁ gámiṣṭhāhúr víprāso aśvinā purājā́ḥ ||

1.118.04a ā́ vāṁ śyenā́so aśvinā vahantu ráthe yuktā́sa āśávaḥ pataṁgā́ḥ |
1.118.04c yé aptúro divyā́so ná gŕ̥dhrā abhí práyo nāsatyā váhanti ||

1.118.05a ā́ vāṁ ráthaṁ yuvatís tiṣṭhad átra juṣṭvī́ narā duhitā́ sū́ryasya |
1.118.05c pári vām áśvā vápuṣaḥ pataṁgā́ váyo vahantv aruṣā́ abhī́ke ||

1.118.06a úd vándanam airataṁ daṁsánābhir úd rebháṁ dasrā vr̥ṣaṇā śácībhiḥ |
1.118.06c níṣ ṭaugryám pārayathaḥ samudrā́t púnaś cyávānaṁ cakrathur yúvānam ||

1.118.07a yuvám átrayé 'vanītāya taptám ū́rjam omā́nam aśvināv adhattam |
1.118.07c yuváṁ káṇvāyā́piriptāya cákṣuḥ práty adhattaṁ suṣṭutíṁ jujuṣāṇā́ ||

1.118.08a yuváṁ dhenúṁ śayáve nādhitā́yā́pinvatam aśvinā pūrvyā́ya |
1.118.08c ámuñcataṁ vártikām áṁhaso níḥ práti jáṅghāṁ viśpálāyā adhattam ||

1.118.09a yuváṁ śvetám pedáva índrajūtam ahihánam aśvinādattam áśvam |
1.118.09c johū́tram aryó abhíbhūtim ugráṁ sahasrasā́ṁ vŕ̥ṣaṇaṁ vīḍvàṅgam ||

1.118.10a tā́ vāṁ narā sv ávase sujātā́ hávāmahe aśvinā nā́dhamānāḥ |
1.118.10c ā́ na úpa vásumatā ráthena gíro juṣāṇā́ suvitā́ya yātam ||

1.118.11a ā́ śyenásya jávasā nū́tanenāsmé yātaṁ nāsatyā sajóṣāḥ |
1.118.11c háve hí vām aśvinā rātáhavyaḥ śaśvattamā́yā uṣáso vyùṣṭau ||

1.119.01a ā́ vāṁ rátham purumāyám manojúvaṁ jīrā́śvaṁ yajñíyaṁ jīváse huve |
1.119.01c sahásraketuṁ vanínaṁ śatádvasuṁ śruṣṭīvā́naṁ varivodhā́m abhí práyaḥ ||

1.119.02a ūrdhvā́ dhītíḥ práty asya práyāmany ádhāyi śásman sám ayanta ā́ díśaḥ |
1.119.02c svádāmi gharmám práti yanty ūtáya ā́ vām ūrjā́nī rátham aśvināruhat ||

1.119.03a sáṁ yán mitháḥ paspr̥dhānā́so ágmata śubhé makhā́ ámitā jāyávo ráṇe |
1.119.03c yuvór áha pravaṇé cekite rátho yád aśvinā váhathaḥ sūrím ā́ váram ||

1.119.04a yuvám bhujyúm bhurámāṇaṁ víbhir gatáṁ sváyuktibhir niváhantā pitŕ̥bhya ā́ |
1.119.04c yāsiṣṭáṁ vartír vr̥ṣaṇā vijenyàṁ dívodāsāya máhi ceti vām ávaḥ ||

1.119.05a yuvór aśvinā vápuṣe yuvāyújaṁ ráthaṁ vā́ṇī yematur asya śárdhyam |
1.119.05c ā́ vām patitváṁ sakhyā́ya jagmúṣī yóṣāvr̥ṇīta jényā yuvā́m pátī ||

1.119.06a yuváṁ rebhám páriṣūter uruṣyatho hiména gharmám páritaptam átraye |
1.119.06c yuváṁ śayór avasám pipyathur gávi prá dīrghéṇa vándanas tāry ā́yuṣā ||

1.119.07a yuváṁ vándanaṁ nírr̥taṁ jaraṇyáyā ráthaṁ ná dasrā karaṇā́ sám invathaḥ |
1.119.07c kṣétrād ā́ vípraṁ janatho vipanyáyā prá vām átra vidhaté daṁsánā bhuvat ||

1.119.08a ágacchataṁ kŕ̥pamāṇam parāváti pitúḥ svásya tyájasā níbādhitam |
1.119.08c svàrvatīr itá ūtī́r yuvór áha citrā́ abhī́ke abhavann abhíṣṭayaḥ ||

1.119.09a utá syā́ vām mádhuman mákṣikārapan máde sómasyauśijó huvanyati |
1.119.09c yuváṁ dadhīcó mána ā́ vivāsathó 'thā śíraḥ práti vām áśvyaṁ vadat ||

1.119.10a yuvám pedáve puruvā́ram aśvinā spr̥dhā́ṁ śvetáṁ tarutā́raṁ duvasyathaḥ |
1.119.10c śáryair abhídyum pŕ̥tanāsu duṣṭáraṁ carkŕ̥tyam índram iva carṣaṇīsáham ||

1.120.01a kā́ rādhad dhótrāśvinā vāṁ kó vāṁ jóṣa ubháyoḥ |
1.120.01c kathā́ vidhāty ápracetāḥ ||

1.120.02a vidvā́ṁsāv íd dúraḥ pr̥cched ávidvān itthā́paro acetā́ḥ |
1.120.02c nū́ cin nú márte ákrau ||

1.120.03a tā́ vidvā́ṁsā havāmahe vāṁ tā́ no vidvā́ṁsā mánma vocetam adyá |
1.120.03c prā́rcad dáyamāno yuvā́kuḥ ||

1.120.04a ví pr̥cchāmi pākyā̀ ná devā́n váṣaṭkr̥tasyādbhutásya dasrā |
1.120.04c pātáṁ ca sáhyaso yuváṁ ca rábhyaso naḥ ||

1.120.05a prá yā́ ghóṣe bhŕ̥gavāṇe ná śóbhe yáyā vācā́ yájati pajriyó vām |
1.120.05c praíṣayúr ná vidvā́n ||

1.120.06a śrutáṁ gāyatráṁ tákavānasyāháṁ cid dhí rirébhāśvinā vām |
1.120.06c ā́kṣī́ śubhas patī dán ||

1.120.07a yuváṁ hy ā́stam mahó rán yuváṁ vā yán nirátataṁsatam |
1.120.07c tā́ no vasū sugopā́ syātam pātáṁ no vŕ̥kād aghāyóḥ ||

1.120.08a mā́ kásmai dhātam abhy àmitríṇe no mā́kútrā no gr̥hébhyo dhenávo guḥ |
1.120.08c stanābhújo áśiśvīḥ ||

1.120.09a duhīyán mitrádhitaye yuvā́ku rāyé ca no mimītáṁ vā́javatyai |
1.120.09c iṣé ca no mimītaṁ dhenumátyai ||

1.120.10a aśvínor asanaṁ rátham anaśváṁ vājínīvatoḥ |
1.120.10c ténāhám bhū́ri cākana ||

1.120.11a ayáṁ samaha mā tanūhyā́te jánām̐ ánu |
1.120.11c somapéyaṁ sukhó ráthaḥ ||

1.120.12a ádha svápnasya nír vidé 'bhuñjataś ca revátaḥ |
1.120.12c ubhā́ tā́ básri naśyataḥ ||

1.121.01a kád itthā́ nr̥̄́m̐ḥ pā́traṁ devayatā́ṁ śrávad gíro áṅgirasāṁ turaṇyán |
1.121.01c prá yád ā́naḍ víśa ā́ harmyásyorú kraṁsate adhvaré yájatraḥ ||

1.121.02a stámbhīd dha dyā́ṁ sá dharúṇam pruṣāyad r̥bhúr vā́jāya dráviṇaṁ náro góḥ |
1.121.02c ánu svajā́m mahiṣáś cakṣata vrā́m ménām áśvasya pári mātáraṁ góḥ ||

1.121.03a nákṣad dhávam aruṇī́ḥ pūrvyáṁ rā́ṭ turó viśā́m áṅgirasām ánu dyū́n |
1.121.03c tákṣad vájraṁ níyutaṁ tastámbhad dyā́ṁ cátuṣpade náryāya dvipā́de ||

1.121.04a asyá máde svaryàṁ dā r̥tā́yā́pīvr̥tam usríyāṇām ánīkam |
1.121.04c yád dha prasárge trikakúm nivártad ápa drúho mā́nuṣasya dúro vaḥ ||

1.121.05a túbhyam páyo yát pitárāv ánītāṁ rā́dhaḥ surétas turáṇe bhuraṇyū́ |
1.121.05c śúci yát te rékṇa ā́yajanta sabardúghāyāḥ páya usríyāyāḥ ||

1.121.06a ádha prá jajñe taráṇir mamattu prá rocy asyā́ uṣáso ná sū́raḥ |
1.121.06c índur yébhir ā́ṣṭa svéduhavyaiḥ sruvéṇa siñcáñ jaráṇābhí dhā́ma ||

1.121.07a svidhmā́ yád vanádhitir apasyā́t sū́ro adhvaré pári ródhanā góḥ |
1.121.07c yád dha prabhā́si kŕ̥tvyām̐ ánu dyū́n ánarviśe paśvíṣe turā́ya ||

1.121.08a aṣṭā́ mahó divá ā́do hárī ihá dyumnāsā́ham abhí yodhāná útsam |
1.121.08c háriṁ yát te mandínaṁ dukṣán vr̥dhé górabhasam ádribhir vātā́pyam ||

1.121.09a tvám āyasám práti vartayo gór divó áśmānam úpanītam ŕ̥bhvā |
1.121.09c kútsāya yátra puruhūta vanváñ chúṣṇam anantaíḥ pariyā́si vadhaíḥ ||

1.121.10a purā́ yát sū́ras támaso ápītes tám adrivaḥ phaligáṁ hetím asya |
1.121.10c śúṣṇasya cit párihitaṁ yád ójo divás pári súgrathitaṁ tád ā́daḥ ||

1.121.11a ánu tvā mahī́ pā́jasī acakré dyā́vākṣā́mā madatām indra kárman |
1.121.11c tváṁ vr̥trám āśáyānaṁ sirā́su mahó vájreṇa siṣvapo varā́hum ||

1.121.12a tvám indra náryo yā́m̐ ávo nr̥̄́n tíṣṭhā vā́tasya suyújo váhiṣṭhān |
1.121.12c yáṁ te kāvyá uśánā mandínaṁ dā́d vr̥traháṇam pā́ryaṁ tatakṣa vájram ||

1.121.13a tváṁ sū́ro haríto rāmayo nr̥̄́n bhárac cakrám étaśo nā́yám indra |
1.121.13c prā́sya pāráṁ navatíṁ nāvyā̀nām ápi kartám avartayó 'yajyūn ||

1.121.14a tváṁ no asyā́ indra durháṇāyāḥ pāhí vajrivo duritā́d abhī́ke |
1.121.14c prá no vā́jān rathyò áśvabudhyān iṣé yandhi śrávase sūnŕ̥tāyai ||

1.121.15a mā́ sā́ te asmát sumatír ví dasad vā́japramahaḥ sám íṣo varanta |
1.121.15c ā́ no bhaja maghavan góṣv aryó máṁhiṣṭhās te sadhamā́daḥ syāma ||

1.122.01a prá vaḥ pā́ntaṁ raghumanyavó 'ndho yajñáṁ rudrā́ya mīḷhúṣe bharadhvam |
1.122.01c divó astoṣy ásurasya vīraír iṣudhyéva marúto ródasyoḥ ||

1.122.02a pátnīva pūrváhūtiṁ vāvr̥dhádhyā uṣā́sānáktā purudhā́ vídāne |
1.122.02c starī́r nā́tkaṁ vyùtaṁ vásānā sū́ryasya śriyā́ sudŕ̥śī híraṇyaiḥ ||

1.122.03a mamáttu naḥ párijmā vasarhā́ mamáttu vā́to apā́ṁ vŕ̥ṣaṇvān |
1.122.03c śiśītám indrāparvatā yuváṁ nas tán no víśve varivasyantu devā́ḥ ||

1.122.04a utá tyā́ me yaśásā śvetanā́yai vyántā pā́ntauśijó huvádhyai |
1.122.04c prá vo nápātam apā́ṁ kr̥ṇudhvam prá mātárā rāspinásyāyóḥ ||

1.122.05a ā́ vo ruvaṇyúm auśijó huvádhyai ghóṣeva śáṁsam árjunasya náṁśe |
1.122.05c prá vaḥ pūṣṇé dāvána ā́m̐ ácchā voceya vasútātim agnéḥ ||

1.122.06a śrutám me mitrāvaruṇā hávemótá śrutaṁ sádane viśvátaḥ sīm |
1.122.06c śrótu naḥ śróturātiḥ suśrótuḥ sukṣétrā síndhur adbhíḥ ||

1.122.07a stuṣé sā́ vāṁ varuṇa mitra rātír gávāṁ śatā́ pr̥kṣáyāmeṣu pajré |
1.122.07c śrutárathe priyárathe dádhānāḥ sadyáḥ puṣṭíṁ nirundhānā́so agman ||

1.122.08a asyá stuṣe máhimaghasya rā́dhaḥ sácā sanema náhuṣaḥ suvī́rāḥ |
1.122.08c jáno yáḥ pajrébhyo vājínīvān áśvāvato rathíno máhyaṁ sūríḥ ||

1.122.09a jáno yó mitrāvaruṇāv abhidhrúg apó ná vāṁ sunóty akṣṇayādhrúk |
1.122.09c svayáṁ sá yákṣmaṁ hŕ̥daye ní dhatta ā́pa yád īṁ hótrābhir r̥tā́vā ||

1.122.10a sá vrā́dhato náhuṣo dáṁsujūtaḥ śárdhastaro narā́ṁ gūrtáśravāḥ |
1.122.10c vísr̥ṣṭarātir yāti bāḷhasŕ̥tvā víśvāsu pr̥tsú sádam íc chū́raḥ ||

1.122.11a ádha gmántā náhuṣo hávaṁ sūréḥ śrótā rājāno amŕ̥tasya mandrāḥ |
1.122.11c nabhojúvo yán niravásya rā́dhaḥ práśastaye mahinā́ ráthavate ||

1.122.12a etáṁ śárdhaṁ dhāma yásya sūrér íty avocan dáśatayasya náṁśe |
1.122.12c dyumnā́ni yéṣu vasútātī rārán víśve sanvantu prabhr̥théṣu vā́jam ||

1.122.13a mándāmahe dáśatayasya dhāsér dvír yát páñca bíbhrato yánty ánnā |
1.122.13c kím iṣṭā́śva iṣṭáraśmir etá īśānā́sas táruṣa r̥ñjate nr̥̄́n ||

1.122.14a híraṇyakarṇam maṇigrīvam árṇas tán no víśve varivasyantu devā́ḥ |
1.122.14c aryó gíraḥ sadyá ā́ jagmúṣīr ósrā́ś cākantūbháyeṣv asmé ||

1.122.15a catvā́ro mā maśarśā́rasya śíśvas tráyo rā́jña ā́yavasasya jiṣṇóḥ |
1.122.15c rátho vām mitrāvaruṇā dīrghā́psāḥ syū́magabhastiḥ sū́ro nā́dyaut ||

1.123.01a pr̥thū́ rátho dákṣiṇāyā ayojy aínaṁ devā́so amŕ̥tāso asthuḥ |
1.123.01c kr̥ṣṇā́d úd asthād aryā̀ víhāyāś cíkitsantī mā́nuṣāya kṣáyāya ||

1.123.02a pū́rvā víśvasmād bhúvanād abodhi jáyantī vā́jam br̥hatī́ sánutrī |
1.123.02c uccā́ vy àkhyad yuvatíḥ punarbhū́r óṣā́ agan prathamā́ pūrváhūtau ||

1.123.03a yád adyá bhāgáṁ vibhájāsi nŕ̥bhya úṣo devi martyatrā́ sujāte |
1.123.03c devó no átra savitā́ dámūnā ánāgaso vocati sū́ryāya ||

1.123.04a gr̥háṁ-gr̥ham ahanā́ yāty ácchā divé-dive ádhi nā́mā dádhānā |
1.123.04c síṣāsantī dyotanā́ śáśvad ā́gād ágram-agram íd bhajate vásūnām ||

1.123.05a bhágasya svásā váruṇasya jāmír úṣaḥ sūnr̥te prathamā́ jarasva |
1.123.05c paścā́ sá daghyā yó aghásya dhātā́ jáyema táṁ dákṣiṇayā ráthena ||

1.123.06a úd īratāṁ sūnŕ̥tā út púraṁdhīr úd agnáyaḥ śuśucānā́so asthuḥ |
1.123.06c spārhā́ vásūni támasā́pagūḷhāvíṣ kr̥ṇvanty uṣáso vibhātī́ḥ ||

1.123.07a ápānyád éty abhy ànyád eti víṣurūpe áhanī sáṁ carete |
1.123.07c parikṣítos támo anyā́ gúhākar ádyaud uṣā́ḥ śóśucatā ráthena ||

1.123.08a sadŕ̥śīr adyá sadŕ̥śīr íd u śvó dīrgháṁ sacante váruṇasya dhā́ma |
1.123.08c anavadyā́s triṁśátaṁ yójanāny ékaikā krátum pári yanti sadyáḥ ||

1.123.09a jānaty áhnaḥ prathamásya nā́ma śukrā́ kr̥ṣṇā́d ajaniṣṭa śvitīcī́ |
1.123.09c r̥tásya yóṣā ná mināti dhā́mā́har-ahar niṣkr̥tám ācárantī ||

1.123.10a kanyèva tanvā̀ śā́śadānām̐ éṣi devi devám íyakṣamāṇam |
1.123.10c saṁsmáyamānā yuvatíḥ purástād āvír vákṣāṁsi kr̥ṇuṣe vibhātī́ ||

1.123.11a susaṁkāśā́ mātŕ̥mr̥ṣṭeva yóṣāvís tanvàṁ kr̥ṇuṣe dr̥śé kám |
1.123.11c bhadrā́ tvám uṣo vitaráṁ vy ùccha ná tát te anyā́ uṣáso naśanta ||

1.123.12a áśvāvatīr gómatīr viśvávārā yátamānā raśmíbhiḥ sū́ryasya |
1.123.12c párā ca yánti púnar ā́ ca yanti bhadrā́ nā́ma váhamānā uṣā́saḥ ||

1.123.13a r̥tásya raśmím anuyácchamānā bhadrám-bhadraṁ krátum asmā́su dhehi |
1.123.13c úṣo no adyá suhávā vy ùcchāsmā́su rā́yo maghávatsu ca syuḥ ||

1.124.01a uṣā́ ucchántī samidhāné agnā́ udyán sū́rya urviyā́ jyótir aśret |
1.124.01c devó no átra savitā́ nv ártham prā́sāvīd dvipát prá cátuṣpad ityaí ||

1.124.02a áminatī daívyāni vratā́ni praminatī́ manuṣyā̀ yugā́ni |
1.124.02c īyúṣīṇām upamā́ śáśvatīnām āyatīnā́m prathamóṣā́ vy àdyaut ||

1.124.03a eṣā́ divó duhitā́ práty adarśi jyótir vásānā samanā́ purástāt |
1.124.03c r̥tásya pánthām ánv eti sādhú prajānatī́va ná díśo mināti ||

1.124.04a úpo adarśi śundhyúvo ná vákṣo nodhā́ ivāvír akr̥ta priyā́ṇi |
1.124.04c admasán ná sasató bodháyantī śaśvattamā́gāt púnar eyúṣīṇām ||

1.124.05a pū́rve árdhe rájaso aptyásya gávāṁ jánitry akr̥ta prá ketúm |
1.124.05c vy ù prathate vitaráṁ várīya óbhā́ pr̥ṇántī pitrór upásthā ||

1.124.06a evéd eṣā́ purutámā dr̥śé káṁ nā́jāmiṁ ná pári vr̥ṇakti jāmím |
1.124.06c arepásā tanvā̀ śā́śadānā nā́rbhād ī́ṣate ná mahó vibhātī́ ||

1.124.07a abhrātéva puṁsá eti pratīcī́ gartārúg iva sanáye dhánānām |
1.124.07c jāyéva pátya uśatī́ suvā́sā uṣā́ hasréva ní riṇīte ápsaḥ ||

1.124.08a svásā svásre jyā́yasyai yónim āraig ápaity asyāḥ praticákṣyeva |
1.124.08c vyucchántī raśmíbhiḥ sū́ryasyāñjy àṅkte samanagā́ iva vrā́ḥ ||

1.124.09a āsā́m pū́rvāsām áhasu svásr̥̄ṇām áparā pū́rvām abhy èti paścā́t |
1.124.09c tā́ḥ pratnaván návyasīr nūnám asmé revád ucchantu sudínā uṣā́saḥ ||

1.124.10a prá bodhayoṣaḥ pr̥ṇató maghony ábudhyamānāḥ paṇáyaḥ sasantu |
1.124.10c revád uccha maghávadbhyo maghoni revát stotré sūnr̥te jāráyantī ||

1.124.11a áveyám aśvaid yuvatíḥ purástād yuṅkté gávām aruṇā́nām ánīkam |
1.124.11c ví nūnám ucchād ásati prá ketúr gr̥háṁ-gr̥ham úpa tiṣṭhāte agníḥ ||

1.124.12a út te váyaś cid vasatér apaptan náraś ca yé pitubhā́jo vyùṣṭau |
1.124.12c amā́ saté vahasi bhū́ri vāmám úṣo devi dāśúṣe mártyāya ||

1.124.13a ástoḍhvaṁ stomyā bráhmaṇā mé 'vīvr̥dhadhvam uśatī́r uṣāsaḥ |
1.124.13c yuṣmā́kaṁ devīr ávasā sanema sahasríṇaṁ ca śatínaṁ ca vā́jam ||

1.125.01a prātā́ rátnam prātarítvā dadhāti táṁ cikitvā́n pratigŕ̥hyā ní dhatte |
1.125.01c téna prajā́ṁ vardháyamāna ā́yū rāyás póṣeṇa sacate suvī́raḥ ||

1.125.02a sugúr asat suhiraṇyáḥ sváśvo br̥hád asmai váya índro dadhāti |
1.125.02c yás tvāyántaṁ vásunā prātaritvo mukṣī́jayeva pádim utsinā́ti ||

1.125.03a ā́yam adyá sukŕ̥tam prātár icchánn iṣṭéḥ putráṁ vásumatā ráthena |
1.125.03c aṁśóḥ sutám pāyaya matsarásya kṣayádvīraṁ vardhaya sūnŕ̥tābhiḥ ||

1.125.04a úpa kṣaranti síndhavo mayobhúva ījānáṁ ca yakṣyámāṇaṁ ca dhenávaḥ |
1.125.04c pr̥ṇántaṁ ca pápuriṁ ca śravasyávo ghr̥tásya dhā́rā úpa yanti viśvátaḥ ||

1.125.05a nā́kasya pr̥ṣṭhé ádhi tiṣṭhati śritó yáḥ pr̥ṇā́ti sá ha devéṣu gacchati |
1.125.05c tásmā ā́po ghr̥tám arṣanti síndhavas tásmā iyáṁ dákṣiṇā pinvate sádā ||

1.125.06a dákṣiṇāvatām íd imā́ni citrā́ dákṣiṇāvatāṁ diví sū́ryāsaḥ |
1.125.06c dákṣiṇāvanto amŕ̥tam bhajante dákṣiṇāvantaḥ prá tiranta ā́yuḥ ||

1.125.07a mā́ pr̥ṇánto dúritam éna ā́ran mā́ jāriṣuḥ sūráyaḥ suvratā́saḥ |
1.125.07c anyás téṣām paridhír astu káś cid ápr̥ṇantam abhí sáṁ yantu śókāḥ ||

1.126.01a ámandān stómān prá bhare manīṣā́ síndhāv ádhi kṣiyató bhāvyásya |
1.126.01c yó me sahásram ámimīta savā́n atū́rto rā́jā śráva icchámānaḥ ||

1.126.02a śatáṁ rā́jño nā́dhamānasya niṣkā́ñ chatám áśvān práyatān sadyá ā́dam |
1.126.02c śatáṁ kakṣī́vām̐ ásurasya gónāṁ diví śrávo 'járam ā́ tatāna ||

1.126.03a úpa mā śyāvā́ḥ svanáyena dattā́ vadhū́manto dáśa ráthāso asthuḥ |
1.126.03c ṣaṣṭíḥ sahásram ánu gávyam ā́gāt sánat kakṣī́vām̐ abhipitvé áhnām ||

1.126.04a catvāriṁśád dáśarathasya śóṇāḥ sahásrasyā́gre śréṇiṁ nayanti |
1.126.04c madacyútaḥ kr̥śanā́vato átyān kakṣī́vanta úd amr̥kṣanta pajrā́ḥ ||

1.126.05a pū́rvām ánu práyatim ā́ dade vas trī́n yuktā́m̐ aṣṭā́v arídhāyaso gā́ḥ |
1.126.05c subándhavo yé viśyā̀ iva vrā́ ánasvantaḥ śráva aíṣanta pajrā́ḥ ||

1.126.06a ā́gadhitā párigadhitā yā́ kaśīkéva jáṅgahe |
1.126.06c dádāti máhyaṁ yā́durī yā́śūnām bhojyā̀ śatā́ ||

1.126.07a úpopa me párā mr̥śa mā́ me dabhrā́ṇi manyathāḥ |
1.126.07c sárvāhám asmi romaśā́ gandhā́rīṇām ivāvikā́ ||

1.127.01a agníṁ hótāram manye dā́svantaṁ vásuṁ sūnúṁ sáhaso jātávedasaṁ vípraṁ ná jātávedasam |
1.127.01d yá ūrdhváyā svadhvaró devó devā́cyā kr̥pā́ |
1.127.01f ghr̥tásya víbhrāṣṭim ánu vaṣṭi śocíṣājúhvānasya sarpíṣaḥ ||

1.127.02a yájiṣṭhaṁ tvā yájamānā huvema jyéṣṭham áṅgirasāṁ vipra mánmabhir víprebhiḥ śukra mánmabhiḥ |
1.127.02d párijmānam iva dyā́ṁ hótāraṁ carṣaṇīnā́m |
1.127.02f śocíṣkeśaṁ vŕ̥ṣaṇaṁ yám imā́ víśaḥ prā́vantu jūtáye víśaḥ ||

1.127.03a sá hí purū́ cid ójasā virúkmatā dī́dyāno bhávati druhaṁtaráḥ paraśúr ná druhaṁtaráḥ |
1.127.03d vīḷú cid yásya sámr̥tau śrúvad váneva yát sthirám |
1.127.03f niḥṣáhamāṇo yamate nā́yate dhanvāsáhā nā́yate ||

1.127.04a dr̥ḷhā́ cid asmā ánu dur yáthā vidé téjiṣṭhābhir aráṇibhir dāṣṭy ávase 'gnáye dāṣṭy ávase |
1.127.04d prá yáḥ purū́ṇi gā́hate tákṣad váneva śocíṣā |
1.127.04f sthirā́ cid ánnā ní riṇāty ójasā ní sthirā́ṇi cid ójasā ||

1.127.05a tám asya pr̥kṣám úparāsu dhīmahi náktaṁ yáḥ sudárśataro dívātarād áprāyuṣe dívātarāt |
1.127.05d ā́d asyā́yur grábhaṇavad vīḷú śárma ná sūnáve |
1.127.05f bhaktám ábhaktam ávo vyánto ajárā agnáyo vyánto ajárāḥ ||

1.127.06a sá hí śárdho ná mā́rutaṁ tuviṣváṇir ápnasvatīṣūrvárāsv iṣṭánir ā́rtanāsv iṣṭániḥ |
1.127.06d ā́dad dhavyā́ny ādadír yajñásya ketúr arháṇā |
1.127.06f ádha smāsya hárṣato hŕ̥ṣīvato víśve juṣanta pánthāṁ náraḥ śubhé ná pánthām ||

1.127.07a dvitā́ yád īṁ kīstā́so abhídyavo namasyánta upavócanta bhŕ̥gavo mathnánto dāśā́ bhŕ̥gavaḥ |
1.127.07d agnír īśe vásūnāṁ śúcir yó dharṇír eṣām |
1.127.07f priyā́m̐ apidhī́m̐r vaniṣīṣṭa médhira ā́ vaniṣīṣṭa médhiraḥ ||

1.127.08a víśvāsāṁ tvā viśā́m pátiṁ havāmahe sárvāsāṁ samānáṁ dámpatim bhujé satyágirvāhasam bhujé |
1.127.08d átithim mā́nuṣāṇām pitúr ná yásyāsayā́ |
1.127.08f amī́ ca víśve amŕ̥tāsa ā́ váyo havyā́ devéṣv ā́ váyaḥ ||

1.127.09a tvám agne sáhasā sáhantamaḥ śuṣmíntamo jāyase devátātaye rayír ná devátātaye |
1.127.09d śuṣmíntamo hí te mádo dyumníntama utá krátuḥ |
1.127.09f ádha smā te pári caranty ajara śruṣṭīvā́no nā́jara ||

1.127.10a prá vo mahé sáhasā sáhasvata uṣarbúdhe paśuṣé nā́gnáye stómo babhūtv agnáye |
1.127.10d práti yád īṁ havíṣmān víśvāsu kṣā́su jóguve |
1.127.10f ágre rebhó ná jarata r̥ṣūṇā́ṁ jū́rṇir hóta r̥ṣūṇā́m ||

1.127.11a sá no nédiṣṭhaṁ dádr̥śāna ā́ bharā́gne devébhiḥ sácanāḥ sucetúnā mahó rāyáḥ sucetúnā |
1.127.11d máhi śaviṣṭha nas kr̥dhi saṁcákṣe bhujé asyaí |
1.127.11f máhi stotŕ̥bhyo maghavan suvī́ryam máthīr ugró ná śávasā ||

1.128.01a ayáṁ jāyata mánuṣo dhárīmaṇi hótā yájiṣṭha uśíjām ánu vratám agníḥ svám ánu vratám |
1.128.01d viśváśruṣṭiḥ sakhīyaté rayír iva śravasyaté |
1.128.01f ádabdho hótā ní ṣadad iḷás padé párivīta iḷás padé ||

1.128.02a táṁ yajñasā́dham ápi vātayāmasy r̥tásya pathā́ námasā havíṣmatā devátātā havíṣmatā |
1.128.02d sá na ūrjā́m upā́bhr̥ty ayā́ kr̥pā́ ná jūryati |
1.128.02f yám mātaríśvā mánave parāváto devám bhā́ḥ parāvátaḥ ||

1.128.03a évena sadyáḥ páry eti pā́rthivam muhurgī́ réto vr̥ṣabháḥ kánikradad dádhad rétaḥ kánikradat |
1.128.03d śatáṁ cákṣāṇo akṣábhir devó váneṣu turváṇiḥ |
1.128.03f sádo dádhāna úpareṣu sā́nuṣv agníḥ páreṣu sā́nuṣu ||

1.128.04a sá sukrátuḥ puróhito dáme-dame 'gnír yajñásyādhvarásya cetati krátvā yajñásya cetati |
1.128.04d krátvā vedhā́ iṣūyaté víśvā jātā́ni paspaśe |
1.128.04f yáto ghr̥taśrī́r átithir ájāyata váhnir vedhā́ ájāyata ||

1.128.05a krátvā yád asya táviṣīṣu pr̥ñcáte 'gnér áveṇa marútāṁ ná bhojyèṣirā́ya ná bhojyā̀ |
1.128.05d sá hí ṣmā dā́nam ínvati vásūnāṁ ca majmánā |
1.128.05f sá nas trāsate duritā́d abhihrútaḥ śáṁsād aghā́d abhihrútaḥ ||

1.128.06a víśvo víhāyā aratír vásur dadhe háste dákṣiṇe taráṇir ná śiśrathac chravasyáyā ná śiśrathat |
1.128.06d víśvasmā íd iṣudhyaté devatrā́ havyám óhiṣe |
1.128.06f víśvasmā ít sukŕ̥te vā́ram r̥ṇvaty agnír dvā́rā vy r̥̀ṇvati ||

1.128.07a sá mā́nuṣe vr̥jáne śáṁtamo hitò 'gnír yajñéṣu jényo ná viśpátiḥ priyó yajñéṣu viśpátiḥ |
1.128.07d sá havyā́ mā́nuṣāṇām iḷā́ kr̥tā́ni patyate |
1.128.07f sá nas trāsate váruṇasya dhūrtér mahó devásya dhūrtéḥ ||

1.128.08a agníṁ hótāram īḷate vásudhitim priyáṁ cétiṣṭham aratíṁ ny èrire havyavā́haṁ ny èrire |
1.128.08d viśvā́yuṁ viśvávedasaṁ hótāraṁ yajatáṁ kavím |
1.128.08f devā́so raṇvám ávase vasūyávo gīrbhī́ raṇváṁ vasūyávaḥ ||

1.129.01a yáṁ tváṁ rátham indra medhásātaye 'pākā́ sántam iṣira praṇáyasi prā́navadya náyasi |
1.129.01d sadyáś cit tám abhíṣṭaye káro váśaś ca vājínam |
1.129.01f sā́smā́kam anavadya tūtujāna vedhásām imā́ṁ vā́caṁ ná vedhásām ||

1.129.02a sá śrudhi yáḥ smā pŕ̥tanāsu kā́su cid dakṣā́yya indra bhárahūtaye nŕ̥bhir ási prátūrtaye nŕ̥bhiḥ |
1.129.02d yáḥ śū́raiḥ svàḥ sánitā yó víprair vā́jaṁ tárutā |
1.129.02f tám īśānā́sa iradhanta vājínam pr̥kṣám átyaṁ ná vājínam ||

1.129.03a dasmó hí ṣmā vŕ̥ṣaṇam pínvasi tvácaṁ káṁ cid yāvīr aráruṁ śūra mártyam parivr̥ṇákṣi mártyam |
1.129.03d índrotá túbhyaṁ tád divé tád rudrā́ya sváyaśase |
1.129.03f mitrā́ya vocaṁ váruṇāya sapráthaḥ sumr̥ḷīkā́ya sapráthaḥ ||

1.129.04a asmā́kaṁ va índram uśmasīṣṭáye sákhāyaṁ viśvā́yum prāsáhaṁ yújaṁ vā́jeṣu prāsáhaṁ yújam |
1.129.04d asmā́kam bráhmotáyé 'vā pr̥tsúṣu kā́su cit |
1.129.04f nahí tvā śátruḥ stárate str̥ṇóṣi yáṁ víśvaṁ śátruṁ str̥ṇóṣi yám ||

1.129.05a ní ṣū́ namā́timatiṁ káyasya cit téjiṣṭhābhir aráṇibhir nótíbhir ugrā́bhir ugrotíbhiḥ |
1.129.05d néṣi ṇo yáthā purā́nenā́ḥ śūra mányase |
1.129.05f víśvāni pūrór ápa parṣi váhnir āsā́ váhnir no áccha ||

1.129.06a prá tád voceyam bhávyāyéndave hávyo ná yá iṣávān mánma réjati rakṣohā́ mánma réjati |
1.129.06d svayáṁ só asmád ā́ nidó vadhaír ajeta durmatím |
1.129.06f áva sraved agháśaṁso 'vatarám áva kṣudrám iva sravet ||

1.129.07a vanéma tád dhótrayā citántyā vanéma rayíṁ rayivaḥ suvī́ryaṁ raṇváṁ sántaṁ suvī́ryam |
1.129.07d durmánmānaṁ sumántubhir ém iṣā́ pr̥cīmahi |
1.129.07f ā́ satyā́bhir índraṁ dyumnáhūtibhir yájatraṁ dyumnáhūtibhiḥ ||

1.129.08a prá-prā vo asmé sváyaśobhir ūtī́ parivargá índro durmatīnā́ṁ dárīman durmatīnā́m |
1.129.08d svayáṁ sā́ riṣayádhyai yā́ na upeṣé atraíḥ |
1.129.08f hatém asan ná vakṣati kṣiptā́ jūrṇír ná vakṣati ||

1.129.09a tváṁ na indra rāyā́ párīṇasā yāhí pathā́m̐ anehásā puró yāhy arakṣásā |
1.129.09d sácasva naḥ parāká ā́ sácasvāstamīká ā́ |
1.129.09f pāhí no dūrā́d ārā́d abhíṣṭibhiḥ sádā pāhy abhíṣṭibhiḥ ||

1.129.10a tváṁ na indra rāyā́ tárūṣasográṁ cit tvā mahimā́ sakṣad ávase mahé mitráṁ nā́vase |
1.129.10d ójiṣṭha trā́tar ávitā ráthaṁ káṁ cid amartya |
1.129.10f anyám asmád ririṣeḥ káṁ cid adrivo rírikṣantaṁ cid adrivaḥ ||

1.129.11a pāhí na indra suṣṭuta sridhò 'vayātā́ sádam íd durmatīnā́ṁ deváḥ sán durmatīnā́m |
1.129.11d hantā́ pāpásya rakṣásas trātā́ víprasya mā́vataḥ |
1.129.11f ádhā hí tvā janitā́ jī́janad vaso rakṣoháṇaṁ tvā jī́janad vaso ||

1.130.01a éndra yāhy úpa naḥ parāváto nā́yám ácchā vidáthānīva sátpatir ástaṁ rā́jeva sátpatiḥ |
1.130.01d hávāmahe tvā vayám práyasvantaḥ suté sácā |
1.130.01f putrā́so ná pitáraṁ vā́jasātaye máṁhiṣṭhaṁ vā́jasātaye ||

1.130.02a píbā sómam indra suvānám ádribhiḥ kóśena siktám avatáṁ ná váṁsagas tātr̥ṣāṇó ná váṁsagaḥ |
1.130.02d mádāya haryatā́ya te tuvíṣṭamāya dhā́yase |
1.130.02f ā́ tvā yacchantu haríto ná sū́ryam áhā víśveva sū́ryam ||

1.130.03a ávindad divó níhitaṁ gúhā nidhíṁ vér ná gárbham párivītam áśmany ananté antár áśmani |
1.130.03d vrajáṁ vajrī́ gávām iva síṣāsann áṅgirastamaḥ |
1.130.03f ápāvr̥ṇod íṣa índraḥ párīvr̥tā dvā́ra íṣaḥ párīvr̥tāḥ ||

1.130.04a dādr̥hāṇó vájram índro gábhastyoḥ kṣádmeva tigmám ásanāya sáṁ śyad ahihátyāya sáṁ śyat |
1.130.04d saṁvivyāná ójasā śávobhir indra majmánā |
1.130.04f táṣṭeva vr̥kṣáṁ vaníno ní vr̥ścasi paraśvéva ní vr̥ścasi ||

1.130.05a tváṁ vŕ̥thā nadyà indra sártavé 'cchā samudrám asr̥jo ráthām̐ iva vājayató ráthām̐ iva |
1.130.05d itá ūtī́r ayuñjata samānám ártham ákṣitam |
1.130.05f dhenū́r iva mánave viśvádohaso jánāya viśvádohasaḥ ||

1.130.06a imā́ṁ te vā́caṁ vasūyánta āyávo ráthaṁ ná dhī́raḥ svápā atakṣiṣuḥ sumnā́ya tvā́m atakṣiṣuḥ |
1.130.06d śumbhánto jényaṁ yathā vā́jeṣu vipra vājínam |
1.130.06f átyam iva śávase sātáye dhánā víśvā dhánāni sātáye ||

1.130.07a bhinát púro navatím indra pūráve dívodāsāya máhi dāśúṣe nr̥to vájreṇa dāśúṣe nr̥to |
1.130.07d atithigvā́ya śámbaraṁ girér ugró ávābharat |
1.130.07f mahó dhánāni dáyamāna ójasā víśvā dhánāny ójasā ||

1.130.08a índraḥ samátsu yájamānam ā́ryam prā́vad víśveṣu śatámūtir ājíṣu svàrmīḷheṣv ājíṣu |
1.130.08d mánave śā́sad avratā́n tvácaṁ kr̥ṣṇā́m arandhayat |
1.130.08f dákṣan ná víśvaṁ tatr̥ṣāṇám oṣati ny àrśasānám oṣati ||

1.130.09a sū́raś cakrám prá vr̥haj jātá ójasā prapitvé vā́cam aruṇó muṣāyatīśāná ā́ muṣāyati |
1.130.09d uśánā yát parāvátó 'jagann ūtáye kave |
1.130.09f sumnā́ni víśvā mánuṣeva turváṇir áhā víśveva turváṇiḥ ||

1.130.10a sá no návyebhir vr̥ṣakarmann ukthaíḥ púrāṁ dartaḥ pāyúbhiḥ pāhi śagmaíḥ |
1.130.10b divodāsébhir indra stávāno vāvr̥dhīthā́ áhobhir iva dyaúḥ ||

1.131.01a índrāya hí dyaúr ásuro ánamnaténdrāya mahī́ pr̥thivī́ várīmabhir dyumnásātā várīmabhiḥ |
1.131.01d índraṁ víśve sajóṣaso devā́so dadhire puráḥ |
1.131.01f índrāya víśvā sávanāni mā́nuṣā rātā́ni santu mā́nuṣā ||

1.131.02a víśveṣu hí tvā sávaneṣu tuñjáte samānám ékaṁ vŕ̥ṣamaṇyavaḥ pŕ̥thak svàḥ saniṣyávaḥ pŕ̥thak |
1.131.02d táṁ tvā nā́vaṁ ná parṣáṇiṁ śūṣásya dhurí dhīmahi |
1.131.02f índraṁ ná yajñaíś citáyanta āyávaḥ stómebhir índram āyávaḥ ||

1.131.03a ví tvā tatasre mithunā́ avasyávo vrajásya sātā́ gávyasya niḥsŕ̥jaḥ sákṣanta indra niḥsŕ̥jaḥ |
1.131.03d yád gavyántā dvā́ jánā svàr yántā samū́hasi |
1.131.03f āvíṣ kárikrad vŕ̥ṣaṇaṁ sacābhúvaṁ vájram indra sacābhúvam ||

1.131.04a vidúṣ ṭe asyá vīryàsya pūrávaḥ púro yád indra śā́radīr avā́tiraḥ sāsahānó avā́tiraḥ |
1.131.04d śā́sas tám indra mártyam áyajyuṁ śavasas pate |
1.131.04f mahī́m amuṣṇāḥ pr̥thivī́m imā́ apó mandasāná imā́ apáḥ ||

1.131.05a ā́d ít te asyá vīryàsya carkiran mádeṣu vr̥ṣann uśíjo yád ā́vitha sakhīyató yád ā́vitha |
1.131.05d cakártha kārám ebhyaḥ pŕ̥tanāsu právantave |
1.131.05f té anyā́m-anyāṁ nadyàṁ saniṣṇata śravasyántaḥ saniṣṇata ||

1.131.06a utó no asyā́ uṣáso juṣéta hy àrkásya bodhi havíṣo hávīmabhiḥ svàrṣātā hávīmabhiḥ |
1.131.06d yád indra hántave mŕ̥dho vŕ̥ṣā vajriñ cíketasi |
1.131.06f ā́ me asyá vedháso návīyaso mánma śrudhi návīyasaḥ ||

1.131.07a tváṁ tám indra vāvr̥dhānó asmayúr amitrayántaṁ tuvijāta mártyaṁ vájreṇa śūra mártyam |
1.131.07d jahí yó no aghāyáti śr̥ṇuṣvá suśrávastamaḥ |
1.131.07f riṣṭáṁ ná yā́mann ápa bhūtu durmatír víśvā́pa bhūtu durmatíḥ ||

1.132.01a tváyā vayám maghavan pū́rvye dhána índratvotāḥ sāsahyāma pr̥tanyató vanuyā́ma vanuṣyatáḥ |
1.132.01d nédiṣṭhe asmínn áhany ádhi vocā nú sunvaté |
1.132.01f asmín yajñé ví cayemā bháre kr̥táṁ vājayánto bháre kr̥tám ||

1.132.02a svarjeṣé bhára āprásya vákmany uṣarbúdhaḥ svásminn áñjasi krāṇásya svásminn áñjasi |
1.132.02d áhann índro yáthā vidé śīrṣṇā́-śīrṣṇopavā́cyaḥ |
1.132.02f asmatrā́ te sadhryàk santu rātáyo bhadrā́ bhadrásya rātáyaḥ ||

1.132.03a tát tú práyaḥ pratnáthā te śuśukvanáṁ yásmin yajñé vā́ram ákr̥ṇvata kṣáyam r̥tásya vā́r asi kṣáyam |
1.132.03d ví tád vocer ádha dvitā́ntáḥ paśyanti raśmíbhiḥ |
1.132.03f sá ghā vide ánv índro gavéṣaṇo bandhukṣídbhyo gavéṣaṇaḥ ||

1.132.04a nū́ itthā́ te pūrváthā ca pravā́cyaṁ yád áṅgirobhyó 'vr̥ṇor ápa vrajám índra śíkṣann ápa vrajám |
1.132.04d aíbhyaḥ samānyā́ diśā́smábhyaṁ jeṣi yótsi ca |
1.132.04f sunvádbhyo randhayā káṁ cid avratáṁ hr̥ṇāyántaṁ cid avratám ||

1.132.05a sáṁ yáj jánān krátubhiḥ śū́ra īkṣáyad dháne hité taruṣanta śravasyávaḥ prá yakṣanta śravasyávaḥ |
1.132.05d tásmā ā́yuḥ prajā́vad íd bā́dhe arcanty ójasā |
1.132.05f índra okyàṁ didhiṣanta dhītáyo devā́m̐ ácchā ná dhītáyaḥ ||

1.132.06a yuváṁ tám indrāparvatā puroyúdhā yó naḥ pr̥tanyā́d ápa táṁ-tam íd dhataṁ vájreṇa táṁ-tam íd dhatam |
1.132.06d dūré cattā́ya cchantsad gáhanaṁ yád ínakṣat |
1.132.06f asmā́kaṁ śátrūn pári śūra viśváto darmā́ darṣīṣṭa viśvátaḥ ||

1.133.01a ubhé punāmi ródasī r̥téna drúho dahāmi sám mahī́r anindrā́ḥ |
1.133.01c abhivlágya yátra hatā́ amítrā vailasthānám pári tr̥ḷhā́ áśeran ||

1.133.02a abhivlágyā cid adrivaḥ śīrṣā́ yātumátīnām |
1.133.02c chindhí vaṭūríṇā padā́ mahā́vaṭūriṇā padā́ ||

1.133.03a ávāsām maghavañ jahi śárdho yātumátīnām |
1.133.03c vailasthānaké armaké mahā́vailasthe armaké ||

1.133.04a yā́sāṁ tisráḥ pañcāśáto 'bhivlaṅgaír apā́vapaḥ |
1.133.04c tát sú te manāyati takát sú te manāyati ||

1.133.05a piśáṅgabhr̥ṣṭim ambhr̥ṇám piśā́cim indra sám mr̥ṇa |
1.133.05c sárvaṁ rákṣo ní barhaya ||

1.133.06a avár mahá indra dādr̥hí śrudhī́ naḥ śuśóca hí dyaúḥ kṣā́ ná bhīṣā́m̐ adrivo ghr̥ṇā́n ná bhīṣā́m̐ adrivaḥ |
1.133.06d śuṣmíntamo hí śuṣmíbhir vadhaír ugrébhir ī́yase |
1.133.06f ápūruṣaghno apratīta śūra sátvabhis trisaptaíḥ śūra sátvabhiḥ ||

1.133.07a vanóti hí sunván kṣáyam párīṇasaḥ sunvānó hí ṣmā yájaty áva dvíṣo devā́nām áva dvíṣaḥ |
1.133.07d sunvāná ít siṣāsati sahásrā vājy ávr̥taḥ |
1.133.07f sunvānā́yéndro dadāty ābhúvaṁ rayíṁ dadāty ābhúvam ||

1.134.01a ā́ tvā júvo rārahāṇā́ abhí práyo vā́yo váhantv ihá pūrvápītaye sómasya pūrvápītaye |
1.134.01d ūrdhvā́ te ánu sūnŕ̥tā mánas tiṣṭhatu jānatī́ |
1.134.01f niyútvatā ráthenā́ yāhi dāváne vā́yo makhásya dāváne ||

1.134.02a mándantu tvā mandíno vāyav índavo 'smát krāṇā́saḥ súkr̥tā abhídyavo góbhiḥ krāṇā́ abhídyavaḥ |
1.134.02d yád dha krāṇā́ irádhyai dákṣaṁ sácanta ūtáyaḥ |
1.134.02f sadhrīcīnā́ niyúto dāváne dhíya úpa bruvata īṁ dhíyaḥ ||

1.134.03a vāyúr yuṅkte róhitā vāyúr aruṇā́ vāyū́ ráthe ajirā́ dhurí vóḷhave váhiṣṭhā dhurí vóḷhave |
1.134.03d prá bodhayā púraṁdhiṁ jārá ā́ sasatī́m iva |
1.134.03f prá cakṣaya ródasī vāsayoṣásaḥ śrávase vāsayoṣásaḥ ||

1.134.04a túbhyam uṣā́saḥ śúcayaḥ parāváti bhadrā́ vástrā tanvate dáṁsu raśmíṣu citrā́ návyeṣu raśmíṣu |
1.134.04d túbhyaṁ dhenúḥ sabardúghā víśvā vásūni dohate |
1.134.04f ájanayo marúto vakṣáṇābhyo divá ā́ vakṣáṇābhyaḥ ||

1.134.05a túbhyaṁ śukrā́saḥ śúcayas turaṇyávo mádeṣūgrā́ iṣaṇanta bhurváṇy apā́m iṣanta bhurváṇi |
1.134.05d tvā́ṁ tsārī́ dásamāno bhágam īṭṭe takvavī́ye |
1.134.05f tváṁ víśvasmād bhúvanāt pāsi dhármaṇāsuryā̀t pāsi dhármaṇā ||

1.134.06a tváṁ no vāyav eṣām ápūrvyaḥ sómānām prathamáḥ pītím arhasi sutā́nām pītím arhasi |
1.134.06d utó vihútmatīnāṁ viśā́ṁ vavarjúṣīṇām |
1.134.06f víśvā ít te dhenávo duhra āśíraṁ ghr̥táṁ duhrata āśíram ||

1.135.01a stīrṇám barhír úpa no yāhi vītáye sahásreṇa niyútā niyutvate śatínībhir niyutvate |
1.135.01d túbhyaṁ hí pūrvápītaye devā́ devā́ya yemiré |
1.135.01f prá te sutā́so mádhumanto asthiran mádāya krátve asthiran ||

1.135.02a túbhyāyáṁ sómaḥ páripūto ádribhiḥ spārhā́ vásānaḥ pári kóśam arṣati śukrā́ vásāno arṣati |
1.135.02d távāyám bhāgá āyúṣu sómo devéṣu hūyate |
1.135.02f váha vāyo niyúto yāhy asmayúr juṣāṇó yāhy asmayúḥ ||

1.135.03a ā́ no niyúdbhiḥ śatínībhir adhvaráṁ sahasríṇībhir úpa yāhi vītáye vā́yo havyā́ni vītáye |
1.135.03d távāyám bhāgá r̥tvíyaḥ sáraśmiḥ sū́rye sácā |
1.135.03f adhvaryúbhir bháramāṇā ayaṁsata vā́yo śukrā́ ayaṁsata ||

1.135.04a ā́ vāṁ rátho niyútvān vakṣad ávase 'bhí práyāṁsi súdhitāni vītáye vā́yo havyā́ni vītáye |
1.135.04d píbatam mádhvo ándhasaḥ pūrvapéyaṁ hí vāṁ hitám |
1.135.04f vā́yav ā́ candréṇa rā́dhasā́ gatam índraś ca rā́dhasā́ gatam ||

1.135.05a ā́ vāṁ dhíyo vavr̥tyur adhvarā́m̐ úpemám índum marmr̥janta vājínam āśúm átyaṁ ná vājínam |
1.135.05d téṣām pibatam asmayū́ ā́ no gantam ihótyā́ |
1.135.05f índravāyū sutā́nām ádribhir yuvám mádāya vājadā yuvám ||

1.135.06a imé vāṁ sómā apsv ā́ sutā́ ihā́dhvaryúbhir bháramāṇā ayaṁsata vā́yo śukrā́ ayaṁsata |
1.135.06d eté vām abhy àsr̥kṣata tiráḥ pavítram āśávaḥ |
1.135.06f yuvāyávó 'ti rómāṇy avyáyā sómāso áty avyáyā ||

1.135.07a áti vāyo sasató yāhi śáśvato yátra grā́vā vádati tátra gacchataṁ gr̥hám índraś ca gacchatam |
1.135.07d ví sūnŕ̥tā dádr̥śe rī́yate ghr̥tám ā́ pūrṇáyā niyútā yātho adhvarám índraś ca yātho adhvarám ||

1.135.08a átrā́ha tád vahethe mádhva ā́hutiṁ yám aśvatthám upatíṣṭhanta jāyávo 'smé té santu jāyávaḥ |
1.135.08d sākáṁ gā́vaḥ súvate pácyate yávo ná te vāya úpa dasyanti dhenávo nā́pa dasyanti dhenávaḥ ||

1.135.09a imé yé te sú vāyo bāhvòjaso 'ntár nadī́ te patáyanty ukṣáṇo máhi vrā́dhanta ukṣáṇaḥ |
1.135.09d dhánvañ cid yé anāśávo jīrā́ś cid ágiraukasaḥ |
1.135.09f sū́ryasyeva raśmáyo durniyántavo hástayor durniyántavaḥ ||

1.136.01a prá sú jyéṣṭhaṁ nicirā́bhyām br̥hán námo havyám matím bharatā mr̥ḷayádbhyāṁ svā́diṣṭham mr̥ḷayádbhyām |
1.136.01d tā́ samrā́jā ghr̥tā́sutī yajñé-yajña úpastutā |
1.136.01f áthainoḥ kṣatráṁ ná kútaś canā́dhŕ̥ṣe devatváṁ nū́ cid ādhŕ̥ṣe ||

1.136.02a ádarśi gātúr uráve várīyasī pánthā r̥tásya sám ayaṁsta raśmíbhiś cákṣur bhágasya raśmíbhiḥ |
1.136.02d dyukṣám mitrásya sā́danam aryamṇó váruṇasya ca |
1.136.02f áthā dadhāte br̥hád ukthyàṁ váya upastútyam br̥hád váyaḥ ||

1.136.03a jyótiṣmatīm áditiṁ dhārayátkṣitiṁ svàrvatīm ā́ sacete divé-dive jāgr̥vā́ṁsā divé-dive |
1.136.03d jyótiṣmat kṣatrám āśāte ādityā́ dā́nunas pátī |
1.136.03f mitrás táyor váruṇo yātayájjano 'ryamā́ yātayájjanaḥ ||

1.136.04a ayám mitrā́ya váruṇāya śáṁtamaḥ sómo bhūtv avapā́neṣv ā́bhago devó devéṣv ā́bhagaḥ |
1.136.04d táṁ devā́so juṣerata víśve adyá sajóṣasaḥ |
1.136.04f táthā rājānā karatho yád ī́maha ŕ̥tāvānā yád ī́mahe ||

1.136.05a yó mitrā́ya váruṇāyā́vidhaj jáno 'narvā́ṇaṁ tám pári pāto áṁhaso dāśvā́ṁsam mártam áṁhasaḥ |
1.136.05d tám aryamā́bhí rakṣaty r̥jūyántam ánu vratám |
1.136.05f ukthaír yá enoḥ paribhū́ṣati vratáṁ stómair ābhū́ṣati vratám ||

1.136.06a námo divé br̥haté ródasībhyām mitrā́ya vocaṁ váruṇāya mīḷhúṣe sumr̥ḷīkā́ya mīḷhúṣe |
1.136.06d índram agním úpa stuhi dyukṣám aryamáṇam bhágam |
1.136.06f jyóg jī́vantaḥ prajáyā sacemahi sómasyotī́ sacemahi ||

1.136.07a ūtī́ devā́nāṁ vayám índravanto maṁsīmáhi sváyaśaso marúdbhiḥ |
1.136.07c agnír mitró váruṇaḥ śárma yaṁsan tád aśyāma maghávāno vayáṁ ca ||

1.137.01a suṣumā́ yātam ádribhir góśrītā matsarā́ imé sómāso matsarā́ imé |
1.137.01d ā́ rājānā divispr̥śāsmatrā́ gantam úpa naḥ |
1.137.01f imé vām mitrāvaruṇā gávāśiraḥ sómāḥ śukrā́ gávāśiraḥ ||

1.137.02a imá ā́ yātam índavaḥ sómāso dádhyāśiraḥ sutā́so dádhyāśiraḥ |
1.137.02d utá vām uṣáso budhí sākáṁ sū́ryasya raśmíbhiḥ |
1.137.02f sutó mitrā́ya váruṇāya pītáye cā́rur r̥tā́ya pītáye ||

1.137.03a tā́ṁ vāṁ dhenúṁ ná vāsarī́m aṁśúṁ duhanty ádribhiḥ sómaṁ duhanty ádribhiḥ |
1.137.03d asmatrā́ gantam úpa no 'rvā́ñcā sómapītaye |
1.137.03f ayáṁ vām mitrāvaruṇā nŕ̥bhiḥ sutáḥ sóma ā́ pītáye sutáḥ ||

1.138.01a prá-pra pūṣṇás tuvijātásya śasyate mahitvám asya taváso ná tandate stotrám asya ná tandate |
1.138.01d árcāmi sumnayánn ahám ántyūtim mayobhúvam |
1.138.01f víśvasya yó mána āyuyuvé makhó devá āyuyuvé makháḥ ||

1.138.02a prá hí tvā pūṣann ajiráṁ ná yā́mani stómebhiḥ kr̥ṇvá r̥ṇávo yáthā mŕ̥dha úṣṭro ná pīparo mŕ̥dhaḥ |
1.138.02d huvé yát tvā mayobhúvaṁ deváṁ sakhyā́ya mártyaḥ |
1.138.02f asmā́kam āṅgūṣā́n dyumnínas kr̥dhi vā́jeṣu dyumnínas kr̥dhi ||

1.138.03a yásya te pūṣan sakhyé vipanyávaḥ krátvā cit sántó 'vasā bubhujrirá íti krátvā bubhujriré |
1.138.03d tā́m ánu tvā návīyasīṁ niyútaṁ rāyá īmahe |
1.138.03f áheḷamāna uruśaṁsa sárī bhava vā́je-vāje sárī bhava ||

1.138.04a asyā́ ū ṣú ṇa úpa sātáye bhuvó 'heḷamāno rarivā́m̐ ajāśva śravasyatā́m ajāśva |
1.138.04d ó ṣú tvā vavr̥tīmahi stómebhir dasma sādhúbhiḥ |
1.138.04f nahí tvā pūṣann atimánya āghr̥ṇe ná te sakhyám apahnuvé ||

1.139.01a ástu śraúṣaṭ puró agníṁ dhiyā́ dadha ā́ nú tác chárdho divyáṁ vr̥ṇīmaha indravāyū́ vr̥ṇīmahe |
1.139.01d yád dha krāṇā́ vivásvati nā́bhā saṁdā́yi návyasī |
1.139.01f ádha prá sū́ na úpa yantu dhītáyo devā́m̐ ácchā ná dhītáyaḥ ||

1.139.02a yád dha tyán mitrāvaruṇāv r̥tā́d ádhy ādadā́the ánr̥taṁ svéna manyúnā dákṣasya svéna manyúnā |
1.139.02d yuvór itthā́dhi sádmasv ápaśyāma hiraṇyáyam |
1.139.02f dhībhíś caná mánasā svébhir akṣábhiḥ sómasya svébhir akṣábhiḥ ||

1.139.03a yuvā́ṁ stómebhir devayánto aśvināśrāváyanta iva ślókam āyávo yuvā́ṁ havyā́bhy ā̀yávaḥ |
1.139.03d yuvór víśvā ádhi śríyaḥ pŕ̥kṣaś ca viśvavedasā |
1.139.03f pruṣāyánte vām paváyo hiraṇyáye ráthe dasrā hiraṇyáye ||

1.139.04a áceti dasrā vy ù nā́kam r̥ṇvatho yuñjáte vāṁ rathayújo díviṣṭiṣv adhvasmā́no díviṣṭiṣu |
1.139.04d ádhi vāṁ sthā́ma vandhúre ráthe dasrā hiraṇyáye |
1.139.04f pathéva yántāv anuśā́satā rájó 'ñjasā śā́satā rájaḥ ||

1.139.05a śácībhir naḥ śacīvasū dívā náktaṁ daśasyatam |
1.139.05c mā́ vāṁ rātír úpa dasat kádā canā́smád rātíḥ kádā caná ||

1.139.06a vŕ̥ṣann indra vr̥ṣapā́ṇāsa índava imé sutā́ ádriṣutāsa udbhídas túbhyaṁ sutā́sa udbhídaḥ |
1.139.06d té tvā mandantu dāváne mahé citrā́ya rā́dhase |
1.139.06f gīrbhír girvāhaḥ stávamāna ā́ gahi sumr̥ḷīkó na ā́ gahi ||

1.139.07a ó ṣū́ ṇo agne śr̥ṇuhi tvám īḷitó devébhyo bravasi yajñíyebhyo rā́jabhyo yajñíyebhyaḥ |
1.139.07d yád dha tyā́m áṅgirobhyo dhenúṁ devā ádattana |
1.139.07f ví tā́ṁ duhre aryamā́ kartárī sácām̐ eṣá tā́ṁ veda me sácā ||

1.139.08a mó ṣú vo asmád abhí tā́ni paúṁsyā sánā bhūvan dyumnā́ni mótá jāriṣur asmát purótá jāriṣuḥ |
1.139.08d yád vaś citráṁ yugé-yuge návyaṁ ghóṣād ámartyam |
1.139.08f asmā́su tán maruto yác ca duṣṭáraṁ didhr̥tā́ yác ca duṣṭáram ||

1.139.09a dadhyáṅ ha me janúṣam pū́rvo áṅgirāḥ priyámedhaḥ káṇvo átrir mánur vidus té me pū́rve mánur viduḥ |
1.139.09d téṣāṁ devéṣv ā́yatir asmā́kaṁ téṣu nā́bhayaḥ |
1.139.09f téṣām padéna máhy ā́ name giréndrāgnī́ ā́ name girā́ ||

1.139.10a hótā yakṣad vaníno vanta vā́ryam bŕ̥haspátir yajati vená ukṣábhiḥ puruvā́rebhir ukṣábhiḥ |
1.139.10d jagr̥bhmā́ dūráādiśaṁ ślókam ádrer ádha tmánā |
1.139.10f ádhārayad araríndāni sukrátuḥ purū́ sádmāni sukrátuḥ ||

1.139.11a yé devāso divy ékādaśa sthá pr̥thivyā́m ádhy ékādaśa sthá |
1.139.11c apsukṣíto mahinaíkādaśa sthá té devāso yajñám imáṁ juṣadhvam ||

1.140.01a vediṣáde priyádhāmāya sudyúte dhāsím iva prá bharā yónim agnáye |
1.140.01c vástreṇeva vāsayā mánmanā śúciṁ jyotī́rathaṁ śukrávarṇaṁ tamohánam ||

1.140.02a abhí dvijánmā trivŕ̥d ánnam r̥jyate saṁvatsaré vāvr̥dhe jagdhám ī púnaḥ |
1.140.02c anyásyāsā́ jihváyā jényo vŕ̥ṣā ny ànyéna vaníno mr̥ṣṭa vāraṇáḥ ||

1.140.03a kr̥ṣṇaprútau vevijé asya sakṣítā ubhā́ tarete abhí mātárā śíśum |
1.140.03c prācā́jihvaṁ dhvasáyantaṁ tr̥ṣucyútam ā́ sā́cyaṁ kúpayaṁ várdhanam pitúḥ ||

1.140.04a mumukṣvò mánave mānavasyaté raghudrúvaḥ kr̥ṣṇásītāsa ū júvaḥ |
1.140.04c asamanā́ ajirā́so raghuṣyádo vā́tajūtā úpa yujyanta āśávaḥ ||

1.140.05a ā́d asya té dhvasáyanto vŕ̥therate kr̥ṣṇám ábhvam máhi várpaḥ kárikrataḥ |
1.140.05c yát sīm mahī́m avánim prā́bhí mármr̥śad abhiśvasán stanáyann éti nā́nadat ||

1.140.06a bhū́ṣan ná yó 'dhi babhrū́ṣu námnate vŕ̥ṣeva pátnīr abhy èti róruvat |
1.140.06c ojāyámānas tanvàś ca śumbhate bhīmó ná śŕ̥ṅgā davidhāva durgŕ̥bhiḥ ||

1.140.07a sá saṁstíro viṣṭíraḥ sáṁ gr̥bhāyati jānánn evá jānatī́r nítya ā́ śaye |
1.140.07c púnar vardhante ápi yanti devyàm anyád várpaḥ pitróḥ kr̥ṇvate sácā ||

1.140.08a tám agrúvaḥ keśínīḥ sáṁ hí rebhirá ūrdhvā́s tasthur mamrúṣīḥ prā́yáve púnaḥ |
1.140.08c tā́sāṁ jarā́m pramuñcánn eti nā́nadad ásum páraṁ janáyañ jīvám ástr̥tam ||

1.140.09a adhīvāsám pári mātū́ rihánn áha tuvigrébhiḥ sátvabhir yāti ví jráyaḥ |
1.140.09c váyo dádhat padváte rérihat sádā́nu śyénī sacate vartanī́r áha ||

1.140.10a asmā́kam agne maghávatsu dīdihy ádha śvásīvān vr̥ṣabhó dámūnāḥ |
1.140.10c avā́syā śíśumatīr adīder vármeva yutsú parijárbhurāṇaḥ ||

1.140.11a idám agne súdhitaṁ dúrdhitād ádhi priyā́d u cin mánmanaḥ préyo astu te |
1.140.11c yát te śukráṁ tanvò rócate śúci ténāsmábhyaṁ vanase rátnam ā́ tvám ||

1.140.12a ráthāya nā́vam utá no gr̥hā́ya nítyāritrām padvátīṁ rāsy agne |
1.140.12c asmā́kaṁ vīrā́m̐ utá no maghóno jánām̐ś ca yā́ pāráyāc chárma yā́ ca ||

1.140.13a abhī́ no agna ukthám íj juguryā dyā́vākṣā́mā síndhavaś ca svágūrtāḥ |
1.140.13c gávyaṁ yávyaṁ yánto dīrghā́héṣaṁ váram aruṇyò varanta ||

1.141.01a báḷ itthā́ tád vápuṣe dhāyi darśatáṁ devásya bhárgaḥ sáhaso yáto jáni |
1.141.01c yád īm úpa hvárate sā́dhate matír r̥tásya dhénā anayanta sasrútaḥ ||

1.141.02a pr̥kṣó vápuḥ pitumā́n nítya ā́ śaye dvitī́yam ā́ saptáśivāsu mātŕ̥ṣu |
1.141.02c tr̥tī́yam asya vr̥ṣabhásya doháse dáśapramatiṁ janayanta yóṣaṇaḥ ||

1.141.03a nír yád īm budhnā́n mahiṣásya várpasa īśānā́saḥ śávasā kránta sūráyaḥ |
1.141.03c yád īm ánu pradívo mádhva ādhavé gúhā sántam mātaríśvā mathāyáti ||

1.141.04a prá yát pitúḥ paramā́n nīyáte páry ā́ pr̥kṣúdho vīrúdho dáṁsu rohati |
1.141.04c ubhā́ yád asya janúṣaṁ yád ínvata ā́d íd yáviṣṭho abhavad ghr̥ṇā́ śúciḥ ||

1.141.05a ā́d ín mātr̥̄́r ā́viśad yā́sv ā́ śúcir áhiṁsyamāna urviyā́ ví vāvr̥dhe |
1.141.05c ánu yát pū́rvā áruhat sanājúvo ní návyasīṣv ávarāsu dhāvate ||

1.141.06a ā́d íd dhótāraṁ vr̥ṇate díviṣṭiṣu bhágam iva papr̥cānā́sa r̥ñjate |
1.141.06c devā́n yát krátvā majmánā puruṣṭutó mártaṁ śáṁsaṁ viśvádhā véti dhā́yase ||

1.141.07a ví yád ásthād yajató vā́tacodito hvāró ná vákvā jaráṇā ánākr̥taḥ |
1.141.07c tásya pátman dakṣúṣaḥ kr̥ṣṇájaṁhasaḥ śúcijanmano rája ā́ vyàdhvanaḥ ||

1.141.08a rátho ná yātáḥ śíkvabhiḥ kr̥tó dyā́m áṅgebhir aruṣébhir īyate |
1.141.08c ā́d asya té kr̥ṣṇā́so dakṣi sūráyaḥ śū́rasyeva tveṣáthād īṣate váyaḥ ||

1.141.09a tváyā hy àgne váruṇo dhr̥távrato mitráḥ śāśadré aryamā́ sudā́navaḥ |
1.141.09c yát sīm ánu krátunā viśváthā vibhúr arā́n ná nemíḥ paribhū́r ájāyathāḥ ||

1.141.10a tvám agne śaśamānā́ya sunvaté rátnaṁ yaviṣṭha devátātim invasi |
1.141.10c táṁ tvā nú návyaṁ sahaso yuvan vayám bhágaṁ ná kāré mahiratna dhīmahi ||

1.141.11a asmé rayíṁ ná svárthaṁ dámūnasam bhágaṁ dákṣaṁ ná papr̥cāsi dharṇasím |
1.141.11c raśmī́m̐r iva yó yámati jánmanī ubhé devā́nāṁ śáṁsam r̥tá ā́ ca sukrátuḥ ||

1.141.12a utá naḥ sudyótmā jīrā́śvo hótā mandráḥ śr̥ṇavac candrárathaḥ |
1.141.12c sá no neṣan néṣatamair ámūro 'gnír vāmáṁ suvitáṁ vásyo áccha ||

1.141.13a ástāvy agníḥ śímīvadbhir arkaíḥ sā́mrājyāya prataráṁ dádhānaḥ |
1.141.13c amī́ ca yé maghávāno vayáṁ ca míhaṁ ná sū́ro áti níṣ ṭatanyuḥ ||

1.142.01a sámiddho agna ā́ vaha devā́m̐ adyá yatásruce |
1.142.01c tántuṁ tanuṣva pūrvyáṁ sutásomāya dāśúṣe ||

1.142.02a ghr̥távantam úpa māsi mádhumantaṁ tanūnapāt |
1.142.02c yajñáṁ víprasya mā́vataḥ śaśamānásya dāśúṣaḥ ||

1.142.03a śúciḥ pāvakó ádbhuto mádhvā yajñám mimikṣati |
1.142.03c nárāśáṁsas trír ā́ divó devó devéṣu yajñíyaḥ ||

1.142.04a īḷitó agna ā́ vahéndraṁ citrám ihá priyám |
1.142.04c iyáṁ hí tvā matír mámā́cchā sujihva vacyáte ||

1.142.05a str̥ṇānā́so yatásruco barhír yajñé svadhvaré |
1.142.05c vr̥ñjé devávyacastamam índrāya śárma sapráthaḥ ||

1.142.06a ví śrayantām r̥tāvŕ̥dhaḥ prayaí devébhyo mahī́ḥ |
1.142.06c pāvakā́saḥ puruspŕ̥ho dvā́ro devī́r asaścátaḥ ||

1.142.07a ā́ bhándamāne úpāke náktoṣā́sā supéśasā |
1.142.07c yahvī́ r̥tásya mātárā sī́datām barhír ā́ sumát ||

1.142.08a mandrájihvā jugurváṇī hótārā daívyā kavī́ |
1.142.08c yajñáṁ no yakṣatām imáṁ sidhrám adyá divispŕ̥śam ||

1.142.09a śúcir devéṣv árpitā hótrā marútsu bhā́ratī |
1.142.09c íḷā sárasvatī mahī́ barhíḥ sīdantu yajñíyāḥ ||

1.142.10a tán nas turī́pam ádbhutam purú vā́ram purú tmánā |
1.142.10c tváṣṭā póṣāya ví ṣyatu rāyé nā́bhā no asmayúḥ ||

1.142.11a avasr̥jánn úpa tmánā devā́n yakṣi vanaspate |
1.142.11c agnír havyā́ suṣūdati devó devéṣu médhiraḥ ||

1.142.12a pūṣaṇváte marútvate viśvádevāya vāyáve |
1.142.12c svā́hā gāyatrávepase havyám índrāya kartana ||

1.142.13a svā́hākr̥tāny ā́ gahy úpa havyā́ni vītáye |
1.142.13c índrā́ gahi śrudhī́ hávaṁ tvā́ṁ havante adhvaré ||

1.143.01a prá távyasīṁ návyasīṁ dhītím agnáye vācó matíṁ sáhasaḥ sūnáve bhare |
1.143.01c apā́ṁ nápād yó vásubhiḥ sahá priyó hótā pr̥thivyā́ṁ ny ásīdad r̥tvíyaḥ ||

1.143.02a sá jā́yamānaḥ paramé vyòmany āvír agnír abhavan mātaríśvane |
1.143.02c asyá krátvā samidhānásya majmánā prá dyā́vā śocíḥ pr̥thivī́ arocayat ||

1.143.03a asyá tveṣā́ ajárā asyá bhānávaḥ susaṁdŕ̥śaḥ suprátīkasya sudyútaḥ |
1.143.03c bhā́tvakṣaso áty aktúr ná síndhavo 'gné rejante ásasanto ajárāḥ ||

1.143.04a yám eriré bhŕ̥gavo viśvávedasaṁ nā́bhā pr̥thivyā́ bhúvanasya majmánā |
1.143.04c agníṁ táṁ gīrbhír hinuhi svá ā́ dáme yá éko vásvo váruṇo ná rā́jati ||

1.143.05a ná yó várāya marútām iva svanáḥ séneva sr̥ṣṭā́ divyā́ yáthāśániḥ |
1.143.05c agnír jámbhais tigitaír atti bhárvati yodhó ná śátrūn sá vánā ny r̥̀ñjate ||

1.143.06a kuvín no agnír ucáthasya vī́r ásad vásuṣ kuvíd vásubhiḥ kā́mam āvárat |
1.143.06c codáḥ kuvít tutujyā́t sātáye dhíyaḥ śúcipratīkaṁ tám ayā́ dhiyā́ gr̥ṇe ||

1.143.07a ghr̥tápratīkaṁ va r̥tásya dhūrṣádam agním mitráṁ ná samidhāná r̥ñjate |
1.143.07c índhāno akró vidátheṣu dī́dyac chukrávarṇām úd u no yaṁsate dhíyam ||

1.143.08a áprayucchann áprayucchadbhir agne śivébhir naḥ pāyúbhiḥ pāhi śagmaíḥ |
1.143.08c ádabdhebhir ádr̥pitebhir iṣṭé 'nimiṣadbhiḥ pári pāhi no jā́ḥ ||

1.144.01a éti prá hótā vratám asya māyáyordhvā́ṁ dádhānaḥ śúcipeśasaṁ dhíyam |
1.144.01c abhí srúcaḥ kramate dakṣiṇāvŕ̥to yā́ asya dhā́ma prathamáṁ ha níṁsate ||

1.144.02a abhī́m r̥tásya dohánā anūṣata yónau devásya sádane párīvr̥tāḥ |
1.144.02c apā́m upásthe víbhr̥to yád ā́vasad ádha svadhā́ adhayad yā́bhir ī́yate ||

1.144.03a yúyūṣataḥ sávayasā tád íd vápuḥ samānám árthaṁ vitáritratā mitháḥ |
1.144.03c ā́d īm bhágo ná hávyaḥ sám asmád ā́ vóḷhur ná raśmī́n sám ayaṁsta sā́rathiḥ ||

1.144.04a yám īṁ dvā́ sávayasā saparyátaḥ samāné yónā mithunā́ sámokasā |
1.144.04c dívā ná náktam palitó yúvājani purū́ cárann ajáro mā́nuṣā yugā́ ||

1.144.05a tám īṁ hinvanti dhītáyo dáśa vríśo devám mártāsa ūtáye havāmahe |
1.144.05c dhánor ádhi praváta ā́ sá r̥ṇvaty abhivrájadbhir vayúnā návādhita ||

1.144.06a tváṁ hy àgne divyásya rā́jasi tvám pā́rthivasya paśupā́ iva tmánā |
1.144.06c énī ta eté br̥hatī́ abhiśríyā hiraṇyáyī vákvarī barhír āśāte ||

1.144.07a ágne juṣásva práti harya tád váco mándra svádhāva ŕ̥tajāta súkrato |
1.144.07c yó viśvátaḥ pratyáṅṅ ási darśató raṇváḥ sáṁdr̥ṣṭau pitumā́m̐ iva kṣáyaḥ ||

1.145.01a tám pr̥cchatā sá jagāmā sá veda sá cikitvā́m̐ īyate sā́ nv ī̀yate |
1.145.01c tásmin santi praśíṣas tásminn iṣṭáyaḥ sá vā́jasya śávasaḥ śuṣmíṇas pátiḥ ||

1.145.02a tám ít pr̥cchanti ná simó ví pr̥cchati svéneva dhī́ro mánasā yád ágrabhīt |
1.145.02c ná mr̥ṣyate prathamáṁ nā́paraṁ váco 'syá krátvā sacate ápradr̥pitaḥ ||

1.145.03a tám íd gacchanti juhvàs tám árvatīr víśvāny ékaḥ śr̥ṇavad vácāṁsi me |
1.145.03c purupraiṣás táturir yajñasā́dhanó 'cchidrotiḥ śíśur ā́datta sáṁ rábhaḥ ||

1.145.04a upasthā́yaṁ carati yát samā́rata sadyó jātás tatsāra yújyebhiḥ |
1.145.04c abhí śvāntám mr̥śate nāndyè mudé yád īṁ gácchanty uśatī́r apiṣṭhitám ||

1.145.05a sá īm mr̥gó ápyo vanargúr úpa tvacy ùpamásyāṁ ní dhāyi |
1.145.05c vy àbravīd vayúnā mártyebhyo 'gnír vidvā́m̐ r̥tacíd dhí satyáḥ ||

1.146.01a trimūrdhā́naṁ saptáraśmiṁ gr̥ṇīṣé 'nūnam agním pitrór upásthe |
1.146.01c niṣattám asya cárato dhruvásya víśvā divó rocanā́paprivā́ṁsam ||

1.146.02a ukṣā́ mahā́m̐ abhí vavakṣa ene ajáras tasthāv itáūtir r̥ṣváḥ |
1.146.02c urvyā́ḥ padó ní dadhāti sā́nau rihánty ū́dho aruṣā́so asya ||

1.146.03a samānáṁ vatsám abhí saṁcárantī víṣvag dhenū́ ví carataḥ suméke |
1.146.03c anapavr̥jyā́m̐ ádhvano mímāne víśvān kétām̐ ádhi mahó dádhāne ||

1.146.04a dhī́rāsaḥ padáṁ kaváyo nayanti nā́nā hr̥dā́ rákṣamāṇā ajuryám |
1.146.04c síṣāsantaḥ páry apaśyanta síndhum āvír ebhyo abhavat sū́ryo nr̥̄́n ||

1.146.05a didr̥kṣéṇyaḥ pári kā́ṣṭhāsu jénya īḷényo mahó árbhāya jīváse |
1.146.05c purutrā́ yád ábhavat sū́r áhaibhyo gárbhebhyo maghávā viśvádarśataḥ ||

1.147.01a kathā́ te agne śucáyanta āyór dadāśúr vā́jebhir āśuṣāṇā́ḥ |
1.147.01c ubhé yát toké tánaye dádhānā r̥tásya sā́man raṇáyanta devā́ḥ ||

1.147.02a bódhā me asyá vácaso yaviṣṭha máṁhiṣṭhasya prábhr̥tasya svadhāvaḥ |
1.147.02c pī́yati tvo ánu tvo gr̥ṇāti vandā́rus te tanvàṁ vande agne ||

1.147.03a yé pāyávo māmateyáṁ te agne páśyanto andháṁ duritā́d árakṣan |
1.147.03c rarákṣa tā́n sukŕ̥to viśvávedā dípsanta íd ripávo nā́ha debhuḥ ||

1.147.04a yó no agne árarivām̐ aghāyúr arātīvā́ marcáyati dvayéna |
1.147.04c mántro gurúḥ púnar astu só asmā ánu mr̥kṣīṣṭa tanvàṁ duruktaíḥ ||

1.147.05a utá vā yáḥ sahasya pravidvā́n márto mártam marcáyati dvayéna |
1.147.05c átaḥ pāhi stavamāna stuvántam ágne mā́kir no duritā́ya dhāyīḥ ||

1.148.01a máthīd yád īṁ viṣṭó mātaríśvā hótāraṁ viśvā́psuṁ viśvádevyam |
1.148.01c ní yáṁ dadhúr manuṣyā̀su vikṣú svàr ṇá citráṁ vápuṣe vibhā́vam ||

1.148.02a dadānám ín ná dadabhanta mánmāgnír várūtham máma tásya cākan |
1.148.02c juṣánta víśvāny asya kármópastutim bháramāṇasya kāróḥ ||

1.148.03a nítye cin nú yáṁ sádane jagr̥bhré práśastibhir dadhiré yajñíyāsaḥ |
1.148.03c prá sū́ nayanta gr̥bháyanta iṣṭā́v áśvāso ná rathyò rārahāṇā́ḥ ||

1.148.04a purū́ṇi dasmó ní riṇāti jámbhair ā́d rocate vána ā́ vibhā́vā |
1.148.04c ā́d asya vā́to ánu vāti śocír ástur ná śáryām asanā́m ánu dyū́n ||

1.148.05a ná yáṁ ripávo ná riṣaṇyávo gárbhe sántaṁ reṣaṇā́ reṣáyanti |
1.148.05c andhā́ apaśyā́ ná dabhann abhikhyā́ nítyāsa īm pretā́ro arakṣan ||

1.149.01a maháḥ sá rāyá éṣate pátir dánn iná inásya vásunaḥ padá ā́ |
1.149.01c úpa dhrájantam ádrayo vidhánn ít ||

1.149.02a sá yó vŕ̥ṣā narā́ṁ ná ródasyoḥ śrávobhir ásti jīvápītasargaḥ |
1.149.02c prá yáḥ sasrāṇáḥ śiśrītá yónau ||

1.149.03a ā́ yáḥ púraṁ nā́rmiṇīm ádīded átyaḥ kavír nabhanyò nā́rvā |
1.149.03c sū́ro ná rurukvā́ñ chatā́tmā ||

1.149.04a abhí dvijánmā trī́ rocanā́ni víśvā rájāṁsi śuśucānó asthāt |
1.149.04c hótā yájiṣṭho apā́ṁ sadhásthe ||

1.149.05a ayáṁ sá hótā yó dvijánmā víśvā dadhé vā́ryāṇi śravasyā́ |
1.149.05c márto yó asmai sutúko dadā́śa ||

1.150.01a purú tvā dāśvā́n voce 'rír agne táva svid ā́ |
1.150.01c todásyeva śaraṇá ā́ mahásya ||

1.150.02a vy àninásya dhanínaḥ prahoṣé cid áraruṣaḥ |
1.150.02c kadā́ caná prajígato ádevayoḥ ||

1.150.03a sá candró vipra mártyo mahó vrā́dhantamo diví |
1.150.03c prá-prét te agne vanúṣaḥ syāma ||

1.151.01a mitráṁ ná yáṁ śímyā góṣu gavyávaḥ svādhyò vidáthe apsú jī́janan |
1.151.01c árejetāṁ ródasī pā́jasā girā́ práti priyáṁ yajatáṁ janúṣām ávaḥ ||

1.151.02a yád dha tyád vām purumīḷhásya somínaḥ prá mitrā́so ná dadhiré svābhúvaḥ |
1.151.02c ádha krátuṁ vidataṁ gātúm árcata utá śrutaṁ vr̥ṣaṇā pastyā̀vataḥ ||

1.151.03a ā́ vām bhūṣan kṣitáyo jánma ródasyoḥ pravā́cyaṁ vr̥ṣaṇā dákṣase mahé |
1.151.03c yád īm r̥tā́ya bháratho yád árvate prá hótrayā śímyā vītho adhvarám ||

1.151.04a prá sā́ kṣitír asura yā́ máhi priyá ŕ̥tāvānāv r̥tám ā́ ghoṣatho br̥hát |
1.151.04c yuváṁ divó br̥ható dákṣam ābhúvaṁ gā́ṁ ná dhury úpa yuñjāthe apáḥ ||

1.151.05a mahī́ átra mahinā́ vā́ram r̥ṇvatho 'reṇávas túja ā́ sádman dhenávaḥ |
1.151.05c sváranti tā́ uparátāti sū́ryam ā́ nimrúca uṣásas takvavī́r iva ||

1.151.06a ā́ vām r̥tā́ya keśínīr anūṣata mítra yátra váruṇa gātúm árcathaḥ |
1.151.06c áva tmánā sr̥játam pínvataṁ dhíyo yuváṁ víprasya mánmanām irajyathaḥ ||

1.151.07a yó vāṁ yajñaíḥ śaśamānó ha dā́śati kavír hótā yájati manmasā́dhanaḥ |
1.151.07c úpā́ha táṁ gácchatho vīthó adhvarám ácchā gíraḥ sumatíṁ gantam asmayū́ ||

1.151.08a yuvā́ṁ yajñaíḥ prathamā́ góbhir añjata ŕ̥tāvānā mánaso ná práyuktiṣu |
1.151.08c bháranti vām mánmanā saṁyátā gíró 'dr̥pyatā mánasā revád āśāthe ||

1.151.09a revád váyo dadhāthe revád āśāthe nárā māyā́bhir itáūti mā́hinam |
1.151.09c ná vāṁ dyā́vó 'habhir nótá síndhavo ná devatvám paṇáyo nā́naśur maghám ||

1.152.01a yuváṁ vástrāṇi pīvasā́ vasāthe yuvór ácchidrā mántavo ha sárgāḥ |
1.152.01c ávātiratam ánr̥tāni víśva r̥téna mitrāvaruṇā sacethe ||

1.152.02a etác caná tvo ví ciketad eṣāṁ satyó mántraḥ kaviśastá ŕ̥ghāvān |
1.152.02c triráśriṁ hanti cáturaśrir ugró devanído há prathamā́ ajūryan ||

1.152.03a apā́d eti prathamā́ padvátīnāṁ kás tád vām mitrāvaruṇā́ ciketa |
1.152.03c gárbho bhārám bharaty ā́ cid asya r̥tám píparty ánr̥taṁ ní tārīt ||

1.152.04a prayántam ít pári jāráṁ kanī́nām páśyāmasi nópanipádyamānam |
1.152.04c ánavapr̥gṇā vítatā vásānam priyám mitrásya váruṇasya dhā́ma ||

1.152.05a anaśvó jātó anabhīśúr árvā kánikradat patayad ūrdhvásānuḥ |
1.152.05c acíttam bráhma jujuṣur yúvānaḥ prá mitré dhā́ma váruṇe gr̥ṇántaḥ ||

1.152.06a ā́ dhenávo māmateyám ávantīr brahmapríyam pīpayan sásminn ū́dhan |
1.152.06c pitvó bhikṣeta vayúnāni vidvā́n āsā́vívāsann áditim uruṣyet ||

1.152.07a ā́ vām mitrāvaruṇā havyájuṣṭiṁ námasā devāv ávasā vavr̥tyām |
1.152.07c asmā́kam bráhma pŕ̥tanāsu sahyā asmā́kaṁ vr̥ṣṭír divyā́ supārā́ ||

1.153.01a yájāmahe vām maháḥ sajóṣā havyébhir mitrāvaruṇā námobhiḥ |
1.153.01c ghr̥taír ghr̥tasnū ádha yád vām asmé adhvaryávo ná dhītíbhir bháranti ||

1.153.02a prástutir vāṁ dhā́ma ná práyuktir áyāmi mitrāvaruṇā suvr̥ktíḥ |
1.153.02c anákti yád vāṁ vidátheṣu hótā sumnáṁ vāṁ sūrír vr̥ṣaṇāv íyakṣan ||

1.153.03a pīpā́ya dhenúr áditir r̥tā́ya jánāya mitrāvaruṇā havirdé |
1.153.03c hinóti yád vāṁ vidáthe saparyán sá rātáhavyo mā́nuṣo ná hótā ||

1.153.04a utá vāṁ vikṣú mádyāsv ándho gā́va ā́paś ca pīpayanta devī́ḥ |
1.153.04c utó no asyá pūrvyáḥ pátir dán vītám pātám páyasa usríyāyāḥ ||

1.154.01a víṣṇor nú kaṁ vīryā̀ṇi prá vocaṁ yáḥ pā́rthivāni vimamé rájāṁsi |
1.154.01c yó áskabhāyad úttaraṁ sadhásthaṁ vicakramāṇás tredhórugāyáḥ ||

1.154.02a prá tád víṣṇuḥ stavate vīryèṇa mr̥gó ná bhīmáḥ kucaró giriṣṭhā́ḥ |
1.154.02c yásyorúṣu triṣú vikrámaṇeṣv adhikṣiyánti bhúvanāni víśvā ||

1.154.03a prá víṣṇave śūṣám etu mánma girikṣíta urugāyā́ya vŕ̥ṣṇe |
1.154.03c yá idáṁ dīrghám práyataṁ sadhástham éko vimamé tribhír ít padébhiḥ ||

1.154.04a yásya trī́ pūrṇā́ mádhunā padā́ny ákṣīyamāṇā svadháyā mádanti |
1.154.04c yá u tridhā́tu pr̥thivī́m utá dyā́m éko dādhā́ra bhúvanāni víśvā ||

1.154.05a tád asya priyám abhí pā́tho aśyāṁ náro yátra devayávo mádanti |
1.154.05c urukramásya sá hí bándhur itthā́ víṣṇoḥ padé paramé mádhva útsaḥ ||

1.154.06a tā́ vāṁ vā́stūny uśmasi gámadhyai yátra gā́vo bhū́riśr̥ṅgā ayā́saḥ |
1.154.06c átrā́ha tád urugāyásya vŕ̥ṣṇaḥ paramám padám áva bhāti bhū́ri ||

1.155.01a prá vaḥ pā́ntam ándhaso dhiyāyaté mahé śū́rāya víṣṇave cārcata |
1.155.01c yā́ sā́nuni párvatānām ádābhyā mahás tasthátur árvateva sādhúnā ||

1.155.02a tveṣám itthā́ samáraṇaṁ śímīvator índrāviṣṇū sutapā́ vām uruṣyati |
1.155.02c yā́ mártyāya pratidhīyámānam ít kr̥śā́nor ástur asanā́m uruṣyáthaḥ ||

1.155.03a tā́ īṁ vardhanti máhy asya paúṁsyaṁ ní mātárā nayati rétase bhujé |
1.155.03c dádhāti putró 'varam páram pitúr nā́ma tr̥tī́yam ádhi rocané diváḥ ||

1.155.04a tát-tad íd asya paúṁsyaṁ gr̥ṇīmasīnásya trātúr avr̥kásya mīḷhúṣaḥ |
1.155.04c yáḥ pā́rthivāni tribhír íd vígāmabhir urú krámiṣṭorugāyā́ya jīváse ||

1.155.05a dvé íd asya krámaṇe svardŕ̥śo 'bhikhyā́ya mártyo bhuraṇyati |
1.155.05c tr̥tī́yam asya nákir ā́ dadharṣati váyaś caná patáyantaḥ patatríṇaḥ ||

1.155.06a catúrbhiḥ sākáṁ navatíṁ ca nā́mabhiś cakráṁ ná vr̥ttáṁ vyátīm̐r avīvipat |
1.155.06c br̥háccharīro vimímāna ŕ̥kvabhir yúvā́kumāraḥ práty ety āhavám ||

1.156.01a bhávā mitró ná śévyo ghr̥tā́sutir víbhūtadyumna evayā́ u sapráthāḥ |
1.156.01c ádhā te viṣṇo vidúṣā cid árdhyaḥ stómo yajñáś ca rā́dhyo havíṣmatā ||

1.156.02a yáḥ pūrvyā́ya vedháse návīyase sumájjānaye víṣṇave dádāśati |
1.156.02c yó jātám asya maható máhi brávat séd u śrávobhir yújyaṁ cid abhy àsat ||

1.156.03a tám u stotāraḥ pūrvyáṁ yáthā vidá r̥tásya gárbhaṁ janúṣā pipartana |
1.156.03c ā́sya jānánto nā́ma cid vivaktana mahás te viṣṇo sumatím bhajāmahe ||

1.156.04a tám asya rā́jā váruṇas tám aśvínā krátuṁ sacanta mā́rutasya vedhásaḥ |
1.156.04c dādhā́ra dákṣam uttamám aharvídaṁ vrajáṁ ca víṣṇuḥ sákhivām̐ aporṇuté ||

1.156.05a ā́ yó vivā́ya sacáthāya daívya índrāya víṣṇuḥ sukŕ̥te sukŕ̥ttaraḥ |
1.156.05c vedhā́ ajinvat triṣadhasthá ā́ryam r̥tásya bhāgé yájamānam ā́bhajat ||

1.157.01a ábodhy agnír jmá úd eti sū́ryo vy ùṣā́ś candrā́ mahy ā̀vo arcíṣā |
1.157.01c ā́yukṣātām aśvínā yā́tave rátham prā́sāvīd deváḥ savitā́ jágat pŕ̥thak ||

1.157.02a yád yuñjā́the vŕ̥ṣaṇam aśvinā ráthaṁ ghr̥téna no mádhunā kṣatrám ukṣatam |
1.157.02c asmā́kam bráhma pŕ̥tanāsu jinvataṁ vayáṁ dhánā śū́rasātā bhajemahi ||

1.157.03a arvā́ṅ tricakró madhuvā́hano rátho jīrā́śvo aśvínor yātu súṣṭutaḥ |
1.157.03c trivandhuró maghávā viśvásaubhagaḥ śáṁ na ā́ vakṣad dvipáde cátuṣpade ||

1.157.04a ā́ na ū́rjaṁ vahatam aśvinā yuvám mádhumatyā naḥ káśayā mimikṣatam |
1.157.04c prā́yus tā́riṣṭaṁ nī́ rápāṁsi mr̥kṣataṁ sédhataṁ dvéṣo bhávataṁ sacābhúvā ||

1.157.05a yuváṁ ha gárbhaṁ jágatīṣu dhattho yuváṁ víśveṣu bhúvaneṣv antáḥ |
1.157.05c yuvám agníṁ ca vr̥ṣaṇāv apáś ca vánaspátīm̐r aśvināv aírayethām ||

1.157.06a yuváṁ ha stho bhiṣájā bheṣajébhir átho ha stho rathyā̀ rā́thyebhiḥ |
1.157.06c átho ha kṣatrám ádhi dhattha ugrā yó vāṁ havíṣmān mánasā dadā́śa ||

1.158.01a vásū rudrā́ purumántū vr̥dhántā daśasyátaṁ no vr̥ṣaṇāv abhíṣṭau |
1.158.01c dásrā ha yád rékṇa aucathyó vām prá yát sasrā́the ákavābhir ūtī́ ||

1.158.02a kó vāṁ dāśat sumatáye cid asyaí vásū yád dhéthe námasā padé góḥ |
1.158.02c jigr̥tám asmé revátīḥ púraṁdhīḥ kāmapréṇeva mánasā cárantā ||

1.158.03a yuktó ha yád vāṁ taugryā́ya perúr ví mádhye árṇaso dhā́yi pajráḥ |
1.158.03c úpa vām ávaḥ śaraṇáṁ gameyaṁ śū́ro nā́jma patáyadbhir évaiḥ ||

1.158.04a úpastutir aucathyám uruṣyen mā́ mā́m imé patatríṇī ví dugdhām |
1.158.04c mā́ mā́m édho dáśatayaś citó dhāk prá yád vām baddhás tmáni khā́dati kṣā́m ||

1.158.05a ná mā garan nadyò mātŕ̥tamā dāsā́ yád īṁ súsamubdham avā́dhuḥ |
1.158.05c śíro yád asya traitanó vitákṣat svayáṁ dāsá úro áṁsāv ápi gdha ||

1.158.06a dīrghátamā māmateyó jujurvā́n daśamé yugé |
1.158.06c apā́m árthaṁ yatī́nām brahmā́ bhavati sā́rathiḥ ||

1.159.01a prá dyā́vā yajñaíḥ pr̥thivī́ r̥tāvŕ̥dhā mahī́ stuṣe vidátheṣu prácetasā |
1.159.01c devébhir yé deváputre sudáṁsasetthā́ dhiyā́ vā́ryāṇi prabhū́ṣataḥ ||

1.159.02a utá manye pitúr adrúho máno mātúr máhi svátavas tád dhávīmabhiḥ |
1.159.02c surétasā pitárā bhū́ma cakratur urú prajā́yā amŕ̥taṁ várīmabhiḥ ||

1.159.03a té sūnávaḥ svápasaḥ sudáṁsaso mahī́ jajñur mātárā pūrvácittaye |
1.159.03c sthātúś ca satyáṁ jágataś ca dhármaṇi putrásya pāthaḥ padám ádvayāvinaḥ ||

1.159.04a té māyíno mamire suprácetaso jāmī́ sáyonī mithunā́ sámokasā |
1.159.04c návyaṁ-navyaṁ tántum ā́ tanvate diví samudré antáḥ kaváyaḥ sudītáyaḥ ||

1.159.05a tád rā́dho adyá savitúr váreṇyaṁ vayáṁ devásya prasavé manāmahe |
1.159.05c asmábhyaṁ dyāvāpr̥thivī sucetúnā rayíṁ dhattaṁ vásumantaṁ śatagvínam ||

1.160.01a té hí dyā́vāpr̥thivī́ viśváśambhuva r̥tā́varī rájaso dhārayátkavī |
1.160.01c sujánmanī dhiṣáṇe antár īyate devó devī́ dhármaṇā sū́ryaḥ śúciḥ ||

1.160.02a uruvyácasā mahínī asaścátā pitā́ mātā́ ca bhúvanāni rakṣataḥ |
1.160.02c sudhŕ̥ṣṭame vapuṣyè ná ródasī pitā́ yát sīm abhí rūpaír ávāsayat ||

1.160.03a sá váhniḥ putráḥ pitróḥ pavítravān punā́ti dhī́ro bhúvanāni māyáyā |
1.160.03c dhenúṁ ca pŕ̥śniṁ vr̥ṣabháṁ surétasaṁ viśvā́hā śukrám páyo asya dukṣata ||

1.160.04a ayáṁ devā́nām apásām apástamo yó jajā́na ródasī viśváśambhuvā |
1.160.04c ví yó mamé rájasī sukratūyáyājárebhiḥ skámbhanebhiḥ sám ānr̥ce ||

1.160.05a té no gr̥ṇāné mahinī máhi śrávaḥ kṣatráṁ dyāvāpr̥thivī dhāsatho br̥hát |
1.160.05c yénābhí kr̥ṣṭī́s tatánāma viśváhā panā́yyam ójo asmé sám invatam ||

1.161.01a kím u śréṣṭhaḥ kíṁ yáviṣṭho na ā́jagan kím īyate dūtyàṁ kád yád ūcimá |
1.161.01c ná nindima camasáṁ yó mahākuló 'gne bhrātar drúṇa íd bhūtím ūdima ||

1.161.02a ékaṁ camasáṁ catúraḥ kr̥ṇotana tád vo devā́ abruvan tád va ā́gamam |
1.161.02c saúdhanvanā yády evā́ kariṣyátha sākáṁ devaír yajñíyāso bhaviṣyatha ||

1.161.03a agníṁ dūtám práti yád ábravītanā́śvaḥ kártvo rátha utéhá kártvaḥ |
1.161.03c dhenúḥ kártvā yuvaśā́ kártvā dvā́ tā́ni bhrātar ánu vaḥ kr̥tvy émasi ||

1.161.04a cakr̥vā́ṁsa r̥bhavas tád apr̥cchata kvéd abhūd yáḥ syá dūtó na ā́jagan |
1.161.04c yadā́vā́khyac camasā́ñ catúraḥ kr̥tā́n ā́d ít tváṣṭā gnā́sv antár ny ā̀naje ||

1.161.05a hánāmainām̐ íti tváṣṭā yád ábravīc camasáṁ yé devapā́nam ánindiṣuḥ |
1.161.05c anyā́ nā́māni kr̥ṇvate suté sácām̐ anyaír enān kanyā̀ nā́mabhiḥ sparat ||

1.161.06a índro hárī yuyujé aśvínā rátham bŕ̥haspátir viśvárūpām úpājata |
1.161.06c r̥bhúr víbhvā vā́jo devā́m̐ agacchata svápaso yajñíyam bhāgám aitana ||

1.161.07a níś cármaṇo gā́m ariṇīta dhītíbhir yā́ járantā yuvaśā́ tā́kr̥ṇotana |
1.161.07c saúdhanvanā áśvād áśvam atakṣata yuktvā́ rátham úpa devā́m̐ ayātana ||

1.161.08a idám udakám pibatéty abravītanedáṁ vā ghā pibatā muñjanéjanam |
1.161.08c saúdhanvanā yádi tán néva háryatha tr̥tī́ye ghā sávane mādayādhvai ||

1.161.09a ā́po bhū́yiṣṭhā íty éko abravīd agnír bhū́yiṣṭha íty anyó abravīt |
1.161.09c vadharyántīm bahúbhyaḥ praíko abravīd r̥tā́ vádantaś camasā́m̐ apiṁśata ||

1.161.10a śroṇā́m éka udakáṁ gā́m ávājati māṁsám ékaḥ piṁśati sūnáyā́bhr̥tam |
1.161.10c ā́ nimrúcaḥ śákr̥d éko ápābharat kíṁ svit putrébhyaḥ pitárā úpāvatuḥ ||

1.161.11a udvátsv asmā akr̥ṇotanā tŕ̥ṇaṁ nivátsv apáḥ svapasyáyā naraḥ |
1.161.11c ágohyasya yád ásastanā gr̥hé tád adyédám r̥bhavo nā́nu gacchatha ||

1.161.12a sammī́lya yád bhúvanā paryásarpata kvà svit tātyā́ pitárā va āsatuḥ |
1.161.12c áśapata yáḥ karásnaṁ va ādadé yáḥ prā́bravīt pró tásmā abravītana ||

1.161.13a suṣupvā́ṁsa r̥bhavas tád apr̥cchatā́gohya ká idáṁ no abūbudhat |
1.161.13c śvā́nam bastó bodhayitā́ram abravīt saṁvatsará idám adyā́ vy àkhyata ||

1.161.14a divā́ yānti marúto bhū́myāgnír ayáṁ vā́to antárikṣeṇa yāti |
1.161.14c adbhír yāti váruṇaḥ samudraír yuṣmā́m̐ icchántaḥ śavaso napātaḥ ||

1.162.01a mā́ no mitró váruṇo aryamā́yúr índra r̥bhukṣā́ marútaḥ pári khyan |
1.162.01c yád vājíno devájātasya sápteḥ pravakṣyā́mo vidáthe vīryā̀ṇi ||

1.162.02a yán nirṇíjā rékṇasā prā́vr̥tasya rātíṁ gr̥bhītā́m mukható náyanti |
1.162.02c súprāṅ ajó mémyad viśvárūpa indrāpūṣṇóḥ priyám ápy eti pā́thaḥ ||

1.162.03a eṣá cchā́gaḥ puró áśvena vājínā pūṣṇó bhāgó nīyate viśvádevyaḥ |
1.162.03c abhipríyaṁ yát puroḷā́śam árvatā tváṣṭéd enaṁ sauśravasā́ya jinvati ||

1.162.04a yád dhaviṣyàm r̥tuśó devayā́naṁ trír mā́nuṣāḥ páry áśvaṁ náyanti |
1.162.04c átrā pūṣṇáḥ prathamó bhāgá eti yajñáṁ devébhyaḥ prativedáyann ajáḥ ||

1.162.05a hótādhvaryúr ā́vayā agnimindhó grāvagrābhá utá śáṁstā súvipraḥ |
1.162.05c téna yajñéna svàraṁkr̥tena svìṣṭena vakṣáṇā ā́ pr̥ṇadhvam ||

1.162.06a yūpavraskā́ utá yé yūpavāhā́ś caṣā́laṁ yé aśvayūpā́ya tákṣati |
1.162.06c yé cā́rvate pácanaṁ sambháranty utó téṣām abhígūrtir na invatu ||

1.162.07a úpa prā́gāt sumán me 'dhāyi mánma devā́nām ā́śā úpa vītápr̥ṣṭhaḥ |
1.162.07c ánv enaṁ víprā ŕ̥ṣayo madanti devā́nām puṣṭé cakr̥mā subándhum ||

1.162.08a yád vājíno dā́ma saṁdā́nam árvato yā́ śīrṣaṇyā̀ raśanā́ rájjur asya |
1.162.08c yád vā ghāsya prábhr̥tam āsyè tŕ̥ṇaṁ sárvā tā́ te ápi devéṣv astu ||

1.162.09a yád áśvasya kravíṣo mákṣikā́śa yád vā svárau svádhitau riptám ásti |
1.162.09c yád dhástayoḥ śamitúr yán nakhéṣu sárvā tā́ te ápi devéṣv astu ||

1.162.10a yád ū́vadhyam udárasyāpavā́ti yá āmásya kravíṣo gandhó ásti |
1.162.10c sukr̥tā́ tác chamitā́raḥ kr̥ṇvantūtá médhaṁ śr̥tapā́kam pacantu ||

1.162.11a yát te gā́trād agnínā pacyámānād abhí śū́laṁ níhatasyāvadhā́vati |
1.162.11c mā́ tád bhū́myām ā́ śriṣan mā́ tŕ̥ṇeṣu devébhyas tád uśádbhyo rātám astu ||

1.162.12a yé vājínam paripáśyanti pakváṁ yá īm āhúḥ surabhír nír haréti |
1.162.12c yé cā́rvato māṁsabhikṣā́m upā́sata utó téṣām abhígūrtir na invatu ||

1.162.13a yán nī́kṣaṇam mām̐spácanyā ukhā́yā yā́ pā́trāṇi yūṣṇá āsécanāni |
1.162.13c ūṣmaṇyā̀pidhā́nā carūṇā́m aṅkā́ḥ sūnā́ḥ pári bhūṣanty áśvam ||

1.162.14a nikrámaṇaṁ niṣádanaṁ vivártanaṁ yác ca páḍbīśam árvataḥ |
1.162.14c yác ca papaú yác ca ghāsíṁ jaghā́sa sárvā tā́ te ápi devéṣv astu ||

1.162.15a mā́ tvāgnír dhvanayīd dhūmágandhir mókhā́ bhrā́janty abhí vikta jághriḥ |
1.162.15c iṣṭáṁ vītám abhígūrtaṁ váṣaṭkr̥taṁ táṁ devā́saḥ práti gr̥bhṇanty áśvam ||

1.162.16a yád áśvāya vā́sa upastr̥ṇánty adhīvāsáṁ yā́ híraṇyāny asmai |
1.162.16c saṁdā́nam árvantam páḍbīśam priyā́ devéṣv ā́ yāmayanti ||

1.162.17a yát te sādé máhasā śū́kr̥tasya pā́rṣṇyā vā káśayā vā tutóda |
1.162.17c srucéva tā́ havíṣo adhvaréṣu sárvā tā́ te bráhmaṇā sūdayāmi ||

1.162.18a cátustriṁśad vājíno devábandhor váṅkrīr áśvasya svádhitiḥ sám eti |
1.162.18c ácchidrā gā́trā vayúnā kr̥ṇota páruṣ-parur anughúṣyā ví śasta ||

1.162.19a ékas tváṣṭur áśvasyā viśastā́ dvā́ yantā́rā bhavatas tátha r̥túḥ |
1.162.19c yā́ te gā́trāṇām r̥tuthā́ kr̥ṇómi tā́-tā píṇḍānām prá juhomy agnaú ||

1.162.20a mā́ tvā tapat priyá ātmā́piyántam mā́ svádhitis tanvà ā́ tiṣṭhipat te |
1.162.20c mā́ te gr̥dhnúr aviśastā́tihā́ya chidrā́ gā́trāṇy asínā míthū kaḥ ||

1.162.21a ná vā́ u etán mriyase ná riṣyasi devā́m̐ íd eṣi pathíbhiḥ sugébhiḥ |
1.162.21c hárī te yúñjā pŕ̥ṣatī abhūtām úpāsthād vājī́ dhurí rā́sabhasya ||

1.162.22a sugávyaṁ no vājī́ sváśvyam puṁsáḥ putrā́m̐ utá viśvāpúṣaṁ rayím |
1.162.22c anāgāstváṁ no áditiḥ kr̥ṇotu kṣatráṁ no áśvo vanatāṁ havíṣmān ||

1.163.01a yád ákrandaḥ prathamáṁ jā́yamāna udyán samudrā́d utá vā púrīṣāt |
1.163.01c śyenásya pakṣā́ hariṇásya bāhū́ upastútyam máhi jātáṁ te arvan ||

1.163.02a yaména dattáṁ tritá enam āyunag índra eṇam prathamó ádhy atiṣṭhat |
1.163.02c gandharvó asya raśanā́m agr̥bhṇāt sū́rād áśvaṁ vasavo nír ataṣṭa ||

1.163.03a ási yamó ásy ādityó arvann ási tritó gúhyena vraténa |
1.163.03c ási sómena samáyā vípr̥kta āhús te trī́ṇi diví bándhanāni ||

1.163.04a trī́ṇi ta āhur diví bándhanāni trī́ṇy apsú trī́ṇy antáḥ samudré |
1.163.04c utéva me váruṇaś chantsy arvan yátrā ta āhúḥ paramáṁ janítram ||

1.163.05a imā́ te vājinn avamā́rjanānīmā́ śaphā́nāṁ sanitúr nidhā́nā |
1.163.05c átrā te bhadrā́ raśanā́ apaśyam r̥tásya yā́ abhirákṣanti gopā́ḥ ||

1.163.06a ātmā́naṁ te mánasārā́d ajānām avó divā́ patáyantam pataṁgám |
1.163.06c śíro apaśyam pathíbhiḥ sugébhir areṇúbhir jéhamānam patatrí ||

1.163.07a átrā te rūpám uttamám apaśyaṁ jígīṣamāṇam iṣá ā́ padé góḥ |
1.163.07c yadā́ te márto ánu bhógam ā́naḷ ā́d íd grásiṣṭha óṣadhīr ajīgaḥ ||

1.163.08a ánu tvā rátho ánu máryo arvann ánu gā́vó 'nu bhágaḥ kanī́nām |
1.163.08c ánu vrā́tāsas táva sakhyám īyur ánu devā́ mamire vīryàṁ te ||

1.163.09a híraṇyaśr̥ṅgó 'yo asya pā́dā mánojavā ávara índra āsīt |
1.163.09c devā́ íd asya havirádyam āyan yó árvantam prathamó adhyátiṣṭhat ||

1.163.10a īrmā́ntāsaḥ sílikamadhyamāsaḥ sáṁ śū́raṇāso divyā́so átyāḥ |
1.163.10c haṁsā́ iva śreṇiśó yatante yád ā́kṣiṣur divyám ájmam áśvāḥ ||

1.163.11a táva śárīram patayiṣṇv àrvan táva cittáṁ vā́ta iva dhrájīmān |
1.163.11c táva śŕ̥ṅgāṇi víṣṭhitā purutrā́raṇyeṣu járbhurāṇā caranti ||

1.163.12a úpa prā́gāc chásanaṁ vājy árvā devadrī́cā mánasā dī́dhyānaḥ |
1.163.12c ajáḥ puró nīyate nā́bhir asyā́nu paścā́t kaváyo yanti rebhā́ḥ ||

1.163.13a úpa prā́gāt paramáṁ yát sadhástham árvām̐ ácchā pitáram mātáraṁ ca |
1.163.13c adyā́ devā́ñ júṣṭatamo hí gamyā́ áthā́ śāste dāśúṣe vā́ryāṇi ||

1.164.01a asyá vāmásya palitásya hótus tásya bhrā́tā madhyamó asty áśnaḥ |
1.164.01c tr̥tī́yo bhrā́tā ghr̥tápr̥ṣṭho asyā́trāpaśyaṁ viśpátiṁ saptáputram ||

1.164.02a saptá yuñjanti rátham ékacakram éko áśvo vahati saptánāmā |
1.164.02c trinā́bhi cakrám ajáram anarváṁ yátremā́ víśvā bhúvanā́dhi tasthúḥ ||

1.164.03a imáṁ rátham ádhi yé saptá tasthúḥ saptácakraṁ saptá vahanty áśvāḥ |
1.164.03c saptá svásāro abhí sáṁ navante yátra gávāṁ níhitā saptá nā́ma ||

1.164.04a kó dadarśa prathamáṁ jā́yamānam asthanvántaṁ yád anasthā́ bíbharti |
1.164.04c bhū́myā ásur ásr̥g ātmā́ kvà svit kó vidvā́ṁsam úpa gāt práṣṭum etát ||

1.164.05a pā́kaḥ pr̥cchāmi mánasā́vijānan devā́nām enā́ níhitā padā́ni |
1.164.05c vatsé baṣkáyé 'dhi saptá tántūn ví tatnire kaváya ótavā́ u ||

1.164.06a ácikitvāñ cikitúṣaś cid átra kavī́n pr̥cchāmi vidmáne ná vidvā́n |
1.164.06c ví yás tastámbha ṣáḷ imā́ rájāṁsy ajásya rūpé kím ápi svid ékam ||

1.164.07a ihá bravītu yá īm aṅgá védāsyá vāmásya níhitam padáṁ véḥ |
1.164.07c śīrṣṇáḥ kṣīráṁ duhrate gā́vo asya vavríṁ vásānā udakám padā́puḥ ||

1.164.08a mātā́ pitáram r̥tá ā́ babhāja dhīty ágre mánasā sáṁ hí jagmé |
1.164.08c sā́ bībhatsúr gárbharasā níviddhā námasvanta íd upavākám īyuḥ ||

1.164.09a yuktā́ mātā́sīd dhurí dákṣiṇāyā átiṣṭhad gárbho vr̥janī́ṣv antáḥ |
1.164.09c ámīmed vatsó ánu gā́m apaśyad viśvarūpyàṁ triṣú yójaneṣu ||

1.164.10a tisró mātr̥̄́s trī́n pitr̥̄́n bíbhrad éka ūrdhvás tasthau ném áva glāpayanti |
1.164.10c mantráyante divó amúṣya pr̥ṣṭhé viśvavídaṁ vā́cam áviśvaminvām ||

1.164.11a dvā́daśāraṁ nahí táj járāya várvarti cakrám pári dyā́m r̥tásya |
1.164.11c ā́ putrā́ agne mithunā́so átra saptá śatā́ni viṁśatíś ca tasthuḥ ||

1.164.12a páñcapādam pitáraṁ dvā́daśākr̥tiṁ divá āhuḥ páre árdhe purīṣíṇam |
1.164.12c áthemé anyá úpare vicakṣaṇáṁ saptácakre ṣáḷara āhur árpitam ||

1.164.13a páñcāre cakré parivártamāne tásminn ā́ tasthur bhúvanāni víśvā |
1.164.13c tásya nā́kṣas tapyate bhū́ribhāraḥ sanā́d evá ná śīryate sánābhiḥ ||

1.164.14a sánemi cakrám ajáraṁ ví vāvr̥ta uttānā́yāṁ dáśa yuktā́ vahanti |
1.164.14c sū́ryasya cákṣū rájasaity ā́vr̥taṁ tásminn ā́rpitā bhúvanāni víśvā ||

1.164.15a sākaṁjā́nāṁ saptátham āhur ekajáṁ ṣáḷ íd yamā́ ŕ̥ṣayo devajā́ íti |
1.164.15c téṣām iṣṭā́ni víhitāni dhāmaśáḥ sthātré rejante víkr̥tāni rūpaśáḥ ||

1.164.16a stríyaḥ satī́s tā́m̐ u me puṁsá āhuḥ páśyad akṣaṇvā́n ná ví cetad andháḥ |
1.164.16c kavír yáḥ putráḥ sá īm ā́ ciketa yás tā́ vijānā́t sá pitúṣ pitā́sat ||

1.164.17a aváḥ páreṇa pará enā́vareṇa padā́ vatsám bíbhratī gaúr úd asthāt |
1.164.17c sā́ kadrī́cī káṁ svid árdham párāgāt kvà svit sūte nahí yūthé antáḥ ||

1.164.18a aváḥ páreṇa pitáraṁ yó asyānuvéda pará enā́vareṇa |
1.164.18c kavīyámānaḥ ká ihá prá vocad devám mánaḥ kúto ádhi prájātam ||

1.164.19a yé arvā́ñcas tā́m̐ u párāca āhur yé párāñcas tā́m̐ u arvā́ca āhuḥ |
1.164.19c índraś ca yā́ cakráthuḥ soma tā́ni dhurā́ ná yuktā́ rájaso vahanti ||

1.164.20a dvā́ suparṇā́ sayújā sákhāyā samānáṁ vr̥kṣám pári ṣasvajāte |
1.164.20c táyor anyáḥ píppalaṁ svādv átty ánaśnann anyó abhí cākaśīti ||

1.164.21a yátrā suparṇā́ amŕ̥tasya bhāgám ánimeṣaṁ vidáthābhisváranti |
1.164.21c inó víśvasya bhúvanasya gopā́ḥ sá mā dhī́raḥ pā́kam átrā́ viveśa ||

1.164.22a yásmin vr̥kṣé madhvádaḥ suparṇā́ niviśánte súvate cā́dhi víśve |
1.164.22c tásyéd āhuḥ píppalaṁ svādv ágre tán nón naśad yáḥ pitáraṁ ná véda ||

1.164.23a yád gāyatré ádhi gāyatrám ā́hitaṁ traíṣṭubhād vā traíṣṭubhaṁ nirátakṣata |
1.164.23c yád vā jágaj jágaty ā́hitam padáṁ yá ít tád vidús té amr̥tatvám ānaśuḥ ||

1.164.24a gāyatréṇa práti mimīte arkám arkéṇa sā́ma traíṣṭubhena vākám |
1.164.24c vākéna vākáṁ dvipádā cátuṣpadākṣáreṇa mimate saptá vā́ṇīḥ ||

1.164.25a jágatā síndhuṁ divy àstabhāyad rathaṁtaré sū́ryam páry apaśyat |
1.164.25c gāyatrásya samídhas tisrá āhus táto mahnā́ prá ririce mahitvā́ ||

1.164.26a úpa hvaye sudúghāṁ dhenúm etā́ṁ suhásto godhúg utá dohad enām |
1.164.26c śréṣṭhaṁ saváṁ savitā́ sāviṣan no 'bhī̀ddho gharmás tád u ṣú prá vocam ||

1.164.27a hiṅkr̥ṇvatī́ vasupátnī vásūnāṁ vatsám icchántī mánasābhy ā́gāt |
1.164.27c duhā́m aśvíbhyām páyo aghnyéyáṁ sā́ vardhatām mahaté saúbhagāya ||

1.164.28a gaúr amīmed ánu vatsám miṣántam mūrdhā́naṁ híṅṅ akr̥ṇon mā́tavā́ u |
1.164.28c sŕ̥kvāṇaṁ gharmám abhí vāvaśānā́ mímāti māyúm páyate páyobhiḥ ||

1.164.29a ayáṁ sá śiṅkte yéna gaúr abhī́vr̥tā mímāti māyúṁ dhvasánāv ádhi śritā́ |
1.164.29c sā́ cittíbhir ní hí cakā́ra mártyaṁ vidyúd bhávantī práti vavrím auhata ||

1.164.30a anác chaye turágātu jīvám éjad dhruvám mádhya ā́ pastyā̀nām |
1.164.30c jīvó mr̥tásya carati svadhā́bhir ámartyo mártyenā sáyoniḥ ||

1.164.31a ápaśyaṁ gopā́m ánipadyamānam ā́ ca párā ca pathíbhiś cárantam |
1.164.31c sá sadhrī́cīḥ sá víṣūcīr vásāna ā́ varīvarti bhúvaneṣv antáḥ ||

1.164.32a yá īṁ cakā́ra ná só asyá veda yá īṁ dadárśa hírug ín nú tásmāt |
1.164.32c sá mātúr yónā párivīto antár bahuprajā́ nírr̥tim ā́ viveśa ||

1.164.33a dyaúr me pitā́ janitā́ nā́bhir átra bándhur me mātā́ pr̥thivī́ mahī́yám |
1.164.33c uttānáyoś camvòr yónir antár átrā pitā́ duhitúr gárbham ā́dhāt ||

1.164.34a pr̥cchā́mi tvā páram ántam pr̥thivyā́ḥ pr̥cchā́mi yátra bhúvanasya nā́bhiḥ |
1.164.34c pr̥cchā́mi tvā vŕ̥ṣṇo áśvasya rétaḥ pr̥cchā́mi vācáḥ paramáṁ vyòma ||

1.164.35a iyáṁ védiḥ páro ántaḥ pr̥thivyā́ ayáṁ yajñó bhúvanasya nā́bhiḥ |
1.164.35c ayáṁ sómo vŕ̥ṣṇo áśvasya réto brahmā́yáṁ vācáḥ paramáṁ vyòma ||

1.164.36a saptā́rdhagarbhā́ bhúvanasya réto víṣṇos tiṣṭhanti pradíśā vídharmaṇi |
1.164.36c té dhītíbhir mánasā té vipaścítaḥ paribhúvaḥ pári bhavanti viśvátaḥ ||

1.164.37a ná ví jānāmi yád ivedám ásmi niṇyáḥ sáṁnaddho mánasā carāmi |
1.164.37c yadā́ mā́gan prathamajā́ r̥tásyā́d íd vācó aśnuve bhāgám asyā́ḥ ||

1.164.38a ápāṅ prā́ṅ eti svadháyā gr̥bhītó 'martyo mártyenā sáyoniḥ |
1.164.38c tā́ śáśvantā viṣūcī́nā viyántā ny ànyáṁ cikyúr ná ní cikyur anyám ||

1.164.39a r̥có akṣáre paramé vyòman yásmin devā́ ádhi víśve niṣedúḥ |
1.164.39c yás tán ná véda kím r̥cā́ kariṣyati yá ít tád vidús tá imé sám āsate ||

1.164.40a sūyavasā́d bhágavatī hí bhūyā́ átho vayám bhágavantaḥ syāma |
1.164.40c addhí tŕ̥ṇam aghnye viśvadā́nīm píba śuddhám udakám ācárantī ||

1.164.41a gaurī́r mimāya salilā́ni tákṣaty ékapadī dvipádī sā́ cátuṣpadī |
1.164.41c aṣṭā́padī návapadī babhūvúṣī sahásrākṣarā paramé vyòman ||

1.164.42a tásyāḥ samudrā́ ádhi ví kṣaranti téna jīvanti pradíśaś cátasraḥ |
1.164.42c tátaḥ kṣaraty akṣáraṁ tád víśvam úpa jīvati ||

1.164.43a śakamáyaṁ dhūmám ārā́d apaśyaṁ viṣūvátā pará enā́vareṇa |
1.164.43c ukṣā́ṇam pŕ̥śnim apacanta vīrā́s tā́ni dhármāṇi prathamā́ny āsan ||

1.164.44a tráyaḥ keśína r̥tuthā́ ví cakṣate saṁvatsaré vapata éka eṣām |
1.164.44c víśvam éko abhí caṣṭe śácībhir dhrā́jir ékasya dadr̥śe ná rūpám ||

1.164.45a catvā́ri vā́k párimitā padā́ni tā́ni vidur brāhmaṇā́ yé manīṣíṇaḥ |
1.164.45c gúhā trī́ṇi níhitā néṅgayanti turī́yaṁ vācó manuṣyā̀ vadanti ||

1.164.46a índram mitráṁ váruṇam agním āhur átho divyáḥ sá suparṇó garútmān |
1.164.46c ékaṁ sád víprā bahudhā́ vadanty agníṁ yamám mātaríśvānam āhuḥ ||

1.164.47a kr̥ṣṇáṁ niyā́naṁ hárayaḥ suparṇā́ apó vásānā dívam út patanti |
1.164.47c tá ā́vavr̥tran sádanād r̥tásyā́d íd ghr̥téna pr̥thivī́ vy ùdyate ||

1.164.48a dvā́daśa pradháyaś cakrám ékaṁ trī́ṇi nábhyāni ká u tác ciketa |
1.164.48c tásmin sākáṁ triśatā́ ná śaṅkávo 'rpitā́ḥ ṣaṣṭír ná calācalā́saḥ ||

1.164.49a yás te stánaḥ śaśayó yó mayobhū́r yéna víśvā púṣyasi vā́ryāṇi |
1.164.49c yó ratnadhā́ vasuvíd yáḥ sudátraḥ sárasvati tám ihá dhā́tave kaḥ ||

1.164.50a yajñéna yajñám ayajanta devā́s tā́ni dhármāṇi prathamā́ny āsan |
1.164.50c té ha nā́kam mahimā́naḥ sacanta yátra pū́rve sādhyā́ḥ sánti devā́ḥ ||

1.164.51a samānám etád udakám úc caíty áva cā́habhiḥ |
1.164.51c bhū́mim parjányā jínvanti dívaṁ jinvanty agnáyaḥ ||

1.164.52a divyáṁ suparṇáṁ vāyasám br̥hántam apā́ṁ gárbhaṁ darśatám óṣadhīnām |
1.164.52c abhīpató vr̥ṣṭíbhis tarpáyantaṁ sárasvantam ávase johavīmi ||

1.165.01a káyā śubhā́ sávayasaḥ sánīḷāḥ samānyā́ marútaḥ sám mimikṣuḥ |
1.165.01c káyā matī́ kúta étāsa eté 'rcanti śúṣmaṁ vŕ̥ṣaṇo vasūyā́ ||

1.165.02a kásya bráhmāṇi jujuṣur yúvānaḥ kó adhvaré marúta ā́ vavarta |
1.165.02c śyenā́m̐ iva dhrájato antárikṣe kéna mahā́ mánasā rīramāma ||

1.165.03a kútas tvám indra mā́hinaḥ sánn éko yāsi satpate kíṁ ta itthā́ |
1.165.03c sám pr̥cchase samarāṇáḥ śubhānaír vocés tán no harivo yát te asmé ||

1.165.04a bráhmāṇi me matáyaḥ śáṁ sutā́saḥ śúṣma iyarti prábhr̥to me ádriḥ |
1.165.04c ā́ śāsate práti haryanty ukthémā́ hárī vahatas tā́ no áccha ||

1.165.05a áto vayám antamébhir yujānā́ḥ svákṣatrebhis tanvàḥ śúmbhamānāḥ |
1.165.05c máhobhir étām̐ úpa yujmahe nv índra svadhā́m ánu hí no babhū́tha ||

1.165.06a kvà syā́ vo marutaḥ svadhā́sīd yán mā́m ékaṁ samádhattāhihátye |
1.165.06c aháṁ hy ùgrás taviṣás túviṣmān víśvasya śátror ánamaṁ vadhasnaíḥ ||

1.165.07a bhū́ri cakartha yújyebhir asmé samānébhir vr̥ṣabha paúṁsyebhiḥ |
1.165.07c bhū́rīṇi hí kr̥ṇávāmā śaviṣṭhéndra krátvā maruto yád váśāma ||

1.165.08a vádhīṁ vr̥trám maruta indriyéṇa svéna bhā́mena taviṣó babhūvā́n |
1.165.08c ahám etā́ mánave viśváścandrāḥ sugā́ apáś cakara vájrabāhuḥ ||

1.165.09a ánuttam ā́ te maghavan nákir nú ná tvā́vām̐ asti devátā vídānaḥ |
1.165.09c ná jā́yamāno náśate ná jātó yā́ni kariṣyā́ kr̥ṇuhí pravr̥ddha ||

1.165.10a ékasya cin me vibhv àstv ójo yā́ nú dadhr̥ṣvā́n kr̥ṇávai manīṣā́ |
1.165.10c aháṁ hy ùgró maruto vídāno yā́ni cyávam índra íd īśa eṣām ||

1.165.11a ámandan mā marutaḥ stómo átra yán me naraḥ śrútyam bráhma cakrá |
1.165.11c índrāya vŕ̥ṣṇe súmakhāya máhyaṁ sákhye sákhāyas tanvè tanū́bhiḥ ||

1.165.12a evéd eté práti mā rócamānā ánedyaḥ śráva éṣo dádhānāḥ |
1.165.12c saṁcákṣyā marutaś candrávarṇā ácchānta me chadáyāthā ca nūnám ||

1.165.13a kó nv átra maruto māmahe vaḥ prá yātana sákhīm̐r ácchā sakhāyaḥ |
1.165.13c mánmāni citrā apivātáyanta eṣā́m bhūta návedā ma r̥tā́nām ||

1.165.14a ā́ yád duvasyā́d duváse ná kārúr asmā́ñ cakré mānyásya medhā́ |
1.165.14c ó ṣú vartta maruto vípram ácchemā́ bráhmāṇi jaritā́ vo arcat ||

1.165.15a eṣá vaḥ stómo maruta iyáṁ gī́r māndāryásya mānyásya kāróḥ |
1.165.15c éṣā́ yāsīṣṭa tanvè vayā́ṁ vidyā́meṣáṁ vr̥jánaṁ jīrádānum ||

1.166.01a tán nú vocāma rabhasā́ya jánmane pū́rvam mahitváṁ vr̥ṣabhásya ketáve |
1.166.01c aidhéva yā́man marutas tuviṣvaṇo yudhéva śakrās taviṣā́ṇi kartana ||

1.166.02a nítyaṁ ná sūnúm mádhu bíbhrata úpa krī́ḷanti krīḷā́ vidátheṣu ghŕ̥ṣvayaḥ |
1.166.02c nákṣanti rudrā́ ávasā namasvínaṁ ná mardhanti svátavaso haviṣkŕ̥tam ||

1.166.03a yásmā ū́māso amŕ̥tā árāsata rāyás póṣaṁ ca havíṣā dadāśúṣe |
1.166.03c ukṣánty asmai marúto hitā́ iva purū́ rájāṁsi páyasā mayobhúvaḥ ||

1.166.04a ā́ yé rájāṁsi táviṣībhir ávyata prá va évāsaḥ sváyatāso adhrajan |
1.166.04c bháyante víśvā bhúvanāni harmyā́ citró vo yā́maḥ práyatāsv r̥ṣṭíṣu ||

1.166.05a yát tveṣáyāmā nadáyanta párvatān divó vā pr̥ṣṭháṁ náryā ácucyavuḥ |
1.166.05c víśvo vo ájman bhayate vánaspátī rathīyántīva prá jihīta óṣadhiḥ ||

1.166.06a yūyáṁ na ugrā marutaḥ sucetúnā́riṣṭagrāmāḥ sumatím pipartana |
1.166.06c yátrā vo didyúd rádati krívirdatī riṇā́ti paśváḥ súdhiteva barháṇā ||

1.166.07a prá skambhádeṣṇā anavabhrárādhaso 'lātr̥ṇā́so vidátheṣu súṣṭutāḥ |
1.166.07c árcanty arkám madirásya pītáye vidúr vīrásya prathamā́ni paúṁsyā ||

1.166.08a śatábhujibhis tám abhíhruter aghā́t pūrbhī́ rakṣatā maruto yám ā́vata |
1.166.08c jánaṁ yám ugrās tavaso virapśinaḥ pāthánā śáṁsāt tánayasya puṣṭíṣu ||

1.166.09a víśvāni bhadrā́ maruto rátheṣu vo mithaspŕ̥dhyeva taviṣā́ṇy ā́hitā |
1.166.09c áṁseṣv ā́ vaḥ prápatheṣu khādáyó 'kṣo vaś cakrā́ samáyā ví vāvr̥te ||

1.166.10a bhū́rīṇi bhadrā́ náryeṣu bāhúṣu vákṣaḥsu rukmā́ rabhasā́so añjáyaḥ |
1.166.10c áṁseṣv étāḥ pavíṣu kṣurā́ ádhi váyo ná pakṣā́n vy ánu śríyo dhire ||

1.166.11a mahā́nto mahnā́ vibhvò víbhūtayo dūredŕ̥śo yé divyā́ iva stŕ̥bhiḥ |
1.166.11c mandrā́ḥ sujihvā́ḥ sváritāra āsábhiḥ sámmiślā índre marútaḥ pariṣṭúbhaḥ ||

1.166.12a tád vaḥ sujātā maruto mahitvanáṁ dīrgháṁ vo dātrám áditer iva vratám |
1.166.12c índraś caná tyájasā ví hruṇāti táj jánāya yásmai sukŕ̥te árādhvam ||

1.166.13a tád vo jāmitvám marutaḥ páre yugé purū́ yác cháṁsam amr̥tāsa ā́vata |
1.166.13c ayā́ dhiyā́ mánave śruṣṭím ā́vyā sākáṁ náro daṁsánair ā́ cikitrire ||

1.166.14a yéna dīrghám marutaḥ śūśávāma yuṣmā́kena párīṇasā turāsaḥ |
1.166.14c ā́ yát tatánan vr̥jáne jánāsa ebhír yajñébhis tád abhī́ṣṭim aśyām ||

1.166.15a eṣá vaḥ stómo maruta iyáṁ gī́r māndāryásya mānyásya kāróḥ |
1.166.15c éṣā́ yāsīṣṭa tanvè vayā́ṁ vidyā́meṣáṁ vr̥jánaṁ jīrádānum ||

1.167.01a sahásraṁ ta indrotáyo naḥ sahásram íṣo harivo gūrtátamāḥ |
1.167.01c sahásraṁ rā́yo mādayádhyai sahasríṇa úpa no yantu vā́jāḥ ||

1.167.02a ā́ nó 'vobhir marúto yāntv ácchā jyéṣṭhebhir vā br̥háddivaiḥ sumāyā́ḥ |
1.167.02c ádha yád eṣāṁ niyútaḥ paramā́ḥ samudrásya cid dhanáyanta pāré ||

1.167.03a mimyákṣa yéṣu súdhitā ghr̥tā́cī híraṇyanirṇig úparā ná r̥ṣṭíḥ |
1.167.03c gúhā cárantī mánuṣo ná yóṣā sabhā́vatī vidathyèva sáṁ vā́k ||

1.167.04a párā śubhrā́ ayā́so yavyā́ sādhāraṇyéva marúto mimikṣuḥ |
1.167.04c ná rodasī́ ápa nudanta ghorā́ juṣánta vŕ̥dhaṁ sakhyā́ya devā́ḥ ||

1.167.05a jóṣad yád īm asuryā̀ sacádhyai víṣitastukā rodasī́ nr̥máṇāḥ |
1.167.05c ā́ sūryéva vidható ráthaṁ gāt tveṣápratīkā nábhaso nétyā́ ||

1.167.06a ā́sthāpayanta yuvatíṁ yúvānaḥ śubhé nímiślāṁ vidátheṣu pajrā́m |
1.167.06c arkó yád vo maruto havíṣmān gā́yad gātháṁ sutásomo duvasyán ||

1.167.07a prá táṁ vivakmi vákmyo yá eṣām marútām mahimā́ satyó ásti |
1.167.07c sácā yád īṁ vŕ̥ṣamaṇā ahaṁyúḥ sthirā́ cij jánīr váhate subhāgā́ḥ ||

1.167.08a pā́nti mitrā́váruṇāv avadyā́c cáyata īm aryamó ápraśastān |
1.167.08c utá cyavante ácyutā dhruvā́ṇi vāvr̥dhá īm maruto dā́tivāraḥ ||

1.167.09a nahī́ nú vo maruto ánty asmé ārā́ttāc cic chávaso ántam āpúḥ |
1.167.09c té dhr̥ṣṇúnā śávasā śūśuvā́ṁsó 'rṇo ná dvéṣo dhr̥ṣatā́ pári ṣṭhuḥ ||

1.167.10a vayám adyéndrasya préṣṭhā vayáṁ śvó vocemahi samaryé |
1.167.10c vayám purā́ máhi ca no ánu dyū́n tán na r̥bhukṣā́ narā́m ánu ṣyāt ||

1.167.11a eṣá vaḥ stómo maruta iyáṁ gī́r māndāryásya mānyásya kāróḥ |
1.167.11c éṣā́ yāsīṣṭa tanvè vayā́ṁ vidyā́meṣáṁ vr̥jánaṁ jīrádānum ||

1.168.01a yajñā́-yajñā vaḥ samanā́ tuturváṇir dhíyaṁ-dhiyaṁ vo devayā́ u dadhidhve |
1.168.01c ā́ vo 'rvā́caḥ suvitā́ya ródasyor mahé vavr̥tyām ávase suvr̥ktíbhiḥ ||

1.168.02a vavrā́so ná yé svajā́ḥ svátavasa íṣaṁ svàr abhijā́yanta dhū́tayaḥ |
1.168.02c sahasríyāso apā́ṁ nórmáya āsā́ gā́vo vándyāso nókṣáṇaḥ ||

1.168.03a sómāso ná yé sutā́s tr̥ptā́ṁśavo hr̥tsú pītā́so duváso nā́sate |
1.168.03c aíṣām áṁseṣu rambhíṇīva rārabhe hásteṣu khādíś ca kr̥tíś ca sáṁ dadhe ||

1.168.04a áva sváyuktā divá ā́ vŕ̥thā yayur ámartyāḥ káśayā codata tmánā |
1.168.04c areṇávas tuvijātā́ acucyavur dr̥ḷhā́ni cin marúto bhrā́jadr̥ṣṭayaḥ ||

1.168.05a kó vo 'ntár maruta r̥ṣṭividyuto réjati tmánā hánveva jihváyā |
1.168.05c dhanvacyúta iṣā́ṁ ná yā́mani purupraíṣā ahanyò naítaśaḥ ||

1.168.06a kvà svid asyá rájaso mahás páraṁ kvā́varam maruto yásminn āyayá |
1.168.06c yác cyāváyatha vithuréva sáṁhitaṁ vy ádriṇā patatha tveṣám arṇavám ||

1.168.07a sātír ná vó 'mavatī svàrvatī tveṣā́ vípākā marutaḥ pípiṣvatī |
1.168.07c bhadrā́ vo rātíḥ pr̥ṇató ná dákṣiṇā pr̥thujráyī asuryèva jáñjatī ||

1.168.08a práti ṣṭobhanti síndhavaḥ pavíbhyo yád abhríyāṁ vā́cam udīráyanti |
1.168.08c áva smayanta vidyútaḥ pr̥thivyā́ṁ yádī ghr̥tám marútaḥ pruṣṇuvánti ||

1.168.09a ásūta pŕ̥śnir mahaté ráṇāya tveṣám ayā́sām marútām ánīkam |
1.168.09c té sapsarā́so 'janayantā́bhvam ā́d ít svadhā́m iṣirā́m páry apaśyan ||

1.168.10a eṣá vaḥ stómo maruta iyáṁ gī́r māndāryásya mānyásya kāróḥ |
1.168.10c éṣā́ yāsīṣṭa tanvè vayā́ṁ vidyā́meṣáṁ vr̥jánaṁ jīrádānum ||

1.169.01a maháś cit tvám indra yatá etā́n maháś cid asi tyájaso varūtā́ |
1.169.01c sá no vedho marútāṁ cikitvā́n sumnā́ vanuṣva táva hí préṣṭhā ||

1.169.02a áyujran ta indra viśvákr̥ṣṭīr vidānā́so niṣṣídho martyatrā́ |
1.169.02c marútām pr̥tsutír hā́samānā svàrmīḷhasya pradhánasya sātaú ||

1.169.03a ámyak sā́ ta indra r̥ṣṭír asmé sánemy ábhvam marúto junanti |
1.169.03c agníś cid dhí ṣmātasé śuśukvā́n ā́po ná dvīpáṁ dádhati práyāṁsi ||

1.169.04a tváṁ tū́ na indra táṁ rayíṁ dā ójiṣṭhayā dákṣiṇayeva rātím |
1.169.04c stútaś ca yā́s te cakánanta vāyóḥ stánaṁ ná mádhvaḥ pīpayanta vā́jaiḥ ||

1.169.05a tvé rā́ya indra tośátamāḥ praṇetā́raḥ kásya cid r̥tāyóḥ |
1.169.05c té ṣú ṇo marúto mr̥ḷayantu yé smā purā́ gātūyántīva devā́ḥ ||

1.169.06a práti prá yāhīndra mīḷhúṣo nr̥̄́n maháḥ pā́rthive sádane yatasva |
1.169.06c ádha yád eṣām pr̥thubudhnā́sa étās tīrthé nā́ryáḥ paúṁsyāni tasthúḥ ||

1.169.07a práti ghorā́ṇām étānām ayā́sām marútāṁ śr̥ṇva āyatā́m upabdíḥ |
1.169.07c yé mártyam pr̥tanāyántam ū́mair r̥ṇāvā́naṁ ná patáyanta sárgaiḥ ||

1.169.08a tvám mā́nebhya indra viśvájanyā rádā marúdbhiḥ śurúdho góagrāḥ |
1.169.08c stávānebhiḥ stavase deva devaír vidyā́meṣáṁ vr̥jánaṁ jīrádānum ||

1.170.01a ná nūnám ásti nó śváḥ kás tád veda yád ádbhutam |
1.170.01c anyásya cittám abhí saṁcaréṇyam utā́dhītaṁ ví naśyati ||

1.170.02a kíṁ na indra jighāṁsasi bhrā́taro marútas táva |
1.170.02c tébhiḥ kalpasva sādhuyā́ mā́ naḥ samáraṇe vadhīḥ ||

1.170.03a kíṁ no bhrātar agastya sákhā sánn áti manyase |
1.170.03c vidmā́ hí te yáthā máno 'smábhyam ín ná ditsasi ||

1.170.04a áraṁ kr̥ṇvantu védiṁ sám agním indhatām puráḥ |
1.170.04c tátrāmŕ̥tasya cétanaṁ yajñáṁ te tanavāvahai ||

1.170.05a tvám īśiṣe vasupate vásūnāṁ tvám mitrā́ṇām mitrapate dhéṣṭhaḥ |
1.170.05c índra tvám marúdbhiḥ sáṁ vadasvā́dha prā́śāna r̥tuthā́ havī́ṁṣi ||

1.171.01a práti va enā́ námasāhám emi sūkténa bhikṣe sumatíṁ turā́ṇām |
1.171.01c rarāṇátā maruto vedyā́bhir ní héḷo dhattá ví mucadhvam áśvān ||

1.171.02a eṣá vaḥ stómo maruto námasvān hr̥dā́ taṣṭó mánasā dhāyi devāḥ |
1.171.02c úpem ā́ yāta mánasā juṣāṇā́ yūyáṁ hí ṣṭhā́ námasa íd vr̥dhā́saḥ ||

1.171.03a stutā́so no marúto mr̥ḷayantūtá stutó maghávā śámbhaviṣṭhaḥ |
1.171.03c ūrdhvā́ naḥ santu komyā́ vánāny áhāni víśvā maruto jigīṣā́ ||

1.171.04a asmā́d aháṁ taviṣā́d ī́ṣamāṇa índrād bhiyā́ maruto réjamānaḥ |
1.171.04c yuṣmábhyaṁ havyā́ níśitāny āsan tā́ny āré cakr̥mā mr̥ḷátā naḥ ||

1.171.05a yéna mā́nāsaś citáyanta usrā́ vyùṣṭiṣu śávasā śáśvatīnām |
1.171.05c sá no marúdbhir vr̥ṣabha śrávo dhā ugrá ugrébhiḥ stháviraḥ sahodā́ḥ ||

1.171.06a tvám pāhīndra sáhīyaso nr̥̄́n bhávā marúdbhir ávayātaheḷāḥ |
1.171.06c supraketébhiḥ sāsahír dádhāno vidyā́meṣáṁ vr̥jánaṁ jīrádānum ||

1.172.01a citró vo 'stu yā́maś citrá ūtī́ sudānavaḥ |
1.172.01c máruto áhibhānavaḥ ||

1.172.02a āré sā́ vaḥ sudānavo máruta r̥ñjatī́ śáruḥ |
1.172.02c āré áśmā yám ásyatha ||

1.172.03a tr̥ṇaskandásya nú víśaḥ pári vr̥ṅkta sudānavaḥ |
1.172.03c ūrdhvā́n naḥ karta jīváse ||

1.173.01a gā́yat sā́ma nabhanyàṁ yáthā vér árcāma tád vāvr̥dhānáṁ svàrvat |
1.173.01c gā́vo dhenávo barhíṣy ádabdhā ā́ yát sadmā́naṁ divyáṁ vívāsān ||

1.173.02a árcad vŕ̥ṣā vŕ̥ṣabhiḥ svéduhavyair mr̥gó nā́śno áti yáj juguryā́t |
1.173.02c prá mandayúr manā́ṁ gūrta hótā bhárate máryo mithunā́ yájatraḥ ||

1.173.03a nákṣad dhótā pári sádma mitā́ yán bhárad gárbham ā́ śarádaḥ pr̥thivyā́ḥ |
1.173.03c krándad áśvo náyamāno ruvád gaúr antár dūtó ná ródasī carad vā́k ||

1.173.04a tā́ karmā́ṣatarāsmai prá cyautnā́ni devayánto bharante |
1.173.04c jújoṣad índro dasmávarcā nā́satyeva súgmyo ratheṣṭhā́ḥ ||

1.173.05a tám u ṣṭuhī́ndraṁ yó ha sátvā yáḥ śū́ro maghávā yó ratheṣṭhā́ḥ |
1.173.05c pratīcáś cid yódhīyān vŕ̥ṣaṇvān vavavrúṣaś cit támaso vihantā́ ||

1.173.06a prá yád itthā́ mahinā́ nŕ̥bhyo ásty áraṁ ródasī kakṣyè nā́smai |
1.173.06c sáṁ vivya índro vr̥jánaṁ ná bhū́mā bhárti svadhā́vām̐ opaśám iva dyā́m ||

1.173.07a samátsu tvā śūra satā́m urāṇám prapathíntamam paritaṁsayádhyai |
1.173.07c sajóṣasa índram máde kṣoṇī́ḥ sūríṁ cid yé anumádanti vā́jaiḥ ||

1.173.08a evā́ hí te śáṁ sávanā samudrá ā́po yát ta āsú mádanti devī́ḥ |
1.173.08c víśvā te ánu jóṣyā bhūd gaúḥ sūrī́m̐ś cid yádi dhiṣā́ véṣi jánān ||

1.173.09a ásāma yáthā suṣakhā́ya ena svabhiṣṭáyo narā́ṁ ná śáṁsaiḥ |
1.173.09c ásad yáthā na índro vandaneṣṭhā́s turó ná kárma náyamāna ukthā́ ||

1.173.10a víṣpardhaso narā́ṁ ná śáṁsair asmā́kāsad índro vájrahastaḥ |
1.173.10c mitrāyúvo ná pū́rpatiṁ súśiṣṭau madhyāyúva úpa śikṣanti yajñaíḥ ||

1.173.11a yajñó hí ṣméndraṁ káś cid r̥ndháñ juhurāṇáś cin mánasā pariyán |
1.173.11c tīrthé nā́cchā tātr̥ṣāṇám óko dīrghó ná sidhrám ā́ kr̥ṇoty ádhvā ||

1.173.12a mó ṣū́ ṇa indrā́tra pr̥tsú devaír ásti hí ṣmā te śuṣminn avayā́ḥ |
1.173.12c maháś cid yásya mīḷhúṣo yavyā́ havíṣmato marúto vándate gī́ḥ ||

1.173.13a eṣá stóma indra túbhyam asmé eténa gātúṁ harivo vido naḥ |
1.173.13c ā́ no vavr̥tyāḥ suvitā́ya deva vidyā́meṣáṁ vr̥jánaṁ jīrádānum ||

1.174.01a tváṁ rā́jendra yé ca devā́ rákṣā nr̥̄́n pāhy àsura tvám asmā́n |
1.174.01c tváṁ sátpatir maghávā nas tárutras tváṁ satyó vásavānaḥ sahodā́ḥ ||

1.174.02a dáno víśa indra mr̥dhrávācaḥ saptá yát púraḥ śárma śā́radīr dárt |
1.174.02c r̥ṇór apó anavadyā́rṇā yū́ne vr̥trám purukútsāya randhīḥ ||

1.174.03a ájā vŕ̥ta indra śū́rapatnīr dyā́ṁ ca yébhiḥ puruhūta nūnám |
1.174.03c rákṣo agním aśúṣaṁ tū́rvayāṇaṁ siṁhó ná dáme ápāṁsi vástoḥ ||

1.174.04a śéṣan nú tá indra sásmin yónau práśastaye pávīravasya mahnā́ |
1.174.04c sr̥jád árṇāṁsy áva yád yudhā́ gā́s tíṣṭhad dhárī dhr̥ṣatā́ mr̥ṣṭa vā́jān ||

1.174.05a váha kútsam indra yásmiñ cākán syūmanyū́ r̥jrā́ vā́tasyā́śvā |
1.174.05c prá sū́raś cakráṁ vr̥hatād abhī́ke 'bhí spŕ̥dho yāsiṣad vájrabāhuḥ ||

1.174.06a jaghanvā́m̐ indra mitrérūñ codápravr̥ddho harivo ádāśūn |
1.174.06c prá yé páśyann aryamáṇaṁ sácāyós tváyā śūrtā́ váhamānā ápatyam ||

1.174.07a rápat kavír indrārkásātau kṣā́ṁ dāsā́yopabárhaṇīṁ kaḥ |
1.174.07c kárat tisró maghávā dā́nucitrā ní duryoṇé kúyavācam mr̥dhí śret ||

1.174.08a sánā tā́ ta indra návyā ā́guḥ sáho nábhó 'viraṇāya pūrvī́ḥ |
1.174.08c bhinát púro ná bhído ádevīr nanámo vádhar ádevasya pīyóḥ ||

1.174.09a tváṁ dhúnir indra dhúnimatīr r̥ṇór apáḥ sīrā́ ná srávantīḥ |
1.174.09c prá yát samudrám áti śūra párṣi pāráyā turváśaṁ yáduṁ svastí ||

1.174.10a tvám asmā́kam indra viśvádha syā avr̥kátamo narā́ṁ nr̥pātā́ |
1.174.10c sá no víśvāsāṁ spr̥dhā́ṁ sahodā́ vidyā́meṣáṁ vr̥jánaṁ jīrádānum ||

1.175.01a mátsy ápāyi te máhaḥ pā́trasyeva harivo matsaró mádaḥ |
1.175.01c vŕ̥ṣā te vŕ̥ṣṇa índur vājī́ sahasrasā́tamaḥ ||

1.175.02a ā́ nas te gantu matsaró vŕ̥ṣā mádo váreṇyaḥ |
1.175.02c sahā́vām̐ indra sānasíḥ pr̥tanāṣā́ḷ ámartyaḥ ||

1.175.03a tváṁ hí śū́raḥ sánitā codáyo mánuṣo rátham |
1.175.03c sahā́vān dásyum avratám óṣaḥ pā́traṁ ná śocíṣā ||

1.175.04a muṣāyá sū́ryaṁ kave cakrám ī́śāna ójasā |
1.175.04c váha śúṣṇāya vadháṁ kútsaṁ vā́tasyā́śvaiḥ ||

1.175.05a śuṣmíntamo hí te mádo dyumníntama utá krátuḥ |
1.175.05c vr̥traghnā́ varivovídā maṁsīṣṭhā́ aśvasā́tamaḥ ||

1.175.06a yáthā pū́rvebhyo jaritŕ̥bhya indra máya ivā́po ná tŕ̥ṣyate babhū́tha |
1.175.06c tā́m ánu tvā nivídaṁ johavīmi vidyā́meṣáṁ vr̥jánaṁ jīrádānum ||

1.176.01a mátsi no vásyaïṣṭaya índram indo vŕ̥ṣā́ viśa |
1.176.01c r̥ghāyámāṇa invasi śátrum ánti ná vindasi ||

1.176.02a tásminn ā́ veśayā gíro yá ékaś carṣaṇīnā́m |
1.176.02c ánu svadhā́ yám upyáte yávaṁ ná cárkr̥ṣad vŕ̥ṣā ||

1.176.03a yásya víśvāni hástayoḥ páñca kṣitīnā́ṁ vásu |
1.176.03c spāśáyasva yó asmadhrúg divyévāśánir jahi ||

1.176.04a ásunvantaṁ samaṁ jahi dūṇā́śaṁ yó ná te máyaḥ |
1.176.04c asmábhyam asya védanaṁ daddhí sūríś cid ohate ||

1.176.05a ā́vo yásya dvibárhaso 'rkéṣu sānuṣág ásat |
1.176.05c ājā́v índrasyendo prā́vo vā́jeṣu vājínam ||

1.176.06a yáthā pū́rvebhyo jaritŕ̥bhya indra máya ivā́po ná tŕ̥ṣyate babhū́tha |
1.176.06c tā́m ánu tvā nivídaṁ johavīmi vidyā́meṣáṁ vr̥jánaṁ jīrádānum ||

1.177.01a ā́ carṣaṇiprā́ vr̥ṣabhó jánānāṁ rā́jā kr̥ṣṭīnā́m puruhūtá índraḥ |
1.177.01c stutáḥ śravasyánn ávasópa madríg yuktvā́ hárī vŕ̥ṣaṇā́ yāhy arvā́ṅ ||

1.177.02a yé te vŕ̥ṣaṇo vr̥ṣabhā́sa indra brahmayújo vŕ̥ṣarathāso átyāḥ |
1.177.02c tā́m̐ ā́ tiṣṭha tébhir ā́ yāhy arvā́ṅ hávāmahe tvā sutá indra sóme ||

1.177.03a ā́ tiṣṭha ráthaṁ vŕ̥ṣaṇaṁ vŕ̥ṣā te sutáḥ sómaḥ páriṣiktā mádhūni |
1.177.03c yuktvā́ vŕ̥ṣabhyāṁ vr̥ṣabha kṣitīnā́ṁ háribhyāṁ yāhi pravátópa madrík ||

1.177.04a ayáṁ yajñó devayā́ ayám miyédha imā́ bráhmāṇy ayám indra sómaḥ |
1.177.04c stīrṇám barhír ā́ tú śakra prá yāhi píbā niṣádya ví mucā hárī ihá ||

1.177.05a ó súṣṭuta indra yāhy arvā́ṅ úpa bráhmāṇi mānyásya kāróḥ |
1.177.05c vidyā́ma vástor ávasā gr̥ṇánto vidyā́meṣáṁ vr̥jánaṁ jīrádānum ||

1.178.01a yád dha syā́ ta indra śruṣṭír ásti yáyā babhū́tha jaritŕ̥bhya ūtī́ |
1.178.01c mā́ naḥ kā́mam maháyantam ā́ dhag víśvā te aśyām páry ā́pa āyóḥ ||

1.178.02a ná ghā rā́jéndra ā́ dabhan no yā́ nú svásārā kr̥ṇávanta yónau |
1.178.02c ā́paś cid asmai sutúkā aveṣan gáman na índraḥ sakhyā́ váyaś ca ||

1.178.03a jétā nŕ̥bhir índraḥ pr̥tsú śū́raḥ śrótā hávaṁ nā́dhamānasya kāróḥ |
1.178.03c prábhartā ráthaṁ dāśúṣa upāká údyantā gíro yádi ca tmánā bhū́t ||

1.178.04a evā́ nŕ̥bhir índraḥ suśravasyā́ prakhādáḥ pr̥kṣó abhí mitríṇo bhūt |
1.178.04c samaryá iṣáḥ stavate vívāci satrākaró yájamānasya śáṁsaḥ ||

1.178.05a tváyā vayám maghavann indra śátrūn abhí ṣyāma maható mányamānān |
1.178.05c tváṁ trātā́ tvám u no vr̥dhé bhūr vidyā́meṣáṁ vr̥jánaṁ jīrádānum ||

1.179.01a pūrvī́r aháṁ śarádaḥ śaśramāṇā́ doṣā́ vástor uṣáso jaráyantīḥ |
1.179.01c minā́ti śríyaṁ jarimā́ tanū́nām ápy ū nú pátnīr vŕ̥ṣaṇo jagamyuḥ ||

1.179.02a yé cid dhí pū́rva r̥tasā́pa ā́san sākáṁ devébhir ávadann r̥tā́ni |
1.179.02c té cid ávāsur nahy ántam āpúḥ sám ū nú pátnīr vŕ̥ṣabhir jagamyuḥ ||

1.179.03a ná mŕ̥ṣā śrāntáṁ yád ávanti devā́ víśvā ít spŕ̥dho abhy àśnavāva |
1.179.03c jáyāvéd átra śatánītham ājíṁ yát samyáñcā mithunā́v abhy ájāva ||

1.179.04a nadásya mā rudhatáḥ kā́ma ā́gann itá ā́jāto amútaḥ kútaś cit |
1.179.04c lópāmudrā vŕ̥ṣaṇaṁ nī́ riṇāti dhī́ram ádhīrā dhayati śvasántam ||

1.179.05a imáṁ nú sómam ántito hr̥tsú pītám úpa bruve |
1.179.05c yát sīm ā́gaś cakr̥mā́ tát sú mr̥ḷatu pulukā́mo hí mártyaḥ ||

1.179.06a agástyaḥ khánamānaḥ khanítraiḥ prajā́m ápatyam bálam icchámānaḥ |
1.179.06c ubhaú várṇāv ŕ̥ṣir ugráḥ pupoṣa satyā́ devéṣv āśíṣo jagāma ||

1.180.01a yuvó rájāṁsi suyámāso áśvā rátho yád vām páry árṇāṁsi dī́yat |
1.180.01c hiraṇyáyā vām paváyaḥ pruṣāyan mádhvaḥ píbantā uṣásaḥ sacethe ||

1.180.02a yuvám átyasyā́va nakṣatho yád vípatmano náryasya práyajyoḥ |
1.180.02c svásā yád vāṁ viśvagūrtī bhárāti vā́jāyéṭṭe madhupāv iṣé ca ||

1.180.03a yuvám páya usríyāyām adhattam pakvám āmā́yām áva pū́rvyaṁ góḥ |
1.180.03c antár yád vaníno vām r̥tapsū hvāró ná śúcir yájate havíṣmān ||

1.180.04a yuváṁ ha gharmám mádhumantam átraye 'pó ná kṣódo 'vr̥ṇītam eṣé |
1.180.04c tád vāṁ narāv aśvinā páśvaïṣṭī ráthyeva cakrā́ práti yanti mádhvaḥ ||

1.180.05a ā́ vāṁ dānā́ya vavr̥tīya dasrā gór óheṇa taugryó ná jívriḥ |
1.180.05c apáḥ kṣoṇī́ sacate mā́hinā vāṁ jūrṇó vām ákṣur áṁhaso yajatrā ||

1.180.06a ní yád yuvéthe niyútaḥ sudānū úpa svadhā́bhiḥ sr̥jathaḥ púraṁdhim |
1.180.06c préṣad véṣad vā́to ná sūrír ā́ mahé dade suvrató ná vā́jam ||

1.180.07a vayáṁ cid dhí vāṁ jaritā́raḥ satyā́ vipanyā́mahe ví paṇír hitā́vān |
1.180.07c ádhā cid dhí ṣmāśvināv anindyā pāthó hí ṣmā vr̥ṣaṇāv ántidevam ||

1.180.08a yuvā́ṁ cid dhí ṣmāśvināv ánu dyū́n vírudrasya prasrávaṇasya sātaú |
1.180.08c agástyo narā́ṁ nŕ̥ṣu práśastaḥ kā́rādhunīva citayat sahásraiḥ ||

1.180.09a prá yád váhethe mahinā́ ráthasya prá syandrā yātho mánuṣo ná hótā |
1.180.09c dhattáṁ sūríbhya utá vā sváśvyaṁ nā́satyā rayiṣā́caḥ syāma ||

1.180.10a táṁ vāṁ ráthaṁ vayám adyā́ huvema stómair aśvinā suvitā́ya návyam |
1.180.10c áriṣṭanemim pári dyā́m iyānáṁ vidyā́meṣáṁ vr̥jánaṁ jīrádānum ||

1.181.01a kád u préṣṭāv iṣā́ṁ rayīṇā́m adhvaryántā yád unninīthó apā́m |
1.181.01c ayáṁ vāṁ yajñó akr̥ta práśastiṁ vásudhitī ávitārā janānām ||

1.181.02a ā́ vām áśvāsaḥ śúcayaḥ payaspā́ vā́taraṁhaso divyā́so átyāḥ |
1.181.02c manojúvo vŕ̥ṣaṇo vītápr̥ṣṭhā éhá svarā́jo aśvínā vahantu ||

1.181.03a ā́ vāṁ rátho 'vánir ná pravátvān sr̥právandhuraḥ suvitā́ya gamyāḥ |
1.181.03c vŕ̥ṣṇaḥ sthātārā mánaso jávīyān ahampūrvó yajató dhiṣṇyā yáḥ ||

1.181.04a ihéha jātā́ sám avāvaśītām arepásā tanvā̀ nā́mabhiḥ svaíḥ |
1.181.04c jiṣṇúr vām anyáḥ súmakhasya sūrír divó anyáḥ subhágaḥ putrá ūhe ||

1.181.05a prá vāṁ nicerúḥ kakuhó váśām̐ ánu piśáṅgarūpaḥ sádanāni gamyāḥ |
1.181.05c hárī anyásya pīpáyanta vā́jair mathrā́ rájāṁsy aśvinā ví ghóṣaiḥ ||

1.181.06a prá vāṁ śarádvān vr̥ṣabhó ná niṣṣā́ṭ pūrvī́r íṣaś carati mádhva iṣṇán |
1.181.06c évair anyásya pīpáyanta vā́jair véṣantīr ūrdhvā́ nadyò na ā́guḥ ||

1.181.07a ásarji vāṁ sthávirā vedhasā gī́r bāḷhé aśvinā tredhā́ kṣárantī |
1.181.07c úpastutāv avataṁ nā́dhamānaṁ yā́mann áyāmañ chr̥ṇutaṁ hávam me ||

1.181.08a utá syā́ vāṁ rúśato vápsaso gī́s tribarhíṣi sádasi pinvate nr̥̄́n |
1.181.08c vŕ̥ṣā vām meghó vr̥ṣaṇā pīpāya gór ná séke mánuṣo daśasyán ||

1.181.09a yuvā́m pūṣévāśvinā púraṁdhir agním uṣā́ṁ ná jarate havíṣmān |
1.181.09c huvé yád vāṁ varivasyā́ gr̥ṇānó vidyā́meṣáṁ vr̥jánaṁ jīrádānum ||

1.182.01a ábhūd idáṁ vayúnam ó ṣú bhūṣatā rátho vŕ̥ṣaṇvān mádatā manīṣiṇaḥ |
1.182.01c dhiyaṁjinvā́ dhíṣṇyā viśpálāvasū divó nápātā sukŕ̥te śúcivratā ||

1.182.02a índratamā hí dhíṣṇyā marúttamā dasrā́ dáṁsiṣṭhā rathyā̀ rathī́tamā |
1.182.02c pūrṇáṁ ráthaṁ vahethe mádhva ā́citaṁ téna dāśvā́ṁsam úpa yātho aśvinā ||

1.182.03a kím átra dasrā kr̥ṇuthaḥ kím āsāthe jáno yáḥ káś cid áhavir mahīyáte |
1.182.03c áti kramiṣṭaṁ jurátam paṇér ásuṁ jyótir víprāya kr̥ṇutaṁ vacasyáve ||

1.182.04a jambháyatam abhíto rā́yataḥ śúno hatám mŕ̥dho vidáthus tā́ny aśvinā |
1.182.04c vā́caṁ-vācaṁ jaritū́ ratnínīṁ kr̥tam ubhā́ śáṁsaṁ nāsatyāvatam máma ||

1.182.05a yuvám etáṁ cakrathuḥ síndhuṣu plavám ātmanvántam pakṣíṇaṁ taugryā́ya kám |
1.182.05c yéna devatrā́ mánasā nirūháthuḥ supaptanī́ petathuḥ kṣódaso maháḥ ||

1.182.06a ávaviddhaṁ taugryám apsv àntár anārambhaṇé támasi práviddham |
1.182.06c cátasro nā́vo jáṭhalasya júṣṭā úd aśvíbhyām iṣitā́ḥ pārayanti ||

1.182.07a káḥ svid vr̥kṣó níṣṭhito mádhye árṇaso yáṁ taugryó nādhitáḥ paryáṣasvajat |
1.182.07c parṇā́ mr̥gásya patáror ivārábha úd aśvinā ūhathuḥ śrómatāya kám ||

1.182.08a tád vāṁ narā nāsatyāv ánu ṣyād yád vām mā́nāsa ucátham ávocan |
1.182.08c asmā́d adyá sádasaḥ somyā́d ā́ vidyā́meṣáṁ vr̥jánaṁ jīrádānum ||

1.183.01a táṁ yuñjāthām mánaso yó jávīyān trivandhuró vr̥ṣaṇā yás tricakráḥ |
1.183.01c yénopayātháḥ sukŕ̥to duroṇáṁ tridhā́tunā patatho vír ná parṇaíḥ ||

1.183.02a suvŕ̥d rátho vartate yánn abhí kṣā́ṁ yát tíṣṭhathaḥ krátumantā́nu pr̥kṣé |
1.183.02c vápur vapuṣyā́ sacatām iyáṁ gī́r divó duhitróṣásā sacethe ||

1.183.03a ā́ tiṣṭhataṁ suvŕ̥taṁ yó rátho vām ánu vratā́ni vártate havíṣmān |
1.183.03c yéna narā nāsatyeṣayádhyai vartír yāthás tánayāya tmáne ca ||

1.183.04a mā́ vāṁ vŕ̥ko mā́ vr̥kī́r ā́ dadharṣīn mā́ pári varktam utá mā́ti dhaktam |
1.183.04c ayáṁ vām bhāgó níhita iyáṁ gī́r dásrāv imé vāṁ nidháyo mádhūnām ||

1.183.05a yuvā́ṁ gótamaḥ purumīḷhó átrir dásrā hávaté 'vase havíṣmān |
1.183.05c díśaṁ ná diṣṭā́m r̥jūyéva yántā́ me hávaṁ nāsatyópa yātam ||

1.183.06a átāriṣma támasas pārám asyá práti vāṁ stómo aśvināv adhāyi |
1.183.06c éhá yātam pathíbhir devayā́nair vidyā́meṣáṁ vr̥jánaṁ jīrádānum ||

1.184.01a tā́ vām adyá tā́v aparáṁ huvemocchántyām uṣási váhnir ukthaíḥ |
1.184.01c nā́satyā kúha cit sántāv aryó divó nápātā sudā́starāya ||

1.184.02a asmé ū ṣú vr̥ṣaṇā mādayethām út paṇī́m̐r hatam ūrmyā́ mádantā |
1.184.02c śrutám me ácchoktibhir matīnā́m éṣṭā narā nícetārā ca kárṇaiḥ ||

1.184.03a śriyé pūṣann iṣukŕ̥teva devā́ nā́satyā vahatúṁ sūryā́yāḥ |
1.184.03c vacyánte vāṁ kakuhā́ apsú jātā́ yugā́ jūrṇéva váruṇasya bhū́reḥ ||

1.184.04a asmé sā́ vām mādhvī rātír astu stómaṁ hinotam mānyásya kāróḥ |
1.184.04c ánu yád vāṁ śravasyā̀ sudānū suvī́ryāya carṣaṇáyo mádanti ||

1.184.05a eṣá vāṁ stómo aśvināv akāri mā́nebhir maghavānā suvr̥ktí |
1.184.05c yātáṁ vartís tánayāya tmáne cāgástye nāsatyā mádantā ||

1.184.06a átāriṣma támasas pārám asyá práti vāṁ stómo aśvināv adhāyi |
1.184.06c éhá yātam pathíbhir devayā́nair vidyā́meṣáṁ vr̥jánaṁ jīrádānum ||

1.185.01a katarā́ pū́rvā katarā́parāyóḥ kathā́ jāté kavayaḥ kó ví veda |
1.185.01c víśvaṁ tmánā bibhr̥to yád dha nā́ma ví vartete áhanī cakríyeva ||

1.185.02a bhū́riṁ dvé ácarantī cárantam padvántaṁ gárbham apádī dadhāte |
1.185.02c nítyaṁ ná sūnúm pitrór upásthe dyā́vā rákṣatam pr̥thivī no ábhvāt ||

1.185.03a anehó dātrám áditer anarváṁ huvé svàrvad avadháṁ námasvat |
1.185.03c tád rodasī janayataṁ jaritré dyā́vā rákṣatam pr̥thivī no ábhvāt ||

1.185.04a átapyamāne ávasā́vantī ánu ṣyāma ródasī deváputre |
1.185.04c ubhé devā́nām ubháyebhir áhnāṁ dyā́vā rákṣatam pr̥thivī no ábhvāt ||

1.185.05a saṁgácchamāne yuvatī́ sámante svásārā jāmī́ pitrór upásthe |
1.185.05c abhijíghrantī bhúvanasya nā́bhiṁ dyā́vā rákṣatam pr̥thivī no ábhvāt ||

1.185.06a urvī́ sádmanī br̥hatī́ r̥téna huvé devā́nām ávasā jánitrī |
1.185.06c dadhā́te yé amŕ̥taṁ suprátīke dyā́vā rákṣatam pr̥thivī no ábhvāt ||

1.185.07a urvī́ pr̥thvī́ bahulé dūréante úpa bruve námasā yajñé asmín |
1.185.07c dadhā́te yé subháge suprátūrtī dyā́vā rákṣatam pr̥thivī no ábhvāt ||

1.185.08a devā́n vā yác cakr̥mā́ kác cid ā́gaḥ sákhāyaṁ vā sádam íj jā́spatiṁ vā |
1.185.08c iyáṁ dhī́r bhūyā avayā́nam eṣāṁ dyā́vā rákṣatam pr̥thivī no ábhvāt ||

1.185.09a ubhā́ śáṁsā náryā mā́m aviṣṭām ubhé mā́m ūtī́ ávasā sacetām |
1.185.09c bhū́ri cid aryáḥ sudā́starāyeṣā́ mádanta iṣayema devāḥ ||

1.185.10a r̥táṁ divé tád avocam pr̥thivyā́ abhiśrāvā́ya prathamáṁ sumedhā́ḥ |
1.185.10c pātā́m avadyā́d duritā́d abhī́ke pitā́ mātā́ ca rakṣatām ávobhiḥ ||

1.185.11a idáṁ dyāvāpr̥thivī satyám astu pítar mā́tar yád ihópabruvé vām |
1.185.11c bhūtáṁ devā́nām avamé ávobhir vidyā́meṣáṁ vr̥jánaṁ jīrádānum ||

1.186.01a ā́ na íḷābhir vidáthe suśastí viśvā́naraḥ savitā́ devá etu |
1.186.01c ápi yáthā yuvāno mátsathā no víśvaṁ jágad abhipitvé manīṣā́ ||

1.186.02a ā́ no víśva ā́skrā gamantu devā́ mitró aryamā́ váruṇaḥ sajóṣāḥ |
1.186.02c bhúvan yáthā no víśve vr̥dhā́saḥ káran suṣā́hā vithuráṁ ná śávaḥ ||

1.186.03a préṣṭhaṁ vo átithiṁ gr̥ṇīṣe 'gníṁ śastíbhis turváṇiḥ sajóṣāḥ |
1.186.03c ásad yáthā no váruṇaḥ sukīrtír íṣaś ca parṣad arigūrtáḥ sūríḥ ||

1.186.04a úpa va éṣe námasā jigīṣóṣā́sānáktā sudúgheva dhenúḥ |
1.186.04c samāné áhan vimímāno arkáṁ víṣurūpe páyasi sásminn ū́dhan ||

1.186.05a utá nó 'hir budhnyò máyas kaḥ śíśuṁ ná pipyúṣīva veti síndhuḥ |
1.186.05c yéna nápātam apā́ṁ junā́ma manojúvo vŕ̥ṣaṇo yáṁ váhanti ||

1.186.06a utá na īṁ tváṣṭā́ gantv ácchā smát sūríbhir abhipitvé sajóṣāḥ |
1.186.06c ā́ vr̥trahéndraś carṣaṇiprā́s tuvíṣṭamo narā́ṁ na ihá gamyāḥ ||

1.186.07a utá na īm matáyó 'śvayogāḥ śíśuṁ ná gā́vas táruṇaṁ rihanti |
1.186.07c tám īṁ gíro jánayo ná pátnīḥ surabhíṣṭamaṁ narā́ṁ nasanta ||

1.186.08a utá na īm marúto vr̥ddhásenāḥ smád ródasī sámanasaḥ sadantu |
1.186.08c pŕ̥ṣadaśvāso 'vánayo ná ráthā riśā́daso mitrayújo ná devā́ḥ ||

1.186.09a prá nú yád eṣām mahinā́ cikitré prá yuñjate prayújas té suvr̥ktí |
1.186.09c ádha yád eṣāṁ sudíne ná śárur víśvam ériṇam pruṣāyánta sénāḥ ||

1.186.10a pró aśvínāv ávase kr̥ṇudhvam prá pūṣáṇaṁ svátavaso hí sánti |
1.186.10c adveṣó víṣṇur vā́ta r̥bhukṣā́ ácchā sumnā́ya vavr̥tīya devā́n ||

1.186.11a iyáṁ sā́ vo asmé dī́dhitir yajatrā apiprā́ṇī ca sádanī ca bhūyāḥ |
1.186.11c ní yā́ devéṣu yátate vasūyúr vidyā́meṣáṁ vr̥jánaṁ jīrádānum ||

1.187.01a pitúṁ nú stoṣam mahó dharmā́ṇaṁ táviṣīm |
1.187.01c yásya tritó vy ójasā vr̥tráṁ víparvam ardáyat ||

1.187.02a svā́do pito mádho pito vayáṁ tvā vavr̥mahe |
1.187.02c asmā́kam avitā́ bhava ||

1.187.03a úpa naḥ pitav ā́ cara śiváḥ śivā́bhir ūtíbhiḥ |
1.187.03c mayobhúr adviṣeṇyáḥ sákhā suśévo ádvayāḥ ||

1.187.04a táva tyé pito rásā rájāṁsy ánu víṣṭhitāḥ |
1.187.04c diví vā́tā iva śritā́ḥ ||

1.187.05a táva tyé pito dádatas táva svādiṣṭha té pito |
1.187.05c prá svādmā́no rásānāṁ tuvigrī́vā iverate ||

1.187.06a tvé pito mahā́nāṁ devā́nām máno hitám |
1.187.06c ákāri cā́ru ketúnā távā́him ávasāvadhīt ||

1.187.07a yád adó pito ájagan vivásva párvatānām |
1.187.07c átrā cin no madho pitó 'ram bhakṣā́ya gamyāḥ ||

1.187.08a yád apā́m óṣadhīnām pariṁśám āriśā́mahe |
1.187.08c vā́tāpe pī́va íd bhava ||

1.187.09a yát te soma gávāśiro yávāśiro bhájāmahe |
1.187.09c vā́tāpe pī́va íd bhava ||

1.187.10a karambhá oṣadhe bhava pī́vo vr̥kká udārathíḥ |
1.187.10c vā́tāpe pī́va íd bhava ||

1.187.11a táṁ tvā vayám pito vácobhir gā́vo ná havyā́ suṣūdima |
1.187.11c devébhyas tvā sadhamā́dam asmábhyaṁ tvā sadhamā́dam ||

1.188.01a sámiddho adyá rājasi devó devaíḥ sahasrajit |
1.188.01c dūtó havyā́ kavír vaha ||

1.188.02a tánūnapād r̥táṁ yaté mádhvā yajñáḥ sám ajyate |
1.188.02c dádhat sahasríṇīr íṣaḥ ||

1.188.03a ājúhvāno na ī́ḍyo devā́m̐ ā́ vakṣi yajñíyān |
1.188.03c ágne sahasrasā́ asi ||

1.188.04a prācī́nam barhír ójasā sahásravīram astr̥ṇan |
1.188.04c yátrādityā virā́jatha ||

1.188.05a virā́ṭ samrā́ḍ vibhvī́ḥ prabhvī́r bahvī́ś ca bhū́yasīś ca yā́ḥ |
1.188.05c dúro ghr̥tā́ny akṣaran ||

1.188.06a surukmé hí supéśasā́dhi śriyā́ virā́jataḥ |
1.188.06c uṣā́sāv éhá sīdatām ||

1.188.07a prathamā́ hí suvā́casā hótārā daívyā kavī́ |
1.188.07c yajñáṁ no yakṣatām imám ||

1.188.08a bhā́ratī́ḷe sárasvati yā́ vaḥ sárvā upabruvé |
1.188.08c tā́ naś codayata śriyé ||

1.188.09a tváṣṭā rūpā́ṇi hí prabhúḥ paśū́n víśvān samānajé |
1.188.09c téṣāṁ naḥ sphātím ā́ yaja ||

1.188.10a úpa tmányā vanaspate pā́tho devébhyaḥ sr̥ja |
1.188.10c agnír havyā́ni siṣvadat ||

1.188.11a purogā́ agnír devā́nāṁ gāyatréṇa sám ajyate |
1.188.11c svā́hākr̥tīṣu rocate ||

1.189.01a ágne náya supáthā rāyé asmā́n víśvāni deva vayúnāni vidvā́n |
1.189.01c yuyodhy àsmáj juhurāṇám éno bhū́yiṣṭhāṁ te námaüktiṁ vidhema ||

1.189.02a ágne tvám pārayā návyo asmā́n svastíbhir áti durgā́ṇi víśvā |
1.189.02c pū́ś ca pr̥thvī́ bahulā́ na urvī́ bhávā tokā́ya tánayāya śáṁ yóḥ ||

1.189.03a ágne tvám asmád yuyodhy ámīvā ánagnitrā abhy ámanta kr̥ṣṭī́ḥ |
1.189.03c púnar asmábhyaṁ suvitā́ya deva kṣā́ṁ víśvebhir amŕ̥tebhir yajatra ||

1.189.04a pāhí no agne pāyúbhir ájasrair utá priyé sádana ā́ śuśukvā́n |
1.189.04c mā́ te bhayáṁ jaritā́raṁ yaviṣṭha nūnáṁ vidan mā́paráṁ sahasvaḥ ||

1.189.05a mā́ no agné 'va sr̥jo aghā́yāviṣyáve ripáve ducchúnāyai |
1.189.05c mā́ datváte dáśate mā́dáte no mā́ rī́ṣate sahasāvan párā dāḥ ||

1.189.06a ví gha tvā́vām̐ r̥tajāta yaṁsad gr̥ṇānó agne tanvè várūtham |
1.189.06c víśvād ririkṣór utá vā ninitsór abhihrútām ási hí deva viṣpáṭ ||

1.189.07a tváṁ tā́m̐ agna ubháyān ví vidvā́n véṣi prapitvé mánuṣo yajatra |
1.189.07c abhipitvé mánave śā́syo bhūr marmr̥jénya uśígbhir nā́kráḥ ||

1.189.08a ávocāma nivácanāny asmin mā́nasya sūnúḥ sahasāné agnaú |
1.189.08c vayáṁ sahásram ŕ̥ṣibhiḥ sanema vidyā́meṣáṁ vr̥jánaṁ jīrádānum ||

1.190.01a anarvā́ṇaṁ vr̥ṣabhám mandrájihvam bŕ̥haspátiṁ vardhayā návyam arkaíḥ |
1.190.01c gāthānyàḥ surúco yásya devā́ āśr̥ṇvánti návamānasya mártāḥ ||

1.190.02a tám r̥tvíyā úpa vā́caḥ sacante sárgo ná yó devayatā́m ásarji |
1.190.02c bŕ̥haspátiḥ sá hy áñjo várāṁsi víbhvā́bhavat sám r̥té mātaríśvā ||

1.190.03a úpastutiṁ námasa údyatiṁ ca ślókaṁ yaṁsat savitéva prá bāhū́ |
1.190.03c asyá krátvāhanyò yó ásti mr̥gó ná bhīmó arakṣásas túviṣmān ||

1.190.04a asyá ślóko divī́yate pr̥thivyā́m átyo ná yaṁsad yakṣabhŕ̥d vícetāḥ |
1.190.04c mr̥gā́ṇāṁ ná hetáyo yánti cemā́ bŕ̥haspáter áhimāyām̐ abhí dyū́n ||

1.190.05a yé tvā devosrikám mányamānāḥ pāpā́ bhadrám upajī́vanti pajrā́ḥ |
1.190.05c ná dūḍhyè ánu dadāsi vāmám bŕ̥haspate cáyasa ít píyārum ||

1.190.06a supraítuḥ sūyávaso ná pánthā durniyántuḥ páriprīto ná mitráḥ |
1.190.06c anarvā́ṇo abhí yé cákṣate nó 'pīvr̥tā aporṇuvánto asthuḥ ||

1.190.07a sáṁ yáṁ stúbho 'vánayo ná yánti samudráṁ ná sraváto ródhacakrāḥ |
1.190.07c sá vidvā́m̐ ubháyaṁ caṣṭe antár bŕ̥haspátis tára ā́paś ca gŕ̥dhraḥ ||

1.190.08a evā́ mahás tuvijātás túviṣmān bŕ̥haspátir vr̥ṣabhó dhāyi deváḥ |
1.190.08c sá naḥ stutó vīrávad dhātu gómad vidyā́meṣáṁ vr̥jánaṁ jīrádānum ||

1.191.01a káṅkato ná káṅkató 'tho satīnákaṅkataḥ |
1.191.01c dvā́v íti plúṣī íti ny àdŕ̥ṣṭā alipsata ||

1.191.02a adŕ̥ṣṭān hanty āyaty átho hanti parāyatī́ |
1.191.02c átho avaghnatī́ hanty átho pinaṣṭi piṁṣatī́ ||

1.191.03a śarā́saḥ kúśarāso darbhā́saḥ sairyā́ utá |
1.191.03c mauñjā́ adŕ̥ṣṭā vairiṇā́ḥ sárve sākáṁ ny àlipsata ||

1.191.04a ní gā́vo goṣṭhé asadan ní mr̥gā́so avikṣata |
1.191.04c ní ketávo jánānāṁ ny àdŕ̥ṣṭā alipsata ||

1.191.05a etá u tyé práty adr̥śran pradoṣáṁ táskarā iva |
1.191.05c ádr̥ṣṭā víśvadr̥ṣṭāḥ prátibuddhā abhūtana ||

1.191.06a dyaúr vaḥ pitā́ pr̥thivī́ mātā́ sómo bhrā́tā́ditiḥ svásā |
1.191.06c ádr̥ṣṭā víśvadr̥ṣṭās tíṣṭhateláyatā sú kam ||

1.191.07a yé áṁsyā yé áṅgyāḥ sūcī́kā yé prakaṅkatā́ḥ |
1.191.07c ádr̥ṣṭāḥ kíṁ canéhá vaḥ sárve sākáṁ ní jasyata ||

1.191.08a út purástāt sū́rya eti viśvádr̥ṣṭo adr̥ṣṭahā́ |
1.191.08c adŕ̥ṣṭān sárvāñ jambháyan sárvāś ca yātudhānyàḥ ||

1.191.09a úd apaptad asaú sū́ryaḥ purú víśvāni jū́rvan |
1.191.09c ādityáḥ párvatebhyo viśvádr̥ṣṭo adr̥ṣṭahā́ ||

1.191.10a sū́rye viṣám ā́ sajāmi dŕ̥tiṁ súrāvato gr̥hé |
1.191.10c só cin nú ná marāti nó vayám marāmāré asya yójanaṁ hariṣṭhā́ mádhu tvā madhulā́ cakāra ||

1.191.11a iyattikā́ śakuntikā́ sakā́ jaghāsa te viṣám |
1.191.11c só cin nú ná marāti nó vayám marāmāré asya yójanaṁ hariṣṭhā́ mádhu tvā madhulā́ cakāra ||

1.191.12a tríḥ saptá viṣpuliṅgakā́ viṣásya púṣyam akṣan |
1.191.12c tā́ś cin nú ná maranti nó vayám marāmāré asya yójanaṁ hariṣṭhā́ mádhu tvā madhulā́ cakāra ||

1.191.13a navānā́ṁ navatīnā́ṁ viṣásya rópuṣīṇām |
1.191.13c sárvāsām agrabhaṁ nā́māré asya yójanaṁ hariṣṭhā́ mádhu tvā madhulā́ cakāra ||

1.191.14a tríḥ saptá mayūryàḥ saptá svásāro agrúvaḥ |
1.191.14c tā́s te viṣáṁ ví jabhrira udakáṁ kumbhínīr iva ||

1.191.15a iyattakáḥ kuṣumbhakás takám bhinadmy áśmanā |
1.191.15c táto viṣám prá vāvr̥te párācīr ánu saṁvátaḥ ||

1.191.16a kuṣumbhakás tád abravīd giréḥ pravartamānakáḥ |
1.191.16c vŕ̥ścikasyārasáṁ viṣám arasáṁ vr̥ścika te viṣám ||

2.001.01a tvám agne dyúbhis tvám āśuśukṣáṇis tvám adbhyás tvám áśmanas pári |
2.001.01c tváṁ vánebhyas tvám óṣadhībhyas tváṁ nr̥ṇā́ṁ nr̥pate jāyase śúciḥ ||

2.001.02a távāgne hotráṁ táva potrám r̥tvíyaṁ táva neṣṭráṁ tvám agníd r̥tāyatáḥ |
2.001.02c táva praśāstráṁ tvám adhvarīyasi brahmā́ cā́si gr̥hápatiś ca no dáme ||

2.001.03a tvám agna índro vr̥ṣabháḥ satā́m asi tváṁ víṣṇur urugāyó namasyàḥ |
2.001.03c tvám brahmā́ rayivíd brahmaṇas pate tváṁ vidhartaḥ sacase púraṁdhyā ||

2.001.04a tvám agne rā́jā váruṇo dhr̥távratas tvám mitró bhavasi dasmá ī́ḍyaḥ |
2.001.04c tvám aryamā́ sátpatir yásya sambhújaṁ tvám áṁśo vidáthe deva bhājayúḥ ||

2.001.05a tvám agne tváṣṭā vidhaté suvī́ryaṁ táva gnā́vo mitramahaḥ sajātyàm |
2.001.05c tvám āśuhémā rariṣe sváśvyaṁ tváṁ narā́ṁ śárdho asi purūvásuḥ ||

2.001.06a tvám agne rudró ásuro mahó divás tváṁ śárdho mā́rutam pr̥kṣá īśiṣe |
2.001.06c tváṁ vā́tair aruṇaír yāsi śaṁgayás tvám pūṣā́ vidhatáḥ pāsi nú tmánā ||

2.001.07a tvám agne draviṇodā́ araṁkŕ̥te tváṁ deváḥ savitā́ ratnadhā́ asi |
2.001.07c tvám bhágo nr̥pate vásva īśiṣe tvám pāyúr dáme yás té 'vidhat ||

2.001.08a tvā́m agne dáma ā́ viśpátiṁ víśas tvā́ṁ rā́jānaṁ suvidátram r̥ñjate |
2.001.08c tváṁ víśvāni svanīka patyase tváṁ sahásrāṇi śatā́ dáśa práti ||

2.001.09a tvā́m agne pitáram iṣṭíbhir náras tvā́m bhrātrā́ya śámyā tanūrúcam |
2.001.09c tvám putró bhavasi yás té 'vidhat tváṁ sákhā suśévaḥ pāsy ādhŕ̥ṣaḥ ||

2.001.10a tvám agna r̥bhúr āké namasyàs tváṁ vā́jasya kṣumáto rāyá īśiṣe |
2.001.10c tváṁ ví bhāsy ánu dakṣi dāváne tváṁ viśíkṣur asi yajñám ātániḥ ||

2.001.11a tvám agne áditir deva dāśúṣe tváṁ hótrā bhā́ratī vardhase girā́ |
2.001.11c tvám íḷā śatáhimāsi dákṣase tváṁ vr̥trahā́ vasupate sárasvatī ||

2.001.12a tvám agne súbhr̥ta uttamáṁ váyas táva spārhé várṇa ā́ saṁdŕ̥śi śríyaḥ |
2.001.12c tváṁ vā́jaḥ pratáraṇo br̥hánn asi tváṁ rayír bahuló viśvátas pr̥thúḥ ||

2.001.13a tvā́m agna ādityā́sa āsyàṁ tvā́ṁ jihvā́ṁ śúcayaś cakrire kave |
2.001.13c tvā́ṁ rātiṣā́co adhvaréṣu saścire tvé devā́ havír adanty ā́hutam ||

2.001.14a tvé agne víśve amŕ̥tāso adrúha āsā́ devā́ havír adanty ā́hutam |
2.001.14c tváyā mártāsaḥ svadanta āsutíṁ tváṁ gárbho vīrúdhāṁ jajñiṣe śúciḥ ||

2.001.15a tváṁ tā́n sáṁ ca práti cāsi majmánā́gne sujāta prá ca deva ricyase |
2.001.15c pr̥kṣó yád átra mahinā́ ví te bhúvad ánu dyā́vāpr̥thivī́ ródasī ubhé ||

2.001.16a yé stotŕ̥bhyo góagrām áśvapeśasam ágne rātím upasr̥jánti sūráyaḥ |
2.001.16c asmā́ñ ca tā́m̐ś ca prá hí néṣi vásya ā́ br̥hád vadema vidáthe suvī́rāḥ ||

2.002.01a yajñéna vardhata jātávedasam agníṁ yajadhvaṁ havíṣā tánā girā́ |
2.002.01c samidhānáṁ suprayásaṁ svàrṇaraṁ dyukṣáṁ hótāraṁ vr̥jáneṣu dhūrṣádam ||

2.002.02a abhí tvā náktīr uṣáso vavāśiré 'gne vatsáṁ ná svásareṣu dhenávaḥ |
2.002.02c divá ivéd aratír mā́nuṣā yugā́ kṣápo bhāsi puruvāra saṁyátaḥ ||

2.002.03a táṁ devā́ budhné rájasaḥ sudáṁsasaṁ diváspr̥thivyór aratíṁ ny èrire |
2.002.03c rátham iva védyaṁ śukráśociṣam agním mitráṁ ná kṣitíṣu praśáṁsyam ||

2.002.04a tám ukṣámāṇaṁ rájasi svá ā́ dáme candrám iva surúcaṁ hvārá ā́ dadhuḥ |
2.002.04c pŕ̥śnyāḥ pataráṁ citáyantam akṣábhiḥ pāthó ná pāyúṁ jánasī ubhé ánu ||

2.002.05a sá hótā víśvam pári bhūtv adhvaráṁ tám u havyaír mánuṣa r̥ñjate girā́ |
2.002.05c hiriśipró vr̥dhasānā́su járbhurad dyaúr ná stŕ̥bhiś citayad ródasī ánu ||

2.002.06a sá no revát samidhānáḥ svastáye saṁdadasvā́n rayím asmā́su dīdihi |
2.002.06c ā́ naḥ kr̥ṇuṣva suvitā́ya ródasī ágne havyā́ mánuṣo deva vītáye ||

2.002.07a dā́ no agne br̥ható dā́ḥ sahasríṇo duró ná vā́jaṁ śrútyā ápā vr̥dhi |
2.002.07c prā́cī dyā́vāpr̥thivī́ bráhmaṇā kr̥dhi svàr ṇá śukrám uṣáso ví didyutaḥ ||

2.002.08a sá idhāná uṣáso rā́myā ánu svàr ṇá dīded aruṣéṇa bhānúnā |
2.002.08c hótrābhir agnír mánuṣaḥ svadhvaró rā́jā viśā́m átithiś cā́rur āyáve ||

2.002.09a evā́ no agne amŕ̥teṣu pūrvya dhī́ṣ pīpāya br̥háddiveṣu mā́nuṣā |
2.002.09c dúhānā dhenúr vr̥jáneṣu kāráve tmánā śatínam pururū́pam iṣáṇi ||

2.002.10a vayám agne árvatā vā suvī́ryam bráhmaṇā vā citayemā jánām̐ áti |
2.002.10c asmā́kaṁ dyumnám ádhi páñca kr̥ṣṭíṣūccā́ svàr ṇá śuśucīta duṣṭáram ||

2.002.11a sá no bodhi sahasya praśáṁsyo yásmin sujātā́ iṣáyanta sūráyaḥ |
2.002.11c yám agne yajñám upayánti vājíno nítye toké dīdivā́ṁsaṁ své dáme ||

2.002.12a ubháyāso jātavedaḥ syāma te stotā́ro agne sūráyaś ca śármaṇi |
2.002.12c vásvo rāyáḥ puruścandrásya bhū́yasaḥ prajā́vataḥ svapatyásya śagdhi naḥ ||

2.002.13a yé stotŕ̥bhyo góagrām áśvapeśasam ágne rātím upasr̥jánti sūráyaḥ |
2.002.13c asmā́ñ ca tā́m̐ś ca prá hí néṣi vásya ā́ br̥hád vadema vidáthe suvī́rāḥ ||

2.003.01a sámiddho agnír níhitaḥ pr̥thivyā́m pratyáṅ víśvāni bhúvanāny asthāt |
2.003.01c hótā pāvakáḥ pradívaḥ sumedhā́ devó devā́n yajatv agnír árhan ||

2.003.02a nárāśáṁsaḥ práti dhā́māny añján tisró dívaḥ práti mahnā́ svarcíḥ |
2.003.02c ghr̥taprúṣā mánasā havyám undán mūrdhán yajñásya sám anaktu devā́n ||

2.003.03a īḷitó agne mánasā no árhan devā́n yakṣi mā́nuṣāt pū́rvo adyá |
2.003.03c sá ā́ vaha marútāṁ śárdho ácyutam índraṁ naro barhiṣádaṁ yajadhvam ||

2.003.04a déva barhir várdhamānaṁ suvī́raṁ stīrṇáṁ rāyé subháraṁ védy asyā́m |
2.003.04c ghr̥ténāktáṁ vasavaḥ sīdatedáṁ víśve devā ādityā yajñíyāsaḥ ||

2.003.05a ví śrayantām urviyā́ hūyámānā dvā́ro devī́ḥ suprāyaṇā́ námobhiḥ |
2.003.05c vyácasvatīr ví prathantām ajuryā́ várṇam punānā́ yaśásaṁ suvī́ram ||

2.003.06a sādhv ápāṁsi sanátā na ukṣité uṣā́sānáktā vayyèva raṇvité |
2.003.06c tántuṁ tatáṁ saṁváyantī samīcī́ yajñásya péśaḥ sudúghe páyasvatī ||

2.003.07a daívyā hótārā prathamā́ vidúṣṭara r̥jú yakṣataḥ sám r̥cā́ vapúṣṭarā |
2.003.07c devā́n yájantāv r̥tuthā́ sám añjato nā́bhā pr̥thivyā́ ádhi sā́nuṣu triṣú ||

2.003.08a sárasvatī sādháyantī dhíyaṁ na íḷā devī́ bhā́ratī viśvátūrtiḥ |
2.003.08c tisró devī́ḥ svadháyā barhír édám ácchidram pāntu śaraṇáṁ niṣádya ||

2.003.09a piśáṅgarūpaḥ subháro vayodhā́ḥ śruṣṭī́ vīró jāyate devákāmaḥ |
2.003.09c prajā́ṁ tváṣṭā ví ṣyatu nā́bhim asmé áthā devā́nām ápy etu pā́thaḥ ||

2.003.10a vánaspátir avasr̥jánn úpa sthād agnír havíḥ sūdayāti prá dhībhíḥ |
2.003.10c trídhā sámaktaṁ nayatu prajānán devébhyo daívyaḥ śamitópa havyám ||

2.003.11a ghr̥tám mimikṣe ghr̥tám asya yónir ghr̥té śritó ghr̥tám v asya dhā́ma |
2.003.11c anuṣvadhám ā́ vaha mādáyasva svā́hākr̥taṁ vr̥ṣabha vakṣi havyám ||

2.004.01a huvé vaḥ sudyótmānaṁ suvr̥ktíṁ viśā́m agním átithiṁ suprayásam |
2.004.01c mitrá iva yó didhiṣā́yyo bhū́d devá ā́deve jáne jātávedāḥ ||

2.004.02a imáṁ vidhánto apā́ṁ sadhásthe dvitā́dadhur bhŕ̥gavo vikṣv ā̀yóḥ |
2.004.02c eṣá víśvāny abhy àstu bhū́mā devā́nām agnír aratír jīrā́śvaḥ ||

2.004.03a agníṁ devā́so mā́nuṣīṣu vikṣú priyáṁ dhuḥ kṣeṣyánto ná mitrám |
2.004.03c sá dīdayad uśatī́r ū́rmyā ā́ dakṣā́yyo yó dā́svate dáma ā́ ||

2.004.04a asyá raṇvā́ svásyeva puṣṭíḥ sáṁdr̥ṣṭir asya hiyānásya dákṣoḥ |
2.004.04c ví yó bháribhrad óṣadhīṣu jihvā́m átyo ná ráthyo dodhavīti vā́rān ||

2.004.05a ā́ yán me ábhvaṁ vanádaḥ pánantośígbhyo nā́mimīta várṇam |
2.004.05c sá citréṇa cikite ráṁsu bhāsā́ jujurvā́m̐ yó múhur ā́ yúvā bhū́t ||

2.004.06a ā́ yó vánā tātr̥ṣāṇó ná bhā́ti vā́r ṇá pathā́ ráthyeva svānīt |
2.004.06c kr̥ṣṇā́dhvā tápū raṇváś ciketa dyaúr iva smáyamāno nábhobhiḥ ||

2.004.07a sá yó vy ásthād abhí dákṣad urvī́m paśúr naíti svayúr ágopāḥ |
2.004.07c agníḥ śocíṣmām̐ atasā́ny uṣṇán kr̥ṣṇávyathir asvadayan ná bhū́ma ||

2.004.08a nū́ te pū́rvasyā́vaso ádhītau tr̥tī́ye vidáthe mánma śaṁsi |
2.004.08c asmé agne saṁyádvīram br̥hántaṁ kṣumántaṁ vā́jaṁ svapatyáṁ rayíṁ dāḥ ||

2.004.09a tváyā yáthā gr̥tsamadā́so agne gúhā vanvánta úparām̐ abhí ṣyúḥ |
2.004.09c suvī́rāso abhimātiṣā́haḥ smát sūríbhyo gr̥ṇaté tád váyo dhāḥ ||

2.005.01a hótājaniṣṭa cétanaḥ pitā́ pitŕ̥bhya ūtáye |
2.005.01c prayákṣañ jényaṁ vásu śakéma vājíno yámam ||

2.005.02a ā́ yásmin saptá raśmáyas tatā́ yajñásya netári |
2.005.02c manuṣvád daívyam aṣṭamám pótā víśvaṁ tád invati ||

2.005.03a dadhanvé vā yád īm ánu vócad bráhmāṇi vér u tát |
2.005.03c pári víśvāni kā́vyā nemíś cakrám ivābhavat ||

2.005.04a sākáṁ hí śúcinā śúciḥ praśāstā́ krátunā́jani |
2.005.04c vidvā́m̐ asya vratā́ dhruvā́ vayā́ ivā́nu rohate ||

2.005.05a tā́ asya várṇam āyúvo néṣṭuḥ sacanta dhenávaḥ |
2.005.05c kuvít tisŕ̥bhya ā́ váraṁ svásāro yā́ idáṁ yayúḥ ||

2.005.06a yádī mātúr úpa svásā ghr̥tám bháranty ásthita |
2.005.06c tā́sām adhvaryúr ā́gatau yávo vr̥ṣṭī́va modate ||

2.005.07a sváḥ svā́ya dhā́yase kr̥ṇutā́m r̥tvíg r̥tvíjam |
2.005.07c stómaṁ yajñáṁ cā́d áraṁ vanémā rarimā́ vayám ||

2.005.08a yáthā vidvā́m̐ áraṁ kárad víśvebhyo yajatébhyaḥ |
2.005.08c ayám agne tvé ápi yáṁ yajñáṁ cakr̥mā́ vayám ||

2.006.01a imā́m me agne samídham imā́m upasádaṁ vaneḥ |
2.006.01c imā́ u ṣú śrudhī gíraḥ ||

2.006.02a ayā́ te agne vidhemórjo napād áśvamiṣṭe |
2.006.02c enā́ sūkténa sujāta ||

2.006.03a táṁ tvā gīrbhír gírvaṇasaṁ draviṇasyúṁ draviṇodaḥ |
2.006.03c saparyéma saparyávaḥ ||

2.006.04a sá bodhi sūrír maghávā vásupate vásudāvan |
2.006.04c yuyodhy àsmád dvéṣāṁsi ||

2.006.05a sá no vr̥ṣṭíṁ divás pári sá no vā́jam anarvā́ṇam |
2.006.05c sá naḥ sahasríṇīr íṣaḥ ||

2.006.06a ī́ḷānāyāvasyáve yáviṣṭha dūta no girā́ |
2.006.06c yájiṣṭha hotar ā́ gahi ||

2.006.07a antár hy àgna ī́yase vidvā́ñ jánmobháyā kave |
2.006.07c dūtó jányeva mítryaḥ ||

2.006.08a sá vidvā́m̐ ā́ ca piprayo yákṣi cikitva ānuṣák |
2.006.08c ā́ cāsmín satsi barhíṣi ||

2.007.01a śréṣṭhaṁ yaviṣṭha bhāratā́gne dyumántam ā́ bhara |
2.007.01c váso puruspŕ̥haṁ rayím ||

2.007.02a mā́ no árātir īśata devásya mártyasya ca |
2.007.02c párṣi tásyā utá dviṣáḥ ||

2.007.03a víśvā utá tváyā vayáṁ dhā́rā udanyā̀ iva |
2.007.03c áti gāhemahi dvíṣaḥ ||

2.007.04a śúciḥ pāvaka vándyó 'gne br̥hád ví rocase |
2.007.04c tváṁ ghr̥tébhir ā́hutaḥ ||

2.007.05a tváṁ no asi bhāratā́gne vaśā́bhir ukṣábhiḥ |
2.007.05c aṣṭā́padībhir ā́hutaḥ ||

2.007.06a drvànnaḥ sarpírāsutiḥ pratnó hótā váreṇyaḥ |
2.007.06c sáhasas putró ádbhutaḥ ||

2.008.01a vājayánn iva nū́ ráthān yógām̐ agnér úpa stuhi |
2.008.01c yaśástamasya mīḷhúṣaḥ ||

2.008.02a yáḥ sunīthó dadāśúṣe 'juryó jaráyann arím |
2.008.02c cā́rupratīka ā́hutaḥ ||

2.008.03a yá u śriyā́ dámeṣv ā́ doṣóṣási praśasyáte |
2.008.03c yásya vratáṁ ná mī́yate ||

2.008.04a ā́ yáḥ svàr ṇá bhānúnā citró vibhā́ty arcíṣā |
2.008.04c añjānó ajárair abhí ||

2.008.05a átrim ánu svarā́jyam agním ukthā́ni vāvr̥dhuḥ |
2.008.05c víśvā ádhi śríyo dadhe ||

2.008.06a agnér índrasya sómasya devā́nām ūtíbhir vayám |
2.008.06c áriṣyantaḥ sacemahy abhí ṣyāma pr̥tanyatáḥ ||

2.009.01a ní hótā hotr̥ṣádane vídānas tveṣó dīdivā́m̐ asadat sudákṣaḥ |
2.009.01c ádabdhavratapramatir vásiṣṭhaḥ sahasrambharáḥ śúcijihvo agníḥ ||

2.009.02a tváṁ dūtás tvám u naḥ paraspā́s tváṁ vásya ā́ vr̥ṣabha praṇetā́ |
2.009.02c ágne tokásya nas táne tanū́nām áprayucchan dī́dyad bodhi gopā́ḥ ||

2.009.03a vidhéma te paramé jánmann agne vidhéma stómair ávare sadhásthe |
2.009.03c yásmād yóner udā́rithā yáje tám prá tvé havī́ṁṣi juhure sámiddhe ||

2.009.04a ágne yájasva havíṣā yájīyāñ chruṣṭī́ deṣṇám abhí gr̥ṇīhi rā́dhaḥ |
2.009.04c tváṁ hy ási rayipátī rayīṇā́ṁ tváṁ śukrásya vácaso manótā ||

2.009.05a ubháyaṁ te ná kṣīyate vasavyàṁ divé-dive jā́yamānasya dasma |
2.009.05c kr̥dhí kṣumántaṁ jaritā́ram agne kr̥dhí pátiṁ svapatyásya rāyáḥ ||

2.009.06a saínā́nīkena suvidátro asmé yáṣṭā devā́m̐ ā́yajiṣṭhaḥ svastí |
2.009.06c ádabdho gopā́ utá naḥ paraspā́ ágne dyumád utá revád didīhi ||

2.010.01a johū́tro agníḥ prathamáḥ pitéveḷás padé mánuṣā yát sámiddhaḥ |
2.010.01c śríyaṁ vásāno amŕ̥to vícetā marmr̥jényaḥ śravasyàḥ sá vājī́ ||

2.010.02a śrūyā́ agníś citrábhānur hávam me víśvābhir gīrbhír amŕ̥to vícetāḥ |
2.010.02c śyāvā́ ráthaṁ vahato róhitā votā́ruṣā́ha cakre víbhr̥traḥ ||

2.010.03a uttānā́yām ajanayan súṣūtam bhúvad agníḥ purupéśāsu gárbhaḥ |
2.010.03c śíriṇāyāṁ cid aktúnā máhobhir áparīvr̥to vasati prácetāḥ ||

2.010.04a jígharmy agníṁ havíṣā ghr̥téna pratikṣiyántam bhúvanāni víśvā |
2.010.04c pr̥thúṁ tiraścā́ váyasā br̥hántaṁ vyáciṣṭham ánnai rabhasáṁ dŕ̥śānam ||

2.010.05a ā́ viśvátaḥ pratyáñcaṁ jigharmy arakṣásā mánasā táj juṣeta |
2.010.05c máryaśrīḥ spr̥hayádvarṇo agnír nā́bhimŕ̥śe tanvā̀ járbhurāṇaḥ ||

2.010.06a jñeyā́ bhāgáṁ sahasānó váreṇa tvā́dūtāso manuvád vadema |
2.010.06c ánūnam agníṁ juhvā̀ vacasyā́ madhupŕ̥caṁ dhanasā́ johavīmi ||

2.011.01a śrudhī́ hávam indra mā́ riṣaṇyaḥ syā́ma te dāváne vásūnām |
2.011.01c imā́ hí tvā́m ū́rjo vardháyanti vasūyávaḥ síndhavo ná kṣárantaḥ ||

2.011.02a sr̥jó mahī́r indra yā́ ápinvaḥ páriṣṭhitā áhinā śūra pūrvī́ḥ |
2.011.02c ámartyaṁ cid dāsám mányamānam ávābhinad ukthaír vāvr̥dhānáḥ ||

2.011.03a ukthéṣv ín nú śūra yéṣu cākán stómeṣv indra rudríyeṣu ca |
2.011.03c túbhyéd etā́ yā́su mandasānáḥ prá vāyáve sisrate ná śubhrā́ḥ ||

2.011.04a śubhráṁ nú te śúṣmaṁ vardháyantaḥ śubhráṁ vájram bāhvór dádhānāḥ |
2.011.04c śubhrás tvám indra vāvr̥dhānó asmé dā́sīr víśaḥ sū́ryeṇa sahyāḥ ||

2.011.05a gúhā hitáṁ gúhyaṁ gūḷhám apsv ápīvr̥tam māyínaṁ kṣiyántam |
2.011.05c utó apó dyā́ṁ tastabhvā́ṁsam áhann áhiṁ śūra vīryèṇa ||

2.011.06a stávā nú ta indra pūrvyā́ mahā́ny utá stavāma nū́tanā kr̥tā́ni |
2.011.06c stávā vájram bāhvór uśántaṁ stávā hárī sū́ryasya ketū́ ||

2.011.07a hárī nú ta indra vājáyantā ghr̥taścútaṁ svārám asvārṣṭām |
2.011.07c ví samanā́ bhū́mir aprathiṣṭā́raṁsta párvataś cit sariṣyán ||

2.011.08a ní párvataḥ sādy áprayucchan sám mātŕ̥bhir vāvaśānó akrān |
2.011.08c dūré pāré vā́ṇīṁ vardháyanta índreṣitāṁ dhamánim paprathan ní ||

2.011.09a índro mahā́ṁ síndhum āśáyānam māyāvínaṁ vr̥trám asphuran níḥ |
2.011.09c árejetāṁ ródasī bhiyāné kánikradato vŕ̥ṣṇo asya vájrāt ||

2.011.10a ároravīd vŕ̥ṣṇo asya vájró 'mānuṣaṁ yán mā́nuṣo nijū́rvāt |
2.011.10c ní māyíno dānavásya māyā́ ápādayat papivā́n sutásya ||

2.011.11a píbā-pibéd indra śūra sómam mándantu tvā mandínaḥ sutā́saḥ |
2.011.11c pr̥ṇántas te kukṣī́ vardhayantv itthā́ sutáḥ paurá índram āva ||

2.011.12a tvé indrā́py abhūma víprā dhíyaṁ vanema r̥tayā́ sápantaḥ |
2.011.12c avasyávo dhīmahi práśastiṁ sadyás te rāyó dāváne syāma ||

2.011.13a syā́ma té ta indra yé ta ūtī́ avasyáva ū́rjaṁ vardháyantaḥ |
2.011.13c śuṣmíntamaṁ yáṁ cākánāma devāsmé rayíṁ rāsi vīrávantam ||

2.011.14a rā́si kṣáyaṁ rā́si mitrám asmé rā́si śárdha indra mā́rutaṁ naḥ |
2.011.14c sajóṣaso yé ca mandasānā́ḥ prá vāyávaḥ pānty ágraṇītim ||

2.011.15a vyántv ín nú yéṣu mandasānás tr̥pát sómam pāhi drahyád indra |
2.011.15c asmā́n sú pr̥tsv ā́ tarutrā́vardhayo dyā́m br̥hádbhir arkaíḥ ||

2.011.16a br̥hánta ín nú yé te tarutrokthébhir vā sumnám āvívāsān |
2.011.16c str̥ṇānā́so barhíḥ pastyā̀vat tvótā íd indra vā́jam agman ||

2.011.17a ugréṣv ín nú śūra mandasānás tríkadrukeṣu pāhi sómam indra |
2.011.17c pradódhuvac chmáśruṣu prīṇānó yāhí háribhyāṁ sutásya pītím ||

2.011.18a dhiṣvā́ śávaḥ śūra yéna vr̥trám avā́bhinad dā́num aurṇavābhám |
2.011.18c ápāvr̥ṇor jyótir ā́ryāya ní savyatáḥ sādi dásyur indra ||

2.011.19a sánema yé ta ūtíbhis táranto víśvāḥ spŕ̥dha ā́ryeṇa dásyūn |
2.011.19c asmábhyaṁ tát tvāṣṭráṁ viśvárūpam árandhayaḥ sākhyásya tritā́ya ||

2.011.20a asyá suvānásya mandínas tritásya ny árbudaṁ vāvr̥dhānó astaḥ |
2.011.20c ávartayat sū́ryo ná cakrám bhinád valám índro áṅgirasvān ||

2.011.21a nūnáṁ sā́ te práti váraṁ jaritré duhīyád indra dákṣiṇā maghónī |
2.011.21c śíkṣā stotŕ̥bhyo mā́ti dhag bhágo no br̥hád vadema vidáthe suvī́rāḥ ||

2.012.01a yó jātá evá prathamó mánasvān devó devā́n krátunā paryábhūṣat |
2.012.01c yásya śúṣmād ródasī ábhyasetāṁ nr̥mṇásya mahnā́ sá janāsa índraḥ ||

2.012.02a yáḥ pr̥thivī́ṁ vyáthamānām ádr̥ṁhad yáḥ párvatān prákupitām̐ áramṇāt |
2.012.02c yó antárikṣaṁ vimamé várīyo yó dyā́m ástabhnāt sá janāsa índraḥ ||

2.012.03a yó hatvā́him áriṇāt saptá síndhūn yó gā́ udā́jad apadhā́ valásya |
2.012.03c yó áśmanor antár agníṁ jajā́na saṁvŕ̥k samátsu sá janāsa índraḥ ||

2.012.04a yénemā́ víśvā cyávanā kr̥tā́ni yó dā́saṁ várṇam ádharaṁ gúhā́kaḥ |
2.012.04c śvaghnī́va yó jigīvā́lm̐ lakṣám ā́dad aryáḥ puṣṭā́ni sá janāsa índraḥ ||

2.012.05a yáṁ smā pr̥cchánti kúha séti ghorám utém āhur naíṣó astī́ty enam |
2.012.05c só aryáḥ puṣṭī́r víja ivā́ mināti śrád asmai dhatta sá janāsa índraḥ ||

2.012.06a yó radhrásya coditā́ yáḥ kr̥śásya yó brahmáṇo nā́dhamānasya kīréḥ |
2.012.06c yuktágrāvṇo yò 'vitā́ suśipráḥ sutásomasya sá janāsa índraḥ ||

2.012.07a yásyā́śvāsaḥ pradíśi yásya gā́vo yásya grā́mā yásya víśve ráthāsaḥ |
2.012.07c yáḥ sū́ryaṁ yá uṣásaṁ jajā́na yó apā́ṁ netā́ sá janāsa índraḥ ||

2.012.08a yáṁ krándasī saṁyatī́ vihváyete páré 'vara ubháyā amítrāḥ |
2.012.08c samānáṁ cid rátham ātasthivā́ṁsā nā́nā havete sá janāsa índraḥ ||

2.012.09a yásmān ná r̥té vijáyante jánāso yáṁ yúdhyamānā ávase hávante |
2.012.09c yó víśvasya pratimā́nam babhū́va yó acyutacyút sá janāsa índraḥ ||

2.012.10a yáḥ śáśvato máhy éno dádhānān ámanyamānāñ chárvā jaghā́na |
2.012.10c yáḥ śárdhate nā́nudádāti śr̥dhyā́ṁ yó dásyor hantā́ sá janāsa índraḥ ||

2.012.11a yáḥ śámbaram párvateṣu kṣiyántaṁ catvāriṁśyā́ṁ śarády anvávindat |
2.012.11c ojāyámānaṁ yó áhiṁ jaghā́na dā́nuṁ śáyānaṁ sá janāsa índraḥ ||

2.012.12a yáḥ saptáraśmir vr̥ṣabhás túviṣmān avā́sr̥jat sártave saptá síndhūn |
2.012.12c yó rauhiṇám ásphurad vájrabāhur dyā́m āróhantaṁ sá janāsa índraḥ ||

2.012.13a dyā́vā cid asmai pr̥thivī́ namete śúṣmāc cid asya párvatā bhayante |
2.012.13c yáḥ somapā́ nicitó vájrabāhur yó vájrahastaḥ sá janāsa índraḥ ||

2.012.14a yáḥ sunvántam ávati yáḥ pácantaṁ yáḥ śáṁsantaṁ yáḥ śaśamānám ūtī́ |
2.012.14c yásya bráhma várdhanaṁ yásya sómo yásyedáṁ rā́dhaḥ sá janāsa índraḥ ||

2.012.15a yáḥ sunvaté pácate dudhrá ā́ cid vā́jaṁ dárdarṣi sá kílāsi satyáḥ |
2.012.15c vayáṁ ta indra viśváha priyā́saḥ suvī́rāso vidátham ā́ vadema ||

2.013.01a r̥túr jánitrī tásyā apás pári makṣū́ jātá ā́viśad yā́su várdhate |
2.013.01c tád āhanā́ abhavat pipyúṣī páyo 'ṁśóḥ pīyū́ṣam prathamáṁ tád ukthyàm ||

2.013.02a sadhrī́m ā́ yanti pári bíbhratīḥ páyo viśvápsnyāya prá bharanta bhójanam |
2.013.02c samānó ádhvā pravátām anuṣyáde yás tā́kr̥ṇoḥ prathamáṁ sā́sy ukthyàḥ ||

2.013.03a ánv éko vadati yád dádāti tád rūpā́ minán tádapā éka īyate |
2.013.03c víśvā ékasya vinúdas titikṣate yás tā́kr̥ṇoḥ prathamáṁ sā́sy ukthyàḥ ||

2.013.04a prajā́bhyaḥ puṣṭíṁ vibhájanta āsate rayím iva pr̥ṣṭhám prabhávantam āyaté |
2.013.04c ásinvan dáṁṣṭraiḥ pitúr atti bhójanaṁ yás tā́kr̥ṇoḥ prathamáṁ sā́sy ukthyàḥ ||

2.013.05a ádhākr̥ṇoḥ pr̥thivī́ṁ saṁdŕ̥śe divé yó dhautīnā́m ahihann ā́riṇak patháḥ |
2.013.05c táṁ tvā stómebhir udábhir ná vājínaṁ deváṁ devā́ ajanan sā́sy ukthyàḥ ||

2.013.06a yó bhójanaṁ ca dáyase ca várdhanam ārdrā́d ā́ śúṣkam mádhumad dudóhitha |
2.013.06c sá śevadhíṁ ní dadhiṣe vivásvati víśvasyaíka īśiṣe sā́sy ukthyàḥ ||

2.013.07a yáḥ puṣpíṇīś ca prasvàś ca dhármaṇā́dhi dā́ne vy àvánīr ádhārayaḥ |
2.013.07c yáś cā́samā ájano didyúto divá urúr ūrvā́m̐ abhítaḥ sā́sy ukthyàḥ ||

2.013.08a yó nārmaráṁ sahávasuṁ níhantave pr̥kṣā́ya ca dāsáveśāya cā́vahaḥ |
2.013.08c ūrjáyantyā ápariviṣṭam āsyàm utaívā́dyá purukr̥t sā́sy ukthyàḥ ||

2.013.09a śatáṁ vā yásya dáśa sākám ā́dya ékasya śruṣṭaú yád dha codám ā́vitha |
2.013.09c arajjaú dásyūn sám unab dabhī́taye suprāvyò abhavaḥ sā́sy ukthyàḥ ||

2.013.10a víśvéd ánu rodhanā́ asya paúṁsyaṁ dadúr asmai dadhiré kr̥tnáve dhánam |
2.013.10c ṣáḷ astabhnā viṣṭíraḥ páñca saṁdŕ̥śaḥ pári paró abhavaḥ sā́sy ukthyàḥ ||

2.013.11a supravācanáṁ táva vīra vīryàṁ yád ékena krátunā vindáse vásu |
2.013.11c jātū́ṣṭhirasya prá váyaḥ sáhasvato yā́ cakártha séndra víśvāsy ukthyàḥ ||

2.013.12a áramayaḥ sárapasas tárāya káṁ turvī́taye ca vayyā̀ya ca srutím |
2.013.12c nīcā́ sántam úd anayaḥ parāvŕ̥jam prā́ndháṁ śroṇáṁ śraváyan sā́sy ukthyàḥ ||

2.013.13a asmábhyaṁ tád vaso dānā́ya rā́dhaḥ sám arthayasva bahú te vasavyàm |
2.013.13c índra yác citráṁ śravasyā́ ánu dyū́n br̥hád vadema vidáthe suvī́rāḥ ||

2.014.01a ádhvaryavo bháraténdrāya sómam ā́matrebhiḥ siñcatā mádyam ándhaḥ |
2.014.01c kāmī́ hí vīráḥ sádam asya pītíṁ juhóta vŕ̥ṣṇe tád íd eṣá vaṣṭi ||

2.014.02a ádhvaryavo yó apó vavrivā́ṁsaṁ vr̥tráṁ jaghā́nāśányeva vr̥kṣám |
2.014.02c tásmā etám bharata tadvaśā́yam̐ eṣá índro arhati pītím asya ||

2.014.03a ádhvaryavo yó dŕ̥bhīkaṁ jaghā́na yó gā́ udā́jad ápa hí valáṁ váḥ |
2.014.03c tásmā etám antárikṣe ná vā́tam índraṁ sómair órṇuta jū́r ná vástraiḥ ||

2.014.04a ádhvaryavo yá úraṇaṁ jaghā́na náva cakhvā́ṁsaṁ navatíṁ ca bāhū́n |
2.014.04c yó árbudam áva nīcā́ babādhé tám índraṁ sómasya bhr̥thé hinota ||

2.014.05a ádhvaryavo yáḥ sv áśnaṁ jaghā́na yáḥ śúṣṇam aśúṣaṁ yó vyàṁsam |
2.014.05c yáḥ pípruṁ námuciṁ yó rudhikrā́ṁ tásmā índrāyā́ndhaso juhota ||

2.014.06a ádhvaryavo yáḥ śatáṁ śámbarasya púro bibhédā́śmaneva pūrvī́ḥ |
2.014.06c yó varcínaḥ śatám índraḥ sahásram apā́vapad bháratā sómam asmai ||

2.014.07a ádhvaryavo yáḥ śatám ā́ sahásram bhū́myā upásthé 'vapaj jaghanvā́n |
2.014.07c kútsasyāyór atithigvásya vīrā́n ny ā́vr̥ṇag bháratā sómam asmai ||

2.014.08a ádhvaryavo yán naraḥ kāmáyādhve śruṣṭī́ váhanto naśathā tád índre |
2.014.08c gábhastipūtam bharata śrutā́yéndrāya sómaṁ yajyavo juhota ||

2.014.09a ádhvaryavaḥ kártanā śruṣṭím asmai váne nípūtaṁ vána ún nayadhvam |
2.014.09c juṣāṇó hástyam abhí vāvaśe va índrāya sómam madiráṁ juhota ||

2.014.10a ádhvaryavaḥ páyasódhar yáthā góḥ sómebhir īm pr̥ṇatā bhojám índram |
2.014.10c védāhám asya níbhr̥tam ma etád dítsantam bhū́yo yajatáś ciketa ||

2.014.11a ádhvaryavo yó divyásya vásvo yáḥ pā́rthivasya kṣámyasya rā́jā |
2.014.11c tám ū́rdaraṁ ná pr̥ṇatā yávenéndraṁ sómebhis tád ápo vo astu ||

2.014.12a asmábhyaṁ tád vaso dānā́ya rā́dhaḥ sám arthayasva bahú te vasavyàm |
2.014.12c índra yác citráṁ śravasyā́ ánu dyū́n br̥hád vadema vidáthe suvī́rāḥ ||

2.015.01a prá ghā nv àsya maható mahā́ni satyā́ satyásya káraṇāni vocam |
2.015.01c tríkadrukeṣv apibat sutásyāsyá máde áhim índro jaghāna ||

2.015.02a avaṁśé dyā́m astabhāyad br̥hántam ā́ ródasī apr̥ṇad antárikṣam |
2.015.02c sá dhārayat pr̥thivī́m papráthac ca sómasya tā́ máda índraś cakāra ||

2.015.03a sádmeva prā́co ví mimāya mā́nair vájreṇa khā́ny atr̥ṇan nadī́nām |
2.015.03c vŕ̥thāsr̥jat pathíbhir dīrghayāthaíḥ sómasya tā́ máda índraś cakāra ||

2.015.04a sá pravoḷhr̥̄́n parigátyā dabhī́ter víśvam adhāg ā́yudham iddhé agnaú |
2.015.04c sáṁ góbhir áśvair asr̥jad ráthebhiḥ sómasya tā́ máda índraś cakāra ||

2.015.05a sá īm mahī́ṁ dhúnim étor aramṇāt só asnātr̥̄́n apārayat svastí |
2.015.05c tá utsnā́ya rayím abhí prá tasthuḥ sómasya tā́ máda índraś cakāra ||

2.015.06a sódañcaṁ síndhum ariṇān mahitvā́ vájreṇā́na uṣásaḥ sám pipeṣa |
2.015.06c ajaváso javínībhir vivr̥ścán sómasya tā́ máda índraś cakāra ||

2.015.07a sá vidvā́m̐ apagoháṁ kanī́nām āvír bhávann úd atiṣṭhat parāvŕ̥k |
2.015.07c práti śroṇáḥ sthād vy ànág acaṣṭa sómasya tā́ máda índraś cakāra ||

2.015.08a bhinád valám áṅgirobhir gr̥ṇānó ví párvatasya dr̥ṁhitā́ny airat |
2.015.08c riṇág ródhāṁsi kr̥trímāṇy eṣāṁ sómasya tā́ máda índraś cakāra ||

2.015.09a svápnenābhyúpyā cúmuriṁ dhúniṁ ca jaghántha dásyum prá dabhī́tim āvaḥ |
2.015.09c rambhī́ cid átra vivide híraṇyaṁ sómasya tā́ máda índraś cakāra ||

2.015.10a nūnáṁ sā́ te práti váraṁ jaritré duhīyád indra dákṣiṇā maghónī |
2.015.10c śíkṣā stotŕ̥bhyo mā́ti dhag bhágo no br̥hád vadema vidáthe suvī́rāḥ ||

2.016.01a prá vaḥ satā́ṁ jyéṣṭhatamāya suṣṭutím agnā́v iva samidhāné havír bhare |
2.016.01c índram ajuryáṁ jaráyantam ukṣitáṁ sanā́d yúvānam ávase havāmahe ||

2.016.02a yásmād índrād br̥hatáḥ kíṁ caném r̥té víśvāny asmin sámbhr̥tā́dhi vīryā̀ |
2.016.02c jaṭháre sómaṁ tanvī̀ sáho máho háste vájram bhárati śīrṣáṇi krátum ||

2.016.03a ná kṣoṇī́bhyām paribhvè ta indriyáṁ ná samudraíḥ párvatair indra te ráthaḥ |
2.016.03c ná te vájram ánv aśnoti káś caná yád āśúbhiḥ pátasi yójanā purú ||

2.016.04a víśve hy àsmai yajatā́ya dhr̥ṣṇáve krátum bháranti vr̥ṣabhā́ya sáścate |
2.016.04c vŕ̥ṣā yajasva havíṣā vidúṣṭaraḥ píbendra sómaṁ vr̥ṣabhéṇa bhānúnā ||

2.016.05a vŕ̥ṣṇaḥ kóśaḥ pavate mádhva ūrmír vr̥ṣabhā́nnāya vr̥ṣabhā́ya pā́tave |
2.016.05c vŕ̥ṣaṇādhvaryū́ vr̥ṣabhā́so ádrayo vŕ̥ṣaṇaṁ sómaṁ vr̥ṣabhā́ya suṣvati ||

2.016.06a vŕ̥ṣā te vájra utá te vŕ̥ṣā rátho vŕ̥ṣaṇā hárī vr̥ṣabhā́ṇy ā́yudhā |
2.016.06c vŕ̥ṣṇo mádasya vr̥ṣabha tvám īśiṣa índra sómasya vr̥ṣabhásya tr̥pṇuhi ||

2.016.07a prá te nā́vaṁ ná sámane vacasyúvam bráhmaṇā yāmi sávaneṣu dā́dhr̥ṣiḥ |
2.016.07c kuvín no asyá vácaso nibódhiṣad índram útsaṁ ná vásunaḥ sicāmahe ||

2.016.08a purā́ sambādhā́d abhy ā́ vavr̥tsva no dhenúr ná vatsáṁ yávasasya pipyúṣī |
2.016.08c sakŕ̥t sú te sumatíbhiḥ śatakrato sám pátnībhir ná vŕ̥ṣaṇo nasīmahi ||

2.016.09a nūnáṁ sā́ te práti váraṁ jaritré duhīyád indra dákṣiṇā maghónī |
2.016.09c śíkṣā stotŕ̥bhyo mā́ti dhag bhágo no br̥hád vadema vidáthe suvī́rāḥ ||

2.017.01a tád asmai návyam aṅgirasvád arcata śúṣmā yád asya pratnáthodī́rate |
2.017.01c víśvā yád gotrā́ sáhasā párīvr̥tā máde sómasya dr̥ṁhitā́ny aírayat ||

2.017.02a sá bhūtu yó ha prathamā́ya dhā́yasa ójo mímāno mahimā́nam ā́tirat |
2.017.02c śū́ro yó yutsú tanvàm parivyáta śīrṣáṇi dyā́m mahinā́ práty amuñcata ||

2.017.03a ádhākr̥ṇoḥ prathamáṁ vīryàm mahád yád asyā́gre bráhmaṇā śúṣmam aírayaḥ |
2.017.03c ratheṣṭhéna háryaśvena vícyutāḥ prá jīráyaḥ sisrate sadhryàk pŕ̥thak ||

2.017.04a ádhā yó víśvā bhúvanābhí majmáneśānakŕ̥t právayā abhy ávardhata |
2.017.04c ā́d ródasī jyótiṣā váhnir ā́tanot sī́vyan támāṁsi dúdhitā sám avyayat ||

2.017.05a sá prācī́nān párvatān dr̥ṁhad ójasādharācī́nam akr̥ṇod apā́m ápaḥ |
2.017.05c ádhārayat pr̥thivī́ṁ viśvádhāyasam ástabhnān māyáyā dyā́m avasrásaḥ ||

2.017.06a sā́smā áram bāhúbhyāṁ yám pitā́kr̥ṇod víśvasmād ā́ janúṣo védasas pári |
2.017.06c yénā pr̥thivyā́ṁ ní kríviṁ śayádhyai vájreṇa hatvy ávr̥ṇak tuviṣváṇiḥ ||

2.017.07a amājū́r iva pitróḥ sácā satī́ samānā́d ā́ sádasas tvā́m iye bhágam |
2.017.07c kr̥dhí praketám úpa māsy ā́ bhara daddhí bhāgáṁ tanvò yéna māmáhaḥ ||

2.017.08a bhojáṁ tvā́m indra vayáṁ huvema dadíṣ ṭvám indrā́pāṁsi vā́jān |
2.017.08c aviḍḍhī̀ndra citráyā na ūtī́ kr̥dhí vr̥ṣann indra vásyaso naḥ ||

2.017.09a nūnáṁ sā́ te práti váraṁ jaritré duhīyád indra dákṣiṇā maghónī |
2.017.09c śíkṣā stotŕ̥bhyo mā́ti dhag bhágo no br̥hád vadema vidáthe suvī́rāḥ ||

2.018.01a prātā́ rátho návo yoji sásniś cáturyugas trikaśáḥ saptáraśmiḥ |
2.018.01c dáśāritro manuṣyàḥ svarṣā́ḥ sá iṣṭíbhir matíbhī ráṁhyo bhūt ||

2.018.02a sā́smā áram prathamáṁ sá dvitī́yam utó tr̥tī́yam mánuṣaḥ sá hótā |
2.018.02c anyásyā gárbham anyá ū jananta só anyébhiḥ sacate jényo vŕ̥ṣā ||

2.018.03a hárī nú kaṁ rátha índrasya yojam āyaí sūkténa vácasā návena |
2.018.03c mó ṣú tvā́m átra bahávo hí víprā ní rīraman yájamānāso anyé ||

2.018.04a ā́ dvā́bhyāṁ háribhyām indra yāhy ā́ catúrbhir ā́ ṣaḍbhír hūyámānaḥ |
2.018.04c ā́ṣṭābhír daśábhiḥ somapéyam ayáṁ sutáḥ sumakha mā́ mŕ̥dhas kaḥ ||

2.018.05a ā́ viṁśatyā́ triṁśátā yāhy arvā́ṅ ā́ catvāriṁśátā háribhir yujānáḥ |
2.018.05c ā́ pañcāśátā suráthebhir indrā́ ṣaṣṭyā́ saptatyā́ somapéyam ||

2.018.06a ā́śītyā́ navatyā́ yāhy arvā́ṅ ā́ śaténa háribhir uhyámānaḥ |
2.018.06c ayáṁ hí te śunáhotreṣu sóma índra tvāyā́ páriṣikto mádāya ||

2.018.07a máma bráhmendra yāhy ácchā víśvā hárī dhurí dhiṣvā ráthasya |
2.018.07c purutrā́ hí vihávyo babhū́thāsmíñ chūra sávane mādayasva ||

2.018.08a ná ma índreṇa sakhyáṁ ví yoṣad asmábhyam asya dákṣiṇā duhīta |
2.018.08c úpa jyéṣṭhe várūthe gábhastau prāyé-prāye jigīvā́ṁsaḥ syāma ||

2.018.09a nūnáṁ sā́ te práti váraṁ jaritré duhīyád indra dákṣiṇā maghónī |
2.018.09c śíkṣā stotŕ̥bhyo mā́ti dhag bhágo no br̥hád vadema vidáthe suvī́rāḥ ||

2.019.01a ápāyy asyā́ndhaso mádāya mánīṣiṇaḥ suvānásya práyasaḥ |
2.019.01c yásminn índraḥ pradívi vāvr̥dhāná óko dadhé brahmaṇyántaś ca náraḥ ||

2.019.02a asyá mandānó mádhvo vájrahastó 'him índro arṇovŕ̥taṁ ví vr̥ścat |
2.019.02c prá yád váyo ná svásarāṇy ácchā práyāṁsi ca nadī́nāṁ cákramanta ||

2.019.03a sá mā́hina índro árṇo apā́m praírayad ahihā́cchā samudrám |
2.019.03c ájanayat sū́ryaṁ vidád gā́ aktúnā́hnāṁ vayúnāni sādhat ||

2.019.04a só apratī́ni mánave purū́ṇī́ndro dāśad dāśúṣe hánti vr̥trám |
2.019.04c sadyó yó nŕ̥bhyo atasā́yyo bhū́t paspr̥dhānébhyaḥ sū́ryasya sātaú ||

2.019.05a sá sunvatá índraḥ sū́ryam ā́ devó riṇaṅ mártyāya stavā́n |
2.019.05c ā́ yád rayíṁ guhádavadyam asmai bhárad áṁśaṁ naítaśo daśasyán ||

2.019.06a sá randhayat sadívaḥ sā́rathaye śúṣṇam aśúṣaṁ kúyavaṁ kútsāya |
2.019.06c dívodāsāya navatíṁ ca návéndraḥ púro vy aìrac chámbarasya ||

2.019.07a evā́ ta indrocátham ahema śravasyā́ ná tmánā vājáyantaḥ |
2.019.07c aśyā́ma tát sā́ptam āśuṣāṇā́ nanámo vádhar ádevasya pīyóḥ ||

2.019.08a evā́ te gr̥tsamadā́ḥ śūra mánmāvasyávo ná vayúnāni takṣuḥ |
2.019.08c brahmaṇyánta indra te návīya íṣam ū́rjaṁ sukṣitíṁ sumnám aśyuḥ ||

2.019.09a nūnáṁ sā́ te práti váraṁ jaritré duhīyád indra dákṣiṇā maghónī |
2.019.09c śíkṣā stotŕ̥bhyo mā́ti dhag bhágo no br̥hád vadema vidáthe suvī́rāḥ ||

2.020.01a vayáṁ te váya indra viddhí ṣú ṇaḥ prá bharāmahe vājayúr ná rátham |
2.020.01c vipanyávo dī́dhyato manīṣā́ sumnám íyakṣantas tvā́vato nr̥̄́n ||

2.020.02a tváṁ na indra tvā́bhir ūtī́ tvāyató abhiṣṭipā́si jánān |
2.020.02c tvám inó dāśúṣo varūtétthā́dhīr abhí yó nákṣati tvā ||

2.020.03a sá no yúvéndro johū́traḥ sákhā śivó narā́m astu pātā́ |
2.020.03c yáḥ śáṁsantaṁ yáḥ śaśamānám ūtī́ pácantaṁ ca stuvántaṁ ca praṇéṣat ||

2.020.04a tám u stuṣa índraṁ táṁ gr̥ṇīṣe yásmin purā́ vāvr̥dhúḥ śāśadúś ca |
2.020.04c sá vásvaḥ kā́mam pīparad iyānó brahmaṇyató nū́tanasyāyóḥ ||

2.020.05a só áṅgirasām ucáthā jujuṣvā́n bráhmā tūtod índro gātúm iṣṇán |
2.020.05c muṣṇánn uṣásaḥ sū́ryeṇa stavā́n áśnasya cic chiśnathat pūrvyā́ṇi ||

2.020.06a sá ha śrutá índro nā́ma devá ūrdhvó bhuvan mánuṣe dasmátamaḥ |
2.020.06c áva priyám arśasānásya sāhvā́ñ chíro bharad dāsásya svadhā́vān ||

2.020.07a sá vr̥trahéndraḥ kr̥ṣṇáyonīḥ puraṁdaró dā́sīr airayad ví |
2.020.07c ájanayan mánave kṣā́m apáś ca satrā́ śáṁsaṁ yájamānasya tūtot ||

2.020.08a tásmai tavasyàm ánu dāyi satréndrāya devébhir árṇasātau |
2.020.08c práti yád asya vájram bāhvór dhúr hatvī́ dásyūn púra ā́yasīr ní tārīt ||

2.020.09a nūnáṁ sā́ te práti váraṁ jaritré duhīyád indra dákṣiṇā maghónī |
2.020.09c śíkṣā stotŕ̥bhyo mā́ti dhag bhágo no br̥hád vadema vidáthe suvī́rāḥ ||

2.021.01a viśvajíte dhanajíte svarjíte satrājíte nr̥jíta urvarājíte |
2.021.01c aśvajíte gojíte abjíte bharéndrāya sómaṁ yajatā́ya haryatám ||

2.021.02a abhibhúve 'bhibhaṅgā́ya vanvaté 'ṣāḷhāya sáhamānāya vedháse |
2.021.02c tuvigráye váhnaye duṣṭárītave satrāsā́he náma índrāya vocata ||

2.021.03a satrāsāhó janabhakṣó janaṁsaháś cyávano yudhmó ánu jóṣam ukṣitáḥ |
2.021.03c vr̥taṁcayáḥ sáhurir vikṣv ā̀ritá índrasya vocam prá kr̥tā́ni vīryā̀ ||

2.021.04a anānudó vr̥ṣabhó dódhato vadhó gambhīrá r̥ṣvó ásamaṣṭakāvyaḥ |
2.021.04c radhracodáḥ śnáthano vīḷitás pr̥thúr índraḥ suyajñá uṣásaḥ svàr janat ||

2.021.05a yajñéna gātúm aptúro vividrire dhíyo hinvānā́ uśíjo manīṣíṇaḥ |
2.021.05c abhisvárā niṣádā gā́ avasyáva índre hinvānā́ dráviṇāny āśata ||

2.021.06a índra śréṣṭhāni dráviṇāni dhehi cíttiṁ dákṣasya subhagatvám asmé |
2.021.06c póṣaṁ rayīṇā́m áriṣṭiṁ tanū́nāṁ svādmā́naṁ vācáḥ sudinatvám áhnām ||

2.022.01a tríkadrukeṣu mahiṣó yávāśiraṁ tuviśúṣmas tr̥pát sómam apibad víṣṇunā sutáṁ yáthā́vaśat |
2.022.01e sá īm mamāda máhi kárma kártave mahā́m urúṁ saínaṁ saścad devó deváṁ satyám índraṁ satyá índuḥ ||

2.022.02a ádha tvíṣīmām̐ abhy ójasā kríviṁ yudhā́bhavad ā́ ródasī apr̥ṇad asya majmánā prá vāvr̥dhe |
2.022.02e ádhattānyáṁ jaṭháre prém aricyata saínaṁ saścad devó deváṁ satyám índraṁ satyá índuḥ ||

2.022.03a sākáṁ jātáḥ krátunā sākám ójasā vavakṣitha sākáṁ vr̥ddhó vīryaìḥ sāsahír mŕ̥dho vícarṣaṇiḥ |
2.022.03e dā́tā rā́dhaḥ stuvaté kā́myaṁ vásu saínaṁ saścad devó deváṁ satyám índraṁ satyá índuḥ ||

2.022.04a táva tyán náryaṁ nr̥tó 'pa indra prathamám pūrvyáṁ diví pravā́cyaṁ kr̥tám |
2.022.04c yád devásya śávasā prā́riṇā ásuṁ riṇánn apáḥ |
2.022.04e bhúvad víśvam abhy ā́devam ójasā vidā́d ū́rjaṁ śatákratur vidā́d íṣam ||

2.023.01a gaṇā́nāṁ tvā gaṇápatiṁ havāmahe kavíṁ kavīnā́m upamáśravastamam |
2.023.01c jyeṣṭharā́jam bráhmaṇām brahmaṇas pata ā́ naḥ śr̥ṇvánn ūtíbhiḥ sīda sā́danam ||

2.023.02a devā́ś cit te asurya prácetaso bŕ̥haspate yajñíyam bhāgám ānaśuḥ |
2.023.02c usrā́ iva sū́ryo jyótiṣā mahó víśveṣām íj janitā́ bráhmaṇām asi ||

2.023.03a ā́ vibā́dhyā parirā́pas támāṁsi ca jyótiṣmantaṁ rátham r̥tásya tiṣṭhasi |
2.023.03c bŕ̥haspate bhīmám amitradámbhanaṁ rakṣoháṇaṁ gotrabhídaṁ svarvídam ||

2.023.04a sunītíbhir nayasi trā́yase jánaṁ yás túbhyaṁ dā́śān ná tám áṁho aśnavat |
2.023.04c brahmadvíṣas tápano manyumī́r asi bŕ̥haspate máhi tát te mahitvanám ||

2.023.05a ná tám áṁho ná duritáṁ kútaś caná nā́rātayas titirur ná dvayāvínaḥ |
2.023.05c víśvā íd asmād dhvaráso ví bādhase yáṁ sugopā́ rákṣasi brahmaṇas pate ||

2.023.06a tváṁ no gopā́ḥ pathikŕ̥d vicakṣaṇás táva vratā́ya matíbhir jarāmahe |
2.023.06c bŕ̥haspate yó no abhí hváro dadhé svā́ tám marmartu ducchúnā hárasvatī ||

2.023.07a utá vā yó no marcáyād ánāgaso 'rātīvā́ mártaḥ sānukó vŕ̥kaḥ |
2.023.07c bŕ̥haspate ápa táṁ vartayā patháḥ sugáṁ no asyaí devávītaye kr̥dhi ||

2.023.08a trātā́raṁ tvā tanū́nāṁ havāmahé 'vaspartar adhivaktā́ram asmayúm |
2.023.08c bŕ̥haspate devanído ní barhaya mā́ durévā úttaraṁ sumnám ún naśan ||

2.023.09a tváyā vayáṁ suvŕ̥dhā brahmaṇas pate spārhā́ vásu manuṣyā́ dadīmahi |
2.023.09c yā́ no dūré taḷíto yā́ árātayo 'bhí sánti jambháyā tā́ anapnásaḥ ||

2.023.10a tváyā vayám uttamáṁ dhīmahe váyo bŕ̥haspate pápriṇā sásninā yujā́ |
2.023.10c mā́ no duḥśáṁso abhidipsúr īśata prá suśáṁsā matíbhis tāriṣīmahi ||

2.023.11a anānudó vr̥ṣabhó jágmir āhaváṁ níṣṭaptā śátrum pŕ̥tanāsu sāsahíḥ |
2.023.11c ási satyá r̥ṇayā́ brahmaṇas pata ugrásya cid damitā́ vīḷuharṣíṇaḥ ||

2.023.12a ádevena mánasā yó riṣaṇyáti śāsā́m ugró mányamāno jíghāṁsati |
2.023.12c bŕ̥haspate mā́ práṇak tásya no vadhó ní karma manyúṁ durévasya śárdhataḥ ||

2.023.13a bháreṣu hávyo námasopasádyo gántā vā́jeṣu sánitā dhánaṁ-dhanam |
2.023.13c víśvā íd aryó abhidipsvò mŕ̥dho bŕ̥haspátir ví vavarhā ráthām̐ iva ||

2.023.14a téjiṣṭhayā tapanī́ rakṣásas tapa yé tvā nidé dadhiré dr̥ṣṭávīryam |
2.023.14c āvís tát kr̥ṣva yád ásat ta ukthyàm bŕ̥haspate ví parirā́po ardaya ||

2.023.15a bŕ̥haspate áti yád aryó árhād dyumád vibhā́ti krátumaj jáneṣu |
2.023.15c yád dīdáyac chávasa r̥taprajāta tád asmā́su dráviṇaṁ dhehi citrám ||

2.023.16a mā́ naḥ stenébhyo yé abhí druhás padé nirāmíṇo ripávó 'nneṣu jāgr̥dhúḥ |
2.023.16c ā́ devā́nām óhate ví vráyo hr̥dí bŕ̥haspate ná paráḥ sā́mno viduḥ ||

2.023.17a víśvebhyo hí tvā bhúvanebhyas pári tváṣṭā́janat sā́mnaḥ-sāmnaḥ kavíḥ |
2.023.17c sá r̥ṇacíd r̥ṇayā́ bráhmaṇas pátir druhó hantā́ mahá r̥tásya dhartári ||

2.023.18a táva śriyé vy àjihīta párvato gávāṁ gotrám udásr̥jo yád aṅgiraḥ |
2.023.18c índreṇa yujā́ támasā párīvr̥tam bŕ̥haspate nír apā́m aubjo arṇavám ||

2.023.19a bráhmaṇas pate tvám asyá yantā́ sūktásya bodhi tánayaṁ ca jinva |
2.023.19c víśvaṁ tád bhadráṁ yád ávanti devā́ br̥hád vadema vidáthe suvī́rāḥ ||

2.024.01a sémā́m aviḍḍhi prábhr̥tiṁ yá ī́śiṣe 'yā́ vidhema návayā mahā́ girā́ |
2.024.01c yáthā no mīḍhvā́n stávate sákhā táva bŕ̥haspate sī́ṣadhaḥ sótá no matím ||

2.024.02a yó nántvāny ánaman ny ójasotā́dardar manyúnā śámbarāṇi ví |
2.024.02c prā́cyāvayad ácyutā bráhmaṇas pátir ā́ cā́viśad vásumantaṁ ví párvatam ||

2.024.03a tád devā́nāṁ devátamāya kártvam áśrathnan dr̥ḷhā́vradanta vīḷitā́ |
2.024.03c úd gā́ ājad ábhinad bráhmaṇā valám ágūhat támo vy àcakṣayat svàḥ ||

2.024.04a áśmāsyam avatám bráhmaṇas pátir mádhudhāram abhí yám ójasā́tr̥ṇat |
2.024.04c tám evá víśve papire svardŕ̥śo bahú sākáṁ sisicur útsam udríṇam ||

2.024.05a sánā tā́ kā́ cid bhúvanā bhávītvā mādbhíḥ śarádbhir dúro varanta vaḥ |
2.024.05c áyatantā carato anyád-anyad íd yā́ cakā́ra vayúnā bráhmaṇas pátiḥ ||

2.024.06a abhinákṣanto abhí yé tám ānaśúr nidhím paṇīnā́m paramáṁ gúhā hitám |
2.024.06c té vidvā́ṁsaḥ praticákṣyā́nr̥tā púnar yáta u ā́yan tád úd īyur āvíśam ||

2.024.07a r̥tā́vānaḥ praticákṣyā́nr̥tā púnar ā́ta ā́ tasthuḥ kaváyo mahás patháḥ |
2.024.07c té bāhúbhyāṁ dhamitám agním áśmani nákiḥ ṣó asty áraṇo jahúr hí tám ||

2.024.08a r̥tájyena kṣipréṇa bráhmaṇas pátir yátra váṣṭi prá tád aśnoti dhánvanā |
2.024.08c tásya sādhvī́r íṣavo yā́bhir ásyati nr̥cákṣaso dr̥śáye kárṇayonayaḥ ||

2.024.09a sá saṁnayáḥ sá vinayáḥ puróhitaḥ sá súṣṭutaḥ sá yudhí bráhmaṇas pátiḥ |
2.024.09c cākṣmó yád vā́jam bhárate matī́ dhánā́d ít sū́ryas tapati tapyatúr vŕ̥thā ||

2.024.10a vibhú prabhú prathamám mehánāvato bŕ̥haspáteḥ suvidátrāṇi rā́dhyā |
2.024.10c imā́ sātā́ni venyásya vājíno yéna jánā ubháye bhuñjaté víśaḥ ||

2.024.11a yó 'vare vr̥jáne viśváthā vibhúr mahā́m u raṇváḥ śávasā vavákṣitha |
2.024.11c sá devó devā́n práti paprathe pr̥thú víśvéd u tā́ paribhū́r bráhmaṇas pátiḥ ||

2.024.12a víśvaṁ satyám maghavānā yuvór íd ā́paś caná prá minanti vratáṁ vām |
2.024.12c ácchendrābrahmaṇaspatī havír nó 'nnaṁ yújeva vājínā jigātam ||

2.024.13a utā́śiṣṭhā ánu śr̥ṇvanti váhnayaḥ sabhéyo vípro bharate matī́ dhánā |
2.024.13c vīḷudvéṣā ánu váśa r̥ṇám ādadíḥ sá ha vājī́ samithé bráhmaṇas pátiḥ ||

2.024.14a bráhmaṇas páter abhavad yathāvaśáṁ satyó manyúr máhi kármā kariṣyatáḥ |
2.024.14c yó gā́ udā́jat sá divé ví cābhajan mahī́va rītíḥ śávasāsarat pŕ̥thak ||

2.024.15a bráhmaṇas pate suyámasya viśváhā rāyáḥ syāma rathyò váyasvataḥ |
2.024.15c vīréṣu vīrā́m̐ úpa pr̥ṅdhi nas tváṁ yád ī́śāno bráhmaṇā véṣi me hávam ||

2.024.16a bráhmaṇas pate tvám asyá yantā́ sūktásya bodhi tánayaṁ ca jinva |
2.024.16c víśvaṁ tád bhadráṁ yád ávanti devā́ br̥hád vadema vidáthe suvī́rāḥ ||

2.025.01a índhāno agníṁ vanavad vanuṣyatáḥ kr̥tábrahmā śūśuvad rātáhavya ít |
2.025.01c jāténa jātám áti sá prá sarsr̥te yáṁ-yaṁ yújaṁ kr̥ṇuté bráhmaṇas pátiḥ ||

2.025.02a vīrébhir vīrā́n vanavad vanuṣyató góbhī rayím paprathad bódhati tmánā |
2.025.02c tokáṁ ca tásya tánayaṁ ca vardhate yáṁ-yaṁ yújaṁ kr̥ṇuté bráhmaṇas pátiḥ ||

2.025.03a síndhur ná kṣódaḥ śímīvām̐ r̥ghāyató vŕ̥ṣeva vádhrīm̐r abhí vaṣṭy ójasā |
2.025.03c agnér iva prásitir nā́ha vártave yáṁ-yaṁ yújaṁ kr̥ṇuté bráhmaṇas pátiḥ ||

2.025.04a tásmā arṣanti divyā́ asaścátaḥ sá sátvabhiḥ prathamó góṣu gacchati |
2.025.04c ánibhr̥ṣṭataviṣir hanty ójasā yáṁ-yaṁ yújaṁ kr̥ṇuté bráhmaṇas pátiḥ ||

2.025.05a tásmā íd víśve dhunayanta síndhavó 'cchidrā śárma dadhire purū́ṇi |
2.025.05c devā́nāṁ sumné subhágaḥ sá edhate yáṁ-yaṁ yújaṁ kr̥ṇuté bráhmaṇas pátiḥ ||

2.026.01a r̥júr íc cháṁso vanavad vanuṣyató devayánn íd ádevayantam abhy àsat |
2.026.01c suprāvī́r íd vanavat pr̥tsú duṣṭáraṁ yájvéd áyajyor ví bhajāti bhójanam ||

2.026.02a yájasva vīra prá vihi manāyató bhadrám mánaḥ kr̥ṇuṣva vr̥tratū́rye |
2.026.02c havíṣ kr̥ṇuṣva subhágo yáthā́sasi bráhmaṇas páter áva ā́ vr̥ṇīmahe ||

2.026.03a sá íj jánena sá viśā́ sá jánmanā sá putraír vā́jam bharate dhánā nŕ̥bhiḥ |
2.026.03c devā́nāṁ yáḥ pitáram āvívāsati śraddhā́manā havíṣā bráhmaṇas pátim ||

2.026.04a yó asmai havyaír ghr̥távadbhir ávidhat prá tám prācā́ nayati bráhmaṇas pátiḥ |
2.026.04c uruṣyátīm áṁhaso rákṣatī riṣò 'ṁhóś cid asmā urucákrir ádbhutaḥ ||

2.027.01a imā́ gíra ādityébhyo ghr̥tásnūḥ sanā́d rā́jabhyo juhvā̀ juhomi |
2.027.01c śr̥ṇótu mitró aryamā́ bhágo nas tuvijātó váruṇo dákṣo áṁśaḥ ||

2.027.02a imáṁ stómaṁ sákratavo me adyá mitró aryamā́ váruṇo juṣanta |
2.027.02c ādityā́saḥ śúcayo dhā́rapūtā ávr̥jinā anavadyā́ áriṣṭāḥ ||

2.027.03a tá ādityā́sa urávo gabhīrā́ ádabdhāso dípsanto bhūryakṣā́ḥ |
2.027.03c antáḥ paśyanti vr̥jinótá sādhú sárvaṁ rā́jabhyaḥ paramā́ cid ánti ||

2.027.04a dhāráyanta ādityā́so jágat sthā́ devā́ víśvasya bhúvanasya gopā́ḥ |
2.027.04c dīrghā́dhiyo rákṣamāṇā asuryàm r̥tā́vānaś cáyamānā r̥ṇā́ni ||

2.027.05a vidyā́m ādityā ávaso vo asyá yád aryaman bhayá ā́ cin mayobhú |
2.027.05c yuṣmā́kam mitrāvaruṇā práṇītau pári śvábhreva duritā́ni vr̥jyām ||

2.027.06a sugó hí vo aryaman mitra pánthā anr̥kṣaró varuṇa sādhúr ásti |
2.027.06c ténādityā ádhi vocatā no yácchatā no duṣparihántu śárma ||

2.027.07a pípartu no áditī rā́japutrā́ti dvéṣāṁsy aryamā́ sugébhiḥ |
2.027.07c br̥hán mitrásya váruṇasya śármópa syāma puruvī́rā áriṣṭāḥ ||

2.027.08a tisró bhū́mīr dhārayan trī́m̐r utá dyū́n trī́ṇi vratā́ vidáthe antár eṣām |
2.027.08c r̥ténādityā máhi vo mahitváṁ tád aryaman varuṇa mitra cā́ru ||

2.027.09a trī́ rocanā́ divyā́ dhārayanta hiraṇyáyāḥ śúcayo dhā́rapūtāḥ |
2.027.09c ásvapnajo animiṣā́ ádabdhā uruśáṁsā r̥jáve mártyāya ||

2.027.10a tváṁ víśveṣāṁ varuṇāsi rā́jā yé ca devā́ asura yé ca mártāḥ |
2.027.10c śatáṁ no rāsva śarádo vicákṣe 'śyā́mā́yūṁṣi súdhitāni pū́rvā ||

2.027.11a ná dakṣiṇā́ ví cikite ná savyā́ ná prācī́nam ādityā nótá paścā́ |
2.027.11c pākyā̀ cid vasavo dhīryā̀ cid yuṣmā́nīto ábhayaṁ jyótir aśyām ||

2.027.12a yó rā́jabhya r̥taníbhyo dadā́śa yáṁ vardháyanti puṣṭáyaś ca nítyāḥ |
2.027.12c sá revā́n yāti prathamó ráthena vasudā́vā vidátheṣu praśastáḥ ||

2.027.13a śúcir apáḥ sūyávasā ádabdha úpa kṣeti vr̥ddhávayāḥ suvī́raḥ |
2.027.13c nákiṣ ṭáṁ ghnanty ántito ná dūrā́d yá ādityā́nām bhávati práṇītau ||

2.027.14a ádite mítra váruṇotá mr̥ḷa yád vo vayáṁ cakr̥mā́ kác cid ā́gaḥ |
2.027.14c urv àśyām ábhayaṁ jyótir indra mā́ no dīrghā́ abhí naśan támisrāḥ ||

2.027.15a ubhé asmai pīpayataḥ samīcī́ divó vr̥ṣṭíṁ subhágo nā́ma púṣyan |
2.027.15c ubhā́ kṣáyāv ājáyan yāti pr̥tsū́bhā́v árdhau bhavataḥ sādhū́ asmai ||

2.027.16a yā́ vo māyā́ abhidrúhe yajatrāḥ pā́śā ādityā ripáve vícr̥ttāḥ |
2.027.16c aśvī́va tā́m̐ áti yeṣaṁ ráthenā́riṣṭā urā́v ā́ śárman syāma ||

2.027.17a mā́hám maghóno varuṇa priyásya bhūridā́vna ā́ vidaṁ śū́nam āpéḥ |
2.027.17c mā́ rāyó rājan suyámād áva sthām br̥hád vadema vidáthe suvī́rāḥ ||

2.028.01a idáṁ kavér ādityásya svarā́jo víśvāni sā́nty abhy àstu mahnā́ |
2.028.01c áti yó mandró yajáthāya deváḥ sukīrtím bhikṣe váruṇasya bhū́reḥ ||

2.028.02a táva vraté subhágāsaḥ syāma svādhyò varuṇa tuṣṭuvā́ṁsaḥ |
2.028.02c upā́yana uṣásāṁ gómatīnām agnáyo ná járamāṇā ánu dyū́n ||

2.028.03a táva syāma puruvī́rasya śármann uruśáṁsasya varuṇa praṇetaḥ |
2.028.03c yūyáṁ naḥ putrā aditer adabdhā abhí kṣamadhvaṁ yújyāya devāḥ ||

2.028.04a prá sīm ādityó asr̥jad vidhartā́m̐ r̥táṁ síndhavo váruṇasya yanti |
2.028.04c ná śrāmyanti ná ví mucanty eté váyo ná paptū raghuyā́ párijman ||

2.028.05a ví mác chrathāya raśanā́m ivā́ga r̥dhyā́ma te varuṇa khā́m r̥tásya |
2.028.05c mā́ tántuś chedi váyato dhíyam me mā́ mā́trā śāry apásaḥ purá r̥tóḥ ||

2.028.06a ápo sú myakṣa varuṇa bhiyásam mát sámrāḷ ŕ̥tāvó 'nu mā gr̥bhāya |
2.028.06c dā́meva vatsā́d ví mumugdhy áṁho nahí tvád āré nimíṣaś canéśe ||

2.028.07a mā́ no vadhaír varuṇa yé ta iṣṭā́v énaḥ kr̥ṇvántam asura bhrīṇánti |
2.028.07c mā́ jyótiṣaḥ pravasathā́ni ganma ví ṣū́ mŕ̥dhaḥ śiśratho jīváse naḥ ||

2.028.08a námaḥ purā́ te varuṇotá nūnám utā́paráṁ tuvijāta bravāma |
2.028.08c tvé hí kam párvate ná śritā́ny ápracyutāni dūḷabha vratā́ni ||

2.028.09a pára r̥ṇā́ sāvīr ádha mátkr̥tāni mā́háṁ rājann anyákr̥tena bhojam |
2.028.09c ávyuṣṭā ín nú bhū́yasīr uṣā́sa ā́ no jīvā́n varuṇa tā́su śādhi ||

2.028.10a yó me rājan yújyo vā sákhā vā svápne bhayám bhīráve máhyam ā́ha |
2.028.10c stenó vā yó dípsati no vŕ̥ko vā tváṁ tásmād varuṇa pāhy asmā́n ||

2.028.11a mā́hám maghóno varuṇa priyásya bhūridā́vna ā́ vidaṁ śū́nam āpéḥ |
2.028.11c mā́ rāyó rājan suyámād áva sthām br̥hád vadema vidáthe suvī́rāḥ ||

2.029.01a dhŕ̥tavratā ā́dityā íṣirā āré mát karta rahasū́r ivā́gaḥ |
2.029.01c śr̥ṇvató vo váruṇa mítra dévā bhadrásya vidvā́m̐ ávase huve vaḥ ||

2.029.02a yūyáṁ devāḥ prámatir yūyám ójo yūyáṁ dvéṣāṁsi sanutár yuyota |
2.029.02c abhikṣattā́ro abhí ca kṣámadhvam adyā́ ca no mr̥ḷáyatāparáṁ ca ||

2.029.03a kím ū nú vaḥ kr̥ṇavāmā́pareṇa kíṁ sánena vasava ā́pyena |
2.029.03c yūyáṁ no mitrāvaruṇādite ca svastím indrāmaruto dadhāta ||

2.029.04a hayé devā yūyám íd āpáyaḥ stha té mr̥ḷata nā́dhamānāya máhyam |
2.029.04c mā́ vo rátho madhyamavā́ḷ r̥té bhūn mā́ yuṣmā́vatsv āpíṣu śramiṣma ||

2.029.05a prá va éko mimaya bhū́ry ā́go yán mā pitéva kitaváṁ śaśāsá |
2.029.05c āré pā́śā āré aghā́ni devā mā́ mā́dhi putré vím iva grabhīṣṭa ||

2.029.06a arvā́ñco adyā́ bhavatā yajatrā ā́ vo hā́rdi bháyamāno vyayeyam |
2.029.06c trā́dhvaṁ no devā nijúro vŕ̥kasya trā́dhvaṁ kartā́d avapádo yajatrāḥ ||

2.029.07a mā́hám maghóno varuṇa priyásya bhūridā́vna ā́ vidaṁ śū́nam āpéḥ |
2.029.07c mā́ rāyó rājan suyámād áva sthām br̥hád vadema vidáthe suvī́rāḥ ||

2.030.01a r̥táṁ devā́ya kr̥ṇvaté savitrá índrāyāhighné ná ramanta ā́paḥ |
2.030.01c áhar-ahar yāty aktúr apā́ṁ kíyāty ā́ prathamáḥ sárga āsām ||

2.030.02a yó vr̥trā́ya sínam átrā́bhariṣyat prá táṁ jánitrī vidúṣa uvāca |
2.030.02c pathó rádantīr ánu jóṣam asmai divé-dive dhúnayo yanty ártham ||

2.030.03a ūrdhvó hy ásthād ádhy antárikṣé 'dhā vr̥trā́ya prá vadháṁ jabhāra |
2.030.03c míhaṁ vásāna úpa hī́m ádudrot tigmā́yudho ajayac chátrum índraḥ ||

2.030.04a bŕ̥haspate tápuṣā́śneva vidhya vŕ̥kadvaraso ásurasya vīrā́n |
2.030.04c yáthā jaghántha dhr̥ṣatā́ purā́ cid evā́ jahi śátrum asmā́kam indra ||

2.030.05a áva kṣipa divó áśmānam uccā́ yéna śátrum mandasānó nijū́rvāḥ |
2.030.05c tokásya sātaú tánayasya bhū́rer asmā́m̐ ardháṁ kr̥ṇutād indra gónām ||

2.030.06a prá hí krátuṁ vr̥hátho yáṁ vanuthó radhrásya stho yájamānasya codaú |
2.030.06c índrāsomā yuvám asmā́m̐ aviṣṭam asmín bhayásthe kr̥ṇutam u lokám ||

2.030.07a ná mā taman ná śraman nótá tandran ná vocāma mā́ sunotéti sómam |
2.030.07c yó me pr̥ṇā́d yó dádad yó nibódhād yó mā sunvántam úpa góbhir ā́yat ||

2.030.08a sárasvati tvám asmā́m̐ aviḍḍhi marútvatī dhr̥ṣatī́ jeṣi śátrūn |
2.030.08c tyáṁ cic chárdhantaṁ taviṣīyámāṇam índro hanti vr̥ṣabháṁ śáṇḍikānām ||

2.030.09a yó naḥ sánutya utá vā jighatnúr abhikhyā́ya táṁ tigiténa vidhya |
2.030.09c bŕ̥haspata ā́yudhair jeṣi śátrūn druhé rī́ṣantam pári dhehi rājan ||

2.030.10a asmā́kebhiḥ sátvabhiḥ śūra śū́rair vīryā̀ kr̥dhi yā́ni te kártvāni |
2.030.10c jyóg abhūvann ánudhūpitāso hatvī́ téṣām ā́ bharā no vásūni ||

2.030.11a táṁ vaḥ śárdham mā́rutaṁ sumnayúr girópa bruve námasā daívyaṁ jánam |
2.030.11c yáthā rayíṁ sárvavīraṁ náśāmahā apatyasā́caṁ śrútyaṁ divé-dive ||

2.031.01a asmā́kam mitrāvaruṇāvataṁ rátham ādityaí rudraír vásubhiḥ sacābhúvā |
2.031.01c prá yád váyo ná páptan vásmanas pári śravasyávo hŕ̥ṣīvanto vanarṣádaḥ ||

2.031.02a ádha smā na úd avatā sajoṣaso ráthaṁ devāso abhí vikṣú vājayúm |
2.031.02c yád āśávaḥ pádyābhis títrato rájaḥ pr̥thivyā́ḥ sā́nau jáṅghananta pāṇíbhiḥ ||

2.031.03a utá syá na índro viśvácarṣaṇir diváḥ śárdhena mā́rutena sukrátuḥ |
2.031.03c ánu nú sthāty avr̥kā́bhir ūtíbhī rátham mahé sanáye vā́jasātaye ||

2.031.04a utá syá devó bhúvanasya sakṣáṇis tváṣṭā gnā́bhiḥ sajóṣā jūjuvad rátham |
2.031.04c íḷā bhágo br̥haddivótá ródasī pūṣā́ púraṁdhir aśvínāv ádhā pátī ||

2.031.05a utá tyé devī́ subháge mithūdŕ̥śoṣā́sānáktā jágatām apījúvā |
2.031.05c stuṣé yád vām pr̥thivi návyasā vácaḥ sthātúś ca váyas trívayā upastíre ||

2.031.06a utá vaḥ śáṁsam uśíjām iva śmasy áhir budhnyò 'já ékapād utá |
2.031.06c tritá r̥bhukṣā́ḥ savitā́ cáno dadhe 'pā́ṁ nápād āśuhémā dhiyā́ śámi ||

2.031.07a etā́ vo vaśmy údyatā yajatrā átakṣann āyávo návyase sám |
2.031.07c śravasyávo vā́jaṁ cakānā́ḥ sáptir ná ráthyo áha dhītím aśyāḥ ||

2.032.01a asyá me dyāvāpr̥thivī r̥tāyató bhūtám avitrī́ vácasaḥ síṣāsataḥ |
2.032.01c yáyor ā́yuḥ prataráṁ té idám purá úpastute vasūyúr vām mahó dadhe ||

2.032.02a mā́ no gúhyā rípa āyór áhan dabhan mā́ na ābhyó rīradho ducchúnābhyaḥ |
2.032.02c mā́ no ví yauḥ sakhyā́ viddhí tásya naḥ sumnāyatā́ mánasā tát tvemahe ||

2.032.03a áheḷatā mánasā śruṣṭím ā́ vaha dúhānāṁ dhenúm pipyúṣīm asaścátam |
2.032.03c pádyābhir āśúṁ vácasā ca vājínaṁ tvā́ṁ hinomi puruhūta viśváhā ||

2.032.04a rākā́m aháṁ suhávāṁ suṣṭutī́ huve śr̥ṇótu naḥ subhágā bódhatu tmánā |
2.032.04c sī́vyatv ápaḥ sūcyā́cchidyamānayā dádātu vīráṁ śatádāyam ukthyàm ||

2.032.05a yā́s te rāke sumatáyaḥ supéśaso yā́bhir dádāsi dāśúṣe vásūni |
2.032.05c tā́bhir no adyá sumánā upā́gahi sahasrapoṣáṁ subhage rárāṇā ||

2.032.06a sínīvāli pŕ̥thuṣṭuke yā́ devā́nām ási svásā |
2.032.06c juṣásva havyám ā́hutam prajā́ṁ devi didiḍḍhi naḥ ||

2.032.07a yā́ subāhúḥ svaṅguríḥ suṣū́mā bahusū́varī |
2.032.07c tásyai viśpátnyai havíḥ sinīvālyaí juhotana ||

2.032.08a yā́ guṅgū́r yā́ sinīvālī́ yā́ rākā́ yā́ sárasvatī |
2.032.08c indrāṇī́m ahva ūtáye varuṇānī́ṁ svastáye ||

2.033.01a ā́ te pitar marutāṁ sumnám etu mā́ naḥ sū́ryasya saṁdŕ̥śo yuyothāḥ |
2.033.01c abhí no vīró árvati kṣameta prá jāyemahi rudra prajā́bhiḥ ||

2.033.02a tvā́dattebhī rudra śáṁtamebhiḥ śatáṁ hímā aśīya bheṣajébhiḥ |
2.033.02c vy àsmád dvéṣo vitaráṁ vy áṁho vy ámīvāś cātayasvā víṣūcīḥ ||

2.033.03a śréṣṭho jātásya rudra śriyā́si tavástamas tavásāṁ vajrabāho |
2.033.03c párṣi ṇaḥ pārám áṁhasaḥ svastí víśvā abhī̀tī rápaso yuyodhi ||

2.033.04a mā́ tvā rudra cukrudhāmā námobhir mā́ dúṣṭutī vr̥ṣabha mā́ sáhūtī |
2.033.04c ún no vīrā́m̐ arpaya bheṣajébhir bhiṣáktamaṁ tvā bhiṣájāṁ śr̥ṇomi ||

2.033.05a hávīmabhir hávate yó havírbhir áva stómebhī rudráṁ diṣīya |
2.033.05c r̥dūdáraḥ suhávo mā́ no asyaí babhrúḥ suśípro rīradhan manā́yai ||

2.033.06a ún mā mamanda vr̥ṣabhó marútvān tvákṣīyasā váyasā nā́dhamānam |
2.033.06c ghŕ̥ṇīva cchāyā́m arapā́ aśīyā́ vivāseyaṁ rudrásya sumnám ||

2.033.07a kvà syá te rudra mr̥ḷayā́kur hásto yó ásti bheṣajó jálāṣaḥ |
2.033.07c apabhartā́ rápaso daívyasyābhī́ nú mā vr̥ṣabha cakṣamīthāḥ ||

2.033.08a prá babhráve vr̥ṣabhā́ya śvitīcé mahó mahī́ṁ suṣṭutím īrayāmi |
2.033.08c namasyā́ kalmalīkínaṁ námobhir gr̥ṇīmási tveṣáṁ rudrásya nā́ma ||

2.033.09a sthirébhir áṅgaiḥ pururū́pa ugró babhrúḥ śukrébhiḥ pipiśe híraṇyaiḥ |
2.033.09c ī́śānād asyá bhúvanasya bhū́rer ná vā́ u yoṣad rudrā́d asuryàm ||

2.033.10a árhan bibharṣi sā́yakāni dhánvā́rhan niṣkáṁ yajatáṁ viśvárūpam |
2.033.10c árhann idáṁ dayase víśvam ábhvaṁ ná vā́ ójīyo rudra tvád asti ||

2.033.11a stuhí śrutáṁ gartasádaṁ yúvānam mr̥gáṁ ná bhīmám upahatnúm ugrám |
2.033.11c mr̥ḷā́ jaritré rudra stávāno 'nyáṁ te asmán ní vapantu sénāḥ ||

2.033.12a kumāráś cit pitáraṁ vándamānam práti nānāma rudropayántam |
2.033.12c bhū́rer dātā́raṁ sátpatiṁ gr̥ṇīṣe stutás tvám bheṣajā́ rāsy asmé ||

2.033.13a yā́ vo bheṣajā́ marutaḥ śúcīni yā́ śáṁtamā vr̥ṣaṇo yā́ mayobhú |
2.033.13c yā́ni mánur ávr̥ṇītā pitā́ nas tā́ śáṁ ca yóś ca rudrásya vaśmi ||

2.033.14a pári ṇo hetī́ rudrásya vr̥jyāḥ pári tveṣásya durmatír mahī́ gāt |
2.033.14c áva sthirā́ maghávadbhyas tanuṣva mī́ḍhvas tokā́ya tánayāya mr̥ḷa ||

2.033.15a evā́ babhro vr̥ṣabha cekitāna yáthā deva ná hr̥ṇīṣé ná háṁsi |
2.033.15c havanaśrún no rudrehá bodhi br̥hád vadema vidáthe suvī́rāḥ ||

2.034.01a dhārāvarā́ marúto dhr̥ṣṇvòjaso mr̥gā́ ná bhīmā́s táviṣībhir arcínaḥ |
2.034.01c agnáyo ná śuśucānā́ r̥jīṣíṇo bhŕ̥miṁ dhámanto ápa gā́ avr̥ṇvata ||

2.034.02a dyā́vo ná stŕ̥bhiś citayanta khādíno vy àbhríyā ná dyutayanta vr̥ṣṭáyaḥ |
2.034.02c rudró yád vo maruto rukmavakṣaso vŕ̥ṣā́jani pŕ̥śnyāḥ śukrá ū́dhani ||

2.034.03a ukṣánte áśvām̐ átyām̐ ivājíṣu nadásya kárṇais turayanta āśúbhiḥ |
2.034.03c híraṇyaśiprā maruto dávidhvataḥ pr̥kṣáṁ yātha pŕ̥ṣatībhiḥ samanyavaḥ ||

2.034.04a pr̥kṣé tā́ víśvā bhúvanā vavakṣire mitrā́ya vā sádam ā́ jīrádānavaḥ |
2.034.04c pŕ̥ṣadaśvāso anavabhrárādhasa r̥jipyā́so ná vayúneṣu dhūrṣádaḥ ||

2.034.05a índhanvabhir dhenúbhī rapśádūdhabhir adhvasmábhiḥ pathíbhir bhrājadr̥ṣṭayaḥ |
2.034.05c ā́ haṁsā́so ná svásarāṇi gantana mádhor mádāya marutaḥ samanyavaḥ ||

2.034.06a ā́ no bráhmāṇi marutaḥ samanyavo narā́ṁ ná śáṁsaḥ sávanāni gantana |
2.034.06c áśvām iva pipyata dhenúm ū́dhani kártā dhíyaṁ jaritré vā́japeśasam ||

2.034.07a táṁ no dāta maruto vājínaṁ rátha āpānám bráhma citáyad divé-dive |
2.034.07c íṣaṁ stotŕ̥bhyo vr̥jáneṣu kāráve saním medhā́m áriṣṭaṁ duṣṭáraṁ sáhaḥ ||

2.034.08a yád yuñjáte marúto rukmávakṣasó 'śvān rátheṣu bhága ā́ sudā́navaḥ |
2.034.08c dhenúr ná śíśve svásareṣu pinvate jánāya rātáhaviṣe mahī́m íṣam ||

2.034.09a yó no maruto vr̥kátāti mártyo ripúr dadhé vasavo rákṣatā riṣáḥ |
2.034.09c vartáyata tápuṣā cakríyābhí tám áva rudrā aśáso hantanā vádhaḥ ||

2.034.10a citráṁ tád vo maruto yā́ma cekite pŕ̥śnyā yád ū́dhar ápy āpáyo duhúḥ |
2.034.10c yád vā nidé návamānasya rudriyās tritáṁ járāya juratā́m adābhyāḥ ||

2.034.11a tā́n vo mahó marúta evayā́vno víṣṇor eṣásya prabhr̥thé havāmahe |
2.034.11c híraṇyavarṇān kakuhā́n yatásruco brahmaṇyántaḥ śáṁsyaṁ rā́dha īmahe ||

2.034.12a té dáśagvāḥ prathamā́ yajñám ūhire té no hinvantūṣáso vyùṣṭiṣu |
2.034.12c uṣā́ ná rāmī́r aruṇaír áporṇute mahó jyótiṣā śucatā́ góarṇasā ||

2.034.13a té kṣoṇī́bhir aruṇébhir nā́ñjíbhī rudrā́ r̥tásya sádaneṣu vāvr̥dhuḥ |
2.034.13c niméghamānā átyena pā́jasā suścandráṁ várṇaṁ dadhire supéśasam ||

2.034.14a tā́m̐ iyānó máhi várūtham ūtáya úpa ghéd enā́ námasā gr̥ṇīmasi |
2.034.14c tritó ná yā́n páñca hótr̥̄n abhíṣṭaya āvavártad ávarāñ cakríyā́vase ||

2.034.15a yáyā radhrám pāráyathā́ty áṁho yáyā nidó muñcátha vanditā́ram |
2.034.15c arvā́cī sā́ maruto yā́ va ūtír ó ṣú vāśréva sumatír jigātu ||

2.035.01a úpem asr̥kṣi vājayúr vacasyā́ṁ cáno dadhīta nādyó gíro me |
2.035.01c apā́ṁ nápād āśuhémā kuvít sá supéśasas karati jóṣiṣad dhí ||

2.035.02a imáṁ sv àsmai hr̥dá ā́ sútaṣṭam mántraṁ vocema kuvíd asya védat |
2.035.02c apā́ṁ nápād asuryàsya mahnā́ víśvāny aryó bhúvanā jajāna ||

2.035.03a sám anyā́ yánty úpa yanty anyā́ḥ samānám ūrváṁ nadyàḥ pr̥ṇanti |
2.035.03c tám ū śúciṁ śúcayo dīdivā́ṁsam apā́ṁ nápātam pári tasthur ā́paḥ ||

2.035.04a tám ásmerā yuvatáyo yúvānam marmr̥jyámānāḥ pári yanty ā́paḥ |
2.035.04c sá śukrébhiḥ śíkvabhī revád asmé dīdā́yānidhmó ghr̥tánirṇig apsú ||

2.035.05a asmaí tisró avyathyā́ya nā́rīr devā́ya devī́r didhiṣanty ánnam |
2.035.05c kŕ̥tā ivópa hí prasarsré apsú sá pīyū́ṣaṁ dhayati pūrvasū́nām ||

2.035.06a áśvasyā́tra jánimāsyá ca svàr druhó riṣáḥ sampŕ̥caḥ pāhi sūrī́n |
2.035.06c āmā́su pūrṣú paró apramr̥ṣyáṁ nā́rātayo ví naśan nā́nr̥tāni ||

2.035.07a svá ā́ dáme sudúghā yásya dhenúḥ svadhā́m pīpāya subhv ánnam atti |
2.035.07c só apā́ṁ nápād ūrjáyann apsv àntár vasudéyāya vidhaté ví bhāti ||

2.035.08a yó apsv ā́ śúcinā daívyena r̥tā́vā́jasra urviyā́ vibhā́ti |
2.035.08c vayā́ íd anyā́ bhúvanāny asya prá jāyante vīrúdhaś ca prajā́bhiḥ ||

2.035.09a apā́ṁ nápād ā́ hy ásthād upásthaṁ jihmā́nām ūrdhvó vidyútaṁ vásānaḥ |
2.035.09c tásya jyéṣṭham mahimā́naṁ váhantīr híraṇyavarṇāḥ pári yanti yahvī́ḥ ||

2.035.10a híraṇyarūpaḥ sá híraṇyasaṁdr̥g apā́ṁ nápāt séd u híraṇyavarṇaḥ |
2.035.10c hiraṇyáyāt pári yóner niṣádyā hiraṇyadā́ dadaty ánnam asmai ||

2.035.11a tád asyā́nīkam utá cā́ru nā́māpīcyàṁ vardhate náptur apā́m |
2.035.11c yám indháte yuvatáyaḥ sám itthā́ híraṇyavarṇaṁ ghr̥tám ánnam asya ||

2.035.12a asmaí bahūnā́m avamā́ya sákhye yajñaír vidhema námasā havírbhiḥ |
2.035.12c sáṁ sā́nu mā́rjmi dídhiṣāmi bílmair dádhāmy ánnaiḥ pári vanda r̥gbhíḥ ||

2.035.13a sá īṁ vŕ̥ṣājanayat tā́su gárbhaṁ sá īṁ śíśur dhayati táṁ rihanti |
2.035.13c só apā́ṁ nápād ánabhimlātavarṇo 'nyásyevehá tanvā̀ viveṣa ||

2.035.14a asmín padé paramé tasthivā́ṁsam adhvasmábhir viśváhā dīdivā́ṁsam |
2.035.14c ā́po náptre ghr̥tám ánnaṁ váhantīḥ svayám átkaiḥ pári dīyanti yahvī́ḥ ||

2.035.15a áyāṁsam agne sukṣitíṁ jánāyā́yāṁsam u maghávadbhyaḥ suvr̥ktím |
2.035.15c víśvaṁ tád bhadráṁ yád ávanti devā́ br̥hád vadema vidáthe suvī́rāḥ ||

2.036.01a túbhyaṁ hinvānó vasiṣṭa gā́ apó 'dhukṣan sīm ávibhir ádribhir náraḥ |
2.036.01c píbendra svā́hā práhutaṁ váṣaṭkr̥taṁ hotrā́d ā́ sómam prathamó yá ī́śiṣe ||

2.036.02a yajñaíḥ sámmiślāḥ pŕ̥ṣatībhir r̥ṣṭíbhir yā́mañ chubhrā́so añjíṣu priyā́ utá |
2.036.02c āsádyā barhír bharatasya sūnavaḥ potrā́d ā́ sómam pibatā divo naraḥ ||

2.036.03a améva naḥ suhavā ā́ hí gántana ní barhíṣi sadatanā ráṇiṣṭana |
2.036.03c áthā mandasva jujuṣāṇó ándhasas tváṣṭar devébhir jánibhiḥ sumádgaṇaḥ ||

2.036.04a ā́ vakṣi devā́m̐ ihá vipra yákṣi cośán hotar ní ṣadā yóniṣu triṣú |
2.036.04c práti vīhi prásthitaṁ somyám mádhu píbā́gnīdhrāt táva bhāgásya tr̥pṇuhi ||

2.036.05a eṣá syá te tanvò nr̥mṇavárdhanaḥ sáha ójaḥ pradívi bāhvór hitáḥ |
2.036.05c túbhyaṁ sutó maghavan túbhyam ā́bhr̥tas tvám asya brā́hmaṇād ā́ tr̥pát piba ||

2.036.06a juṣéthāṁ yajñám bódhataṁ hávasya me sattó hótā nivídaḥ pūrvyā́ ánu |
2.036.06c ácchā rā́jānā náma ety āvŕ̥tam praśāstrā́d ā́ pibataṁ somyám mádhu ||

2.037.01a mándasva hotrā́d ánu jóṣam ándhasó 'dhvaryavaḥ sá pūrṇā́ṁ vaṣṭy āsícam |
2.037.01c tásmā etám bharata tadvaśó dadír hotrā́t sómaṁ draviṇodaḥ píba r̥túbhiḥ ||

2.037.02a yám u pū́rvam áhuve tám idáṁ huve séd u hávyo dadír yó nā́ma pátyate |
2.037.02c adhvaryúbhiḥ prásthitaṁ somyám mádhu potrā́t sómaṁ draviṇodaḥ píba r̥túbhiḥ ||

2.037.03a médyantu te váhnayo yébhir ī́yasé 'riṣaṇyan vīḷayasvā vanaspate |
2.037.03c āyū́yā dhr̥ṣṇo abhigū́ryā tváṁ neṣṭrā́t sómaṁ draviṇodaḥ píba r̥túbhiḥ ||

2.037.04a ápād dhotrā́d utá potrā́d amattotá neṣṭrā́d ajuṣata práyo hitám |
2.037.04c turī́yam pā́tram ámr̥ktam ámartyaṁ draviṇodā́ḥ pibatu drāviṇodasáḥ ||

2.037.05a arvā́ñcam adyá yayyàṁ nr̥vā́haṇaṁ ráthaṁ yuñjāthām ihá vāṁ vimócanam |
2.037.05c pr̥ṅktáṁ havī́ṁṣi mádhunā́ hí kaṁ gatám áthā sómam pibataṁ vājinīvasū ||

2.037.06a jóṣy agne samídhaṁ jóṣy ā́hutiṁ jóṣi bráhma jányaṁ jóṣi suṣṭutím |
2.037.06c víśvebhir víśvām̐ r̥túnā vaso mahá uśán devā́m̐ uśatáḥ pāyayā havíḥ ||

2.038.01a úd u ṣyá deváḥ savitā́ savā́ya śaśvattamáṁ tádapā váhnir asthāt |
2.038.01c nūnáṁ devébhyo ví hí dhā́ti rátnam áthā́bhajad vītíhotraṁ svastaú ||

2.038.02a víśvasya hí śruṣṭáye devá ūrdhváḥ prá bāhávā pr̥thúpāṇiḥ sísarti |
2.038.02c ā́paś cid asya vratá ā́ nímr̥grā ayáṁ cid vā́to ramate párijman ||

2.038.03a āśúbhiś cid yā́n ví mucāti nūnám árīramad átamānaṁ cid étoḥ |
2.038.03c ahyárṣūṇāṁ cin ny àyām̐ aviṣyā́m ánu vratáṁ savitúr móky ā́gāt ||

2.038.04a púnaḥ sám avyad vítataṁ váyantī madhyā́ kártor ny àdhāc chákma dhī́raḥ |
2.038.04c út saṁhā́yāsthād vy r̥̀tū́m̐r adardhar arámatiḥ savitā́ devá ā́gāt ||

2.038.05a nā́naúkāṁsi dúryo víśvam ā́yur ví tiṣṭhate prabhaváḥ śóko agnéḥ |
2.038.05c jyéṣṭham mātā́ sūnáve bhāgám ā́dhād ánv asya kétam iṣitáṁ savitrā́ ||

2.038.06a samā́vavarti víṣṭhito jigīṣúr víśveṣāṁ kā́maś cáratām amā́bhūt |
2.038.06c śáśvām̐ ápo víkr̥taṁ hitvy ā́gād ánu vratáṁ savitúr daívyasya ||

2.038.07a tváyā hitám ápyam apsú bhāgáṁ dhánvā́nv ā́ mr̥gayáso ví tasthuḥ |
2.038.07c vánāni víbhyo nákir asya tā́ni vratā́ devásya savitúr minanti ||

2.038.08a yādrādhyàṁ váruṇo yónim ápyam ániśitaṁ nimíṣi járbhurāṇaḥ |
2.038.08c víśvo mārtāṇḍó vrajám ā́ paśúr gāt sthaśó jánmāni savitā́ vy ā́kaḥ ||

2.038.09a ná yásyéndro váruṇo ná mitró vratám aryamā́ ná minánti rudráḥ |
2.038.09c nā́rātayas tám idáṁ svastí huvé deváṁ savitā́raṁ námobhiḥ ||

2.038.10a bhágaṁ dhíyaṁ vājáyantaḥ púraṁdhiṁ nárāśáṁso gnā́spátir no avyāḥ |
2.038.10c āyé vāmásya saṁgathé rayīṇā́m priyā́ devásya savitúḥ syāma ||

2.038.11a asmábhyaṁ tád divó adbhyáḥ pr̥thivyā́s tváyā dattáṁ kā́myaṁ rā́dha ā́ gāt |
2.038.11c śáṁ yát stotŕ̥bhya āpáye bhávāty uruśáṁsāya savitar jaritré ||

2.039.01a grā́vāṇeva tád íd árthaṁ jarethe gŕ̥dhreva vr̥kṣáṁ nidhimántam áccha |
2.039.01c brahmā́ṇeva vidátha ukthaśā́sā dūtéva hávyā jányā purutrā́ ||

2.039.02a prātaryā́vāṇā rathyèva vīrā́jéva yamā́ váram ā́ sacethe |
2.039.02c méne iva tanvā̀ śúmbhamāne dámpatīva kratuvídā jáneṣu ||

2.039.03a śŕ̥ṅgeva naḥ prathamā́ gantam arvā́k chaphā́v iva járbhurāṇā tárobhiḥ |
2.039.03c cakravākéva práti vástor usrārvā́ñcā yātaṁ rathyèva śakrā ||

2.039.04a nāvéva naḥ pārayataṁ yugéva nábhyeva na upadhī́va pradhī́va |
2.039.04c śvā́neva no áriṣaṇyā tanū́nāṁ khŕ̥galeva visrásaḥ pātam asmā́n ||

2.039.05a vā́tevājuryā́ nadyèva rītír akṣī́ iva cákṣuṣā́ yātam arvā́k |
2.039.05c hástāv iva tanvè śámbhaviṣṭhā pā́deva no nayataṁ vásyo áccha ||

2.039.06a óṣṭhāv iva mádhv āsné vádantā stánāv iva pipyataṁ jīváse naḥ |
2.039.06c nā́seva nas tanvò rakṣitā́rā kárṇāv iva suśrútā bhūtam asmé ||

2.039.07a hásteva śaktím abhí saṁdadī́ naḥ kṣā́meva naḥ sám ajataṁ rájāṁsi |
2.039.07c imā́ gíro aśvinā yuṣmayántīḥ kṣṇótreṇeva svádhitiṁ sáṁ śiśītam ||

2.039.08a etā́ni vām aśvinā várdhanāni bráhma stómaṁ gr̥tsamadā́so akran |
2.039.08c tā́ni narā jujuṣāṇópa yātam br̥hád vadema vidáthe suvī́rāḥ ||

2.040.01a sómāpūṣaṇā jánanā rayīṇā́ṁ jánanā divó jánanā pr̥thivyā́ḥ |
2.040.01c jātaú víśvasya bhúvanasya gopaú devā́ akr̥ṇvann amŕ̥tasya nā́bhim ||

2.040.02a imaú devaú jā́yamānau juṣantemaú támāṁsi gūhatām ájuṣṭā |
2.040.02c ābhyā́m índraḥ pakvám āmā́sv antáḥ somāpūṣábhyāṁ janad usríyāsu ||

2.040.03a sómāpūṣaṇā rájaso vimā́naṁ saptácakraṁ rátham áviśvaminvam |
2.040.03c viṣūvŕ̥tam mánasā yujyámānaṁ táṁ jinvatho vr̥ṣaṇā páñcaraśmim ||

2.040.04a divy ànyáḥ sádanaṁ cakrá uccā́ pr̥thivyā́m anyó ádhy antárikṣe |
2.040.04c tā́v asmábhyam puruvā́ram purukṣúṁ rāyás póṣaṁ ví ṣyatāṁ nā́bhim asmé ||

2.040.05a víśvāny anyó bhúvanā jajā́na víśvam anyó abhicákṣāṇa eti |
2.040.05c sómāpūṣaṇāv ávataṁ dhíyam me yuvā́bhyāṁ víśvāḥ pŕ̥tanā jayema ||

2.040.06a dhíyam pūṣā́ jinvatu viśvaminvó rayíṁ sómo rayipátir dadhātu |
2.040.06c ávatu devy áditir anarvā́ br̥hád vadema vidáthe suvī́rāḥ ||

2.041.01a vā́yo yé te sahasríṇo ráthāsas tébhir ā́ gahi |
2.041.01c niyútvān sómapītaye ||

2.041.02a niyútvān vāyav ā́ gahy ayáṁ śukró ayāmi te |
2.041.02c gántāsi sunvató gr̥hám ||

2.041.03a śukrásyādyá gávāśira índravāyū niyútvataḥ |
2.041.03c ā́ yātam píbataṁ narā ||

2.041.04a ayáṁ vām mitrāvaruṇā sutáḥ sóma r̥tāvr̥dhā |
2.041.04c máméd ihá śrutaṁ hávam ||

2.041.05a rā́jānāv ánabhidruhā dhruvé sádasy uttamé |
2.041.05c sahásrasthūṇa āsāte ||

2.041.06a tā́ samrā́jā ghr̥tā́sutī ādityā́ dā́nunas pátī |
2.041.06c sácete ánavahvaram ||

2.041.07a gómad ū ṣú nāsatyā́śvāvad yātam aśvinā |
2.041.07c vartī́ rudrā nr̥pā́yyam ||

2.041.08a ná yát páro nā́ntara ādadhárṣad vr̥ṣaṇvasū |
2.041.08c duḥśáṁso mártyo ripúḥ ||

2.041.09a tā́ na ā́ voḷham aśvinā rayím piśáṅgasaṁdr̥śam |
2.041.09c dhíṣṇyā varivovídam ||

2.041.10a índro aṅgá mahád bhayám abhī́ ṣád ápa cucyavat |
2.041.10c sá hí sthiró vícarṣaṇiḥ ||

2.041.11a índraś ca mr̥ḷáyāti no ná naḥ paścā́d agháṁ naśat |
2.041.11c bhadrám bhavāti naḥ puráḥ ||

2.041.12a índra ā́śābhyas pári sárvābhyo ábhayaṁ karat |
2.041.12c jétā śátrūn vícarṣaṇiḥ ||

2.041.13a víśve devāsa ā́ gata śr̥ṇutā́ ma imáṁ hávam |
2.041.13c édám barhír ní ṣīdata ||

2.041.14a tīvró vo mádhumām̐ ayáṁ śunáhotreṣu matsaráḥ |
2.041.14c etám pibata kā́myam ||

2.041.15a índrajyeṣṭhā márudgaṇā dévāsaḥ pū́ṣarātayaḥ |
2.041.15c víśve máma śrutā hávam ||

2.041.16a ámbitame nádītame dévitame sárasvati |
2.041.16c apraśastā́ iva smasi práśastim amba nas kr̥dhi ||

2.041.17a tvé víśvā sarasvati śritā́yūṁṣi devyā́m |
2.041.17c śunáhotreṣu matsva prajā́ṁ devi didiḍḍhi naḥ ||

2.041.18a imā́ bráhma sarasvati juṣásva vājinīvati |
2.041.18c yā́ te mánma gr̥tsamadā́ r̥tāvari priyā́ devéṣu júhvati ||

2.041.19a prétāṁ yajñásya śambhúvā yuvā́m íd ā́ vr̥ṇīmahe |
2.041.19c agníṁ ca havyavā́hanam ||

2.041.20a dyā́vā naḥ pr̥thivī́ imáṁ sidhrám adyá divispŕ̥śam |
2.041.20c yajñáṁ devéṣu yacchatām ||

2.041.21a ā́ vām upástham adruhā devā́ḥ sīdantu yajñíyāḥ |
2.041.21c ihā́dyá sómapītaye ||

2.042.01a kánikradaj janúṣam prabruvāṇá íyarti vā́cam aritéva nā́vam |
2.042.01c sumaṅgálaś ca śakune bhávāsi mā́ tvā kā́ cid abhibhā́ víśvyā vidat ||

2.042.02a mā́ tvā śyená úd vadhīn mā́ suparṇó mā́ tvā vidad íṣumān vīró ástā |
2.042.02c pítryām ánu pradíśaṁ kánikradat sumaṅgálo bhadravādī́ vadehá ||

2.042.03a áva kranda dakṣiṇató gr̥hā́ṇāṁ sumaṅgálo bhadravādī́ śakunte |
2.042.03c mā́ naḥ stená īśata mā́gháśaṁso br̥hád vadema vidáthe suvī́rāḥ ||

2.043.01a pradakṣiṇíd abhí gr̥ṇanti kārávo váyo vádanta r̥tuthā́ śakúntayaḥ |
2.043.01c ubhé vā́cau vadati sāmagā́ iva gāyatráṁ ca traíṣṭubhaṁ cā́nu rājati ||

2.043.02a udgātéva śakune sā́ma gāyasi brahmaputrá iva sávaneṣu śaṁsasi |
2.043.02c vŕ̥ṣeva vājī́ śíśumatīr apī́tyā sarváto naḥ śakune bhadrám ā́ vada viśváto naḥ śakune púṇyam ā́ vada ||

2.043.03a āvádam̐s tváṁ śakune bhadrám ā́ vada tūṣṇī́m ā́sīnaḥ sumatíṁ cikiddhi naḥ |
2.043.03c yád utpátan vádasi karkarír yathā br̥hád vadema vidáthe suvī́rāḥ ||

3.001.01a sómasya mā tavásaṁ vákṣy agne váhniṁ cakartha vidáthe yájadhyai |
3.001.01c devā́m̐ ácchā dī́dyad yuñjé ádriṁ śamāyé agne tanvàṁ juṣasva ||

3.001.02a prā́ñcaṁ yajñáṁ cakr̥ma várdhatāṁ gī́ḥ samídbhir agníṁ námasā duvasyan |
3.001.02c diváḥ śaśāsur vidáthā kavīnā́ṁ gŕ̥tsāya cit taváse gātúm īṣuḥ ||

3.001.03a máyo dadhe médhiraḥ pūtádakṣo diváḥ subándhur janúṣā pr̥thivyā́ḥ |
3.001.03c ávindann u darśatám apsv àntár devā́so agním apási svásr̥̄ṇām ||

3.001.04a ávardhayan subhágaṁ saptá yahvī́ḥ śvetáṁ jajñānám aruṣám mahitvā́ |
3.001.04c śíśuṁ ná jātám abhy ā̀rur áśvā devā́so agníṁ jániman vapuṣyan ||

3.001.05a śukrébhir áṅgai rája ātatanvā́n krátum punānáḥ kavíbhiḥ pavítraiḥ |
3.001.05c śocír vásānaḥ páry ā́yur apā́ṁ śríyo mimīte br̥hatī́r ánūnāḥ ||

3.001.06a vavrā́jā sīm ánadatīr ádabdhā divó yahvī́r ávasānā ánagnāḥ |
3.001.06c sánā átra yuvatáyaḥ sáyonīr ékaṁ gárbhaṁ dadhire saptá vā́ṇīḥ ||

3.001.07a stīrṇā́ asya saṁháto viśvárūpā ghr̥tásya yónau sraváthe mádhūnām |
3.001.07c ásthur átra dhenávaḥ pínvamānā mahī́ dasmásya mātárā samīcī́ ||

3.001.08a babhrāṇáḥ sūno sahaso vy àdyaud dádhānaḥ śukrā́ rabhasā́ vápūṁṣi |
3.001.08c ścótanti dhā́rā mádhuno ghr̥tásya vŕ̥ṣā yátra vāvr̥dhé kā́vyena ||

3.001.09a pitúś cid ū́dhar janúṣā viveda vy àsya dhā́rā asr̥jad ví dhénāḥ |
3.001.09c gúhā cárantaṁ sákhibhiḥ śivébhir divó yahvī́bhir ná gúhā babhūva ||

3.001.10a pitúś ca gárbhaṁ janitúś ca babhre pūrvī́r éko adhayat pī́pyānāḥ |
3.001.10c vŕ̥ṣṇe sapátnī śúcaye sábandhū ubhé asmai manuṣyè ní pāhi ||

3.001.11a uraú mahā́m̐ anibādhé vavardhā́po agníṁ yaśásaḥ sáṁ hí pūrvī́ḥ |
3.001.11c r̥tásya yónāv aśayad dámūnā jāmīnā́m agnír apási svásr̥̄ṇām ||

3.001.12a akró ná babhríḥ samithé mahī́nāṁ didr̥kṣéyaḥ sūnáve bhā́r̥jīkaḥ |
3.001.12c úd usríyā jánitā yó jajā́nāpā́ṁ gárbho nŕ̥tamo yahvó agníḥ ||

3.001.13a apā́ṁ gárbhaṁ darśatám óṣadhīnāṁ vánā jajāna subhágā vírūpam |
3.001.13c devā́saś cin mánasā sáṁ hí jagmúḥ pániṣṭhaṁ jātáṁ tavásaṁ duvasyan ||

3.001.14a br̥hánta íd bhānávo bhā́r̥jīkam agníṁ sacanta vidyúto ná śukrā́ḥ |
3.001.14c gúheva vr̥ddháṁ sádasi své antár apārá ūrvé amŕ̥taṁ dúhānāḥ ||

3.001.15a ī́ḷe ca tvā yájamāno havírbhir ī́ḷe sakhitváṁ sumatíṁ níkāmaḥ |
3.001.15c devaír ávo mimīhi sáṁ jaritré rákṣā ca no dámyebhir ánīkaiḥ ||

3.001.16a upakṣetā́ras táva supraṇīté 'gne víśvāni dhányā dádhānāḥ |
3.001.16c surétasā śrávasā túñjamānā abhí ṣyāma pr̥tanāyū́m̐r ádevān ||

3.001.17a ā́ devā́nām abhavaḥ ketúr agne mandró víśvāni kā́vyāni vidvā́n |
3.001.17c práti mártām̐ avāsayo dámūnā ánu devā́n rathiró yāsi sā́dhan ||

3.001.18a ní duroṇé amŕ̥to mártyānāṁ rā́jā sasāda vidáthāni sā́dhan |
3.001.18c ghr̥tápratīka urviyā́ vy àdyaud agnír víśvāni kā́vyāni vidvā́n ||

3.001.19a ā́ no gahi sakhyébhiḥ śivébhir mahā́n mahī́bhir ūtíbhiḥ saraṇyán |
3.001.19c asmé rayím bahuláṁ sáṁtarutraṁ suvā́cam bhāgáṁ yaśásaṁ kr̥dhī naḥ ||

3.001.20a etā́ te agne jánimā sánāni prá pūrvyā́ya nū́tanāni vocam |
3.001.20c mahā́nti vŕ̥ṣṇe sávanā kr̥témā́ jánmañ-janman níhito jātávedāḥ ||

3.001.21a jánmañ-janman níhito jātávedā viśvā́mitrebhir idhyate ájasraḥ |
3.001.21c tásya vayáṁ sumataú yajñíyasyā́pi bhadré saumanasé syāma ||

3.001.22a imáṁ yajñáṁ sahasāvan tváṁ no devatrā́ dhehi sukrato rárāṇaḥ |
3.001.22c prá yaṁsi hotar br̥hatī́r íṣo nó 'gne máhi dráviṇam ā́ yajasva ||

3.001.23a íḷām agne purudáṁsaṁ saníṁ góḥ śaśvattamáṁ hávamānāya sādha |
3.001.23c syā́n naḥ sūnús tánayo vijā́vā́gne sā́ te sumatír bhūtv asmé ||

3.002.01a vaiśvānarā́ya dhiṣáṇām r̥tāvŕ̥dhe ghr̥táṁ ná pūtám agnáye janāmasi |
3.002.01c dvitā́ hótāram mánuṣaś ca vāgháto dhiyā́ ráthaṁ ná kúliśaḥ sám r̥ṇvati ||

3.002.02a sá rocayaj janúṣā ródasī ubhé sá mātrór abhavat putrá ī́ḍyaḥ |
3.002.02c havyavā́ḷ agnír ajáraś cánohito dūḷábho viśā́m átithir vibhā́vasuḥ ||

3.002.03a krátvā dákṣasya táruṣo vídharmaṇi devā́so agníṁ janayanta cíttibhiḥ |
3.002.03c rurucānám bhānúnā jyótiṣā mahā́m átyaṁ ná vā́jaṁ saniṣyánn úpa bruve ||

3.002.04a ā́ mandrásya saniṣyánto váreṇyaṁ vr̥ṇīmáhe áhrayaṁ vā́jam r̥gmíyam |
3.002.04c rātím bhŕ̥gūṇām uśíjaṁ kavíkratum agníṁ rā́jantaṁ divyéna śocíṣā ||

3.002.05a agníṁ sumnā́ya dadhire puró jánā vā́jaśravasam ihá vr̥ktábarhiṣaḥ |
3.002.05c yatásrucaḥ surúcaṁ viśvádevyaṁ rudráṁ yajñā́nāṁ sā́dhadiṣṭim apásām ||

3.002.06a pā́vakaśoce táva hí kṣáyam pári hótar yajñéṣu vr̥ktábarhiṣo náraḥ |
3.002.06c ágne dúva icchámānāsa ā́pyam úpāsate dráviṇaṁ dhehi tébhyaḥ ||

3.002.07a ā́ ródasī apr̥ṇad ā́ svàr maháj jātáṁ yád enam apáso ádhārayan |
3.002.07c só adhvarā́ya pári ṇīyate kavír átyo ná vā́jasātaye cánohitaḥ ||

3.002.08a namasyáta havyádātiṁ svadhvaráṁ duvasyáta dámyaṁ jātávedasam |
3.002.08c rathī́r r̥tásya br̥ható vícarṣaṇir agnír devā́nām abhavat puróhitaḥ ||

3.002.09a tisró yahvásya samídhaḥ párijmano 'gnér apunann uśíjo ámr̥tyavaḥ |
3.002.09c tā́sām ékām ádadhur mártye bhújam u lokám u dvé úpa jāmím īyatuḥ ||

3.002.10a viśā́ṁ kavíṁ viśpátim mā́nuṣīr íṣaḥ sáṁ sīm akr̥ṇvan svádhitiṁ ná téjase |
3.002.10c sá udváto niváto yāti véviṣat sá gárbham eṣú bhúvaneṣu dīdharat ||

3.002.11a sá jinvate jaṭháreṣu prajajñivā́n vŕ̥ṣā citréṣu nā́nadan ná siṁháḥ |
3.002.11c vaiśvānaráḥ pr̥thupā́jā ámartyo vásu rátnā dáyamāno ví dāśúṣe ||

3.002.12a vaiśvānaráḥ pratnáthā nā́kam ā́ruhad divás pr̥ṣṭhám bhándamānaḥ sumánmabhiḥ |
3.002.12c sá pūrvaváj janáyañ jantáve dhánaṁ samānám ájmam páry eti jā́gr̥viḥ ||

3.002.13a r̥tā́vānaṁ yajñíyaṁ vípram ukthyàm ā́ yáṁ dadhé mātaríśvā diví kṣáyam |
3.002.13c táṁ citráyāmaṁ hárikeśam īmahe sudītím agníṁ suvitā́ya návyase ||

3.002.14a śúciṁ ná yā́mann iṣiráṁ svardŕ̥śaṁ ketúṁ divó rocanasthā́m uṣarbúdham |
3.002.14c agním mūrdhā́naṁ divó ápratiṣkutaṁ tám īmahe námasā vājínam br̥hát ||

3.002.15a mandráṁ hótāraṁ śúcim ádvayāvinaṁ dámūnasam ukthyàṁ viśvácarṣaṇim |
3.002.15c ráthaṁ ná citráṁ vápuṣāya darśatám mánurhitaṁ sádam íd rāyá īmahe ||

3.003.01a vaiśvānarā́ya pr̥thupā́jase vípo rátnā vidhanta dharúṇeṣu gā́tave |
3.003.01c agnír hí devā́m̐ amŕ̥to duvasyáty áthā dhármāṇi sanátā ná dūduṣat ||

3.003.02a antár dūtó ródasī dasmá īyate hótā níṣatto mánuṣaḥ puróhitaḥ |
3.003.02c kṣáyam br̥hántam pári bhūṣati dyúbhir devébhir agnír iṣitó dhiyā́vasuḥ ||

3.003.03a ketúṁ yajñā́nāṁ vidáthasya sā́dhanaṁ víprāso agním mahayanta cíttibhiḥ |
3.003.03c ápāṁsi yásminn ádhi saṁdadhúr gíras tásmin sumnā́ni yájamāna ā́ cake ||

3.003.04a pitā́ yajñā́nām ásuro vipaścítāṁ vimā́nam agnír vayúnaṁ ca vāghátām |
3.003.04c ā́ viveśa ródasī bhū́rivarpasā purupriyó bhandate dhā́mabhiḥ kavíḥ ||

3.003.05a candrám agníṁ candrárathaṁ hárivrataṁ vaiśvānarám apsuṣádaṁ svarvídam |
3.003.05c vigāháṁ tū́rṇiṁ táviṣībhir ā́vr̥tam bhū́rṇiṁ devā́sa ihá suśríyaṁ dadhuḥ ||

3.003.06a agnír devébhir mánuṣaś ca jantúbhis tanvānó yajñám purupéśasaṁ dhiyā́ |
3.003.06c rathī́r antár īyate sā́dhadiṣṭibhir jīró dámūnā abhiśasticā́tanaḥ ||

3.003.07a ágne járasva svapatyá ā́yuny ūrjā́ pinvasva sám íṣo didīhi naḥ |
3.003.07c váyāṁsi jinva br̥hatáś ca jāgr̥va uśíg devā́nām ási sukrátur vipā́m ||

3.003.08a viśpátiṁ yahvám átithiṁ náraḥ sádā yantā́raṁ dhīnā́m uśíjaṁ ca vāghátām |
3.003.08c adhvarā́ṇāṁ cétanaṁ jātávedasam prá śaṁsanti námasā jūtíbhir vr̥dhé ||

3.003.09a vibhā́vā deváḥ suráṇaḥ pári kṣitī́r agnír babhūva śávasā sumádrathaḥ |
3.003.09c tásya vratā́ni bhūripoṣíṇo vayám úpa bhūṣema dáma ā́ suvr̥ktíbhiḥ ||

3.003.10a vaíśvānara táva dhā́māny ā́ cake yébhiḥ svarvíd ábhavo vicakṣaṇa |
3.003.10c jātá ā́pr̥ṇo bhúvanāni ródasī ágne tā́ víśvā paribhū́r asi tmánā ||

3.003.11a vaiśvānarásya daṁsánābhyo br̥hád áriṇād ékaḥ svapasyáyā kavíḥ |
3.003.11c ubhā́ pitárā maháyann ajāyatāgnír dyā́vāpr̥thivī́ bhū́riretasā ||

3.004.01a samít-samit sumánā bodhy asmé śucā́-śucā sumatíṁ rāsi vásvaḥ |
3.004.01c ā́ deva devā́n yajáthāya vakṣi sákhā sákhīn sumánā yakṣy agne ||

3.004.02a yáṁ devā́sas trír áhann āyájante divé-dive váruṇo mitró agníḥ |
3.004.02c sémáṁ yajñám mádhumantaṁ kr̥dhī nas tánūnapād ghr̥táyoniṁ vidhántam ||

3.004.03a prá dī́dhitir viśvávārā jigāti hótāram iḷáḥ prathamáṁ yájadhyai |
3.004.03c ácchā námobhir vr̥ṣabháṁ vandádhyai sá devā́n yakṣad iṣitó yájīyān ||

3.004.04a ūrdhvó vāṁ gātúr adhvaré akāry ūrdhvā́ śocī́ṁṣi prásthitā rájāṁsi |
3.004.04c divó vā nā́bhā ny àsādi hótā str̥ṇīmáhi devávyacā ví barhíḥ ||

3.004.05a saptá hotrā́ṇi mánasā vr̥ṇānā́ ínvanto víśvam práti yann r̥téna |
3.004.05c nr̥péśaso vidátheṣu prá jātā́ abhī̀máṁ yajñáṁ ví caranta pūrvī́ḥ ||

3.004.06a ā́ bhándamāne uṣásā úpāke utá smayete tanvā̀ vírūpe |
3.004.06c yáthā no mitró váruṇo jújoṣad índro marútvām̐ utá vā máhobhiḥ ||

3.004.07a daívyā hótārā prathamā́ ny r̥̀ñje saptá pr̥kṣā́saḥ svadháyā madanti |
3.004.07c r̥táṁ śáṁsanta r̥tám ít tá āhur ánu vratáṁ vratapā́ dī́dhyānāḥ ||

3.004.08a ā́ bhā́ratī bhā́ratībhiḥ sajóṣā íḷā devaír manuṣyèbhir agníḥ |
3.004.08c sárasvatī sārasvatébhir arvā́k tisró devī́r barhír édáṁ sadantu ||

3.004.09a tán nas turī́pam ádha poṣayitnú déva tvaṣṭar ví rarāṇáḥ syasva |
3.004.09c yáto vīráḥ karmaṇyàḥ sudákṣo yuktágrāvā jā́yate devákāmaḥ ||

3.004.10a vánaspaté 'va sr̥jópa devā́n agnír havíḥ śamitā́ sūdayāti |
3.004.10c séd u hótā satyátaro yajāti yáthā devā́nāṁ jánimāni véda ||

3.004.11a ā́ yāhy agne samidhānó arvā́ṅ índreṇa devaíḥ saráthaṁ turébhiḥ |
3.004.11c barhír na āstām áditiḥ suputrā́ svā́hā devā́ amŕ̥tā mādayantām ||

3.005.01a práty agnír uṣásaś cékitānó 'bodhi vípraḥ padavī́ḥ kavīnā́m |
3.005.01c pr̥thupā́jā devayádbhiḥ sámiddhó 'pa dvā́rā támaso váhnir āvaḥ ||

3.005.02a préd v agnír vāvr̥dhe stómebhir gīrbhíḥ stotr̥̄ṇā́ṁ namasyà ukthaíḥ |
3.005.02c pūrvī́r r̥tásya saṁdŕ̥śaś cakānáḥ sáṁ dūtó adyaud uṣáso viroké ||

3.005.03a ádhāyy agnír mā́nuṣīṣu vikṣv àpā́ṁ gárbho mitrá r̥téna sā́dhan |
3.005.03c ā́ haryató yajatáḥ sā́nv asthād ábhūd u vípro hávyo matīnā́m ||

3.005.04a mitró agnír bhavati yát sámiddho mitró hótā váruṇo jātávedāḥ |
3.005.04c mitró adhvaryúr iṣiró dámūnā mitráḥ síndhūnām utá párvatānām ||

3.005.05a pā́ti priyáṁ ripó ágram padáṁ véḥ pā́ti yahváś cáraṇaṁ sū́ryasya |
3.005.05c pā́ti nā́bhā saptáśīrṣāṇam agníḥ pā́ti devā́nām upamā́dam r̥ṣváḥ ||

3.005.06a r̥bhúś cakra ī́ḍyaṁ cā́ru nā́ma víśvāni devó vayúnāni vidvā́n |
3.005.06c sasásya cárma ghr̥távat padáṁ vés tád íd agnī́ rakṣaty áprayucchan ||

3.005.07a ā́ yónim agnír ghr̥távantam asthāt pr̥thúpragāṇam uśántam uśānáḥ |
3.005.07c dī́dyānaḥ śúcir r̥ṣváḥ pāvakáḥ púnaḥ-punar mātárā návyasī kaḥ ||

3.005.08a sadyó jātá óṣadhībhir vavakṣe yádī várdhanti prasvò ghr̥téna |
3.005.08c ā́pa iva pravátā śúmbhamānā uruṣyád agníḥ pitrór upásthe ||

3.005.09a úd u ṣṭutáḥ samídhā yahvó adyaud várṣman divó ádhi nā́bhā pr̥thivyā́ḥ |
3.005.09c mitró agnír ī́ḍyo mātaríśvā́ dūtó vakṣad yajáthāya devā́n ||

3.005.10a úd astambhīt samídhā nā́kam r̥ṣvò 'gnír bhávann uttamó rocanā́nām |
3.005.10c yádī bhŕ̥gubhyaḥ pári mātaríśvā gúhā sántaṁ havyavā́haṁ samīdhé ||

3.005.11a íḷām agne purudáṁsaṁ saníṁ góḥ śaśvattamáṁ hávamānāya sādha |
3.005.11c syā́n naḥ sūnús tánayo vijā́vā́gne sā́ te sumatír bhūtv asmé ||

3.006.01a prá kāravo mananā́ vacyámānā devadrī́cīṁ nayata devayántaḥ |
3.006.01c dakṣiṇāvā́ḍ vājínī prā́cy eti havír bháranty agnáye ghr̥tā́cī ||

3.006.02a ā́ ródasī apr̥ṇā jā́yamāna utá prá rikthā ádha nú prayajyo |
3.006.02c diváś cid agne mahinā́ pr̥thivyā́ vacyántāṁ te váhnayaḥ saptájihvāḥ ||

3.006.03a dyaúś ca tvā pr̥thivī́ yajñíyāso ní hótāraṁ sādayante dámāya |
3.006.03c yádī víśo mā́nuṣīr devayántīḥ práyasvatīr ī́ḷate śukrám arcíḥ ||

3.006.04a mahā́n sadhásthe dhruvá ā́ níṣatto 'ntár dyā́vā mā́hine háryamāṇaḥ |
3.006.04c ā́skre sapátnī ajáre ámr̥kte sabardúghe urugāyásya dhenū́ ||

3.006.05a vratā́ te agne maható mahā́ni táva krátvā ródasī ā́ tatantha |
3.006.05c tváṁ dūtó abhavo jā́yamānas tváṁ netā́ vr̥ṣabha carṣaṇīnā́m ||

3.006.06a r̥tásya vā keśínā yogyā́bhir ghr̥tasnúvā róhitā dhurí dhiṣva |
3.006.06c áthā́ vaha devā́n deva víśvān svadhvarā́ kr̥ṇuhi jātavedaḥ ||

3.006.07a diváś cid ā́ te rucayanta rokā́ uṣó vibhātī́r ánu bhāsi pūrvī́ḥ |
3.006.07c apó yád agna uśádhag váneṣu hótur mandrásya panáyanta devā́ḥ ||

3.006.08a uraú vā yé antárikṣe mádanti divó vā yé rocané sánti devā́ḥ |
3.006.08c ū́mā vā yé suhávāso yájatrā āyemiré rathyò agne áśvāḥ ||

3.006.09a aíbhir agne saráthaṁ yāhy arvā́ṅ nānāratháṁ vā vibhávo hy áśvāḥ |
3.006.09c pátnīvatas triṁśátaṁ trī́m̐ś ca devā́n anuṣvadhám ā́ vaha mādáyasva ||

3.006.10a sá hótā yásya ródasī cid urvī́ yajñáṁ-yajñam abhí vr̥dhé gr̥ṇītáḥ |
3.006.10c prā́cī adhvaréva tasthatuḥ suméke r̥tā́varī r̥tájātasya satyé ||

3.006.11a íḷām agne purudáṁsaṁ saníṁ góḥ śaśvattamáṁ hávamānāya sādha |
3.006.11c syā́n naḥ sūnús tánayo vijā́vā́gne sā́ te sumatír bhūtv asmé ||

3.007.01a prá yá ārúḥ śitipr̥ṣṭhásya dhāsér ā́ mātárā viviśuḥ saptá vā́ṇīḥ |
3.007.01c parikṣítā pitárā sáṁ carete prá sarsrāte dīrghám ā́yuḥ prayákṣe ||

3.007.02a divákṣaso dhenávo vŕ̥ṣṇo áśvā devī́r ā́ tasthau mádhumad váhantīḥ |
3.007.02c r̥tásya tvā sádasi kṣemayántam páry ékā carati vartaníṁ gaúḥ ||

3.007.03a ā́ sīm arohat suyámā bhávantīḥ pátiś cikitvā́n rayivíd rayīṇā́m |
3.007.03c prá nī́lapr̥ṣṭho atasásya dhāsés tā́ avāsayat purudhápratīkaḥ ||

3.007.04a máhi tvāṣṭrám ūrjáyantīr ajuryáṁ stabhūyámānaṁ vaháto vahanti |
3.007.04c vy áṅgebhir didyutānáḥ sadhástha ékām iva ródasī ā́ viveśa ||

3.007.05a jānánti vŕ̥ṣṇo aruṣásya śévam utá bradhnásya śā́sane raṇanti |
3.007.05c divorúcaḥ surúco rócamānā íḷā yéṣāṁ gáṇyā mā́hinā gī́ḥ ||

3.007.06a utó pitŕ̥bhyām pravídā́nu ghóṣam mahó mahádbhyām anayanta śūṣám |
3.007.06c ukṣā́ ha yátra pári dhā́nam aktór ánu sváṁ dhā́ma jaritúr vavákṣa ||

3.007.07a adhvaryúbhiḥ pañcábhiḥ saptá víprāḥ priyáṁ rakṣante níhitam padáṁ véḥ |
3.007.07c prā́ñco madanty ukṣáṇo ajuryā́ devā́ devā́nām ánu hí vratā́ gúḥ ||

3.007.08a daívyā hótārā prathamā́ ny r̥̀ñje saptá pr̥kṣā́saḥ svadháyā madanti |
3.007.08c r̥táṁ śáṁsanta r̥tám ít tá āhur ánu vratáṁ vratapā́ dī́dhyānāḥ ||

3.007.09a vr̥ṣāyánte mahé átyāya pūrvī́r vŕ̥ṣṇe citrā́ya raśmáyaḥ suyāmā́ḥ |
3.007.09c déva hotar mandrátaraś cikitvā́n mahó devā́n ródasī éhá vakṣi ||

3.007.10a pr̥kṣáprayajo draviṇaḥ suvā́caḥ suketáva uṣáso revád ūṣuḥ |
3.007.10c utó cid agne mahinā́ pr̥thivyā́ḥ kr̥táṁ cid énaḥ sám mahé daśasya ||

3.007.11a íḷām agne purudáṁsaṁ saníṁ góḥ śaśvattamáṁ hávamānāya sādha |
3.007.11c syā́n naḥ sūnús tánayo vijā́vā́gne sā́ te sumatír bhūtv asmé ||

3.008.01a añjánti tvā́m adhvaré devayánto vánaspate mádhunā daívyena |
3.008.01c yád ūrdhvás tíṣṭhā dráviṇehá dhattād yád vā kṣáyo mātúr asyā́ upásthe ||

3.008.02a sámiddhasya śráyamāṇaḥ purástād bráhma vanvānó ajáraṁ suvī́ram |
3.008.02c āré asmád ámatim bā́dhamāna úc chrayasva mahaté saúbhagāya ||

3.008.03a úc chrayasva vanaspate várṣman pr̥thivyā́ ádhi |
3.008.03c súmitī mīyámāno várco dhā yajñávāhase ||

3.008.04a yúvā suvā́sāḥ párivīta ā́gāt sá u śréyān bhavati jā́yamānaḥ |
3.008.04c táṁ dhī́rāsaḥ kaváya ún nayanti svādhyò mánasā devayántaḥ ||

3.008.05a jātó jāyate sudinatvé áhnāṁ samaryá ā́ vidáthe várdhamānaḥ |
3.008.05c punánti dhī́rā apáso manīṣā́ devayā́ vípra úd iyarti vā́cam ||

3.008.06a yā́n vo náro devayánto nimimyúr vánaspate svádhitir vā tatákṣa |
3.008.06c té devā́saḥ sváravas tasthivā́ṁsaḥ prajā́vad asmé didhiṣantu rátnam ||

3.008.07a yé vr̥kṇā́so ádhi kṣámi nímitāso yatásrucaḥ |
3.008.07c té no vyantu vā́ryaṁ devatrā́ kṣetrasā́dhasaḥ ||

3.008.08a ādityā́ rudrā́ vásavaḥ sunīthā́ dyā́vākṣā́mā pr̥thivī́ antárikṣam |
3.008.08c sajóṣaso yajñám avantu devā́ ūrdhváṁ kr̥ṇvantv adhvarásya ketúm ||

3.008.09a haṁsā́ iva śreṇiśó yátānāḥ śukrā́ vásānāḥ sváravo na ā́guḥ |
3.008.09c unnīyámānāḥ kavíbhiḥ purástād devā́ devā́nām ápi yanti pā́thaḥ ||

3.008.10a śŕ̥ṅgāṇīvéc chr̥ṅgíṇāṁ sáṁ dadr̥śre caṣā́lavantaḥ sváravaḥ pr̥thivyā́m |
3.008.10c vāghádbhir vā vihavé śróṣamāṇā asmā́m̐ avantu pr̥tanā́jyeṣu ||

3.008.11a vánaspate śatávalśo ví roha sahásravalśā ví vayáṁ ruhema |
3.008.11c yáṁ tvā́m ayáṁ svádhitis téjamānaḥ praṇinā́ya mahaté saúbhagāya ||

3.009.01a sákhāyas tvā vavr̥mahe devám mártāsa ūtáye |
3.009.01c apā́ṁ nápātaṁ subhágaṁ sudī́ditiṁ suprátūrtim anehásam ||

3.009.02a kā́yamāno vanā́ tváṁ yán mātr̥̄́r ájagann apáḥ |
3.009.02c ná tát te agne pramŕ̥ṣe nivártanaṁ yád dūré sánn ihā́bhavaḥ ||

3.009.03a áti tr̥ṣṭáṁ vavakṣithā́thaivá sumánā asi |
3.009.03c prá-prānyé yánti páry anyá āsate yéṣāṁ sakhyé ási śritáḥ ||

3.009.04a īyivā́ṁsam áti srídhaḥ śáśvatīr áti saścátaḥ |
3.009.04c ánv īm avindan nicirā́so adrúho 'psú siṁhám iva śritám ||

3.009.05a sasr̥vā́ṁsam iva tmánāgním itthā́ tiróhitam |
3.009.05c aínaṁ nayan mātaríśvā parāváto devébhyo mathitám pári ||

3.009.06a táṁ tvā mártā agr̥bhṇata devébhyo havyavāhana |
3.009.06c víśvān yád yajñā́m̐ abhipā́si mānuṣa táva krátvā yaviṣṭhya ||

3.009.07a tád bhadráṁ táva daṁsánā pā́kāya cic chadayati |
3.009.07c tvā́ṁ yád agne paśávaḥ samā́sate sámiddham apiśarvaré ||

3.009.08a ā́ juhotā svadhvaráṁ śīrám pāvakáśociṣam |
3.009.08c āśúṁ dūtám ajirám pratnám ī́ḍyaṁ śruṣṭī́ deváṁ saparyata ||

3.009.09a trī́ṇi śatā́ trī́ sahásrāṇy agníṁ triṁśác ca devā́ náva cāsaparyan |
3.009.09c aúkṣan ghr̥taír ástr̥ṇan barhír asmā ā́d íd dhótāraṁ ny àsādayanta ||

3.010.01a tvā́m agne manīṣíṇaḥ samrā́jaṁ carṣaṇīnā́m |
3.010.01c devám mártāsa indhate sám adhvaré ||

3.010.02a tvā́ṁ yajñéṣv r̥tvíjam ágne hótāram īḷate |
3.010.02c gopā́ r̥tásya dīdihi své dáme ||

3.010.03a sá ghā yás te dádāśati samídhā jātávedase |
3.010.03c só agne dhatte suvī́ryaṁ sá puṣyati ||

3.010.04a sá ketúr adhvarā́ṇām agnír devébhir ā́ gamat |
3.010.04c añjānáḥ saptá hótr̥bhir havíṣmate ||

3.010.05a prá hótre pūrvyáṁ váco 'gnáye bharatā br̥hát |
3.010.05c vipā́ṁ jyótīṁṣi bíbhrate ná vedháse ||

3.010.06a agníṁ vardhantu no gíro yáto jā́yata ukthyàḥ |
3.010.06c mahé vā́jāya dráviṇāya darśatáḥ ||

3.010.07a ágne yájiṣṭho adhvaré devā́n devayaté yaja |
3.010.07c hótā mandró ví rājasy áti srídhaḥ ||

3.010.08a sá naḥ pāvaka dīdihi dyumád asmé suvī́ryam |
3.010.08c bhávā stotŕ̥bhyo ántamaḥ svastáye ||

3.010.09a táṁ tvā víprā vipanyávo jāgr̥vā́ṁsaḥ sám indhate |
3.010.09c havyavā́ham ámartyaṁ sahovŕ̥dham ||

3.011.01a agnír hótā puróhito 'dhvarásya vícarṣaṇiḥ |
3.011.01c sá veda yajñám ānuṣák ||

3.011.02a sá havyavā́ḷ ámartya uśíg dūtáś cánohitaḥ |
3.011.02c agnír dhiyā́ sám r̥ṇvati ||

3.011.03a agnír dhiyā́ sá cetati ketúr yajñásya pūrvyáḥ |
3.011.03c árthaṁ hy àsya taráṇi ||

3.011.04a agníṁ sūnúṁ sánaśrutaṁ sáhaso jātávedasam |
3.011.04c váhniṁ devā́ akr̥ṇvata ||

3.011.05a ádābhyaḥ puraetā́ viśā́m agnír mā́nuṣīṇām |
3.011.05c tū́rṇī ráthaḥ sádā návaḥ ||

3.011.06a sāhvā́n víśvā abhiyújaḥ krátur devā́nām ámr̥ktaḥ |
3.011.06c agnís tuvíśravastamaḥ ||

3.011.07a abhí práyāṁsi vā́hasā dāśvā́m̐ aśnoti mártyaḥ |
3.011.07c kṣáyam pāvakáśociṣaḥ ||

3.011.08a pári víśvāni súdhitāgnér aśyāma mánmabhiḥ |
3.011.08c víprāso jātávedasaḥ ||

3.011.09a ágne víśvāni vā́ryā vā́jeṣu saniṣāmahe |
3.011.09c tvé devā́sa érire ||

3.012.01a índrāgnī ā́ gataṁ sutáṁ gīrbhír nábho váreṇyam |
3.012.01c asyá pātaṁ dhiyéṣitā́ ||

3.012.02a índrāgnī jaritúḥ sácā yajñó jigāti cétanaḥ |
3.012.02c ayā́ pātam imáṁ sutám ||

3.012.03a índram agníṁ kavicchádā yajñásya jūtyā́ vr̥ṇe |
3.012.03c tā́ sómasyehá tr̥mpatām ||

3.012.04a tośā́ vr̥traháṇā huve sajítvānā́parājitā |
3.012.04c indrāgnī́ vājasā́tamā ||

3.012.05a prá vām arcanty ukthíno nīthāvído jaritā́raḥ |
3.012.05c índrāgnī íṣa ā́ vr̥ṇe ||

3.012.06a índrāgnī navatím púro dāsápatnīr adhūnutam |
3.012.06c sākám ékena kármaṇā ||

3.012.07a índrāgnī ápasas páry úpa prá yanti dhītáyaḥ |
3.012.07c r̥tásya pathyā̀ ánu ||

3.012.08a índrāgnī taviṣā́ṇi vāṁ sadhásthāni práyāṁsi ca |
3.012.08c yuvór aptū́ryaṁ hitám ||

3.012.09a índrāgnī rocanā́ diváḥ pári vā́jeṣu bhūṣathaḥ |
3.012.09c tád vāṁ ceti prá vīryàm ||

3.013.01a prá vo devā́yāgnáye bárhiṣṭham arcāsmai |
3.013.01c gámad devébhir ā́ sá no yájiṣṭho barhír ā́ sadat ||

3.013.02a r̥tā́vā yásya ródasī dákṣaṁ sácanta ūtáyaḥ |
3.013.02c havíṣmantas tám īḷate táṁ saniṣyántó 'vase ||

3.013.03a sá yantā́ vípra eṣāṁ sá yajñā́nām áthā hí ṣáḥ |
3.013.03c agníṁ táṁ vo duvasyata dā́tā yó vánitā maghám ||

3.013.04a sá naḥ śármāṇi vītáye 'gnír yacchatu śáṁtamā |
3.013.04c yáto naḥ pruṣṇávad vásu diví kṣitíbhyo apsv ā́ ||

3.013.05a dīdivā́ṁsam ápūrvyaṁ vásvībhir asya dhītíbhiḥ |
3.013.05c ŕ̥kvāṇo agním indhate hótāraṁ viśpátiṁ viśā́m ||

3.013.06a utá no bráhmann aviṣa ukthéṣu devahū́tamaḥ |
3.013.06c śáṁ naḥ śocā marúdvr̥dhó 'gne sahasrasā́tamaḥ ||

3.013.07a nū́ no rāsva sahásravat tokávat puṣṭimád vásu |
3.013.07c dyumád agne suvī́ryaṁ várṣiṣṭham ánupakṣitam ||

3.014.01a ā́ hótā mandró vidáthāny asthāt satyó yájvā kavítamaḥ sá vedhā́ḥ |
3.014.01c vidyúdrathaḥ sáhasas putró agníḥ śocíṣkeśaḥ pr̥thivyā́m pā́jo aśret ||

3.014.02a áyāmi te námaüktiṁ juṣasva ŕ̥tāvas túbhyaṁ cétate sahasvaḥ |
3.014.02c vidvā́m̐ ā́ vakṣi vidúṣo ní ṣatsi mádhya ā́ barhír ūtáye yajatra ||

3.014.03a drávatāṁ ta uṣásā vājáyantī ágne vā́tasya pathyā̀bhir áccha |
3.014.03c yát sīm añjánti pūrvyáṁ havírbhir ā́ vandhúreva tasthatur duroṇé ||

3.014.04a mitráś ca túbhyaṁ váruṇaḥ sahasvó 'gne víśve marútaḥ sumnám arcan |
3.014.04c yác chocíṣā sahasas putra tíṣṭhā abhí kṣitī́ḥ pratháyan sū́ryo nr̥̄́n ||

3.014.05a vayáṁ te adyá rarimā́ hí kā́mam uttānáhastā námasopasádya |
3.014.05c yájiṣṭhena mánasā yakṣi devā́n ásredhatā mánmanā vípro agne ||

3.014.06a tvád dhí putra sahaso ví pūrvī́r devásya yánty ūtáyo ví vā́jāḥ |
3.014.06c tváṁ dehi sahasríṇaṁ rayíṁ no 'droghéṇa vácasā satyám agne ||

3.014.07a túbhyaṁ dakṣa kavikrato yā́nīmā́ déva mártāso adhvaré ákarma |
3.014.07c tváṁ víśvasya suráthasya bodhi sárvaṁ tád agne amr̥ta svadehá ||

3.015.01a ví pā́jasā pr̥thúnā śóśucāno bā́dhasva dviṣó rakṣáso ámīvāḥ |
3.015.01c suśármaṇo br̥hatáḥ śármaṇi syām agnér aháṁ suhávasya práṇītau ||

3.015.02a tváṁ no asyā́ uṣáso vyùṣṭau tváṁ sū́ra údite bodhi gopā́ḥ |
3.015.02c jánmeva nítyaṁ tánayaṁ juṣasva stómam me agne tanvā̀ sujāta ||

3.015.03a tváṁ nr̥cákṣā vr̥ṣabhā́nu pūrvī́ḥ kr̥ṣṇā́sv agne aruṣó ví bhāhi |
3.015.03c váso néṣi ca párṣi cā́ty áṁhaḥ kr̥dhī́ no rāyá uśíjo yaviṣṭha ||

3.015.04a áṣāḷho agne vr̥ṣabhó didīhi púro víśvāḥ saúbhagā saṁjigīvā́n |
3.015.04c yajñásya netā́ prathamásya pāyór jā́tavedo br̥hatáḥ supraṇīte ||

3.015.05a ácchidrā śárma jaritaḥ purū́ṇi devā́m̐ ácchā dī́dyānaḥ sumedhā́ḥ |
3.015.05c rátho ná sásnir abhí vakṣi vā́jam ágne tváṁ ródasī naḥ suméke ||

3.015.06a prá pīpaya vr̥ṣabha jínva vā́jān ágne tváṁ ródasī naḥ sudóghe |
3.015.06c devébhir deva surúcā rucānó mā́ no mártasya durmatíḥ pári ṣṭhāt ||

3.015.07a íḷām agne purudáṁsaṁ saníṁ góḥ śaśvattamáṁ hávamānāya sādha |
3.015.07c syā́n naḥ sūnús tánayo vijā́vā́gne sā́ te sumatír bhūtv asmé ||

3.016.01a ayám agníḥ suvī́ryasyéśe maháḥ saúbhagasya |
3.016.01c rāyá īśe svapatyásya gómata ī́śe vr̥traháthānām ||

3.016.02a imáṁ naro marutaḥ saścatā vŕ̥dhaṁ yásmin rā́yaḥ śévr̥dhāsaḥ |
3.016.02c abhí yé sánti pŕ̥tanāsu dūḍhyò viśvā́hā śátrum ādabhúḥ ||

3.016.03a sá tváṁ no rāyáḥ śiśīhi mī́ḍhvo agne suvī́ryasya |
3.016.03c túvidyumna várṣiṣṭhasya prajā́vato 'namīvásya śuṣmíṇaḥ ||

3.016.04a cákrir yó víśvā bhúvanābhí sāsahíś cákrir devéṣv ā́ dúvaḥ |
3.016.04c ā́ devéṣu yátata ā́ suvī́rya ā́ śáṁsa utá nr̥ṇā́m ||

3.016.05a mā́ no agné 'mataye mā́vī́ratāyai rīradhaḥ |
3.016.05c mā́gótāyai sahasas putra mā́ nidé 'pa dvéṣāṁsy ā́ kr̥dhi ||

3.016.06a śagdhí vā́jasya subhaga prajā́vató 'gne br̥ható adhvaré |
3.016.06c sáṁ rāyā́ bhū́yasā sr̥ja mayobhúnā túvidyumna yáśasvatā ||

3.017.01a samidhyámānaḥ prathamā́nu dhármā sám aktúbhir ajyate viśvávāraḥ |
3.017.01c śocíṣkeśo ghr̥tánirṇik pāvakáḥ suyajñó agnír yajáthāya devā́n ||

3.017.02a yáthā́yajo hotrám agne pr̥thivyā́ yáthā divó jātavedaś cikitvā́n |
3.017.02c evā́néna havíṣā yakṣi devā́n manuṣvád yajñám prá tiremám adyá ||

3.017.03a trī́ṇy ā́yūṁṣi táva jātavedas tisrá ājā́nīr uṣásas te agne |
3.017.03c tā́bhir devā́nām ávo yakṣi vidvā́n áthā bhava yájamānāya śáṁ yóḥ ||

3.017.04a agníṁ sudītíṁ sudŕ̥śaṁ gr̥ṇánto namasyā́mas tvéḍyaṁ jātavedaḥ |
3.017.04c tvā́ṁ dūtám aratíṁ havyavā́haṁ devā́ akr̥ṇvann amŕ̥tasya nā́bhim ||

3.017.05a yás tvád dhótā pū́rvo agne yájīyān dvitā́ ca sáttā svadháyā ca śambhúḥ |
3.017.05c tásyā́nu dhárma prá yajā cikitvó 'thā no dhā adhvaráṁ devávītau ||

3.018.01a bhávā no agne sumánā úpetau sákheva sákhye pitáreva sādhúḥ |
3.018.01c purudrúho hí kṣitáyo jánānām práti pratīcī́r dahatād árātīḥ ||

3.018.02a tápo ṣv àgne ántarām̐ amítrān tápā śáṁsam áraruṣaḥ párasya |
3.018.02c tápo vaso cikitānó acíttān ví te tiṣṭhantām ajárā ayā́saḥ ||

3.018.03a idhménāgna icchámāno ghr̥téna juhómi havyáṁ tárase bálāya |
3.018.03c yā́vad ī́śe bráhmaṇā vándamāna imā́ṁ dhíyaṁ śataséyāya devī́m ||

3.018.04a úc chocíṣā sahasas putra stutó br̥hád váyaḥ śaśamānéṣu dhehi |
3.018.04c revád agne viśvā́mitreṣu śáṁ yór marmr̥jmā́ te tanvàm bhū́ri kŕ̥tvaḥ ||

3.018.05a kr̥dhí rátnaṁ susanitar dhánānāṁ sá ghéd agne bhavasi yát sámiddhaḥ |
3.018.05c stotúr duroṇé subhágasya revát sr̥prā́ karásnā dadhiṣe vápūṁṣi ||

3.019.01a agníṁ hótāram prá vr̥ṇe miyédhe gŕ̥tsaṁ kavíṁ viśvavídam ámūram |
3.019.01c sá no yakṣad devátātā yájīyān rāyé vā́jāya vanate maghā́ni ||

3.019.02a prá te agne havíṣmatīm iyarmy ácchā sudyumnā́ṁ rātínīṁ ghr̥tā́cīm |
3.019.02c pradakṣiṇíd devátātim urāṇáḥ sáṁ rātíbhir vásubhir yajñám aśret ||

3.019.03a sá téjīyasā mánasā tvóta utá śikṣa svapatyásya śikṣóḥ |
3.019.03c ágne rāyó nŕ̥tamasya prábhūtau bhūyā́ma te suṣṭutáyaś ca vásvaḥ ||

3.019.04a bhū́rīṇi hí tvé dadhiré ánīkā́gne devásya yájyavo jánāsaḥ |
3.019.04c sá ā́ vaha devátātiṁ yaviṣṭha śárdho yád adyá divyáṁ yájāsi ||

3.019.05a yát tvā hótāram anájan miyédhe niṣādáyanto yajáthāya devā́ḥ |
3.019.05c sá tváṁ no agne 'vitéhá bodhy ádhi śrávāṁsi dhehi nas tanū́ṣu ||

3.020.01a agním uṣásam aśvínā dadhikrā́ṁ vyùṣṭiṣu havate váhnir ukthaíḥ |
3.020.01c sujyótiṣo naḥ śr̥ṇvantu devā́ḥ sajóṣaso adhvaráṁ vāvaśānā́ḥ ||

3.020.02a ágne trī́ te vā́jinā trī́ ṣadhásthā tisrás te jihvā́ r̥tajāta pūrvī́ḥ |
3.020.02c tisrá u te tanvò devávātās tā́bhir naḥ pāhi gíro áprayucchan ||

3.020.03a ágne bhū́rīṇi táva jātavedo déva svadhāvo 'mŕ̥tasya nā́ma |
3.020.03c yā́ś ca māyā́ māyínāṁ viśvaminva tvé pūrvī́ḥ saṁdadhúḥ pr̥ṣṭabandho ||

3.020.04a agnír netā́ bhága iva kṣitīnā́ṁ daívīnāṁ devá r̥tupā́ r̥tā́vā |
3.020.04c sá vr̥trahā́ sanáyo viśvávedāḥ párṣad víśvā́ti duritā́ gr̥ṇántam ||

3.020.05a dadhikrā́m agním uṣásaṁ ca devī́m bŕ̥haspátiṁ savitā́raṁ ca devám |
3.020.05c aśvínā mitrā́váruṇā bhágaṁ ca vásūn rudrā́m̐ ādityā́m̐ ihá huve ||

3.021.01a imáṁ no yajñám amŕ̥teṣu dhehīmā́ havyā́ jātavedo juṣasva |
3.021.01c stokā́nām agne médaso ghr̥tásya hótaḥ prā́śāna prathamó niṣádya ||

3.021.02a ghr̥távantaḥ pāvaka te stokā́ḥ ścotanti médasaḥ |
3.021.02c svádharman devávītaye śréṣṭhaṁ no dhehi vā́ryam ||

3.021.03a túbhyaṁ stokā́ ghr̥taścútó 'gne víprāya santya |
3.021.03c ŕ̥ṣiḥ śréṣṭhaḥ sám idhyase yajñásya prāvitā́ bhava ||

3.021.04a túbhyaṁ ścotanty adhrigo śacīvaḥ stokā́so agne médaso ghr̥tásya |
3.021.04c kaviśastó br̥hatā́ bhānúnā́gā havyā́ juṣasva medhira ||

3.021.05a ójiṣṭhaṁ te madhyató méda údbhr̥tam prá te vayáṁ dadāmahe |
3.021.05c ścótanti te vaso stokā́ ádhi tvací práti tā́n devaśó vihi ||

3.022.01a ayáṁ só agnír yásmin sómam índraḥ sutáṁ dadhé jaṭháre vāvaśānáḥ |
3.022.01c sahasríṇaṁ vā́jam átyaṁ ná sáptiṁ sasavā́n sán stūyase jātavedaḥ ||

3.022.02a ágne yát te diví várcaḥ pr̥thivyā́ṁ yád óṣadhīṣv apsv ā́ yajatra |
3.022.02c yénāntárikṣam urv ā̀tatántha tveṣáḥ sá bhānúr arṇavó nr̥cákṣāḥ ||

3.022.03a ágne divó árṇam ácchā jigāsy ácchā devā́m̐ ūciṣe dhíṣṇyā yé |
3.022.03c yā́ rocané parástāt sū́ryasya yā́ś cāvástād upatíṣṭhanta ā́paḥ ||

3.022.04a purīṣyā̀so agnáyaḥ prāvaṇébhiḥ sajóṣasaḥ |
3.022.04c juṣántāṁ yajñám adrúho 'namīvā́ íṣo mahī́ḥ ||

3.022.05a íḷām agne purudáṁsaṁ saníṁ góḥ śaśvattamáṁ hávamānāya sādha |
3.022.05c syā́n naḥ sūnús tánayo vijā́vā́gne sā́ te sumatír bhūtv asmé ||

3.023.01a nírmathitaḥ súdhita ā́ sadhásthe yúvā kavír adhvarásya praṇetā́ |
3.023.01c jū́ryatsv agnír ajáro váneṣv átrā dadhe amŕ̥taṁ jātávedāḥ ||

3.023.02a ámanthiṣṭām bhā́ratā revád agníṁ deváśravā devávātaḥ sudákṣam |
3.023.02c ágne ví paśya br̥hatā́bhí rāyéṣā́ṁ no netā́ bhavatād ánu dyū́n ||

3.023.03a dáśa kṣípaḥ pūrvyáṁ sīm ajījanan sújātam mātŕ̥ṣu priyám |
3.023.03c agníṁ stuhi daivavātáṁ devaśravo yó jánānām ásad vaśī́ ||

3.023.04a ní tvā dadhe vára ā́ pr̥thivyā́ íḷāyās padé sudinatvé áhnām |
3.023.04c dr̥ṣádvatyām mā́nuṣa āpayā́yāṁ sárasvatyāṁ revád agne didīhi ||

3.023.05a íḷām agne purudáṁsaṁ saníṁ góḥ śaśvattamáṁ hávamānāya sādha |
3.023.05c syā́n naḥ sūnús tánayo vijā́vā́gne sā́ te sumatír bhūtv asmé ||

3.024.01a ágne sáhasva pŕ̥tanā abhímātīr ápāsya |
3.024.01c duṣṭáras tárann árātīr várco dhā yajñávāhase ||

3.024.02a ágna iḷā́ sám idhyase vītíhotro ámartyaḥ |
3.024.02c juṣásva sū́ no adhvarám ||

3.024.03a ágne dyumnéna jāgr̥ve sáhasaḥ sūnav āhuta |
3.024.03c édám barhíḥ sado máma ||

3.024.04a ágne víśvebhir agníbhir devébhir mahayā gíraḥ |
3.024.04c yajñéṣu yá u cāyávaḥ ||

3.024.05a ágne dā́ dāśúṣe rayíṁ vīrávantam párīṇasam |
3.024.05c śiśīhí naḥ sūnumátaḥ ||

3.025.01a ágne diváḥ sūnúr asi prácetās tánā pr̥thivyā́ utá viśvávedāḥ |
3.025.01c ŕ̥dhag devā́m̐ ihá yajā cikitvaḥ ||

3.025.02a agníḥ sanoti vīryā̀ṇi vidvā́n sanóti vā́jam amŕ̥tāya bhū́ṣan |
3.025.02c sá no devā́m̐ éhá vahā purukṣo ||

3.025.03a agnír dyā́vāpr̥thivī́ viśvájanye ā́ bhāti devī́ amŕ̥te ámūraḥ |
3.025.03c kṣáyan vā́jaiḥ puruścandró námobhiḥ ||

3.025.04a ágna índraś ca dāśúṣo duroṇé sutā́vato yajñám ihópa yātam |
3.025.04c ámardhantā somapéyāya devā ||

3.025.05a ágne apā́ṁ sám idhyase duroṇé nítyaḥ sūno sahaso jātavedaḥ |
3.025.05c sadhásthāni maháyamāna ūtī́ ||

3.026.01a vaiśvānarám mánasāgníṁ nicā́yyā havíṣmanto anuṣatyáṁ svarvídam |
3.026.01c sudā́nuṁ deváṁ rathiráṁ vasūyávo gīrbhī́ raṇváṁ kuśikā́so havāmahe ||

3.026.02a táṁ śubhrám agním ávase havāmahe vaiśvānarám mātaríśvānam ukthyàm |
3.026.02c bŕ̥haspátim mánuṣo devátātaye vípraṁ śrótāram átithiṁ raghuṣyádam ||

3.026.03a áśvo ná krándañ jánibhiḥ sám idhyate vaiśvānaráḥ kuśikébhir yugé-yuge |
3.026.03c sá no agníḥ suvī́ryaṁ sváśvyaṁ dádhātu rátnam amŕ̥teṣu jā́gr̥viḥ ||

3.026.04a prá yantu vā́jās táviṣībhir agnáyaḥ śubhé sámmiślāḥ pŕ̥ṣatīr ayukṣata |
3.026.04c br̥hadúkṣo marúto viśvávedasaḥ prá vepayanti párvatām̐ ádābhyāḥ ||

3.026.05a agniśríyo marúto viśvákr̥ṣṭaya ā́ tveṣám ugrám áva īmahe vayám |
3.026.05c té svāníno rudríyā varṣánirṇijaḥ siṁhā́ ná heṣákratavaḥ sudā́navaḥ ||

3.026.06a vrā́taṁ-vrātaṁ gaṇáṁ-gaṇaṁ suśastíbhir agnér bhā́mam marútām ója īmahe |
3.026.06c pŕ̥ṣadaśvāso anavabhrárādhaso gántāro yajñáṁ vidátheṣu dhī́rāḥ ||

3.026.07a agnír asmi jánmanā jātávedā ghr̥tám me cákṣur amŕ̥tam ma āsán |
3.026.07c arkás tridhā́tū rájaso vimā́nó 'jasro gharmó havír asmi nā́ma ||

3.026.08a tribhíḥ pavítrair ápupod dhy àrkáṁ hr̥dā́ matíṁ jyótir ánu prajānán |
3.026.08c várṣiṣṭhaṁ rátnam akr̥ta svadhā́bhir ā́d íd dyā́vāpr̥thivī́ páry apaśyat ||

3.026.09a śatádhāram útsam ákṣīyamāṇaṁ vipaścítam pitáraṁ váktvānām |
3.026.09c meḷím mádantam pitrór upásthe táṁ rodasī pipr̥taṁ satyavā́cam ||

3.027.01a prá vo vā́jā abhídyavo havíṣmanto ghr̥tā́cyā |
3.027.01c devā́ñ jigāti sumnayúḥ ||

3.027.02a ī́ḷe agníṁ vipaścítaṁ girā́ yajñásya sā́dhanam |
3.027.02c śruṣṭīvā́naṁ dhitā́vānam ||

3.027.03a ágne śakéma te vayáṁ yámaṁ devásya vājínaḥ |
3.027.03c áti dvéṣāṁsi tarema ||

3.027.04a samidhyámāno adhvarè 'gníḥ pāvaká ī́ḍyaḥ |
3.027.04c śocíṣkeśas tám īmahe ||

3.027.05a pr̥thupā́jā ámartyo ghr̥tánirṇik svā̀hutaḥ |
3.027.05c agnír yajñásya havyavā́ṭ ||

3.027.06a táṁ sabā́dho yatásruca itthā́ dhiyā́ yajñávantaḥ |
3.027.06c ā́ cakrur agním ūtáye ||

3.027.07a hótā devó ámartyaḥ purástād eti māyáyā |
3.027.07c vidáthāni pracodáyan ||

3.027.08a vājī́ vā́jeṣu dhīyate 'dhvaréṣu prá ṇīyate |
3.027.08c vípro yajñásya sā́dhanaḥ ||

3.027.09a dhiyā́ cakre váreṇyo bhūtā́nāṁ gárbham ā́ dadhe |
3.027.09c dákṣasya pitáraṁ tánā ||

3.027.10a ní tvā dadhe váreṇyaṁ dákṣasyeḷā́ sahaskr̥ta |
3.027.10c ágne sudītím uśíjam ||

3.027.11a agníṁ yantúram aptúram r̥tásya yóge vanúṣaḥ |
3.027.11c víprā vā́jaiḥ sám indhate ||

3.027.12a ūrjó nápātam adhvaré dīdivā́ṁsam úpa dyávi |
3.027.12c agním īḷe kavíkratum ||

3.027.13a īḷényo namasyàs tirás támāṁsi darśatáḥ |
3.027.13c sám agnír idhyate vŕ̥ṣā ||

3.027.14a vŕ̥ṣo agníḥ sám idhyaté 'śvo ná devavā́hanaḥ |
3.027.14c táṁ havíṣmanta īḷate ||

3.027.15a vŕ̥ṣaṇaṁ tvā vayáṁ vr̥ṣan vŕ̥ṣaṇaḥ sám idhīmahi |
3.027.15c ágne dī́dyatam br̥hát ||

3.028.01a ágne juṣásva no havíḥ puroḷā́śaṁ jātavedaḥ |
3.028.01c prātaḥsāvé dhiyāvaso ||

3.028.02a puroḷā́ agne pacatás túbhyaṁ vā ghā páriṣkr̥taḥ |
3.028.02c táṁ juṣasva yaviṣṭhya ||

3.028.03a ágne vīhí puroḷā́śam ā́hutaṁ tiróahnyam |
3.028.03c sáhasaḥ sūnúr asy adhvaré hitáḥ ||

3.028.04a mā́dhyaṁdine sávane jātavedaḥ puroḷā́śam ihá kave juṣasva |
3.028.04c ágne yahvásya táva bhāgadhéyaṁ ná prá minanti vidátheṣu dhī́rāḥ ||

3.028.05a ágne tr̥tī́ye sávane hí kā́niṣaḥ puroḷā́śaṁ sahasaḥ sūnav ā́hutam |
3.028.05c áthā devéṣv adhvaráṁ vipanyáyā dhā́ rátnavantam amŕ̥teṣu jā́gr̥vim ||

3.028.06a ágne vr̥dhāná ā́hutim puroḷā́śaṁ jātavedaḥ |
3.028.06c juṣásva tiróahnyam ||

3.029.01a ástīdám adhimánthanam ásti prajánanaṁ kr̥tám |
3.029.01c etā́ṁ viśpátnīm ā́ bharāgním manthāma pūrváthā ||

3.029.02a aráṇyor níhito jātávedā gárbha iva súdhito garbhíṇīṣu |
3.029.02c divé-diva ī́ḍyo jāgr̥vádbhir havíṣmadbhir manuṣyèbhir agníḥ ||

3.029.03a uttānā́yām áva bharā cikitvā́n sadyáḥ právītā vŕ̥ṣaṇaṁ jajāna |
3.029.03c aruṣástūpo rúśad asya pā́ja íḷāyās putró vayúne 'janiṣṭa ||

3.029.04a íḷāyās tvā padé vayáṁ nā́bhā pr̥thivyā́ ádhi |
3.029.04c jā́tavedo ní dhīmahy ágne havyā́ya vóḷhave ||

3.029.05a mánthatā naraḥ kavím ádvayantam prácetasam amŕ̥taṁ suprátīkam |
3.029.05c yajñásya ketúm prathamám purástād agníṁ naro janayatā suśévam ||

3.029.06a yádī mánthanti bāhúbhir ví rocaté 'śvo ná vājy àruṣó váneṣv ā́ |
3.029.06c citró ná yā́mann aśvínor ánivr̥taḥ pári vr̥ṇakty áśmanas tŕ̥ṇā dáhan ||

3.029.07a jātó agnī́ rocate cékitāno vājī́ vípraḥ kaviśastáḥ sudā́nuḥ |
3.029.07c yáṁ devā́sa ī́ḍyaṁ viśvavídaṁ havyavā́ham ádadhur adhvaréṣu ||

3.029.08a sī́da hotaḥ svá u loké cikitvā́n sādáyā yajñáṁ sukr̥tásya yónau |
3.029.08c devāvī́r devā́n havíṣā yajāsy ágne br̥hád yájamāne váyo dhāḥ ||

3.029.09a kr̥ṇóta dhūmáṁ vŕ̥ṣaṇaṁ sakhāyó 'sredhanta itana vā́jam áccha |
3.029.09c ayám agníḥ pr̥tanāṣā́ṭ suvī́ro yéna devā́so ásahanta dásyūn ||

3.029.10a ayáṁ te yónir r̥tvíyo yáto jātó árocathāḥ |
3.029.10c táṁ jānánn agna ā́ sīdā́thā no vardhayā gíraḥ ||

3.029.11a tánūnápād ucyate gárbha āsuró nárāśáṁso bhavati yád vijā́yate |
3.029.11c mātaríśvā yád ámimīta mātári vā́tasya sárgo abhavat sárīmaṇi ||

3.029.12a sunirmáthā nírmathitaḥ sunidhā́ níhitaḥ kavíḥ |
3.029.12c ágne svadhvarā́ kr̥ṇu devā́n devayaté yaja ||

3.029.13a ájījanann amŕ̥tam mártyāso 'sremā́ṇaṁ taráṇiṁ vīḷújambham |
3.029.13c dáśa svásāro agrúvaḥ samīcī́ḥ púmāṁsaṁ jātám abhí sáṁ rabhante ||

3.029.14a prá saptáhotā sanakā́d arocata mātúr upásthe yád áśocad ū́dhani |
3.029.14c ná ní miṣati suráṇo divé-dive yád ásurasya jaṭhárād ájāyata ||

3.029.15a amitrāyúdho marútām iva prayā́ḥ prathamajā́ bráhmaṇo víśvam íd viduḥ |
3.029.15c dyumnávad bráhma kuśikā́sa érira éka-eko dáme agníṁ sám īdhire ||

3.029.16a yád adyá tvā prayatí yajñé asmín hótaś cikitvó 'vr̥ṇīmahīhá |
3.029.16c dhruvám ayā dhruvám utā́śamiṣṭhāḥ prajānán vidvā́m̐ úpa yāhi sómam ||

3.030.01a icchánti tvā somyā́saḥ sákhāyaḥ sunvánti sómaṁ dádhati práyāṁsi |
3.030.01c títikṣante abhíśastiṁ jánānām índra tvád ā́ káś caná hí praketáḥ ||

3.030.02a ná te dūré paramā́ cid rájāṁsy ā́ tú prá yāhi harivo háribhyām |
3.030.02c sthirā́ya vŕ̥ṣṇe sávanā kr̥témā́ yuktā́ grā́vāṇaḥ samidhāné agnaú ||

3.030.03a índraḥ suśípro maghávā tárutro mahā́vrātas tuvikūrmír ŕ̥ghāvān |
3.030.03c yád ugró dhā́ bādhitó mártyeṣu kvà tyā́ te vr̥ṣabha vīryā̀ṇi ||

3.030.04a tváṁ hí ṣmā cyāváyann ácyutāny éko vr̥trā́ cárasi jíghnamānaḥ |
3.030.04c táva dyā́vāpr̥thivī́ párvatāsó 'nu vratā́ya nímiteva tasthuḥ ||

3.030.05a utā́bhaye puruhūta śrávobhir éko dr̥ḷhám avado vr̥trahā́ sán |
3.030.05c imé cid indra ródasī apāré yát saṁgr̥bhṇā́ maghavan kāśír ít te ||

3.030.06a prá sū́ ta indra pravátā háribhyām prá te vájraḥ pramr̥ṇánn etu śátrūn |
3.030.06c jahí pratīcó anūcáḥ párāco víśvaṁ satyáṁ kr̥ṇuhi viṣṭám astu ||

3.030.07a yásmai dhā́yur ádadhā mártyāyā́bhaktaṁ cid bhajate gehyàṁ sáḥ |
3.030.07c bhadrā́ ta indra sumatír ghr̥tā́cī sahásradānā puruhūta rātíḥ ||

3.030.08a sahádānum puruhūta kṣiyántam ahastám indra sám piṇak kúṇārum |
3.030.08c abhí vr̥tráṁ várdhamānam píyārum apā́dam indra tavásā jaghantha ||

3.030.09a ní sāmanā́m iṣirā́m indra bhū́mim mahī́m apārā́ṁ sádane sasattha |
3.030.09c ástabhnād dyā́ṁ vr̥ṣabhó antárikṣam árṣantv ā́pas tváyehá prásūtāḥ ||

3.030.10a alātr̥ṇó valá indra vrajó góḥ purā́ hántor bháyamāno vy ā̀ra |
3.030.10c sugā́n pathó akr̥ṇon niráje gā́ḥ prā́van vā́ṇīḥ puruhūtáṁ dhámantīḥ ||

3.030.11a éko dvé vásumatī samīcī́ índra ā́ paprau pr̥thivī́m utá dyā́m |
3.030.11c utā́ntárikṣād abhí naḥ samīká iṣó rathī́ḥ sayújaḥ śūra vā́jān ||

3.030.12a díśaḥ sū́ryo ná mināti prádiṣṭā divé-dive háryaśvaprasūtāḥ |
3.030.12c sáṁ yád ā́naḷ ádhvana ā́d íd áśvair vimócanaṁ kr̥ṇute tát tv àsya ||

3.030.13a dídr̥kṣanta uṣáso yā́mann aktór vivásvatyā máhi citrám ánīkam |
3.030.13c víśve jānanti mahinā́ yád ā́gād índrasya kárma súkr̥tā purū́ṇi ||

3.030.14a máhi jyótir níhitaṁ vakṣáṇāsv āmā́ pakváṁ carati bíbhratī gaúḥ |
3.030.14c víśvaṁ svā́dma sámbhr̥tam usríyāyāṁ yát sīm índro ádadhād bhójanāya ||

3.030.15a índra dŕ̥hya yāmakośā́ abhūvan yajñā́ya śikṣa gr̥ṇaté sákhibhyaḥ |
3.030.15c durmāyávo durévā mártyāso niṣaṅgíṇo ripávo hántvāsaḥ ||

3.030.16a sáṁ ghóṣaḥ śr̥ṇve 'vamaír amítrair jahī́ ny èṣv aśániṁ tápiṣṭhām |
3.030.16c vr̥ścém adhástād ví rujā sáhasva jahí rákṣo maghavan randháyasva ||

3.030.17a úd vr̥ha rákṣaḥ sahámūlam indra vr̥ścā́ mádhyam práty ágraṁ śr̥ṇīhi |
3.030.17c ā́ kī́vataḥ salalū́kaṁ cakartha brahmadvíṣe tápuṣiṁ hetím asya ||

3.030.18a svastáye vājíbhiś ca praṇetaḥ sáṁ yán mahī́r íṣa āsátsi pūrvī́ḥ |
3.030.18c rāyó vantā́ro br̥hatáḥ syāmāsmé astu bhága indra prajā́vān ||

3.030.19a ā́ no bhara bhágam indra dyumántaṁ ní te deṣṇásya dhīmahi prareké |
3.030.19c ūrvá iva paprathe kā́mo asmé tám ā́ pr̥ṇa vasupate vásūnām ||

3.030.20a imáṁ kā́mam mandayā góbhir áśvaiś candrávatā rā́dhasā papráthaś ca |
3.030.20c svaryávo matíbhis túbhyaṁ víprā índrāya vā́haḥ kuśikā́so akran ||

3.030.21a ā́ no gotrā́ dardr̥hi gopate gā́ḥ sám asmábhyaṁ sanáyo yantu vā́jāḥ |
3.030.21c divákṣā asi vr̥ṣabha satyáśuṣmo 'smábhyaṁ sú maghavan bodhi godā́ḥ ||

3.030.22a śunáṁ huvema maghávānam índram asmín bháre nŕ̥tamaṁ vā́jasātau |
3.030.22c śr̥ṇvántam ugrám ūtáye samátsu ghnántaṁ vr̥trā́ṇi saṁjítaṁ dhánānām ||

3.031.01a śā́sad váhnir duhitúr naptyàṁ gād vidvā́m̐ r̥tásya dī́dhitiṁ saparyán |
3.031.01c pitā́ yátra duhitúḥ sékam r̥ñján sáṁ śagmyèna mánasā dadhanvé ||

3.031.02a ná jāmáye tā́nvo rikthám āraik cakā́ra gárbhaṁ sanitúr nidhā́nam |
3.031.02c yádī mātáro janáyanta váhnim anyáḥ kartā́ sukŕ̥tor anyá r̥ndhán ||

3.031.03a agnír jajñe juhvā̀ réjamāno mahás putrā́m̐ aruṣásya prayákṣe |
3.031.03c mahā́n gárbho máhy ā́ jātám eṣām mahī́ pravŕ̥d dháryaśvasya yajñaíḥ ||

3.031.04a abhí jaítrīr asacanta spr̥dhānám máhi jyótis támaso nír ajānan |
3.031.04c táṁ jānatī́ḥ práty úd āyann uṣā́saḥ pátir gávām abhavad éka índraḥ ||

3.031.05a vīḷaú satī́r abhí dhī́rā atr̥ndan prācā́hinvan mánasā saptá víprāḥ |
3.031.05c víśvām avindan pathyā̀m r̥tásya prajānánn ít tā́ námasā́ viveśa ||

3.031.06a vidád yádī sarámā rugṇám ádrer máhi pā́thaḥ pūrvyáṁ sadhryàk kaḥ |
3.031.06c ágraṁ nayat supády ákṣarāṇām ácchā rávam prathamā́ jānatī́ gāt ||

3.031.07a ágacchad u vípratamaḥ sakhīyánn ásūdayat sukŕ̥te gárbham ádriḥ |
3.031.07c sasā́na máryo yúvabhir makhasyánn áthābhavad áṅgirāḥ sadyó árcan ||

3.031.08a satáḥ-sataḥ pratimā́nam purobhū́r víśvā veda jánimā hánti śúṣṇam |
3.031.08c prá ṇo diváḥ padavī́r gavyúr árcan sákhā sákhīm̐r amuñcan nír avadyā́t ||

3.031.09a ní gavyatā́ mánasā sedur arkaíḥ kr̥ṇvānā́so amr̥tatvā́ya gātúm |
3.031.09c idáṁ cin nú sádanam bhū́ry eṣāṁ yéna mā́sām̐ ásiṣāsann r̥téna ||

3.031.10a sampáśyamānā amadann abhí svám páyaḥ pratnásya rétaso dúghānāḥ |
3.031.10c ví ródasī atapad ghóṣa eṣāṁ jāté niṣṭhā́m ádadhur góṣu vīrā́n ||

3.031.11a sá jātébhir vr̥trahā́ séd u havyaír úd usríyā asr̥jad índro arkaíḥ |
3.031.11c urūcy àsmai ghr̥távad bhárantī mádhu svā́dma duduhe jényā gaúḥ ||

3.031.12a pitré cic cakruḥ sádanaṁ sám asmai máhi tvíṣīmat sukŕ̥to ví hí khyán |
3.031.12c viṣkabhnántaḥ skámbhanenā jánitrī ā́sīnā ūrdhváṁ rabhasáṁ ví minvan ||

3.031.13a mahī́ yádi dhiṣáṇā śiśnáthe dhā́t sadyovŕ̥dhaṁ vibhvàṁ ródasyoḥ |
3.031.13c gíro yásminn anavadyā́ḥ samīcī́r víśvā índrāya táviṣīr ánuttāḥ ||

3.031.14a máhy ā́ te sakhyáṁ vaśmi śaktī́r ā́ vr̥traghné niyúto yanti pūrvī́ḥ |
3.031.14c máhi stotrám áva ā́ganma sūrér asmā́kaṁ sú maghavan bodhi gopā́ḥ ||

3.031.15a máhi kṣétram purú ścandráṁ vividvā́n ā́d ít sákhibhyaś caráthaṁ sám airat |
3.031.15c índro nŕ̥bhir ajanad dī́dyānaḥ sākáṁ sū́ryam uṣásaṁ gātúm agním ||

3.031.16a apáś cid eṣá vibhvò dámūnāḥ prá sadhrī́cīr asr̥jad viśváścandrāḥ |
3.031.16c mádhvaḥ punānā́ḥ kavíbhiḥ pavítrair dyúbhir hinvanty aktúbhir dhánutrīḥ ||

3.031.17a ánu kr̥ṣṇé vásudhitī jihāte ubhé sū́ryasya maṁhánā yájatre |
3.031.17c pári yát te mahimā́naṁ vr̥jádhyai sákhāya indra kā́myā r̥jipyā́ḥ ||

3.031.18a pátir bhava vr̥trahan sūnŕ̥tānāṁ girā́ṁ viśvā́yur vr̥ṣabhó vayodhā́ḥ |
3.031.18c ā́ no gahi sakhyébhiḥ śivébhir mahā́n mahī́bhir ūtíbhiḥ saraṇyán ||

3.031.19a tám aṅgirasván námasā saparyán návyaṁ kr̥ṇomi sányase purājā́m |
3.031.19c drúho ví yāhi bahulā́ ádevīḥ svàś ca no maghavan sātáye dhāḥ ||

3.031.20a míhaḥ pāvakā́ḥ prátatā abhūvan svastí naḥ pipr̥hi pārám āsām |
3.031.20c índra tváṁ rathiráḥ pāhi no riṣó makṣū́-makṣū kr̥ṇuhi gojíto naḥ ||

3.031.21a ádediṣṭa vr̥trahā́ gópatir gā́ antáḥ kr̥ṣṇā́m̐ aruṣaír dhā́mabhir gāt |
3.031.21c prá sūnŕ̥tā diśámāna r̥téna dúraś ca víśvā avr̥ṇod ápa svā́ḥ ||

3.031.22a śunáṁ huvema maghávānam índram asmín bháre nŕ̥tamaṁ vā́jasātau |
3.031.22c śr̥ṇvántam ugrám ūtáye samátsu ghnántaṁ vr̥trā́ṇi saṁjítaṁ dhánānām ||

3.032.01a índra sómaṁ somapate píbemám mā́dhyaṁdinaṁ sávanaṁ cā́ru yát te |
3.032.01c praprúthyā śípre maghavann r̥jīṣin vimúcyā hárī ihá mādayasva ||

3.032.02a gávāśiram manthínam indra śukrám píbā sómaṁ rarimā́ te mádāya |
3.032.02c brahmakŕ̥tā mā́rutenā gaṇéna sajóṣā rudraís tr̥pád ā́ vr̥ṣasva ||

3.032.03a yé te śúṣmaṁ yé táviṣīm ávardhann árcanta indra marútas ta ójaḥ |
3.032.03c mā́dhyaṁdine sávane vajrahasta píbā rudrébhiḥ ságaṇaḥ suśipra ||

3.032.04a tá ín nv àsya mádhumad vivipra índrasya śárdho marúto yá ā́san |
3.032.04c yébhir vr̥trásyeṣitó vivédāmarmáṇo mányamānasya márma ||

3.032.05a manuṣvád indra sávanaṁ juṣāṇáḥ píbā sómaṁ śáśvate vīryā̀ya |
3.032.05c sá ā́ vavr̥tsva haryaśva yajñaíḥ saraṇyúbhir apó árṇā sisarṣi ||

3.032.06a tvám apó yád dha vr̥tráṁ jaghanvā́m̐ átyām̐ iva prā́sr̥jaḥ sártavā́jaú |
3.032.06c śáyānam indra cáratā vadhéna vavrivā́ṁsam pári devī́r ádevam ||

3.032.07a yájāma ín námasā vr̥ddhám índram br̥hántam r̥ṣvám ajáraṁ yúvānam |
3.032.07c yásya priyé mamátur yajñíyasya ná ródasī mahimā́nam mamā́te ||

3.032.08a índrasya kárma súkr̥tā purū́ṇi vratā́ni devā́ ná minanti víśve |
3.032.08c dādhā́ra yáḥ pr̥thivī́ṁ dyā́m utémā́ṁ jajā́na sū́ryam uṣásaṁ sudáṁsāḥ ||

3.032.09a ádrogha satyáṁ táva tán mahitváṁ sadyó yáj jātó ápibo ha sómam |
3.032.09c ná dyā́va indra tavásas ta ójo nā́hā ná mā́sāḥ śarádo varanta ||

3.032.10a tváṁ sadyó apibo jātá indra mádāya sómam paramé vyòman |
3.032.10c yád dha dyā́vāpr̥thivī́ ā́viveśīr áthābhavaḥ pūrvyáḥ kārúdhāyāḥ ||

3.032.11a áhann áhim pariśáyānam árṇa ojāyámānaṁ tuvijāta távyān |
3.032.11c ná te mahitvám ánu bhūd ádha dyaúr yád anyáyā sphigyā̀ kṣā́m ávasthāḥ ||

3.032.12a yajñó hí ta indra várdhano bhū́d utá priyáḥ sutásomo miyédhaḥ |
3.032.12c yajñéna yajñám ava yajñíyaḥ sán yajñás te vájram ahihátya āvat ||

3.032.13a yajñénéndram ávasā́ cakre arvā́g aínaṁ sumnā́ya návyase vavr̥tyām |
3.032.13c yáḥ stómebhir vāvr̥dhé pūrvyébhir yó madhyamébhir utá nū́tanebhiḥ ||

3.032.14a vivéṣa yán mā dhiṣáṇā jajā́na stávai purā́ pā́ryād índram áhnaḥ |
3.032.14c áṁhaso yátra pīpárad yáthā no nāvéva yā́ntam ubháye havante ||

3.032.15a ā́pūrṇo asya kaláśaḥ svā́hā sékteva kóśaṁ sisice píbadhyai |
3.032.15c sám u priyā́ ā́vavr̥tran mádāya pradakṣiṇíd abhí sómāsa índram ||

3.032.16a ná tvā gabhīráḥ puruhūta síndhur nā́drayaḥ pári ṣánto varanta |
3.032.16c itthā́ sákhibhya iṣitó yád indrā́ dr̥ḷháṁ cid árujo gávyam ūrvám ||

3.032.17a śunáṁ huvema maghávānam índram asmín bháre nŕ̥tamaṁ vā́jasātau |
3.032.17c śr̥ṇvántam ugrám ūtáye samátsu ghnántaṁ vr̥trā́ṇi saṁjítaṁ dhánānām ||

3.033.01a prá párvatānām uśatī́ upásthād áśve iva víṣite hā́samāne |
3.033.01c gā́veva śubhré mātárā rihāṇé vípāṭ chutudrī́ páyasā javete ||

3.033.02a índreṣite prasavám bhíkṣamāṇe ácchā samudráṁ rathyèva yāthaḥ |
3.033.02c samārāṇé ūrmíbhiḥ pínvamāne anyā́ vām anyā́m ápy eti śubhre ||

3.033.03a ácchā síndhum mātŕ̥tamām ayāsaṁ vípāśam urvī́ṁ subhágām aganma |
3.033.03c vatsám iva mātárā saṁrihāṇé samānáṁ yónim ánu saṁcárantī ||

3.033.04a enā́ vayám páyasā pínvamānā ánu yóniṁ devákr̥taṁ cárantīḥ |
3.033.04c ná vártave prasaváḥ sárgataktaḥ kiṁyúr vípro nadyò johavīti ||

3.033.05a rámadhvam me vácase somyā́ya ŕ̥tāvarīr úpa muhūrtám évaiḥ |
3.033.05c prá síndhum ácchā br̥hatī́ manīṣā́vasyúr ahve kuśikásya sūnúḥ ||

3.033.06a índro asmā́m̐ aradad vájrabāhur ápāhan vr̥trám paridhíṁ nadī́nām |
3.033.06c devò 'nayat savitā́ supāṇís tásya vayám prasavé yāma urvī́ḥ ||

3.033.07a pravā́cyaṁ śaśvadhā́ vīryàṁ tád índrasya kárma yád áhiṁ vivr̥ścát |
3.033.07c ví vájreṇa pariṣádo jaghānā́yann ā́pó 'yanam icchámānāḥ ||

3.033.08a etád váco jaritar mā́pi mr̥ṣṭhā ā́ yát te ghóṣān úttarā yugā́ni |
3.033.08c ukthéṣu kāro práti no juṣasva mā́ no ní kaḥ puruṣatrā́ námas te ||

3.033.09a ó ṣú svasāraḥ kāráve śr̥ṇota yayaú vo dūrā́d ánasā ráthena |
3.033.09c ní ṣū́ namadhvam bhávatā supārā́ adhoakṣā́ḥ sindhavaḥ srotyā́bhiḥ ||

3.033.10a ā́ te kāro śr̥ṇavāmā vácāṁsi yayā́tha dūrā́d ánasā ráthena |
3.033.10c ní te naṁsai pīpyānéva yóṣā máryāyeva kanyā̀ śaśvacaí te ||

3.033.11a yád aṅgá tvā bharatā́ḥ saṁtáreyur gavyán grā́ma iṣitá índrajūtaḥ |
3.033.11c árṣād áha prasaváḥ sárgatakta ā́ vo vr̥ṇe sumatíṁ yajñíyānām ||

3.033.12a átāriṣur bharatā́ gavyávaḥ sám ábhakta vípraḥ sumatíṁ nadī́nām |
3.033.12c prá pinvadhvam iṣáyantīḥ surā́dhā ā́ vakṣáṇāḥ pr̥ṇádhvaṁ yātá śī́bham ||

3.033.13a úd va ūrmíḥ śámyā hantv ā́po yóktrāṇi muñcata |
3.033.13c mā́duṣkr̥tau vyènasāghnyaú śū́nam ā́ratām ||

3.034.01a índraḥ pūrbhíd ā́tirad dā́sam arkaír vidádvasur dáyamāno ví śátrūn |
3.034.01c bráhmajūtas tanvā̀ vāvr̥dhānó bhū́ridātra ā́pr̥ṇad ródasī ubhé ||

3.034.02a makhásya te taviṣásya prá jūtím íyarmi vā́cam amŕ̥tāya bhū́ṣan |
3.034.02c índra kṣitīnā́m asi mā́nuṣīṇāṁ viśā́ṁ daívīnām utá pūrvayā́vā ||

3.034.03a índro vr̥trám avr̥ṇoc chárdhanītiḥ prá māyínām aminād várpaṇītiḥ |
3.034.03c áhan vyàṁsam uśádhag váneṣv āvír dhénā akr̥ṇod rāmyā́ṇām ||

3.034.04a índraḥ svarṣā́ janáyann áhāni jigā́yośígbhiḥ pŕ̥tanā abhiṣṭíḥ |
3.034.04c prā́rocayan mánave ketúm áhnām ávindaj jyótir br̥haté ráṇāya ||

3.034.05a índras tújo barháṇā ā́ viveśa nr̥vád dádhāno náryā purū́ṇi |
3.034.05c ácetayad dhíya imā́ jaritré prémáṁ várṇam atirac chukrám āsām ||

3.034.06a mahó mahā́ni panayanty asyéndrasya kárma súkr̥tā purū́ṇi |
3.034.06c vr̥jánena vr̥jinā́n sám pipeṣa māyā́bhir dásyūm̐r abhíbhūtyojāḥ ||

3.034.07a yudhéndro mahnā́ várivaś cakāra devébhyaḥ sátpatiś carṣaṇiprā́ḥ |
3.034.07c vivásvataḥ sádane asya tā́ni víprā ukthébhiḥ kaváyo gr̥ṇanti ||

3.034.08a satrāsā́haṁ váreṇyaṁ sahodā́ṁ sasavā́ṁsaṁ svàr apáś ca devī́ḥ |
3.034.08c sasā́na yáḥ pr̥thivī́ṁ dyā́m utémā́m índram madanty ánu dhī́raṇāsaḥ ||

3.034.09a sasā́nā́tyām̐ utá sū́ryaṁ sasānéndraḥ sasāna purubhójasaṁ gā́m |
3.034.09c hiraṇyáyam utá bhógaṁ sasāna hatvī́ dásyūn prā́ryaṁ várṇam āvat ||

3.034.10a índra óṣadhīr asanod áhāni vánaspátīm̐r asanod antárikṣam |
3.034.10c bibhéda valáṁ nunudé vívācó 'thābhavad damitā́bhíkratūnām ||

3.034.11a śunáṁ huvema maghávānam índram asmín bháre nŕ̥tamaṁ vā́jasātau |
3.034.11c śr̥ṇvántam ugrám ūtáye samátsu ghnántaṁ vr̥trā́ṇi saṁjítaṁ dhánānām ||

3.035.01a tíṣṭhā hárī rátha ā́ yujyámānā yāhí vāyúr ná niyúto no áccha |
3.035.01c píbāsy ándho abhísr̥ṣṭo asmé índra svā́hā rarimā́ te mádāya ||

3.035.02a úpājirā́ puruhūtā́ya sáptī hárī ráthasya dhūrṣv ā́ yunajmi |
3.035.02c dravád yáthā sámbhr̥taṁ viśvátaś cid úpemáṁ yajñám ā́ vahāta índram ||

3.035.03a úpo nayasva vŕ̥ṣaṇā tapuṣpótém ava tváṁ vr̥ṣabha svadhāvaḥ |
3.035.03c grásetām áśvā ví mucehá śóṇā divé-dive sadŕ̥śīr addhi dhānā́ḥ ||

3.035.04a bráhmaṇā te brahmayújā yunajmi hárī sákhāyā sadhamā́da āśū́ |
3.035.04c sthiráṁ ráthaṁ sukhám indrādhitíṣṭhan prajānán vidvā́m̐ úpa yāhi sómam ||

3.035.05a mā́ te hárī vŕ̥ṣaṇā vītápr̥ṣṭhā ní rīraman yájamānāso anyé |
3.035.05c atyā́yāhi śáśvato vayáṁ té 'raṁ sutébhiḥ kr̥ṇavāma sómaiḥ ||

3.035.06a távāyáṁ sómas tvám éhy arvā́ṅ chaśvattamáṁ sumánā asyá pāhi |
3.035.06c asmín yajñé barhíṣy ā́ niṣádyā dadhiṣvémáṁ jaṭhára índum indra ||

3.035.07a stīrṇáṁ te barhíḥ sutá indra sómaḥ kr̥tā́ dhānā́ áttave te háribhyām |
3.035.07c tádokase puruśā́kāya vŕ̥ṣṇe marútvate túbhyaṁ rātā́ havī́ṁṣi ||

3.035.08a imáṁ náraḥ párvatās túbhyam ā́paḥ sám indra góbhir mádhumantam akran |
3.035.08c tásyāgátyā sumánā r̥ṣva pāhi prajānán vidvā́n pathyā̀ ánu svā́ḥ ||

3.035.09a yā́m̐ ā́bhajo marúta indra sóme yé tvā́m ávardhann ábhavan gaṇás te |
3.035.09c tébhir etáṁ sajóṣā vāvaśānò 'gnéḥ piba jihváyā sómam indra ||

3.035.10a índra píba svadháyā cit sutásyāgnér vā pāhi jihváyā yajatra |
3.035.10c adhvaryór vā práyataṁ śakra hástād dhótur vā yajñáṁ havíṣo juṣasva ||

3.035.11a śunáṁ huvema maghávānam índram asmín bháre nŕ̥tamaṁ vā́jasātau |
3.035.11c śr̥ṇvántam ugrám ūtáye samátsu ghnántaṁ vr̥trā́ṇi saṁjítaṁ dhánānām ||

3.036.01a imā́m ū ṣú prábhr̥tiṁ sātáye dhāḥ śáśvac-chaśvad ūtíbhir yā́damānaḥ |
3.036.01c suté-sute vāvr̥dhe várdhanebhir yáḥ kármabhir mahádbhiḥ súśruto bhū́t ||

3.036.02a índrāya sómāḥ pradívo vídānā r̥bhúr yébhir vŕ̥ṣaparvā víhāyāḥ |
3.036.02c prayamyámānān práti ṣū́ gr̥bhāyéndra píba vŕ̥ṣadhūtasya vŕ̥ṣṇaḥ ||

3.036.03a píbā várdhasva táva ghā sutā́sa índra sómāsaḥ prathamā́ utémé |
3.036.03c yáthā́pibaḥ pūrvyā́m̐ indra sómām̐ evā́ pāhi pányo adyā́ návīyān ||

3.036.04a mahā́m̐ ámatro vr̥jáne virapśy ùgráṁ śávaḥ patyate dhr̥ṣṇv ójaḥ |
3.036.04c nā́ha vivyāca pr̥thivī́ canaínaṁ yát sómāso háryaśvam ámandan ||

3.036.05a mahā́m̐ ugró vāvr̥dhe vīryā̀ya samā́cakre vr̥ṣabháḥ kā́vyena |
3.036.05c índro bhágo vājadā́ asya gā́vaḥ prá jāyante dákṣiṇā asya pūrvī́ḥ ||

3.036.06a prá yát síndhavaḥ prasaváṁ yáthā́yann ā́paḥ samudráṁ rathyèva jagmuḥ |
3.036.06c átaś cid índraḥ sádaso várīyān yád īṁ sómaḥ pr̥ṇáti dugdhó aṁśúḥ ||

3.036.07a samudréṇa síndhavo yā́damānā índrāya sómaṁ súṣutam bhárantaḥ |
3.036.07c aṁśúṁ duhanti hastíno bharítrair mádhvaḥ punanti dhā́rayā pavítraiḥ ||

3.036.08a hradā́ iva kukṣáyaḥ somadhā́nāḥ sám ī vivyāca sávanā purū́ṇi |
3.036.08c ánnā yád índraḥ prathamā́ vy ā́śa vr̥tráṁ jaghanvā́m̐ avr̥ṇīta sómam ||

3.036.09a ā́ tū́ bhara mā́kir etát pári ṣṭhād vidmā́ hí tvā vásupatiṁ vásūnām |
3.036.09c índra yát te mā́hinaṁ dátram ásty asmábhyaṁ tád dharyaśva prá yandhi ||

3.036.10a asmé prá yandhi maghavann r̥jīṣinn índra rāyó viśvávārasya bhū́reḥ |
3.036.10c asmé śatáṁ śarádo jīváse dhā asmé vīrā́ñ cháśvata indra śiprin ||

3.036.11a śunáṁ huvema maghávānam índram asmín bháre nŕ̥tamaṁ vā́jasātau |
3.036.11c śr̥ṇvántam ugrám ūtáye samátsu ghnántaṁ vr̥trā́ṇi saṁjítaṁ dhánānām ||

3.037.01a vā́rtrahatyāya śávase pr̥tanāṣā́hyāya ca |
3.037.01c índra tvā́ vartayāmasi ||

3.037.02a arvācī́naṁ sú te mána utá cákṣuḥ śatakrato |
3.037.02c índra kr̥ṇvántu vāghátaḥ ||

3.037.03a nā́māni te śatakrato víśvābhir gīrbhír īmahe |
3.037.03c índrābhimātiṣā́hye ||

3.037.04a puruṣṭutásya dhā́mabhiḥ śaténa mahayāmasi |
3.037.04c índrasya carṣaṇīdhŕ̥taḥ ||

3.037.05a índraṁ vr̥trā́ya hántave puruhūtám úpa bruve |
3.037.05c bháreṣu vā́jasātaye ||

3.037.06a vā́jeṣu sāsahír bhava tvā́m īmahe śatakrato |
3.037.06c índra vr̥trā́ya hántave ||

3.037.07a dyumnéṣu pr̥tanā́jye pr̥tsutū́rṣu śrávaḥsu ca |
3.037.07c índra sā́kṣvābhímātiṣu ||

3.037.08a śuṣmíntamaṁ na ūtáye dyumnínam pāhi jā́gr̥vim |
3.037.08c índra sómaṁ śatakrato ||

3.037.09a indriyā́ṇi śatakrato yā́ te jáneṣu pañcásu |
3.037.09c índra tā́ni ta ā́ vr̥ṇe ||

3.037.10a ágann indra śrávo br̥hád dyumnáṁ dadhiṣva duṣṭáram |
3.037.10c út te śúṣmaṁ tirāmasi ||

3.037.11a arvāváto na ā́ gahy átho śakra parāvátaḥ |
3.037.11c u lokó yás te adriva índrehá táta ā́ gahi ||

3.038.01a abhí táṣṭeva dīdhayā manīṣā́m átyo ná vājī́ sudhúro jíhānaḥ |
3.038.01c abhí priyā́ṇi mármr̥śat párāṇi kavī́m̐r icchāmi saṁdŕ̥śe sumedhā́ḥ ||

3.038.02a inótá pr̥ccha jánimā kavīnā́m manodhŕ̥taḥ sukŕ̥tas takṣata dyā́m |
3.038.02c imā́ u te praṇyò várdhamānā mánovātā ádha nú dhármaṇi gman ||

3.038.03a ní ṣīm íd átra gúhyā dádhānā utá kṣatrā́ya ródasī sám añjan |
3.038.03c sám mā́trābhir mamiré yemúr urvī́ antár mahī́ sámr̥te dhā́yase dhuḥ ||

3.038.04a ātíṣṭhantam pári víśve abhūṣañ chríyo vásānaś carati svárociḥ |
3.038.04c mahát tád vŕ̥ṣṇo ásurasya nā́mā́ viśvárūpo amŕ̥tāni tasthau ||

3.038.05a ásūta pū́rvo vr̥ṣabhó jyā́yān imā́ asya śurúdhaḥ santi pūrvī́ḥ |
3.038.05c dívo napātā vidáthasya dhībhíḥ kṣatráṁ rājānā pradívo dadhāthe ||

3.038.06a trī́ṇi rājānā vidáthe purū́ṇi pári víśvāni bhūṣathaḥ sádāṁsi |
3.038.06c ápaśyam átra mánasā jaganvā́n vraté gandharvā́m̐ ápi vāyúkeśān ||

3.038.07a tád ín nv àsya vr̥ṣabhásya dhenór ā́ nā́mabhir mamire sákmyaṁ góḥ |
3.038.07c anyád-anyad asuryàṁ vásānā ní māyíno mamire rūpám asmin ||

3.038.08a tád ín nv àsya savitúr nákir me hiraṇyáyīm amátiṁ yā́m áśiśret |
3.038.08c ā́ suṣṭutī́ ródasī viśvaminvé ápīva yóṣā jánimāni vavre ||

3.038.09a yuvám pratnásya sādhatho mahó yád daívī svastíḥ pári ṇaḥ syātam |
3.038.09c gopā́jihvasya tasthúṣo vírūpā víśve paśyanti māyínaḥ kr̥tā́ni ||

3.038.10a śunáṁ huvema maghávānam índram asmín bháre nŕ̥tamaṁ vā́jasātau |
3.038.10c śr̥ṇvántam ugrám ūtáye samátsu ghnántaṁ vr̥trā́ṇi saṁjítaṁ dhánānām ||

3.039.01a índram matír hr̥dá ā́ vacyámānā́cchā pátiṁ stómataṣṭā jigāti |
3.039.01c yā́ jā́gr̥vir vidáthe śasyámānéndra yát te jā́yate viddhí tásya ||

3.039.02a diváś cid ā́ pūrvyā́ jā́yamānā ví jā́gr̥vir vidáthe śasyámānā |
3.039.02c bhadrā́ vástrāṇy árjunā vásānā séyám asmé sanajā́ pítryā dhī́ḥ ||

3.039.03a yamā́ cid átra yamasū́r asūta jihvā́yā ágram pátad ā́ hy ásthāt |
3.039.03c vápūṁṣi jātā́ mithunā́ sacete tamohánā tápuṣo budhná étā ||

3.039.04a nákir eṣāṁ ninditā́ mártyeṣu yé asmā́kam pitáro góṣu yodhā́ḥ |
3.039.04c índra eṣāṁ dr̥ṁhitā́ mā́hināvān úd gotrā́ṇi sasr̥je daṁsánāvān ||

3.039.05a sákhā ha yátra sákhibhir návagvair abhijñv ā́ sátvabhir gā́ anugmán |
3.039.05c satyáṁ tád índro daśábhir dáśagvaiḥ sū́ryaṁ viveda támasi kṣiyántam ||

3.039.06a índro mádhu sámbhr̥tam usríyāyām padvád viveda śaphávan náme góḥ |
3.039.06c gúhā hitáṁ gúhyaṁ gūḷhám apsú háste dadhe dákṣiṇe dákṣiṇāvān ||

3.039.07a jyótir vr̥ṇīta támaso vijānánn āré syāma duritā́d abhī́ke |
3.039.07c imā́ gíraḥ somapāḥ somavr̥ddha juṣásvendra purutámasya kāróḥ ||

3.039.08a jyótir yajñā́ya ródasī ánu ṣyād āré syāma duritásya bhū́reḥ |
3.039.08c bhū́ri cid dhí tujató mártyasya supārā́so vasavo barháṇāvat ||

3.039.09a śunáṁ huvema maghávānam índram asmín bháre nŕ̥tamaṁ vā́jasātau |
3.039.09c śr̥ṇvántam ugrám ūtáye samátsu ghnántaṁ vr̥trā́ṇi saṁjítaṁ dhánānām ||

3.040.01a índra tvā vr̥ṣabháṁ vayáṁ suté sóme havāmahe |
3.040.01c sá pāhi mádhvo ándhasaḥ ||

3.040.02a índra kratuvídaṁ sutáṁ sómaṁ harya puruṣṭuta |
3.040.02c píbā́ vr̥ṣasva tā́tr̥pim ||

3.040.03a índra prá ṇo dhitā́vānaṁ yajñáṁ víśvebhir devébhiḥ |
3.040.03c tirá stavāna viśpate ||

3.040.04a índra sómāḥ sutā́ imé táva prá yanti satpate |
3.040.04c kṣáyaṁ candrā́sa índavaḥ ||

3.040.05a dadhiṣvā́ jaṭháre sutáṁ sómam indra váreṇyam |
3.040.05c táva dyukṣā́sa índavaḥ ||

3.040.06a gírvaṇaḥ pāhí naḥ sutám mádhor dhā́rābhir ajyase |
3.040.06c índra tvā́dātam íd yáśaḥ ||

3.040.07a abhí dyumnā́ni vanína índraṁ sacante ákṣitā |
3.040.07c pītvī́ sómasya vāvr̥dhe ||

3.040.08a arvāváto na ā́ gahi parāvátaś ca vr̥trahan |
3.040.08c imā́ juṣasva no gíraḥ ||

3.040.09a yád antarā́ parāvátam arvāvátaṁ ca hūyáse |
3.040.09c índrehá táta ā́ gahi ||

3.041.01a ā́ tū́ na indra madryàg ghuvānáḥ sómapītaye |
3.041.01c háribhyāṁ yāhy adrivaḥ ||

3.041.02a sattó hótā na r̥tvíyas tistiré barhír ānuṣák |
3.041.02c áyujran prātár ádrayaḥ ||

3.041.03a imā́ bráhma brahmavāhaḥ kriyánta ā́ barhíḥ sīda |
3.041.03c vīhí śūra puroḷā́śam ||

3.041.04a rārandhí sávaneṣu ṇa eṣú stómeṣu vr̥trahan |
3.041.04c ukthéṣv indra girvaṇaḥ ||

3.041.05a matáyaḥ somapā́m urúṁ rihánti śávasas pátim |
3.041.05c índraṁ vatsáṁ ná mātáraḥ ||

3.041.06a sá mandasvā hy ándhaso rā́dhase tanvā̀ mahé |
3.041.06c ná stotā́raṁ nidé karaḥ ||

3.041.07a vayám indra tvāyávo havíṣmanto jarāmahe |
3.041.07c utá tvám asmayúr vaso ||

3.041.08a mā́ré asmád ví mumuco háripriyārvā́ṅ yāhi |
3.041.08c índra svadhāvo mátsvehá ||

3.041.09a arvā́ñcaṁ tvā sukhé ráthe váhatām indra keśínā |
3.041.09c ghr̥tásnū barhír āsáde ||

3.042.01a úpa naḥ sutám ā́ gahi sómam indra gávāśiram |
3.042.01c háribhyāṁ yás te asmayúḥ ||

3.042.02a tám indra mádam ā́ gahi barhiḥṣṭhā́ṁ grā́vabhiḥ sutám |
3.042.02c kuvín nv àsya tr̥pṇávaḥ ||

3.042.03a índram itthā́ gíro mámā́cchāgur iṣitā́ itáḥ |
3.042.03c āvŕ̥te sómapītaye ||

3.042.04a índraṁ sómasya pītáye stómair ihá havāmahe |
3.042.04c ukthébhiḥ kuvíd āgámat ||

3.042.05a índra sómāḥ sutā́ imé tā́n dadhiṣva śatakrato |
3.042.05c jaṭháre vājinīvaso ||

3.042.06a vidmā́ hí tvā dhanaṁjayáṁ vā́jeṣu dadhr̥ṣáṁ kave |
3.042.06c ádhā te sumnám īmahe ||

3.042.07a imám indra gávāśiraṁ yávāśiraṁ ca naḥ piba |
3.042.07c āgátyā vŕ̥ṣabhiḥ sutám ||

3.042.08a túbhyéd indra svá okyè sómaṁ codāmi pītáye |
3.042.08c eṣá rārantu te hr̥dí ||

3.042.09a tvā́ṁ sutásya pītáye pratnám indra havāmahe |
3.042.09c kuśikā́so avasyávaḥ ||

3.043.01a ā́ yāhy arvā́ṅ úpa vandhureṣṭhā́s távéd ánu pradívaḥ somapéyam |
3.043.01c priyā́ sákhāyā ví mucópa barhís tvā́m imé havyavā́ho havante ||

3.043.02a ā́ yāhi pūrvī́r áti carṣaṇī́r ā́m̐ aryá āśíṣa úpa no háribhyām |
3.043.02c imā́ hí tvā matáyaḥ stómataṣṭā índra hávante sakhyáṁ juṣāṇā́ḥ ||

3.043.03a ā́ no yajñáṁ namovŕ̥dhaṁ sajóṣā índra deva háribhir yāhi tū́yam |
3.043.03c aháṁ hí tvā matíbhir jóhavīmi ghr̥táprayāḥ sadhamā́de mádhūnām ||

3.043.04a ā́ ca tvā́m etā́ vŕ̥ṣaṇā váhāto hárī sákhāyā sudhúrā sváṅgā |
3.043.04c dhānā́vad índraḥ sávanaṁ juṣāṇáḥ sákhā sákhyuḥ śr̥ṇavad vándanāni ||

3.043.05a kuvín mā gopā́ṁ kárase jánasya kuvíd rā́jānam maghavann r̥jīṣin |
3.043.05c kuvín ma ŕ̥ṣim papivā́ṁsaṁ sutásya kuvín me vásvo amŕ̥tasya śíkṣāḥ ||

3.043.06a ā́ tvā br̥hánto hárayo yujānā́ arvā́g indra sadhamā́do vahantu |
3.043.06c prá yé dvitā́ divá r̥ñjánty ā́tāḥ súsammr̥ṣṭāso vr̥ṣabhásya mūrā́ḥ ||

3.043.07a índra píba vŕ̥ṣadhūtasya vŕ̥ṣṇa ā́ yáṁ te śyená uśaté jabhā́ra |
3.043.07c yásya máde cyāváyasi prá kr̥ṣṭī́r yásya máde ápa gotrā́ vavártha ||

3.043.08a śunáṁ huvema maghávānam índram asmín bháre nŕ̥tamaṁ vā́jasātau |
3.043.08c śr̥ṇvántam ugrám ūtáye samátsu ghnántaṁ vr̥trā́ṇi saṁjítaṁ dhánānām ||

3.044.01a ayáṁ te astu haryatáḥ sóma ā́ háribhiḥ sutáḥ |
3.044.01c juṣāṇá indra háribhir na ā́ gahy ā́ tiṣṭha háritaṁ rátham ||

3.044.02a haryánn uṣásam arcayaḥ sū́ryaṁ haryánn arocayaḥ |
3.044.02c vidvā́m̐ś cikitvā́n haryaśva vardhasa índra víśvā abhí śríyaḥ ||

3.044.03a dyā́m índro háridhāyasam pr̥thivī́ṁ hárivarpasam |
3.044.03c ádhārayad dharítor bhū́ri bhójanaṁ yáyor antár háriś cárat ||

3.044.04a jajñānó hárito vŕ̥ṣā víśvam ā́ bhāti rocanám |
3.044.04c háryaśvo háritaṁ dhatta ā́yudham ā́ vájram bāhvór hárim ||

3.044.05a índro haryántam árjunaṁ vájraṁ śukraír abhī́vr̥tam |
3.044.05c ápāvr̥ṇod dháribhir ádribhiḥ sutám úd gā́ háribhir ājata ||

3.045.01a ā́ mandraír indra háribhir yāhí mayū́raromabhiḥ |
3.045.01c mā́ tvā ké cin ní yaman víṁ ná pāśínó 'ti dhánveva tā́m̐ ihi ||

3.045.02a vr̥trakhādó valaṁrujáḥ purā́ṁ darmó apā́m ajáḥ |
3.045.02c sthā́tā ráthasya háryor abhisvará índro dr̥ḷhā́ cid ārujáḥ ||

3.045.03a gambhīrā́m̐ udadhī́m̐r iva krátum puṣyasi gā́ iva |
3.045.03c prá sugopā́ yávasaṁ dhenávo yathā hradáṁ kulyā́ ivāśata ||

3.045.04a ā́ nas tújaṁ rayím bharā́ṁśaṁ ná pratijānaté |
3.045.04c vr̥kṣám pakvám phálam aṅkī́va dhūnuhī́ndra sampā́raṇaṁ vásu ||

3.045.05a svayúr indra svarā́ḷ asi smáddiṣṭiḥ sváyaśastaraḥ |
3.045.05c sá vāvr̥dhāná ójasā puruṣṭuta bhávā naḥ suśrávastamaḥ ||

3.046.01a yudhmásya te vr̥ṣabhásya svarā́ja ugrásya yū́naḥ sthávirasya ghŕ̥ṣveḥ |
3.046.01c ájūryato vajríṇo vīryā̀ṇī́ndra śrutásya maható mahā́ni ||

3.046.02a mahā́m̐ asi mahiṣa vŕ̥ṣṇyebhir dhanaspŕ̥d ugra sáhamāno anyā́n |
3.046.02c éko víśvasya bhúvanasya rā́jā sá yodháyā ca kṣayáyā ca jánān ||

3.046.03a prá mā́trābhī ririce rócamānaḥ prá devébhir viśváto ápratītaḥ |
3.046.03c prá majmánā divá índraḥ pr̥thivyā́ḥ prórór mahó antárikṣād r̥jīṣī́ ||

3.046.04a urúṁ gabhīráṁ janúṣābhy ùgráṁ viśvávyacasam avatám matīnā́m |
3.046.04c índraṁ sómāsaḥ pradívi sutā́saḥ samudráṁ ná sraváta ā́ viśanti ||

3.046.05a yáṁ sómam indra pr̥thivī́dyā́vā gárbhaṁ ná mātā́ bibhr̥tás tvāyā́ |
3.046.05c táṁ te hinvanti tám u te mr̥janty adhvaryávo vr̥ṣabha pā́tavā́ u ||

3.047.01a marútvām̐ indra vr̥ṣabhó ráṇāya píbā sómam anuṣvadhám mádāya |
3.047.01c ā́ siñcasva jaṭháre mádhva ūrmíṁ tváṁ rā́jāsi pradívaḥ sutā́nām ||

3.047.02a sajóṣā indra ságaṇo marúdbhiḥ sómam piba vr̥trahā́ śūra vidvā́n |
3.047.02c jahí śátrūm̐r ápa mŕ̥dho nudasvā́thā́bhayaṁ kr̥ṇuhi viśváto naḥ ||

3.047.03a utá r̥túbhir r̥tupāḥ pāhi sómam índra devébhiḥ sákhibhiḥ sutáṁ naḥ |
3.047.03c yā́m̐ ā́bhajo marúto yé tvā́nv áhan vr̥trám ádadhus túbhyam ójaḥ ||

3.047.04a yé tvāhihátye maghavann ávardhan yé śāmbaré harivo yé gáviṣṭau |
3.047.04c yé tvā nūnám anumádanti víprāḥ píbendra sómaṁ ságaṇo marúdbhiḥ ||

3.047.05a marútvantaṁ vr̥ṣabháṁ vāvr̥dhānám ákavāriṁ divyáṁ śāsám índram |
3.047.05c viśvāsā́ham ávase nū́tanāyográṁ sahodā́m ihá táṁ huvema ||

3.048.01a sadyó ha jātó vr̥ṣabháḥ kanī́naḥ prábhartum āvad ándhasaḥ sutásya |
3.048.01c sādhóḥ piba pratikāmáṁ yáthā te rásāśiraḥ prathamáṁ somyásya ||

3.048.02a yáj jā́yathās tád áhar asya kā́me 'ṁśóḥ pīyū́ṣam apibo giriṣṭhā́m |
3.048.02c táṁ te mātā́ pári yóṣā jánitrī maháḥ pitúr dáma ā́siñcad ágre ||

3.048.03a upasthā́ya mātáram ánnam aiṭṭa tigmám apaśyad abhí sómam ū́dhaḥ |
3.048.03c prayāváyann acarad gŕ̥tso anyā́n mahā́ni cakre purudhápratīkaḥ ||

3.048.04a ugrás turāṣā́ḷ abhíbhūtyojā yathāvaśáṁ tanvàṁ cakra eṣáḥ |
3.048.04c tváṣṭāram índro janúṣābhibhū́yāmúṣyā sómam apibac camū́ṣu ||

3.048.05a śunáṁ huvema maghávānam índram asmín bháre nŕ̥tamaṁ vā́jasātau |
3.048.05c śr̥ṇvántam ugrám ūtáye samátsu ghnántaṁ vr̥trā́ṇi saṁjítaṁ dhánānām ||

3.049.01a śáṁsā mahā́m índraṁ yásmin víśvā ā́ kr̥ṣṭáyaḥ somapā́ḥ kā́mam ávyan |
3.049.01c yáṁ sukrátuṁ dhiṣáṇe vibhvataṣṭáṁ ghanáṁ vr̥trā́ṇāṁ janáyanta devā́ḥ ||

3.049.02a yáṁ nú nákiḥ pŕ̥tanāsu svarā́jaṁ dvitā́ tárati nŕ̥tamaṁ hariṣṭhā́m |
3.049.02c inátamaḥ sátvabhir yó ha śūṣaíḥ pr̥thujráyā aminād ā́yur dásyoḥ ||

3.049.03a sahā́vā pr̥tsú taráṇir nā́rvā vyānaśī́ ródasī mehánāvān |
3.049.03c bhágo ná kāré hávyo matīnā́m pitéva cā́ruḥ suhávo vayodhā́ḥ ||

3.049.04a dhartā́ divó rájasas pr̥ṣṭá ūrdhvó rátho ná vāyúr vásubhir niyútvān |
3.049.04c kṣapā́ṁ vastā́ janitā́ sū́ryasya víbhaktā bhāgáṁ dhiṣáṇeva vā́jam ||

3.049.05a śunáṁ huvema maghávānam índram asmín bháre nŕ̥tamaṁ vā́jasātau |
3.049.05c śr̥ṇvántam ugrám ūtáye samátsu ghnántaṁ vr̥trā́ṇi saṁjítaṁ dhánānām ||

3.050.01a índraḥ svā́hā pibatu yásya sóma āgátyā túmro vr̥ṣabhó marútvān |
3.050.01c óruvyácāḥ pr̥ṇatām ebhír ánnair ā́sya havís tanvàḥ kā́mam r̥dhyāḥ ||

3.050.02a ā́ te saparyū́ javáse yunajmi yáyor ánu pradívaḥ śruṣṭím ā́vaḥ |
3.050.02c ihá tvā dheyur hárayaḥ suśipra píbā tv àsyá súṣutasya cā́roḥ ||

3.050.03a góbhir mimikṣúṁ dadhire supārám índraṁ jyaíṣṭhyāya dhā́yase gr̥ṇānā́ḥ |
3.050.03c mandānáḥ sómam papivā́m̐ r̥jīṣin sám asmábhyam purudhā́ gā́ iṣaṇya ||

3.050.04a imáṁ kā́mam mandayā góbhir áśvaiś candrávatā rā́dhasā papráthaś ca |
3.050.04c svaryávo matíbhis túbhyaṁ víprā índrāya vā́haḥ kuśikā́so akran ||

3.050.05a śunáṁ huvema maghávānam índram asmín bháre nŕ̥tamaṁ vā́jasātau |
3.050.05c śr̥ṇvántam ugrám ūtáye samátsu ghnántaṁ vr̥trā́ṇi saṁjítaṁ dhánānām ||

3.051.01a carṣaṇīdhŕ̥tam maghávānam ukthyàm índraṁ gíro br̥hatī́r abhy ànūṣata |
3.051.01c vāvr̥dhānám puruhūtáṁ suvr̥ktíbhir ámartyaṁ járamāṇaṁ divé-dive ||

3.051.02a śatákratum arṇaváṁ śākínaṁ náraṁ gíro ma índram úpa yanti viśvátaḥ |
3.051.02c vājasánim pūrbhídaṁ tū́rṇim aptúraṁ dhāmasā́cam abhiṣā́caṁ svarvídam ||

3.051.03a ākaré vásor jaritā́ panasyate 'nehásaḥ stúbha índro duvasyati |
3.051.03c vivásvataḥ sádana ā́ hí pipriyé satrāsā́ham abhimātihánaṁ stuhi ||

3.051.04a nr̥ṇā́m u tvā nŕ̥tamaṁ gīrbhír ukthaír abhí prá vīrám arcatā sabā́dhaḥ |
3.051.04c sáṁ sáhase purumāyó jihīte námo asya pradíva éka īśe ||

3.051.05a pūrvī́r asya niṣṣídho mártyeṣu purū́ vásūni pr̥thivī́ bibharti |
3.051.05c índrāya dyā́va óṣadhīr utā́po rayíṁ rakṣanti jīráyo vánāni ||

3.051.06a túbhyam bráhmāṇi gíra indra túbhyaṁ satrā́ dadhire harivo juṣásva |
3.051.06c bodhy ā̀pír ávaso nū́tanasya sákhe vaso jaritŕ̥bhyo váyo dhāḥ ||

3.051.07a índra marutva ihá pāhi sómaṁ yáthā śāryāté ápibaḥ sutásya |
3.051.07c táva práṇītī táva śūra śármann ā́ vivāsanti kaváyaḥ suyajñā́ḥ ||

3.051.08a sá vāvaśāná ihá pāhi sómam marúdbhir indra sákhibhiḥ sutáṁ naḥ |
3.051.08c jātáṁ yát tvā pári devā́ ábhūṣan mahé bhárāya puruhūta víśve ||

3.051.09a aptū́rye maruta āpír eṣó 'mandann índram ánu dā́tivārāḥ |
3.051.09c tébhiḥ sākám pibatu vr̥trakhādáḥ sutáṁ sómaṁ dāśúṣaḥ své sadhásthe ||

3.051.10a idáṁ hy ánv ójasā sutáṁ rādhānām pate |
3.051.10c píbā tv àsyá girvaṇaḥ ||

3.051.11a yás te ánu svadhā́m ásat suté ní yaccha tanvàm |
3.051.11c sá tvā mamattu somyám ||

3.051.12a prá te aśnotu kukṣyóḥ préndra bráhmaṇā śíraḥ |
3.051.12c prá bāhū́ śūra rā́dhase ||

3.052.01a dhānā́vantaṁ karambhíṇam apūpávantam ukthínam |
3.052.01c índra prātár juṣasva naḥ ||

3.052.02a puroḷā́śam pacatyàṁ juṣásvendrā́ gurasva ca |
3.052.02c túbhyaṁ havyā́ni sisrate ||

3.052.03a puroḷā́śaṁ ca no gháso joṣáyāse gíraś ca naḥ |
3.052.03c vadhūyúr iva yóṣaṇām ||

3.052.04a puroḷā́śaṁ sanaśruta prātaḥsāvé juṣasva naḥ |
3.052.04c índra krátur hí te br̥hán ||

3.052.05a mā́dhyaṁdinasya sávanasya dhānā́ḥ puroḷā́śam indra kr̥ṣvehá cā́rum |
3.052.05c prá yát stotā́ jaritā́ tū́rṇyartho vr̥ṣāyámāṇa úpa gīrbhír ī́ṭṭe ||

3.052.06a tr̥tī́ye dhānā́ḥ sávane puruṣṭuta puroḷā́śam ā́hutam māmahasva naḥ |
3.052.06c r̥bhumántaṁ vā́javantaṁ tvā kave práyasvanta úpa śikṣema dhītíbhiḥ ||

3.052.07a pūṣaṇváte te cakr̥mā karambháṁ hárivate háryaśvāya dhānā́ḥ |
3.052.07c apūpám addhi ságaṇo marúdbhiḥ sómam piba vr̥trahā́ śūra vidvā́n ||

3.052.08a práti dhānā́ bharata tū́yam asmai puroḷā́śaṁ vīrátamāya nr̥ṇā́m |
3.052.08c divé-dive sadŕ̥śīr indra túbhyaṁ várdhantu tvā somapéyāya dhr̥ṣṇo ||

3.053.01a índrāparvatā br̥hatā́ ráthena vāmī́r íṣa ā́ vahataṁ suvī́rāḥ |
3.053.01c vītáṁ havyā́ny adhvaréṣu devā várdhethāṁ gīrbhír íḷayā mádantā ||

3.053.02a tíṣṭhā sú kam maghavan mā́ párā gāḥ sómasya nú tvā súṣutasya yakṣi |
3.053.02c pitúr ná putráḥ sícam ā́ rabhe ta índra svā́diṣṭhayā girā́ śacīvaḥ ||

3.053.03a śáṁsāvādhvaryo práti me gr̥ṇīhī́ndrāya vā́haḥ kr̥ṇavāva júṣṭam |
3.053.03c édám barhír yájamānasya sīdā́thā ca bhūd ukthám índrāya śastám ||

3.053.04a jāyéd ástam maghavan séd u yónis tád ít tvā yuktā́ hárayo vahantu |
3.053.04c yadā́ kadā́ ca sunávāma sómam agníṣ ṭvā dūtó dhanvāty áccha ||

3.053.05a párā yāhi maghavann ā́ ca yāhī́ndra bhrātar ubhayátrā te ártham |
3.053.05c yátrā ráthasya br̥ható nidhā́naṁ vimócanaṁ vājíno rā́sabhasya ||

3.053.06a ápāḥ sómam ástam indra prá yāhi kalyāṇī́r jāyā́ suráṇaṁ gr̥hé te |
3.053.06c yátrā ráthasya br̥ható nidhā́naṁ vimócanaṁ vājíno dákṣiṇāvat ||

3.053.07a imé bhojā́ áṅgiraso vírūpā divás putrā́so ásurasya vīrā́ḥ |
3.053.07c viśvā́mitrāya dádato maghā́ni sahasrasāvé prá tiranta ā́yuḥ ||

3.053.08a rūpáṁ-rūpam maghávā bobhavīti māyā́ḥ kr̥ṇvānás tanvàm pári svā́m |
3.053.08c trír yád diváḥ pári muhūrtám ā́gāt svaír mántrair ánr̥tupā r̥tā́vā ||

3.053.09a mahā́m̐ ŕ̥ṣir devajā́ devájūtó 'stabhnāt síndhum arṇaváṁ nr̥cákṣāḥ |
3.053.09c viśvā́mitro yád ávahat sudā́sam ápriyāyata kuśikébhir índraḥ ||

3.053.10a haṁsā́ iva kr̥ṇutha ślókam ádribhir mádanto gīrbhír adhvaré suté sácā |
3.053.10c devébhir viprā r̥ṣayo nr̥cakṣaso ví pibadhvaṁ kuśikāḥ somyám mádhu ||

3.053.11a úpa préta kuśikāś cetáyadhvam áśvaṁ rāyé prá muñcatā sudā́saḥ |
3.053.11c rā́jā vr̥tráṁ jaṅghanat prā́g ápāg údag áthā yajāte vára ā́ pr̥thivyā́ḥ ||

3.053.12a yá imé ródasī ubhé ahám índram átuṣṭavam |
3.053.12c viśvā́mitrasya rakṣati bráhmedám bhā́rataṁ jánam ||

3.053.13a viśvā́mitrā arāsata bráhméndrāya vajríṇe |
3.053.13c kárad ín naḥ surā́dhasaḥ ||

3.053.14a kíṁ te kr̥ṇvanti kī́kaṭeṣu gā́vo nā́śíraṁ duhré ná tapanti gharmám |
3.053.14c ā́ no bhara prámagandasya védo naicāśākhám maghavan randhayā naḥ ||

3.053.15a sasarparī́r ámatim bā́dhamānā br̥hán mimāya jamádagnidattā |
3.053.15c ā́ sū́ryasya duhitā́ tatāna śrávo devéṣv amŕ̥tam ajuryám ||

3.053.16a sasarparī́r abharat tū́yam ebhyó 'dhi śrávaḥ pā́ñcajanyāsu kr̥ṣṭíṣu |
3.053.16c sā́ pakṣyā̀ návyam ā́yur dádhānā yā́m me palastijamadagnáyo dadúḥ ||

3.053.17a sthiraú gā́vau bhavatāṁ vīḷúr ákṣo méṣā́ ví varhi mā́ yugáṁ ví śāri |
3.053.17c índraḥ pātalyè dadatāṁ śárītor áriṣṭaneme abhí naḥ sacasva ||

3.053.18a bálaṁ dhehi tanū́ṣu no bálam indrānaḷútsu naḥ |
3.053.18c bálaṁ tokā́ya tánayāya jīváse tváṁ hí baladā́ ási ||

3.053.19a abhí vyayasva khadirásya sā́ram ójo dhehi spandané śiṁśápāyām |
3.053.19c ákṣa vīḷo vīḷita vīḷáyasva mā́ yā́mād asmā́d áva jīhipo naḥ ||

3.053.20a ayám asmā́n vánaspátir mā́ ca hā́ mā́ ca rīriṣat |
3.053.20c svasty ā́ gr̥hébhya ā́vasā́ ā́ vimócanāt ||

3.053.21a índrotíbhir bahulā́bhir no adyá yācchreṣṭhā́bhir maghavañ chūra jinva |
3.053.21c yó no dvéṣṭy ádharaḥ sás padīṣṭa yám u dviṣmás tám u prāṇó jahātu ||

3.053.22a paraśúṁ cid ví tapati śimbaláṁ cid ví vr̥ścati |
3.053.22c ukhā́ cid indra yéṣantī práyastā phénam asyati ||

3.053.23a ná sā́yakasya cikite janāso lodháṁ nayanti páśu mányamānāḥ |
3.053.23c nā́vājinaṁ vājínā hāsayanti ná gardabhám puró áśvān nayanti ||

3.053.24a imá indra bharatásya putrā́ apapitváṁ cikitur ná prapitvám |
3.053.24c hinvánty áśvam áraṇaṁ ná nítyaṁ jyā̀vājam pári ṇayanty ājaú ||

3.054.01a imám mahé vidathyā̀ya śūṣáṁ śáśvat kŕ̥tva ī́ḍyāya prá jabhruḥ |
3.054.01c śr̥ṇótu no dámyebhir ánīkaiḥ śr̥ṇótv agnír divyaír ájasraḥ ||

3.054.02a máhi mahé divé arcā pr̥thivyaí kā́mo ma iccháñ carati prajānán |
3.054.02c yáyor ha stóme vidátheṣu devā́ḥ saparyávo mādáyante sácāyóḥ ||

3.054.03a yuvór r̥táṁ rodasī satyám astu mahé ṣú ṇaḥ suvitā́ya prá bhūtam |
3.054.03c idáṁ divé námo agne pr̥thivyaí saparyā́mi práyasā yā́mi rátnam ||

3.054.04a utó hí vām pūrvyā́ āvividrá ŕ̥tāvarī rodasī satyavā́caḥ |
3.054.04c náraś cid vāṁ samithé śū́rasātau vavandiré pr̥thivi vévidānāḥ ||

3.054.05a kó addhā́ veda ká ihá prá vocad devā́m̐ ácchā pathyā̀ kā́ sám eti |
3.054.05c dádr̥śra eṣām avamā́ sádāṁsi páreṣu yā́ gúhyeṣu vratéṣu ||

3.054.06a kavír nr̥cákṣā abhí ṣīm acaṣṭa r̥tásya yónā víghr̥te mádantī |
3.054.06c nā́nā cakrāte sádanaṁ yáthā véḥ samānéna krátunā saṁvidāné ||

3.054.07a samānyā́ víyute dūréante dhruvé padé tasthatur jāgarū́ke |
3.054.07c utá svásārā yuvatī́ bhávantī ā́d u bruvāte mithunā́ni nā́ma ||

3.054.08a víśvéd eté jánimā sáṁ vivikto mahó devā́n bíbhratī ná vyathete |
3.054.08c éjad dhruvám patyate víśvam ékaṁ cárat patatrí víṣuṇaṁ ví jātám ||

3.054.09a sánā purāṇám ádhy emy ārā́n maháḥ pitúr janitúr jāmí tán naḥ |
3.054.09c devā́so yátra panitā́ra évair uraú pathí vyùte tasthúr antáḥ ||

3.054.10a imáṁ stómaṁ rodasī prá bravīmy r̥dūdárāḥ śr̥ṇavann agnijihvā́ḥ |
3.054.10c mitráḥ samrā́jo váruṇo yúvāna ādityā́saḥ kaváyaḥ paprathānā́ḥ ||

3.054.11a híraṇyapāṇiḥ savitā́ sujihvás trír ā́ divó vidáthe pátyamānaḥ |
3.054.11c devéṣu ca savitaḥ ślókam áśrer ā́d asmábhyam ā́ suva sarvátātim ||

3.054.12a sukŕ̥t supāṇíḥ svávām̐ r̥tā́vā devás tváṣṭā́vase tā́ni no dhāt |
3.054.12c pūṣaṇvánta r̥bhavo mādayadhvam ūrdhvágrāvāṇo adhvarám ataṣṭa ||

3.054.13a vidyúdrathā marúta r̥ṣṭimánto divó máryā r̥tájātā ayā́saḥ |
3.054.13c sárasvatī śr̥ṇavan yajñíyāso dhā́tā rayíṁ sahávīraṁ turāsaḥ ||

3.054.14a víṣṇuṁ stómāsaḥ purudasmám arkā́ bhágasyeva kāríṇo yā́mani gman |
3.054.14c urukramáḥ kakuhó yásya pūrvī́r ná mardhanti yuvatáyo jánitrīḥ ||

3.054.15a índro víśvair vīryaìḥ pátyamāna ubhé ā́ paprau ródasī mahitvā́ |
3.054.15c puraṁdaró vr̥trahā́ dhr̥ṣṇúṣeṇaḥ saṁgŕ̥bhyā na ā́ bharā bhū́ri paśváḥ ||

3.054.16a nā́satyā me pitárā bandhupŕ̥cchā sajātyàm aśvínoś cā́ru nā́ma |
3.054.16c yuváṁ hí sthó rayidaú no rayīṇā́ṁ dātráṁ rakṣethe ákavair ádabdhā ||

3.054.17a mahát tád vaḥ kavayaś cā́ru nā́ma yád dha devā bhávatha víśva índre |
3.054.17c sákha r̥bhúbhiḥ puruhūta priyébhir imā́ṁ dhíyaṁ sātáye takṣatā naḥ ||

3.054.18a aryamā́ ṇo áditir yajñíyāsó 'dabdhāni váruṇasya vratā́ni |
3.054.18c yuyóta no anapatyā́ni gántoḥ prajā́vān naḥ paśumā́m̐ astu gātúḥ ||

3.054.19a devā́nāṁ dūtáḥ purudhá prásūtó 'nāgān no vocatu sarvátātā |
3.054.19c śr̥ṇótu naḥ pr̥thivī́ dyaúr utā́paḥ sū́ryo nákṣatrair urv àntárikṣam ||

3.054.20a śr̥ṇvántu no vŕ̥ṣaṇaḥ párvatāso dhruvákṣemāsa íḷayā mádantaḥ |
3.054.20c ādityaír no áditiḥ śr̥ṇotu yácchantu no marútaḥ śárma bhadrám ||

3.054.21a sádā sugáḥ pitumā́m̐ astu pánthā mádhvā devā óṣadhīḥ sám pipr̥kta |
3.054.21c bhágo me agne sakhyé ná mr̥dhyā úd rāyó aśyāṁ sádanam purukṣóḥ ||

3.054.22a svádasva havyā́ sám íṣo didīhy asmadryàk sám mimīhi śrávāṁsi |
3.054.22c víśvām̐ agne pr̥tsú tā́ñ jeṣi śátrūn áhā víśvā sumánā dīdihī naḥ ||

3.055.01a uṣásaḥ pū́rvā ádha yád vyūṣúr mahád ví jajñe akṣáram padé góḥ |
3.055.01c vratā́ devā́nām úpa nú prabhū́ṣan mahád devā́nām asuratvám ékam ||

3.055.02a mó ṣū́ ṇo átra juhuranta devā́ mā́ pū́rve agne pitáraḥ padajñā́ḥ |
3.055.02c purāṇyóḥ sádmanoḥ ketúr antár mahád devā́nām asuratvám ékam ||

3.055.03a ví me purutrā́ patayanti kā́māḥ śámy ácchā dīdye pūrvyā́ṇi |
3.055.03c sámiddhe agnā́v r̥tám íd vadema mahád devā́nām asuratvám ékam ||

3.055.04a samānó rā́jā víbhr̥taḥ purutrā́ śáye śayā́su práyuto vánā́nu |
3.055.04c anyā́ vatsám bhárati kṣéti mātā́ mahád devā́nām asuratvám ékam ||

3.055.05a ākṣít pū́rvāsv áparā anūrút sadyó jātā́su táruṇīṣv antáḥ |
3.055.05c antárvatīḥ suvate ápravītā mahád devā́nām asuratvám ékam ||

3.055.06a śayúḥ parástād ádha nú dvimātā́bandhanáś carati vatsá ékaḥ |
3.055.06c mitrásya tā́ váruṇasya vratā́ni mahád devā́nām asuratvám ékam ||

3.055.07a dvimātā́ hótā vidátheṣu samrā́ḷ ánv ágraṁ cárati kṣéti budhnáḥ |
3.055.07c prá ráṇyāni raṇyavā́co bharante mahád devā́nām asuratvám ékam ||

3.055.08a śū́rasyeva yúdhyato antamásya pratīcī́naṁ dadr̥śe víśvam āyát |
3.055.08c antár matíś carati niṣṣídhaṁ gór mahád devā́nām asuratvám ékam ||

3.055.09a ní veveti palitó dūtá āsv antár mahā́m̐ś carati rocanéna |
3.055.09c vápūṁṣi bíbhrad abhí no ví caṣṭe mahád devā́nām asuratvám ékam ||

3.055.10a víṣṇur gopā́ḥ paramám pāti pā́thaḥ priyā́ dhā́māny amŕ̥tā dádhānaḥ |
3.055.10c agníṣ ṭā́ víśvā bhúvanāni veda mahád devā́nām asuratvám ékam ||

3.055.11a nā́nā cakrāte yamyā̀ vápūṁṣi táyor anyád rócate kr̥ṣṇám anyát |
3.055.11c śyā́vī ca yád áruṣī ca svásārau mahád devā́nām asuratvám ékam ||

3.055.12a mātā́ ca yátra duhitā́ ca dhenū́ sabardúghe dhāpáyete samīcī́ |
3.055.12c r̥tásya té sádasīḷe antár mahád devā́nām asuratvám ékam ||

3.055.13a anyásyā vatsáṁ rihatī́ mimāya káyā bhuvā́ ní dadhe dhenúr ū́dhaḥ |
3.055.13c r̥tásya sā́ páyasāpinvatéḷā mahád devā́nām asuratvám ékam ||

3.055.14a pádyā vaste pururū́pā vápūṁṣy ūrdhvā́ tasthau tryáviṁ rérihāṇā |
3.055.14c r̥tásya sádma ví carāmi vidvā́n mahád devā́nām asuratvám ékam ||

3.055.15a padé iva níhite dasmé antás táyor anyád gúhyam āvír anyát |
3.055.15c sadhrīcīnā́ pathyā̀ sā́ víṣūcī mahád devā́nām asuratvám ékam ||

3.055.16a ā́ dhenávo dhunayantām áśiśvīḥ sabardúghāḥ śaśayā́ ápradugdhāḥ |
3.055.16c návyā-navyā yuvatáyo bhávantīr mahád devā́nām asuratvám ékam ||

3.055.17a yád anyā́su vr̥ṣabhó róravīti só anyásmin yūthé ní dadhāti rétaḥ |
3.055.17c sá hí kṣápāvān sá bhágaḥ sá rā́jā mahád devā́nām asuratvám ékam ||

3.055.18a vīrásya nú sváśvyaṁ janāsaḥ prá nú vocāma vidúr asya devā́ḥ |
3.055.18c ṣoḷhā́ yuktā́ḥ páñca-pañcā́ vahanti mahád devā́nām asuratvám ékam ||

3.055.19a devás tváṣṭā savitā́ viśvárūpaḥ pupóṣa prajā́ḥ purudhā́ jajāna |
3.055.19c imā́ ca víśvā bhúvanāny asya mahád devā́nām asuratvám ékam ||

3.055.20a mahī́ sám airac camvā̀ samīcī́ ubhé té asya vásunā nyr̥̀ṣṭe |
3.055.20c śr̥ṇvé vīró vindámāno vásūni mahád devā́nām asuratvám ékam ||

3.055.21a imā́ṁ ca naḥ pr̥thivī́ṁ viśvádhāyā úpa kṣeti hitámitro ná rā́jā |
3.055.21c puraḥsádaḥ śarmasádo ná vīrā́ mahád devā́nām asuratvám ékam ||

3.055.22a niṣṣídhvarīs ta óṣadhīr utā́po rayíṁ ta indra pr̥thivī́ bibharti |
3.055.22c sákhāyas te vāmabhā́jaḥ syāma mahád devā́nām asuratvám ékam ||

3.056.01a ná tā́ minanti māyíno ná dhī́rā vratā́ devā́nām prathamā́ dhruvā́ṇi |
3.056.01c ná ródasī adrúhā vedyā́bhir ná párvatā nináme tasthivā́ṁsaḥ ||

3.056.02a ṣáḍ bhārā́m̐ éko ácaran bibharty r̥táṁ várṣiṣṭham úpa gā́va ā́guḥ |
3.056.02c tisró mahī́r úparās tasthur átyā gúhā dvé níhite dárśy ékā ||

3.056.03a tripājasyó vr̥ṣabhó viśvárūpa utá tryudhā́ purudhá prajā́vān |
3.056.03c tryanīkáḥ patyate mā́hināvān sá retodhā́ vr̥ṣabháḥ śáśvatīnām ||

3.056.04a abhī́ka āsām padavī́r abodhy ādityā́nām ahve cā́ru nā́ma |
3.056.04c ā́paś cid asmā aramanta devī́ḥ pŕ̥thag vrájantīḥ pári ṣīm avr̥ñjan ||

3.056.05a trī́ ṣadhásthā sindhavas tríḥ kavīnā́m utá trimātā́ vidátheṣu samrā́ṭ |
3.056.05c r̥tā́varīr yóṣaṇās tisró ápyās trír ā́ divó vidáthe pátyamānāḥ ||

3.056.06a trír ā́ diváḥ savitar vā́ryāṇi divé-diva ā́ suva trír no áhnaḥ |
3.056.06c tridhā́tu rāyá ā́ suvā vásūni bhága trātar dhiṣaṇe sātáye dhāḥ ||

3.056.07a trír ā́ diváḥ savitā́ soṣavīti rā́jānā mitrā́váruṇā supāṇī́ |
3.056.07c ā́paś cid asya ródasī cid urvī́ rátnam bhikṣanta savitúḥ savā́ya ||

3.056.08a trír uttamā́ dūṇáśā rocanā́ni tráyo rājanty ásurasya vīrā́ḥ |
3.056.08c r̥tā́vāna iṣirā́ dūḷábhāsas trír ā́ divó vidáthe santu devā́ḥ ||

3.057.01a prá me vivikvā́m̐ avidan manīṣā́ṁ dhenúṁ cárantīm práyutām ágopām |
3.057.01c sadyáś cid yā́ duduhé bhū́ri dhāsér índras tád agníḥ panitā́ro asyāḥ ||

3.057.02a índraḥ sú pūṣā́ vŕ̥ṣaṇā suhástā divó ná prītā́ḥ śaśayáṁ duduhre |
3.057.02c víśve yád asyāṁ raṇáyanta devā́ḥ prá vó 'tra vasavaḥ sumnám aśyām ||

3.057.03a yā́ jāmáyo vŕ̥ṣṇa icchánti śaktíṁ namasyántīr jānate gárbham asmin |
3.057.03c ácchā putráṁ dhenávo vāvaśānā́ maháś caranti bíbhrataṁ vápūṁṣi ||

3.057.04a ácchā vivakmi ródasī suméke grā́vṇo yujānó adhvaré manīṣā́ |
3.057.04c imā́ u te mánave bhū́rivārā ūrdhvā́ bhavanti darśatā́ yájatrāḥ ||

3.057.05a yā́ te jihvā́ mádhumatī sumedhā́ ágne devéṣūcyáta urūcī́ |
3.057.05c táyehá víśvām̐ ávase yájatrān ā́ sādaya pāyáyā cā mádhūni ||

3.057.06a yā́ te agne párvatasyeva dhā́rā́saścantī pīpáyad deva citrā́ |
3.057.06c tā́m asmábhyam prámatiṁ jātavedo váso rā́sva sumatíṁ viśvájanyām ||

3.058.01a dhenúḥ pratnásya kā́myaṁ dúhānāntáḥ putráś carati dákṣiṇāyāḥ |
3.058.01c ā́ dyotaníṁ vahati śubhráyāmoṣásaḥ stómo aśvínāv ajīgaḥ ||

3.058.02a suyúg vahanti práti vām r̥ténordhvā́ bhavanti pitáreva médhāḥ |
3.058.02c járethām asmád ví paṇér manīṣā́ṁ yuvór ávaś cakr̥mā́ yātam arvā́k ||

3.058.03a suyúgbhir áśvaiḥ suvŕ̥tā ráthena dásrāv imáṁ śr̥ṇutaṁ ślókam ádreḥ |
3.058.03c kím aṅgá vām práty ávartiṁ gámiṣṭhāhúr víprāso aśvinā purājā́ḥ ||

3.058.04a ā́ manyethām ā́ gataṁ kác cid évair víśve jánāso aśvínā havante |
3.058.04c imā́ hí vāṁ gór̥jīkā mádhūni prá mitrā́so ná dadúr usró ágre ||

3.058.05a tiráḥ purū́ cid aśvinā rájāṁsy āṅgūṣó vām maghavānā jáneṣu |
3.058.05c éhá yātam pathíbhir devayā́nair dásrāv imé vāṁ nidháyo mádhūnām ||

3.058.06a purāṇám ókaḥ sakhyáṁ śiváṁ vāṁ yuvór narā dráviṇaṁ jahnā́vyām |
3.058.06c púnaḥ kr̥ṇvānā́ḥ sakhyā́ śivā́ni mádhvā madema sahá nū́ samānā́ḥ ||

3.058.07a áśvinā vāyúnā yuváṁ sudakṣā niyúdbhiś ca sajóṣasā yuvānā |
3.058.07c nā́satyā tiróahnyaṁ juṣāṇā́ sómam pibatam asrídhā sudānū ||

3.058.08a áśvinā pári vām íṣaḥ purūcī́r īyúr gīrbhír yátamānā ámr̥dhrāḥ |
3.058.08c rátho ha vām r̥tajā́ ádrijūtaḥ pári dyā́vāpr̥thivī́ yāti sadyáḥ ||

3.058.09a áśvinā madhuṣúttamo yuvā́kuḥ sómas tám pātam ā́ gataṁ duroṇé |
3.058.09c rátho ha vām bhū́ri várpaḥ kárikrat sutā́vato niṣkr̥tám ā́gamiṣṭhaḥ ||

3.059.01a mitró jánān yātayati bruvāṇó mitró dādhāra pr̥thivī́m utá dyā́m |
3.059.01c mitráḥ kr̥ṣṭī́r ánimiṣābhí caṣṭe mitrā́ya havyáṁ ghr̥távaj juhota ||

3.059.02a prá sá mitra márto astu práyasvān yás ta āditya śíkṣati vraténa |
3.059.02c ná hanyate ná jīyate tvóto naínam áṁho aśnoty ántito ná dūrā́t ||

3.059.03a anamīvā́sa íḷayā mádanto mitájñavo várimann ā́ pr̥thivyā́ḥ |
3.059.03c ādityásya vratám upakṣiyánto vayám mitrásya sumataú syāma ||

3.059.04a ayám mitró namasyàḥ suśévo rā́jā sukṣatró ajaniṣṭa vedhā́ḥ |
3.059.04c tásya vayáṁ sumataú yajñíyasyā́pi bhadré saumanasé syāma ||

3.059.05a mahā́m̐ ādityó námasopasádyo yātayájjano gr̥ṇaté suśévaḥ |
3.059.05c tásmā etát pányatamāya júṣṭam agnaú mitrā́ya havír ā́ juhota ||

3.059.06a mitrásya carṣaṇīdhŕ̥tó 'vo devásya sānasí |
3.059.06c dyumnáṁ citráśravastamam ||

3.059.07a abhí yó mahinā́ dívam mitró babhū́va sapráthāḥ |
3.059.07c abhí śrávobhiḥ pr̥thivī́m ||

3.059.08a mitrā́ya páñca yemire jánā abhíṣṭiśavase |
3.059.08c sá devā́n víśvān bibharti ||

3.059.09a mitró devéṣv āyúṣu jánāya vr̥ktábarhiṣe |
3.059.09c íṣa iṣṭávratā akaḥ ||

3.060.01a ihéha vo mánasā bandhútā nara uśíjo jagmur abhí tā́ni védasā |
3.060.01c yā́bhir māyā́bhiḥ prátijūtivarpasaḥ saúdhanvanā yajñíyam bhāgám ānaśá ||

3.060.02a yā́bhiḥ śácībhiś camasā́m̐ ápiṁśata yáyā dhiyā́ gā́m áriṇīta cármaṇaḥ |
3.060.02c yéna hárī mánasā nirátakṣata téna devatvám r̥bhavaḥ sám ānaśa ||

3.060.03a índrasya sakhyám r̥bhávaḥ sám ānaśur mánor nápāto apáso dadhanvire |
3.060.03c saudhanvanā́so amr̥tatvám érire viṣṭvī́ śámībhiḥ sukŕ̥taḥ sukr̥tyáyā ||

3.060.04a índreṇa yātha saráthaṁ suté sácām̐ átho váśānām bhavathā sahá śriyā́ |
3.060.04c ná vaḥ pratimaí sukr̥tā́ni vāghataḥ saúdhanvanā r̥bhavo vīryā̀ṇi ca ||

3.060.05a índra r̥bhúbhir vā́javadbhiḥ sámukṣitaṁ sutáṁ sómam ā́ vr̥ṣasvā gábhastyoḥ |
3.060.05c dhiyéṣitó maghavan dāśúṣo gr̥hé saudhanvanébhiḥ sahá matsvā nŕ̥bhiḥ ||

3.060.06a índra r̥bhumā́n vā́javān matsvehá no 'smín sávane śácyā puruṣṭuta |
3.060.06c imā́ni túbhyaṁ svásarāṇi yemire vratā́ devā́nām mánuṣaś ca dhármabhiḥ ||

3.060.07a índra r̥bhúbhir vājíbhir vājáyann ihá stómaṁ jaritúr úpa yāhi yajñíyam |
3.060.07c śatáṁ kétebhir iṣirébhir āyáve sahásraṇītho adhvarásya hómani ||

3.061.01a úṣo vā́jena vājini prácetāḥ stómaṁ juṣasva gr̥ṇató maghoni |
3.061.01c purāṇī́ devi yuvatíḥ púraṁdhir ánu vratáṁ carasi viśvavāre ||

3.061.02a úṣo devy ámartyā ví bhāhi candrárathā sūnŕ̥tā īráyantī |
3.061.02c ā́ tvā vahantu suyámāso áśvā híraṇyavarṇām pr̥thupā́jaso yé ||

3.061.03a úṣaḥ pratīcī́ bhúvanāni víśvordhvā́ tiṣṭhasy amŕ̥tasya ketúḥ |
3.061.03c samānám árthaṁ caraṇīyámānā cakrám iva navyasy ā́ vavr̥tsva ||

3.061.04a áva syū́meva cinvatī́ maghóny uṣā́ yāti svásarasya pátnī |
3.061.04c svàr jánantī subhágā sudáṁsā ā́ntād diváḥ papratha ā́ pr̥thivyā́ḥ ||

3.061.05a ácchā vo devī́m uṣásaṁ vibhātī́m prá vo bharadhvaṁ námasā suvr̥ktím |
3.061.05c ūrdhvám madhudhā́ diví pā́jo aśret prá rocanā́ ruruce raṇvásaṁdr̥k ||

3.061.06a r̥tā́varī divó arkaír abodhy ā́ revátī ródasī citrám asthāt |
3.061.06c āyatī́m agna uṣásaṁ vibhātī́ṁ vāmám eṣi dráviṇam bhíkṣamāṇaḥ ||

3.061.07a r̥tásya budhná uṣásām iṣaṇyán vŕ̥ṣā mahī́ ródasī ā́ viveśa |
3.061.07c mahī́ mitrásya váruṇasya māyā́ candréva bhānúṁ ví dadhe purutrā́ ||

3.062.01a imā́ u vām bhr̥máyo mányamānā yuvā́vate ná tújyā abhūvan |
3.062.01c kvà tyád indrāvaruṇā yáśo vāṁ yéna smā sínam bhárathaḥ sákhibhyaḥ ||

3.062.02a ayám u vām purutámo rayīyáñ chaśvattamám ávase johavīti |
3.062.02c sajóṣāv indrāvaruṇā marúdbhir divā́ pr̥thivyā́ śr̥ṇutaṁ hávam me ||

3.062.03a asmé tád indrāvaruṇā vásu ṣyād asmé rayír marutaḥ sárvavīraḥ |
3.062.03c asmā́n várūtrīḥ śaraṇaír avantv asmā́n hótrā bhā́ratī dákṣiṇābhiḥ ||

3.062.04a bŕ̥haspate juṣásva no havyā́ni viśvadevya |
3.062.04c rā́sva rátnāni dāśúṣe ||

3.062.05a śúcim arkaír bŕ̥haspátim adhvaréṣu namasyata |
3.062.05c ánāmy ója ā́ cake ||

3.062.06a vr̥ṣabháṁ carṣaṇīnā́ṁ viśvárūpam ádābhyam |
3.062.06c bŕ̥haspátiṁ váreṇyam ||

3.062.07a iyáṁ te pūṣann āghr̥ṇe suṣṭutír deva návyasī |
3.062.07c asmā́bhis túbhyaṁ śasyate ||

3.062.08a tā́ṁ juṣasva gíram máma vājayántīm avā dhíyam |
3.062.08c vadhūyúr iva yóṣaṇām ||

3.062.09a yó víśvābhí vipáśyati bhúvanā sáṁ ca páśyati |
3.062.09c sá naḥ pūṣā́vitā́ bhuvat ||

3.062.10a tát savitúr váreṇyam bhárgo devásya dhīmahi |
3.062.10c dhíyo yó naḥ pracodáyāt ||

3.062.11a devásya savitúr vayáṁ vājayántaḥ púraṁdhyā |
3.062.11c bhágasya rātím īmahe ||

3.062.12a deváṁ náraḥ savitā́raṁ víprā yajñaíḥ suvr̥ktíbhiḥ |
3.062.12c namasyánti dhiyéṣitā́ḥ ||

3.062.13a sómo jigāti gātuvíd devā́nām eti niṣkr̥tám |
3.062.13c r̥tásya yónim āsádam ||

3.062.14a sómo asmábhyaṁ dvipáde cátuṣpade ca paśáve |
3.062.14c anamīvā́ íṣas karat ||

3.062.15a asmā́kam ā́yur vardháyann abhímātīḥ sáhamānaḥ |
3.062.15c sómaḥ sadhástham ā́sadat ||

3.062.16a ā́ no mitrāvaruṇā ghr̥taír gávyūtim ukṣatam |
3.062.16c mádhvā rájāṁsi sukratū ||

3.062.17a uruśáṁsā namovŕ̥dhā mahnā́ dákṣasya rājathaḥ |
3.062.17c drā́ghiṣṭhābhiḥ śucivratā ||

3.062.18a gr̥ṇānā́ jamádagninā yónāv r̥tásya sīdatam |
3.062.18c pātáṁ sómam r̥tāvr̥dhā ||

4.001.01a tvā́ṁ hy àgne sádam ít samanyávo devā́so devám aratíṁ nyerirá íti krátvā nyeriré |
4.001.01c ámartyaṁ yajata mártyeṣv ā́ devám ā́devaṁ janata prácetasaṁ víśvam ā́devaṁ janata prácetasam ||

4.001.02a sá bhrā́taraṁ váruṇam agna ā́ vavr̥tsva devā́m̐ ácchā sumatī́ yajñávanasaṁ jyéṣṭhaṁ yajñávanasam |
4.001.02c r̥tā́vānam ādityáṁ carṣaṇīdhŕ̥taṁ rā́jānaṁ carṣaṇīdhŕ̥tam ||

4.001.03a sákhe sákhāyam abhy ā́ vavr̥tsvāśúṁ ná cakráṁ ráthyeva ráṁhyāsmábhyaṁ dasma ráṁhyā |
4.001.03c ágne mr̥ḷīkáṁ váruṇe sácā vido marútsu viśvábhānuṣu |
4.001.03d tokā́ya tujé śuśucāna śáṁ kr̥dhy asmábhyaṁ dasma śáṁ kr̥dhi ||

4.001.04a tváṁ no agne váruṇasya vidvā́n devásya héḷó 'va yāsisīṣṭhāḥ |
4.001.04c yájiṣṭho váhnitamaḥ śóśucāno víśvā dvéṣāṁsi prá mumugdhy asmát ||

4.001.05a sá tváṁ no agne 'vamó bhavotī́ nédiṣṭho asyā́ uṣáso vyùṣṭau |
4.001.05c áva yakṣva no váruṇaṁ rárāṇo vīhí mr̥ḷīkáṁ suhávo na edhi ||

4.001.06a asyá śréṣṭhā subhágasya saṁdŕ̥g devásya citrátamā mártyeṣu |
4.001.06c śúci ghr̥táṁ ná taptám ághnyāyāḥ spārhā́ devásya maṁháneva dhenóḥ ||

4.001.07a trír asya tā́ paramā́ santi satyā́ spārhā́ devásya jánimāny agnéḥ |
4.001.07c ananté antáḥ párivīta ā́gāc chúciḥ śukró aryó rórucānaḥ ||

4.001.08a sá dūtó víśvéd abhí vaṣṭi sádmā hótā híraṇyaratho ráṁsujihvaḥ |
4.001.08c rohídaśvo vapuṣyò vibhā́vā sádā raṇváḥ pitumátīva saṁsát ||

4.001.09a sá cetayan mánuṣo yajñábandhuḥ prá tám mahyā́ raśanáyā nayanti |
4.001.09c sá kṣety asya dúryāsu sā́dhan devó mártasya sadhanitvám āpa ||

4.001.10a sá tū́ no agnír nayatu prajānánn ácchā rátnaṁ devábhaktaṁ yád asya |
4.001.10c dhiyā́ yád víśve amŕ̥tā ákr̥ṇvan dyaúṣ pitā́ janitā́ satyám ukṣan ||

4.001.11a sá jāyata prathamáḥ pastyā̀su mahó budhné rájaso asyá yónau |
4.001.11b apā́d aśīrṣā́ guhámāno ántāyóyuvāno vr̥ṣabhásya nīḷé ||

4.001.12a prá śárdha ārta prathamáṁ vipanyā́m̐ r̥tásya yónā vr̥ṣabhásya nīḷé |
4.001.12c spārhó yúvā vapuṣyò vibhā́vā saptá priyā́so 'janayanta vŕ̥ṣṇe ||

4.001.13a asmā́kam átra pitáro manuṣyā̀ abhí prá sedur r̥tám āśuṣāṇā́ḥ |
4.001.13c áśmavrajāḥ sudúghā vavré antár úd usrā́ ājann uṣáso huvānā́ḥ ||

4.001.14a té marmr̥jata dadr̥vā́ṁso ádriṁ tád eṣām anyé abhíto ví vocan |
4.001.14c paśváyantrāso abhí kārám arcan vidánta jyótiś cakr̥pánta dhībhíḥ ||

4.001.15a té gavyatā́ mánasā dr̥dhrám ubdháṁ gā́ yemānám pári ṣántam ádrim |
4.001.15c dr̥ḷháṁ náro vácasā daívyena vrajáṁ gómantam uśíjo ví vavruḥ ||

4.001.16a té manvata prathamáṁ nā́ma dhenós tríḥ saptá mātúḥ paramā́ṇi vindan |
4.001.16c táj jānatī́r abhy ànūṣata vrā́ āvír bhuvad aruṇī́r yaśásā góḥ ||

4.001.17a néśat támo dúdhitaṁ rócata dyaúr úd devyā́ uṣáso bhānúr arta |
4.001.17c ā́ sū́ryo br̥hatás tiṣṭhad ájrām̐ r̥jú márteṣu vr̥jinā́ ca páśyan ||

4.001.18a ā́d ít paścā́ bubudhānā́ vy àkhyann ā́d íd rátnaṁ dhārayanta dyúbhaktam |
4.001.18c víśve víśvāsu dúryāsu devā́ mítra dhiyé varuṇa satyám astu ||

4.001.19a ácchā voceya śuśucānám agníṁ hótāraṁ viśvábharasaṁ yájiṣṭham |
4.001.19c śúcy ū́dho atr̥ṇan ná gávām ándho ná pūtám páriṣiktam aṁśóḥ ||

4.001.20a víśveṣām áditir yajñíyānāṁ víśveṣām átithir mā́nuṣāṇām |
4.001.20c agnír devā́nām áva āvr̥ṇānáḥ sumr̥ḷīkó bhavatu jātávedāḥ ||

4.002.01a yó mártyeṣv amŕ̥ta r̥tā́vā devó devéṣv aratír nidhā́yi |
4.002.01c hótā yájiṣṭho mahnā́ śucádhyai havyaír agnír mánuṣa īrayádhyai ||

4.002.02a ihá tváṁ sūno sahaso no adyá jātó jātā́m̐ ubháyām̐ antár agne |
4.002.02c dūtá īyase yuyujāná r̥ṣva r̥jumuṣkā́n vŕ̥ṣaṇaḥ śukrā́m̐ś ca ||

4.002.03a átyā vr̥dhasnū́ róhitā ghr̥tásnū r̥tásya manye mánasā jáviṣṭhā |
4.002.03c antár īyase aruṣā́ yujānó yuṣmā́m̐ś ca devā́n víśa ā́ ca mártān ||

4.002.04a aryamáṇaṁ váruṇam mitrám eṣām índrāvíṣṇū marúto aśvínotá |
4.002.04c sváśvo agne suráthaḥ surā́dhā éd u vaha suhavíṣe jánāya ||

4.002.05a gómām̐ agné 'vimām̐ aśvī́ yajñó nr̥vátsakhā sádam íd apramr̥ṣyáḥ |
4.002.05c íḷāvām̐ eṣó asura prajā́vān dīrghó rayíḥ pr̥thubudhnáḥ sabhā́vān ||

4.002.06a yás ta idhmáṁ jabhárat siṣvidānó mūrdhā́naṁ vā tatápate tvāyā́ |
4.002.06c bhúvas tásya svátavām̐ḥ pāyúr agne víśvasmāt sīm aghāyatá uruṣya ||

4.002.07a yás te bhárād ánniyate cid ánnaṁ niśíṣan mandrám átithim udī́rat |
4.002.07c ā́ devayúr inádhate duroṇé tásmin rayír dhruvó astu dā́svān ||

4.002.08a yás tvā doṣā́ yá uṣási praśáṁsāt priyáṁ vā tvā kr̥ṇávate havíṣmān |
4.002.08c áśvo ná své dáma ā́ hemyā́vān tám áṁhasaḥ pīparo dāśvā́ṁsam ||

4.002.09a yás túbhyam agne amŕ̥tāya dā́śad dúvas tvé kr̥ṇávate yatásruk |
4.002.09c ná sá rāyā́ śaśamānó ví yoṣan naínam áṁhaḥ pári varad aghāyóḥ ||

4.002.10a yásya tvám agne adhvaráṁ jújoṣo devó mártasya súdhitaṁ rárāṇaḥ |
4.002.10c prītéd asad dhótrā sā́ yaviṣṭhā́sāma yásya vidható vr̥dhā́saḥ ||

4.002.11a cíttim ácittiṁ cinavad ví vidvā́n pr̥ṣṭhéva vītā́ vr̥jinā́ ca mártān |
4.002.11c rāyé ca naḥ svapatyā́ya deva dítiṁ ca rā́svā́ditim uruṣya ||

4.002.12a kavíṁ śaśāsuḥ kaváyó 'dabdhā nidhāráyanto dúryāsv āyóḥ |
4.002.12c átas tváṁ dŕ̥śyām̐ agna etā́n paḍbhíḥ paśyer ádbhutām̐ aryá évaiḥ ||

4.002.13a tvám agne vāgháte supráṇītiḥ sutásomāya vidhaté yaviṣṭha |
4.002.13c rátnam bhara śaśamānā́ya ghr̥ṣve pr̥thú ścandrám ávase carṣaṇiprā́ḥ ||

4.002.14a ádhā ha yád vayám agne tvāyā́ paḍbhír hástebhiś cakr̥mā́ tanū́bhiḥ |
4.002.14c ráthaṁ ná kránto ápasā bhuríjor r̥táṁ yemuḥ sudhyà āśuṣāṇā́ḥ ||

4.002.15a ádhā mātúr uṣásaḥ saptá víprā jā́yemahi prathamā́ vedháso nr̥̄́n |
4.002.15c divás putrā́ áṅgiraso bhavemā́driṁ rujema dhanínaṁ śucántaḥ ||

4.002.16a ádhā yáthā naḥ pitáraḥ párāsaḥ pratnā́so agna r̥tám āśuṣāṇā́ḥ |
4.002.16c śúcī́d ayan dī́dhitim ukthaśā́saḥ kṣā́mā bhindánto aruṇī́r ápa vran ||

4.002.17a sukármāṇaḥ surúco devayántó 'yo ná devā́ jánimā dhámantaḥ |
4.002.17c śucánto agníṁ vavr̥dhánta índram ūrváṁ gávyam pariṣádanto agman ||

4.002.18a ā́ yūthéva kṣumáti paśvó akhyad devā́nāṁ yáj jánimā́nty ugra |
4.002.18c mártānāṁ cid urváśīr akr̥pran vr̥dhé cid aryá úparasyāyóḥ ||

4.002.19a ákarma te svápaso abhūma r̥tám avasrann uṣáso vibhātī́ḥ |
4.002.19c ánūnam agním purudhā́ suścandráṁ devásya mármr̥jataś cā́ru cákṣuḥ ||

4.002.20a etā́ te agna ucáthāni vedhó 'vocāma kaváye tā́ juṣasva |
4.002.20c úc chocasva kr̥ṇuhí vásyaso no mahó rāyáḥ puruvāra prá yandhi ||

4.003.01a ā́ vo rā́jānam adhvarásya rudráṁ hótāraṁ satyayájaṁ ródasyoḥ |
4.003.01c agním purā́ tanayitnór acíttād dhíraṇyarūpam ávase kr̥ṇudhvam ||

4.003.02a ayáṁ yóniś cakr̥mā́ yáṁ vayáṁ te jāyéva pátya uśatī́ suvā́sāḥ |
4.003.02c arvācīnáḥ párivīto ní ṣīdemā́ u te svapāka pratīcī́ḥ ||

4.003.03a āśr̥ṇvaté ádr̥pitāya mánma nr̥cákṣase sumr̥ḷīkā́ya vedhaḥ |
4.003.03c devā́ya śastím amŕ̥tāya śaṁsa grā́veva sótā madhuṣúd yám īḷé ||

4.003.04a tváṁ cin naḥ śámyā agne asyā́ r̥tásya bodhy r̥tacit svādhī́ḥ |
4.003.04c kadā́ ta ukthā́ sadhamā́dyāni kadā́ bhavanti sakhyā́ gr̥hé te ||

4.003.05a kathā́ ha tád váruṇāya tvám agne kathā́ divé garhase kán na ā́gaḥ |
4.003.05c kathā́ mitrā́ya mīḷhúṣe pr̥thivyaí brávaḥ kád aryamṇé kád bhágāya ||

4.003.06a kád dhíṣṇyāsu vr̥dhasānó agne kád vā́tāya prátavase śubhaṁyé |
4.003.06c párijmane nā́satyāya kṣé brávaḥ kád agne rudrā́ya nr̥ghné ||

4.003.07a kathā́ mahé puṣṭimbharā́ya pūṣṇé kád rudrā́ya súmakhāya havirdé |
4.003.07c kád víṣṇava urugāyā́ya réto brávaḥ kád agne śárave br̥hatyaí ||

4.003.08a kathā́ śárdhāya marútām r̥tā́ya kathā́ sūré br̥haté pr̥cchyámānaḥ |
4.003.08c práti bravó 'ditaye turā́ya sā́dhā divó jātavedaś cikitvā́n ||

4.003.09a r̥téna r̥táṁ níyatam īḷa ā́ gór āmā́ sácā mádhumat pakvám agne |
4.003.09c kr̥ṣṇā́ satī́ rúśatā dhāsínaiṣā́ jā́maryeṇa páyasā pīpāya ||

4.003.10a r̥téna hí ṣmā vr̥ṣabháś cid aktáḥ púmām̐ agníḥ páyasā pr̥ṣṭhyèna |
4.003.10c áspandamāno acarad vayodhā́ vŕ̥ṣā śukráṁ duduhe pŕ̥śnir ū́dhaḥ ||

4.003.11a r̥ténā́driṁ vy àsan bhidántaḥ sám áṅgiraso navanta góbhiḥ |
4.003.11c śunáṁ náraḥ pári ṣadann uṣā́sam āvíḥ svàr abhavaj jāté agnaú ||

4.003.12a r̥téna devī́r amŕ̥tā ámr̥ktā árṇobhir ā́po mádhumadbhir agne |
4.003.12c vājī́ ná sárgeṣu prastubhānáḥ prá sádam ít srávitave dadhanyuḥ ||

4.003.13a mā́ kásya yakṣáṁ sádam íd dhuró gā mā́ veśásya praminató mā́péḥ |
4.003.13c mā́ bhrā́tur agne ánr̥jor r̥ṇáṁ ver mā́ sákhyur dákṣaṁ ripór bhujema ||

4.003.14a rákṣā ṇo agne táva rákṣaṇebhī rārakṣāṇáḥ sumakha prīṇānáḥ |
4.003.14c práti ṣphura ví ruja vīḍv áṁho jahí rákṣo máhi cid vāvr̥dhānám ||

4.003.15a ebhír bhava sumánā agne arkaír imā́n spr̥śa mánmabhiḥ śūra vā́jān |
4.003.15c utá bráhmāṇy aṅgiro juṣasva sáṁ te śastír devávātā jareta ||

4.003.16a etā́ víśvā vidúṣe túbhyaṁ vedho nīthā́ny agne niṇyā́ vácāṁsi |
4.003.16c nivácanā kaváye kā́vyāny áśaṁsiṣam matíbhir vípra ukthaíḥ ||

4.004.01a kr̥ṇuṣvá pā́jaḥ prásitiṁ ná pr̥thvī́ṁ yāhí rā́jevā́mavām̐ íbhena |
4.004.01c tr̥ṣvī́m ánu prásitiṁ drūṇānó 'stāsi vídhya rakṣásas tápiṣṭhaiḥ ||

4.004.02a táva bhramā́sa āśuyā́ patanty ánu spr̥śa dhr̥ṣatā́ śóśucānaḥ |
4.004.02c tápūṁṣy agne juhvā̀ pataṁgā́n ásaṁdito ví sr̥ja víṣvag ulkā́ḥ ||

4.004.03a práti spáśo ví sr̥ja tū́rṇitamo bhávā pāyúr viśó asyā́ ádabdhaḥ |
4.004.03c yó no dūré agháśaṁso yó ánty ágne mā́kiṣ ṭe vyáthir ā́ dadharṣīt ||

4.004.04a úd agne tiṣṭha práty ā́ tanuṣva ny àmítrām̐ oṣatāt tigmahete |
4.004.04c yó no árātiṁ samidhāna cakré nīcā́ táṁ dhakṣy atasáṁ ná śúṣkam ||

4.004.05a ūrdhvó bhava práti vidhyā́dhy asmád āvíṣ kr̥ṇuṣva daívyāny agne |
4.004.05c áva sthirā́ tanuhi yātujū́nāṁ jāmím ájāmim prá mr̥ṇīhi śátrūn ||

4.004.06a sá te jānāti sumatíṁ yaviṣṭha yá ī́vate bráhmaṇe gātúm aírat |
4.004.06c víśvāny asmai sudínāni rāyó dyumnā́ny aryó ví dúro abhí dyaut ||

4.004.07a séd agne astu subhágaḥ sudā́nur yás tvā nítyena havíṣā yá ukthaíḥ |
4.004.07c píprīṣati svá ā́yuṣi duroṇé víśvéd asmai sudínā sā́sad iṣṭíḥ ||

4.004.08a árcāmi te sumatíṁ ghóṣy arvā́k sáṁ te vāvā́tā jaratām iyáṁ gī́ḥ |
4.004.08c sváśvās tvā suráthā marjayemāsmé kṣatrā́ṇi dhārayer ánu dyū́n ||

4.004.09a ihá tvā bhū́ry ā́ cared úpa tmán dóṣāvastar dīdivā́ṁsam ánu dyū́n |
4.004.09c krī́ḷantas tvā sumánasaḥ sapemābhí dyumnā́ tasthivā́ṁso jánānām ||

4.004.10a yás tvā sváśvaḥ suhiraṇyó agna upayā́ti vásumatā ráthena |
4.004.10c tásya trātā́ bhavasi tásya sákhā yás ta ātithyám ānuṣág jújoṣat ||

4.004.11a mahó rujāmi bandhútā vácobhis tán mā pitúr gótamād ánv iyāya |
4.004.11c tváṁ no asyá vácasaś cikiddhi hótar yaviṣṭha sukrato dámūnāḥ ||

4.004.12a ásvapnajas taráṇayaḥ suśévā átandrāso 'vr̥kā́ áśramiṣṭhāḥ |
4.004.12c té pāyávaḥ sadhryàñco niṣádyā́gne táva naḥ pāntv amūra ||

4.004.13a yé pāyávo māmateyáṁ te agne páśyanto andháṁ duritā́d árakṣan |
4.004.13c rarákṣa tā́n sukŕ̥to viśvávedā dípsanta íd ripávo nā́ha debhuḥ ||

4.004.14a tváyā vayáṁ sadhanyàs tvótās táva práṇīty aśyāma vā́jān |
4.004.14c ubhā́ śáṁsā sūdaya satyatāte 'nuṣṭhuyā́ kr̥ṇuhy ahrayāṇa ||

4.004.15a ayā́ te agne samídhā vidhema práti stómaṁ śasyámānaṁ gr̥bhāya |
4.004.15c dáhāśáso rakṣásaḥ pāhy àsmā́n druhó nidó mitramaho avadyā́t ||

4.005.01a vaiśvānarā́ya mīḷhúṣe sajóṣāḥ kathā́ dāśemāgnáye br̥hád bhā́ḥ |
4.005.01c ánūnena br̥hatā́ vakṣáthenópa stabhāyad upamín ná ródhaḥ ||

4.005.02a mā́ nindata yá imā́m máhyaṁ rātíṁ devó dadaú mártyāya svadhā́vān |
4.005.02c pā́kāya gŕ̥tso amŕ̥to vícetā vaiśvānaró nŕ̥tamo yahvó agníḥ ||

4.005.03a sā́ma dvibárhā máhi tigmábhr̥ṣṭiḥ sahásraretā vr̥ṣabhás túviṣmān |
4.005.03c padáṁ ná gór ápagūḷhaṁ vividvā́n agnír máhyam préd u vocan manīṣā́m ||

4.005.04a prá tā́m̐ agnír babhasat tigmájambhas tápiṣṭhena śocíṣā yáḥ surā́dhāḥ |
4.005.04c prá yé minánti váruṇasya dhā́ma priyā́ mitrásya cétato dhruvā́ṇi ||

4.005.05a abhrātáro ná yóṣaṇo vyántaḥ patirípo ná jánayo durévāḥ |
4.005.05c pāpā́saḥ sánto anr̥tā́ asatyā́ idám padám ajanatā gabhīrám ||

4.005.06a idám me agne kíyate pāvakā́minate gurúm bhāráṁ ná mánma |
4.005.06c br̥hád dadhātha dhr̥ṣatā́ gabhīráṁ yahvám pr̥ṣṭhám práyasā saptádhātu ||

4.005.07a tám ín nv èvá samanā́ samānám abhí krátvā punatī́ dhītír aśyāḥ |
4.005.07c sasásya cármann ádhi cā́ru pŕ̥śner ágre rupá ā́rupitaṁ jábāru ||

4.005.08a pravā́cyaṁ vácasaḥ kím me asyá gúhā hitám úpa niṇíg vadanti |
4.005.08c yád usríyāṇām ápa vā́r iva vrán pā́ti priyáṁ rupó ágram padáṁ véḥ ||

4.005.09a idám u tyán máhi mahā́m ánīkaṁ yád usríyā sácata pūrvyáṁ gaúḥ |
4.005.09c r̥tásya padé ádhi dī́dyānaṁ gúhā raghuṣyád raghuyád viveda ||

4.005.10a ádha dyutānáḥ pitróḥ sácāsā́manuta gúhyaṁ cā́ru pŕ̥śneḥ |
4.005.10c mātúṣ padé paramé ánti ṣád gór vŕ̥ṣṇaḥ śocíṣaḥ práyatasya jihvā́ ||

4.005.11a r̥táṁ voce námasā pr̥cchyámānas távāśásā jātavedo yádīdám |
4.005.11c tvám asyá kṣayasi yád dha víśvaṁ diví yád u dráviṇaṁ yát pr̥thivyā́m ||

4.005.12a kíṁ no asyá dráviṇaṁ kád dha rátnaṁ ví no voco jātavedaś cikitvā́n |
4.005.12c gúhā́dhvanaḥ paramáṁ yán no asyá réku padáṁ ná nidānā́ áganma ||

4.005.13a kā́ maryā́dā vayúnā kád dha vāmám ácchā gamema raghávo ná vā́jam |
4.005.13c kadā́ no devī́r amŕ̥tasya pátnīḥ sū́ro várṇena tatanann uṣā́saḥ ||

4.005.14a aniréṇa vácasā phalgvèna pratī́tyena kr̥dhúnātr̥pā́saḥ |
4.005.14c ádhā té agne kím ihā́ vadanty anāyudhā́sa ā́satā sacantām ||

4.005.15a asyá śriyé samidhānásya vŕ̥ṣṇo vásor ánīkaṁ dáma ā́ ruroca |
4.005.15c rúśad vásānaḥ sudŕ̥śīkarūpaḥ kṣitír ná rāyā́ puruvā́ro adyaut ||

4.006.01a ūrdhvá ū ṣú ṇo adhvarasya hotar ágne tíṣṭha devátātā yájīyān |
4.006.01c tváṁ hí víśvam abhy ási mánma prá vedhásaś cit tirasi manīṣā́m ||

4.006.02a ámūro hótā ny àsādi vikṣv àgnír mandró vidátheṣu prácetāḥ |
4.006.02c ūrdhvám bhānúṁ savitévāśren méteva dhūmáṁ stabhāyad úpa dyā́m ||

4.006.03a yatā́ sujūrṇī́ rātínī ghr̥tā́cī pradakṣiṇíd devátātim urāṇáḥ |
4.006.03c úd u svárur navajā́ nā́kráḥ paśvó anakti súdhitaḥ sumékaḥ ||

4.006.04a stīrṇé barhíṣi samidhāné agnā́ ūrdhvó adhvaryúr jujuṣāṇó asthāt |
4.006.04c páry agníḥ paśupā́ ná hótā triviṣṭy èti pradíva urāṇáḥ ||

4.006.05a pári tmánā mitádrur eti hótāgnír mandró mádhuvacā r̥tā́vā |
4.006.05c drávanty asya vājíno ná śókā bháyante víśvā bhúvanā yád ábhrāṭ ||

4.006.06a bhadrā́ te agne svanīka saṁdŕ̥g ghorásya sató víṣuṇasya cā́ruḥ |
4.006.06c ná yát te śocís támasā váranta ná dhvasmā́nas tanvī̀ répa ā́ dhuḥ ||

4.006.07a ná yásya sā́tur jánitor ávāri ná mātárāpitárā nū́ cid iṣṭaú |
4.006.07c ádhā mitró ná súdhitaḥ pāvakò 'gnír dīdāya mā́nuṣīṣu vikṣú ||

4.006.08a dvír yám páñca jī́janan saṁvásānāḥ svásāro agním mā́nuṣīṣu vikṣú |
4.006.08c uṣarbúdham atharyò ná dántaṁ śukráṁ svā́sam paraśúṁ ná tigmám ||

4.006.09a táva tyé agne haríto ghr̥tasnā́ róhitāsa r̥jváñcaḥ sváñcaḥ |
4.006.09c aruṣā́so vŕ̥ṣaṇa r̥jumuṣkā́ ā́ devátātim ahvanta dasmā́ḥ ||

4.006.10a yé ha tyé te sáhamānā ayā́sas tveṣā́so agne arcáyaś cáranti |
4.006.10c śyenā́so ná duvasanā́so árthaṁ tuviṣvaṇáso mā́rutaṁ ná śárdhaḥ ||

4.006.11a ákāri bráhma samidhāna túbhyaṁ śáṁsāty uktháṁ yájate vy ū̀ dhāḥ |
4.006.11c hótāram agním mánuṣo ní ṣedur namasyánta uśíjaḥ śáṁsam āyóḥ ||

4.007.01a ayám ihá prathamó dhāyi dhātŕ̥bhir hótā yájiṣṭho adhvaréṣv ī́ḍyaḥ |
4.007.01c yám ápnavāno bhŕ̥gavo virurucúr váneṣu citráṁ vibhvàṁ viśé-viśe ||

4.007.02a ágne kadā́ ta ānuṣág bhúvad devásya cétanam |
4.007.02c ádhā hí tvā jagr̥bhriré mártāso vikṣv ī́ḍyam ||

4.007.03a r̥tā́vānaṁ vícetasam páśyanto dyā́m iva stŕ̥bhiḥ |
4.007.03c víśveṣām adhvarā́ṇāṁ haskartā́raṁ dáme-dame ||

4.007.04a āśúṁ dūtáṁ vivásvato víśvā yáś carṣaṇī́r abhí |
4.007.04c ā́ jabhruḥ ketúm āyávo bhŕ̥gavāṇaṁ viśé-viśe ||

4.007.05a tám īṁ hótāram ānuṣák cikitvā́ṁsaṁ ní ṣedire |
4.007.05c raṇvám pāvakáśociṣaṁ yájiṣṭhaṁ saptá dhā́mabhiḥ ||

4.007.06a táṁ śáśvatīṣu mātŕ̥ṣu vána ā́ vītám áśritam |
4.007.06c citráṁ sántaṁ gúhā hitáṁ suvédaṁ kūcidarthínam ||

4.007.07a sasásya yád víyutā sásminn ū́dhann r̥tásya dhā́man raṇáyanta devā́ḥ |
4.007.07c mahā́m̐ agnír námasā rātáhavyo vér adhvarā́ya sádam íd r̥tā́vā ||

4.007.08a vér adhvarásya dūtyā̀ni vidvā́n ubhé antā́ ródasī saṁcikitvā́n |
4.007.08c dūtá īyase pradíva urāṇó vidúṣṭaro divá āródhanāni ||

4.007.09a kr̥ṣṇáṁ ta éma rúśataḥ puró bhā́ś cariṣṇv àrcír vápuṣām íd ékam |
4.007.09c yád ápravītā dádhate ha gárbhaṁ sadyáś cij jātó bhávasī́d u dūtáḥ ||

4.007.10a sadyó jātásya dádr̥śānam ójo yád asya vā́to anuvā́ti śocíḥ |
4.007.10c vr̥ṇákti tigmā́m ataséṣu jihvā́ṁ sthirā́ cid ánnā dayate ví jámbhaiḥ ||

4.007.11a tr̥ṣú yád ánnā tr̥ṣúṇā vavákṣa tr̥ṣúṁ dūtáṁ kr̥ṇute yahvó agníḥ |
4.007.11c vā́tasya meḷíṁ sacate nijū́rvann āśúṁ ná vājayate hinvé árvā ||

4.008.01a dūtáṁ vo viśvávedasaṁ havyavā́ham ámartyam |
4.008.01c yájiṣṭham r̥ñjase girā́ ||

4.008.02a sá hí védā vásudhitim mahā́m̐ āródhanaṁ diváḥ |
4.008.02c sá devā́m̐ éhá vakṣati ||

4.008.03a sá veda devá ānámaṁ devā́m̐ r̥tāyaté dáme |
4.008.03c dā́ti priyā́ṇi cid vásu ||

4.008.04a sá hótā séd u dūtyàṁ cikitvā́m̐ antár īyate |
4.008.04c vidvā́m̐ āródhanaṁ diváḥ ||

4.008.05a té syāma yé agnáye dadāśúr havyádātibhiḥ |
4.008.05c yá īm púṣyanta indhaté ||

4.008.06a té rāyā́ té suvī́ryaiḥ sasavā́ṁso ví śr̥ṇvire |
4.008.06c yé agnā́ dadhiré dúvaḥ ||

4.008.07a asmé rā́yo divé-dive sáṁ carantu puruspŕ̥haḥ |
4.008.07c asmé vā́jāsa īratām ||

4.008.08a sá vípraś carṣaṇīnā́ṁ śávasā mā́nuṣāṇām |
4.008.08c áti kṣipréva vidhyati ||

4.009.01a ágne mr̥ḷá mahā́m̐ asi yá īm ā́ devayúṁ jánam |
4.009.01c iyétha barhír āsádam ||

4.009.02a sá mā́nuṣīṣu dūḷábho vikṣú prāvī́r ámartyaḥ |
4.009.02c dūtó víśveṣām bhuvat ||

4.009.03a sá sádma pári ṇīyate hótā mandró díviṣṭiṣu |
4.009.03c utá pótā ní ṣīdati ||

4.009.04a utá gnā́ agnír adhvará utó gr̥hápatir dáme |
4.009.04c utá brahmā́ ní ṣīdati ||

4.009.05a véṣi hy àdhvarīyatā́m upavaktā́ jánānām |
4.009.05b havyā́ ca mā́nuṣāṇām ||

4.009.06a véṣī́d v asya dūtyàṁ yásya jújoṣo adhvarám |
4.009.06b havyám mártasya vóḷhave ||

4.009.07a asmā́kaṁ joṣy adhvarám asmā́kaṁ yajñám aṅgiraḥ |
4.009.07c asmā́kaṁ śr̥ṇudhī hávam ||

4.009.08a pári te dūḷábho rátho 'smā́m̐ aśnotu viśvátaḥ |
4.009.08c yéna rákṣasi dāśúṣaḥ ||

4.010.01a ágne tám adyā́śvaṁ ná stómaiḥ krátuṁ ná bhadráṁ hr̥dispŕ̥śam |
4.010.01c r̥dhyā́mā ta óhaiḥ ||

4.010.02a ádhā hy àgne krátor bhadrásya dákṣasya sādhóḥ |
4.010.02c rathī́r r̥tásya br̥ható babhū́tha ||

4.010.03a ebhír no arkaír bhávā no arvā́ṅ svàr ṇá jyótiḥ |
4.010.03c ágne víśvebhiḥ sumánā ánīkaiḥ ||

4.010.04a ābhíṣ ṭe adyá gīrbhír gr̥ṇántó 'gne dā́śema |
4.010.04c prá te divó ná stanayanti śúṣmāḥ ||

4.010.05a táva svā́diṣṭhā́gne sáṁdr̥ṣṭir idā́ cid áhna idā́ cid aktóḥ |
4.010.05c śriyé rukmó ná rocata upāké ||

4.010.06a ghr̥táṁ ná pūtáṁ tanū́r arepā́ḥ śúci híraṇyam |
4.010.06c tát te rukmó ná rocata svadhāvaḥ ||

4.010.07a kr̥táṁ cid dhí ṣmā sánemi dvéṣó 'gna inóṣi mártāt |
4.010.07c itthā́ yájamānād r̥tāvaḥ ||

4.010.08a śivā́ naḥ sakhyā́ sántu bhrātrā́gne devéṣu yuṣmé |
4.010.08c sā́ no nā́bhiḥ sádane sásminn ū́dhan ||

4.011.01a bhadráṁ te agne sahasinn ánīkam upāká ā́ rocate sū́ryasya |
4.011.01c rúśad dr̥śé dadr̥śe naktayā́ cid árūkṣitaṁ dr̥śá ā́ rūpé ánnam ||

4.011.02a ví ṣāhy agne gr̥ṇaté manīṣā́ṁ kháṁ vépasā tuvijāta stávānaḥ |
4.011.02c víśvebhir yád vāvánaḥ śukra devaís tán no rāsva sumaho bhū́ri mánma ||

4.011.03a tvád agne kā́vyā tván manīṣā́s tvád ukthā́ jāyante rā́dhyāni |
4.011.03c tvád eti dráviṇaṁ vīrápeśā itthā́dhiye dāśúṣe mártyāya ||

4.011.04a tvád vājī́ vājambharó víhāyā abhiṣṭikŕ̥j jāyate satyáśuṣmaḥ |
4.011.04c tvád rayír devájūto mayobhús tvád āśúr jūjuvā́m̐ agne árvā ||

4.011.05a tvā́m agne prathamáṁ devayánto devám mártā amr̥ta mandrájihvam |
4.011.05c dveṣoyútam ā́ vivāsanti dhībhír dámūnasaṁ gr̥hápatim ámūram ||

4.011.06a āré asmád ámatim āré áṁha āré víśvāṁ durmatíṁ yán nipā́si |
4.011.06c doṣā́ śiváḥ sahasaḥ sūno agne yáṁ devá ā́ cit sácase svastí ||

4.012.01a yás tvā́m agna inádhate yatásruk trís te ánnaṁ kr̥ṇávat sásminn áhan |
4.012.01c sá sú dyumnaír abhy àstu prasákṣat táva krátvā jātavedaś cikitvā́n ||

4.012.02a idhmáṁ yás te jabhárac chaśramāṇó mahó agne ánīkam ā́ saparyán |
4.012.02c sá idhānáḥ práti doṣā́m uṣā́sam púṣyan rayíṁ sacate ghnánn amítrān ||

4.012.03a agnír īśe br̥hatáḥ kṣatríyasyāgnír vā́jasya paramásya rāyáḥ |
4.012.03c dádhāti rátnaṁ vidhaté yáviṣṭho vy ā̀nuṣáṅ mártyāya svadhā́vān ||

4.012.04a yác cid dhí te puruṣatrā́ yaviṣṭhā́cittibhiś cakr̥mā́ kác cid ā́gaḥ |
4.012.04c kr̥dhī́ ṣv àsmā́m̐ áditer ánāgān vy énāṁsi śiśratho víṣvag agne ||

4.012.05a maháś cid agna énaso abhī́ka ūrvā́d devā́nām utá mártyānām |
4.012.05c mā́ te sákhāyaḥ sádam íd riṣāma yácchā tokā́ya tánayāya śáṁ yóḥ ||

4.012.06a yáthā ha tyád vasavo gauryàṁ cit padí ṣitā́m ámuñcatā yajatrāḥ |
4.012.06c evó ṣv àsmán muñcatā vy áṁhaḥ prá tāry agne prataráṁ na ā́yuḥ ||

4.013.01a práty agnír uṣásām ágram akhyad vibhātīnā́ṁ sumánā ratnadhéyam |
4.013.01c yātám aśvinā sukŕ̥to duroṇám út sū́ryo jyótiṣā devá eti ||

4.013.02a ūrdhvám bhānúṁ savitā́ devó aśred drapsáṁ dávidhvad gaviṣó ná sátvā |
4.013.02c ánu vratáṁ váruṇo yanti mitró yát sū́ryaṁ divy ā̀roháyanti ||

4.013.03a yáṁ sīm ákr̥ṇvan támase vipŕ̥ce dhruvákṣemā ánavasyanto ártham |
4.013.03c táṁ sū́ryaṁ harítaḥ saptá yahvī́ḥ spáśaṁ víśvasya jágato vahanti ||

4.013.04a váhiṣṭhebhir viháran yāsi tántum avavyáyann ásitaṁ deva vásma |
4.013.04c dávidhvato raśmáyaḥ sū́ryasya cármevā́vādhus támo apsv àntáḥ ||

4.013.05a ánāyato ánibaddhaḥ kathā́yáṁ nyàṅṅ uttānó 'va padyate ná |
4.013.05c káyā yāti svadháyā kó dadarśa diváḥ skambháḥ sámr̥taḥ pāti nā́kam ||

4.014.01a práty agnír uṣáso jātávedā ákhyad devó rócamānā máhobhiḥ |
4.014.01c ā́ nāsatyorugāyā́ ráthenemáṁ yajñám úpa no yātam áccha ||

4.014.02a ūrdhváṁ ketúṁ savitā́ devó aśrej jyótir víśvasmai bhúvanāya kr̥ṇván |
4.014.02c ā́prā dyā́vāpr̥thivī́ antárikṣaṁ ví sū́ryo raśmíbhiś cékitānaḥ ||

4.014.03a āváhanty aruṇī́r jyótiṣā́gān mahī́ citrā́ raśmíbhiś cékitānā |
4.014.03c prabodháyantī suvitā́ya devy ùṣā́ īyate suyújā ráthena ||

4.014.04a ā́ vāṁ váhiṣṭhā ihá té vahantu ráthā áśvāsa uṣáso vyùṣṭau |
4.014.04c imé hí vām madhupéyāya sómā asmín yajñé vr̥ṣaṇā mādayethām ||

4.014.05a ánāyato ánibaddhaḥ kathā́yáṁ nyàṅṅ uttānó 'va padyate ná |
4.014.05c káyā yāti svadháyā kó dadarśa diváḥ skambháḥ sámr̥taḥ pāti nā́kam ||

4.015.01a agnír hótā no adhvaré vājī́ sán pári ṇīyate |
4.015.01c devó devéṣu yajñíyaḥ ||

4.015.02a pári triviṣṭy àdhvaráṁ yā́ty agnī́ rathī́r iva |
4.015.02c ā́ devéṣu práyo dádhat ||

4.015.03a pári vā́japatiḥ kavír agnír havyā́ny akramīt |
4.015.03c dádhad rátnāni dāśúṣe ||

4.015.04a ayáṁ yáḥ sŕ̥ñjaye puró daivavāté samidhyáte |
4.015.04c dyumā́m̐ amitradámbhanaḥ ||

4.015.05a ásya ghā vīrá ī́vato 'gnér īśīta mártyaḥ |
4.015.05c tigmájambhasya mīḷhúṣaḥ ||

4.015.06a tám árvantaṁ ná sānasím aruṣáṁ ná diváḥ śíśum |
4.015.06c marmr̥jyánte divé-dive ||

4.015.07a bódhad yán mā háribhyāṁ kumāráḥ sāhadevyáḥ |
4.015.07c ácchā ná hūtá úd aram ||

4.015.08a utá tyā́ yajatā́ hárī kumārā́t sāhadevyā́t |
4.015.08c práyatā sadyá ā́ dade ||

4.015.09a eṣá vāṁ devāv aśvinā kumāráḥ sāhadevyáḥ |
4.015.09c dīrghā́yur astu sómakaḥ ||

4.015.10a táṁ yuváṁ devāv aśvinā kumāráṁ sāhadevyám |
4.015.10c dīrghā́yuṣaṁ kr̥ṇotana ||

4.016.01a ā́ satyó yātu maghávām̐ r̥jīṣī́ drávantv asya háraya úpa naḥ |
4.016.01c tásmā íd ándhaḥ suṣumā sudákṣam ihā́bhipitváṁ karate gr̥ṇānáḥ ||

4.016.02a áva sya śūrā́dhvano nā́nte 'smín no adyá sávane mandádhyai |
4.016.02c śáṁsāty ukthám uśáneva vedhā́ś cikitúṣe asuryā̀ya mánma ||

4.016.03a kavír ná niṇyáṁ vidáthāni sā́dhan vŕ̥ṣā yát sékaṁ vipipānó árcāt |
4.016.03c divá itthā́ jījanat saptá kārū́n áhnā cic cakrur vayúnā gr̥ṇántaḥ ||

4.016.04a svàr yád védi sudŕ̥śīkam arkaír máhi jyótī rurucur yád dha vástoḥ |
4.016.04c andhā́ támāṁsi dúdhitā vicákṣe nŕ̥bhyaś cakāra nŕ̥tamo abhíṣṭau ||

4.016.05a vavakṣá índro ámitam r̥jīṣy ùbhé ā́ paprau ródasī mahitvā́ |
4.016.05c átaś cid asya mahimā́ ví recy abhí yó víśvā bhúvanā babhū́va ||

4.016.06a víśvāni śakró náryāṇi vidvā́n apó rireca sákhibhir níkāmaiḥ |
4.016.06c áśmānaṁ cid yé bibhidúr vácobhir vrajáṁ gómantam uśíjo ví vavruḥ ||

4.016.07a apó vr̥tráṁ vavrivā́ṁsam párāhan prā́vat te vájram pr̥thivī́ sácetāḥ |
4.016.07c prā́rṇāṁsi samudríyāṇy ainoḥ pátir bhávañ chávasā śūra dhr̥ṣṇo ||

4.016.08a apó yád ádrim puruhūta dárdar āvír bhuvat sarámā pūrvyáṁ te |
4.016.08c sá no netā́ vā́jam ā́ darṣi bhū́riṁ gotrā́ rujánn áṅgirobhir gr̥ṇānáḥ ||

4.016.09a ácchā kavíṁ nr̥maṇo gā abhíṣṭau svàrṣātā maghavan nā́dhamānam |
4.016.09c ūtíbhis tám iṣaṇo dyumnáhūtau ní māyā́vān ábrahmā dásyur arta ||

4.016.10a ā́ dasyughnā́ mánasā yāhy ástam bhúvat te kútsaḥ sakhyé níkāmaḥ |
4.016.10c své yónau ní ṣadataṁ sárūpā ví vāṁ cikitsad r̥tacíd dha nā́rī ||

4.016.11a yā́si kútsena sarátham avasyús todó vā́tasya háryor ī́śānaḥ |
4.016.11c r̥jrā́ vā́jaṁ ná gádhyaṁ yúyūṣan kavír yád áhan pā́ryāya bhū́ṣāt ||

4.016.12a kútsāya śúṣṇam aśúṣaṁ ní barhīḥ prapitvé áhnaḥ kúyavaṁ sahásrā |
4.016.12c sadyó dásyūn prá mr̥ṇa kutsyéna prá sū́raś cakráṁ vr̥hatād abhī́ke ||

4.016.13a tvám píprum mŕ̥gayaṁ śūśuvā́ṁsam r̥jíśvane vaidathinā́ya randhīḥ |
4.016.13c pañcāśát kr̥ṣṇā́ ní vapaḥ sahásrā́tkaṁ ná púro jarimā́ ví dardaḥ ||

4.016.14a sū́ra upāké tanvàṁ dádhāno ví yát te céty amŕ̥tasya várpaḥ |
4.016.14c mr̥gó ná hastī́ táviṣīm uṣāṇáḥ siṁhó ná bhīmá ā́yudhāni bíbhrat ||

4.016.15a índraṁ kā́mā vasūyánto agman svàrmīḷhe ná sávane cakānā́ḥ |
4.016.15c śravasyávaḥ śaśamānā́sa ukthaír óko ná raṇvā́ sudŕ̥śīva puṣṭíḥ ||

4.016.16a tám íd va índraṁ suhávaṁ huvema yás tā́ cakā́ra náryā purū́ṇi |
4.016.16c yó mā́vate jaritré gádhyaṁ cin makṣū́ vā́jam bhárati spārhárādhāḥ ||

4.016.17a tigmā́ yád antár aśániḥ pátāti kásmiñ cic chūra muhuké jánānām |
4.016.17c ghorā́ yád arya sámr̥tir bhávāty ádha smā nas tanvò bodhi gopā́ḥ ||

4.016.18a bhúvo 'vitā́ vāmádevasya dhīnā́m bhúvaḥ sákhāvr̥kó vā́jasātau |
4.016.18c tvā́m ánu prámatim ā́ jaganmoruśáṁso jaritré viśvádha syāḥ ||

4.016.19a ebhír nŕ̥bhir indra tvāyúbhiṣ ṭvā maghávadbhir maghavan víśva ājaú |
4.016.19c dyā́vo ná dyumnaír abhí sánto aryáḥ kṣapó madema śarádaś ca pūrvī́ḥ ||

4.016.20a evéd índrāya vr̥ṣabhā́ya vŕ̥ṣṇe bráhmākarma bhŕ̥gavo ná rátham |
4.016.20c nū́ cid yáthā naḥ sakhyā́ viyóṣad ásan na ugrò 'vitā́ tanūpā́ḥ ||

4.016.21a nū́ ṣṭutá indra nū́ gr̥ṇāná íṣaṁ jaritré nadyò ná pīpeḥ |
4.016.21c ákāri te harivo bráhma návyaṁ dhiyā́ syāma rathyàḥ sadāsā́ḥ ||

4.017.01a tvám mahā́m̐ indra túbhyaṁ ha kṣā́ ánu kṣatrám maṁhánā manyata dyaúḥ |
4.017.01c tváṁ vr̥tráṁ śávasā jaghanvā́n sr̥jáḥ síndhūm̐r áhinā jagrasānā́n ||

4.017.02a táva tviṣó jániman rejata dyaú réjad bhū́mir bhiyásā svásya manyóḥ |
4.017.02c r̥ghāyánta subhvàḥ párvatāsa ā́rdan dhánvāni saráyanta ā́paḥ ||

4.017.03a bhinád giríṁ śávasā vájram iṣṇánn āviṣkr̥ṇvānáḥ sahasāná ójaḥ |
4.017.03c vádhīd vr̥tráṁ vájreṇa mandasānáḥ sárann ā́po jávasā hatávr̥ṣṇīḥ ||

4.017.04a suvī́ras te janitā́ manyata dyaúr índrasya kartā́ svápastamo bhūt |
4.017.04c yá īṁ jajā́na svaryàṁ suvájram ánapacyutaṁ sádaso ná bhū́ma ||

4.017.05a yá éka ic cyāváyati prá bhū́mā rā́jā kr̥ṣṭīnā́m puruhūtá índraḥ |
4.017.05c satyám enam ánu víśve madanti rātíṁ devásya gr̥ṇató maghónaḥ ||

4.017.06a satrā́ sómā abhavann asya víśve satrā́ mádāso br̥ható mádiṣṭhāḥ |
4.017.06c satrā́bhavo vásupatir vásūnāṁ dátre víśvā adhithā indra kr̥ṣṭī́ḥ ||

4.017.07a tvám ádha prathamáṁ jā́yamānó 'me víśvā adhithā indra kr̥ṣṭī́ḥ |
4.017.07c tvám práti praváta āśáyānam áhiṁ vájreṇa maghavan ví vr̥ścaḥ ||

4.017.08a satrāháṇaṁ dā́dhr̥ṣiṁ túmram índram mahā́m apāráṁ vr̥ṣabháṁ suvájram |
4.017.08c hántā yó vr̥tráṁ sánitotá vā́jaṁ dā́tā maghā́ni maghávā surā́dhāḥ ||

4.017.09a ayáṁ vŕ̥taś cātayate samīcī́r yá ājíṣu maghávā śr̥ṇvá ékaḥ |
4.017.09c ayáṁ vā́jam bharati yáṁ sanóty asyá priyā́saḥ sakhyé syāma ||

4.017.10a ayáṁ śr̥ṇve ádha jáyann utá ghnánn ayám utá prá kr̥ṇute yudhā́ gā́ḥ |
4.017.10c yadā́ satyáṁ kr̥ṇuté manyúm índro víśvaṁ dr̥ḷhám bhayata éjad asmāt ||

4.017.11a sám índro gā́ ajayat sáṁ híraṇyā sám aśviyā́ maghávā yó ha pūrvī́ḥ |
4.017.11c ebhír nŕ̥bhir nŕ̥tamo asya śākaí rāyó vibhaktā́ sambharáś ca vásvaḥ ||

4.017.12a kíyat svid índro ádhy eti mātúḥ kíyat pitúr janitúr yó jajā́na |
4.017.12c yó asya śúṣmam muhukaír íyarti vā́to ná jūtáḥ stanáyadbhir abhraíḥ ||

4.017.13a kṣiyántaṁ tvam ákṣiyantaṁ kr̥ṇotī́yarti reṇúm maghávā samóham |
4.017.13c vibhañjanúr aśánimām̐ iva dyaúr utá stotā́ram maghávā vásau dhāt ||

4.017.14a ayáṁ cakrám iṣaṇat sū́ryasya ny étaśaṁ rīramat sasr̥māṇám |
4.017.14b ā́ kr̥ṣṇá īṁ juhurāṇó jigharti tvacó budhné rájaso asyá yónau ||

4.017.15a ásiknyāṁ yájamāno ná hótā ||

4.017.16a gavyánta índraṁ sakhyā́ya víprā aśvāyánto vŕ̥ṣaṇaṁ vājáyantaḥ |
4.017.16c janīyánto janidā́m ákṣitotim ā́ cyāvayāmo 'vaté ná kóśam ||

4.017.17a trātā́ no bodhi dádr̥śāna āpír abhikhyātā́ marḍitā́ somyā́nām |
4.017.17c sákhā pitā́ pitŕ̥tamaḥ pitr̥̄ṇā́ṁ kártem u lokám uśaté vayodhā́ḥ ||

4.017.18a sakhīyatā́m avitā́ bodhi sákhā gr̥ṇāná indra stuvaté váyo dhāḥ |
4.017.18c vayáṁ hy ā́ te cakr̥mā́ sabā́dha ābhíḥ śámībhir maháyanta indra ||

4.017.19a stutá índro maghávā yád dha vr̥trā́ bhū́rīṇy éko apratī́ni hanti |
4.017.19c asyá priyó jaritā́ yásya śárman nákir devā́ vāráyante ná mártāḥ ||

4.017.20a evā́ na índro maghávā virapśī́ kárat satyā́ carṣaṇīdhŕ̥d anarvā́ |
4.017.20c tváṁ rā́jā janúṣāṁ dhehy asmé ádhi śrávo mā́hinaṁ yáj jaritré ||

4.017.21a nū́ ṣṭutá indra nū́ gr̥ṇāná íṣaṁ jaritré nadyò ná pīpeḥ |
4.017.21c ákāri te harivo bráhma návyaṁ dhiyā́ syāma rathyàḥ sadāsā́ḥ ||

4.018.01a ayám pánthā ánuvittaḥ purāṇó yáto devā́ udájāyanta víśve |
4.018.01c átaś cid ā́ janiṣīṣṭa právr̥ddho mā́ mātáram amuyā́ páttave kaḥ ||

4.018.02a nā́hám áto nír ayā durgáhaitát tiraścátā pārśvā́n nír gamāṇi |
4.018.02c bahū́ni me ákr̥tā kártvāni yúdhyai tvena sáṁ tvena pr̥cchai ||

4.018.03a parāyatī́m mātáram ánv acaṣṭa ná nā́nu gāny ánu nū́ gamāni |
4.018.03c tváṣṭur gr̥hé apibat sómam índraḥ śatadhanyàṁ camvòḥ sutásya ||

4.018.04a kíṁ sá ŕ̥dhak kr̥ṇavad yáṁ sahásram māsó jabhā́ra śarádaś ca pūrvī́ḥ |
4.018.04c nahī́ nv àsya pratimā́nam ásty antár jātéṣūtá yé jánitvāḥ ||

4.018.05a avadyám iva mányamānā gúhākar índram mātā́ vīryèṇā nyr̥̀ṣṭam |
4.018.05c áthód asthāt svayám átkaṁ vásāna ā́ ródasī apr̥ṇāj jā́yamānaḥ ||

4.018.06a etā́ arṣanty alalābhávantīr r̥tā́varīr iva saṁkróśamānāḥ |
4.018.06c etā́ ví pr̥ccha kím idám bhananti kám ā́po ádrim paridhíṁ rujanti ||

4.018.07a kím u ṣvid asmai nivído bhananténdrasyāvadyáṁ didhiṣanta ā́paḥ |
4.018.07c mámaitā́n putró mahatā́ vadhéna vr̥tráṁ jaghanvā́m̐ asr̥jad ví síndhūn ||

4.018.08a mámac caná tvā yuvatíḥ parā́sa mámac caná tvā kuṣávā jagā́ra |
4.018.08c mámac cid ā́paḥ śíśave mamr̥ḍyur mámac cid índraḥ sáhasód atiṣṭhat ||

4.018.09a mámac caná te maghavan vyàṁso nivividhvā́m̐ ápa hánū jaghā́na |
4.018.09c ádhā níviddha úttaro babhūvā́ñ chíro dāsásya sám piṇag vadhéna ||

4.018.10a gr̥ṣṭíḥ sasūva stháviraṁ tavāgā́m anādhr̥ṣyáṁ vr̥ṣabháṁ túmram índram |
4.018.10c árīḷhaṁ vatsáṁ caráthāya mātā́ svayáṁ gātúṁ tanvà icchámānam ||

4.018.11a utá mātā́ mahiṣám ánv avenad amī́ tvā jahati putra devā́ḥ |
4.018.11c áthābravīd vr̥trám índro haniṣyán sákhe viṣṇo vitaráṁ ví kramasva ||

4.018.12a kás te mātáraṁ vidhávām acakrac chayúṁ kás tvā́m ajighāṁsac cárantam |
4.018.12c kás te devó ádhi mārḍīká āsīd yát prā́kṣiṇāḥ pitáram pādagŕ̥hya ||

4.018.13a ávartyā śúna āntrā́ṇi pece ná devéṣu vivide marḍitā́ram |
4.018.13c ápaśyaṁ jāyā́m ámahīyamānām ádhā me śyenó mádhv ā́ jabhāra ||

4.019.01a evā́ tvā́m indra vajrinn átra víśve devā́saḥ suhávāsa ū́māḥ |
4.019.01c mahā́m ubhé ródasī vr̥ddhám r̥ṣváṁ nír ékam íd vr̥ṇate vr̥trahátye ||

4.019.02a ávāsr̥janta jívrayo ná devā́ bhúvaḥ samrā́ḷ indra satyáyoniḥ |
4.019.02c áhann áhim pariśáyānam árṇaḥ prá vartanī́r arado viśvádhenāḥ ||

4.019.03a átr̥pṇuvantaṁ víyatam abudhyám ábudhyamānaṁ suṣupāṇám indra |
4.019.03c saptá práti praváta āśáyānam áhiṁ vájreṇa ví riṇā aparván ||

4.019.04a ákṣodayac chávasā kṣā́ma budhnáṁ vā́r ṇá vā́tas táviṣībhir índraḥ |
4.019.04c dr̥ḷhā́ny aubhnād uśámāna ójó 'vābhinat kakúbhaḥ párvatānām ||

4.019.05a abhí prá dadrur jánayo ná gárbhaṁ ráthā iva prá yayuḥ sākám ádrayaḥ |
4.019.05c átarpayo visŕ̥ta ubjá ūrmī́n tváṁ vr̥tā́m̐ ariṇā indra síndhūn ||

4.019.06a tvám mahī́m avániṁ viśvádhenāṁ turvī́taye vayyā̀ya kṣárantīm |
4.019.06c áramayo námasaíjad árṇaḥ sutaraṇā́m̐ akr̥ṇor indra síndhūn ||

4.019.07a prā́grúvo nabhanvò ná vákvā dhvasrā́ apinvad yuvatī́r r̥tajñā́ḥ |
4.019.07c dhánvāny ájrām̐ apr̥ṇak tr̥ṣāṇā́m̐ ádhog índraḥ staryò dáṁsupatnīḥ ||

4.019.08a pūrvī́r uṣásaḥ śarádaś ca gūrtā́ vr̥tráṁ jaghanvā́m̐ asr̥jad ví síndhūn |
4.019.08c páriṣṭhitā atr̥ṇad badbadhānā́ḥ sīrā́ índraḥ srávitave pr̥thivyā́ ||

4.019.09a vamrī́bhiḥ putrám agrúvo adānáṁ nivéśanād dhariva ā́ jabhartha |
4.019.09c vy àndhó akhyad áhim ādadānó nír bhūd ukhacchít sám aranta párva ||

4.019.10a prá te pū́rvāṇi káraṇāni viprāvidvā́m̐ āha vidúṣe kárāṁsi |
4.019.10c yáthā-yathā vŕ̥ṣṇyāni svágūrtā́pāṁsi rājan náryā́viveṣīḥ ||

4.019.11a nū́ ṣṭutá indra nū́ gr̥ṇāná íṣaṁ jaritré nadyò ná pīpeḥ |
4.019.11c ákāri te harivo bráhma návyaṁ dhiyā́ syāma rathyàḥ sadāsā́ḥ ||

4.020.01a ā́ na índro dūrā́d ā́ na āsā́d abhiṣṭikŕ̥d ávase yāsad ugráḥ |
4.020.01c ójiṣṭhebhir nr̥pátir vájrabāhuḥ saṁgé samátsu turváṇiḥ pr̥tanyū́n ||

4.020.02a ā́ na índro háribhir yātv ácchārvācīnó 'vase rā́dhase ca |
4.020.02c tíṣṭhāti vajrī́ maghávā virapśī́máṁ yajñám ánu no vā́jasātau ||

4.020.03a imáṁ yajñáṁ tvám asmā́kam indra puró dádhat saniṣyasi krátuṁ naḥ |
4.020.03c śvaghnī́va vajrin sanáye dhánānāṁ tváyā vayám aryá ājíṁ jayema ||

4.020.04a uśánn u ṣú ṇaḥ sumánā upāké sómasya nú súṣutasya svadhāvaḥ |
4.020.04c pā́ indra prátibhr̥tasya mádhvaḥ sám ándhasā mamadaḥ pr̥ṣṭhyèna ||

4.020.05a ví yó rarapśá ŕ̥ṣibhir návebhir vr̥kṣó ná pakváḥ sŕ̥ṇyo ná jétā |
4.020.05c máryo ná yóṣām abhí mányamānó 'cchā vivakmi puruhūtám índram ||

4.020.06a girír ná yáḥ svátavām̐ r̥ṣvá índraḥ sanā́d evá sáhase jātá ugráḥ |
4.020.06c ā́dartā vájraṁ stháviraṁ ná bhīmá udnéva kóśaṁ vásunā nyr̥̀ṣṭam ||

4.020.07a ná yásya vartā́ janúṣā nv ásti ná rā́dhasa āmarītā́ maghásya |
4.020.07c udvāvr̥ṣāṇás taviṣīva ugrāsmábhyaṁ daddhi puruhūta rāyáḥ ||

4.020.08a ī́kṣe rāyáḥ kṣáyasya carṣaṇīnā́m utá vrajám apavartā́si gónām |
4.020.08c śikṣānaráḥ samithéṣu prahā́vān vásvo rāśím abhinetā́si bhū́rim ||

4.020.09a káyā tác chr̥ṇve śácyā śáciṣṭho yáyā kr̥ṇóti múhu kā́ cid r̥ṣváḥ |
4.020.09c purú dāśúṣe vícayiṣṭho áṁhó 'thā dadhāti dráviṇaṁ jaritré ||

4.020.10a mā́ no mardhīr ā́ bharā daddhí tán naḥ prá dāśúṣe dā́tave bhū́ri yát te |
4.020.10c návye deṣṇé śasté asmín ta ukthé prá bravāma vayám indra stuvántaḥ ||

4.020.11a nū́ ṣṭutá indra nū́ gr̥ṇāná íṣaṁ jaritré nadyò ná pīpeḥ |
4.020.11c ákāri te harivo bráhma návyaṁ dhiyā́ syāma rathyàḥ sadāsā́ḥ ||

4.021.01a ā́ yātv índró 'vasa úpa na ihá stutáḥ sadhamā́d astu śū́raḥ |
4.021.01c vāvr̥dhānás táviṣīr yásya pūrvī́r dyaúr ná kṣatrám abhíbhūti púṣyāt ||

4.021.02a tásyéd ihá stavatha vŕ̥ṣṇyāni tuvidyumnásya tuvirā́dhaso nr̥̄́n |
4.021.02c yásya krátur vidathyò ná samrā́ṭ sāhvā́n tárutro abhy ásti kr̥ṣṭī́ḥ ||

4.021.03a ā́ yātv índro divá ā́ pr̥thivyā́ makṣū́ samudrā́d utá vā púrīṣāt |
4.021.03c svàrṇarād ávase no marútvān parāváto vā sádanād r̥tásya ||

4.021.04a sthūrásya rāyó br̥ható yá ī́śe tám u ṣṭavāma vidátheṣv índram |
4.021.04c yó vāyúnā jáyati gómatīṣu prá dhr̥ṣṇuyā́ náyati vásyo áccha ||

4.021.05a úpa yó námo námasi stabhāyánn íyarti vā́caṁ janáyan yájadhyai |
4.021.05c r̥ñjasānáḥ puruvā́ra ukthaír éndraṁ kr̥ṇvīta sádaneṣu hótā ||

4.021.06a dhiṣā́ yádi dhiṣaṇyántaḥ saraṇyā́n sádanto ádrim auśijásya góhe |
4.021.06c ā́ duróṣāḥ pāstyásya hótā yó no mahā́n saṁváraṇeṣu váhniḥ ||

4.021.07a satrā́ yád īm bhārvarásya vŕ̥ṣṇaḥ síṣakti śúṣmaḥ stuvaté bhárāya |
4.021.07c gúhā yád īm auśijásya góhe prá yád dhiyé prā́yase mádāya ||

4.021.08a ví yád várāṁsi párvatasya vr̥ṇvé páyobhir jinvé apā́ṁ jávāṁsi |
4.021.08c vidád gaurásya gavayásya góhe yádī vā́jāya sudhyò váhanti ||

4.021.09a bhadrā́ te hástā súkr̥totá pāṇī́ prayantā́rā stuvaté rā́dha indra |
4.021.09c kā́ te níṣattiḥ kím u nó mamatsi kíṁ nód-ud u harṣase dā́tavā́ u ||

4.021.10a evā́ vásva índraḥ satyáḥ samrā́ḍ ḍhántā vr̥tráṁ várivaḥ pūráve kaḥ |
4.021.10c púruṣṭuta krátvā naḥ śagdhi rāyó bhakṣīyá té 'vaso daívyasya ||

4.021.11a nū́ ṣṭutá indra nū́ gr̥ṇāná íṣaṁ jaritré nadyò ná pīpeḥ |
4.021.11c ákāri te harivo bráhma návyaṁ dhiyā́ syāma rathyàḥ sadāsā́ḥ ||

4.022.01a yán na índro jujuṣé yác ca váṣṭi tán no mahā́n karati śuṣmy ā́ cit |
4.022.01c bráhma stómam maghávā sómam ukthā́ yó áśmānaṁ śávasā bíbhrad éti ||

4.022.02a vŕ̥ṣā vŕ̥ṣandhiṁ cáturaśrim ásyann ugró bāhúbhyāṁ nŕ̥tamaḥ śácīvān |
4.022.02c śriyé páruṣṇīm uṣámāṇa ū́rṇāṁ yásyāḥ párvāṇi sakhyā́ya vivyé ||

4.022.03a yó devó devátamo jā́yamāno mahó vā́jebhir mahádbhiś ca śúṣmaiḥ |
4.022.03c dádhāno vájram bāhvór uśántaṁ dyā́m ámena rejayat prá bhū́ma ||

4.022.04a víśvā ródhāṁsi pravátaś ca pūrvī́r dyaúr r̥ṣvā́j jániman rejata kṣā́ḥ |
4.022.04c ā́ mātárā bhárati śuṣmy ā́ gór nr̥vát párijman nonuvanta vā́tāḥ ||

4.022.05a tā́ tū́ ta indra maható mahā́ni víśveṣv ít sávaneṣu pravā́cyā |
4.022.05c yác chūra dhr̥ṣṇo dhr̥ṣatā́ dadhr̥ṣvā́n áhiṁ vájreṇa śávasā́viveṣīḥ ||

4.022.06a tā́ tū́ te satyā́ tuvinr̥mṇa víśvā prá dhenávaḥ sisrate vŕ̥ṣṇa ū́dhnaḥ |
4.022.06c ádhā ha tvád vr̥ṣamaṇo bhiyānā́ḥ prá síndhavo jávasā cakramanta ||

4.022.07a átrā́ha te harivas tā́ u devī́r ávobhir indra stavanta svásāraḥ |
4.022.07c yát sīm ánu prá mucó badbadhānā́ dīrghā́m ánu prásitiṁ syandayádhyai ||

4.022.08a pipīḷé aṁśúr mádyo ná síndhur ā́ tvā śámī śaśamānásya śaktíḥ |
4.022.08c asmadryàk chuśucānásya yamyā āśúr ná raśmíṁ tuvyójasaṁ góḥ ||

4.022.09a asmé várṣiṣṭhā kr̥ṇuhi jyéṣṭhā nr̥mṇā́ni satrā́ sahure sáhāṁsi |
4.022.09c asmábhyaṁ vr̥trā́ suhánāni randhi jahí vádhar vanúṣo mártyasya ||

4.022.10a asmā́kam ít sú śr̥ṇuhi tvám indrāsmábhyaṁ citrā́m̐ úpa māhi vā́jān |
4.022.10c asmábhyaṁ víśvā iṣaṇaḥ púraṁdhīr asmā́kaṁ sú maghavan bodhi godā́ḥ ||

4.022.11a nū́ ṣṭutá indra nū́ gr̥ṇāná íṣaṁ jaritré nadyò ná pīpeḥ |
4.022.11c ákāri te harivo bráhma návyaṁ dhiyā́ syāma rathyàḥ sadāsā́ḥ ||

4.023.01a kathā́ mahā́m avr̥dhat kásya hótur yajñáṁ juṣāṇó abhí sómam ū́dhaḥ |
4.023.01c píbann uśānó juṣámāṇo ándho vavakṣá r̥ṣváḥ śucaté dhánāya ||

4.023.02a kó asya vīráḥ sadhamā́dam āpa sám ānaṁśa sumatíbhiḥ kó asya |
4.023.02c kád asya citráṁ cikite kád ūtī́ vr̥dhé bhuvac chaśamānásya yájyoḥ ||

4.023.03a kathā́ śr̥ṇoti hūyámānam índraḥ kathā́ śr̥ṇvánn ávasām asya veda |
4.023.03c kā́ asya pūrvī́r úpamātayo ha kathaínam āhuḥ pápuriṁ jaritré ||

4.023.04a kathā́ sabā́dhaḥ śaśamānó asya náśad abhí dráviṇaṁ dī́dhyānaḥ |
4.023.04c devó bhuvan návedā ma r̥tā́nāṁ námo jagr̥bhvā́m̐ abhí yáj jújoṣat ||

4.023.05a kathā́ kád asyā́ uṣáso vyùṣṭau devó mártasya sakhyáṁ jujoṣa |
4.023.05c kathā́ kád asya sakhyáṁ sákhibhyo yé asmin kā́maṁ suyújaṁ tatasré ||

4.023.06a kím ā́d ámatraṁ sakhyáṁ sákhibhyaḥ kadā́ nú te bhrātrám prá bravāma |
4.023.06c śriyé sudŕ̥śo vápur asya sárgāḥ svàr ṇá citrátamam iṣa ā́ góḥ ||

4.023.07a drúhaṁ jíghāṁsan dhvarásam anindrā́ṁ tétikte tigmā́ tujáse ánīkā |
4.023.07c r̥ṇā́ cid yátra r̥ṇayā́ na ugró dūré ájñātā uṣáso babādhé ||

4.023.08a r̥tásya hí śurúdhaḥ sánti pūrvī́r r̥tásya dhītír vr̥jinā́ni hanti |
4.023.08c r̥tásya ślóko badhirā́ tatarda kárṇā budhānáḥ śucámāna āyóḥ ||

4.023.09a r̥tásya dr̥ḷhā́ dharúṇāni santi purū́ṇi candrā́ vápuṣe vápūṁṣi |
4.023.09c r̥téna dīrghám iṣaṇanta pŕ̥kṣa r̥téna gā́va r̥tám ā́ viveśuḥ ||

4.023.10a r̥táṁ yemāná r̥tám íd vanoty r̥tásya śúṣmas turayā́ u gavyúḥ |
4.023.10c r̥tā́ya pr̥thvī́ bahulé gabhīré r̥tā́ya dhenū́ paramé duhāte ||

4.023.11a nū́ ṣṭutá indra nū́ gr̥ṇāná íṣaṁ jaritré nadyò ná pīpeḥ |
4.023.11c ákāri te harivo bráhma návyaṁ dhiyā́ syāma rathyàḥ sadāsā́ḥ ||

4.024.01a kā́ suṣṭutíḥ śávasaḥ sūnúm índram arvācīnáṁ rā́dhasa ā́ vavartat |
4.024.01c dadír hí vīró gr̥ṇaté vásūni sá gópatir niṣṣídhāṁ no janāsaḥ ||

4.024.02a sá vr̥trahátye hávyaḥ sá ī́ḍyaḥ sá súṣṭuta índraḥ satyárādhāḥ |
4.024.02c sá yā́mann ā́ maghávā mártyāya brahmaṇyaté súṣvaye várivo dhāt ||

4.024.03a tám ín náro ví hvayante samīké ririkvā́ṁsas tanvàḥ kr̥ṇvata trā́m |
4.024.03c mithó yát tyāgám ubháyāso ágman náras tokásya tánayasya sātaú ||

4.024.04a kratūyánti kṣitáyo yóga ugrāśuṣāṇā́so mithó árṇasātau |
4.024.04c sáṁ yád víśó 'vavr̥tranta yudhmā́ ā́d ín néma indrayante abhī́ke ||

4.024.05a ā́d íd dha néma indriyáṁ yajanta ā́d ít paktíḥ puroḷā́śaṁ riricyāt |
4.024.05c ā́d ít sómo ví papr̥cyād ásuṣvīn ā́d íj jujoṣa vr̥ṣabháṁ yájadhyai ||

4.024.06a kr̥ṇóty asmai várivo yá itthéndrāya sómam uśaté sunóti |
4.024.06c sadhrīcī́nena mánasā́vivenan tám ít sákhāyaṁ kr̥ṇute samátsu ||

4.024.07a yá índrāya sunávat sómam adyá pácāt paktī́r utá bhr̥jjā́ti dhānā́ḥ |
4.024.07c práti manāyór ucáthāni háryan tásmin dadhad vŕ̥ṣaṇaṁ śúṣmam índraḥ ||

4.024.08a yadā́ samaryáṁ vy áced ŕ̥ghāvā dīrgháṁ yád ājím abhy ákhyad aryáḥ |
4.024.08c ácikradad vŕ̥ṣaṇam pátny ácchā duroṇá ā́ níśitaṁ somasúdbhiḥ ||

4.024.09a bhū́yasā vasnám acarat kánīyó 'vikrīto akāniṣam púnar yán |
4.024.09c sá bhū́yasā kánīyo nā́rirecīd dīnā́ dákṣā ví duhanti prá vāṇám ||

4.024.10a ká imáṁ daśábhir máméndraṁ krīṇāti dhenúbhiḥ |
4.024.10c yadā́ vr̥trā́ṇi jáṅghanad áthainam me púnar dadat ||

4.024.11a nū́ ṣṭutá indra nū́ gr̥ṇāná íṣaṁ jaritré nadyò ná pīpeḥ |
4.024.11c ákāri te harivo bráhma návyaṁ dhiyā́ syāma rathyàḥ sadāsā́ḥ ||

4.025.01a kó adyá náryo devákāma uśánn índrasya sakhyáṁ jujoṣa |
4.025.01c kó vā mahé 'vase pā́ryāya sámiddhe agnaú sutásoma īṭṭe ||

4.025.02a kó nānāma vácasā somyā́ya manāyúr vā bhavati vásta usrā́ḥ |
4.025.02c ká índrasya yújyaṁ káḥ sakhitváṁ kó bhrātráṁ vaṣṭi kaváye ká ūtī́ ||

4.025.03a kó devā́nām ávo adyā́ vr̥ṇīte ká ādityā́m̐ áditiṁ jyótir īṭṭe |
4.025.03c kásyāśvínāv índro agníḥ sutásyāṁśóḥ pibanti mánasā́vivenam ||

4.025.04a tásmā agnír bhā́rataḥ śárma yaṁsaj jyók paśyāt sū́ryam uccárantam |
4.025.04c yá índrāya sunávāméty ā́ha náre náryāya nŕ̥tamāya nr̥ṇā́m ||

4.025.05a ná táṁ jinanti bahávo ná dabhrā́ urv àsmā áditiḥ śárma yaṁsat |
4.025.05c priyáḥ sukŕ̥t priyá índre manāyúḥ priyáḥ suprāvī́ḥ priyó asya somī́ ||

4.025.06a suprāvyàḥ prāśuṣā́ḷ eṣá vīráḥ súṣveḥ paktíṁ kr̥ṇute kévaléndraḥ |
4.025.06c nā́suṣver āpír ná sákhā ná jāmír duṣprāvyò 'vahantéd ávācaḥ ||

4.025.07a ná revátā paṇínā sakhyám índró 'sunvatā sutapā́ḥ sáṁ gr̥ṇīte |
4.025.07c ā́sya védaḥ khidáti hánti nagnáṁ ví súṣvaye paktáye kévalo bhūt ||

4.025.08a índram páré 'vare madhyamā́sa índraṁ yā́ntó 'vasitāsa índram |
4.025.08c índraṁ kṣiyánta utá yúdhyamānā índraṁ náro vājayánto havante ||

4.026.01a ahám mánur abhavaṁ sū́ryaś cāháṁ kakṣī́vām̐ ŕ̥ṣir asmi vípraḥ |
4.026.01c aháṁ kútsam ārjuneyáṁ ny r̥̀ñje 'háṁ kavír uśánā páśyatā mā ||

4.026.02a ahám bhū́mim adadām ā́ryāyāháṁ vr̥ṣṭíṁ dāśúṣe mártyāya |
4.026.02c ahám apó anayaṁ vāvaśānā́ máma devā́so ánu kétam āyan ||

4.026.03a ahám púro mandasānó vy aìraṁ náva sākáṁ navatī́ḥ śámbarasya |
4.026.03c śatatamáṁ veśyàṁ sarvátātā dívodāsam atithigváṁ yád ā́vam ||

4.026.04a prá sú ṣá víbhyo maruto vír astu prá śyenáḥ śyenébhya āśupátvā |
4.026.04c acakráyā yát svadháyā suparṇó havyám bháran mánave devájuṣṭam ||

4.026.05a bhárad yádi vír áto vévijānaḥ pathórúṇā mánojavā asarji |
4.026.05c tū́yaṁ yayau mádhunā somyénotá śrávo vivide śyenó átra ||

4.026.06a r̥jīpī́ śyenó dádamāno aṁśúm parāvátaḥ śakunó mandrám mádam |
4.026.06c sómam bharad dādr̥hāṇó devā́vān divó amúṣmād úttarād ādā́ya ||

4.026.07a ādā́ya śyenó abharat sómaṁ sahásraṁ savā́m̐ ayútaṁ ca sākám |
4.026.07c átrā púraṁdhir ajahād árātīr máde sómasya mūrā́ ámūraḥ ||

4.027.01a gárbhe nú sánn ánv eṣām avedam aháṁ devā́nāṁ jánimāni víśvā |
4.027.01c śatám mā púra ā́yasīr arakṣann ádha śyenó javásā nír adīyam ||

4.027.02a ná ghā sá mā́m ápa jóṣaṁ jabhārābhī́m āsa tvákṣasā vīryèṇa |
4.027.02c īrmā́ púraṁdhir ajahād árātīr utá vā́tām̐ atarac chū́śuvānaḥ ||

4.027.03a áva yác chyenó ásvanīd ádha dyór ví yád yádi vā́ta ūhúḥ púraṁdhim |
4.027.03c sr̥jád yád asmā áva ha kṣipáj jyā́ṁ kr̥śā́nur ástā mánasā bhuraṇyán ||

4.027.04a r̥jipyá īm índrāvato ná bhujyúṁ śyenó jabhāra br̥ható ádhi ṣṇóḥ |
4.027.04c antáḥ patat patatry àsya parṇám ádha yā́mani prásitasya tád véḥ ||

4.027.05a ádha śvetáṁ kaláśaṁ góbhir aktám āpipyānám maghávā śukrám ándhaḥ |
4.027.05c adhvaryúbhiḥ práyatam mádhvo ágram índro mádāya práti dhat píbadhyai śū́ro mádāya práti dhat píbadhyai ||

4.028.01a tvā́ yujā́ táva tát soma sakhyá índro apó mánave sasrútas kaḥ |
4.028.01c áhann áhim áriṇāt saptá síndhūn ápāvr̥ṇod ápihiteva khā́ni ||

4.028.02a tvā́ yujā́ ní khidat sū́ryasyéndraś cakráṁ sáhasā sadyá indo |
4.028.02c ádhi ṣṇúnā br̥hatā́ vártamānam mahó druhó ápa viśvā́yu dhāyi ||

4.028.03a áhann índro ádahad agnír indo purā́ dásyūn madhyáṁdinād abhī́ke |
4.028.03c durgé duroṇé krátvā ná yātā́m purū́ sahásrā śárvā ní barhīt ||

4.028.04a víśvasmāt sīm adhamā́m̐ indra dásyūn víśo dā́sīr akr̥ṇor apraśastā́ḥ |
4.028.04c ábādhethām ámr̥ṇataṁ ní śátrūn ávindethām ápacitiṁ vádhatraiḥ ||

4.028.05a evā́ satyám maghavānā yuváṁ tád índraś ca somorvám áśvyaṁ góḥ |
4.028.05c ā́dardr̥tam ápihitāny áśnā riricáthuḥ kṣā́ś cit tatr̥dānā́ ||

4.029.01a ā́ naḥ stutá úpa vā́jebhir ūtī́ índra yāhí háribhir mandasānáḥ |
4.029.01c tiráś cid aryáḥ sávanā purū́ṇy āṅgūṣébhir gr̥ṇānáḥ satyárādhāḥ ||

4.029.02a ā́ hí ṣmā yā́ti náryaś cikitvā́n hūyámānaḥ sotŕ̥bhir úpa yajñám |
4.029.02c sváśvo yó ábhīrur mányamānaḥ suṣvāṇébhir mádati sáṁ ha vīraíḥ ||

4.029.03a śrāváyéd asya kárṇā vājayádhyai júṣṭām ánu prá díśam mandayádhyai |
4.029.03c udvāvr̥ṣāṇó rā́dhase túviṣmān káran na índraḥ sutīrthā́bhayaṁ ca ||

4.029.04a ácchā yó gántā nā́dhamānam ūtī́ itthā́ vípraṁ hávamānaṁ gr̥ṇántam |
4.029.04c úpa tmáni dádhāno dhury ā̀śū́n sahásrāṇi śatā́ni vájrabāhuḥ ||

4.029.05a tvótāso maghavann indra víprā vayáṁ te syāma sūráyo gr̥ṇántaḥ |
4.029.05c bhejānā́so br̥háddivasya rāyá ākāyyàsya dāváne purukṣóḥ ||

4.030.01a nákir indra tvád úttaro ná jyā́yām̐ asti vr̥trahan |
4.030.01c nákir evā́ yáthā tvám ||

4.030.02a satrā́ te ánu kr̥ṣṭáyo víśvā cakréva vāvr̥tuḥ |
4.030.02c satrā́ mahā́m̐ asi śrutáḥ ||

4.030.03a víśve canéd anā́ tvā devā́sa indra yuyudhuḥ |
4.030.03c yád áhā náktam ā́tiraḥ ||

4.030.04a yátrotá bādhitébhyaś cakráṁ kútsāya yúdhyate |
4.030.04c muṣāyá indra sū́ryam ||

4.030.05a yátra devā́m̐ r̥ghāyató víśvām̐ áyudhya éka ít |
4.030.05c tvám indra vanū́m̐r áhan ||

4.030.06a yátrotá mártyāya kám áriṇā indra sū́ryam |
4.030.06c prā́vaḥ śácībhir étaśam ||

4.030.07a kím ā́d utā́si vr̥trahan mághavan manyumáttamaḥ |
4.030.07c átrā́ha dā́num ā́tiraḥ ||

4.030.08a etád ghéd utá vīryàm índra cakártha paúṁsyam |
4.030.08c stríyaṁ yád durhaṇāyúvaṁ vádhīr duhitáraṁ diváḥ ||

4.030.09a diváś cid ghā duhitáram mahā́n mahīyámānām |
4.030.09c uṣā́sam indra sám piṇak ||

4.030.10a ápoṣā́ ánasaḥ sarat sámpiṣṭād áha bibhyúṣī |
4.030.10c ní yát sīṁ śiśnáthad vŕ̥ṣā ||

4.030.11a etád asyā ánaḥ śaye súsampiṣṭaṁ vípāśy ā́ |
4.030.11c sasā́ra sīm parāvátaḥ ||

4.030.12a utá síndhuṁ vibālyàṁ vitasthānā́m ádhi kṣámi |
4.030.12c pári ṣṭhā indra māyáyā ||

4.030.13a utá śúṣṇasya dhr̥ṣṇuyā́ prá mr̥kṣo abhí védanam |
4.030.13c púro yád asya sampiṇák ||

4.030.14a utá dāsáṁ kaulitarám br̥hatáḥ párvatād ádhi |
4.030.14c ávāhann indra śámbaram ||

4.030.15a utá dāsásya varcínaḥ sahásrāṇi śatā́vadhīḥ |
4.030.15c ádhi páñca pradhī́m̐r iva ||

4.030.16a utá tyám putrám agrúvaḥ párāvr̥ktaṁ śatákratuḥ |
4.030.16c ukthéṣv índra ā́bhajat ||

4.030.17a utá tyā́ turváśāyádū asnātā́rā śácīpátiḥ |
4.030.17c índro vidvā́m̐ apārayat ||

4.030.18a utá tyā́ sadyá ā́ryā saráyor indra pārátaḥ |
4.030.18c árṇācitrárathāvadhīḥ ||

4.030.19a ánu dvā́ jahitā́ nayo 'ndháṁ śroṇáṁ ca vr̥trahan |
4.030.19c ná tát te sumnám áṣṭave ||

4.030.20a śatám aśmanmáyīnām purā́m índro vy ā̀syat |
4.030.20c dívodāsāya dāśúṣe ||

4.030.21a ásvāpayad dabhī́taye sahásrā triṁśátaṁ háthaiḥ |
4.030.21c dāsā́nām índro māyáyā ||

4.030.22a sá ghéd utā́si vr̥trahan samāná indra gópatiḥ |
4.030.22c yás tā́ víśvāni cicyuṣé ||

4.030.23a utá nūnáṁ yád indriyáṁ kariṣyā́ indra paúṁsyam |
4.030.23c adyā́ nákiṣ ṭád ā́ minat ||

4.030.24a vāmáṁ-vāmaṁ ta ādure devó dadātv aryamā́ |
4.030.24c vāmám pūṣā́ vāmám bhágo vāmáṁ deváḥ kárūḷatī ||

4.031.01a káyā naś citrá ā́ bhuvad ūtī́ sadā́vr̥dhaḥ sákhā |
4.031.01c káyā śáciṣṭhayā vr̥tā́ ||

4.031.02a kás tvā satyó mádānām máṁhiṣṭho matsad ándhasaḥ |
4.031.02c dr̥ḷhā́ cid ārúje vásu ||

4.031.03a abhī́ ṣú ṇaḥ sákhīnām avitā́ jaritr̥̄ṇā́m |
4.031.03c śatám bhavāsy ūtíbhiḥ ||

4.031.04a abhī́ na ā́ vavr̥tsva cakráṁ ná vr̥ttám árvataḥ |
4.031.04c niyúdbhiś carṣaṇīnā́m ||

4.031.05a pravátā hí krátūnām ā́ hā padéva gácchasi |
4.031.05c ábhakṣi sū́rye sácā ||

4.031.06a sáṁ yát ta indra manyávaḥ sáṁ cakrā́ṇi dadhanviré |
4.031.06c ádha tvé ádha sū́rye ||

4.031.07a utá smā hí tvā́m āhúr ín maghávānaṁ śacīpate |
4.031.07c dā́tāram ávidīdhayum ||

4.031.08a utá smā sadyá ít pári śaśamānā́ya sunvaté |
4.031.08c purū́ cin maṁhase vásu ||

4.031.09a nahí ṣmā te śatáṁ caná rā́dho váranta āmúraḥ |
4.031.09c ná cyautnā́ni kariṣyatáḥ ||

4.031.10a asmā́m̐ avantu te śatám asmā́n sahásram ūtáyaḥ |
4.031.10c asmā́n víśvā abhíṣṭayaḥ ||

4.031.11a asmā́m̐ ihā́ vr̥ṇīṣva sakhyā́ya svastáye |
4.031.11c mahó rāyé divítmate ||

4.031.12a asmā́m̐ aviḍḍhi viśváhéndra rāyā́ párīṇasā |
4.031.12c asmā́n víśvābhir ūtíbhiḥ ||

4.031.13a asmábhyaṁ tā́m̐ ápā vr̥dhi vrajā́m̐ ásteva gómataḥ |
4.031.13c návābhir indrotíbhiḥ ||

4.031.14a asmā́kaṁ dhr̥ṣṇuyā́ rátho dyumā́m̐ indrā́napacyutaḥ |
4.031.14c gavyúr aśvayúr īyate ||

4.031.15a asmā́kam uttamáṁ kr̥dhi śrávo devéṣu sūrya |
4.031.15c várṣiṣṭhaṁ dyā́m ivopári ||

4.032.01a ā́ tū́ na indra vr̥trahann asmā́kam ardhám ā́ gahi |
4.032.01c mahā́n mahī́bhir ūtíbhiḥ ||

4.032.02a bhŕ̥miś cid ghāsi tū́tujir ā́ citra citríṇīṣv ā́ |
4.032.02c citráṁ kr̥ṇoṣy ūtáye ||

4.032.03a dabhrébhiś cic cháśīyāṁsaṁ háṁsi vrā́dhantam ójasā |
4.032.03c sákhibhir yé tvé sácā ||

4.032.04a vayám indra tvé sácā vayáṁ tvābhí nonumaḥ |
4.032.04c asmā́m̐-asmām̐ íd úd ava ||

4.032.05a sá naś citrā́bhir adrivo 'navadyā́bhir ūtíbhiḥ |
4.032.05c ánādhr̥ṣṭābhir ā́ gahi ||

4.032.06a bhūyā́mo ṣú tvā́vataḥ sákhāya indra gómataḥ |
4.032.06c yújo vā́jāya ghŕ̥ṣvaye ||

4.032.07a tváṁ hy éka ī́śiṣa índra vā́jasya gómataḥ |
4.032.07c sá no yandhi mahī́m íṣam ||

4.032.08a ná tvā varante anyáthā yád dítsasi stutó maghám |
4.032.08c stotŕ̥bhya indra girvaṇaḥ ||

4.032.09a abhí tvā gótamā girā́nūṣata prá dāváne |
4.032.09c índra vā́jāya ghŕ̥ṣvaye ||

4.032.10a prá te vocāma vīryā̀ yā́ mandasāná ā́rujaḥ |
4.032.10c púro dā́sīr abhī́tya ||

4.032.11a tā́ te gr̥ṇanti vedháso yā́ni cakártha paúṁsyā |
4.032.11c sutéṣv indra girvaṇaḥ ||

4.032.12a ávīvr̥dhanta gótamā índra tvé stómavāhasaḥ |
4.032.12c aíṣu dhā vīrávad yáśaḥ ||

4.032.13a yác cid dhí śáśvatām ásī́ndra sā́dhāraṇas tvám |
4.032.13c táṁ tvā vayáṁ havāmahe ||

4.032.14a arvācīnó vaso bhavāsmé sú matsvā́ndhasaḥ |
4.032.14c sómānām indra somapāḥ ||

4.032.15a asmā́kaṁ tvā matīnā́m ā́ stóma indra yacchatu |
4.032.15c arvā́g ā́ vartayā hárī ||

4.032.16a puroḷā́śaṁ ca no gháso joṣáyāse gíraś ca naḥ |
4.032.16c vadhūyúr iva yóṣaṇām ||

4.032.17a sahásraṁ vyátīnāṁ yuktā́nām índram īmahe |
4.032.17c śatáṁ sómasya khāryàḥ ||

4.032.18a sahásrā te śatā́ vayáṁ gávām ā́ cyāvayāmasi |
4.032.18c asmatrā́ rā́dha etu te ||

4.032.19a dáśa te kaláśānāṁ híraṇyānām adhīmahi |
4.032.19c bhūridā́ asi vr̥trahan ||

4.032.20a bhū́ridā bhū́ri dehi no mā́ dabhrám bhū́ry ā́ bhara |
4.032.20c bhū́ri ghéd indra ditsasi ||

4.032.21a bhūridā́ hy ási śrutáḥ purutrā́ śūra vr̥trahan |
4.032.21c ā́ no bhajasva rā́dhasi ||

4.032.22a prá te babhrū́ vicakṣaṇa śáṁsāmi goṣaṇo napāt |
4.032.22c mā́bhyāṁ gā́ ánu śiśrathaḥ ||

4.032.23a kanīnakéva vidradhé náve drupadé arbhaké |
4.032.23c babhrū́ yā́meṣu śobhete ||

4.032.24a áram ma usráyāmṇé 'ram ánusrayāmṇe |
4.032.24c babhrū́ yā́meṣv asrídhā ||

4.033.01a prá r̥bhúbhyo dūtám iva vā́cam iṣya upastíre śvaítarīṁ dhenúm īḷe |
4.033.01c yé vā́tajūtās taráṇibhir évaiḥ pári dyā́ṁ sadyó apáso babhūvúḥ ||

4.033.02a yadā́ram ákrann r̥bhávaḥ pitŕ̥bhyām páriviṣṭī veṣáṇā daṁsánābhiḥ |
4.033.02c ā́d íd devā́nām úpa sakhyám āyan dhī́rāsaḥ puṣṭím avahan manā́yai ||

4.033.03a púnar yé cakrúḥ pitárā yúvānā sánā yū́peva jaraṇā́ śáyānā |
4.033.03c té vā́jo víbhvām̐ r̥bhúr índravanto mádhupsaraso no 'vantu yajñám ||

4.033.04a yát saṁvátsam r̥bhávo gā́m árakṣan yát saṁvátsam r̥bhávo mā́ ápiṁśan |
4.033.04c yát saṁvátsam ábharan bhā́so asyās tā́bhiḥ śámībhir amr̥tatvám āśuḥ ||

4.033.05a jyeṣṭhá āha camasā́ dvā́ karéti kánīyān trī́n kr̥ṇavāméty āha |
4.033.05c kaniṣṭhá āha catúras karéti tváṣṭa r̥bhavas tát panayad váco vaḥ ||

4.033.06a satyám ūcur nára evā́ hí cakrúr ánu svadhā́m r̥bhávo jagmur etā́m |
4.033.06c vibhrā́jamānām̐ś camasā́m̐ áhevā́venat tváṣṭā catúro dadr̥śvā́n ||

4.033.07a dvā́daśa dyū́n yád ágohyasyātithyé ráṇann r̥bhávaḥ sasántaḥ |
4.033.07c sukṣétrākr̥ṇvann ánayanta síndhūn dhánvā́tiṣṭhann óṣadhīr nimnám ā́paḥ ||

4.033.08a ráthaṁ yé cakrúḥ suvŕ̥taṁ nareṣṭhā́ṁ yé dhenúṁ viśvajúvaṁ viśvárūpām |
4.033.08c tá ā́ takṣantv r̥bhávo rayíṁ naḥ svávasaḥ svápasaḥ suhástāḥ ||

4.033.09a ápo hy èṣām ájuṣanta devā́ abhí krátvā mánasā dī́dhyānāḥ |
4.033.09c vā́jo devā́nām abhavat sukárméndrasya r̥bhukṣā́ váruṇasya víbhvā ||

4.033.10a yé hárī medháyokthā́ mádanta índrāya cakrúḥ suyújā yé áśvā |
4.033.10c té rāyás póṣaṁ dráviṇāny asmé dhattá r̥bhavaḥ kṣemayánto ná mitrám ||

4.033.11a idā́hnaḥ pītím utá vo mádaṁ dhur ná r̥té śrāntásya sakhyā́ya devā́ḥ |
4.033.11c té nūnám asmé r̥bhavo vásūni tr̥tī́ye asmín sávane dadhāta ||

4.034.01a r̥bhúr víbhvā vā́ja índro no ácchemáṁ yajñáṁ ratnadhéyópa yāta |
4.034.01c idā́ hí vo dhiṣáṇā devy áhnām ádhāt pītíṁ sám mádā agmatā vaḥ ||

4.034.02a vidānā́so jánmano vājaratnā utá r̥túbhir r̥bhavo mādayadhvam |
4.034.02c sáṁ vo mádā ágmata sám púraṁdhiḥ suvī́rām asmé rayím érayadhvam ||

4.034.03a ayáṁ vo yajñá r̥bhavo 'kāri yám ā́ manuṣvát pradívo dadhidhvé |
4.034.03c prá vó 'cchā jujuṣāṇā́so asthur ábhūta víśve agriyótá vājāḥ ||

4.034.04a ábhūd u vo vidhaté ratnadhéyam idā́ naro dāśúṣe mártyāya |
4.034.04c píbata vājā r̥bhavo dadé vo máhi tr̥tī́yaṁ sávanam mádāya ||

4.034.05a ā́ vājā yātópa na r̥bhukṣā mahó naro dráviṇaso gr̥ṇānā́ḥ |
4.034.05c ā́ vaḥ pītáyo 'bhipitvé áhnām imā́ ástaṁ navasvà iva gman ||

4.034.06a ā́ napātaḥ śavaso yātanópemáṁ yajñáṁ námasā hūyámānāḥ |
4.034.06c sajóṣasaḥ sūrayo yásya ca sthá mádhvaḥ pāta ratnadhā́ índravantaḥ ||

4.034.07a sajóṣā indra váruṇena sómaṁ sajóṣāḥ pāhi girvaṇo marúdbhiḥ |
4.034.07c agrepā́bhir r̥tupā́bhiḥ sajóṣā gnā́spátnībhī ratnadhā́bhiḥ sajóṣāḥ ||

4.034.08a sajóṣasa ādityaír mādayadhvaṁ sajóṣasa r̥bhavaḥ párvatebhiḥ |
4.034.08c sajóṣaso daívyenā savitrā́ sajóṣasaḥ síndhubhī ratnadhébhiḥ ||

4.034.09a yé aśvínā yé pitárā yá ūtī́ dhenúṁ tatakṣúr r̥bhávo yé áśvā |
4.034.09c yé áṁsatrā yá ŕ̥dhag ródasī yé víbhvo náraḥ svapatyā́ni cakrúḥ ||

4.034.10a yé gómantaṁ vā́javantaṁ suvī́raṁ rayíṁ dhatthá vásumantam purukṣúm |
4.034.10c té agrepā́ r̥bhavo mandasānā́ asmé dhatta yé ca rātíṁ gr̥ṇánti ||

4.034.11a nā́pābhūta ná vo 'tītr̥ṣāmā́niḥśastā r̥bhavo yajñé asmín |
4.034.11c sám índreṇa mádatha sám marúdbhiḥ sáṁ rā́jabhī ratnadhéyāya devāḥ ||

4.035.01a ihópa yāta śavaso napātaḥ saúdhanvanā r̥bhavo mā́pa bhūta |
4.035.01c asmín hí vaḥ sávane ratnadhéyaṁ gámantv índram ánu vo mádāsaḥ ||

4.035.02a ā́gann r̥bhūṇā́m ihá ratnadhéyam ábhūt sómasya súṣutasya pītíḥ |
4.035.02c sukr̥tyáyā yát svapasyáyā cam̐ ékaṁ vicakrá camasáṁ caturdhā́ ||

4.035.03a vy àkr̥ṇota camasáṁ caturdhā́ sákhe ví śikṣéty abravīta |
4.035.03c áthaita vājā amŕ̥tasya pánthāṁ gaṇáṁ devā́nām r̥bhavaḥ suhastāḥ ||

4.035.04a kimmáyaḥ svic camasá eṣá āsa yáṁ kā́vyena catúro vicakrá |
4.035.04c áthā sunudhvaṁ sávanam mádāya pātá r̥bhavo mádhunaḥ somyásya ||

4.035.05a śácyākarta pitárā yúvānā śácyākarta camasáṁ devapā́nam |
4.035.05c śácyā hárī dhánutarāv ataṣṭendravā́hāv r̥bhavo vājaratnāḥ ||

4.035.06a yó vaḥ sunóty abhipitvé áhnāṁ tīvráṁ vājāsaḥ sávanam mádāya |
4.035.06c tásmai rayím r̥bhavaḥ sárvavīram ā́ takṣata vr̥ṣaṇo mandasānā́ḥ ||

4.035.07a prātáḥ sutám apibo haryaśva mā́dhyaṁdinaṁ sávanaṁ kévalaṁ te |
4.035.07c sám r̥bhúbhiḥ pibasva ratnadhébhiḥ sákhīm̐r yā́m̐ indra cakr̥ṣé sukr̥tyā́ ||

4.035.08a yé devā́so ábhavatā sukr̥tyā́ śyenā́ ivéd ádhi diví niṣedá |
4.035.08c té rátnaṁ dhāta śavaso napātaḥ saúdhanvanā ábhavatāmŕ̥tāsaḥ ||

4.035.09a yát tr̥tī́yaṁ sávanaṁ ratnadhéyam ákr̥ṇudhvaṁ svapasyā́ suhastāḥ |
4.035.09c tád r̥bhavaḥ páriṣiktaṁ va etát sám mádebhir indriyébhiḥ pibadhvam ||

4.036.01a anaśvó jātó anabhīśúr ukthyò ráthas tricakráḥ pári vartate rájaḥ |
4.036.01c mahát tád vo devyàsya pravā́canaṁ dyā́m r̥bhavaḥ pr̥thivī́ṁ yác ca púṣyatha ||

4.036.02a ráthaṁ yé cakrúḥ suvŕ̥taṁ sucétasó 'vihvarantam mánasas pári dhyáyā |
4.036.02c tā́m̐ ū nv àsyá sávanasya pītáya ā́ vo vājā r̥bhavo vedayāmasi ||

4.036.03a tád vo vājā r̥bhavaḥ supravācanáṁ devéṣu vibhvo abhavan mahitvanám |
4.036.03c jívrī yát sántā pitárā sanājúrā púnar yúvānā caráthāya tákṣatha ||

4.036.04a ékaṁ ví cakra camasáṁ cáturvayaṁ níś cármaṇo gā́m ariṇīta dhītíbhiḥ |
4.036.04c áthā devéṣv amr̥tatvám ānaśa śruṣṭī́ vājā r̥bhavas tád va ukthyàm ||

4.036.05a r̥bhutó rayíḥ prathamáśravastamo vā́jaśrutāso yám ájījanan náraḥ |
4.036.05c vibhvataṣṭó vidátheṣu pravā́cyo yáṁ devāsó 'vathā sá vícarṣaṇiḥ ||

4.036.06a sá vājy árvā sá ŕ̥ṣir vacasyáyā sá śū́ro ástā pŕ̥tanāsu duṣṭáraḥ |
4.036.06c sá rāyás póṣaṁ sá suvī́ryaṁ dadhe yáṁ vā́jo víbhvām̐ r̥bhávo yám ā́viṣuḥ ||

4.036.07a śréṣṭhaṁ vaḥ péśo ádhi dhāyi darśatáṁ stómo vājā r̥bhavas táṁ jujuṣṭana |
4.036.07c dhī́rāso hí ṣṭhā́ kaváyo vipaścítas tā́n va enā́ bráhmaṇā́ vedayāmasi ||

4.036.08a yūyám asmábhyaṁ dhiṣáṇābhyas pári vidvā́ṁso víśvā náryāṇi bhójanā |
4.036.08c dyumántaṁ vā́jaṁ vŕ̥ṣaśuṣmam uttamám ā́ no rayím r̥bhavas takṣatā́ váyaḥ ||

4.036.09a ihá prajā́m ihá rayíṁ rárāṇā ihá śrávo vīrávat takṣatā naḥ |
4.036.09c yéna vayáṁ citáyemā́ty anyā́n táṁ vā́jaṁ citrám r̥bhavo dadā naḥ ||

4.037.01a úpa no vājā adhvarám r̥bhukṣā dévā yātá pathíbhir devayā́naiḥ |
4.037.01c yáthā yajñám mánuṣo vikṣv ā̀sú dadhidhvé raṇvāḥ sudíneṣv áhnām ||

4.037.02a té vo hr̥dé mánase santu yajñā́ júṣṭāso adyá ghr̥tánirṇijo guḥ |
4.037.02c prá vaḥ sutā́so harayanta pūrṇā́ḥ krátve dákṣāya harṣayanta pītā́ḥ ||

4.037.03a tryudāyáṁ deváhitaṁ yáthā vaḥ stómo vājā r̥bhukṣaṇo dadé vaḥ |
4.037.03c juhvé manuṣvád úparāsu vikṣú yuṣmé sácā br̥háddiveṣu sómam ||

4.037.04a pī́voaśvāḥ śucádrathā hí bhūtā́yaḥśiprā vājinaḥ suniṣkā́ḥ |
4.037.04c índrasya sūno śavaso napātó 'nu vaś cety agriyám mádāya ||

4.037.05a r̥bhúm r̥bhukṣaṇo rayíṁ vā́je vājíntamaṁ yújam |
4.037.05c índrasvantaṁ havāmahe sadāsā́tamam aśvínam ||

4.037.06a séd r̥bhavo yám ávatha yūyám índraś ca mártyam |
4.037.06c sá dhībhír astu sánitā medhásātā só árvatā ||

4.037.07a ví no vājā r̥bhukṣaṇaḥ patháś citana yáṣṭave |
4.037.07c asmábhyaṁ sūrayaḥ stutā́ víśvā ā́śās tarīṣáṇi ||

4.037.08a táṁ no vājā r̥bhukṣaṇa índra nā́satyā rayím |
4.037.08c sám áśvaṁ carṣaṇíbhya ā́ purú śasta magháttaye ||

4.038.01a utó hí vāṁ dātrā́ sánti pū́rvā yā́ pūrúbhyas trasádasyur nitośé |
4.038.01c kṣetrāsā́ṁ dadathur urvarāsā́ṁ ghanáṁ dásyubhyo abhíbhūtim ugrám ||

4.038.02a utá vājínam puruniṣṣídhvānaṁ dadhikrā́m u dadathur viśvákr̥ṣṭim |
4.038.02c r̥jipyáṁ śyenám pruṣitápsum āśúṁ carkŕ̥tyam aryó nr̥pátiṁ ná śū́ram ||

4.038.03a yáṁ sīm ánu praváteva drávantaṁ víśvaḥ pūrúr mádati hárṣamāṇaḥ |
4.038.03c paḍbhír gŕ̥dhyantam medhayúṁ ná śū́raṁ rathatúraṁ vā́tam iva dhrájantam ||

4.038.04a yáḥ smārundhānó gádhyā samátsu sánutaraś cárati góṣu gácchan |
4.038.04c āvírr̥jīko vidáthā nicíkyat tiró aratím páry ā́pa āyóḥ ||

4.038.05a utá smainaṁ vastramáthiṁ ná tāyúm ánu krośanti kṣitáyo bháreṣu |
4.038.05c nīcā́yamānaṁ jásuriṁ ná śyenáṁ śrávaś cā́cchā paśumác ca yūthám ||

4.038.06a utá smāsu prathamáḥ sariṣyán ní veveti śréṇibhī ráthānām |
4.038.06c srájaṁ kr̥ṇvānó jányo ná śúbhvā reṇúṁ rérihat kiráṇaṁ dadaśvā́n ||

4.038.07a utá syá vājī́ sáhurir r̥tā́vā śúśrūṣamāṇas tanvā̀ samaryé |
4.038.07c túraṁ yatī́ṣu turáyann r̥jipyó 'dhi bhruvóḥ kirate reṇúm r̥ñján ||

4.038.08a utá smāsya tanyatór iva dyór r̥ghāyató abhiyújo bhayante |
4.038.08c yadā́ sahásram abhí ṣīm áyodhīd durvártuḥ smā bhavati bhīmá r̥ñján ||

4.038.09a utá smāsya panayanti jánā jūtíṁ kr̥ṣṭipró abhíbhūtim āśóḥ |
4.038.09c utaínam āhuḥ samithé viyántaḥ párā dadhikrā́ asarat sahásraiḥ ||

4.038.10a ā́ dadhikrā́ḥ śávasā páñca kr̥ṣṭī́ḥ sū́rya iva jyótiṣāpás tatāna |
4.038.10c sahasrasā́ḥ śatasā́ vājy árvā pr̥ṇáktu mádhvā sám imā́ vácāṁsi ||

4.039.01a āśúṁ dadhikrā́ṁ tám u nú ṣṭavāma divás pr̥thivyā́ utá carkirāma |
4.039.01c ucchántīr mā́m uṣásaḥ sūdayantv áti víśvāni duritā́ni parṣan ||

4.039.02a maháś carkarmy árvataḥ kratuprā́ dadhikrā́vṇaḥ puruvā́rasya vŕ̥ṣṇaḥ |
4.039.02c yám pūrúbhyo dīdivā́ṁsaṁ nā́gníṁ dadáthur mitrāvaruṇā táturim ||

4.039.03a yó áśvasya dadhikrā́vṇo ákārīt sámiddhe agnā́ uṣáso vyùṣṭau |
4.039.03c ánāgasaṁ tám áditiḥ kr̥ṇotu sá mitréṇa váruṇenā sajóṣāḥ ||

4.039.04a dadhikrā́vṇa iṣá ūrjó mahó yád ámanmahi marútāṁ nā́ma bhadrám |
4.039.04c svastáye váruṇam mitrám agníṁ hávāmaha índraṁ vájrabāhum ||

4.039.05a índram ivéd ubháye ví hvayanta udī́rāṇā yajñám upaprayántaḥ |
4.039.05c dadhikrā́m u sū́danam mártyāya dadáthur mitrāvaruṇā no áśvam ||

4.039.06a dadhikrā́vṇo akāriṣaṁ jiṣṇór áśvasya vājínaḥ |
4.039.06c surabhí no múkhā karat prá ṇa ā́yūṁṣi tāriṣat ||

4.040.01a dadhikrā́vṇa íd u nú carkirāma víśvā ín mā́m uṣásaḥ sūdayantu |
4.040.01c apā́m agnér uṣásaḥ sū́ryasya bŕ̥haspáter āṅgirasásya jiṣṇóḥ ||

4.040.02a sátvā bhariṣó gaviṣó duvanyasác chravasyā́d iṣá uṣásas turaṇyasát |
4.040.02c satyó dravó dravaráḥ pataṁgaró dadhikrā́véṣam ū́rjaṁ svàr janat ||

4.040.03a utá smāsya drávatas turaṇyatáḥ parṇáṁ ná vér ánu vāti pragardhínaḥ |
4.040.03c śyenásyeva dhrájato aṅkasám pári dadhikrā́vṇaḥ sahórjā́ táritrataḥ ||

4.040.04a utá syá vājī́ kṣipaṇíṁ turaṇyati grīvā́yām baddhó apikakṣá āsáni |
4.040.04c krátuṁ dadhikrā́ ánu saṁtávītvat pathā́m áṅkāṁsy ánv āpánīphaṇat ||

4.040.05a haṁsáḥ śuciṣád vásur antarikṣasád dhótā vediṣád átithir duroṇasát |
4.040.05c nr̥ṣád varasád r̥tasád vyomasád abjā́ gojā́ r̥tajā́ adrijā́ r̥tám ||

4.041.01a índrā kó vāṁ varuṇā sumnám āpa stómo havíṣmām̐ amŕ̥to ná hótā |
4.041.01c yó vāṁ hr̥dí krátumām̐ asmád uktáḥ paspárśad indrāvaruṇā námasvān ||

4.041.02a índrā ha yó váruṇā cakrá āpī́ devaú mártaḥ sakhyā́ya práyasvān |
4.041.02c sá hanti vr̥trā́ samithéṣu śátrūn ávobhir vā mahádbhiḥ sá prá śr̥ṇve ||

4.041.03a índrā ha rátnaṁ váruṇā dhéṣṭhetthā́ nŕ̥bhyaḥ śaśamānébhyas tā́ |
4.041.03c yádī sákhāyā sakhyā́ya sómaiḥ sutébhiḥ suprayásā mādáyaite ||

4.041.04a índrā yuváṁ varuṇā didyúm asminn ójiṣṭham ugrā ní vadhiṣṭaṁ vájram |
4.041.04c yó no durévo vr̥kátir dabhī́tis tásmin mimāthām abhíbhūty ójaḥ ||

4.041.05a índrā yuváṁ varuṇā bhūtám asyā́ dhiyáḥ pretā́rā vr̥ṣabhéva dhenóḥ |
4.041.05c sā́ no duhīyad yávaseva gatvī́ sahásradhārā páyasā mahī́ gaúḥ ||

4.041.06a toké hité tánaya urvárāsu sū́ro dŕ̥śīke vŕ̥ṣaṇaś ca paúṁsye |
4.041.06c índrā no átra váruṇā syātām ávobhir dasmā́ páritakmyāyām ||

4.041.07a yuvā́m íd dhy ávase pūrvyā́ya pári prábhūtī gavíṣaḥ svāpī |
4.041.07c vr̥ṇīmáhe sakhyā́ya priyā́ya śū́rā máṁhiṣṭhā pitáreva śambhū́ ||

4.041.08a tā́ vāṁ dhíyó 'vase vājayántīr ājíṁ ná jagmur yuvayū́ḥ sudānū |
4.041.08c śriyé ná gā́va úpa sómam asthur índraṁ gíro váruṇam me manīṣā́ḥ ||

4.041.09a imā́ índraṁ váruṇam me manīṣā́ ágmann úpa dráviṇam icchámānāḥ |
4.041.09c úpem asthur joṣṭā́ra iva vásvo raghvī́r iva śrávaso bhíkṣamāṇāḥ ||

4.041.10a áśvyasya tmánā ráthyasya puṣṭér nítyasya rāyáḥ pátayaḥ syāma |
4.041.10c tā́ cakrāṇā́ ūtíbhir návyasībhir asmatrā́ rā́yo niyútaḥ sacantām ||

4.041.11a ā́ no br̥hantā br̥hatī́bhir ūtī́ índra yātáṁ varuṇa vā́jasātau |
4.041.11c yád didyávaḥ pŕ̥tanāsu prakrī́ḷān tásya vāṁ syāma sanitā́ra ājéḥ ||

4.042.01a máma dvitā́ rāṣṭráṁ kṣatríyasya viśvā́yor víśve amŕ̥tā yáthā naḥ |
4.042.01c krátuṁ sacante váruṇasya devā́ rā́jāmi kr̥ṣṭér upamásya vavréḥ ||

4.042.02a aháṁ rā́jā váruṇo máhyaṁ tā́ny asuryā̀ṇi prathamā́ dhārayanta |
4.042.02c krátuṁ sacante váruṇasya devā́ rā́jāmi kr̥ṣṭér upamásya vavréḥ ||

4.042.03a ahám índro váruṇas té mahitvórvī́ gabhīré rájasī suméke |
4.042.03c tváṣṭeva víśvā bhúvanāni vidvā́n sám airayaṁ ródasī dhāráyaṁ ca ||

4.042.04a ahám apó apinvam ukṣámāṇā dhāráyaṁ dívaṁ sádana r̥tásya |
4.042.04c r̥téna putró áditer r̥tā́votá tridhā́tu prathayad ví bhū́ma ||

4.042.05a mā́ṁ náraḥ sváśvā vājáyanto mā́ṁ vr̥tā́ḥ samáraṇe havante |
4.042.05c kr̥ṇómy ājím maghávāhám índra íyarmi reṇúm abhíbhūtyojāḥ ||

4.042.06a aháṁ tā́ víśvā cakaraṁ nákir mā daívyaṁ sáho varate ápratītam |
4.042.06c yán mā sómāso mamádan yád ukthóbhé bhayete rájasī apāré ||

4.042.07a vidúṣ ṭe víśvā bhúvanāni tásya tā́ prá bravīṣi váruṇāya vedhaḥ |
4.042.07c tváṁ vr̥trā́ṇi śr̥ṇviṣe jaghanvā́n tváṁ vr̥tā́m̐ ariṇā indra síndhūn ||

4.042.08a asmā́kam átra pitáras tá āsan saptá ŕ̥ṣayo daurgahé badhyámāne |
4.042.08c tá ā́yajanta trasádasyum asyā índraṁ ná vr̥tratúram ardhadevám ||

4.042.09a purukútsānī hí vām ádāśad dhavyébhir indrāvaruṇā námobhiḥ |
4.042.09c áthā rā́jānaṁ trasádasyum asyā vr̥traháṇaṁ dadathur ardhadevám ||

4.042.10a rāyā́ vayáṁ sasavā́ṁso madema havyéna devā́ yávasena gā́vaḥ |
4.042.10c tā́ṁ dhenúm indrāvaruṇā yuváṁ no viśvā́hā dhattam ánapasphurantīm ||

4.043.01a ká u śravat katamó yajñíyānāṁ vandā́ru deváḥ katamó juṣāte |
4.043.01c kásyemā́ṁ devī́m amŕ̥teṣu préṣṭhāṁ hr̥dí śreṣāma suṣṭutíṁ suhavyā́m ||

4.043.02a kó mr̥ḷāti katamá ā́gamiṣṭho devā́nām u katamáḥ śámbhaviṣṭhaḥ |
4.043.02c ráthaṁ kám āhur dravádaśvam āśúṁ yáṁ sū́ryasya duhitā́vr̥ṇīta ||

4.043.03a makṣū́ hí ṣmā gácchatha ī́vato dyū́n índro ná śaktím páritakmyāyām |
4.043.03c divá ā́jātā divyā́ suparṇā́ káyā śácīnām bhavathaḥ śáciṣṭhā ||

4.043.04a kā́ vām bhūd úpamātiḥ káyā na ā́śvinā gamatho hūyámānā |
4.043.04c kó vām maháś cit tyájaso abhī́ka uruṣyátam mādhvī dasrā na ūtī́ ||

4.043.05a urú vāṁ ráthaḥ pári nakṣati dyā́m ā́ yát samudrā́d abhí vártate vām |
4.043.05c mádhvā mādhvī mádhu vām pruṣāyan yát sīṁ vām pŕ̥kṣo bhurájanta pakvā́ḥ ||

4.043.06a síndhur ha vāṁ rasáyā siñcad áśvān ghr̥ṇā́ váyo 'ruṣā́saḥ pári gman |
4.043.06c tád ū ṣú vām ajiráṁ ceti yā́naṁ yéna pátī bhávathaḥ sūryā́yāḥ ||

4.043.07a ihéha yád vāṁ samanā́ papr̥kṣé séyám asmé sumatír vājaratnā |
4.043.07c uruṣyátaṁ jaritā́raṁ yuváṁ ha śritáḥ kā́mo nāsatyā yuvadrík ||

4.044.01a táṁ vāṁ ráthaṁ vayám adyā́ huvema pr̥thujráyam aśvinā sáṁgatiṁ góḥ |
4.044.01c yáḥ sūryā́ṁ váhati vandhurāyúr gírvāhasam purutámaṁ vasūyúm ||

4.044.02a yuváṁ śríyam aśvinā devátā tā́ṁ dívo napātā vanathaḥ śácībhiḥ |
4.044.02c yuvór vápur abhí pŕ̥kṣaḥ sacante váhanti yát kakuhā́so ráthe vām ||

4.044.03a kó vām adyā́ karate rātáhavya ūtáye vā sutapéyāya vārkaíḥ |
4.044.03c r̥tásya vā vanúṣe pūrvyā́ya námo yemānó aśvinā́ vavartat ||

4.044.04a hiraṇyáyena purubhū ráthenemáṁ yajñáṁ nāsatyópa yātam |
4.044.04c píbātha ín mádhunaḥ somyásya dádhatho rátnaṁ vidhaté jánāya ||

4.044.05a ā́ no yātaṁ divó ácchā pr̥thivyā́ hiraṇyáyena suvŕ̥tā ráthena |
4.044.05c mā́ vām anyé ní yaman devayántaḥ sáṁ yád dadé nā́bhiḥ pūrvyā́ vām ||

4.044.06a nū́ no rayím puruvī́ram br̥hántaṁ dásrā mímāthām ubháyeṣv asmé |
4.044.06c náro yád vām aśvinā stómam ā́van sadhástutim ājamīḷhā́so agman ||

4.044.07a ihéha yád vāṁ samanā́ papr̥kṣé séyám asmé sumatír vājaratnā |
4.044.07c uruṣyátaṁ jaritā́raṁ yuváṁ ha śritáḥ kā́mo nāsatyā yuvadrík ||

4.045.01a eṣá syá bhānúr úd iyarti yujyáte ráthaḥ párijmā divó asyá sā́navi |
4.045.01c pr̥kṣā́so asmin mithunā́ ádhi tráyo dŕ̥tis turī́yo mádhuno ví rapśate ||

4.045.02a úd vām pr̥kṣā́so mádhumanta īrate ráthā áśvāsa uṣáso vyùṣṭiṣu |
4.045.02c aporṇuvántas táma ā́ párīvr̥taṁ svàr ṇá śukráṁ tanvánta ā́ rájaḥ ||

4.045.03a mádhvaḥ pibatam madhupébhir āsábhir utá priyám mádhune yuñjāthāṁ rátham |
4.045.03c ā́ vartaním mádhunā jinvathas pathó dŕ̥tiṁ vahethe mádhumantam aśvinā ||

4.045.04a haṁsā́so yé vām mádhumanto asrídho híraṇyaparṇā uhúva uṣarbúdhaḥ |
4.045.04c udaprúto mandíno mandinispŕ̥śo mádhvo ná mákṣaḥ sávanāni gacchathaḥ ||

4.045.05a svadhvarā́so mádhumanto agnáya usrā́ jarante práti vástor aśvínā |
4.045.05c yán niktáhastas taráṇir vicakṣaṇáḥ sómaṁ suṣā́va mádhumantam ádribhiḥ ||

4.045.06a ākenipā́so áhabhir dávidhvataḥ svàr ṇá śukráṁ tanvánta ā́ rájaḥ |
4.045.06c sū́raś cid áśvān yuyujāná īyate víśvām̐ ánu svadháyā cetathas patháḥ ||

4.045.07a prá vām avocam aśvinā dhiyaṁdhā́ ráthaḥ sváśvo ajáro yó ásti |
4.045.07c yéna sadyáḥ pári rájāṁsi yāthó havíṣmantaṁ taráṇim bhojám áccha ||

4.046.01a ágram pibā mádhūnāṁ sutáṁ vāyo díviṣṭiṣu |
4.046.01c tváṁ hí pūrvapā́ ási ||

4.046.02a śaténā no abhíṣṭibhir niyútvām̐ índrasārathiḥ |
4.046.02c vā́yo sutásya tr̥mpatam ||

4.046.03a ā́ vāṁ sahásraṁ háraya índravāyū abhí práyaḥ |
4.046.03c váhantu sómapītaye ||

4.046.04a ráthaṁ híraṇyavandhuram índravāyū svadhvarám |
4.046.04c ā́ hí sthā́tho divispŕ̥śam ||

4.046.05a ráthena pr̥thupā́jasā dāśvā́ṁsam úpa gacchatam |
4.046.05c índravāyū ihā́ gatam ||

4.046.06a índravāyū ayáṁ sutás táṁ devébhiḥ sajóṣasā |
4.046.06c píbataṁ dāśúṣo gr̥hé ||

4.046.07a ihá prayā́ṇam astu vām índravāyū vimócanam |
4.046.07c ihá vāṁ sómapītaye ||

4.047.01a vā́yo śukró ayāmi te mádhvo ágraṁ díviṣṭiṣu |
4.047.01c ā́ yāhi sómapītaye spārhó deva niyútvatā ||

4.047.02a índraś ca vāyav eṣāṁ sómānām pītím arhathaḥ |
4.047.02c yuvā́ṁ hí yántī́ndavo nimnám ā́po ná sadhryàk ||

4.047.03a vā́yav índraś ca śuṣmíṇā saráthaṁ śavasas patī |
4.047.03c niyútvantā na ūtáya ā́ yātaṁ sómapītaye ||

4.047.04a yā́ vāṁ sánti puruspŕ̥ho niyúto dāśúṣe narā |
4.047.04c asmé tā́ yajñavāhaséndravāyū ní yacchatam ||

4.048.01a vihí hótrā ávītā vípo ná rā́yo aryáḥ |
4.048.01c vā́yav ā́ candréṇa ráthena yāhí sutásya pītáye ||

4.048.02a niryuvāṇó áśastīr niyútvām̐ índrasārathiḥ |
4.048.02c vā́yav ā́ candréṇa ráthena yāhí sutásya pītáye ||

4.048.03a ánu kr̥ṣṇé vásudhitī yemā́te viśvápeśasā |
4.048.03c vā́yav ā́ candréṇa ráthena yāhí sutásya pītáye ||

4.048.04a váhantu tvā manoyújo yuktā́so navatír náva |
4.048.04c vā́yav ā́ candréṇa ráthena yāhí sutásya pītáye ||

4.048.05a vā́yo śatáṁ hárīṇāṁ yuvásva póṣyāṇām |
4.048.05c utá vā te sahasríṇo rátha ā́ yātu pā́jasā ||

4.049.01a idáṁ vām āsyè havíḥ priyám indrābr̥haspatī |
4.049.01c ukthám mádaś ca śasyate ||

4.049.02a ayáṁ vām pári ṣicyate sóma indrābr̥haspatī |
4.049.02c cā́rur mádāya pītáye ||

4.049.03a ā́ na indrābr̥haspatī gr̥hám índraś ca gacchatam |
4.049.03c somapā́ sómapītaye ||

4.049.04a asmé indrābr̥haspatī rayíṁ dhattaṁ śatagvínam |
4.049.04c áśvāvantaṁ sahasríṇam ||

4.049.05a índrābŕ̥haspátī vayáṁ suté gīrbhír havāmahe |
4.049.05c asyá sómasya pītáye ||

4.049.06a sómam indrābr̥haspatī píbataṁ dāśúṣo gr̥hé |
4.049.06c mādáyethāṁ tádokasā ||

4.050.01a yás tastámbha sáhasā ví jmó ántān bŕ̥haspátis triṣadhasthó ráveṇa |
4.050.01c tám pratnā́sa ŕ̥ṣayo dī́dhyānāḥ puró víprā dadhire mandrájihvam ||

4.050.02a dhunétayaḥ supraketám mádanto bŕ̥haspate abhí yé nas tatasré |
4.050.02c pŕ̥ṣantaṁ sr̥prám ádabdham ūrvám bŕ̥haspate rákṣatād asya yónim ||

4.050.03a bŕ̥haspate yā́ paramā́ parāvád áta ā́ ta r̥taspŕ̥śo ní ṣeduḥ |
4.050.03c túbhyaṁ khātā́ avatā́ ádridugdhā mádhvaḥ ścotanty abhíto virapśám ||

4.050.04a bŕ̥haspátiḥ prathamáṁ jā́yamāno mahó jyótiṣaḥ paramé vyòman |
4.050.04c saptā́syas tuvijātó ráveṇa ví saptáraśmir adhamat támāṁsi ||

4.050.05a sá suṣṭúbhā sá ŕ̥kvatā gaṇéna valáṁ ruroja phaligáṁ ráveṇa |
4.050.05c bŕ̥haspátir usríyā havyasū́daḥ kánikradad vā́vaśatīr úd ājat ||

4.050.06a evā́ pitré viśvádevāya vŕ̥ṣṇe yajñaír vidhema námasā havírbhiḥ |
4.050.06c bŕ̥haspate suprajā́ vīrávanto vayáṁ syāma pátayo rayīṇā́m ||

4.050.07a sá íd rā́jā prátijanyāni víśvā śúṣmeṇa tasthāv abhí vīryèṇa |
4.050.07c bŕ̥haspátiṁ yáḥ súbhr̥tam bibhárti valgūyáti vándate pūrvabhā́jam ||

4.050.08a sá ít kṣeti súdhita ókasi své tásmā íḷā pinvate viśvadā́nīm |
4.050.08c tásmai víśaḥ svayám evā́ namante yásmin brahmā́ rā́jani pū́rva éti ||

4.050.09a ápratīto jayati sáṁ dhánāni prátijanyāny utá yā́ sájanyā |
4.050.09c avasyáve yó várivaḥ kr̥ṇóti brahmáṇe rā́jā tám avanti devā́ḥ ||

4.050.10a índraś ca sómam pibatam br̥haspate 'smín yajñé mandasānā́ vr̥ṣaṇvasū |
4.050.10c ā́ vāṁ viśantv índavaḥ svābhúvo 'smé rayíṁ sárvavīraṁ ní yacchatam ||

4.050.11a bŕ̥haspata indra várdhataṁ naḥ sácā sā́ vāṁ sumatír bhūtv asmé |
4.050.11c aviṣṭáṁ dhíyo jigr̥tám púraṁdhīr jajastám aryó vanúṣām árātīḥ ||

4.051.01a idám u tyát purutámam purástāj jyótis támaso vayúnāvad asthāt |
4.051.01c nūnáṁ divó duhitáro vibhātī́r gātúṁ kr̥ṇavann uṣáso jánāya ||

4.051.02a ásthur u citrā́ uṣásaḥ purástān mitā́ iva sváravo 'dhvaréṣu |
4.051.02c vy ū̀ vrajásya támaso dvā́rocchántīr avrañ chúcayaḥ pāvakā́ḥ ||

4.051.03a ucchántīr adyá citayanta bhojā́n rādhodéyāyoṣáso maghónīḥ |
4.051.03c acitré antáḥ paṇáyaḥ sasantv ábudhyamānās támaso vímadhye ||

4.051.04a kuvít sá devīḥ sanáyo návo vā yā́mo babhūyā́d uṣaso vo adyá |
4.051.04c yénā návagve áṅgire dáśagve saptā́sye revatī revád ūṣá ||

4.051.05a yūyáṁ hí devīr r̥tayúgbhir áśvaiḥ pariprayāthá bhúvanāni sadyáḥ |
4.051.05c prabodháyantīr uṣasaḥ sasántaṁ dvipā́c cátuṣpāc caráthāya jīvám ||

4.051.06a kvà svid āsāṁ katamā́ purāṇī́ yáyā vidhā́nā vidadhúr r̥bhūṇā́m |
4.051.06c śúbhaṁ yác chubhrā́ uṣásaś cáranti ná ví jñāyante sadŕ̥śīr ajuryā́ḥ ||

4.051.07a tā́ ghā tā́ bhadrā́ uṣásaḥ purā́sur abhiṣṭídyumnā r̥tájātasatyāḥ |
4.051.07c yā́sv ījānáḥ śaśamāná ukthaíḥ stuváñ cháṁsan dráviṇaṁ sadyá ā́pa ||

4.051.08a tā́ ā́ caranti samanā́ purástāt samānátaḥ samanā́ paprathānā́ḥ |
4.051.08c r̥tásya devī́ḥ sádaso budhānā́ gávāṁ ná sárgā uṣáso jarante ||

4.051.09a tā́ ín nv èvá samanā́ samānī́r ámītavarṇā uṣásaś caranti |
4.051.09c gū́hantīr ábhvam ásitaṁ rúśadbhiḥ śukrā́s tanū́bhiḥ śúcayo rucānā́ḥ ||

4.051.10a rayíṁ divo duhitaro vibhātī́ḥ prajā́vantaṁ yacchatāsmā́su devīḥ |
4.051.10c syonā́d ā́ vaḥ pratibúdhyamānāḥ suvī́ryasya pátayaḥ syāma ||

4.051.11a tád vo divo duhitaro vibhātī́r úpa bruva uṣaso yajñáketuḥ |
4.051.11c vayáṁ syāma yaśáso jáneṣu tád dyaúś ca dhattā́m pr̥thivī́ ca devī́ ||

4.052.01a práti ṣyā́ sūnárī jánī vyucchántī pári svásuḥ |
4.052.01c divó adarśi duhitā́ ||

4.052.02a áśveva citrā́ruṣī mātā́ gávām r̥tā́varī |
4.052.02c sákhābhūd aśvínor uṣā́ḥ ||

4.052.03a utá sákhāsy aśvínor utá mātā́ gávām asi |
4.052.03c utóṣo vásva īśiṣe ||

4.052.04a yāvayáddveṣasaṁ tvā cikitvít sūnr̥tāvari |
4.052.04c práti stómair abhutsmahi ||

4.052.05a práti bhadrā́ adr̥kṣata gávāṁ sárgā ná raśmáyaḥ |
4.052.05c óṣā́ aprā urú jráyaḥ ||

4.052.06a āpaprúṣī vibhāvari vy ā̀var jyótiṣā támaḥ |
4.052.06c úṣo ánu svadhā́m ava ||

4.052.07a ā́ dyā́ṁ tanoṣi raśmíbhir ā́ntárikṣam urú priyám |
4.052.07c úṣaḥ śukréṇa śocíṣā ||

4.053.01a tád devásya savitúr vā́ryam mahád vr̥ṇīmáhe ásurasya prácetasaḥ |
4.053.01c chardír yéna dāśúṣe yácchati tmánā tán no mahā́m̐ úd ayān devó aktúbhiḥ ||

4.053.02a divó dhartā́ bhúvanasya prajā́patiḥ piśáṅgaṁ drāpím práti muñcate kavíḥ |
4.053.02c vicakṣaṇáḥ pratháyann āpr̥ṇánn urv ájījanat savitā́ sumnám ukthyàm ||

4.053.03a ā́prā rájāṁsi divyā́ni pā́rthivā ślókaṁ deváḥ kr̥ṇute svā́ya dhármaṇe |
4.053.03c prá bāhū́ asrāk savitā́ sávīmani niveśáyan prasuvánn aktúbhir jágat ||

4.053.04a ádābhyo bhúvanāni pracā́kaśad vratā́ni deváḥ savitā́bhí rakṣate |
4.053.04c prā́srāg bāhū́ bhúvanasya prajā́bhyo dhr̥távrato mahó ájmasya rājati ||

4.053.05a trír antárikṣaṁ savitā́ mahitvanā́ trī́ rájāṁsi paribhús trī́ṇi rocanā́ |
4.053.05c tisró dívaḥ pr̥thivī́s tisrá invati tribhír vrataír abhí no rakṣati tmánā ||

4.053.06a br̥hátsumnaḥ prasavītā́ nivéśano jágataḥ sthātúr ubháyasya yó vaśī́ |
4.053.06c sá no deváḥ savitā́ śárma yacchatv asmé kṣáyāya trivárūtham áṁhasaḥ ||

4.053.07a ā́gan devá r̥túbhir várdhatu kṣáyaṁ dádhātu naḥ savitā́ suprajā́m íṣam |
4.053.07c sá naḥ kṣapā́bhir áhabhiś ca jinvatu prajā́vantaṁ rayím asmé sám invatu ||

4.054.01a ábhūd deváḥ savitā́ vándyo nú na idā́nīm áhna upavā́cyo nŕ̥bhiḥ |
4.054.01c ví yó rátnā bhájati mānavébhyaḥ śréṣṭhaṁ no átra dráviṇaṁ yáthā dádhat ||

4.054.02a devébhyo hí prathamáṁ yajñíyebhyo 'mr̥tatváṁ suvási bhāgám uttamám |
4.054.02c ā́d íd dāmā́naṁ savitar vy ū̀rṇuṣe 'nūcīnā́ jīvitā́ mā́nuṣebhyaḥ ||

4.054.03a ácittī yác cakr̥mā́ daívye jáne dīnaír dákṣaiḥ prábhūtī pūruṣatvátā |
4.054.03c devéṣu ca savitar mā́nuṣeṣu ca tváṁ no átra suvatād ánāgasaḥ ||

4.054.04a ná pramíye savitúr daívyasya tád yáthā víśvam bhúvanaṁ dhārayiṣyáti |
4.054.04c yát pr̥thivyā́ várimann ā́ svaṅgurír várṣman diváḥ suváti satyám asya tát ||

4.054.05a índrajyeṣṭhān br̥hádbhyaḥ párvatebhyaḥ kṣáyām̐ ebhyaḥ suvasi pastyā̀vataḥ |
4.054.05c yáthā-yathā patáyanto viyemirá evaívá tasthuḥ savitaḥ savā́ya te ||

4.054.06a yé te trír áhan savitaḥ savā́so divé-dive saúbhagam āsuvánti |
4.054.06c índro dyā́vāpr̥thivī́ síndhur adbhír ādityaír no áditiḥ śárma yaṁsat ||

4.055.01a kó vas trātā́ vasavaḥ kó varūtā́ dyā́vābhūmī adite trā́sīthāṁ naḥ |
4.055.01c sáhīyaso varuṇa mitra mártāt kó vo 'dhvaré várivo dhāti devāḥ ||

4.055.02a prá yé dhā́māni pūrvyā́ṇy árcān ví yád ucchā́n viyotā́ro ámūrāḥ |
4.055.02c vidhātā́ro ví té dadhur ájasrā r̥tádhītayo rurucanta dasmā́ḥ ||

4.055.03a prá pastyā̀m áditiṁ síndhum arkaíḥ svastím īḷe sakhyā́ya devī́m |
4.055.03c ubhé yáthā no áhanī nipā́ta uṣā́sānáktā karatām ádabdhe ||

4.055.04a vy àryamā́ váruṇaś ceti pánthām iṣás pátiḥ suvitáṁ gātúm agníḥ |
4.055.04c índrāviṣṇū nr̥vád u ṣú stávānā śárma no yantam ámavad várūtham ||

4.055.05a ā́ párvatasya marútām ávāṁsi devásya trātúr avri bhágasya |
4.055.05c pā́t pátir jányād áṁhaso no mitró mitríyād utá na uruṣyet ||

4.055.06a nū́ rodasī áhinā budhnyèna stuvītá devī ápyebhir iṣṭaíḥ |
4.055.06c samudráṁ ná saṁcáraṇe saniṣyávo gharmásvaraso nadyò ápa vran ||

4.055.07a devaír no devy áditir ní pātu devás trātā́ trāyatām áprayucchan |
4.055.07c nahí mitrásya váruṇasya dhāsím árhāmasi pramíyaṁ sā́nv agnéḥ ||

4.055.08a agnír īśe vasavyàsyāgnír maháḥ saúbhagasya |
4.055.08c tā́ny asmábhyaṁ rāsate ||

4.055.09a úṣo maghony ā́ vaha sū́nr̥te vā́ryā purú |
4.055.09c asmábhyaṁ vājinīvati ||

4.055.10a tát sú naḥ savitā́ bhágo váruṇo mitró aryamā́ |
4.055.10c índro no rā́dhasā́ gamat ||

4.056.01a mahī́ dyā́vāpr̥thivī́ ihá jyéṣṭhe rucā́ bhavatāṁ śucáyadbhir arkaíḥ |
4.056.01c yát sīṁ váriṣṭhe br̥hatī́ viminván ruvád dhokṣā́ paprathānébhir évaiḥ ||

4.056.02a devī́ devébhir yajaté yájatrair áminatī tasthatur ukṣámāṇe |
4.056.02c r̥tā́varī adrúhā deváputre yajñásya netrī́ śucáyadbhir arkaíḥ ||

4.056.03a sá ít svápā bhúvaneṣv āsa yá imé dyā́vāpr̥thivī́ jajā́na |
4.056.03c urvī́ gabhīré rájasī suméke avaṁśé dhī́raḥ śácyā sám airat ||

4.056.04a nū́ rodasī br̥hádbhir no várūthaiḥ pátnīvadbhir iṣáyantī sajóṣāḥ |
4.056.04c urūcī́ víśve yajaté ní pātaṁ dhiyā́ syāma rathyàḥ sadāsā́ḥ ||

4.056.05a prá vām máhi dyávī abhy úpastutim bharāmahe |
4.056.05c śúcī úpa práśastaye ||

4.056.06a punāné tanvā̀ mitháḥ svéna dákṣeṇa rājathaḥ |
4.056.06c ūhyā́the sanā́d r̥tám ||

4.056.07a mahī́ mitrásya sādhathas tárantī pípratī r̥tám |
4.056.07c pári yajñáṁ ní ṣedathuḥ ||

4.057.01a kṣétrasya pátinā vayáṁ hiténeva jayāmasi |
4.057.01c gā́m áśvam poṣayitnv ā́ sá no mr̥ḷātīdŕ̥śe ||

4.057.02a kṣétrasya pate mádhumantam ūrmíṁ dhenúr iva páyo asmā́su dhukṣva |
4.057.02c madhuścútaṁ ghr̥tám iva súpūtam r̥tásya naḥ pátayo mr̥ḷayantu ||

4.057.03a mádhumatīr óṣadhīr dyā́va ā́po mádhuman no bhavatv antárikṣam |
4.057.03c kṣétrasya pátir mádhumān no astv áriṣyanto ánv enaṁ carema ||

4.057.04a śunáṁ vāhā́ḥ śunáṁ náraḥ śunáṁ kr̥ṣatu lā́ṅgalam |
4.057.04c śunáṁ varatrā́ badhyantāṁ śunám áṣṭrām úd iṅgaya ||

4.057.05a śúnāsīrāv imā́ṁ vā́caṁ juṣethāṁ yád diví cakráthuḥ páyaḥ |
4.057.05c ténemā́m úpa siñcatam ||

4.057.06a arvā́cī subhage bhava sī́te vándāmahe tvā |
4.057.06c yáthā naḥ subhágā́sasi yáthā naḥ suphálā́sasi ||

4.057.07a índraḥ sī́tāṁ ní gr̥hṇātu tā́m pūṣā́nu yacchatu |
4.057.07c sā́ naḥ páyasvatī duhām úttarām-uttarāṁ sámām ||

4.057.08a śunáṁ naḥ phā́lā ví kr̥ṣantu bhū́miṁ śunáṁ kīnā́śā abhí yantu vāhaíḥ |
4.057.08c śunám parjányo mádhunā páyobhiḥ śúnāsīrā śunám asmā́su dhattam ||

4.058.01a samudrā́d ūrmír mádhumām̐ úd ārad úpāṁśúnā sám amr̥tatvám ānaṭ |
4.058.01c ghr̥tásya nā́ma gúhyaṁ yád ásti jihvā́ devā́nām amŕ̥tasya nā́bhiḥ ||

4.058.02a vayáṁ nā́ma prá bravāmā ghr̥tásyāsmín yajñé dhārayāmā námobhiḥ |
4.058.02c úpa brahmā́ śr̥ṇavac chasyámānaṁ cátuḥśr̥ṅgo 'vamīd gaurá etát ||

4.058.03a catvā́ri śŕ̥ṅgā tráyo asya pā́dā dvé śīrṣé saptá hástāso asya |
4.058.03c trídhā baddhó vr̥ṣabhó roravīti mahó devó mártyām̐ ā́ viveśa ||

4.058.04a trídhā hitám paṇíbhir guhyámānaṁ gávi devā́so ghr̥tám ánv avindan |
4.058.04c índra ékaṁ sū́rya ékaṁ jajāna venā́d ékaṁ svadháyā níṣ ṭatakṣuḥ ||

4.058.05a etā́ arṣanti hŕ̥dyāt samudrā́c chatávrajā ripúṇā nā́vacákṣe |
4.058.05c ghr̥tásya dhā́rā abhí cākaśīmi hiraṇyáyo vetasó mádhya āsām ||

4.058.06a samyák sravanti saríto ná dhénā antár hr̥dā́ mánasā pūyámānāḥ |
4.058.06c eté arṣanty ūrmáyo ghr̥tásya mr̥gā́ iva kṣipaṇór ī́ṣamāṇāḥ ||

4.058.07a síndhor iva prādhvané śūghanā́so vā́tapramiyaḥ patayanti yahvā́ḥ |
4.058.07c ghr̥tásya dhā́rā aruṣó ná vājī́ kā́ṣṭhā bhindánn ūrmíbhiḥ pínvamānaḥ ||

4.058.08a abhí pravanta sámaneva yóṣāḥ kalyāṇyàḥ smáyamānāso agním |
4.058.08c ghr̥tásya dhā́rāḥ samídho nasanta tā́ juṣāṇó haryati jātávedāḥ ||

4.058.09a kanyā̀ iva vahatúm étavā́ u añjy àñjānā́ abhí cākaśīmi |
4.058.09c yátra sómaḥ sūyáte yátra yajñó ghr̥tásya dhā́rā abhí tát pavante ||

4.058.10a abhy àrṣata suṣṭutíṁ gávyam ājím asmā́su bhadrā́ dráviṇāni dhatta |
4.058.10c imáṁ yajñáṁ nayata devátā no ghr̥tásya dhā́rā mádhumat pavante ||

4.058.11a dhā́man te víśvam bhúvanam ádhi śritám antáḥ samudré hr̥dy àntár ā́yuṣi |
4.058.11c apā́m ánīke samithé yá ā́bhr̥tas tám aśyāma mádhumantaṁ ta ūrmím ||

5.001.01a ábodhy agníḥ samídhā jánānām práti dhenúm ivāyatī́m uṣā́sam |
5.001.01c yahvā́ iva prá vayā́m ujjíhānāḥ prá bhānávaḥ sisrate nā́kam áccha ||

5.001.02a ábodhi hótā yajáthāya devā́n ūrdhvó agníḥ sumánāḥ prātár asthāt |
5.001.02c sámiddhasya rúśad adarśi pā́jo mahā́n devás támaso nír amoci ||

5.001.03a yád īṁ gaṇásya raśanā́m ájīgaḥ śúcir aṅkte śúcibhir góbhir agníḥ |
5.001.03c ā́d dákṣiṇā yujyate vājayánty uttānā́m ūrdhvó adhayaj juhū́bhiḥ ||

5.001.04a agním ácchā devayatā́m mánāṁsi cákṣūṁṣīva sū́rye sáṁ caranti |
5.001.04c yád īṁ súvāte uṣásā vírūpe śvetó vājī́ jāyate ágre áhnām ||

5.001.05a jániṣṭa hí jényo ágre áhnāṁ hitó hitéṣv aruṣó váneṣu |
5.001.05c dáme-dame saptá rátnā dádhāno 'gnír hótā ní ṣasādā yájīyān ||

5.001.06a agnír hótā ny àsīdad yájīyān upásthe mātúḥ surabhā́ u loké |
5.001.06c yúvā kavíḥ puruniṣṭhá r̥tā́vā dhartā́ kr̥ṣṭīnā́m utá mádhya iddháḥ ||

5.001.07a prá ṇú tyáṁ vípram adhvaréṣu sādhúm agníṁ hótāram īḷate námobhiḥ |
5.001.07c ā́ yás tatā́na ródasī r̥téna nítyam mr̥janti vājínaṁ ghr̥téna ||

5.001.08a mārjālyò mr̥jyate své dámūnāḥ kavipraśastó átithiḥ śivó naḥ |
5.001.08c sahásraśr̥ṅgo vr̥ṣabhás tádojā víśvām̐ agne sáhasā prā́sy anyā́n ||

5.001.09a prá sadyó agne áty eṣy anyā́n āvír yásmai cā́rutamo babhū́tha |
5.001.09c īḷényo vapuṣyò vibhā́vā priyó viśā́m átithir mā́nuṣīṇām ||

5.001.10a túbhyam bharanti kṣitáyo yaviṣṭha balím agne ántita ótá dūrā́t |
5.001.10c ā́ bhándiṣṭhasya sumatíṁ cikiddhi br̥hát te agne máhi śárma bhadrám ||

5.001.11a ā́dyá rátham bhānumo bhānumántam ágne tíṣṭha yajatébhiḥ sámantam |
5.001.11c vidvā́n pathīnā́m urv àntárikṣam éhá devā́n havirádyāya vakṣi ||

5.001.12a ávocāma kaváye médhyāya váco vandā́ru vr̥ṣabhā́ya vŕ̥ṣṇe |
5.001.12c gáviṣṭhiro námasā stómam agnaú divī̀va rukmám uruvyáñcam aśret ||

5.002.01a kumārám mātā́ yuvatíḥ sámubdhaṁ gúhā bibharti ná dadāti pitré |
5.002.01c ánīkam asya ná mináj jánāsaḥ puráḥ paśyanti níhitam arataú ||

5.002.02a kám etáṁ tváṁ yuvate kumārám péṣī bibharṣi máhiṣī jajāna |
5.002.02c pūrvī́r hí gárbhaḥ śarádo vavárdhā́paśyaṁ jātáṁ yád ásūta mātā́ ||

5.002.03a híraṇyadantaṁ śúcivarṇam ārā́t kṣétrād apaśyam ā́yudhā mímānam |
5.002.03c dadānó asmā amŕ̥taṁ vipŕ̥kvat kím mā́m anindrā́ḥ kr̥ṇavann anukthā́ḥ ||

5.002.04a kṣétrād apaśyaṁ sanutáś cárantaṁ sumád yūtháṁ ná purú śóbhamānam |
5.002.04c ná tā́ agr̥bhrann ájaniṣṭa hí ṣáḥ páliknīr íd yuvatáyo bhavanti ||

5.002.05a ké me maryakáṁ ví yavanta góbhir ná yéṣāṁ gopā́ áraṇaś cid ā́sa |
5.002.05c yá īṁ jagr̥bhúr áva té sr̥jantv ā́jāti paśvá úpa naś cikitvā́n ||

5.002.06a vasā́ṁ rā́jānaṁ vasatíṁ jánānām árātayo ní dadhur mártyeṣu |
5.002.06c bráhmāṇy átrer áva táṁ sr̥jantu ninditā́ro níndyāso bhavantu ||

5.002.07a śúnaś cic chépaṁ níditaṁ sahásrād yū́pād amuñco áśamiṣṭa hí ṣáḥ |
5.002.07c evā́smád agne ví mumugdhi pā́śān hótaś cikitva ihá tū́ niṣádya ||

5.002.08a hr̥ṇīyámāno ápa hí mád aíyeḥ prá me devā́nāṁ vratapā́ uvāca |
5.002.08c índro vidvā́m̐ ánu hí tvā cacákṣa ténāhám agne ánuśiṣṭa ā́gām ||

5.002.09a ví jyótiṣā br̥hatā́ bhāty agnír āvír víśvāni kr̥ṇute mahitvā́ |
5.002.09c prā́devīr māyā́ḥ sahate durévāḥ śíśīte śŕ̥ṅge rákṣase viníkṣe ||

5.002.10a utá svānā́so diví ṣantv agnés tigmā́yudhā rákṣase hántavā́ u |
5.002.10c máde cid asya prá rujanti bhā́mā ná varante paribā́dho ádevīḥ ||

5.002.11a etáṁ te stómaṁ tuvijāta vípro ráthaṁ ná dhī́raḥ svápā atakṣam |
5.002.11c yádī́d agne práti tváṁ deva háryāḥ svàrvatīr apá enā jayema ||

5.002.12a tuvigrī́vo vr̥ṣabhó vāvr̥dhānò 'śatrv àryáḥ sám ajāti védaḥ |
5.002.12c ítīmám agním amŕ̥tā avocan barhíṣmate mánave śárma yaṁsad dhavíṣmate mánave śárma yaṁsat ||

5.003.01a tvám agne váruṇo jā́yase yát tvám mitró bhavasi yát sámiddhaḥ |
5.003.01c tvé víśve sahasas putra devā́s tvám índro dāśúṣe mártyāya ||

5.003.02a tvám aryamā́ bhavasi yát kanī́nāṁ nā́ma svadhāvan gúhyam bibharṣi |
5.003.02c añjánti mitráṁ súdhitaṁ ná góbhir yád dámpatī sámanasā kr̥ṇóṣi ||

5.003.03a táva śriyé marúto marjayanta rúdra yát te jánima cā́ru citrám |
5.003.03c padáṁ yád víṣṇor upamáṁ nidhā́yi téna pāsi gúhyaṁ nā́ma gónām ||

5.003.04a táva śriyā́ sudŕ̥śo deva devā́ḥ purū́ dádhānā amŕ̥taṁ sapanta |
5.003.04c hótāram agním mánuṣo ní ṣedur daśasyánta uśíjaḥ śáṁsam āyóḥ ||

5.003.05a ná tvád dhótā pū́rvo agne yájīyān ná kā́vyaiḥ paró asti svadhāvaḥ |
5.003.05c viśáś ca yásyā átithir bhávāsi sá yajñéna vanavad deva mártān ||

5.003.06a vayám agne vanuyāma tvótā vasūyávo havíṣā búdhyamānāḥ |
5.003.06c vayáṁ samaryé vidátheṣv áhnāṁ vayáṁ rāyā́ sahasas putra mártān ||

5.003.07a yó na ā́go abhy éno bhárāty ádhī́d aghám agháśaṁse dadhāta |
5.003.07c jahī́ cikitvo abhíśastim etā́m ágne yó no marcáyati dvayéna ||

5.003.08a tvā́m asyā́ vyúṣi deva pū́rve dūtáṁ kr̥ṇvānā́ ayajanta havyaíḥ |
5.003.08c saṁsthé yád agna ī́yase rayīṇā́ṁ devó mártair vásubhir idhyámānaḥ ||

5.003.09a áva spr̥dhi pitáraṁ yódhi vidvā́n putró yás te sahasaḥ sūna ūhé |
5.003.09c kadā́ cikitvo abhí cakṣase nó 'gne kadā́m̐ r̥tacíd yātayāse ||

5.003.10a bhū́ri nā́ma vándamāno dadhāti pitā́ vaso yádi táj joṣáyāse |
5.003.10c kuvíd devásya sáhasā cakānáḥ sumnám agnír vanate vāvr̥dhānáḥ ||

5.003.11a tvám aṅgá jaritā́raṁ yaviṣṭha víśvāny agne duritā́ti parṣi |
5.003.11c stenā́ adr̥śran ripávo jánāsó 'jñātaketā vr̥jinā́ abhūvan ||

5.003.12a imé yā́māsas tvadríg abhūvan vásave vā tád íd ā́go avāci |
5.003.12c nā́hāyám agnír abhíśastaye no ná rī́ṣate vāvr̥dhānáḥ párā dāt ||

5.004.01a tvā́m agne vásupatiṁ vásūnām abhí prá mande adhvaréṣu rājan |
5.004.01c tváyā vā́jaṁ vājayánto jayemābhí ṣyāma pr̥tsutī́r mártyānām ||

5.004.02a havyavā́ḷ agnír ajáraḥ pitā́ no vibhúr vibhā́vā sudŕ̥śīko asmé |
5.004.02c sugārhapatyā́ḥ sám íṣo didīhy asmadryàk sám mimīhi śrávāṁsi ||

5.004.03a viśā́ṁ kavíṁ viśpátim mā́nuṣīṇāṁ śúcim pāvakáṁ ghr̥tápr̥ṣṭham agním |
5.004.03c ní hótāraṁ viśvavídaṁ dadhidhve sá devéṣu vanate vā́ryāṇi ||

5.004.04a juṣásvāgna íḷayā sajóṣā yátamāno raśmíbhiḥ sū́ryasya |
5.004.04c juṣásva naḥ samídhaṁ jātaveda ā́ ca devā́n havirádyāya vakṣi ||

5.004.05a júṣṭo dámūnā átithir duroṇá imáṁ no yajñám úpa yāhi vidvā́n |
5.004.05c víśvā agne abhiyújo vihátyā śatrūyatā́m ā́ bharā bhójanāni ||

5.004.06a vadhéna dásyum prá hí cātáyasva váyaḥ kr̥ṇvānás tanvè svā́yai |
5.004.06c píparṣi yát sahasas putra devā́nt só agne pāhi nr̥tama vā́je asmā́n ||

5.004.07a vayáṁ te agna ukthaír vidhema vayáṁ havyaíḥ pāvaka bhadraśoce |
5.004.07c asmé rayíṁ viśvávāraṁ sám invāsmé víśvāni dráviṇāni dhehi ||

5.004.08a asmā́kam agne adhvaráṁ juṣasva sáhasaḥ sūno triṣadhastha havyám |
5.004.08c vayáṁ devéṣu sukŕ̥taḥ syāma śármaṇā nas trivárūthena pāhi ||

5.004.09a víśvāni no durgáhā jātavedaḥ síndhuṁ ná nāvā́ duritā́ti parṣi |
5.004.09c ágne atriván námasā gr̥ṇānò 'smā́kam bodhy avitā́ tanū́nām ||

5.004.10a yás tvā hr̥dā́ kīríṇā mányamānó 'martyam mártyo jóhavīmi |
5.004.10c jā́tavedo yáśo asmā́su dhehi prajā́bhir agne amr̥tatvám aśyām ||

5.004.11a yásmai tváṁ sukŕ̥te jātaveda u lokám agne kr̥ṇávaḥ syonám |
5.004.11c aśvínaṁ sá putríṇaṁ vīrávantaṁ gómantaṁ rayíṁ naśate svastí ||

5.005.01a súsamiddhāya śocíṣe ghr̥táṁ tīvráṁ juhotana |
5.005.01c agnáye jātávedase ||

5.005.02a nárāśáṁsaḥ suṣūdatīmáṁ yajñám ádābhyaḥ |
5.005.02c kavír hí mádhuhastyaḥ ||

5.005.03a īḷitó agna ā́ vahéndraṁ citrám ihá priyám |
5.005.03c sukhaí ráthebhir ūtáye ||

5.005.04a ū́rṇamradā ví prathasvābhy àrkā́ anūṣata |
5.005.04c bhávā naḥ śubhra sātáye ||

5.005.05a dévīr dvāro ví śrayadhvaṁ suprāyaṇā́ na ūtáye |
5.005.05c prá-pra yajñám pr̥ṇītana ||

5.005.06a suprátīke vayovŕ̥dhā yahvī́ r̥tásya mātárā |
5.005.06c doṣā́m uṣā́sam īmahe ||

5.005.07a vā́tasya pátmann īḷitā́ daívyā hótārā mánuṣaḥ |
5.005.07c imáṁ no yajñám ā́ gatam ||

5.005.08a íḷā sárasvatī mahī́ tisró devī́r mayobhúvaḥ |
5.005.08b barhíḥ sīdantv asrídhaḥ ||

5.005.09a śivás tvaṣṭar ihā́ gahi vibhúḥ póṣa utá tmánā |
5.005.09c yajñé-yajñe na úd ava ||

5.005.10a yátra véttha vanaspate devā́nāṁ gúhyā nā́māni |
5.005.10c tátra havyā́ni gāmaya ||

5.005.11a svā́hāgnáye váruṇāya svā́héndrāya marúdbhyaḥ |
5.005.11c svā́hā devébhyo havíḥ ||

5.006.01a agníṁ tám manye yó vásur ástaṁ yáṁ yánti dhenávaḥ |
5.006.01c ástam árvanta āśávó 'staṁ nítyāso vājína íṣaṁ stotŕ̥bhya ā́ bhara ||

5.006.02a só agnír yó vásur gr̥ṇé sáṁ yám āyánti dhenávaḥ |
5.006.02c sám árvanto raghudrúvaḥ sáṁ sujātā́saḥ sūráya íṣaṁ stotŕ̥bhya ā́ bhara ||

5.006.03a agnír hí vājínaṁ viśé dádāti viśvácarṣaṇiḥ |
5.006.03c agnī́ rāyé svābhúvaṁ sá prītó yāti vā́ryam íṣaṁ stotŕ̥bhya ā́ bhara ||

5.006.04a ā́ te agna idhīmahi dyumántaṁ devājáram |
5.006.04c yád dha syā́ te pánīyasī samíd dīdáyati dyávī́ṣaṁ stotŕ̥bhya ā́ bhara ||

5.006.05a ā́ te agna r̥cā́ havíḥ śúkrasya śociṣas pate |
5.006.05c súścandra dásma víśpate hávyavāṭ túbhyaṁ hūyata íṣaṁ stotŕ̥bhya ā́ bhara ||

5.006.06a pró tyé agnáyo 'gníṣu víśvam puṣyanti vā́ryam |
5.006.06c té hinvire tá invire tá iṣaṇyanty ānuṣág íṣaṁ stotŕ̥bhya ā́ bhara ||

5.006.07a táva tyé agne arcáyo máhi vrādhanta vājínaḥ |
5.006.07c yé pátvabhiḥ śaphā́nāṁ vrajā́ bhuránta gónām íṣaṁ stotŕ̥bhya ā́ bhara ||

5.006.08a návā no agna ā́ bhara stotŕ̥bhyaḥ sukṣitī́r íṣaḥ |
5.006.08c té syāma yá ānr̥cús tvā́dūtāso dáme-dama íṣaṁ stotŕ̥bhya ā́ bhara ||

5.006.09a ubhé suścandra sarpíṣo dárvī śrīṇīṣa āsáni |
5.006.09c utó na út pupūryā ukthéṣu śavasas pata íṣaṁ stotŕ̥bhya ā́ bhara ||

5.006.10a evā́m̐ agním ajuryamur gīrbhír yajñébhir ānuṣák |
5.006.10c dádhad asmé suvī́ryam utá tyád āśváśvyam íṣaṁ stotŕ̥bhya ā́ bhara ||

5.007.01a sákhāyaḥ sáṁ vaḥ samyáñcam íṣaṁ stómaṁ cāgnáye |
5.007.01c várṣiṣṭhāya kṣitīnā́m ūrjó náptre sáhasvate ||

5.007.02a kútrā cid yásya sámr̥tau raṇvā́ náro nr̥ṣádane |
5.007.02c árhantaś cid yám indhaté saṁjanáyanti jantávaḥ ||

5.007.03a sáṁ yád iṣó vánāmahe sáṁ havyā́ mā́nuṣāṇām |
5.007.03c utá dyumnásya śávasa r̥tásya raśmím ā́ dade ||

5.007.04a sá smā kr̥ṇoti ketúm ā́ náktaṁ cid dūrá ā́ saté |
5.007.04c pāvakó yád vánaspátīn prá smā minā́ty ajáraḥ ||

5.007.05a áva sma yásya véṣaṇe svédam pathíṣu júhvati |
5.007.05c abhī́m áha svájenyam bhū́mā pr̥ṣṭhéva ruruhuḥ ||

5.007.06a yám mártyaḥ puruspŕ̥haṁ vidád víśvasya dhā́yase |
5.007.06c prá svā́danam pitūnā́m ástatātiṁ cid āyáve ||

5.007.07a sá hí ṣmā dhánvā́kṣitaṁ dā́tā ná dā́ty ā́ paśúḥ |
5.007.07c híriśmaśruḥ śúcidann r̥bhúr ánibhr̥ṣṭataviṣiḥ ||

5.007.08a śúciḥ ṣma yásmā atrivát prá svádhitīva rī́yate |
5.007.08c suṣū́r asūta mātā́ krāṇā́ yád ānaśé bhágam ||

5.007.09a ā́ yás te sarpirāsuté 'gne śám ásti dhā́yase |
5.007.09c aíṣu dyumnám utá śráva ā́ cittám mártyeṣu dhāḥ ||

5.007.10a íti cin manyúm adhríjas tvā́dātam ā́ paśúṁ dade |
5.007.10c ā́d agne ápr̥ṇató 'triḥ sāsahyād dásyūn iṣáḥ sāsahyān nr̥̄́n ||

5.008.01a tvā́m agna r̥tāyávaḥ sám īdhire pratnám pratnā́sa ūtáye sahaskr̥ta |
5.008.01c puruścandráṁ yajatáṁ viśvádhāyasaṁ dámūnasaṁ gr̥hápatiṁ váreṇyam ||

5.008.02a tvā́m agne átithim pūrvyáṁ víśaḥ śocíṣkeśaṁ gr̥hápatiṁ ní ṣedire |
5.008.02c br̥hátketum pururū́paṁ dhanaspŕ̥taṁ suśármāṇaṁ svávasaṁ jaradvíṣam ||

5.008.03a tvā́m agne mā́nuṣīr īḷate víśo hotrāvídaṁ víviciṁ ratnadhā́tamam |
5.008.03c gúhā sántaṁ subhaga viśvádarśataṁ tuviṣvaṇásaṁ suyájaṁ ghr̥taśríyam ||

5.008.04a tvā́m agne dharṇasíṁ viśvádhā vayáṁ gīrbhír gr̥ṇánto námasópa sedima |
5.008.04c sá no juṣasva samidhānó aṅgiro devó mártasya yaśásā sudītíbhiḥ ||

5.008.05a tvám agne pururū́po viśé-viśe váyo dadhāsi pratnáthā puruṣṭuta |
5.008.05c purū́ṇy ánnā sáhasā ví rājasi tvíṣiḥ sā́ te titviṣāṇásya nā́dhŕ̥ṣe ||

5.008.06a tvā́m agne samidhānáṁ yaviṣṭhya devā́ dūtáṁ cakrire havyavā́hanam |
5.008.06c urujráyasaṁ ghr̥táyonim ā́hutaṁ tveṣáṁ cákṣur dadhire codayánmati ||

5.008.07a tvā́m agne pradíva ā́hutaṁ ghr̥taíḥ sumnāyávaḥ suṣamídhā sám īdhire |
5.008.07c sá vāvr̥dhāná óṣadhībhir ukṣitò 'bhí jráyāṁsi pā́rthivā ví tiṣṭhase ||

5.009.01a tvā́m agne havíṣmanto devám mártāsa īḷate |
5.009.01c mánye tvā jātávedasaṁ sá havyā́ vakṣy ānuṣák ||

5.009.02a agnír hótā dā́svataḥ kṣáyasya vr̥ktábarhiṣaḥ |
5.009.02c sáṁ yajñā́saś cáranti yáṁ sáṁ vā́jāsaḥ śravasyávaḥ ||

5.009.03a utá sma yáṁ śíśuṁ yathā návaṁ jániṣṭāráṇī |
5.009.03c dhartā́ram mā́nuṣīṇāṁ viśā́m agníṁ svadhvarám ||

5.009.04a utá sma durgr̥bhīyase putró ná hvāryā́ṇām |
5.009.04c purū́ yó dágdhā́si vánā́gne paśúr ná yávase ||

5.009.05a ádha sma yásyārcáyaḥ samyák saṁyánti dhūmínaḥ |
5.009.05c yád īm áha tritó divy úpa dhmā́teva dhámati śíśīte dhmātárī yathā ||

5.009.06a távāhám agna ūtíbhir mitrásya ca práśastibhiḥ |
5.009.06c dveṣoyúto ná duritā́ turyā́ma mártyānām ||

5.009.07a táṁ no agne abhī́ náro rayíṁ sahasva ā́ bhara |
5.009.07c sá kṣepayat sá poṣayad bhúvad vā́jasya sātáya utaídhi pr̥tsú no vr̥dhé ||

5.010.01a ágna ójiṣṭham ā́ bhara dyumnám asmábhyam adhrigo |
5.010.01c prá no rāyā́ párīṇasā rátsi vā́jāya pánthām ||

5.010.02a tváṁ no agne adbhuta krátvā dákṣasya maṁhánā |
5.010.02c tvé asuryàm ā́ruhat krāṇā́ mitró ná yajñíyaḥ ||

5.010.03a tváṁ no agna eṣāṁ gáyam puṣṭíṁ ca vardhaya |
5.010.03c yé stómebhiḥ prá sūráyo náro maghā́ny ānaśúḥ ||

5.010.04a yé agne candra te gíraḥ śumbhánty áśvarādhasaḥ |
5.010.04c śúṣmebhiḥ śuṣmíṇo náro diváś cid yéṣām br̥hát sukīrtír bódhati tmánā ||

5.010.05a táva tyé agne arcáyo bhrā́janto yanti dhr̥ṣṇuyā́ |
5.010.05c párijmāno ná vidyútaḥ svānó rátho ná vājayúḥ ||

5.010.06a nū́ no agna ūtáye sabā́dhasaś ca rātáye |
5.010.06c asmā́kāsaś ca sūráyo víśvā ā́śās tarīṣáṇi ||

5.010.07a tváṁ no agne aṅgiraḥ stutáḥ stávāna ā́ bhara |
5.010.07c hótar vibhvāsáhaṁ rayíṁ stotŕ̥bhyaḥ stávase ca na utaídhi pr̥tsú no vr̥dhé ||

5.011.01a jánasya gopā́ ajaniṣṭa jā́gr̥vir agníḥ sudákṣaḥ suvitā́ya návyase |
5.011.01c ghr̥tápratīko br̥hatā́ divispŕ̥śā dyumád ví bhāti bharatébhyaḥ śúciḥ ||

5.011.02a yajñásya ketúm prathamám puróhitam agníṁ náras triṣadhasthé sám īdhire |
5.011.02c índreṇa devaíḥ saráthaṁ sá barhíṣi sī́dan ní hótā yajáthāya sukrátuḥ ||

5.011.03a ásammr̥ṣṭo jāyase mātróḥ śúcir mandráḥ kavír úd atiṣṭho vivásvataḥ |
5.011.03c ghr̥téna tvāvardhayann agna āhuta dhūmás te ketúr abhavad diví śritáḥ ||

5.011.04a agnír no yajñám úpa vetu sādhuyā́gníṁ náro ví bharante gr̥hé-gr̥he |
5.011.04c agnír dūtó abhavad dhavyavā́hano 'gníṁ vr̥ṇānā́ vr̥ṇate kavíkratum ||

5.011.05a túbhyedám agne mádhumattamaṁ vácas túbhyam manīṣā́ iyám astu śáṁ hr̥dé |
5.011.05c tvā́ṁ gíraḥ síndhum ivāvánīr mahī́r ā́ pr̥ṇanti śávasā vardháyanti ca ||

5.011.06a tvā́m agne áṅgiraso gúhā hitám ánv avindañ chiśriyāṇáṁ váne-vane |
5.011.06c sá jāyase mathyámānaḥ sáho mahát tvā́m āhuḥ sáhasas putrám aṅgiraḥ ||

5.012.01a prā́gnáye br̥haté yajñíyāya r̥tásya vŕ̥ṣṇe ásurāya mánma |
5.012.01c ghr̥táṁ ná yajñá āsyè súpūtaṁ gíram bhare vr̥ṣabhā́ya pratīcī́m ||

5.012.02a r̥táṁ cikitva r̥tám íc cikiddhy r̥tásya dhā́rā ánu tr̥ndhi pūrvī́ḥ |
5.012.02c nā́háṁ yātúṁ sáhasā ná dvayéna r̥táṁ sapāmy aruṣásya vŕ̥ṣṇaḥ ||

5.012.03a káyā no agna r̥táyann r̥téna bhúvo návedā ucáthasya návyaḥ |
5.012.03c védā me devá r̥tupā́ r̥tūnā́ṁ nā́hám pátiṁ sanitúr asyá rāyáḥ ||

5.012.04a ké te agne ripáve bándhanāsaḥ ké pāyávaḥ saniṣanta dyumántaḥ |
5.012.04c ké dhāsím agne ánr̥tasya pānti ká ā́sato vácasaḥ santi gopā́ḥ ||

5.012.05a sákhāyas te víṣuṇā agna eté śivā́saḥ sánto áśivā abhūvan |
5.012.05c ádhūrṣata svayám eté vácobhir r̥jūyaté vr̥jinā́ni bruvántaḥ ||

5.012.06a yás te agne námasā yajñám ī́ṭṭa r̥táṁ sá pāty aruṣásya vŕ̥ṣṇaḥ |
5.012.06c tásya kṣáyaḥ pr̥thúr ā́ sādhúr etu prasársrāṇasya náhuṣasya śéṣaḥ ||

5.013.01a árcantas tvā havāmahé 'rcantaḥ sám idhīmahi |
5.013.01c ágne árcanta ūtáye ||

5.013.02a agnéḥ stómam manāmahe sidhrám adyá divispŕ̥śaḥ |
5.013.02c devásya draviṇasyávaḥ ||

5.013.03a agnír juṣata no gíro hótā yó mā́nuṣeṣv ā́ |
5.013.03c sá yakṣad daívyaṁ jánam ||

5.013.04a tvám agne sapráthā asi júṣṭo hótā váreṇyaḥ |
5.013.04c tváyā yajñáṁ ví tanvate ||

5.013.05a tvā́m agne vājasā́tamaṁ víprā vardhanti súṣṭutam |
5.013.05c sá no rāsva suvī́ryam ||

5.013.06a ágne nemír arā́m̐ iva devā́m̐s tvám paribhū́r asi |
5.013.06c ā́ rā́dhaś citrám r̥ñjase ||

5.014.01a agníṁ stómena bodhaya samidhānó ámartyam |
5.014.01c havyā́ devéṣu no dadhat ||

5.014.02a tám adhvaréṣv īḷate devám mártā ámartyam |
5.014.02c yájiṣṭham mā́nuṣe jáne ||

5.014.03a táṁ hí śáśvanta ī́ḷate srucā́ deváṁ ghr̥taścútā |
5.014.03c agníṁ havyā́ya vóḷhave ||

5.014.04a agnír jātó arocata ghnán dásyūñ jyótiṣā támaḥ |
5.014.04c ávindad gā́ apáḥ svàḥ ||

5.014.05a agním īḷényaṁ kavíṁ ghr̥tápr̥ṣṭhaṁ saparyata |
5.014.05c vétu me śr̥ṇávad dhávam ||

5.014.06a agníṁ ghr̥téna vāvr̥dhuḥ stómebhir viśvácarṣaṇim |
5.014.06c svādhī́bhir vacasyúbhiḥ ||

5.015.01a prá vedháse kaváye védyāya gíram bhare yaśáse pūrvyā́ya |
5.015.01c ghr̥táprasatto ásuraḥ suśévo rāyó dhartā́ dharúṇo vásvo agníḥ ||

5.015.02a r̥téna r̥táṁ dharúṇaṁ dhārayanta yajñásya śāké paramé vyòman |
5.015.02c divó dhárman dharúṇe sedúṣo nr̥̄́ñ jātaír ájātām̐ abhí yé nanakṣúḥ ||

5.015.03a aṅhoyúvas tanvàs tanvate ví váyo mahád duṣṭáram pūrvyā́ya |
5.015.03c sá saṁváto návajātas tuturyāt siṅháṁ ná kruddhám abhítaḥ pári ṣṭhuḥ ||

5.015.04a mātéva yád bhárase paprathānó jánaṁ-janaṁ dhā́yase cákṣase ca |
5.015.04c váyo-vayo jarase yád dádhānaḥ pári tmánā víṣurūpo jigāsi ||

5.015.05a vā́jo nú te śávasas pātv ántam urúṁ dóghaṁ dharúṇaṁ deva rāyáḥ |
5.015.05c padáṁ ná tāyúr gúhā dádhāno mahó rāyé citáyann átrim aspaḥ ||

5.016.01a br̥hád váyo hí bhānávé 'rcā devā́yāgnáye |
5.016.01c yám mitráṁ ná práśastibhir mártāso dadhiré puráḥ ||

5.016.02a sá hí dyúbhir jánānāṁ hótā dákṣasya bāhvóḥ |
5.016.02c ví havyám agnír ānuṣág bhágo ná vā́ram r̥ṇvati ||

5.016.03a asyá stóme maghónaḥ sakhyé vr̥ddháśociṣaḥ |
5.016.03c víśvā yásmin tuviṣváṇi sám aryé śúṣmam ādadhúḥ ||

5.016.04a ádhā hy àgna eṣāṁ suvī́ryasya maṁhánā |
5.016.04c tám íd yahváṁ ná ródasī pári śrávo babhūvatuḥ ||

5.016.05a nū́ na éhi vā́ryam ágne gr̥ṇāná ā́ bhara |
5.016.05c yé vayáṁ yé ca sūráyaḥ svastí dhā́mahe sácotaídhi pr̥tsú no vr̥dhé ||

5.017.01a ā́ yajñaír deva mártya itthā́ távyāṁsam ūtáye |
5.017.01c agníṁ kr̥té svadhvaré pūrúr īḷītā́vase ||

5.017.02a ásya hí sváyaśastara āsā́ vidharman mányase |
5.017.02c táṁ nā́kaṁ citráśociṣam mandrám paró manīṣáyā ||

5.017.03a asyá vā́sā́ u arcíṣā yá ā́yukta tujā́ girā́ |
5.017.03c divó ná yásya rétasā br̥hác chócanty arcáyaḥ ||

5.017.04a asyá krátvā vícetaso dasmásya vásu rátha ā́ |
5.017.04c ádhā víśvāsu hávyo 'gnír vikṣú prá śasyate ||

5.017.05a nū́ na íd dhí vā́ryam āsā́ sacanta sūráyaḥ |
5.017.05c ū́rjo napād abhíṣṭaye pāhí śagdhí svastáya utaídhi pr̥tsú no vr̥dhé ||

5.018.01a prātár agníḥ purupriyó viśáḥ stavetā́tithiḥ |
5.018.01c víśvāni yó ámartyo havyā́ márteṣu ráṇyati ||

5.018.02a dvitā́ya mr̥ktávāhase svásya dákṣasya maṁhánā |
5.018.02c índuṁ sá dhatta ānuṣák stotā́ cit te amartya ||

5.018.03a táṁ vo dīrghā́yuśociṣaṁ girā́ huve maghónām |
5.018.03c áriṣṭo yéṣāṁ rátho vy àśvadāvann ī́yate ||

5.018.04a citrā́ vā yéṣu dī́dhitir āsánn ukthā́ pā́nti yé |
5.018.04b stīrṇám barhíḥ svàrṇare śrávāṁsi dadhire pári ||

5.018.05a yé me pañcāśátaṁ dadúr áśvānāṁ sadhástuti |
5.018.05b dyumád agne máhi śrávo br̥hát kr̥dhi maghónāṁ nr̥vád amr̥ta nr̥ṇā́m ||

5.019.01a abhy àvasthā́ḥ prá jāyante prá vavrér vavríś ciketa |
5.019.01c upásthe mātúr ví caṣṭe ||

5.019.02a juhuré ví citáyantó 'nimiṣaṁ nr̥mṇám pānti |
5.019.02c ā́ dr̥ḷhā́m púraṁ viviśuḥ ||

5.019.03a ā́ śvaitreyásya jantávo dyumád vardhanta kr̥ṣṭáyaḥ |
5.019.03b niṣkágrīvo br̥háduktha enā́ mádhvā ná vājayúḥ ||

5.019.04a priyáṁ dugdháṁ ná kā́myam ájāmi jāmyóḥ sácā |
5.019.04c gharmó ná vā́jajaṭharó 'dabdhaḥ śáśvato dábhaḥ ||

5.019.05a krī́ḷan no raśma ā́ bhuvaḥ sám bhásmanā vāyúnā vévidānaḥ |
5.019.05b tā́ asya san dhr̥ṣájo ná tigmā́ḥ súsaṁśitā vakṣyò vakṣaṇesthā́ḥ ||

5.020.01a yám agne vājasātama tváṁ cin mányase rayím |
5.020.01c táṁ no gīrbhíḥ śravā́yyaṁ devatrā́ panayā yújam ||

5.020.02a yé agne néráyanti te vr̥ddhā́ ugrásya śávasaḥ |
5.020.02b ápa dvéṣo ápa hváro 'nyávratasya saścire ||

5.020.03a hótāraṁ tvā vr̥ṇīmahé 'gne dákṣasya sā́dhanam |
5.020.03b yajñéṣu pūrvyáṁ girā́ práyasvanto havāmahe ||

5.020.04a itthā́ yáthā ta ūtáye sáhasāvan divé-dive |
5.020.04b rāyá r̥tā́ya sukrato góbhiḥ ṣyāma sadhamā́do vīraíḥ syāma sadhamā́daḥ ||

5.021.01a manuṣvát tvā ní dhīmahi manuṣvát sám idhīmahi |
5.021.01c ágne manuṣvád aṅgiro devā́n devayaté yaja ||