Ṛgveda-Saṁhitā without Vedic accents

1.001.01a agnim īḻe purohitaṁ yajñasya devam ṛtvijam |
1.001.01c hotāraṁ ratnadhātamam ||
1.001.02a agniḥ pūrvebhir ṛṣibhir īḍyo nūtanair uta |
1.001.02c sa devām̐ eha vakṣati ||
1.001.03a agninā rayim aśnavat poṣam eva dive-dive |
1.001.03c yaśasaṁ vīravattamam ||
1.001.04a agne yaṁ yajñam adhvaraṁ viśvataḥ paribhūr asi |
1.001.04c sa id deveṣu gacchati ||
1.001.05a agnir hotā kavikratuḥ satyaś citraśravastamaḥ |
1.001.05c devo devebhir ā gamat ||
1.001.06a yad aṅga dāśuṣe tvam agne bhadraṁ kariṣyasi |
1.001.06c tavet tat satyam aṅgiraḥ ||
1.001.07a upa tvāgne dive-dive doṣāvastar dhiyā vayam |
1.001.07c namo bharanta emasi ||
1.001.08a rājantam adhvarāṇāṁ gopām ṛtasya dīdivim |
1.001.08c vardhamānaṁ sve dame ||
1.001.09a sa naḥ piteva sūnave 'gne sūpāyano bhava |
1.001.09c sacasvā naḥ svastaye ||

1.002.01a vāyav ā yāhi darśateme somā araṁkṛtāḥ |
1.002.01c teṣām pāhi śrudhī havam ||
1.002.02a vāya ukthebhir jarante tvām acchā jaritāraḥ |
1.002.02c sutasomā aharvidaḥ ||
1.002.03a vāyo tava prapṛñcatī dhenā jigāti dāśuṣe |
1.002.03c urūcī somapītaye ||
1.002.04a indravāyū ime sutā upa prayobhir ā gatam |
1.002.04c indavo vām uśanti hi ||
1.002.05a vāyav indraś ca cetathaḥ sutānāṁ vājinīvasū |
1.002.05c tāv ā yātam upa dravat ||
1.002.06a vāyav indraś ca sunvata ā yātam upa niṣkṛtam |
1.002.06c makṣv itthā dhiyā narā ||
1.002.07a mitraṁ huve pūtadakṣaṁ varuṇaṁ ca riśādasam |
1.002.07c dhiyaṁ ghṛtācīṁ sādhantā ||
1.002.08a ṛtena mitrāvaruṇāv ṛtāvṛdhāv ṛtaspṛśā |
1.002.08c kratum bṛhantam āśāthe ||
1.002.09a kavī no mitrāvaruṇā tuvijātā urukṣayā |
1.002.09c dakṣaṁ dadhāte apasam ||

1.003.01a aśvinā yajvarīr iṣo dravatpāṇī śubhas patī |
1.003.01c purubhujā canasyatam ||
1.003.02a aśvinā purudaṁsasā narā śavīrayā dhiyā |
1.003.02c dhiṣṇyā vanataṁ giraḥ ||
1.003.03a dasrā yuvākavaḥ sutā nāsatyā vṛktabarhiṣaḥ |
1.003.03c ā yātaṁ rudravartanī ||
1.003.04a indrā yāhi citrabhāno sutā ime tvāyavaḥ |
1.003.04c aṇvībhis tanā pūtāsaḥ ||
1.003.05a indrā yāhi dhiyeṣito viprajūtaḥ sutāvataḥ |
1.003.05c upa brahmāṇi vāghataḥ ||
1.003.06a indrā yāhi tūtujāna upa brahmāṇi harivaḥ |
1.003.06c sute dadhiṣva naś canaḥ ||
1.003.07a omāsaś carṣaṇīdhṛto viśve devāsa ā gata |
1.003.07c dāśvāṁso dāśuṣaḥ sutam ||
1.003.08a viśve devāso apturaḥ sutam ā ganta tūrṇayaḥ |
1.003.08c usrā iva svasarāṇi ||
1.003.09a viśve devāso asridha ehimāyāso adruhaḥ |
1.003.09c medhaṁ juṣanta vahnayaḥ ||
1.003.10a pāvakā naḥ sarasvatī vājebhir vājinīvatī |
1.003.10c yajñaṁ vaṣṭu dhiyāvasuḥ ||
1.003.11a codayitrī sūnṛtānāṁ cetantī sumatīnām |
1.003.11c yajñaṁ dadhe sarasvatī ||
1.003.12a maho arṇaḥ sarasvatī pra cetayati ketunā |
1.003.12c dhiyo viśvā vi rājati ||

1.004.01a surūpakṛtnum ūtaye sudughām iva goduhe |
1.004.01c juhūmasi dyavi-dyavi ||
1.004.02a upa naḥ savanā gahi somasya somapāḥ piba |
1.004.02c godā id revato madaḥ ||
1.004.03a athā te antamānāṁ vidyāma sumatīnām |
1.004.03c mā no ati khya ā gahi ||
1.004.04a parehi vigram astṛtam indram pṛcchā vipaścitam |
1.004.04c yas te sakhibhya ā varam ||
1.004.05a uta bruvantu no nido nir anyataś cid ārata |
1.004.05c dadhānā indra id duvaḥ ||
1.004.06a uta naḥ subhagām̐ arir voceyur dasma kṛṣṭayaḥ |
1.004.06c syāmed indrasya śarmaṇi ||
1.004.07a em āśum āśave bhara yajñaśriyaṁ nṛmādanam |
1.004.07c patayan mandayatsakham ||
1.004.08a asya pītvā śatakrato ghano vṛtrāṇām abhavaḥ |
1.004.08c prāvo vājeṣu vājinam ||
1.004.09a taṁ tvā vājeṣu vājinaṁ vājayāmaḥ śatakrato |
1.004.09c dhanānām indra sātaye ||
1.004.10a yo rāyo 'vanir mahān supāraḥ sunvataḥ sakhā |
1.004.10c tasmā indrāya gāyata ||

1.005.01a ā tv etā ni ṣīdatendram abhi pra gāyata |
1.005.01c sakhāyaḥ stomavāhasaḥ ||
1.005.02a purūtamam purūṇām īśānaṁ vāryāṇām |
1.005.02c indraṁ some sacā sute ||
1.005.03a sa ghā no yoga ā bhuvat sa rāye sa puraṁdhyām |
1.005.03c gamad vājebhir ā sa naḥ ||
1.005.04a yasya saṁsthe na vṛṇvate harī samatsu śatravaḥ |
1.005.04c tasmā indrāya gāyata ||
1.005.05a sutapāvne sutā ime śucayo yanti vītaye |
1.005.05c somāso dadhyāśiraḥ ||
1.005.06a tvaṁ sutasya pītaye sadyo vṛddho ajāyathāḥ |
1.005.06c indra jyaiṣṭhyāya sukrato ||
1.005.07a ā tvā viśantv āśavaḥ somāsa indra girvaṇaḥ |
1.005.07c śaṁ te santu pracetase ||
1.005.08a tvāṁ stomā avīvṛdhan tvām ukthā śatakrato |
1.005.08c tvāṁ vardhantu no giraḥ ||
1.005.09a akṣitotiḥ saned imaṁ vājam indraḥ sahasriṇam |
1.005.09c yasmin viśvāni pauṁsyā ||
1.005.10a mā no martā abhi druhan tanūnām indra girvaṇaḥ |
1.005.10c īśāno yavayā vadham ||

1.006.01a yuñjanti bradhnam aruṣaṁ carantam pari tasthuṣaḥ |
1.006.01c rocante rocanā divi ||
1.006.02a yuñjanty asya kāmyā harī vipakṣasā rathe |
1.006.02c śoṇā dhṛṣṇū nṛvāhasā ||
1.006.03a ketuṁ kṛṇvann aketave peśo maryā apeśase |
1.006.03c sam uṣadbhir ajāyathāḥ ||
1.006.04a ād aha svadhām anu punar garbhatvam erire |
1.006.04c dadhānā nāma yajñiyam ||
1.006.05a vīḻu cid ārujatnubhir guhā cid indra vahnibhiḥ |
1.006.05c avinda usriyā anu ||
1.006.06a devayanto yathā matim acchā vidadvasuṁ giraḥ |
1.006.06c mahām anūṣata śrutam ||
1.006.07a indreṇa saṁ hi dṛkṣase saṁjagmāno abibhyuṣā |
1.006.07c mandū samānavarcasā ||
1.006.08a anavadyair abhidyubhir makhaḥ sahasvad arcati |
1.006.08c gaṇair indrasya kāmyaiḥ ||
1.006.09a ataḥ parijmann ā gahi divo vā rocanād adhi |
1.006.09c sam asminn ṛñjate giraḥ ||
1.006.10a ito vā sātim īmahe divo vā pārthivād adhi |
1.006.10c indram maho vā rajasaḥ ||

1.007.01a indram id gāthino bṛhad indram arkebhir arkiṇaḥ |
1.007.01c indraṁ vāṇīr anūṣata ||
1.007.02a indra id dharyoḥ sacā sammiśla ā vacoyujā |
1.007.02c indro vajrī hiraṇyayaḥ ||
1.007.03a indro dīrghāya cakṣasa ā sūryaṁ rohayad divi |
1.007.03c vi gobhir adrim airayat ||
1.007.04a indra vājeṣu no 'va sahasrapradhaneṣu ca |
1.007.04c ugra ugrābhir ūtibhiḥ ||
1.007.05a indraṁ vayam mahādhana indram arbhe havāmahe |
1.007.05c yujaṁ vṛtreṣu vajriṇam ||
1.007.06a sa no vṛṣann amuṁ caruṁ satrādāvann apā vṛdhi |
1.007.06c asmabhyam apratiṣkutaḥ ||
1.007.07a tuñje-tuñje ya uttare stomā indrasya vajriṇaḥ |
1.007.07c na vindhe asya suṣṭutim ||
1.007.08a vṛṣā yūtheva vaṁsagaḥ kṛṣṭīr iyarty ojasā |
1.007.08c īśāno apratiṣkutaḥ ||
1.007.09a ya ekaś carṣaṇīnāṁ vasūnām irajyati |
1.007.09c indraḥ pañca kṣitīnām ||
1.007.10a indraṁ vo viśvatas pari havāmahe janebhyaḥ |
1.007.10c asmākam astu kevalaḥ ||

1.008.01a endra sānasiṁ rayiṁ sajitvānaṁ sadāsaham |
1.008.01c varṣiṣṭham ūtaye bhara ||
1.008.02a ni yena muṣṭihatyayā ni vṛtrā ruṇadhāmahai |
1.008.02c tvotāso ny arvatā ||
1.008.03a indra tvotāsa ā vayaṁ vajraṁ ghanā dadīmahi |
1.008.03c jayema saṁ yudhi spṛdhaḥ ||
1.008.04a vayaṁ śūrebhir astṛbhir indra tvayā yujā vayam |
1.008.04c sāsahyāma pṛtanyataḥ ||
1.008.05a mahām̐ indraḥ paraś ca nu mahitvam astu vajriṇe |
1.008.05c dyaur na prathinā śavaḥ ||
1.008.06a samohe vā ya āśata naras tokasya sanitau |
1.008.06c viprāso vā dhiyāyavaḥ ||
1.008.07a yaḥ kukṣiḥ somapātamaḥ samudra iva pinvate |
1.008.07c urvīr āpo na kākudaḥ ||
1.008.08a evā hy asya sūnṛtā virapśī gomatī mahī |
1.008.08c pakvā śākhā na dāśuṣe ||
1.008.09a evā hi te vibhūtaya ūtaya indra māvate |
1.008.09c sadyaś cit santi dāśuṣe ||
1.008.10a evā hy asya kāmyā stoma ukthaṁ ca śaṁsyā |
1.008.10c indrāya somapītaye ||

1.009.01a indrehi matsy andhaso viśvebhiḥ somaparvabhiḥ |
1.009.01c mahām̐ abhiṣṭir ojasā ||
1.009.02a em enaṁ sṛjatā sute mandim indrāya mandine |
1.009.02c cakriṁ viśvāni cakraye ||
1.009.03a matsvā suśipra mandibhiḥ stomebhir viśvacarṣaṇe |
1.009.03c sacaiṣu savaneṣv ā ||
1.009.04a asṛgram indra te giraḥ prati tvām ud ahāsata |
1.009.04c ajoṣā vṛṣabham patim ||
1.009.05a saṁ codaya citram arvāg rādha indra vareṇyam |
1.009.05c asad it te vibhu prabhu ||
1.009.06a asmān su tatra codayendra rāye rabhasvataḥ |
1.009.06c tuvidyumna yaśasvataḥ ||
1.009.07a saṁ gomad indra vājavad asme pṛthu śravo bṛhat |
1.009.07c viśvāyur dhehy akṣitam ||
1.009.08a asme dhehi śravo bṛhad dyumnaṁ sahasrasātamam |
1.009.08c indra tā rathinīr iṣaḥ ||
1.009.09a vasor indraṁ vasupatiṁ gīrbhir gṛṇanta ṛgmiyam |
1.009.09c homa gantāram ūtaye ||
1.009.10a sute-sute nyokase bṛhad bṛhata ed ariḥ |
1.009.10c indrāya śūṣam arcati ||

1.010.01a gāyanti tvā gāyatriṇo 'rcanty arkam arkiṇaḥ |
1.010.01c brahmāṇas tvā śatakrata ud vaṁśam iva yemire ||
1.010.02a yat sānoḥ sānum āruhad bhūry aspaṣṭa kartvam |
1.010.02c tad indro arthaṁ cetati yūthena vṛṣṇir ejati ||
1.010.03a yukṣvā hi keśinā harī vṛṣaṇā kakṣyaprā |
1.010.03c athā na indra somapā girām upaśrutiṁ cara ||
1.010.04a ehi stomām̐ abhi svarābhi gṛṇīhy ā ruva |
1.010.04c brahma ca no vaso sacendra yajñaṁ ca vardhaya ||
1.010.05a uktham indrāya śaṁsyaṁ vardhanam puruniṣṣidhe |
1.010.05c śakro yathā suteṣu ṇo rāraṇat sakhyeṣu ca ||
1.010.06a tam it sakhitva īmahe taṁ rāye taṁ suvīrye |
1.010.06c sa śakra uta naḥ śakad indro vasu dayamānaḥ ||
1.010.07a suvivṛtaṁ sunirajam indra tvādātam id yaśaḥ |
1.010.07c gavām apa vrajaṁ vṛdhi kṛṇuṣva rādho adrivaḥ ||
1.010.08a nahi tvā rodasī ubhe ṛghāyamāṇam invataḥ |
1.010.08c jeṣaḥ svarvatīr apaḥ saṁ gā asmabhyaṁ dhūnuhi ||
1.010.09a āśrutkarṇa śrudhī havaṁ nū cid dadhiṣva me giraḥ |
1.010.09c indra stomam imam mama kṛṣvā yujaś cid antaram ||
1.010.10a vidmā hi tvā vṛṣantamaṁ vājeṣu havanaśrutam |
1.010.10c vṛṣantamasya hūmaha ūtiṁ sahasrasātamām ||
1.010.11a ā tū na indra kauśika mandasānaḥ sutam piba |
1.010.11c navyam āyuḥ pra sū tira kṛdhī sahasrasām ṛṣim ||
1.010.12a pari tvā girvaṇo gira imā bhavantu viśvataḥ |
1.010.12c vṛddhāyum anu vṛddhayo juṣṭā bhavantu juṣṭayaḥ ||

1.011.01a indraṁ viśvā avīvṛdhan samudravyacasaṁ giraḥ |
1.011.01c rathītamaṁ rathīnāṁ vājānāṁ satpatim patim ||
1.011.02a sakhye ta indra vājino mā bhema śavasas pate |
1.011.02c tvām abhi pra ṇonumo jetāram aparājitam ||
1.011.03a pūrvīr indrasya rātayo na vi dasyanty ūtayaḥ |
1.011.03c yadī vājasya gomataḥ stotṛbhyo maṁhate magham ||
1.011.04a purām bhindur yuvā kavir amitaujā ajāyata |
1.011.04c indro viśvasya karmaṇo dhartā vajrī puruṣṭutaḥ ||
1.011.05a tvaṁ valasya gomato 'pāvar adrivo bilam |
1.011.05c tvāṁ devā abibhyuṣas tujyamānāsa āviṣuḥ ||
1.011.06a tavāhaṁ śūra rātibhiḥ praty āyaṁ sindhum āvadan |
1.011.06c upātiṣṭhanta girvaṇo viduṣ ṭe tasya kāravaḥ ||
1.011.07a māyābhir indra māyinaṁ tvaṁ śuṣṇam avātiraḥ |
1.011.07c viduṣ ṭe tasya medhirās teṣāṁ śravāṁsy ut tira ||
1.011.08a indram īśānam ojasābhi stomā anūṣata |
1.011.08c sahasraṁ yasya rātaya uta vā santi bhūyasīḥ ||

1.012.01a agniṁ dūtaṁ vṛṇīmahe hotāraṁ viśvavedasam |
1.012.01c asya yajñasya sukratum ||
1.012.02a agnim-agniṁ havīmabhiḥ sadā havanta viśpatim |
1.012.02c havyavāham purupriyam ||
1.012.03a agne devām̐ ihā vaha jajñāno vṛktabarhiṣe |
1.012.03c asi hotā na īḍyaḥ ||
1.012.04a tām̐ uśato vi bodhaya yad agne yāsi dūtyam |
1.012.04c devair ā satsi barhiṣi ||
1.012.05a ghṛtāhavana dīdivaḥ prati ṣma riṣato daha |
1.012.05c agne tvaṁ rakṣasvinaḥ ||
1.012.06a agnināgniḥ sam idhyate kavir gṛhapatir yuvā |
1.012.06c havyavāḍ juhvāsyaḥ ||
1.012.07a kavim agnim upa stuhi satyadharmāṇam adhvare |
1.012.07c devam amīvacātanam ||
1.012.08a yas tvām agne haviṣpatir dūtaṁ deva saparyati |
1.012.08c tasya sma prāvitā bhava ||
1.012.09a yo agniṁ devavītaye haviṣmām̐ āvivāsati |
1.012.09c tasmai pāvaka mṛḻaya ||
1.012.10a sa naḥ pāvaka dīdivo 'gne devām̐ ihā vaha |
1.012.10c upa yajñaṁ haviś ca naḥ ||
1.012.11a sa naḥ stavāna ā bhara gāyatreṇa navīyasā |
1.012.11c rayiṁ vīravatīm iṣam ||
1.012.12a agne śukreṇa śociṣā viśvābhir devahūtibhiḥ |
1.012.12c imaṁ stomaṁ juṣasva naḥ ||

1.013.01a susamiddho na ā vaha devām̐ agne haviṣmate |
1.013.01c hotaḥ pāvaka yakṣi ca ||
1.013.02a madhumantaṁ tanūnapād yajñaṁ deveṣu naḥ kave |
1.013.02c adyā kṛṇuhi vītaye ||
1.013.03a narāśaṁsam iha priyam asmin yajña upa hvaye |
1.013.03c madhujihvaṁ haviṣkṛtam ||
1.013.04a agne sukhatame rathe devām̐ īḻita ā vaha |
1.013.04c asi hotā manurhitaḥ ||
1.013.05a stṛṇīta barhir ānuṣag ghṛtapṛṣṭham manīṣiṇaḥ |
1.013.05c yatrāmṛtasya cakṣaṇam ||
1.013.06a vi śrayantām ṛtāvṛdho dvāro devīr asaścataḥ |
1.013.06c adyā nūnaṁ ca yaṣṭave ||
1.013.07a naktoṣāsā supeśasāsmin yajña upa hvaye |
1.013.07c idaṁ no barhir āsade ||
1.013.08a tā sujihvā upa hvaye hotārā daivyā kavī |
1.013.08c yajñaṁ no yakṣatām imam ||
1.013.09a iḻā sarasvatī mahī tisro devīr mayobhuvaḥ |
1.013.09c barhiḥ sīdantv asridhaḥ ||
1.013.10a iha tvaṣṭāram agriyaṁ viśvarūpam upa hvaye |
1.013.10c asmākam astu kevalaḥ ||
1.013.11a ava sṛjā vanaspate deva devebhyo haviḥ |
1.013.11c pra dātur astu cetanam ||
1.013.12a svāhā yajñaṁ kṛṇotanendrāya yajvano gṛhe |
1.013.12c tatra devām̐ upa hvaye ||

1.014.01a aibhir agne duvo giro viśvebhiḥ somapītaye |
1.014.01c devebhir yāhi yakṣi ca ||
1.014.02a ā tvā kaṇvā ahūṣata gṛṇanti vipra te dhiyaḥ |
1.014.02c devebhir agna ā gahi ||
1.014.03a indravāyū bṛhaspatim mitrāgnim pūṣaṇam bhagam |
1.014.03c ādityān mārutaṁ gaṇam ||
1.014.04a pra vo bhriyanta indavo matsarā mādayiṣṇavaḥ |
1.014.04c drapsā madhvaś camūṣadaḥ ||
1.014.05a īḻate tvām avasyavaḥ kaṇvāso vṛktabarhiṣaḥ |
1.014.05c haviṣmanto araṁkṛtaḥ ||
1.014.06a ghṛtapṛṣṭhā manoyujo ye tvā vahanti vahnayaḥ |
1.014.06c ā devān somapītaye ||
1.014.07a tān yajatrām̐ ṛtāvṛdho 'gne patnīvatas kṛdhi |
1.014.07c madhvaḥ sujihva pāyaya ||
1.014.08a ye yajatrā ya īḍyās te te pibantu jihvayā |
1.014.08c madhor agne vaṣaṭkṛti ||
1.014.09a ākīṁ sūryasya rocanād viśvān devām̐ uṣarbudhaḥ |
1.014.09c vipro hoteha vakṣati ||
1.014.10a viśvebhiḥ somyam madhv agna indreṇa vāyunā |
1.014.10c pibā mitrasya dhāmabhiḥ ||
1.014.11a tvaṁ hotā manurhito 'gne yajñeṣu sīdasi |
1.014.11c semaṁ no adhvaraṁ yaja ||
1.014.12a yukṣvā hy aruṣī rathe harito deva rohitaḥ |
1.014.12c tābhir devām̐ ihā vaha ||

1.015.01a indra somam piba ṛtunā tvā viśantv indavaḥ |
1.015.01c matsarāsas tadokasaḥ ||
1.015.02a marutaḥ pibata ṛtunā potrād yajñam punītana |
1.015.02c yūyaṁ hi ṣṭhā sudānavaḥ ||
1.015.03a abhi yajñaṁ gṛṇīhi no gnāvo neṣṭaḥ piba ṛtunā |
1.015.03c tvaṁ hi ratnadhā asi ||
1.015.04a agne devām̐ ihā vaha sādayā yoniṣu triṣu |
1.015.04c pari bhūṣa piba ṛtunā ||
1.015.05a brāhmaṇād indra rādhasaḥ pibā somam ṛtūm̐r anu |
1.015.05c taved dhi sakhyam astṛtam ||
1.015.06a yuvaṁ dakṣaṁ dhṛtavrata mitrāvaruṇa dūḻabham |
1.015.06c ṛtunā yajñam āśāthe ||
1.015.07a draviṇodā draviṇaso grāvahastāso adhvare |
1.015.07c yajñeṣu devam īḻate ||
1.015.08a draviṇodā dadātu no vasūni yāni śṛṇvire |
1.015.08c deveṣu tā vanāmahe ||
1.015.09a draviṇodāḥ pipīṣati juhota pra ca tiṣṭhata |
1.015.09c neṣṭrād ṛtubhir iṣyata ||
1.015.10a yat tvā turīyam ṛtubhir draviṇodo yajāmahe |
1.015.10c adha smā no dadir bhava ||
1.015.11a aśvinā pibatam madhu dīdyagnī śucivratā |
1.015.11c ṛtunā yajñavāhasā ||
1.015.12a gārhapatyena santya ṛtunā yajñanīr asi |
1.015.12c devān devayate yaja ||

1.016.01a ā tvā vahantu harayo vṛṣaṇaṁ somapītaye |
1.016.01c indra tvā sūracakṣasaḥ ||
1.016.02a imā dhānā ghṛtasnuvo harī ihopa vakṣataḥ |
1.016.02c indraṁ sukhatame rathe ||
1.016.03a indram prātar havāmaha indram prayaty adhvare |
1.016.03c indraṁ somasya pītaye ||
1.016.04a upa naḥ sutam ā gahi haribhir indra keśibhiḥ |
1.016.04c sute hi tvā havāmahe ||
1.016.05a semaṁ naḥ stomam ā gahy upedaṁ savanaṁ sutam |
1.016.05c gauro na tṛṣitaḥ piba ||
1.016.06a ime somāsa indavaḥ sutāso adhi barhiṣi |
1.016.06c tām̐ indra sahase piba ||
1.016.07a ayaṁ te stomo agriyo hṛdispṛg astu śaṁtamaḥ |
1.016.07c athā somaṁ sutam piba ||
1.016.08a viśvam it savanaṁ sutam indro madāya gacchati |
1.016.08c vṛtrahā somapītaye ||
1.016.09a semaṁ naḥ kāmam ā pṛṇa gobhir aśvaiḥ śatakrato |
1.016.09c stavāma tvā svādhyaḥ ||

1.017.01a indrāvaruṇayor ahaṁ samrājor ava ā vṛṇe |
1.017.01c tā no mṛḻāta īdṛśe ||
1.017.02a gantārā hi stho 'vase havaṁ viprasya māvataḥ |
1.017.02c dhartārā carṣaṇīnām ||
1.017.03a anukāmaṁ tarpayethām indrāvaruṇa rāya ā |
1.017.03c tā vāṁ nediṣṭham īmahe ||
1.017.04a yuvāku hi śacīnāṁ yuvāku sumatīnām |
1.017.04c bhūyāma vājadāvnām ||
1.017.05a indraḥ sahasradāvnāṁ varuṇaḥ śaṁsyānām |
1.017.05c kratur bhavaty ukthyaḥ ||
1.017.06a tayor id avasā vayaṁ sanema ni ca dhīmahi |
1.017.06c syād uta prarecanam ||
1.017.07a indrāvaruṇa vām ahaṁ huve citrāya rādhase |
1.017.07c asmān su jigyuṣas kṛtam ||
1.017.08a indrāvaruṇa nū nu vāṁ siṣāsantīṣu dhīṣv ā |
1.017.08c asmabhyaṁ śarma yacchatam ||
1.017.09a pra vām aśnotu suṣṭutir indrāvaruṇa yāṁ huve |
1.017.09c yām ṛdhāthe sadhastutim ||

1.018.01a somānaṁ svaraṇaṁ kṛṇuhi brahmaṇas pate |
1.018.01c kakṣīvantaṁ ya auśijaḥ ||
1.018.02a yo revān yo amīvahā vasuvit puṣṭivardhanaḥ |
1.018.02c sa naḥ siṣaktu yas turaḥ ||
1.018.03a mā naḥ śaṁso araruṣo dhūrtiḥ praṇaṅ martyasya |
1.018.03c rakṣā ṇo brahmaṇas pate ||
1.018.04a sa ghā vīro na riṣyati yam indro brahmaṇas patiḥ |
1.018.04c somo hinoti martyam ||
1.018.05a tvaṁ tam brahmaṇas pate soma indraś ca martyam |
1.018.05c dakṣiṇā pātv aṁhasaḥ ||
1.018.06a sadasas patim adbhutam priyam indrasya kāmyam |
1.018.06c sanim medhām ayāsiṣam ||
1.018.07a yasmād ṛte na sidhyati yajño vipaścitaś cana |
1.018.07c sa dhīnāṁ yogam invati ||
1.018.08a ād ṛdhnoti haviṣkṛtim prāñcaṁ kṛṇoty adhvaram |
1.018.08c hotrā deveṣu gacchati ||
1.018.09a narāśaṁsaṁ sudhṛṣṭamam apaśyaṁ saprathastamam |
1.018.09c divo na sadmamakhasam ||

1.019.01a prati tyaṁ cārum adhvaraṁ gopīthāya pra hūyase |
1.019.01c marudbhir agna ā gahi ||
1.019.02a nahi devo na martyo mahas tava kratum paraḥ |
1.019.02c marudbhir agna ā gahi ||
1.019.03a ye maho rajaso vidur viśve devāso adruhaḥ |
1.019.03c marudbhir agna ā gahi ||
1.019.04a ya ugrā arkam ānṛcur anādhṛṣṭāsa ojasā |
1.019.04c marudbhir agna ā gahi ||
1.019.05a ye śubhrā ghoravarpasaḥ sukṣatrāso riśādasaḥ |
1.019.05c marudbhir agna ā gahi ||
1.019.06a ye nākasyādhi rocane divi devāsa āsate |
1.019.06c marudbhir agna ā gahi ||
1.019.07a ya īṅkhayanti parvatān tiraḥ samudram arṇavam |
1.019.07c marudbhir agna ā gahi ||
1.019.08a ā ye tanvanti raśmibhis tiraḥ samudram ojasā |
1.019.08c marudbhir agna ā gahi ||
1.019.09a abhi tvā pūrvapītaye sṛjāmi somyam madhu |
1.019.09c marudbhir agna ā gahi ||

1.020.01a ayaṁ devāya janmane stomo viprebhir āsayā |
1.020.01c akāri ratnadhātamaḥ ||
1.020.02a ya indrāya vacoyujā tatakṣur manasā harī |
1.020.02c śamībhir yajñam āśata ||
1.020.03a takṣan nāsatyābhyām parijmānaṁ sukhaṁ ratham |
1.020.03c takṣan dhenuṁ sabardughām ||
1.020.04a yuvānā pitarā punaḥ satyamantrā ṛjūyavaḥ |
1.020.04c ṛbhavo viṣṭy akrata ||
1.020.05a saṁ vo madāso agmatendreṇa ca marutvatā |
1.020.05c ādityebhiś ca rājabhiḥ ||
1.020.06a uta tyaṁ camasaṁ navaṁ tvaṣṭur devasya niṣkṛtam |
1.020.06c akarta caturaḥ punaḥ ||
1.020.07a te no ratnāni dhattana trir ā sāptāni sunvate |
1.020.07c ekam-ekaṁ suśastibhiḥ ||
1.020.08a adhārayanta vahnayo 'bhajanta sukṛtyayā |
1.020.08c bhāgaṁ deveṣu yajñiyam ||

1.021.01a ihendrāgnī upa hvaye tayor it stomam uśmasi |
1.021.01c tā somaṁ somapātamā ||
1.021.02a tā yajñeṣu pra śaṁsatendrāgnī śumbhatā naraḥ |
1.021.02c tā gāyatreṣu gāyata ||
1.021.03a tā mitrasya praśastaya indrāgnī tā havāmahe |
1.021.03c somapā somapītaye ||
1.021.04a ugrā santā havāmaha upedaṁ savanaṁ sutam |
1.021.04c indrāgnī eha gacchatām ||
1.021.05a tā mahāntā sadaspatī indrāgnī rakṣa ubjatam |
1.021.05c aprajāḥ santv atriṇaḥ ||
1.021.06a tena satyena jāgṛtam adhi pracetune pade |
1.021.06c indrāgnī śarma yacchatam ||

1.022.01a prātaryujā vi bodhayāśvināv eha gacchatām |
1.022.01c asya somasya pītaye ||
1.022.02a yā surathā rathītamobhā devā divispṛśā |
1.022.02c aśvinā tā havāmahe ||
1.022.03a yā vāṁ kaśā madhumaty aśvinā sūnṛtāvatī |
1.022.03c tayā yajñam mimikṣatam ||
1.022.04a nahi vām asti dūrake yatrā rathena gacchathaḥ |
1.022.04c aśvinā somino gṛham ||
1.022.05a hiraṇyapāṇim ūtaye savitāram upa hvaye |
1.022.05c sa cettā devatā padam ||
1.022.06a apāṁ napātam avase savitāram upa stuhi |
1.022.06c tasya vratāny uśmasi ||
1.022.07a vibhaktāraṁ havāmahe vasoś citrasya rādhasaḥ |
1.022.07c savitāraṁ nṛcakṣasam ||
1.022.08a sakhāya ā ni ṣīdata savitā stomyo nu naḥ |
1.022.08c dātā rādhāṁsi śumbhati ||
1.022.09a agne patnīr ihā vaha devānām uśatīr upa |
1.022.09c tvaṣṭāraṁ somapītaye ||
1.022.10a ā gnā agna ihāvase hotrāṁ yaviṣṭha bhāratīm |
1.022.10c varūtrīṁ dhiṣaṇāṁ vaha ||
1.022.11a abhi no devīr avasā mahaḥ śarmaṇā nṛpatnīḥ |
1.022.11c acchinnapatrāḥ sacantām ||
1.022.12a ihendrāṇīm upa hvaye varuṇānīṁ svastaye |
1.022.12c agnāyīṁ somapītaye ||
1.022.13a mahī dyauḥ pṛthivī ca na imaṁ yajñam mimikṣatām |
1.022.13c pipṛtāṁ no bharīmabhiḥ ||
1.022.14a tayor id ghṛtavat payo viprā rihanti dhītibhiḥ |
1.022.14c gandharvasya dhruve pade ||
1.022.15a syonā pṛthivi bhavānṛkṣarā niveśanī |
1.022.15c yacchā naḥ śarma saprathaḥ ||
1.022.16a ato devā avantu no yato viṣṇur vicakrame |
1.022.16c pṛthivyāḥ sapta dhāmabhiḥ ||
1.022.17a idaṁ viṣṇur vi cakrame tredhā ni dadhe padam |
1.022.17c samūḻham asya pāṁsure ||
1.022.18a trīṇi padā vi cakrame viṣṇur gopā adābhyaḥ |
1.022.18c ato dharmāṇi dhārayan ||
1.022.19a viṣṇoḥ karmāṇi paśyata yato vratāni paspaśe |
1.022.19c indrasya yujyaḥ sakhā ||
1.022.20a tad viṣṇoḥ paramam padaṁ sadā paśyanti sūrayaḥ |
1.022.20c divīva cakṣur ātatam ||
1.022.21a tad viprāso vipanyavo jāgṛvāṁsaḥ sam indhate |
1.022.21c viṣṇor yat paramam padam ||

1.023.01a tīvrāḥ somāsa ā gahy āśīrvantaḥ sutā ime |
1.023.01c vāyo tān prasthitān piba ||
1.023.02a ubhā devā divispṛśendravāyū havāmahe |
1.023.02c asya somasya pītaye ||
1.023.03a indravāyū manojuvā viprā havanta ūtaye |
1.023.03c sahasrākṣā dhiyas patī ||
1.023.04a mitraṁ vayaṁ havāmahe varuṇaṁ somapītaye |
1.023.04c jajñānā pūtadakṣasā ||
1.023.05a ṛtena yāv ṛtāvṛdhāv ṛtasya jyotiṣas patī |
1.023.05c tā mitrāvaruṇā huve ||
1.023.06a varuṇaḥ prāvitā bhuvan mitro viśvābhir ūtibhiḥ |
1.023.06c karatāṁ naḥ surādhasaḥ ||
1.023.07a marutvantaṁ havāmaha indram ā somapītaye |
1.023.07c sajūr gaṇena tṛmpatu ||
1.023.08a indrajyeṣṭhā marudgaṇā devāsaḥ pūṣarātayaḥ |
1.023.08c viśve mama śrutā havam ||
1.023.09a hata vṛtraṁ sudānava indreṇa sahasā yujā |
1.023.09c mā no duḥśaṁsa īśata ||
1.023.10a viśvān devān havāmahe marutaḥ somapītaye |
1.023.10c ugrā hi pṛśnimātaraḥ ||
1.023.11a jayatām iva tanyatur marutām eti dhṛṣṇuyā |
1.023.11c yac chubhaṁ yāthanā naraḥ ||
1.023.12a haskārād vidyutas pary ato jātā avantu naḥ |
1.023.12c maruto mṛḻayantu naḥ ||
1.023.13a ā pūṣañ citrabarhiṣam āghṛṇe dharuṇaṁ divaḥ |
1.023.13c ājā naṣṭaṁ yathā paśum ||
1.023.14a pūṣā rājānam āghṛṇir apagūḻhaṁ guhā hitam |
1.023.14c avindac citrabarhiṣam ||
1.023.15a uto sa mahyam indubhiḥ ṣaḍ yuktām̐ anuseṣidhat |
1.023.15c gobhir yavaṁ na carkṛṣat ||
1.023.16a ambayo yanty adhvabhir jāmayo adhvarīyatām |
1.023.16c pṛñcatīr madhunā payaḥ ||
1.023.17a amūr yā upa sūrye yābhir vā sūryaḥ saha |
1.023.17c tā no hinvantv adhvaram ||
1.023.18a apo devīr upa hvaye yatra gāvaḥ pibanti naḥ |
1.023.18c sindhubhyaḥ kartvaṁ haviḥ ||
1.023.19a apsv antar amṛtam apsu bheṣajam apām uta praśastaye |
1.023.19c devā bhavata vājinaḥ ||
1.023.20a apsu me somo abravīd antar viśvāni bheṣajā |
1.023.20c agniṁ ca viśvaśambhuvam āpaś ca viśvabheṣajīḥ ||
1.023.21a āpaḥ pṛṇīta bheṣajaṁ varūthaṁ tanve mama |
1.023.21c jyok ca sūryaṁ dṛśe ||
1.023.22a idam āpaḥ pra vahata yat kiṁ ca duritam mayi |
1.023.22c yad vāham abhidudroha yad vā śepa utānṛtam ||
1.023.23a āpo adyānv acāriṣaṁ rasena sam agasmahi |
1.023.23c payasvān agna ā gahi tam mā saṁ sṛja varcasā ||
1.023.24a sam māgne varcasā sṛja sam prajayā sam āyuṣā |
1.023.24c vidyur me asya devā indro vidyāt saha ṛṣibhiḥ ||

1.024.01a kasya nūnaṁ katamasyāmṛtānām manāmahe cāru devasya nāma |
1.024.01c ko no mahyā aditaye punar dāt pitaraṁ ca dṛśeyam mātaraṁ ca ||
1.024.02a agner vayam prathamasyāmṛtānām manāmahe cāru devasya nāma |
1.024.02c sa no mahyā aditaye punar dāt pitaraṁ ca dṛśeyam mātaraṁ ca ||
1.024.03a abhi tvā deva savitar īśānaṁ vāryāṇām |
1.024.03c sadāvan bhāgam īmahe ||
1.024.04a yaś cid dhi ta itthā bhagaḥ śaśamānaḥ purā nidaḥ |
1.024.04c adveṣo hastayor dadhe ||
1.024.05a bhagabhaktasya te vayam ud aśema tavāvasā |
1.024.05c mūrdhānaṁ rāya ārabhe ||
1.024.06a nahi te kṣatraṁ na saho na manyuṁ vayaś canāmī patayanta āpuḥ |
1.024.06c nemā āpo animiṣaṁ carantīr na ye vātasya praminanty abhvam ||
1.024.07a abudhne rājā varuṇo vanasyordhvaṁ stūpaṁ dadate pūtadakṣaḥ |
1.024.07c nīcīnāḥ sthur upari budhna eṣām asme antar nihitāḥ ketavaḥ syuḥ ||
1.024.08a uruṁ hi rājā varuṇaś cakāra sūryāya panthām anvetavā u |
1.024.08c apade pādā pratidhātave 'kar utāpavaktā hṛdayāvidhaś cit ||
1.024.09a śataṁ te rājan bhiṣajaḥ sahasram urvī gabhīrā sumatiṣ ṭe astu |
1.024.09c bādhasva dūre nirṛtim parācaiḥ kṛtaṁ cid enaḥ pra mumugdhy asmat ||
1.024.10a amī ya ṛkṣā nihitāsa uccā naktaṁ dadṛśre kuha cid diveyuḥ |
1.024.10c adabdhāni varuṇasya vratāni vicākaśac candramā naktam eti ||
1.024.11a tat tvā yāmi brahmaṇā vandamānas tad ā śāste yajamāno havirbhiḥ |
1.024.11c aheḻamāno varuṇeha bodhy uruśaṁsa mā na āyuḥ pra moṣīḥ ||
1.024.12a tad in naktaṁ tad divā mahyam āhus tad ayaṁ keto hṛda ā vi caṣṭe |
1.024.12c śunaḥśepo yam ahvad gṛbhītaḥ so asmān rājā varuṇo mumoktu ||
1.024.13a śunaḥśepo hy ahvad gṛbhītas triṣv ādityaṁ drupadeṣu baddhaḥ |
1.024.13c avainaṁ rājā varuṇaḥ sasṛjyād vidvām̐ adabdho vi mumoktu pāśān ||
1.024.14a ava te heḻo varuṇa namobhir ava yajñebhir īmahe havirbhiḥ |
1.024.14c kṣayann asmabhyam asura pracetā rājann enāṁsi śiśrathaḥ kṛtāni ||
1.024.15a ud uttamaṁ varuṇa pāśam asmad avādhamaṁ vi madhyamaṁ śrathāya |
1.024.15c athā vayam āditya vrate tavānāgaso aditaye syāma ||

1.025.01a yac cid dhi te viśo yathā pra deva varuṇa vratam |
1.025.01c minīmasi dyavi-dyavi ||
1.025.02a mā no vadhāya hatnave jihīḻānasya rīradhaḥ |
1.025.02c mā hṛṇānasya manyave ||
1.025.03a vi mṛḻīkāya te mano rathīr aśvaṁ na saṁditam |
1.025.03c gīrbhir varuṇa sīmahi ||
1.025.04a parā hi me vimanyavaḥ patanti vasyaïṣṭaye |
1.025.04c vayo na vasatīr upa ||
1.025.05a kadā kṣatraśriyaṁ naram ā varuṇaṁ karāmahe |
1.025.05c mṛḻīkāyorucakṣasam ||
1.025.06a tad it samānam āśāte venantā na pra yucchataḥ |
1.025.06c dhṛtavratāya dāśuṣe ||
1.025.07a vedā yo vīnām padam antarikṣeṇa patatām |
1.025.07c veda nāvaḥ samudriyaḥ ||
1.025.08a veda māso dhṛtavrato dvādaśa prajāvataḥ |
1.025.08c vedā ya upajāyate ||
1.025.09a veda vātasya vartanim uror ṛṣvasya bṛhataḥ |
1.025.09c vedā ye adhyāsate ||
1.025.10a ni ṣasāda dhṛtavrato varuṇaḥ pastyāsv ā |
1.025.10c sāmrājyāya sukratuḥ ||
1.025.11a ato viśvāny adbhutā cikitvām̐ abhi paśyati |
1.025.11c kṛtāni yā ca kartvā ||
1.025.12a sa no viśvāhā sukratur ādityaḥ supathā karat |
1.025.12c pra ṇa āyūṁṣi tāriṣat ||
1.025.13a bibhrad drāpiṁ hiraṇyayaṁ varuṇo vasta nirṇijam |
1.025.13c pari spaśo ni ṣedire ||
1.025.14a na yaṁ dipsanti dipsavo na druhvāṇo janānām |
1.025.14c na devam abhimātayaḥ ||
1.025.15a uta yo mānuṣeṣv ā yaśaś cakre asāmy ā |
1.025.15c asmākam udareṣv ā ||
1.025.16a parā me yanti dhītayo gāvo na gavyūtīr anu |
1.025.16c icchantīr urucakṣasam ||
1.025.17a saṁ nu vocāvahai punar yato me madhv ābhṛtam |
1.025.17c hoteva kṣadase priyam ||
1.025.18a darśaṁ nu viśvadarśataṁ darśaṁ ratham adhi kṣami |
1.025.18c etā juṣata me giraḥ ||
1.025.19a imam me varuṇa śrudhī havam adyā ca mṛḻaya |
1.025.19c tvām avasyur ā cake ||
1.025.20a tvaṁ viśvasya medhira divaś ca gmaś ca rājasi |
1.025.20c sa yāmani prati śrudhi ||
1.025.21a ud uttamam mumugdhi no vi pāśam madhyamaṁ cṛta |
1.025.21c avādhamāni jīvase ||

1.026.01a vasiṣvā hi miyedhya vastrāṇy ūrjām pate |
1.026.01c semaṁ no adhvaraṁ yaja ||
1.026.02a ni no hotā vareṇyaḥ sadā yaviṣṭha manmabhiḥ |
1.026.02c agne divitmatā vacaḥ ||
1.026.03a ā hi ṣmā sūnave pitāpir yajaty āpaye |
1.026.03c sakhā sakhye vareṇyaḥ ||
1.026.04a ā no barhī riśādaso varuṇo mitro aryamā |
1.026.04c sīdantu manuṣo yathā ||
1.026.05a pūrvya hotar asya no mandasva sakhyasya ca |
1.026.05c imā u ṣu śrudhī giraḥ ||
1.026.06a yac cid dhi śaśvatā tanā devaṁ-devaṁ yajāmahe |
1.026.06c tve id dhūyate haviḥ ||
1.026.07a priyo no astu viśpatir hotā mandro vareṇyaḥ |
1.026.07c priyāḥ svagnayo vayam ||
1.026.08a svagnayo hi vāryaṁ devāso dadhire ca naḥ |
1.026.08c svagnayo manāmahe ||
1.026.09a athā na ubhayeṣām amṛta martyānām |
1.026.09c mithaḥ santu praśastayaḥ ||
1.026.10a viśvebhir agne agnibhir imaṁ yajñam idaṁ vacaḥ |
1.026.10c cano dhāḥ sahaso yaho ||

1.027.01a aśvaṁ na tvā vāravantaṁ vandadhyā agniṁ namobhiḥ |
1.027.01c samrājantam adhvarāṇām ||
1.027.02a sa ghā naḥ sūnuḥ śavasā pṛthupragāmā suśevaḥ |
1.027.02c mīḍhvām̐ asmākam babhūyāt ||
1.027.03a sa no dūrāc cāsāc ca ni martyād aghāyoḥ |
1.027.03c pāhi sadam id viśvāyuḥ ||
1.027.04a imam ū ṣu tvam asmākaṁ saniṁ gāyatraṁ navyāṁsam |
1.027.04c agne deveṣu pra vocaḥ ||
1.027.05a ā no bhaja parameṣv ā vājeṣu madhyameṣu |
1.027.05c śikṣā vasvo antamasya ||
1.027.06a vibhaktāsi citrabhāno sindhor ūrmā upāka ā |
1.027.06c sadyo dāśuṣe kṣarasi ||
1.027.07a yam agne pṛtsu martyam avā vājeṣu yaṁ junāḥ |
1.027.07c sa yantā śaśvatīr iṣaḥ ||
1.027.08a nakir asya sahantya paryetā kayasya cit |
1.027.08c vājo asti śravāyyaḥ ||
1.027.09a sa vājaṁ viśvacarṣaṇir arvadbhir astu tarutā |
1.027.09c viprebhir astu sanitā ||
1.027.10a jarābodha tad viviḍḍhi viśe-viśe yajñiyāya |
1.027.10c stomaṁ rudrāya dṛśīkam ||
1.027.11a sa no mahām̐ animāno dhūmaketuḥ puruścandraḥ |
1.027.11c dhiye vājāya hinvatu ||
1.027.12a sa revām̐ iva viśpatir daivyaḥ ketuḥ śṛṇotu naḥ |
1.027.12c ukthair agnir bṛhadbhānuḥ ||
1.027.13a namo mahadbhyo namo arbhakebhyo namo yuvabhyo nama āśinebhyaḥ |
1.027.13c yajāma devān yadi śaknavāma mā jyāyasaḥ śaṁsam ā vṛkṣi devāḥ ||

1.028.01a yatra grāvā pṛthubudhna ūrdhvo bhavati sotave |
1.028.01c ulūkhalasutānām aved v indra jalgulaḥ ||
1.028.02a yatra dvāv iva jaghanādhiṣavaṇyā kṛtā |
1.028.02c ulūkhalasutānām aved v indra jalgulaḥ ||
1.028.03a yatra nāry apacyavam upacyavaṁ ca śikṣate |
1.028.03c ulūkhalasutānām aved v indra jalgulaḥ ||
1.028.04a yatra manthāṁ vibadhnate raśmīn yamitavā iva |
1.028.04c ulūkhalasutānām aved v indra jalgulaḥ ||
1.028.05a yac cid dhi tvaṁ gṛhe-gṛha ulūkhalaka yujyase |
1.028.05c iha dyumattamaṁ vada jayatām iva dundubhiḥ ||
1.028.06a uta sma te vanaspate vāto vi vāty agram it |
1.028.06c atho indrāya pātave sunu somam ulūkhala ||
1.028.07a āyajī vājasātamā tā hy uccā vijarbhṛtaḥ |
1.028.07c harī ivāndhāṁsi bapsatā ||
1.028.08a tā no adya vanaspatī ṛṣvāv ṛṣvebhiḥ sotṛbhiḥ |
1.028.08c indrāya madhumat sutam ||
1.028.09a uc chiṣṭaṁ camvor bhara somam pavitra ā sṛja |
1.028.09c ni dhehi gor adhi tvaci ||

1.029.01a yac cid dhi satya somapā anāśastā iva smasi |
1.029.01c ā tū na indra śaṁsaya goṣv aśveṣu śubhriṣu sahasreṣu tuvīmagha ||
1.029.02a śiprin vājānām pate śacīvas tava daṁsanā |
1.029.02c ā tū na indra śaṁsaya goṣv aśveṣu śubhriṣu sahasreṣu tuvīmagha ||
1.029.03a ni ṣvāpayā mithūdṛśā sastām abudhyamāne |
1.029.03c ā tū na indra śaṁsaya goṣv aśveṣu śubhriṣu sahasreṣu tuvīmagha ||
1.029.04a sasantu tyā arātayo bodhantu śūra rātayaḥ |
1.029.04c ā tū na indra śaṁsaya goṣv aśveṣu śubhriṣu sahasreṣu tuvīmagha ||
1.029.05a sam indra gardabham mṛṇa nuvantam pāpayāmuyā |
1.029.05c ā tū na indra śaṁsaya goṣv aśveṣu śubhriṣu sahasreṣu tuvīmagha ||
1.029.06a patāti kuṇḍṛṇācyā dūraṁ vāto vanād adhi |
1.029.06c ā tū na indra śaṁsaya goṣv aśveṣu śubhriṣu sahasreṣu tuvīmagha ||
1.029.07a sarvam parikrośaṁ jahi jambhayā kṛkadāśvam |
1.029.07c ā tū na indra śaṁsaya goṣv aśveṣu śubhriṣu sahasreṣu tuvīmagha ||

1.030.01a ā va indraṁ kriviṁ yathā vājayantaḥ śatakratum |
1.030.01c maṁhiṣṭhaṁ siñca indubhiḥ ||
1.030.02a śataṁ vā yaḥ śucīnāṁ sahasraṁ vā samāśirām |
1.030.02c ed u nimnaṁ na rīyate ||
1.030.03a saṁ yan madāya śuṣmiṇa enā hy asyodare |
1.030.03c samudro na vyaco dadhe ||
1.030.04a ayam u te sam atasi kapota iva garbhadhim |
1.030.04c vacas tac cin na ohase ||
1.030.05a stotraṁ rādhānām pate girvāho vīra yasya te |
1.030.05c vibhūtir astu sūnṛtā ||
1.030.06a ūrdhvas tiṣṭhā na ūtaye 'smin vāje śatakrato |
1.030.06c sam anyeṣu bravāvahai ||
1.030.07a yoge-yoge tavastaraṁ vāje-vāje havāmahe |
1.030.07c sakhāya indram ūtaye ||
1.030.08a ā ghā gamad yadi śravat sahasriṇībhir ūtibhiḥ |
1.030.08c vājebhir upa no havam ||
1.030.09a anu pratnasyaukaso huve tuvipratiṁ naram |
1.030.09c yaṁ te pūrvam pitā huve ||
1.030.10a taṁ tvā vayaṁ viśvavārā śāsmahe puruhūta |
1.030.10c sakhe vaso jaritṛbhyaḥ ||
1.030.11a asmākaṁ śipriṇīnāṁ somapāḥ somapāvnām |
1.030.11c sakhe vajrin sakhīnām ||
1.030.12a tathā tad astu somapāḥ sakhe vajrin tathā kṛṇu |
1.030.12c yathā ta uśmasīṣṭaye ||
1.030.13a revatīr naḥ sadhamāda indre santu tuvivājāḥ |
1.030.13c kṣumanto yābhir madema ||
1.030.14a ā gha tvāvān tmanāptaḥ stotṛbhyo dhṛṣṇav iyānaḥ |
1.030.14c ṛṇor akṣaṁ na cakryoḥ ||
1.030.15a ā yad duvaḥ śatakratav ā kāmaṁ jaritṝṇām |
1.030.15c ṛṇor akṣaṁ na śacībhiḥ ||
1.030.16a śaśvad indraḥ popruthadbhir jigāya nānadadbhiḥ śāśvasadbhir dhanāni |
1.030.16c sa no hiraṇyarathaṁ daṁsanāvān sa naḥ sanitā sanaye sa no 'dāt ||
1.030.17a āśvināv aśvāvatyeṣā yātaṁ śavīrayā |
1.030.17c gomad dasrā hiraṇyavat ||
1.030.18a samānayojano hi vāṁ ratho dasrāv amartyaḥ |
1.030.18c samudre aśvineyate ||
1.030.19a ny aghnyasya mūrdhani cakraṁ rathasya yemathuḥ |
1.030.19c pari dyām anyad īyate ||
1.030.20a kas ta uṣaḥ kadhapriye bhuje marto amartye |
1.030.20c kaṁ nakṣase vibhāvari ||
1.030.21a vayaṁ hi te amanmahy āntād ā parākāt |
1.030.21c aśve na citre aruṣi ||
1.030.22a tvaṁ tyebhir ā gahi vājebhir duhitar divaḥ |
1.030.22c asme rayiṁ ni dhāraya ||

1.031.01a tvam agne prathamo aṅgirā ṛṣir devo devānām abhavaḥ śivaḥ sakhā |
1.031.01c tava vrate kavayo vidmanāpaso 'jāyanta maruto bhrājadṛṣṭayaḥ ||
1.031.02a tvam agne prathamo aṅgirastamaḥ kavir devānām pari bhūṣasi vratam |
1.031.02c vibhur viśvasmai bhuvanāya medhiro dvimātā śayuḥ katidhā cid āyave ||
1.031.03a tvam agne prathamo mātariśvana āvir bhava sukratūyā vivasvate |
1.031.03c arejetāṁ rodasī hotṛvūrye 'saghnor bhāram ayajo maho vaso ||
1.031.04a tvam agne manave dyām avāśayaḥ purūravase sukṛte sukṛttaraḥ |
1.031.04c śvātreṇa yat pitror mucyase pary ā tvā pūrvam anayann āparam punaḥ ||
1.031.05a tvam agne vṛṣabhaḥ puṣṭivardhana udyatasruce bhavasi śravāyyaḥ |
1.031.05c ya āhutim pari vedā vaṣaṭkṛtim ekāyur agre viśa āvivāsasi ||
1.031.06a tvam agne vṛjinavartaniṁ naraṁ sakman piparṣi vidathe vicarṣaṇe |
1.031.06c yaḥ śūrasātā paritakmye dhane dabhrebhiś cit samṛtā haṁsi bhūyasaḥ ||
1.031.07a tvaṁ tam agne amṛtatva uttame martaṁ dadhāsi śravase dive-dive |
1.031.07c yas tātṛṣāṇa ubhayāya janmane mayaḥ kṛṇoṣi praya ā ca sūraye ||
1.031.08a tvaṁ no agne sanaye dhanānāṁ yaśasaṁ kāruṁ kṛṇuhi stavānaḥ |
1.031.08c ṛdhyāma karmāpasā navena devair dyāvāpṛthivī prāvataṁ naḥ ||
1.031.09a tvaṁ no agne pitror upastha ā devo deveṣv anavadya jāgṛviḥ |
1.031.09c tanūkṛd bodhi pramatiś ca kārave tvaṁ kalyāṇa vasu viśvam opiṣe ||
1.031.10a tvam agne pramatis tvam pitāsi nas tvaṁ vayaskṛt tava jāmayo vayam |
1.031.10c saṁ tvā rāyaḥ śatinaḥ saṁ sahasriṇaḥ suvīraṁ yanti vratapām adābhya ||
1.031.11a tvām agne prathamam āyum āyave devā akṛṇvan nahuṣasya viśpatim |
1.031.11c iḻām akṛṇvan manuṣasya śāsanīm pitur yat putro mamakasya jāyate ||
1.031.12a tvaṁ no agne tava deva pāyubhir maghono rakṣa tanvaś ca vandya |
1.031.12c trātā tokasya tanaye gavām asy animeṣaṁ rakṣamāṇas tava vrate ||
1.031.13a tvam agne yajyave pāyur antaro 'niṣaṅgāya caturakṣa idhyase |
1.031.13c yo rātahavyo 'vṛkāya dhāyase kīreś cin mantram manasā vanoṣi tam ||
1.031.14a tvam agna uruśaṁsāya vāghate spārhaṁ yad rekṇaḥ paramaṁ vanoṣi tat |
1.031.14c ādhrasya cit pramatir ucyase pitā pra pākaṁ śāssi pra diśo viduṣṭaraḥ ||
1.031.15a tvam agne prayatadakṣiṇaṁ naraṁ varmeva syūtam pari pāsi viśvataḥ |
1.031.15c svādukṣadmā yo vasatau syonakṛj jīvayājaṁ yajate sopamā divaḥ ||
1.031.16a imām agne śaraṇim mīmṛṣo na imam adhvānaṁ yam agāma dūrāt |
1.031.16c āpiḥ pitā pramatiḥ somyānām bhṛmir asy ṛṣikṛn martyānām ||
1.031.17a manuṣvad agne aṅgirasvad aṅgiro yayātivat sadane pūrvavac chuce |
1.031.17c accha yāhy ā vahā daivyaṁ janam ā sādaya barhiṣi yakṣi ca priyam ||
1.031.18a etenāgne brahmaṇā vāvṛdhasva śaktī vā yat te cakṛmā vidā vā |
1.031.18c uta pra ṇeṣy abhi vasyo asmān saṁ naḥ sṛja sumatyā vājavatyā ||

1.032.01a indrasya nu vīryāṇi pra vocaṁ yāni cakāra prathamāni vajrī |
1.032.01c ahann ahim anv apas tatarda pra vakṣaṇā abhinat parvatānām ||
1.032.02a ahann ahim parvate śiśriyāṇaṁ tvaṣṭāsmai vajraṁ svaryaṁ tatakṣa |
1.032.02c vāśrā iva dhenavaḥ syandamānā añjaḥ samudram ava jagmur āpaḥ ||
1.032.03a vṛṣāyamāṇo 'vṛṇīta somaṁ trikadrukeṣv apibat sutasya |
1.032.03c ā sāyakam maghavādatta vajram ahann enam prathamajām ahīnām ||
1.032.04a yad indrāhan prathamajām ahīnām ān māyinām amināḥ prota māyāḥ |
1.032.04c āt sūryaṁ janayan dyām uṣāsaṁ tādītnā śatruṁ na kilā vivitse ||
1.032.05a ahan vṛtraṁ vṛtrataraṁ vyaṁsam indro vajreṇa mahatā vadhena |
1.032.05c skandhāṁsīva kuliśenā vivṛkṇāhiḥ śayata upapṛk pṛthivyāḥ ||
1.032.06a ayoddheva durmada ā hi juhve mahāvīraṁ tuvibādham ṛjīṣam |
1.032.06c nātārīd asya samṛtiṁ vadhānāṁ saṁ rujānāḥ pipiṣa indraśatruḥ ||
1.032.07a apād ahasto apṛtanyad indram āsya vajram adhi sānau jaghāna |
1.032.07c vṛṣṇo vadhriḥ pratimānam bubhūṣan purutrā vṛtro aśayad vyastaḥ ||
1.032.08a nadaṁ na bhinnam amuyā śayānam mano ruhāṇā ati yanty āpaḥ |
1.032.08c yāś cid vṛtro mahinā paryatiṣṭhat tāsām ahiḥ patsutaḥśīr babhūva ||
1.032.09a nīcāvayā abhavad vṛtraputrendro asyā ava vadhar jabhāra |
1.032.09c uttarā sūr adharaḥ putra āsīd dānuḥ śaye sahavatsā na dhenuḥ ||
1.032.10a atiṣṭhantīnām aniveśanānāṁ kāṣṭhānām madhye nihitaṁ śarīram |
1.032.10c vṛtrasya niṇyaṁ vi caranty āpo dīrghaṁ tama āśayad indraśatruḥ ||
1.032.11a dāsapatnīr ahigopā atiṣṭhan niruddhā āpaḥ paṇineva gāvaḥ |
1.032.11c apām bilam apihitaṁ yad āsīd vṛtraṁ jaghanvām̐ apa tad vavāra ||
1.032.12a aśvyo vāro abhavas tad indra sṛke yat tvā pratyahan deva ekaḥ |
1.032.12c ajayo gā ajayaḥ śūra somam avāsṛjaḥ sartave sapta sindhūn ||
1.032.13a nāsmai vidyun na tanyatuḥ siṣedha na yām miham akirad dhrāduniṁ ca |
1.032.13c indraś ca yad yuyudhāte ahiś cotāparībhyo maghavā vi jigye ||
1.032.14a aher yātāraṁ kam apaśya indra hṛdi yat te jaghnuṣo bhīr agacchat |
1.032.14c nava ca yan navatiṁ ca sravantīḥ śyeno na bhīto ataro rajāṁsi ||
1.032.15a indro yāto 'vasitasya rājā śamasya ca śṛṅgiṇo vajrabāhuḥ |
1.032.15c sed u rājā kṣayati carṣaṇīnām arān na nemiḥ pari tā babhūva ||

1.033.01a etāyāmopa gavyanta indram asmākaṁ su pramatiṁ vāvṛdhāti |
1.033.01c anāmṛṇaḥ kuvid ād asya rāyo gavāṁ ketam param āvarjate naḥ ||
1.033.02a uped ahaṁ dhanadām apratītaṁ juṣṭāṁ na śyeno vasatim patāmi |
1.033.02c indraṁ namasyann upamebhir arkair yaḥ stotṛbhyo havyo asti yāman ||
1.033.03a ni sarvasena iṣudhīm̐r asakta sam aryo gā ajati yasya vaṣṭi |
1.033.03c coṣkūyamāṇa indra bhūri vāmam mā paṇir bhūr asmad adhi pravṛddha ||
1.033.04a vadhīr hi dasyuṁ dhaninaṁ ghanenam̐ ekaś carann upaśākebhir indra |
1.033.04c dhanor adhi viṣuṇak te vy āyann ayajvānaḥ sanakāḥ pretim īyuḥ ||
1.033.05a parā cic chīrṣā vavṛjus ta indrāyajvāno yajvabhiḥ spardhamānāḥ |
1.033.05c pra yad divo harivaḥ sthātar ugra nir avratām̐ adhamo rodasyoḥ ||
1.033.06a ayuyutsann anavadyasya senām ayātayanta kṣitayo navagvāḥ |
1.033.06c vṛṣāyudho na vadhrayo niraṣṭāḥ pravadbhir indrāc citayanta āyan ||
1.033.07a tvam etān rudato jakṣataś cāyodhayo rajasa indra pāre |
1.033.07c avādaho diva ā dasyum uccā pra sunvataḥ stuvataḥ śaṁsam āvaḥ ||
1.033.08a cakrāṇāsaḥ parīṇaham pṛthivyā hiraṇyena maṇinā śumbhamānāḥ |
1.033.08c na hinvānāsas titirus ta indram pari spaśo adadhāt sūryeṇa ||
1.033.09a pari yad indra rodasī ubhe abubhojīr mahinā viśvataḥ sīm |
1.033.09c amanyamānām̐ abhi manyamānair nir brahmabhir adhamo dasyum indra ||
1.033.10a na ye divaḥ pṛthivyā antam āpur na māyābhir dhanadām paryabhūvan |
1.033.10c yujaṁ vajraṁ vṛṣabhaś cakra indro nir jyotiṣā tamaso gā adukṣat ||
1.033.11a anu svadhām akṣarann āpo asyāvardhata madhya ā nāvyānām |
1.033.11c sadhrīcīnena manasā tam indra ojiṣṭhena hanmanāhann abhi dyūn ||
1.033.12a ny āvidhyad ilībiśasya dṛḻhā vi śṛṅgiṇam abhinac chuṣṇam indraḥ |
1.033.12c yāvat taro maghavan yāvad ojo vajreṇa śatrum avadhīḥ pṛtanyum ||
1.033.13a abhi sidhmo ajigād asya śatrūn vi tigmena vṛṣabheṇā puro 'bhet |
1.033.13c saṁ vajreṇāsṛjad vṛtram indraḥ pra svām matim atirac chāśadānaḥ ||
1.033.14a āvaḥ kutsam indra yasmiñ cākan prāvo yudhyantaṁ vṛṣabhaṁ daśadyum |
1.033.14c śaphacyuto reṇur nakṣata dyām uc chvaitreyo nṛṣāhyāya tasthau ||
1.033.15a āvaḥ śamaṁ vṛṣabhaṁ tugryāsu kṣetrajeṣe maghavañ chvitryaṁ gām |
1.033.15c jyok cid atra tasthivāṁso akrañ chatrūyatām adharā vedanākaḥ ||

1.034.01a triś cin no adyā bhavataṁ navedasā vibhur vāṁ yāma uta rātir aśvinā |
1.034.01c yuvor hi yantraṁ himyeva vāsaso 'bhyāyaṁsenyā bhavatam manīṣibhiḥ ||
1.034.02a trayaḥ pavayo madhuvāhane rathe somasya venām anu viśva id viduḥ |
1.034.02c trayaḥ skambhāsaḥ skabhitāsa ārabhe trir naktaṁ yāthas trir v aśvinā divā ||
1.034.03a samāne ahan trir avadyagohanā trir adya yajñam madhunā mimikṣatam |
1.034.03c trir vājavatīr iṣo aśvinā yuvaṁ doṣā asmabhyam uṣasaś ca pinvatam ||
1.034.04a trir vartir yātaṁ trir anuvrate jane triḥ suprāvye tredheva śikṣatam |
1.034.04c trir nāndyaṁ vahatam aśvinā yuvaṁ triḥ pṛkṣo asme akṣareva pinvatam ||
1.034.05a trir no rayiṁ vahatam aśvinā yuvaṁ trir devatātā trir utāvataṁ dhiyaḥ |
1.034.05c triḥ saubhagatvaṁ trir uta śravāṁsi nas triṣṭhaṁ vāṁ sūre duhitā ruhad ratham ||
1.034.06a trir no aśvinā divyāni bheṣajā triḥ pārthivāni trir u dattam adbhyaḥ |
1.034.06c omānaṁ śaṁyor mamakāya sūnave tridhātu śarma vahataṁ śubhas patī ||
1.034.07a trir no aśvinā yajatā dive-dive pari tridhātu pṛthivīm aśāyatam |
1.034.07c tisro nāsatyā rathyā parāvata ātmeva vātaḥ svasarāṇi gacchatam ||
1.034.08a trir aśvinā sindhubhiḥ saptamātṛbhis traya āhāvās tredhā haviṣ kṛtam |
1.034.08c tisraḥ pṛthivīr upari pravā divo nākaṁ rakṣethe dyubhir aktubhir hitam ||
1.034.09a kva trī cakrā trivṛto rathasya kva trayo vandhuro ye sanīḻāḥ |
1.034.09c kadā yogo vājino rāsabhasya yena yajñaṁ nāsatyopayāthaḥ ||
1.034.10a ā nāsatyā gacchataṁ hūyate havir madhvaḥ pibatam madhupebhir āsabhiḥ |
1.034.10c yuvor hi pūrvaṁ savitoṣaso ratham ṛtāya citraṁ ghṛtavantam iṣyati ||
1.034.11a ā nāsatyā tribhir ekādaśair iha devebhir yātam madhupeyam aśvinā |
1.034.11c prāyus tāriṣṭaṁ nī rapāṁsi mṛkṣataṁ sedhataṁ dveṣo bhavataṁ sacābhuvā ||
1.034.12a ā no aśvinā trivṛtā rathenārvāñcaṁ rayiṁ vahataṁ suvīram |
1.034.12c śṛṇvantā vām avase johavīmi vṛdhe ca no bhavataṁ vājasātau ||

1.035.01a hvayāmy agnim prathamaṁ svastaye hvayāmi mitrāvaruṇāv ihāvase |
1.035.01c hvayāmi rātrīṁ jagato niveśanīṁ hvayāmi devaṁ savitāram ūtaye ||
1.035.02a ā kṛṣṇena rajasā vartamāno niveśayann amṛtam martyaṁ ca |
1.035.02c hiraṇyayena savitā rathenā devo yāti bhuvanāni paśyan ||
1.035.03a yāti devaḥ pravatā yāty udvatā yāti śubhrābhyāṁ yajato haribhyām |
1.035.03c ā devo yāti savitā parāvato 'pa viśvā duritā bādhamānaḥ ||
1.035.04a abhīvṛtaṁ kṛśanair viśvarūpaṁ hiraṇyaśamyaṁ yajato bṛhantam |
1.035.04c āsthād rathaṁ savitā citrabhānuḥ kṛṣṇā rajāṁsi taviṣīṁ dadhānaḥ ||
1.035.05a vi janāñ chyāvāḥ śitipādo akhyan rathaṁ hiraṇyapraügaṁ vahantaḥ |
1.035.05c śaśvad viśaḥ savitur daivyasyopasthe viśvā bhuvanāni tasthuḥ ||
1.035.06a tisro dyāvaḥ savitur dvā upasthām̐ ekā yamasya bhuvane virāṣāṭ |
1.035.06c āṇiṁ na rathyam amṛtādhi tasthur iha bravītu ya u tac ciketat ||
1.035.07a vi suparṇo antarikṣāṇy akhyad gabhīravepā asuraḥ sunīthaḥ |
1.035.07c kvedānīṁ sūryaḥ kaś ciketa katamāṁ dyāṁ raśmir asyā tatāna ||
1.035.08a aṣṭau vy akhyat kakubhaḥ pṛthivyās trī dhanva yojanā sapta sindhūn |
1.035.08c hiraṇyākṣaḥ savitā deva āgād dadhad ratnā dāśuṣe vāryāṇi ||
1.035.09a hiraṇyapāṇiḥ savitā vicarṣaṇir ubhe dyāvāpṛthivī antar īyate |
1.035.09c apāmīvām bādhate veti sūryam abhi kṛṣṇena rajasā dyām ṛṇoti ||
1.035.10a hiraṇyahasto asuraḥ sunīthaḥ sumṛḻīkaḥ svavām̐ yātv arvāṅ |
1.035.10c apasedhan rakṣaso yātudhānān asthād devaḥ pratidoṣaṁ gṛṇānaḥ ||
1.035.11a ye te panthāḥ savitaḥ pūrvyāso 'reṇavaḥ sukṛtā antarikṣe |
1.035.11c tebhir no adya pathibhiḥ sugebhī rakṣā ca no adhi ca brūhi deva ||

1.036.01a pra vo yahvam purūṇāṁ viśāṁ devayatīnām |
1.036.01c agniṁ sūktebhir vacobhir īmahe yaṁ sīm id anya īḻate ||
1.036.02a janāso agniṁ dadhire sahovṛdhaṁ haviṣmanto vidhema te |
1.036.02c sa tvaṁ no adya sumanā ihāvitā bhavā vājeṣu santya ||
1.036.03a pra tvā dūtaṁ vṛṇīmahe hotāraṁ viśvavedasam |
1.036.03c mahas te sato vi caranty arcayo divi spṛśanti bhānavaḥ ||
1.036.04a devāsas tvā varuṇo mitro aryamā saṁ dūtam pratnam indhate |
1.036.04c viśvaṁ so agne jayati tvayā dhanaṁ yas te dadāśa martyaḥ ||
1.036.05a mandro hotā gṛhapatir agne dūto viśām asi |
1.036.05c tve viśvā saṁgatāni vratā dhruvā yāni devā akṛṇvata ||
1.036.06a tve id agne subhage yaviṣṭhya viśvam ā hūyate haviḥ |
1.036.06c sa tvaṁ no adya sumanā utāparaṁ yakṣi devān suvīryā ||
1.036.07a taṁ ghem itthā namasvina upa svarājam āsate |
1.036.07c hotrābhir agnim manuṣaḥ sam indhate titirvāṁso ati sridhaḥ ||
1.036.08a ghnanto vṛtram ataran rodasī apa uru kṣayāya cakrire |
1.036.08c bhuvat kaṇve vṛṣā dyumny āhutaḥ krandad aśvo gaviṣṭiṣu ||
1.036.09a saṁ sīdasva mahām̐ asi śocasva devavītamaḥ |
1.036.09c vi dhūmam agne aruṣam miyedhya sṛja praśasta darśatam ||
1.036.10a yaṁ tvā devāso manave dadhur iha yajiṣṭhaṁ havyavāhana |
1.036.10c yaṁ kaṇvo medhyātithir dhanaspṛtaṁ yaṁ vṛṣā yam upastutaḥ ||
1.036.11a yam agnim medhyātithiḥ kaṇva īdha ṛtād adhi |
1.036.11c tasya preṣo dīdiyus tam imā ṛcas tam agniṁ vardhayāmasi ||
1.036.12a rāyas pūrdhi svadhāvo 'sti hi te 'gne deveṣv āpyam |
1.036.12c tvaṁ vājasya śrutyasya rājasi sa no mṛḻa mahām̐ asi ||
1.036.13a ūrdhva ū ṣu ṇa ūtaye tiṣṭhā devo na savitā |
1.036.13c ūrdhvo vājasya sanitā yad añjibhir vāghadbhir vihvayāmahe ||
1.036.14a ūrdhvo naḥ pāhy aṁhaso ni ketunā viśvaṁ sam atriṇaṁ daha |
1.036.14c kṛdhī na ūrdhvāñ carathāya jīvase vidā deveṣu no duvaḥ ||
1.036.15a pāhi no agne rakṣasaḥ pāhi dhūrter arāvṇaḥ |
1.036.15c pāhi rīṣata uta vā jighāṁsato bṛhadbhāno yaviṣṭhya ||
1.036.16a ghaneva viṣvag vi jahy arāvṇas tapurjambha yo asmadhruk |
1.036.16c yo martyaḥ śiśīte aty aktubhir mā naḥ sa ripur īśata ||
1.036.17a agnir vavne suvīryam agniḥ kaṇvāya saubhagam |
1.036.17c agniḥ prāvan mitrota medhyātithim agniḥ sātā upastutam ||
1.036.18a agninā turvaśaṁ yadum parāvata ugrādevaṁ havāmahe |
1.036.18c agnir nayan navavāstvam bṛhadrathaṁ turvītiṁ dasyave sahaḥ ||
1.036.19a ni tvām agne manur dadhe jyotir janāya śaśvate |
1.036.19c dīdetha kaṇva ṛtajāta ukṣito yaṁ namasyanti kṛṣṭayaḥ ||
1.036.20a tveṣāso agner amavanto arcayo bhīmāso na pratītaye |
1.036.20c rakṣasvinaḥ sadam id yātumāvato viśvaṁ sam atriṇaṁ daha ||

1.037.01a krīḻaṁ vaḥ śardho mārutam anarvāṇaṁ ratheśubham |
1.037.01c kaṇvā abhi pra gāyata ||
1.037.02a ye pṛṣatībhir ṛṣṭibhiḥ sākaṁ vāśībhir añjibhiḥ |
1.037.02c ajāyanta svabhānavaḥ ||
1.037.03a iheva śṛṇva eṣāṁ kaśā hasteṣu yad vadān |
1.037.03c ni yāmañ citram ṛñjate ||
1.037.04a pra vaḥ śardhāya ghṛṣvaye tveṣadyumnāya śuṣmiṇe |
1.037.04c devattam brahma gāyata ||
1.037.05a pra śaṁsā goṣv aghnyaṁ krīḻaṁ yac chardho mārutam |
1.037.05c jambhe rasasya vāvṛdhe ||
1.037.06a ko vo varṣiṣṭha ā naro divaś ca gmaś ca dhūtayaḥ |
1.037.06c yat sīm antaṁ na dhūnutha ||
1.037.07a ni vo yāmāya mānuṣo dadhra ugrāya manyave |
1.037.07c jihīta parvato giriḥ ||
1.037.08a yeṣām ajmeṣu pṛthivī jujurvām̐ iva viśpatiḥ |
1.037.08c bhiyā yāmeṣu rejate ||
1.037.09a sthiraṁ hi jānam eṣāṁ vayo mātur niretave |
1.037.09c yat sīm anu dvitā śavaḥ ||
1.037.10a ud u tye sūnavo giraḥ kāṣṭhā ajmeṣv atnata |
1.037.10c vāśrā abhijñu yātave ||
1.037.11a tyaṁ cid ghā dīrgham pṛthum miho napātam amṛdhram |
1.037.11c pra cyāvayanti yāmabhiḥ ||
1.037.12a maruto yad dha vo balaṁ janām̐ acucyavītana |
1.037.12c girīm̐r acucyavītana ||
1.037.13a yad dha yānti marutaḥ saṁ ha bruvate 'dhvann ā |
1.037.13c śṛṇoti kaś cid eṣām ||
1.037.14a pra yāta śībham āśubhiḥ santi kaṇveṣu vo duvaḥ |
1.037.14c tatro ṣu mādayādhvai ||
1.037.15a asti hi ṣmā madāya vaḥ smasi ṣmā vayam eṣām |
1.037.15c viśvaṁ cid āyur jīvase ||

1.038.01a kad dha nūnaṁ kadhapriyaḥ pitā putraṁ na hastayoḥ |
1.038.01c dadhidhve vṛktabarhiṣaḥ ||
1.038.02a kva nūnaṁ kad vo arthaṁ gantā divo na pṛthivyāḥ |
1.038.02c kva vo gāvo na raṇyanti ||
1.038.03a kva vaḥ sumnā navyāṁsi marutaḥ kva suvitā |
1.038.03c kvo viśvāni saubhagā ||
1.038.04a yad yūyam pṛśnimātaro martāsaḥ syātana |
1.038.04c stotā vo amṛtaḥ syāt ||
1.038.05a mā vo mṛgo na yavase jaritā bhūd ajoṣyaḥ |
1.038.05c pathā yamasya gād upa ||
1.038.06a mo ṣu ṇaḥ parā-parā nirṛtir durhaṇā vadhīt |
1.038.06c padīṣṭa tṛṣṇayā saha ||
1.038.07a satyaṁ tveṣā amavanto dhanvañ cid ā rudriyāsaḥ |
1.038.07c mihaṁ kṛṇvanty avātām ||
1.038.08a vāśreva vidyun mimāti vatsaṁ na mātā siṣakti |
1.038.08c yad eṣāṁ vṛṣṭir asarji ||
1.038.09a divā cit tamaḥ kṛṇvanti parjanyenodavāhena |
1.038.09c yat pṛthivīṁ vyundanti ||
1.038.10a adha svanān marutāṁ viśvam ā sadma pārthivam |
1.038.10c arejanta pra mānuṣāḥ ||
1.038.11a maruto vīḻupāṇibhiś citrā rodhasvatīr anu |
1.038.11c yātem akhidrayāmabhiḥ ||
1.038.12a sthirā vaḥ santu nemayo rathā aśvāsa eṣām |
1.038.12c susaṁskṛtā abhīśavaḥ ||
1.038.13a acchā vadā tanā girā jarāyai brahmaṇas patim |
1.038.13c agnim mitraṁ na darśatam ||
1.038.14a mimīhi ślokam āsye parjanya iva tatanaḥ |
1.038.14c gāya gāyatram ukthyam ||
1.038.15a vandasva mārutaṁ gaṇaṁ tveṣam panasyum arkiṇam |
1.038.15c asme vṛddhā asann iha ||

1.039.01a pra yad itthā parāvataḥ śocir na mānam asyatha |
1.039.01c kasya kratvā marutaḥ kasya varpasā kaṁ yātha kaṁ ha dhūtayaḥ ||
1.039.02a sthirā vaḥ santv āyudhā parāṇude vīḻū uta pratiṣkabhe |
1.039.02c yuṣmākam astu taviṣī panīyasī mā martyasya māyinaḥ ||
1.039.03a parā ha yat sthiraṁ hatha naro vartayathā guru |
1.039.03c vi yāthana vaninaḥ pṛthivyā vy āśāḥ parvatānām ||
1.039.04a nahi vaḥ śatrur vivide adhi dyavi na bhūmyāṁ riśādasaḥ |
1.039.04c yuṣmākam astu taviṣī tanā yujā rudrāso nū cid ādhṛṣe ||
1.039.05a pra vepayanti parvatān vi viñcanti vanaspatīn |
1.039.05c pro ārata maruto durmadā iva devāsaḥ sarvayā viśā ||
1.039.06a upo ratheṣu pṛṣatīr ayugdhvam praṣṭir vahati rohitaḥ |
1.039.06c ā vo yāmāya pṛthivī cid aśrod abībhayanta mānuṣāḥ ||
1.039.07a ā vo makṣū tanāya kaṁ rudrā avo vṛṇīmahe |
1.039.07c gantā nūnaṁ no 'vasā yathā puretthā kaṇvāya bibhyuṣe ||
1.039.08a yuṣmeṣito maruto martyeṣita ā yo no abhva īṣate |
1.039.08c vi taṁ yuyota śavasā vy ojasā vi yuṣmākābhir ūtibhiḥ ||
1.039.09a asāmi hi prayajyavaḥ kaṇvaṁ dada pracetasaḥ |
1.039.09c asāmibhir maruta ā na ūtibhir gantā vṛṣṭiṁ na vidyutaḥ ||
1.039.10a asāmy ojo bibhṛthā sudānavo 'sāmi dhūtayaḥ śavaḥ |
1.039.10c ṛṣidviṣe marutaḥ parimanyava iṣuṁ na sṛjata dviṣam ||

1.040.01a ut tiṣṭha brahmaṇas pate devayantas tvemahe |
1.040.01c upa pra yantu marutaḥ sudānava indra prāśūr bhavā sacā ||
1.040.02a tvām id dhi sahasas putra martya upabrūte dhane hite |
1.040.02c suvīryam maruta ā svaśvyaṁ dadhīta yo va ācake ||
1.040.03a praitu brahmaṇas patiḥ pra devy etu sūnṛtā |
1.040.03c acchā vīraṁ naryam paṅktirādhasaṁ devā yajñaṁ nayantu naḥ ||
1.040.04a yo vāghate dadāti sūnaraṁ vasu sa dhatte akṣiti śravaḥ |
1.040.04c tasmā iḻāṁ suvīrām ā yajāmahe supratūrtim anehasam ||
1.040.05a pra nūnam brahmaṇas patir mantraṁ vadaty ukthyam |
1.040.05c yasminn indro varuṇo mitro aryamā devā okāṁsi cakrire ||
1.040.06a tam id vocemā vidatheṣu śambhuvam mantraṁ devā anehasam |
1.040.06c imāṁ ca vācam pratiharyathā naro viśved vāmā vo aśnavat ||
1.040.07a ko devayantam aśnavaj janaṁ ko vṛktabarhiṣam |
1.040.07c pra-pra dāśvān pastyābhir asthitāntarvāvat kṣayaṁ dadhe ||
1.040.08a upa kṣatram pṛñcīta hanti rājabhir bhaye cit sukṣitiṁ dadhe |
1.040.08c nāsya vartā na tarutā mahādhane nārbhe asti vajriṇaḥ ||

1.041.01a yaṁ rakṣanti pracetaso varuṇo mitro aryamā |
1.041.01c nū cit sa dabhyate janaḥ ||
1.041.02a yam bāhuteva piprati pānti martyaṁ riṣaḥ |
1.041.02c ariṣṭaḥ sarva edhate ||
1.041.03a vi durgā vi dviṣaḥ puro ghnanti rājāna eṣām |
1.041.03c nayanti duritā tiraḥ ||
1.041.04a sugaḥ panthā anṛkṣara ādityāsa ṛtaṁ yate |
1.041.04c nātrāvakhādo asti vaḥ ||
1.041.05a yaṁ yajñaṁ nayathā nara ādityā ṛjunā pathā |
1.041.05c pra vaḥ sa dhītaye naśat ||
1.041.06a sa ratnam martyo vasu viśvaṁ tokam uta tmanā |
1.041.06c acchā gacchaty astṛtaḥ ||
1.041.07a kathā rādhāma sakhāyaḥ stomam mitrasyāryamṇaḥ |
1.041.07c mahi psaro varuṇasya ||
1.041.08a mā vo ghnantam mā śapantam prati voce devayantam |
1.041.08c sumnair id va ā vivāse ||
1.041.09a caturaś cid dadamānād bibhīyād ā nidhātoḥ |
1.041.09c na duruktāya spṛhayet ||

1.042.01a sam pūṣann adhvanas tira vy aṁho vimuco napāt |
1.042.01c sakṣvā deva pra ṇas puraḥ ||
1.042.02a yo naḥ pūṣann agho vṛko duḥśeva ādideśati |
1.042.02c apa sma tam patho jahi ||
1.042.03a apa tyam paripanthinam muṣīvāṇaṁ huraścitam |
1.042.03c dūram adhi sruter aja ||
1.042.04a tvaṁ tasya dvayāvino 'ghaśaṁsasya kasya cit |
1.042.04c padābhi tiṣṭha tapuṣim ||
1.042.05a ā tat te dasra mantumaḥ pūṣann avo vṛṇīmahe |
1.042.05c yena pitṝn acodayaḥ ||
1.042.06a adhā no viśvasaubhaga hiraṇyavāśīmattama |
1.042.06c dhanāni suṣaṇā kṛdhi ||
1.042.07a ati naḥ saścato naya sugā naḥ supathā kṛṇu |
1.042.07c pūṣann iha kratuṁ vidaḥ ||
1.042.08a abhi sūyavasaṁ naya na navajvāro adhvane |
1.042.08c pūṣann iha kratuṁ vidaḥ ||
1.042.09a śagdhi pūrdhi pra yaṁsi ca śiśīhi prāsy udaram |
1.042.09c pūṣann iha kratuṁ vidaḥ ||
1.042.10a na pūṣaṇam methāmasi sūktair abhi gṛṇīmasi |
1.042.10c vasūni dasmam īmahe ||

1.043.01a kad rudrāya pracetase mīḻhuṣṭamāya tavyase |
1.043.01c vocema śaṁtamaṁ hṛde ||
1.043.02a yathā no aditiḥ karat paśve nṛbhyo yathā gave |
1.043.02c yathā tokāya rudriyam ||
1.043.03a yathā no mitro varuṇo yathā rudraś ciketati |
1.043.03c yathā viśve sajoṣasaḥ ||
1.043.04a gāthapatim medhapatiṁ rudraṁ jalāṣabheṣajam |
1.043.04c tac chaṁyoḥ sumnam īmahe ||
1.043.05a yaḥ śukra iva sūryo hiraṇyam iva rocate |
1.043.05c śreṣṭho devānāṁ vasuḥ ||
1.043.06a śaṁ naḥ karaty arvate sugam meṣāya meṣye |
1.043.06c nṛbhyo nāribhyo gave ||
1.043.07a asme soma śriyam adhi ni dhehi śatasya nṛṇām |
1.043.07c mahi śravas tuvinṛmṇam ||
1.043.08a mā naḥ somaparibādho mārātayo juhuranta |
1.043.08c ā na indo vāje bhaja ||
1.043.09a yās te prajā amṛtasya parasmin dhāmann ṛtasya |
1.043.09c mūrdhā nābhā soma vena ābhūṣantīḥ soma vedaḥ ||

1.044.01a agne vivasvad uṣasaś citraṁ rādho amartya |
1.044.01c ā dāśuṣe jātavedo vahā tvam adyā devām̐ uṣarbudhaḥ ||
1.044.02a juṣṭo hi dūto asi havyavāhano 'gne rathīr adhvarāṇām |
1.044.02c sajūr aśvibhyām uṣasā suvīryam asme dhehi śravo bṛhat ||
1.044.03a adyā dūtaṁ vṛṇīmahe vasum agnim purupriyam |
1.044.03c dhūmaketum bhāṛjīkaṁ vyuṣṭiṣu yajñānām adhvaraśriyam ||
1.044.04a śreṣṭhaṁ yaviṣṭham atithiṁ svāhutaṁ juṣṭaṁ janāya dāśuṣe |
1.044.04c devām̐ acchā yātave jātavedasam agnim īḻe vyuṣṭiṣu ||
1.044.05a staviṣyāmi tvām ahaṁ viśvasyāmṛta bhojana |
1.044.05c agne trātāram amṛtam miyedhya yajiṣṭhaṁ havyavāhana ||
1.044.06a suśaṁso bodhi gṛṇate yaviṣṭhya madhujihvaḥ svāhutaḥ |
1.044.06c praskaṇvasya pratirann āyur jīvase namasyā daivyaṁ janam ||
1.044.07a hotāraṁ viśvavedasaṁ saṁ hi tvā viśa indhate |
1.044.07c sa ā vaha puruhūta pracetaso 'gne devām̐ iha dravat ||
1.044.08a savitāram uṣasam aśvinā bhagam agniṁ vyuṣṭiṣu kṣapaḥ |
1.044.08c kaṇvāsas tvā sutasomāsa indhate havyavāhaṁ svadhvara ||
1.044.09a patir hy adhvarāṇām agne dūto viśām asi |
1.044.09c uṣarbudha ā vaha somapītaye devām̐ adya svardṛśaḥ ||
1.044.10a agne pūrvā anūṣaso vibhāvaso dīdetha viśvadarśataḥ |
1.044.10c asi grāmeṣv avitā purohito 'si yajñeṣu mānuṣaḥ ||
1.044.11a ni tvā yajñasya sādhanam agne hotāram ṛtvijam |
1.044.11c manuṣvad deva dhīmahi pracetasaṁ jīraṁ dūtam amartyam ||
1.044.12a yad devānām mitramahaḥ purohito 'ntaro yāsi dūtyam |
1.044.12c sindhor iva prasvanitāsa ūrmayo 'gner bhrājante arcayaḥ ||
1.044.13a śrudhi śrutkarṇa vahnibhir devair agne sayāvabhiḥ |
1.044.13c ā sīdantu barhiṣi mitro aryamā prātaryāvāṇo adhvaram ||
1.044.14a śṛṇvantu stomam marutaḥ sudānavo 'gnijihvā ṛtāvṛdhaḥ |
1.044.14c pibatu somaṁ varuṇo dhṛtavrato 'śvibhyām uṣasā sajūḥ ||

1.045.01a tvam agne vasūm̐r iha rudrām̐ ādityām̐ uta |
1.045.01c yajā svadhvaraṁ janam manujātaṁ ghṛtapruṣam ||
1.045.02a śruṣṭīvāno hi dāśuṣe devā agne vicetasaḥ |
1.045.02c tān rohidaśva girvaṇas trayastriṁśatam ā vaha ||
1.045.03a priyamedhavad atrivaj jātavedo virūpavat |
1.045.03c aṅgirasvan mahivrata praskaṇvasya śrudhī havam ||
1.045.04a mahikerava ūtaye priyamedhā ahūṣata |
1.045.04c rājantam adhvarāṇām agniṁ śukreṇa śociṣā ||
1.045.05a ghṛtāhavana santyemā u ṣu śrudhī giraḥ |
1.045.05c yābhiḥ kaṇvasya sūnavo havante 'vase tvā ||
1.045.06a tvāṁ citraśravastama havante vikṣu jantavaḥ |
1.045.06c śociṣkeśam purupriyāgne havyāya voḻhave ||
1.045.07a ni tvā hotāram ṛtvijaṁ dadhire vasuvittamam |
1.045.07c śrutkarṇaṁ saprathastamaṁ viprā agne diviṣṭiṣu ||
1.045.08a ā tvā viprā acucyavuḥ sutasomā abhi prayaḥ |
1.045.08c bṛhad bhā bibhrato havir agne martāya dāśuṣe ||
1.045.09a prātaryāvṇaḥ sahaskṛta somapeyāya santya |
1.045.09c ihādya daivyaṁ janam barhir ā sādayā vaso ||
1.045.10a arvāñcaṁ daivyaṁ janam agne yakṣva sahūtibhiḥ |
1.045.10c ayaṁ somaḥ sudānavas tam pāta tiroahnyam ||

1.046.01a eṣo uṣā apūrvyā vy ucchati priyā divaḥ |
1.046.01c stuṣe vām aśvinā bṛhat ||
1.046.02a yā dasrā sindhumātarā manotarā rayīṇām |
1.046.02c dhiyā devā vasuvidā ||
1.046.03a vacyante vāṁ kakuhāso jūrṇāyām adhi viṣṭapi |
1.046.03c yad vāṁ ratho vibhiṣ patāt ||
1.046.04a haviṣā jāro apām piparti papurir narā |
1.046.04c pitā kuṭasya carṣaṇiḥ ||
1.046.05a ādāro vām matīnāṁ nāsatyā matavacasā |
1.046.05c pātaṁ somasya dhṛṣṇuyā ||
1.046.06a yā naḥ pīparad aśvinā jyotiṣmatī tamas tiraḥ |
1.046.06c tām asme rāsāthām iṣam ||
1.046.07a ā no nāvā matīnāṁ yātam pārāya gantave |
1.046.07c yuñjāthām aśvinā ratham ||
1.046.08a aritraṁ vāṁ divas pṛthu tīrthe sindhūnāṁ rathaḥ |
1.046.08c dhiyā yuyujra indavaḥ ||
1.046.09a divas kaṇvāsa indavo vasu sindhūnām pade |
1.046.09c svaṁ vavriṁ kuha dhitsathaḥ ||
1.046.10a abhūd u bhā u aṁśave hiraṇyam prati sūryaḥ |
1.046.10c vy akhyaj jihvayāsitaḥ ||
1.046.11a abhūd u pāram etave panthā ṛtasya sādhuyā |
1.046.11c adarśi vi srutir divaḥ ||
1.046.12a tat-tad id aśvinor avo jaritā prati bhūṣati |
1.046.12c made somasya pipratoḥ ||
1.046.13a vāvasānā vivasvati somasya pītyā girā |
1.046.13c manuṣvac chambhū ā gatam ||
1.046.14a yuvor uṣā anu śriyam parijmanor upācarat |
1.046.14c ṛtā vanatho aktubhiḥ ||
1.046.15a ubhā pibatam aśvinobhā naḥ śarma yacchatam |
1.046.15c avidriyābhir ūtibhiḥ ||

1.047.01a ayaṁ vām madhumattamaḥ sutaḥ soma ṛtāvṛdhā |
1.047.01c tam aśvinā pibataṁ tiroahnyaṁ dhattaṁ ratnāni dāśuṣe ||
1.047.02a trivandhureṇa trivṛtā supeśasā rathenā yātam aśvinā |
1.047.02c kaṇvāso vām brahma kṛṇvanty adhvare teṣāṁ su śṛṇutaṁ havam ||
1.047.03a aśvinā madhumattamam pātaṁ somam ṛtāvṛdhā |
1.047.03c athādya dasrā vasu bibhratā rathe dāśvāṁsam upa gacchatam ||
1.047.04a triṣadhasthe barhiṣi viśvavedasā madhvā yajñam mimikṣatam |
1.047.04c kaṇvāso vāṁ sutasomā abhidyavo yuvāṁ havante aśvinā ||
1.047.05a yābhiḥ kaṇvam abhiṣṭibhiḥ prāvataṁ yuvam aśvinā |
1.047.05c tābhiḥ ṣv asmām̐ avataṁ śubhas patī pātaṁ somam ṛtāvṛdhā ||
1.047.06a sudāse dasrā vasu bibhratā rathe pṛkṣo vahatam aśvinā |
1.047.06c rayiṁ samudrād uta vā divas pary asme dhattam puruspṛham ||
1.047.07a yan nāsatyā parāvati yad vā stho adhi turvaśe |
1.047.07c ato rathena suvṛtā na ā gataṁ sākaṁ sūryasya raśmibhiḥ ||
1.047.08a arvāñcā vāṁ saptayo 'dhvaraśriyo vahantu savaned upa |
1.047.08c iṣam pṛñcantā sukṛte sudānava ā barhiḥ sīdataṁ narā ||
1.047.09a tena nāsatyā gataṁ rathena sūryatvacā |
1.047.09c yena śaśvad ūhathur dāśuṣe vasu madhvaḥ somasya pītaye ||
1.047.10a ukthebhir arvāg avase purūvasū arkaiś ca ni hvayāmahe |
1.047.10c śaśvat kaṇvānāṁ sadasi priye hi kaṁ somam papathur aśvinā ||

1.048.01a saha vāmena na uṣo vy ucchā duhitar divaḥ |
1.048.01c saha dyumnena bṛhatā vibhāvari rāyā devi dāsvatī ||
1.048.02a aśvāvatīr gomatīr viśvasuvido bhūri cyavanta vastave |
1.048.02c ud īraya prati mā sūnṛtā uṣaś coda rādho maghonām ||
1.048.03a uvāsoṣā ucchāc ca nu devī jīrā rathānām |
1.048.03c ye asyā ācaraṇeṣu dadhrire samudre na śravasyavaḥ ||
1.048.04a uṣo ye te pra yāmeṣu yuñjate mano dānāya sūrayaḥ |
1.048.04c atrāha tat kaṇva eṣāṁ kaṇvatamo nāma gṛṇāti nṛṇām ||
1.048.05a ā ghā yoṣeva sūnary uṣā yāti prabhuñjatī |
1.048.05c jarayantī vṛjanam padvad īyata ut pātayati pakṣiṇaḥ ||
1.048.06a vi yā sṛjati samanaṁ vy arthinaḥ padaṁ na vety odatī |
1.048.06c vayo nakiṣ ṭe paptivāṁsa āsate vyuṣṭau vājinīvati ||
1.048.07a eṣāyukta parāvataḥ sūryasyodayanād adhi |
1.048.07c śataṁ rathebhiḥ subhagoṣā iyaṁ vi yāty abhi mānuṣān ||
1.048.08a viśvam asyā nānāma cakṣase jagaj jyotiṣ kṛṇoti sūnarī |
1.048.08c apa dveṣo maghonī duhitā diva uṣā ucchad apa sridhaḥ ||
1.048.09a uṣa ā bhāhi bhānunā candreṇa duhitar divaḥ |
1.048.09c āvahantī bhūry asmabhyaṁ saubhagaṁ vyucchantī diviṣṭiṣu ||
1.048.10a viśvasya hi prāṇanaṁ jīvanaṁ tve vi yad ucchasi sūnari |
1.048.10c sā no rathena bṛhatā vibhāvari śrudhi citrāmaghe havam ||
1.048.11a uṣo vājaṁ hi vaṁsva yaś citro mānuṣe jane |
1.048.11c tenā vaha sukṛto adhvarām̐ upa ye tvā gṛṇanti vahnayaḥ ||
1.048.12a viśvān devām̐ ā vaha somapītaye 'ntarikṣād uṣas tvam |
1.048.12c sāsmāsu dhā gomad aśvāvad ukthyam uṣo vājaṁ suvīryam ||
1.048.13a yasyā ruśanto arcayaḥ prati bhadrā adṛkṣata |
1.048.13c sā no rayiṁ viśvavāraṁ supeśasam uṣā dadātu sugmyam ||
1.048.14a ye cid dhi tvām ṛṣayaḥ pūrva ūtaye juhūre 'vase mahi |
1.048.14c sā naḥ stomām̐ abhi gṛṇīhi rādhasoṣaḥ śukreṇa śociṣā ||
1.048.15a uṣo yad adya bhānunā vi dvārāv ṛṇavo divaḥ |
1.048.15c pra no yacchatād avṛkam pṛthu cchardiḥ pra devi gomatīr iṣaḥ ||
1.048.16a saṁ no rāyā bṛhatā viśvapeśasā mimikṣvā sam iḻābhir ā |
1.048.16c saṁ dyumnena viśvaturoṣo mahi saṁ vājair vājinīvati ||

1.049.01a uṣo bhadrebhir ā gahi divaś cid rocanād adhi |
1.049.01c vahantv aruṇapsava upa tvā somino gṛham ||
1.049.02a supeśasaṁ sukhaṁ rathaṁ yam adhyasthā uṣas tvam |
1.049.02c tenā suśravasaṁ janam prāvādya duhitar divaḥ ||
1.049.03a vayaś cit te patatriṇo dvipac catuṣpad arjuni |
1.049.03c uṣaḥ prārann ṛtūm̐r anu divo antebhyas pari ||
1.049.04a vyucchantī hi raśmibhir viśvam ābhāsi rocanam |
1.049.04c tāṁ tvām uṣar vasūyavo gīrbhiḥ kaṇvā ahūṣata ||

1.050.01a ud u tyaṁ jātavedasaṁ devaṁ vahanti ketavaḥ |
1.050.01c dṛśe viśvāya sūryam ||
1.050.02a apa tye tāyavo yathā nakṣatrā yanty aktubhiḥ |
1.050.02c sūrāya viśvacakṣase ||
1.050.03a adṛśram asya ketavo vi raśmayo janām̐ anu |
1.050.03c bhrājanto agnayo yathā ||
1.050.04a taraṇir viśvadarśato jyotiṣkṛd asi sūrya |
1.050.04c viśvam ā bhāsi rocanam ||
1.050.05a pratyaṅ devānāṁ viśaḥ pratyaṅṅ ud eṣi mānuṣān |
1.050.05c pratyaṅ viśvaṁ svar dṛśe ||
1.050.06a yenā pāvaka cakṣasā bhuraṇyantaṁ janām̐ anu |
1.050.06c tvaṁ varuṇa paśyasi ||
1.050.07a vi dyām eṣi rajas pṛthv ahā mimāno aktubhiḥ |
1.050.07c paśyañ janmāni sūrya ||
1.050.08a sapta tvā harito rathe vahanti deva sūrya |
1.050.08c śociṣkeśaṁ vicakṣaṇa ||
1.050.09a ayukta sapta śundhyuvaḥ sūro rathasya naptyaḥ |
1.050.09c tābhir yāti svayuktibhiḥ ||
1.050.10a ud vayaṁ tamasas pari jyotiṣ paśyanta uttaram |
1.050.10c devaṁ devatrā sūryam aganma jyotir uttamam ||
1.050.11a udyann adya mitramaha ārohann uttarāṁ divam |
1.050.11c hṛdrogam mama sūrya harimāṇaṁ ca nāśaya ||
1.050.12a śukeṣu me harimāṇaṁ ropaṇākāsu dadhmasi |
1.050.12c atho hāridraveṣu me harimāṇaṁ ni dadhmasi ||
1.050.13a ud agād ayam ādityo viśvena sahasā saha |
1.050.13c dviṣantam mahyaṁ randhayan mo ahaṁ dviṣate radham ||

1.051.01a abhi tyam meṣam puruhūtam ṛgmiyam indraṁ gīrbhir madatā vasvo arṇavam |
1.051.01c yasya dyāvo na vicaranti mānuṣā bhuje maṁhiṣṭham abhi vipram arcata ||
1.051.02a abhīm avanvan svabhiṣṭim ūtayo 'ntarikṣaprāṁ taviṣībhir āvṛtam |
1.051.02c indraṁ dakṣāsa ṛbhavo madacyutaṁ śatakratuṁ javanī sūnṛtāruhat ||
1.051.03a tvaṁ gotram aṅgirobhyo 'vṛṇor apotātraye śatadureṣu gātuvit |
1.051.03c sasena cid vimadāyāvaho vasv ājāv adriṁ vāvasānasya nartayan ||
1.051.04a tvam apām apidhānāvṛṇor apādhārayaḥ parvate dānumad vasu |
1.051.04c vṛtraṁ yad indra śavasāvadhīr ahim ād it sūryaṁ divy ārohayo dṛśe ||
1.051.05a tvam māyābhir apa māyino 'dhamaḥ svadhābhir ye adhi śuptāv ajuhvata |
1.051.05c tvam pipror nṛmaṇaḥ prārujaḥ puraḥ pra ṛjiśvānaṁ dasyuhatyeṣv āvitha ||
1.051.06a tvaṁ kutsaṁ śuṣṇahatyeṣv āvithārandhayo 'tithigvāya śambaram |
1.051.06c mahāntaṁ cid arbudaṁ ni kramīḥ padā sanād eva dasyuhatyāya jajñiṣe ||
1.051.07a tve viśvā taviṣī sadhryag ghitā tava rādhaḥ somapīthāya harṣate |
1.051.07c tava vajraś cikite bāhvor hito vṛścā śatror ava viśvāni vṛṣṇyā ||
1.051.08a vi jānīhy āryān ye ca dasyavo barhiṣmate randhayā śāsad avratān |
1.051.08c śākī bhava yajamānasya coditā viśvet tā te sadhamādeṣu cākana ||
1.051.09a anuvratāya randhayann apavratān ābhūbhir indraḥ śnathayann anābhuvaḥ |
1.051.09c vṛddhasya cid vardhato dyām inakṣataḥ stavāno vamro vi jaghāna saṁdihaḥ ||
1.051.10a takṣad yat ta uśanā sahasā saho vi rodasī majmanā bādhate śavaḥ |
1.051.10c ā tvā vātasya nṛmaṇo manoyuja ā pūryamāṇam avahann abhi śravaḥ ||
1.051.11a mandiṣṭa yad uśane kāvye sacām̐ indro vaṅkū vaṅkutarādhi tiṣṭhati |
1.051.11c ugro yayiṁ nir apaḥ srotasāsṛjad vi śuṣṇasya dṛṁhitā airayat puraḥ ||
1.051.12a ā smā rathaṁ vṛṣapāṇeṣu tiṣṭhasi śāryātasya prabhṛtā yeṣu mandase |
1.051.12c indra yathā sutasomeṣu cākano 'narvāṇaṁ ślokam ā rohase divi ||
1.051.13a adadā arbhām mahate vacasyave kakṣīvate vṛcayām indra sunvate |
1.051.13c menābhavo vṛṣaṇaśvasya sukrato viśvet tā te savaneṣu pravācyā ||
1.051.14a indro aśrāyi sudhyo nireke pajreṣu stomo duryo na yūpaḥ |
1.051.14c aśvayur gavyū rathayur vasūyur indra id rāyaḥ kṣayati prayantā ||
1.051.15a idaṁ namo vṛṣabhāya svarāje satyaśuṣmāya tavase 'vāci |
1.051.15c asminn indra vṛjane sarvavīrāḥ smat sūribhis tava śarman syāma ||

1.052.01a tyaṁ su meṣam mahayā svarvidaṁ śataṁ yasya subhvaḥ sākam īrate |
1.052.01c atyaṁ na vājaṁ havanasyadaṁ ratham endraṁ vavṛtyām avase suvṛktibhiḥ ||
1.052.02a sa parvato na dharuṇeṣv acyutaḥ sahasramūtis taviṣīṣu vāvṛdhe |
1.052.02c indro yad vṛtram avadhīn nadīvṛtam ubjann arṇāṁsi jarhṛṣāṇo andhasā ||
1.052.03a sa hi dvaro dvariṣu vavra ūdhani candrabudhno madavṛddho manīṣibhiḥ |
1.052.03c indraṁ tam ahve svapasyayā dhiyā maṁhiṣṭharātiṁ sa hi paprir andhasaḥ ||
1.052.04a ā yam pṛṇanti divi sadmabarhiṣaḥ samudraṁ na subhvaḥ svā abhiṣṭayaḥ |
1.052.04c taṁ vṛtrahatye anu tasthur ūtayaḥ śuṣmā indram avātā ahrutapsavaḥ ||
1.052.05a abhi svavṛṣṭim made asya yudhyato raghvīr iva pravaṇe sasrur ūtayaḥ |
1.052.05c indro yad vajrī dhṛṣamāṇo andhasā bhinad valasya paridhīm̐r iva tritaḥ ||
1.052.06a parīṁ ghṛṇā carati titviṣe śavo 'po vṛtvī rajaso budhnam āśayat |
1.052.06c vṛtrasya yat pravaṇe durgṛbhiśvano nijaghantha hanvor indra tanyatum ||
1.052.07a hradaṁ na hi tvā nyṛṣanty ūrmayo brahmāṇīndra tava yāni vardhanā |
1.052.07c tvaṣṭā cit te yujyaṁ vāvṛdhe śavas tatakṣa vajram abhibhūtyojasam ||
1.052.08a jaghanvām̐ u haribhiḥ sambhṛtakratav indra vṛtram manuṣe gātuyann apaḥ |
1.052.08c ayacchathā bāhvor vajram āyasam adhārayo divy ā sūryaṁ dṛśe ||
1.052.09a bṛhat svaścandram amavad yad ukthyam akṛṇvata bhiyasā rohaṇaṁ divaḥ |
1.052.09c yan mānuṣapradhanā indram ūtayaḥ svar nṛṣāco maruto 'madann anu ||
1.052.10a dyauś cid asyāmavām̐ aheḥ svanād ayoyavīd bhiyasā vajra indra te |
1.052.10c vṛtrasya yad badbadhānasya rodasī made sutasya śavasābhinac chiraḥ ||
1.052.11a yad in nv indra pṛthivī daśabhujir ahāni viśvā tatananta kṛṣṭayaḥ |
1.052.11c atrāha te maghavan viśrutaṁ saho dyām anu śavasā barhaṇā bhuvat ||
1.052.12a tvam asya pāre rajaso vyomanaḥ svabhūtyojā avase dhṛṣanmanaḥ |
1.052.12c cakṛṣe bhūmim pratimānam ojaso 'paḥ svaḥ paribhūr eṣy ā divam ||
1.052.13a tvam bhuvaḥ pratimānam pṛthivyā ṛṣvavīrasya bṛhataḥ patir bhūḥ |
1.052.13c viśvam āprā antarikṣam mahitvā satyam addhā nakir anyas tvāvān ||
1.052.14a na yasya dyāvāpṛthivī anu vyaco na sindhavo rajaso antam ānaśuḥ |
1.052.14c nota svavṛṣṭim made asya yudhyata eko anyac cakṛṣe viśvam ānuṣak ||
1.052.15a ārcann atra marutaḥ sasminn ājau viśve devāso amadann anu tvā |
1.052.15c vṛtrasya yad bhṛṣṭimatā vadhena ni tvam indra praty ānaṁ jaghantha ||

1.053.01a ny ū ṣu vācam pra mahe bharāmahe gira indrāya sadane vivasvataḥ |
1.053.01c nū cid dhi ratnaṁ sasatām ivāvidan na duṣṭutir draviṇodeṣu śasyate ||
1.053.02a duro aśvasya dura indra gor asi duro yavasya vasuna inas patiḥ |
1.053.02c śikṣānaraḥ pradivo akāmakarśanaḥ sakhā sakhibhyas tam idaṁ gṛṇīmasi ||
1.053.03a śacīva indra purukṛd dyumattama taved idam abhitaś cekite vasu |
1.053.03c ataḥ saṁgṛbhyābhibhūta ā bhara mā tvāyato jarituḥ kāmam ūnayīḥ ||
1.053.04a ebhir dyubhiḥ sumanā ebhir indubhir nirundhāno amatiṁ gobhir aśvinā |
1.053.04c indreṇa dasyuṁ darayanta indubhir yutadveṣasaḥ sam iṣā rabhemahi ||
1.053.05a sam indra rāyā sam iṣā rabhemahi saṁ vājebhiḥ puruścandrair abhidyubhiḥ |
1.053.05c saṁ devyā pramatyā vīraśuṣmayā goagrayāśvāvatyā rabhemahi ||
1.053.06a te tvā madā amadan tāni vṛṣṇyā te somāso vṛtrahatyeṣu satpate |
1.053.06c yat kārave daśa vṛtrāṇy aprati barhiṣmate ni sahasrāṇi barhayaḥ ||
1.053.07a yudhā yudham upa ghed eṣi dhṛṣṇuyā purā puraṁ sam idaṁ haṁsy ojasā |
1.053.07c namyā yad indra sakhyā parāvati nibarhayo namuciṁ nāma māyinam ||
1.053.08a tvaṁ karañjam uta parṇayaṁ vadhīs tejiṣṭhayātithigvasya vartanī |
1.053.08c tvaṁ śatā vaṅgṛdasyābhinat puro 'nānudaḥ pariṣūtā ṛjiśvanā ||
1.053.09a tvam etāñ janarājño dvir daśābandhunā suśravasopajagmuṣaḥ |
1.053.09c ṣaṣṭiṁ sahasrā navatiṁ nava śruto ni cakreṇa rathyā duṣpadāvṛṇak ||
1.053.10a tvam āvitha suśravasaṁ tavotibhis tava trāmabhir indra tūrvayāṇam |
1.053.10c tvam asmai kutsam atithigvam āyum mahe rājñe yūne arandhanāyaḥ ||
1.053.11a ya udṛcīndra devagopāḥ sakhāyas te śivatamā asāma |
1.053.11c tvāṁ stoṣāma tvayā suvīrā drāghīya āyuḥ prataraṁ dadhānāḥ ||

1.054.01a mā no asmin maghavan pṛtsv aṁhasi nahi te antaḥ śavasaḥ parīṇaśe |
1.054.01c akrandayo nadyo roruvad vanā kathā na kṣoṇīr bhiyasā sam ārata ||
1.054.02a arcā śakrāya śākine śacīvate śṛṇvantam indram mahayann abhi ṣṭuhi |
1.054.02c yo dhṛṣṇunā śavasā rodasī ubhe vṛṣā vṛṣatvā vṛṣabho nyṛñjate ||
1.054.03a arcā dive bṛhate śūṣyaṁ vacaḥ svakṣatraṁ yasya dhṛṣato dhṛṣan manaḥ |
1.054.03c bṛhacchravā asuro barhaṇā kṛtaḥ puro haribhyāṁ vṛṣabho ratho hi ṣaḥ ||
1.054.04a tvaṁ divo bṛhataḥ sānu kopayo 'va tmanā dhṛṣatā śambaram bhinat |
1.054.04c yan māyino vrandino mandinā dhṛṣac chitāṁ gabhastim aśanim pṛtanyasi ||
1.054.05a ni yad vṛṇakṣi śvasanasya mūrdhani śuṣṇasya cid vrandino roruvad vanā |
1.054.05c prācīnena manasā barhaṇāvatā yad adyā cit kṛṇavaḥ kas tvā pari ||
1.054.06a tvam āvitha naryaṁ turvaśaṁ yaduṁ tvaṁ turvītiṁ vayyaṁ śatakrato |
1.054.06c tvaṁ ratham etaśaṁ kṛtvye dhane tvam puro navatiṁ dambhayo nava ||
1.054.07a sa ghā rājā satpatiḥ śūśuvaj jano rātahavyaḥ prati yaḥ śāsam invati |
1.054.07c ukthā vā yo abhigṛṇāti rādhasā dānur asmā uparā pinvate divaḥ ||
1.054.08a asamaṁ kṣatram asamā manīṣā pra somapā apasā santu neme |
1.054.08c ye ta indra daduṣo vardhayanti mahi kṣatraṁ sthaviraṁ vṛṣṇyaṁ ca ||
1.054.09a tubhyed ete bahulā adridugdhāś camūṣadaś camasā indrapānāḥ |
1.054.09c vy aśnuhi tarpayā kāmam eṣām athā mano vasudeyāya kṛṣva ||
1.054.10a apām atiṣṭhad dharuṇahvaraṁ tamo 'ntar vṛtrasya jaṭhareṣu parvataḥ |
1.054.10c abhīm indro nadyo vavriṇā hitā viśvā anuṣṭhāḥ pravaṇeṣu jighnate ||
1.054.11a sa śevṛdham adhi dhā dyumnam asme mahi kṣatraṁ janāṣāḻ indra tavyam |
1.054.11c rakṣā ca no maghonaḥ pāhi sūrīn rāye ca naḥ svapatyā iṣe dhāḥ ||

1.055.01a divaś cid asya varimā vi papratha indraṁ na mahnā pṛthivī cana prati |
1.055.01c bhīmas tuviṣmāñ carṣaṇibhya ātapaḥ śiśīte vajraṁ tejase na vaṁsagaḥ ||
1.055.02a so arṇavo na nadyaḥ samudriyaḥ prati gṛbhṇāti viśritā varīmabhiḥ |
1.055.02c indraḥ somasya pītaye vṛṣāyate sanāt sa yudhma ojasā panasyate ||
1.055.03a tvaṁ tam indra parvataṁ na bhojase maho nṛmṇasya dharmaṇām irajyasi |
1.055.03c pra vīryeṇa devatāti cekite viśvasmā ugraḥ karmaṇe purohitaḥ ||
1.055.04a sa id vane namasyubhir vacasyate cāru janeṣu prabruvāṇa indriyam |
1.055.04c vṛṣā chandur bhavati haryato vṛṣā kṣemeṇa dhenām maghavā yad invati ||
1.055.05a sa in mahāni samithāni majmanā kṛṇoti yudhma ojasā janebhyaḥ |
1.055.05c adhā cana śrad dadhati tviṣīmata indrāya vajraṁ nighanighnate vadham ||
1.055.06a sa hi śravasyuḥ sadanāni kṛtrimā kṣmayā vṛdhāna ojasā vināśayan |
1.055.06c jyotīṁṣi kṛṇvann avṛkāṇi yajyave 'va sukratuḥ sartavā apaḥ sṛjat ||
1.055.07a dānāya manaḥ somapāvann astu te 'rvāñcā harī vandanaśrud ā kṛdhi |
1.055.07c yamiṣṭhāsaḥ sārathayo ya indra te na tvā ketā ā dabhnuvanti bhūrṇayaḥ ||
1.055.08a aprakṣitaṁ vasu bibharṣi hastayor aṣāḻhaṁ sahas tanvi śruto dadhe |
1.055.08c āvṛtāso 'vatāso na kartṛbhis tanūṣu te kratava indra bhūrayaḥ ||

1.056.01a eṣa pra pūrvīr ava tasya camriṣo 'tyo na yoṣām ud ayaṁsta bhurvaṇiḥ |
1.056.01c dakṣam mahe pāyayate hiraṇyayaṁ ratham āvṛtyā hariyogam ṛbhvasam ||
1.056.02a taṁ gūrtayo nemanniṣaḥ parīṇasaḥ samudraṁ na saṁcaraṇe saniṣyavaḥ |
1.056.02c patiṁ dakṣasya vidathasya nū saho giriṁ na venā adhi roha tejasā ||
1.056.03a sa turvaṇir mahām̐ areṇu pauṁsye girer bhṛṣṭir na bhrājate tujā śavaḥ |
1.056.03c yena śuṣṇam māyinam āyaso made dudhra ābhūṣu rāmayan ni dāmani ||
1.056.04a devī yadi taviṣī tvāvṛdhotaya indraṁ siṣakty uṣasaṁ na sūryaḥ |
1.056.04c yo dhṛṣṇunā śavasā bādhate tama iyarti reṇum bṛhad arhariṣvaṇiḥ ||
1.056.05a vi yat tiro dharuṇam acyutaṁ rajo 'tiṣṭhipo diva ātāsu barhaṇā |
1.056.05c svarmīḻhe yan mada indra harṣyāhan vṛtraṁ nir apām aubjo arṇavam ||
1.056.06a tvaṁ divo dharuṇaṁ dhiṣa ojasā pṛthivyā indra sadaneṣu māhinaḥ |
1.056.06c tvaṁ sutasya made ariṇā apo vi vṛtrasya samayā pāṣyārujaḥ ||

1.057.01a pra maṁhiṣṭhāya bṛhate bṛhadraye satyaśuṣmāya tavase matim bhare |
1.057.01c apām iva pravaṇe yasya durdharaṁ rādho viśvāyu śavase apāvṛtam ||
1.057.02a adha te viśvam anu hāsad iṣṭaya āpo nimneva savanā haviṣmataḥ |
1.057.02c yat parvate na samaśīta haryata indrasya vajraḥ śnathitā hiraṇyayaḥ ||
1.057.03a asmai bhīmāya namasā sam adhvara uṣo na śubhra ā bharā panīyase |
1.057.03c yasya dhāma śravase nāmendriyaṁ jyotir akāri harito nāyase ||
1.057.04a ime ta indra te vayam puruṣṭuta ye tvārabhya carāmasi prabhūvaso |
1.057.04c nahi tvad anyo girvaṇo giraḥ saghat kṣoṇīr iva prati no harya tad vacaḥ ||
1.057.05a bhūri ta indra vīryaṁ tava smasy asya stotur maghavan kāmam ā pṛṇa |
1.057.05c anu te dyaur bṛhatī vīryam mama iyaṁ ca te pṛthivī nema ojase ||
1.057.06a tvaṁ tam indra parvatam mahām uruṁ vajreṇa vajrin parvaśaś cakartitha |
1.057.06c avāsṛjo nivṛtāḥ sartavā apaḥ satrā viśvaṁ dadhiṣe kevalaṁ sahaḥ ||

1.058.01a nū cit sahojā amṛto ni tundate hotā yad dūto abhavad vivasvataḥ |
1.058.01c vi sādhiṣṭhebhiḥ pathibhī rajo mama ā devatātā haviṣā vivāsati ||
1.058.02a ā svam adma yuvamāno ajaras tṛṣv aviṣyann ataseṣu tiṣṭhati |
1.058.02c atyo na pṛṣṭham pruṣitasya rocate divo na sānu stanayann acikradat ||
1.058.03a krāṇā rudrebhir vasubhiḥ purohito hotā niṣatto rayiṣāḻ amartyaḥ |
1.058.03c ratho na vikṣv ṛñjasāna āyuṣu vy ānuṣag vāryā deva ṛṇvati ||
1.058.04a vi vātajūto ataseṣu tiṣṭhate vṛthā juhūbhiḥ sṛṇyā tuviṣvaṇiḥ |
1.058.04c tṛṣu yad agne vanino vṛṣāyase kṛṣṇaṁ ta ema ruśadūrme ajara ||
1.058.05a tapurjambho vana ā vātacodito yūthe na sāhvām̐ ava vāti vaṁsagaḥ |
1.058.05c abhivrajann akṣitam pājasā rajaḥ sthātuś caratham bhayate patatriṇaḥ ||
1.058.06a dadhuṣ ṭvā bhṛgavo mānuṣeṣv ā rayiṁ na cāruṁ suhavaṁ janebhyaḥ |
1.058.06c hotāram agne atithiṁ vareṇyam mitraṁ na śevaṁ divyāya janmane ||
1.058.07a hotāraṁ sapta juhvo yajiṣṭhaṁ yaṁ vāghato vṛṇate adhvareṣu |
1.058.07c agniṁ viśveṣām aratiṁ vasūnāṁ saparyāmi prayasā yāmi ratnam ||
1.058.08a acchidrā sūno sahaso no adya stotṛbhyo mitramahaḥ śarma yaccha |
1.058.08c agne gṛṇantam aṁhasa uruṣyorjo napāt pūrbhir āyasībhiḥ ||
1.058.09a bhavā varūthaṁ gṛṇate vibhāvo bhavā maghavan maghavadbhyaḥ śarma |
1.058.09c uruṣyāgne aṁhaso gṛṇantam prātar makṣū dhiyāvasur jagamyāt ||

1.059.01a vayā id agne agnayas te anye tve viśve amṛtā mādayante |
1.059.01c vaiśvānara nābhir asi kṣitīnāṁ sthūṇeva janām̐ upamid yayantha ||
1.059.02a mūrdhā divo nābhir agniḥ pṛthivyā athābhavad aratī rodasyoḥ |
1.059.02c taṁ tvā devāso 'janayanta devaṁ vaiśvānara jyotir id āryāya ||
1.059.03a ā sūrye na raśmayo dhruvāso vaiśvānare dadhire 'gnā vasūni |
1.059.03c yā parvateṣv oṣadhīṣv apsu yā mānuṣeṣv asi tasya rājā ||
1.059.04a bṛhatī iva sūnave rodasī giro hotā manuṣyo na dakṣaḥ |
1.059.04c svarvate satyaśuṣmāya pūrvīr vaiśvānarāya nṛtamāya yahvīḥ ||
1.059.05a divaś cit te bṛhato jātavedo vaiśvānara pra ririce mahitvam |
1.059.05c rājā kṛṣṭīnām asi mānuṣīṇāṁ yudhā devebhyo varivaś cakartha ||
1.059.06a pra nū mahitvaṁ vṛṣabhasya vocaṁ yam pūravo vṛtrahaṇaṁ sacante |
1.059.06c vaiśvānaro dasyum agnir jaghanvām̐ adhūnot kāṣṭhā ava śambaram bhet ||
1.059.07a vaiśvānaro mahimnā viśvakṛṣṭir bharadvājeṣu yajato vibhāvā |
1.059.07c śātavaneye śatinībhir agniḥ puruṇīthe jarate sūnṛtāvān ||

1.060.01a vahniṁ yaśasaṁ vidathasya ketuṁ suprāvyaṁ dūtaṁ sadyoartham |
1.060.01c dvijanmānaṁ rayim iva praśastaṁ rātim bharad bhṛgave mātariśvā ||
1.060.02a asya śāsur ubhayāsaḥ sacante haviṣmanta uśijo ye ca martāḥ |
1.060.02c divaś cit pūrvo ny asādi hotāpṛcchyo viśpatir vikṣu vedhāḥ ||
1.060.03a taṁ navyasī hṛda ā jāyamānam asmat sukīrtir madhujihvam aśyāḥ |
1.060.03c yam ṛtvijo vṛjane mānuṣāsaḥ prayasvanta āyavo jījananta ||
1.060.04a uśik pāvako vasur mānuṣeṣu vareṇyo hotādhāyi vikṣu |
1.060.04c damūnā gṛhapatir dama ām̐ agnir bhuvad rayipatī rayīṇām ||
1.060.05a taṁ tvā vayam patim agne rayīṇām pra śaṁsāmo matibhir gotamāsaḥ |
1.060.05c āśuṁ na vājambharam marjayantaḥ prātar makṣū dhiyāvasur jagamyāt ||

1.061.01a asmā id u pra tavase turāya prayo na harmi stomam māhināya |
1.061.01c ṛcīṣamāyādhrigava oham indrāya brahmāṇi rātatamā ||
1.061.02a asmā id u praya iva pra yaṁsi bharāmy āṅgūṣam bādhe suvṛkti |
1.061.02c indrāya hṛdā manasā manīṣā pratnāya patye dhiyo marjayanta ||
1.061.03a asmā id u tyam upamaṁ svarṣām bharāmy āṅgūṣam āsyena |
1.061.03c maṁhiṣṭham acchoktibhir matīnāṁ suvṛktibhiḥ sūriṁ vāvṛdhadhyai ||
1.061.04a asmā id u stomaṁ saṁ hinomi rathaṁ na taṣṭeva tatsināya |
1.061.04c giraś ca girvāhase suvṛktīndrāya viśvaminvam medhirāya ||
1.061.05a asmā id u saptim iva śravasyendrāyārkaṁ juhvā sam añje |
1.061.05c vīraṁ dānaukasaṁ vandadhyai purāṁ gūrtaśravasaṁ darmāṇam ||
1.061.06a asmā id u tvaṣṭā takṣad vajraṁ svapastamaṁ svaryaṁ raṇāya |
1.061.06c vṛtrasya cid vidad yena marma tujann īśānas tujatā kiyedhāḥ ||
1.061.07a asyed u mātuḥ savaneṣu sadyo mahaḥ pitum papivāñ cārv annā |
1.061.07c muṣāyad viṣṇuḥ pacataṁ sahīyān vidhyad varāhaṁ tiro adrim astā ||
1.061.08a asmā id u gnāś cid devapatnīr indrāyārkam ahihatya ūvuḥ |
1.061.08c pari dyāvāpṛthivī jabhra urvī nāsya te mahimānam pari ṣṭaḥ ||
1.061.09a asyed eva pra ririce mahitvaṁ divas pṛthivyāḥ pary antarikṣāt |
1.061.09c svarāḻ indro dama ā viśvagūrtaḥ svarir amatro vavakṣe raṇāya ||
1.061.10a asyed eva śavasā śuṣantaṁ vi vṛścad vajreṇa vṛtram indraḥ |
1.061.10c gā na vrāṇā avanīr amuñcad abhi śravo dāvane sacetāḥ ||
1.061.11a asyed u tveṣasā ranta sindhavaḥ pari yad vajreṇa sīm ayacchat |
1.061.11c īśānakṛd dāśuṣe daśasyan turvītaye gādhaṁ turvaṇiḥ kaḥ ||
1.061.12a asmā id u pra bharā tūtujāno vṛtrāya vajram īśānaḥ kiyedhāḥ |
1.061.12c gor na parva vi radā tiraśceṣyann arṇāṁsy apāṁ caradhyai ||
1.061.13a asyed u pra brūhi pūrvyāṇi turasya karmāṇi navya ukthaiḥ |
1.061.13c yudhe yad iṣṇāna āyudhāny ṛghāyamāṇo niriṇāti śatrūn ||
1.061.14a asyed u bhiyā girayaś ca dṛḻhā dyāvā ca bhūmā januṣas tujete |
1.061.14c upo venasya joguvāna oṇiṁ sadyo bhuvad vīryāya nodhāḥ ||
1.061.15a asmā id u tyad anu dāyy eṣām eko yad vavne bhūrer īśānaḥ |
1.061.15c praitaśaṁ sūrye paspṛdhānaṁ sauvaśvye suṣvim āvad indraḥ ||
1.061.16a evā te hāriyojanā suvṛktīndra brahmāṇi gotamāso akran |
1.061.16c aiṣu viśvapeśasaṁ dhiyaṁ dhāḥ prātar makṣū dhiyāvasur jagamyāt ||

1.062.01a pra manmahe śavasānāya śūṣam āṅgūṣaṁ girvaṇase aṅgirasvat |
1.062.01c suvṛktibhiḥ stuvata ṛgmiyāyārcāmārkaṁ nare viśrutāya ||
1.062.02a pra vo mahe mahi namo bharadhvam āṅgūṣyaṁ śavasānāya sāma |
1.062.02c yenā naḥ pūrve pitaraḥ padajñā arcanto aṅgiraso gā avindan ||
1.062.03a indrasyāṅgirasāṁ ceṣṭau vidat saramā tanayāya dhāsim |
1.062.03c bṛhaspatir bhinad adriṁ vidad gāḥ sam usriyābhir vāvaśanta naraḥ ||
1.062.04a sa suṣṭubhā sa stubhā sapta vipraiḥ svareṇādriṁ svaryo navagvaiḥ |
1.062.04c saraṇyubhiḥ phaligam indra śakra valaṁ raveṇa darayo daśagvaiḥ ||
1.062.05a gṛṇāno aṅgirobhir dasma vi var uṣasā sūryeṇa gobhir andhaḥ |
1.062.05c vi bhūmyā aprathaya indra sānu divo raja uparam astabhāyaḥ ||
1.062.06a tad u prayakṣatamam asya karma dasmasya cārutamam asti daṁsaḥ |
1.062.06c upahvare yad uparā apinvan madhvarṇaso nadyaś catasraḥ ||
1.062.07a dvitā vi vavre sanajā sanīḻe ayāsyaḥ stavamānebhir arkaiḥ |
1.062.07c bhago na mene parame vyomann adhārayad rodasī sudaṁsāḥ ||
1.062.08a sanād divam pari bhūmā virūpe punarbhuvā yuvatī svebhir evaiḥ |
1.062.08c kṛṣṇebhir aktoṣā ruśadbhir vapurbhir ā carato anyānyā ||
1.062.09a sanemi sakhyaṁ svapasyamānaḥ sūnur dādhāra śavasā sudaṁsāḥ |
1.062.09c āmāsu cid dadhiṣe pakvam antaḥ payaḥ kṛṣṇāsu ruśad rohiṇīṣu ||
1.062.10a sanāt sanīḻā avanīr avātā vratā rakṣante amṛtāḥ sahobhiḥ |
1.062.10c purū sahasrā janayo na patnīr duvasyanti svasāro ahrayāṇam ||
1.062.11a sanāyuvo namasā navyo arkair vasūyavo matayo dasma dadruḥ |
1.062.11c patiṁ na patnīr uśatīr uśantaṁ spṛśanti tvā śavasāvan manīṣāḥ ||
1.062.12a sanād eva tava rāyo gabhastau na kṣīyante nopa dasyanti dasma |
1.062.12c dyumām̐ asi kratumām̐ indra dhīraḥ śikṣā śacīvas tava naḥ śacībhiḥ ||
1.062.13a sanāyate gotama indra navyam atakṣad brahma hariyojanāya |
1.062.13c sunīthāya naḥ śavasāna nodhāḥ prātar makṣū dhiyāvasur jagamyāt ||

1.063.01a tvam mahām̐ indra yo ha śuṣmair dyāvā jajñānaḥ pṛthivī ame dhāḥ |
1.063.01c yad dha te viśvā girayaś cid abhvā bhiyā dṛḻhāsaḥ kiraṇā naijan ||
1.063.02a ā yad dharī indra vivratā ver ā te vajraṁ jaritā bāhvor dhāt |
1.063.02c yenāviharyatakrato amitrān pura iṣṇāsi puruhūta pūrvīḥ ||
1.063.03a tvaṁ satya indra dhṛṣṇur etān tvam ṛbhukṣā naryas tvaṁ ṣāṭ |
1.063.03c tvaṁ śuṣṇaṁ vṛjane pṛkṣa āṇau yūne kutsāya dyumate sacāhan ||
1.063.04a tvaṁ ha tyad indra codīḥ sakhā vṛtraṁ yad vajrin vṛṣakarmann ubhnāḥ |
1.063.04c yad dha śūra vṛṣamaṇaḥ parācair vi dasyūm̐r yonāv akṛto vṛthāṣāṭ ||
1.063.05a tvaṁ ha tyad indrāriṣaṇyan dṛḻhasya cin martānām ajuṣṭau |
1.063.05c vy asmad ā kāṣṭhā arvate var ghaneva vajriñ chnathihy amitrān ||
1.063.06a tvāṁ ha tyad indrārṇasātau svarmīḻhe nara ājā havante |
1.063.06c tava svadhāva iyam ā samarya ūtir vājeṣv atasāyyā bhūt ||
1.063.07a tvaṁ ha tyad indra sapta yudhyan puro vajrin purukutsāya dardaḥ |
1.063.07c barhir na yat sudāse vṛthā varg aṁho rājan varivaḥ pūrave kaḥ ||
1.063.08a tvaṁ tyāṁ na indra deva citrām iṣam āpo na pīpayaḥ parijman |
1.063.08c yayā śūra praty asmabhyaṁ yaṁsi tmanam ūrjaṁ na viśvadha kṣaradhyai ||
1.063.09a akāri ta indra gotamebhir brahmāṇy oktā namasā haribhyām |
1.063.09c supeśasaṁ vājam ā bharā naḥ prātar makṣū dhiyāvasur jagamyāt ||

1.064.01a vṛṣṇe śardhāya sumakhāya vedhase nodhaḥ suvṛktim pra bharā marudbhyaḥ |
1.064.01c apo na dhīro manasā suhastyo giraḥ sam añje vidatheṣv ābhuvaḥ ||
1.064.02a te jajñire diva ṛṣvāsa ukṣaṇo rudrasya maryā asurā arepasaḥ |
1.064.02c pāvakāsaḥ śucayaḥ sūryā iva satvāno na drapsino ghoravarpasaḥ ||
1.064.03a yuvāno rudrā ajarā abhogghano vavakṣur adhrigāvaḥ parvatā iva |
1.064.03c dṛḻhā cid viśvā bhuvanāni pārthivā pra cyāvayanti divyāni majmanā ||
1.064.04a citrair añjibhir vapuṣe vy añjate vakṣaḥsu rukmām̐ adhi yetire śubhe |
1.064.04c aṁseṣv eṣāṁ ni mimṛkṣur ṛṣṭayaḥ sākaṁ jajñire svadhayā divo naraḥ ||
1.064.05a īśānakṛto dhunayo riśādaso vātān vidyutas taviṣībhir akrata |
1.064.05c duhanty ūdhar divyāni dhūtayo bhūmim pinvanti payasā parijrayaḥ ||
1.064.06a pinvanty apo marutaḥ sudānavaḥ payo ghṛtavad vidatheṣv ābhuvaḥ |
1.064.06c atyaṁ na mihe vi nayanti vājinam utsaṁ duhanti stanayantam akṣitam ||
1.064.07a mahiṣāso māyinaś citrabhānavo girayo na svatavaso raghuṣyadaḥ |
1.064.07c mṛgā iva hastinaḥ khādathā vanā yad āruṇīṣu taviṣīr ayugdhvam ||
1.064.08a siṁhā iva nānadati pracetasaḥ piśā iva supiśo viśvavedasaḥ |
1.064.08c kṣapo jinvantaḥ pṛṣatībhir ṛṣṭibhiḥ sam it sabādhaḥ śavasāhimanyavaḥ ||
1.064.09a rodasī ā vadatā gaṇaśriyo nṛṣācaḥ śūrāḥ śavasāhimanyavaḥ |
1.064.09c ā vandhureṣv amatir na darśatā vidyun na tasthau maruto ratheṣu vaḥ ||
1.064.10a viśvavedaso rayibhiḥ samokasaḥ sammiślāsas taviṣībhir virapśinaḥ |
1.064.10c astāra iṣuṁ dadhire gabhastyor anantaśuṣmā vṛṣakhādayo naraḥ ||
1.064.11a hiraṇyayebhiḥ pavibhiḥ payovṛdha ujjighnanta āpathyo na parvatān |
1.064.11c makhā ayāsaḥ svasṛto dhruvacyuto dudhrakṛto maruto bhrājadṛṣṭayaḥ ||
1.064.12a ghṛṣum pāvakaṁ vaninaṁ vicarṣaṇiṁ rudrasya sūnuṁ havasā gṛṇīmasi |
1.064.12c rajasturaṁ tavasam mārutaṁ gaṇam ṛjīṣiṇaṁ vṛṣaṇaṁ saścata śriye ||
1.064.13a pra nū sa martaḥ śavasā janām̐ ati tasthau va ūtī maruto yam āvata |
1.064.13c arvadbhir vājam bharate dhanā nṛbhir āpṛcchyaṁ kratum ā kṣeti puṣyati ||
1.064.14a carkṛtyam marutaḥ pṛtsu duṣṭaraṁ dyumantaṁ śuṣmam maghavatsu dhattana |
1.064.14c dhanaspṛtam ukthyaṁ viśvacarṣaṇiṁ tokam puṣyema tanayaṁ śataṁ himāḥ ||
1.064.15a nū ṣṭhiram maruto vīravantam ṛtīṣāhaṁ rayim asmāsu dhatta |
1.064.15c sahasriṇaṁ śatinaṁ śūśuvāṁsam prātar makṣū dhiyāvasur jagamyāt ||

1.065.01 paśvā na tāyuṁ guhā catantaṁ namo yujānaṁ namo vahantam ||
1.065.02 sajoṣā dhīrāḥ padair anu gmann upa tvā sīdan viśve yajatrāḥ ||
1.065.03 ṛtasya devā anu vratā gur bhuvat pariṣṭir dyaur na bhūma ||
1.065.04 vardhantīm āpaḥ panvā suśiśvim ṛtasya yonā garbhe sujātam ||
1.065.05 puṣṭir na raṇvā kṣitir na pṛthvī girir na bhujma kṣodo na śambhu ||
1.065.06 atyo nājman sargaprataktaḥ sindhur na kṣodaḥ ka īṁ varāte ||
1.065.07 jāmiḥ sindhūnām bhrāteva svasrām ibhyān na rājā vanāny atti ||
1.065.08 yad vātajūto vanā vy asthād agnir ha dāti romā pṛthivyāḥ ||
1.065.09 śvasity apsu haṁso na sīdan kratvā cetiṣṭho viśām uṣarbhut ||
1.065.10 somo na vedhā ṛtaprajātaḥ paśur na śiśvā vibhur dūrebhāḥ ||

1.066.01 rayir na citrā sūro na saṁdṛg āyur na prāṇo nityo na sūnuḥ ||
1.066.02 takvā na bhūrṇir vanā siṣakti payo na dhenuḥ śucir vibhāvā ||
1.066.03 dādhāra kṣemam oko na raṇvo yavo na pakvo jetā janānām ||
1.066.04 ṛṣir na stubhvā vikṣu praśasto vājī na prīto vayo dadhāti ||
1.066.05 durokaśociḥ kratur na nityo jāyeva yonāv araṁ viśvasmai ||
1.066.06 citro yad abhrāṭ chveto na vikṣu ratho na rukmī tveṣaḥ samatsu ||
1.066.07 seneva sṛṣṭāmaṁ dadhāty astur na didyut tveṣapratīkā ||
1.066.08 yamo ha jāto yamo janitvaṁ jāraḥ kanīnām patir janīnām ||
1.066.09 taṁ vaś carāthā vayaṁ vasatyāstaṁ na gāvo nakṣanta iddham ||
1.066.10 sindhur na kṣodaḥ pra nīcīr ainon navanta gāvaḥ svar dṛśīke ||

1.067.01 vaneṣu jāyur marteṣu mitro vṛṇīte śruṣṭiṁ rājevājuryam ||
1.067.02 kṣemo na sādhuḥ kratur na bhadro bhuvat svādhīr hotā havyavāṭ ||
1.067.03 haste dadhāno nṛmṇā viśvāny ame devān dhād guhā niṣīdan ||
1.067.04 vidantīm atra naro dhiyaṁdhā hṛdā yat taṣṭān mantrām̐ aśaṁsan ||
1.067.05 ajo na kṣāṁ dādhāra pṛthivīṁ tastambha dyām mantrebhiḥ satyaiḥ ||
1.067.06 priyā padāni paśvo ni pāhi viśvāyur agne guhā guhaṁ gāḥ ||
1.067.07 ya īṁ ciketa guhā bhavantam ā yaḥ sasāda dhārām ṛtasya ||
1.067.08 vi ye cṛtanty ṛtā sapanta ād id vasūni pra vavācāsmai ||
1.067.09 vi yo vīrutsu rodhan mahitvota prajā uta prasūṣv antaḥ ||
1.067.10 cittir apāṁ dame viśvāyuḥ sadmeva dhīrāḥ sammāya cakruḥ ||

1.068.01 śrīṇann upa sthād divam bhuraṇyuḥ sthātuś caratham aktūn vy ūrṇot ||
1.068.02 pari yad eṣām eko viśveṣām bhuvad devo devānām mahitvā ||
1.068.03 ād it te viśve kratuṁ juṣanta śuṣkād yad deva jīvo janiṣṭhāḥ ||
1.068.04 bhajanta viśve devatvaṁ nāma ṛtaṁ sapanto amṛtam evaiḥ ||
1.068.05 ṛtasya preṣā ṛtasya dhītir viśvāyur viśve apāṁsi cakruḥ ||
1.068.06 yas tubhyaṁ dāśād yo vā te śikṣāt tasmai cikitvān rayiṁ dayasva ||
1.068.07 hotā niṣatto manor apatye sa cin nv āsām patī rayīṇām ||
1.068.08 icchanta reto mithas tanūṣu saṁ jānata svair dakṣair amūrāḥ ||
1.068.09 pitur na putrāḥ kratuṁ juṣanta śroṣan ye asya śāsaṁ turāsaḥ ||
1.068.10 vi rāya aurṇod duraḥ purukṣuḥ pipeśa nākaṁ stṛbhir damūnāḥ ||

1.069.01 śukraḥ śuśukvām̐ uṣo na jāraḥ paprā samīcī divo na jyotiḥ ||
1.069.02 pari prajātaḥ kratvā babhūtha bhuvo devānām pitā putraḥ san ||
1.069.03 vedhā adṛpto agnir vijānann ūdhar na gonāṁ svādmā pitūnām ||
1.069.04 jane na śeva āhūryaḥ san madhye niṣatto raṇvo duroṇe ||
1.069.05 putro na jāto raṇvo duroṇe vājī na prīto viśo vi tārīt ||
1.069.06 viśo yad ahve nṛbhiḥ sanīḻā agnir devatvā viśvāny aśyāḥ ||
1.069.07 nakiṣ ṭa etā vratā minanti nṛbhyo yad ebhyaḥ śruṣṭiṁ cakartha ||
1.069.08 tat tu te daṁso yad ahan samānair nṛbhir yad yukto vive rapāṁsi ||
1.069.09 uṣo na jāro vibhāvosraḥ saṁjñātarūpaś ciketad asmai ||
1.069.10 tmanā vahanto duro vy ṛṇvan navanta viśve svar dṛśīke ||

1.070.01 vanema pūrvīr aryo manīṣā agniḥ suśoko viśvāny aśyāḥ ||
1.070.02 ā daivyāni vratā cikitvān ā mānuṣasya janasya janma ||
1.070.03 garbho yo apāṁ garbho vanānāṁ garbhaś ca sthātāṁ garbhaś carathām ||
1.070.04 adrau cid asmā antar duroṇe viśāṁ na viśvo amṛtaḥ svādhīḥ ||
1.070.05 sa hi kṣapāvām̐ agnī rayīṇāṁ dāśad yo asmā araṁ sūktaiḥ ||
1.070.06 etā cikitvo bhūmā ni pāhi devānāṁ janma martām̐ś ca vidvān ||
1.070.07 vardhān yam pūrvīḥ kṣapo virūpāḥ sthātuś ca ratham ṛtapravītam ||
1.070.08 arādhi hotā svar niṣattaḥ kṛṇvan viśvāny apāṁsi satyā ||
1.070.09 goṣu praśastiṁ vaneṣu dhiṣe bharanta viśve baliṁ svar ṇaḥ ||
1.070.10 vi tvā naraḥ purutrā saparyan pitur na jivrer vi vedo bharanta ||
1.070.11 sādhur na gṛdhnur asteva śūro yāteva bhīmas tveṣaḥ samatsu ||

1.071.01a upa pra jinvann uśatīr uśantam patiṁ na nityaṁ janayaḥ sanīḻāḥ |
1.071.01c svasāraḥ śyāvīm aruṣīm ajuṣrañ citram ucchantīm uṣasaṁ na gāvaḥ ||
1.071.02a vīḻu cid dṛḻhā pitaro na ukthair adriṁ rujann aṅgiraso raveṇa |
1.071.02c cakrur divo bṛhato gātum asme ahaḥ svar vividuḥ ketum usrāḥ ||
1.071.03a dadhann ṛtaṁ dhanayann asya dhītim ād id aryo didhiṣvo vibhṛtrāḥ |
1.071.03c atṛṣyantīr apaso yanty acchā devāñ janma prayasā vardhayantīḥ ||
1.071.04a mathīd yad īṁ vibhṛto mātariśvā gṛhe-gṛhe śyeto jenyo bhūt |
1.071.04c ād īṁ rājñe na sahīyase sacā sann ā dūtyam bhṛgavāṇo vivāya ||
1.071.05a mahe yat pitra īṁ rasaṁ dive kar ava tsarat pṛśanyaś cikitvān |
1.071.05c sṛjad astā dhṛṣatā didyum asmai svāyāṁ devo duhitari tviṣiṁ dhāt ||
1.071.06a sva ā yas tubhyaṁ dama ā vibhāti namo vā dāśād uśato anu dyūn |
1.071.06c vardho agne vayo asya dvibarhā yāsad rāyā sarathaṁ yaṁ junāsi ||
1.071.07a agniṁ viśvā abhi pṛkṣaḥ sacante samudraṁ na sravataḥ sapta yahvīḥ |
1.071.07c na jāmibhir vi cikite vayo no vidā deveṣu pramatiṁ cikitvān ||
1.071.08a ā yad iṣe nṛpatiṁ teja ānaṭ chuci reto niṣiktaṁ dyaur abhīke |
1.071.08c agniḥ śardham anavadyaṁ yuvānaṁ svādhyaṁ janayat sūdayac ca ||
1.071.09a mano na yo 'dhvanaḥ sadya ety ekaḥ satrā sūro vasva īśe |
1.071.09c rājānā mitrāvaruṇā supāṇī goṣu priyam amṛtaṁ rakṣamāṇā ||
1.071.10a mā no agne sakhyā pitryāṇi pra marṣiṣṭhā abhi viduṣ kaviḥ san |
1.071.10c nabho na rūpaṁ jarimā mināti purā tasyā abhiśaster adhīhi ||

1.072.01a ni kāvyā vedhasaḥ śaśvatas kar haste dadhāno naryā purūṇi |
1.072.01c agnir bhuvad rayipatī rayīṇāṁ satrā cakrāṇo amṛtāni viśvā ||
1.072.02a asme vatsam pari ṣantaṁ na vindann icchanto viśve amṛtā amūrāḥ |
1.072.02c śramayuvaḥ padavyo dhiyaṁdhās tasthuḥ pade parame cārv agneḥ ||
1.072.03a tisro yad agne śaradas tvām ic chuciṁ ghṛtena śucayaḥ saparyān |
1.072.03c nāmāni cid dadhire yajñiyāny asūdayanta tanvaḥ sujātāḥ ||
1.072.04a ā rodasī bṛhatī vevidānāḥ pra rudriyā jabhrire yajñiyāsaḥ |
1.072.04c vidan marto nemadhitā cikitvān agnim pade parame tasthivāṁsam ||
1.072.05a saṁjānānā upa sīdann abhijñu patnīvanto namasyaṁ namasyan |
1.072.05c ririkvāṁsas tanvaḥ kṛṇvata svāḥ sakhā sakhyur nimiṣi rakṣamāṇāḥ ||
1.072.06a triḥ sapta yad guhyāni tve it padāvidan nihitā yajñiyāsaḥ |
1.072.06c tebhī rakṣante amṛtaṁ sajoṣāḥ paśūñ ca sthātṝñ carathaṁ ca pāhi ||
1.072.07a vidvām̐ agne vayunāni kṣitīnāṁ vy ānuṣak churudho jīvase dhāḥ |
1.072.07c antarvidvām̐ adhvano devayānān atandro dūto abhavo havirvāṭ ||
1.072.08a svādhyo diva ā sapta yahvī rāyo duro vy ṛtajñā ajānan |
1.072.08c vidad gavyaṁ saramā dṛḻham ūrvaṁ yenā nu kam mānuṣī bhojate viṭ ||
1.072.09a ā ye viśvā svapatyāni tasthuḥ kṛṇvānāso amṛtatvāya gātum |
1.072.09c mahnā mahadbhiḥ pṛthivī vi tasthe mātā putrair aditir dhāyase veḥ ||
1.072.10a adhi śriyaṁ ni dadhuś cārum asmin divo yad akṣī amṛtā akṛṇvan |
1.072.10c adha kṣaranti sindhavo na sṛṣṭāḥ pra nīcīr agne aruṣīr ajānan ||

1.073.01a rayir na yaḥ pitṛvitto vayodhāḥ supraṇītiś cikituṣo na śāsuḥ |
1.073.01c syonaśīr atithir na prīṇāno hoteva sadma vidhato vi tārīt ||
1.073.02a devo na yaḥ savitā satyamanmā kratvā nipāti vṛjanāni viśvā |
1.073.02c purupraśasto amatir na satya ātmeva śevo didhiṣāyyo bhūt ||
1.073.03a devo na yaḥ pṛthivīṁ viśvadhāyā upakṣeti hitamitro na rājā |
1.073.03c puraḥsadaḥ śarmasado na vīrā anavadyā patijuṣṭeva nārī ||
1.073.04a taṁ tvā naro dama ā nityam iddham agne sacanta kṣitiṣu dhruvāsu |
1.073.04c adhi dyumnaṁ ni dadhur bhūry asmin bhavā viśvāyur dharuṇo rayīṇām ||
1.073.05a vi pṛkṣo agne maghavāno aśyur vi sūrayo dadato viśvam āyuḥ |
1.073.05c sanema vājaṁ samitheṣv aryo bhāgaṁ deveṣu śravase dadhānāḥ ||
1.073.06a ṛtasya hi dhenavo vāvaśānāḥ smadūdhnīḥ pīpayanta dyubhaktāḥ |
1.073.06c parāvataḥ sumatim bhikṣamāṇā vi sindhavaḥ samayā sasrur adrim ||
1.073.07a tve agne sumatim bhikṣamāṇā divi śravo dadhire yajñiyāsaḥ |
1.073.07c naktā ca cakrur uṣasā virūpe kṛṣṇaṁ ca varṇam aruṇaṁ ca saṁ dhuḥ ||
1.073.08a yān rāye martān suṣūdo agne te syāma maghavāno vayaṁ ca |
1.073.08c chāyeva viśvam bhuvanaṁ sisakṣy āpaprivān rodasī antarikṣam ||
1.073.09a arvadbhir agne arvato nṛbhir nṝn vīrair vīrān vanuyāmā tvotāḥ |
1.073.09c īśānāsaḥ pitṛvittasya rāyo vi sūrayaḥ śatahimā no aśyuḥ ||
1.073.10a etā te agna ucathāni vedho juṣṭāni santu manase hṛde ca |
1.073.10c śakema rāyaḥ sudhuro yamaṁ te 'dhi śravo devabhaktaṁ dadhānāḥ ||

1.074.01a upaprayanto adhvaram mantraṁ vocemāgnaye |
1.074.01c āre asme ca śṛṇvate ||
1.074.02a yaḥ snīhitīṣu pūrvyaḥ saṁjagmānāsu kṛṣṭiṣu |
1.074.02c arakṣad dāśuṣe gayam ||
1.074.03a uta bruvantu jantava ud agnir vṛtrahājani |
1.074.03c dhanaṁjayo raṇe-raṇe ||
1.074.04a yasya dūto asi kṣaye veṣi havyāni vītaye |
1.074.04c dasmat kṛṇoṣy adhvaram ||
1.074.05a tam it suhavyam aṅgiraḥ sudevaṁ sahaso yaho |
1.074.05c janā āhuḥ subarhiṣam ||
1.074.06a ā ca vahāsi tām̐ iha devām̐ upa praśastaye |
1.074.06c havyā suścandra vītaye ||
1.074.07a na yor upabdir aśvyaḥ śṛṇve rathasya kac cana |
1.074.07c yad agne yāsi dūtyam ||
1.074.08a tvoto vājy ahrayo 'bhi pūrvasmād aparaḥ |
1.074.08c pra dāśvām̐ agne asthāt ||
1.074.09a uta dyumat suvīryam bṛhad agne vivāsasi |
1.074.09c devebhyo deva dāśuṣe ||

1.075.01a juṣasva saprathastamaṁ vaco devapsarastamam |
1.075.01c havyā juhvāna āsani ||
1.075.02a athā te aṅgirastamāgne vedhastama priyam |
1.075.02c vocema brahma sānasi ||
1.075.03a kas te jāmir janānām agne ko dāśvadhvaraḥ |
1.075.03c ko ha kasminn asi śritaḥ ||
1.075.04a tvaṁ jāmir janānām agne mitro asi priyaḥ |
1.075.04c sakhā sakhibhya īḍyaḥ ||
1.075.05a yajā no mitrāvaruṇā yajā devām̐ ṛtam bṛhat |
1.075.05c agne yakṣi svaṁ damam ||

1.076.01a kā ta upetir manaso varāya bhuvad agne śaṁtamā kā manīṣā |
1.076.01c ko vā yajñaiḥ pari dakṣaṁ ta āpa kena vā te manasā dāśema ||
1.076.02a ehy agna iha hotā ni ṣīdādabdhaḥ su puraetā bhavā naḥ |
1.076.02c avatāṁ tvā rodasī viśvaminve yajā mahe saumanasāya devān ||
1.076.03a pra su viśvān rakṣaso dhakṣy agne bhavā yajñānām abhiśastipāvā |
1.076.03c athā vaha somapatiṁ haribhyām ātithyam asmai cakṛmā sudāvne ||
1.076.04a prajāvatā vacasā vahnir āsā ca huve ni ca satsīha devaiḥ |
1.076.04c veṣi hotram uta potraṁ yajatra bodhi prayantar janitar vasūnām ||
1.076.05a yathā viprasya manuṣo havirbhir devām̐ ayajaḥ kavibhiḥ kaviḥ san |
1.076.05c evā hotaḥ satyatara tvam adyāgne mandrayā juhvā yajasva ||

1.077.01a kathā dāśemāgnaye kāsmai devajuṣṭocyate bhāmine gīḥ |
1.077.01c yo martyeṣv amṛta ṛtāvā hotā yajiṣṭha it kṛṇoti devān ||
1.077.02a yo adhvareṣu śaṁtama ṛtāvā hotā tam ū namobhir ā kṛṇudhvam |
1.077.02c agnir yad ver martāya devān sa cā bodhāti manasā yajāti ||
1.077.03a sa hi kratuḥ sa maryaḥ sa sādhur mitro na bhūd adbhutasya rathīḥ |
1.077.03c tam medheṣu prathamaṁ devayantīr viśa upa bruvate dasmam ārīḥ ||
1.077.04a sa no nṛṇāṁ nṛtamo riśādā agnir giro 'vasā vetu dhītim |
1.077.04c tanā ca ye maghavānaḥ śaviṣṭhā vājaprasūtā iṣayanta manma ||
1.077.05a evāgnir gotamebhir ṛtāvā viprebhir astoṣṭa jātavedāḥ |
1.077.05c sa eṣu dyumnam pīpayat sa vājaṁ sa puṣṭiṁ yāti joṣam ā cikitvān ||

1.078.01a abhi tvā gotamā girā jātavedo vicarṣaṇe |
1.078.01c dyumnair abhi pra ṇonumaḥ ||
1.078.02a tam u tvā gotamo girā rāyaskāmo duvasyati |
1.078.02c dyumnair abhi pra ṇonumaḥ ||
1.078.03a tam u tvā vājasātamam aṅgirasvad dhavāmahe |
1.078.03c dyumnair abhi pra ṇonumaḥ ||
1.078.04a tam u tvā vṛtrahantamaṁ yo dasyūm̐r avadhūnuṣe |
1.078.04c dyumnair abhi pra ṇonumaḥ ||
1.078.05a avocāma rahūgaṇā agnaye madhumad vacaḥ |
1.078.05c dyumnair abhi pra ṇonumaḥ ||

1.079.01a hiraṇyakeśo rajaso visāre 'hir dhunir vāta iva dhrajīmān |
1.079.01c śucibhrājā uṣaso navedā yaśasvatīr apasyuvo na satyāḥ ||
1.079.02a ā te suparṇā aminantam̐ evaiḥ kṛṣṇo nonāva vṛṣabho yadīdam |
1.079.02c śivābhir na smayamānābhir āgāt patanti mihaḥ stanayanty abhrā ||
1.079.03a yad īm ṛtasya payasā piyāno nayann ṛtasya pathibhī rajiṣṭhaiḥ |
1.079.03c aryamā mitro varuṇaḥ parijmā tvacam pṛñcanty uparasya yonau ||
1.079.04a agne vājasya gomata īśānaḥ sahaso yaho |
1.079.04c asme dhehi jātavedo mahi śravaḥ ||
1.079.05a sa idhāno vasuṣ kavir agnir īḻenyo girā |
1.079.05c revad asmabhyam purvaṇīka dīdihi ||
1.079.06a kṣapo rājann uta tmanāgne vastor utoṣasaḥ |
1.079.06c sa tigmajambha rakṣaso daha prati ||
1.079.07a avā no agna ūtibhir gāyatrasya prabharmaṇi |
1.079.07c viśvāsu dhīṣu vandya ||
1.079.08a ā no agne rayim bhara satrāsāhaṁ vareṇyam |
1.079.08c viśvāsu pṛtsu duṣṭaram ||
1.079.09a ā no agne sucetunā rayiṁ viśvāyupoṣasam |
1.079.09c mārḍīkaṁ dhehi jīvase ||
1.079.10a pra pūtās tigmaśociṣe vāco gotamāgnaye |
1.079.10c bharasva sumnayur giraḥ ||
1.079.11a yo no agne 'bhidāsaty anti dūre padīṣṭa saḥ |
1.079.11c asmākam id vṛdhe bhava ||
1.079.12a sahasrākṣo vicarṣaṇir agnī rakṣāṁsi sedhati |
1.079.12c hotā gṛṇīta ukthyaḥ ||

1.080.01a itthā hi soma in made brahmā cakāra vardhanam |
1.080.01c śaviṣṭha vajrinn ojasā pṛthivyā niḥ śaśā ahim arcann anu svarājyam ||
1.080.02a sa tvāmadad vṛṣā madaḥ somaḥ śyenābhṛtaḥ sutaḥ |
1.080.02c yenā vṛtraṁ nir adbhyo jaghantha vajrinn ojasārcann anu svarājyam ||
1.080.03a prehy abhīhi dhṛṣṇuhi na te vajro ni yaṁsate |
1.080.03c indra nṛmṇaṁ hi te śavo hano vṛtraṁ jayā apo 'rcann anu svarājyam ||
1.080.04a nir indra bhūmyā adhi vṛtraṁ jaghantha nir divaḥ |
1.080.04c sṛjā marutvatīr ava jīvadhanyā imā apo 'rcann anu svarājyam ||
1.080.05a indro vṛtrasya dodhataḥ sānuṁ vajreṇa hīḻitaḥ |
1.080.05c abhikramyāva jighnate 'paḥ sarmāya codayann arcann anu svarājyam ||
1.080.06a adhi sānau ni jighnate vajreṇa śataparvaṇā |
1.080.06c mandāna indro andhasaḥ sakhibhyo gātum icchaty arcann anu svarājyam ||
1.080.07a indra tubhyam id adrivo 'nuttaṁ vajrin vīryam |
1.080.07c yad dha tyam māyinam mṛgaṁ tam u tvam māyayāvadhīr arcann anu svarājyam ||
1.080.08a vi te vajrāso asthiran navatiṁ nāvyā anu |
1.080.08c mahat ta indra vīryam bāhvos te balaṁ hitam arcann anu svarājyam ||
1.080.09a sahasraṁ sākam arcata pari ṣṭobhata viṁśatiḥ |
1.080.09c śatainam anv anonavur indrāya brahmodyatam arcann anu svarājyam ||
1.080.10a indro vṛtrasya taviṣīṁ nir ahan sahasā sahaḥ |
1.080.10c mahat tad asya pauṁsyaṁ vṛtraṁ jaghanvām̐ asṛjad arcann anu svarājyam ||
1.080.11a ime cit tava manyave vepete bhiyasā mahī |
1.080.11c yad indra vajrinn ojasā vṛtram marutvām̐ avadhīr arcann anu svarājyam ||
1.080.12a na vepasā na tanyatendraṁ vṛtro vi bībhayat |
1.080.12c abhy enaṁ vajra āyasaḥ sahasrabhṛṣṭir āyatārcann anu svarājyam ||
1.080.13a yad vṛtraṁ tava cāśaniṁ vajreṇa samayodhayaḥ |
1.080.13c ahim indra jighāṁsato divi te badbadhe śavo 'rcann anu svarājyam ||
1.080.14a abhiṣṭane te adrivo yat sthā jagac ca rejate |
1.080.14c tvaṣṭā cit tava manyava indra vevijyate bhiyārcann anu svarājyam ||
1.080.15a nahi nu yād adhīmasīndraṁ ko vīryā paraḥ |
1.080.15c tasmin nṛmṇam uta kratuṁ devā ojāṁsi saṁ dadhur arcann anu svarājyam ||
1.080.16a yām atharvā manuṣ pitā dadhyaṅ dhiyam atnata |
1.080.16c tasmin brahmāṇi pūrvathendra ukthā sam agmatārcann anu svarājyam ||

1.081.01a indro madāya vāvṛdhe śavase vṛtrahā nṛbhiḥ |
1.081.01c tam in mahatsv ājiṣūtem arbhe havāmahe sa vājeṣu pra no 'viṣat ||
1.081.02a asi hi vīra senyo 'si bhūri parādadiḥ |
1.081.02c asi dabhrasya cid vṛdho yajamānāya śikṣasi sunvate bhūri te vasu ||
1.081.03a yad udīrata ājayo dhṛṣṇave dhīyate dhanā |
1.081.03c yukṣvā madacyutā harī kaṁ hanaḥ kaṁ vasau dadho 'smām̐ indra vasau dadhaḥ ||
1.081.04a kratvā mahām̐ anuṣvadham bhīma ā vāvṛdhe śavaḥ |
1.081.04c śriya ṛṣva upākayor ni śiprī harivān dadhe hastayor vajram āyasam ||
1.081.05a ā paprau pārthivaṁ rajo badbadhe rocanā divi |
1.081.05c na tvāvām̐ indra kaś cana na jāto na janiṣyate 'ti viśvaṁ vavakṣitha ||
1.081.06a yo aryo martabhojanam parādadāti dāśuṣe |
1.081.06c indro asmabhyaṁ śikṣatu vi bhajā bhūri te vasu bhakṣīya tava rādhasaḥ ||
1.081.07a made-made hi no dadir yūthā gavām ṛjukratuḥ |
1.081.07c saṁ gṛbhāya purū śatobhayāhastyā vasu śiśīhi rāya ā bhara ||
1.081.08a mādayasva sute sacā śavase śūra rādhase |
1.081.08c vidmā hi tvā purūvasum upa kāmān sasṛjmahe 'thā no 'vitā bhava ||
1.081.09a ete ta indra jantavo viśvam puṣyanti vāryam |
1.081.09c antar hi khyo janānām aryo vedo adāśuṣāṁ teṣāṁ no veda ā bhara ||

1.082.01a upo ṣu śṛṇuhī giro maghavan mātathā iva |
1.082.01c yadā naḥ sūnṛtāvataḥ kara ād arthayāsa id yojā nv indra te harī ||
1.082.02a akṣann amīmadanta hy ava priyā adhūṣata |
1.082.02c astoṣata svabhānavo viprā naviṣṭhayā matī yojā nv indra te harī ||
1.082.03a susaṁdṛśaṁ tvā vayam maghavan vandiṣīmahi |
1.082.03c pra nūnam pūrṇavandhuraḥ stuto yāhi vaśām̐ anu yojā nv indra te harī ||
1.082.04a sa ghā taṁ vṛṣaṇaṁ ratham adhi tiṣṭhāti govidam |
1.082.04c yaḥ pātraṁ hāriyojanam pūrṇam indra ciketati yojā nv indra te harī ||
1.082.05a yuktas te astu dakṣiṇa uta savyaḥ śatakrato |
1.082.05c tena jāyām upa priyām mandāno yāhy andhaso yojā nv indra te harī ||
1.082.06a yunajmi te brahmaṇā keśinā harī upa pra yāhi dadhiṣe gabhastyoḥ |
1.082.06c ut tvā sutāso rabhasā amandiṣuḥ pūṣaṇvān vajrin sam u patnyāmadaḥ ||

1.083.01a aśvāvati prathamo goṣu gacchati suprāvīr indra martyas tavotibhiḥ |
1.083.01c tam it pṛṇakṣi vasunā bhavīyasā sindhum āpo yathābhito vicetasaḥ ||
1.083.02a āpo na devīr upa yanti hotriyam avaḥ paśyanti vitataṁ yathā rajaḥ |
1.083.02c prācair devāsaḥ pra ṇayanti devayum brahmapriyaṁ joṣayante varā iva ||
1.083.03a adhi dvayor adadhā ukthyaṁ vaco yatasrucā mithunā yā saparyataḥ |
1.083.03c asaṁyatto vrate te kṣeti puṣyati bhadrā śaktir yajamānāya sunvate ||
1.083.04a ād aṅgirāḥ prathamaṁ dadhire vaya iddhāgnayaḥ śamyā ye sukṛtyayā |
1.083.04c sarvam paṇeḥ sam avindanta bhojanam aśvāvantaṁ gomantam ā paśuṁ naraḥ ||
1.083.05a yajñair atharvā prathamaḥ pathas tate tataḥ sūryo vratapā vena ājani |
1.083.05c ā gā ājad uśanā kāvyaḥ sacā yamasya jātam amṛtaṁ yajāmahe ||
1.083.06a barhir vā yat svapatyāya vṛjyate 'rko vā ślokam āghoṣate divi |
1.083.06c grāvā yatra vadati kārur ukthyas tasyed indro abhipitveṣu raṇyati ||

1.084.01a asāvi soma indra te śaviṣṭha dhṛṣṇav ā gahi |
1.084.01c ā tvā pṛṇaktv indriyaṁ rajaḥ sūryo na raśmibhiḥ ||
1.084.02a indram id dharī vahato 'pratidhṛṣṭaśavasam |
1.084.02c ṛṣīṇāṁ ca stutīr upa yajñaṁ ca mānuṣāṇām ||
1.084.03a ā tiṣṭha vṛtrahan rathaṁ yuktā te brahmaṇā harī |
1.084.03c arvācīnaṁ su te mano grāvā kṛṇotu vagnunā ||
1.084.04a imam indra sutam piba jyeṣṭham amartyam madam |
1.084.04c śukrasya tvābhy akṣaran dhārā ṛtasya sādane ||
1.084.05a indrāya nūnam arcatokthāni ca bravītana |
1.084.05c sutā amatsur indavo jyeṣṭhaṁ namasyatā sahaḥ ||
1.084.06a nakiṣ ṭvad rathītaro harī yad indra yacchase |
1.084.06c nakiṣ ṭvānu majmanā nakiḥ svaśva ānaśe ||
1.084.07a ya eka id vidayate vasu martāya dāśuṣe |
1.084.07c īśāno apratiṣkuta indro aṅga ||
1.084.08a kadā martam arādhasam padā kṣumpam iva sphurat |
1.084.08c kadā naḥ śuśravad gira indro aṅga ||
1.084.09a yaś cid dhi tvā bahubhya ā sutāvām̐ āvivāsati |
1.084.09c ugraṁ tat patyate śava indro aṅga ||
1.084.10a svādor itthā viṣūvato madhvaḥ pibanti gauryaḥ |
1.084.10c yā indreṇa sayāvarīr vṛṣṇā madanti śobhase vasvīr anu svarājyam ||
1.084.11a tā asya pṛśanāyuvaḥ somaṁ śrīṇanti pṛśnayaḥ |
1.084.11c priyā indrasya dhenavo vajraṁ hinvanti sāyakaṁ vasvīr anu svarājyam ||
1.084.12a tā asya namasā sahaḥ saparyanti pracetasaḥ |
1.084.12c vratāny asya saścire purūṇi pūrvacittaye vasvīr anu svarājyam ||
1.084.13a indro dadhīco asthabhir vṛtrāṇy apratiṣkutaḥ |
1.084.13c jaghāna navatīr nava ||
1.084.14a icchann aśvasya yac chiraḥ parvateṣv apaśritam |
1.084.14c tad vidac charyaṇāvati ||
1.084.15a atrāha gor amanvata nāma tvaṣṭur apīcyam |
1.084.15c itthā candramaso gṛhe ||
1.084.16a ko adya yuṅkte dhuri gā ṛtasya śimīvato bhāmino durhṛṇāyūn |
1.084.16c āsanniṣūn hṛtsvaso mayobhūn ya eṣām bhṛtyām ṛṇadhat sa jīvāt ||
1.084.17a ka īṣate tujyate ko bibhāya ko maṁsate santam indraṁ ko anti |
1.084.17c kas tokāya ka ibhāyota rāye 'dhi bravat tanve ko janāya ||
1.084.18a ko agnim īṭṭe haviṣā ghṛtena srucā yajātā ṛtubhir dhruvebhiḥ |
1.084.18c kasmai devā ā vahān āśu homa ko maṁsate vītihotraḥ sudevaḥ ||
1.084.19a tvam aṅga pra śaṁsiṣo devaḥ śaviṣṭha martyam |
1.084.19c na tvad anyo maghavann asti marḍitendra bravīmi te vacaḥ ||
1.084.20a mā te rādhāṁsi mā ta ūtayo vaso 'smān kadā canā dabhan |
1.084.20c viśvā ca na upamimīhi mānuṣa vasūni carṣaṇibhya ā ||

1.085.01a pra ye śumbhante janayo na saptayo yāman rudrasya sūnavaḥ sudaṁsasaḥ |
1.085.01c rodasī hi marutaś cakrire vṛdhe madanti vīrā vidatheṣu ghṛṣvayaḥ ||
1.085.02a ta ukṣitāso mahimānam āśata divi rudrāso adhi cakrire sadaḥ |
1.085.02c arcanto arkaṁ janayanta indriyam adhi śriyo dadhire pṛśnimātaraḥ ||
1.085.03a gomātaro yac chubhayante añjibhis tanūṣu śubhrā dadhire virukmataḥ |
1.085.03c bādhante viśvam abhimātinam apa vartmāny eṣām anu rīyate ghṛtam ||
1.085.04a vi ye bhrājante sumakhāsa ṛṣṭibhiḥ pracyāvayanto acyutā cid ojasā |
1.085.04c manojuvo yan maruto ratheṣv ā vṛṣavrātāsaḥ pṛṣatīr ayugdhvam ||
1.085.05a pra yad ratheṣu pṛṣatīr ayugdhvaṁ vāje adrim maruto raṁhayantaḥ |
1.085.05c utāruṣasya vi ṣyanti dhārāś carmevodabhir vy undanti bhūma ||
1.085.06a ā vo vahantu saptayo raghuṣyado raghupatvānaḥ pra jigāta bāhubhiḥ |
1.085.06c sīdatā barhir uru vaḥ sadas kṛtam mādayadhvam maruto madhvo andhasaḥ ||
1.085.07a te 'vardhanta svatavaso mahitvanā nākaṁ tasthur uru cakrire sadaḥ |
1.085.07c viṣṇur yad dhāvad vṛṣaṇam madacyutaṁ vayo na sīdann adhi barhiṣi priye ||
1.085.08a śūrā ived yuyudhayo na jagmayaḥ śravasyavo na pṛtanāsu yetire |
1.085.08c bhayante viśvā bhuvanā marudbhyo rājāna iva tveṣasaṁdṛśo naraḥ ||
1.085.09a tvaṣṭā yad vajraṁ sukṛtaṁ hiraṇyayaṁ sahasrabhṛṣṭiṁ svapā avartayat |
1.085.09c dhatta indro nary apāṁsi kartave 'han vṛtraṁ nir apām aubjad arṇavam ||
1.085.10a ūrdhvaṁ nunudre 'vataṁ ta ojasā dādṛhāṇaṁ cid bibhidur vi parvatam |
1.085.10c dhamanto vāṇam marutaḥ sudānavo made somasya raṇyāni cakrire ||
1.085.11a jihmaṁ nunudre 'vataṁ tayā diśāsiñcann utsaṁ gotamāya tṛṣṇaje |
1.085.11c ā gacchantīm avasā citrabhānavaḥ kāmaṁ viprasya tarpayanta dhāmabhiḥ ||
1.085.12a yā vaḥ śarma śaśamānāya santi tridhātūni dāśuṣe yacchatādhi |
1.085.12c asmabhyaṁ tāni maruto vi yanta rayiṁ no dhatta vṛṣaṇaḥ suvīram ||

1.086.01a maruto yasya hi kṣaye pāthā divo vimahasaḥ |
1.086.01c sa sugopātamo janaḥ ||
1.086.02a yajñair vā yajñavāhaso viprasya vā matīnām |
1.086.02c marutaḥ śṛṇutā havam ||
1.086.03a uta vā yasya vājino 'nu vipram atakṣata |
1.086.03c sa gantā gomati vraje ||
1.086.04a asya vīrasya barhiṣi sutaḥ somo diviṣṭiṣu |
1.086.04c uktham madaś ca śasyate ||
1.086.05a asya śroṣantv ā bhuvo viśvā yaś carṣaṇīr abhi |
1.086.05c sūraṁ cit sasruṣīr iṣaḥ ||
1.086.06a pūrvībhir hi dadāśima śaradbhir maruto vayam |
1.086.06c avobhiś carṣaṇīnām ||
1.086.07a subhagaḥ sa prayajyavo maruto astu martyaḥ |
1.086.07c yasya prayāṁsi parṣatha ||
1.086.08a śaśamānasya vā naraḥ svedasya satyaśavasaḥ |
1.086.08c vidā kāmasya venataḥ ||
1.086.09a yūyaṁ tat satyaśavasa āviṣ karta mahitvanā |
1.086.09c vidhyatā vidyutā rakṣaḥ ||
1.086.10a gūhatā guhyaṁ tamo vi yāta viśvam atriṇam |
1.086.10c jyotiṣ kartā yad uśmasi ||

1.087.01a pratvakṣasaḥ pratavaso virapśino 'nānatā avithurā ṛjīṣiṇaḥ |
1.087.01c juṣṭatamāso nṛtamāso añjibhir vy ānajre ke cid usrā iva stṛbhiḥ ||
1.087.02a upahvareṣu yad acidhvaṁ yayiṁ vaya iva marutaḥ kena cit pathā |
1.087.02c ścotanti kośā upa vo ratheṣv ā ghṛtam ukṣatā madhuvarṇam arcate ||
1.087.03a praiṣām ajmeṣu vithureva rejate bhūmir yāmeṣu yad dha yuñjate śubhe |
1.087.03c te krīḻayo dhunayo bhrājadṛṣṭayaḥ svayam mahitvam panayanta dhūtayaḥ ||
1.087.04a sa hi svasṛt pṛṣadaśvo yuvā gaṇo 'yā īśānas taviṣībhir āvṛtaḥ |
1.087.04c asi satya ṛṇayāvānedyo 'syā dhiyaḥ prāvitāthā vṛṣā gaṇaḥ ||
1.087.05a pituḥ pratnasya janmanā vadāmasi somasya jihvā pra jigāti cakṣasā |
1.087.05c yad īm indraṁ śamy ṛkvāṇa āśatād in nāmāni yajñiyāni dadhire ||
1.087.06a śriyase kam bhānubhiḥ sam mimikṣire te raśmibhis ta ṛkvabhiḥ sukhādayaḥ |
1.087.06c te vāśīmanta iṣmiṇo abhīravo vidre priyasya mārutasya dhāmnaḥ ||

1.088.01a ā vidyunmadbhir marutaḥ svarkai rathebhir yāta ṛṣṭimadbhir aśvaparṇaiḥ |
1.088.01c ā varṣiṣṭhayā na iṣā vayo na paptatā sumāyāḥ ||
1.088.02a te 'ruṇebhir varam ā piśaṅgaiḥ śubhe kaṁ yānti rathatūrbhir aśvaiḥ |
1.088.02c rukmo na citraḥ svadhitīvān pavyā rathasya jaṅghananta bhūma ||
1.088.03a śriye kaṁ vo adhi tanūṣu vāśīr medhā vanā na kṛṇavanta ūrdhvā |
1.088.03c yuṣmabhyaṁ kam marutaḥ sujātās tuvidyumnāso dhanayante adrim ||
1.088.04a ahāni gṛdhrāḥ pary ā va āgur imāṁ dhiyaṁ vārkāryāṁ ca devīm |
1.088.04c brahma kṛṇvanto gotamāso arkair ūrdhvaṁ nunudra utsadhim pibadhyai ||
1.088.05a etat tyan na yojanam aceti sasvar ha yan maruto gotamo vaḥ |
1.088.05c paśyan hiraṇyacakrān ayodaṁṣṭrān vidhāvato varāhūn ||
1.088.06a eṣā syā vo maruto 'nubhartrī prati ṣṭobhati vāghato na vāṇī |
1.088.06c astobhayad vṛthāsām anu svadhāṁ gabhastyoḥ ||

1.089.01a ā no bhadrāḥ kratavo yantu viśvato 'dabdhāso aparītāsa udbhidaḥ |
1.089.01c devā no yathā sadam id vṛdhe asann aprāyuvo rakṣitāro dive-dive ||
1.089.02a devānām bhadrā sumatir ṛjūyatāṁ devānāṁ rātir abhi no ni vartatām |
1.089.02c devānāṁ sakhyam upa sedimā vayaṁ devā na āyuḥ pra tirantu jīvase ||
1.089.03a tān pūrvayā nividā hūmahe vayam bhagam mitram aditiṁ dakṣam asridham |
1.089.03c aryamaṇaṁ varuṇaṁ somam aśvinā sarasvatī naḥ subhagā mayas karat ||
1.089.04a tan no vāto mayobhu vātu bheṣajaṁ tan mātā pṛthivī tat pitā dyauḥ |
1.089.04c tad grāvāṇaḥ somasuto mayobhuvas tad aśvinā śṛṇutaṁ dhiṣṇyā yuvam ||
1.089.05a tam īśānaṁ jagatas tasthuṣas patiṁ dhiyaṁjinvam avase hūmahe vayam |
1.089.05c pūṣā no yathā vedasām asad vṛdhe rakṣitā pāyur adabdhaḥ svastaye ||
1.089.06a svasti na indro vṛddhaśravāḥ svasti naḥ pūṣā viśvavedāḥ |
1.089.06c svasti nas tārkṣyo ariṣṭanemiḥ svasti no bṛhaspatir dadhātu ||
1.089.07a pṛṣadaśvā marutaḥ pṛśnimātaraḥ śubhaṁyāvāno vidatheṣu jagmayaḥ |
1.089.07c agnijihvā manavaḥ sūracakṣaso viśve no devā avasā gamann iha ||
1.089.08a bhadraṁ karṇebhiḥ śṛṇuyāma devā bhadram paśyemākṣabhir yajatrāḥ |
1.089.08c sthirair aṅgais tuṣṭuvāṁsas tanūbhir vy aśema devahitaṁ yad āyuḥ ||
1.089.09a śatam in nu śarado anti devā yatrā naś cakrā jarasaṁ tanūnām |
1.089.09c putrāso yatra pitaro bhavanti mā no madhyā rīriṣatāyur gantoḥ ||
1.089.10a aditir dyaur aditir antarikṣam aditir mātā sa pitā sa putraḥ |
1.089.10c viśve devā aditiḥ pañca janā aditir jātam aditir janitvam ||

1.090.01a ṛjunītī no varuṇo mitro nayatu vidvān |
1.090.01c aryamā devaiḥ sajoṣāḥ ||
1.090.02a te hi vasvo vasavānās te apramūrā mahobhiḥ |
1.090.02c vratā rakṣante viśvāhā ||
1.090.03a te asmabhyaṁ śarma yaṁsann amṛtā martyebhyaḥ |
1.090.03c bādhamānā apa dviṣaḥ ||
1.090.04a vi naḥ pathaḥ suvitāya ciyantv indro marutaḥ |
1.090.04c pūṣā bhago vandyāsaḥ ||
1.090.05a uta no dhiyo goagrāḥ pūṣan viṣṇav evayāvaḥ |
1.090.05c kartā naḥ svastimataḥ ||
1.090.06a madhu vātā ṛtāyate madhu kṣaranti sindhavaḥ |
1.090.06c mādhvīr naḥ santv oṣadhīḥ ||
1.090.07a madhu naktam utoṣaso madhumat pārthivaṁ rajaḥ |
1.090.07c madhu dyaur astu naḥ pitā ||
1.090.08a madhumān no vanaspatir madhumām̐ astu sūryaḥ |
1.090.08c mādhvīr gāvo bhavantu naḥ ||
1.090.09a śaṁ no mitraḥ śaṁ varuṇaḥ śaṁ no bhavatv aryamā |
1.090.09c śaṁ na indro bṛhaspatiḥ śaṁ no viṣṇur urukramaḥ ||

1.091.01a tvaṁ soma pra cikito manīṣā tvaṁ rajiṣṭham anu neṣi panthām |
1.091.01c tava praṇītī pitaro na indo deveṣu ratnam abhajanta dhīrāḥ ||
1.091.02a tvaṁ soma kratubhiḥ sukratur bhūs tvaṁ dakṣaiḥ sudakṣo viśvavedāḥ |
1.091.02c tvaṁ vṛṣā vṛṣatvebhir mahitvā dyumnebhir dyumny abhavo nṛcakṣāḥ ||
1.091.03a rājño nu te varuṇasya vratāni bṛhad gabhīraṁ tava soma dhāma |
1.091.03c śuciṣ ṭvam asi priyo na mitro dakṣāyyo aryamevāsi soma ||
1.091.04a yā te dhāmāni divi yā pṛthivyāṁ yā parvateṣv oṣadhīṣv apsu |
1.091.04c tebhir no viśvaiḥ sumanā aheḻan rājan soma prati havyā gṛbhāya ||
1.091.05a tvaṁ somāsi satpatis tvaṁ rājota vṛtrahā |
1.091.05c tvam bhadro asi kratuḥ ||
1.091.06a tvaṁ ca soma no vaśo jīvātuṁ na marāmahe |
1.091.06c priyastotro vanaspatiḥ ||
1.091.07a tvaṁ soma mahe bhagaṁ tvaṁ yūna ṛtāyate |
1.091.07c dakṣaṁ dadhāsi jīvase ||
1.091.08a tvaṁ naḥ soma viśvato rakṣā rājann aghāyataḥ |
1.091.08c na riṣyet tvāvataḥ sakhā ||
1.091.09a soma yās te mayobhuva ūtayaḥ santi dāśuṣe |
1.091.09c tābhir no 'vitā bhava ||
1.091.10a imaṁ yajñam idaṁ vaco jujuṣāṇa upāgahi |
1.091.10c soma tvaṁ no vṛdhe bhava ||
1.091.11a soma gīrbhiṣ ṭvā vayaṁ vardhayāmo vacovidaḥ |
1.091.11c sumṛḻīko na ā viśa ||
1.091.12a gayasphāno amīvahā vasuvit puṣṭivardhanaḥ |
1.091.12c sumitraḥ soma no bhava ||
1.091.13a soma rārandhi no hṛdi gāvo na yavaseṣv ā |
1.091.13c marya iva sva okye ||
1.091.14a yaḥ soma sakhye tava rāraṇad deva martyaḥ |
1.091.14c taṁ dakṣaḥ sacate kaviḥ ||
1.091.15a uruṣyā ṇo abhiśasteḥ soma ni pāhy aṁhasaḥ |
1.091.15c sakhā suśeva edhi naḥ ||
1.091.16a ā pyāyasva sam etu te viśvataḥ soma vṛṣṇyam |
1.091.16c bhavā vājasya saṁgathe ||
1.091.17a ā pyāyasva madintama soma viśvebhir aṁśubhiḥ |
1.091.17c bhavā naḥ suśravastamaḥ sakhā vṛdhe ||
1.091.18a saṁ te payāṁsi sam u yantu vājāḥ saṁ vṛṣṇyāny abhimātiṣāhaḥ |
1.091.18c āpyāyamāno amṛtāya soma divi śravāṁsy uttamāni dhiṣva ||
1.091.19a yā te dhāmāni haviṣā yajanti tā te viśvā paribhūr astu yajñam |
1.091.19c gayasphānaḥ prataraṇaḥ suvīro 'vīrahā pra carā soma duryān ||
1.091.20a somo dhenuṁ somo arvantam āśuṁ somo vīraṁ karmaṇyaṁ dadāti |
1.091.20c sādanyaṁ vidathyaṁ sabheyam pitṛśravaṇaṁ yo dadāśad asmai ||
1.091.21a aṣāḻhaṁ yutsu pṛtanāsu papriṁ svarṣām apsāṁ vṛjanasya gopām |
1.091.21c bhareṣujāṁ sukṣitiṁ suśravasaṁ jayantaṁ tvām anu madema soma ||
1.091.22a tvam imā oṣadhīḥ soma viśvās tvam apo ajanayas tvaṁ gāḥ |
1.091.22c tvam ā tatanthorv antarikṣaṁ tvaṁ jyotiṣā vi tamo vavartha ||
1.091.23a devena no manasā deva soma rāyo bhāgaṁ sahasāvann abhi yudhya |
1.091.23c mā tvā tanad īśiṣe vīryasyobhayebhyaḥ pra cikitsā gaviṣṭau ||

1.092.01a etā u tyā uṣasaḥ ketum akrata pūrve ardhe rajaso bhānum añjate |
1.092.01c niṣkṛṇvānā āyudhānīva dhṛṣṇavaḥ prati gāvo 'ruṣīr yanti mātaraḥ ||
1.092.02a ud apaptann aruṇā bhānavo vṛthā svāyujo aruṣīr gā ayukṣata |
1.092.02c akrann uṣāso vayunāni pūrvathā ruśantam bhānum aruṣīr aśiśrayuḥ ||
1.092.03a arcanti nārīr apaso na viṣṭibhiḥ samānena yojanenā parāvataḥ |
1.092.03c iṣaṁ vahantīḥ sukṛte sudānave viśved aha yajamānāya sunvate ||
1.092.04a adhi peśāṁsi vapate nṛtūr ivāporṇute vakṣa usreva barjaham |
1.092.04c jyotir viśvasmai bhuvanāya kṛṇvatī gāvo na vrajaṁ vy uṣā āvar tamaḥ ||
1.092.05a praty arcī ruśad asyā adarśi vi tiṣṭhate bādhate kṛṣṇam abhvam |
1.092.05c svaruṁ na peśo vidatheṣv añjañ citraṁ divo duhitā bhānum aśret ||
1.092.06a atāriṣma tamasas pāram asyoṣā ucchantī vayunā kṛṇoti |
1.092.06c śriye chando na smayate vibhātī supratīkā saumanasāyājīgaḥ ||
1.092.07a bhāsvatī netrī sūnṛtānāṁ divaḥ stave duhitā gotamebhiḥ |
1.092.07c prajāvato nṛvato aśvabudhyān uṣo goagrām̐ upa māsi vājān ||
1.092.08a uṣas tam aśyāṁ yaśasaṁ suvīraṁ dāsapravargaṁ rayim aśvabudhyam |
1.092.08c sudaṁsasā śravasā yā vibhāsi vājaprasūtā subhage bṛhantam ||
1.092.09a viśvāni devī bhuvanābhicakṣyā pratīcī cakṣur urviyā vi bhāti |
1.092.09c viśvaṁ jīvaṁ carase bodhayantī viśvasya vācam avidan manāyoḥ ||
1.092.10a punaḥ-punar jāyamānā purāṇī samānaṁ varṇam abhi śumbhamānā |
1.092.10c śvaghnīva kṛtnur vija āminānā martasya devī jarayanty āyuḥ ||
1.092.11a vyūrṇvatī divo antām̐ abodhy apa svasāraṁ sanutar yuyoti |
1.092.11c praminatī manuṣyā yugāni yoṣā jārasya cakṣasā vi bhāti ||
1.092.12a paśūn na citrā subhagā prathānā sindhur na kṣoda urviyā vy aśvait |
1.092.12c aminatī daivyāni vratāni sūryasya ceti raśmibhir dṛśānā ||
1.092.13a uṣas tac citram ā bharāsmabhyaṁ vājinīvati |
1.092.13c yena tokaṁ ca tanayaṁ ca dhāmahe ||
1.092.14a uṣo adyeha gomaty aśvāvati vibhāvari |
1.092.14c revad asme vy uccha sūnṛtāvati ||
1.092.15a yukṣvā hi vājinīvaty aśvām̐ adyāruṇām̐ uṣaḥ |
1.092.15c athā no viśvā saubhagāny ā vaha ||
1.092.16a aśvinā vartir asmad ā gomad dasrā hiraṇyavat |
1.092.16c arvāg rathaṁ samanasā ni yacchatam ||
1.092.17a yāv itthā ślokam ā divo jyotir janāya cakrathuḥ |
1.092.17c ā na ūrjaṁ vahatam aśvinā yuvam ||
1.092.18a eha devā mayobhuvā dasrā hiraṇyavartanī |
1.092.18c uṣarbudho vahantu somapītaye ||

1.093.01a agnīṣomāv imaṁ su me śṛṇutaṁ vṛṣaṇā havam |
1.093.01c prati sūktāni haryatam bhavataṁ dāśuṣe mayaḥ ||
1.093.02a agnīṣomā yo adya vām idaṁ vacaḥ saparyati |
1.093.02c tasmai dhattaṁ suvīryaṁ gavām poṣaṁ svaśvyam ||
1.093.03a agnīṣomā ya āhutiṁ yo vāṁ dāśād dhaviṣkṛtim |
1.093.03c sa prajayā suvīryaṁ viśvam āyur vy aśnavat ||
1.093.04a agnīṣomā ceti tad vīryaṁ vāṁ yad amuṣṇītam avasam paṇiṁ gāḥ |
1.093.04c avātiratam bṛsayasya śeṣo 'vindataṁ jyotir ekam bahubhyaḥ ||
1.093.05a yuvam etāni divi rocanāny agniś ca soma sakratū adhattam |
1.093.05c yuvaṁ sindhūm̐r abhiśaster avadyād agnīṣomāv amuñcataṁ gṛbhītān ||
1.093.06a ānyaṁ divo mātariśvā jabhārāmathnād anyam pari śyeno adreḥ |
1.093.06c agnīṣomā brahmaṇā vāvṛdhānoruṁ yajñāya cakrathur u lokam ||
1.093.07a agnīṣomā haviṣaḥ prasthitasya vītaṁ haryataṁ vṛṣaṇā juṣethām |
1.093.07c suśarmāṇā svavasā hi bhūtam athā dhattaṁ yajamānāya śaṁ yoḥ ||
1.093.08a yo agnīṣomā haviṣā saparyād devadrīcā manasā yo ghṛtena |
1.093.08c tasya vrataṁ rakṣatam pātam aṁhaso viśe janāya mahi śarma yacchatam ||
1.093.09a agnīṣomā savedasā sahūtī vanataṁ giraḥ |
1.093.09c saṁ devatrā babhūvathuḥ ||
1.093.10a agnīṣomāv anena vāṁ yo vāṁ ghṛtena dāśati |
1.093.10c tasmai dīdayatam bṛhat ||
1.093.11a agnīṣomāv imāni no yuvaṁ havyā jujoṣatam |
1.093.11c ā yātam upa naḥ sacā ||
1.093.12a agnīṣomā pipṛtam arvato na ā pyāyantām usriyā havyasūdaḥ |
1.093.12c asme balāni maghavatsu dhattaṁ kṛṇutaṁ no adhvaraṁ śruṣṭimantam ||

1.094.01a imaṁ stomam arhate jātavedase ratham iva sam mahemā manīṣayā |
1.094.01c bhadrā hi naḥ pramatir asya saṁsady agne sakhye mā riṣāmā vayaṁ tava ||
1.094.02a yasmai tvam āyajase sa sādhaty anarvā kṣeti dadhate suvīryam |
1.094.02c sa tūtāva nainam aśnoty aṁhatir agne sakhye mā riṣāmā vayaṁ tava ||
1.094.03a śakema tvā samidhaṁ sādhayā dhiyas tve devā havir adanty āhutam |
1.094.03c tvam ādityām̐ ā vaha tān hy uśmasy agne sakhye mā riṣāmā vayaṁ tava ||
1.094.04a bharāmedhmaṁ kṛṇavāmā havīṁṣi te citayantaḥ parvaṇā-parvaṇā vayam |
1.094.04c jīvātave prataraṁ sādhayā dhiyo 'gne sakhye mā riṣāmā vayaṁ tava ||
1.094.05a viśāṁ gopā asya caranti jantavo dvipac ca yad uta catuṣpad aktubhiḥ |
1.094.05c citraḥ praketa uṣaso mahām̐ asy agne sakhye mā riṣāmā vayaṁ tava ||
1.094.06a tvam adhvaryur uta hotāsi pūrvyaḥ praśāstā potā januṣā purohitaḥ |
1.094.06c viśvā vidvām̐ ārtvijyā dhīra puṣyasy agne sakhye mā riṣāmā vayaṁ tava ||
1.094.07a yo viśvataḥ supratīkaḥ sadṛṅṅ asi dūre cit san taḻid ivāti rocase |
1.094.07c rātryāś cid andho ati deva paśyasy agne sakhye mā riṣāmā vayaṁ tava ||
1.094.08a pūrvo devā bhavatu sunvato ratho 'smākaṁ śaṁso abhy astu dūḍhyaḥ |
1.094.08c tad ā jānītota puṣyatā vaco 'gne sakhye mā riṣāmā vayaṁ tava ||
1.094.09a vadhair duḥśaṁsām̐ apa dūḍhyo jahi dūre vā ye anti vā ke cid atriṇaḥ |
1.094.09c athā yajñāya gṛṇate sugaṁ kṛdhy agne sakhye mā riṣāmā vayaṁ tava ||
1.094.10a yad ayukthā aruṣā rohitā rathe vātajūtā vṛṣabhasyeva te ravaḥ |
1.094.10c ād invasi vanino dhūmaketunāgne sakhye mā riṣāmā vayaṁ tava ||
1.094.11a adha svanād uta bibhyuḥ patatriṇo drapsā yat te yavasādo vy asthiran |
1.094.11c sugaṁ tat te tāvakebhyo rathebhyo 'gne sakhye mā riṣāmā vayaṁ tava ||
1.094.12a ayam mitrasya varuṇasya dhāyase 'vayātām marutāṁ heḻo adbhutaḥ |
1.094.12c mṛḻā su no bhūtv eṣām manaḥ punar agne sakhye mā riṣāmā vayaṁ tava ||
1.094.13a devo devānām asi mitro adbhuto vasur vasūnām asi cārur adhvare |
1.094.13c śarman syāma tava saprathastame 'gne sakhye mā riṣāmā vayaṁ tava ||
1.094.14a tat te bhadraṁ yat samiddhaḥ sve dame somāhuto jarase mṛḻayattamaḥ |
1.094.14c dadhāsi ratnaṁ draviṇaṁ ca dāśuṣe 'gne sakhye mā riṣāmā vayaṁ tava ||
1.094.15a yasmai tvaṁ sudraviṇo dadāśo 'nāgāstvam adite sarvatātā |
1.094.15c yam bhadreṇa śavasā codayāsi prajāvatā rādhasā te syāma ||
1.094.16a sa tvam agne saubhagatvasya vidvān asmākam āyuḥ pra tireha deva |
1.094.16c tan no mitro varuṇo māmahantām aditiḥ sindhuḥ pṛthivī uta dyauḥ ||

1.095.01a dve virūpe carataḥ svarthe anyānyā vatsam upa dhāpayete |
1.095.01c harir anyasyām bhavati svadhāvāñ chukro anyasyāṁ dadṛśe suvarcāḥ ||
1.095.02a daśemaṁ tvaṣṭur janayanta garbham atandrāso yuvatayo vibhṛtram |
1.095.02c tigmānīkaṁ svayaśasaṁ janeṣu virocamānam pari ṣīṁ nayanti ||
1.095.03a trīṇi jānā pari bhūṣanty asya samudra ekaṁ divy ekam apsu |
1.095.03c pūrvām anu pra diśam pārthivānām ṛtūn praśāsad vi dadhāv anuṣṭhu ||
1.095.04a ka imaṁ vo niṇyam ā ciketa vatso mātṝr janayata svadhābhiḥ |
1.095.04c bahvīnāṁ garbho apasām upasthān mahān kavir niś carati svadhāvān ||
1.095.05a āviṣṭyo vardhate cārur āsu jihmānām ūrdhvaḥ svayaśā upasthe |
1.095.05c ubhe tvaṣṭur bibhyatur jāyamānāt pratīcī siṁham prati joṣayete ||
1.095.06a ubhe bhadre joṣayete na mene gāvo na vāśrā upa tasthur evaiḥ |
1.095.06c sa dakṣāṇāṁ dakṣapatir babhūvāñjanti yaṁ dakṣiṇato havirbhiḥ ||
1.095.07a ud yaṁyamīti saviteva bāhū ubhe sicau yatate bhīma ṛñjan |
1.095.07c uc chukram atkam ajate simasmān navā mātṛbhyo vasanā jahāti ||
1.095.08a tveṣaṁ rūpaṁ kṛṇuta uttaraṁ yat sampṛñcānaḥ sadane gobhir adbhiḥ |
1.095.08c kavir budhnam pari marmṛjyate dhīḥ sā devatātā samitir babhūva ||
1.095.09a uru te jrayaḥ pary eti budhnaṁ virocamānam mahiṣasya dhāma |
1.095.09c viśvebhir agne svayaśobhir iddho 'dabdhebhiḥ pāyubhiḥ pāhy asmān ||
1.095.10a dhanvan srotaḥ kṛṇute gātum ūrmiṁ śukrair ūrmibhir abhi nakṣati kṣām |
1.095.10c viśvā sanāni jaṭhareṣu dhatte 'ntar navāsu carati prasūṣu ||
1.095.11a evā no agne samidhā vṛdhāno revat pāvaka śravase vi bhāhi |
1.095.11c tan no mitro varuṇo māmahantām aditiḥ sindhuḥ pṛthivī uta dyauḥ ||

1.096.01a sa pratnathā sahasā jāyamānaḥ sadyaḥ kāvyāni baḻ adhatta viśvā |
1.096.01c āpaś ca mitraṁ dhiṣaṇā ca sādhan devā agniṁ dhārayan draviṇodām ||
1.096.02a sa pūrvayā nividā kavyatāyor imāḥ prajā ajanayan manūnām |
1.096.02c vivasvatā cakṣasā dyām apaś ca devā agniṁ dhārayan draviṇodām ||
1.096.03a tam īḻata prathamaṁ yajñasādhaṁ viśa ārīr āhutam ṛñjasānam |
1.096.03c ūrjaḥ putram bharataṁ sṛpradānuṁ devā agniṁ dhārayan draviṇodām ||
1.096.04a sa mātariśvā puruvārapuṣṭir vidad gātuṁ tanayāya svarvit |
1.096.04c viśāṁ gopā janitā rodasyor devā agniṁ dhārayan draviṇodām ||
1.096.05a naktoṣāsā varṇam āmemyāne dhāpayete śiśum ekaṁ samīcī |
1.096.05c dyāvākṣāmā rukmo antar vi bhāti devā agniṁ dhārayan draviṇodām ||
1.096.06a rāyo budhnaḥ saṁgamano vasūnāṁ yajñasya ketur manmasādhano veḥ |
1.096.06c amṛtatvaṁ rakṣamāṇāsa enaṁ devā agniṁ dhārayan draviṇodām ||
1.096.07a nū ca purā ca sadanaṁ rayīṇāṁ jātasya ca jāyamānasya ca kṣām |
1.096.07c sataś ca gopām bhavataś ca bhūrer devā agniṁ dhārayan draviṇodām ||
1.096.08a draviṇodā draviṇasas turasya draviṇodāḥ sanarasya pra yaṁsat |
1.096.08c draviṇodā vīravatīm iṣaṁ no draviṇodā rāsate dīrgham āyuḥ ||
1.096.09a evā no agne samidhā vṛdhāno revat pāvaka śravase vi bhāhi |
1.096.09c tan no mitro varuṇo māmahantām aditiḥ sindhuḥ pṛthivī uta dyauḥ ||

1.097.01a apa naḥ śośucad agham agne śuśugdhy ā rayim |
1.097.01c apa naḥ śośucad agham ||
1.097.02a sukṣetriyā sugātuyā vasūyā ca yajāmahe |
1.097.02c apa naḥ śośucad agham ||
1.097.03a pra yad bhandiṣṭha eṣām prāsmākāsaś ca sūrayaḥ |
1.097.03c apa naḥ śośucad agham ||
1.097.04a pra yat te agne sūrayo jāyemahi pra te vayam |
1.097.04c apa naḥ śośucad agham ||
1.097.05a pra yad agneḥ sahasvato viśvato yanti bhānavaḥ |
1.097.05c apa naḥ śośucad agham ||
1.097.06a tvaṁ hi viśvatomukha viśvataḥ paribhūr asi |
1.097.06c apa naḥ śośucad agham ||
1.097.07a dviṣo no viśvatomukhāti nāveva pāraya |
1.097.07c apa naḥ śośucad agham ||
1.097.08a sa naḥ sindhum iva nāvayāti parṣā svastaye |
1.097.08c apa naḥ śośucad agham ||

1.098.01a vaiśvānarasya sumatau syāma rājā hi kam bhuvanānām abhiśrīḥ |
1.098.01c ito jāto viśvam idaṁ vi caṣṭe vaiśvānaro yatate sūryeṇa ||
1.098.02a pṛṣṭo divi pṛṣṭo agniḥ pṛthivyām pṛṣṭo viśvā oṣadhīr ā viveśa |
1.098.02c vaiśvānaraḥ sahasā pṛṣṭo agniḥ sa no divā sa riṣaḥ pātu naktam ||
1.098.03a vaiśvānara tava tat satyam astv asmān rāyo maghavānaḥ sacantām |
1.098.03c tan no mitro varuṇo māmahantām aditiḥ sindhuḥ pṛthivī uta dyauḥ ||

1.099.01a jātavedase sunavāma somam arātīyato ni dahāti vedaḥ |
1.099.01c sa naḥ parṣad ati durgāṇi viśvā nāveva sindhuṁ duritāty agniḥ ||

1.100.01a sa yo vṛṣā vṛṣṇyebhiḥ samokā maho divaḥ pṛthivyāś ca samrāṭ |
1.100.01c satīnasatvā havyo bhareṣu marutvān no bhavatv indra ūtī ||
1.100.02a yasyānāptaḥ sūryasyeva yāmo bhare-bhare vṛtrahā śuṣmo asti |
1.100.02c vṛṣantamaḥ sakhibhiḥ svebhir evair marutvān no bhavatv indra ūtī ||
1.100.03a divo na yasya retaso dughānāḥ panthāso yanti śavasāparītāḥ |
1.100.03c taraddveṣāḥ sāsahiḥ pauṁsyebhir marutvān no bhavatv indra ūtī ||
1.100.04a so aṅgirobhir aṅgirastamo bhūd vṛṣā vṛṣabhiḥ sakhibhiḥ sakhā san |
1.100.04c ṛgmibhir ṛgmī gātubhir jyeṣṭho marutvān no bhavatv indra ūtī ||
1.100.05a sa sūnubhir na rudrebhir ṛbhvā nṛṣāhye sāsahvām̐ amitrān |
1.100.05c sanīḻebhiḥ śravasyāni tūrvan marutvān no bhavatv indra ūtī ||
1.100.06a sa manyumīḥ samadanasya kartāsmākebhir nṛbhiḥ sūryaṁ sanat |
1.100.06c asminn ahan satpatiḥ puruhūto marutvān no bhavatv indra ūtī ||
1.100.07a tam ūtayo raṇayañ chūrasātau taṁ kṣemasya kṣitayaḥ kṛṇvata trām |
1.100.07c sa viśvasya karuṇasyeśa eko marutvān no bhavatv indra ūtī ||
1.100.08a tam apsanta śavasa utsaveṣu naro naram avase taṁ dhanāya |
1.100.08c so andhe cit tamasi jyotir vidan marutvān no bhavatv indra ūtī ||
1.100.09a sa savyena yamati vrādhataś cit sa dakṣiṇe saṁgṛbhītā kṛtāni |
1.100.09c sa kīriṇā cit sanitā dhanāni marutvān no bhavatv indra ūtī ||
1.100.10a sa grāmebhiḥ sanitā sa rathebhir vide viśvābhiḥ kṛṣṭibhir nv adya |
1.100.10c sa pauṁsyebhir abhibhūr aśastīr marutvān no bhavatv indra ūtī ||
1.100.11a sa jāmibhir yat samajāti mīḻhe 'jāmibhir vā puruhūta evaiḥ |
1.100.11c apāṁ tokasya tanayasya jeṣe marutvān no bhavatv indra ūtī ||
1.100.12a sa vajrabhṛd dasyuhā bhīma ugraḥ sahasracetāḥ śatanītha ṛbhvā |
1.100.12c camrīṣo na śavasā pāñcajanyo marutvān no bhavatv indra ūtī ||
1.100.13a tasya vajraḥ krandati smat svarṣā divo na tveṣo ravathaḥ śimīvān |
1.100.13c taṁ sacante sanayas taṁ dhanāni marutvān no bhavatv indra ūtī ||
1.100.14a yasyājasraṁ śavasā mānam uktham paribhujad rodasī viśvataḥ sīm |
1.100.14c sa pāriṣat kratubhir mandasāno marutvān no bhavatv indra ūtī ||
1.100.15a na yasya devā devatā na martā āpaś cana śavaso antam āpuḥ |
1.100.15c sa prarikvā tvakṣasā kṣmo divaś ca marutvān no bhavatv indra ūtī ||
1.100.16a rohic chyāvā sumadaṁśur lalāmīr dyukṣā rāya ṛjrāśvasya |
1.100.16c vṛṣaṇvantam bibhratī dhūrṣu ratham mandrā ciketa nāhuṣīṣu vikṣu ||
1.100.17a etat tyat ta indra vṛṣṇa ukthaṁ vārṣāgirā abhi gṛṇanti rādhaḥ |
1.100.17c ṛjrāśvaḥ praṣṭibhir ambarīṣaḥ sahadevo bhayamānaḥ surādhāḥ ||
1.100.18a dasyūñ chimyūm̐ś ca puruhūta evair hatvā pṛthivyāṁ śarvā ni barhīt |
1.100.18c sanat kṣetraṁ sakhibhiḥ śvitnyebhiḥ sanat sūryaṁ sanad apaḥ suvajraḥ ||
1.100.19a viśvāhendro adhivaktā no astv aparihvṛtāḥ sanuyāma vājam |
1.100.19c tan no mitro varuṇo māmahantām aditiḥ sindhuḥ pṛthivī uta dyauḥ ||

1.101.01a pra mandine pitumad arcatā vaco yaḥ kṛṣṇagarbhā nirahann ṛjiśvanā |
1.101.01c avasyavo vṛṣaṇaṁ vajradakṣiṇam marutvantaṁ sakhyāya havāmahe ||
1.101.02a yo vyaṁsaṁ jāhṛṣāṇena manyunā yaḥ śambaraṁ yo ahan piprum avratam |
1.101.02c indro yaḥ śuṣṇam aśuṣaṁ ny āvṛṇaṅ marutvantaṁ sakhyāya havāmahe ||
1.101.03a yasya dyāvāpṛthivī pauṁsyam mahad yasya vrate varuṇo yasya sūryaḥ |
1.101.03c yasyendrasya sindhavaḥ saścati vratam marutvantaṁ sakhyāya havāmahe ||
1.101.04a yo aśvānāṁ yo gavāṁ gopatir vaśī ya āritaḥ karmaṇi-karmaṇi sthiraḥ |
1.101.04c vīḻoś cid indro yo asunvato vadho marutvantaṁ sakhyāya havāmahe ||
1.101.05a yo viśvasya jagataḥ prāṇatas patir yo brahmaṇe prathamo gā avindat |
1.101.05c indro yo dasyūm̐r adharām̐ avātiran marutvantaṁ sakhyāya havāmahe ||
1.101.06a yaḥ śūrebhir havyo yaś ca bhīrubhir yo dhāvadbhir hūyate yaś ca jigyubhiḥ |
1.101.06c indraṁ yaṁ viśvā bhuvanābhi saṁdadhur marutvantaṁ sakhyāya havāmahe ||
1.101.07a rudrāṇām eti pradiśā vicakṣaṇo rudrebhir yoṣā tanute pṛthu jrayaḥ |
1.101.07c indram manīṣā abhy arcati śrutam marutvantaṁ sakhyāya havāmahe ||
1.101.08a yad vā marutvaḥ parame sadhasthe yad vāvame vṛjane mādayāse |
1.101.08c ata ā yāhy adhvaraṁ no acchā tvāyā haviś cakṛmā satyarādhaḥ ||
1.101.09a tvāyendra somaṁ suṣumā sudakṣa tvāyā haviś cakṛmā brahmavāhaḥ |
1.101.09c adhā niyutvaḥ sagaṇo marudbhir asmin yajñe barhiṣi mādayasva ||
1.101.10a mādayasva haribhir ye ta indra vi ṣyasva śipre vi sṛjasva dhene |
1.101.10c ā tvā suśipra harayo vahantūśan havyāni prati no juṣasva ||
1.101.11a marutstotrasya vṛjanasya gopā vayam indreṇa sanuyāma vājam |
1.101.11c tan no mitro varuṇo māmahantām aditiḥ sindhuḥ pṛthivī uta dyauḥ ||

1.102.01a imāṁ te dhiyam pra bhare maho mahīm asya stotre dhiṣaṇā yat ta ānaje |
1.102.01c tam utsave ca prasave ca sāsahim indraṁ devāsaḥ śavasāmadann anu ||
1.102.02a asya śravo nadyaḥ sapta bibhrati dyāvākṣāmā pṛthivī darśataṁ vapuḥ |
1.102.02c asme sūryācandramasābhicakṣe śraddhe kam indra carato vitarturam ||
1.102.03a taṁ smā ratham maghavan prāva sātaye jaitraṁ yaṁ te anumadāma saṁgame |
1.102.03c ājā na indra manasā puruṣṭuta tvāyadbhyo maghavañ charma yaccha naḥ ||
1.102.04a vayaṁ jayema tvayā yujā vṛtam asmākam aṁśam ud avā bhare-bhare |
1.102.04c asmabhyam indra varivaḥ sugaṁ kṛdhi pra śatrūṇām maghavan vṛṣṇyā ruja ||
1.102.05a nānā hi tvā havamānā janā ime dhanānāṁ dhartar avasā vipanyavaḥ |
1.102.05c asmākaṁ smā ratham ā tiṣṭha sātaye jaitraṁ hīndra nibhṛtam manas tava ||
1.102.06a gojitā bāhū amitakratuḥ simaḥ karman-karmañ chatamūtiḥ khajaṁkaraḥ |
1.102.06c akalpa indraḥ pratimānam ojasāthā janā vi hvayante siṣāsavaḥ ||
1.102.07a ut te śatān maghavann uc ca bhūyasa ut sahasrād ririce kṛṣṭiṣu śravaḥ |
1.102.07c amātraṁ tvā dhiṣaṇā titviṣe mahy adhā vṛtrāṇi jighnase puraṁdara ||
1.102.08a triviṣṭidhātu pratimānam ojasas tisro bhūmīr nṛpate trīṇi rocanā |
1.102.08c atīdaṁ viśvam bhuvanaṁ vavakṣithāśatrur indra januṣā sanād asi ||
1.102.09a tvāṁ deveṣu prathamaṁ havāmahe tvam babhūtha pṛtanāsu sāsahiḥ |
1.102.09c semaṁ naḥ kārum upamanyum udbhidam indraḥ kṛṇotu prasave ratham puraḥ ||
1.102.10a tvaṁ jigetha na dhanā rurodhithārbheṣv ājā maghavan mahatsu ca |
1.102.10c tvām ugram avase saṁ śiśīmasy athā na indra havaneṣu codaya ||
1.102.11a viśvāhendro adhivaktā no astv aparihvṛtāḥ sanuyāma vājam |
1.102.11c tan no mitro varuṇo māmahantām aditiḥ sindhuḥ pṛthivī uta dyauḥ ||

1.103.01a tat ta indriyam paramam parācair adhārayanta kavayaḥ puredam |
1.103.01c kṣamedam anyad divy anyad asya sam ī pṛcyate samaneva ketuḥ ||
1.103.02a sa dhārayat pṛthivīm paprathac ca vajreṇa hatvā nir apaḥ sasarja |
1.103.02c ahann ahim abhinad rauhiṇaṁ vy ahan vyaṁsam maghavā śacībhiḥ ||
1.103.03a sa jātūbharmā śraddadhāna ojaḥ puro vibhindann acarad vi dāsīḥ |
1.103.03c vidvān vajrin dasyave hetim asyāryaṁ saho vardhayā dyumnam indra ||
1.103.04a tad ūcuṣe mānuṣemā yugāni kīrtenyam maghavā nāma bibhrat |
1.103.04c upaprayan dasyuhatyāya vajrī yad dha sūnuḥ śravase nāma dadhe ||
1.103.05a tad asyedam paśyatā bhūri puṣṭaṁ śrad indrasya dhattana vīryāya |
1.103.05c sa gā avindat so avindad aśvān sa oṣadhīḥ so apaḥ sa vanāni ||
1.103.06a bhūrikarmaṇe vṛṣabhāya vṛṣṇe satyaśuṣmāya sunavāma somam |
1.103.06c ya ādṛtyā paripanthīva śūro 'yajvano vibhajann eti vedaḥ ||
1.103.07a tad indra preva vīryaṁ cakartha yat sasantaṁ vajreṇābodhayo 'him |
1.103.07c anu tvā patnīr hṛṣitaṁ vayaś ca viśve devāso amadann anu tvā ||
1.103.08a śuṣṇam pipruṁ kuyavaṁ vṛtram indra yadāvadhīr vi puraḥ śambarasya |
1.103.08c tan no mitro varuṇo māmahantām aditiḥ sindhuḥ pṛthivī uta dyauḥ ||

1.104.01a yoniṣ ṭa indra niṣade akāri tam ā ni ṣīda svāno nārvā |
1.104.01c vimucyā vayo 'vasāyāśvān doṣā vastor vahīyasaḥ prapitve ||
1.104.02a o tye nara indram ūtaye gur nū cit tān sadyo adhvano jagamyāt |
1.104.02c devāso manyuṁ dāsasya ścamnan te na ā vakṣan suvitāya varṇam ||
1.104.03a ava tmanā bharate ketavedā ava tmanā bharate phenam udan |
1.104.03c kṣīreṇa snātaḥ kuyavasya yoṣe hate te syātām pravaṇe śiphāyāḥ ||
1.104.04a yuyopa nābhir uparasyāyoḥ pra pūrvābhis tirate rāṣṭi śūraḥ |
1.104.04c añjasī kuliśī vīrapatnī payo hinvānā udabhir bharante ||
1.104.05a prati yat syā nīthādarśi dasyor oko nācchā sadanaṁ jānatī gāt |
1.104.05c adha smā no maghavañ carkṛtād in mā no magheva niṣṣapī parā dāḥ ||
1.104.06a sa tvaṁ na indra sūrye so apsv anāgāstva ā bhaja jīvaśaṁse |
1.104.06c māntarām bhujam ā rīriṣo naḥ śraddhitaṁ te mahata indriyāya ||
1.104.07a adhā manye śrat te asmā adhāyi vṛṣā codasva mahate dhanāya |
1.104.07c mā no akṛte puruhūta yonāv indra kṣudhyadbhyo vaya āsutiṁ dāḥ ||
1.104.08a mā no vadhīr indra mā parā dā mā naḥ priyā bhojanāni pra moṣīḥ |
1.104.08c āṇḍā mā no maghavañ chakra nir bhen mā naḥ pātrā bhet sahajānuṣāṇi ||
1.104.09a arvāṅ ehi somakāmaṁ tvāhur ayaṁ sutas tasya pibā madāya |
1.104.09c uruvyacā jaṭhara ā vṛṣasva piteva naḥ śṛṇuhi hūyamānaḥ ||

1.105.01a candramā apsv antar ā suparṇo dhāvate divi |
1.105.01c na vo hiraṇyanemayaḥ padaṁ vindanti vidyuto vittam me asya rodasī ||
1.105.02a artham id vā u arthina ā jāyā yuvate patim |
1.105.02c tuñjāte vṛṣṇyam payaḥ paridāya rasaṁ duhe vittam me asya rodasī ||
1.105.03a mo ṣu devā adaḥ svar ava pādi divas pari |
1.105.03c mā somyasya śambhuvaḥ śūne bhūma kadā cana vittam me asya rodasī ||
1.105.04a yajñam pṛcchāmy avamaṁ sa tad dūto vi vocati |
1.105.04c kva ṛtam pūrvyaṁ gataṁ kas tad bibharti nūtano vittam me asya rodasī ||
1.105.05a amī ye devāḥ sthana triṣv ā rocane divaḥ |
1.105.05c kad va ṛtaṁ kad anṛtaṁ kva pratnā va āhutir vittam me asya rodasī ||
1.105.06a kad va ṛtasya dharṇasi kad varuṇasya cakṣaṇam |
1.105.06c kad aryamṇo mahas pathāti krāmema dūḍhyo vittam me asya rodasī ||
1.105.07a ahaṁ so asmi yaḥ purā sute vadāmi kāni cit |
1.105.07c tam mā vyanty ādhyo vṛko na tṛṣṇajam mṛgaṁ vittam me asya rodasī ||
1.105.08a sam mā tapanty abhitaḥ sapatnīr iva parśavaḥ |
1.105.08c mūṣo na śiśnā vy adanti mādhyaḥ stotāraṁ te śatakrato vittam me asya rodasī ||
1.105.09a amī ye sapta raśmayas tatrā me nābhir ātatā |
1.105.09c tritas tad vedāptyaḥ sa jāmitvāya rebhati vittam me asya rodasī ||
1.105.10a amī ye pañcokṣaṇo madhye tasthur maho divaḥ |
1.105.10c devatrā nu pravācyaṁ sadhrīcīnā ni vāvṛtur vittam me asya rodasī ||
1.105.11a suparṇā eta āsate madhya ārodhane divaḥ |
1.105.11c te sedhanti patho vṛkaṁ tarantaṁ yahvatīr apo vittam me asya rodasī ||
1.105.12a navyaṁ tad ukthyaṁ hitaṁ devāsaḥ supravācanam |
1.105.12c ṛtam arṣanti sindhavaḥ satyaṁ tātāna sūryo vittam me asya rodasī ||
1.105.13a agne tava tyad ukthyaṁ deveṣv asty āpyam |
1.105.13c sa naḥ satto manuṣvad ā devān yakṣi viduṣṭaro vittam me asya rodasī ||
1.105.14a satto hotā manuṣvad ā devām̐ acchā viduṣṭaraḥ |
1.105.14c agnir havyā suṣūdati devo deveṣu medhiro vittam me asya rodasī ||
1.105.15a brahmā kṛṇoti varuṇo gātuvidaṁ tam īmahe |
1.105.15c vy ūrṇoti hṛdā matiṁ navyo jāyatām ṛtaṁ vittam me asya rodasī ||
1.105.16a asau yaḥ panthā ādityo divi pravācyaṁ kṛtaḥ |
1.105.16c na sa devā atikrame tam martāso na paśyatha vittam me asya rodasī ||
1.105.17a tritaḥ kūpe 'vahito devān havata ūtaye |
1.105.17c tac chuśrāva bṛhaspatiḥ kṛṇvann aṁhūraṇād uru vittam me asya rodasī ||
1.105.18a aruṇo mā sakṛd vṛkaḥ pathā yantaṁ dadarśa hi |
1.105.18c uj jihīte nicāyyā taṣṭeva pṛṣṭyāmayī vittam me asya rodasī ||
1.105.19a enāṅgūṣeṇa vayam indravanto 'bhi ṣyāma vṛjane sarvavīrāḥ |
1.105.19c tan no mitro varuṇo māmahantām aditiḥ sindhuḥ pṛthivī uta dyauḥ ||

1.106.01a indram mitraṁ varuṇam agnim ūtaye mārutaṁ śardho aditiṁ havāmahe |
1.106.01c rathaṁ na durgād vasavaḥ sudānavo viśvasmān no aṁhaso niṣ pipartana ||
1.106.02a ta ādityā ā gatā sarvatātaye bhūta devā vṛtratūryeṣu śambhuvaḥ |
1.106.02c rathaṁ na durgād vasavaḥ sudānavo viśvasmān no aṁhaso niṣ pipartana ||
1.106.03a avantu naḥ pitaraḥ supravācanā uta devī devaputre ṛtāvṛdhā |
1.106.03c rathaṁ na durgād vasavaḥ sudānavo viśvasmān no aṁhaso niṣ pipartana ||
1.106.04a narāśaṁsaṁ vājinaṁ vājayann iha kṣayadvīram pūṣaṇaṁ sumnair īmahe |
1.106.04c rathaṁ na durgād vasavaḥ sudānavo viśvasmān no aṁhaso niṣ pipartana ||
1.106.05a bṛhaspate sadam in naḥ sugaṁ kṛdhi śaṁ yor yat te manurhitaṁ tad īmahe |
1.106.05c rathaṁ na durgād vasavaḥ sudānavo viśvasmān no aṁhaso niṣ pipartana ||
1.106.06a indraṁ kutso vṛtrahaṇaṁ śacīpatiṁ kāṭe nibāḻha ṛṣir ahvad ūtaye |
1.106.06c rathaṁ na durgād vasavaḥ sudānavo viśvasmān no aṁhaso niṣ pipartana ||
1.106.07a devair no devy aditir ni pātu devas trātā trāyatām aprayucchan |
1.106.07c tan no mitro varuṇo māmahantām aditiḥ sindhuḥ pṛthivī uta dyauḥ ||

1.107.01a yajño devānām praty eti sumnam ādityāso bhavatā mṛḻayantaḥ |
1.107.01c ā vo 'rvācī sumatir vavṛtyād aṁhoś cid yā varivovittarāsat ||
1.107.02a upa no devā avasā gamantv aṅgirasāṁ sāmabhiḥ stūyamānāḥ |
1.107.02c indra indriyair maruto marudbhir ādityair no aditiḥ śarma yaṁsat ||
1.107.03a tan na indras tad varuṇas tad agnis tad aryamā tat savitā cano dhāt |
1.107.03c tan no mitro varuṇo māmahantām aditiḥ sindhuḥ pṛthivī uta dyauḥ ||

1.108.01a ya indrāgnī citratamo ratho vām abhi viśvāni bhuvanāni caṣṭe |
1.108.01c tenā yātaṁ sarathaṁ tasthivāṁsāthā somasya pibataṁ sutasya ||
1.108.02a yāvad idam bhuvanaṁ viśvam asty uruvyacā varimatā gabhīram |
1.108.02c tāvām̐ ayam pātave somo astv aram indrāgnī manase yuvabhyām ||
1.108.03a cakrāthe hi sadhryaṅ nāma bhadraṁ sadhrīcīnā vṛtrahaṇā uta sthaḥ |
1.108.03c tāv indrāgnī sadhryañcā niṣadyā vṛṣṇaḥ somasya vṛṣaṇā vṛṣethām ||
1.108.04a samiddheṣv agniṣv ānajānā yatasrucā barhir u tistirāṇā |
1.108.04c tīvraiḥ somaiḥ pariṣiktebhir arvāg endrāgnī saumanasāya yātam ||
1.108.05a yānīndrāgnī cakrathur vīryāṇi yāni rūpāṇy uta vṛṣṇyāni |
1.108.05c yā vām pratnāni sakhyā śivāni tebhiḥ somasya pibataṁ sutasya ||
1.108.06a yad abravam prathamaṁ vāṁ vṛṇāno 'yaṁ somo asurair no vihavyaḥ |
1.108.06c tāṁ satyāṁ śraddhām abhy ā hi yātam athā somasya pibataṁ sutasya ||
1.108.07a yad indrāgnī madathaḥ sve duroṇe yad brahmaṇi rājani vā yajatrā |
1.108.07c ataḥ pari vṛṣaṇāv ā hi yātam athā somasya pibataṁ sutasya ||
1.108.08a yad indrāgnī yaduṣu turvaśeṣu yad druhyuṣv anuṣu pūruṣu sthaḥ |
1.108.08c ataḥ pari vṛṣaṇāv ā hi yātam athā somasya pibataṁ sutasya ||
1.108.09a yad indrāgnī avamasyām pṛthivyām madhyamasyām paramasyām uta sthaḥ |
1.108.09c ataḥ pari vṛṣaṇāv ā hi yātam athā somasya pibataṁ sutasya ||
1.108.10a yad indrāgnī paramasyām pṛthivyām madhyamasyām avamasyām uta sthaḥ |
1.108.10c ataḥ pari vṛṣaṇāv ā hi yātam athā somasya pibataṁ sutasya ||
1.108.11a yad indrāgnī divi ṣṭho yat pṛthivyāṁ yat parvateṣv oṣadhīṣv apsu |
1.108.11c ataḥ pari vṛṣaṇāv ā hi yātam athā somasya pibataṁ sutasya ||
1.108.12a yad indrāgnī uditā sūryasya madhye divaḥ svadhayā mādayethe |
1.108.12c ataḥ pari vṛṣaṇāv ā hi yātam athā somasya pibataṁ sutasya ||
1.108.13a evendrāgnī papivāṁsā sutasya viśvāsmabhyaṁ saṁ jayataṁ dhanāni |
1.108.13c tan no mitro varuṇo māmahantām aditiḥ sindhuḥ pṛthivī uta dyauḥ ||

1.109.01a vi hy akhyam manasā vasya icchann indrāgnī jñāsa uta vā sajātān |
1.109.01c nānyā yuvat pramatir asti mahyaṁ sa vāṁ dhiyaṁ vājayantīm atakṣam ||
1.109.02a aśravaṁ hi bhūridāvattarā vāṁ vijāmātur uta vā ghā syālāt |
1.109.02c athā somasya prayatī yuvabhyām indrāgnī stomaṁ janayāmi navyam ||
1.109.03a mā cchedma raśmīm̐r iti nādhamānāḥ pitṝṇāṁ śaktīr anuyacchamānāḥ |
1.109.03c indrāgnibhyāṁ kaṁ vṛṣaṇo madanti tā hy adrī dhiṣaṇāyā upasthe ||
1.109.04a yuvābhyāṁ devī dhiṣaṇā madāyendrāgnī somam uśatī sunoti |
1.109.04c tāv aśvinā bhadrahastā supāṇī ā dhāvatam madhunā pṛṅktam apsu ||
1.109.05a yuvām indrāgnī vasuno vibhāge tavastamā śuśrava vṛtrahatye |
1.109.05c tāv āsadyā barhiṣi yajñe asmin pra carṣaṇī mādayethāṁ sutasya ||
1.109.06a pra carṣaṇibhyaḥ pṛtanāhaveṣu pra pṛthivyā riricāthe divaś ca |
1.109.06c pra sindhubhyaḥ pra giribhyo mahitvā prendrāgnī viśvā bhuvanāty anyā ||
1.109.07a ā bharataṁ śikṣataṁ vajrabāhū asmām̐ indrāgnī avataṁ śacībhiḥ |
1.109.07c ime nu te raśmayaḥ sūryasya yebhiḥ sapitvam pitaro na āsan ||
1.109.08a puraṁdarā śikṣataṁ vajrahastāsmām̐ indrāgnī avatam bhareṣu |
1.109.08c tan no mitro varuṇo māmahantām aditiḥ sindhuḥ pṛthivī uta dyauḥ ||

1.110.01a tatam me apas tad u tāyate punaḥ svādiṣṭhā dhītir ucathāya śasyate |
1.110.01c ayaṁ samudra iha viśvadevyaḥ svāhākṛtasya sam u tṛpṇuta ṛbhavaḥ ||
1.110.02a ābhogayam pra yad icchanta aitanāpākāḥ prāñco mama ke cid āpayaḥ |
1.110.02c saudhanvanāsaś caritasya bhūmanāgacchata savitur dāśuṣo gṛham ||
1.110.03a tat savitā vo 'mṛtatvam āsuvad agohyaṁ yac chravayanta aitana |
1.110.03c tyaṁ cic camasam asurasya bhakṣaṇam ekaṁ santam akṛṇutā caturvayam ||
1.110.04a viṣṭvī śamī taraṇitvena vāghato martāsaḥ santo amṛtatvam ānaśuḥ |
1.110.04c saudhanvanā ṛbhavaḥ sūracakṣasaḥ saṁvatsare sam apṛcyanta dhītibhiḥ ||
1.110.05a kṣetram iva vi mamus tejanenam̐ ekam pātram ṛbhavo jehamānam |
1.110.05c upastutā upamaṁ nādhamānā amartyeṣu śrava icchamānāḥ ||
1.110.06a ā manīṣām antarikṣasya nṛbhyaḥ sruceva ghṛtaṁ juhavāma vidmanā |
1.110.06c taraṇitvā ye pitur asya saścira ṛbhavo vājam aruhan divo rajaḥ ||
1.110.07a ṛbhur na indraḥ śavasā navīyān ṛbhur vājebhir vasubhir vasur dadiḥ |
1.110.07c yuṣmākaṁ devā avasāhani priye 'bhi tiṣṭhema pṛtsutīr asunvatām ||
1.110.08a niś carmaṇa ṛbhavo gām apiṁśata saṁ vatsenāsṛjatā mātaram punaḥ |
1.110.08c saudhanvanāsaḥ svapasyayā naro jivrī yuvānā pitarākṛṇotana ||
1.110.09a vājebhir no vājasātāv aviḍḍhy ṛbhumām̐ indra citram ā darṣi rādhaḥ |
1.110.09c tan no mitro varuṇo māmahantām aditiḥ sindhuḥ pṛthivī uta dyauḥ ||

1.111.01a takṣan rathaṁ suvṛtaṁ vidmanāpasas takṣan harī indravāhā vṛṣaṇvasū |
1.111.01c takṣan pitṛbhyām ṛbhavo yuvad vayas takṣan vatsāya mātaraṁ sacābhuvam ||
1.111.02a ā no yajñāya takṣata ṛbhumad vayaḥ kratve dakṣāya suprajāvatīm iṣam |
1.111.02c yathā kṣayāma sarvavīrayā viśā tan naḥ śardhāya dhāsathā sv indriyam ||
1.111.03a ā takṣata sātim asmabhyam ṛbhavaḥ sātiṁ rathāya sātim arvate naraḥ |
1.111.03c sātiṁ no jaitrīṁ sam maheta viśvahā jāmim ajāmim pṛtanāsu sakṣaṇim ||
1.111.04a ṛbhukṣaṇam indram ā huva ūtaya ṛbhūn vājān marutaḥ somapītaye |
1.111.04c ubhā mitrāvaruṇā nūnam aśvinā te no hinvantu sātaye dhiye jiṣe ||
1.111.05a ṛbhur bharāya saṁ śiśātu sātiṁ samaryajid vājo asmām̐ aviṣṭu |
1.111.05c tan no mitro varuṇo māmahantām aditiḥ sindhuḥ pṛthivī uta dyauḥ ||

1.112.01a īḻe dyāvāpṛthivī pūrvacittaye 'gniṁ gharmaṁ surucaṁ yāmann iṣṭaye |
1.112.01c yābhir bhare kāram aṁśāya jinvathas tābhir ū ṣu ūtibhir aśvinā gatam ||
1.112.02a yuvor dānāya subharā asaścato ratham ā tasthur vacasaṁ na mantave |
1.112.02c yābhir dhiyo 'vathaḥ karmann iṣṭaye tābhir ū ṣu ūtibhir aśvinā gatam ||
1.112.03a yuvaṁ tāsāṁ divyasya praśāsane viśāṁ kṣayatho amṛtasya majmanā |
1.112.03c yābhir dhenum asvam pinvatho narā tābhir ū ṣu ūtibhir aśvinā gatam ||
1.112.04a yābhiḥ parijmā tanayasya majmanā dvimātā tūrṣu taraṇir vibhūṣati |
1.112.04c yābhis trimantur abhavad vicakṣaṇas tābhir ū ṣu ūtibhir aśvinā gatam ||
1.112.05a yābhī rebhaṁ nivṛtaṁ sitam adbhya ud vandanam airayataṁ svar dṛśe |
1.112.05c yābhiḥ kaṇvam pra siṣāsantam āvataṁ tābhir ū ṣu ūtibhir aśvinā gatam ||
1.112.06a yābhir antakaṁ jasamānam āraṇe bhujyuṁ yābhir avyathibhir jijinvathuḥ |
1.112.06c yābhiḥ karkandhuṁ vayyaṁ ca jinvathas tābhir ū ṣu ūtibhir aśvinā gatam ||
1.112.07a yābhiḥ śucantiṁ dhanasāṁ suṣaṁsadaṁ taptaṁ gharmam omyāvantam atraye |
1.112.07c yābhiḥ pṛśnigum purukutsam āvataṁ tābhir ū ṣu ūtibhir aśvinā gatam ||
1.112.08a yābhiḥ śacībhir vṛṣaṇā parāvṛjam prāndhaṁ śroṇaṁ cakṣasa etave kṛthaḥ |
1.112.08c yābhir vartikāṁ grasitām amuñcataṁ tābhir ū ṣu ūtibhir aśvinā gatam ||
1.112.09a yābhiḥ sindhum madhumantam asaścataṁ vasiṣṭhaṁ yābhir ajarāv ajinvatam |
1.112.09c yābhiḥ kutsaṁ śrutaryaṁ naryam āvataṁ tābhir ū ṣu ūtibhir aśvinā gatam ||
1.112.10a yābhir viśpalāṁ dhanasām atharvyaṁ sahasramīḻha ājāv ajinvatam |
1.112.10c yābhir vaśam aśvyam preṇim āvataṁ tābhir ū ṣu ūtibhir aśvinā gatam ||
1.112.11a yābhiḥ sudānū auśijāya vaṇije dīrghaśravase madhu kośo akṣarat |
1.112.11c kakṣīvantaṁ stotāraṁ yābhir āvataṁ tābhir ū ṣu ūtibhir aśvinā gatam ||
1.112.12a yābhī rasāṁ kṣodasodnaḥ pipinvathur anaśvaṁ yābhī ratham āvataṁ jiṣe |
1.112.12c yābhis triśoka usriyā udājata tābhir ū ṣu ūtibhir aśvinā gatam ||
1.112.13a yābhiḥ sūryam pariyāthaḥ parāvati mandhātāraṁ kṣaitrapatyeṣv āvatam |
1.112.13c yābhir vipram pra bharadvājam āvataṁ tābhir ū ṣu ūtibhir aśvinā gatam ||
1.112.14a yābhir mahām atithigvaṁ kaśojuvaṁ divodāsaṁ śambarahatya āvatam |
1.112.14c yābhiḥ pūrbhidye trasadasyum āvataṁ tābhir ū ṣu ūtibhir aśvinā gatam ||
1.112.15a yābhir vamraṁ vipipānam upastutaṁ kaliṁ yābhir vittajāniṁ duvasyathaḥ |
1.112.15c yābhir vyaśvam uta pṛthim āvataṁ tābhir ū ṣu ūtibhir aśvinā gatam ||
1.112.16a yābhir narā śayave yābhir atraye yābhiḥ purā manave gātum īṣathuḥ |
1.112.16c yābhiḥ śārīr ājataṁ syūmaraśmaye tābhir ū ṣu ūtibhir aśvinā gatam ||
1.112.17a yābhiḥ paṭharvā jaṭharasya majmanāgnir nādīdec cita iddho ajmann ā |
1.112.17c yābhiḥ śaryātam avatho mahādhane tābhir ū ṣu ūtibhir aśvinā gatam ||
1.112.18a yābhir aṅgiro manasā niraṇyatho 'graṁ gacchatho vivare goarṇasaḥ |
1.112.18c yābhir manuṁ śūram iṣā samāvataṁ tābhir ū ṣu ūtibhir aśvinā gatam ||
1.112.19a yābhiḥ patnīr vimadāya nyūhathur ā gha vā yābhir aruṇīr aśikṣatam |
1.112.19c yābhiḥ sudāsa ūhathuḥ sudevyaṁ tābhir ū ṣu ūtibhir aśvinā gatam ||
1.112.20a yābhiḥ śaṁtātī bhavatho dadāśuṣe bhujyuṁ yābhir avatho yābhir adhrigum |
1.112.20c omyāvatīṁ subharām ṛtastubhaṁ tābhir ū ṣu ūtibhir aśvinā gatam ||
1.112.21a yābhiḥ kṛśānum asane duvasyatho jave yābhir yūno arvantam āvatam |
1.112.21c madhu priyam bharatho yat saraḍbhyas tābhir ū ṣu ūtibhir aśvinā gatam ||
1.112.22a yābhir naraṁ goṣuyudhaṁ nṛṣāhye kṣetrasya sātā tanayasya jinvathaḥ |
1.112.22c yābhī rathām̐ avatho yābhir arvatas tābhir ū ṣu ūtibhir aśvinā gatam ||
1.112.23a yābhiḥ kutsam ārjuneyaṁ śatakratū pra turvītim pra ca dabhītim āvatam |
1.112.23c yābhir dhvasantim puruṣantim āvataṁ tābhir ū ṣu ūtibhir aśvinā gatam ||
1.112.24a apnasvatīm aśvinā vācam asme kṛtaṁ no dasrā vṛṣaṇā manīṣām |
1.112.24c adyūtye 'vase ni hvaye vāṁ vṛdhe ca no bhavataṁ vājasātau ||
1.112.25a dyubhir aktubhiḥ pari pātam asmān ariṣṭebhir aśvinā saubhagebhiḥ |
1.112.25c tan no mitro varuṇo māmahantām aditiḥ sindhuḥ pṛthivī uta dyauḥ ||

1.113.01a idaṁ śreṣṭhaṁ jyotiṣāṁ jyotir āgāc citraḥ praketo ajaniṣṭa vibhvā |
1.113.01c yathā prasūtā savituḥ savāyam̐ evā rātry uṣase yonim āraik ||
1.113.02a ruśadvatsā ruśatī śvetyāgād āraig u kṛṣṇā sadanāny asyāḥ |
1.113.02c samānabandhū amṛte anūcī dyāvā varṇaṁ carata āmināne ||
1.113.03a samāno adhvā svasror anantas tam anyānyā carato devaśiṣṭe |
1.113.03c na methete na tasthatuḥ sumeke naktoṣāsā samanasā virūpe ||
1.113.04a bhāsvatī netrī sūnṛtānām aceti citrā vi duro na āvaḥ |
1.113.04c prārpyā jagad vy u no rāyo akhyad uṣā ajīgar bhuvanāni viśvā ||
1.113.05a jihmaśye caritave maghony ābhogaya iṣṭaye rāya u tvam |
1.113.05c dabhram paśyadbhya urviyā vicakṣa uṣā ajīgar bhuvanāni viśvā ||
1.113.06a kṣatrāya tvaṁ śravase tvam mahīyā iṣṭaye tvam artham iva tvam ityai |
1.113.06c visadṛśā jīvitābhipracakṣa uṣā ajīgar bhuvanāni viśvā ||
1.113.07a eṣā divo duhitā praty adarśi vyucchantī yuvatiḥ śukravāsāḥ |
1.113.07c viśvasyeśānā pārthivasya vasva uṣo adyeha subhage vy uccha ||
1.113.08a parāyatīnām anv eti pātha āyatīnām prathamā śaśvatīnām |
1.113.08c vyucchantī jīvam udīrayanty uṣā mṛtaṁ kaṁ cana bodhayantī ||
1.113.09a uṣo yad agniṁ samidhe cakartha vi yad āvaś cakṣasā sūryasya |
1.113.09c yan mānuṣān yakṣyamāṇām̐ ajīgas tad deveṣu cakṛṣe bhadram apnaḥ ||
1.113.10a kiyāty ā yat samayā bhavāti yā vyūṣur yāś ca nūnaṁ vyucchān |
1.113.10c anu pūrvāḥ kṛpate vāvaśānā pradīdhyānā joṣam anyābhir eti ||
1.113.11a īyuṣ ṭe ye pūrvatarām apaśyan vyucchantīm uṣasam martyāsaḥ |
1.113.11c asmābhir ū nu praticakṣyābhūd o te yanti ye aparīṣu paśyān ||
1.113.12a yāvayaddveṣā ṛtapā ṛtejāḥ sumnāvarī sūnṛtā īrayantī |
1.113.12c sumaṅgalīr bibhratī devavītim ihādyoṣaḥ śreṣṭhatamā vy uccha ||
1.113.13a śaśvat puroṣā vy uvāsa devy atho adyedaṁ vy āvo maghonī |
1.113.13c atho vy ucchād uttarām̐ anu dyūn ajarāmṛtā carati svadhābhiḥ ||
1.113.14a vy añjibhir diva ātāsv adyaud apa kṛṣṇāṁ nirṇijaṁ devy āvaḥ |
1.113.14c prabodhayanty aruṇebhir aśvair oṣā yāti suyujā rathena ||
1.113.15a āvahantī poṣyā vāryāṇi citraṁ ketuṁ kṛṇute cekitānā |
1.113.15c īyuṣīṇām upamā śaśvatīnāṁ vibhātīnām prathamoṣā vy aśvait ||
1.113.16a ud īrdhvaṁ jīvo asur na āgād apa prāgāt tama ā jyotir eti |
1.113.16c āraik panthāṁ yātave sūryāyāganma yatra pratiranta āyuḥ ||
1.113.17a syūmanā vāca ud iyarti vahniḥ stavāno rebha uṣaso vibhātīḥ |
1.113.17c adyā tad uccha gṛṇate maghony asme āyur ni didīhi prajāvat ||
1.113.18a yā gomatīr uṣasaḥ sarvavīrā vyucchanti dāśuṣe martyāya |
1.113.18c vāyor iva sūnṛtānām udarke tā aśvadā aśnavat somasutvā ||
1.113.19a mātā devānām aditer anīkaṁ yajñasya ketur bṛhatī vi bhāhi |
1.113.19c praśastikṛd brahmaṇe no vy ucchā no jane janaya viśvavāre ||
1.113.20a yac citram apna uṣaso vahantījānāya śaśamānāya bhadram |
1.113.20c tan no mitro varuṇo māmahantām aditiḥ sindhuḥ pṛthivī uta dyauḥ ||

1.114.01a imā rudrāya tavase kapardine kṣayadvīrāya pra bharāmahe matīḥ |
1.114.01c yathā śam asad dvipade catuṣpade viśvam puṣṭaṁ grāme asminn anāturam ||
1.114.02a mṛḻā no rudrota no mayas kṛdhi kṣayadvīrāya namasā vidhema te |
1.114.02c yac chaṁ ca yoś ca manur āyeje pitā tad aśyāma tava rudra praṇītiṣu ||
1.114.03a aśyāma te sumatiṁ devayajyayā kṣayadvīrasya tava rudra mīḍhvaḥ |
1.114.03c sumnāyann id viśo asmākam ā carāriṣṭavīrā juhavāma te haviḥ ||
1.114.04a tveṣaṁ vayaṁ rudraṁ yajñasādhaṁ vaṅkuṁ kavim avase ni hvayāmahe |
1.114.04c āre asmad daivyaṁ heḻo asyatu sumatim id vayam asyā vṛṇīmahe ||
1.114.05a divo varāham aruṣaṁ kapardinaṁ tveṣaṁ rūpaṁ namasā ni hvayāmahe |
1.114.05c haste bibhrad bheṣajā vāryāṇi śarma varma cchardir asmabhyaṁ yaṁsat ||
1.114.06a idam pitre marutām ucyate vacaḥ svādoḥ svādīyo rudrāya vardhanam |
1.114.06c rāsvā ca no amṛta martabhojanaṁ tmane tokāya tanayāya mṛḻa ||
1.114.07a mā no mahāntam uta mā no arbhakam mā na ukṣantam uta mā na ukṣitam |
1.114.07c mā no vadhīḥ pitaram mota mātaram mā naḥ priyās tanvo rudra rīriṣaḥ ||
1.114.08a mā nas toke tanaye mā na āyau mā no goṣu mā no aśveṣu rīriṣaḥ |
1.114.08c vīrān mā no rudra bhāmito vadhīr haviṣmantaḥ sadam it tvā havāmahe ||
1.114.09a upa te stomān paśupā ivākaraṁ rāsvā pitar marutāṁ sumnam asme |
1.114.09c bhadrā hi te sumatir mṛḻayattamāthā vayam ava it te vṛṇīmahe ||
1.114.10a āre te goghnam uta pūruṣaghnaṁ kṣayadvīra sumnam asme te astu |
1.114.10c mṛḻā ca no adhi ca brūhi devādhā ca naḥ śarma yaccha dvibarhāḥ ||
1.114.11a avocāma namo asmā avasyavaḥ śṛṇotu no havaṁ rudro marutvān |
1.114.11c tan no mitro varuṇo māmahantām aditiḥ sindhuḥ pṛthivī uta dyauḥ ||

1.115.01a citraṁ devānām ud agād anīkaṁ cakṣur mitrasya varuṇasyāgneḥ |
1.115.01c āprā dyāvāpṛthivī antarikṣaṁ sūrya ātmā jagatas tasthuṣaś ca ||
1.115.02a sūryo devīm uṣasaṁ rocamānām maryo na yoṣām abhy eti paścāt |
1.115.02c yatrā naro devayanto yugāni vitanvate prati bhadrāya bhadram ||
1.115.03a bhadrā aśvā haritaḥ sūryasya citrā etagvā anumādyāsaḥ |
1.115.03c namasyanto diva ā pṛṣṭham asthuḥ pari dyāvāpṛthivī yanti sadyaḥ ||
1.115.04a tat sūryasya devatvaṁ tan mahitvam madhyā kartor vitataṁ saṁ jabhāra |
1.115.04c yaded ayukta haritaḥ sadhasthād ād rātrī vāsas tanute simasmai ||
1.115.05a tan mitrasya varuṇasyābhicakṣe sūryo rūpaṁ kṛṇute dyor upasthe |
1.115.05c anantam anyad ruśad asya pājaḥ kṛṣṇam anyad dharitaḥ sam bharanti ||
1.115.06a adyā devā uditā sūryasya nir aṁhasaḥ pipṛtā nir avadyāt |
1.115.06c tan no mitro varuṇo māmahantām aditiḥ sindhuḥ pṛthivī uta dyauḥ ||

1.116.01a nāsatyābhyām barhir iva pra vṛñje stomām̐ iyarmy abhriyeva vātaḥ |
1.116.01c yāv arbhagāya vimadāya jāyāṁ senājuvā nyūhatū rathena ||
1.116.02a vīḻupatmabhir āśuhemabhir vā devānāṁ vā jūtibhiḥ śāśadānā |
1.116.02c tad rāsabho nāsatyā sahasram ājā yamasya pradhane jigāya ||
1.116.03a tugro ha bhujyum aśvinodameghe rayiṁ na kaś cin mamṛvām̐ avāhāḥ |
1.116.03c tam ūhathur naubhir ātmanvatībhir antarikṣaprudbhir apodakābhiḥ ||
1.116.04a tisraḥ kṣapas trir ahātivrajadbhir nāsatyā bhujyum ūhathuḥ pataṁgaiḥ |
1.116.04c samudrasya dhanvann ārdrasya pāre tribhī rathaiḥ śatapadbhiḥ ṣaḻaśvaiḥ ||
1.116.05a anārambhaṇe tad avīrayethām anāsthāne agrabhaṇe samudre |
1.116.05c yad aśvinā ūhathur bhujyum astaṁ śatāritrāṁ nāvam ātasthivāṁsam ||
1.116.06a yam aśvinā dadathuḥ śvetam aśvam aghāśvāya śaśvad it svasti |
1.116.06c tad vāṁ dātram mahi kīrtenyam bhūt paidvo vājī sadam id dhavyo aryaḥ ||
1.116.07a yuvaṁ narā stuvate pajriyāya kakṣīvate aradatam puraṁdhim |
1.116.07c kārotarāc chaphād aśvasya vṛṣṇaḥ śataṁ kumbhām̐ asiñcataṁ surāyāḥ ||
1.116.08a himenāgniṁ ghraṁsam avārayethām pitumatīm ūrjam asmā adhattam |
1.116.08c ṛbīse atrim aśvināvanītam un ninyathuḥ sarvagaṇaṁ svasti ||
1.116.09a parāvataṁ nāsatyānudethām uccābudhnaṁ cakrathur jihmabāram |
1.116.09c kṣarann āpo na pāyanāya rāye sahasrāya tṛṣyate gotamasya ||
1.116.10a jujuruṣo nāsatyota vavrim prāmuñcataṁ drāpim iva cyavānāt |
1.116.10c prātirataṁ jahitasyāyur dasrād it patim akṛṇutaṁ kanīnām ||
1.116.11a tad vāṁ narā śaṁsyaṁ rādhyaṁ cābhiṣṭiman nāsatyā varūtham |
1.116.11c yad vidvāṁsā nidhim ivāpagūḻham ud darśatād ūpathur vandanāya ||
1.116.12a tad vāṁ narā sanaye daṁsa ugram āviṣ kṛṇomi tanyatur na vṛṣṭim |
1.116.12c dadhyaṅ ha yan madhv ātharvaṇo vām aśvasya śīrṣṇā pra yad īm uvāca ||
1.116.13a ajohavīn nāsatyā karā vām mahe yāman purubhujā puraṁdhiḥ |
1.116.13c śrutaṁ tac chāsur iva vadhrimatyā hiraṇyahastam aśvināv adattam ||
1.116.14a āsno vṛkasya vartikām abhīke yuvaṁ narā nāsatyāmumuktam |
1.116.14c uto kavim purubhujā yuvaṁ ha kṛpamāṇam akṛṇutaṁ vicakṣe ||
1.116.15a caritraṁ hi ver ivācchedi parṇam ājā khelasya paritakmyāyām |
1.116.15c sadyo jaṅghām āyasīṁ viśpalāyai dhane hite sartave praty adhattam ||
1.116.16a śatam meṣān vṛkye cakṣadānam ṛjrāśvaṁ tam pitāndhaṁ cakāra |
1.116.16c tasmā akṣī nāsatyā vicakṣa ādhattaṁ dasrā bhiṣajāv anarvan ||
1.116.17a ā vāṁ rathaṁ duhitā sūryasya kārṣmevātiṣṭhad arvatā jayantī |
1.116.17c viśve devā anv amanyanta hṛdbhiḥ sam u śriyā nāsatyā sacethe ||
1.116.18a yad ayātaṁ divodāsāya vartir bharadvājāyāśvinā hayantā |
1.116.18c revad uvāha sacano ratho vāṁ vṛṣabhaś ca śiṁśumāraś ca yuktā ||
1.116.19a rayiṁ sukṣatraṁ svapatyam āyuḥ suvīryaṁ nāsatyā vahantā |
1.116.19c ā jahnāvīṁ samanasopa vājais trir ahno bhāgaṁ dadhatīm ayātam ||
1.116.20a pariviṣṭaṁ jāhuṣaṁ viśvataḥ sīṁ sugebhir naktam ūhathū rajobhiḥ |
1.116.20c vibhindunā nāsatyā rathena vi parvatām̐ ajarayū ayātam ||
1.116.21a ekasyā vastor āvataṁ raṇāya vaśam aśvinā sanaye sahasrā |
1.116.21c nir ahataṁ ducchunā indravantā pṛthuśravaso vṛṣaṇāv arātīḥ ||
1.116.22a śarasya cid ārcatkasyāvatād ā nīcād uccā cakrathuḥ pātave vāḥ |
1.116.22c śayave cin nāsatyā śacībhir jasuraye staryam pipyathur gām ||
1.116.23a avasyate stuvate kṛṣṇiyāya ṛjūyate nāsatyā śacībhiḥ |
1.116.23c paśuṁ na naṣṭam iva darśanāya viṣṇāpvaṁ dadathur viśvakāya ||
1.116.24a daśa rātrīr aśivenā nava dyūn avanaddhaṁ śnathitam apsv antaḥ |
1.116.24c viprutaṁ rebham udani pravṛktam un ninyathuḥ somam iva sruveṇa ||
1.116.25a pra vāṁ daṁsāṁsy aśvināv avocam asya patiḥ syāṁ sugavaḥ suvīraḥ |
1.116.25c uta paśyann aśnuvan dīrgham āyur astam ivej jarimāṇaṁ jagamyām ||

1.117.01a madhvaḥ somasyāśvinā madāya pratno hotā vivāsate vām |
1.117.01c barhiṣmatī rātir viśritā gīr iṣā yātaṁ nāsatyopa vājaiḥ ||
1.117.02a yo vām aśvinā manaso javīyān rathaḥ svaśvo viśa ājigāti |
1.117.02c yena gacchathaḥ sukṛto duroṇaṁ tena narā vartir asmabhyaṁ yātam ||
1.117.03a ṛṣiṁ narāv aṁhasaḥ pāñcajanyam ṛbīsād atrim muñcatho gaṇena |
1.117.03c minantā dasyor aśivasya māyā anupūrvaṁ vṛṣaṇā codayantā ||
1.117.04a aśvaṁ na gūḻham aśvinā durevair ṛṣiṁ narā vṛṣaṇā rebham apsu |
1.117.04c saṁ taṁ riṇītho viprutaṁ daṁsobhir na vāṁ jūryanti pūrvyā kṛtāni ||
1.117.05a suṣupvāṁsaṁ na nirṛter upasthe sūryaṁ na dasrā tamasi kṣiyantam |
1.117.05c śubhe rukmaṁ na darśataṁ nikhātam ud ūpathur aśvinā vandanāya ||
1.117.06a tad vāṁ narā śaṁsyam pajriyeṇa kakṣīvatā nāsatyā parijman |
1.117.06c śaphād aśvasya vājino janāya śataṁ kumbhām̐ asiñcatam madhūnām ||
1.117.07a yuvaṁ narā stuvate kṛṣṇiyāya viṣṇāpvaṁ dadathur viśvakāya |
1.117.07c ghoṣāyai cit pitṛṣade duroṇe patiṁ jūryantyā aśvināv adattam ||
1.117.08a yuvaṁ śyāvāya ruśatīm adattam mahaḥ kṣoṇasyāśvinā kaṇvāya |
1.117.08c pravācyaṁ tad vṛṣaṇā kṛtaṁ vāṁ yan nārṣadāya śravo adhyadhattam ||
1.117.09a purū varpāṁsy aśvinā dadhānā ni pedava ūhathur āśum aśvam |
1.117.09c sahasrasāṁ vājinam apratītam ahihanaṁ śravasyaṁ tarutram ||
1.117.10a etāni vāṁ śravasyā sudānū brahmāṅgūṣaṁ sadanaṁ rodasyoḥ |
1.117.10c yad vām pajrāso aśvinā havante yātam iṣā ca viduṣe ca vājam ||
1.117.11a sūnor mānenāśvinā gṛṇānā vājaṁ viprāya bhuraṇā radantā |
1.117.11c agastye brahmaṇā vāvṛdhānā saṁ viśpalāṁ nāsatyāriṇītam ||
1.117.12a kuha yāntā suṣṭutiṁ kāvyasya divo napātā vṛṣaṇā śayutrā |
1.117.12c hiraṇyasyeva kalaśaṁ nikhātam ud ūpathur daśame aśvināhan ||
1.117.13a yuvaṁ cyavānam aśvinā jarantam punar yuvānaṁ cakrathuḥ śacībhiḥ |
1.117.13c yuvo rathaṁ duhitā sūryasya saha śriyā nāsatyāvṛṇīta ||
1.117.14a yuvaṁ tugrāya pūrvyebhir evaiḥ punarmanyāv abhavataṁ yuvānā |
1.117.14c yuvam bhujyum arṇaso niḥ samudrād vibhir ūhathur ṛjrebhir aśvaiḥ ||
1.117.15a ajohavīd aśvinā taugryo vām proḻhaḥ samudram avyathir jaganvān |
1.117.15c niṣ ṭam ūhathuḥ suyujā rathena manojavasā vṛṣaṇā svasti ||
1.117.16a ajohavīd aśvinā vartikā vām āsno yat sīm amuñcataṁ vṛkasya |
1.117.16c vi jayuṣā yayathuḥ sānv adrer jātaṁ viṣvāco ahataṁ viṣeṇa ||
1.117.17a śatam meṣān vṛkye māmahānaṁ tamaḥ praṇītam aśivena pitrā |
1.117.17c ākṣī ṛjrāśve aśvināv adhattaṁ jyotir andhāya cakrathur vicakṣe ||
1.117.18a śunam andhāya bharam ahvayat sā vṛkīr aśvinā vṛṣaṇā nareti |
1.117.18c jāraḥ kanīna iva cakṣadāna ṛjrāśvaḥ śatam ekaṁ ca meṣān ||
1.117.19a mahī vām ūtir aśvinā mayobhūr uta srāmaṁ dhiṣṇyā saṁ riṇīthaḥ |
1.117.19c athā yuvām id ahvayat puraṁdhir āgacchataṁ sīṁ vṛṣaṇāv avobhiḥ ||
1.117.20a adhenuṁ dasrā staryaṁ viṣaktām apinvataṁ śayave aśvinā gām |
1.117.20c yuvaṁ śacībhir vimadāya jāyāṁ ny ūhathuḥ purumitrasya yoṣām ||
1.117.21a yavaṁ vṛkeṇāśvinā vapanteṣaṁ duhantā manuṣāya dasrā |
1.117.21c abhi dasyum bakureṇā dhamantoru jyotiś cakrathur āryāya ||
1.117.22a ātharvaṇāyāśvinā dadhīce 'śvyaṁ śiraḥ praty airayatam |
1.117.22c sa vām madhu pra vocad ṛtāyan tvāṣṭraṁ yad dasrāv apikakṣyaṁ vām ||
1.117.23a sadā kavī sumatim ā cake vāṁ viśvā dhiyo aśvinā prāvatam me |
1.117.23c asme rayiṁ nāsatyā bṛhantam apatyasācaṁ śrutyaṁ rarāthām ||
1.117.24a hiraṇyahastam aśvinā rarāṇā putraṁ narā vadhrimatyā adattam |
1.117.24c tridhā ha śyāvam aśvinā vikastam uj jīvasa airayataṁ sudānū ||
1.117.25a etāni vām aśvinā vīryāṇi pra pūrvyāṇy āyavo 'vocan |
1.117.25c brahma kṛṇvanto vṛṣaṇā yuvabhyāṁ suvīrāso vidatham ā vadema ||

1.118.01a ā vāṁ ratho aśvinā śyenapatvā sumṛḻīkaḥ svavām̐ yātv arvāṅ |
1.118.01c yo martyasya manaso javīyān trivandhuro vṛṣaṇā vātaraṁhāḥ ||
1.118.02a trivandhureṇa trivṛtā rathena tricakreṇa suvṛtā yātam arvāk |
1.118.02c pinvataṁ gā jinvatam arvato no vardhayatam aśvinā vīram asme ||
1.118.03a pravadyāmanā suvṛtā rathena dasrāv imaṁ śṛṇutaṁ ślokam adreḥ |
1.118.03c kim aṅga vām praty avartiṁ gamiṣṭhāhur viprāso aśvinā purājāḥ ||
1.118.04a ā vāṁ śyenāso aśvinā vahantu rathe yuktāsa āśavaḥ pataṁgāḥ |
1.118.04c ye apturo divyāso na gṛdhrā abhi prayo nāsatyā vahanti ||
1.118.05a ā vāṁ rathaṁ yuvatis tiṣṭhad atra juṣṭvī narā duhitā sūryasya |
1.118.05c pari vām aśvā vapuṣaḥ pataṁgā vayo vahantv aruṣā abhīke ||
1.118.06a ud vandanam airataṁ daṁsanābhir ud rebhaṁ dasrā vṛṣaṇā śacībhiḥ |
1.118.06c niṣ ṭaugryam pārayathaḥ samudrāt punaś cyavānaṁ cakrathur yuvānam ||
1.118.07a yuvam atraye 'vanītāya taptam ūrjam omānam aśvināv adhattam |
1.118.07c yuvaṁ kaṇvāyāpiriptāya cakṣuḥ praty adhattaṁ suṣṭutiṁ jujuṣāṇā ||
1.118.08a yuvaṁ dhenuṁ śayave nādhitāyāpinvatam aśvinā pūrvyāya |
1.118.08c amuñcataṁ vartikām aṁhaso niḥ prati jaṅghāṁ viśpalāyā adhattam ||
1.118.09a yuvaṁ śvetam pedava indrajūtam ahihanam aśvinādattam aśvam |
1.118.09c johūtram aryo abhibhūtim ugraṁ sahasrasāṁ vṛṣaṇaṁ vīḍvaṅgam ||
1.118.10a tā vāṁ narā sv avase sujātā havāmahe aśvinā nādhamānāḥ |
1.118.10c ā na upa vasumatā rathena giro juṣāṇā suvitāya yātam ||
1.118.11a ā śyenasya javasā nūtanenāsme yātaṁ nāsatyā sajoṣāḥ |
1.118.11c have hi vām aśvinā rātahavyaḥ śaśvattamāyā uṣaso vyuṣṭau ||

1.119.01a ā vāṁ ratham purumāyam manojuvaṁ jīrāśvaṁ yajñiyaṁ jīvase huve |
1.119.01c sahasraketuṁ vaninaṁ śatadvasuṁ śruṣṭīvānaṁ varivodhām abhi prayaḥ ||
1.119.02a ūrdhvā dhītiḥ praty asya prayāmany adhāyi śasman sam ayanta ā diśaḥ |
1.119.02c svadāmi gharmam prati yanty ūtaya ā vām ūrjānī ratham aśvināruhat ||
1.119.03a saṁ yan mithaḥ paspṛdhānāso agmata śubhe makhā amitā jāyavo raṇe |
1.119.03c yuvor aha pravaṇe cekite ratho yad aśvinā vahathaḥ sūrim ā varam ||
1.119.04a yuvam bhujyum bhuramāṇaṁ vibhir gataṁ svayuktibhir nivahantā pitṛbhya ā |
1.119.04c yāsiṣṭaṁ vartir vṛṣaṇā vijenyaṁ divodāsāya mahi ceti vām avaḥ ||
1.119.05a yuvor aśvinā vapuṣe yuvāyujaṁ rathaṁ vāṇī yematur asya śardhyam |
1.119.05c ā vām patitvaṁ sakhyāya jagmuṣī yoṣāvṛṇīta jenyā yuvām patī ||
1.119.06a yuvaṁ rebham pariṣūter uruṣyatho himena gharmam paritaptam atraye |
1.119.06c yuvaṁ śayor avasam pipyathur gavi pra dīrgheṇa vandanas tāry āyuṣā ||
1.119.07a yuvaṁ vandanaṁ nirṛtaṁ jaraṇyayā rathaṁ na dasrā karaṇā sam invathaḥ |
1.119.07c kṣetrād ā vipraṁ janatho vipanyayā pra vām atra vidhate daṁsanā bhuvat ||
1.119.08a agacchataṁ kṛpamāṇam parāvati pituḥ svasya tyajasā nibādhitam |
1.119.08c svarvatīr ita ūtīr yuvor aha citrā abhīke abhavann abhiṣṭayaḥ ||
1.119.09a uta syā vām madhuman makṣikārapan made somasyauśijo huvanyati |
1.119.09c yuvaṁ dadhīco mana ā vivāsatho 'thā śiraḥ prati vām aśvyaṁ vadat ||
1.119.10a yuvam pedave puruvāram aśvinā spṛdhāṁ śvetaṁ tarutāraṁ duvasyathaḥ |
1.119.10c śaryair abhidyum pṛtanāsu duṣṭaraṁ carkṛtyam indram iva carṣaṇīsaham ||

1.120.01a kā rādhad dhotrāśvinā vāṁ ko vāṁ joṣa ubhayoḥ |
1.120.01c kathā vidhāty apracetāḥ ||
1.120.02a vidvāṁsāv id duraḥ pṛcched avidvān itthāparo acetāḥ |
1.120.02c nū cin nu marte akrau ||
1.120.03a tā vidvāṁsā havāmahe vāṁ tā no vidvāṁsā manma vocetam adya |
1.120.03c prārcad dayamāno yuvākuḥ ||
1.120.04a vi pṛcchāmi pākyā na devān vaṣaṭkṛtasyādbhutasya dasrā |
1.120.04c pātaṁ ca sahyaso yuvaṁ ca rabhyaso naḥ ||
1.120.05a pra yā ghoṣe bhṛgavāṇe na śobhe yayā vācā yajati pajriyo vām |
1.120.05c praiṣayur na vidvān ||
1.120.06a śrutaṁ gāyatraṁ takavānasyāhaṁ cid dhi rirebhāśvinā vām |
1.120.06c ākṣī śubhas patī dan ||
1.120.07a yuvaṁ hy āstam maho ran yuvaṁ vā yan niratataṁsatam |
1.120.07c tā no vasū sugopā syātam pātaṁ no vṛkād aghāyoḥ ||
1.120.08a mā kasmai dhātam abhy amitriṇe no mākutrā no gṛhebhyo dhenavo guḥ |
1.120.08c stanābhujo aśiśvīḥ ||
1.120.09a duhīyan mitradhitaye yuvāku rāye ca no mimītaṁ vājavatyai |
1.120.09c iṣe ca no mimītaṁ dhenumatyai ||
1.120.10a aśvinor asanaṁ ratham anaśvaṁ vājinīvatoḥ |
1.120.10c tenāham bhūri cākana ||
1.120.11a ayaṁ samaha mā tanūhyāte janām̐ anu |
1.120.11c somapeyaṁ sukho rathaḥ ||
1.120.12a adha svapnasya nir vide 'bhuñjataś ca revataḥ |
1.120.12c ubhā tā basri naśyataḥ ||

1.121.01a kad itthā nṝm̐ḥ pātraṁ devayatāṁ śravad giro aṅgirasāṁ turaṇyan |
1.121.01c pra yad ānaḍ viśa ā harmyasyoru kraṁsate adhvare yajatraḥ ||
1.121.02a stambhīd dha dyāṁ sa dharuṇam pruṣāyad ṛbhur vājāya draviṇaṁ naro goḥ |
1.121.02c anu svajām mahiṣaś cakṣata vrām menām aśvasya pari mātaraṁ goḥ ||
1.121.03a nakṣad dhavam aruṇīḥ pūrvyaṁ rāṭ turo viśām aṅgirasām anu dyūn |
1.121.03c takṣad vajraṁ niyutaṁ tastambhad dyāṁ catuṣpade naryāya dvipāde ||
1.121.04a asya made svaryaṁ dā ṛtāyāpīvṛtam usriyāṇām anīkam |
1.121.04c yad dha prasarge trikakum nivartad apa druho mānuṣasya duro vaḥ ||
1.121.05a tubhyam payo yat pitarāv anītāṁ rādhaḥ suretas turaṇe bhuraṇyū |
1.121.05c śuci yat te rekṇa āyajanta sabardughāyāḥ paya usriyāyāḥ ||
1.121.06a adha pra jajñe taraṇir mamattu pra rocy asyā uṣaso na sūraḥ |
1.121.06c indur yebhir āṣṭa sveduhavyaiḥ sruveṇa siñcañ jaraṇābhi dhāma ||
1.121.07a svidhmā yad vanadhitir apasyāt sūro adhvare pari rodhanā goḥ |
1.121.07c yad dha prabhāsi kṛtvyām̐ anu dyūn anarviśe paśviṣe turāya ||
1.121.08a aṣṭā maho diva ādo harī iha dyumnāsāham abhi yodhāna utsam |
1.121.08c hariṁ yat te mandinaṁ dukṣan vṛdhe gorabhasam adribhir vātāpyam ||
1.121.09a tvam āyasam prati vartayo gor divo aśmānam upanītam ṛbhvā |
1.121.09c kutsāya yatra puruhūta vanvañ chuṣṇam anantaiḥ pariyāsi vadhaiḥ ||
1.121.10a purā yat sūras tamaso apītes tam adrivaḥ phaligaṁ hetim asya |
1.121.10c śuṣṇasya cit parihitaṁ yad ojo divas pari sugrathitaṁ tad ādaḥ ||
1.121.11a anu tvā mahī pājasī acakre dyāvākṣāmā madatām indra karman |
1.121.11c tvaṁ vṛtram āśayānaṁ sirāsu maho vajreṇa siṣvapo varāhum ||
1.121.12a tvam indra naryo yām̐ avo nṝn tiṣṭhā vātasya suyujo vahiṣṭhān |
1.121.12c yaṁ te kāvya uśanā mandinaṁ dād vṛtrahaṇam pāryaṁ tatakṣa vajram ||
1.121.13a tvaṁ sūro harito rāmayo nṝn bharac cakram etaśo nāyam indra |
1.121.13c prāsya pāraṁ navatiṁ nāvyānām api kartam avartayo 'yajyūn ||
1.121.14a tvaṁ no asyā indra durhaṇāyāḥ pāhi vajrivo duritād abhīke |
1.121.14c pra no vājān rathyo aśvabudhyān iṣe yandhi śravase sūnṛtāyai ||
1.121.15a mā sā te asmat sumatir vi dasad vājapramahaḥ sam iṣo varanta |
1.121.15c ā no bhaja maghavan goṣv aryo maṁhiṣṭhās te sadhamādaḥ syāma ||

1.122.01a pra vaḥ pāntaṁ raghumanyavo 'ndho yajñaṁ rudrāya mīḻhuṣe bharadhvam |
1.122.01c divo astoṣy asurasya vīrair iṣudhyeva maruto rodasyoḥ ||
1.122.02a patnīva pūrvahūtiṁ vāvṛdhadhyā uṣāsānaktā purudhā vidāne |
1.122.02c starīr nātkaṁ vyutaṁ vasānā sūryasya śriyā sudṛśī hiraṇyaiḥ ||
1.122.03a mamattu naḥ parijmā vasarhā mamattu vāto apāṁ vṛṣaṇvān |
1.122.03c śiśītam indrāparvatā yuvaṁ nas tan no viśve varivasyantu devāḥ ||
1.122.04a uta tyā me yaśasā śvetanāyai vyantā pāntauśijo huvadhyai |
1.122.04c pra vo napātam apāṁ kṛṇudhvam pra mātarā rāspinasyāyoḥ ||
1.122.05a ā vo ruvaṇyum auśijo huvadhyai ghoṣeva śaṁsam arjunasya naṁśe |
1.122.05c pra vaḥ pūṣṇe dāvana ām̐ acchā voceya vasutātim agneḥ ||
1.122.06a śrutam me mitrāvaruṇā havemota śrutaṁ sadane viśvataḥ sīm |
1.122.06c śrotu naḥ śroturātiḥ suśrotuḥ sukṣetrā sindhur adbhiḥ ||
1.122.07a stuṣe sā vāṁ varuṇa mitra rātir gavāṁ śatā pṛkṣayāmeṣu pajre |
1.122.07c śrutarathe priyarathe dadhānāḥ sadyaḥ puṣṭiṁ nirundhānāso agman ||
1.122.08a asya stuṣe mahimaghasya rādhaḥ sacā sanema nahuṣaḥ suvīrāḥ |
1.122.08c jano yaḥ pajrebhyo vājinīvān aśvāvato rathino mahyaṁ sūriḥ ||
1.122.09a jano yo mitrāvaruṇāv abhidhrug apo na vāṁ sunoty akṣṇayādhruk |
1.122.09c svayaṁ sa yakṣmaṁ hṛdaye ni dhatta āpa yad īṁ hotrābhir ṛtāvā ||
1.122.10a sa vrādhato nahuṣo daṁsujūtaḥ śardhastaro narāṁ gūrtaśravāḥ |
1.122.10c visṛṣṭarātir yāti bāḻhasṛtvā viśvāsu pṛtsu sadam ic chūraḥ ||
1.122.11a adha gmantā nahuṣo havaṁ sūreḥ śrotā rājāno amṛtasya mandrāḥ |
1.122.11c nabhojuvo yan niravasya rādhaḥ praśastaye mahinā rathavate ||
1.122.12a etaṁ śardhaṁ dhāma yasya sūrer ity avocan daśatayasya naṁśe |
1.122.12c dyumnāni yeṣu vasutātī rāran viśve sanvantu prabhṛtheṣu vājam ||
1.122.13a mandāmahe daśatayasya dhāser dvir yat pañca bibhrato yanty annā |
1.122.13c kim iṣṭāśva iṣṭaraśmir eta īśānāsas taruṣa ṛñjate nṝn ||
1.122.14a hiraṇyakarṇam maṇigrīvam arṇas tan no viśve varivasyantu devāḥ |
1.122.14c aryo giraḥ sadya ā jagmuṣīr osrāś cākantūbhayeṣv asme ||
1.122.15a catvāro mā maśarśārasya śiśvas trayo rājña āyavasasya jiṣṇoḥ |
1.122.15c ratho vām mitrāvaruṇā dīrghāpsāḥ syūmagabhastiḥ sūro nādyaut ||

1.123.01a pṛthū ratho dakṣiṇāyā ayojy ainaṁ devāso amṛtāso asthuḥ |
1.123.01c kṛṣṇād ud asthād aryā vihāyāś cikitsantī mānuṣāya kṣayāya ||
1.123.02a pūrvā viśvasmād bhuvanād abodhi jayantī vājam bṛhatī sanutrī |
1.123.02c uccā vy akhyad yuvatiḥ punarbhūr oṣā agan prathamā pūrvahūtau ||
1.123.03a yad adya bhāgaṁ vibhajāsi nṛbhya uṣo devi martyatrā sujāte |
1.123.03c devo no atra savitā damūnā anāgaso vocati sūryāya ||
1.123.04a gṛhaṁ-gṛham ahanā yāty acchā dive-dive adhi nāmā dadhānā |
1.123.04c siṣāsantī dyotanā śaśvad āgād agram-agram id bhajate vasūnām ||
1.123.05a bhagasya svasā varuṇasya jāmir uṣaḥ sūnṛte prathamā jarasva |
1.123.05c paścā sa daghyā yo aghasya dhātā jayema taṁ dakṣiṇayā rathena ||
1.123.06a ud īratāṁ sūnṛtā ut puraṁdhīr ud agnayaḥ śuśucānāso asthuḥ |
1.123.06c spārhā vasūni tamasāpagūḻhāviṣ kṛṇvanty uṣaso vibhātīḥ ||
1.123.07a apānyad ety abhy anyad eti viṣurūpe ahanī saṁ carete |
1.123.07c parikṣitos tamo anyā guhākar adyaud uṣāḥ śośucatā rathena ||
1.123.08a sadṛśīr adya sadṛśīr id u śvo dīrghaṁ sacante varuṇasya dhāma |
1.123.08c anavadyās triṁśataṁ yojanāny ekaikā kratum pari yanti sadyaḥ ||
1.123.09a jānaty ahnaḥ prathamasya nāma śukrā kṛṣṇād ajaniṣṭa śvitīcī |
1.123.09c ṛtasya yoṣā na mināti dhāmāhar-ahar niṣkṛtam ācarantī ||
1.123.10a kanyeva tanvā śāśadānām̐ eṣi devi devam iyakṣamāṇam |
1.123.10c saṁsmayamānā yuvatiḥ purastād āvir vakṣāṁsi kṛṇuṣe vibhātī ||
1.123.11a susaṁkāśā mātṛmṛṣṭeva yoṣāvis tanvaṁ kṛṇuṣe dṛśe kam |
1.123.11c bhadrā tvam uṣo vitaraṁ vy uccha na tat te anyā uṣaso naśanta ||
1.123.12a aśvāvatīr gomatīr viśvavārā yatamānā raśmibhiḥ sūryasya |
1.123.12c parā ca yanti punar ā ca yanti bhadrā nāma vahamānā uṣāsaḥ ||
1.123.13a ṛtasya raśmim anuyacchamānā bhadram-bhadraṁ kratum asmāsu dhehi |
1.123.13c uṣo no adya suhavā vy ucchāsmāsu rāyo maghavatsu ca syuḥ ||

1.124.01a uṣā ucchantī samidhāne agnā udyan sūrya urviyā jyotir aśret |
1.124.01c devo no atra savitā nv artham prāsāvīd dvipat pra catuṣpad ityai ||
1.124.02a aminatī daivyāni vratāni praminatī manuṣyā yugāni |
1.124.02c īyuṣīṇām upamā śaśvatīnām āyatīnām prathamoṣā vy adyaut ||
1.124.03a eṣā divo duhitā praty adarśi jyotir vasānā samanā purastāt |
1.124.03c ṛtasya panthām anv eti sādhu prajānatīva na diśo mināti ||
1.124.04a upo adarśi śundhyuvo na vakṣo nodhā ivāvir akṛta priyāṇi |
1.124.04c admasan na sasato bodhayantī śaśvattamāgāt punar eyuṣīṇām ||
1.124.05a pūrve ardhe rajaso aptyasya gavāṁ janitry akṛta pra ketum |
1.124.05c vy u prathate vitaraṁ varīya obhā pṛṇantī pitror upasthā ||
1.124.06a eved eṣā purutamā dṛśe kaṁ nājāmiṁ na pari vṛṇakti jāmim |
1.124.06c arepasā tanvā śāśadānā nārbhād īṣate na maho vibhātī ||
1.124.07a abhrāteva puṁsa eti pratīcī gartārug iva sanaye dhanānām |
1.124.07c jāyeva patya uśatī suvāsā uṣā hasreva ni riṇīte apsaḥ ||
1.124.08a svasā svasre jyāyasyai yonim āraig apaity asyāḥ praticakṣyeva |
1.124.08c vyucchantī raśmibhiḥ sūryasyāñjy aṅkte samanagā iva vrāḥ ||
1.124.09a āsām pūrvāsām ahasu svasṝṇām aparā pūrvām abhy eti paścāt |
1.124.09c tāḥ pratnavan navyasīr nūnam asme revad ucchantu sudinā uṣāsaḥ ||
1.124.10a pra bodhayoṣaḥ pṛṇato maghony abudhyamānāḥ paṇayaḥ sasantu |
1.124.10c revad uccha maghavadbhyo maghoni revat stotre sūnṛte jārayantī ||
1.124.11a aveyam aśvaid yuvatiḥ purastād yuṅkte gavām aruṇānām anīkam |
1.124.11c vi nūnam ucchād asati pra ketur gṛhaṁ-gṛham upa tiṣṭhāte agniḥ ||
1.124.12a ut te vayaś cid vasater apaptan naraś ca ye pitubhājo vyuṣṭau |
1.124.12c amā sate vahasi bhūri vāmam uṣo devi dāśuṣe martyāya ||
1.124.13a astoḍhvaṁ stomyā brahmaṇā me 'vīvṛdhadhvam uśatīr uṣāsaḥ |
1.124.13c yuṣmākaṁ devīr avasā sanema sahasriṇaṁ ca śatinaṁ ca vājam ||

1.125.01a prātā ratnam prātaritvā dadhāti taṁ cikitvān pratigṛhyā ni dhatte |
1.125.01c tena prajāṁ vardhayamāna āyū rāyas poṣeṇa sacate suvīraḥ ||
1.125.02a sugur asat suhiraṇyaḥ svaśvo bṛhad asmai vaya indro dadhāti |
1.125.02c yas tvāyantaṁ vasunā prātaritvo mukṣījayeva padim utsināti ||
1.125.03a āyam adya sukṛtam prātar icchann iṣṭeḥ putraṁ vasumatā rathena |
1.125.03c aṁśoḥ sutam pāyaya matsarasya kṣayadvīraṁ vardhaya sūnṛtābhiḥ ||
1.125.04a upa kṣaranti sindhavo mayobhuva ījānaṁ ca yakṣyamāṇaṁ ca dhenavaḥ |
1.125.04c pṛṇantaṁ ca papuriṁ ca śravasyavo ghṛtasya dhārā upa yanti viśvataḥ ||
1.125.05a nākasya pṛṣṭhe adhi tiṣṭhati śrito yaḥ pṛṇāti sa ha deveṣu gacchati |
1.125.05c tasmā āpo ghṛtam arṣanti sindhavas tasmā iyaṁ dakṣiṇā pinvate sadā ||
1.125.06a dakṣiṇāvatām id imāni citrā dakṣiṇāvatāṁ divi sūryāsaḥ |
1.125.06c dakṣiṇāvanto amṛtam bhajante dakṣiṇāvantaḥ pra tiranta āyuḥ ||
1.125.07a mā pṛṇanto duritam ena āran mā jāriṣuḥ sūrayaḥ suvratāsaḥ |
1.125.07c anyas teṣām paridhir astu kaś cid apṛṇantam abhi saṁ yantu śokāḥ ||

1.126.01a amandān stomān pra bhare manīṣā sindhāv adhi kṣiyato bhāvyasya |
1.126.01c yo me sahasram amimīta savān atūrto rājā śrava icchamānaḥ ||
1.126.02a śataṁ rājño nādhamānasya niṣkāñ chatam aśvān prayatān sadya ādam |
1.126.02c śataṁ kakṣīvām̐ asurasya gonāṁ divi śravo 'jaram ā tatāna ||
1.126.03a upa mā śyāvāḥ svanayena dattā vadhūmanto daśa rathāso asthuḥ |
1.126.03c ṣaṣṭiḥ sahasram anu gavyam āgāt sanat kakṣīvām̐ abhipitve ahnām ||
1.126.04a catvāriṁśad daśarathasya śoṇāḥ sahasrasyāgre śreṇiṁ nayanti |
1.126.04c madacyutaḥ kṛśanāvato atyān kakṣīvanta ud amṛkṣanta pajrāḥ ||
1.126.05a pūrvām anu prayatim ā dade vas trīn yuktām̐ aṣṭāv aridhāyaso gāḥ |
1.126.05c subandhavo ye viśyā iva vrā anasvantaḥ śrava aiṣanta pajrāḥ ||
1.126.06a āgadhitā parigadhitā yā kaśīkeva jaṅgahe |
1.126.06c dadāti mahyaṁ yādurī yāśūnām bhojyā śatā ||
1.126.07a upopa me parā mṛśa mā me dabhrāṇi manyathāḥ |
1.126.07c sarvāham asmi romaśā gandhārīṇām ivāvikā ||

1.127.01a agniṁ hotāram manye dāsvantaṁ vasuṁ sūnuṁ sahaso jātavedasaṁ vipraṁ na jātavedasam |
1.127.01d ya ūrdhvayā svadhvaro devo devācyā kṛpā |
1.127.01f ghṛtasya vibhrāṣṭim anu vaṣṭi śociṣājuhvānasya sarpiṣaḥ ||
1.127.02a yajiṣṭhaṁ tvā yajamānā huvema jyeṣṭham aṅgirasāṁ vipra manmabhir viprebhiḥ śukra manmabhiḥ |
1.127.02d parijmānam iva dyāṁ hotāraṁ carṣaṇīnām |
1.127.02f śociṣkeśaṁ vṛṣaṇaṁ yam imā viśaḥ prāvantu jūtaye viśaḥ ||
1.127.03a sa hi purū cid ojasā virukmatā dīdyāno bhavati druhaṁtaraḥ paraśur na druhaṁtaraḥ |
1.127.03d vīḻu cid yasya samṛtau śruvad vaneva yat sthiram |
1.127.03f niḥṣahamāṇo yamate nāyate dhanvāsahā nāyate ||
1.127.04a dṛḻhā cid asmā anu dur yathā vide tejiṣṭhābhir araṇibhir dāṣṭy avase 'gnaye dāṣṭy avase |
1.127.04d pra yaḥ purūṇi gāhate takṣad vaneva śociṣā |
1.127.04f sthirā cid annā ni riṇāty ojasā ni sthirāṇi cid ojasā ||
1.127.05a tam asya pṛkṣam uparāsu dhīmahi naktaṁ yaḥ sudarśataro divātarād aprāyuṣe divātarāt |
1.127.05d ād asyāyur grabhaṇavad vīḻu śarma na sūnave |
1.127.05f bhaktam abhaktam avo vyanto ajarā agnayo vyanto ajarāḥ ||
1.127.06a sa hi śardho na mārutaṁ tuviṣvaṇir apnasvatīṣūrvarāsv iṣṭanir ārtanāsv iṣṭaniḥ |
1.127.06d ādad dhavyāny ādadir yajñasya ketur arhaṇā |
1.127.06f adha smāsya harṣato hṛṣīvato viśve juṣanta panthāṁ naraḥ śubhe na panthām ||
1.127.07a dvitā yad īṁ kīstāso abhidyavo namasyanta upavocanta bhṛgavo mathnanto dāśā bhṛgavaḥ |
1.127.07d agnir īśe vasūnāṁ śucir yo dharṇir eṣām |
1.127.07f priyām̐ apidhīm̐r vaniṣīṣṭa medhira ā vaniṣīṣṭa medhiraḥ ||
1.127.08a viśvāsāṁ tvā viśām patiṁ havāmahe sarvāsāṁ samānaṁ dampatim bhuje satyagirvāhasam bhuje |
1.127.08d atithim mānuṣāṇām pitur na yasyāsayā |
1.127.08f amī ca viśve amṛtāsa ā vayo havyā deveṣv ā vayaḥ ||
1.127.09a tvam agne sahasā sahantamaḥ śuṣmintamo jāyase devatātaye rayir na devatātaye |
1.127.09d śuṣmintamo hi te mado dyumnintama uta kratuḥ |
1.127.09f adha smā te pari caranty ajara śruṣṭīvāno nājara ||
1.127.10a pra vo mahe sahasā sahasvata uṣarbudhe paśuṣe nāgnaye stomo babhūtv agnaye |
1.127.10d prati yad īṁ haviṣmān viśvāsu kṣāsu joguve |
1.127.10f agre rebho na jarata ṛṣūṇāṁ jūrṇir hota ṛṣūṇām ||
1.127.11a sa no nediṣṭhaṁ dadṛśāna ā bharāgne devebhiḥ sacanāḥ sucetunā maho rāyaḥ sucetunā |
1.127.11d mahi śaviṣṭha nas kṛdhi saṁcakṣe bhuje asyai |
1.127.11f mahi stotṛbhyo maghavan suvīryam mathīr ugro na śavasā ||

1.128.01a ayaṁ jāyata manuṣo dharīmaṇi hotā yajiṣṭha uśijām anu vratam agniḥ svam anu vratam |
1.128.01d viśvaśruṣṭiḥ sakhīyate rayir iva śravasyate |
1.128.01f adabdho hotā ni ṣadad iḻas pade parivīta iḻas pade ||
1.128.02a taṁ yajñasādham api vātayāmasy ṛtasya pathā namasā haviṣmatā devatātā haviṣmatā |
1.128.02d sa na ūrjām upābhṛty ayā kṛpā na jūryati |
1.128.02f yam mātariśvā manave parāvato devam bhāḥ parāvataḥ ||
1.128.03a evena sadyaḥ pary eti pārthivam muhurgī reto vṛṣabhaḥ kanikradad dadhad retaḥ kanikradat |
1.128.03d śataṁ cakṣāṇo akṣabhir devo vaneṣu turvaṇiḥ |
1.128.03f sado dadhāna upareṣu sānuṣv agniḥ pareṣu sānuṣu ||
1.128.04a sa sukratuḥ purohito dame-dame 'gnir yajñasyādhvarasya cetati kratvā yajñasya cetati |
1.128.04d kratvā vedhā iṣūyate viśvā jātāni paspaśe |
1.128.04f yato ghṛtaśrīr atithir ajāyata vahnir vedhā ajāyata ||
1.128.05a kratvā yad asya taviṣīṣu pṛñcate 'gner aveṇa marutāṁ na bhojyeṣirāya na bhojyā |
1.128.05d sa hi ṣmā dānam invati vasūnāṁ ca majmanā |
1.128.05f sa nas trāsate duritād abhihrutaḥ śaṁsād aghād abhihrutaḥ ||
1.128.06a viśvo vihāyā aratir vasur dadhe haste dakṣiṇe taraṇir na śiśrathac chravasyayā na śiśrathat |
1.128.06d viśvasmā id iṣudhyate devatrā havyam ohiṣe |
1.128.06f viśvasmā it sukṛte vāram ṛṇvaty agnir dvārā vy ṛṇvati ||
1.128.07a sa mānuṣe vṛjane śaṁtamo hito 'gnir yajñeṣu jenyo na viśpatiḥ priyo yajñeṣu viśpatiḥ |
1.128.07d sa havyā mānuṣāṇām iḻā kṛtāni patyate |
1.128.07f sa nas trāsate varuṇasya dhūrter maho devasya dhūrteḥ ||
1.128.08a agniṁ hotāram īḻate vasudhitim priyaṁ cetiṣṭham aratiṁ ny erire havyavāhaṁ ny erire |
1.128.08d viśvāyuṁ viśvavedasaṁ hotāraṁ yajataṁ kavim |
1.128.08f devāso raṇvam avase vasūyavo gīrbhī raṇvaṁ vasūyavaḥ ||

1.129.01a yaṁ tvaṁ ratham indra medhasātaye 'pākā santam iṣira praṇayasi prānavadya nayasi |
1.129.01d sadyaś cit tam abhiṣṭaye karo vaśaś ca vājinam |
1.129.01f sāsmākam anavadya tūtujāna vedhasām imāṁ vācaṁ na vedhasām ||
1.129.02a sa śrudhi yaḥ smā pṛtanāsu kāsu cid dakṣāyya indra bharahūtaye nṛbhir asi pratūrtaye nṛbhiḥ |
1.129.02d yaḥ śūraiḥ svaḥ sanitā yo viprair vājaṁ tarutā |
1.129.02f tam īśānāsa iradhanta vājinam pṛkṣam atyaṁ na vājinam ||
1.129.03a dasmo hi ṣmā vṛṣaṇam pinvasi tvacaṁ kaṁ cid yāvīr araruṁ śūra martyam parivṛṇakṣi martyam |
1.129.03d indrota tubhyaṁ tad dive tad rudrāya svayaśase |
1.129.03f mitrāya vocaṁ varuṇāya saprathaḥ sumṛḻīkāya saprathaḥ ||
1.129.04a asmākaṁ va indram uśmasīṣṭaye sakhāyaṁ viśvāyum prāsahaṁ yujaṁ vājeṣu prāsahaṁ yujam |
1.129.04d asmākam brahmotaye 'vā pṛtsuṣu kāsu cit |
1.129.04f nahi tvā śatruḥ starate stṛṇoṣi yaṁ viśvaṁ śatruṁ stṛṇoṣi yam ||
1.129.05a ni ṣū namātimatiṁ kayasya cit tejiṣṭhābhir araṇibhir notibhir ugrābhir ugrotibhiḥ |
1.129.05d neṣi ṇo yathā purānenāḥ śūra manyase |
1.129.05f viśvāni pūror apa parṣi vahnir āsā vahnir no accha ||
1.129.06a pra tad voceyam bhavyāyendave havyo na ya iṣavān manma rejati rakṣohā manma rejati |
1.129.06d svayaṁ so asmad ā nido vadhair ajeta durmatim |
1.129.06f ava sraved aghaśaṁso 'vataram ava kṣudram iva sravet ||
1.129.07a vanema tad dhotrayā citantyā vanema rayiṁ rayivaḥ suvīryaṁ raṇvaṁ santaṁ suvīryam |
1.129.07d durmanmānaṁ sumantubhir em iṣā pṛcīmahi |
1.129.07f ā satyābhir indraṁ dyumnahūtibhir yajatraṁ dyumnahūtibhiḥ ||
1.129.08a pra-prā vo asme svayaśobhir ūtī parivarga indro durmatīnāṁ darīman durmatīnām |
1.129.08d svayaṁ sā riṣayadhyai yā na upeṣe atraiḥ |
1.129.08f hatem asan na vakṣati kṣiptā jūrṇir na vakṣati ||
1.129.09a tvaṁ na indra rāyā parīṇasā yāhi pathām̐ anehasā puro yāhy arakṣasā |
1.129.09d sacasva naḥ parāka ā sacasvāstamīka ā |
1.129.09f pāhi no dūrād ārād abhiṣṭibhiḥ sadā pāhy abhiṣṭibhiḥ ||
1.129.10a tvaṁ na indra rāyā tarūṣasograṁ cit tvā mahimā sakṣad avase mahe mitraṁ nāvase |
1.129.10d ojiṣṭha trātar avitā rathaṁ kaṁ cid amartya |
1.129.10f anyam asmad ririṣeḥ kaṁ cid adrivo ririkṣantaṁ cid adrivaḥ ||
1.129.11a pāhi na indra suṣṭuta sridho 'vayātā sadam id durmatīnāṁ devaḥ san durmatīnām |
1.129.11d hantā pāpasya rakṣasas trātā viprasya māvataḥ |
1.129.11f adhā hi tvā janitā jījanad vaso rakṣohaṇaṁ tvā jījanad vaso ||

1.130.01a endra yāhy upa naḥ parāvato nāyam acchā vidathānīva satpatir astaṁ rājeva satpatiḥ |
1.130.01d havāmahe tvā vayam prayasvantaḥ sute sacā |
1.130.01f putrāso na pitaraṁ vājasātaye maṁhiṣṭhaṁ vājasātaye ||
1.130.02a pibā somam indra suvānam adribhiḥ kośena siktam avataṁ na vaṁsagas tātṛṣāṇo na vaṁsagaḥ |
1.130.02d madāya haryatāya te tuviṣṭamāya dhāyase |
1.130.02f ā tvā yacchantu harito na sūryam ahā viśveva sūryam ||
1.130.03a avindad divo nihitaṁ guhā nidhiṁ ver na garbham parivītam aśmany anante antar aśmani |
1.130.03d vrajaṁ vajrī gavām iva siṣāsann aṅgirastamaḥ |
1.130.03f apāvṛṇod iṣa indraḥ parīvṛtā dvāra iṣaḥ parīvṛtāḥ ||
1.130.04a dādṛhāṇo vajram indro gabhastyoḥ kṣadmeva tigmam asanāya saṁ śyad ahihatyāya saṁ śyat |
1.130.04d saṁvivyāna ojasā śavobhir indra majmanā |
1.130.04f taṣṭeva vṛkṣaṁ vanino ni vṛścasi paraśveva ni vṛścasi ||
1.130.05a tvaṁ vṛthā nadya indra sartave 'cchā samudram asṛjo rathām̐ iva vājayato rathām̐ iva |
1.130.05d ita ūtīr ayuñjata samānam artham akṣitam |
1.130.05f dhenūr iva manave viśvadohaso janāya viśvadohasaḥ ||
1.130.06a imāṁ te vācaṁ vasūyanta āyavo rathaṁ na dhīraḥ svapā atakṣiṣuḥ sumnāya tvām atakṣiṣuḥ |
1.130.06d śumbhanto jenyaṁ yathā vājeṣu vipra vājinam |
1.130.06f atyam iva śavase sātaye dhanā viśvā dhanāni sātaye ||
1.130.07a bhinat puro navatim indra pūrave divodāsāya mahi dāśuṣe nṛto vajreṇa dāśuṣe nṛto |
1.130.07d atithigvāya śambaraṁ girer ugro avābharat |
1.130.07f maho dhanāni dayamāna ojasā viśvā dhanāny ojasā ||
1.130.08a indraḥ samatsu yajamānam āryam prāvad viśveṣu śatamūtir ājiṣu svarmīḻheṣv ājiṣu |
1.130.08d manave śāsad avratān tvacaṁ kṛṣṇām arandhayat |
1.130.08f dakṣan na viśvaṁ tatṛṣāṇam oṣati ny arśasānam oṣati ||
1.130.09a sūraś cakram pra vṛhaj jāta ojasā prapitve vācam aruṇo muṣāyatīśāna ā muṣāyati |
1.130.09d uśanā yat parāvato 'jagann ūtaye kave |
1.130.09f sumnāni viśvā manuṣeva turvaṇir ahā viśveva turvaṇiḥ ||
1.130.10a sa no navyebhir vṛṣakarmann ukthaiḥ purāṁ dartaḥ pāyubhiḥ pāhi śagmaiḥ |
1.130.10b divodāsebhir indra stavāno vāvṛdhīthā ahobhir iva dyauḥ ||

1.131.01a indrāya hi dyaur asuro anamnatendrāya mahī pṛthivī varīmabhir dyumnasātā varīmabhiḥ |
1.131.01d indraṁ viśve sajoṣaso devāso dadhire puraḥ |
1.131.01f indrāya viśvā savanāni mānuṣā rātāni santu mānuṣā ||
1.131.02a viśveṣu hi tvā savaneṣu tuñjate samānam ekaṁ vṛṣamaṇyavaḥ pṛthak svaḥ saniṣyavaḥ pṛthak |
1.131.02d taṁ tvā nāvaṁ na parṣaṇiṁ śūṣasya dhuri dhīmahi |
1.131.02f indraṁ na yajñaiś citayanta āyavaḥ stomebhir indram āyavaḥ ||
1.131.03a vi tvā tatasre mithunā avasyavo vrajasya sātā gavyasya niḥsṛjaḥ sakṣanta indra niḥsṛjaḥ |
1.131.03d yad gavyantā dvā janā svar yantā samūhasi |
1.131.03f āviṣ karikrad vṛṣaṇaṁ sacābhuvaṁ vajram indra sacābhuvam ||
1.131.04a viduṣ ṭe asya vīryasya pūravaḥ puro yad indra śāradīr avātiraḥ sāsahāno avātiraḥ |
1.131.04d śāsas tam indra martyam ayajyuṁ śavasas pate |
1.131.04f mahīm amuṣṇāḥ pṛthivīm imā apo mandasāna imā apaḥ ||
1.131.05a ād it te asya vīryasya carkiran madeṣu vṛṣann uśijo yad āvitha sakhīyato yad āvitha |
1.131.05d cakartha kāram ebhyaḥ pṛtanāsu pravantave |
1.131.05f te anyām-anyāṁ nadyaṁ saniṣṇata śravasyantaḥ saniṣṇata ||
1.131.06a uto no asyā uṣaso juṣeta hy arkasya bodhi haviṣo havīmabhiḥ svarṣātā havīmabhiḥ |
1.131.06d yad indra hantave mṛdho vṛṣā vajriñ ciketasi |
1.131.06f ā me asya vedhaso navīyaso manma śrudhi navīyasaḥ ||
1.131.07a tvaṁ tam indra vāvṛdhāno asmayur amitrayantaṁ tuvijāta martyaṁ vajreṇa śūra martyam |
1.131.07d jahi yo no aghāyati śṛṇuṣva suśravastamaḥ |
1.131.07f riṣṭaṁ na yāmann apa bhūtu durmatir viśvāpa bhūtu durmatiḥ ||

1.132.01a tvayā vayam maghavan pūrvye dhana indratvotāḥ sāsahyāma pṛtanyato vanuyāma vanuṣyataḥ |
1.132.01d nediṣṭhe asminn ahany adhi vocā nu sunvate |
1.132.01f asmin yajñe vi cayemā bhare kṛtaṁ vājayanto bhare kṛtam ||
1.132.02a svarjeṣe bhara āprasya vakmany uṣarbudhaḥ svasminn añjasi krāṇasya svasminn añjasi |
1.132.02d ahann indro yathā vide śīrṣṇā-śīrṣṇopavācyaḥ |
1.132.02f asmatrā te sadhryak santu rātayo bhadrā bhadrasya rātayaḥ ||
1.132.03a tat tu prayaḥ pratnathā te śuśukvanaṁ yasmin yajñe vāram akṛṇvata kṣayam ṛtasya vār asi kṣayam |
1.132.03d vi tad vocer adha dvitāntaḥ paśyanti raśmibhiḥ |
1.132.03f sa ghā vide anv indro gaveṣaṇo bandhukṣidbhyo gaveṣaṇaḥ ||
1.132.04a nū itthā te pūrvathā ca pravācyaṁ yad aṅgirobhyo 'vṛṇor apa vrajam indra śikṣann apa vrajam |
1.132.04d aibhyaḥ samānyā diśāsmabhyaṁ jeṣi yotsi ca |
1.132.04f sunvadbhyo randhayā kaṁ cid avrataṁ hṛṇāyantaṁ cid avratam ||
1.132.05a saṁ yaj janān kratubhiḥ śūra īkṣayad dhane hite taruṣanta śravasyavaḥ pra yakṣanta śravasyavaḥ |
1.132.05d tasmā āyuḥ prajāvad id bādhe arcanty ojasā |
1.132.05f indra okyaṁ didhiṣanta dhītayo devām̐ acchā na dhītayaḥ ||
1.132.06a yuvaṁ tam indrāparvatā puroyudhā yo naḥ pṛtanyād apa taṁ-tam id dhataṁ vajreṇa taṁ-tam id dhatam |
1.132.06d dūre cattāya cchantsad gahanaṁ yad inakṣat |
1.132.06f asmākaṁ śatrūn pari śūra viśvato darmā darṣīṣṭa viśvataḥ ||

1.133.01a ubhe punāmi rodasī ṛtena druho dahāmi sam mahīr anindrāḥ |
1.133.01c abhivlagya yatra hatā amitrā vailasthānam pari tṛḻhā aśeran ||
1.133.02a abhivlagyā cid adrivaḥ śīrṣā yātumatīnām |
1.133.02c chindhi vaṭūriṇā padā mahāvaṭūriṇā padā ||
1.133.03a avāsām maghavañ jahi śardho yātumatīnām |
1.133.03c vailasthānake armake mahāvailasthe armake ||
1.133.04a yāsāṁ tisraḥ pañcāśato 'bhivlaṅgair apāvapaḥ |
1.133.04c tat su te manāyati takat su te manāyati ||
1.133.05a piśaṅgabhṛṣṭim ambhṛṇam piśācim indra sam mṛṇa |
1.133.05c sarvaṁ rakṣo ni barhaya ||
1.133.06a avar maha indra dādṛhi śrudhī naḥ śuśoca hi dyauḥ kṣā na bhīṣām̐ adrivo ghṛṇān na bhīṣām̐ adrivaḥ |
1.133.06d śuṣmintamo hi śuṣmibhir vadhair ugrebhir īyase |
1.133.06f apūruṣaghno apratīta śūra satvabhis trisaptaiḥ śūra satvabhiḥ ||
1.133.07a vanoti hi sunvan kṣayam parīṇasaḥ sunvāno hi ṣmā yajaty ava dviṣo devānām ava dviṣaḥ |
1.133.07d sunvāna it siṣāsati sahasrā vājy avṛtaḥ |
1.133.07f sunvānāyendro dadāty ābhuvaṁ rayiṁ dadāty ābhuvam ||

1.134.01a ā tvā juvo rārahāṇā abhi prayo vāyo vahantv iha pūrvapītaye somasya pūrvapītaye |
1.134.01d ūrdhvā te anu sūnṛtā manas tiṣṭhatu jānatī |
1.134.01f niyutvatā rathenā yāhi dāvane vāyo makhasya dāvane ||
1.134.02a mandantu tvā mandino vāyav indavo 'smat krāṇāsaḥ sukṛtā abhidyavo gobhiḥ krāṇā abhidyavaḥ |
1.134.02d yad dha krāṇā iradhyai dakṣaṁ sacanta ūtayaḥ |
1.134.02f sadhrīcīnā niyuto dāvane dhiya upa bruvata īṁ dhiyaḥ ||
1.134.03a vāyur yuṅkte rohitā vāyur aruṇā vāyū rathe ajirā dhuri voḻhave vahiṣṭhā dhuri voḻhave |
1.134.03d pra bodhayā puraṁdhiṁ jāra ā sasatīm iva |
1.134.03f pra cakṣaya rodasī vāsayoṣasaḥ śravase vāsayoṣasaḥ ||
1.134.04a tubhyam uṣāsaḥ śucayaḥ parāvati bhadrā vastrā tanvate daṁsu raśmiṣu citrā navyeṣu raśmiṣu |
1.134.04d tubhyaṁ dhenuḥ sabardughā viśvā vasūni dohate |
1.134.04f ajanayo maruto vakṣaṇābhyo diva ā vakṣaṇābhyaḥ ||
1.134.05a tubhyaṁ śukrāsaḥ śucayas turaṇyavo madeṣūgrā iṣaṇanta bhurvaṇy apām iṣanta bhurvaṇi |
1.134.05d tvāṁ tsārī dasamāno bhagam īṭṭe takvavīye |
1.134.05f tvaṁ viśvasmād bhuvanāt pāsi dharmaṇāsuryāt pāsi dharmaṇā ||
1.134.06a tvaṁ no vāyav eṣām apūrvyaḥ somānām prathamaḥ pītim arhasi sutānām pītim arhasi |
1.134.06d uto vihutmatīnāṁ viśāṁ vavarjuṣīṇām |
1.134.06f viśvā it te dhenavo duhra āśiraṁ ghṛtaṁ duhrata āśiram ||

1.135.01a stīrṇam barhir upa no yāhi vītaye sahasreṇa niyutā niyutvate śatinībhir niyutvate |
1.135.01d tubhyaṁ hi pūrvapītaye devā devāya yemire |
1.135.01f pra te sutāso madhumanto asthiran madāya kratve asthiran ||
1.135.02a tubhyāyaṁ somaḥ paripūto adribhiḥ spārhā vasānaḥ pari kośam arṣati śukrā vasāno arṣati |
1.135.02d tavāyam bhāga āyuṣu somo deveṣu hūyate |
1.135.02f vaha vāyo niyuto yāhy asmayur juṣāṇo yāhy asmayuḥ ||
1.135.03a ā no niyudbhiḥ śatinībhir adhvaraṁ sahasriṇībhir upa yāhi vītaye vāyo havyāni vītaye |
1.135.03d tavāyam bhāga ṛtviyaḥ saraśmiḥ sūrye sacā |
1.135.03f adhvaryubhir bharamāṇā ayaṁsata vāyo śukrā ayaṁsata ||
1.135.04a ā vāṁ ratho niyutvān vakṣad avase 'bhi prayāṁsi sudhitāni vītaye vāyo havyāni vītaye |
1.135.04d pibatam madhvo andhasaḥ pūrvapeyaṁ hi vāṁ hitam |
1.135.04f vāyav ā candreṇa rādhasā gatam indraś ca rādhasā gatam ||
1.135.05a ā vāṁ dhiyo vavṛtyur adhvarām̐ upemam indum marmṛjanta vājinam āśum atyaṁ na vājinam |
1.135.05d teṣām pibatam asmayū ā no gantam ihotyā |
1.135.05f indravāyū sutānām adribhir yuvam madāya vājadā yuvam ||
1.135.06a ime vāṁ somā apsv ā sutā ihādhvaryubhir bharamāṇā ayaṁsata vāyo śukrā ayaṁsata |
1.135.06d ete vām abhy asṛkṣata tiraḥ pavitram āśavaḥ |
1.135.06f yuvāyavo 'ti romāṇy avyayā somāso aty avyayā ||
1.135.07a ati vāyo sasato yāhi śaśvato yatra grāvā vadati tatra gacchataṁ gṛham indraś ca gacchatam |
1.135.07d vi sūnṛtā dadṛśe rīyate ghṛtam ā pūrṇayā niyutā yātho adhvaram indraś ca yātho adhvaram ||
1.135.08a atrāha tad vahethe madhva āhutiṁ yam aśvattham upatiṣṭhanta jāyavo 'sme te santu jāyavaḥ |
1.135.08d sākaṁ gāvaḥ suvate pacyate yavo na te vāya upa dasyanti dhenavo nāpa dasyanti dhenavaḥ ||
1.135.09a ime ye te su vāyo bāhvojaso 'ntar nadī te patayanty ukṣaṇo mahi vrādhanta ukṣaṇaḥ |
1.135.09d dhanvañ cid ye anāśavo jīrāś cid agiraukasaḥ |
1.135.09f sūryasyeva raśmayo durniyantavo hastayor durniyantavaḥ ||

1.136.01a pra su jyeṣṭhaṁ nicirābhyām bṛhan namo havyam matim bharatā mṛḻayadbhyāṁ svādiṣṭham mṛḻayadbhyām |
1.136.01d tā samrājā ghṛtāsutī yajñe-yajña upastutā |
1.136.01f athainoḥ kṣatraṁ na kutaś canādhṛṣe devatvaṁ nū cid ādhṛṣe ||
1.136.02a adarśi gātur urave varīyasī panthā ṛtasya sam ayaṁsta raśmibhiś cakṣur bhagasya raśmibhiḥ |
1.136.02d dyukṣam mitrasya sādanam aryamṇo varuṇasya ca |
1.136.02f athā dadhāte bṛhad ukthyaṁ vaya upastutyam bṛhad vayaḥ ||
1.136.03a jyotiṣmatīm aditiṁ dhārayatkṣitiṁ svarvatīm ā sacete dive-dive jāgṛvāṁsā dive-dive |
1.136.03d jyotiṣmat kṣatram āśāte ādityā dānunas patī |
1.136.03f mitras tayor varuṇo yātayajjano 'ryamā yātayajjanaḥ ||
1.136.04a ayam mitrāya varuṇāya śaṁtamaḥ somo bhūtv avapāneṣv ābhago devo deveṣv ābhagaḥ |
1.136.04d taṁ devāso juṣerata viśve adya sajoṣasaḥ |
1.136.04f tathā rājānā karatho yad īmaha ṛtāvānā yad īmahe ||
1.136.05a yo mitrāya varuṇāyāvidhaj jano 'narvāṇaṁ tam pari pāto aṁhaso dāśvāṁsam martam aṁhasaḥ |
1.136.05d tam aryamābhi rakṣaty ṛjūyantam anu vratam |
1.136.05f ukthair ya enoḥ paribhūṣati vrataṁ stomair ābhūṣati vratam ||
1.136.06a namo dive bṛhate rodasībhyām mitrāya vocaṁ varuṇāya mīḻhuṣe sumṛḻīkāya mīḻhuṣe |
1.136.06d indram agnim upa stuhi dyukṣam aryamaṇam bhagam |
1.136.06f jyog jīvantaḥ prajayā sacemahi somasyotī sacemahi ||
1.136.07a ūtī devānāṁ vayam indravanto maṁsīmahi svayaśaso marudbhiḥ |
1.136.07c agnir mitro varuṇaḥ śarma yaṁsan tad aśyāma maghavāno vayaṁ ca ||

1.137.01a suṣumā yātam adribhir gośrītā matsarā ime somāso matsarā ime |
1.137.01d ā rājānā divispṛśāsmatrā gantam upa naḥ |
1.137.01f ime vām mitrāvaruṇā gavāśiraḥ somāḥ śukrā gavāśiraḥ ||
1.137.02a ima ā yātam indavaḥ somāso dadhyāśiraḥ sutāso dadhyāśiraḥ |
1.137.02d uta vām uṣaso budhi sākaṁ sūryasya raśmibhiḥ |
1.137.02f suto mitrāya varuṇāya pītaye cārur ṛtāya pītaye ||
1.137.03a tāṁ vāṁ dhenuṁ na vāsarīm aṁśuṁ duhanty adribhiḥ somaṁ duhanty adribhiḥ |
1.137.03d asmatrā gantam upa no 'rvāñcā somapītaye |
1.137.03f ayaṁ vām mitrāvaruṇā nṛbhiḥ sutaḥ soma ā pītaye sutaḥ ||

1.138.01a pra-pra pūṣṇas tuvijātasya śasyate mahitvam asya tavaso na tandate stotram asya na tandate |
1.138.01d arcāmi sumnayann aham antyūtim mayobhuvam |
1.138.01f viśvasya yo mana āyuyuve makho deva āyuyuve makhaḥ ||
1.138.02a pra hi tvā pūṣann ajiraṁ na yāmani stomebhiḥ kṛṇva ṛṇavo yathā mṛdha uṣṭro na pīparo mṛdhaḥ |
1.138.02d huve yat tvā mayobhuvaṁ devaṁ sakhyāya martyaḥ |
1.138.02f asmākam āṅgūṣān dyumninas kṛdhi vājeṣu dyumninas kṛdhi ||
1.138.03a yasya te pūṣan sakhye vipanyavaḥ kratvā cit santo 'vasā bubhujrira iti kratvā bubhujrire |
1.138.03d tām anu tvā navīyasīṁ niyutaṁ rāya īmahe |
1.138.03f aheḻamāna uruśaṁsa sarī bhava vāje-vāje sarī bhava ||
1.138.04a asyā ū ṣu ṇa upa sātaye bhuvo 'heḻamāno rarivām̐ ajāśva śravasyatām ajāśva |
1.138.04d o ṣu tvā vavṛtīmahi stomebhir dasma sādhubhiḥ |
1.138.04f nahi tvā pūṣann atimanya āghṛṇe na te sakhyam apahnuve ||

1.139.01a astu śrauṣaṭ puro agniṁ dhiyā dadha ā nu tac chardho divyaṁ vṛṇīmaha indravāyū vṛṇīmahe |
1.139.01d yad dha krāṇā vivasvati nābhā saṁdāyi navyasī |
1.139.01f adha pra sū na upa yantu dhītayo devām̐ acchā na dhītayaḥ ||
1.139.02a yad dha tyan mitrāvaruṇāv ṛtād adhy ādadāthe anṛtaṁ svena manyunā dakṣasya svena manyunā |
1.139.02d yuvor itthādhi sadmasv apaśyāma hiraṇyayam |
1.139.02f dhībhiś cana manasā svebhir akṣabhiḥ somasya svebhir akṣabhiḥ ||
1.139.03a yuvāṁ stomebhir devayanto aśvināśrāvayanta iva ślokam āyavo yuvāṁ havyābhy āyavaḥ |
1.139.03d yuvor viśvā adhi śriyaḥ pṛkṣaś ca viśvavedasā |
1.139.03f pruṣāyante vām pavayo hiraṇyaye rathe dasrā hiraṇyaye ||
1.139.04a aceti dasrā vy u nākam ṛṇvatho yuñjate vāṁ rathayujo diviṣṭiṣv adhvasmāno diviṣṭiṣu |
1.139.04d adhi vāṁ sthāma vandhure rathe dasrā hiraṇyaye |
1.139.04f patheva yantāv anuśāsatā rajo 'ñjasā śāsatā rajaḥ ||
1.139.05a śacībhir naḥ śacīvasū divā naktaṁ daśasyatam |
1.139.05c mā vāṁ rātir upa dasat kadā canāsmad rātiḥ kadā cana ||
1.139.06a vṛṣann indra vṛṣapāṇāsa indava ime sutā adriṣutāsa udbhidas tubhyaṁ sutāsa udbhidaḥ |
1.139.06d te tvā mandantu dāvane mahe citrāya rādhase |
1.139.06f gīrbhir girvāhaḥ stavamāna ā gahi sumṛḻīko na ā gahi ||
1.139.07a o ṣū ṇo agne śṛṇuhi tvam īḻito devebhyo bravasi yajñiyebhyo rājabhyo yajñiyebhyaḥ |
1.139.07d yad dha tyām aṅgirobhyo dhenuṁ devā adattana |
1.139.07f vi tāṁ duhre aryamā kartarī sacām̐ eṣa tāṁ veda me sacā ||
1.139.08a mo ṣu vo asmad abhi tāni pauṁsyā sanā bhūvan dyumnāni mota jāriṣur asmat purota jāriṣuḥ |
1.139.08d yad vaś citraṁ yuge-yuge navyaṁ ghoṣād amartyam |
1.139.08f asmāsu tan maruto yac ca duṣṭaraṁ didhṛtā yac ca duṣṭaram ||
1.139.09a dadhyaṅ ha me januṣam pūrvo aṅgirāḥ priyamedhaḥ kaṇvo atrir manur vidus te me pūrve manur viduḥ |
1.139.09d teṣāṁ deveṣv āyatir asmākaṁ teṣu nābhayaḥ |
1.139.09f teṣām padena mahy ā name girendrāgnī ā name girā ||
1.139.10a hotā yakṣad vanino vanta vāryam bṛhaspatir yajati vena ukṣabhiḥ puruvārebhir ukṣabhiḥ |
1.139.10d jagṛbhmā dūraādiśaṁ ślokam adrer adha tmanā |
1.139.10f adhārayad ararindāni sukratuḥ purū sadmāni sukratuḥ ||
1.139.11a ye devāso divy ekādaśa stha pṛthivyām adhy ekādaśa stha |
1.139.11c apsukṣito mahinaikādaśa stha te devāso yajñam imaṁ juṣadhvam ||

1.140.01a vediṣade priyadhāmāya sudyute dhāsim iva pra bharā yonim agnaye |
1.140.01c vastreṇeva vāsayā manmanā śuciṁ jyotīrathaṁ śukravarṇaṁ tamohanam ||
1.140.02a abhi dvijanmā trivṛd annam ṛjyate saṁvatsare vāvṛdhe jagdham ī punaḥ |
1.140.02c anyasyāsā jihvayā jenyo vṛṣā ny anyena vanino mṛṣṭa vāraṇaḥ ||
1.140.03a kṛṣṇaprutau vevije asya sakṣitā ubhā tarete abhi mātarā śiśum |
1.140.03c prācājihvaṁ dhvasayantaṁ tṛṣucyutam ā sācyaṁ kupayaṁ vardhanam pituḥ ||
1.140.04a mumukṣvo manave mānavasyate raghudruvaḥ kṛṣṇasītāsa ū juvaḥ |
1.140.04c asamanā ajirāso raghuṣyado vātajūtā upa yujyanta āśavaḥ ||
1.140.05a ād asya te dhvasayanto vṛtherate kṛṣṇam abhvam mahi varpaḥ karikrataḥ |
1.140.05c yat sīm mahīm avanim prābhi marmṛśad abhiśvasan stanayann eti nānadat ||
1.140.06a bhūṣan na yo 'dhi babhrūṣu namnate vṛṣeva patnīr abhy eti roruvat |
1.140.06c ojāyamānas tanvaś ca śumbhate bhīmo na śṛṅgā davidhāva durgṛbhiḥ ||
1.140.07a sa saṁstiro viṣṭiraḥ saṁ gṛbhāyati jānann eva jānatīr nitya ā śaye |
1.140.07c punar vardhante api yanti devyam anyad varpaḥ pitroḥ kṛṇvate sacā ||
1.140.08a tam agruvaḥ keśinīḥ saṁ hi rebhira ūrdhvās tasthur mamruṣīḥ prāyave punaḥ |
1.140.08c tāsāṁ jarām pramuñcann eti nānadad asum paraṁ janayañ jīvam astṛtam ||
1.140.09a adhīvāsam pari mātū rihann aha tuvigrebhiḥ satvabhir yāti vi jrayaḥ |
1.140.09c vayo dadhat padvate rerihat sadānu śyenī sacate vartanīr aha ||
1.140.10a asmākam agne maghavatsu dīdihy adha śvasīvān vṛṣabho damūnāḥ |
1.140.10c avāsyā śiśumatīr adīder varmeva yutsu parijarbhurāṇaḥ ||
1.140.11a idam agne sudhitaṁ durdhitād adhi priyād u cin manmanaḥ preyo astu te |
1.140.11c yat te śukraṁ tanvo rocate śuci tenāsmabhyaṁ vanase ratnam ā tvam ||
1.140.12a rathāya nāvam uta no gṛhāya nityāritrām padvatīṁ rāsy agne |
1.140.12c asmākaṁ vīrām̐ uta no maghono janām̐ś ca yā pārayāc charma yā ca ||
1.140.13a abhī no agna uktham ij juguryā dyāvākṣāmā sindhavaś ca svagūrtāḥ |
1.140.13c gavyaṁ yavyaṁ yanto dīrghāheṣaṁ varam aruṇyo varanta ||

1.141.01a baḻ itthā tad vapuṣe dhāyi darśataṁ devasya bhargaḥ sahaso yato jani |
1.141.01c yad īm upa hvarate sādhate matir ṛtasya dhenā anayanta sasrutaḥ ||
1.141.02a pṛkṣo vapuḥ pitumān nitya ā śaye dvitīyam ā saptaśivāsu mātṛṣu |
1.141.02c tṛtīyam asya vṛṣabhasya dohase daśapramatiṁ janayanta yoṣaṇaḥ ||
1.141.03a nir yad īm budhnān mahiṣasya varpasa īśānāsaḥ śavasā kranta sūrayaḥ |
1.141.03c yad īm anu pradivo madhva ādhave guhā santam mātariśvā mathāyati ||
1.141.04a pra yat pituḥ paramān nīyate pary ā pṛkṣudho vīrudho daṁsu rohati |
1.141.04c ubhā yad asya januṣaṁ yad invata ād id yaviṣṭho abhavad ghṛṇā śuciḥ ||
1.141.05a ād in mātṝr āviśad yāsv ā śucir ahiṁsyamāna urviyā vi vāvṛdhe |
1.141.05c anu yat pūrvā aruhat sanājuvo ni navyasīṣv avarāsu dhāvate ||
1.141.06a ād id dhotāraṁ vṛṇate diviṣṭiṣu bhagam iva papṛcānāsa ṛñjate |
1.141.06c devān yat kratvā majmanā puruṣṭuto martaṁ śaṁsaṁ viśvadhā veti dhāyase ||
1.141.07a vi yad asthād yajato vātacodito hvāro na vakvā jaraṇā anākṛtaḥ |
1.141.07c tasya patman dakṣuṣaḥ kṛṣṇajaṁhasaḥ śucijanmano raja ā vyadhvanaḥ ||
1.141.08a ratho na yātaḥ śikvabhiḥ kṛto dyām aṅgebhir aruṣebhir īyate |
1.141.08c ād asya te kṛṣṇāso dakṣi sūrayaḥ śūrasyeva tveṣathād īṣate vayaḥ ||
1.141.09a tvayā hy agne varuṇo dhṛtavrato mitraḥ śāśadre aryamā sudānavaḥ |
1.141.09c yat sīm anu kratunā viśvathā vibhur arān na nemiḥ paribhūr ajāyathāḥ ||
1.141.10a tvam agne śaśamānāya sunvate ratnaṁ yaviṣṭha devatātim invasi |
1.141.10c taṁ tvā nu navyaṁ sahaso yuvan vayam bhagaṁ na kāre mahiratna dhīmahi ||
1.141.11a asme rayiṁ na svarthaṁ damūnasam bhagaṁ dakṣaṁ na papṛcāsi dharṇasim |
1.141.11c raśmīm̐r iva yo yamati janmanī ubhe devānāṁ śaṁsam ṛta ā ca sukratuḥ ||
1.141.12a uta naḥ sudyotmā jīrāśvo hotā mandraḥ śṛṇavac candrarathaḥ |
1.141.12c sa no neṣan neṣatamair amūro 'gnir vāmaṁ suvitaṁ vasyo accha ||
1.141.13a astāvy agniḥ śimīvadbhir arkaiḥ sāmrājyāya prataraṁ dadhānaḥ |
1.141.13c amī ca ye maghavāno vayaṁ ca mihaṁ na sūro ati niṣ ṭatanyuḥ ||

1.142.01a samiddho agna ā vaha devām̐ adya yatasruce |
1.142.01c tantuṁ tanuṣva pūrvyaṁ sutasomāya dāśuṣe ||
1.142.02a ghṛtavantam upa māsi madhumantaṁ tanūnapāt |
1.142.02c yajñaṁ viprasya māvataḥ śaśamānasya dāśuṣaḥ ||
1.142.03a śuciḥ pāvako adbhuto madhvā yajñam mimikṣati |
1.142.03c narāśaṁsas trir ā divo devo deveṣu yajñiyaḥ ||
1.142.04a īḻito agna ā vahendraṁ citram iha priyam |
1.142.04c iyaṁ hi tvā matir mamācchā sujihva vacyate ||
1.142.05a stṛṇānāso yatasruco barhir yajñe svadhvare |
1.142.05c vṛñje devavyacastamam indrāya śarma saprathaḥ ||
1.142.06a vi śrayantām ṛtāvṛdhaḥ prayai devebhyo mahīḥ |
1.142.06c pāvakāsaḥ puruspṛho dvāro devīr asaścataḥ ||
1.142.07a ā bhandamāne upāke naktoṣāsā supeśasā |
1.142.07c yahvī ṛtasya mātarā sīdatām barhir ā sumat ||
1.142.08a mandrajihvā jugurvaṇī hotārā daivyā kavī |
1.142.08c yajñaṁ no yakṣatām imaṁ sidhram adya divispṛśam ||
1.142.09a śucir deveṣv arpitā hotrā marutsu bhāratī |
1.142.09c iḻā sarasvatī mahī barhiḥ sīdantu yajñiyāḥ ||
1.142.10a tan nas turīpam adbhutam puru vāram puru tmanā |
1.142.10c tvaṣṭā poṣāya vi ṣyatu rāye nābhā no asmayuḥ ||
1.142.11a avasṛjann upa tmanā devān yakṣi vanaspate |
1.142.11c agnir havyā suṣūdati devo deveṣu medhiraḥ ||
1.142.12a pūṣaṇvate marutvate viśvadevāya vāyave |
1.142.12c svāhā gāyatravepase havyam indrāya kartana ||
1.142.13a svāhākṛtāny ā gahy upa havyāni vītaye |
1.142.13c indrā gahi śrudhī havaṁ tvāṁ havante adhvare ||

1.143.01a pra tavyasīṁ navyasīṁ dhītim agnaye vāco matiṁ sahasaḥ sūnave bhare |
1.143.01c apāṁ napād yo vasubhiḥ saha priyo hotā pṛthivyāṁ ny asīdad ṛtviyaḥ ||
1.143.02a sa jāyamānaḥ parame vyomany āvir agnir abhavan mātariśvane |
1.143.02c asya kratvā samidhānasya majmanā pra dyāvā śociḥ pṛthivī arocayat ||
1.143.03a asya tveṣā ajarā asya bhānavaḥ susaṁdṛśaḥ supratīkasya sudyutaḥ |
1.143.03c bhātvakṣaso aty aktur na sindhavo 'gne rejante asasanto ajarāḥ ||
1.143.04a yam erire bhṛgavo viśvavedasaṁ nābhā pṛthivyā bhuvanasya majmanā |
1.143.04c agniṁ taṁ gīrbhir hinuhi sva ā dame ya eko vasvo varuṇo na rājati ||
1.143.05a na yo varāya marutām iva svanaḥ seneva sṛṣṭā divyā yathāśaniḥ |
1.143.05c agnir jambhais tigitair atti bharvati yodho na śatrūn sa vanā ny ṛñjate ||
1.143.06a kuvin no agnir ucathasya vīr asad vasuṣ kuvid vasubhiḥ kāmam āvarat |
1.143.06c codaḥ kuvit tutujyāt sātaye dhiyaḥ śucipratīkaṁ tam ayā dhiyā gṛṇe ||
1.143.07a ghṛtapratīkaṁ va ṛtasya dhūrṣadam agnim mitraṁ na samidhāna ṛñjate |
1.143.07c indhāno akro vidatheṣu dīdyac chukravarṇām ud u no yaṁsate dhiyam ||
1.143.08a aprayucchann aprayucchadbhir agne śivebhir naḥ pāyubhiḥ pāhi śagmaiḥ |
1.143.08c adabdhebhir adṛpitebhir iṣṭe 'nimiṣadbhiḥ pari pāhi no jāḥ ||

1.144.01a eti pra hotā vratam asya māyayordhvāṁ dadhānaḥ śucipeśasaṁ dhiyam |
1.144.01c abhi srucaḥ kramate dakṣiṇāvṛto yā asya dhāma prathamaṁ ha niṁsate ||
1.144.02a abhīm ṛtasya dohanā anūṣata yonau devasya sadane parīvṛtāḥ |
1.144.02c apām upasthe vibhṛto yad āvasad adha svadhā adhayad yābhir īyate ||
1.144.03a yuyūṣataḥ savayasā tad id vapuḥ samānam arthaṁ vitaritratā mithaḥ |
1.144.03c ād īm bhago na havyaḥ sam asmad ā voḻhur na raśmīn sam ayaṁsta sārathiḥ ||
1.144.04a yam īṁ dvā savayasā saparyataḥ samāne yonā mithunā samokasā |
1.144.04c divā na naktam palito yuvājani purū carann ajaro mānuṣā yugā ||
1.144.05a tam īṁ hinvanti dhītayo daśa vriśo devam martāsa ūtaye havāmahe |
1.144.05c dhanor adhi pravata ā sa ṛṇvaty abhivrajadbhir vayunā navādhita ||
1.144.06a tvaṁ hy agne divyasya rājasi tvam pārthivasya paśupā iva tmanā |
1.144.06c enī ta ete bṛhatī abhiśriyā hiraṇyayī vakvarī barhir āśāte ||
1.144.07a agne juṣasva prati harya tad vaco mandra svadhāva ṛtajāta sukrato |
1.144.07c yo viśvataḥ pratyaṅṅ asi darśato raṇvaḥ saṁdṛṣṭau pitumām̐ iva kṣayaḥ ||

1.145.01a tam pṛcchatā sa jagāmā sa veda sa cikitvām̐ īyate sā nv īyate |
1.145.01c tasmin santi praśiṣas tasminn iṣṭayaḥ sa vājasya śavasaḥ śuṣmiṇas patiḥ ||
1.145.02a tam it pṛcchanti na simo vi pṛcchati sveneva dhīro manasā yad agrabhīt |
1.145.02c na mṛṣyate prathamaṁ nāparaṁ vaco 'sya kratvā sacate apradṛpitaḥ ||
1.145.03a tam id gacchanti juhvas tam arvatīr viśvāny ekaḥ śṛṇavad vacāṁsi me |
1.145.03c purupraiṣas taturir yajñasādhano 'cchidrotiḥ śiśur ādatta saṁ rabhaḥ ||
1.145.04a upasthāyaṁ carati yat samārata sadyo jātas tatsāra yujyebhiḥ |
1.145.04c abhi śvāntam mṛśate nāndye mude yad īṁ gacchanty uśatīr apiṣṭhitam ||
1.145.05a sa īm mṛgo apyo vanargur upa tvacy upamasyāṁ ni dhāyi |
1.145.05c vy abravīd vayunā martyebhyo 'gnir vidvām̐ ṛtacid dhi satyaḥ ||

1.146.01a trimūrdhānaṁ saptaraśmiṁ gṛṇīṣe 'nūnam agnim pitror upasthe |
1.146.01c niṣattam asya carato dhruvasya viśvā divo rocanāpaprivāṁsam ||
1.146.02a ukṣā mahām̐ abhi vavakṣa ene ajaras tasthāv itaūtir ṛṣvaḥ |
1.146.02c urvyāḥ pado ni dadhāti sānau rihanty ūdho aruṣāso asya ||
1.146.03a samānaṁ vatsam abhi saṁcarantī viṣvag dhenū vi carataḥ sumeke |
1.146.03c anapavṛjyām̐ adhvano mimāne viśvān ketām̐ adhi maho dadhāne ||
1.146.04a dhīrāsaḥ padaṁ kavayo nayanti nānā hṛdā rakṣamāṇā ajuryam |
1.146.04c siṣāsantaḥ pary apaśyanta sindhum āvir ebhyo abhavat sūryo nṝn ||
1.146.05a didṛkṣeṇyaḥ pari kāṣṭhāsu jenya īḻenyo maho arbhāya jīvase |
1.146.05c purutrā yad abhavat sūr ahaibhyo garbhebhyo maghavā viśvadarśataḥ ||

1.147.01a kathā te agne śucayanta āyor dadāśur vājebhir āśuṣāṇāḥ |
1.147.01c ubhe yat toke tanaye dadhānā ṛtasya sāman raṇayanta devāḥ ||
1.147.02a bodhā me asya vacaso yaviṣṭha maṁhiṣṭhasya prabhṛtasya svadhāvaḥ |
1.147.02c pīyati tvo anu tvo gṛṇāti vandārus te tanvaṁ vande agne ||
1.147.03a ye pāyavo māmateyaṁ te agne paśyanto andhaṁ duritād arakṣan |
1.147.03c rarakṣa tān sukṛto viśvavedā dipsanta id ripavo nāha debhuḥ ||
1.147.04a yo no agne ararivām̐ aghāyur arātīvā marcayati dvayena |
1.147.04c mantro guruḥ punar astu so asmā anu mṛkṣīṣṭa tanvaṁ duruktaiḥ ||
1.147.05a uta vā yaḥ sahasya pravidvān marto martam marcayati dvayena |
1.147.05c ataḥ pāhi stavamāna stuvantam agne mākir no duritāya dhāyīḥ ||

1.148.01a mathīd yad īṁ viṣṭo mātariśvā hotāraṁ viśvāpsuṁ viśvadevyam |
1.148.01c ni yaṁ dadhur manuṣyāsu vikṣu svar ṇa citraṁ vapuṣe vibhāvam ||
1.148.02a dadānam in na dadabhanta manmāgnir varūtham mama tasya cākan |
1.148.02c juṣanta viśvāny asya karmopastutim bharamāṇasya kāroḥ ||
1.148.03a nitye cin nu yaṁ sadane jagṛbhre praśastibhir dadhire yajñiyāsaḥ |
1.148.03c pra sū nayanta gṛbhayanta iṣṭāv aśvāso na rathyo rārahāṇāḥ ||
1.148.04a purūṇi dasmo ni riṇāti jambhair ād rocate vana ā vibhāvā |
1.148.04c ād asya vāto anu vāti śocir astur na śaryām asanām anu dyūn ||
1.148.05a na yaṁ ripavo na riṣaṇyavo garbhe santaṁ reṣaṇā reṣayanti |
1.148.05c andhā apaśyā na dabhann abhikhyā nityāsa īm pretāro arakṣan ||

1.149.01a mahaḥ sa rāya eṣate patir dann ina inasya vasunaḥ pada ā |
1.149.01c upa dhrajantam adrayo vidhann it ||
1.149.02a sa yo vṛṣā narāṁ na rodasyoḥ śravobhir asti jīvapītasargaḥ |
1.149.02c pra yaḥ sasrāṇaḥ śiśrīta yonau ||
1.149.03a ā yaḥ puraṁ nārmiṇīm adīded atyaḥ kavir nabhanyo nārvā |
1.149.03c sūro na rurukvāñ chatātmā ||
1.149.04a abhi dvijanmā trī rocanāni viśvā rajāṁsi śuśucāno asthāt |
1.149.04c hotā yajiṣṭho apāṁ sadhasthe ||
1.149.05a ayaṁ sa hotā yo dvijanmā viśvā dadhe vāryāṇi śravasyā |
1.149.05c marto yo asmai sutuko dadāśa ||

1.150.01a puru tvā dāśvān voce 'rir agne tava svid ā |
1.150.01c todasyeva śaraṇa ā mahasya ||
1.150.02a vy aninasya dhaninaḥ prahoṣe cid araruṣaḥ |
1.150.02c kadā cana prajigato adevayoḥ ||
1.150.03a sa candro vipra martyo maho vrādhantamo divi |
1.150.03c pra-pret te agne vanuṣaḥ syāma ||

1.151.01a mitraṁ na yaṁ śimyā goṣu gavyavaḥ svādhyo vidathe apsu jījanan |
1.151.01c arejetāṁ rodasī pājasā girā prati priyaṁ yajataṁ januṣām avaḥ ||
1.151.02a yad dha tyad vām purumīḻhasya sominaḥ pra mitrāso na dadhire svābhuvaḥ |
1.151.02c adha kratuṁ vidataṁ gātum arcata uta śrutaṁ vṛṣaṇā pastyāvataḥ ||
1.151.03a ā vām bhūṣan kṣitayo janma rodasyoḥ pravācyaṁ vṛṣaṇā dakṣase mahe |
1.151.03c yad īm ṛtāya bharatho yad arvate pra hotrayā śimyā vītho adhvaram ||
1.151.04a pra sā kṣitir asura yā mahi priya ṛtāvānāv ṛtam ā ghoṣatho bṛhat |
1.151.04c yuvaṁ divo bṛhato dakṣam ābhuvaṁ gāṁ na dhury upa yuñjāthe apaḥ ||
1.151.05a mahī atra mahinā vāram ṛṇvatho 'reṇavas tuja ā sadman dhenavaḥ |
1.151.05c svaranti tā uparatāti sūryam ā nimruca uṣasas takvavīr iva ||
1.151.06a ā vām ṛtāya keśinīr anūṣata mitra yatra varuṇa gātum arcathaḥ |
1.151.06c ava tmanā sṛjatam pinvataṁ dhiyo yuvaṁ viprasya manmanām irajyathaḥ ||
1.151.07a yo vāṁ yajñaiḥ śaśamāno ha dāśati kavir hotā yajati manmasādhanaḥ |
1.151.07c upāha taṁ gacchatho vītho adhvaram acchā giraḥ sumatiṁ gantam asmayū ||
1.151.08a yuvāṁ yajñaiḥ prathamā gobhir añjata ṛtāvānā manaso na prayuktiṣu |
1.151.08c bharanti vām manmanā saṁyatā giro 'dṛpyatā manasā revad āśāthe ||
1.151.09a revad vayo dadhāthe revad āśāthe narā māyābhir itaūti māhinam |
1.151.09c na vāṁ dyāvo 'habhir nota sindhavo na devatvam paṇayo nānaśur magham ||

1.152.01a yuvaṁ vastrāṇi pīvasā vasāthe yuvor acchidrā mantavo ha sargāḥ |
1.152.01c avātiratam anṛtāni viśva ṛtena mitrāvaruṇā sacethe ||
1.152.02a etac cana tvo vi ciketad eṣāṁ satyo mantraḥ kaviśasta ṛghāvān |
1.152.02c triraśriṁ hanti caturaśrir ugro devanido ha prathamā ajūryan ||
1.152.03a apād eti prathamā padvatīnāṁ kas tad vām mitrāvaruṇā ciketa |
1.152.03c garbho bhāram bharaty ā cid asya ṛtam piparty anṛtaṁ ni tārīt ||
1.152.04a prayantam it pari jāraṁ kanīnām paśyāmasi nopanipadyamānam |
1.152.04c anavapṛgṇā vitatā vasānam priyam mitrasya varuṇasya dhāma ||
1.152.05a anaśvo jāto anabhīśur arvā kanikradat patayad ūrdhvasānuḥ |
1.152.05c acittam brahma jujuṣur yuvānaḥ pra mitre dhāma varuṇe gṛṇantaḥ ||
1.152.06a ā dhenavo māmateyam avantīr brahmapriyam pīpayan sasminn ūdhan |
1.152.06c pitvo bhikṣeta vayunāni vidvān āsāvivāsann aditim uruṣyet ||
1.152.07a ā vām mitrāvaruṇā havyajuṣṭiṁ namasā devāv avasā vavṛtyām |
1.152.07c asmākam brahma pṛtanāsu sahyā asmākaṁ vṛṣṭir divyā supārā ||

1.153.01a yajāmahe vām mahaḥ sajoṣā havyebhir mitrāvaruṇā namobhiḥ |
1.153.01c ghṛtair ghṛtasnū adha yad vām asme adhvaryavo na dhītibhir bharanti ||
1.153.02a prastutir vāṁ dhāma na prayuktir ayāmi mitrāvaruṇā suvṛktiḥ |
1.153.02c anakti yad vāṁ vidatheṣu hotā sumnaṁ vāṁ sūrir vṛṣaṇāv iyakṣan ||
1.153.03a pīpāya dhenur aditir ṛtāya janāya mitrāvaruṇā havirde |
1.153.03c hinoti yad vāṁ vidathe saparyan sa rātahavyo mānuṣo na hotā ||
1.153.04a uta vāṁ vikṣu madyāsv andho gāva āpaś ca pīpayanta devīḥ |
1.153.04c uto no asya pūrvyaḥ patir dan vītam pātam payasa usriyāyāḥ ||

1.154.01a viṣṇor nu kaṁ vīryāṇi pra vocaṁ yaḥ pārthivāni vimame rajāṁsi |
1.154.01c yo askabhāyad uttaraṁ sadhasthaṁ vicakramāṇas tredhorugāyaḥ ||
1.154.02a pra tad viṣṇuḥ stavate vīryeṇa mṛgo na bhīmaḥ kucaro giriṣṭhāḥ |
1.154.02c yasyoruṣu triṣu vikramaṇeṣv adhikṣiyanti bhuvanāni viśvā ||
1.154.03a pra viṣṇave śūṣam etu manma girikṣita urugāyāya vṛṣṇe |
1.154.03c ya idaṁ dīrgham prayataṁ sadhastham eko vimame tribhir it padebhiḥ ||
1.154.04a yasya trī pūrṇā madhunā padāny akṣīyamāṇā svadhayā madanti |
1.154.04c ya u tridhātu pṛthivīm uta dyām eko dādhāra bhuvanāni viśvā ||
1.154.05a tad asya priyam abhi pātho aśyāṁ naro yatra devayavo madanti |
1.154.05c urukramasya sa hi bandhur itthā viṣṇoḥ pade parame madhva utsaḥ ||
1.154.06a tā vāṁ vāstūny uśmasi gamadhyai yatra gāvo bhūriśṛṅgā ayāsaḥ |
1.154.06c atrāha tad urugāyasya vṛṣṇaḥ paramam padam ava bhāti bhūri ||

1.155.01a pra vaḥ pāntam andhaso dhiyāyate mahe śūrāya viṣṇave cārcata |
1.155.01c yā sānuni parvatānām adābhyā mahas tasthatur arvateva sādhunā ||
1.155.02a tveṣam itthā samaraṇaṁ śimīvator indrāviṣṇū sutapā vām uruṣyati |
1.155.02c yā martyāya pratidhīyamānam it kṛśānor astur asanām uruṣyathaḥ ||
1.155.03a tā īṁ vardhanti mahy asya pauṁsyaṁ ni mātarā nayati retase bhuje |
1.155.03c dadhāti putro 'varam param pitur nāma tṛtīyam adhi rocane divaḥ ||
1.155.04a tat-tad id asya pauṁsyaṁ gṛṇīmasīnasya trātur avṛkasya mīḻhuṣaḥ |
1.155.04c yaḥ pārthivāni tribhir id vigāmabhir uru kramiṣṭorugāyāya jīvase ||
1.155.05a dve id asya kramaṇe svardṛśo 'bhikhyāya martyo bhuraṇyati |
1.155.05c tṛtīyam asya nakir ā dadharṣati vayaś cana patayantaḥ patatriṇaḥ ||
1.155.06a caturbhiḥ sākaṁ navatiṁ ca nāmabhiś cakraṁ na vṛttaṁ vyatīm̐r avīvipat |
1.155.06c bṛhaccharīro vimimāna ṛkvabhir yuvākumāraḥ praty ety āhavam ||

1.156.01a bhavā mitro na śevyo ghṛtāsutir vibhūtadyumna evayā u saprathāḥ |
1.156.01c adhā te viṣṇo viduṣā cid ardhyaḥ stomo yajñaś ca rādhyo haviṣmatā ||
1.156.02a yaḥ pūrvyāya vedhase navīyase sumajjānaye viṣṇave dadāśati |
1.156.02c yo jātam asya mahato mahi bravat sed u śravobhir yujyaṁ cid abhy asat ||
1.156.03a tam u stotāraḥ pūrvyaṁ yathā vida ṛtasya garbhaṁ januṣā pipartana |
1.156.03c āsya jānanto nāma cid vivaktana mahas te viṣṇo sumatim bhajāmahe ||
1.156.04a tam asya rājā varuṇas tam aśvinā kratuṁ sacanta mārutasya vedhasaḥ |
1.156.04c dādhāra dakṣam uttamam aharvidaṁ vrajaṁ ca viṣṇuḥ sakhivām̐ aporṇute ||
1.156.05a ā yo vivāya sacathāya daivya indrāya viṣṇuḥ sukṛte sukṛttaraḥ |
1.156.05c vedhā ajinvat triṣadhastha āryam ṛtasya bhāge yajamānam ābhajat ||

1.157.01a abodhy agnir jma ud eti sūryo vy uṣāś candrā mahy āvo arciṣā |
1.157.01c āyukṣātām aśvinā yātave ratham prāsāvīd devaḥ savitā jagat pṛthak ||
1.157.02a yad yuñjāthe vṛṣaṇam aśvinā rathaṁ ghṛtena no madhunā kṣatram ukṣatam |
1.157.02c asmākam brahma pṛtanāsu jinvataṁ vayaṁ dhanā śūrasātā bhajemahi ||
1.157.03a arvāṅ tricakro madhuvāhano ratho jīrāśvo aśvinor yātu suṣṭutaḥ |
1.157.03c trivandhuro maghavā viśvasaubhagaḥ śaṁ na ā vakṣad dvipade catuṣpade ||
1.157.04a ā na ūrjaṁ vahatam aśvinā yuvam madhumatyā naḥ kaśayā mimikṣatam |
1.157.04c prāyus tāriṣṭaṁ nī rapāṁsi mṛkṣataṁ sedhataṁ dveṣo bhavataṁ sacābhuvā ||
1.157.05a yuvaṁ ha garbhaṁ jagatīṣu dhattho yuvaṁ viśveṣu bhuvaneṣv antaḥ |
1.157.05c yuvam agniṁ ca vṛṣaṇāv apaś ca vanaspatīm̐r aśvināv airayethām ||
1.157.06a yuvaṁ ha stho bhiṣajā bheṣajebhir atho ha stho rathyā rāthyebhiḥ |
1.157.06c atho ha kṣatram adhi dhattha ugrā yo vāṁ haviṣmān manasā dadāśa ||

1.158.01a vasū rudrā purumantū vṛdhantā daśasyataṁ no vṛṣaṇāv abhiṣṭau |
1.158.01c dasrā ha yad rekṇa aucathyo vām pra yat sasrāthe akavābhir ūtī ||
1.158.02a ko vāṁ dāśat sumataye cid asyai vasū yad dhethe namasā pade goḥ |
1.158.02c jigṛtam asme revatīḥ puraṁdhīḥ kāmapreṇeva manasā carantā ||
1.158.03a yukto ha yad vāṁ taugryāya perur vi madhye arṇaso dhāyi pajraḥ |
1.158.03c upa vām avaḥ śaraṇaṁ gameyaṁ śūro nājma patayadbhir evaiḥ ||
1.158.04a upastutir aucathyam uruṣyen mā mām ime patatriṇī vi dugdhām |
1.158.04c mā mām edho daśatayaś cito dhāk pra yad vām baddhas tmani khādati kṣām ||
1.158.05a na mā garan nadyo mātṛtamā dāsā yad īṁ susamubdham avādhuḥ |
1.158.05c śiro yad asya traitano vitakṣat svayaṁ dāsa uro aṁsāv api gdha ||
1.158.06a dīrghatamā māmateyo jujurvān daśame yuge |
1.158.06c apām arthaṁ yatīnām brahmā bhavati sārathiḥ ||

1.159.01a pra dyāvā yajñaiḥ pṛthivī ṛtāvṛdhā mahī stuṣe vidatheṣu pracetasā |
1.159.01c devebhir ye devaputre sudaṁsasetthā dhiyā vāryāṇi prabhūṣataḥ ||
1.159.02a uta manye pitur adruho mano mātur mahi svatavas tad dhavīmabhiḥ |
1.159.02c suretasā pitarā bhūma cakratur uru prajāyā amṛtaṁ varīmabhiḥ ||
1.159.03a te sūnavaḥ svapasaḥ sudaṁsaso mahī jajñur mātarā pūrvacittaye |
1.159.03c sthātuś ca satyaṁ jagataś ca dharmaṇi putrasya pāthaḥ padam advayāvinaḥ ||
1.159.04a te māyino mamire supracetaso jāmī sayonī mithunā samokasā |
1.159.04c navyaṁ-navyaṁ tantum ā tanvate divi samudre antaḥ kavayaḥ sudītayaḥ ||
1.159.05a tad rādho adya savitur vareṇyaṁ vayaṁ devasya prasave manāmahe |
1.159.05c asmabhyaṁ dyāvāpṛthivī sucetunā rayiṁ dhattaṁ vasumantaṁ śatagvinam ||

1.160.01a te hi dyāvāpṛthivī viśvaśambhuva ṛtāvarī rajaso dhārayatkavī |
1.160.01c sujanmanī dhiṣaṇe antar īyate devo devī dharmaṇā sūryaḥ śuciḥ ||
1.160.02a uruvyacasā mahinī asaścatā pitā mātā ca bhuvanāni rakṣataḥ |
1.160.02c sudhṛṣṭame vapuṣye na rodasī pitā yat sīm abhi rūpair avāsayat ||
1.160.03a sa vahniḥ putraḥ pitroḥ pavitravān punāti dhīro bhuvanāni māyayā |
1.160.03c dhenuṁ ca pṛśniṁ vṛṣabhaṁ suretasaṁ viśvāhā śukram payo asya dukṣata ||
1.160.04a ayaṁ devānām apasām apastamo yo jajāna rodasī viśvaśambhuvā |
1.160.04c vi yo mame rajasī sukratūyayājarebhiḥ skambhanebhiḥ sam ānṛce ||
1.160.05a te no gṛṇāne mahinī mahi śravaḥ kṣatraṁ dyāvāpṛthivī dhāsatho bṛhat |
1.160.05c yenābhi kṛṣṭīs tatanāma viśvahā panāyyam ojo asme sam invatam ||

1.161.01a kim u śreṣṭhaḥ kiṁ yaviṣṭho na ājagan kim īyate dūtyaṁ kad yad ūcima |
1.161.01c na nindima camasaṁ yo mahākulo 'gne bhrātar druṇa id bhūtim ūdima ||
1.161.02a ekaṁ camasaṁ caturaḥ kṛṇotana tad vo devā abruvan tad va āgamam |
1.161.02c saudhanvanā yady evā kariṣyatha sākaṁ devair yajñiyāso bhaviṣyatha ||
1.161.03a agniṁ dūtam prati yad abravītanāśvaḥ kartvo ratha uteha kartvaḥ |
1.161.03c dhenuḥ kartvā yuvaśā kartvā dvā tāni bhrātar anu vaḥ kṛtvy emasi ||
1.161.04a cakṛvāṁsa ṛbhavas tad apṛcchata kved abhūd yaḥ sya dūto na ājagan |
1.161.04c yadāvākhyac camasāñ caturaḥ kṛtān ād it tvaṣṭā gnāsv antar ny ānaje ||
1.161.05a hanāmainām̐ iti tvaṣṭā yad abravīc camasaṁ ye devapānam anindiṣuḥ |
1.161.05c anyā nāmāni kṛṇvate sute sacām̐ anyair enān kanyā nāmabhiḥ sparat ||
1.161.06a indro harī yuyuje aśvinā ratham bṛhaspatir viśvarūpām upājata |
1.161.06c ṛbhur vibhvā vājo devām̐ agacchata svapaso yajñiyam bhāgam aitana ||
1.161.07a niś carmaṇo gām ariṇīta dhītibhir yā jarantā yuvaśā tākṛṇotana |
1.161.07c saudhanvanā aśvād aśvam atakṣata yuktvā ratham upa devām̐ ayātana ||
1.161.08a idam udakam pibatety abravītanedaṁ vā ghā pibatā muñjanejanam |
1.161.08c saudhanvanā yadi tan neva haryatha tṛtīye ghā savane mādayādhvai ||
1.161.09a āpo bhūyiṣṭhā ity eko abravīd agnir bhūyiṣṭha ity anyo abravīt |
1.161.09c vadharyantīm bahubhyaḥ praiko abravīd ṛtā vadantaś camasām̐ apiṁśata ||
1.161.10a śroṇām eka udakaṁ gām avājati māṁsam ekaḥ piṁśati sūnayābhṛtam |
1.161.10c ā nimrucaḥ śakṛd eko apābharat kiṁ svit putrebhyaḥ pitarā upāvatuḥ ||
1.161.11a udvatsv asmā akṛṇotanā tṛṇaṁ nivatsv apaḥ svapasyayā naraḥ |
1.161.11c agohyasya yad asastanā gṛhe tad adyedam ṛbhavo nānu gacchatha ||
1.161.12a sammīlya yad bhuvanā paryasarpata kva svit tātyā pitarā va āsatuḥ |
1.161.12c aśapata yaḥ karasnaṁ va ādade yaḥ prābravīt pro tasmā abravītana ||
1.161.13a suṣupvāṁsa ṛbhavas tad apṛcchatāgohya ka idaṁ no abūbudhat |
1.161.13c śvānam basto bodhayitāram abravīt saṁvatsara idam adyā vy akhyata ||
1.161.14a divā yānti maruto bhūmyāgnir ayaṁ vāto antarikṣeṇa yāti |
1.161.14c adbhir yāti varuṇaḥ samudrair yuṣmām̐ icchantaḥ śavaso napātaḥ ||

1.162.01a mā no mitro varuṇo aryamāyur indra ṛbhukṣā marutaḥ pari khyan |
1.162.01c yad vājino devajātasya sapteḥ pravakṣyāmo vidathe vīryāṇi ||
1.162.02a yan nirṇijā rekṇasā prāvṛtasya rātiṁ gṛbhītām mukhato nayanti |
1.162.02c suprāṅ ajo memyad viśvarūpa indrāpūṣṇoḥ priyam apy eti pāthaḥ ||
1.162.03a eṣa cchāgaḥ puro aśvena vājinā pūṣṇo bhāgo nīyate viśvadevyaḥ |
1.162.03c abhipriyaṁ yat puroḻāśam arvatā tvaṣṭed enaṁ sauśravasāya jinvati ||
1.162.04a yad dhaviṣyam ṛtuśo devayānaṁ trir mānuṣāḥ pary aśvaṁ nayanti |
1.162.04c atrā pūṣṇaḥ prathamo bhāga eti yajñaṁ devebhyaḥ prativedayann ajaḥ ||
1.162.05a hotādhvaryur āvayā agnimindho grāvagrābha uta śaṁstā suvipraḥ |
1.162.05c tena yajñena svaraṁkṛtena sviṣṭena vakṣaṇā ā pṛṇadhvam ||
1.162.06a yūpavraskā uta ye yūpavāhāś caṣālaṁ ye aśvayūpāya takṣati |
1.162.06c ye cārvate pacanaṁ sambharanty uto teṣām abhigūrtir na invatu ||
1.162.07a upa prāgāt suman me 'dhāyi manma devānām āśā upa vītapṛṣṭhaḥ |
1.162.07c anv enaṁ viprā ṛṣayo madanti devānām puṣṭe cakṛmā subandhum ||
1.162.08a yad vājino dāma saṁdānam arvato yā śīrṣaṇyā raśanā rajjur asya |
1.162.08c yad vā ghāsya prabhṛtam āsye tṛṇaṁ sarvā tā te api deveṣv astu ||
1.162.09a yad aśvasya kraviṣo makṣikāśa yad vā svarau svadhitau riptam asti |
1.162.09c yad dhastayoḥ śamitur yan nakheṣu sarvā tā te api deveṣv astu ||
1.162.10a yad ūvadhyam udarasyāpavāti ya āmasya kraviṣo gandho asti |
1.162.10c sukṛtā tac chamitāraḥ kṛṇvantūta medhaṁ śṛtapākam pacantu ||
1.162.11a yat te gātrād agninā pacyamānād abhi śūlaṁ nihatasyāvadhāvati |
1.162.11c mā tad bhūmyām ā śriṣan mā tṛṇeṣu devebhyas tad uśadbhyo rātam astu ||
1.162.12a ye vājinam paripaśyanti pakvaṁ ya īm āhuḥ surabhir nir hareti |
1.162.12c ye cārvato māṁsabhikṣām upāsata uto teṣām abhigūrtir na invatu ||
1.162.13a yan nīkṣaṇam mām̐spacanyā ukhāyā yā pātrāṇi yūṣṇa āsecanāni |
1.162.13c ūṣmaṇyāpidhānā carūṇām aṅkāḥ sūnāḥ pari bhūṣanty aśvam ||
1.162.14a nikramaṇaṁ niṣadanaṁ vivartanaṁ yac ca paḍbīśam arvataḥ |
1.162.14c yac ca papau yac ca ghāsiṁ jaghāsa sarvā tā te api deveṣv astu ||
1.162.15a mā tvāgnir dhvanayīd dhūmagandhir mokhā bhrājanty abhi vikta jaghriḥ |
1.162.15c iṣṭaṁ vītam abhigūrtaṁ vaṣaṭkṛtaṁ taṁ devāsaḥ prati gṛbhṇanty aśvam ||
1.162.16a yad aśvāya vāsa upastṛṇanty adhīvāsaṁ yā hiraṇyāny asmai |
1.162.16c saṁdānam arvantam paḍbīśam priyā deveṣv ā yāmayanti ||
1.162.17a yat te sāde mahasā śūkṛtasya pārṣṇyā vā kaśayā vā tutoda |
1.162.17c sruceva tā haviṣo adhvareṣu sarvā tā te brahmaṇā sūdayāmi ||
1.162.18a catustriṁśad vājino devabandhor vaṅkrīr aśvasya svadhitiḥ sam eti |
1.162.18c acchidrā gātrā vayunā kṛṇota paruṣ-parur anughuṣyā vi śasta ||
1.162.19a ekas tvaṣṭur aśvasyā viśastā dvā yantārā bhavatas tatha ṛtuḥ |
1.162.19c yā te gātrāṇām ṛtuthā kṛṇomi tā-tā piṇḍānām pra juhomy agnau ||
1.162.20a mā tvā tapat priya ātmāpiyantam mā svadhitis tanva ā tiṣṭhipat te |
1.162.20c mā te gṛdhnur aviśastātihāya chidrā gātrāṇy asinā mithū kaḥ ||
1.162.21a na vā u etan mriyase na riṣyasi devām̐ id eṣi pathibhiḥ sugebhiḥ |
1.162.21c harī te yuñjā pṛṣatī abhūtām upāsthād vājī dhuri rāsabhasya ||
1.162.22a sugavyaṁ no vājī svaśvyam puṁsaḥ putrām̐ uta viśvāpuṣaṁ rayim |
1.162.22c anāgāstvaṁ no aditiḥ kṛṇotu kṣatraṁ no aśvo vanatāṁ haviṣmān ||

1.163.01a yad akrandaḥ prathamaṁ jāyamāna udyan samudrād uta vā purīṣāt |
1.163.01c śyenasya pakṣā hariṇasya bāhū upastutyam mahi jātaṁ te arvan ||
1.163.02a yamena dattaṁ trita enam āyunag indra eṇam prathamo adhy atiṣṭhat |
1.163.02c gandharvo asya raśanām agṛbhṇāt sūrād aśvaṁ vasavo nir ataṣṭa ||
1.163.03a asi yamo asy ādityo arvann asi trito guhyena vratena |
1.163.03c asi somena samayā vipṛkta āhus te trīṇi divi bandhanāni ||
1.163.04a trīṇi ta āhur divi bandhanāni trīṇy apsu trīṇy antaḥ samudre |
1.163.04c uteva me varuṇaś chantsy arvan yatrā ta āhuḥ paramaṁ janitram ||
1.163.05a imā te vājinn avamārjanānīmā śaphānāṁ sanitur nidhānā |
1.163.05c atrā te bhadrā raśanā apaśyam ṛtasya yā abhirakṣanti gopāḥ ||
1.163.06a ātmānaṁ te manasārād ajānām avo divā patayantam pataṁgam |
1.163.06c śiro apaśyam pathibhiḥ sugebhir areṇubhir jehamānam patatri ||
1.163.07a atrā te rūpam uttamam apaśyaṁ jigīṣamāṇam iṣa ā pade goḥ |
1.163.07c yadā te marto anu bhogam ānaḻ ād id grasiṣṭha oṣadhīr ajīgaḥ ||
1.163.08a anu tvā ratho anu maryo arvann anu gāvo 'nu bhagaḥ kanīnām |
1.163.08c anu vrātāsas tava sakhyam īyur anu devā mamire vīryaṁ te ||
1.163.09a hiraṇyaśṛṅgo 'yo asya pādā manojavā avara indra āsīt |
1.163.09c devā id asya haviradyam āyan yo arvantam prathamo adhyatiṣṭhat ||
1.163.10a īrmāntāsaḥ silikamadhyamāsaḥ saṁ śūraṇāso divyāso atyāḥ |
1.163.10c haṁsā iva śreṇiśo yatante yad ākṣiṣur divyam ajmam aśvāḥ ||
1.163.11a tava śarīram patayiṣṇv arvan tava cittaṁ vāta iva dhrajīmān |
1.163.11c tava śṛṅgāṇi viṣṭhitā purutrāraṇyeṣu jarbhurāṇā caranti ||
1.163.12a upa prāgāc chasanaṁ vājy arvā devadrīcā manasā dīdhyānaḥ |
1.163.12c ajaḥ puro nīyate nābhir asyānu paścāt kavayo yanti rebhāḥ ||
1.163.13a upa prāgāt paramaṁ yat sadhastham arvām̐ acchā pitaram mātaraṁ ca |
1.163.13c adyā devāñ juṣṭatamo hi gamyā athā śāste dāśuṣe vāryāṇi ||

1.164.01a asya vāmasya palitasya hotus tasya bhrātā madhyamo asty aśnaḥ |
1.164.01c tṛtīyo bhrātā ghṛtapṛṣṭho asyātrāpaśyaṁ viśpatiṁ saptaputram ||
1.164.02a sapta yuñjanti ratham ekacakram eko aśvo vahati saptanāmā |
1.164.02c trinābhi cakram ajaram anarvaṁ yatremā viśvā bhuvanādhi tasthuḥ ||
1.164.03a imaṁ ratham adhi ye sapta tasthuḥ saptacakraṁ sapta vahanty aśvāḥ |
1.164.03c sapta svasāro abhi saṁ navante yatra gavāṁ nihitā sapta nāma ||
1.164.04a ko dadarśa prathamaṁ jāyamānam asthanvantaṁ yad anasthā bibharti |
1.164.04c bhūmyā asur asṛg ātmā kva svit ko vidvāṁsam upa gāt praṣṭum etat ||
1.164.05a pākaḥ pṛcchāmi manasāvijānan devānām enā nihitā padāni |
1.164.05c vatse baṣkaye 'dhi sapta tantūn vi tatnire kavaya otavā u ||
1.164.06a acikitvāñ cikituṣaś cid atra kavīn pṛcchāmi vidmane na vidvān |
1.164.06c vi yas tastambha ṣaḻ imā rajāṁsy ajasya rūpe kim api svid ekam ||
1.164.07a iha bravītu ya īm aṅga vedāsya vāmasya nihitam padaṁ veḥ |
1.164.07c śīrṣṇaḥ kṣīraṁ duhrate gāvo asya vavriṁ vasānā udakam padāpuḥ ||
1.164.08a mātā pitaram ṛta ā babhāja dhīty agre manasā saṁ hi jagme |
1.164.08c sā bībhatsur garbharasā nividdhā namasvanta id upavākam īyuḥ ||
1.164.09a yuktā mātāsīd dhuri dakṣiṇāyā atiṣṭhad garbho vṛjanīṣv antaḥ |
1.164.09c amīmed vatso anu gām apaśyad viśvarūpyaṁ triṣu yojaneṣu ||
1.164.10a tisro mātṝs trīn pitṝn bibhrad eka ūrdhvas tasthau nem ava glāpayanti |
1.164.10c mantrayante divo amuṣya pṛṣṭhe viśvavidaṁ vācam aviśvaminvām ||
1.164.11a dvādaśāraṁ nahi taj jarāya varvarti cakram pari dyām ṛtasya |
1.164.11c ā putrā agne mithunāso atra sapta śatāni viṁśatiś ca tasthuḥ ||
1.164.12a pañcapādam pitaraṁ dvādaśākṛtiṁ diva āhuḥ pare ardhe purīṣiṇam |
1.164.12c atheme anya upare vicakṣaṇaṁ saptacakre ṣaḻara āhur arpitam ||
1.164.13a pañcāre cakre parivartamāne tasminn ā tasthur bhuvanāni viśvā |
1.164.13c tasya nākṣas tapyate bhūribhāraḥ sanād eva na śīryate sanābhiḥ ||
1.164.14a sanemi cakram ajaraṁ vi vāvṛta uttānāyāṁ daśa yuktā vahanti |
1.164.14c sūryasya cakṣū rajasaity āvṛtaṁ tasminn ārpitā bhuvanāni viśvā ||
1.164.15a sākaṁjānāṁ saptatham āhur ekajaṁ ṣaḻ id yamā ṛṣayo devajā iti |
1.164.15c teṣām iṣṭāni vihitāni dhāmaśaḥ sthātre rejante vikṛtāni rūpaśaḥ ||
1.164.16a striyaḥ satīs tām̐ u me puṁsa āhuḥ paśyad akṣaṇvān na vi cetad andhaḥ |
1.164.16c kavir yaḥ putraḥ sa īm ā ciketa yas tā vijānāt sa pituṣ pitāsat ||
1.164.17a avaḥ pareṇa para enāvareṇa padā vatsam bibhratī gaur ud asthāt |
1.164.17c sā kadrīcī kaṁ svid ardham parāgāt kva svit sūte nahi yūthe antaḥ ||
1.164.18a avaḥ pareṇa pitaraṁ yo asyānuveda para enāvareṇa |
1.164.18c kavīyamānaḥ ka iha pra vocad devam manaḥ kuto adhi prajātam ||
1.164.19a ye arvāñcas tām̐ u parāca āhur ye parāñcas tām̐ u arvāca āhuḥ |
1.164.19c indraś ca yā cakrathuḥ soma tāni dhurā na yuktā rajaso vahanti ||
1.164.20a dvā suparṇā sayujā sakhāyā samānaṁ vṛkṣam pari ṣasvajāte |
1.164.20c tayor anyaḥ pippalaṁ svādv atty anaśnann anyo abhi cākaśīti ||
1.164.21a yatrā suparṇā amṛtasya bhāgam animeṣaṁ vidathābhisvaranti |
1.164.21c ino viśvasya bhuvanasya gopāḥ sa mā dhīraḥ pākam atrā viveśa ||
1.164.22a yasmin vṛkṣe madhvadaḥ suparṇā niviśante suvate cādhi viśve |
1.164.22c tasyed āhuḥ pippalaṁ svādv agre tan non naśad yaḥ pitaraṁ na veda ||
1.164.23a yad gāyatre adhi gāyatram āhitaṁ traiṣṭubhād vā traiṣṭubhaṁ niratakṣata |
1.164.23c yad vā jagaj jagaty āhitam padaṁ ya it tad vidus te amṛtatvam ānaśuḥ ||
1.164.24a gāyatreṇa prati mimīte arkam arkeṇa sāma traiṣṭubhena vākam |
1.164.24c vākena vākaṁ dvipadā catuṣpadākṣareṇa mimate sapta vāṇīḥ ||
1.164.25a jagatā sindhuṁ divy astabhāyad rathaṁtare sūryam pary apaśyat |
1.164.25c gāyatrasya samidhas tisra āhus tato mahnā pra ririce mahitvā ||
1.164.26a upa hvaye sudughāṁ dhenum etāṁ suhasto godhug uta dohad enām |
1.164.26c śreṣṭhaṁ savaṁ savitā sāviṣan no 'bhīddho gharmas tad u ṣu pra vocam ||
1.164.27a hiṅkṛṇvatī vasupatnī vasūnāṁ vatsam icchantī manasābhy āgāt |
1.164.27c duhām aśvibhyām payo aghnyeyaṁ sā vardhatām mahate saubhagāya ||
1.164.28a gaur amīmed anu vatsam miṣantam mūrdhānaṁ hiṅṅ akṛṇon mātavā u |
1.164.28c sṛkvāṇaṁ gharmam abhi vāvaśānā mimāti māyum payate payobhiḥ ||
1.164.29a ayaṁ sa śiṅkte yena gaur abhīvṛtā mimāti māyuṁ dhvasanāv adhi śritā |
1.164.29c sā cittibhir ni hi cakāra martyaṁ vidyud bhavantī prati vavrim auhata ||
1.164.30a anac chaye turagātu jīvam ejad dhruvam madhya ā pastyānām |
1.164.30c jīvo mṛtasya carati svadhābhir amartyo martyenā sayoniḥ ||
1.164.31a apaśyaṁ gopām anipadyamānam ā ca parā ca pathibhiś carantam |
1.164.31c sa sadhrīcīḥ sa viṣūcīr vasāna ā varīvarti bhuvaneṣv antaḥ ||
1.164.32a ya īṁ cakāra na so asya veda ya īṁ dadarśa hirug in nu tasmāt |
1.164.32c sa mātur yonā parivīto antar bahuprajā nirṛtim ā viveśa ||
1.164.33a dyaur me pitā janitā nābhir atra bandhur me mātā pṛthivī mahīyam |
1.164.33c uttānayoś camvor yonir antar atrā pitā duhitur garbham ādhāt ||
1.164.34a pṛcchāmi tvā param antam pṛthivyāḥ pṛcchāmi yatra bhuvanasya nābhiḥ |
1.164.34c pṛcchāmi tvā vṛṣṇo aśvasya retaḥ pṛcchāmi vācaḥ paramaṁ vyoma ||
1.164.35a iyaṁ vediḥ paro antaḥ pṛthivyā ayaṁ yajño bhuvanasya nābhiḥ |
1.164.35c ayaṁ somo vṛṣṇo aśvasya reto brahmāyaṁ vācaḥ paramaṁ vyoma ||
1.164.36a saptārdhagarbhā bhuvanasya reto viṣṇos tiṣṭhanti pradiśā vidharmaṇi |
1.164.36c te dhītibhir manasā te vipaścitaḥ paribhuvaḥ pari bhavanti viśvataḥ ||
1.164.37a na vi jānāmi yad ivedam asmi niṇyaḥ saṁnaddho manasā carāmi |
1.164.37c yadā māgan prathamajā ṛtasyād id vāco aśnuve bhāgam asyāḥ ||
1.164.38a apāṅ prāṅ eti svadhayā gṛbhīto 'martyo martyenā sayoniḥ |
1.164.38c tā śaśvantā viṣūcīnā viyantā ny anyaṁ cikyur na ni cikyur anyam ||
1.164.39a ṛco akṣare parame vyoman yasmin devā adhi viśve niṣeduḥ |
1.164.39c yas tan na veda kim ṛcā kariṣyati ya it tad vidus ta ime sam āsate ||
1.164.40a sūyavasād bhagavatī hi bhūyā atho vayam bhagavantaḥ syāma |
1.164.40c addhi tṛṇam aghnye viśvadānīm piba śuddham udakam ācarantī ||
1.164.41a gaurīr mimāya salilāni takṣaty ekapadī dvipadī sā catuṣpadī |
1.164.41c aṣṭāpadī navapadī babhūvuṣī sahasrākṣarā parame vyoman ||
1.164.42a tasyāḥ samudrā adhi vi kṣaranti tena jīvanti pradiśaś catasraḥ |
1.164.42c tataḥ kṣaraty akṣaraṁ tad viśvam upa jīvati ||
1.164.43a śakamayaṁ dhūmam ārād apaśyaṁ viṣūvatā para enāvareṇa |
1.164.43c ukṣāṇam pṛśnim apacanta vīrās tāni dharmāṇi prathamāny āsan ||
1.164.44a trayaḥ keśina ṛtuthā vi cakṣate saṁvatsare vapata eka eṣām |
1.164.44c viśvam eko abhi caṣṭe śacībhir dhrājir ekasya dadṛśe na rūpam ||
1.164.45a catvāri vāk parimitā padāni tāni vidur brāhmaṇā ye manīṣiṇaḥ |
1.164.45c guhā trīṇi nihitā neṅgayanti turīyaṁ vāco manuṣyā vadanti ||
1.164.46a indram mitraṁ varuṇam agnim āhur atho divyaḥ sa suparṇo garutmān |
1.164.46c ekaṁ sad viprā bahudhā vadanty agniṁ yamam mātariśvānam āhuḥ ||
1.164.47a kṛṣṇaṁ niyānaṁ harayaḥ suparṇā apo vasānā divam ut patanti |
1.164.47c ta āvavṛtran sadanād ṛtasyād id ghṛtena pṛthivī vy udyate ||
1.164.48a dvādaśa pradhayaś cakram ekaṁ trīṇi nabhyāni ka u tac ciketa |
1.164.48c tasmin sākaṁ triśatā na śaṅkavo 'rpitāḥ ṣaṣṭir na calācalāsaḥ ||
1.164.49a yas te stanaḥ śaśayo yo mayobhūr yena viśvā puṣyasi vāryāṇi |
1.164.49c yo ratnadhā vasuvid yaḥ sudatraḥ sarasvati tam iha dhātave kaḥ ||
1.164.50a yajñena yajñam ayajanta devās tāni dharmāṇi prathamāny āsan |
1.164.50c te ha nākam mahimānaḥ sacanta yatra pūrve sādhyāḥ santi devāḥ ||
1.164.51a samānam etad udakam uc caity ava cāhabhiḥ |
1.164.51c bhūmim parjanyā jinvanti divaṁ jinvanty agnayaḥ ||
1.164.52a divyaṁ suparṇaṁ vāyasam bṛhantam apāṁ garbhaṁ darśatam oṣadhīnām |
1.164.52c abhīpato vṛṣṭibhis tarpayantaṁ sarasvantam avase johavīmi ||

1.165.01a kayā śubhā savayasaḥ sanīḻāḥ samānyā marutaḥ sam mimikṣuḥ |
1.165.01c kayā matī kuta etāsa ete 'rcanti śuṣmaṁ vṛṣaṇo vasūyā ||
1.165.02a kasya brahmāṇi jujuṣur yuvānaḥ ko adhvare maruta ā vavarta |
1.165.02c śyenām̐ iva dhrajato antarikṣe kena mahā manasā rīramāma ||
1.165.03a kutas tvam indra māhinaḥ sann eko yāsi satpate kiṁ ta itthā |
1.165.03c sam pṛcchase samarāṇaḥ śubhānair voces tan no harivo yat te asme ||
1.165.04a brahmāṇi me matayaḥ śaṁ sutāsaḥ śuṣma iyarti prabhṛto me adriḥ |
1.165.04c ā śāsate prati haryanty ukthemā harī vahatas tā no accha ||
1.165.05a ato vayam antamebhir yujānāḥ svakṣatrebhis tanvaḥ śumbhamānāḥ |
1.165.05c mahobhir etām̐ upa yujmahe nv indra svadhām anu hi no babhūtha ||
1.165.06a kva syā vo marutaḥ svadhāsīd yan mām ekaṁ samadhattāhihatye |
1.165.06c ahaṁ hy ugras taviṣas tuviṣmān viśvasya śatror anamaṁ vadhasnaiḥ ||
1.165.07a bhūri cakartha yujyebhir asme samānebhir vṛṣabha pauṁsyebhiḥ |
1.165.07c bhūrīṇi hi kṛṇavāmā śaviṣṭhendra kratvā maruto yad vaśāma ||
1.165.08a vadhīṁ vṛtram maruta indriyeṇa svena bhāmena taviṣo babhūvān |
1.165.08c aham etā manave viśvaścandrāḥ sugā apaś cakara vajrabāhuḥ ||
1.165.09a anuttam ā te maghavan nakir nu na tvāvām̐ asti devatā vidānaḥ |
1.165.09c na jāyamāno naśate na jāto yāni kariṣyā kṛṇuhi pravṛddha ||
1.165.10a ekasya cin me vibhv astv ojo yā nu dadhṛṣvān kṛṇavai manīṣā |
1.165.10c ahaṁ hy ugro maruto vidāno yāni cyavam indra id īśa eṣām ||
1.165.11a amandan mā marutaḥ stomo atra yan me naraḥ śrutyam brahma cakra |
1.165.11c indrāya vṛṣṇe sumakhāya mahyaṁ sakhye sakhāyas tanve tanūbhiḥ ||
1.165.12a eved ete prati mā rocamānā anedyaḥ śrava eṣo dadhānāḥ |
1.165.12c saṁcakṣyā marutaś candravarṇā acchānta me chadayāthā ca nūnam ||
1.165.13a ko nv atra maruto māmahe vaḥ pra yātana sakhīm̐r acchā sakhāyaḥ |
1.165.13c manmāni citrā apivātayanta eṣām bhūta navedā ma ṛtānām ||
1.165.14a ā yad duvasyād duvase na kārur asmāñ cakre mānyasya medhā |
1.165.14c o ṣu vartta maruto vipram acchemā brahmāṇi jaritā vo arcat ||
1.165.15a eṣa vaḥ stomo maruta iyaṁ gīr māndāryasya mānyasya kāroḥ |
1.165.15c eṣā yāsīṣṭa tanve vayāṁ vidyāmeṣaṁ vṛjanaṁ jīradānum ||

1.166.01a tan nu vocāma rabhasāya janmane pūrvam mahitvaṁ vṛṣabhasya ketave |
1.166.01c aidheva yāman marutas tuviṣvaṇo yudheva śakrās taviṣāṇi kartana ||
1.166.02a nityaṁ na sūnum madhu bibhrata upa krīḻanti krīḻā vidatheṣu ghṛṣvayaḥ |
1.166.02c nakṣanti rudrā avasā namasvinaṁ na mardhanti svatavaso haviṣkṛtam ||
1.166.03a yasmā ūmāso amṛtā arāsata rāyas poṣaṁ ca haviṣā dadāśuṣe |
1.166.03c ukṣanty asmai maruto hitā iva purū rajāṁsi payasā mayobhuvaḥ ||
1.166.04a ā ye rajāṁsi taviṣībhir avyata pra va evāsaḥ svayatāso adhrajan |
1.166.04c bhayante viśvā bhuvanāni harmyā citro vo yāmaḥ prayatāsv ṛṣṭiṣu ||
1.166.05a yat tveṣayāmā nadayanta parvatān divo vā pṛṣṭhaṁ naryā acucyavuḥ |
1.166.05c viśvo vo ajman bhayate vanaspatī rathīyantīva pra jihīta oṣadhiḥ ||
1.166.06a yūyaṁ na ugrā marutaḥ sucetunāriṣṭagrāmāḥ sumatim pipartana |
1.166.06c yatrā vo didyud radati krivirdatī riṇāti paśvaḥ sudhiteva barhaṇā ||
1.166.07a pra skambhadeṣṇā anavabhrarādhaso 'lātṛṇāso vidatheṣu suṣṭutāḥ |
1.166.07c arcanty arkam madirasya pītaye vidur vīrasya prathamāni pauṁsyā ||
1.166.08a śatabhujibhis tam abhihruter aghāt pūrbhī rakṣatā maruto yam āvata |
1.166.08c janaṁ yam ugrās tavaso virapśinaḥ pāthanā śaṁsāt tanayasya puṣṭiṣu ||
1.166.09a viśvāni bhadrā maruto ratheṣu vo mithaspṛdhyeva taviṣāṇy āhitā |
1.166.09c aṁseṣv ā vaḥ prapatheṣu khādayo 'kṣo vaś cakrā samayā vi vāvṛte ||
1.166.10a bhūrīṇi bhadrā naryeṣu bāhuṣu vakṣaḥsu rukmā rabhasāso añjayaḥ |
1.166.10c aṁseṣv etāḥ paviṣu kṣurā adhi vayo na pakṣān vy anu śriyo dhire ||
1.166.11a mahānto mahnā vibhvo vibhūtayo dūredṛśo ye divyā iva stṛbhiḥ |
1.166.11c mandrāḥ sujihvāḥ svaritāra āsabhiḥ sammiślā indre marutaḥ pariṣṭubhaḥ ||
1.166.12a tad vaḥ sujātā maruto mahitvanaṁ dīrghaṁ vo dātram aditer iva vratam |
1.166.12c indraś cana tyajasā vi hruṇāti taj janāya yasmai sukṛte arādhvam ||
1.166.13a tad vo jāmitvam marutaḥ pare yuge purū yac chaṁsam amṛtāsa āvata |
1.166.13c ayā dhiyā manave śruṣṭim āvyā sākaṁ naro daṁsanair ā cikitrire ||
1.166.14a yena dīrgham marutaḥ śūśavāma yuṣmākena parīṇasā turāsaḥ |
1.166.14c ā yat tatanan vṛjane janāsa ebhir yajñebhis tad abhīṣṭim aśyām ||
1.166.15a eṣa vaḥ stomo maruta iyaṁ gīr māndāryasya mānyasya kāroḥ |
1.166.15c eṣā yāsīṣṭa tanve vayāṁ vidyāmeṣaṁ vṛjanaṁ jīradānum ||

1.167.01a sahasraṁ ta indrotayo naḥ sahasram iṣo harivo gūrtatamāḥ |
1.167.01c sahasraṁ rāyo mādayadhyai sahasriṇa upa no yantu vājāḥ ||
1.167.02a ā no 'vobhir maruto yāntv acchā jyeṣṭhebhir vā bṛhaddivaiḥ sumāyāḥ |
1.167.02c adha yad eṣāṁ niyutaḥ paramāḥ samudrasya cid dhanayanta pāre ||
1.167.03a mimyakṣa yeṣu sudhitā ghṛtācī hiraṇyanirṇig uparā na ṛṣṭiḥ |
1.167.03c guhā carantī manuṣo na yoṣā sabhāvatī vidathyeva saṁ vāk ||
1.167.04a parā śubhrā ayāso yavyā sādhāraṇyeva maruto mimikṣuḥ |
1.167.04c na rodasī apa nudanta ghorā juṣanta vṛdhaṁ sakhyāya devāḥ ||
1.167.05a joṣad yad īm asuryā sacadhyai viṣitastukā rodasī nṛmaṇāḥ |
1.167.05c ā sūryeva vidhato rathaṁ gāt tveṣapratīkā nabhaso netyā ||
1.167.06a āsthāpayanta yuvatiṁ yuvānaḥ śubhe nimiślāṁ vidatheṣu pajrām |
1.167.06c arko yad vo maruto haviṣmān gāyad gāthaṁ sutasomo duvasyan ||
1.167.07a pra taṁ vivakmi vakmyo ya eṣām marutām mahimā satyo asti |
1.167.07c sacā yad īṁ vṛṣamaṇā ahaṁyuḥ sthirā cij janīr vahate subhāgāḥ ||
1.167.08a pānti mitrāvaruṇāv avadyāc cayata īm aryamo apraśastān |
1.167.08c uta cyavante acyutā dhruvāṇi vāvṛdha īm maruto dātivāraḥ ||
1.167.09a nahī nu vo maruto anty asme ārāttāc cic chavaso antam āpuḥ |
1.167.09c te dhṛṣṇunā śavasā śūśuvāṁso 'rṇo na dveṣo dhṛṣatā pari ṣṭhuḥ ||
1.167.10a vayam adyendrasya preṣṭhā vayaṁ śvo vocemahi samarye |
1.167.10c vayam purā mahi ca no anu dyūn tan na ṛbhukṣā narām anu ṣyāt ||
1.167.11a eṣa vaḥ stomo maruta iyaṁ gīr māndāryasya mānyasya kāroḥ |
1.167.11c eṣā yāsīṣṭa tanve vayāṁ vidyāmeṣaṁ vṛjanaṁ jīradānum ||

1.168.01a yajñā-yajñā vaḥ samanā tuturvaṇir dhiyaṁ-dhiyaṁ vo devayā u dadhidhve |
1.168.01c ā vo 'rvācaḥ suvitāya rodasyor mahe vavṛtyām avase suvṛktibhiḥ ||
1.168.02a vavrāso na ye svajāḥ svatavasa iṣaṁ svar abhijāyanta dhūtayaḥ |
1.168.02c sahasriyāso apāṁ normaya āsā gāvo vandyāso nokṣaṇaḥ ||
1.168.03a somāso na ye sutās tṛptāṁśavo hṛtsu pītāso duvaso nāsate |
1.168.03c aiṣām aṁseṣu rambhiṇīva rārabhe hasteṣu khādiś ca kṛtiś ca saṁ dadhe ||
1.168.04a ava svayuktā diva ā vṛthā yayur amartyāḥ kaśayā codata tmanā |
1.168.04c areṇavas tuvijātā acucyavur dṛḻhāni cin maruto bhrājadṛṣṭayaḥ ||
1.168.05a ko vo 'ntar maruta ṛṣṭividyuto rejati tmanā hanveva jihvayā |
1.168.05c dhanvacyuta iṣāṁ na yāmani purupraiṣā ahanyo naitaśaḥ ||
1.168.06a kva svid asya rajaso mahas paraṁ kvāvaram maruto yasminn āyaya |
1.168.06c yac cyāvayatha vithureva saṁhitaṁ vy adriṇā patatha tveṣam arṇavam ||
1.168.07a sātir na vo 'mavatī svarvatī tveṣā vipākā marutaḥ pipiṣvatī |
1.168.07c bhadrā vo rātiḥ pṛṇato na dakṣiṇā pṛthujrayī asuryeva jañjatī ||
1.168.08a prati ṣṭobhanti sindhavaḥ pavibhyo yad abhriyāṁ vācam udīrayanti |
1.168.08c ava smayanta vidyutaḥ pṛthivyāṁ yadī ghṛtam marutaḥ pruṣṇuvanti ||
1.168.09a asūta pṛśnir mahate raṇāya tveṣam ayāsām marutām anīkam |
1.168.09c te sapsarāso 'janayantābhvam ād it svadhām iṣirām pary apaśyan ||
1.168.10a eṣa vaḥ stomo maruta iyaṁ gīr māndāryasya mānyasya kāroḥ |
1.168.10c eṣā yāsīṣṭa tanve vayāṁ vidyāmeṣaṁ vṛjanaṁ jīradānum ||

1.169.01a mahaś cit tvam indra yata etān mahaś cid asi tyajaso varūtā |
1.169.01c sa no vedho marutāṁ cikitvān sumnā vanuṣva tava hi preṣṭhā ||
1.169.02a ayujran ta indra viśvakṛṣṭīr vidānāso niṣṣidho martyatrā |
1.169.02c marutām pṛtsutir hāsamānā svarmīḻhasya pradhanasya sātau ||
1.169.03a amyak sā ta indra ṛṣṭir asme sanemy abhvam maruto junanti |
1.169.03c agniś cid dhi ṣmātase śuśukvān āpo na dvīpaṁ dadhati prayāṁsi ||
1.169.04a tvaṁ tū na indra taṁ rayiṁ dā ojiṣṭhayā dakṣiṇayeva rātim |
1.169.04c stutaś ca yās te cakananta vāyoḥ stanaṁ na madhvaḥ pīpayanta vājaiḥ ||
1.169.05a tve rāya indra tośatamāḥ praṇetāraḥ kasya cid ṛtāyoḥ |
1.169.05c te ṣu ṇo maruto mṛḻayantu ye smā purā gātūyantīva devāḥ ||
1.169.06a prati pra yāhīndra mīḻhuṣo nṝn mahaḥ pārthive sadane yatasva |
1.169.06c adha yad eṣām pṛthubudhnāsa etās tīrthe nāryaḥ pauṁsyāni tasthuḥ ||
1.169.07a prati ghorāṇām etānām ayāsām marutāṁ śṛṇva āyatām upabdiḥ |
1.169.07c ye martyam pṛtanāyantam ūmair ṛṇāvānaṁ na patayanta sargaiḥ ||
1.169.08a tvam mānebhya indra viśvajanyā radā marudbhiḥ śurudho goagrāḥ |
1.169.08c stavānebhiḥ stavase deva devair vidyāmeṣaṁ vṛjanaṁ jīradānum ||

1.170.01a na nūnam asti no śvaḥ kas tad veda yad adbhutam |
1.170.01c anyasya cittam abhi saṁcareṇyam utādhītaṁ vi naśyati ||
1.170.02a kiṁ na indra jighāṁsasi bhrātaro marutas tava |
1.170.02c tebhiḥ kalpasva sādhuyā mā naḥ samaraṇe vadhīḥ ||
1.170.03a kiṁ no bhrātar agastya sakhā sann ati manyase |
1.170.03c vidmā hi te yathā mano 'smabhyam in na ditsasi ||
1.170.04a araṁ kṛṇvantu vediṁ sam agnim indhatām puraḥ |
1.170.04c tatrāmṛtasya cetanaṁ yajñaṁ te tanavāvahai ||
1.170.05a tvam īśiṣe vasupate vasūnāṁ tvam mitrāṇām mitrapate dheṣṭhaḥ |
1.170.05c indra tvam marudbhiḥ saṁ vadasvādha prāśāna ṛtuthā havīṁṣi ||

1.171.01a prati va enā namasāham emi sūktena bhikṣe sumatiṁ turāṇām |
1.171.01c rarāṇatā maruto vedyābhir ni heḻo dhatta vi mucadhvam aśvān ||
1.171.02a eṣa vaḥ stomo maruto namasvān hṛdā taṣṭo manasā dhāyi devāḥ |
1.171.02c upem ā yāta manasā juṣāṇā yūyaṁ hi ṣṭhā namasa id vṛdhāsaḥ ||
1.171.03a stutāso no maruto mṛḻayantūta stuto maghavā śambhaviṣṭhaḥ |
1.171.03c ūrdhvā naḥ santu komyā vanāny ahāni viśvā maruto jigīṣā ||
1.171.04a asmād ahaṁ taviṣād īṣamāṇa indrād bhiyā maruto rejamānaḥ |
1.171.04c yuṣmabhyaṁ havyā niśitāny āsan tāny āre cakṛmā mṛḻatā naḥ ||
1.171.05a yena mānāsaś citayanta usrā vyuṣṭiṣu śavasā śaśvatīnām |
1.171.05c sa no marudbhir vṛṣabha śravo dhā ugra ugrebhiḥ sthaviraḥ sahodāḥ ||
1.171.06a tvam pāhīndra sahīyaso nṝn bhavā marudbhir avayātaheḻāḥ |
1.171.06c supraketebhiḥ sāsahir dadhāno vidyāmeṣaṁ vṛjanaṁ jīradānum ||

1.172.01a citro vo 'stu yāmaś citra ūtī sudānavaḥ |
1.172.01c maruto ahibhānavaḥ ||
1.172.02a āre sā vaḥ sudānavo maruta ṛñjatī śaruḥ |
1.172.02c āre aśmā yam asyatha ||
1.172.03a tṛṇaskandasya nu viśaḥ pari vṛṅkta sudānavaḥ |
1.172.03c ūrdhvān naḥ karta jīvase ||

1.173.01a gāyat sāma nabhanyaṁ yathā ver arcāma tad vāvṛdhānaṁ svarvat |
1.173.01c gāvo dhenavo barhiṣy adabdhā ā yat sadmānaṁ divyaṁ vivāsān ||
1.173.02a arcad vṛṣā vṛṣabhiḥ sveduhavyair mṛgo nāśno ati yaj juguryāt |
1.173.02c pra mandayur manāṁ gūrta hotā bharate maryo mithunā yajatraḥ ||
1.173.03a nakṣad dhotā pari sadma mitā yan bharad garbham ā śaradaḥ pṛthivyāḥ |
1.173.03c krandad aśvo nayamāno ruvad gaur antar dūto na rodasī carad vāk ||
1.173.04a tā karmāṣatarāsmai pra cyautnāni devayanto bharante |
1.173.04c jujoṣad indro dasmavarcā nāsatyeva sugmyo ratheṣṭhāḥ ||
1.173.05a tam u ṣṭuhīndraṁ yo ha satvā yaḥ śūro maghavā yo ratheṣṭhāḥ |
1.173.05c pratīcaś cid yodhīyān vṛṣaṇvān vavavruṣaś cit tamaso vihantā ||
1.173.06a pra yad itthā mahinā nṛbhyo asty araṁ rodasī kakṣye nāsmai |
1.173.06c saṁ vivya indro vṛjanaṁ na bhūmā bharti svadhāvām̐ opaśam iva dyām ||
1.173.07a samatsu tvā śūra satām urāṇam prapathintamam paritaṁsayadhyai |
1.173.07c sajoṣasa indram made kṣoṇīḥ sūriṁ cid ye anumadanti vājaiḥ ||
1.173.08a evā hi te śaṁ savanā samudra āpo yat ta āsu madanti devīḥ |
1.173.08c viśvā te anu joṣyā bhūd gauḥ sūrīm̐ś cid yadi dhiṣā veṣi janān ||
1.173.09a asāma yathā suṣakhāya ena svabhiṣṭayo narāṁ na śaṁsaiḥ |
1.173.09c asad yathā na indro vandaneṣṭhās turo na karma nayamāna ukthā ||
1.173.10a viṣpardhaso narāṁ na śaṁsair asmākāsad indro vajrahastaḥ |
1.173.10c mitrāyuvo na pūrpatiṁ suśiṣṭau madhyāyuva upa śikṣanti yajñaiḥ ||
1.173.11a yajño hi ṣmendraṁ kaś cid ṛndhañ juhurāṇaś cin manasā pariyan |
1.173.11c tīrthe nācchā tātṛṣāṇam oko dīrgho na sidhram ā kṛṇoty adhvā ||
1.173.12a mo ṣū ṇa indrātra pṛtsu devair asti hi ṣmā te śuṣminn avayāḥ |
1.173.12c mahaś cid yasya mīḻhuṣo yavyā haviṣmato maruto vandate gīḥ ||
1.173.13a eṣa stoma indra tubhyam asme etena gātuṁ harivo vido naḥ |
1.173.13c ā no vavṛtyāḥ suvitāya deva vidyāmeṣaṁ vṛjanaṁ jīradānum ||

1.174.01a tvaṁ rājendra ye ca devā rakṣā nṝn pāhy asura tvam asmān |
1.174.01c tvaṁ satpatir maghavā nas tarutras tvaṁ satyo vasavānaḥ sahodāḥ ||
1.174.02a dano viśa indra mṛdhravācaḥ sapta yat puraḥ śarma śāradīr dart |
1.174.02c ṛṇor apo anavadyārṇā yūne vṛtram purukutsāya randhīḥ ||
1.174.03a ajā vṛta indra śūrapatnīr dyāṁ ca yebhiḥ puruhūta nūnam |
1.174.03c rakṣo agnim aśuṣaṁ tūrvayāṇaṁ siṁho na dame apāṁsi vastoḥ ||
1.174.04a śeṣan nu ta indra sasmin yonau praśastaye pavīravasya mahnā |
1.174.04c sṛjad arṇāṁsy ava yad yudhā gās tiṣṭhad dharī dhṛṣatā mṛṣṭa vājān ||
1.174.05a vaha kutsam indra yasmiñ cākan syūmanyū ṛjrā vātasyāśvā |
1.174.05c pra sūraś cakraṁ vṛhatād abhīke 'bhi spṛdho yāsiṣad vajrabāhuḥ ||
1.174.06a jaghanvām̐ indra mitrerūñ codapravṛddho harivo adāśūn |
1.174.06c pra ye paśyann aryamaṇaṁ sacāyos tvayā śūrtā vahamānā apatyam ||
1.174.07a rapat kavir indrārkasātau kṣāṁ dāsāyopabarhaṇīṁ kaḥ |
1.174.07c karat tisro maghavā dānucitrā ni duryoṇe kuyavācam mṛdhi śret ||
1.174.08a sanā tā ta indra navyā āguḥ saho nabho 'viraṇāya pūrvīḥ |
1.174.08c bhinat puro na bhido adevīr nanamo vadhar adevasya pīyoḥ ||
1.174.09a tvaṁ dhunir indra dhunimatīr ṛṇor apaḥ sīrā na sravantīḥ |
1.174.09c pra yat samudram ati śūra parṣi pārayā turvaśaṁ yaduṁ svasti ||
1.174.10a tvam asmākam indra viśvadha syā avṛkatamo narāṁ nṛpātā |
1.174.10c sa no viśvāsāṁ spṛdhāṁ sahodā vidyāmeṣaṁ vṛjanaṁ jīradānum ||

1.175.01a matsy apāyi te mahaḥ pātrasyeva harivo matsaro madaḥ |
1.175.01c vṛṣā te vṛṣṇa indur vājī sahasrasātamaḥ ||
1.175.02a ā nas te gantu matsaro vṛṣā mado vareṇyaḥ |
1.175.02c sahāvām̐ indra sānasiḥ pṛtanāṣāḻ amartyaḥ ||
1.175.03a tvaṁ hi śūraḥ sanitā codayo manuṣo ratham |
1.175.03c sahāvān dasyum avratam oṣaḥ pātraṁ na śociṣā ||
1.175.04a muṣāya sūryaṁ kave cakram īśāna ojasā |
1.175.04c vaha śuṣṇāya vadhaṁ kutsaṁ vātasyāśvaiḥ ||
1.175.05a śuṣmintamo hi te mado dyumnintama uta kratuḥ |
1.175.05c vṛtraghnā varivovidā maṁsīṣṭhā aśvasātamaḥ ||
1.175.06a yathā pūrvebhyo jaritṛbhya indra maya ivāpo na tṛṣyate babhūtha |
1.175.06c tām anu tvā nividaṁ johavīmi vidyāmeṣaṁ vṛjanaṁ jīradānum ||

1.176.01a matsi no vasyaïṣṭaya indram indo vṛṣā viśa |
1.176.01c ṛghāyamāṇa invasi śatrum anti na vindasi ||
1.176.02a tasminn ā veśayā giro ya ekaś carṣaṇīnām |
1.176.02c anu svadhā yam upyate yavaṁ na carkṛṣad vṛṣā ||
1.176.03a yasya viśvāni hastayoḥ pañca kṣitīnāṁ vasu |
1.176.03c spāśayasva yo asmadhrug divyevāśanir jahi ||
1.176.04a asunvantaṁ samaṁ jahi dūṇāśaṁ yo na te mayaḥ |
1.176.04c asmabhyam asya vedanaṁ daddhi sūriś cid ohate ||
1.176.05a āvo yasya dvibarhaso 'rkeṣu sānuṣag asat |
1.176.05c ājāv indrasyendo prāvo vājeṣu vājinam ||
1.176.06a yathā pūrvebhyo jaritṛbhya indra maya ivāpo na tṛṣyate babhūtha |
1.176.06c tām anu tvā nividaṁ johavīmi vidyāmeṣaṁ vṛjanaṁ jīradānum ||

1.177.01a ā carṣaṇiprā vṛṣabho janānāṁ rājā kṛṣṭīnām puruhūta indraḥ |
1.177.01c stutaḥ śravasyann avasopa madrig yuktvā harī vṛṣaṇā yāhy arvāṅ ||
1.177.02a ye te vṛṣaṇo vṛṣabhāsa indra brahmayujo vṛṣarathāso atyāḥ |
1.177.02c tām̐ ā tiṣṭha tebhir ā yāhy arvāṅ havāmahe tvā suta indra some ||
1.177.03a ā tiṣṭha rathaṁ vṛṣaṇaṁ vṛṣā te sutaḥ somaḥ pariṣiktā madhūni |
1.177.03c yuktvā vṛṣabhyāṁ vṛṣabha kṣitīnāṁ haribhyāṁ yāhi pravatopa madrik ||
1.177.04a ayaṁ yajño devayā ayam miyedha imā brahmāṇy ayam indra somaḥ |
1.177.04c stīrṇam barhir ā tu śakra pra yāhi pibā niṣadya vi mucā harī iha ||
1.177.05a o suṣṭuta indra yāhy arvāṅ upa brahmāṇi mānyasya kāroḥ |
1.177.05c vidyāma vastor avasā gṛṇanto vidyāmeṣaṁ vṛjanaṁ jīradānum ||

1.178.01a yad dha syā ta indra śruṣṭir asti yayā babhūtha jaritṛbhya ūtī |
1.178.01c mā naḥ kāmam mahayantam ā dhag viśvā te aśyām pary āpa āyoḥ ||
1.178.02a na ghā rājendra ā dabhan no yā nu svasārā kṛṇavanta yonau |
1.178.02c āpaś cid asmai sutukā aveṣan gaman na indraḥ sakhyā vayaś ca ||
1.178.03a jetā nṛbhir indraḥ pṛtsu śūraḥ śrotā havaṁ nādhamānasya kāroḥ |
1.178.03c prabhartā rathaṁ dāśuṣa upāka udyantā giro yadi ca tmanā bhūt ||
1.178.04a evā nṛbhir indraḥ suśravasyā prakhādaḥ pṛkṣo abhi mitriṇo bhūt |
1.178.04c samarya iṣaḥ stavate vivāci satrākaro yajamānasya śaṁsaḥ ||
1.178.05a tvayā vayam maghavann indra śatrūn abhi ṣyāma mahato manyamānān |
1.178.05c tvaṁ trātā tvam u no vṛdhe bhūr vidyāmeṣaṁ vṛjanaṁ jīradānum ||

1.179.01a pūrvīr ahaṁ śaradaḥ śaśramāṇā doṣā vastor uṣaso jarayantīḥ |
1.179.01c mināti śriyaṁ jarimā tanūnām apy ū nu patnīr vṛṣaṇo jagamyuḥ ||
1.179.02a ye cid dhi pūrva ṛtasāpa āsan sākaṁ devebhir avadann ṛtāni |
1.179.02c te cid avāsur nahy antam āpuḥ sam ū nu patnīr vṛṣabhir jagamyuḥ ||
1.179.03a na mṛṣā śrāntaṁ yad avanti devā viśvā it spṛdho abhy aśnavāva |
1.179.03c jayāved atra śatanītham ājiṁ yat samyañcā mithunāv abhy ajāva ||
1.179.04a nadasya mā rudhataḥ kāma āgann ita ājāto amutaḥ kutaś cit |
1.179.04c lopāmudrā vṛṣaṇaṁ nī riṇāti dhīram adhīrā dhayati śvasantam ||
1.179.05a imaṁ nu somam antito hṛtsu pītam upa bruve |
1.179.05c yat sīm āgaś cakṛmā tat su mṛḻatu pulukāmo hi martyaḥ ||
1.179.06a agastyaḥ khanamānaḥ khanitraiḥ prajām apatyam balam icchamānaḥ |
1.179.06c ubhau varṇāv ṛṣir ugraḥ pupoṣa satyā deveṣv āśiṣo jagāma ||

1.180.01a yuvo rajāṁsi suyamāso aśvā ratho yad vām pary arṇāṁsi dīyat |
1.180.01c hiraṇyayā vām pavayaḥ pruṣāyan madhvaḥ pibantā uṣasaḥ sacethe ||
1.180.02a yuvam atyasyāva nakṣatho yad vipatmano naryasya prayajyoḥ |
1.180.02c svasā yad vāṁ viśvagūrtī bharāti vājāyeṭṭe madhupāv iṣe ca ||
1.180.03a yuvam paya usriyāyām adhattam pakvam āmāyām ava pūrvyaṁ goḥ |
1.180.03c antar yad vanino vām ṛtapsū hvāro na śucir yajate haviṣmān ||
1.180.04a yuvaṁ ha gharmam madhumantam atraye 'po na kṣodo 'vṛṇītam eṣe |
1.180.04c tad vāṁ narāv aśvinā paśvaïṣṭī rathyeva cakrā prati yanti madhvaḥ ||
1.180.05a ā vāṁ dānāya vavṛtīya dasrā gor oheṇa taugryo na jivriḥ |
1.180.05c apaḥ kṣoṇī sacate māhinā vāṁ jūrṇo vām akṣur aṁhaso yajatrā ||
1.180.06a ni yad yuvethe niyutaḥ sudānū upa svadhābhiḥ sṛjathaḥ puraṁdhim |
1.180.06c preṣad veṣad vāto na sūrir ā mahe dade suvrato na vājam ||
1.180.07a vayaṁ cid dhi vāṁ jaritāraḥ satyā vipanyāmahe vi paṇir hitāvān |
1.180.07c adhā cid dhi ṣmāśvināv anindyā pātho hi ṣmā vṛṣaṇāv antidevam ||
1.180.08a yuvāṁ cid dhi ṣmāśvināv anu dyūn virudrasya prasravaṇasya sātau |
1.180.08c agastyo narāṁ nṛṣu praśastaḥ kārādhunīva citayat sahasraiḥ ||
1.180.09a pra yad vahethe mahinā rathasya pra syandrā yātho manuṣo na hotā |
1.180.09c dhattaṁ sūribhya uta vā svaśvyaṁ nāsatyā rayiṣācaḥ syāma ||
1.180.10a taṁ vāṁ rathaṁ vayam adyā huvema stomair aśvinā suvitāya navyam |
1.180.10c ariṣṭanemim pari dyām iyānaṁ vidyāmeṣaṁ vṛjanaṁ jīradānum ||

1.181.01a kad u preṣṭāv iṣāṁ rayīṇām adhvaryantā yad unninītho apām |
1.181.01c ayaṁ vāṁ yajño akṛta praśastiṁ vasudhitī avitārā janānām ||
1.181.02a ā vām aśvāsaḥ śucayaḥ payaspā vātaraṁhaso divyāso atyāḥ |
1.181.02c manojuvo vṛṣaṇo vītapṛṣṭhā eha svarājo aśvinā vahantu ||
1.181.03a ā vāṁ ratho 'vanir na pravatvān sṛpravandhuraḥ suvitāya gamyāḥ |
1.181.03c vṛṣṇaḥ sthātārā manaso javīyān ahampūrvo yajato dhiṣṇyā yaḥ ||
1.181.04a iheha jātā sam avāvaśītām arepasā tanvā nāmabhiḥ svaiḥ |
1.181.04c jiṣṇur vām anyaḥ sumakhasya sūrir divo anyaḥ subhagaḥ putra ūhe ||
1.181.05a pra vāṁ niceruḥ kakuho vaśām̐ anu piśaṅgarūpaḥ sadanāni gamyāḥ |
1.181.05c harī anyasya pīpayanta vājair mathrā rajāṁsy aśvinā vi ghoṣaiḥ ||
1.181.06a pra vāṁ śaradvān vṛṣabho na niṣṣāṭ pūrvīr iṣaś carati madhva iṣṇan |
1.181.06c evair anyasya pīpayanta vājair veṣantīr ūrdhvā nadyo na āguḥ ||
1.181.07a asarji vāṁ sthavirā vedhasā gīr bāḻhe aśvinā tredhā kṣarantī |
1.181.07c upastutāv avataṁ nādhamānaṁ yāmann ayāmañ chṛṇutaṁ havam me ||
1.181.08a uta syā vāṁ ruśato vapsaso gīs tribarhiṣi sadasi pinvate nṝn |
1.181.08c vṛṣā vām megho vṛṣaṇā pīpāya gor na seke manuṣo daśasyan ||
1.181.09a yuvām pūṣevāśvinā puraṁdhir agnim uṣāṁ na jarate haviṣmān |
1.181.09c huve yad vāṁ varivasyā gṛṇāno vidyāmeṣaṁ vṛjanaṁ jīradānum ||

1.182.01a abhūd idaṁ vayunam o ṣu bhūṣatā ratho vṛṣaṇvān madatā manīṣiṇaḥ |
1.182.01c dhiyaṁjinvā dhiṣṇyā viśpalāvasū divo napātā sukṛte śucivratā ||
1.182.02a indratamā hi dhiṣṇyā maruttamā dasrā daṁsiṣṭhā rathyā rathītamā |
1.182.02c pūrṇaṁ rathaṁ vahethe madhva ācitaṁ tena dāśvāṁsam upa yātho aśvinā ||
1.182.03a kim atra dasrā kṛṇuthaḥ kim āsāthe jano yaḥ kaś cid ahavir mahīyate |
1.182.03c ati kramiṣṭaṁ juratam paṇer asuṁ jyotir viprāya kṛṇutaṁ vacasyave ||
1.182.04a jambhayatam abhito rāyataḥ śuno hatam mṛdho vidathus tāny aśvinā |
1.182.04c vācaṁ-vācaṁ jaritū ratninīṁ kṛtam ubhā śaṁsaṁ nāsatyāvatam mama ||
1.182.05a yuvam etaṁ cakrathuḥ sindhuṣu plavam ātmanvantam pakṣiṇaṁ taugryāya kam |
1.182.05c yena devatrā manasā nirūhathuḥ supaptanī petathuḥ kṣodaso mahaḥ ||
1.182.06a avaviddhaṁ taugryam apsv antar anārambhaṇe tamasi praviddham |
1.182.06c catasro nāvo jaṭhalasya juṣṭā ud aśvibhyām iṣitāḥ pārayanti ||
1.182.07a kaḥ svid vṛkṣo niṣṭhito madhye arṇaso yaṁ taugryo nādhitaḥ paryaṣasvajat |
1.182.07c parṇā mṛgasya pataror ivārabha ud aśvinā ūhathuḥ śromatāya kam ||
1.182.08a tad vāṁ narā nāsatyāv anu ṣyād yad vām mānāsa ucatham avocan |
1.182.08c asmād adya sadasaḥ somyād ā vidyāmeṣaṁ vṛjanaṁ jīradānum ||

1.183.01a taṁ yuñjāthām manaso yo javīyān trivandhuro vṛṣaṇā yas tricakraḥ |
1.183.01c yenopayāthaḥ sukṛto duroṇaṁ tridhātunā patatho vir na parṇaiḥ ||
1.183.02a suvṛd ratho vartate yann abhi kṣāṁ yat tiṣṭhathaḥ kratumantānu pṛkṣe |
1.183.02c vapur vapuṣyā sacatām iyaṁ gīr divo duhitroṣasā sacethe ||
1.183.03a ā tiṣṭhataṁ suvṛtaṁ yo ratho vām anu vratāni vartate haviṣmān |
1.183.03c yena narā nāsatyeṣayadhyai vartir yāthas tanayāya tmane ca ||
1.183.04a mā vāṁ vṛko mā vṛkīr ā dadharṣīn mā pari varktam uta māti dhaktam |
1.183.04c ayaṁ vām bhāgo nihita iyaṁ gīr dasrāv ime vāṁ nidhayo madhūnām ||
1.183.05a yuvāṁ gotamaḥ purumīḻho atrir dasrā havate 'vase haviṣmān |
1.183.05c diśaṁ na diṣṭām ṛjūyeva yantā me havaṁ nāsatyopa yātam ||
1.183.06a atāriṣma tamasas pāram asya prati vāṁ stomo aśvināv adhāyi |
1.183.06c eha yātam pathibhir devayānair vidyāmeṣaṁ vṛjanaṁ jīradānum ||

1.184.01a tā vām adya tāv aparaṁ huvemocchantyām uṣasi vahnir ukthaiḥ |
1.184.01c nāsatyā kuha cit santāv aryo divo napātā sudāstarāya ||
1.184.02a asme ū ṣu vṛṣaṇā mādayethām ut paṇīm̐r hatam ūrmyā madantā |
1.184.02c śrutam me acchoktibhir matīnām eṣṭā narā nicetārā ca karṇaiḥ ||
1.184.03a śriye pūṣann iṣukṛteva devā nāsatyā vahatuṁ sūryāyāḥ |
1.184.03c vacyante vāṁ kakuhā apsu jātā yugā jūrṇeva varuṇasya bhūreḥ ||
1.184.04a asme sā vām mādhvī rātir astu stomaṁ hinotam mānyasya kāroḥ |
1.184.04c anu yad vāṁ śravasyā sudānū suvīryāya carṣaṇayo madanti ||
1.184.05a eṣa vāṁ stomo aśvināv akāri mānebhir maghavānā suvṛkti |
1.184.05c yātaṁ vartis tanayāya tmane cāgastye nāsatyā madantā ||
1.184.06a atāriṣma tamasas pāram asya prati vāṁ stomo aśvināv adhāyi |
1.184.06c eha yātam pathibhir devayānair vidyāmeṣaṁ vṛjanaṁ jīradānum ||

1.185.01a katarā pūrvā katarāparāyoḥ kathā jāte kavayaḥ ko vi veda |
1.185.01c viśvaṁ tmanā bibhṛto yad dha nāma vi vartete ahanī cakriyeva ||
1.185.02a bhūriṁ dve acarantī carantam padvantaṁ garbham apadī dadhāte |
1.185.02c nityaṁ na sūnum pitror upasthe dyāvā rakṣatam pṛthivī no abhvāt ||
1.185.03a aneho dātram aditer anarvaṁ huve svarvad avadhaṁ namasvat |
1.185.03c tad rodasī janayataṁ jaritre dyāvā rakṣatam pṛthivī no abhvāt ||
1.185.04a atapyamāne avasāvantī anu ṣyāma rodasī devaputre |
1.185.04c ubhe devānām ubhayebhir ahnāṁ dyāvā rakṣatam pṛthivī no abhvāt ||
1.185.05a saṁgacchamāne yuvatī samante svasārā jāmī pitror upasthe |
1.185.05c abhijighrantī bhuvanasya nābhiṁ dyāvā rakṣatam pṛthivī no abhvāt ||
1.185.06a urvī sadmanī bṛhatī ṛtena huve devānām avasā janitrī |
1.185.06c dadhāte ye amṛtaṁ supratīke dyāvā rakṣatam pṛthivī no abhvāt ||
1.185.07a urvī pṛthvī bahule dūreante upa bruve namasā yajñe asmin |
1.185.07c dadhāte ye subhage supratūrtī dyāvā rakṣatam pṛthivī no abhvāt ||
1.185.08a devān vā yac cakṛmā kac cid āgaḥ sakhāyaṁ vā sadam ij jāspatiṁ vā |
1.185.08c iyaṁ dhīr bhūyā avayānam eṣāṁ dyāvā rakṣatam pṛthivī no abhvāt ||
1.185.09a ubhā śaṁsā naryā mām aviṣṭām ubhe mām ūtī avasā sacetām |
1.185.09c bhūri cid aryaḥ sudāstarāyeṣā madanta iṣayema devāḥ ||
1.185.10a ṛtaṁ dive tad avocam pṛthivyā abhiśrāvāya prathamaṁ sumedhāḥ |
1.185.10c pātām avadyād duritād abhīke pitā mātā ca rakṣatām avobhiḥ ||
1.185.11a idaṁ dyāvāpṛthivī satyam astu pitar mātar yad ihopabruve vām |
1.185.11c bhūtaṁ devānām avame avobhir vidyāmeṣaṁ vṛjanaṁ jīradānum ||

1.186.01a ā na iḻābhir vidathe suśasti viśvānaraḥ savitā deva etu |
1.186.01c api yathā yuvāno matsathā no viśvaṁ jagad abhipitve manīṣā ||
1.186.02a ā no viśva āskrā gamantu devā mitro aryamā varuṇaḥ sajoṣāḥ |
1.186.02c bhuvan yathā no viśve vṛdhāsaḥ karan suṣāhā vithuraṁ na śavaḥ ||
1.186.03a preṣṭhaṁ vo atithiṁ gṛṇīṣe 'gniṁ śastibhis turvaṇiḥ sajoṣāḥ |
1.186.03c asad yathā no varuṇaḥ sukīrtir iṣaś ca parṣad arigūrtaḥ sūriḥ ||
1.186.04a upa va eṣe namasā jigīṣoṣāsānaktā sudugheva dhenuḥ |
1.186.04c samāne ahan vimimāno arkaṁ viṣurūpe payasi sasminn ūdhan ||
1.186.05a uta no 'hir budhnyo mayas kaḥ śiśuṁ na pipyuṣīva veti sindhuḥ |
1.186.05c yena napātam apāṁ junāma manojuvo vṛṣaṇo yaṁ vahanti ||
1.186.06a uta na īṁ tvaṣṭā gantv acchā smat sūribhir abhipitve sajoṣāḥ |
1.186.06c ā vṛtrahendraś carṣaṇiprās tuviṣṭamo narāṁ na iha gamyāḥ ||
1.186.07a uta na īm matayo 'śvayogāḥ śiśuṁ na gāvas taruṇaṁ rihanti |
1.186.07c tam īṁ giro janayo na patnīḥ surabhiṣṭamaṁ narāṁ nasanta ||
1.186.08a uta na īm maruto vṛddhasenāḥ smad rodasī samanasaḥ sadantu |
1.186.08c pṛṣadaśvāso 'vanayo na rathā riśādaso mitrayujo na devāḥ ||
1.186.09a pra nu yad eṣām mahinā cikitre pra yuñjate prayujas te suvṛkti |
1.186.09c adha yad eṣāṁ sudine na śarur viśvam eriṇam pruṣāyanta senāḥ ||
1.186.10a pro aśvināv avase kṛṇudhvam pra pūṣaṇaṁ svatavaso hi santi |
1.186.10c adveṣo viṣṇur vāta ṛbhukṣā acchā sumnāya vavṛtīya devān ||
1.186.11a iyaṁ sā vo asme dīdhitir yajatrā apiprāṇī ca sadanī ca bhūyāḥ |
1.186.11c ni yā deveṣu yatate vasūyur vidyāmeṣaṁ vṛjanaṁ jīradānum ||

1.187.01a pituṁ nu stoṣam maho dharmāṇaṁ taviṣīm |
1.187.01c yasya trito vy ojasā vṛtraṁ viparvam ardayat ||
1.187.02a svādo pito madho pito vayaṁ tvā vavṛmahe |
1.187.02c asmākam avitā bhava ||
1.187.03a upa naḥ pitav ā cara śivaḥ śivābhir ūtibhiḥ |
1.187.03c mayobhur adviṣeṇyaḥ sakhā suśevo advayāḥ ||
1.187.04a tava tye pito rasā rajāṁsy anu viṣṭhitāḥ |
1.187.04c divi vātā iva śritāḥ ||
1.187.05a tava tye pito dadatas tava svādiṣṭha te pito |
1.187.05c pra svādmāno rasānāṁ tuvigrīvā iverate ||
1.187.06a tve pito mahānāṁ devānām mano hitam |
1.187.06c akāri cāru ketunā tavāhim avasāvadhīt ||
1.187.07a yad ado pito ajagan vivasva parvatānām |
1.187.07c atrā cin no madho pito 'ram bhakṣāya gamyāḥ ||
1.187.08a yad apām oṣadhīnām pariṁśam āriśāmahe |
1.187.08c vātāpe pīva id bhava ||
1.187.09a yat te soma gavāśiro yavāśiro bhajāmahe |
1.187.09c vātāpe pīva id bhava ||
1.187.10a karambha oṣadhe bhava pīvo vṛkka udārathiḥ |
1.187.10c vātāpe pīva id bhava ||
1.187.11a taṁ tvā vayam pito vacobhir gāvo na havyā suṣūdima |
1.187.11c devebhyas tvā sadhamādam asmabhyaṁ tvā sadhamādam ||

1.188.01a samiddho adya rājasi devo devaiḥ sahasrajit |
1.188.01c dūto havyā kavir vaha ||
1.188.02a tanūnapād ṛtaṁ yate madhvā yajñaḥ sam ajyate |
1.188.02c dadhat sahasriṇīr iṣaḥ ||
1.188.03a ājuhvāno na īḍyo devām̐ ā vakṣi yajñiyān |
1.188.03c agne sahasrasā asi ||
1.188.04a prācīnam barhir ojasā sahasravīram astṛṇan |
1.188.04c yatrādityā virājatha ||
1.188.05a virāṭ samrāḍ vibhvīḥ prabhvīr bahvīś ca bhūyasīś ca yāḥ |
1.188.05c duro ghṛtāny akṣaran ||
1.188.06a surukme hi supeśasādhi śriyā virājataḥ |
1.188.06c uṣāsāv eha sīdatām ||
1.188.07a prathamā hi suvācasā hotārā daivyā kavī |
1.188.07c yajñaṁ no yakṣatām imam ||
1.188.08a bhāratīḻe sarasvati yā vaḥ sarvā upabruve |
1.188.08c tā naś codayata śriye ||
1.188.09a tvaṣṭā rūpāṇi hi prabhuḥ paśūn viśvān samānaje |
1.188.09c teṣāṁ naḥ sphātim ā yaja ||
1.188.10a upa tmanyā vanaspate pātho devebhyaḥ sṛja |
1.188.10c agnir havyāni siṣvadat ||
1.188.11a purogā agnir devānāṁ gāyatreṇa sam ajyate |
1.188.11c svāhākṛtīṣu rocate ||

1.189.01a agne naya supathā rāye asmān viśvāni deva vayunāni vidvān |
1.189.01c yuyodhy asmaj juhurāṇam eno bhūyiṣṭhāṁ te namaüktiṁ vidhema ||
1.189.02a agne tvam pārayā navyo asmān svastibhir ati durgāṇi viśvā |
1.189.02c pūś ca pṛthvī bahulā na urvī bhavā tokāya tanayāya śaṁ yoḥ ||
1.189.03a agne tvam asmad yuyodhy amīvā anagnitrā abhy amanta kṛṣṭīḥ |
1.189.03c punar asmabhyaṁ suvitāya deva kṣāṁ viśvebhir amṛtebhir yajatra ||
1.189.04a pāhi no agne pāyubhir ajasrair uta priye sadana ā śuśukvān |
1.189.04c mā te bhayaṁ jaritāraṁ yaviṣṭha nūnaṁ vidan māparaṁ sahasvaḥ ||
1.189.05a mā no agne 'va sṛjo aghāyāviṣyave ripave ducchunāyai |
1.189.05c mā datvate daśate mādate no mā rīṣate sahasāvan parā dāḥ ||
1.189.06a vi gha tvāvām̐ ṛtajāta yaṁsad gṛṇāno agne tanve varūtham |
1.189.06c viśvād ririkṣor uta vā ninitsor abhihrutām asi hi deva viṣpaṭ ||
1.189.07a tvaṁ tām̐ agna ubhayān vi vidvān veṣi prapitve manuṣo yajatra |
1.189.07c abhipitve manave śāsyo bhūr marmṛjenya uśigbhir nākraḥ ||
1.189.08a avocāma nivacanāny asmin mānasya sūnuḥ sahasāne agnau |
1.189.08c vayaṁ sahasram ṛṣibhiḥ sanema vidyāmeṣaṁ vṛjanaṁ jīradānum ||

1.190.01a anarvāṇaṁ vṛṣabham mandrajihvam bṛhaspatiṁ vardhayā navyam arkaiḥ |
1.190.01c gāthānyaḥ suruco yasya devā āśṛṇvanti navamānasya martāḥ ||
1.190.02a tam ṛtviyā upa vācaḥ sacante sargo na yo devayatām asarji |
1.190.02c bṛhaspatiḥ sa hy añjo varāṁsi vibhvābhavat sam ṛte mātariśvā ||
1.190.03a upastutiṁ namasa udyatiṁ ca ślokaṁ yaṁsat saviteva pra bāhū |
1.190.03c asya kratvāhanyo yo asti mṛgo na bhīmo arakṣasas tuviṣmān ||
1.190.04a asya śloko divīyate pṛthivyām atyo na yaṁsad yakṣabhṛd vicetāḥ |
1.190.04c mṛgāṇāṁ na hetayo yanti cemā bṛhaspater ahimāyām̐ abhi dyūn ||
1.190.05a ye tvā devosrikam manyamānāḥ pāpā bhadram upajīvanti pajrāḥ |
1.190.05c na dūḍhye anu dadāsi vāmam bṛhaspate cayasa it piyārum ||
1.190.06a supraituḥ sūyavaso na panthā durniyantuḥ pariprīto na mitraḥ |
1.190.06c anarvāṇo abhi ye cakṣate no 'pīvṛtā aporṇuvanto asthuḥ ||
1.190.07a saṁ yaṁ stubho 'vanayo na yanti samudraṁ na sravato rodhacakrāḥ |
1.190.07c sa vidvām̐ ubhayaṁ caṣṭe antar bṛhaspatis tara āpaś ca gṛdhraḥ ||
1.190.08a evā mahas tuvijātas tuviṣmān bṛhaspatir vṛṣabho dhāyi devaḥ |
1.190.08c sa naḥ stuto vīravad dhātu gomad vidyāmeṣaṁ vṛjanaṁ jīradānum ||

1.191.01a kaṅkato na kaṅkato 'tho satīnakaṅkataḥ |
1.191.01c dvāv iti pluṣī iti ny adṛṣṭā alipsata ||
1.191.02a adṛṣṭān hanty āyaty atho hanti parāyatī |
1.191.02c atho avaghnatī hanty atho pinaṣṭi piṁṣatī ||
1.191.03a śarāsaḥ kuśarāso darbhāsaḥ sairyā uta |
1.191.03c mauñjā adṛṣṭā vairiṇāḥ sarve sākaṁ ny alipsata ||
1.191.04a ni gāvo goṣṭhe asadan ni mṛgāso avikṣata |
1.191.04c ni ketavo janānāṁ ny adṛṣṭā alipsata ||
1.191.05a eta u tye praty adṛśran pradoṣaṁ taskarā iva |
1.191.05c adṛṣṭā viśvadṛṣṭāḥ pratibuddhā abhūtana ||
1.191.06a dyaur vaḥ pitā pṛthivī mātā somo bhrātāditiḥ svasā |
1.191.06c adṛṣṭā viśvadṛṣṭās tiṣṭhatelayatā su kam ||
1.191.07a ye aṁsyā ye aṅgyāḥ sūcīkā ye prakaṅkatāḥ |
1.191.07c adṛṣṭāḥ kiṁ caneha vaḥ sarve sākaṁ ni jasyata ||
1.191.08a ut purastāt sūrya eti viśvadṛṣṭo adṛṣṭahā |
1.191.08c adṛṣṭān sarvāñ jambhayan sarvāś ca yātudhānyaḥ ||
1.191.09a ud apaptad asau sūryaḥ puru viśvāni jūrvan |
1.191.09c ādityaḥ parvatebhyo viśvadṛṣṭo adṛṣṭahā ||
1.191.10a sūrye viṣam ā sajāmi dṛtiṁ surāvato gṛhe |
1.191.10c so cin nu na marāti no vayam marāmāre asya yojanaṁ hariṣṭhā madhu tvā madhulā cakāra ||
1.191.11a iyattikā śakuntikā sakā jaghāsa te viṣam |
1.191.11c so cin nu na marāti no vayam marāmāre asya yojanaṁ hariṣṭhā madhu tvā madhulā cakāra ||
1.191.12a triḥ sapta viṣpuliṅgakā viṣasya puṣyam akṣan |
1.191.12c tāś cin nu na maranti no vayam marāmāre asya yojanaṁ hariṣṭhā madhu tvā madhulā cakāra ||
1.191.13a navānāṁ navatīnāṁ viṣasya ropuṣīṇām |
1.191.13c sarvāsām agrabhaṁ nāmāre asya yojanaṁ hariṣṭhā madhu tvā madhulā cakāra ||
1.191.14a triḥ sapta mayūryaḥ sapta svasāro agruvaḥ |
1.191.14c tās te viṣaṁ vi jabhrira udakaṁ kumbhinīr iva ||
1.191.15a iyattakaḥ kuṣumbhakas takam bhinadmy aśmanā |
1.191.15c tato viṣam pra vāvṛte parācīr anu saṁvataḥ ||
1.191.16a kuṣumbhakas tad abravīd gireḥ pravartamānakaḥ |
1.191.16c vṛścikasyārasaṁ viṣam arasaṁ vṛścika te viṣam ||


2.001.01a tvam agne dyubhis tvam āśuśukṣaṇis tvam adbhyas tvam aśmanas pari |
2.001.01c tvaṁ vanebhyas tvam oṣadhībhyas tvaṁ nṛṇāṁ nṛpate jāyase śuciḥ ||
2.001.02a tavāgne hotraṁ tava potram ṛtviyaṁ tava neṣṭraṁ tvam agnid ṛtāyataḥ |
2.001.02c tava praśāstraṁ tvam adhvarīyasi brahmā cāsi gṛhapatiś ca no dame ||
2.001.03a tvam agna indro vṛṣabhaḥ satām asi tvaṁ viṣṇur urugāyo namasyaḥ |
2.001.03c tvam brahmā rayivid brahmaṇas pate tvaṁ vidhartaḥ sacase puraṁdhyā ||
2.001.04a tvam agne rājā varuṇo dhṛtavratas tvam mitro bhavasi dasma īḍyaḥ |
2.001.04c tvam aryamā satpatir yasya sambhujaṁ tvam aṁśo vidathe deva bhājayuḥ ||
2.001.05a tvam agne tvaṣṭā vidhate suvīryaṁ tava gnāvo mitramahaḥ sajātyam |
2.001.05c tvam āśuhemā rariṣe svaśvyaṁ tvaṁ narāṁ śardho asi purūvasuḥ ||
2.001.06a tvam agne rudro asuro maho divas tvaṁ śardho mārutam pṛkṣa īśiṣe |
2.001.06c tvaṁ vātair aruṇair yāsi śaṁgayas tvam pūṣā vidhataḥ pāsi nu tmanā ||
2.001.07a tvam agne draviṇodā araṁkṛte tvaṁ devaḥ savitā ratnadhā asi |
2.001.07c tvam bhago nṛpate vasva īśiṣe tvam pāyur dame yas te 'vidhat ||
2.001.08a tvām agne dama ā viśpatiṁ viśas tvāṁ rājānaṁ suvidatram ṛñjate |
2.001.08c tvaṁ viśvāni svanīka patyase tvaṁ sahasrāṇi śatā daśa prati ||
2.001.09a tvām agne pitaram iṣṭibhir naras tvām bhrātrāya śamyā tanūrucam |
2.001.09c tvam putro bhavasi yas te 'vidhat tvaṁ sakhā suśevaḥ pāsy ādhṛṣaḥ ||
2.001.10a tvam agna ṛbhur āke namasyas tvaṁ vājasya kṣumato rāya īśiṣe |
2.001.10c tvaṁ vi bhāsy anu dakṣi dāvane tvaṁ viśikṣur asi yajñam ātaniḥ ||
2.001.11a tvam agne aditir deva dāśuṣe tvaṁ hotrā bhāratī vardhase girā |
2.001.11c tvam iḻā śatahimāsi dakṣase tvaṁ vṛtrahā vasupate sarasvatī ||
2.001.12a tvam agne subhṛta uttamaṁ vayas tava spārhe varṇa ā saṁdṛśi śriyaḥ |
2.001.12c tvaṁ vājaḥ prataraṇo bṛhann asi tvaṁ rayir bahulo viśvatas pṛthuḥ ||
2.001.13a tvām agna ādityāsa āsyaṁ tvāṁ jihvāṁ śucayaś cakrire kave |
2.001.13c tvāṁ rātiṣāco adhvareṣu saścire tve devā havir adanty āhutam ||
2.001.14a tve agne viśve amṛtāso adruha āsā devā havir adanty āhutam |
2.001.14c tvayā martāsaḥ svadanta āsutiṁ tvaṁ garbho vīrudhāṁ jajñiṣe śuciḥ ||
2.001.15a tvaṁ tān saṁ ca prati cāsi majmanāgne sujāta pra ca deva ricyase |
2.001.15c pṛkṣo yad atra mahinā vi te bhuvad anu dyāvāpṛthivī rodasī ubhe ||
2.001.16a ye stotṛbhyo goagrām aśvapeśasam agne rātim upasṛjanti sūrayaḥ |
2.001.16c asmāñ ca tām̐ś ca pra hi neṣi vasya ā bṛhad vadema vidathe suvīrāḥ ||

2.002.01a yajñena vardhata jātavedasam agniṁ yajadhvaṁ haviṣā tanā girā |
2.002.01c samidhānaṁ suprayasaṁ svarṇaraṁ dyukṣaṁ hotāraṁ vṛjaneṣu dhūrṣadam ||
2.002.02a abhi tvā naktīr uṣaso vavāśire 'gne vatsaṁ na svasareṣu dhenavaḥ |
2.002.02c diva ived aratir mānuṣā yugā kṣapo bhāsi puruvāra saṁyataḥ ||
2.002.03a taṁ devā budhne rajasaḥ sudaṁsasaṁ divaspṛthivyor aratiṁ ny erire |
2.002.03c ratham iva vedyaṁ śukraśociṣam agnim mitraṁ na kṣitiṣu praśaṁsyam ||
2.002.04a tam ukṣamāṇaṁ rajasi sva ā dame candram iva surucaṁ hvāra ā dadhuḥ |
2.002.04c pṛśnyāḥ pataraṁ citayantam akṣabhiḥ pātho na pāyuṁ janasī ubhe anu ||
2.002.05a sa hotā viśvam pari bhūtv adhvaraṁ tam u havyair manuṣa ṛñjate girā |
2.002.05c hiriśipro vṛdhasānāsu jarbhurad dyaur na stṛbhiś citayad rodasī anu ||
2.002.06a sa no revat samidhānaḥ svastaye saṁdadasvān rayim asmāsu dīdihi |
2.002.06c ā naḥ kṛṇuṣva suvitāya rodasī agne havyā manuṣo deva vītaye ||
2.002.07a dā no agne bṛhato dāḥ sahasriṇo duro na vājaṁ śrutyā apā vṛdhi |
2.002.07c prācī dyāvāpṛthivī brahmaṇā kṛdhi svar ṇa śukram uṣaso vi didyutaḥ ||
2.002.08a sa idhāna uṣaso rāmyā anu svar ṇa dīded aruṣeṇa bhānunā |
2.002.08c hotrābhir agnir manuṣaḥ svadhvaro rājā viśām atithiś cārur āyave ||
2.002.09a evā no agne amṛteṣu pūrvya dhīṣ pīpāya bṛhaddiveṣu mānuṣā |
2.002.09c duhānā dhenur vṛjaneṣu kārave tmanā śatinam pururūpam iṣaṇi ||
2.002.10a vayam agne arvatā vā suvīryam brahmaṇā vā citayemā janām̐ ati |
2.002.10c asmākaṁ dyumnam adhi pañca kṛṣṭiṣūccā svar ṇa śuśucīta duṣṭaram ||
2.002.11a sa no bodhi sahasya praśaṁsyo yasmin sujātā iṣayanta sūrayaḥ |
2.002.11c yam agne yajñam upayanti vājino nitye toke dīdivāṁsaṁ sve dame ||
2.002.12a ubhayāso jātavedaḥ syāma te stotāro agne sūrayaś ca śarmaṇi |
2.002.12c vasvo rāyaḥ puruścandrasya bhūyasaḥ prajāvataḥ svapatyasya śagdhi naḥ ||
2.002.13a ye stotṛbhyo goagrām aśvapeśasam agne rātim upasṛjanti sūrayaḥ |
2.002.13c asmāñ ca tām̐ś ca pra hi neṣi vasya ā bṛhad vadema vidathe suvīrāḥ ||

2.003.01a samiddho agnir nihitaḥ pṛthivyām pratyaṅ viśvāni bhuvanāny asthāt |
2.003.01c hotā pāvakaḥ pradivaḥ sumedhā devo devān yajatv agnir arhan ||
2.003.02a narāśaṁsaḥ prati dhāmāny añjan tisro divaḥ prati mahnā svarciḥ |
2.003.02c ghṛtapruṣā manasā havyam undan mūrdhan yajñasya sam anaktu devān ||
2.003.03a īḻito agne manasā no arhan devān yakṣi mānuṣāt pūrvo adya |
2.003.03c sa ā vaha marutāṁ śardho acyutam indraṁ naro barhiṣadaṁ yajadhvam ||
2.003.04a deva barhir vardhamānaṁ suvīraṁ stīrṇaṁ rāye subharaṁ vedy asyām |
2.003.04c ghṛtenāktaṁ vasavaḥ sīdatedaṁ viśve devā ādityā yajñiyāsaḥ ||
2.003.05a vi śrayantām urviyā hūyamānā dvāro devīḥ suprāyaṇā namobhiḥ |
2.003.05c vyacasvatīr vi prathantām ajuryā varṇam punānā yaśasaṁ suvīram ||
2.003.06a sādhv apāṁsi sanatā na ukṣite uṣāsānaktā vayyeva raṇvite |
2.003.06c tantuṁ tataṁ saṁvayantī samīcī yajñasya peśaḥ sudughe payasvatī ||
2.003.07a daivyā hotārā prathamā viduṣṭara ṛju yakṣataḥ sam ṛcā vapuṣṭarā |
2.003.07c devān yajantāv ṛtuthā sam añjato nābhā pṛthivyā adhi sānuṣu triṣu ||
2.003.08a sarasvatī sādhayantī dhiyaṁ na iḻā devī bhāratī viśvatūrtiḥ |
2.003.08c tisro devīḥ svadhayā barhir edam acchidram pāntu śaraṇaṁ niṣadya ||
2.003.09a piśaṅgarūpaḥ subharo vayodhāḥ śruṣṭī vīro jāyate devakāmaḥ |
2.003.09c prajāṁ tvaṣṭā vi ṣyatu nābhim asme athā devānām apy etu pāthaḥ ||
2.003.10a vanaspatir avasṛjann upa sthād agnir haviḥ sūdayāti pra dhībhiḥ |
2.003.10c tridhā samaktaṁ nayatu prajānan devebhyo daivyaḥ śamitopa havyam ||
2.003.11a ghṛtam mimikṣe ghṛtam asya yonir ghṛte śrito ghṛtam v asya dhāma |
2.003.11c anuṣvadham ā vaha mādayasva svāhākṛtaṁ vṛṣabha vakṣi havyam ||

2.004.01a huve vaḥ sudyotmānaṁ suvṛktiṁ viśām agnim atithiṁ suprayasam |
2.004.01c mitra iva yo didhiṣāyyo bhūd deva ādeve jane jātavedāḥ ||
2.004.02a imaṁ vidhanto apāṁ sadhasthe dvitādadhur bhṛgavo vikṣv āyoḥ |
2.004.02c eṣa viśvāny abhy astu bhūmā devānām agnir aratir jīrāśvaḥ ||
2.004.03a agniṁ devāso mānuṣīṣu vikṣu priyaṁ dhuḥ kṣeṣyanto na mitram |
2.004.03c sa dīdayad uśatīr ūrmyā ā dakṣāyyo yo dāsvate dama ā ||
2.004.04a asya raṇvā svasyeva puṣṭiḥ saṁdṛṣṭir asya hiyānasya dakṣoḥ |
2.004.04c vi yo bharibhrad oṣadhīṣu jihvām atyo na rathyo dodhavīti vārān ||
2.004.05a ā yan me abhvaṁ vanadaḥ panantośigbhyo nāmimīta varṇam |
2.004.05c sa citreṇa cikite raṁsu bhāsā jujurvām̐ yo muhur ā yuvā bhūt ||
2.004.06a ā yo vanā tātṛṣāṇo na bhāti vār ṇa pathā rathyeva svānīt |
2.004.06c kṛṣṇādhvā tapū raṇvaś ciketa dyaur iva smayamāno nabhobhiḥ ||
2.004.07a sa yo vy asthād abhi dakṣad urvīm paśur naiti svayur agopāḥ |
2.004.07c agniḥ śociṣmām̐ atasāny uṣṇan kṛṣṇavyathir asvadayan na bhūma ||
2.004.08a nū te pūrvasyāvaso adhītau tṛtīye vidathe manma śaṁsi |
2.004.08c asme agne saṁyadvīram bṛhantaṁ kṣumantaṁ vājaṁ svapatyaṁ rayiṁ dāḥ ||
2.004.09a tvayā yathā gṛtsamadāso agne guhā vanvanta uparām̐ abhi ṣyuḥ |
2.004.09c suvīrāso abhimātiṣāhaḥ smat sūribhyo gṛṇate tad vayo dhāḥ ||

2.005.01a hotājaniṣṭa cetanaḥ pitā pitṛbhya ūtaye |
2.005.01c prayakṣañ jenyaṁ vasu śakema vājino yamam ||
2.005.02a ā yasmin sapta raśmayas tatā yajñasya netari |
2.005.02c manuṣvad daivyam aṣṭamam potā viśvaṁ tad invati ||
2.005.03a dadhanve vā yad īm anu vocad brahmāṇi ver u tat |
2.005.03c pari viśvāni kāvyā nemiś cakram ivābhavat ||
2.005.04a sākaṁ hi śucinā śuciḥ praśāstā kratunājani |
2.005.04c vidvām̐ asya vratā dhruvā vayā ivānu rohate ||
2.005.05a tā asya varṇam āyuvo neṣṭuḥ sacanta dhenavaḥ |
2.005.05c kuvit tisṛbhya ā varaṁ svasāro yā idaṁ yayuḥ ||
2.005.06a yadī mātur upa svasā ghṛtam bharanty asthita |
2.005.06c tāsām adhvaryur āgatau yavo vṛṣṭīva modate ||
2.005.07a svaḥ svāya dhāyase kṛṇutām ṛtvig ṛtvijam |
2.005.07c stomaṁ yajñaṁ cād araṁ vanemā rarimā vayam ||
2.005.08a yathā vidvām̐ araṁ karad viśvebhyo yajatebhyaḥ |
2.005.08c ayam agne tve api yaṁ yajñaṁ cakṛmā vayam ||

2.006.01a imām me agne samidham imām upasadaṁ vaneḥ |
2.006.01c imā u ṣu śrudhī giraḥ ||
2.006.02a ayā te agne vidhemorjo napād aśvamiṣṭe |
2.006.02c enā sūktena sujāta ||
2.006.03a taṁ tvā gīrbhir girvaṇasaṁ draviṇasyuṁ draviṇodaḥ |
2.006.03c saparyema saparyavaḥ ||
2.006.04a sa bodhi sūrir maghavā vasupate vasudāvan |
2.006.04c yuyodhy asmad dveṣāṁsi ||
2.006.05a sa no vṛṣṭiṁ divas pari sa no vājam anarvāṇam |
2.006.05c sa naḥ sahasriṇīr iṣaḥ ||
2.006.06a īḻānāyāvasyave yaviṣṭha dūta no girā |
2.006.06c yajiṣṭha hotar ā gahi ||
2.006.07a antar hy agna īyase vidvāñ janmobhayā kave |
2.006.07c dūto janyeva mitryaḥ ||
2.006.08a sa vidvām̐ ā ca piprayo yakṣi cikitva ānuṣak |
2.006.08c ā cāsmin satsi barhiṣi ||

2.007.01a śreṣṭhaṁ yaviṣṭha bhāratāgne dyumantam ā bhara |
2.007.01c vaso puruspṛhaṁ rayim ||
2.007.02a mā no arātir īśata devasya martyasya ca |
2.007.02c parṣi tasyā uta dviṣaḥ ||
2.007.03a viśvā uta tvayā vayaṁ dhārā udanyā iva |
2.007.03c ati gāhemahi dviṣaḥ ||
2.007.04a śuciḥ pāvaka vandyo 'gne bṛhad vi rocase |
2.007.04c tvaṁ ghṛtebhir āhutaḥ ||
2.007.05a tvaṁ no asi bhāratāgne vaśābhir ukṣabhiḥ |
2.007.05c aṣṭāpadībhir āhutaḥ ||
2.007.06a drvannaḥ sarpirāsutiḥ pratno hotā vareṇyaḥ |
2.007.06c sahasas putro adbhutaḥ ||

2.008.01a vājayann iva nū rathān yogām̐ agner upa stuhi |
2.008.01c yaśastamasya mīḻhuṣaḥ ||
2.008.02a yaḥ sunītho dadāśuṣe 'juryo jarayann arim |
2.008.02c cārupratīka āhutaḥ ||
2.008.03a ya u śriyā dameṣv ā doṣoṣasi praśasyate |
2.008.03c yasya vrataṁ na mīyate ||
2.008.04a ā yaḥ svar ṇa bhānunā citro vibhāty arciṣā |
2.008.04c añjāno ajarair abhi ||
2.008.05a atrim anu svarājyam agnim ukthāni vāvṛdhuḥ |
2.008.05c viśvā adhi śriyo dadhe ||
2.008.06a agner indrasya somasya devānām ūtibhir vayam |
2.008.06c ariṣyantaḥ sacemahy abhi ṣyāma pṛtanyataḥ ||

2.009.01a ni hotā hotṛṣadane vidānas tveṣo dīdivām̐ asadat sudakṣaḥ |
2.009.01c adabdhavratapramatir vasiṣṭhaḥ sahasrambharaḥ śucijihvo agniḥ ||
2.009.02a tvaṁ dūtas tvam u naḥ paraspās tvaṁ vasya ā vṛṣabha praṇetā |
2.009.02c agne tokasya nas tane tanūnām aprayucchan dīdyad bodhi gopāḥ ||
2.009.03a vidhema te parame janmann agne vidhema stomair avare sadhasthe |
2.009.03c yasmād yoner udārithā yaje tam pra tve havīṁṣi juhure samiddhe ||
2.009.04a agne yajasva haviṣā yajīyāñ chruṣṭī deṣṇam abhi gṛṇīhi rādhaḥ |
2.009.04c tvaṁ hy asi rayipatī rayīṇāṁ tvaṁ śukrasya vacaso manotā ||
2.009.05a ubhayaṁ te na kṣīyate vasavyaṁ dive-dive jāyamānasya dasma |
2.009.05c kṛdhi kṣumantaṁ jaritāram agne kṛdhi patiṁ svapatyasya rāyaḥ ||
2.009.06a sainānīkena suvidatro asme yaṣṭā devām̐ āyajiṣṭhaḥ svasti |
2.009.06c adabdho gopā uta naḥ paraspā agne dyumad uta revad didīhi ||

2.010.01a johūtro agniḥ prathamaḥ piteveḻas pade manuṣā yat samiddhaḥ |
2.010.01c śriyaṁ vasāno amṛto vicetā marmṛjenyaḥ śravasyaḥ sa vājī ||
2.010.02a śrūyā agniś citrabhānur havam me viśvābhir gīrbhir amṛto vicetāḥ |
2.010.02c śyāvā rathaṁ vahato rohitā votāruṣāha cakre vibhṛtraḥ ||
2.010.03a uttānāyām ajanayan suṣūtam bhuvad agniḥ purupeśāsu garbhaḥ |
2.010.03c śiriṇāyāṁ cid aktunā mahobhir aparīvṛto vasati pracetāḥ ||
2.010.04a jigharmy agniṁ haviṣā ghṛtena pratikṣiyantam bhuvanāni viśvā |
2.010.04c pṛthuṁ tiraścā vayasā bṛhantaṁ vyaciṣṭham annai rabhasaṁ dṛśānam ||
2.010.05a ā viśvataḥ pratyañcaṁ jigharmy arakṣasā manasā taj juṣeta |
2.010.05c maryaśrīḥ spṛhayadvarṇo agnir nābhimṛśe tanvā jarbhurāṇaḥ ||
2.010.06a jñeyā bhāgaṁ sahasāno vareṇa tvādūtāso manuvad vadema |
2.010.06c anūnam agniṁ juhvā vacasyā madhupṛcaṁ dhanasā johavīmi ||

2.011.01a śrudhī havam indra mā riṣaṇyaḥ syāma te dāvane vasūnām |
2.011.01c imā hi tvām ūrjo vardhayanti vasūyavaḥ sindhavo na kṣarantaḥ ||
2.011.02a sṛjo mahīr indra yā apinvaḥ pariṣṭhitā ahinā śūra pūrvīḥ |
2.011.02c amartyaṁ cid dāsam manyamānam avābhinad ukthair vāvṛdhānaḥ ||
2.011.03a uktheṣv in nu śūra yeṣu cākan stomeṣv indra rudriyeṣu ca |
2.011.03c tubhyed etā yāsu mandasānaḥ pra vāyave sisrate na śubhrāḥ ||
2.011.04a śubhraṁ nu te śuṣmaṁ vardhayantaḥ śubhraṁ vajram bāhvor dadhānāḥ |
2.011.04c śubhras tvam indra vāvṛdhāno asme dāsīr viśaḥ sūryeṇa sahyāḥ ||
2.011.05a guhā hitaṁ guhyaṁ gūḻham apsv apīvṛtam māyinaṁ kṣiyantam |
2.011.05c uto apo dyāṁ tastabhvāṁsam ahann ahiṁ śūra vīryeṇa ||
2.011.06a stavā nu ta indra pūrvyā mahāny uta stavāma nūtanā kṛtāni |
2.011.06c stavā vajram bāhvor uśantaṁ stavā harī sūryasya ketū ||
2.011.07a harī nu ta indra vājayantā ghṛtaścutaṁ svāram asvārṣṭām |
2.011.07c vi samanā bhūmir aprathiṣṭāraṁsta parvataś cit sariṣyan ||
2.011.08a ni parvataḥ sādy aprayucchan sam mātṛbhir vāvaśāno akrān |
2.011.08c dūre pāre vāṇīṁ vardhayanta indreṣitāṁ dhamanim paprathan ni ||
2.011.09a indro mahāṁ sindhum āśayānam māyāvinaṁ vṛtram asphuran niḥ |
2.011.09c arejetāṁ rodasī bhiyāne kanikradato vṛṣṇo asya vajrāt ||
2.011.10a aroravīd vṛṣṇo asya vajro 'mānuṣaṁ yan mānuṣo nijūrvāt |
2.011.10c ni māyino dānavasya māyā apādayat papivān sutasya ||
2.011.11a pibā-pibed indra śūra somam mandantu tvā mandinaḥ sutāsaḥ |
2.011.11c pṛṇantas te kukṣī vardhayantv itthā sutaḥ paura indram āva ||
2.011.12a tve indrāpy abhūma viprā dhiyaṁ vanema ṛtayā sapantaḥ |
2.011.12c avasyavo dhīmahi praśastiṁ sadyas te rāyo dāvane syāma ||
2.011.13a syāma te ta indra ye ta ūtī avasyava ūrjaṁ vardhayantaḥ |
2.011.13c śuṣmintamaṁ yaṁ cākanāma devāsme rayiṁ rāsi vīravantam ||
2.011.14a rāsi kṣayaṁ rāsi mitram asme rāsi śardha indra mārutaṁ naḥ |
2.011.14c sajoṣaso ye ca mandasānāḥ pra vāyavaḥ pānty agraṇītim ||
2.011.15a vyantv in nu yeṣu mandasānas tṛpat somam pāhi drahyad indra |
2.011.15c asmān su pṛtsv ā tarutrāvardhayo dyām bṛhadbhir arkaiḥ ||
2.011.16a bṛhanta in nu ye te tarutrokthebhir vā sumnam āvivāsān |
2.011.16c stṛṇānāso barhiḥ pastyāvat tvotā id indra vājam agman ||
2.011.17a ugreṣv in nu śūra mandasānas trikadrukeṣu pāhi somam indra |
2.011.17c pradodhuvac chmaśruṣu prīṇāno yāhi haribhyāṁ sutasya pītim ||
2.011.18a dhiṣvā śavaḥ śūra yena vṛtram avābhinad dānum aurṇavābham |
2.011.18c apāvṛṇor jyotir āryāya ni savyataḥ sādi dasyur indra ||
2.011.19a sanema ye ta ūtibhis taranto viśvāḥ spṛdha āryeṇa dasyūn |
2.011.19c asmabhyaṁ tat tvāṣṭraṁ viśvarūpam arandhayaḥ sākhyasya tritāya ||
2.011.20a asya suvānasya mandinas tritasya ny arbudaṁ vāvṛdhāno astaḥ |
2.011.20c avartayat sūryo na cakram bhinad valam indro aṅgirasvān ||
2.011.21a nūnaṁ sā te prati varaṁ jaritre duhīyad indra dakṣiṇā maghonī |
2.011.21c śikṣā stotṛbhyo māti dhag bhago no bṛhad vadema vidathe suvīrāḥ ||

2.012.01a yo jāta eva prathamo manasvān devo devān kratunā paryabhūṣat |
2.012.01c yasya śuṣmād rodasī abhyasetāṁ nṛmṇasya mahnā sa janāsa indraḥ ||
2.012.02a yaḥ pṛthivīṁ vyathamānām adṛṁhad yaḥ parvatān prakupitām̐ aramṇāt |
2.012.02c yo antarikṣaṁ vimame varīyo yo dyām astabhnāt sa janāsa indraḥ ||
2.012.03a yo hatvāhim ariṇāt sapta sindhūn yo gā udājad apadhā valasya |
2.012.03c yo aśmanor antar agniṁ jajāna saṁvṛk samatsu sa janāsa indraḥ ||
2.012.04a yenemā viśvā cyavanā kṛtāni yo dāsaṁ varṇam adharaṁ guhākaḥ |
2.012.04c śvaghnīva yo jigīvām̐l lakṣam ādad aryaḥ puṣṭāni sa janāsa indraḥ ||
2.012.05a yaṁ smā pṛcchanti kuha seti ghoram utem āhur naiṣo astīty enam |
2.012.05c so aryaḥ puṣṭīr vija ivā mināti śrad asmai dhatta sa janāsa indraḥ ||
2.012.06a yo radhrasya coditā yaḥ kṛśasya yo brahmaṇo nādhamānasya kīreḥ |
2.012.06c yuktagrāvṇo yo 'vitā suśipraḥ sutasomasya sa janāsa indraḥ ||
2.012.07a yasyāśvāsaḥ pradiśi yasya gāvo yasya grāmā yasya viśve rathāsaḥ |
2.012.07c yaḥ sūryaṁ ya uṣasaṁ jajāna yo apāṁ netā sa janāsa indraḥ ||
2.012.08a yaṁ krandasī saṁyatī vihvayete pare 'vara ubhayā amitrāḥ |
2.012.08c samānaṁ cid ratham ātasthivāṁsā nānā havete sa janāsa indraḥ ||
2.012.09a yasmān na ṛte vijayante janāso yaṁ yudhyamānā avase havante |
2.012.09c yo viśvasya pratimānam babhūva yo acyutacyut sa janāsa indraḥ ||
2.012.10a yaḥ śaśvato mahy eno dadhānān amanyamānāñ charvā jaghāna |
2.012.10c yaḥ śardhate nānudadāti śṛdhyāṁ yo dasyor hantā sa janāsa indraḥ ||
2.012.11a yaḥ śambaram parvateṣu kṣiyantaṁ catvāriṁśyāṁ śarady anvavindat |
2.012.11c ojāyamānaṁ yo ahiṁ jaghāna dānuṁ śayānaṁ sa janāsa indraḥ ||
2.012.12a yaḥ saptaraśmir vṛṣabhas tuviṣmān avāsṛjat sartave sapta sindhūn |
2.012.12c yo rauhiṇam asphurad vajrabāhur dyām ārohantaṁ sa janāsa indraḥ ||
2.012.13a dyāvā cid asmai pṛthivī namete śuṣmāc cid asya parvatā bhayante |
2.012.13c yaḥ somapā nicito vajrabāhur yo vajrahastaḥ sa janāsa indraḥ ||
2.012.14a yaḥ sunvantam avati yaḥ pacantaṁ yaḥ śaṁsantaṁ yaḥ śaśamānam ūtī |
2.012.14c yasya brahma vardhanaṁ yasya somo yasyedaṁ rādhaḥ sa janāsa indraḥ ||
2.012.15a yaḥ sunvate pacate dudhra ā cid vājaṁ dardarṣi sa kilāsi satyaḥ |
2.012.15c vayaṁ ta indra viśvaha priyāsaḥ suvīrāso vidatham ā vadema ||

2.013.01a ṛtur janitrī tasyā apas pari makṣū jāta āviśad yāsu vardhate |
2.013.01c tad āhanā abhavat pipyuṣī payo 'ṁśoḥ pīyūṣam prathamaṁ tad ukthyam ||
2.013.02a sadhrīm ā yanti pari bibhratīḥ payo viśvapsnyāya pra bharanta bhojanam |
2.013.02c samāno adhvā pravatām anuṣyade yas tākṛṇoḥ prathamaṁ sāsy ukthyaḥ ||
2.013.03a anv eko vadati yad dadāti tad rūpā minan tadapā eka īyate |
2.013.03c viśvā ekasya vinudas titikṣate yas tākṛṇoḥ prathamaṁ sāsy ukthyaḥ ||
2.013.04a prajābhyaḥ puṣṭiṁ vibhajanta āsate rayim iva pṛṣṭham prabhavantam āyate |
2.013.04c asinvan daṁṣṭraiḥ pitur atti bhojanaṁ yas tākṛṇoḥ prathamaṁ sāsy ukthyaḥ ||
2.013.05a adhākṛṇoḥ pṛthivīṁ saṁdṛśe dive yo dhautīnām ahihann āriṇak pathaḥ |
2.013.05c taṁ tvā stomebhir udabhir na vājinaṁ devaṁ devā ajanan sāsy ukthyaḥ ||
2.013.06a yo bhojanaṁ ca dayase ca vardhanam ārdrād ā śuṣkam madhumad dudohitha |
2.013.06c sa śevadhiṁ ni dadhiṣe vivasvati viśvasyaika īśiṣe sāsy ukthyaḥ ||
2.013.07a yaḥ puṣpiṇīś ca prasvaś ca dharmaṇādhi dāne vy avanīr adhārayaḥ |
2.013.07c yaś cāsamā ajano didyuto diva urur ūrvām̐ abhitaḥ sāsy ukthyaḥ ||
2.013.08a yo nārmaraṁ sahavasuṁ nihantave pṛkṣāya ca dāsaveśāya cāvahaḥ |
2.013.08c ūrjayantyā apariviṣṭam āsyam utaivādya purukṛt sāsy ukthyaḥ ||
2.013.09a śataṁ vā yasya daśa sākam ādya ekasya śruṣṭau yad dha codam āvitha |
2.013.09c arajjau dasyūn sam unab dabhītaye suprāvyo abhavaḥ sāsy ukthyaḥ ||
2.013.10a viśved anu rodhanā asya pauṁsyaṁ dadur asmai dadhire kṛtnave dhanam |
2.013.10c ṣaḻ astabhnā viṣṭiraḥ pañca saṁdṛśaḥ pari paro abhavaḥ sāsy ukthyaḥ ||
2.013.11a supravācanaṁ tava vīra vīryaṁ yad ekena kratunā vindase vasu |
2.013.11c jātūṣṭhirasya pra vayaḥ sahasvato yā cakartha sendra viśvāsy ukthyaḥ ||
2.013.12a aramayaḥ sarapasas tarāya kaṁ turvītaye ca vayyāya ca srutim |
2.013.12c nīcā santam ud anayaḥ parāvṛjam prāndhaṁ śroṇaṁ śravayan sāsy ukthyaḥ ||
2.013.13a asmabhyaṁ tad vaso dānāya rādhaḥ sam arthayasva bahu te vasavyam |
2.013.13c indra yac citraṁ śravasyā anu dyūn bṛhad vadema vidathe suvīrāḥ ||

2.014.01a adhvaryavo bharatendrāya somam āmatrebhiḥ siñcatā madyam andhaḥ |
2.014.01c kāmī hi vīraḥ sadam asya pītiṁ juhota vṛṣṇe tad id eṣa vaṣṭi ||
2.014.02a adhvaryavo yo apo vavrivāṁsaṁ vṛtraṁ jaghānāśanyeva vṛkṣam |
2.014.02c tasmā etam bharata tadvaśāyam̐ eṣa indro arhati pītim asya ||
2.014.03a adhvaryavo yo dṛbhīkaṁ jaghāna yo gā udājad apa hi valaṁ vaḥ |
2.014.03c tasmā etam antarikṣe na vātam indraṁ somair orṇuta jūr na vastraiḥ ||
2.014.04a adhvaryavo ya uraṇaṁ jaghāna nava cakhvāṁsaṁ navatiṁ ca bāhūn |
2.014.04c yo arbudam ava nīcā babādhe tam indraṁ somasya bhṛthe hinota ||
2.014.05a adhvaryavo yaḥ sv aśnaṁ jaghāna yaḥ śuṣṇam aśuṣaṁ yo vyaṁsam |
2.014.05c yaḥ pipruṁ namuciṁ yo rudhikrāṁ tasmā indrāyāndhaso juhota ||
2.014.06a adhvaryavo yaḥ śataṁ śambarasya puro bibhedāśmaneva pūrvīḥ |
2.014.06c yo varcinaḥ śatam indraḥ sahasram apāvapad bharatā somam asmai ||
2.014.07a adhvaryavo yaḥ śatam ā sahasram bhūmyā upasthe 'vapaj jaghanvān |
2.014.07c kutsasyāyor atithigvasya vīrān ny āvṛṇag bharatā somam asmai ||
2.014.08a adhvaryavo yan naraḥ kāmayādhve śruṣṭī vahanto naśathā tad indre |
2.014.08c gabhastipūtam bharata śrutāyendrāya somaṁ yajyavo juhota ||
2.014.09a adhvaryavaḥ kartanā śruṣṭim asmai vane nipūtaṁ vana un nayadhvam |
2.014.09c juṣāṇo hastyam abhi vāvaśe va indrāya somam madiraṁ juhota ||
2.014.10a adhvaryavaḥ payasodhar yathā goḥ somebhir īm pṛṇatā bhojam indram |
2.014.10c vedāham asya nibhṛtam ma etad ditsantam bhūyo yajataś ciketa ||
2.014.11a adhvaryavo yo divyasya vasvo yaḥ pārthivasya kṣamyasya rājā |
2.014.11c tam ūrdaraṁ na pṛṇatā yavenendraṁ somebhis tad apo vo astu ||
2.014.12a asmabhyaṁ tad vaso dānāya rādhaḥ sam arthayasva bahu te vasavyam |
2.014.12c indra yac citraṁ śravasyā anu dyūn bṛhad vadema vidathe suvīrāḥ ||

2.015.01a pra ghā nv asya mahato mahāni satyā satyasya karaṇāni vocam |
2.015.01c trikadrukeṣv apibat sutasyāsya made ahim indro jaghāna ||
2.015.02a avaṁśe dyām astabhāyad bṛhantam ā rodasī apṛṇad antarikṣam |
2.015.02c sa dhārayat pṛthivīm paprathac ca somasya tā mada indraś cakāra ||
2.015.03a sadmeva prāco vi mimāya mānair vajreṇa khāny atṛṇan nadīnām |
2.015.03c vṛthāsṛjat pathibhir dīrghayāthaiḥ somasya tā mada indraś cakāra ||
2.015.04a sa pravoḻhṝn parigatyā dabhīter viśvam adhāg āyudham iddhe agnau |
2.015.04c saṁ gobhir aśvair asṛjad rathebhiḥ somasya tā mada indraś cakāra ||
2.015.05a sa īm mahīṁ dhunim etor aramṇāt so asnātṝn apārayat svasti |
2.015.05c ta utsnāya rayim abhi pra tasthuḥ somasya tā mada indraś cakāra ||
2.015.06a sodañcaṁ sindhum ariṇān mahitvā vajreṇāna uṣasaḥ sam pipeṣa |
2.015.06c ajavaso javinībhir vivṛścan somasya tā mada indraś cakāra ||
2.015.07a sa vidvām̐ apagohaṁ kanīnām āvir bhavann ud atiṣṭhat parāvṛk |
2.015.07c prati śroṇaḥ sthād vy anag acaṣṭa somasya tā mada indraś cakāra ||
2.015.08a bhinad valam aṅgirobhir gṛṇāno vi parvatasya dṛṁhitāny airat |
2.015.08c riṇag rodhāṁsi kṛtrimāṇy eṣāṁ somasya tā mada indraś cakāra ||
2.015.09a svapnenābhyupyā cumuriṁ dhuniṁ ca jaghantha dasyum pra dabhītim āvaḥ |
2.015.09c rambhī cid atra vivide hiraṇyaṁ somasya tā mada indraś cakāra ||
2.015.10a nūnaṁ sā te prati varaṁ jaritre duhīyad indra dakṣiṇā maghonī |
2.015.10c śikṣā stotṛbhyo māti dhag bhago no bṛhad vadema vidathe suvīrāḥ ||

2.016.01a pra vaḥ satāṁ jyeṣṭhatamāya suṣṭutim agnāv iva samidhāne havir bhare |
2.016.01c indram ajuryaṁ jarayantam ukṣitaṁ sanād yuvānam avase havāmahe ||
2.016.02a yasmād indrād bṛhataḥ kiṁ canem ṛte viśvāny asmin sambhṛtādhi vīryā |
2.016.02c jaṭhare somaṁ tanvī saho maho haste vajram bharati śīrṣaṇi kratum ||
2.016.03a na kṣoṇībhyām paribhve ta indriyaṁ na samudraiḥ parvatair indra te rathaḥ |
2.016.03c na te vajram anv aśnoti kaś cana yad āśubhiḥ patasi yojanā puru ||
2.016.04a viśve hy asmai yajatāya dhṛṣṇave kratum bharanti vṛṣabhāya saścate |
2.016.04c vṛṣā yajasva haviṣā viduṣṭaraḥ pibendra somaṁ vṛṣabheṇa bhānunā ||
2.016.05a vṛṣṇaḥ kośaḥ pavate madhva ūrmir vṛṣabhānnāya vṛṣabhāya pātave |
2.016.05c vṛṣaṇādhvaryū vṛṣabhāso adrayo vṛṣaṇaṁ somaṁ vṛṣabhāya suṣvati ||
2.016.06a vṛṣā te vajra uta te vṛṣā ratho vṛṣaṇā harī vṛṣabhāṇy āyudhā |
2.016.06c vṛṣṇo madasya vṛṣabha tvam īśiṣa indra somasya vṛṣabhasya tṛpṇuhi ||
2.016.07a pra te nāvaṁ na samane vacasyuvam brahmaṇā yāmi savaneṣu dādhṛṣiḥ |
2.016.07c kuvin no asya vacaso nibodhiṣad indram utsaṁ na vasunaḥ sicāmahe ||
2.016.08a purā sambādhād abhy ā vavṛtsva no dhenur na vatsaṁ yavasasya pipyuṣī |
2.016.08c sakṛt su te sumatibhiḥ śatakrato sam patnībhir na vṛṣaṇo nasīmahi ||
2.016.09a nūnaṁ sā te prati varaṁ jaritre duhīyad indra dakṣiṇā maghonī |
2.016.09c śikṣā stotṛbhyo māti dhag bhago no bṛhad vadema vidathe suvīrāḥ ||

2.017.01a tad asmai navyam aṅgirasvad arcata śuṣmā yad asya pratnathodīrate |
2.017.01c viśvā yad gotrā sahasā parīvṛtā made somasya dṛṁhitāny airayat ||
2.017.02a sa bhūtu yo ha prathamāya dhāyasa ojo mimāno mahimānam ātirat |
2.017.02c śūro yo yutsu tanvam parivyata śīrṣaṇi dyām mahinā praty amuñcata ||
2.017.03a adhākṛṇoḥ prathamaṁ vīryam mahad yad asyāgre brahmaṇā śuṣmam airayaḥ |
2.017.03c ratheṣṭhena haryaśvena vicyutāḥ pra jīrayaḥ sisrate sadhryak pṛthak ||
2.017.04a adhā yo viśvā bhuvanābhi majmaneśānakṛt pravayā abhy avardhata |
2.017.04c ād rodasī jyotiṣā vahnir ātanot sīvyan tamāṁsi dudhitā sam avyayat ||
2.017.05a sa prācīnān parvatān dṛṁhad ojasādharācīnam akṛṇod apām apaḥ |
2.017.05c adhārayat pṛthivīṁ viśvadhāyasam astabhnān māyayā dyām avasrasaḥ ||
2.017.06a sāsmā aram bāhubhyāṁ yam pitākṛṇod viśvasmād ā januṣo vedasas pari |
2.017.06c yenā pṛthivyāṁ ni kriviṁ śayadhyai vajreṇa hatvy avṛṇak tuviṣvaṇiḥ ||
2.017.07a amājūr iva pitroḥ sacā satī samānād ā sadasas tvām iye bhagam |
2.017.07c kṛdhi praketam upa māsy ā bhara daddhi bhāgaṁ tanvo yena māmahaḥ ||
2.017.08a bhojaṁ tvām indra vayaṁ huvema dadiṣ ṭvam indrāpāṁsi vājān |
2.017.08c aviḍḍhīndra citrayā na ūtī kṛdhi vṛṣann indra vasyaso naḥ ||
2.017.09a nūnaṁ sā te prati varaṁ jaritre duhīyad indra dakṣiṇā maghonī |
2.017.09c śikṣā stotṛbhyo māti dhag bhago no bṛhad vadema vidathe suvīrāḥ ||

2.018.01a prātā ratho navo yoji sasniś caturyugas trikaśaḥ saptaraśmiḥ |
2.018.01c daśāritro manuṣyaḥ svarṣāḥ sa iṣṭibhir matibhī raṁhyo bhūt ||
2.018.02a sāsmā aram prathamaṁ sa dvitīyam uto tṛtīyam manuṣaḥ sa hotā |
2.018.02c anyasyā garbham anya ū jananta so anyebhiḥ sacate jenyo vṛṣā ||
2.018.03a harī nu kaṁ ratha indrasya yojam āyai sūktena vacasā navena |
2.018.03c mo ṣu tvām atra bahavo hi viprā ni rīraman yajamānāso anye ||
2.018.04a ā dvābhyāṁ haribhyām indra yāhy ā caturbhir ā ṣaḍbhir hūyamānaḥ |
2.018.04c āṣṭābhir daśabhiḥ somapeyam ayaṁ sutaḥ sumakha mā mṛdhas kaḥ ||
2.018.05a ā viṁśatyā triṁśatā yāhy arvāṅ ā catvāriṁśatā haribhir yujānaḥ |
2.018.05c ā pañcāśatā surathebhir indrā ṣaṣṭyā saptatyā somapeyam ||
2.018.06a āśītyā navatyā yāhy arvāṅ ā śatena haribhir uhyamānaḥ |
2.018.06c ayaṁ hi te śunahotreṣu soma indra tvāyā pariṣikto madāya ||
2.018.07a mama brahmendra yāhy acchā viśvā harī dhuri dhiṣvā rathasya |
2.018.07c purutrā hi vihavyo babhūthāsmiñ chūra savane mādayasva ||
2.018.08a na ma indreṇa sakhyaṁ vi yoṣad asmabhyam asya dakṣiṇā duhīta |
2.018.08c upa jyeṣṭhe varūthe gabhastau prāye-prāye jigīvāṁsaḥ syāma ||
2.018.09a nūnaṁ sā te prati varaṁ jaritre duhīyad indra dakṣiṇā maghonī |
2.018.09c śikṣā stotṛbhyo māti dhag bhago no bṛhad vadema vidathe suvīrāḥ ||

2.019.01a apāyy asyāndhaso madāya manīṣiṇaḥ suvānasya prayasaḥ |
2.019.01c yasminn indraḥ pradivi vāvṛdhāna oko dadhe brahmaṇyantaś ca naraḥ ||
2.019.02a asya mandāno madhvo vajrahasto 'him indro arṇovṛtaṁ vi vṛścat |
2.019.02c pra yad vayo na svasarāṇy acchā prayāṁsi ca nadīnāṁ cakramanta ||
2.019.03a sa māhina indro arṇo apām prairayad ahihācchā samudram |
2.019.03c ajanayat sūryaṁ vidad gā aktunāhnāṁ vayunāni sādhat ||
2.019.04a so apratīni manave purūṇīndro dāśad dāśuṣe hanti vṛtram |
2.019.04c sadyo yo nṛbhyo atasāyyo bhūt paspṛdhānebhyaḥ sūryasya sātau ||
2.019.05a sa sunvata indraḥ sūryam ā devo riṇaṅ martyāya stavān |
2.019.05c ā yad rayiṁ guhadavadyam asmai bharad aṁśaṁ naitaśo daśasyan ||
2.019.06a sa randhayat sadivaḥ sārathaye śuṣṇam aśuṣaṁ kuyavaṁ kutsāya |
2.019.06c divodāsāya navatiṁ ca navendraḥ puro vy airac chambarasya ||
2.019.07a evā ta indrocatham ahema śravasyā na tmanā vājayantaḥ |
2.019.07c aśyāma tat sāptam āśuṣāṇā nanamo vadhar adevasya pīyoḥ ||
2.019.08a evā te gṛtsamadāḥ śūra manmāvasyavo na vayunāni takṣuḥ |
2.019.08c brahmaṇyanta indra te navīya iṣam ūrjaṁ sukṣitiṁ sumnam aśyuḥ ||
2.019.09a nūnaṁ sā te prati varaṁ jaritre duhīyad indra dakṣiṇā maghonī |
2.019.09c śikṣā stotṛbhyo māti dhag bhago no bṛhad vadema vidathe suvīrāḥ ||

2.020.01a vayaṁ te vaya indra viddhi ṣu ṇaḥ pra bharāmahe vājayur na ratham |
2.020.01c vipanyavo dīdhyato manīṣā sumnam iyakṣantas tvāvato nṝn ||
2.020.02a tvaṁ na indra tvābhir ūtī tvāyato abhiṣṭipāsi janān |
2.020.02c tvam ino dāśuṣo varūtetthādhīr abhi yo nakṣati tvā ||
2.020.03a sa no yuvendro johūtraḥ sakhā śivo narām astu pātā |
2.020.03c yaḥ śaṁsantaṁ yaḥ śaśamānam ūtī pacantaṁ ca stuvantaṁ ca praṇeṣat ||
2.020.04a tam u stuṣa indraṁ taṁ gṛṇīṣe yasmin purā vāvṛdhuḥ śāśaduś ca |
2.020.04c sa vasvaḥ kāmam pīparad iyāno brahmaṇyato nūtanasyāyoḥ ||
2.020.05a so aṅgirasām ucathā jujuṣvān brahmā tūtod indro gātum iṣṇan |
2.020.05c muṣṇann uṣasaḥ sūryeṇa stavān aśnasya cic chiśnathat pūrvyāṇi ||
2.020.06a sa ha śruta indro nāma deva ūrdhvo bhuvan manuṣe dasmatamaḥ |
2.020.06c ava priyam arśasānasya sāhvāñ chiro bharad dāsasya svadhāvān ||
2.020.07a sa vṛtrahendraḥ kṛṣṇayonīḥ puraṁdaro dāsīr airayad vi |
2.020.07c ajanayan manave kṣām apaś ca satrā śaṁsaṁ yajamānasya tūtot ||
2.020.08a tasmai tavasyam anu dāyi satrendrāya devebhir arṇasātau |
2.020.08c prati yad asya vajram bāhvor dhur hatvī dasyūn pura āyasīr ni tārīt ||
2.020.09a nūnaṁ sā te prati varaṁ jaritre duhīyad indra dakṣiṇā maghonī |
2.020.09c śikṣā stotṛbhyo māti dhag bhago no bṛhad vadema vidathe suvīrāḥ ||

2.021.01a viśvajite dhanajite svarjite satrājite nṛjita urvarājite |
2.021.01c aśvajite gojite abjite bharendrāya somaṁ yajatāya haryatam ||
2.021.02a abhibhuve 'bhibhaṅgāya vanvate 'ṣāḻhāya sahamānāya vedhase |
2.021.02c tuvigraye vahnaye duṣṭarītave satrāsāhe nama indrāya vocata ||
2.021.03a satrāsāho janabhakṣo janaṁsahaś cyavano yudhmo anu joṣam ukṣitaḥ |
2.021.03c vṛtaṁcayaḥ sahurir vikṣv ārita indrasya vocam pra kṛtāni vīryā ||
2.021.04a anānudo vṛṣabho dodhato vadho gambhīra ṛṣvo asamaṣṭakāvyaḥ |
2.021.04c radhracodaḥ śnathano vīḻitas pṛthur indraḥ suyajña uṣasaḥ svar janat ||
2.021.05a yajñena gātum apturo vividrire dhiyo hinvānā uśijo manīṣiṇaḥ |
2.021.05c abhisvarā niṣadā gā avasyava indre hinvānā draviṇāny āśata ||
2.021.06a indra śreṣṭhāni draviṇāni dhehi cittiṁ dakṣasya subhagatvam asme |
2.021.06c poṣaṁ rayīṇām ariṣṭiṁ tanūnāṁ svādmānaṁ vācaḥ sudinatvam ahnām ||

2.022.01a trikadrukeṣu mahiṣo yavāśiraṁ tuviśuṣmas tṛpat somam apibad viṣṇunā sutaṁ yathāvaśat |
2.022.01e sa īm mamāda mahi karma kartave mahām uruṁ sainaṁ saścad devo devaṁ satyam indraṁ satya induḥ ||
2.022.02a adha tviṣīmām̐ abhy ojasā kriviṁ yudhābhavad ā rodasī apṛṇad asya majmanā pra vāvṛdhe |
2.022.02e adhattānyaṁ jaṭhare prem aricyata sainaṁ saścad devo devaṁ satyam indraṁ satya induḥ ||
2.022.03a sākaṁ jātaḥ kratunā sākam ojasā vavakṣitha sākaṁ vṛddho vīryaiḥ sāsahir mṛdho vicarṣaṇiḥ |
2.022.03e dātā rādhaḥ stuvate kāmyaṁ vasu sainaṁ saścad devo devaṁ satyam indraṁ satya induḥ ||
2.022.04a tava tyan naryaṁ nṛto 'pa indra prathamam pūrvyaṁ divi pravācyaṁ kṛtam |
2.022.04c yad devasya śavasā prāriṇā asuṁ riṇann apaḥ |
2.022.04e bhuvad viśvam abhy ādevam ojasā vidād ūrjaṁ śatakratur vidād iṣam ||

2.023.01a gaṇānāṁ tvā gaṇapatiṁ havāmahe kaviṁ kavīnām upamaśravastamam |
2.023.01c jyeṣṭharājam brahmaṇām brahmaṇas pata ā naḥ śṛṇvann ūtibhiḥ sīda sādanam ||
2.023.02a devāś cit te asurya pracetaso bṛhaspate yajñiyam bhāgam ānaśuḥ |
2.023.02c usrā iva sūryo jyotiṣā maho viśveṣām ij janitā brahmaṇām asi ||
2.023.03a ā vibādhyā parirāpas tamāṁsi ca jyotiṣmantaṁ ratham ṛtasya tiṣṭhasi |
2.023.03c bṛhaspate bhīmam amitradambhanaṁ rakṣohaṇaṁ gotrabhidaṁ svarvidam ||
2.023.04a sunītibhir nayasi trāyase janaṁ yas tubhyaṁ dāśān na tam aṁho aśnavat |
2.023.04c brahmadviṣas tapano manyumīr asi bṛhaspate mahi tat te mahitvanam ||
2.023.05a na tam aṁho na duritaṁ kutaś cana nārātayas titirur na dvayāvinaḥ |
2.023.05c viśvā id asmād dhvaraso vi bādhase yaṁ sugopā rakṣasi brahmaṇas pate ||
2.023.06a tvaṁ no gopāḥ pathikṛd vicakṣaṇas tava vratāya matibhir jarāmahe |
2.023.06c bṛhaspate yo no abhi hvaro dadhe svā tam marmartu ducchunā harasvatī ||
2.023.07a uta vā yo no marcayād anāgaso 'rātīvā martaḥ sānuko vṛkaḥ |
2.023.07c bṛhaspate apa taṁ vartayā pathaḥ sugaṁ no asyai devavītaye kṛdhi ||
2.023.08a trātāraṁ tvā tanūnāṁ havāmahe 'vaspartar adhivaktāram asmayum |
2.023.08c bṛhaspate devanido ni barhaya mā durevā uttaraṁ sumnam un naśan ||
2.023.09a tvayā vayaṁ suvṛdhā brahmaṇas pate spārhā vasu manuṣyā dadīmahi |
2.023.09c yā no dūre taḻito yā arātayo 'bhi santi jambhayā tā anapnasaḥ ||
2.023.10a tvayā vayam uttamaṁ dhīmahe vayo bṛhaspate papriṇā sasninā yujā |
2.023.10c mā no duḥśaṁso abhidipsur īśata pra suśaṁsā matibhis tāriṣīmahi ||
2.023.11a anānudo vṛṣabho jagmir āhavaṁ niṣṭaptā śatrum pṛtanāsu sāsahiḥ |
2.023.11c asi satya ṛṇayā brahmaṇas pata ugrasya cid damitā vīḻuharṣiṇaḥ ||
2.023.12a adevena manasā yo riṣaṇyati śāsām ugro manyamāno jighāṁsati |
2.023.12c bṛhaspate mā praṇak tasya no vadho ni karma manyuṁ durevasya śardhataḥ ||
2.023.13a bhareṣu havyo namasopasadyo gantā vājeṣu sanitā dhanaṁ-dhanam |
2.023.13c viśvā id aryo abhidipsvo mṛdho bṛhaspatir vi vavarhā rathām̐ iva ||
2.023.14a tejiṣṭhayā tapanī rakṣasas tapa ye tvā nide dadhire dṛṣṭavīryam |
2.023.14c āvis tat kṛṣva yad asat ta ukthyam bṛhaspate vi parirāpo ardaya ||
2.023.15a bṛhaspate ati yad aryo arhād dyumad vibhāti kratumaj janeṣu |
2.023.15c yad dīdayac chavasa ṛtaprajāta tad asmāsu draviṇaṁ dhehi citram ||
2.023.16a mā naḥ stenebhyo ye abhi druhas pade nirāmiṇo ripavo 'nneṣu jāgṛdhuḥ |
2.023.16c ā devānām ohate vi vrayo hṛdi bṛhaspate na paraḥ sāmno viduḥ ||
2.023.17a viśvebhyo hi tvā bhuvanebhyas pari tvaṣṭājanat sāmnaḥ-sāmnaḥ kaviḥ |
2.023.17c sa ṛṇacid ṛṇayā brahmaṇas patir druho hantā maha ṛtasya dhartari ||
2.023.18a tava śriye vy ajihīta parvato gavāṁ gotram udasṛjo yad aṅgiraḥ |
2.023.18c indreṇa yujā tamasā parīvṛtam bṛhaspate nir apām aubjo arṇavam ||
2.023.19a brahmaṇas pate tvam asya yantā sūktasya bodhi tanayaṁ ca jinva |
2.023.19c viśvaṁ tad bhadraṁ yad avanti devā bṛhad vadema vidathe suvīrāḥ ||

2.024.01a semām aviḍḍhi prabhṛtiṁ ya īśiṣe 'yā vidhema navayā mahā girā |
2.024.01c yathā no mīḍhvān stavate sakhā tava bṛhaspate sīṣadhaḥ sota no matim ||
2.024.02a yo nantvāny anaman ny ojasotādardar manyunā śambarāṇi vi |
2.024.02c prācyāvayad acyutā brahmaṇas patir ā cāviśad vasumantaṁ vi parvatam ||
2.024.03a tad devānāṁ devatamāya kartvam aśrathnan dṛḻhāvradanta vīḻitā |
2.024.03c ud gā ājad abhinad brahmaṇā valam agūhat tamo vy acakṣayat svaḥ ||
2.024.04a aśmāsyam avatam brahmaṇas patir madhudhāram abhi yam ojasātṛṇat |
2.024.04c tam eva viśve papire svardṛśo bahu sākaṁ sisicur utsam udriṇam ||
2.024.05a sanā tā kā cid bhuvanā bhavītvā mādbhiḥ śaradbhir duro varanta vaḥ |
2.024.05c ayatantā carato anyad-anyad id yā cakāra vayunā brahmaṇas patiḥ ||
2.024.06a abhinakṣanto abhi ye tam ānaśur nidhim paṇīnām paramaṁ guhā hitam |
2.024.06c te vidvāṁsaḥ praticakṣyānṛtā punar yata u āyan tad ud īyur āviśam ||
2.024.07a ṛtāvānaḥ praticakṣyānṛtā punar āta ā tasthuḥ kavayo mahas pathaḥ |
2.024.07c te bāhubhyāṁ dhamitam agnim aśmani nakiḥ ṣo asty araṇo jahur hi tam ||
2.024.08a ṛtajyena kṣipreṇa brahmaṇas patir yatra vaṣṭi pra tad aśnoti dhanvanā |
2.024.08c tasya sādhvīr iṣavo yābhir asyati nṛcakṣaso dṛśaye karṇayonayaḥ ||
2.024.09a sa saṁnayaḥ sa vinayaḥ purohitaḥ sa suṣṭutaḥ sa yudhi brahmaṇas patiḥ |
2.024.09c cākṣmo yad vājam bharate matī dhanād it sūryas tapati tapyatur vṛthā ||
2.024.10a vibhu prabhu prathamam mehanāvato bṛhaspateḥ suvidatrāṇi rādhyā |
2.024.10c imā sātāni venyasya vājino yena janā ubhaye bhuñjate viśaḥ ||
2.024.11a yo 'vare vṛjane viśvathā vibhur mahām u raṇvaḥ śavasā vavakṣitha |
2.024.11c sa devo devān prati paprathe pṛthu viśved u tā paribhūr brahmaṇas patiḥ ||
2.024.12a viśvaṁ satyam maghavānā yuvor id āpaś cana pra minanti vrataṁ vām |
2.024.12c acchendrābrahmaṇaspatī havir no 'nnaṁ yujeva vājinā jigātam ||
2.024.13a utāśiṣṭhā anu śṛṇvanti vahnayaḥ sabheyo vipro bharate matī dhanā |
2.024.13c vīḻudveṣā anu vaśa ṛṇam ādadiḥ sa ha vājī samithe brahmaṇas patiḥ ||
2.024.14a brahmaṇas pater abhavad yathāvaśaṁ satyo manyur mahi karmā kariṣyataḥ |
2.024.14c yo gā udājat sa dive vi cābhajan mahīva rītiḥ śavasāsarat pṛthak ||
2.024.15a brahmaṇas pate suyamasya viśvahā rāyaḥ syāma rathyo vayasvataḥ |
2.024.15c vīreṣu vīrām̐ upa pṛṅdhi nas tvaṁ yad īśāno brahmaṇā veṣi me havam ||
2.024.16a brahmaṇas pate tvam asya yantā sūktasya bodhi tanayaṁ ca jinva |
2.024.16c viśvaṁ tad bhadraṁ yad avanti devā bṛhad vadema vidathe suvīrāḥ ||

2.025.01a indhāno agniṁ vanavad vanuṣyataḥ kṛtabrahmā śūśuvad rātahavya it |
2.025.01c jātena jātam ati sa pra sarsṛte yaṁ-yaṁ yujaṁ kṛṇute brahmaṇas patiḥ ||
2.025.02a vīrebhir vīrān vanavad vanuṣyato gobhī rayim paprathad bodhati tmanā |
2.025.02c tokaṁ ca tasya tanayaṁ ca vardhate yaṁ-yaṁ yujaṁ kṛṇute brahmaṇas patiḥ ||
2.025.03a sindhur na kṣodaḥ śimīvām̐ ṛghāyato vṛṣeva vadhrīm̐r abhi vaṣṭy ojasā |
2.025.03c agner iva prasitir nāha vartave yaṁ-yaṁ yujaṁ kṛṇute brahmaṇas patiḥ ||
2.025.04a tasmā arṣanti divyā asaścataḥ sa satvabhiḥ prathamo goṣu gacchati |
2.025.04c anibhṛṣṭataviṣir hanty ojasā yaṁ-yaṁ yujaṁ kṛṇute brahmaṇas patiḥ ||
2.025.05a tasmā id viśve dhunayanta sindhavo 'cchidrā śarma dadhire purūṇi |
2.025.05c devānāṁ sumne subhagaḥ sa edhate yaṁ-yaṁ yujaṁ kṛṇute brahmaṇas patiḥ ||

2.026.01a ṛjur ic chaṁso vanavad vanuṣyato devayann id adevayantam abhy asat |
2.026.01c suprāvīr id vanavat pṛtsu duṣṭaraṁ yajved ayajyor vi bhajāti bhojanam ||
2.026.02a yajasva vīra pra vihi manāyato bhadram manaḥ kṛṇuṣva vṛtratūrye |
2.026.02c haviṣ kṛṇuṣva subhago yathāsasi brahmaṇas pater ava ā vṛṇīmahe ||
2.026.03a sa ij janena sa viśā sa janmanā sa putrair vājam bharate dhanā nṛbhiḥ |
2.026.03c devānāṁ yaḥ pitaram āvivāsati śraddhāmanā haviṣā brahmaṇas patim ||
2.026.04a yo asmai havyair ghṛtavadbhir avidhat pra tam prācā nayati brahmaṇas patiḥ |
2.026.04c uruṣyatīm aṁhaso rakṣatī riṣo 'ṁhoś cid asmā urucakrir adbhutaḥ ||

2.027.01a imā gira ādityebhyo ghṛtasnūḥ sanād rājabhyo juhvā juhomi |
2.027.01c śṛṇotu mitro aryamā bhago nas tuvijāto varuṇo dakṣo aṁśaḥ ||
2.027.02a imaṁ stomaṁ sakratavo me adya mitro aryamā varuṇo juṣanta |
2.027.02c ādityāsaḥ śucayo dhārapūtā avṛjinā anavadyā ariṣṭāḥ ||
2.027.03a ta ādityāsa uravo gabhīrā adabdhāso dipsanto bhūryakṣāḥ |
2.027.03c antaḥ paśyanti vṛjinota sādhu sarvaṁ rājabhyaḥ paramā cid anti ||
2.027.04a dhārayanta ādityāso jagat sthā devā viśvasya bhuvanasya gopāḥ |
2.027.04c dīrghādhiyo rakṣamāṇā asuryam ṛtāvānaś cayamānā ṛṇāni ||
2.027.05a vidyām ādityā avaso vo asya yad aryaman bhaya ā cin mayobhu |
2.027.05c yuṣmākam mitrāvaruṇā praṇītau pari śvabhreva duritāni vṛjyām ||
2.027.06a sugo hi vo aryaman mitra panthā anṛkṣaro varuṇa sādhur asti |
2.027.06c tenādityā adhi vocatā no yacchatā no duṣparihantu śarma ||
2.027.07a pipartu no aditī rājaputrāti dveṣāṁsy aryamā sugebhiḥ |
2.027.07c bṛhan mitrasya varuṇasya śarmopa syāma puruvīrā ariṣṭāḥ ||
2.027.08a tisro bhūmīr dhārayan trīm̐r uta dyūn trīṇi vratā vidathe antar eṣām |
2.027.08c ṛtenādityā mahi vo mahitvaṁ tad aryaman varuṇa mitra cāru ||
2.027.09a trī rocanā divyā dhārayanta hiraṇyayāḥ śucayo dhārapūtāḥ |
2.027.09c asvapnajo animiṣā adabdhā uruśaṁsā ṛjave martyāya ||
2.027.10a tvaṁ viśveṣāṁ varuṇāsi rājā ye ca devā asura ye ca martāḥ |
2.027.10c śataṁ no rāsva śarado vicakṣe 'śyāmāyūṁṣi sudhitāni pūrvā ||
2.027.11a na dakṣiṇā vi cikite na savyā na prācīnam ādityā nota paścā |
2.027.11c pākyā cid vasavo dhīryā cid yuṣmānīto abhayaṁ jyotir aśyām ||
2.027.12a yo rājabhya ṛtanibhyo dadāśa yaṁ vardhayanti puṣṭayaś ca nityāḥ |
2.027.12c sa revān yāti prathamo rathena vasudāvā vidatheṣu praśastaḥ ||
2.027.13a śucir apaḥ sūyavasā adabdha upa kṣeti vṛddhavayāḥ suvīraḥ |
2.027.13c nakiṣ ṭaṁ ghnanty antito na dūrād ya ādityānām bhavati praṇītau ||
2.027.14a adite mitra varuṇota mṛḻa yad vo vayaṁ cakṛmā kac cid āgaḥ |
2.027.14c urv aśyām abhayaṁ jyotir indra mā no dīrghā abhi naśan tamisrāḥ ||
2.027.15a ubhe asmai pīpayataḥ samīcī divo vṛṣṭiṁ subhago nāma puṣyan |
2.027.15c ubhā kṣayāv ājayan yāti pṛtsūbhāv ardhau bhavataḥ sādhū asmai ||
2.027.16a yā vo māyā abhidruhe yajatrāḥ pāśā ādityā ripave vicṛttāḥ |
2.027.16c aśvīva tām̐ ati yeṣaṁ rathenāriṣṭā urāv ā śarman syāma ||
2.027.17a māham maghono varuṇa priyasya bhūridāvna ā vidaṁ śūnam āpeḥ |
2.027.17c mā rāyo rājan suyamād ava sthām bṛhad vadema vidathe suvīrāḥ ||

2.028.01a idaṁ kaver ādityasya svarājo viśvāni sānty abhy astu mahnā |
2.028.01c ati yo mandro yajathāya devaḥ sukīrtim bhikṣe varuṇasya bhūreḥ ||
2.028.02a tava vrate subhagāsaḥ syāma svādhyo varuṇa tuṣṭuvāṁsaḥ |
2.028.02c upāyana uṣasāṁ gomatīnām agnayo na jaramāṇā anu dyūn ||
2.028.03a tava syāma puruvīrasya śarmann uruśaṁsasya varuṇa praṇetaḥ |
2.028.03c yūyaṁ naḥ putrā aditer adabdhā abhi kṣamadhvaṁ yujyāya devāḥ ||
2.028.04a pra sīm ādityo asṛjad vidhartām̐ ṛtaṁ sindhavo varuṇasya yanti |
2.028.04c na śrāmyanti na vi mucanty ete vayo na paptū raghuyā parijman ||
2.028.05a vi mac chrathāya raśanām ivāga ṛdhyāma te varuṇa khām ṛtasya |
2.028.05c mā tantuś chedi vayato dhiyam me mā mātrā śāry apasaḥ pura ṛtoḥ ||
2.028.06a apo su myakṣa varuṇa bhiyasam mat samrāḻ ṛtāvo 'nu mā gṛbhāya |
2.028.06c dāmeva vatsād vi mumugdhy aṁho nahi tvad āre nimiṣaś caneśe ||
2.028.07a mā no vadhair varuṇa ye ta iṣṭāv enaḥ kṛṇvantam asura bhrīṇanti |
2.028.07c mā jyotiṣaḥ pravasathāni ganma vi ṣū mṛdhaḥ śiśratho jīvase naḥ ||
2.028.08a namaḥ purā te varuṇota nūnam utāparaṁ tuvijāta bravāma |
2.028.08c tve hi kam parvate na śritāny apracyutāni dūḻabha vratāni ||
2.028.09a para ṛṇā sāvīr adha matkṛtāni māhaṁ rājann anyakṛtena bhojam |
2.028.09c avyuṣṭā in nu bhūyasīr uṣāsa ā no jīvān varuṇa tāsu śādhi ||
2.028.10a yo me rājan yujyo vā sakhā vā svapne bhayam bhīrave mahyam āha |
2.028.10c steno vā yo dipsati no vṛko vā tvaṁ tasmād varuṇa pāhy asmān ||
2.028.11a māham maghono varuṇa priyasya bhūridāvna ā vidaṁ śūnam āpeḥ |
2.028.11c mā rāyo rājan suyamād ava sthām bṛhad vadema vidathe suvīrāḥ ||

2.029.01a dhṛtavratā ādityā iṣirā āre mat karta rahasūr ivāgaḥ |
2.029.01c śṛṇvato vo varuṇa mitra devā bhadrasya vidvām̐ avase huve vaḥ ||
2.029.02a yūyaṁ devāḥ pramatir yūyam ojo yūyaṁ dveṣāṁsi sanutar yuyota |
2.029.02c abhikṣattāro abhi ca kṣamadhvam adyā ca no mṛḻayatāparaṁ ca ||
2.029.03a kim ū nu vaḥ kṛṇavāmāpareṇa kiṁ sanena vasava āpyena |
2.029.03c yūyaṁ no mitrāvaruṇādite ca svastim indrāmaruto dadhāta ||
2.029.04a haye devā yūyam id āpayaḥ stha te mṛḻata nādhamānāya mahyam |
2.029.04c mā vo ratho madhyamavāḻ ṛte bhūn mā yuṣmāvatsv āpiṣu śramiṣma ||
2.029.05a pra va eko mimaya bhūry āgo yan mā piteva kitavaṁ śaśāsa |
2.029.05c āre pāśā āre aghāni devā mā mādhi putre vim iva grabhīṣṭa ||
2.029.06a arvāñco adyā bhavatā yajatrā ā vo hārdi bhayamāno vyayeyam |
2.029.06c trādhvaṁ no devā nijuro vṛkasya trādhvaṁ kartād avapado yajatrāḥ ||
2.029.07a māham maghono varuṇa priyasya bhūridāvna ā vidaṁ śūnam āpeḥ |
2.029.07c mā rāyo rājan suyamād ava sthām bṛhad vadema vidathe suvīrāḥ ||

2.030.01a ṛtaṁ devāya kṛṇvate savitra indrāyāhighne na ramanta āpaḥ |
2.030.01c ahar-ahar yāty aktur apāṁ kiyāty ā prathamaḥ sarga āsām ||
2.030.02a yo vṛtrāya sinam atrābhariṣyat pra taṁ janitrī viduṣa uvāca |
2.030.02c patho radantīr anu joṣam asmai dive-dive dhunayo yanty artham ||
2.030.03a ūrdhvo hy asthād adhy antarikṣe 'dhā vṛtrāya pra vadhaṁ jabhāra |
2.030.03c mihaṁ vasāna upa hīm adudrot tigmāyudho ajayac chatrum indraḥ ||
2.030.04a bṛhaspate tapuṣāśneva vidhya vṛkadvaraso asurasya vīrān |
2.030.04c yathā jaghantha dhṛṣatā purā cid evā jahi śatrum asmākam indra ||
2.030.05a ava kṣipa divo aśmānam uccā yena śatrum mandasāno nijūrvāḥ |
2.030.05c tokasya sātau tanayasya bhūrer asmām̐ ardhaṁ kṛṇutād indra gonām ||
2.030.06a pra hi kratuṁ vṛhatho yaṁ vanutho radhrasya stho yajamānasya codau |
2.030.06c indrāsomā yuvam asmām̐ aviṣṭam asmin bhayasthe kṛṇutam u lokam ||
2.030.07a na mā taman na śraman nota tandran na vocāma mā sunoteti somam |
2.030.07c yo me pṛṇād yo dadad yo nibodhād yo mā sunvantam upa gobhir āyat ||
2.030.08a sarasvati tvam asmām̐ aviḍḍhi marutvatī dhṛṣatī jeṣi śatrūn |
2.030.08c tyaṁ cic chardhantaṁ taviṣīyamāṇam indro hanti vṛṣabhaṁ śaṇḍikānām ||
2.030.09a yo naḥ sanutya uta vā jighatnur abhikhyāya taṁ tigitena vidhya |
2.030.09c bṛhaspata āyudhair jeṣi śatrūn druhe rīṣantam pari dhehi rājan ||
2.030.10a asmākebhiḥ satvabhiḥ śūra śūrair vīryā kṛdhi yāni te kartvāni |
2.030.10c jyog abhūvann anudhūpitāso hatvī teṣām ā bharā no vasūni ||
2.030.11a taṁ vaḥ śardham mārutaṁ sumnayur giropa bruve namasā daivyaṁ janam |
2.030.11c yathā rayiṁ sarvavīraṁ naśāmahā apatyasācaṁ śrutyaṁ dive-dive ||

2.031.01a asmākam mitrāvaruṇāvataṁ ratham ādityai rudrair vasubhiḥ sacābhuvā |
2.031.01c pra yad vayo na paptan vasmanas pari śravasyavo hṛṣīvanto vanarṣadaḥ ||
2.031.02a adha smā na ud avatā sajoṣaso rathaṁ devāso abhi vikṣu vājayum |
2.031.02c yad āśavaḥ padyābhis titrato rajaḥ pṛthivyāḥ sānau jaṅghananta pāṇibhiḥ ||
2.031.03a uta sya na indro viśvacarṣaṇir divaḥ śardhena mārutena sukratuḥ |
2.031.03c anu nu sthāty avṛkābhir ūtibhī ratham mahe sanaye vājasātaye ||
2.031.04a uta sya devo bhuvanasya sakṣaṇis tvaṣṭā gnābhiḥ sajoṣā jūjuvad ratham |
2.031.04c iḻā bhago bṛhaddivota rodasī pūṣā puraṁdhir aśvināv adhā patī ||
2.031.05a uta tye devī subhage mithūdṛśoṣāsānaktā jagatām apījuvā |
2.031.05c stuṣe yad vām pṛthivi navyasā vacaḥ sthātuś ca vayas trivayā upastire ||
2.031.06a uta vaḥ śaṁsam uśijām iva śmasy ahir budhnyo 'ja ekapād uta |
2.031.06c trita ṛbhukṣāḥ savitā cano dadhe 'pāṁ napād āśuhemā dhiyā śami ||
2.031.07a etā vo vaśmy udyatā yajatrā atakṣann āyavo navyase sam |
2.031.07c śravasyavo vājaṁ cakānāḥ saptir na rathyo aha dhītim aśyāḥ ||

2.032.01a asya me dyāvāpṛthivī ṛtāyato bhūtam avitrī vacasaḥ siṣāsataḥ |
2.032.01c yayor āyuḥ prataraṁ te idam pura upastute vasūyur vām maho dadhe ||
2.032.02a mā no guhyā ripa āyor ahan dabhan mā na ābhyo rīradho ducchunābhyaḥ |
2.032.02c mā no vi yauḥ sakhyā viddhi tasya naḥ sumnāyatā manasā tat tvemahe ||
2.032.03a aheḻatā manasā śruṣṭim ā vaha duhānāṁ dhenum pipyuṣīm asaścatam |
2.032.03c padyābhir āśuṁ vacasā ca vājinaṁ tvāṁ hinomi puruhūta viśvahā ||
2.032.04a rākām ahaṁ suhavāṁ suṣṭutī huve śṛṇotu naḥ subhagā bodhatu tmanā |
2.032.04c sīvyatv apaḥ sūcyācchidyamānayā dadātu vīraṁ śatadāyam ukthyam ||
2.032.05a yās te rāke sumatayaḥ supeśaso yābhir dadāsi dāśuṣe vasūni |
2.032.05c tābhir no adya sumanā upāgahi sahasrapoṣaṁ subhage rarāṇā ||
2.032.06a sinīvāli pṛthuṣṭuke yā devānām asi svasā |
2.032.06c juṣasva havyam āhutam prajāṁ devi didiḍḍhi naḥ ||
2.032.07a yā subāhuḥ svaṅguriḥ suṣūmā bahusūvarī |
2.032.07c tasyai viśpatnyai haviḥ sinīvālyai juhotana ||
2.032.08a yā guṅgūr yā sinīvālī yā rākā yā sarasvatī |
2.032.08c indrāṇīm ahva ūtaye varuṇānīṁ svastaye ||

2.033.01a ā te pitar marutāṁ sumnam etu mā naḥ sūryasya saṁdṛśo yuyothāḥ |
2.033.01c abhi no vīro arvati kṣameta pra jāyemahi rudra prajābhiḥ ||
2.033.02a tvādattebhī rudra śaṁtamebhiḥ śataṁ himā aśīya bheṣajebhiḥ |
2.033.02c vy asmad dveṣo vitaraṁ vy aṁho vy amīvāś cātayasvā viṣūcīḥ ||
2.033.03a śreṣṭho jātasya rudra śriyāsi tavastamas tavasāṁ vajrabāho |
2.033.03c parṣi ṇaḥ pāram aṁhasaḥ svasti viśvā abhītī rapaso yuyodhi ||
2.033.04a mā tvā rudra cukrudhāmā namobhir mā duṣṭutī vṛṣabha mā sahūtī |
2.033.04c un no vīrām̐ arpaya bheṣajebhir bhiṣaktamaṁ tvā bhiṣajāṁ śṛṇomi ||
2.033.05a havīmabhir havate yo havirbhir ava stomebhī rudraṁ diṣīya |
2.033.05c ṛdūdaraḥ suhavo mā no asyai babhruḥ suśipro rīradhan manāyai ||
2.033.06a un mā mamanda vṛṣabho marutvān tvakṣīyasā vayasā nādhamānam |
2.033.06c ghṛṇīva cchāyām arapā aśīyā vivāseyaṁ rudrasya sumnam ||
2.033.07a kva sya te rudra mṛḻayākur hasto yo asti bheṣajo jalāṣaḥ |
2.033.07c apabhartā rapaso daivyasyābhī nu mā vṛṣabha cakṣamīthāḥ ||
2.033.08a pra babhrave vṛṣabhāya śvitīce maho mahīṁ suṣṭutim īrayāmi |
2.033.08c namasyā kalmalīkinaṁ namobhir gṛṇīmasi tveṣaṁ rudrasya nāma ||
2.033.09a sthirebhir aṅgaiḥ pururūpa ugro babhruḥ śukrebhiḥ pipiśe hiraṇyaiḥ |
2.033.09c īśānād asya bhuvanasya bhūrer na vā u yoṣad rudrād asuryam ||
2.033.10a arhan bibharṣi sāyakāni dhanvārhan niṣkaṁ yajataṁ viśvarūpam |
2.033.10c arhann idaṁ dayase viśvam abhvaṁ na vā ojīyo rudra tvad asti ||
2.033.11a stuhi śrutaṁ gartasadaṁ yuvānam mṛgaṁ na bhīmam upahatnum ugram |
2.033.11c mṛḻā jaritre rudra stavāno 'nyaṁ te asman ni vapantu senāḥ ||
2.033.12a kumāraś cit pitaraṁ vandamānam prati nānāma rudropayantam |
2.033.12c bhūrer dātāraṁ satpatiṁ gṛṇīṣe stutas tvam bheṣajā rāsy asme ||
2.033.13a yā vo bheṣajā marutaḥ śucīni yā śaṁtamā vṛṣaṇo yā mayobhu |
2.033.13c yāni manur avṛṇītā pitā nas tā śaṁ ca yoś ca rudrasya vaśmi ||
2.033.14a pari ṇo hetī rudrasya vṛjyāḥ pari tveṣasya durmatir mahī gāt |
2.033.14c ava sthirā maghavadbhyas tanuṣva mīḍhvas tokāya tanayāya mṛḻa ||
2.033.15a evā babhro vṛṣabha cekitāna yathā deva na hṛṇīṣe na haṁsi |
2.033.15c havanaśrun no rudreha bodhi bṛhad vadema vidathe suvīrāḥ ||

2.034.01a dhārāvarā maruto dhṛṣṇvojaso mṛgā na bhīmās taviṣībhir arcinaḥ |
2.034.01c agnayo na śuśucānā ṛjīṣiṇo bhṛmiṁ dhamanto apa gā avṛṇvata ||
2.034.02a dyāvo na stṛbhiś citayanta khādino vy abhriyā na dyutayanta vṛṣṭayaḥ |
2.034.02c rudro yad vo maruto rukmavakṣaso vṛṣājani pṛśnyāḥ śukra ūdhani ||
2.034.03a ukṣante aśvām̐ atyām̐ ivājiṣu nadasya karṇais turayanta āśubhiḥ |
2.034.03c hiraṇyaśiprā maruto davidhvataḥ pṛkṣaṁ yātha pṛṣatībhiḥ samanyavaḥ ||
2.034.04a pṛkṣe tā viśvā bhuvanā vavakṣire mitrāya vā sadam ā jīradānavaḥ |
2.034.04c pṛṣadaśvāso anavabhrarādhasa ṛjipyāso na vayuneṣu dhūrṣadaḥ ||
2.034.05a indhanvabhir dhenubhī rapśadūdhabhir adhvasmabhiḥ pathibhir bhrājadṛṣṭayaḥ |
2.034.05c ā haṁsāso na svasarāṇi gantana madhor madāya marutaḥ samanyavaḥ ||
2.034.06a ā no brahmāṇi marutaḥ samanyavo narāṁ na śaṁsaḥ savanāni gantana |
2.034.06c aśvām iva pipyata dhenum ūdhani kartā dhiyaṁ jaritre vājapeśasam ||
2.034.07a taṁ no dāta maruto vājinaṁ ratha āpānam brahma citayad dive-dive |
2.034.07c iṣaṁ stotṛbhyo vṛjaneṣu kārave sanim medhām ariṣṭaṁ duṣṭaraṁ sahaḥ ||
2.034.08a yad yuñjate maruto rukmavakṣaso 'śvān ratheṣu bhaga ā sudānavaḥ |
2.034.08c dhenur na śiśve svasareṣu pinvate janāya rātahaviṣe mahīm iṣam ||
2.034.09a yo no maruto vṛkatāti martyo ripur dadhe vasavo rakṣatā riṣaḥ |
2.034.09c vartayata tapuṣā cakriyābhi tam ava rudrā aśaso hantanā vadhaḥ ||
2.034.10a citraṁ tad vo maruto yāma cekite pṛśnyā yad ūdhar apy āpayo duhuḥ |
2.034.10c yad vā nide navamānasya rudriyās tritaṁ jarāya juratām adābhyāḥ ||
2.034.11a tān vo maho maruta evayāvno viṣṇor eṣasya prabhṛthe havāmahe |
2.034.11c hiraṇyavarṇān kakuhān yatasruco brahmaṇyantaḥ śaṁsyaṁ rādha īmahe ||
2.034.12a te daśagvāḥ prathamā yajñam ūhire te no hinvantūṣaso vyuṣṭiṣu |
2.034.12c uṣā na rāmīr aruṇair aporṇute maho jyotiṣā śucatā goarṇasā ||
2.034.13a te kṣoṇībhir aruṇebhir nāñjibhī rudrā ṛtasya sadaneṣu vāvṛdhuḥ |
2.034.13c nimeghamānā atyena pājasā suścandraṁ varṇaṁ dadhire supeśasam ||
2.034.14a tām̐ iyāno mahi varūtham ūtaya upa ghed enā namasā gṛṇīmasi |
2.034.14c trito na yān pañca hotṝn abhiṣṭaya āvavartad avarāñ cakriyāvase ||
2.034.15a yayā radhram pārayathāty aṁho yayā nido muñcatha vanditāram |
2.034.15c arvācī sā maruto yā va ūtir o ṣu vāśreva sumatir jigātu ||

2.035.01a upem asṛkṣi vājayur vacasyāṁ cano dadhīta nādyo giro me |
2.035.01c apāṁ napād āśuhemā kuvit sa supeśasas karati joṣiṣad dhi ||
2.035.02a imaṁ sv asmai hṛda ā sutaṣṭam mantraṁ vocema kuvid asya vedat |
2.035.02c apāṁ napād asuryasya mahnā viśvāny aryo bhuvanā jajāna ||
2.035.03a sam anyā yanty upa yanty anyāḥ samānam ūrvaṁ nadyaḥ pṛṇanti |
2.035.03c tam ū śuciṁ śucayo dīdivāṁsam apāṁ napātam pari tasthur āpaḥ ||
2.035.04a tam asmerā yuvatayo yuvānam marmṛjyamānāḥ pari yanty āpaḥ |
2.035.04c sa śukrebhiḥ śikvabhī revad asme dīdāyānidhmo ghṛtanirṇig apsu ||
2.035.05a asmai tisro avyathyāya nārīr devāya devīr didhiṣanty annam |
2.035.05c kṛtā ivopa hi prasarsre apsu sa pīyūṣaṁ dhayati pūrvasūnām ||
2.035.06a aśvasyātra janimāsya ca svar druho riṣaḥ sampṛcaḥ pāhi sūrīn |
2.035.06c āmāsu pūrṣu paro apramṛṣyaṁ nārātayo vi naśan nānṛtāni ||
2.035.07a sva ā dame sudughā yasya dhenuḥ svadhām pīpāya subhv annam atti |
2.035.07c so apāṁ napād ūrjayann apsv antar vasudeyāya vidhate vi bhāti ||
2.035.08a yo apsv ā śucinā daivyena ṛtāvājasra urviyā vibhāti |
2.035.08c vayā id anyā bhuvanāny asya pra jāyante vīrudhaś ca prajābhiḥ ||
2.035.09a apāṁ napād ā hy asthād upasthaṁ jihmānām ūrdhvo vidyutaṁ vasānaḥ |
2.035.09c tasya jyeṣṭham mahimānaṁ vahantīr hiraṇyavarṇāḥ pari yanti yahvīḥ ||
2.035.10a hiraṇyarūpaḥ sa hiraṇyasaṁdṛg apāṁ napāt sed u hiraṇyavarṇaḥ |
2.035.10c hiraṇyayāt pari yoner niṣadyā hiraṇyadā dadaty annam asmai ||
2.035.11a tad asyānīkam uta cāru nāmāpīcyaṁ vardhate naptur apām |
2.035.11c yam indhate yuvatayaḥ sam itthā hiraṇyavarṇaṁ ghṛtam annam asya ||
2.035.12a asmai bahūnām avamāya sakhye yajñair vidhema namasā havirbhiḥ |
2.035.12c saṁ sānu mārjmi didhiṣāmi bilmair dadhāmy annaiḥ pari vanda ṛgbhiḥ ||
2.035.13a sa īṁ vṛṣājanayat tāsu garbhaṁ sa īṁ śiśur dhayati taṁ rihanti |
2.035.13c so apāṁ napād anabhimlātavarṇo 'nyasyeveha tanvā viveṣa ||
2.035.14a asmin pade parame tasthivāṁsam adhvasmabhir viśvahā dīdivāṁsam |
2.035.14c āpo naptre ghṛtam annaṁ vahantīḥ svayam atkaiḥ pari dīyanti yahvīḥ ||
2.035.15a ayāṁsam agne sukṣitiṁ janāyāyāṁsam u maghavadbhyaḥ suvṛktim |
2.035.15c viśvaṁ tad bhadraṁ yad avanti devā bṛhad vadema vidathe suvīrāḥ ||

2.036.01a tubhyaṁ hinvāno vasiṣṭa gā apo 'dhukṣan sīm avibhir adribhir naraḥ |
2.036.01c pibendra svāhā prahutaṁ vaṣaṭkṛtaṁ hotrād ā somam prathamo ya īśiṣe ||
2.036.02a yajñaiḥ sammiślāḥ pṛṣatībhir ṛṣṭibhir yāmañ chubhrāso añjiṣu priyā uta |
2.036.02c āsadyā barhir bharatasya sūnavaḥ potrād ā somam pibatā divo naraḥ ||
2.036.03a ameva naḥ suhavā ā hi gantana ni barhiṣi sadatanā raṇiṣṭana |
2.036.03c athā mandasva jujuṣāṇo andhasas tvaṣṭar devebhir janibhiḥ sumadgaṇaḥ ||
2.036.04a ā vakṣi devām̐ iha vipra yakṣi cośan hotar ni ṣadā yoniṣu triṣu |
2.036.04c prati vīhi prasthitaṁ somyam madhu pibāgnīdhrāt tava bhāgasya tṛpṇuhi ||
2.036.05a eṣa sya te tanvo nṛmṇavardhanaḥ saha ojaḥ pradivi bāhvor hitaḥ |
2.036.05c tubhyaṁ suto maghavan tubhyam ābhṛtas tvam asya brāhmaṇād ā tṛpat piba ||
2.036.06a juṣethāṁ yajñam bodhataṁ havasya me satto hotā nividaḥ pūrvyā anu |
2.036.06c acchā rājānā nama ety āvṛtam praśāstrād ā pibataṁ somyam madhu ||

2.037.01a mandasva hotrād anu joṣam andhaso 'dhvaryavaḥ sa pūrṇāṁ vaṣṭy āsicam |
2.037.01c tasmā etam bharata tadvaśo dadir hotrāt somaṁ draviṇodaḥ piba ṛtubhiḥ ||
2.037.02a yam u pūrvam ahuve tam idaṁ huve sed u havyo dadir yo nāma patyate |
2.037.02c adhvaryubhiḥ prasthitaṁ somyam madhu potrāt somaṁ draviṇodaḥ piba ṛtubhiḥ ||
2.037.03a medyantu te vahnayo yebhir īyase 'riṣaṇyan vīḻayasvā vanaspate |
2.037.03c āyūyā dhṛṣṇo abhigūryā tvaṁ neṣṭrāt somaṁ draviṇodaḥ piba ṛtubhiḥ ||
2.037.04a apād dhotrād uta potrād amattota neṣṭrād ajuṣata prayo hitam |
2.037.04c turīyam pātram amṛktam amartyaṁ draviṇodāḥ pibatu drāviṇodasaḥ ||
2.037.05a arvāñcam adya yayyaṁ nṛvāhaṇaṁ rathaṁ yuñjāthām iha vāṁ vimocanam |
2.037.05c pṛṅktaṁ havīṁṣi madhunā hi kaṁ gatam athā somam pibataṁ vājinīvasū ||
2.037.06a joṣy agne samidhaṁ joṣy āhutiṁ joṣi brahma janyaṁ joṣi suṣṭutim |
2.037.06c viśvebhir viśvām̐ ṛtunā vaso maha uśan devām̐ uśataḥ pāyayā haviḥ ||

2.038.01a ud u ṣya devaḥ savitā savāya śaśvattamaṁ tadapā vahnir asthāt |
2.038.01c nūnaṁ devebhyo vi hi dhāti ratnam athābhajad vītihotraṁ svastau ||
2.038.02a viśvasya hi śruṣṭaye deva ūrdhvaḥ pra bāhavā pṛthupāṇiḥ sisarti |
2.038.02c āpaś cid asya vrata ā nimṛgrā ayaṁ cid vāto ramate parijman ||
2.038.03a āśubhiś cid yān vi mucāti nūnam arīramad atamānaṁ cid etoḥ |
2.038.03c ahyarṣūṇāṁ cin ny ayām̐ aviṣyām anu vrataṁ savitur moky āgāt ||
2.038.04a punaḥ sam avyad vitataṁ vayantī madhyā kartor ny adhāc chakma dhīraḥ |
2.038.04c ut saṁhāyāsthād vy ṛtūm̐r adardhar aramatiḥ savitā deva āgāt ||
2.038.05a nānaukāṁsi duryo viśvam āyur vi tiṣṭhate prabhavaḥ śoko agneḥ |
2.038.05c jyeṣṭham mātā sūnave bhāgam ādhād anv asya ketam iṣitaṁ savitrā ||
2.038.06a samāvavarti viṣṭhito jigīṣur viśveṣāṁ kāmaś caratām amābhūt |
2.038.06c śaśvām̐ apo vikṛtaṁ hitvy āgād anu vrataṁ savitur daivyasya ||
2.038.07a tvayā hitam apyam apsu bhāgaṁ dhanvānv ā mṛgayaso vi tasthuḥ |
2.038.07c vanāni vibhyo nakir asya tāni vratā devasya savitur minanti ||
2.038.08a yādrādhyaṁ varuṇo yonim apyam aniśitaṁ nimiṣi jarbhurāṇaḥ |
2.038.08c viśvo mārtāṇḍo vrajam ā paśur gāt sthaśo janmāni savitā vy ākaḥ ||
2.038.09a na yasyendro varuṇo na mitro vratam aryamā na minanti rudraḥ |
2.038.09c nārātayas tam idaṁ svasti huve devaṁ savitāraṁ namobhiḥ ||
2.038.10a bhagaṁ dhiyaṁ vājayantaḥ puraṁdhiṁ narāśaṁso gnāspatir no avyāḥ |
2.038.10c āye vāmasya saṁgathe rayīṇām priyā devasya savituḥ syāma ||
2.038.11a asmabhyaṁ tad divo adbhyaḥ pṛthivyās tvayā dattaṁ kāmyaṁ rādha ā gāt |
2.038.11c śaṁ yat stotṛbhya āpaye bhavāty uruśaṁsāya savitar jaritre ||

2.039.01a grāvāṇeva tad id arthaṁ jarethe gṛdhreva vṛkṣaṁ nidhimantam accha |
2.039.01c brahmāṇeva vidatha ukthaśāsā dūteva havyā janyā purutrā ||
2.039.02a prātaryāvāṇā rathyeva vīrājeva yamā varam ā sacethe |
2.039.02c mene iva tanvā śumbhamāne dampatīva kratuvidā janeṣu ||
2.039.03a śṛṅgeva naḥ prathamā gantam arvāk chaphāv iva jarbhurāṇā tarobhiḥ |
2.039.03c cakravākeva prati vastor usrārvāñcā yātaṁ rathyeva śakrā ||
2.039.04a nāveva naḥ pārayataṁ yugeva nabhyeva na upadhīva pradhīva |
2.039.04c śvāneva no ariṣaṇyā tanūnāṁ khṛgaleva visrasaḥ pātam asmān ||
2.039.05a vātevājuryā nadyeva rītir akṣī iva cakṣuṣā yātam arvāk |
2.039.05c hastāv iva tanve śambhaviṣṭhā pādeva no nayataṁ vasyo accha ||
2.039.06a oṣṭhāv iva madhv āsne vadantā stanāv iva pipyataṁ jīvase naḥ |
2.039.06c nāseva nas tanvo rakṣitārā karṇāv iva suśrutā bhūtam asme ||
2.039.07a hasteva śaktim abhi saṁdadī naḥ kṣāmeva naḥ sam ajataṁ rajāṁsi |
2.039.07c imā giro aśvinā yuṣmayantīḥ kṣṇotreṇeva svadhitiṁ saṁ śiśītam ||
2.039.08a etāni vām aśvinā vardhanāni brahma stomaṁ gṛtsamadāso akran |
2.039.08c tāni narā jujuṣāṇopa yātam bṛhad vadema vidathe suvīrāḥ ||

2.040.01a somāpūṣaṇā jananā rayīṇāṁ jananā divo jananā pṛthivyāḥ |
2.040.01c jātau viśvasya bhuvanasya gopau devā akṛṇvann amṛtasya nābhim ||
2.040.02a imau devau jāyamānau juṣantemau tamāṁsi gūhatām ajuṣṭā |
2.040.02c ābhyām indraḥ pakvam āmāsv antaḥ somāpūṣabhyāṁ janad usriyāsu ||
2.040.03a somāpūṣaṇā rajaso vimānaṁ saptacakraṁ ratham aviśvaminvam |
2.040.03c viṣūvṛtam manasā yujyamānaṁ taṁ jinvatho vṛṣaṇā pañcaraśmim ||
2.040.04a divy anyaḥ sadanaṁ cakra uccā pṛthivyām anyo adhy antarikṣe |
2.040.04c tāv asmabhyam puruvāram purukṣuṁ rāyas poṣaṁ vi ṣyatāṁ nābhim asme ||
2.040.05a viśvāny anyo bhuvanā jajāna viśvam anyo abhicakṣāṇa eti |
2.040.05c somāpūṣaṇāv avataṁ dhiyam me yuvābhyāṁ viśvāḥ pṛtanā jayema ||
2.040.06a dhiyam pūṣā jinvatu viśvaminvo rayiṁ somo rayipatir dadhātu |
2.040.06c avatu devy aditir anarvā bṛhad vadema vidathe suvīrāḥ ||

2.041.01a vāyo ye te sahasriṇo rathāsas tebhir ā gahi |
2.041.01c niyutvān somapītaye ||
2.041.02a niyutvān vāyav ā gahy ayaṁ śukro ayāmi te |
2.041.02c gantāsi sunvato gṛham ||
2.041.03a śukrasyādya gavāśira indravāyū niyutvataḥ |
2.041.03c ā yātam pibataṁ narā ||
2.041.04a ayaṁ vām mitrāvaruṇā sutaḥ soma ṛtāvṛdhā |
2.041.04c mamed iha śrutaṁ havam ||
2.041.05a rājānāv anabhidruhā dhruve sadasy uttame |
2.041.05c sahasrasthūṇa āsāte ||
2.041.06a tā samrājā ghṛtāsutī ādityā dānunas patī |
2.041.06c sacete anavahvaram ||
2.041.07a gomad ū ṣu nāsatyāśvāvad yātam aśvinā |
2.041.07c vartī rudrā nṛpāyyam ||
2.041.08a na yat paro nāntara ādadharṣad vṛṣaṇvasū |
2.041.08c duḥśaṁso martyo ripuḥ ||
2.041.09a tā na ā voḻham aśvinā rayim piśaṅgasaṁdṛśam |
2.041.09c dhiṣṇyā varivovidam ||
2.041.10a indro aṅga mahad bhayam abhī ṣad apa cucyavat |
2.041.10c sa hi sthiro vicarṣaṇiḥ ||
2.041.11a indraś ca mṛḻayāti no na naḥ paścād aghaṁ naśat |
2.041.11c bhadram bhavāti naḥ puraḥ ||
2.041.12a indra āśābhyas pari sarvābhyo abhayaṁ karat |
2.041.12c jetā śatrūn vicarṣaṇiḥ ||
2.041.13a viśve devāsa ā gata śṛṇutā ma imaṁ havam |
2.041.13c edam barhir ni ṣīdata ||
2.041.14a tīvro vo madhumām̐ ayaṁ śunahotreṣu matsaraḥ |
2.041.14c etam pibata kāmyam ||
2.041.15a indrajyeṣṭhā marudgaṇā devāsaḥ pūṣarātayaḥ |
2.041.15c viśve mama śrutā havam ||
2.041.16a ambitame nadītame devitame sarasvati |
2.041.16c apraśastā iva smasi praśastim amba nas kṛdhi ||
2.041.17a tve viśvā sarasvati śritāyūṁṣi devyām |
2.041.17c śunahotreṣu matsva prajāṁ devi didiḍḍhi naḥ ||
2.041.18a imā brahma sarasvati juṣasva vājinīvati |
2.041.18c yā te manma gṛtsamadā ṛtāvari priyā deveṣu juhvati ||
2.041.19a pretāṁ yajñasya śambhuvā yuvām id ā vṛṇīmahe |
2.041.19c agniṁ ca havyavāhanam ||
2.041.20a dyāvā naḥ pṛthivī imaṁ sidhram adya divispṛśam |
2.041.20c yajñaṁ deveṣu yacchatām ||
2.041.21a ā vām upastham adruhā devāḥ sīdantu yajñiyāḥ |
2.041.21c ihādya somapītaye ||

2.042.01a kanikradaj januṣam prabruvāṇa iyarti vācam ariteva nāvam |
2.042.01c sumaṅgalaś ca śakune bhavāsi mā tvā kā cid abhibhā viśvyā vidat ||
2.042.02a mā tvā śyena ud vadhīn mā suparṇo mā tvā vidad iṣumān vīro astā |
2.042.02c pitryām anu pradiśaṁ kanikradat sumaṅgalo bhadravādī vadeha ||
2.042.03a ava kranda dakṣiṇato gṛhāṇāṁ sumaṅgalo bhadravādī śakunte |
2.042.03c mā naḥ stena īśata māghaśaṁso bṛhad vadema vidathe suvīrāḥ ||

2.043.01a pradakṣiṇid abhi gṛṇanti kāravo vayo vadanta ṛtuthā śakuntayaḥ |
2.043.01c ubhe vācau vadati sāmagā iva gāyatraṁ ca traiṣṭubhaṁ cānu rājati ||
2.043.02a udgāteva śakune sāma gāyasi brahmaputra iva savaneṣu śaṁsasi |
2.043.02c vṛṣeva vājī śiśumatīr apītyā sarvato naḥ śakune bhadram ā vada viśvato naḥ śakune puṇyam ā vada ||
2.043.03a āvadam̐s tvaṁ śakune bhadram ā vada tūṣṇīm āsīnaḥ sumatiṁ cikiddhi naḥ |
2.043.03c yad utpatan vadasi karkarir yathā bṛhad vadema vidathe suvīrāḥ ||


3.001.01a somasya mā tavasaṁ vakṣy agne vahniṁ cakartha vidathe yajadhyai |
3.001.01c devām̐ acchā dīdyad yuñje adriṁ śamāye agne tanvaṁ juṣasva ||
3.001.02a prāñcaṁ yajñaṁ cakṛma vardhatāṁ gīḥ samidbhir agniṁ namasā duvasyan |
3.001.02c divaḥ śaśāsur vidathā kavīnāṁ gṛtsāya cit tavase gātum īṣuḥ ||
3.001.03a mayo dadhe medhiraḥ pūtadakṣo divaḥ subandhur januṣā pṛthivyāḥ |
3.001.03c avindann u darśatam apsv antar devāso agnim apasi svasṝṇām ||
3.001.04a avardhayan subhagaṁ sapta yahvīḥ śvetaṁ jajñānam aruṣam mahitvā |
3.001.04c śiśuṁ na jātam abhy ārur aśvā devāso agniṁ janiman vapuṣyan ||
3.001.05a śukrebhir aṅgai raja ātatanvān kratum punānaḥ kavibhiḥ pavitraiḥ |
3.001.05c śocir vasānaḥ pary āyur apāṁ śriyo mimīte bṛhatīr anūnāḥ ||
3.001.06a vavrājā sīm anadatīr adabdhā divo yahvīr avasānā anagnāḥ |
3.001.06c sanā atra yuvatayaḥ sayonīr ekaṁ garbhaṁ dadhire sapta vāṇīḥ ||
3.001.07a stīrṇā asya saṁhato viśvarūpā ghṛtasya yonau sravathe madhūnām |
3.001.07c asthur atra dhenavaḥ pinvamānā mahī dasmasya mātarā samīcī ||
3.001.08a babhrāṇaḥ sūno sahaso vy adyaud dadhānaḥ śukrā rabhasā vapūṁṣi |
3.001.08c ścotanti dhārā madhuno ghṛtasya vṛṣā yatra vāvṛdhe kāvyena ||
3.001.09a pituś cid ūdhar januṣā viveda vy asya dhārā asṛjad vi dhenāḥ |
3.001.09c guhā carantaṁ sakhibhiḥ śivebhir divo yahvībhir na guhā babhūva ||
3.001.10a pituś ca garbhaṁ janituś ca babhre pūrvīr eko adhayat pīpyānāḥ |
3.001.10c vṛṣṇe sapatnī śucaye sabandhū ubhe asmai manuṣye ni pāhi ||
3.001.11a urau mahām̐ anibādhe vavardhāpo agniṁ yaśasaḥ saṁ hi pūrvīḥ |
3.001.11c ṛtasya yonāv aśayad damūnā jāmīnām agnir apasi svasṝṇām ||
3.001.12a akro na babhriḥ samithe mahīnāṁ didṛkṣeyaḥ sūnave bhāṛjīkaḥ |
3.001.12c ud usriyā janitā yo jajānāpāṁ garbho nṛtamo yahvo agniḥ ||
3.001.13a apāṁ garbhaṁ darśatam oṣadhīnāṁ vanā jajāna subhagā virūpam |
3.001.13c devāsaś cin manasā saṁ hi jagmuḥ paniṣṭhaṁ jātaṁ tavasaṁ duvasyan ||
3.001.14a bṛhanta id bhānavo bhāṛjīkam agniṁ sacanta vidyuto na śukrāḥ |
3.001.14c guheva vṛddhaṁ sadasi sve antar apāra ūrve amṛtaṁ duhānāḥ ||
3.001.15a īḻe ca tvā yajamāno havirbhir īḻe sakhitvaṁ sumatiṁ nikāmaḥ |
3.001.15c devair avo mimīhi saṁ jaritre rakṣā ca no damyebhir anīkaiḥ ||
3.001.16a upakṣetāras tava supraṇīte 'gne viśvāni dhanyā dadhānāḥ |
3.001.16c suretasā śravasā tuñjamānā abhi ṣyāma pṛtanāyūm̐r adevān ||
3.001.17a ā devānām abhavaḥ ketur agne mandro viśvāni kāvyāni vidvān |
3.001.17c prati martām̐ avāsayo damūnā anu devān rathiro yāsi sādhan ||
3.001.18a ni duroṇe amṛto martyānāṁ rājā sasāda vidathāni sādhan |
3.001.18c ghṛtapratīka urviyā vy adyaud agnir viśvāni kāvyāni vidvān ||
3.001.19a ā no gahi sakhyebhiḥ śivebhir mahān mahībhir ūtibhiḥ saraṇyan |
3.001.19c asme rayim bahulaṁ saṁtarutraṁ suvācam bhāgaṁ yaśasaṁ kṛdhī naḥ ||
3.001.20a etā te agne janimā sanāni pra pūrvyāya nūtanāni vocam |
3.001.20c mahānti vṛṣṇe savanā kṛtemā janmañ-janman nihito jātavedāḥ ||
3.001.21a janmañ-janman nihito jātavedā viśvāmitrebhir idhyate ajasraḥ |
3.001.21c tasya vayaṁ sumatau yajñiyasyāpi bhadre saumanase syāma ||
3.001.22a imaṁ yajñaṁ sahasāvan tvaṁ no devatrā dhehi sukrato rarāṇaḥ |
3.001.22c pra yaṁsi hotar bṛhatīr iṣo no 'gne mahi draviṇam ā yajasva ||
3.001.23a iḻām agne purudaṁsaṁ saniṁ goḥ śaśvattamaṁ havamānāya sādha |
3.001.23c syān naḥ sūnus tanayo vijāvāgne sā te sumatir bhūtv asme ||

3.002.01a vaiśvānarāya dhiṣaṇām ṛtāvṛdhe ghṛtaṁ na pūtam agnaye janāmasi |
3.002.01c dvitā hotāram manuṣaś ca vāghato dhiyā rathaṁ na kuliśaḥ sam ṛṇvati ||
3.002.02a sa rocayaj januṣā rodasī ubhe sa mātror abhavat putra īḍyaḥ |
3.002.02c havyavāḻ agnir ajaraś canohito dūḻabho viśām atithir vibhāvasuḥ ||
3.002.03a kratvā dakṣasya taruṣo vidharmaṇi devāso agniṁ janayanta cittibhiḥ |
3.002.03c rurucānam bhānunā jyotiṣā mahām atyaṁ na vājaṁ saniṣyann upa bruve ||
3.002.04a ā mandrasya saniṣyanto vareṇyaṁ vṛṇīmahe ahrayaṁ vājam ṛgmiyam |
3.002.04c rātim bhṛgūṇām uśijaṁ kavikratum agniṁ rājantaṁ divyena śociṣā ||
3.002.05a agniṁ sumnāya dadhire puro janā vājaśravasam iha vṛktabarhiṣaḥ |
3.002.05c yatasrucaḥ surucaṁ viśvadevyaṁ rudraṁ yajñānāṁ sādhadiṣṭim apasām ||
3.002.06a pāvakaśoce tava hi kṣayam pari hotar yajñeṣu vṛktabarhiṣo naraḥ |
3.002.06c agne duva icchamānāsa āpyam upāsate draviṇaṁ dhehi tebhyaḥ ||
3.002.07a ā rodasī apṛṇad ā svar mahaj jātaṁ yad enam apaso adhārayan |
3.002.07c so adhvarāya pari ṇīyate kavir atyo na vājasātaye canohitaḥ ||
3.002.08a namasyata havyadātiṁ svadhvaraṁ duvasyata damyaṁ jātavedasam |
3.002.08c rathīr ṛtasya bṛhato vicarṣaṇir agnir devānām abhavat purohitaḥ ||
3.002.09a tisro yahvasya samidhaḥ parijmano 'gner apunann uśijo amṛtyavaḥ |
3.002.09c tāsām ekām adadhur martye bhujam u lokam u dve upa jāmim īyatuḥ ||
3.002.10a viśāṁ kaviṁ viśpatim mānuṣīr iṣaḥ saṁ sīm akṛṇvan svadhitiṁ na tejase |
3.002.10c sa udvato nivato yāti veviṣat sa garbham eṣu bhuvaneṣu dīdharat ||
3.002.11a sa jinvate jaṭhareṣu prajajñivān vṛṣā citreṣu nānadan na siṁhaḥ |
3.002.11c vaiśvānaraḥ pṛthupājā amartyo vasu ratnā dayamāno vi dāśuṣe ||
3.002.12a vaiśvānaraḥ pratnathā nākam āruhad divas pṛṣṭham bhandamānaḥ sumanmabhiḥ |
3.002.12c sa pūrvavaj janayañ jantave dhanaṁ samānam ajmam pary eti jāgṛviḥ ||
3.002.13a ṛtāvānaṁ yajñiyaṁ vipram ukthyam ā yaṁ dadhe mātariśvā divi kṣayam |
3.002.13c taṁ citrayāmaṁ harikeśam īmahe sudītim agniṁ suvitāya navyase ||
3.002.14a śuciṁ na yāmann iṣiraṁ svardṛśaṁ ketuṁ divo rocanasthām uṣarbudham |
3.002.14c agnim mūrdhānaṁ divo apratiṣkutaṁ tam īmahe namasā vājinam bṛhat ||
3.002.15a mandraṁ hotāraṁ śucim advayāvinaṁ damūnasam ukthyaṁ viśvacarṣaṇim |
3.002.15c rathaṁ na citraṁ vapuṣāya darśatam manurhitaṁ sadam id rāya īmahe ||

3.003.01a vaiśvānarāya pṛthupājase vipo ratnā vidhanta dharuṇeṣu gātave |
3.003.01c agnir hi devām̐ amṛto duvasyaty athā dharmāṇi sanatā na dūduṣat ||
3.003.02a antar dūto rodasī dasma īyate hotā niṣatto manuṣaḥ purohitaḥ |
3.003.02c kṣayam bṛhantam pari bhūṣati dyubhir devebhir agnir iṣito dhiyāvasuḥ ||
3.003.03a ketuṁ yajñānāṁ vidathasya sādhanaṁ viprāso agnim mahayanta cittibhiḥ |
3.003.03c apāṁsi yasminn adhi saṁdadhur giras tasmin sumnāni yajamāna ā cake ||
3.003.04a pitā yajñānām asuro vipaścitāṁ vimānam agnir vayunaṁ ca vāghatām |
3.003.04c ā viveśa rodasī bhūrivarpasā purupriyo bhandate dhāmabhiḥ kaviḥ ||
3.003.05a candram agniṁ candrarathaṁ harivrataṁ vaiśvānaram apsuṣadaṁ svarvidam |
3.003.05c vigāhaṁ tūrṇiṁ taviṣībhir āvṛtam bhūrṇiṁ devāsa iha suśriyaṁ dadhuḥ ||
3.003.06a agnir devebhir manuṣaś ca jantubhis tanvāno yajñam purupeśasaṁ dhiyā |
3.003.06c rathīr antar īyate sādhadiṣṭibhir jīro damūnā abhiśasticātanaḥ ||
3.003.07a agne jarasva svapatya āyuny ūrjā pinvasva sam iṣo didīhi naḥ |
3.003.07c vayāṁsi jinva bṛhataś ca jāgṛva uśig devānām asi sukratur vipām ||
3.003.08a viśpatiṁ yahvam atithiṁ naraḥ sadā yantāraṁ dhīnām uśijaṁ ca vāghatām |
3.003.08c adhvarāṇāṁ cetanaṁ jātavedasam pra śaṁsanti namasā jūtibhir vṛdhe ||
3.003.09a vibhāvā devaḥ suraṇaḥ pari kṣitīr agnir babhūva śavasā sumadrathaḥ |
3.003.09c tasya vratāni bhūripoṣiṇo vayam upa bhūṣema dama ā suvṛktibhiḥ ||
3.003.10a vaiśvānara tava dhāmāny ā cake yebhiḥ svarvid abhavo vicakṣaṇa |
3.003.10c jāta āpṛṇo bhuvanāni rodasī agne tā viśvā paribhūr asi tmanā ||
3.003.11a vaiśvānarasya daṁsanābhyo bṛhad ariṇād ekaḥ svapasyayā kaviḥ |
3.003.11c ubhā pitarā mahayann ajāyatāgnir dyāvāpṛthivī bhūriretasā ||

3.004.01a samit-samit sumanā bodhy asme śucā-śucā sumatiṁ rāsi vasvaḥ |
3.004.01c ā deva devān yajathāya vakṣi sakhā sakhīn sumanā yakṣy agne ||
3.004.02a yaṁ devāsas trir ahann āyajante dive-dive varuṇo mitro agniḥ |
3.004.02c semaṁ yajñam madhumantaṁ kṛdhī nas tanūnapād ghṛtayoniṁ vidhantam ||
3.004.03a pra dīdhitir viśvavārā jigāti hotāram iḻaḥ prathamaṁ yajadhyai |
3.004.03c acchā namobhir vṛṣabhaṁ vandadhyai sa devān yakṣad iṣito yajīyān ||
3.004.04a ūrdhvo vāṁ gātur adhvare akāry ūrdhvā śocīṁṣi prasthitā rajāṁsi |
3.004.04c divo vā nābhā ny asādi hotā stṛṇīmahi devavyacā vi barhiḥ ||
3.004.05a sapta hotrāṇi manasā vṛṇānā invanto viśvam prati yann ṛtena |
3.004.05c nṛpeśaso vidatheṣu pra jātā abhīmaṁ yajñaṁ vi caranta pūrvīḥ ||
3.004.06a ā bhandamāne uṣasā upāke uta smayete tanvā virūpe |
3.004.06c yathā no mitro varuṇo jujoṣad indro marutvām̐ uta vā mahobhiḥ ||
3.004.07a daivyā hotārā prathamā ny ṛñje sapta pṛkṣāsaḥ svadhayā madanti |
3.004.07c ṛtaṁ śaṁsanta ṛtam it ta āhur anu vrataṁ vratapā dīdhyānāḥ ||
3.004.08a ā bhāratī bhāratībhiḥ sajoṣā iḻā devair manuṣyebhir agniḥ |
3.004.08c sarasvatī sārasvatebhir arvāk tisro devīr barhir edaṁ sadantu ||
3.004.09a tan nas turīpam adha poṣayitnu deva tvaṣṭar vi rarāṇaḥ syasva |
3.004.09c yato vīraḥ karmaṇyaḥ sudakṣo yuktagrāvā jāyate devakāmaḥ ||
3.004.10a vanaspate 'va sṛjopa devān agnir haviḥ śamitā sūdayāti |
3.004.10c sed u hotā satyataro yajāti yathā devānāṁ janimāni veda ||
3.004.11a ā yāhy agne samidhāno arvāṅ indreṇa devaiḥ sarathaṁ turebhiḥ |
3.004.11c barhir na āstām aditiḥ suputrā svāhā devā amṛtā mādayantām ||

3.005.01a praty agnir uṣasaś cekitāno 'bodhi vipraḥ padavīḥ kavīnām |
3.005.01c pṛthupājā devayadbhiḥ samiddho 'pa dvārā tamaso vahnir āvaḥ ||
3.005.02a pred v agnir vāvṛdhe stomebhir gīrbhiḥ stotṝṇāṁ namasya ukthaiḥ |
3.005.02c pūrvīr ṛtasya saṁdṛśaś cakānaḥ saṁ dūto adyaud uṣaso viroke ||
3.005.03a adhāyy agnir mānuṣīṣu vikṣv apāṁ garbho mitra ṛtena sādhan |
3.005.03c ā haryato yajataḥ sānv asthād abhūd u vipro havyo matīnām ||
3.005.04a mitro agnir bhavati yat samiddho mitro hotā varuṇo jātavedāḥ |
3.005.04c mitro adhvaryur iṣiro damūnā mitraḥ sindhūnām uta parvatānām ||
3.005.05a pāti priyaṁ ripo agram padaṁ veḥ pāti yahvaś caraṇaṁ sūryasya |
3.005.05c pāti nābhā saptaśīrṣāṇam agniḥ pāti devānām upamādam ṛṣvaḥ ||
3.005.06a ṛbhuś cakra īḍyaṁ cāru nāma viśvāni devo vayunāni vidvān |
3.005.06c sasasya carma ghṛtavat padaṁ ves tad id agnī rakṣaty aprayucchan ||
3.005.07a ā yonim agnir ghṛtavantam asthāt pṛthupragāṇam uśantam uśānaḥ |
3.005.07c dīdyānaḥ śucir ṛṣvaḥ pāvakaḥ punaḥ-punar mātarā navyasī kaḥ ||
3.005.08a sadyo jāta oṣadhībhir vavakṣe yadī vardhanti prasvo ghṛtena |
3.005.08c āpa iva pravatā śumbhamānā uruṣyad agniḥ pitror upasthe ||
3.005.09a ud u ṣṭutaḥ samidhā yahvo adyaud varṣman divo adhi nābhā pṛthivyāḥ |
3.005.09c mitro agnir īḍyo mātariśvā dūto vakṣad yajathāya devān ||
3.005.10a ud astambhīt samidhā nākam ṛṣvo 'gnir bhavann uttamo rocanānām |
3.005.10c yadī bhṛgubhyaḥ pari mātariśvā guhā santaṁ havyavāhaṁ samīdhe ||
3.005.11a iḻām agne purudaṁsaṁ saniṁ goḥ śaśvattamaṁ havamānāya sādha |
3.005.11c syān naḥ sūnus tanayo vijāvāgne sā te sumatir bhūtv asme ||

3.006.01a pra kāravo mananā vacyamānā devadrīcīṁ nayata devayantaḥ |
3.006.01c dakṣiṇāvāḍ vājinī prācy eti havir bharanty agnaye ghṛtācī ||
3.006.02a ā rodasī apṛṇā jāyamāna uta pra rikthā adha nu prayajyo |
3.006.02c divaś cid agne mahinā pṛthivyā vacyantāṁ te vahnayaḥ saptajihvāḥ ||
3.006.03a dyauś ca tvā pṛthivī yajñiyāso ni hotāraṁ sādayante damāya |
3.006.03c yadī viśo mānuṣīr devayantīḥ prayasvatīr īḻate śukram arciḥ ||
3.006.04a mahān sadhasthe dhruva ā niṣatto 'ntar dyāvā māhine haryamāṇaḥ |
3.006.04c āskre sapatnī ajare amṛkte sabardughe urugāyasya dhenū ||
3.006.05a vratā te agne mahato mahāni tava kratvā rodasī ā tatantha |
3.006.05c tvaṁ dūto abhavo jāyamānas tvaṁ netā vṛṣabha carṣaṇīnām ||
3.006.06a ṛtasya vā keśinā yogyābhir ghṛtasnuvā rohitā dhuri dhiṣva |
3.006.06c athā vaha devān deva viśvān svadhvarā kṛṇuhi jātavedaḥ ||
3.006.07a divaś cid ā te rucayanta rokā uṣo vibhātīr anu bhāsi pūrvīḥ |
3.006.07c apo yad agna uśadhag vaneṣu hotur mandrasya panayanta devāḥ ||
3.006.08a urau vā ye antarikṣe madanti divo vā ye rocane santi devāḥ |
3.006.08c ūmā vā ye suhavāso yajatrā āyemire rathyo agne aśvāḥ ||
3.006.09a aibhir agne sarathaṁ yāhy arvāṅ nānārathaṁ vā vibhavo hy aśvāḥ |
3.006.09c patnīvatas triṁśataṁ trīm̐ś ca devān anuṣvadham ā vaha mādayasva ||
3.006.10a sa hotā yasya rodasī cid urvī yajñaṁ-yajñam abhi vṛdhe gṛṇītaḥ |
3.006.10c prācī adhvareva tasthatuḥ sumeke ṛtāvarī ṛtajātasya satye ||
3.006.11a iḻām agne purudaṁsaṁ saniṁ goḥ śaśvattamaṁ havamānāya sādha |
3.006.11c syān naḥ sūnus tanayo vijāvāgne sā te sumatir bhūtv asme ||

3.007.01a pra ya āruḥ śitipṛṣṭhasya dhāser ā mātarā viviśuḥ sapta vāṇīḥ |
3.007.01c parikṣitā pitarā saṁ carete pra sarsrāte dīrgham āyuḥ prayakṣe ||
3.007.02a divakṣaso dhenavo vṛṣṇo aśvā devīr ā tasthau madhumad vahantīḥ |
3.007.02c ṛtasya tvā sadasi kṣemayantam pary ekā carati vartaniṁ gauḥ ||
3.007.03a ā sīm arohat suyamā bhavantīḥ patiś cikitvān rayivid rayīṇām |
3.007.03c pra nīlapṛṣṭho atasasya dhāses tā avāsayat purudhapratīkaḥ ||
3.007.04a mahi tvāṣṭram ūrjayantīr ajuryaṁ stabhūyamānaṁ vahato vahanti |
3.007.04c vy aṅgebhir didyutānaḥ sadhastha ekām iva rodasī ā viveśa ||
3.007.05a jānanti vṛṣṇo aruṣasya śevam uta bradhnasya śāsane raṇanti |
3.007.05c divorucaḥ suruco rocamānā iḻā yeṣāṁ gaṇyā māhinā gīḥ ||
3.007.06a uto pitṛbhyām pravidānu ghoṣam maho mahadbhyām anayanta śūṣam |
3.007.06c ukṣā ha yatra pari dhānam aktor anu svaṁ dhāma jaritur vavakṣa ||
3.007.07a adhvaryubhiḥ pañcabhiḥ sapta viprāḥ priyaṁ rakṣante nihitam padaṁ veḥ |
3.007.07c prāñco madanty ukṣaṇo ajuryā devā devānām anu hi vratā guḥ ||
3.007.08a daivyā hotārā prathamā ny ṛñje sapta pṛkṣāsaḥ svadhayā madanti |
3.007.08c ṛtaṁ śaṁsanta ṛtam it ta āhur anu vrataṁ vratapā dīdhyānāḥ ||
3.007.09a vṛṣāyante mahe atyāya pūrvīr vṛṣṇe citrāya raśmayaḥ suyāmāḥ |
3.007.09c deva hotar mandrataraś cikitvān maho devān rodasī eha vakṣi ||
3.007.10a pṛkṣaprayajo draviṇaḥ suvācaḥ suketava uṣaso revad ūṣuḥ |
3.007.10c uto cid agne mahinā pṛthivyāḥ kṛtaṁ cid enaḥ sam mahe daśasya ||
3.007.11a iḻām agne purudaṁsaṁ saniṁ goḥ śaśvattamaṁ havamānāya sādha |
3.007.11c syān naḥ sūnus tanayo vijāvāgne sā te sumatir bhūtv asme ||

3.008.01a añjanti tvām adhvare devayanto vanaspate madhunā daivyena |
3.008.01c yad ūrdhvas tiṣṭhā draviṇeha dhattād yad vā kṣayo mātur asyā upasthe ||
3.008.02a samiddhasya śrayamāṇaḥ purastād brahma vanvāno ajaraṁ suvīram |
3.008.02c āre asmad amatim bādhamāna uc chrayasva mahate saubhagāya ||
3.008.03a uc chrayasva vanaspate varṣman pṛthivyā adhi |
3.008.03c sumitī mīyamāno varco dhā yajñavāhase ||
3.008.04a yuvā suvāsāḥ parivīta āgāt sa u śreyān bhavati jāyamānaḥ |
3.008.04c taṁ dhīrāsaḥ kavaya un nayanti svādhyo manasā devayantaḥ ||
3.008.05a jāto jāyate sudinatve ahnāṁ samarya ā vidathe vardhamānaḥ |
3.008.05c punanti dhīrā apaso manīṣā devayā vipra ud iyarti vācam ||
3.008.06a yān vo naro devayanto nimimyur vanaspate svadhitir vā tatakṣa |
3.008.06c te devāsaḥ svaravas tasthivāṁsaḥ prajāvad asme didhiṣantu ratnam ||
3.008.07a ye vṛkṇāso adhi kṣami nimitāso yatasrucaḥ |
3.008.07c te no vyantu vāryaṁ devatrā kṣetrasādhasaḥ ||
3.008.08a ādityā rudrā vasavaḥ sunīthā dyāvākṣāmā pṛthivī antarikṣam |
3.008.08c sajoṣaso yajñam avantu devā ūrdhvaṁ kṛṇvantv adhvarasya ketum ||
3.008.09a haṁsā iva śreṇiśo yatānāḥ śukrā vasānāḥ svaravo na āguḥ |
3.008.09c unnīyamānāḥ kavibhiḥ purastād devā devānām api yanti pāthaḥ ||
3.008.10a śṛṅgāṇīvec chṛṅgiṇāṁ saṁ dadṛśre caṣālavantaḥ svaravaḥ pṛthivyām |
3.008.10c vāghadbhir vā vihave śroṣamāṇā asmām̐ avantu pṛtanājyeṣu ||
3.008.11a vanaspate śatavalśo vi roha sahasravalśā vi vayaṁ ruhema |
3.008.11c yaṁ tvām ayaṁ svadhitis tejamānaḥ praṇināya mahate saubhagāya ||

3.009.01a sakhāyas tvā vavṛmahe devam martāsa ūtaye |
3.009.01c apāṁ napātaṁ subhagaṁ sudīditiṁ supratūrtim anehasam ||
3.009.02a kāyamāno vanā tvaṁ yan mātṝr ajagann apaḥ |
3.009.02c na tat te agne pramṛṣe nivartanaṁ yad dūre sann ihābhavaḥ ||
3.009.03a ati tṛṣṭaṁ vavakṣithāthaiva sumanā asi |
3.009.03c pra-prānye yanti pary anya āsate yeṣāṁ sakhye asi śritaḥ ||
3.009.04a īyivāṁsam ati sridhaḥ śaśvatīr ati saścataḥ |
3.009.04c anv īm avindan nicirāso adruho 'psu siṁham iva śritam ||
3.009.05a sasṛvāṁsam iva tmanāgnim itthā tirohitam |
3.009.05c ainaṁ nayan mātariśvā parāvato devebhyo mathitam pari ||
3.009.06a taṁ tvā martā agṛbhṇata devebhyo havyavāhana |
3.009.06c viśvān yad yajñām̐ abhipāsi mānuṣa tava kratvā yaviṣṭhya ||
3.009.07a tad bhadraṁ tava daṁsanā pākāya cic chadayati |
3.009.07c tvāṁ yad agne paśavaḥ samāsate samiddham apiśarvare ||
3.009.08a ā juhotā svadhvaraṁ śīram pāvakaśociṣam |
3.009.08c āśuṁ dūtam ajiram pratnam īḍyaṁ śruṣṭī devaṁ saparyata ||
3.009.09a trīṇi śatā trī sahasrāṇy agniṁ triṁśac ca devā nava cāsaparyan |
3.009.09c aukṣan ghṛtair astṛṇan barhir asmā ād id dhotāraṁ ny asādayanta ||

3.010.01a tvām agne manīṣiṇaḥ samrājaṁ carṣaṇīnām |
3.010.01c devam martāsa indhate sam adhvare ||
3.010.02a tvāṁ yajñeṣv ṛtvijam agne hotāram īḻate |
3.010.02c gopā ṛtasya dīdihi sve dame ||
3.010.03a sa ghā yas te dadāśati samidhā jātavedase |
3.010.03c so agne dhatte suvīryaṁ sa puṣyati ||
3.010.04a sa ketur adhvarāṇām agnir devebhir ā gamat |
3.010.04c añjānaḥ sapta hotṛbhir haviṣmate ||
3.010.05a pra hotre pūrvyaṁ vaco 'gnaye bharatā bṛhat |
3.010.05c vipāṁ jyotīṁṣi bibhrate na vedhase ||
3.010.06a agniṁ vardhantu no giro yato jāyata ukthyaḥ |
3.010.06c mahe vājāya draviṇāya darśataḥ ||
3.010.07a agne yajiṣṭho adhvare devān devayate yaja |
3.010.07c hotā mandro vi rājasy ati sridhaḥ ||
3.010.08a sa naḥ pāvaka dīdihi dyumad asme suvīryam |
3.010.08c bhavā stotṛbhyo antamaḥ svastaye ||
3.010.09a taṁ tvā viprā vipanyavo jāgṛvāṁsaḥ sam indhate |
3.010.09c havyavāham amartyaṁ sahovṛdham ||

3.011.01a agnir hotā purohito 'dhvarasya vicarṣaṇiḥ |
3.011.01c sa veda yajñam ānuṣak ||
3.011.02a sa havyavāḻ amartya uśig dūtaś canohitaḥ |
3.011.02c agnir dhiyā sam ṛṇvati ||
3.011.03a agnir dhiyā sa cetati ketur yajñasya pūrvyaḥ |
3.011.03c arthaṁ hy asya taraṇi ||
3.011.04a agniṁ sūnuṁ sanaśrutaṁ sahaso jātavedasam |
3.011.04c vahniṁ devā akṛṇvata ||
3.011.05a adābhyaḥ puraetā viśām agnir mānuṣīṇām |
3.011.05c tūrṇī rathaḥ sadā navaḥ ||
3.011.06a sāhvān viśvā abhiyujaḥ kratur devānām amṛktaḥ |
3.011.06c agnis tuviśravastamaḥ ||
3.011.07a abhi prayāṁsi vāhasā dāśvām̐ aśnoti martyaḥ |
3.011.07c kṣayam pāvakaśociṣaḥ ||
3.011.08a pari viśvāni sudhitāgner aśyāma manmabhiḥ |
3.011.08c viprāso jātavedasaḥ ||
3.011.09a agne viśvāni vāryā vājeṣu saniṣāmahe |
3.011.09c tve devāsa erire ||

3.012.01a indrāgnī ā gataṁ sutaṁ gīrbhir nabho vareṇyam |
3.012.01c asya pātaṁ dhiyeṣitā ||
3.012.02a indrāgnī jarituḥ sacā yajño jigāti cetanaḥ |
3.012.02c ayā pātam imaṁ sutam ||
3.012.03a indram agniṁ kavicchadā yajñasya jūtyā vṛṇe |
3.012.03c tā somasyeha tṛmpatām ||
3.012.04a tośā vṛtrahaṇā huve sajitvānāparājitā |
3.012.04c indrāgnī vājasātamā ||
3.012.05a pra vām arcanty ukthino nīthāvido jaritāraḥ |
3.012.05c indrāgnī iṣa ā vṛṇe ||
3.012.06a indrāgnī navatim puro dāsapatnīr adhūnutam |
3.012.06c sākam ekena karmaṇā ||
3.012.07a indrāgnī apasas pary upa pra yanti dhītayaḥ |
3.012.07c ṛtasya pathyā anu ||
3.012.08a indrāgnī taviṣāṇi vāṁ sadhasthāni prayāṁsi ca |
3.012.08c yuvor aptūryaṁ hitam ||
3.012.09a indrāgnī rocanā divaḥ pari vājeṣu bhūṣathaḥ |
3.012.09c tad vāṁ ceti pra vīryam ||

3.013.01a pra vo devāyāgnaye barhiṣṭham arcāsmai |
3.013.01c gamad devebhir ā sa no yajiṣṭho barhir ā sadat ||
3.013.02a ṛtāvā yasya rodasī dakṣaṁ sacanta ūtayaḥ |
3.013.02c haviṣmantas tam īḻate taṁ saniṣyanto 'vase ||
3.013.03a sa yantā vipra eṣāṁ sa yajñānām athā hi ṣaḥ |
3.013.03c agniṁ taṁ vo duvasyata dātā yo vanitā magham ||
3.013.04a sa naḥ śarmāṇi vītaye 'gnir yacchatu śaṁtamā |
3.013.04c yato naḥ pruṣṇavad vasu divi kṣitibhyo apsv ā ||
3.013.05a dīdivāṁsam apūrvyaṁ vasvībhir asya dhītibhiḥ |
3.013.05c ṛkvāṇo agnim indhate hotāraṁ viśpatiṁ viśām ||
3.013.06a uta no brahmann aviṣa uktheṣu devahūtamaḥ |
3.013.06c śaṁ naḥ śocā marudvṛdho 'gne sahasrasātamaḥ ||
3.013.07a nū no rāsva sahasravat tokavat puṣṭimad vasu |
3.013.07c dyumad agne suvīryaṁ varṣiṣṭham anupakṣitam ||

3.014.01a ā hotā mandro vidathāny asthāt satyo yajvā kavitamaḥ sa vedhāḥ |
3.014.01c vidyudrathaḥ sahasas putro agniḥ śociṣkeśaḥ pṛthivyām pājo aśret ||
3.014.02a ayāmi te namaüktiṁ juṣasva ṛtāvas tubhyaṁ cetate sahasvaḥ |
3.014.02c vidvām̐ ā vakṣi viduṣo ni ṣatsi madhya ā barhir ūtaye yajatra ||
3.014.03a dravatāṁ ta uṣasā vājayantī agne vātasya pathyābhir accha |
3.014.03c yat sīm añjanti pūrvyaṁ havirbhir ā vandhureva tasthatur duroṇe ||
3.014.04a mitraś ca tubhyaṁ varuṇaḥ sahasvo 'gne viśve marutaḥ sumnam arcan |
3.014.04c yac chociṣā sahasas putra tiṣṭhā abhi kṣitīḥ prathayan sūryo nṝn ||
3.014.05a vayaṁ te adya rarimā hi kāmam uttānahastā namasopasadya |
3.014.05c yajiṣṭhena manasā yakṣi devān asredhatā manmanā vipro agne ||
3.014.06a tvad dhi putra sahaso vi pūrvīr devasya yanty ūtayo vi vājāḥ |
3.014.06c tvaṁ dehi sahasriṇaṁ rayiṁ no 'drogheṇa vacasā satyam agne ||
3.014.07a tubhyaṁ dakṣa kavikrato yānīmā deva martāso adhvare akarma |
3.014.07c tvaṁ viśvasya surathasya bodhi sarvaṁ tad agne amṛta svadeha ||

3.015.01a vi pājasā pṛthunā śośucāno bādhasva dviṣo rakṣaso amīvāḥ |
3.015.01c suśarmaṇo bṛhataḥ śarmaṇi syām agner ahaṁ suhavasya praṇītau ||
3.015.02a tvaṁ no asyā uṣaso vyuṣṭau tvaṁ sūra udite bodhi gopāḥ |
3.015.02c janmeva nityaṁ tanayaṁ juṣasva stomam me agne tanvā sujāta ||
3.015.03a tvaṁ nṛcakṣā vṛṣabhānu pūrvīḥ kṛṣṇāsv agne aruṣo vi bhāhi |
3.015.03c vaso neṣi ca parṣi cāty aṁhaḥ kṛdhī no rāya uśijo yaviṣṭha ||
3.015.04a aṣāḻho agne vṛṣabho didīhi puro viśvāḥ saubhagā saṁjigīvān |
3.015.04c yajñasya netā prathamasya pāyor jātavedo bṛhataḥ supraṇīte ||
3.015.05a acchidrā śarma jaritaḥ purūṇi devām̐ acchā dīdyānaḥ sumedhāḥ |
3.015.05c ratho na sasnir abhi vakṣi vājam agne tvaṁ rodasī naḥ sumeke ||
3.015.06a pra pīpaya vṛṣabha jinva vājān agne tvaṁ rodasī naḥ sudoghe |
3.015.06c devebhir deva surucā rucāno mā no martasya durmatiḥ pari ṣṭhāt ||
3.015.07a iḻām agne purudaṁsaṁ saniṁ goḥ śaśvattamaṁ havamānāya sādha |
3.015.07c syān naḥ sūnus tanayo vijāvāgne sā te sumatir bhūtv asme ||

3.016.01a ayam agniḥ suvīryasyeśe mahaḥ saubhagasya |
3.016.01c rāya īśe svapatyasya gomata īśe vṛtrahathānām ||
3.016.02a imaṁ naro marutaḥ saścatā vṛdhaṁ yasmin rāyaḥ śevṛdhāsaḥ |
3.016.02c abhi ye santi pṛtanāsu dūḍhyo viśvāhā śatrum ādabhuḥ ||
3.016.03a sa tvaṁ no rāyaḥ śiśīhi mīḍhvo agne suvīryasya |
3.016.03c tuvidyumna varṣiṣṭhasya prajāvato 'namīvasya śuṣmiṇaḥ ||
3.016.04a cakrir yo viśvā bhuvanābhi sāsahiś cakrir deveṣv ā duvaḥ |
3.016.04c ā deveṣu yatata ā suvīrya ā śaṁsa uta nṛṇām ||
3.016.05a mā no agne 'mataye māvīratāyai rīradhaḥ |
3.016.05c māgotāyai sahasas putra mā nide 'pa dveṣāṁsy ā kṛdhi ||
3.016.06a śagdhi vājasya subhaga prajāvato 'gne bṛhato adhvare |
3.016.06c saṁ rāyā bhūyasā sṛja mayobhunā tuvidyumna yaśasvatā ||

3.017.01a samidhyamānaḥ prathamānu dharmā sam aktubhir ajyate viśvavāraḥ |
3.017.01c śociṣkeśo ghṛtanirṇik pāvakaḥ suyajño agnir yajathāya devān ||
3.017.02a yathāyajo hotram agne pṛthivyā yathā divo jātavedaś cikitvān |
3.017.02c evānena haviṣā yakṣi devān manuṣvad yajñam pra tiremam adya ||
3.017.03a trīṇy āyūṁṣi tava jātavedas tisra ājānīr uṣasas te agne |
3.017.03c tābhir devānām avo yakṣi vidvān athā bhava yajamānāya śaṁ yoḥ ||
3.017.04a agniṁ sudītiṁ sudṛśaṁ gṛṇanto namasyāmas tveḍyaṁ jātavedaḥ |
3.017.04c tvāṁ dūtam aratiṁ havyavāhaṁ devā akṛṇvann amṛtasya nābhim ||
3.017.05a yas tvad dhotā pūrvo agne yajīyān dvitā ca sattā svadhayā ca śambhuḥ |
3.017.05c tasyānu dharma pra yajā cikitvo 'thā no dhā adhvaraṁ devavītau ||

3.018.01a bhavā no agne sumanā upetau sakheva sakhye pitareva sādhuḥ |
3.018.01c purudruho hi kṣitayo janānām prati pratīcīr dahatād arātīḥ ||
3.018.02a tapo ṣv agne antarām̐ amitrān tapā śaṁsam araruṣaḥ parasya |
3.018.02c tapo vaso cikitāno acittān vi te tiṣṭhantām ajarā ayāsaḥ ||
3.018.03a idhmenāgna icchamāno ghṛtena juhomi havyaṁ tarase balāya |
3.018.03c yāvad īśe brahmaṇā vandamāna imāṁ dhiyaṁ śataseyāya devīm ||
3.018.04a uc chociṣā sahasas putra stuto bṛhad vayaḥ śaśamāneṣu dhehi |
3.018.04c revad agne viśvāmitreṣu śaṁ yor marmṛjmā te tanvam bhūri kṛtvaḥ ||
3.018.05a kṛdhi ratnaṁ susanitar dhanānāṁ sa ghed agne bhavasi yat samiddhaḥ |
3.018.05c stotur duroṇe subhagasya revat sṛprā karasnā dadhiṣe vapūṁṣi ||

3.019.01a agniṁ hotāram pra vṛṇe miyedhe gṛtsaṁ kaviṁ viśvavidam amūram |
3.019.01c sa no yakṣad devatātā yajīyān rāye vājāya vanate maghāni ||
3.019.02a pra te agne haviṣmatīm iyarmy acchā sudyumnāṁ rātinīṁ ghṛtācīm |
3.019.02c pradakṣiṇid devatātim urāṇaḥ saṁ rātibhir vasubhir yajñam aśret ||
3.019.03a sa tejīyasā manasā tvota uta śikṣa svapatyasya śikṣoḥ |
3.019.03c agne rāyo nṛtamasya prabhūtau bhūyāma te suṣṭutayaś ca vasvaḥ ||
3.019.04a bhūrīṇi hi tve dadhire anīkāgne devasya yajyavo janāsaḥ |
3.019.04c sa ā vaha devatātiṁ yaviṣṭha śardho yad adya divyaṁ yajāsi ||
3.019.05a yat tvā hotāram anajan miyedhe niṣādayanto yajathāya devāḥ |
3.019.05c sa tvaṁ no agne 'viteha bodhy adhi śravāṁsi dhehi nas tanūṣu ||

3.020.01a agnim uṣasam aśvinā dadhikrāṁ vyuṣṭiṣu havate vahnir ukthaiḥ |
3.020.01c sujyotiṣo naḥ śṛṇvantu devāḥ sajoṣaso adhvaraṁ vāvaśānāḥ ||
3.020.02a agne trī te vājinā trī ṣadhasthā tisras te jihvā ṛtajāta pūrvīḥ |
3.020.02c tisra u te tanvo devavātās tābhir naḥ pāhi giro aprayucchan ||
3.020.03a agne bhūrīṇi tava jātavedo deva svadhāvo 'mṛtasya nāma |
3.020.03c yāś ca māyā māyināṁ viśvaminva tve pūrvīḥ saṁdadhuḥ pṛṣṭabandho ||
3.020.04a agnir netā bhaga iva kṣitīnāṁ daivīnāṁ deva ṛtupā ṛtāvā |
3.020.04c sa vṛtrahā sanayo viśvavedāḥ parṣad viśvāti duritā gṛṇantam ||
3.020.05a dadhikrām agnim uṣasaṁ ca devīm bṛhaspatiṁ savitāraṁ ca devam |
3.020.05c aśvinā mitrāvaruṇā bhagaṁ ca vasūn rudrām̐ ādityām̐ iha huve ||

3.021.01a imaṁ no yajñam amṛteṣu dhehīmā havyā jātavedo juṣasva |
3.021.01c stokānām agne medaso ghṛtasya hotaḥ prāśāna prathamo niṣadya ||
3.021.02a ghṛtavantaḥ pāvaka te stokāḥ ścotanti medasaḥ |
3.021.02c svadharman devavītaye śreṣṭhaṁ no dhehi vāryam ||
3.021.03a tubhyaṁ stokā ghṛtaścuto 'gne viprāya santya |
3.021.03c ṛṣiḥ śreṣṭhaḥ sam idhyase yajñasya prāvitā bhava ||
3.021.04a tubhyaṁ ścotanty adhrigo śacīvaḥ stokāso agne medaso ghṛtasya |
3.021.04c kaviśasto bṛhatā bhānunāgā havyā juṣasva medhira ||
3.021.05a ojiṣṭhaṁ te madhyato meda udbhṛtam pra te vayaṁ dadāmahe |
3.021.05c ścotanti te vaso stokā adhi tvaci prati tān devaśo vihi ||

3.022.01a ayaṁ so agnir yasmin somam indraḥ sutaṁ dadhe jaṭhare vāvaśānaḥ |
3.022.01c sahasriṇaṁ vājam atyaṁ na saptiṁ sasavān san stūyase jātavedaḥ ||
3.022.02a agne yat te divi varcaḥ pṛthivyāṁ yad oṣadhīṣv apsv ā yajatra |
3.022.02c yenāntarikṣam urv ātatantha tveṣaḥ sa bhānur arṇavo nṛcakṣāḥ ||
3.022.03a agne divo arṇam acchā jigāsy acchā devām̐ ūciṣe dhiṣṇyā ye |
3.022.03c yā rocane parastāt sūryasya yāś cāvastād upatiṣṭhanta āpaḥ ||
3.022.04a purīṣyāso agnayaḥ prāvaṇebhiḥ sajoṣasaḥ |
3.022.04c juṣantāṁ yajñam adruho 'namīvā iṣo mahīḥ ||
3.022.05a iḻām agne purudaṁsaṁ saniṁ goḥ śaśvattamaṁ havamānāya sādha |
3.022.05c syān naḥ sūnus tanayo vijāvāgne sā te sumatir bhūtv asme ||

3.023.01a nirmathitaḥ sudhita ā sadhasthe yuvā kavir adhvarasya praṇetā |
3.023.01c jūryatsv agnir ajaro vaneṣv atrā dadhe amṛtaṁ jātavedāḥ ||
3.023.02a amanthiṣṭām bhāratā revad agniṁ devaśravā devavātaḥ sudakṣam |
3.023.02c agne vi paśya bṛhatābhi rāyeṣāṁ no netā bhavatād anu dyūn ||
3.023.03a daśa kṣipaḥ pūrvyaṁ sīm ajījanan sujātam mātṛṣu priyam |
3.023.03c agniṁ stuhi daivavātaṁ devaśravo yo janānām asad vaśī ||
3.023.04a ni tvā dadhe vara ā pṛthivyā iḻāyās pade sudinatve ahnām |
3.023.04c dṛṣadvatyām mānuṣa āpayāyāṁ sarasvatyāṁ revad agne didīhi ||
3.023.05a iḻām agne purudaṁsaṁ saniṁ goḥ śaśvattamaṁ havamānāya sādha |
3.023.05c syān naḥ sūnus tanayo vijāvāgne sā te sumatir bhūtv asme ||

3.024.01a agne sahasva pṛtanā abhimātīr apāsya |
3.024.01c duṣṭaras tarann arātīr varco dhā yajñavāhase ||
3.024.02a agna iḻā sam idhyase vītihotro amartyaḥ |
3.024.02c juṣasva sū no adhvaram ||
3.024.03a agne dyumnena jāgṛve sahasaḥ sūnav āhuta |
3.024.03c edam barhiḥ sado mama ||
3.024.04a agne viśvebhir agnibhir devebhir mahayā giraḥ |
3.024.04c yajñeṣu ya u cāyavaḥ ||
3.024.05a agne dā dāśuṣe rayiṁ vīravantam parīṇasam |
3.024.05c śiśīhi naḥ sūnumataḥ ||

3.025.01a agne divaḥ sūnur asi pracetās tanā pṛthivyā uta viśvavedāḥ |
3.025.01c ṛdhag devām̐ iha yajā cikitvaḥ ||
3.025.02a agniḥ sanoti vīryāṇi vidvān sanoti vājam amṛtāya bhūṣan |
3.025.02c sa no devām̐ eha vahā purukṣo ||
3.025.03a agnir dyāvāpṛthivī viśvajanye ā bhāti devī amṛte amūraḥ |
3.025.03c kṣayan vājaiḥ puruścandro namobhiḥ ||
3.025.04a agna indraś ca dāśuṣo duroṇe sutāvato yajñam ihopa yātam |
3.025.04c amardhantā somapeyāya devā ||
3.025.05a agne apāṁ sam idhyase duroṇe nityaḥ sūno sahaso jātavedaḥ |
3.025.05c sadhasthāni mahayamāna ūtī ||

3.026.01a vaiśvānaram manasāgniṁ nicāyyā haviṣmanto anuṣatyaṁ svarvidam |
3.026.01c sudānuṁ devaṁ rathiraṁ vasūyavo gīrbhī raṇvaṁ kuśikāso havāmahe ||
3.026.02a taṁ śubhram agnim avase havāmahe vaiśvānaram mātariśvānam ukthyam |
3.026.02c bṛhaspatim manuṣo devatātaye vipraṁ śrotāram atithiṁ raghuṣyadam ||
3.026.03a aśvo na krandañ janibhiḥ sam idhyate vaiśvānaraḥ kuśikebhir yuge-yuge |
3.026.03c sa no agniḥ suvīryaṁ svaśvyaṁ dadhātu ratnam amṛteṣu jāgṛviḥ ||
3.026.04a pra yantu vājās taviṣībhir agnayaḥ śubhe sammiślāḥ pṛṣatīr ayukṣata |
3.026.04c bṛhadukṣo maruto viśvavedasaḥ pra vepayanti parvatām̐ adābhyāḥ ||
3.026.05a agniśriyo maruto viśvakṛṣṭaya ā tveṣam ugram ava īmahe vayam |
3.026.05c te svānino rudriyā varṣanirṇijaḥ siṁhā na heṣakratavaḥ sudānavaḥ ||
3.026.06a vrātaṁ-vrātaṁ gaṇaṁ-gaṇaṁ suśastibhir agner bhāmam marutām oja īmahe |
3.026.06c pṛṣadaśvāso anavabhrarādhaso gantāro yajñaṁ vidatheṣu dhīrāḥ ||
3.026.07a agnir asmi janmanā jātavedā ghṛtam me cakṣur amṛtam ma āsan |
3.026.07c arkas tridhātū rajaso vimāno 'jasro gharmo havir asmi nāma ||
3.026.08a tribhiḥ pavitrair apupod dhy arkaṁ hṛdā matiṁ jyotir anu prajānan |
3.026.08c varṣiṣṭhaṁ ratnam akṛta svadhābhir ād id dyāvāpṛthivī pary apaśyat ||
3.026.09a śatadhāram utsam akṣīyamāṇaṁ vipaścitam pitaraṁ vaktvānām |
3.026.09c meḻim madantam pitror upasthe taṁ rodasī pipṛtaṁ satyavācam ||

3.027.01a pra vo vājā abhidyavo haviṣmanto ghṛtācyā |
3.027.01c devāñ jigāti sumnayuḥ ||
3.027.02a īḻe agniṁ vipaścitaṁ girā yajñasya sādhanam |
3.027.02c śruṣṭīvānaṁ dhitāvānam ||
3.027.03a agne śakema te vayaṁ yamaṁ devasya vājinaḥ |
3.027.03c ati dveṣāṁsi tarema ||
3.027.04a samidhyamāno adhvare 'gniḥ pāvaka īḍyaḥ |
3.027.04c śociṣkeśas tam īmahe ||
3.027.05a pṛthupājā amartyo ghṛtanirṇik svāhutaḥ |
3.027.05c agnir yajñasya havyavāṭ ||
3.027.06a taṁ sabādho yatasruca itthā dhiyā yajñavantaḥ |
3.027.06c ā cakrur agnim ūtaye ||
3.027.07a hotā devo amartyaḥ purastād eti māyayā |
3.027.07c vidathāni pracodayan ||
3.027.08a vājī vājeṣu dhīyate 'dhvareṣu pra ṇīyate |
3.027.08c vipro yajñasya sādhanaḥ ||
3.027.09a dhiyā cakre vareṇyo bhūtānāṁ garbham ā dadhe |
3.027.09c dakṣasya pitaraṁ tanā ||
3.027.10a ni tvā dadhe vareṇyaṁ dakṣasyeḻā sahaskṛta |
3.027.10c agne sudītim uśijam ||
3.027.11a agniṁ yanturam apturam ṛtasya yoge vanuṣaḥ |
3.027.11c viprā vājaiḥ sam indhate ||
3.027.12a ūrjo napātam adhvare dīdivāṁsam upa dyavi |
3.027.12c agnim īḻe kavikratum ||
3.027.13a īḻenyo namasyas tiras tamāṁsi darśataḥ |
3.027.13c sam agnir idhyate vṛṣā ||
3.027.14a vṛṣo agniḥ sam idhyate 'śvo na devavāhanaḥ |
3.027.14c taṁ haviṣmanta īḻate ||
3.027.15a vṛṣaṇaṁ tvā vayaṁ vṛṣan vṛṣaṇaḥ sam idhīmahi |
3.027.15c agne dīdyatam bṛhat ||

3.028.01a agne juṣasva no haviḥ puroḻāśaṁ jātavedaḥ |
3.028.01c prātaḥsāve dhiyāvaso ||
3.028.02a puroḻā agne pacatas tubhyaṁ vā ghā pariṣkṛtaḥ |
3.028.02c taṁ juṣasva yaviṣṭhya ||
3.028.03a agne vīhi puroḻāśam āhutaṁ tiroahnyam |
3.028.03c sahasaḥ sūnur asy adhvare hitaḥ ||
3.028.04a mādhyaṁdine savane jātavedaḥ puroḻāśam iha kave juṣasva |
3.028.04c agne yahvasya tava bhāgadheyaṁ na pra minanti vidatheṣu dhīrāḥ ||
3.028.05a agne tṛtīye savane hi kāniṣaḥ puroḻāśaṁ sahasaḥ sūnav āhutam |
3.028.05c athā deveṣv adhvaraṁ vipanyayā dhā ratnavantam amṛteṣu jāgṛvim ||
3.028.06a agne vṛdhāna āhutim puroḻāśaṁ jātavedaḥ |
3.028.06c juṣasva tiroahnyam ||

3.029.01a astīdam adhimanthanam asti prajananaṁ kṛtam |
3.029.01c etāṁ viśpatnīm ā bharāgnim manthāma pūrvathā ||
3.029.02a araṇyor nihito jātavedā garbha iva sudhito garbhiṇīṣu |
3.029.02c dive-diva īḍyo jāgṛvadbhir haviṣmadbhir manuṣyebhir agniḥ ||
3.029.03a uttānāyām ava bharā cikitvān sadyaḥ pravītā vṛṣaṇaṁ jajāna |
3.029.03c aruṣastūpo ruśad asya pāja iḻāyās putro vayune 'janiṣṭa ||
3.029.04a iḻāyās tvā pade vayaṁ nābhā pṛthivyā adhi |
3.029.04c jātavedo ni dhīmahy agne havyāya voḻhave ||
3.029.05a manthatā naraḥ kavim advayantam pracetasam amṛtaṁ supratīkam |
3.029.05c yajñasya ketum prathamam purastād agniṁ naro janayatā suśevam ||
3.029.06a yadī manthanti bāhubhir vi rocate 'śvo na vājy aruṣo vaneṣv ā |
3.029.06c citro na yāmann aśvinor anivṛtaḥ pari vṛṇakty aśmanas tṛṇā dahan ||
3.029.07a jāto agnī rocate cekitāno vājī vipraḥ kaviśastaḥ sudānuḥ |
3.029.07c yaṁ devāsa īḍyaṁ viśvavidaṁ havyavāham adadhur adhvareṣu ||
3.029.08a sīda hotaḥ sva u loke cikitvān sādayā yajñaṁ sukṛtasya yonau |
3.029.08c devāvīr devān haviṣā yajāsy agne bṛhad yajamāne vayo dhāḥ ||
3.029.09a kṛṇota dhūmaṁ vṛṣaṇaṁ sakhāyo 'sredhanta itana vājam accha |
3.029.09c ayam agniḥ pṛtanāṣāṭ suvīro yena devāso asahanta dasyūn ||
3.029.10a ayaṁ te yonir ṛtviyo yato jāto arocathāḥ |
3.029.10c taṁ jānann agna ā sīdāthā no vardhayā giraḥ ||
3.029.11a tanūnapād ucyate garbha āsuro narāśaṁso bhavati yad vijāyate |
3.029.11c mātariśvā yad amimīta mātari vātasya sargo abhavat sarīmaṇi ||
3.029.12a sunirmathā nirmathitaḥ sunidhā nihitaḥ kaviḥ |
3.029.12c agne svadhvarā kṛṇu devān devayate yaja ||
3.029.13a ajījanann amṛtam martyāso 'sremāṇaṁ taraṇiṁ vīḻujambham |
3.029.13c daśa svasāro agruvaḥ samīcīḥ pumāṁsaṁ jātam abhi saṁ rabhante ||
3.029.14a pra saptahotā sanakād arocata mātur upasthe yad aśocad ūdhani |
3.029.14c na ni miṣati suraṇo dive-dive yad asurasya jaṭharād ajāyata ||
3.029.15a amitrāyudho marutām iva prayāḥ prathamajā brahmaṇo viśvam id viduḥ |
3.029.15c dyumnavad brahma kuśikāsa erira eka-eko dame agniṁ sam īdhire ||
3.029.16a yad adya tvā prayati yajñe asmin hotaś cikitvo 'vṛṇīmahīha |
3.029.16c dhruvam ayā dhruvam utāśamiṣṭhāḥ prajānan vidvām̐ upa yāhi somam ||

3.030.01a icchanti tvā somyāsaḥ sakhāyaḥ sunvanti somaṁ dadhati prayāṁsi |
3.030.01c titikṣante abhiśastiṁ janānām indra tvad ā kaś cana hi praketaḥ ||
3.030.02a na te dūre paramā cid rajāṁsy ā tu pra yāhi harivo haribhyām |
3.030.02c sthirāya vṛṣṇe savanā kṛtemā yuktā grāvāṇaḥ samidhāne agnau ||
3.030.03a indraḥ suśipro maghavā tarutro mahāvrātas tuvikūrmir ṛghāvān |
3.030.03c yad ugro dhā bādhito martyeṣu kva tyā te vṛṣabha vīryāṇi ||
3.030.04a tvaṁ hi ṣmā cyāvayann acyutāny eko vṛtrā carasi jighnamānaḥ |
3.030.04c tava dyāvāpṛthivī parvatāso 'nu vratāya nimiteva tasthuḥ ||
3.030.05a utābhaye puruhūta śravobhir eko dṛḻham avado vṛtrahā san |
3.030.05c ime cid indra rodasī apāre yat saṁgṛbhṇā maghavan kāśir it te ||
3.030.06a pra sū ta indra pravatā haribhyām pra te vajraḥ pramṛṇann etu śatrūn |
3.030.06c jahi pratīco anūcaḥ parāco viśvaṁ satyaṁ kṛṇuhi viṣṭam astu ||
3.030.07a yasmai dhāyur adadhā martyāyābhaktaṁ cid bhajate gehyaṁ saḥ |
3.030.07c bhadrā ta indra sumatir ghṛtācī sahasradānā puruhūta rātiḥ ||
3.030.08a sahadānum puruhūta kṣiyantam ahastam indra sam piṇak kuṇārum |
3.030.08c abhi vṛtraṁ vardhamānam piyārum apādam indra tavasā jaghantha ||
3.030.09a ni sāmanām iṣirām indra bhūmim mahīm apārāṁ sadane sasattha |
3.030.09c astabhnād dyāṁ vṛṣabho antarikṣam arṣantv āpas tvayeha prasūtāḥ ||
3.030.10a alātṛṇo vala indra vrajo goḥ purā hantor bhayamāno vy āra |
3.030.10c sugān patho akṛṇon niraje gāḥ prāvan vāṇīḥ puruhūtaṁ dhamantīḥ ||
3.030.11a eko dve vasumatī samīcī indra ā paprau pṛthivīm uta dyām |
3.030.11c utāntarikṣād abhi naḥ samīka iṣo rathīḥ sayujaḥ śūra vājān ||
3.030.12a diśaḥ sūryo na mināti pradiṣṭā dive-dive haryaśvaprasūtāḥ |
3.030.12c saṁ yad ānaḻ adhvana ād id aśvair vimocanaṁ kṛṇute tat tv asya ||
3.030.13a didṛkṣanta uṣaso yāmann aktor vivasvatyā mahi citram anīkam |
3.030.13c viśve jānanti mahinā yad āgād indrasya karma sukṛtā purūṇi ||
3.030.14a mahi jyotir nihitaṁ vakṣaṇāsv āmā pakvaṁ carati bibhratī gauḥ |
3.030.14c viśvaṁ svādma sambhṛtam usriyāyāṁ yat sīm indro adadhād bhojanāya ||
3.030.15a indra dṛhya yāmakośā abhūvan yajñāya śikṣa gṛṇate sakhibhyaḥ |
3.030.15c durmāyavo durevā martyāso niṣaṅgiṇo ripavo hantvāsaḥ ||
3.030.16a saṁ ghoṣaḥ śṛṇve 'vamair amitrair jahī ny eṣv aśaniṁ tapiṣṭhām |
3.030.16c vṛścem adhastād vi rujā sahasva jahi rakṣo maghavan randhayasva ||
3.030.17a ud vṛha rakṣaḥ sahamūlam indra vṛścā madhyam praty agraṁ śṛṇīhi |
3.030.17c ā kīvataḥ salalūkaṁ cakartha brahmadviṣe tapuṣiṁ hetim asya ||
3.030.18a svastaye vājibhiś ca praṇetaḥ saṁ yan mahīr iṣa āsatsi pūrvīḥ |
3.030.18c rāyo vantāro bṛhataḥ syāmāsme astu bhaga indra prajāvān ||
3.030.19a ā no bhara bhagam indra dyumantaṁ ni te deṣṇasya dhīmahi prareke |
3.030.19c ūrva iva paprathe kāmo asme tam ā pṛṇa vasupate vasūnām ||
3.030.20a imaṁ kāmam mandayā gobhir aśvaiś candravatā rādhasā paprathaś ca |
3.030.20c svaryavo matibhis tubhyaṁ viprā indrāya vāhaḥ kuśikāso akran ||
3.030.21a ā no gotrā dardṛhi gopate gāḥ sam asmabhyaṁ sanayo yantu vājāḥ |
3.030.21c divakṣā asi vṛṣabha satyaśuṣmo 'smabhyaṁ su maghavan bodhi godāḥ ||
3.030.22a śunaṁ huvema maghavānam indram asmin bhare nṛtamaṁ vājasātau |
3.030.22c śṛṇvantam ugram ūtaye samatsu ghnantaṁ vṛtrāṇi saṁjitaṁ dhanānām ||

3.031.01a śāsad vahnir duhitur naptyaṁ gād vidvām̐ ṛtasya dīdhitiṁ saparyan |
3.031.01c pitā yatra duhituḥ sekam ṛñjan saṁ śagmyena manasā dadhanve ||
3.031.02a na jāmaye tānvo riktham āraik cakāra garbhaṁ sanitur nidhānam |
3.031.02c yadī mātaro janayanta vahnim anyaḥ kartā sukṛtor anya ṛndhan ||
3.031.03a agnir jajñe juhvā rejamāno mahas putrām̐ aruṣasya prayakṣe |
3.031.03c mahān garbho mahy ā jātam eṣām mahī pravṛd dharyaśvasya yajñaiḥ ||
3.031.04a abhi jaitrīr asacanta spṛdhānam mahi jyotis tamaso nir ajānan |
3.031.04c taṁ jānatīḥ praty ud āyann uṣāsaḥ patir gavām abhavad eka indraḥ ||
3.031.05a vīḻau satīr abhi dhīrā atṛndan prācāhinvan manasā sapta viprāḥ |
3.031.05c viśvām avindan pathyām ṛtasya prajānann it tā namasā viveśa ||
3.031.06a vidad yadī saramā rugṇam adrer mahi pāthaḥ pūrvyaṁ sadhryak kaḥ |
3.031.06c agraṁ nayat supady akṣarāṇām acchā ravam prathamā jānatī gāt ||
3.031.07a agacchad u vipratamaḥ sakhīyann asūdayat sukṛte garbham adriḥ |
3.031.07c sasāna maryo yuvabhir makhasyann athābhavad aṅgirāḥ sadyo arcan ||
3.031.08a sataḥ-sataḥ pratimānam purobhūr viśvā veda janimā hanti śuṣṇam |
3.031.08c pra ṇo divaḥ padavīr gavyur arcan sakhā sakhīm̐r amuñcan nir avadyāt ||
3.031.09a ni gavyatā manasā sedur arkaiḥ kṛṇvānāso amṛtatvāya gātum |
3.031.09c idaṁ cin nu sadanam bhūry eṣāṁ yena māsām̐ asiṣāsann ṛtena ||
3.031.10a sampaśyamānā amadann abhi svam payaḥ pratnasya retaso dughānāḥ |
3.031.10c vi rodasī atapad ghoṣa eṣāṁ jāte niṣṭhām adadhur goṣu vīrān ||
3.031.11a sa jātebhir vṛtrahā sed u havyair ud usriyā asṛjad indro arkaiḥ |
3.031.11c urūcy asmai ghṛtavad bharantī madhu svādma duduhe jenyā gauḥ ||
3.031.12a pitre cic cakruḥ sadanaṁ sam asmai mahi tviṣīmat sukṛto vi hi khyan |
3.031.12c viṣkabhnantaḥ skambhanenā janitrī āsīnā ūrdhvaṁ rabhasaṁ vi minvan ||
3.031.13a mahī yadi dhiṣaṇā śiśnathe dhāt sadyovṛdhaṁ vibhvaṁ rodasyoḥ |
3.031.13c giro yasminn anavadyāḥ samīcīr viśvā indrāya taviṣīr anuttāḥ ||
3.031.14a mahy ā te sakhyaṁ vaśmi śaktīr ā vṛtraghne niyuto yanti pūrvīḥ |
3.031.14c mahi stotram ava āganma sūrer asmākaṁ su maghavan bodhi gopāḥ ||
3.031.15a mahi kṣetram puru ścandraṁ vividvān ād it sakhibhyaś carathaṁ sam airat |
3.031.15c indro nṛbhir ajanad dīdyānaḥ sākaṁ sūryam uṣasaṁ gātum agnim ||
3.031.16a apaś cid eṣa vibhvo damūnāḥ pra sadhrīcīr asṛjad viśvaścandrāḥ |
3.031.16c madhvaḥ punānāḥ kavibhiḥ pavitrair dyubhir hinvanty aktubhir dhanutrīḥ ||
3.031.17a anu kṛṣṇe vasudhitī jihāte ubhe sūryasya maṁhanā yajatre |
3.031.17c pari yat te mahimānaṁ vṛjadhyai sakhāya indra kāmyā ṛjipyāḥ ||
3.031.18a patir bhava vṛtrahan sūnṛtānāṁ girāṁ viśvāyur vṛṣabho vayodhāḥ |
3.031.18c ā no gahi sakhyebhiḥ śivebhir mahān mahībhir ūtibhiḥ saraṇyan ||
3.031.19a tam aṅgirasvan namasā saparyan navyaṁ kṛṇomi sanyase purājām |
3.031.19c druho vi yāhi bahulā adevīḥ svaś ca no maghavan sātaye dhāḥ ||
3.031.20a mihaḥ pāvakāḥ pratatā abhūvan svasti naḥ pipṛhi pāram āsām |
3.031.20c indra tvaṁ rathiraḥ pāhi no riṣo makṣū-makṣū kṛṇuhi gojito naḥ ||
3.031.21a adediṣṭa vṛtrahā gopatir gā antaḥ kṛṣṇām̐ aruṣair dhāmabhir gāt |
3.031.21c pra sūnṛtā diśamāna ṛtena duraś ca viśvā avṛṇod apa svāḥ ||
3.031.22a śunaṁ huvema maghavānam indram asmin bhare nṛtamaṁ vājasātau |
3.031.22c śṛṇvantam ugram ūtaye samatsu ghnantaṁ vṛtrāṇi saṁjitaṁ dhanānām ||

3.032.01a indra somaṁ somapate pibemam mādhyaṁdinaṁ savanaṁ cāru yat te |
3.032.01c prapruthyā śipre maghavann ṛjīṣin vimucyā harī iha mādayasva ||
3.032.02a gavāśiram manthinam indra śukram pibā somaṁ rarimā te madāya |
3.032.02c brahmakṛtā mārutenā gaṇena sajoṣā rudrais tṛpad ā vṛṣasva ||
3.032.03a ye te śuṣmaṁ ye taviṣīm avardhann arcanta indra marutas ta ojaḥ |
3.032.03c mādhyaṁdine savane vajrahasta pibā rudrebhiḥ sagaṇaḥ suśipra ||
3.032.04a ta in nv asya madhumad vivipra indrasya śardho maruto ya āsan |
3.032.04c yebhir vṛtrasyeṣito vivedāmarmaṇo manyamānasya marma ||
3.032.05a manuṣvad indra savanaṁ juṣāṇaḥ pibā somaṁ śaśvate vīryāya |
3.032.05c sa ā vavṛtsva haryaśva yajñaiḥ saraṇyubhir apo arṇā sisarṣi ||
3.032.06a tvam apo yad dha vṛtraṁ jaghanvām̐ atyām̐ iva prāsṛjaḥ sartavājau |
3.032.06c śayānam indra caratā vadhena vavrivāṁsam pari devīr adevam ||
3.032.07a yajāma in namasā vṛddham indram bṛhantam ṛṣvam ajaraṁ yuvānam |
3.032.07c yasya priye mamatur yajñiyasya na rodasī mahimānam mamāte ||
3.032.08a indrasya karma sukṛtā purūṇi vratāni devā na minanti viśve |
3.032.08c dādhāra yaḥ pṛthivīṁ dyām utemāṁ jajāna sūryam uṣasaṁ sudaṁsāḥ ||
3.032.09a adrogha satyaṁ tava tan mahitvaṁ sadyo yaj jāto apibo ha somam |
3.032.09c na dyāva indra tavasas ta ojo nāhā na māsāḥ śarado varanta ||
3.032.10a tvaṁ sadyo apibo jāta indra madāya somam parame vyoman |
3.032.10c yad dha dyāvāpṛthivī āviveśīr athābhavaḥ pūrvyaḥ kārudhāyāḥ ||
3.032.11a ahann ahim pariśayānam arṇa ojāyamānaṁ tuvijāta tavyān |
3.032.11c na te mahitvam anu bhūd adha dyaur yad anyayā sphigyā kṣām avasthāḥ ||
3.032.12a yajño hi ta indra vardhano bhūd uta priyaḥ sutasomo miyedhaḥ |
3.032.12c yajñena yajñam ava yajñiyaḥ san yajñas te vajram ahihatya āvat ||
3.032.13a yajñenendram avasā cakre arvāg ainaṁ sumnāya navyase vavṛtyām |
3.032.13c yaḥ stomebhir vāvṛdhe pūrvyebhir yo madhyamebhir uta nūtanebhiḥ ||
3.032.14a viveṣa yan mā dhiṣaṇā jajāna stavai purā pāryād indram ahnaḥ |
3.032.14c aṁhaso yatra pīparad yathā no nāveva yāntam ubhaye havante ||
3.032.15a āpūrṇo asya kalaśaḥ svāhā sekteva kośaṁ sisice pibadhyai |
3.032.15c sam u priyā āvavṛtran madāya pradakṣiṇid abhi somāsa indram ||
3.032.16a na tvā gabhīraḥ puruhūta sindhur nādrayaḥ pari ṣanto varanta |
3.032.16c itthā sakhibhya iṣito yad indrā dṛḻhaṁ cid arujo gavyam ūrvam ||
3.032.17a śunaṁ huvema maghavānam indram asmin bhare nṛtamaṁ vājasātau |
3.032.17c śṛṇvantam ugram ūtaye samatsu ghnantaṁ vṛtrāṇi saṁjitaṁ dhanānām ||

3.033.01a pra parvatānām uśatī upasthād aśve iva viṣite hāsamāne |
3.033.01c gāveva śubhre mātarā rihāṇe vipāṭ chutudrī payasā javete ||
3.033.02a indreṣite prasavam bhikṣamāṇe acchā samudraṁ rathyeva yāthaḥ |
3.033.02c samārāṇe ūrmibhiḥ pinvamāne anyā vām anyām apy eti śubhre ||
3.033.03a acchā sindhum mātṛtamām ayāsaṁ vipāśam urvīṁ subhagām aganma |
3.033.03c vatsam iva mātarā saṁrihāṇe samānaṁ yonim anu saṁcarantī ||
3.033.04a enā vayam payasā pinvamānā anu yoniṁ devakṛtaṁ carantīḥ |
3.033.04c na vartave prasavaḥ sargataktaḥ kiṁyur vipro nadyo johavīti ||
3.033.05a ramadhvam me vacase somyāya ṛtāvarīr upa muhūrtam evaiḥ |
3.033.05c pra sindhum acchā bṛhatī manīṣāvasyur ahve kuśikasya sūnuḥ ||
3.033.06a indro asmām̐ aradad vajrabāhur apāhan vṛtram paridhiṁ nadīnām |
3.033.06c devo 'nayat savitā supāṇis tasya vayam prasave yāma urvīḥ ||
3.033.07a pravācyaṁ śaśvadhā vīryaṁ tad indrasya karma yad ahiṁ vivṛścat |
3.033.07c vi vajreṇa pariṣado jaghānāyann āpo 'yanam icchamānāḥ ||
3.033.08a etad vaco jaritar māpi mṛṣṭhā ā yat te ghoṣān uttarā yugāni |
3.033.08c uktheṣu kāro prati no juṣasva mā no ni kaḥ puruṣatrā namas te ||
3.033.09a o ṣu svasāraḥ kārave śṛṇota yayau vo dūrād anasā rathena |
3.033.09c ni ṣū namadhvam bhavatā supārā adhoakṣāḥ sindhavaḥ srotyābhiḥ ||
3.033.10a ā te kāro śṛṇavāmā vacāṁsi yayātha dūrād anasā rathena |
3.033.10c ni te naṁsai pīpyāneva yoṣā maryāyeva kanyā śaśvacai te ||
3.033.11a yad aṅga tvā bharatāḥ saṁtareyur gavyan grāma iṣita indrajūtaḥ |
3.033.11c arṣād aha prasavaḥ sargatakta ā vo vṛṇe sumatiṁ yajñiyānām ||
3.033.12a atāriṣur bharatā gavyavaḥ sam abhakta vipraḥ sumatiṁ nadīnām |
3.033.12c pra pinvadhvam iṣayantīḥ surādhā ā vakṣaṇāḥ pṛṇadhvaṁ yāta śībham ||
3.033.13a ud va ūrmiḥ śamyā hantv āpo yoktrāṇi muñcata |
3.033.13c māduṣkṛtau vyenasāghnyau śūnam āratām ||

3.034.01a indraḥ pūrbhid ātirad dāsam arkair vidadvasur dayamāno vi śatrūn |
3.034.01c brahmajūtas tanvā vāvṛdhāno bhūridātra āpṛṇad rodasī ubhe ||
3.034.02a makhasya te taviṣasya pra jūtim iyarmi vācam amṛtāya bhūṣan |
3.034.02c indra kṣitīnām asi mānuṣīṇāṁ viśāṁ daivīnām uta pūrvayāvā ||
3.034.03a indro vṛtram avṛṇoc chardhanītiḥ pra māyinām aminād varpaṇītiḥ |
3.034.03c ahan vyaṁsam uśadhag vaneṣv āvir dhenā akṛṇod rāmyāṇām ||
3.034.04a indraḥ svarṣā janayann ahāni jigāyośigbhiḥ pṛtanā abhiṣṭiḥ |
3.034.04c prārocayan manave ketum ahnām avindaj jyotir bṛhate raṇāya ||
3.034.05a indras tujo barhaṇā ā viveśa nṛvad dadhāno naryā purūṇi |
3.034.05c acetayad dhiya imā jaritre premaṁ varṇam atirac chukram āsām ||
3.034.06a maho mahāni panayanty asyendrasya karma sukṛtā purūṇi |
3.034.06c vṛjanena vṛjinān sam pipeṣa māyābhir dasyūm̐r abhibhūtyojāḥ ||
3.034.07a yudhendro mahnā varivaś cakāra devebhyaḥ satpatiś carṣaṇiprāḥ |
3.034.07c vivasvataḥ sadane asya tāni viprā ukthebhiḥ kavayo gṛṇanti ||
3.034.08a satrāsāhaṁ vareṇyaṁ sahodāṁ sasavāṁsaṁ svar apaś ca devīḥ |
3.034.08c sasāna yaḥ pṛthivīṁ dyām utemām indram madanty anu dhīraṇāsaḥ ||
3.034.09a sasānātyām̐ uta sūryaṁ sasānendraḥ sasāna purubhojasaṁ gām |
3.034.09c hiraṇyayam uta bhogaṁ sasāna hatvī dasyūn prāryaṁ varṇam āvat ||
3.034.10a indra oṣadhīr asanod ahāni vanaspatīm̐r asanod antarikṣam |
3.034.10c bibheda valaṁ nunude vivāco 'thābhavad damitābhikratūnām ||
3.034.11a śunaṁ huvema maghavānam indram asmin bhare nṛtamaṁ vājasātau |
3.034.11c śṛṇvantam ugram ūtaye samatsu ghnantaṁ vṛtrāṇi saṁjitaṁ dhanānām ||

3.035.01a tiṣṭhā harī ratha ā yujyamānā yāhi vāyur na niyuto no accha |
3.035.01c pibāsy andho abhisṛṣṭo asme indra svāhā rarimā te madāya ||
3.035.02a upājirā puruhūtāya saptī harī rathasya dhūrṣv ā yunajmi |
3.035.02c dravad yathā sambhṛtaṁ viśvataś cid upemaṁ yajñam ā vahāta indram ||
3.035.03a upo nayasva vṛṣaṇā tapuṣpotem ava tvaṁ vṛṣabha svadhāvaḥ |
3.035.03c grasetām aśvā vi muceha śoṇā dive-dive sadṛśīr addhi dhānāḥ ||
3.035.04a brahmaṇā te brahmayujā yunajmi harī sakhāyā sadhamāda āśū |
3.035.04c sthiraṁ rathaṁ sukham indrādhitiṣṭhan prajānan vidvām̐ upa yāhi somam ||
3.035.05a mā te harī vṛṣaṇā vītapṛṣṭhā ni rīraman yajamānāso anye |
3.035.05c atyāyāhi śaśvato vayaṁ te 'raṁ sutebhiḥ kṛṇavāma somaiḥ ||
3.035.06a tavāyaṁ somas tvam ehy arvāṅ chaśvattamaṁ sumanā asya pāhi |
3.035.06c asmin yajñe barhiṣy ā niṣadyā dadhiṣvemaṁ jaṭhara indum indra ||
3.035.07a stīrṇaṁ te barhiḥ suta indra somaḥ kṛtā dhānā attave te haribhyām |
3.035.07c tadokase puruśākāya vṛṣṇe marutvate tubhyaṁ rātā havīṁṣi ||
3.035.08a imaṁ naraḥ parvatās tubhyam āpaḥ sam indra gobhir madhumantam akran |
3.035.08c tasyāgatyā sumanā ṛṣva pāhi prajānan vidvān pathyā anu svāḥ ||
3.035.09a yām̐ ābhajo maruta indra some ye tvām avardhann abhavan gaṇas te |
3.035.09c tebhir etaṁ sajoṣā vāvaśāno 'gneḥ piba jihvayā somam indra ||
3.035.10a indra piba svadhayā cit sutasyāgner vā pāhi jihvayā yajatra |
3.035.10c adhvaryor vā prayataṁ śakra hastād dhotur vā yajñaṁ haviṣo juṣasva ||
3.035.11a śunaṁ huvema maghavānam indram asmin bhare nṛtamaṁ vājasātau |
3.035.11c śṛṇvantam ugram ūtaye samatsu ghnantaṁ vṛtrāṇi saṁjitaṁ dhanānām ||

3.036.01a imām ū ṣu prabhṛtiṁ sātaye dhāḥ śaśvac-chaśvad ūtibhir yādamānaḥ |
3.036.01c sute-sute vāvṛdhe vardhanebhir yaḥ karmabhir mahadbhiḥ suśruto bhūt ||
3.036.02a indrāya somāḥ pradivo vidānā ṛbhur yebhir vṛṣaparvā vihāyāḥ |
3.036.02c prayamyamānān prati ṣū gṛbhāyendra piba vṛṣadhūtasya vṛṣṇaḥ ||
3.036.03a pibā vardhasva tava ghā sutāsa indra somāsaḥ prathamā uteme |
3.036.03c yathāpibaḥ pūrvyām̐ indra somām̐ evā pāhi panyo adyā navīyān ||
3.036.04a mahām̐ amatro vṛjane virapśy ugraṁ śavaḥ patyate dhṛṣṇv ojaḥ |
3.036.04c nāha vivyāca pṛthivī canainaṁ yat somāso haryaśvam amandan ||
3.036.05a mahām̐ ugro vāvṛdhe vīryāya samācakre vṛṣabhaḥ kāvyena |
3.036.05c indro bhago vājadā asya gāvaḥ pra jāyante dakṣiṇā asya pūrvīḥ ||
3.036.06a pra yat sindhavaḥ prasavaṁ yathāyann āpaḥ samudraṁ rathyeva jagmuḥ |
3.036.06c ataś cid indraḥ sadaso varīyān yad īṁ somaḥ pṛṇati dugdho aṁśuḥ ||
3.036.07a samudreṇa sindhavo yādamānā indrāya somaṁ suṣutam bharantaḥ |
3.036.07c aṁśuṁ duhanti hastino bharitrair madhvaḥ punanti dhārayā pavitraiḥ ||
3.036.08a hradā iva kukṣayaḥ somadhānāḥ sam ī vivyāca savanā purūṇi |
3.036.08c annā yad indraḥ prathamā vy āśa vṛtraṁ jaghanvām̐ avṛṇīta somam ||
3.036.09a ā tū bhara mākir etat pari ṣṭhād vidmā hi tvā vasupatiṁ vasūnām |
3.036.09c indra yat te māhinaṁ datram asty asmabhyaṁ tad dharyaśva pra yandhi ||
3.036.10a asme pra yandhi maghavann ṛjīṣinn indra rāyo viśvavārasya bhūreḥ |
3.036.10c asme śataṁ śarado jīvase dhā asme vīrāñ chaśvata indra śiprin ||
3.036.11a śunaṁ huvema maghavānam indram asmin bhare nṛtamaṁ vājasātau |
3.036.11c śṛṇvantam ugram ūtaye samatsu ghnantaṁ vṛtrāṇi saṁjitaṁ dhanānām ||

3.037.01a vārtrahatyāya śavase pṛtanāṣāhyāya ca |
3.037.01c indra tvā vartayāmasi ||
3.037.02a arvācīnaṁ su te mana uta cakṣuḥ śatakrato |
3.037.02c indra kṛṇvantu vāghataḥ ||
3.037.03a nāmāni te śatakrato viśvābhir gīrbhir īmahe |
3.037.03c indrābhimātiṣāhye ||
3.037.04a puruṣṭutasya dhāmabhiḥ śatena mahayāmasi |
3.037.04c indrasya carṣaṇīdhṛtaḥ ||
3.037.05a indraṁ vṛtrāya hantave puruhūtam upa bruve |
3.037.05c bhareṣu vājasātaye ||
3.037.06a vājeṣu sāsahir bhava tvām īmahe śatakrato |
3.037.06c indra vṛtrāya hantave ||
3.037.07a dyumneṣu pṛtanājye pṛtsutūrṣu śravaḥsu ca |
3.037.07c indra sākṣvābhimātiṣu ||
3.037.08a śuṣmintamaṁ na ūtaye dyumninam pāhi jāgṛvim |
3.037.08c indra somaṁ śatakrato ||
3.037.09a indriyāṇi śatakrato yā te janeṣu pañcasu |
3.037.09c indra tāni ta ā vṛṇe ||
3.037.10a agann indra śravo bṛhad dyumnaṁ dadhiṣva duṣṭaram |
3.037.10c ut te śuṣmaṁ tirāmasi ||
3.037.11a arvāvato na ā gahy atho śakra parāvataḥ |
3.037.11c u loko yas te adriva indreha tata ā gahi ||

3.038.01a abhi taṣṭeva dīdhayā manīṣām atyo na vājī sudhuro jihānaḥ |
3.038.01c abhi priyāṇi marmṛśat parāṇi kavīm̐r icchāmi saṁdṛśe sumedhāḥ ||
3.038.02a inota pṛccha janimā kavīnām manodhṛtaḥ sukṛtas takṣata dyām |
3.038.02c imā u te praṇyo vardhamānā manovātā adha nu dharmaṇi gman ||
3.038.03a ni ṣīm id atra guhyā dadhānā uta kṣatrāya rodasī sam añjan |
3.038.03c sam mātrābhir mamire yemur urvī antar mahī samṛte dhāyase dhuḥ ||
3.038.04a ātiṣṭhantam pari viśve abhūṣañ chriyo vasānaś carati svarociḥ |
3.038.04c mahat tad vṛṣṇo asurasya nāmā viśvarūpo amṛtāni tasthau ||
3.038.05a asūta pūrvo vṛṣabho jyāyān imā asya śurudhaḥ santi pūrvīḥ |
3.038.05c divo napātā vidathasya dhībhiḥ kṣatraṁ rājānā pradivo dadhāthe ||
3.038.06a trīṇi rājānā vidathe purūṇi pari viśvāni bhūṣathaḥ sadāṁsi |
3.038.06c apaśyam atra manasā jaganvān vrate gandharvām̐ api vāyukeśān ||
3.038.07a tad in nv asya vṛṣabhasya dhenor ā nāmabhir mamire sakmyaṁ goḥ |
3.038.07c anyad-anyad asuryaṁ vasānā ni māyino mamire rūpam asmin ||
3.038.08a tad in nv asya savitur nakir me hiraṇyayīm amatiṁ yām aśiśret |
3.038.08c ā suṣṭutī rodasī viśvaminve apīva yoṣā janimāni vavre ||
3.038.09a yuvam pratnasya sādhatho maho yad daivī svastiḥ pari ṇaḥ syātam |
3.038.09c gopājihvasya tasthuṣo virūpā viśve paśyanti māyinaḥ kṛtāni ||
3.038.10a śunaṁ huvema maghavānam indram asmin bhare nṛtamaṁ vājasātau |
3.038.10c śṛṇvantam ugram ūtaye samatsu ghnantaṁ vṛtrāṇi saṁjitaṁ dhanānām ||

3.039.01a indram matir hṛda ā vacyamānācchā patiṁ stomataṣṭā jigāti |
3.039.01c yā jāgṛvir vidathe śasyamānendra yat te jāyate viddhi tasya ||
3.039.02a divaś cid ā pūrvyā jāyamānā vi jāgṛvir vidathe śasyamānā |
3.039.02c bhadrā vastrāṇy arjunā vasānā seyam asme sanajā pitryā dhīḥ ||
3.039.03a yamā cid atra yamasūr asūta jihvāyā agram patad ā hy asthāt |
3.039.03c vapūṁṣi jātā mithunā sacete tamohanā tapuṣo budhna etā ||
3.039.04a nakir eṣāṁ ninditā martyeṣu ye asmākam pitaro goṣu yodhāḥ |
3.039.04c indra eṣāṁ dṛṁhitā māhināvān ud gotrāṇi sasṛje daṁsanāvān ||
3.039.05a sakhā ha yatra sakhibhir navagvair abhijñv ā satvabhir gā anugman |
3.039.05c satyaṁ tad indro daśabhir daśagvaiḥ sūryaṁ viveda tamasi kṣiyantam ||
3.039.06a indro madhu sambhṛtam usriyāyām padvad viveda śaphavan name goḥ |
3.039.06c guhā hitaṁ guhyaṁ gūḻham apsu haste dadhe dakṣiṇe dakṣiṇāvān ||
3.039.07a jyotir vṛṇīta tamaso vijānann āre syāma duritād abhīke |
3.039.07c imā giraḥ somapāḥ somavṛddha juṣasvendra purutamasya kāroḥ ||
3.039.08a jyotir yajñāya rodasī anu ṣyād āre syāma duritasya bhūreḥ |
3.039.08c bhūri cid dhi tujato martyasya supārāso vasavo barhaṇāvat ||
3.039.09a śunaṁ huvema maghavānam indram asmin bhare nṛtamaṁ vājasātau |
3.039.09c śṛṇvantam ugram ūtaye samatsu ghnantaṁ vṛtrāṇi saṁjitaṁ dhanānām ||

3.040.01a indra tvā vṛṣabhaṁ vayaṁ sute some havāmahe |
3.040.01c sa pāhi madhvo andhasaḥ ||
3.040.02a indra kratuvidaṁ sutaṁ somaṁ harya puruṣṭuta |
3.040.02c pibā vṛṣasva tātṛpim ||
3.040.03a indra pra ṇo dhitāvānaṁ yajñaṁ viśvebhir devebhiḥ |
3.040.03c tira stavāna viśpate ||
3.040.04a indra somāḥ sutā ime tava pra yanti satpate |
3.040.04c kṣayaṁ candrāsa indavaḥ ||
3.040.05a dadhiṣvā jaṭhare sutaṁ somam indra vareṇyam |
3.040.05c tava dyukṣāsa indavaḥ ||
3.040.06a girvaṇaḥ pāhi naḥ sutam madhor dhārābhir ajyase |
3.040.06c indra tvādātam id yaśaḥ ||
3.040.07a abhi dyumnāni vanina indraṁ sacante akṣitā |
3.040.07c pītvī somasya vāvṛdhe ||
3.040.08a arvāvato na ā gahi parāvataś ca vṛtrahan |
3.040.08c imā juṣasva no giraḥ ||
3.040.09a yad antarā parāvatam arvāvataṁ ca hūyase |
3.040.09c indreha tata ā gahi ||

3.041.01a ā tū na indra madryag ghuvānaḥ somapītaye |
3.041.01c haribhyāṁ yāhy adrivaḥ ||
3.041.02a satto hotā na ṛtviyas tistire barhir ānuṣak |
3.041.02c ayujran prātar adrayaḥ ||
3.041.03a imā brahma brahmavāhaḥ kriyanta ā barhiḥ sīda |
3.041.03c vīhi śūra puroḻāśam ||
3.041.04a rārandhi savaneṣu ṇa eṣu stomeṣu vṛtrahan |
3.041.04c uktheṣv indra girvaṇaḥ ||
3.041.05a matayaḥ somapām uruṁ rihanti śavasas patim |
3.041.05c indraṁ vatsaṁ na mātaraḥ ||
3.041.06a sa mandasvā hy andhaso rādhase tanvā mahe |
3.041.06c na stotāraṁ nide karaḥ ||
3.041.07a vayam indra tvāyavo haviṣmanto jarāmahe |
3.041.07c uta tvam asmayur vaso ||
3.041.08a māre asmad vi mumuco haripriyārvāṅ yāhi |
3.041.08c indra svadhāvo matsveha ||
3.041.09a arvāñcaṁ tvā sukhe rathe vahatām indra keśinā |
3.041.09c ghṛtasnū barhir āsade ||

3.042.01a upa naḥ sutam ā gahi somam indra gavāśiram |
3.042.01c haribhyāṁ yas te asmayuḥ ||
3.042.02a tam indra madam ā gahi barhiḥṣṭhāṁ grāvabhiḥ sutam |
3.042.02c kuvin nv asya tṛpṇavaḥ ||
3.042.03a indram itthā giro mamācchāgur iṣitā itaḥ |
3.042.03c āvṛte somapītaye ||
3.042.04a indraṁ somasya pītaye stomair iha havāmahe |
3.042.04c ukthebhiḥ kuvid āgamat ||
3.042.05a indra somāḥ sutā ime tān dadhiṣva śatakrato |
3.042.05c jaṭhare vājinīvaso ||
3.042.06a vidmā hi tvā dhanaṁjayaṁ vājeṣu dadhṛṣaṁ kave |
3.042.06c adhā te sumnam īmahe ||
3.042.07a imam indra gavāśiraṁ yavāśiraṁ ca naḥ piba |
3.042.07c āgatyā vṛṣabhiḥ sutam ||
3.042.08a tubhyed indra sva okye somaṁ codāmi pītaye |
3.042.08c eṣa rārantu te hṛdi ||
3.042.09a tvāṁ sutasya pītaye pratnam indra havāmahe |
3.042.09c kuśikāso avasyavaḥ ||

3.043.01a ā yāhy arvāṅ upa vandhureṣṭhās taved anu pradivaḥ somapeyam |
3.043.01c priyā sakhāyā vi mucopa barhis tvām ime havyavāho havante ||
3.043.02a ā yāhi pūrvīr ati carṣaṇīr ām̐ arya āśiṣa upa no haribhyām |
3.043.02c imā hi tvā matayaḥ stomataṣṭā indra havante sakhyaṁ juṣāṇāḥ ||
3.043.03a ā no yajñaṁ namovṛdhaṁ sajoṣā indra deva haribhir yāhi tūyam |
3.043.03c ahaṁ hi tvā matibhir johavīmi ghṛtaprayāḥ sadhamāde madhūnām ||
3.043.04a ā ca tvām etā vṛṣaṇā vahāto harī sakhāyā sudhurā svaṅgā |
3.043.04c dhānāvad indraḥ savanaṁ juṣāṇaḥ sakhā sakhyuḥ śṛṇavad vandanāni ||
3.043.05a kuvin mā gopāṁ karase janasya kuvid rājānam maghavann ṛjīṣin |
3.043.05c kuvin ma ṛṣim papivāṁsaṁ sutasya kuvin me vasvo amṛtasya śikṣāḥ ||
3.043.06a ā tvā bṛhanto harayo yujānā arvāg indra sadhamādo vahantu |
3.043.06c pra ye dvitā diva ṛñjanty ātāḥ susammṛṣṭāso vṛṣabhasya mūrāḥ ||
3.043.07a indra piba vṛṣadhūtasya vṛṣṇa ā yaṁ te śyena uśate jabhāra |
3.043.07c yasya made cyāvayasi pra kṛṣṭīr yasya made apa gotrā vavartha ||
3.043.08a śunaṁ huvema maghavānam indram asmin bhare nṛtamaṁ vājasātau |
3.043.08c śṛṇvantam ugram ūtaye samatsu ghnantaṁ vṛtrāṇi saṁjitaṁ dhanānām ||

3.044.01a ayaṁ te astu haryataḥ soma ā haribhiḥ sutaḥ |
3.044.01c juṣāṇa indra haribhir na ā gahy ā tiṣṭha haritaṁ ratham ||
3.044.02a haryann uṣasam arcayaḥ sūryaṁ haryann arocayaḥ |
3.044.02c vidvām̐ś cikitvān haryaśva vardhasa indra viśvā abhi śriyaḥ ||
3.044.03a dyām indro haridhāyasam pṛthivīṁ harivarpasam |
3.044.03c adhārayad dharitor bhūri bhojanaṁ yayor antar hariś carat ||
3.044.04a jajñāno harito vṛṣā viśvam ā bhāti rocanam |
3.044.04c haryaśvo haritaṁ dhatta āyudham ā vajram bāhvor harim ||
3.044.05a indro haryantam arjunaṁ vajraṁ śukrair abhīvṛtam |
3.044.05c apāvṛṇod dharibhir adribhiḥ sutam ud gā haribhir ājata ||

3.045.01a ā mandrair indra haribhir yāhi mayūraromabhiḥ |
3.045.01c mā tvā ke cin ni yaman viṁ na pāśino 'ti dhanveva tām̐ ihi ||
3.045.02a vṛtrakhādo valaṁrujaḥ purāṁ darmo apām ajaḥ |
3.045.02c sthātā rathasya haryor abhisvara indro dṛḻhā cid ārujaḥ ||
3.045.03a gambhīrām̐ udadhīm̐r iva kratum puṣyasi gā iva |
3.045.03c pra sugopā yavasaṁ dhenavo yathā hradaṁ kulyā ivāśata ||
3.045.04a ā nas tujaṁ rayim bharāṁśaṁ na pratijānate |
3.045.04c vṛkṣam pakvam phalam aṅkīva dhūnuhīndra sampāraṇaṁ vasu ||
3.045.05a svayur indra svarāḻ asi smaddiṣṭiḥ svayaśastaraḥ |
3.045.05c sa vāvṛdhāna ojasā puruṣṭuta bhavā naḥ suśravastamaḥ ||

3.046.01a yudhmasya te vṛṣabhasya svarāja ugrasya yūnaḥ sthavirasya ghṛṣveḥ |
3.046.01c ajūryato vajriṇo vīryāṇīndra śrutasya mahato mahāni ||
3.046.02a mahām̐ asi mahiṣa vṛṣṇyebhir dhanaspṛd ugra sahamāno anyān |
3.046.02c eko viśvasya bhuvanasya rājā sa yodhayā ca kṣayayā ca janān ||
3.046.03a pra mātrābhī ririce rocamānaḥ pra devebhir viśvato apratītaḥ |
3.046.03c pra majmanā diva indraḥ pṛthivyāḥ proror maho antarikṣād ṛjīṣī ||
3.046.04a uruṁ gabhīraṁ januṣābhy ugraṁ viśvavyacasam avatam matīnām |
3.046.04c indraṁ somāsaḥ pradivi sutāsaḥ samudraṁ na sravata ā viśanti ||
3.046.05a yaṁ somam indra pṛthivīdyāvā garbhaṁ na mātā bibhṛtas tvāyā |
3.046.05c taṁ te hinvanti tam u te mṛjanty adhvaryavo vṛṣabha pātavā u ||

3.047.01a marutvām̐ indra vṛṣabho raṇāya pibā somam anuṣvadham madāya |
3.047.01c ā siñcasva jaṭhare madhva ūrmiṁ tvaṁ rājāsi pradivaḥ sutānām ||
3.047.02a sajoṣā indra sagaṇo marudbhiḥ somam piba vṛtrahā śūra vidvān |
3.047.02c jahi śatrūm̐r apa mṛdho nudasvāthābhayaṁ kṛṇuhi viśvato naḥ ||
3.047.03a uta ṛtubhir ṛtupāḥ pāhi somam indra devebhiḥ sakhibhiḥ sutaṁ naḥ |
3.047.03c yām̐ ābhajo maruto ye tvānv ahan vṛtram adadhus tubhyam ojaḥ ||
3.047.04a ye tvāhihatye maghavann avardhan ye śāmbare harivo ye gaviṣṭau |
3.047.04c ye tvā nūnam anumadanti viprāḥ pibendra somaṁ sagaṇo marudbhiḥ ||
3.047.05a marutvantaṁ vṛṣabhaṁ vāvṛdhānam akavāriṁ divyaṁ śāsam indram |
3.047.05c viśvāsāham avase nūtanāyograṁ sahodām iha taṁ huvema ||

3.048.01a sadyo ha jāto vṛṣabhaḥ kanīnaḥ prabhartum āvad andhasaḥ sutasya |
3.048.01c sādhoḥ piba pratikāmaṁ yathā te rasāśiraḥ prathamaṁ somyasya ||
3.048.02a yaj jāyathās tad ahar asya kāme 'ṁśoḥ pīyūṣam apibo giriṣṭhām |
3.048.02c taṁ te mātā pari yoṣā janitrī mahaḥ pitur dama āsiñcad agre ||
3.048.03a upasthāya mātaram annam aiṭṭa tigmam apaśyad abhi somam ūdhaḥ |
3.048.03c prayāvayann acarad gṛtso anyān mahāni cakre purudhapratīkaḥ ||
3.048.04a ugras turāṣāḻ abhibhūtyojā yathāvaśaṁ tanvaṁ cakra eṣaḥ |
3.048.04c tvaṣṭāram indro januṣābhibhūyāmuṣyā somam apibac camūṣu ||
3.048.05a śunaṁ huvema maghavānam indram asmin bhare nṛtamaṁ vājasātau |
3.048.05c śṛṇvantam ugram ūtaye samatsu ghnantaṁ vṛtrāṇi saṁjitaṁ dhanānām ||

3.049.01a śaṁsā mahām indraṁ yasmin viśvā ā kṛṣṭayaḥ somapāḥ kāmam avyan |
3.049.01c yaṁ sukratuṁ dhiṣaṇe vibhvataṣṭaṁ ghanaṁ vṛtrāṇāṁ janayanta devāḥ ||
3.049.02a yaṁ nu nakiḥ pṛtanāsu svarājaṁ dvitā tarati nṛtamaṁ hariṣṭhām |
3.049.02c inatamaḥ satvabhir yo ha śūṣaiḥ pṛthujrayā aminād āyur dasyoḥ ||
3.049.03a sahāvā pṛtsu taraṇir nārvā vyānaśī rodasī mehanāvān |
3.049.03c bhago na kāre havyo matīnām piteva cāruḥ suhavo vayodhāḥ ||
3.049.04a dhartā divo rajasas pṛṣṭa ūrdhvo ratho na vāyur vasubhir niyutvān |
3.049.04c kṣapāṁ vastā janitā sūryasya vibhaktā bhāgaṁ dhiṣaṇeva vājam ||
3.049.05a śunaṁ huvema maghavānam indram asmin bhare nṛtamaṁ vājasātau |
3.049.05c śṛṇvantam ugram ūtaye samatsu ghnantaṁ vṛtrāṇi saṁjitaṁ dhanānām ||

3.050.01a indraḥ svāhā pibatu yasya soma āgatyā tumro vṛṣabho marutvān |
3.050.01c oruvyacāḥ pṛṇatām ebhir annair āsya havis tanvaḥ kāmam ṛdhyāḥ ||
3.050.02a ā te saparyū javase yunajmi yayor anu pradivaḥ śruṣṭim āvaḥ |
3.050.02c iha tvā dheyur harayaḥ suśipra pibā tv asya suṣutasya cāroḥ ||
3.050.03a gobhir mimikṣuṁ dadhire supāram indraṁ jyaiṣṭhyāya dhāyase gṛṇānāḥ |
3.050.03c mandānaḥ somam papivām̐ ṛjīṣin sam asmabhyam purudhā gā iṣaṇya ||
3.050.04a imaṁ kāmam mandayā gobhir aśvaiś candravatā rādhasā paprathaś ca |
3.050.04c svaryavo matibhis tubhyaṁ viprā indrāya vāhaḥ kuśikāso akran ||
3.050.05a śunaṁ huvema maghavānam indram asmin bhare nṛtamaṁ vājasātau |
3.050.05c śṛṇvantam ugram ūtaye samatsu ghnantaṁ vṛtrāṇi saṁjitaṁ dhanānām ||

3.051.01a carṣaṇīdhṛtam maghavānam ukthyam indraṁ giro bṛhatīr abhy anūṣata |
3.051.01c vāvṛdhānam puruhūtaṁ suvṛktibhir amartyaṁ jaramāṇaṁ dive-dive ||
3.051.02a śatakratum arṇavaṁ śākinaṁ naraṁ giro ma indram upa yanti viśvataḥ |
3.051.02c vājasanim pūrbhidaṁ tūrṇim apturaṁ dhāmasācam abhiṣācaṁ svarvidam ||
3.051.03a ākare vasor jaritā panasyate 'nehasaḥ stubha indro duvasyati |
3.051.03c vivasvataḥ sadana ā hi pipriye satrāsāham abhimātihanaṁ stuhi ||
3.051.04a nṛṇām u tvā nṛtamaṁ gīrbhir ukthair abhi pra vīram arcatā sabādhaḥ |
3.051.04c saṁ sahase purumāyo jihīte namo asya pradiva eka īśe ||
3.051.05a pūrvīr asya niṣṣidho martyeṣu purū vasūni pṛthivī bibharti |
3.051.05c indrāya dyāva oṣadhīr utāpo rayiṁ rakṣanti jīrayo vanāni ||
3.051.06a tubhyam brahmāṇi gira indra tubhyaṁ satrā dadhire harivo juṣasva |
3.051.06c bodhy āpir avaso nūtanasya sakhe vaso jaritṛbhyo vayo dhāḥ ||
3.051.07a indra marutva iha pāhi somaṁ yathā śāryāte apibaḥ sutasya |
3.051.07c tava praṇītī tava śūra śarmann ā vivāsanti kavayaḥ suyajñāḥ ||
3.051.08a sa vāvaśāna iha pāhi somam marudbhir indra sakhibhiḥ sutaṁ naḥ |
3.051.08c jātaṁ yat tvā pari devā abhūṣan mahe bharāya puruhūta viśve ||
3.051.09a aptūrye maruta āpir eṣo 'mandann indram anu dātivārāḥ |
3.051.09c tebhiḥ sākam pibatu vṛtrakhādaḥ sutaṁ somaṁ dāśuṣaḥ sve sadhasthe ||
3.051.10a idaṁ hy anv ojasā sutaṁ rādhānām pate |
3.051.10c pibā tv asya girvaṇaḥ ||
3.051.11a yas te anu svadhām asat sute ni yaccha tanvam |
3.051.11c sa tvā mamattu somyam ||
3.051.12a pra te aśnotu kukṣyoḥ prendra brahmaṇā śiraḥ |
3.051.12c pra bāhū śūra rādhase ||

3.052.01a dhānāvantaṁ karambhiṇam apūpavantam ukthinam |
3.052.01c indra prātar juṣasva naḥ ||
3.052.02a puroḻāśam pacatyaṁ juṣasvendrā gurasva ca |
3.052.02c tubhyaṁ havyāni sisrate ||
3.052.03a puroḻāśaṁ ca no ghaso joṣayāse giraś ca naḥ |
3.052.03c vadhūyur iva yoṣaṇām ||
3.052.04a puroḻāśaṁ sanaśruta prātaḥsāve juṣasva naḥ |
3.052.04c indra kratur hi te bṛhan ||
3.052.05a mādhyaṁdinasya savanasya dhānāḥ puroḻāśam indra kṛṣveha cārum |
3.052.05c pra yat stotā jaritā tūrṇyartho vṛṣāyamāṇa upa gīrbhir īṭṭe ||
3.052.06a tṛtīye dhānāḥ savane puruṣṭuta puroḻāśam āhutam māmahasva naḥ |
3.052.06c ṛbhumantaṁ vājavantaṁ tvā kave prayasvanta upa śikṣema dhītibhiḥ ||
3.052.07a pūṣaṇvate te cakṛmā karambhaṁ harivate haryaśvāya dhānāḥ |
3.052.07c apūpam addhi sagaṇo marudbhiḥ somam piba vṛtrahā śūra vidvān ||
3.052.08a prati dhānā bharata tūyam asmai puroḻāśaṁ vīratamāya nṛṇām |
3.052.08c dive-dive sadṛśīr indra tubhyaṁ vardhantu tvā somapeyāya dhṛṣṇo ||

3.053.01a indrāparvatā bṛhatā rathena vāmīr iṣa ā vahataṁ suvīrāḥ |
3.053.01c vītaṁ havyāny adhvareṣu devā vardhethāṁ gīrbhir iḻayā madantā ||
3.053.02a tiṣṭhā su kam maghavan mā parā gāḥ somasya nu tvā suṣutasya yakṣi |
3.053.02c pitur na putraḥ sicam ā rabhe ta indra svādiṣṭhayā girā śacīvaḥ ||
3.053.03a śaṁsāvādhvaryo prati me gṛṇīhīndrāya vāhaḥ kṛṇavāva juṣṭam |
3.053.03c edam barhir yajamānasya sīdāthā ca bhūd uktham indrāya śastam ||
3.053.04a jāyed astam maghavan sed u yonis tad it tvā yuktā harayo vahantu |
3.053.04c yadā kadā ca sunavāma somam agniṣ ṭvā dūto dhanvāty accha ||
3.053.05a parā yāhi maghavann ā ca yāhīndra bhrātar ubhayatrā te artham |
3.053.05c yatrā rathasya bṛhato nidhānaṁ vimocanaṁ vājino rāsabhasya ||
3.053.06a apāḥ somam astam indra pra yāhi kalyāṇīr jāyā suraṇaṁ gṛhe te |
3.053.06c yatrā rathasya bṛhato nidhānaṁ vimocanaṁ vājino dakṣiṇāvat ||
3.053.07a ime bhojā aṅgiraso virūpā divas putrāso asurasya vīrāḥ |
3.053.07c viśvāmitrāya dadato maghāni sahasrasāve pra tiranta āyuḥ ||
3.053.08a rūpaṁ-rūpam maghavā bobhavīti māyāḥ kṛṇvānas tanvam pari svām |
3.053.08c trir yad divaḥ pari muhūrtam āgāt svair mantrair anṛtupā ṛtāvā ||
3.053.09a mahām̐ ṛṣir devajā devajūto 'stabhnāt sindhum arṇavaṁ nṛcakṣāḥ |
3.053.09c viśvāmitro yad avahat sudāsam apriyāyata kuśikebhir indraḥ ||
3.053.10a haṁsā iva kṛṇutha ślokam adribhir madanto gīrbhir adhvare sute sacā |
3.053.10c devebhir viprā ṛṣayo nṛcakṣaso vi pibadhvaṁ kuśikāḥ somyam madhu ||
3.053.11a upa preta kuśikāś cetayadhvam aśvaṁ rāye pra muñcatā sudāsaḥ |
3.053.11c rājā vṛtraṁ jaṅghanat prāg apāg udag athā yajāte vara ā pṛthivyāḥ ||
3.053.12a ya ime rodasī ubhe aham indram atuṣṭavam |
3.053.12c viśvāmitrasya rakṣati brahmedam bhārataṁ janam ||
3.053.13a viśvāmitrā arāsata brahmendrāya vajriṇe |
3.053.13c karad in naḥ surādhasaḥ ||
3.053.14a kiṁ te kṛṇvanti kīkaṭeṣu gāvo nāśiraṁ duhre na tapanti gharmam |
3.053.14c ā no bhara pramagandasya vedo naicāśākham maghavan randhayā naḥ ||
3.053.15a sasarparīr amatim bādhamānā bṛhan mimāya jamadagnidattā |
3.053.15c ā sūryasya duhitā tatāna śravo deveṣv amṛtam ajuryam ||
3.053.16a sasarparīr abharat tūyam ebhyo 'dhi śravaḥ pāñcajanyāsu kṛṣṭiṣu |
3.053.16c sā pakṣyā navyam āyur dadhānā yām me palastijamadagnayo daduḥ ||
3.053.17a sthirau gāvau bhavatāṁ vīḻur akṣo meṣā vi varhi mā yugaṁ vi śāri |
3.053.17c indraḥ pātalye dadatāṁ śarītor ariṣṭaneme abhi naḥ sacasva ||
3.053.18a balaṁ dhehi tanūṣu no balam indrānaḻutsu naḥ |
3.053.18c balaṁ tokāya tanayāya jīvase tvaṁ hi baladā asi ||
3.053.19a abhi vyayasva khadirasya sāram ojo dhehi spandane śiṁśapāyām |
3.053.19c akṣa vīḻo vīḻita vīḻayasva mā yāmād asmād ava jīhipo naḥ ||
3.053.20a ayam asmān vanaspatir mā ca hā mā ca rīriṣat |
3.053.20c svasty ā gṛhebhya āvasā ā vimocanāt ||
3.053.21a indrotibhir bahulābhir no adya yācchreṣṭhābhir maghavañ chūra jinva |
3.053.21c yo no dveṣṭy adharaḥ sas padīṣṭa yam u dviṣmas tam u prāṇo jahātu ||
3.053.22a paraśuṁ cid vi tapati śimbalaṁ cid vi vṛścati |
3.053.22c ukhā cid indra yeṣantī prayastā phenam asyati ||
3.053.23a na sāyakasya cikite janāso lodhaṁ nayanti paśu manyamānāḥ |
3.053.23c nāvājinaṁ vājinā hāsayanti na gardabham puro aśvān nayanti ||
3.053.24a ima indra bharatasya putrā apapitvaṁ cikitur na prapitvam |
3.053.24c hinvanty aśvam araṇaṁ na nityaṁ jyāvājam pari ṇayanty ājau ||

3.054.01a imam mahe vidathyāya śūṣaṁ śaśvat kṛtva īḍyāya pra jabhruḥ |
3.054.01c śṛṇotu no damyebhir anīkaiḥ śṛṇotv agnir divyair ajasraḥ ||
3.054.02a mahi mahe dive arcā pṛthivyai kāmo ma icchañ carati prajānan |
3.054.02c yayor ha stome vidatheṣu devāḥ saparyavo mādayante sacāyoḥ ||
3.054.03a yuvor ṛtaṁ rodasī satyam astu mahe ṣu ṇaḥ suvitāya pra bhūtam |
3.054.03c idaṁ dive namo agne pṛthivyai saparyāmi prayasā yāmi ratnam ||
3.054.04a uto hi vām pūrvyā āvividra ṛtāvarī rodasī satyavācaḥ |
3.054.04c naraś cid vāṁ samithe śūrasātau vavandire pṛthivi vevidānāḥ ||
3.054.05a ko addhā veda ka iha pra vocad devām̐ acchā pathyā kā sam eti |
3.054.05c dadṛśra eṣām avamā sadāṁsi pareṣu yā guhyeṣu vrateṣu ||
3.054.06a kavir nṛcakṣā abhi ṣīm acaṣṭa ṛtasya yonā vighṛte madantī |
3.054.06c nānā cakrāte sadanaṁ yathā veḥ samānena kratunā saṁvidāne ||
3.054.07a samānyā viyute dūreante dhruve pade tasthatur jāgarūke |
3.054.07c uta svasārā yuvatī bhavantī ād u bruvāte mithunāni nāma ||
3.054.08a viśved ete janimā saṁ vivikto maho devān bibhratī na vyathete |
3.054.08c ejad dhruvam patyate viśvam ekaṁ carat patatri viṣuṇaṁ vi jātam ||
3.054.09a sanā purāṇam adhy emy ārān mahaḥ pitur janitur jāmi tan naḥ |
3.054.09c devāso yatra panitāra evair urau pathi vyute tasthur antaḥ ||
3.054.10a imaṁ stomaṁ rodasī pra bravīmy ṛdūdarāḥ śṛṇavann agnijihvāḥ |
3.054.10c mitraḥ samrājo varuṇo yuvāna ādityāsaḥ kavayaḥ paprathānāḥ ||
3.054.11a hiraṇyapāṇiḥ savitā sujihvas trir ā divo vidathe patyamānaḥ |
3.054.11c deveṣu ca savitaḥ ślokam aśrer ād asmabhyam ā suva sarvatātim ||
3.054.12a sukṛt supāṇiḥ svavām̐ ṛtāvā devas tvaṣṭāvase tāni no dhāt |
3.054.12c pūṣaṇvanta ṛbhavo mādayadhvam ūrdhvagrāvāṇo adhvaram ataṣṭa ||
3.054.13a vidyudrathā maruta ṛṣṭimanto divo maryā ṛtajātā ayāsaḥ |
3.054.13c sarasvatī śṛṇavan yajñiyāso dhātā rayiṁ sahavīraṁ turāsaḥ ||
3.054.14a viṣṇuṁ stomāsaḥ purudasmam arkā bhagasyeva kāriṇo yāmani gman |
3.054.14c urukramaḥ kakuho yasya pūrvīr na mardhanti yuvatayo janitrīḥ ||
3.054.15a indro viśvair vīryaiḥ patyamāna ubhe ā paprau rodasī mahitvā |
3.054.15c puraṁdaro vṛtrahā dhṛṣṇuṣeṇaḥ saṁgṛbhyā na ā bharā bhūri paśvaḥ ||
3.054.16a nāsatyā me pitarā bandhupṛcchā sajātyam aśvinoś cāru nāma |
3.054.16c yuvaṁ hi stho rayidau no rayīṇāṁ dātraṁ rakṣethe akavair adabdhā ||
3.054.17a mahat tad vaḥ kavayaś cāru nāma yad dha devā bhavatha viśva indre |
3.054.17c sakha ṛbhubhiḥ puruhūta priyebhir imāṁ dhiyaṁ sātaye takṣatā naḥ ||
3.054.18a aryamā ṇo aditir yajñiyāso 'dabdhāni varuṇasya vratāni |
3.054.18c yuyota no anapatyāni gantoḥ prajāvān naḥ paśumām̐ astu gātuḥ ||
3.054.19a devānāṁ dūtaḥ purudha prasūto 'nāgān no vocatu sarvatātā |
3.054.19c śṛṇotu naḥ pṛthivī dyaur utāpaḥ sūryo nakṣatrair urv antarikṣam ||
3.054.20a śṛṇvantu no vṛṣaṇaḥ parvatāso dhruvakṣemāsa iḻayā madantaḥ |
3.054.20c ādityair no aditiḥ śṛṇotu yacchantu no marutaḥ śarma bhadram ||
3.054.21a sadā sugaḥ pitumām̐ astu panthā madhvā devā oṣadhīḥ sam pipṛkta |
3.054.21c bhago me agne sakhye na mṛdhyā ud rāyo aśyāṁ sadanam purukṣoḥ ||
3.054.22a svadasva havyā sam iṣo didīhy asmadryak sam mimīhi śravāṁsi |
3.054.22c viśvām̐ agne pṛtsu tāñ jeṣi śatrūn ahā viśvā sumanā dīdihī naḥ ||

3.055.01a uṣasaḥ pūrvā adha yad vyūṣur mahad vi jajñe akṣaram pade goḥ |
3.055.01c vratā devānām upa nu prabhūṣan mahad devānām asuratvam ekam ||
3.055.02a mo ṣū ṇo atra juhuranta devā mā pūrve agne pitaraḥ padajñāḥ |
3.055.02c purāṇyoḥ sadmanoḥ ketur antar mahad devānām asuratvam ekam ||
3.055.03a vi me purutrā patayanti kāmāḥ śamy acchā dīdye pūrvyāṇi |
3.055.03c samiddhe agnāv ṛtam id vadema mahad devānām asuratvam ekam ||
3.055.04a samāno rājā vibhṛtaḥ purutrā śaye śayāsu prayuto vanānu |
3.055.04c anyā vatsam bharati kṣeti mātā mahad devānām asuratvam ekam ||
3.055.05a ākṣit pūrvāsv aparā anūrut sadyo jātāsu taruṇīṣv antaḥ |
3.055.05c antarvatīḥ suvate apravītā mahad devānām asuratvam ekam ||
3.055.06a śayuḥ parastād adha nu dvimātābandhanaś carati vatsa ekaḥ |
3.055.06c mitrasya tā varuṇasya vratāni mahad devānām asuratvam ekam ||
3.055.07a dvimātā hotā vidatheṣu samrāḻ anv agraṁ carati kṣeti budhnaḥ |
3.055.07c pra raṇyāni raṇyavāco bharante mahad devānām asuratvam ekam ||
3.055.08a śūrasyeva yudhyato antamasya pratīcīnaṁ dadṛśe viśvam āyat |
3.055.08c antar matiś carati niṣṣidhaṁ gor mahad devānām asuratvam ekam ||
3.055.09a ni veveti palito dūta āsv antar mahām̐ś carati rocanena |
3.055.09c vapūṁṣi bibhrad abhi no vi caṣṭe mahad devānām asuratvam ekam ||
3.055.10a viṣṇur gopāḥ paramam pāti pāthaḥ priyā dhāmāny amṛtā dadhānaḥ |
3.055.10c agniṣ ṭā viśvā bhuvanāni veda mahad devānām asuratvam ekam ||
3.055.11a nānā cakrāte yamyā vapūṁṣi tayor anyad rocate kṛṣṇam anyat |
3.055.11c śyāvī ca yad aruṣī ca svasārau mahad devānām asuratvam ekam ||
3.055.12a mātā ca yatra duhitā ca dhenū sabardughe dhāpayete samīcī |
3.055.12c ṛtasya te sadasīḻe antar mahad devānām asuratvam ekam ||
3.055.13a anyasyā vatsaṁ rihatī mimāya kayā bhuvā ni dadhe dhenur ūdhaḥ |
3.055.13c ṛtasya sā payasāpinvateḻā mahad devānām asuratvam ekam ||
3.055.14a padyā vaste pururūpā vapūṁṣy ūrdhvā tasthau tryaviṁ rerihāṇā |
3.055.14c ṛtasya sadma vi carāmi vidvān mahad devānām asuratvam ekam ||
3.055.15a pade iva nihite dasme antas tayor anyad guhyam āvir anyat |
3.055.15c sadhrīcīnā pathyā sā viṣūcī mahad devānām asuratvam ekam ||
3.055.16a ā dhenavo dhunayantām aśiśvīḥ sabardughāḥ śaśayā apradugdhāḥ |
3.055.16c navyā-navyā yuvatayo bhavantīr mahad devānām asuratvam ekam ||
3.055.17a yad anyāsu vṛṣabho roravīti so anyasmin yūthe ni dadhāti retaḥ |
3.055.17c sa hi kṣapāvān sa bhagaḥ sa rājā mahad devānām asuratvam ekam ||
3.055.18a vīrasya nu svaśvyaṁ janāsaḥ pra nu vocāma vidur asya devāḥ |
3.055.18c ṣoḻhā yuktāḥ pañca-pañcā vahanti mahad devānām asuratvam ekam ||
3.055.19a devas tvaṣṭā savitā viśvarūpaḥ pupoṣa prajāḥ purudhā jajāna |
3.055.19c imā ca viśvā bhuvanāny asya mahad devānām asuratvam ekam ||
3.055.20a mahī sam airac camvā samīcī ubhe te asya vasunā nyṛṣṭe |
3.055.20c śṛṇve vīro vindamāno vasūni mahad devānām asuratvam ekam ||
3.055.21a imāṁ ca naḥ pṛthivīṁ viśvadhāyā upa kṣeti hitamitro na rājā |
3.055.21c puraḥsadaḥ śarmasado na vīrā mahad devānām asuratvam ekam ||
3.055.22a niṣṣidhvarīs ta oṣadhīr utāpo rayiṁ ta indra pṛthivī bibharti |
3.055.22c sakhāyas te vāmabhājaḥ syāma mahad devānām asuratvam ekam ||

3.056.01a na tā minanti māyino na dhīrā vratā devānām prathamā dhruvāṇi |
3.056.01c na rodasī adruhā vedyābhir na parvatā niname tasthivāṁsaḥ ||
3.056.02a ṣaḍ bhārām̐ eko acaran bibharty ṛtaṁ varṣiṣṭham upa gāva āguḥ |
3.056.02c tisro mahīr uparās tasthur atyā guhā dve nihite darśy ekā ||
3.056.03a tripājasyo vṛṣabho viśvarūpa uta tryudhā purudha prajāvān |
3.056.03c tryanīkaḥ patyate māhināvān sa retodhā vṛṣabhaḥ śaśvatīnām ||
3.056.04a abhīka āsām padavīr abodhy ādityānām ahve cāru nāma |
3.056.04c āpaś cid asmā aramanta devīḥ pṛthag vrajantīḥ pari ṣīm avṛñjan ||
3.056.05a trī ṣadhasthā sindhavas triḥ kavīnām uta trimātā vidatheṣu samrāṭ |
3.056.05c ṛtāvarīr yoṣaṇās tisro apyās trir ā divo vidathe patyamānāḥ ||
3.056.06a trir ā divaḥ savitar vāryāṇi dive-diva ā suva trir no ahnaḥ |
3.056.06c tridhātu rāya ā suvā vasūni bhaga trātar dhiṣaṇe sātaye dhāḥ ||
3.056.07a trir ā divaḥ savitā soṣavīti rājānā mitrāvaruṇā supāṇī |
3.056.07c āpaś cid asya rodasī cid urvī ratnam bhikṣanta savituḥ savāya ||
3.056.08a trir uttamā dūṇaśā rocanāni trayo rājanty asurasya vīrāḥ |
3.056.08c ṛtāvāna iṣirā dūḻabhāsas trir ā divo vidathe santu devāḥ ||

3.057.01a pra me vivikvām̐ avidan manīṣāṁ dhenuṁ carantīm prayutām agopām |
3.057.01c sadyaś cid yā duduhe bhūri dhāser indras tad agniḥ panitāro asyāḥ ||
3.057.02a indraḥ su pūṣā vṛṣaṇā suhastā divo na prītāḥ śaśayaṁ duduhre |
3.057.02c viśve yad asyāṁ raṇayanta devāḥ pra vo 'tra vasavaḥ sumnam aśyām ||
3.057.03a yā jāmayo vṛṣṇa icchanti śaktiṁ namasyantīr jānate garbham asmin |
3.057.03c acchā putraṁ dhenavo vāvaśānā mahaś caranti bibhrataṁ vapūṁṣi ||
3.057.04a acchā vivakmi rodasī sumeke grāvṇo yujāno adhvare manīṣā |
3.057.04c imā u te manave bhūrivārā ūrdhvā bhavanti darśatā yajatrāḥ ||
3.057.05a yā te jihvā madhumatī sumedhā agne deveṣūcyata urūcī |
3.057.05c tayeha viśvām̐ avase yajatrān ā sādaya pāyayā cā madhūni ||
3.057.06a yā te agne parvatasyeva dhārāsaścantī pīpayad deva citrā |
3.057.06c tām asmabhyam pramatiṁ jātavedo vaso rāsva sumatiṁ viśvajanyām ||

3.058.01a dhenuḥ pratnasya kāmyaṁ duhānāntaḥ putraś carati dakṣiṇāyāḥ |
3.058.01c ā dyotaniṁ vahati śubhrayāmoṣasaḥ stomo aśvināv ajīgaḥ ||
3.058.02a suyug vahanti prati vām ṛtenordhvā bhavanti pitareva medhāḥ |
3.058.02c jarethām asmad vi paṇer manīṣāṁ yuvor avaś cakṛmā yātam arvāk ||
3.058.03a suyugbhir aśvaiḥ suvṛtā rathena dasrāv imaṁ śṛṇutaṁ ślokam adreḥ |
3.058.03c kim aṅga vām praty avartiṁ gamiṣṭhāhur viprāso aśvinā purājāḥ ||
3.058.04a ā manyethām ā gataṁ kac cid evair viśve janāso aśvinā havante |
3.058.04c imā hi vāṁ goṛjīkā madhūni pra mitrāso na dadur usro agre ||
3.058.05a tiraḥ purū cid aśvinā rajāṁsy āṅgūṣo vām maghavānā janeṣu |
3.058.05c eha yātam pathibhir devayānair dasrāv ime vāṁ nidhayo madhūnām ||
3.058.06a purāṇam okaḥ sakhyaṁ śivaṁ vāṁ yuvor narā draviṇaṁ jahnāvyām |
3.058.06c punaḥ kṛṇvānāḥ sakhyā śivāni madhvā madema saha nū samānāḥ ||
3.058.07a aśvinā vāyunā yuvaṁ sudakṣā niyudbhiṣ ca sajoṣasā yuvānā |
3.058.07c nāsatyā tiroahnyaṁ juṣāṇā somam pibatam asridhā sudānū ||
3.058.08a aśvinā pari vām iṣaḥ purūcīr īyur gīrbhir yatamānā amṛdhrāḥ |
3.058.08c ratho ha vām ṛtajā adrijūtaḥ pari dyāvāpṛthivī yāti sadyaḥ ||
3.058.09a aśvinā madhuṣuttamo yuvākuḥ somas tam pātam ā gataṁ duroṇe |
3.058.09c ratho ha vām bhūri varpaḥ karikrat sutāvato niṣkṛtam āgamiṣṭhaḥ ||

3.059.01a mitro janān yātayati bruvāṇo mitro dādhāra pṛthivīm uta dyām |
3.059.01c mitraḥ kṛṣṭīr animiṣābhi caṣṭe mitrāya havyaṁ ghṛtavaj juhota ||
3.059.02a pra sa mitra marto astu prayasvān yas ta āditya śikṣati vratena |
3.059.02c na hanyate na jīyate tvoto nainam aṁho aśnoty antito na dūrāt ||
3.059.03a anamīvāsa iḻayā madanto mitajñavo varimann ā pṛthivyāḥ |
3.059.03c ādityasya vratam upakṣiyanto vayam mitrasya sumatau syāma ||
3.059.04a ayam mitro namasyaḥ suśevo rājā sukṣatro ajaniṣṭa vedhāḥ |
3.059.04c tasya vayaṁ sumatau yajñiyasyāpi bhadre saumanase syāma ||
3.059.05a mahām̐ ādityo namasopasadyo yātayajjano gṛṇate suśevaḥ |
3.059.05c tasmā etat panyatamāya juṣṭam agnau mitrāya havir ā juhota ||
3.059.06a mitrasya carṣaṇīdhṛto 'vo devasya sānasi |
3.059.06c dyumnaṁ citraśravastamam ||
3.059.07a abhi yo mahinā divam mitro babhūva saprathāḥ |
3.059.07c abhi śravobhiḥ pṛthivīm ||
3.059.08a mitrāya pañca yemire janā abhiṣṭiśavase |
3.059.08c sa devān viśvān bibharti ||
3.059.09a mitro deveṣv āyuṣu janāya vṛktabarhiṣe |
3.059.09c iṣa iṣṭavratā akaḥ ||

3.060.01a iheha vo manasā bandhutā nara uśijo jagmur abhi tāni vedasā |
3.060.01c yābhir māyābhiḥ pratijūtivarpasaḥ saudhanvanā yajñiyam bhāgam ānaśa ||
3.060.02a yābhiḥ śacībhiś camasām̐ apiṁśata yayā dhiyā gām ariṇīta carmaṇaḥ |
3.060.02c yena harī manasā niratakṣata tena devatvam ṛbhavaḥ sam ānaśa ||
3.060.03a indrasya sakhyam ṛbhavaḥ sam ānaśur manor napāto apaso dadhanvire |
3.060.03c saudhanvanāso amṛtatvam erire viṣṭvī śamībhiḥ sukṛtaḥ sukṛtyayā ||
3.060.04a indreṇa yātha sarathaṁ sute sacām̐ atho vaśānām bhavathā saha śriyā |
3.060.04c na vaḥ pratimai sukṛtāni vāghataḥ saudhanvanā ṛbhavo vīryāṇi ca ||
3.060.05a indra ṛbhubhir vājavadbhiḥ samukṣitaṁ sutaṁ somam ā vṛṣasvā gabhastyoḥ |
3.060.05c dhiyeṣito maghavan dāśuṣo gṛhe saudhanvanebhiḥ saha matsvā nṛbhiḥ ||
3.060.06a indra ṛbhumān vājavān matsveha no 'smin savane śacyā puruṣṭuta |
3.060.06c imāni tubhyaṁ svasarāṇi yemire vratā devānām manuṣaś ca dharmabhiḥ ||
3.060.07a indra ṛbhubhir vājibhir vājayann iha stomaṁ jaritur upa yāhi yajñiyam |
3.060.07c śataṁ ketebhir iṣirebhir āyave sahasraṇītho adhvarasya homani ||

3.061.01a uṣo vājena vājini pracetāḥ stomaṁ juṣasva gṛṇato maghoni |
3.061.01c purāṇī devi yuvatiḥ puraṁdhir anu vrataṁ carasi viśvavāre ||
3.061.02a uṣo devy amartyā vi bhāhi candrarathā sūnṛtā īrayantī |
3.061.02c ā tvā vahantu suyamāso aśvā hiraṇyavarṇām pṛthupājaso ye ||
3.061.03a uṣaḥ pratīcī bhuvanāni viśvordhvā tiṣṭhasy amṛtasya ketuḥ |
3.061.03c samānam arthaṁ caraṇīyamānā cakram iva navyasy ā vavṛtsva ||
3.061.04a ava syūmeva cinvatī maghony uṣā yāti svasarasya patnī |
3.061.04c svar janantī subhagā sudaṁsā āntād divaḥ papratha ā pṛthivyāḥ ||
3.061.05a acchā vo devīm uṣasaṁ vibhātīm pra vo bharadhvaṁ namasā suvṛktim |
3.061.05c ūrdhvam madhudhā divi pājo aśret pra rocanā ruruce raṇvasaṁdṛk ||
3.061.06a ṛtāvarī divo arkair abodhy ā revatī rodasī citram asthāt |
3.061.06c āyatīm agna uṣasaṁ vibhātīṁ vāmam eṣi draviṇam bhikṣamāṇaḥ ||
3.061.07a ṛtasya budhna uṣasām iṣaṇyan vṛṣā mahī rodasī ā viveśa |
3.061.07c mahī mitrasya varuṇasya māyā candreva bhānuṁ vi dadhe purutrā ||

3.062.01a imā u vām bhṛmayo manyamānā yuvāvate na tujyā abhūvan |
3.062.01c kva tyad indrāvaruṇā yaśo vāṁ yena smā sinam bharathaḥ sakhibhyaḥ ||
3.062.02a ayam u vām purutamo rayīyañ chaśvattamam avase johavīti |
3.062.02c sajoṣāv indrāvaruṇā marudbhir divā pṛthivyā śṛṇutaṁ havam me ||
3.062.03a asme tad indrāvaruṇā vasu ṣyād asme rayir marutaḥ sarvavīraḥ |
3.062.03c asmān varūtrīḥ śaraṇair avantv asmān hotrā bhāratī dakṣiṇābhiḥ ||
3.062.04a bṛhaspate juṣasva no havyāni viśvadevya |
3.062.04c rāsva ratnāni dāśuṣe ||
3.062.05a śucim arkair bṛhaspatim adhvareṣu namasyata |
3.062.05c anāmy oja ā cake ||
3.062.06a vṛṣabhaṁ carṣaṇīnāṁ viśvarūpam adābhyam |
3.062.06c bṛhaspatiṁ vareṇyam ||
3.062.07a iyaṁ te pūṣann āghṛṇe suṣṭutir deva navyasī |
3.062.07c asmābhis tubhyaṁ śasyate ||
3.062.08a tāṁ juṣasva giram mama vājayantīm avā dhiyam |
3.062.08c vadhūyur iva yoṣaṇām ||
3.062.09a yo viśvābhi vipaśyati bhuvanā saṁ ca paśyati |
3.062.09c sa naḥ pūṣāvitā bhuvat ||
3.062.10a tat savitur vareṇyam bhargo devasya dhīmahi |
3.062.10c dhiyo yo naḥ pracodayāt ||
3.062.11a devasya savitur vayaṁ vājayantaḥ puraṁdhyā |
3.062.11c bhagasya rātim īmahe ||
3.062.12a devaṁ naraḥ savitāraṁ viprā yajñaiḥ suvṛktibhiḥ |
3.062.12c namasyanti dhiyeṣitāḥ ||
3.062.13a somo jigāti gātuvid devānām eti niṣkṛtam |
3.062.13c ṛtasya yonim āsadam ||
3.062.14a somo asmabhyaṁ dvipade catuṣpade ca paśave |
3.062.14c anamīvā iṣas karat ||
3.062.15a asmākam āyur vardhayann abhimātīḥ sahamānaḥ |
3.062.15c somaḥ sadhastham āsadat ||
3.062.16a ā no mitrāvaruṇā ghṛtair gavyūtim ukṣatam |
3.062.16c madhvā rajāṁsi sukratū ||
3.062.17a uruśaṁsā namovṛdhā mahnā dakṣasya rājathaḥ |
3.062.17c drāghiṣṭhābhiḥ śucivratā ||
3.062.18a gṛṇānā jamadagninā yonāv ṛtasya sīdatam |
3.062.18c pātaṁ somam ṛtāvṛdhā ||


4.001.01a tvāṁ hy agne sadam it samanyavo devāso devam aratiṁ nyerira iti kratvā nyerire |
4.001.01c amartyaṁ yajata martyeṣv ā devam ādevaṁ janata pracetasaṁ viśvam ādevaṁ janata pracetasam ||
4.001.02a sa bhrātaraṁ varuṇam agna ā vavṛtsva devām̐ acchā sumatī yajñavanasaṁ jyeṣṭhaṁ yajñavanasam |
4.001.02c ṛtāvānam ādityaṁ carṣaṇīdhṛtaṁ rājānaṁ carṣaṇīdhṛtam ||
4.001.03a sakhe sakhāyam abhy ā vavṛtsvāśuṁ na cakraṁ rathyeva raṁhyāsmabhyaṁ dasma raṁhyā |
4.001.03c agne mṛḻīkaṁ varuṇe sacā vido marutsu viśvabhānuṣu |
4.001.03d tokāya tuje śuśucāna śaṁ kṛdhy asmabhyaṁ dasma śaṁ kṛdhi ||
4.001.04a tvaṁ no agne varuṇasya vidvān devasya heḻo 'va yāsisīṣṭhāḥ |
4.001.04c yajiṣṭho vahnitamaḥ śośucāno viśvā dveṣāṁsi pra mumugdhy asmat ||
4.001.05a sa tvaṁ no agne 'vamo bhavotī nediṣṭho asyā uṣaso vyuṣṭau |
4.001.05c ava yakṣva no varuṇaṁ rarāṇo vīhi mṛḻīkaṁ suhavo na edhi ||
4.001.06a asya śreṣṭhā subhagasya saṁdṛg devasya citratamā martyeṣu |
4.001.06c śuci ghṛtaṁ na taptam aghnyāyāḥ spārhā devasya maṁhaneva dhenoḥ ||
4.001.07a trir asya tā paramā santi satyā spārhā devasya janimāny agneḥ |
4.001.07c anante antaḥ parivīta āgāc chuciḥ śukro aryo rorucānaḥ ||
4.001.08a sa dūto viśved abhi vaṣṭi sadmā hotā hiraṇyaratho raṁsujihvaḥ |
4.001.08c rohidaśvo vapuṣyo vibhāvā sadā raṇvaḥ pitumatīva saṁsat ||
4.001.09a sa cetayan manuṣo yajñabandhuḥ pra tam mahyā raśanayā nayanti |
4.001.09c sa kṣety asya duryāsu sādhan devo martasya sadhanitvam āpa ||
4.001.10a sa tū no agnir nayatu prajānann acchā ratnaṁ devabhaktaṁ yad asya |
4.001.10c dhiyā yad viśve amṛtā akṛṇvan dyauṣ pitā janitā satyam ukṣan ||
4.001.11a sa jāyata prathamaḥ pastyāsu maho budhne rajaso asya yonau |
4.001.11b apād aśīrṣā guhamāno antāyoyuvāno vṛṣabhasya nīḻe ||
4.001.12a pra śardha ārta prathamaṁ vipanyām̐ ṛtasya yonā vṛṣabhasya nīḻe |
4.001.12c spārho yuvā vapuṣyo vibhāvā sapta priyāso 'janayanta vṛṣṇe ||
4.001.13a asmākam atra pitaro manuṣyā abhi pra sedur ṛtam āśuṣāṇāḥ |
4.001.13c aśmavrajāḥ sudughā vavre antar ud usrā ājann uṣaso huvānāḥ ||
4.001.14a te marmṛjata dadṛvāṁso adriṁ tad eṣām anye abhito vi vocan |
4.001.14c paśvayantrāso abhi kāram arcan vidanta jyotiś cakṛpanta dhībhiḥ ||
4.001.15a te gavyatā manasā dṛdhram ubdhaṁ gā yemānam pari ṣantam adrim |
4.001.15c dṛḻhaṁ naro vacasā daivyena vrajaṁ gomantam uśijo vi vavruḥ ||
4.001.16a te manvata prathamaṁ nāma dhenos triḥ sapta mātuḥ paramāṇi vindan |
4.001.16c taj jānatīr abhy anūṣata vrā āvir bhuvad aruṇīr yaśasā goḥ ||
4.001.17a neśat tamo dudhitaṁ rocata dyaur ud devyā uṣaso bhānur arta |
4.001.17c ā sūryo bṛhatas tiṣṭhad ajrām̐ ṛju marteṣu vṛjinā ca paśyan ||
4.001.18a ād it paścā bubudhānā vy akhyann ād id ratnaṁ dhārayanta dyubhaktam |
4.001.18c viśve viśvāsu duryāsu devā mitra dhiye varuṇa satyam astu ||
4.001.19a acchā voceya śuśucānam agniṁ hotāraṁ viśvabharasaṁ yajiṣṭham |
4.001.19c śucy ūdho atṛṇan na gavām andho na pūtam pariṣiktam aṁśoḥ ||
4.001.20a viśveṣām aditir yajñiyānāṁ viśveṣām atithir mānuṣāṇām |
4.001.20c agnir devānām ava āvṛṇānaḥ sumṛḻīko bhavatu jātavedāḥ ||

4.002.01a yo martyeṣv amṛta ṛtāvā devo deveṣv aratir nidhāyi |
4.002.01c hotā yajiṣṭho mahnā śucadhyai havyair agnir manuṣa īrayadhyai ||
4.002.02a iha tvaṁ sūno sahaso no adya jāto jātām̐ ubhayām̐ antar agne |
4.002.02c dūta īyase yuyujāna ṛṣva ṛjumuṣkān vṛṣaṇaḥ śukrām̐ś ca ||
4.002.03a atyā vṛdhasnū rohitā ghṛtasnū ṛtasya manye manasā javiṣṭhā |
4.002.03c antar īyase aruṣā yujāno yuṣmām̐ś ca devān viśa ā ca martān ||
4.002.04a aryamaṇaṁ varuṇam mitram eṣām indrāviṣṇū maruto aśvinota |
4.002.04c svaśvo agne surathaḥ surādhā ed u vaha suhaviṣe janāya ||
4.002.05a gomām̐ agne 'vimām̐ aśvī yajño nṛvatsakhā sadam id apramṛṣyaḥ |
4.002.05c iḻāvām̐ eṣo asura prajāvān dīrgho rayiḥ pṛthubudhnaḥ sabhāvān ||
4.002.06a yas ta idhmaṁ jabharat siṣvidāno mūrdhānaṁ vā tatapate tvāyā |
4.002.06c bhuvas tasya svatavām̐ḥ pāyur agne viśvasmāt sīm aghāyata uruṣya ||
4.002.07a yas te bharād anniyate cid annaṁ niśiṣan mandram atithim udīrat |
4.002.07c ā devayur inadhate duroṇe tasmin rayir dhruvo astu dāsvān ||
4.002.08a yas tvā doṣā ya uṣasi praśaṁsāt priyaṁ vā tvā kṛṇavate haviṣmān |
4.002.08c aśvo na sve dama ā hemyāvān tam aṁhasaḥ pīparo dāśvāṁsam ||
4.002.09a yas tubhyam agne amṛtāya dāśad duvas tve kṛṇavate yatasruk |
4.002.09c na sa rāyā śaśamāno vi yoṣan nainam aṁhaḥ pari varad aghāyoḥ ||
4.002.10a yasya tvam agne adhvaraṁ jujoṣo devo martasya sudhitaṁ rarāṇaḥ |
4.002.10c prīted asad dhotrā sā yaviṣṭhāsāma yasya vidhato vṛdhāsaḥ ||
4.002.11a cittim acittiṁ cinavad vi vidvān pṛṣṭheva vītā vṛjinā ca martān |
4.002.11c rāye ca naḥ svapatyāya deva ditiṁ ca rāsvāditim uruṣya ||
4.002.12a kaviṁ śaśāsuḥ kavayo 'dabdhā nidhārayanto duryāsv āyoḥ |
4.002.12c atas tvaṁ dṛśyām̐ agna etān paḍbhiḥ paśyer adbhutām̐ arya evaiḥ ||
4.002.13a tvam agne vāghate supraṇītiḥ sutasomāya vidhate yaviṣṭha |
4.002.13c ratnam bhara śaśamānāya ghṛṣve pṛthu ścandram avase carṣaṇiprāḥ ||
4.002.14a adhā ha yad vayam agne tvāyā paḍbhir hastebhiś cakṛmā tanūbhiḥ |
4.002.14c rathaṁ na kranto apasā bhurijor ṛtaṁ yemuḥ sudhya āśuṣāṇāḥ ||
4.002.15a adhā mātur uṣasaḥ sapta viprā jāyemahi prathamā vedhaso nṝn |
4.002.15c divas putrā aṅgiraso bhavemādriṁ rujema dhaninaṁ śucantaḥ ||
4.002.16a adhā yathā naḥ pitaraḥ parāsaḥ pratnāso agna ṛtam āśuṣāṇāḥ |
4.002.16c śucīd ayan dīdhitim ukthaśāsaḥ kṣāmā bhindanto aruṇīr apa vran ||
4.002.17a sukarmāṇaḥ suruco devayanto 'yo na devā janimā dhamantaḥ |
4.002.17c śucanto agniṁ vavṛdhanta indram ūrvaṁ gavyam pariṣadanto agman ||
4.002.18a ā yūtheva kṣumati paśvo akhyad devānāṁ yaj janimānty ugra |
4.002.18c martānāṁ cid urvaśīr akṛpran vṛdhe cid arya uparasyāyoḥ ||
4.002.19a akarma te svapaso abhūma ṛtam avasrann uṣaso vibhātīḥ |
4.002.19c anūnam agnim purudhā suścandraṁ devasya marmṛjataś cāru cakṣuḥ ||
4.002.20a etā te agna ucathāni vedho 'vocāma kavaye tā juṣasva |
4.002.20c uc chocasva kṛṇuhi vasyaso no maho rāyaḥ puruvāra pra yandhi ||

4.003.01a ā vo rājānam adhvarasya rudraṁ hotāraṁ satyayajaṁ rodasyoḥ |
4.003.01c agnim purā tanayitnor acittād dhiraṇyarūpam avase kṛṇudhvam ||
4.003.02a ayaṁ yoniś cakṛmā yaṁ vayaṁ te jāyeva patya uśatī suvāsāḥ |
4.003.02c arvācīnaḥ parivīto ni ṣīdemā u te svapāka pratīcīḥ ||
4.003.03a āśṛṇvate adṛpitāya manma nṛcakṣase sumṛḻīkāya vedhaḥ |
4.003.03c devāya śastim amṛtāya śaṁsa grāveva sotā madhuṣud yam īḻe ||
4.003.04a tvaṁ cin naḥ śamyā agne asyā ṛtasya bodhy ṛtacit svādhīḥ |
4.003.04c kadā ta ukthā sadhamādyāni kadā bhavanti sakhyā gṛhe te ||
4.003.05a kathā ha tad varuṇāya tvam agne kathā dive garhase kan na āgaḥ |
4.003.05c kathā mitrāya mīḻhuṣe pṛthivyai bravaḥ kad aryamṇe kad bhagāya ||
4.003.06a kad dhiṣṇyāsu vṛdhasāno agne kad vātāya pratavase śubhaṁye |
4.003.06c parijmane nāsatyāya kṣe bravaḥ kad agne rudrāya nṛghne ||
4.003.07a kathā mahe puṣṭimbharāya pūṣṇe kad rudrāya sumakhāya havirde |
4.003.07c kad viṣṇava urugāyāya reto bravaḥ kad agne śarave bṛhatyai ||
4.003.08a kathā śardhāya marutām ṛtāya kathā sūre bṛhate pṛcchyamānaḥ |
4.003.08c prati bravo 'ditaye turāya sādhā divo jātavedaś cikitvān ||
4.003.09a ṛtena ṛtaṁ niyatam īḻa ā gor āmā sacā madhumat pakvam agne |
4.003.09c kṛṣṇā satī ruśatā dhāsinaiṣā jāmaryeṇa payasā pīpāya ||
4.003.10a ṛtena hi ṣmā vṛṣabhaś cid aktaḥ pumām̐ agniḥ payasā pṛṣṭhyena |
4.003.10c aspandamāno acarad vayodhā vṛṣā śukraṁ duduhe pṛśnir ūdhaḥ ||
4.003.11a ṛtenādriṁ vy asan bhidantaḥ sam aṅgiraso navanta gobhiḥ |
4.003.11c śunaṁ naraḥ pari ṣadann uṣāsam āviḥ svar abhavaj jāte agnau ||
4.003.12a ṛtena devīr amṛtā amṛktā arṇobhir āpo madhumadbhir agne |
4.003.12c vājī na sargeṣu prastubhānaḥ pra sadam it sravitave dadhanyuḥ ||
4.003.13a mā kasya yakṣaṁ sadam id dhuro gā mā veśasya praminato māpeḥ |
4.003.13c mā bhrātur agne anṛjor ṛṇaṁ ver mā sakhyur dakṣaṁ ripor bhujema ||
4.003.14a rakṣā ṇo agne tava rakṣaṇebhī rārakṣāṇaḥ sumakha prīṇānaḥ |
4.003.14c prati ṣphura vi ruja vīḍv aṁho jahi rakṣo mahi cid vāvṛdhānam ||
4.003.15a ebhir bhava sumanā agne arkair imān spṛśa manmabhiḥ śūra vājān |
4.003.15c uta brahmāṇy aṅgiro juṣasva saṁ te śastir devavātā jareta ||
4.003.16a etā viśvā viduṣe tubhyaṁ vedho nīthāny agne niṇyā vacāṁsi |
4.003.16c nivacanā kavaye kāvyāny aśaṁsiṣam matibhir vipra ukthaiḥ ||

4.004.01a kṛṇuṣva pājaḥ prasitiṁ na pṛthvīṁ yāhi rājevāmavām̐ ibhena |
4.004.01c tṛṣvīm anu prasitiṁ drūṇāno 'stāsi vidhya rakṣasas tapiṣṭhaiḥ ||
4.004.02a tava bhramāsa āśuyā patanty anu spṛśa dhṛṣatā śośucānaḥ |
4.004.02c tapūṁṣy agne juhvā pataṁgān asaṁdito vi sṛja viṣvag ulkāḥ ||
4.004.03a prati spaśo vi sṛja tūrṇitamo bhavā pāyur viśo asyā adabdhaḥ |
4.004.03c yo no dūre aghaśaṁso yo anty agne mākiṣ ṭe vyathir ā dadharṣīt ||
4.004.04a ud agne tiṣṭha praty ā tanuṣva ny amitrām̐ oṣatāt tigmahete |
4.004.04c yo no arātiṁ samidhāna cakre nīcā taṁ dhakṣy atasaṁ na śuṣkam ||
4.004.05a ūrdhvo bhava prati vidhyādhy asmad āviṣ kṛṇuṣva daivyāny agne |
4.004.05c ava sthirā tanuhi yātujūnāṁ jāmim ajāmim pra mṛṇīhi śatrūn ||
4.004.06a sa te jānāti sumatiṁ yaviṣṭha ya īvate brahmaṇe gātum airat |
4.004.06c viśvāny asmai sudināni rāyo dyumnāny aryo vi duro abhi dyaut ||
4.004.07a sed agne astu subhagaḥ sudānur yas tvā nityena haviṣā ya ukthaiḥ |
4.004.07c piprīṣati sva āyuṣi duroṇe viśved asmai sudinā sāsad iṣṭiḥ ||
4.004.08a arcāmi te sumatiṁ ghoṣy arvāk saṁ te vāvātā jaratām iyaṁ gīḥ |
4.004.08c svaśvās tvā surathā marjayemāsme kṣatrāṇi dhārayer anu dyūn ||
4.004.09a iha tvā bhūry ā cared upa tman doṣāvastar dīdivāṁsam anu dyūn |
4.004.09c krīḻantas tvā sumanasaḥ sapemābhi dyumnā tasthivāṁso janānām ||
4.004.10a yas tvā svaśvaḥ suhiraṇyo agna upayāti vasumatā rathena |
4.004.10c tasya trātā bhavasi tasya sakhā yas ta ātithyam ānuṣag jujoṣat ||
4.004.11a maho rujāmi bandhutā vacobhis tan mā pitur gotamād anv iyāya |
4.004.11c tvaṁ no asya vacasaś cikiddhi hotar yaviṣṭha sukrato damūnāḥ ||
4.004.12a asvapnajas taraṇayaḥ suśevā atandrāso 'vṛkā aśramiṣṭhāḥ |
4.004.12c te pāyavaḥ sadhryañco niṣadyāgne tava naḥ pāntv amūra ||
4.004.13a ye pāyavo māmateyaṁ te agne paśyanto andhaṁ duritād arakṣan |
4.004.13c rarakṣa tān sukṛto viśvavedā dipsanta id ripavo nāha debhuḥ ||
4.004.14a tvayā vayaṁ sadhanyas tvotās tava praṇīty aśyāma vājān |
4.004.14c ubhā śaṁsā sūdaya satyatāte 'nuṣṭhuyā kṛṇuhy ahrayāṇa ||
4.004.15a ayā te agne samidhā vidhema prati stomaṁ śasyamānaṁ gṛbhāya |
4.004.15c dahāśaso rakṣasaḥ pāhy asmān druho nido mitramaho avadyāt ||

4.005.01a vaiśvānarāya mīḻhuṣe sajoṣāḥ kathā dāśemāgnaye bṛhad bhāḥ |
4.005.01c anūnena bṛhatā vakṣathenopa stabhāyad upamin na rodhaḥ ||
4.005.02a mā nindata ya imām mahyaṁ rātiṁ devo dadau martyāya svadhāvān |
4.005.02c pākāya gṛtso amṛto vicetā vaiśvānaro nṛtamo yahvo agniḥ ||
4.005.03a sāma dvibarhā mahi tigmabhṛṣṭiḥ sahasraretā vṛṣabhas tuviṣmān |
4.005.03c padaṁ na gor apagūḻhaṁ vividvān agnir mahyam pred u vocan manīṣām ||
4.005.04a pra tām̐ agnir babhasat tigmajambhas tapiṣṭhena śociṣā yaḥ surādhāḥ |
4.005.04c pra ye minanti varuṇasya dhāma priyā mitrasya cetato dhruvāṇi ||
4.005.05a abhrātaro na yoṣaṇo vyantaḥ patiripo na janayo durevāḥ |
4.005.05c pāpāsaḥ santo anṛtā asatyā idam padam ajanatā gabhīram ||
4.005.06a idam me agne kiyate pāvakāminate gurum bhāraṁ na manma |
4.005.06c bṛhad dadhātha dhṛṣatā gabhīraṁ yahvam pṛṣṭham prayasā saptadhātu ||
4.005.07a tam in nv eva samanā samānam abhi kratvā punatī dhītir aśyāḥ |
4.005.07c sasasya carmann adhi cāru pṛśner agre rupa ārupitaṁ jabāru ||
4.005.08a pravācyaṁ vacasaḥ kim me asya guhā hitam upa niṇig vadanti |
4.005.08c yad usriyāṇām apa vār iva vran pāti priyaṁ rupo agram padaṁ veḥ ||
4.005.09a idam u tyan mahi mahām anīkaṁ yad usriyā sacata pūrvyaṁ gauḥ |
4.005.09c ṛtasya pade adhi dīdyānaṁ guhā raghuṣyad raghuyad viveda ||
4.005.10a adha dyutānaḥ pitroḥ sacāsāmanuta guhyaṁ cāru pṛśneḥ |
4.005.10c mātuṣ pade parame anti ṣad gor vṛṣṇaḥ śociṣaḥ prayatasya jihvā ||
4.005.11a ṛtaṁ voce namasā pṛcchyamānas tavāśasā jātavedo yadīdam |
4.005.11c tvam asya kṣayasi yad dha viśvaṁ divi yad u draviṇaṁ yat pṛthivyām ||
4.005.12a kiṁ no asya draviṇaṁ kad dha ratnaṁ vi no voco jātavedaś cikitvān |
4.005.12c guhādhvanaḥ paramaṁ yan no asya reku padaṁ na nidānā aganma ||
4.005.13a kā maryādā vayunā kad dha vāmam acchā gamema raghavo na vājam |
4.005.13c kadā no devīr amṛtasya patnīḥ sūro varṇena tatanann uṣāsaḥ ||
4.005.14a anireṇa vacasā phalgvena pratītyena kṛdhunātṛpāsaḥ |
4.005.14c adhā te agne kim ihā vadanty anāyudhāsa āsatā sacantām ||
4.005.15a asya śriye samidhānasya vṛṣṇo vasor anīkaṁ dama ā ruroca |
4.005.15c ruśad vasānaḥ sudṛśīkarūpaḥ kṣitir na rāyā puruvāro adyaut ||

4.006.01a ūrdhva ū ṣu ṇo adhvarasya hotar agne tiṣṭha devatātā yajīyān |
4.006.01c tvaṁ hi viśvam abhy asi manma pra vedhasaś cit tirasi manīṣām ||
4.006.02a amūro hotā ny asādi vikṣv agnir mandro vidatheṣu pracetāḥ |
4.006.02c ūrdhvam bhānuṁ savitevāśren meteva dhūmaṁ stabhāyad upa dyām ||
4.006.03a yatā sujūrṇī rātinī ghṛtācī pradakṣiṇid devatātim urāṇaḥ |
4.006.03c ud u svarur navajā nākraḥ paśvo anakti sudhitaḥ sumekaḥ ||
4.006.04a stīrṇe barhiṣi samidhāne agnā ūrdhvo adhvaryur jujuṣāṇo asthāt |
4.006.04c pary agniḥ paśupā na hotā triviṣṭy eti pradiva urāṇaḥ ||
4.006.05a pari tmanā mitadrur eti hotāgnir mandro madhuvacā ṛtāvā |
4.006.05c dravanty asya vājino na śokā bhayante viśvā bhuvanā yad abhrāṭ ||
4.006.06a bhadrā te agne svanīka saṁdṛg ghorasya sato viṣuṇasya cāruḥ |
4.006.06c na yat te śocis tamasā varanta na dhvasmānas tanvī repa ā dhuḥ ||
4.006.07a na yasya sātur janitor avāri na mātarāpitarā nū cid iṣṭau |
4.006.07c adhā mitro na sudhitaḥ pāvako 'gnir dīdāya mānuṣīṣu vikṣu ||
4.006.08a dvir yam pañca jījanan saṁvasānāḥ svasāro agnim mānuṣīṣu vikṣu |
4.006.08c uṣarbudham atharyo na dantaṁ śukraṁ svāsam paraśuṁ na tigmam ||
4.006.09a tava tye agne harito ghṛtasnā rohitāsa ṛjvañcaḥ svañcaḥ |
4.006.09c aruṣāso vṛṣaṇa ṛjumuṣkā ā devatātim ahvanta dasmāḥ ||
4.006.10a ye ha tye te sahamānā ayāsas tveṣāso agne arcayaś caranti |
4.006.10c śyenāso na duvasanāso arthaṁ tuviṣvaṇaso mārutaṁ na śardhaḥ ||
4.006.11a akāri brahma samidhāna tubhyaṁ śaṁsāty ukthaṁ yajate vy ū dhāḥ |
4.006.11c hotāram agnim manuṣo ni ṣedur namasyanta uśijaḥ śaṁsam āyoḥ ||

4.007.01a ayam iha prathamo dhāyi dhātṛbhir hotā yajiṣṭho adhvareṣv īḍyaḥ |
4.007.01c yam apnavāno bhṛgavo virurucur vaneṣu citraṁ vibhvaṁ viśe-viśe ||
4.007.02a agne kadā ta ānuṣag bhuvad devasya cetanam |
4.007.02c adhā hi tvā jagṛbhrire martāso vikṣv īḍyam ||
4.007.03a ṛtāvānaṁ vicetasam paśyanto dyām iva stṛbhiḥ |
4.007.03c viśveṣām adhvarāṇāṁ haskartāraṁ dame-dame ||
4.007.04a āśuṁ dūtaṁ vivasvato viśvā yaś carṣaṇīr abhi |
4.007.04c ā jabhruḥ ketum āyavo bhṛgavāṇaṁ viśe-viśe ||
4.007.05a tam īṁ hotāram ānuṣak cikitvāṁsaṁ ni ṣedire |
4.007.05c raṇvam pāvakaśociṣaṁ yajiṣṭhaṁ sapta dhāmabhiḥ ||
4.007.06a taṁ śaśvatīṣu mātṛṣu vana ā vītam aśritam |
4.007.06c citraṁ santaṁ guhā hitaṁ suvedaṁ kūcidarthinam ||
4.007.07a sasasya yad viyutā sasminn ūdhann ṛtasya dhāman raṇayanta devāḥ |
4.007.07c mahām̐ agnir namasā rātahavyo ver adhvarāya sadam id ṛtāvā ||
4.007.08a ver adhvarasya dūtyāni vidvān ubhe antā rodasī saṁcikitvān |
4.007.08c dūta īyase pradiva urāṇo viduṣṭaro diva ārodhanāni ||
4.007.09a kṛṣṇaṁ ta ema ruśataḥ puro bhāś cariṣṇv arcir vapuṣām id ekam |
4.007.09c yad apravītā dadhate ha garbhaṁ sadyaś cij jāto bhavasīd u dūtaḥ ||
4.007.10a sadyo jātasya dadṛśānam ojo yad asya vāto anuvāti śociḥ |
4.007.10c vṛṇakti tigmām ataseṣu jihvāṁ sthirā cid annā dayate vi jambhaiḥ ||
4.007.11a tṛṣu yad annā tṛṣuṇā vavakṣa tṛṣuṁ dūtaṁ kṛṇute yahvo agniḥ |
4.007.11c vātasya meḻiṁ sacate nijūrvann āśuṁ na vājayate hinve arvā ||

4.008.01a dūtaṁ vo viśvavedasaṁ havyavāham amartyam |
4.008.01c yajiṣṭham ṛñjase girā ||
4.008.02a sa hi vedā vasudhitim mahām̐ ārodhanaṁ divaḥ |
4.008.02c sa devām̐ eha vakṣati ||
4.008.03a sa veda deva ānamaṁ devām̐ ṛtāyate dame |
4.008.03c dāti priyāṇi cid vasu ||
4.008.04a sa hotā sed u dūtyaṁ cikitvām̐ antar īyate |
4.008.04c vidvām̐ ārodhanaṁ divaḥ ||
4.008.05a te syāma ye agnaye dadāśur havyadātibhiḥ |
4.008.05c ya īm puṣyanta indhate ||
4.008.06a te rāyā te suvīryaiḥ sasavāṁso vi śṛṇvire |
4.008.06c ye agnā dadhire duvaḥ ||
4.008.07a asme rāyo dive-dive saṁ carantu puruspṛhaḥ |
4.008.07c asme vājāsa īratām ||
4.008.08a sa vipraś carṣaṇīnāṁ śavasā mānuṣāṇām |
4.008.08c ati kṣipreva vidhyati ||

4.009.01a agne mṛḻa mahām̐ asi ya īm ā devayuṁ janam |
4.009.01c iyetha barhir āsadam ||
4.009.02a sa mānuṣīṣu dūḻabho vikṣu prāvīr amartyaḥ |
4.009.02c dūto viśveṣām bhuvat ||
4.009.03a sa sadma pari ṇīyate hotā mandro diviṣṭiṣu |
4.009.03c uta potā ni ṣīdati ||
4.009.04a uta gnā agnir adhvara uto gṛhapatir dame |
4.009.04c uta brahmā ni ṣīdati ||
4.009.05a veṣi hy adhvarīyatām upavaktā janānām |
4.009.05b havyā ca mānuṣāṇām ||
4.009.06a veṣīd v asya dūtyaṁ yasya jujoṣo adhvaram |
4.009.06b havyam martasya voḻhave ||
4.009.07a asmākaṁ joṣy adhvaram asmākaṁ yajñam aṅgiraḥ |
4.009.07c asmākaṁ śṛṇudhī havam ||
4.009.08a pari te dūḻabho ratho 'smām̐ aśnotu viśvataḥ |
4.009.08c yena rakṣasi dāśuṣaḥ ||

4.010.01a agne tam adyāśvaṁ na stomaiḥ kratuṁ na bhadraṁ hṛdispṛśam |
4.010.01c ṛdhyāmā ta ohaiḥ ||
4.010.02a adhā hy agne krator bhadrasya dakṣasya sādhoḥ |
4.010.02c rathīr ṛtasya bṛhato babhūtha ||
4.010.03a ebhir no arkair bhavā no arvāṅ svar ṇa jyotiḥ |
4.010.03c agne viśvebhiḥ sumanā anīkaiḥ ||
4.010.04a ābhiṣ ṭe adya gīrbhir gṛṇanto 'gne dāśema |
4.010.04c pra te divo na stanayanti śuṣmāḥ ||
4.010.05a tava svādiṣṭhāgne saṁdṛṣṭir idā cid ahna idā cid aktoḥ |
4.010.05c śriye rukmo na rocata upāke ||
4.010.06a ghṛtaṁ na pūtaṁ tanūr arepāḥ śuci hiraṇyam |
4.010.06c tat te rukmo na rocata svadhāvaḥ ||
4.010.07a kṛtaṁ cid dhi ṣmā sanemi dveṣo 'gna inoṣi martāt |
4.010.07c itthā yajamānād ṛtāvaḥ ||
4.010.08a śivā naḥ sakhyā santu bhrātrāgne deveṣu yuṣme |
4.010.08c sā no nābhiḥ sadane sasminn ūdhan ||

4.011.01a bhadraṁ te agne sahasinn anīkam upāka ā rocate sūryasya |
4.011.01c ruśad dṛśe dadṛśe naktayā cid arūkṣitaṁ dṛśa ā rūpe annam ||
4.011.02a vi ṣāhy agne gṛṇate manīṣāṁ khaṁ vepasā tuvijāta stavānaḥ |
4.011.02c viśvebhir yad vāvanaḥ śukra devais tan no rāsva sumaho bhūri manma ||
4.011.03a tvad agne kāvyā tvan manīṣās tvad ukthā jāyante rādhyāni |
4.011.03c tvad eti draviṇaṁ vīrapeśā itthādhiye dāśuṣe martyāya ||
4.011.04a tvad vājī vājambharo vihāyā abhiṣṭikṛj jāyate satyaśuṣmaḥ |
4.011.04c tvad rayir devajūto mayobhus tvad āśur jūjuvām̐ agne arvā ||
4.011.05a tvām agne prathamaṁ devayanto devam martā amṛta mandrajihvam |
4.011.05c dveṣoyutam ā vivāsanti dhībhir damūnasaṁ gṛhapatim amūram ||
4.011.06a āre asmad amatim āre aṁha āre viśvāṁ durmatiṁ yan nipāsi |
4.011.06c doṣā śivaḥ sahasaḥ sūno agne yaṁ deva ā cit sacase svasti ||

4.012.01a yas tvām agna inadhate yatasruk tris te annaṁ kṛṇavat sasminn ahan |
4.012.01c sa su dyumnair abhy astu prasakṣat tava kratvā jātavedaś cikitvān ||
4.012.02a idhmaṁ yas te jabharac chaśramāṇo maho agne anīkam ā saparyan |
4.012.02c sa idhānaḥ prati doṣām uṣāsam puṣyan rayiṁ sacate ghnann amitrān ||
4.012.03a agnir īśe bṛhataḥ kṣatriyasyāgnir vājasya paramasya rāyaḥ |
4.012.03c dadhāti ratnaṁ vidhate yaviṣṭho vy ānuṣaṅ martyāya svadhāvān ||
4.012.04a yac cid dhi te puruṣatrā yaviṣṭhācittibhiś cakṛmā kac cid āgaḥ |
4.012.04c kṛdhī ṣv asmām̐ aditer anāgān vy enāṁsi śiśratho viṣvag agne ||
4.012.05a mahaś cid agna enaso abhīka ūrvād devānām uta martyānām |
4.012.05c mā te sakhāyaḥ sadam id riṣāma yacchā tokāya tanayāya śaṁ yoḥ ||
4.012.06a yathā ha tyad vasavo gauryaṁ cit padi ṣitām amuñcatā yajatrāḥ |
4.012.06c evo ṣv asman muñcatā vy aṁhaḥ pra tāry agne prataraṁ na āyuḥ ||

4.013.01a praty agnir uṣasām agram akhyad vibhātīnāṁ sumanā ratnadheyam |
4.013.01c yātam aśvinā sukṛto duroṇam ut sūryo jyotiṣā deva eti ||
4.013.02a ūrdhvam bhānuṁ savitā devo aśred drapsaṁ davidhvad gaviṣo na satvā |
4.013.02c anu vrataṁ varuṇo yanti mitro yat sūryaṁ divy ārohayanti ||
4.013.03a yaṁ sīm akṛṇvan tamase vipṛce dhruvakṣemā anavasyanto artham |
4.013.03c taṁ sūryaṁ haritaḥ sapta yahvīḥ spaśaṁ viśvasya jagato vahanti ||
4.013.04a vahiṣṭhebhir viharan yāsi tantum avavyayann asitaṁ deva vasma |
4.013.04c davidhvato raśmayaḥ sūryasya carmevāvādhus tamo apsv antaḥ ||
4.013.05a anāyato anibaddhaḥ kathāyaṁ nyaṅṅ uttāno 'va padyate na |
4.013.05c kayā yāti svadhayā ko dadarśa divaḥ skambhaḥ samṛtaḥ pāti nākam ||

4.014.01a praty agnir uṣaso jātavedā akhyad devo rocamānā mahobhiḥ |
4.014.01c ā nāsatyorugāyā rathenemaṁ yajñam upa no yātam accha ||
4.014.02a ūrdhvaṁ ketuṁ savitā devo aśrej jyotir viśvasmai bhuvanāya kṛṇvan |
4.014.02c āprā dyāvāpṛthivī antarikṣaṁ vi sūryo raśmibhiś cekitānaḥ ||
4.014.03a āvahanty aruṇīr jyotiṣāgān mahī citrā raśmibhiś cekitānā |
4.014.03c prabodhayantī suvitāya devy uṣā īyate suyujā rathena ||
4.014.04a ā vāṁ vahiṣṭhā iha te vahantu rathā aśvāsa uṣaso vyuṣṭau |
4.014.04c ime hi vām madhupeyāya somā asmin yajñe vṛṣaṇā mādayethām ||
4.014.05a anāyato anibaddhaḥ kathāyaṁ nyaṅṅ uttāno 'va padyate na |
4.014.05c kayā yāti svadhayā ko dadarśa divaḥ skambhaḥ samṛtaḥ pāti nākam ||

4.015.01a agnir hotā no adhvare vājī san pari ṇīyate |
4.015.01c devo deveṣu yajñiyaḥ ||
4.015.02a pari triviṣṭy adhvaraṁ yāty agnī rathīr iva |
4.015.02c ā deveṣu prayo dadhat ||
4.015.03a pari vājapatiḥ kavir agnir havyāny akramīt |
4.015.03c dadhad ratnāni dāśuṣe ||
4.015.04a ayaṁ yaḥ sṛñjaye puro daivavāte samidhyate |
4.015.04c dyumām̐ amitradambhanaḥ ||
4.015.05a asya ghā vīra īvato 'gner īśīta martyaḥ |
4.015.05c tigmajambhasya mīḻhuṣaḥ ||
4.015.06a tam arvantaṁ na sānasim aruṣaṁ na divaḥ śiśum |
4.015.06c marmṛjyante dive-dive ||
4.015.07a bodhad yan mā haribhyāṁ kumāraḥ sāhadevyaḥ |
4.015.07c acchā na hūta ud aram ||
4.015.08a uta tyā yajatā harī kumārāt sāhadevyāt |
4.015.08c prayatā sadya ā dade ||
4.015.09a eṣa vāṁ devāv aśvinā kumāraḥ sāhadevyaḥ |
4.015.09c dīrghāyur astu somakaḥ ||
4.015.10a taṁ yuvaṁ devāv aśvinā kumāraṁ sāhadevyam |
4.015.10c dīrghāyuṣaṁ kṛṇotana ||

4.016.01a ā satyo yātu maghavām̐ ṛjīṣī dravantv asya haraya upa naḥ |
4.016.01c tasmā id andhaḥ suṣumā sudakṣam ihābhipitvaṁ karate gṛṇānaḥ ||
4.016.02a ava sya śūrādhvano nānte 'smin no adya savane mandadhyai |
4.016.02c śaṁsāty uktham uśaneva vedhāś cikituṣe asuryāya manma ||
4.016.03a kavir na niṇyaṁ vidathāni sādhan vṛṣā yat sekaṁ vipipāno arcāt |
4.016.03c diva itthā jījanat sapta kārūn ahnā cic cakrur vayunā gṛṇantaḥ ||
4.016.04a svar yad vedi sudṛśīkam arkair mahi jyotī rurucur yad dha vastoḥ |
4.016.04c andhā tamāṁsi dudhitā vicakṣe nṛbhyaś cakāra nṛtamo abhiṣṭau ||
4.016.05a vavakṣa indro amitam ṛjīṣy ubhe ā paprau rodasī mahitvā |
4.016.05c ataś cid asya mahimā vi recy abhi yo viśvā bhuvanā babhūva ||
4.016.06a viśvāni śakro naryāṇi vidvān apo rireca sakhibhir nikāmaiḥ |
4.016.06c aśmānaṁ cid ye bibhidur vacobhir vrajaṁ gomantam uśijo vi vavruḥ ||
4.016.07a apo vṛtraṁ vavrivāṁsam parāhan prāvat te vajram pṛthivī sacetāḥ |
4.016.07c prārṇāṁsi samudriyāṇy ainoḥ patir bhavañ chavasā śūra dhṛṣṇo ||
4.016.08a apo yad adrim puruhūta dardar āvir bhuvat saramā pūrvyaṁ te |
4.016.08c sa no netā vājam ā darṣi bhūriṁ gotrā rujann aṅgirobhir gṛṇānaḥ ||
4.016.09a acchā kaviṁ nṛmaṇo gā abhiṣṭau svarṣātā maghavan nādhamānam |
4.016.09c ūtibhis tam iṣaṇo dyumnahūtau ni māyāvān abrahmā dasyur arta ||
4.016.10a ā dasyughnā manasā yāhy astam bhuvat te kutsaḥ sakhye nikāmaḥ |
4.016.10c sve yonau ni ṣadataṁ sarūpā vi vāṁ cikitsad ṛtacid dha nārī ||
4.016.11a yāsi kutsena saratham avasyus todo vātasya haryor īśānaḥ |
4.016.11c ṛjrā vājaṁ na gadhyaṁ yuyūṣan kavir yad ahan pāryāya bhūṣāt ||
4.016.12a kutsāya śuṣṇam aśuṣaṁ ni barhīḥ prapitve ahnaḥ kuyavaṁ sahasrā |
4.016.12c sadyo dasyūn pra mṛṇa kutsyena pra sūraś cakraṁ vṛhatād abhīke ||
4.016.13a tvam piprum mṛgayaṁ śūśuvāṁsam ṛjiśvane vaidathināya randhīḥ |
4.016.13c pañcāśat kṛṣṇā ni vapaḥ sahasrātkaṁ na puro jarimā vi dardaḥ ||
4.016.14a sūra upāke tanvaṁ dadhāno vi yat te cety amṛtasya varpaḥ |
4.016.14c mṛgo na hastī taviṣīm uṣāṇaḥ siṁho na bhīma āyudhāni bibhrat ||
4.016.15a indraṁ kāmā vasūyanto agman svarmīḻhe na savane cakānāḥ |
4.016.15c śravasyavaḥ śaśamānāsa ukthair oko na raṇvā sudṛśīva puṣṭiḥ ||
4.016.16a tam id va indraṁ suhavaṁ huvema yas tā cakāra naryā purūṇi |
4.016.16c yo māvate jaritre gadhyaṁ cin makṣū vājam bharati spārharādhāḥ ||
4.016.17a tigmā yad antar aśaniḥ patāti kasmiñ cic chūra muhuke janānām |
4.016.17c ghorā yad arya samṛtir bhavāty adha smā nas tanvo bodhi gopāḥ ||
4.016.18a bhuvo 'vitā vāmadevasya dhīnām bhuvaḥ sakhāvṛko vājasātau |
4.016.18c tvām anu pramatim ā jaganmoruśaṁso jaritre viśvadha syāḥ ||
4.016.19a ebhir nṛbhir indra tvāyubhiṣ ṭvā maghavadbhir maghavan viśva ājau |
4.016.19c dyāvo na dyumnair abhi santo aryaḥ kṣapo madema śaradaś ca pūrvīḥ ||
4.016.20a eved indrāya vṛṣabhāya vṛṣṇe brahmākarma bhṛgavo na ratham |
4.016.20c nū cid yathā naḥ sakhyā viyoṣad asan na ugro 'vitā tanūpāḥ ||
4.016.21a nū ṣṭuta indra nū gṛṇāna iṣaṁ jaritre nadyo na pīpeḥ |
4.016.21c akāri te harivo brahma navyaṁ dhiyā syāma rathyaḥ sadāsāḥ ||

4.017.01a tvam mahām̐ indra tubhyaṁ ha kṣā anu kṣatram maṁhanā manyata dyauḥ |
4.017.01c tvaṁ vṛtraṁ śavasā jaghanvān sṛjaḥ sindhūm̐r ahinā jagrasānān ||
4.017.02a tava tviṣo janiman rejata dyau rejad bhūmir bhiyasā svasya manyoḥ |
4.017.02c ṛghāyanta subhvaḥ parvatāsa ārdan dhanvāni sarayanta āpaḥ ||
4.017.03a bhinad giriṁ śavasā vajram iṣṇann āviṣkṛṇvānaḥ sahasāna ojaḥ |
4.017.03c vadhīd vṛtraṁ vajreṇa mandasānaḥ sarann āpo javasā hatavṛṣṇīḥ ||
4.017.04a suvīras te janitā manyata dyaur indrasya kartā svapastamo bhūt |
4.017.04c ya īṁ jajāna svaryaṁ suvajram anapacyutaṁ sadaso na bhūma ||
4.017.05a ya eka ic cyāvayati pra bhūmā rājā kṛṣṭīnām puruhūta indraḥ |
4.017.05c satyam enam anu viśve madanti rātiṁ devasya gṛṇato maghonaḥ ||
4.017.06a satrā somā abhavann asya viśve satrā madāso bṛhato madiṣṭhāḥ |
4.017.06c satrābhavo vasupatir vasūnāṁ datre viśvā adhithā indra kṛṣṭīḥ ||
4.017.07a tvam adha prathamaṁ jāyamāno 'me viśvā adhithā indra kṛṣṭīḥ |
4.017.07c tvam prati pravata āśayānam ahiṁ vajreṇa maghavan vi vṛścaḥ ||
4.017.08a satrāhaṇaṁ dādhṛṣiṁ tumram indram mahām apāraṁ vṛṣabhaṁ suvajram |
4.017.08c hantā yo vṛtraṁ sanitota vājaṁ dātā maghāni maghavā surādhāḥ ||
4.017.09a ayaṁ vṛtaś cātayate samīcīr ya ājiṣu maghavā śṛṇva ekaḥ |
4.017.09c ayaṁ vājam bharati yaṁ sanoty asya priyāsaḥ sakhye syāma ||
4.017.10a ayaṁ śṛṇve adha jayann uta ghnann ayam uta pra kṛṇute yudhā gāḥ |
4.017.10c yadā satyaṁ kṛṇute manyum indro viśvaṁ dṛḻham bhayata ejad asmāt ||
4.017.11a sam indro gā ajayat saṁ hiraṇyā sam aśviyā maghavā yo ha pūrvīḥ |
4.017.11c ebhir nṛbhir nṛtamo asya śākai rāyo vibhaktā sambharaś ca vasvaḥ ||
4.017.12a kiyat svid indro adhy eti mātuḥ kiyat pitur janitur yo jajāna |
4.017.12c yo asya śuṣmam muhukair iyarti vāto na jūtaḥ stanayadbhir abhraiḥ ||
4.017.13a kṣiyantaṁ tvam akṣiyantaṁ kṛṇotīyarti reṇum maghavā samoham |
4.017.13c vibhañjanur aśanimām̐ iva dyaur uta stotāram maghavā vasau dhāt ||
4.017.14a ayaṁ cakram iṣaṇat sūryasya ny etaśaṁ rīramat sasṛmāṇam |
4.017.14b ā kṛṣṇa īṁ juhurāṇo jigharti tvaco budhne rajaso asya yonau ||
4.017.15a asiknyāṁ yajamāno na hotā ||
4.017.16a gavyanta indraṁ sakhyāya viprā aśvāyanto vṛṣaṇaṁ vājayantaḥ |
4.017.16c janīyanto janidām akṣitotim ā cyāvayāmo 'vate na kośam ||
4.017.17a trātā no bodhi dadṛśāna āpir abhikhyātā marḍitā somyānām |
4.017.17c sakhā pitā pitṛtamaḥ pitṝṇāṁ kartem u lokam uśate vayodhāḥ ||
4.017.18a sakhīyatām avitā bodhi sakhā gṛṇāna indra stuvate vayo dhāḥ |
4.017.18c vayaṁ hy ā te cakṛmā sabādha ābhiḥ śamībhir mahayanta indra ||
4.017.19a stuta indro maghavā yad dha vṛtrā bhūrīṇy eko apratīni hanti |
4.017.19c asya priyo jaritā yasya śarman nakir devā vārayante na martāḥ ||
4.017.20a evā na indro maghavā virapśī karat satyā carṣaṇīdhṛd anarvā |
4.017.20c tvaṁ rājā januṣāṁ dhehy asme adhi śravo māhinaṁ yaj jaritre ||
4.017.21a nū ṣṭuta indra nū gṛṇāna iṣaṁ jaritre nadyo na pīpeḥ |
4.017.21c akāri te harivo brahma navyaṁ dhiyā syāma rathyaḥ sadāsāḥ ||

4.018.01a ayam panthā anuvittaḥ purāṇo yato devā udajāyanta viśve |
4.018.01c ataś cid ā janiṣīṣṭa pravṛddho mā mātaram amuyā pattave kaḥ ||
4.018.02a nāham ato nir ayā durgahaitat tiraścatā pārśvān nir gamāṇi |
4.018.02c bahūni me akṛtā kartvāni yudhyai tvena saṁ tvena pṛcchai ||
4.018.03a parāyatīm mātaram anv acaṣṭa na nānu gāny anu nū gamāni |
4.018.03c tvaṣṭur gṛhe apibat somam indraḥ śatadhanyaṁ camvoḥ sutasya ||
4.018.04a kiṁ sa ṛdhak kṛṇavad yaṁ sahasram māso jabhāra śaradaś ca pūrvīḥ |
4.018.04c nahī nv asya pratimānam asty antar jāteṣūta ye janitvāḥ ||
4.018.05a avadyam iva manyamānā guhākar indram mātā vīryeṇā nyṛṣṭam |
4.018.05c athod asthāt svayam atkaṁ vasāna ā rodasī apṛṇāj jāyamānaḥ ||
4.018.06a etā arṣanty alalābhavantīr ṛtāvarīr iva saṁkrośamānāḥ |
4.018.06c etā vi pṛccha kim idam bhananti kam āpo adrim paridhiṁ rujanti ||
4.018.07a kim u ṣvid asmai nivido bhanantendrasyāvadyaṁ didhiṣanta āpaḥ |
4.018.07c mamaitān putro mahatā vadhena vṛtraṁ jaghanvām̐ asṛjad vi sindhūn ||
4.018.08a mamac cana tvā yuvatiḥ parāsa mamac cana tvā kuṣavā jagāra |
4.018.08c mamac cid āpaḥ śiśave mamṛḍyur mamac cid indraḥ sahasod atiṣṭhat ||
4.018.09a mamac cana te maghavan vyaṁso nivividhvām̐ apa hanū jaghāna |
4.018.09c adhā nividdha uttaro babhūvāñ chiro dāsasya sam piṇag vadhena ||
4.018.10a gṛṣṭiḥ sasūva sthaviraṁ tavāgām anādhṛṣyaṁ vṛṣabhaṁ tumram indram |
4.018.10c arīḻhaṁ vatsaṁ carathāya mātā svayaṁ gātuṁ tanva icchamānam ||
4.018.11a uta mātā mahiṣam anv avenad amī tvā jahati putra devāḥ |
4.018.11c athābravīd vṛtram indro haniṣyan sakhe viṣṇo vitaraṁ vi kramasva ||
4.018.12a kas te mātaraṁ vidhavām acakrac chayuṁ kas tvām ajighāṁsac carantam |
4.018.12c kas te devo adhi mārḍīka āsīd yat prākṣiṇāḥ pitaram pādagṛhya ||
4.018.13a avartyā śuna āntrāṇi pece na deveṣu vivide marḍitāram |
4.018.13c apaśyaṁ jāyām amahīyamānām adhā me śyeno madhv ā jabhāra ||

4.019.01a evā tvām indra vajrinn atra viśve devāsaḥ suhavāsa ūmāḥ |
4.019.01c mahām ubhe rodasī vṛddham ṛṣvaṁ nir ekam id vṛṇate vṛtrahatye ||
4.019.02a avāsṛjanta jivrayo na devā bhuvaḥ samrāḻ indra satyayoniḥ |
4.019.02c ahann ahim pariśayānam arṇaḥ pra vartanīr arado viśvadhenāḥ ||
4.019.03a atṛpṇuvantaṁ viyatam abudhyam abudhyamānaṁ suṣupāṇam indra |
4.019.03c sapta prati pravata āśayānam ahiṁ vajreṇa vi riṇā aparvan ||
4.019.04a akṣodayac chavasā kṣāma budhnaṁ vār ṇa vātas taviṣībhir indraḥ |
4.019.04c dṛḻhāny aubhnād uśamāna ojo 'vābhinat kakubhaḥ parvatānām ||
4.019.05a abhi pra dadrur janayo na garbhaṁ rathā iva pra yayuḥ sākam adrayaḥ |
4.019.05c atarpayo visṛta ubja ūrmīn tvaṁ vṛtām̐ ariṇā indra sindhūn ||
4.019.06a tvam mahīm avaniṁ viśvadhenāṁ turvītaye vayyāya kṣarantīm |
4.019.06c aramayo namasaijad arṇaḥ sutaraṇām̐ akṛṇor indra sindhūn ||
4.019.07a prāgruvo nabhanvo na vakvā dhvasrā apinvad yuvatīr ṛtajñāḥ |
4.019.07c dhanvāny ajrām̐ apṛṇak tṛṣāṇām̐ adhog indraḥ staryo daṁsupatnīḥ ||
4.019.08a pūrvīr uṣasaḥ śaradaś ca gūrtā vṛtraṁ jaghanvām̐ asṛjad vi sindhūn |
4.019.08c pariṣṭhitā atṛṇad badbadhānāḥ sīrā indraḥ sravitave pṛthivyā ||
4.019.09a vamrībhiḥ putram agruvo adānaṁ niveśanād dhariva ā jabhartha |
4.019.09c vy andho akhyad ahim ādadāno nir bhūd ukhacchit sam aranta parva ||
4.019.10a pra te pūrvāṇi karaṇāni viprāvidvām̐ āha viduṣe karāṁsi |
4.019.10c yathā-yathā vṛṣṇyāni svagūrtāpāṁsi rājan naryāviveṣīḥ ||
4.019.11a nū ṣṭuta indra nū gṛṇāna iṣaṁ jaritre nadyo na pīpeḥ |
4.019.11c akāri te harivo brahma navyaṁ dhiyā syāma rathyaḥ sadāsāḥ ||

4.020.01a ā na indro dūrād ā na āsād abhiṣṭikṛd avase yāsad ugraḥ |
4.020.01c ojiṣṭhebhir nṛpatir vajrabāhuḥ saṁge samatsu turvaṇiḥ pṛtanyūn ||
4.020.02a ā na indro haribhir yātv acchārvācīno 'vase rādhase ca |
4.020.02c tiṣṭhāti vajrī maghavā virapśīmaṁ yajñam anu no vājasātau ||
4.020.03a imaṁ yajñaṁ tvam asmākam indra puro dadhat saniṣyasi kratuṁ naḥ |
4.020.03c śvaghnīva vajrin sanaye dhanānāṁ tvayā vayam arya ājiṁ jayema ||
4.020.04a uśann u ṣu ṇaḥ sumanā upāke somasya nu suṣutasya svadhāvaḥ |
4.020.04c pā indra pratibhṛtasya madhvaḥ sam andhasā mamadaḥ pṛṣṭhyena ||
4.020.05a vi yo rarapśa ṛṣibhir navebhir vṛkṣo na pakvaḥ sṛṇyo na jetā |
4.020.05c maryo na yoṣām abhi manyamāno 'cchā vivakmi puruhūtam indram ||
4.020.06a girir na yaḥ svatavām̐ ṛṣva indraḥ sanād eva sahase jāta ugraḥ |
4.020.06c ādartā vajraṁ sthaviraṁ na bhīma udneva kośaṁ vasunā nyṛṣṭam ||
4.020.07a na yasya vartā januṣā nv asti na rādhasa āmarītā maghasya |
4.020.07c udvāvṛṣāṇas taviṣīva ugrāsmabhyaṁ daddhi puruhūta rāyaḥ ||
4.020.08a īkṣe rāyaḥ kṣayasya carṣaṇīnām uta vrajam apavartāsi gonām |
4.020.08c śikṣānaraḥ samitheṣu prahāvān vasvo rāśim abhinetāsi bhūrim ||
4.020.09a kayā tac chṛṇve śacyā śaciṣṭho yayā kṛṇoti muhu kā cid ṛṣvaḥ |
4.020.09c puru dāśuṣe vicayiṣṭho aṁho 'thā dadhāti draviṇaṁ jaritre ||
4.020.10a mā no mardhīr ā bharā daddhi tan naḥ pra dāśuṣe dātave bhūri yat te |
4.020.10c navye deṣṇe śaste asmin ta ukthe pra bravāma vayam indra stuvantaḥ ||
4.020.11a nū ṣṭuta indra nū gṛṇāna iṣaṁ jaritre nadyo na pīpeḥ |
4.020.11c akāri te harivo brahma navyaṁ dhiyā syāma rathyaḥ sadāsāḥ ||

4.021.01a ā yātv indro 'vasa upa na iha stutaḥ sadhamād astu śūraḥ |
4.021.01c vāvṛdhānas taviṣīr yasya pūrvīr dyaur na kṣatram abhibhūti puṣyāt ||
4.021.02a tasyed iha stavatha vṛṣṇyāni tuvidyumnasya tuvirādhaso nṝn |
4.021.02c yasya kratur vidathyo na samrāṭ sāhvān tarutro abhy asti kṛṣṭīḥ ||
4.021.03a ā yātv indro diva ā pṛthivyā makṣū samudrād uta vā purīṣāt |
4.021.03c svarṇarād avase no marutvān parāvato vā sadanād ṛtasya ||
4.021.04a sthūrasya rāyo bṛhato ya īśe tam u ṣṭavāma vidatheṣv indram |
4.021.04c yo vāyunā jayati gomatīṣu pra dhṛṣṇuyā nayati vasyo accha ||
4.021.05a upa yo namo namasi stabhāyann iyarti vācaṁ janayan yajadhyai |
4.021.05c ṛñjasānaḥ puruvāra ukthair endraṁ kṛṇvīta sadaneṣu hotā ||
4.021.06a dhiṣā yadi dhiṣaṇyantaḥ saraṇyān sadanto adrim auśijasya gohe |
4.021.06c ā duroṣāḥ pāstyasya hotā yo no mahān saṁvaraṇeṣu vahniḥ ||
4.021.07a satrā yad īm bhārvarasya vṛṣṇaḥ siṣakti śuṣmaḥ stuvate bharāya |
4.021.07c guhā yad īm auśijasya gohe pra yad dhiye prāyase madāya ||
4.021.08a vi yad varāṁsi parvatasya vṛṇve payobhir jinve apāṁ javāṁsi |
4.021.08c vidad gaurasya gavayasya gohe yadī vājāya sudhyo vahanti ||
4.021.09a bhadrā te hastā sukṛtota pāṇī prayantārā stuvate rādha indra |
4.021.09c kā te niṣattiḥ kim u no mamatsi kiṁ nod-ud u harṣase dātavā u ||
4.021.10a evā vasva indraḥ satyaḥ samrāḍ ḍhantā vṛtraṁ varivaḥ pūrave kaḥ |
4.021.10c puruṣṭuta kratvā naḥ śagdhi rāyo bhakṣīya te 'vaso daivyasya ||
4.021.11a nū ṣṭuta indra nū gṛṇāna iṣaṁ jaritre nadyo na pīpeḥ |
4.021.11c akāri te harivo brahma navyaṁ dhiyā syāma rathyaḥ sadāsāḥ ||

4.022.01a yan na indro jujuṣe yac ca vaṣṭi tan no mahān karati śuṣmy ā cit |
4.022.01c brahma stomam maghavā somam ukthā yo aśmānaṁ śavasā bibhrad eti ||
4.022.02a vṛṣā vṛṣandhiṁ caturaśrim asyann ugro bāhubhyāṁ nṛtamaḥ śacīvān |
4.022.02c śriye paruṣṇīm uṣamāṇa ūrṇāṁ yasyāḥ parvāṇi sakhyāya vivye ||
4.022.03a yo devo devatamo jāyamāno maho vājebhir mahadbhiś ca śuṣmaiḥ |
4.022.03c dadhāno vajram bāhvor uśantaṁ dyām amena rejayat pra bhūma ||
4.022.04a viśvā rodhāṁsi pravataś ca pūrvīr dyaur ṛṣvāj janiman rejata kṣāḥ |
4.022.04c ā mātarā bharati śuṣmy ā gor nṛvat parijman nonuvanta vātāḥ ||
4.022.05a tā tū ta indra mahato mahāni viśveṣv it savaneṣu pravācyā |
4.022.05c yac chūra dhṛṣṇo dhṛṣatā dadhṛṣvān ahiṁ vajreṇa śavasāviveṣīḥ ||
4.022.06a tā tū te satyā tuvinṛmṇa viśvā pra dhenavaḥ sisrate vṛṣṇa ūdhnaḥ |
4.022.06c adhā ha tvad vṛṣamaṇo bhiyānāḥ pra sindhavo javasā cakramanta ||
4.022.07a atrāha te harivas tā u devīr avobhir indra stavanta svasāraḥ |
4.022.07c yat sīm anu pra muco badbadhānā dīrghām anu prasitiṁ syandayadhyai ||
4.022.08a pipīḻe aṁśur madyo na sindhur ā tvā śamī śaśamānasya śaktiḥ |
4.022.08c asmadryak chuśucānasya yamyā āśur na raśmiṁ tuvyojasaṁ goḥ ||
4.022.09a asme varṣiṣṭhā kṛṇuhi jyeṣṭhā nṛmṇāni satrā sahure sahāṁsi |
4.022.09c asmabhyaṁ vṛtrā suhanāni randhi jahi vadhar vanuṣo martyasya ||
4.022.10a asmākam it su śṛṇuhi tvam indrāsmabhyaṁ citrām̐ upa māhi vājān |
4.022.10c asmabhyaṁ viśvā iṣaṇaḥ puraṁdhīr asmākaṁ su maghavan bodhi godāḥ ||
4.022.11a nū ṣṭuta indra nū gṛṇāna iṣaṁ jaritre nadyo na pīpeḥ |
4.022.11c akāri te harivo brahma navyaṁ dhiyā syāma rathyaḥ sadāsāḥ ||

4.023.01a kathā mahām avṛdhat kasya hotur yajñaṁ juṣāṇo abhi somam ūdhaḥ |
4.023.01c pibann uśāno juṣamāṇo andho vavakṣa ṛṣvaḥ śucate dhanāya ||
4.023.02a ko asya vīraḥ sadhamādam āpa sam ānaṁśa sumatibhiḥ ko asya |
4.023.02c kad asya citraṁ cikite kad ūtī vṛdhe bhuvac chaśamānasya yajyoḥ ||
4.023.03a kathā śṛṇoti hūyamānam indraḥ kathā śṛṇvann avasām asya veda |
4.023.03c kā asya pūrvīr upamātayo ha kathainam āhuḥ papuriṁ jaritre ||
4.023.04a kathā sabādhaḥ śaśamāno asya naśad abhi draviṇaṁ dīdhyānaḥ |
4.023.04c devo bhuvan navedā ma ṛtānāṁ namo jagṛbhvām̐ abhi yaj jujoṣat ||
4.023.05a kathā kad asyā uṣaso vyuṣṭau devo martasya sakhyaṁ jujoṣa |
4.023.05c kathā kad asya sakhyaṁ sakhibhyo ye asmin kāmaṁ suyujaṁ tatasre ||
4.023.06a kim ād amatraṁ sakhyaṁ sakhibhyaḥ kadā nu te bhrātram pra bravāma |
4.023.06c śriye sudṛśo vapur asya sargāḥ svar ṇa citratamam iṣa ā goḥ ||
4.023.07a druhaṁ jighāṁsan dhvarasam anindrāṁ tetikte tigmā tujase anīkā |
4.023.07c ṛṇā cid yatra ṛṇayā na ugro dūre ajñātā uṣaso babādhe ||
4.023.08a ṛtasya hi śurudhaḥ santi pūrvīr ṛtasya dhītir vṛjināni hanti |
4.023.08c ṛtasya śloko badhirā tatarda karṇā budhānaḥ śucamāna āyoḥ ||
4.023.09a ṛtasya dṛḻhā dharuṇāni santi purūṇi candrā vapuṣe vapūṁṣi |
4.023.09c ṛtena dīrgham iṣaṇanta pṛkṣa ṛtena gāva ṛtam ā viveśuḥ ||
4.023.10a ṛtaṁ yemāna ṛtam id vanoty ṛtasya śuṣmas turayā u gavyuḥ |
4.023.10c ṛtāya pṛthvī bahule gabhīre ṛtāya dhenū parame duhāte ||
4.023.11a nū ṣṭuta indra nū gṛṇāna iṣaṁ jaritre nadyo na pīpeḥ |
4.023.11c akāri te harivo brahma navyaṁ dhiyā syāma rathyaḥ sadāsāḥ ||

4.024.01a kā suṣṭutiḥ śavasaḥ sūnum indram arvācīnaṁ rādhasa ā vavartat |
4.024.01c dadir hi vīro gṛṇate vasūni sa gopatir niṣṣidhāṁ no janāsaḥ ||
4.024.02a sa vṛtrahatye havyaḥ sa īḍyaḥ sa suṣṭuta indraḥ satyarādhāḥ |
4.024.02c sa yāmann ā maghavā martyāya brahmaṇyate suṣvaye varivo dhāt ||
4.024.03a tam in naro vi hvayante samīke ririkvāṁsas tanvaḥ kṛṇvata trām |
4.024.03c mitho yat tyāgam ubhayāso agman naras tokasya tanayasya sātau ||
4.024.04a kratūyanti kṣitayo yoga ugrāśuṣāṇāso mitho arṇasātau |
4.024.04c saṁ yad viśo 'vavṛtranta yudhmā ād in nema indrayante abhīke ||
4.024.05a ād id dha nema indriyaṁ yajanta ād it paktiḥ puroḻāśaṁ riricyāt |
4.024.05c ād it somo vi papṛcyād asuṣvīn ād ij jujoṣa vṛṣabhaṁ yajadhyai ||
4.024.06a kṛṇoty asmai varivo ya itthendrāya somam uśate sunoti |
4.024.06c sadhrīcīnena manasāvivenan tam it sakhāyaṁ kṛṇute samatsu ||
4.024.07a ya indrāya sunavat somam adya pacāt paktīr uta bhṛjjāti dhānāḥ |
4.024.07c prati manāyor ucathāni haryan tasmin dadhad vṛṣaṇaṁ śuṣmam indraḥ ||
4.024.08a yadā samaryaṁ vy aced ṛghāvā dīrghaṁ yad ājim abhy akhyad aryaḥ |
4.024.08c acikradad vṛṣaṇam patny acchā duroṇa ā niśitaṁ somasudbhiḥ ||
4.024.09a bhūyasā vasnam acarat kanīyo 'vikrīto akāniṣam punar yan |
4.024.09c sa bhūyasā kanīyo nārirecīd dīnā dakṣā vi duhanti pra vāṇam ||
4.024.10a ka imaṁ daśabhir mamendraṁ krīṇāti dhenubhiḥ |
4.024.10c yadā vṛtrāṇi jaṅghanad athainam me punar dadat ||
4.024.11a nū ṣṭuta indra nū gṛṇāna iṣaṁ jaritre nadyo na pīpeḥ |
4.024.11c akāri te harivo brahma navyaṁ dhiyā syāma rathyaḥ sadāsāḥ ||

4.025.01a ko adya naryo devakāma uśann indrasya sakhyaṁ jujoṣa |
4.025.01c ko vā mahe 'vase pāryāya samiddhe agnau sutasoma īṭṭe ||
4.025.02a ko nānāma vacasā somyāya manāyur vā bhavati vasta usrāḥ |
4.025.02c ka indrasya yujyaṁ kaḥ sakhitvaṁ ko bhrātraṁ vaṣṭi kavaye ka ūtī ||
4.025.03a ko devānām avo adyā vṛṇīte ka ādityām̐ aditiṁ jyotir īṭṭe |
4.025.03c kasyāśvināv indro agniḥ sutasyāṁśoḥ pibanti manasāvivenam ||
4.025.04a tasmā agnir bhārataḥ śarma yaṁsaj jyok paśyāt sūryam uccarantam |
4.025.04c ya indrāya sunavāmety āha nare naryāya nṛtamāya nṛṇām ||
4.025.05a na taṁ jinanti bahavo na dabhrā urv asmā aditiḥ śarma yaṁsat |
4.025.05c priyaḥ sukṛt priya indre manāyuḥ priyaḥ suprāvīḥ priyo asya somī ||
4.025.06a suprāvyaḥ prāśuṣāḻ eṣa vīraḥ suṣveḥ paktiṁ kṛṇute kevalendraḥ |
4.025.06c nāsuṣver āpir na sakhā na jāmir duṣprāvyo 'vahanted avācaḥ ||
4.025.07a na revatā paṇinā sakhyam indro 'sunvatā sutapāḥ saṁ gṛṇīte |
4.025.07c āsya vedaḥ khidati hanti nagnaṁ vi suṣvaye paktaye kevalo bhūt ||
4.025.08a indram pare 'vare madhyamāsa indraṁ yānto 'vasitāsa indram |
4.025.08c indraṁ kṣiyanta uta yudhyamānā indraṁ naro vājayanto havante ||

4.026.01a aham manur abhavaṁ sūryaś cāhaṁ kakṣīvām̐ ṛṣir asmi vipraḥ |
4.026.01c ahaṁ kutsam ārjuneyaṁ ny ṛñje 'haṁ kavir uśanā paśyatā mā ||
4.026.02a aham bhūmim adadām āryāyāhaṁ vṛṣṭiṁ dāśuṣe martyāya |
4.026.02c aham apo anayaṁ vāvaśānā mama devāso anu ketam āyan ||
4.026.03a aham puro mandasāno vy airaṁ nava sākaṁ navatīḥ śambarasya |
4.026.03c śatatamaṁ veśyaṁ sarvatātā divodāsam atithigvaṁ yad āvam ||
4.026.04a pra su ṣa vibhyo maruto vir astu pra śyenaḥ śyenebhya āśupatvā |
4.026.04c acakrayā yat svadhayā suparṇo havyam bharan manave devajuṣṭam ||
4.026.05a bharad yadi vir ato vevijānaḥ pathoruṇā manojavā asarji |
4.026.05c tūyaṁ yayau madhunā somyenota śravo vivide śyeno atra ||
4.026.06a ṛjīpī śyeno dadamāno aṁśum parāvataḥ śakuno mandram madam |
4.026.06c somam bharad dādṛhāṇo devāvān divo amuṣmād uttarād ādāya ||
4.026.07a ādāya śyeno abharat somaṁ sahasraṁ savām̐ ayutaṁ ca sākam |
4.026.07c atrā puraṁdhir ajahād arātīr made somasya mūrā amūraḥ ||

4.027.01a garbhe nu sann anv eṣām avedam ahaṁ devānāṁ janimāni viśvā |
4.027.01c śatam mā pura āyasīr arakṣann adha śyeno javasā nir adīyam ||
4.027.02a na ghā sa mām apa joṣaṁ jabhārābhīm āsa tvakṣasā vīryeṇa |
4.027.02c īrmā puraṁdhir ajahād arātīr uta vātām̐ atarac chūśuvānaḥ ||
4.027.03a ava yac chyeno asvanīd adha dyor vi yad yadi vāta ūhuḥ puraṁdhim |
4.027.03c sṛjad yad asmā ava ha kṣipaj jyāṁ kṛśānur astā manasā bhuraṇyan ||
4.027.04a ṛjipya īm indrāvato na bhujyuṁ śyeno jabhāra bṛhato adhi ṣṇoḥ |
4.027.04c antaḥ patat patatry asya parṇam adha yāmani prasitasya tad veḥ ||
4.027.05a adha śvetaṁ kalaśaṁ gobhir aktam āpipyānam maghavā śukram andhaḥ |
4.027.05c adhvaryubhiḥ prayatam madhvo agram indro madāya prati dhat pibadhyai śūro madāya prati dhat pibadhyai ||

4.028.01a tvā yujā tava tat soma sakhya indro apo manave sasrutas kaḥ |
4.028.01c ahann ahim ariṇāt sapta sindhūn apāvṛṇod apihiteva khāni ||
4.028.02a tvā yujā ni khidat sūryasyendraś cakraṁ sahasā sadya indo |
4.028.02c adhi ṣṇunā bṛhatā vartamānam maho druho apa viśvāyu dhāyi ||
4.028.03a ahann indro adahad agnir indo purā dasyūn madhyaṁdinād abhīke |
4.028.03c durge duroṇe kratvā na yātām purū sahasrā śarvā ni barhīt ||
4.028.04a viśvasmāt sīm adhamām̐ indra dasyūn viśo dāsīr akṛṇor apraśastāḥ |
4.028.04c abādhethām amṛṇataṁ ni śatrūn avindethām apacitiṁ vadhatraiḥ ||
4.028.05a evā satyam maghavānā yuvaṁ tad indraś ca somorvam aśvyaṁ goḥ |
4.028.05c ādardṛtam apihitāny aśnā riricathuḥ kṣāś cit tatṛdānā ||

4.029.01a ā naḥ stuta upa vājebhir ūtī indra yāhi haribhir mandasānaḥ |
4.029.01c tiraś cid aryaḥ savanā purūṇy āṅgūṣebhir gṛṇānaḥ satyarādhāḥ ||
4.029.02a ā hi ṣmā yāti naryaś cikitvān hūyamānaḥ sotṛbhir upa yajñam |
4.029.02c svaśvo yo abhīrur manyamānaḥ suṣvāṇebhir madati saṁ ha vīraiḥ ||
4.029.03a śrāvayed asya karṇā vājayadhyai juṣṭām anu pra diśam mandayadhyai |
4.029.03c udvāvṛṣāṇo rādhase tuviṣmān karan na indraḥ sutīrthābhayaṁ ca ||
4.029.04a acchā yo gantā nādhamānam ūtī itthā vipraṁ havamānaṁ gṛṇantam |
4.029.04c upa tmani dadhāno dhury āśūn sahasrāṇi śatāni vajrabāhuḥ ||
4.029.05a tvotāso maghavann indra viprā vayaṁ te syāma sūrayo gṛṇantaḥ |
4.029.05c bhejānāso bṛhaddivasya rāya ākāyyasya dāvane purukṣoḥ ||

4.030.01a nakir indra tvad uttaro na jyāyām̐ asti vṛtrahan |
4.030.01c nakir evā yathā tvam ||
4.030.02a satrā te anu kṛṣṭayo viśvā cakreva vāvṛtuḥ |
4.030.02c satrā mahām̐ asi śrutaḥ ||
4.030.03a viśve caned anā tvā devāsa indra yuyudhuḥ |
4.030.03c yad ahā naktam ātiraḥ ||
4.030.04a yatrota bādhitebhyaś cakraṁ kutsāya yudhyate |
4.030.04c muṣāya indra sūryam ||
4.030.05a yatra devām̐ ṛghāyato viśvām̐ ayudhya eka it |
4.030.05c tvam indra vanūm̐r ahan ||
4.030.06a yatrota martyāya kam ariṇā indra sūryam |
4.030.06c prāvaḥ śacībhir etaśam ||
4.030.07a kim ād utāsi vṛtrahan maghavan manyumattamaḥ |
4.030.07c atrāha dānum ātiraḥ ||
4.030.08a etad ghed uta vīryam indra cakartha pauṁsyam |
4.030.08c striyaṁ yad durhaṇāyuvaṁ vadhīr duhitaraṁ divaḥ ||
4.030.09a divaś cid ghā duhitaram mahān mahīyamānām |
4.030.09c uṣāsam indra sam piṇak ||
4.030.10a apoṣā anasaḥ sarat sampiṣṭād aha bibhyuṣī |
4.030.10c ni yat sīṁ śiśnathad vṛṣā ||
4.030.11a etad asyā anaḥ śaye susampiṣṭaṁ vipāśy ā |
4.030.11c sasāra sīm parāvataḥ ||
4.030.12a uta sindhuṁ vibālyaṁ vitasthānām adhi kṣami |
4.030.12c pari ṣṭhā indra māyayā ||
4.030.13a uta śuṣṇasya dhṛṣṇuyā pra mṛkṣo abhi vedanam |
4.030.13c puro yad asya sampiṇak ||
4.030.14a uta dāsaṁ kaulitaram bṛhataḥ parvatād adhi |
4.030.14c avāhann indra śambaram ||
4.030.15a uta dāsasya varcinaḥ sahasrāṇi śatāvadhīḥ |
4.030.15c adhi pañca pradhīm̐r iva ||
4.030.16a uta tyam putram agruvaḥ parāvṛktaṁ śatakratuḥ |
4.030.16c uktheṣv indra ābhajat ||
4.030.17a uta tyā turvaśāyadū asnātārā śacīpatiḥ |
4.030.17c indro vidvām̐ apārayat ||
4.030.18a uta tyā sadya āryā sarayor indra pārataḥ |
4.030.18c arṇācitrarathāvadhīḥ ||
4.030.19a anu dvā jahitā nayo 'ndhaṁ śroṇaṁ ca vṛtrahan |
4.030.19c na tat te sumnam aṣṭave ||
4.030.20a śatam aśmanmayīnām purām indro vy āsyat |
4.030.20c divodāsāya dāśuṣe ||
4.030.21a asvāpayad dabhītaye sahasrā triṁśataṁ hathaiḥ |
4.030.21c dāsānām indro māyayā ||
4.030.22a sa ghed utāsi vṛtrahan samāna indra gopatiḥ |
4.030.22c yas tā viśvāni cicyuṣe ||
4.030.23a uta nūnaṁ yad indriyaṁ kariṣyā indra pauṁsyam |
4.030.23c adyā nakiṣ ṭad ā minat ||
4.030.24a vāmaṁ-vāmaṁ ta ādure devo dadātv aryamā |
4.030.24c vāmam pūṣā vāmam bhago vāmaṁ devaḥ karūḻatī ||

4.031.01a kayā naś citra ā bhuvad ūtī sadāvṛdhaḥ sakhā |
4.031.01c kayā śaciṣṭhayā vṛtā ||
4.031.02a kas tvā satyo madānām maṁhiṣṭho matsad andhasaḥ |
4.031.02c dṛḻhā cid āruje vasu ||
4.031.03a abhī ṣu ṇaḥ sakhīnām avitā jaritṝṇām |
4.031.03c śatam bhavāsy ūtibhiḥ ||
4.031.04a abhī na ā vavṛtsva cakraṁ na vṛttam arvataḥ |
4.031.04c niyudbhiś carṣaṇīnām ||
4.031.05a pravatā hi kratūnām ā hā padeva gacchasi |
4.031.05c abhakṣi sūrye sacā ||
4.031.06a saṁ yat ta indra manyavaḥ saṁ cakrāṇi dadhanvire |
4.031.06c adha tve adha sūrye ||
4.031.07a uta smā hi tvām āhur in maghavānaṁ śacīpate |
4.031.07c dātāram avidīdhayum ||
4.031.08a uta smā sadya it pari śaśamānāya sunvate |
4.031.08c purū cin maṁhase vasu ||
4.031.09a nahi ṣmā te śataṁ cana rādho varanta āmuraḥ |
4.031.09c na cyautnāni kariṣyataḥ ||
4.031.10a asmām̐ avantu te śatam asmān sahasram ūtayaḥ |
4.031.10c asmān viśvā abhiṣṭayaḥ ||
4.031.11a asmām̐ ihā vṛṇīṣva sakhyāya svastaye |
4.031.11c maho rāye divitmate ||
4.031.12a asmām̐ aviḍḍhi viśvahendra rāyā parīṇasā |
4.031.12c asmān viśvābhir ūtibhiḥ ||
4.031.13a asmabhyaṁ tām̐ apā vṛdhi vrajām̐ asteva gomataḥ |
4.031.13c navābhir indrotibhiḥ ||
4.031.14a asmākaṁ dhṛṣṇuyā ratho dyumām̐ indrānapacyutaḥ |
4.031.14c gavyur aśvayur īyate ||
4.031.15a asmākam uttamaṁ kṛdhi śravo deveṣu sūrya |
4.031.15c varṣiṣṭhaṁ dyām ivopari ||

4.032.01a ā tū na indra vṛtrahann asmākam ardham ā gahi |
4.032.01c mahān mahībhir ūtibhiḥ ||
4.032.02a bhṛmiś cid ghāsi tūtujir ā citra citriṇīṣv ā |
4.032.02c citraṁ kṛṇoṣy ūtaye ||
4.032.03a dabhrebhiś cic chaśīyāṁsaṁ haṁsi vrādhantam ojasā |
4.032.03c sakhibhir ye tve sacā ||
4.032.04a vayam indra tve sacā vayaṁ tvābhi nonumaḥ |
4.032.04c asmām̐-asmām̐ id ud ava ||
4.032.05a sa naś citrābhir adrivo 'navadyābhir ūtibhiḥ |
4.032.05c anādhṛṣṭābhir ā gahi ||
4.032.06a bhūyāmo ṣu tvāvataḥ sakhāya indra gomataḥ |
4.032.06c yujo vājāya ghṛṣvaye ||
4.032.07a tvaṁ hy eka īśiṣa indra vājasya gomataḥ |
4.032.07c sa no yandhi mahīm iṣam ||
4.032.08a na tvā varante anyathā yad ditsasi stuto magham |
4.032.08c stotṛbhya indra girvaṇaḥ ||
4.032.09a abhi tvā gotamā girānūṣata pra dāvane |
4.032.09c indra vājāya ghṛṣvaye ||
4.032.10a pra te vocāma vīryā yā mandasāna ārujaḥ |
4.032.10c puro dāsīr abhītya ||
4.032.11a tā te gṛṇanti vedhaso yāni cakartha pauṁsyā |
4.032.11c suteṣv indra girvaṇaḥ ||
4.032.12a avīvṛdhanta gotamā indra tve stomavāhasaḥ |
4.032.12c aiṣu dhā vīravad yaśaḥ ||
4.032.13a yac cid dhi śaśvatām asīndra sādhāraṇas tvam |
4.032.13c taṁ tvā vayaṁ havāmahe ||
4.032.14a arvācīno vaso bhavāsme su matsvāndhasaḥ |
4.032.14c somānām indra somapāḥ ||
4.032.15a asmākaṁ tvā matīnām ā stoma indra yacchatu |
4.032.15c arvāg ā vartayā harī ||
4.032.16a puroḻāśaṁ ca no ghaso joṣayāse giraś ca naḥ |
4.032.16c vadhūyur iva yoṣaṇām ||
4.032.17a sahasraṁ vyatīnāṁ yuktānām indram īmahe |
4.032.17c śataṁ somasya khāryaḥ ||
4.032.18a sahasrā te śatā vayaṁ gavām ā cyāvayāmasi |
4.032.18c asmatrā rādha etu te ||
4.032.19a daśa te kalaśānāṁ hiraṇyānām adhīmahi |
4.032.19c bhūridā asi vṛtrahan ||
4.032.20a bhūridā bhūri dehi no mā dabhram bhūry ā bhara |
4.032.20c bhūri ghed indra ditsasi ||
4.032.21a bhūridā hy asi śrutaḥ purutrā śūra vṛtrahan |
4.032.21c ā no bhajasva rādhasi ||
4.032.22a pra te babhrū vicakṣaṇa śaṁsāmi goṣaṇo napāt |
4.032.22c mābhyāṁ gā anu śiśrathaḥ ||
4.032.23a kanīnakeva vidradhe nave drupade arbhake |
4.032.23c babhrū yāmeṣu śobhete ||
4.032.24a aram ma usrayāmṇe 'ram anusrayāmṇe |
4.032.24c babhrū yāmeṣv asridhā ||

4.033.01a pra ṛbhubhyo dūtam iva vācam iṣya upastire śvaitarīṁ dhenum īḻe |
4.033.01c ye vātajūtās taraṇibhir evaiḥ pari dyāṁ sadyo apaso babhūvuḥ ||
4.033.02a yadāram akrann ṛbhavaḥ pitṛbhyām pariviṣṭī veṣaṇā daṁsanābhiḥ |
4.033.02c ād id devānām upa sakhyam āyan dhīrāsaḥ puṣṭim avahan manāyai ||
4.033.03a punar ye cakruḥ pitarā yuvānā sanā yūpeva jaraṇā śayānā |
4.033.03c te vājo vibhvām̐ ṛbhur indravanto madhupsaraso no 'vantu yajñam ||
4.033.04a yat saṁvatsam ṛbhavo gām arakṣan yat saṁvatsam ṛbhavo mā apiṁśan |
4.033.04c yat saṁvatsam abharan bhāso asyās tābhiḥ śamībhir amṛtatvam āśuḥ ||
4.033.05a jyeṣṭha āha camasā dvā kareti kanīyān trīn kṛṇavāmety āha |
4.033.05c kaniṣṭha āha caturas kareti tvaṣṭa ṛbhavas tat panayad vaco vaḥ ||
4.033.06a satyam ūcur nara evā hi cakrur anu svadhām ṛbhavo jagmur etām |
4.033.06c vibhrājamānām̐ś camasām̐ ahevāvenat tvaṣṭā caturo dadṛśvān ||
4.033.07a dvādaśa dyūn yad agohyasyātithye raṇann ṛbhavaḥ sasantaḥ |
4.033.07c sukṣetrākṛṇvann anayanta sindhūn dhanvātiṣṭhann oṣadhīr nimnam āpaḥ ||
4.033.08a rathaṁ ye cakruḥ suvṛtaṁ nareṣṭhāṁ ye dhenuṁ viśvajuvaṁ viśvarūpām |
4.033.08c ta ā takṣantv ṛbhavo rayiṁ naḥ svavasaḥ svapasaḥ suhastāḥ ||
4.033.09a apo hy eṣām ajuṣanta devā abhi kratvā manasā dīdhyānāḥ |
4.033.09c vājo devānām abhavat sukarmendrasya ṛbhukṣā varuṇasya vibhvā ||
4.033.10a ye harī medhayokthā madanta indrāya cakruḥ suyujā ye aśvā |
4.033.10c te rāyas poṣaṁ draviṇāny asme dhatta ṛbhavaḥ kṣemayanto na mitram ||
4.033.11a idāhnaḥ pītim uta vo madaṁ dhur na ṛte śrāntasya sakhyāya devāḥ |
4.033.11c te nūnam asme ṛbhavo vasūni tṛtīye asmin savane dadhāta ||

4.034.01a ṛbhur vibhvā vāja indro no acchemaṁ yajñaṁ ratnadheyopa yāta |
4.034.01c idā hi vo dhiṣaṇā devy ahnām adhāt pītiṁ sam madā agmatā vaḥ ||
4.034.02a vidānāso janmano vājaratnā uta ṛtubhir ṛbhavo mādayadhvam |
4.034.02c saṁ vo madā agmata sam puraṁdhiḥ suvīrām asme rayim erayadhvam ||
4.034.03a ayaṁ vo yajña ṛbhavo 'kāri yam ā manuṣvat pradivo dadhidhve |
4.034.03c pra vo 'cchā jujuṣāṇāso asthur abhūta viśve agriyota vājāḥ ||
4.034.04a abhūd u vo vidhate ratnadheyam idā naro dāśuṣe martyāya |
4.034.04c pibata vājā ṛbhavo dade vo mahi tṛtīyaṁ savanam madāya ||
4.034.05a ā vājā yātopa na ṛbhukṣā maho naro draviṇaso gṛṇānāḥ |
4.034.05c ā vaḥ pītayo 'bhipitve ahnām imā astaṁ navasva iva gman ||
4.034.06a ā napātaḥ śavaso yātanopemaṁ yajñaṁ namasā hūyamānāḥ |
4.034.06c sajoṣasaḥ sūrayo yasya ca stha madhvaḥ pāta ratnadhā indravantaḥ ||
4.034.07a sajoṣā indra varuṇena somaṁ sajoṣāḥ pāhi girvaṇo marudbhiḥ |
4.034.07c agrepābhir ṛtupābhiḥ sajoṣā gnāspatnībhī ratnadhābhiḥ sajoṣāḥ ||
4.034.08a sajoṣasa ādityair mādayadhvaṁ sajoṣasa ṛbhavaḥ parvatebhiḥ |
4.034.08c sajoṣaso daivyenā savitrā sajoṣasaḥ sindhubhī ratnadhebhiḥ ||
4.034.09a ye aśvinā ye pitarā ya ūtī dhenuṁ tatakṣur ṛbhavo ye aśvā |
4.034.09c ye aṁsatrā ya ṛdhag rodasī ye vibhvo naraḥ svapatyāni cakruḥ ||
4.034.10a ye gomantaṁ vājavantaṁ suvīraṁ rayiṁ dhattha vasumantam purukṣum |
4.034.10c te agrepā ṛbhavo mandasānā asme dhatta ye ca rātiṁ gṛṇanti ||
4.034.11a nāpābhūta na vo 'tītṛṣāmāniḥśastā ṛbhavo yajñe asmin |
4.034.11c sam indreṇa madatha sam marudbhiḥ saṁ rājabhī ratnadheyāya devāḥ ||

4.035.01a ihopa yāta śavaso napātaḥ saudhanvanā ṛbhavo māpa bhūta |
4.035.01c asmin hi vaḥ savane ratnadheyaṁ gamantv indram anu vo madāsaḥ ||
4.035.02a āgann ṛbhūṇām iha ratnadheyam abhūt somasya suṣutasya pītiḥ |
4.035.02c sukṛtyayā yat svapasyayā cam̐ ekaṁ vicakra camasaṁ caturdhā ||
4.035.03a vy akṛṇota camasaṁ caturdhā sakhe vi śikṣety abravīta |
4.035.03c athaita vājā amṛtasya panthāṁ gaṇaṁ devānām ṛbhavaḥ suhastāḥ ||
4.035.04a kimmayaḥ svic camasa eṣa āsa yaṁ kāvyena caturo vicakra |
4.035.04c athā sunudhvaṁ savanam madāya pāta ṛbhavo madhunaḥ somyasya ||
4.035.05a śacyākarta pitarā yuvānā śacyākarta camasaṁ devapānam |
4.035.05c śacyā harī dhanutarāv ataṣṭendravāhāv ṛbhavo vājaratnāḥ ||
4.035.06a yo vaḥ sunoty abhipitve ahnāṁ tīvraṁ vājāsaḥ savanam madāya |
4.035.06c tasmai rayim ṛbhavaḥ sarvavīram ā takṣata vṛṣaṇo mandasānāḥ ||
4.035.07a prātaḥ sutam apibo haryaśva mādhyaṁdinaṁ savanaṁ kevalaṁ te |
4.035.07c sam ṛbhubhiḥ pibasva ratnadhebhiḥ sakhīm̐r yām̐ indra cakṛṣe sukṛtyā ||
4.035.08a ye devāso abhavatā sukṛtyā śyenā ived adhi divi niṣeda |
4.035.08c te ratnaṁ dhāta śavaso napātaḥ saudhanvanā abhavatāmṛtāsaḥ ||
4.035.09a yat tṛtīyaṁ savanaṁ ratnadheyam akṛṇudhvaṁ svapasyā suhastāḥ |
4.035.09c tad ṛbhavaḥ pariṣiktaṁ va etat sam madebhir indriyebhiḥ pibadhvam ||

4.036.01a anaśvo jāto anabhīśur ukthyo rathas tricakraḥ pari vartate rajaḥ |
4.036.01c mahat tad vo devyasya pravācanaṁ dyām ṛbhavaḥ pṛthivīṁ yac ca puṣyatha ||
4.036.02a rathaṁ ye cakruḥ suvṛtaṁ sucetaso 'vihvarantam manasas pari dhyayā |
4.036.02c tām̐ ū nv asya savanasya pītaya ā vo vājā ṛbhavo vedayāmasi ||
4.036.03a tad vo vājā ṛbhavaḥ supravācanaṁ deveṣu vibhvo abhavan mahitvanam |
4.036.03c jivrī yat santā pitarā sanājurā punar yuvānā carathāya takṣatha ||
4.036.04a ekaṁ vi cakra camasaṁ caturvayaṁ niś carmaṇo gām ariṇīta dhītibhiḥ |
4.036.04c athā deveṣv amṛtatvam ānaśa śruṣṭī vājā ṛbhavas tad va ukthyam ||
4.036.05a ṛbhuto rayiḥ prathamaśravastamo vājaśrutāso yam ajījanan naraḥ |
4.036.05c vibhvataṣṭo vidatheṣu pravācyo yaṁ devāso 'vathā sa vicarṣaṇiḥ ||
4.036.06a sa vājy arvā sa ṛṣir vacasyayā sa śūro astā pṛtanāsu duṣṭaraḥ |
4.036.06c sa rāyas poṣaṁ sa suvīryaṁ dadhe yaṁ vājo vibhvām̐ ṛbhavo yam āviṣuḥ ||
4.036.07a śreṣṭhaṁ vaḥ peśo adhi dhāyi darśataṁ stomo vājā ṛbhavas taṁ jujuṣṭana |
4.036.07c dhīrāso hi ṣṭhā kavayo vipaścitas tān va enā brahmaṇā vedayāmasi ||
4.036.08a yūyam asmabhyaṁ dhiṣaṇābhyas pari vidvāṁso viśvā naryāṇi bhojanā |
4.036.08c dyumantaṁ vājaṁ vṛṣaśuṣmam uttamam ā no rayim ṛbhavas takṣatā vayaḥ ||
4.036.09a iha prajām iha rayiṁ rarāṇā iha śravo vīravat takṣatā naḥ |
4.036.09c yena vayaṁ citayemāty anyān taṁ vājaṁ citram ṛbhavo dadā naḥ ||

4.037.01a upa no vājā adhvaram ṛbhukṣā devā yāta pathibhir devayānaiḥ |
4.037.01c yathā yajñam manuṣo vikṣv āsu dadhidhve raṇvāḥ sudineṣv ahnām ||
4.037.02a te vo hṛde manase santu yajñā juṣṭāso adya ghṛtanirṇijo guḥ |
4.037.02c pra vaḥ sutāso harayanta pūrṇāḥ kratve dakṣāya harṣayanta pītāḥ ||
4.037.03a tryudāyaṁ devahitaṁ yathā vaḥ stomo vājā ṛbhukṣaṇo dade vaḥ |
4.037.03c juhve manuṣvad uparāsu vikṣu yuṣme sacā bṛhaddiveṣu somam ||
4.037.04a pīvoaśvāḥ śucadrathā hi bhūtāyaḥśiprā vājinaḥ suniṣkāḥ |
4.037.04c indrasya sūno śavaso napāto 'nu vaś cety agriyam madāya ||
4.037.05a ṛbhum ṛbhukṣaṇo rayiṁ vāje vājintamaṁ yujam |
4.037.05c indrasvantaṁ havāmahe sadāsātamam aśvinam ||
4.037.06a sed ṛbhavo yam avatha yūyam indraś ca martyam |
4.037.06c sa dhībhir astu sanitā medhasātā so arvatā ||
4.037.07a vi no vājā ṛbhukṣaṇaḥ pathaś citana yaṣṭave |
4.037.07c asmabhyaṁ sūrayaḥ stutā viśvā āśās tarīṣaṇi ||
4.037.08a taṁ no vājā ṛbhukṣaṇa indra nāsatyā rayim |
4.037.08c sam aśvaṁ carṣaṇibhya ā puru śasta maghattaye ||

4.038.01a uto hi vāṁ dātrā santi pūrvā yā pūrubhyas trasadasyur nitośe |
4.038.01c kṣetrāsāṁ dadathur urvarāsāṁ ghanaṁ dasyubhyo abhibhūtim ugram ||
4.038.02a uta vājinam puruniṣṣidhvānaṁ dadhikrām u dadathur viśvakṛṣṭim |
4.038.02c ṛjipyaṁ śyenam pruṣitapsum āśuṁ carkṛtyam aryo nṛpatiṁ na śūram ||
4.038.03a yaṁ sīm anu pravateva dravantaṁ viśvaḥ pūrur madati harṣamāṇaḥ |
4.038.03c paḍbhir gṛdhyantam medhayuṁ na śūraṁ rathaturaṁ vātam iva dhrajantam ||
4.038.04a yaḥ smārundhāno gadhyā samatsu sanutaraś carati goṣu gacchan |
4.038.04c āvirṛjīko vidathā nicikyat tiro aratim pary āpa āyoḥ ||
4.038.05a uta smainaṁ vastramathiṁ na tāyum anu krośanti kṣitayo bhareṣu |
4.038.05c nīcāyamānaṁ jasuriṁ na śyenaṁ śravaś cācchā paśumac ca yūtham ||
4.038.06a uta smāsu prathamaḥ sariṣyan ni veveti śreṇibhī rathānām |
4.038.06c srajaṁ kṛṇvāno janyo na śubhvā reṇuṁ rerihat kiraṇaṁ dadaśvān ||
4.038.07a uta sya vājī sahurir ṛtāvā śuśrūṣamāṇas tanvā samarye |
4.038.07c turaṁ yatīṣu turayann ṛjipyo 'dhi bhruvoḥ kirate reṇum ṛñjan ||
4.038.08a uta smāsya tanyator iva dyor ṛghāyato abhiyujo bhayante |
4.038.08c yadā sahasram abhi ṣīm ayodhīd durvartuḥ smā bhavati bhīma ṛñjan ||
4.038.09a uta smāsya panayanti janā jūtiṁ kṛṣṭipro abhibhūtim āśoḥ |
4.038.09c utainam āhuḥ samithe viyantaḥ parā dadhikrā asarat sahasraiḥ ||
4.038.10a ā dadhikrāḥ śavasā pañca kṛṣṭīḥ sūrya iva jyotiṣāpas tatāna |
4.038.10c sahasrasāḥ śatasā vājy arvā pṛṇaktu madhvā sam imā vacāṁsi ||

4.039.01a āśuṁ dadhikrāṁ tam u nu ṣṭavāma divas pṛthivyā uta carkirāma |
4.039.01c ucchantīr mām uṣasaḥ sūdayantv ati viśvāni duritāni parṣan ||
4.039.02a mahaś carkarmy arvataḥ kratuprā dadhikrāvṇaḥ puruvārasya vṛṣṇaḥ |
4.039.02c yam pūrubhyo dīdivāṁsaṁ nāgniṁ dadathur mitrāvaruṇā taturim ||
4.039.03a yo aśvasya dadhikrāvṇo akārīt samiddhe agnā uṣaso vyuṣṭau |
4.039.03c anāgasaṁ tam aditiḥ kṛṇotu sa mitreṇa varuṇenā sajoṣāḥ ||
4.039.04a dadhikrāvṇa iṣa ūrjo maho yad amanmahi marutāṁ nāma bhadram |
4.039.04c svastaye varuṇam mitram agniṁ havāmaha indraṁ vajrabāhum ||
4.039.05a indram ived ubhaye vi hvayanta udīrāṇā yajñam upaprayantaḥ |
4.039.05c dadhikrām u sūdanam martyāya dadathur mitrāvaruṇā no aśvam ||
4.039.06a dadhikrāvṇo akāriṣaṁ jiṣṇor aśvasya vājinaḥ |
4.039.06c surabhi no mukhā karat pra ṇa āyūṁṣi tāriṣat ||

4.040.01a dadhikrāvṇa id u nu carkirāma viśvā in mām uṣasaḥ sūdayantu |
4.040.01c apām agner uṣasaḥ sūryasya bṛhaspater āṅgirasasya jiṣṇoḥ ||
4.040.02a satvā bhariṣo gaviṣo duvanyasac chravasyād iṣa uṣasas turaṇyasat |
4.040.02c satyo dravo dravaraḥ pataṁgaro dadhikrāveṣam ūrjaṁ svar janat ||
4.040.03a uta smāsya dravatas turaṇyataḥ parṇaṁ na ver anu vāti pragardhinaḥ |
4.040.03c śyenasyeva dhrajato aṅkasam pari dadhikrāvṇaḥ sahorjā taritrataḥ ||
4.040.04a uta sya vājī kṣipaṇiṁ turaṇyati grīvāyām baddho apikakṣa āsani |
4.040.04c kratuṁ dadhikrā anu saṁtavītvat pathām aṅkāṁsy anv āpanīphaṇat ||
4.040.05a haṁsaḥ śuciṣad vasur antarikṣasad dhotā vediṣad atithir duroṇasat |
4.040.05c nṛṣad varasad ṛtasad vyomasad abjā gojā ṛtajā adrijā ṛtam ||

4.041.01a indrā ko vāṁ varuṇā sumnam āpa stomo haviṣmām̐ amṛto na hotā |
4.041.01c yo vāṁ hṛdi kratumām̐ asmad uktaḥ pasparśad indrāvaruṇā namasvān ||
4.041.02a indrā ha yo varuṇā cakra āpī devau martaḥ sakhyāya prayasvān |
4.041.02c sa hanti vṛtrā samitheṣu śatrūn avobhir vā mahadbhiḥ sa pra śṛṇve ||
4.041.03a indrā ha ratnaṁ varuṇā dheṣṭhetthā nṛbhyaḥ śaśamānebhyas tā |
4.041.03c yadī sakhāyā sakhyāya somaiḥ sutebhiḥ suprayasā mādayaite ||
4.041.04a indrā yuvaṁ varuṇā didyum asminn ojiṣṭham ugrā ni vadhiṣṭaṁ vajram |
4.041.04c yo no durevo vṛkatir dabhītis tasmin mimāthām abhibhūty ojaḥ ||
4.041.05a indrā yuvaṁ varuṇā bhūtam asyā dhiyaḥ pretārā vṛṣabheva dhenoḥ |
4.041.05c sā no duhīyad yavaseva gatvī sahasradhārā payasā mahī gauḥ ||
4.041.06a toke hite tanaya urvarāsu sūro dṛśīke vṛṣaṇaś ca pauṁsye |
4.041.06c indrā no atra varuṇā syātām avobhir dasmā paritakmyāyām ||
4.041.07a yuvām id dhy avase pūrvyāya pari prabhūtī gaviṣaḥ svāpī |
4.041.07c vṛṇīmahe sakhyāya priyāya śūrā maṁhiṣṭhā pitareva śambhū ||
4.041.08a tā vāṁ dhiyo 'vase vājayantīr ājiṁ na jagmur yuvayūḥ sudānū |
4.041.08c śriye na gāva upa somam asthur indraṁ giro varuṇam me manīṣāḥ ||
4.041.09a imā indraṁ varuṇam me manīṣā agmann upa draviṇam icchamānāḥ |
4.041.09c upem asthur joṣṭāra iva vasvo raghvīr iva śravaso bhikṣamāṇāḥ ||
4.041.10a aśvyasya tmanā rathyasya puṣṭer nityasya rāyaḥ patayaḥ syāma |
4.041.10c tā cakrāṇā ūtibhir navyasībhir asmatrā rāyo niyutaḥ sacantām ||
4.041.11a ā no bṛhantā bṛhatībhir ūtī indra yātaṁ varuṇa vājasātau |
4.041.11c yad didyavaḥ pṛtanāsu prakrīḻān tasya vāṁ syāma sanitāra ājeḥ ||

4.042.01a mama dvitā rāṣṭraṁ kṣatriyasya viśvāyor viśve amṛtā yathā naḥ |
4.042.01c kratuṁ sacante varuṇasya devā rājāmi kṛṣṭer upamasya vavreḥ ||
4.042.02a ahaṁ rājā varuṇo mahyaṁ tāny asuryāṇi prathamā dhārayanta |
4.042.02c kratuṁ sacante varuṇasya devā rājāmi kṛṣṭer upamasya vavreḥ ||
4.042.03a aham indro varuṇas te mahitvorvī gabhīre rajasī sumeke |
4.042.03c tvaṣṭeva viśvā bhuvanāni vidvān sam airayaṁ rodasī dhārayaṁ ca ||
4.042.04a aham apo apinvam ukṣamāṇā dhārayaṁ divaṁ sadana ṛtasya |
4.042.04c ṛtena putro aditer ṛtāvota tridhātu prathayad vi bhūma ||
4.042.05a māṁ naraḥ svaśvā vājayanto māṁ vṛtāḥ samaraṇe havante |
4.042.05c kṛṇomy ājim maghavāham indra iyarmi reṇum abhibhūtyojāḥ ||
4.042.06a ahaṁ tā viśvā cakaraṁ nakir mā daivyaṁ saho varate apratītam |
4.042.06c yan mā somāso mamadan yad ukthobhe bhayete rajasī apāre ||
4.042.07a viduṣ ṭe viśvā bhuvanāni tasya tā pra bravīṣi varuṇāya vedhaḥ |
4.042.07c tvaṁ vṛtrāṇi śṛṇviṣe jaghanvān tvaṁ vṛtām̐ ariṇā indra sindhūn ||
4.042.08a asmākam atra pitaras ta āsan sapta ṛṣayo daurgahe badhyamāne |
4.042.08c ta āyajanta trasadasyum asyā indraṁ na vṛtraturam ardhadevam ||
4.042.09a purukutsānī hi vām adāśad dhavyebhir indrāvaruṇā namobhiḥ |
4.042.09c athā rājānaṁ trasadasyum asyā vṛtrahaṇaṁ dadathur ardhadevam ||
4.042.10a rāyā vayaṁ sasavāṁso madema havyena devā yavasena gāvaḥ |
4.042.10c tāṁ dhenum indrāvaruṇā yuvaṁ no viśvāhā dhattam anapasphurantīm ||

4.043.01a ka u śravat katamo yajñiyānāṁ vandāru devaḥ katamo juṣāte |
4.043.01c kasyemāṁ devīm amṛteṣu preṣṭhāṁ hṛdi śreṣāma suṣṭutiṁ suhavyām ||
4.043.02a ko mṛḻāti katama āgamiṣṭho devānām u katamaḥ śambhaviṣṭhaḥ |
4.043.02c rathaṁ kam āhur dravadaśvam āśuṁ yaṁ sūryasya duhitāvṛṇīta ||
4.043.03a makṣū hi ṣmā gacchatha īvato dyūn indro na śaktim paritakmyāyām |
4.043.03c diva ājātā divyā suparṇā kayā śacīnām bhavathaḥ śaciṣṭhā ||
4.043.04a kā vām bhūd upamātiḥ kayā na āśvinā gamatho hūyamānā |
4.043.04c ko vām mahaś cit tyajaso abhīka uruṣyatam mādhvī dasrā na ūtī ||
4.043.05a uru vāṁ rathaḥ pari nakṣati dyām ā yat samudrād abhi vartate vām |
4.043.05c madhvā mādhvī madhu vām pruṣāyan yat sīṁ vām pṛkṣo bhurajanta pakvāḥ ||
4.043.06a sindhur ha vāṁ rasayā siñcad aśvān ghṛṇā vayo 'ruṣāsaḥ pari gman |
4.043.06c tad ū ṣu vām ajiraṁ ceti yānaṁ yena patī bhavathaḥ sūryāyāḥ ||
4.043.07a iheha yad vāṁ samanā papṛkṣe seyam asme sumatir vājaratnā |
4.043.07c uruṣyataṁ jaritāraṁ yuvaṁ ha śritaḥ kāmo nāsatyā yuvadrik ||

4.044.01a taṁ vāṁ rathaṁ vayam adyā huvema pṛthujrayam aśvinā saṁgatiṁ goḥ |
4.044.01c yaḥ sūryāṁ vahati vandhurāyur girvāhasam purutamaṁ vasūyum ||
4.044.02a yuvaṁ śriyam aśvinā devatā tāṁ divo napātā vanathaḥ śacībhiḥ |
4.044.02c yuvor vapur abhi pṛkṣaḥ sacante vahanti yat kakuhāso rathe vām ||
4.044.03a ko vām adyā karate rātahavya ūtaye vā sutapeyāya vārkaiḥ |
4.044.03c ṛtasya vā vanuṣe pūrvyāya namo yemāno aśvinā vavartat ||
4.044.04a hiraṇyayena purubhū rathenemaṁ yajñaṁ nāsatyopa yātam |
4.044.04c pibātha in madhunaḥ somyasya dadhatho ratnaṁ vidhate janāya ||
4.044.05a ā no yātaṁ divo acchā pṛthivyā hiraṇyayena suvṛtā rathena |
4.044.05c mā vām anye ni yaman devayantaḥ saṁ yad dade nābhiḥ pūrvyā vām ||
4.044.06a nū no rayim puruvīram bṛhantaṁ dasrā mimāthām ubhayeṣv asme |
4.044.06c naro yad vām aśvinā stomam āvan sadhastutim ājamīḻhāso agman ||
4.044.07a iheha yad vāṁ samanā papṛkṣe seyam asme sumatir vājaratnā |
4.044.07c uruṣyataṁ jaritāraṁ yuvaṁ ha śritaḥ kāmo nāsatyā yuvadrik ||

4.045.01a eṣa sya bhānur ud iyarti yujyate rathaḥ parijmā divo asya sānavi |
4.045.01c pṛkṣāso asmin mithunā adhi trayo dṛtis turīyo madhuno vi rapśate ||
4.045.02a ud vām pṛkṣāso madhumanta īrate rathā aśvāsa uṣaso vyuṣṭiṣu |
4.045.02c aporṇuvantas tama ā parīvṛtaṁ svar ṇa śukraṁ tanvanta ā rajaḥ ||
4.045.03a madhvaḥ pibatam madhupebhir āsabhir uta priyam madhune yuñjāthāṁ ratham |
4.045.03c ā vartanim madhunā jinvathas patho dṛtiṁ vahethe madhumantam aśvinā ||
4.045.04a haṁsāso ye vām madhumanto asridho hiraṇyaparṇā uhuva uṣarbudhaḥ |
4.045.04c udapruto mandino mandinispṛśo madhvo na makṣaḥ savanāni gacchathaḥ ||
4.045.05a svadhvarāso madhumanto agnaya usrā jarante prati vastor aśvinā |
4.045.05c yan niktahastas taraṇir vicakṣaṇaḥ somaṁ suṣāva madhumantam adribhiḥ ||
4.045.06a ākenipāso ahabhir davidhvataḥ svar ṇa śukraṁ tanvanta ā rajaḥ |
4.045.06c sūraś cid aśvān yuyujāna īyate viśvām̐ anu svadhayā cetathas pathaḥ ||
4.045.07a pra vām avocam aśvinā dhiyaṁdhā rathaḥ svaśvo ajaro yo asti |
4.045.07c yena sadyaḥ pari rajāṁsi yātho haviṣmantaṁ taraṇim bhojam accha ||

4.046.01a agram pibā madhūnāṁ sutaṁ vāyo diviṣṭiṣu |
4.046.01c tvaṁ hi pūrvapā asi ||
4.046.02a śatenā no abhiṣṭibhir niyutvām̐ indrasārathiḥ |
4.046.02c vāyo sutasya tṛmpatam ||
4.046.03a ā vāṁ sahasraṁ haraya indravāyū abhi prayaḥ |
4.046.03c vahantu somapītaye ||
4.046.04a rathaṁ hiraṇyavandhuram indravāyū svadhvaram |
4.046.04c ā hi sthātho divispṛśam ||
4.046.05a rathena pṛthupājasā dāśvāṁsam upa gacchatam |
4.046.05c indravāyū ihā gatam ||
4.046.06a indravāyū ayaṁ sutas taṁ devebhiḥ sajoṣasā |
4.046.06c pibataṁ dāśuṣo gṛhe ||
4.046.07a iha prayāṇam astu vām indravāyū vimocanam |
4.046.07c iha vāṁ somapītaye ||

4.047.01a vāyo śukro ayāmi te madhvo agraṁ diviṣṭiṣu |
4.047.01c ā yāhi somapītaye spārho deva niyutvatā ||
4.047.02a indraś ca vāyav eṣāṁ somānām pītim arhathaḥ |
4.047.02c yuvāṁ hi yantīndavo nimnam āpo na sadhryak ||
4.047.03a vāyav indraś ca śuṣmiṇā sarathaṁ śavasas patī |
4.047.03c niyutvantā na ūtaya ā yātaṁ somapītaye ||
4.047.04a yā vāṁ santi puruspṛho niyuto dāśuṣe narā |
4.047.04c asme tā yajñavāhasendravāyū ni yacchatam ||

4.048.01a vihi hotrā avītā vipo na rāyo aryaḥ |
4.048.01c vāyav ā candreṇa rathena yāhi sutasya pītaye ||
4.048.02a niryuvāṇo aśastīr niyutvām̐ indrasārathiḥ |
4.048.02c vāyav ā candreṇa rathena yāhi sutasya pītaye ||
4.048.03a anu kṛṣṇe vasudhitī yemāte viśvapeśasā |
4.048.03c vāyav ā candreṇa rathena yāhi sutasya pītaye ||
4.048.04a vahantu tvā manoyujo yuktāso navatir nava |
4.048.04c vāyav ā candreṇa rathena yāhi sutasya pītaye ||
4.048.05a vāyo śataṁ harīṇāṁ yuvasva poṣyāṇām |
4.048.05c uta vā te sahasriṇo ratha ā yātu pājasā ||

4.049.01a idaṁ vām āsye haviḥ priyam indrābṛhaspatī |
4.049.01c uktham madaś ca śasyate ||
4.049.02a ayaṁ vām pari ṣicyate soma indrābṛhaspatī |
4.049.02c cārur madāya pītaye ||
4.049.03a ā na indrābṛhaspatī gṛham indraś ca gacchatam |
4.049.03c somapā somapītaye ||
4.049.04a asme indrābṛhaspatī rayiṁ dhattaṁ śatagvinam |
4.049.04c aśvāvantaṁ sahasriṇam ||
4.049.05a indrābṛhaspatī vayaṁ sute gīrbhir havāmahe |
4.049.05c asya somasya pītaye ||
4.049.06a somam indrābṛhaspatī pibataṁ dāśuṣo gṛhe |
4.049.06c mādayethāṁ tadokasā ||

4.050.01a yas tastambha sahasā vi jmo antān bṛhaspatis triṣadhastho raveṇa |
4.050.01c tam pratnāsa ṛṣayo dīdhyānāḥ puro viprā dadhire mandrajihvam ||
4.050.02a dhunetayaḥ supraketam madanto bṛhaspate abhi ye nas tatasre |
4.050.02c pṛṣantaṁ sṛpram adabdham ūrvam bṛhaspate rakṣatād asya yonim ||
4.050.03a bṛhaspate yā paramā parāvad ata ā ta ṛtaspṛśo ni ṣeduḥ |
4.050.03c tubhyaṁ khātā avatā adridugdhā madhvaḥ ścotanty abhito virapśam ||
4.050.04a bṛhaspatiḥ prathamaṁ jāyamāno maho jyotiṣaḥ parame vyoman |
4.050.04c saptāsyas tuvijāto raveṇa vi saptaraśmir adhamat tamāṁsi ||
4.050.05a sa suṣṭubhā sa ṛkvatā gaṇena valaṁ ruroja phaligaṁ raveṇa |
4.050.05c bṛhaspatir usriyā havyasūdaḥ kanikradad vāvaśatīr ud ājat ||
4.050.06a evā pitre viśvadevāya vṛṣṇe yajñair vidhema namasā havirbhiḥ |
4.050.06c bṛhaspate suprajā vīravanto vayaṁ syāma patayo rayīṇām ||
4.050.07a sa id rājā pratijanyāni viśvā śuṣmeṇa tasthāv abhi vīryeṇa |
4.050.07c bṛhaspatiṁ yaḥ subhṛtam bibharti valgūyati vandate pūrvabhājam ||
4.050.08a sa it kṣeti sudhita okasi sve tasmā iḻā pinvate viśvadānīm |
4.050.08c tasmai viśaḥ svayam evā namante yasmin brahmā rājani pūrva eti ||
4.050.09a apratīto jayati saṁ dhanāni pratijanyāny uta yā sajanyā |
4.050.09c avasyave yo varivaḥ kṛṇoti brahmaṇe rājā tam avanti devāḥ ||
4.050.10a indraś ca somam pibatam bṛhaspate 'smin yajñe mandasānā vṛṣaṇvasū |
4.050.10c ā vāṁ viśantv indavaḥ svābhuvo 'sme rayiṁ sarvavīraṁ ni yacchatam ||
4.050.11a bṛhaspata indra vardhataṁ naḥ sacā sā vāṁ sumatir bhūtv asme |
4.050.11c aviṣṭaṁ dhiyo jigṛtam puraṁdhīr jajastam aryo vanuṣām arātīḥ ||

4.051.01a idam u tyat purutamam purastāj jyotis tamaso vayunāvad asthāt |
4.051.01c nūnaṁ divo duhitaro vibhātīr gātuṁ kṛṇavann uṣaso janāya ||
4.051.02a asthur u citrā uṣasaḥ purastān mitā iva svaravo 'dhvareṣu |
4.051.02c vy ū vrajasya tamaso dvārocchantīr avrañ chucayaḥ pāvakāḥ ||
4.051.03a ucchantīr adya citayanta bhojān rādhodeyāyoṣaso maghonīḥ |
4.051.03c acitre antaḥ paṇayaḥ sasantv abudhyamānās tamaso vimadhye ||
4.051.04a kuvit sa devīḥ sanayo navo vā yāmo babhūyād uṣaso vo adya |
4.051.04c yenā navagve aṅgire daśagve saptāsye revatī revad ūṣa ||
4.051.05a yūyaṁ hi devīr ṛtayugbhir aśvaiḥ pariprayātha bhuvanāni sadyaḥ |
4.051.05c prabodhayantīr uṣasaḥ sasantaṁ dvipāc catuṣpāc carathāya jīvam ||
4.051.06a kva svid āsāṁ katamā purāṇī yayā vidhānā vidadhur ṛbhūṇām |
4.051.06c śubhaṁ yac chubhrā uṣasaś caranti na vi jñāyante sadṛśīr ajuryāḥ ||
4.051.07a tā ghā tā bhadrā uṣasaḥ purāsur abhiṣṭidyumnā ṛtajātasatyāḥ |
4.051.07c yāsv ījānaḥ śaśamāna ukthaiḥ stuvañ chaṁsan draviṇaṁ sadya āpa ||
4.051.08a tā ā caranti samanā purastāt samānataḥ samanā paprathānāḥ |
4.051.08c ṛtasya devīḥ sadaso budhānā gavāṁ na sargā uṣaso jarante ||
4.051.09a tā in nv eva samanā samānīr amītavarṇā uṣasaś caranti |
4.051.09c gūhantīr abhvam asitaṁ ruśadbhiḥ śukrās tanūbhiḥ śucayo rucānāḥ ||
4.051.10a rayiṁ divo duhitaro vibhātīḥ prajāvantaṁ yacchatāsmāsu devīḥ |
4.051.10c syonād ā vaḥ pratibudhyamānāḥ suvīryasya patayaḥ syāma ||
4.051.11a tad vo divo duhitaro vibhātīr upa bruva uṣaso yajñaketuḥ |
4.051.11c vayaṁ syāma yaśaso janeṣu tad dyauś ca dhattām pṛthivī ca devī ||

4.052.01a prati ṣyā sūnarī janī vyucchantī pari svasuḥ |
4.052.01c divo adarśi duhitā ||
4.052.02a aśveva citrāruṣī mātā gavām ṛtāvarī |
4.052.02c sakhābhūd aśvinor uṣāḥ ||
4.052.03a uta sakhāsy aśvinor uta mātā gavām asi |
4.052.03c utoṣo vasva īśiṣe ||
4.052.04a yāvayaddveṣasaṁ tvā cikitvit sūnṛtāvari |
4.052.04c prati stomair abhutsmahi ||
4.052.05a prati bhadrā adṛkṣata gavāṁ sargā na raśmayaḥ |
4.052.05c oṣā aprā uru jrayaḥ ||
4.052.06a āpapruṣī vibhāvari vy āvar jyotiṣā tamaḥ |
4.052.06c uṣo anu svadhām ava ||
4.052.07a ā dyāṁ tanoṣi raśmibhir āntarikṣam uru priyam |
4.052.07c uṣaḥ śukreṇa śociṣā ||

4.053.01a tad devasya savitur vāryam mahad vṛṇīmahe asurasya pracetasaḥ |
4.053.01c chardir yena dāśuṣe yacchati tmanā tan no mahām̐ ud ayān devo aktubhiḥ ||
4.053.02a divo dhartā bhuvanasya prajāpatiḥ piśaṅgaṁ drāpim prati muñcate kaviḥ |
4.053.02c vicakṣaṇaḥ prathayann āpṛṇann urv ajījanat savitā sumnam ukthyam ||
4.053.03a āprā rajāṁsi divyāni pārthivā ślokaṁ devaḥ kṛṇute svāya dharmaṇe |
4.053.03c pra bāhū asrāk savitā savīmani niveśayan prasuvann aktubhir jagat ||
4.053.04a adābhyo bhuvanāni pracākaśad vratāni devaḥ savitābhi rakṣate |
4.053.04c prāsrāg bāhū bhuvanasya prajābhyo dhṛtavrato maho ajmasya rājati ||
4.053.05a trir antarikṣaṁ savitā mahitvanā trī rajāṁsi paribhus trīṇi rocanā |
4.053.05c tisro divaḥ pṛthivīs tisra invati tribhir vratair abhi no rakṣati tmanā ||
4.053.06a bṛhatsumnaḥ prasavītā niveśano jagataḥ sthātur ubhayasya yo vaśī |
4.053.06c sa no devaḥ savitā śarma yacchatv asme kṣayāya trivarūtham aṁhasaḥ ||
4.053.07a āgan deva ṛtubhir vardhatu kṣayaṁ dadhātu naḥ savitā suprajām iṣam |
4.053.07c sa naḥ kṣapābhir ahabhiś ca jinvatu prajāvantaṁ rayim asme sam invatu ||

4.054.01a abhūd devaḥ savitā vandyo nu na idānīm ahna upavācyo nṛbhiḥ |
4.054.01c vi yo ratnā bhajati mānavebhyaḥ śreṣṭhaṁ no atra draviṇaṁ yathā dadhat ||
4.054.02a devebhyo hi prathamaṁ yajñiyebhyo 'mṛtatvaṁ suvasi bhāgam uttamam |
4.054.02c ād id dāmānaṁ savitar vy ūrṇuṣe 'nūcīnā jīvitā mānuṣebhyaḥ ||
4.054.03a acittī yac cakṛmā daivye jane dīnair dakṣaiḥ prabhūtī pūruṣatvatā |
4.054.03c deveṣu ca savitar mānuṣeṣu ca tvaṁ no atra suvatād anāgasaḥ ||
4.054.04a na pramiye savitur daivyasya tad yathā viśvam bhuvanaṁ dhārayiṣyati |
4.054.04c yat pṛthivyā varimann ā svaṅgurir varṣman divaḥ suvati satyam asya tat ||
4.054.05a indrajyeṣṭhān bṛhadbhyaḥ parvatebhyaḥ kṣayām̐ ebhyaḥ suvasi pastyāvataḥ |
4.054.05c yathā-yathā patayanto viyemira evaiva tasthuḥ savitaḥ savāya te ||
4.054.06a ye te trir ahan savitaḥ savāso dive-dive saubhagam āsuvanti |
4.054.06c indro dyāvāpṛthivī sindhur adbhir ādityair no aditiḥ śarma yaṁsat ||

4.055.01a ko vas trātā vasavaḥ ko varūtā dyāvābhūmī adite trāsīthāṁ naḥ |
4.055.01c sahīyaso varuṇa mitra martāt ko vo 'dhvare varivo dhāti devāḥ ||
4.055.02a pra ye dhāmāni pūrvyāṇy arcān vi yad ucchān viyotāro amūrāḥ |
4.055.02c vidhātāro vi te dadhur ajasrā ṛtadhītayo rurucanta dasmāḥ ||
4.055.03a pra pastyām aditiṁ sindhum arkaiḥ svastim īḻe sakhyāya devīm |
4.055.03c ubhe yathā no ahanī nipāta uṣāsānaktā karatām adabdhe ||
4.055.04a vy aryamā varuṇaś ceti panthām iṣas patiḥ suvitaṁ gātum agniḥ |
4.055.04c indrāviṣṇū nṛvad u ṣu stavānā śarma no yantam amavad varūtham ||
4.055.05a ā parvatasya marutām avāṁsi devasya trātur avri bhagasya |
4.055.05c pāt patir janyād aṁhaso no mitro mitriyād uta na uruṣyet ||
4.055.06a nū rodasī ahinā budhnyena stuvīta devī apyebhir iṣṭaiḥ |
4.055.06c samudraṁ na saṁcaraṇe saniṣyavo gharmasvaraso nadyo apa vran ||
4.055.07a devair no devy aditir ni pātu devas trātā trāyatām aprayucchan |
4.055.07c nahi mitrasya varuṇasya dhāsim arhāmasi pramiyaṁ sānv agneḥ ||
4.055.08a agnir īśe vasavyasyāgnir mahaḥ saubhagasya |
4.055.08c tāny asmabhyaṁ rāsate ||
4.055.09a uṣo maghony ā vaha sūnṛte vāryā puru |
4.055.09c asmabhyaṁ vājinīvati ||
4.055.10a tat su naḥ savitā bhago varuṇo mitro aryamā |
4.055.10c indro no rādhasā gamat ||

4.056.01a mahī dyāvāpṛthivī iha jyeṣṭhe rucā bhavatāṁ śucayadbhir arkaiḥ |
4.056.01c yat sīṁ variṣṭhe bṛhatī viminvan ruvad dhokṣā paprathānebhir evaiḥ ||
4.056.02a devī devebhir yajate yajatrair aminatī tasthatur ukṣamāṇe |
4.056.02c ṛtāvarī adruhā devaputre yajñasya netrī śucayadbhir arkaiḥ ||
4.056.03a sa it svapā bhuvaneṣv āsa ya ime dyāvāpṛthivī jajāna |
4.056.03c urvī gabhīre rajasī sumeke avaṁśe dhīraḥ śacyā sam airat ||
4.056.04a nū rodasī bṛhadbhir no varūthaiḥ patnīvadbhir iṣayantī sajoṣāḥ |
4.056.04c urūcī viśve yajate ni pātaṁ dhiyā syāma rathyaḥ sadāsāḥ ||
4.056.05a pra vām mahi dyavī abhy upastutim bharāmahe |
4.056.05c śucī upa praśastaye ||
4.056.06a punāne tanvā mithaḥ svena dakṣeṇa rājathaḥ |
4.056.06c ūhyāthe sanād ṛtam ||
4.056.07a mahī mitrasya sādhathas tarantī pipratī ṛtam |
4.056.07c pari yajñaṁ ni ṣedathuḥ ||

4.057.01a kṣetrasya patinā vayaṁ hiteneva jayāmasi |
4.057.01c gām aśvam poṣayitnv ā sa no mṛḻātīdṛśe ||
4.057.02a kṣetrasya pate madhumantam ūrmiṁ dhenur iva payo asmāsu dhukṣva |
4.057.02c madhuścutaṁ ghṛtam iva supūtam ṛtasya naḥ patayo mṛḻayantu ||
4.057.03a madhumatīr oṣadhīr dyāva āpo madhuman no bhavatv antarikṣam |
4.057.03c kṣetrasya patir madhumān no astv ariṣyanto anv enaṁ carema ||
4.057.04a śunaṁ vāhāḥ śunaṁ naraḥ śunaṁ kṛṣatu lāṅgalam |
4.057.04c śunaṁ varatrā badhyantāṁ śunam aṣṭrām ud iṅgaya ||
4.057.05a śunāsīrāv imāṁ vācaṁ juṣethāṁ yad divi cakrathuḥ payaḥ |
4.057.05c tenemām upa siñcatam ||
4.057.06a arvācī subhage bhava sīte vandāmahe tvā |
4.057.06c yathā naḥ subhagāsasi yathā naḥ suphalāsasi ||
4.057.07a indraḥ sītāṁ ni gṛhṇātu tām pūṣānu yacchatu |
4.057.07c sā naḥ payasvatī duhām uttarām-uttarāṁ samām ||
4.057.08a śunaṁ naḥ phālā vi kṛṣantu bhūmiṁ śunaṁ kīnāśā abhi yantu vāhaiḥ |
4.057.08c śunam parjanyo madhunā payobhiḥ śunāsīrā śunam asmāsu dhattam ||

4.058.01a samudrād ūrmir madhumām̐ ud ārad upāṁśunā sam amṛtatvam ānaṭ |
4.058.01c ghṛtasya nāma guhyaṁ yad asti jihvā devānām amṛtasya nābhiḥ ||
4.058.02a vayaṁ nāma pra bravāmā ghṛtasyāsmin yajñe dhārayāmā namobhiḥ |
4.058.02c upa brahmā śṛṇavac chasyamānaṁ catuḥśṛṅgo 'vamīd gaura etat ||
4.058.03a catvāri śṛṅgā trayo asya pādā dve śīrṣe sapta hastāso asya |
4.058.03c tridhā baddho vṛṣabho roravīti maho devo martyām̐ ā viveśa ||
4.058.04a tridhā hitam paṇibhir guhyamānaṁ gavi devāso ghṛtam anv avindan |
4.058.04c indra ekaṁ sūrya ekaṁ jajāna venād ekaṁ svadhayā niṣ ṭatakṣuḥ ||
4.058.05a etā arṣanti hṛdyāt samudrāc chatavrajā ripuṇā nāvacakṣe |
4.058.05c ghṛtasya dhārā abhi cākaśīmi hiraṇyayo vetaso madhya āsām ||
4.058.06a samyak sravanti sarito na dhenā antar hṛdā manasā pūyamānāḥ |
4.058.06c ete arṣanty ūrmayo ghṛtasya mṛgā iva kṣipaṇor īṣamāṇāḥ ||
4.058.07a sindhor iva prādhvane śūghanāso vātapramiyaḥ patayanti yahvāḥ |
4.058.07c ghṛtasya dhārā aruṣo na vājī kāṣṭhā bhindann ūrmibhiḥ pinvamānaḥ ||
4.058.08a abhi pravanta samaneva yoṣāḥ kalyāṇyaḥ smayamānāso agnim |
4.058.08c ghṛtasya dhārāḥ samidho nasanta tā juṣāṇo haryati jātavedāḥ ||
4.058.09a kanyā iva vahatum etavā u añjy añjānā abhi cākaśīmi |
4.058.09c yatra somaḥ sūyate yatra yajño ghṛtasya dhārā abhi tat pavante ||
4.058.10a abhy arṣata suṣṭutiṁ gavyam ājim asmāsu bhadrā draviṇāni dhatta |
4.058.10c imaṁ yajñaṁ nayata devatā no ghṛtasya dhārā madhumat pavante ||
4.058.11a dhāman te viśvam bhuvanam adhi śritam antaḥ samudre hṛdy antar āyuṣi |
4.058.11c apām anīke samithe ya ābhṛtas tam aśyāma madhumantaṁ ta ūrmim ||


5.001.01a abodhy agniḥ samidhā janānām prati dhenum ivāyatīm uṣāsam |
5.001.01c yahvā iva pra vayām ujjihānāḥ pra bhānavaḥ sisrate nākam accha ||
5.001.02a abodhi hotā yajathāya devān ūrdhvo agniḥ sumanāḥ prātar asthāt |
5.001.02c samiddhasya ruśad adarśi pājo mahān devas tamaso nir amoci ||
5.001.03a yad īṁ gaṇasya raśanām ajīgaḥ śucir aṅkte śucibhir gobhir agniḥ |
5.001.03c ād dakṣiṇā yujyate vājayanty uttānām ūrdhvo adhayaj juhūbhiḥ ||
5.001.04a agnim acchā devayatām manāṁsi cakṣūṁṣīva sūrye saṁ caranti |
5.001.04c yad īṁ suvāte uṣasā virūpe śveto vājī jāyate agre ahnām ||
5.001.05a janiṣṭa hi jenyo agre ahnāṁ hito hiteṣv aruṣo vaneṣu |
5.001.05c dame-dame sapta ratnā dadhāno 'gnir hotā ni ṣasādā yajīyān ||
5.001.06a agnir hotā ny asīdad yajīyān upasthe mātuḥ surabhā u loke |
5.001.06c yuvā kaviḥ puruniṣṭha ṛtāvā dhartā kṛṣṭīnām uta madhya iddhaḥ ||
5.001.07a pra ṇu tyaṁ vipram adhvareṣu sādhum agniṁ hotāram īḻate namobhiḥ |
5.001.07c ā yas tatāna rodasī ṛtena nityam mṛjanti vājinaṁ ghṛtena ||
5.001.08a mārjālyo mṛjyate sve damūnāḥ kavipraśasto atithiḥ śivo naḥ |
5.001.08c sahasraśṛṅgo vṛṣabhas tadojā viśvām̐ agne sahasā prāsy anyān ||
5.001.09a pra sadyo agne aty eṣy anyān āvir yasmai cārutamo babhūtha |
5.001.09c īḻenyo vapuṣyo vibhāvā priyo viśām atithir mānuṣīṇām ||
5.001.10a tubhyam bharanti kṣitayo yaviṣṭha balim agne antita ota dūrāt |
5.001.10c ā bhandiṣṭhasya sumatiṁ cikiddhi bṛhat te agne mahi śarma bhadram ||
5.001.11a ādya ratham bhānumo bhānumantam agne tiṣṭha yajatebhiḥ samantam |
5.001.11c vidvān pathīnām urv antarikṣam eha devān haviradyāya vakṣi ||
5.001.12a avocāma kavaye medhyāya vaco vandāru vṛṣabhāya vṛṣṇe |
5.001.12c gaviṣṭhiro namasā stomam agnau divīva rukmam uruvyañcam aśret ||

5.002.01a kumāram mātā yuvatiḥ samubdhaṁ guhā bibharti na dadāti pitre |
5.002.01c anīkam asya na minaj janāsaḥ puraḥ paśyanti nihitam aratau ||
5.002.02a kam etaṁ tvaṁ yuvate kumāram peṣī bibharṣi mahiṣī jajāna |
5.002.02c pūrvīr hi garbhaḥ śarado vavardhāpaśyaṁ jātaṁ yad asūta mātā ||
5.002.03a hiraṇyadantaṁ śucivarṇam ārāt kṣetrād apaśyam āyudhā mimānam |
5.002.03c dadāno asmā amṛtaṁ vipṛkvat kim mām anindrāḥ kṛṇavann anukthāḥ ||
5.002.04a kṣetrād apaśyaṁ sanutaś carantaṁ sumad yūthaṁ na puru śobhamānam |
5.002.04c na tā agṛbhrann ajaniṣṭa hi ṣaḥ paliknīr id yuvatayo bhavanti ||
5.002.05a ke me maryakaṁ vi yavanta gobhir na yeṣāṁ gopā araṇaś cid āsa |
5.002.05c ya īṁ jagṛbhur ava te sṛjantv ājāti paśva upa naś cikitvān ||
5.002.06a vasāṁ rājānaṁ vasatiṁ janānām arātayo ni dadhur martyeṣu |
5.002.06c brahmāṇy atrer ava taṁ sṛjantu ninditāro nindyāso bhavantu ||
5.002.07a śunaś cic chepaṁ niditaṁ sahasrād yūpād amuñco aśamiṣṭa hi ṣaḥ |
5.002.07c evāsmad agne vi mumugdhi pāśān hotaś cikitva iha tū niṣadya ||
5.002.08a hṛṇīyamāno apa hi mad aiyeḥ pra me devānāṁ vratapā uvāca |
5.002.08c indro vidvām̐ anu hi tvā cacakṣa tenāham agne anuśiṣṭa āgām ||
5.002.09a vi jyotiṣā bṛhatā bhāty agnir āvir viśvāni kṛṇute mahitvā |
5.002.09c prādevīr māyāḥ sahate durevāḥ śiśīte śṛṅge rakṣase vinikṣe ||
5.002.10a uta svānāso divi ṣantv agnes tigmāyudhā rakṣase hantavā u |
5.002.10c made cid asya pra rujanti bhāmā na varante paribādho adevīḥ ||
5.002.11a etaṁ te stomaṁ tuvijāta vipro rathaṁ na dhīraḥ svapā atakṣam |
5.002.11c yadīd agne prati tvaṁ deva haryāḥ svarvatīr apa enā jayema ||
5.002.12a tuvigrīvo vṛṣabho vāvṛdhāno 'śatrv aryaḥ sam ajāti vedaḥ |
5.002.12c itīmam agnim amṛtā avocan barhiṣmate manave śarma yaṁsad dhaviṣmate manave śarma yaṁsat ||

5.003.01a tvam agne varuṇo jāyase yat tvam mitro bhavasi yat samiddhaḥ |
5.003.01c tve viśve sahasas putra devās tvam indro dāśuṣe martyāya ||
5.003.02a tvam aryamā bhavasi yat kanīnāṁ nāma svadhāvan guhyam bibharṣi |
5.003.02c añjanti mitraṁ sudhitaṁ na gobhir yad dampatī samanasā kṛṇoṣi ||
5.003.03a tava śriye maruto marjayanta rudra yat te janima cāru citram |
5.003.03c padaṁ yad viṣṇor upamaṁ nidhāyi tena pāsi guhyaṁ nāma gonām ||
5.003.04a tava śriyā sudṛśo deva devāḥ purū dadhānā amṛtaṁ sapanta |
5.003.04c hotāram agnim manuṣo ni ṣedur daśasyanta uśijaḥ śaṁsam āyoḥ ||
5.003.05a na tvad dhotā pūrvo agne yajīyān na kāvyaiḥ paro asti svadhāvaḥ |
5.003.05c viśaś ca yasyā atithir bhavāsi sa yajñena vanavad deva martān ||
5.003.06a vayam agne vanuyāma tvotā vasūyavo haviṣā budhyamānāḥ |
5.003.06c vayaṁ samarye vidatheṣv ahnāṁ vayaṁ rāyā sahasas putra martān ||
5.003.07a yo na āgo abhy eno bharāty adhīd agham aghaśaṁse dadhāta |
5.003.07c jahī cikitvo abhiśastim etām agne yo no marcayati dvayena ||
5.003.08a tvām asyā vyuṣi deva pūrve dūtaṁ kṛṇvānā ayajanta havyaiḥ |
5.003.08c saṁsthe yad agna īyase rayīṇāṁ devo martair vasubhir idhyamānaḥ ||
5.003.09a ava spṛdhi pitaraṁ yodhi vidvān putro yas te sahasaḥ sūna ūhe |
5.003.09c kadā cikitvo abhi cakṣase no 'gne kadām̐ ṛtacid yātayāse ||
5.003.10a bhūri nāma vandamāno dadhāti pitā vaso yadi taj joṣayāse |
5.003.10c kuvid devasya sahasā cakānaḥ sumnam agnir vanate vāvṛdhānaḥ ||
5.003.11a tvam aṅga jaritāraṁ yaviṣṭha viśvāny agne duritāti parṣi |
5.003.11c stenā adṛśran ripavo janāso 'jñātaketā vṛjinā abhūvan ||
5.003.12a ime yāmāsas tvadrig abhūvan vasave vā tad id āgo avāci |
5.003.12c nāhāyam agnir abhiśastaye no na rīṣate vāvṛdhānaḥ parā dāt ||

5.004.01a tvām agne vasupatiṁ vasūnām abhi pra mande adhvareṣu rājan |
5.004.01c tvayā vājaṁ vājayanto jayemābhi ṣyāma pṛtsutīr martyānām ||
5.004.02a havyavāḻ agnir ajaraḥ pitā no vibhur vibhāvā sudṛśīko asme |
5.004.02c sugārhapatyāḥ sam iṣo didīhy asmadryak sam mimīhi śravāṁsi ||
5.004.03a viśāṁ kaviṁ viśpatim mānuṣīṇāṁ śucim pāvakaṁ ghṛtapṛṣṭham agnim |
5.004.03c ni hotāraṁ viśvavidaṁ dadhidhve sa deveṣu vanate vāryāṇi ||
5.004.04a juṣasvāgna iḻayā sajoṣā yatamāno raśmibhiḥ sūryasya |
5.004.04c juṣasva naḥ samidhaṁ jātaveda ā ca devān haviradyāya vakṣi ||
5.004.05a juṣṭo damūnā atithir duroṇa imaṁ no yajñam upa yāhi vidvān |
5.004.05c viśvā agne abhiyujo vihatyā śatrūyatām ā bharā bhojanāni ||
5.004.06a vadhena dasyum pra hi cātayasva vayaḥ kṛṇvānas tanve svāyai |
5.004.06c piparṣi yat sahasas putra devānt so agne pāhi nṛtama vāje asmān ||
5.004.07a vayaṁ te agna ukthair vidhema vayaṁ havyaiḥ pāvaka bhadraśoce |
5.004.07c asme rayiṁ viśvavāraṁ sam invāsme viśvāni draviṇāni dhehi ||
5.004.08a asmākam agne adhvaraṁ juṣasva sahasaḥ sūno triṣadhastha havyam |
5.004.08c vayaṁ deveṣu sukṛtaḥ syāma śarmaṇā nas trivarūthena pāhi ||
5.004.09a viśvāni no durgahā jātavedaḥ sindhuṁ na nāvā duritāti parṣi |
5.004.09c agne atrivan namasā gṛṇāno 'smākam bodhy avitā tanūnām ||
5.004.10a yas tvā hṛdā kīriṇā manyamāno 'martyam martyo johavīmi |
5.004.10c jātavedo yaśo asmāsu dhehi prajābhir agne amṛtatvam aśyām ||
5.004.11a yasmai tvaṁ sukṛte jātaveda u lokam agne kṛṇavaḥ syonam |
5.004.11c aśvinaṁ sa putriṇaṁ vīravantaṁ gomantaṁ rayiṁ naśate svasti ||

5.005.01a susamiddhāya śociṣe ghṛtaṁ tīvraṁ juhotana |
5.005.01c agnaye jātavedase ||
5.005.02a narāśaṁsaḥ suṣūdatīmaṁ yajñam adābhyaḥ |
5.005.02c kavir hi madhuhastyaḥ ||
5.005.03a īḻito agna ā vahendraṁ citram iha priyam |
5.005.03c sukhai rathebhir ūtaye ||
5.005.04a ūrṇamradā vi prathasvābhy arkā anūṣata |
5.005.04c bhavā naḥ śubhra sātaye ||
5.005.05a devīr dvāro vi śrayadhvaṁ suprāyaṇā na ūtaye |
5.005.05c pra-pra yajñam pṛṇītana ||
5.005.06a supratīke vayovṛdhā yahvī ṛtasya mātarā |
5.005.06c doṣām uṣāsam īmahe ||
5.005.07a vātasya patmann īḻitā daivyā hotārā manuṣaḥ |
5.005.07c imaṁ no yajñam ā gatam ||
5.005.08a iḻā sarasvatī mahī tisro devīr mayobhuvaḥ |
5.005.08b barhiḥ sīdantv asridhaḥ ||
5.005.09a śivas tvaṣṭar ihā gahi vibhuḥ poṣa uta tmanā |
5.005.09c yajñe-yajñe na ud ava ||
5.005.10a yatra vettha vanaspate devānāṁ guhyā nāmāni |
5.005.10c tatra havyāni gāmaya ||
5.005.11a svāhāgnaye varuṇāya svāhendrāya marudbhyaḥ |
5.005.11c svāhā devebhyo haviḥ ||

5.006.01a agniṁ tam manye yo vasur astaṁ yaṁ yanti dhenavaḥ |
5.006.01c astam arvanta āśavo 'staṁ nityāso vājina iṣaṁ stotṛbhya ā bhara ||
5.006.02a so agnir yo vasur gṛṇe saṁ yam āyanti dhenavaḥ |
5.006.02c sam arvanto raghudruvaḥ saṁ sujātāsaḥ sūraya iṣaṁ stotṛbhya ā bhara ||
5.006.03a agnir hi vājinaṁ viśe dadāti viśvacarṣaṇiḥ |
5.006.03c agnī rāye svābhuvaṁ sa prīto yāti vāryam iṣaṁ stotṛbhya ā bhara ||
5.006.04a ā te agna idhīmahi dyumantaṁ devājaram |
5.006.04c yad dha syā te panīyasī samid dīdayati dyavīṣaṁ stotṛbhya ā bhara ||
5.006.05a ā te agna ṛcā haviḥ śukrasya śociṣas pate |
5.006.05c suścandra dasma viśpate havyavāṭ tubhyaṁ hūyata iṣaṁ stotṛbhya ā bhara ||
5.006.06a pro tye agnayo 'gniṣu viśvam puṣyanti vāryam |
5.006.06c te hinvire ta invire ta iṣaṇyanty ānuṣag iṣaṁ stotṛbhya ā bhara ||
5.006.07a tava tye agne arcayo mahi vrādhanta vājinaḥ |
5.006.07c ye patvabhiḥ śaphānāṁ vrajā bhuranta gonām iṣaṁ stotṛbhya ā bhara ||
5.006.08a navā no agna ā bhara stotṛbhyaḥ sukṣitīr iṣaḥ |
5.006.08c te syāma ya ānṛcus tvādūtāso dame-dama iṣaṁ stotṛbhya ā bhara ||
5.006.09a ubhe suścandra sarpiṣo darvī śrīṇīṣa āsani |
5.006.09c uto na ut pupūryā uktheṣu śavasas pata iṣaṁ stotṛbhya ā bhara ||
5.006.10a evām̐ agnim ajuryamur gīrbhir yajñebhir ānuṣak |
5.006.10c dadhad asme suvīryam uta tyad āśvaśvyam iṣaṁ stotṛbhya ā bhara ||

5.007.01a sakhāyaḥ saṁ vaḥ samyañcam iṣaṁ stomaṁ cāgnaye |
5.007.01c varṣiṣṭhāya kṣitīnām ūrjo naptre sahasvate ||
5.007.02a kutrā cid yasya samṛtau raṇvā naro nṛṣadane |
5.007.02c arhantaś cid yam indhate saṁjanayanti jantavaḥ ||
5.007.03a saṁ yad iṣo vanāmahe saṁ havyā mānuṣāṇām |
5.007.03c uta dyumnasya śavasa ṛtasya raśmim ā dade ||
5.007.04a sa smā kṛṇoti ketum ā naktaṁ cid dūra ā sate |
5.007.04c pāvako yad vanaspatīn pra smā mināty ajaraḥ ||
5.007.05a ava sma yasya veṣaṇe svedam pathiṣu juhvati |
5.007.05c abhīm aha svajenyam bhūmā pṛṣṭheva ruruhuḥ ||
5.007.06a yam martyaḥ puruspṛhaṁ vidad viśvasya dhāyase |
5.007.06c pra svādanam pitūnām astatātiṁ cid āyave ||
5.007.07a sa hi ṣmā dhanvākṣitaṁ dātā na dāty ā paśuḥ |
5.007.07c hiriśmaśruḥ śucidann ṛbhur anibhṛṣṭataviṣiḥ ||
5.007.08a śuciḥ ṣma yasmā atrivat pra svadhitīva rīyate |
5.007.08c suṣūr asūta mātā krāṇā yad ānaśe bhagam ||
5.007.09a ā yas te sarpirāsute 'gne śam asti dhāyase |
5.007.09c aiṣu dyumnam uta śrava ā cittam martyeṣu dhāḥ ||
5.007.10a iti cin manyum adhrijas tvādātam ā paśuṁ dade |
5.007.10c ād agne apṛṇato 'triḥ sāsahyād dasyūn iṣaḥ sāsahyān nṝn ||

5.008.01a tvām agna ṛtāyavaḥ sam īdhire pratnam pratnāsa ūtaye sahaskṛta |
5.008.01c puruścandraṁ yajataṁ viśvadhāyasaṁ damūnasaṁ gṛhapatiṁ vareṇyam ||
5.008.02a tvām agne atithim pūrvyaṁ viśaḥ śociṣkeśaṁ gṛhapatiṁ ni ṣedire |
5.008.02c bṛhatketum pururūpaṁ dhanaspṛtaṁ suśarmāṇaṁ svavasaṁ jaradviṣam ||
5.008.03a tvām agne mānuṣīr īḻate viśo hotrāvidaṁ viviciṁ ratnadhātamam |
5.008.03c guhā santaṁ subhaga viśvadarśataṁ tuviṣvaṇasaṁ suyajaṁ ghṛtaśriyam ||
5.008.04a tvām agne dharṇasiṁ viśvadhā vayaṁ gīrbhir gṛṇanto namasopa sedima |
5.008.04c sa no juṣasva samidhāno aṅgiro devo martasya yaśasā sudītibhiḥ ||
5.008.05a tvam agne pururūpo viśe-viśe vayo dadhāsi pratnathā puruṣṭuta |
5.008.05c purūṇy annā sahasā vi rājasi tviṣiḥ sā te titviṣāṇasya nādhṛṣe ||
5.008.06a tvām agne samidhānaṁ yaviṣṭhya devā dūtaṁ cakrire havyavāhanam |
5.008.06c urujrayasaṁ ghṛtayonim āhutaṁ tveṣaṁ cakṣur dadhire codayanmati ||
5.008.07a tvām agne pradiva āhutaṁ ghṛtaiḥ sumnāyavaḥ suṣamidhā sam īdhire |
5.008.07c sa vāvṛdhāna oṣadhībhir ukṣito 'bhi jrayāṁsi pārthivā vi tiṣṭhase ||

5.009.01a tvām agne haviṣmanto devam martāsa īḻate |
5.009.01c manye tvā jātavedasaṁ sa havyā vakṣy ānuṣak ||
5.009.02a agnir hotā dāsvataḥ kṣayasya vṛktabarhiṣaḥ |
5.009.02c saṁ yajñāsaś caranti yaṁ saṁ vājāsaḥ śravasyavaḥ ||
5.009.03a uta sma yaṁ śiśuṁ yathā navaṁ janiṣṭāraṇī |
5.009.03c dhartāram mānuṣīṇāṁ viśām agniṁ svadhvaram ||
5.009.04a uta sma durgṛbhīyase putro na hvāryāṇām |
5.009.04c purū yo dagdhāsi vanāgne paśur na yavase ||
5.009.05a adha sma yasyārcayaḥ samyak saṁyanti dhūminaḥ |
5.009.05c yad īm aha trito divy upa dhmāteva dhamati śiśīte dhmātarī yathā ||
5.009.06a tavāham agna ūtibhir mitrasya ca praśastibhiḥ |
5.009.06c dveṣoyuto na duritā turyāma martyānām ||
5.009.07a taṁ no agne abhī naro rayiṁ sahasva ā bhara |
5.009.07c sa kṣepayat sa poṣayad bhuvad vājasya sātaya utaidhi pṛtsu no vṛdhe ||

5.010.01a agna ojiṣṭham ā bhara dyumnam asmabhyam adhrigo |
5.010.01c pra no rāyā parīṇasā ratsi vājāya panthām ||
5.010.02a tvaṁ no agne adbhuta kratvā dakṣasya maṁhanā |
5.010.02c tve asuryam āruhat krāṇā mitro na yajñiyaḥ ||
5.010.03a tvaṁ no agna eṣāṁ gayam puṣṭiṁ ca vardhaya |
5.010.03c ye stomebhiḥ pra sūrayo naro maghāny ānaśuḥ ||
5.010.04a ye agne candra te giraḥ śumbhanty aśvarādhasaḥ |
5.010.04c śuṣmebhiḥ śuṣmiṇo naro divaś cid yeṣām bṛhat sukīrtir bodhati tmanā ||
5.010.05a tava tye agne arcayo bhrājanto yanti dhṛṣṇuyā |
5.010.05c parijmāno na vidyutaḥ svāno ratho na vājayuḥ ||
5.010.06a nū no agna ūtaye sabādhasaś ca rātaye |
5.010.06c asmākāsaś ca sūrayo viśvā āśās tarīṣaṇi ||
5.010.07a tvaṁ no agne aṅgiraḥ stutaḥ stavāna ā bhara |
5.010.07c hotar vibhvāsahaṁ rayiṁ stotṛbhyaḥ stavase ca na utaidhi pṛtsu no vṛdhe ||

5.011.01a janasya gopā ajaniṣṭa jāgṛvir agniḥ sudakṣaḥ suvitāya navyase |
5.011.01c ghṛtapratīko bṛhatā divispṛśā dyumad vi bhāti bharatebhyaḥ śuciḥ ||
5.011.02a yajñasya ketum prathamam purohitam agniṁ naras triṣadhasthe sam īdhire |
5.011.02c indreṇa devaiḥ sarathaṁ sa barhiṣi sīdan ni hotā yajathāya sukratuḥ ||
5.011.03a asammṛṣṭo jāyase mātroḥ śucir mandraḥ kavir ud atiṣṭho vivasvataḥ |
5.011.03c ghṛtena tvāvardhayann agna āhuta dhūmas te ketur abhavad divi śritaḥ ||
5.011.04a agnir no yajñam upa vetu sādhuyāgniṁ naro vi bharante gṛhe-gṛhe |
5.011.04c agnir dūto abhavad dhavyavāhano 'gniṁ vṛṇānā vṛṇate kavikratum ||
5.011.05a tubhyedam agne madhumattamaṁ vacas tubhyam manīṣā iyam astu śaṁ hṛde |
5.011.05c tvāṁ giraḥ sindhum ivāvanīr mahīr ā pṛṇanti śavasā vardhayanti ca ||
5.011.06a tvām agne aṅgiraso guhā hitam anv avindañ chiśriyāṇaṁ vane-vane |
5.011.06c sa jāyase mathyamānaḥ saho mahat tvām āhuḥ sahasas putram aṅgiraḥ ||

5.012.01a prāgnaye bṛhate yajñiyāya ṛtasya vṛṣṇe asurāya manma |
5.012.01c ghṛtaṁ na yajña āsye supūtaṁ giram bhare vṛṣabhāya pratīcīm ||
5.012.02a ṛtaṁ cikitva ṛtam ic cikiddhy ṛtasya dhārā anu tṛndhi pūrvīḥ |
5.012.02c nāhaṁ yātuṁ sahasā na dvayena ṛtaṁ sapāmy aruṣasya vṛṣṇaḥ ||
5.012.03a kayā no agna ṛtayann ṛtena bhuvo navedā ucathasya navyaḥ |
5.012.03c vedā me deva ṛtupā ṛtūnāṁ nāham patiṁ sanitur asya rāyaḥ ||
5.012.04a ke te agne ripave bandhanāsaḥ ke pāyavaḥ saniṣanta dyumantaḥ |
5.012.04c ke dhāsim agne anṛtasya pānti ka āsato vacasaḥ santi gopāḥ ||
5.012.05a sakhāyas te viṣuṇā agna ete śivāsaḥ santo aśivā abhūvan |
5.012.05c adhūrṣata svayam ete vacobhir ṛjūyate vṛjināni bruvantaḥ ||
5.012.06a yas te agne namasā yajñam īṭṭa ṛtaṁ sa pāty aruṣasya vṛṣṇaḥ |
5.012.06c tasya kṣayaḥ pṛthur ā sādhur etu prasarsrāṇasya nahuṣasya śeṣaḥ ||

5.013.01a arcantas tvā havāmahe 'rcantaḥ sam idhīmahi |
5.013.01c agne arcanta ūtaye ||
5.013.02a agneḥ stomam manāmahe sidhram adya divispṛśaḥ |
5.013.02c devasya draviṇasyavaḥ ||
5.013.03a agnir juṣata no giro hotā yo mānuṣeṣv ā |
5.013.03c sa yakṣad daivyaṁ janam ||
5.013.04a tvam agne saprathā asi juṣṭo hotā vareṇyaḥ |
5.013.04c tvayā yajñaṁ vi tanvate ||
5.013.05a tvām agne vājasātamaṁ viprā vardhanti suṣṭutam |
5.013.05c sa no rāsva suvīryam ||
5.013.06a agne nemir arām̐ iva devām̐s tvam paribhūr asi |
5.013.06c ā rādhaś citram ṛñjase ||

5.014.01a agniṁ stomena bodhaya samidhāno amartyam |
5.014.01c havyā deveṣu no dadhat ||
5.014.02a tam adhvareṣv īḻate devam martā amartyam |
5.014.02c yajiṣṭham mānuṣe jane ||
5.014.03a taṁ hi śaśvanta īḻate srucā devaṁ ghṛtaścutā |
5.014.03c agniṁ havyāya voḻhave ||
5.014.04a agnir jāto arocata ghnan dasyūñ jyotiṣā tamaḥ |
5.014.04c avindad gā apaḥ svaḥ ||
5.014.05a agnim īḻenyaṁ kaviṁ ghṛtapṛṣṭhaṁ saparyata |
5.014.05c vetu me śṛṇavad dhavam ||
5.014.06a agniṁ ghṛtena vāvṛdhuḥ stomebhir viśvacarṣaṇim |
5.014.06c svādhībhir vacasyubhiḥ ||

5.015.01a pra vedhase kavaye vedyāya giram bhare yaśase pūrvyāya |
5.015.01c ghṛtaprasatto asuraḥ suśevo rāyo dhartā dharuṇo vasvo agniḥ ||
5.015.02a ṛtena ṛtaṁ dharuṇaṁ dhārayanta yajñasya śāke parame vyoman |
5.015.02c divo dharman dharuṇe seduṣo nṝñ jātair ajātām̐ abhi ye nanakṣuḥ ||
5.015.03a aṅhoyuvas tanvas tanvate vi vayo mahad duṣṭaram pūrvyāya |
5.015.03c sa saṁvato navajātas tuturyāt siṅhaṁ na kruddham abhitaḥ pari ṣṭhuḥ ||
5.015.04a māteva yad bharase paprathāno janaṁ-janaṁ dhāyase cakṣase ca |
5.015.04c vayo-vayo jarase yad dadhānaḥ pari tmanā viṣurūpo jigāsi ||
5.015.05a vājo nu te śavasas pātv antam uruṁ doghaṁ dharuṇaṁ deva rāyaḥ |
5.015.05c padaṁ na tāyur guhā dadhāno maho rāye citayann atrim aspaḥ ||

5.016.01a bṛhad vayo hi bhānave 'rcā devāyāgnaye |
5.016.01c yam mitraṁ na praśastibhir martāso dadhire puraḥ ||
5.016.02a sa hi dyubhir janānāṁ hotā dakṣasya bāhvoḥ |
5.016.02c vi havyam agnir ānuṣag bhago na vāram ṛṇvati ||
5.016.03a asya stome maghonaḥ sakhye vṛddhaśociṣaḥ |
5.016.03c viśvā yasmin tuviṣvaṇi sam arye śuṣmam ādadhuḥ ||
5.016.04a adhā hy agna eṣāṁ suvīryasya maṁhanā |
5.016.04c tam id yahvaṁ na rodasī pari śravo babhūvatuḥ ||
5.016.05a nū na ehi vāryam agne gṛṇāna ā bhara |
5.016.05c ye vayaṁ ye ca sūrayaḥ svasti dhāmahe sacotaidhi pṛtsu no vṛdhe ||

5.017.01a ā yajñair deva martya itthā tavyāṁsam ūtaye |
5.017.01c agniṁ kṛte svadhvare pūrur īḻītāvase ||
5.017.02a asya hi svayaśastara āsā vidharman manyase |
5.017.02c taṁ nākaṁ citraśociṣam mandram paro manīṣayā ||
5.017.03a asya vāsā u arciṣā ya āyukta tujā girā |
5.017.03c divo na yasya retasā bṛhac chocanty arcayaḥ ||
5.017.04a asya kratvā vicetaso dasmasya vasu ratha ā |
5.017.04c adhā viśvāsu havyo 'gnir vikṣu pra śasyate ||
5.017.05a nū na id dhi vāryam āsā sacanta sūrayaḥ |
5.017.05c ūrjo napād abhiṣṭaye pāhi śagdhi svastaya utaidhi pṛtsu no vṛdhe ||

5.018.01a prātar agniḥ purupriyo viśaḥ stavetātithiḥ |
5.018.01c viśvāni yo amartyo havyā marteṣu raṇyati ||
5.018.02a dvitāya mṛktavāhase svasya dakṣasya maṁhanā |
5.018.02c induṁ sa dhatta ānuṣak stotā cit te amartya ||
5.018.03a taṁ vo dīrghāyuśociṣaṁ girā huve maghonām |
5.018.03c ariṣṭo yeṣāṁ ratho vy aśvadāvann īyate ||
5.018.04a citrā vā yeṣu dīdhitir āsann ukthā pānti ye |
5.018.04b stīrṇam barhiḥ svarṇare śravāṁsi dadhire pari ||
5.018.05a ye me pañcāśataṁ dadur aśvānāṁ sadhastuti |
5.018.05b dyumad agne mahi śravo bṛhat kṛdhi maghonāṁ nṛvad amṛta nṛṇām ||

5.019.01a abhy avasthāḥ pra jāyante pra vavrer vavriś ciketa |
5.019.01c upasthe mātur vi caṣṭe ||
5.019.02a juhure vi citayanto 'nimiṣaṁ nṛmṇam pānti |
5.019.02c ā dṛḻhām puraṁ viviśuḥ ||
5.019.03a ā śvaitreyasya jantavo dyumad vardhanta kṛṣṭayaḥ |
5.019.03b niṣkagrīvo bṛhaduktha enā madhvā na vājayuḥ ||
5.019.04a priyaṁ dugdhaṁ na kāmyam ajāmi jāmyoḥ sacā |
5.019.04c gharmo na vājajaṭharo 'dabdhaḥ śaśvato dabhaḥ ||
5.019.05a krīḻan no raśma ā bhuvaḥ sam bhasmanā vāyunā vevidānaḥ |
5.019.05b tā asya san dhṛṣajo na tigmāḥ susaṁśitā vakṣyo vakṣaṇesthāḥ ||

5.020.01a yam agne vājasātama tvaṁ cin manyase rayim |
5.020.01c taṁ no gīrbhiḥ śravāyyaṁ devatrā panayā yujam ||
5.020.02a ye agne nerayanti te vṛddhā ugrasya śavasaḥ |
5.020.02b apa dveṣo apa hvaro 'nyavratasya saścire ||
5.020.03a hotāraṁ tvā vṛṇīmahe 'gne dakṣasya sādhanam |
5.020.03b yajñeṣu pūrvyaṁ girā prayasvanto havāmahe ||
5.020.04a itthā yathā ta ūtaye sahasāvan dive-dive |
5.020.04b rāya ṛtāya sukrato gobhiḥ ṣyāma sadhamādo vīraiḥ syāma sadhamādaḥ ||

5.021.01a manuṣvat tvā ni dhīmahi manuṣvat sam idhīmahi |
5.021.01c agne manuṣvad aṅgiro devān devayate yaja ||
5.021.02a tvaṁ hi mānuṣe jane 'gne suprīta idhyase |
5.021.02c srucas tvā yanty ānuṣak sujāta sarpirāsute ||
5.021.03a tvāṁ viśve sajoṣaso devāso dūtam akrata |
5.021.03b saparyantas tvā kave yajñeṣu devam īḻate ||
5.021.04a devaṁ vo devayajyayāgnim īḻīta martyaḥ |
5.021.04b samiddhaḥ śukra dīdihy ṛtasya yonim āsadaḥ sasasya yonim āsadaḥ ||

5.022.01a pra viśvasāmann atrivad arcā pāvakaśociṣe |
5.022.01c yo adhvareṣv īḍyo hotā mandratamo viśi ||
5.022.02a ny agniṁ jātavedasaṁ dadhātā devam ṛtvijam |
5.022.02c pra yajña etv ānuṣag adyā devavyacastamaḥ ||
5.022.03a cikitvinmanasaṁ tvā devam martāsa ūtaye |
5.022.03c vareṇyasya te 'vasa iyānāso amanmahi ||
5.022.04a agne cikiddhy asya na idaṁ vacaḥ sahasya |
5.022.04c taṁ tvā suśipra dampate stomair vardhanty atrayo gīrbhiḥ śumbhanty atrayaḥ ||

5.023.01a agne sahantam ā bhara dyumnasya prāsahā rayim |
5.023.01c viśvā yaś carṣaṇīr abhy āsā vājeṣu sāsahat ||
5.023.02a tam agne pṛtanāṣahaṁ rayiṁ sahasva ā bhara |
5.023.02b tvaṁ hi satyo adbhuto dātā vājasya gomataḥ ||
5.023.03a viśve hi tvā sajoṣaso janāso vṛktabarhiṣaḥ |
5.023.03c hotāraṁ sadmasu priyaṁ vyanti vāryā puru ||
5.023.04a sa hi ṣmā viśvacarṣaṇir abhimāti saho dadhe |
5.023.04b agna eṣu kṣayeṣv ā revan naḥ śukra dīdihi dyumat pāvaka dīdihi ||

5.024.01a agne tvaṁ no antama uta trātā śivo bhavā varūthyaḥ ||
5.024.02a vasur agnir vasuśravā acchā nakṣi dyumattamaṁ rayiṁ dāḥ ||
5.024.03a sa no bodhi śrudhī havam uruṣyā ṇo aghāyataḥ samasmāt ||
5.024.04a taṁ tvā śociṣṭha dīdivaḥ sumnāya nūnam īmahe sakhibhyaḥ ||

5.025.01a acchā vo agnim avase devaṁ gāsi sa no vasuḥ |
5.025.01c rāsat putra ṛṣūṇām ṛtāvā parṣati dviṣaḥ ||
5.025.02a sa hi satyo yam pūrve cid devāsaś cid yam īdhire |
5.025.02c hotāram mandrajihvam it sudītibhir vibhāvasum ||
5.025.03a sa no dhītī variṣṭhayā śreṣṭhayā ca sumatyā |
5.025.03c agne rāyo didīhi naḥ suvṛktibhir vareṇya ||
5.025.04a agnir deveṣu rājaty agnir marteṣv āviśan |
5.025.04c agnir no havyavāhano 'gniṁ dhībhiḥ saparyata ||
5.025.05a agnis tuviśravastamaṁ tuvibrahmāṇam uttamam |
5.025.05c atūrtaṁ śrāvayatpatim putraṁ dadāti dāśuṣe ||
5.025.06a agnir dadāti satpatiṁ sāsāha yo yudhā nṛbhiḥ |
5.025.06c agnir atyaṁ raghuṣyadaṁ jetāram aparājitam ||
5.025.07a yad vāhiṣṭhaṁ tad agnaye bṛhad arca vibhāvaso |
5.025.07c mahiṣīva tvad rayis tvad vājā ud īrate ||
5.025.08a tava dyumanto arcayo grāvevocyate bṛhat |
5.025.08c uto te tanyatur yathā svāno arta tmanā divaḥ ||
5.025.09a evām̐ agniṁ vasūyavaḥ sahasānaṁ vavandima |
5.025.09c sa no viśvā ati dviṣaḥ parṣan nāveva sukratuḥ ||

5.026.01a agne pāvaka rociṣā mandrayā deva jihvayā |
5.026.01c ā devān vakṣi yakṣi ca ||
5.026.02a taṁ tvā ghṛtasnav īmahe citrabhāno svardṛśam |
5.026.02c devām̐ ā vītaye vaha ||
5.026.03a vītihotraṁ tvā kave dyumantaṁ sam idhīmahi |
5.026.03c agne bṛhantam adhvare ||
5.026.04a agne viśvebhir ā gahi devebhir havyadātaye |
5.026.04b hotāraṁ tvā vṛṇīmahe ||
5.026.05a yajamānāya sunvata āgne suvīryaṁ vaha |
5.026.05c devair ā satsi barhiṣi ||
5.026.06a samidhānaḥ sahasrajid agne dharmāṇi puṣyasi |
5.026.06c devānāṁ dūta ukthyaḥ ||
5.026.07a ny agniṁ jātavedasaṁ hotravāhaṁ yaviṣṭhyam |
5.026.07c dadhātā devam ṛtvijam ||
5.026.08a pra yajña etv ānuṣag adyā devavyacastamaḥ |
5.026.08c stṛṇīta barhir āsade ||
5.026.09a edam maruto aśvinā mitraḥ sīdantu varuṇaḥ |
5.026.09c devāsaḥ sarvayā viśā ||

5.027.01a anasvantā satpatir māmahe me gāvā cetiṣṭho asuro maghonaḥ |
5.027.01c traivṛṣṇo agne daśabhiḥ sahasrair vaiśvānara tryaruṇaś ciketa ||
5.027.02a yo me śatā ca viṁśatiṁ ca gonāṁ harī ca yuktā sudhurā dadāti |
5.027.02c vaiśvānara suṣṭuto vāvṛdhāno 'gne yaccha tryaruṇāya śarma ||
5.027.03a evā te agne sumatiṁ cakāno naviṣṭhāya navamaṁ trasadasyuḥ |
5.027.03c yo me giras tuvijātasya pūrvīr yuktenābhi tryaruṇo gṛṇāti ||
5.027.04a yo ma iti pravocaty aśvamedhāya sūraye |
5.027.04b dadad ṛcā saniṁ yate dadan medhām ṛtāyate ||
5.027.05a yasya mā paruṣāḥ śatam uddharṣayanty ukṣaṇaḥ |
5.027.05c aśvamedhasya dānāḥ somā iva tryāśiraḥ ||
5.027.06a indrāgnī śatadāvny aśvamedhe suvīryam |
5.027.06c kṣatraṁ dhārayatam bṛhad divi sūryam ivājaram ||

5.028.01a samiddho agnir divi śocir aśret pratyaṅṅ uṣasam urviyā vi bhāti |
5.028.01c eti prācī viśvavārā namobhir devām̐ īḻānā haviṣā ghṛtācī ||
5.028.02a samidhyamāno amṛtasya rājasi haviṣ kṛṇvantaṁ sacase svastaye |
5.028.02c viśvaṁ sa dhatte draviṇaṁ yam invasy ātithyam agne ni ca dhatta it puraḥ ||
5.028.03a agne śardha mahate saubhagāya tava dyumnāny uttamāni santu |
5.028.03c saṁ jāspatyaṁ suyamam ā kṛṇuṣva śatrūyatām abhi tiṣṭhā mahāṁsi ||
5.028.04a samiddhasya pramahaso 'gne vande tava śriyam |
5.028.04c vṛṣabho dyumnavām̐ asi sam adhvareṣv idhyase ||
5.028.05a samiddho agna āhuta devān yakṣi svadhvara |
5.028.05c tvaṁ hi havyavāḻ asi ||
5.028.06a ā juhotā duvasyatāgnim prayaty adhvare |
5.028.06c vṛṇīdhvaṁ havyavāhanam ||

5.029.01a try aryamā manuṣo devatātā trī rocanā divyā dhārayanta |
5.029.01c arcanti tvā marutaḥ pūtadakṣās tvam eṣām ṛṣir indrāsi dhīraḥ ||
5.029.02a anu yad īm maruto mandasānam ārcann indram papivāṁsaṁ sutasya |
5.029.02c ādatta vajram abhi yad ahiṁ hann apo yahvīr asṛjat sartavā u ||
5.029.03a uta brahmāṇo maruto me asyendraḥ somasya suṣutasya peyāḥ |
5.029.03c tad dhi havyam manuṣe gā avindad ahann ahim papivām̐ indro asya ||
5.029.04a ād rodasī vitaraṁ vi ṣkabhāyat saṁvivyānaś cid bhiyase mṛgaṁ kaḥ |
5.029.04c jigartim indro apajargurāṇaḥ prati śvasantam ava dānavaṁ han ||
5.029.05a adha kratvā maghavan tubhyaṁ devā anu viśve adaduḥ somapeyam |
5.029.05c yat sūryasya haritaḥ patantīḥ puraḥ satīr uparā etaśe kaḥ ||
5.029.06a nava yad asya navatiṁ ca bhogān sākaṁ vajreṇa maghavā vivṛścat |
5.029.06c arcantīndram marutaḥ sadhasthe traiṣṭubhena vacasā bādhata dyām ||
5.029.07a sakhā sakhye apacat tūyam agnir asya kratvā mahiṣā trī śatāni |
5.029.07c trī sākam indro manuṣaḥ sarāṁsi sutam pibad vṛtrahatyāya somam ||
5.029.08a trī yac chatā mahiṣāṇām agho mās trī sarāṁsi maghavā somyāpāḥ |
5.029.08c kāraṁ na viśve ahvanta devā bharam indrāya yad ahiṁ jaghāna ||
5.029.09a uśanā yat sahasyair ayātaṁ gṛham indra jūjuvānebhir aśvaiḥ |
5.029.09c vanvāno atra sarathaṁ yayātha kutsena devair avanor ha śuṣṇam ||
5.029.10a prānyac cakram avṛhaḥ sūryasya kutsāyānyad varivo yātave 'kaḥ |
5.029.10c anāso dasyūm̐r amṛṇo vadhena ni duryoṇa āvṛṇaṅ mṛdhravācaḥ ||
5.029.11a stomāsas tvā gaurivīter avardhann arandhayo vaidathināya piprum |
5.029.11c ā tvām ṛjiśvā sakhyāya cakre pacan paktīr apibaḥ somam asya ||
5.029.12a navagvāsaḥ sutasomāsa indraṁ daśagvāso abhy arcanty arkaiḥ |
5.029.12c gavyaṁ cid ūrvam apidhānavantaṁ taṁ cin naraḥ śaśamānā apa vran ||
5.029.13a katho nu te pari carāṇi vidvān vīryā maghavan yā cakartha |
5.029.13c yā co nu navyā kṛṇavaḥ śaviṣṭha pred u tā te vidatheṣu bravāma ||
5.029.14a etā viśvā cakṛvām̐ indra bhūry aparīto januṣā vīryeṇa |
5.029.14c yā cin nu vajrin kṛṇavo dadhṛṣvān na te vartā taviṣyā asti tasyāḥ ||
5.029.15a indra brahma kriyamāṇā juṣasva yā te śaviṣṭha navyā akarma |
5.029.15c vastreva bhadrā sukṛtā vasūyū rathaṁ na dhīraḥ svapā atakṣam ||

5.030.01a kva sya vīraḥ ko apaśyad indraṁ sukharatham īyamānaṁ haribhyām |
5.030.01c yo rāyā vajrī sutasomam icchan tad oko gantā puruhūta ūtī ||
5.030.02a avācacakṣam padam asya sasvar ugraṁ nidhātur anv āyam icchan |
5.030.02c apṛccham anyām̐ uta te ma āhur indraṁ naro bubudhānā aśema ||
5.030.03a pra nu vayaṁ sute yā te kṛtānīndra bravāma yāni no jujoṣaḥ |
5.030.03b vedad avidvāñ chṛṇavac ca vidvān vahate 'yam maghavā sarvasenaḥ ||
5.030.04a sthiram manaś cakṛṣe jāta indra veṣīd eko yudhaye bhūyasaś cit |
5.030.04b aśmānaṁ cic chavasā didyuto vi vido gavām ūrvam usriyāṇām ||
5.030.05a paro yat tvam parama ājaniṣṭhāḥ parāvati śrutyaṁ nāma bibhrat |
5.030.05c ataś cid indrād abhayanta devā viśvā apo ajayad dāsapatnīḥ ||
5.030.06a tubhyed ete marutaḥ suśevā arcanty arkaṁ sunvanty andhaḥ |
5.030.06c ahim ohānam apa āśayānam pra māyābhir māyinaṁ sakṣad indraḥ ||
5.030.07a vi ṣū mṛdho januṣā dānam invann ahan gavā maghavan saṁcakānaḥ |
5.030.07c atrā dāsasya namuceḥ śiro yad avartayo manave gātum icchan ||
5.030.08a yujaṁ hi mām akṛthā ād id indra śiro dāsasya namucer mathāyan |
5.030.08c aśmānaṁ cit svaryaṁ vartamānam pra cakriyeva rodasī marudbhyaḥ ||
5.030.09a striyo hi dāsa āyudhāni cakre kim mā karann abalā asya senāḥ |
5.030.09c antar hy akhyad ubhe asya dhene athopa praid yudhaye dasyum indraḥ ||
5.030.10a sam atra gāvo 'bhito 'navanteheha vatsair viyutā yad āsan |
5.030.10c saṁ tā indro asṛjad asya śākair yad īṁ somāsaḥ suṣutā amandan ||
5.030.11a yad īṁ somā babhrudhūtā amandann aroravīd vṛṣabhaḥ sādaneṣu |
5.030.11c puraṁdaraḥ papivām̐ indro asya punar gavām adadād usriyāṇām ||
5.030.12a bhadram idaṁ ruśamā agne akran gavāṁ catvāri dadataḥ sahasrā |
5.030.12c ṛṇaṁcayasya prayatā maghāni praty agrabhīṣma nṛtamasya nṛṇām ||
5.030.13a supeśasam māva sṛjanty astaṁ gavāṁ sahasrai ruśamāso agne |
5.030.13c tīvrā indram amamanduḥ sutāso 'ktor vyuṣṭau paritakmyāyāḥ ||
5.030.14a aucchat sā rātrī paritakmyā yām̐ ṛṇaṁcaye rājani ruśamānām |
5.030.14c atyo na vājī raghur ajyamāno babhruś catvāry asanat sahasrā ||
5.030.15a catuḥsahasraṁ gavyasya paśvaḥ praty agrabhīṣma ruśameṣv agne |
5.030.15c gharmaś cit taptaḥ pravṛje ya āsīd ayasmayas tam v ādāma viprāḥ ||

5.031.01a indro rathāya pravataṁ kṛṇoti yam adhyasthān maghavā vājayantam |
5.031.01c yūtheva paśvo vy unoti gopā ariṣṭo yāti prathamaḥ siṣāsan ||
5.031.02a ā pra drava harivo mā vi venaḥ piśaṅgarāte abhi naḥ sacasva |
5.031.02c nahi tvad indra vasyo anyad asty amenām̐ś cij janivataś cakartha ||
5.031.03a ud yat sahaḥ sahasa ājaniṣṭa dediṣṭa indra indriyāṇi viśvā |
5.031.03c prācodayat sudughā vavre antar vi jyotiṣā saṁvavṛtvat tamo 'vaḥ ||
5.031.04a anavas te ratham aśvāya takṣan tvaṣṭā vajram puruhūta dyumantam |
5.031.04c brahmāṇa indram mahayanto arkair avardhayann ahaye hantavā u ||
5.031.05a vṛṣṇe yat te vṛṣaṇo arkam arcān indra grāvāṇo aditiḥ sajoṣāḥ |
5.031.05c anaśvāso ye pavayo 'rathā indreṣitā abhy avartanta dasyūn ||
5.031.06a pra te pūrvāṇi karaṇāni vocam pra nūtanā maghavan yā cakartha |
5.031.06c śaktīvo yad vibharā rodasī ubhe jayann apo manave dānucitrāḥ ||
5.031.07a tad in nu te karaṇaṁ dasma viprāhiṁ yad ghnann ojo atrāmimīthāḥ |
5.031.07c śuṣṇasya cit pari māyā agṛbhṇāḥ prapitvaṁ yann apa dasyūm̐r asedhaḥ ||
5.031.08a tvam apo yadave turvaśāyāramayaḥ sudughāḥ pāra indra |
5.031.08c ugram ayātam avaho ha kutsaṁ saṁ ha yad vām uśanāranta devāḥ ||
5.031.09a indrākutsā vahamānā rathenā vām atyā api karṇe vahantu |
5.031.09c niḥ ṣīm adbhyo dhamatho niḥ ṣadhasthān maghono hṛdo varathas tamāṁsi ||
5.031.10a vātasya yuktān suyujaś cid aśvān kaviś cid eṣo ajagann avasyuḥ |
5.031.10c viśve te atra marutaḥ sakhāya indra brahmāṇi taviṣīm avardhan ||
5.031.11a sūraś cid ratham paritakmyāyām pūrvaṁ karad uparaṁ jūjuvāṁsam |
5.031.11c bharac cakram etaśaḥ saṁ riṇāti puro dadhat saniṣyati kratuṁ naḥ ||
5.031.12a āyaṁ janā abhicakṣe jagāmendraḥ sakhāyaṁ sutasomam icchan |
5.031.12c vadan grāvāva vedim bhriyāte yasya jīram adhvaryavaś caranti ||
5.031.13a ye cākananta cākananta nū te martā amṛta mo te aṁha āran |
5.031.13c vāvandhi yajyūm̐r uta teṣu dhehy ojo janeṣu yeṣu te syāma ||

5.032.01a adardar utsam asṛjo vi khāni tvam arṇavān badbadhānām̐ aramṇāḥ |
5.032.01c mahāntam indra parvataṁ vi yad vaḥ sṛjo vi dhārā ava dānavaṁ han ||
5.032.02a tvam utsām̐ ṛtubhir badbadhānām̐ araṁha ūdhaḥ parvatasya vajrin |
5.032.02c ahiṁ cid ugra prayutaṁ śayānaṁ jaghanvām̐ indra taviṣīm adhatthāḥ ||
5.032.03a tyasya cin mahato nir mṛgasya vadhar jaghāna taviṣībhir indraḥ |
5.032.03c ya eka id apratir manyamāna ād asmād anyo ajaniṣṭa tavyān ||
5.032.04a tyaṁ cid eṣāṁ svadhayā madantam miho napātaṁ suvṛdhaṁ tamogām |
5.032.04c vṛṣaprabharmā dānavasya bhāmaṁ vajreṇa vajrī ni jaghāna śuṣṇam ||
5.032.05a tyaṁ cid asya kratubhir niṣattam amarmaṇo vidad id asya marma |
5.032.05c yad īṁ sukṣatra prabhṛtā madasya yuyutsantaṁ tamasi harmye dhāḥ ||
5.032.06a tyaṁ cid itthā katpayaṁ śayānam asūrye tamasi vāvṛdhānam |
5.032.06c taṁ cin mandāno vṛṣabhaḥ sutasyoccair indro apagūryā jaghāna ||
5.032.07a ud yad indro mahate dānavāya vadhar yamiṣṭa saho apratītam |
5.032.07c yad īṁ vajrasya prabhṛtau dadābha viśvasya jantor adhamaṁ cakāra ||
5.032.08a tyaṁ cid arṇam madhupaṁ śayānam asinvaṁ vavram mahy ādad ugraḥ |
5.032.08c apādam atram mahatā vadhena ni duryoṇa āvṛṇaṅ mṛdhravācam ||
5.032.09a ko asya śuṣmaṁ taviṣīṁ varāta eko dhanā bharate apratītaḥ |
5.032.09c ime cid asya jrayaso nu devī indrasyaujaso bhiyasā jihāte ||
5.032.10a ny asmai devī svadhitir jihīta indrāya gātur uśatīva yeme |
5.032.10c saṁ yad ojo yuvate viśvam ābhir anu svadhāvne kṣitayo namanta ||
5.032.11a ekaṁ nu tvā satpatim pāñcajanyaṁ jātaṁ śṛṇomi yaśasaṁ janeṣu |
5.032.11c tam me jagṛbhra āśaso naviṣṭhaṁ doṣā vastor havamānāsa indram ||
5.032.12a evā hi tvām ṛtuthā yātayantam maghā viprebhyo dadataṁ śṛṇomi |
5.032.12c kiṁ te brahmāṇo gṛhate sakhāyo ye tvāyā nidadhuḥ kāmam indra ||

5.033.01a mahi mahe tavase dīdhye nṝn indrāyetthā tavase atavyān |
5.033.01c yo asmai sumatiṁ vājasātau stuto jane samaryaś ciketa ||
5.033.02a sa tvaṁ na indra dhiyasāno arkair harīṇāṁ vṛṣan yoktram aśreḥ |
5.033.02c yā itthā maghavann anu joṣaṁ vakṣo abhi prāryaḥ sakṣi janān ||
5.033.03a na te ta indrābhy asmad ṛṣvāyuktāso abrahmatā yad asan |
5.033.03c tiṣṭhā ratham adhi taṁ vajrahastā raśmiṁ deva yamase svaśvaḥ ||
5.033.04a purū yat ta indra santy ukthā gave cakarthorvarāsu yudhyan |
5.033.04c tatakṣe sūryāya cid okasi sve vṛṣā samatsu dāsasya nāma cit ||
5.033.05a vayaṁ te ta indra ye ca naraḥ śardho jajñānā yātāś ca rathāḥ |
5.033.05c āsmāñ jagamyād ahiśuṣma satvā bhago na havyaḥ prabhṛtheṣu cāruḥ ||
5.033.06a papṛkṣeṇyam indra tve hy ojo nṛmṇāni ca nṛtamāno amartaḥ |
5.033.06c sa na enīṁ vasavāno rayiṁ dāḥ prāryaḥ stuṣe tuvimaghasya dānam ||
5.033.07a evā na indrotibhir ava pāhi gṛṇataḥ śūra kārūn |
5.033.07c uta tvacaṁ dadato vājasātau piprīhi madhvaḥ suṣutasya cāroḥ ||
5.033.08a uta tye mā paurukutsyasya sūres trasadasyor hiraṇino rarāṇāḥ |
5.033.08c vahantu mā daśa śyetāso asya gairikṣitasya kratubhir nu saśce ||
5.033.09a uta tye mā mārutāśvasya śoṇāḥ kratvāmaghāso vidathasya rātau |
5.033.09c sahasrā me cyavatāno dadāna ānūkam aryo vapuṣe nārcat ||
5.033.10a uta tye mā dhvanyasya juṣṭā lakṣmaṇyasya suruco yatānāḥ |
5.033.10c mahnā rāyaḥ saṁvaraṇasya ṛṣer vrajaṁ na gāvaḥ prayatā api gman ||

5.034.01a ajātaśatrum ajarā svarvaty anu svadhāmitā dasmam īyate |
5.034.01c sunotana pacata brahmavāhase puruṣṭutāya prataraṁ dadhātana ||
5.034.02a ā yaḥ somena jaṭharam apipratāmandata maghavā madhvo andhasaḥ |
5.034.02c yad īm mṛgāya hantave mahāvadhaḥ sahasrabhṛṣṭim uśanā vadhaṁ yamat ||
5.034.03a yo asmai ghraṁsa uta vā ya ūdhani somaṁ sunoti bhavati dyumām̐ aha |
5.034.03c apāpa śakras tatanuṣṭim ūhati tanūśubhram maghavā yaḥ kavāsakhaḥ ||
5.034.04a yasyāvadhīt pitaraṁ yasya mātaraṁ yasya śakro bhrātaraṁ nāta īṣate |
5.034.04c vetīd v asya prayatā yataṁkaro na kilbiṣād īṣate vasva ākaraḥ ||
5.034.05a na pañcabhir daśabhir vaṣṭy ārabhaṁ nāsunvatā sacate puṣyatā cana |
5.034.05c jināti ved amuyā hanti vā dhunir ā devayum bhajati gomati vraje ||
5.034.06a vitvakṣaṇaḥ samṛtau cakramāsajo 'sunvato viṣuṇaḥ sunvato vṛdhaḥ |
5.034.06c indro viśvasya damitā vibhīṣaṇo yathāvaśaṁ nayati dāsam āryaḥ ||
5.034.07a sam īm paṇer ajati bhojanam muṣe vi dāśuṣe bhajati sūnaraṁ vasu |
5.034.07c durge cana dhriyate viśva ā puru jano yo asya taviṣīm acukrudhat ||
5.034.08a saṁ yaj janau sudhanau viśvaśardhasāv aved indro maghavā goṣu śubhriṣu |
5.034.08c yujaṁ hy anyam akṛta pravepany ud īṁ gavyaṁ sṛjate satvabhir dhuniḥ ||
5.034.09a sahasrasām āgniveśiṁ gṛṇīṣe śatrim agna upamāṁ ketum aryaḥ |
5.034.09c tasmā āpaḥ saṁyataḥ pīpayanta tasmin kṣatram amavat tveṣam astu ||

5.035.01a yas te sādhiṣṭho 'vasa indra kratuṣ ṭam ā bhara |
5.035.01c asmabhyaṁ carṣaṇīsahaṁ sasniṁ vājeṣu duṣṭaram ||
5.035.02a yad indra te catasro yac chūra santi tisraḥ |
5.035.02c yad vā pañca kṣitīnām avas tat su na ā bhara ||
5.035.03a ā te 'vo vareṇyaṁ vṛṣantamasya hūmahe |
5.035.03c vṛṣajūtir hi jajñiṣa ābhūbhir indra turvaṇiḥ ||
5.035.04a vṛṣā hy asi rādhase jajñiṣe vṛṣṇi te śavaḥ |
5.035.04c svakṣatraṁ te dhṛṣan manaḥ satrāham indra pauṁsyam ||
5.035.05a tvaṁ tam indra martyam amitrayantam adrivaḥ |
5.035.05c sarvarathā śatakrato ni yāhi śavasas pate ||
5.035.06a tvām id vṛtrahantama janāso vṛktabarhiṣaḥ |
5.035.06c ugram pūrvīṣu pūrvyaṁ havante vājasātaye ||
5.035.07a asmākam indra duṣṭaram puroyāvānam ājiṣu |
5.035.07c sayāvānaṁ dhane-dhane vājayantam avā ratham ||
5.035.08a asmākam indrehi no ratham avā puraṁdhyā |
5.035.08c vayaṁ śaviṣṭha vāryaṁ divi śravo dadhīmahi divi stomam manāmahe ||

5.036.01a sa ā gamad indro yo vasūnāṁ ciketad dātuṁ dāmano rayīṇām |
5.036.01c dhanvacaro na vaṁsagas tṛṣāṇaś cakamānaḥ pibatu dugdham aṁśum ||
5.036.02a ā te hanū harivaḥ śūra śipre ruhat somo na parvatasya pṛṣṭhe |
5.036.02c anu tvā rājann arvato na hinvan gīrbhir madema puruhūta viśve ||
5.036.03a cakraṁ na vṛttam puruhūta vepate mano bhiyā me amater id adrivaḥ |
5.036.03c rathād adhi tvā jaritā sadāvṛdha kuvin nu stoṣan maghavan purūvasuḥ ||
5.036.04a eṣa grāveva jaritā ta indreyarti vācam bṛhad āśuṣāṇaḥ |
5.036.04c pra savyena maghavan yaṁsi rāyaḥ pra dakṣiṇid dharivo mā vi venaḥ ||
5.036.05a vṛṣā tvā vṛṣaṇaṁ vardhatu dyaur vṛṣā vṛṣabhyāṁ vahase haribhyām |
5.036.05c sa no vṛṣā vṛṣarathaḥ suśipra vṛṣakrato vṛṣā vajrin bhare dhāḥ ||
5.036.06a yo rohitau vājinau vājinīvān tribhiḥ śataiḥ sacamānāv adiṣṭa |
5.036.06c yūne sam asmai kṣitayo namantāṁ śrutarathāya maruto duvoyā ||

5.037.01a sam bhānunā yatate sūryasyājuhvāno ghṛtapṛṣṭhaḥ svañcāḥ |
5.037.01c tasmā amṛdhrā uṣaso vy ucchān ya indrāya sunavāmety āha ||
5.037.02a samiddhāgnir vanavat stīrṇabarhir yuktagrāvā sutasomo jarāte |
5.037.02c grāvāṇo yasyeṣiraṁ vadanty ayad adhvaryur haviṣāva sindhum ||
5.037.03a vadhūr iyam patim icchanty eti ya īṁ vahāte mahiṣīm iṣirām |
5.037.03c āsya śravasyād ratha ā ca ghoṣāt purū sahasrā pari vartayāte ||
5.037.04a na sa rājā vyathate yasminn indras tīvraṁ somam pibati gosakhāyam |
5.037.04c ā satvanair ajati hanti vṛtraṁ kṣeti kṣitīḥ subhago nāma puṣyan ||
5.037.05a puṣyāt kṣeme abhi yoge bhavāty ubhe vṛtau saṁyatī saṁ jayāti |
5.037.05c priyaḥ sūrye priyo agnā bhavāti ya indrāya sutasomo dadāśat ||

5.038.01a uroṣ ṭa indra rādhaso vibhvī rātiḥ śatakrato |
5.038.01c adhā no viśvacarṣaṇe dyumnā sukṣatra maṁhaya ||
5.038.02a yad īm indra śravāyyam iṣaṁ śaviṣṭha dadhiṣe |
5.038.02c paprathe dīrghaśruttamaṁ hiraṇyavarṇa duṣṭaram ||
5.038.03a śuṣmāso ye te adrivo mehanā ketasāpaḥ |
5.038.03c ubhā devāv abhiṣṭaye divaś ca gmaś ca rājathaḥ ||
5.038.04a uto no asya kasya cid dakṣasya tava vṛtrahan |
5.038.04c asmabhyaṁ nṛmṇam ā bharāsmabhyaṁ nṛmaṇasyase ||
5.038.05a nū ta ābhir abhiṣṭibhis tava śarmañ chatakrato |
5.038.05c indra syāma sugopāḥ śūra syāma sugopāḥ ||

5.039.01a yad indra citra mehanāsti tvādātam adrivaḥ |
5.039.01c rādhas tan no vidadvasa ubhayāhasty ā bhara ||
5.039.02a yan manyase vareṇyam indra dyukṣaṁ tad ā bhara |
5.039.02c vidyāma tasya te vayam akūpārasya dāvane ||
5.039.03a yat te ditsu prarādhyam mano asti śrutam bṛhat |
5.039.03c tena dṛḻhā cid adriva ā vājaṁ darṣi sātaye ||
5.039.04a maṁhiṣṭhaṁ vo maghonāṁ rājānaṁ carṣaṇīnām |
5.039.04c indram upa praśastaye pūrvībhir jujuṣe giraḥ ||
5.039.05a asmā it kāvyaṁ vaca uktham indrāya śaṁsyam |
5.039.05c tasmā u brahmavāhase giro vardhanty atrayo giraḥ śumbhanty atrayaḥ ||

5.040.01a ā yāhy adribhiḥ sutaṁ somaṁ somapate piba |
5.040.01c vṛṣann indra vṛṣabhir vṛtrahantama ||
5.040.02a vṛṣā grāvā vṛṣā mado vṛṣā somo ayaṁ sutaḥ |
5.040.02c vṛṣann indra vṛṣabhir vṛtrahantama ||
5.040.03a vṛṣā tvā vṛṣaṇaṁ huve vajriñ citrābhir ūtibhiḥ |
5.040.03c vṛṣann indra vṛṣabhir vṛtrahantama ||
5.040.04a ṛjīṣī vajrī vṛṣabhas turāṣāṭ chuṣmī rājā vṛtrahā somapāvā |
5.040.04c yuktvā haribhyām upa yāsad arvāṅ mādhyaṁdine savane matsad indraḥ ||
5.040.05a yat tvā sūrya svarbhānus tamasāvidhyad āsuraḥ |
5.040.05c akṣetravid yathā mugdho bhuvanāny adīdhayuḥ ||
5.040.06a svarbhānor adha yad indra māyā avo divo vartamānā avāhan |
5.040.06c gūḻhaṁ sūryaṁ tamasāpavratena turīyeṇa brahmaṇāvindad atriḥ ||
5.040.07a mā mām imaṁ tava santam atra irasyā drugdho bhiyasā ni gārīt |
5.040.07c tvam mitro asi satyarādhās tau mehāvataṁ varuṇaś ca rājā ||
5.040.08a grāvṇo brahmā yuyujānaḥ saparyan kīriṇā devān namasopaśikṣan |
5.040.08c atriḥ sūryasya divi cakṣur ādhāt svarbhānor apa māyā aghukṣat ||
5.040.09a yaṁ vai sūryaṁ svarbhānus tamasāvidhyad āsuraḥ |
5.040.09c atrayas tam anv avindan nahy anye aśaknuvan ||

5.041.01a ko nu vām mitrāvaruṇāv ṛtāyan divo vā mahaḥ pārthivasya vā de |
5.041.01c ṛtasya vā sadasi trāsīthāṁ no yajñāyate vā paśuṣo na vājān ||
5.041.02a te no mitro varuṇo aryamāyur indra ṛbhukṣā maruto juṣanta |
5.041.02c namobhir vā ye dadhate suvṛktiṁ stomaṁ rudrāya mīḻhuṣe sajoṣāḥ ||
5.041.03a ā vāṁ yeṣṭhāśvinā huvadhyai vātasya patman rathyasya puṣṭau |
5.041.03c uta vā divo asurāya manma prāndhāṁsīva yajyave bharadhvam ||
5.041.04a pra sakṣaṇo divyaḥ kaṇvahotā trito divaḥ sajoṣā vāto agniḥ |
5.041.04c pūṣā bhagaḥ prabhṛthe viśvabhojā ājiṁ na jagmur āśvaśvatamāḥ ||
5.041.05a pra vo rayiṁ yuktāśvam bharadhvaṁ rāya eṣe 'vase dadhīta dhīḥ |
5.041.05c suśeva evair auśijasya hotā ye va evā marutas turāṇām ||
5.041.06a pra vo vāyuṁ rathayujaṁ kṛṇudhvam pra devaṁ vipram panitāram arkaiḥ |
5.041.06c iṣudhyava ṛtasāpaḥ puraṁdhīr vasvīr no atra patnīr ā dhiye dhuḥ ||
5.041.07a upa va eṣe vandyebhiḥ śūṣaiḥ pra yahvī divaś citayadbhir arkaiḥ |
5.041.07c uṣāsānaktā viduṣīva viśvam ā hā vahato martyāya yajñam ||
5.041.08a abhi vo arce poṣyāvato nṝn vāstoṣ patiṁ tvaṣṭāraṁ rarāṇaḥ |
5.041.08c dhanyā sajoṣā dhiṣaṇā namobhir vanaspatīm̐r oṣadhī rāya eṣe ||
5.041.09a tuje nas tane parvatāḥ santu svaitavo ye vasavo na vīrāḥ |
5.041.09c panita āptyo yajataḥ sadā no vardhān naḥ śaṁsaṁ naryo abhiṣṭau ||
5.041.10a vṛṣṇo astoṣi bhūmyasya garbhaṁ trito napātam apāṁ suvṛkti |
5.041.10c gṛṇīte agnir etarī na śūṣaiḥ śociṣkeśo ni riṇāti vanā ||
5.041.11a kathā mahe rudriyāya bravāma kad rāye cikituṣe bhagāya |
5.041.11c āpa oṣadhīr uta no 'vantu dyaur vanā girayo vṛkṣakeśāḥ ||
5.041.12a śṛṇotu na ūrjām patir giraḥ sa nabhas tarīyām̐ iṣiraḥ parijmā |
5.041.12c śṛṇvantv āpaḥ puro na śubhrāḥ pari sruco babṛhāṇasyādreḥ ||
5.041.13a vidā cin nu mahānto ye va evā bravāma dasmā vāryaṁ dadhānāḥ |
5.041.13c vayaś cana subhva āva yanti kṣubhā martam anuyataṁ vadhasnaiḥ ||
5.041.14a ā daivyāni pārthivāni janmāpaś cācchā sumakhāya vocam |
5.041.14c vardhantāṁ dyāvo giraś candrāgrā udā vardhantām abhiṣātā arṇāḥ ||
5.041.15a pade-pade me jarimā ni dhāyi varūtrī vā śakrā yā pāyubhiś ca |
5.041.15c siṣaktu mātā mahī rasā naḥ smat sūribhir ṛjuhasta ṛjuvaniḥ ||
5.041.16a kathā dāśema namasā sudānūn evayā maruto acchoktau praśravaso maruto acchoktau |
5.041.16c mā no 'hir budhnyo riṣe dhād asmākam bhūd upamātivaniḥ ||
5.041.17a iti cin nu prajāyai paśumatyai devāso vanate martyo va ā devāso vanate martyo vaḥ |
5.041.17c atrā śivāṁ tanvo dhāsim asyā jarāṁ cin me nirṛtir jagrasīta ||
5.041.18a tāṁ vo devāḥ sumatim ūrjayantīm iṣam aśyāma vasavaḥ śasā goḥ |
5.041.18c sā naḥ sudānur mṛḻayantī devī prati dravantī suvitāya gamyāḥ ||
5.041.19a abhi na iḻā yūthasya mātā sman nadībhir urvaśī vā gṛṇātu |
5.041.19c urvaśī vā bṛhaddivā gṛṇānābhyūrṇvānā prabhṛthasyāyoḥ ||
5.041.20a siṣaktu na ūrjavyasya puṣṭeḥ ||

5.042.01a pra śaṁtamā varuṇaṁ dīdhitī gīr mitram bhagam aditiṁ nūnam aśyāḥ |
5.042.01c pṛṣadyoniḥ pañcahotā śṛṇotv atūrtapanthā asuro mayobhuḥ ||
5.042.02a prati me stomam aditir jagṛbhyāt sūnuṁ na mātā hṛdyaṁ suśevam |
5.042.02c brahma priyaṁ devahitaṁ yad asty aham mitre varuṇe yan mayobhu ||
5.042.03a ud īraya kavitamaṁ kavīnām unattainam abhi madhvā ghṛtena |
5.042.03c sa no vasūni prayatā hitāni candrāṇi devaḥ savitā suvāti ||
5.042.04a sam indra ṇo manasā neṣi gobhiḥ saṁ sūribhir harivaḥ saṁ svasti |
5.042.04c sam brahmaṇā devahitaṁ yad asti saṁ devānāṁ sumatyā yajñiyānām ||
5.042.05a devo bhagaḥ savitā rāyo aṁśa indro vṛtrasya saṁjito dhanānām |
5.042.05c ṛbhukṣā vāja uta vā puraṁdhir avantu no amṛtāsas turāsaḥ ||
5.042.06a marutvato apratītasya jiṣṇor ajūryataḥ pra bravāmā kṛtāni |
5.042.06c na te pūrve maghavan nāparāso na vīryaṁ nūtanaḥ kaś canāpa ||
5.042.07a upa stuhi prathamaṁ ratnadheyam bṛhaspatiṁ sanitāraṁ dhanānām |
5.042.07c yaḥ śaṁsate stuvate śambhaviṣṭhaḥ purūvasur āgamaj johuvānam ||
5.042.08a tavotibhiḥ sacamānā ariṣṭā bṛhaspate maghavānaḥ suvīrāḥ |
5.042.08c ye aśvadā uta vā santi godā ye vastradāḥ subhagās teṣu rāyaḥ ||
5.042.09a visarmāṇaṁ kṛṇuhi vittam eṣāṁ ye bhuñjate apṛṇanto na ukthaiḥ |
5.042.09c apavratān prasave vāvṛdhānān brahmadviṣaḥ sūryād yāvayasva ||
5.042.10a ya ohate rakṣaso devavītāv acakrebhis tam maruto ni yāta |
5.042.10c yo vaḥ śamīṁ śaśamānasya nindāt tucchyān kāmān karate siṣvidānaḥ ||
5.042.11a tam u ṣṭuhi yaḥ sviṣuḥ sudhanvā yo viśvasya kṣayati bheṣajasya |
5.042.11c yakṣvā mahe saumanasāya rudraṁ namobhir devam asuraṁ duvasya ||
5.042.12a damūnaso apaso ye suhastā vṛṣṇaḥ patnīr nadyo vibhvataṣṭāḥ |
5.042.12c sarasvatī bṛhaddivota rākā daśasyantīr varivasyantu śubhrāḥ ||
5.042.13a pra sū mahe suśaraṇāya medhāṁ giram bhare navyasīṁ jāyamānām |
5.042.13c ya āhanā duhitur vakṣaṇāsu rūpā mināno akṛṇod idaṁ naḥ ||
5.042.14a pra suṣṭutiḥ stanayantaṁ ruvantam iḻas patiṁ jaritar nūnam aśyāḥ |
5.042.14c yo abdimām̐ udanimām̐ iyarti pra vidyutā rodasī ukṣamāṇaḥ ||
5.042.15a eṣa stomo mārutaṁ śardho acchā rudrasya sūnūm̐r yuvanyūm̐r ud aśyāḥ |
5.042.15c kāmo rāye havate mā svasty upa stuhi pṛṣadaśvām̐ ayāsaḥ ||
5.042.16a praiṣa stomaḥ pṛthivīm antarikṣaṁ vanaspatīm̐r oṣadhī rāye aśyāḥ |
5.042.16c devo-devaḥ suhavo bhūtu mahyam mā no mātā pṛthivī durmatau dhāt ||
5.042.17a urau devā anibādhe syāma ||
5.042.18a sam aśvinor avasā nūtanena mayobhuvā supraṇītī gamema |
5.042.18c ā no rayiṁ vahatam ota vīrān ā viśvāny amṛtā saubhagāni ||

5.043.01a ā dhenavaḥ payasā tūrṇyarthā amardhantīr upa no yantu madhvā |
5.043.01c maho rāye bṛhatīḥ sapta vipro mayobhuvo jaritā johavīti ||
5.043.02a ā suṣṭutī namasā vartayadhyai dyāvā vājāya pṛthivī amṛdhre |
5.043.02c pitā mātā madhuvacāḥ suhastā bhare-bhare no yaśasāv aviṣṭām ||
5.043.03a adhvaryavaś cakṛvāṁso madhūni pra vāyave bharata cāru śukram |
5.043.03c hoteva naḥ prathamaḥ pāhy asya deva madhvo rarimā te madāya ||
5.043.04a daśa kṣipo yuñjate bāhū adriṁ somasya yā śamitārā suhastā |
5.043.04c madhvo rasaṁ sugabhastir giriṣṭhāṁ caniścadad duduhe śukram aṁśuḥ ||
5.043.05a asāvi te jujuṣāṇāya somaḥ kratve dakṣāya bṛhate madāya |
5.043.05c harī rathe sudhurā yoge arvāg indra priyā kṛṇuhi hūyamānaḥ ||
5.043.06a ā no mahīm aramatiṁ sajoṣā gnāṁ devīṁ namasā rātahavyām |
5.043.06c madhor madāya bṛhatīm ṛtajñām āgne vaha pathibhir devayānaiḥ ||
5.043.07a añjanti yam prathayanto na viprā vapāvantaṁ nāgninā tapantaḥ |
5.043.07c pitur na putra upasi preṣṭha ā gharmo agnim ṛtayann asādi ||
5.043.08a acchā mahī bṛhatī śaṁtamā gīr dūto na gantv aśvinā huvadhyai |
5.043.08c mayobhuvā sarathā yātam arvāg gantaṁ nidhiṁ dhuram āṇir na nābhim ||
5.043.09a pra tavyaso namaüktiṁ turasyāham pūṣṇa uta vāyor adikṣi |
5.043.09c yā rādhasā coditārā matīnāṁ yā vājasya draviṇodā uta tman ||
5.043.10a ā nāmabhir maruto vakṣi viśvān ā rūpebhir jātavedo huvānaḥ |
5.043.10c yajñaṁ giro jarituḥ suṣṭutiṁ ca viśve ganta maruto viśva ūtī ||
5.043.11a ā no divo bṛhataḥ parvatād ā sarasvatī yajatā gantu yajñam |
5.043.11c havaṁ devī jujuṣāṇā ghṛtācī śagmāṁ no vācam uśatī śṛṇotu ||
5.043.12a ā vedhasaṁ nīlapṛṣṭham bṛhantam bṛhaspatiṁ sadane sādayadhvam |
5.043.12c sādadyoniṁ dama ā dīdivāṁsaṁ hiraṇyavarṇam aruṣaṁ sapema ||
5.043.13a ā dharṇasir bṛhaddivo rarāṇo viśvebhir gantv omabhir huvānaḥ |
5.043.13c gnā vasāna oṣadhīr amṛdhras tridhātuśṛṅgo vṛṣabho vayodhāḥ ||
5.043.14a mātuṣ pade parame śukra āyor vipanyavo rāspirāso agman |
5.043.14c suśevyaṁ namasā rātahavyāḥ śiśum mṛjanty āyavo na vāse ||
5.043.15a bṛhad vayo bṛhate tubhyam agne dhiyājuro mithunāsaḥ sacanta |
5.043.15c devo-devaḥ suhavo bhūtu mahyam mā no mātā pṛthivī durmatau dhāt ||
5.043.16a urau devā anibādhe syāma ||
5.043.17a sam aśvinor avasā nūtanena mayobhuvā supraṇītī gamema |
5.043.17c ā no rayiṁ vahatam ota vīrān ā viśvāny amṛtā saubhagāni ||

5.044.01a tam pratnathā pūrvathā viśvathemathā jyeṣṭhatātim barhiṣadaṁ svarvidam |
5.044.01c pratīcīnaṁ vṛjanaṁ dohase girāśuṁ jayantam anu yāsu vardhase ||
5.044.02a śriye sudṛśīr uparasya yāḥ svar virocamānaḥ kakubhām acodate |
5.044.02c sugopā asi na dabhāya sukrato paro māyābhir ṛta āsa nāma te ||
5.044.03a atyaṁ haviḥ sacate sac ca dhātu cāriṣṭagātuḥ sa hotā sahobhariḥ |
5.044.03c prasarsrāṇo anu barhir vṛṣā śiśur madhye yuvājaro visruhā hitaḥ ||
5.044.04a pra va ete suyujo yāmann iṣṭaye nīcīr amuṣmai yamya ṛtāvṛdhaḥ |
5.044.04c suyantubhiḥ sarvaśāsair abhīśubhiḥ krivir nāmāni pravaṇe muṣāyati ||
5.044.05a saṁjarbhurāṇas tarubhiḥ sutegṛbhaṁ vayākinaṁ cittagarbhāsu susvaruḥ |
5.044.05c dhāravākeṣv ṛjugātha śobhase vardhasva patnīr abhi jīvo adhvare ||
5.044.06a yādṛg eva dadṛśe tādṛg ucyate saṁ chāyayā dadhire sidhrayāpsv ā |
5.044.06c mahīm asmabhyam uruṣām uru jrayo bṛhat suvīram anapacyutaṁ sahaḥ ||
5.044.07a vety agrur janivān vā ati spṛdhaḥ samaryatā manasā sūryaḥ kaviḥ |
5.044.07c ghraṁsaṁ rakṣantam pari viśvato gayam asmākaṁ śarma vanavat svāvasuḥ ||
5.044.08a jyāyāṁsam asya yatunasya ketuna ṛṣisvaraṁ carati yāsu nāma te |
5.044.08c yādṛśmin dhāyi tam apasyayā vidad ya u svayaṁ vahate so araṁ karat ||
5.044.09a samudram āsām ava tasthe agrimā na riṣyati savanaṁ yasminn āyatā |
5.044.09c atrā na hārdi kravaṇasya rejate yatrā matir vidyate pūtabandhanī ||
5.044.10a sa hi kṣatrasya manasasya cittibhir evāvadasya yajatasya sadhreḥ |
5.044.10c avatsārasya spṛṇavāma raṇvabhiḥ śaviṣṭhaṁ vājaṁ viduṣā cid ardhyam ||
5.044.11a śyena āsām aditiḥ kakṣyo mado viśvavārasya yajatasya māyinaḥ |
5.044.11c sam anyam-anyam arthayanty etave vidur viṣāṇam paripānam anti te ||
5.044.12a sadāpṛṇo yajato vi dviṣo vadhīd bāhuvṛktaḥ śrutavit taryo vaḥ sacā |
5.044.12c ubhā sa varā praty eti bhāti ca yad īṁ gaṇam bhajate suprayāvabhiḥ ||
5.044.13a sutambharo yajamānasya satpatir viśvāsām ūdhaḥ sa dhiyām udañcanaḥ |
5.044.13c bharad dhenū rasavac chiśriye payo 'nubruvāṇo adhy eti na svapan ||
5.044.14a yo jāgāra tam ṛcaḥ kāmayante yo jāgāra tam u sāmāni yanti |
5.044.14c yo jāgāra tam ayaṁ soma āha tavāham asmi sakhye nyokāḥ ||
5.044.15a agnir jāgāra tam ṛcaḥ kāmayante 'gnir jāgāra tam u sāmāni yanti |
5.044.15c agnir jāgāra tam ayaṁ soma āha tavāham asmi sakhye nyokāḥ ||

5.045.01a vidā divo viṣyann adrim ukthair āyatyā uṣaso arcino guḥ |
5.045.01c apāvṛta vrajinīr ut svar gād vi duro mānuṣīr deva āvaḥ ||
5.045.02a vi sūryo amatiṁ na śriyaṁ sād orvād gavām mātā jānatī gāt |
5.045.02c dhanvarṇaso nadyaḥ khādoarṇāḥ sthūṇeva sumitā dṛṁhata dyauḥ ||
5.045.03a asmā ukthāya parvatasya garbho mahīnāṁ januṣe pūrvyāya |
5.045.03c vi parvato jihīta sādhata dyaur āvivāsanto dasayanta bhūma ||
5.045.04a sūktebhir vo vacobhir devajuṣṭair indrā nv agnī avase huvadhyai |
5.045.04c ukthebhir hi ṣmā kavayaḥ suyajñā āvivāsanto maruto yajanti ||
5.045.05a eto nv adya sudhyo bhavāma pra ducchunā minavāmā varīyaḥ |
5.045.05c āre dveṣāṁsi sanutar dadhāmāyāma prāñco yajamānam accha ||
5.045.06a etā dhiyaṁ kṛṇavāmā sakhāyo 'pa yā mātām̐ ṛṇuta vrajaṁ goḥ |
5.045.06c yayā manur viśiśipraṁ jigāya yayā vaṇig vaṅkur āpā purīṣam ||
5.045.07a anūnod atra hastayato adrir ārcan yena daśa māso navagvāḥ |
5.045.07c ṛtaṁ yatī saramā gā avindad viśvāni satyāṅgirāś cakāra ||
5.045.08a viśve asyā vyuṣi māhināyāḥ saṁ yad gobhir aṅgiraso navanta |
5.045.08c utsa āsām parame sadhastha ṛtasya pathā saramā vidad gāḥ ||
5.045.09a ā sūryo yātu saptāśvaḥ kṣetraṁ yad asyorviyā dīrghayāthe |
5.045.09c raghuḥ śyenaḥ patayad andho acchā yuvā kavir dīdayad goṣu gacchan ||
5.045.10a ā sūryo aruhac chukram arṇo 'yukta yad dharito vītapṛṣṭhāḥ |
5.045.10c udnā na nāvam anayanta dhīrā āśṛṇvatīr āpo arvāg atiṣṭhan ||
5.045.11a dhiyaṁ vo apsu dadhiṣe svarṣāṁ yayātaran daśa māso navagvāḥ |
5.045.11c ayā dhiyā syāma devagopā ayā dhiyā tuturyāmāty aṁhaḥ ||

5.046.01a hayo na vidvām̐ ayuji svayaṁ dhuri tāṁ vahāmi prataraṇīm avasyuvam |
5.046.01c nāsyā vaśmi vimucaṁ nāvṛtam punar vidvān pathaḥ puraeta ṛju neṣati ||
5.046.02a agna indra varuṇa mitra devāḥ śardhaḥ pra yanta mārutota viṣṇo |
5.046.02c ubhā nāsatyā rudro adha gnāḥ pūṣā bhagaḥ sarasvatī juṣanta ||
5.046.03a indrāgnī mitrāvaruṇāditiṁ svaḥ pṛthivīṁ dyām marutaḥ parvatām̐ apaḥ |
5.046.03c huve viṣṇum pūṣaṇam brahmaṇas patim bhagaṁ nu śaṁsaṁ savitāram ūtaye ||
5.046.04a uta no viṣṇur uta vāto asridho draviṇodā uta somo mayas karat |
5.046.04c uta ṛbhava uta rāye no aśvinota tvaṣṭota vibhvānu maṁsate ||
5.046.05a uta tyan no mārutaṁ śardha ā gamad divikṣayaṁ yajatam barhir āsade |
5.046.05c bṛhaspatiḥ śarma pūṣota no yamad varūthyaṁ varuṇo mitro aryamā ||
5.046.06a uta tye naḥ parvatāsaḥ suśastayaḥ sudītayo nadyas trāmaṇe bhuvan |
5.046.06c bhago vibhaktā śavasāvasā gamad uruvyacā aditiḥ śrotu me havam ||
5.046.07a devānām patnīr uśatīr avantu naḥ prāvantu nas tujaye vājasātaye |
5.046.07c yāḥ pārthivāso yā apām api vrate tā no devīḥ suhavāḥ śarma yacchata ||
5.046.08a uta gnā vyantu devapatnīr indrāṇy agnāyy aśvinī rāṭ |
5.046.08c ā rodasī varuṇānī śṛṇotu vyantu devīr ya ṛtur janīnām ||

5.047.01a prayuñjatī diva eti bruvāṇā mahī mātā duhitur bodhayantī |
5.047.01c āvivāsantī yuvatir manīṣā pitṛbhya ā sadane johuvānā ||
5.047.02a ajirāsas tadapa īyamānā ātasthivāṁso amṛtasya nābhim |
5.047.02c anantāsa uravo viśvataḥ sīm pari dyāvāpṛthivī yanti panthāḥ ||
5.047.03a ukṣā samudro aruṣaḥ suparṇaḥ pūrvasya yonim pitur ā viveśa |
5.047.03c madhye divo nihitaḥ pṛśnir aśmā vi cakrame rajasas pāty antau ||
5.047.04a catvāra īm bibhrati kṣemayanto daśa garbhaṁ carase dhāpayante |
5.047.04c tridhātavaḥ paramā asya gāvo divaś caranti pari sadyo antān ||
5.047.05a idaṁ vapur nivacanaṁ janāsaś caranti yan nadyas tasthur āpaḥ |
5.047.05c dve yad īm bibhṛto mātur anye iheha jāte yamyā sabandhū ||
5.047.06a vi tanvate dhiyo asmā apāṁsi vastrā putrāya mātaro vayanti |
5.047.06c upaprakṣe vṛṣaṇo modamānā divas pathā vadhvo yanty accha ||
5.047.07a tad astu mitrāvaruṇā tad agne śaṁ yor asmabhyam idam astu śastam |
5.047.07c aśīmahi gādham uta pratiṣṭhāṁ namo dive bṛhate sādanāya ||

5.048.01a kad u priyāya dhāmne manāmahe svakṣatrāya svayaśase mahe vayam |
5.048.01c āmenyasya rajaso yad abhra ām̐ apo vṛṇānā vitanoti māyinī ||
5.048.02a tā atnata vayunaṁ vīravakṣaṇaṁ samānyā vṛtayā viśvam ā rajaḥ |
5.048.02c apo apācīr aparā apejate pra pūrvābhis tirate devayur janaḥ ||
5.048.03a ā grāvabhir ahanyebhir aktubhir variṣṭhaṁ vajram ā jigharti māyini |
5.048.03c śataṁ vā yasya pracaran sve dame saṁvartayanto vi ca vartayann ahā ||
5.048.04a tām asya rītim paraśor iva praty anīkam akhyam bhuje asya varpasaḥ |
5.048.04c sacā yadi pitumantam iva kṣayaṁ ratnaṁ dadhāti bharahūtaye viśe ||
5.048.05a sa jihvayā caturanīka ṛñjate cāru vasāno varuṇo yatann arim |
5.048.05c na tasya vidma puruṣatvatā vayaṁ yato bhagaḥ savitā dāti vāryam ||

5.049.01a devaṁ vo adya savitāram eṣe bhagaṁ ca ratnaṁ vibhajantam āyoḥ |
5.049.01c ā vāṁ narā purubhujā vavṛtyāṁ dive-dive cid aśvinā sakhīyan ||
5.049.02a prati prayāṇam asurasya vidvān sūktair devaṁ savitāraṁ duvasya |
5.049.02c upa bruvīta namasā vijānañ jyeṣṭhaṁ ca ratnaṁ vibhajantam āyoḥ ||
5.049.03a adatrayā dayate vāryāṇi pūṣā bhago aditir vasta usraḥ |
5.049.03c indro viṣṇur varuṇo mitro agnir ahāni bhadrā janayanta dasmāḥ ||
5.049.04a tan no anarvā savitā varūthaṁ tat sindhava iṣayanto anu gman |
5.049.04c upa yad voce adhvarasya hotā rāyaḥ syāma patayo vājaratnāḥ ||
5.049.05a pra ye vasubhya īvad ā namo dur ye mitre varuṇe sūktavācaḥ |
5.049.05c avaitv abhvaṁ kṛṇutā varīyo divaspṛthivyor avasā madema ||

5.050.01a viśvo devasya netur marto vurīta sakhyam |
5.050.01c viśvo rāya iṣudhyati dyumnaṁ vṛṇīta puṣyase ||
5.050.02a te te deva netar ye cemām̐ anuśase |
5.050.02c te rāyā te hy āpṛce sacemahi sacathyaiḥ ||
5.050.03a ato na ā nṝn atithīn ataḥ patnīr daśasyata |
5.050.03c āre viśvam patheṣṭhāṁ dviṣo yuyotu yūyuviḥ ||
5.050.04a yatra vahnir abhihito dudravad droṇyaḥ paśuḥ |
5.050.04c nṛmaṇā vīrapastyo 'rṇā dhīreva sanitā ||
5.050.05a eṣa te deva netā rathaspatiḥ śaṁ rayiḥ |
5.050.05c śaṁ rāye śaṁ svastaya iṣaḥstuto manāmahe devastuto manāmahe ||

5.051.01a agne sutasya pītaye viśvair ūmebhir ā gahi |
5.051.01c devebhir havyadātaye ||
5.051.02a ṛtadhītaya ā gata satyadharmāṇo adhvaram |
5.051.02c agneḥ pibata jihvayā ||
5.051.03a viprebhir vipra santya prātaryāvabhir ā gahi |
5.051.03c devebhiḥ somapītaye ||
5.051.04a ayaṁ somaś camū suto 'matre pari ṣicyate |
5.051.04c priya indrāya vāyave ||
5.051.05a vāyav ā yāhi vītaye juṣāṇo havyadātaye |
5.051.05c pibā sutasyāndhaso abhi prayaḥ ||
5.051.06a indraś ca vāyav eṣāṁ sutānām pītim arhathaḥ |
5.051.06c tāñ juṣethām arepasāv abhi prayaḥ ||
5.051.07a sutā indrāya vāyave somāso dadhyāśiraḥ |
5.051.07c nimnaṁ na yanti sindhavo 'bhi prayaḥ ||
5.051.08a sajūr viśvebhir devebhir aśvibhyām uṣasā sajūḥ |
5.051.08c ā yāhy agne atrivat sute raṇa ||
5.051.09a sajūr mitrāvaruṇābhyāṁ sajūḥ somena viṣṇunā |
5.051.09c ā yāhy agne atrivat sute raṇa ||
5.051.10a sajūr ādityair vasubhiḥ sajūr indreṇa vāyunā |
5.051.10c ā yāhy agne atrivat sute raṇa ||
5.051.11a svasti no mimītām aśvinā bhagaḥ svasti devy aditir anarvaṇaḥ |
5.051.11c svasti pūṣā asuro dadhātu naḥ svasti dyāvāpṛthivī sucetunā ||
5.051.12a svastaye vāyum upa bravāmahai somaṁ svasti bhuvanasya yas patiḥ |
5.051.12c bṛhaspatiṁ sarvagaṇaṁ svastaye svastaya ādityāso bhavantu naḥ ||
5.051.13a viśve devā no adyā svastaye vaiśvānaro vasur agniḥ svastaye |
5.051.13c devā avantv ṛbhavaḥ svastaye svasti no rudraḥ pātv aṁhasaḥ ||
5.051.14a svasti mitrāvaruṇā svasti pathye revati |
5.051.14c svasti na indraś cāgniś ca svasti no adite kṛdhi ||
5.051.15a svasti panthām anu carema sūryācandramasāv iva |
5.051.15c punar dadatāghnatā jānatā saṁ gamemahi ||

5.052.01a pra śyāvāśva dhṛṣṇuyārcā marudbhir ṛkvabhiḥ |
5.052.01c ye adrogham anuṣvadhaṁ śravo madanti yajñiyāḥ ||
5.052.02a te hi sthirasya śavasaḥ sakhāyaḥ santi dhṛṣṇuyā |
5.052.02c te yāmann ā dhṛṣadvinas tmanā pānti śaśvataḥ ||
5.052.03a te syandrāso nokṣaṇo 'ti ṣkandanti śarvarīḥ |
5.052.03c marutām adhā maho divi kṣamā ca manmahe ||
5.052.04a marutsu vo dadhīmahi stomaṁ yajñaṁ ca dhṛṣṇuyā |
5.052.04c viśve ye mānuṣā yugā pānti martyaṁ riṣaḥ ||
5.052.05a arhanto ye sudānavo naro asāmiśavasaḥ |
5.052.05c pra yajñaṁ yajñiyebhyo divo arcā marudbhyaḥ ||
5.052.06a ā rukmair ā yudhā nara ṛṣvā ṛṣṭīr asṛkṣata |
5.052.06c anv enām̐ aha vidyuto maruto jajjhatīr iva bhānur arta tmanā divaḥ ||
5.052.07a ye vāvṛdhanta pārthivā ya urāv antarikṣa ā |
5.052.07c vṛjane vā nadīnāṁ sadhasthe vā maho divaḥ ||
5.052.08a śardho mārutam uc chaṁsa satyaśavasam ṛbhvasam |
5.052.08c uta sma te śubhe naraḥ pra syandrā yujata tmanā ||
5.052.09a uta sma te paruṣṇyām ūrṇā vasata śundhyavaḥ |
5.052.09c uta pavyā rathānām adrim bhindanty ojasā ||
5.052.10a āpathayo vipathayo 'ntaspathā anupathāḥ |
5.052.10c etebhir mahyaṁ nāmabhir yajñaṁ viṣṭāra ohate ||
5.052.11a adhā naro ny ohate 'dhā niyuta ohate |
5.052.11c adhā pārāvatā iti citrā rūpāṇi darśyā ||
5.052.12a chandaḥstubhaḥ kubhanyava utsam ā kīriṇo nṛtuḥ |
5.052.12c te me ke cin na tāyava ūmā āsan dṛśi tviṣe ||
5.052.13a ya ṛṣvā ṛṣṭividyutaḥ kavayaḥ santi vedhasaḥ |
5.052.13c tam ṛṣe mārutaṁ gaṇaṁ namasyā ramayā girā ||
5.052.14a accha ṛṣe mārutaṁ gaṇaṁ dānā mitraṁ na yoṣaṇā |
5.052.14c divo vā dhṛṣṇava ojasā stutā dhībhir iṣaṇyata ||
5.052.15a nū manvāna eṣāṁ devām̐ acchā na vakṣaṇā |
5.052.15c dānā saceta sūribhir yāmaśrutebhir añjibhiḥ ||
5.052.16a pra ye me bandhveṣe gāṁ vocanta sūrayaḥ pṛśniṁ vocanta mātaram |
5.052.16c adhā pitaram iṣmiṇaṁ rudraṁ vocanta śikvasaḥ ||
5.052.17a sapta me sapta śākina ekam-ekā śatā daduḥ |
5.052.17c yamunāyām adhi śrutam ud rādho gavyam mṛje ni rādho aśvyam mṛje ||

5.053.01a ko veda jānam eṣāṁ ko vā purā sumneṣv āsa marutām |
5.053.01c yad yuyujre kilāsyaḥ ||
5.053.02a aitān ratheṣu tasthuṣaḥ kaḥ śuśrāva kathā yayuḥ |
5.053.02c kasmai sasruḥ sudāse anv āpaya iḻābhir vṛṣṭayaḥ saha ||
5.053.03a te ma āhur ya āyayur upa dyubhir vibhir made |
5.053.03c naro maryā arepasa imān paśyann iti ṣṭuhi ||
5.053.04a ye añjiṣu ye vāśīṣu svabhānavaḥ srakṣu rukmeṣu khādiṣu |
5.053.04c śrāyā ratheṣu dhanvasu ||
5.053.05a yuṣmākaṁ smā rathām̐ anu mude dadhe maruto jīradānavaḥ |
5.053.05c vṛṣṭī dyāvo yatīr iva ||
5.053.06a ā yaṁ naraḥ sudānavo dadāśuṣe divaḥ kośam acucyavuḥ |
5.053.06c vi parjanyaṁ sṛjanti rodasī anu dhanvanā yanti vṛṣṭayaḥ ||
5.053.07a tatṛdānāḥ sindhavaḥ kṣodasā rajaḥ pra sasrur dhenavo yathā |
5.053.07c syannā aśvā ivādhvano vimocane vi yad vartanta enyaḥ ||
5.053.08a ā yāta maruto diva āntarikṣād amād uta |
5.053.08c māva sthāta parāvataḥ ||
5.053.09a mā vo rasānitabhā kubhā krumur mā vaḥ sindhur ni rīramat |
5.053.09c mā vaḥ pari ṣṭhāt sarayuḥ purīṣiṇy asme it sumnam astu vaḥ ||
5.053.10a taṁ vaḥ śardhaṁ rathānāṁ tveṣaṁ gaṇam mārutaṁ navyasīnām |
5.053.10c anu pra yanti vṛṣṭayaḥ ||
5.053.11a śardhaṁ-śardhaṁ va eṣāṁ vrātaṁ-vrātaṁ gaṇaṁ-gaṇaṁ suśastibhiḥ |
5.053.11c anu krāmema dhītibhiḥ ||
5.053.12a kasmā adya sujātāya rātahavyāya pra yayuḥ |
5.053.12c enā yāmena marutaḥ ||
5.053.13a yena tokāya tanayāya dhānyam bījaṁ vahadhve akṣitam |
5.053.13c asmabhyaṁ tad dhattana yad va īmahe rādho viśvāyu saubhagam ||
5.053.14a atīyāma nidas tiraḥ svastibhir hitvāvadyam arātīḥ |
5.053.14c vṛṣṭvī śaṁ yor āpa usri bheṣajaṁ syāma marutaḥ saha ||
5.053.15a sudevaḥ samahāsati suvīro naro marutaḥ sa martyaḥ |
5.053.15c yaṁ trāyadhve syāma te ||
5.053.16a stuhi bhojān stuvato asya yāmani raṇan gāvo na yavase |
5.053.16c yataḥ pūrvām̐ iva sakhīm̐r anu hvaya girā gṛṇīhi kāminaḥ ||

5.054.01a pra śardhāya mārutāya svabhānava imāṁ vācam anajā parvatacyute |
5.054.01c gharmastubhe diva ā pṛṣṭhayajvane dyumnaśravase mahi nṛmṇam arcata ||
5.054.02a pra vo marutas taviṣā udanyavo vayovṛdho aśvayujaḥ parijrayaḥ |
5.054.02c saṁ vidyutā dadhati vāśati tritaḥ svaranty āpo 'vanā parijrayaḥ ||
5.054.03a vidyunmahaso naro aśmadidyavo vātatviṣo marutaḥ parvatacyutaḥ |
5.054.03c abdayā cin muhur ā hrādunīvṛtaḥ stanayadamā rabhasā udojasaḥ ||
5.054.04a vy aktūn rudrā vy ahāni śikvaso vy antarikṣaṁ vi rajāṁsi dhūtayaḥ |
5.054.04c vi yad ajrām̐ ajatha nāva īṁ yathā vi durgāṇi maruto nāha riṣyatha ||
5.054.05a tad vīryaṁ vo maruto mahitvanaṁ dīrghaṁ tatāna sūryo na yojanam |
5.054.05c etā na yāme agṛbhītaśociṣo 'naśvadāṁ yan ny ayātanā girim ||
5.054.06a abhrāji śardho maruto yad arṇasam moṣathā vṛkṣaṁ kapaneva vedhasaḥ |
5.054.06c adha smā no aramatiṁ sajoṣasaś cakṣur iva yantam anu neṣathā sugam ||
5.054.07a na sa jīyate maruto na hanyate na sredhati na vyathate na riṣyati |
5.054.07c nāsya rāya upa dasyanti notaya ṛṣiṁ vā yaṁ rājānaṁ vā suṣūdatha ||
5.054.08a niyutvanto grāmajito yathā naro 'ryamaṇo na marutaḥ kabandhinaḥ |
5.054.08c pinvanty utsaṁ yad ināso asvaran vy undanti pṛthivīm madhvo andhasā ||
5.054.09a pravatvatīyam pṛthivī marudbhyaḥ pravatvatī dyaur bhavati prayadbhyaḥ |
5.054.09c pravatvatīḥ pathyā antarikṣyāḥ pravatvantaḥ parvatā jīradānavaḥ ||
5.054.10a yan marutaḥ sabharasaḥ svarṇaraḥ sūrya udite madathā divo naraḥ |
5.054.10c na vo 'śvāḥ śrathayantāha sisrataḥ sadyo asyādhvanaḥ pāram aśnutha ||
5.054.11a aṁseṣu va ṛṣṭayaḥ patsu khādayo vakṣaḥsu rukmā maruto rathe śubhaḥ |
5.054.11c agnibhrājaso vidyuto gabhastyoḥ śiprāḥ śīrṣasu vitatā hiraṇyayīḥ ||
5.054.12a taṁ nākam aryo agṛbhītaśociṣaṁ ruśat pippalam maruto vi dhūnutha |
5.054.12c sam acyanta vṛjanātitviṣanta yat svaranti ghoṣaṁ vitatam ṛtāyavaḥ ||
5.054.13a yuṣmādattasya maruto vicetaso rāyaḥ syāma rathyo vayasvataḥ |
5.054.13c na yo yucchati tiṣyo yathā divo 'sme rāranta marutaḥ sahasriṇam ||
5.054.14a yūyaṁ rayim marutaḥ spārhavīraṁ yūyam ṛṣim avatha sāmavipram |
5.054.14c yūyam arvantam bharatāya vājaṁ yūyaṁ dhattha rājānaṁ śruṣṭimantam ||
5.054.15a tad vo yāmi draviṇaṁ sadyaūtayo yenā svar ṇa tatanāma nṝm̐r abhi |
5.054.15c idaṁ su me maruto haryatā vaco yasya tarema tarasā śataṁ himāḥ ||

5.055.01a prayajyavo maruto bhrājadṛṣṭayo bṛhad vayo dadhire rukmavakṣasaḥ |
5.055.01c īyante aśvaiḥ suyamebhir āśubhiḥ śubhaṁ yātām anu rathā avṛtsata ||
5.055.02a svayaṁ dadhidhve taviṣīṁ yathā vida bṛhan mahānta urviyā vi rājatha |
5.055.02c utāntarikṣam mamire vy ojasā śubhaṁ yātām anu rathā avṛtsata ||
5.055.03a sākaṁ jātāḥ subhvaḥ sākam ukṣitāḥ śriye cid ā prataraṁ vāvṛdhur naraḥ |
5.055.03c virokiṇaḥ sūryasyeva raśmayaḥ śubhaṁ yātām anu rathā avṛtsata ||
5.055.04a ābhūṣeṇyaṁ vo maruto mahitvanaṁ didṛkṣeṇyaṁ sūryasyeva cakṣaṇam |
5.055.04c uto asmām̐ amṛtatve dadhātana śubhaṁ yātām anu rathā avṛtsata ||
5.055.05a ud īrayathā marutaḥ samudrato yūyaṁ vṛṣṭiṁ varṣayathā purīṣiṇaḥ |
5.055.05c na vo dasrā upa dasyanti dhenavaḥ śubhaṁ yātām anu rathā avṛtsata ||
5.055.06a yad aśvān dhūrṣu pṛṣatīr ayugdhvaṁ hiraṇyayān praty atkām̐ amugdhvam |
5.055.06c viśvā it spṛdho maruto vy asyatha śubhaṁ yātām anu rathā avṛtsata ||
5.055.07a na parvatā na nadyo varanta vo yatrācidhvam maruto gacchathed u tat |
5.055.07c uta dyāvāpṛthivī yāthanā pari śubhaṁ yātām anu rathā avṛtsata ||
5.055.08a yat pūrvyam maruto yac ca nūtanaṁ yad udyate vasavo yac ca śasyate |
5.055.08c viśvasya tasya bhavathā navedasaḥ śubhaṁ yātām anu rathā avṛtsata ||
5.055.09a mṛḻata no maruto mā vadhiṣṭanāsmabhyaṁ śarma bahulaṁ vi yantana |
5.055.09c adhi stotrasya sakhyasya gātana śubhaṁ yātām anu rathā avṛtsata ||
5.055.10a yūyam asmān nayata vasyo acchā nir aṁhatibhyo maruto gṛṇānāḥ |
5.055.10c juṣadhvaṁ no havyadātiṁ yajatrā vayaṁ syāma patayo rayīṇām ||

5.056.01a agne śardhantam ā gaṇam piṣṭaṁ rukmebhir añjibhiḥ |
5.056.01c viśo adya marutām ava hvaye divaś cid rocanād adhi ||
5.056.02a yathā cin manyase hṛdā tad in me jagmur āśasaḥ |
5.056.02c ye te nediṣṭhaṁ havanāny āgaman tān vardha bhīmasaṁdṛśaḥ ||
5.056.03a mīḻhuṣmatīva pṛthivī parāhatā madanty ety asmad ā |
5.056.03c ṛkṣo na vo marutaḥ śimīvām̐ amo dudhro gaur iva bhīmayuḥ ||
5.056.04a ni ye riṇanty ojasā vṛthā gāvo na durdhuraḥ |
5.056.04c aśmānaṁ cit svaryam parvataṁ girim pra cyāvayanti yāmabhiḥ ||
5.056.05a ut tiṣṭha nūnam eṣāṁ stomaiḥ samukṣitānām |
5.056.05c marutām purutamam apūrvyaṁ gavāṁ sargam iva hvaye ||
5.056.06a yuṅgdhvaṁ hy aruṣī rathe yuṅgdhvaṁ ratheṣu rohitaḥ |
5.056.06c yuṅgdhvaṁ harī ajirā dhuri voḻhave vahiṣṭhā dhuri voḻhave ||
5.056.07a uta sya vājy aruṣas tuviṣvaṇir iha sma dhāyi darśataḥ |
5.056.07c mā vo yāmeṣu marutaś ciraṁ karat pra taṁ ratheṣu codata ||
5.056.08a rathaṁ nu mārutaṁ vayaṁ śravasyum ā huvāmahe |
5.056.08c ā yasmin tasthau suraṇāni bibhratī sacā marutsu rodasī ||
5.056.09a taṁ vaḥ śardhaṁ ratheśubhaṁ tveṣam panasyum ā huve |
5.056.09c yasmin sujātā subhagā mahīyate sacā marutsu mīḻhuṣī ||

5.057.01a ā rudrāsa indravantaḥ sajoṣaso hiraṇyarathāḥ suvitāya gantana |
5.057.01c iyaṁ vo asmat prati haryate matis tṛṣṇaje na diva utsā udanyave ||
5.057.02a vāśīmanta ṛṣṭimanto manīṣiṇaḥ sudhanvāna iṣumanto niṣaṅgiṇaḥ |
5.057.02c svaśvāḥ stha surathāḥ pṛśnimātaraḥ svāyudhā maruto yāthanā śubham ||
5.057.03a dhūnutha dyām parvatān dāśuṣe vasu ni vo vanā jihate yāmano bhiyā |
5.057.03c kopayatha pṛthivīm pṛśnimātaraḥ śubhe yad ugrāḥ pṛṣatīr ayugdhvam ||
5.057.04a vātatviṣo maruto varṣanirṇijo yamā iva susadṛśaḥ supeśasaḥ |
5.057.04c piśaṅgāśvā aruṇāśvā arepasaḥ pratvakṣaso mahinā dyaur ivoravaḥ ||
5.057.05a purudrapsā añjimantaḥ sudānavas tveṣasaṁdṛśo anavabhrarādhasaḥ |
5.057.05c sujātāso januṣā rukmavakṣaso divo arkā amṛtaṁ nāma bhejire ||
5.057.06a ṛṣṭayo vo maruto aṁsayor adhi saha ojo bāhvor vo balaṁ hitam |
5.057.06c nṛmṇā śīrṣasv āyudhā ratheṣu vo viśvā vaḥ śrīr adhi tanūṣu pipiśe ||
5.057.07a gomad aśvāvad rathavat suvīraṁ candravad rādho maruto dadā naḥ |
5.057.07c praśastiṁ naḥ kṛṇuta rudriyāso bhakṣīya vo 'vaso daivyasya ||
5.057.08a haye naro maruto mṛḻatā nas tuvīmaghāso amṛtā ṛtajñāḥ |
5.057.08c satyaśrutaḥ kavayo yuvāno bṛhadgirayo bṛhad ukṣamāṇāḥ ||

5.058.01a tam u nūnaṁ taviṣīmantam eṣāṁ stuṣe gaṇam mārutaṁ navyasīnām |
5.058.01c ya āśvaśvā amavad vahanta uteśire amṛtasya svarājaḥ ||
5.058.02a tveṣaṁ gaṇaṁ tavasaṁ khādihastaṁ dhunivratam māyinaṁ dātivāram |
5.058.02c mayobhuvo ye amitā mahitvā vandasva vipra tuvirādhaso nṝn ||
5.058.03a ā vo yantūdavāhāso adya vṛṣṭiṁ ye viśve maruto junanti |
5.058.03c ayaṁ yo agnir marutaḥ samiddha etaṁ juṣadhvaṁ kavayo yuvānaḥ ||
5.058.04a yūyaṁ rājānam iryaṁ janāya vibhvataṣṭaṁ janayathā yajatrāḥ |
5.058.04c yuṣmad eti muṣṭihā bāhujūto yuṣmat sadaśvo marutaḥ suvīraḥ ||
5.058.05a arā ived acaramā aheva pra-pra jāyante akavā mahobhiḥ |
5.058.05c pṛśneḥ putrā upamāso rabhiṣṭhāḥ svayā matyā marutaḥ sam mimikṣuḥ ||
5.058.06a yat prāyāsiṣṭa pṛṣatībhir aśvair vīḻupavibhir maruto rathebhiḥ |
5.058.06c kṣodanta āpo riṇate vanāny avosriyo vṛṣabhaḥ krandatu dyauḥ ||
5.058.07a prathiṣṭa yāman pṛthivī cid eṣām bharteva garbhaṁ svam ic chavo dhuḥ |
5.058.07c vātān hy aśvān dhury āyuyujre varṣaṁ svedaṁ cakrire rudriyāsaḥ ||
5.058.08a haye naro maruto mṛḻatā nas tuvīmaghāso amṛtā ṛtajñāḥ |
5.058.08c satyaśrutaḥ kavayo yuvāno bṛhadgirayo bṛhad ukṣamāṇāḥ ||

5.059.01a pra vaḥ spaḻ akran suvitāya dāvane 'rcā dive pra pṛthivyā ṛtam bhare |
5.059.01c ukṣante aśvān taruṣanta ā rajo 'nu svam bhānuṁ śrathayante arṇavaiḥ ||
5.059.02a amād eṣām bhiyasā bhūmir ejati naur na pūrṇā kṣarati vyathir yatī |
5.059.02c dūredṛśo ye citayanta emabhir antar mahe vidathe yetire naraḥ ||
5.059.03a gavām iva śriyase śṛṅgam uttamaṁ sūryo na cakṣū rajaso visarjane |
5.059.03c atyā iva subhvaś cāravaḥ sthana maryā iva śriyase cetathā naraḥ ||
5.059.04a ko vo mahānti mahatām ud aśnavat kas kāvyā marutaḥ ko ha pauṁsyā |
5.059.04c yūyaṁ ha bhūmiṁ kiraṇaṁ na rejatha pra yad bharadhve suvitāya dāvane ||
5.059.05a aśvā ived aruṣāsaḥ sabandhavaḥ śūrā iva prayudhaḥ prota yuyudhuḥ |
5.059.05c maryā iva suvṛdho vāvṛdhur naraḥ sūryasya cakṣuḥ pra minanti vṛṣṭibhiḥ ||
5.059.06a te ajyeṣṭhā akaniṣṭhāsa udbhido 'madhyamāso mahasā vi vāvṛdhuḥ |
5.059.06c sujātāso januṣā pṛśnimātaro divo maryā ā no acchā jigātana ||
5.059.07a vayo na ye śreṇīḥ paptur ojasāntān divo bṛhataḥ sānunas pari |
5.059.07c aśvāsa eṣām ubhaye yathā viduḥ pra parvatasya nabhanūm̐r acucyavuḥ ||
5.059.08a mimātu dyaur aditir vītaye naḥ saṁ dānucitrā uṣaso yatantām |
5.059.08c ācucyavur divyaṁ kośam eta ṛṣe rudrasya maruto gṛṇānāḥ ||

5.060.01a īḻe agniṁ svavasaṁ namobhir iha prasatto vi cayat kṛtaṁ naḥ |
5.060.01c rathair iva pra bhare vājayadbhiḥ pradakṣiṇin marutāṁ stomam ṛdhyām ||
5.060.02a ā ye tasthuḥ pṛṣatīṣu śrutāsu sukheṣu rudrā maruto ratheṣu |
5.060.02c vanā cid ugrā jihate ni vo bhiyā pṛthivī cid rejate parvataś cit ||
5.060.03a parvataś cin mahi vṛddho bibhāya divaś cit sānu rejata svane vaḥ |
5.060.03c yat krīḻatha maruta ṛṣṭimanta āpa iva sadhryañco dhavadhve ||
5.060.04a varā ived raivatāso hiraṇyair abhi svadhābhis tanvaḥ pipiśre |
5.060.04c śriye śreyāṁsas tavaso ratheṣu satrā mahāṁsi cakrire tanūṣu ||
5.060.05a ajyeṣṭhāso akaniṣṭhāsa ete sam bhrātaro vāvṛdhuḥ saubhagāya |
5.060.05c yuvā pitā svapā rudra eṣāṁ sudughā pṛśniḥ sudinā marudbhyaḥ ||
5.060.06a yad uttame maruto madhyame vā yad vāvame subhagāso divi ṣṭha |
5.060.06c ato no rudrā uta vā nv asyāgne vittād dhaviṣo yad yajāma ||
5.060.07a agniś ca yan maruto viśvavedaso divo vahadhva uttarād adhi ṣṇubhiḥ |
5.060.07c te mandasānā dhunayo riśādaso vāmaṁ dhatta yajamānāya sunvate ||
5.060.08a agne marudbhiḥ śubhayadbhir ṛkvabhiḥ somam piba mandasāno gaṇaśribhiḥ |
5.060.08c pāvakebhir viśvaminvebhir āyubhir vaiśvānara pradivā ketunā sajūḥ ||

5.061.01a ke ṣṭhā naraḥ śreṣṭhatamā ya eka-eka āyaya |
5.061.01c paramasyāḥ parāvataḥ ||
5.061.02a kva vo 'śvāḥ kvābhīśavaḥ kathaṁ śeka kathā yaya |
5.061.02c pṛṣṭhe sado nasor yamaḥ ||
5.061.03a jaghane coda eṣāṁ vi sakthāni naro yamuḥ |
5.061.03c putrakṛthe na janayaḥ ||
5.061.04a parā vīrāsa etana maryāso bhadrajānayaḥ |
5.061.04c agnitapo yathāsatha ||
5.061.05a sanat sāśvyam paśum uta gavyaṁ śatāvayam |
5.061.05c śyāvāśvastutāya yā dor vīrāyopabarbṛhat ||
5.061.06a uta tvā strī śaśīyasī puṁso bhavati vasyasī |
5.061.06c adevatrād arādhasaḥ ||
5.061.07a vi yā jānāti jasuriṁ vi tṛṣyantaṁ vi kāminam |
5.061.07c devatrā kṛṇute manaḥ ||
5.061.08a uta ghā nemo astutaḥ pumām̐ iti bruve paṇiḥ |
5.061.08c sa vairadeya it samaḥ ||
5.061.09a uta me 'rapad yuvatir mamanduṣī prati śyāvāya vartanim |
5.061.09c vi rohitā purumīḻhāya yematur viprāya dīrghayaśase ||
5.061.10a yo me dhenūnāṁ śataṁ vaidadaśvir yathā dadat |
5.061.10c taranta iva maṁhanā ||
5.061.11a ya īṁ vahanta āśubhiḥ pibanto madiram madhu |
5.061.11c atra śravāṁsi dadhire ||
5.061.12a yeṣāṁ śriyādhi rodasī vibhrājante ratheṣv ā |
5.061.12c divi rukma ivopari ||
5.061.13a yuvā sa māruto gaṇas tveṣaratho anedyaḥ |
5.061.13c śubhaṁyāvāpratiṣkutaḥ ||
5.061.14a ko veda nūnam eṣāṁ yatrā madanti dhūtayaḥ |
5.061.14c ṛtajātā arepasaḥ ||
5.061.15a yūyam martaṁ vipanyavaḥ praṇetāra itthā dhiyā |
5.061.15c śrotāro yāmahūtiṣu ||
5.061.16a te no vasūni kāmyā puruścandrā riśādasaḥ |
5.061.16c ā yajñiyāso vavṛttana ||
5.061.17a etam me stomam ūrmye dārbhyāya parā vaha |
5.061.17c giro devi rathīr iva ||
5.061.18a uta me vocatād iti sutasome rathavītau |
5.061.18c na kāmo apa veti me ||
5.061.19a eṣa kṣeti rathavītir maghavā gomatīr anu |
5.061.19c parvateṣv apaśritaḥ ||

5.062.01a ṛtena ṛtam apihitaṁ dhruvaṁ vāṁ sūryasya yatra vimucanty aśvān |
5.062.01c daśa śatā saha tasthus tad ekaṁ devānāṁ śreṣṭhaṁ vapuṣām apaśyam ||
5.062.02a tat su vām mitrāvaruṇā mahitvam īrmā tasthuṣīr ahabhir duduhre |
5.062.02c viśvāḥ pinvathaḥ svasarasya dhenā anu vām ekaḥ pavir ā vavarta ||
5.062.03a adhārayatam pṛthivīm uta dyām mitrarājānā varuṇā mahobhiḥ |
5.062.03c vardhayatam oṣadhīḥ pinvataṁ gā ava vṛṣṭiṁ sṛjataṁ jīradānū ||
5.062.04a ā vām aśvāsaḥ suyujo vahantu yataraśmaya upa yantv arvāk |
5.062.04c ghṛtasya nirṇig anu vartate vām upa sindhavaḥ pradivi kṣaranti ||
5.062.05a anu śrutām amatiṁ vardhad urvīm barhir iva yajuṣā rakṣamāṇā |
5.062.05c namasvantā dhṛtadakṣādhi garte mitrāsāthe varuṇeḻāsv antaḥ ||
5.062.06a akravihastā sukṛte paraspā yaṁ trāsāthe varuṇeḻāsv antaḥ |
5.062.06c rājānā kṣatram ahṛṇīyamānā sahasrasthūṇam bibhṛthaḥ saha dvau ||
5.062.07a hiraṇyanirṇig ayo asya sthūṇā vi bhrājate divy aśvājanīva |
5.062.07c bhadre kṣetre nimitā tilvile vā sanema madhvo adhigartyasya ||
5.062.08a hiraṇyarūpam uṣaso vyuṣṭāv ayaḥsthūṇam uditā sūryasya |
5.062.08c ā rohatho varuṇa mitra gartam ataś cakṣāthe aditiṁ ditiṁ ca ||
5.062.09a yad baṁhiṣṭhaṁ nātividhe sudānū acchidraṁ śarma bhuvanasya gopā |
5.062.09c tena no mitrāvaruṇāv aviṣṭaṁ siṣāsanto jigīvāṁsaḥ syāma ||

5.063.01a ṛtasya gopāv adhi tiṣṭhatho rathaṁ satyadharmāṇā parame vyomani |
5.063.01c yam atra mitrāvaruṇāvatho yuvaṁ tasmai vṛṣṭir madhumat pinvate divaḥ ||
5.063.02a samrājāv asya bhuvanasya rājatho mitrāvaruṇā vidathe svardṛśā |
5.063.02c vṛṣṭiṁ vāṁ rādho amṛtatvam īmahe dyāvāpṛthivī vi caranti tanyavaḥ ||
5.063.03a samrājā ugrā vṛṣabhā divas patī pṛthivyā mitrāvaruṇā vicarṣaṇī |
5.063.03c citrebhir abhrair upa tiṣṭhatho ravaṁ dyāṁ varṣayatho asurasya māyayā ||
5.063.04a māyā vām mitrāvaruṇā divi śritā sūryo jyotiś carati citram āyudham |
5.063.04c tam abhreṇa vṛṣṭyā gūhatho divi parjanya drapsā madhumanta īrate ||
5.063.05a rathaṁ yuñjate marutaḥ śubhe sukhaṁ śūro na mitrāvaruṇā gaviṣṭiṣu |
5.063.05c rajāṁsi citrā vi caranti tanyavo divaḥ samrājā payasā na ukṣatam ||
5.063.06a vācaṁ su mitrāvaruṇāv irāvatīm parjanyaś citrāṁ vadati tviṣīmatīm |
5.063.06c abhrā vasata marutaḥ su māyayā dyāṁ varṣayatam aruṇām arepasam ||
5.063.07a dharmaṇā mitrāvaruṇā vipaścitā vratā rakṣethe asurasya māyayā |
5.063.07c ṛtena viśvam bhuvanaṁ vi rājathaḥ sūryam ā dhattho divi citryaṁ ratham ||

5.064.01a varuṇaṁ vo riśādasam ṛcā mitraṁ havāmahe |
5.064.01c pari vrajeva bāhvor jaganvāṁsā svarṇaram ||
5.064.02a tā bāhavā sucetunā pra yantam asmā arcate |
5.064.02c śevaṁ hi jāryaṁ vāṁ viśvāsu kṣāsu joguve ||
5.064.03a yan nūnam aśyāṁ gatim mitrasya yāyām pathā |
5.064.03c asya priyasya śarmaṇy ahiṁsānasya saścire ||
5.064.04a yuvābhyām mitrāvaruṇopamaṁ dheyām ṛcā |
5.064.04c yad dha kṣaye maghonāṁ stotṝṇāṁ ca spūrdhase ||
5.064.05a ā no mitra sudītibhir varuṇaś ca sadhastha ā |
5.064.05c sve kṣaye maghonāṁ sakhīnāṁ ca vṛdhase ||
5.064.06a yuvaṁ no yeṣu varuṇa kṣatram bṛhac ca bibhṛthaḥ |
5.064.06c uru ṇo vājasātaye kṛtaṁ rāye svastaye ||
5.064.07a ucchantyām me yajatā devakṣatre ruśadgavi |
5.064.07c sutaṁ somaṁ na hastibhir ā paḍbhir dhāvataṁ narā bibhratāv arcanānasam ||

5.065.01a yaś ciketa sa sukratur devatrā sa bravītu naḥ |
5.065.01c varuṇo yasya darśato mitro vā vanate giraḥ ||
5.065.02a tā hi śreṣṭhavarcasā rājānā dīrghaśruttamā |
5.065.02c tā satpatī ṛtāvṛdha ṛtāvānā jane-jane ||
5.065.03a tā vām iyāno 'vase pūrvā upa bruve sacā |
5.065.03c svaśvāsaḥ su cetunā vājām̐ abhi pra dāvane ||
5.065.04a mitro aṁhoś cid ād uru kṣayāya gātuṁ vanate |
5.065.04c mitrasya hi pratūrvataḥ sumatir asti vidhataḥ ||
5.065.05a vayam mitrasyāvasi syāma saprathastame |
5.065.05c anehasas tvotayaḥ satrā varuṇaśeṣasaḥ ||
5.065.06a yuvam mitremaṁ janaṁ yatathaḥ saṁ ca nayathaḥ |
5.065.06c mā maghonaḥ pari khyatam mo asmākam ṛṣīṇāṁ gopīthe na uruṣyatam ||

5.066.01a ā cikitāna sukratū devau marta riśādasā |
5.066.01c varuṇāya ṛtapeśase dadhīta prayase mahe ||
5.066.02a tā hi kṣatram avihrutaṁ samyag asuryam āśāte |
5.066.02c adha vrateva mānuṣaṁ svar ṇa dhāyi darśatam ||
5.066.03a tā vām eṣe rathānām urvīṁ gavyūtim eṣām |
5.066.03c rātahavyasya suṣṭutiṁ dadhṛk stomair manāmahe ||
5.066.04a adhā hi kāvyā yuvaṁ dakṣasya pūrbhir adbhutā |
5.066.04c ni ketunā janānāṁ cikethe pūtadakṣasā ||
5.066.05a tad ṛtam pṛthivi bṛhac chravaeṣa ṛṣīṇām |
5.066.05c jrayasānāv aram pṛthv ati kṣaranti yāmabhiḥ ||
5.066.06a ā yad vām īyacakṣasā mitra vayaṁ ca sūrayaḥ |
5.066.06c vyaciṣṭhe bahupāyye yatemahi svarājye ||

5.067.01a baḻ itthā deva niṣkṛtam ādityā yajatam bṛhat |
5.067.01c varuṇa mitrāryaman varṣiṣṭhaṁ kṣatram āśāthe ||
5.067.02a ā yad yoniṁ hiraṇyayaṁ varuṇa mitra sadathaḥ |
5.067.02c dhartārā carṣaṇīnāṁ yantaṁ sumnaṁ riśādasā ||
5.067.03a viśve hi viśvavedaso varuṇo mitro aryamā |
5.067.03c vratā padeva saścire pānti martyaṁ riṣaḥ ||
5.067.04a te hi satyā ṛtaspṛśa ṛtāvāno jane-jane |
5.067.04c sunīthāsaḥ sudānavo 'ṁhoś cid urucakrayaḥ ||
5.067.05a ko nu vām mitrāstuto varuṇo vā tanūnām |
5.067.05c tat su vām eṣate matir atribhya eṣate matiḥ ||

5.068.01a pra vo mitrāya gāyata varuṇāya vipā girā |
5.068.01c mahikṣatrāv ṛtam bṛhat ||
5.068.02a samrājā yā ghṛtayonī mitraś cobhā varuṇaś ca |
5.068.02c devā deveṣu praśastā ||
5.068.03a tā naḥ śaktam pārthivasya maho rāyo divyasya |
5.068.03c mahi vāṁ kṣatraṁ deveṣu ||
5.068.04a ṛtam ṛtena sapanteṣiraṁ dakṣam āśāte |
5.068.04c adruhā devau vardhete ||
5.068.05a vṛṣṭidyāvā rītyāpeṣas patī dānumatyāḥ |
5.068.05c bṛhantaṁ gartam āśāte ||

5.069.01a trī rocanā varuṇa trīm̐r uta dyūn trīṇi mitra dhārayatho rajāṁsi |
5.069.01c vāvṛdhānāv amatiṁ kṣatriyasyānu vrataṁ rakṣamāṇāv ajuryam ||
5.069.02a irāvatīr varuṇa dhenavo vām madhumad vāṁ sindhavo mitra duhre |
5.069.02c trayas tasthur vṛṣabhāsas tisṛṇāṁ dhiṣaṇānāṁ retodhā vi dyumantaḥ ||
5.069.03a prātar devīm aditiṁ johavīmi madhyaṁdina uditā sūryasya |
5.069.03c rāye mitrāvaruṇā sarvatāteḻe tokāya tanayāya śaṁ yoḥ ||
5.069.04a yā dhartārā rajaso rocanasyotādityā divyā pārthivasya |
5.069.04c na vāṁ devā amṛtā ā minanti vratāni mitrāvaruṇā dhruvāṇi ||

5.070.01a purūruṇā cid dhy asty avo nūnaṁ vāṁ varuṇa |
5.070.01c mitra vaṁsi vāṁ sumatim ||
5.070.02a tā vāṁ samyag adruhvāṇeṣam aśyāma dhāyase |
5.070.02c vayaṁ te rudrā syāma ||
5.070.03a pātaṁ no rudrā pāyubhir uta trāyethāṁ sutrātrā |
5.070.03c turyāma dasyūn tanūbhiḥ ||
5.070.04a mā kasyādbhutakratū yakṣam bhujemā tanūbhiḥ |
5.070.04c mā śeṣasā mā tanasā ||

5.071.01a ā no gantaṁ riśādasā varuṇa mitra barhaṇā |
5.071.01c upemaṁ cārum adhvaram ||
5.071.02a viśvasya hi pracetasā varuṇa mitra rājathaḥ |
5.071.02c īśānā pipyataṁ dhiyaḥ ||
5.071.03a upa naḥ sutam ā gataṁ varuṇa mitra dāśuṣaḥ |
5.071.03c asya somasya pītaye ||

5.072.01a ā mitre varuṇe vayaṁ gīrbhir juhumo atrivat |
5.072.01c ni barhiṣi sadataṁ somapītaye ||
5.072.02a vratena stho dhruvakṣemā dharmaṇā yātayajjanā |
5.072.02c ni barhiṣi sadataṁ somapītaye ||
5.072.03a mitraś ca no varuṇaś ca juṣetāṁ yajñam iṣṭaye |
5.072.03c ni barhiṣi sadatāṁ somapītaye ||

5.073.01a yad adya sthaḥ parāvati yad arvāvaty aśvinā |
5.073.01c yad vā purū purubhujā yad antarikṣa ā gatam ||
5.073.02a iha tyā purubhūtamā purū daṁsāṁsi bibhratā |
5.073.02c varasyā yāmy adhrigū huve tuviṣṭamā bhuje ||
5.073.03a īrmānyad vapuṣe vapuś cakraṁ rathasya yemathuḥ |
5.073.03c pary anyā nāhuṣā yugā mahnā rajāṁsi dīyathaḥ ||
5.073.04a tad ū ṣu vām enā kṛtaṁ viśvā yad vām anu ṣṭave |
5.073.04c nānā jātāv arepasā sam asme bandhum eyathuḥ ||
5.073.05a ā yad vāṁ sūryā rathaṁ tiṣṭhad raghuṣyadaṁ sadā |
5.073.05c pari vām aruṣā vayo ghṛṇā varanta ātapaḥ ||
5.073.06a yuvor atriś ciketati narā sumnena cetasā |
5.073.06c gharmaṁ yad vām arepasaṁ nāsatyāsnā bhuraṇyati ||
5.073.07a ugro vāṁ kakuho yayiḥ śṛṇve yāmeṣu saṁtaniḥ |
5.073.07c yad vāṁ daṁsobhir aśvinātrir narāvavartati ||
5.073.08a madhva ū ṣu madhūyuvā rudrā siṣakti pipyuṣī |
5.073.08c yat samudrāti parṣathaḥ pakvāḥ pṛkṣo bharanta vām ||
5.073.09a satyam id vā u aśvinā yuvām āhur mayobhuvā |
5.073.09c tā yāman yāmahūtamā yāmann ā mṛḻayattamā ||
5.073.10a imā brahmāṇi vardhanāśvibhyāṁ santu śaṁtamā |
5.073.10c yā takṣāma rathām̐ ivāvocāma bṛhan namaḥ ||

5.074.01a kūṣṭho devāv aśvinādyā divo manāvasū |
5.074.01c tac chravatho vṛṣaṇvasū atrir vām ā vivāsati ||
5.074.02a kuha tyā kuha nu śrutā divi devā nāsatyā |
5.074.02c kasminn ā yatatho jane ko vāṁ nadīnāṁ sacā ||
5.074.03a kaṁ yāthaḥ kaṁ ha gacchathaḥ kam acchā yuñjāthe ratham |
5.074.03c kasya brahmāṇi raṇyatho vayaṁ vām uśmasīṣṭaye ||
5.074.04a pauraṁ cid dhy udaprutam paura paurāya jinvathaḥ |
5.074.04c yad īṁ gṛbhītatātaye siṁham iva druhas pade ||
5.074.05a pra cyavānāj jujuruṣo vavrim atkaṁ na muñcathaḥ |
5.074.05c yuvā yadī kṛthaḥ punar ā kāmam ṛṇve vadhvaḥ ||
5.074.06a asti hi vām iha stotā smasi vāṁ saṁdṛśi śriye |
5.074.06c nū śrutam ma ā gatam avobhir vājinīvasū ||
5.074.07a ko vām adya purūṇām ā vavne martyānām |
5.074.07c ko vipro vipravāhasā ko yajñair vājinīvasū ||
5.074.08a ā vāṁ ratho rathānāṁ yeṣṭho yātv aśvinā |
5.074.08c purū cid asmayus tira āṅgūṣo martyeṣv ā ||
5.074.09a śam ū ṣu vām madhūyuvāsmākam astu carkṛtiḥ |
5.074.09c arvācīnā vicetasā vibhiḥ śyeneva dīyatam ||
5.074.10a aśvinā yad dha karhi cic chuśrūyātam imaṁ havam |
5.074.10c vasvīr ū ṣu vām bhujaḥ pṛñcanti su vām pṛcaḥ ||

5.075.01a prati priyatamaṁ rathaṁ vṛṣaṇaṁ vasuvāhanam |
5.075.01c stotā vām aśvināv ṛṣiḥ stomena prati bhūṣati mādhvī mama śrutaṁ havam ||
5.075.02a atyāyātam aśvinā tiro viśvā ahaṁ sanā |
5.075.02c dasrā hiraṇyavartanī suṣumnā sindhuvāhasā mādhvī mama śrutaṁ havam ||
5.075.03a ā no ratnāni bibhratāv aśvinā gacchataṁ yuvam |
5.075.03c rudrā hiraṇyavartanī juṣāṇā vājinīvasū mādhvī mama śrutaṁ havam ||
5.075.04a suṣṭubho vāṁ vṛṣaṇvasū rathe vāṇīcy āhitā |
5.075.04c uta vāṁ kakuho mṛgaḥ pṛkṣaḥ kṛṇoti vāpuṣo mādhvī mama śrutaṁ havam ||
5.075.05a bodhinmanasā rathyeṣirā havanaśrutā |
5.075.05c vibhiś cyavānam aśvinā ni yātho advayāvinam mādhvī mama śrutaṁ havam ||
5.075.06a ā vāṁ narā manoyujo 'śvāsaḥ pruṣitapsavaḥ |
5.075.06c vayo vahantu pītaye saha sumnebhir aśvinā mādhvī mama śrutaṁ havam ||
5.075.07a aśvināv eha gacchataṁ nāsatyā mā vi venatam |
5.075.07c tiraś cid aryayā pari vartir yātam adābhyā mādhvī mama śrutaṁ havam ||
5.075.08a asmin yajñe adābhyā jaritāraṁ śubhas patī |
5.075.08c avasyum aśvinā yuvaṁ gṛṇantam upa bhūṣatho mādhvī mama śrutaṁ havam ||
5.075.09a abhūd uṣā ruśatpaśur āgnir adhāyy ṛtviyaḥ |
5.075.09c ayoji vāṁ vṛṣaṇvasū ratho dasrāv amartyo mādhvī mama śrutaṁ havam ||

5.076.01a ā bhāty agnir uṣasām anīkam ud viprāṇāṁ devayā vāco asthuḥ |
5.076.01c arvāñcā nūnaṁ rathyeha yātam pīpivāṁsam aśvinā gharmam accha ||
5.076.02a na saṁskṛtam pra mimīto gamiṣṭhānti nūnam aśvinopastuteha |
5.076.02c divābhipitve 'vasāgamiṣṭhā praty avartiṁ dāśuṣe śambhaviṣṭhā ||
5.076.03a utā yātaṁ saṁgave prātar ahno madhyaṁdina uditā sūryasya |
5.076.03c divā naktam avasā śaṁtamena nedānīm pītir aśvinā tatāna ||
5.076.04a idaṁ hi vām pradivi sthānam oka ime gṛhā aśvinedaṁ duroṇam |
5.076.04c ā no divo bṛhataḥ parvatād ādbhyo yātam iṣam ūrjaṁ vahantā ||
5.076.05a sam aśvinor avasā nūtanena mayobhuvā supraṇītī gamema |
5.076.05c ā no rayiṁ vahatam ota vīrān ā viśvāny amṛtā saubhagāni ||

5.077.01a prātaryāvāṇā prathamā yajadhvam purā gṛdhrād araruṣaḥ pibātaḥ |
5.077.01c prātar hi yajñam aśvinā dadhāte pra śaṁsanti kavayaḥ pūrvabhājaḥ ||
5.077.02a prātar yajadhvam aśvinā hinota na sāyam asti devayā ajuṣṭam |
5.077.02c utānyo asmad yajate vi cāvaḥ pūrvaḥ-pūrvo yajamāno vanīyān ||
5.077.03a hiraṇyatvaṅ madhuvarṇo ghṛtasnuḥ pṛkṣo vahann ā ratho vartate vām |
5.077.03c manojavā aśvinā vātaraṁhā yenātiyātho duritāni viśvā ||
5.077.04a yo bhūyiṣṭhaṁ nāsatyābhyāṁ viveṣa caniṣṭham pitvo rarate vibhāge |
5.077.04c sa tokam asya pīparac chamībhir anūrdhvabhāsaḥ sadam it tuturyāt ||
5.077.05a sam aśvinor avasā nūtanena mayobhuvā supraṇītī gamema |
5.077.05c ā no rayiṁ vahatam ota vīrān ā viśvāny amṛtā saubhagāni ||

5.078.01a aśvināv eha gacchataṁ nāsatyā mā vi venatam |
5.078.01c haṁsāv iva patatam ā sutām̐ upa ||
5.078.02a aśvinā hariṇāv iva gaurāv ivānu yavasam |
5.078.02c haṁsāv iva patatam ā sutām̐ upa ||
5.078.03a aśvinā vājinīvasū juṣethāṁ yajñam iṣṭaye |
5.078.03c haṁsāv iva patatam ā sutām̐ upa ||
5.078.04a atrir yad vām avarohann ṛbīsam ajohavīn nādhamāneva yoṣā |
5.078.04c śyenasya cij javasā nūtanenāgacchatam aśvinā śaṁtamena ||
5.078.05a vi jihīṣva vanaspate yoniḥ sūṣyantyā iva |
5.078.05c śrutam me aśvinā havaṁ saptavadhriṁ ca muñcatam ||
5.078.06a bhītāya nādhamānāya ṛṣaye saptavadhraye |
5.078.06c māyābhir aśvinā yuvaṁ vṛkṣaṁ saṁ ca vi cācathaḥ ||
5.078.07a yathā vātaḥ puṣkariṇīṁ samiṅgayati sarvataḥ |
5.078.07c evā te garbha ejatu niraitu daśamāsyaḥ ||
5.078.08a yathā vāto yathā vanaṁ yathā samudra ejati |
5.078.08c evā tvaṁ daśamāsya sahāvehi jarāyuṇā ||
5.078.09a daśa māsāñ chaśayānaḥ kumāro adhi mātari |
5.078.09c niraitu jīvo akṣato jīvo jīvantyā adhi ||

5.079.01a mahe no adya bodhayoṣo rāye divitmatī |
5.079.01c yathā cin no abodhayaḥ satyaśravasi vāyye sujāte aśvasūnṛte ||
5.079.02a yā sunīthe śaucadrathe vy auccho duhitar divaḥ |
5.079.02c sā vy uccha sahīyasi satyaśravasi vāyye sujāte aśvasūnṛte ||
5.079.03a sā no adyābharadvasur vy ucchā duhitar divaḥ |
5.079.03c yo vy aucchaḥ sahīyasi satyaśravasi vāyye sujāte aśvasūnṛte ||
5.079.04a abhi ye tvā vibhāvari stomair gṛṇanti vahnayaḥ |
5.079.04c maghair maghoni suśriyo dāmanvantaḥ surātayaḥ sujāte aśvasūnṛte ||
5.079.05a yac cid dhi te gaṇā ime chadayanti maghattaye |
5.079.05c pari cid vaṣṭayo dadhur dadato rādho ahrayaṁ sujāte aśvasūnṛte ||
5.079.06a aiṣu dhā vīravad yaśa uṣo maghoni sūriṣu |
5.079.06c ye no rādhāṁsy ahrayā maghavāno arāsata sujāte aśvasūnṛte ||
5.079.07a tebhyo dyumnam bṛhad yaśa uṣo maghony ā vaha |
5.079.07c ye no rādhāṁsy aśvyā gavyā bhajanta sūrayaḥ sujāte aśvasūnṛte ||
5.079.08a uta no gomatīr iṣa ā vahā duhitar divaḥ |
5.079.08c sākaṁ sūryasya raśmibhiḥ śukraiḥ śocadbhir arcibhiḥ sujāte aśvasūnṛte ||
5.079.09a vy ucchā duhitar divo mā ciraṁ tanuthā apaḥ |
5.079.09c net tvā stenaṁ yathā ripuṁ tapāti sūro arciṣā sujāte aśvasūnṛte ||
5.079.10a etāvad ved uṣas tvam bhūyo vā dātum arhasi |
5.079.10c yā stotṛbhyo vibhāvary ucchantī na pramīyase sujāte aśvasūnṛte ||

5.080.01a dyutadyāmānam bṛhatīm ṛtena ṛtāvarīm aruṇapsuṁ vibhātīm |
5.080.01c devīm uṣasaṁ svar āvahantīm prati viprāso matibhir jarante ||
5.080.02a eṣā janaṁ darśatā bodhayantī sugān pathaḥ kṛṇvatī yāty agre |
5.080.02c bṛhadrathā bṛhatī viśvaminvoṣā jyotir yacchaty agre ahnām ||
5.080.03a eṣā gobhir aruṇebhir yujānāsredhantī rayim aprāyu cakre |
5.080.03c patho radantī suvitāya devī puruṣṭutā viśvavārā vi bhāti ||
5.080.04a eṣā vyenī bhavati dvibarhā āviṣkṛṇvānā tanvam purastāt |
5.080.04c ṛtasya panthām anv eti sādhu prajānatīva na diśo mināti ||
5.080.05a eṣā śubhrā na tanvo vidānordhveva snātī dṛśaye no asthāt |
5.080.05c apa dveṣo bādhamānā tamāṁsy uṣā divo duhitā jyotiṣāgāt ||
5.080.06a eṣā pratīcī duhitā divo nṝn yoṣeva bhadrā ni riṇīte apsaḥ |
5.080.06c vyūrṇvatī dāśuṣe vāryāṇi punar jyotir yuvatiḥ pūrvathākaḥ ||

5.081.01a yuñjate mana uta yuñjate dhiyo viprā viprasya bṛhato vipaścitaḥ |
5.081.01c vi hotrā dadhe vayunāvid eka in mahī devasya savituḥ pariṣṭutiḥ ||
5.081.02a viśvā rūpāṇi prati muñcate kaviḥ prāsāvīd bhadraṁ dvipade catuṣpade |
5.081.02c vi nākam akhyat savitā vareṇyo 'nu prayāṇam uṣaso vi rājati ||
5.081.03a yasya prayāṇam anv anya id yayur devā devasya mahimānam ojasā |
5.081.03c yaḥ pārthivāni vimame sa etaśo rajāṁsi devaḥ savitā mahitvanā ||
5.081.04a uta yāsi savitas trīṇi rocanota sūryasya raśmibhiḥ sam ucyasi |
5.081.04c uta rātrīm ubhayataḥ parīyasa uta mitro bhavasi deva dharmabhiḥ ||
5.081.05a uteśiṣe prasavasya tvam eka id uta pūṣā bhavasi deva yāmabhiḥ |
5.081.05c utedaṁ viśvam bhuvanaṁ vi rājasi śyāvāśvas te savitaḥ stomam ānaśe ||

5.082.01a tat savitur vṛṇīmahe vayaṁ devasya bhojanam |
5.082.01c śreṣṭhaṁ sarvadhātamaṁ turam bhagasya dhīmahi ||
5.082.02a asya hi svayaśastaraṁ savituḥ kac cana priyam |
5.082.02c na minanti svarājyam ||
5.082.03a sa hi ratnāni dāśuṣe suvāti savitā bhagaḥ |
5.082.03c tam bhāgaṁ citram īmahe ||
5.082.04a adyā no deva savitaḥ prajāvat sāvīḥ saubhagam |
5.082.04c parā duṣṣvapnyaṁ suva ||
5.082.05a viśvāni deva savitar duritāni parā suva |
5.082.05c yad bhadraṁ tan na ā suva ||
5.082.06a anāgaso aditaye devasya savituḥ save |
5.082.06c viśvā vāmāni dhīmahi ||
5.082.07a ā viśvadevaṁ satpatiṁ sūktair adyā vṛṇīmahe |
5.082.07c satyasavaṁ savitāram ||
5.082.08a ya ime ubhe ahanī pura ety aprayucchan |
5.082.08c svādhīr devaḥ savitā ||
5.082.09a ya imā viśvā jātāny āśrāvayati ślokena |
5.082.09c pra ca suvāti savitā ||

5.083.01a acchā vada tavasaṁ gīrbhir ābhiḥ stuhi parjanyaṁ namasā vivāsa |
5.083.01c kanikradad vṛṣabho jīradānū reto dadhāty oṣadhīṣu garbham ||
5.083.02a vi vṛkṣān hanty uta hanti rakṣaso viśvam bibhāya bhuvanam mahāvadhāt |
5.083.02c utānāgā īṣate vṛṣṇyāvato yat parjanyaḥ stanayan hanti duṣkṛtaḥ ||
5.083.03a rathīva kaśayāśvām̐ abhikṣipann āvir dūtān kṛṇute varṣyām̐ aha |
5.083.03c dūrāt siṁhasya stanathā ud īrate yat parjanyaḥ kṛṇute varṣyaṁ nabhaḥ ||
5.083.04a pra vātā vānti patayanti vidyuta ud oṣadhīr jihate pinvate svaḥ |
5.083.04c irā viśvasmai bhuvanāya jāyate yat parjanyaḥ pṛthivīṁ retasāvati ||
5.083.05a yasya vrate pṛthivī nannamīti yasya vrate śaphavaj jarbhurīti |
5.083.05c yasya vrata oṣadhīr viśvarūpāḥ sa naḥ parjanya mahi śarma yaccha ||
5.083.06a divo no vṛṣṭim maruto rarīdhvam pra pinvata vṛṣṇo aśvasya dhārāḥ |
5.083.06c arvāṅ etena stanayitnunehy apo niṣiñcann asuraḥ pitā naḥ ||
5.083.07a abhi kranda stanaya garbham ā dhā udanvatā pari dīyā rathena |
5.083.07c dṛtiṁ su karṣa viṣitaṁ nyañcaṁ samā bhavantūdvato nipādāḥ ||
5.083.08a mahāntaṁ kośam ud acā ni ṣiñca syandantāṁ kulyā viṣitāḥ purastāt |
5.083.08c ghṛtena dyāvāpṛthivī vy undhi suprapāṇam bhavatv aghnyābhyaḥ ||
5.083.09a yat parjanya kanikradat stanayan haṁsi duṣkṛtaḥ |
5.083.09c pratīdaṁ viśvam modate yat kiṁ ca pṛthivyām adhi ||
5.083.10a avarṣīr varṣam ud u ṣū gṛbhāyākar dhanvāny atyetavā u |
5.083.10c ajījana oṣadhīr bhojanāya kam uta prajābhyo 'vido manīṣām ||

5.084.01a baḻ itthā parvatānāṁ khidram bibharṣi pṛthivi |
5.084.01c pra yā bhūmim pravatvati mahnā jinoṣi mahini ||
5.084.02a stomāsas tvā vicāriṇi prati ṣṭobhanty aktubhiḥ |
5.084.02c pra yā vājaṁ na heṣantam perum asyasy arjuni ||
5.084.03a dṛḻhā cid yā vanaspatīn kṣmayā dardharṣy ojasā |
5.084.03c yat te abhrasya vidyuto divo varṣanti vṛṣṭayaḥ ||

5.085.01a pra samrāje bṛhad arcā gabhīram brahma priyaṁ varuṇāya śrutāya |
5.085.01c vi yo jaghāna śamiteva carmopastire pṛthivīṁ sūryāya ||
5.085.02a vaneṣu vy antarikṣaṁ tatāna vājam arvatsu paya usriyāsu |
5.085.02c hṛtsu kratuṁ varuṇo apsv agniṁ divi sūryam adadhāt somam adrau ||
5.085.03a nīcīnabāraṁ varuṇaḥ kavandham pra sasarja rodasī antarikṣam |
5.085.03c tena viśvasya bhuvanasya rājā yavaṁ na vṛṣṭir vy unatti bhūma ||
5.085.04a unatti bhūmim pṛthivīm uta dyāṁ yadā dugdhaṁ varuṇo vaṣṭy ād it |
5.085.04c sam abhreṇa vasata parvatāsas taviṣīyantaḥ śrathayanta vīrāḥ ||
5.085.05a imām ū ṣv āsurasya śrutasya mahīm māyāṁ varuṇasya pra vocam |
5.085.05c māneneva tasthivām̐ antarikṣe vi yo mame pṛthivīṁ sūryeṇa ||
5.085.06a imām ū nu kavitamasya māyām mahīṁ devasya nakir ā dadharṣa |
5.085.06c ekaṁ yad udnā na pṛṇanty enīr āsiñcantīr avanayaḥ samudram ||
5.085.07a aryamyaṁ varuṇa mitryaṁ vā sakhāyaṁ vā sadam id bhrātaraṁ vā |
5.085.07c veśaṁ vā nityaṁ varuṇāraṇaṁ vā yat sīm āgaś cakṛmā śiśrathas tat ||
5.085.08a kitavāso yad riripur na dīvi yad vā ghā satyam uta yan na vidma |
5.085.08c sarvā tā vi ṣya śithireva devādhā te syāma varuṇa priyāsaḥ ||

5.086.01a indrāgnī yam avatha ubhā vājeṣu martyam |
5.086.01c dṛḻhā cit sa pra bhedati dyumnā vāṇīr iva tritaḥ ||
5.086.02a yā pṛtanāsu duṣṭarā yā vājeṣu śravāyyā |
5.086.02c yā pañca carṣaṇīr abhīndrāgnī tā havāmahe ||
5.086.03a tayor id amavac chavas tigmā didyun maghonoḥ |
5.086.03c prati druṇā gabhastyor gavāṁ vṛtraghna eṣate ||
5.086.04a tā vām eṣe rathānām indrāgnī havāmahe |
5.086.04c patī turasya rādhaso vidvāṁsā girvaṇastamā ||
5.086.05a tā vṛdhantāv anu dyūn martāya devāv adabhā |
5.086.05c arhantā cit puro dadhe 'ṁśeva devāv arvate ||
5.086.06a evendrāgnibhyām ahāvi havyaṁ śūṣyaṁ ghṛtaṁ na pūtam adribhiḥ |
5.086.06c tā sūriṣu śravo bṛhad rayiṁ gṛṇatsu didhṛtam iṣaṁ gṛṇatsu didhṛtam ||

5.087.01a pra vo mahe matayo yantu viṣṇave marutvate girijā evayāmarut |
5.087.01c pra śardhāya prayajyave sukhādaye tavase bhandadiṣṭaye dhunivratāya śavase ||
5.087.02a pra ye jātā mahinā ye ca nu svayam pra vidmanā bruvata evayāmarut |
5.087.02c kratvā tad vo maruto nādhṛṣe śavo dānā mahnā tad eṣām adhṛṣṭāso nādrayaḥ ||
5.087.03a pra ye divo bṛhataḥ śṛṇvire girā suśukvānaḥ subhva evayāmarut |
5.087.03c na yeṣām irī sadhastha īṣṭa ām̐ agnayo na svavidyutaḥ pra syandrāso dhunīnām ||
5.087.04a sa cakrame mahato nir urukramaḥ samānasmāt sadasa evayāmarut |
5.087.04c yadāyukta tmanā svād adhi ṣṇubhir viṣpardhaso vimahaso jigāti śevṛdho nṛbhiḥ ||
5.087.05a svano na vo 'mavān rejayad vṛṣā tveṣo yayis taviṣa evayāmarut |
5.087.05c yenā sahanta ṛñjata svarociṣaḥ sthāraśmāno hiraṇyayāḥ svāyudhāsa iṣmiṇaḥ ||
5.087.06a apāro vo mahimā vṛddhaśavasas tveṣaṁ śavo 'vatv evayāmarut |
5.087.06c sthātāro hi prasitau saṁdṛśi sthana te na uruṣyatā nidaḥ śuśukvāṁso nāgnayaḥ ||
5.087.07a te rudrāsaḥ sumakhā agnayo yathā tuvidyumnā avantv evayāmarut |
5.087.07c dīrgham pṛthu paprathe sadma pārthivaṁ yeṣām ajmeṣv ā mahaḥ śardhāṁsy adbhutainasām ||
5.087.08a adveṣo no maruto gātum etana śrotā havaṁ jaritur evayāmarut |
5.087.08c viṣṇor mahaḥ samanyavo yuyotana smad rathyo na daṁsanāpa dveṣāṁsi sanutaḥ ||
5.087.09a gantā no yajñaṁ yajñiyāḥ suśami śrotā havam arakṣa evayāmarut |
5.087.09c jyeṣṭhāso na parvatāso vyomani yūyaṁ tasya pracetasaḥ syāta durdhartavo nidaḥ ||


6.001.01a tvaṁ hy agne prathamo manotāsyā dhiyo abhavo dasma hotā |
6.001.01c tvaṁ sīṁ vṛṣann akṛṇor duṣṭarītu saho viśvasmai sahase sahadhyai ||
6.001.02a adhā hotā ny asīdo yajīyān iḻas pada iṣayann īḍyaḥ san |
6.001.02c taṁ tvā naraḥ prathamaṁ devayanto maho rāye citayanto anu gman ||
6.001.03a vṛteva yantam bahubhir vasavyais tve rayiṁ jāgṛvāṁso anu gman |
6.001.03c ruśantam agniṁ darśatam bṛhantaṁ vapāvantaṁ viśvahā dīdivāṁsam ||
6.001.04a padaṁ devasya namasā vyantaḥ śravasyavaḥ śrava āpann amṛktam |
6.001.04c nāmāni cid dadhire yajñiyāni bhadrāyāṁ te raṇayanta saṁdṛṣṭau ||
6.001.05a tvāṁ vardhanti kṣitayaḥ pṛthivyāṁ tvāṁ rāya ubhayāso janānām |
6.001.05c tvaṁ trātā taraṇe cetyo bhūḥ pitā mātā sadam in mānuṣāṇām ||
6.001.06a saparyeṇyaḥ sa priyo vikṣv agnir hotā mandro ni ṣasādā yajīyān |
6.001.06c taṁ tvā vayaṁ dama ā dīdivāṁsam upa jñubādho namasā sadema ||
6.001.07a taṁ tvā vayaṁ sudhyo navyam agne sumnāyava īmahe devayantaḥ |
6.001.07c tvaṁ viśo anayo dīdyāno divo agne bṛhatā rocanena ||
6.001.08a viśāṁ kaviṁ viśpatiṁ śaśvatīnāṁ nitośanaṁ vṛṣabhaṁ carṣaṇīnām |
6.001.08c pretīṣaṇim iṣayantam pāvakaṁ rājantam agniṁ yajataṁ rayīṇām ||
6.001.09a so agna īje śaśame ca marto yas ta ānaṭ samidhā havyadātim |
6.001.09c ya āhutim pari vedā namobhir viśvet sa vāmā dadhate tvotaḥ ||
6.001.10a asmā u te mahi mahe vidhema namobhir agne samidhota havyaiḥ |
6.001.10c vedī sūno sahaso gīrbhir ukthair ā te bhadrāyāṁ sumatau yatema ||
6.001.11a ā yas tatantha rodasī vi bhāsā śravobhiś ca śravasyas tarutraḥ |
6.001.11c bṛhadbhir vājaiḥ sthavirebhir asme revadbhir agne vitaraṁ vi bhāhi ||
6.001.12a nṛvad vaso sadam id dhehy asme bhūri tokāya tanayāya paśvaḥ |
6.001.12c pūrvīr iṣo bṛhatīr āre-aghā asme bhadrā sauśravasāni santu ||
6.001.13a purūṇy agne purudhā tvāyā vasūni rājan vasutā te aśyām |
6.001.13c purūṇi hi tve puruvāra santy agne vasu vidhate rājani tve ||

6.002.01a tvaṁ hi kṣaitavad yaśo 'gne mitro na patyase |
6.002.01c tvaṁ vicarṣaṇe śravo vaso puṣṭiṁ na puṣyasi ||
6.002.02a tvāṁ hi ṣmā carṣaṇayo yajñebhir gīrbhir īḻate |
6.002.02c tvāṁ vājī yāty avṛko rajastūr viśvacarṣaṇiḥ ||
6.002.03a sajoṣas tvā divo naro yajñasya ketum indhate |
6.002.03c yad dha sya mānuṣo janaḥ sumnāyur juhve adhvare ||
6.002.04a ṛdhad yas te sudānave dhiyā martaḥ śaśamate |
6.002.04c ūtī ṣa bṛhato divo dviṣo aṁho na tarati ||
6.002.05a samidhā yas ta āhutiṁ niśitim martyo naśat |
6.002.05c vayāvantaṁ sa puṣyati kṣayam agne śatāyuṣam ||
6.002.06a tveṣas te dhūma ṛṇvati divi ṣañ chukra ātataḥ |
6.002.06c sūro na hi dyutā tvaṁ kṛpā pāvaka rocase ||
6.002.07a adhā hi vikṣv īḍyo 'si priyo no atithiḥ |
6.002.07c raṇvaḥ purīva jūryaḥ sūnur na trayayāyyaḥ ||
6.002.08a kratvā hi droṇe ajyase 'gne vājī na kṛtvyaḥ |
6.002.08c parijmeva svadhā gayo 'tyo na hvāryaḥ śiśuḥ ||
6.002.09a tvaṁ tyā cid acyutāgne paśur na yavase |
6.002.09c dhāmā ha yat te ajara vanā vṛścanti śikvasaḥ ||
6.002.10a veṣi hy adhvarīyatām agne hotā dame viśām |
6.002.10c samṛdho viśpate kṛṇu juṣasva havyam aṅgiraḥ ||
6.002.11a acchā no mitramaho deva devān agne vocaḥ sumatiṁ rodasyoḥ |
6.002.11c vīhi svastiṁ sukṣitiṁ divo nṝn dviṣo aṁhāṁsi duritā tarema tā tarema tavāvasā tarema ||

6.003.01a agne sa kṣeṣad ṛtapā ṛtejā uru jyotir naśate devayuṣ ṭe |
6.003.01c yaṁ tvam mitreṇa varuṇaḥ sajoṣā deva pāsi tyajasā martam aṁhaḥ ||
6.003.02a īje yajñebhiḥ śaśame śamībhir ṛdhadvārāyāgnaye dadāśa |
6.003.02c evā cana taṁ yaśasām ajuṣṭir nāṁho martaṁ naśate na pradṛptiḥ ||
6.003.03a sūro na yasya dṛśatir arepā bhīmā yad eti śucatas ta ā dhīḥ |
6.003.03c heṣasvataḥ śurudho nāyam aktoḥ kutrā cid raṇvo vasatir vanejāḥ ||
6.003.04a tigmaṁ cid ema mahi varpo asya bhasad aśvo na yamasāna āsā |
6.003.04c vijehamānaḥ paraśur na jihvāṁ dravir na drāvayati dāru dhakṣat ||
6.003.05a sa id asteva prati dhād asiṣyañ chiśīta tejo 'yaso na dhārām |
6.003.05c citradhrajatir aratir yo aktor ver na druṣadvā raghupatmajaṁhāḥ ||
6.003.06a sa īṁ rebho na prati vasta usrāḥ śociṣā rārapīti mitramahāḥ |
6.003.06c naktaṁ ya īm aruṣo yo divā nṝn amartyo aruṣo yo divā nṝn ||
6.003.07a divo na yasya vidhato navīnod vṛṣā rukṣa oṣadhīṣu nūnot |
6.003.07c ghṛṇā na yo dhrajasā patmanā yann ā rodasī vasunā daṁ supatnī ||
6.003.08a dhāyobhir vā yo yujyebhir arkair vidyun na davidyot svebhiḥ śuṣmaiḥ |
6.003.08c śardho vā yo marutāṁ tatakṣa ṛbhur na tveṣo rabhasāno adyaut ||

6.004.01a yathā hotar manuṣo devatātā yajñebhiḥ sūno sahaso yajāsi |
6.004.01c evā no adya samanā samānān uśann agna uśato yakṣi devān ||
6.004.02a sa no vibhāvā cakṣaṇir na vastor agnir vandāru vedyaś cano dhāt |
6.004.02c viśvāyur yo amṛto martyeṣūṣarbhud bhūd atithir jātavedāḥ ||
6.004.03a dyāvo na yasya panayanty abhvam bhāsāṁsi vaste sūryo na śukraḥ |
6.004.03c vi ya inoty ajaraḥ pāvako 'śnasya cic chiśnathat pūrvyāṇi ||
6.004.04a vadmā hi sūno asy admasadvā cakre agnir januṣājmānnam |
6.004.04c sa tvaṁ na ūrjasana ūrjaṁ dhā rājeva jer avṛke kṣeṣy antaḥ ||
6.004.05a nitikti yo vāraṇam annam atti vāyur na rāṣṭry aty ety aktūn |
6.004.05c turyāma yas ta ādiśām arātīr atyo na hrutaḥ patataḥ parihrut ||
6.004.06a ā sūryo na bhānumadbhir arkair agne tatantha rodasī vi bhāsā |
6.004.06c citro nayat pari tamāṁsy aktaḥ śociṣā patmann auśijo na dīyan ||
6.004.07a tvāṁ hi mandratamam arkaśokair vavṛmahe mahi naḥ śroṣy agne |
6.004.07c indraṁ na tvā śavasā devatā vāyum pṛṇanti rādhasā nṛtamāḥ ||
6.004.08a nū no agne 'vṛkebhiḥ svasti veṣi rāyaḥ pathibhiḥ parṣy aṁhaḥ |
6.004.08c tā sūribhyo gṛṇate rāsi sumnam madema śatahimāḥ suvīrāḥ ||

6.005.01a huve vaḥ sūnuṁ sahaso yuvānam adroghavācam matibhir yaviṣṭham |
6.005.01c ya invati draviṇāni pracetā viśvavārāṇi puruvāro adhruk ||
6.005.02a tve vasūni purvaṇīka hotar doṣā vastor erire yajñiyāsaḥ |
6.005.02c kṣāmeva viśvā bhuvanāni yasmin saṁ saubhagāni dadhire pāvake ||
6.005.03a tvaṁ vikṣu pradivaḥ sīda āsu kratvā rathīr abhavo vāryāṇām |
6.005.03c ata inoṣi vidhate cikitvo vy ānuṣag jātavedo vasūni ||
6.005.04a yo naḥ sanutyo abhidāsad agne yo antaro mitramaho vanuṣyāt |
6.005.04c tam ajarebhir vṛṣabhis tava svais tapā tapiṣṭha tapasā tapasvān ||
6.005.05a yas te yajñena samidhā ya ukthair arkebhiḥ sūno sahaso dadāśat |
6.005.05c sa martyeṣv amṛta pracetā rāyā dyumnena śravasā vi bhāti ||
6.005.06a sa tat kṛdhīṣitas tūyam agne spṛdho bādhasva sahasā sahasvān |
6.005.06c yac chasyase dyubhir akto vacobhis taj juṣasva jaritur ghoṣi manma ||
6.005.07a aśyāma taṁ kāmam agne tavotī aśyāma rayiṁ rayivaḥ suvīram |
6.005.07c aśyāma vājam abhi vājayanto 'śyāma dyumnam ajarājaraṁ te ||

6.006.01a pra navyasā sahasaḥ sūnum acchā yajñena gātum ava icchamānaḥ |
6.006.01c vṛścadvanaṁ kṛṣṇayāmaṁ ruśantaṁ vītī hotāraṁ divyaṁ jigāti ||
6.006.02a sa śvitānas tanyatū rocanasthā ajarebhir nānadadbhir yaviṣṭhaḥ |
6.006.02c yaḥ pāvakaḥ purutamaḥ purūṇi pṛthūny agnir anuyāti bharvan ||
6.006.03a vi te viṣvag vātajūtāso agne bhāmāsaḥ śuce śucayaś caranti |
6.006.03c tuvimrakṣāso divyā navagvā vanā vananti dhṛṣatā rujantaḥ ||
6.006.04a ye te śukrāsaḥ śucayaḥ śuciṣmaḥ kṣāṁ vapanti viṣitāso aśvāḥ |
6.006.04c adha bhramas ta urviyā vi bhāti yātayamāno adhi sānu pṛśneḥ ||
6.006.05a adha jihvā pāpatīti pra vṛṣṇo goṣuyudho nāśaniḥ sṛjānā |
6.006.05c śūrasyeva prasitiḥ kṣātir agner durvartur bhīmo dayate vanāni ||
6.006.06a ā bhānunā pārthivāni jrayāṁsi mahas todasya dhṛṣatā tatantha |
6.006.06c sa bādhasvāpa bhayā sahobhiḥ spṛdho vanuṣyan vanuṣo ni jūrva ||
6.006.07a sa citra citraṁ citayantam asme citrakṣatra citratamaṁ vayodhām |
6.006.07c candraṁ rayim puruvīram bṛhantaṁ candra candrābhir gṛṇate yuvasva ||

6.007.01a mūrdhānaṁ divo aratim pṛthivyā vaiśvānaram ṛta ā jātam agnim |
6.007.01c kaviṁ samrājam atithiṁ janānām āsann ā pātraṁ janayanta devāḥ ||
6.007.02a nābhiṁ yajñānāṁ sadanaṁ rayīṇām mahām āhāvam abhi saṁ navanta |
6.007.02c vaiśvānaraṁ rathyam adhvarāṇāṁ yajñasya ketuṁ janayanta devāḥ ||
6.007.03a tvad vipro jāyate vājy agne tvad vīrāso abhimātiṣāhaḥ |
6.007.03c vaiśvānara tvam asmāsu dhehi vasūni rājan spṛhayāyyāṇi ||
6.007.04a tvāṁ viśve amṛta jāyamānaṁ śiśuṁ na devā abhi saṁ navante |
6.007.04c tava kratubhir amṛtatvam āyan vaiśvānara yat pitror adīdeḥ ||
6.007.05a vaiśvānara tava tāni vratāni mahāny agne nakir ā dadharṣa |
6.007.05c yaj jāyamānaḥ pitror upasthe 'vindaḥ ketuṁ vayuneṣv ahnām ||
6.007.06a vaiśvānarasya vimitāni cakṣasā sānūni divo amṛtasya ketunā |
6.007.06c tasyed u viśvā bhuvanādhi mūrdhani vayā iva ruruhuḥ sapta visruhaḥ ||
6.007.07a vi yo rajāṁsy amimīta sukratur vaiśvānaro vi divo rocanā kaviḥ |
6.007.07c pari yo viśvā bhuvanāni paprathe 'dabdho gopā amṛtasya rakṣitā ||

6.008.01a pṛkṣasya vṛṣṇo aruṣasya nū sahaḥ pra nu vocaṁ vidathā jātavedasaḥ |
6.008.01c vaiśvānarāya matir navyasī śuciḥ soma iva pavate cārur agnaye ||
6.008.02a sa jāyamānaḥ parame vyomani vratāny agnir vratapā arakṣata |
6.008.02c vy antarikṣam amimīta sukratur vaiśvānaro mahinā nākam aspṛśat ||
6.008.03a vy astabhnād rodasī mitro adbhuto 'ntarvāvad akṛṇoj jyotiṣā tamaḥ |
6.008.03c vi carmaṇīva dhiṣaṇe avartayad vaiśvānaro viśvam adhatta vṛṣṇyam ||
6.008.04a apām upasthe mahiṣā agṛbhṇata viśo rājānam upa tasthur ṛgmiyam |
6.008.04c ā dūto agnim abharad vivasvato vaiśvānaram mātariśvā parāvataḥ ||
6.008.05a yuge-yuge vidathyaṁ gṛṇadbhyo 'gne rayiṁ yaśasaṁ dhehi navyasīm |
6.008.05c pavyeva rājann aghaśaṁsam ajara nīcā ni vṛśca vaninaṁ na tejasā ||
6.008.06a asmākam agne maghavatsu dhārayānāmi kṣatram ajaraṁ suvīryam |
6.008.06c vayaṁ jayema śatinaṁ sahasriṇaṁ vaiśvānara vājam agne tavotibhiḥ ||
6.008.07a adabdhebhis tava gopābhir iṣṭe 'smākam pāhi triṣadhastha sūrīn |
6.008.07c rakṣā ca no daduṣāṁ śardho agne vaiśvānara pra ca tārīḥ stavānaḥ ||

6.009.01a ahaś ca kṛṣṇam ahar arjunaṁ ca vi vartete rajasī vedyābhiḥ |
6.009.01c vaiśvānaro jāyamāno na rājāvātiraj jyotiṣāgnis tamāṁsi ||
6.009.02a nāhaṁ tantuṁ na vi jānāmy otuṁ na yaṁ vayanti samare 'tamānāḥ |
6.009.02c kasya svit putra iha vaktvāni paro vadāty avareṇa pitrā ||
6.009.03a sa it tantuṁ sa vi jānāty otuṁ sa vaktvāny ṛtuthā vadāti |
6.009.03c ya īṁ ciketad amṛtasya gopā avaś caran paro anyena paśyan ||
6.009.04a ayaṁ hotā prathamaḥ paśyatemam idaṁ jyotir amṛtam martyeṣu |
6.009.04c ayaṁ sa jajñe dhruva ā niṣatto 'martyas tanvā vardhamānaḥ ||
6.009.05a dhruvaṁ jyotir nihitaṁ dṛśaye kam mano javiṣṭham patayatsv antaḥ |
6.009.05c viśve devāḥ samanasaḥ saketā ekaṁ kratum abhi vi yanti sādhu ||
6.009.06a vi me karṇā patayato vi cakṣur vīdaṁ jyotir hṛdaya āhitaṁ yat |
6.009.06c vi me manaś carati dūraādhīḥ kiṁ svid vakṣyāmi kim u nū maniṣye ||
6.009.07a viśve devā anamasyan bhiyānās tvām agne tamasi tasthivāṁsam |
6.009.07c vaiśvānaro 'vatūtaye no 'martyo 'vatūtaye naḥ ||

6.010.01a puro vo mandraṁ divyaṁ suvṛktim prayati yajñe agnim adhvare dadhidhvam |
6.010.01c pura ukthebhiḥ sa hi no vibhāvā svadhvarā karati jātavedāḥ ||
6.010.02a tam u dyumaḥ purvaṇīka hotar agne agnibhir manuṣa idhānaḥ |
6.010.02c stomaṁ yam asmai mamateva śūṣaṁ ghṛtaṁ na śuci matayaḥ pavante ||
6.010.03a pīpāya sa śravasā martyeṣu yo agnaye dadāśa vipra ukthaiḥ |
6.010.03c citrābhis tam ūtibhiś citraśocir vrajasya sātā gomato dadhāti ||
6.010.04a ā yaḥ paprau jāyamāna urvī dūredṛśā bhāsā kṛṣṇādhvā |
6.010.04c adha bahu cit tama ūrmyāyās tiraḥ śociṣā dadṛśe pāvakaḥ ||
6.010.05a nū naś citram puruvājābhir ūtī agne rayim maghavadbhyaś ca dhehi |
6.010.05c ye rādhasā śravasā cāty anyān suvīryebhiś cābhi santi janān ||
6.010.06a imaṁ yajñaṁ cano dhā agna uśan yaṁ ta āsāno juhute haviṣmān |
6.010.06c bharadvājeṣu dadhiṣe suvṛktim avīr vājasya gadhyasya sātau ||
6.010.07a vi dveṣāṁsīnuhi vardhayeḻām madema śatahimāḥ suvīrāḥ ||

6.011.01a yajasva hotar iṣito yajīyān agne bādho marutāṁ na prayukti |
6.011.01c ā no mitrāvaruṇā nāsatyā dyāvā hotrāya pṛthivī vavṛtyāḥ ||
6.011.02a tvaṁ hotā mandratamo no adhrug antar devo vidathā martyeṣu |
6.011.02c pāvakayā juhvā vahnir āsāgne yajasva tanvaṁ tava svām ||
6.011.03a dhanyā cid dhi tve dhiṣaṇā vaṣṭi pra devāñ janma gṛṇate yajadhyai |
6.011.03c vepiṣṭho aṅgirasāṁ yad dha vipro madhu cchando bhanati rebha iṣṭau ||
6.011.04a adidyutat sv apāko vibhāvāgne yajasva rodasī urūcī |
6.011.04c āyuṁ na yaṁ namasā rātahavyā añjanti suprayasam pañca janāḥ ||
6.011.05a vṛñje ha yan namasā barhir agnāv ayāmi srug ghṛtavatī suvṛktiḥ |
6.011.05c amyakṣi sadma sadane pṛthivyā aśrāyi yajñaḥ sūrye na cakṣuḥ ||
6.011.06a daśasyā naḥ purvaṇīka hotar devebhir agne agnibhir idhānaḥ |
6.011.06c rāyaḥ sūno sahaso vāvasānā ati srasema vṛjanaṁ nāṁhaḥ ||

6.012.01a madhye hotā duroṇe barhiṣo rāḻ agnis todasya rodasī yajadhyai |
6.012.01c ayaṁ sa sūnuḥ sahasa ṛtāvā dūrāt sūryo na śociṣā tatāna ||
6.012.02a ā yasmin tve sv apāke yajatra yakṣad rājan sarvatāteva nu dyauḥ |
6.012.02c triṣadhasthas tataruṣo na jaṁho havyā maghāni mānuṣā yajadhyai ||
6.012.03a tejiṣṭhā yasyāratir vanerāṭ todo adhvan na vṛdhasāno adyaut |
6.012.03c adrogho na dravitā cetati tmann amartyo 'vartra oṣadhīṣu ||
6.012.04a sāsmākebhir etarī na śūṣair agniḥ ṣṭave dama ā jātavedāḥ |
6.012.04c drvanno vanvan kratvā nārvosraḥ piteva jārayāyi yajñaiḥ ||
6.012.05a adha smāsya panayanti bhāso vṛthā yat takṣad anuyāti pṛthvīm |
6.012.05c sadyo yaḥ syandro viṣito dhavīyān ṛṇo na tāyur ati dhanvā rāṭ ||
6.012.06a sa tvaṁ no arvan nidāyā viśvebhir agne agnibhir idhānaḥ |
6.012.06c veṣi rāyo vi yāsi ducchunā madema śatahimāḥ suvīrāḥ ||

6.013.01a tvad viśvā subhaga saubhagāny agne vi yanti vanino na vayāḥ |
6.013.01c śruṣṭī rayir vājo vṛtratūrye divo vṛṣṭir īḍyo rītir apām ||
6.013.02a tvam bhago na ā hi ratnam iṣe parijmeva kṣayasi dasmavarcāḥ |
6.013.02c agne mitro na bṛhata ṛtasyāsi kṣattā vāmasya deva bhūreḥ ||
6.013.03a sa satpatiḥ śavasā hanti vṛtram agne vipro vi paṇer bharti vājam |
6.013.03c yaṁ tvam praceta ṛtajāta rāyā sajoṣā naptrāpāṁ hinoṣi ||
6.013.04a yas te sūno sahaso gīrbhir ukthair yajñair marto niśitiṁ vedyānaṭ |
6.013.04c viśvaṁ sa deva prati vāram agne dhatte dhānyam patyate vasavyaiḥ ||
6.013.05a tā nṛbhya ā sauśravasā suvīrāgne sūno sahasaḥ puṣyase dhāḥ |
6.013.05c kṛṇoṣi yac chavasā bhūri paśvo vayo vṛkāyāraye jasuraye ||
6.013.06a vadmā sūno sahaso no vihāyā agne tokaṁ tanayaṁ vāji no dāḥ |
6.013.06c viśvābhir gīrbhir abhi pūrtim aśyām madema śatahimāḥ suvīrāḥ ||

6.014.01a agnā yo martyo duvo dhiyaṁ jujoṣa dhītibhiḥ |
6.014.01c bhasan nu ṣa pra pūrvya iṣaṁ vurītāvase ||
6.014.02a agnir id dhi pracetā agnir vedhastama ṛṣiḥ |
6.014.02c agniṁ hotāram īḻate yajñeṣu manuṣo viśaḥ ||
6.014.03a nānā hy agne 'vase spardhante rāyo aryaḥ |
6.014.03c tūrvanto dasyum āyavo vrataiḥ sīkṣanto avratam ||
6.014.04a agnir apsām ṛtīṣahaṁ vīraṁ dadāti satpatim |
6.014.04c yasya trasanti śavasaḥ saṁcakṣi śatravo bhiyā ||
6.014.05a agnir hi vidmanā nido devo martam uruṣyati |
6.014.05c sahāvā yasyāvṛto rayir vājeṣv avṛtaḥ ||
6.014.06a acchā no mitramaho deva devān agne vocaḥ sumatiṁ rodasyoḥ |
6.014.06c vīhi svastiṁ sukṣitiṁ divo nṝn dviṣo aṁhāṁsi duritā tarema tā tarema tavāvasā tarema ||

6.015.01a imam ū ṣu vo atithim uṣarbudhaṁ viśvāsāṁ viśām patim ṛñjase girā |
6.015.01c vetīd divo januṣā kac cid ā śucir jyok cid atti garbho yad acyutam ||
6.015.02a mitraṁ na yaṁ sudhitam bhṛgavo dadhur vanaspatāv īḍyam ūrdhvaśociṣam |
6.015.02c sa tvaṁ suprīto vītahavye adbhuta praśastibhir mahayase dive-dive ||
6.015.03a sa tvaṁ dakṣasyāvṛko vṛdho bhūr aryaḥ parasyāntarasya taruṣaḥ |
6.015.03c rāyaḥ sūno sahaso martyeṣv ā chardir yaccha vītahavyāya sapratho bharadvājāya saprathaḥ ||
6.015.04a dyutānaṁ vo atithiṁ svarṇaram agniṁ hotāram manuṣaḥ svadhvaram |
6.015.04c vipraṁ na dyukṣavacasaṁ suvṛktibhir havyavāham aratiṁ devam ṛñjase ||
6.015.05a pāvakayā yaś citayantyā kṛpā kṣāman ruruca uṣaso na bhānunā |
6.015.05c tūrvan na yāmann etaśasya nū raṇa ā yo ghṛṇe na tatṛṣāṇo ajaraḥ ||
6.015.06a agnim-agniṁ vaḥ samidhā duvasyata priyam-priyaṁ vo atithiṁ gṛṇīṣaṇi |
6.015.06c upa vo gīrbhir amṛtaṁ vivāsata devo deveṣu vanate hi vāryaṁ devo deveṣu vanate hi no duvaḥ ||
6.015.07a samiddham agniṁ samidhā girā gṛṇe śucim pāvakam puro adhvare dhruvam |
6.015.07c vipraṁ hotāram puruvāram adruhaṁ kaviṁ sumnair īmahe jātavedasam ||
6.015.08a tvāṁ dūtam agne amṛtaṁ yuge-yuge havyavāhaṁ dadhire pāyum īḍyam |
6.015.08c devāsaś ca martāsaś ca jāgṛviṁ vibhuṁ viśpatiṁ namasā ni ṣedire ||
6.015.09a vibhūṣann agna ubhayām̐ anu vratā dūto devānāṁ rajasī sam īyase |
6.015.09c yat te dhītiṁ sumatim āvṛṇīmahe 'dha smā nas trivarūthaḥ śivo bhava ||
6.015.10a taṁ supratīkaṁ sudṛśaṁ svañcam avidvāṁso viduṣṭaraṁ sapema |
6.015.10c sa yakṣad viśvā vayunāni vidvān pra havyam agnir amṛteṣu vocat ||
6.015.11a tam agne pāsy uta tam piparṣi yas ta ānaṭ kavaye śūra dhītim |
6.015.11c yajñasya vā niśitiṁ voditiṁ vā tam it pṛṇakṣi śavasota rāyā ||
6.015.12a tvam agne vanuṣyato ni pāhi tvam u naḥ sahasāvann avadyāt |
6.015.12c saṁ tvā dhvasmanvad abhy etu pāthaḥ saṁ rayiḥ spṛhayāyyaḥ sahasrī ||
6.015.13a agnir hotā gṛhapatiḥ sa rājā viśvā veda janimā jātavedāḥ |
6.015.13c devānām uta yo martyānāṁ yajiṣṭhaḥ sa pra yajatām ṛtāvā ||
6.015.14a agne yad adya viśo adhvarasya hotaḥ pāvakaśoce veṣ ṭvaṁ hi yajvā |
6.015.14c ṛtā yajāsi mahinā vi yad bhūr havyā vaha yaviṣṭha yā te adya ||
6.015.15a abhi prayāṁsi sudhitāni hi khyo ni tvā dadhīta rodasī yajadhyai |
6.015.15c avā no maghavan vājasātāv agne viśvāni duritā tarema tā tarema tavāvasā tarema ||
6.015.16a agne viśvebhiḥ svanīka devair ūrṇāvantam prathamaḥ sīda yonim |
6.015.16c kulāyinaṁ ghṛtavantaṁ savitre yajñaṁ naya yajamānāya sādhu ||
6.015.17a imam u tyam atharvavad agnim manthanti vedhasaḥ |
6.015.17c yam aṅkūyantam ānayann amūraṁ śyāvyābhyaḥ ||
6.015.18a janiṣvā devavītaye sarvatātā svastaye |
6.015.18c ā devān vakṣy amṛtām̐ ṛtāvṛdho yajñaṁ deveṣu pispṛśaḥ ||
6.015.19a vayam u tvā gṛhapate janānām agne akarma samidhā bṛhantam |
6.015.19c asthūri no gārhapatyāni santu tigmena nas tejasā saṁ śiśādhi ||

6.016.01a tvam agne yajñānāṁ hotā viśveṣāṁ hitaḥ |
6.016.01c devebhir mānuṣe jane ||
6.016.02a sa no mandrābhir adhvare jihvābhir yajā mahaḥ |
6.016.02c ā devān vakṣi yakṣi ca ||
6.016.03a vetthā hi vedho adhvanaḥ pathaś ca devāñjasā |
6.016.03c agne yajñeṣu sukrato ||
6.016.04a tvām īḻe adha dvitā bharato vājibhiḥ śunam |
6.016.04c īje yajñeṣu yajñiyam ||
6.016.05a tvam imā vāryā puru divodāsāya sunvate |
6.016.05c bharadvājāya dāśuṣe ||
6.016.06a tvaṁ dūto amartya ā vahā daivyaṁ janam |
6.016.06c śṛṇvan viprasya suṣṭutim ||
6.016.07a tvām agne svādhyo martāso devavītaye |
6.016.07c yajñeṣu devam īḻate ||
6.016.08a tava pra yakṣi saṁdṛśam uta kratuṁ sudānavaḥ |
6.016.08c viśve juṣanta kāminaḥ ||
6.016.09a tvaṁ hotā manurhito vahnir āsā viduṣṭaraḥ |
6.016.09c agne yakṣi divo viśaḥ ||
6.016.10a agna ā yāhi vītaye gṛṇāno havyadātaye |
6.016.10c ni hotā satsi barhiṣi ||
6.016.11a taṁ tvā samidbhir aṅgiro ghṛtena vardhayāmasi |
6.016.11c bṛhac chocā yaviṣṭhya ||
6.016.12a sa naḥ pṛthu śravāyyam acchā deva vivāsasi |
6.016.12c bṛhad agne suvīryam ||
6.016.13a tvām agne puṣkarād adhy atharvā nir amanthata |
6.016.13c mūrdhno viśvasya vāghataḥ ||
6.016.14a tam u tvā dadhyaṅṅ ṛṣiḥ putra īdhe atharvaṇaḥ |
6.016.14c vṛtrahaṇam puraṁdaram ||
6.016.15a tam u tvā pāthyo vṛṣā sam īdhe dasyuhantamam |
6.016.15c dhanaṁjayaṁ raṇe-raṇe ||
6.016.16a ehy ū ṣu bravāṇi te 'gna itthetarā giraḥ |
6.016.16c ebhir vardhāsa indubhiḥ ||
6.016.17a yatra kva ca te mano dakṣaṁ dadhasa uttaram |
6.016.17c tatrā sadaḥ kṛṇavase ||
6.016.18a nahi te pūrtam akṣipad bhuvan nemānāṁ vaso |
6.016.18c athā duvo vanavase ||
6.016.19a āgnir agāmi bhārato vṛtrahā purucetanaḥ |
6.016.19c divodāsasya satpatiḥ ||
6.016.20a sa hi viśvāti pārthivā rayiṁ dāśan mahitvanā |
6.016.20c vanvann avāto astṛtaḥ ||
6.016.21a sa pratnavan navīyasāgne dyumnena saṁyatā |
6.016.21c bṛhat tatantha bhānunā ||
6.016.22a pra vaḥ sakhāyo agnaye stomaṁ yajñaṁ ca dhṛṣṇuyā |
6.016.22c arca gāya ca vedhase ||
6.016.23a sa hi yo mānuṣā yugā sīdad dhotā kavikratuḥ |
6.016.23c dūtaś ca havyavāhanaḥ ||
6.016.24a tā rājānā śucivratādityān mārutaṁ gaṇam |
6.016.24c vaso yakṣīha rodasī ||
6.016.25a vasvī te agne saṁdṛṣṭir iṣayate martyāya |
6.016.25c ūrjo napād amṛtasya ||
6.016.26a kratvā dā astu śreṣṭho 'dya tvā vanvan surekṇāḥ |
6.016.26c marta ānāśa suvṛktim ||
6.016.27a te te agne tvotā iṣayanto viśvam āyuḥ |
6.016.27c taranto aryo arātīr vanvanto aryo arātīḥ ||
6.016.28a agnis tigmena śociṣā yāsad viśvaṁ ny atriṇam |
6.016.28c agnir no vanate rayim ||
6.016.29a suvīraṁ rayim ā bhara jātavedo vicarṣaṇe |
6.016.29c jahi rakṣāṁsi sukrato ||
6.016.30a tvaṁ naḥ pāhy aṁhaso jātavedo aghāyataḥ |
6.016.30c rakṣā ṇo brahmaṇas kave ||
6.016.31a yo no agne dureva ā marto vadhāya dāśati |
6.016.31c tasmān naḥ pāhy aṁhasaḥ ||
6.016.32a tvaṁ taṁ deva jihvayā pari bādhasva duṣkṛtam |
6.016.32c marto yo no jighāṁsati ||
6.016.33a bharadvājāya saprathaḥ śarma yaccha sahantya |
6.016.33c agne vareṇyaṁ vasu ||
6.016.34a agnir vṛtrāṇi jaṅghanad draviṇasyur vipanyayā |
6.016.34c samiddhaḥ śukra āhutaḥ ||
6.016.35a garbhe mātuḥ pituṣ pitā vididyutāno akṣare |
6.016.35c sīdann ṛtasya yonim ā ||
6.016.36a brahma prajāvad ā bhara jātavedo vicarṣaṇe |
6.016.36c agne yad dīdayad divi ||
6.016.37a upa tvā raṇvasaṁdṛśam prayasvantaḥ sahaskṛta |
6.016.37c agne sasṛjmahe giraḥ ||
6.016.38a upa cchāyām iva ghṛṇer aganma śarma te vayam |
6.016.38c agne hiraṇyasaṁdṛśaḥ ||
6.016.39a ya ugra iva śaryahā tigmaśṛṅgo na vaṁsagaḥ |
6.016.39c agne puro rurojitha ||
6.016.40a ā yaṁ haste na khādinaṁ śiśuṁ jātaṁ na bibhrati |
6.016.40c viśām agniṁ svadhvaram ||
6.016.41a pra devaṁ devavītaye bharatā vasuvittamam |
6.016.41c ā sve yonau ni ṣīdatu ||
6.016.42a ā jātaṁ jātavedasi priyaṁ śiśītātithim |
6.016.42c syona ā gṛhapatim ||
6.016.43a agne yukṣvā hi ye tavāśvāso deva sādhavaḥ |
6.016.43c araṁ vahanti manyave ||
6.016.44a acchā no yāhy ā vahābhi prayāṁsi vītaye |
6.016.44c ā devān somapītaye ||
6.016.45a ud agne bhārata dyumad ajasreṇa davidyutat |
6.016.45c śocā vi bhāhy ajara ||
6.016.46a vītī yo devam marto duvasyed agnim īḻītādhvare haviṣmān |
6.016.46c hotāraṁ satyayajaṁ rodasyor uttānahasto namasā vivāset ||
6.016.47a ā te agna ṛcā havir hṛdā taṣṭam bharāmasi |
6.016.47c te te bhavantūkṣaṇa ṛṣabhāso vaśā uta ||
6.016.48a agniṁ devāso agriyam indhate vṛtrahantamam |
6.016.48c yenā vasūny ābhṛtā tṛḻhā rakṣāṁsi vājinā ||

6.017.01a pibā somam abhi yam ugra tarda ūrvaṁ gavyam mahi gṛṇāna indra |
6.017.01c vi yo dhṛṣṇo vadhiṣo vajrahasta viśvā vṛtram amitriyā śavobhiḥ ||
6.017.02a sa īm pāhi ya ṛjīṣī tarutro yaḥ śipravān vṛṣabho yo matīnām |
6.017.02c yo gotrabhid vajrabhṛd yo hariṣṭhāḥ sa indra citrām̐ abhi tṛndhi vājān ||
6.017.03a evā pāhi pratnathā mandatu tvā śrudhi brahma vāvṛdhasvota gīrbhiḥ |
6.017.03c āviḥ sūryaṁ kṛṇuhi pīpihīṣo jahi śatrūm̐r abhi gā indra tṛndhi ||
6.017.04a te tvā madā bṛhad indra svadhāva ime pītā ukṣayanta dyumantam |
6.017.04c mahām anūnaṁ tavasaṁ vibhūtim matsarāso jarhṛṣanta prasāham ||
6.017.05a yebhiḥ sūryam uṣasam mandasāno 'vāsayo 'pa dṛḻhāni dardrat |
6.017.05c mahām adrim pari gā indra santaṁ nutthā acyutaṁ sadasas pari svāt ||
6.017.06a tava kratvā tava tad daṁsanābhir āmāsu pakvaṁ śacyā ni dīdhaḥ |
6.017.06c aurṇor dura usriyābhyo vi dṛḻhod ūrvād gā asṛjo aṅgirasvān ||
6.017.07a paprātha kṣām mahi daṁso vy urvīm upa dyām ṛṣvo bṛhad indra stabhāyaḥ |
6.017.07c adhārayo rodasī devaputre pratne mātarā yahvī ṛtasya ||
6.017.08a adha tvā viśve pura indra devā ekaṁ tavasaṁ dadhire bharāya |
6.017.08c adevo yad abhy auhiṣṭa devān svarṣātā vṛṇata indram atra ||
6.017.09a adha dyauś cit te apa sā nu vajrād dvitānamad bhiyasā svasya manyoḥ |
6.017.09c ahiṁ yad indro abhy ohasānaṁ ni cid viśvāyuḥ śayathe jaghāna ||
6.017.10a adha tvaṣṭā te maha ugra vajraṁ sahasrabhṛṣṭiṁ vavṛtac chatāśrim |
6.017.10c nikāmam aramaṇasaṁ yena navantam ahiṁ sam piṇag ṛjīṣin ||
6.017.11a vardhān yaṁ viśve marutaḥ sajoṣāḥ pacac chatam mahiṣām̐ indra tubhyam |
6.017.11c pūṣā viṣṇus trīṇi sarāṁsi dhāvan vṛtrahaṇam madiram aṁśum asmai ||
6.017.12a ā kṣodo mahi vṛtaṁ nadīnām pariṣṭhitam asṛja ūrmim apām |
6.017.12c tāsām anu pravata indra panthām prārdayo nīcīr apasaḥ samudram ||
6.017.13a evā tā viśvā cakṛvāṁsam indram mahām ugram ajuryaṁ sahodām |
6.017.13c suvīraṁ tvā svāyudhaṁ suvajram ā brahma navyam avase vavṛtyāt ||
6.017.14a sa no vājāya śravasa iṣe ca rāye dhehi dyumata indra viprān |
6.017.14c bharadvāje nṛvata indra sūrīn divi ca smaidhi pārye na indra ||
6.017.15a ayā vājaṁ devahitaṁ sanema madema śatahimāḥ suvīrāḥ ||

6.018.01a tam u ṣṭuhi yo abhibhūtyojā vanvann avātaḥ puruhūta indraḥ |
6.018.01c aṣāḻham ugraṁ sahamānam ābhir gīrbhir vardha vṛṣabhaṁ carṣaṇīnām ||
6.018.02a sa yudhmaḥ satvā khajakṛt samadvā tuvimrakṣo nadanumām̐ ṛjīṣī |
6.018.02c bṛhadreṇuś cyavano mānuṣīṇām ekaḥ kṛṣṭīnām abhavat sahāvā ||
6.018.03a tvaṁ ha nu tyad adamāyo dasyūm̐r ekaḥ kṛṣṭīr avanor āryāya |
6.018.03c asti svin nu vīryaṁ tat ta indra na svid asti tad ṛtuthā vi vocaḥ ||
6.018.04a sad id dhi te tuvijātasya manye sahaḥ sahiṣṭha turatas turasya |
6.018.04c ugram ugrasya tavasas tavīyo 'radhrasya radhraturo babhūva ||
6.018.05a tan naḥ pratnaṁ sakhyam astu yuṣme itthā vadadbhir valam aṅgirobhiḥ |
6.018.05c hann acyutacyud dasmeṣayantam ṛṇoḥ puro vi duro asya viśvāḥ ||
6.018.06a sa hi dhībhir havyo asty ugra īśānakṛn mahati vṛtratūrye |
6.018.06c sa tokasātā tanaye sa vajrī vitantasāyyo abhavat samatsu ||
6.018.07a sa majmanā janima mānuṣāṇām amartyena nāmnāti pra sarsre |
6.018.07c sa dyumnena sa śavasota rāyā sa vīryeṇa nṛtamaḥ samokāḥ ||
6.018.08a sa yo na muhe na mithū jano bhūt sumantunāmā cumuriṁ dhuniṁ ca |
6.018.08c vṛṇak pipruṁ śambaraṁ śuṣṇam indraḥ purāṁ cyautnāya śayathāya nū cit ||
6.018.09a udāvatā tvakṣasā panyasā ca vṛtrahatyāya ratham indra tiṣṭha |
6.018.09c dhiṣva vajraṁ hasta ā dakṣiṇatrābhi pra manda purudatra māyāḥ ||
6.018.10a agnir na śuṣkaṁ vanam indra hetī rakṣo ni dhakṣy aśanir na bhīmā |
6.018.10c gambhīraya ṛṣvayā yo rurojādhvānayad duritā dambhayac ca ||
6.018.11a ā sahasram pathibhir indra rāyā tuvidyumna tuvivājebhir arvāk |
6.018.11c yāhi sūno sahaso yasya nū cid adeva īśe puruhūta yotoḥ ||
6.018.12a pra tuvidyumnasya sthavirasya ghṛṣver divo rarapśe mahimā pṛthivyāḥ |
6.018.12c nāsya śatrur na pratimānam asti na pratiṣṭhiḥ purumāyasya sahyoḥ ||
6.018.13a pra tat te adyā karaṇaṁ kṛtam bhūt kutsaṁ yad āyum atithigvam asmai |
6.018.13c purū sahasrā ni śiśā abhi kṣām ut tūrvayāṇaṁ dhṛṣatā ninetha ||
6.018.14a anu tvāhighne adha deva devā madan viśve kavitamaṁ kavīnām |
6.018.14c karo yatra varivo bādhitāya dive janāya tanve gṛṇānaḥ ||
6.018.15a anu dyāvāpṛthivī tat ta ojo 'martyā jihata indra devāḥ |
6.018.15c kṛṣvā kṛtno akṛtaṁ yat te asty ukthaṁ navīyo janayasva yajñaiḥ ||

6.019.01a mahām̐ indro nṛvad ā carṣaṇiprā uta dvibarhā aminaḥ sahobhiḥ |
6.019.01c asmadryag vāvṛdhe vīryāyoruḥ pṛthuḥ sukṛtaḥ kartṛbhir bhūt ||
6.019.02a indram eva dhiṣaṇā sātaye dhād bṛhantam ṛṣvam ajaraṁ yuvānam |
6.019.02c aṣāḻhena śavasā śūśuvāṁsaṁ sadyaś cid yo vāvṛdhe asāmi ||
6.019.03a pṛthū karasnā bahulā gabhastī asmadryak sam mimīhi śravāṁsi |
6.019.03c yūtheva paśvaḥ paśupā damūnā asmām̐ indrābhy ā vavṛtsvājau ||
6.019.04a taṁ va indraṁ catinam asya śākair iha nūnaṁ vājayanto huvema |
6.019.04c yathā cit pūrve jaritāra āsur anedyā anavadyā ariṣṭāḥ ||
6.019.05a dhṛtavrato dhanadāḥ somavṛddhaḥ sa hi vāmasya vasunaḥ purukṣuḥ |
6.019.05c saṁ jagmire pathyā rāyo asmin samudre na sindhavo yādamānāḥ ||
6.019.06a śaviṣṭhaṁ na ā bhara śūra śava ojiṣṭham ojo abhibhūta ugram |
6.019.06c viśvā dyumnā vṛṣṇyā mānuṣāṇām asmabhyaṁ dā harivo mādayadhyai ||
6.019.07a yas te madaḥ pṛtanāṣāḻ amṛdhra indra taṁ na ā bhara śūśuvāṁsam |
6.019.07c yena tokasya tanayasya sātau maṁsīmahi jigīvāṁsas tvotāḥ ||
6.019.08a ā no bhara vṛṣaṇaṁ śuṣmam indra dhanaspṛtaṁ śūśuvāṁsaṁ sudakṣam |
6.019.08c yena vaṁsāma pṛtanāsu śatrūn tavotibhir uta jāmīm̐r ajāmīn ||
6.019.09a ā te śuṣmo vṛṣabha etu paścād ottarād adharād ā purastāt |
6.019.09c ā viśvato abhi sam etv arvāṅ indra dyumnaṁ svarvad dhehy asme ||
6.019.10a nṛvat ta indra nṛtamābhir ūtī vaṁsīmahi vāmaṁ śromatebhiḥ |
6.019.10c īkṣe hi vasva ubhayasya rājan dhā ratnam mahi sthūram bṛhantam ||
6.019.11a marutvantaṁ vṛṣabhaṁ vāvṛdhānam akavāriṁ divyaṁ śāsam indram |
6.019.11c viśvāsāham avase nūtanāyograṁ sahodām iha taṁ huvema ||
6.019.12a janaṁ vajrin mahi cin manyamānam ebhyo nṛbhyo randhayā yeṣv asmi |
6.019.12c adhā hi tvā pṛthivyāṁ śūrasātau havāmahe tanaye goṣv apsu ||
6.019.13a vayaṁ ta ebhiḥ puruhūta sakhyaiḥ śatroḥ-śatror uttara it syāma |
6.019.13c ghnanto vṛtrāṇy ubhayāni śūra rāyā madema bṛhatā tvotāḥ ||

6.020.01a dyaur na ya indrābhi bhūmāryas tasthau rayiḥ śavasā pṛtsu janān |
6.020.01c taṁ naḥ sahasrabharam urvarāsāṁ daddhi sūno sahaso vṛtraturam ||
6.020.02a divo na tubhyam anv indra satrāsuryaṁ devebhir dhāyi viśvam |
6.020.02c ahiṁ yad vṛtram apo vavrivāṁsaṁ hann ṛjīṣin viṣṇunā sacānaḥ ||
6.020.03a tūrvann ojīyān tavasas tavīyān kṛtabrahmendro vṛddhamahāḥ |
6.020.03c rājābhavan madhunaḥ somyasya viśvāsāṁ yat purāṁ dartnum āvat ||
6.020.04a śatair apadran paṇaya indrātra daśoṇaye kavaye 'rkasātau |
6.020.04c vadhaiḥ śuṣṇasyāśuṣasya māyāḥ pitvo nārirecīt kiṁ cana pra ||
6.020.05a maho druho apa viśvāyu dhāyi vajrasya yat patane pādi śuṣṇaḥ |
6.020.05c uru ṣa sarathaṁ sārathaye kar indraḥ kutsāya sūryasya sātau ||
6.020.06a pra śyeno na madiram aṁśum asmai śiro dāsasya namucer mathāyan |
6.020.06c prāvan namīṁ sāpyaṁ sasantam pṛṇag rāyā sam iṣā saṁ svasti ||
6.020.07a vi pipror ahimāyasya dṛḻhāḥ puro vajriñ chavasā na dardaḥ |
6.020.07c sudāman tad rekṇo apramṛṣyam ṛjiśvane dātraṁ dāśuṣe dāḥ ||
6.020.08a sa vetasuṁ daśamāyaṁ daśoṇiṁ tūtujim indraḥ svabhiṣṭisumnaḥ |
6.020.08c ā tugraṁ śaśvad ibhaṁ dyotanāya mātur na sīm upa sṛjā iyadhyai ||
6.020.09a sa īṁ spṛdho vanate apratīto bibhrad vajraṁ vṛtrahaṇaṁ gabhastau |
6.020.09c tiṣṭhad dharī adhy asteva garte vacoyujā vahata indram ṛṣvam ||
6.020.10a sanema te 'vasā navya indra pra pūravaḥ stavanta enā yajñaiḥ |
6.020.10c sapta yat puraḥ śarma śāradīr dard dhan dāsīḥ purukutsāya śikṣan ||
6.020.11a tvaṁ vṛdha indra pūrvyo bhūr varivasyann uśane kāvyāya |
6.020.11c parā navavāstvam anudeyam mahe pitre dadātha svaṁ napātam ||
6.020.12a tvaṁ dhunir indra dhunimatīr ṛṇor apaḥ sīrā na sravantīḥ |
6.020.12c pra yat samudram ati śūra parṣi pārayā turvaśaṁ yaduṁ svasti ||
6.020.13a tava ha tyad indra viśvam ājau sasto dhunīcumurī yā ha siṣvap |
6.020.13c dīdayad it tubhyaṁ somebhiḥ sunvan dabhītir idhmabhṛtiḥ pakthy arkaiḥ ||

6.021.01a imā u tvā purutamasya kāror havyaṁ vīra havyā havante |
6.021.01c dhiyo ratheṣṭhām ajaraṁ navīyo rayir vibhūtir īyate vacasyā ||
6.021.02a tam u stuṣa indraṁ yo vidāno girvāhasaṁ gīrbhir yajñavṛddham |
6.021.02c yasya divam ati mahnā pṛthivyāḥ purumāyasya ririce mahitvam ||
6.021.03a sa it tamo 'vayunaṁ tatanvat sūryeṇa vayunavac cakāra |
6.021.03c kadā te martā amṛtasya dhāmeyakṣanto na minanti svadhāvaḥ ||
6.021.04a yas tā cakāra sa kuha svid indraḥ kam ā janaṁ carati kāsu vikṣu |
6.021.04c kas te yajño manase śaṁ varāya ko arka indra katamaḥ sa hotā ||
6.021.05a idā hi te veviṣataḥ purājāḥ pratnāsa āsuḥ purukṛt sakhāyaḥ |
6.021.05c ye madhyamāsa uta nūtanāsa utāvamasya puruhūta bodhi ||
6.021.06a tam pṛcchanto 'varāsaḥ parāṇi pratnā ta indra śrutyānu yemuḥ |
6.021.06c arcāmasi vīra brahmavāho yād eva vidma tāt tvā mahāntam ||
6.021.07a abhi tvā pājo rakṣaso vi tasthe mahi jajñānam abhi tat su tiṣṭha |
6.021.07c tava pratnena yujyena sakhyā vajreṇa dhṛṣṇo apa tā nudasva ||
6.021.08a sa tu śrudhīndra nūtanasya brahmaṇyato vīra kārudhāyaḥ |
6.021.08c tvaṁ hy āpiḥ pradivi pitṝṇāṁ śaśvad babhūtha suhava eṣṭau ||
6.021.09a protaye varuṇam mitram indram marutaḥ kṛṣvāvase no adya |
6.021.09c pra pūṣaṇaṁ viṣṇum agnim puraṁdhiṁ savitāram oṣadhīḥ parvatām̐ś ca ||
6.021.10a ima u tvā puruśāka prayajyo jaritāro abhy arcanty arkaiḥ |
6.021.10c śrudhī havam ā huvato huvāno na tvāvām̐ anyo amṛta tvad asti ||
6.021.11a nū ma ā vācam upa yāhi vidvān viśvebhiḥ sūno sahaso yajatraiḥ |
6.021.11c ye agnijihvā ṛtasāpa āsur ye manuṁ cakrur uparaṁ dasāya ||
6.021.12a sa no bodhi puraetā sugeṣūta durgeṣu pathikṛd vidānaḥ |
6.021.12c ye aśramāsa uravo vahiṣṭhās tebhir na indrābhi vakṣi vājam ||

6.022.01a ya eka id dhavyaś carṣaṇīnām indraṁ taṁ gīrbhir abhy arca ābhiḥ |
6.022.01c yaḥ patyate vṛṣabho vṛṣṇyāvān satyaḥ satvā purumāyaḥ sahasvān ||
6.022.02a tam u naḥ pūrve pitaro navagvāḥ sapta viprāso abhi vājayantaḥ |
6.022.02c nakṣaddābhaṁ taturim parvateṣṭhām adroghavācam matibhiḥ śaviṣṭham ||
6.022.03a tam īmaha indram asya rāyaḥ puruvīrasya nṛvataḥ purukṣoḥ |
6.022.03c yo askṛdhoyur ajaraḥ svarvān tam ā bhara harivo mādayadhyai ||
6.022.04a tan no vi voco yadi te purā cij jaritāra ānaśuḥ sumnam indra |
6.022.04c kas te bhāgaḥ kiṁ vayo dudhra khidvaḥ puruhūta purūvaso 'suraghnaḥ ||
6.022.05a tam pṛcchantī vajrahastaṁ ratheṣṭhām indraṁ vepī vakvarī yasya nū gīḥ |
6.022.05c tuvigrābhaṁ tuvikūrmiṁ rabhodāṁ gātum iṣe nakṣate tumram accha ||
6.022.06a ayā ha tyam māyayā vāvṛdhānam manojuvā svatavaḥ parvatena |
6.022.06c acyutā cid vīḻitā svojo rujo vi dṛḻhā dhṛṣatā virapśin ||
6.022.07a taṁ vo dhiyā navyasyā śaviṣṭham pratnam pratnavat paritaṁsayadhyai |
6.022.07c sa no vakṣad animānaḥ suvahmendro viśvāny ati durgahāṇi ||
6.022.08a ā janāya druhvaṇe pārthivāni divyāni dīpayo 'ntarikṣā |
6.022.08c tapā vṛṣan viśvataḥ śociṣā tān brahmadviṣe śocaya kṣām apaś ca ||
6.022.09a bhuvo janasya divyasya rājā pārthivasya jagatas tveṣasaṁdṛk |
6.022.09c dhiṣva vajraṁ dakṣiṇa indra haste viśvā ajurya dayase vi māyāḥ ||
6.022.10a ā saṁyatam indra ṇaḥ svastiṁ śatrutūryāya bṛhatīm amṛdhrām |
6.022.10c yayā dāsāny āryāṇi vṛtrā karo vajrin sutukā nāhuṣāṇi ||
6.022.11a sa no niyudbhiḥ puruhūta vedho viśvavārābhir ā gahi prayajyo |
6.022.11c na yā adevo varate na deva ābhir yāhi tūyam ā madryadrik ||

6.023.01a suta it tvaṁ nimiśla indra some stome brahmaṇi śasyamāna ukthe |
6.023.01c yad vā yuktābhyām maghavan haribhyām bibhrad vajram bāhvor indra yāsi ||
6.023.02a yad vā divi pārye suṣvim indra vṛtrahatye 'vasi śūrasātau |
6.023.02c yad vā dakṣasya bibhyuṣo abibhyad arandhayaḥ śardhata indra dasyūn ||
6.023.03a pātā sutam indro astu somam praṇenīr ugro jaritāram ūtī |
6.023.03c kartā vīrāya suṣvaya u lokaṁ dātā vasu stuvate kīraye cit ||
6.023.04a ganteyānti savanā haribhyām babhrir vajram papiḥ somaṁ dadir gāḥ |
6.023.04c kartā vīraṁ naryaṁ sarvavīraṁ śrotā havaṁ gṛṇataḥ stomavāhāḥ ||
6.023.05a asmai vayaṁ yad vāvāna tad viviṣma indrāya yo naḥ pradivo apas kaḥ |
6.023.05c sute some stumasi śaṁsad ukthendrāya brahma vardhanaṁ yathāsat ||
6.023.06a brahmāṇi hi cakṛṣe vardhanāni tāvat ta indra matibhir viviṣmaḥ |
6.023.06c sute some sutapāḥ śaṁtamāni rāṇḍyā kriyāsma vakṣaṇāni yajñaiḥ ||
6.023.07a sa no bodhi puroḻāśaṁ rarāṇaḥ pibā tu somaṁ goṛjīkam indra |
6.023.07c edam barhir yajamānasya sīdoruṁ kṛdhi tvāyata u lokam ||
6.023.08a sa mandasvā hy anu joṣam ugra pra tvā yajñāsa ime aśnuvantu |
6.023.08c preme havāsaḥ puruhūtam asme ā tveyaṁ dhīr avasa indra yamyāḥ ||
6.023.09a taṁ vaḥ sakhāyaḥ saṁ yathā suteṣu somebhir īm pṛṇatā bhojam indram |
6.023.09c kuvit tasmā asati no bharāya na suṣvim indro 'vase mṛdhāti ||
6.023.10a eved indraḥ sute astāvi some bharadvājeṣu kṣayad in maghonaḥ |
6.023.10c asad yathā jaritra uta sūrir indro rāyo viśvavārasya dātā ||

6.024.01a vṛṣā mada indre śloka ukthā sacā someṣu sutapā ṛjīṣī |
6.024.01c arcatryo maghavā nṛbhya ukthair dyukṣo rājā girām akṣitotiḥ ||
6.024.02a taturir vīro naryo vicetāḥ śrotā havaṁ gṛṇata urvyūtiḥ |
6.024.02c vasuḥ śaṁso narāṁ kārudhāyā vājī stuto vidathe dāti vājam ||
6.024.03a akṣo na cakryoḥ śūra bṛhan pra te mahnā ririce rodasyoḥ |
6.024.03c vṛkṣasya nu te puruhūta vayā vy ūtayo ruruhur indra pūrvīḥ ||
6.024.04a śacīvatas te puruśāka śākā gavām iva srutayaḥ saṁcaraṇīḥ |
6.024.04c vatsānāṁ na tantayas ta indra dāmanvanto adāmānaḥ sudāman ||
6.024.05a anyad adya karvaram anyad u śvo 'sac ca san muhur ācakrir indraḥ |
6.024.05c mitro no atra varuṇaś ca pūṣāryo vaśasya paryetāsti ||
6.024.06a vi tvad āpo na parvatasya pṛṣṭhād ukthebhir indrānayanta yajñaiḥ |
6.024.06c taṁ tvābhiḥ suṣṭutibhir vājayanta ājiṁ na jagmur girvāho aśvāḥ ||
6.024.07a na yaṁ jaranti śarado na māsā na dyāva indram avakarśayanti |
6.024.07c vṛddhasya cid vardhatām asya tanūḥ stomebhir ukthaiś ca śasyamānā ||
6.024.08a na vīḻave namate na sthirāya na śardhate dasyujūtāya stavān |
6.024.08c ajrā indrasya girayaś cid ṛṣvā gambhīre cid bhavati gādham asmai ||
6.024.09a gambhīreṇa na uruṇāmatrin preṣo yandhi sutapāvan vājān |
6.024.09c sthā ū ṣu ūrdhva ūtī ariṣaṇyann aktor vyuṣṭau paritakmyāyām ||
6.024.10a sacasva nāyam avase abhīka ito vā tam indra pāhi riṣaḥ |
6.024.10c amā cainam araṇye pāhi riṣo madema śatahimāḥ suvīrāḥ ||

6.025.01a yā ta ūtir avamā yā paramā yā madhyamendra śuṣminn asti |
6.025.01c tābhir ū ṣu vṛtrahatye 'vīr na ebhiś ca vājair mahān na ugra ||
6.025.02a ābhiḥ spṛdho mithatīr ariṣaṇyann amitrasya vyathayā manyum indra |
6.025.02c ābhir viśvā abhiyujo viṣūcīr āryāya viśo 'va tārīr dāsīḥ ||
6.025.03a indra jāmaya uta ye 'jāmayo 'rvācīnāso vanuṣo yuyujre |
6.025.03c tvam eṣāṁ vithurā śavāṁsi jahi vṛṣṇyāni kṛṇuhī parācaḥ ||
6.025.04a śūro vā śūraṁ vanate śarīrais tanūrucā taruṣi yat kṛṇvaite |
6.025.04c toke vā goṣu tanaye yad apsu vi krandasī urvarāsu bravaite ||
6.025.05a nahi tvā śūro na turo na dhṛṣṇur na tvā yodho manyamāno yuyodha |
6.025.05c indra nakiṣ ṭvā praty asty eṣāṁ viśvā jātāny abhy asi tāni ||
6.025.06a sa patyata ubhayor nṛmṇam ayor yadī vedhasaḥ samithe havante |
6.025.06c vṛtre vā maho nṛvati kṣaye vā vyacasvantā yadi vitantasaite ||
6.025.07a adha smā te carṣaṇayo yad ejān indra trātota bhavā varūtā |
6.025.07c asmākāso ye nṛtamāso arya indra sūrayo dadhire puro naḥ ||
6.025.08a anu te dāyi maha indriyāya satrā te viśvam anu vṛtrahatye |
6.025.08c anu kṣatram anu saho yajatrendra devebhir anu te nṛṣahye ||
6.025.09a evā naḥ spṛdhaḥ sam ajā samatsv indra rārandhi mithatīr adevīḥ |
6.025.09c vidyāma vastor avasā gṛṇanto bharadvājā uta ta indra nūnam ||

6.026.01a śrudhī na indra hvayāmasi tvā maho vājasya sātau vāvṛṣāṇāḥ |
6.026.01c saṁ yad viśo 'yanta śūrasātā ugraṁ no 'vaḥ pārye ahan dāḥ ||
6.026.02a tvāṁ vājī havate vājineyo maho vājasya gadhyasya sātau |
6.026.02c tvāṁ vṛtreṣv indra satpatiṁ tarutraṁ tvāṁ caṣṭe muṣṭihā goṣu yudhyan ||
6.026.03a tvaṁ kaviṁ codayo 'rkasātau tvaṁ kutsāya śuṣṇaṁ dāśuṣe vark |
6.026.03c tvaṁ śiro amarmaṇaḥ parāhann atithigvāya śaṁsyaṁ kariṣyan ||
6.026.04a tvaṁ ratham pra bharo yodham ṛṣvam āvo yudhyantaṁ vṛṣabhaṁ daśadyum |
6.026.04c tvaṁ tugraṁ vetasave sacāhan tvaṁ tujiṁ gṛṇantam indra tūtoḥ ||
6.026.05a tvaṁ tad uktham indra barhaṇā kaḥ pra yac chatā sahasrā śūra darṣi |
6.026.05c ava girer dāsaṁ śambaraṁ han prāvo divodāsaṁ citrābhir ūtī ||
6.026.06a tvaṁ śraddhābhir mandasānaḥ somair dabhītaye cumurim indra siṣvap |
6.026.06c tvaṁ rajim piṭhīnase daśasyan ṣaṣṭiṁ sahasrā śacyā sacāhan ||
6.026.07a ahaṁ cana tat sūribhir ānaśyāṁ tava jyāya indra sumnam ojaḥ |
6.026.07c tvayā yat stavante sadhavīra vīrās trivarūthena nahuṣā śaviṣṭha ||
6.026.08a vayaṁ te asyām indra dyumnahūtau sakhāyaḥ syāma mahina preṣṭhāḥ |
6.026.08c prātardaniḥ kṣatraśrīr astu śreṣṭho ghane vṛtrāṇāṁ sanaye dhanānām ||

6.027.01a kim asya made kim v asya pītāv indraḥ kim asya sakhye cakāra |
6.027.01c raṇā vā ye niṣadi kiṁ te asya purā vividre kim u nūtanāsaḥ ||
6.027.02a sad asya made sad v asya pītāv indraḥ sad asya sakhye cakāra |
6.027.02c raṇā vā ye niṣadi sat te asya purā vividre sad u nūtanāsaḥ ||
6.027.03a nahi nu te mahimanaḥ samasya na maghavan maghavattvasya vidma |
6.027.03c na rādhaso-rādhaso nūtanasyendra nakir dadṛśa indriyaṁ te ||
6.027.04a etat tyat ta indriyam aceti yenāvadhīr varaśikhasya śeṣaḥ |
6.027.04c vajrasya yat te nihatasya śuṣmāt svanāc cid indra paramo dadāra ||
6.027.05a vadhīd indro varaśikhasya śeṣo 'bhyāvartine cāyamānāya śikṣan |
6.027.05c vṛcīvato yad dhariyūpīyāyāṁ han pūrve ardhe bhiyasāparo dart ||
6.027.06a triṁśacchataṁ varmiṇa indra sākaṁ yavyāvatyām puruhūta śravasyā |
6.027.06c vṛcīvantaḥ śarave patyamānāḥ pātrā bhindānā nyarthāny āyan ||
6.027.07a yasya gāvāv aruṣā sūyavasyū antar ū ṣu carato rerihāṇā |
6.027.07c sa sṛñjayāya turvaśam parādād vṛcīvato daivavātāya śikṣan ||
6.027.08a dvayām̐ agne rathino viṁśatiṁ gā vadhūmato maghavā mahyaṁ samrāṭ |
6.027.08c abhyāvartī cāyamāno dadāti dūṇāśeyaṁ dakṣiṇā pārthavānām ||

6.028.01a ā gāvo agmann uta bhadram akran sīdantu goṣṭhe raṇayantv asme |
6.028.01c prajāvatīḥ pururūpā iha syur indrāya pūrvīr uṣaso duhānāḥ ||
6.028.02a indro yajvane pṛṇate ca śikṣaty uped dadāti na svam muṣāyati |
6.028.02c bhūyo-bhūyo rayim id asya vardhayann abhinne khilye ni dadhāti devayum ||
6.028.03a na tā naśanti na dabhāti taskaro nāsām āmitro vyathir ā dadharṣati |
6.028.03c devām̐ś ca yābhir yajate dadāti ca jyog it tābhiḥ sacate gopatiḥ saha ||
6.028.04a na tā arvā reṇukakāṭo aśnute na saṁskṛtatram upa yanti tā abhi |
6.028.04c urugāyam abhayaṁ tasya tā anu gāvo martasya vi caranti yajvanaḥ ||
6.028.05a gāvo bhago gāva indro me acchān gāvaḥ somasya prathamasya bhakṣaḥ |
6.028.05c imā yā gāvaḥ sa janāsa indra icchāmīd dhṛdā manasā cid indram ||
6.028.06a yūyaṁ gāvo medayathā kṛśaṁ cid aśrīraṁ cit kṛṇuthā supratīkam |
6.028.06c bhadraṁ gṛhaṁ kṛṇutha bhadravāco bṛhad vo vaya ucyate sabhāsu ||
6.028.07a prajāvatīḥ sūyavasaṁ riśantīḥ śuddhā apaḥ suprapāṇe pibantīḥ |
6.028.07c mā vaḥ stena īśata māghaśaṁsaḥ pari vo hetī rudrasya vṛjyāḥ ||
6.028.08a upedam upaparcanam āsu goṣūpa pṛcyatām |
6.028.08c upa ṛṣabhasya retasy upendra tava vīrye ||

6.029.01a indraṁ vo naraḥ sakhyāya sepur maho yantaḥ sumataye cakānāḥ |
6.029.01c maho hi dātā vajrahasto asti mahām u raṇvam avase yajadhvam ||
6.029.02a ā yasmin haste naryā mimikṣur ā rathe hiraṇyaye ratheṣṭhāḥ |
6.029.02c ā raśmayo gabhastyoḥ sthūrayor ādhvann aśvāso vṛṣaṇo yujānāḥ ||
6.029.03a śriye te pādā duva ā mimikṣur dhṛṣṇur vajrī śavasā dakṣiṇāvān |
6.029.03c vasāno atkaṁ surabhiṁ dṛśe kaṁ svar ṇa nṛtav iṣiro babhūtha ||
6.029.04a sa soma āmiślatamaḥ suto bhūd yasmin paktiḥ pacyate santi dhānāḥ |
6.029.04c indraṁ naraḥ stuvanto brahmakārā ukthā śaṁsanto devavātatamāḥ ||
6.029.05a na te antaḥ śavaso dhāyy asya vi tu bābadhe rodasī mahitvā |
6.029.05c ā tā sūriḥ pṛṇati tūtujāno yūthevāpsu samījamāna ūtī ||
6.029.06a eved indraḥ suhava ṛṣvo astūtī anūtī hiriśipraḥ satvā |
6.029.06c evā hi jāto asamātyojāḥ purū ca vṛtrā hanati ni dasyūn ||

6.030.01a bhūya id vāvṛdhe vīryāyam̐ eko ajuryo dayate vasūni |
6.030.01c pra ririce diva indraḥ pṛthivyā ardham id asya prati rodasī ubhe ||
6.030.02a adhā manye bṛhad asuryam asya yāni dādhāra nakir ā mināti |
6.030.02c dive-dive sūryo darśato bhūd vi sadmāny urviyā sukratur dhāt ||
6.030.03a adyā cin nū cit tad apo nadīnāṁ yad ābhyo arado gātum indra |
6.030.03c ni parvatā admasado na sedus tvayā dṛḻhāni sukrato rajāṁsi ||
6.030.04a satyam it tan na tvāvām̐ anyo astīndra devo na martyo jyāyān |
6.030.04c ahann ahim pariśayānam arṇo 'vāsṛjo apo acchā samudram ||
6.030.05a tvam apo vi duro viṣūcīr indra dṛḻham arujaḥ parvatasya |
6.030.05c rājābhavo jagataś carṣaṇīnāṁ sākaṁ sūryaṁ janayan dyām uṣāsam ||

6.031.01a abhūr eko rayipate rayīṇām ā hastayor adhithā indra kṛṣṭīḥ |
6.031.01c vi toke apsu tanaye ca sūre 'vocanta carṣaṇayo vivācaḥ ||
6.031.02a tvad bhiyendra pārthivāni viśvācyutā cic cyāvayante rajāṁsi |
6.031.02c dyāvākṣāmā parvatāso vanāni viśvaṁ dṛḻham bhayate ajmann ā te ||
6.031.03a tvaṁ kutsenābhi śuṣṇam indrāśuṣaṁ yudhya kuyavaṁ gaviṣṭau |
6.031.03c daśa prapitve adha sūryasya muṣāyaś cakram avive rapāṁsi ||
6.031.04a tvaṁ śatāny ava śambarasya puro jaghanthāpratīni dasyoḥ |
6.031.04c aśikṣo yatra śacyā śacīvo divodāsāya sunvate sutakre bharadvājāya gṛṇate vasūni ||
6.031.05a sa satyasatvan mahate raṇāya ratham ā tiṣṭha tuvinṛmṇa bhīmam |
6.031.05c yāhi prapathinn avasopa madrik pra ca śruta śrāvaya carṣaṇibhyaḥ ||

6.032.01a apūrvyā purutamāny asmai mahe vīrāya tavase turāya |
6.032.01c virapśine vajriṇe śaṁtamāni vacāṁsy āsā sthavirāya takṣam ||
6.032.02a sa mātarā sūryeṇā kavīnām avāsayad rujad adriṁ gṛṇānaḥ |
6.032.02c svādhībhir ṛkvabhir vāvaśāna ud usriyāṇām asṛjan nidānam ||
6.032.03a sa vahnibhir ṛkvabhir goṣu śaśvan mitajñubhiḥ purukṛtvā jigāya |
6.032.03c puraḥ purohā sakhibhiḥ sakhīyan dṛḻhā ruroja kavibhiḥ kaviḥ san ||
6.032.04a sa nīvyābhir jaritāram acchā maho vājebhir mahadbhiś ca śuṣmaiḥ |
6.032.04c puruvīrābhir vṛṣabha kṣitīnām ā girvaṇaḥ suvitāya pra yāhi ||
6.032.05a sa sargeṇa śavasā takto atyair apa indro dakṣiṇatas turāṣāṭ |
6.032.05c itthā sṛjānā anapāvṛd arthaṁ dive-dive viviṣur apramṛṣyam ||

6.033.01a ya ojiṣṭha indra taṁ su no dā mado vṛṣan svabhiṣṭir dāsvān |
6.033.01c sauvaśvyaṁ yo vanavat svaśvo vṛtrā samatsu sāsahad amitrān ||
6.033.02a tvāṁ hīndrāvase vivāco havante carṣaṇayaḥ śūrasātau |
6.033.02c tvaṁ viprebhir vi paṇīm̐r aśāyas tvota it sanitā vājam arvā ||
6.033.03a tvaṁ tām̐ indrobhayām̐ amitrān dāsā vṛtrāṇy āryā ca śūra |
6.033.03c vadhīr vaneva sudhitebhir atkair ā pṛtsu darṣi nṛṇāṁ nṛtama ||
6.033.04a sa tvaṁ na indrākavābhir ūtī sakhā viśvāyur avitā vṛdhe bhūḥ |
6.033.04c svarṣātā yad dhvayāmasi tvā yudhyanto nemadhitā pṛtsu śūra ||
6.033.05a nūnaṁ na indrāparāya ca syā bhavā mṛḻīka uta no abhiṣṭau |
6.033.05c itthā gṛṇanto mahinasya śarman divi ṣyāma pārye goṣatamāḥ ||

6.034.01a saṁ ca tve jagmur gira indra pūrvīr vi ca tvad yanti vibhvo manīṣāḥ |
6.034.01c purā nūnaṁ ca stutaya ṛṣīṇām paspṛdhra indre adhy ukthārkā ||
6.034.02a puruhūto yaḥ purugūrta ṛbhvām̐ ekaḥ purupraśasto asti yajñaiḥ |
6.034.02c ratho na mahe śavase yujāno 'smābhir indro anumādyo bhūt ||
6.034.03a na yaṁ hiṁsanti dhītayo na vāṇīr indraṁ nakṣantīd abhi vardhayantīḥ |
6.034.03c yadi stotāraḥ śataṁ yat sahasraṁ gṛṇanti girvaṇasaṁ śaṁ tad asmai ||
6.034.04a asmā etad divy arceva māsā mimikṣa indre ny ayāmi somaḥ |
6.034.04c janaṁ na dhanvann abhi saṁ yad āpaḥ satrā vāvṛdhur havanāni yajñaiḥ ||
6.034.05a asmā etan mahy āṅgūṣam asmā indrāya stotram matibhir avāci |
6.034.05c asad yathā mahati vṛtratūrya indro viśvāyur avitā vṛdhaś ca ||

6.035.01a kadā bhuvan rathakṣayāṇi brahma kadā stotre sahasrapoṣyaṁ dāḥ |
6.035.01c kadā stomaṁ vāsayo 'sya rāyā kadā dhiyaḥ karasi vājaratnāḥ ||
6.035.02a karhi svit tad indra yan nṛbhir nṝn vīrair vīrān nīḻayāse jayājīn |
6.035.02c tridhātu gā adhi jayāsi goṣv indra dyumnaṁ svarvad dhehy asme ||
6.035.03a karhi svit tad indra yaj jaritre viśvapsu brahma kṛṇavaḥ śaviṣṭha |
6.035.03c kadā dhiyo na niyuto yuvāse kadā gomaghā havanāni gacchāḥ ||
6.035.04a sa gomaghā jaritre aśvaścandrā vājaśravaso adhi dhehi pṛkṣaḥ |
6.035.04c pīpihīṣaḥ sudughām indra dhenum bharadvājeṣu suruco rurucyāḥ ||
6.035.05a tam ā nūnaṁ vṛjanam anyathā cic chūro yac chakra vi duro gṛṇīṣe |
6.035.05c mā nir araṁ śukradughasya dhenor āṅgirasān brahmaṇā vipra jinva ||

6.036.01a satrā madāsas tava viśvajanyāḥ satrā rāyo 'dha ye pārthivāsaḥ |
6.036.01c satrā vājānām abhavo vibhaktā yad deveṣu dhārayathā asuryam ||
6.036.02a anu pra yeje jana ojo asya satrā dadhire anu vīryāya |
6.036.02c syūmagṛbhe dudhaye 'rvate ca kratuṁ vṛñjanty api vṛtrahatye ||
6.036.03a taṁ sadhrīcīr ūtayo vṛṣṇyāni pauṁsyāni niyutaḥ saścur indram |
6.036.03c samudraṁ na sindhava ukthaśuṣmā uruvyacasaṁ gira ā viśanti ||
6.036.04a sa rāyas khām upa sṛjā gṛṇānaḥ puruścandrasya tvam indra vasvaḥ |
6.036.04c patir babhūthāsamo janānām eko viśvasya bhuvanasya rājā ||
6.036.05a sa tu śrudhi śrutyā yo duvoyur dyaur na bhūmābhi rāyo aryaḥ |
6.036.05c aso yathā naḥ śavasā cakāno yuge-yuge vayasā cekitānaḥ ||

6.037.01a arvāg rathaṁ viśvavāraṁ ta ugrendra yuktāso harayo vahantu |
6.037.01c kīriś cid dhi tvā havate svarvān ṛdhīmahi sadhamādas te adya ||
6.037.02a pro droṇe harayaḥ karmāgman punānāsa ṛjyanto abhūvan |
6.037.02c indro no asya pūrvyaḥ papīyād dyukṣo madasya somyasya rājā ||
6.037.03a āsasrāṇāsaḥ śavasānam acchendraṁ sucakre rathyāso aśvāḥ |
6.037.03c abhi śrava ṛjyanto vaheyur nū cin nu vāyor amṛtaṁ vi dasyet ||
6.037.04a variṣṭho asya dakṣiṇām iyartīndro maghonāṁ tuvikūrmitamaḥ |
6.037.04c yayā vajrivaḥ pariyāsy aṁho maghā ca dhṛṣṇo dayase vi sūrīn ||
6.037.05a indro vājasya sthavirasya dātendro gīrbhir vardhatāṁ vṛddhamahāḥ |
6.037.05c indro vṛtraṁ haniṣṭho astu satvā tā sūriḥ pṛṇati tūtujānaḥ ||

6.038.01a apād ita ud u naś citratamo mahīm bharṣad dyumatīm indrahūtim |
6.038.01c panyasīṁ dhītiṁ daivyasya yāmañ janasya rātiṁ vanate sudānuḥ ||
6.038.02a dūrāc cid ā vasato asya karṇā ghoṣād indrasya tanyati bruvāṇaḥ |
6.038.02c eyam enaṁ devahūtir vavṛtyān madryag indram iyam ṛcyamānā ||
6.038.03a taṁ vo dhiyā paramayā purājām ajaram indram abhy anūṣy arkaiḥ |
6.038.03c brahmā ca giro dadhire sam asmin mahām̐ś ca stomo adhi vardhad indre ||
6.038.04a vardhād yaṁ yajña uta soma indraṁ vardhād brahma gira ukthā ca manma |
6.038.04c vardhāhainam uṣaso yāmann aktor vardhān māsāḥ śarado dyāva indram ||
6.038.05a evā jajñānaṁ sahase asāmi vāvṛdhānaṁ rādhase ca śrutāya |
6.038.05c mahām ugram avase vipra nūnam ā vivāsema vṛtratūryeṣu ||

6.039.01a mandrasya kaver divyasya vahner vipramanmano vacanasya madhvaḥ |
6.039.01c apā nas tasya sacanasya deveṣo yuvasva gṛṇate goagrāḥ ||
6.039.02a ayam uśānaḥ pary adrim usrā ṛtadhītibhir ṛtayug yujānaḥ |
6.039.02c rujad arugṇaṁ vi valasya sānum paṇīm̐r vacobhir abhi yodhad indraḥ ||
6.039.03a ayaṁ dyotayad adyuto vy aktūn doṣā vastoḥ śarada indur indra |
6.039.03c imaṁ ketum adadhur nū cid ahnāṁ śucijanmana uṣasaś cakāra ||
6.039.04a ayaṁ rocayad aruco rucāno 'yaṁ vāsayad vy ṛtena pūrvīḥ |
6.039.04c ayam īyata ṛtayugbhir aśvaiḥ svarvidā nābhinā carṣaṇiprāḥ ||
6.039.05a nū gṛṇāno gṛṇate pratna rājann iṣaḥ pinva vasudeyāya pūrvīḥ |
6.039.05c apa oṣadhīr aviṣā vanāni gā arvato nṝn ṛcase rirīhi ||

6.040.01a indra piba tubhyaṁ suto madāyāva sya harī vi mucā sakhāyā |
6.040.01c uta pra gāya gaṇa ā niṣadyāthā yajñāya gṛṇate vayo dhāḥ ||
6.040.02a asya piba yasya jajñāna indra madāya kratve apibo virapśin |
6.040.02c tam u te gāvo nara āpo adrir induṁ sam ahyan pītaye sam asmai ||
6.040.03a samiddhe agnau suta indra soma ā tvā vahantu harayo vahiṣṭhāḥ |
6.040.03c tvāyatā manasā johavīmīndrā yāhi suvitāya mahe naḥ ||
6.040.04a ā yāhi śaśvad uśatā yayāthendra mahā manasā somapeyam |
6.040.04c upa brahmāṇi śṛṇava imā no 'thā te yajñas tanve vayo dhāt ||
6.040.05a yad indra divi pārye yad ṛdhag yad vā sve sadane yatra vāsi |
6.040.05c ato no yajñam avase niyutvān sajoṣāḥ pāhi girvaṇo marudbhiḥ ||

6.041.01a aheḻamāna upa yāhi yajñaṁ tubhyam pavanta indavaḥ sutāsaḥ |
6.041.01c gāvo na vajrin svam oko acchendrā gahi prathamo yajñiyānām ||
6.041.02a yā te kākut sukṛtā yā variṣṭhā yayā śaśvat pibasi madhva ūrmim |
6.041.02c tayā pāhi pra te adhvaryur asthāt saṁ te vajro vartatām indra gavyuḥ ||
6.041.03a eṣa drapso vṛṣabho viśvarūpa indrāya vṛṣṇe sam akāri somaḥ |
6.041.03c etam piba harivaḥ sthātar ugra yasyeśiṣe pradivi yas te annam ||
6.041.04a sutaḥ somo asutād indra vasyān ayaṁ śreyāñ cikituṣe raṇāya |
6.041.04c etaṁ titirva upa yāhi yajñaṁ tena viśvās taviṣīr ā pṛṇasva ||
6.041.05a hvayāmasi tvendra yāhy arvāṅ araṁ te somas tanve bhavāti |
6.041.05c śatakrato mādayasvā suteṣu prāsmām̐ ava pṛtanāsu pra vikṣu ||

6.042.01a praty asmai pipīṣate viśvāni viduṣe bhara |
6.042.01c araṁgamāya jagmaye 'paścāddaghvane nare ||
6.042.02a em enam pratyetana somebhiḥ somapātamam |
6.042.02c amatrebhir ṛjīṣiṇam indraṁ sutebhir indubhiḥ ||
6.042.03a yadī sutebhir indubhiḥ somebhiḥ pratibhūṣatha |
6.042.03c vedā viśvasya medhiro dhṛṣat taṁ-tam id eṣate ||
6.042.04a asmā-asmā id andhaso 'dhvaryo pra bharā sutam |
6.042.04c kuvit samasya jenyasya śardhato 'bhiśaster avasparat ||

6.043.01a yasya tyac chambaram made divodāsāya randhayaḥ |
6.043.01c ayaṁ sa soma indra te sutaḥ piba ||
6.043.02a yasya tīvrasutam madam madhyam antaṁ ca rakṣase |
6.043.02c ayaṁ sa soma indra te sutaḥ piba ||
6.043.03a yasya gā antar aśmano made dṛḻhā avāsṛjaḥ |
6.043.03c ayaṁ sa soma indra te sutaḥ piba ||
6.043.04a yasya mandāno andhaso māghonaṁ dadhiṣe śavaḥ |
6.043.04c ayaṁ sa soma indra te sutaḥ piba ||

6.044.01a yo rayivo rayiṁtamo yo dyumnair dyumnavattamaḥ |
6.044.01c somaḥ sutaḥ sa indra te 'sti svadhāpate madaḥ ||
6.044.02a yaḥ śagmas tuviśagma te rāyo dāmā matīnām |
6.044.02c somaḥ sutaḥ sa indra te 'sti svadhāpate madaḥ ||
6.044.03a yena vṛddho na śavasā turo na svābhir ūtibhiḥ |
6.044.03c somaḥ sutaḥ sa indra te 'sti svadhāpate madaḥ ||
6.044.04a tyam u vo aprahaṇaṁ gṛṇīṣe śavasas patim |
6.044.04c indraṁ viśvāsāhaṁ naram maṁhiṣṭhaṁ viśvacarṣaṇim ||
6.044.05a yaṁ vardhayantīd giraḥ patiṁ turasya rādhasaḥ |
6.044.05c tam in nv asya rodasī devī śuṣmaṁ saparyataḥ ||
6.044.06a tad va ukthasya barhaṇendrāyopastṛṇīṣaṇi |
6.044.06c vipo na yasyotayo vi yad rohanti sakṣitaḥ ||
6.044.07a avidad dakṣam mitro navīyān papāno devebhyo vasyo acait |
6.044.07c sasavān staulābhir dhautarībhir uruṣyā pāyur abhavat sakhibhyaḥ ||
6.044.08a ṛtasya pathi vedhā apāyi śriye manāṁsi devāso akran |
6.044.08c dadhāno nāma maho vacobhir vapur dṛśaye venyo vy āvaḥ ||
6.044.09a dyumattamaṁ dakṣaṁ dhehy asme sedhā janānām pūrvīr arātīḥ |
6.044.09c varṣīyo vayaḥ kṛṇuhi śacībhir dhanasya sātāv asmām̐ aviḍḍhi ||
6.044.10a indra tubhyam in maghavann abhūma vayaṁ dātre harivo mā vi venaḥ |
6.044.10c nakir āpir dadṛśe martyatrā kim aṅga radhracodanaṁ tvāhuḥ ||
6.044.11a mā jasvane vṛṣabha no rarīthā mā te revataḥ sakhye riṣāma |
6.044.11c pūrvīṣ ṭa indra niṣṣidho janeṣu jahy asuṣvīn pra vṛhāpṛṇataḥ ||
6.044.12a ud abhrāṇīva stanayann iyartīndro rādhāṁsy aśvyāni gavyā |
6.044.12c tvam asi pradivaḥ kārudhāyā mā tvādāmāna ā dabhan maghonaḥ ||
6.044.13a adhvaryo vīra pra mahe sutānām indrāya bhara sa hy asya rājā |
6.044.13c yaḥ pūrvyābhir uta nūtanābhir gīrbhir vāvṛdhe gṛṇatām ṛṣīṇām ||
6.044.14a asya made puru varpāṁsi vidvān indro vṛtrāṇy apratī jaghāna |
6.044.14c tam u pra hoṣi madhumantam asmai somaṁ vīrāya śipriṇe pibadhyai ||
6.044.15a pātā sutam indro astu somaṁ hantā vṛtraṁ vajreṇa mandasānaḥ |
6.044.15c gantā yajñam parāvataś cid acchā vasur dhīnām avitā kārudhāyāḥ ||
6.044.16a idaṁ tyat pātram indrapānam indrasya priyam amṛtam apāyi |
6.044.16c matsad yathā saumanasāya devaṁ vy asmad dveṣo yuyavad vy aṁhaḥ ||
6.044.17a enā mandāno jahi śūra śatrūñ jāmim ajāmim maghavann amitrān |
6.044.17c abhiṣeṇām̐ abhy ādediśānān parāca indra pra mṛṇā jahī ca ||
6.044.18a āsu ṣmā ṇo maghavann indra pṛtsv asmabhyam mahi varivaḥ sugaṁ kaḥ |
6.044.18c apāṁ tokasya tanayasya jeṣa indra sūrīn kṛṇuhi smā no ardham ||
6.044.19a ā tvā harayo vṛṣaṇo yujānā vṛṣarathāso vṛṣaraśmayo 'tyāḥ |
6.044.19c asmatrāñco vṛṣaṇo vajravāho vṛṣṇe madāya suyujo vahantu ||
6.044.20a ā te vṛṣan vṛṣaṇo droṇam asthur ghṛtapruṣo normayo madantaḥ |
6.044.20c indra pra tubhyaṁ vṛṣabhiḥ sutānāṁ vṛṣṇe bharanti vṛṣabhāya somam ||
6.044.21a vṛṣāsi divo vṛṣabhaḥ pṛthivyā vṛṣā sindhūnāṁ vṛṣabhaḥ stiyānām |
6.044.21c vṛṣṇe ta indur vṛṣabha pīpāya svādū raso madhupeyo varāya ||
6.044.22a ayaṁ devaḥ sahasā jāyamāna indreṇa yujā paṇim astabhāyat |
6.044.22c ayaṁ svasya pitur āyudhānīndur amuṣṇād aśivasya māyāḥ ||
6.044.23a ayam akṛṇod uṣasaḥ supatnīr ayaṁ sūrye adadhāj jyotir antaḥ |
6.044.23c ayaṁ tridhātu divi rocaneṣu triteṣu vindad amṛtaṁ nigūḻham ||
6.044.24a ayaṁ dyāvāpṛthivī vi ṣkabhāyad ayaṁ ratham ayunak saptaraśmim |
6.044.24c ayaṁ goṣu śacyā pakvam antaḥ somo dādhāra daśayantram utsam ||

6.045.01a ya ānayat parāvataḥ sunītī turvaśaṁ yadum |
6.045.01c indraḥ sa no yuvā sakhā ||
6.045.02a avipre cid vayo dadhad anāśunā cid arvatā |
6.045.02c indro jetā hitaṁ dhanam ||
6.045.03a mahīr asya praṇītayaḥ pūrvīr uta praśastayaḥ |
6.045.03c nāsya kṣīyanta ūtayaḥ ||
6.045.04a sakhāyo brahmavāhase 'rcata pra ca gāyata |
6.045.04c sa hi naḥ pramatir mahī ||
6.045.05a tvam ekasya vṛtrahann avitā dvayor asi |
6.045.05c utedṛśe yathā vayam ||
6.045.06a nayasīd v ati dviṣaḥ kṛṇoṣy ukthaśaṁsinaḥ |
6.045.06c nṛbhiḥ suvīra ucyase ||
6.045.07a brahmāṇam brahmavāhasaṁ gīrbhiḥ sakhāyam ṛgmiyam |
6.045.07c gāṁ na dohase huve ||
6.045.08a yasya viśvāni hastayor ūcur vasūni ni dvitā |
6.045.08c vīrasya pṛtanāṣahaḥ ||
6.045.09a vi dṛḻhāni cid adrivo janānāṁ śacīpate |
6.045.09c vṛha māyā anānata ||
6.045.10a tam u tvā satya somapā indra vājānām pate |
6.045.10c ahūmahi śravasyavaḥ ||
6.045.11a tam u tvā yaḥ purāsitha yo vā nūnaṁ hite dhane |
6.045.11c havyaḥ sa śrudhī havam ||
6.045.12a dhībhir arvadbhir arvato vājām̐ indra śravāyyān |
6.045.12c tvayā jeṣma hitaṁ dhanam ||
6.045.13a abhūr u vīra girvaṇo mahām̐ indra dhane hite |
6.045.13c bhare vitantasāyyaḥ ||
6.045.14a yā ta ūtir amitrahan makṣūjavastamāsati |
6.045.14c tayā no hinuhī ratham ||
6.045.15a sa rathena rathītamo 'smākenābhiyugvanā |
6.045.15c jeṣi jiṣṇo hitaṁ dhanam ||
6.045.16a ya eka it tam u ṣṭuhi kṛṣṭīnāṁ vicarṣaṇiḥ |
6.045.16c patir jajñe vṛṣakratuḥ ||
6.045.17a yo gṛṇatām id āsithāpir ūtī śivaḥ sakhā |
6.045.17c sa tvaṁ na indra mṛḻaya ||
6.045.18a dhiṣva vajraṁ gabhastyo rakṣohatyāya vajrivaḥ |
6.045.18c sāsahīṣṭhā abhi spṛdhaḥ ||
6.045.19a pratnaṁ rayīṇāṁ yujaṁ sakhāyaṁ kīricodanam |
6.045.19c brahmavāhastamaṁ huve ||
6.045.20a sa hi viśvāni pārthivām̐ eko vasūni patyate |
6.045.20c girvaṇastamo adhriguḥ ||
6.045.21a sa no niyudbhir ā pṛṇa kāmaṁ vājebhir aśvibhiḥ |
6.045.21c gomadbhir gopate dhṛṣat ||
6.045.22a tad vo gāya sute sacā puruhūtāya satvane |
6.045.22c śaṁ yad gave na śākine ||
6.045.23a na ghā vasur ni yamate dānaṁ vājasya gomataḥ |
6.045.23c yat sīm upa śravad giraḥ ||
6.045.24a kuvitsasya pra hi vrajaṁ gomantaṁ dasyuhā gamat |
6.045.24c śacībhir apa no varat ||
6.045.25a imā u tvā śatakrato 'bhi pra ṇonuvur giraḥ |
6.045.25c indra vatsaṁ na mātaraḥ ||
6.045.26a dūṇāśaṁ sakhyaṁ tava gaur asi vīra gavyate |
6.045.26c aśvo aśvāyate bhava ||
6.045.27a sa mandasvā hy andhaso rādhase tanvā mahe |
6.045.27c na stotāraṁ nide karaḥ ||
6.045.28a imā u tvā sute-sute nakṣante girvaṇo giraḥ |
6.045.28c vatsaṁ gāvo na dhenavaḥ ||
6.045.29a purūtamam purūṇāṁ stotṝṇāṁ vivāci |
6.045.29c vājebhir vājayatām ||
6.045.30a asmākam indra bhūtu te stomo vāhiṣṭho antamaḥ |
6.045.30c asmān rāye mahe hinu ||
6.045.31a adhi bṛbuḥ paṇīnāṁ varṣiṣṭhe mūrdhann asthāt |
6.045.31c uruḥ kakṣo na gāṅgyaḥ ||
6.045.32a yasya vāyor iva dravad bhadrā rātiḥ sahasriṇī |
6.045.32c sadyo dānāya maṁhate ||
6.045.33a tat su no viśve arya ā sadā gṛṇanti kāravaḥ |
6.045.33c bṛbuṁ sahasradātamaṁ sūriṁ sahasrasātamam ||

6.046.01a tvām id dhi havāmahe sātā vājasya kāravaḥ |
6.046.01c tvāṁ vṛtreṣv indra satpatiṁ naras tvāṁ kāṣṭhāsv arvataḥ ||
6.046.02a sa tvaṁ naś citra vajrahasta dhṛṣṇuyā mahaḥ stavāno adrivaḥ |
6.046.02c gām aśvaṁ rathyam indra saṁ kira satrā vājaṁ na jigyuṣe ||
6.046.03a yaḥ satrāhā vicarṣaṇir indraṁ taṁ hūmahe vayam |
6.046.03c sahasramuṣka tuvinṛmṇa satpate bhavā samatsu no vṛdhe ||
6.046.04a bādhase janān vṛṣabheva manyunā ghṛṣau mīḻha ṛcīṣama |
6.046.04c asmākam bodhy avitā mahādhane tanūṣv apsu sūrye ||
6.046.05a indra jyeṣṭhaṁ na ā bharam̐ ojiṣṭham papuri śravaḥ |
6.046.05c yeneme citra vajrahasta rodasī obhe suśipra prāḥ ||
6.046.06a tvām ugram avase carṣaṇīsahaṁ rājan deveṣu hūmahe |
6.046.06c viśvā su no vithurā pibdanā vaso 'mitrān suṣahān kṛdhi ||
6.046.07a yad indra nāhuṣīṣv ām̐ ojo nṛmṇaṁ ca kṛṣṭiṣu |
6.046.07c yad vā pañca kṣitīnāṁ dyumnam ā bhara satrā viśvāni pauṁsyā ||
6.046.08a yad vā tṛkṣau maghavan druhyāv ā jane yat pūrau kac ca vṛṣṇyam |
6.046.08c asmabhyaṁ tad rirīhi saṁ nṛṣāhye 'mitrān pṛtsu turvaṇe ||
6.046.09a indra tridhātu śaraṇaṁ trivarūthaṁ svastimat |
6.046.09c chardir yaccha maghavadbhyaś ca mahyaṁ ca yāvayā didyum ebhyaḥ ||
6.046.10a ye gavyatā manasā śatrum ādabhur abhipraghnanti dhṛṣṇuyā |
6.046.10c adha smā no maghavann indra girvaṇas tanūpā antamo bhava ||
6.046.11a adha smā no vṛdhe bhavendra nāyam avā yudhi |
6.046.11c yad antarikṣe patayanti parṇino didyavas tigmamūrdhānaḥ ||
6.046.12a yatra śūrāsas tanvo vitanvate priyā śarma pitṝṇām |
6.046.12c adha smā yaccha tanve tane ca chardir acittaṁ yāvaya dveṣaḥ ||
6.046.13a yad indra sarge arvataś codayāse mahādhane |
6.046.13c asamane adhvani vṛjine pathi śyenām̐ iva śravasyataḥ ||
6.046.14a sindhūm̐r iva pravaṇa āśuyā yato yadi klośam anu ṣvaṇi |
6.046.14c ā ye vayo na varvṛtaty āmiṣi gṛbhītā bāhvor gavi ||

6.047.01a svāduṣ kilāyam madhumām̐ utāyaṁ tīvraḥ kilāyaṁ rasavām̐ utāyam |
6.047.01c uto nv asya papivāṁsam indraṁ na kaś cana sahata āhaveṣu ||
6.047.02a ayaṁ svādur iha madiṣṭha āsa yasyendro vṛtrahatye mamāda |
6.047.02c purūṇi yaś cyautnā śambarasya vi navatiṁ nava ca dehyo han ||
6.047.03a ayam me pīta ud iyarti vācam ayam manīṣām uśatīm ajīgaḥ |
6.047.03c ayaṁ ṣaḻ urvīr amimīta dhīro na yābhyo bhuvanaṁ kac canāre ||
6.047.04a ayaṁ sa yo varimāṇam pṛthivyā varṣmāṇaṁ divo akṛṇod ayaṁ saḥ |
6.047.04c ayam pīyūṣaṁ tisṛṣu pravatsu somo dādhārorv antarikṣam ||
6.047.05a ayaṁ vidac citradṛśīkam arṇaḥ śukrasadmanām uṣasām anīke |
6.047.05c ayam mahān mahatā skambhanenod dyām astabhnād vṛṣabho marutvān ||
6.047.06a dhṛṣat piba kalaśe somam indra vṛtrahā śūra samare vasūnām |
6.047.06c mādhyaṁdine savana ā vṛṣasva rayisthāno rayim asmāsu dhehi ||
6.047.07a indra pra ṇaḥ puraeteva paśya pra no naya prataraṁ vasyo accha |
6.047.07c bhavā supāro atipārayo no bhavā sunītir uta vāmanītiḥ ||
6.047.08a uruṁ no lokam anu neṣi vidvān svarvaj jyotir abhayaṁ svasti |
6.047.08c ṛṣvā ta indra sthavirasya bāhū upa stheyāma śaraṇā bṛhantā ||
6.047.09a variṣṭhe na indra vandhure dhā vahiṣṭhayoḥ śatāvann aśvayor ā |
6.047.09c iṣam ā vakṣīṣāṁ varṣiṣṭhām mā nas tārīn maghavan rāyo aryaḥ ||
6.047.10a indra mṛḻa mahyaṁ jīvātum iccha codaya dhiyam ayaso na dhārām |
6.047.10c yat kiṁ cāhaṁ tvāyur idaṁ vadāmi taj juṣasva kṛdhi mā devavantam ||
6.047.11a trātāram indram avitāram indraṁ have-have suhavaṁ śūram indram |
6.047.11c hvayāmi śakram puruhūtam indraṁ svasti no maghavā dhātv indraḥ ||
6.047.12a indraḥ sutrāmā svavām̐ avobhiḥ sumṛḻīko bhavatu viśvavedāḥ |
6.047.12c bādhatāṁ dveṣo abhayaṁ kṛṇotu suvīryasya patayaḥ syāma ||
6.047.13a tasya vayaṁ sumatau yajñiyasyāpi bhadre saumanase syāma |
6.047.13c sa sutrāmā svavām̐ indro asme ārāc cid dveṣaḥ sanutar yuyotu ||
6.047.14a ava tve indra pravato normir giro brahmāṇi niyuto dhavante |
6.047.14c urū na rādhaḥ savanā purūṇy apo gā vajrin yuvase sam indūn ||
6.047.15a ka īṁ stavat kaḥ pṛṇāt ko yajāte yad ugram in maghavā viśvahāvet |
6.047.15c pādāv iva praharann anyam-anyaṁ kṛṇoti pūrvam aparaṁ śacībhiḥ ||
6.047.16a śṛṇve vīra ugram-ugraṁ damāyann anyam-anyam atinenīyamānaḥ |
6.047.16c edhamānadviḻ ubhayasya rājā coṣkūyate viśa indro manuṣyān ||
6.047.17a parā pūrveṣāṁ sakhyā vṛṇakti vitarturāṇo aparebhir eti |
6.047.17c anānubhūtīr avadhūnvānaḥ pūrvīr indraḥ śaradas tartarīti ||
6.047.18a rūpaṁ-rūpam pratirūpo babhūva tad asya rūpam praticakṣaṇāya |
6.047.18c indro māyābhiḥ pururūpa īyate yuktā hy asya harayaḥ śatā daśa ||
6.047.19a yujāno haritā rathe bhūri tvaṣṭeha rājati |
6.047.19c ko viśvāhā dviṣataḥ pakṣa āsata utāsīneṣu sūriṣu ||
6.047.20a agavyūti kṣetram āganma devā urvī satī bhūmir aṁhūraṇābhūt |
6.047.20c bṛhaspate pra cikitsā gaviṣṭāv itthā sate jaritra indra panthām ||
6.047.21a dive-dive sadṛśīr anyam ardhaṁ kṛṣṇā asedhad apa sadmano jāḥ |
6.047.21c ahan dāsā vṛṣabho vasnayantodavraje varcinaṁ śambaraṁ ca ||
6.047.22a prastoka in nu rādhasas ta indra daśa kośayīr daśa vājino 'dāt |
6.047.22c divodāsād atithigvasya rādhaḥ śāmbaraṁ vasu praty agrabhīṣma ||
6.047.23a daśāśvān daśa kośān daśa vastrādhibhojanā |
6.047.23c daśo hiraṇyapiṇḍān divodāsād asāniṣam ||
6.047.24a daśa rathān praṣṭimataḥ śataṁ gā atharvabhyaḥ |
6.047.24c aśvathaḥ pāyave 'dāt ||
6.047.25a mahi rādho viśvajanyaṁ dadhānān bharadvājān sārñjayo abhy ayaṣṭa ||
6.047.26a vanaspate vīḍvaṅgo hi bhūyā asmatsakhā prataraṇaḥ suvīraḥ |
6.047.26c gobhiḥ saṁnaddho asi vīḻayasvāsthātā te jayatu jetvāni ||
6.047.27a divas pṛthivyāḥ pary oja udbhṛtaṁ vanaspatibhyaḥ pary ābhṛtaṁ sahaḥ |
6.047.27c apām ojmānam pari gobhir āvṛtam indrasya vajraṁ haviṣā rathaṁ yaja ||
6.047.28a indrasya vajro marutām anīkam mitrasya garbho varuṇasya nābhiḥ |
6.047.28c semāṁ no havyadātiṁ juṣāṇo deva ratha prati havyā gṛbhāya ||
6.047.29a upa śvāsaya pṛthivīm uta dyām purutrā te manutāṁ viṣṭhitaṁ jagat |
6.047.29c sa dundubhe sajūr indreṇa devair dūrād davīyo apa sedha śatrūn ||
6.047.30a ā krandaya balam ojo na ā dhā niḥ ṣṭanihi duritā bādhamānaḥ |
6.047.30c apa protha dundubhe ducchunā ita indrasya muṣṭir asi vīḻayasva ||
6.047.31a āmūr aja pratyāvartayemāḥ ketumad dundubhir vāvadīti |
6.047.31c sam aśvaparṇāś caranti no naro 'smākam indra rathino jayantu ||

6.048.01a yajñā-yajñā vo agnaye girā-girā ca dakṣase |
6.048.01c pra-pra vayam amṛtaṁ jātavedasam priyam mitraṁ na śaṁsiṣam ||
6.048.02a ūrjo napātaṁ sa hināyam asmayur dāśema havyadātaye |
6.048.02c bhuvad vājeṣv avitā bhuvad vṛdha uta trātā tanūnām ||
6.048.03a vṛṣā hy agne ajaro mahān vibhāsy arciṣā |
6.048.03c ajasreṇa śociṣā śośucac chuce sudītibhiḥ su dīdihi ||
6.048.04a maho devān yajasi yakṣy ānuṣak tava kratvota daṁsanā |
6.048.04c arvācaḥ sīṁ kṛṇuhy agne 'vase rāsva vājota vaṁsva ||
6.048.05a yam āpo adrayo vanā garbham ṛtasya piprati |
6.048.05c sahasā yo mathito jāyate nṛbhiḥ pṛthivyā adhi sānavi ||
6.048.06a ā yaḥ paprau bhānunā rodasī ubhe dhūmena dhāvate divi |
6.048.06c tiras tamo dadṛśa ūrmyāsv ā śyāvāsv aruṣo vṛṣā śyāvā aruṣo vṛṣā ||
6.048.07a bṛhadbhir agne arcibhiḥ śukreṇa deva śociṣā |
6.048.07c bharadvāje samidhāno yaviṣṭhya revan naḥ śukra dīdihi dyumat pāvaka dīdihi ||
6.048.08a viśvāsāṁ gṛhapatir viśām asi tvam agne mānuṣīṇām |
6.048.08c śatam pūrbhir yaviṣṭha pāhy aṁhasaḥ sameddhāraṁ śataṁ himāḥ stotṛbhyo ye ca dadati ||
6.048.09a tvaṁ naś citra ūtyā vaso rādhāṁsi codaya |
6.048.09c asya rāyas tvam agne rathīr asi vidā gādhaṁ tuce tu naḥ ||
6.048.10a parṣi tokaṁ tanayam partṛbhiṣ ṭvam adabdhair aprayutvabhiḥ |
6.048.10c agne heḻāṁsi daivyā yuyodhi no 'devāni hvarāṁsi ca ||
6.048.11a ā sakhāyaḥ sabardughāṁ dhenum ajadhvam upa navyasā vacaḥ |
6.048.11c sṛjadhvam anapasphurām ||
6.048.12a yā śardhāya mārutāya svabhānave śravo 'mṛtyu dhukṣata |
6.048.12c yā mṛḻīke marutāṁ turāṇāṁ yā sumnair evayāvarī ||
6.048.13a bharadvājāyāva dhukṣata dvitā |
6.048.13b dhenuṁ ca viśvadohasam iṣaṁ ca viśvabhojasam ||
6.048.14a taṁ va indraṁ na sukratuṁ varuṇam iva māyinam |
6.048.14c aryamaṇaṁ na mandraṁ sṛprabhojasaṁ viṣṇuṁ na stuṣa ādiśe ||
6.048.15a tveṣaṁ śardho na mārutaṁ tuviṣvaṇy anarvāṇam pūṣaṇaṁ saṁ yathā śatā |
6.048.15c saṁ sahasrā kāriṣac carṣaṇibhya ām̐ āvir gūḻhā vasū karat suvedā no vasū karat ||
6.048.16a ā mā pūṣann upa drava śaṁsiṣaṁ nu te apikarṇa āghṛṇe |
6.048.16c aghā aryo arātayaḥ ||
6.048.17a mā kākambīram ud vṛho vanaspatim aśastīr vi hi nīnaśaḥ |
6.048.17c mota sūro aha evā cana grīvā ādadhate veḥ ||
6.048.18a dṛter iva te 'vṛkam astu sakhyam |
6.048.18b acchidrasya dadhanvataḥ supūrṇasya dadhanvataḥ ||
6.048.19a paro hi martyair asi samo devair uta śriyā |
6.048.19c abhi khyaḥ pūṣan pṛtanāsu nas tvam avā nūnaṁ yathā purā ||
6.048.20a vāmī vāmasya dhūtayaḥ praṇītir astu sūnṛtā |
6.048.20c devasya vā maruto martyasya vejānasya prayajyavaḥ ||
6.048.21a sadyaś cid yasya carkṛtiḥ pari dyāṁ devo naiti sūryaḥ |
6.048.21c tveṣaṁ śavo dadhire nāma yajñiyam maruto vṛtrahaṁ śavo jyeṣṭhaṁ vṛtrahaṁ śavaḥ ||
6.048.22a sakṛd dha dyaur ajāyata sakṛd bhūmir ajāyata |
6.048.22c pṛśnyā dugdhaṁ sakṛt payas tad anyo nānu jāyate ||

6.049.01a stuṣe janaṁ suvrataṁ navyasībhir gīrbhir mitrāvaruṇā sumnayantā |
6.049.01c ta ā gamantu ta iha śruvantu sukṣatrāso varuṇo mitro agniḥ ||
6.049.02a viśo-viśa īḍyam adhvareṣv adṛptakratum aratiṁ yuvatyoḥ |
6.049.02c divaḥ śiśuṁ sahasaḥ sūnum agniṁ yajñasya ketum aruṣaṁ yajadhyai ||
6.049.03a aruṣasya duhitarā virūpe stṛbhir anyā pipiśe sūro anyā |
6.049.03c mithasturā vicarantī pāvake manma śrutaṁ nakṣata ṛcyamāne ||
6.049.04a pra vāyum acchā bṛhatī manīṣā bṛhadrayiṁ viśvavāraṁ rathaprām |
6.049.04c dyutadyāmā niyutaḥ patyamānaḥ kaviḥ kavim iyakṣasi prayajyo ||
6.049.05a sa me vapuś chadayad aśvinor yo ratho virukmān manasā yujānaḥ |
6.049.05c yena narā nāsatyeṣayadhyai vartir yāthas tanayāya tmane ca ||
6.049.06a parjanyavātā vṛṣabhā pṛthivyāḥ purīṣāṇi jinvatam apyāni |
6.049.06c satyaśrutaḥ kavayo yasya gīrbhir jagataḥ sthātar jagad ā kṛṇudhvam ||
6.049.07a pāvīravī kanyā citrāyuḥ sarasvatī vīrapatnī dhiyaṁ dhāt |
6.049.07c gnābhir acchidraṁ śaraṇaṁ sajoṣā durādharṣaṁ gṛṇate śarma yaṁsat ||
6.049.08a pathas-pathaḥ paripatiṁ vacasyā kāmena kṛto abhy ānaḻ arkam |
6.049.08c sa no rāsac churudhaś candrāgrā dhiyaṁ-dhiyaṁ sīṣadhāti pra pūṣā ||
6.049.09a prathamabhājaṁ yaśasaṁ vayodhāṁ supāṇiṁ devaṁ sugabhastim ṛbhvam |
6.049.09c hotā yakṣad yajatam pastyānām agnis tvaṣṭāraṁ suhavaṁ vibhāvā ||
6.049.10a bhuvanasya pitaraṁ gīrbhir ābhī rudraṁ divā vardhayā rudram aktau |
6.049.10c bṛhantam ṛṣvam ajaraṁ suṣumnam ṛdhag ghuvema kavineṣitāsaḥ ||
6.049.11a ā yuvānaḥ kavayo yajñiyāso maruto ganta gṛṇato varasyām |
6.049.11c acitraṁ cid dhi jinvathā vṛdhanta itthā nakṣanto naro aṅgirasvat ||
6.049.12a pra vīrāya pra tavase turāyājā yūtheva paśurakṣir astam |
6.049.12c sa pispṛśati tanvi śrutasya stṛbhir na nākaṁ vacanasya vipaḥ ||
6.049.13a yo rajāṁsi vimame pārthivāni triś cid viṣṇur manave bādhitāya |
6.049.13c tasya te śarmann upadadyamāne rāyā madema tanvā tanā ca ||
6.049.14a tan no 'hir budhnyo adbhir arkais tat parvatas tat savitā cano dhāt |
6.049.14c tad oṣadhībhir abhi rātiṣāco bhagaḥ puraṁdhir jinvatu pra rāye ||
6.049.15a nu no rayiṁ rathyaṁ carṣaṇiprām puruvīram maha ṛtasya gopām |
6.049.15c kṣayaṁ dātājaraṁ yena janān spṛdho adevīr abhi ca kramāma viśa ādevīr abhy aśnavāma ||

6.050.01a huve vo devīm aditiṁ namobhir mṛḻīkāya varuṇam mitram agnim |
6.050.01c abhikṣadām aryamaṇaṁ suśevaṁ trātṝn devān savitāram bhagaṁ ca ||
6.050.02a sujyotiṣaḥ sūrya dakṣapitṝn anāgāstve sumaho vīhi devān |
6.050.02c dvijanmāno ya ṛtasāpaḥ satyāḥ svarvanto yajatā agnijihvāḥ ||
6.050.03a uta dyāvāpṛthivī kṣatram uru bṛhad rodasī śaraṇaṁ suṣumne |
6.050.03c mahas karatho varivo yathā no 'sme kṣayāya dhiṣaṇe anehaḥ ||
6.050.04a ā no rudrasya sūnavo namantām adyā hūtāso vasavo 'dhṛṣṭāḥ |
6.050.04c yad īm arbhe mahati vā hitāso bādhe maruto ahvāma devān ||
6.050.05a mimyakṣa yeṣu rodasī nu devī siṣakti pūṣā abhyardhayajvā |
6.050.05c śrutvā havam maruto yad dha yātha bhūmā rejante adhvani pravikte ||
6.050.06a abhi tyaṁ vīraṁ girvaṇasam arcendram brahmaṇā jaritar navena |
6.050.06c śravad id dhavam upa ca stavāno rāsad vājām̐ upa maho gṛṇānaḥ ||
6.050.07a omānam āpo mānuṣīr amṛktaṁ dhāta tokāya tanayāya śaṁ yoḥ |
6.050.07c yūyaṁ hi ṣṭhā bhiṣajo mātṛtamā viśvasya sthātur jagato janitrīḥ ||
6.050.08a ā no devaḥ savitā trāyamāṇo hiraṇyapāṇir yajato jagamyāt |
6.050.08c yo datravām̐ uṣaso na pratīkaṁ vyūrṇute dāśuṣe vāryāṇi ||
6.050.09a uta tvaṁ sūno sahaso no adyā devām̐ asminn adhvare vavṛtyāḥ |
6.050.09c syām ahaṁ te sadam id rātau tava syām agne 'vasā suvīraḥ ||
6.050.10a uta tyā me havam ā jagmyātaṁ nāsatyā dhībhir yuvam aṅga viprā |
6.050.10c atriṁ na mahas tamaso 'mumuktaṁ tūrvataṁ narā duritād abhīke ||
6.050.11a te no rāyo dyumato vājavato dātāro bhūta nṛvataḥ purukṣoḥ |
6.050.11c daśasyanto divyāḥ pārthivāso gojātā apyā mṛḻatā ca devāḥ ||
6.050.12a te no rudraḥ sarasvatī sajoṣā mīḻhuṣmanto viṣṇur mṛḻantu vāyuḥ |
6.050.12c ṛbhukṣā vājo daivyo vidhātā parjanyāvātā pipyatām iṣaṁ naḥ ||
6.050.13a uta sya devaḥ savitā bhago no 'pāṁ napād avatu dānu papriḥ |
6.050.13c tvaṣṭā devebhir janibhiḥ sajoṣā dyaur devebhiḥ pṛthivī samudraiḥ ||
6.050.14a uta no 'hir budhnyaḥ śṛṇotv aja ekapāt pṛthivī samudraḥ |
6.050.14c viśve devā ṛtāvṛdho huvānāḥ stutā mantrāḥ kaviśastā avantu ||
6.050.15a evā napāto mama tasya dhībhir bharadvājā abhy arcanty arkaiḥ |
6.050.15c gnā hutāso vasavo 'dhṛṣṭā viśve stutāso bhūtā yajatrāḥ ||

6.051.01a ud u tyac cakṣur mahi mitrayor ām̐ eti priyaṁ varuṇayor adabdham |
6.051.01c ṛtasya śuci darśatam anīkaṁ rukmo na diva uditā vy adyaut ||
6.051.02a veda yas trīṇi vidathāny eṣāṁ devānāṁ janma sanutar ā ca vipraḥ |
6.051.02c ṛju marteṣu vṛjinā ca paśyann abhi caṣṭe sūro arya evān ||
6.051.03a stuṣa u vo maha ṛtasya gopān aditim mitraṁ varuṇaṁ sujātān |
6.051.03c aryamaṇam bhagam adabdhadhītīn acchā voce sadhanyaḥ pāvakān ||
6.051.04a riśādasaḥ satpatīm̐r adabdhān maho rājñaḥ suvasanasya dātṝn |
6.051.04c yūnaḥ sukṣatrān kṣayato divo nṝn ādityān yāmy aditiṁ duvoyu ||
6.051.05a dyauṣ pitaḥ pṛthivi mātar adhrug agne bhrātar vasavo mṛḻatā naḥ |
6.051.05c viśva ādityā adite sajoṣā asmabhyaṁ śarma bahulaṁ vi yanta ||
6.051.06a mā no vṛkāya vṛkye samasmā aghāyate rīradhatā yajatrāḥ |
6.051.06c yūyaṁ hi ṣṭhā rathyo nas tanūnāṁ yūyaṁ dakṣasya vacaso babhūva ||
6.051.07a mā va eno anyakṛtam bhujema mā tat karma vasavo yac cayadhve |
6.051.07c viśvasya hi kṣayatha viśvadevāḥ svayaṁ ripus tanvaṁ rīriṣīṣṭa ||
6.051.08a nama id ugraṁ nama ā vivāse namo dādhāra pṛthivīm uta dyām |
6.051.08c namo devebhyo nama īśa eṣāṁ kṛtaṁ cid eno namasā vivāse ||
6.051.09a ṛtasya vo rathyaḥ pūtadakṣān ṛtasya pastyasado adabdhān |
6.051.09c tām̐ ā namobhir urucakṣaso nṝn viśvān va ā name maho yajatrāḥ ||
6.051.10a te hi śreṣṭhavarcasas ta u nas tiro viśvāni duritā nayanti |
6.051.10c sukṣatrāso varuṇo mitro agnir ṛtadhītayo vakmarājasatyāḥ ||
6.051.11a te na indraḥ pṛthivī kṣāma vardhan pūṣā bhago aditiḥ pañca janāḥ |
6.051.11c suśarmāṇaḥ svavasaḥ sunīthā bhavantu naḥ sutrātrāsaḥ sugopāḥ ||
6.051.12a nū sadmānaṁ divyaṁ naṁśi devā bhāradvājaḥ sumatiṁ yāti hotā |
6.051.12c āsānebhir yajamāno miyedhair devānāṁ janma vasūyur vavanda ||
6.051.13a apa tyaṁ vṛjinaṁ ripuṁ stenam agne durādhyam |
6.051.13c daviṣṭham asya satpate kṛdhī sugam ||
6.051.14a grāvāṇaḥ soma no hi kaṁ sakhitvanāya vāvaśuḥ |
6.051.14c jahī ny atriṇam paṇiṁ vṛko hi ṣaḥ ||
6.051.15a yūyaṁ hi ṣṭhā sudānava indrajyeṣṭhā abhidyavaḥ |
6.051.15c kartā no adhvann ā sugaṁ gopā amā ||
6.051.16a api panthām aganmahi svastigām anehasam |
6.051.16c yena viśvāḥ pari dviṣo vṛṇakti vindate vasu ||

6.052.01a na tad divā na pṛthivyānu manye na yajñena nota śamībhir ābhiḥ |
6.052.01c ubjantu taṁ subhvaḥ parvatāso ni hīyatām atiyājasya yaṣṭā ||
6.052.02a ati vā yo maruto manyate no brahma vā yaḥ kriyamāṇaṁ ninitsāt |
6.052.02c tapūṁṣi tasmai vṛjināni santu brahmadviṣam abhi taṁ śocatu dyauḥ ||
6.052.03a kim aṅga tvā brahmaṇaḥ soma gopāṁ kim aṅga tvāhur abhiśastipāṁ naḥ |
6.052.03c kim aṅga naḥ paśyasi nidyamānān brahmadviṣe tapuṣiṁ hetim asya ||
6.052.04a avantu mām uṣaso jāyamānā avantu mā sindhavaḥ pinvamānāḥ |
6.052.04c avantu mā parvatāso dhruvāso 'vantu mā pitaro devahūtau ||
6.052.05a viśvadānīṁ sumanasaḥ syāma paśyema nu sūryam uccarantam |
6.052.05c tathā karad vasupatir vasūnāṁ devām̐ ohāno 'vasāgamiṣṭhaḥ ||
6.052.06a indro nediṣṭham avasāgamiṣṭhaḥ sarasvatī sindhubhiḥ pinvamānā |
6.052.06c parjanyo na oṣadhībhir mayobhur agniḥ suśaṁsaḥ suhavaḥ piteva ||
6.052.07a viśve devāsa ā gata śṛṇutā ma imaṁ havam |
6.052.07c edam barhir ni ṣīdata ||
6.052.08a yo vo devā ghṛtasnunā havyena pratibhūṣati |
6.052.08c taṁ viśva upa gacchatha ||
6.052.09a upa naḥ sūnavo giraḥ śṛṇvantv amṛtasya ye |
6.052.09c sumṛḻīkā bhavantu naḥ ||
6.052.10a viśve devā ṛtāvṛdha ṛtubhir havanaśrutaḥ |
6.052.10c juṣantāṁ yujyam payaḥ ||
6.052.11a stotram indro marudgaṇas tvaṣṭṛmān mitro aryamā |
6.052.11c imā havyā juṣanta naḥ ||
6.052.12a imaṁ no agne adhvaraṁ hotar vayunaśo yaja |
6.052.12c cikitvān daivyaṁ janam ||
6.052.13a viśve devāḥ śṛṇutemaṁ havam me ye antarikṣe ya upa dyavi ṣṭha |
6.052.13c ye agnijihvā uta vā yajatrā āsadyāsmin barhiṣi mādayadhvam ||
6.052.14a viśve devā mama śṛṇvantu yajñiyā ubhe rodasī apāṁ napāc ca manma |
6.052.14c mā vo vacāṁsi paricakṣyāṇi vocaṁ sumneṣv id vo antamā madema ||
6.052.15a ye ke ca jmā mahino ahimāyā divo jajñire apāṁ sadhasthe |
6.052.15c te asmabhyam iṣaye viśvam āyuḥ kṣapa usrā varivasyantu devāḥ ||
6.052.16a agnīparjanyāv avataṁ dhiyam me 'smin have suhavā suṣṭutiṁ naḥ |
6.052.16c iḻām anyo janayad garbham anyaḥ prajāvatīr iṣa ā dhattam asme ||
6.052.17a stīrṇe barhiṣi samidhāne agnau sūktena mahā namasā vivāse |
6.052.17c asmin no adya vidathe yajatrā viśve devā haviṣi mādayadhvam ||

6.053.01a vayam u tvā pathas pate rathaṁ na vājasātaye |
6.053.01c dhiye pūṣann ayujmahi ||
6.053.02a abhi no naryaṁ vasu vīram prayatadakṣiṇam |
6.053.02c vāmaṁ gṛhapatiṁ naya ||
6.053.03a aditsantaṁ cid āghṛṇe pūṣan dānāya codaya |
6.053.03c paṇeś cid vi mradā manaḥ ||
6.053.04a vi patho vājasātaye cinuhi vi mṛdho jahi |
6.053.04c sādhantām ugra no dhiyaḥ ||
6.053.05a pari tṛndhi paṇīnām ārayā hṛdayā kave |
6.053.05c athem asmabhyaṁ randhaya ||
6.053.06a vi pūṣann ārayā tuda paṇer iccha hṛdi priyam |
6.053.06c athem asmabhyaṁ randhaya ||
6.053.07a ā rikha kikirā kṛṇu paṇīnāṁ hṛdayā kave |
6.053.07c athem asmabhyaṁ randhaya ||
6.053.08a yām pūṣan brahmacodanīm ārām bibharṣy āghṛṇe |
6.053.08c tayā samasya hṛdayam ā rikha kikirā kṛṇu ||
6.053.09a yā te aṣṭrā goopaśāghṛṇe paśusādhanī |
6.053.09c tasyās te sumnam īmahe ||
6.053.10a uta no goṣaṇiṁ dhiyam aśvasāṁ vājasām uta |
6.053.10c nṛvat kṛṇuhi vītaye ||

6.054.01a sam pūṣan viduṣā naya yo añjasānuśāsati |
6.054.01c ya evedam iti bravat ||
6.054.02a sam u pūṣṇā gamemahi yo gṛhām̐ abhiśāsati |
6.054.02c ima eveti ca bravat ||
6.054.03a pūṣṇaś cakraṁ na riṣyati na kośo 'va padyate |
6.054.03c no asya vyathate paviḥ ||
6.054.04a yo asmai haviṣāvidhan na tam pūṣāpi mṛṣyate |
6.054.04c prathamo vindate vasu ||
6.054.05a pūṣā gā anv etu naḥ pūṣā rakṣatv arvataḥ |
6.054.05c pūṣā vājaṁ sanotu naḥ ||
6.054.06a pūṣann anu pra gā ihi yajamānasya sunvataḥ |
6.054.06c asmākaṁ stuvatām uta ||
6.054.07a mākir neśan mākīṁ riṣan mākīṁ saṁ śāri kevaṭe |
6.054.07c athāriṣṭābhir ā gahi ||
6.054.08a śṛṇvantam pūṣaṇaṁ vayam iryam anaṣṭavedasam |
6.054.08c īśānaṁ rāya īmahe ||
6.054.09a pūṣan tava vrate vayaṁ na riṣyema kadā cana |
6.054.09c stotāras ta iha smasi ||
6.054.10a pari pūṣā parastād dhastaṁ dadhātu dakṣiṇam |
6.054.10c punar no naṣṭam ājatu ||

6.055.01a ehi vāṁ vimuco napād āghṛṇe saṁ sacāvahai |
6.055.01c rathīr ṛtasya no bhava ||
6.055.02a rathītamaṁ kapardinam īśānaṁ rādhaso mahaḥ |
6.055.02c rāyaḥ sakhāyam īmahe ||
6.055.03a rāyo dhārāsy āghṛṇe vaso rāśir ajāśva |
6.055.03c dhīvato-dhīvataḥ sakhā ||
6.055.04a pūṣaṇaṁ nv ajāśvam upa stoṣāma vājinam |
6.055.04c svasur yo jāra ucyate ||
6.055.05a mātur didhiṣum abravaṁ svasur jāraḥ śṛṇotu naḥ |
6.055.05c bhrātendrasya sakhā mama ||
6.055.06a ājāsaḥ pūṣaṇaṁ rathe niśṛmbhās te janaśriyam |
6.055.06c devaṁ vahantu bibhrataḥ ||

6.056.01a ya enam ādideśati karambhād iti pūṣaṇam |
6.056.01c na tena deva ādiśe ||
6.056.02a uta ghā sa rathītamaḥ sakhyā satpatir yujā |
6.056.02c indro vṛtrāṇi jighnate ||
6.056.03a utādaḥ paruṣe gavi sūraś cakraṁ hiraṇyayam |
6.056.03c ny airayad rathītamaḥ ||
6.056.04a yad adya tvā puruṣṭuta bravāma dasra mantumaḥ |
6.056.04c tat su no manma sādhaya ||
6.056.05a imaṁ ca no gaveṣaṇaṁ sātaye sīṣadho gaṇam |
6.056.05c ārāt pūṣann asi śrutaḥ ||
6.056.06a ā te svastim īmaha āreaghām upāvasum |
6.056.06c adyā ca sarvatātaye śvaś ca sarvatātaye ||

6.057.01a indrā nu pūṣaṇā vayaṁ sakhyāya svastaye |
6.057.01c huvema vājasātaye ||
6.057.02a somam anya upāsadat pātave camvoḥ sutam |
6.057.02c karambham anya icchati ||
6.057.03a ajā anyasya vahnayo harī anyasya sambhṛtā |
6.057.03c tābhyāṁ vṛtrāṇi jighnate ||
6.057.04a yad indro anayad rito mahīr apo vṛṣantamaḥ |
6.057.04c tatra pūṣābhavat sacā ||
6.057.05a tām pūṣṇaḥ sumatiṁ vayaṁ vṛkṣasya pra vayām iva |
6.057.05c indrasya cā rabhāmahe ||
6.057.06a ut pūṣaṇaṁ yuvāmahe 'bhīśūm̐r iva sārathiḥ |
6.057.06c mahyā indraṁ svastaye ||

6.058.01a śukraṁ te anyad yajataṁ te anyad viṣurūpe ahanī dyaur ivāsi |
6.058.01c viśvā hi māyā avasi svadhāvo bhadrā te pūṣann iha rātir astu ||
6.058.02a ajāśvaḥ paśupā vājapastyo dhiyaṁjinvo bhuvane viśve arpitaḥ |
6.058.02c aṣṭrām pūṣā śithirām udvarīvṛjat saṁcakṣāṇo bhuvanā deva īyate ||
6.058.03a yās te pūṣan nāvo antaḥ samudre hiraṇyayīr antarikṣe caranti |
6.058.03c tābhir yāsi dūtyāṁ sūryasya kāmena kṛta śrava icchamānaḥ ||
6.058.04a pūṣā subandhur diva ā pṛthivyā iḻas patir maghavā dasmavarcāḥ |
6.058.04c yaṁ devāso adaduḥ sūryāyai kāmena kṛtaṁ tavasaṁ svañcam ||

6.059.01a pra nu vocā suteṣu vāṁ vīryā yāni cakrathuḥ |
6.059.01c hatāso vām pitaro devaśatrava indrāgnī jīvatho yuvam ||
6.059.02a baḻ itthā mahimā vām indrāgnī paniṣṭha ā |
6.059.02c samāno vāṁ janitā bhrātarā yuvaṁ yamāv ihehamātarā ||
6.059.03a okivāṁsā sute sacām̐ aśvā saptī ivādane |
6.059.03c indrā nv agnī avaseha vajriṇā vayaṁ devā havāmahe ||
6.059.04a ya indrāgnī suteṣu vāṁ stavat teṣv ṛtāvṛdhā |
6.059.04c joṣavākaṁ vadataḥ pajrahoṣiṇā na devā bhasathaś cana ||
6.059.05a indrāgnī ko asya vāṁ devau martaś ciketati |
6.059.05c viṣūco aśvān yuyujāna īyata ekaḥ samāna ā rathe ||
6.059.06a indrāgnī apād iyam pūrvāgāt padvatībhyaḥ |
6.059.06c hitvī śiro jihvayā vāvadac carat triṁśat padā ny akramīt ||
6.059.07a indrāgnī ā hi tanvate naro dhanvāni bāhvoḥ |
6.059.07c mā no asmin mahādhane parā varktaṁ gaviṣṭiṣu ||
6.059.08a indrāgnī tapanti māghā aryo arātayaḥ |
6.059.08c apa dveṣāṁsy ā kṛtaṁ yuyutaṁ sūryād adhi ||
6.059.09a indrāgnī yuvor api vasu divyāni pārthivā |
6.059.09c ā na iha pra yacchataṁ rayiṁ viśvāyupoṣasam ||
6.059.10a indrāgnī ukthavāhasā stomebhir havanaśrutā |
6.059.10c viśvābhir gīrbhir ā gatam asya somasya pītaye ||

6.060.01a śnathad vṛtram uta sanoti vājam indrā yo agnī sahurī saparyāt |
6.060.01c irajyantā vasavyasya bhūreḥ sahastamā sahasā vājayantā ||
6.060.02a tā yodhiṣṭam abhi gā indra nūnam apaḥ svar uṣaso agna ūḻhāḥ |
6.060.02c diśaḥ svar uṣasa indra citrā apo gā agne yuvase niyutvān ||
6.060.03a ā vṛtrahaṇā vṛtrahabhiḥ śuṣmair indra yātaṁ namobhir agne arvāk |
6.060.03c yuvaṁ rādhobhir akavebhir indrāgne asme bhavatam uttamebhiḥ ||
6.060.04a tā huve yayor idam papne viśvam purā kṛtam |
6.060.04c indrāgnī na mardhataḥ ||
6.060.05a ugrā vighaninā mṛdha indrāgnī havāmahe |
6.060.05c tā no mṛḻāta īdṛśe ||
6.060.06a hato vṛtrāṇy āryā hato dāsāni satpatī |
6.060.06c hato viśvā apa dviṣaḥ ||
6.060.07a indrāgnī yuvām ime 'bhi stomā anūṣata |
6.060.07c pibataṁ śambhuvā sutam ||
6.060.08a yā vāṁ santi puruspṛho niyuto dāśuṣe narā |
6.060.08c indrāgnī tābhir ā gatam ||
6.060.09a tābhir ā gacchataṁ naropedaṁ savanaṁ sutam |
6.060.09c indrāgnī somapītaye ||
6.060.10a tam īḻiṣva yo arciṣā vanā viśvā pariṣvajat |
6.060.10c kṛṣṇā kṛṇoti jihvayā ||
6.060.11a ya iddha āvivāsati sumnam indrasya martyaḥ |
6.060.11c dyumnāya sutarā apaḥ ||
6.060.12a tā no vājavatīr iṣa āśūn pipṛtam arvataḥ |
6.060.12c indram agniṁ ca voḻhave ||
6.060.13a ubhā vām indrāgnī āhuvadhyā ubhā rādhasaḥ saha mādayadhyai |
6.060.13c ubhā dātārāv iṣāṁ rayīṇām ubhā vājasya sātaye huve vām ||
6.060.14a ā no gavyebhir aśvyair vasavyair upa gacchatam |
6.060.14c sakhāyau devau sakhyāya śambhuvendrāgnī tā havāmahe ||
6.060.15a indrāgnī śṛṇutaṁ havaṁ yajamānasya sunvataḥ |
6.060.15c vītaṁ havyāny ā gatam pibataṁ somyam madhu ||

6.061.01a iyam adadād rabhasam ṛṇacyutaṁ divodāsaṁ vadhryaśvāya dāśuṣe |
6.061.01c yā śaśvantam ācakhādāvasam paṇiṁ tā te dātrāṇi taviṣā sarasvati ||
6.061.02a iyaṁ śuṣmebhir bisakhā ivārujat sānu girīṇāṁ taviṣebhir ūrmibhiḥ |
6.061.02c pārāvataghnīm avase suvṛktibhiḥ sarasvatīm ā vivāsema dhītibhiḥ ||
6.061.03a sarasvati devanido ni barhaya prajāṁ viśvasya bṛsayasya māyinaḥ |
6.061.03c uta kṣitibhyo 'vanīr avindo viṣam ebhyo asravo vājinīvati ||
6.061.04a pra ṇo devī sarasvatī vājebhir vājinīvatī |
6.061.04c dhīnām avitry avatu ||
6.061.05a yas tvā devi sarasvaty upabrūte dhane hite |
6.061.05c indraṁ na vṛtratūrye ||
6.061.06a tvaṁ devi sarasvaty avā vājeṣu vājini |
6.061.06c radā pūṣeva naḥ sanim ||
6.061.07a uta syā naḥ sarasvatī ghorā hiraṇyavartaniḥ |
6.061.07c vṛtraghnī vaṣṭi suṣṭutim ||
6.061.08a yasyā ananto ahrutas tveṣaś cariṣṇur arṇavaḥ |
6.061.08c amaś carati roruvat ||
6.061.09a sā no viśvā ati dviṣaḥ svasṝr anyā ṛtāvarī |
6.061.09c atann aheva sūryaḥ ||
6.061.10a uta naḥ priyā priyāsu saptasvasā sujuṣṭā |
6.061.10c sarasvatī stomyā bhūt ||
6.061.11a āpapruṣī pārthivāny uru rajo antarikṣam |
6.061.11c sarasvatī nidas pātu ||
6.061.12a triṣadhasthā saptadhātuḥ pañca jātā vardhayantī |
6.061.12c vāje-vāje havyā bhūt ||
6.061.13a pra yā mahimnā mahināsu cekite dyumnebhir anyā apasām apastamā |
6.061.13c ratha iva bṛhatī vibhvane kṛtopastutyā cikituṣā sarasvatī ||
6.061.14a sarasvaty abhi no neṣi vasyo māpa spharīḥ payasā mā na ā dhak |
6.061.14c juṣasva naḥ sakhyā veśyā ca mā tvat kṣetrāṇy araṇāni ganma ||

6.062.01a stuṣe narā divo asya prasantāśvinā huve jaramāṇo arkaiḥ |
6.062.01c yā sadya usrā vyuṣi jmo antān yuyūṣataḥ pary urū varāṁsi ||
6.062.02a tā yajñam ā śucibhiś cakramāṇā rathasya bhānuṁ rurucū rajobhiḥ |
6.062.02c purū varāṁsy amitā mimānāpo dhanvāny ati yātho ajrān ||
6.062.03a tā ha tyad vartir yad aradhram ugretthā dhiya ūhathuḥ śaśvad aśvaiḥ |
6.062.03c manojavebhir iṣiraiḥ śayadhyai pari vyathir dāśuṣo martyasya ||
6.062.04a tā navyaso jaramāṇasya manmopa bhūṣato yuyujānasaptī |
6.062.04c śubham pṛkṣam iṣam ūrjaṁ vahantā hotā yakṣat pratno adhrug yuvānā ||
6.062.05a tā valgū dasrā puruśākatamā pratnā navyasā vacasā vivāse |
6.062.05c yā śaṁsate stuvate śambhaviṣṭhā babhūvatur gṛṇate citrarātī ||
6.062.06a tā bhujyuṁ vibhir adbhyaḥ samudrāt tugrasya sūnum ūhathū rajobhiḥ |
6.062.06c areṇubhir yojanebhir bhujantā patatribhir arṇaso nir upasthāt ||
6.062.07a vi jayuṣā rathyā yātam adriṁ śrutaṁ havaṁ vṛṣaṇā vadhrimatyāḥ |
6.062.07c daśasyantā śayave pipyathur gām iti cyavānā sumatim bhuraṇyū ||
6.062.08a yad rodasī pradivo asti bhūmā heḻo devānām uta martyatrā |
6.062.08c tad ādityā vasavo rudriyāso rakṣoyuje tapur aghaṁ dadhāta ||
6.062.09a ya īṁ rājānāv ṛtuthā vidadhad rajaso mitro varuṇaś ciketat |
6.062.09c gambhīrāya rakṣase hetim asya droghāya cid vacasa ānavāya ||
6.062.10a antaraiś cakrais tanayāya vartir dyumatā yātaṁ nṛvatā rathena |
6.062.10c sanutyena tyajasā martyasya vanuṣyatām api śīrṣā vavṛktam ||
6.062.11a ā paramābhir uta madhyamābhir niyudbhir yātam avamābhir arvāk |
6.062.11c dṛḻhasya cid gomato vi vrajasya duro vartaṁ gṛṇate citrarātī ||

6.063.01a kva tyā valgū puruhūtādya dūto na stomo 'vidan namasvān |
6.063.01c ā yo arvāṅ nāsatyā vavarta preṣṭhā hy asatho asya manman ||
6.063.02a aram me gantaṁ havanāyāsmai gṛṇānā yathā pibātho andhaḥ |
6.063.02c pari ha tyad vartir yātho riṣo na yat paro nāntaras tuturyāt ||
6.063.03a akāri vām andhaso varīmann astāri barhiḥ suprāyaṇatamam |
6.063.03c uttānahasto yuvayur vavandā vāṁ nakṣanto adraya āñjan ||
6.063.04a ūrdhvo vām agnir adhvareṣv asthāt pra rātir eti jūrṇinī ghṛtācī |
6.063.04c pra hotā gūrtamanā urāṇo 'yukta yo nāsatyā havīman ||
6.063.05a adhi śriye duhitā sūryasya rathaṁ tasthau purubhujā śatotim |
6.063.05c pra māyābhir māyinā bhūtam atra narā nṛtū janiman yajñiyānām ||
6.063.06a yuvaṁ śrībhir darśatābhir ābhiḥ śubhe puṣṭim ūhathuḥ sūryāyāḥ |
6.063.06c pra vāṁ vayo vapuṣe 'nu paptan nakṣad vāṇī suṣṭutā dhiṣṇyā vām ||
6.063.07a ā vāṁ vayo 'śvāso vahiṣṭhā abhi prayo nāsatyā vahantu |
6.063.07c pra vāṁ ratho manojavā asarjīṣaḥ pṛkṣa iṣidho anu pūrvīḥ ||
6.063.08a puru hi vām purubhujā deṣṇaṁ dhenuṁ na iṣam pinvatam asakrām |
6.063.08c stutaś ca vām mādhvī suṣṭutiś ca rasāś ca ye vām anu rātim agman ||
6.063.09a uta ma ṛjre purayasya raghvī sumīḻhe śatam peruke ca pakvā |
6.063.09c śāṇḍo dād dhiraṇinaḥ smaddiṣṭīn daśa vaśāso abhiṣāca ṛṣvān ||
6.063.10a saṁ vāṁ śatā nāsatyā sahasrāśvānām purupanthā gire dāt |
6.063.10c bharadvājāya vīra nū gire dād dhatā rakṣāṁsi purudaṁsasā syuḥ ||
6.063.11a ā vāṁ sumne variman sūribhiḥ ṣyām ||

6.064.01a ud u śriya uṣaso rocamānā asthur apāṁ normayo ruśantaḥ |
6.064.01c kṛṇoti viśvā supathā sugāny abhūd u vasvī dakṣiṇā maghonī ||
6.064.02a bhadrā dadṛkṣa urviyā vi bhāsy ut te śocir bhānavo dyām apaptan |
6.064.02c āvir vakṣaḥ kṛṇuṣe śumbhamānoṣo devi rocamānā mahobhiḥ ||
6.064.03a vahanti sīm aruṇāso ruśanto gāvaḥ subhagām urviyā prathānām |
6.064.03c apejate śūro asteva śatrūn bādhate tamo ajiro na voḻhā ||
6.064.04a sugota te supathā parvateṣv avāte apas tarasi svabhāno |
6.064.04c sā na ā vaha pṛthuyāmann ṛṣve rayiṁ divo duhitar iṣayadhyai ||
6.064.05a sā vaha yokṣabhir avātoṣo varaṁ vahasi joṣam anu |
6.064.05c tvaṁ divo duhitar yā ha devī pūrvahūtau maṁhanā darśatā bhūḥ ||
6.064.06a ut te vayaś cid vasater apaptan naraś ca ye pitubhājo vyuṣṭau |
6.064.06c amā sate vahasi bhūri vāmam uṣo devi dāśuṣe martyāya ||

6.065.01a eṣā syā no duhitā divojāḥ kṣitīr ucchantī mānuṣīr ajīgaḥ |
6.065.01c yā bhānunā ruśatā rāmyāsv ajñāyi tiras tamasaś cid aktūn ||
6.065.02a vi tad yayur aruṇayugbhir aśvaiś citram bhānty uṣasaś candrarathāḥ |
6.065.02c agraṁ yajñasya bṛhato nayantīr vi tā bādhante tama ūrmyāyāḥ ||
6.065.03a śravo vājam iṣam ūrjaṁ vahantīr ni dāśuṣa uṣaso martyāya |
6.065.03c maghonīr vīravat patyamānā avo dhāta vidhate ratnam adya ||
6.065.04a idā hi vo vidhate ratnam astīdā vīrāya dāśuṣa uṣāsaḥ |
6.065.04c idā viprāya jarate yad ukthā ni ṣma māvate vahathā purā cit ||
6.065.05a idā hi ta uṣo adrisāno gotrā gavām aṅgiraso gṛṇanti |
6.065.05c vy arkeṇa bibhidur brahmaṇā ca satyā nṛṇām abhavad devahūtiḥ ||
6.065.06a ucchā divo duhitaḥ pratnavan no bharadvājavad vidhate maghoni |
6.065.06c suvīraṁ rayiṁ gṛṇate rirīhy urugāyam adhi dhehi śravo naḥ ||

6.066.01a vapur nu tac cikituṣe cid astu samānaṁ nāma dhenu patyamānam |
6.066.01c marteṣv anyad dohase pīpāya sakṛc chukraṁ duduhe pṛśnir ūdhaḥ ||
6.066.02a ye agnayo na śośucann idhānā dvir yat trir maruto vāvṛdhanta |
6.066.02c areṇavo hiraṇyayāsa eṣāṁ sākaṁ nṛmṇaiḥ pauṁsyebhiś ca bhūvan ||
6.066.03a rudrasya ye mīḻhuṣaḥ santi putrā yām̐ś co nu dādhṛvir bharadhyai |
6.066.03c vide hi mātā maho mahī ṣā set pṛśniḥ subhve garbham ādhāt ||
6.066.04a na ya īṣante januṣo 'yā nv antaḥ santo 'vadyāni punānāḥ |
6.066.04c nir yad duhre śucayo 'nu joṣam anu śriyā tanvam ukṣamāṇāḥ ||
6.066.05a makṣū na yeṣu dohase cid ayā ā nāma dhṛṣṇu mārutaṁ dadhānāḥ |
6.066.05c na ye staunā ayāso mahnā nū cit sudānur ava yāsad ugrān ||
6.066.06a ta id ugrāḥ śavasā dhṛṣṇuṣeṇā ubhe yujanta rodasī sumeke |
6.066.06c adha smaiṣu rodasī svaśocir āmavatsu tasthau na rokaḥ ||
6.066.07a aneno vo maruto yāmo astv anaśvaś cid yam ajaty arathīḥ |
6.066.07c anavaso anabhīśū rajastūr vi rodasī pathyā yāti sādhan ||
6.066.08a nāsya vartā na tarutā nv asti maruto yam avatha vājasātau |
6.066.08c toke vā goṣu tanaye yam apsu sa vrajaṁ dartā pārye adha dyoḥ ||
6.066.09a pra citram arkaṁ gṛṇate turāya mārutāya svatavase bharadhvam |
6.066.09c ye sahāṁsi sahasā sahante rejate agne pṛthivī makhebhyaḥ ||
6.066.10a tviṣīmanto adhvarasyeva didyut tṛṣucyavaso juhvo nāgneḥ |
6.066.10c arcatrayo dhunayo na vīrā bhrājajjanmāno maruto adhṛṣṭāḥ ||
6.066.11a taṁ vṛdhantam mārutam bhrājadṛṣṭiṁ rudrasya sūnuṁ havasā vivāse |
6.066.11c divaḥ śardhāya śucayo manīṣā girayo nāpa ugrā aspṛdhran ||

6.067.01a viśveṣāṁ vaḥ satāṁ jyeṣṭhatamā gīrbhir mitrāvaruṇā vāvṛdhadhyai |
6.067.01c saṁ yā raśmeva yamatur yamiṣṭhā dvā janām̐ asamā bāhubhiḥ svaiḥ ||
6.067.02a iyam mad vām pra stṛṇīte manīṣopa priyā namasā barhir accha |
6.067.02c yantaṁ no mitrāvaruṇāv adhṛṣṭaṁ chardir yad vāṁ varūthyaṁ sudānū ||
6.067.03a ā yātam mitrāvaruṇā suśasty upa priyā namasā hūyamānā |
6.067.03c saṁ yāv apnaḥstho apaseva janāñ chrudhīyataś cid yatatho mahitvā ||
6.067.04a aśvā na yā vājinā pūtabandhū ṛtā yad garbham aditir bharadhyai |
6.067.04c pra yā mahi mahāntā jāyamānā ghorā martāya ripave ni dīdhaḥ ||
6.067.05a viśve yad vām maṁhanā mandamānāḥ kṣatraṁ devāso adadhuḥ sajoṣāḥ |
6.067.05c pari yad bhūtho rodasī cid urvī santi spaśo adabdhāso amūrāḥ ||
6.067.06a tā hi kṣatraṁ dhārayethe anu dyūn dṛṁhethe sānum upamād iva dyoḥ |
6.067.06c dṛḻho nakṣatra uta viśvadevo bhūmim ātān dyāṁ dhāsināyoḥ ||
6.067.07a tā vigraṁ dhaithe jaṭharam pṛṇadhyā ā yat sadma sabhṛtayaḥ pṛṇanti |
6.067.07c na mṛṣyante yuvatayo 'vātā vi yat payo viśvajinvā bharante ||
6.067.08a tā jihvayā sadam edaṁ sumedhā ā yad vāṁ satyo aratir ṛte bhūt |
6.067.08c tad vām mahitvaṁ ghṛtānnāv astu yuvaṁ dāśuṣe vi cayiṣṭam aṁhaḥ ||
6.067.09a pra yad vām mitrāvaruṇā spūrdhan priyā dhāma yuvadhitā minanti |
6.067.09c na ye devāsa ohasā na martā ayajñasāco apyo na putrāḥ ||
6.067.10a vi yad vācaṁ kīstāso bharante śaṁsanti ke cin nivido manānāḥ |
6.067.10c ād vām bravāma satyāny ukthā nakir devebhir yatatho mahitvā ||
6.067.11a avor itthā vāṁ chardiṣo abhiṣṭau yuvor mitrāvaruṇāv askṛdhoyu |
6.067.11c anu yad gāvaḥ sphurān ṛjipyaṁ dhṛṣṇuṁ yad raṇe vṛṣaṇaṁ yunajan ||

6.068.01a śruṣṭī vāṁ yajña udyataḥ sajoṣā manuṣvad vṛktabarhiṣo yajadhyai |
6.068.01c ā ya indrāvaruṇāv iṣe adya mahe sumnāya maha āvavartat ||
6.068.02a tā hi śreṣṭhā devatātā tujā śūrāṇāṁ śaviṣṭhā tā hi bhūtam |
6.068.02c maghonām maṁhiṣṭhā tuviśuṣma ṛtena vṛtraturā sarvasenā ||
6.068.03a tā gṛṇīhi namasyebhiḥ śūṣaiḥ sumnebhir indrāvaruṇā cakānā |
6.068.03c vajreṇānyaḥ śavasā hanti vṛtraṁ siṣakty anyo vṛjaneṣu vipraḥ ||
6.068.04a gnāś ca yan naraś ca vāvṛdhanta viśve devāso narāṁ svagūrtāḥ |
6.068.04c praibhya indrāvaruṇā mahitvā dyauś ca pṛthivi bhūtam urvī ||
6.068.05a sa it sudānuḥ svavām̐ ṛtāvendrā yo vāṁ varuṇa dāśati tman |
6.068.05c iṣā sa dviṣas tared dāsvān vaṁsad rayiṁ rayivataś ca janān ||
6.068.06a yaṁ yuvaṁ dāśvadhvarāya devā rayiṁ dhattho vasumantam purukṣum |
6.068.06c asme sa indrāvaruṇāv api ṣyāt pra yo bhanakti vanuṣām aśastīḥ ||
6.068.07a uta naḥ sutrātro devagopāḥ sūribhya indrāvaruṇā rayiḥ ṣyāt |
6.068.07c yeṣāṁ śuṣmaḥ pṛtanāsu sāhvān pra sadyo dyumnā tirate taturiḥ ||
6.068.08a nū na indrāvaruṇā gṛṇānā pṛṅktaṁ rayiṁ sauśravasāya devā |
6.068.08c itthā gṛṇanto mahinasya śardho 'po na nāvā duritā tarema ||
6.068.09a pra samrāje bṛhate manma nu priyam arca devāya varuṇāya saprathaḥ |
6.068.09c ayaṁ ya urvī mahinā mahivrataḥ kratvā vibhāty ajaro na śociṣā ||
6.068.10a indrāvaruṇā sutapāv imaṁ sutaṁ somam pibatam madyaṁ dhṛtavratā |
6.068.10c yuvo ratho adhvaraṁ devavītaye prati svasaram upa yāti pītaye ||
6.068.11a indrāvaruṇā madhumattamasya vṛṣṇaḥ somasya vṛṣaṇā vṛṣethām |
6.068.11c idaṁ vām andhaḥ pariṣiktam asme āsadyāsmin barhiṣi mādayethām ||

6.069.01a saṁ vāṁ karmaṇā sam iṣā hinomīndrāviṣṇū apasas pāre asya |
6.069.01c juṣethāṁ yajñaṁ draviṇaṁ ca dhattam ariṣṭair naḥ pathibhiḥ pārayantā ||
6.069.02a yā viśvāsāṁ janitārā matīnām indrāviṣṇū kalaśā somadhānā |
6.069.02c pra vāṁ giraḥ śasyamānā avantu pra stomāso gīyamānāso arkaiḥ ||
6.069.03a indrāviṣṇū madapatī madānām ā somaṁ yātaṁ draviṇo dadhānā |
6.069.03c saṁ vām añjantv aktubhir matīnāṁ saṁ stomāsaḥ śasyamānāsa ukthaiḥ ||
6.069.04a ā vām aśvāso abhimātiṣāha indrāviṣṇū sadhamādo vahantu |
6.069.04c juṣethāṁ viśvā havanā matīnām upa brahmāṇi śṛṇutaṁ giro me ||
6.069.05a indrāviṣṇū tat panayāyyaṁ vāṁ somasya mada uru cakramāthe |
6.069.05c akṛṇutam antarikṣaṁ varīyo 'prathataṁ jīvase no rajāṁsi ||
6.069.06a indrāviṣṇū haviṣā vāvṛdhānāgrādvānā namasā rātahavyā |
6.069.06c ghṛtāsutī draviṇaṁ dhattam asme samudraḥ sthaḥ kalaśaḥ somadhānaḥ ||
6.069.07a indrāviṣṇū pibatam madhvo asya somasya dasrā jaṭharam pṛṇethām |
6.069.07c ā vām andhāṁsi madirāṇy agmann upa brahmāṇi śṛṇutaṁ havam me ||
6.069.08a ubhā jigyathur na parā jayethe na parā jigye kataraś canainoḥ |
6.069.08c indraś ca viṣṇo yad apaspṛdhethāṁ tredhā sahasraṁ vi tad airayethām ||

6.070.01a ghṛtavatī bhuvanānām abhiśriyorvī pṛthvī madhudughe supeśasā |
6.070.01c dyāvāpṛthivī varuṇasya dharmaṇā viṣkabhite ajare bhūriretasā ||
6.070.02a asaścantī bhūridhāre payasvatī ghṛtaṁ duhāte sukṛte śucivrate |
6.070.02c rājantī asya bhuvanasya rodasī asme retaḥ siñcataṁ yan manurhitam ||
6.070.03a yo vām ṛjave kramaṇāya rodasī marto dadāśa dhiṣaṇe sa sādhati |
6.070.03c pra prajābhir jāyate dharmaṇas pari yuvoḥ siktā viṣurūpāṇi savratā ||
6.070.04a ghṛtena dyāvāpṛthivī abhīvṛte ghṛtaśriyā ghṛtapṛcā ghṛtāvṛdhā |
6.070.04c urvī pṛthvī hotṛvūrye purohite te id viprā īḻate sumnam iṣṭaye ||
6.070.05a madhu no dyāvāpṛthivī mimikṣatām madhuścutā madhudughe madhuvrate |
6.070.05c dadhāne yajñaṁ draviṇaṁ ca devatā mahi śravo vājam asme suvīryam ||
6.070.06a ūrjaṁ no dyauś ca pṛthivī ca pinvatām pitā mātā viśvavidā sudaṁsasā |
6.070.06c saṁrarāṇe rodasī viśvaśambhuvā saniṁ vājaṁ rayim asme sam invatām ||

6.071.01a ud u ṣya devaḥ savitā hiraṇyayā bāhū ayaṁsta savanāya sukratuḥ |
6.071.01c ghṛtena pāṇī abhi pruṣṇute makho yuvā sudakṣo rajaso vidharmaṇi ||
6.071.02a devasya vayaṁ savituḥ savīmani śreṣṭhe syāma vasunaś ca dāvane |
6.071.02c yo viśvasya dvipado yaś catuṣpado niveśane prasave cāsi bhūmanaḥ ||
6.071.03a adabdhebhiḥ savitaḥ pāyubhiṣ ṭvaṁ śivebhir adya pari pāhi no gayam |
6.071.03c hiraṇyajihvaḥ suvitāya navyase rakṣā mākir no aghaśaṁsa īśata ||
6.071.04a ud u ṣya devaḥ savitā damūnā hiraṇyapāṇiḥ pratidoṣam asthāt |
6.071.04c ayohanur yajato mandrajihva ā dāśuṣe suvati bhūri vāmam ||
6.071.05a ud ū ayām̐ upavakteva bāhū hiraṇyayā savitā supratīkā |
6.071.05c divo rohāṁsy aruhat pṛthivyā arīramat patayat kac cid abhvam ||
6.071.06a vāmam adya savitar vāmam u śvo dive-dive vāmam asmabhyaṁ sāvīḥ |
6.071.06c vāmasya hi kṣayasya deva bhūrer ayā dhiyā vāmabhājaḥ syāma ||

6.072.01a indrāsomā mahi tad vām mahitvaṁ yuvam mahāni prathamāni cakrathuḥ |
6.072.01c yuvaṁ sūryaṁ vividathur yuvaṁ svar viśvā tamāṁsy ahataṁ nidaś ca ||
6.072.02a indrāsomā vāsayatha uṣāsam ut sūryaṁ nayatho jyotiṣā saha |
6.072.02c upa dyāṁ skambhathuḥ skambhanenāprathatam pṛthivīm mātaraṁ vi ||
6.072.03a indrāsomāv ahim apaḥ pariṣṭhāṁ hatho vṛtram anu vāṁ dyaur amanyata |
6.072.03c prārṇāṁsy airayataṁ nadīnām ā samudrāṇi paprathuḥ purūṇi ||
6.072.04a indrāsomā pakvam āmāsv antar ni gavām id dadhathur vakṣaṇāsu |
6.072.04c jagṛbhathur anapinaddham āsu ruśac citrāsu jagatīṣv antaḥ ||
6.072.05a indrāsomā yuvam aṅga tarutram apatyasācaṁ śrutyaṁ rarāthe |
6.072.05c yuvaṁ śuṣmaṁ naryaṁ carṣaṇibhyaḥ saṁ vivyathuḥ pṛtanāṣāham ugrā ||

6.073.01a yo adribhit prathamajā ṛtāvā bṛhaspatir āṅgiraso haviṣmān |
6.073.01c dvibarhajmā prāgharmasat pitā na ā rodasī vṛṣabho roravīti ||
6.073.02a janāya cid ya īvata u lokam bṛhaspatir devahūtau cakāra |
6.073.02c ghnan vṛtrāṇi vi puro dardarīti jayañ chatrūm̐r amitrān pṛtsu sāhan ||
6.073.03a bṛhaspatiḥ sam ajayad vasūni maho vrajān gomato deva eṣaḥ |
6.073.03c apaḥ siṣāsan svar apratīto bṛhaspatir hanty amitram arkaiḥ ||

6.074.01a somārudrā dhārayethām asuryam pra vām iṣṭayo 'ram aśnuvantu |
6.074.01c dame-dame sapta ratnā dadhānā śaṁ no bhūtaṁ dvipade śaṁ catuṣpade ||
6.074.02a somārudrā vi vṛhataṁ viṣūcīm amīvā yā no gayam āviveśa |
6.074.02c āre bādhethāṁ nirṛtim parācair asme bhadrā sauśravasāni santu ||
6.074.03a somārudrā yuvam etāny asme viśvā tanūṣu bheṣajāni dhattam |
6.074.03c ava syatam muñcataṁ yan no asti tanūṣu baddhaṁ kṛtam eno asmat ||
6.074.04a tigmāyudhau tigmahetī suśevau somārudrāv iha su mṛḻataṁ naḥ |
6.074.04c pra no muñcataṁ varuṇasya pāśād gopāyataṁ naḥ sumanasyamānā ||

6.075.01a jīmūtasyeva bhavati pratīkaṁ yad varmī yāti samadām upasthe |
6.075.01c anāviddhayā tanvā jaya tvaṁ sa tvā varmaṇo mahimā pipartu ||
6.075.02a dhanvanā gā dhanvanājiṁ jayema dhanvanā tīvrāḥ samado jayema |
6.075.02c dhanuḥ śatror apakāmaṁ kṛṇoti dhanvanā sarvāḥ pradiśo jayema ||
6.075.03a vakṣyantīved ā ganīganti karṇam priyaṁ sakhāyam pariṣasvajānā |
6.075.03c yoṣeva śiṅkte vitatādhi dhanvañ jyā iyaṁ samane pārayantī ||
6.075.04a te ācarantī samaneva yoṣā māteva putram bibhṛtām upasthe |
6.075.04c apa śatrūn vidhyatāṁ saṁvidāne ārtnī ime viṣphurantī amitrān ||
6.075.05a bahvīnām pitā bahur asya putraś ciścā kṛṇoti samanāvagatya |
6.075.05c iṣudhiḥ saṅkāḥ pṛtanāś ca sarvāḥ pṛṣṭhe ninaddho jayati prasūtaḥ ||
6.075.06a rathe tiṣṭhan nayati vājinaḥ puro yatra-yatra kāmayate suṣārathiḥ |
6.075.06c abhīśūnām mahimānam panāyata manaḥ paścād anu yacchanti raśmayaḥ ||
6.075.07a tīvrān ghoṣān kṛṇvate vṛṣapāṇayo 'śvā rathebhiḥ saha vājayantaḥ |
6.075.07c avakrāmantaḥ prapadair amitrān kṣiṇanti śatrūm̐r anapavyayantaḥ ||
6.075.08a rathavāhanaṁ havir asya nāma yatrāyudhaṁ nihitam asya varma |
6.075.08c tatrā ratham upa śagmaṁ sadema viśvāhā vayaṁ sumanasyamānāḥ ||
6.075.09a svāduṣaṁsadaḥ pitaro vayodhāḥ kṛcchreśritaḥ śaktīvanto gabhīrāḥ |
6.075.09c citrasenā iṣubalā amṛdhrāḥ satovīrā uravo vrātasāhāḥ ||
6.075.10a brāhmaṇāsaḥ pitaraḥ somyāsaḥ śive no dyāvāpṛthivī anehasā |
6.075.10c pūṣā naḥ pātu duritād ṛtāvṛdho rakṣā mākir no aghaśaṁsa īśata ||
6.075.11a suparṇaṁ vaste mṛgo asyā danto gobhiḥ saṁnaddhā patati prasūtā |
6.075.11c yatrā naraḥ saṁ ca vi ca dravanti tatrāsmabhyam iṣavaḥ śarma yaṁsan ||
6.075.12a ṛjīte pari vṛṅdhi no 'śmā bhavatu nas tanūḥ |
6.075.12c somo adhi bravītu no 'ditiḥ śarma yacchatu ||
6.075.13a ā jaṅghanti sānv eṣāṁ jaghanām̐ upa jighnate |
6.075.13c aśvājani pracetaso 'śvān samatsu codaya ||
6.075.14a ahir iva bhogaiḥ pary eti bāhuṁ jyāyā hetim paribādhamānaḥ |
6.075.14c hastaghno viśvā vayunāni vidvān pumān pumāṁsam pari pātu viśvataḥ ||
6.075.15a ālāktā yā ruruśīrṣṇy atho yasyā ayo mukham |
6.075.15c idam parjanyaretasa iṣvai devyai bṛhan namaḥ ||
6.075.16a avasṛṣṭā parā pata śaravye brahmasaṁśite |
6.075.16c gacchāmitrān pra padyasva māmīṣāṁ kaṁ canoc chiṣaḥ ||
6.075.17a yatra bāṇāḥ sampatanti kumārā viśikhā iva |
6.075.17c tatrā no brahmaṇas patir aditiḥ śarma yacchatu viśvāhā śarma yacchatu ||
6.075.18a marmāṇi te varmaṇā chādayāmi somas tvā rājāmṛtenānu vastām |
6.075.18c uror varīyo varuṇas te kṛṇotu jayantaṁ tvānu devā madantu ||
6.075.19a yo naḥ svo araṇo yaś ca niṣṭyo jighāṁsati |
6.075.19c devās taṁ sarve dhūrvantu brahma varma mamāntaram ||


7.001.01a agniṁ naro dīdhitibhir araṇyor hastacyutī janayanta praśastam |
7.001.01c dūredṛśaṁ gṛhapatim atharyum ||
7.001.02a tam agnim aste vasavo ny ṛṇvan supraticakṣam avase kutaś cit |
7.001.02c dakṣāyyo yo dama āsa nityaḥ ||
7.001.03a preddho agne dīdihi puro no 'jasrayā sūrmyā yaviṣṭha |
7.001.03c tvāṁ śaśvanta upa yanti vājāḥ ||
7.001.04a pra te agnayo 'gnibhyo varaṁ niḥ suvīrāsaḥ śośucanta dyumantaḥ |
7.001.04c yatrā naraḥ samāsate sujātāḥ ||
7.001.05a dā no agne dhiyā rayiṁ suvīraṁ svapatyaṁ sahasya praśastam |
7.001.05c na yaṁ yāvā tarati yātumāvān ||
7.001.06a upa yam eti yuvatiḥ sudakṣaṁ doṣā vastor haviṣmatī ghṛtācī |
7.001.06c upa svainam aramatir vasūyuḥ ||
7.001.07a viśvā agne 'pa dahārātīr yebhis tapobhir adaho jarūtham |
7.001.07c pra nisvaraṁ cātayasvāmīvām ||
7.001.08a ā yas te agna idhate anīkaṁ vasiṣṭha śukra dīdivaḥ pāvaka |
7.001.08c uto na ebhiḥ stavathair iha syāḥ ||
7.001.09a vi ye te agne bhejire anīkam martā naraḥ pitryāsaḥ purutrā |
7.001.09c uto na ebhiḥ sumanā iha syāḥ ||
7.001.10a ime naro vṛtrahatyeṣu śūrā viśvā adevīr abhi santu māyāḥ |
7.001.10c ye me dhiyam panayanta praśastām ||
7.001.11a mā śūne agne ni ṣadāma nṛṇām māśeṣaso 'vīratā pari tvā |
7.001.11c prajāvatīṣu duryāsu durya ||
7.001.12a yam aśvī nityam upayāti yajñam prajāvantaṁ svapatyaṁ kṣayaṁ naḥ |
7.001.12c svajanmanā śeṣasā vāvṛdhānam ||
7.001.13a pāhi no agne rakṣaso ajuṣṭāt pāhi dhūrter araruṣo aghāyoḥ |
7.001.13c tvā yujā pṛtanāyūm̐r abhi ṣyām ||
7.001.14a sed agnir agnīm̐r aty astv anyān yatra vājī tanayo vīḻupāṇiḥ |
7.001.14c sahasrapāthā akṣarā sameti ||
7.001.15a sed agnir yo vanuṣyato nipāti sameddhāram aṁhasa uruṣyāt |
7.001.15c sujātāsaḥ pari caranti vīrāḥ ||
7.001.16a ayaṁ so agnir āhutaḥ purutrā yam īśānaḥ sam id indhe haviṣmān |
7.001.16c pari yam ety adhvareṣu hotā ||
7.001.17a tve agna āhavanāni bhūrīśānāsa ā juhuyāma nityā |
7.001.17c ubhā kṛṇvanto vahatū miyedhe ||
7.001.18a imo agne vītatamāni havyājasro vakṣi devatātim accha |
7.001.18c prati na īṁ surabhīṇi vyantu ||
7.001.19a mā no agne 'vīrate parā dā durvāsase 'mataye mā no asyai |
7.001.19c mā naḥ kṣudhe mā rakṣasa ṛtāvo mā no dame mā vana ā juhūrthāḥ ||
7.001.20a nū me brahmāṇy agna uc chaśādhi tvaṁ deva maghavadbhyaḥ suṣūdaḥ |
7.001.20c rātau syāmobhayāsa ā te yūyam pāta svastibhiḥ sadā naḥ ||
7.001.21a tvam agne suhavo raṇvasaṁdṛk sudītī sūno sahaso didīhi |
7.001.21c mā tve sacā tanaye nitya ā dhaṅ mā vīro asman naryo vi dāsīt ||
7.001.22a mā no agne durbhṛtaye sacaiṣu deveddheṣv agniṣu pra vocaḥ |
7.001.22c mā te asmān durmatayo bhṛmāc cid devasya sūno sahaso naśanta ||
7.001.23a sa marto agne svanīka revān amartye ya ājuhoti havyam |
7.001.23c sa devatā vasuvaniṁ dadhāti yaṁ sūrir arthī pṛcchamāna eti ||
7.001.24a maho no agne suvitasya vidvān rayiṁ sūribhya ā vahā bṛhantam |
7.001.24c yena vayaṁ sahasāvan mademāvikṣitāsa āyuṣā suvīrāḥ ||
7.001.25a nū me brahmāṇy agna uc chaśādhi tvaṁ deva maghavadbhyaḥ suṣūdaḥ |
7.001.25c rātau syāmobhayāsa ā te yūyam pāta svastibhiḥ sadā naḥ ||

7.002.01a juṣasva naḥ samidham agne adya śocā bṛhad yajataṁ dhūmam ṛṇvan |
7.002.01c upa spṛśa divyaṁ sānu stūpaiḥ saṁ raśmibhis tatanaḥ sūryasya ||
7.002.02a narāśaṁsasya mahimānam eṣām upa stoṣāma yajatasya yajñaiḥ |
7.002.02c ye sukratavaḥ śucayo dhiyaṁdhāḥ svadanti devā ubhayāni havyā ||
7.002.03a īḻenyaṁ vo asuraṁ sudakṣam antar dūtaṁ rodasī satyavācam |
7.002.03c manuṣvad agnim manunā samiddhaṁ sam adhvarāya sadam in mahema ||
7.002.04a saparyavo bharamāṇā abhijñu pra vṛñjate namasā barhir agnau |
7.002.04c ājuhvānā ghṛtapṛṣṭham pṛṣadvad adhvaryavo haviṣā marjayadhvam ||
7.002.05a svādhyo vi duro devayanto 'śiśrayū rathayur devatātā |
7.002.05c pūrvī śiśuṁ na mātarā rihāṇe sam agruvo na samaneṣv añjan ||
7.002.06a uta yoṣaṇe divye mahī na uṣāsānaktā sudugheva dhenuḥ |
7.002.06c barhiṣadā puruhūte maghonī ā yajñiye suvitāya śrayetām ||
7.002.07a viprā yajñeṣu mānuṣeṣu kārū manye vāṁ jātavedasā yajadhyai |
7.002.07c ūrdhvaṁ no adhvaraṁ kṛtaṁ haveṣu tā deveṣu vanatho vāryāṇi ||
7.002.08a ā bhāratī bhāratībhiḥ sajoṣā iḻā devair manuṣyebhir agniḥ |
7.002.08c sarasvatī sārasvatebhir arvāk tisro devīr barhir edaṁ sadantu ||
7.002.09a tan nas turīpam adha poṣayitnu deva tvaṣṭar vi rarāṇaḥ syasva |
7.002.09c yato vīraḥ karmaṇyaḥ sudakṣo yuktagrāvā jāyate devakāmaḥ ||
7.002.10a vanaspate 'va sṛjopa devān agnir haviḥ śamitā sūdayāti |
7.002.10c sed u hotā satyataro yajāti yathā devānāṁ janimāni veda ||
7.002.11a ā yāhy agne samidhāno arvāṅ indreṇa devaiḥ sarathaṁ turebhiḥ |
7.002.11c barhir na āstām aditiḥ suputrā svāhā devā amṛtā mādayantām ||

7.003.01a agniṁ vo devam agnibhiḥ sajoṣā yajiṣṭhaṁ dūtam adhvare kṛṇudhvam |
7.003.01c yo martyeṣu nidhruvir ṛtāvā tapurmūrdhā ghṛtānnaḥ pāvakaḥ ||
7.003.02a prothad aśvo na yavase 'viṣyan yadā mahaḥ saṁvaraṇād vy asthāt |
7.003.02c ād asya vāto anu vāti śocir adha sma te vrajanaṁ kṛṣṇam asti ||
7.003.03a ud yasya te navajātasya vṛṣṇo 'gne caranty ajarā idhānāḥ |
7.003.03c acchā dyām aruṣo dhūma eti saṁ dūto agna īyase hi devān ||
7.003.04a vi yasya te pṛthivyām pājo aśret tṛṣu yad annā samavṛkta jambhaiḥ |
7.003.04c seneva sṛṣṭā prasitiṣ ṭa eti yavaṁ na dasma juhvā vivekṣi ||
7.003.05a tam id doṣā tam uṣasi yaviṣṭham agnim atyaṁ na marjayanta naraḥ |
7.003.05c niśiśānā atithim asya yonau dīdāya śocir āhutasya vṛṣṇaḥ ||
7.003.06a susaṁdṛk te svanīka pratīkaṁ vi yad rukmo na rocasa upāke |
7.003.06c divo na te tanyatur eti śuṣmaś citro na sūraḥ prati cakṣi bhānum ||
7.003.07a yathā vaḥ svāhāgnaye dāśema parīḻābhir ghṛtavadbhiś ca havyaiḥ |
7.003.07c tebhir no agne amitair mahobhiḥ śatam pūrbhir āyasībhir ni pāhi ||
7.003.08a yā vā te santi dāśuṣe adhṛṣṭā giro vā yābhir nṛvatīr uruṣyāḥ |
7.003.08c tābhir naḥ sūno sahaso ni pāhi smat sūrīñ jaritṝñ jātavedaḥ ||
7.003.09a nir yat pūteva svadhitiḥ śucir gāt svayā kṛpā tanvā rocamānaḥ |
7.003.09c ā yo mātror uśenyo janiṣṭa devayajyāya sukratuḥ pāvakaḥ ||
7.003.10a etā no agne saubhagā didīhy api kratuṁ sucetasaṁ vatema |
7.003.10c viśvā stotṛbhyo gṛṇate ca santu yūyam pāta svastibhiḥ sadā naḥ ||

7.004.01a pra vaḥ śukrāya bhānave bharadhvaṁ havyam matiṁ cāgnaye supūtam |
7.004.01c yo daivyāni mānuṣā janūṁṣy antar viśvāni vidmanā jigāti ||
7.004.02a sa gṛtso agnis taruṇaś cid astu yato yaviṣṭho ajaniṣṭa mātuḥ |
7.004.02c saṁ yo vanā yuvate śucidan bhūri cid annā sam id atti sadyaḥ ||
7.004.03a asya devasya saṁsady anīke yam martāsaḥ śyetaṁ jagṛbhre |
7.004.03c ni yo gṛbham pauruṣeyīm uvoca durokam agnir āyave śuśoca ||
7.004.04a ayaṁ kavir akaviṣu pracetā marteṣv agnir amṛto ni dhāyi |
7.004.04c sa mā no atra juhuraḥ sahasvaḥ sadā tve sumanasaḥ syāma ||
7.004.05a ā yo yoniṁ devakṛtaṁ sasāda kratvā hy agnir amṛtām̐ atārīt |
7.004.05c tam oṣadhīś ca vaninaś ca garbham bhūmiś ca viśvadhāyasam bibharti ||
7.004.06a īśe hy agnir amṛtasya bhūrer īśe rāyaḥ suvīryasya dātoḥ |
7.004.06c mā tvā vayaṁ sahasāvann avīrā māpsavaḥ pari ṣadāma māduvaḥ ||
7.004.07a pariṣadyaṁ hy araṇasya rekṇo nityasya rāyaḥ patayaḥ syāma |
7.004.07c na śeṣo agne anyajātam asty acetānasya mā patho vi dukṣaḥ ||
7.004.08a nahi grabhāyāraṇaḥ suśevo 'nyodaryo manasā mantavā u |
7.004.08c adhā cid okaḥ punar it sa ety ā no vājy abhīṣāḻ etu navyaḥ ||
7.004.09a tvam agne vanuṣyato ni pāhi tvam u naḥ sahasāvann avadyāt |
7.004.09c saṁ tvā dhvasmanvad abhy etu pāthaḥ saṁ rayiḥ spṛhayāyyaḥ sahasrī ||
7.004.10a etā no agne saubhagā didīhy api kratuṁ sucetasaṁ vatema |
7.004.10c viśvā stotṛbhyo gṛṇate ca santu yūyam pāta svastibhiḥ sadā naḥ ||

7.005.01a prāgnaye tavase bharadhvaṁ giraṁ divo arataye pṛthivyāḥ |
7.005.01c yo viśveṣām amṛtānām upasthe vaiśvānaro vāvṛdhe jāgṛvadbhiḥ ||
7.005.02a pṛṣṭo divi dhāyy agniḥ pṛthivyāṁ netā sindhūnāṁ vṛṣabhaḥ stiyānām |
7.005.02c sa mānuṣīr abhi viśo vi bhāti vaiśvānaro vāvṛdhāno vareṇa ||
7.005.03a tvad bhiyā viśa āyann asiknīr asamanā jahatīr bhojanāni |
7.005.03c vaiśvānara pūrave śośucānaḥ puro yad agne darayann adīdeḥ ||
7.005.04a tava tridhātu pṛthivī uta dyaur vaiśvānara vratam agne sacanta |
7.005.04c tvam bhāsā rodasī ā tatanthājasreṇa śociṣā śośucānaḥ ||
7.005.05a tvām agne harito vāvaśānā giraḥ sacante dhunayo ghṛtācīḥ |
7.005.05c patiṁ kṛṣṭīnāṁ rathyaṁ rayīṇāṁ vaiśvānaram uṣasāṁ ketum ahnām ||
7.005.06a tve asuryaṁ vasavo ny ṛṇvan kratuṁ hi te mitramaho juṣanta |
7.005.06c tvaṁ dasyūm̐r okaso agna āja uru jyotir janayann āryāya ||
7.005.07a sa jāyamānaḥ parame vyoman vāyur na pāthaḥ pari pāsi sadyaḥ |
7.005.07c tvam bhuvanā janayann abhi krann apatyāya jātavedo daśasyan ||
7.005.08a tām agne asme iṣam erayasva vaiśvānara dyumatīṁ jātavedaḥ |
7.005.08c yayā rādhaḥ pinvasi viśvavāra pṛthu śravo dāśuṣe martyāya ||
7.005.09a taṁ no agne maghavadbhyaḥ purukṣuṁ rayiṁ ni vājaṁ śrutyaṁ yuvasva |
7.005.09c vaiśvānara mahi naḥ śarma yaccha rudrebhir agne vasubhiḥ sajoṣāḥ ||

7.006.01a pra samrājo asurasya praśastim puṁsaḥ kṛṣṭīnām anumādyasya |
7.006.01c indrasyeva pra tavasas kṛtāni vande dāruṁ vandamāno vivakmi ||
7.006.02a kaviṁ ketuṁ dhāsim bhānum adrer hinvanti śaṁ rājyaṁ rodasyoḥ |
7.006.02c puraṁdarasya gīrbhir ā vivāse 'gner vratāni pūrvyā mahāni ||
7.006.03a ny akratūn grathino mṛdhravācaḥ paṇīm̐r aśraddhām̐ avṛdhām̐ ayajñān |
7.006.03c pra-pra tān dasyūm̐r agnir vivāya pūrvaś cakārāparām̐ ayajyūn ||
7.006.04a yo apācīne tamasi madantīḥ prācīś cakāra nṛtamaḥ śacībhiḥ |
7.006.04c tam īśānaṁ vasvo agniṁ gṛṇīṣe 'nānataṁ damayantam pṛtanyūn ||
7.006.05a yo dehyo anamayad vadhasnair yo aryapatnīr uṣasaś cakāra |
7.006.05c sa nirudhyā nahuṣo yahvo agnir viśaś cakre balihṛtaḥ sahobhiḥ ||
7.006.06a yasya śarmann upa viśve janāsa evais tasthuḥ sumatim bhikṣamāṇāḥ |
7.006.06c vaiśvānaro varam ā rodasyor āgniḥ sasāda pitror upastham ||
7.006.07a ā devo dade budhnyā vasūni vaiśvānara uditā sūryasya |
7.006.07c ā samudrād avarād ā parasmād āgnir dade diva ā pṛthivyāḥ ||

7.007.01a pra vo devaṁ cit sahasānam agnim aśvaṁ na vājinaṁ hiṣe namobhiḥ |
7.007.01c bhavā no dūto adhvarasya vidvān tmanā deveṣu vivide mitadruḥ ||
7.007.02a ā yāhy agne pathyā anu svā mandro devānāṁ sakhyaṁ juṣāṇaḥ |
7.007.02c ā sānu śuṣmair nadayan pṛthivyā jambhebhir viśvam uśadhag vanāni ||
7.007.03a prācīno yajñaḥ sudhitaṁ hi barhiḥ prīṇīte agnir īḻito na hotā |
7.007.03c ā mātarā viśvavāre huvāno yato yaviṣṭha jajñiṣe suśevaḥ ||
7.007.04a sadyo adhvare rathiraṁ jananta mānuṣāso vicetaso ya eṣām |
7.007.04c viśām adhāyi viśpatir duroṇe 'gnir mandro madhuvacā ṛtāvā ||
7.007.05a asādi vṛto vahnir ājaganvān agnir brahmā nṛṣadane vidhartā |
7.007.05c dyauś ca yam pṛthivī vāvṛdhāte ā yaṁ hotā yajati viśvavāram ||
7.007.06a ete dyumnebhir viśvam ātiranta mantraṁ ye vāraṁ naryā atakṣan |
7.007.06c pra ye viśas tiranta śroṣamāṇā ā ye me asya dīdhayann ṛtasya ||
7.007.07a nū tvām agna īmahe vasiṣṭhā īśānaṁ sūno sahaso vasūnām |
7.007.07c iṣaṁ stotṛbhyo maghavadbhya ānaḍ yūyam pāta svastibhiḥ sadā naḥ ||

7.008.01a indhe rājā sam aryo namobhir yasya pratīkam āhutaṁ ghṛtena |
7.008.01c naro havyebhir īḻate sabādha āgnir agra uṣasām aśoci ||
7.008.02a ayam u ṣya sumahām̐ avedi hotā mandro manuṣo yahvo agniḥ |
7.008.02c vi bhā akaḥ sasṛjānaḥ pṛthivyāṁ kṛṣṇapavir oṣadhībhir vavakṣe ||
7.008.03a kayā no agne vi vasaḥ suvṛktiṁ kām u svadhām ṛṇavaḥ śasyamānaḥ |
7.008.03c kadā bhavema patayaḥ sudatra rāyo vantāro duṣṭarasya sādhoḥ ||
7.008.04a pra-prāyam agnir bharatasya śṛṇve vi yat sūryo na rocate bṛhad bhāḥ |
7.008.04c abhi yaḥ pūrum pṛtanāsu tasthau dyutāno daivyo atithiḥ śuśoca ||
7.008.05a asann it tve āhavanāni bhūri bhuvo viśvebhiḥ sumanā anīkaiḥ |
7.008.05c stutaś cid agne śṛṇviṣe gṛṇānaḥ svayaṁ vardhasva tanvaṁ sujāta ||
7.008.06a idaṁ vacaḥ śatasāḥ saṁsahasram ud agnaye janiṣīṣṭa dvibarhāḥ |
7.008.06c śaṁ yat stotṛbhya āpaye bhavāti dyumad amīvacātanaṁ rakṣohā ||
7.008.07a nū tvām agna īmahe vasiṣṭhā īśānaṁ sūno sahaso vasūnām |
7.008.07c iṣaṁ stotṛbhyo maghavadbhya ānaḍ yūyam pāta svastibhiḥ sadā naḥ ||

7.009.01a abodhi jāra uṣasām upasthād dhotā mandraḥ kavitamaḥ pāvakaḥ |
7.009.01c dadhāti ketum ubhayasya jantor havyā deveṣu draviṇaṁ sukṛtsu ||
7.009.02a sa sukratur yo vi duraḥ paṇīnām punāno arkam purubhojasaṁ naḥ |
7.009.02c hotā mandro viśāṁ damūnās tiras tamo dadṛśe rāmyāṇām ||
7.009.03a amūraḥ kavir aditir vivasvān susaṁsan mitro atithiḥ śivo naḥ |
7.009.03c citrabhānur uṣasām bhāty agre 'pāṁ garbhaḥ prasva ā viveśa ||
7.009.04a īḻenyo vo manuṣo yugeṣu samanagā aśucaj jātavedāḥ |
7.009.04c susaṁdṛśā bhānunā yo vibhāti prati gāvaḥ samidhānam budhanta ||
7.009.05a agne yāhi dūtyam mā riṣaṇyo devām̐ acchā brahmakṛtā gaṇena |
7.009.05c sarasvatīm maruto aśvināpo yakṣi devān ratnadheyāya viśvān ||
7.009.06a tvām agne samidhāno vasiṣṭho jarūthaṁ han yakṣi rāye puraṁdhim |
7.009.06c puruṇīthā jātavedo jarasva yūyam pāta svastibhiḥ sadā naḥ ||

7.010.01a uṣo na jāraḥ pṛthu pājo aśred davidyutad dīdyac chośucānaḥ |
7.010.01c vṛṣā hariḥ śucir ā bhāti bhāsā dhiyo hinvāna uśatīr ajīgaḥ ||
7.010.02a svar ṇa vastor uṣasām aroci yajñaṁ tanvānā uśijo na manma |
7.010.02c agnir janmāni deva ā vi vidvān dravad dūto devayāvā vaniṣṭhaḥ ||
7.010.03a acchā giro matayo devayantīr agniṁ yanti draviṇam bhikṣamāṇāḥ |
7.010.03c susaṁdṛśaṁ supratīkaṁ svañcaṁ havyavāham aratim mānuṣāṇām ||
7.010.04a indraṁ no agne vasubhiḥ sajoṣā rudraṁ rudrebhir ā vahā bṛhantam |
7.010.04c ādityebhir aditiṁ viśvajanyām bṛhaspatim ṛkvabhir viśvavāram ||
7.010.05a mandraṁ hotāram uśijo yaviṣṭham agniṁ viśa īḻate adhvareṣu |
7.010.05c sa hi kṣapāvām̐ abhavad rayīṇām atandro dūto yajathāya devān ||

7.011.01a mahām̐ asy adhvarasya praketo na ṛte tvad amṛtā mādayante |
7.011.01c ā viśvebhiḥ sarathaṁ yāhi devair ny agne hotā prathamaḥ sadeha ||
7.011.02a tvām īḻate ajiraṁ dūtyāya haviṣmantaḥ sadam in mānuṣāsaḥ |
7.011.02c yasya devair āsado barhir agne 'hāny asmai sudinā bhavanti ||
7.011.03a triś cid aktoḥ pra cikitur vasūni tve antar dāśuṣe martyāya |
7.011.03c manuṣvad agna iha yakṣi devān bhavā no dūto abhiśastipāvā ||
7.011.04a agnir īśe bṛhato adhvarasyāgnir viśvasya haviṣaḥ kṛtasya |
7.011.04c kratuṁ hy asya vasavo juṣantāthā devā dadhire havyavāham ||
7.011.05a āgne vaha haviradyāya devān indrajyeṣṭhāsa iha mādayantām |
7.011.05c imaṁ yajñaṁ divi deveṣu dhehi yūyam pāta svastibhiḥ sadā naḥ ||

7.012.01a aganma mahā namasā yaviṣṭhaṁ yo dīdāya samiddhaḥ sve duroṇe |
7.012.01c citrabhānuṁ rodasī antar urvī svāhutaṁ viśvataḥ pratyañcam ||
7.012.02a sa mahnā viśvā duritāni sāhvān agniḥ ṣṭave dama ā jātavedāḥ |
7.012.02c sa no rakṣiṣad duritād avadyād asmān gṛṇata uta no maghonaḥ ||
7.012.03a tvaṁ varuṇa uta mitro agne tvāṁ vardhanti matibhir vasiṣṭhāḥ |
7.012.03c tve vasu suṣaṇanāni santu yūyam pāta svastibhiḥ sadā naḥ ||

7.013.01a prāgnaye viśvaśuce dhiyaṁdhe 'suraghne manma dhītim bharadhvam |
7.013.01c bhare havir na barhiṣi prīṇāno vaiśvānarāya yataye matīnām ||
7.013.02a tvam agne śociṣā śośucāna ā rodasī apṛṇā jāyamānaḥ |
7.013.02c tvaṁ devām̐ abhiśaster amuñco vaiśvānara jātavedo mahitvā ||
7.013.03a jāto yad agne bhuvanā vy akhyaḥ paśūn na gopā iryaḥ parijmā |
7.013.03c vaiśvānara brahmaṇe vinda gātuṁ yūyam pāta svastibhiḥ sadā naḥ ||

7.014.01a samidhā jātavedase devāya devahūtibhiḥ |
7.014.01c havirbhiḥ śukraśociṣe namasvino vayaṁ dāśemāgnaye ||
7.014.02a vayaṁ te agne samidhā vidhema vayaṁ dāśema suṣṭutī yajatra |
7.014.02c vayaṁ ghṛtenādhvarasya hotar vayaṁ deva haviṣā bhadraśoce ||
7.014.03a ā no devebhir upa devahūtim agne yāhi vaṣaṭkṛtiṁ juṣāṇaḥ |
7.014.03c tubhyaṁ devāya dāśataḥ syāma yūyam pāta svastibhiḥ sadā naḥ ||

7.015.01a upasadyāya mīḻhuṣa āsye juhutā haviḥ |
7.015.01c yo no nediṣṭham āpyam ||
7.015.02a yaḥ pañca carṣaṇīr abhi niṣasāda dame-dame |
7.015.02c kavir gṛhapatir yuvā ||
7.015.03a sa no vedo amātyam agnī rakṣatu viśvataḥ |
7.015.03c utāsmān pātv aṁhasaḥ ||
7.015.04a navaṁ nu stomam agnaye divaḥ śyenāya jījanam |
7.015.04c vasvaḥ kuvid vanāti naḥ ||
7.015.05a spārhā yasya śriyo dṛśe rayir vīravato yathā |
7.015.05c agre yajñasya śocataḥ ||
7.015.06a semāṁ vetu vaṣaṭkṛtim agnir juṣata no giraḥ |
7.015.06c yajiṣṭho havyavāhanaḥ ||
7.015.07a ni tvā nakṣya viśpate dyumantaṁ deva dhīmahi |
7.015.07c suvīram agna āhuta ||
7.015.08a kṣapa usraś ca dīdihi svagnayas tvayā vayam |
7.015.08c suvīras tvam asmayuḥ ||
7.015.09a upa tvā sātaye naro viprāso yanti dhītibhiḥ |
7.015.09c upākṣarā sahasriṇī ||
7.015.10a agnī rakṣāṁsi sedhati śukraśocir amartyaḥ |
7.015.10c śuciḥ pāvaka īḍyaḥ ||
7.015.11a sa no rādhāṁsy ā bhareśānaḥ sahaso yaho |
7.015.11c bhagaś ca dātu vāryam ||
7.015.12a tvam agne vīravad yaśo devaś ca savitā bhagaḥ |
7.015.12c ditiś ca dāti vāryam ||
7.015.13a agne rakṣā ṇo aṁhasaḥ prati ṣma deva rīṣataḥ |
7.015.13c tapiṣṭhair ajaro daha ||
7.015.14a adhā mahī na āyasy anādhṛṣṭo nṛpītaye |
7.015.14c pūr bhavā śatabhujiḥ ||
7.015.15a tvaṁ naḥ pāhy aṁhaso doṣāvastar aghāyataḥ |
7.015.15c divā naktam adābhya ||

7.016.01a enā vo agniṁ namasorjo napātam ā huve |
7.016.01c priyaṁ cetiṣṭham aratiṁ svadhvaraṁ viśvasya dūtam amṛtam ||
7.016.02a sa yojate aruṣā viśvabhojasā sa dudravat svāhutaḥ |
7.016.02c subrahmā yajñaḥ suśamī vasūnāṁ devaṁ rādho janānām ||
7.016.03a ud asya śocir asthād ājuhvānasya mīḻhuṣaḥ |
7.016.03c ud dhūmāso aruṣāso divispṛśaḥ sam agnim indhate naraḥ ||
7.016.04a taṁ tvā dūtaṁ kṛṇmahe yaśastamaṁ devām̐ ā vītaye vaha |
7.016.04c viśvā sūno sahaso martabhojanā rāsva tad yat tvemahe ||
7.016.05a tvam agne gṛhapatis tvaṁ hotā no adhvare |
7.016.05c tvam potā viśvavāra pracetā yakṣi veṣi ca vāryam ||
7.016.06a kṛdhi ratnaṁ yajamānāya sukrato tvaṁ hi ratnadhā asi |
7.016.06c ā na ṛte śiśīhi viśvam ṛtvijaṁ suśaṁso yaś ca dakṣate ||
7.016.07a tve agne svāhuta priyāsaḥ santu sūrayaḥ |
7.016.07c yantāro ye maghavāno janānām ūrvān dayanta gonām ||
7.016.08a yeṣām iḻā ghṛtahastā duroṇa ām̐ api prātā niṣīdati |
7.016.08c tām̐s trāyasva sahasya druho nido yacchā naḥ śarma dīrghaśrut ||
7.016.09a sa mandrayā ca jihvayā vahnir āsā viduṣṭaraḥ |
7.016.09c agne rayim maghavadbhyo na ā vaha havyadātiṁ ca sūdaya ||
7.016.10a ye rādhāṁsi dadaty aśvyā maghā kāmena śravaso mahaḥ |
7.016.10c tām̐ aṁhasaḥ pipṛhi partṛbhiṣ ṭvaṁ śatam pūrbhir yaviṣṭhya ||
7.016.11a devo vo draviṇodāḥ pūrṇāṁ vivaṣṭy āsicam |
7.016.11c ud vā siñcadhvam upa vā pṛṇadhvam ād id vo deva ohate ||
7.016.12a taṁ hotāram adhvarasya pracetasaṁ vahniṁ devā akṛṇvata |
7.016.12c dadhāti ratnaṁ vidhate suvīryam agnir janāya dāśuṣe ||

7.017.01 agne bhava suṣamidhā samiddha uta barhir urviyā vi stṛṇītām ||
7.017.02 uta dvāra uśatīr vi śrayantām uta devām̐ uśata ā vaheha ||
7.017.03 agne vīhi haviṣā yakṣi devān svadhvarā kṛṇuhi jātavedaḥ ||
7.017.04 svadhvarā karati jātavedā yakṣad devām̐ amṛtān piprayac ca ||
7.017.05 vaṁsva viśvā vāryāṇi pracetaḥ satyā bhavantv āśiṣo no adya ||
7.017.06 tvām u te dadhire havyavāhaṁ devāso agna ūrja ā napātam ||
7.017.07 te te devāya dāśataḥ syāma maho no ratnā vi dadha iyānaḥ ||

7.018.01a tve ha yat pitaraś cin na indra viśvā vāmā jaritāro asanvan |
7.018.01c tve gāvaḥ sudughās tve hy aśvās tvaṁ vasu devayate vaniṣṭhaḥ ||
7.018.02a rājeva hi janibhiḥ kṣeṣy evāva dyubhir abhi viduṣ kaviḥ san |
7.018.02c piśā giro maghavan gobhir aśvais tvāyataḥ śiśīhi rāye asmān ||
7.018.03a imā u tvā paspṛdhānāso atra mandrā giro devayantīr upa sthuḥ |
7.018.03c arvācī te pathyā rāya etu syāma te sumatāv indra śarman ||
7.018.04a dhenuṁ na tvā sūyavase dudukṣann upa brahmāṇi sasṛje vasiṣṭhaḥ |
7.018.04c tvām in me gopatiṁ viśva āhā na indraḥ sumatiṁ gantv accha ||
7.018.05a arṇāṁsi cit paprathānā sudāsa indro gādhāny akṛṇot supārā |
7.018.05c śardhantaṁ śimyum ucathasya navyaḥ śāpaṁ sindhūnām akṛṇod aśastīḥ ||
7.018.06a puroḻā it turvaśo yakṣur āsīd rāye matsyāso niśitā apīva |
7.018.06c śruṣṭiṁ cakrur bhṛgavo druhyavaś ca sakhā sakhāyam atarad viṣūcoḥ ||
7.018.07a ā pakthāso bhalānaso bhanantālināso viṣāṇinaḥ śivāsaḥ |
7.018.07c ā yo 'nayat sadhamā āryasya gavyā tṛtsubhyo ajagan yudhā nṝn ||
7.018.08a durādhyo aditiṁ srevayanto 'cetaso vi jagṛbhre paruṣṇīm |
7.018.08c mahnāvivyak pṛthivīm patyamānaḥ paśuṣ kavir aśayac cāyamānaḥ ||
7.018.09a īyur arthaṁ na nyartham paruṣṇīm āśuś caned abhipitvaṁ jagāma |
7.018.09c sudāsa indraḥ sutukām̐ amitrān arandhayan mānuṣe vadhrivācaḥ ||
7.018.10a īyur gāvo na yavasād agopā yathākṛtam abhi mitraṁ citāsaḥ |
7.018.10c pṛśnigāvaḥ pṛśninipreṣitāsaḥ śruṣṭiṁ cakrur niyuto rantayaś ca ||
7.018.11a ekaṁ ca yo viṁśatiṁ ca śravasyā vaikarṇayor janān rājā ny astaḥ |
7.018.11c dasmo na sadman ni śiśāti barhiḥ śūraḥ sargam akṛṇod indra eṣām ||
7.018.12a adha śrutaṁ kavaṣaṁ vṛddham apsv anu druhyuṁ ni vṛṇag vajrabāhuḥ |
7.018.12c vṛṇānā atra sakhyāya sakhyaṁ tvāyanto ye amadann anu tvā ||
7.018.13a vi sadyo viśvā dṛṁhitāny eṣām indraḥ puraḥ sahasā sapta dardaḥ |
7.018.13c vy ānavasya tṛtsave gayam bhāg jeṣma pūruṁ vidathe mṛdhravācam ||
7.018.14a ni gavyavo 'navo druhyavaś ca ṣaṣṭiḥ śatā suṣupuḥ ṣaṭ sahasrā |
7.018.14c ṣaṣṭir vīrāso adhi ṣaḍ duvoyu viśved indrasya vīryā kṛtāni ||
7.018.15a indreṇaite tṛtsavo veviṣāṇā āpo na sṛṣṭā adhavanta nīcīḥ |
7.018.15c durmitrāsaḥ prakalavin mimānā jahur viśvāni bhojanā sudāse ||
7.018.16a ardhaṁ vīrasya śṛtapām anindram parā śardhantaṁ nunude abhi kṣām |
7.018.16c indro manyum manyumyo mimāya bheje patho vartanim patyamānaḥ ||
7.018.17a ādhreṇa cit tad v ekaṁ cakāra siṁhyaṁ cit petvenā jaghāna |
7.018.17c ava sraktīr veśyāvṛścad indraḥ prāyacchad viśvā bhojanā sudāse ||
7.018.18a śaśvanto hi śatravo rāradhuṣ ṭe bhedasya cic chardhato vinda randhim |
7.018.18c martām̐ enaḥ stuvato yaḥ kṛṇoti tigmaṁ tasmin ni jahi vajram indra ||
7.018.19a āvad indraṁ yamunā tṛtsavaś ca prātra bhedaṁ sarvatātā muṣāyat |
7.018.19c ajāsaś ca śigravo yakṣavaś ca baliṁ śīrṣāṇi jabhrur aśvyāni ||
7.018.20a na ta indra sumatayo na rāyaḥ saṁcakṣe pūrvā uṣaso na nūtnāḥ |
7.018.20c devakaṁ cin mānyamānaṁ jaghanthāva tmanā bṛhataḥ śambaram bhet ||
7.018.21a pra ye gṛhād amamadus tvāyā parāśaraḥ śatayātur vasiṣṭhaḥ |
7.018.21c na te bhojasya sakhyam mṛṣantādhā sūribhyaḥ sudinā vy ucchān ||
7.018.22a dve naptur devavataḥ śate gor dvā rathā vadhūmantā sudāsaḥ |
7.018.22c arhann agne paijavanasya dānaṁ hoteva sadma pary emi rebhan ||
7.018.23a catvāro mā paijavanasya dānāḥ smaddiṣṭayaḥ kṛśanino nireke |
7.018.23c ṛjrāso mā pṛthiviṣṭhāḥ sudāsas tokaṁ tokāya śravase vahanti ||
7.018.24a yasya śravo rodasī antar urvī śīrṣṇe-śīrṣṇe vibabhājā vibhaktā |
7.018.24c sapted indraṁ na sravato gṛṇanti ni yudhyāmadhim aśiśād abhīke ||
7.018.25a imaṁ naro marutaḥ saścatānu divodāsaṁ na pitaraṁ sudāsaḥ |
7.018.25c aviṣṭanā paijavanasya ketaṁ dūṇāśaṁ kṣatram ajaraṁ duvoyu ||

7.019.01a yas tigmaśṛṅgo vṛṣabho na bhīma ekaḥ kṛṣṭīś cyāvayati pra viśvāḥ |
7.019.01c yaḥ śaśvato adāśuṣo gayasya prayantāsi suṣvitarāya vedaḥ ||
7.019.02a tvaṁ ha tyad indra kutsam āvaḥ śuśrūṣamāṇas tanvā samarye |
7.019.02c dāsaṁ yac chuṣṇaṁ kuyavaṁ ny asmā arandhaya ārjuneyāya śikṣan ||
7.019.03a tvaṁ dhṛṣṇo dhṛṣatā vītahavyam prāvo viśvābhir ūtibhiḥ sudāsam |
7.019.03c pra paurukutsiṁ trasadasyum āvaḥ kṣetrasātā vṛtrahatyeṣu pūrum ||
7.019.04a tvaṁ nṛbhir nṛmaṇo devavītau bhūrīṇi vṛtrā haryaśva haṁsi |
7.019.04c tvaṁ ni dasyuṁ cumuriṁ dhuniṁ cāsvāpayo dabhītaye suhantu ||
7.019.05a tava cyautnāni vajrahasta tāni nava yat puro navatiṁ ca sadyaḥ |
7.019.05c niveśane śatatamāviveṣīr ahañ ca vṛtraṁ namucim utāhan ||
7.019.06a sanā tā ta indra bhojanāni rātahavyāya dāśuṣe sudāse |
7.019.06c vṛṣṇe te harī vṛṣaṇā yunajmi vyantu brahmāṇi puruśāka vājam ||
7.019.07a mā te asyāṁ sahasāvan pariṣṭāv aghāya bhūma harivaḥ parādai |
7.019.07c trāyasva no 'vṛkebhir varūthais tava priyāsaḥ sūriṣu syāma ||
7.019.08a priyāsa it te maghavann abhiṣṭau naro madema śaraṇe sakhāyaḥ |
7.019.08c ni turvaśaṁ ni yādvaṁ śiśīhy atithigvāya śaṁsyaṁ kariṣyan ||
7.019.09a sadyaś cin nu te maghavann abhiṣṭau naraḥ śaṁsanty ukthaśāsa ukthā |
7.019.09c ye te havebhir vi paṇīm̐r adāśann asmān vṛṇīṣva yujyāya tasmai ||
7.019.10a ete stomā narāṁ nṛtama tubhyam asmadryañco dadato maghāni |
7.019.10c teṣām indra vṛtrahatye śivo bhūḥ sakhā ca śūro 'vitā ca nṛṇām ||
7.019.11a nū indra śūra stavamāna ūtī brahmajūtas tanvā vāvṛdhasva |
7.019.11c upa no vājān mimīhy upa stīn yūyam pāta svastibhiḥ sadā naḥ ||

7.020.01a ugro jajñe vīryāya svadhāvāñ cakrir apo naryo yat kariṣyan |
7.020.01c jagmir yuvā nṛṣadanam avobhis trātā na indra enaso mahaś cit ||
7.020.02a hantā vṛtram indraḥ śūśuvānaḥ prāvīn nu vīro jaritāram ūtī |
7.020.02c kartā sudāse aha vā u lokaṁ dātā vasu muhur ā dāśuṣe bhūt ||
7.020.03a yudhmo anarvā khajakṛt samadvā śūraḥ satrāṣāḍ januṣem aṣāḻhaḥ |
7.020.03c vy āsa indraḥ pṛtanāḥ svojā adhā viśvaṁ śatrūyantaṁ jaghāna ||
7.020.04a ubhe cid indra rodasī mahitvā paprātha taviṣībhis tuviṣmaḥ |
7.020.04c ni vajram indro harivān mimikṣan sam andhasā madeṣu vā uvoca ||
7.020.05a vṛṣā jajāna vṛṣaṇaṁ raṇāya tam u cin nārī naryaṁ sasūva |
7.020.05c pra yaḥ senānīr adha nṛbhyo astīnaḥ satvā gaveṣaṇaḥ sa dhṛṣṇuḥ ||
7.020.06a nū cit sa bhreṣate jano na reṣan mano yo asya ghoram āvivāsāt |
7.020.06c yajñair ya indre dadhate duvāṁsi kṣayat sa rāya ṛtapā ṛtejāḥ ||
7.020.07a yad indra pūrvo aparāya śikṣann ayaj jyāyān kanīyaso deṣṇam |
7.020.07c amṛta it pary āsīta dūram ā citra citryam bharā rayiṁ naḥ ||
7.020.08a yas ta indra priyo jano dadāśad asan nireke adrivaḥ sakhā te |
7.020.08c vayaṁ te asyāṁ sumatau caniṣṭhāḥ syāma varūthe aghnato nṛpītau ||
7.020.09a eṣa stomo acikradad vṛṣā ta uta stāmur maghavann akrapiṣṭa |
7.020.09c rāyas kāmo jaritāraṁ ta āgan tvam aṅga śakra vasva ā śako naḥ ||
7.020.10a sa na indra tvayatāyā iṣe dhās tmanā ca ye maghavāno junanti |
7.020.10c vasvī ṣu te jaritre astu śaktir yūyam pāta svastibhiḥ sadā naḥ ||

7.021.01a asāvi devaṁ goṛjīkam andho ny asminn indro januṣem uvoca |
7.021.01c bodhāmasi tvā haryaśva yajñair bodhā naḥ stomam andhaso madeṣu ||
7.021.02a pra yanti yajñaṁ vipayanti barhiḥ somamādo vidathe dudhravācaḥ |
7.021.02c ny u bhriyante yaśaso gṛbhād ā dūraüpabdo vṛṣaṇo nṛṣācaḥ ||
7.021.03a tvam indra sravitavā apas kaḥ pariṣṭhitā ahinā śūra pūrvīḥ |
7.021.03c tvad vāvakre rathyo na dhenā rejante viśvā kṛtrimāṇi bhīṣā ||
7.021.04a bhīmo viveṣāyudhebhir eṣām apāṁsi viśvā naryāṇi vidvān |
7.021.04c indraḥ puro jarhṛṣāṇo vi dūdhod vi vajrahasto mahinā jaghāna ||
7.021.05a na yātava indra jūjuvur no na vandanā śaviṣṭha vedyābhiḥ |
7.021.05c sa śardhad aryo viṣuṇasya jantor mā śiśnadevā api gur ṛtaṁ naḥ ||
7.021.06a abhi kratvendra bhūr adha jman na te vivyaṅ mahimānaṁ rajāṁsi |
7.021.06c svenā hi vṛtraṁ śavasā jaghantha na śatrur antaṁ vividad yudhā te ||
7.021.07a devāś cit te asuryāya pūrve 'nu kṣatrāya mamire sahāṁsi |
7.021.07c indro maghāni dayate viṣahyendraṁ vājasya johuvanta sātau ||
7.021.08a kīriś cid dhi tvām avase juhāveśānam indra saubhagasya bhūreḥ |
7.021.08c avo babhūtha śatamūte asme abhikṣattus tvāvato varūtā ||
7.021.09a sakhāyas ta indra viśvaha syāma namovṛdhāso mahinā tarutra |
7.021.09c vanvantu smā te 'vasā samīke 'bhītim aryo vanuṣāṁ śavāṁsi ||
7.021.10a sa na indra tvayatāyā iṣe dhās tmanā ca ye maghavāno junanti |
7.021.10c vasvī ṣu te jaritre astu śaktir yūyam pāta svastibhiḥ sadā naḥ ||

7.022.01a pibā somam indra mandatu tvā yaṁ te suṣāva haryaśvādriḥ |
7.022.01c sotur bāhubhyāṁ suyato nārvā ||
7.022.02a yas te mado yujyaś cārur asti yena vṛtrāṇi haryaśva haṁsi |
7.022.02c sa tvām indra prabhūvaso mamattu ||
7.022.03a bodhā su me maghavan vācam emāṁ yāṁ te vasiṣṭho arcati praśastim |
7.022.03c imā brahma sadhamāde juṣasva ||
7.022.04a śrudhī havaṁ vipipānasyādrer bodhā viprasyārcato manīṣām |
7.022.04c kṛṣvā duvāṁsy antamā sacemā ||
7.022.05a na te giro api mṛṣye turasya na suṣṭutim asuryasya vidvān |
7.022.05c sadā te nāma svayaśo vivakmi ||
7.022.06a bhūri hi te savanā mānuṣeṣu bhūri manīṣī havate tvām it |
7.022.06c māre asman maghavañ jyok kaḥ ||
7.022.07a tubhyed imā savanā śūra viśvā tubhyam brahmāṇi vardhanā kṛṇomi |
7.022.07c tvaṁ nṛbhir havyo viśvadhāsi ||
7.022.08a nū cin nu te manyamānasya dasmod aśnuvanti mahimānam ugra |
7.022.08c na vīryam indra te na rādhaḥ ||
7.022.09a ye ca pūrva ṛṣayo ye ca nūtnā indra brahmāṇi janayanta viprāḥ |
7.022.09c asme te santu sakhyā śivāni yūyam pāta svastibhiḥ sadā naḥ ||

7.023.01a ud u brahmāṇy airata śravasyendraṁ samarye mahayā vasiṣṭha |
7.023.01c ā yo viśvāni śavasā tatānopaśrotā ma īvato vacāṁsi ||
7.023.02a ayāmi ghoṣa indra devajāmir irajyanta yac churudho vivāci |
7.023.02c nahi svam āyuś cikite janeṣu tānīd aṁhāṁsy ati parṣy asmān ||
7.023.03a yuje rathaṁ gaveṣaṇaṁ haribhyām upa brahmāṇi jujuṣāṇam asthuḥ |
7.023.03c vi bādhiṣṭa sya rodasī mahitvendro vṛtrāṇy apratī jaghanvān ||
7.023.04a āpaś cit pipyuḥ staryo na gāvo nakṣann ṛtaṁ jaritāras ta indra |
7.023.04c yāhi vāyur na niyuto no acchā tvaṁ hi dhībhir dayase vi vājān ||
7.023.05a te tvā madā indra mādayantu śuṣmiṇaṁ tuvirādhasaṁ jaritre |
7.023.05c eko devatrā dayase hi martān asmiñ chūra savane mādayasva ||
7.023.06a eved indraṁ vṛṣaṇaṁ vajrabāhuṁ vasiṣṭhāso abhy arcanty arkaiḥ |
7.023.06c sa naḥ stuto vīravad dhātu gomad yūyam pāta svastibhiḥ sadā naḥ ||

7.024.01a yoniṣ ṭa indra sadane akāri tam ā nṛbhiḥ puruhūta pra yāhi |
7.024.01c aso yathā no 'vitā vṛdhe ca dado vasūni mamadaś ca somaiḥ ||
7.024.02a gṛbhītaṁ te mana indra dvibarhāḥ sutaḥ somaḥ pariṣiktā madhūni |
7.024.02c visṛṣṭadhenā bharate suvṛktir iyam indraṁ johuvatī manīṣā ||
7.024.03a ā no diva ā pṛthivyā ṛjīṣinn idam barhiḥ somapeyāya yāhi |
7.024.03c vahantu tvā harayo madryañcam āṅgūṣam acchā tavasam madāya ||
7.024.04a ā no viśvābhir ūtibhiḥ sajoṣā brahma juṣāṇo haryaśva yāhi |
7.024.04c varīvṛjat sthavirebhiḥ suśiprāsme dadhad vṛṣaṇaṁ śuṣmam indra ||
7.024.05a eṣa stomo maha ugrāya vāhe dhurīvātyo na vājayann adhāyi |
7.024.05c indra tvāyam arka īṭṭe vasūnāṁ divīva dyām adhi naḥ śromataṁ dhāḥ ||
7.024.06a evā na indra vāryasya pūrdhi pra te mahīṁ sumatiṁ vevidāma |
7.024.06c iṣam pinva maghavadbhyaḥ suvīrāṁ yūyam pāta svastibhiḥ sadā naḥ ||

7.025.01a ā te maha indroty ugra samanyavo yat samaranta senāḥ |
7.025.01c patāti didyun naryasya bāhvor mā te mano viṣvadryag vi cārīt ||
7.025.02a ni durga indra śnathihy amitrām̐ abhi ye no martāso amanti |
7.025.02c āre taṁ śaṁsaṁ kṛṇuhi ninitsor ā no bhara sambharaṇaṁ vasūnām ||
7.025.03a śataṁ te śiprinn ūtayaḥ sudāse sahasraṁ śaṁsā uta rātir astu |
7.025.03c jahi vadhar vanuṣo martyasyāsme dyumnam adhi ratnaṁ ca dhehi ||
7.025.04a tvāvato hīndra kratve asmi tvāvato 'vituḥ śūra rātau |
7.025.04c viśved ahāni taviṣīva ugram̐ okaḥ kṛṇuṣva harivo na mardhīḥ ||
7.025.05a kutsā ete haryaśvāya śūṣam indre saho devajūtam iyānāḥ |
7.025.05c satrā kṛdhi suhanā śūra vṛtrā vayaṁ tarutrāḥ sanuyāma vājam ||
7.025.06a evā na indra vāryasya pūrdhi pra te mahīṁ sumatiṁ vevidāma |
7.025.06c iṣam pinva maghavadbhyaḥ suvīrāṁ yūyam pāta svastibhiḥ sadā naḥ ||

7.026.01a na soma indram asuto mamāda nābrahmāṇo maghavānaṁ sutāsaḥ |
7.026.01c tasmā ukthaṁ janaye yaj jujoṣan nṛvan navīyaḥ śṛṇavad yathā naḥ ||
7.026.02a uktha-ukthe soma indram mamāda nīthe-nīthe maghavānaṁ sutāsaḥ |
7.026.02c yad īṁ sabādhaḥ pitaraṁ na putrāḥ samānadakṣā avase havante ||
7.026.03a cakāra tā kṛṇavan nūnam anyā yāni bruvanti vedhasaḥ suteṣu |
7.026.03c janīr iva patir ekaḥ samāno ni māmṛje pura indraḥ su sarvāḥ ||
7.026.04a evā tam āhur uta śṛṇva indra eko vibhaktā taraṇir maghānām |
7.026.04c mithastura ūtayo yasya pūrvīr asme bhadrāṇi saścata priyāṇi ||
7.026.05a evā vasiṣṭha indram ūtaye nṝn kṛṣṭīnāṁ vṛṣabhaṁ sute gṛṇāti |
7.026.05c sahasriṇa upa no māhi vājān yūyam pāta svastibhiḥ sadā naḥ ||

7.027.01a indraṁ naro nemadhitā havante yat pāryā yunajate dhiyas tāḥ |
7.027.01c śūro nṛṣātā śavasaś cakāna ā gomati vraje bhajā tvaṁ naḥ ||
7.027.02a ya indra śuṣmo maghavan te asti śikṣā sakhibhyaḥ puruhūta nṛbhyaḥ |
7.027.02c tvaṁ hi dṛḻhā maghavan vicetā apā vṛdhi parivṛtaṁ na rādhaḥ ||
7.027.03a indro rājā jagataś carṣaṇīnām adhi kṣami viṣurūpaṁ yad asti |
7.027.03c tato dadāti dāśuṣe vasūni codad rādha upastutaś cid arvāk ||
7.027.04a nū cin na indro maghavā sahūtī dāno vājaṁ ni yamate na ūtī |
7.027.04c anūnā yasya dakṣiṇā pīpāya vāmaṁ nṛbhyo abhivītā sakhibhyaḥ ||
7.027.05a nū indra rāye varivas kṛdhī na ā te mano vavṛtyāma maghāya |
7.027.05c gomad aśvāvad rathavad vyanto yūyam pāta svastibhiḥ sadā naḥ ||

7.028.01a brahmā ṇa indropa yāhi vidvān arvāñcas te harayaḥ santu yuktāḥ |
7.028.01c viśve cid dhi tvā vihavanta martā asmākam ic chṛṇuhi viśvaminva ||
7.028.02a havaṁ ta indra mahimā vy ānaḍ brahma yat pāsi śavasinn ṛṣīṇām |
7.028.02c ā yad vajraṁ dadhiṣe hasta ugra ghoraḥ san kratvā janiṣṭhā aṣāḻhaḥ ||
7.028.03a tava praṇītīndra johuvānān saṁ yan nṝn na rodasī ninetha |
7.028.03c mahe kṣatrāya śavase hi jajñe 'tūtujiṁ cit tūtujir aśiśnat ||
7.028.04a ebhir na indrāhabhir daśasya durmitrāso hi kṣitayaḥ pavante |
7.028.04c prati yac caṣṭe anṛtam anenā ava dvitā varuṇo māyī naḥ sāt ||
7.028.05a vocemed indram maghavānam enam maho rāyo rādhaso yad dadan naḥ |
7.028.05c yo arcato brahmakṛtim aviṣṭho yūyam pāta svastibhiḥ sadā naḥ ||

7.029.01a ayaṁ soma indra tubhyaṁ sunva ā tu pra yāhi harivas tadokāḥ |
7.029.01c pibā tv asya suṣutasya cāror dado maghāni maghavann iyānaḥ ||
7.029.02a brahman vīra brahmakṛtiṁ juṣāṇo 'rvācīno haribhir yāhi tūyam |
7.029.02c asminn ū ṣu savane mādayasvopa brahmāṇi śṛṇava imā naḥ ||
7.029.03a kā te asty araṁkṛtiḥ sūktaiḥ kadā nūnaṁ te maghavan dāśema |
7.029.03c viśvā matīr ā tatane tvāyādhā ma indra śṛṇavo havemā ||
7.029.04a uto ghā te puruṣyā id āsan yeṣām pūrveṣām aśṛṇor ṛṣīṇām |
7.029.04c adhāhaṁ tvā maghavañ johavīmi tvaṁ na indrāsi pramatiḥ piteva ||
7.029.05a vocemed indram maghavānam enam maho rāyo rādhaso yad dadan naḥ |
7.029.05c yo arcato brahmakṛtim aviṣṭho yūyam pāta svastibhiḥ sadā naḥ ||

7.030.01a ā no deva śavasā yāhi śuṣmin bhavā vṛdha indra rāyo asya |
7.030.01c mahe nṛmṇāya nṛpate suvajra mahi kṣatrāya pauṁsyāya śūra ||
7.030.02a havanta u tvā havyaṁ vivāci tanūṣu śūrāḥ sūryasya sātau |
7.030.02c tvaṁ viśveṣu senyo janeṣu tvaṁ vṛtrāṇi randhayā suhantu ||
7.030.03a ahā yad indra sudinā vyucchān dadho yat ketum upamaṁ samatsu |
7.030.03c ny agniḥ sīdad asuro na hotā huvāno atra subhagāya devān ||
7.030.04a vayaṁ te ta indra ye ca deva stavanta śūra dadato maghāni |
7.030.04c yacchā sūribhya upamaṁ varūthaṁ svābhuvo jaraṇām aśnavanta ||
7.030.05a vocemed indram maghavānam enam maho rāyo rādhaso yad dadan naḥ |
7.030.05c yo arcato brahmakṛtim aviṣṭho yūyam pāta svastibhiḥ sadā naḥ ||

7.031.01a pra va indrāya mādanaṁ haryaśvāya gāyata |
7.031.01c sakhāyaḥ somapāvne ||
7.031.02a śaṁsed ukthaṁ sudānava uta dyukṣaṁ yathā naraḥ |
7.031.02c cakṛmā satyarādhase ||
7.031.03a tvaṁ na indra vājayus tvaṁ gavyuḥ śatakrato |
7.031.03c tvaṁ hiraṇyayur vaso ||
7.031.04a vayam indra tvāyavo 'bhi pra ṇonumo vṛṣan |
7.031.04c viddhī tv asya no vaso ||
7.031.05a mā no nide ca vaktave 'ryo randhīr arāvṇe |
7.031.05c tve api kratur mama ||
7.031.06a tvaṁ varmāsi saprathaḥ puroyodhaś ca vṛtrahan |
7.031.06c tvayā prati bruve yujā ||
7.031.07a mahām̐ utāsi yasya te 'nu svadhāvarī sahaḥ |
7.031.07c mamnāte indra rodasī ||
7.031.08a taṁ tvā marutvatī pari bhuvad vāṇī sayāvarī |
7.031.08c nakṣamāṇā saha dyubhiḥ ||
7.031.09a ūrdhvāsas tvānv indavo bhuvan dasmam upa dyavi |
7.031.09c saṁ te namanta kṛṣṭayaḥ ||
7.031.10a pra vo mahe mahivṛdhe bharadhvam pracetase pra sumatiṁ kṛṇudhvam |
7.031.10c viśaḥ pūrvīḥ pra carā carṣaṇiprāḥ ||
7.031.11a uruvyacase mahine suvṛktim indrāya brahma janayanta viprāḥ |
7.031.11c tasya vratāni na minanti dhīrāḥ ||
7.031.12a indraṁ vāṇīr anuttamanyum eva satrā rājānaṁ dadhire sahadhyai |
7.031.12c haryaśvāya barhayā sam āpīn ||

7.032.01a mo ṣu tvā vāghataś canāre asman ni rīraman |
7.032.01c ārāttāc cit sadhamādaṁ na ā gahīha vā sann upa śrudhi ||
7.032.02a ime hi te brahmakṛtaḥ sute sacā madhau na makṣa āsate |
7.032.02c indre kāmaṁ jaritāro vasūyavo rathe na pādam ā dadhuḥ ||
7.032.03 rāyaskāmo vajrahastaṁ sudakṣiṇam putro na pitaraṁ huve ||
7.032.04a ima indrāya sunvire somāso dadhyāśiraḥ |
7.032.04c tām̐ ā madāya vajrahasta pītaye haribhyāṁ yāhy oka ā ||
7.032.05a śravac chrutkarṇa īyate vasūnāṁ nū cin no mardhiṣad giraḥ |
7.032.05c sadyaś cid yaḥ sahasrāṇi śatā dadan nakir ditsantam ā minat ||
7.032.06a sa vīro apratiṣkuta indreṇa śūśuve nṛbhiḥ |
7.032.06c yas te gabhīrā savanāni vṛtrahan sunoty ā ca dhāvati ||
7.032.07a bhavā varūtham maghavan maghonāṁ yat samajāsi śardhataḥ |
7.032.07c vi tvāhatasya vedanam bhajemahy ā dūṇāśo bharā gayam ||
7.032.08a sunotā somapāvne somam indrāya vajriṇe |
7.032.08c pacatā paktīr avase kṛṇudhvam it pṛṇann it pṛṇate mayaḥ ||
7.032.09a mā sredhata somino dakṣatā mahe kṛṇudhvaṁ rāya ātuje |
7.032.09c taraṇir ij jayati kṣeti puṣyati na devāsaḥ kavatnave ||
7.032.10a nakiḥ sudāso ratham pary āsa na rīramat |
7.032.10c indro yasyāvitā yasya maruto gamat sa gomati vraje ||
7.032.11a gamad vājaṁ vājayann indra martyo yasya tvam avitā bhuvaḥ |
7.032.11c asmākam bodhy avitā rathānām asmākaṁ śūra nṛṇām ||
7.032.12a ud in nv asya ricyate 'ṁśo dhanaṁ na jigyuṣaḥ |
7.032.12c ya indro harivān na dabhanti taṁ ripo dakṣaṁ dadhāti somini ||
7.032.13a mantram akharvaṁ sudhitaṁ supeśasaṁ dadhāta yajñiyeṣv ā |
7.032.13c pūrvīś cana prasitayas taranti taṁ ya indre karmaṇā bhuvat ||
7.032.14a kas tam indra tvāvasum ā martyo dadharṣati |
7.032.14c śraddhā it te maghavan pārye divi vājī vājaṁ siṣāsati ||
7.032.15a maghonaḥ sma vṛtrahatyeṣu codaya ye dadati priyā vasu |
7.032.15c tava praṇītī haryaśva sūribhir viśvā tarema duritā ||
7.032.16a taved indrāvamaṁ vasu tvam puṣyasi madhyamam |
7.032.16c satrā viśvasya paramasya rājasi nakiṣ ṭvā goṣu vṛṇvate ||
7.032.17a tvaṁ viśvasya dhanadā asi śruto ya īm bhavanty ājayaḥ |
7.032.17c tavāyaṁ viśvaḥ puruhūta pārthivo 'vasyur nāma bhikṣate ||
7.032.18a yad indra yāvatas tvam etāvad aham īśīya |
7.032.18c stotāram id didhiṣeya radāvaso na pāpatvāya rāsīya ||
7.032.19a śikṣeyam in mahayate dive-dive rāya ā kuhacidvide |
7.032.19c nahi tvad anyan maghavan na āpyaṁ vasyo asti pitā cana ||
7.032.20a taraṇir it siṣāsati vājam puraṁdhyā yujā |
7.032.20c ā va indram puruhūtaṁ name girā nemiṁ taṣṭeva sudrvam ||
7.032.21a na duṣṭutī martyo vindate vasu na sredhantaṁ rayir naśat |
7.032.21c suśaktir in maghavan tubhyam māvate deṣṇaṁ yat pārye divi ||
7.032.22a abhi tvā śūra nonumo 'dugdhā iva dhenavaḥ |
7.032.22c īśānam asya jagataḥ svardṛśam īśānam indra tasthuṣaḥ ||
7.032.23a na tvāvām̐ anyo divyo na pārthivo na jāto na janiṣyate |
7.032.23c aśvāyanto maghavann indra vājino gavyantas tvā havāmahe ||
7.032.24a abhī ṣatas tad ā bharendra jyāyaḥ kanīyasaḥ |
7.032.24c purūvasur hi maghavan sanād asi bhare-bhare ca havyaḥ ||
7.032.25a parā ṇudasva maghavann amitrān suvedā no vasū kṛdhi |
7.032.25c asmākam bodhy avitā mahādhane bhavā vṛdhaḥ sakhīnām ||
7.032.26a indra kratuṁ na ā bhara pitā putrebhyo yathā |
7.032.26c śikṣā ṇo asmin puruhūta yāmani jīvā jyotir aśīmahi ||
7.032.27a mā no ajñātā vṛjanā durādhyo māśivāso ava kramuḥ |
7.032.27c tvayā vayam pravataḥ śaśvatīr apo 'ti śūra tarāmasi ||

7.033.01a śvityañco mā dakṣiṇataskapardā dhiyaṁjinvāso abhi hi pramanduḥ |
7.033.01c uttiṣṭhan voce pari barhiṣo nṝn na me dūrād avitave vasiṣṭhāḥ ||
7.033.02a dūrād indram anayann ā sutena tiro vaiśantam ati pāntam ugram |
7.033.02c pāśadyumnasya vāyatasya somāt sutād indro 'vṛṇītā vasiṣṭhān ||
7.033.03a even nu kaṁ sindhum ebhis tatāreven nu kam bhedam ebhir jaghāna |
7.033.03c even nu kaṁ dāśarājñe sudāsam prāvad indro brahmaṇā vo vasiṣṭhāḥ ||
7.033.04a juṣṭī naro brahmaṇā vaḥ pitṝṇām akṣam avyayaṁ na kilā riṣātha |
7.033.04c yac chakvarīṣu bṛhatā raveṇendre śuṣmam adadhātā vasiṣṭhāḥ ||
7.033.05a ud dyām ivet tṛṣṇajo nāthitāso 'dīdhayur dāśarājñe vṛtāsaḥ |
7.033.05c vasiṣṭhasya stuvata indro aśrod uruṁ tṛtsubhyo akṛṇod u lokam ||
7.033.06a daṇḍā ived goajanāsa āsan paricchinnā bharatā arbhakāsaḥ |
7.033.06c abhavac ca puraetā vasiṣṭha ād it tṛtsūnāṁ viśo aprathanta ||
7.033.07a trayaḥ kṛṇvanti bhuvaneṣu retas tisraḥ prajā āryā jyotiragrāḥ |
7.033.07c trayo gharmāsa uṣasaṁ sacante sarvām̐ it tām̐ anu vidur vasiṣṭhāḥ ||
7.033.08a sūryasyeva vakṣatho jyotir eṣāṁ samudrasyeva mahimā gabhīraḥ |
7.033.08c vātasyeva prajavo nānyena stomo vasiṣṭhā anvetave vaḥ ||
7.033.09a ta in niṇyaṁ hṛdayasya praketaiḥ sahasravalśam abhi saṁ caranti |
7.033.09c yamena tatam paridhiṁ vayanto 'psarasa upa sedur vasiṣṭhāḥ ||
7.033.10a vidyuto jyotiḥ pari saṁjihānam mitrāvaruṇā yad apaśyatāṁ tvā |
7.033.10c tat te janmotaikaṁ vasiṣṭhāgastyo yat tvā viśa ājabhāra ||
7.033.11a utāsi maitrāvaruṇo vasiṣṭhorvaśyā brahman manaso 'dhi jātaḥ |
7.033.11c drapsaṁ skannam brahmaṇā daivyena viśve devāḥ puṣkare tvādadanta ||
7.033.12a sa praketa ubhayasya pravidvān sahasradāna uta vā sadānaḥ |
7.033.12c yamena tatam paridhiṁ vayiṣyann apsarasaḥ pari jajñe vasiṣṭhaḥ ||
7.033.13a satre ha jātāv iṣitā namobhiḥ kumbhe retaḥ siṣicatuḥ samānam |
7.033.13c tato ha māna ud iyāya madhyāt tato jātam ṛṣim āhur vasiṣṭham ||
7.033.14a ukthabhṛtaṁ sāmabhṛtam bibharti grāvāṇam bibhrat pra vadāty agre |
7.033.14c upainam ādhvaṁ sumanasyamānā ā vo gacchāti pratṛdo vasiṣṭhaḥ ||

7.034.01 pra śukraitu devī manīṣā asmat sutaṣṭo ratho na vājī ||
7.034.02 viduḥ pṛthivyā divo janitraṁ śṛṇvanty āpo adha kṣarantīḥ ||
7.034.03 āpaś cid asmai pinvanta pṛthvīr vṛtreṣu śūrā maṁsanta ugrāḥ ||
7.034.04 ā dhūrṣv asmai dadhātāśvān indro na vajrī hiraṇyabāhuḥ ||
7.034.05 abhi pra sthātāheva yajñaṁ yāteva patman tmanā hinota ||
7.034.06 tmanā samatsu hinota yajñaṁ dadhāta ketuṁ janāya vīram ||
7.034.07 ud asya śuṣmād bhānur nārta bibharti bhāram pṛthivī na bhūma ||
7.034.08 hvayāmi devām̐ ayātur agne sādhann ṛtena dhiyaṁ dadhāmi ||
7.034.09 abhi vo devīṁ dhiyaṁ dadhidhvam pra vo devatrā vācaṁ kṛṇudhvam ||
7.034.10 ā caṣṭa āsām pātho nadīnāṁ varuṇa ugraḥ sahasracakṣāḥ ||
7.034.11 rājā rāṣṭrānām peśo nadīnām anuttam asmai kṣatraṁ viśvāyu ||
7.034.12 aviṣṭo asmān viśvāsu vikṣv adyuṁ kṛṇota śaṁsaṁ ninitsoḥ ||
7.034.13 vy etu didyud dviṣām aśevā yuyota viṣvag rapas tanūnām ||
7.034.14 avīn no agnir havyān namobhiḥ preṣṭho asmā adhāyi stomaḥ ||
7.034.15 sajūr devebhir apāṁ napātaṁ sakhāyaṁ kṛdhvaṁ śivo no astu ||
7.034.16 abjām ukthair ahiṁ gṛṇīṣe budhne nadīnāṁ rajaḥsu ṣīdan ||
7.034.17 mā no 'hir budhnyo riṣe dhān mā yajño asya sridhad ṛtāyoḥ ||
7.034.18 uta na eṣu nṛṣu śravo dhuḥ pra rāye yantu śardhanto aryaḥ ||
7.034.19 tapanti śatruṁ svar ṇa bhūmā mahāsenāso amebhir eṣām ||
7.034.20 ā yan naḥ patnīr gamanty acchā tvaṣṭā supāṇir dadhātu vīrān ||
7.034.21 prati naḥ stomaṁ tvaṣṭā juṣeta syād asme aramatir vasūyuḥ ||
7.034.22a tā no rāsan rātiṣāco vasūny ā rodasī varuṇānī śṛṇotu |
7.034.22c varūtrībhiḥ suśaraṇo no astu tvaṣṭā sudatro vi dadhātu rāyaḥ ||
7.034.23a tan no rāyaḥ parvatās tan na āpas tad rātiṣāca oṣadhīr uta dyauḥ |
7.034.23c vanaspatibhiḥ pṛthivī sajoṣā ubhe rodasī pari pāsato naḥ ||
7.034.24a anu tad urvī rodasī jihātām anu dyukṣo varuṇa indrasakhā |
7.034.24c anu viśve maruto ye sahāso rāyaḥ syāma dharuṇaṁ dhiyadhyai ||
7.034.25a tan na indro varuṇo mitro agnir āpa oṣadhīr vanino juṣanta |
7.034.25c śarman syāma marutām upasthe yūyam pāta svastibhiḥ sadā naḥ ||

7.035.01a śaṁ na indrāgnī bhavatām avobhiḥ śaṁ na indrāvaruṇā rātahavyā |
7.035.01c śam indrāsomā suvitāya śaṁ yoḥ śaṁ na indrāpūṣaṇā vājasātau ||
7.035.02a śaṁ no bhagaḥ śam u naḥ śaṁso astu śaṁ naḥ puraṁdhiḥ śam u santu rāyaḥ |
7.035.02c śaṁ naḥ satyasya suyamasya śaṁsaḥ śaṁ no aryamā purujāto astu ||
7.035.03a śaṁ no dhātā śam u dhartā no astu śaṁ na urūcī bhavatu svadhābhiḥ |
7.035.03c śaṁ rodasī bṛhatī śaṁ no adriḥ śaṁ no devānāṁ suhavāni santu ||
7.035.04a śaṁ no agnir jyotiranīko astu śaṁ no mitrāvaruṇāv aśvinā śam |
7.035.04c śaṁ naḥ sukṛtāṁ sukṛtāni santu śaṁ na iṣiro abhi vātu vātaḥ ||
7.035.05a śaṁ no dyāvāpṛthivī pūrvahūtau śam antarikṣaṁ dṛśaye no astu |
7.035.05c śaṁ na oṣadhīr vanino bhavantu śaṁ no rajasas patir astu jiṣṇuḥ ||
7.035.06a śaṁ na indro vasubhir devo astu śam ādityebhir varuṇaḥ suśaṁsaḥ |
7.035.06c śaṁ no rudro rudrebhir jalāṣaḥ śaṁ nas tvaṣṭā gnābhir iha śṛṇotu ||
7.035.07a śaṁ naḥ somo bhavatu brahma śaṁ naḥ śaṁ no grāvāṇaḥ śam u santu yajñāḥ |
7.035.07c śaṁ naḥ svarūṇām mitayo bhavantu śaṁ naḥ prasvaḥ śam v astu vediḥ ||
7.035.08a śaṁ naḥ sūrya urucakṣā ud etu śaṁ naś catasraḥ pradiśo bhavantu |
7.035.08c śaṁ naḥ parvatā dhruvayo bhavantu śaṁ naḥ sindhavaḥ śam u santv āpaḥ ||
7.035.09a śaṁ no aditir bhavatu vratebhiḥ śaṁ no bhavantu marutaḥ svarkāḥ |
7.035.09c śaṁ no viṣṇuḥ śam u pūṣā no astu śaṁ no bhavitraṁ śam v astu vāyuḥ ||
7.035.10a śaṁ no devaḥ savitā trāyamāṇaḥ śaṁ no bhavantūṣaso vibhātīḥ |
7.035.10c śaṁ naḥ parjanyo bhavatu prajābhyaḥ śaṁ naḥ kṣetrasya patir astu śambhuḥ ||
7.035.11a śaṁ no devā viśvadevā bhavantu śaṁ sarasvatī saha dhībhir astu |
7.035.11c śam abhiṣācaḥ śam u rātiṣācaḥ śaṁ no divyāḥ pārthivāḥ śaṁ no apyāḥ ||
7.035.12a śaṁ naḥ satyasya patayo bhavantu śaṁ no arvantaḥ śam u santu gāvaḥ |
7.035.12c śaṁ na ṛbhavaḥ sukṛtaḥ suhastāḥ śaṁ no bhavantu pitaro haveṣu ||
7.035.13a śaṁ no aja ekapād devo astu śaṁ no 'hir budhnyaḥ śaṁ samudraḥ |
7.035.13c śaṁ no apāṁ napāt perur astu śaṁ naḥ pṛśnir bhavatu devagopā ||
7.035.14a ādityā rudrā vasavo juṣantedam brahma kriyamāṇaṁ navīyaḥ |
7.035.14c śṛṇvantu no divyāḥ pārthivāso gojātā uta ye yajñiyāsaḥ ||
7.035.15a ye devānāṁ yajñiyā yajñiyānām manor yajatrā amṛtā ṛtajñāḥ |
7.035.15c te no rāsantām urugāyam adya yūyam pāta svastibhiḥ sadā naḥ ||

7.036.01a pra brahmaitu sadanād ṛtasya vi raśmibhiḥ sasṛje sūryo gāḥ |
7.036.01c vi sānunā pṛthivī sasra urvī pṛthu pratīkam adhy edhe agniḥ ||
7.036.02a imāṁ vām mitrāvaruṇā suvṛktim iṣaṁ na kṛṇve asurā navīyaḥ |
7.036.02c ino vām anyaḥ padavīr adabdho janaṁ ca mitro yatati bruvāṇaḥ ||
7.036.03a ā vātasya dhrajato ranta ityā apīpayanta dhenavo na sūdāḥ |
7.036.03c maho divaḥ sadane jāyamāno 'cikradad vṛṣabhaḥ sasminn ūdhan ||
7.036.04a girā ya etā yunajad dharī ta indra priyā surathā śūra dhāyū |
7.036.04c pra yo manyuṁ ririkṣato mināty ā sukratum aryamaṇaṁ vavṛtyām ||
7.036.05a yajante asya sakhyaṁ vayaś ca namasvinaḥ sva ṛtasya dhāman |
7.036.05c vi pṛkṣo bābadhe nṛbhiḥ stavāna idaṁ namo rudrāya preṣṭham ||
7.036.06a ā yat sākaṁ yaśaso vāvaśānāḥ sarasvatī saptathī sindhumātā |
7.036.06c yāḥ suṣvayanta sudughāḥ sudhārā abhi svena payasā pīpyānāḥ ||
7.036.07a uta tye no maruto mandasānā dhiyaṁ tokaṁ ca vājino 'vantu |
7.036.07c mā naḥ pari khyad akṣarā caranty avīvṛdhan yujyaṁ te rayiṁ naḥ ||
7.036.08a pra vo mahīm aramatiṁ kṛṇudhvam pra pūṣaṇaṁ vidathyaṁ na vīram |
7.036.08c bhagaṁ dhiyo 'vitāraṁ no asyāḥ sātau vājaṁ rātiṣācam puraṁdhim ||
7.036.09a acchāyaṁ vo marutaḥ śloka etv acchā viṣṇuṁ niṣiktapām avobhiḥ |
7.036.09c uta prajāyai gṛṇate vayo dhur yūyam pāta svastibhiḥ sadā naḥ ||

7.037.01a ā vo vāhiṣṭho vahatu stavadhyai ratho vājā ṛbhukṣaṇo amṛktaḥ |
7.037.01c abhi tripṛṣṭhaiḥ savaneṣu somair made suśiprā mahabhiḥ pṛṇadhvam ||
7.037.02a yūyaṁ ha ratnam maghavatsu dhattha svardṛśa ṛbhukṣaṇo amṛktam |
7.037.02c saṁ yajñeṣu svadhāvantaḥ pibadhvaṁ vi no rādhāṁsi matibhir dayadhvam ||
7.037.03a uvocitha hi maghavan deṣṇam maho arbhasya vasuno vibhāge |
7.037.03c ubhā te pūrṇā vasunā gabhastī na sūnṛtā ni yamate vasavyā ||
7.037.04a tvam indra svayaśā ṛbhukṣā vājo na sādhur astam eṣy ṛkvā |
7.037.04c vayaṁ nu te dāśvāṁsaḥ syāma brahma kṛṇvanto harivo vasiṣṭhāḥ ||
7.037.05a sanitāsi pravato dāśuṣe cid yābhir viveṣo haryaśva dhībhiḥ |
7.037.05c vavanmā nu te yujyābhir ūtī kadā na indra rāya ā daśasyeḥ ||
7.037.06a vāsayasīva vedhasas tvaṁ naḥ kadā na indra vacaso bubodhaḥ |
7.037.06c astaṁ tātyā dhiyā rayiṁ suvīram pṛkṣo no arvā ny uhīta vājī ||
7.037.07a abhi yaṁ devī nirṛtiś cid īśe nakṣanta indraṁ śaradaḥ supṛkṣaḥ |
7.037.07c upa tribandhur jaradaṣṭim ety asvaveśaṁ yaṁ kṛṇavanta martāḥ ||
7.037.08a ā no rādhāṁsi savitaḥ stavadhyā ā rāyo yantu parvatasya rātau |
7.037.08c sadā no divyaḥ pāyuḥ siṣaktu yūyam pāta svastibhiḥ sadā naḥ ||

7.038.01a ud u ṣya devaḥ savitā yayāma hiraṇyayīm amatiṁ yām aśiśret |
7.038.01c nūnam bhago havyo mānuṣebhir vi yo ratnā purūvasur dadhāti ||
7.038.02a ud u tiṣṭha savitaḥ śrudhy asya hiraṇyapāṇe prabhṛtāv ṛtasya |
7.038.02c vy urvīm pṛthvīm amatiṁ sṛjāna ā nṛbhyo martabhojanaṁ suvānaḥ ||
7.038.03a api ṣṭutaḥ savitā devo astu yam ā cid viśve vasavo gṛṇanti |
7.038.03c sa naḥ stomān namasyaś cano dhād viśvebhiḥ pātu pāyubhir ni sūrīn ||
7.038.04a abhi yaṁ devy aditir gṛṇāti savaṁ devasya savitur juṣāṇā |
7.038.04c abhi samrājo varuṇo gṛṇanty abhi mitrāso aryamā sajoṣāḥ ||
7.038.05a abhi ye mitho vanuṣaḥ sapante rātiṁ divo rātiṣācaḥ pṛthivyāḥ |
7.038.05c ahir budhnya uta naḥ śṛṇotu varūtry ekadhenubhir ni pātu ||
7.038.06a anu tan no jāspatir maṁsīṣṭa ratnaṁ devasya savitur iyānaḥ |
7.038.06c bhagam ugro 'vase johavīti bhagam anugro adha yāti ratnam ||
7.038.07a śaṁ no bhavantu vājino haveṣu devatātā mitadravaḥ svarkāḥ |
7.038.07c jambhayanto 'hiṁ vṛkaṁ rakṣāṁsi sanemy asmad yuyavann amīvāḥ ||
7.038.08a vāje-vāje 'vata vājino no dhaneṣu viprā amṛtā ṛtajñāḥ |
7.038.08c asya madhvaḥ pibata mādayadhvaṁ tṛptā yāta pathibhir devayānaiḥ ||

7.039.01a ūrdhvo agniḥ sumatiṁ vasvo aśret pratīcī jūrṇir devatātim eti |
7.039.01c bhejāte adrī rathyeva panthām ṛtaṁ hotā na iṣito yajāti ||
7.039.02a pra vāvṛje suprayā barhir eṣām ā viśpatīva bīriṭa iyāte |
7.039.02c viśām aktor uṣasaḥ pūrvahūtau vāyuḥ pūṣā svastaye niyutvān ||
7.039.03a jmayā atra vasavo ranta devā urāv antarikṣe marjayanta śubhrāḥ |
7.039.03c arvāk patha urujrayaḥ kṛṇudhvaṁ śrotā dūtasya jagmuṣo no asya ||
7.039.04a te hi yajñeṣu yajñiyāsa ūmāḥ sadhasthaṁ viśve abhi santi devāḥ |
7.039.04c tām̐ adhvara uśato yakṣy agne śruṣṭī bhagaṁ nāsatyā puraṁdhim ||
7.039.05a āgne giro diva ā pṛthivyā mitraṁ vaha varuṇam indram agnim |
7.039.05c āryamaṇam aditiṁ viṣṇum eṣāṁ sarasvatī maruto mādayantām ||
7.039.06a rare havyam matibhir yajñiyānāṁ nakṣat kāmam martyānām asinvan |
7.039.06c dhātā rayim avidasyaṁ sadāsāṁ sakṣīmahi yujyebhir nu devaiḥ ||
7.039.07a nū rodasī abhiṣṭute vasiṣṭhair ṛtāvāno varuṇo mitro agniḥ |
7.039.07c yacchantu candrā upamaṁ no arkaṁ yūyam pāta svastibhiḥ sadā naḥ ||

7.040.01a o śruṣṭir vidathyā sam etu prati stomaṁ dadhīmahi turāṇām |
7.040.01c yad adya devaḥ savitā suvāti syāmāsya ratnino vibhāge ||
7.040.02a mitras tan no varuṇo rodasī ca dyubhaktam indro aryamā dadātu |
7.040.02c dideṣṭu devy aditī rekṇo vāyuś ca yan niyuvaite bhagaś ca ||
7.040.03a sed ugro astu marutaḥ sa śuṣmī yam martyam pṛṣadaśvā avātha |
7.040.03c utem agniḥ sarasvatī junanti na tasya rāyaḥ paryetāsti ||
7.040.04a ayaṁ hi netā varuṇa ṛtasya mitro rājāno aryamāpo dhuḥ |
7.040.04c suhavā devy aditir anarvā te no aṁho ati parṣann ariṣṭān ||
7.040.05a asya devasya mīḻhuṣo vayā viṣṇor eṣasya prabhṛthe havirbhiḥ |
7.040.05c vide hi rudro rudriyam mahitvaṁ yāsiṣṭaṁ vartir aśvināv irāvat ||
7.040.06a mātra pūṣann āghṛṇa irasyo varūtrī yad rātiṣācaś ca rāsan |
7.040.06c mayobhuvo no arvanto ni pāntu vṛṣṭim parijmā vāto dadātu ||
7.040.07a nū rodasī abhiṣṭute vasiṣṭhair ṛtāvāno varuṇo mitro agniḥ |
7.040.07c yacchantu candrā upamaṁ no arkaṁ yūyam pāta svastibhiḥ sadā naḥ ||

7.041.01a prātar agnim prātar indraṁ havāmahe prātar mitrāvaruṇā prātar aśvinā |
7.041.01c prātar bhagam pūṣaṇam brahmaṇas patim prātaḥ somam uta rudraṁ huvema ||
7.041.02a prātarjitam bhagam ugraṁ huvema vayam putram aditer yo vidhartā |
7.041.02c ādhraś cid yam manyamānas turaś cid rājā cid yam bhagam bhakṣīty āha ||
7.041.03a bhaga praṇetar bhaga satyarādho bhagemāṁ dhiyam ud avā dadan naḥ |
7.041.03c bhaga pra ṇo janaya gobhir aśvair bhaga pra nṛbhir nṛvantaḥ syāma ||
7.041.04a utedānīm bhagavantaḥ syāmota prapitva uta madhye ahnām |
7.041.04c utoditā maghavan sūryasya vayaṁ devānāṁ sumatau syāma ||
7.041.05a bhaga eva bhagavām̐ astu devās tena vayam bhagavantaḥ syāma |
7.041.05c taṁ tvā bhaga sarva ij johavīti sa no bhaga puraetā bhaveha ||
7.041.06a sam adhvarāyoṣaso namanta dadhikrāveva śucaye padāya |
7.041.06c arvācīnaṁ vasuvidam bhagaṁ no ratham ivāśvā vājina ā vahantu ||
7.041.07a aśvāvatīr gomatīr na uṣāso vīravatīḥ sadam ucchantu bhadrāḥ |
7.041.07c ghṛtaṁ duhānā viśvataḥ prapītā yūyam pāta svastibhiḥ sadā naḥ ||

7.042.01a pra brahmāṇo aṅgiraso nakṣanta pra krandanur nabhanyasya vetu |
7.042.01c pra dhenava udapruto navanta yujyātām adrī adhvarasya peśaḥ ||
7.042.02a sugas te agne sanavitto adhvā yukṣvā sute harito rohitaś ca |
7.042.02c ye vā sadmann aruṣā vīravāho huve devānāṁ janimāni sattaḥ ||
7.042.03a sam u vo yajñam mahayan namobhiḥ pra hotā mandro ririca upāke |
7.042.03c yajasva su purvaṇīka devān ā yajñiyām aramatiṁ vavṛtyāḥ ||
7.042.04a yadā vīrasya revato duroṇe syonaśīr atithir āciketat |
7.042.04c suprīto agniḥ sudhito dama ā sa viśe dāti vāryam iyatyai ||
7.042.05a imaṁ no agne adhvaraṁ juṣasva marutsv indre yaśasaṁ kṛdhī naḥ |
7.042.05c ā naktā barhiḥ sadatām uṣāsośantā mitrāvaruṇā yajeha ||
7.042.06a evāgniṁ sahasyaṁ vasiṣṭho rāyaskāmo viśvapsnyasya staut |
7.042.06c iṣaṁ rayim paprathad vājam asme yūyam pāta svastibhiḥ sadā naḥ ||

7.043.01a pra vo yajñeṣu devayanto arcan dyāvā namobhiḥ pṛthivī iṣadhyai |
7.043.01c yeṣām brahmāṇy asamāni viprā viṣvag viyanti vanino na śākhāḥ ||
7.043.02a pra yajña etu hetvo na saptir ud yacchadhvaṁ samanaso ghṛtācīḥ |
7.043.02c stṛṇīta barhir adhvarāya sādhūrdhvā śocīṁṣi devayūny asthuḥ ||
7.043.03a ā putrāso na mātaraṁ vibhṛtrāḥ sānau devāso barhiṣaḥ sadantu |
7.043.03c ā viśvācī vidathyām anaktv agne mā no devatātā mṛdhas kaḥ ||
7.043.04a te sīṣapanta joṣam ā yajatrā ṛtasya dhārāḥ sudughā duhānāḥ |
7.043.04c jyeṣṭhaṁ vo adya maha ā vasūnām ā gantana samanaso yati ṣṭha ||
7.043.05a evā no agne vikṣv ā daśasya tvayā vayaṁ sahasāvann āskrāḥ |
7.043.05c rāyā yujā sadhamādo ariṣṭā yūyam pāta svastibhiḥ sadā naḥ ||

7.044.01a dadhikrāṁ vaḥ prathamam aśvinoṣasam agniṁ samiddham bhagam ūtaye huve |
7.044.01c indraṁ viṣṇum pūṣaṇam brahmaṇas patim ādityān dyāvāpṛthivī apaḥ svaḥ ||
7.044.02a dadhikrām u namasā bodhayanta udīrāṇā yajñam upaprayantaḥ |
7.044.02c iḻāṁ devīm barhiṣi sādayanto 'śvinā viprā suhavā huvema ||
7.044.03a dadhikrāvāṇam bubudhāno agnim upa bruva uṣasaṁ sūryaṁ gām |
7.044.03c bradhnam mam̐ścator varuṇasya babhruṁ te viśvāsmad duritā yāvayantu ||
7.044.04a dadhikrāvā prathamo vājy arvāgre rathānām bhavati prajānan |
7.044.04c saṁvidāna uṣasā sūryeṇādityebhir vasubhir aṅgirobhiḥ ||
7.044.05a ā no dadhikrāḥ pathyām anaktv ṛtasya panthām anvetavā u |
7.044.05c śṛṇotu no daivyaṁ śardho agniḥ śṛṇvantu viśve mahiṣā amūrāḥ ||

7.045.01a ā devo yātu savitā suratno 'ntarikṣaprā vahamāno aśvaiḥ |
7.045.01c haste dadhāno naryā purūṇi niveśayañ ca prasuvañ ca bhūma ||
7.045.02a ud asya bāhū śithirā bṛhantā hiraṇyayā divo antām̐ anaṣṭām |
7.045.02c nūnaṁ so asya mahimā paniṣṭa sūraś cid asmā anu dād apasyām ||
7.045.03a sa ghā no devaḥ savitā sahāvā sāviṣad vasupatir vasūni |
7.045.03c viśrayamāṇo amatim urūcīm martabhojanam adha rāsate naḥ ||
7.045.04a imā giraḥ savitāraṁ sujihvam pūrṇagabhastim īḻate supāṇim |
7.045.04c citraṁ vayo bṛhad asme dadhātu yūyam pāta svastibhiḥ sadā naḥ ||

7.046.01a imā rudrāya sthiradhanvane giraḥ kṣipreṣave devāya svadhāvne |
7.046.01c aṣāḻhāya sahamānāya vedhase tigmāyudhāya bharatā śṛṇotu naḥ ||
7.046.02a sa hi kṣayeṇa kṣamyasya janmanaḥ sāmrājyena divyasya cetati |
7.046.02c avann avantīr upa no duraś carānamīvo rudra jāsu no bhava ||
7.046.03a yā te didyud avasṛṣṭā divas pari kṣmayā carati pari sā vṛṇaktu naḥ |
7.046.03c sahasraṁ te svapivāta bheṣajā mā nas tokeṣu tanayeṣu rīriṣaḥ ||
7.046.04a mā no vadhī rudra mā parā dā mā te bhūma prasitau hīḻitasya |
7.046.04c ā no bhaja barhiṣi jīvaśaṁse yūyam pāta svastibhiḥ sadā naḥ ||

7.047.01a āpo yaṁ vaḥ prathamaṁ devayanta indrapānam ūrmim akṛṇvateḻaḥ |
7.047.01c taṁ vo vayaṁ śucim aripram adya ghṛtapruṣam madhumantaṁ vanema ||
7.047.02a tam ūrmim āpo madhumattamaṁ vo 'pāṁ napād avatv āśuhemā |
7.047.02c yasminn indro vasubhir mādayāte tam aśyāma devayanto vo adya ||
7.047.03a śatapavitrāḥ svadhayā madantīr devīr devānām api yanti pāthaḥ |
7.047.03c tā indrasya na minanti vratāni sindhubhyo havyaṁ ghṛtavaj juhota ||
7.047.04a yāḥ sūryo raśmibhir ātatāna yābhya indro aradad gātum ūrmim |
7.047.04c te sindhavo varivo dhātanā no yūyam pāta svastibhiḥ sadā naḥ ||

7.048.01a ṛbhukṣaṇo vājā mādayadhvam asme naro maghavānaḥ sutasya |
7.048.01c ā vo 'rvācaḥ kratavo na yātāṁ vibhvo rathaṁ naryaṁ vartayantu ||
7.048.02a ṛbhur ṛbhubhir abhi vaḥ syāma vibhvo vibhubhiḥ śavasā śavāṁsi |
7.048.02c vājo asmām̐ avatu vājasātāv indreṇa yujā taruṣema vṛtram ||
7.048.03a te cid dhi pūrvīr abhi santi śāsā viśvām̐ arya uparatāti vanvan |
7.048.03c indro vibhvām̐ ṛbhukṣā vājo aryaḥ śatror mithatyā kṛṇavan vi nṛmṇam ||
7.048.04a nū devāso varivaḥ kartanā no bhūta no viśve 'vase sajoṣāḥ |
7.048.04c sam asme iṣaṁ vasavo dadīran yūyam pāta svastibhiḥ sadā naḥ ||

7.049.01a samudrajyeṣṭhāḥ salilasya madhyāt punānā yanty aniviśamānāḥ |
7.049.01c indro yā vajrī vṛṣabho rarāda tā āpo devīr iha mām avantu ||
7.049.02a yā āpo divyā uta vā sravanti khanitrimā uta vā yāḥ svayaṁjāḥ |
7.049.02c samudrārthā yāḥ śucayaḥ pāvakās tā āpo devīr iha mām avantu ||
7.049.03a yāsāṁ rājā varuṇo yāti madhye satyānṛte avapaśyañ janānām |
7.049.03c madhuścutaḥ śucayo yāḥ pāvakās tā āpo devīr iha mām avantu ||
7.049.04a yāsu rājā varuṇo yāsu somo viśve devā yāsūrjam madanti |
7.049.04c vaiśvānaro yāsv agniḥ praviṣṭas tā āpo devīr iha mām avantu ||

7.050.01a ā mām mitrāvaruṇeha rakṣataṁ kulāyayad viśvayan mā na ā gan |
7.050.01c ajakāvaṁ durdṛśīkaṁ tiro dadhe mā mām padyena rapasā vidat tsaruḥ ||
7.050.02a yad vijāman paruṣi vandanam bhuvad aṣṭhīvantau pari kulphau ca dehat |
7.050.02c agniṣ ṭac chocann apa bādhatām ito mā mām padyena rapasā vidat tsaruḥ ||
7.050.03a yac chalmalau bhavati yan nadīṣu yad oṣadhībhyaḥ pari jāyate viṣam |
7.050.03c viśve devā nir itas tat suvantu mā mām padyena rapasā vidat tsaruḥ ||
7.050.04a yāḥ pravato nivata udvata udanvatīr anudakāś ca yāḥ |
7.050.04c tā asmabhyam payasā pinvamānāḥ śivā devīr aśipadā bhavantu sarvā nadyo aśimidā bhavantu ||

7.051.01a ādityānām avasā nūtanena sakṣīmahi śarmaṇā śaṁtamena |
7.051.01c anāgāstve adititve turāsa imaṁ yajñaṁ dadhatu śroṣamāṇāḥ ||
7.051.02a ādityāso aditir mādayantām mitro aryamā varuṇo rajiṣṭhāḥ |
7.051.02c asmākaṁ santu bhuvanasya gopāḥ pibantu somam avase no adya ||
7.051.03a ādityā viśve marutaś ca viśve devāś ca viśva ṛbhavaś ca viśve |
7.051.03c indro agnir aśvinā tuṣṭuvānā yūyam pāta svastibhiḥ sadā naḥ ||

7.052.01a ādityāso aditayaḥ syāma pūr devatrā vasavo martyatrā |
7.052.01c sanema mitrāvaruṇā sananto bhavema dyāvāpṛthivī bhavantaḥ ||
7.052.02a mitras tan no varuṇo māmahanta śarma tokāya tanayāya gopāḥ |
7.052.02c mā vo bhujemānyajātam eno mā tat karma vasavo yac cayadhve ||
7.052.03a turaṇyavo 'ṅgiraso nakṣanta ratnaṁ devasya savitur iyānāḥ |
7.052.03c pitā ca tan no mahān yajatro viśve devāḥ samanaso juṣanta ||

7.053.01a pra dyāvā yajñaiḥ pṛthivī namobhiḥ sabādha īḻe bṛhatī yajatre |
7.053.01c te cid dhi pūrve kavayo gṛṇantaḥ puro mahī dadhire devaputre ||
7.053.02a pra pūrvaje pitarā navyasībhir gīrbhiḥ kṛṇudhvaṁ sadane ṛtasya |
7.053.02c ā no dyāvāpṛthivī daivyena janena yātam mahi vāṁ varūtham ||
7.053.03a uto hi vāṁ ratnadheyāni santi purūṇi dyāvāpṛthivī sudāse |
7.053.03c asme dhattaṁ yad asad askṛdhoyu yūyam pāta svastibhiḥ sadā naḥ ||

7.054.01a vāstoṣ pate prati jānīhy asmān svāveśo anamīvo bhavā naḥ |
7.054.01c yat tvemahe prati tan no juṣasva śaṁ no bhava dvipade śaṁ catuṣpade ||
7.054.02a vāstoṣ pate prataraṇo na edhi gayasphāno gobhir aśvebhir indo |
7.054.02c ajarāsas te sakhye syāma piteva putrān prati no juṣasva ||
7.054.03a vāstoṣ pate śagmayā saṁsadā te sakṣīmahi raṇvayā gātumatyā |
7.054.03c pāhi kṣema uta yoge varaṁ no yūyam pāta svastibhiḥ sadā naḥ ||

7.055.01a amīvahā vāstoṣ pate viśvā rūpāṇy āviśan |
7.055.01c sakhā suśeva edhi naḥ ||
7.055.02a yad arjuna sārameya dataḥ piśaṅga yacchase |
7.055.02c vīva bhrājanta ṛṣṭaya upa srakveṣu bapsato ni ṣu svapa ||
7.055.03a stenaṁ rāya sārameya taskaraṁ vā punaḥsara |
7.055.03c stotṝn indrasya rāyasi kim asmān ducchunāyase ni ṣu svapa ||
7.055.04a tvaṁ sūkarasya dardṛhi tava dardartu sūkaraḥ |
7.055.04c stotṝn indrasya rāyasi kim asmān ducchunāyase ni ṣu svapa ||
7.055.05a sastu mātā sastu pitā sastu śvā sastu viśpatiḥ |
7.055.05c sasantu sarve jñātayaḥ sastv ayam abhito janaḥ ||
7.055.06a ya āste yaś ca carati yaś ca paśyati no janaḥ |
7.055.06c teṣāṁ saṁ hanmo akṣāṇi yathedaṁ harmyaṁ tathā ||
7.055.07a sahasraśṛṅgo vṛṣabho yaḥ samudrād udācarat |
7.055.07c tenā sahasyenā vayaṁ ni janān svāpayāmasi ||
7.055.08a proṣṭheśayā vahyeśayā nārīr yās talpaśīvarīḥ |
7.055.08c striyo yāḥ puṇyagandhās tāḥ sarvāḥ svāpayāmasi ||

7.056.01a ka īṁ vyaktā naraḥ sanīḻā rudrasya maryā adha svaśvāḥ ||
7.056.02a nakir hy eṣāṁ janūṁṣi veda te aṅga vidre mitho janitram ||
7.056.03a abhi svapūbhir mitho vapanta vātasvanasaḥ śyenā aspṛdhran ||
7.056.04a etāni dhīro niṇyā ciketa pṛśnir yad ūdho mahī jabhāra ||
7.056.05a sā viṭ suvīrā marudbhir astu sanāt sahantī puṣyantī nṛmṇam ||
7.056.06a yāmaṁ yeṣṭhāḥ śubhā śobhiṣṭhāḥ śriyā sammiślā ojobhir ugrāḥ ||
7.056.07a ugraṁ va ojaḥ sthirā śavāṁsy adhā marudbhir gaṇas tuviṣmān ||
7.056.08a śubhro vaḥ śuṣmaḥ krudhmī manāṁsi dhunir munir iva śardhasya dhṛṣṇoḥ ||
7.056.09a sanemy asmad yuyota didyum mā vo durmatir iha praṇaṅ naḥ ||
7.056.10a priyā vo nāma huve turāṇām ā yat tṛpan maruto vāvaśānāḥ ||
7.056.11a svāyudhāsa iṣmiṇaḥ suniṣkā uta svayaṁ tanvaḥ śumbhamānāḥ ||
7.056.12a śucī vo havyā marutaḥ śucīnāṁ śuciṁ hinomy adhvaraṁ śucibhyaḥ |
7.056.12c ṛtena satyam ṛtasāpa āyañ chucijanmānaḥ śucayaḥ pāvakāḥ ||
7.056.13a aṁseṣv ā marutaḥ khādayo vo vakṣaḥsu rukmā upaśiśriyāṇāḥ |
7.056.13c vi vidyuto na vṛṣṭibhī rucānā anu svadhām āyudhair yacchamānāḥ ||
7.056.14a pra budhnyā va īrate mahāṁsi pra nāmāni prayajyavas tiradhvam |
7.056.14c sahasriyaṁ damyam bhāgam etaṁ gṛhamedhīyam maruto juṣadhvam ||
7.056.15a yadi stutasya maruto adhīthetthā viprasya vājino havīman |
7.056.15c makṣū rāyaḥ suvīryasya dāta nū cid yam anya ādabhad arāvā ||
7.056.16a atyāso na ye marutaḥ svañco yakṣadṛśo na śubhayanta maryāḥ |
7.056.16c te harmyeṣṭhāḥ śiśavo na śubhrā vatsāso na prakrīḻinaḥ payodhāḥ ||
7.056.17a daśasyanto no maruto mṛḻantu varivasyanto rodasī sumeke |
7.056.17c āre gohā nṛhā vadho vo astu sumnebhir asme vasavo namadhvam ||
7.056.18a ā vo hotā johavīti sattaḥ satrācīṁ rātim maruto gṛṇānaḥ |
7.056.18c ya īvato vṛṣaṇo asti gopāḥ so advayāvī havate va ukthaiḥ ||
7.056.19a ime turam maruto rāmayantīme sahaḥ sahasa ā namanti |
7.056.19c ime śaṁsaṁ vanuṣyato ni pānti guru dveṣo araruṣe dadhanti ||
7.056.20a ime radhraṁ cin maruto junanti bhṛmiṁ cid yathā vasavo juṣanta |
7.056.20c apa bādhadhvaṁ vṛṣaṇas tamāṁsi dhatta viśvaṁ tanayaṁ tokam asme ||
7.056.21a mā vo dātrān maruto nir arāma mā paścād daghma rathyo vibhāge |
7.056.21c ā naḥ spārhe bhajatanā vasavye yad īṁ sujātaṁ vṛṣaṇo vo asti ||
7.056.22a saṁ yad dhananta manyubhir janāsaḥ śūrā yahvīṣv oṣadhīṣu vikṣu |
7.056.22c adha smā no maruto rudriyāsas trātāro bhūta pṛtanāsv aryaḥ ||
7.056.23a bhūri cakra marutaḥ pitryāṇy ukthāni yā vaḥ śasyante purā cit |
7.056.23c marudbhir ugraḥ pṛtanāsu sāḻhā marudbhir it sanitā vājam arvā ||
7.056.24a asme vīro marutaḥ śuṣmy astu janānāṁ yo asuro vidhartā |
7.056.24c apo yena sukṣitaye taremādha svam oko abhi vaḥ syāma ||
7.056.25a tan na indro varuṇo mitro agnir āpa oṣadhīr vanino juṣanta |
7.056.25c śarman syāma marutām upasthe yūyam pāta svastibhiḥ sadā naḥ ||

7.057.01a madhvo vo nāma mārutaṁ yajatrāḥ pra yajñeṣu śavasā madanti |
7.057.01c ye rejayanti rodasī cid urvī pinvanty utsaṁ yad ayāsur ugrāḥ ||
7.057.02a nicetāro hi maruto gṛṇantam praṇetāro yajamānasya manma |
7.057.02c asmākam adya vidatheṣu barhir ā vītaye sadata pipriyāṇāḥ ||
7.057.03a naitāvad anye maruto yatheme bhrājante rukmair āyudhais tanūbhiḥ |
7.057.03c ā rodasī viśvapiśaḥ piśānāḥ samānam añjy añjate śubhe kam ||
7.057.04a ṛdhak sā vo maruto didyud astu yad va āgaḥ puruṣatā karāma |
7.057.04c mā vas tasyām api bhūmā yajatrā asme vo astu sumatiś caniṣṭhā ||
7.057.05a kṛte cid atra maruto raṇantānavadyāsaḥ śucayaḥ pāvakāḥ |
7.057.05c pra ṇo 'vata sumatibhir yajatrāḥ pra vājebhis tirata puṣyase naḥ ||
7.057.06a uta stutāso maruto vyantu viśvebhir nāmabhir naro havīṁṣi |
7.057.06c dadāta no amṛtasya prajāyai jigṛta rāyaḥ sūnṛtā maghāni ||
7.057.07a ā stutāso maruto viśva ūtī acchā sūrīn sarvatātā jigāta |
7.057.07c ye nas tmanā śatino vardhayanti yūyam pāta svastibhiḥ sadā naḥ ||

7.058.01a pra sākamukṣe arcatā gaṇāya yo daivyasya dhāmnas tuviṣmān |
7.058.01c uta kṣodanti rodasī mahitvā nakṣante nākaṁ nirṛter avaṁśāt ||
7.058.02a janūś cid vo marutas tveṣyeṇa bhīmāsas tuvimanyavo 'yāsaḥ |
7.058.02c pra ye mahobhir ojasota santi viśvo vo yāman bhayate svardṛk ||
7.058.03a bṛhad vayo maghavadbhyo dadhāta jujoṣann in marutaḥ suṣṭutiṁ naḥ |
7.058.03c gato nādhvā vi tirāti jantum pra ṇaḥ spārhābhir ūtibhis tireta ||
7.058.04a yuṣmoto vipro marutaḥ śatasvī yuṣmoto arvā sahuriḥ sahasrī |
7.058.04c yuṣmotaḥ samrāḻ uta hanti vṛtram pra tad vo astu dhūtayo deṣṇam ||
7.058.05a tām̐ ā rudrasya mīḻhuṣo vivāse kuvin naṁsante marutaḥ punar naḥ |
7.058.05c yat sasvartā jihīḻire yad āvir ava tad ena īmahe turāṇām ||
7.058.06a pra sā vāci suṣṭutir maghonām idaṁ sūktam maruto juṣanta |
7.058.06c ārāc cid dveṣo vṛṣaṇo yuyota yūyam pāta svastibhiḥ sadā naḥ ||

7.059.01a yaṁ trāyadhva idam-idaṁ devāso yaṁ ca nayatha |
7.059.01c tasmā agne varuṇa mitrāryaman marutaḥ śarma yacchata ||
7.059.02a yuṣmākaṁ devā avasāhani priya ījānas tarati dviṣaḥ |
7.059.02c pra sa kṣayaṁ tirate vi mahīr iṣo yo vo varāya dāśati ||
7.059.03a nahi vaś caramaṁ cana vasiṣṭhaḥ parimaṁsate |
7.059.03c asmākam adya marutaḥ sute sacā viśve pibata kāminaḥ ||
7.059.04a nahi va ūtiḥ pṛtanāsu mardhati yasmā arādhvaṁ naraḥ |
7.059.04c abhi va āvart sumatir navīyasī tūyaṁ yāta pipīṣavaḥ ||
7.059.05a o ṣu ghṛṣvirādhaso yātanāndhāṁsi pītaye |
7.059.05c imā vo havyā maruto rare hi kam mo ṣv anyatra gantana ||
7.059.06a ā ca no barhiḥ sadatāvitā ca naḥ spārhāṇi dātave vasu |
7.059.06c asredhanto marutaḥ somye madhau svāheha mādayādhvai ||
7.059.07a sasvaś cid dhi tanvaḥ śumbhamānā ā haṁsāso nīlapṛṣṭhā apaptan |
7.059.07c viśvaṁ śardho abhito mā ni ṣeda naro na raṇvāḥ savane madantaḥ ||
7.059.08a yo no maruto abhi durhṛṇāyus tiraś cittāni vasavo jighāṁsati |
7.059.08c druhaḥ pāśān prati sa mucīṣṭa tapiṣṭhena hanmanā hantanā tam ||
7.059.09a sāṁtapanā idaṁ havir marutas taj jujuṣṭana |
7.059.09c yuṣmākotī riśādasaḥ ||
7.059.10a gṛhamedhāsa ā gata maruto māpa bhūtana |
7.059.10c yuṣmākotī sudānavaḥ ||
7.059.11a iheha vaḥ svatavasaḥ kavayaḥ sūryatvacaḥ |
7.059.11c yajñam maruta ā vṛṇe ||
7.059.12a tryambakaṁ yajāmahe sugandhim puṣṭivardhanam |
7.059.12c urvārukam iva bandhanān mṛtyor mukṣīya māmṛtāt ||

7.060.01a yad adya sūrya bravo 'nāgā udyan mitrāya varuṇāya satyam |
7.060.01c vayaṁ devatrādite syāma tava priyāso aryaman gṛṇantaḥ ||
7.060.02a eṣa sya mitrāvaruṇā nṛcakṣā ubhe ud eti sūryo abhi jman |
7.060.02c viśvasya sthātur jagataś ca gopā ṛju marteṣu vṛjinā ca paśyan ||
7.060.03a ayukta sapta haritaḥ sadhasthād yā īṁ vahanti sūryaṁ ghṛtācīḥ |
7.060.03c dhāmāni mitrāvaruṇā yuvākuḥ saṁ yo yūtheva janimāni caṣṭe ||
7.060.04a ud vām pṛkṣāso madhumanto asthur ā sūryo aruhac chukram arṇaḥ |
7.060.04c yasmā ādityā adhvano radanti mitro aryamā varuṇaḥ sajoṣāḥ ||
7.060.05a ime cetāro anṛtasya bhūrer mitro aryamā varuṇo hi santi |
7.060.05c ima ṛtasya vāvṛdhur duroṇe śagmāsaḥ putrā aditer adabdhāḥ ||
7.060.06a ime mitro varuṇo dūḻabhāso 'cetasaṁ cic citayanti dakṣaiḥ |
7.060.06c api kratuṁ sucetasaṁ vatantas tiraś cid aṁhaḥ supathā nayanti ||
7.060.07a ime divo animiṣā pṛthivyāś cikitvāṁso acetasaṁ nayanti |
7.060.07c pravrāje cin nadyo gādham asti pāraṁ no asya viṣpitasya parṣan ||
7.060.08a yad gopāvad aditiḥ śarma bhadram mitro yacchanti varuṇaḥ sudāse |
7.060.08c tasminn ā tokaṁ tanayaṁ dadhānā mā karma devaheḻanaṁ turāsaḥ ||
7.060.09a ava vediṁ hotrābhir yajeta ripaḥ kāś cid varuṇadhrutaḥ saḥ |
7.060.09c pari dveṣobhir aryamā vṛṇaktūruṁ sudāse vṛṣaṇā u lokam ||
7.060.10a sasvaś cid dhi samṛtis tveṣy eṣām apīcyena sahasā sahante |
7.060.10c yuṣmad bhiyā vṛṣaṇo rejamānā dakṣasya cin mahinā mṛḻatā naḥ ||
7.060.11a yo brahmaṇe sumatim āyajāte vājasya sātau paramasya rāyaḥ |
7.060.11c sīkṣanta manyum maghavāno arya uru kṣayāya cakrire sudhātu ||
7.060.12a iyaṁ deva purohitir yuvabhyāṁ yajñeṣu mitrāvaruṇāv akāri |
7.060.12c viśvāni durgā pipṛtaṁ tiro no yūyam pāta svastibhiḥ sadā naḥ ||

7.061.01a ud vāṁ cakṣur varuṇa supratīkaṁ devayor eti sūryas tatanvān |
7.061.01c abhi yo viśvā bhuvanāni caṣṭe sa manyum martyeṣv ā ciketa ||
7.061.02a pra vāṁ sa mitrāvaruṇāv ṛtāvā vipro manmāni dīrghaśrud iyarti |
7.061.02c yasya brahmāṇi sukratū avātha ā yat kratvā na śaradaḥ pṛṇaithe ||
7.061.03a proror mitrāvaruṇā pṛthivyāḥ pra diva ṛṣvād bṛhataḥ sudānū |
7.061.03c spaśo dadhāthe oṣadhīṣu vikṣv ṛdhag yato animiṣaṁ rakṣamāṇā ||
7.061.04a śaṁsā mitrasya varuṇasya dhāma śuṣmo rodasī badbadhe mahitvā |
7.061.04c ayan māsā ayajvanām avīrāḥ pra yajñamanmā vṛjanaṁ tirāte ||
7.061.05a amūrā viśvā vṛṣaṇāv imā vāṁ na yāsu citraṁ dadṛśe na yakṣam |
7.061.05c druhaḥ sacante anṛtā janānāṁ na vāṁ niṇyāny acite abhūvan ||
7.061.06a sam u vāṁ yajñam mahayaṁ namobhir huve vām mitrāvaruṇā sabādhaḥ |
7.061.06c pra vām manmāny ṛcase navāni kṛtāni brahma jujuṣann imāni ||
7.061.07a iyaṁ deva purohitir yuvabhyāṁ yajñeṣu mitrāvaruṇāv akāri |
7.061.07c viśvāni durgā pipṛtaṁ tiro no yūyam pāta svastibhiḥ sadā naḥ ||

7.062.01a ut sūryo bṛhad arcīṁṣy aśret puru viśvā janima mānuṣāṇām |
7.062.01c samo divā dadṛśe rocamānaḥ kratvā kṛtaḥ sukṛtaḥ kartṛbhir bhūt ||
7.062.02a sa sūrya prati puro na ud gā ebhiḥ stomebhir etaśebhir evaiḥ |
7.062.02c pra no mitrāya varuṇāya voco 'nāgaso aryamṇe agnaye ca ||
7.062.03a vi naḥ sahasraṁ śurudho radantv ṛtāvāno varuṇo mitro agniḥ |
7.062.03c yacchantu candrā upamaṁ no arkam ā naḥ kāmam pūpurantu stavānāḥ ||
7.062.04a dyāvābhūmī adite trāsīthāṁ no ye vāṁ jajñuḥ sujanimāna ṛṣve |
7.062.04c mā heḻe bhūma varuṇasya vāyor mā mitrasya priyatamasya nṛṇām ||
7.062.05a pra bāhavā sisṛtaṁ jīvase na ā no gavyūtim ukṣataṁ ghṛtena |
7.062.05c ā no jane śravayataṁ yuvānā śrutam me mitrāvaruṇā havemā ||
7.062.06a nū mitro varuṇo aryamā nas tmane tokāya varivo dadhantu |
7.062.06c sugā no viśvā supathāni santu yūyam pāta svastibhiḥ sadā naḥ ||

7.063.01a ud v eti subhago viśvacakṣāḥ sādhāraṇaḥ sūryo mānuṣāṇām |
7.063.01c cakṣur mitrasya varuṇasya devaś carmeva yaḥ samavivyak tamāṁsi ||
7.063.02a ud v eti prasavītā janānām mahān ketur arṇavaḥ sūryasya |
7.063.02c samānaṁ cakram paryāvivṛtsan yad etaśo vahati dhūrṣu yuktaḥ ||
7.063.03a vibhrājamāna uṣasām upasthād rebhair ud ety anumadyamānaḥ |
7.063.03c eṣa me devaḥ savitā cacchanda yaḥ samānaṁ na pramināti dhāma ||
7.063.04a divo rukma urucakṣā ud eti dūrearthas taraṇir bhrājamānaḥ |
7.063.04c nūnaṁ janāḥ sūryeṇa prasūtā ayann arthāni kṛṇavann apāṁsi ||
7.063.05a yatrā cakrur amṛtā gātum asmai śyeno na dīyann anv eti pāthaḥ |
7.063.05c prati vāṁ sūra udite vidhema namobhir mitrāvaruṇota havyaiḥ ||
7.063.06a nū mitro varuṇo aryamā nas tmane tokāya varivo dadhantu |
7.063.06c sugā no viśvā supathāni santu yūyam pāta svastibhiḥ sadā naḥ ||

7.064.01a divi kṣayantā rajasaḥ pṛthivyām pra vāṁ ghṛtasya nirṇijo dadīran |
7.064.01c havyaṁ no mitro aryamā sujāto rājā sukṣatro varuṇo juṣanta ||
7.064.02a ā rājānā maha ṛtasya gopā sindhupatī kṣatriyā yātam arvāk |
7.064.02c iḻāṁ no mitrāvaruṇota vṛṣṭim ava diva invataṁ jīradānū ||
7.064.03a mitras tan no varuṇo devo aryaḥ pra sādhiṣṭhebhiḥ pathibhir nayantu |
7.064.03c bravad yathā na ād ariḥ sudāsa iṣā madema saha devagopāḥ ||
7.064.04a yo vāṁ gartam manasā takṣad etam ūrdhvāṁ dhītiṁ kṛṇavad dhārayac ca |
7.064.04c ukṣethām mitrāvaruṇā ghṛtena tā rājānā sukṣitīs tarpayethām ||
7.064.05a eṣa stomo varuṇa mitra tubhyaṁ somaḥ śukro na vāyave 'yāmi |
7.064.05c aviṣṭaṁ dhiyo jigṛtam puraṁdhīr yūyam pāta svastibhiḥ sadā naḥ ||

7.065.01a prati vāṁ sūra udite sūktair mitraṁ huve varuṇam pūtadakṣam |
7.065.01c yayor asuryam akṣitaṁ jyeṣṭhaṁ viśvasya yāmann ācitā jigatnu ||
7.065.02a tā hi devānām asurā tāv aryā tā naḥ kṣitīḥ karatam ūrjayantīḥ |
7.065.02c aśyāma mitrāvaruṇā vayaṁ vāṁ dyāvā ca yatra pīpayann ahā ca ||
7.065.03a tā bhūripāśāv anṛtasya setū duratyetū ripave martyāya |
7.065.03c ṛtasya mitrāvaruṇā pathā vām apo na nāvā duritā tarema ||
7.065.04a ā no mitrāvaruṇā havyajuṣṭiṁ ghṛtair gavyūtim ukṣatam iḻābhiḥ |
7.065.04c prati vām atra varam ā janāya pṛṇītam udno divyasya cāroḥ ||
7.065.05a eṣa stomo varuṇa mitra tubhyaṁ somaḥ śukro na vāyave 'yāmi |
7.065.05c aviṣṭaṁ dhiyo jigṛtam puraṁdhīr yūyam pāta svastibhiḥ sadā naḥ ||

7.066.01a pra mitrayor varuṇayoḥ stomo na etu śūṣyaḥ |
7.066.01c namasvān tuvijātayoḥ ||
7.066.02a yā dhārayanta devāḥ sudakṣā dakṣapitarā |
7.066.02c asuryāya pramahasā ||
7.066.03a tā naḥ stipā tanūpā varuṇa jaritṝṇām |
7.066.03c mitra sādhayataṁ dhiyaḥ ||
7.066.04a yad adya sūra udite 'nāgā mitro aryamā |
7.066.04c suvāti savitā bhagaḥ ||
7.066.05a suprāvīr astu sa kṣayaḥ pra nu yāman sudānavaḥ |
7.066.05c ye no aṁho 'tipiprati ||
7.066.06a uta svarājo aditir adabdhasya vratasya ye |
7.066.06c maho rājāna īśate ||
7.066.07a prati vāṁ sūra udite mitraṁ gṛṇīṣe varuṇam |
7.066.07c aryamaṇaṁ riśādasam ||
7.066.08a rāyā hiraṇyayā matir iyam avṛkāya śavase |
7.066.08c iyaṁ viprā medhasātaye ||
7.066.09a te syāma deva varuṇa te mitra sūribhiḥ saha |
7.066.09c iṣaṁ svaś ca dhīmahi ||
7.066.10a bahavaḥ sūracakṣaso 'gnijihvā ṛtāvṛdhaḥ |
7.066.10c trīṇi ye yemur vidathāni dhītibhir viśvāni paribhūtibhiḥ ||
7.066.11a vi ye dadhuḥ śaradam māsam ād ahar yajñam aktuṁ cād ṛcam |
7.066.11c anāpyaṁ varuṇo mitro aryamā kṣatraṁ rājāna āśata ||
7.066.12a tad vo adya manāmahe sūktaiḥ sūra udite |
7.066.12c yad ohate varuṇo mitro aryamā yūyam ṛtasya rathyaḥ ||
7.066.13a ṛtāvāna ṛtajātā ṛtāvṛdho ghorāso anṛtadviṣaḥ |
7.066.13c teṣāṁ vaḥ sumne succhardiṣṭame naraḥ syāma ye ca sūrayaḥ ||
7.066.14a ud u tyad darśataṁ vapur diva eti pratihvare |
7.066.14c yad īm āśur vahati deva etaśo viśvasmai cakṣase aram ||
7.066.15a śīrṣṇaḥ-śīrṣṇo jagatas tasthuṣas patiṁ samayā viśvam ā rajaḥ |
7.066.15c sapta svasāraḥ suvitāya sūryaṁ vahanti harito rathe ||
7.066.16a tac cakṣur devahitaṁ śukram uccarat |
7.066.16b paśyema śaradaḥ śataṁ jīvema śaradaḥ śatam ||
7.066.17a kāvyebhir adābhyā yātaṁ varuṇa dyumat |
7.066.17c mitraś ca somapītaye ||
7.066.18a divo dhāmabhir varuṇa mitraś cā yātam adruhā |
7.066.18c pibataṁ somam ātujī ||
7.066.19a ā yātam mitrāvaruṇā juṣāṇāv āhutiṁ narā |
7.066.19c pātaṁ somam ṛtāvṛdhā ||

7.067.01a prati vāṁ rathaṁ nṛpatī jaradhyai haviṣmatā manasā yajñiyena |
7.067.01c yo vāṁ dūto na dhiṣṇyāv ajīgar acchā sūnur na pitarā vivakmi ||
7.067.02a aśocy agniḥ samidhāno asme upo adṛśran tamasaś cid antāḥ |
7.067.02c aceti ketur uṣasaḥ purastāc chriye divo duhitur jāyamānaḥ ||
7.067.03a abhi vāṁ nūnam aśvinā suhotā stomaiḥ siṣakti nāsatyā vivakvān |
7.067.03c pūrvībhir yātam pathyābhir arvāk svarvidā vasumatā rathena ||
7.067.04a avor vāṁ nūnam aśvinā yuvākur huve yad vāṁ sute mādhvī vasūyuḥ |
7.067.04c ā vāṁ vahantu sthavirāso aśvāḥ pibātho asme suṣutā madhūni ||
7.067.05a prācīm u devāśvinā dhiyam me 'mṛdhrāṁ sātaye kṛtaṁ vasūyum |
7.067.05c viśvā aviṣṭaṁ vāja ā puraṁdhīs tā naḥ śaktaṁ śacīpatī śacībhiḥ ||
7.067.06a aviṣṭaṁ dhīṣv aśvinā na āsu prajāvad reto ahrayaṁ no astu |
7.067.06c ā vāṁ toke tanaye tūtujānāḥ suratnāso devavītiṁ gamema ||
7.067.07a eṣa sya vām pūrvagatveva sakhye nidhir hito mādhvī rāto asme |
7.067.07c aheḻatā manasā yātam arvāg aśnantā havyam mānuṣīṣu vikṣu ||
7.067.08a ekasmin yoge bhuraṇā samāne pari vāṁ sapta sravato ratho gāt |
7.067.08c na vāyanti subhvo devayuktā ye vāṁ dhūrṣu taraṇayo vahanti ||
7.067.09a asaścatā maghavadbhyo hi bhūtaṁ ye rāyā maghadeyaṁ junanti |
7.067.09c pra ye bandhuṁ sūnṛtābhis tirante gavyā pṛñcanto aśvyā maghāni ||
7.067.10a nū me havam ā śṛṇutaṁ yuvānā yāsiṣṭaṁ vartir aśvināv irāvat |
7.067.10c dhattaṁ ratnāni jarataṁ ca sūrīn yūyam pāta svastibhiḥ sadā naḥ ||

7.068.01a ā śubhrā yātam aśvinā svaśvā giro dasrā jujuṣāṇā yuvākoḥ |
7.068.01c havyāni ca pratibhṛtā vītaṁ naḥ ||
7.068.02a pra vām andhāṁsi madyāny asthur araṁ gantaṁ haviṣo vītaye me |
7.068.02c tiro aryo havanāni śrutaṁ naḥ ||
7.068.03a pra vāṁ ratho manojavā iyarti tiro rajāṁsy aśvinā śatotiḥ |
7.068.03c asmabhyaṁ sūryāvasū iyānaḥ ||
7.068.04a ayaṁ ha yad vāṁ devayā u adrir ūrdhvo vivakti somasud yuvabhyām |
7.068.04c ā valgū vipro vavṛtīta havyaiḥ ||
7.068.05a citraṁ ha yad vām bhojanaṁ nv asti ny atraye mahiṣvantaṁ yuyotam |
7.068.05c yo vām omānaṁ dadhate priyaḥ san ||
7.068.06a uta tyad vāṁ jurate aśvinā bhūc cyavānāya pratītyaṁ havirde |
7.068.06c adhi yad varpa itaūti dhatthaḥ ||
7.068.07a uta tyam bhujyum aśvinā sakhāyo madhye jahur durevāsaḥ samudre |
7.068.07c nir īm parṣad arāvā yo yuvākuḥ ||
7.068.08a vṛkāya cij jasamānāya śaktam uta śrutaṁ śayave hūyamānā |
7.068.08c yāv aghnyām apinvatam apo na staryaṁ cic chakty aśvinā śacībhiḥ ||
7.068.09a eṣa sya kārur jarate sūktair agre budhāna uṣasāṁ sumanmā |
7.068.09c iṣā taṁ vardhad aghnyā payobhir yūyam pāta svastibhiḥ sadā naḥ ||

7.069.01a ā vāṁ ratho rodasī badbadhāno hiraṇyayo vṛṣabhir yātv aśvaiḥ |
7.069.01c ghṛtavartaniḥ pavibhī rucāna iṣāṁ voḻhā nṛpatir vājinīvān ||
7.069.02a sa paprathāno abhi pañca bhūmā trivandhuro manasā yātu yuktaḥ |
7.069.02c viśo yena gacchatho devayantīḥ kutrā cid yāmam aśvinā dadhānā ||
7.069.03a svaśvā yaśasā yātam arvāg dasrā nidhim madhumantam pibāthaḥ |
7.069.03c vi vāṁ ratho vadhvā yādamāno 'ntān divo bādhate vartanibhyām ||
7.069.04a yuvoḥ śriyam pari yoṣāvṛṇīta sūro duhitā paritakmyāyām |
7.069.04c yad devayantam avathaḥ śacībhiḥ pari ghraṁsam omanā vāṁ vayo gāt ||
7.069.05a yo ha sya vāṁ rathirā vasta usrā ratho yujānaḥ pariyāti vartiḥ |
7.069.05c tena naḥ śaṁ yor uṣaso vyuṣṭau ny aśvinā vahataṁ yajñe asmin ||
7.069.06a narā gaureva vidyutaṁ tṛṣāṇāsmākam adya savanopa yātam |
7.069.06c purutrā hi vām matibhir havante mā vām anye ni yaman devayantaḥ ||
7.069.07a yuvam bhujyum avaviddhaṁ samudra ud ūhathur arṇaso asridhānaiḥ |
7.069.07c patatribhir aśramair avyathibhir daṁsanābhir aśvinā pārayantā ||
7.069.08a nū me havam ā śṛṇutaṁ yuvānā yāsiṣṭaṁ vartir aśvināv irāvat |
7.069.08c dhattaṁ ratnāni jarataṁ ca sūrīn yūyam pāta svastibhiḥ sadā naḥ ||

7.070.01a ā viśvavārāśvinā gataṁ naḥ pra tat sthānam avāci vām pṛthivyām |
7.070.01c aśvo na vājī śunapṛṣṭho asthād ā yat sedathur dhruvase na yonim ||
7.070.02a siṣakti sā vāṁ sumatiś caniṣṭhātāpi gharmo manuṣo duroṇe |
7.070.02c yo vāṁ samudrān saritaḥ piparty etagvā cin na suyujā yujānaḥ ||
7.070.03a yāni sthānāny aśvinā dadhāthe divo yahvīṣv oṣadhīṣu vikṣu |
7.070.03c ni parvatasya mūrdhani sadanteṣaṁ janāya dāśuṣe vahantā ||
7.070.04a caniṣṭaṁ devā oṣadhīṣv apsu yad yogyā aśnavaithe ṛṣīṇām |
7.070.04c purūṇi ratnā dadhatau ny asme anu pūrvāṇi cakhyathur yugāni ||
7.070.05a śuśruvāṁsā cid aśvinā purūṇy abhi brahmāṇi cakṣāthe ṛṣīṇām |
7.070.05c prati pra yātaṁ varam ā janāyāsme vām astu sumatiś caniṣṭhā ||
7.070.06a yo vāṁ yajño nāsatyā haviṣmān kṛtabrahmā samaryo bhavāti |
7.070.06c upa pra yātaṁ varam ā vasiṣṭham imā brahmāṇy ṛcyante yuvabhyām ||
7.070.07a iyam manīṣā iyam aśvinā gīr imāṁ suvṛktiṁ vṛṣaṇā juṣethām |
7.070.07c imā brahmāṇi yuvayūny agman yūyam pāta svastibhiḥ sadā naḥ ||

7.071.01a apa svasur uṣaso nag jihīte riṇakti kṛṣṇīr aruṣāya panthām |
7.071.01c aśvāmaghā gomaghā vāṁ huvema divā naktaṁ śarum asmad yuyotam ||
7.071.02a upāyātaṁ dāśuṣe martyāya rathena vāmam aśvinā vahantā |
7.071.02c yuyutam asmad anirām amīvāṁ divā naktam mādhvī trāsīthāṁ naḥ ||
7.071.03a ā vāṁ ratham avamasyāṁ vyuṣṭau sumnāyavo vṛṣaṇo vartayantu |
7.071.03c syūmagabhastim ṛtayugbhir aśvair āśvinā vasumantaṁ vahethām ||
7.071.04a yo vāṁ ratho nṛpatī asti voḻhā trivandhuro vasumām̐ usrayāmā |
7.071.04c ā na enā nāsatyopa yātam abhi yad vāṁ viśvapsnyo jigāti ||
7.071.05a yuvaṁ cyavānaṁ jaraso 'mumuktaṁ ni pedava ūhathur āśum aśvam |
7.071.05c nir aṁhasas tamasaḥ spartam atriṁ ni jāhuṣaṁ śithire dhātam antaḥ ||
7.071.06a iyam manīṣā iyam aśvinā gīr imāṁ suvṛktiṁ vṛṣaṇā juṣethām |
7.071.06c imā brahmāṇi yuvayūny agman yūyam pāta svastibhiḥ sadā naḥ ||

7.072.01a ā gomatā nāsatyā rathenāśvāvatā puruścandreṇa yātam |
7.072.01c abhi vāṁ viśvā niyutaḥ sacante spārhayā śriyā tanvā śubhānā ||
7.072.02a ā no devebhir upa yātam arvāk sajoṣasā nāsatyā rathena |
7.072.02c yuvor hi naḥ sakhyā pitryāṇi samāno bandhur uta tasya vittam ||
7.072.03a ud u stomāso aśvinor abudhrañ jāmi brahmāṇy uṣasaś ca devīḥ |
7.072.03c āvivāsan rodasī dhiṣṇyeme acchā vipro nāsatyā vivakti ||
7.072.04a vi ced ucchanty aśvinā uṣāsaḥ pra vām brahmāṇi kāravo bharante |
7.072.04c ūrdhvam bhānuṁ savitā devo aśred bṛhad agnayaḥ samidhā jarante ||
7.072.05a ā paścātān nāsatyā purastād āśvinā yātam adharād udaktāt |
7.072.05c ā viśvataḥ pāñcajanyena rāyā yūyam pāta svastibhiḥ sadā naḥ ||

7.073.01a atāriṣma tamasas pāram asya prati stomaṁ devayanto dadhānāḥ |
7.073.01c purudaṁsā purutamā purājāmartyā havate aśvinā gīḥ ||
7.073.02a ny u priyo manuṣaḥ sādi hotā nāsatyā yo yajate vandate ca |
7.073.02c aśnītam madhvo aśvinā upāka ā vāṁ voce vidatheṣu prayasvān ||
7.073.03a ahema yajñam pathām urāṇā imāṁ suvṛktiṁ vṛṣaṇā juṣethām |
7.073.03c śruṣṭīveva preṣito vām abodhi prati stomair jaramāṇo vasiṣṭhaḥ ||
7.073.04a upa tyā vahnī gamato viśaṁ no rakṣohaṇā sambhṛtā vīḻupāṇī |
7.073.04c sam andhāṁsy agmata matsarāṇi mā no mardhiṣṭam ā gataṁ śivena ||
7.073.05a ā paścātān nāsatyā purastād āśvinā yātam adharād udaktāt |
7.073.05c ā viśvataḥ pāñcajanyena rāyā yūyam pāta svastibhiḥ sadā naḥ ||

7.074.01a imā u vāṁ diviṣṭaya usrā havante aśvinā |
7.074.01c ayaṁ vām ahve 'vase śacīvasū viśaṁ-viśaṁ hi gacchathaḥ ||
7.074.02a yuvaṁ citraṁ dadathur bhojanaṁ narā codethāṁ sūnṛtāvate |
7.074.02c arvāg rathaṁ samanasā ni yacchatam pibataṁ somyam madhu ||
7.074.03a ā yātam upa bhūṣatam madhvaḥ pibatam aśvinā |
7.074.03c dugdham payo vṛṣaṇā jenyāvasū mā no mardhiṣṭam ā gatam ||
7.074.04a aśvāso ye vām upa dāśuṣo gṛhaṁ yuvāṁ dīyanti bibhrataḥ |
7.074.04c makṣūyubhir narā hayebhir aśvinā devā yātam asmayū ||
7.074.05a adhā ha yanto aśvinā pṛkṣaḥ sacanta sūrayaḥ |
7.074.05c tā yaṁsato maghavadbhyo dhruvaṁ yaśaś chardir asmabhyaṁ nāsatyā ||
7.074.06a pra ye yayur avṛkāso rathā iva nṛpātāro janānām |
7.074.06c uta svena śavasā śūśuvur nara uta kṣiyanti sukṣitim ||

7.075.01a vy uṣā āvo divijā ṛtenāviṣkṛṇvānā mahimānam āgāt |
7.075.01c apa druhas tama āvar ajuṣṭam aṅgirastamā pathyā ajīgaḥ ||
7.075.02a mahe no adya suvitāya bodhy uṣo mahe saubhagāya pra yandhi |
7.075.02c citraṁ rayiṁ yaśasaṁ dhehy asme devi marteṣu mānuṣi śravasyum ||
7.075.03a ete tye bhānavo darśatāyāś citrā uṣaso amṛtāsa āguḥ |
7.075.03c janayanto daivyāni vratāny āpṛṇanto antarikṣā vy asthuḥ ||
7.075.04a eṣā syā yujānā parākāt pañca kṣitīḥ pari sadyo jigāti |
7.075.04c abhipaśyantī vayunā janānāṁ divo duhitā bhuvanasya patnī ||
7.075.05a vājinīvatī sūryasya yoṣā citrāmaghā rāya īśe vasūnām |
7.075.05c ṛṣiṣṭutā jarayantī maghony uṣā ucchati vahnibhir gṛṇānā ||
7.075.06a prati dyutānām aruṣāso aśvāś citrā adṛśrann uṣasaṁ vahantaḥ |
7.075.06c yāti śubhrā viśvapiśā rathena dadhāti ratnaṁ vidhate janāya ||
7.075.07a satyā satyebhir mahatī mahadbhir devī devebhir yajatā yajatraiḥ |
7.075.07c rujad dṛḻhāni dadad usriyāṇām prati gāva uṣasaṁ vāvaśanta ||
7.075.08a nū no gomad vīravad dhehi ratnam uṣo aśvāvat purubhojo asme |
7.075.08c mā no barhiḥ puruṣatā nide kar yūyam pāta svastibhiḥ sadā naḥ ||

7.076.01a ud u jyotir amṛtaṁ viśvajanyaṁ viśvānaraḥ savitā devo aśret |
7.076.01c kratvā devānām ajaniṣṭa cakṣur āvir akar bhuvanaṁ viśvam uṣāḥ ||
7.076.02a pra me panthā devayānā adṛśrann amardhanto vasubhir iṣkṛtāsaḥ |
7.076.02c abhūd u ketur uṣasaḥ purastāt pratīcy āgād adhi harmyebhyaḥ ||
7.076.03a tānīd ahāni bahulāny āsan yā prācīnam uditā sūryasya |
7.076.03c yataḥ pari jāra ivācaranty uṣo dadṛkṣe na punar yatīva ||
7.076.04a ta id devānāṁ sadhamāda āsann ṛtāvānaḥ kavayaḥ pūrvyāsaḥ |
7.076.04c gūḻhaṁ jyotiḥ pitaro anv avindan satyamantrā ajanayann uṣāsam ||
7.076.05a samāna ūrve adhi saṁgatāsaḥ saṁ jānate na yatante mithas te |
7.076.05c te devānāṁ na minanti vratāny amardhanto vasubhir yādamānāḥ ||
7.076.06a prati tvā stomair īḻate vasiṣṭhā uṣarbudhaḥ subhage tuṣṭuvāṁsaḥ |
7.076.06c gavāṁ netrī vājapatnī na ucchoṣaḥ sujāte prathamā jarasva ||
7.076.07a eṣā netrī rādhasaḥ sūnṛtānām uṣā ucchantī ribhyate vasiṣṭhaiḥ |
7.076.07c dīrghaśrutaṁ rayim asme dadhānā yūyam pāta svastibhiḥ sadā naḥ ||

7.077.01a upo ruruce yuvatir na yoṣā viśvaṁ jīvam prasuvantī carāyai |
7.077.01c abhūd agniḥ samidhe mānuṣāṇām akar jyotir bādhamānā tamāṁsi ||
7.077.02a viśvam pratīcī saprathā ud asthād ruśad vāso bibhratī śukram aśvait |
7.077.02c hiraṇyavarṇā sudṛśīkasaṁdṛg gavām mātā netry ahnām aroci ||
7.077.03a devānāṁ cakṣuḥ subhagā vahantī śvetaṁ nayantī sudṛśīkam aśvam |
7.077.03c uṣā adarśi raśmibhir vyaktā citrāmaghā viśvam anu prabhūtā ||
7.077.04a antivāmā dūre amitram ucchorvīṁ gavyūtim abhayaṁ kṛdhī naḥ |
7.077.04c yāvaya dveṣa ā bharā vasūni codaya rādho gṛṇate maghoni ||
7.077.05a asme śreṣṭhebhir bhānubhir vi bhāhy uṣo devi pratirantī na āyuḥ |
7.077.05c iṣaṁ ca no dadhatī viśvavāre gomad aśvāvad rathavac ca rādhaḥ ||
7.077.06a yāṁ tvā divo duhitar vardhayanty uṣaḥ sujāte matibhir vasiṣṭhāḥ |
7.077.06c sāsmāsu dhā rayim ṛṣvam bṛhantaṁ yūyam pāta svastibhiḥ sadā naḥ ||

7.078.01a prati ketavaḥ prathamā adṛśrann ūrdhvā asyā añjayo vi śrayante |
7.078.01c uṣo arvācā bṛhatā rathena jyotiṣmatā vāmam asmabhyaṁ vakṣi ||
7.078.02a prati ṣīm agnir jarate samiddhaḥ prati viprāso matibhir gṛṇantaḥ |
7.078.02c uṣā yāti jyotiṣā bādhamānā viśvā tamāṁsi duritāpa devī ||
7.078.03a etā u tyāḥ praty adṛśran purastāj jyotir yacchantīr uṣaso vibhātīḥ |
7.078.03c ajījanan sūryaṁ yajñam agnim apācīnaṁ tamo agād ajuṣṭam ||
7.078.04a aceti divo duhitā maghonī viśve paśyanty uṣasaṁ vibhātīm |
7.078.04c āsthād rathaṁ svadhayā yujyamānam ā yam aśvāsaḥ suyujo vahanti ||
7.078.05a prati tvādya sumanaso budhantāsmākāso maghavāno vayaṁ ca |
7.078.05c tilvilāyadhvam uṣaso vibhātīr yūyam pāta svastibhiḥ sadā naḥ ||

7.079.01a vy uṣā āvaḥ pathyā janānām pañca kṣitīr mānuṣīr bodhayantī |
7.079.01c susaṁdṛgbhir ukṣabhir bhānum aśred vi sūryo rodasī cakṣasāvaḥ ||
7.079.02a vy añjate divo anteṣv aktūn viśo na yuktā uṣaso yatante |
7.079.02c saṁ te gāvas tama ā vartayanti jyotir yacchanti saviteva bāhū ||
7.079.03a abhūd uṣā indratamā maghony ajījanat suvitāya śravāṁsi |
7.079.03c vi divo devī duhitā dadhāty aṅgirastamā sukṛte vasūni ||
7.079.04a tāvad uṣo rādho asmabhyaṁ rāsva yāvat stotṛbhyo arado gṛṇānā |
7.079.04c yāṁ tvā jajñur vṛṣabhasyā raveṇa vi dṛḻhasya duro adrer aurṇoḥ ||
7.079.05a devaṁ-devaṁ rādhase codayanty asmadryak sūnṛtā īrayantī |
7.079.05c vyucchantī naḥ sanaye dhiyo dhā yūyam pāta svastibhiḥ sadā naḥ ||

7.080.01a prati stomebhir uṣasaṁ vasiṣṭhā gīrbhir viprāsaḥ prathamā abudhran |
7.080.01c vivartayantīṁ rajasī samante āviṣkṛṇvatīm bhuvanāni viśvā ||
7.080.02a eṣā syā navyam āyur dadhānā gūḍhvī tamo jyotiṣoṣā abodhi |
7.080.02c agra eti yuvatir ahrayāṇā prācikitat sūryaṁ yajñam agnim ||
7.080.03a aśvāvatīr gomatīr na uṣāso vīravatīḥ sadam ucchantu bhadrāḥ |
7.080.03c ghṛtaṁ duhānā viśvataḥ prapītā yūyam pāta svastibhiḥ sadā naḥ ||

7.081.01a praty u adarśy āyaty ucchantī duhitā divaḥ |
7.081.01c apo mahi vyayati cakṣase tamo jyotiṣ kṛṇoti sūnarī ||
7.081.02a ud usriyāḥ sṛjate sūryaḥ sacām̐ udyan nakṣatram arcivat |
7.081.02c taved uṣo vyuṣi sūryasya ca sam bhaktena gamemahi ||
7.081.03a prati tvā duhitar diva uṣo jīrā abhutsmahi |
7.081.03c yā vahasi puru spārhaṁ vananvati ratnaṁ na dāśuṣe mayaḥ ||
7.081.04a ucchantī yā kṛṇoṣi maṁhanā mahi prakhyai devi svar dṛśe |
7.081.04c tasyās te ratnabhāja īmahe vayaṁ syāma mātur na sūnavaḥ ||
7.081.05a tac citraṁ rādha ā bharoṣo yad dīrghaśruttamam |
7.081.05c yat te divo duhitar martabhojanaṁ tad rāsva bhunajāmahai ||
7.081.06a śravaḥ sūribhyo amṛtaṁ vasutvanaṁ vājām̐ asmabhyaṁ gomataḥ |
7.081.06c codayitrī maghonaḥ sūnṛtāvaty uṣā ucchad apa sridhaḥ ||

7.082.01a indrāvaruṇā yuvam adhvarāya no viśe janāya mahi śarma yacchatam |
7.082.01c dīrghaprayajyum ati yo vanuṣyati vayaṁ jayema pṛtanāsu dūḍhyaḥ ||
7.082.02a samrāḻ anyaḥ svarāḻ anya ucyate vām mahāntāv indrāvaruṇā mahāvasū |
7.082.02c viśve devāsaḥ parame vyomani saṁ vām ojo vṛṣaṇā sam balaṁ dadhuḥ ||
7.082.03a anv apāṁ khāny atṛntam ojasā sūryam airayataṁ divi prabhum |
7.082.03c indrāvaruṇā made asya māyino 'pinvatam apitaḥ pinvataṁ dhiyaḥ ||
7.082.04a yuvām id yutsu pṛtanāsu vahnayo yuvāṁ kṣemasya prasave mitajñavaḥ |
7.082.04c īśānā vasva ubhayasya kārava indrāvaruṇā suhavā havāmahe ||
7.082.05a indrāvaruṇā yad imāni cakrathur viśvā jātāni bhuvanasya majmanā |
7.082.05c kṣemeṇa mitro varuṇaṁ duvasyati marudbhir ugraḥ śubham anya īyate ||
7.082.06a mahe śulkāya varuṇasya nu tviṣa ojo mimāte dhruvam asya yat svam |
7.082.06c ajāmim anyaḥ śnathayantam ātirad dabhrebhir anyaḥ pra vṛṇoti bhūyasaḥ ||
7.082.07a na tam aṁho na duritāni martyam indrāvaruṇā na tapaḥ kutaś cana |
7.082.07c yasya devā gacchatho vītho adhvaraṁ na tam martasya naśate parihvṛtiḥ ||
7.082.08a arvāṅ narā daivyenāvasā gataṁ śṛṇutaṁ havaṁ yadi me jujoṣathaḥ |
7.082.08c yuvor hi sakhyam uta vā yad āpyam mārḍīkam indrāvaruṇā ni yacchatam ||
7.082.09a asmākam indrāvaruṇā bhare-bhare puroyodhā bhavataṁ kṛṣṭyojasā |
7.082.09c yad vāṁ havanta ubhaye adha spṛdhi naras tokasya tanayasya sātiṣu ||
7.082.10a asme indro varuṇo mitro aryamā dyumnaṁ yacchantu mahi śarma saprathaḥ |
7.082.10c avadhraṁ jyotir aditer ṛtāvṛdho devasya ślokaṁ savitur manāmahe ||

7.083.01a yuvāṁ narā paśyamānāsa āpyam prācā gavyantaḥ pṛthuparśavo yayuḥ |
7.083.01c dāsā ca vṛtrā hatam āryāṇi ca sudāsam indrāvaruṇāvasāvatam ||
7.083.02a yatrā naraḥ samayante kṛtadhvajo yasminn ājā bhavati kiṁ cana priyam |
7.083.02c yatrā bhayante bhuvanā svardṛśas tatrā na indrāvaruṇādhi vocatam ||
7.083.03a sam bhūmyā antā dhvasirā adṛkṣatendrāvaruṇā divi ghoṣa āruhat |
7.083.03c asthur janānām upa mām arātayo 'rvāg avasā havanaśrutā gatam ||
7.083.04a indrāvaruṇā vadhanābhir aprati bhedaṁ vanvantā pra sudāsam āvatam |
7.083.04c brahmāṇy eṣāṁ śṛṇutaṁ havīmani satyā tṛtsūnām abhavat purohitiḥ ||
7.083.05a indrāvaruṇāv abhy ā tapanti māghāny aryo vanuṣām arātayaḥ |
7.083.05c yuvaṁ hi vasva ubhayasya rājatho 'dha smā no 'vatam pārye divi ||
7.083.06a yuvāṁ havanta ubhayāsa ājiṣv indraṁ ca vasvo varuṇaṁ ca sātaye |
7.083.06c yatra rājabhir daśabhir nibādhitam pra sudāsam āvataṁ tṛtsubhiḥ saha ||
7.083.07a daśa rājānaḥ samitā ayajyavaḥ sudāsam indrāvaruṇā na yuyudhuḥ |
7.083.07c satyā nṛṇām admasadām upastutir devā eṣām abhavan devahūtiṣu ||
7.083.08a dāśarājñe pariyattāya viśvataḥ sudāsa indrāvaruṇāv aśikṣatam |
7.083.08c śvityañco yatra namasā kapardino dhiyā dhīvanto asapanta tṛtsavaḥ ||
7.083.09a vṛtrāṇy anyaḥ samitheṣu jighnate vratāny anyo abhi rakṣate sadā |
7.083.09c havāmahe vāṁ vṛṣaṇā suvṛktibhir asme indrāvaruṇā śarma yacchatam ||
7.083.10a asme indro varuṇo mitro aryamā dyumnaṁ yacchantu mahi śarma saprathaḥ |
7.083.10c avadhraṁ jyotir aditer ṛtāvṛdho devasya ślokaṁ savitur manāmahe ||

7.084.01a ā vāṁ rājānāv adhvare vavṛtyāṁ havyebhir indrāvaruṇā namobhiḥ |
7.084.01c pra vāṁ ghṛtācī bāhvor dadhānā pari tmanā viṣurūpā jigāti ||
7.084.02a yuvo rāṣṭram bṛhad invati dyaur yau setṛbhir arajjubhiḥ sinīthaḥ |
7.084.02c pari no heḻo varuṇasya vṛjyā uruṁ na indraḥ kṛṇavad u lokam ||
7.084.03a kṛtaṁ no yajñaṁ vidatheṣu cāruṁ kṛtam brahmāṇi sūriṣu praśastā |
7.084.03c upo rayir devajūto na etu pra ṇaḥ spārhābhir ūtibhis tiretam ||
7.084.04a asme indrāvaruṇā viśvavāraṁ rayiṁ dhattaṁ vasumantam purukṣum |
7.084.04c pra ya ādityo anṛtā mināty amitā śūro dayate vasūni ||
7.084.05a iyam indraṁ varuṇam aṣṭa me gīḥ prāvat toke tanaye tūtujānā |
7.084.05c suratnāso devavītiṁ gamema yūyam pāta svastibhiḥ sadā naḥ ||

7.085.01a punīṣe vām arakṣasam manīṣāṁ somam indrāya varuṇāya juhvat |
7.085.01c ghṛtapratīkām uṣasaṁ na devīṁ tā no yāmann uruṣyatām abhīke ||
7.085.02a spardhante vā u devahūye atra yeṣu dhvajeṣu didyavaḥ patanti |
7.085.02c yuvaṁ tām̐ indrāvaruṇāv amitrān hatam parācaḥ śarvā viṣūcaḥ ||
7.085.03a āpaś cid dhi svayaśasaḥ sadaḥsu devīr indraṁ varuṇaṁ devatā dhuḥ |
7.085.03c kṛṣṭīr anyo dhārayati praviktā vṛtrāṇy anyo apratīni hanti ||
7.085.04a sa sukratur ṛtacid astu hotā ya āditya śavasā vāṁ namasvān |
7.085.04c āvavartad avase vāṁ haviṣmān asad it sa suvitāya prayasvān ||
7.085.05a iyam indraṁ varuṇam aṣṭa me gīḥ prāvat toke tanaye tūtujānā |
7.085.05c suratnāso devavītiṁ gamema yūyam pāta svastibhiḥ sadā naḥ ||

7.086.01a dhīrā tv asya mahinā janūṁṣi vi yas tastambha rodasī cid urvī |
7.086.01c pra nākam ṛṣvaṁ nunude bṛhantaṁ dvitā nakṣatram paprathac ca bhūma ||
7.086.02a uta svayā tanvā saṁ vade tat kadā nv antar varuṇe bhuvāni |
7.086.02c kim me havyam ahṛṇāno juṣeta kadā mṛḻīkaṁ sumanā abhi khyam ||
7.086.03a pṛcche tad eno varuṇa didṛkṣūpo emi cikituṣo vipṛccham |
7.086.03c samānam in me kavayaś cid āhur ayaṁ ha tubhyaṁ varuṇo hṛṇīte ||
7.086.04a kim āga āsa varuṇa jyeṣṭhaṁ yat stotāraṁ jighāṁsasi sakhāyam |
7.086.04c pra tan me voco dūḻabha svadhāvo 'va tvānenā namasā tura iyām ||
7.086.05a ava drugdhāni pitryā sṛjā no 'va yā vayaṁ cakṛmā tanūbhiḥ |
7.086.05c ava rājan paśutṛpaṁ na tāyuṁ sṛjā vatsaṁ na dāmno vasiṣṭham ||
7.086.06a na sa svo dakṣo varuṇa dhrutiḥ sā surā manyur vibhīdako acittiḥ |
7.086.06c asti jyāyān kanīyasa upāre svapnaś caned anṛtasya prayotā ||
7.086.07a araṁ dāso na mīḻhuṣe karāṇy ahaṁ devāya bhūrṇaye 'nāgāḥ |
7.086.07c acetayad acito devo aryo gṛtsaṁ rāye kavitaro junāti ||
7.086.08a ayaṁ su tubhyaṁ varuṇa svadhāvo hṛdi stoma upaśritaś cid astu |
7.086.08c śaṁ naḥ kṣeme śam u yoge no astu yūyam pāta svastibhiḥ sadā naḥ ||

7.087.01a radat patho varuṇaḥ sūryāya prārṇāṁsi samudriyā nadīnām |
7.087.01c sargo na sṛṣṭo arvatīr ṛtāyañ cakāra mahīr avanīr ahabhyaḥ ||
7.087.02a ātmā te vāto raja ā navīnot paśur na bhūrṇir yavase sasavān |
7.087.02c antar mahī bṛhatī rodasīme viśvā te dhāma varuṇa priyāṇi ||
7.087.03a pari spaśo varuṇasya smadiṣṭā ubhe paśyanti rodasī sumeke |
7.087.03c ṛtāvānaḥ kavayo yajñadhīrāḥ pracetaso ya iṣayanta manma ||
7.087.04a uvāca me varuṇo medhirāya triḥ sapta nāmāghnyā bibharti |
7.087.04c vidvān padasya guhyā na vocad yugāya vipra uparāya śikṣan ||
7.087.05a tisro dyāvo nihitā antar asmin tisro bhūmīr uparāḥ ṣaḍvidhānāḥ |
7.087.05c gṛtso rājā varuṇaś cakra etaṁ divi preṅkhaṁ hiraṇyayaṁ śubhe kam ||
7.087.06a ava sindhuṁ varuṇo dyaur iva sthād drapso na śveto mṛgas tuviṣmān |
7.087.06c gambhīraśaṁso rajaso vimānaḥ supārakṣatraḥ sato asya rājā ||
7.087.07a yo mṛḻayāti cakruṣe cid āgo vayaṁ syāma varuṇe anāgāḥ |
7.087.07c anu vratāny aditer ṛdhanto yūyam pāta svastibhiḥ sadā naḥ ||

7.088.01a pra śundhyuvaṁ varuṇāya preṣṭhām matiṁ vasiṣṭha mīḻhuṣe bharasva |
7.088.01c ya īm arvāñcaṁ karate yajatraṁ sahasrāmaghaṁ vṛṣaṇam bṛhantam ||
7.088.02a adhā nv asya saṁdṛśaṁ jaganvān agner anīkaṁ varuṇasya maṁsi |
7.088.02c svar yad aśmann adhipā u andho 'bhi mā vapur dṛśaye ninīyāt ||
7.088.03a ā yad ruhāva varuṇaś ca nāvam pra yat samudram īrayāva madhyam |
7.088.03c adhi yad apāṁ snubhiś carāva pra preṅkha īṅkhayāvahai śubhe kam ||
7.088.04a vasiṣṭhaṁ ha varuṇo nāvy ādhād ṛṣiṁ cakāra svapā mahobhiḥ |
7.088.04c stotāraṁ vipraḥ sudinatve ahnāṁ yān nu dyāvas tatanan yād uṣāsaḥ ||
7.088.05a kva tyāni nau sakhyā babhūvuḥ sacāvahe yad avṛkam purā cit |
7.088.05c bṛhantam mānaṁ varuṇa svadhāvaḥ sahasradvāraṁ jagamā gṛhaṁ te ||
7.088.06a ya āpir nityo varuṇa priyaḥ san tvām āgāṁsi kṛṇavat sakhā te |
7.088.06c mā ta enasvanto yakṣin bhujema yandhi ṣmā vipraḥ stuvate varūtham ||
7.088.07a dhruvāsu tvāsu kṣitiṣu kṣiyanto vy asmat pāśaṁ varuṇo mumocat |
7.088.07c avo vanvānā aditer upasthād yūyam pāta svastibhiḥ sadā naḥ ||

7.089.01a mo ṣu varuṇa mṛnmayaṁ gṛhaṁ rājann ahaṁ gamam |
7.089.01c mṛḻā sukṣatra mṛḻaya ||
7.089.02a yad emi prasphurann iva dṛtir na dhmāto adrivaḥ |
7.089.02c mṛḻā sukṣatra mṛḻaya ||
7.089.03a kratvaḥ samaha dīnatā pratīpaṁ jagamā śuce |
7.089.03c mṛḻā sukṣatra mṛḻaya ||
7.089.04a apām madhye tasthivāṁsaṁ tṛṣṇāvidaj jaritāram |
7.089.04c mṛḻā sukṣatra mṛḻaya ||
7.089.05a yat kiṁ cedaṁ varuṇa daivye jane 'bhidroham manuṣyāś carāmasi |
7.089.05c acittī yat tava dharmā yuyopima mā nas tasmād enaso deva rīriṣaḥ ||

7.090.01a pra vīrayā śucayo dadrire vām adhvaryubhir madhumantaḥ sutāsaḥ |
7.090.01c vaha vāyo niyuto yāhy acchā pibā sutasyāndhaso madāya ||
7.090.02a īśānāya prahutiṁ yas ta ānaṭ chuciṁ somaṁ śucipās tubhyaṁ vāyo |
7.090.02c kṛṇoṣi tam martyeṣu praśastaṁ jāto-jāto jāyate vājy asya ||
7.090.03a rāye nu yaṁ jajñatū rodasīme rāye devī dhiṣaṇā dhāti devam |
7.090.03c adha vāyuṁ niyutaḥ saścata svā uta śvetaṁ vasudhitiṁ nireke ||
7.090.04a ucchann uṣasaḥ sudinā ariprā uru jyotir vividur dīdhyānāḥ |
7.090.04c gavyaṁ cid ūrvam uśijo vi vavrus teṣām anu pradivaḥ sasrur āpaḥ ||
7.090.05a te satyena manasā dīdhyānāḥ svena yuktāsaḥ kratunā vahanti |
7.090.05c indravāyū vīravāhaṁ rathaṁ vām īśānayor abhi pṛkṣaḥ sacante ||
7.090.06a īśānāso ye dadhate svar ṇo gobhir aśvebhir vasubhir hiraṇyaiḥ |
7.090.06c indravāyū sūrayo viśvam āyur arvadbhir vīraiḥ pṛtanāsu sahyuḥ ||
7.090.07a arvanto na śravaso bhikṣamāṇā indravāyū suṣṭutibhir vasiṣṭhāḥ |
7.090.07c vājayantaḥ sv avase huvema yūyam pāta svastibhiḥ sadā naḥ ||

7.091.01a kuvid aṅga namasā ye vṛdhāsaḥ purā devā anavadyāsa āsan |
7.091.01c te vāyave manave bādhitāyāvāsayann uṣasaṁ sūryeṇa ||
7.091.02a uśantā dūtā na dabhāya gopā māsaś ca pāthaḥ śaradaś ca pūrvīḥ |
7.091.02c indravāyū suṣṭutir vām iyānā mārḍīkam īṭṭe suvitaṁ ca navyam ||
7.091.03a pīvoannām̐ rayivṛdhaḥ sumedhāḥ śvetaḥ siṣakti niyutām abhiśrīḥ |
7.091.03c te vāyave samanaso vi tasthur viśven naraḥ svapatyāni cakruḥ ||
7.091.04a yāvat taras tanvo yāvad ojo yāvan naraś cakṣasā dīdhyānāḥ |
7.091.04c śuciṁ somaṁ śucipā pātam asme indravāyū sadatam barhir edam ||
7.091.05a niyuvānā niyutaḥ spārhavīrā indravāyū sarathaṁ yātam arvāk |
7.091.05c idaṁ hi vām prabhṛtam madhvo agram adha prīṇānā vi mumuktam asme ||
7.091.06a yā vāṁ śataṁ niyuto yāḥ sahasram indravāyū viśvavārāḥ sacante |
7.091.06c ābhir yātaṁ suvidatrābhir arvāk pātaṁ narā pratibhṛtasya madhvaḥ ||
7.091.07a arvanto na śravaso bhikṣamāṇā indravāyū suṣṭutibhir vasiṣṭhāḥ |
7.091.07c vājayantaḥ sv avase huvema yūyam pāta svastibhiḥ sadā naḥ ||

7.092.01a ā vāyo bhūṣa śucipā upa naḥ sahasraṁ te niyuto viśvavāra |
7.092.01c upo te andho madyam ayāmi yasya deva dadhiṣe pūrvapeyam ||
7.092.02a pra sotā jīro adhvareṣv asthāt somam indrāya vāyave pibadhyai |
7.092.02c pra yad vām madhvo agriyam bharanty adhvaryavo devayantaḥ śacībhiḥ ||
7.092.03a pra yābhir yāsi dāśvāṁsam acchā niyudbhir vāyav iṣṭaye duroṇe |
7.092.03c ni no rayiṁ subhojasaṁ yuvasva ni vīraṁ gavyam aśvyaṁ ca rādhaḥ ||
7.092.04a ye vāyava indramādanāsa ādevāso nitośanāso aryaḥ |
7.092.04c ghnanto vṛtrāṇi sūribhiḥ ṣyāma sāsahvāṁso yudhā nṛbhir amitrān ||
7.092.05a ā no niyudbhiḥ śatinībhir adhvaraṁ sahasriṇībhir upa yāhi yajñam |
7.092.05c vāyo asmin savane mādayasva yūyam pāta svastibhiḥ sadā naḥ ||

7.093.01a śuciṁ nu stomaṁ navajātam adyendrāgnī vṛtrahaṇā juṣethām |
7.093.01c ubhā hi vāṁ suhavā johavīmi tā vājaṁ sadya uśate dheṣṭhā ||
7.093.02a tā sānasī śavasānā hi bhūtaṁ sākaṁvṛdhā śavasā śūśuvāṁsā |
7.093.02c kṣayantau rāyo yavasasya bhūreḥ pṛṅktaṁ vājasya sthavirasya ghṛṣveḥ ||
7.093.03a upo ha yad vidathaṁ vājino gur dhībhir viprāḥ pramatim icchamānāḥ |
7.093.03c arvanto na kāṣṭhāṁ nakṣamāṇā indrāgnī johuvato naras te ||
7.093.04a gīrbhir vipraḥ pramatim icchamāna īṭṭe rayiṁ yaśasam pūrvabhājam |
7.093.04c indrāgnī vṛtrahaṇā suvajrā pra no navyebhis tirataṁ deṣṇaiḥ ||
7.093.05a saṁ yan mahī mithatī spardhamāne tanūrucā śūrasātā yataite |
7.093.05c adevayuṁ vidathe devayubhiḥ satrā hataṁ somasutā janena ||
7.093.06a imām u ṣu somasutim upa na endrāgnī saumanasāya yātam |
7.093.06c nū cid dhi parimamnāthe asmān ā vāṁ śaśvadbhir vavṛtīya vājaiḥ ||
7.093.07a so agna enā namasā samiddho 'cchā mitraṁ varuṇam indraṁ voceḥ |
7.093.07c yat sīm āgaś cakṛmā tat su mṛḻa tad aryamāditiḥ śiśrathantu ||
7.093.08a etā agna āśuṣāṇāsa iṣṭīr yuvoḥ sacābhy aśyāma vājān |
7.093.08c mendro no viṣṇur marutaḥ pari khyan yūyam pāta svastibhiḥ sadā naḥ ||

7.094.01a iyaṁ vām asya manmana indrāgnī pūrvyastutiḥ |
7.094.01c abhrād vṛṣṭir ivājani ||
7.094.02a śṛṇutaṁ jaritur havam indrāgnī vanataṁ giraḥ |
7.094.02c īśānā pipyataṁ dhiyaḥ ||
7.094.03a mā pāpatvāya no narendrāgnī mābhiśastaye |
7.094.03c mā no rīradhataṁ nide ||
7.094.04a indre agnā namo bṛhat suvṛktim erayāmahe |
7.094.04c dhiyā dhenā avasyavaḥ ||
7.094.05a tā hi śaśvanta īḻata itthā viprāsa ūtaye |
7.094.05c sabādho vājasātaye ||
7.094.06a tā vāṁ gīrbhir vipanyavaḥ prayasvanto havāmahe |
7.094.06c medhasātā saniṣyavaḥ ||
7.094.07a indrāgnī avasā gatam asmabhyaṁ carṣaṇīsahā |
7.094.07c mā no duḥśaṁsa īśata ||
7.094.08a mā kasya no araruṣo dhūrtiḥ praṇaṅ martyasya |
7.094.08c indrāgnī śarma yacchatam ||
7.094.09a gomad dhiraṇyavad vasu yad vām aśvāvad īmahe |
7.094.09c indrāgnī tad vanemahi ||
7.094.10a yat soma ā sute nara indrāgnī ajohavuḥ |
7.094.10c saptīvantā saparyavaḥ ||
7.094.11a ukthebhir vṛtrahantamā yā mandānā cid ā girā |
7.094.11c āṅgūṣair āvivāsataḥ ||
7.094.12a tāv id duḥśaṁsam martyaṁ durvidvāṁsaṁ rakṣasvinam |
7.094.12c ābhogaṁ hanmanā hatam udadhiṁ hanmanā hatam ||

7.095.01a pra kṣodasā dhāyasā sasra eṣā sarasvatī dharuṇam āyasī pūḥ |
7.095.01c prabābadhānā rathyeva yāti viśvā apo mahinā sindhur anyāḥ ||
7.095.02a ekācetat sarasvatī nadīnāṁ śucir yatī giribhya ā samudrāt |
7.095.02c rāyaś cetantī bhuvanasya bhūrer ghṛtam payo duduhe nāhuṣāya ||
7.095.03a sa vāvṛdhe naryo yoṣaṇāsu vṛṣā śiśur vṛṣabho yajñiyāsu |
7.095.03c sa vājinam maghavadbhyo dadhāti vi sātaye tanvam māmṛjīta ||
7.095.04a uta syā naḥ sarasvatī juṣāṇopa śravat subhagā yajṇe asmin |
7.095.04c mitajñubhir namasyair iyānā rāyā yujā cid uttarā sakhibhyaḥ ||
7.095.05a imā juhvānā yuṣmad ā namobhiḥ prati stomaṁ sarasvati juṣasva |
7.095.05c tava śarman priyatame dadhānā upa stheyāma śaraṇaṁ na vṛkṣam ||
7.095.06a ayam u te sarasvati vasiṣṭho dvārāv ṛtasya subhage vy āvaḥ |
7.095.06c vardha śubhre stuvate rāsi vājān yūyam pāta svastibhiḥ sadā naḥ ||

7.096.01a bṛhad u gāyiṣe vaco 'suryā nadīnām |
7.096.01c sarasvatīm in mahayā suvṛktibhiḥ stomair vasiṣṭha rodasī ||
7.096.02a ubhe yat te mahinā śubhre andhasī adhikṣiyanti pūravaḥ |
7.096.02c sā no bodhy avitrī marutsakhā coda rādho maghonām ||
7.096.03a bhadram id bhadrā kṛṇavat sarasvaty akavārī cetati vājinīvatī |
7.096.03c gṛṇānā jamadagnivat stuvānā ca vasiṣṭhavat ||
7.096.04a janīyanto nv agravaḥ putrīyantaḥ sudānavaḥ |
7.096.04c sarasvantaṁ havāmahe ||
7.096.05a ye te sarasva ūrmayo madhumanto ghṛtaścutaḥ |
7.096.05c tebhir no 'vitā bhava ||
7.096.06a pīpivāṁsaṁ sarasvataḥ stanaṁ yo viśvadarśataḥ |
7.096.06c bhakṣīmahi prajām iṣam ||

7.097.01a yajñe divo nṛṣadane pṛthivyā naro yatra devayavo madanti |
7.097.01c indrāya yatra savanāni sunve gaman madāya prathamaṁ vayaś ca ||
7.097.02a ā daivyā vṛṇīmahe 'vāṁsi bṛhaspatir no maha ā sakhāyaḥ |
7.097.02c yathā bhavema mīḻhuṣe anāgā yo no dātā parāvataḥ piteva ||
7.097.03a tam u jyeṣṭhaṁ namasā havirbhiḥ suśevam brahmaṇas patiṁ gṛṇīṣe |
7.097.03c indraṁ śloko mahi daivyaḥ siṣaktu yo brahmaṇo devakṛtasya rājā ||
7.097.04a sa ā no yoniṁ sadatu preṣṭho bṛhaspatir viśvavāro yo asti |
7.097.04c kāmo rāyaḥ suvīryasya taṁ dāt parṣan no ati saścato ariṣṭān ||
7.097.05a tam ā no arkam amṛtāya juṣṭam ime dhāsur amṛtāsaḥ purājāḥ |
7.097.05c śucikrandaṁ yajatam pastyānām bṛhaspatim anarvāṇaṁ huvema ||
7.097.06a taṁ śagmāso aruṣāso aśvā bṛhaspatiṁ sahavāho vahanti |
7.097.06c sahaś cid yasya nīlavat sadhasthaṁ nabho na rūpam aruṣaṁ vasānāḥ ||
7.097.07a sa hi śuciḥ śatapatraḥ sa śundhyur hiraṇyavāśīr iṣiraḥ svarṣāḥ |
7.097.07c bṛhaspatiḥ sa svāveśa ṛṣvaḥ purū sakhibhya āsutiṁ kariṣṭhaḥ ||
7.097.08a devī devasya rodasī janitrī bṛhaspatiṁ vāvṛdhatur mahitvā |
7.097.08c dakṣāyyāya dakṣatā sakhāyaḥ karad brahmaṇe sutarā sugādhā ||
7.097.09a iyaṁ vām brahmaṇas pate suvṛktir brahmendrāya vajriṇe akāri |
7.097.09c aviṣṭaṁ dhiyo jigṛtam puraṁdhīr jajastam aryo vanuṣām arātīḥ ||
7.097.10a bṛhaspate yuvam indraś ca vasvo divyasyeśāthe uta pārthivasya |
7.097.10c dhattaṁ rayiṁ stuvate kīraye cid yūyam pāta svastibhiḥ sadā naḥ ||

7.098.01a adhvaryavo 'ruṇaṁ dugdham aṁśuṁ juhotana vṛṣabhāya kṣitīnām |
7.098.01c gaurād vedīyām̐ avapānam indro viśvāhed yāti sutasomam icchan ||
7.098.02a yad dadhiṣe pradivi cārv annaṁ dive-dive pītim id asya vakṣi |
7.098.02c uta hṛdota manasā juṣāṇa uśann indra prasthitān pāhi somān ||
7.098.03a jajñānaḥ somaṁ sahase papātha pra te mātā mahimānam uvāca |
7.098.03c endra paprāthorv antarikṣaṁ yudhā devebhyo varivaś cakartha ||
7.098.04a yad yodhayā mahato manyamānān sākṣāma tān bāhubhiḥ śāśadānān |
7.098.04c yad vā nṛbhir vṛta indrābhiyudhyās taṁ tvayājiṁ sauśravasaṁ jayema ||
7.098.05a prendrasya vocam prathamā kṛtāni pra nūtanā maghavā yā cakāra |
7.098.05c yaded adevīr asahiṣṭa māyā athābhavat kevalaḥ somo asya ||
7.098.06a tavedaṁ viśvam abhitaḥ paśavyaṁ yat paśyasi cakṣasā sūryasya |
7.098.06c gavām asi gopatir eka indra bhakṣīmahi te prayatasya vasvaḥ ||
7.098.07a bṛhaspate yuvam indraś ca vasvo divyasyeśāthe uta pārthivasya |
7.098.07c dhattaṁ rayiṁ stuvate kīraye cid yūyam pāta svastibhiḥ sadā naḥ ||

7.099.01a paro mātrayā tanvā vṛdhāna na te mahitvam anv aśnuvanti |
7.099.01c ubhe te vidma rajasī pṛthivyā viṣṇo deva tvam paramasya vitse ||
7.099.02a na te viṣṇo jāyamāno na jāto deva mahimnaḥ param antam āpa |
7.099.02c ud astabhnā nākam ṛṣvam bṛhantaṁ dādhartha prācīṁ kakubham pṛthivyāḥ ||
7.099.03a irāvatī dhenumatī hi bhūtaṁ sūyavasinī manuṣe daśasyā |
7.099.03c vy astabhnā rodasī viṣṇav ete dādhartha pṛthivīm abhito mayūkhaiḥ ||
7.099.04a uruṁ yajñāya cakrathur u lokaṁ janayantā sūryam uṣāsam agnim |
7.099.04c dāsasya cid vṛṣaśiprasya māyā jaghnathur narā pṛtanājyeṣu ||
7.099.05a indrāviṣṇū dṛṁhitāḥ śambarasya nava puro navatiṁ ca śnathiṣṭam |
7.099.05c śataṁ varcinaḥ sahasraṁ ca sākaṁ hatho apraty asurasya vīrān ||
7.099.06a iyam manīṣā bṛhatī bṛhantorukramā tavasā vardhayantī |
7.099.06c rare vāṁ stomaṁ vidatheṣu viṣṇo pinvatam iṣo vṛjaneṣv indra ||
7.099.07a vaṣaṭ te viṣṇav āsa ā kṛṇomi tan me juṣasva śipiviṣṭa havyam |
7.099.07c vardhantu tvā suṣṭutayo giro me yūyam pāta svastibhiḥ sadā naḥ ||

7.100.01a nū marto dayate saniṣyan yo viṣṇava urugāyāya dāśat |
7.100.01c pra yaḥ satrācā manasā yajāta etāvantaṁ naryam āvivāsāt ||
7.100.02a tvaṁ viṣṇo sumatiṁ viśvajanyām aprayutām evayāvo matiṁ dāḥ |
7.100.02c parco yathā naḥ suvitasya bhūrer aśvāvataḥ puruścandrasya rāyaḥ ||
7.100.03a trir devaḥ pṛthivīm eṣa etāṁ vi cakrame śatarcasam mahitvā |
7.100.03c pra viṣṇur astu tavasas tavīyān tveṣaṁ hy asya sthavirasya nāma ||
7.100.04a vi cakrame pṛthivīm eṣa etāṁ kṣetrāya viṣṇur manuṣe daśasyan |
7.100.04c dhruvāso asya kīrayo janāsa urukṣitiṁ sujanimā cakāra ||
7.100.05a pra tat te adya śipiviṣṭa nāmāryaḥ śaṁsāmi vayunāni vidvān |
7.100.05c taṁ tvā gṛṇāmi tavasam atavyān kṣayantam asya rajasaḥ parāke ||
7.100.06a kim it te viṣṇo paricakṣyam bhūt pra yad vavakṣe śipiviṣṭo asmi |
7.100.06c mā varpo asmad apa gūha etad yad anyarūpaḥ samithe babhūtha ||
7.100.07a vaṣaṭ te viṣṇav āsa ā kṛṇomi tan me juṣasva śipiviṣṭa havyam |
7.100.07c vardhantu tvā suṣṭutayo giro me yūyam pāta svastibhiḥ sadā naḥ ||

7.101.01a tisro vācaḥ pra vada jyotiragrā yā etad duhre madhudogham ūdhaḥ |
7.101.01c sa vatsaṁ kṛṇvan garbham oṣadhīnāṁ sadyo jāto vṛṣabho roravīti ||
7.101.02a yo vardhana oṣadhīnāṁ yo apāṁ yo viśvasya jagato deva īśe |
7.101.02c sa tridhātu śaraṇaṁ śarma yaṁsat trivartu jyotiḥ svabhiṣṭy asme ||
7.101.03a starīr u tvad bhavati sūta u tvad yathāvaśaṁ tanvaṁ cakra eṣaḥ |
7.101.03c pituḥ payaḥ prati gṛbhṇāti mātā tena pitā vardhate tena putraḥ ||
7.101.04a yasmin viśvāni bhuvanāni tasthus tisro dyāvas tredhā sasrur āpaḥ |
7.101.04c trayaḥ kośāsa upasecanāso madhvaḥ ścotanty abhito virapśam ||
7.101.05a idaṁ vacaḥ parjanyāya svarāje hṛdo astv antaraṁ taj jujoṣat |
7.101.05c mayobhuvo vṛṣṭayaḥ santv asme supippalā oṣadhīr devagopāḥ ||
7.101.06a sa retodhā vṛṣabhaḥ śaśvatīnāṁ tasminn ātmā jagatas tasthuṣaś ca |
7.101.06c tan ma ṛtam pātu śataśāradāya yūyam pāta svastibhiḥ sadā naḥ ||

7.102.01a parjanyāya pra gāyata divas putrāya mīḻhuṣe |
7.102.01c sa no yavasam icchatu ||
7.102.02a yo garbham oṣadhīnāṁ gavāṁ kṛṇoty arvatām |
7.102.02c parjanyaḥ puruṣīṇām ||
7.102.03a tasmā id āsye havir juhotā madhumattamam |
7.102.03c iḻāṁ naḥ saṁyataṁ karat ||

7.103.01a saṁvatsaraṁ śaśayānā brāhmaṇā vratacāriṇaḥ |
7.103.01c vācam parjanyajinvitām pra maṇḍūkā avādiṣuḥ ||
7.103.02a divyā āpo abhi yad enam āyan dṛtiṁ na śuṣkaṁ sarasī śayānam |
7.103.02c gavām aha na māyur vatsinīnām maṇḍūkānāṁ vagnur atrā sam eti ||
7.103.03a yad īm enām̐ uśato abhy avarṣīt tṛṣyāvataḥ prāvṛṣy āgatāyām |
7.103.03c akhkhalīkṛtyā pitaraṁ na putro anyo anyam upa vadantam eti ||
7.103.04a anyo anyam anu gṛbhṇāty enor apām prasarge yad amandiṣātām |
7.103.04c maṇḍūko yad abhivṛṣṭaḥ kaniṣkan pṛśniḥ sampṛṅkte haritena vācam ||
7.103.05a yad eṣām anyo anyasya vācaṁ śāktasyeva vadati śikṣamāṇaḥ |
7.103.05c sarvaṁ tad eṣāṁ samṛdheva parva yat suvāco vadathanādhy apsu ||
7.103.06a gomāyur eko ajamāyur ekaḥ pṛśnir eko harita eka eṣām |
7.103.06c samānaṁ nāma bibhrato virūpāḥ purutrā vācam pipiśur vadantaḥ ||
7.103.07a brāhmaṇāso atirātre na some saro na pūrṇam abhito vadantaḥ |
7.103.07c saṁvatsarasya tad ahaḥ pari ṣṭha yan maṇḍūkāḥ prāvṛṣīṇam babhūva ||
7.103.08a brāhmaṇāsaḥ somino vācam akrata brahma kṛṇvantaḥ parivatsarīṇam |
7.103.08c adhvaryavo gharmiṇaḥ siṣvidānā āvir bhavanti guhyā na ke cit ||
7.103.09a devahitiṁ jugupur dvādaśasya ṛtuṁ naro na pra minanty ete |
7.103.09c saṁvatsare prāvṛṣy āgatāyāṁ taptā gharmā aśnuvate visargam ||
7.103.10a gomāyur adād ajamāyur adāt pṛśnir adād dharito no vasūni |
7.103.10c gavām maṇḍūkā dadataḥ śatāni sahasrasāve pra tiranta āyuḥ ||

7.104.01a indrāsomā tapataṁ rakṣa ubjataṁ ny arpayataṁ vṛṣaṇā tamovṛdhaḥ |
7.104.01c parā śṛṇītam acito ny oṣataṁ hataṁ nudethāṁ ni śiśītam atriṇaḥ ||
7.104.02a indrāsomā sam aghaśaṁsam abhy aghaṁ tapur yayastu carur agnivām̐ iva |
7.104.02c brahmadviṣe kravyāde ghoracakṣase dveṣo dhattam anavāyaṁ kimīdine ||
7.104.03a indrāsomā duṣkṛto vavre antar anārambhaṇe tamasi pra vidhyatam |
7.104.03c yathā nātaḥ punar ekaś canodayat tad vām astu sahase manyumac chavaḥ ||
7.104.04a indrāsomā vartayataṁ divo vadhaṁ sam pṛthivyā aghaśaṁsāya tarhaṇam |
7.104.04c ut takṣataṁ svaryam parvatebhyo yena rakṣo vāvṛdhānaṁ nijūrvathaḥ ||
7.104.05a indrāsomā vartayataṁ divas pary agnitaptebhir yuvam aśmahanmabhiḥ |
7.104.05c tapurvadhebhir ajarebhir atriṇo ni parśāne vidhyataṁ yantu nisvaram ||
7.104.06a indrāsomā pari vām bhūtu viśvata iyam matiḥ kakṣyāśveva vājinā |
7.104.06c yāṁ vāṁ hotrām parihinomi medhayemā brahmāṇi nṛpatīva jinvatam ||
7.104.07a prati smarethāṁ tujayadbhir evair hataṁ druho rakṣaso bhaṅgurāvataḥ |
7.104.07c indrāsomā duṣkṛte mā sugam bhūd yo naḥ kadā cid abhidāsati druhā ||
7.104.08a yo mā pākena manasā carantam abhicaṣṭe anṛtebhir vacobhiḥ |
7.104.08c āpa iva kāśinā saṁgṛbhītā asann astv āsata indra vaktā ||
7.104.09a ye pākaśaṁsaṁ viharanta evair ye vā bhadraṁ dūṣayanti svadhābhiḥ |
7.104.09c ahaye vā tān pradadātu soma ā vā dadhātu nirṛter upasthe ||
7.104.10a yo no rasaṁ dipsati pitvo agne yo aśvānāṁ yo gavāṁ yas tanūnām |
7.104.10c ripuḥ stenaḥ steyakṛd dabhram etu ni ṣa hīyatāṁ tanvā tanā ca ||
7.104.11a paraḥ so astu tanvā tanā ca tisraḥ pṛthivīr adho astu viśvāḥ |
7.104.11c prati śuṣyatu yaśo asya devā yo no divā dipsati yaś ca naktam ||
7.104.12a suvijñānaṁ cikituṣe janāya sac cāsac ca vacasī paspṛdhāte |
7.104.12c tayor yat satyaṁ yatarad ṛjīyas tad it somo 'vati hanty āsat ||
7.104.13a na vā u somo vṛjinaṁ hinoti na kṣatriyam mithuyā dhārayantam |
7.104.13c hanti rakṣo hanty āsad vadantam ubhāv indrasya prasitau śayāte ||
7.104.14a yadi vāham anṛtadeva āsa moghaṁ vā devām̐ apyūhe agne |
7.104.14c kim asmabhyaṁ jātavedo hṛṇīṣe droghavācas te nirṛthaṁ sacantām ||
7.104.15a adyā murīya yadi yātudhāno asmi yadi vāyus tatapa pūruṣasya |
7.104.15c adhā sa vīrair daśabhir vi yūyā yo mā moghaṁ yātudhānety āha ||
7.104.16a yo māyātuṁ yātudhānety āha yo vā rakṣāḥ śucir asmīty āha |
7.104.16c indras taṁ hantu mahatā vadhena viśvasya jantor adhamas padīṣṭa ||
7.104.17a pra yā jigāti khargaleva naktam apa druhā tanvaṁ gūhamānā |
7.104.17c vavrām̐ anantām̐ ava sā padīṣṭa grāvāṇo ghnantu rakṣasa upabdaiḥ ||
7.104.18a vi tiṣṭhadhvam maruto vikṣv icchata gṛbhāyata rakṣasaḥ sam pinaṣṭana |
7.104.18c vayo ye bhūtvī patayanti naktabhir ye vā ripo dadhire deve adhvare ||
7.104.19a pra vartaya divo aśmānam indra somaśitam maghavan saṁ śiśādhi |
7.104.19c prāktād apāktād adharād udaktād abhi jahi rakṣasaḥ parvatena ||
7.104.20a eta u tye patayanti śvayātava indraṁ dipsanti dipsavo 'dābhyam |
7.104.20c śiśīte śakraḥ piśunebhyo vadhaṁ nūnaṁ sṛjad aśaniṁ yātumadbhyaḥ ||
7.104.21a indro yātūnām abhavat parāśaro havirmathīnām abhy āvivāsatām |
7.104.21c abhīd u śakraḥ paraśur yathā vanam pātreva bhindan sata eti rakṣasaḥ ||
7.104.22a ulūkayātuṁ śuśulūkayātuṁ jahi śvayātum uta kokayātum |
7.104.22c suparṇayātum uta gṛdhrayātuṁ dṛṣadeva pra mṛṇa rakṣa indra ||
7.104.23a mā no rakṣo abhi naḍ yātumāvatām apocchatu mithunā yā kimīdinā |
7.104.23c pṛthivī naḥ pārthivāt pātv aṁhaso 'ntarikṣaṁ divyāt pātv asmān ||
7.104.24a indra jahi pumāṁsaṁ yātudhānam uta striyam māyayā śāśadānām |
7.104.24c vigrīvāso mūradevā ṛdantu mā te dṛśan sūryam uccarantam ||
7.104.25a prati cakṣva vi cakṣvendraś ca soma jāgṛtam |
7.104.25c rakṣobhyo vadham asyatam aśaniṁ yātumadbhyaḥ ||


8.001.01a mā cid anyad vi śaṁsata sakhāyo mā riṣaṇyata |
8.001.01c indram it stotā vṛṣaṇaṁ sacā sute muhur ukthā ca śaṁsata ||
8.001.02a avakrakṣiṇaṁ vṛṣabhaṁ yathājuraṁ gāṁ na carṣaṇīsaham |
8.001.02c vidveṣaṇaṁ saṁvananobhayaṁkaram maṁhiṣṭham ubhayāvinam ||
8.001.03a yac cid dhi tvā janā ime nānā havanta ūtaye |
8.001.03c asmākam brahmedam indra bhūtu te 'hā viśvā ca vardhanam ||
8.001.04a vi tartūryante maghavan vipaścito 'ryo vipo janānām |
8.001.04c upa kramasva pururūpam ā bhara vājaṁ nediṣṭham ūtaye ||
8.001.05a mahe cana tvām adrivaḥ parā śulkāya deyām |
8.001.05c na sahasrāya nāyutāya vajrivo na śatāya śatāmagha ||
8.001.06a vasyām̐ indrāsi me pitur uta bhrātur abhuñjataḥ |
8.001.06c mātā ca me chadayathaḥ samā vaso vasutvanāya rādhase ||
8.001.07a kveyatha kved asi purutrā cid dhi te manaḥ |
8.001.07c alarṣi yudhma khajakṛt puraṁdara pra gāyatrā agāsiṣuḥ ||
8.001.08a prāsmai gāyatram arcata vāvātur yaḥ puraṁdaraḥ |
8.001.08c yābhiḥ kāṇvasyopa barhir āsadaṁ yāsad vajrī bhinat puraḥ ||
8.001.09a ye te santi daśagvinaḥ śatino ye sahasriṇaḥ |
8.001.09c aśvāso ye te vṛṣaṇo raghudruvas tebhir nas tūyam ā gahi ||
8.001.10a ā tv adya sabardughāṁ huve gāyatravepasam |
8.001.10c indraṁ dhenuṁ sudughām anyām iṣam urudhārām araṁkṛtam ||
8.001.11a yat tudat sūra etaśaṁ vaṅkū vātasya parṇinā |
8.001.11c vahat kutsam ārjuneyaṁ śatakratuḥ tsarad gandharvam astṛtam ||
8.001.12a ya ṛte cid abhiśriṣaḥ purā jatrubhya ātṛdaḥ |
8.001.12c saṁdhātā saṁdhim maghavā purūvasur iṣkartā vihrutam punaḥ ||
8.001.13a mā bhūma niṣṭyā ivendra tvad araṇā iva |
8.001.13c vanāni na prajahitāny adrivo duroṣāso amanmahi ||
8.001.14a amanmahīd anāśavo 'nugrāsaś ca vṛtrahan |
8.001.14c sakṛt su te mahatā śūra rādhasā anu stomam mudīmahi ||
8.001.15a yadi stomam mama śravad asmākam indram indavaḥ |
8.001.15c tiraḥ pavitraṁ sasṛvāṁsa āśavo mandantu tugryāvṛdhaḥ ||
8.001.16a ā tv adya sadhastutiṁ vāvātuḥ sakhyur ā gahi |
8.001.16c upastutir maghonām pra tvāvatv adhā te vaśmi suṣṭutim ||
8.001.17a sotā hi somam adribhir em enam apsu dhāvata |
8.001.17c gavyā vastreva vāsayanta in naro nir dhukṣan vakṣaṇābhyaḥ ||
8.001.18a adha jmo adha vā divo bṛhato rocanād adhi |
8.001.18c ayā vardhasva tanvā girā mamā jātā sukrato pṛṇa ||
8.001.19a indrāya su madintamaṁ somaṁ sotā vareṇyam |
8.001.19c śakra eṇam pīpayad viśvayā dhiyā hinvānaṁ na vājayum ||
8.001.20a mā tvā somasya galdayā sadā yācann ahaṁ girā |
8.001.20c bhūrṇim mṛgaṁ na savaneṣu cukrudhaṁ ka īśānaṁ na yāciṣat ||
8.001.21a madeneṣitam madam ugram ugreṇa śavasā |
8.001.21c viśveṣāṁ tarutāram madacyutam made hi ṣmā dadāti naḥ ||
8.001.22a śevāre vāryā puru devo martāya dāśuṣe |
8.001.22c sa sunvate ca stuvate ca rāsate viśvagūrto ariṣṭutaḥ ||
8.001.23a endra yāhi matsva citreṇa deva rādhasā |
8.001.23c saro na prāsy udaraṁ sapītibhir ā somebhir uru sphiram ||
8.001.24a ā tvā sahasram ā śataṁ yuktā rathe hiraṇyaye |
8.001.24c brahmayujo haraya indra keśino vahantu somapītaye ||
8.001.25a ā tvā rathe hiraṇyaye harī mayūraśepyā |
8.001.25c śitipṛṣṭhā vahatām madhvo andhaso vivakṣaṇasya pītaye ||
8.001.26a pibā tv asya girvaṇaḥ sutasya pūrvapā iva |
8.001.26c pariṣkṛtasya rasina iyam āsutiś cārur madāya patyate ||
8.001.27a ya eko asti daṁsanā mahām̐ ugro abhi vrataiḥ |
8.001.27c gamat sa śiprī na sa yoṣad ā gamad dhavaṁ na pari varjati ||
8.001.28a tvam puraṁ cariṣṇvaṁ vadhaiḥ śuṣṇasya sam piṇak |
8.001.28c tvam bhā anu caro adha dvitā yad indra havyo bhuvaḥ ||
8.001.29a mama tvā sūra udite mama madhyaṁdine divaḥ |
8.001.29c mama prapitve apiśarvare vasav ā stomāso avṛtsata ||
8.001.30a stuhi stuhīd ete ghā te maṁhiṣṭhāso maghonām |
8.001.30c ninditāśvaḥ prapathī paramajyā maghasya medhyātithe ||
8.001.31a ā yad aśvān vananvataḥ śraddhayāhaṁ rathe ruham |
8.001.31c uta vāmasya vasunaś ciketati yo asti yādvaḥ paśuḥ ||
8.001.32a ya ṛjrā mahyam māmahe saha tvacā hiraṇyayā |
8.001.32c eṣa viśvāny abhy astu saubhagāsaṅgasya svanadrathaḥ ||
8.001.33a adha plāyogir ati dāsad anyān āsaṅgo agne daśabhiḥ sahasraiḥ |
8.001.33c adhokṣaṇo daśa mahyaṁ ruśanto naḻā iva saraso nir atiṣṭhan ||
8.001.34a anv asya sthūraṁ dadṛśe purastād anastha ūrur avarambamāṇaḥ |
8.001.34c śaśvatī nāry abhicakṣyāha subhadram arya bhojanam bibharṣi ||

8.002.01a idaṁ vaso sutam andhaḥ pibā supūrṇam udaram |
8.002.01c anābhayin rarimā te ||
8.002.02a nṛbhir dhūtaḥ suto aśnair avyo vāraiḥ paripūtaḥ |
8.002.02c aśvo na nikto nadīṣu ||
8.002.03a taṁ te yavaṁ yathā gobhiḥ svādum akarma śrīṇantaḥ |
8.002.03c indra tvāsmin sadhamāde ||
8.002.04a indra it somapā eka indraḥ sutapā viśvāyuḥ |
8.002.04c antar devān martyām̐ś ca ||
8.002.05a na yaṁ śukro na durāśīr na tṛprā uruvyacasam |
8.002.05c apaspṛṇvate suhārdam ||
8.002.06a gobhir yad īm anye asman mṛgaṁ na vrā mṛgayante |
8.002.06c abhitsaranti dhenubhiḥ ||
8.002.07a traya indrasya somāḥ sutāsaḥ santu devasya |
8.002.07c sve kṣaye sutapāvnaḥ ||
8.002.08a trayaḥ kośāsaḥ ścotanti tisraś camvaḥ supūrṇāḥ |
8.002.08c samāne adhi bhārman ||
8.002.09a śucir asi puruniḥṣṭhāḥ kṣīrair madhyata āśīrtaḥ |
8.002.09c dadhnā mandiṣṭhaḥ śūrasya ||
8.002.10a ime ta indra somās tīvrā asme sutāsaḥ |
8.002.10c śukrā āśiraṁ yācante ||
8.002.11a tām̐ āśiram puroḻāśam indremaṁ somaṁ śrīṇīhi |
8.002.11c revantaṁ hi tvā śṛṇomi ||
8.002.12a hṛtsu pītāso yudhyante durmadāso na surāyām |
8.002.12c ūdhar na nagnā jarante ||
8.002.13a revām̐ id revataḥ stotā syāt tvāvato maghonaḥ |
8.002.13c pred u harivaḥ śrutasya ||
8.002.14a ukthaṁ cana śasyamānam agor arir ā ciketa |
8.002.14c na gāyatraṁ gīyamānam ||
8.002.15a mā na indra pīyatnave mā śardhate parā dāḥ |
8.002.15c śikṣā śacīvaḥ śacībhiḥ ||
8.002.16a vayam u tvā tadidarthā indra tvāyantaḥ sakhāyaḥ |
8.002.16c kaṇvā ukthebhir jarante ||
8.002.17a na ghem anyad ā papana vajrinn apaso naviṣṭau |
8.002.17c taved u stomaṁ ciketa ||
8.002.18a icchanti devāḥ sunvantaṁ na svapnāya spṛhayanti |
8.002.18c yanti pramādam atandrāḥ ||
8.002.19a o ṣu pra yāhi vājebhir mā hṛṇīthā abhy asmān |
8.002.19c mahām̐ iva yuvajāniḥ ||
8.002.20a mo ṣv adya durhaṇāvān sāyaṁ karad āre asmat |
8.002.20c aśrīra iva jāmātā ||
8.002.21a vidmā hy asya vīrasya bhūridāvarīṁ sumatim |
8.002.21c triṣu jātasya manāṁsi ||
8.002.22a ā tū ṣiñca kaṇvamantaṁ na ghā vidma śavasānāt |
8.002.22c yaśastaraṁ śatamūteḥ ||
8.002.23a jyeṣṭhena sotar indrāya somaṁ vīrāya śakrāya |
8.002.23c bharā piban naryāya ||
8.002.24a yo vediṣṭho avyathiṣv aśvāvantaṁ jaritṛbhyaḥ |
8.002.24c vājaṁ stotṛbhyo gomantam ||
8.002.25a panyam-panyam it sotāra ā dhāvata madyāya |
8.002.25c somaṁ vīrāya śūrāya ||
8.002.26a pātā vṛtrahā sutam ā ghā gaman nāre asmat |
8.002.26c ni yamate śatamūtiḥ ||
8.002.27a eha harī brahmayujā śagmā vakṣataḥ sakhāyam |
8.002.27c gīrbhiḥ śrutaṁ girvaṇasam ||
8.002.28a svādavaḥ somā ā yāhi śrītāḥ somā ā yāhi |
8.002.28c śiprinn ṛṣīvaḥ śacīvo nāyam acchā sadhamādam ||
8.002.29a stutaś ca yās tvā vardhanti mahe rādhase nṛmṇāya |
8.002.29c indra kāriṇaṁ vṛdhantaḥ ||
8.002.30a giraś ca yās te girvāha ukthā ca tubhyaṁ tāni |
8.002.30c satrā dadhire śavāṁsi ||
8.002.31a eved eṣa tuvikūrmir vājām̐ eko vajrahastaḥ |
8.002.31c sanād amṛkto dayate ||
8.002.32a hantā vṛtraṁ dakṣiṇenendraḥ purū puruhūtaḥ |
8.002.32c mahān mahībhiḥ śacībhiḥ ||
8.002.33a yasmin viśvāś carṣaṇaya uta cyautnā jrayāṁsi ca |
8.002.33c anu ghen mandī maghonaḥ ||
8.002.34a eṣa etāni cakārendro viśvā yo 'ti śṛṇve |
8.002.34c vājadāvā maghonām ||
8.002.35a prabhartā rathaṁ gavyantam apākāc cid yam avati |
8.002.35c ino vasu sa hi voḻhā ||
8.002.36a sanitā vipro arvadbhir hantā vṛtraṁ nṛbhiḥ śūraḥ |
8.002.36c satyo 'vitā vidhantam ||
8.002.37a yajadhvainam priyamedhā indraṁ satrācā manasā |
8.002.37c yo bhūt somaiḥ satyamadvā ||
8.002.38a gāthaśravasaṁ satpatiṁ śravaskāmam purutmānam |
8.002.38c kaṇvāso gāta vājinam ||
8.002.39a ya ṛte cid gās padebhyo dāt sakhā nṛbhyaḥ śacīvān |
8.002.39c ye asmin kāmam aśriyan ||
8.002.40a itthā dhīvantam adrivaḥ kāṇvam medhyātithim |
8.002.40c meṣo bhūto 'bhi yann ayaḥ ||
8.002.41a śikṣā vibhindo asmai catvāry ayutā dadat |
8.002.41c aṣṭā paraḥ sahasrā ||
8.002.42a uta su tye payovṛdhā mākī raṇasya naptyā |
8.002.42c janitvanāya māmahe ||

8.003.01a pibā sutasya rasino matsvā na indra gomataḥ |
8.003.01c āpir no bodhi sadhamādyo vṛdhe 'smām̐ avantu te dhiyaḥ ||
8.003.02a bhūyāma te sumatau vājino vayam mā naḥ star abhimātaye |
8.003.02c asmāñ citrābhir avatād abhiṣṭibhir ā naḥ sumneṣu yāmaya ||
8.003.03a imā u tvā purūvaso giro vardhantu yā mama |
8.003.03c pāvakavarṇāḥ śucayo vipaścito 'bhi stomair anūṣata ||
8.003.04a ayaṁ sahasram ṛṣibhiḥ sahaskṛtaḥ samudra iva paprathe |
8.003.04c satyaḥ so asya mahimā gṛṇe śavo yajñeṣu viprarājye ||
8.003.05a indram id devatātaya indram prayaty adhvare |
8.003.05c indraṁ samīke vanino havāmaha indraṁ dhanasya sātaye ||
8.003.06a indro mahnā rodasī paprathac chava indraḥ sūryam arocayat |
8.003.06c indre ha viśvā bhuvanāni yemira indre suvānāsa indavaḥ ||
8.003.07a abhi tvā pūrvapītaya indra stomebhir āyavaḥ |
8.003.07c samīcīnāsa ṛbhavaḥ sam asvaran rudrā gṛṇanta pūrvyam ||
8.003.08a asyed indro vāvṛdhe vṛṣṇyaṁ śavo made sutasya viṣṇavi |
8.003.08c adyā tam asya mahimānam āyavo 'nu ṣṭuvanti pūrvathā ||
8.003.09a tat tvā yāmi suvīryaṁ tad brahma pūrvacittaye |
8.003.09c yenā yatibhyo bhṛgave dhane hite yena praskaṇvam āvitha ||
8.003.10a yenā samudram asṛjo mahīr apas tad indra vṛṣṇi te śavaḥ |
8.003.10c sadyaḥ so asya mahimā na saṁnaśe yaṁ kṣoṇīr anucakrade ||
8.003.11a śagdhī na indra yat tvā rayiṁ yāmi suvīryam |
8.003.11c śagdhi vājāya prathamaṁ siṣāsate śagdhi stomāya pūrvya ||
8.003.12a śagdhī no asya yad dha pauram āvitha dhiya indra siṣāsataḥ |
8.003.12c śagdhi yathā ruśamaṁ śyāvakaṁ kṛpam indra prāvaḥ svarṇaram ||
8.003.13a kan navyo atasīnāṁ turo gṛṇīta martyaḥ |
8.003.13c nahī nv asya mahimānam indriyaṁ svar gṛṇanta ānaśuḥ ||
8.003.14a kad u stuvanta ṛtayanta devata ṛṣiḥ ko vipra ohate |
8.003.14c kadā havam maghavann indra sunvataḥ kad u stuvata ā gamaḥ ||
8.003.15a ud u tye madhumattamā giraḥ stomāsa īrate |
8.003.15c satrājito dhanasā akṣitotayo vājayanto rathā iva ||
8.003.16a kaṇvā iva bhṛgavaḥ sūryā iva viśvam id dhītam ānaśuḥ |
8.003.16c indraṁ stomebhir mahayanta āyavaḥ priyamedhāso asvaran ||
8.003.17a yukṣvā hi vṛtrahantama harī indra parāvataḥ |
8.003.17c arvācīno maghavan somapītaya ugra ṛṣvebhir ā gahi ||
8.003.18a ime hi te kāravo vāvaśur dhiyā viprāso medhasātaye |
8.003.18c sa tvaṁ no maghavann indra girvaṇo veno na śṛṇudhī havam ||
8.003.19a nir indra bṛhatībhyo vṛtraṁ dhanubhyo asphuraḥ |
8.003.19c nir arbudasya mṛgayasya māyino niḥ parvatasya gā ājaḥ ||
8.003.20a nir agnayo rurucur nir u sūryo niḥ soma indriyo rasaḥ |
8.003.20c nir antarikṣād adhamo mahām ahiṁ kṛṣe tad indra pauṁsyam ||
8.003.21a yam me dur indro marutaḥ pākasthāmā kaurayāṇaḥ |
8.003.21c viśveṣāṁ tmanā śobhiṣṭham upeva divi dhāvamānam ||
8.003.22a rohitam me pākasthāmā sudhuraṁ kakṣyaprām |
8.003.22c adād rāyo vibodhanam ||
8.003.23a yasmā anye daśa prati dhuraṁ vahanti vahnayaḥ |
8.003.23c astaṁ vayo na tugryam ||
8.003.24a ātmā pitus tanūr vāsa ojodā abhyañjanam |
8.003.24c turīyam id rohitasya pākasthāmānam bhojaṁ dātāram abravam ||

8.004.01a yad indra prāg apāg udaṅ nyag vā hūyase nṛbhiḥ |
8.004.01c simā purū nṛṣūto asy ānave 'si praśardha turvaśe ||
8.004.02a yad vā rume ruśame śyāvake kṛpa indra mādayase sacā |
8.004.02c kaṇvāsas tvā brahmabhiḥ stomavāhasa indrā yacchanty ā gahi ||
8.004.03a yathā gauro apā kṛtaṁ tṛṣyann ety averiṇam |
8.004.03c āpitve naḥ prapitve tūyam ā gahi kaṇveṣu su sacā piba ||
8.004.04a mandantu tvā maghavann indrendavo rādhodeyāya sunvate |
8.004.04c āmuṣyā somam apibaś camū sutaṁ jyeṣṭhaṁ tad dadhiṣe sahaḥ ||
8.004.05a pra cakre sahasā saho babhañja manyum ojasā |
8.004.05c viśve ta indra pṛtanāyavo yaho ni vṛkṣā iva yemire ||
8.004.06a sahasreṇeva sacate yavīyudhā yas ta ānaḻ upastutim |
8.004.06c putram prāvargaṁ kṛṇute suvīrye dāśnoti namaüktibhiḥ ||
8.004.07a mā bhema mā śramiṣmograsya sakhye tava |
8.004.07c mahat te vṛṣṇo abhicakṣyaṁ kṛtam paśyema turvaśaṁ yadum ||
8.004.08a savyām anu sphigyaṁ vāvase vṛṣā na dāno asya roṣati |
8.004.08c madhvā sampṛktāḥ sāragheṇa dhenavas tūyam ehi dravā piba ||
8.004.09a aśvī rathī surūpa id gomām̐ id indra te sakhā |
8.004.09c śvātrabhājā vayasā sacate sadā candro yāti sabhām upa ||
8.004.10a ṛśyo na tṛṣyann avapānam ā gahi pibā somaṁ vaśām̐ anu |
8.004.10c nimeghamāno maghavan dive-diva ojiṣṭhaṁ dadhiṣe sahaḥ ||
8.004.11a adhvaryo drāvayā tvaṁ somam indraḥ pipāsati |
8.004.11c upa nūnaṁ yuyuje vṛṣaṇā harī ā ca jagāma vṛtrahā ||
8.004.12a svayaṁ cit sa manyate dāśurir jano yatrā somasya tṛmpasi |
8.004.12c idaṁ te annaṁ yujyaṁ samukṣitaṁ tasyehi pra dravā piba ||
8.004.13a ratheṣṭhāyādhvaryavaḥ somam indrāya sotana |
8.004.13c adhi bradhnasyādrayo vi cakṣate sunvanto dāśvadhvaram ||
8.004.14a upa bradhnaṁ vāvātā vṛṣaṇā harī indram apasu vakṣataḥ |
8.004.14c arvāñcaṁ tvā saptayo 'dhvaraśriyo vahantu savaned upa ||
8.004.15a pra pūṣaṇaṁ vṛṇīmahe yujyāya purūvasum |
8.004.15c sa śakra śikṣa puruhūta no dhiyā tuje rāye vimocana ||
8.004.16a saṁ naḥ śiśīhi bhurijor iva kṣuraṁ rāsva rāyo vimocana |
8.004.16c tve tan naḥ suvedam usriyaṁ vasu yaṁ tvaṁ hinoṣi martyam ||
8.004.17a vemi tvā pūṣann ṛñjase vemi stotava āghṛṇe |
8.004.17c na tasya vemy araṇaṁ hi tad vaso stuṣe pajrāya sāmne ||
8.004.18a parā gāvo yavasaṁ kac cid āghṛṇe nityaṁ rekṇo amartya |
8.004.18c asmākam pūṣann avitā śivo bhava maṁhiṣṭho vājasātaye ||
8.004.19a sthūraṁ rādhaḥ śatāśvaṁ kuruṅgasya diviṣṭiṣu |
8.004.19c rājñas tveṣasya subhagasya rātiṣu turvaśeṣv amanmahi ||
8.004.20a dhībhiḥ sātāni kāṇvasya vājinaḥ priyamedhair abhidyubhiḥ |
8.004.20c ṣaṣṭiṁ sahasrānu nirmajām aje nir yūthāni gavām ṛṣiḥ ||
8.004.21a vṛkṣāś cin me abhipitve arāraṇuḥ |
8.004.21c gām bhajanta mehanāśvam bhajanta mehanā ||

8.005.01a dūrād iheva yat saty aruṇapsur aśiśvitat |
8.005.01c vi bhānuṁ viśvadhātanat ||
8.005.02a nṛvad dasrā manoyujā rathena pṛthupājasā |
8.005.02c sacethe aśvinoṣasam ||
8.005.03a yuvābhyāṁ vājinīvasū prati stomā adṛkṣata |
8.005.03c vācaṁ dūto yathohiṣe ||
8.005.04a purupriyā ṇa ūtaye purumandrā purūvasū |
8.005.04c stuṣe kaṇvāso aśvinā ||
8.005.05a maṁhiṣṭhā vājasātameṣayantā śubhas patī |
8.005.05c gantārā dāśuṣo gṛham ||
8.005.06a tā sudevāya dāśuṣe sumedhām avitāriṇīm |
8.005.06c ghṛtair gavyūtim ukṣatam ||
8.005.07a ā naḥ stomam upa dravat tūyaṁ śyenebhir āśubhiḥ |
8.005.07c yātam aśvebhir aśvinā ||
8.005.08a yebhis tisraḥ parāvato divo viśvāni rocanā |
8.005.08c trīm̐r aktūn paridīyathaḥ ||
8.005.09a uta no gomatīr iṣa uta sātīr aharvidā |
8.005.09c vi pathaḥ sātaye sitam ||
8.005.10a ā no gomantam aśvinā suvīraṁ surathaṁ rayim |
8.005.10c voḻham aśvāvatīr iṣaḥ ||
8.005.11a vāvṛdhānā śubhas patī dasrā hiraṇyavartanī |
8.005.11c pibataṁ somyam madhu ||
8.005.12a asmabhyaṁ vājinīvasū maghavadbhyaś ca saprathaḥ |
8.005.12c chardir yantam adābhyam ||
8.005.13a ni ṣu brahma janānāṁ yāviṣṭaṁ tūyam ā gatam |
8.005.13c mo ṣv anyām̐ upāratam ||
8.005.14a asya pibatam aśvinā yuvam madasya cāruṇaḥ |
8.005.14c madhvo rātasya dhiṣṇyā ||
8.005.15a asme ā vahataṁ rayiṁ śatavantaṁ sahasriṇam |
8.005.15c purukṣuṁ viśvadhāyasam ||
8.005.16a purutrā cid dhi vāṁ narā vihvayante manīṣiṇaḥ |
8.005.16c vāghadbhir aśvinā gatam ||
8.005.17a janāso vṛktabarhiṣo haviṣmanto araṁkṛtaḥ |
8.005.17c yuvāṁ havante aśvinā ||
8.005.18a asmākam adya vām ayaṁ stomo vāhiṣṭho antamaḥ |
8.005.18c yuvābhyām bhūtv aśvinā ||
8.005.19a yo ha vām madhuno dṛtir āhito rathacarṣaṇe |
8.005.19c tataḥ pibatam aśvinā ||
8.005.20a tena no vājinīvasū paśve tokāya śaṁ gave |
8.005.20c vahatam pīvarīr iṣaḥ ||
8.005.21a uta no divyā iṣa uta sindhūm̐r aharvidā |
8.005.21c apa dvāreva varṣathaḥ ||
8.005.22a kadā vāṁ taugryo vidhat samudre jahito narā |
8.005.22c yad vāṁ ratho vibhiṣ patāt ||
8.005.23a yuvaṁ kaṇvāya nāsatyā ṛpiriptāya harmye |
8.005.23c śaśvad ūtīr daśasyathaḥ ||
8.005.24a tābhir ā yātam ūtibhir navyasībhiḥ suśastibhiḥ |
8.005.24c yad vāṁ vṛṣaṇvasū huve ||
8.005.25a yathā cit kaṇvam āvatam priyamedham upastutam |
8.005.25c atriṁ śiñjāram aśvinā ||
8.005.26a yathota kṛtvye dhane 'ṁśuṁ goṣv agastyam |
8.005.26c yathā vājeṣu sobharim ||
8.005.27a etāvad vāṁ vṛṣaṇvasū ato vā bhūyo aśvinā |
8.005.27c gṛṇantaḥ sumnam īmahe ||
8.005.28a rathaṁ hiraṇyavandhuraṁ hiraṇyābhīśum aśvinā |
8.005.28c ā hi sthātho divispṛśam ||
8.005.29a hiraṇyayī vāṁ rabhir īṣā akṣo hiraṇyayaḥ |
8.005.29c ubhā cakrā hiraṇyayā ||
8.005.30a tena no vājinīvasū parāvataś cid ā gatam |
8.005.30c upemāṁ suṣṭutim mama ||
8.005.31a ā vahethe parākāt pūrvīr aśnantāv aśvinā |
8.005.31c iṣo dāsīr amartyā ||
8.005.32a ā no dyumnair ā śravobhir ā rāyā yātam aśvinā |
8.005.32c puruścandrā nāsatyā ||
8.005.33a eha vām pruṣitapsavo vayo vahantu parṇinaḥ |
8.005.33c acchā svadhvaraṁ janam ||
8.005.34a rathaṁ vām anugāyasaṁ ya iṣā vartate saha |
8.005.34c na cakram abhi bādhate ||
8.005.35a hiraṇyayena rathena dravatpāṇibhir aśvaiḥ |
8.005.35c dhījavanā nāsatyā ||
8.005.36a yuvam mṛgaṁ jāgṛvāṁsaṁ svadatho vā vṛṣaṇvasū |
8.005.36c tā naḥ pṛṅktam iṣā rayim ||
8.005.37a tā me aśvinā sanīnāṁ vidyātaṁ navānām |
8.005.37c yathā cic caidyaḥ kaśuḥ śatam uṣṭrānāṁ dadat sahasrā daśa gonām ||
8.005.38a yo me hiraṇyasaṁdṛśo daśa rājño amaṁhata |
8.005.38c adhaspadā ic caidyasya kṛṣṭayaś carmamnā abhito janāḥ ||
8.005.39a mākir enā pathā gād yeneme yanti cedayaḥ |
8.005.39c anyo net sūrir ohate bhūridāvattaro janaḥ ||

8.006.01a mahām̐ indro ya ojasā parjanyo vṛṣṭimām̐ iva |
8.006.01c stomair vatsasya vāvṛdhe ||
8.006.02a prajām ṛtasya piprataḥ pra yad bharanta vahnayaḥ |
8.006.02c viprā ṛtasya vāhasā ||
8.006.03a kaṇvā indraṁ yad akrata stomair yajñasya sādhanam |
8.006.03c jāmi bruvata āyudham ||
8.006.04a sam asya manyave viśo viśvā namanta kṛṣṭayaḥ |
8.006.04c samudrāyeva sindhavaḥ ||
8.006.05a ojas tad asya titviṣa ubhe yat samavartayat |
8.006.05c indraś carmeva rodasī ||
8.006.06a vi cid vṛtrasya dodhato vajreṇa śataparvaṇā |
8.006.06c śiro bibheda vṛṣṇinā ||
8.006.07a imā abhi pra ṇonumo vipām agreṣu dhītayaḥ |
8.006.07c agneḥ śocir na didyutaḥ ||
8.006.08a guhā satīr upa tmanā pra yac chocanta dhītayaḥ |
8.006.08c kaṇvā ṛtasya dhārayā ||
8.006.09a pra tam indra naśīmahi rayiṁ gomantam aśvinam |
8.006.09c pra brahma pūrvacittaye ||
8.006.10a aham id dhi pituṣ pari medhām ṛtasya jagrabha |
8.006.10c ahaṁ sūrya ivājani ||
8.006.11a aham pratnena manmanā giraḥ śumbhāmi kaṇvavat |
8.006.11c yenendraḥ śuṣmam id dadhe ||
8.006.12a ye tvām indra na tuṣṭuvur ṛṣayo ye ca tuṣṭuvuḥ |
8.006.12c mamed vardhasva suṣṭutaḥ ||
8.006.13a yad asya manyur adhvanīd vi vṛtram parvaśo rujan |
8.006.13c apaḥ samudram airayat ||
8.006.14a ni śuṣṇa indra dharṇasiṁ vajraṁ jaghantha dasyavi |
8.006.14c vṛṣā hy ugra śṛṇviṣe ||
8.006.15a na dyāva indram ojasā nāntarikṣāṇi vajriṇam |
8.006.15c na vivyacanta bhūmayaḥ ||
8.006.16a yas ta indra mahīr apaḥ stabhūyamāna āśayat |
8.006.16c ni tam padyāsu śiśnathaḥ ||
8.006.17a ya ime rodasī mahī samīcī samajagrabhīt |
8.006.17c tamobhir indra taṁ guhaḥ ||
8.006.18a ya indra yatayas tvā bhṛgavo ye ca tuṣṭuvuḥ |
8.006.18c mamed ugra śrudhī havam ||
8.006.19a imās ta indra pṛśnayo ghṛtaṁ duhata āśiram |
8.006.19c enām ṛtasya pipyuṣīḥ ||
8.006.20a yā indra prasvas tvāsā garbham acakriran |
8.006.20c pari dharmeva sūryam ||
8.006.21a tvām ic chavasas pate kaṇvā ukthena vāvṛdhuḥ |
8.006.21c tvāṁ sutāsa indavaḥ ||
8.006.22a taved indra praṇītiṣūta praśastir adrivaḥ |
8.006.22c yajño vitantasāyyaḥ ||
8.006.23a ā na indra mahīm iṣam puraṁ na darṣi gomatīm |
8.006.23c uta prajāṁ suvīryam ||
8.006.24a uta tyad āśvaśvyaṁ yad indra nāhuṣīṣv ā |
8.006.24c agre vikṣu pradīdayat ||
8.006.25a abhi vrajaṁ na tatniṣe sūra upākacakṣasam |
8.006.25c yad indra mṛḻayāsi naḥ ||
8.006.26a yad aṅga taviṣīyasa indra prarājasi kṣitīḥ |
8.006.26c mahām̐ apāra ojasā ||
8.006.27a taṁ tvā haviṣmatīr viśa upa bruvata ūtaye |
8.006.27c urujrayasam indubhiḥ ||
8.006.28a upahvare girīṇāṁ saṁgathe ca nadīnām |
8.006.28c dhiyā vipro ajāyata ||
8.006.29a ataḥ samudram udvataś cikitvām̐ ava paśyati |
8.006.29c yato vipāna ejati ||
8.006.30a ād it pratnasya retaso jyotiṣ paśyanti vāsaram |
8.006.30c paro yad idhyate divā ||
8.006.31a kaṇvāsa indra te matiṁ viśve vardhanti pauṁsyam |
8.006.31c uto śaviṣṭha vṛṣṇyam ||
8.006.32a imām ma indra suṣṭutiṁ juṣasva pra su mām ava |
8.006.32c uta pra vardhayā matim ||
8.006.33a uta brahmaṇyā vayaṁ tubhyam pravṛddha vajrivaḥ |
8.006.33c viprā atakṣma jīvase ||
8.006.34a abhi kaṇvā anūṣatāpo na pravatā yatīḥ |
8.006.34c indraṁ vananvatī matiḥ ||
8.006.35a indram ukthāni vāvṛdhuḥ samudram iva sindhavaḥ |
8.006.35c anuttamanyum ajaram ||
8.006.36a ā no yāhi parāvato haribhyāṁ haryatābhyām |
8.006.36c imam indra sutam piba ||
8.006.37a tvām id vṛtrahantama janāso vṛktabarhiṣaḥ |
8.006.37c havante vājasātaye ||
8.006.38a anu tvā rodasī ubhe cakraṁ na varty etaśam |
8.006.38c anu suvānāsa indavaḥ ||
8.006.39a mandasvā su svarṇara utendra śaryaṇāvati |
8.006.39c matsvā vivasvato matī ||
8.006.40a vāvṛdhāna upa dyavi vṛṣā vajry aroravīt |
8.006.40c vṛtrahā somapātamaḥ ||
8.006.41a ṛṣir hi pūrvajā asy eka īśāna ojasā |
8.006.41c indra coṣkūyase vasu ||
8.006.42a asmākaṁ tvā sutām̐ upa vītapṛṣṭhā abhi prayaḥ |
8.006.42c śataṁ vahantu harayaḥ ||
8.006.43a imāṁ su pūrvyāṁ dhiyam madhor ghṛtasya pipyuṣīm |
8.006.43c kaṇvā ukthena vāvṛdhuḥ ||
8.006.44a indram id vimahīnām medhe vṛṇīta martyaḥ |
8.006.44c indraṁ saniṣyur ūtaye ||
8.006.45a arvāñcaṁ tvā puruṣṭuta priyamedhastutā harī |
8.006.45c somapeyāya vakṣataḥ ||
8.006.46a śatam ahaṁ tirindire sahasram parśāv ā dade |
8.006.46c rādhāṁsi yādvānām ||
8.006.47a trīṇi śatāny arvatāṁ sahasrā daśa gonām |
8.006.47c daduṣ pajrāya sāmne ||
8.006.48a ud ānaṭ kakuho divam uṣṭrāñ caturyujo dadat |
8.006.48c śravasā yādvaṁ janam ||

8.007.01a pra yad vas triṣṭubham iṣam maruto vipro akṣarat |
8.007.01c vi parvateṣu rājatha ||
8.007.02a yad aṅga taviṣīyavo yāmaṁ śubhrā acidhvam |
8.007.02c ni parvatā ahāsata ||
8.007.03a ud īrayanta vāyubhir vāśrāsaḥ pṛśnimātaraḥ |
8.007.03c dhukṣanta pipyuṣīm iṣam ||
8.007.04a vapanti maruto miham pra vepayanti parvatān |
8.007.04c yad yāmaṁ yānti vāyubhiḥ ||
8.007.05a ni yad yāmāya vo girir ni sindhavo vidharmaṇe |
8.007.05c mahe śuṣmāya yemire ||
8.007.06a yuṣmām̐ u naktam ūtaye yuṣmān divā havāmahe |
8.007.06c yuṣmān prayaty adhvare ||
8.007.07a ud u tye aruṇapsavaś citrā yāmebhir īrate |
8.007.07c vāśrā adhi ṣṇunā divaḥ ||
8.007.08a sṛjanti raśmim ojasā panthāṁ sūryāya yātave |
8.007.08c te bhānubhir vi tasthire ||
8.007.09a imām me maruto giram imaṁ stomam ṛbhukṣaṇaḥ |
8.007.09c imam me vanatā havam ||
8.007.10a trīṇi sarāṁsi pṛśnayo duduhre vajriṇe madhu |
8.007.10c utsaṁ kavandham udriṇam ||
8.007.11a maruto yad dha vo divaḥ sumnāyanto havāmahe |
8.007.11c ā tū na upa gantana ||
8.007.12a yūyaṁ hi ṣṭhā sudānavo rudrā ṛbhukṣaṇo dame |
8.007.12c uta pracetaso made ||
8.007.13a ā no rayim madacyutam purukṣuṁ viśvadhāyasam |
8.007.13c iyartā maruto divaḥ ||
8.007.14a adhīva yad girīṇāṁ yāmaṁ śubhrā acidhvam |
8.007.14c suvānair mandadhva indubhiḥ ||
8.007.15a etāvataś cid eṣāṁ sumnam bhikṣeta martyaḥ |
8.007.15c adābhyasya manmabhiḥ ||
8.007.16a ye drapsā iva rodasī dhamanty anu vṛṣṭibhiḥ |
8.007.16c utsaṁ duhanto akṣitam ||
8.007.17a ud u svānebhir īrata ud rathair ud u vāyubhiḥ |
8.007.17c ut stomaiḥ pṛśnimātaraḥ ||
8.007.18a yenāva turvaśaṁ yaduṁ yena kaṇvaṁ dhanaspṛtam |
8.007.18c rāye su tasya dhīmahi ||
8.007.19a imā u vaḥ sudānavo ghṛtaṁ na pipyuṣīr iṣaḥ |
8.007.19c vardhān kāṇvasya manmabhiḥ ||
8.007.20a kva nūnaṁ sudānavo madathā vṛktabarhiṣaḥ |
8.007.20c brahmā ko vaḥ saparyati ||
8.007.21a nahi ṣma yad dha vaḥ purā stomebhir vṛktabarhiṣaḥ |
8.007.21c śardhām̐ ṛtasya jinvatha ||
8.007.22a sam u tye mahatīr apaḥ saṁ kṣoṇī sam u sūryam |
8.007.22c saṁ vajram parvaśo dadhuḥ ||
8.007.23a vi vṛtram parvaśo yayur vi parvatām̐ arājinaḥ |
8.007.23c cakrāṇā vṛṣṇi pauṁsyam ||
8.007.24a anu tritasya yudhyataḥ śuṣmam āvann uta kratum |
8.007.24c anv indraṁ vṛtratūrye ||
8.007.25a vidyuddhastā abhidyavaḥ śiprāḥ śīrṣan hiraṇyayīḥ |
8.007.25c śubhrā vy añjata śriye ||
8.007.26a uśanā yat parāvata ukṣṇo randhram ayātana |
8.007.26c dyaur na cakradad bhiyā ||
8.007.27a ā no makhasya dāvane 'śvair hiraṇyapāṇibhiḥ |
8.007.27c devāsa upa gantana ||
8.007.28a yad eṣām pṛṣatī rathe praṣṭir vahati rohitaḥ |
8.007.28c yānti śubhrā riṇann apaḥ ||
8.007.29a suṣome śaryaṇāvaty ārjīke pastyāvati |
8.007.29c yayur nicakrayā naraḥ ||
8.007.30a kadā gacchātha maruta itthā vipraṁ havamānam |
8.007.30c mārḍīkebhir nādhamānam ||
8.007.31a kad dha nūnaṁ kadhapriyo yad indram ajahātana |
8.007.31c ko vaḥ sakhitva ohate ||
8.007.32a saho ṣu ṇo vajrahastaiḥ kaṇvāso agnim marudbhiḥ |
8.007.32c stuṣe hiraṇyavāśībhiḥ ||
8.007.33a o ṣu vṛṣṇaḥ prayajyūn ā navyase suvitāya |
8.007.33c vavṛtyāṁ citravājān ||
8.007.34a girayaś cin ni jihate parśānāso manyamānāḥ |
8.007.34c parvatāś cin ni yemire ||
8.007.35a ākṣṇayāvāno vahanty antarikṣeṇa patataḥ |
8.007.35c dhātāraḥ stuvate vayaḥ ||
8.007.36a agnir hi jāni pūrvyaś chando na sūro arciṣā |
8.007.36c te bhānubhir vi tasthire ||

8.008.01a ā no viśvābhir ūtibhir aśvinā gacchataṁ yuvam |
8.008.01c dasrā hiraṇyavartanī pibataṁ somyam madhu ||
8.008.02a ā nūnaṁ yātam aśvinā rathena sūryatvacā |
8.008.02c bhujī hiraṇyapeśasā kavī gambhīracetasā ||
8.008.03a ā yātaṁ nahuṣas pary āntarikṣāt suvṛktibhiḥ |
8.008.03c pibātho aśvinā madhu kaṇvānāṁ savane sutam ||
8.008.04a ā no yātaṁ divas pary āntarikṣād adhapriyā |
8.008.04c putraḥ kaṇvasya vām iha suṣāva somyam madhu ||
8.008.05a ā no yātam upaśruty aśvinā somapītaye |
8.008.05c svāhā stomasya vardhanā pra kavī dhītibhir narā ||
8.008.06a yac cid dhi vām pura ṛṣayo juhūre 'vase narā |
8.008.06c ā yātam aśvinā gatam upemāṁ suṣṭutim mama ||
8.008.07a divaś cid rocanād adhy ā no gantaṁ svarvidā |
8.008.07c dhībhir vatsapracetasā stomebhir havanaśrutā ||
8.008.08a kim anye pary āsate 'smat stomebhir aśvinā |
8.008.08c putraḥ kaṇvasya vām ṛṣir gīrbhir vatso avīvṛdhat ||
8.008.09a ā vāṁ vipra ihāvase 'hvat stomebhir aśvinā |
8.008.09c ariprā vṛtrahantamā tā no bhūtam mayobhuvā ||
8.008.10a ā yad vāṁ yoṣaṇā ratham atiṣṭhad vājinīvasū |
8.008.10c viśvāny aśvinā yuvam pra dhītāny agacchatam ||
8.008.11a ataḥ sahasranirṇijā rathenā yātam aśvinā |
8.008.11c vatso vām madhumad vaco 'śaṁsīt kāvyaḥ kaviḥ ||
8.008.12a purumandrā purūvasū manotarā rayīṇām |
8.008.12c stomam me aśvināv imam abhi vahnī anūṣātām ||
8.008.13a ā no viśvāny aśvinā dhattaṁ rādhāṁsy ahrayā |
8.008.13c kṛtaṁ na ṛtviyāvato mā no rīradhataṁ nide ||
8.008.14a yan nāsatyā parāvati yad vā stho adhy ambare |
8.008.14c ataḥ sahasranirṇijā rathenā yātam aśvinā ||
8.008.15a yo vāṁ nāsatyāv ṛṣir gīrbhir vatso avīvṛdhat |
8.008.15c tasmai sahasranirṇijam iṣaṁ dhattaṁ ghṛtaścutam ||
8.008.16a prāsmā ūrjaṁ ghṛtaścutam aśvinā yacchataṁ yuvam |
8.008.16c yo vāṁ sumnāya tuṣṭavad vasūyād dānunas patī ||
8.008.17a ā no gantaṁ riśādasemaṁ stomam purubhujā |
8.008.17c kṛtaṁ naḥ suśriyo naremā dātam abhiṣṭaye ||
8.008.18a ā vāṁ viśvābhir ūtibhiḥ priyamedhā ahūṣata |
8.008.18c rājantāv adhvarāṇām aśvinā yāmahūtiṣu ||
8.008.19a ā no gantam mayobhuvāśvinā śambhuvā yuvam |
8.008.19c yo vāṁ vipanyū dhītibhir gīrbhir vatso avīvṛdhat ||
8.008.20a yābhiḥ kaṇvam medhātithiṁ yābhir vaśaṁ daśavrajam |
8.008.20c yābhir gośaryam āvataṁ tābhir no 'vataṁ narā ||
8.008.21a yābhir narā trasadasyum āvataṁ kṛtvye dhane |
8.008.21c tābhiḥ ṣv asmām̐ aśvinā prāvataṁ vājasātaye ||
8.008.22a pra vāṁ stomāḥ suvṛktayo giro vardhantv aśvinā |
8.008.22c purutrā vṛtrahantamā tā no bhūtam puruspṛhā ||
8.008.23a trīṇi padāny aśvinor āviḥ sānti guhā paraḥ |
8.008.23c kavī ṛtasya patmabhir arvāg jīvebhyas pari ||

8.009.01a ā nūnam aśvinā yuvaṁ vatsasya gantam avase |
8.009.01c prāsmai yacchatam avṛkam pṛthu cchardir yuyutaṁ yā arātayaḥ ||
8.009.02a yad antarikṣe yad divi yat pañca mānuṣām̐ anu |
8.009.02c nṛmṇaṁ tad dhattam aśvinā ||
8.009.03a ye vāṁ daṁsāṁsy aśvinā viprāsaḥ parimāmṛśuḥ |
8.009.03c evet kāṇvasya bodhatam ||
8.009.04a ayaṁ vāṁ gharmo aśvinā stomena pari ṣicyate |
8.009.04c ayaṁ somo madhumān vājinīvasū yena vṛtraṁ ciketathaḥ ||
8.009.05a yad apsu yad vanaspatau yad oṣadhīṣu purudaṁsasā kṛtam |
8.009.05c tena māviṣṭam aśvinā ||
8.009.06a yan nāsatyā bhuraṇyatho yad vā deva bhiṣajyathaḥ |
8.009.06c ayaṁ vāṁ vatso matibhir na vindhate haviṣmantaṁ hi gacchathaḥ ||
8.009.07a ā nūnam aśvinor ṛṣiḥ stomaṁ ciketa vāmayā |
8.009.07c ā somam madhumattamaṁ gharmaṁ siñcād atharvaṇi ||
8.009.08a ā nūnaṁ raghuvartaniṁ rathaṁ tiṣṭhātho aśvinā |
8.009.08c ā vāṁ stomā ime mama nabho na cucyavīrata ||
8.009.09a yad adya vāṁ nāsatyokthair ācucyuvīmahi |
8.009.09c yad vā vāṇībhir aśvinevet kāṇvasya bodhatam ||
8.009.10a yad vāṁ kakṣīvām̐ uta yad vyaśva ṛṣir yad vāṁ dīrghatamā juhāva |
8.009.10c pṛthī yad vāṁ vainyaḥ sādaneṣv eved ato aśvinā cetayethām ||
8.009.11a yātaṁ chardiṣpā uta naḥ paraspā bhūtaṁ jagatpā uta nas tanūpā |
8.009.11c vartis tokāya tanayāya yātam ||
8.009.12a yad indreṇa sarathaṁ yātho aśvinā yad vā vāyunā bhavathaḥ samokasā |
8.009.12c yad ādityebhir ṛbhubhiḥ sajoṣasā yad vā viṣṇor vikramaṇeṣu tiṣṭhathaḥ ||
8.009.13a yad adyāśvināv ahaṁ huveya vājasātaye |
8.009.13c yat pṛtsu turvaṇe sahas tac chreṣṭham aśvinor avaḥ ||
8.009.14a ā nūnaṁ yātam aśvinemā havyāni vāṁ hitā |
8.009.14c ime somāso adhi turvaśe yadāv ime kaṇveṣu vām atha ||
8.009.15a yan nāsatyā parāke arvāke asti bheṣajam |
8.009.15c tena nūnaṁ vimadāya pracetasā chardir vatsāya yacchatam ||
8.009.16a abhutsy u pra devyā sākaṁ vācāham aśvinoḥ |
8.009.16c vy āvar devy ā matiṁ vi rātim martyebhyaḥ ||
8.009.17a pra bodhayoṣo aśvinā pra devi sūnṛte mahi |
8.009.17c pra yajñahotar ānuṣak pra madāya śravo bṛhat ||
8.009.18a yad uṣo yāsi bhānunā saṁ sūryeṇa rocase |
8.009.18c ā hāyam aśvino ratho vartir yāti nṛpāyyam ||
8.009.19a yad āpītāso aṁśavo gāvo na duhra ūdhabhiḥ |
8.009.19c yad vā vāṇīr anūṣata pra devayanto aśvinā ||
8.009.20a pra dyumnāya pra śavase pra nṛṣāhyāya śarmaṇe |
8.009.20c pra dakṣāya pracetasā ||
8.009.21a yan nūnaṁ dhībhir aśvinā pitur yonā niṣīdathaḥ |
8.009.21c yad vā sumnebhir ukthyā ||

8.010.01a yat stho dīrghaprasadmani yad vādo rocane divaḥ |
8.010.01c yad vā samudre adhy ākṛte gṛhe 'ta ā yātam aśvinā ||
8.010.02a yad vā yajñam manave sammimikṣathur evet kāṇvasya bodhatam |
8.010.02c bṛhaspatiṁ viśvān devām̐ ahaṁ huva indrāviṣṇū aśvināv āśuheṣasā ||
8.010.03a tyā nv aśvinā huve sudaṁsasā gṛbhe kṛtā |
8.010.03c yayor asti pra ṇaḥ sakhyaṁ deveṣv adhy āpyam ||
8.010.04a yayor adhi pra yajñā asūre santi sūrayaḥ |
8.010.04c tā yajñasyādhvarasya pracetasā svadhābhir yā pibataḥ somyam madhu ||
8.010.05a yad adyāśvināv apāg yat prāk stho vājinīvasū |
8.010.05c yad druhyavy anavi turvaśe yadau huve vām atha mā gatam ||
8.010.06a yad antarikṣe patathaḥ purubhujā yad veme rodasī anu |
8.010.06c yad vā svadhābhir adhitiṣṭhatho ratham ata ā yātam aśvinā ||

8.011.01a tvam agne vratapā asi deva ā martyeṣv ā |
8.011.01c tvaṁ yajñeṣv īḍyaḥ ||
8.011.02a tvam asi praśasyo vidatheṣu sahantya |
8.011.02c agne rathīr adhvarāṇām ||
8.011.03a sa tvam asmad apa dviṣo yuyodhi jātavedaḥ |
8.011.03c adevīr agne arātīḥ ||
8.011.04a anti cit santam aha yajñam martasya ripoḥ |
8.011.04c nopa veṣi jātavedaḥ ||
8.011.05a martā amartyasya te bhūri nāma manāmahe |
8.011.05c viprāso jātavedasaḥ ||
8.011.06a vipraṁ viprāso 'vase devam martāsa ūtaye |
8.011.06c agniṁ gīrbhir havāmahe ||
8.011.07a ā te vatso mano yamat paramāc cit sadhasthāt |
8.011.07c agne tvāṁkāmayā girā ||
8.011.08a purutrā hi sadṛṅṅ asi viśo viśvā anu prabhuḥ |
8.011.08c samatsu tvā havāmahe ||
8.011.09a samatsv agnim avase vājayanto havāmahe |
8.011.09c vājeṣu citrarādhasam ||
8.011.10a pratno hi kam īḍyo adhvareṣu sanāc ca hotā navyaś ca satsi |
8.011.10c svāṁ cāgne tanvam piprayasvāsmabhyaṁ ca saubhagam ā yajasva ||

8.012.01a ya indra somapātamo madaḥ śaviṣṭha cetati |
8.012.01c yenā haṁsi ny atriṇaṁ tam īmahe ||
8.012.02a yenā daśagvam adhriguṁ vepayantaṁ svarṇaram |
8.012.02c yenā samudram āvithā tam īmahe ||
8.012.03a yena sindhum mahīr apo rathām̐ iva pracodayaḥ |
8.012.03c panthām ṛtasya yātave tam īmahe ||
8.012.04a imaṁ stomam abhiṣṭaye ghṛtaṁ na pūtam adrivaḥ |
8.012.04c yenā nu sadya ojasā vavakṣitha ||
8.012.05a imaṁ juṣasva girvaṇaḥ samudra iva pinvate |
8.012.05c indra viśvābhir ūtibhir vavakṣitha ||
8.012.06a yo no devaḥ parāvataḥ sakhitvanāya māmahe |
8.012.06c divo na vṛṣṭim prathayan vavakṣitha ||
8.012.07a vavakṣur asya ketava uta vajro gabhastyoḥ |
8.012.07c yat sūryo na rodasī avardhayat ||
8.012.08a yadi pravṛddha satpate sahasram mahiṣām̐ aghaḥ |
8.012.08c ād it ta indriyam mahi pra vāvṛdhe ||
8.012.09a indraḥ sūryasya raśmibhir ny arśasānam oṣati |
8.012.09c agnir vaneva sāsahiḥ pra vāvṛdhe ||
8.012.10a iyaṁ ta ṛtviyāvatī dhītir eti navīyasī |
8.012.10c saparyantī purupriyā mimīta it ||
8.012.11a garbho yajñasya devayuḥ kratum punīta ānuṣak |
8.012.11c stomair indrasya vāvṛdhe mimīta it ||
8.012.12a sanir mitrasya papratha indraḥ somasya pītaye |
8.012.12c prācī vāśīva sunvate mimīta it ||
8.012.13a yaṁ viprā ukthavāhaso 'bhipramandur āyavaḥ |
8.012.13c ghṛtaṁ na pipya āsany ṛtasya yat ||
8.012.14a uta svarāje aditiḥ stomam indrāya jījanat |
8.012.14c purupraśastam ūtaya ṛtasya yat ||
8.012.15a abhi vahnaya ūtaye 'nūṣata praśastaye |
8.012.15c na deva vivratā harī ṛtasya yat ||
8.012.16a yat somam indra viṣṇavi yad vā gha trita āptye |
8.012.16c yad vā marutsu mandase sam indubhiḥ ||
8.012.17a yad vā śakra parāvati samudre adhi mandase |
8.012.17c asmākam it sute raṇā sam indubhiḥ ||
8.012.18a yad vāsi sunvato vṛdho yajamānasya satpate |
8.012.18c ukthe vā yasya raṇyasi sam indubhiḥ ||
8.012.19a devaṁ-devaṁ vo 'vasa indram-indraṁ gṛṇīṣaṇi |
8.012.19c adhā yajñāya turvaṇe vy ānaśuḥ ||
8.012.20a yajñebhir yajñavāhasaṁ somebhiḥ somapātamam |
8.012.20c hotrābhir indraṁ vāvṛdhur vy ānaśuḥ ||
8.012.21a mahīr asya praṇītayaḥ pūrvīr uta praśastayaḥ |
8.012.21c viśvā vasūni dāśuṣe vy ānaśuḥ ||
8.012.22a indraṁ vṛtrāya hantave devāso dadhire puraḥ |
8.012.22c indraṁ vāṇīr anūṣatā sam ojase ||
8.012.23a mahāntam mahinā vayaṁ stomebhir havanaśrutam |
8.012.23c arkair abhi pra ṇonumaḥ sam ojase ||
8.012.24a na yaṁ vivikto rodasī nāntarikṣāṇi vajriṇam |
8.012.24c amād id asya titviṣe sam ojasaḥ ||
8.012.25a yad indra pṛtanājye devās tvā dadhire puraḥ |
8.012.25c ād it te haryatā harī vavakṣatuḥ ||
8.012.26a yadā vṛtraṁ nadīvṛtaṁ śavasā vajrinn avadhīḥ |
8.012.26c ād it te haryatā harī vavakṣatuḥ ||
8.012.27a yadā te viṣṇur ojasā trīṇi padā vicakrame |
8.012.27c ād it te haryatā harī vavakṣatuḥ ||
8.012.28a yadā te haryatā harī vāvṛdhāte dive-dive |
8.012.28c ād it te viśvā bhuvanāni yemire ||
8.012.29a yadā te mārutīr viśas tubhyam indra niyemire |
8.012.29c ād it te viśvā bhuvanāni yemire ||
8.012.30a yadā sūryam amuṁ divi śukraṁ jyotir adhārayaḥ |
8.012.30c ād it te viśvā bhuvanāni yemire ||
8.012.31a imāṁ ta indra suṣṭutiṁ vipra iyarti dhītibhiḥ |
8.012.31c jāmim padeva pipratīm prādhvare ||
8.012.32a yad asya dhāmani priye samīcīnāso asvaran |
8.012.32c nābhā yajñasya dohanā prādhvare ||
8.012.33a suvīryaṁ svaśvyaṁ sugavyam indra daddhi naḥ |
8.012.33c hoteva pūrvacittaye prādhvare ||

8.013.01a indraḥ suteṣu someṣu kratum punīta ukthyam |
8.013.01c vide vṛdhasya dakṣaso mahān hi ṣaḥ ||
8.013.02a sa prathame vyomani devānāṁ sadane vṛdhaḥ |
8.013.02c supāraḥ suśravastamaḥ sam apsujit ||
8.013.03a tam ahve vājasātaya indram bharāya śuṣmiṇam |
8.013.03c bhavā naḥ sumne antamaḥ sakhā vṛdhe ||
8.013.04a iyaṁ ta indra girvaṇo rātiḥ kṣarati sunvataḥ |
8.013.04c mandāno asya barhiṣo vi rājasi ||
8.013.05a nūnaṁ tad indra daddhi no yat tvā sunvanta īmahe |
8.013.05c rayiṁ naś citram ā bharā svarvidam ||
8.013.06a stotā yat te vicarṣaṇir atipraśardhayad giraḥ |
8.013.06c vayā ivānu rohate juṣanta yat ||
8.013.07a pratnavaj janayā giraḥ śṛṇudhī jaritur havam |
8.013.07c made-made vavakṣithā sukṛtvane ||
8.013.08a krīḻanty asya sūnṛtā āpo na pravatā yatīḥ |
8.013.08c ayā dhiyā ya ucyate patir divaḥ ||
8.013.09a uto patir ya ucyate kṛṣṭīnām eka id vaśī |
8.013.09c namovṛdhair avasyubhiḥ sute raṇa ||
8.013.10a stuhi śrutaṁ vipaścitaṁ harī yasya prasakṣiṇā |
8.013.10c gantārā dāśuṣo gṛhaṁ namasvinaḥ ||
8.013.11a tūtujāno mahemate 'śvebhiḥ pruṣitapsubhiḥ |
8.013.11c ā yāhi yajñam āśubhiḥ śam id dhi te ||
8.013.12a indra śaviṣṭha satpate rayiṁ gṛṇatsu dhāraya |
8.013.12c śravaḥ sūribhyo amṛtaṁ vasutvanam ||
8.013.13a have tvā sūra udite have madhyaṁdine divaḥ |
8.013.13c juṣāṇa indra saptibhir na ā gahi ||
8.013.14a ā tū gahi pra tu drava matsvā sutasya gomataḥ |
8.013.14c tantuṁ tanuṣva pūrvyaṁ yathā vide ||
8.013.15a yac chakrāsi parāvati yad arvāvati vṛtrahan |
8.013.15c yad vā samudre andhaso 'vited asi ||
8.013.16a indraṁ vardhantu no gira indraṁ sutāsa indavaḥ |
8.013.16c indre haviṣmatīr viśo arāṇiṣuḥ ||
8.013.17a tam id viprā avasyavaḥ pravatvatībhir ūtibhiḥ |
8.013.17c indraṁ kṣoṇīr avardhayan vayā iva ||
8.013.18a trikadrukeṣu cetanaṁ devāso yajñam atnata |
8.013.18c tam id vardhantu no giraḥ sadāvṛdham ||
8.013.19a stotā yat te anuvrata ukthāny ṛtuthā dadhe |
8.013.19c śuciḥ pāvaka ucyate so adbhutaḥ ||
8.013.20a tad id rudrasya cetati yahvam pratneṣu dhāmasu |
8.013.20c mano yatrā vi tad dadhur vicetasaḥ ||
8.013.21a yadi me sakhyam āvara imasya pāhy andhasaḥ |
8.013.21c yena viśvā ati dviṣo atārima ||
8.013.22a kadā ta indra girvaṇaḥ stotā bhavāti śaṁtamaḥ |
8.013.22c kadā no gavye aśvye vasau dadhaḥ ||
8.013.23a uta te suṣṭutā harī vṛṣaṇā vahato ratham |
8.013.23c ajuryasya madintamaṁ yam īmahe ||
8.013.24a tam īmahe puruṣṭutaṁ yahvam pratnābhir ūtibhiḥ |
8.013.24c ni barhiṣi priye sadad adha dvitā ||
8.013.25a vardhasvā su puruṣṭuta ṛṣiṣṭutābhir ūtibhiḥ |
8.013.25c dhukṣasva pipyuṣīm iṣam avā ca naḥ ||
8.013.26a indra tvam avited asītthā stuvato adrivaḥ |
8.013.26c ṛtād iyarmi te dhiyam manoyujam ||
8.013.27a iha tyā sadhamādyā yujānaḥ somapītaye |
8.013.27c harī indra pratadvasū abhi svara ||
8.013.28a abhi svarantu ye tava rudrāsaḥ sakṣata śriyam |
8.013.28c uto marutvatīr viśo abhi prayaḥ ||
8.013.29a imā asya pratūrtayaḥ padaṁ juṣanta yad divi |
8.013.29c nābhā yajñasya saṁ dadhur yathā vide ||
8.013.30a ayaṁ dīrghāya cakṣase prāci prayaty adhvare |
8.013.30c mimīte yajñam ānuṣag vicakṣya ||
8.013.31a vṛṣāyam indra te ratha uto te vṛṣaṇā harī |
8.013.31c vṛṣā tvaṁ śatakrato vṛṣā havaḥ ||
8.013.32a vṛṣā grāvā vṛṣā mado vṛṣā somo ayaṁ sutaḥ |
8.013.32c vṛṣā yajño yam invasi vṛṣā havaḥ ||
8.013.33a vṛṣā tvā vṛṣaṇaṁ huve vajriñ citrābhir ūtibhiḥ |
8.013.33c vāvantha hi pratiṣṭutiṁ vṛṣā havaḥ ||

8.014.01a yad indrāhaṁ yathā tvam īśīya vasva eka it |
8.014.01c stotā me goṣakhā syāt ||
8.014.02a śikṣeyam asmai ditseyaṁ śacīpate manīṣiṇe |
8.014.02c yad ahaṁ gopatiḥ syām ||
8.014.03a dhenuṣ ṭa indra sūnṛtā yajamānāya sunvate |
8.014.03c gām aśvam pipyuṣī duhe ||
8.014.04a na te vartāsti rādhasa indra devo na martyaḥ |
8.014.04c yad ditsasi stuto magham ||
8.014.05a yajña indram avardhayad yad bhūmiṁ vy avartayat |
8.014.05c cakrāṇa opaśaṁ divi ||
8.014.06a vāvṛdhānasya te vayaṁ viśvā dhanāni jigyuṣaḥ |
8.014.06c ūtim indrā vṛṇīmahe ||
8.014.07a vy antarikṣam atiran made somasya rocanā |
8.014.07c indro yad abhinad valam ||
8.014.08a ud gā ājad aṅgirobhya āviṣ kṛṇvan guhā satīḥ |
8.014.08c arvāñcaṁ nunude valam ||
8.014.09a indreṇa rocanā divo dṛḻhāni dṛṁhitāni ca |
8.014.09c sthirāṇi na parāṇude ||
8.014.10a apām ūrmir madann iva stoma indrājirāyate |
8.014.10c vi te madā arājiṣuḥ ||
8.014.11a tvaṁ hi stomavardhana indrāsy ukthavardhanaḥ |
8.014.11c stotṝṇām uta bhadrakṛt ||
8.014.12a indram it keśinā harī somapeyāya vakṣataḥ |
8.014.12c upa yajñaṁ surādhasam ||
8.014.13a apām phenena namuceḥ śira indrod avartayaḥ |
8.014.13c viśvā yad ajayaḥ spṛdhaḥ ||
8.014.14a māyābhir utsisṛpsata indra dyām ārurukṣataḥ |
8.014.14c ava dasyūm̐r adhūnuthāḥ ||
8.014.15a asunvām indra saṁsadaṁ viṣūcīṁ vy anāśayaḥ |
8.014.15c somapā uttaro bhavan ||

8.015.01a tam v abhi pra gāyata puruhūtam puruṣṭutam |
8.015.01c indraṁ gīrbhis taviṣam ā vivāsata ||
8.015.02a yasya dvibarhaso bṛhat saho dādhāra rodasī |
8.015.02c girīm̐r ajrām̐ apaḥ svar vṛṣatvanā ||
8.015.03a sa rājasi puruṣṭutam̐ eko vṛtrāṇi jighnase |
8.015.03c indra jaitrā śravasyā ca yantave ||
8.015.04a taṁ te madaṁ gṛṇīmasi vṛṣaṇam pṛtsu sāsahim |
8.015.04c u lokakṛtnum adrivo hariśriyam ||
8.015.05a yena jyotīṁṣy āyave manave ca viveditha |
8.015.05c mandāno asya barhiṣo vi rājasi ||
8.015.06a tad adyā cit ta ukthino 'nu ṣṭuvanti pūrvathā |
8.015.06c vṛṣapatnīr apo jayā dive-dive ||
8.015.07a tava tyad indriyam bṛhat tava śuṣmam uta kratum |
8.015.07c vajraṁ śiśāti dhiṣaṇā vareṇyam ||
8.015.08a tava dyaur indra pauṁsyam pṛthivī vardhati śravaḥ |
8.015.08c tvām āpaḥ parvatāsaś ca hinvire ||
8.015.09a tvāṁ viṣṇur bṛhan kṣayo mitro gṛṇāti varuṇaḥ |
8.015.09c tvāṁ śardho madaty anu mārutam ||
8.015.10a tvaṁ vṛṣā janānām maṁhiṣṭha indra jajñiṣe |
8.015.10c satrā viśvā svapatyāni dadhiṣe ||
8.015.11a satrā tvam puruṣṭutam̐ eko vṛtrāṇi tośase |
8.015.11c nānya indrāt karaṇam bhūya invati ||
8.015.12a yad indra manmaśas tvā nānā havanta ūtaye |
8.015.12c asmākebhir nṛbhir atrā svar jaya ||
8.015.13a araṁ kṣayāya no mahe viśvā rūpāṇy āviśan |
8.015.13c indraṁ jaitrāya harṣayā śacīpatim ||

8.016.01a pra samrājaṁ carṣaṇīnām indraṁ stotā navyaṁ gīrbhiḥ |
8.016.01c naraṁ nṛṣāham maṁhiṣṭham ||
8.016.02a yasminn ukthāni raṇyanti viśvāni ca śravasyā |
8.016.02c apām avo na samudre ||
8.016.03a taṁ suṣṭutyā vivāse jyeṣṭharājam bhare kṛtnum |
8.016.03c maho vājinaṁ sanibhyaḥ ||
8.016.04a yasyānūnā gabhīrā madā uravas tarutrāḥ |
8.016.04c harṣumantaḥ śūrasātau ||
8.016.05a tam id dhaneṣu hiteṣv adhivākāya havante |
8.016.05c yeṣām indras te jayanti ||
8.016.06a tam ic cyautnair āryanti taṁ kṛtebhiś carṣaṇayaḥ |
8.016.06c eṣa indro varivaskṛt ||
8.016.07a indro brahmendra ṛṣir indraḥ purū puruhūtaḥ |
8.016.07c mahān mahībhiḥ śacībhiḥ ||
8.016.08a sa stomyaḥ sa havyaḥ satyaḥ satvā tuvikūrmiḥ |
8.016.08c ekaś cit sann abhibhūtiḥ ||
8.016.09a tam arkebhis taṁ sāmabhis taṁ gāyatraiś carṣaṇayaḥ |
8.016.09c indraṁ vardhanti kṣitayaḥ ||
8.016.10a praṇetāraṁ vasyo acchā kartāraṁ jyotiḥ samatsu |
8.016.10c sāsahvāṁsaṁ yudhāmitrān ||
8.016.11a sa naḥ papriḥ pārayāti svasti nāvā puruhūtaḥ |
8.016.11c indro viśvā ati dviṣaḥ ||
8.016.12a sa tvaṁ na indra vājebhir daśasyā ca gātuyā ca |
8.016.12c acchā ca naḥ sumnaṁ neṣi ||

8.017.01a ā yāhi suṣumā hi ta indra somam pibā imam |
8.017.01c edam barhiḥ sado mama ||
8.017.02a ā tvā brahmayujā harī vahatām indra keśinā |
8.017.02c upa brahmāṇi naḥ śṛṇu ||
8.017.03a brahmāṇas tvā vayaṁ yujā somapām indra sominaḥ |
8.017.03c sutāvanto havāmahe ||
8.017.04a ā no yāhi sutāvato 'smākaṁ suṣṭutīr upa |
8.017.04c pibā su śiprinn andhasaḥ ||
8.017.05a ā te siñcāmi kukṣyor anu gātrā vi dhāvatu |
8.017.05c gṛbhāya jihvayā madhu ||
8.017.06a svāduṣ ṭe astu saṁsude madhumān tanve tava |
8.017.06c somaḥ śam astu te hṛde ||
8.017.07a ayam u tvā vicarṣaṇe janīr ivābhi saṁvṛtaḥ |
8.017.07c pra soma indra sarpatu ||
8.017.08a tuvigrīvo vapodaraḥ subāhur andhaso made |
8.017.08c indro vṛtrāṇi jighnate ||
8.017.09a indra prehi puras tvaṁ viśvasyeśāna ojasā |
8.017.09c vṛtrāṇi vṛtrahañ jahi ||
8.017.10a dīrghas te astv aṅkuśo yenā vasu prayacchasi |
8.017.10c yajamānāya sunvate ||
8.017.11a ayaṁ ta indra somo nipūto adhi barhiṣi |
8.017.11c ehīm asya dravā piba ||
8.017.12a śācigo śācipūjanāyaṁ raṇāya te sutaḥ |
8.017.12c ākhaṇḍala pra hūyase ||
8.017.13a yas te śṛṅgavṛṣo napāt praṇapāt kuṇḍapāyyaḥ |
8.017.13c ny asmin dadhra ā manaḥ ||
8.017.14a vāstoṣ pate dhruvā sthūṇāṁsatraṁ somyānām |
8.017.14c drapso bhettā purāṁ śaśvatīnām indro munīnāṁ sakhā ||
8.017.15a pṛdākusānur yajato gaveṣaṇa ekaḥ sann abhi bhūyasaḥ |
8.017.15c bhūrṇim aśvaṁ nayat tujā puro gṛbhendraṁ somasya pītaye ||

8.018.01a idaṁ ha nūnam eṣāṁ sumnam bhikṣeta martyaḥ |
8.018.01c ādityānām apūrvyaṁ savīmani ||
8.018.02a anarvāṇo hy eṣām panthā ādityānām |
8.018.02c adabdhāḥ santi pāyavaḥ sugevṛdhaḥ ||
8.018.03a tat su naḥ savitā bhago varuṇo mitro aryamā |
8.018.03c śarma yacchantu sapratho yad īmahe ||
8.018.04a devebhir devy adite 'riṣṭabharmann ā gahi |
8.018.04c smat sūribhiḥ purupriye suśarmabhiḥ ||
8.018.05a te hi putrāso aditer vidur dveṣāṁsi yotave |
8.018.05c aṁhoś cid urucakrayo 'nehasaḥ ||
8.018.06a aditir no divā paśum aditir naktam advayāḥ |
8.018.06c aditiḥ pātv aṁhasaḥ sadāvṛdhā ||
8.018.07a uta syā no divā matir aditir ūtyā gamat |
8.018.07c sā śaṁtāti mayas karad apa sridhaḥ ||
8.018.08a uta tyā daivyā bhiṣajā śaṁ naḥ karato aśvinā |
8.018.08c yuyuyātām ito rapo apa sridhaḥ ||
8.018.09a śam agnir agnibhiḥ karac chaṁ nas tapatu sūryaḥ |
8.018.09c śaṁ vāto vātv arapā apa sridhaḥ ||
8.018.10a apāmīvām apa sridham apa sedhata durmatim |
8.018.10c ādityāso yuyotanā no aṁhasaḥ ||
8.018.11a yuyotā śarum asmad ām̐ ādityāsa utāmatim |
8.018.11c ṛdhag dveṣaḥ kṛṇuta viśvavedasaḥ ||
8.018.12a tat su naḥ śarma yacchatādityā yan mumocati |
8.018.12c enasvantaṁ cid enasaḥ sudānavaḥ ||
8.018.13a yo naḥ kaś cid ririkṣati rakṣastvena martyaḥ |
8.018.13c svaiḥ ṣa evai ririṣīṣṭa yur janaḥ ||
8.018.14a sam it tam agham aśnavad duḥśaṁsam martyaṁ ripum |
8.018.14c yo asmatrā durhaṇāvām̐ upa dvayuḥ ||
8.018.15a pākatrā sthana devā hṛtsu jānītha martyam |
8.018.15c upa dvayuṁ cādvayuṁ ca vasavaḥ ||
8.018.16a ā śarma parvatānām otāpāṁ vṛṇīmahe |
8.018.16c dyāvākṣāmāre asmad rapas kṛtam ||
8.018.17a te no bhadreṇa śarmaṇā yuṣmākaṁ nāvā vasavaḥ |
8.018.17c ati viśvāni duritā pipartana ||
8.018.18a tuce