Ṛgveda-Saṁhitā - Maṇḍala 6-10

6.001.01a tvaṁ hy agne prathamo manotāsyā dhiyo abhavo dasma hotā |
6.001.01c tvaṁ sīṁ vṛṣann akṛṇor duṣṭarītu saho viśvasmai sahase sahadhyai ||
6.001.02a adhā hotā ny asīdo yajīyān iḻas pada iṣayann īḍyaḥ san |
6.001.02c taṁ tvā naraḥ prathamaṁ devayanto maho rāye citayanto anu gman ||
6.001.03a vṛteva yantam bahubhir vasavyais tve rayiṁ jāgṛvāṁso anu gman |
6.001.03c ruśantam agniṁ darśatam bṛhantaṁ vapāvantaṁ viśvahā dīdivāṁsam ||
6.001.04a padaṁ devasya namasā vyantaḥ śravasyavaḥ śrava āpann amṛktam |
6.001.04c nāmāni cid dadhire yajñiyāni bhadrāyāṁ te raṇayanta saṁdṛṣṭau ||
6.001.05a tvāṁ vardhanti kṣitayaḥ pṛthivyāṁ tvāṁ rāya ubhayāso janānām |
6.001.05c tvaṁ trātā taraṇe cetyo bhūḥ pitā mātā sadam in mānuṣāṇām ||
6.001.06a saparyeṇyaḥ sa priyo vikṣv agnir hotā mandro ni ṣasādā yajīyān |
6.001.06c taṁ tvā vayaṁ dama ā dīdivāṁsam upa jñubādho namasā sadema ||
6.001.07a taṁ tvā vayaṁ sudhyo navyam agne sumnāyava īmahe devayantaḥ |
6.001.07c tvaṁ viśo anayo dīdyāno divo agne bṛhatā rocanena ||
6.001.08a viśāṁ kaviṁ viśpatiṁ śaśvatīnāṁ nitośanaṁ vṛṣabhaṁ carṣaṇīnām |
6.001.08c pretīṣaṇim iṣayantam pāvakaṁ rājantam agniṁ yajataṁ rayīṇām ||
6.001.09a so agna īje śaśame ca marto yas ta ānaṭ samidhā havyadātim |
6.001.09c ya āhutim pari vedā namobhir viśvet sa vāmā dadhate tvotaḥ ||
6.001.10a asmā u te mahi mahe vidhema namobhir agne samidhota havyaiḥ |
6.001.10c vedī sūno sahaso gīrbhir ukthair ā te bhadrāyāṁ sumatau yatema ||
6.001.11a ā yas tatantha rodasī vi bhāsā śravobhiś ca śravasyas tarutraḥ |
6.001.11c bṛhadbhir vājaiḥ sthavirebhir asme revadbhir agne vitaraṁ vi bhāhi ||
6.001.12a nṛvad vaso sadam id dhehy asme bhūri tokāya tanayāya paśvaḥ |
6.001.12c pūrvīr iṣo bṛhatīr āre-aghā asme bhadrā sauśravasāni santu ||
6.001.13a purūṇy agne purudhā tvāyā vasūni rājan vasutā te aśyām |
6.001.13c purūṇi hi tve puruvāra santy agne vasu vidhate rājani tve ||

6.002.01a tvaṁ hi kṣaitavad yaśo 'gne mitro na patyase |
6.002.01c tvaṁ vicarṣaṇe śravo vaso puṣṭiṁ na puṣyasi ||
6.002.02a tvāṁ hi ṣmā carṣaṇayo yajñebhir gīrbhir īḻate |
6.002.02c tvāṁ vājī yāty avṛko rajastūr viśvacarṣaṇiḥ ||
6.002.03a sajoṣas tvā divo naro yajñasya ketum indhate |
6.002.03c yad dha sya mānuṣo janaḥ sumnāyur juhve adhvare ||
6.002.04a ṛdhad yas te sudānave dhiyā martaḥ śaśamate |
6.002.04c ūtī ṣa bṛhato divo dviṣo aṁho na tarati ||
6.002.05a samidhā yas ta āhutiṁ niśitim martyo naśat |
6.002.05c vayāvantaṁ sa puṣyati kṣayam agne śatāyuṣam ||
6.002.06a tveṣas te dhūma ṛṇvati divi ṣañ chukra ātataḥ |
6.002.06c sūro na hi dyutā tvaṁ kṛpā pāvaka rocase ||
6.002.07a adhā hi vikṣv īḍyo 'si priyo no atithiḥ |
6.002.07c raṇvaḥ purīva jūryaḥ sūnur na trayayāyyaḥ ||
6.002.08a kratvā hi droṇe ajyase 'gne vājī na kṛtvyaḥ |
6.002.08c parijmeva svadhā gayo 'tyo na hvāryaḥ śiśuḥ ||
6.002.09a tvaṁ tyā cid acyutāgne paśur na yavase |
6.002.09c dhāmā ha yat te ajara vanā vṛścanti śikvasaḥ ||
6.002.10a veṣi hy adhvarīyatām agne hotā dame viśām |
6.002.10c samṛdho viśpate kṛṇu juṣasva havyam aṅgiraḥ ||
6.002.11a acchā no mitramaho deva devān agne vocaḥ sumatiṁ rodasyoḥ |
6.002.11c vīhi svastiṁ sukṣitiṁ divo nṝn dviṣo aṁhāṁsi duritā tarema tā tarema tavāvasā tarema ||

6.003.01a agne sa kṣeṣad ṛtapā ṛtejā uru jyotir naśate devayuṣ ṭe |
6.003.01c yaṁ tvam mitreṇa varuṇaḥ sajoṣā deva pāsi tyajasā martam aṁhaḥ ||
6.003.02a īje yajñebhiḥ śaśame śamībhir ṛdhadvārāyāgnaye dadāśa |
6.003.02c evā cana taṁ yaśasām ajuṣṭir nāṁho martaṁ naśate na pradṛptiḥ ||
6.003.03a sūro na yasya dṛśatir arepā bhīmā yad eti śucatas ta ā dhīḥ |
6.003.03c heṣasvataḥ śurudho nāyam aktoḥ kutrā cid raṇvo vasatir vanejāḥ ||
6.003.04a tigmaṁ cid ema mahi varpo asya bhasad aśvo na yamasāna āsā |
6.003.04c vijehamānaḥ paraśur na jihvāṁ dravir na drāvayati dāru dhakṣat ||
6.003.05a sa id asteva prati dhād asiṣyañ chiśīta tejo 'yaso na dhārām |
6.003.05c citradhrajatir aratir yo aktor ver na druṣadvā raghupatmajaṁhāḥ ||
6.003.06a sa īṁ rebho na prati vasta usrāḥ śociṣā rārapīti mitramahāḥ |
6.003.06c naktaṁ ya īm aruṣo yo divā nṝn amartyo aruṣo yo divā nṝn ||
6.003.07a divo na yasya vidhato navīnod vṛṣā rukṣa oṣadhīṣu nūnot |
6.003.07c ghṛṇā na yo dhrajasā patmanā yann ā rodasī vasunā daṁ supatnī ||
6.003.08a dhāyobhir vā yo yujyebhir arkair vidyun na davidyot svebhiḥ śuṣmaiḥ |
6.003.08c śardho vā yo marutāṁ tatakṣa ṛbhur na tveṣo rabhasāno adyaut ||

6.004.01a yathā hotar manuṣo devatātā yajñebhiḥ sūno sahaso yajāsi |
6.004.01c evā no adya samanā samānān uśann agna uśato yakṣi devān ||
6.004.02a sa no vibhāvā cakṣaṇir na vastor agnir vandāru vedyaś cano dhāt |
6.004.02c viśvāyur yo amṛto martyeṣūṣarbhud bhūd atithir jātavedāḥ ||
6.004.03a dyāvo na yasya panayanty abhvam bhāsāṁsi vaste sūryo na śukraḥ |
6.004.03c vi ya inoty ajaraḥ pāvako 'śnasya cic chiśnathat pūrvyāṇi ||
6.004.04a vadmā hi sūno asy admasadvā cakre agnir januṣājmānnam |
6.004.04c sa tvaṁ na ūrjasana ūrjaṁ dhā rājeva jer avṛke kṣeṣy antaḥ ||
6.004.05a nitikti yo vāraṇam annam atti vāyur na rāṣṭry aty ety aktūn |
6.004.05c turyāma yas ta ādiśām arātīr atyo na hrutaḥ patataḥ parihrut ||
6.004.06a ā sūryo na bhānumadbhir arkair agne tatantha rodasī vi bhāsā |
6.004.06c citro nayat pari tamāṁsy aktaḥ śociṣā patmann auśijo na dīyan ||
6.004.07a tvāṁ hi mandratamam arkaśokair vavṛmahe mahi naḥ śroṣy agne |
6.004.07c indraṁ na tvā śavasā devatā vāyum pṛṇanti rādhasā nṛtamāḥ ||
6.004.08a nū no agne 'vṛkebhiḥ svasti veṣi rāyaḥ pathibhiḥ parṣy aṁhaḥ |
6.004.08c tā sūribhyo gṛṇate rāsi sumnam madema śatahimāḥ suvīrāḥ ||

6.005.01a huve vaḥ sūnuṁ sahaso yuvānam adroghavācam matibhir yaviṣṭham |
6.005.01c ya invati draviṇāni pracetā viśvavārāṇi puruvāro adhruk ||
6.005.02a tve vasūni purvaṇīka hotar doṣā vastor erire yajñiyāsaḥ |
6.005.02c kṣāmeva viśvā bhuvanāni yasmin saṁ saubhagāni dadhire pāvake ||
6.005.03a tvaṁ vikṣu pradivaḥ sīda āsu kratvā rathīr abhavo vāryāṇām |
6.005.03c ata inoṣi vidhate cikitvo vy ānuṣag jātavedo vasūni ||
6.005.04a yo naḥ sanutyo abhidāsad agne yo antaro mitramaho vanuṣyāt |
6.005.04c tam ajarebhir vṛṣabhis tava svais tapā tapiṣṭha tapasā tapasvān ||
6.005.05a yas te yajñena samidhā ya ukthair arkebhiḥ sūno sahaso dadāśat |
6.005.05c sa martyeṣv amṛta pracetā rāyā dyumnena śravasā vi bhāti ||
6.005.06a sa tat kṛdhīṣitas tūyam agne spṛdho bādhasva sahasā sahasvān |
6.005.06c yac chasyase dyubhir akto vacobhis taj juṣasva jaritur ghoṣi manma ||
6.005.07a aśyāma taṁ kāmam agne tavotī aśyāma rayiṁ rayivaḥ suvīram |
6.005.07c aśyāma vājam abhi vājayanto 'śyāma dyumnam ajarājaraṁ te ||

6.006.01a pra navyasā sahasaḥ sūnum acchā yajñena gātum ava icchamānaḥ |
6.006.01c vṛścadvanaṁ kṛṣṇayāmaṁ ruśantaṁ vītī hotāraṁ divyaṁ jigāti ||
6.006.02a sa śvitānas tanyatū rocanasthā ajarebhir nānadadbhir yaviṣṭhaḥ |
6.006.02c yaḥ pāvakaḥ purutamaḥ purūṇi pṛthūny agnir anuyāti bharvan ||
6.006.03a vi te viṣvag vātajūtāso agne bhāmāsaḥ śuce śucayaś caranti |
6.006.03c tuvimrakṣāso divyā navagvā vanā vananti dhṛṣatā rujantaḥ ||
6.006.04a ye te śukrāsaḥ śucayaḥ śuciṣmaḥ kṣāṁ vapanti viṣitāso aśvāḥ |
6.006.04c adha bhramas ta urviyā vi bhāti yātayamāno adhi sānu pṛśneḥ ||
6.006.05a adha jihvā pāpatīti pra vṛṣṇo goṣuyudho nāśaniḥ sṛjānā |
6.006.05c śūrasyeva prasitiḥ kṣātir agner durvartur bhīmo dayate vanāni ||
6.006.06a ā bhānunā pārthivāni jrayāṁsi mahas todasya dhṛṣatā tatantha |
6.006.06c sa bādhasvāpa bhayā sahobhiḥ spṛdho vanuṣyan vanuṣo ni jūrva ||
6.006.07a sa citra citraṁ citayantam asme citrakṣatra citratamaṁ vayodhām |
6.006.07c candraṁ rayim puruvīram bṛhantaṁ candra candrābhir gṛṇate yuvasva ||

6.007.01a mūrdhānaṁ divo aratim pṛthivyā vaiśvānaram ṛta ā jātam agnim |
6.007.01c kaviṁ samrājam atithiṁ janānām āsann ā pātraṁ janayanta devāḥ ||
6.007.02a nābhiṁ yajñānāṁ sadanaṁ rayīṇām mahām āhāvam abhi saṁ navanta |
6.007.02c vaiśvānaraṁ rathyam adhvarāṇāṁ yajñasya ketuṁ janayanta devāḥ ||
6.007.03a tvad vipro jāyate vājy agne tvad vīrāso abhimātiṣāhaḥ |
6.007.03c vaiśvānara tvam asmāsu dhehi vasūni rājan spṛhayāyyāṇi ||
6.007.04a tvāṁ viśve amṛta jāyamānaṁ śiśuṁ na devā abhi saṁ navante |
6.007.04c tava kratubhir amṛtatvam āyan vaiśvānara yat pitror adīdeḥ ||
6.007.05a vaiśvānara tava tāni vratāni mahāny agne nakir ā dadharṣa |
6.007.05c yaj jāyamānaḥ pitror upasthe 'vindaḥ ketuṁ vayuneṣv ahnām ||
6.007.06a vaiśvānarasya vimitāni cakṣasā sānūni divo amṛtasya ketunā |
6.007.06c tasyed u viśvā bhuvanādhi mūrdhani vayā iva ruruhuḥ sapta visruhaḥ ||
6.007.07a vi yo rajāṁsy amimīta sukratur vaiśvānaro vi divo rocanā kaviḥ |
6.007.07c pari yo viśvā bhuvanāni paprathe 'dabdho gopā amṛtasya rakṣitā ||

6.008.01a pṛkṣasya vṛṣṇo aruṣasya nū sahaḥ pra nu vocaṁ vidathā jātavedasaḥ |
6.008.01c vaiśvānarāya matir navyasī śuciḥ soma iva pavate cārur agnaye ||
6.008.02a sa jāyamānaḥ parame vyomani vratāny agnir vratapā arakṣata |
6.008.02c vy antarikṣam amimīta sukratur vaiśvānaro mahinā nākam aspṛśat ||
6.008.03a vy astabhnād rodasī mitro adbhuto 'ntarvāvad akṛṇoj jyotiṣā tamaḥ |
6.008.03c vi carmaṇīva dhiṣaṇe avartayad vaiśvānaro viśvam adhatta vṛṣṇyam ||
6.008.04a apām upasthe mahiṣā agṛbhṇata viśo rājānam upa tasthur ṛgmiyam |
6.008.04c ā dūto agnim abharad vivasvato vaiśvānaram mātariśvā parāvataḥ ||
6.008.05a yuge-yuge vidathyaṁ gṛṇadbhyo 'gne rayiṁ yaśasaṁ dhehi navyasīm |
6.008.05c pavyeva rājann aghaśaṁsam ajara nīcā ni vṛśca vaninaṁ na tejasā ||
6.008.06a asmākam agne maghavatsu dhārayānāmi kṣatram ajaraṁ suvīryam |
6.008.06c vayaṁ jayema śatinaṁ sahasriṇaṁ vaiśvānara vājam agne tavotibhiḥ ||
6.008.07a adabdhebhis tava gopābhir iṣṭe 'smākam pāhi triṣadhastha sūrīn |
6.008.07c rakṣā ca no daduṣāṁ śardho agne vaiśvānara pra ca tārīḥ stavānaḥ ||

6.009.01a ahaś ca kṛṣṇam ahar arjunaṁ ca vi vartete rajasī vedyābhiḥ |
6.009.01c vaiśvānaro jāyamāno na rājāvātiraj jyotiṣāgnis tamāṁsi ||
6.009.02a nāhaṁ tantuṁ na vi jānāmy otuṁ na yaṁ vayanti samare 'tamānāḥ |
6.009.02c kasya svit putra iha vaktvāni paro vadāty avareṇa pitrā ||
6.009.03a sa it tantuṁ sa vi jānāty otuṁ sa vaktvāny ṛtuthā vadāti |
6.009.03c ya īṁ ciketad amṛtasya gopā avaś caran paro anyena paśyan ||
6.009.04a ayaṁ hotā prathamaḥ paśyatemam idaṁ jyotir amṛtam martyeṣu |
6.009.04c ayaṁ sa jajñe dhruva ā niṣatto 'martyas tanvā vardhamānaḥ ||
6.009.05a dhruvaṁ jyotir nihitaṁ dṛśaye kam mano javiṣṭham patayatsv antaḥ |
6.009.05c viśve devāḥ samanasaḥ saketā ekaṁ kratum abhi vi yanti sādhu ||
6.009.06a vi me karṇā patayato vi cakṣur vīdaṁ jyotir hṛdaya āhitaṁ yat |
6.009.06c vi me manaś carati dūraādhīḥ kiṁ svid vakṣyāmi kim u nū maniṣye ||
6.009.07a viśve devā anamasyan bhiyānās tvām agne tamasi tasthivāṁsam |
6.009.07c vaiśvānaro 'vatūtaye no 'martyo 'vatūtaye naḥ ||

6.010.01a puro vo mandraṁ divyaṁ suvṛktim prayati yajñe agnim adhvare dadhidhvam |
6.010.01c pura ukthebhiḥ sa hi no vibhāvā svadhvarā karati jātavedāḥ ||
6.010.02a tam u dyumaḥ purvaṇīka hotar agne agnibhir manuṣa idhānaḥ |
6.010.02c stomaṁ yam asmai mamateva śūṣaṁ ghṛtaṁ na śuci matayaḥ pavante ||
6.010.03a pīpāya sa śravasā martyeṣu yo agnaye dadāśa vipra ukthaiḥ |
6.010.03c citrābhis tam ūtibhiś citraśocir vrajasya sātā gomato dadhāti ||
6.010.04a ā yaḥ paprau jāyamāna urvī dūredṛśā bhāsā kṛṣṇādhvā |
6.010.04c adha bahu cit tama ūrmyāyās tiraḥ śociṣā dadṛśe pāvakaḥ ||
6.010.05a nū naś citram puruvājābhir ūtī agne rayim maghavadbhyaś ca dhehi |
6.010.05c ye rādhasā śravasā cāty anyān suvīryebhiś cābhi santi janān ||
6.010.06a imaṁ yajñaṁ cano dhā agna uśan yaṁ ta āsāno juhute haviṣmān |
6.010.06c bharadvājeṣu dadhiṣe suvṛktim avīr vājasya gadhyasya sātau ||
6.010.07a vi dveṣāṁsīnuhi vardhayeḻām madema śatahimāḥ suvīrāḥ ||

6.011.01a yajasva hotar iṣito yajīyān agne bādho marutāṁ na prayukti |
6.011.01c ā no mitrāvaruṇā nāsatyā dyāvā hotrāya pṛthivī vavṛtyāḥ ||
6.011.02a tvaṁ hotā mandratamo no adhrug antar devo vidathā martyeṣu |
6.011.02c pāvakayā juhvā vahnir āsāgne yajasva tanvaṁ tava svām ||
6.011.03a dhanyā cid dhi tve dhiṣaṇā vaṣṭi pra devāñ janma gṛṇate yajadhyai |
6.011.03c vepiṣṭho aṅgirasāṁ yad dha vipro madhu cchando bhanati rebha iṣṭau ||
6.011.04a adidyutat sv apāko vibhāvāgne yajasva rodasī urūcī |
6.011.04c āyuṁ na yaṁ namasā rātahavyā añjanti suprayasam pañca janāḥ ||
6.011.05a vṛñje ha yan namasā barhir agnāv ayāmi srug ghṛtavatī suvṛktiḥ |
6.011.05c amyakṣi sadma sadane pṛthivyā aśrāyi yajñaḥ sūrye na cakṣuḥ ||
6.011.06a daśasyā naḥ purvaṇīka hotar devebhir agne agnibhir idhānaḥ |
6.011.06c rāyaḥ sūno sahaso vāvasānā ati srasema vṛjanaṁ nāṁhaḥ ||

6.012.01a madhye hotā duroṇe barhiṣo rāḻ agnis todasya rodasī yajadhyai |
6.012.01c ayaṁ sa sūnuḥ sahasa ṛtāvā dūrāt sūryo na śociṣā tatāna ||
6.012.02a ā yasmin tve sv apāke yajatra yakṣad rājan sarvatāteva nu dyauḥ |
6.012.02c triṣadhasthas tataruṣo na jaṁho havyā maghāni mānuṣā yajadhyai ||
6.012.03a tejiṣṭhā yasyāratir vanerāṭ todo adhvan na vṛdhasāno adyaut |
6.012.03c adrogho na dravitā cetati tmann amartyo 'vartra oṣadhīṣu ||
6.012.04a sāsmākebhir etarī na śūṣair agniḥ ṣṭave dama ā jātavedāḥ |
6.012.04c drvanno vanvan kratvā nārvosraḥ piteva jārayāyi yajñaiḥ ||
6.012.05a adha smāsya panayanti bhāso vṛthā yat takṣad anuyāti pṛthvīm |
6.012.05c sadyo yaḥ syandro viṣito dhavīyān ṛṇo na tāyur ati dhanvā rāṭ ||
6.012.06a sa tvaṁ no arvan nidāyā viśvebhir agne agnibhir idhānaḥ |
6.012.06c veṣi rāyo vi yāsi ducchunā madema śatahimāḥ suvīrāḥ ||

6.013.01a tvad viśvā subhaga saubhagāny agne vi yanti vanino na vayāḥ |
6.013.01c śruṣṭī rayir vājo vṛtratūrye divo vṛṣṭir īḍyo rītir apām ||
6.013.02a tvam bhago na ā hi ratnam iṣe parijmeva kṣayasi dasmavarcāḥ |
6.013.02c agne mitro na bṛhata ṛtasyāsi kṣattā vāmasya deva bhūreḥ ||
6.013.03a sa satpatiḥ śavasā hanti vṛtram agne vipro vi paṇer bharti vājam |
6.013.03c yaṁ tvam praceta ṛtajāta rāyā sajoṣā naptrāpāṁ hinoṣi ||
6.013.04a yas te sūno sahaso gīrbhir ukthair yajñair marto niśitiṁ vedyānaṭ |
6.013.04c viśvaṁ sa deva prati vāram agne dhatte dhānyam patyate vasavyaiḥ ||
6.013.05a tā nṛbhya ā sauśravasā suvīrāgne sūno sahasaḥ puṣyase dhāḥ |
6.013.05c kṛṇoṣi yac chavasā bhūri paśvo vayo vṛkāyāraye jasuraye ||
6.013.06a vadmā sūno sahaso no vihāyā agne tokaṁ tanayaṁ vāji no dāḥ |
6.013.06c viśvābhir gīrbhir abhi pūrtim aśyām madema śatahimāḥ suvīrāḥ ||

6.014.01a agnā yo martyo duvo dhiyaṁ jujoṣa dhītibhiḥ |
6.014.01c bhasan nu ṣa pra pūrvya iṣaṁ vurītāvase ||
6.014.02a agnir id dhi pracetā agnir vedhastama ṛṣiḥ |
6.014.02c agniṁ hotāram īḻate yajñeṣu manuṣo viśaḥ ||
6.014.03a nānā hy agne 'vase spardhante rāyo aryaḥ |
6.014.03c tūrvanto dasyum āyavo vrataiḥ sīkṣanto avratam ||
6.014.04a agnir apsām ṛtīṣahaṁ vīraṁ dadāti satpatim |
6.014.04c yasya trasanti śavasaḥ saṁcakṣi śatravo bhiyā ||
6.014.05a agnir hi vidmanā nido devo martam uruṣyati |
6.014.05c sahāvā yasyāvṛto rayir vājeṣv avṛtaḥ ||
6.014.06a acchā no mitramaho deva devān agne vocaḥ sumatiṁ rodasyoḥ |
6.014.06c vīhi svastiṁ sukṣitiṁ divo nṝn dviṣo aṁhāṁsi duritā tarema tā tarema tavāvasā tarema ||

6.015.01a imam ū ṣu vo atithim uṣarbudhaṁ viśvāsāṁ viśām patim ṛñjase girā |
6.015.01c vetīd divo januṣā kac cid ā śucir jyok cid atti garbho yad acyutam ||
6.015.02a mitraṁ na yaṁ sudhitam bhṛgavo dadhur vanaspatāv īḍyam ūrdhvaśociṣam |
6.015.02c sa tvaṁ suprīto vītahavye adbhuta praśastibhir mahayase dive-dive ||
6.015.03a sa tvaṁ dakṣasyāvṛko vṛdho bhūr aryaḥ parasyāntarasya taruṣaḥ |
6.015.03c rāyaḥ sūno sahaso martyeṣv ā chardir yaccha vītahavyāya sapratho bharadvājāya saprathaḥ ||
6.015.04a dyutānaṁ vo atithiṁ svarṇaram agniṁ hotāram manuṣaḥ svadhvaram |
6.015.04c vipraṁ na dyukṣavacasaṁ suvṛktibhir havyavāham aratiṁ devam ṛñjase ||
6.015.05a pāvakayā yaś citayantyā kṛpā kṣāman ruruca uṣaso na bhānunā |
6.015.05c tūrvan na yāmann etaśasya nū raṇa ā yo ghṛṇe na tatṛṣāṇo ajaraḥ ||
6.015.06a agnim-agniṁ vaḥ samidhā duvasyata priyam-priyaṁ vo atithiṁ gṛṇīṣaṇi |
6.015.06c upa vo gīrbhir amṛtaṁ vivāsata devo deveṣu vanate hi vāryaṁ devo deveṣu vanate hi no duvaḥ ||
6.015.07a samiddham agniṁ samidhā girā gṛṇe śucim pāvakam puro adhvare dhruvam |
6.015.07c vipraṁ hotāram puruvāram adruhaṁ kaviṁ sumnair īmahe jātavedasam ||
6.015.08a tvāṁ dūtam agne amṛtaṁ yuge-yuge havyavāhaṁ dadhire pāyum īḍyam |
6.015.08c devāsaś ca martāsaś ca jāgṛviṁ vibhuṁ viśpatiṁ namasā ni ṣedire ||
6.015.09a vibhūṣann agna ubhayām̐ anu vratā dūto devānāṁ rajasī sam īyase |
6.015.09c yat te dhītiṁ sumatim āvṛṇīmahe 'dha smā nas trivarūthaḥ śivo bhava ||
6.015.10a taṁ supratīkaṁ sudṛśaṁ svañcam avidvāṁso viduṣṭaraṁ sapema |
6.015.10c sa yakṣad viśvā vayunāni vidvān pra havyam agnir amṛteṣu vocat ||
6.015.11a tam agne pāsy uta tam piparṣi yas ta ānaṭ kavaye śūra dhītim |
6.015.11c yajñasya vā niśitiṁ voditiṁ vā tam it pṛṇakṣi śavasota rāyā ||
6.015.12a tvam agne vanuṣyato ni pāhi tvam u naḥ sahasāvann avadyāt |
6.015.12c saṁ tvā dhvasmanvad abhy etu pāthaḥ saṁ rayiḥ spṛhayāyyaḥ sahasrī ||
6.015.13a agnir hotā gṛhapatiḥ sa rājā viśvā veda janimā jātavedāḥ |
6.015.13c devānām uta yo martyānāṁ yajiṣṭhaḥ sa pra yajatām ṛtāvā ||
6.015.14a agne yad adya viśo adhvarasya hotaḥ pāvakaśoce veṣ ṭvaṁ hi yajvā |
6.015.14c ṛtā yajāsi mahinā vi yad bhūr havyā vaha yaviṣṭha yā te adya ||
6.015.15a abhi prayāṁsi sudhitāni hi khyo ni tvā dadhīta rodasī yajadhyai |
6.015.15c avā no maghavan vājasātāv agne viśvāni duritā tarema tā tarema tavāvasā tarema ||
6.015.16a agne viśvebhiḥ svanīka devair ūrṇāvantam prathamaḥ sīda yonim |
6.015.16c kulāyinaṁ ghṛtavantaṁ savitre yajñaṁ naya yajamānāya sādhu ||
6.015.17a imam u tyam atharvavad agnim manthanti vedhasaḥ |
6.015.17c yam aṅkūyantam ānayann amūraṁ śyāvyābhyaḥ ||
6.015.18a janiṣvā devavītaye sarvatātā svastaye |
6.015.18c ā devān vakṣy amṛtām̐ ṛtāvṛdho yajñaṁ deveṣu pispṛśaḥ ||
6.015.19a vayam u tvā gṛhapate janānām agne akarma samidhā bṛhantam |
6.015.19c asthūri no gārhapatyāni santu tigmena nas tejasā saṁ śiśādhi ||

6.016.01a tvam agne yajñānāṁ hotā viśveṣāṁ hitaḥ |
6.016.01c devebhir mānuṣe jane ||
6.016.02a sa no mandrābhir adhvare jihvābhir yajā mahaḥ |
6.016.02c ā devān vakṣi yakṣi ca ||
6.016.03a vetthā hi vedho adhvanaḥ pathaś ca devāñjasā |
6.016.03c agne yajñeṣu sukrato ||
6.016.04a tvām īḻe adha dvitā bharato vājibhiḥ śunam |
6.016.04c īje yajñeṣu yajñiyam ||
6.016.05a tvam imā vāryā puru divodāsāya sunvate |
6.016.05c bharadvājāya dāśuṣe ||
6.016.06a tvaṁ dūto amartya ā vahā daivyaṁ janam |
6.016.06c śṛṇvan viprasya suṣṭutim ||
6.016.07a tvām agne svādhyo martāso devavītaye |
6.016.07c yajñeṣu devam īḻate ||
6.016.08a tava pra yakṣi saṁdṛśam uta kratuṁ sudānavaḥ |
6.016.08c viśve juṣanta kāminaḥ ||
6.016.09a tvaṁ hotā manurhito vahnir āsā viduṣṭaraḥ |
6.016.09c agne yakṣi divo viśaḥ ||
6.016.10a agna ā yāhi vītaye gṛṇāno havyadātaye |
6.016.10c ni hotā satsi barhiṣi ||
6.016.11a taṁ tvā samidbhir aṅgiro ghṛtena vardhayāmasi |
6.016.11c bṛhac chocā yaviṣṭhya ||
6.016.12a sa naḥ pṛthu śravāyyam acchā deva vivāsasi |
6.016.12c bṛhad agne suvīryam ||
6.016.13a tvām agne puṣkarād adhy atharvā nir amanthata |
6.016.13c mūrdhno viśvasya vāghataḥ ||
6.016.14a tam u tvā dadhyaṅṅ ṛṣiḥ putra īdhe atharvaṇaḥ |
6.016.14c vṛtrahaṇam puraṁdaram ||
6.016.15a tam u tvā pāthyo vṛṣā sam īdhe dasyuhantamam |
6.016.15c dhanaṁjayaṁ raṇe-raṇe ||
6.016.16a ehy ū ṣu bravāṇi te 'gna itthetarā giraḥ |
6.016.16c ebhir vardhāsa indubhiḥ ||
6.016.17a yatra kva ca te mano dakṣaṁ dadhasa uttaram |
6.016.17c tatrā sadaḥ kṛṇavase ||
6.016.18a nahi te pūrtam akṣipad bhuvan nemānāṁ vaso |
6.016.18c athā duvo vanavase ||
6.016.19a āgnir agāmi bhārato vṛtrahā purucetanaḥ |
6.016.19c divodāsasya satpatiḥ ||
6.016.20a sa hi viśvāti pārthivā rayiṁ dāśan mahitvanā |
6.016.20c vanvann avāto astṛtaḥ ||
6.016.21a sa pratnavan navīyasāgne dyumnena saṁyatā |
6.016.21c bṛhat tatantha bhānunā ||
6.016.22a pra vaḥ sakhāyo agnaye stomaṁ yajñaṁ ca dhṛṣṇuyā |
6.016.22c arca gāya ca vedhase ||
6.016.23a sa hi yo mānuṣā yugā sīdad dhotā kavikratuḥ |
6.016.23c dūtaś ca havyavāhanaḥ ||
6.016.24a tā rājānā śucivratādityān mārutaṁ gaṇam |
6.016.24c vaso yakṣīha rodasī ||
6.016.25a vasvī te agne saṁdṛṣṭir iṣayate martyāya |
6.016.25c ūrjo napād amṛtasya ||
6.016.26a kratvā dā astu śreṣṭho 'dya tvā vanvan surekṇāḥ |
6.016.26c marta ānāśa suvṛktim ||
6.016.27a te te agne tvotā iṣayanto viśvam āyuḥ |
6.016.27c taranto aryo arātīr vanvanto aryo arātīḥ ||
6.016.28a agnis tigmena śociṣā yāsad viśvaṁ ny atriṇam |
6.016.28c agnir no vanate rayim ||
6.016.29a suvīraṁ rayim ā bhara jātavedo vicarṣaṇe |
6.016.29c jahi rakṣāṁsi sukrato ||
6.016.30a tvaṁ naḥ pāhy aṁhaso jātavedo aghāyataḥ |
6.016.30c rakṣā ṇo brahmaṇas kave ||
6.016.31a yo no agne dureva ā marto vadhāya dāśati |
6.016.31c tasmān naḥ pāhy aṁhasaḥ ||
6.016.32a tvaṁ taṁ deva jihvayā pari bādhasva duṣkṛtam |
6.016.32c marto yo no jighāṁsati ||
6.016.33a bharadvājāya saprathaḥ śarma yaccha sahantya |
6.016.33c agne vareṇyaṁ vasu ||
6.016.34a agnir vṛtrāṇi jaṅghanad draviṇasyur vipanyayā |
6.016.34c samiddhaḥ śukra āhutaḥ ||
6.016.35a garbhe mātuḥ pituṣ pitā vididyutāno akṣare |
6.016.35c sīdann ṛtasya yonim ā ||
6.016.36a brahma prajāvad ā bhara jātavedo vicarṣaṇe |
6.016.36c agne yad dīdayad divi ||
6.016.37a upa tvā raṇvasaṁdṛśam prayasvantaḥ sahaskṛta |
6.016.37c agne sasṛjmahe giraḥ ||
6.016.38a upa cchāyām iva ghṛṇer aganma śarma te vayam |
6.016.38c agne hiraṇyasaṁdṛśaḥ ||
6.016.39a ya ugra iva śaryahā tigmaśṛṅgo na vaṁsagaḥ |
6.016.39c agne puro rurojitha ||
6.016.40a ā yaṁ haste na khādinaṁ śiśuṁ jātaṁ na bibhrati |
6.016.40c viśām agniṁ svadhvaram ||
6.016.41a pra devaṁ devavītaye bharatā vasuvittamam |
6.016.41c ā sve yonau ni ṣīdatu ||
6.016.42a ā jātaṁ jātavedasi priyaṁ śiśītātithim |
6.016.42c syona ā gṛhapatim ||
6.016.43a agne yukṣvā hi ye tavāśvāso deva sādhavaḥ |
6.016.43c araṁ vahanti manyave ||
6.016.44a acchā no yāhy ā vahābhi prayāṁsi vītaye |
6.016.44c ā devān somapītaye ||
6.016.45a ud agne bhārata dyumad ajasreṇa davidyutat |
6.016.45c śocā vi bhāhy ajara ||
6.016.46a vītī yo devam marto duvasyed agnim īḻītādhvare haviṣmān |
6.016.46c hotāraṁ satyayajaṁ rodasyor uttānahasto namasā vivāset ||
6.016.47a ā te agna ṛcā havir hṛdā taṣṭam bharāmasi |
6.016.47c te te bhavantūkṣaṇa ṛṣabhāso vaśā uta ||
6.016.48a agniṁ devāso agriyam indhate vṛtrahantamam |
6.016.48c yenā vasūny ābhṛtā tṛḻhā rakṣāṁsi vājinā ||

6.017.01a pibā somam abhi yam ugra tarda ūrvaṁ gavyam mahi gṛṇāna indra |
6.017.01c vi yo dhṛṣṇo vadhiṣo vajrahasta viśvā vṛtram amitriyā śavobhiḥ ||
6.017.02a sa īm pāhi ya ṛjīṣī tarutro yaḥ śipravān vṛṣabho yo matīnām |
6.017.02c yo gotrabhid vajrabhṛd yo hariṣṭhāḥ sa indra citrām̐ abhi tṛndhi vājān ||
6.017.03a evā pāhi pratnathā mandatu tvā śrudhi brahma vāvṛdhasvota gīrbhiḥ |
6.017.03c āviḥ sūryaṁ kṛṇuhi pīpihīṣo jahi śatrūm̐r abhi gā indra tṛndhi ||
6.017.04a te tvā madā bṛhad indra svadhāva ime pītā ukṣayanta dyumantam |
6.017.04c mahām anūnaṁ tavasaṁ vibhūtim matsarāso jarhṛṣanta prasāham ||
6.017.05a yebhiḥ sūryam uṣasam mandasāno 'vāsayo 'pa dṛḻhāni dardrat |
6.017.05c mahām adrim pari gā indra santaṁ nutthā acyutaṁ sadasas pari svāt ||
6.017.06a tava kratvā tava tad daṁsanābhir āmāsu pakvaṁ śacyā ni dīdhaḥ |
6.017.06c aurṇor dura usriyābhyo vi dṛḻhod ūrvād gā asṛjo aṅgirasvān ||
6.017.07a paprātha kṣām mahi daṁso vy urvīm upa dyām ṛṣvo bṛhad indra stabhāyaḥ |
6.017.07c adhārayo rodasī devaputre pratne mātarā yahvī ṛtasya ||
6.017.08a adha tvā viśve pura indra devā ekaṁ tavasaṁ dadhire bharāya |
6.017.08c adevo yad abhy auhiṣṭa devān svarṣātā vṛṇata indram atra ||
6.017.09a adha dyauś cit te apa sā nu vajrād dvitānamad bhiyasā svasya manyoḥ |
6.017.09c ahiṁ yad indro abhy ohasānaṁ ni cid viśvāyuḥ śayathe jaghāna ||
6.017.10a adha tvaṣṭā te maha ugra vajraṁ sahasrabhṛṣṭiṁ vavṛtac chatāśrim |
6.017.10c nikāmam aramaṇasaṁ yena navantam ahiṁ sam piṇag ṛjīṣin ||
6.017.11a vardhān yaṁ viśve marutaḥ sajoṣāḥ pacac chatam mahiṣām̐ indra tubhyam |
6.017.11c pūṣā viṣṇus trīṇi sarāṁsi dhāvan vṛtrahaṇam madiram aṁśum asmai ||
6.017.12a ā kṣodo mahi vṛtaṁ nadīnām pariṣṭhitam asṛja ūrmim apām |
6.017.12c tāsām anu pravata indra panthām prārdayo nīcīr apasaḥ samudram ||
6.017.13a evā tā viśvā cakṛvāṁsam indram mahām ugram ajuryaṁ sahodām |
6.017.13c suvīraṁ tvā svāyudhaṁ suvajram ā brahma navyam avase vavṛtyāt ||
6.017.14a sa no vājāya śravasa iṣe ca rāye dhehi dyumata indra viprān |
6.017.14c bharadvāje nṛvata indra sūrīn divi ca smaidhi pārye na indra ||
6.017.15a ayā vājaṁ devahitaṁ sanema madema śatahimāḥ suvīrāḥ ||

6.018.01a tam u ṣṭuhi yo abhibhūtyojā vanvann avātaḥ puruhūta indraḥ |
6.018.01c aṣāḻham ugraṁ sahamānam ābhir gīrbhir vardha vṛṣabhaṁ carṣaṇīnām ||
6.018.02a sa yudhmaḥ satvā khajakṛt samadvā tuvimrakṣo nadanumām̐ ṛjīṣī |
6.018.02c bṛhadreṇuś cyavano mānuṣīṇām ekaḥ kṛṣṭīnām abhavat sahāvā ||
6.018.03a tvaṁ ha nu tyad adamāyo dasyūm̐r ekaḥ kṛṣṭīr avanor āryāya |
6.018.03c asti svin nu vīryaṁ tat ta indra na svid asti tad ṛtuthā vi vocaḥ ||
6.018.04a sad id dhi te tuvijātasya manye sahaḥ sahiṣṭha turatas turasya |
6.018.04c ugram ugrasya tavasas tavīyo 'radhrasya radhraturo babhūva ||
6.018.05a tan naḥ pratnaṁ sakhyam astu yuṣme itthā vadadbhir valam aṅgirobhiḥ |
6.018.05c hann acyutacyud dasmeṣayantam ṛṇoḥ puro vi duro asya viśvāḥ ||
6.018.06a sa hi dhībhir havyo asty ugra īśānakṛn mahati vṛtratūrye |
6.018.06c sa tokasātā tanaye sa vajrī vitantasāyyo abhavat samatsu ||
6.018.07a sa majmanā janima mānuṣāṇām amartyena nāmnāti pra sarsre |
6.018.07c sa dyumnena sa śavasota rāyā sa vīryeṇa nṛtamaḥ samokāḥ ||
6.018.08a sa yo na muhe na mithū jano bhūt sumantunāmā cumuriṁ dhuniṁ ca |
6.018.08c vṛṇak pipruṁ śambaraṁ śuṣṇam indraḥ purāṁ cyautnāya śayathāya nū cit ||
6.018.09a udāvatā tvakṣasā panyasā ca vṛtrahatyāya ratham indra tiṣṭha |
6.018.09c dhiṣva vajraṁ hasta ā dakṣiṇatrābhi pra manda purudatra māyāḥ ||
6.018.10a agnir na śuṣkaṁ vanam indra hetī rakṣo ni dhakṣy aśanir na bhīmā |
6.018.10c gambhīraya ṛṣvayā yo rurojādhvānayad duritā dambhayac ca ||
6.018.11a ā sahasram pathibhir indra rāyā tuvidyumna tuvivājebhir arvāk |
6.018.11c yāhi sūno sahaso yasya nū cid adeva īśe puruhūta yotoḥ ||
6.018.12a pra tuvidyumnasya sthavirasya ghṛṣver divo rarapśe mahimā pṛthivyāḥ |
6.018.12c nāsya śatrur na pratimānam asti na pratiṣṭhiḥ purumāyasya sahyoḥ ||
6.018.13a pra tat te adyā karaṇaṁ kṛtam bhūt kutsaṁ yad āyum atithigvam asmai |
6.018.13c purū sahasrā ni śiśā abhi kṣām ut tūrvayāṇaṁ dhṛṣatā ninetha ||
6.018.14a anu tvāhighne adha deva devā madan viśve kavitamaṁ kavīnām |
6.018.14c karo yatra varivo bādhitāya dive janāya tanve gṛṇānaḥ ||
6.018.15a anu dyāvāpṛthivī tat ta ojo 'martyā jihata indra devāḥ |
6.018.15c kṛṣvā kṛtno akṛtaṁ yat te asty ukthaṁ navīyo janayasva yajñaiḥ ||

6.019.01a mahām̐ indro nṛvad ā carṣaṇiprā uta dvibarhā aminaḥ sahobhiḥ |
6.019.01c asmadryag vāvṛdhe vīryāyoruḥ pṛthuḥ sukṛtaḥ kartṛbhir bhūt ||
6.019.02a indram eva dhiṣaṇā sātaye dhād bṛhantam ṛṣvam ajaraṁ yuvānam |
6.019.02c aṣāḻhena śavasā śūśuvāṁsaṁ sadyaś cid yo vāvṛdhe asāmi ||
6.019.03a pṛthū karasnā bahulā gabhastī asmadryak sam mimīhi śravāṁsi |
6.019.03c yūtheva paśvaḥ paśupā damūnā asmām̐ indrābhy ā vavṛtsvājau ||
6.019.04a taṁ va indraṁ catinam asya śākair iha nūnaṁ vājayanto huvema |
6.019.04c yathā cit pūrve jaritāra āsur anedyā anavadyā ariṣṭāḥ ||
6.019.05a dhṛtavrato dhanadāḥ somavṛddhaḥ sa hi vāmasya vasunaḥ purukṣuḥ |
6.019.05c saṁ jagmire pathyā rāyo asmin samudre na sindhavo yādamānāḥ ||
6.019.06a śaviṣṭhaṁ na ā bhara śūra śava ojiṣṭham ojo abhibhūta ugram |
6.019.06c viśvā dyumnā vṛṣṇyā mānuṣāṇām asmabhyaṁ dā harivo mādayadhyai ||
6.019.07a yas te madaḥ pṛtanāṣāḻ amṛdhra indra taṁ na ā bhara śūśuvāṁsam |
6.019.07c yena tokasya tanayasya sātau maṁsīmahi jigīvāṁsas tvotāḥ ||
6.019.08a ā no bhara vṛṣaṇaṁ śuṣmam indra dhanaspṛtaṁ śūśuvāṁsaṁ sudakṣam |
6.019.08c yena vaṁsāma pṛtanāsu śatrūn tavotibhir uta jāmīm̐r ajāmīn ||
6.019.09a ā te śuṣmo vṛṣabha etu paścād ottarād adharād ā purastāt |
6.019.09c ā viśvato abhi sam etv arvāṅ indra dyumnaṁ svarvad dhehy asme ||
6.019.10a nṛvat ta indra nṛtamābhir ūtī vaṁsīmahi vāmaṁ śromatebhiḥ |
6.019.10c īkṣe hi vasva ubhayasya rājan dhā ratnam mahi sthūram bṛhantam ||
6.019.11a marutvantaṁ vṛṣabhaṁ vāvṛdhānam akavāriṁ divyaṁ śāsam indram |
6.019.11c viśvāsāham avase nūtanāyograṁ sahodām iha taṁ huvema ||
6.019.12a janaṁ vajrin mahi cin manyamānam ebhyo nṛbhyo randhayā yeṣv asmi |
6.019.12c adhā hi tvā pṛthivyāṁ śūrasātau havāmahe tanaye goṣv apsu ||
6.019.13a vayaṁ ta ebhiḥ puruhūta sakhyaiḥ śatroḥ-śatror uttara it syāma |
6.019.13c ghnanto vṛtrāṇy ubhayāni śūra rāyā madema bṛhatā tvotāḥ ||

6.020.01a dyaur na ya indrābhi bhūmāryas tasthau rayiḥ śavasā pṛtsu janān |
6.020.01c taṁ naḥ sahasrabharam urvarāsāṁ daddhi sūno sahaso vṛtraturam ||
6.020.02a divo na tubhyam anv indra satrāsuryaṁ devebhir dhāyi viśvam |
6.020.02c ahiṁ yad vṛtram apo vavrivāṁsaṁ hann ṛjīṣin viṣṇunā sacānaḥ ||
6.020.03a tūrvann ojīyān tavasas tavīyān kṛtabrahmendro vṛddhamahāḥ |
6.020.03c rājābhavan madhunaḥ somyasya viśvāsāṁ yat purāṁ dartnum āvat ||
6.020.04a śatair apadran paṇaya indrātra daśoṇaye kavaye 'rkasātau |
6.020.04c vadhaiḥ śuṣṇasyāśuṣasya māyāḥ pitvo nārirecīt kiṁ cana pra ||
6.020.05a maho druho apa viśvāyu dhāyi vajrasya yat patane pādi śuṣṇaḥ |
6.020.05c uru ṣa sarathaṁ sārathaye kar indraḥ kutsāya sūryasya sātau ||
6.020.06a pra śyeno na madiram aṁśum asmai śiro dāsasya namucer mathāyan |
6.020.06c prāvan namīṁ sāpyaṁ sasantam pṛṇag rāyā sam iṣā saṁ svasti ||
6.020.07a vi pipror ahimāyasya dṛḻhāḥ puro vajriñ chavasā na dardaḥ |
6.020.07c sudāman tad rekṇo apramṛṣyam ṛjiśvane dātraṁ dāśuṣe dāḥ ||
6.020.08a sa vetasuṁ daśamāyaṁ daśoṇiṁ tūtujim indraḥ svabhiṣṭisumnaḥ |
6.020.08c ā tugraṁ śaśvad ibhaṁ dyotanāya mātur na sīm upa sṛjā iyadhyai ||
6.020.09a sa īṁ spṛdho vanate apratīto bibhrad vajraṁ vṛtrahaṇaṁ gabhastau |
6.020.09c tiṣṭhad dharī adhy asteva garte vacoyujā vahata indram ṛṣvam ||
6.020.10a sanema te 'vasā navya indra pra pūravaḥ stavanta enā yajñaiḥ |
6.020.10c sapta yat puraḥ śarma śāradīr dard dhan dāsīḥ purukutsāya śikṣan ||
6.020.11a tvaṁ vṛdha indra pūrvyo bhūr varivasyann uśane kāvyāya |
6.020.11c parā navavāstvam anudeyam mahe pitre dadātha svaṁ napātam ||
6.020.12a tvaṁ dhunir indra dhunimatīr ṛṇor apaḥ sīrā na sravantīḥ |
6.020.12c pra yat samudram ati śūra parṣi pārayā turvaśaṁ yaduṁ svasti ||
6.020.13a tava ha tyad indra viśvam ājau sasto dhunīcumurī yā ha siṣvap |
6.020.13c dīdayad it tubhyaṁ somebhiḥ sunvan dabhītir idhmabhṛtiḥ pakthy arkaiḥ ||

6.021.01a imā u tvā purutamasya kāror havyaṁ vīra havyā havante |
6.021.01c dhiyo ratheṣṭhām ajaraṁ navīyo rayir vibhūtir īyate vacasyā ||
6.021.02a tam u stuṣa indraṁ yo vidāno girvāhasaṁ gīrbhir yajñavṛddham |
6.021.02c yasya divam ati mahnā pṛthivyāḥ purumāyasya ririce mahitvam ||
6.021.03a sa it tamo 'vayunaṁ tatanvat sūryeṇa vayunavac cakāra |
6.021.03c kadā te martā amṛtasya dhāmeyakṣanto na minanti svadhāvaḥ ||
6.021.04a yas tā cakāra sa kuha svid indraḥ kam ā janaṁ carati kāsu vikṣu |
6.021.04c kas te yajño manase śaṁ varāya ko arka indra katamaḥ sa hotā ||
6.021.05a idā hi te veviṣataḥ purājāḥ pratnāsa āsuḥ purukṛt sakhāyaḥ |
6.021.05c ye madhyamāsa uta nūtanāsa utāvamasya puruhūta bodhi ||
6.021.06a tam pṛcchanto 'varāsaḥ parāṇi pratnā ta indra śrutyānu yemuḥ |
6.021.06c arcāmasi vīra brahmavāho yād eva vidma tāt tvā mahāntam ||
6.021.07a abhi tvā pājo rakṣaso vi tasthe mahi jajñānam abhi tat su tiṣṭha |
6.021.07c tava pratnena yujyena sakhyā vajreṇa dhṛṣṇo apa tā nudasva ||
6.021.08a sa tu śrudhīndra nūtanasya brahmaṇyato vīra kārudhāyaḥ |
6.021.08c tvaṁ hy āpiḥ pradivi pitṝṇāṁ śaśvad babhūtha suhava eṣṭau ||
6.021.09a protaye varuṇam mitram indram marutaḥ kṛṣvāvase no adya |
6.021.09c pra pūṣaṇaṁ viṣṇum agnim puraṁdhiṁ savitāram oṣadhīḥ parvatām̐ś ca ||
6.021.10a ima u tvā puruśāka prayajyo jaritāro abhy arcanty arkaiḥ |
6.021.10c śrudhī havam ā huvato huvāno na tvāvām̐ anyo amṛta tvad asti ||
6.021.11a nū ma ā vācam upa yāhi vidvān viśvebhiḥ sūno sahaso yajatraiḥ |
6.021.11c ye agnijihvā ṛtasāpa āsur ye manuṁ cakrur uparaṁ dasāya ||
6.021.12a sa no bodhi puraetā sugeṣūta durgeṣu pathikṛd vidānaḥ |
6.021.12c ye aśramāsa uravo vahiṣṭhās tebhir na indrābhi vakṣi vājam ||

6.022.01a ya eka id dhavyaś carṣaṇīnām indraṁ taṁ gīrbhir abhy arca ābhiḥ |
6.022.01c yaḥ patyate vṛṣabho vṛṣṇyāvān satyaḥ satvā purumāyaḥ sahasvān ||
6.022.02a tam u naḥ pūrve pitaro navagvāḥ sapta viprāso abhi vājayantaḥ |
6.022.02c nakṣaddābhaṁ taturim parvateṣṭhām adroghavācam matibhiḥ śaviṣṭham ||
6.022.03a tam īmaha indram asya rāyaḥ puruvīrasya nṛvataḥ purukṣoḥ |
6.022.03c yo askṛdhoyur ajaraḥ svarvān tam ā bhara harivo mādayadhyai ||
6.022.04a tan no vi voco yadi te purā cij jaritāra ānaśuḥ sumnam indra |
6.022.04c kas te bhāgaḥ kiṁ vayo dudhra khidvaḥ puruhūta purūvaso 'suraghnaḥ ||
6.022.05a tam pṛcchantī vajrahastaṁ ratheṣṭhām indraṁ vepī vakvarī yasya nū gīḥ |
6.022.05c tuvigrābhaṁ tuvikūrmiṁ rabhodāṁ gātum iṣe nakṣate tumram accha ||
6.022.06a ayā ha tyam māyayā vāvṛdhānam manojuvā svatavaḥ parvatena |
6.022.06c acyutā cid vīḻitā svojo rujo vi dṛḻhā dhṛṣatā virapśin ||
6.022.07a taṁ vo dhiyā navyasyā śaviṣṭham pratnam pratnavat paritaṁsayadhyai |
6.022.07c sa no vakṣad animānaḥ suvahmendro viśvāny ati durgahāṇi ||
6.022.08a ā janāya druhvaṇe pārthivāni divyāni dīpayo 'ntarikṣā |
6.022.08c tapā vṛṣan viśvataḥ śociṣā tān brahmadviṣe śocaya kṣām apaś ca ||
6.022.09a bhuvo janasya divyasya rājā pārthivasya jagatas tveṣasaṁdṛk |
6.022.09c dhiṣva vajraṁ dakṣiṇa indra haste viśvā ajurya dayase vi māyāḥ ||
6.022.10a ā saṁyatam indra ṇaḥ svastiṁ śatrutūryāya bṛhatīm amṛdhrām |
6.022.10c yayā dāsāny āryāṇi vṛtrā karo vajrin sutukā nāhuṣāṇi ||
6.022.11a sa no niyudbhiḥ puruhūta vedho viśvavārābhir ā gahi prayajyo |
6.022.11c na yā adevo varate na deva ābhir yāhi tūyam ā madryadrik ||

6.023.01a suta it tvaṁ nimiśla indra some stome brahmaṇi śasyamāna ukthe |
6.023.01c yad vā yuktābhyām maghavan haribhyām bibhrad vajram bāhvor indra yāsi ||
6.023.02a yad vā divi pārye suṣvim indra vṛtrahatye 'vasi śūrasātau |
6.023.02c yad vā dakṣasya bibhyuṣo abibhyad arandhayaḥ śardhata indra dasyūn ||
6.023.03a pātā sutam indro astu somam praṇenīr ugro jaritāram ūtī |
6.023.03c kartā vīrāya suṣvaya u lokaṁ dātā vasu stuvate kīraye cit ||
6.023.04a ganteyānti savanā haribhyām babhrir vajram papiḥ somaṁ dadir gāḥ |
6.023.04c kartā vīraṁ naryaṁ sarvavīraṁ śrotā havaṁ gṛṇataḥ stomavāhāḥ ||
6.023.05a asmai vayaṁ yad vāvāna tad viviṣma indrāya yo naḥ pradivo apas kaḥ |
6.023.05c sute some stumasi śaṁsad ukthendrāya brahma vardhanaṁ yathāsat ||
6.023.06a brahmāṇi hi cakṛṣe vardhanāni tāvat ta indra matibhir viviṣmaḥ |
6.023.06c sute some sutapāḥ śaṁtamāni rāṇḍyā kriyāsma vakṣaṇāni yajñaiḥ ||
6.023.07a sa no bodhi puroḻāśaṁ rarāṇaḥ pibā tu somaṁ goṛjīkam indra |
6.023.07c edam barhir yajamānasya sīdoruṁ kṛdhi tvāyata u lokam ||
6.023.08a sa mandasvā hy anu joṣam ugra pra tvā yajñāsa ime aśnuvantu |
6.023.08c preme havāsaḥ puruhūtam asme ā tveyaṁ dhīr avasa indra yamyāḥ ||
6.023.09a taṁ vaḥ sakhāyaḥ saṁ yathā suteṣu somebhir īm pṛṇatā bhojam indram |
6.023.09c kuvit tasmā asati no bharāya na suṣvim indro 'vase mṛdhāti ||
6.023.10a eved indraḥ sute astāvi some bharadvājeṣu kṣayad in maghonaḥ |
6.023.10c asad yathā jaritra uta sūrir indro rāyo viśvavārasya dātā ||

6.024.01a vṛṣā mada indre śloka ukthā sacā someṣu sutapā ṛjīṣī |
6.024.01c arcatryo maghavā nṛbhya ukthair dyukṣo rājā girām akṣitotiḥ ||
6.024.02a taturir vīro naryo vicetāḥ śrotā havaṁ gṛṇata urvyūtiḥ |
6.024.02c vasuḥ śaṁso narāṁ kārudhāyā vājī stuto vidathe dāti vājam ||
6.024.03a akṣo na cakryoḥ śūra bṛhan pra te mahnā ririce rodasyoḥ |
6.024.03c vṛkṣasya nu te puruhūta vayā vy ūtayo ruruhur indra pūrvīḥ ||
6.024.04a śacīvatas te puruśāka śākā gavām iva srutayaḥ saṁcaraṇīḥ |
6.024.04c vatsānāṁ na tantayas ta indra dāmanvanto adāmānaḥ sudāman ||
6.024.05a anyad adya karvaram anyad u śvo 'sac ca san muhur ācakrir indraḥ |
6.024.05c mitro no atra varuṇaś ca pūṣāryo vaśasya paryetāsti ||
6.024.06a vi tvad āpo na parvatasya pṛṣṭhād ukthebhir indrānayanta yajñaiḥ |
6.024.06c taṁ tvābhiḥ suṣṭutibhir vājayanta ājiṁ na jagmur girvāho aśvāḥ ||
6.024.07a na yaṁ jaranti śarado na māsā na dyāva indram avakarśayanti |
6.024.07c vṛddhasya cid vardhatām asya tanūḥ stomebhir ukthaiś ca śasyamānā ||
6.024.08a na vīḻave namate na sthirāya na śardhate dasyujūtāya stavān |
6.024.08c ajrā indrasya girayaś cid ṛṣvā gambhīre cid bhavati gādham asmai ||
6.024.09a gambhīreṇa na uruṇāmatrin preṣo yandhi sutapāvan vājān |
6.024.09c sthā ū ṣu ūrdhva ūtī ariṣaṇyann aktor vyuṣṭau paritakmyāyām ||
6.024.10a sacasva nāyam avase abhīka ito vā tam indra pāhi riṣaḥ |
6.024.10c amā cainam araṇye pāhi riṣo madema śatahimāḥ suvīrāḥ ||

6.025.01a yā ta ūtir avamā yā paramā yā madhyamendra śuṣminn asti |
6.025.01c tābhir ū ṣu vṛtrahatye 'vīr na ebhiś ca vājair mahān na ugra ||
6.025.02a ābhiḥ spṛdho mithatīr ariṣaṇyann amitrasya vyathayā manyum indra |
6.025.02c ābhir viśvā abhiyujo viṣūcīr āryāya viśo 'va tārīr dāsīḥ ||
6.025.03a indra jāmaya uta ye 'jāmayo 'rvācīnāso vanuṣo yuyujre |
6.025.03c tvam eṣāṁ vithurā śavāṁsi jahi vṛṣṇyāni kṛṇuhī parācaḥ ||
6.025.04a śūro vā śūraṁ vanate śarīrais tanūrucā taruṣi yat kṛṇvaite |
6.025.04c toke vā goṣu tanaye yad apsu vi krandasī urvarāsu bravaite ||
6.025.05a nahi tvā śūro na turo na dhṛṣṇur na tvā yodho manyamāno yuyodha |
6.025.05c indra nakiṣ ṭvā praty asty eṣāṁ viśvā jātāny abhy asi tāni ||
6.025.06a sa patyata ubhayor nṛmṇam ayor yadī vedhasaḥ samithe havante |
6.025.06c vṛtre vā maho nṛvati kṣaye vā vyacasvantā yadi vitantasaite ||
6.025.07a adha smā te carṣaṇayo yad ejān indra trātota bhavā varūtā |
6.025.07c asmākāso ye nṛtamāso arya indra sūrayo dadhire puro naḥ ||
6.025.08a anu te dāyi maha indriyāya satrā te viśvam anu vṛtrahatye |
6.025.08c anu kṣatram anu saho yajatrendra devebhir anu te nṛṣahye ||
6.025.09a evā naḥ spṛdhaḥ sam ajā samatsv indra rārandhi mithatīr adevīḥ |
6.025.09c vidyāma vastor avasā gṛṇanto bharadvājā uta ta indra nūnam ||

6.026.01a śrudhī na indra hvayāmasi tvā maho vājasya sātau vāvṛṣāṇāḥ |
6.026.01c saṁ yad viśo 'yanta śūrasātā ugraṁ no 'vaḥ pārye ahan dāḥ ||
6.026.02a tvāṁ vājī havate vājineyo maho vājasya gadhyasya sātau |
6.026.02c tvāṁ vṛtreṣv indra satpatiṁ tarutraṁ tvāṁ caṣṭe muṣṭihā goṣu yudhyan ||
6.026.03a tvaṁ kaviṁ codayo 'rkasātau tvaṁ kutsāya śuṣṇaṁ dāśuṣe vark |
6.026.03c tvaṁ śiro amarmaṇaḥ parāhann atithigvāya śaṁsyaṁ kariṣyan ||
6.026.04a tvaṁ ratham pra bharo yodham ṛṣvam āvo yudhyantaṁ vṛṣabhaṁ daśadyum |
6.026.04c tvaṁ tugraṁ vetasave sacāhan tvaṁ tujiṁ gṛṇantam indra tūtoḥ ||
6.026.05a tvaṁ tad uktham indra barhaṇā kaḥ pra yac chatā sahasrā śūra darṣi |
6.026.05c ava girer dāsaṁ śambaraṁ han prāvo divodāsaṁ citrābhir ūtī ||
6.026.06a tvaṁ śraddhābhir mandasānaḥ somair dabhītaye cumurim indra siṣvap |
6.026.06c tvaṁ rajim piṭhīnase daśasyan ṣaṣṭiṁ sahasrā śacyā sacāhan ||
6.026.07a ahaṁ cana tat sūribhir ānaśyāṁ tava jyāya indra sumnam ojaḥ |
6.026.07c tvayā yat stavante sadhavīra vīrās trivarūthena nahuṣā śaviṣṭha ||
6.026.08a vayaṁ te asyām indra dyumnahūtau sakhāyaḥ syāma mahina preṣṭhāḥ |
6.026.08c prātardaniḥ kṣatraśrīr astu śreṣṭho ghane vṛtrāṇāṁ sanaye dhanānām ||

6.027.01a kim asya made kim v asya pītāv indraḥ kim asya sakhye cakāra |
6.027.01c raṇā vā ye niṣadi kiṁ te asya purā vividre kim u nūtanāsaḥ ||
6.027.02a sad asya made sad v asya pītāv indraḥ sad asya sakhye cakāra |
6.027.02c raṇā vā ye niṣadi sat te asya purā vividre sad u nūtanāsaḥ ||
6.027.03a nahi nu te mahimanaḥ samasya na maghavan maghavattvasya vidma |
6.027.03c na rādhaso-rādhaso nūtanasyendra nakir dadṛśa indriyaṁ te ||
6.027.04a etat tyat ta indriyam aceti yenāvadhīr varaśikhasya śeṣaḥ |
6.027.04c vajrasya yat te nihatasya śuṣmāt svanāc cid indra paramo dadāra ||
6.027.05a vadhīd indro varaśikhasya śeṣo 'bhyāvartine cāyamānāya śikṣan |
6.027.05c vṛcīvato yad dhariyūpīyāyāṁ han pūrve ardhe bhiyasāparo dart ||
6.027.06a triṁśacchataṁ varmiṇa indra sākaṁ yavyāvatyām puruhūta śravasyā |
6.027.06c vṛcīvantaḥ śarave patyamānāḥ pātrā bhindānā nyarthāny āyan ||
6.027.07a yasya gāvāv aruṣā sūyavasyū antar ū ṣu carato rerihāṇā |
6.027.07c sa sṛñjayāya turvaśam parādād vṛcīvato daivavātāya śikṣan ||
6.027.08a dvayām̐ agne rathino viṁśatiṁ gā vadhūmato maghavā mahyaṁ samrāṭ |
6.027.08c abhyāvartī cāyamāno dadāti dūṇāśeyaṁ dakṣiṇā pārthavānām ||

6.028.01a ā gāvo agmann uta bhadram akran sīdantu goṣṭhe raṇayantv asme |
6.028.01c prajāvatīḥ pururūpā iha syur indrāya pūrvīr uṣaso duhānāḥ ||
6.028.02a indro yajvane pṛṇate ca śikṣaty uped dadāti na svam muṣāyati |
6.028.02c bhūyo-bhūyo rayim id asya vardhayann abhinne khilye ni dadhāti devayum ||
6.028.03a na tā naśanti na dabhāti taskaro nāsām āmitro vyathir ā dadharṣati |
6.028.03c devām̐ś ca yābhir yajate dadāti ca jyog it tābhiḥ sacate gopatiḥ saha ||
6.028.04a na tā arvā reṇukakāṭo aśnute na saṁskṛtatram upa yanti tā abhi |
6.028.04c urugāyam abhayaṁ tasya tā anu gāvo martasya vi caranti yajvanaḥ ||
6.028.05a gāvo bhago gāva indro me acchān gāvaḥ somasya prathamasya bhakṣaḥ |
6.028.05c imā yā gāvaḥ sa janāsa indra icchāmīd dhṛdā manasā cid indram ||
6.028.06a yūyaṁ gāvo medayathā kṛśaṁ cid aśrīraṁ cit kṛṇuthā supratīkam |
6.028.06c bhadraṁ gṛhaṁ kṛṇutha bhadravāco bṛhad vo vaya ucyate sabhāsu ||
6.028.07a prajāvatīḥ sūyavasaṁ riśantīḥ śuddhā apaḥ suprapāṇe pibantīḥ |
6.028.07c mā vaḥ stena īśata māghaśaṁsaḥ pari vo hetī rudrasya vṛjyāḥ ||
6.028.08a upedam upaparcanam āsu goṣūpa pṛcyatām |
6.028.08c upa ṛṣabhasya retasy upendra tava vīrye ||

6.029.01a indraṁ vo naraḥ sakhyāya sepur maho yantaḥ sumataye cakānāḥ |
6.029.01c maho hi dātā vajrahasto asti mahām u raṇvam avase yajadhvam ||
6.029.02a ā yasmin haste naryā mimikṣur ā rathe hiraṇyaye ratheṣṭhāḥ |
6.029.02c ā raśmayo gabhastyoḥ sthūrayor ādhvann aśvāso vṛṣaṇo yujānāḥ ||
6.029.03a śriye te pādā duva ā mimikṣur dhṛṣṇur vajrī śavasā dakṣiṇāvān |
6.029.03c vasāno atkaṁ surabhiṁ dṛśe kaṁ svar ṇa nṛtav iṣiro babhūtha ||
6.029.04a sa soma āmiślatamaḥ suto bhūd yasmin paktiḥ pacyate santi dhānāḥ |
6.029.04c indraṁ naraḥ stuvanto brahmakārā ukthā śaṁsanto devavātatamāḥ ||
6.029.05a na te antaḥ śavaso dhāyy asya vi tu bābadhe rodasī mahitvā |
6.029.05c ā tā sūriḥ pṛṇati tūtujāno yūthevāpsu samījamāna ūtī ||
6.029.06a eved indraḥ suhava ṛṣvo astūtī anūtī hiriśipraḥ satvā |
6.029.06c evā hi jāto asamātyojāḥ purū ca vṛtrā hanati ni dasyūn ||

6.030.01a bhūya id vāvṛdhe vīryāyam̐ eko ajuryo dayate vasūni |
6.030.01c pra ririce diva indraḥ pṛthivyā ardham id asya prati rodasī ubhe ||
6.030.02a adhā manye bṛhad asuryam asya yāni dādhāra nakir ā mināti |
6.030.02c dive-dive sūryo darśato bhūd vi sadmāny urviyā sukratur dhāt ||
6.030.03a adyā cin nū cit tad apo nadīnāṁ yad ābhyo arado gātum indra |
6.030.03c ni parvatā admasado na sedus tvayā dṛḻhāni sukrato rajāṁsi ||
6.030.04a satyam it tan na tvāvām̐ anyo astīndra devo na martyo jyāyān |
6.030.04c ahann ahim pariśayānam arṇo 'vāsṛjo apo acchā samudram ||
6.030.05a tvam apo vi duro viṣūcīr indra dṛḻham arujaḥ parvatasya |
6.030.05c rājābhavo jagataś carṣaṇīnāṁ sākaṁ sūryaṁ janayan dyām uṣāsam ||

6.031.01a abhūr eko rayipate rayīṇām ā hastayor adhithā indra kṛṣṭīḥ |
6.031.01c vi toke apsu tanaye ca sūre 'vocanta carṣaṇayo vivācaḥ ||
6.031.02a tvad bhiyendra pārthivāni viśvācyutā cic cyāvayante rajāṁsi |
6.031.02c dyāvākṣāmā parvatāso vanāni viśvaṁ dṛḻham bhayate ajmann ā te ||
6.031.03a tvaṁ kutsenābhi śuṣṇam indrāśuṣaṁ yudhya kuyavaṁ gaviṣṭau |
6.031.03c daśa prapitve adha sūryasya muṣāyaś cakram avive rapāṁsi ||
6.031.04a tvaṁ śatāny ava śambarasya puro jaghanthāpratīni dasyoḥ |
6.031.04c aśikṣo yatra śacyā śacīvo divodāsāya sunvate sutakre bharadvājāya gṛṇate vasūni ||
6.031.05a sa satyasatvan mahate raṇāya ratham ā tiṣṭha tuvinṛmṇa bhīmam |
6.031.05c yāhi prapathinn avasopa madrik pra ca śruta śrāvaya carṣaṇibhyaḥ ||

6.032.01a apūrvyā purutamāny asmai mahe vīrāya tavase turāya |
6.032.01c virapśine vajriṇe śaṁtamāni vacāṁsy āsā sthavirāya takṣam ||
6.032.02a sa mātarā sūryeṇā kavīnām avāsayad rujad adriṁ gṛṇānaḥ |
6.032.02c svādhībhir ṛkvabhir vāvaśāna ud usriyāṇām asṛjan nidānam ||
6.032.03a sa vahnibhir ṛkvabhir goṣu śaśvan mitajñubhiḥ purukṛtvā jigāya |
6.032.03c puraḥ purohā sakhibhiḥ sakhīyan dṛḻhā ruroja kavibhiḥ kaviḥ san ||
6.032.04a sa nīvyābhir jaritāram acchā maho vājebhir mahadbhiś ca śuṣmaiḥ |
6.032.04c puruvīrābhir vṛṣabha kṣitīnām ā girvaṇaḥ suvitāya pra yāhi ||
6.032.05a sa sargeṇa śavasā takto atyair apa indro dakṣiṇatas turāṣāṭ |
6.032.05c itthā sṛjānā anapāvṛd arthaṁ dive-dive viviṣur apramṛṣyam ||

6.033.01a ya ojiṣṭha indra taṁ su no dā mado vṛṣan svabhiṣṭir dāsvān |
6.033.01c sauvaśvyaṁ yo vanavat svaśvo vṛtrā samatsu sāsahad amitrān ||
6.033.02a tvāṁ hīndrāvase vivāco havante carṣaṇayaḥ śūrasātau |
6.033.02c tvaṁ viprebhir vi paṇīm̐r aśāyas tvota it sanitā vājam arvā ||
6.033.03a tvaṁ tām̐ indrobhayām̐ amitrān dāsā vṛtrāṇy āryā ca śūra |
6.033.03c vadhīr vaneva sudhitebhir atkair ā pṛtsu darṣi nṛṇāṁ nṛtama ||
6.033.04a sa tvaṁ na indrākavābhir ūtī sakhā viśvāyur avitā vṛdhe bhūḥ |
6.033.04c svarṣātā yad dhvayāmasi tvā yudhyanto nemadhitā pṛtsu śūra ||
6.033.05a nūnaṁ na indrāparāya ca syā bhavā mṛḻīka uta no abhiṣṭau |
6.033.05c itthā gṛṇanto mahinasya śarman divi ṣyāma pārye goṣatamāḥ ||

6.034.01a saṁ ca tve jagmur gira indra pūrvīr vi ca tvad yanti vibhvo manīṣāḥ |
6.034.01c purā nūnaṁ ca stutaya ṛṣīṇām paspṛdhra indre adhy ukthārkā ||
6.034.02a puruhūto yaḥ purugūrta ṛbhvām̐ ekaḥ purupraśasto asti yajñaiḥ |
6.034.02c ratho na mahe śavase yujāno 'smābhir indro anumādyo bhūt ||
6.034.03a na yaṁ hiṁsanti dhītayo na vāṇīr indraṁ nakṣantīd abhi vardhayantīḥ |
6.034.03c yadi stotāraḥ śataṁ yat sahasraṁ gṛṇanti girvaṇasaṁ śaṁ tad asmai ||
6.034.04a asmā etad divy arceva māsā mimikṣa indre ny ayāmi somaḥ |
6.034.04c janaṁ na dhanvann abhi saṁ yad āpaḥ satrā vāvṛdhur havanāni yajñaiḥ ||
6.034.05a asmā etan mahy āṅgūṣam asmā indrāya stotram matibhir avāci |
6.034.05c asad yathā mahati vṛtratūrya indro viśvāyur avitā vṛdhaś ca ||

6.035.01a kadā bhuvan rathakṣayāṇi brahma kadā stotre sahasrapoṣyaṁ dāḥ |
6.035.01c kadā stomaṁ vāsayo 'sya rāyā kadā dhiyaḥ karasi vājaratnāḥ ||
6.035.02a karhi svit tad indra yan nṛbhir nṝn vīrair vīrān nīḻayāse jayājīn |
6.035.02c tridhātu gā adhi jayāsi goṣv indra dyumnaṁ svarvad dhehy asme ||
6.035.03a karhi svit tad indra yaj jaritre viśvapsu brahma kṛṇavaḥ śaviṣṭha |
6.035.03c kadā dhiyo na niyuto yuvāse kadā gomaghā havanāni gacchāḥ ||
6.035.04a sa gomaghā jaritre aśvaścandrā vājaśravaso adhi dhehi pṛkṣaḥ |
6.035.04c pīpihīṣaḥ sudughām indra dhenum bharadvājeṣu suruco rurucyāḥ ||
6.035.05a tam ā nūnaṁ vṛjanam anyathā cic chūro yac chakra vi duro gṛṇīṣe |
6.035.05c mā nir araṁ śukradughasya dhenor āṅgirasān brahmaṇā vipra jinva ||

6.036.01a satrā madāsas tava viśvajanyāḥ satrā rāyo 'dha ye pārthivāsaḥ |
6.036.01c satrā vājānām abhavo vibhaktā yad deveṣu dhārayathā asuryam ||
6.036.02a anu pra yeje jana ojo asya satrā dadhire anu vīryāya |
6.036.02c syūmagṛbhe dudhaye 'rvate ca kratuṁ vṛñjanty api vṛtrahatye ||
6.036.03a taṁ sadhrīcīr ūtayo vṛṣṇyāni pauṁsyāni niyutaḥ saścur indram |
6.036.03c samudraṁ na sindhava ukthaśuṣmā uruvyacasaṁ gira ā viśanti ||
6.036.04a sa rāyas khām upa sṛjā gṛṇānaḥ puruścandrasya tvam indra vasvaḥ |
6.036.04c patir babhūthāsamo janānām eko viśvasya bhuvanasya rājā ||
6.036.05a sa tu śrudhi śrutyā yo duvoyur dyaur na bhūmābhi rāyo aryaḥ |
6.036.05c aso yathā naḥ śavasā cakāno yuge-yuge vayasā cekitānaḥ ||

6.037.01a arvāg rathaṁ viśvavāraṁ ta ugrendra yuktāso harayo vahantu |
6.037.01c kīriś cid dhi tvā havate svarvān ṛdhīmahi sadhamādas te adya ||
6.037.02a pro droṇe harayaḥ karmāgman punānāsa ṛjyanto abhūvan |
6.037.02c indro no asya pūrvyaḥ papīyād dyukṣo madasya somyasya rājā ||
6.037.03a āsasrāṇāsaḥ śavasānam acchendraṁ sucakre rathyāso aśvāḥ |
6.037.03c abhi śrava ṛjyanto vaheyur nū cin nu vāyor amṛtaṁ vi dasyet ||
6.037.04a variṣṭho asya dakṣiṇām iyartīndro maghonāṁ tuvikūrmitamaḥ |
6.037.04c yayā vajrivaḥ pariyāsy aṁho maghā ca dhṛṣṇo dayase vi sūrīn ||
6.037.05a indro vājasya sthavirasya dātendro gīrbhir vardhatāṁ vṛddhamahāḥ |
6.037.05c indro vṛtraṁ haniṣṭho astu satvā tā sūriḥ pṛṇati tūtujānaḥ ||

6.038.01a apād ita ud u naś citratamo mahīm bharṣad dyumatīm indrahūtim |
6.038.01c panyasīṁ dhītiṁ daivyasya yāmañ janasya rātiṁ vanate sudānuḥ ||
6.038.02a dūrāc cid ā vasato asya karṇā ghoṣād indrasya tanyati bruvāṇaḥ |
6.038.02c eyam enaṁ devahūtir vavṛtyān madryag indram iyam ṛcyamānā ||
6.038.03a taṁ vo dhiyā paramayā purājām ajaram indram abhy anūṣy arkaiḥ |
6.038.03c brahmā ca giro dadhire sam asmin mahām̐ś ca stomo adhi vardhad indre ||
6.038.04a vardhād yaṁ yajña uta soma indraṁ vardhād brahma gira ukthā ca manma |
6.038.04c vardhāhainam uṣaso yāmann aktor vardhān māsāḥ śarado dyāva indram ||
6.038.05a evā jajñānaṁ sahase asāmi vāvṛdhānaṁ rādhase ca śrutāya |
6.038.05c mahām ugram avase vipra nūnam ā vivāsema vṛtratūryeṣu ||

6.039.01a mandrasya kaver divyasya vahner vipramanmano vacanasya madhvaḥ |
6.039.01c apā nas tasya sacanasya deveṣo yuvasva gṛṇate goagrāḥ ||
6.039.02a ayam uśānaḥ pary adrim usrā ṛtadhītibhir ṛtayug yujānaḥ |
6.039.02c rujad arugṇaṁ vi valasya sānum paṇīm̐r vacobhir abhi yodhad indraḥ ||
6.039.03a ayaṁ dyotayad adyuto vy aktūn doṣā vastoḥ śarada indur indra |
6.039.03c imaṁ ketum adadhur nū cid ahnāṁ śucijanmana uṣasaś cakāra ||
6.039.04a ayaṁ rocayad aruco rucāno 'yaṁ vāsayad vy ṛtena pūrvīḥ |
6.039.04c ayam īyata ṛtayugbhir aśvaiḥ svarvidā nābhinā carṣaṇiprāḥ ||
6.039.05a nū gṛṇāno gṛṇate pratna rājann iṣaḥ pinva vasudeyāya pūrvīḥ |
6.039.05c apa oṣadhīr aviṣā vanāni gā arvato nṝn ṛcase rirīhi ||

6.040.01a indra piba tubhyaṁ suto madāyāva sya harī vi mucā sakhāyā |
6.040.01c uta pra gāya gaṇa ā niṣadyāthā yajñāya gṛṇate vayo dhāḥ ||
6.040.02a asya piba yasya jajñāna indra madāya kratve apibo virapśin |
6.040.02c tam u te gāvo nara āpo adrir induṁ sam ahyan pītaye sam asmai ||
6.040.03a samiddhe agnau suta indra soma ā tvā vahantu harayo vahiṣṭhāḥ |
6.040.03c tvāyatā manasā johavīmīndrā yāhi suvitāya mahe naḥ ||
6.040.04a ā yāhi śaśvad uśatā yayāthendra mahā manasā somapeyam |
6.040.04c upa brahmāṇi śṛṇava imā no 'thā te yajñas tanve vayo dhāt ||
6.040.05a yad indra divi pārye yad ṛdhag yad vā sve sadane yatra vāsi |
6.040.05c ato no yajñam avase niyutvān sajoṣāḥ pāhi girvaṇo marudbhiḥ ||

6.041.01a aheḻamāna upa yāhi yajñaṁ tubhyam pavanta indavaḥ sutāsaḥ |
6.041.01c gāvo na vajrin svam oko acchendrā gahi prathamo yajñiyānām ||
6.041.02a yā te kākut sukṛtā yā variṣṭhā yayā śaśvat pibasi madhva ūrmim |
6.041.02c tayā pāhi pra te adhvaryur asthāt saṁ te vajro vartatām indra gavyuḥ ||
6.041.03a eṣa drapso vṛṣabho viśvarūpa indrāya vṛṣṇe sam akāri somaḥ |
6.041.03c etam piba harivaḥ sthātar ugra yasyeśiṣe pradivi yas te annam ||
6.041.04a sutaḥ somo asutād indra vasyān ayaṁ śreyāñ cikituṣe raṇāya |
6.041.04c etaṁ titirva upa yāhi yajñaṁ tena viśvās taviṣīr ā pṛṇasva ||
6.041.05a hvayāmasi tvendra yāhy arvāṅ araṁ te somas tanve bhavāti |
6.041.05c śatakrato mādayasvā suteṣu prāsmām̐ ava pṛtanāsu pra vikṣu ||

6.042.01a praty asmai pipīṣate viśvāni viduṣe bhara |
6.042.01c araṁgamāya jagmaye 'paścāddaghvane nare ||
6.042.02a em enam pratyetana somebhiḥ somapātamam |
6.042.02c amatrebhir ṛjīṣiṇam indraṁ sutebhir indubhiḥ ||
6.042.03a yadī sutebhir indubhiḥ somebhiḥ pratibhūṣatha |
6.042.03c vedā viśvasya medhiro dhṛṣat taṁ-tam id eṣate ||
6.042.04a asmā-asmā id andhaso 'dhvaryo pra bharā sutam |
6.042.04c kuvit samasya jenyasya śardhato 'bhiśaster avasparat ||

6.043.01a yasya tyac chambaram made divodāsāya randhayaḥ |
6.043.01c ayaṁ sa soma indra te sutaḥ piba ||
6.043.02a yasya tīvrasutam madam madhyam antaṁ ca rakṣase |
6.043.02c ayaṁ sa soma indra te sutaḥ piba ||
6.043.03a yasya gā antar aśmano made dṛḻhā avāsṛjaḥ |
6.043.03c ayaṁ sa soma indra te sutaḥ piba ||
6.043.04a yasya mandāno andhaso māghonaṁ dadhiṣe śavaḥ |
6.043.04c ayaṁ sa soma indra te sutaḥ piba ||

6.044.01a yo rayivo rayiṁtamo yo dyumnair dyumnavattamaḥ |
6.044.01c somaḥ sutaḥ sa indra te 'sti svadhāpate madaḥ ||
6.044.02a yaḥ śagmas tuviśagma te rāyo dāmā matīnām |
6.044.02c somaḥ sutaḥ sa indra te 'sti svadhāpate madaḥ ||
6.044.03a yena vṛddho na śavasā turo na svābhir ūtibhiḥ |
6.044.03c somaḥ sutaḥ sa indra te 'sti svadhāpate madaḥ ||
6.044.04a tyam u vo aprahaṇaṁ gṛṇīṣe śavasas patim |
6.044.04c indraṁ viśvāsāhaṁ naram maṁhiṣṭhaṁ viśvacarṣaṇim ||
6.044.05a yaṁ vardhayantīd giraḥ patiṁ turasya rādhasaḥ |
6.044.05c tam in nv asya rodasī devī śuṣmaṁ saparyataḥ ||
6.044.06a tad va ukthasya barhaṇendrāyopastṛṇīṣaṇi |
6.044.06c vipo na yasyotayo vi yad rohanti sakṣitaḥ ||
6.044.07a avidad dakṣam mitro navīyān papāno devebhyo vasyo acait |
6.044.07c sasavān staulābhir dhautarībhir uruṣyā pāyur abhavat sakhibhyaḥ ||
6.044.08a ṛtasya pathi vedhā apāyi śriye manāṁsi devāso akran |
6.044.08c dadhāno nāma maho vacobhir vapur dṛśaye venyo vy āvaḥ ||
6.044.09a dyumattamaṁ dakṣaṁ dhehy asme sedhā janānām pūrvīr arātīḥ |
6.044.09c varṣīyo vayaḥ kṛṇuhi śacībhir dhanasya sātāv asmām̐ aviḍḍhi ||
6.044.10a indra tubhyam in maghavann abhūma vayaṁ dātre harivo mā vi venaḥ |
6.044.10c nakir āpir dadṛśe martyatrā kim aṅga radhracodanaṁ tvāhuḥ ||
6.044.11a mā jasvane vṛṣabha no rarīthā mā te revataḥ sakhye riṣāma |
6.044.11c pūrvīṣ ṭa indra niṣṣidho janeṣu jahy asuṣvīn pra vṛhāpṛṇataḥ ||
6.044.12a ud abhrāṇīva stanayann iyartīndro rādhāṁsy aśvyāni gavyā |
6.044.12c tvam asi pradivaḥ kārudhāyā mā tvādāmāna ā dabhan maghonaḥ ||
6.044.13a adhvaryo vīra pra mahe sutānām indrāya bhara sa hy asya rājā |
6.044.13c yaḥ pūrvyābhir uta nūtanābhir gīrbhir vāvṛdhe gṛṇatām ṛṣīṇām ||
6.044.14a asya made puru varpāṁsi vidvān indro vṛtrāṇy apratī jaghāna |
6.044.14c tam u pra hoṣi madhumantam asmai somaṁ vīrāya śipriṇe pibadhyai ||
6.044.15a pātā sutam indro astu somaṁ hantā vṛtraṁ vajreṇa mandasānaḥ |
6.044.15c gantā yajñam parāvataś cid acchā vasur dhīnām avitā kārudhāyāḥ ||
6.044.16a idaṁ tyat pātram indrapānam indrasya priyam amṛtam apāyi |
6.044.16c matsad yathā saumanasāya devaṁ vy asmad dveṣo yuyavad vy aṁhaḥ ||
6.044.17a enā mandāno jahi śūra śatrūñ jāmim ajāmim maghavann amitrān |
6.044.17c abhiṣeṇām̐ abhy ādediśānān parāca indra pra mṛṇā jahī ca ||
6.044.18a āsu ṣmā ṇo maghavann indra pṛtsv asmabhyam mahi varivaḥ sugaṁ kaḥ |
6.044.18c apāṁ tokasya tanayasya jeṣa indra sūrīn kṛṇuhi smā no ardham ||
6.044.19a ā tvā harayo vṛṣaṇo yujānā vṛṣarathāso vṛṣaraśmayo 'tyāḥ |
6.044.19c asmatrāñco vṛṣaṇo vajravāho vṛṣṇe madāya suyujo vahantu ||
6.044.20a ā te vṛṣan vṛṣaṇo droṇam asthur ghṛtapruṣo normayo madantaḥ |
6.044.20c indra pra tubhyaṁ vṛṣabhiḥ sutānāṁ vṛṣṇe bharanti vṛṣabhāya somam ||
6.044.21a vṛṣāsi divo vṛṣabhaḥ pṛthivyā vṛṣā sindhūnāṁ vṛṣabhaḥ stiyānām |
6.044.21c vṛṣṇe ta indur vṛṣabha pīpāya svādū raso madhupeyo varāya ||
6.044.22a ayaṁ devaḥ sahasā jāyamāna indreṇa yujā paṇim astabhāyat |
6.044.22c ayaṁ svasya pitur āyudhānīndur amuṣṇād aśivasya māyāḥ ||
6.044.23a ayam akṛṇod uṣasaḥ supatnīr ayaṁ sūrye adadhāj jyotir antaḥ |
6.044.23c ayaṁ tridhātu divi rocaneṣu triteṣu vindad amṛtaṁ nigūḻham ||
6.044.24a ayaṁ dyāvāpṛthivī vi ṣkabhāyad ayaṁ ratham ayunak saptaraśmim |
6.044.24c ayaṁ goṣu śacyā pakvam antaḥ somo dādhāra daśayantram utsam ||

6.045.01a ya ānayat parāvataḥ sunītī turvaśaṁ yadum |
6.045.01c indraḥ sa no yuvā sakhā ||
6.045.02a avipre cid vayo dadhad anāśunā cid arvatā |
6.045.02c indro jetā hitaṁ dhanam ||
6.045.03a mahīr asya praṇītayaḥ pūrvīr uta praśastayaḥ |
6.045.03c nāsya kṣīyanta ūtayaḥ ||
6.045.04a sakhāyo brahmavāhase 'rcata pra ca gāyata |
6.045.04c sa hi naḥ pramatir mahī ||
6.045.05a tvam ekasya vṛtrahann avitā dvayor asi |
6.045.05c utedṛśe yathā vayam ||
6.045.06a nayasīd v ati dviṣaḥ kṛṇoṣy ukthaśaṁsinaḥ |
6.045.06c nṛbhiḥ suvīra ucyase ||
6.045.07a brahmāṇam brahmavāhasaṁ gīrbhiḥ sakhāyam ṛgmiyam |
6.045.07c gāṁ na dohase huve ||
6.045.08a yasya viśvāni hastayor ūcur vasūni ni dvitā |
6.045.08c vīrasya pṛtanāṣahaḥ ||
6.045.09a vi dṛḻhāni cid adrivo janānāṁ śacīpate |
6.045.09c vṛha māyā anānata ||
6.045.10a tam u tvā satya somapā indra vājānām pate |
6.045.10c ahūmahi śravasyavaḥ ||
6.045.11a tam u tvā yaḥ purāsitha yo vā nūnaṁ hite dhane |
6.045.11c havyaḥ sa śrudhī havam ||
6.045.12a dhībhir arvadbhir arvato vājām̐ indra śravāyyān |
6.045.12c tvayā jeṣma hitaṁ dhanam ||
6.045.13a abhūr u vīra girvaṇo mahām̐ indra dhane hite |
6.045.13c bhare vitantasāyyaḥ ||
6.045.14a yā ta ūtir amitrahan makṣūjavastamāsati |
6.045.14c tayā no hinuhī ratham ||
6.045.15a sa rathena rathītamo 'smākenābhiyugvanā |
6.045.15c jeṣi jiṣṇo hitaṁ dhanam ||
6.045.16a ya eka it tam u ṣṭuhi kṛṣṭīnāṁ vicarṣaṇiḥ |
6.045.16c patir jajñe vṛṣakratuḥ ||
6.045.17a yo gṛṇatām id āsithāpir ūtī śivaḥ sakhā |
6.045.17c sa tvaṁ na indra mṛḻaya ||
6.045.18a dhiṣva vajraṁ gabhastyo rakṣohatyāya vajrivaḥ |
6.045.18c sāsahīṣṭhā abhi spṛdhaḥ ||
6.045.19a pratnaṁ rayīṇāṁ yujaṁ sakhāyaṁ kīricodanam |
6.045.19c brahmavāhastamaṁ huve ||
6.045.20a sa hi viśvāni pārthivām̐ eko vasūni patyate |
6.045.20c girvaṇastamo adhriguḥ ||
6.045.21a sa no niyudbhir ā pṛṇa kāmaṁ vājebhir aśvibhiḥ |
6.045.21c gomadbhir gopate dhṛṣat ||
6.045.22a tad vo gāya sute sacā puruhūtāya satvane |
6.045.22c śaṁ yad gave na śākine ||
6.045.23a na ghā vasur ni yamate dānaṁ vājasya gomataḥ |
6.045.23c yat sīm upa śravad giraḥ ||
6.045.24a kuvitsasya pra hi vrajaṁ gomantaṁ dasyuhā gamat |
6.045.24c śacībhir apa no varat ||
6.045.25a imā u tvā śatakrato 'bhi pra ṇonuvur giraḥ |
6.045.25c indra vatsaṁ na mātaraḥ ||
6.045.26a dūṇāśaṁ sakhyaṁ tava gaur asi vīra gavyate |
6.045.26c aśvo aśvāyate bhava ||
6.045.27a sa mandasvā hy andhaso rādhase tanvā mahe |
6.045.27c na stotāraṁ nide karaḥ ||
6.045.28a imā u tvā sute-sute nakṣante girvaṇo giraḥ |
6.045.28c vatsaṁ gāvo na dhenavaḥ ||
6.045.29a purūtamam purūṇāṁ stotṝṇāṁ vivāci |
6.045.29c vājebhir vājayatām ||
6.045.30a asmākam indra bhūtu te stomo vāhiṣṭho antamaḥ |
6.045.30c asmān rāye mahe hinu ||
6.045.31a adhi bṛbuḥ paṇīnāṁ varṣiṣṭhe mūrdhann asthāt |
6.045.31c uruḥ kakṣo na gāṅgyaḥ ||
6.045.32a yasya vāyor iva dravad bhadrā rātiḥ sahasriṇī |
6.045.32c sadyo dānāya maṁhate ||
6.045.33a tat su no viśve arya ā sadā gṛṇanti kāravaḥ |
6.045.33c bṛbuṁ sahasradātamaṁ sūriṁ sahasrasātamam ||

6.046.01a tvām id dhi havāmahe sātā vājasya kāravaḥ |
6.046.01c tvāṁ vṛtreṣv indra satpatiṁ naras tvāṁ kāṣṭhāsv arvataḥ ||
6.046.02a sa tvaṁ naś citra vajrahasta dhṛṣṇuyā mahaḥ stavāno adrivaḥ |
6.046.02c gām aśvaṁ rathyam indra saṁ kira satrā vājaṁ na jigyuṣe ||
6.046.03a yaḥ satrāhā vicarṣaṇir indraṁ taṁ hūmahe vayam |
6.046.03c sahasramuṣka tuvinṛmṇa satpate bhavā samatsu no vṛdhe ||
6.046.04a bādhase janān vṛṣabheva manyunā ghṛṣau mīḻha ṛcīṣama |
6.046.04c asmākam bodhy avitā mahādhane tanūṣv apsu sūrye ||
6.046.05a indra jyeṣṭhaṁ na ā bharam̐ ojiṣṭham papuri śravaḥ |
6.046.05c yeneme citra vajrahasta rodasī obhe suśipra prāḥ ||
6.046.06a tvām ugram avase carṣaṇīsahaṁ rājan deveṣu hūmahe |
6.046.06c viśvā su no vithurā pibdanā vaso 'mitrān suṣahān kṛdhi ||
6.046.07a yad indra nāhuṣīṣv ām̐ ojo nṛmṇaṁ ca kṛṣṭiṣu |
6.046.07c yad vā pañca kṣitīnāṁ dyumnam ā bhara satrā viśvāni pauṁsyā ||
6.046.08a yad vā tṛkṣau maghavan druhyāv ā jane yat pūrau kac ca vṛṣṇyam |
6.046.08c asmabhyaṁ tad rirīhi saṁ nṛṣāhye 'mitrān pṛtsu turvaṇe ||
6.046.09a indra tridhātu śaraṇaṁ trivarūthaṁ svastimat |
6.046.09c chardir yaccha maghavadbhyaś ca mahyaṁ ca yāvayā didyum ebhyaḥ ||
6.046.10a ye gavyatā manasā śatrum ādabhur abhipraghnanti dhṛṣṇuyā |
6.046.10c adha smā no maghavann indra girvaṇas tanūpā antamo bhava ||
6.046.11a adha smā no vṛdhe bhavendra nāyam avā yudhi |
6.046.11c yad antarikṣe patayanti parṇino didyavas tigmamūrdhānaḥ ||
6.046.12a yatra śūrāsas tanvo vitanvate priyā śarma pitṝṇām |
6.046.12c adha smā yaccha tanve tane ca chardir acittaṁ yāvaya dveṣaḥ ||
6.046.13a yad indra sarge arvataś codayāse mahādhane |
6.046.13c asamane adhvani vṛjine pathi śyenām̐ iva śravasyataḥ ||
6.046.14a sindhūm̐r iva pravaṇa āśuyā yato yadi klośam anu ṣvaṇi |
6.046.14c ā ye vayo na varvṛtaty āmiṣi gṛbhītā bāhvor gavi ||

6.047.01a svāduṣ kilāyam madhumām̐ utāyaṁ tīvraḥ kilāyaṁ rasavām̐ utāyam |
6.047.01c uto nv asya papivāṁsam indraṁ na kaś cana sahata āhaveṣu ||
6.047.02a ayaṁ svādur iha madiṣṭha āsa yasyendro vṛtrahatye mamāda |
6.047.02c purūṇi yaś cyautnā śambarasya vi navatiṁ nava ca dehyo han ||
6.047.03a ayam me pīta ud iyarti vācam ayam manīṣām uśatīm ajīgaḥ |
6.047.03c ayaṁ ṣaḻ urvīr amimīta dhīro na yābhyo bhuvanaṁ kac canāre ||
6.047.04a ayaṁ sa yo varimāṇam pṛthivyā varṣmāṇaṁ divo akṛṇod ayaṁ saḥ |
6.047.04c ayam pīyūṣaṁ tisṛṣu pravatsu somo dādhārorv antarikṣam ||
6.047.05a ayaṁ vidac citradṛśīkam arṇaḥ śukrasadmanām uṣasām anīke |
6.047.05c ayam mahān mahatā skambhanenod dyām astabhnād vṛṣabho marutvān ||
6.047.06a dhṛṣat piba kalaśe somam indra vṛtrahā śūra samare vasūnām |
6.047.06c mādhyaṁdine savana ā vṛṣasva rayisthāno rayim asmāsu dhehi ||
6.047.07a indra pra ṇaḥ puraeteva paśya pra no naya prataraṁ vasyo accha |
6.047.07c bhavā supāro atipārayo no bhavā sunītir uta vāmanītiḥ ||
6.047.08a uruṁ no lokam anu neṣi vidvān svarvaj jyotir abhayaṁ svasti |
6.047.08c ṛṣvā ta indra sthavirasya bāhū upa stheyāma śaraṇā bṛhantā ||
6.047.09a variṣṭhe na indra vandhure dhā vahiṣṭhayoḥ śatāvann aśvayor ā |
6.047.09c iṣam ā vakṣīṣāṁ varṣiṣṭhām mā nas tārīn maghavan rāyo aryaḥ ||
6.047.10a indra mṛḻa mahyaṁ jīvātum iccha codaya dhiyam ayaso na dhārām |
6.047.10c yat kiṁ cāhaṁ tvāyur idaṁ vadāmi taj juṣasva kṛdhi mā devavantam ||
6.047.11a trātāram indram avitāram indraṁ have-have suhavaṁ śūram indram |
6.047.11c hvayāmi śakram puruhūtam indraṁ svasti no maghavā dhātv indraḥ ||
6.047.12a indraḥ sutrāmā svavām̐ avobhiḥ sumṛḻīko bhavatu viśvavedāḥ |
6.047.12c bādhatāṁ dveṣo abhayaṁ kṛṇotu suvīryasya patayaḥ syāma ||
6.047.13a tasya vayaṁ sumatau yajñiyasyāpi bhadre saumanase syāma |
6.047.13c sa sutrāmā svavām̐ indro asme ārāc cid dveṣaḥ sanutar yuyotu ||
6.047.14a ava tve indra pravato normir giro brahmāṇi niyuto dhavante |
6.047.14c urū na rādhaḥ savanā purūṇy apo gā vajrin yuvase sam indūn ||
6.047.15a ka īṁ stavat kaḥ pṛṇāt ko yajāte yad ugram in maghavā viśvahāvet |
6.047.15c pādāv iva praharann anyam-anyaṁ kṛṇoti pūrvam aparaṁ śacībhiḥ ||
6.047.16a śṛṇve vīra ugram-ugraṁ damāyann anyam-anyam atinenīyamānaḥ |
6.047.16c edhamānadviḻ ubhayasya rājā coṣkūyate viśa indro manuṣyān ||
6.047.17a parā pūrveṣāṁ sakhyā vṛṇakti vitarturāṇo aparebhir eti |
6.047.17c anānubhūtīr avadhūnvānaḥ pūrvīr indraḥ śaradas tartarīti ||
6.047.18a rūpaṁ-rūpam pratirūpo babhūva tad asya rūpam praticakṣaṇāya |
6.047.18c indro māyābhiḥ pururūpa īyate yuktā hy asya harayaḥ śatā daśa ||
6.047.19a yujāno haritā rathe bhūri tvaṣṭeha rājati |
6.047.19c ko viśvāhā dviṣataḥ pakṣa āsata utāsīneṣu sūriṣu ||
6.047.20a agavyūti kṣetram āganma devā urvī satī bhūmir aṁhūraṇābhūt |
6.047.20c bṛhaspate pra cikitsā gaviṣṭāv itthā sate jaritra indra panthām ||
6.047.21a dive-dive sadṛśīr anyam ardhaṁ kṛṣṇā asedhad apa sadmano jāḥ |
6.047.21c ahan dāsā vṛṣabho vasnayantodavraje varcinaṁ śambaraṁ ca ||
6.047.22a prastoka in nu rādhasas ta indra daśa kośayīr daśa vājino 'dāt |
6.047.22c divodāsād atithigvasya rādhaḥ śāmbaraṁ vasu praty agrabhīṣma ||
6.047.23a daśāśvān daśa kośān daśa vastrādhibhojanā |
6.047.23c daśo hiraṇyapiṇḍān divodāsād asāniṣam ||
6.047.24a daśa rathān praṣṭimataḥ śataṁ gā atharvabhyaḥ |
6.047.24c aśvathaḥ pāyave 'dāt ||
6.047.25a mahi rādho viśvajanyaṁ dadhānān bharadvājān sārñjayo abhy ayaṣṭa ||
6.047.26a vanaspate vīḍvaṅgo hi bhūyā asmatsakhā prataraṇaḥ suvīraḥ |
6.047.26c gobhiḥ saṁnaddho asi vīḻayasvāsthātā te jayatu jetvāni ||
6.047.27a divas pṛthivyāḥ pary oja udbhṛtaṁ vanaspatibhyaḥ pary ābhṛtaṁ sahaḥ |
6.047.27c apām ojmānam pari gobhir āvṛtam indrasya vajraṁ haviṣā rathaṁ yaja ||
6.047.28a indrasya vajro marutām anīkam mitrasya garbho varuṇasya nābhiḥ |
6.047.28c semāṁ no havyadātiṁ juṣāṇo deva ratha prati havyā gṛbhāya ||
6.047.29a upa śvāsaya pṛthivīm uta dyām purutrā te manutāṁ viṣṭhitaṁ jagat |
6.047.29c sa dundubhe sajūr indreṇa devair dūrād davīyo apa sedha śatrūn ||
6.047.30a ā krandaya balam ojo na ā dhā niḥ ṣṭanihi duritā bādhamānaḥ |
6.047.30c apa protha dundubhe ducchunā ita indrasya muṣṭir asi vīḻayasva ||
6.047.31a āmūr aja pratyāvartayemāḥ ketumad dundubhir vāvadīti |
6.047.31c sam aśvaparṇāś caranti no naro 'smākam indra rathino jayantu ||

6.048.01a yajñā-yajñā vo agnaye girā-girā ca dakṣase |
6.048.01c pra-pra vayam amṛtaṁ jātavedasam priyam mitraṁ na śaṁsiṣam ||
6.048.02a ūrjo napātaṁ sa hināyam asmayur dāśema havyadātaye |
6.048.02c bhuvad vājeṣv avitā bhuvad vṛdha uta trātā tanūnām ||
6.048.03a vṛṣā hy agne ajaro mahān vibhāsy arciṣā |
6.048.03c ajasreṇa śociṣā śośucac chuce sudītibhiḥ su dīdihi ||
6.048.04a maho devān yajasi yakṣy ānuṣak tava kratvota daṁsanā |
6.048.04c arvācaḥ sīṁ kṛṇuhy agne 'vase rāsva vājota vaṁsva ||
6.048.05a yam āpo adrayo vanā garbham ṛtasya piprati |
6.048.05c sahasā yo mathito jāyate nṛbhiḥ pṛthivyā adhi sānavi ||
6.048.06a ā yaḥ paprau bhānunā rodasī ubhe dhūmena dhāvate divi |
6.048.06c tiras tamo dadṛśa ūrmyāsv ā śyāvāsv aruṣo vṛṣā śyāvā aruṣo vṛṣā ||
6.048.07a bṛhadbhir agne arcibhiḥ śukreṇa deva śociṣā |
6.048.07c bharadvāje samidhāno yaviṣṭhya revan naḥ śukra dīdihi dyumat pāvaka dīdihi ||
6.048.08a viśvāsāṁ gṛhapatir viśām asi tvam agne mānuṣīṇām |
6.048.08c śatam pūrbhir yaviṣṭha pāhy aṁhasaḥ sameddhāraṁ śataṁ himāḥ stotṛbhyo ye ca dadati ||
6.048.09a tvaṁ naś citra ūtyā vaso rādhāṁsi codaya |
6.048.09c asya rāyas tvam agne rathīr asi vidā gādhaṁ tuce tu naḥ ||
6.048.10a parṣi tokaṁ tanayam partṛbhiṣ ṭvam adabdhair aprayutvabhiḥ |
6.048.10c agne heḻāṁsi daivyā yuyodhi no 'devāni hvarāṁsi ca ||
6.048.11a ā sakhāyaḥ sabardughāṁ dhenum ajadhvam upa navyasā vacaḥ |
6.048.11c sṛjadhvam anapasphurām ||
6.048.12a yā śardhāya mārutāya svabhānave śravo 'mṛtyu dhukṣata |
6.048.12c yā mṛḻīke marutāṁ turāṇāṁ yā sumnair evayāvarī ||
6.048.13a bharadvājāyāva dhukṣata dvitā |
6.048.13b dhenuṁ ca viśvadohasam iṣaṁ ca viśvabhojasam ||
6.048.14a taṁ va indraṁ na sukratuṁ varuṇam iva māyinam |
6.048.14c aryamaṇaṁ na mandraṁ sṛprabhojasaṁ viṣṇuṁ na stuṣa ādiśe ||
6.048.15a tveṣaṁ śardho na mārutaṁ tuviṣvaṇy anarvāṇam pūṣaṇaṁ saṁ yathā śatā |
6.048.15c saṁ sahasrā kāriṣac carṣaṇibhya ām̐ āvir gūḻhā vasū karat suvedā no vasū karat ||
6.048.16a ā mā pūṣann upa drava śaṁsiṣaṁ nu te apikarṇa āghṛṇe |
6.048.16c aghā aryo arātayaḥ ||
6.048.17a mā kākambīram ud vṛho vanaspatim aśastīr vi hi nīnaśaḥ |
6.048.17c mota sūro aha evā cana grīvā ādadhate veḥ ||
6.048.18a dṛter iva te 'vṛkam astu sakhyam |
6.048.18b acchidrasya dadhanvataḥ supūrṇasya dadhanvataḥ ||
6.048.19a paro hi martyair asi samo devair uta śriyā |
6.048.19c abhi khyaḥ pūṣan pṛtanāsu nas tvam avā nūnaṁ yathā purā ||
6.048.20a vāmī vāmasya dhūtayaḥ praṇītir astu sūnṛtā |
6.048.20c devasya vā maruto martyasya vejānasya prayajyavaḥ ||
6.048.21a sadyaś cid yasya carkṛtiḥ pari dyāṁ devo naiti sūryaḥ |
6.048.21c tveṣaṁ śavo dadhire nāma yajñiyam maruto vṛtrahaṁ śavo jyeṣṭhaṁ vṛtrahaṁ śavaḥ ||
6.048.22a sakṛd dha dyaur ajāyata sakṛd bhūmir ajāyata |
6.048.22c pṛśnyā dugdhaṁ sakṛt payas tad anyo nānu jāyate ||

6.049.01a stuṣe janaṁ suvrataṁ navyasībhir gīrbhir mitrāvaruṇā sumnayantā |
6.049.01c ta ā gamantu ta iha śruvantu sukṣatrāso varuṇo mitro agniḥ ||
6.049.02a viśo-viśa īḍyam adhvareṣv adṛptakratum aratiṁ yuvatyoḥ |
6.049.02c divaḥ śiśuṁ sahasaḥ sūnum agniṁ yajñasya ketum aruṣaṁ yajadhyai ||
6.049.03a aruṣasya duhitarā virūpe stṛbhir anyā pipiśe sūro anyā |
6.049.03c mithasturā vicarantī pāvake manma śrutaṁ nakṣata ṛcyamāne ||
6.049.04a pra vāyum acchā bṛhatī manīṣā bṛhadrayiṁ viśvavāraṁ rathaprām |
6.049.04c dyutadyāmā niyutaḥ patyamānaḥ kaviḥ kavim iyakṣasi prayajyo ||
6.049.05a sa me vapuś chadayad aśvinor yo ratho virukmān manasā yujānaḥ |
6.049.05c yena narā nāsatyeṣayadhyai vartir yāthas tanayāya tmane ca ||
6.049.06a parjanyavātā vṛṣabhā pṛthivyāḥ purīṣāṇi jinvatam apyāni |
6.049.06c satyaśrutaḥ kavayo yasya gīrbhir jagataḥ sthātar jagad ā kṛṇudhvam ||
6.049.07a pāvīravī kanyā citrāyuḥ sarasvatī vīrapatnī dhiyaṁ dhāt |
6.049.07c gnābhir acchidraṁ śaraṇaṁ sajoṣā durādharṣaṁ gṛṇate śarma yaṁsat ||
6.049.08a pathas-pathaḥ paripatiṁ vacasyā kāmena kṛto abhy ānaḻ arkam |
6.049.08c sa no rāsac churudhaś candrāgrā dhiyaṁ-dhiyaṁ sīṣadhāti pra pūṣā ||
6.049.09a prathamabhājaṁ yaśasaṁ vayodhāṁ supāṇiṁ devaṁ sugabhastim ṛbhvam |
6.049.09c hotā yakṣad yajatam pastyānām agnis tvaṣṭāraṁ suhavaṁ vibhāvā ||
6.049.10a bhuvanasya pitaraṁ gīrbhir ābhī rudraṁ divā vardhayā rudram aktau |
6.049.10c bṛhantam ṛṣvam ajaraṁ suṣumnam ṛdhag ghuvema kavineṣitāsaḥ ||
6.049.11a ā yuvānaḥ kavayo yajñiyāso maruto ganta gṛṇato varasyām |
6.049.11c acitraṁ cid dhi jinvathā vṛdhanta itthā nakṣanto naro aṅgirasvat ||
6.049.12a pra vīrāya pra tavase turāyājā yūtheva paśurakṣir astam |
6.049.12c sa pispṛśati tanvi śrutasya stṛbhir na nākaṁ vacanasya vipaḥ ||
6.049.13a yo rajāṁsi vimame pārthivāni triś cid viṣṇur manave bādhitāya |
6.049.13c tasya te śarmann upadadyamāne rāyā madema tanvā tanā ca ||
6.049.14a tan no 'hir budhnyo adbhir arkais tat parvatas tat savitā cano dhāt |
6.049.14c tad oṣadhībhir abhi rātiṣāco bhagaḥ puraṁdhir jinvatu pra rāye ||
6.049.15a nu no rayiṁ rathyaṁ carṣaṇiprām puruvīram maha ṛtasya gopām |
6.049.15c kṣayaṁ dātājaraṁ yena janān spṛdho adevīr abhi ca kramāma viśa ādevīr abhy aśnavāma ||

6.050.01a huve vo devīm aditiṁ namobhir mṛḻīkāya varuṇam mitram agnim |
6.050.01c abhikṣadām aryamaṇaṁ suśevaṁ trātṝn devān savitāram bhagaṁ ca ||
6.050.02a sujyotiṣaḥ sūrya dakṣapitṝn anāgāstve sumaho vīhi devān |
6.050.02c dvijanmāno ya ṛtasāpaḥ satyāḥ svarvanto yajatā agnijihvāḥ ||
6.050.03a uta dyāvāpṛthivī kṣatram uru bṛhad rodasī śaraṇaṁ suṣumne |
6.050.03c mahas karatho varivo yathā no 'sme kṣayāya dhiṣaṇe anehaḥ ||
6.050.04a ā no rudrasya sūnavo namantām adyā hūtāso vasavo 'dhṛṣṭāḥ |
6.050.04c yad īm arbhe mahati vā hitāso bādhe maruto ahvāma devān ||
6.050.05a mimyakṣa yeṣu rodasī nu devī siṣakti pūṣā abhyardhayajvā |
6.050.05c śrutvā havam maruto yad dha yātha bhūmā rejante adhvani pravikte ||
6.050.06a abhi tyaṁ vīraṁ girvaṇasam arcendram brahmaṇā jaritar navena |
6.050.06c śravad id dhavam upa ca stavāno rāsad vājām̐ upa maho gṛṇānaḥ ||
6.050.07a omānam āpo mānuṣīr amṛktaṁ dhāta tokāya tanayāya śaṁ yoḥ |
6.050.07c yūyaṁ hi ṣṭhā bhiṣajo mātṛtamā viśvasya sthātur jagato janitrīḥ ||
6.050.08a ā no devaḥ savitā trāyamāṇo hiraṇyapāṇir yajato jagamyāt |
6.050.08c yo datravām̐ uṣaso na pratīkaṁ vyūrṇute dāśuṣe vāryāṇi ||
6.050.09a uta tvaṁ sūno sahaso no adyā devām̐ asminn adhvare vavṛtyāḥ |
6.050.09c syām ahaṁ te sadam id rātau tava syām agne 'vasā suvīraḥ ||
6.050.10a uta tyā me havam ā jagmyātaṁ nāsatyā dhībhir yuvam aṅga viprā |
6.050.10c atriṁ na mahas tamaso 'mumuktaṁ tūrvataṁ narā duritād abhīke ||
6.050.11a te no rāyo dyumato vājavato dātāro bhūta nṛvataḥ purukṣoḥ |
6.050.11c daśasyanto divyāḥ pārthivāso gojātā apyā mṛḻatā ca devāḥ ||
6.050.12a te no rudraḥ sarasvatī sajoṣā mīḻhuṣmanto viṣṇur mṛḻantu vāyuḥ |
6.050.12c ṛbhukṣā vājo daivyo vidhātā parjanyāvātā pipyatām iṣaṁ naḥ ||
6.050.13a uta sya devaḥ savitā bhago no 'pāṁ napād avatu dānu papriḥ |
6.050.13c tvaṣṭā devebhir janibhiḥ sajoṣā dyaur devebhiḥ pṛthivī samudraiḥ ||
6.050.14a uta no 'hir budhnyaḥ śṛṇotv aja ekapāt pṛthivī samudraḥ |
6.050.14c viśve devā ṛtāvṛdho huvānāḥ stutā mantrāḥ kaviśastā avantu ||
6.050.15a evā napāto mama tasya dhībhir bharadvājā abhy arcanty arkaiḥ |
6.050.15c gnā hutāso vasavo 'dhṛṣṭā viśve stutāso bhūtā yajatrāḥ ||

6.051.01a ud u tyac cakṣur mahi mitrayor ām̐ eti priyaṁ varuṇayor adabdham |
6.051.01c ṛtasya śuci darśatam anīkaṁ rukmo na diva uditā vy adyaut ||
6.051.02a veda yas trīṇi vidathāny eṣāṁ devānāṁ janma sanutar ā ca vipraḥ |
6.051.02c ṛju marteṣu vṛjinā ca paśyann abhi caṣṭe sūro arya evān ||
6.051.03a stuṣa u vo maha ṛtasya gopān aditim mitraṁ varuṇaṁ sujātān |
6.051.03c aryamaṇam bhagam adabdhadhītīn acchā voce sadhanyaḥ pāvakān ||
6.051.04a riśādasaḥ satpatīm̐r adabdhān maho rājñaḥ suvasanasya dātṝn |
6.051.04c yūnaḥ sukṣatrān kṣayato divo nṝn ādityān yāmy aditiṁ duvoyu ||
6.051.05a dyauṣ pitaḥ pṛthivi mātar adhrug agne bhrātar vasavo mṛḻatā naḥ |
6.051.05c viśva ādityā adite sajoṣā asmabhyaṁ śarma bahulaṁ vi yanta ||
6.051.06a mā no vṛkāya vṛkye samasmā aghāyate rīradhatā yajatrāḥ |
6.051.06c yūyaṁ hi ṣṭhā rathyo nas tanūnāṁ yūyaṁ dakṣasya vacaso babhūva ||
6.051.07a mā va eno anyakṛtam bhujema mā tat karma vasavo yac cayadhve |
6.051.07c viśvasya hi kṣayatha viśvadevāḥ svayaṁ ripus tanvaṁ rīriṣīṣṭa ||
6.051.08a nama id ugraṁ nama ā vivāse namo dādhāra pṛthivīm uta dyām |
6.051.08c namo devebhyo nama īśa eṣāṁ kṛtaṁ cid eno namasā vivāse ||
6.051.09a ṛtasya vo rathyaḥ pūtadakṣān ṛtasya pastyasado adabdhān |
6.051.09c tām̐ ā namobhir urucakṣaso nṝn viśvān va ā name maho yajatrāḥ ||
6.051.10a te hi śreṣṭhavarcasas ta u nas tiro viśvāni duritā nayanti |
6.051.10c sukṣatrāso varuṇo mitro agnir ṛtadhītayo vakmarājasatyāḥ ||
6.051.11a te na indraḥ pṛthivī kṣāma vardhan pūṣā bhago aditiḥ pañca janāḥ |
6.051.11c suśarmāṇaḥ svavasaḥ sunīthā bhavantu naḥ sutrātrāsaḥ sugopāḥ ||
6.051.12a nū sadmānaṁ divyaṁ naṁśi devā bhāradvājaḥ sumatiṁ yāti hotā |
6.051.12c āsānebhir yajamāno miyedhair devānāṁ janma vasūyur vavanda ||
6.051.13a apa tyaṁ vṛjinaṁ ripuṁ stenam agne durādhyam |
6.051.13c daviṣṭham asya satpate kṛdhī sugam ||
6.051.14a grāvāṇaḥ soma no hi kaṁ sakhitvanāya vāvaśuḥ |
6.051.14c jahī ny atriṇam paṇiṁ vṛko hi ṣaḥ ||
6.051.15a yūyaṁ hi ṣṭhā sudānava indrajyeṣṭhā abhidyavaḥ |
6.051.15c kartā no adhvann ā sugaṁ gopā amā ||
6.051.16a api panthām aganmahi svastigām anehasam |
6.051.16c yena viśvāḥ pari dviṣo vṛṇakti vindate vasu ||

6.052.01a na tad divā na pṛthivyānu manye na yajñena nota śamībhir ābhiḥ |
6.052.01c ubjantu taṁ subhvaḥ parvatāso ni hīyatām atiyājasya yaṣṭā ||
6.052.02a ati vā yo maruto manyate no brahma vā yaḥ kriyamāṇaṁ ninitsāt |
6.052.02c tapūṁṣi tasmai vṛjināni santu brahmadviṣam abhi taṁ śocatu dyauḥ ||
6.052.03a kim aṅga tvā brahmaṇaḥ soma gopāṁ kim aṅga tvāhur abhiśastipāṁ naḥ |
6.052.03c kim aṅga naḥ paśyasi nidyamānān brahmadviṣe tapuṣiṁ hetim asya ||
6.052.04a avantu mām uṣaso jāyamānā avantu mā sindhavaḥ pinvamānāḥ |
6.052.04c avantu mā parvatāso dhruvāso 'vantu mā pitaro devahūtau ||
6.052.05a viśvadānīṁ sumanasaḥ syāma paśyema nu sūryam uccarantam |
6.052.05c tathā karad vasupatir vasūnāṁ devām̐ ohāno 'vasāgamiṣṭhaḥ ||
6.052.06a indro nediṣṭham avasāgamiṣṭhaḥ sarasvatī sindhubhiḥ pinvamānā |
6.052.06c parjanyo na oṣadhībhir mayobhur agniḥ suśaṁsaḥ suhavaḥ piteva ||
6.052.07a viśve devāsa ā gata śṛṇutā ma imaṁ havam |
6.052.07c edam barhir ni ṣīdata ||
6.052.08a yo vo devā ghṛtasnunā havyena pratibhūṣati |
6.052.08c taṁ viśva upa gacchatha ||
6.052.09a upa naḥ sūnavo giraḥ śṛṇvantv amṛtasya ye |
6.052.09c sumṛḻīkā bhavantu naḥ ||
6.052.10a viśve devā ṛtāvṛdha ṛtubhir havanaśrutaḥ |
6.052.10c juṣantāṁ yujyam payaḥ ||
6.052.11a stotram indro marudgaṇas tvaṣṭṛmān mitro aryamā |
6.052.11c imā havyā juṣanta naḥ ||
6.052.12a imaṁ no agne adhvaraṁ hotar vayunaśo yaja |
6.052.12c cikitvān daivyaṁ janam ||
6.052.13a viśve devāḥ śṛṇutemaṁ havam me ye antarikṣe ya upa dyavi ṣṭha |
6.052.13c ye agnijihvā uta vā yajatrā āsadyāsmin barhiṣi mādayadhvam ||
6.052.14a viśve devā mama śṛṇvantu yajñiyā ubhe rodasī apāṁ napāc ca manma |
6.052.14c mā vo vacāṁsi paricakṣyāṇi vocaṁ sumneṣv id vo antamā madema ||
6.052.15a ye ke ca jmā mahino ahimāyā divo jajñire apāṁ sadhasthe |
6.052.15c te asmabhyam iṣaye viśvam āyuḥ kṣapa usrā varivasyantu devāḥ ||
6.052.16a agnīparjanyāv avataṁ dhiyam me 'smin have suhavā suṣṭutiṁ naḥ |
6.052.16c iḻām anyo janayad garbham anyaḥ prajāvatīr iṣa ā dhattam asme ||
6.052.17a stīrṇe barhiṣi samidhāne agnau sūktena mahā namasā vivāse |
6.052.17c asmin no adya vidathe yajatrā viśve devā haviṣi mādayadhvam ||

6.053.01a vayam u tvā pathas pate rathaṁ na vājasātaye |
6.053.01c dhiye pūṣann ayujmahi ||
6.053.02a abhi no naryaṁ vasu vīram prayatadakṣiṇam |
6.053.02c vāmaṁ gṛhapatiṁ naya ||
6.053.03a aditsantaṁ cid āghṛṇe pūṣan dānāya codaya |
6.053.03c paṇeś cid vi mradā manaḥ ||
6.053.04a vi patho vājasātaye cinuhi vi mṛdho jahi |
6.053.04c sādhantām ugra no dhiyaḥ ||
6.053.05a pari tṛndhi paṇīnām ārayā hṛdayā kave |
6.053.05c athem asmabhyaṁ randhaya ||
6.053.06a vi pūṣann ārayā tuda paṇer iccha hṛdi priyam |
6.053.06c athem asmabhyaṁ randhaya ||
6.053.07a ā rikha kikirā kṛṇu paṇīnāṁ hṛdayā kave |
6.053.07c athem asmabhyaṁ randhaya ||
6.053.08a yām pūṣan brahmacodanīm ārām bibharṣy āghṛṇe |
6.053.08c tayā samasya hṛdayam ā rikha kikirā kṛṇu ||
6.053.09a yā te aṣṭrā goopaśāghṛṇe paśusādhanī |
6.053.09c tasyās te sumnam īmahe ||
6.053.10a uta no goṣaṇiṁ dhiyam aśvasāṁ vājasām uta |
6.053.10c nṛvat kṛṇuhi vītaye ||

6.054.01a sam pūṣan viduṣā naya yo añjasānuśāsati |
6.054.01c ya evedam iti bravat ||
6.054.02a sam u pūṣṇā gamemahi yo gṛhām̐ abhiśāsati |
6.054.02c ima eveti ca bravat ||
6.054.03a pūṣṇaś cakraṁ na riṣyati na kośo 'va padyate |
6.054.03c no asya vyathate paviḥ ||
6.054.04a yo asmai haviṣāvidhan na tam pūṣāpi mṛṣyate |
6.054.04c prathamo vindate vasu ||
6.054.05a pūṣā gā anv etu naḥ pūṣā rakṣatv arvataḥ |
6.054.05c pūṣā vājaṁ sanotu naḥ ||
6.054.06a pūṣann anu pra gā ihi yajamānasya sunvataḥ |
6.054.06c asmākaṁ stuvatām uta ||
6.054.07a mākir neśan mākīṁ riṣan mākīṁ saṁ śāri kevaṭe |
6.054.07c athāriṣṭābhir ā gahi ||
6.054.08a śṛṇvantam pūṣaṇaṁ vayam iryam anaṣṭavedasam |
6.054.08c īśānaṁ rāya īmahe ||
6.054.09a pūṣan tava vrate vayaṁ na riṣyema kadā cana |
6.054.09c stotāras ta iha smasi ||
6.054.10a pari pūṣā parastād dhastaṁ dadhātu dakṣiṇam |
6.054.10c punar no naṣṭam ājatu ||

6.055.01a ehi vāṁ vimuco napād āghṛṇe saṁ sacāvahai |
6.055.01c rathīr ṛtasya no bhava ||
6.055.02a rathītamaṁ kapardinam īśānaṁ rādhaso mahaḥ |
6.055.02c rāyaḥ sakhāyam īmahe ||
6.055.03a rāyo dhārāsy āghṛṇe vaso rāśir ajāśva |
6.055.03c dhīvato-dhīvataḥ sakhā ||
6.055.04a pūṣaṇaṁ nv ajāśvam upa stoṣāma vājinam |
6.055.04c svasur yo jāra ucyate ||
6.055.05a mātur didhiṣum abravaṁ svasur jāraḥ śṛṇotu naḥ |
6.055.05c bhrātendrasya sakhā mama ||
6.055.06a ājāsaḥ pūṣaṇaṁ rathe niśṛmbhās te janaśriyam |
6.055.06c devaṁ vahantu bibhrataḥ ||

6.056.01a ya enam ādideśati karambhād iti pūṣaṇam |
6.056.01c na tena deva ādiśe ||
6.056.02a uta ghā sa rathītamaḥ sakhyā satpatir yujā |
6.056.02c indro vṛtrāṇi jighnate ||
6.056.03a utādaḥ paruṣe gavi sūraś cakraṁ hiraṇyayam |
6.056.03c ny airayad rathītamaḥ ||
6.056.04a yad adya tvā puruṣṭuta bravāma dasra mantumaḥ |
6.056.04c tat su no manma sādhaya ||
6.056.05a imaṁ ca no gaveṣaṇaṁ sātaye sīṣadho gaṇam |
6.056.05c ārāt pūṣann asi śrutaḥ ||
6.056.06a ā te svastim īmaha āreaghām upāvasum |
6.056.06c adyā ca sarvatātaye śvaś ca sarvatātaye ||

6.057.01a indrā nu pūṣaṇā vayaṁ sakhyāya svastaye |
6.057.01c huvema vājasātaye ||
6.057.02a somam anya upāsadat pātave camvoḥ sutam |
6.057.02c karambham anya icchati ||
6.057.03a ajā anyasya vahnayo harī anyasya sambhṛtā |
6.057.03c tābhyāṁ vṛtrāṇi jighnate ||
6.057.04a yad indro anayad rito mahīr apo vṛṣantamaḥ |
6.057.04c tatra pūṣābhavat sacā ||
6.057.05a tām pūṣṇaḥ sumatiṁ vayaṁ vṛkṣasya pra vayām iva |
6.057.05c indrasya cā rabhāmahe ||
6.057.06a ut pūṣaṇaṁ yuvāmahe 'bhīśūm̐r iva sārathiḥ |
6.057.06c mahyā indraṁ svastaye ||

6.058.01a śukraṁ te anyad yajataṁ te anyad viṣurūpe ahanī dyaur ivāsi |
6.058.01c viśvā hi māyā avasi svadhāvo bhadrā te pūṣann iha rātir astu ||
6.058.02a ajāśvaḥ paśupā vājapastyo dhiyaṁjinvo bhuvane viśve arpitaḥ |
6.058.02c aṣṭrām pūṣā śithirām udvarīvṛjat saṁcakṣāṇo bhuvanā deva īyate ||
6.058.03a yās te pūṣan nāvo antaḥ samudre hiraṇyayīr antarikṣe caranti |
6.058.03c tābhir yāsi dūtyāṁ sūryasya kāmena kṛta śrava icchamānaḥ ||
6.058.04a pūṣā subandhur diva ā pṛthivyā iḻas patir maghavā dasmavarcāḥ |
6.058.04c yaṁ devāso adaduḥ sūryāyai kāmena kṛtaṁ tavasaṁ svañcam ||

6.059.01a pra nu vocā suteṣu vāṁ vīryā yāni cakrathuḥ |
6.059.01c hatāso vām pitaro devaśatrava indrāgnī jīvatho yuvam ||
6.059.02a baḻ itthā mahimā vām indrāgnī paniṣṭha ā |
6.059.02c samāno vāṁ janitā bhrātarā yuvaṁ yamāv ihehamātarā ||
6.059.03a okivāṁsā sute sacām̐ aśvā saptī ivādane |
6.059.03c indrā nv agnī avaseha vajriṇā vayaṁ devā havāmahe ||
6.059.04a ya indrāgnī suteṣu vāṁ stavat teṣv ṛtāvṛdhā |
6.059.04c joṣavākaṁ vadataḥ pajrahoṣiṇā na devā bhasathaś cana ||
6.059.05a indrāgnī ko asya vāṁ devau martaś ciketati |
6.059.05c viṣūco aśvān yuyujāna īyata ekaḥ samāna ā rathe ||
6.059.06a indrāgnī apād iyam pūrvāgāt padvatībhyaḥ |
6.059.06c hitvī śiro jihvayā vāvadac carat triṁśat padā ny akramīt ||
6.059.07a indrāgnī ā hi tanvate naro dhanvāni bāhvoḥ |
6.059.07c mā no asmin mahādhane parā varktaṁ gaviṣṭiṣu ||
6.059.08a indrāgnī tapanti māghā aryo arātayaḥ |
6.059.08c apa dveṣāṁsy ā kṛtaṁ yuyutaṁ sūryād adhi ||
6.059.09a indrāgnī yuvor api vasu divyāni pārthivā |
6.059.09c ā na iha pra yacchataṁ rayiṁ viśvāyupoṣasam ||
6.059.10a indrāgnī ukthavāhasā stomebhir havanaśrutā |
6.059.10c viśvābhir gīrbhir ā gatam asya somasya pītaye ||

6.060.01a śnathad vṛtram uta sanoti vājam indrā yo agnī sahurī saparyāt |
6.060.01c irajyantā vasavyasya bhūreḥ sahastamā sahasā vājayantā ||
6.060.02a tā yodhiṣṭam abhi gā indra nūnam apaḥ svar uṣaso agna ūḻhāḥ |
6.060.02c diśaḥ svar uṣasa indra citrā apo gā agne yuvase niyutvān ||
6.060.03a ā vṛtrahaṇā vṛtrahabhiḥ śuṣmair indra yātaṁ namobhir agne arvāk |
6.060.03c yuvaṁ rādhobhir akavebhir indrāgne asme bhavatam uttamebhiḥ ||
6.060.04a tā huve yayor idam papne viśvam purā kṛtam |
6.060.04c indrāgnī na mardhataḥ ||
6.060.05a ugrā vighaninā mṛdha indrāgnī havāmahe |
6.060.05c tā no mṛḻāta īdṛśe ||
6.060.06a hato vṛtrāṇy āryā hato dāsāni satpatī |
6.060.06c hato viśvā apa dviṣaḥ ||
6.060.07a indrāgnī yuvām ime 'bhi stomā anūṣata |
6.060.07c pibataṁ śambhuvā sutam ||
6.060.08a yā vāṁ santi puruspṛho niyuto dāśuṣe narā |
6.060.08c indrāgnī tābhir ā gatam ||
6.060.09a tābhir ā gacchataṁ naropedaṁ savanaṁ sutam |
6.060.09c indrāgnī somapītaye ||
6.060.10a tam īḻiṣva yo arciṣā vanā viśvā pariṣvajat |
6.060.10c kṛṣṇā kṛṇoti jihvayā ||
6.060.11a ya iddha āvivāsati sumnam indrasya martyaḥ |
6.060.11c dyumnāya sutarā apaḥ ||
6.060.12a tā no vājavatīr iṣa āśūn pipṛtam arvataḥ |
6.060.12c indram agniṁ ca voḻhave ||
6.060.13a ubhā vām indrāgnī āhuvadhyā ubhā rādhasaḥ saha mādayadhyai |
6.060.13c ubhā dātārāv iṣāṁ rayīṇām ubhā vājasya sātaye huve vām ||
6.060.14a ā no gavyebhir aśvyair vasavyair upa gacchatam |
6.060.14c sakhāyau devau sakhyāya śambhuvendrāgnī tā havāmahe ||
6.060.15a indrāgnī śṛṇutaṁ havaṁ yajamānasya sunvataḥ |
6.060.15c vītaṁ havyāny ā gatam pibataṁ somyam madhu ||

6.061.01a iyam adadād rabhasam ṛṇacyutaṁ divodāsaṁ vadhryaśvāya dāśuṣe |
6.061.01c yā śaśvantam ācakhādāvasam paṇiṁ tā te dātrāṇi taviṣā sarasvati ||
6.061.02a iyaṁ śuṣmebhir bisakhā ivārujat sānu girīṇāṁ taviṣebhir ūrmibhiḥ |
6.061.02c pārāvataghnīm avase suvṛktibhiḥ sarasvatīm ā vivāsema dhītibhiḥ ||
6.061.03a sarasvati devanido ni barhaya prajāṁ viśvasya bṛsayasya māyinaḥ |
6.061.03c uta kṣitibhyo 'vanīr avindo viṣam ebhyo asravo vājinīvati ||
6.061.04a pra ṇo devī sarasvatī vājebhir vājinīvatī |
6.061.04c dhīnām avitry avatu ||
6.061.05a yas tvā devi sarasvaty upabrūte dhane hite |
6.061.05c indraṁ na vṛtratūrye ||
6.061.06a tvaṁ devi sarasvaty avā vājeṣu vājini |
6.061.06c radā pūṣeva naḥ sanim ||
6.061.07a uta syā naḥ sarasvatī ghorā hiraṇyavartaniḥ |
6.061.07c vṛtraghnī vaṣṭi suṣṭutim ||
6.061.08a yasyā ananto ahrutas tveṣaś cariṣṇur arṇavaḥ |
6.061.08c amaś carati roruvat ||
6.061.09a sā no viśvā ati dviṣaḥ svasṝr anyā ṛtāvarī |
6.061.09c atann aheva sūryaḥ ||
6.061.10a uta naḥ priyā priyāsu saptasvasā sujuṣṭā |
6.061.10c sarasvatī stomyā bhūt ||
6.061.11a āpapruṣī pārthivāny uru rajo antarikṣam |
6.061.11c sarasvatī nidas pātu ||
6.061.12a triṣadhasthā saptadhātuḥ pañca jātā vardhayantī |
6.061.12c vāje-vāje havyā bhūt ||
6.061.13a pra yā mahimnā mahināsu cekite dyumnebhir anyā apasām apastamā |
6.061.13c ratha iva bṛhatī vibhvane kṛtopastutyā cikituṣā sarasvatī ||
6.061.14a sarasvaty abhi no neṣi vasyo māpa spharīḥ payasā mā na ā dhak |
6.061.14c juṣasva naḥ sakhyā veśyā ca mā tvat kṣetrāṇy araṇāni ganma ||

6.062.01a stuṣe narā divo asya prasantāśvinā huve jaramāṇo arkaiḥ |
6.062.01c yā sadya usrā vyuṣi jmo antān yuyūṣataḥ pary urū varāṁsi ||
6.062.02a tā yajñam ā śucibhiś cakramāṇā rathasya bhānuṁ rurucū rajobhiḥ |
6.062.02c purū varāṁsy amitā mimānāpo dhanvāny ati yātho ajrān ||
6.062.03a tā ha tyad vartir yad aradhram ugretthā dhiya ūhathuḥ śaśvad aśvaiḥ |
6.062.03c manojavebhir iṣiraiḥ śayadhyai pari vyathir dāśuṣo martyasya ||
6.062.04a tā navyaso jaramāṇasya manmopa bhūṣato yuyujānasaptī |
6.062.04c śubham pṛkṣam iṣam ūrjaṁ vahantā hotā yakṣat pratno adhrug yuvānā ||
6.062.05a tā valgū dasrā puruśākatamā pratnā navyasā vacasā vivāse |
6.062.05c yā śaṁsate stuvate śambhaviṣṭhā babhūvatur gṛṇate citrarātī ||
6.062.06a tā bhujyuṁ vibhir adbhyaḥ samudrāt tugrasya sūnum ūhathū rajobhiḥ |
6.062.06c areṇubhir yojanebhir bhujantā patatribhir arṇaso nir upasthāt ||
6.062.07a vi jayuṣā rathyā yātam adriṁ śrutaṁ havaṁ vṛṣaṇā vadhrimatyāḥ |
6.062.07c daśasyantā śayave pipyathur gām iti cyavānā sumatim bhuraṇyū ||
6.062.08a yad rodasī pradivo asti bhūmā heḻo devānām uta martyatrā |
6.062.08c tad ādityā vasavo rudriyāso rakṣoyuje tapur aghaṁ dadhāta ||
6.062.09a ya īṁ rājānāv ṛtuthā vidadhad rajaso mitro varuṇaś ciketat |
6.062.09c gambhīrāya rakṣase hetim asya droghāya cid vacasa ānavāya ||
6.062.10a antaraiś cakrais tanayāya vartir dyumatā yātaṁ nṛvatā rathena |
6.062.10c sanutyena tyajasā martyasya vanuṣyatām api śīrṣā vavṛktam ||
6.062.11a ā paramābhir uta madhyamābhir niyudbhir yātam avamābhir arvāk |
6.062.11c dṛḻhasya cid gomato vi vrajasya duro vartaṁ gṛṇate citrarātī ||

6.063.01a kva tyā valgū puruhūtādya dūto na stomo 'vidan namasvān |
6.063.01c ā yo arvāṅ nāsatyā vavarta preṣṭhā hy asatho asya manman ||
6.063.02a aram me gantaṁ havanāyāsmai gṛṇānā yathā pibātho andhaḥ |
6.063.02c pari ha tyad vartir yātho riṣo na yat paro nāntaras tuturyāt ||
6.063.03a akāri vām andhaso varīmann astāri barhiḥ suprāyaṇatamam |
6.063.03c uttānahasto yuvayur vavandā vāṁ nakṣanto adraya āñjan ||
6.063.04a ūrdhvo vām agnir adhvareṣv asthāt pra rātir eti jūrṇinī ghṛtācī |
6.063.04c pra hotā gūrtamanā urāṇo 'yukta yo nāsatyā havīman ||
6.063.05a adhi śriye duhitā sūryasya rathaṁ tasthau purubhujā śatotim |
6.063.05c pra māyābhir māyinā bhūtam atra narā nṛtū janiman yajñiyānām ||
6.063.06a yuvaṁ śrībhir darśatābhir ābhiḥ śubhe puṣṭim ūhathuḥ sūryāyāḥ |
6.063.06c pra vāṁ vayo vapuṣe 'nu paptan nakṣad vāṇī suṣṭutā dhiṣṇyā vām ||
6.063.07a ā vāṁ vayo 'śvāso vahiṣṭhā abhi prayo nāsatyā vahantu |
6.063.07c pra vāṁ ratho manojavā asarjīṣaḥ pṛkṣa iṣidho anu pūrvīḥ ||
6.063.08a puru hi vām purubhujā deṣṇaṁ dhenuṁ na iṣam pinvatam asakrām |
6.063.08c stutaś ca vām mādhvī suṣṭutiś ca rasāś ca ye vām anu rātim agman ||
6.063.09a uta ma ṛjre purayasya raghvī sumīḻhe śatam peruke ca pakvā |
6.063.09c śāṇḍo dād dhiraṇinaḥ smaddiṣṭīn daśa vaśāso abhiṣāca ṛṣvān ||
6.063.10a saṁ vāṁ śatā nāsatyā sahasrāśvānām purupanthā gire dāt |
6.063.10c bharadvājāya vīra nū gire dād dhatā rakṣāṁsi purudaṁsasā syuḥ ||
6.063.11a ā vāṁ sumne variman sūribhiḥ ṣyām ||

6.064.01a ud u śriya uṣaso rocamānā asthur apāṁ normayo ruśantaḥ |
6.064.01c kṛṇoti viśvā supathā sugāny abhūd u vasvī dakṣiṇā maghonī ||
6.064.02a bhadrā dadṛkṣa urviyā vi bhāsy ut te śocir bhānavo dyām apaptan |
6.064.02c āvir vakṣaḥ kṛṇuṣe śumbhamānoṣo devi rocamānā mahobhiḥ ||
6.064.03a vahanti sīm aruṇāso ruśanto gāvaḥ subhagām urviyā prathānām |
6.064.03c apejate śūro asteva śatrūn bādhate tamo ajiro na voḻhā ||
6.064.04a sugota te supathā parvateṣv avāte apas tarasi svabhāno |
6.064.04c sā na ā vaha pṛthuyāmann ṛṣve rayiṁ divo duhitar iṣayadhyai ||
6.064.05a sā vaha yokṣabhir avātoṣo varaṁ vahasi joṣam anu |
6.064.05c tvaṁ divo duhitar yā ha devī pūrvahūtau maṁhanā darśatā bhūḥ ||
6.064.06a ut te vayaś cid vasater apaptan naraś ca ye pitubhājo vyuṣṭau |
6.064.06c amā sate vahasi bhūri vāmam uṣo devi dāśuṣe martyāya ||

6.065.01a eṣā syā no duhitā divojāḥ kṣitīr ucchantī mānuṣīr ajīgaḥ |
6.065.01c yā bhānunā ruśatā rāmyāsv ajñāyi tiras tamasaś cid aktūn ||
6.065.02a vi tad yayur aruṇayugbhir aśvaiś citram bhānty uṣasaś candrarathāḥ |
6.065.02c agraṁ yajñasya bṛhato nayantīr vi tā bādhante tama ūrmyāyāḥ ||
6.065.03a śravo vājam iṣam ūrjaṁ vahantīr ni dāśuṣa uṣaso martyāya |
6.065.03c maghonīr vīravat patyamānā avo dhāta vidhate ratnam adya ||
6.065.04a idā hi vo vidhate ratnam astīdā vīrāya dāśuṣa uṣāsaḥ |
6.065.04c idā viprāya jarate yad ukthā ni ṣma māvate vahathā purā cit ||
6.065.05a idā hi ta uṣo adrisāno gotrā gavām aṅgiraso gṛṇanti |
6.065.05c vy arkeṇa bibhidur brahmaṇā ca satyā nṛṇām abhavad devahūtiḥ ||
6.065.06a ucchā divo duhitaḥ pratnavan no bharadvājavad vidhate maghoni |
6.065.06c suvīraṁ rayiṁ gṛṇate rirīhy urugāyam adhi dhehi śravo naḥ ||

6.066.01a vapur nu tac cikituṣe cid astu samānaṁ nāma dhenu patyamānam |
6.066.01c marteṣv anyad dohase pīpāya sakṛc chukraṁ duduhe pṛśnir ūdhaḥ ||
6.066.02a ye agnayo na śośucann idhānā dvir yat trir maruto vāvṛdhanta |
6.066.02c areṇavo hiraṇyayāsa eṣāṁ sākaṁ nṛmṇaiḥ pauṁsyebhiś ca bhūvan ||
6.066.03a rudrasya ye mīḻhuṣaḥ santi putrā yām̐ś co nu dādhṛvir bharadhyai |
6.066.03c vide hi mātā maho mahī ṣā set pṛśniḥ subhve garbham ādhāt ||
6.066.04a na ya īṣante januṣo 'yā nv antaḥ santo 'vadyāni punānāḥ |
6.066.04c nir yad duhre śucayo 'nu joṣam anu śriyā tanvam ukṣamāṇāḥ ||
6.066.05a makṣū na yeṣu dohase cid ayā ā nāma dhṛṣṇu mārutaṁ dadhānāḥ |
6.066.05c na ye staunā ayāso mahnā nū cit sudānur ava yāsad ugrān ||
6.066.06a ta id ugrāḥ śavasā dhṛṣṇuṣeṇā ubhe yujanta rodasī sumeke |
6.066.06c adha smaiṣu rodasī svaśocir āmavatsu tasthau na rokaḥ ||
6.066.07a aneno vo maruto yāmo astv anaśvaś cid yam ajaty arathīḥ |
6.066.07c anavaso anabhīśū rajastūr vi rodasī pathyā yāti sādhan ||
6.066.08a nāsya vartā na tarutā nv asti maruto yam avatha vājasātau |
6.066.08c toke vā goṣu tanaye yam apsu sa vrajaṁ dartā pārye adha dyoḥ ||
6.066.09a pra citram arkaṁ gṛṇate turāya mārutāya svatavase bharadhvam |
6.066.09c ye sahāṁsi sahasā sahante rejate agne pṛthivī makhebhyaḥ ||
6.066.10a tviṣīmanto adhvarasyeva didyut tṛṣucyavaso juhvo nāgneḥ |
6.066.10c arcatrayo dhunayo na vīrā bhrājajjanmāno maruto adhṛṣṭāḥ ||
6.066.11a taṁ vṛdhantam mārutam bhrājadṛṣṭiṁ rudrasya sūnuṁ havasā vivāse |
6.066.11c divaḥ śardhāya śucayo manīṣā girayo nāpa ugrā aspṛdhran ||

6.067.01a viśveṣāṁ vaḥ satāṁ jyeṣṭhatamā gīrbhir mitrāvaruṇā vāvṛdhadhyai |
6.067.01c saṁ yā raśmeva yamatur yamiṣṭhā dvā janām̐ asamā bāhubhiḥ svaiḥ ||
6.067.02a iyam mad vām pra stṛṇīte manīṣopa priyā namasā barhir accha |
6.067.02c yantaṁ no mitrāvaruṇāv adhṛṣṭaṁ chardir yad vāṁ varūthyaṁ sudānū ||
6.067.03a ā yātam mitrāvaruṇā suśasty upa priyā namasā hūyamānā |
6.067.03c saṁ yāv apnaḥstho apaseva janāñ chrudhīyataś cid yatatho mahitvā ||
6.067.04a aśvā na yā vājinā pūtabandhū ṛtā yad garbham aditir bharadhyai |
6.067.04c pra yā mahi mahāntā jāyamānā ghorā martāya ripave ni dīdhaḥ ||
6.067.05a viśve yad vām maṁhanā mandamānāḥ kṣatraṁ devāso adadhuḥ sajoṣāḥ |
6.067.05c pari yad bhūtho rodasī cid urvī santi spaśo adabdhāso amūrāḥ ||
6.067.06a tā hi kṣatraṁ dhārayethe anu dyūn dṛṁhethe sānum upamād iva dyoḥ |
6.067.06c dṛḻho nakṣatra uta viśvadevo bhūmim ātān dyāṁ dhāsināyoḥ ||
6.067.07a tā vigraṁ dhaithe jaṭharam pṛṇadhyā ā yat sadma sabhṛtayaḥ pṛṇanti |
6.067.07c na mṛṣyante yuvatayo 'vātā vi yat payo viśvajinvā bharante ||
6.067.08a tā jihvayā sadam edaṁ sumedhā ā yad vāṁ satyo aratir ṛte bhūt |
6.067.08c tad vām mahitvaṁ ghṛtānnāv astu yuvaṁ dāśuṣe vi cayiṣṭam aṁhaḥ ||
6.067.09a pra yad vām mitrāvaruṇā spūrdhan priyā dhāma yuvadhitā minanti |
6.067.09c na ye devāsa ohasā na martā ayajñasāco apyo na putrāḥ ||
6.067.10a vi yad vācaṁ kīstāso bharante śaṁsanti ke cin nivido manānāḥ |
6.067.10c ād vām bravāma satyāny ukthā nakir devebhir yatatho mahitvā ||
6.067.11a avor itthā vāṁ chardiṣo abhiṣṭau yuvor mitrāvaruṇāv askṛdhoyu |
6.067.11c anu yad gāvaḥ sphurān ṛjipyaṁ dhṛṣṇuṁ yad raṇe vṛṣaṇaṁ yunajan ||

6.068.01a śruṣṭī vāṁ yajña udyataḥ sajoṣā manuṣvad vṛktabarhiṣo yajadhyai |
6.068.01c ā ya indrāvaruṇāv iṣe adya mahe sumnāya maha āvavartat ||
6.068.02a tā hi śreṣṭhā devatātā tujā śūrāṇāṁ śaviṣṭhā tā hi bhūtam |
6.068.02c maghonām maṁhiṣṭhā tuviśuṣma ṛtena vṛtraturā sarvasenā ||
6.068.03a tā gṛṇīhi namasyebhiḥ śūṣaiḥ sumnebhir indrāvaruṇā cakānā |
6.068.03c vajreṇānyaḥ śavasā hanti vṛtraṁ siṣakty anyo vṛjaneṣu vipraḥ ||
6.068.04a gnāś ca yan naraś ca vāvṛdhanta viśve devāso narāṁ svagūrtāḥ |
6.068.04c praibhya indrāvaruṇā mahitvā dyauś ca pṛthivi bhūtam urvī ||
6.068.05a sa it sudānuḥ svavām̐ ṛtāvendrā yo vāṁ varuṇa dāśati tman |
6.068.05c iṣā sa dviṣas tared dāsvān vaṁsad rayiṁ rayivataś ca janān ||
6.068.06a yaṁ yuvaṁ dāśvadhvarāya devā rayiṁ dhattho vasumantam purukṣum |
6.068.06c asme sa indrāvaruṇāv api ṣyāt pra yo bhanakti vanuṣām aśastīḥ ||
6.068.07a uta naḥ sutrātro devagopāḥ sūribhya indrāvaruṇā rayiḥ ṣyāt |
6.068.07c yeṣāṁ śuṣmaḥ pṛtanāsu sāhvān pra sadyo dyumnā tirate taturiḥ ||
6.068.08a nū na indrāvaruṇā gṛṇānā pṛṅktaṁ rayiṁ sauśravasāya devā |
6.068.08c itthā gṛṇanto mahinasya śardho 'po na nāvā duritā tarema ||
6.068.09a pra samrāje bṛhate manma nu priyam arca devāya varuṇāya saprathaḥ |
6.068.09c ayaṁ ya urvī mahinā mahivrataḥ kratvā vibhāty ajaro na śociṣā ||
6.068.10a indrāvaruṇā sutapāv imaṁ sutaṁ somam pibatam madyaṁ dhṛtavratā |
6.068.10c yuvo ratho adhvaraṁ devavītaye prati svasaram upa yāti pītaye ||
6.068.11a indrāvaruṇā madhumattamasya vṛṣṇaḥ somasya vṛṣaṇā vṛṣethām |
6.068.11c idaṁ vām andhaḥ pariṣiktam asme āsadyāsmin barhiṣi mādayethām ||

6.069.01a saṁ vāṁ karmaṇā sam iṣā hinomīndrāviṣṇū apasas pāre asya |
6.069.01c juṣethāṁ yajñaṁ draviṇaṁ ca dhattam ariṣṭair naḥ pathibhiḥ pārayantā ||
6.069.02a yā viśvāsāṁ janitārā matīnām indrāviṣṇū kalaśā somadhānā |
6.069.02c pra vāṁ giraḥ śasyamānā avantu pra stomāso gīyamānāso arkaiḥ ||
6.069.03a indrāviṣṇū madapatī madānām ā somaṁ yātaṁ draviṇo dadhānā |
6.069.03c saṁ vām añjantv aktubhir matīnāṁ saṁ stomāsaḥ śasyamānāsa ukthaiḥ ||
6.069.04a ā vām aśvāso abhimātiṣāha indrāviṣṇū sadhamādo vahantu |
6.069.04c juṣethāṁ viśvā havanā matīnām upa brahmāṇi śṛṇutaṁ giro me ||
6.069.05a indrāviṣṇū tat panayāyyaṁ vāṁ somasya mada uru cakramāthe |
6.069.05c akṛṇutam antarikṣaṁ varīyo 'prathataṁ jīvase no rajāṁsi ||
6.069.06a indrāviṣṇū haviṣā vāvṛdhānāgrādvānā namasā rātahavyā |
6.069.06c ghṛtāsutī draviṇaṁ dhattam asme samudraḥ sthaḥ kalaśaḥ somadhānaḥ ||
6.069.07a indrāviṣṇū pibatam madhvo asya somasya dasrā jaṭharam pṛṇethām |
6.069.07c ā vām andhāṁsi madirāṇy agmann upa brahmāṇi śṛṇutaṁ havam me ||
6.069.08a ubhā jigyathur na parā jayethe na parā jigye kataraś canainoḥ |
6.069.08c indraś ca viṣṇo yad apaspṛdhethāṁ tredhā sahasraṁ vi tad airayethām ||

6.070.01a ghṛtavatī bhuvanānām abhiśriyorvī pṛthvī madhudughe supeśasā |
6.070.01c dyāvāpṛthivī varuṇasya dharmaṇā viṣkabhite ajare bhūriretasā ||
6.070.02a asaścantī bhūridhāre payasvatī ghṛtaṁ duhāte sukṛte śucivrate |
6.070.02c rājantī asya bhuvanasya rodasī asme retaḥ siñcataṁ yan manurhitam ||
6.070.03a yo vām ṛjave kramaṇāya rodasī marto dadāśa dhiṣaṇe sa sādhati |
6.070.03c pra prajābhir jāyate dharmaṇas pari yuvoḥ siktā viṣurūpāṇi savratā ||
6.070.04a ghṛtena dyāvāpṛthivī abhīvṛte ghṛtaśriyā ghṛtapṛcā ghṛtāvṛdhā |
6.070.04c urvī pṛthvī hotṛvūrye purohite te id viprā īḻate sumnam iṣṭaye ||
6.070.05a madhu no dyāvāpṛthivī mimikṣatām madhuścutā madhudughe madhuvrate |
6.070.05c dadhāne yajñaṁ draviṇaṁ ca devatā mahi śravo vājam asme suvīryam ||
6.070.06a ūrjaṁ no dyauś ca pṛthivī ca pinvatām pitā mātā viśvavidā sudaṁsasā |
6.070.06c saṁrarāṇe rodasī viśvaśambhuvā saniṁ vājaṁ rayim asme sam invatām ||

6.071.01a ud u ṣya devaḥ savitā hiraṇyayā bāhū ayaṁsta savanāya sukratuḥ |
6.071.01c ghṛtena pāṇī abhi pruṣṇute makho yuvā sudakṣo rajaso vidharmaṇi ||
6.071.02a devasya vayaṁ savituḥ savīmani śreṣṭhe syāma vasunaś ca dāvane |
6.071.02c yo viśvasya dvipado yaś catuṣpado niveśane prasave cāsi bhūmanaḥ ||
6.071.03a adabdhebhiḥ savitaḥ pāyubhiṣ ṭvaṁ śivebhir adya pari pāhi no gayam |
6.071.03c hiraṇyajihvaḥ suvitāya navyase rakṣā mākir no aghaśaṁsa īśata ||
6.071.04a ud u ṣya devaḥ savitā damūnā hiraṇyapāṇiḥ pratidoṣam asthāt |
6.071.04c ayohanur yajato mandrajihva ā dāśuṣe suvati bhūri vāmam ||
6.071.05a ud ū ayām̐ upavakteva bāhū hiraṇyayā savitā supratīkā |
6.071.05c divo rohāṁsy aruhat pṛthivyā arīramat patayat kac cid abhvam ||
6.071.06a vāmam adya savitar vāmam u śvo dive-dive vāmam asmabhyaṁ sāvīḥ |
6.071.06c vāmasya hi kṣayasya deva bhūrer ayā dhiyā vāmabhājaḥ syāma ||

6.072.01a indrāsomā mahi tad vām mahitvaṁ yuvam mahāni prathamāni cakrathuḥ |
6.072.01c yuvaṁ sūryaṁ vividathur yuvaṁ svar viśvā tamāṁsy ahataṁ nidaś ca ||
6.072.02a indrāsomā vāsayatha uṣāsam ut sūryaṁ nayatho jyotiṣā saha |
6.072.02c upa dyāṁ skambhathuḥ skambhanenāprathatam pṛthivīm mātaraṁ vi ||
6.072.03a indrāsomāv ahim apaḥ pariṣṭhāṁ hatho vṛtram anu vāṁ dyaur amanyata |
6.072.03c prārṇāṁsy airayataṁ nadīnām ā samudrāṇi paprathuḥ purūṇi ||
6.072.04a indrāsomā pakvam āmāsv antar ni gavām id dadhathur vakṣaṇāsu |
6.072.04c jagṛbhathur anapinaddham āsu ruśac citrāsu jagatīṣv antaḥ ||
6.072.05a indrāsomā yuvam aṅga tarutram apatyasācaṁ śrutyaṁ rarāthe |
6.072.05c yuvaṁ śuṣmaṁ naryaṁ carṣaṇibhyaḥ saṁ vivyathuḥ pṛtanāṣāham ugrā ||

6.073.01a yo adribhit prathamajā ṛtāvā bṛhaspatir āṅgiraso haviṣmān |
6.073.01c dvibarhajmā prāgharmasat pitā na ā rodasī vṛṣabho roravīti ||
6.073.02a janāya cid ya īvata u lokam bṛhaspatir devahūtau cakāra |
6.073.02c ghnan vṛtrāṇi vi puro dardarīti jayañ chatrūm̐r amitrān pṛtsu sāhan ||
6.073.03a bṛhaspatiḥ sam ajayad vasūni maho vrajān gomato deva eṣaḥ |
6.073.03c apaḥ siṣāsan svar apratīto bṛhaspatir hanty amitram arkaiḥ ||

6.074.01a somārudrā dhārayethām asuryam pra vām iṣṭayo 'ram aśnuvantu |
6.074.01c dame-dame sapta ratnā dadhānā śaṁ no bhūtaṁ dvipade śaṁ catuṣpade ||
6.074.02a somārudrā vi vṛhataṁ viṣūcīm amīvā yā no gayam āviveśa |
6.074.02c āre bādhethāṁ nirṛtim parācair asme bhadrā sauśravasāni santu ||
6.074.03a somārudrā yuvam etāny asme viśvā tanūṣu bheṣajāni dhattam |
6.074.03c ava syatam muñcataṁ yan no asti tanūṣu baddhaṁ kṛtam eno asmat ||
6.074.04a tigmāyudhau tigmahetī suśevau somārudrāv iha su mṛḻataṁ naḥ |
6.074.04c pra no muñcataṁ varuṇasya pāśād gopāyataṁ naḥ sumanasyamānā ||

6.075.01a jīmūtasyeva bhavati pratīkaṁ yad varmī yāti samadām upasthe |
6.075.01c anāviddhayā tanvā jaya tvaṁ sa tvā varmaṇo mahimā pipartu ||
6.075.02a dhanvanā gā dhanvanājiṁ jayema dhanvanā tīvrāḥ samado jayema |
6.075.02c dhanuḥ śatror apakāmaṁ kṛṇoti dhanvanā sarvāḥ pradiśo jayema ||
6.075.03a vakṣyantīved ā ganīganti karṇam priyaṁ sakhāyam pariṣasvajānā |
6.075.03c yoṣeva śiṅkte vitatādhi dhanvañ jyā iyaṁ samane pārayantī ||
6.075.04a te ācarantī samaneva yoṣā māteva putram bibhṛtām upasthe |
6.075.04c apa śatrūn vidhyatāṁ saṁvidāne ārtnī ime viṣphurantī amitrān ||
6.075.05a bahvīnām pitā bahur asya putraś ciścā kṛṇoti samanāvagatya |
6.075.05c iṣudhiḥ saṅkāḥ pṛtanāś ca sarvāḥ pṛṣṭhe ninaddho jayati prasūtaḥ ||
6.075.06a rathe tiṣṭhan nayati vājinaḥ puro yatra-yatra kāmayate suṣārathiḥ |
6.075.06c abhīśūnām mahimānam panāyata manaḥ paścād anu yacchanti raśmayaḥ ||
6.075.07a tīvrān ghoṣān kṛṇvate vṛṣapāṇayo 'śvā rathebhiḥ saha vājayantaḥ |
6.075.07c avakrāmantaḥ prapadair amitrān kṣiṇanti śatrūm̐r anapavyayantaḥ ||
6.075.08a rathavāhanaṁ havir asya nāma yatrāyudhaṁ nihitam asya varma |
6.075.08c tatrā ratham upa śagmaṁ sadema viśvāhā vayaṁ sumanasyamānāḥ ||
6.075.09a svāduṣaṁsadaḥ pitaro vayodhāḥ kṛcchreśritaḥ śaktīvanto gabhīrāḥ |
6.075.09c citrasenā iṣubalā amṛdhrāḥ satovīrā uravo vrātasāhāḥ ||
6.075.10a brāhmaṇāsaḥ pitaraḥ somyāsaḥ śive no dyāvāpṛthivī anehasā |
6.075.10c pūṣā naḥ pātu duritād ṛtāvṛdho rakṣā mākir no aghaśaṁsa īśata ||
6.075.11a suparṇaṁ vaste mṛgo asyā danto gobhiḥ saṁnaddhā patati prasūtā |
6.075.11c yatrā naraḥ saṁ ca vi ca dravanti tatrāsmabhyam iṣavaḥ śarma yaṁsan ||
6.075.12a ṛjīte pari vṛṅdhi no 'śmā bhavatu nas tanūḥ |
6.075.12c somo adhi bravītu no 'ditiḥ śarma yacchatu ||
6.075.13a ā jaṅghanti sānv eṣāṁ jaghanām̐ upa jighnate |
6.075.13c aśvājani pracetaso 'śvān samatsu codaya ||
6.075.14a ahir iva bhogaiḥ pary eti bāhuṁ jyāyā hetim paribādhamānaḥ |
6.075.14c hastaghno viśvā vayunāni vidvān pumān pumāṁsam pari pātu viśvataḥ ||
6.075.15a ālāktā yā ruruśīrṣṇy atho yasyā ayo mukham |
6.075.15c idam parjanyaretasa iṣvai devyai bṛhan namaḥ ||
6.075.16a avasṛṣṭā parā pata śaravye brahmasaṁśite |
6.075.16c gacchāmitrān pra padyasva māmīṣāṁ kaṁ canoc chiṣaḥ ||
6.075.17a yatra bāṇāḥ sampatanti kumārā viśikhā iva |
6.075.17c tatrā no brahmaṇas patir aditiḥ śarma yacchatu viśvāhā śarma yacchatu ||
6.075.18a marmāṇi te varmaṇā chādayāmi somas tvā rājāmṛtenānu vastām |
6.075.18c uror varīyo varuṇas te kṛṇotu jayantaṁ tvānu devā madantu ||
6.075.19a yo naḥ svo araṇo yaś ca niṣṭyo jighāṁsati |
6.075.19c devās taṁ sarve dhūrvantu brahma varma mamāntaram ||


7.001.01a agniṁ naro dīdhitibhir araṇyor hastacyutī janayanta praśastam |
7.001.01c dūredṛśaṁ gṛhapatim atharyum ||
7.001.02a tam agnim aste vasavo ny ṛṇvan supraticakṣam avase kutaś cit |
7.001.02c dakṣāyyo yo dama āsa nityaḥ ||
7.001.03a preddho agne dīdihi puro no 'jasrayā sūrmyā yaviṣṭha |
7.001.03c tvāṁ śaśvanta upa yanti vājāḥ ||
7.001.04a pra te agnayo 'gnibhyo varaṁ niḥ suvīrāsaḥ śośucanta dyumantaḥ |
7.001.04c yatrā naraḥ samāsate sujātāḥ ||
7.001.05a dā no agne dhiyā rayiṁ suvīraṁ svapatyaṁ sahasya praśastam |
7.001.05c na yaṁ yāvā tarati yātumāvān ||
7.001.06a upa yam eti yuvatiḥ sudakṣaṁ doṣā vastor haviṣmatī ghṛtācī |
7.001.06c upa svainam aramatir vasūyuḥ ||
7.001.07a viśvā agne 'pa dahārātīr yebhis tapobhir adaho jarūtham |
7.001.07c pra nisvaraṁ cātayasvāmīvām ||
7.001.08a ā yas te agna idhate anīkaṁ vasiṣṭha śukra dīdivaḥ pāvaka |
7.001.08c uto na ebhiḥ stavathair iha syāḥ ||
7.001.09a vi ye te agne bhejire anīkam martā naraḥ pitryāsaḥ purutrā |
7.001.09c uto na ebhiḥ sumanā iha syāḥ ||
7.001.10a ime naro vṛtrahatyeṣu śūrā viśvā adevīr abhi santu māyāḥ |
7.001.10c ye me dhiyam panayanta praśastām ||
7.001.11a mā śūne agne ni ṣadāma nṛṇām māśeṣaso 'vīratā pari tvā |
7.001.11c prajāvatīṣu duryāsu durya ||
7.001.12a yam aśvī nityam upayāti yajñam prajāvantaṁ svapatyaṁ kṣayaṁ naḥ |
7.001.12c svajanmanā śeṣasā vāvṛdhānam ||
7.001.13a pāhi no agne rakṣaso ajuṣṭāt pāhi dhūrter araruṣo aghāyoḥ |
7.001.13c tvā yujā pṛtanāyūm̐r abhi ṣyām ||
7.001.14a sed agnir agnīm̐r aty astv anyān yatra vājī tanayo vīḻupāṇiḥ |
7.001.14c sahasrapāthā akṣarā sameti ||
7.001.15a sed agnir yo vanuṣyato nipāti sameddhāram aṁhasa uruṣyāt |
7.001.15c sujātāsaḥ pari caranti vīrāḥ ||
7.001.16a ayaṁ so agnir āhutaḥ purutrā yam īśānaḥ sam id indhe haviṣmān |
7.001.16c pari yam ety adhvareṣu hotā ||
7.001.17a tve agna āhavanāni bhūrīśānāsa ā juhuyāma nityā |
7.001.17c ubhā kṛṇvanto vahatū miyedhe ||
7.001.18a imo agne vītatamāni havyājasro vakṣi devatātim accha |
7.001.18c prati na īṁ surabhīṇi vyantu ||
7.001.19a mā no agne 'vīrate parā dā durvāsase 'mataye mā no asyai |
7.001.19c mā naḥ kṣudhe mā rakṣasa ṛtāvo mā no dame mā vana ā juhūrthāḥ ||
7.001.20a nū me brahmāṇy agna uc chaśādhi tvaṁ deva maghavadbhyaḥ suṣūdaḥ |
7.001.20c rātau syāmobhayāsa ā te yūyam pāta svastibhiḥ sadā naḥ ||
7.001.21a tvam agne suhavo raṇvasaṁdṛk sudītī sūno sahaso didīhi |
7.001.21c mā tve sacā tanaye nitya ā dhaṅ mā vīro asman naryo vi dāsīt ||
7.001.22a mā no agne durbhṛtaye sacaiṣu deveddheṣv agniṣu pra vocaḥ |
7.001.22c mā te asmān durmatayo bhṛmāc cid devasya sūno sahaso naśanta ||
7.001.23a sa marto agne svanīka revān amartye ya ājuhoti havyam |
7.001.23c sa devatā vasuvaniṁ dadhāti yaṁ sūrir arthī pṛcchamāna eti ||
7.001.24a maho no agne suvitasya vidvān rayiṁ sūribhya ā vahā bṛhantam |
7.001.24c yena vayaṁ sahasāvan mademāvikṣitāsa āyuṣā suvīrāḥ ||
7.001.25a nū me brahmāṇy agna uc chaśādhi tvaṁ deva maghavadbhyaḥ suṣūdaḥ |
7.001.25c rātau syāmobhayāsa ā te yūyam pāta svastibhiḥ sadā naḥ ||

7.002.01a juṣasva naḥ samidham agne adya śocā bṛhad yajataṁ dhūmam ṛṇvan |
7.002.01c upa spṛśa divyaṁ sānu stūpaiḥ saṁ raśmibhis tatanaḥ sūryasya ||
7.002.02a narāśaṁsasya mahimānam eṣām upa stoṣāma yajatasya yajñaiḥ |
7.002.02c ye sukratavaḥ śucayo dhiyaṁdhāḥ svadanti devā ubhayāni havyā ||
7.002.03a īḻenyaṁ vo asuraṁ sudakṣam antar dūtaṁ rodasī satyavācam |
7.002.03c manuṣvad agnim manunā samiddhaṁ sam adhvarāya sadam in mahema ||
7.002.04a saparyavo bharamāṇā abhijñu pra vṛñjate namasā barhir agnau |
7.002.04c ājuhvānā ghṛtapṛṣṭham pṛṣadvad adhvaryavo haviṣā marjayadhvam ||
7.002.05a svādhyo vi duro devayanto 'śiśrayū rathayur devatātā |
7.002.05c pūrvī śiśuṁ na mātarā rihāṇe sam agruvo na samaneṣv añjan ||
7.002.06a uta yoṣaṇe divye mahī na uṣāsānaktā sudugheva dhenuḥ |
7.002.06c barhiṣadā puruhūte maghonī ā yajñiye suvitāya śrayetām ||
7.002.07a viprā yajñeṣu mānuṣeṣu kārū manye vāṁ jātavedasā yajadhyai |
7.002.07c ūrdhvaṁ no adhvaraṁ kṛtaṁ haveṣu tā deveṣu vanatho vāryāṇi ||
7.002.08a ā bhāratī bhāratībhiḥ sajoṣā iḻā devair manuṣyebhir agniḥ |
7.002.08c sarasvatī sārasvatebhir arvāk tisro devīr barhir edaṁ sadantu ||
7.002.09a tan nas turīpam adha poṣayitnu deva tvaṣṭar vi rarāṇaḥ syasva |
7.002.09c yato vīraḥ karmaṇyaḥ sudakṣo yuktagrāvā jāyate devakāmaḥ ||
7.002.10a vanaspate 'va sṛjopa devān agnir haviḥ śamitā sūdayāti |
7.002.10c sed u hotā satyataro yajāti yathā devānāṁ janimāni veda ||
7.002.11a ā yāhy agne samidhāno arvāṅ indreṇa devaiḥ sarathaṁ turebhiḥ |
7.002.11c barhir na āstām aditiḥ suputrā svāhā devā amṛtā mādayantām ||

7.003.01a agniṁ vo devam agnibhiḥ sajoṣā yajiṣṭhaṁ dūtam adhvare kṛṇudhvam |
7.003.01c yo martyeṣu nidhruvir ṛtāvā tapurmūrdhā ghṛtānnaḥ pāvakaḥ ||
7.003.02a prothad aśvo na yavase 'viṣyan yadā mahaḥ saṁvaraṇād vy asthāt |
7.003.02c ād asya vāto anu vāti śocir adha sma te vrajanaṁ kṛṣṇam asti ||
7.003.03a ud yasya te navajātasya vṛṣṇo 'gne caranty ajarā idhānāḥ |
7.003.03c acchā dyām aruṣo dhūma eti saṁ dūto agna īyase hi devān ||
7.003.04a vi yasya te pṛthivyām pājo aśret tṛṣu yad annā samavṛkta jambhaiḥ |
7.003.04c seneva sṛṣṭā prasitiṣ ṭa eti yavaṁ na dasma juhvā vivekṣi ||
7.003.05a tam id doṣā tam uṣasi yaviṣṭham agnim atyaṁ na marjayanta naraḥ |
7.003.05c niśiśānā atithim asya yonau dīdāya śocir āhutasya vṛṣṇaḥ ||
7.003.06a susaṁdṛk te svanīka pratīkaṁ vi yad rukmo na rocasa upāke |
7.003.06c divo na te tanyatur eti śuṣmaś citro na sūraḥ prati cakṣi bhānum ||
7.003.07a yathā vaḥ svāhāgnaye dāśema parīḻābhir ghṛtavadbhiś ca havyaiḥ |
7.003.07c tebhir no agne amitair mahobhiḥ śatam pūrbhir āyasībhir ni pāhi ||
7.003.08a yā vā te santi dāśuṣe adhṛṣṭā giro vā yābhir nṛvatīr uruṣyāḥ |
7.003.08c tābhir naḥ sūno sahaso ni pāhi smat sūrīñ jaritṝñ jātavedaḥ ||
7.003.09a nir yat pūteva svadhitiḥ śucir gāt svayā kṛpā tanvā rocamānaḥ |
7.003.09c ā yo mātror uśenyo janiṣṭa devayajyāya sukratuḥ pāvakaḥ ||
7.003.10a etā no agne saubhagā didīhy api kratuṁ sucetasaṁ vatema |
7.003.10c viśvā stotṛbhyo gṛṇate ca santu yūyam pāta svastibhiḥ sadā naḥ ||

7.004.01a pra vaḥ śukrāya bhānave bharadhvaṁ havyam matiṁ cāgnaye supūtam |
7.004.01c yo daivyāni mānuṣā janūṁṣy antar viśvāni vidmanā jigāti ||
7.004.02a sa gṛtso agnis taruṇaś cid astu yato yaviṣṭho ajaniṣṭa mātuḥ |
7.004.02c saṁ yo vanā yuvate śucidan bhūri cid annā sam id atti sadyaḥ ||
7.004.03a asya devasya saṁsady anīke yam martāsaḥ śyetaṁ jagṛbhre |
7.004.03c ni yo gṛbham pauruṣeyīm uvoca durokam agnir āyave śuśoca ||
7.004.04a ayaṁ kavir akaviṣu pracetā marteṣv agnir amṛto ni dhāyi |
7.004.04c sa mā no atra juhuraḥ sahasvaḥ sadā tve sumanasaḥ syāma ||
7.004.05a ā yo yoniṁ devakṛtaṁ sasāda kratvā hy agnir amṛtām̐ atārīt |
7.004.05c tam oṣadhīś ca vaninaś ca garbham bhūmiś ca viśvadhāyasam bibharti ||
7.004.06a īśe hy agnir amṛtasya bhūrer īśe rāyaḥ suvīryasya dātoḥ |
7.004.06c mā tvā vayaṁ sahasāvann avīrā māpsavaḥ pari ṣadāma māduvaḥ ||
7.004.07a pariṣadyaṁ hy araṇasya rekṇo nityasya rāyaḥ patayaḥ syāma |
7.004.07c na śeṣo agne anyajātam asty acetānasya mā patho vi dukṣaḥ ||
7.004.08a nahi grabhāyāraṇaḥ suśevo 'nyodaryo manasā mantavā u |
7.004.08c adhā cid okaḥ punar it sa ety ā no vājy abhīṣāḻ etu navyaḥ ||
7.004.09a tvam agne vanuṣyato ni pāhi tvam u naḥ sahasāvann avadyāt |
7.004.09c saṁ tvā dhvasmanvad abhy etu pāthaḥ saṁ rayiḥ spṛhayāyyaḥ sahasrī ||
7.004.10a etā no agne saubhagā didīhy api kratuṁ sucetasaṁ vatema |
7.004.10c viśvā stotṛbhyo gṛṇate ca santu yūyam pāta svastibhiḥ sadā naḥ ||

7.005.01a prāgnaye tavase bharadhvaṁ giraṁ divo arataye pṛthivyāḥ |
7.005.01c yo viśveṣām amṛtānām upasthe vaiśvānaro vāvṛdhe jāgṛvadbhiḥ ||
7.005.02a pṛṣṭo divi dhāyy agniḥ pṛthivyāṁ netā sindhūnāṁ vṛṣabhaḥ stiyānām |
7.005.02c sa mānuṣīr abhi viśo vi bhāti vaiśvānaro vāvṛdhāno vareṇa ||
7.005.03a tvad bhiyā viśa āyann asiknīr asamanā jahatīr bhojanāni |
7.005.03c vaiśvānara pūrave śośucānaḥ puro yad agne darayann adīdeḥ ||
7.005.04a tava tridhātu pṛthivī uta dyaur vaiśvānara vratam agne sacanta |
7.005.04c tvam bhāsā rodasī ā tatanthājasreṇa śociṣā śośucānaḥ ||
7.005.05a tvām agne harito vāvaśānā giraḥ sacante dhunayo ghṛtācīḥ |
7.005.05c patiṁ kṛṣṭīnāṁ rathyaṁ rayīṇāṁ vaiśvānaram uṣasāṁ ketum ahnām ||
7.005.06a tve asuryaṁ vasavo ny ṛṇvan kratuṁ hi te mitramaho juṣanta |
7.005.06c tvaṁ dasyūm̐r okaso agna āja uru jyotir janayann āryāya ||
7.005.07a sa jāyamānaḥ parame vyoman vāyur na pāthaḥ pari pāsi sadyaḥ |
7.005.07c tvam bhuvanā janayann abhi krann apatyāya jātavedo daśasyan ||
7.005.08a tām agne asme iṣam erayasva vaiśvānara dyumatīṁ jātavedaḥ |
7.005.08c yayā rādhaḥ pinvasi viśvavāra pṛthu śravo dāśuṣe martyāya ||
7.005.09a taṁ no agne maghavadbhyaḥ purukṣuṁ rayiṁ ni vājaṁ śrutyaṁ yuvasva |
7.005.09c vaiśvānara mahi naḥ śarma yaccha rudrebhir agne vasubhiḥ sajoṣāḥ ||

7.006.01a pra samrājo asurasya praśastim puṁsaḥ kṛṣṭīnām anumādyasya |
7.006.01c indrasyeva pra tavasas kṛtāni vande dāruṁ vandamāno vivakmi ||
7.006.02a kaviṁ ketuṁ dhāsim bhānum adrer hinvanti śaṁ rājyaṁ rodasyoḥ |
7.006.02c puraṁdarasya gīrbhir ā vivāse 'gner vratāni pūrvyā mahāni ||
7.006.03a ny akratūn grathino mṛdhravācaḥ paṇīm̐r aśraddhām̐ avṛdhām̐ ayajñān |
7.006.03c pra-pra tān dasyūm̐r agnir vivāya pūrvaś cakārāparām̐ ayajyūn ||
7.006.04a yo apācīne tamasi madantīḥ prācīś cakāra nṛtamaḥ śacībhiḥ |
7.006.04c tam īśānaṁ vasvo agniṁ gṛṇīṣe 'nānataṁ damayantam pṛtanyūn ||
7.006.05a yo dehyo anamayad vadhasnair yo aryapatnīr uṣasaś cakāra |
7.006.05c sa nirudhyā nahuṣo yahvo agnir viśaś cakre balihṛtaḥ sahobhiḥ ||
7.006.06a yasya śarmann upa viśve janāsa evais tasthuḥ sumatim bhikṣamāṇāḥ |
7.006.06c vaiśvānaro varam ā rodasyor āgniḥ sasāda pitror upastham ||
7.006.07a ā devo dade budhnyā vasūni vaiśvānara uditā sūryasya |
7.006.07c ā samudrād avarād ā parasmād āgnir dade diva ā pṛthivyāḥ ||

7.007.01a pra vo devaṁ cit sahasānam agnim aśvaṁ na vājinaṁ hiṣe namobhiḥ |
7.007.01c bhavā no dūto adhvarasya vidvān tmanā deveṣu vivide mitadruḥ ||
7.007.02a ā yāhy agne pathyā anu svā mandro devānāṁ sakhyaṁ juṣāṇaḥ |
7.007.02c ā sānu śuṣmair nadayan pṛthivyā jambhebhir viśvam uśadhag vanāni ||
7.007.03a prācīno yajñaḥ sudhitaṁ hi barhiḥ prīṇīte agnir īḻito na hotā |
7.007.03c ā mātarā viśvavāre huvāno yato yaviṣṭha jajñiṣe suśevaḥ ||
7.007.04a sadyo adhvare rathiraṁ jananta mānuṣāso vicetaso ya eṣām |
7.007.04c viśām adhāyi viśpatir duroṇe 'gnir mandro madhuvacā ṛtāvā ||
7.007.05a asādi vṛto vahnir ājaganvān agnir brahmā nṛṣadane vidhartā |
7.007.05c dyauś ca yam pṛthivī vāvṛdhāte ā yaṁ hotā yajati viśvavāram ||
7.007.06a ete dyumnebhir viśvam ātiranta mantraṁ ye vāraṁ naryā atakṣan |
7.007.06c pra ye viśas tiranta śroṣamāṇā ā ye me asya dīdhayann ṛtasya ||
7.007.07a nū tvām agna īmahe vasiṣṭhā īśānaṁ sūno sahaso vasūnām |
7.007.07c iṣaṁ stotṛbhyo maghavadbhya ānaḍ yūyam pāta svastibhiḥ sadā naḥ ||

7.008.01a indhe rājā sam aryo namobhir yasya pratīkam āhutaṁ ghṛtena |
7.008.01c naro havyebhir īḻate sabādha āgnir agra uṣasām aśoci ||
7.008.02a ayam u ṣya sumahām̐ avedi hotā mandro manuṣo yahvo agniḥ |
7.008.02c vi bhā akaḥ sasṛjānaḥ pṛthivyāṁ kṛṣṇapavir oṣadhībhir vavakṣe ||
7.008.03a kayā no agne vi vasaḥ suvṛktiṁ kām u svadhām ṛṇavaḥ śasyamānaḥ |
7.008.03c kadā bhavema patayaḥ sudatra rāyo vantāro duṣṭarasya sādhoḥ ||
7.008.04a pra-prāyam agnir bharatasya śṛṇve vi yat sūryo na rocate bṛhad bhāḥ |
7.008.04c abhi yaḥ pūrum pṛtanāsu tasthau dyutāno daivyo atithiḥ śuśoca ||
7.008.05a asann it tve āhavanāni bhūri bhuvo viśvebhiḥ sumanā anīkaiḥ |
7.008.05c stutaś cid agne śṛṇviṣe gṛṇānaḥ svayaṁ vardhasva tanvaṁ sujāta ||
7.008.06a idaṁ vacaḥ śatasāḥ saṁsahasram ud agnaye janiṣīṣṭa dvibarhāḥ |
7.008.06c śaṁ yat stotṛbhya āpaye bhavāti dyumad amīvacātanaṁ rakṣohā ||
7.008.07a nū tvām agna īmahe vasiṣṭhā īśānaṁ sūno sahaso vasūnām |
7.008.07c iṣaṁ stotṛbhyo maghavadbhya ānaḍ yūyam pāta svastibhiḥ sadā naḥ ||

7.009.01a abodhi jāra uṣasām upasthād dhotā mandraḥ kavitamaḥ pāvakaḥ |
7.009.01c dadhāti ketum ubhayasya jantor havyā deveṣu draviṇaṁ sukṛtsu ||
7.009.02a sa sukratur yo vi duraḥ paṇīnām punāno arkam purubhojasaṁ naḥ |
7.009.02c hotā mandro viśāṁ damūnās tiras tamo dadṛśe rāmyāṇām ||
7.009.03a amūraḥ kavir aditir vivasvān susaṁsan mitro atithiḥ śivo naḥ |
7.009.03c citrabhānur uṣasām bhāty agre 'pāṁ garbhaḥ prasva ā viveśa ||
7.009.04a īḻenyo vo manuṣo yugeṣu samanagā aśucaj jātavedāḥ |
7.009.04c susaṁdṛśā bhānunā yo vibhāti prati gāvaḥ samidhānam budhanta ||
7.009.05a agne yāhi dūtyam mā riṣaṇyo devām̐ acchā brahmakṛtā gaṇena |
7.009.05c sarasvatīm maruto aśvināpo yakṣi devān ratnadheyāya viśvān ||
7.009.06a tvām agne samidhāno vasiṣṭho jarūthaṁ han yakṣi rāye puraṁdhim |
7.009.06c puruṇīthā jātavedo jarasva yūyam pāta svastibhiḥ sadā naḥ ||

7.010.01a uṣo na jāraḥ pṛthu pājo aśred davidyutad dīdyac chośucānaḥ |
7.010.01c vṛṣā hariḥ śucir ā bhāti bhāsā dhiyo hinvāna uśatīr ajīgaḥ ||
7.010.02a svar ṇa vastor uṣasām aroci yajñaṁ tanvānā uśijo na manma |
7.010.02c agnir janmāni deva ā vi vidvān dravad dūto devayāvā vaniṣṭhaḥ ||
7.010.03a acchā giro matayo devayantīr agniṁ yanti draviṇam bhikṣamāṇāḥ |
7.010.03c susaṁdṛśaṁ supratīkaṁ svañcaṁ havyavāham aratim mānuṣāṇām ||
7.010.04a indraṁ no agne vasubhiḥ sajoṣā rudraṁ rudrebhir ā vahā bṛhantam |
7.010.04c ādityebhir aditiṁ viśvajanyām bṛhaspatim ṛkvabhir viśvavāram ||
7.010.05a mandraṁ hotāram uśijo yaviṣṭham agniṁ viśa īḻate adhvareṣu |
7.010.05c sa hi kṣapāvām̐ abhavad rayīṇām atandro dūto yajathāya devān ||

7.011.01a mahām̐ asy adhvarasya praketo na ṛte tvad amṛtā mādayante |
7.011.01c ā viśvebhiḥ sarathaṁ yāhi devair ny agne hotā prathamaḥ sadeha ||
7.011.02a tvām īḻate ajiraṁ dūtyāya haviṣmantaḥ sadam in mānuṣāsaḥ |
7.011.02c yasya devair āsado barhir agne 'hāny asmai sudinā bhavanti ||
7.011.03a triś cid aktoḥ pra cikitur vasūni tve antar dāśuṣe martyāya |
7.011.03c manuṣvad agna iha yakṣi devān bhavā no dūto abhiśastipāvā ||
7.011.04a agnir īśe bṛhato adhvarasyāgnir viśvasya haviṣaḥ kṛtasya |
7.011.04c kratuṁ hy asya vasavo juṣantāthā devā dadhire havyavāham ||
7.011.05a āgne vaha haviradyāya devān indrajyeṣṭhāsa iha mādayantām |
7.011.05c imaṁ yajñaṁ divi deveṣu dhehi yūyam pāta svastibhiḥ sadā naḥ ||

7.012.01a aganma mahā namasā yaviṣṭhaṁ yo dīdāya samiddhaḥ sve duroṇe |
7.012.01c citrabhānuṁ rodasī antar urvī svāhutaṁ viśvataḥ pratyañcam ||
7.012.02a sa mahnā viśvā duritāni sāhvān agniḥ ṣṭave dama ā jātavedāḥ |
7.012.02c sa no rakṣiṣad duritād avadyād asmān gṛṇata uta no maghonaḥ ||
7.012.03a tvaṁ varuṇa uta mitro agne tvāṁ vardhanti matibhir vasiṣṭhāḥ |
7.012.03c tve vasu suṣaṇanāni santu yūyam pāta svastibhiḥ sadā naḥ ||

7.013.01a prāgnaye viśvaśuce dhiyaṁdhe 'suraghne manma dhītim bharadhvam |
7.013.01c bhare havir na barhiṣi prīṇāno vaiśvānarāya yataye matīnām ||
7.013.02a tvam agne śociṣā śośucāna ā rodasī apṛṇā jāyamānaḥ |
7.013.02c tvaṁ devām̐ abhiśaster amuñco vaiśvānara jātavedo mahitvā ||
7.013.03a jāto yad agne bhuvanā vy akhyaḥ paśūn na gopā iryaḥ parijmā |
7.013.03c vaiśvānara brahmaṇe vinda gātuṁ yūyam pāta svastibhiḥ sadā naḥ ||

7.014.01a samidhā jātavedase devāya devahūtibhiḥ |
7.014.01c havirbhiḥ śukraśociṣe namasvino vayaṁ dāśemāgnaye ||
7.014.02a vayaṁ te agne samidhā vidhema vayaṁ dāśema suṣṭutī yajatra |
7.014.02c vayaṁ ghṛtenādhvarasya hotar vayaṁ deva haviṣā bhadraśoce ||
7.014.03a ā no devebhir upa devahūtim agne yāhi vaṣaṭkṛtiṁ juṣāṇaḥ |
7.014.03c tubhyaṁ devāya dāśataḥ syāma yūyam pāta svastibhiḥ sadā naḥ ||

7.015.01a upasadyāya mīḻhuṣa āsye juhutā haviḥ |
7.015.01c yo no nediṣṭham āpyam ||
7.015.02a yaḥ pañca carṣaṇīr abhi niṣasāda dame-dame |
7.015.02c kavir gṛhapatir yuvā ||
7.015.03a sa no vedo amātyam agnī rakṣatu viśvataḥ |
7.015.03c utāsmān pātv aṁhasaḥ ||
7.015.04a navaṁ nu stomam agnaye divaḥ śyenāya jījanam |
7.015.04c vasvaḥ kuvid vanāti naḥ ||
7.015.05a spārhā yasya śriyo dṛśe rayir vīravato yathā |
7.015.05c agre yajñasya śocataḥ ||
7.015.06a semāṁ vetu vaṣaṭkṛtim agnir juṣata no giraḥ |
7.015.06c yajiṣṭho havyavāhanaḥ ||
7.015.07a ni tvā nakṣya viśpate dyumantaṁ deva dhīmahi |
7.015.07c suvīram agna āhuta ||
7.015.08a kṣapa usraś ca dīdihi svagnayas tvayā vayam |
7.015.08c suvīras tvam asmayuḥ ||
7.015.09a upa tvā sātaye naro viprāso yanti dhītibhiḥ |
7.015.09c upākṣarā sahasriṇī ||
7.015.10a agnī rakṣāṁsi sedhati śukraśocir amartyaḥ |
7.015.10c śuciḥ pāvaka īḍyaḥ ||
7.015.11a sa no rādhāṁsy ā bhareśānaḥ sahaso yaho |
7.015.11c bhagaś ca dātu vāryam ||
7.015.12a tvam agne vīravad yaśo devaś ca savitā bhagaḥ |
7.015.12c ditiś ca dāti vāryam ||
7.015.13a agne rakṣā ṇo aṁhasaḥ prati ṣma deva rīṣataḥ |
7.015.13c tapiṣṭhair ajaro daha ||
7.015.14a adhā mahī na āyasy anādhṛṣṭo nṛpītaye |
7.015.14c pūr bhavā śatabhujiḥ ||
7.015.15a tvaṁ naḥ pāhy aṁhaso doṣāvastar aghāyataḥ |
7.015.15c divā naktam adābhya ||

7.016.01a enā vo agniṁ namasorjo napātam ā huve |
7.016.01c priyaṁ cetiṣṭham aratiṁ svadhvaraṁ viśvasya dūtam amṛtam ||
7.016.02a sa yojate aruṣā viśvabhojasā sa dudravat svāhutaḥ |
7.016.02c subrahmā yajñaḥ suśamī vasūnāṁ devaṁ rādho janānām ||
7.016.03a ud asya śocir asthād ājuhvānasya mīḻhuṣaḥ |
7.016.03c ud dhūmāso aruṣāso divispṛśaḥ sam agnim indhate naraḥ ||
7.016.04a taṁ tvā dūtaṁ kṛṇmahe yaśastamaṁ devām̐ ā vītaye vaha |
7.016.04c viśvā sūno sahaso martabhojanā rāsva tad yat tvemahe ||
7.016.05a tvam agne gṛhapatis tvaṁ hotā no adhvare |
7.016.05c tvam potā viśvavāra pracetā yakṣi veṣi ca vāryam ||
7.016.06a kṛdhi ratnaṁ yajamānāya sukrato tvaṁ hi ratnadhā asi |
7.016.06c ā na ṛte śiśīhi viśvam ṛtvijaṁ suśaṁso yaś ca dakṣate ||
7.016.07a tve agne svāhuta priyāsaḥ santu sūrayaḥ |
7.016.07c yantāro ye maghavāno janānām ūrvān dayanta gonām ||
7.016.08a yeṣām iḻā ghṛtahastā duroṇa ām̐ api prātā niṣīdati |
7.016.08c tām̐s trāyasva sahasya druho nido yacchā naḥ śarma dīrghaśrut ||
7.016.09a sa mandrayā ca jihvayā vahnir āsā viduṣṭaraḥ |
7.016.09c agne rayim maghavadbhyo na ā vaha havyadātiṁ ca sūdaya ||
7.016.10a ye rādhāṁsi dadaty aśvyā maghā kāmena śravaso mahaḥ |
7.016.10c tām̐ aṁhasaḥ pipṛhi partṛbhiṣ ṭvaṁ śatam pūrbhir yaviṣṭhya ||
7.016.11a devo vo draviṇodāḥ pūrṇāṁ vivaṣṭy āsicam |
7.016.11c ud vā siñcadhvam upa vā pṛṇadhvam ād id vo deva ohate ||
7.016.12a taṁ hotāram adhvarasya pracetasaṁ vahniṁ devā akṛṇvata |
7.016.12c dadhāti ratnaṁ vidhate suvīryam agnir janāya dāśuṣe ||

7.017.01 agne bhava suṣamidhā samiddha uta barhir urviyā vi stṛṇītām ||
7.017.02 uta dvāra uśatīr vi śrayantām uta devām̐ uśata ā vaheha ||
7.017.03 agne vīhi haviṣā yakṣi devān svadhvarā kṛṇuhi jātavedaḥ ||
7.017.04 svadhvarā karati jātavedā yakṣad devām̐ amṛtān piprayac ca ||
7.017.05 vaṁsva viśvā vāryāṇi pracetaḥ satyā bhavantv āśiṣo no adya ||
7.017.06 tvām u te dadhire havyavāhaṁ devāso agna ūrja ā napātam ||
7.017.07 te te devāya dāśataḥ syāma maho no ratnā vi dadha iyānaḥ ||

7.018.01a tve ha yat pitaraś cin na indra viśvā vāmā jaritāro asanvan |
7.018.01c tve gāvaḥ sudughās tve hy aśvās tvaṁ vasu devayate vaniṣṭhaḥ ||
7.018.02a rājeva hi janibhiḥ kṣeṣy evāva dyubhir abhi viduṣ kaviḥ san |
7.018.02c piśā giro maghavan gobhir aśvais tvāyataḥ śiśīhi rāye asmān ||
7.018.03a imā u tvā paspṛdhānāso atra mandrā giro devayantīr upa sthuḥ |
7.018.03c arvācī te pathyā rāya etu syāma te sumatāv indra śarman ||
7.018.04a dhenuṁ na tvā sūyavase dudukṣann upa brahmāṇi sasṛje vasiṣṭhaḥ |
7.018.04c tvām in me gopatiṁ viśva āhā na indraḥ sumatiṁ gantv accha ||
7.018.05a arṇāṁsi cit paprathānā sudāsa indro gādhāny akṛṇot supārā |
7.018.05c śardhantaṁ śimyum ucathasya navyaḥ śāpaṁ sindhūnām akṛṇod aśastīḥ ||
7.018.06a puroḻā it turvaśo yakṣur āsīd rāye matsyāso niśitā apīva |
7.018.06c śruṣṭiṁ cakrur bhṛgavo druhyavaś ca sakhā sakhāyam atarad viṣūcoḥ ||
7.018.07a ā pakthāso bhalānaso bhanantālināso viṣāṇinaḥ śivāsaḥ |
7.018.07c ā yo 'nayat sadhamā āryasya gavyā tṛtsubhyo ajagan yudhā nṝn ||
7.018.08a durādhyo aditiṁ srevayanto 'cetaso vi jagṛbhre paruṣṇīm |
7.018.08c mahnāvivyak pṛthivīm patyamānaḥ paśuṣ kavir aśayac cāyamānaḥ ||
7.018.09a īyur arthaṁ na nyartham paruṣṇīm āśuś caned abhipitvaṁ jagāma |
7.018.09c sudāsa indraḥ sutukām̐ amitrān arandhayan mānuṣe vadhrivācaḥ ||
7.018.10a īyur gāvo na yavasād agopā yathākṛtam abhi mitraṁ citāsaḥ |
7.018.10c pṛśnigāvaḥ pṛśninipreṣitāsaḥ śruṣṭiṁ cakrur niyuto rantayaś ca ||
7.018.11a ekaṁ ca yo viṁśatiṁ ca śravasyā vaikarṇayor janān rājā ny astaḥ |
7.018.11c dasmo na sadman ni śiśāti barhiḥ śūraḥ sargam akṛṇod indra eṣām ||
7.018.12a adha śrutaṁ kavaṣaṁ vṛddham apsv anu druhyuṁ ni vṛṇag vajrabāhuḥ |
7.018.12c vṛṇānā atra sakhyāya sakhyaṁ tvāyanto ye amadann anu tvā ||
7.018.13a vi sadyo viśvā dṛṁhitāny eṣām indraḥ puraḥ sahasā sapta dardaḥ |
7.018.13c vy ānavasya tṛtsave gayam bhāg jeṣma pūruṁ vidathe mṛdhravācam ||
7.018.14a ni gavyavo 'navo druhyavaś ca ṣaṣṭiḥ śatā suṣupuḥ ṣaṭ sahasrā |
7.018.14c ṣaṣṭir vīrāso adhi ṣaḍ duvoyu viśved indrasya vīryā kṛtāni ||
7.018.15a indreṇaite tṛtsavo veviṣāṇā āpo na sṛṣṭā adhavanta nīcīḥ |
7.018.15c durmitrāsaḥ prakalavin mimānā jahur viśvāni bhojanā sudāse ||
7.018.16a ardhaṁ vīrasya śṛtapām anindram parā śardhantaṁ nunude abhi kṣām |
7.018.16c indro manyum manyumyo mimāya bheje patho vartanim patyamānaḥ ||
7.018.17a ādhreṇa cit tad v ekaṁ cakāra siṁhyaṁ cit petvenā jaghāna |
7.018.17c ava sraktīr veśyāvṛścad indraḥ prāyacchad viśvā bhojanā sudāse ||
7.018.18a śaśvanto hi śatravo rāradhuṣ ṭe bhedasya cic chardhato vinda randhim |
7.018.18c martām̐ enaḥ stuvato yaḥ kṛṇoti tigmaṁ tasmin ni jahi vajram indra ||
7.018.19a āvad indraṁ yamunā tṛtsavaś ca prātra bhedaṁ sarvatātā muṣāyat |
7.018.19c ajāsaś ca śigravo yakṣavaś ca baliṁ śīrṣāṇi jabhrur aśvyāni ||
7.018.20a na ta indra sumatayo na rāyaḥ saṁcakṣe pūrvā uṣaso na nūtnāḥ |
7.018.20c devakaṁ cin mānyamānaṁ jaghanthāva tmanā bṛhataḥ śambaram bhet ||
7.018.21a pra ye gṛhād amamadus tvāyā parāśaraḥ śatayātur vasiṣṭhaḥ |
7.018.21c na te bhojasya sakhyam mṛṣantādhā sūribhyaḥ sudinā vy ucchān ||
7.018.22a dve naptur devavataḥ śate gor dvā rathā vadhūmantā sudāsaḥ |
7.018.22c arhann agne paijavanasya dānaṁ hoteva sadma pary emi rebhan ||
7.018.23a catvāro mā paijavanasya dānāḥ smaddiṣṭayaḥ kṛśanino nireke |
7.018.23c ṛjrāso mā pṛthiviṣṭhāḥ sudāsas tokaṁ tokāya śravase vahanti ||
7.018.24a yasya śravo rodasī antar urvī śīrṣṇe-śīrṣṇe vibabhājā vibhaktā |
7.018.24c sapted indraṁ na sravato gṛṇanti ni yudhyāmadhim aśiśād abhīke ||
7.018.25a imaṁ naro marutaḥ saścatānu divodāsaṁ na pitaraṁ sudāsaḥ |
7.018.25c aviṣṭanā paijavanasya ketaṁ dūṇāśaṁ kṣatram ajaraṁ duvoyu ||

7.019.01a yas tigmaśṛṅgo vṛṣabho na bhīma ekaḥ kṛṣṭīś cyāvayati pra viśvāḥ |
7.019.01c yaḥ śaśvato adāśuṣo gayasya prayantāsi suṣvitarāya vedaḥ ||
7.019.02a tvaṁ ha tyad indra kutsam āvaḥ śuśrūṣamāṇas tanvā samarye |
7.019.02c dāsaṁ yac chuṣṇaṁ kuyavaṁ ny asmā arandhaya ārjuneyāya śikṣan ||
7.019.03a tvaṁ dhṛṣṇo dhṛṣatā vītahavyam prāvo viśvābhir ūtibhiḥ sudāsam |
7.019.03c pra paurukutsiṁ trasadasyum āvaḥ kṣetrasātā vṛtrahatyeṣu pūrum ||
7.019.04a tvaṁ nṛbhir nṛmaṇo devavītau bhūrīṇi vṛtrā haryaśva haṁsi |
7.019.04c tvaṁ ni dasyuṁ cumuriṁ dhuniṁ cāsvāpayo dabhītaye suhantu ||
7.019.05a tava cyautnāni vajrahasta tāni nava yat puro navatiṁ ca sadyaḥ |
7.019.05c niveśane śatatamāviveṣīr ahañ ca vṛtraṁ namucim utāhan ||
7.019.06a sanā tā ta indra bhojanāni rātahavyāya dāśuṣe sudāse |
7.019.06c vṛṣṇe te harī vṛṣaṇā yunajmi vyantu brahmāṇi puruśāka vājam ||
7.019.07a mā te asyāṁ sahasāvan pariṣṭāv aghāya bhūma harivaḥ parādai |
7.019.07c trāyasva no 'vṛkebhir varūthais tava priyāsaḥ sūriṣu syāma ||
7.019.08a priyāsa it te maghavann abhiṣṭau naro madema śaraṇe sakhāyaḥ |
7.019.08c ni turvaśaṁ ni yādvaṁ śiśīhy atithigvāya śaṁsyaṁ kariṣyan ||
7.019.09a sadyaś cin nu te maghavann abhiṣṭau naraḥ śaṁsanty ukthaśāsa ukthā |
7.019.09c ye te havebhir vi paṇīm̐r adāśann asmān vṛṇīṣva yujyāya tasmai ||
7.019.10a ete stomā narāṁ nṛtama tubhyam asmadryañco dadato maghāni |
7.019.10c teṣām indra vṛtrahatye śivo bhūḥ sakhā ca śūro 'vitā ca nṛṇām ||
7.019.11a nū indra śūra stavamāna ūtī brahmajūtas tanvā vāvṛdhasva |
7.019.11c upa no vājān mimīhy upa stīn yūyam pāta svastibhiḥ sadā naḥ ||

7.020.01a ugro jajñe vīryāya svadhāvāñ cakrir apo naryo yat kariṣyan |
7.020.01c jagmir yuvā nṛṣadanam avobhis trātā na indra enaso mahaś cit ||
7.020.02a hantā vṛtram indraḥ śūśuvānaḥ prāvīn nu vīro jaritāram ūtī |
7.020.02c kartā sudāse aha vā u lokaṁ dātā vasu muhur ā dāśuṣe bhūt ||
7.020.03a yudhmo anarvā khajakṛt samadvā śūraḥ satrāṣāḍ januṣem aṣāḻhaḥ |
7.020.03c vy āsa indraḥ pṛtanāḥ svojā adhā viśvaṁ śatrūyantaṁ jaghāna ||
7.020.04a ubhe cid indra rodasī mahitvā paprātha taviṣībhis tuviṣmaḥ |
7.020.04c ni vajram indro harivān mimikṣan sam andhasā madeṣu vā uvoca ||
7.020.05a vṛṣā jajāna vṛṣaṇaṁ raṇāya tam u cin nārī naryaṁ sasūva |
7.020.05c pra yaḥ senānīr adha nṛbhyo astīnaḥ satvā gaveṣaṇaḥ sa dhṛṣṇuḥ ||
7.020.06a nū cit sa bhreṣate jano na reṣan mano yo asya ghoram āvivāsāt |
7.020.06c yajñair ya indre dadhate duvāṁsi kṣayat sa rāya ṛtapā ṛtejāḥ ||
7.020.07a yad indra pūrvo aparāya śikṣann ayaj jyāyān kanīyaso deṣṇam |
7.020.07c amṛta it pary āsīta dūram ā citra citryam bharā rayiṁ naḥ ||
7.020.08a yas ta indra priyo jano dadāśad asan nireke adrivaḥ sakhā te |
7.020.08c vayaṁ te asyāṁ sumatau caniṣṭhāḥ syāma varūthe aghnato nṛpītau ||
7.020.09a eṣa stomo acikradad vṛṣā ta uta stāmur maghavann akrapiṣṭa |
7.020.09c rāyas kāmo jaritāraṁ ta āgan tvam aṅga śakra vasva ā śako naḥ ||
7.020.10a sa na indra tvayatāyā iṣe dhās tmanā ca ye maghavāno junanti |
7.020.10c vasvī ṣu te jaritre astu śaktir yūyam pāta svastibhiḥ sadā naḥ ||

7.021.01a asāvi devaṁ goṛjīkam andho ny asminn indro januṣem uvoca |
7.021.01c bodhāmasi tvā haryaśva yajñair bodhā naḥ stomam andhaso madeṣu ||
7.021.02a pra yanti yajñaṁ vipayanti barhiḥ somamādo vidathe dudhravācaḥ |
7.021.02c ny u bhriyante yaśaso gṛbhād ā dūraüpabdo vṛṣaṇo nṛṣācaḥ ||
7.021.03a tvam indra sravitavā apas kaḥ pariṣṭhitā ahinā śūra pūrvīḥ |
7.021.03c tvad vāvakre rathyo na dhenā rejante viśvā kṛtrimāṇi bhīṣā ||
7.021.04a bhīmo viveṣāyudhebhir eṣām apāṁsi viśvā naryāṇi vidvān |
7.021.04c indraḥ puro jarhṛṣāṇo vi dūdhod vi vajrahasto mahinā jaghāna ||
7.021.05a na yātava indra jūjuvur no na vandanā śaviṣṭha vedyābhiḥ |
7.021.05c sa śardhad aryo viṣuṇasya jantor mā śiśnadevā api gur ṛtaṁ naḥ ||
7.021.06a abhi kratvendra bhūr adha jman na te vivyaṅ mahimānaṁ rajāṁsi |
7.021.06c svenā hi vṛtraṁ śavasā jaghantha na śatrur antaṁ vividad yudhā te ||
7.021.07a devāś cit te asuryāya pūrve 'nu kṣatrāya mamire sahāṁsi |
7.021.07c indro maghāni dayate viṣahyendraṁ vājasya johuvanta sātau ||
7.021.08a kīriś cid dhi tvām avase juhāveśānam indra saubhagasya bhūreḥ |
7.021.08c avo babhūtha śatamūte asme abhikṣattus tvāvato varūtā ||
7.021.09a sakhāyas ta indra viśvaha syāma namovṛdhāso mahinā tarutra |
7.021.09c vanvantu smā te 'vasā samīke 'bhītim aryo vanuṣāṁ śavāṁsi ||
7.021.10a sa na indra tvayatāyā iṣe dhās tmanā ca ye maghavāno junanti |
7.021.10c vasvī ṣu te jaritre astu śaktir yūyam pāta svastibhiḥ sadā naḥ ||

7.022.01a pibā somam indra mandatu tvā yaṁ te suṣāva haryaśvādriḥ |
7.022.01c sotur bāhubhyāṁ suyato nārvā ||
7.022.02a yas te mado yujyaś cārur asti yena vṛtrāṇi haryaśva haṁsi |
7.022.02c sa tvām indra prabhūvaso mamattu ||
7.022.03a bodhā su me maghavan vācam emāṁ yāṁ te vasiṣṭho arcati praśastim |
7.022.03c imā brahma sadhamāde juṣasva ||
7.022.04a śrudhī havaṁ vipipānasyādrer bodhā viprasyārcato manīṣām |
7.022.04c kṛṣvā duvāṁsy antamā sacemā ||
7.022.05a na te giro api mṛṣye turasya na suṣṭutim asuryasya vidvān |
7.022.05c sadā te nāma svayaśo vivakmi ||
7.022.06a bhūri hi te savanā mānuṣeṣu bhūri manīṣī havate tvām it |
7.022.06c māre asman maghavañ jyok kaḥ ||
7.022.07a tubhyed imā savanā śūra viśvā tubhyam brahmāṇi vardhanā kṛṇomi |
7.022.07c tvaṁ nṛbhir havyo viśvadhāsi ||
7.022.08a nū cin nu te manyamānasya dasmod aśnuvanti mahimānam ugra |
7.022.08c na vīryam indra te na rādhaḥ ||
7.022.09a ye ca pūrva ṛṣayo ye ca nūtnā indra brahmāṇi janayanta viprāḥ |
7.022.09c asme te santu sakhyā śivāni yūyam pāta svastibhiḥ sadā naḥ ||

7.023.01a ud u brahmāṇy airata śravasyendraṁ samarye mahayā vasiṣṭha |
7.023.01c ā yo viśvāni śavasā tatānopaśrotā ma īvato vacāṁsi ||
7.023.02a ayāmi ghoṣa indra devajāmir irajyanta yac churudho vivāci |
7.023.02c nahi svam āyuś cikite janeṣu tānīd aṁhāṁsy ati parṣy asmān ||
7.023.03a yuje rathaṁ gaveṣaṇaṁ haribhyām upa brahmāṇi jujuṣāṇam asthuḥ |
7.023.03c vi bādhiṣṭa sya rodasī mahitvendro vṛtrāṇy apratī jaghanvān ||
7.023.04a āpaś cit pipyuḥ staryo na gāvo nakṣann ṛtaṁ jaritāras ta indra |
7.023.04c yāhi vāyur na niyuto no acchā tvaṁ hi dhībhir dayase vi vājān ||
7.023.05a te tvā madā indra mādayantu śuṣmiṇaṁ tuvirādhasaṁ jaritre |
7.023.05c eko devatrā dayase hi martān asmiñ chūra savane mādayasva ||
7.023.06a eved indraṁ vṛṣaṇaṁ vajrabāhuṁ vasiṣṭhāso abhy arcanty arkaiḥ |
7.023.06c sa naḥ stuto vīravad dhātu gomad yūyam pāta svastibhiḥ sadā naḥ ||

7.024.01a yoniṣ ṭa indra sadane akāri tam ā nṛbhiḥ puruhūta pra yāhi |
7.024.01c aso yathā no 'vitā vṛdhe ca dado vasūni mamadaś ca somaiḥ ||
7.024.02a gṛbhītaṁ te mana indra dvibarhāḥ sutaḥ somaḥ pariṣiktā madhūni |
7.024.02c visṛṣṭadhenā bharate suvṛktir iyam indraṁ johuvatī manīṣā ||
7.024.03a ā no diva ā pṛthivyā ṛjīṣinn idam barhiḥ somapeyāya yāhi |
7.024.03c vahantu tvā harayo madryañcam āṅgūṣam acchā tavasam madāya ||
7.024.04a ā no viśvābhir ūtibhiḥ sajoṣā brahma juṣāṇo haryaśva yāhi |
7.024.04c varīvṛjat sthavirebhiḥ suśiprāsme dadhad vṛṣaṇaṁ śuṣmam indra ||
7.024.05a eṣa stomo maha ugrāya vāhe dhurīvātyo na vājayann adhāyi |
7.024.05c indra tvāyam arka īṭṭe vasūnāṁ divīva dyām adhi naḥ śromataṁ dhāḥ ||
7.024.06a evā na indra vāryasya pūrdhi pra te mahīṁ sumatiṁ vevidāma |
7.024.06c iṣam pinva maghavadbhyaḥ suvīrāṁ yūyam pāta svastibhiḥ sadā naḥ ||

7.025.01a ā te maha indroty ugra samanyavo yat samaranta senāḥ |
7.025.01c patāti didyun naryasya bāhvor mā te mano viṣvadryag vi cārīt ||
7.025.02a ni durga indra śnathihy amitrām̐ abhi ye no martāso amanti |
7.025.02c āre taṁ śaṁsaṁ kṛṇuhi ninitsor ā no bhara sambharaṇaṁ vasūnām ||
7.025.03a śataṁ te śiprinn ūtayaḥ sudāse sahasraṁ śaṁsā uta rātir astu |
7.025.03c jahi vadhar vanuṣo martyasyāsme dyumnam adhi ratnaṁ ca dhehi ||
7.025.04a tvāvato hīndra kratve asmi tvāvato 'vituḥ śūra rātau |
7.025.04c viśved ahāni taviṣīva ugram̐ okaḥ kṛṇuṣva harivo na mardhīḥ ||
7.025.05a kutsā ete haryaśvāya śūṣam indre saho devajūtam iyānāḥ |
7.025.05c satrā kṛdhi suhanā śūra vṛtrā vayaṁ tarutrāḥ sanuyāma vājam ||
7.025.06a evā na indra vāryasya pūrdhi pra te mahīṁ sumatiṁ vevidāma |
7.025.06c iṣam pinva maghavadbhyaḥ suvīrāṁ yūyam pāta svastibhiḥ sadā naḥ ||

7.026.01a na soma indram asuto mamāda nābrahmāṇo maghavānaṁ sutāsaḥ |
7.026.01c tasmā ukthaṁ janaye yaj jujoṣan nṛvan navīyaḥ śṛṇavad yathā naḥ ||
7.026.02a uktha-ukthe soma indram mamāda nīthe-nīthe maghavānaṁ sutāsaḥ |
7.026.02c yad īṁ sabādhaḥ pitaraṁ na putrāḥ samānadakṣā avase havante ||
7.026.03a cakāra tā kṛṇavan nūnam anyā yāni bruvanti vedhasaḥ suteṣu |
7.026.03c janīr iva patir ekaḥ samāno ni māmṛje pura indraḥ su sarvāḥ ||
7.026.04a evā tam āhur uta śṛṇva indra eko vibhaktā taraṇir maghānām |
7.026.04c mithastura ūtayo yasya pūrvīr asme bhadrāṇi saścata priyāṇi ||
7.026.05a evā vasiṣṭha indram ūtaye nṝn kṛṣṭīnāṁ vṛṣabhaṁ sute gṛṇāti |
7.026.05c sahasriṇa upa no māhi vājān yūyam pāta svastibhiḥ sadā naḥ ||

7.027.01a indraṁ naro nemadhitā havante yat pāryā yunajate dhiyas tāḥ |
7.027.01c śūro nṛṣātā śavasaś cakāna ā gomati vraje bhajā tvaṁ naḥ ||
7.027.02a ya indra śuṣmo maghavan te asti śikṣā sakhibhyaḥ puruhūta nṛbhyaḥ |
7.027.02c tvaṁ hi dṛḻhā maghavan vicetā apā vṛdhi parivṛtaṁ na rādhaḥ ||
7.027.03a indro rājā jagataś carṣaṇīnām adhi kṣami viṣurūpaṁ yad asti |
7.027.03c tato dadāti dāśuṣe vasūni codad rādha upastutaś cid arvāk ||
7.027.04a nū cin na indro maghavā sahūtī dāno vājaṁ ni yamate na ūtī |
7.027.04c anūnā yasya dakṣiṇā pīpāya vāmaṁ nṛbhyo abhivītā sakhibhyaḥ ||
7.027.05a nū indra rāye varivas kṛdhī na ā te mano vavṛtyāma maghāya |
7.027.05c gomad aśvāvad rathavad vyanto yūyam pāta svastibhiḥ sadā naḥ ||

7.028.01a brahmā ṇa indropa yāhi vidvān arvāñcas te harayaḥ santu yuktāḥ |
7.028.01c viśve cid dhi tvā vihavanta martā asmākam ic chṛṇuhi viśvaminva ||
7.028.02a havaṁ ta indra mahimā vy ānaḍ brahma yat pāsi śavasinn ṛṣīṇām |
7.028.02c ā yad vajraṁ dadhiṣe hasta ugra ghoraḥ san kratvā janiṣṭhā aṣāḻhaḥ ||
7.028.03a tava praṇītīndra johuvānān saṁ yan nṝn na rodasī ninetha |
7.028.03c mahe kṣatrāya śavase hi jajñe 'tūtujiṁ cit tūtujir aśiśnat ||
7.028.04a ebhir na indrāhabhir daśasya durmitrāso hi kṣitayaḥ pavante |
7.028.04c prati yac caṣṭe anṛtam anenā ava dvitā varuṇo māyī naḥ sāt ||
7.028.05a vocemed indram maghavānam enam maho rāyo rādhaso yad dadan naḥ |
7.028.05c yo arcato brahmakṛtim aviṣṭho yūyam pāta svastibhiḥ sadā naḥ ||

7.029.01a ayaṁ soma indra tubhyaṁ sunva ā tu pra yāhi harivas tadokāḥ |
7.029.01c pibā tv asya suṣutasya cāror dado maghāni maghavann iyānaḥ ||
7.029.02a brahman vīra brahmakṛtiṁ juṣāṇo 'rvācīno haribhir yāhi tūyam |
7.029.02c asminn ū ṣu savane mādayasvopa brahmāṇi śṛṇava imā naḥ ||
7.029.03a kā te asty araṁkṛtiḥ sūktaiḥ kadā nūnaṁ te maghavan dāśema |
7.029.03c viśvā matīr ā tatane tvāyādhā ma indra śṛṇavo havemā ||
7.029.04a uto ghā te puruṣyā id āsan yeṣām pūrveṣām aśṛṇor ṛṣīṇām |
7.029.04c adhāhaṁ tvā maghavañ johavīmi tvaṁ na indrāsi pramatiḥ piteva ||
7.029.05a vocemed indram maghavānam enam maho rāyo rādhaso yad dadan naḥ |
7.029.05c yo arcato brahmakṛtim aviṣṭho yūyam pāta svastibhiḥ sadā naḥ ||

7.030.01a ā no deva śavasā yāhi śuṣmin bhavā vṛdha indra rāyo asya |
7.030.01c mahe nṛmṇāya nṛpate suvajra mahi kṣatrāya pauṁsyāya śūra ||
7.030.02a havanta u tvā havyaṁ vivāci tanūṣu śūrāḥ sūryasya sātau |
7.030.02c tvaṁ viśveṣu senyo janeṣu tvaṁ vṛtrāṇi randhayā suhantu ||
7.030.03a ahā yad indra sudinā vyucchān dadho yat ketum upamaṁ samatsu |
7.030.03c ny agniḥ sīdad asuro na hotā huvāno atra subhagāya devān ||
7.030.04a vayaṁ te ta indra ye ca deva stavanta śūra dadato maghāni |
7.030.04c yacchā sūribhya upamaṁ varūthaṁ svābhuvo jaraṇām aśnavanta ||
7.030.05a vocemed indram maghavānam enam maho rāyo rādhaso yad dadan naḥ |
7.030.05c yo arcato brahmakṛtim aviṣṭho yūyam pāta svastibhiḥ sadā naḥ ||

7.031.01a pra va indrāya mādanaṁ haryaśvāya gāyata |
7.031.01c sakhāyaḥ somapāvne ||
7.031.02a śaṁsed ukthaṁ sudānava uta dyukṣaṁ yathā naraḥ |
7.031.02c cakṛmā satyarādhase ||
7.031.03a tvaṁ na indra vājayus tvaṁ gavyuḥ śatakrato |
7.031.03c tvaṁ hiraṇyayur vaso ||
7.031.04a vayam indra tvāyavo 'bhi pra ṇonumo vṛṣan |
7.031.04c viddhī tv asya no vaso ||
7.031.05a mā no nide ca vaktave 'ryo randhīr arāvṇe |
7.031.05c tve api kratur mama ||
7.031.06a tvaṁ varmāsi saprathaḥ puroyodhaś ca vṛtrahan |
7.031.06c tvayā prati bruve yujā ||
7.031.07a mahām̐ utāsi yasya te 'nu svadhāvarī sahaḥ |
7.031.07c mamnāte indra rodasī ||
7.031.08a taṁ tvā marutvatī pari bhuvad vāṇī sayāvarī |
7.031.08c nakṣamāṇā saha dyubhiḥ ||
7.031.09a ūrdhvāsas tvānv indavo bhuvan dasmam upa dyavi |
7.031.09c saṁ te namanta kṛṣṭayaḥ ||
7.031.10a pra vo mahe mahivṛdhe bharadhvam pracetase pra sumatiṁ kṛṇudhvam |
7.031.10c viśaḥ pūrvīḥ pra carā carṣaṇiprāḥ ||
7.031.11a uruvyacase mahine suvṛktim indrāya brahma janayanta viprāḥ |
7.031.11c tasya vratāni na minanti dhīrāḥ ||
7.031.12a indraṁ vāṇīr anuttamanyum eva satrā rājānaṁ dadhire sahadhyai |
7.031.12c haryaśvāya barhayā sam āpīn ||

7.032.01a mo ṣu tvā vāghataś canāre asman ni rīraman |
7.032.01c ārāttāc cit sadhamādaṁ na ā gahīha vā sann upa śrudhi ||
7.032.02a ime hi te brahmakṛtaḥ sute sacā madhau na makṣa āsate |
7.032.02c indre kāmaṁ jaritāro vasūyavo rathe na pādam ā dadhuḥ ||
7.032.03 rāyaskāmo vajrahastaṁ sudakṣiṇam putro na pitaraṁ huve ||
7.032.04a ima indrāya sunvire somāso dadhyāśiraḥ |
7.032.04c tām̐ ā madāya vajrahasta pītaye haribhyāṁ yāhy oka ā ||
7.032.05a śravac chrutkarṇa īyate vasūnāṁ nū cin no mardhiṣad giraḥ |
7.032.05c sadyaś cid yaḥ sahasrāṇi śatā dadan nakir ditsantam ā minat ||
7.032.06a sa vīro apratiṣkuta indreṇa śūśuve nṛbhiḥ |
7.032.06c yas te gabhīrā savanāni vṛtrahan sunoty ā ca dhāvati ||
7.032.07a bhavā varūtham maghavan maghonāṁ yat samajāsi śardhataḥ |
7.032.07c vi tvāhatasya vedanam bhajemahy ā dūṇāśo bharā gayam ||
7.032.08a sunotā somapāvne somam indrāya vajriṇe |
7.032.08c pacatā paktīr avase kṛṇudhvam it pṛṇann it pṛṇate mayaḥ ||
7.032.09a mā sredhata somino dakṣatā mahe kṛṇudhvaṁ rāya ātuje |
7.032.09c taraṇir ij jayati kṣeti puṣyati na devāsaḥ kavatnave ||
7.032.10a nakiḥ sudāso ratham pary āsa na rīramat |
7.032.10c indro yasyāvitā yasya maruto gamat sa gomati vraje ||
7.032.11a gamad vājaṁ vājayann indra martyo yasya tvam avitā bhuvaḥ |
7.032.11c asmākam bodhy avitā rathānām asmākaṁ śūra nṛṇām ||
7.032.12a ud in nv asya ricyate 'ṁśo dhanaṁ na jigyuṣaḥ |
7.032.12c ya indro harivān na dabhanti taṁ ripo dakṣaṁ dadhāti somini ||
7.032.13a mantram akharvaṁ sudhitaṁ supeśasaṁ dadhāta yajñiyeṣv ā |
7.032.13c pūrvīś cana prasitayas taranti taṁ ya indre karmaṇā bhuvat ||
7.032.14a kas tam indra tvāvasum ā martyo dadharṣati |
7.032.14c śraddhā it te maghavan pārye divi vājī vājaṁ siṣāsati ||
7.032.15a maghonaḥ sma vṛtrahatyeṣu codaya ye dadati priyā vasu |
7.032.15c tava praṇītī haryaśva sūribhir viśvā tarema duritā ||
7.032.16a taved indrāvamaṁ vasu tvam puṣyasi madhyamam |
7.032.16c satrā viśvasya paramasya rājasi nakiṣ ṭvā goṣu vṛṇvate ||
7.032.17a tvaṁ viśvasya dhanadā asi śruto ya īm bhavanty ājayaḥ |
7.032.17c tavāyaṁ viśvaḥ puruhūta pārthivo 'vasyur nāma bhikṣate ||
7.032.18a yad indra yāvatas tvam etāvad aham īśīya |
7.032.18c stotāram id didhiṣeya radāvaso na pāpatvāya rāsīya ||
7.032.19a śikṣeyam in mahayate dive-dive rāya ā kuhacidvide |
7.032.19c nahi tvad anyan maghavan na āpyaṁ vasyo asti pitā cana ||
7.032.20a taraṇir it siṣāsati vājam puraṁdhyā yujā |
7.032.20c ā va indram puruhūtaṁ name girā nemiṁ taṣṭeva sudrvam ||
7.032.21a na duṣṭutī martyo vindate vasu na sredhantaṁ rayir naśat |
7.032.21c suśaktir in maghavan tubhyam māvate deṣṇaṁ yat pārye divi ||
7.032.22a abhi tvā śūra nonumo 'dugdhā iva dhenavaḥ |
7.032.22c īśānam asya jagataḥ svardṛśam īśānam indra tasthuṣaḥ ||
7.032.23a na tvāvām̐ anyo divyo na pārthivo na jāto na janiṣyate |
7.032.23c aśvāyanto maghavann indra vājino gavyantas tvā havāmahe ||
7.032.24a abhī ṣatas tad ā bharendra jyāyaḥ kanīyasaḥ |
7.032.24c purūvasur hi maghavan sanād asi bhare-bhare ca havyaḥ ||
7.032.25a parā ṇudasva maghavann amitrān suvedā no vasū kṛdhi |
7.032.25c asmākam bodhy avitā mahādhane bhavā vṛdhaḥ sakhīnām ||
7.032.26a indra kratuṁ na ā bhara pitā putrebhyo yathā |
7.032.26c śikṣā ṇo asmin puruhūta yāmani jīvā jyotir aśīmahi ||
7.032.27a mā no ajñātā vṛjanā durādhyo māśivāso ava kramuḥ |
7.032.27c tvayā vayam pravataḥ śaśvatīr apo 'ti śūra tarāmasi ||

7.033.01a śvityañco mā dakṣiṇataskapardā dhiyaṁjinvāso abhi hi pramanduḥ |
7.033.01c uttiṣṭhan voce pari barhiṣo nṝn na me dūrād avitave vasiṣṭhāḥ ||
7.033.02a dūrād indram anayann ā sutena tiro vaiśantam ati pāntam ugram |
7.033.02c pāśadyumnasya vāyatasya somāt sutād indro 'vṛṇītā vasiṣṭhān ||
7.033.03a even nu kaṁ sindhum ebhis tatāreven nu kam bhedam ebhir jaghāna |
7.033.03c even nu kaṁ dāśarājñe sudāsam prāvad indro brahmaṇā vo vasiṣṭhāḥ ||
7.033.04a juṣṭī naro brahmaṇā vaḥ pitṝṇām akṣam avyayaṁ na kilā riṣātha |
7.033.04c yac chakvarīṣu bṛhatā raveṇendre śuṣmam adadhātā vasiṣṭhāḥ ||
7.033.05a ud dyām ivet tṛṣṇajo nāthitāso 'dīdhayur dāśarājñe vṛtāsaḥ |
7.033.05c vasiṣṭhasya stuvata indro aśrod uruṁ tṛtsubhyo akṛṇod u lokam ||
7.033.06a daṇḍā ived goajanāsa āsan paricchinnā bharatā arbhakāsaḥ |
7.033.06c abhavac ca puraetā vasiṣṭha ād it tṛtsūnāṁ viśo aprathanta ||
7.033.07a trayaḥ kṛṇvanti bhuvaneṣu retas tisraḥ prajā āryā jyotiragrāḥ |
7.033.07c trayo gharmāsa uṣasaṁ sacante sarvām̐ it tām̐ anu vidur vasiṣṭhāḥ ||
7.033.08a sūryasyeva vakṣatho jyotir eṣāṁ samudrasyeva mahimā gabhīraḥ |
7.033.08c vātasyeva prajavo nānyena stomo vasiṣṭhā anvetave vaḥ ||
7.033.09a ta in niṇyaṁ hṛdayasya praketaiḥ sahasravalśam abhi saṁ caranti |
7.033.09c yamena tatam paridhiṁ vayanto 'psarasa upa sedur vasiṣṭhāḥ ||
7.033.10a vidyuto jyotiḥ pari saṁjihānam mitrāvaruṇā yad apaśyatāṁ tvā |
7.033.10c tat te janmotaikaṁ vasiṣṭhāgastyo yat tvā viśa ājabhāra ||
7.033.11a utāsi maitrāvaruṇo vasiṣṭhorvaśyā brahman manaso 'dhi jātaḥ |
7.033.11c drapsaṁ skannam brahmaṇā daivyena viśve devāḥ puṣkare tvādadanta ||
7.033.12a sa praketa ubhayasya pravidvān sahasradāna uta vā sadānaḥ |
7.033.12c yamena tatam paridhiṁ vayiṣyann apsarasaḥ pari jajñe vasiṣṭhaḥ ||
7.033.13a satre ha jātāv iṣitā namobhiḥ kumbhe retaḥ siṣicatuḥ samānam |
7.033.13c tato ha māna ud iyāya madhyāt tato jātam ṛṣim āhur vasiṣṭham ||
7.033.14a ukthabhṛtaṁ sāmabhṛtam bibharti grāvāṇam bibhrat pra vadāty agre |
7.033.14c upainam ādhvaṁ sumanasyamānā ā vo gacchāti pratṛdo vasiṣṭhaḥ ||

7.034.01 pra śukraitu devī manīṣā asmat sutaṣṭo ratho na vājī ||
7.034.02 viduḥ pṛthivyā divo janitraṁ śṛṇvanty āpo adha kṣarantīḥ ||
7.034.03 āpaś cid asmai pinvanta pṛthvīr vṛtreṣu śūrā maṁsanta ugrāḥ ||
7.034.04 ā dhūrṣv asmai dadhātāśvān indro na vajrī hiraṇyabāhuḥ ||
7.034.05 abhi pra sthātāheva yajñaṁ yāteva patman tmanā hinota ||
7.034.06 tmanā samatsu hinota yajñaṁ dadhāta ketuṁ janāya vīram ||
7.034.07 ud asya śuṣmād bhānur nārta bibharti bhāram pṛthivī na bhūma ||
7.034.08 hvayāmi devām̐ ayātur agne sādhann ṛtena dhiyaṁ dadhāmi ||
7.034.09 abhi vo devīṁ dhiyaṁ dadhidhvam pra vo devatrā vācaṁ kṛṇudhvam ||
7.034.10 ā caṣṭa āsām pātho nadīnāṁ varuṇa ugraḥ sahasracakṣāḥ ||
7.034.11 rājā rāṣṭrānām peśo nadīnām anuttam asmai kṣatraṁ viśvāyu ||
7.034.12 aviṣṭo asmān viśvāsu vikṣv adyuṁ kṛṇota śaṁsaṁ ninitsoḥ ||
7.034.13 vy etu didyud dviṣām aśevā yuyota viṣvag rapas tanūnām ||
7.034.14 avīn no agnir havyān namobhiḥ preṣṭho asmā adhāyi stomaḥ ||
7.034.15 sajūr devebhir apāṁ napātaṁ sakhāyaṁ kṛdhvaṁ śivo no astu ||
7.034.16 abjām ukthair ahiṁ gṛṇīṣe budhne nadīnāṁ rajaḥsu ṣīdan ||
7.034.17 mā no 'hir budhnyo riṣe dhān mā yajño asya sridhad ṛtāyoḥ ||
7.034.18 uta na eṣu nṛṣu śravo dhuḥ pra rāye yantu śardhanto aryaḥ ||
7.034.19 tapanti śatruṁ svar ṇa bhūmā mahāsenāso amebhir eṣām ||
7.034.20 ā yan naḥ patnīr gamanty acchā tvaṣṭā supāṇir dadhātu vīrān ||
7.034.21 prati naḥ stomaṁ tvaṣṭā juṣeta syād asme aramatir vasūyuḥ ||
7.034.22a tā no rāsan rātiṣāco vasūny ā rodasī varuṇānī śṛṇotu |
7.034.22c varūtrībhiḥ suśaraṇo no astu tvaṣṭā sudatro vi dadhātu rāyaḥ ||
7.034.23a tan no rāyaḥ parvatās tan na āpas tad rātiṣāca oṣadhīr uta dyauḥ |
7.034.23c vanaspatibhiḥ pṛthivī sajoṣā ubhe rodasī pari pāsato naḥ ||
7.034.24a anu tad urvī rodasī jihātām anu dyukṣo varuṇa indrasakhā |
7.034.24c anu viśve maruto ye sahāso rāyaḥ syāma dharuṇaṁ dhiyadhyai ||
7.034.25a tan na indro varuṇo mitro agnir āpa oṣadhīr vanino juṣanta |
7.034.25c śarman syāma marutām upasthe yūyam pāta svastibhiḥ sadā naḥ ||

7.035.01a śaṁ na indrāgnī bhavatām avobhiḥ śaṁ na indrāvaruṇā rātahavyā |
7.035.01c śam indrāsomā suvitāya śaṁ yoḥ śaṁ na indrāpūṣaṇā vājasātau ||
7.035.02a śaṁ no bhagaḥ śam u naḥ śaṁso astu śaṁ naḥ puraṁdhiḥ śam u santu rāyaḥ |
7.035.02c śaṁ naḥ satyasya suyamasya śaṁsaḥ śaṁ no aryamā purujāto astu ||
7.035.03a śaṁ no dhātā śam u dhartā no astu śaṁ na urūcī bhavatu svadhābhiḥ |
7.035.03c śaṁ rodasī bṛhatī śaṁ no adriḥ śaṁ no devānāṁ suhavāni santu ||
7.035.04a śaṁ no agnir jyotiranīko astu śaṁ no mitrāvaruṇāv aśvinā śam |
7.035.04c śaṁ naḥ sukṛtāṁ sukṛtāni santu śaṁ na iṣiro abhi vātu vātaḥ ||
7.035.05a śaṁ no dyāvāpṛthivī pūrvahūtau śam antarikṣaṁ dṛśaye no astu |
7.035.05c śaṁ na oṣadhīr vanino bhavantu śaṁ no rajasas patir astu jiṣṇuḥ ||
7.035.06a śaṁ na indro vasubhir devo astu śam ādityebhir varuṇaḥ suśaṁsaḥ |
7.035.06c śaṁ no rudro rudrebhir jalāṣaḥ śaṁ nas tvaṣṭā gnābhir iha śṛṇotu ||
7.035.07a śaṁ naḥ somo bhavatu brahma śaṁ naḥ śaṁ no grāvāṇaḥ śam u santu yajñāḥ |
7.035.07c śaṁ naḥ svarūṇām mitayo bhavantu śaṁ naḥ prasvaḥ śam v astu vediḥ ||
7.035.08a śaṁ naḥ sūrya urucakṣā ud etu śaṁ naś catasraḥ pradiśo bhavantu |
7.035.08c śaṁ naḥ parvatā dhruvayo bhavantu śaṁ naḥ sindhavaḥ śam u santv āpaḥ ||
7.035.09a śaṁ no aditir bhavatu vratebhiḥ śaṁ no bhavantu marutaḥ svarkāḥ |
7.035.09c śaṁ no viṣṇuḥ śam u pūṣā no astu śaṁ no bhavitraṁ śam v astu vāyuḥ ||
7.035.10a śaṁ no devaḥ savitā trāyamāṇaḥ śaṁ no bhavantūṣaso vibhātīḥ |
7.035.10c śaṁ naḥ parjanyo bhavatu prajābhyaḥ śaṁ naḥ kṣetrasya patir astu śambhuḥ ||
7.035.11a śaṁ no devā viśvadevā bhavantu śaṁ sarasvatī saha dhībhir astu |
7.035.11c śam abhiṣācaḥ śam u rātiṣācaḥ śaṁ no divyāḥ pārthivāḥ śaṁ no apyāḥ ||
7.035.12a śaṁ naḥ satyasya patayo bhavantu śaṁ no arvantaḥ śam u santu gāvaḥ |
7.035.12c śaṁ na ṛbhavaḥ sukṛtaḥ suhastāḥ śaṁ no bhavantu pitaro haveṣu ||
7.035.13a śaṁ no aja ekapād devo astu śaṁ no 'hir budhnyaḥ śaṁ samudraḥ |
7.035.13c śaṁ no apāṁ napāt perur astu śaṁ naḥ pṛśnir bhavatu devagopā ||
7.035.14a ādityā rudrā vasavo juṣantedam brahma kriyamāṇaṁ navīyaḥ |
7.035.14c śṛṇvantu no divyāḥ pārthivāso gojātā uta ye yajñiyāsaḥ ||
7.035.15a ye devānāṁ yajñiyā yajñiyānām manor yajatrā amṛtā ṛtajñāḥ |
7.035.15c te no rāsantām urugāyam adya yūyam pāta svastibhiḥ sadā naḥ ||

7.036.01a pra brahmaitu sadanād ṛtasya vi raśmibhiḥ sasṛje sūryo gāḥ |
7.036.01c vi sānunā pṛthivī sasra urvī pṛthu pratīkam adhy edhe agniḥ ||
7.036.02a imāṁ vām mitrāvaruṇā suvṛktim iṣaṁ na kṛṇve asurā navīyaḥ |
7.036.02c ino vām anyaḥ padavīr adabdho janaṁ ca mitro yatati bruvāṇaḥ ||
7.036.03a ā vātasya dhrajato ranta ityā apīpayanta dhenavo na sūdāḥ |
7.036.03c maho divaḥ sadane jāyamāno 'cikradad vṛṣabhaḥ sasminn ūdhan ||
7.036.04a girā ya etā yunajad dharī ta indra priyā surathā śūra dhāyū |
7.036.04c pra yo manyuṁ ririkṣato mināty ā sukratum aryamaṇaṁ vavṛtyām ||
7.036.05a yajante asya sakhyaṁ vayaś ca namasvinaḥ sva ṛtasya dhāman |
7.036.05c vi pṛkṣo bābadhe nṛbhiḥ stavāna idaṁ namo rudrāya preṣṭham ||
7.036.06a ā yat sākaṁ yaśaso vāvaśānāḥ sarasvatī saptathī sindhumātā |
7.036.06c yāḥ suṣvayanta sudughāḥ sudhārā abhi svena payasā pīpyānāḥ ||
7.036.07a uta tye no maruto mandasānā dhiyaṁ tokaṁ ca vājino 'vantu |
7.036.07c mā naḥ pari khyad akṣarā caranty avīvṛdhan yujyaṁ te rayiṁ naḥ ||
7.036.08a pra vo mahīm aramatiṁ kṛṇudhvam pra pūṣaṇaṁ vidathyaṁ na vīram |
7.036.08c bhagaṁ dhiyo 'vitāraṁ no asyāḥ sātau vājaṁ rātiṣācam puraṁdhim ||
7.036.09a acchāyaṁ vo marutaḥ śloka etv acchā viṣṇuṁ niṣiktapām avobhiḥ |
7.036.09c uta prajāyai gṛṇate vayo dhur yūyam pāta svastibhiḥ sadā naḥ ||

7.037.01a ā vo vāhiṣṭho vahatu stavadhyai ratho vājā ṛbhukṣaṇo amṛktaḥ |
7.037.01c abhi tripṛṣṭhaiḥ savaneṣu somair made suśiprā mahabhiḥ pṛṇadhvam ||
7.037.02a yūyaṁ ha ratnam maghavatsu dhattha svardṛśa ṛbhukṣaṇo amṛktam |
7.037.02c saṁ yajñeṣu svadhāvantaḥ pibadhvaṁ vi no rādhāṁsi matibhir dayadhvam ||
7.037.03a uvocitha hi maghavan deṣṇam maho arbhasya vasuno vibhāge |
7.037.03c ubhā te pūrṇā vasunā gabhastī na sūnṛtā ni yamate vasavyā ||
7.037.04a tvam indra svayaśā ṛbhukṣā vājo na sādhur astam eṣy ṛkvā |
7.037.04c vayaṁ nu te dāśvāṁsaḥ syāma brahma kṛṇvanto harivo vasiṣṭhāḥ ||
7.037.05a sanitāsi pravato dāśuṣe cid yābhir viveṣo haryaśva dhībhiḥ |
7.037.05c vavanmā nu te yujyābhir ūtī kadā na indra rāya ā daśasyeḥ ||
7.037.06a vāsayasīva vedhasas tvaṁ naḥ kadā na indra vacaso bubodhaḥ |
7.037.06c astaṁ tātyā dhiyā rayiṁ suvīram pṛkṣo no arvā ny uhīta vājī ||
7.037.07a abhi yaṁ devī nirṛtiś cid īśe nakṣanta indraṁ śaradaḥ supṛkṣaḥ |
7.037.07c upa tribandhur jaradaṣṭim ety asvaveśaṁ yaṁ kṛṇavanta martāḥ ||
7.037.08a ā no rādhāṁsi savitaḥ stavadhyā ā rāyo yantu parvatasya rātau |
7.037.08c sadā no divyaḥ pāyuḥ siṣaktu yūyam pāta svastibhiḥ sadā naḥ ||

7.038.01a ud u ṣya devaḥ savitā yayāma hiraṇyayīm amatiṁ yām aśiśret |
7.038.01c nūnam bhago havyo mānuṣebhir vi yo ratnā purūvasur dadhāti ||
7.038.02a ud u tiṣṭha savitaḥ śrudhy asya hiraṇyapāṇe prabhṛtāv ṛtasya |
7.038.02c vy urvīm pṛthvīm amatiṁ sṛjāna ā nṛbhyo martabhojanaṁ suvānaḥ ||
7.038.03a api ṣṭutaḥ savitā devo astu yam ā cid viśve vasavo gṛṇanti |
7.038.03c sa naḥ stomān namasyaś cano dhād viśvebhiḥ pātu pāyubhir ni sūrīn ||
7.038.04a abhi yaṁ devy aditir gṛṇāti savaṁ devasya savitur juṣāṇā |
7.038.04c abhi samrājo varuṇo gṛṇanty abhi mitrāso aryamā sajoṣāḥ ||
7.038.05a abhi ye mitho vanuṣaḥ sapante rātiṁ divo rātiṣācaḥ pṛthivyāḥ |
7.038.05c ahir budhnya uta naḥ śṛṇotu varūtry ekadhenubhir ni pātu ||
7.038.06a anu tan no jāspatir maṁsīṣṭa ratnaṁ devasya savitur iyānaḥ |
7.038.06c bhagam ugro 'vase johavīti bhagam anugro adha yāti ratnam ||
7.038.07a śaṁ no bhavantu vājino haveṣu devatātā mitadravaḥ svarkāḥ |
7.038.07c jambhayanto 'hiṁ vṛkaṁ rakṣāṁsi sanemy asmad yuyavann amīvāḥ ||
7.038.08a vāje-vāje 'vata vājino no dhaneṣu viprā amṛtā ṛtajñāḥ |
7.038.08c asya madhvaḥ pibata mādayadhvaṁ tṛptā yāta pathibhir devayānaiḥ ||

7.039.01a ūrdhvo agniḥ sumatiṁ vasvo aśret pratīcī jūrṇir devatātim eti |
7.039.01c bhejāte adrī rathyeva panthām ṛtaṁ hotā na iṣito yajāti ||
7.039.02a pra vāvṛje suprayā barhir eṣām ā viśpatīva bīriṭa iyāte |
7.039.02c viśām aktor uṣasaḥ pūrvahūtau vāyuḥ pūṣā svastaye niyutvān ||
7.039.03a jmayā atra vasavo ranta devā urāv antarikṣe marjayanta śubhrāḥ |
7.039.03c arvāk patha urujrayaḥ kṛṇudhvaṁ śrotā dūtasya jagmuṣo no asya ||
7.039.04a te hi yajñeṣu yajñiyāsa ūmāḥ sadhasthaṁ viśve abhi santi devāḥ |
7.039.04c tām̐ adhvara uśato yakṣy agne śruṣṭī bhagaṁ nāsatyā puraṁdhim ||
7.039.05a āgne giro diva ā pṛthivyā mitraṁ vaha varuṇam indram agnim |
7.039.05c āryamaṇam aditiṁ viṣṇum eṣāṁ sarasvatī maruto mādayantām ||
7.039.06a rare havyam matibhir yajñiyānāṁ nakṣat kāmam martyānām asinvan |
7.039.06c dhātā rayim avidasyaṁ sadāsāṁ sakṣīmahi yujyebhir nu devaiḥ ||
7.039.07a nū rodasī abhiṣṭute vasiṣṭhair ṛtāvāno varuṇo mitro agniḥ |
7.039.07c yacchantu candrā upamaṁ no arkaṁ yūyam pāta svastibhiḥ sadā naḥ ||

7.040.01a o śruṣṭir vidathyā sam etu prati stomaṁ dadhīmahi turāṇām |
7.040.01c yad adya devaḥ savitā suvāti syāmāsya ratnino vibhāge ||
7.040.02a mitras tan no varuṇo rodasī ca dyubhaktam indro aryamā dadātu |
7.040.02c dideṣṭu devy aditī rekṇo vāyuś ca yan niyuvaite bhagaś ca ||
7.040.03a sed ugro astu marutaḥ sa śuṣmī yam martyam pṛṣadaśvā avātha |
7.040.03c utem agniḥ sarasvatī junanti na tasya rāyaḥ paryetāsti ||
7.040.04a ayaṁ hi netā varuṇa ṛtasya mitro rājāno aryamāpo dhuḥ |
7.040.04c suhavā devy aditir anarvā te no aṁho ati parṣann ariṣṭān ||
7.040.05a asya devasya mīḻhuṣo vayā viṣṇor eṣasya prabhṛthe havirbhiḥ |
7.040.05c vide hi rudro rudriyam mahitvaṁ yāsiṣṭaṁ vartir aśvināv irāvat ||
7.040.06a mātra pūṣann āghṛṇa irasyo varūtrī yad rātiṣācaś ca rāsan |
7.040.06c mayobhuvo no arvanto ni pāntu vṛṣṭim parijmā vāto dadātu ||
7.040.07a nū rodasī abhiṣṭute vasiṣṭhair ṛtāvāno varuṇo mitro agniḥ |
7.040.07c yacchantu candrā upamaṁ no arkaṁ yūyam pāta svastibhiḥ sadā naḥ ||

7.041.01a prātar agnim prātar indraṁ havāmahe prātar mitrāvaruṇā prātar aśvinā |
7.041.01c prātar bhagam pūṣaṇam brahmaṇas patim prātaḥ somam uta rudraṁ huvema ||
7.041.02a prātarjitam bhagam ugraṁ huvema vayam putram aditer yo vidhartā |
7.041.02c ādhraś cid yam manyamānas turaś cid rājā cid yam bhagam bhakṣīty āha ||
7.041.03a bhaga praṇetar bhaga satyarādho bhagemāṁ dhiyam ud avā dadan naḥ |
7.041.03c bhaga pra ṇo janaya gobhir aśvair bhaga pra nṛbhir nṛvantaḥ syāma ||
7.041.04a utedānīm bhagavantaḥ syāmota prapitva uta madhye ahnām |
7.041.04c utoditā maghavan sūryasya vayaṁ devānāṁ sumatau syāma ||
7.041.05a bhaga eva bhagavām̐ astu devās tena vayam bhagavantaḥ syāma |
7.041.05c taṁ tvā bhaga sarva ij johavīti sa no bhaga puraetā bhaveha ||
7.041.06a sam adhvarāyoṣaso namanta dadhikrāveva śucaye padāya |
7.041.06c arvācīnaṁ vasuvidam bhagaṁ no ratham ivāśvā vājina ā vahantu ||
7.041.07a aśvāvatīr gomatīr na uṣāso vīravatīḥ sadam ucchantu bhadrāḥ |
7.041.07c ghṛtaṁ duhānā viśvataḥ prapītā yūyam pāta svastibhiḥ sadā naḥ ||

7.042.01a pra brahmāṇo aṅgiraso nakṣanta pra krandanur nabhanyasya vetu |
7.042.01c pra dhenava udapruto navanta yujyātām adrī adhvarasya peśaḥ ||
7.042.02a sugas te agne sanavitto adhvā yukṣvā sute harito rohitaś ca |
7.042.02c ye vā sadmann aruṣā vīravāho huve devānāṁ janimāni sattaḥ ||
7.042.03a sam u vo yajñam mahayan namobhiḥ pra hotā mandro ririca upāke |
7.042.03c yajasva su purvaṇīka devān ā yajñiyām aramatiṁ vavṛtyāḥ ||
7.042.04a yadā vīrasya revato duroṇe syonaśīr atithir āciketat |
7.042.04c suprīto agniḥ sudhito dama ā sa viśe dāti vāryam iyatyai ||
7.042.05a imaṁ no agne adhvaraṁ juṣasva marutsv indre yaśasaṁ kṛdhī naḥ |
7.042.05c ā naktā barhiḥ sadatām uṣāsośantā mitrāvaruṇā yajeha ||
7.042.06a evāgniṁ sahasyaṁ vasiṣṭho rāyaskāmo viśvapsnyasya staut |
7.042.06c iṣaṁ rayim paprathad vājam asme yūyam pāta svastibhiḥ sadā naḥ ||

7.043.01a pra vo yajñeṣu devayanto arcan dyāvā namobhiḥ pṛthivī iṣadhyai |
7.043.01c yeṣām brahmāṇy asamāni viprā viṣvag viyanti vanino na śākhāḥ ||
7.043.02a pra yajña etu hetvo na saptir ud yacchadhvaṁ samanaso ghṛtācīḥ |
7.043.02c stṛṇīta barhir adhvarāya sādhūrdhvā śocīṁṣi devayūny asthuḥ ||
7.043.03a ā putrāso na mātaraṁ vibhṛtrāḥ sānau devāso barhiṣaḥ sadantu |
7.043.03c ā viśvācī vidathyām anaktv agne mā no devatātā mṛdhas kaḥ ||
7.043.04a te sīṣapanta joṣam ā yajatrā ṛtasya dhārāḥ sudughā duhānāḥ |
7.043.04c jyeṣṭhaṁ vo adya maha ā vasūnām ā gantana samanaso yati ṣṭha ||
7.043.05a evā no agne vikṣv ā daśasya tvayā vayaṁ sahasāvann āskrāḥ |
7.043.05c rāyā yujā sadhamādo ariṣṭā yūyam pāta svastibhiḥ sadā naḥ ||

7.044.01a dadhikrāṁ vaḥ prathamam aśvinoṣasam agniṁ samiddham bhagam ūtaye huve |
7.044.01c indraṁ viṣṇum pūṣaṇam brahmaṇas patim ādityān dyāvāpṛthivī apaḥ svaḥ ||
7.044.02a dadhikrām u namasā bodhayanta udīrāṇā yajñam upaprayantaḥ |
7.044.02c iḻāṁ devīm barhiṣi sādayanto 'śvinā viprā suhavā huvema ||
7.044.03a dadhikrāvāṇam bubudhāno agnim upa bruva uṣasaṁ sūryaṁ gām |
7.044.03c bradhnam mam̐ścator varuṇasya babhruṁ te viśvāsmad duritā yāvayantu ||
7.044.04a dadhikrāvā prathamo vājy arvāgre rathānām bhavati prajānan |
7.044.04c saṁvidāna uṣasā sūryeṇādityebhir vasubhir aṅgirobhiḥ ||
7.044.05a ā no dadhikrāḥ pathyām anaktv ṛtasya panthām anvetavā u |
7.044.05c śṛṇotu no daivyaṁ śardho agniḥ śṛṇvantu viśve mahiṣā amūrāḥ ||

7.045.01a ā devo yātu savitā suratno 'ntarikṣaprā vahamāno aśvaiḥ |
7.045.01c haste dadhāno naryā purūṇi niveśayañ ca prasuvañ ca bhūma ||
7.045.02a ud asya bāhū śithirā bṛhantā hiraṇyayā divo antām̐ anaṣṭām |
7.045.02c nūnaṁ so asya mahimā paniṣṭa sūraś cid asmā anu dād apasyām ||
7.045.03a sa ghā no devaḥ savitā sahāvā sāviṣad vasupatir vasūni |
7.045.03c viśrayamāṇo amatim urūcīm martabhojanam adha rāsate naḥ ||
7.045.04a imā giraḥ savitāraṁ sujihvam pūrṇagabhastim īḻate supāṇim |
7.045.04c citraṁ vayo bṛhad asme dadhātu yūyam pāta svastibhiḥ sadā naḥ ||

7.046.01a imā rudrāya sthiradhanvane giraḥ kṣipreṣave devāya svadhāvne |
7.046.01c aṣāḻhāya sahamānāya vedhase tigmāyudhāya bharatā śṛṇotu naḥ ||
7.046.02a sa hi kṣayeṇa kṣamyasya janmanaḥ sāmrājyena divyasya cetati |
7.046.02c avann avantīr upa no duraś carānamīvo rudra jāsu no bhava ||
7.046.03a yā te didyud avasṛṣṭā divas pari kṣmayā carati pari sā vṛṇaktu naḥ |
7.046.03c sahasraṁ te svapivāta bheṣajā mā nas tokeṣu tanayeṣu rīriṣaḥ ||
7.046.04a mā no vadhī rudra mā parā dā mā te bhūma prasitau hīḻitasya |
7.046.04c ā no bhaja barhiṣi jīvaśaṁse yūyam pāta svastibhiḥ sadā naḥ ||

7.047.01a āpo yaṁ vaḥ prathamaṁ devayanta indrapānam ūrmim akṛṇvateḻaḥ |
7.047.01c taṁ vo vayaṁ śucim aripram adya ghṛtapruṣam madhumantaṁ vanema ||
7.047.02a tam ūrmim āpo madhumattamaṁ vo 'pāṁ napād avatv āśuhemā |
7.047.02c yasminn indro vasubhir mādayāte tam aśyāma devayanto vo adya ||
7.047.03a śatapavitrāḥ svadhayā madantīr devīr devānām api yanti pāthaḥ |
7.047.03c tā indrasya na minanti vratāni sindhubhyo havyaṁ ghṛtavaj juhota ||
7.047.04a yāḥ sūryo raśmibhir ātatāna yābhya indro aradad gātum ūrmim |
7.047.04c te sindhavo varivo dhātanā no yūyam pāta svastibhiḥ sadā naḥ ||

7.048.01a ṛbhukṣaṇo vājā mādayadhvam asme naro maghavānaḥ sutasya |
7.048.01c ā vo 'rvācaḥ kratavo na yātāṁ vibhvo rathaṁ naryaṁ vartayantu ||
7.048.02a ṛbhur ṛbhubhir abhi vaḥ syāma vibhvo vibhubhiḥ śavasā śavāṁsi |
7.048.02c vājo asmām̐ avatu vājasātāv indreṇa yujā taruṣema vṛtram ||
7.048.03a te cid dhi pūrvīr abhi santi śāsā viśvām̐ arya uparatāti vanvan |
7.048.03c indro vibhvām̐ ṛbhukṣā vājo aryaḥ śatror mithatyā kṛṇavan vi nṛmṇam ||
7.048.04a nū devāso varivaḥ kartanā no bhūta no viśve 'vase sajoṣāḥ |
7.048.04c sam asme iṣaṁ vasavo dadīran yūyam pāta svastibhiḥ sadā naḥ ||

7.049.01a samudrajyeṣṭhāḥ salilasya madhyāt punānā yanty aniviśamānāḥ |
7.049.01c indro yā vajrī vṛṣabho rarāda tā āpo devīr iha mām avantu ||
7.049.02a yā āpo divyā uta vā sravanti khanitrimā uta vā yāḥ svayaṁjāḥ |
7.049.02c samudrārthā yāḥ śucayaḥ pāvakās tā āpo devīr iha mām avantu ||
7.049.03a yāsāṁ rājā varuṇo yāti madhye satyānṛte avapaśyañ janānām |
7.049.03c madhuścutaḥ śucayo yāḥ pāvakās tā āpo devīr iha mām avantu ||
7.049.04a yāsu rājā varuṇo yāsu somo viśve devā yāsūrjam madanti |
7.049.04c vaiśvānaro yāsv agniḥ praviṣṭas tā āpo devīr iha mām avantu ||

7.050.01a ā mām mitrāvaruṇeha rakṣataṁ kulāyayad viśvayan mā na ā gan |
7.050.01c ajakāvaṁ durdṛśīkaṁ tiro dadhe mā mām padyena rapasā vidat tsaruḥ ||
7.050.02a yad vijāman paruṣi vandanam bhuvad aṣṭhīvantau pari kulphau ca dehat |
7.050.02c agniṣ ṭac chocann apa bādhatām ito mā mām padyena rapasā vidat tsaruḥ ||
7.050.03a yac chalmalau bhavati yan nadīṣu yad oṣadhībhyaḥ pari jāyate viṣam |
7.050.03c viśve devā nir itas tat suvantu mā mām padyena rapasā vidat tsaruḥ ||
7.050.04a yāḥ pravato nivata udvata udanvatīr anudakāś ca yāḥ |
7.050.04c tā asmabhyam payasā pinvamānāḥ śivā devīr aśipadā bhavantu sarvā nadyo aśimidā bhavantu ||

7.051.01a ādityānām avasā nūtanena sakṣīmahi śarmaṇā śaṁtamena |
7.051.01c anāgāstve adititve turāsa imaṁ yajñaṁ dadhatu śroṣamāṇāḥ ||
7.051.02a ādityāso aditir mādayantām mitro aryamā varuṇo rajiṣṭhāḥ |
7.051.02c asmākaṁ santu bhuvanasya gopāḥ pibantu somam avase no adya ||
7.051.03a ādityā viśve marutaś ca viśve devāś ca viśva ṛbhavaś ca viśve |
7.051.03c indro agnir aśvinā tuṣṭuvānā yūyam pāta svastibhiḥ sadā naḥ ||

7.052.01a ādityāso aditayaḥ syāma pūr devatrā vasavo martyatrā |
7.052.01c sanema mitrāvaruṇā sananto bhavema dyāvāpṛthivī bhavantaḥ ||
7.052.02a mitras tan no varuṇo māmahanta śarma tokāya tanayāya gopāḥ |
7.052.02c mā vo bhujemānyajātam eno mā tat karma vasavo yac cayadhve ||
7.052.03a turaṇyavo 'ṅgiraso nakṣanta ratnaṁ devasya savitur iyānāḥ |
7.052.03c pitā ca tan no mahān yajatro viśve devāḥ samanaso juṣanta ||

7.053.01a pra dyāvā yajñaiḥ pṛthivī namobhiḥ sabādha īḻe bṛhatī yajatre |
7.053.01c te cid dhi pūrve kavayo gṛṇantaḥ puro mahī dadhire devaputre ||
7.053.02a pra pūrvaje pitarā navyasībhir gīrbhiḥ kṛṇudhvaṁ sadane ṛtasya |
7.053.02c ā no dyāvāpṛthivī daivyena janena yātam mahi vāṁ varūtham ||
7.053.03a uto hi vāṁ ratnadheyāni santi purūṇi dyāvāpṛthivī sudāse |
7.053.03c asme dhattaṁ yad asad askṛdhoyu yūyam pāta svastibhiḥ sadā naḥ ||

7.054.01a vāstoṣ pate prati jānīhy asmān svāveśo anamīvo bhavā naḥ |
7.054.01c yat tvemahe prati tan no juṣasva śaṁ no bhava dvipade śaṁ catuṣpade ||
7.054.02a vāstoṣ pate prataraṇo na edhi gayasphāno gobhir aśvebhir indo |
7.054.02c ajarāsas te sakhye syāma piteva putrān prati no juṣasva ||
7.054.03a vāstoṣ pate śagmayā saṁsadā te sakṣīmahi raṇvayā gātumatyā |
7.054.03c pāhi kṣema uta yoge varaṁ no yūyam pāta svastibhiḥ sadā naḥ ||

7.055.01a amīvahā vāstoṣ pate viśvā rūpāṇy āviśan |
7.055.01c sakhā suśeva edhi naḥ ||
7.055.02a yad arjuna sārameya dataḥ piśaṅga yacchase |
7.055.02c vīva bhrājanta ṛṣṭaya upa srakveṣu bapsato ni ṣu svapa ||
7.055.03a stenaṁ rāya sārameya taskaraṁ vā punaḥsara |
7.055.03c stotṝn indrasya rāyasi kim asmān ducchunāyase ni ṣu svapa ||
7.055.04a tvaṁ sūkarasya dardṛhi tava dardartu sūkaraḥ |
7.055.04c stotṝn indrasya rāyasi kim asmān ducchunāyase ni ṣu svapa ||
7.055.05a sastu mātā sastu pitā sastu śvā sastu viśpatiḥ |
7.055.05c sasantu sarve jñātayaḥ sastv ayam abhito janaḥ ||
7.055.06a ya āste yaś ca carati yaś ca paśyati no janaḥ |
7.055.06c teṣāṁ saṁ hanmo akṣāṇi yathedaṁ harmyaṁ tathā ||
7.055.07a sahasraśṛṅgo vṛṣabho yaḥ samudrād udācarat |
7.055.07c tenā sahasyenā vayaṁ ni janān svāpayāmasi ||
7.055.08a proṣṭheśayā vahyeśayā nārīr yās talpaśīvarīḥ |
7.055.08c striyo yāḥ puṇyagandhās tāḥ sarvāḥ svāpayāmasi ||

7.056.01a ka īṁ vyaktā naraḥ sanīḻā rudrasya maryā adha svaśvāḥ ||
7.056.02a nakir hy eṣāṁ janūṁṣi veda te aṅga vidre mitho janitram ||
7.056.03a abhi svapūbhir mitho vapanta vātasvanasaḥ śyenā aspṛdhran ||
7.056.04a etāni dhīro niṇyā ciketa pṛśnir yad ūdho mahī jabhāra ||
7.056.05a sā viṭ suvīrā marudbhir astu sanāt sahantī puṣyantī nṛmṇam ||
7.056.06a yāmaṁ yeṣṭhāḥ śubhā śobhiṣṭhāḥ śriyā sammiślā ojobhir ugrāḥ ||
7.056.07a ugraṁ va ojaḥ sthirā śavāṁsy adhā marudbhir gaṇas tuviṣmān ||
7.056.08a śubhro vaḥ śuṣmaḥ krudhmī manāṁsi dhunir munir iva śardhasya dhṛṣṇoḥ ||
7.056.09a sanemy asmad yuyota didyum mā vo durmatir iha praṇaṅ naḥ ||
7.056.10a priyā vo nāma huve turāṇām ā yat tṛpan maruto vāvaśānāḥ ||
7.056.11a svāyudhāsa iṣmiṇaḥ suniṣkā uta svayaṁ tanvaḥ śumbhamānāḥ ||
7.056.12a śucī vo havyā marutaḥ śucīnāṁ śuciṁ hinomy adhvaraṁ śucibhyaḥ |
7.056.12c ṛtena satyam ṛtasāpa āyañ chucijanmānaḥ śucayaḥ pāvakāḥ ||
7.056.13a aṁseṣv ā marutaḥ khādayo vo vakṣaḥsu rukmā upaśiśriyāṇāḥ |
7.056.13c vi vidyuto na vṛṣṭibhī rucānā anu svadhām āyudhair yacchamānāḥ ||
7.056.14a pra budhnyā va īrate mahāṁsi pra nāmāni prayajyavas tiradhvam |
7.056.14c sahasriyaṁ damyam bhāgam etaṁ gṛhamedhīyam maruto juṣadhvam ||
7.056.15a yadi stutasya maruto adhīthetthā viprasya vājino havīman |
7.056.15c makṣū rāyaḥ suvīryasya dāta nū cid yam anya ādabhad arāvā ||
7.056.16a atyāso na ye marutaḥ svañco yakṣadṛśo na śubhayanta maryāḥ |
7.056.16c te harmyeṣṭhāḥ śiśavo na śubhrā vatsāso na prakrīḻinaḥ payodhāḥ ||
7.056.17a daśasyanto no maruto mṛḻantu varivasyanto rodasī sumeke |
7.056.17c āre gohā nṛhā vadho vo astu sumnebhir asme vasavo namadhvam ||
7.056.18a ā vo hotā johavīti sattaḥ satrācīṁ rātim maruto gṛṇānaḥ |
7.056.18c ya īvato vṛṣaṇo asti gopāḥ so advayāvī havate va ukthaiḥ ||
7.056.19a ime turam maruto rāmayantīme sahaḥ sahasa ā namanti |
7.056.19c ime śaṁsaṁ vanuṣyato ni pānti guru dveṣo araruṣe dadhanti ||
7.056.20a ime radhraṁ cin maruto junanti bhṛmiṁ cid yathā vasavo juṣanta |
7.056.20c apa bādhadhvaṁ vṛṣaṇas tamāṁsi dhatta viśvaṁ tanayaṁ tokam asme ||
7.056.21a mā vo dātrān maruto nir arāma mā paścād daghma rathyo vibhāge |
7.056.21c ā naḥ spārhe bhajatanā vasavye yad īṁ sujātaṁ vṛṣaṇo vo asti ||
7.056.22a saṁ yad dhananta manyubhir janāsaḥ śūrā yahvīṣv oṣadhīṣu vikṣu |
7.056.22c adha smā no maruto rudriyāsas trātāro bhūta pṛtanāsv aryaḥ ||
7.056.23a bhūri cakra marutaḥ pitryāṇy ukthāni yā vaḥ śasyante purā cit |
7.056.23c marudbhir ugraḥ pṛtanāsu sāḻhā marudbhir it sanitā vājam arvā ||
7.056.24a asme vīro marutaḥ śuṣmy astu janānāṁ yo asuro vidhartā |
7.056.24c apo yena sukṣitaye taremādha svam oko abhi vaḥ syāma ||
7.056.25a tan na indro varuṇo mitro agnir āpa oṣadhīr vanino juṣanta |
7.056.25c śarman syāma marutām upasthe yūyam pāta svastibhiḥ sadā naḥ ||

7.057.01a madhvo vo nāma mārutaṁ yajatrāḥ pra yajñeṣu śavasā madanti |
7.057.01c ye rejayanti rodasī cid urvī pinvanty utsaṁ yad ayāsur ugrāḥ ||
7.057.02a nicetāro hi maruto gṛṇantam praṇetāro yajamānasya manma |
7.057.02c asmākam adya vidatheṣu barhir ā vītaye sadata pipriyāṇāḥ ||
7.057.03a naitāvad anye maruto yatheme bhrājante rukmair āyudhais tanūbhiḥ |
7.057.03c ā rodasī viśvapiśaḥ piśānāḥ samānam añjy añjate śubhe kam ||
7.057.04a ṛdhak sā vo maruto didyud astu yad va āgaḥ puruṣatā karāma |
7.057.04c mā vas tasyām api bhūmā yajatrā asme vo astu sumatiś caniṣṭhā ||
7.057.05a kṛte cid atra maruto raṇantānavadyāsaḥ śucayaḥ pāvakāḥ |
7.057.05c pra ṇo 'vata sumatibhir yajatrāḥ pra vājebhis tirata puṣyase naḥ ||
7.057.06a uta stutāso maruto vyantu viśvebhir nāmabhir naro havīṁṣi |
7.057.06c dadāta no amṛtasya prajāyai jigṛta rāyaḥ sūnṛtā maghāni ||
7.057.07a ā stutāso maruto viśva ūtī acchā sūrīn sarvatātā jigāta |
7.057.07c ye nas tmanā śatino vardhayanti yūyam pāta svastibhiḥ sadā naḥ ||

7.058.01a pra sākamukṣe arcatā gaṇāya yo daivyasya dhāmnas tuviṣmān |
7.058.01c uta kṣodanti rodasī mahitvā nakṣante nākaṁ nirṛter avaṁśāt ||
7.058.02a janūś cid vo marutas tveṣyeṇa bhīmāsas tuvimanyavo 'yāsaḥ |
7.058.02c pra ye mahobhir ojasota santi viśvo vo yāman bhayate svardṛk ||
7.058.03a bṛhad vayo maghavadbhyo dadhāta jujoṣann in marutaḥ suṣṭutiṁ naḥ |
7.058.03c gato nādhvā vi tirāti jantum pra ṇaḥ spārhābhir ūtibhis tireta ||
7.058.04a yuṣmoto vipro marutaḥ śatasvī yuṣmoto arvā sahuriḥ sahasrī |
7.058.04c yuṣmotaḥ samrāḻ uta hanti vṛtram pra tad vo astu dhūtayo deṣṇam ||
7.058.05a tām̐ ā rudrasya mīḻhuṣo vivāse kuvin naṁsante marutaḥ punar naḥ |
7.058.05c yat sasvartā jihīḻire yad āvir ava tad ena īmahe turāṇām ||
7.058.06a pra sā vāci suṣṭutir maghonām idaṁ sūktam maruto juṣanta |
7.058.06c ārāc cid dveṣo vṛṣaṇo yuyota yūyam pāta svastibhiḥ sadā naḥ ||

7.059.01a yaṁ trāyadhva idam-idaṁ devāso yaṁ ca nayatha |
7.059.01c tasmā agne varuṇa mitrāryaman marutaḥ śarma yacchata ||
7.059.02a yuṣmākaṁ devā avasāhani priya ījānas tarati dviṣaḥ |
7.059.02c pra sa kṣayaṁ tirate vi mahīr iṣo yo vo varāya dāśati ||
7.059.03a nahi vaś caramaṁ cana vasiṣṭhaḥ parimaṁsate |
7.059.03c asmākam adya marutaḥ sute sacā viśve pibata kāminaḥ ||
7.059.04a nahi va ūtiḥ pṛtanāsu mardhati yasmā arādhvaṁ naraḥ |
7.059.04c abhi va āvart sumatir navīyasī tūyaṁ yāta pipīṣavaḥ ||
7.059.05a o ṣu ghṛṣvirādhaso yātanāndhāṁsi pītaye |
7.059.05c imā vo havyā maruto rare hi kam mo ṣv anyatra gantana ||
7.059.06a ā ca no barhiḥ sadatāvitā ca naḥ spārhāṇi dātave vasu |
7.059.06c asredhanto marutaḥ somye madhau svāheha mādayādhvai ||
7.059.07a sasvaś cid dhi tanvaḥ śumbhamānā ā haṁsāso nīlapṛṣṭhā apaptan |
7.059.07c viśvaṁ śardho abhito mā ni ṣeda naro na raṇvāḥ savane madantaḥ ||
7.059.08a yo no maruto abhi durhṛṇāyus tiraś cittāni vasavo jighāṁsati |
7.059.08c druhaḥ pāśān prati sa mucīṣṭa tapiṣṭhena hanmanā hantanā tam ||
7.059.09a sāṁtapanā idaṁ havir marutas taj jujuṣṭana |
7.059.09c yuṣmākotī riśādasaḥ ||
7.059.10a gṛhamedhāsa ā gata maruto māpa bhūtana |
7.059.10c yuṣmākotī sudānavaḥ ||
7.059.11a iheha vaḥ svatavasaḥ kavayaḥ sūryatvacaḥ |
7.059.11c yajñam maruta ā vṛṇe ||
7.059.12a tryambakaṁ yajāmahe sugandhim puṣṭivardhanam |
7.059.12c urvārukam iva bandhanān mṛtyor mukṣīya māmṛtāt ||

7.060.01a yad adya sūrya bravo 'nāgā udyan mitrāya varuṇāya satyam |
7.060.01c vayaṁ devatrādite syāma tava priyāso aryaman gṛṇantaḥ ||
7.060.02a eṣa sya mitrāvaruṇā nṛcakṣā ubhe ud eti sūryo abhi jman |
7.060.02c viśvasya sthātur jagataś ca gopā ṛju marteṣu vṛjinā ca paśyan ||
7.060.03a ayukta sapta haritaḥ sadhasthād yā īṁ vahanti sūryaṁ ghṛtācīḥ |
7.060.03c dhāmāni mitrāvaruṇā yuvākuḥ saṁ yo yūtheva janimāni caṣṭe ||
7.060.04a ud vām pṛkṣāso madhumanto asthur ā sūryo aruhac chukram arṇaḥ |
7.060.04c yasmā ādityā adhvano radanti mitro aryamā varuṇaḥ sajoṣāḥ ||
7.060.05a ime cetāro anṛtasya bhūrer mitro aryamā varuṇo hi santi |
7.060.05c ima ṛtasya vāvṛdhur duroṇe śagmāsaḥ putrā aditer adabdhāḥ ||
7.060.06a ime mitro varuṇo dūḻabhāso 'cetasaṁ cic citayanti dakṣaiḥ |
7.060.06c api kratuṁ sucetasaṁ vatantas tiraś cid aṁhaḥ supathā nayanti ||
7.060.07a ime divo animiṣā pṛthivyāś cikitvāṁso acetasaṁ nayanti |
7.060.07c pravrāje cin nadyo gādham asti pāraṁ no asya viṣpitasya parṣan ||
7.060.08a yad gopāvad aditiḥ śarma bhadram mitro yacchanti varuṇaḥ sudāse |
7.060.08c tasminn ā tokaṁ tanayaṁ dadhānā mā karma devaheḻanaṁ turāsaḥ ||
7.060.09a ava vediṁ hotrābhir yajeta ripaḥ kāś cid varuṇadhrutaḥ saḥ |
7.060.09c pari dveṣobhir aryamā vṛṇaktūruṁ sudāse vṛṣaṇā u lokam ||
7.060.10a sasvaś cid dhi samṛtis tveṣy eṣām apīcyena sahasā sahante |
7.060.10c yuṣmad bhiyā vṛṣaṇo rejamānā dakṣasya cin mahinā mṛḻatā naḥ ||
7.060.11a yo brahmaṇe sumatim āyajāte vājasya sātau paramasya rāyaḥ |
7.060.11c sīkṣanta manyum maghavāno arya uru kṣayāya cakrire sudhātu ||
7.060.12a iyaṁ deva purohitir yuvabhyāṁ yajñeṣu mitrāvaruṇāv akāri |
7.060.12c viśvāni durgā pipṛtaṁ tiro no yūyam pāta svastibhiḥ sadā naḥ ||

7.061.01a ud vāṁ cakṣur varuṇa supratīkaṁ devayor eti sūryas tatanvān |
7.061.01c abhi yo viśvā bhuvanāni caṣṭe sa manyum martyeṣv ā ciketa ||
7.061.02a pra vāṁ sa mitrāvaruṇāv ṛtāvā vipro manmāni dīrghaśrud iyarti |
7.061.02c yasya brahmāṇi sukratū avātha ā yat kratvā na śaradaḥ pṛṇaithe ||
7.061.03a proror mitrāvaruṇā pṛthivyāḥ pra diva ṛṣvād bṛhataḥ sudānū |
7.061.03c spaśo dadhāthe oṣadhīṣu vikṣv ṛdhag yato animiṣaṁ rakṣamāṇā ||
7.061.04a śaṁsā mitrasya varuṇasya dhāma śuṣmo rodasī badbadhe mahitvā |
7.061.04c ayan māsā ayajvanām avīrāḥ pra yajñamanmā vṛjanaṁ tirāte ||
7.061.05a amūrā viśvā vṛṣaṇāv imā vāṁ na yāsu citraṁ dadṛśe na yakṣam |
7.061.05c druhaḥ sacante anṛtā janānāṁ na vāṁ niṇyāny acite abhūvan ||
7.061.06a sam u vāṁ yajñam mahayaṁ namobhir huve vām mitrāvaruṇā sabādhaḥ |
7.061.06c pra vām manmāny ṛcase navāni kṛtāni brahma jujuṣann imāni ||
7.061.07a iyaṁ deva purohitir yuvabhyāṁ yajñeṣu mitrāvaruṇāv akāri |
7.061.07c viśvāni durgā pipṛtaṁ tiro no yūyam pāta svastibhiḥ sadā naḥ ||

7.062.01a ut sūryo bṛhad arcīṁṣy aśret puru viśvā janima mānuṣāṇām |
7.062.01c samo divā dadṛśe rocamānaḥ kratvā kṛtaḥ sukṛtaḥ kartṛbhir bhūt ||
7.062.02a sa sūrya prati puro na ud gā ebhiḥ stomebhir etaśebhir evaiḥ |
7.062.02c pra no mitrāya varuṇāya voco 'nāgaso aryamṇe agnaye ca ||
7.062.03a vi naḥ sahasraṁ śurudho radantv ṛtāvāno varuṇo mitro agniḥ |
7.062.03c yacchantu candrā upamaṁ no arkam ā naḥ kāmam pūpurantu stavānāḥ ||
7.062.04a dyāvābhūmī adite trāsīthāṁ no ye vāṁ jajñuḥ sujanimāna ṛṣve |
7.062.04c mā heḻe bhūma varuṇasya vāyor mā mitrasya priyatamasya nṛṇām ||
7.062.05a pra bāhavā sisṛtaṁ jīvase na ā no gavyūtim ukṣataṁ ghṛtena |
7.062.05c ā no jane śravayataṁ yuvānā śrutam me mitrāvaruṇā havemā ||
7.062.06a nū mitro varuṇo aryamā nas tmane tokāya varivo dadhantu |
7.062.06c sugā no viśvā supathāni santu yūyam pāta svastibhiḥ sadā naḥ ||

7.063.01a ud v eti subhago viśvacakṣāḥ sādhāraṇaḥ sūryo mānuṣāṇām |
7.063.01c cakṣur mitrasya varuṇasya devaś carmeva yaḥ samavivyak tamāṁsi ||
7.063.02a ud v eti prasavītā janānām mahān ketur arṇavaḥ sūryasya |
7.063.02c samānaṁ cakram paryāvivṛtsan yad etaśo vahati dhūrṣu yuktaḥ ||
7.063.03a vibhrājamāna uṣasām upasthād rebhair ud ety anumadyamānaḥ |
7.063.03c eṣa me devaḥ savitā cacchanda yaḥ samānaṁ na pramināti dhāma ||
7.063.04a divo rukma urucakṣā ud eti dūrearthas taraṇir bhrājamānaḥ |
7.063.04c nūnaṁ janāḥ sūryeṇa prasūtā ayann arthāni kṛṇavann apāṁsi ||
7.063.05a yatrā cakrur amṛtā gātum asmai śyeno na dīyann anv eti pāthaḥ |
7.063.05c prati vāṁ sūra udite vidhema namobhir mitrāvaruṇota havyaiḥ ||
7.063.06a nū mitro varuṇo aryamā nas tmane tokāya varivo dadhantu |
7.063.06c sugā no viśvā supathāni santu yūyam pāta svastibhiḥ sadā naḥ ||

7.064.01a divi kṣayantā rajasaḥ pṛthivyām pra vāṁ ghṛtasya nirṇijo dadīran |
7.064.01c havyaṁ no mitro aryamā sujāto rājā sukṣatro varuṇo juṣanta ||
7.064.02a ā rājānā maha ṛtasya gopā sindhupatī kṣatriyā yātam arvāk |
7.064.02c iḻāṁ no mitrāvaruṇota vṛṣṭim ava diva invataṁ jīradānū ||
7.064.03a mitras tan no varuṇo devo aryaḥ pra sādhiṣṭhebhiḥ pathibhir nayantu |
7.064.03c bravad yathā na ād ariḥ sudāsa iṣā madema saha devagopāḥ ||
7.064.04a yo vāṁ gartam manasā takṣad etam ūrdhvāṁ dhītiṁ kṛṇavad dhārayac ca |
7.064.04c ukṣethām mitrāvaruṇā ghṛtena tā rājānā sukṣitīs tarpayethām ||
7.064.05a eṣa stomo varuṇa mitra tubhyaṁ somaḥ śukro na vāyave 'yāmi |
7.064.05c aviṣṭaṁ dhiyo jigṛtam puraṁdhīr yūyam pāta svastibhiḥ sadā naḥ ||

7.065.01a prati vāṁ sūra udite sūktair mitraṁ huve varuṇam pūtadakṣam |
7.065.01c yayor asuryam akṣitaṁ jyeṣṭhaṁ viśvasya yāmann ācitā jigatnu ||
7.065.02a tā hi devānām asurā tāv aryā tā naḥ kṣitīḥ karatam ūrjayantīḥ |
7.065.02c aśyāma mitrāvaruṇā vayaṁ vāṁ dyāvā ca yatra pīpayann ahā ca ||
7.065.03a tā bhūripāśāv anṛtasya setū duratyetū ripave martyāya |
7.065.03c ṛtasya mitrāvaruṇā pathā vām apo na nāvā duritā tarema ||
7.065.04a ā no mitrāvaruṇā havyajuṣṭiṁ ghṛtair gavyūtim ukṣatam iḻābhiḥ |
7.065.04c prati vām atra varam ā janāya pṛṇītam udno divyasya cāroḥ ||
7.065.05a eṣa stomo varuṇa mitra tubhyaṁ somaḥ śukro na vāyave 'yāmi |
7.065.05c aviṣṭaṁ dhiyo jigṛtam puraṁdhīr yūyam pāta svastibhiḥ sadā naḥ ||

7.066.01a pra mitrayor varuṇayoḥ stomo na etu śūṣyaḥ |
7.066.01c namasvān tuvijātayoḥ ||
7.066.02a yā dhārayanta devāḥ sudakṣā dakṣapitarā |
7.066.02c asuryāya pramahasā ||
7.066.03a tā naḥ stipā tanūpā varuṇa jaritṝṇām |
7.066.03c mitra sādhayataṁ dhiyaḥ ||
7.066.04a yad adya sūra udite 'nāgā mitro aryamā |
7.066.04c suvāti savitā bhagaḥ ||
7.066.05a suprāvīr astu sa kṣayaḥ pra nu yāman sudānavaḥ |
7.066.05c ye no aṁho 'tipiprati ||
7.066.06a uta svarājo aditir adabdhasya vratasya ye |
7.066.06c maho rājāna īśate ||
7.066.07a prati vāṁ sūra udite mitraṁ gṛṇīṣe varuṇam |
7.066.07c aryamaṇaṁ riśādasam ||
7.066.08a rāyā hiraṇyayā matir iyam avṛkāya śavase |
7.066.08c iyaṁ viprā medhasātaye ||
7.066.09a te syāma deva varuṇa te mitra sūribhiḥ saha |
7.066.09c iṣaṁ svaś ca dhīmahi ||
7.066.10a bahavaḥ sūracakṣaso 'gnijihvā ṛtāvṛdhaḥ |
7.066.10c trīṇi ye yemur vidathāni dhītibhir viśvāni paribhūtibhiḥ ||
7.066.11a vi ye dadhuḥ śaradam māsam ād ahar yajñam aktuṁ cād ṛcam |
7.066.11c anāpyaṁ varuṇo mitro aryamā kṣatraṁ rājāna āśata ||
7.066.12a tad vo adya manāmahe sūktaiḥ sūra udite |
7.066.12c yad ohate varuṇo mitro aryamā yūyam ṛtasya rathyaḥ ||
7.066.13a ṛtāvāna ṛtajātā ṛtāvṛdho ghorāso anṛtadviṣaḥ |
7.066.13c teṣāṁ vaḥ sumne succhardiṣṭame naraḥ syāma ye ca sūrayaḥ ||
7.066.14a ud u tyad darśataṁ vapur diva eti pratihvare |
7.066.14c yad īm āśur vahati deva etaśo viśvasmai cakṣase aram ||
7.066.15a śīrṣṇaḥ-śīrṣṇo jagatas tasthuṣas patiṁ samayā viśvam ā rajaḥ |
7.066.15c sapta svasāraḥ suvitāya sūryaṁ vahanti harito rathe ||
7.066.16a tac cakṣur devahitaṁ śukram uccarat |
7.066.16b paśyema śaradaḥ śataṁ jīvema śaradaḥ śatam ||
7.066.17a kāvyebhir adābhyā yātaṁ varuṇa dyumat |
7.066.17c mitraś ca somapītaye ||
7.066.18a divo dhāmabhir varuṇa mitraś cā yātam adruhā |
7.066.18c pibataṁ somam ātujī ||
7.066.19a ā yātam mitrāvaruṇā juṣāṇāv āhutiṁ narā |
7.066.19c pātaṁ somam ṛtāvṛdhā ||

7.067.01a prati vāṁ rathaṁ nṛpatī jaradhyai haviṣmatā manasā yajñiyena |
7.067.01c yo vāṁ dūto na dhiṣṇyāv ajīgar acchā sūnur na pitarā vivakmi ||
7.067.02a aśocy agniḥ samidhāno asme upo adṛśran tamasaś cid antāḥ |
7.067.02c aceti ketur uṣasaḥ purastāc chriye divo duhitur jāyamānaḥ ||
7.067.03a abhi vāṁ nūnam aśvinā suhotā stomaiḥ siṣakti nāsatyā vivakvān |
7.067.03c pūrvībhir yātam pathyābhir arvāk svarvidā vasumatā rathena ||
7.067.04a avor vāṁ nūnam aśvinā yuvākur huve yad vāṁ sute mādhvī vasūyuḥ |
7.067.04c ā vāṁ vahantu sthavirāso aśvāḥ pibātho asme suṣutā madhūni ||
7.067.05a prācīm u devāśvinā dhiyam me 'mṛdhrāṁ sātaye kṛtaṁ vasūyum |
7.067.05c viśvā aviṣṭaṁ vāja ā puraṁdhīs tā naḥ śaktaṁ śacīpatī śacībhiḥ ||
7.067.06a aviṣṭaṁ dhīṣv aśvinā na āsu prajāvad reto ahrayaṁ no astu |
7.067.06c ā vāṁ toke tanaye tūtujānāḥ suratnāso devavītiṁ gamema ||
7.067.07a eṣa sya vām pūrvagatveva sakhye nidhir hito mādhvī rāto asme |
7.067.07c aheḻatā manasā yātam arvāg aśnantā havyam mānuṣīṣu vikṣu ||
7.067.08a ekasmin yoge bhuraṇā samāne pari vāṁ sapta sravato ratho gāt |
7.067.08c na vāyanti subhvo devayuktā ye vāṁ dhūrṣu taraṇayo vahanti ||
7.067.09a asaścatā maghavadbhyo hi bhūtaṁ ye rāyā maghadeyaṁ junanti |
7.067.09c pra ye bandhuṁ sūnṛtābhis tirante gavyā pṛñcanto aśvyā maghāni ||
7.067.10a nū me havam ā śṛṇutaṁ yuvānā yāsiṣṭaṁ vartir aśvināv irāvat |
7.067.10c dhattaṁ ratnāni jarataṁ ca sūrīn yūyam pāta svastibhiḥ sadā naḥ ||

7.068.01a ā śubhrā yātam aśvinā svaśvā giro dasrā jujuṣāṇā yuvākoḥ |
7.068.01c havyāni ca pratibhṛtā vītaṁ naḥ ||
7.068.02a pra vām andhāṁsi madyāny asthur araṁ gantaṁ haviṣo vītaye me |
7.068.02c tiro aryo havanāni śrutaṁ naḥ ||
7.068.03a pra vāṁ ratho manojavā iyarti tiro rajāṁsy aśvinā śatotiḥ |
7.068.03c asmabhyaṁ sūryāvasū iyānaḥ ||
7.068.04a ayaṁ ha yad vāṁ devayā u adrir ūrdhvo vivakti somasud yuvabhyām |
7.068.04c ā valgū vipro vavṛtīta havyaiḥ ||
7.068.05a citraṁ ha yad vām bhojanaṁ nv asti ny atraye mahiṣvantaṁ yuyotam |
7.068.05c yo vām omānaṁ dadhate priyaḥ san ||
7.068.06a uta tyad vāṁ jurate aśvinā bhūc cyavānāya pratītyaṁ havirde |
7.068.06c adhi yad varpa itaūti dhatthaḥ ||
7.068.07a uta tyam bhujyum aśvinā sakhāyo madhye jahur durevāsaḥ samudre |
7.068.07c nir īm parṣad arāvā yo yuvākuḥ ||
7.068.08a vṛkāya cij jasamānāya śaktam uta śrutaṁ śayave hūyamānā |
7.068.08c yāv aghnyām apinvatam apo na staryaṁ cic chakty aśvinā śacībhiḥ ||
7.068.09a eṣa sya kārur jarate sūktair agre budhāna uṣasāṁ sumanmā |
7.068.09c iṣā taṁ vardhad aghnyā payobhir yūyam pāta svastibhiḥ sadā naḥ ||

7.069.01a ā vāṁ ratho rodasī badbadhāno hiraṇyayo vṛṣabhir yātv aśvaiḥ |
7.069.01c ghṛtavartaniḥ pavibhī rucāna iṣāṁ voḻhā nṛpatir vājinīvān ||
7.069.02a sa paprathāno abhi pañca bhūmā trivandhuro manasā yātu yuktaḥ |
7.069.02c viśo yena gacchatho devayantīḥ kutrā cid yāmam aśvinā dadhānā ||
7.069.03a svaśvā yaśasā yātam arvāg dasrā nidhim madhumantam pibāthaḥ |
7.069.03c vi vāṁ ratho vadhvā yādamāno 'ntān divo bādhate vartanibhyām ||
7.069.04a yuvoḥ śriyam pari yoṣāvṛṇīta sūro duhitā paritakmyāyām |
7.069.04c yad devayantam avathaḥ śacībhiḥ pari ghraṁsam omanā vāṁ vayo gāt ||
7.069.05a yo ha sya vāṁ rathirā vasta usrā ratho yujānaḥ pariyāti vartiḥ |
7.069.05c tena naḥ śaṁ yor uṣaso vyuṣṭau ny aśvinā vahataṁ yajñe asmin ||
7.069.06a narā gaureva vidyutaṁ tṛṣāṇāsmākam adya savanopa yātam |
7.069.06c purutrā hi vām matibhir havante mā vām anye ni yaman devayantaḥ ||
7.069.07a yuvam bhujyum avaviddhaṁ samudra ud ūhathur arṇaso asridhānaiḥ |
7.069.07c patatribhir aśramair avyathibhir daṁsanābhir aśvinā pārayantā ||
7.069.08a nū me havam ā śṛṇutaṁ yuvānā yāsiṣṭaṁ vartir aśvināv irāvat |
7.069.08c dhattaṁ ratnāni jarataṁ ca sūrīn yūyam pāta svastibhiḥ sadā naḥ ||

7.070.01a ā viśvavārāśvinā gataṁ naḥ pra tat sthānam avāci vām pṛthivyām |
7.070.01c aśvo na vājī śunapṛṣṭho asthād ā yat sedathur dhruvase na yonim ||
7.070.02a siṣakti sā vāṁ sumatiś caniṣṭhātāpi gharmo manuṣo duroṇe |
7.070.02c yo vāṁ samudrān saritaḥ piparty etagvā cin na suyujā yujānaḥ ||
7.070.03a yāni sthānāny aśvinā dadhāthe divo yahvīṣv oṣadhīṣu vikṣu |
7.070.03c ni parvatasya mūrdhani sadanteṣaṁ janāya dāśuṣe vahantā ||
7.070.04a caniṣṭaṁ devā oṣadhīṣv apsu yad yogyā aśnavaithe ṛṣīṇām |
7.070.04c purūṇi ratnā dadhatau ny asme anu pūrvāṇi cakhyathur yugāni ||
7.070.05a śuśruvāṁsā cid aśvinā purūṇy abhi brahmāṇi cakṣāthe ṛṣīṇām |
7.070.05c prati pra yātaṁ varam ā janāyāsme vām astu sumatiś caniṣṭhā ||
7.070.06a yo vāṁ yajño nāsatyā haviṣmān kṛtabrahmā samaryo bhavāti |
7.070.06c upa pra yātaṁ varam ā vasiṣṭham imā brahmāṇy ṛcyante yuvabhyām ||
7.070.07a iyam manīṣā iyam aśvinā gīr imāṁ suvṛktiṁ vṛṣaṇā juṣethām |
7.070.07c imā brahmāṇi yuvayūny agman yūyam pāta svastibhiḥ sadā naḥ ||

7.071.01a apa svasur uṣaso nag jihīte riṇakti kṛṣṇīr aruṣāya panthām |
7.071.01c aśvāmaghā gomaghā vāṁ huvema divā naktaṁ śarum asmad yuyotam ||
7.071.02a upāyātaṁ dāśuṣe martyāya rathena vāmam aśvinā vahantā |
7.071.02c yuyutam asmad anirām amīvāṁ divā naktam mādhvī trāsīthāṁ naḥ ||
7.071.03a ā vāṁ ratham avamasyāṁ vyuṣṭau sumnāyavo vṛṣaṇo vartayantu |
7.071.03c syūmagabhastim ṛtayugbhir aśvair āśvinā vasumantaṁ vahethām ||
7.071.04a yo vāṁ ratho nṛpatī asti voḻhā trivandhuro vasumām̐ usrayāmā |
7.071.04c ā na enā nāsatyopa yātam abhi yad vāṁ viśvapsnyo jigāti ||
7.071.05a yuvaṁ cyavānaṁ jaraso 'mumuktaṁ ni pedava ūhathur āśum aśvam |
7.071.05c nir aṁhasas tamasaḥ spartam atriṁ ni jāhuṣaṁ śithire dhātam antaḥ ||
7.071.06a iyam manīṣā iyam aśvinā gīr imāṁ suvṛktiṁ vṛṣaṇā juṣethām |
7.071.06c imā brahmāṇi yuvayūny agman yūyam pāta svastibhiḥ sadā naḥ ||

7.072.01a ā gomatā nāsatyā rathenāśvāvatā puruścandreṇa yātam |
7.072.01c abhi vāṁ viśvā niyutaḥ sacante spārhayā śriyā tanvā śubhānā ||
7.072.02a ā no devebhir upa yātam arvāk sajoṣasā nāsatyā rathena |
7.072.02c yuvor hi naḥ sakhyā pitryāṇi samāno bandhur uta tasya vittam ||
7.072.03a ud u stomāso aśvinor abudhrañ jāmi brahmāṇy uṣasaś ca devīḥ |
7.072.03c āvivāsan rodasī dhiṣṇyeme acchā vipro nāsatyā vivakti ||
7.072.04a vi ced ucchanty aśvinā uṣāsaḥ pra vām brahmāṇi kāravo bharante |
7.072.04c ūrdhvam bhānuṁ savitā devo aśred bṛhad agnayaḥ samidhā jarante ||
7.072.05a ā paścātān nāsatyā purastād āśvinā yātam adharād udaktāt |
7.072.05c ā viśvataḥ pāñcajanyena rāyā yūyam pāta svastibhiḥ sadā naḥ ||

7.073.01a atāriṣma tamasas pāram asya prati stomaṁ devayanto dadhānāḥ |
7.073.01c purudaṁsā purutamā purājāmartyā havate aśvinā gīḥ ||
7.073.02a ny u priyo manuṣaḥ sādi hotā nāsatyā yo yajate vandate ca |
7.073.02c aśnītam madhvo aśvinā upāka ā vāṁ voce vidatheṣu prayasvān ||
7.073.03a ahema yajñam pathām urāṇā imāṁ suvṛktiṁ vṛṣaṇā juṣethām |
7.073.03c śruṣṭīveva preṣito vām abodhi prati stomair jaramāṇo vasiṣṭhaḥ ||
7.073.04a upa tyā vahnī gamato viśaṁ no rakṣohaṇā sambhṛtā vīḻupāṇī |
7.073.04c sam andhāṁsy agmata matsarāṇi mā no mardhiṣṭam ā gataṁ śivena ||
7.073.05a ā paścātān nāsatyā purastād āśvinā yātam adharād udaktāt |
7.073.05c ā viśvataḥ pāñcajanyena rāyā yūyam pāta svastibhiḥ sadā naḥ ||

7.074.01a imā u vāṁ diviṣṭaya usrā havante aśvinā |
7.074.01c ayaṁ vām ahve 'vase śacīvasū viśaṁ-viśaṁ hi gacchathaḥ ||
7.074.02a yuvaṁ citraṁ dadathur bhojanaṁ narā codethāṁ sūnṛtāvate |
7.074.02c arvāg rathaṁ samanasā ni yacchatam pibataṁ somyam madhu ||
7.074.03a ā yātam upa bhūṣatam madhvaḥ pibatam aśvinā |
7.074.03c dugdham payo vṛṣaṇā jenyāvasū mā no mardhiṣṭam ā gatam ||
7.074.04a aśvāso ye vām upa dāśuṣo gṛhaṁ yuvāṁ dīyanti bibhrataḥ |
7.074.04c makṣūyubhir narā hayebhir aśvinā devā yātam asmayū ||
7.074.05a adhā ha yanto aśvinā pṛkṣaḥ sacanta sūrayaḥ |
7.074.05c tā yaṁsato maghavadbhyo dhruvaṁ yaśaś chardir asmabhyaṁ nāsatyā ||
7.074.06a pra ye yayur avṛkāso rathā iva nṛpātāro janānām |
7.074.06c uta svena śavasā śūśuvur nara uta kṣiyanti sukṣitim ||

7.075.01a vy uṣā āvo divijā ṛtenāviṣkṛṇvānā mahimānam āgāt |
7.075.01c apa druhas tama āvar ajuṣṭam aṅgirastamā pathyā ajīgaḥ ||
7.075.02a mahe no adya suvitāya bodhy uṣo mahe saubhagāya pra yandhi |
7.075.02c citraṁ rayiṁ yaśasaṁ dhehy asme devi marteṣu mānuṣi śravasyum ||
7.075.03a ete tye bhānavo darśatāyāś citrā uṣaso amṛtāsa āguḥ |
7.075.03c janayanto daivyāni vratāny āpṛṇanto antarikṣā vy asthuḥ ||
7.075.04a eṣā syā yujānā parākāt pañca kṣitīḥ pari sadyo jigāti |
7.075.04c abhipaśyantī vayunā janānāṁ divo duhitā bhuvanasya patnī ||
7.075.05a vājinīvatī sūryasya yoṣā citrāmaghā rāya īśe vasūnām |
7.075.05c ṛṣiṣṭutā jarayantī maghony uṣā ucchati vahnibhir gṛṇānā ||
7.075.06a prati dyutānām aruṣāso aśvāś citrā adṛśrann uṣasaṁ vahantaḥ |
7.075.06c yāti śubhrā viśvapiśā rathena dadhāti ratnaṁ vidhate janāya ||
7.075.07a satyā satyebhir mahatī mahadbhir devī devebhir yajatā yajatraiḥ |
7.075.07c rujad dṛḻhāni dadad usriyāṇām prati gāva uṣasaṁ vāvaśanta ||
7.075.08a nū no gomad vīravad dhehi ratnam uṣo aśvāvat purubhojo asme |
7.075.08c mā no barhiḥ puruṣatā nide kar yūyam pāta svastibhiḥ sadā naḥ ||

7.076.01a ud u jyotir amṛtaṁ viśvajanyaṁ viśvānaraḥ savitā devo aśret |
7.076.01c kratvā devānām ajaniṣṭa cakṣur āvir akar bhuvanaṁ viśvam uṣāḥ ||
7.076.02a pra me panthā devayānā adṛśrann amardhanto vasubhir iṣkṛtāsaḥ |
7.076.02c abhūd u ketur uṣasaḥ purastāt pratīcy āgād adhi harmyebhyaḥ ||
7.076.03a tānīd ahāni bahulāny āsan yā prācīnam uditā sūryasya |
7.076.03c yataḥ pari jāra ivācaranty uṣo dadṛkṣe na punar yatīva ||
7.076.04a ta id devānāṁ sadhamāda āsann ṛtāvānaḥ kavayaḥ pūrvyāsaḥ |
7.076.04c gūḻhaṁ jyotiḥ pitaro anv avindan satyamantrā ajanayann uṣāsam ||
7.076.05a samāna ūrve adhi saṁgatāsaḥ saṁ jānate na yatante mithas te |
7.076.05c te devānāṁ na minanti vratāny amardhanto vasubhir yādamānāḥ ||
7.076.06a prati tvā stomair īḻate vasiṣṭhā uṣarbudhaḥ subhage tuṣṭuvāṁsaḥ |
7.076.06c gavāṁ netrī vājapatnī na ucchoṣaḥ sujāte prathamā jarasva ||
7.076.07a eṣā netrī rādhasaḥ sūnṛtānām uṣā ucchantī ribhyate vasiṣṭhaiḥ |
7.076.07c dīrghaśrutaṁ rayim asme dadhānā yūyam pāta svastibhiḥ sadā naḥ ||

7.077.01a upo ruruce yuvatir na yoṣā viśvaṁ jīvam prasuvantī carāyai |
7.077.01c abhūd agniḥ samidhe mānuṣāṇām akar jyotir bādhamānā tamāṁsi ||
7.077.02a viśvam pratīcī saprathā ud asthād ruśad vāso bibhratī śukram aśvait |
7.077.02c hiraṇyavarṇā sudṛśīkasaṁdṛg gavām mātā netry ahnām aroci ||
7.077.03a devānāṁ cakṣuḥ subhagā vahantī śvetaṁ nayantī sudṛśīkam aśvam |
7.077.03c uṣā adarśi raśmibhir vyaktā citrāmaghā viśvam anu prabhūtā ||
7.077.04a antivāmā dūre amitram ucchorvīṁ gavyūtim abhayaṁ kṛdhī naḥ |
7.077.04c yāvaya dveṣa ā bharā vasūni codaya rādho gṛṇate maghoni ||
7.077.05a asme śreṣṭhebhir bhānubhir vi bhāhy uṣo devi pratirantī na āyuḥ |
7.077.05c iṣaṁ ca no dadhatī viśvavāre gomad aśvāvad rathavac ca rādhaḥ ||
7.077.06a yāṁ tvā divo duhitar vardhayanty uṣaḥ sujāte matibhir vasiṣṭhāḥ |
7.077.06c sāsmāsu dhā rayim ṛṣvam bṛhantaṁ yūyam pāta svastibhiḥ sadā naḥ ||

7.078.01a prati ketavaḥ prathamā adṛśrann ūrdhvā asyā añjayo vi śrayante |
7.078.01c uṣo arvācā bṛhatā rathena jyotiṣmatā vāmam asmabhyaṁ vakṣi ||
7.078.02a prati ṣīm agnir jarate samiddhaḥ prati viprāso matibhir gṛṇantaḥ |
7.078.02c uṣā yāti jyotiṣā bādhamānā viśvā tamāṁsi duritāpa devī ||
7.078.03a etā u tyāḥ praty adṛśran purastāj jyotir yacchantīr uṣaso vibhātīḥ |
7.078.03c ajījanan sūryaṁ yajñam agnim apācīnaṁ tamo agād ajuṣṭam ||
7.078.04a aceti divo duhitā maghonī viśve paśyanty uṣasaṁ vibhātīm |
7.078.04c āsthād rathaṁ svadhayā yujyamānam ā yam aśvāsaḥ suyujo vahanti ||
7.078.05a prati tvādya sumanaso budhantāsmākāso maghavāno vayaṁ ca |
7.078.05c tilvilāyadhvam uṣaso vibhātīr yūyam pāta svastibhiḥ sadā naḥ ||

7.079.01a vy uṣā āvaḥ pathyā janānām pañca kṣitīr mānuṣīr bodhayantī |
7.079.01c susaṁdṛgbhir ukṣabhir bhānum aśred vi sūryo rodasī cakṣasāvaḥ ||
7.079.02a vy añjate divo anteṣv aktūn viśo na yuktā uṣaso yatante |
7.079.02c saṁ te gāvas tama ā vartayanti jyotir yacchanti saviteva bāhū ||
7.079.03a abhūd uṣā indratamā maghony ajījanat suvitāya śravāṁsi |
7.079.03c vi divo devī duhitā dadhāty aṅgirastamā sukṛte vasūni ||
7.079.04a tāvad uṣo rādho asmabhyaṁ rāsva yāvat stotṛbhyo arado gṛṇānā |
7.079.04c yāṁ tvā jajñur vṛṣabhasyā raveṇa vi dṛḻhasya duro adrer aurṇoḥ ||
7.079.05a devaṁ-devaṁ rādhase codayanty asmadryak sūnṛtā īrayantī |
7.079.05c vyucchantī naḥ sanaye dhiyo dhā yūyam pāta svastibhiḥ sadā naḥ ||

7.080.01a prati stomebhir uṣasaṁ vasiṣṭhā gīrbhir viprāsaḥ prathamā abudhran |
7.080.01c vivartayantīṁ rajasī samante āviṣkṛṇvatīm bhuvanāni viśvā ||
7.080.02a eṣā syā navyam āyur dadhānā gūḍhvī tamo jyotiṣoṣā abodhi |
7.080.02c agra eti yuvatir ahrayāṇā prācikitat sūryaṁ yajñam agnim ||
7.080.03a aśvāvatīr gomatīr na uṣāso vīravatīḥ sadam ucchantu bhadrāḥ |
7.080.03c ghṛtaṁ duhānā viśvataḥ prapītā yūyam pāta svastibhiḥ sadā naḥ ||

7.081.01a praty u adarśy āyaty ucchantī duhitā divaḥ |
7.081.01c apo mahi vyayati cakṣase tamo jyotiṣ kṛṇoti sūnarī ||
7.081.02a ud usriyāḥ sṛjate sūryaḥ sacām̐ udyan nakṣatram arcivat |
7.081.02c taved uṣo vyuṣi sūryasya ca sam bhaktena gamemahi ||
7.081.03a prati tvā duhitar diva uṣo jīrā abhutsmahi |
7.081.03c yā vahasi puru spārhaṁ vananvati ratnaṁ na dāśuṣe mayaḥ ||
7.081.04a ucchantī yā kṛṇoṣi maṁhanā mahi prakhyai devi svar dṛśe |
7.081.04c tasyās te ratnabhāja īmahe vayaṁ syāma mātur na sūnavaḥ ||
7.081.05a tac citraṁ rādha ā bharoṣo yad dīrghaśruttamam |
7.081.05c yat te divo duhitar martabhojanaṁ tad rāsva bhunajāmahai ||
7.081.06a śravaḥ sūribhyo amṛtaṁ vasutvanaṁ vājām̐ asmabhyaṁ gomataḥ |
7.081.06c codayitrī maghonaḥ sūnṛtāvaty uṣā ucchad apa sridhaḥ ||

7.082.01a indrāvaruṇā yuvam adhvarāya no viśe janāya mahi śarma yacchatam |
7.082.01c dīrghaprayajyum ati yo vanuṣyati vayaṁ jayema pṛtanāsu dūḍhyaḥ ||
7.082.02a samrāḻ anyaḥ svarāḻ anya ucyate vām mahāntāv indrāvaruṇā mahāvasū |
7.082.02c viśve devāsaḥ parame vyomani saṁ vām ojo vṛṣaṇā sam balaṁ dadhuḥ ||
7.082.03a anv apāṁ khāny atṛntam ojasā sūryam airayataṁ divi prabhum |
7.082.03c indrāvaruṇā made asya māyino 'pinvatam apitaḥ pinvataṁ dhiyaḥ ||
7.082.04a yuvām id yutsu pṛtanāsu vahnayo yuvāṁ kṣemasya prasave mitajñavaḥ |
7.082.04c īśānā vasva ubhayasya kārava indrāvaruṇā suhavā havāmahe ||
7.082.05a indrāvaruṇā yad imāni cakrathur viśvā jātāni bhuvanasya majmanā |
7.082.05c kṣemeṇa mitro varuṇaṁ duvasyati marudbhir ugraḥ śubham anya īyate ||
7.082.06a mahe śulkāya varuṇasya nu tviṣa ojo mimāte dhruvam asya yat svam |
7.082.06c ajāmim anyaḥ śnathayantam ātirad dabhrebhir anyaḥ pra vṛṇoti bhūyasaḥ ||
7.082.07a na tam aṁho na duritāni martyam indrāvaruṇā na tapaḥ kutaś cana |
7.082.07c yasya devā gacchatho vītho adhvaraṁ na tam martasya naśate parihvṛtiḥ ||
7.082.08a arvāṅ narā daivyenāvasā gataṁ śṛṇutaṁ havaṁ yadi me jujoṣathaḥ |
7.082.08c yuvor hi sakhyam uta vā yad āpyam mārḍīkam indrāvaruṇā ni yacchatam ||
7.082.09a asmākam indrāvaruṇā bhare-bhare puroyodhā bhavataṁ kṛṣṭyojasā |
7.082.09c yad vāṁ havanta ubhaye adha spṛdhi naras tokasya tanayasya sātiṣu ||
7.082.10a asme indro varuṇo mitro aryamā dyumnaṁ yacchantu mahi śarma saprathaḥ |
7.082.10c avadhraṁ jyotir aditer ṛtāvṛdho devasya ślokaṁ savitur manāmahe ||

7.083.01a yuvāṁ narā paśyamānāsa āpyam prācā gavyantaḥ pṛthuparśavo yayuḥ |
7.083.01c dāsā ca vṛtrā hatam āryāṇi ca sudāsam indrāvaruṇāvasāvatam ||
7.083.02a yatrā naraḥ samayante kṛtadhvajo yasminn ājā bhavati kiṁ cana priyam |
7.083.02c yatrā bhayante bhuvanā svardṛśas tatrā na indrāvaruṇādhi vocatam ||
7.083.03a sam bhūmyā antā dhvasirā adṛkṣatendrāvaruṇā divi ghoṣa āruhat |
7.083.03c asthur janānām upa mām arātayo 'rvāg avasā havanaśrutā gatam ||
7.083.04a indrāvaruṇā vadhanābhir aprati bhedaṁ vanvantā pra sudāsam āvatam |
7.083.04c brahmāṇy eṣāṁ śṛṇutaṁ havīmani satyā tṛtsūnām abhavat purohitiḥ ||
7.083.05a indrāvaruṇāv abhy ā tapanti māghāny aryo vanuṣām arātayaḥ |
7.083.05c yuvaṁ hi vasva ubhayasya rājatho 'dha smā no 'vatam pārye divi ||
7.083.06a yuvāṁ havanta ubhayāsa ājiṣv indraṁ ca vasvo varuṇaṁ ca sātaye |
7.083.06c yatra rājabhir daśabhir nibādhitam pra sudāsam āvataṁ tṛtsubhiḥ saha ||
7.083.07a daśa rājānaḥ samitā ayajyavaḥ sudāsam indrāvaruṇā na yuyudhuḥ |
7.083.07c satyā nṛṇām admasadām upastutir devā eṣām abhavan devahūtiṣu ||
7.083.08a dāśarājñe pariyattāya viśvataḥ sudāsa indrāvaruṇāv aśikṣatam |
7.083.08c śvityañco yatra namasā kapardino dhiyā dhīvanto asapanta tṛtsavaḥ ||
7.083.09a vṛtrāṇy anyaḥ samitheṣu jighnate vratāny anyo abhi rakṣate sadā |
7.083.09c havāmahe vāṁ vṛṣaṇā suvṛktibhir asme indrāvaruṇā śarma yacchatam ||
7.083.10a asme indro varuṇo mitro aryamā dyumnaṁ yacchantu mahi śarma saprathaḥ |
7.083.10c avadhraṁ jyotir aditer ṛtāvṛdho devasya ślokaṁ savitur manāmahe ||

7.084.01a ā vāṁ rājānāv adhvare vavṛtyāṁ havyebhir indrāvaruṇā namobhiḥ |
7.084.01c pra vāṁ ghṛtācī bāhvor dadhānā pari tmanā viṣurūpā jigāti ||
7.084.02a yuvo rāṣṭram bṛhad invati dyaur yau setṛbhir arajjubhiḥ sinīthaḥ |
7.084.02c pari no heḻo varuṇasya vṛjyā uruṁ na indraḥ kṛṇavad u lokam ||
7.084.03a kṛtaṁ no yajñaṁ vidatheṣu cāruṁ kṛtam brahmāṇi sūriṣu praśastā |
7.084.03c upo rayir devajūto na etu pra ṇaḥ spārhābhir ūtibhis tiretam ||
7.084.04a asme indrāvaruṇā viśvavāraṁ rayiṁ dhattaṁ vasumantam purukṣum |
7.084.04c pra ya ādityo anṛtā mināty amitā śūro dayate vasūni ||
7.084.05a iyam indraṁ varuṇam aṣṭa me gīḥ prāvat toke tanaye tūtujānā |
7.084.05c suratnāso devavītiṁ gamema yūyam pāta svastibhiḥ sadā naḥ ||

7.085.01a punīṣe vām arakṣasam manīṣāṁ somam indrāya varuṇāya juhvat |
7.085.01c ghṛtapratīkām uṣasaṁ na devīṁ tā no yāmann uruṣyatām abhīke ||
7.085.02a spardhante vā u devahūye atra yeṣu dhvajeṣu didyavaḥ patanti |
7.085.02c yuvaṁ tām̐ indrāvaruṇāv amitrān hatam parācaḥ śarvā viṣūcaḥ ||
7.085.03a āpaś cid dhi svayaśasaḥ sadaḥsu devīr indraṁ varuṇaṁ devatā dhuḥ |
7.085.03c kṛṣṭīr anyo dhārayati praviktā vṛtrāṇy anyo apratīni hanti ||
7.085.04a sa sukratur ṛtacid astu hotā ya āditya śavasā vāṁ namasvān |
7.085.04c āvavartad avase vāṁ haviṣmān asad it sa suvitāya prayasvān ||
7.085.05a iyam indraṁ varuṇam aṣṭa me gīḥ prāvat toke tanaye tūtujānā |
7.085.05c suratnāso devavītiṁ gamema yūyam pāta svastibhiḥ sadā naḥ ||

7.086.01a dhīrā tv asya mahinā janūṁṣi vi yas tastambha rodasī cid urvī |
7.086.01c pra nākam ṛṣvaṁ nunude bṛhantaṁ dvitā nakṣatram paprathac ca bhūma ||
7.086.02a uta svayā tanvā saṁ vade tat kadā nv antar varuṇe bhuvāni |
7.086.02c kim me havyam ahṛṇāno juṣeta kadā mṛḻīkaṁ sumanā abhi khyam ||
7.086.03a pṛcche tad eno varuṇa didṛkṣūpo emi cikituṣo vipṛccham |
7.086.03c samānam in me kavayaś cid āhur ayaṁ ha tubhyaṁ varuṇo hṛṇīte ||
7.086.04a kim āga āsa varuṇa jyeṣṭhaṁ yat stotāraṁ jighāṁsasi sakhāyam |
7.086.04c pra tan me voco dūḻabha svadhāvo 'va tvānenā namasā tura iyām ||
7.086.05a ava drugdhāni pitryā sṛjā no 'va yā vayaṁ cakṛmā tanūbhiḥ |
7.086.05c ava rājan paśutṛpaṁ na tāyuṁ sṛjā vatsaṁ na dāmno vasiṣṭham ||
7.086.06a na sa svo dakṣo varuṇa dhrutiḥ sā surā manyur vibhīdako acittiḥ |
7.086.06c asti jyāyān kanīyasa upāre svapnaś caned anṛtasya prayotā ||
7.086.07a araṁ dāso na mīḻhuṣe karāṇy ahaṁ devāya bhūrṇaye 'nāgāḥ |
7.086.07c acetayad acito devo aryo gṛtsaṁ rāye kavitaro junāti ||
7.086.08a ayaṁ su tubhyaṁ varuṇa svadhāvo hṛdi stoma upaśritaś cid astu |
7.086.08c śaṁ naḥ kṣeme śam u yoge no astu yūyam pāta svastibhiḥ sadā naḥ ||

7.087.01a radat patho varuṇaḥ sūryāya prārṇāṁsi samudriyā nadīnām |
7.087.01c sargo na sṛṣṭo arvatīr ṛtāyañ cakāra mahīr avanīr ahabhyaḥ ||
7.087.02a ātmā te vāto raja ā navīnot paśur na bhūrṇir yavase sasavān |
7.087.02c antar mahī bṛhatī rodasīme viśvā te dhāma varuṇa priyāṇi ||
7.087.03a pari spaśo varuṇasya smadiṣṭā ubhe paśyanti rodasī sumeke |
7.087.03c ṛtāvānaḥ kavayo yajñadhīrāḥ pracetaso ya iṣayanta manma ||
7.087.04a uvāca me varuṇo medhirāya triḥ sapta nāmāghnyā bibharti |
7.087.04c vidvān padasya guhyā na vocad yugāya vipra uparāya śikṣan ||
7.087.05a tisro dyāvo nihitā antar asmin tisro bhūmīr uparāḥ ṣaḍvidhānāḥ |
7.087.05c gṛtso rājā varuṇaś cakra etaṁ divi preṅkhaṁ hiraṇyayaṁ śubhe kam ||
7.087.06a ava sindhuṁ varuṇo dyaur iva sthād drapso na śveto mṛgas tuviṣmān |
7.087.06c gambhīraśaṁso rajaso vimānaḥ supārakṣatraḥ sato asya rājā ||
7.087.07a yo mṛḻayāti cakruṣe cid āgo vayaṁ syāma varuṇe anāgāḥ |
7.087.07c anu vratāny aditer ṛdhanto yūyam pāta svastibhiḥ sadā naḥ ||

7.088.01a pra śundhyuvaṁ varuṇāya preṣṭhām matiṁ vasiṣṭha mīḻhuṣe bharasva |
7.088.01c ya īm arvāñcaṁ karate yajatraṁ sahasrāmaghaṁ vṛṣaṇam bṛhantam ||
7.088.02a adhā nv asya saṁdṛśaṁ jaganvān agner anīkaṁ varuṇasya maṁsi |
7.088.02c svar yad aśmann adhipā u andho 'bhi mā vapur dṛśaye ninīyāt ||
7.088.03a ā yad ruhāva varuṇaś ca nāvam pra yat samudram īrayāva madhyam |
7.088.03c adhi yad apāṁ snubhiś carāva pra preṅkha īṅkhayāvahai śubhe kam ||
7.088.04a vasiṣṭhaṁ ha varuṇo nāvy ādhād ṛṣiṁ cakāra svapā mahobhiḥ |
7.088.04c stotāraṁ vipraḥ sudinatve ahnāṁ yān nu dyāvas tatanan yād uṣāsaḥ ||
7.088.05a kva tyāni nau sakhyā babhūvuḥ sacāvahe yad avṛkam purā cit |
7.088.05c bṛhantam mānaṁ varuṇa svadhāvaḥ sahasradvāraṁ jagamā gṛhaṁ te ||
7.088.06a ya āpir nityo varuṇa priyaḥ san tvām āgāṁsi kṛṇavat sakhā te |
7.088.06c mā ta enasvanto yakṣin bhujema yandhi ṣmā vipraḥ stuvate varūtham ||
7.088.07a dhruvāsu tvāsu kṣitiṣu kṣiyanto vy asmat pāśaṁ varuṇo mumocat |
7.088.07c avo vanvānā aditer upasthād yūyam pāta svastibhiḥ sadā naḥ ||

7.089.01a mo ṣu varuṇa mṛnmayaṁ gṛhaṁ rājann ahaṁ gamam |
7.089.01c mṛḻā sukṣatra mṛḻaya ||
7.089.02a yad emi prasphurann iva dṛtir na dhmāto adrivaḥ |
7.089.02c mṛḻā sukṣatra mṛḻaya ||
7.089.03a kratvaḥ samaha dīnatā pratīpaṁ jagamā śuce |
7.089.03c mṛḻā sukṣatra mṛḻaya ||
7.089.04a apām madhye tasthivāṁsaṁ tṛṣṇāvidaj jaritāram |
7.089.04c mṛḻā sukṣatra mṛḻaya ||
7.089.05a yat kiṁ cedaṁ varuṇa daivye jane 'bhidroham manuṣyāś carāmasi |
7.089.05c acittī yat tava dharmā yuyopima mā nas tasmād enaso deva rīriṣaḥ ||

7.090.01a pra vīrayā śucayo dadrire vām adhvaryubhir madhumantaḥ sutāsaḥ |
7.090.01c vaha vāyo niyuto yāhy acchā pibā sutasyāndhaso madāya ||
7.090.02a īśānāya prahutiṁ yas ta ānaṭ chuciṁ somaṁ śucipās tubhyaṁ vāyo |
7.090.02c kṛṇoṣi tam martyeṣu praśastaṁ jāto-jāto jāyate vājy asya ||
7.090.03a rāye nu yaṁ jajñatū rodasīme rāye devī dhiṣaṇā dhāti devam |
7.090.03c adha vāyuṁ niyutaḥ saścata svā uta śvetaṁ vasudhitiṁ nireke ||
7.090.04a ucchann uṣasaḥ sudinā ariprā uru jyotir vividur dīdhyānāḥ |
7.090.04c gavyaṁ cid ūrvam uśijo vi vavrus teṣām anu pradivaḥ sasrur āpaḥ ||
7.090.05a te satyena manasā dīdhyānāḥ svena yuktāsaḥ kratunā vahanti |
7.090.05c indravāyū vīravāhaṁ rathaṁ vām īśānayor abhi pṛkṣaḥ sacante ||
7.090.06a īśānāso ye dadhate svar ṇo gobhir aśvebhir vasubhir hiraṇyaiḥ |
7.090.06c indravāyū sūrayo viśvam āyur arvadbhir vīraiḥ pṛtanāsu sahyuḥ ||
7.090.07a arvanto na śravaso bhikṣamāṇā indravāyū suṣṭutibhir vasiṣṭhāḥ |
7.090.07c vājayantaḥ sv avase huvema yūyam pāta svastibhiḥ sadā naḥ ||

7.091.01a kuvid aṅga namasā ye vṛdhāsaḥ purā devā anavadyāsa āsan |
7.091.01c te vāyave manave bādhitāyāvāsayann uṣasaṁ sūryeṇa ||
7.091.02a uśantā dūtā na dabhāya gopā māsaś ca pāthaḥ śaradaś ca pūrvīḥ |
7.091.02c indravāyū suṣṭutir vām iyānā mārḍīkam īṭṭe suvitaṁ ca navyam ||
7.091.03a pīvoannām̐ rayivṛdhaḥ sumedhāḥ śvetaḥ siṣakti niyutām abhiśrīḥ |
7.091.03c te vāyave samanaso vi tasthur viśven naraḥ svapatyāni cakruḥ ||
7.091.04a yāvat taras tanvo yāvad ojo yāvan naraś cakṣasā dīdhyānāḥ |
7.091.04c śuciṁ somaṁ śucipā pātam asme indravāyū sadatam barhir edam ||
7.091.05a niyuvānā niyutaḥ spārhavīrā indravāyū sarathaṁ yātam arvāk |
7.091.05c idaṁ hi vām prabhṛtam madhvo agram adha prīṇānā vi mumuktam asme ||
7.091.06a yā vāṁ śataṁ niyuto yāḥ sahasram indravāyū viśvavārāḥ sacante |
7.091.06c ābhir yātaṁ suvidatrābhir arvāk pātaṁ narā pratibhṛtasya madhvaḥ ||
7.091.07a arvanto na śravaso bhikṣamāṇā indravāyū suṣṭutibhir vasiṣṭhāḥ |
7.091.07c vājayantaḥ sv avase huvema yūyam pāta svastibhiḥ sadā naḥ ||

7.092.01a ā vāyo bhūṣa śucipā upa naḥ sahasraṁ te niyuto viśvavāra |
7.092.01c upo te andho madyam ayāmi yasya deva dadhiṣe pūrvapeyam ||
7.092.02a pra sotā jīro adhvareṣv asthāt somam indrāya vāyave pibadhyai |
7.092.02c pra yad vām madhvo agriyam bharanty adhvaryavo devayantaḥ śacībhiḥ ||
7.092.03a pra yābhir yāsi dāśvāṁsam acchā niyudbhir vāyav iṣṭaye duroṇe |
7.092.03c ni no rayiṁ subhojasaṁ yuvasva ni vīraṁ gavyam aśvyaṁ ca rādhaḥ ||
7.092.04a ye vāyava indramādanāsa ādevāso nitośanāso aryaḥ |
7.092.04c ghnanto vṛtrāṇi sūribhiḥ ṣyāma sāsahvāṁso yudhā nṛbhir amitrān ||
7.092.05a ā no niyudbhiḥ śatinībhir adhvaraṁ sahasriṇībhir upa yāhi yajñam |
7.092.05c vāyo asmin savane mādayasva yūyam pāta svastibhiḥ sadā naḥ ||

7.093.01a śuciṁ nu stomaṁ navajātam adyendrāgnī vṛtrahaṇā juṣethām |
7.093.01c ubhā hi vāṁ suhavā johavīmi tā vājaṁ sadya uśate dheṣṭhā ||
7.093.02a tā sānasī śavasānā hi bhūtaṁ sākaṁvṛdhā śavasā śūśuvāṁsā |
7.093.02c kṣayantau rāyo yavasasya bhūreḥ pṛṅktaṁ vājasya sthavirasya ghṛṣveḥ ||
7.093.03a upo ha yad vidathaṁ vājino gur dhībhir viprāḥ pramatim icchamānāḥ |
7.093.03c arvanto na kāṣṭhāṁ nakṣamāṇā indrāgnī johuvato naras te ||
7.093.04a gīrbhir vipraḥ pramatim icchamāna īṭṭe rayiṁ yaśasam pūrvabhājam |
7.093.04c indrāgnī vṛtrahaṇā suvajrā pra no navyebhis tirataṁ deṣṇaiḥ ||
7.093.05a saṁ yan mahī mithatī spardhamāne tanūrucā śūrasātā yataite |
7.093.05c adevayuṁ vidathe devayubhiḥ satrā hataṁ somasutā janena ||
7.093.06a imām u ṣu somasutim upa na endrāgnī saumanasāya yātam |
7.093.06c nū cid dhi parimamnāthe asmān ā vāṁ śaśvadbhir vavṛtīya vājaiḥ ||
7.093.07a so agna enā namasā samiddho 'cchā mitraṁ varuṇam indraṁ voceḥ |
7.093.07c yat sīm āgaś cakṛmā tat su mṛḻa tad aryamāditiḥ śiśrathantu ||
7.093.08a etā agna āśuṣāṇāsa iṣṭīr yuvoḥ sacābhy aśyāma vājān |
7.093.08c mendro no viṣṇur marutaḥ pari khyan yūyam pāta svastibhiḥ sadā naḥ ||

7.094.01a iyaṁ vām asya manmana indrāgnī pūrvyastutiḥ |
7.094.01c abhrād vṛṣṭir ivājani ||
7.094.02a śṛṇutaṁ jaritur havam indrāgnī vanataṁ giraḥ |
7.094.02c īśānā pipyataṁ dhiyaḥ ||
7.094.03a mā pāpatvāya no narendrāgnī mābhiśastaye |
7.094.03c mā no rīradhataṁ nide ||
7.094.04a indre agnā namo bṛhat suvṛktim erayāmahe |
7.094.04c dhiyā dhenā avasyavaḥ ||
7.094.05a tā hi śaśvanta īḻata itthā viprāsa ūtaye |
7.094.05c sabādho vājasātaye ||
7.094.06a tā vāṁ gīrbhir vipanyavaḥ prayasvanto havāmahe |
7.094.06c medhasātā saniṣyavaḥ ||
7.094.07a indrāgnī avasā gatam asmabhyaṁ carṣaṇīsahā |
7.094.07c mā no duḥśaṁsa īśata ||
7.094.08a mā kasya no araruṣo dhūrtiḥ praṇaṅ martyasya |
7.094.08c indrāgnī śarma yacchatam ||
7.094.09a gomad dhiraṇyavad vasu yad vām aśvāvad īmahe |
7.094.09c indrāgnī tad vanemahi ||
7.094.10a yat soma ā sute nara indrāgnī ajohavuḥ |
7.094.10c saptīvantā saparyavaḥ ||
7.094.11a ukthebhir vṛtrahantamā yā mandānā cid ā girā |
7.094.11c āṅgūṣair āvivāsataḥ ||
7.094.12a tāv id duḥśaṁsam martyaṁ durvidvāṁsaṁ rakṣasvinam |
7.094.12c ābhogaṁ hanmanā hatam udadhiṁ hanmanā hatam ||

7.095.01a pra kṣodasā dhāyasā sasra eṣā sarasvatī dharuṇam āyasī pūḥ |
7.095.01c prabābadhānā rathyeva yāti viśvā apo mahinā sindhur anyāḥ ||
7.095.02a ekācetat sarasvatī nadīnāṁ śucir yatī giribhya ā samudrāt |
7.095.02c rāyaś cetantī bhuvanasya bhūrer ghṛtam payo duduhe nāhuṣāya ||
7.095.03a sa vāvṛdhe naryo yoṣaṇāsu vṛṣā śiśur vṛṣabho yajñiyāsu |
7.095.03c sa vājinam maghavadbhyo dadhāti vi sātaye tanvam māmṛjīta ||
7.095.04a uta syā naḥ sarasvatī juṣāṇopa śravat subhagā yajṇe asmin |
7.095.04c mitajñubhir namasyair iyānā rāyā yujā cid uttarā sakhibhyaḥ ||
7.095.05a imā juhvānā yuṣmad ā namobhiḥ prati stomaṁ sarasvati juṣasva |
7.095.05c tava śarman priyatame dadhānā upa stheyāma śaraṇaṁ na vṛkṣam ||
7.095.06a ayam u te sarasvati vasiṣṭho dvārāv ṛtasya subhage vy āvaḥ |
7.095.06c vardha śubhre stuvate rāsi vājān yūyam pāta svastibhiḥ sadā naḥ ||

7.096.01a bṛhad u gāyiṣe vaco 'suryā nadīnām |
7.096.01c sarasvatīm in mahayā suvṛktibhiḥ stomair vasiṣṭha rodasī ||
7.096.02a ubhe yat te mahinā śubhre andhasī adhikṣiyanti pūravaḥ |
7.096.02c sā no bodhy avitrī marutsakhā coda rādho maghonām ||
7.096.03a bhadram id bhadrā kṛṇavat sarasvaty akavārī cetati vājinīvatī |
7.096.03c gṛṇānā jamadagnivat stuvānā ca vasiṣṭhavat ||
7.096.04a janīyanto nv agravaḥ putrīyantaḥ sudānavaḥ |
7.096.04c sarasvantaṁ havāmahe ||
7.096.05a ye te sarasva ūrmayo madhumanto ghṛtaścutaḥ |
7.096.05c tebhir no 'vitā bhava ||
7.096.06a pīpivāṁsaṁ sarasvataḥ stanaṁ yo viśvadarśataḥ |
7.096.06c bhakṣīmahi prajām iṣam ||

7.097.01a yajñe divo nṛṣadane pṛthivyā naro yatra devayavo madanti |
7.097.01c indrāya yatra savanāni sunve gaman madāya prathamaṁ vayaś ca ||
7.097.02a ā daivyā vṛṇīmahe 'vāṁsi bṛhaspatir no maha ā sakhāyaḥ |
7.097.02c yathā bhavema mīḻhuṣe anāgā yo no dātā parāvataḥ piteva ||
7.097.03a tam u jyeṣṭhaṁ namasā havirbhiḥ suśevam brahmaṇas patiṁ gṛṇīṣe |
7.097.03c indraṁ śloko mahi daivyaḥ siṣaktu yo brahmaṇo devakṛtasya rājā ||
7.097.04a sa ā no yoniṁ sadatu preṣṭho bṛhaspatir viśvavāro yo asti |
7.097.04c kāmo rāyaḥ suvīryasya taṁ dāt parṣan no ati saścato ariṣṭān ||
7.097.05a tam ā no arkam amṛtāya juṣṭam ime dhāsur amṛtāsaḥ purājāḥ |
7.097.05c śucikrandaṁ yajatam pastyānām bṛhaspatim anarvāṇaṁ huvema ||
7.097.06a taṁ śagmāso aruṣāso aśvā bṛhaspatiṁ sahavāho vahanti |
7.097.06c sahaś cid yasya nīlavat sadhasthaṁ nabho na rūpam aruṣaṁ vasānāḥ ||
7.097.07a sa hi śuciḥ śatapatraḥ sa śundhyur hiraṇyavāśīr iṣiraḥ svarṣāḥ |
7.097.07c bṛhaspatiḥ sa svāveśa ṛṣvaḥ purū sakhibhya āsutiṁ kariṣṭhaḥ ||
7.097.08a devī devasya rodasī janitrī bṛhaspatiṁ vāvṛdhatur mahitvā |
7.097.08c dakṣāyyāya dakṣatā sakhāyaḥ karad brahmaṇe sutarā sugādhā ||
7.097.09a iyaṁ vām brahmaṇas pate suvṛktir brahmendrāya vajriṇe akāri |
7.097.09c aviṣṭaṁ dhiyo jigṛtam puraṁdhīr jajastam aryo vanuṣām arātīḥ ||
7.097.10a bṛhaspate yuvam indraś ca vasvo divyasyeśāthe uta pārthivasya |
7.097.10c dhattaṁ rayiṁ stuvate kīraye cid yūyam pāta svastibhiḥ sadā naḥ ||

7.098.01a adhvaryavo 'ruṇaṁ dugdham aṁśuṁ juhotana vṛṣabhāya kṣitīnām |
7.098.01c gaurād vedīyām̐ avapānam indro viśvāhed yāti sutasomam icchan ||
7.098.02a yad dadhiṣe pradivi cārv annaṁ dive-dive pītim id asya vakṣi |
7.098.02c uta hṛdota manasā juṣāṇa uśann indra prasthitān pāhi somān ||
7.098.03a jajñānaḥ somaṁ sahase papātha pra te mātā mahimānam uvāca |
7.098.03c endra paprāthorv antarikṣaṁ yudhā devebhyo varivaś cakartha ||
7.098.04a yad yodhayā mahato manyamānān sākṣāma tān bāhubhiḥ śāśadānān |
7.098.04c yad vā nṛbhir vṛta indrābhiyudhyās taṁ tvayājiṁ sauśravasaṁ jayema ||
7.098.05a prendrasya vocam prathamā kṛtāni pra nūtanā maghavā yā cakāra |
7.098.05c yaded adevīr asahiṣṭa māyā athābhavat kevalaḥ somo asya ||
7.098.06a tavedaṁ viśvam abhitaḥ paśavyaṁ yat paśyasi cakṣasā sūryasya |
7.098.06c gavām asi gopatir eka indra bhakṣīmahi te prayatasya vasvaḥ ||
7.098.07a bṛhaspate yuvam indraś ca vasvo divyasyeśāthe uta pārthivasya |
7.098.07c dhattaṁ rayiṁ stuvate kīraye cid yūyam pāta svastibhiḥ sadā naḥ ||

7.099.01a paro mātrayā tanvā vṛdhāna na te mahitvam anv aśnuvanti |
7.099.01c ubhe te vidma rajasī pṛthivyā viṣṇo deva tvam paramasya vitse ||
7.099.02a na te viṣṇo jāyamāno na jāto deva mahimnaḥ param antam āpa |
7.099.02c ud astabhnā nākam ṛṣvam bṛhantaṁ dādhartha prācīṁ kakubham pṛthivyāḥ ||
7.099.03a irāvatī dhenumatī hi bhūtaṁ sūyavasinī manuṣe daśasyā |
7.099.03c vy astabhnā rodasī viṣṇav ete dādhartha pṛthivīm abhito mayūkhaiḥ ||
7.099.04a uruṁ yajñāya cakrathur u lokaṁ janayantā sūryam uṣāsam agnim |
7.099.04c dāsasya cid vṛṣaśiprasya māyā jaghnathur narā pṛtanājyeṣu ||
7.099.05a indrāviṣṇū dṛṁhitāḥ śambarasya nava puro navatiṁ ca śnathiṣṭam |
7.099.05c śataṁ varcinaḥ sahasraṁ ca sākaṁ hatho apraty asurasya vīrān ||
7.099.06a iyam manīṣā bṛhatī bṛhantorukramā tavasā vardhayantī |
7.099.06c rare vāṁ stomaṁ vidatheṣu viṣṇo pinvatam iṣo vṛjaneṣv indra ||
7.099.07a vaṣaṭ te viṣṇav āsa ā kṛṇomi tan me juṣasva śipiviṣṭa havyam |
7.099.07c vardhantu tvā suṣṭutayo giro me yūyam pāta svastibhiḥ sadā naḥ ||

7.100.01a nū marto dayate saniṣyan yo viṣṇava urugāyāya dāśat |
7.100.01c pra yaḥ satrācā manasā yajāta etāvantaṁ naryam āvivāsāt ||
7.100.02a tvaṁ viṣṇo sumatiṁ viśvajanyām aprayutām evayāvo matiṁ dāḥ |
7.100.02c parco yathā naḥ suvitasya bhūrer aśvāvataḥ puruścandrasya rāyaḥ ||
7.100.03a trir devaḥ pṛthivīm eṣa etāṁ vi cakrame śatarcasam mahitvā |
7.100.03c pra viṣṇur astu tavasas tavīyān tveṣaṁ hy asya sthavirasya nāma ||
7.100.04a vi cakrame pṛthivīm eṣa etāṁ kṣetrāya viṣṇur manuṣe daśasyan |
7.100.04c dhruvāso asya kīrayo janāsa urukṣitiṁ sujanimā cakāra ||
7.100.05a pra tat te adya śipiviṣṭa nāmāryaḥ śaṁsāmi vayunāni vidvān |
7.100.05c taṁ tvā gṛṇāmi tavasam atavyān kṣayantam asya rajasaḥ parāke ||
7.100.06a kim it te viṣṇo paricakṣyam bhūt pra yad vavakṣe śipiviṣṭo asmi |
7.100.06c mā varpo asmad apa gūha etad yad anyarūpaḥ samithe babhūtha ||
7.100.07a vaṣaṭ te viṣṇav āsa ā kṛṇomi tan me juṣasva śipiviṣṭa havyam |
7.100.07c vardhantu tvā suṣṭutayo giro me yūyam pāta svastibhiḥ sadā naḥ ||

7.101.01a tisro vācaḥ pra vada jyotiragrā yā etad duhre madhudogham ūdhaḥ |
7.101.01c sa vatsaṁ kṛṇvan garbham oṣadhīnāṁ sadyo jāto vṛṣabho roravīti ||
7.101.02a yo vardhana oṣadhīnāṁ yo apāṁ yo viśvasya jagato deva īśe |
7.101.02c sa tridhātu śaraṇaṁ śarma yaṁsat trivartu jyotiḥ svabhiṣṭy asme ||
7.101.03a starīr u tvad bhavati sūta u tvad yathāvaśaṁ tanvaṁ cakra eṣaḥ |
7.101.03c pituḥ payaḥ prati gṛbhṇāti mātā tena pitā vardhate tena putraḥ ||
7.101.04a yasmin viśvāni bhuvanāni tasthus tisro dyāvas tredhā sasrur āpaḥ |
7.101.04c trayaḥ kośāsa upasecanāso madhvaḥ ścotanty abhito virapśam ||
7.101.05a idaṁ vacaḥ parjanyāya svarāje hṛdo astv antaraṁ taj jujoṣat |
7.101.05c mayobhuvo vṛṣṭayaḥ santv asme supippalā oṣadhīr devagopāḥ ||
7.101.06a sa retodhā vṛṣabhaḥ śaśvatīnāṁ tasminn ātmā jagatas tasthuṣaś ca |
7.101.06c tan ma ṛtam pātu śataśāradāya yūyam pāta svastibhiḥ sadā naḥ ||

7.102.01a parjanyāya pra gāyata divas putrāya mīḻhuṣe |
7.102.01c sa no yavasam icchatu ||
7.102.02a yo garbham oṣadhīnāṁ gavāṁ kṛṇoty arvatām |
7.102.02c parjanyaḥ puruṣīṇām ||
7.102.03a tasmā id āsye havir juhotā madhumattamam |
7.102.03c iḻāṁ naḥ saṁyataṁ karat ||

7.103.01a saṁvatsaraṁ śaśayānā brāhmaṇā vratacāriṇaḥ |
7.103.01c vācam parjanyajinvitām pra maṇḍūkā avādiṣuḥ ||
7.103.02a divyā āpo abhi yad enam āyan dṛtiṁ na śuṣkaṁ sarasī śayānam |
7.103.02c gavām aha na māyur vatsinīnām maṇḍūkānāṁ vagnur atrā sam eti ||
7.103.03a yad īm enām̐ uśato abhy avarṣīt tṛṣyāvataḥ prāvṛṣy āgatāyām |
7.103.03c akhkhalīkṛtyā pitaraṁ na putro anyo anyam upa vadantam eti ||
7.103.04a anyo anyam anu gṛbhṇāty enor apām prasarge yad amandiṣātām |
7.103.04c maṇḍūko yad abhivṛṣṭaḥ kaniṣkan pṛśniḥ sampṛṅkte haritena vācam ||
7.103.05a yad eṣām anyo anyasya vācaṁ śāktasyeva vadati śikṣamāṇaḥ |
7.103.05c sarvaṁ tad eṣāṁ samṛdheva parva yat suvāco vadathanādhy apsu ||
7.103.06a gomāyur eko ajamāyur ekaḥ pṛśnir eko harita eka eṣām |
7.103.06c samānaṁ nāma bibhrato virūpāḥ purutrā vācam pipiśur vadantaḥ ||
7.103.07a brāhmaṇāso atirātre na some saro na pūrṇam abhito vadantaḥ |
7.103.07c saṁvatsarasya tad ahaḥ pari ṣṭha yan maṇḍūkāḥ prāvṛṣīṇam babhūva ||
7.103.08a brāhmaṇāsaḥ somino vācam akrata brahma kṛṇvantaḥ parivatsarīṇam |
7.103.08c adhvaryavo gharmiṇaḥ siṣvidānā āvir bhavanti guhyā na ke cit ||
7.103.09a devahitiṁ jugupur dvādaśasya ṛtuṁ naro na pra minanty ete |
7.103.09c saṁvatsare prāvṛṣy āgatāyāṁ taptā gharmā aśnuvate visargam ||
7.103.10a gomāyur adād ajamāyur adāt pṛśnir adād dharito no vasūni |
7.103.10c gavām maṇḍūkā dadataḥ śatāni sahasrasāve pra tiranta āyuḥ ||

7.104.01a indrāsomā tapataṁ rakṣa ubjataṁ ny arpayataṁ vṛṣaṇā tamovṛdhaḥ |
7.104.01c parā śṛṇītam acito ny oṣataṁ hataṁ nudethāṁ ni śiśītam atriṇaḥ ||
7.104.02a indrāsomā sam aghaśaṁsam abhy aghaṁ tapur yayastu carur agnivām̐ iva |
7.104.02c brahmadviṣe kravyāde ghoracakṣase dveṣo dhattam anavāyaṁ kimīdine ||
7.104.03a indrāsomā duṣkṛto vavre antar anārambhaṇe tamasi pra vidhyatam |
7.104.03c yathā nātaḥ punar ekaś canodayat tad vām astu sahase manyumac chavaḥ ||
7.104.04a indrāsomā vartayataṁ divo vadhaṁ sam pṛthivyā aghaśaṁsāya tarhaṇam |
7.104.04c ut takṣataṁ svaryam parvatebhyo yena rakṣo vāvṛdhānaṁ nijūrvathaḥ ||
7.104.05a indrāsomā vartayataṁ divas pary agnitaptebhir yuvam aśmahanmabhiḥ |
7.104.05c tapurvadhebhir ajarebhir atriṇo ni parśāne vidhyataṁ yantu nisvaram ||
7.104.06a indrāsomā pari vām bhūtu viśvata iyam matiḥ kakṣyāśveva vājinā |
7.104.06c yāṁ vāṁ hotrām parihinomi medhayemā brahmāṇi nṛpatīva jinvatam ||
7.104.07a prati smarethāṁ tujayadbhir evair hataṁ druho rakṣaso bhaṅgurāvataḥ |
7.104.07c indrāsomā duṣkṛte mā sugam bhūd yo naḥ kadā cid abhidāsati druhā ||
7.104.08a yo mā pākena manasā carantam abhicaṣṭe anṛtebhir vacobhiḥ |
7.104.08c āpa iva kāśinā saṁgṛbhītā asann astv āsata indra vaktā ||
7.104.09a ye pākaśaṁsaṁ viharanta evair ye vā bhadraṁ dūṣayanti svadhābhiḥ |
7.104.09c ahaye vā tān pradadātu soma ā vā dadhātu nirṛter upasthe ||
7.104.10a yo no rasaṁ dipsati pitvo agne yo aśvānāṁ yo gavāṁ yas tanūnām |
7.104.10c ripuḥ stenaḥ steyakṛd dabhram etu ni ṣa hīyatāṁ tanvā tanā ca ||
7.104.11a paraḥ so astu tanvā tanā ca tisraḥ pṛthivīr adho astu viśvāḥ |
7.104.11c prati śuṣyatu yaśo asya devā yo no divā dipsati yaś ca naktam ||
7.104.12a suvijñānaṁ cikituṣe janāya sac cāsac ca vacasī paspṛdhāte |
7.104.12c tayor yat satyaṁ yatarad ṛjīyas tad it somo 'vati hanty āsat ||
7.104.13a na vā u somo vṛjinaṁ hinoti na kṣatriyam mithuyā dhārayantam |
7.104.13c hanti rakṣo hanty āsad vadantam ubhāv indrasya prasitau śayāte ||
7.104.14a yadi vāham anṛtadeva āsa moghaṁ vā devām̐ apyūhe agne |
7.104.14c kim asmabhyaṁ jātavedo hṛṇīṣe droghavācas te nirṛthaṁ sacantām ||
7.104.15a adyā murīya yadi yātudhāno asmi yadi vāyus tatapa pūruṣasya |
7.104.15c adhā sa vīrair daśabhir vi yūyā yo mā moghaṁ yātudhānety āha ||
7.104.16a yo māyātuṁ yātudhānety āha yo vā rakṣāḥ śucir asmīty āha |
7.104.16c indras taṁ hantu mahatā vadhena viśvasya jantor adhamas padīṣṭa ||
7.104.17a pra yā jigāti khargaleva naktam apa druhā tanvaṁ gūhamānā |
7.104.17c vavrām̐ anantām̐ ava sā padīṣṭa grāvāṇo ghnantu rakṣasa upabdaiḥ ||
7.104.18a vi tiṣṭhadhvam maruto vikṣv icchata gṛbhāyata rakṣasaḥ sam pinaṣṭana |
7.104.18c vayo ye bhūtvī patayanti naktabhir ye vā ripo dadhire deve adhvare ||
7.104.19a pra vartaya divo aśmānam indra somaśitam maghavan saṁ śiśādhi |
7.104.19c prāktād apāktād adharād udaktād abhi jahi rakṣasaḥ parvatena ||
7.104.20a eta u tye patayanti śvayātava indraṁ dipsanti dipsavo 'dābhyam |
7.104.20c śiśīte śakraḥ piśunebhyo vadhaṁ nūnaṁ sṛjad aśaniṁ yātumadbhyaḥ ||
7.104.21a indro yātūnām abhavat parāśaro havirmathīnām abhy āvivāsatām |
7.104.21c abhīd u śakraḥ paraśur yathā vanam pātreva bhindan sata eti rakṣasaḥ ||
7.104.22a ulūkayātuṁ śuśulūkayātuṁ jahi śvayātum uta kokayātum |
7.104.22c suparṇayātum uta gṛdhrayātuṁ dṛṣadeva pra mṛṇa rakṣa indra ||
7.104.23a mā no rakṣo abhi naḍ yātumāvatām apocchatu mithunā yā kimīdinā |
7.104.23c pṛthivī naḥ pārthivāt pātv aṁhaso 'ntarikṣaṁ divyāt pātv asmān ||
7.104.24a indra jahi pumāṁsaṁ yātudhānam uta striyam māyayā śāśadānām |
7.104.24c vigrīvāso mūradevā ṛdantu mā te dṛśan sūryam uccarantam ||
7.104.25a prati cakṣva vi cakṣvendraś ca soma jāgṛtam |
7.104.25c rakṣobhyo vadham asyatam aśaniṁ yātumadbhyaḥ ||


8.001.01a mā cid anyad vi śaṁsata sakhāyo mā riṣaṇyata |
8.001.01c indram it stotā vṛṣaṇaṁ sacā sute muhur ukthā ca śaṁsata ||
8.001.02a avakrakṣiṇaṁ vṛṣabhaṁ yathājuraṁ gāṁ na carṣaṇīsaham |
8.001.02c vidveṣaṇaṁ saṁvananobhayaṁkaram maṁhiṣṭham ubhayāvinam ||
8.001.03a yac cid dhi tvā janā ime nānā havanta ūtaye |
8.001.03c asmākam brahmedam indra bhūtu te 'hā viśvā ca vardhanam ||
8.001.04a vi tartūryante maghavan vipaścito 'ryo vipo janānām |
8.001.04c upa kramasva pururūpam ā bhara vājaṁ nediṣṭham ūtaye ||
8.001.05a mahe cana tvām adrivaḥ parā śulkāya deyām |
8.001.05c na sahasrāya nāyutāya vajrivo na śatāya śatāmagha ||
8.001.06a vasyām̐ indrāsi me pitur uta bhrātur abhuñjataḥ |
8.001.06c mātā ca me chadayathaḥ samā vaso vasutvanāya rādhase ||
8.001.07a kveyatha kved asi purutrā cid dhi te manaḥ |
8.001.07c alarṣi yudhma khajakṛt puraṁdara pra gāyatrā agāsiṣuḥ ||
8.001.08a prāsmai gāyatram arcata vāvātur yaḥ puraṁdaraḥ |
8.001.08c yābhiḥ kāṇvasyopa barhir āsadaṁ yāsad vajrī bhinat puraḥ ||
8.001.09a ye te santi daśagvinaḥ śatino ye sahasriṇaḥ |
8.001.09c aśvāso ye te vṛṣaṇo raghudruvas tebhir nas tūyam ā gahi ||
8.001.10a ā tv adya sabardughāṁ huve gāyatravepasam |
8.001.10c indraṁ dhenuṁ sudughām anyām iṣam urudhārām araṁkṛtam ||
8.001.11a yat tudat sūra etaśaṁ vaṅkū vātasya parṇinā |
8.001.11c vahat kutsam ārjuneyaṁ śatakratuḥ tsarad gandharvam astṛtam ||
8.001.12a ya ṛte cid abhiśriṣaḥ purā jatrubhya ātṛdaḥ |
8.001.12c saṁdhātā saṁdhim maghavā purūvasur iṣkartā vihrutam punaḥ ||
8.001.13a mā bhūma niṣṭyā ivendra tvad araṇā iva |
8.001.13c vanāni na prajahitāny adrivo duroṣāso amanmahi ||
8.001.14a amanmahīd anāśavo 'nugrāsaś ca vṛtrahan |
8.001.14c sakṛt su te mahatā śūra rādhasā anu stomam mudīmahi ||
8.001.15a yadi stomam mama śravad asmākam indram indavaḥ |
8.001.15c tiraḥ pavitraṁ sasṛvāṁsa āśavo mandantu tugryāvṛdhaḥ ||
8.001.16a ā tv adya sadhastutiṁ vāvātuḥ sakhyur ā gahi |
8.001.16c upastutir maghonām pra tvāvatv adhā te vaśmi suṣṭutim ||
8.001.17a sotā hi somam adribhir em enam apsu dhāvata |
8.001.17c gavyā vastreva vāsayanta in naro nir dhukṣan vakṣaṇābhyaḥ ||
8.001.18a adha jmo adha vā divo bṛhato rocanād adhi |
8.001.18c ayā vardhasva tanvā girā mamā jātā sukrato pṛṇa ||
8.001.19a indrāya su madintamaṁ somaṁ sotā vareṇyam |
8.001.19c śakra eṇam pīpayad viśvayā dhiyā hinvānaṁ na vājayum ||
8.001.20a mā tvā somasya galdayā sadā yācann ahaṁ girā |
8.001.20c bhūrṇim mṛgaṁ na savaneṣu cukrudhaṁ ka īśānaṁ na yāciṣat ||
8.001.21a madeneṣitam madam ugram ugreṇa śavasā |
8.001.21c viśveṣāṁ tarutāram madacyutam made hi ṣmā dadāti naḥ ||
8.001.22a śevāre vāryā puru devo martāya dāśuṣe |
8.001.22c sa sunvate ca stuvate ca rāsate viśvagūrto ariṣṭutaḥ ||
8.001.23a endra yāhi matsva citreṇa deva rādhasā |
8.001.23c saro na prāsy udaraṁ sapītibhir ā somebhir uru sphiram ||
8.001.24a ā tvā sahasram ā śataṁ yuktā rathe hiraṇyaye |
8.001.24c brahmayujo haraya indra keśino vahantu somapītaye ||
8.001.25a ā tvā rathe hiraṇyaye harī mayūraśepyā |
8.001.25c śitipṛṣṭhā vahatām madhvo andhaso vivakṣaṇasya pītaye ||
8.001.26a pibā tv asya girvaṇaḥ sutasya pūrvapā iva |
8.001.26c pariṣkṛtasya rasina iyam āsutiś cārur madāya patyate ||
8.001.27a ya eko asti daṁsanā mahām̐ ugro abhi vrataiḥ |
8.001.27c gamat sa śiprī na sa yoṣad ā gamad dhavaṁ na pari varjati ||
8.001.28a tvam puraṁ cariṣṇvaṁ vadhaiḥ śuṣṇasya sam piṇak |
8.001.28c tvam bhā anu caro adha dvitā yad indra havyo bhuvaḥ ||
8.001.29a mama tvā sūra udite mama madhyaṁdine divaḥ |
8.001.29c mama prapitve apiśarvare vasav ā stomāso avṛtsata ||
8.001.30a stuhi stuhīd ete ghā te maṁhiṣṭhāso maghonām |
8.001.30c ninditāśvaḥ prapathī paramajyā maghasya medhyātithe ||
8.001.31a ā yad aśvān vananvataḥ śraddhayāhaṁ rathe ruham |
8.001.31c uta vāmasya vasunaś ciketati yo asti yādvaḥ paśuḥ ||
8.001.32a ya ṛjrā mahyam māmahe saha tvacā hiraṇyayā |
8.001.32c eṣa viśvāny abhy astu saubhagāsaṅgasya svanadrathaḥ ||
8.001.33a adha plāyogir ati dāsad anyān āsaṅgo agne daśabhiḥ sahasraiḥ |
8.001.33c adhokṣaṇo daśa mahyaṁ ruśanto naḻā iva saraso nir atiṣṭhan ||
8.001.34a anv asya sthūraṁ dadṛśe purastād anastha ūrur avarambamāṇaḥ |
8.001.34c śaśvatī nāry abhicakṣyāha subhadram arya bhojanam bibharṣi ||

8.002.01a idaṁ vaso sutam andhaḥ pibā supūrṇam udaram |
8.002.01c anābhayin rarimā te ||
8.002.02a nṛbhir dhūtaḥ suto aśnair avyo vāraiḥ paripūtaḥ |
8.002.02c aśvo na nikto nadīṣu ||
8.002.03a taṁ te yavaṁ yathā gobhiḥ svādum akarma śrīṇantaḥ |
8.002.03c indra tvāsmin sadhamāde ||
8.002.04a indra it somapā eka indraḥ sutapā viśvāyuḥ |
8.002.04c antar devān martyām̐ś ca ||
8.002.05a na yaṁ śukro na durāśīr na tṛprā uruvyacasam |
8.002.05c apaspṛṇvate suhārdam ||
8.002.06a gobhir yad īm anye asman mṛgaṁ na vrā mṛgayante |
8.002.06c abhitsaranti dhenubhiḥ ||
8.002.07a traya indrasya somāḥ sutāsaḥ santu devasya |
8.002.07c sve kṣaye sutapāvnaḥ ||
8.002.08a trayaḥ kośāsaḥ ścotanti tisraś camvaḥ supūrṇāḥ |
8.002.08c samāne adhi bhārman ||
8.002.09a śucir asi puruniḥṣṭhāḥ kṣīrair madhyata āśīrtaḥ |
8.002.09c dadhnā mandiṣṭhaḥ śūrasya ||
8.002.10a ime ta indra somās tīvrā asme sutāsaḥ |
8.002.10c śukrā āśiraṁ yācante ||
8.002.11a tām̐ āśiram puroḻāśam indremaṁ somaṁ śrīṇīhi |
8.002.11c revantaṁ hi tvā śṛṇomi ||
8.002.12a hṛtsu pītāso yudhyante durmadāso na surāyām |
8.002.12c ūdhar na nagnā jarante ||
8.002.13a revām̐ id revataḥ stotā syāt tvāvato maghonaḥ |
8.002.13c pred u harivaḥ śrutasya ||
8.002.14a ukthaṁ cana śasyamānam agor arir ā ciketa |
8.002.14c na gāyatraṁ gīyamānam ||
8.002.15a mā na indra pīyatnave mā śardhate parā dāḥ |
8.002.15c śikṣā śacīvaḥ śacībhiḥ ||
8.002.16a vayam u tvā tadidarthā indra tvāyantaḥ sakhāyaḥ |
8.002.16c kaṇvā ukthebhir jarante ||
8.002.17a na ghem anyad ā papana vajrinn apaso naviṣṭau |
8.002.17c taved u stomaṁ ciketa ||
8.002.18a icchanti devāḥ sunvantaṁ na svapnāya spṛhayanti |
8.002.18c yanti pramādam atandrāḥ ||
8.002.19a o ṣu pra yāhi vājebhir mā hṛṇīthā abhy asmān |
8.002.19c mahām̐ iva yuvajāniḥ ||
8.002.20a mo ṣv adya durhaṇāvān sāyaṁ karad āre asmat |
8.002.20c aśrīra iva jāmātā ||
8.002.21a vidmā hy asya vīrasya bhūridāvarīṁ sumatim |
8.002.21c triṣu jātasya manāṁsi ||
8.002.22a ā tū ṣiñca kaṇvamantaṁ na ghā vidma śavasānāt |
8.002.22c yaśastaraṁ śatamūteḥ ||
8.002.23a jyeṣṭhena sotar indrāya somaṁ vīrāya śakrāya |
8.002.23c bharā piban naryāya ||
8.002.24a yo vediṣṭho avyathiṣv aśvāvantaṁ jaritṛbhyaḥ |
8.002.24c vājaṁ stotṛbhyo gomantam ||
8.002.25a panyam-panyam it sotāra ā dhāvata madyāya |
8.002.25c somaṁ vīrāya śūrāya ||
8.002.26a pātā vṛtrahā sutam ā ghā gaman nāre asmat |
8.002.26c ni yamate śatamūtiḥ ||
8.002.27a eha harī brahmayujā śagmā vakṣataḥ sakhāyam |
8.002.27c gīrbhiḥ śrutaṁ girvaṇasam ||
8.002.28a svādavaḥ somā ā yāhi śrītāḥ somā ā yāhi |
8.002.28c śiprinn ṛṣīvaḥ śacīvo nāyam acchā sadhamādam ||
8.002.29a stutaś ca yās tvā vardhanti mahe rādhase nṛmṇāya |
8.002.29c indra kāriṇaṁ vṛdhantaḥ ||
8.002.30a giraś ca yās te girvāha ukthā ca tubhyaṁ tāni |
8.002.30c satrā dadhire śavāṁsi ||
8.002.31a eved eṣa tuvikūrmir vājām̐ eko vajrahastaḥ |
8.002.31c sanād amṛkto dayate ||
8.002.32a hantā vṛtraṁ dakṣiṇenendraḥ purū puruhūtaḥ |
8.002.32c mahān mahībhiḥ śacībhiḥ ||
8.002.33a yasmin viśvāś carṣaṇaya uta cyautnā jrayāṁsi ca |
8.002.33c anu ghen mandī maghonaḥ ||
8.002.34a eṣa etāni cakārendro viśvā yo 'ti śṛṇve |
8.002.34c vājadāvā maghonām ||
8.002.35a prabhartā rathaṁ gavyantam apākāc cid yam avati |
8.002.35c ino vasu sa hi voḻhā ||
8.002.36a sanitā vipro arvadbhir hantā vṛtraṁ nṛbhiḥ śūraḥ |
8.002.36c satyo 'vitā vidhantam ||
8.002.37a yajadhvainam priyamedhā indraṁ satrācā manasā |
8.002.37c yo bhūt somaiḥ satyamadvā ||
8.002.38a gāthaśravasaṁ satpatiṁ śravaskāmam purutmānam |
8.002.38c kaṇvāso gāta vājinam ||
8.002.39a ya ṛte cid gās padebhyo dāt sakhā nṛbhyaḥ śacīvān |
8.002.39c ye asmin kāmam aśriyan ||
8.002.40a itthā dhīvantam adrivaḥ kāṇvam medhyātithim |
8.002.40c meṣo bhūto 'bhi yann ayaḥ ||
8.002.41a śikṣā vibhindo asmai catvāry ayutā dadat |
8.002.41c aṣṭā paraḥ sahasrā ||
8.002.42a uta su tye payovṛdhā mākī raṇasya naptyā |
8.002.42c janitvanāya māmahe ||

8.003.01a pibā sutasya rasino matsvā na indra gomataḥ |
8.003.01c āpir no bodhi sadhamādyo vṛdhe 'smām̐ avantu te dhiyaḥ ||
8.003.02a bhūyāma te sumatau vājino vayam mā naḥ star abhimātaye |
8.003.02c asmāñ citrābhir avatād abhiṣṭibhir ā naḥ sumneṣu yāmaya ||
8.003.03a imā u tvā purūvaso giro vardhantu yā mama |
8.003.03c pāvakavarṇāḥ śucayo vipaścito 'bhi stomair anūṣata ||
8.003.04a ayaṁ sahasram ṛṣibhiḥ sahaskṛtaḥ samudra iva paprathe |
8.003.04c satyaḥ so asya mahimā gṛṇe śavo yajñeṣu viprarājye ||
8.003.05a indram id devatātaya indram prayaty adhvare |
8.003.05c indraṁ samīke vanino havāmaha indraṁ dhanasya sātaye ||
8.003.06a indro mahnā rodasī paprathac chava indraḥ sūryam arocayat |
8.003.06c indre ha viśvā bhuvanāni yemira indre suvānāsa indavaḥ ||
8.003.07a abhi tvā pūrvapītaya indra stomebhir āyavaḥ |
8.003.07c samīcīnāsa ṛbhavaḥ sam asvaran rudrā gṛṇanta pūrvyam ||
8.003.08a asyed indro vāvṛdhe vṛṣṇyaṁ śavo made sutasya viṣṇavi |
8.003.08c adyā tam asya mahimānam āyavo 'nu ṣṭuvanti pūrvathā ||
8.003.09a tat tvā yāmi suvīryaṁ tad brahma pūrvacittaye |
8.003.09c yenā yatibhyo bhṛgave dhane hite yena praskaṇvam āvitha ||
8.003.10a yenā samudram asṛjo mahīr apas tad indra vṛṣṇi te śavaḥ |
8.003.10c sadyaḥ so asya mahimā na saṁnaśe yaṁ kṣoṇīr anucakrade ||
8.003.11a śagdhī na indra yat tvā rayiṁ yāmi suvīryam |
8.003.11c śagdhi vājāya prathamaṁ siṣāsate śagdhi stomāya pūrvya ||
8.003.12a śagdhī no asya yad dha pauram āvitha dhiya indra siṣāsataḥ |
8.003.12c śagdhi yathā ruśamaṁ śyāvakaṁ kṛpam indra prāvaḥ svarṇaram ||
8.003.13a kan navyo atasīnāṁ turo gṛṇīta martyaḥ |
8.003.13c nahī nv asya mahimānam indriyaṁ svar gṛṇanta ānaśuḥ ||
8.003.14a kad u stuvanta ṛtayanta devata ṛṣiḥ ko vipra ohate |
8.003.14c kadā havam maghavann indra sunvataḥ kad u stuvata ā gamaḥ ||
8.003.15a ud u tye madhumattamā giraḥ stomāsa īrate |
8.003.15c satrājito dhanasā akṣitotayo vājayanto rathā iva ||
8.003.16a kaṇvā iva bhṛgavaḥ sūryā iva viśvam id dhītam ānaśuḥ |
8.003.16c indraṁ stomebhir mahayanta āyavaḥ priyamedhāso asvaran ||
8.003.17a yukṣvā hi vṛtrahantama harī indra parāvataḥ |
8.003.17c arvācīno maghavan somapītaya ugra ṛṣvebhir ā gahi ||
8.003.18a ime hi te kāravo vāvaśur dhiyā viprāso medhasātaye |
8.003.18c sa tvaṁ no maghavann indra girvaṇo veno na śṛṇudhī havam ||
8.003.19a nir indra bṛhatībhyo vṛtraṁ dhanubhyo asphuraḥ |
8.003.19c nir arbudasya mṛgayasya māyino niḥ parvatasya gā ājaḥ ||
8.003.20a nir agnayo rurucur nir u sūryo niḥ soma indriyo rasaḥ |
8.003.20c nir antarikṣād adhamo mahām ahiṁ kṛṣe tad indra pauṁsyam ||
8.003.21a yam me dur indro marutaḥ pākasthāmā kaurayāṇaḥ |
8.003.21c viśveṣāṁ tmanā śobhiṣṭham upeva divi dhāvamānam ||
8.003.22a rohitam me pākasthāmā sudhuraṁ kakṣyaprām |
8.003.22c adād rāyo vibodhanam ||
8.003.23a yasmā anye daśa prati dhuraṁ vahanti vahnayaḥ |
8.003.23c astaṁ vayo na tugryam ||
8.003.24a ātmā pitus tanūr vāsa ojodā abhyañjanam |
8.003.24c turīyam id rohitasya pākasthāmānam bhojaṁ dātāram abravam ||

8.004.01a yad indra prāg apāg udaṅ nyag vā hūyase nṛbhiḥ |
8.004.01c simā purū nṛṣūto asy ānave 'si praśardha turvaśe ||
8.004.02a yad vā rume ruśame śyāvake kṛpa indra mādayase sacā |
8.004.02c kaṇvāsas tvā brahmabhiḥ stomavāhasa indrā yacchanty ā gahi ||
8.004.03a yathā gauro apā kṛtaṁ tṛṣyann ety averiṇam |
8.004.03c āpitve naḥ prapitve tūyam ā gahi kaṇveṣu su sacā piba ||
8.004.04a mandantu tvā maghavann indrendavo rādhodeyāya sunvate |
8.004.04c āmuṣyā somam apibaś camū sutaṁ jyeṣṭhaṁ tad dadhiṣe sahaḥ ||
8.004.05a pra cakre sahasā saho babhañja manyum ojasā |
8.004.05c viśve ta indra pṛtanāyavo yaho ni vṛkṣā iva yemire ||
8.004.06a sahasreṇeva sacate yavīyudhā yas ta ānaḻ upastutim |
8.004.06c putram prāvargaṁ kṛṇute suvīrye dāśnoti namaüktibhiḥ ||
8.004.07a mā bhema mā śramiṣmograsya sakhye tava |
8.004.07c mahat te vṛṣṇo abhicakṣyaṁ kṛtam paśyema turvaśaṁ yadum ||
8.004.08a savyām anu sphigyaṁ vāvase vṛṣā na dāno asya roṣati |
8.004.08c madhvā sampṛktāḥ sāragheṇa dhenavas tūyam ehi dravā piba ||
8.004.09a aśvī rathī surūpa id gomām̐ id indra te sakhā |
8.004.09c śvātrabhājā vayasā sacate sadā candro yāti sabhām upa ||
8.004.10a ṛśyo na tṛṣyann avapānam ā gahi pibā somaṁ vaśām̐ anu |
8.004.10c nimeghamāno maghavan dive-diva ojiṣṭhaṁ dadhiṣe sahaḥ ||
8.004.11a adhvaryo drāvayā tvaṁ somam indraḥ pipāsati |
8.004.11c upa nūnaṁ yuyuje vṛṣaṇā harī ā ca jagāma vṛtrahā ||
8.004.12a svayaṁ cit sa manyate dāśurir jano yatrā somasya tṛmpasi |
8.004.12c idaṁ te annaṁ yujyaṁ samukṣitaṁ tasyehi pra dravā piba ||
8.004.13a ratheṣṭhāyādhvaryavaḥ somam indrāya sotana |
8.004.13c adhi bradhnasyādrayo vi cakṣate sunvanto dāśvadhvaram ||
8.004.14a upa bradhnaṁ vāvātā vṛṣaṇā harī indram apasu vakṣataḥ |
8.004.14c arvāñcaṁ tvā saptayo 'dhvaraśriyo vahantu savaned upa ||
8.004.15a pra pūṣaṇaṁ vṛṇīmahe yujyāya purūvasum |
8.004.15c sa śakra śikṣa puruhūta no dhiyā tuje rāye vimocana ||
8.004.16a saṁ naḥ śiśīhi bhurijor iva kṣuraṁ rāsva rāyo vimocana |
8.004.16c tve tan naḥ suvedam usriyaṁ vasu yaṁ tvaṁ hinoṣi martyam ||
8.004.17a vemi tvā pūṣann ṛñjase vemi stotava āghṛṇe |
8.004.17c na tasya vemy araṇaṁ hi tad vaso stuṣe pajrāya sāmne ||
8.004.18a parā gāvo yavasaṁ kac cid āghṛṇe nityaṁ rekṇo amartya |
8.004.18c asmākam pūṣann avitā śivo bhava maṁhiṣṭho vājasātaye ||
8.004.19a sthūraṁ rādhaḥ śatāśvaṁ kuruṅgasya diviṣṭiṣu |
8.004.19c rājñas tveṣasya subhagasya rātiṣu turvaśeṣv amanmahi ||
8.004.20a dhībhiḥ sātāni kāṇvasya vājinaḥ priyamedhair abhidyubhiḥ |
8.004.20c ṣaṣṭiṁ sahasrānu nirmajām aje nir yūthāni gavām ṛṣiḥ ||
8.004.21a vṛkṣāś cin me abhipitve arāraṇuḥ |
8.004.21c gām bhajanta mehanāśvam bhajanta mehanā ||

8.005.01a dūrād iheva yat saty aruṇapsur aśiśvitat |
8.005.01c vi bhānuṁ viśvadhātanat ||
8.005.02a nṛvad dasrā manoyujā rathena pṛthupājasā |
8.005.02c sacethe aśvinoṣasam ||
8.005.03a yuvābhyāṁ vājinīvasū prati stomā adṛkṣata |
8.005.03c vācaṁ dūto yathohiṣe ||
8.005.04a purupriyā ṇa ūtaye purumandrā purūvasū |
8.005.04c stuṣe kaṇvāso aśvinā ||
8.005.05a maṁhiṣṭhā vājasātameṣayantā śubhas patī |
8.005.05c gantārā dāśuṣo gṛham ||
8.005.06a tā sudevāya dāśuṣe sumedhām avitāriṇīm |
8.005.06c ghṛtair gavyūtim ukṣatam ||
8.005.07a ā naḥ stomam upa dravat tūyaṁ śyenebhir āśubhiḥ |
8.005.07c yātam aśvebhir aśvinā ||
8.005.08a yebhis tisraḥ parāvato divo viśvāni rocanā |
8.005.08c trīm̐r aktūn paridīyathaḥ ||
8.005.09a uta no gomatīr iṣa uta sātīr aharvidā |
8.005.09c vi pathaḥ sātaye sitam ||
8.005.10a ā no gomantam aśvinā suvīraṁ surathaṁ rayim |
8.005.10c voḻham aśvāvatīr iṣaḥ ||
8.005.11a vāvṛdhānā śubhas patī dasrā hiraṇyavartanī |
8.005.11c pibataṁ somyam madhu ||
8.005.12a asmabhyaṁ vājinīvasū maghavadbhyaś ca saprathaḥ |
8.005.12c chardir yantam adābhyam ||
8.005.13a ni ṣu brahma janānāṁ yāviṣṭaṁ tūyam ā gatam |
8.005.13c mo ṣv anyām̐ upāratam ||
8.005.14a asya pibatam aśvinā yuvam madasya cāruṇaḥ |
8.005.14c madhvo rātasya dhiṣṇyā ||
8.005.15a asme ā vahataṁ rayiṁ śatavantaṁ sahasriṇam |
8.005.15c purukṣuṁ viśvadhāyasam ||
8.005.16a purutrā cid dhi vāṁ narā vihvayante manīṣiṇaḥ |
8.005.16c vāghadbhir aśvinā gatam ||
8.005.17a janāso vṛktabarhiṣo haviṣmanto araṁkṛtaḥ |
8.005.17c yuvāṁ havante aśvinā ||
8.005.18a asmākam adya vām ayaṁ stomo vāhiṣṭho antamaḥ |
8.005.18c yuvābhyām bhūtv aśvinā ||
8.005.19a yo ha vām madhuno dṛtir āhito rathacarṣaṇe |
8.005.19c tataḥ pibatam aśvinā ||
8.005.20a tena no vājinīvasū paśve tokāya śaṁ gave |
8.005.20c vahatam pīvarīr iṣaḥ ||
8.005.21a uta no divyā iṣa uta sindhūm̐r aharvidā |
8.005.21c apa dvāreva varṣathaḥ ||
8.005.22a kadā vāṁ taugryo vidhat samudre jahito narā |
8.005.22c yad vāṁ ratho vibhiṣ patāt ||
8.005.23a yuvaṁ kaṇvāya nāsatyā ṛpiriptāya harmye |
8.005.23c śaśvad ūtīr daśasyathaḥ ||
8.005.24a tābhir ā yātam ūtibhir navyasībhiḥ suśastibhiḥ |
8.005.24c yad vāṁ vṛṣaṇvasū huve ||
8.005.25a yathā cit kaṇvam āvatam priyamedham upastutam |
8.005.25c atriṁ śiñjāram aśvinā ||
8.005.26a yathota kṛtvye dhane 'ṁśuṁ goṣv agastyam |
8.005.26c yathā vājeṣu sobharim ||
8.005.27a etāvad vāṁ vṛṣaṇvasū ato vā bhūyo aśvinā |
8.005.27c gṛṇantaḥ sumnam īmahe ||
8.005.28a rathaṁ hiraṇyavandhuraṁ hiraṇyābhīśum aśvinā |
8.005.28c ā hi sthātho divispṛśam ||
8.005.29a hiraṇyayī vāṁ rabhir īṣā akṣo hiraṇyayaḥ |
8.005.29c ubhā cakrā hiraṇyayā ||
8.005.30a tena no vājinīvasū parāvataś cid ā gatam |
8.005.30c upemāṁ suṣṭutim mama ||
8.005.31a ā vahethe parākāt pūrvīr aśnantāv aśvinā |
8.005.31c iṣo dāsīr amartyā ||
8.005.32a ā no dyumnair ā śravobhir ā rāyā yātam aśvinā |
8.005.32c puruścandrā nāsatyā ||
8.005.33a eha vām pruṣitapsavo vayo vahantu parṇinaḥ |
8.005.33c acchā svadhvaraṁ janam ||
8.005.34a rathaṁ vām anugāyasaṁ ya iṣā vartate saha |
8.005.34c na cakram abhi bādhate ||
8.005.35a hiraṇyayena rathena dravatpāṇibhir aśvaiḥ |
8.005.35c dhījavanā nāsatyā ||
8.005.36a yuvam mṛgaṁ jāgṛvāṁsaṁ svadatho vā vṛṣaṇvasū |
8.005.36c tā naḥ pṛṅktam iṣā rayim ||
8.005.37a tā me aśvinā sanīnāṁ vidyātaṁ navānām |
8.005.37c yathā cic caidyaḥ kaśuḥ śatam uṣṭrānāṁ dadat sahasrā daśa gonām ||
8.005.38a yo me hiraṇyasaṁdṛśo daśa rājño amaṁhata |
8.005.38c adhaspadā ic caidyasya kṛṣṭayaś carmamnā abhito janāḥ ||
8.005.39a mākir enā pathā gād yeneme yanti cedayaḥ |
8.005.39c anyo net sūrir ohate bhūridāvattaro janaḥ ||

8.006.01a mahām̐ indro ya ojasā parjanyo vṛṣṭimām̐ iva |
8.006.01c stomair vatsasya vāvṛdhe ||
8.006.02a prajām ṛtasya piprataḥ pra yad bharanta vahnayaḥ |
8.006.02c viprā ṛtasya vāhasā ||
8.006.03a kaṇvā indraṁ yad akrata stomair yajñasya sādhanam |
8.006.03c jāmi bruvata āyudham ||
8.006.04a sam asya manyave viśo viśvā namanta kṛṣṭayaḥ |
8.006.04c samudrāyeva sindhavaḥ ||
8.006.05a ojas tad asya titviṣa ubhe yat samavartayat |
8.006.05c indraś carmeva rodasī ||
8.006.06a vi cid vṛtrasya dodhato vajreṇa śataparvaṇā |
8.006.06c śiro bibheda vṛṣṇinā ||
8.006.07a imā abhi pra ṇonumo vipām agreṣu dhītayaḥ |
8.006.07c agneḥ śocir na didyutaḥ ||
8.006.08a guhā satīr upa tmanā pra yac chocanta dhītayaḥ |
8.006.08c kaṇvā ṛtasya dhārayā ||
8.006.09a pra tam indra naśīmahi rayiṁ gomantam aśvinam |
8.006.09c pra brahma pūrvacittaye ||
8.006.10a aham id dhi pituṣ pari medhām ṛtasya jagrabha |
8.006.10c ahaṁ sūrya ivājani ||
8.006.11a aham pratnena manmanā giraḥ śumbhāmi kaṇvavat |
8.006.11c yenendraḥ śuṣmam id dadhe ||
8.006.12a ye tvām indra na tuṣṭuvur ṛṣayo ye ca tuṣṭuvuḥ |
8.006.12c mamed vardhasva suṣṭutaḥ ||
8.006.13a yad asya manyur adhvanīd vi vṛtram parvaśo rujan |
8.006.13c apaḥ samudram airayat ||
8.006.14a ni śuṣṇa indra dharṇasiṁ vajraṁ jaghantha dasyavi |
8.006.14c vṛṣā hy ugra śṛṇviṣe ||
8.006.15a na dyāva indram ojasā nāntarikṣāṇi vajriṇam |
8.006.15c na vivyacanta bhūmayaḥ ||
8.006.16a yas ta indra mahīr apaḥ stabhūyamāna āśayat |
8.006.16c ni tam padyāsu śiśnathaḥ ||
8.006.17a ya ime rodasī mahī samīcī samajagrabhīt |
8.006.17c tamobhir indra taṁ guhaḥ ||
8.006.18a ya indra yatayas tvā bhṛgavo ye ca tuṣṭuvuḥ |
8.006.18c mamed ugra śrudhī havam ||
8.006.19a imās ta indra pṛśnayo ghṛtaṁ duhata āśiram |
8.006.19c enām ṛtasya pipyuṣīḥ ||
8.006.20a yā indra prasvas tvāsā garbham acakriran |
8.006.20c pari dharmeva sūryam ||
8.006.21a tvām ic chavasas pate kaṇvā ukthena vāvṛdhuḥ |
8.006.21c tvāṁ sutāsa indavaḥ ||
8.006.22a taved indra praṇītiṣūta praśastir adrivaḥ |
8.006.22c yajño vitantasāyyaḥ ||
8.006.23a ā na indra mahīm iṣam puraṁ na darṣi gomatīm |
8.006.23c uta prajāṁ suvīryam ||
8.006.24a uta tyad āśvaśvyaṁ yad indra nāhuṣīṣv ā |
8.006.24c agre vikṣu pradīdayat ||
8.006.25a abhi vrajaṁ na tatniṣe sūra upākacakṣasam |
8.006.25c yad indra mṛḻayāsi naḥ ||
8.006.26a yad aṅga taviṣīyasa indra prarājasi kṣitīḥ |
8.006.26c mahām̐ apāra ojasā ||
8.006.27a taṁ tvā haviṣmatīr viśa upa bruvata ūtaye |
8.006.27c urujrayasam indubhiḥ ||
8.006.28a upahvare girīṇāṁ saṁgathe ca nadīnām |
8.006.28c dhiyā vipro ajāyata ||
8.006.29a ataḥ samudram udvataś cikitvām̐ ava paśyati |
8.006.29c yato vipāna ejati ||
8.006.30a ād it pratnasya retaso jyotiṣ paśyanti vāsaram |
8.006.30c paro yad idhyate divā ||
8.006.31a kaṇvāsa indra te matiṁ viśve vardhanti pauṁsyam |
8.006.31c uto śaviṣṭha vṛṣṇyam ||
8.006.32a imām ma indra suṣṭutiṁ juṣasva pra su mām ava |
8.006.32c uta pra vardhayā matim ||
8.006.33a uta brahmaṇyā vayaṁ tubhyam pravṛddha vajrivaḥ |
8.006.33c viprā atakṣma jīvase ||
8.006.34a abhi kaṇvā anūṣatāpo na pravatā yatīḥ |
8.006.34c indraṁ vananvatī matiḥ ||
8.006.35a indram ukthāni vāvṛdhuḥ samudram iva sindhavaḥ |
8.006.35c anuttamanyum ajaram ||
8.006.36a ā no yāhi parāvato haribhyāṁ haryatābhyām |
8.006.36c imam indra sutam piba ||
8.006.37a tvām id vṛtrahantama janāso vṛktabarhiṣaḥ |
8.006.37c havante vājasātaye ||
8.006.38a anu tvā rodasī ubhe cakraṁ na varty etaśam |
8.006.38c anu suvānāsa indavaḥ ||
8.006.39a mandasvā su svarṇara utendra śaryaṇāvati |
8.006.39c matsvā vivasvato matī ||
8.006.40a vāvṛdhāna upa dyavi vṛṣā vajry aroravīt |
8.006.40c vṛtrahā somapātamaḥ ||
8.006.41a ṛṣir hi pūrvajā asy eka īśāna ojasā |
8.006.41c indra coṣkūyase vasu ||
8.006.42a asmākaṁ tvā sutām̐ upa vītapṛṣṭhā abhi prayaḥ |
8.006.42c śataṁ vahantu harayaḥ ||
8.006.43a imāṁ su pūrvyāṁ dhiyam madhor ghṛtasya pipyuṣīm |
8.006.43c kaṇvā ukthena vāvṛdhuḥ ||
8.006.44a indram id vimahīnām medhe vṛṇīta martyaḥ |
8.006.44c indraṁ saniṣyur ūtaye ||
8.006.45a arvāñcaṁ tvā puruṣṭuta priyamedhastutā harī |
8.006.45c somapeyāya vakṣataḥ ||
8.006.46a śatam ahaṁ tirindire sahasram parśāv ā dade |
8.006.46c rādhāṁsi yādvānām ||
8.006.47a trīṇi śatāny arvatāṁ sahasrā daśa gonām |
8.006.47c daduṣ pajrāya sāmne ||
8.006.48a ud ānaṭ kakuho divam uṣṭrāñ caturyujo dadat |
8.006.48c śravasā yādvaṁ janam ||

8.007.01a pra yad vas triṣṭubham iṣam maruto vipro akṣarat |
8.007.01c vi parvateṣu rājatha ||
8.007.02a yad aṅga taviṣīyavo yāmaṁ śubhrā acidhvam |
8.007.02c ni parvatā ahāsata ||
8.007.03a ud īrayanta vāyubhir vāśrāsaḥ pṛśnimātaraḥ |
8.007.03c dhukṣanta pipyuṣīm iṣam ||
8.007.04a vapanti maruto miham pra vepayanti parvatān |
8.007.04c yad yāmaṁ yānti vāyubhiḥ ||
8.007.05a ni yad yāmāya vo girir ni sindhavo vidharmaṇe |
8.007.05c mahe śuṣmāya yemire ||
8.007.06a yuṣmām̐ u naktam ūtaye yuṣmān divā havāmahe |
8.007.06c yuṣmān prayaty adhvare ||
8.007.07a ud u tye aruṇapsavaś citrā yāmebhir īrate |
8.007.07c vāśrā adhi ṣṇunā divaḥ ||
8.007.08a sṛjanti raśmim ojasā panthāṁ sūryāya yātave |
8.007.08c te bhānubhir vi tasthire ||
8.007.09a imām me maruto giram imaṁ stomam ṛbhukṣaṇaḥ |
8.007.09c imam me vanatā havam ||
8.007.10a trīṇi sarāṁsi pṛśnayo duduhre vajriṇe madhu |
8.007.10c utsaṁ kavandham udriṇam ||
8.007.11a maruto yad dha vo divaḥ sumnāyanto havāmahe |
8.007.11c ā tū na upa gantana ||
8.007.12a yūyaṁ hi ṣṭhā sudānavo rudrā ṛbhukṣaṇo dame |
8.007.12c uta pracetaso made ||
8.007.13a ā no rayim madacyutam purukṣuṁ viśvadhāyasam |
8.007.13c iyartā maruto divaḥ ||
8.007.14a adhīva yad girīṇāṁ yāmaṁ śubhrā acidhvam |
8.007.14c suvānair mandadhva indubhiḥ ||
8.007.15a etāvataś cid eṣāṁ sumnam bhikṣeta martyaḥ |
8.007.15c adābhyasya manmabhiḥ ||
8.007.16a ye drapsā iva rodasī dhamanty anu vṛṣṭibhiḥ |
8.007.16c utsaṁ duhanto akṣitam ||
8.007.17a ud u svānebhir īrata ud rathair ud u vāyubhiḥ |
8.007.17c ut stomaiḥ pṛśnimātaraḥ ||
8.007.18a yenāva turvaśaṁ yaduṁ yena kaṇvaṁ dhanaspṛtam |
8.007.18c rāye su tasya dhīmahi ||
8.007.19a imā u vaḥ sudānavo ghṛtaṁ na pipyuṣīr iṣaḥ |
8.007.19c vardhān kāṇvasya manmabhiḥ ||
8.007.20a kva nūnaṁ sudānavo madathā vṛktabarhiṣaḥ |
8.007.20c brahmā ko vaḥ saparyati ||
8.007.21a nahi ṣma yad dha vaḥ purā stomebhir vṛktabarhiṣaḥ |
8.007.21c śardhām̐ ṛtasya jinvatha ||
8.007.22a sam u tye mahatīr apaḥ saṁ kṣoṇī sam u sūryam |
8.007.22c saṁ vajram parvaśo dadhuḥ ||
8.007.23a vi vṛtram parvaśo yayur vi parvatām̐ arājinaḥ |
8.007.23c cakrāṇā vṛṣṇi pauṁsyam ||
8.007.24a anu tritasya yudhyataḥ śuṣmam āvann uta kratum |
8.007.24c anv indraṁ vṛtratūrye ||
8.007.25a vidyuddhastā abhidyavaḥ śiprāḥ śīrṣan hiraṇyayīḥ |
8.007.25c śubhrā vy añjata śriye ||
8.007.26a uśanā yat parāvata ukṣṇo randhram ayātana |
8.007.26c dyaur na cakradad bhiyā ||
8.007.27a ā no makhasya dāvane 'śvair hiraṇyapāṇibhiḥ |
8.007.27c devāsa upa gantana ||
8.007.28a yad eṣām pṛṣatī rathe praṣṭir vahati rohitaḥ |
8.007.28c yānti śubhrā riṇann apaḥ ||
8.007.29a suṣome śaryaṇāvaty ārjīke pastyāvati |
8.007.29c yayur nicakrayā naraḥ ||
8.007.30a kadā gacchātha maruta itthā vipraṁ havamānam |
8.007.30c mārḍīkebhir nādhamānam ||
8.007.31a kad dha nūnaṁ kadhapriyo yad indram ajahātana |
8.007.31c ko vaḥ sakhitva ohate ||
8.007.32a saho ṣu ṇo vajrahastaiḥ kaṇvāso agnim marudbhiḥ |
8.007.32c stuṣe hiraṇyavāśībhiḥ ||
8.007.33a o ṣu vṛṣṇaḥ prayajyūn ā navyase suvitāya |
8.007.33c vavṛtyāṁ citravājān ||
8.007.34a girayaś cin ni jihate parśānāso manyamānāḥ |
8.007.34c parvatāś cin ni yemire ||
8.007.35a ākṣṇayāvāno vahanty antarikṣeṇa patataḥ |
8.007.35c dhātāraḥ stuvate vayaḥ ||
8.007.36a agnir hi jāni pūrvyaś chando na sūro arciṣā |
8.007.36c te bhānubhir vi tasthire ||

8.008.01a ā no viśvābhir ūtibhir aśvinā gacchataṁ yuvam |
8.008.01c dasrā hiraṇyavartanī pibataṁ somyam madhu ||
8.008.02a ā nūnaṁ yātam aśvinā rathena sūryatvacā |
8.008.02c bhujī hiraṇyapeśasā kavī gambhīracetasā ||
8.008.03a ā yātaṁ nahuṣas pary āntarikṣāt suvṛktibhiḥ |
8.008.03c pibātho aśvinā madhu kaṇvānāṁ savane sutam ||
8.008.04a ā no yātaṁ divas pary āntarikṣād adhapriyā |
8.008.04c putraḥ kaṇvasya vām iha suṣāva somyam madhu ||
8.008.05a ā no yātam upaśruty aśvinā somapītaye |
8.008.05c svāhā stomasya vardhanā pra kavī dhītibhir narā ||
8.008.06a yac cid dhi vām pura ṛṣayo juhūre 'vase narā |
8.008.06c ā yātam aśvinā gatam upemāṁ suṣṭutim mama ||
8.008.07a divaś cid rocanād adhy ā no gantaṁ svarvidā |
8.008.07c dhībhir vatsapracetasā stomebhir havanaśrutā ||
8.008.08a kim anye pary āsate 'smat stomebhir aśvinā |
8.008.08c putraḥ kaṇvasya vām ṛṣir gīrbhir vatso avīvṛdhat ||
8.008.09a ā vāṁ vipra ihāvase 'hvat stomebhir aśvinā |
8.008.09c ariprā vṛtrahantamā tā no bhūtam mayobhuvā ||
8.008.10a ā yad vāṁ yoṣaṇā ratham atiṣṭhad vājinīvasū |
8.008.10c viśvāny aśvinā yuvam pra dhītāny agacchatam ||
8.008.11a ataḥ sahasranirṇijā rathenā yātam aśvinā |
8.008.11c vatso vām madhumad vaco 'śaṁsīt kāvyaḥ kaviḥ ||
8.008.12a purumandrā purūvasū manotarā rayīṇām |
8.008.12c stomam me aśvināv imam abhi vahnī anūṣātām ||
8.008.13a ā no viśvāny aśvinā dhattaṁ rādhāṁsy ahrayā |
8.008.13c kṛtaṁ na ṛtviyāvato mā no rīradhataṁ nide ||
8.008.14a yan nāsatyā parāvati yad vā stho adhy ambare |
8.008.14c ataḥ sahasranirṇijā rathenā yātam aśvinā ||
8.008.15a yo vāṁ nāsatyāv ṛṣir gīrbhir vatso avīvṛdhat |
8.008.15c tasmai sahasranirṇijam iṣaṁ dhattaṁ ghṛtaścutam ||
8.008.16a prāsmā ūrjaṁ ghṛtaścutam aśvinā yacchataṁ yuvam |
8.008.16c yo vāṁ sumnāya tuṣṭavad vasūyād dānunas patī ||
8.008.17a ā no gantaṁ riśādasemaṁ stomam purubhujā |
8.008.17c kṛtaṁ naḥ suśriyo naremā dātam abhiṣṭaye ||
8.008.18a ā vāṁ viśvābhir ūtibhiḥ priyamedhā ahūṣata |
8.008.18c rājantāv adhvarāṇām aśvinā yāmahūtiṣu ||
8.008.19a ā no gantam mayobhuvāśvinā śambhuvā yuvam |
8.008.19c yo vāṁ vipanyū dhītibhir gīrbhir vatso avīvṛdhat ||
8.008.20a yābhiḥ kaṇvam medhātithiṁ yābhir vaśaṁ daśavrajam |
8.008.20c yābhir gośaryam āvataṁ tābhir no 'vataṁ narā ||
8.008.21a yābhir narā trasadasyum āvataṁ kṛtvye dhane |
8.008.21c tābhiḥ ṣv asmām̐ aśvinā prāvataṁ vājasātaye ||
8.008.22a pra vāṁ stomāḥ suvṛktayo giro vardhantv aśvinā |
8.008.22c purutrā vṛtrahantamā tā no bhūtam puruspṛhā ||
8.008.23a trīṇi padāny aśvinor āviḥ sānti guhā paraḥ |
8.008.23c kavī ṛtasya patmabhir arvāg jīvebhyas pari ||

8.009.01a ā nūnam aśvinā yuvaṁ vatsasya gantam avase |
8.009.01c prāsmai yacchatam avṛkam pṛthu cchardir yuyutaṁ yā arātayaḥ ||
8.009.02a yad antarikṣe yad divi yat pañca mānuṣām̐ anu |
8.009.02c nṛmṇaṁ tad dhattam aśvinā ||
8.009.03a ye vāṁ daṁsāṁsy aśvinā viprāsaḥ parimāmṛśuḥ |
8.009.03c evet kāṇvasya bodhatam ||
8.009.04a ayaṁ vāṁ gharmo aśvinā stomena pari ṣicyate |
8.009.04c ayaṁ somo madhumān vājinīvasū yena vṛtraṁ ciketathaḥ ||
8.009.05a yad apsu yad vanaspatau yad oṣadhīṣu purudaṁsasā kṛtam |
8.009.05c tena māviṣṭam aśvinā ||
8.009.06a yan nāsatyā bhuraṇyatho yad vā deva bhiṣajyathaḥ |
8.009.06c ayaṁ vāṁ vatso matibhir na vindhate haviṣmantaṁ hi gacchathaḥ ||
8.009.07a ā nūnam aśvinor ṛṣiḥ stomaṁ ciketa vāmayā |
8.009.07c ā somam madhumattamaṁ gharmaṁ siñcād atharvaṇi ||
8.009.08a ā nūnaṁ raghuvartaniṁ rathaṁ tiṣṭhātho aśvinā |
8.009.08c ā vāṁ stomā ime mama nabho na cucyavīrata ||
8.009.09a yad adya vāṁ nāsatyokthair ācucyuvīmahi |
8.009.09c yad vā vāṇībhir aśvinevet kāṇvasya bodhatam ||
8.009.10a yad vāṁ kakṣīvām̐ uta yad vyaśva ṛṣir yad vāṁ dīrghatamā juhāva |
8.009.10c pṛthī yad vāṁ vainyaḥ sādaneṣv eved ato aśvinā cetayethām ||
8.009.11a yātaṁ chardiṣpā uta naḥ paraspā bhūtaṁ jagatpā uta nas tanūpā |
8.009.11c vartis tokāya tanayāya yātam ||
8.009.12a yad indreṇa sarathaṁ yātho aśvinā yad vā vāyunā bhavathaḥ samokasā |
8.009.12c yad ādityebhir ṛbhubhiḥ sajoṣasā yad vā viṣṇor vikramaṇeṣu tiṣṭhathaḥ ||
8.009.13a yad adyāśvināv ahaṁ huveya vājasātaye |
8.009.13c yat pṛtsu turvaṇe sahas tac chreṣṭham aśvinor avaḥ ||
8.009.14a ā nūnaṁ yātam aśvinemā havyāni vāṁ hitā |
8.009.14c ime somāso adhi turvaśe yadāv ime kaṇveṣu vām atha ||
8.009.15a yan nāsatyā parāke arvāke asti bheṣajam |
8.009.15c tena nūnaṁ vimadāya pracetasā chardir vatsāya yacchatam ||
8.009.16a abhutsy u pra devyā sākaṁ vācāham aśvinoḥ |
8.009.16c vy āvar devy ā matiṁ vi rātim martyebhyaḥ ||
8.009.17a pra bodhayoṣo aśvinā pra devi sūnṛte mahi |
8.009.17c pra yajñahotar ānuṣak pra madāya śravo bṛhat ||
8.009.18a yad uṣo yāsi bhānunā saṁ sūryeṇa rocase |
8.009.18c ā hāyam aśvino ratho vartir yāti nṛpāyyam ||
8.009.19a yad āpītāso aṁśavo gāvo na duhra ūdhabhiḥ |
8.009.19c yad vā vāṇīr anūṣata pra devayanto aśvinā ||
8.009.20a pra dyumnāya pra śavase pra nṛṣāhyāya śarmaṇe |
8.009.20c pra dakṣāya pracetasā ||
8.009.21a yan nūnaṁ dhībhir aśvinā pitur yonā niṣīdathaḥ |
8.009.21c yad vā sumnebhir ukthyā ||

8.010.01a yat stho dīrghaprasadmani yad vādo rocane divaḥ |
8.010.01c yad vā samudre adhy ākṛte gṛhe 'ta ā yātam aśvinā ||
8.010.02a yad vā yajñam manave sammimikṣathur evet kāṇvasya bodhatam |
8.010.02c bṛhaspatiṁ viśvān devām̐ ahaṁ huva indrāviṣṇū aśvināv āśuheṣasā ||
8.010.03a tyā nv aśvinā huve sudaṁsasā gṛbhe kṛtā |
8.010.03c yayor asti pra ṇaḥ sakhyaṁ deveṣv adhy āpyam ||
8.010.04a yayor adhi pra yajñā asūre santi sūrayaḥ |
8.010.04c tā yajñasyādhvarasya pracetasā svadhābhir yā pibataḥ somyam madhu ||
8.010.05a yad adyāśvināv apāg yat prāk stho vājinīvasū |
8.010.05c yad druhyavy anavi turvaśe yadau huve vām atha mā gatam ||
8.010.06a yad antarikṣe patathaḥ purubhujā yad veme rodasī anu |
8.010.06c yad vā svadhābhir adhitiṣṭhatho ratham ata ā yātam aśvinā ||

8.011.01a tvam agne vratapā asi deva ā martyeṣv ā |
8.011.01c tvaṁ yajñeṣv īḍyaḥ ||
8.011.02a tvam asi praśasyo vidatheṣu sahantya |
8.011.02c agne rathīr adhvarāṇām ||
8.011.03a sa tvam asmad apa dviṣo yuyodhi jātavedaḥ |
8.011.03c adevīr agne arātīḥ ||
8.011.04a anti cit santam aha yajñam martasya ripoḥ |
8.011.04c nopa veṣi jātavedaḥ ||
8.011.05a martā amartyasya te bhūri nāma manāmahe |
8.011.05c viprāso jātavedasaḥ ||
8.011.06a vipraṁ viprāso 'vase devam martāsa ūtaye |
8.011.06c agniṁ gīrbhir havāmahe ||
8.011.07a ā te vatso mano yamat paramāc cit sadhasthāt |
8.011.07c agne tvāṁkāmayā girā ||
8.011.08a purutrā hi sadṛṅṅ asi viśo viśvā anu prabhuḥ |
8.011.08c samatsu tvā havāmahe ||
8.011.09a samatsv agnim avase vājayanto havāmahe |
8.011.09c vājeṣu citrarādhasam ||
8.011.10a pratno hi kam īḍyo adhvareṣu sanāc ca hotā navyaś ca satsi |
8.011.10c svāṁ cāgne tanvam piprayasvāsmabhyaṁ ca saubhagam ā yajasva ||

8.012.01a ya indra somapātamo madaḥ śaviṣṭha cetati |
8.012.01c yenā haṁsi ny atriṇaṁ tam īmahe ||
8.012.02a yenā daśagvam adhriguṁ vepayantaṁ svarṇaram |
8.012.02c yenā samudram āvithā tam īmahe ||
8.012.03a yena sindhum mahīr apo rathām̐ iva pracodayaḥ |
8.012.03c panthām ṛtasya yātave tam īmahe ||
8.012.04a imaṁ stomam abhiṣṭaye ghṛtaṁ na pūtam adrivaḥ |
8.012.04c yenā nu sadya ojasā vavakṣitha ||
8.012.05a imaṁ juṣasva girvaṇaḥ samudra iva pinvate |
8.012.05c indra viśvābhir ūtibhir vavakṣitha ||
8.012.06a yo no devaḥ parāvataḥ sakhitvanāya māmahe |
8.012.06c divo na vṛṣṭim prathayan vavakṣitha ||
8.012.07a vavakṣur asya ketava uta vajro gabhastyoḥ |
8.012.07c yat sūryo na rodasī avardhayat ||
8.012.08a yadi pravṛddha satpate sahasram mahiṣām̐ aghaḥ |
8.012.08c ād it ta indriyam mahi pra vāvṛdhe ||
8.012.09a indraḥ sūryasya raśmibhir ny arśasānam oṣati |
8.012.09c agnir vaneva sāsahiḥ pra vāvṛdhe ||
8.012.10a iyaṁ ta ṛtviyāvatī dhītir eti navīyasī |
8.012.10c saparyantī purupriyā mimīta it ||
8.012.11a garbho yajñasya devayuḥ kratum punīta ānuṣak |
8.012.11c stomair indrasya vāvṛdhe mimīta it ||
8.012.12a sanir mitrasya papratha indraḥ somasya pītaye |
8.012.12c prācī vāśīva sunvate mimīta it ||
8.012.13a yaṁ viprā ukthavāhaso 'bhipramandur āyavaḥ |
8.012.13c ghṛtaṁ na pipya āsany ṛtasya yat ||
8.012.14a uta svarāje aditiḥ stomam indrāya jījanat |
8.012.14c purupraśastam ūtaya ṛtasya yat ||
8.012.15a abhi vahnaya ūtaye 'nūṣata praśastaye |
8.012.15c na deva vivratā harī ṛtasya yat ||
8.012.16a yat somam indra viṣṇavi yad vā gha trita āptye |
8.012.16c yad vā marutsu mandase sam indubhiḥ ||
8.012.17a yad vā śakra parāvati samudre adhi mandase |
8.012.17c asmākam it sute raṇā sam indubhiḥ ||
8.012.18a yad vāsi sunvato vṛdho yajamānasya satpate |
8.012.18c ukthe vā yasya raṇyasi sam indubhiḥ ||
8.012.19a devaṁ-devaṁ vo 'vasa indram-indraṁ gṛṇīṣaṇi |
8.012.19c adhā yajñāya turvaṇe vy ānaśuḥ ||
8.012.20a yajñebhir yajñavāhasaṁ somebhiḥ somapātamam |
8.012.20c hotrābhir indraṁ vāvṛdhur vy ānaśuḥ ||
8.012.21a mahīr asya praṇītayaḥ pūrvīr uta praśastayaḥ |
8.012.21c viśvā vasūni dāśuṣe vy ānaśuḥ ||
8.012.22a indraṁ vṛtrāya hantave devāso dadhire puraḥ |
8.012.22c indraṁ vāṇīr anūṣatā sam ojase ||
8.012.23a mahāntam mahinā vayaṁ stomebhir havanaśrutam |
8.012.23c arkair abhi pra ṇonumaḥ sam ojase ||
8.012.24a na yaṁ vivikto rodasī nāntarikṣāṇi vajriṇam |
8.012.24c amād id asya titviṣe sam ojasaḥ ||
8.012.25a yad indra pṛtanājye devās tvā dadhire puraḥ |
8.012.25c ād it te haryatā harī vavakṣatuḥ ||
8.012.26a yadā vṛtraṁ nadīvṛtaṁ śavasā vajrinn avadhīḥ |
8.012.26c ād it te haryatā harī vavakṣatuḥ ||
8.012.27a yadā te viṣṇur ojasā trīṇi padā vicakrame |
8.012.27c ād it te haryatā harī vavakṣatuḥ ||
8.012.28a yadā te haryatā harī vāvṛdhāte dive-dive |
8.012.28c ād it te viśvā bhuvanāni yemire ||
8.012.29a yadā te mārutīr viśas tubhyam indra niyemire |
8.012.29c ād it te viśvā bhuvanāni yemire ||
8.012.30a yadā sūryam amuṁ divi śukraṁ jyotir adhārayaḥ |
8.012.30c ād it te viśvā bhuvanāni yemire ||
8.012.31a imāṁ ta indra suṣṭutiṁ vipra iyarti dhītibhiḥ |
8.012.31c jāmim padeva pipratīm prādhvare ||
8.012.32a yad asya dhāmani priye samīcīnāso asvaran |
8.012.32c nābhā yajñasya dohanā prādhvare ||
8.012.33a suvīryaṁ svaśvyaṁ sugavyam indra daddhi naḥ |
8.012.33c hoteva pūrvacittaye prādhvare ||

8.013.01a indraḥ suteṣu someṣu kratum punīta ukthyam |
8.013.01c vide vṛdhasya dakṣaso mahān hi ṣaḥ ||
8.013.02a sa prathame vyomani devānāṁ sadane vṛdhaḥ |
8.013.02c supāraḥ suśravastamaḥ sam apsujit ||
8.013.03a tam ahve vājasātaya indram bharāya śuṣmiṇam |
8.013.03c bhavā naḥ sumne antamaḥ sakhā vṛdhe ||
8.013.04a iyaṁ ta indra girvaṇo rātiḥ kṣarati sunvataḥ |
8.013.04c mandāno asya barhiṣo vi rājasi ||
8.013.05a nūnaṁ tad indra daddhi no yat tvā sunvanta īmahe |
8.013.05c rayiṁ naś citram ā bharā svarvidam ||
8.013.06a stotā yat te vicarṣaṇir atipraśardhayad giraḥ |
8.013.06c vayā ivānu rohate juṣanta yat ||
8.013.07a pratnavaj janayā giraḥ śṛṇudhī jaritur havam |
8.013.07c made-made vavakṣithā sukṛtvane ||
8.013.08a krīḻanty asya sūnṛtā āpo na pravatā yatīḥ |
8.013.08c ayā dhiyā ya ucyate patir divaḥ ||
8.013.09a uto patir ya ucyate kṛṣṭīnām eka id vaśī |
8.013.09c namovṛdhair avasyubhiḥ sute raṇa ||
8.013.10a stuhi śrutaṁ vipaścitaṁ harī yasya prasakṣiṇā |
8.013.10c gantārā dāśuṣo gṛhaṁ namasvinaḥ ||
8.013.11a tūtujāno mahemate 'śvebhiḥ pruṣitapsubhiḥ |
8.013.11c ā yāhi yajñam āśubhiḥ śam id dhi te ||
8.013.12a indra śaviṣṭha satpate rayiṁ gṛṇatsu dhāraya |
8.013.12c śravaḥ sūribhyo amṛtaṁ vasutvanam ||
8.013.13a have tvā sūra udite have madhyaṁdine divaḥ |
8.013.13c juṣāṇa indra saptibhir na ā gahi ||
8.013.14a ā tū gahi pra tu drava matsvā sutasya gomataḥ |
8.013.14c tantuṁ tanuṣva pūrvyaṁ yathā vide ||
8.013.15a yac chakrāsi parāvati yad arvāvati vṛtrahan |
8.013.15c yad vā samudre andhaso 'vited asi ||
8.013.16a indraṁ vardhantu no gira indraṁ sutāsa indavaḥ |
8.013.16c indre haviṣmatīr viśo arāṇiṣuḥ ||
8.013.17a tam id viprā avasyavaḥ pravatvatībhir ūtibhiḥ |
8.013.17c indraṁ kṣoṇīr avardhayan vayā iva ||
8.013.18a trikadrukeṣu cetanaṁ devāso yajñam atnata |
8.013.18c tam id vardhantu no giraḥ sadāvṛdham ||
8.013.19a stotā yat te anuvrata ukthāny ṛtuthā dadhe |
8.013.19c śuciḥ pāvaka ucyate so adbhutaḥ ||
8.013.20a tad id rudrasya cetati yahvam pratneṣu dhāmasu |
8.013.20c mano yatrā vi tad dadhur vicetasaḥ ||
8.013.21a yadi me sakhyam āvara imasya pāhy andhasaḥ |
8.013.21c yena viśvā ati dviṣo atārima ||
8.013.22a kadā ta indra girvaṇaḥ stotā bhavāti śaṁtamaḥ |
8.013.22c kadā no gavye aśvye vasau dadhaḥ ||
8.013.23a uta te suṣṭutā harī vṛṣaṇā vahato ratham |
8.013.23c ajuryasya madintamaṁ yam īmahe ||
8.013.24a tam īmahe puruṣṭutaṁ yahvam pratnābhir ūtibhiḥ |
8.013.24c ni barhiṣi priye sadad adha dvitā ||
8.013.25a vardhasvā su puruṣṭuta ṛṣiṣṭutābhir ūtibhiḥ |
8.013.25c dhukṣasva pipyuṣīm iṣam avā ca naḥ ||
8.013.26a indra tvam avited asītthā stuvato adrivaḥ |
8.013.26c ṛtād iyarmi te dhiyam manoyujam ||
8.013.27a iha tyā sadhamādyā yujānaḥ somapītaye |
8.013.27c harī indra pratadvasū abhi svara ||
8.013.28a abhi svarantu ye tava rudrāsaḥ sakṣata śriyam |
8.013.28c uto marutvatīr viśo abhi prayaḥ ||
8.013.29a imā asya pratūrtayaḥ padaṁ juṣanta yad divi |
8.013.29c nābhā yajñasya saṁ dadhur yathā vide ||
8.013.30a ayaṁ dīrghāya cakṣase prāci prayaty adhvare |
8.013.30c mimīte yajñam ānuṣag vicakṣya ||
8.013.31a vṛṣāyam indra te ratha uto te vṛṣaṇā harī |
8.013.31c vṛṣā tvaṁ śatakrato vṛṣā havaḥ ||
8.013.32a vṛṣā grāvā vṛṣā mado vṛṣā somo ayaṁ sutaḥ |
8.013.32c vṛṣā yajño yam invasi vṛṣā havaḥ ||
8.013.33a vṛṣā tvā vṛṣaṇaṁ huve vajriñ citrābhir ūtibhiḥ |
8.013.33c vāvantha hi pratiṣṭutiṁ vṛṣā havaḥ ||

8.014.01a yad indrāhaṁ yathā tvam īśīya vasva eka it |
8.014.01c stotā me goṣakhā syāt ||
8.014.02a śikṣeyam asmai ditseyaṁ śacīpate manīṣiṇe |
8.014.02c yad ahaṁ gopatiḥ syām ||
8.014.03a dhenuṣ ṭa indra sūnṛtā yajamānāya sunvate |
8.014.03c gām aśvam pipyuṣī duhe ||
8.014.04a na te vartāsti rādhasa indra devo na martyaḥ |
8.014.04c yad ditsasi stuto magham ||
8.014.05a yajña indram avardhayad yad bhūmiṁ vy avartayat |
8.014.05c cakrāṇa opaśaṁ divi ||
8.014.06a vāvṛdhānasya te vayaṁ viśvā dhanāni jigyuṣaḥ |
8.014.06c ūtim indrā vṛṇīmahe ||
8.014.07a vy antarikṣam atiran made somasya rocanā |
8.014.07c indro yad abhinad valam ||
8.014.08a ud gā ājad aṅgirobhya āviṣ kṛṇvan guhā satīḥ |
8.014.08c arvāñcaṁ nunude valam ||
8.014.09a indreṇa rocanā divo dṛḻhāni dṛṁhitāni ca |
8.014.09c sthirāṇi na parāṇude ||
8.014.10a apām ūrmir madann iva stoma indrājirāyate |
8.014.10c vi te madā arājiṣuḥ ||
8.014.11a tvaṁ hi stomavardhana indrāsy ukthavardhanaḥ |
8.014.11c stotṝṇām uta bhadrakṛt ||
8.014.12a indram it keśinā harī somapeyāya vakṣataḥ |
8.014.12c upa yajñaṁ surādhasam ||
8.014.13a apām phenena namuceḥ śira indrod avartayaḥ |
8.014.13c viśvā yad ajayaḥ spṛdhaḥ ||
8.014.14a māyābhir utsisṛpsata indra dyām ārurukṣataḥ |
8.014.14c ava dasyūm̐r adhūnuthāḥ ||
8.014.15a asunvām indra saṁsadaṁ viṣūcīṁ vy anāśayaḥ |
8.014.15c somapā uttaro bhavan ||

8.015.01a tam v abhi pra gāyata puruhūtam puruṣṭutam |
8.015.01c indraṁ gīrbhis taviṣam ā vivāsata ||
8.015.02a yasya dvibarhaso bṛhat saho dādhāra rodasī |
8.015.02c girīm̐r ajrām̐ apaḥ svar vṛṣatvanā ||
8.015.03a sa rājasi puruṣṭutam̐ eko vṛtrāṇi jighnase |
8.015.03c indra jaitrā śravasyā ca yantave ||
8.015.04a taṁ te madaṁ gṛṇīmasi vṛṣaṇam pṛtsu sāsahim |
8.015.04c u lokakṛtnum adrivo hariśriyam ||
8.015.05a yena jyotīṁṣy āyave manave ca viveditha |
8.015.05c mandāno asya barhiṣo vi rājasi ||
8.015.06a tad adyā cit ta ukthino 'nu ṣṭuvanti pūrvathā |
8.015.06c vṛṣapatnīr apo jayā dive-dive ||
8.015.07a tava tyad indriyam bṛhat tava śuṣmam uta kratum |
8.015.07c vajraṁ śiśāti dhiṣaṇā vareṇyam ||
8.015.08a tava dyaur indra pauṁsyam pṛthivī vardhati śravaḥ |
8.015.08c tvām āpaḥ parvatāsaś ca hinvire ||
8.015.09a tvāṁ viṣṇur bṛhan kṣayo mitro gṛṇāti varuṇaḥ |
8.015.09c tvāṁ śardho madaty anu mārutam ||
8.015.10a tvaṁ vṛṣā janānām maṁhiṣṭha indra jajñiṣe |
8.015.10c satrā viśvā svapatyāni dadhiṣe ||
8.015.11a satrā tvam puruṣṭutam̐ eko vṛtrāṇi tośase |
8.015.11c nānya indrāt karaṇam bhūya invati ||
8.015.12a yad indra manmaśas tvā nānā havanta ūtaye |
8.015.12c asmākebhir nṛbhir atrā svar jaya ||
8.015.13a araṁ kṣayāya no mahe viśvā rūpāṇy āviśan |
8.015.13c indraṁ jaitrāya harṣayā śacīpatim ||

8.016.01a pra samrājaṁ carṣaṇīnām indraṁ stotā navyaṁ gīrbhiḥ |
8.016.01c naraṁ nṛṣāham maṁhiṣṭham ||
8.016.02a yasminn ukthāni raṇyanti viśvāni ca śravasyā |
8.016.02c apām avo na samudre ||
8.016.03a taṁ suṣṭutyā vivāse jyeṣṭharājam bhare kṛtnum |
8.016.03c maho vājinaṁ sanibhyaḥ ||
8.016.04a yasyānūnā gabhīrā madā uravas tarutrāḥ |
8.016.04c harṣumantaḥ śūrasātau ||
8.016.05a tam id dhaneṣu hiteṣv adhivākāya havante |
8.016.05c yeṣām indras te jayanti ||
8.016.06a tam ic cyautnair āryanti taṁ kṛtebhiś carṣaṇayaḥ |
8.016.06c eṣa indro varivaskṛt ||
8.016.07a indro brahmendra ṛṣir indraḥ purū puruhūtaḥ |
8.016.07c mahān mahībhiḥ śacībhiḥ ||
8.016.08a sa stomyaḥ sa havyaḥ satyaḥ satvā tuvikūrmiḥ |
8.016.08c ekaś cit sann abhibhūtiḥ ||
8.016.09a tam arkebhis taṁ sāmabhis taṁ gāyatraiś carṣaṇayaḥ |
8.016.09c indraṁ vardhanti kṣitayaḥ ||
8.016.10a praṇetāraṁ vasyo acchā kartāraṁ jyotiḥ samatsu |
8.016.10c sāsahvāṁsaṁ yudhāmitrān ||
8.016.11a sa naḥ papriḥ pārayāti svasti nāvā puruhūtaḥ |
8.016.11c indro viśvā ati dviṣaḥ ||
8.016.12a sa tvaṁ na indra vājebhir daśasyā ca gātuyā ca |
8.016.12c acchā ca naḥ sumnaṁ neṣi ||

8.017.01a ā yāhi suṣumā hi ta indra somam pibā imam |
8.017.01c edam barhiḥ sado mama ||
8.017.02a ā tvā brahmayujā harī vahatām indra keśinā |
8.017.02c upa brahmāṇi naḥ śṛṇu ||
8.017.03a brahmāṇas tvā vayaṁ yujā somapām indra sominaḥ |
8.017.03c sutāvanto havāmahe ||
8.017.04a ā no yāhi sutāvato 'smākaṁ suṣṭutīr upa |
8.017.04c pibā su śiprinn andhasaḥ ||
8.017.05a ā te siñcāmi kukṣyor anu gātrā vi dhāvatu |
8.017.05c gṛbhāya jihvayā madhu ||
8.017.06a svāduṣ ṭe astu saṁsude madhumān tanve tava |
8.017.06c somaḥ śam astu te hṛde ||
8.017.07a ayam u tvā vicarṣaṇe janīr ivābhi saṁvṛtaḥ |
8.017.07c pra soma indra sarpatu ||
8.017.08a tuvigrīvo vapodaraḥ subāhur andhaso made |
8.017.08c indro vṛtrāṇi jighnate ||
8.017.09a indra prehi puras tvaṁ viśvasyeśāna ojasā |
8.017.09c vṛtrāṇi vṛtrahañ jahi ||
8.017.10a dīrghas te astv aṅkuśo yenā vasu prayacchasi |
8.017.10c yajamānāya sunvate ||
8.017.11a ayaṁ ta indra somo nipūto adhi barhiṣi |
8.017.11c ehīm asya dravā piba ||
8.017.12a śācigo śācipūjanāyaṁ raṇāya te sutaḥ |
8.017.12c ākhaṇḍala pra hūyase ||
8.017.13a yas te śṛṅgavṛṣo napāt praṇapāt kuṇḍapāyyaḥ |
8.017.13c ny asmin dadhra ā manaḥ ||
8.017.14a vāstoṣ pate dhruvā sthūṇāṁsatraṁ somyānām |
8.017.14c drapso bhettā purāṁ śaśvatīnām indro munīnāṁ sakhā ||
8.017.15a pṛdākusānur yajato gaveṣaṇa ekaḥ sann abhi bhūyasaḥ |
8.017.15c bhūrṇim aśvaṁ nayat tujā puro gṛbhendraṁ somasya pītaye ||

8.018.01a idaṁ ha nūnam eṣāṁ sumnam bhikṣeta martyaḥ |
8.018.01c ādityānām apūrvyaṁ savīmani ||
8.018.02a anarvāṇo hy eṣām panthā ādityānām |
8.018.02c adabdhāḥ santi pāyavaḥ sugevṛdhaḥ ||
8.018.03a tat su naḥ savitā bhago varuṇo mitro aryamā |
8.018.03c śarma yacchantu sapratho yad īmahe ||
8.018.04a devebhir devy adite 'riṣṭabharmann ā gahi |
8.018.04c smat sūribhiḥ purupriye suśarmabhiḥ ||
8.018.05a te hi putrāso aditer vidur dveṣāṁsi yotave |
8.018.05c aṁhoś cid urucakrayo 'nehasaḥ ||
8.018.06a aditir no divā paśum aditir naktam advayāḥ |
8.018.06c aditiḥ pātv aṁhasaḥ sadāvṛdhā ||
8.018.07a uta syā no divā matir aditir ūtyā gamat |
8.018.07c sā śaṁtāti mayas karad apa sridhaḥ ||
8.018.08a uta tyā daivyā bhiṣajā śaṁ naḥ karato aśvinā |
8.018.08c yuyuyātām ito rapo apa sridhaḥ ||
8.018.09a śam agnir agnibhiḥ karac chaṁ nas tapatu sūryaḥ |
8.018.09c śaṁ vāto vātv arapā apa sridhaḥ ||
8.018.10a apāmīvām apa sridham apa sedhata durmatim |
8.018.10c ādityāso yuyotanā no aṁhasaḥ ||
8.018.11a yuyotā śarum asmad ām̐ ādityāsa utāmatim |
8.018.11c ṛdhag dveṣaḥ kṛṇuta viśvavedasaḥ ||
8.018.12a tat su naḥ śarma yacchatādityā yan mumocati |
8.018.12c enasvantaṁ cid enasaḥ sudānavaḥ ||
8.018.13a yo naḥ kaś cid ririkṣati rakṣastvena martyaḥ |
8.018.13c svaiḥ ṣa evai ririṣīṣṭa yur janaḥ ||
8.018.14a sam it tam agham aśnavad duḥśaṁsam martyaṁ ripum |
8.018.14c yo asmatrā durhaṇāvām̐ upa dvayuḥ ||
8.018.15a pākatrā sthana devā hṛtsu jānītha martyam |
8.018.15c upa dvayuṁ cādvayuṁ ca vasavaḥ ||
8.018.16a ā śarma parvatānām otāpāṁ vṛṇīmahe |
8.018.16c dyāvākṣāmāre asmad rapas kṛtam ||
8.018.17a te no bhadreṇa śarmaṇā yuṣmākaṁ nāvā vasavaḥ |
8.018.17c ati viśvāni duritā pipartana ||
8.018.18a tuce tanāya tat su no drāghīya āyur jīvase |
8.018.18c ādityāsaḥ sumahasaḥ kṛṇotana ||
8.018.19a yajño hīḻo vo antara ādityā asti mṛḻata |
8.018.19c yuṣme id vo api ṣmasi sajātye ||
8.018.20a bṛhad varūtham marutāṁ devaṁ trātāram aśvinā |
8.018.20c mitram īmahe varuṇaṁ svastaye ||
8.018.21a aneho mitrāryaman nṛvad varuṇa śaṁsyam |
8.018.21c trivarūtham maruto yanta naś chardiḥ ||
8.018.22a ye cid dhi mṛtyubandhava ādityā manavaḥ smasi |
8.018.22c pra sū na āyur jīvase tiretana ||

8.019.01a taṁ gūrdhayā svarṇaraṁ devāso devam aratiṁ dadhanvire |
8.019.01c devatrā havyam ohire ||
8.019.02a vibhūtarātiṁ vipra citraśociṣam agnim īḻiṣva yanturam |
8.019.02c asya medhasya somyasya sobhare prem adhvarāya pūrvyam ||
8.019.03a yajiṣṭhaṁ tvā vavṛmahe devaṁ devatrā hotāram amartyam |
8.019.03c asya yajñasya sukratum ||
8.019.04a ūrjo napātaṁ subhagaṁ sudīditim agniṁ śreṣṭhaśociṣam |
8.019.04c sa no mitrasya varuṇasya so apām ā sumnaṁ yakṣate divi ||
8.019.05a yaḥ samidhā ya āhutī yo vedena dadāśa marto agnaye |
8.019.05c yo namasā svadhvaraḥ ||
8.019.06a tasyed arvanto raṁhayanta āśavas tasya dyumnitamaṁ yaśaḥ |
8.019.06c na tam aṁho devakṛtaṁ kutaś cana na martyakṛtaṁ naśat ||
8.019.07a svagnayo vo agnibhiḥ syāma sūno sahasa ūrjām pate |
8.019.07c suvīras tvam asmayuḥ ||
8.019.08a praśaṁsamāno atithir na mitriyo 'gnī ratho na vedyaḥ |
8.019.08c tve kṣemāso api santi sādhavas tvaṁ rājā rayīṇām ||
8.019.09a so addhā dāśvadhvaro 'gne martaḥ subhaga sa praśaṁsyaḥ |
8.019.09c sa dhībhir astu sanitā ||
8.019.10a yasya tvam ūrdhvo adhvarāya tiṣṭhasi kṣayadvīraḥ sa sādhate |
8.019.10c so arvadbhiḥ sanitā sa vipanyubhiḥ sa śūraiḥ sanitā kṛtam ||
8.019.11a yasyāgnir vapur gṛhe stomaṁ cano dadhīta viśvavāryaḥ |
8.019.11c havyā vā veviṣad viṣaḥ ||
8.019.12a viprasya vā stuvataḥ sahaso yaho makṣūtamasya rātiṣu |
8.019.12c avodevam uparimartyaṁ kṛdhi vaso vividuṣo vacaḥ ||
8.019.13a yo agniṁ havyadātibhir namobhir vā sudakṣam āvivāsati |
8.019.13c girā vājiraśociṣam ||
8.019.14a samidhā yo niśitī dāśad aditiṁ dhāmabhir asya martyaḥ |
8.019.14c viśvet sa dhībhiḥ subhago janām̐ ati dyumnair udna iva tāriṣat ||
8.019.15a tad agne dyumnam ā bhara yat sāsahat sadane kaṁ cid atriṇam |
8.019.15c manyuṁ janasya dūḍhyaḥ ||
8.019.16a yena caṣṭe varuṇo mitro aryamā yena nāsatyā bhagaḥ |
8.019.16c vayaṁ tat te śavasā gātuvittamā indratvotā vidhemahi ||
8.019.17a te ghed agne svādhyo ye tvā vipra nidadhire nṛcakṣasam |
8.019.17c viprāso deva sukratum ||
8.019.18a ta id vediṁ subhaga ta āhutiṁ te sotuṁ cakrire divi |
8.019.18c ta id vājebhir jigyur mahad dhanaṁ ye tve kāmaṁ nyerire ||
8.019.19a bhadro no agnir āhuto bhadrā rātiḥ subhaga bhadro adhvaraḥ |
8.019.19c bhadrā uta praśastayaḥ ||
8.019.20a bhadram manaḥ kṛṇuṣva vṛtratūrye yenā samatsu sāsahaḥ |
8.019.20c ava sthirā tanuhi bhūri śardhatāṁ vanemā te abhiṣṭibhiḥ ||
8.019.21a īḻe girā manurhitaṁ yaṁ devā dūtam aratiṁ nyerire |
8.019.21c yajiṣṭhaṁ havyavāhanam ||
8.019.22a tigmajambhāya taruṇāya rājate prayo gāyasy agnaye |
8.019.22c yaḥ piṁśate sūnṛtābhiḥ suvīryam agnir ghṛtebhir āhutaḥ ||
8.019.23a yadī ghṛtebhir āhuto vāśīm agnir bharata uc cāva ca |
8.019.23c asura iva nirṇijam ||
8.019.24a yo havyāny airayatā manurhito deva āsā sugandhinā |
8.019.24c vivāsate vāryāṇi svadhvaro hotā devo amartyaḥ ||
8.019.25a yad agne martyas tvaṁ syām aham mitramaho amartyaḥ |
8.019.25c sahasaḥ sūnav āhuta ||
8.019.26a na tvā rāsīyābhiśastaye vaso na pāpatvāya santya |
8.019.26c na me stotāmatīvā na durhitaḥ syād agne na pāpayā ||
8.019.27a pitur na putraḥ subhṛto duroṇa ā devām̐ etu pra ṇo haviḥ ||
8.019.28a tavāham agna ūtibhir nediṣṭhābhiḥ saceya joṣam ā vaso |
8.019.28c sadā devasya martyaḥ ||
8.019.29a tava kratvā saneyaṁ tava rātibhir agne tava praśastibhiḥ |
8.019.29c tvām id āhuḥ pramatiṁ vaso mamāgne harṣasva dātave ||
8.019.30a pra so agne tavotibhiḥ suvīrābhis tirate vājabharmabhiḥ |
8.019.30c yasya tvaṁ sakhyam āvaraḥ ||
8.019.31a tava drapso nīlavān vāśa ṛtviya indhānaḥ siṣṇav ā dade |
8.019.31c tvam mahīnām uṣasām asi priyaḥ kṣapo vastuṣu rājasi ||
8.019.32a tam āganma sobharayaḥ sahasramuṣkaṁ svabhiṣṭim avase |
8.019.32c samrājaṁ trāsadasyavam ||
8.019.33a yasya te agne anye agnaya upakṣito vayā iva |
8.019.33c vipo na dyumnā ni yuve janānāṁ tava kṣatrāṇi vardhayan ||
8.019.34a yam ādityāso adruhaḥ pāraṁ nayatha martyam |
8.019.34c maghonāṁ viśveṣāṁ sudānavaḥ ||
8.019.35a yūyaṁ rājānaḥ kaṁ cic carṣaṇīsahaḥ kṣayantam mānuṣām̐ anu |
8.019.35c vayaṁ te vo varuṇa mitrāryaman syāmed ṛtasya rathyaḥ ||
8.019.36a adān me paurukutsyaḥ pañcāśataṁ trasadasyur vadhūnām |
8.019.36c maṁhiṣṭho aryaḥ satpatiḥ ||
8.019.37a uta me prayiyor vayiyoḥ suvāstvā adhi tugvani |
8.019.37c tisṝṇāṁ saptatīnāṁ śyāvaḥ praṇetā bhuvad vasur diyānām patiḥ ||

8.020.01a ā gantā mā riṣaṇyata prasthāvāno māpa sthātā samanyavaḥ |
8.020.01c sthirā cin namayiṣṇavaḥ ||
8.020.02a vīḻupavibhir maruta ṛbhukṣaṇa ā rudrāsaḥ sudītibhiḥ |
8.020.02c iṣā no adyā gatā puruspṛho yajñam ā sobharīyavaḥ ||
8.020.03a vidmā hi rudriyāṇāṁ śuṣmam ugram marutāṁ śimīvatām |
8.020.03c viṣṇor eṣasya mīḻhuṣām ||
8.020.04a vi dvīpāni pāpatan tiṣṭhad ducchunobhe yujanta rodasī |
8.020.04c pra dhanvāny airata śubhrakhādayo yad ejatha svabhānavaḥ ||
8.020.05a acyutā cid vo ajmann ā nānadati parvatāso vanaspatiḥ |
8.020.05c bhūmir yāmeṣu rejate ||
8.020.06a amāya vo maruto yātave dyaur jihīta uttarā bṛhat |
8.020.06c yatrā naro dediśate tanūṣv ā tvakṣāṁsi bāhvojasaḥ ||
8.020.07a svadhām anu śriyaṁ naro mahi tveṣā amavanto vṛṣapsavaḥ |
8.020.07c vahante ahrutapsavaḥ ||
8.020.08a gobhir vāṇo ajyate sobharīṇāṁ rathe kośe hiraṇyaye |
8.020.08c gobandhavaḥ sujātāsa iṣe bhuje mahānto naḥ sparase nu ||
8.020.09a prati vo vṛṣadañjayo vṛṣṇe śardhāya mārutāya bharadhvam |
8.020.09c havyā vṛṣaprayāvṇe ||
8.020.10a vṛṣaṇaśvena maruto vṛṣapsunā rathena vṛṣanābhinā |
8.020.10c ā śyenāso na pakṣiṇo vṛthā naro havyā no vītaye gata ||
8.020.11a samānam añjy eṣāṁ vi bhrājante rukmāso adhi bāhuṣu |
8.020.11c davidyutaty ṛṣṭayaḥ ||
8.020.12a ta ugrāso vṛṣaṇa ugrabāhavo nakiṣ ṭanūṣu yetire |
8.020.12c sthirā dhanvāny āyudhā ratheṣu vo 'nīkeṣv adhi śriyaḥ ||
8.020.13a yeṣām arṇo na sapratho nāma tveṣaṁ śaśvatām ekam id bhuje |
8.020.13c vayo na pitryaṁ sahaḥ ||
8.020.14a tān vandasva marutas tām̐ upa stuhi teṣāṁ hi dhunīnām |
8.020.14c arāṇāṁ na caramas tad eṣāṁ dānā mahnā tad eṣām ||
8.020.15a subhagaḥ sa va ūtiṣv āsa pūrvāsu maruto vyuṣṭiṣu |
8.020.15c yo vā nūnam utāsati ||
8.020.16a yasya vā yūyam prati vājino nara ā havyā vītaye gatha |
8.020.16c abhi ṣa dyumnair uta vājasātibhiḥ sumnā vo dhūtayo naśat ||
8.020.17a yathā rudrasya sūnavo divo vaśanty asurasya vedhasaḥ |
8.020.17c yuvānas tathed asat ||
8.020.18a ye cārhanti marutaḥ sudānavaḥ sman mīḻhuṣaś caranti ye |
8.020.18c ataś cid ā na upa vasyasā hṛdā yuvāna ā vavṛdhvam ||
8.020.19a yūna ū ṣu naviṣṭhayā vṛṣṇaḥ pāvakām̐ abhi sobhare girā |
8.020.19c gāya gā iva carkṛṣat ||
8.020.20a sāhā ye santi muṣṭiheva havyo viśvāsu pṛtsu hotṛṣu |
8.020.20c vṛṣṇaś candrān na suśravastamān girā vandasva maruto aha ||
8.020.21a gāvaś cid ghā samanyavaḥ sajātyena marutaḥ sabandhavaḥ |
8.020.21c rihate kakubho mithaḥ ||
8.020.22a martaś cid vo nṛtavo rukmavakṣasa upa bhrātṛtvam āyati |
8.020.22c adhi no gāta marutaḥ sadā hi va āpitvam asti nidhruvi ||
8.020.23a maruto mārutasya na ā bheṣajasya vahatā sudānavaḥ |
8.020.23c yūyaṁ sakhāyaḥ saptayaḥ ||
8.020.24a yābhiḥ sindhum avatha yābhis tūrvatha yābhir daśasyathā krivim |
8.020.24c mayo no bhūtotibhir mayobhuvaḥ śivābhir asacadviṣaḥ ||
8.020.25a yat sindhau yad asiknyāṁ yat samudreṣu marutaḥ subarhiṣaḥ |
8.020.25c yat parvateṣu bheṣajam ||
8.020.26a viśvam paśyanto bibhṛthā tanūṣv ā tenā no adhi vocata |
8.020.26c kṣamā rapo maruta āturasya na iṣkartā vihrutam punaḥ ||

8.021.01a vayam u tvām apūrvya sthūraṁ na kac cid bharanto 'vasyavaḥ |
8.021.01c vāje citraṁ havāmahe ||
8.021.02a upa tvā karmann ūtaye sa no yuvograś cakrāma yo dhṛṣat |
8.021.02c tvām id dhy avitāraṁ vavṛmahe sakhāya indra sānasim ||
8.021.03a ā yāhīma indavo 'śvapate gopata urvarāpate |
8.021.03c somaṁ somapate piba ||
8.021.04a vayaṁ hi tvā bandhumantam abandhavo viprāsa indra yemima |
8.021.04c yā te dhāmāni vṛṣabha tebhir ā gahi viśvebhiḥ somapītaye ||
8.021.05a sīdantas te vayo yathā gośrīte madhau madire vivakṣaṇe |
8.021.05c abhi tvām indra nonumaḥ ||
8.021.06a acchā ca tvainā namasā vadāmasi kim muhuś cid vi dīdhayaḥ |
8.021.06c santi kāmāso harivo dadiṣ ṭvaṁ smo vayaṁ santi no dhiyaḥ ||
8.021.07a nūtnā id indra te vayam ūtī abhūma nahi nū te adrivaḥ |
8.021.07c vidmā purā parīṇasaḥ ||
8.021.08a vidmā sakhitvam uta śūra bhojyam ā te tā vajrinn īmahe |
8.021.08c uto samasminn ā śiśīhi no vaso vāje suśipra gomati ||
8.021.09a yo na idam-idam purā pra vasya ānināya tam u vaḥ stuṣe |
8.021.09c sakhāya indram ūtaye ||
8.021.10a haryaśvaṁ satpatiṁ carṣaṇīsahaṁ sa hi ṣmā yo amandata |
8.021.10c ā tu naḥ sa vayati gavyam aśvyaṁ stotṛbhyo maghavā śatam ||
8.021.11a tvayā ha svid yujā vayam prati śvasantaṁ vṛṣabha bruvīmahi |
8.021.11c saṁsthe janasya gomataḥ ||
8.021.12a jayema kāre puruhūta kāriṇo 'bhi tiṣṭhema dūḍhyaḥ |
8.021.12c nṛbhir vṛtraṁ hanyāma śūśuyāma cāver indra pra ṇo dhiyaḥ ||
8.021.13a abhrātṛvyo anā tvam anāpir indra januṣā sanād asi |
8.021.13c yudhed āpitvam icchase ||
8.021.14a nakī revantaṁ sakhyāya vindase pīyanti te surāśvaḥ |
8.021.14c yadā kṛṇoṣi nadanuṁ sam ūhasy ād it piteva hūyase ||
8.021.15a mā te amājuro yathā mūrāsa indra sakhye tvāvataḥ |
8.021.15c ni ṣadāma sacā sute ||
8.021.16a mā te godatra nir arāma rādhasa indra mā te gṛhāmahi |
8.021.16c dṛḻhā cid aryaḥ pra mṛśābhy ā bhara na te dāmāna ādabhe ||
8.021.17a indro vā ghed iyan maghaṁ sarasvatī vā subhagā dadir vasu |
8.021.17c tvaṁ vā citra dāśuṣe ||
8.021.18a citra id rājā rājakā id anyake yake sarasvatīm anu |
8.021.18c parjanya iva tatanad dhi vṛṣṭyā sahasram ayutā dadat ||

8.022.01a o tyam ahva ā ratham adyā daṁsiṣṭham ūtaye |
8.022.01c yam aśvinā suhavā rudravartanī ā sūryāyai tasthathuḥ ||
8.022.02a pūrvāyuṣaṁ suhavam puruspṛham bhujyuṁ vājeṣu pūrvyam |
8.022.02c sacanāvantaṁ sumatibhiḥ sobhare vidveṣasam anehasam ||
8.022.03a iha tyā purubhūtamā devā namobhir aśvinā |
8.022.03c arvācīnā sv avase karāmahe gantārā dāśuṣo gṛham ||
8.022.04a yuvo rathasya pari cakram īyata īrmānyad vām iṣaṇyati |
8.022.04c asmām̐ acchā sumatir vāṁ śubhas patī ā dhenur iva dhāvatu ||
8.022.05a ratho yo vāṁ trivandhuro hiraṇyābhīśur aśvinā |
8.022.05c pari dyāvāpṛthivī bhūṣati śrutas tena nāsatyā gatam ||
8.022.06a daśasyantā manave pūrvyaṁ divi yavaṁ vṛkeṇa karṣathaḥ |
8.022.06c tā vām adya sumatibhiḥ śubhas patī aśvinā pra stuvīmahi ||
8.022.07a upa no vājinīvasū yātam ṛtasya pathibhiḥ |
8.022.07c yebhis tṛkṣiṁ vṛṣaṇā trāsadasyavam mahe kṣatrāya jinvathaḥ ||
8.022.08a ayaṁ vām adribhiḥ sutaḥ somo narā vṛṣaṇvasū |
8.022.08c ā yātaṁ somapītaye pibataṁ dāśuṣo gṛhe ||
8.022.09a ā hi ruhatam aśvinā rathe kośe hiraṇyaye vṛṣaṇvasū |
8.022.09c yuñjāthām pīvarīr iṣaḥ ||
8.022.10a yābhiḥ paktham avatho yābhir adhriguṁ yābhir babhruṁ vijoṣasam |
8.022.10c tābhir no makṣū tūyam aśvinā gatam bhiṣajyataṁ yad āturam ||
8.022.11a yad adhrigāvo adhrigū idā cid ahno aśvinā havāmahe |
8.022.11c vayaṁ gīrbhir vipanyavaḥ ||
8.022.12a tābhir ā yātaṁ vṛṣaṇopa me havaṁ viśvapsuṁ viśvavāryam |
8.022.12c iṣā maṁhiṣṭhā purubhūtamā narā yābhiḥ kriviṁ vāvṛdhus tābhir ā gatam ||
8.022.13a tāv idā cid ahānāṁ tāv aśvinā vandamāna upa bruve |
8.022.13c tā u namobhir īmahe ||
8.022.14a tāv id doṣā tā uṣasi śubhas patī tā yāman rudravartanī |
8.022.14c mā no martāya ripave vājinīvasū paro rudrāv ati khyatam ||
8.022.15a ā sugmyāya sugmyam prātā rathenāśvinā vā sakṣaṇī |
8.022.15c huve piteva sobharī ||
8.022.16a manojavasā vṛṣaṇā madacyutā makṣuṁgamābhir ūtibhiḥ |
8.022.16c ārāttāc cid bhūtam asme avase pūrvībhiḥ purubhojasā ||
8.022.17a ā no aśvāvad aśvinā vartir yāsiṣṭam madhupātamā narā |
8.022.17c gomad dasrā hiraṇyavat ||
8.022.18a suprāvargaṁ suvīryaṁ suṣṭhu vāryam anādhṛṣṭaṁ rakṣasvinā |
8.022.18c asminn ā vām āyāne vājinīvasū viśvā vāmāni dhīmahi ||

8.023.01a īḻiṣvā hi pratīvyaṁ yajasva jātavedasam |
8.023.01c cariṣṇudhūmam agṛbhītaśociṣam ||
8.023.02a dāmānaṁ viśvacarṣaṇe 'gniṁ viśvamano girā |
8.023.02c uta stuṣe viṣpardhaso rathānām ||
8.023.03a yeṣām ābādha ṛgmiya iṣaḥ pṛkṣaś ca nigrabhe |
8.023.03c upavidā vahnir vindate vasu ||
8.023.04a ud asya śocir asthād dīdiyuṣo vy ajaram |
8.023.04c tapurjambhasya sudyuto gaṇaśriyaḥ ||
8.023.05a ud u tiṣṭha svadhvara stavāno devyā kṛpā |
8.023.05c abhikhyā bhāsā bṛhatā śuśukvaniḥ ||
8.023.06a agne yāhi suśastibhir havyā juhvāna ānuṣak |
8.023.06c yathā dūto babhūtha havyavāhanaḥ ||
8.023.07a agniṁ vaḥ pūrvyaṁ huve hotāraṁ carṣaṇīnām |
8.023.07c tam ayā vācā gṛṇe tam u vaḥ stuṣe ||
8.023.08a yajñebhir adbhutakratuṁ yaṁ kṛpā sūdayanta it |
8.023.08c mitraṁ na jane sudhitam ṛtāvani ||
8.023.09a ṛtāvānam ṛtāyavo yajñasya sādhanaṁ girā |
8.023.09c upo enaṁ jujuṣur namasas pade ||
8.023.10a acchā no aṅgirastamaṁ yajñāso yantu saṁyataḥ |
8.023.10c hotā yo asti vikṣv ā yaśastamaḥ ||
8.023.11a agne tava tye ajarendhānāso bṛhad bhāḥ |
8.023.11c aśvā iva vṛṣaṇas taviṣīyavaḥ ||
8.023.12a sa tvaṁ na ūrjām pate rayiṁ rāsva suvīryam |
8.023.12c prāva nas toke tanaye samatsv ā ||
8.023.13a yad vā u viśpatiḥ śitaḥ suprīto manuṣo viśi |
8.023.13c viśved agniḥ prati rakṣāṁsi sedhati ||
8.023.14a śruṣṭy agne navasya me stomasya vīra viśpate |
8.023.14c ni māyinas tapuṣā rakṣaso daha ||
8.023.15a na tasya māyayā cana ripur īśīta martyaḥ |
8.023.15c yo agnaye dadāśa havyadātibhiḥ ||
8.023.16a vyaśvas tvā vasuvidam ukṣaṇyur aprīṇād ṛṣiḥ |
8.023.16c maho rāye tam u tvā sam idhīmahi ||
8.023.17a uśanā kāvyas tvā ni hotāram asādayat |
8.023.17c āyajiṁ tvā manave jātavedasam ||
8.023.18a viśve hi tvā sajoṣaso devāso dūtam akrata |
8.023.18c śruṣṭī deva prathamo yajñiyo bhuvaḥ ||
8.023.19a imaṁ ghā vīro amṛtaṁ dūtaṁ kṛṇvīta martyaḥ |
8.023.19c pāvakaṁ kṛṣṇavartaniṁ vihāyasam ||
8.023.20a taṁ huvema yatasrucaḥ subhāsaṁ śukraśociṣam |
8.023.20c viśām agnim ajaram pratnam īḍyam ||
8.023.21a yo asmai havyadātibhir āhutim marto 'vidhat |
8.023.21c bhūri poṣaṁ sa dhatte vīravad yaśaḥ ||
8.023.22a prathamaṁ jātavedasam agniṁ yajñeṣu pūrvyam |
8.023.22c prati srug eti namasā haviṣmatī ||
8.023.23a ābhir vidhemāgnaye jyeṣṭhābhir vyaśvavat |
8.023.23c maṁhiṣṭhābhir matibhiḥ śukraśociṣe ||
8.023.24a nūnam arca vihāyase stomebhiḥ sthūrayūpavat |
8.023.24c ṛṣe vaiyaśva damyāyāgnaye ||
8.023.25a atithim mānuṣāṇāṁ sūnuṁ vanaspatīnām |
8.023.25c viprā agnim avase pratnam īḻate ||
8.023.26a maho viśvām̐ abhi ṣato 'bhi havyāni mānuṣā |
8.023.26c agne ni ṣatsi namasādhi barhiṣi ||
8.023.27a vaṁsvā no vāryā puru vaṁsva rāyaḥ puruspṛhaḥ |
8.023.27c suvīryasya prajāvato yaśasvataḥ ||
8.023.28a tvaṁ varo suṣāmṇe 'gne janāya codaya |
8.023.28c sadā vaso rātiṁ yaviṣṭha śaśvate ||
8.023.29a tvaṁ hi supratūr asi tvaṁ no gomatīr iṣaḥ |
8.023.29c maho rāyaḥ sātim agne apā vṛdhi ||
8.023.30a agne tvaṁ yaśā asy ā mitrāvaruṇā vaha |
8.023.30c ṛtāvānā samrājā pūtadakṣasā ||

8.024.01a sakhāya ā śiṣāmahi brahmendrāya vajriṇe |
8.024.01c stuṣa ū ṣu vo nṛtamāya dhṛṣṇave ||
8.024.02a śavasā hy asi śruto vṛtrahatyena vṛtrahā |
8.024.02c maghair maghono ati śūra dāśasi ||
8.024.03a sa naḥ stavāna ā bhara rayiṁ citraśravastamam |
8.024.03c nireke cid yo harivo vasur dadiḥ ||
8.024.04a ā nirekam uta priyam indra darṣi janānām |
8.024.04c dhṛṣatā dhṛṣṇo stavamāna ā bhara ||
8.024.05a na te savyaṁ na dakṣiṇaṁ hastaṁ varanta āmuraḥ |
8.024.05c na paribādho harivo gaviṣṭiṣu ||
8.024.06a ā tvā gobhir iva vrajaṁ gīrbhir ṛṇomy adrivaḥ |
8.024.06c ā smā kāmaṁ jaritur ā manaḥ pṛṇa ||
8.024.07a viśvāni viśvamanaso dhiyā no vṛtrahantama |
8.024.07c ugra praṇetar adhi ṣū vaso gahi ||
8.024.08a vayaṁ te asya vṛtrahan vidyāma śūra navyasaḥ |
8.024.08c vasoḥ spārhasya puruhūta rādhasaḥ ||
8.024.09a indra yathā hy asti te 'parītaṁ nṛto śavaḥ |
8.024.09c amṛktā rātiḥ puruhūta dāśuṣe ||
8.024.10a ā vṛṣasva mahāmaha mahe nṛtama rādhase |
8.024.10c dṛḻhaś cid dṛhya maghavan maghattaye ||
8.024.11a nū anyatrā cid adrivas tvan no jagmur āśasaḥ |
8.024.11c maghavañ chagdhi tava tan na ūtibhiḥ ||
8.024.12a nahy aṅga nṛto tvad anyaṁ vindāmi rādhase |
8.024.12c rāye dyumnāya śavase ca girvaṇaḥ ||
8.024.13a endum indrāya siñcata pibāti somyam madhu |
8.024.13c pra rādhasā codayāte mahitvanā ||
8.024.14a upo harīṇām patiṁ dakṣam pṛñcantam abravam |
8.024.14c nūnaṁ śrudhi stuvato aśvyasya ||
8.024.15a nahy aṅga purā cana jajñe vīrataras tvat |
8.024.15c nakī rāyā naivathā na bhandanā ||
8.024.16a ed u madhvo madintaraṁ siñca vādhvaryo andhasaḥ |
8.024.16c evā hi vīraḥ stavate sadāvṛdhaḥ ||
8.024.17a indra sthātar harīṇāṁ nakiṣ ṭe pūrvyastutim |
8.024.17c ud ānaṁśa śavasā na bhandanā ||
8.024.18a taṁ vo vājānām patim ahūmahi śravasyavaḥ |
8.024.18c aprāyubhir yajñebhir vāvṛdhenyam ||
8.024.19a eto nv indraṁ stavāma sakhāyaḥ stomyaṁ naram |
8.024.19c kṛṣṭīr yo viśvā abhy asty eka it ||
8.024.20a agorudhāya gaviṣe dyukṣāya dasmyaṁ vacaḥ |
8.024.20c ghṛtāt svādīyo madhunaś ca vocata ||
8.024.21a yasyāmitāni vīryā na rādhaḥ paryetave |
8.024.21c jyotir na viśvam abhy asti dakṣiṇā ||
8.024.22a stuhīndraṁ vyaśvavad anūrmiṁ vājinaṁ yamam |
8.024.22c aryo gayam maṁhamānaṁ vi dāśuṣe ||
8.024.23a evā nūnam upa stuhi vaiyaśva daśamaṁ navam |
8.024.23c suvidvāṁsaṁ carkṛtyaṁ caraṇīnām ||
8.024.24a vetthā hi nirṛtīnāṁ vajrahasta parivṛjam |
8.024.24c ahar-ahaḥ śundhyuḥ paripadām iva ||
8.024.25a tad indrāva ā bhara yenā daṁsiṣṭha kṛtvane |
8.024.25c dvitā kutsāya śiśnatho ni codaya ||
8.024.26a tam u tvā nūnam īmahe navyaṁ daṁsiṣṭha sanyase |
8.024.26c sa tvaṁ no viśvā abhimātīḥ sakṣaṇiḥ ||
8.024.27a ya ṛkṣād aṁhaso mucad yo vāryāt sapta sindhuṣu |
8.024.27c vadhar dāsasya tuvinṛmṇa nīnamaḥ ||
8.024.28a yathā varo suṣāmṇe sanibhya āvaho rayim |
8.024.28c vyaśvebhyaḥ subhage vājinīvati ||
8.024.29a ā nāryasya dakṣiṇā vyaśvām̐ etu sominaḥ |
8.024.29c sthūraṁ ca rādhaḥ śatavat sahasravat ||
8.024.30a yat tvā pṛcchād ījānaḥ kuhayā kuhayākṛte |
8.024.30c eṣo apaśrito valo gomatīm ava tiṣṭhati ||

8.025.01a tā vāṁ viśvasya gopā devā deveṣu yajñiyā |
8.025.01c ṛtāvānā yajase pūtadakṣasā ||
8.025.02a mitrā tanā na rathyā varuṇo yaś ca sukratuḥ |
8.025.02c sanāt sujātā tanayā dhṛtavratā ||
8.025.03a tā mātā viśvavedasāsuryāya pramahasā |
8.025.03c mahī jajānāditir ṛtāvarī ||
8.025.04a mahāntā mitrāvaruṇā samrājā devāv asurā |
8.025.04c ṛtāvānāv ṛtam ā ghoṣato bṛhat ||
8.025.05a napātā śavaso mahaḥ sūnū dakṣasya sukratū |
8.025.05c sṛpradānū iṣo vāstv adhi kṣitaḥ ||
8.025.06a saṁ yā dānūni yemathur divyāḥ pārthivīr iṣaḥ |
8.025.06c nabhasvatīr ā vāṁ carantu vṛṣṭayaḥ ||
8.025.07a adhi yā bṛhato divo 'bhi yūtheva paśyataḥ |
8.025.07c ṛtāvānā samrājā namase hitā ||
8.025.08a ṛtāvānā ni ṣedatuḥ sāmrājyāya sukratū |
8.025.08c dhṛtavratā kṣatriyā kṣatram āśatuḥ ||
8.025.09a akṣṇaś cid gātuvittarānulbaṇena cakṣasā |
8.025.09c ni cin miṣantā nicirā ni cikyatuḥ ||
8.025.10a uta no devy aditir uruṣyatāṁ nāsatyā |
8.025.10c uruṣyantu maruto vṛddhaśavasaḥ ||
8.025.11a te no nāvam uruṣyata divā naktaṁ sudānavaḥ |
8.025.11c ariṣyanto ni pāyubhiḥ sacemahi ||
8.025.12a aghnate viṣṇave vayam ariṣyantaḥ sudānave |
8.025.12c śrudhi svayāvan sindho pūrvacittaye ||
8.025.13a tad vāryaṁ vṛṇīmahe variṣṭhaṁ gopayatyam |
8.025.13c mitro yat pānti varuṇo yad aryamā ||
8.025.14a uta naḥ sindhur apāṁ tan marutas tad aśvinā |
8.025.14c indro viṣṇur mīḍhvāṁsaḥ sajoṣasaḥ ||
8.025.15a te hi ṣmā vanuṣo naro 'bhimātiṁ kayasya cit |
8.025.15c tigmaṁ na kṣodaḥ pratighnanti bhūrṇayaḥ ||
8.025.16a ayam eka itthā purūru caṣṭe vi viśpatiḥ |
8.025.16c tasya vratāny anu vaś carāmasi ||
8.025.17a anu pūrvāṇy okyā sāmrājyasya saścima |
8.025.17c mitrasya vratā varuṇasya dīrghaśrut ||
8.025.18a pari yo raśminā divo 'ntān mame pṛthivyāḥ |
8.025.18c ubhe ā paprau rodasī mahitvā ||
8.025.19a ud u ṣya śaraṇe divo jyotir ayaṁsta sūryaḥ |
8.025.19c agnir na śukraḥ samidhāna āhutaḥ ||
8.025.20a vaco dīrghaprasadmanīśe vājasya gomataḥ |
8.025.20c īśe hi pitvo 'viṣasya dāvane ||
8.025.21a tat sūryaṁ rodasī ubhe doṣā vastor upa bruve |
8.025.21c bhojeṣv asmām̐ abhy uc carā sadā ||
8.025.22a ṛjram ukṣaṇyāyane rajataṁ harayāṇe |
8.025.22c rathaṁ yuktam asanāma suṣāmaṇi ||
8.025.23a tā me aśvyānāṁ harīṇāṁ nitośanā |
8.025.23c uto nu kṛtvyānāṁ nṛvāhasā ||
8.025.24a smadabhīśū kaśāvantā viprā naviṣṭhayā matī |
8.025.24c maho vājināv arvantā sacāsanam ||

8.026.01a yuvor u ṣū rathaṁ huve sadhastutyāya sūriṣu |
8.026.01c atūrtadakṣā vṛṣaṇā vṛṣaṇvasū ||
8.026.02a yuvaṁ varo suṣāmṇe mahe tane nāsatyā |
8.026.02c avobhir yātho vṛṣaṇā vṛṣaṇvasū ||
8.026.03a tā vām adya havāmahe havyebhir vājinīvasū |
8.026.03c pūrvīr iṣa iṣayantāv ati kṣapaḥ ||
8.026.04a ā vāṁ vāhiṣṭho aśvinā ratho yātu śruto narā |
8.026.04c upa stomān turasya darśathaḥ śriye ||
8.026.05a juhurāṇā cid aśvinā manyethāṁ vṛṣaṇvasū |
8.026.05c yuvaṁ hi rudrā parṣatho ati dviṣaḥ ||
8.026.06a dasrā hi viśvam ānuṣaṅ makṣūbhiḥ paridīyathaḥ |
8.026.06c dhiyaṁjinvā madhuvarṇā śubhas patī ||
8.026.07a upa no yātam aśvinā rāyā viśvapuṣā saha |
8.026.07c maghavānā suvīrāv anapacyutā ||
8.026.08a ā me asya pratīvyam indranāsatyā gatam |
8.026.08c devā devebhir adya sacanastamā ||
8.026.09a vayaṁ hi vāṁ havāmaha ukṣaṇyanto vyaśvavat |
8.026.09c sumatibhir upa viprāv ihā gatam ||
8.026.10a aśvinā sv ṛṣe stuhi kuvit te śravato havam |
8.026.10c nedīyasaḥ kūḻayātaḥ paṇīm̐r uta ||
8.026.11a vaiyaśvasya śrutaṁ naroto me asya vedathaḥ |
8.026.11c sajoṣasā varuṇo mitro aryamā ||
8.026.12a yuvādattasya dhiṣṇyā yuvānītasya sūribhiḥ |
8.026.12c ahar-ahar vṛṣaṇa mahyaṁ śikṣatam ||
8.026.13a yo vāṁ yajñebhir āvṛto 'dhivastrā vadhūr iva |
8.026.13c saparyantā śubhe cakrāte aśvinā ||
8.026.14a yo vām uruvyacastamaṁ ciketati nṛpāyyam |
8.026.14c vartir aśvinā pari yātam asmayū ||
8.026.15a asmabhyaṁ su vṛṣaṇvasū yātaṁ vartir nṛpāyyam |
8.026.15c viṣudruheva yajñam ūhathur girā ||
8.026.16a vāhiṣṭho vāṁ havānāṁ stomo dūto huvan narā |
8.026.16c yuvābhyām bhūtv aśvinā ||
8.026.17a yad ado divo arṇava iṣo vā madatho gṛhe |
8.026.17c śrutam in me amartyā ||
8.026.18a uta syā śvetayāvarī vāhiṣṭhā vāṁ nadīnām |
8.026.18c sindhur hiraṇyavartaniḥ ||
8.026.19a smad etayā sukīrtyāśvinā śvetayā dhiyā |
8.026.19c vahethe śubhrayāvānā ||
8.026.20a yukṣvā hi tvaṁ rathāsahā yuvasva poṣyā vaso |
8.026.20c ān no vāyo madhu pibāsmākaṁ savanā gahi ||
8.026.21a tava vāyav ṛtaspate tvaṣṭur jāmātar adbhuta |
8.026.21c avāṁsy ā vṛṇīmahe ||
8.026.22a tvaṣṭur jāmātaraṁ vayam īśānaṁ rāya īmahe |
8.026.22c sutāvanto vāyuṁ dyumnā janāsaḥ ||
8.026.23a vāyo yāhi śivā divo vahasvā su svaśvyam |
8.026.23c vahasva mahaḥ pṛthupakṣasā rathe ||
8.026.24a tvāṁ hi supsarastamaṁ nṛṣadaneṣu hūmahe |
8.026.24c grāvāṇaṁ nāśvapṛṣṭham maṁhanā ||
8.026.25a sa tvaṁ no deva manasā vāyo mandāno agriyaḥ |
8.026.25c kṛdhi vājām̐ apo dhiyaḥ ||

8.027.01a agnir ukthe purohito grāvāṇo barhir adhvare |
8.027.01c ṛcā yāmi maruto brahmaṇas patiṁ devām̐ avo vareṇyam ||
8.027.02a ā paśuṁ gāsi pṛthivīṁ vanaspatīn uṣāsā naktam oṣadhīḥ |
8.027.02c viśve ca no vasavo viśvavedaso dhīnām bhūta prāvitāraḥ ||
8.027.03a pra sū na etv adhvaro 'gnā deveṣu pūrvyaḥ |
8.027.03c ādityeṣu pra varuṇe dhṛtavrate marutsu viśvabhānuṣu ||
8.027.04a viśve hi ṣmā manave viśvavedaso bhuvan vṛdhe riśādasaḥ |
8.027.04c ariṣṭebhiḥ pāyubhir viśvavedaso yantā no 'vṛkaṁ chardiḥ ||
8.027.05a ā no adya samanaso gantā viśve sajoṣasaḥ |
8.027.05c ṛcā girā maruto devy adite sadane pastye mahi ||
8.027.06a abhi priyā maruto yā vo aśvyā havyā mitra prayāthana |
8.027.06c ā barhir indro varuṇas turā nara ādityāsaḥ sadantu naḥ ||
8.027.07a vayaṁ vo vṛktabarhiṣo hitaprayasa ānuṣak |
8.027.07c sutasomāso varuṇa havāmahe manuṣvad iddhāgnayaḥ ||
8.027.08a ā pra yāta maruto viṣṇo aśvinā pūṣan mākīnayā dhiyā |
8.027.08c indra ā yātu prathamaḥ saniṣyubhir vṛṣā yo vṛtrahā gṛṇe ||
8.027.09a vi no devāso adruho 'cchidraṁ śarma yacchata |
8.027.09c na yad dūrād vasavo nū cid antito varūtham ādadharṣati ||
8.027.10a asti hi vaḥ sajātyaṁ riśādaso devāso asty āpyam |
8.027.10c pra ṇaḥ pūrvasmai suvitāya vocata makṣū sumnāya navyase ||
8.027.11a idā hi va upastutim idā vāmasya bhaktaye |
8.027.11c upa vo viśvavedaso namasyur ām̐ asṛkṣy anyām iva ||
8.027.12a ud u ṣya vaḥ savitā supraṇītayo 'sthād ūrdhvo vareṇyaḥ |
8.027.12c ni dvipādaś catuṣpādo arthino 'viśran patayiṣṇavaḥ ||
8.027.13a devaṁ-devaṁ vo 'vase devaṁ-devam abhiṣṭaye |
8.027.13c devaṁ-devaṁ huvema vājasātaye gṛṇanto devyā dhiyā ||
8.027.14a devāso hi ṣmā manave samanyavo viśve sākaṁ sarātayaḥ |
8.027.14c te no adya te aparaṁ tuce tu no bhavantu varivovidaḥ ||
8.027.15a pra vaḥ śaṁsāmy adruhaḥ saṁstha upastutīnām |
8.027.15c na taṁ dhūrtir varuṇa mitra martyaṁ yo vo dhāmabhyo 'vidhat ||
8.027.16a pra sa kṣayaṁ tirate vi mahīr iṣo yo vo varāya dāśati |
8.027.16c pra prajābhir jāyate dharmaṇas pary ariṣṭaḥ sarva edhate ||
8.027.17a ṛte sa vindate yudhaḥ sugebhir yāty adhvanaḥ |
8.027.17c aryamā mitro varuṇaḥ sarātayo yaṁ trāyante sajoṣasaḥ ||
8.027.18a ajre cid asmai kṛṇuthā nyañcanaṁ durge cid ā susaraṇam |
8.027.18c eṣā cid asmād aśaniḥ paro nu sāsredhantī vi naśyatu ||
8.027.19a yad adya sūrya udyati priyakṣatrā ṛtaṁ dadha |
8.027.19c yan nimruci prabudhi viśvavedaso yad vā madhyaṁdine divaḥ ||
8.027.20a yad vābhipitve asurā ṛtaṁ yate chardir yema vi dāśuṣe |
8.027.20c vayaṁ tad vo vasavo viśvavedasa upa stheyāma madhya ā ||
8.027.21a yad adya sūra udite yan madhyaṁdina ātuci |
8.027.21c vāmaṁ dhattha manave viśvavedaso juhvānāya pracetase ||
8.027.22a vayaṁ tad vaḥ samrāja ā vṛṇīmahe putro na bahupāyyam |
8.027.22c aśyāma tad ādityā juhvato havir yena vasyo 'naśāmahai ||

8.028.01a ye triṁśati trayas paro devāso barhir āsadan |
8.028.01c vidann aha dvitāsanan ||
8.028.02a varuṇo mitro aryamā smadrātiṣāco agnayaḥ |
8.028.02c patnīvanto vaṣaṭkṛtāḥ ||
8.028.03a te no gopā apācyās ta udak ta itthā nyak |
8.028.03c purastāt sarvayā viśā ||
8.028.04a yathā vaśanti devās tathed asat tad eṣāṁ nakir ā minat |
8.028.04c arāvā cana martyaḥ ||
8.028.05a saptānāṁ sapta ṛṣṭayaḥ sapta dyumnāny eṣām |
8.028.05c sapto adhi śriyo dhire ||

8.029.01a babhrur eko viṣuṇaḥ sūnaro yuvāñjy aṅkte hiraṇyayam ||
8.029.02a yonim eka ā sasāda dyotano 'ntar deveṣu medhiraḥ ||
8.029.03a vāśīm eko bibharti hasta āyasīm antar deveṣu nidhruviḥ ||
8.029.04a vajram eko bibharti hasta āhitaṁ tena vṛtrāṇi jighnate ||
8.029.05a tigmam eko bibharti hasta āyudhaṁ śucir ugro jalāṣabheṣajaḥ ||
8.029.06a patha ekaḥ pīpāya taskaro yathām̐ eṣa veda nidhīnām ||
8.029.07a trīṇy eka urugāyo vi cakrame yatra devāso madanti ||
8.029.08a vibhir dvā carata ekayā saha pra pravāseva vasataḥ ||
8.029.09a sado dvā cakrāte upamā divi samrājā sarpirāsutī ||
8.029.10a arcanta eke mahi sāma manvata tena sūryam arocayan ||

8.030.01a nahi vo asty arbhako devāso na kumārakaḥ |
8.030.01c viśve satomahānta it ||
8.030.02a iti stutāso asathā riśādaso ye stha trayaś ca triṁśac ca |
8.030.02c manor devā yajñiyāsaḥ ||
8.030.03a te nas trādhvaṁ te 'vata ta u no adhi vocata |
8.030.03c mā naḥ pathaḥ pitryān mānavād adhi dūraṁ naiṣṭa parāvataḥ ||
8.030.04a ye devāsa iha sthana viśve vaiśvānarā uta |
8.030.04c asmabhyaṁ śarma sapratho gave 'śvāya yacchata ||

8.031.01a yo yajāti yajāta it sunavac ca pacāti ca |
8.031.01c brahmed indrasya cākanat ||
8.031.02a puroḻāśaṁ yo asmai somaṁ rarata āśiram |
8.031.02c pād it taṁ śakro aṁhasaḥ ||
8.031.03a tasya dyumām̐ asad ratho devajūtaḥ sa śūśuvat |
8.031.03c viśvā vanvann amitriyā ||
8.031.04a asya prajāvatī gṛhe 'saścantī dive-dive |
8.031.04c iḻā dhenumatī duhe ||
8.031.05a yā dampatī samanasā sunuta ā ca dhāvataḥ |
8.031.05c devāso nityayāśirā ||
8.031.06a prati prāśavyām̐ itaḥ samyañcā barhir āśāte |
8.031.06c na tā vājeṣu vāyataḥ ||
8.031.07a na devānām api hnutaḥ sumatiṁ na jugukṣataḥ |
8.031.07c śravo bṛhad vivāsataḥ ||
8.031.08a putriṇā tā kumāriṇā viśvam āyur vy aśnutaḥ |
8.031.08c ubhā hiraṇyapeśasā ||
8.031.09a vītihotrā kṛtadvasū daśasyantāmṛtāya kam |
8.031.09c sam ūdho romaśaṁ hato deveṣu kṛṇuto duvaḥ ||
8.031.10a ā śarma parvatānāṁ vṛṇīmahe nadīnām |
8.031.10c ā viṣṇoḥ sacābhuvaḥ ||
8.031.11a aitu pūṣā rayir bhagaḥ svasti sarvadhātamaḥ |
8.031.11c urur adhvā svastaye ||
8.031.12a aramatir anarvaṇo viśvo devasya manasā |
8.031.12c ādityānām aneha it ||
8.031.13a yathā no mitro aryamā varuṇaḥ santi gopāḥ |
8.031.13c sugā ṛtasya panthāḥ ||
8.031.14a agniṁ vaḥ pūrvyaṁ girā devam īḻe vasūnām |
8.031.14c saparyantaḥ purupriyam mitraṁ na kṣetrasādhasam ||
8.031.15a makṣū devavato rathaḥ śūro vā pṛtsu kāsu cit |
8.031.15c devānāṁ ya in mano yajamāna iyakṣaty abhīd ayajvano bhuvat ||
8.031.16a na yajamāna riṣyasi na sunvāna na devayo |
8.031.16c devānāṁ ya in mano yajamāna iyakṣaty abhīd ayajvano bhuvat ||
8.031.17a nakiṣ ṭaṁ karmaṇā naśan na pra yoṣan na yoṣati |
8.031.17c devānāṁ ya in mano yajamāna iyakṣaty abhīd ayajvano bhuvat ||
8.031.18a asad atra suvīryam uta tyad āśvaśvyam |
8.031.18c devānāṁ ya in mano yajamāna iyakṣaty abhīd ayajvano bhuvat ||

8.032.01a pra kṛtāny ṛjīṣiṇaḥ kaṇvā indrasya gāthayā |
8.032.01c made somasya vocata ||
8.032.02a yaḥ sṛbindam anarśanim pipruṁ dāsam ahīśuvam |
8.032.02c vadhīd ugro riṇann apaḥ ||
8.032.03a ny arbudasya viṣṭapaṁ varṣmāṇam bṛhatas tira |
8.032.03c kṛṣe tad indra pauṁsyam ||
8.032.04a prati śrutāya vo dhṛṣat tūrṇāśaṁ na girer adhi |
8.032.04c huve suśipram ūtaye ||
8.032.05a sa gor aśvasya vi vrajam mandānaḥ somyebhyaḥ |
8.032.05c puraṁ na śūra darṣasi ||
8.032.06a yadi me rāraṇaḥ suta ukthe vā dadhase canaḥ |
8.032.06c ārād upa svadhā gahi ||
8.032.07a vayaṁ ghā te api ṣmasi stotāra indra girvaṇaḥ |
8.032.07c tvaṁ no jinva somapāḥ ||
8.032.08a uta naḥ pitum ā bhara saṁrarāṇo avikṣitam |
8.032.08c maghavan bhūri te vasu ||
8.032.09a uta no gomatas kṛdhi hiraṇyavato aśvinaḥ |
8.032.09c iḻābhiḥ saṁ rabhemahi ||
8.032.10a bṛbadukthaṁ havāmahe sṛprakarasnam ūtaye |
8.032.10c sādhu kṛṇvantam avase ||
8.032.11a yaḥ saṁsthe cic chatakratur ād īṁ kṛṇoti vṛtrahā |
8.032.11c jaritṛbhyaḥ purūvasuḥ ||
8.032.12a sa naḥ śakraś cid ā śakad dānavām̐ antarābharaḥ |
8.032.12c indro viśvābhir ūtibhiḥ ||
8.032.13a yo rāyo 'vanir mahān supāraḥ sunvataḥ sakhā |
8.032.13c tam indram abhi gāyata ||
8.032.14a āyantāram mahi sthiram pṛtanāsu śravojitam |
8.032.14c bhūrer īśānam ojasā ||
8.032.15a nakir asya śacīnāṁ niyantā sūnṛtānām |
8.032.15c nakir vaktā na dād iti ||
8.032.16a na nūnam brahmaṇām ṛṇam prāśūnām asti sunvatām |
8.032.16c na somo apratā pape ||
8.032.17a panya id upa gāyata panya ukthāni śaṁsata |
8.032.17c brahmā kṛṇota panya it ||
8.032.18a panya ā dardirac chatā sahasrā vājy avṛtaḥ |
8.032.18c indro yo yajvano vṛdhaḥ ||
8.032.19a vi ṣū cara svadhā anu kṛṣṭīnām anv āhuvaḥ |
8.032.19c indra piba sutānām ||
8.032.20a piba svadhainavānām uta yas tugrye sacā |
8.032.20c utāyam indra yas tava ||
8.032.21a atīhi manyuṣāviṇaṁ suṣuvāṁsam upāraṇe |
8.032.21c imaṁ rātaṁ sutam piba ||
8.032.22a ihi tisraḥ parāvata ihi pañca janām̐ ati |
8.032.22c dhenā indrāvacākaśat ||
8.032.23a sūryo raśmiṁ yathā sṛjā tvā yacchantu me giraḥ |
8.032.23c nimnam āpo na sadhryak ||
8.032.24a adhvaryav ā tu hi ṣiñca somaṁ vīrāya śipriṇe |
8.032.24c bharā sutasya pītaye ||
8.032.25a ya udnaḥ phaligam bhinan nyak sindhūm̐r avāsṛjat |
8.032.25c yo goṣu pakvaṁ dhārayat ||
8.032.26a ahan vṛtram ṛcīṣama aurṇavābham ahīśuvam |
8.032.26c himenāvidhyad arbudam ||
8.032.27a pra va ugrāya niṣṭure 'ṣāḻhāya prasakṣiṇe |
8.032.27c devattam brahma gāyata ||
8.032.28a yo viśvāny abhi vratā somasya made andhasaḥ |
8.032.28c indro deveṣu cetati ||
8.032.29a iha tyā sadhamādyā harī hiraṇyakeśyā |
8.032.29c voḻhām abhi prayo hitam ||
8.032.30a arvāñcaṁ tvā puruṣṭuta priyamedhastutā harī |
8.032.30c somapeyāya vakṣataḥ ||

8.033.01a vayaṁ gha tvā sutāvanta āpo na vṛktabarhiṣaḥ |
8.033.01c pavitrasya prasravaṇeṣu vṛtrahan pari stotāra āsate ||
8.033.02a svaranti tvā sute naro vaso nireka ukthinaḥ |
8.033.02c kadā sutaṁ tṛṣāṇa oka ā gama indra svabdīva vaṁsagaḥ ||
8.033.03a kaṇvebhir dhṛṣṇav ā dhṛṣad vājaṁ darṣi sahasriṇam |
8.033.03c piśaṅgarūpam maghavan vicarṣaṇe makṣū gomantam īmahe ||
8.033.04a pāhi gāyāndhaso mada indrāya medhyātithe |
8.033.04c yaḥ sammiślo haryor yaḥ sute sacā vajrī ratho hiraṇyayaḥ ||
8.033.05a yaḥ suṣavyaḥ sudakṣiṇa ino yaḥ sukratur gṛṇe |
8.033.05c ya ākaraḥ sahasrā yaḥ śatāmagha indro yaḥ pūrbhid āritaḥ ||
8.033.06a yo dhṛṣito yo 'vṛto yo asti śmaśruṣu śritaḥ |
8.033.06c vibhūtadyumnaś cyavanaḥ puruṣṭutaḥ kratvā gaur iva śākinaḥ ||
8.033.07a ka īṁ veda sute sacā pibantaṁ kad vayo dadhe |
8.033.07c ayaṁ yaḥ puro vibhinatty ojasā mandānaḥ śipry andhasaḥ ||
8.033.08a dānā mṛgo na vāraṇaḥ purutrā carathaṁ dadhe |
8.033.08c nakiṣ ṭvā ni yamad ā sute gamo mahām̐ś carasy ojasā ||
8.033.09a ya ugraḥ sann aniṣṭṛtaḥ sthiro raṇāya saṁskṛtaḥ |
8.033.09c yadi stotur maghavā śṛṇavad dhavaṁ nendro yoṣaty ā gamat ||
8.033.10a satyam itthā vṛṣed asi vṛṣajūtir no 'vṛtaḥ |
8.033.10c vṛṣā hy ugra śṛṇviṣe parāvati vṛṣo arvāvati śrutaḥ ||
8.033.11a vṛṣaṇas te abhīśavo vṛṣā kaśā hiraṇyayī |
8.033.11c vṛṣā ratho maghavan vṛṣaṇā harī vṛṣā tvaṁ śatakrato ||
8.033.12a vṛṣā sotā sunotu te vṛṣann ṛjīpinn ā bhara |
8.033.12c vṛṣā dadhanve vṛṣaṇaṁ nadīṣv ā tubhyaṁ sthātar harīṇām ||
8.033.13a endra yāhi pītaye madhu śaviṣṭha somyam |
8.033.13c nāyam acchā maghavā śṛṇavad giro brahmokthā ca sukratuḥ ||
8.033.14a vahantu tvā ratheṣṭhām ā harayo rathayujaḥ |
8.033.14c tiraś cid aryaṁ savanāni vṛtrahann anyeṣāṁ yā śatakrato ||
8.033.15a asmākam adyāntamaṁ stomaṁ dhiṣva mahāmaha |
8.033.15c asmākaṁ te savanā santu śaṁtamā madāya dyukṣa somapāḥ ||
8.033.16a nahi ṣas tava no mama śāstre anyasya raṇyati |
8.033.16c yo asmān vīra ānayat ||
8.033.17a indraś cid ghā tad abravīt striyā aśāsyam manaḥ |
8.033.17c uto aha kratuṁ raghum ||
8.033.18a saptī cid ghā madacyutā mithunā vahato ratham |
8.033.18c eved dhūr vṛṣṇa uttarā ||
8.033.19a adhaḥ paśyasva mopari saṁtarām pādakau hara |
8.033.19c mā te kaśaplakau dṛśan strī hi brahmā babhūvitha ||

8.034.01a endra yāhi haribhir upa kaṇvasya suṣṭutim |
8.034.01c divo amuṣya śāsato divaṁ yaya divāvaso ||
8.034.02a ā tvā grāvā vadann iha somī ghoṣeṇa yacchatu |
8.034.02c divo amuṣya śāsato divaṁ yaya divāvaso ||
8.034.03a atrā vi nemir eṣām urāṁ na dhūnute vṛkaḥ |
8.034.03c divo amuṣya śāsato divaṁ yaya divāvaso ||
8.034.04a ā tvā kaṇvā ihāvase havante vājasātaye |
8.034.04c divo amuṣya śāsato divaṁ yaya divāvaso ||
8.034.05a dadhāmi te sutānāṁ vṛṣṇe na pūrvapāyyam |
8.034.05c divo amuṣya śāsato divaṁ yaya divāvaso ||
8.034.06a smatpuraṁdhir na ā gahi viśvatodhīr na ūtaye |
8.034.06c divo amuṣya śāsato divaṁ yaya divāvaso ||
8.034.07a ā no yāhi mahemate sahasrote śatāmagha |
8.034.07c divo amuṣya śāsato divaṁ yaya divāvaso ||
8.034.08a ā tvā hotā manurhito devatrā vakṣad īḍyaḥ |
8.034.08c divo amuṣya śāsato divaṁ yaya divāvaso ||
8.034.09a ā tvā madacyutā harī śyenam pakṣeva vakṣataḥ |
8.034.09c divo amuṣya śāsato divaṁ yaya divāvaso ||
8.034.10a ā yāhy arya ā pari svāhā somasya pītaye |
8.034.10c divo amuṣya śāsato divaṁ yaya divāvaso ||
8.034.11a ā no yāhy upaśruty uktheṣu raṇayā iha |
8.034.11c divo amuṣya śāsato divaṁ yaya divāvaso ||
8.034.12a sarūpair ā su no gahi sambhṛtaiḥ sambhṛtāśvaḥ |
8.034.12c divo amuṣya śāsato divaṁ yaya divāvaso ||
8.034.13a ā yāhi parvatebhyaḥ samudrasyādhi viṣṭapaḥ |
8.034.13c divo amuṣya śāsato divaṁ yaya divāvaso ||
8.034.14a ā no gavyāny aśvyā sahasrā śūra dardṛhi |
8.034.14c divo amuṣya śāsato divaṁ yaya divāvaso ||
8.034.15a ā naḥ sahasraśo bharāyutāni śatāni ca |
8.034.15c divo amuṣya śāsato divaṁ yaya divāvaso ||
8.034.16a ā yad indraś ca dadvahe sahasraṁ vasurociṣaḥ |
8.034.16c ojiṣṭham aśvyam paśum ||
8.034.17a ya ṛjrā vātaraṁhaso 'ruṣāso raghuṣyadaḥ |
8.034.17c bhrājante sūryā iva ||
8.034.18a pārāvatasya rātiṣu dravaccakreṣv āśuṣu |
8.034.18c tiṣṭhaṁ vanasya madhya ā ||

8.035.01a agninendreṇa varuṇena viṣṇunādityai rudrair vasubhiḥ sacābhuvā |
8.035.01c sajoṣasā uṣasā sūryeṇa ca somam pibatam aśvinā ||
8.035.02a viśvābhir dhībhir bhuvanena vājinā divā pṛthivyādribhiḥ sacābhuvā |
8.035.02c sajoṣasā uṣasā sūryeṇa ca somam pibatam aśvinā ||
8.035.03a viśvair devais tribhir ekādaśair ihādbhir marudbhir bhṛgubhiḥ sacābhuvā |
8.035.03c sajoṣasā uṣasā sūryeṇa ca somam pibatam aśvinā ||
8.035.04a juṣethāṁ yajñam bodhataṁ havasya me viśveha devau savanāva gacchatam |
8.035.04c sajoṣasā uṣasā sūryeṇa ceṣaṁ no voḻham aśvinā ||
8.035.05a stomaṁ juṣethāṁ yuvaśeva kanyanāṁ viśveha devau savanāva gacchatam |
8.035.05c sajoṣasā uṣasā sūryeṇa ceṣaṁ no voḻham aśvinā ||
8.035.06a giro juṣethām adhvaraṁ juṣethāṁ viśveha devau savanāva gacchatam |
8.035.06c sajoṣasā uṣasā sūryeṇa ceṣaṁ no voḻham aśvinā ||
8.035.07a hāridraveva patatho vaned upa somaṁ sutam mahiṣevāva gacchathaḥ |
8.035.07c sajoṣasā uṣasā sūryeṇa ca trir vartir yātam aśvinā ||
8.035.08a haṁsāv iva patatho adhvagāv iva somaṁ sutam mahiṣevāva gacchathaḥ |
8.035.08c sajoṣasā uṣasā sūryeṇa ca trir vartir yātam aśvinā ||
8.035.09a śyenāv iva patatho havyadātaye somaṁ sutam mahiṣevāva gacchathaḥ |
8.035.09c sajoṣasā uṣasā sūryeṇa ca trir vartir yātam aśvinā ||
8.035.10a pibataṁ ca tṛpṇutaṁ cā ca gacchatam prajāṁ ca dhattaṁ draviṇaṁ ca dhattam |
8.035.10c sajoṣasā uṣasā sūryeṇa corjaṁ no dhattam aśvinā ||
8.035.11a jayataṁ ca pra stutaṁ ca pra cāvatam prajāṁ ca dhattaṁ draviṇaṁ ca dhattam |
8.035.11c sajoṣasā uṣasā sūryeṇa corjaṁ no dhattam aśvinā ||
8.035.12a hataṁ ca śatrūn yatataṁ ca mitriṇaḥ prajāṁ ca dhattaṁ draviṇaṁ ca dhattam |
8.035.12c sajoṣasā uṣasā sūryeṇa corjaṁ no dhattam aśvinā ||
8.035.13a mitrāvaruṇavantā uta dharmavantā marutvantā jaritur gacchatho havam |
8.035.13c sajoṣasā uṣasā sūryeṇa cādityair yātam aśvinā ||
8.035.14a aṅgirasvantā uta viṣṇuvantā marutvantā jaritur gacchatho havam |
8.035.14c sajoṣasā uṣasā sūryeṇa cādityair yātam aśvinā ||
8.035.15a ṛbhumantā vṛṣaṇā vājavantā marutvantā jaritur gacchatho havam |
8.035.15c sajoṣasā uṣasā sūryeṇa cādityair yātam aśvinā ||
8.035.16a brahma jinvatam uta jinvataṁ dhiyo hataṁ rakṣāṁsi sedhatam amīvāḥ |
8.035.16c sajoṣasā uṣasā sūryeṇa ca somaṁ sunvato aśvinā ||
8.035.17a kṣatraṁ jinvatam uta jinvataṁ nṝn hataṁ rakṣāṁsi sedhatam amīvāḥ |
8.035.17c sajoṣasā uṣasā sūryeṇa ca somaṁ sunvato aśvinā ||
8.035.18a dhenūr jinvatam uta jinvataṁ viśo hataṁ rakṣāṁsi sedhatam amīvāḥ |
8.035.18c sajoṣasā uṣasā sūryeṇa ca somaṁ sunvato aśvinā ||
8.035.19a atrer iva śṛṇutam pūrvyastutiṁ śyāvāśvasya sunvato madacyutā |
8.035.19c sajoṣasā uṣasā sūryeṇa cāśvinā tiroahnyam ||
8.035.20a sargām̐ iva sṛjataṁ suṣṭutīr upa śyāvāśvasya sunvato madacyutā |
8.035.20c sajoṣasā uṣasā sūryeṇa cāśvinā tiroahnyam ||
8.035.21a raśmīm̐r iva yacchatam adhvarām̐ upa śyāvāśvasya sunvato madacyutā |
8.035.21c sajoṣasā uṣasā sūryeṇa cāśvinā tiroahnyam ||
8.035.22a arvāg rathaṁ ni yacchatam pibataṁ somyam madhu |
8.035.22c ā yātam aśvinā gatam avasyur vām ahaṁ huve dhattaṁ ratnāni dāśuṣe ||
8.035.23a namovāke prasthite adhvare narā vivakṣaṇasya pītaye |
8.035.23c ā yātam aśvinā gatam avasyur vām ahaṁ huve dhattaṁ ratnāni dāśuṣe ||
8.035.24a svāhākṛtasya tṛmpataṁ sutasya devāv andhasaḥ |
8.035.24c ā yātam aśvinā gatam avasyur vām ahaṁ huve dhattaṁ ratnāni dāśuṣe ||

8.036.01a avitāsi sunvato vṛktabarhiṣaḥ pibā somam madāya kaṁ śatakrato |
8.036.01c yaṁ te bhāgam adhārayan viśvāḥ sehānaḥ pṛtanā uru jrayaḥ sam apsujin marutvām̐ indra satpate ||
8.036.02a prāva stotāram maghavann ava tvām pibā somam madāya kaṁ śatakrato |
8.036.02c yaṁ te bhāgam adhārayan viśvāḥ sehānaḥ pṛtanā uru jrayaḥ sam apsujin marutvām̐ indra satpate ||
8.036.03a ūrjā devām̐ avasy ojasā tvām pibā somam madāya kaṁ śatakrato |
8.036.03c yaṁ te bhāgam adhārayan viśvāḥ sehānaḥ pṛtanā uru jrayaḥ sam apsujin marutvām̐ indra satpate ||
8.036.04a janitā divo janitā pṛthivyāḥ pibā somam madāya kaṁ śatakrato |
8.036.04c yaṁ te bhāgam adhārayan viśvāḥ sehānaḥ pṛtanā uru jrayaḥ sam apsujin marutvām̐ indra satpate ||
8.036.05a janitāśvānāṁ janitā gavām asi pibā somam madāya kaṁ śatakrato |
8.036.05c yaṁ te bhāgam adhārayan viśvāḥ sehānaḥ pṛtanā uru jrayaḥ sam apsujin marutvām̐ indra satpate ||
8.036.06a atrīṇāṁ stomam adrivo mahas kṛdhi pibā somam madāya kaṁ śatakrato |
8.036.06c yaṁ te bhāgam adhārayan viśvāḥ sehānaḥ pṛtanā uru jrayaḥ sam apsujin marutvām̐ indra satpate ||
8.036.07a śyāvāśvasya sunvatas tathā śṛṇu yathāśṛṇor atreḥ karmāṇi kṛṇvataḥ |
8.036.07c pra trasadasyum āvitha tvam eka in nṛṣāhya indra brahmāṇi vardhayan ||

8.037.01a predam brahma vṛtratūryeṣv āvitha pra sunvataḥ śacīpata indra viśvābhir ūtibhiḥ |
8.037.01d mādhyaṁdinasya savanasya vṛtrahann anedya pibā somasya vajrivaḥ ||
8.037.02a sehāna ugra pṛtanā abhi druhaḥ śacīpata indra viśvābhir ūtibhiḥ |
8.037.02d mādhyaṁdinasya savanasya vṛtrahann anedya pibā somasya vajrivaḥ ||
8.037.03a ekarāḻ asya bhuvanasya rājasi śacīpata indra viśvābhir ūtibhiḥ |
8.037.03d mādhyaṁdinasya savanasya vṛtrahann anedya pibā somasya vajrivaḥ ||
8.037.04a sasthāvānā yavayasi tvam eka ic chacīpata indra viśvābhir ūtibhiḥ |
8.037.04d mādhyaṁdinasya savanasya vṛtrahann anedya pibā somasya vajrivaḥ ||
8.037.05a kṣemasya ca prayujaś ca tvam īśiṣe śacīpata indra viśvābhir ūtibhiḥ |
8.037.05d mādhyaṁdinasya savanasya vṛtrahann anedya pibā somasya vajrivaḥ ||
8.037.06a kṣatrāya tvam avasi na tvam āvitha śacīpata indra viśvābhir ūtibhiḥ |
8.037.06d mādhyaṁdinasya savanasya vṛtrahann anedya pibā somasya vajrivaḥ ||
8.037.07a śyāvāśvasya rebhatas tathā śṛṇu yathāśṛṇor atreḥ karmāṇi kṛṇvataḥ |
8.037.07c pra trasadasyum āvitha tvam eka in nṛṣāhya indra kṣatrāṇi vardhayan ||

8.038.01a yajñasya hi stha ṛtvijā sasnī vājeṣu karmasu |
8.038.01c indrāgnī tasya bodhatam ||
8.038.02a tośāsā rathayāvānā vṛtrahaṇāparājitā |
8.038.02c indrāgnī tasya bodhatam ||
8.038.03a idaṁ vām madiram madhv adhukṣann adribhir naraḥ |
8.038.03c indrāgnī tasya bodhatam ||
8.038.04a juṣethāṁ yajñam iṣṭaye sutaṁ somaṁ sadhastutī |
8.038.04c indrāgnī ā gataṁ narā ||
8.038.05a imā juṣethāṁ savanā yebhir havyāny ūhathuḥ |
8.038.05c indrāgnī ā gataṁ narā ||
8.038.06a imāṁ gāyatravartaniṁ juṣethāṁ suṣṭutim mama |
8.038.06c indrāgnī ā gataṁ narā ||
8.038.07a prātaryāvabhir ā gataṁ devebhir jenyāvasū |
8.038.07c indrāgnī somapītaye ||
8.038.08a śyāvāśvasya sunvato 'trīṇāṁ śṛṇutaṁ havam |
8.038.08c indrāgnī somapītaye ||
8.038.09a evā vām ahva ūtaye yathāhuvanta medhirāḥ |
8.038.09c indrāgnī somapītaye ||
8.038.10a āhaṁ sarasvatīvator indrāgnyor avo vṛṇe |
8.038.10c yābhyāṁ gāyatram ṛcyate ||

8.039.01a agnim astoṣy ṛgmiyam agnim īḻā yajadhyai |
8.039.01c agnir devām̐ anaktu na ubhe hi vidathe kavir antaś carati dūtyaṁ nabhantām anyake same ||
8.039.02a ny agne navyasā vacas tanūṣu śaṁsam eṣām |
8.039.02c ny arātī rarāvṇāṁ viśvā aryo arātīr ito yucchantv āmuro nabhantām anyake same ||
8.039.03a agne manmāni tubhyaṁ kaṁ ghṛtaṁ na juhva āsani |
8.039.03c sa deveṣu pra cikiddhi tvaṁ hy asi pūrvyaḥ śivo dūto vivasvato nabhantām anyake same ||
8.039.04a tat-tad agnir vayo dadhe yathā-yathā kṛpaṇyati |
8.039.04c ūrjāhutir vasūnāṁ śaṁ ca yoś ca mayo dadhe viśvasyai devahūtyai nabhantām anyake same ||
8.039.05a sa ciketa sahīyasāgniś citreṇa karmaṇā |
8.039.05c sa hotā śaśvatīnāṁ dakṣiṇābhir abhīvṛta inoti ca pratīvyaṁ nabhantām anyake same ||
8.039.06a agnir jātā devānām agnir veda martānām apīcyam |
8.039.06c agniḥ sa draviṇodā agnir dvārā vy ūrṇute svāhuto navīyasā nabhantām anyake same ||
8.039.07a agnir deveṣu saṁvasuḥ sa vikṣu yajñiyāsv ā |
8.039.07c sa mudā kāvyā puru viśvam bhūmeva puṣyati devo deveṣu yajñiyo nabhantām anyake same ||
8.039.08a yo agniḥ saptamānuṣaḥ śrito viśveṣu sindhuṣu |
8.039.08c tam āganma tripastyam mandhātur dasyuhantamam agniṁ yajñeṣu pūrvyaṁ nabhantām anyake same ||
8.039.09a agnis trīṇi tridhātūny ā kṣeti vidathā kaviḥ |
8.039.09c sa trīm̐r ekādaśām̐ iha yakṣac ca piprayac ca no vipro dūtaḥ pariṣkṛto nabhantām anyake same ||
8.039.10a tvaṁ no agna āyuṣu tvaṁ deveṣu pūrvya vasva eka irajyasi |
8.039.10d tvām āpaḥ parisrutaḥ pari yanti svasetavo nabhantām anyake same ||

8.040.01a indrāgnī yuvaṁ su naḥ sahantā dāsatho rayim |
8.040.01c yena dṛḻhā samatsv ā vīḻu cit sāhiṣīmahy agnir vaneva vāta in nabhantām anyake same ||
8.040.02a nahi vāṁ vavrayāmahe 'thendram id yajāmahe śaviṣṭhaṁ nṛṇāṁ naram |
8.040.02d sa naḥ kadā cid arvatā gamad ā vājasātaye gamad ā medhasātaye nabhantām anyake same ||
8.040.03a tā hi madhyam bharāṇām indrāgnī adhikṣitaḥ |
8.040.03c tā u kavitvanā kavī pṛcchyamānā sakhīyate saṁ dhītam aśnutaṁ narā nabhantām anyake same ||
8.040.04a abhy arca nabhākavad indrāgnī yajasā girā |
8.040.04c yayor viśvam idaṁ jagad iyaṁ dyauḥ pṛthivī mahy upasthe bibhṛto vasu nabhantām anyake same ||
8.040.05a pra brahmāṇi nabhākavad indrāgnibhyām irajyata |
8.040.05c yā saptabudhnam arṇavaṁ jihmabāram aporṇuta indra īśāna ojasā nabhantām anyake same ||
8.040.06a api vṛśca purāṇavad vratater iva guṣpitam ojo dāsasya dambhaya |
8.040.06d vayaṁ tad asya sambhṛtaṁ vasv indreṇa vi bhajemahi nabhantām anyake same ||
8.040.07a yad indrāgnī janā ime vihvayante tanā girā |
8.040.07c asmākebhir nṛbhir vayaṁ sāsahyāma pṛtanyato vanuyāma vanuṣyato nabhantām anyake same ||
8.040.08a yā nu śvetāv avo diva uccarāta upa dyubhiḥ |
8.040.08c indrāgnyor anu vratam uhānā yanti sindhavo yān sīm bandhād amuñcatāṁ nabhantām anyake same ||
8.040.09a pūrvīṣ ṭa indropamātayaḥ pūrvīr uta praśastayaḥ sūno hinvasya harivaḥ |
8.040.09d vasvo vīrasyāpṛco yā nu sādhanta no dhiyo nabhantām anyake same ||
8.040.10a taṁ śiśītā suvṛktibhis tveṣaṁ satvānam ṛgmiyam |
8.040.10c uto nu cid ya ojasā śuṣṇasyāṇḍāni bhedati jeṣat svarvatīr apo nabhantām anyake same ||
8.040.11a taṁ śiśītā svadhvaraṁ satyaṁ satvānam ṛtviyam |
8.040.11c uto nu cid ya ohata āṇḍā śuṣṇasya bhedaty ajaiḥ svarvatīr apo nabhantām anyake same ||
8.040.12a evendrāgnibhyām pitṛvan navīyo mandhātṛvad aṅgirasvad avāci |
8.040.12c tridhātunā śarmaṇā pātam asmān vayaṁ syāma patayo rayīṇām ||

8.041.01a asmā ū ṣu prabhūtaye varuṇāya marudbhyo 'rcā viduṣṭarebhyaḥ |
8.041.01d yo dhītā mānuṣāṇām paśvo gā iva rakṣati nabhantām anyake same ||
8.041.02a tam ū ṣu samanā girā pitṝṇāṁ ca manmabhiḥ |
8.041.02c nābhākasya praśastibhir yaḥ sindhūnām upodaye saptasvasā sa madhyamo nabhantām anyake same ||
8.041.03a sa kṣapaḥ pari ṣasvaje ny usro māyayā dadhe sa viśvam pari darśataḥ |
8.041.03d tasya venīr anu vratam uṣas tisro avardhayan nabhantām anyake same ||
8.041.04a yaḥ kakubho nidhārayaḥ pṛthivyām adhi darśataḥ |
8.041.04c sa mātā pūrvyam padaṁ tad varuṇasya saptyaṁ sa hi gopā iveryo nabhantām anyake same ||
8.041.05a yo dhartā bhuvanānāṁ ya usrāṇām apīcyā veda nāmāni guhyā |
8.041.05d sa kaviḥ kāvyā puru rūpaṁ dyaur iva puṣyati nabhantām anyake same ||
8.041.06a yasmin viśvāni kāvyā cakre nābhir iva śritā |
8.041.06c tritaṁ jūtī saparyata vraje gāvo na saṁyuje yuje aśvām̐ ayukṣata nabhantām anyake same ||
8.041.07a ya āsv atka āśaye viśvā jātāny eṣām |
8.041.07c pari dhāmāni marmṛśad varuṇasya puro gaye viśve devā anu vrataṁ nabhantām anyake same ||
8.041.08a sa samudro apīcyas turo dyām iva rohati ni yad āsu yajur dadhe |
8.041.08d sa māyā arcinā padāstṛṇān nākam āruhan nabhantām anyake same ||
8.041.09a yasya śvetā vicakṣaṇā tisro bhūmīr adhikṣitaḥ |
8.041.09c trir uttarāṇi papratur varuṇasya dhruvaṁ sadaḥ sa saptānām irajyati nabhantām anyake same ||
8.041.10a yaḥ śvetām̐ adhinirṇijaś cakre kṛṣṇām̐ anu vratā |
8.041.10c sa dhāma pūrvyam mame yaḥ skambhena vi rodasī ajo na dyām adhārayan nabhantām anyake same ||

8.042.01a astabhnād dyām asuro viśvavedā amimīta varimāṇam pṛthivyāḥ |
8.042.01c āsīdad viśvā bhuvanāni samrāḍ viśvet tāni varuṇasya vratāni ||
8.042.02a evā vandasva varuṇam bṛhantaṁ namasyā dhīram amṛtasya gopām |
8.042.02c sa naḥ śarma trivarūthaṁ vi yaṁsat pātaṁ no dyāvāpṛthivī upasthe ||
8.042.03a imāṁ dhiyaṁ śikṣamāṇasya deva kratuṁ dakṣaṁ varuṇa saṁ śiśādhi |
8.042.03c yayāti viśvā duritā tarema sutarmāṇam adhi nāvaṁ ruhema ||
8.042.04a ā vāṁ grāvāṇo aśvinā dhībhir viprā acucyavuḥ |
8.042.04c nāsatyā somapītaye nabhantām anyake same ||
8.042.05a yathā vām atrir aśvinā gīrbhir vipro ajohavīt |
8.042.05c nāsatyā somapītaye nabhantām anyake same ||
8.042.06a evā vām ahva ūtaye yathāhuvanta medhirāḥ |
8.042.06c nāsatyā somapītaye nabhantām anyake same ||

8.043.01a ime viprasya vedhaso 'gner astṛtayajvanaḥ |
8.043.01c giraḥ stomāsa īrate ||
8.043.02a asmai te pratiharyate jātavedo vicarṣaṇe |
8.043.02c agne janāmi suṣṭutim ||
8.043.03a ārokā iva ghed aha tigmā agne tava tviṣaḥ |
8.043.03c dadbhir vanāni bapsati ||
8.043.04a harayo dhūmaketavo vātajūtā upa dyavi |
8.043.04c yatante vṛthag agnayaḥ ||
8.043.05a ete tye vṛthag agnaya iddhāsaḥ sam adṛkṣata |
8.043.05c uṣasām iva ketavaḥ ||
8.043.06a kṛṣṇā rajāṁsi patsutaḥ prayāṇe jātavedasaḥ |
8.043.06c agnir yad rodhati kṣami ||
8.043.07a dhāsiṁ kṛṇvāna oṣadhīr bapsad agnir na vāyati |
8.043.07c punar yan taruṇīr api ||
8.043.08a jihvābhir aha nannamad arciṣā jañjaṇābhavan |
8.043.08c agnir vaneṣu rocate ||
8.043.09a apsv agne sadhiṣ ṭava sauṣadhīr anu rudhyase |
8.043.09c garbhe sañ jāyase punaḥ ||
8.043.10a ud agne tava tad ghṛtād arcī rocata āhutam |
8.043.10c niṁsānaṁ juhvo mukhe ||
8.043.11a ukṣānnāya vaśānnāya somapṛṣṭhāya vedhase |
8.043.11c stomair vidhemāgnaye ||
8.043.12a uta tvā namasā vayaṁ hotar vareṇyakrato |
8.043.12c agne samidbhir īmahe ||
8.043.13a uta tvā bhṛguvac chuce manuṣvad agna āhuta |
8.043.13c aṅgirasvad dhavāmahe ||
8.043.14a tvaṁ hy agne agninā vipro vipreṇa san satā |
8.043.14c sakhā sakhyā samidhyase ||
8.043.15a sa tvaṁ viprāya dāśuṣe rayiṁ dehi sahasriṇam |
8.043.15c agne vīravatīm iṣam ||
8.043.16a agne bhrātaḥ sahaskṛta rohidaśva śucivrata |
8.043.16c imaṁ stomaṁ juṣasva me ||
8.043.17a uta tvāgne mama stuto vāśrāya pratiharyate |
8.043.17c goṣṭhaṁ gāva ivāśata ||
8.043.18a tubhyaṁ tā aṅgirastama viśvāḥ sukṣitayaḥ pṛthak |
8.043.18c agne kāmāya yemire ||
8.043.19a agniṁ dhībhir manīṣiṇo medhirāso vipaścitaḥ |
8.043.19c admasadyāya hinvire ||
8.043.20a taṁ tvām ajmeṣu vājinaṁ tanvānā agne adhvaram |
8.043.20c vahniṁ hotāram īḻate ||
8.043.21a purutrā hi sadṛṅṅ asi viśo viśvā anu prabhuḥ |
8.043.21c samatsu tvā havāmahe ||
8.043.22a tam īḻiṣva ya āhuto 'gnir vibhrājate ghṛtaiḥ |
8.043.22c imaṁ naḥ śṛṇavad dhavam ||
8.043.23a taṁ tvā vayaṁ havāmahe śṛṇvantaṁ jātavedasam |
8.043.23c agne ghnantam apa dviṣaḥ ||
8.043.24a viśāṁ rājānam adbhutam adhyakṣaṁ dharmaṇām imam |
8.043.24c agnim īḻe sa u śravat ||
8.043.25a agniṁ viśvāyuvepasam maryaṁ na vājinaṁ hitam |
8.043.25c saptiṁ na vājayāmasi ||
8.043.26a ghnan mṛdhrāṇy apa dviṣo dahan rakṣāṁsi viśvahā |
8.043.26c agne tigmena dīdihi ||
8.043.27a yaṁ tvā janāsa indhate manuṣvad aṅgirastama |
8.043.27c agne sa bodhi me vacaḥ ||
8.043.28a yad agne divijā asy apsujā vā sahaskṛta |
8.043.28c taṁ tvā gīrbhir havāmahe ||
8.043.29a tubhyaṁ ghet te janā ime viśvāḥ sukṣitayaḥ pṛthak |
8.043.29c dhāsiṁ hinvanty attave ||
8.043.30a te ghed agne svādhyo 'hā viśvā nṛcakṣasaḥ |
8.043.30c tarantaḥ syāma durgahā ||
8.043.31a agnim mandram purupriyaṁ śīram pāvakaśociṣam |
8.043.31c hṛdbhir mandrebhir īmahe ||
8.043.32a sa tvam agne vibhāvasuḥ sṛjan sūryo na raśmibhiḥ |
8.043.32c śardhan tamāṁsi jighnase ||
8.043.33a tat te sahasva īmahe dātraṁ yan nopadasyati |
8.043.33c tvad agne vāryaṁ vasu ||

8.044.01a samidhāgniṁ duvasyata ghṛtair bodhayatātithim |
8.044.01c āsmin havyā juhotana ||
8.044.02a agne stomaṁ juṣasva me vardhasvānena manmanā |
8.044.02c prati sūktāni harya naḥ ||
8.044.03a agniṁ dūtam puro dadhe havyavāham upa bruve |
8.044.03c devām̐ ā sādayād iha ||
8.044.04a ut te bṛhanto arcayaḥ samidhānasya dīdivaḥ |
8.044.04c agne śukrāsa īrate ||
8.044.05a upa tvā juhvo mama ghṛtācīr yantu haryata |
8.044.05c agne havyā juṣasva naḥ ||
8.044.06a mandraṁ hotāram ṛtvijaṁ citrabhānuṁ vibhāvasum |
8.044.06c agnim īḻe sa u śravat ||
8.044.07a pratnaṁ hotāram īḍyaṁ juṣṭam agniṁ kavikratum |
8.044.07c adhvarāṇām abhiśriyam ||
8.044.08a juṣāṇo aṅgirastamemā havyāny ānuṣak |
8.044.08c agne yajñaṁ naya ṛtuthā ||
8.044.09a samidhāna u santya śukraśoca ihā vaha |
8.044.09c cikitvān daivyaṁ janam ||
8.044.10a vipraṁ hotāram adruhaṁ dhūmaketuṁ vibhāvasum |
8.044.10c yajñānāṁ ketum īmahe ||
8.044.11a agne ni pāhi nas tvam prati ṣma deva rīṣataḥ |
8.044.11c bhindhi dveṣaḥ sahaskṛta ||
8.044.12a agniḥ pratnena manmanā śumbhānas tanvaṁ svām |
8.044.12c kavir vipreṇa vāvṛdhe ||
8.044.13a ūrjo napātam ā huve 'gnim pāvakaśociṣam |
8.044.13c asmin yajñe svadhvare ||
8.044.14a sa no mitramahas tvam agne śukreṇa śociṣā |
8.044.14c devair ā satsi barhiṣi ||
8.044.15a yo agniṁ tanvo dame devam martaḥ saparyati |
8.044.15c tasmā id dīdayad vasu ||
8.044.16a agnir mūrdhā divaḥ kakut patiḥ pṛthivyā ayam |
8.044.16c apāṁ retāṁsi jinvati ||
8.044.17a ud agne śucayas tava śukrā bhrājanta īrate |
8.044.17c tava jyotīṁṣy arcayaḥ ||
8.044.18a īśiṣe vāryasya hi dātrasyāgne svarpatiḥ |
8.044.18c stotā syāṁ tava śarmaṇi ||
8.044.19a tvām agne manīṣiṇas tvāṁ hinvanti cittibhiḥ |
8.044.19c tvāṁ vardhantu no giraḥ ||
8.044.20a adabdhasya svadhāvato dūtasya rebhataḥ sadā |
8.044.20c agneḥ sakhyaṁ vṛṇīmahe ||
8.044.21a agniḥ śucivratatamaḥ śucir vipraḥ śuciḥ kaviḥ |
8.044.21c śucī rocata āhutaḥ ||
8.044.22a uta tvā dhītayo mama giro vardhantu viśvahā |
8.044.22c agne sakhyasya bodhi naḥ ||
8.044.23a yad agne syām ahaṁ tvaṁ tvaṁ vā ghā syā aham |
8.044.23c syuṣ ṭe satyā ihāśiṣaḥ ||
8.044.24a vasur vasupatir hi kam asy agne vibhāvasuḥ |
8.044.24c syāma te sumatāv api ||
8.044.25a agne dhṛtavratāya te samudrāyeva sindhavaḥ |
8.044.25c giro vāśrāsa īrate ||
8.044.26a yuvānaṁ viśpatiṁ kaviṁ viśvādam puruvepasam |
8.044.26c agniṁ śumbhāmi manmabhiḥ ||
8.044.27a yajñānāṁ rathye vayaṁ tigmajambhāya vīḻave |
8.044.27c stomair iṣemāgnaye ||
8.044.28a ayam agne tve api jaritā bhūtu santya |
8.044.28c tasmai pāvaka mṛḻaya ||
8.044.29a dhīro hy asy admasad vipro na jāgṛviḥ sadā |
8.044.29c agne dīdayasi dyavi ||
8.044.30a purāgne duritebhyaḥ purā mṛdhrebhyaḥ kave |
8.044.30c pra ṇa āyur vaso tira ||

8.045.01a ā ghā ye agnim indhate stṛṇanti barhir ānuṣak |
8.045.01c yeṣām indro yuvā sakhā ||
8.045.02a bṛhann id idhma eṣām bhūri śastam pṛthuḥ svaruḥ |
8.045.02c yeṣām indro yuvā sakhā ||
8.045.03a ayuddha id yudhā vṛtaṁ śūra ājati satvabhiḥ |
8.045.03c yeṣām indro yuvā sakhā ||
8.045.04a ā bundaṁ vṛtrahā dade jātaḥ pṛcchad vi mātaram |
8.045.04c ka ugrāḥ ke ha śṛṇvire ||
8.045.05a prati tvā śavasī vadad girāv apso na yodhiṣat |
8.045.05c yas te śatrutvam ācake ||
8.045.06a uta tvam maghavañ chṛṇu yas te vaṣṭi vavakṣi tat |
8.045.06c yad vīḻayāsi vīḻu tat ||
8.045.07a yad ājiṁ yāty ājikṛd indraḥ svaśvayur upa |
8.045.07c rathītamo rathīnām ||
8.045.08a vi ṣu viśvā abhiyujo vajrin viṣvag yathā vṛha |
8.045.08c bhavā naḥ suśravastamaḥ ||
8.045.09a asmākaṁ su ratham pura indraḥ kṛṇotu sātaye |
8.045.09c na yaṁ dhūrvanti dhūrtayaḥ ||
8.045.10a vṛjyāma te pari dviṣo 'raṁ te śakra dāvane |
8.045.10c gamemed indra gomataḥ ||
8.045.11a śanaiś cid yanto adrivo 'śvāvantaḥ śatagvinaḥ |
8.045.11c vivakṣaṇā anehasaḥ ||
8.045.12a ūrdhvā hi te dive-dive sahasrā sūnṛtā śatā |
8.045.12c jaritṛbhyo vimaṁhate ||
8.045.13a vidmā hi tvā dhanaṁjayam indra dṛḻhā cid ārujam |
8.045.13c ādāriṇaṁ yathā gayam ||
8.045.14a kakuhaṁ cit tvā kave mandantu dhṛṣṇav indavaḥ |
8.045.14c ā tvā paṇiṁ yad īmahe ||
8.045.15a yas te revām̐ adāśuriḥ pramamarṣa maghattaye |
8.045.15c tasya no veda ā bhara ||
8.045.16a ima u tvā vi cakṣate sakhāya indra sominaḥ |
8.045.16c puṣṭāvanto yathā paśum ||
8.045.17a uta tvābadhiraṁ vayaṁ śrutkarṇaṁ santam ūtaye |
8.045.17c dūrād iha havāmahe ||
8.045.18a yac chuśrūyā imaṁ havaṁ durmarṣaṁ cakriyā uta |
8.045.18c bhaver āpir no antamaḥ ||
8.045.19a yac cid dhi te api vyathir jaganvāṁso amanmahi |
8.045.19c godā id indra bodhi naḥ ||
8.045.20a ā tvā rambhaṁ na jivrayo rarabhmā śavasas pate |
8.045.20c uśmasi tvā sadhastha ā ||
8.045.21a stotram indrāya gāyata purunṛmṇāya satvane |
8.045.21c nakir yaṁ vṛṇvate yudhi ||
8.045.22a abhi tvā vṛṣabhā sute sutaṁ sṛjāmi pītaye |
8.045.22c tṛmpā vy aśnuhī madam ||
8.045.23a mā tvā mūrā aviṣyavo mopahasvāna ā dabhan |
8.045.23c mākīm brahmadviṣo vanaḥ ||
8.045.24a iha tvā goparīṇasā mahe mandantu rādhase |
8.045.24c saro gauro yathā piba ||
8.045.25a yā vṛtrahā parāvati sanā navā ca cucyuve |
8.045.25c tā saṁsatsu pra vocata ||
8.045.26a apibat kadruvaḥ sutam indraḥ sahasrabāhve |
8.045.26c atrādediṣṭa pauṁsyam ||
8.045.27a satyaṁ tat turvaśe yadau vidāno ahnavāyyam |
8.045.27c vy ānaṭ turvaṇe śami ||
8.045.28a taraṇiṁ vo janānāṁ tradaṁ vājasya gomataḥ |
8.045.28c samānam u pra śaṁsiṣam ||
8.045.29a ṛbhukṣaṇaṁ na vartava uktheṣu tugryāvṛdham |
8.045.29c indraṁ some sacā sute ||
8.045.30a yaḥ kṛntad id vi yonyaṁ triśokāya girim pṛthum |
8.045.30c gobhyo gātuṁ niretave ||
8.045.31a yad dadhiṣe manasyasi mandānaḥ pred iyakṣasi |
8.045.31c mā tat kar indra mṛḻaya ||
8.045.32a dabhraṁ cid dhi tvāvataḥ kṛtaṁ śṛṇve adhi kṣami |
8.045.32c jigātv indra te manaḥ ||
8.045.33a taved u tāḥ sukīrtayo 'sann uta praśastayaḥ |
8.045.33c yad indra mṛḻayāsi naḥ ||
8.045.34a mā na ekasminn āgasi mā dvayor uta triṣu |
8.045.34c vadhīr mā śūra bhūriṣu ||
8.045.35a bibhayā hi tvāvata ugrād abhiprabhaṅgiṇaḥ |
8.045.35c dasmād aham ṛtīṣahaḥ ||
8.045.36a mā sakhyuḥ śūnam ā vide mā putrasya prabhūvaso |
8.045.36c āvṛtvad bhūtu te manaḥ ||
8.045.37a ko nu maryā amithitaḥ sakhā sakhāyam abravīt |
8.045.37c jahā ko asmad īṣate ||
8.045.38a evāre vṛṣabhā sute 'sinvan bhūry āvayaḥ |
8.045.38c śvaghnīva nivatā caran ||
8.045.39a ā ta etā vacoyujā harī gṛbhṇe sumadrathā |
8.045.39c yad īm brahmabhya id dadaḥ ||
8.045.40a bhindhi viśvā apa dviṣaḥ pari bādho jahī mṛdhaḥ |
8.045.40c vasu spārhaṁ tad ā bhara ||
8.045.41a yad vīḻāv indra yat sthire yat parśāne parābhṛtam |
8.045.41c vasu spārhaṁ tad ā bhara ||
8.045.42a yasya te viśvamānuṣo bhūrer dattasya vedati |
8.045.42c vasu spārhaṁ tad ā bhara ||

8.046.01a tvāvataḥ purūvaso vayam indra praṇetaḥ |
8.046.01c smasi sthātar harīṇām ||
8.046.02a tvāṁ hi satyam adrivo vidma dātāram iṣām |
8.046.02c vidma dātāraṁ rayīṇām ||
8.046.03a ā yasya te mahimānaṁ śatamūte śatakrato |
8.046.03c gīrbhir gṛṇanti kāravaḥ ||
8.046.04a sunītho ghā sa martyo yam maruto yam aryamā |
8.046.04c mitraḥ pānty adruhaḥ ||
8.046.05a dadhāno gomad aśvavat suvīryam ādityajūta edhate |
8.046.05c sadā rāyā puruspṛhā ||
8.046.06a tam indraṁ dānam īmahe śavasānam abhīrvam |
8.046.06c īśānaṁ rāya īmahe ||
8.046.07a tasmin hi santy ūtayo viśvā abhīravaḥ sacā |
8.046.07c tam ā vahantu saptayaḥ purūvasum madāya harayaḥ sutam ||
8.046.08a yas te mado vareṇyo ya indra vṛtrahantamaḥ |
8.046.08c ya ādadiḥ svar nṛbhir yaḥ pṛtanāsu duṣṭaraḥ ||
8.046.09a yo duṣṭaro viśvavāra śravāyyo vājeṣv asti tarutā |
8.046.09c sa naḥ śaviṣṭha savanā vaso gahi gamema gomati vraje ||
8.046.10a gavyo ṣu ṇo yathā purāśvayota rathayā |
8.046.10c varivasya mahāmaha ||
8.046.11a nahi te śūra rādhaso 'ntaṁ vindāmi satrā |
8.046.11c daśasyā no maghavan nū cid adrivo dhiyo vājebhir āvitha ||
8.046.12a ya ṛṣvaḥ śrāvayatsakhā viśvet sa veda janimā puruṣṭutaḥ |
8.046.12c taṁ viśve mānuṣā yugendraṁ havante taviṣaṁ yatasrucaḥ ||
8.046.13a sa no vājeṣv avitā purūvasuḥ puraḥsthātā maghavā vṛtrahā bhuvat ||
8.046.14a abhi vo vīram andhaso madeṣu gāya girā mahā vicetasam |
8.046.14c indraṁ nāma śrutyaṁ śākinaṁ vaco yathā ||
8.046.15a dadī rekṇas tanve dadir vasu dadir vājeṣu puruhūta vājinam |
8.046.15c nūnam atha ||
8.046.16a viśveṣām irajyantaṁ vasūnāṁ sāsahvāṁsaṁ cid asya varpasaḥ |
8.046.16c kṛpayato nūnam aty atha ||
8.046.17a mahaḥ su vo aram iṣe stavāmahe mīḻhuṣe araṁgamāya jagmaye |
8.046.17c yajñebhir gīrbhir viśvamanuṣām marutām iyakṣasi gāye tvā namasā girā ||
8.046.18a ye pātayante ajmabhir girīṇāṁ snubhir eṣām |
8.046.18c yajñam mahiṣvaṇīnāṁ sumnaṁ tuviṣvaṇīnām prādhvare ||
8.046.19a prabhaṅgaṁ durmatīnām indra śaviṣṭhā bhara |
8.046.19c rayim asmabhyaṁ yujyaṁ codayanmate jyeṣṭhaṁ codayanmate ||
8.046.20a sanitaḥ susanitar ugra citra cetiṣṭha sūnṛta |
8.046.20c prāsahā samrāṭ sahuriṁ sahantam bhujyuṁ vājeṣu pūrvyam ||
8.046.21a ā sa etu ya īvad ām̐ adevaḥ pūrtam ādade |
8.046.21c yathā cid vaśo aśvyaḥ pṛthuśravasi kānīte 'syā vyuṣy ādade ||
8.046.22a ṣaṣṭiṁ sahasrāśvyasyāyutāsanam uṣṭrānāṁ viṁśatiṁ śatā |
8.046.22c daśa śyāvīnāṁ śatā daśa tryaruṣīṇāṁ daśa gavāṁ sahasrā ||
8.046.23a daśa śyāvā ṛdhadrayo vītavārāsa āśavaḥ |
8.046.23c mathrā nemiṁ ni vāvṛtuḥ ||
8.046.24a dānāsaḥ pṛthuśravasaḥ kānītasya surādhasaḥ |
8.046.24c rathaṁ hiraṇyayaṁ dadan maṁhiṣṭhaḥ sūrir abhūd varṣiṣṭham akṛta śravaḥ ||
8.046.25a ā no vāyo mahe tane yāhi makhāya pājase |
8.046.25c vayaṁ hi te cakṛmā bhūri dāvane sadyaś cin mahi dāvane ||
8.046.26a yo aśvebhir vahate vasta usrās triḥ sapta saptatīnām |
8.046.26c ebhiḥ somebhiḥ somasudbhiḥ somapā dānāya śukrapūtapāḥ ||
8.046.27a yo ma imaṁ cid u tmanāmandac citraṁ dāvane |
8.046.27c araṭve akṣe nahuṣe sukṛtvani sukṛttarāya sukratuḥ ||
8.046.28a ucathye vapuṣi yaḥ svarāḻ uta vāyo ghṛtasnāḥ |
8.046.28c aśveṣitaṁ rajeṣitaṁ śuneṣitam prājma tad idaṁ nu tat ||
8.046.29a adha priyam iṣirāya ṣaṣṭiṁ sahasrāsanam |
8.046.29c aśvānām in na vṛṣṇām ||
8.046.30a gāvo na yūtham upa yanti vadhraya upa mā yanti vadhrayaḥ ||
8.046.31a adha yac cārathe gaṇe śatam uṣṭrām̐ acikradat |
8.046.31c adha śvitneṣu viṁśatiṁ śatā ||
8.046.32a śataṁ dāse balbūthe vipras tarukṣa ā dade |
8.046.32c te te vāyav ime janā madantīndragopā madanti devagopāḥ ||
8.046.33a adha syā yoṣaṇā mahī pratīcī vaśam aśvyam |
8.046.33c adhirukmā vi nīyate ||

8.047.01a mahi vo mahatām avo varuṇa mitra dāśuṣe |
8.047.01c yam ādityā abhi druho rakṣathā nem aghaṁ naśad anehaso va ūtayaḥ suūtayo va ūtayaḥ ||
8.047.02a vidā devā aghānām ādityāso apākṛtim |
8.047.02c pakṣā vayo yathopari vy asme śarma yacchatānehaso va ūtayaḥ suūtayo va ūtayaḥ ||
8.047.03a vy asme adhi śarma tat pakṣā vayo na yantana |
8.047.03c viśvāni viśvavedaso varūthyā manāmahe 'nehaso va ūtayaḥ suūtayo va ūtayaḥ ||
8.047.04a yasmā arāsata kṣayaṁ jīvātuṁ ca pracetasaḥ |
8.047.04c manor viśvasya ghed ima ādityā rāya īśate 'nehaso va ūtayaḥ suūtayo va ūtayaḥ ||
8.047.05a pari ṇo vṛṇajann aghā durgāṇi rathyo yathā |
8.047.05c syāmed indrasya śarmaṇy ādityānām utāvasy anehaso va ūtayaḥ suūtayo va ūtayaḥ ||
8.047.06a parihvṛted anā jano yuṣmādattasya vāyati |
8.047.06c devā adabhram āśa vo yam ādityā ahetanānehaso va ūtayaḥ suūtayo va ūtayaḥ ||
8.047.07a na taṁ tigmaṁ cana tyajo na drāsad abhi taṁ guru |
8.047.07c yasmā u śarma sapratha ādityāso arādhvam anehaso va ūtayaḥ suūtayo va ūtayaḥ ||
8.047.08a yuṣme devā api ṣmasi yudhyanta iva varmasu |
8.047.08c yūyam maho na enaso yūyam arbhād uruṣyatānehaso va ūtayaḥ suūtayo va ūtayaḥ ||
8.047.09a aditir na uruṣyatv aditiḥ śarma yacchatu |
8.047.09c mātā mitrasya revato 'ryamṇo varuṇasya cānehaso va ūtayaḥ suūtayo va ūtayaḥ ||
8.047.10a yad devāḥ śarma śaraṇaṁ yad bhadraṁ yad anāturam |
8.047.10c tridhātu yad varūthyaṁ tad asmāsu vi yantanānehaso va ūtayaḥ suūtayo va ūtayaḥ ||
8.047.11a ādityā ava hi khyatādhi kūlād iva spaśaḥ |
8.047.11c sutīrtham arvato yathānu no neṣathā sugam anehaso va ūtayaḥ suūtayo va ūtayaḥ ||
8.047.12a neha bhadraṁ rakṣasvine nāvayai nopayā uta |
8.047.12c gave ca bhadraṁ dhenave vīrāya ca śravasyate 'nehaso va ūtayaḥ suūtayo va ūtayaḥ ||
8.047.13a yad āvir yad apīcyaṁ devāso asti duṣkṛtam |
8.047.13c trite tad viśvam āptya āre asmad dadhātanānehaso va ūtayaḥ suūtayo va ūtayaḥ ||
8.047.14a yac ca goṣu duṣṣvapnyaṁ yac cāsme duhitar divaḥ |
8.047.14c tritāya tad vibhāvary āptyāya parā vahānehaso va ūtayaḥ suūtayo va ūtayaḥ ||
8.047.15a niṣkaṁ vā ghā kṛṇavate srajaṁ vā duhitar divaḥ |
8.047.15c trite duṣṣvapnyaṁ sarvam āptye pari dadmasy anehaso va ūtayaḥ suūtayo va ūtayaḥ ||
8.047.16a tadannāya tadapase tam bhāgam upaseduṣe |
8.047.16c tritāya ca dvitāya coṣo duṣṣvapnyaṁ vahānehaso va ūtayaḥ suūtayo va ūtayaḥ ||
8.047.17a yathā kalāṁ yathā śaphaṁ yatha ṛṇaṁ saṁnayāmasi |
8.047.17c evā duṣṣvapnyaṁ sarvam āptye saṁ nayāmasy anehaso va ūtayaḥ suūtayo va ūtayaḥ ||
8.047.18a ajaiṣmādyāsanāma cābhūmānāgaso vayam |
8.047.18c uṣo yasmād duṣṣvapnyād abhaiṣmāpa tad ucchatv anehaso va ūtayaḥ suūtayo va ūtayaḥ ||

8.048.01a svādor abhakṣi vayasaḥ sumedhāḥ svādhyo varivovittarasya |
8.048.01c viśve yaṁ devā uta martyāso madhu bruvanto abhi saṁcaranti ||
8.048.02a antaś ca prāgā aditir bhavāsy avayātā haraso daivyasya |
8.048.02c indav indrasya sakhyaṁ juṣāṇaḥ śrauṣṭīva dhuram anu rāya ṛdhyāḥ ||
8.048.03a apāma somam amṛtā abhūmāganma jyotir avidāma devān |
8.048.03c kiṁ nūnam asmān kṛṇavad arātiḥ kim u dhūrtir amṛta martyasya ||
8.048.04a śaṁ no bhava hṛda ā pīta indo piteva soma sūnave suśevaḥ |
8.048.04c sakheva sakhya uruśaṁsa dhīraḥ pra ṇa āyur jīvase soma tārīḥ ||
8.048.05a ime mā pītā yaśasa uruṣyavo rathaṁ na gāvaḥ sam anāha parvasu |
8.048.05c te mā rakṣantu visrasaś caritrād uta mā srāmād yavayantv indavaḥ ||
8.048.06a agniṁ na mā mathitaṁ saṁ didīpaḥ pra cakṣaya kṛṇuhi vasyaso naḥ |
8.048.06c athā hi te mada ā soma manye revām̐ iva pra carā puṣṭim accha ||
8.048.07a iṣireṇa te manasā sutasya bhakṣīmahi pitryasyeva rāyaḥ |
8.048.07c soma rājan pra ṇa āyūṁṣi tārīr ahānīva sūryo vāsarāṇi ||
8.048.08a soma rājan mṛḻayā naḥ svasti tava smasi vratyās tasya viddhi |
8.048.08c alarti dakṣa uta manyur indo mā no aryo anukāmam parā dāḥ ||
8.048.09a tvaṁ hi nas tanvaḥ soma gopā gātre-gātre niṣasatthā nṛcakṣāḥ |
8.048.09c yat te vayam pramināma vratāni sa no mṛḻa suṣakhā deva vasyaḥ ||
8.048.10a ṛdūdareṇa sakhyā saceya yo mā na riṣyed dharyaśva pītaḥ |
8.048.10c ayaṁ yaḥ somo ny adhāyy asme tasmā indram pratiram emy āyuḥ ||
8.048.11a apa tyā asthur anirā amīvā nir atrasan tamiṣīcīr abhaiṣuḥ |
8.048.11c ā somo asmām̐ aruhad vihāyā aganma yatra pratiranta āyuḥ ||
8.048.12a yo na induḥ pitaro hṛtsu pīto 'martyo martyām̐ āviveśa |
8.048.12c tasmai somāya haviṣā vidhema mṛḻīke asya sumatau syāma ||
8.048.13a tvaṁ soma pitṛbhiḥ saṁvidāno 'nu dyāvāpṛthivī ā tatantha |
8.048.13c tasmai ta indo haviṣā vidhema vayaṁ syāma patayo rayīṇām ||
8.048.14a trātāro devā adhi vocatā no mā no nidrā īśata mota jalpiḥ |
8.048.14c vayaṁ somasya viśvaha priyāsaḥ suvīrāso vidatham ā vadema ||
8.048.15a tvaṁ naḥ soma viśvato vayodhās tvaṁ svarvid ā viśā nṛcakṣāḥ |
8.048.15c tvaṁ na inda ūtibhiḥ sajoṣāḥ pāhi paścātād uta vā purastāt ||

8.049.01a abhi pra vaḥ surādhasam indram arca yathā vide |
8.049.01c yo jaritṛbhyo maghavā purūvasuḥ sahasreṇeva śikṣati ||
8.049.02a śatānīkeva pra jigāti dhṛṣṇuyā hanti vṛtrāṇi dāśuṣe |
8.049.02c girer iva pra rasā asya pinvire datrāṇi purubhojasaḥ ||
8.049.03a ā tvā sutāsa indavo madā ya indra girvaṇaḥ |
8.049.03c āpo na vajrinn anv okyaṁ saraḥ pṛṇanti śūra rādhase ||
8.049.04a anehasam prataraṇaṁ vivakṣaṇam madhvaḥ svādiṣṭham īm piba |
8.049.04c ā yathā mandasānaḥ kirāsi naḥ pra kṣudreva tmanā dhṛṣat ||
8.049.05a ā naḥ stomam upa dravad dhiyāno aśvo na sotṛbhiḥ |
8.049.05c yaṁ te svadhāvan svadayanti dhenava indra kaṇveṣu rātayaḥ ||
8.049.06a ugraṁ na vīraṁ namasopa sedima vibhūtim akṣitāvasum |
8.049.06c udrīva vajrinn avato na siñcate kṣarantīndra dhītayaḥ ||
8.049.07a yad dha nūnaṁ yad vā yajñe yad vā pṛthivyām adhi |
8.049.07c ato no yajñam āśubhir mahemata ugra ugrebhir ā gahi ||
8.049.08a ajirāso harayo ye ta āśavo vātā iva prasakṣiṇaḥ |
8.049.08c yebhir apatyam manuṣaḥ parīyase yebhir viśvaṁ svar dṛśe ||
8.049.09a etāvatas ta īmaha indra sumnasya gomataḥ |
8.049.09c yathā prāvo maghavan medhyātithiṁ yathā nīpātithiṁ dhane ||
8.049.10a yathā kaṇve maghavan trasadasyavi yathā pakthe daśavraje |
8.049.10c yathā gośarye asanor ṛjiśvanīndra gomad dhiraṇyavat ||

8.050.01a pra su śrutaṁ surādhasam arcā śakram abhiṣṭaye |
8.050.01c yaḥ sunvate stuvate kāmyaṁ vasu sahasreṇeva maṁhate ||
8.050.02a śatānīkā hetayo asya duṣṭarā indrasya samiṣo mahīḥ |
8.050.02c girir na bhujmā maghavatsu pinvate yad īṁ sutā amandiṣuḥ ||
8.050.03a yad īṁ sutāsa indavo 'bhi priyam amandiṣuḥ |
8.050.03c āpo na dhāyi savanam ma ā vaso dughā ivopa dāśuṣe ||
8.050.04a anehasaṁ vo havamānam ūtaye madhvaḥ kṣaranti dhītayaḥ |
8.050.04c ā tvā vaso havamānāsa indava upa stotreṣu dadhire ||
8.050.05a ā naḥ some svadhvara iyāno atyo na tośate |
8.050.05c yaṁ te svadāvan svadanti gūrtayaḥ paure chandayase havam ||
8.050.06a pra vīram ugraṁ viviciṁ dhanaspṛtaṁ vibhūtiṁ rādhaso mahaḥ |
8.050.06c udrīva vajrinn avato vasutvanā sadā pīpetha dāśuṣe ||
8.050.07a yad dha nūnam parāvati yad vā pṛthivyāṁ divi |
8.050.07c yujāna indra haribhir mahemata ṛṣva ṛṣvebhir ā gahi ||
8.050.08a rathirāso harayo ye te asridha ojo vātasya piprati |
8.050.08c yebhir ni dasyum manuṣo nighoṣayo yebhiḥ svaḥ parīyase ||
8.050.09a etāvatas te vaso vidyāma śūra navyasaḥ |
8.050.09c yathā prāva etaśaṁ kṛtvye dhane yathā vaśaṁ daśavraje ||
8.050.10a yathā kaṇve maghavan medhe adhvare dīrghanīthe damūnasi |
8.050.10c yathā gośarye asiṣāso adrivo mayi gotraṁ hariśriyam ||

8.051.01a yathā manau sāṁvaraṇau somam indrāpibaḥ sutam |
8.051.01c nīpātithau maghavan medhyātithau puṣṭigau śruṣṭigau sacā ||
8.051.02a pārṣadvāṇaḥ praskaṇvaṁ sam asādayac chayānaṁ jivrim uddhitam |
8.051.02c sahasrāṇy asiṣāsad gavām ṛṣis tvoto dasyave vṛkaḥ ||
8.051.03a ya ukthebhir na vindhate cikid ya ṛṣicodanaḥ |
8.051.03c indraṁ tam acchā vada navyasyā maty ariṣyantaṁ na bhojase ||
8.051.04a yasmā arkaṁ saptaśīrṣāṇam ānṛcus tridhātum uttame pade |
8.051.04c sa tv imā viśvā bhuvanāni cikradad ād ij janiṣṭa pauṁsyam ||
8.051.05a yo no dātā vasūnām indraṁ taṁ hūmahe vayam |
8.051.05c vidmā hy asya sumatiṁ navīyasīṁ gamema gomati vraje ||
8.051.06a yasmai tvaṁ vaso dānāya śikṣasi sa rāyas poṣam aśnute |
8.051.06c taṁ tvā vayam maghavann indra girvaṇaḥ sutāvanto havāmahe ||
8.051.07a kadā cana starīr asi nendra saścasi dāśuṣe |
8.051.07c upopen nu maghavan bhūya in nu te dānaṁ devasya pṛcyate ||
8.051.08a pra yo nanakṣe abhy ojasā kriviṁ vadhaiḥ śuṣṇaṁ nighoṣayan |
8.051.08c yaded astambhīt prathayann amūṁ divam ād ij janiṣṭa pārthivaḥ ||
8.051.09a yasyāyaṁ viśva āryo dāsaḥ śevadhipā ariḥ |
8.051.09c tiraś cid arye ruśame parīravi tubhyet so ajyate rayiḥ ||
8.051.10a turaṇyavo madhumantaṁ ghṛtaścutaṁ viprāso arkam ānṛcuḥ |
8.051.10c asme rayiḥ paprathe vṛṣṇyaṁ śavo 'sme suvānāsa indavaḥ ||

8.052.01a yathā manau vivasvati somaṁ śakrāpibaḥ sutam |
8.052.01c yathā trite chanda indra jujoṣasy āyau mādayase sacā ||
8.052.02a pṛṣadhre medhye mātariśvanīndra suvāne amandathāḥ |
8.052.02c yathā somaṁ daśaśipre daśoṇye syūmaraśmāv ṛjūnasi ||
8.052.03a ya ukthā kevalā dadhe yaḥ somaṁ dhṛṣitāpibat |
8.052.03c yasmai viṣṇus trīṇi padā vicakrama upa mitrasya dharmabhiḥ ||
8.052.04a yasya tvam indra stomeṣu cākano vāje vājiñ chatakrato |
8.052.04c taṁ tvā vayaṁ sudughām iva goduho juhūmasi śravasyavaḥ ||
8.052.05a yo no dātā sa naḥ pitā mahām̐ ugra īśānakṛt |
8.052.05c ayāmann ugro maghavā purūvasur gor aśvasya pra dātu naḥ ||
8.052.06a yasmai tvaṁ vaso dānāya maṁhase sa rāyas poṣam invati |
8.052.06c vasūyavo vasupatiṁ śatakratuṁ stomair indraṁ havāmahe ||
8.052.07a kadā cana pra yucchasy ubhe ni pāsi janmanī |
8.052.07c turīyāditya havanaṁ ta indriyam ā tasthāv amṛtaṁ divi ||
8.052.08a yasmai tvam maghavann indra girvaṇaḥ śikṣo śikṣasi dāśuṣe |
8.052.08c asmākaṁ gira uta suṣṭutiṁ vaso kaṇvavac chṛṇudhī havam ||
8.052.09a astāvi manma pūrvyam brahmendrāya vocata |
8.052.09c pūrvīr ṛtasya bṛhatīr anūṣata stotur medhā asṛkṣata ||
8.052.10a sam indro rāyo bṛhatīr adhūnuta saṁ kṣoṇī sam u sūryam |
8.052.10c saṁ śukrāsaḥ śucayaḥ saṁ gavāśiraḥ somā indram amandiṣuḥ ||

8.053.01a upamaṁ tvā maghonāṁ jyeṣṭhaṁ ca vṛṣabhāṇām |
8.053.01c pūrbhittamam maghavann indra govidam īśānaṁ rāya īmahe ||
8.053.02a ya āyuṁ kutsam atithigvam ardayo vāvṛdhāno dive-dive |
8.053.02c taṁ tvā vayaṁ haryaśvaṁ śatakratuṁ vājayanto havāmahe ||
8.053.03a ā no viśveṣāṁ rasam madhvaḥ siñcantv adrayaḥ |
8.053.03c ye parāvati sunvire janeṣv ā ye arvāvatīndavaḥ ||
8.053.04a viśvā dveṣāṁsi jahi cāva cā kṛdhi viśve sanvantv ā vasu |
8.053.04c śīṣṭeṣu cit te madirāso aṁśavo yatrā somasya tṛmpasi ||
8.053.05a indra nedīya ed ihi mitamedhābhir ūtibhiḥ |
8.053.05c ā śaṁtama śaṁtamābhir abhiṣṭibhir ā svāpe svāpibhiḥ ||
8.053.06a ājituraṁ satpatiṁ viśvacarṣaṇiṁ kṛdhi prajāsv ābhagam |
8.053.06c pra sū tirā śacībhir ye ta ukthinaḥ kratum punata ānuṣak ||
8.053.07a yas te sādhiṣṭho 'vase te syāma bhareṣu te |
8.053.07c vayaṁ hotrābhir uta devahūtibhiḥ sasavāṁso manāmahe ||
8.053.08a ahaṁ hi te harivo brahma vājayur ājiṁ yāmi sadotibhiḥ |
8.053.08c tvām id eva tam ame sam aśvayur gavyur agre mathīnām ||

8.054.01a etat ta indra vīryaṁ gīrbhir gṛṇanti kāravaḥ |
8.054.01c te stobhanta ūrjam āvan ghṛtaścutam paurāso nakṣan dhītibhiḥ ||
8.054.02a nakṣanta indram avase sukṛtyayā yeṣāṁ suteṣu mandase |
8.054.02c yathā saṁvarte amado yathā kṛśa evāsme indra matsva ||
8.054.03a ā no viśve sajoṣaso devāso gantanopa naḥ |
8.054.03c vasavo rudrā avase na ā gamañ chṛṇvantu maruto havam ||
8.054.04a pūṣā viṣṇur havanam me sarasvaty avantu sapta sindhavaḥ |
8.054.04c āpo vātaḥ parvatāso vanaspatiḥ śṛṇotu pṛthivī havam ||
8.054.05a yad indra rādho asti te māghonam maghavattama |
8.054.05c tena no bodhi sadhamādyo vṛdhe bhago dānāya vṛtrahan ||
8.054.06a ājipate nṛpate tvam id dhi no vāja ā vakṣi sukrato |
8.054.06c vītī hotrābhir uta devavītibhiḥ sasavāṁso vi śṛṇvire ||
8.054.07a santi hy arya āśiṣa indra āyur janānām |
8.054.07c asmān nakṣasva maghavann upāvase dhukṣasva pipyuṣīm iṣam ||
8.054.08a vayaṁ ta indra stomebhir vidhema tvam asmākaṁ śatakrato |
8.054.08c mahi sthūraṁ śaśayaṁ rādho ahrayam praskaṇvāya ni tośaya ||

8.055.01a bhūrīd indrasya vīryaṁ vy akhyam abhy āyati |
8.055.01c rādhas te dasyave vṛka ||
8.055.02a śataṁ śvetāsa ukṣaṇo divi tāro na rocante |
8.055.02c mahnā divaṁ na tastabhuḥ ||
8.055.03a śataṁ veṇūñ chataṁ śunaḥ śataṁ carmāṇi mlātāni |
8.055.03c śatam me balbajastukā aruṣīṇāṁ catuḥśatam ||
8.055.04a sudevāḥ stha kāṇvāyanā vayo-vayo vicarantaḥ |
8.055.04c aśvāso na caṅkramata ||
8.055.05a ād it sāptasya carkirann ānūnasya mahi śravaḥ |
8.055.05c śyāvīr atidhvasan pathaś cakṣuṣā cana saṁnaśe ||

8.056.01a prati te dasyave vṛka rādho adarśy ahrayam |
8.056.01c dyaur na prathinā śavaḥ ||
8.056.02a daśa mahyam pautakrataḥ sahasrā dasyave vṛkaḥ |
8.056.02c nityād rāyo amaṁhata ||
8.056.03a śatam me gardabhānāṁ śatam ūrṇāvatīnām |
8.056.03c śataṁ dāsām̐ ati srajaḥ ||
8.056.04a tatro api prāṇīyata pūtakratāyai vyaktā |
8.056.04c aśvānām in na yūthyām ||
8.056.05a acety agniś cikitur havyavāṭ sa sumadrathaḥ |
8.056.05c agniḥ śukreṇa śociṣā bṛhat sūro arocata divi sūryo arocata ||

8.057.01a yuvaṁ devā kratunā pūrvyeṇa yuktā rathena taviṣaṁ yajatrā |
8.057.01c āgacchataṁ nāsatyā śacībhir idaṁ tṛtīyaṁ savanam pibāthaḥ ||
8.057.02a yuvāṁ devās traya ekādaśāsaḥ satyāḥ satyasya dadṛśe purastāt |
8.057.02c asmākaṁ yajñaṁ savanaṁ juṣāṇā pātaṁ somam aśvinā dīdyagnī ||
8.057.03a panāyyaṁ tad aśvinā kṛtaṁ vāṁ vṛṣabho divo rajasaḥ pṛthivyāḥ |
8.057.03c sahasraṁ śaṁsā uta ye gaviṣṭau sarvām̐ it tām̐ upa yātā pibadhyai ||
8.057.04a ayaṁ vām bhāgo nihito yajatremā giro nāsatyopa yātam |
8.057.04c pibataṁ somam madhumantam asme pra dāśvāṁsam avataṁ śacībhiḥ ||

8.058.01a yam ṛtvijo bahudhā kalpayantaḥ sacetaso yajñam imaṁ vahanti |
8.058.01c yo anūcāno brāhmaṇo yukta āsīt kā svit tatra yajamānasya saṁvit ||
8.058.02a eka evāgnir bahudhā samiddha ekaḥ sūryo viśvam anu prabhūtaḥ |
8.058.02c ekaivoṣāḥ sarvam idaṁ vi bhāty ekaṁ vā idaṁ vi babhūva sarvam ||
8.058.03a jyotiṣmantaṁ ketumantaṁ tricakraṁ sukhaṁ rathaṁ suṣadam bhūrivāram |
8.058.03c citrāmaghā yasya yoge 'dhijajñe taṁ vāṁ huve ati riktam pibadhyai ||

8.059.01a imāni vām bhāgadheyāni sisrata indrāvaruṇā pra mahe suteṣu vām |
8.059.01c yajñe-yajñe ha savanā bhuraṇyatho yat sunvate yajamānāya śikṣathaḥ ||
8.059.02a niṣṣidhvarīr oṣadhīr āpa āstām indrāvaruṇā mahimānam āśata |
8.059.02c yā sisratū rajasaḥ pāre adhvano yayoḥ śatrur nakir ādeva ohate ||
8.059.03a satyaṁ tad indrāvaruṇā kṛśasya vām madhva ūrmiṁ duhate sapta vāṇīḥ |
8.059.03c tābhir dāśvāṁsam avataṁ śubhas patī yo vām adabdho abhi pāti cittibhiḥ ||
8.059.04a ghṛtapruṣaḥ saumyā jīradānavaḥ sapta svasāraḥ sadana ṛtasya |
8.059.04c yā ha vām indrāvaruṇā ghṛtaścutas tābhir dhattaṁ yajamānāya śikṣatam ||
8.059.05a avocāma mahate saubhagāya satyaṁ tveṣābhyām mahimānam indriyam |
8.059.05c asmān sv indrāvaruṇā ghṛtaścutas tribhiḥ sāptebhir avataṁ śubhas patī ||
8.059.06a indrāvaruṇā yad ṛṣibhyo manīṣāṁ vāco matiṁ śrutam adattam agre |
8.059.06c yāni sthānāny asṛjanta dhīrā yajñaṁ tanvānās tapasābhy apaśyam ||
8.059.07a indrāvaruṇā saumanasam adṛptaṁ rāyas poṣaṁ yajamāneṣu dhattam |
8.059.07c prajām puṣṭim bhūtim asmāsu dhattaṁ dīrghāyutvāya pra tirataṁ na āyuḥ ||

8.060.01a agna ā yāhy agnibhir hotāraṁ tvā vṛṇīmahe |
8.060.01c ā tvām anaktu prayatā haviṣmatī yajiṣṭham barhir āsade ||
8.060.02a acchā hi tvā sahasaḥ sūno aṅgiraḥ srucaś caranty adhvare |
8.060.02c ūrjo napātaṁ ghṛtakeśam īmahe 'gniṁ yajñeṣu pūrvyam ||
8.060.03a agne kavir vedhā asi hotā pāvaka yakṣyaḥ |
8.060.03c mandro yajiṣṭho adhvareṣv īḍyo viprebhiḥ śukra manmabhiḥ ||
8.060.04a adrogham ā vahośato yaviṣṭhya devām̐ ajasra vītaye |
8.060.04c abhi prayāṁsi sudhitā vaso gahi mandasva dhītibhir hitaḥ ||
8.060.05a tvam it saprathā asy agne trātar ṛtas kaviḥ |
8.060.05c tvāṁ viprāsaḥ samidhāna dīdiva ā vivāsanti vedhasaḥ ||
8.060.06a śocā śociṣṭha dīdihi viśe mayo rāsva stotre mahām̐ asi |
8.060.06c devānāṁ śarman mama santu sūrayaḥ śatrūṣāhaḥ svagnayaḥ ||
8.060.07a yathā cid vṛddham atasam agne saṁjūrvasi kṣami |
8.060.07c evā daha mitramaho yo asmadhrug durmanmā kaś ca venati ||
8.060.08a mā no martāya ripave rakṣasvine māghaśaṁsāya rīradhaḥ |
8.060.08c asredhadbhis taraṇibhir yaviṣṭhya śivebhiḥ pāhi pāyubhiḥ ||
8.060.09a pāhi no agna ekayā pāhy uta dvitīyayā |
8.060.09c pāhi gīrbhis tisṛbhir ūrjām pate pāhi catasṛbhir vaso ||
8.060.10a pāhi viśvasmād rakṣaso arāvṇaḥ pra sma vājeṣu no 'va |
8.060.10c tvām id dhi nediṣṭhaṁ devatātaya āpiṁ nakṣāmahe vṛdhe ||
8.060.11a ā no agne vayovṛdhaṁ rayim pāvaka śaṁsyam |
8.060.11c rāsvā ca na upamāte puruspṛhaṁ sunītī svayaśastaram ||
8.060.12a yena vaṁsāma pṛtanāsu śardhatas taranto arya ādiśaḥ |
8.060.12c sa tvaṁ no vardha prayasā śacīvaso jinvā dhiyo vasuvidaḥ ||
8.060.13a śiśāno vṛṣabho yathāgniḥ śṛṅge davidhvat |
8.060.13c tigmā asya hanavo na pratidhṛṣe sujambhaḥ sahaso yahuḥ ||
8.060.14a nahi te agne vṛṣabha pratidhṛṣe jambhāso yad vitiṣṭhase |
8.060.14c sa tvaṁ no hotaḥ suhutaṁ haviṣ kṛdhi vaṁsvā no vāryā puru ||
8.060.15a śeṣe vaneṣu mātroḥ saṁ tvā martāsa indhate |
8.060.15c atandro havyā vahasi haviṣkṛta ād id deveṣu rājasi ||
8.060.16a sapta hotāras tam id īḻate tvāgne sutyajam ahrayam |
8.060.16c bhinatsy adriṁ tapasā vi śociṣā prāgne tiṣṭha janām̐ ati ||
8.060.17a agnim-agniṁ vo adhriguṁ huvema vṛktabarhiṣaḥ |
8.060.17c agniṁ hitaprayasaḥ śaśvatīṣv ā hotāraṁ carṣaṇīnām ||
8.060.18a ketena śarman sacate suṣāmaṇy agne tubhyaṁ cikitvanā |
8.060.18c iṣaṇyayā naḥ pururūpam ā bhara vājaṁ nediṣṭham ūtaye ||
8.060.19a agne jaritar viśpatis tepāno deva rakṣasaḥ |
8.060.19c aproṣivān gṛhapatir mahām̐ asi divas pāyur duroṇayuḥ ||
8.060.20a mā no rakṣa ā veśīd āghṛṇīvaso mā yātur yātumāvatām |
8.060.20c parogavyūty anirām apa kṣudham agne sedha rakṣasvinaḥ ||

8.061.01a ubhayaṁ śṛṇavac ca na indro arvāg idaṁ vacaḥ |
8.061.01c satrācyā maghavā somapītaye dhiyā śaviṣṭha ā gamat ||
8.061.02a taṁ hi svarājaṁ vṛṣabhaṁ tam ojase dhiṣaṇe niṣṭatakṣatuḥ |
8.061.02c utopamānām prathamo ni ṣīdasi somakāmaṁ hi te manaḥ ||
8.061.03a ā vṛṣasva purūvaso sutasyendrāndhasaḥ |
8.061.03c vidmā hi tvā harivaḥ pṛtsu sāsahim adhṛṣṭaṁ cid dadhṛṣvaṇim ||
8.061.04a aprāmisatya maghavan tathed asad indra kratvā yathā vaśaḥ |
8.061.04c sanema vājaṁ tava śiprinn avasā makṣū cid yanto adrivaḥ ||
8.061.05a śagdhy ū ṣu śacīpata indra viśvābhir ūtibhiḥ |
8.061.05c bhagaṁ na hi tvā yaśasaṁ vasuvidam anu śūra carāmasi ||
8.061.06a pauro aśvasya purukṛd gavām asy utso deva hiraṇyayaḥ |
8.061.06c nakir hi dānam parimardhiṣat tve yad-yad yāmi tad ā bhara ||
8.061.07a tvaṁ hy ehi cerave vidā bhagaṁ vasuttaye |
8.061.07c ud vāvṛṣasva maghavan gaviṣṭaya ud indrāśvamiṣṭaye ||
8.061.08a tvam purū sahasrāṇi śatāni ca yūthā dānāya maṁhase |
8.061.08c ā puraṁdaraṁ cakṛma vipravacasa indraṁ gāyanto 'vase ||
8.061.09a avipro vā yad avidhad vipro vendra te vacaḥ |
8.061.09c sa pra mamandat tvāyā śatakrato prācāmanyo ahaṁsana ||
8.061.10a ugrabāhur mrakṣakṛtvā puraṁdaro yadi me śṛṇavad dhavam |
8.061.10c vasūyavo vasupatiṁ śatakratuṁ stomair indraṁ havāmahe ||
8.061.11a na pāpāso manāmahe nārāyāso na jaḻhavaḥ |
8.061.11c yad in nv indraṁ vṛṣaṇaṁ sacā sute sakhāyaṁ kṛṇavāmahai ||
8.061.12a ugraṁ yuyujma pṛtanāsu sāsahim ṛṇakātim adābhyam |
8.061.12c vedā bhṛmaṁ cit sanitā rathītamo vājinaṁ yam id ū naśat ||
8.061.13a yata indra bhayāmahe tato no abhayaṁ kṛdhi |
8.061.13c maghavañ chagdhi tava tan na ūtibhir vi dviṣo vi mṛdho jahi ||
8.061.14a tvaṁ hi rādhaspate rādhaso mahaḥ kṣayasyāsi vidhataḥ |
8.061.14c taṁ tvā vayam maghavann indra girvaṇaḥ sutāvanto havāmahe ||
8.061.15a indraḥ spaḻ uta vṛtrahā paraspā no vareṇyaḥ |
8.061.15c sa no rakṣiṣac caramaṁ sa madhyamaṁ sa paścāt pātu naḥ puraḥ ||
8.061.16a tvaṁ naḥ paścād adharād uttarāt pura indra ni pāhi viśvataḥ |
8.061.16c āre asmat kṛṇuhi daivyam bhayam āre hetīr adevīḥ ||
8.061.17a adyādyā śvaḥ-śva indra trāsva pare ca naḥ |
8.061.17c viśvā ca no jaritṝn satpate ahā divā naktaṁ ca rakṣiṣaḥ ||
8.061.18a prabhaṅgī śūro maghavā tuvīmaghaḥ sammiślo viryāya kam |
8.061.18c ubhā te bāhū vṛṣaṇā śatakrato ni yā vajram mimikṣatuḥ ||

8.062.01a pro asmā upastutim bharatā yaj jujoṣati |
8.062.01c ukthair indrasya māhinaṁ vayo vardhanti somino bhadrā indrasya rātayaḥ ||
8.062.02a ayujo asamo nṛbhir ekaḥ kṛṣṭīr ayāsyaḥ |
8.062.02c pūrvīr ati pra vāvṛdhe viśvā jātāny ojasā bhadrā indrasya rātayaḥ ||
8.062.03a ahitena cid arvatā jīradānuḥ siṣāsati |
8.062.03c pravācyam indra tat tava vīryāṇi kariṣyato bhadrā indrasya rātayaḥ ||
8.062.04a ā yāhi kṛṇavāma ta indra brahmāṇi vardhanā |
8.062.04c yebhiḥ śaviṣṭha cākano bhadram iha śravasyate bhadrā indrasya rātayaḥ ||
8.062.05a dhṛṣataś cid dhṛṣan manaḥ kṛṇoṣīndra yat tvam |
8.062.05c tīvraiḥ somaiḥ saparyato namobhiḥ pratibhūṣato bhadrā indrasya rātayaḥ ||
8.062.06a ava caṣṭa ṛcīṣamo 'vatām̐ iva mānuṣaḥ |
8.062.06c juṣṭvī dakṣasya sominaḥ sakhāyaṁ kṛṇute yujam bhadrā indrasya rātayaḥ ||
8.062.07a viśve ta indra vīryaṁ devā anu kratuṁ daduḥ |
8.062.07c bhuvo viśvasya gopatiḥ puruṣṭuta bhadrā indrasya rātayaḥ ||
8.062.08a gṛṇe tad indra te śava upamaṁ devatātaye |
8.062.08c yad dhaṁsi vṛtram ojasā śacīpate bhadrā indrasya rātayaḥ ||
8.062.09a samaneva vapuṣyataḥ kṛṇavan mānuṣā yugā |
8.062.09c vide tad indraś cetanam adha śruto bhadrā indrasya rātayaḥ ||
8.062.10a uj jātam indra te śava ut tvām ut tava kratum |
8.062.10c bhūrigo bhūri vāvṛdhur maghavan tava śarmaṇi bhadrā indrasya rātayaḥ ||
8.062.11a ahaṁ ca tvaṁ ca vṛtrahan saṁ yujyāva sanibhya ā |
8.062.11c arātīvā cid adrivo 'nu nau śūra maṁsate bhadrā indrasya rātayaḥ ||
8.062.12a satyam id vā u taṁ vayam indraṁ stavāma nānṛtam |
8.062.12c mahām̐ asunvato vadho bhūri jyotīṁṣi sunvato bhadrā indrasya rātayaḥ ||

8.063.01a sa pūrvyo mahānāṁ venaḥ kratubhir ānaje |
8.063.01c yasya dvārā manuṣ pitā deveṣu dhiya ānaje ||
8.063.02a divo mānaṁ not sadan somapṛṣṭhāso adrayaḥ |
8.063.02c ukthā brahma ca śaṁsyā ||
8.063.03a sa vidvām̐ aṅgirobhya indro gā avṛṇod apa |
8.063.03c stuṣe tad asya pauṁsyam ||
8.063.04a sa pratnathā kavivṛdha indro vākasya vakṣaṇiḥ |
8.063.04c śivo arkasya homany asmatrā gantv avase ||
8.063.05a ād ū nu te anu kratuṁ svāhā varasya yajyavaḥ |
8.063.05c śvātram arkā anūṣatendra gotrasya dāvane ||
8.063.06a indre viśvāni vīryā kṛtāni kartvāni ca |
8.063.06c yam arkā adhvaraṁ viduḥ ||
8.063.07a yat pāñcajanyayā viśendre ghoṣā asṛkṣata |
8.063.07c astṛṇād barhaṇā vipo 'ryo mānasya sa kṣayaḥ ||
8.063.08a iyam u te anuṣṭutiś cakṛṣe tāni pauṁsyā |
8.063.08c prāvaś cakrasya vartanim ||
8.063.09a asya vṛṣṇo vyodana uru kramiṣṭa jīvase |
8.063.09c yavaṁ na paśva ā dade ||
8.063.10a tad dadhānā avasyavo yuṣmābhir dakṣapitaraḥ |
8.063.10c syāma marutvato vṛdhe ||
8.063.11a baḻ ṛtviyāya dhāmna ṛkvabhiḥ śūra nonumaḥ |
8.063.11c jeṣāmendra tvayā yujā ||
8.063.12a asme rudrā mehanā parvatāso vṛtrahatye bharahūtau sajoṣāḥ |
8.063.12c yaḥ śaṁsate stuvate dhāyi pajra indrajyeṣṭhā asmām̐ avantu devāḥ ||

8.064.01a ut tvā mandantu stomāḥ kṛṇuṣva rādho adrivaḥ |
8.064.01c ava brahmadviṣo jahi ||
8.064.02a padā paṇīm̐r arādhaso ni bādhasva mahām̐ asi |
8.064.02c nahi tvā kaś cana prati ||
8.064.03a tvam īśiṣe sutānām indra tvam asutānām |
8.064.03c tvaṁ rājā janānām ||
8.064.04a ehi prehi kṣayo divy āghoṣañ carṣaṇīnām |
8.064.04c obhe pṛṇāsi rodasī ||
8.064.05a tyaṁ cit parvataṁ giriṁ śatavantaṁ sahasriṇam |
8.064.05c vi stotṛbhyo rurojitha ||
8.064.06a vayam u tvā divā sute vayaṁ naktaṁ havāmahe |
8.064.06c asmākaṁ kāmam ā pṛṇa ||
8.064.07a kva sya vṛṣabho yuvā tuvigrīvo anānataḥ |
8.064.07c brahmā kas taṁ saparyati ||
8.064.08a kasya svit savanaṁ vṛṣā jujuṣvām̐ ava gacchati |
8.064.08c indraṁ ka u svid ā cake ||
8.064.09a kaṁ te dānā asakṣata vṛtrahan kaṁ suvīryā |
8.064.09c ukthe ka u svid antamaḥ ||
8.064.10a ayaṁ te mānuṣe jane somaḥ pūruṣu sūyate |
8.064.10c tasyehi pra dravā piba ||
8.064.11a ayaṁ te śaryaṇāvati suṣomāyām adhi priyaḥ |
8.064.11c ārjīkīye madintamaḥ ||
8.064.12a tam adya rādhase mahe cārum madāya ghṛṣvaye |
8.064.12c ehīm indra dravā piba ||

8.065.01a yad indra prāg apāg udaṅ nyag vā hūyase nṛbhiḥ |
8.065.01c ā yāhi tūyam āśubhiḥ ||
8.065.02a yad vā prasravaṇe divo mādayāse svarṇare |
8.065.02c yad vā samudre andhasaḥ ||
8.065.03a ā tvā gīrbhir mahām uruṁ huve gām iva bhojase |
8.065.03c indra somasya pītaye ||
8.065.04a ā ta indra mahimānaṁ harayo deva te mahaḥ |
8.065.04c rathe vahantu bibhrataḥ ||
8.065.05a indra gṛṇīṣa u stuṣe mahām̐ ugra īśānakṛt |
8.065.05c ehi naḥ sutam piba ||
8.065.06a sutāvantas tvā vayam prayasvanto havāmahe |
8.065.06c idaṁ no barhir āsade ||
8.065.07a yac cid dhi śaśvatām asīndra sādhāraṇas tvam |
8.065.07c taṁ tvā vayaṁ havāmahe ||
8.065.08a idaṁ te somyam madhv adhukṣann adribhir naraḥ |
8.065.08c juṣāṇa indra tat piba ||
8.065.09a viśvām̐ aryo vipaścito 'ti khyas tūyam ā gahi |
8.065.09c asme dhehi śravo bṛhat ||
8.065.10a dātā me pṛṣatīnāṁ rājā hiraṇyavīnām |
8.065.10c mā devā maghavā riṣat ||
8.065.11a sahasre pṛṣatīnām adhi ścandram bṛhat pṛthu |
8.065.11c śukraṁ hiraṇyam ā dade ||
8.065.12a napāto durgahasya me sahasreṇa surādhasaḥ |
8.065.12c śravo deveṣv akrata ||

8.066.01a tarobhir vo vidadvasum indraṁ sabādha ūtaye |
8.066.01c bṛhad gāyantaḥ sutasome adhvare huve bharaṁ na kāriṇam ||
8.066.02a na yaṁ dudhrā varante na sthirā muro made suśipram andhasaḥ |
8.066.02c ya ādṛtyā śaśamānāya sunvate dātā jaritra ukthyam ||
8.066.03a yaḥ śakro mṛkṣo aśvyo yo vā kījo hiraṇyayaḥ |
8.066.03c sa ūrvasya rejayaty apāvṛtim indro gavyasya vṛtrahā ||
8.066.04a nikhātaṁ cid yaḥ purusambhṛtaṁ vasūd id vapati dāśuṣe |
8.066.04c vajrī suśipro haryaśva it karad indraḥ kratvā yathā vaśat ||
8.066.05a yad vāvantha puruṣṭuta purā cic chūra nṛṇām |
8.066.05c vayaṁ tat ta indra sam bharāmasi yajñam ukthaṁ turaṁ vacaḥ ||
8.066.06a sacā someṣu puruhūta vajrivo madāya dyukṣa somapāḥ |
8.066.06c tvam id dhi brahmakṛte kāmyaṁ vasu deṣṭhaḥ sunvate bhuvaḥ ||
8.066.07a vayam enam idā hyo 'pīpemeha vajriṇam |
8.066.07c tasmā u adya samanā sutam bharā nūnam bhūṣata śrute ||
8.066.08a vṛkaś cid asya vāraṇa urāmathir ā vayuneṣu bhūṣati |
8.066.08c semaṁ naḥ stomaṁ jujuṣāṇa ā gahīndra pra citrayā dhiyā ||
8.066.09a kad ū nv asyākṛtam indrasyāsti pauṁsyam |
8.066.09c keno nu kaṁ śromatena na śuśruve januṣaḥ pari vṛtrahā ||
8.066.10a kad ū mahīr adhṛṣṭā asya taviṣīḥ kad u vṛtraghno astṛtam |
8.066.10c indro viśvān bekanāṭām̐ ahardṛśa uta kratvā paṇīm̐r abhi ||
8.066.11a vayaṁ ghā te apūrvyendra brahmāṇi vṛtrahan |
8.066.11c purūtamāsaḥ puruhūta vajrivo bhṛtiṁ na pra bharāmasi ||
8.066.12a pūrvīś cid dhi tve tuvikūrminn āśaso havanta indrotayaḥ |
8.066.12c tiraś cid aryaḥ savanā vaso gahi śaviṣṭha śrudhi me havam ||
8.066.13a vayaṁ ghā te tve id v indra viprā api ṣmasi |
8.066.13c nahi tvad anyaḥ puruhūta kaś cana maghavann asti marḍitā ||
8.066.14a tvaṁ no asyā amater uta kṣudho 'bhiśaster ava spṛdhi |
8.066.14c tvaṁ na ūtī tava citrayā dhiyā śikṣā śaciṣṭha gātuvit ||
8.066.15a soma id vaḥ suto astu kalayo mā bibhītana |
8.066.15c aped eṣa dhvasmāyati svayaṁ ghaiṣo apāyati ||

8.067.01a tyān nu kṣatriyām̐ ava ādityān yāciṣāmahe |
8.067.01c sumṛḻīkām̐ abhiṣṭaye ||
8.067.02a mitro no aty aṁhatiṁ varuṇaḥ parṣad aryamā |
8.067.02c ādityāso yathā viduḥ ||
8.067.03a teṣāṁ hi citram ukthyaṁ varūtham asti dāśuṣe |
8.067.03c ādityānām araṁkṛte ||
8.067.04a mahi vo mahatām avo varuṇa mitrāryaman |
8.067.04c avāṁsy ā vṛṇīmahe ||
8.067.05a jīvān no abhi dhetanādityāsaḥ purā hathāt |
8.067.05c kad dha stha havanaśrutaḥ ||
8.067.06a yad vaḥ śrāntāya sunvate varūtham asti yac chardiḥ |
8.067.06c tenā no adhi vocata ||
8.067.07a asti devā aṁhor urv asti ratnam anāgasaḥ |
8.067.07c ādityā adbhutainasaḥ ||
8.067.08a mā naḥ setuḥ siṣed ayam mahe vṛṇaktu nas pari |
8.067.08c indra id dhi śruto vaśī ||
8.067.09a mā no mṛcā ripūṇāṁ vṛjinānām aviṣyavaḥ |
8.067.09c devā abhi pra mṛkṣata ||
8.067.10a uta tvām adite mahy ahaṁ devy upa bruve |
8.067.10c sumṛḻīkām abhiṣṭaye ||
8.067.11a parṣi dīne gabhīra ām̐ ugraputre jighāṁsataḥ |
8.067.11c mākis tokasya no riṣat ||
8.067.12a aneho na uruvraja urūci vi prasartave |
8.067.12c kṛdhi tokāya jīvase ||
8.067.13a ye mūrdhānaḥ kṣitīnām adabdhāsaḥ svayaśasaḥ |
8.067.13c vratā rakṣante adruhaḥ ||
8.067.14a te na āsno vṛkāṇām ādityāso mumocata |
8.067.14c stenam baddham ivādite ||
8.067.15a apo ṣu ṇa iyaṁ śarur ādityā apa durmatiḥ |
8.067.15c asmad etv ajaghnuṣī ||
8.067.16a śaśvad dhi vaḥ sudānava ādityā ūtibhir vayam |
8.067.16c purā nūnam bubhujmahe ||
8.067.17a śaśvantaṁ hi pracetasaḥ pratiyantaṁ cid enasaḥ |
8.067.17c devāḥ kṛṇutha jīvase ||
8.067.18a tat su no navyaṁ sanyasa ādityā yan mumocati |
8.067.18c bandhād baddham ivādite ||
8.067.19a nāsmākam asti tat tara ādityāso atiṣkade |
8.067.19c yūyam asmabhyam mṛḻata ||
8.067.20a mā no hetir vivasvata ādityāḥ kṛtrimā śaruḥ |
8.067.20c purā nu jaraso vadhīt ||
8.067.21a vi ṣu dveṣo vy aṁhatim ādityāso vi saṁhitam |
8.067.21c viṣvag vi vṛhatā rapaḥ ||

8.068.01a ā tvā rathaṁ yathotaye sumnāya vartayāmasi |
8.068.01c tuvikūrmim ṛtīṣaham indra śaviṣṭha satpate ||
8.068.02a tuviśuṣma tuvikrato śacīvo viśvayā mate |
8.068.02c ā paprātha mahitvanā ||
8.068.03a yasya te mahinā mahaḥ pari jmāyantam īyatuḥ |
8.068.03c hastā vajraṁ hiraṇyayam ||
8.068.04a viśvānarasya vas patim anānatasya śavasaḥ |
8.068.04c evaiś ca carṣaṇīnām ūtī huve rathānām ||
8.068.05a abhiṣṭaye sadāvṛdhaṁ svarmīḻheṣu yaṁ naraḥ |
8.068.05c nānā havanta ūtaye ||
8.068.06a paromātram ṛcīṣamam indram ugraṁ surādhasam |
8.068.06c īśānaṁ cid vasūnām ||
8.068.07a taṁ-tam id rādhase maha indraṁ codāmi pītaye |
8.068.07c yaḥ pūrvyām anuṣṭutim īśe kṛṣṭīnāṁ nṛtuḥ ||
8.068.08a na yasya te śavasāna sakhyam ānaṁśa martyaḥ |
8.068.08c nakiḥ śavāṁsi te naśat ||
8.068.09a tvotāsas tvā yujāpsu sūrye mahad dhanam |
8.068.09c jayema pṛtsu vajrivaḥ ||
8.068.10a taṁ tvā yajñebhir īmahe taṁ gīrbhir girvaṇastama |
8.068.10c indra yathā cid āvitha vājeṣu purumāyyam ||
8.068.11a yasya te svādu sakhyaṁ svādvī praṇītir adrivaḥ |
8.068.11c yajño vitantasāyyaḥ ||
8.068.12a uru ṇas tanve tana uru kṣayāya nas kṛdhi |
8.068.12c uru ṇo yandhi jīvase ||
8.068.13a uruṁ nṛbhya uruṁ gava uruṁ rathāya panthām |
8.068.13c devavītim manāmahe ||
8.068.14a upa mā ṣaḍ dvā-dvā naraḥ somasya harṣyā |
8.068.14c tiṣṭhanti svādurātayaḥ ||
8.068.15a ṛjrāv indrota ā dade harī ṛkṣasya sūnavi |
8.068.15c āśvamedhasya rohitā ||
8.068.16a surathām̐ ātithigve svabhīśūm̐r ārkṣe |
8.068.16c āśvamedhe supeśasaḥ ||
8.068.17a ṣaḻ aśvām̐ ātithigva indrote vadhūmataḥ |
8.068.17c sacā pūtakratau sanam ||
8.068.18a aiṣu cetad vṛṣaṇvaty antar ṛjreṣv aruṣī |
8.068.18c svabhīśuḥ kaśāvatī ||
8.068.19a na yuṣme vājabandhavo ninitsuś cana martyaḥ |
8.068.19c avadyam adhi dīdharat ||

8.069.01a pra-pra vas triṣṭubham iṣam mandadvīrāyendave |
8.069.01c dhiyā vo medhasātaye puraṁdhyā vivāsati ||
8.069.02a nadaṁ va odatīnāṁ nadaṁ yoyuvatīnām |
8.069.02c patiṁ vo aghnyānāṁ dhenūnām iṣudhyasi ||
8.069.03a tā asya sūdadohasaḥ somaṁ śrīṇanti pṛśnayaḥ |
8.069.03c janman devānāṁ viśas triṣv ā rocane divaḥ ||
8.069.04a abhi pra gopatiṁ girendram arca yathā vide |
8.069.04c sūnuṁ satyasya satpatim ||
8.069.05a ā harayaḥ sasṛjrire 'ruṣīr adhi barhiṣi |
8.069.05c yatrābhi saṁnavāmahe ||
8.069.06a indrāya gāva āśiraṁ duduhre vajriṇe madhu |
8.069.06c yat sīm upahvare vidat ||
8.069.07a ud yad bradhnasya viṣṭapaṁ gṛham indraś ca ganvahi |
8.069.07c madhvaḥ pītvā sacevahi triḥ sapta sakhyuḥ pade ||
8.069.08a arcata prārcata priyamedhāso arcata |
8.069.08c arcantu putrakā uta puraṁ na dhṛṣṇv arcata ||
8.069.09a ava svarāti gargaro godhā pari saniṣvaṇat |
8.069.09c piṅgā pari caniṣkadad indrāya brahmodyatam ||
8.069.10a ā yat patanty enyaḥ sudughā anapasphuraḥ |
8.069.10c apasphuraṁ gṛbhāyata somam indrāya pātave ||
8.069.11a apād indro apād agnir viśve devā amatsata |
8.069.11c varuṇa id iha kṣayat tam āpo abhy anūṣata vatsaṁ saṁśiśvarīr iva ||
8.069.12a sudevo asi varuṇa yasya te sapta sindhavaḥ |
8.069.12c anukṣaranti kākudaṁ sūrmyaṁ suṣirām iva ||
8.069.13a yo vyatīm̐r aphāṇayat suyuktām̐ upa dāśuṣe |
8.069.13c takvo netā tad id vapur upamā yo amucyata ||
8.069.14a atīd u śakra ohata indro viśvā ati dviṣaḥ |
8.069.14c bhinat kanīna odanam pacyamānam paro girā ||
8.069.15a arbhako na kumārako 'dhi tiṣṭhan navaṁ ratham |
8.069.15c sa pakṣan mahiṣam mṛgam pitre mātre vibhukratum ||
8.069.16a ā tū suśipra dampate rathaṁ tiṣṭhā hiraṇyayam |
8.069.16c adha dyukṣaṁ sacevahi sahasrapādam aruṣaṁ svastigām anehasam ||
8.069.17a taṁ ghem itthā namasvina upa svarājam āsate |
8.069.17c arthaṁ cid asya sudhitaṁ yad etava āvartayanti dāvane ||
8.069.18a anu pratnasyaukasaḥ priyamedhāsa eṣām |
8.069.18c pūrvām anu prayatiṁ vṛktabarhiṣo hitaprayasa āśata ||

8.070.01a yo rājā carṣaṇīnāṁ yātā rathebhir adhriguḥ |
8.070.01c viśvāsāṁ tarutā pṛtanānāṁ jyeṣṭho yo vṛtrahā gṛṇe ||
8.070.02a indraṁ taṁ śumbha puruhanmann avase yasya dvitā vidhartari |
8.070.02c hastāya vajraḥ prati dhāyi darśato maho dive na sūryaḥ ||
8.070.03a nakiṣ ṭaṁ karmaṇā naśad yaś cakāra sadāvṛdham |
8.070.03c indraṁ na yajñair viśvagūrtam ṛbhvasam adhṛṣṭaṁ dhṛṣṇvojasam ||
8.070.04a aṣāḻham ugram pṛtanāsu sāsahiṁ yasmin mahīr urujrayaḥ |
8.070.04c saṁ dhenavo jāyamāne anonavur dyāvaḥ kṣāmo anonavuḥ ||
8.070.05a yad dyāva indra te śataṁ śatam bhūmīr uta syuḥ |
8.070.05c na tvā vajrin sahasraṁ sūryā anu na jātam aṣṭa rodasī ||
8.070.06a ā paprātha mahinā vṛṣṇyā vṛṣan viśvā śaviṣṭha śavasā |
8.070.06c asmām̐ ava maghavan gomati vraje vajriñ citrābhir ūtibhiḥ ||
8.070.07a na sīm adeva āpad iṣaṁ dīrghāyo martyaḥ |
8.070.07c etagvā cid ya etaśā yuyojate harī indro yuyojate ||
8.070.08a taṁ vo maho mahāyyam indraṁ dānāya sakṣaṇim |
8.070.08c yo gādheṣu ya āraṇeṣu havyo vājeṣv asti havyaḥ ||
8.070.09a ud ū ṣu ṇo vaso mahe mṛśasva śūra rādhase |
8.070.09c ud ū ṣu mahyai maghavan maghattaya ud indra śravase mahe ||
8.070.10a tvaṁ na indra ṛtayus tvānido ni tṛmpasi |
8.070.10c madhye vasiṣva tuvinṛmṇorvor ni dāsaṁ śiśnatho hathaiḥ ||
8.070.11a anyavratam amānuṣam ayajvānam adevayum |
8.070.11c ava svaḥ sakhā dudhuvīta parvataḥ sughnāya dasyum parvataḥ ||
8.070.12a tvaṁ na indrāsāṁ haste śaviṣṭha dāvane |
8.070.12c dhānānāṁ na saṁ gṛbhāyāsmayur dviḥ saṁ gṛbhāyāsmayuḥ ||
8.070.13a sakhāyaḥ kratum icchata kathā rādhāma śarasya |
8.070.13c upastutim bhojaḥ sūrir yo ahrayaḥ ||
8.070.14a bhūribhiḥ samaha ṛṣibhir barhiṣmadbhiḥ staviṣyase |
8.070.14c yad ittham ekam-ekam ic chara vatsān parādadaḥ ||
8.070.15a karṇagṛhyā maghavā śauradevyo vatsaṁ nas tribhya ānayat |
8.070.15c ajāṁ sūrir na dhātave ||

8.071.01a tvaṁ no agne mahobhiḥ pāhi viśvasyā arāteḥ |
8.071.01c uta dviṣo martyasya ||
8.071.02a nahi manyuḥ pauruṣeya īśe hi vaḥ priyajāta |
8.071.02c tvam id asi kṣapāvān ||
8.071.03a sa no viśvebhir devebhir ūrjo napād bhadraśoce |
8.071.03c rayiṁ dehi viśvavāram ||
8.071.04a na tam agne arātayo martaṁ yuvanta rāyaḥ |
8.071.04c yaṁ trāyase dāśvāṁsam ||
8.071.05a yaṁ tvaṁ vipra medhasātāv agne hinoṣi dhanāya |
8.071.05c sa tavotī goṣu gantā ||
8.071.06a tvaṁ rayim puruvīram agne dāśuṣe martāya |
8.071.06c pra ṇo naya vasyo accha ||
8.071.07a uruṣyā ṇo mā parā dā aghāyate jātavedaḥ |
8.071.07c durādhye martāya ||
8.071.08a agne mākiṣ ṭe devasya rātim adevo yuyota |
8.071.08c tvam īśiṣe vasūnām ||
8.071.09a sa no vasva upa māsy ūrjo napān māhinasya |
8.071.09c sakhe vaso jaritṛbhyaḥ ||
8.071.10a acchā naḥ śīraśociṣaṁ giro yantu darśatam |
8.071.10c acchā yajñāso namasā purūvasum purupraśastam ūtaye ||
8.071.11a agniṁ sūnuṁ sahaso jātavedasaṁ dānāya vāryāṇām |
8.071.11c dvitā yo bhūd amṛto martyeṣv ā hotā mandratamo viśi ||
8.071.12a agniṁ vo devayajyayāgnim prayaty adhvare |
8.071.12c agniṁ dhīṣu prathamam agnim arvaty agniṁ kṣaitrāya sādhase ||
8.071.13a agnir iṣāṁ sakhye dadātu na īśe yo vāryāṇām |
8.071.13c agniṁ toke tanaye śaśvad īmahe vasuṁ santaṁ tanūpām ||
8.071.14a agnim īḻiṣvāvase gāthābhiḥ śīraśociṣam |
8.071.14c agniṁ rāye purumīḻha śrutaṁ naro 'gniṁ sudītaye chardiḥ ||
8.071.15a agniṁ dveṣo yotavai no gṛṇīmasy agniṁ śaṁ yoś ca dātave |
8.071.15c viśvāsu vikṣv aviteva havyo bhuvad vastur ṛṣūṇām ||

8.072.01a haviṣ kṛṇudhvam ā gamad adhvaryur vanate punaḥ |
8.072.01c vidvām̐ asya praśāsanam ||
8.072.02a ni tigmam abhy aṁśuṁ sīdad dhotā manāv adhi |
8.072.02c juṣāṇo asya sakhyam ||
8.072.03a antar icchanti taṁ jane rudram paro manīṣayā |
8.072.03c gṛbhṇanti jihvayā sasam ||
8.072.04a jāmy atītape dhanur vayodhā aruhad vanam |
8.072.04c dṛṣadaṁ jihvayāvadhīt ||
8.072.05a caran vatso ruśann iha nidātāraṁ na vindate |
8.072.05c veti stotava ambyam ||
8.072.06a uto nv asya yan mahad aśvāvad yojanam bṛhad |
8.072.06c dāmā rathasya dadṛśe ||
8.072.07a duhanti saptaikām upa dvā pañca sṛjataḥ |
8.072.07c tīrthe sindhor adhi svare ||
8.072.08a ā daśabhir vivasvata indraḥ kośam acucyavīt |
8.072.08c khedayā trivṛtā divaḥ ||
8.072.09a pari tridhātur adhvaraṁ jūrṇir eti navīyasī |
8.072.09c madhvā hotāro añjate ||
8.072.10a siñcanti namasāvatam uccācakram parijmānam |
8.072.10c nīcīnabāram akṣitam ||
8.072.11a abhyāram id adrayo niṣiktam puṣkare madhu |
8.072.11c avatasya visarjane ||
8.072.12a gāva upāvatāvatam mahī yajñasya rapsudā |
8.072.12c ubhā karṇā hiraṇyayā ||
8.072.13a ā sute siñcata śriyaṁ rodasyor abhiśriyam |
8.072.13c rasā dadhīta vṛṣabham ||
8.072.14a te jānata svam okyaṁ saṁ vatsāso na mātṛbhiḥ |
8.072.14c mitho nasanta jāmibhiḥ ||
8.072.15a upa srakveṣu bapsataḥ kṛṇvate dharuṇaṁ divi |
8.072.15c indre agnā namaḥ svaḥ ||
8.072.16a adhukṣat pipyuṣīm iṣam ūrjaṁ saptapadīm ariḥ |
8.072.16c sūryasya sapta raśmibhiḥ ||
8.072.17a somasya mitrāvaruṇoditā sūra ā dade |
8.072.17c tad āturasya bheṣajam ||
8.072.18a uto nv asya yat padaṁ haryatasya nidhānyam |
8.072.18c pari dyāṁ jihvayātanat ||

8.073.01a ud īrāthām ṛtāyate yuñjāthām aśvinā ratham |
8.073.01c anti ṣad bhūtu vām avaḥ ||
8.073.02a nimiṣaś cij javīyasā rathenā yātam aśvinā |
8.073.02c anti ṣad bhūtu vām avaḥ ||
8.073.03a upa stṛṇītam atraye himena gharmam aśvinā |
8.073.03c anti ṣad bhūtu vām avaḥ ||
8.073.04a kuha sthaḥ kuha jagmathuḥ kuha śyeneva petathuḥ |
8.073.04c anti ṣad bhūtu vām avaḥ ||
8.073.05a yad adya karhi karhi cic chuśrūyātam imaṁ havam |
8.073.05c anti ṣad bhūtu vām avaḥ ||
8.073.06a aśvinā yāmahūtamā nediṣṭhaṁ yāmy āpyam |
8.073.06c anti ṣad bhūtu vām avaḥ ||
8.073.07a avantam atraye gṛhaṁ kṛṇutaṁ yuvam aśvinā |
8.073.07c anti ṣad bhūtu vām avaḥ ||
8.073.08a varethe agnim ātapo vadate valgv atraye |
8.073.08c anti ṣad bhūtu vām avaḥ ||
8.073.09a pra saptavadhrir āśasā dhārām agner aśāyata |
8.073.09c anti ṣad bhūtu vām avaḥ ||
8.073.10a ihā gataṁ vṛṣaṇvasū śṛṇutam ma imaṁ havam |
8.073.10c anti ṣad bhūtu vām avaḥ ||
8.073.11a kim idaṁ vām purāṇavaj jarator iva śasyate |
8.073.11c anti ṣad bhūtu vām avaḥ ||
8.073.12a samānaṁ vāṁ sajātyaṁ samāno bandhur aśvinā |
8.073.12c anti ṣad bhūtu vām avaḥ ||
8.073.13a yo vāṁ rajāṁsy aśvinā ratho viyāti rodasī |
8.073.13c anti ṣad bhūtu vām avaḥ ||
8.073.14a ā no gavyebhir aśvyaiḥ sahasrair upa gacchatam |
8.073.14c anti ṣad bhūtu vām avaḥ ||
8.073.15a mā no gavyebhir aśvyaiḥ sahasrebhir ati khyatam |
8.073.15c anti ṣad bhūtu vām avaḥ ||
8.073.16a aruṇapsur uṣā abhūd akar jyotir ṛtāvarī |
8.073.16c anti ṣad bhūtu vām avaḥ ||
8.073.17a aśvinā su vicākaśad vṛkṣam paraśumām̐ iva |
8.073.17c anti ṣad bhūtu vām avaḥ ||
8.073.18a puraṁ na dhṛṣṇav ā ruja kṛṣṇayā bādhito viśā |
8.073.18c anti ṣad bhūtu vām avaḥ ||

8.074.01a viśo-viśo vo atithiṁ vājayantaḥ purupriyam |
8.074.01c agniṁ vo duryaṁ vacaḥ stuṣe śūṣasya manmabhiḥ ||
8.074.02a yaṁ janāso haviṣmanto mitraṁ na sarpirāsutim |
8.074.02c praśaṁsanti praśastibhiḥ ||
8.074.03a panyāṁsaṁ jātavedasaṁ yo devatāty udyatā |
8.074.03c havyāny airayad divi ||
8.074.04a āganma vṛtrahantamaṁ jyeṣṭham agnim ānavam |
8.074.04c yasya śrutarvā bṛhann ārkṣo anīka edhate ||
8.074.05a amṛtaṁ jātavedasaṁ tiras tamāṁsi darśatam |
8.074.05c ghṛtāhavanam īḍyam ||
8.074.06a sabādho yaṁ janā ime 'gniṁ havyebhir īḻate |
8.074.06c juhvānāso yatasrucaḥ ||
8.074.07a iyaṁ te navyasī matir agne adhāyy asmad ā |
8.074.07c mandra sujāta sukrato 'mūra dasmātithe ||
8.074.08a sā te agne śaṁtamā caniṣṭhā bhavatu priyā |
8.074.08c tayā vardhasva suṣṭutaḥ ||
8.074.09a sā dyumnair dyumninī bṛhad upopa śravasi śravaḥ |
8.074.09c dadhīta vṛtratūrye ||
8.074.10a aśvam id gāṁ rathaprāṁ tveṣam indraṁ na satpatim |
8.074.10c yasya śravāṁsi tūrvatha panyam-panyaṁ ca kṛṣṭayaḥ ||
8.074.11a yaṁ tvā gopavano girā caniṣṭhad agne aṅgiraḥ |
8.074.11c sa pāvaka śrudhī havam ||
8.074.12a yaṁ tvā janāsa īḻate sabādho vājasātaye |
8.074.12c sa bodhi vṛtratūrye ||
8.074.13a ahaṁ huvāna ārkṣe śrutarvaṇi madacyuti |
8.074.13c śardhāṁsīva stukāvinām mṛkṣā śīrṣā caturṇām ||
8.074.14a māṁ catvāra āśavaḥ śaviṣṭhasya dravitnavaḥ |
8.074.14c surathāso abhi prayo vakṣan vayo na tugryam ||
8.074.15a satyam it tvā mahenadi paruṣṇy ava dediśam |
8.074.15c nem āpo aśvadātaraḥ śaviṣṭhād asti martyaḥ ||

8.075.01a yukṣvā hi devahūtamām̐ aśvām̐ agne rathīr iva |
8.075.01c ni hotā pūrvyaḥ sadaḥ ||
8.075.02a uta no deva devām̐ acchā voco viduṣṭaraḥ |
8.075.02c śrad viśvā vāryā kṛdhi ||
8.075.03a tvaṁ ha yad yaviṣṭhya sahasaḥ sūnav āhuta |
8.075.03c ṛtāvā yajñiyo bhuvaḥ ||
8.075.04a ayam agniḥ sahasriṇo vājasya śatinas patiḥ |
8.075.04c mūrdhā kavī rayīṇām ||
8.075.05a taṁ nemim ṛbhavo yathā namasva sahūtibhiḥ |
8.075.05c nedīyo yajñam aṅgiraḥ ||
8.075.06a tasmai nūnam abhidyave vācā virūpa nityayā |
8.075.06c vṛṣṇe codasva suṣṭutim ||
8.075.07a kam u ṣvid asya senayāgner apākacakṣasaḥ |
8.075.07c paṇiṁ goṣu starāmahe ||
8.075.08a mā no devānāṁ viśaḥ prasnātīr ivosrāḥ |
8.075.08c kṛśaṁ na hāsur aghnyāḥ ||
8.075.09a mā naḥ samasya dūḍhyaḥ paridveṣaso aṁhatiḥ |
8.075.09c ūrmir na nāvam ā vadhīt ||
8.075.10a namas te agna ojase gṛṇanti deva kṛṣṭayaḥ |
8.075.10c amair amitram ardaya ||
8.075.11a kuvit su no gaviṣṭaye 'gne saṁveṣiṣo rayim |
8.075.11c urukṛd uru ṇas kṛdhi ||
8.075.12a mā no asmin mahādhane parā varg bhārabhṛd yathā |
8.075.12c saṁvargaṁ saṁ rayiṁ jaya ||
8.075.13a anyam asmad bhiyā iyam agne siṣaktu ducchunā |
8.075.13c vardhā no amavac chavaḥ ||
8.075.14a yasyājuṣan namasvinaḥ śamīm adurmakhasya vā |
8.075.14c taṁ ghed agnir vṛdhāvati ||
8.075.15a parasyā adhi saṁvato 'varām̐ abhy ā tara |
8.075.15c yatrāham asmi tām̐ ava ||
8.075.16a vidmā hi te purā vayam agne pitur yathāvasaḥ |
8.075.16c adhā te sumnam īmahe ||

8.076.01a imaṁ nu māyinaṁ huva indram īśānam ojasā |
8.076.01c marutvantaṁ na vṛñjase ||
8.076.02a ayam indro marutsakhā vi vṛtrasyābhinac chiraḥ |
8.076.02c vajreṇa śataparvaṇā ||
8.076.03a vāvṛdhāno marutsakhendro vi vṛtram airayat |
8.076.03c sṛjan samudriyā apaḥ ||
8.076.04a ayaṁ ha yena vā idaṁ svar marutvatā jitam |
8.076.04c indreṇa somapītaye ||
8.076.05a marutvantam ṛjīṣiṇam ojasvantaṁ virapśinam |
8.076.05c indraṁ gīrbhir havāmahe ||
8.076.06a indram pratnena manmanā marutvantaṁ havāmahe |
8.076.06c asya somasya pītaye ||
8.076.07a marutvām̐ indra mīḍhvaḥ pibā somaṁ śatakrato |
8.076.07c asmin yajñe puruṣṭuta ||
8.076.08a tubhyed indra marutvate sutāḥ somāso adrivaḥ |
8.076.08c hṛdā hūyanta ukthinaḥ ||
8.076.09a pibed indra marutsakhā sutaṁ somaṁ diviṣṭiṣu |
8.076.09c vajraṁ śiśāna ojasā ||
8.076.10a uttiṣṭhann ojasā saha pītvī śipre avepayaḥ |
8.076.10c somam indra camū sutam ||
8.076.11a anu tvā rodasī ubhe krakṣamāṇam akṛpetām |
8.076.11c indra yad dasyuhābhavaḥ ||
8.076.12a vācam aṣṭāpadīm ahaṁ navasraktim ṛtaspṛśam |
8.076.12c indrāt pari tanvam mame ||

8.077.01a jajñāno nu śatakratur vi pṛcchad iti mātaram |
8.077.01c ka ugrāḥ ke ha śṛṇvire ||
8.077.02a ād īṁ śavasy abravīd aurṇavābham ahīśuvam |
8.077.02c te putra santu niṣṭuraḥ ||
8.077.03a sam it tān vṛtrahākhidat khe arām̐ iva khedayā |
8.077.03c pravṛddho dasyuhābhavat ||
8.077.04a ekayā pratidhāpibat sākaṁ sarāṁsi triṁśatam |
8.077.04c indraḥ somasya kāṇukā ||
8.077.05a abhi gandharvam atṛṇad abudhneṣu rajaḥsv ā |
8.077.05c indro brahmabhya id vṛdhe ||
8.077.06a nir āvidhyad giribhya ā dhārayat pakvam odanam |
8.077.06c indro bundaṁ svātatam ||
8.077.07a śatabradhna iṣus tava sahasraparṇa eka it |
8.077.07c yam indra cakṛṣe yujam ||
8.077.08a tena stotṛbhya ā bhara nṛbhyo nāribhyo attave |
8.077.08c sadyo jāta ṛbhuṣṭhira ||
8.077.09a etā cyautnāni te kṛtā varṣiṣṭhāni parīṇasā |
8.077.09c hṛdā vīḍv adhārayaḥ ||
8.077.10a viśvet tā viṣṇur ābharad urukramas tveṣitaḥ |
8.077.10c śatam mahiṣān kṣīrapākam odanaṁ varāham indra emuṣam ||
8.077.11a tuvikṣaṁ te sukṛtaṁ sūmayaṁ dhanuḥ sādhur bundo hiraṇyayaḥ |
8.077.11c ubhā te bāhū raṇyā susaṁskṛta ṛdūpe cid ṛdūvṛdhā ||

8.078.01a puroḻāśaṁ no andhasa indra sahasram ā bhara |
8.078.01c śatā ca śūra gonām ||
8.078.02a ā no bhara vyañjanaṁ gām aśvam abhyañjanam |
8.078.02c sacā manā hiraṇyayā ||
8.078.03a uta naḥ karṇaśobhanā purūṇi dhṛṣṇav ā bhara |
8.078.03c tvaṁ hi śṛṇviṣe vaso ||
8.078.04a nakīṁ vṛdhīka indra te na suṣā na sudā uta |
8.078.04c nānyas tvac chūra vāghataḥ ||
8.078.05a nakīm indro nikartave na śakraḥ pariśaktave |
8.078.05c viśvaṁ śṛṇoti paśyati ||
8.078.06a sa manyum martyānām adabdho ni cikīṣate |
8.078.06c purā nidaś cikīṣate ||
8.078.07a kratva it pūrṇam udaraṁ turasyāsti vidhataḥ |
8.078.07c vṛtraghnaḥ somapāvnaḥ ||
8.078.08a tve vasūni saṁgatā viśvā ca soma saubhagā |
8.078.08c sudātv aparihvṛtā ||
8.078.09a tvām id yavayur mama kāmo gavyur hiraṇyayuḥ |
8.078.09c tvām aśvayur eṣate ||
8.078.10a taved indrāham āśasā haste dātraṁ canā dade |
8.078.10c dinasya vā maghavan sambhṛtasya vā pūrdhi yavasya kāśinā ||

8.079.01a ayaṁ kṛtnur agṛbhīto viśvajid udbhid it somaḥ |
8.079.01c ṛṣir vipraḥ kāvyena ||
8.079.02a abhy ūrṇoti yan nagnam bhiṣakti viśvaṁ yat turam |
8.079.02c prem andhaḥ khyan niḥ śroṇo bhūt ||
8.079.03a tvaṁ soma tanūkṛdbhyo dveṣobhyo 'nyakṛtebhyaḥ |
8.079.03c uru yantāsi varūtham ||
8.079.04a tvaṁ cittī tava dakṣair diva ā pṛthivyā ṛjīṣin |
8.079.04c yāvīr aghasya cid dveṣaḥ ||
8.079.05a arthino yanti ced arthaṁ gacchān id daduṣo rātim |
8.079.05c vavṛjyus tṛṣyataḥ kāmam ||
8.079.06a vidad yat pūrvyaṁ naṣṭam ud īm ṛtāyum īrayat |
8.079.06c prem āyus tārīd atīrṇam ||
8.079.07a suśevo no mṛḻayākur adṛptakratur avātaḥ |
8.079.07c bhavā naḥ soma śaṁ hṛde ||
8.079.08a mā naḥ soma saṁ vīvijo mā vi bībhiṣathā rājan |
8.079.08c mā no hārdi tviṣā vadhīḥ ||
8.079.09a ava yat sve sadhasthe devānāṁ durmatīr īkṣe |
8.079.09c rājann apa dviṣaḥ sedha mīḍhvo apa sridhaḥ sedha ||

8.080.01a nahy anyam baḻākaram marḍitāraṁ śatakrato |
8.080.01c tvaṁ na indra mṛḻaya ||
8.080.02a yo naḥ śaśvat purāvithāmṛdhro vājasātaye |
8.080.02c sa tvaṁ na indra mṛḻaya ||
8.080.03a kim aṅga radhracodanaḥ sunvānasyāvited asi |
8.080.03c kuvit sv indra ṇaḥ śakaḥ ||
8.080.04a indra pra ṇo ratham ava paścāc cit santam adrivaḥ |
8.080.04c purastād enam me kṛdhi ||
8.080.05a hanto nu kim āsase prathamaṁ no rathaṁ kṛdhi |
8.080.05c upamaṁ vājayu śravaḥ ||
8.080.06a avā no vājayuṁ rathaṁ sukaraṁ te kim it pari |
8.080.06c asmān su jigyuṣas kṛdhi ||
8.080.07a indra dṛhyasva pūr asi bhadrā ta eti niṣkṛtam |
8.080.07c iyaṁ dhīr ṛtviyāvatī ||
8.080.08a mā sīm avadya ā bhāg urvī kāṣṭhā hitaṁ dhanam |
8.080.08c apāvṛktā aratnayaḥ ||
8.080.09a turīyaṁ nāma yajñiyaṁ yadā karas tad uśmasi |
8.080.09c ād it patir na ohase ||
8.080.10a avīvṛdhad vo amṛtā amandīd ekadyūr devā uta yāś ca devīḥ |
8.080.10c tasmā u rādhaḥ kṛṇuta praśastam prātar makṣū dhiyāvasur jagamyāt ||

8.081.01a ā tū na indra kṣumantaṁ citraṁ grābhaṁ saṁ gṛbhāya |
8.081.01c mahāhastī dakṣiṇena ||
8.081.02a vidmā hi tvā tuvikūrmiṁ tuvideṣṇaṁ tuvīmagham |
8.081.02c tuvimātram avobhiḥ ||
8.081.03a nahi tvā śūra devā na martāso ditsantam |
8.081.03c bhīmaṁ na gāṁ vārayante ||
8.081.04a eto nv indraṁ stavāmeśānaṁ vasvaḥ svarājam |
8.081.04c na rādhasā mardhiṣan naḥ ||
8.081.05a pra stoṣad upa gāsiṣac chravat sāma gīyamānam |
8.081.05c abhi rādhasā jugurat ||
8.081.06a ā no bhara dakṣiṇenābhi savyena pra mṛśa |
8.081.06c indra mā no vasor nir bhāk ||
8.081.07a upa kramasvā bhara dhṛṣatā dhṛṣṇo janānām |
8.081.07c adāśūṣṭarasya vedaḥ ||
8.081.08a indra ya u nu te asti vājo viprebhiḥ sanitvaḥ |
8.081.08c asmābhiḥ su taṁ sanuhi ||
8.081.09a sadyojuvas te vājā asmabhyaṁ viśvaścandrāḥ |
8.081.09c vaśaiś ca makṣū jarante ||

8.082.01a ā pra drava parāvato 'rvāvataś ca vṛtrahan |
8.082.01c madhvaḥ prati prabharmaṇi ||
8.082.02a tīvrāḥ somāsa ā gahi sutāso mādayiṣṇavaḥ |
8.082.02c pibā dadhṛg yathociṣe ||
8.082.03a iṣā mandasvād u te 'raṁ varāya manyave |
8.082.03c bhuvat ta indra śaṁ hṛde ||
8.082.04a ā tv aśatrav ā gahi ny ukthāni ca hūyase |
8.082.04c upame rocane divaḥ ||
8.082.05a tubhyāyam adribhiḥ suto gobhiḥ śrīto madāya kam |
8.082.05c pra soma indra hūyate ||
8.082.06a indra śrudhi su me havam asme sutasya gomataḥ |
8.082.06c vi pītiṁ tṛptim aśnuhi ||
8.082.07a ya indra camaseṣv ā somaś camūṣu te sutaḥ |
8.082.07c pibed asya tvam īśiṣe ||
8.082.08a yo apsu candramā iva somaś camūṣu dadṛśe |
8.082.08c pibed asya tvam īśiṣe ||
8.082.09a yaṁ te śyenaḥ padābharat tiro rajāṁsy aspṛtam |
8.082.09c pibed asya tvam īśiṣe ||

8.083.01a devānām id avo mahat tad ā vṛṇīmahe vayam |
8.083.01c vṛṣṇām asmabhyam ūtaye ||
8.083.02a te naḥ santu yujaḥ sadā varuṇo mitro aryamā |
8.083.02c vṛdhāsaś ca pracetasaḥ ||
8.083.03a ati no viṣpitā puru naubhir apo na parṣatha |
8.083.03c yūyam ṛtasya rathyaḥ ||
8.083.04a vāmaṁ no astv aryaman vāmaṁ varuṇa śaṁsyam |
8.083.04c vāmaṁ hy āvṛṇīmahe ||
8.083.05a vāmasya hi pracetasa īśānāśo riśādasaḥ |
8.083.05c nem ādityā aghasya yat ||
8.083.06a vayam id vaḥ sudānavaḥ kṣiyanto yānto adhvann ā |
8.083.06c devā vṛdhāya hūmahe ||
8.083.07a adhi na indraiṣāṁ viṣṇo sajātyānām |
8.083.07c itā maruto aśvinā ||
8.083.08a pra bhrātṛtvaṁ sudānavo 'dha dvitā samānyā |
8.083.08c mātur garbhe bharāmahe ||
8.083.09a yūyaṁ hi ṣṭhā sudānava indrajyeṣṭhā abhidyavaḥ |
8.083.09c adhā cid va uta bruve ||

8.084.01a preṣṭhaṁ vo atithiṁ stuṣe mitram iva priyam |
8.084.01c agniṁ rathaṁ na vedyam ||
8.084.02a kavim iva pracetasaṁ yaṁ devāso adha dvitā |
8.084.02c ni martyeṣv ādadhuḥ ||
8.084.03a tvaṁ yaviṣṭha dāśuṣo nṝm̐ḥ pāhi śṛṇudhī giraḥ |
8.084.03c rakṣā tokam uta tmanā ||
8.084.04a kayā te agne aṅgira ūrjo napād upastutim |
8.084.04c varāya deva manyave ||
8.084.05a dāśema kasya manasā yajñasya sahaso yaho |
8.084.05c kad u voca idaṁ namaḥ ||
8.084.06a adhā tvaṁ hi nas karo viśvā asmabhyaṁ sukṣitīḥ |
8.084.06c vājadraviṇaso giraḥ ||
8.084.07a kasya nūnam parīṇaso dhiyo jinvasi dampate |
8.084.07c goṣātā yasya te giraḥ ||
8.084.08a tam marjayanta sukratum puroyāvānam ājiṣu |
8.084.08c sveṣu kṣayeṣu vājinam ||
8.084.09a kṣeti kṣemebhiḥ sādhubhir nakir yaṁ ghnanti hanti yaḥ |
8.084.09c agne suvīra edhate ||

8.085.01a ā me havaṁ nāsatyāśvinā gacchataṁ yuvam |
8.085.01c madhvaḥ somasya pītaye ||
8.085.02a imam me stomam aśvinemam me śṛṇutaṁ havam |
8.085.02c madhvaḥ somasya pītaye ||
8.085.03a ayaṁ vāṁ kṛṣṇo aśvinā havate vājinīvasū |
8.085.03c madhvaḥ somasya pītaye ||
8.085.04a śṛṇutaṁ jaritur havaṁ kṛṣṇasya stuvato narā |
8.085.04c madhvaḥ somasya pītaye ||
8.085.05a chardir yantam adābhyaṁ viprāya stuvate narā |
8.085.05c madhvaḥ somasya pītaye ||
8.085.06a gacchataṁ dāśuṣo gṛham itthā stuvato aśvinā |
8.085.06c madhvaḥ somasya pītaye ||
8.085.07a yuñjāthāṁ rāsabhaṁ rathe vīḍvaṅge vṛṣaṇvasū |
8.085.07c madhvaḥ somasya pītaye ||
8.085.08a trivandhureṇa trivṛtā rathenā yātam aśvinā |
8.085.08c madhvaḥ somasya pītaye ||
8.085.09a nū me giro nāsatyāśvinā prāvataṁ yuvam |
8.085.09c madhvaḥ somasya pītaye ||

8.086.01a ubhā hi dasrā bhiṣajā mayobhuvobhā dakṣasya vacaso babhūvathuḥ |
8.086.01c tā vāṁ viśvako havate tanūkṛthe mā no vi yauṣṭaṁ sakhyā mumocatam ||
8.086.02a kathā nūnaṁ vāṁ vimanā upa stavad yuvaṁ dhiyaṁ dadathur vasyaïṣṭaye |
8.086.02c tā vāṁ viśvako havate tanūkṛthe mā no vi yauṣṭaṁ sakhyā mumocatam ||
8.086.03a yuvaṁ hi ṣmā purubhujemam edhatuṁ viṣṇāpve dadathur vasyaïṣṭaye |
8.086.03c tā vāṁ viśvako havate tanūkṛthe mā no vi yauṣṭaṁ sakhyā mumocatam ||
8.086.04a uta tyaṁ vīraṁ dhanasām ṛjīṣiṇaṁ dūre cit santam avase havāmahe |
8.086.04c yasya svādiṣṭhā sumatiḥ pitur yathā mā no vi yauṣṭaṁ sakhyā mumocatam ||
8.086.05a ṛtena devaḥ savitā śamāyata ṛtasya śṛṅgam urviyā vi paprathe |
8.086.05c ṛtaṁ sāsāha mahi cit pṛtanyato mā no vi yauṣṭaṁ sakhyā mumocatam ||

8.087.01a dyumnī vāṁ stomo aśvinā krivir na seka ā gatam |
8.087.01c madhvaḥ sutasya sa divi priyo narā pātaṁ gaurāv iveriṇe ||
8.087.02a pibataṁ gharmam madhumantam aśvinā barhiḥ sīdataṁ narā |
8.087.02c tā mandasānā manuṣo duroṇa ā ni pātaṁ vedasā vayaḥ ||
8.087.03a ā vāṁ viśvābhir ūtibhiḥ priyamedhā ahūṣata |
8.087.03c tā vartir yātam upa vṛktabarhiṣo juṣṭaṁ yajñaṁ diviṣṭiṣu ||
8.087.04a pibataṁ somam madhumantam aśvinā barhiḥ sīdataṁ sumat |
8.087.04c tā vāvṛdhānā upa suṣṭutiṁ divo gantaṁ gaurāv iveriṇam ||
8.087.05a ā nūnaṁ yātam aśvināśvebhiḥ pruṣitapsubhiḥ |
8.087.05c dasrā hiraṇyavartanī śubhas patī pātaṁ somam ṛtāvṛdhā ||
8.087.06a vayaṁ hi vāṁ havāmahe vipanyavo viprāso vājasātaye |
8.087.06c tā valgū dasrā purudaṁsasā dhiyāśvinā śruṣṭy ā gatam ||

8.088.01a taṁ vo dasmam ṛtīṣahaṁ vasor mandānam andhasaḥ |
8.088.01c abhi vatsaṁ na svasareṣu dhenava indraṁ gīrbhir navāmahe ||
8.088.02a dyukṣaṁ sudānuṁ taviṣībhir āvṛtaṁ giriṁ na purubhojasam |
8.088.02c kṣumantaṁ vājaṁ śatinaṁ sahasriṇam makṣū gomantam īmahe ||
8.088.03a na tvā bṛhanto adrayo varanta indra vīḻavaḥ |
8.088.03c yad ditsasi stuvate māvate vasu nakiṣ ṭad ā mināti te ||
8.088.04a yoddhāsi kratvā śavasota daṁsanā viśvā jātābhi majmanā |
8.088.04c ā tvāyam arka ūtaye vavartati yaṁ gotamā ajījanan ||
8.088.05a pra hi ririkṣa ojasā divo antebhyas pari |
8.088.05c na tvā vivyāca raja indra pārthivam anu svadhāṁ vavakṣitha ||
8.088.06a nakiḥ pariṣṭir maghavan maghasya te yad dāśuṣe daśasyasi |
8.088.06c asmākam bodhy ucathasya coditā maṁhiṣṭho vājasātaye ||

8.089.01a bṛhad indrāya gāyata maruto vṛtrahaṁtamam |
8.089.01c yena jyotir ajanayann ṛtāvṛdho devaṁ devāya jāgṛvi ||
8.089.02a apādhamad abhiśastīr aśastihāthendro dyumny ābhavat |
8.089.02c devās ta indra sakhyāya yemire bṛhadbhāno marudgaṇa ||
8.089.03a pra va indrāya bṛhate maruto brahmārcata |
8.089.03c vṛtraṁ hanati vṛtrahā śatakratur vajreṇa śataparvaṇā ||
8.089.04a abhi pra bhara dhṛṣatā dhṛṣanmanaḥ śravaś cit te asad bṛhat |
8.089.04c arṣantv āpo javasā vi mātaro hano vṛtraṁ jayā svaḥ ||
8.089.05a yaj jāyathā apūrvya maghavan vṛtrahatyāya |
8.089.05c tat pṛthivīm aprathayas tad astabhnā uta dyām ||
8.089.06a tat te yajño ajāyata tad arka uta haskṛtiḥ |
8.089.06c tad viśvam abhibhūr asi yaj jātaṁ yac ca jantvam ||
8.089.07a āmāsu pakvam airaya ā sūryaṁ rohayo divi |
8.089.07c gharmaṁ na sāman tapatā suvṛktibhir juṣṭaṁ girvaṇase bṛhat ||

8.090.01a ā no viśvāsu havya indraḥ samatsu bhūṣatu |
8.090.01c upa brahmāṇi savanāni vṛtrahā paramajyā ṛcīṣamaḥ ||
8.090.02a tvaṁ dātā prathamo rādhasām asy asi satya īśānakṛt |
8.090.02c tuvidyumnasya yujyā vṛṇīmahe putrasya śavaso mahaḥ ||
8.090.03a brahmā ta indra girvaṇaḥ kriyante anatidbhutā |
8.090.03c imā juṣasva haryaśva yojanendra yā te amanmahi ||
8.090.04a tvaṁ hi satyo maghavann anānato vṛtrā bhūri nyṛñjase |
8.090.04c sa tvaṁ śaviṣṭha vajrahasta dāśuṣe 'rvāñcaṁ rayim ā kṛdhi ||
8.090.05a tvam indra yaśā asy ṛjīṣī śavasas pate |
8.090.05c tvaṁ vṛtrāṇi haṁsy apratīny eka id anuttā carṣaṇīdhṛtā ||
8.090.06a tam u tvā nūnam asura pracetasaṁ rādho bhāgam ivemahe |
8.090.06c mahīva kṛttiḥ śaraṇā ta indra pra te sumnā no aśnavan ||

8.091.01a kanyā vār avāyatī somam api srutāvidat |
8.091.01c astam bharanty abravīd indrāya sunavai tvā śakrāya sunavai tvā ||
8.091.02a asau ya eṣi vīrako gṛhaṁ-gṛhaṁ vicākaśad |
8.091.02c imaṁ jambhasutam piba dhānāvantaṁ karambhiṇam apūpavantam ukthinam ||
8.091.03a ā cana tvā cikitsāmo 'dhi cana tvā nemasi |
8.091.03c śanair iva śanakair ivendrāyendo pari srava ||
8.091.04a kuvic chakat kuvit karat kuvin no vasyasas karat |
8.091.04c kuvit patidviṣo yatīr indreṇa saṁgamāmahai ||
8.091.05a imāni trīṇi viṣṭapā tānīndra vi rohaya |
8.091.05c śiras tatasyorvarām ād idam ma upodare ||
8.091.06a asau ca yā na urvarād imāṁ tanvam mama |
8.091.06c atho tatasya yac chiraḥ sarvā tā romaśā kṛdhi ||
8.091.07a khe rathasya khe 'nasaḥ khe yugasya śatakrato |
8.091.07c apālām indra triṣ pūtvy akṛṇoḥ sūryatvacam ||

8.092.01a pāntam ā vo andhasa indram abhi pra gāyata |
8.092.01c viśvāsāhaṁ śatakratum maṁhiṣṭhaṁ carṣaṇīnām ||
8.092.02a puruhūtam puruṣṭutaṁ gāthānyaṁ sanaśrutam |
8.092.02c indra iti bravītana ||
8.092.03a indra in no mahānāṁ dātā vājānāṁ nṛtuḥ |
8.092.03c mahām̐ abhijñv ā yamat ||
8.092.04a apād u śipry andhasaḥ sudakṣasya prahoṣiṇaḥ |
8.092.04c indor indro yavāśiraḥ ||
8.092.05a tam v abhi prārcatendraṁ somasya pītaye |
8.092.05c tad id dhy asya vardhanam ||
8.092.06a asya pītvā madānāṁ devo devasyaujasā |
8.092.06c viśvābhi bhuvanā bhuvat ||
8.092.07a tyam u vaḥ satrāsāhaṁ viśvāsu gīrṣv āyatam |
8.092.07c ā cyāvayasy ūtaye ||
8.092.08a yudhmaṁ santam anarvāṇaṁ somapām anapacyutam |
8.092.08c naram avāryakratum ||
8.092.09a śikṣā ṇa indra rāya ā puru vidvām̐ ṛcīṣama |
8.092.09c avā naḥ pārye dhane ||
8.092.10a ataś cid indra ṇa upā yāhi śatavājayā |
8.092.10c iṣā sahasravājayā ||
8.092.11a ayāma dhīvato dhiyo 'rvadbhiḥ śakra godare |
8.092.11c jayema pṛtsu vajrivaḥ ||
8.092.12a vayam u tvā śatakrato gāvo na yavaseṣv ā |
8.092.12c uktheṣu raṇayāmasi ||
8.092.13a viśvā hi martyatvanānukāmā śatakrato |
8.092.13c aganma vajrinn āśasaḥ ||
8.092.14a tve su putra śavaso 'vṛtran kāmakātayaḥ |
8.092.14c na tvām indrāti ricyate ||
8.092.15a sa no vṛṣan saniṣṭhayā saṁ ghorayā dravitnvā |
8.092.15c dhiyāviḍḍhi puraṁdhyā ||
8.092.16a yas te nūnaṁ śatakratav indra dyumnitamo madaḥ |
8.092.16c tena nūnam made madeḥ ||
8.092.17a yas te citraśravastamo ya indra vṛtrahantamaḥ |
8.092.17c ya ojodātamo madaḥ ||
8.092.18a vidmā hi yas te adrivas tvādattaḥ satya somapāḥ |
8.092.18c viśvāsu dasma kṛṣṭiṣu ||
8.092.19a indrāya madvane sutam pari ṣṭobhantu no giraḥ |
8.092.19c arkam arcantu kāravaḥ ||
8.092.20a yasmin viśvā adhi śriyo raṇanti sapta saṁsadaḥ |
8.092.20c indraṁ sute havāmahe ||
8.092.21a trikadrukeṣu cetanaṁ devāso yajñam atnata |
8.092.21c tam id vardhantu no giraḥ ||
8.092.22a ā tvā viśantv indavaḥ samudram iva sindhavaḥ |
8.092.22c na tvām indrāti ricyate ||
8.092.23a vivyaktha mahinā vṛṣan bhakṣaṁ somasya jāgṛve |
8.092.23c ya indra jaṭhareṣu te ||
8.092.24a araṁ ta indra kukṣaye somo bhavatu vṛtrahan |
8.092.24c araṁ dhāmabhya indavaḥ ||
8.092.25a aram aśvāya gāyati śrutakakṣo araṁ gave |
8.092.25c aram indrasya dhāmne ||
8.092.26a araṁ hi ṣma suteṣu ṇaḥ someṣv indra bhūṣasi |
8.092.26c araṁ te śakra dāvane ||
8.092.27a parākāttāc cid adrivas tvāṁ nakṣanta no giraḥ |
8.092.27c araṁ gamāma te vayam ||
8.092.28a evā hy asi vīrayur evā śūra uta sthiraḥ |
8.092.28c evā te rādhyam manaḥ ||
8.092.29a evā rātis tuvīmagha viśvebhir dhāyi dhātṛbhiḥ |
8.092.29c adhā cid indra me sacā ||
8.092.30a mo ṣu brahmeva tandrayur bhuvo vājānām pate |
8.092.30c matsvā sutasya gomataḥ ||
8.092.31a mā na indrābhy ādiśaḥ sūro aktuṣv ā yaman |
8.092.31c tvā yujā vanema tat ||
8.092.32a tvayed indra yujā vayam prati bruvīmahi spṛdhaḥ |
8.092.32c tvam asmākaṁ tava smasi ||
8.092.33a tvām id dhi tvāyavo 'nunonuvataś carān |
8.092.33c sakhāya indra kāravaḥ ||

8.093.01a ud ghed abhi śrutāmaghaṁ vṛṣabhaṁ naryāpasam |
8.093.01c astāram eṣi sūrya ||
8.093.02a nava yo navatim puro bibheda bāhvojasā |
8.093.02c ahiṁ ca vṛtrahāvadhīt ||
8.093.03a sa na indraḥ śivaḥ sakhāśvāvad gomad yavamat |
8.093.03c urudhāreva dohate ||
8.093.04a yad adya kac ca vṛtrahann udagā abhi sūrya |
8.093.04c sarvaṁ tad indra te vaśe ||
8.093.05a yad vā pravṛddha satpate na marā iti manyase |
8.093.05c uto tat satyam it tava ||
8.093.06a ye somāsaḥ parāvati ye arvāvati sunvire |
8.093.06c sarvām̐s tām̐ indra gacchasi ||
8.093.07a tam indraṁ vājayāmasi mahe vṛtrāya hantave |
8.093.07c sa vṛṣā vṛṣabho bhuvat ||
8.093.08a indraḥ sa dāmane kṛta ojiṣṭhaḥ sa made hitaḥ |
8.093.08c dyumnī ślokī sa somyaḥ ||
8.093.09a girā vajro na sambhṛtaḥ sabalo anapacyutaḥ |
8.093.09c vavakṣa ṛṣvo astṛtaḥ ||
8.093.10a durge cin naḥ sugaṁ kṛdhi gṛṇāna indra girvaṇaḥ |
8.093.10c tvaṁ ca maghavan vaśaḥ ||
8.093.11a yasya te nū cid ādiśaṁ na minanti svarājyam |
8.093.11c na devo nādhrigur janaḥ ||
8.093.12a adhā te apratiṣkutaṁ devī śuṣmaṁ saparyataḥ |
8.093.12c ubhe suśipra rodasī ||
8.093.13a tvam etad adhārayaḥ kṛṣṇāsu rohiṇīṣu ca |
8.093.13c paruṣṇīṣu ruśat payaḥ ||
8.093.14a vi yad aher adha tviṣo viśve devāso akramuḥ |
8.093.14c vidan mṛgasya tām̐ amaḥ ||
8.093.15a ād u me nivaro bhuvad vṛtrahādiṣṭa pauṁsyam |
8.093.15c ajātaśatrur astṛtaḥ ||
8.093.16a śrutaṁ vo vṛtrahantamam pra śardhaṁ carṣaṇīnām |
8.093.16c ā śuṣe rādhase mahe ||
8.093.17a ayā dhiyā ca gavyayā puruṇāman puruṣṭuta |
8.093.17c yat some-soma ābhavaḥ ||
8.093.18a bodhinmanā id astu no vṛtrahā bhūryāsutiḥ |
8.093.18c śṛṇotu śakra āśiṣam ||
8.093.19a kayā tvaṁ na ūtyābhi pra mandase vṛṣan |
8.093.19c kayā stotṛbhya ā bhara ||
8.093.20a kasya vṛṣā sute sacā niyutvān vṛṣabho raṇat |
8.093.20c vṛtrahā somapītaye ||
8.093.21a abhī ṣu ṇas tvaṁ rayim mandasānaḥ sahasriṇam |
8.093.21c prayantā bodhi dāśuṣe ||
8.093.22a patnīvantaḥ sutā ima uśanto yanti vītaye |
8.093.22c apāṁ jagmir nicumpuṇaḥ ||
8.093.23a iṣṭā hotrā asṛkṣatendraṁ vṛdhāso adhvare |
8.093.23c acchāvabhṛtham ojasā ||
8.093.24a iha tyā sadhamādyā harī hiraṇyakeśyā |
8.093.24c voḻhām abhi prayo hitam ||
8.093.25a tubhyaṁ somāḥ sutā ime stīrṇam barhir vibhāvaso |
8.093.25c stotṛbhya indram ā vaha ||
8.093.26a ā te dakṣaṁ vi rocanā dadhad ratnā vi dāśuṣe |
8.093.26c stotṛbhya indram arcata ||
8.093.27a ā te dadhāmīndriyam ukthā viśvā śatakrato |
8.093.27c stotṛbhya indra mṛḻaya ||
8.093.28a bhadram-bhadraṁ na ā bhareṣam ūrjaṁ śatakrato |
8.093.28c yad indra mṛḻayāsi naḥ ||
8.093.29a sa no viśvāny ā bhara suvitāni śatakrato |
8.093.29c yad indra mṛḻayāsi naḥ ||
8.093.30a tvām id vṛtrahantama sutāvanto havāmahe |
8.093.30c yad indra mṛḻayāsi naḥ ||
8.093.31a upa no haribhiḥ sutaṁ yāhi madānām pate |
8.093.31c upa no haribhiḥ sutam ||
8.093.32a dvitā yo vṛtrahantamo vida indraḥ śatakratuḥ |
8.093.32c upa no haribhiḥ sutam ||
8.093.33a tvaṁ hi vṛtrahann eṣām pātā somānām asi |
8.093.33c upa no haribhiḥ sutam ||
8.093.34a indra iṣe dadātu na ṛbhukṣaṇam ṛbhuṁ rayim |
8.093.34c vājī dadātu vājinam ||

8.094.01a gaur dhayati marutāṁ śravasyur mātā maghonām |
8.094.01c yuktā vahnī rathānām ||
8.094.02a yasyā devā upasthe vratā viśve dhārayante |
8.094.02c sūryāmāsā dṛśe kam ||
8.094.03a tat su no viśve arya ā sadā gṛṇanti kāravaḥ |
8.094.03c marutaḥ somapītaye ||
8.094.04a asti somo ayaṁ sutaḥ pibanty asya marutaḥ |
8.094.04c uta svarājo aśvinā ||
8.094.05a pibanti mitro aryamā tanā pūtasya varuṇaḥ |
8.094.05c triṣadhasthasya jāvataḥ ||
8.094.06a uto nv asya joṣam ām̐ indraḥ sutasya gomataḥ |
8.094.06c prātar hoteva matsati ||
8.094.07a kad atviṣanta sūrayas tira āpa iva sridhaḥ |
8.094.07c arṣanti pūtadakṣasaḥ ||
8.094.08a kad vo adya mahānāṁ devānām avo vṛṇe |
8.094.08c tmanā ca dasmavarcasām ||
8.094.09a ā ye viśvā pārthivāni paprathan rocanā divaḥ |
8.094.09c marutaḥ somapītaye ||
8.094.10a tyān nu pūtadakṣaso divo vo maruto huve |
8.094.10c asya somasya pītaye ||
8.094.11a tyān nu ye vi rodasī tastabhur maruto huve |
8.094.11c asya somasya pītaye ||
8.094.12a tyaṁ nu mārutaṁ gaṇaṁ giriṣṭhāṁ vṛṣaṇaṁ huve |
8.094.12c asya somasya pītaye ||

8.095.01a ā tvā giro rathīr ivāsthuḥ suteṣu girvaṇaḥ |
8.095.01c abhi tvā sam anūṣatendra vatsaṁ na mātaraḥ ||
8.095.02a ā tvā śukrā acucyavuḥ sutāsa indra girvaṇaḥ |
8.095.02c pibā tv asyāndhasa indra viśvāsu te hitam ||
8.095.03a pibā somam madāya kam indra śyenābhṛtaṁ sutam |
8.095.03c tvaṁ hi śaśvatīnām patī rājā viśām asi ||
8.095.04a śrudhī havaṁ tiraścyā indra yas tvā saparyati |
8.095.04c suvīryasya gomato rāyas pūrdhi mahām̐ asi ||
8.095.05a indra yas te navīyasīṁ giram mandrām ajījanat |
8.095.05c cikitvinmanasaṁ dhiyam pratnām ṛtasya pipyuṣīm ||
8.095.06a tam u ṣṭavāma yaṁ gira indram ukthāni vāvṛdhuḥ |
8.095.06c purūṇy asya pauṁsyā siṣāsanto vanāmahe ||
8.095.07a eto nv indraṁ stavāma śuddhaṁ śuddhena sāmnā |
8.095.07c śuddhair ukthair vāvṛdhvāṁsaṁ śuddha āśīrvān mamattu ||
8.095.08a indra śuddho na ā gahi śuddhaḥ śuddhābhir ūtibhiḥ |
8.095.08c śuddho rayiṁ ni dhāraya śuddho mamaddhi somyaḥ ||
8.095.09a indra śuddho hi no rayiṁ śuddho ratnāni dāśuṣe |
8.095.09c śuddho vṛtrāṇi jighnase śuddho vājaṁ siṣāsasi ||

8.096.01a asmā uṣāsa ātiranta yāmam indrāya naktam ūrmyāḥ suvācaḥ |
8.096.01c asmā āpo mātaraḥ sapta tasthur nṛbhyas tarāya sindhavaḥ supārāḥ ||
8.096.02a atividdhā vithureṇā cid astrā triḥ sapta sānu saṁhitā girīṇām |
8.096.02c na tad devo na martyas tuturyād yāni pravṛddho vṛṣabhaś cakāra ||
8.096.03a indrasya vajra āyaso nimiśla indrasya bāhvor bhūyiṣṭham ojaḥ |
8.096.03c śīrṣann indrasya kratavo nireka āsann eṣanta śrutyā upāke ||
8.096.04a manye tvā yajñiyaṁ yajñiyānām manye tvā cyavanam acyutānām |
8.096.04c manye tvā satvanām indra ketum manye tvā vṛṣabhaṁ carṣaṇīnām ||
8.096.05a ā yad vajram bāhvor indra dhatse madacyutam ahaye hantavā u |
8.096.05c pra parvatā anavanta pra gāvaḥ pra brahmāṇo abhinakṣanta indram ||
8.096.06a tam u ṣṭavāma ya imā jajāna viśvā jātāny avarāṇy asmāt |
8.096.06c indreṇa mitraṁ didhiṣema gīrbhir upo namobhir vṛṣabhaṁ viśema ||
8.096.07a vṛtrasya tvā śvasathād īṣamāṇā viśve devā ajahur ye sakhāyaḥ |
8.096.07c marudbhir indra sakhyaṁ te astv athemā viśvāḥ pṛtanā jayāsi ||
8.096.08a triḥ ṣaṣṭis tvā maruto vāvṛdhānā usrā iva rāśayo yajñiyāsaḥ |
8.096.08c upa tvemaḥ kṛdhi no bhāgadheyaṁ śuṣmaṁ ta enā haviṣā vidhema ||
8.096.09a tigmam āyudham marutām anīkaṁ kas ta indra prati vajraṁ dadharṣa |
8.096.09c anāyudhāso asurā adevāś cakreṇa tām̐ apa vapa ṛjīṣin ||
8.096.10a maha ugrāya tavase suvṛktim preraya śivatamāya paśvaḥ |
8.096.10c girvāhase gira indrāya pūrvīr dhehi tanve kuvid aṅga vedat ||
8.096.11a ukthavāhase vibhve manīṣāṁ druṇā na pāram īrayā nadīnām |
8.096.11c ni spṛśa dhiyā tanvi śrutasya juṣṭatarasya kuvid aṅga vedat ||
8.096.12a tad viviḍḍhi yat ta indro jujoṣat stuhi suṣṭutiṁ namasā vivāsa |
8.096.12c upa bhūṣa jaritar mā ruvaṇyaḥ śrāvayā vācaṁ kuvid aṅga vedat ||
8.096.13a ava drapso aṁśumatīm atiṣṭhad iyānaḥ kṛṣṇo daśabhiḥ sahasraiḥ |
8.096.13c āvat tam indraḥ śacyā dhamantam apa snehitīr nṛmaṇā adhatta ||
8.096.14a drapsam apaśyaṁ viṣuṇe carantam upahvare nadyo aṁśumatyāḥ |
8.096.14c nabho na kṛṣṇam avatasthivāṁsam iṣyāmi vo vṛṣaṇo yudhyatājau ||
8.096.15a adha drapso aṁśumatyā upasthe 'dhārayat tanvaṁ titviṣāṇaḥ |
8.096.15c viśo adevīr abhy ācarantīr bṛhaspatinā yujendraḥ sasāhe ||
8.096.16a tvaṁ ha tyat saptabhyo jāyamāno 'śatrubhyo abhavaḥ śatrur indra |
8.096.16c gūḻhe dyāvāpṛthivī anv avindo vibhumadbhyo bhuvanebhyo raṇaṁ dhāḥ ||
8.096.17a tvaṁ ha tyad apratimānam ojo vajreṇa vajrin dhṛṣito jaghantha |
8.096.17c tvaṁ śuṣṇasyāvātiro vadhatrais tvaṁ gā indra śacyed avindaḥ ||
8.096.18a tvaṁ ha tyad vṛṣabha carṣaṇīnāṁ ghano vṛtrāṇāṁ taviṣo babhūtha |
8.096.18c tvaṁ sindhūm̐r asṛjas tastabhānān tvam apo ajayo dāsapatnīḥ ||
8.096.19a sa sukratū raṇitā yaḥ suteṣv anuttamanyur yo aheva revān |
8.096.19c ya eka in nary apāṁsi kartā sa vṛtrahā pratīd anyam āhuḥ ||
8.096.20a sa vṛtrahendraś carṣaṇīdhṛt taṁ suṣṭutyā havyaṁ huvema |
8.096.20c sa prāvitā maghavā no 'dhivaktā sa vājasya śravasyasya dātā ||
8.096.21a sa vṛtrahendra ṛbhukṣāḥ sadyo jajñāno havyo babhūva |
8.096.21c kṛṇvann apāṁsi naryā purūṇi somo na pīto havyaḥ sakhibhyaḥ ||

8.097.01a yā indra bhuja ābharaḥ svarvām̐ asurebhyaḥ |
8.097.01c stotāram in maghavann asya vardhaya ye ca tve vṛktabarhiṣaḥ ||
8.097.02a yam indra dadhiṣe tvam aśvaṁ gām bhāgam avyayam |
8.097.02c yajamāne sunvati dakṣiṇāvati tasmin taṁ dhehi mā paṇau ||
8.097.03a ya indra sasty avrato 'nuṣvāpam adevayuḥ |
8.097.03c svaiḥ ṣa evair mumurat poṣyaṁ rayiṁ sanutar dhehi taṁ tataḥ ||
8.097.04a yac chakrāsi parāvati yad arvāvati vṛtrahan |
8.097.04c atas tvā gīrbhir dyugad indra keśibhiḥ sutāvām̐ ā vivāsati ||
8.097.05a yad vāsi rocane divaḥ samudrasyādhi viṣṭapi |
8.097.05c yat pārthive sadane vṛtrahantama yad antarikṣa ā gahi ||
8.097.06a sa naḥ someṣu somapāḥ suteṣu śavasas pate |
8.097.06c mādayasva rādhasā sūnṛtāvatendra rāyā parīṇasā ||
8.097.07a mā na indra parā vṛṇag bhavā naḥ sadhamādyaḥ |
8.097.07c tvaṁ na ūtī tvam in na āpyam mā na indra parā vṛṇak ||
8.097.08a asme indra sacā sute ni ṣadā pītaye madhu |
8.097.08c kṛdhī jaritre maghavann avo mahad asme indra sacā sute ||
8.097.09a na tvā devāsa āśata na martyāso adrivaḥ |
8.097.09c viśvā jātāni śavasābhibhūr asi na tvā devāsa āśata ||
8.097.10a viśvāḥ pṛtanā abhibhūtaraṁ naraṁ sajūs tatakṣur indraṁ jajanuś ca rājase |
8.097.10c kratvā variṣṭhaṁ vara āmurim utogram ojiṣṭhaṁ tavasaṁ tarasvinam ||
8.097.11a sam īṁ rebhāso asvarann indraṁ somasya pītaye |
8.097.11c svarpatiṁ yad īṁ vṛdhe dhṛtavrato hy ojasā sam ūtibhiḥ ||
8.097.12a nemiṁ namanti cakṣasā meṣaṁ viprā abhisvarā |
8.097.12c sudītayo vo adruho 'pi karṇe tarasvinaḥ sam ṛkvabhiḥ ||
8.097.13a tam indraṁ johavīmi maghavānam ugraṁ satrā dadhānam apratiṣkutaṁ śavāṁsi |
8.097.13c maṁhiṣṭho gīrbhir ā ca yajñiyo vavartad rāye no viśvā supathā kṛṇotu vajrī ||
8.097.14a tvam pura indra cikid enā vy ojasā śaviṣṭha śakra nāśayadhyai |
8.097.14c tvad viśvāni bhuvanāni vajrin dyāvā rejete pṛthivī ca bhīṣā ||
8.097.15a tan ma ṛtam indra śūra citra pātv apo na vajrin duritāti parṣi bhūri |
8.097.15c kadā na indra rāya ā daśasyer viśvapsnyasya spṛhayāyyasya rājan ||

8.098.01a indrāya sāma gāyata viprāya bṛhate bṛhat |
8.098.01c dharmakṛte vipaścite panasyave ||
8.098.02a tvam indrābhibhūr asi tvaṁ sūryam arocayaḥ |
8.098.02c viśvakarmā viśvadevo mahām̐ asi ||
8.098.03a vibhrājañ jyotiṣā svar agaccho rocanaṁ divaḥ |
8.098.03c devās ta indra sakhyāya yemire ||
8.098.04a endra no gadhi priyaḥ satrājid agohyaḥ |
8.098.04c girir na viśvatas pṛthuḥ patir divaḥ ||
8.098.05a abhi hi satya somapā ubhe babhūtha rodasī |
8.098.05c indrāsi sunvato vṛdhaḥ patir divaḥ ||
8.098.06a tvaṁ hi śaśvatīnām indra dartā purām asi |
8.098.06c hantā dasyor manor vṛdhaḥ patir divaḥ ||
8.098.07a adhā hīndra girvaṇa upa tvā kāmān mahaḥ sasṛjmahe |
8.098.07c udeva yanta udabhiḥ ||
8.098.08a vār ṇa tvā yavyābhir vardhanti śūra brahmāṇi |
8.098.08c vāvṛdhvāṁsaṁ cid adrivo dive-dive ||
8.098.09a yuñjanti harī iṣirasya gāthayorau ratha uruyuge |
8.098.09c indravāhā vacoyujā ||
8.098.10a tvaṁ na indrā bharam̐ ojo nṛmṇaṁ śatakrato vicarṣaṇe |
8.098.10c ā vīram pṛtanāṣaham ||
8.098.11a tvaṁ hi naḥ pitā vaso tvam mātā śatakrato babhūvitha |
8.098.11c adhā te sumnam īmahe ||
8.098.12a tvāṁ śuṣmin puruhūta vājayantam upa bruve śatakrato |
8.098.12c sa no rāsva suvīryam ||

8.099.01a tvām idā hyo naro 'pīpyan vajrin bhūrṇayaḥ |
8.099.01c sa indra stomavāhasām iha śrudhy upa svasaram ā gahi ||
8.099.02a matsvā suśipra harivas tad īmahe tve ā bhūṣanti vedhasaḥ |
8.099.02c tava śravāṁsy upamāny ukthyā suteṣv indra girvaṇaḥ ||
8.099.03a śrāyanta iva sūryaṁ viśved indrasya bhakṣata |
8.099.03c vasūni jāte janamāna ojasā prati bhāgaṁ na dīdhima ||
8.099.04a anarśarātiṁ vasudām upa stuhi bhadrā indrasya rātayaḥ |
8.099.04c so asya kāmaṁ vidhato na roṣati mano dānāya codayan ||
8.099.05a tvam indra pratūrtiṣv abhi viśvā asi spṛdhaḥ |
8.099.05c aśastihā janitā viśvatūr asi tvaṁ tūrya taruṣyataḥ ||
8.099.06a anu te śuṣmaṁ turayantam īyatuḥ kṣoṇī śiśuṁ na mātarā |
8.099.06c viśvās te spṛdhaḥ śnathayanta manyave vṛtraṁ yad indra tūrvasi ||
8.099.07a ita ūtī vo ajaram prahetāram aprahitam |
8.099.07c āśuṁ jetāraṁ hetāraṁ rathītamam atūrtaṁ tugryāvṛdham ||
8.099.08a iṣkartāram aniṣkṛtaṁ sahaskṛtaṁ śatamūtiṁ śatakratum |
8.099.08c samānam indram avase havāmahe vasavānaṁ vasūjuvam ||

8.100.01a ayaṁ ta emi tanvā purastād viśve devā abhi mā yanti paścāt |
8.100.01c yadā mahyaṁ dīdharo bhāgam indrād in mayā kṛṇavo vīryāṇi ||
8.100.02a dadhāmi te madhuno bhakṣam agre hitas te bhāgaḥ suto astu somaḥ |
8.100.02c asaś ca tvaṁ dakṣiṇataḥ sakhā me 'dhā vṛtrāṇi jaṅghanāva bhūri ||
8.100.03a pra su stomam bharata vājayanta indrāya satyaṁ yadi satyam asti |
8.100.03c nendro astīti nema u tva āha ka īṁ dadarśa kam abhi ṣṭavāma ||
8.100.04a ayam asmi jaritaḥ paśya meha viśvā jātāny abhy asmi mahnā |
8.100.04c ṛtasya mā pradiśo vardhayanty ādardiro bhuvanā dardarīmi ||
8.100.05a ā yan mā venā aruhann ṛtasyam̐ ekam āsīnaṁ haryatasya pṛṣṭhe |
8.100.05c manaś cin me hṛda ā praty avocad acikradañ chiśumantaḥ sakhāyaḥ ||
8.100.06a viśvet tā te savaneṣu pravācyā yā cakartha maghavann indra sunvate |
8.100.06c pārāvataṁ yat purusambhṛtaṁ vasv apāvṛṇoḥ śarabhāya ṛṣibandhave ||
8.100.07a pra nūnaṁ dhāvatā pṛthaṅ neha yo vo avāvarīt |
8.100.07c ni ṣīṁ vṛtrasya marmaṇi vajram indro apīpatat ||
8.100.08a manojavā ayamāna āyasīm atarat puram |
8.100.08c divaṁ suparṇo gatvāya somaṁ vajriṇa ābharat ||
8.100.09a samudre antaḥ śayata udnā vajro abhīvṛtaḥ |
8.100.09c bharanty asmai saṁyataḥ puraḥprasravaṇā balim ||
8.100.10a yad vāg vadanty avicetanāni rāṣṭrī devānāṁ niṣasāda mandrā |
8.100.10c catasra ūrjaṁ duduhe payāṁsi kva svid asyāḥ paramaṁ jagāma ||
8.100.11a devīṁ vācam ajanayanta devās tāṁ viśvarūpāḥ paśavo vadanti |
8.100.11c sā no mandreṣam ūrjaṁ duhānā dhenur vāg asmān upa suṣṭutaitu ||
8.100.12a sakhe viṣṇo vitaraṁ vi kramasva dyaur dehi lokaṁ vajrāya viṣkabhe |
8.100.12c hanāva vṛtraṁ riṇacāva sindhūn indrasya yantu prasave visṛṣṭāḥ ||

8.101.01a ṛdhag itthā sa martyaḥ śaśame devatātaye |
8.101.01c yo nūnam mitrāvaruṇāv abhiṣṭaya ācakre havyadātaye ||
8.101.02a varṣiṣṭhakṣatrā urucakṣasā narā rājānā dīrghaśruttamā |
8.101.02c tā bāhutā na daṁsanā ratharyataḥ sākaṁ sūryasya raśmibhiḥ ||
8.101.03a pra yo vām mitrāvaruṇājiro dūto adravat |
8.101.03c ayaḥśīrṣā maderaghuḥ ||
8.101.04a na yaḥ sampṛcche na punar havītave na saṁvādāya ramate |
8.101.04c tasmān no adya samṛter uruṣyatam bāhubhyāṁ na uruṣyatam ||
8.101.05a pra mitrāya prāryamṇe sacathyam ṛtāvaso |
8.101.05c varūthyaṁ varuṇe chandyaṁ vacaḥ stotraṁ rājasu gāyata ||
8.101.06a te hinvire aruṇaṁ jenyaṁ vasv ekam putraṁ tisṝṇām |
8.101.06c te dhāmāny amṛtā martyānām adabdhā abhi cakṣate ||
8.101.07a ā me vacāṁsy udyatā dyumattamāni kartvā |
8.101.07c ubhā yātaṁ nāsatyā sajoṣasā prati havyāni vītaye ||
8.101.08a rātiṁ yad vām arakṣasaṁ havāmahe yuvābhyāṁ vājinīvasū |
8.101.08c prācīṁ hotrām pratirantāv itaṁ narā gṛṇānā jamadagninā ||
8.101.09a ā no yajñaṁ divispṛśaṁ vāyo yāhi sumanmabhiḥ |
8.101.09c antaḥ pavitra upari śrīṇāno 'yaṁ śukro ayāmi te ||
8.101.10a vety adhvaryuḥ pathibhī rajiṣṭhaiḥ prati havyāni vītaye |
8.101.10c adhā niyutva ubhayasya naḥ piba śuciṁ somaṁ gavāśiram ||
8.101.11a baṇ mahām̐ asi sūrya baḻ āditya mahām̐ asi |
8.101.11c mahas te sato mahimā panasyate 'ddhā deva mahām̐ asi ||
8.101.12a baṭ sūrya śravasā mahām̐ asi satrā deva mahām̐ asi |
8.101.12c mahnā devānām asuryaḥ purohito vibhu jyotir adābhyam ||
8.101.13a iyaṁ yā nīcy arkiṇī rūpā rohiṇyā kṛtā |
8.101.13c citreva praty adarśy āyaty antar daśasu bāhuṣu ||
8.101.14a prajā ha tisro atyāyam īyur ny anyā arkam abhito viviśre |
8.101.14c bṛhad dha tasthau bhuvaneṣv antaḥ pavamāno harita ā viveśa ||
8.101.15a mātā rudrāṇāṁ duhitā vasūnāṁ svasādityānām amṛtasya nābhiḥ |
8.101.15c pra nu vocaṁ cikituṣe janāya mā gām anāgām aditiṁ vadhiṣṭa ||
8.101.16a vacovidaṁ vācam udīrayantīṁ viśvābhir dhībhir upatiṣṭhamānām |
8.101.16c devīṁ devebhyaḥ pary eyuṣīṁ gām ā māvṛkta martyo dabhracetāḥ ||

8.102.01a tvam agne bṛhad vayo dadhāsi deva dāśuṣe |
8.102.01c kavir gṛhapatir yuvā ||
8.102.02a sa na īḻānayā saha devām̐ agne duvasyuvā |
8.102.02c cikid vibhānav ā vaha ||
8.102.03a tvayā ha svid yujā vayaṁ codiṣṭhena yaviṣṭhya |
8.102.03c abhi ṣmo vājasātaye ||
8.102.04a aurvabhṛguvac chucim apnavānavad ā huve |
8.102.04c agniṁ samudravāsasam ||
8.102.05a huve vātasvanaṁ kavim parjanyakrandyaṁ sahaḥ |
8.102.05c agniṁ samudravāsasam ||
8.102.06a ā savaṁ savitur yathā bhagasyeva bhujiṁ huve |
8.102.06c agniṁ samudravāsasam ||
8.102.07a agniṁ vo vṛdhantam adhvarāṇām purūtamam |
8.102.07c acchā naptre sahasvate ||
8.102.08a ayaṁ yathā na ābhuvat tvaṣṭā rūpeva takṣyā |
8.102.08c asya kratvā yaśasvataḥ ||
8.102.09a ayaṁ viśvā abhi śriyo 'gnir deveṣu patyate |
8.102.09c ā vājair upa no gamat ||
8.102.10a viśveṣām iha stuhi hotṝṇāṁ yaśastamam |
8.102.10c agniṁ yajñeṣu pūrvyam ||
8.102.11a śīram pāvakaśociṣaṁ jyeṣṭho yo dameṣv ā |
8.102.11c dīdāya dīrghaśruttamaḥ ||
8.102.12a tam arvantaṁ na sānasiṁ gṛṇīhi vipra śuṣmiṇam |
8.102.12c mitraṁ na yātayajjanam ||
8.102.13a upa tvā jāmayo giro dediśatīr haviṣkṛtaḥ |
8.102.13c vāyor anīke asthiran ||
8.102.14a yasya tridhātv avṛtam barhis tasthāv asaṁdinam |
8.102.14c āpaś cin ni dadhā padam ||
8.102.15a padaṁ devasya mīḻhuṣo 'nādhṛṣṭābhir ūtibhiḥ |
8.102.15c bhadrā sūrya ivopadṛk ||
8.102.16a agne ghṛtasya dhītibhis tepāno deva śociṣā |
8.102.16c ā devān vakṣi yakṣi ca ||
8.102.17a taṁ tvājananta mātaraḥ kaviṁ devāso aṅgiraḥ |
8.102.17c havyavāham amartyam ||
8.102.18a pracetasaṁ tvā kave 'gne dūtaṁ vareṇyam |
8.102.18c havyavāhaṁ ni ṣedire ||
8.102.19a nahi me asty aghnyā na svadhitir vananvati |
8.102.19c athaitādṛg bharāmi te ||
8.102.20a yad agne kāni kāni cid ā te dārūṇi dadhmasi |
8.102.20c tā juṣasva yaviṣṭhya ||
8.102.21a yad atty upajihvikā yad vamro atisarpati |
8.102.21c sarvaṁ tad astu te ghṛtam ||
8.102.22a agnim indhāno manasā dhiyaṁ saceta martyaḥ |
8.102.22c agnim īdhe vivasvabhiḥ ||

8.103.01a adarśi gātuvittamo yasmin vratāny ādadhuḥ |
8.103.01c upo ṣu jātam āryasya vardhanam agniṁ nakṣanta no giraḥ ||
8.103.02a pra daivodāso agnir devām̐ acchā na majmanā |
8.103.02c anu mātaram pṛthivīṁ vi vāvṛte tasthau nākasya sānavi ||
8.103.03a yasmād rejanta kṛṣṭayaś carkṛtyāni kṛṇvataḥ |
8.103.03c sahasrasām medhasātāv iva tmanāgniṁ dhībhiḥ saparyata ||
8.103.04a pra yaṁ rāye ninīṣasi marto yas te vaso dāśat |
8.103.04c sa vīraṁ dhatte agna ukthaśaṁsinaṁ tmanā sahasrapoṣiṇam ||
8.103.05a sa dṛḻhe cid abhi tṛṇatti vājam arvatā sa dhatte akṣiti śravaḥ |
8.103.05c tve devatrā sadā purūvaso viśvā vāmāni dhīmahi ||
8.103.06a yo viśvā dayate vasu hotā mandro janānām |
8.103.06c madhor na pātrā prathamāny asmai pra stomā yanty agnaye ||
8.103.07a aśvaṁ na gīrbhī rathyaṁ sudānavo marmṛjyante devayavaḥ |
8.103.07c ubhe toke tanaye dasma viśpate parṣi rādho maghonām ||
8.103.08a pra maṁhiṣṭhāya gāyata ṛtāvne bṛhate śukraśociṣe |
8.103.08c upastutāso agnaye ||
8.103.09a ā vaṁsate maghavā vīravad yaśaḥ samiddho dyumny āhutaḥ |
8.103.09c kuvin no asya sumatir navīyasy acchā vājebhir āgamat ||
8.103.10a preṣṭham u priyāṇāṁ stuhy āsāvātithim |
8.103.10c agniṁ rathānāṁ yamam ||
8.103.11a uditā yo niditā veditā vasv ā yajñiyo vavartati |
8.103.11c duṣṭarā yasya pravaṇe normayo dhiyā vājaṁ siṣāsataḥ ||
8.103.12a mā no hṛṇītām atithir vasur agniḥ purupraśasta eṣaḥ |
8.103.12c yaḥ suhotā svadhvaraḥ ||
8.103.13a mo te riṣan ye acchoktibhir vaso 'gne kebhiś cid evaiḥ |
8.103.13c kīriś cid dhi tvām īṭṭe dūtyāya rātahavyaḥ svadhvaraḥ ||
8.103.14a āgne yāhi marutsakhā rudrebhiḥ somapītaye |
8.103.14c sobharyā upa suṣṭutim mādayasva svarṇare ||


9.001.01a svādiṣṭhayā madiṣṭhayā pavasva soma dhārayā |
9.001.01c indrāya pātave sutaḥ ||
9.001.02a rakṣohā viśvacarṣaṇir abhi yonim ayohatam |
9.001.02c druṇā sadhastham āsadat ||
9.001.03a varivodhātamo bhava maṁhiṣṭho vṛtrahantamaḥ |
9.001.03c parṣi rādho maghonām ||
9.001.04a abhy arṣa mahānāṁ devānāṁ vītim andhasā |
9.001.04c abhi vājam uta śravaḥ ||
9.001.05a tvām acchā carāmasi tad id arthaṁ dive-dive |
9.001.05c indo tve na āśasaḥ ||
9.001.06a punāti te parisrutaṁ somaṁ sūryasya duhitā |
9.001.06c vāreṇa śaśvatā tanā ||
9.001.07a tam īm aṇvīḥ samarya ā gṛbhṇanti yoṣaṇo daśa |
9.001.07c svasāraḥ pārye divi ||
9.001.08a tam īṁ hinvanty agruvo dhamanti bākuraṁ dṛtim |
9.001.08c tridhātu vāraṇam madhu ||
9.001.09a abhīmam aghnyā uta śrīṇanti dhenavaḥ śiśum |
9.001.09c somam indrāya pātave ||
9.001.10a asyed indro madeṣv ā viśvā vṛtrāṇi jighnate |
9.001.10c śūro maghā ca maṁhate ||

9.002.01a pavasva devavīr ati pavitraṁ soma raṁhyā |
9.002.01c indram indo vṛṣā viśa ||
9.002.02a ā vacyasva mahi psaro vṛṣendo dyumnavattamaḥ |
9.002.02c ā yoniṁ dharṇasiḥ sadaḥ ||
9.002.03a adhukṣata priyam madhu dhārā sutasya vedhasaḥ |
9.002.03c apo vasiṣṭa sukratuḥ ||
9.002.04a mahāntaṁ tvā mahīr anv āpo arṣanti sindhavaḥ |
9.002.04c yad gobhir vāsayiṣyase ||
9.002.05a samudro apsu māmṛje viṣṭambho dharuṇo divaḥ |
9.002.05c somaḥ pavitre asmayuḥ ||
9.002.06a acikradad vṛṣā harir mahān mitro na darśataḥ |
9.002.06c saṁ sūryeṇa rocate ||
9.002.07a giras ta inda ojasā marmṛjyante apasyuvaḥ |
9.002.07c yābhir madāya śumbhase ||
9.002.08a taṁ tvā madāya ghṛṣvaya u lokakṛtnum īmahe |
9.002.08c tava praśastayo mahīḥ ||
9.002.09a asmabhyam indav indrayur madhvaḥ pavasva dhārayā |
9.002.09c parjanyo vṛṣṭimām̐ iva ||
9.002.10a goṣā indo nṛṣā asy aśvasā vājasā uta |
9.002.10c ātmā yajñasya pūrvyaḥ ||

9.003.01a eṣa devo amartyaḥ parṇavīr iva dīyati |
9.003.01c abhi droṇāny āsadam ||
9.003.02a eṣa devo vipā kṛto 'ti hvarāṁsi dhāvati |
9.003.02c pavamāno adābhyaḥ ||
9.003.03a eṣa devo vipanyubhiḥ pavamāna ṛtāyubhiḥ |
9.003.03c harir vājāya mṛjyate ||
9.003.04a eṣa viśvāni vāryā śūro yann iva satvabhiḥ |
9.003.04c pavamānaḥ siṣāsati ||
9.003.05a eṣa devo ratharyati pavamāno daśasyati |
9.003.05c āviṣ kṛṇoti vagvanum ||
9.003.06a eṣa viprair abhiṣṭuto 'po devo vi gāhate |
9.003.06c dadhad ratnāni dāśuṣe ||
9.003.07a eṣa divaṁ vi dhāvati tiro rajāṁsi dhārayā |
9.003.07c pavamānaḥ kanikradat ||
9.003.08a eṣa divaṁ vy āsarat tiro rajāṁsy aspṛtaḥ |
9.003.08c pavamānaḥ svadhvaraḥ ||
9.003.09a eṣa pratnena janmanā devo devebhyaḥ sutaḥ |
9.003.09c hariḥ pavitre arṣati ||
9.003.10a eṣa u sya puruvrato jajñāno janayann iṣaḥ |
9.003.10c dhārayā pavate sutaḥ ||

9.004.01a sanā ca soma jeṣi ca pavamāna mahi śravaḥ |
9.004.01c athā no vasyasas kṛdhi ||
9.004.02a sanā jyotiḥ sanā svar viśvā ca soma saubhagā |
9.004.02c athā no vasyasas kṛdhi ||
9.004.03a sanā dakṣam uta kratum apa soma mṛdho jahi |
9.004.03c athā no vasyasas kṛdhi ||
9.004.04a pavītāraḥ punītana somam indrāya pātave |
9.004.04c athā no vasyasas kṛdhi ||
9.004.05a tvaṁ sūrye na ā bhaja tava kratvā tavotibhiḥ |
9.004.05c athā no vasyasas kṛdhi ||
9.004.06a tava kratvā tavotibhir jyok paśyema sūryam |
9.004.06c athā no vasyasas kṛdhi ||
9.004.07a abhy arṣa svāyudha soma dvibarhasaṁ rayim |
9.004.07c athā no vasyasas kṛdhi ||
9.004.08a abhy arṣānapacyuto rayiṁ samatsu sāsahiḥ |
9.004.08c athā no vasyasas kṛdhi ||
9.004.09a tvāṁ yajñair avīvṛdhan pavamāna vidharmaṇi |
9.004.09c athā no vasyasas kṛdhi ||
9.004.10a rayiṁ naś citram aśvinam indo viśvāyum ā bhara |
9.004.10c athā no vasyasas kṛdhi ||

9.005.01a samiddho viśvatas patiḥ pavamāno vi rājati |
9.005.01c prīṇan vṛṣā kanikradat ||
9.005.02a tanūnapāt pavamānaḥ śṛṅge śiśāno arṣati |
9.005.02c antarikṣeṇa rārajat ||
9.005.03a īḻenyaḥ pavamāno rayir vi rājati dyumān |
9.005.03c madhor dhārābhir ojasā ||
9.005.04a barhiḥ prācīnam ojasā pavamānaḥ stṛṇan hariḥ |
9.005.04c deveṣu deva īyate ||
9.005.05a ud ātair jihate bṛhad dvāro devīr hiraṇyayīḥ |
9.005.05c pavamānena suṣṭutāḥ ||
9.005.06a suśilpe bṛhatī mahī pavamāno vṛṣaṇyati |
9.005.06c naktoṣāsā na darśate ||
9.005.07a ubhā devā nṛcakṣasā hotārā daivyā huve |
9.005.07c pavamāna indro vṛṣā ||
9.005.08a bhāratī pavamānasya sarasvatīḻā mahī |
9.005.08c imaṁ no yajñam ā gaman tisro devīḥ supeśasaḥ ||
9.005.09a tvaṣṭāram agrajāṁ gopām puroyāvānam ā huve |
9.005.09c indur indro vṛṣā hariḥ pavamānaḥ prajāpatiḥ ||
9.005.10a vanaspatim pavamāna madhvā sam aṅgdhi dhārayā |
9.005.10c sahasravalśaṁ haritam bhrājamānaṁ hiraṇyayam ||
9.005.11a viśve devāḥ svāhākṛtim pavamānasyā gata |
9.005.11c vāyur bṛhaspatiḥ sūryo 'gnir indraḥ sajoṣasaḥ ||

9.006.01a mandrayā soma dhārayā vṛṣā pavasva devayuḥ |
9.006.01c avyo vāreṣv asmayuḥ ||
9.006.02a abhi tyam madyam madam indav indra iti kṣara |
9.006.02c abhi vājino arvataḥ ||
9.006.03a abhi tyam pūrvyam madaṁ suvāno arṣa pavitra ā |
9.006.03c abhi vājam uta śravaḥ ||
9.006.04a anu drapsāsa indava āpo na pravatāsaran |
9.006.04c punānā indram āśata ||
9.006.05a yam atyam iva vājinam mṛjanti yoṣaṇo daśa |
9.006.05c vane krīḻantam atyavim ||
9.006.06a taṁ gobhir vṛṣaṇaṁ rasam madāya devavītaye |
9.006.06c sutam bharāya saṁ sṛja ||
9.006.07a devo devāya dhārayendrāya pavate sutaḥ |
9.006.07c payo yad asya pīpayat ||
9.006.08a ātmā yajñasya raṁhyā suṣvāṇaḥ pavate sutaḥ |
9.006.08c pratnaṁ ni pāti kāvyam ||
9.006.09a evā punāna indrayur madam madiṣṭha vītaye |
9.006.09c guhā cid dadhiṣe giraḥ ||

9.007.01a asṛgram indavaḥ pathā dharmann ṛtasya suśriyaḥ |
9.007.01c vidānā asya yojanam ||
9.007.02a pra dhārā madhvo agriyo mahīr apo vi gāhate |
9.007.02c havir haviṣṣu vandyaḥ ||
9.007.03a pra yujo vāco agriyo vṛṣāva cakradad vane |
9.007.03c sadmābhi satyo adhvaraḥ ||
9.007.04a pari yat kāvyā kavir nṛmṇā vasāno arṣati |
9.007.04c svar vājī siṣāsati ||
9.007.05a pavamāno abhi spṛdho viśo rājeva sīdati |
9.007.05c yad īm ṛṇvanti vedhasaḥ ||
9.007.06a avyo vāre pari priyo harir vaneṣu sīdati |
9.007.06c rebho vanuṣyate matī ||
9.007.07a sa vāyum indram aśvinā sākam madena gacchati |
9.007.07c raṇā yo asya dharmabhiḥ ||
9.007.08a ā mitrāvaruṇā bhagam madhvaḥ pavanta ūrmayaḥ |
9.007.08c vidānā asya śakmabhiḥ ||
9.007.09a asmabhyaṁ rodasī rayim madhvo vājasya sātaye |
9.007.09c śravo vasūni saṁ jitam ||

9.008.01a ete somā abhi priyam indrasya kāmam akṣaran |
9.008.01c vardhanto asya vīryam ||
9.008.02a punānāsaś camūṣado gacchanto vāyum aśvinā |
9.008.02c te no dhāntu suvīryam ||
9.008.03a indrasya soma rādhase punāno hārdi codaya |
9.008.03c ṛtasya yonim āsadam ||
9.008.04a mṛjanti tvā daśa kṣipo hinvanti sapta dhītayaḥ |
9.008.04c anu viprā amādiṣuḥ ||
9.008.05a devebhyas tvā madāya kaṁ sṛjānam ati meṣyaḥ |
9.008.05c saṁ gobhir vāsayāmasi ||
9.008.06a punānaḥ kalaśeṣv ā vastrāṇy aruṣo hariḥ |
9.008.06c pari gavyāny avyata ||
9.008.07a maghona ā pavasva no jahi viśvā apa dviṣaḥ |
9.008.07c indo sakhāyam ā viśa ||
9.008.08a vṛṣṭiṁ divaḥ pari srava dyumnam pṛthivyā adhi |
9.008.08c saho naḥ soma pṛtsu dhāḥ ||
9.008.09a nṛcakṣasaṁ tvā vayam indrapītaṁ svarvidam |
9.008.09c bhakṣīmahi prajām iṣam ||

9.009.01a pari priyā divaḥ kavir vayāṁsi naptyor hitaḥ |
9.009.01c suvāno yāti kavikratuḥ ||
9.009.02a pra-pra kṣayāya panyase janāya juṣṭo adruhe |
9.009.02c vīty arṣa caniṣṭhayā ||
9.009.03a sa sūnur mātarā śucir jāto jāte arocayat |
9.009.03c mahān mahī ṛtāvṛdhā ||
9.009.04a sa sapta dhītibhir hito nadyo ajinvad adruhaḥ |
9.009.04c yā ekam akṣi vāvṛdhuḥ ||
9.009.05a tā abhi santam astṛtam mahe yuvānam ā dadhuḥ |
9.009.05c indum indra tava vrate ||
9.009.06a abhi vahnir amartyaḥ sapta paśyati vāvahiḥ |
9.009.06c krivir devīr atarpayat ||
9.009.07a avā kalpeṣu naḥ pumas tamāṁsi soma yodhyā |
9.009.07c tāni punāna jaṅghanaḥ ||
9.009.08a nū navyase navīyase sūktāya sādhayā pathaḥ |
9.009.08c pratnavad rocayā rucaḥ ||
9.009.09a pavamāna mahi śravo gām aśvaṁ rāsi vīravat |
9.009.09c sanā medhāṁ sanā svaḥ ||

9.010.01a pra svānāso rathā ivārvanto na śravasyavaḥ |
9.010.01c somāso rāye akramuḥ ||
9.010.02a hinvānāso rathā iva dadhanvire gabhastyoḥ |
9.010.02c bharāsaḥ kāriṇām iva ||
9.010.03a rājāno na praśastibhiḥ somāso gobhir añjate |
9.010.03c yajño na sapta dhātṛbhiḥ ||
9.010.04a pari suvānāsa indavo madāya barhaṇā girā |
9.010.04c sutā arṣanti dhārayā ||
9.010.05a āpānāso vivasvato jananta uṣaso bhagam |
9.010.05c sūrā aṇvaṁ vi tanvate ||
9.010.06a apa dvārā matīnām pratnā ṛṇvanti kāravaḥ |
9.010.06c vṛṣṇo harasa āyavaḥ ||
9.010.07a samīcīnāsa āsate hotāraḥ saptajāmayaḥ |
9.010.07c padam ekasya piprataḥ ||
9.010.08a nābhā nābhiṁ na ā dade cakṣuś cit sūrye sacā |
9.010.08c kaver apatyam ā duhe ||
9.010.09a abhi priyā divas padam adhvaryubhir guhā hitam |
9.010.09c sūraḥ paśyati cakṣasā ||

9.011.01a upāsmai gāyatā naraḥ pavamānāyendave |
9.011.01c abhi devām̐ iyakṣate ||
9.011.02a abhi te madhunā payo 'tharvāṇo aśiśrayuḥ |
9.011.02c devaṁ devāya devayu ||
9.011.03a sa naḥ pavasva śaṁ gave śaṁ janāya śam arvate |
9.011.03c śaṁ rājann oṣadhībhyaḥ ||
9.011.04a babhrave nu svatavase 'ruṇāya divispṛśe |
9.011.04c somāya gātham arcata ||
9.011.05a hastacyutebhir adribhiḥ sutaṁ somam punītana |
9.011.05c madhāv ā dhāvatā madhu ||
9.011.06a namased upa sīdata dadhned abhi śrīṇītana |
9.011.06c indum indre dadhātana ||
9.011.07a amitrahā vicarṣaṇiḥ pavasva soma śaṁ gave |
9.011.07c devebhyo anukāmakṛt ||
9.011.08a indrāya soma pātave madāya pari ṣicyase |
9.011.08c manaścin manasas patiḥ ||
9.011.09a pavamāna suvīryaṁ rayiṁ soma rirīhi naḥ |
9.011.09c indav indreṇa no yujā ||

9.012.01a somā asṛgram indavaḥ sutā ṛtasya sādane |
9.012.01c indrāya madhumattamāḥ ||
9.012.02a abhi viprā anūṣata gāvo vatsaṁ na mātaraḥ |
9.012.02c indraṁ somasya pītaye ||
9.012.03a madacyut kṣeti sādane sindhor ūrmā vipaścit |
9.012.03c somo gaurī adhi śritaḥ ||
9.012.04a divo nābhā vicakṣaṇo 'vyo vāre mahīyate |
9.012.04c somo yaḥ sukratuḥ kaviḥ ||
9.012.05a yaḥ somaḥ kalaśeṣv ām̐ antaḥ pavitra āhitaḥ |
9.012.05c tam induḥ pari ṣasvaje ||
9.012.06a pra vācam indur iṣyati samudrasyādhi viṣṭapi |
9.012.06c jinvan kośam madhuścutam ||
9.012.07a nityastotro vanaspatir dhīnām antaḥ sabardughaḥ |
9.012.07c hinvāno mānuṣā yugā ||
9.012.08a abhi priyā divas padā somo hinvāno arṣati |
9.012.08c viprasya dhārayā kaviḥ ||
9.012.09a ā pavamāna dhāraya rayiṁ sahasravarcasam |
9.012.09c asme indo svābhuvam ||

9.013.01a somaḥ punāno arṣati sahasradhāro atyaviḥ |
9.013.01c vāyor indrasya niṣkṛtam ||
9.013.02a pavamānam avasyavo vipram abhi pra gāyata |
9.013.02c suṣvāṇaṁ devavītaye ||
9.013.03a pavante vājasātaye somāḥ sahasrapājasaḥ |
9.013.03c gṛṇānā devavītaye ||
9.013.04a uta no vājasātaye pavasva bṛhatīr iṣaḥ |
9.013.04c dyumad indo suvīryam ||
9.013.05a te naḥ sahasriṇaṁ rayim pavantām ā suvīryam |
9.013.05c suvānā devāsa indavaḥ ||
9.013.06a atyā hiyānā na hetṛbhir asṛgraṁ vājasātaye |
9.013.06c vi vāram avyam āśavaḥ ||
9.013.07a vāśrā arṣantīndavo 'bhi vatsaṁ na dhenavaḥ |
9.013.07c dadhanvire gabhastyoḥ ||
9.013.08a juṣṭa indrāya matsaraḥ pavamāna kanikradat |
9.013.08c viśvā apa dviṣo jahi ||
9.013.09a apaghnanto arāvṇaḥ pavamānāḥ svardṛśaḥ |
9.013.09c yonāv ṛtasya sīdata ||

9.014.01a pari prāsiṣyadat kaviḥ sindhor ūrmāv adhi śritaḥ |
9.014.01c kāram bibhrat puruspṛham ||
9.014.02a girā yadī sabandhavaḥ pañca vrātā apasyavaḥ |
9.014.02c pariṣkṛṇvanti dharṇasim ||
9.014.03a ād asya śuṣmiṇo rase viśve devā amatsata |
9.014.03c yadī gobhir vasāyate ||
9.014.04a niriṇāno vi dhāvati jahac charyāṇi tānvā |
9.014.04c atrā saṁ jighnate yujā ||
9.014.05a naptībhir yo vivasvataḥ śubhro na māmṛje yuvā |
9.014.05c gāḥ kṛṇvāno na nirṇijam ||
9.014.06a ati śritī tiraścatā gavyā jigāty aṇvyā |
9.014.06c vagnum iyarti yaṁ vide ||
9.014.07a abhi kṣipaḥ sam agmata marjayantīr iṣas patim |
9.014.07c pṛṣṭhā gṛbhṇata vājinaḥ ||
9.014.08a pari divyāni marmṛśad viśvāni soma pārthivā |
9.014.08c vasūni yāhy asmayuḥ ||

9.015.01a eṣa dhiyā yāty aṇvyā śūro rathebhir āśubhiḥ |
9.015.01c gacchann indrasya niṣkṛtam ||
9.015.02a eṣa purū dhiyāyate bṛhate devatātaye |
9.015.02c yatrāmṛtāsa āsate ||
9.015.03a eṣa hito vi nīyate 'ntaḥ śubhrāvatā pathā |
9.015.03c yadī tuñjanti bhūrṇayaḥ ||
9.015.04a eṣa śṛṅgāṇi dodhuvac chiśīte yūthyo vṛṣā |
9.015.04c nṛmṇā dadhāna ojasā ||
9.015.05a eṣa rukmibhir īyate vājī śubhrebhir aṁśubhiḥ |
9.015.05c patiḥ sindhūnām bhavan ||
9.015.06a eṣa vasūni pibdanā paruṣā yayivām̐ ati |
9.015.06c ava śādeṣu gacchati ||
9.015.07a etam mṛjanti marjyam upa droṇeṣv āyavaḥ |
9.015.07c pracakrāṇam mahīr iṣaḥ ||
9.015.08a etam u tyaṁ daśa kṣipo mṛjanti sapta dhītayaḥ |
9.015.08c svāyudham madintamam ||

9.016.01a pra te sotāra oṇyo rasam madāya ghṛṣvaye |
9.016.01c sargo na takty etaśaḥ ||
9.016.02a kratvā dakṣasya rathyam apo vasānam andhasā |
9.016.02c goṣām aṇveṣu saścima ||
9.016.03a anaptam apsu duṣṭaraṁ somam pavitra ā sṛja |
9.016.03c punīhīndrāya pātave ||
9.016.04a pra punānasya cetasā somaḥ pavitre arṣati |
9.016.04c kratvā sadhastham āsadat ||
9.016.05a pra tvā namobhir indava indra somā asṛkṣata |
9.016.05c mahe bharāya kāriṇaḥ ||
9.016.06a punāno rūpe avyaye viśvā arṣann abhi śriyaḥ |
9.016.06c śūro na goṣu tiṣṭhati ||
9.016.07a divo na sānu pipyuṣī dhārā sutasya vedhasaḥ |
9.016.07c vṛthā pavitre arṣati ||
9.016.08a tvaṁ soma vipaścitaṁ tanā punāna āyuṣu |
9.016.08c avyo vāraṁ vi dhāvasi ||

9.017.01a pra nimneneva sindhavo ghnanto vṛtrāṇi bhūrṇayaḥ |
9.017.01c somā asṛgram āśavaḥ ||
9.017.02a abhi suvānāsa indavo vṛṣṭayaḥ pṛthivīm iva |
9.017.02c indraṁ somāso akṣaran ||
9.017.03a atyūrmir matsaro madaḥ somaḥ pavitre arṣati |
9.017.03c vighnan rakṣāṁsi devayuḥ ||
9.017.04a ā kalaśeṣu dhāvati pavitre pari ṣicyate |
9.017.04c ukthair yajñeṣu vardhate ||
9.017.05a ati trī soma rocanā rohan na bhrājase divam |
9.017.05c iṣṇan sūryaṁ na codayaḥ ||
9.017.06a abhi viprā anūṣata mūrdhan yajñasya kāravaḥ |
9.017.06c dadhānāś cakṣasi priyam ||
9.017.07a tam u tvā vājinaṁ naro dhībhir viprā avasyavaḥ |
9.017.07c mṛjanti devatātaye ||
9.017.08a madhor dhārām anu kṣara tīvraḥ sadhastham āsadaḥ |
9.017.08c cārur ṛtāya pītaye ||

9.018.01a pari suvāno giriṣṭhāḥ pavitre somo akṣāḥ |
9.018.01c madeṣu sarvadhā asi ||
9.018.02a tvaṁ vipras tvaṁ kavir madhu pra jātam andhasaḥ |
9.018.02c madeṣu sarvadhā asi ||
9.018.03a tava viśve sajoṣaso devāsaḥ pītim āśata |
9.018.03c madeṣu sarvadhā asi ||
9.018.04a ā yo viśvāni vāryā vasūni hastayor dadhe |
9.018.04c madeṣu sarvadhā asi ||
9.018.05a ya ime rodasī mahī sam mātareva dohate |
9.018.05c madeṣu sarvadhā asi ||
9.018.06a pari yo rodasī ubhe sadyo vājebhir arṣati |
9.018.06c madeṣu sarvadhā asi ||
9.018.07a sa śuṣmī kalaśeṣv ā punāno acikradat |
9.018.07c madeṣu sarvadhā asi ||

9.019.01a yat soma citram ukthyaṁ divyam pārthivaṁ vasu |
9.019.01c tan naḥ punāna ā bhara ||
9.019.02a yuvaṁ hi sthaḥ svarpatī indraś ca soma gopatī |
9.019.02c īśānā pipyataṁ dhiyaḥ ||
9.019.03a vṛṣā punāna āyuṣu stanayann adhi barhiṣi |
9.019.03c hariḥ san yonim āsadat ||
9.019.04a avāvaśanta dhītayo vṛṣabhasyādhi retasi |
9.019.04c sūnor vatsasya mātaraḥ ||
9.019.05a kuvid vṛṣaṇyantībhyaḥ punāno garbham ādadhat |
9.019.05c yāḥ śukraṁ duhate payaḥ ||
9.019.06a upa śikṣāpatasthuṣo bhiyasam ā dhehi śatruṣu |
9.019.06c pavamāna vidā rayim ||
9.019.07a ni śatroḥ soma vṛṣṇyaṁ ni śuṣmaṁ ni vayas tira |
9.019.07c dūre vā sato anti vā ||

9.020.01a pra kavir devavītaye 'vyo vārebhir arṣati |
9.020.01c sāhvān viśvā abhi spṛdhaḥ ||
9.020.02a sa hi ṣmā jaritṛbhya ā vājaṁ gomantam invati |
9.020.02c pavamānaḥ sahasriṇam ||
9.020.03a pari viśvāni cetasā mṛśase pavase matī |
9.020.03c sa naḥ soma śravo vidaḥ ||
9.020.04a abhy arṣa bṛhad yaśo maghavadbhyo dhruvaṁ rayim |
9.020.04c iṣaṁ stotṛbhya ā bhara ||
9.020.05a tvaṁ rājeva suvrato giraḥ somā viveśitha |
9.020.05c punāno vahne adbhuta ||
9.020.06a sa vahnir apsu duṣṭaro mṛjyamāno gabhastyoḥ |
9.020.06c somaś camūṣu sīdati ||
9.020.07a krīḻur makho na maṁhayuḥ pavitraṁ soma gacchasi |
9.020.07c dadhat stotre suvīryam ||

9.021.01a ete dhāvantīndavaḥ somā indrāya ghṛṣvayaḥ |
9.021.01c matsarāsaḥ svarvidaḥ ||
9.021.02a pravṛṇvanto abhiyujaḥ suṣvaye varivovidaḥ |
9.021.02c svayaṁ stotre vayaskṛtaḥ ||
9.021.03a vṛthā krīḻanta indavaḥ sadhastham abhy ekam it |
9.021.03c sindhor ūrmā vy akṣaran ||
9.021.04a ete viśvāni vāryā pavamānāsa āśata |
9.021.04c hitā na saptayo rathe ||
9.021.05a āsmin piśaṅgam indavo dadhātā venam ādiśe |
9.021.05c yo asmabhyam arāvā ||
9.021.06a ṛbhur na rathyaṁ navaṁ dadhātā ketam ādiśe |
9.021.06c śukrāḥ pavadhvam arṇasā ||
9.021.07a eta u tye avīvaśan kāṣṭhāṁ vājino akrata |
9.021.07c sataḥ prāsāviṣur matim ||

9.022.01a ete somāsa āśavo rathā iva pra vājinaḥ |
9.022.01c sargāḥ sṛṣṭā aheṣata ||
9.022.02a ete vātā ivoravaḥ parjanyasyeva vṛṣṭayaḥ |
9.022.02c agner iva bhramā vṛthā ||
9.022.03a ete pūtā vipaścitaḥ somāso dadhyāśiraḥ |
9.022.03c vipā vy ānaśur dhiyaḥ ||
9.022.04a ete mṛṣṭā amartyāḥ sasṛvāṁso na śaśramuḥ |
9.022.04c iyakṣantaḥ patho rajaḥ ||
9.022.05a ete pṛṣṭhāni rodasor viprayanto vy ānaśuḥ |
9.022.05c utedam uttamaṁ rajaḥ ||
9.022.06a tantuṁ tanvānam uttamam anu pravata āśata |
9.022.06c utedam uttamāyyam ||
9.022.07a tvaṁ soma paṇibhya ā vasu gavyāni dhārayaḥ |
9.022.07c tataṁ tantum acikradaḥ ||

9.023.01a somā asṛgram āśavo madhor madasya dhārayā |
9.023.01c abhi viśvāni kāvyā ||
9.023.02a anu pratnāsa āyavaḥ padaṁ navīyo akramuḥ |
9.023.02c ruce jananta sūryam ||
9.023.03a ā pavamāna no bharāryo adāśuṣo gayam |
9.023.03c kṛdhi prajāvatīr iṣaḥ ||
9.023.04a abhi somāsa āyavaḥ pavante madyam madam |
9.023.04c abhi kośam madhuścutam ||
9.023.05a somo arṣati dharṇasir dadhāna indriyaṁ rasam |
9.023.05c suvīro abhiśastipāḥ ||
9.023.06a indrāya soma pavase devebhyaḥ sadhamādyaḥ |
9.023.06c indo vājaṁ siṣāsasi ||
9.023.07a asya pītvā madānām indro vṛtrāṇy aprati |
9.023.07c jaghāna jaghanac ca nu ||

9.024.01a pra somāso adhanviṣuḥ pavamānāsa indavaḥ |
9.024.01c śrīṇānā apsu mṛñjata ||
9.024.02a abhi gāvo adhanviṣur āpo na pravatā yatīḥ |
9.024.02c punānā indram āśata ||
9.024.03a pra pavamāna dhanvasi somendrāya pātave |
9.024.03c nṛbhir yato vi nīyase ||
9.024.04a tvaṁ soma nṛmādanaḥ pavasva carṣaṇīsahe |
9.024.04c sasnir yo anumādyaḥ ||
9.024.05a indo yad adribhiḥ sutaḥ pavitram paridhāvasi |
9.024.05c aram indrasya dhāmne ||
9.024.06a pavasva vṛtrahantamokthebhir anumādyaḥ |
9.024.06c śuciḥ pāvako adbhutaḥ ||
9.024.07a śuciḥ pāvaka ucyate somaḥ sutasya madhvaḥ |
9.024.07c devāvīr aghaśaṁsahā ||

9.025.01a pavasva dakṣasādhano devebhyaḥ pītaye hare |
9.025.01c marudbhyo vāyave madaḥ ||
9.025.02a pavamāna dhiyā hito 'bhi yoniṁ kanikradat |
9.025.02c dharmaṇā vāyum ā viśa ||
9.025.03a saṁ devaiḥ śobhate vṛṣā kavir yonāv adhi priyaḥ |
9.025.03c vṛtrahā devavītamaḥ ||
9.025.04a viśvā rūpāṇy āviśan punāno yāti haryataḥ |
9.025.04c yatrāmṛtāsa āsate ||
9.025.05a aruṣo janayan giraḥ somaḥ pavata āyuṣak |
9.025.05c indraṁ gacchan kavikratuḥ ||
9.025.06a ā pavasva madintama pavitraṁ dhārayā kave |
9.025.06c arkasya yonim āsadam ||

9.026.01a tam amṛkṣanta vājinam upasthe aditer adhi |
9.026.01c viprāso aṇvyā dhiyā ||
9.026.02a taṁ gāvo abhy anūṣata sahasradhāram akṣitam |
9.026.02c induṁ dhartāram ā divaḥ ||
9.026.03a taṁ vedhām medhayāhyan pavamānam adhi dyavi |
9.026.03c dharṇasim bhūridhāyasam ||
9.026.04a tam ahyan bhurijor dhiyā saṁvasānaṁ vivasvataḥ |
9.026.04c patiṁ vāco adābhyam ||
9.026.05a taṁ sānāv adhi jāmayo hariṁ hinvanty adribhiḥ |
9.026.05c haryatam bhūricakṣasam ||
9.026.06a taṁ tvā hinvanti vedhasaḥ pavamāna girāvṛdham |
9.026.06c indav indrāya matsaram ||

9.027.01a eṣa kavir abhiṣṭutaḥ pavitre adhi tośate |
9.027.01c punāno ghnann apa sridhaḥ ||
9.027.02a eṣa indrāya vāyave svarjit pari ṣicyate |
9.027.02c pavitre dakṣasādhanaḥ ||
9.027.03a eṣa nṛbhir vi nīyate divo mūrdhā vṛṣā sutaḥ |
9.027.03c somo vaneṣu viśvavit ||
9.027.04a eṣa gavyur acikradat pavamāno hiraṇyayuḥ |
9.027.04c induḥ satrājid astṛtaḥ ||
9.027.05a eṣa sūryeṇa hāsate pavamāno adhi dyavi |
9.027.05c pavitre matsaro madaḥ ||
9.027.06a eṣa śuṣmy asiṣyadad antarikṣe vṛṣā hariḥ |
9.027.06c punāna indur indram ā ||

9.028.01a eṣa vājī hito nṛbhir viśvavin manasas patiḥ |
9.028.01c avyo vāraṁ vi dhāvati ||
9.028.02a eṣa pavitre akṣarat somo devebhyaḥ sutaḥ |
9.028.02c viśvā dhāmāny āviśan ||
9.028.03a eṣa devaḥ śubhāyate 'dhi yonāv amartyaḥ |
9.028.03c vṛtrahā devavītamaḥ ||
9.028.04a eṣa vṛṣā kanikradad daśabhir jāmibhir yataḥ |
9.028.04c abhi droṇāni dhāvati ||
9.028.05a eṣa sūryam arocayat pavamāno vicarṣaṇiḥ |
9.028.05c viśvā dhāmāni viśvavit ||
9.028.06a eṣa śuṣmy adābhyaḥ somaḥ punāno arṣati |
9.028.06c devāvīr aghaśaṁsahā ||

9.029.01a prāsya dhārā akṣaran vṛṣṇaḥ sutasyaujasā |
9.029.01c devām̐ anu prabhūṣataḥ ||
9.029.02a saptim mṛjanti vedhaso gṛṇantaḥ kāravo girā |
9.029.02c jyotir jajñānam ukthyam ||
9.029.03a suṣahā soma tāni te punānāya prabhūvaso |
9.029.03c vardhā samudram ukthyam ||
9.029.04a viśvā vasūni saṁjayan pavasva soma dhārayā |
9.029.04c inu dveṣāṁsi sadhryak ||
9.029.05a rakṣā su no araruṣaḥ svanāt samasya kasya cit |
9.029.05c nido yatra mumucmahe ||
9.029.06a endo pārthivaṁ rayiṁ divyam pavasva dhārayā |
9.029.06c dyumantaṁ śuṣmam ā bhara ||

9.030.01a pra dhārā asya śuṣmiṇo vṛthā pavitre akṣaran |
9.030.01c punāno vācam iṣyati ||
9.030.02a indur hiyānaḥ sotṛbhir mṛjyamānaḥ kanikradat |
9.030.02c iyarti vagnum indriyam ||
9.030.03a ā naḥ śuṣmaṁ nṛṣāhyaṁ vīravantam puruspṛham |
9.030.03c pavasva soma dhārayā ||
9.030.04a pra somo ati dhārayā pavamāno asiṣyadat |
9.030.04c abhi droṇāny āsadam ||
9.030.05a apsu tvā madhumattamaṁ hariṁ hinvanty adribhiḥ |
9.030.05c indav indrāya pītaye ||
9.030.06a sunotā madhumattamaṁ somam indrāya vajriṇe |
9.030.06c cāruṁ śardhāya matsaram ||

9.031.01a pra somāsaḥ svādhyaḥ pavamānāso akramuḥ |
9.031.01c rayiṁ kṛṇvanti cetanam ||
9.031.02a divas pṛthivyā adhi bhavendo dyumnavardhanaḥ |
9.031.02c bhavā vājānām patiḥ ||
9.031.03a tubhyaṁ vātā abhipriyas tubhyam arṣanti sindhavaḥ |
9.031.03c soma vardhanti te mahaḥ ||
9.031.04a ā pyāyasva sam etu te viśvataḥ soma vṛṣṇyam |
9.031.04c bhavā vājasya saṁgathe ||
9.031.05a tubhyaṁ gāvo ghṛtam payo babhro duduhre akṣitam |
9.031.05c varṣiṣṭhe adhi sānavi ||
9.031.06a svāyudhasya te sato bhuvanasya pate vayam |
9.031.06c indo sakhitvam uśmasi ||

9.032.01a pra somāso madacyutaḥ śravase no maghonaḥ |
9.032.01c sutā vidathe akramuḥ ||
9.032.02a ād īṁ tritasya yoṣaṇo hariṁ hinvanty adribhiḥ |
9.032.02c indum indrāya pītaye ||
9.032.03a ād īṁ haṁso yathā gaṇaṁ viśvasyāvīvaśan matim |
9.032.03c atyo na gobhir ajyate ||
9.032.04a ubhe somāvacākaśan mṛgo na takto arṣasi |
9.032.04c sīdann ṛtasya yonim ā ||
9.032.05a abhi gāvo anūṣata yoṣā jāram iva priyam |
9.032.05c agann ājiṁ yathā hitam ||
9.032.06a asme dhehi dyumad yaśo maghavadbhyaś ca mahyaṁ ca |
9.032.06c sanim medhām uta śravaḥ ||

9.033.01a pra somāso vipaścito 'pāṁ na yanty ūrmayaḥ |
9.033.01c vanāni mahiṣā iva ||
9.033.02a abhi droṇāni babhravaḥ śukrā ṛtasya dhārayā |
9.033.02c vājaṁ gomantam akṣaran ||
9.033.03a sutā indrāya vāyave varuṇāya marudbhyaḥ |
9.033.03c somā arṣanti viṣṇave ||
9.033.04a tisro vāca ud īrate gāvo mimanti dhenavaḥ |
9.033.04c harir eti kanikradat ||
9.033.05a abhi brahmīr anūṣata yahvīr ṛtasya mātaraḥ |
9.033.05c marmṛjyante divaḥ śiśum ||
9.033.06a rāyaḥ samudrām̐ś caturo 'smabhyaṁ soma viśvataḥ |
9.033.06c ā pavasva sahasriṇaḥ ||

9.034.01a pra suvāno dhārayā tanendur hinvāno arṣati |
9.034.01c rujad dṛḻhā vy ojasā ||
9.034.02a suta indrāya vāyave varuṇāya marudbhyaḥ |
9.034.02c somo arṣati viṣṇave ||
9.034.03a vṛṣāṇaṁ vṛṣabhir yataṁ sunvanti somam adribhiḥ |
9.034.03c duhanti śakmanā payaḥ ||
9.034.04a bhuvat tritasya marjyo bhuvad indrāya matsaraḥ |
9.034.04c saṁ rūpair ajyate hariḥ ||
9.034.05a abhīm ṛtasya viṣṭapaṁ duhate pṛśnimātaraḥ |
9.034.05c cāru priyatamaṁ haviḥ ||
9.034.06a sam enam ahrutā imā giro arṣanti sasrutaḥ |
9.034.06c dhenūr vāśro avīvaśat ||

9.035.01a ā naḥ pavasva dhārayā pavamāna rayim pṛthum |
9.035.01c yayā jyotir vidāsi naḥ ||
9.035.02a indo samudramīṅkhaya pavasva viśvamejaya |
9.035.02c rāyo dhartā na ojasā ||
9.035.03a tvayā vīreṇa vīravo 'bhi ṣyāma pṛtanyataḥ |
9.035.03c kṣarā ṇo abhi vāryam ||
9.035.04a pra vājam indur iṣyati siṣāsan vājasā ṛṣiḥ |
9.035.04c vratā vidāna āyudhā ||
9.035.05a taṁ gīrbhir vācamīṅkhayam punānaṁ vāsayāmasi |
9.035.05c somaṁ janasya gopatim ||
9.035.06a viśvo yasya vrate jano dādhāra dharmaṇas pateḥ |
9.035.06c punānasya prabhūvasoḥ ||

9.036.01a asarji rathyo yathā pavitre camvoḥ sutaḥ |
9.036.01c kārṣman vājī ny akramīt ||
9.036.02a sa vahniḥ soma jāgṛviḥ pavasva devavīr ati |
9.036.02c abhi kośam madhuścutam ||
9.036.03a sa no jyotīṁṣi pūrvya pavamāna vi rocaya |
9.036.03c kratve dakṣāya no hinu ||
9.036.04a śumbhamāna ṛtāyubhir mṛjyamāno gabhastyoḥ |
9.036.04c pavate vāre avyaye ||
9.036.05a sa viśvā dāśuṣe vasu somo divyāni pārthivā |
9.036.05c pavatām āntarikṣyā ||
9.036.06a ā divas pṛṣṭham aśvayur gavyayuḥ soma rohasi |
9.036.06c vīrayuḥ śavasas pate ||

9.037.01a sa sutaḥ pītaye vṛṣā somaḥ pavitre arṣati |
9.037.01c vighnan rakṣāṁsi devayuḥ ||
9.037.02a sa pavitre vicakṣaṇo harir arṣati dharṇasiḥ |
9.037.02c abhi yoniṁ kanikradat ||
9.037.03a sa vājī rocanā divaḥ pavamāno vi dhāvati |
9.037.03c rakṣohā vāram avyayam ||
9.037.04a sa tritasyādhi sānavi pavamāno arocayat |
9.037.04c jāmibhiḥ sūryaṁ saha ||
9.037.05a sa vṛtrahā vṛṣā suto varivovid adābhyaḥ |
9.037.05c somo vājam ivāsarat ||
9.037.06a sa devaḥ kavineṣito 'bhi droṇāni dhāvati |
9.037.06c indur indrāya maṁhanā ||

9.038.01a eṣa u sya vṛṣā ratho 'vyo vārebhir arṣati |
9.038.01c gacchan vājaṁ sahasriṇam ||
9.038.02a etaṁ tritasya yoṣaṇo hariṁ hinvanty adribhiḥ |
9.038.02c indum indrāya pītaye ||
9.038.03a etaṁ tyaṁ harito daśa marmṛjyante apasyuvaḥ |
9.038.03c yābhir madāya śumbhate ||
9.038.04a eṣa sya mānuṣīṣv ā śyeno na vikṣu sīdati |
9.038.04c gacchañ jāro na yoṣitam ||
9.038.05a eṣa sya madyo raso 'va caṣṭe divaḥ śiśuḥ |
9.038.05c ya indur vāram āviśat ||
9.038.06a eṣa sya pītaye suto harir arṣati dharṇasiḥ |
9.038.06c krandan yonim abhi priyam ||

9.039.01a āśur arṣa bṛhanmate pari priyeṇa dhāmnā |
9.039.01c yatra devā iti bravan ||
9.039.02a pariṣkṛṇvann aniṣkṛtaṁ janāya yātayann iṣaḥ |
9.039.02c vṛṣṭiṁ divaḥ pari srava ||
9.039.03a suta eti pavitra ā tviṣiṁ dadhāna ojasā |
9.039.03c vicakṣāṇo virocayan ||
9.039.04a ayaṁ sa yo divas pari raghuyāmā pavitra ā |
9.039.04c sindhor ūrmā vy akṣarat ||
9.039.05a āvivāsan parāvato atho arvāvataḥ sutaḥ |
9.039.05c indrāya sicyate madhu ||
9.039.06a samīcīnā anūṣata hariṁ hinvanty adribhiḥ |
9.039.06c yonāv ṛtasya sīdata ||

9.040.01a punāno akramīd abhi viśvā mṛdho vicarṣaṇiḥ |
9.040.01c śumbhanti vipraṁ dhītibhiḥ ||
9.040.02a ā yonim aruṇo ruhad gamad indraṁ vṛṣā sutaḥ |
9.040.02c dhruve sadasi sīdati ||
9.040.03a nū no rayim mahām indo 'smabhyaṁ soma viśvataḥ |
9.040.03c ā pavasva sahasriṇam ||
9.040.04a viśvā soma pavamāna dyumnānīndav ā bhara |
9.040.04c vidāḥ sahasriṇīr iṣaḥ ||
9.040.05a sa naḥ punāna ā bhara rayiṁ stotre suvīryam |
9.040.05c jaritur vardhayā giraḥ ||
9.040.06a punāna indav ā bhara soma dvibarhasaṁ rayim |
9.040.06c vṛṣann indo na ukthyam ||

9.041.01a pra ye gāvo na bhūrṇayas tveṣā ayāso akramuḥ |
9.041.01c ghnantaḥ kṛṣṇām apa tvacam ||
9.041.02a suvitasya manāmahe 'ti setuṁ durāvyam |
9.041.02c sāhvāṁso dasyum avratam ||
9.041.03a śṛṇve vṛṣṭer iva svanaḥ pavamānasya śuṣmiṇaḥ |
9.041.03c caranti vidyuto divi ||
9.041.04a ā pavasva mahīm iṣaṁ gomad indo hiraṇyavat |
9.041.04c aśvāvad vājavat sutaḥ ||
9.041.05a sa pavasva vicarṣaṇa ā mahī rodasī pṛṇa |
9.041.05c uṣāḥ sūryo na raśmibhiḥ ||
9.041.06a pari ṇaḥ śarmayantyā dhārayā soma viśvataḥ |
9.041.06c sarā raseva viṣṭapam ||

9.042.01a janayan rocanā divo janayann apsu sūryam |
9.042.01c vasāno gā apo hariḥ ||
9.042.02a eṣa pratnena manmanā devo devebhyas pari |
9.042.02c dhārayā pavate sutaḥ ||
9.042.03a vāvṛdhānāya tūrvaye pavante vājasātaye |
9.042.03c somāḥ sahasrapājasaḥ ||
9.042.04a duhānaḥ pratnam it payaḥ pavitre pari ṣicyate |
9.042.04c krandan devām̐ ajījanat ||
9.042.05a abhi viśvāni vāryābhi devām̐ ṛtāvṛdhaḥ |
9.042.05c somaḥ punāno arṣati ||
9.042.06a goman naḥ soma vīravad aśvāvad vājavat sutaḥ |
9.042.06c pavasva bṛhatīr iṣaḥ ||

9.043.01a yo atya iva mṛjyate gobhir madāya haryataḥ |
9.043.01c taṁ gīrbhir vāsayāmasi ||
9.043.02a taṁ no viśvā avasyuvo giraḥ śumbhanti pūrvathā |
9.043.02c indum indrāya pītaye ||
9.043.03a punāno yāti haryataḥ somo gīrbhiḥ pariṣkṛtaḥ |
9.043.03c viprasya medhyātitheḥ ||
9.043.04a pavamāna vidā rayim asmabhyaṁ soma suśriyam |
9.043.04c indo sahasravarcasam ||
9.043.05a indur atyo na vājasṛt kanikranti pavitra ā |
9.043.05c yad akṣār ati devayuḥ ||
9.043.06a pavasva vājasātaye viprasya gṛṇato vṛdhe |
9.043.06c soma rāsva suvīryam ||

9.044.01a pra ṇa indo mahe tana ūrmiṁ na bibhrad arṣasi |
9.044.01c abhi devām̐ ayāsyaḥ ||
9.044.02a matī juṣṭo dhiyā hitaḥ somo hinve parāvati |
9.044.02c viprasya dhārayā kaviḥ ||
9.044.03a ayaṁ deveṣu jāgṛviḥ suta eti pavitra ā |
9.044.03c somo yāti vicarṣaṇiḥ ||
9.044.04a sa naḥ pavasva vājayuś cakrāṇaś cārum adhvaram |
9.044.04c barhiṣmām̐ ā vivāsati ||
9.044.05a sa no bhagāya vāyave vipravīraḥ sadāvṛdhaḥ |
9.044.05c somo deveṣv ā yamat ||
9.044.06a sa no adya vasuttaye kratuvid gātuvittamaḥ |
9.044.06c vājaṁ jeṣi śravo bṛhat ||

9.045.01a sa pavasva madāya kaṁ nṛcakṣā devavītaye |
9.045.01c indav indrāya pītaye ||
9.045.02a sa no arṣābhi dūtyaṁ tvam indrāya tośase |
9.045.02c devān sakhibhya ā varam ||
9.045.03a uta tvām aruṇaṁ vayaṁ gobhir añjmo madāya kam |
9.045.03c vi no rāye duro vṛdhi ||
9.045.04a aty ū pavitram akramīd vājī dhuraṁ na yāmani |
9.045.04c indur deveṣu patyate ||
9.045.05a sam ī sakhāyo asvaran vane krīḻantam atyavim |
9.045.05c induṁ nāvā anūṣata ||
9.045.06a tayā pavasva dhārayā yayā pīto vicakṣase |
9.045.06c indo stotre suvīryam ||

9.046.01a asṛgran devavītaye 'tyāsaḥ kṛtvyā iva |
9.046.01c kṣarantaḥ parvatāvṛdhaḥ ||
9.046.02a pariṣkṛtāsa indavo yoṣeva pitryāvatī |
9.046.02c vāyuṁ somā asṛkṣata ||
9.046.03a ete somāsa indavaḥ prayasvantaś camū sutāḥ |
9.046.03c indraṁ vardhanti karmabhiḥ ||
9.046.04a ā dhāvatā suhastyaḥ śukrā gṛbhṇīta manthinā |
9.046.04c gobhiḥ śrīṇīta matsaram ||
9.046.05a sa pavasva dhanaṁjaya prayantā rādhaso mahaḥ |
9.046.05c asmabhyaṁ soma gātuvit ||
9.046.06a etam mṛjanti marjyam pavamānaṁ daśa kṣipaḥ |
9.046.06c indrāya matsaram madam ||

9.047.01a ayā somaḥ sukṛtyayā mahaś cid abhy avardhata |
9.047.01c mandāna ud vṛṣāyate ||
9.047.02a kṛtānīd asya kartvā cetante dasyutarhaṇā |
9.047.02c ṛṇā ca dhṛṣṇuś cayate ||
9.047.03a āt soma indriyo raso vajraḥ sahasrasā bhuvat |
9.047.03c ukthaṁ yad asya jāyate ||
9.047.04a svayaṁ kavir vidhartari viprāya ratnam icchati |
9.047.04c yadī marmṛjyate dhiyaḥ ||
9.047.05a siṣāsatū rayīṇāṁ vājeṣv arvatām iva |
9.047.05c bhareṣu jigyuṣām asi ||

9.048.01a taṁ tvā nṛmṇāni bibhrataṁ sadhastheṣu maho divaḥ |
9.048.01c cāruṁ sukṛtyayemahe ||
9.048.02a saṁvṛktadhṛṣṇum ukthyam mahāmahivratam madam |
9.048.02c śatam puro rurukṣaṇim ||
9.048.03a atas tvā rayim abhi rājānaṁ sukrato divaḥ |
9.048.03c suparṇo avyathir bharat ||
9.048.04a viśvasmā it svar dṛśe sādhāraṇaṁ rajasturam |
9.048.04c gopām ṛtasya vir bharat ||
9.048.05a adhā hinvāna indriyaṁ jyāyo mahitvam ānaśe |
9.048.05c abhiṣṭikṛd vicarṣaṇiḥ ||

9.049.01a pavasva vṛṣṭim ā su no 'pām ūrmiṁ divas pari |
9.049.01c ayakṣmā bṛhatīr iṣaḥ ||
9.049.02a tayā pavasva dhārayā yayā gāva ihāgaman |
9.049.02c janyāsa upa no gṛham ||
9.049.03a ghṛtam pavasva dhārayā yajñeṣu devavītamaḥ |
9.049.03c asmabhyaṁ vṛṣṭim ā pava ||
9.049.04a sa na ūrje vy avyayam pavitraṁ dhāva dhārayā |
9.049.04c devāsaḥ śṛṇavan hi kam ||
9.049.05a pavamāno asiṣyadad rakṣāṁsy apajaṅghanat |
9.049.05c pratnavad rocayan rucaḥ ||

9.050.01a ut te śuṣmāsa īrate sindhor ūrmer iva svanaḥ |
9.050.01c vāṇasya codayā pavim ||
9.050.02a prasave ta ud īrate tisro vāco makhasyuvaḥ |
9.050.02c yad avya eṣi sānavi ||
9.050.03a avyo vāre pari priyaṁ hariṁ hinvanty adribhiḥ |
9.050.03c pavamānam madhuścutam ||
9.050.04a ā pavasva madintama pavitraṁ dhārayā kave |
9.050.04c arkasya yonim āsadam ||
9.050.05a sa pavasva madintama gobhir añjāno aktubhiḥ |
9.050.05c indav indrāya pītaye ||

9.051.01a adhvaryo adribhiḥ sutaṁ somam pavitra ā sṛja |
9.051.01c punīhīndrāya pātave ||
9.051.02a divaḥ pīyūṣam uttamaṁ somam indrāya vajriṇe |
9.051.02c sunotā madhumattamam ||
9.051.03a tava tya indo andhaso devā madhor vy aśnate |
9.051.03c pavamānasya marutaḥ ||
9.051.04a tvaṁ hi soma vardhayan suto madāya bhūrṇaye |
9.051.04c vṛṣan stotāram ūtaye ||
9.051.05a abhy arṣa vicakṣaṇa pavitraṁ dhārayā sutaḥ |
9.051.05c abhi vājam uta śravaḥ ||

9.052.01a pari dyukṣaḥ sanadrayir bharad vājaṁ no andhasā |
9.052.01c suvāno arṣa pavitra ā ||
9.052.02a tava pratnebhir adhvabhir avyo vāre pari priyaḥ |
9.052.02c sahasradhāro yāt tanā ||
9.052.03a carur na yas tam īṅkhayendo na dānam īṅkhaya |
9.052.03c vadhair vadhasnav īṅkhaya ||
9.052.04a ni śuṣmam indav eṣām puruhūta janānām |
9.052.04c yo asmām̐ ādideśati ||
9.052.05a śataṁ na inda ūtibhiḥ sahasraṁ vā śucīnām |
9.052.05c pavasva maṁhayadrayiḥ ||

9.053.01a ut te śuṣmāso asthū rakṣo bhindanto adrivaḥ |
9.053.01c nudasva yāḥ parispṛdhaḥ ||
9.053.02a ayā nijaghnir ojasā rathasaṁge dhane hite |
9.053.02c stavā abibhyuṣā hṛdā ||
9.053.03a asya vratāni nādhṛṣe pavamānasya dūḍhyā |
9.053.03c ruja yas tvā pṛtanyati ||
9.053.04a taṁ hinvanti madacyutaṁ hariṁ nadīṣu vājinam |
9.053.04c indum indrāya matsaram ||

9.054.01a asya pratnām anu dyutaṁ śukraṁ duduhre ahrayaḥ |
9.054.01c payaḥ sahasrasām ṛṣim ||
9.054.02a ayaṁ sūrya ivopadṛg ayaṁ sarāṁsi dhāvati |
9.054.02c sapta pravata ā divam ||
9.054.03a ayaṁ viśvāni tiṣṭhati punāno bhuvanopari |
9.054.03c somo devo na sūryaḥ ||
9.054.04a pari ṇo devavītaye vājām̐ arṣasi gomataḥ |
9.054.04c punāna indav indrayuḥ ||

9.055.01a yavaṁ-yavaṁ no andhasā puṣṭam-puṣṭam pari srava |
9.055.01c soma viśvā ca saubhagā ||
9.055.02a indo yathā tava stavo yathā te jātam andhasaḥ |
9.055.02c ni barhiṣi priye sadaḥ ||
9.055.03a uta no govid aśvavit pavasva somāndhasā |
9.055.03c makṣūtamebhir ahabhiḥ ||
9.055.04a yo jināti na jīyate hanti śatrum abhītya |
9.055.04c sa pavasva sahasrajit ||

9.056.01a pari soma ṛtam bṛhad āśuḥ pavitre arṣati |
9.056.01c vighnan rakṣāṁsi devayuḥ ||
9.056.02a yat somo vājam arṣati śataṁ dhārā apasyuvaḥ |
9.056.02c indrasya sakhyam āviśan ||
9.056.03a abhi tvā yoṣaṇo daśa jāraṁ na kanyānūṣata |
9.056.03c mṛjyase soma sātaye ||
9.056.04a tvam indrāya viṣṇave svādur indo pari srava |
9.056.04c nṝn stotṝn pāhy aṁhasaḥ ||

9.057.01a pra te dhārā asaścato divo na yanti vṛṣṭayaḥ |
9.057.01c acchā vājaṁ sahasriṇam ||
9.057.02a abhi priyāṇi kāvyā viśvā cakṣāṇo arṣati |
9.057.02c haris tuñjāna āyudhā ||
9.057.03a sa marmṛjāna āyubhir ibho rājeva suvrataḥ |
9.057.03c śyeno na vaṁsu ṣīdati ||
9.057.04a sa no viśvā divo vasūto pṛthivyā adhi |
9.057.04c punāna indav ā bhara ||

9.058.01a tarat sa mandī dhāvati dhārā sutasyāndhasaḥ |
9.058.01c tarat sa mandī dhāvati ||
9.058.02a usrā veda vasūnām martasya devy avasaḥ |
9.058.02c tarat sa mandī dhāvati ||
9.058.03a dhvasrayoḥ puruṣantyor ā sahasrāṇi dadmahe |
9.058.03c tarat sa mandī dhāvati ||
9.058.04a ā yayos triṁśataṁ tanā sahasrāṇi ca dadmahe |
9.058.04c tarat sa mandī dhāvati ||

9.059.01a pavasva gojid aśvajid viśvajit soma raṇyajit |
9.059.01c prajāvad ratnam ā bhara ||
9.059.02a pavasvādbhyo adābhyaḥ pavasvauṣadhībhyaḥ |
9.059.02c pavasva dhiṣaṇābhyaḥ ||
9.059.03a tvaṁ soma pavamāno viśvāni duritā tara |
9.059.03c kaviḥ sīda ni barhiṣi ||
9.059.04a pavamāna svar vido jāyamāno 'bhavo mahān |
9.059.04c indo viśvām̐ abhīd asi ||

9.060.01a pra gāyatreṇa gāyata pavamānaṁ vicarṣaṇim |
9.060.01c induṁ sahasracakṣasam ||
9.060.02a taṁ tvā sahasracakṣasam atho sahasrabharṇasam |
9.060.02c ati vāram apāviṣuḥ ||
9.060.03a ati vārān pavamāno asiṣyadat kalaśām̐ abhi dhāvati |
9.060.03c indrasya hārdy āviśan ||
9.060.04a indrasya soma rādhase śam pavasva vicarṣaṇe |
9.060.04c prajāvad reta ā bhara ||

9.061.01a ayā vītī pari srava yas ta indo madeṣv ā |
9.061.01c avāhan navatīr nava ||
9.061.02a puraḥ sadya itthādhiye divodāsāya śambaram |
9.061.02c adha tyaṁ turvaśaṁ yadum ||
9.061.03a pari ṇo aśvam aśvavid gomad indo hiraṇyavat |
9.061.03c kṣarā sahasriṇīr iṣaḥ ||
9.061.04a pavamānasya te vayam pavitram abhyundataḥ |
9.061.04c sakhitvam ā vṛṇīmahe ||
9.061.05a ye te pavitram ūrmayo 'bhikṣaranti dhārayā |
9.061.05c tebhir naḥ soma mṛḻaya ||
9.061.06a sa naḥ punāna ā bhara rayiṁ vīravatīm iṣam |
9.061.06c īśānaḥ soma viśvataḥ ||
9.061.07a etam u tyaṁ daśa kṣipo mṛjanti sindhumātaram |
9.061.07c sam ādityebhir akhyata ||
9.061.08a sam indreṇota vāyunā suta eti pavitra ā |
9.061.08c saṁ sūryasya raśmibhiḥ ||
9.061.09a sa no bhagāya vāyave pūṣṇe pavasva madhumān |
9.061.09c cārur mitre varuṇe ca ||
9.061.10a uccā te jātam andhaso divi ṣad bhūmy ā dade |
9.061.10c ugraṁ śarma mahi śravaḥ ||
9.061.11a enā viśvāny arya ā dyumnāni mānuṣāṇām |
9.061.11c siṣāsanto vanāmahe ||
9.061.12a sa na indrāya yajyave varuṇāya marudbhyaḥ |
9.061.12c varivovit pari srava ||
9.061.13a upo ṣu jātam apturaṁ gobhir bhaṅgam pariṣkṛtam |
9.061.13c induṁ devā ayāsiṣuḥ ||
9.061.14a tam id vardhantu no giro vatsaṁ saṁśiśvarīr iva |
9.061.14c ya indrasya hṛdaṁsaniḥ ||
9.061.15a arṣā ṇaḥ soma śaṁ gave dhukṣasva pipyuṣīm iṣam |
9.061.15c vardhā samudram ukthyam ||
9.061.16a pavamāno ajījanad divaś citraṁ na tanyatum |
9.061.16c jyotir vaiśvānaram bṛhat ||
9.061.17a pavamānasya te raso mado rājann aducchunaḥ |
9.061.17c vi vāram avyam arṣati ||
9.061.18a pavamāna rasas tava dakṣo vi rājati dyumān |
9.061.18c jyotir viśvaṁ svar dṛśe ||
9.061.19a yas te mado vareṇyas tenā pavasvāndhasā |
9.061.19c devāvīr aghaśaṁsahā ||
9.061.20a jaghnir vṛtram amitriyaṁ sasnir vājaṁ dive-dive |
9.061.20c goṣā u aśvasā asi ||
9.061.21a sammiślo aruṣo bhava sūpasthābhir na dhenubhiḥ |
9.061.21c sīdañ chyeno na yonim ā ||
9.061.22a sa pavasva ya āvithendraṁ vṛtrāya hantave |
9.061.22c vavrivāṁsam mahīr apaḥ ||
9.061.23a suvīrāso vayaṁ dhanā jayema soma mīḍhvaḥ |
9.061.23c punāno vardha no giraḥ ||
9.061.24a tvotāsas tavāvasā syāma vanvanta āmuraḥ |
9.061.24c soma vrateṣu jāgṛhi ||
9.061.25a apaghnan pavate mṛdho 'pa somo arāvṇaḥ |
9.061.25c gacchann indrasya niṣkṛtam ||
9.061.26a maho no rāya ā bhara pavamāna jahī mṛdhaḥ |
9.061.26c rāsvendo vīravad yaśaḥ ||
9.061.27a na tvā śataṁ cana hruto rādho ditsantam ā minan |
9.061.27c yat punāno makhasyase ||
9.061.28a pavasvendo vṛṣā sutaḥ kṛdhī no yaśaso jane |
9.061.28c viśvā apa dviṣo jahi ||
9.061.29a asya te sakhye vayaṁ tavendo dyumna uttame |
9.061.29c sāsahyāma pṛtanyataḥ ||
9.061.30a yā te bhīmāny āyudhā tigmāni santi dhūrvaṇe |
9.061.30c rakṣā samasya no nidaḥ ||

9.062.01a ete asṛgram indavas tiraḥ pavitram āśavaḥ |
9.062.01c viśvāny abhi saubhagā ||
9.062.02a vighnanto duritā puru sugā tokāya vājinaḥ |
9.062.02c tanā kṛṇvanto arvate ||
9.062.03a kṛṇvanto varivo gave 'bhy arṣanti suṣṭutim |
9.062.03c iḻām asmabhyaṁ saṁyatam ||
9.062.04a asāvy aṁśur madāyāpsu dakṣo giriṣṭhāḥ |
9.062.04c śyeno na yonim āsadat ||
9.062.05a śubhram andho devavātam apsu dhūto nṛbhiḥ sutaḥ |
9.062.05c svadanti gāvaḥ payobhiḥ ||
9.062.06a ād īm aśvaṁ na hetāro 'śūśubhann amṛtāya |
9.062.06c madhvo rasaṁ sadhamāde ||
9.062.07a yās te dhārā madhuścuto 'sṛgram inda ūtaye |
9.062.07c tābhiḥ pavitram āsadaḥ ||
9.062.08a so arṣendrāya pītaye tiro romāṇy avyayā |
9.062.08c sīdan yonā vaneṣv ā ||
9.062.09a tvam indo pari srava svādiṣṭho aṅgirobhyaḥ |
9.062.09c varivovid ghṛtam payaḥ ||
9.062.10a ayaṁ vicarṣaṇir hitaḥ pavamānaḥ sa cetati |
9.062.10c hinvāna āpyam bṛhat ||
9.062.11a eṣa vṛṣā vṛṣavrataḥ pavamāno aśastihā |
9.062.11c karad vasūni dāśuṣe ||
9.062.12a ā pavasva sahasriṇaṁ rayiṁ gomantam aśvinam |
9.062.12c puruścandram puruspṛham ||
9.062.13a eṣa sya pari ṣicyate marmṛjyamāna āyubhiḥ |
9.062.13c urugāyaḥ kavikratuḥ ||
9.062.14a sahasrotiḥ śatāmagho vimāno rajasaḥ kaviḥ |
9.062.14c indrāya pavate madaḥ ||
9.062.15a girā jāta iha stuta indur indrāya dhīyate |
9.062.15c vir yonā vasatāv iva ||
9.062.16a pavamānaḥ suto nṛbhiḥ somo vājam ivāsarat |
9.062.16c camūṣu śakmanāsadam ||
9.062.17a taṁ tripṛṣṭhe trivandhure rathe yuñjanti yātave |
9.062.17c ṛṣīṇāṁ sapta dhītibhiḥ ||
9.062.18a taṁ sotāro dhanaspṛtam āśuṁ vājāya yātave |
9.062.18c hariṁ hinota vājinam ||
9.062.19a āviśan kalaśaṁ suto viśvā arṣann abhi śriyaḥ |
9.062.19c śūro na goṣu tiṣṭhati ||
9.062.20a ā ta indo madāya kam payo duhanty āyavaḥ |
9.062.20c devā devebhyo madhu ||
9.062.21a ā naḥ somam pavitra ā sṛjatā madhumattamam |
9.062.21c devebhyo devaśruttamam ||
9.062.22a ete somā asṛkṣata gṛṇānāḥ śravase mahe |
9.062.22c madintamasya dhārayā ||
9.062.23a abhi gavyāni vītaye nṛmṇā punāno arṣasi |
9.062.23c sanadvājaḥ pari srava ||
9.062.24a uta no gomatīr iṣo viśvā arṣa pariṣṭubhaḥ |
9.062.24c gṛṇāno jamadagninā ||
9.062.25a pavasva vāco agriyaḥ soma citrābhir ūtibhiḥ |
9.062.25c abhi viśvāni kāvyā ||
9.062.26a tvaṁ samudriyā apo 'griyo vāca īrayan |
9.062.26c pavasva viśvamejaya ||
9.062.27a tubhyemā bhuvanā kave mahimne soma tasthire |
9.062.27c tubhyam arṣanti sindhavaḥ ||
9.062.28a pra te divo na vṛṣṭayo dhārā yanty asaścataḥ |
9.062.28c abhi śukrām upastiram ||
9.062.29a indrāyendum punītanograṁ dakṣāya sādhanam |
9.062.29c īśānaṁ vītirādhasam ||
9.062.30a pavamāna ṛtaḥ kaviḥ somaḥ pavitram āsadat |
9.062.30c dadhat stotre suvīryam ||

9.063.01a ā pavasva sahasriṇaṁ rayiṁ soma suvīryam |
9.063.01c asme śravāṁsi dhāraya ||
9.063.02a iṣam ūrjaṁ ca pinvasa indrāya matsarintamaḥ |
9.063.02c camūṣv ā ni ṣīdasi ||
9.063.03a suta indrāya viṣṇave somaḥ kalaśe akṣarat |
9.063.03c madhumām̐ astu vāyave ||
9.063.04a ete asṛgram āśavo 'ti hvarāṁsi babhravaḥ |
9.063.04c somā ṛtasya dhārayā ||
9.063.05a indraṁ vardhanto apturaḥ kṛṇvanto viśvam āryam |
9.063.05c apaghnanto arāvṇaḥ ||
9.063.06a sutā anu svam ā rajo 'bhy arṣanti babhravaḥ |
9.063.06c indraṁ gacchanta indavaḥ ||
9.063.07a ayā pavasva dhārayā yayā sūryam arocayaḥ |
9.063.07c hinvāno mānuṣīr apaḥ ||
9.063.08a ayukta sūra etaśam pavamāno manāv adhi |
9.063.08c antarikṣeṇa yātave ||
9.063.09a uta tyā harito daśa sūro ayukta yātave |
9.063.09c indur indra iti bruvan ||
9.063.10a parīto vāyave sutaṁ gira indrāya matsaram |
9.063.10c avyo vāreṣu siñcata ||
9.063.11a pavamāna vidā rayim asmabhyaṁ soma duṣṭaram |
9.063.11c yo dūṇāśo vanuṣyatā ||
9.063.12a abhy arṣa sahasriṇaṁ rayiṁ gomantam aśvinam |
9.063.12c abhi vājam uta śravaḥ ||
9.063.13a somo devo na sūryo 'dribhiḥ pavate sutaḥ |
9.063.13c dadhānaḥ kalaśe rasam ||
9.063.14a ete dhāmāny āryā śukrā ṛtasya dhārayā |
9.063.14c vājaṁ gomantam akṣaran ||
9.063.15a sutā indrāya vajriṇe somāso dadhyāśiraḥ |
9.063.15c pavitram aty akṣaran ||
9.063.16a pra soma madhumattamo rāye arṣa pavitra ā |
9.063.16c mado yo devavītamaḥ ||
9.063.17a tam ī mṛjanty āyavo hariṁ nadīṣu vājinam |
9.063.17c indum indrāya matsaram ||
9.063.18a ā pavasva hiraṇyavad aśvāvat soma vīravat |
9.063.18c vājaṁ gomantam ā bhara ||
9.063.19a pari vāje na vājayum avyo vāreṣu siñcata |
9.063.19c indrāya madhumattamam ||
9.063.20a kavim mṛjanti marjyaṁ dhībhir viprā avasyavaḥ |
9.063.20c vṛṣā kanikrad arṣati ||
9.063.21a vṛṣaṇaṁ dhībhir apturaṁ somam ṛtasya dhārayā |
9.063.21c matī viprāḥ sam asvaran ||
9.063.22a pavasva devāyuṣag indraṁ gacchatu te madaḥ |
9.063.22c vāyum ā roha dharmaṇā ||
9.063.23a pavamāna ni tośase rayiṁ soma śravāyyam |
9.063.23c priyaḥ samudram ā viśa ||
9.063.24a apaghnan pavase mṛdhaḥ kratuvit soma matsaraḥ |
9.063.24c nudasvādevayuṁ janam ||
9.063.25a pavamānā asṛkṣata somāḥ śukrāsa indavaḥ |
9.063.25c abhi viśvāni kāvyā ||
9.063.26a pavamānāsa āśavaḥ śubhrā asṛgram indavaḥ |
9.063.26c ghnanto viśvā apa dviṣaḥ ||
9.063.27a pavamānā divas pary antarikṣād asṛkṣata |
9.063.27c pṛthivyā adhi sānavi ||
9.063.28a punānaḥ soma dhārayendo viśvā apa sridhaḥ |
9.063.28c jahi rakṣāṁsi sukrato ||
9.063.29a apaghnan soma rakṣaso 'bhy arṣa kanikradat |
9.063.29c dyumantaṁ śuṣmam uttamam ||
9.063.30a asme vasūni dhāraya soma divyāni pārthivā |
9.063.30c indo viśvāni vāryā ||

9.064.01a vṛṣā soma dyumām̐ asi vṛṣā deva vṛṣavrataḥ |
9.064.01c vṛṣā dharmāṇi dadhiṣe ||
9.064.02a vṛṣṇas te vṛṣṇyaṁ śavo vṛṣā vanaṁ vṛṣā madaḥ |
9.064.02c satyaṁ vṛṣan vṛṣed asi ||
9.064.03a aśvo na cakrado vṛṣā saṁ gā indo sam arvataḥ |
9.064.03c vi no rāye duro vṛdhi ||
9.064.04a asṛkṣata pra vājino gavyā somāso aśvayā |
9.064.04c śukrāso vīrayāśavaḥ ||
9.064.05a śumbhamānā ṛtāyubhir mṛjyamānā gabhastyoḥ |
9.064.05c pavante vāre avyaye ||
9.064.06a te viśvā dāśuṣe vasu somā divyāni pārthivā |
9.064.06c pavantām āntarikṣyā ||
9.064.07a pavamānasya viśvavit pra te sargā asṛkṣata |
9.064.07c sūryasyeva na raśmayaḥ ||
9.064.08a ketuṁ kṛṇvan divas pari viśvā rūpābhy arṣasi |
9.064.08c samudraḥ soma pinvase ||
9.064.09a hinvāno vācam iṣyasi pavamāna vidharmaṇi |
9.064.09c akrān devo na sūryaḥ ||
9.064.10a induḥ paviṣṭa cetanaḥ priyaḥ kavīnām matī |
9.064.10c sṛjad aśvaṁ rathīr iva ||
9.064.11a ūrmir yas te pavitra ā devāvīḥ paryakṣarat |
9.064.11c sīdann ṛtasya yonim ā ||
9.064.12a sa no arṣa pavitra ā mado yo devavītamaḥ |
9.064.12c indav indrāya pītaye ||
9.064.13a iṣe pavasva dhārayā mṛjyamāno manīṣibhiḥ |
9.064.13c indo rucābhi gā ihi ||
9.064.14a punāno varivas kṛdhy ūrjaṁ janāya girvaṇaḥ |
9.064.14c hare sṛjāna āśiram ||
9.064.15a punāno devavītaya indrasya yāhi niṣkṛtam |
9.064.15c dyutāno vājibhir yataḥ ||
9.064.16a pra hinvānāsa indavo 'cchā samudram āśavaḥ |
9.064.16c dhiyā jūtā asṛkṣata ||
9.064.17a marmṛjānāsa āyavo vṛthā samudram indavaḥ |
9.064.17c agmann ṛtasya yonim ā ||
9.064.18a pari ṇo yāhy asmayur viśvā vasūny ojasā |
9.064.18c pāhi naḥ śarma vīravat ||
9.064.19a mimāti vahnir etaśaḥ padaṁ yujāna ṛkvabhiḥ |
9.064.19c pra yat samudra āhitaḥ ||
9.064.20a ā yad yoniṁ hiraṇyayam āśur ṛtasya sīdati |
9.064.20c jahāty apracetasaḥ ||
9.064.21a abhi venā anūṣateyakṣanti pracetasaḥ |
9.064.21c majjanty avicetasaḥ ||
9.064.22a indrāyendo marutvate pavasva madhumattamaḥ |
9.064.22c ṛtasya yonim āsadam ||
9.064.23a taṁ tvā viprā vacovidaḥ pari ṣkṛṇvanti vedhasaḥ |
9.064.23c saṁ tvā mṛjanty āyavaḥ ||
9.064.24a rasaṁ te mitro aryamā pibanti varuṇaḥ kave |
9.064.24c pavamānasya marutaḥ ||
9.064.25a tvaṁ soma vipaścitam punāno vācam iṣyasi |
9.064.25c indo sahasrabharṇasam ||
9.064.26a uto sahasrabharṇasaṁ vācaṁ soma makhasyuvam |
9.064.26c punāna indav ā bhara ||
9.064.27a punāna indav eṣām puruhūta janānām |
9.064.27c priyaḥ samudram ā viśa ||
9.064.28a davidyutatyā rucā pariṣṭobhantyā kṛpā |
9.064.28c somāḥ śukrā gavāśiraḥ ||
9.064.29a hinvāno hetṛbhir yata ā vājaṁ vājy akramīt |
9.064.29c sīdanto vanuṣo yathā ||
9.064.30a ṛdhak soma svastaye saṁjagmāno divaḥ kaviḥ |
9.064.30c pavasva sūryo dṛśe ||

9.065.01a hinvanti sūram usrayaḥ svasāro jāmayas patim |
9.065.01c mahām indum mahīyuvaḥ ||
9.065.02a pavamāna rucā-rucā devo devebhyas pari |
9.065.02c viśvā vasūny ā viśa ||
9.065.03a ā pavamāna suṣṭutiṁ vṛṣṭiṁ devebhyo duvaḥ |
9.065.03c iṣe pavasva saṁyatam ||
9.065.04a vṛṣā hy asi bhānunā dyumantaṁ tvā havāmahe |
9.065.04c pavamāna svādhyaḥ ||
9.065.05a ā pavasva suvīryam mandamānaḥ svāyudha |
9.065.05c iho ṣv indav ā gahi ||
9.065.06a yad adbhiḥ pariṣicyase mṛjyamāno gabhastyoḥ |
9.065.06c druṇā sadhastham aśnuṣe ||
9.065.07a pra somāya vyaśvavat pavamānāya gāyata |
9.065.07c mahe sahasracakṣase ||
9.065.08a yasya varṇam madhuścutaṁ hariṁ hinvanty adribhiḥ |
9.065.08c indum indrāya pītaye ||
9.065.09a tasya te vājino vayaṁ viśvā dhanāni jigyuṣaḥ |
9.065.09c sakhitvam ā vṛṇīmahe ||
9.065.10a vṛṣā pavasva dhārayā marutvate ca matsaraḥ |
9.065.10c viśvā dadhāna ojasā ||
9.065.11a taṁ tvā dhartāram oṇyoḥ pavamāna svardṛśam |
9.065.11c hinve vājeṣu vājinam ||
9.065.12a ayā citto vipānayā hariḥ pavasva dhārayā |
9.065.12c yujaṁ vājeṣu codaya ||
9.065.13a ā na indo mahīm iṣam pavasva viśvadarśataḥ |
9.065.13c asmabhyaṁ soma gātuvit ||
9.065.14a ā kalaśā anūṣatendo dhārābhir ojasā |
9.065.14c endrasya pītaye viśa ||
9.065.15a yasya te madyaṁ rasaṁ tīvraṁ duhanty adribhiḥ |
9.065.15c sa pavasvābhimātihā ||
9.065.16a rājā medhābhir īyate pavamāno manāv adhi |
9.065.16c antarikṣeṇa yātave ||
9.065.17a ā na indo śatagvinaṁ gavām poṣaṁ svaśvyam |
9.065.17c vahā bhagattim ūtaye ||
9.065.18a ā naḥ soma saho juvo rūpaṁ na varcase bhara |
9.065.18c suṣvāṇo devavītaye ||
9.065.19a arṣā soma dyumattamo 'bhi droṇāni roruvat |
9.065.19c sīdañ chyeno na yonim ā ||
9.065.20a apsā indrāya vāyave varuṇāya marudbhyaḥ |
9.065.20c somo arṣati viṣṇave ||
9.065.21a iṣaṁ tokāya no dadhad asmabhyaṁ soma viśvataḥ |
9.065.21c ā pavasva sahasriṇam ||
9.065.22a ye somāsaḥ parāvati ye arvāvati sunvire |
9.065.22c ye vādaḥ śaryaṇāvati ||
9.065.23a ya ārjīkeṣu kṛtvasu ye madhye pastyānām |
9.065.23c ye vā janeṣu pañcasu ||
9.065.24a te no vṛṣṭiṁ divas pari pavantām ā suvīryam |
9.065.24c suvānā devāsa indavaḥ ||
9.065.25a pavate haryato harir gṛṇāno jamadagninā |
9.065.25c hinvāno gor adhi tvaci ||
9.065.26a pra śukrāso vayojuvo hinvānāso na saptayaḥ |
9.065.26c śrīṇānā apsu mṛñjata ||
9.065.27a taṁ tvā suteṣv ābhuvo hinvire devatātaye |
9.065.27c sa pavasvānayā rucā ||
9.065.28a ā te dakṣam mayobhuvaṁ vahnim adyā vṛṇīmahe |
9.065.28c pāntam ā puruspṛham ||
9.065.29a ā mandram ā vareṇyam ā vipram ā manīṣiṇam |
9.065.29c pāntam ā puruspṛham ||
9.065.30a ā rayim ā sucetunam ā sukrato tanūṣv ā |
9.065.30c pāntam ā puruspṛham ||

9.066.01a pavasva viśvacarṣaṇe 'bhi viśvāni kāvyā |
9.066.01c sakhā sakhibhya īḍyaḥ ||
9.066.02a tābhyāṁ viśvasya rājasi ye pavamāna dhāmanī |
9.066.02c pratīcī soma tasthatuḥ ||
9.066.03a pari dhāmāni yāni te tvaṁ somāsi viśvataḥ |
9.066.03c pavamāna ṛtubhiḥ kave ||
9.066.04a pavasva janayann iṣo 'bhi viśvāni vāryā |
9.066.04c sakhā sakhibhya ūtaye ||
9.066.05a tava śukrāso arcayo divas pṛṣṭhe vi tanvate |
9.066.05c pavitraṁ soma dhāmabhiḥ ||
9.066.06a taveme sapta sindhavaḥ praśiṣaṁ soma sisrate |
9.066.06c tubhyaṁ dhāvanti dhenavaḥ ||
9.066.07a pra soma yāhi dhārayā suta indrāya matsaraḥ |
9.066.07c dadhāno akṣiti śravaḥ ||
9.066.08a sam u tvā dhībhir asvaran hinvatīḥ sapta jāmayaḥ |
9.066.08c vipram ājā vivasvataḥ ||
9.066.09a mṛjanti tvā sam agruvo 'vye jīrāv adhi ṣvaṇi |
9.066.09c rebho yad ajyase vane ||
9.066.10a pavamānasya te kave vājin sargā asṛkṣata |
9.066.10c arvanto na śravasyavaḥ ||
9.066.11a acchā kośam madhuścutam asṛgraṁ vāre avyaye |
9.066.11c avāvaśanta dhītayaḥ ||
9.066.12a acchā samudram indavo 'staṁ gāvo na dhenavaḥ |
9.066.12c agmann ṛtasya yonim ā ||
9.066.13a pra ṇa indo mahe raṇa āpo arṣanti sindhavaḥ |
9.066.13c yad gobhir vāsayiṣyase ||
9.066.14a asya te sakhye vayam iyakṣantas tvotayaḥ |
9.066.14c indo sakhitvam uśmasi ||
9.066.15a ā pavasva gaviṣṭaye mahe soma nṛcakṣase |
9.066.15c endrasya jaṭhare viśa ||
9.066.16a mahām̐ asi soma jyeṣṭha ugrāṇām inda ojiṣṭhaḥ |
9.066.16c yudhvā sañ chaśvaj jigetha ||
9.066.17a ya ugrebhyaś cid ojīyāñ chūrebhyaś cic chūrataraḥ |
9.066.17c bhūridābhyaś cin maṁhīyān ||
9.066.18a tvaṁ soma sūra eṣas tokasya sātā tanūnām |
9.066.18c vṛṇīmahe sakhyāya vṛṇīmahe yujyāya ||
9.066.19a agna āyūṁṣi pavasa ā suvorjam iṣaṁ ca naḥ |
9.066.19c āre bādhasva ducchunām ||
9.066.20a agnir ṛṣiḥ pavamānaḥ pāñcajanyaḥ purohitaḥ |
9.066.20c tam īmahe mahāgayam ||
9.066.21a agne pavasva svapā asme varcaḥ suvīryam |
9.066.21c dadhad rayim mayi poṣam ||
9.066.22a pavamāno ati sridho 'bhy arṣati suṣṭutim |
9.066.22c sūro na viśvadarśataḥ ||
9.066.23a sa marmṛjāna āyubhiḥ prayasvān prayase hitaḥ |
9.066.23c indur atyo vicakṣaṇaḥ ||
9.066.24a pavamāna ṛtam bṛhac chukraṁ jyotir ajījanat |
9.066.24c kṛṣṇā tamāṁsi jaṅghanat ||
9.066.25a pavamānasya jaṅghnato hareś candrā asṛkṣata |
9.066.25c jīrā ajiraśociṣaḥ ||
9.066.26a pavamāno rathītamaḥ śubhrebhiḥ śubhraśastamaḥ |
9.066.26c hariścandro marudgaṇaḥ ||
9.066.27a pavamāno vy aśnavad raśmibhir vājasātamaḥ |
9.066.27c dadhat stotre suvīryam ||
9.066.28a pra suvāna indur akṣāḥ pavitram aty avyayam |
9.066.28c punāna indur indram ā ||
9.066.29a eṣa somo adhi tvaci gavāṁ krīḻaty adribhiḥ |
9.066.29c indram madāya johuvat ||
9.066.30a yasya te dyumnavat payaḥ pavamānābhṛtaṁ divaḥ |
9.066.30c tena no mṛḻa jīvase ||

9.067.01a tvaṁ somāsi dhārayur mandra ojiṣṭho adhvare |
9.067.01c pavasva maṁhayadrayiḥ ||
9.067.02a tvaṁ suto nṛmādano dadhanvān matsarintamaḥ |
9.067.02c indrāya sūrir andhasā ||
9.067.03a tvaṁ suṣvāṇo adribhir abhy arṣa kanikradat |
9.067.03c dyumantaṁ śuṣmam uttamam ||
9.067.04a indur hinvāno arṣati tiro vārāṇy avyayā |
9.067.04c harir vājam acikradat ||
9.067.05a indo vy avyam arṣasi vi śravāṁsi vi saubhagā |
9.067.05c vi vājān soma gomataḥ ||
9.067.06a ā na indo śatagvinaṁ rayiṁ gomantam aśvinam |
9.067.06c bharā soma sahasriṇam ||
9.067.07a pavamānāsa indavas tiraḥ pavitram āśavaḥ |
9.067.07c indraṁ yāmebhir āśata ||
9.067.08a kakuhaḥ somyo rasa indur indrāya pūrvyaḥ |
9.067.08c āyuḥ pavata āyave ||
9.067.09a hinvanti sūram usrayaḥ pavamānam madhuścutam |
9.067.09c abhi girā sam asvaran ||
9.067.10a avitā no ajāśvaḥ pūṣā yāmani-yāmani |
9.067.10c ā bhakṣat kanyāsu naḥ ||
9.067.11a ayaṁ somaḥ kapardine ghṛtaṁ na pavate madhu |
9.067.11c ā bhakṣat kanyāsu naḥ ||
9.067.12a ayaṁ ta āghṛṇe suto ghṛtaṁ na pavate śuci |
9.067.12c ā bhakṣat kanyāsu naḥ ||
9.067.13a vāco jantuḥ kavīnām pavasva soma dhārayā |
9.067.13c deveṣu ratnadhā asi ||
9.067.14a ā kalaśeṣu dhāvati śyeno varma vi gāhate |
9.067.14c abhi droṇā kanikradat ||
9.067.15a pari pra soma te raso 'sarji kalaśe sutaḥ |
9.067.15c śyeno na takto arṣati ||
9.067.16a pavasva soma mandayann indrāya madhumattamaḥ ||
9.067.17a asṛgran devavītaye vājayanto rathā iva ||
9.067.18a te sutāso madintamāḥ śukrā vāyum asṛkṣata ||
9.067.19a grāvṇā tunno abhiṣṭutaḥ pavitraṁ soma gacchasi |
9.067.19c dadhat stotre suvīryam ||
9.067.20a eṣa tunno abhiṣṭutaḥ pavitram ati gāhate |
9.067.20c rakṣohā vāram avyayam ||
9.067.21a yad anti yac ca dūrake bhayaṁ vindati mām iha |
9.067.21c pavamāna vi taj jahi ||
9.067.22a pavamānaḥ so adya naḥ pavitreṇa vicarṣaṇiḥ |
9.067.22c yaḥ potā sa punātu naḥ ||
9.067.23a yat te pavitram arciṣy agne vitatam antar ā |
9.067.23c brahma tena punīhi naḥ ||
9.067.24a yat te pavitram arcivad agne tena punīhi naḥ |
9.067.24c brahmasavaiḥ punīhi naḥ ||
9.067.25a ubhābhyāṁ deva savitaḥ pavitreṇa savena ca |
9.067.25c mām punīhi viśvataḥ ||
9.067.26a tribhiṣ ṭvaṁ deva savitar varṣiṣṭhaiḥ soma dhāmabhiḥ |
9.067.26c agne dakṣaiḥ punīhi naḥ ||
9.067.27a punantu māṁ devajanāḥ punantu vasavo dhiyā |
9.067.27c viśve devāḥ punīta mā jātavedaḥ punīhi mā ||
9.067.28a pra pyāyasva pra syandasva soma viśvebhir aṁśubhiḥ |
9.067.28c devebhya uttamaṁ haviḥ ||
9.067.29a upa priyam panipnataṁ yuvānam āhutīvṛdham |
9.067.29c aganma bibhrato namaḥ ||
9.067.30a alāyyasya paraśur nanāśa tam ā pavasva deva soma |
9.067.30c ākhuṁ cid eva deva soma ||
9.067.31a yaḥ pāvamānīr adhyety ṛṣibhiḥ sambhṛtaṁ rasam |
9.067.31c sarvaṁ sa pūtam aśnāti svaditam mātariśvanā ||
9.067.32a pāvamānīr yo adhyety ṛṣibhiḥ sambhṛtaṁ rasam |
9.067.32c tasmai sarasvatī duhe kṣīraṁ sarpir madhūdakam ||

9.068.01a pra devam acchā madhumanta indavo 'siṣyadanta gāva ā na dhenavaḥ |
9.068.01c barhiṣado vacanāvanta ūdhabhiḥ parisrutam usriyā nirṇijaṁ dhire ||
9.068.02a sa roruvad abhi pūrvā acikradad upāruhaḥ śrathayan svādate hariḥ |
9.068.02c tiraḥ pavitram pariyann uru jrayo ni śaryāṇi dadhate deva ā varam ||
9.068.03a vi yo mame yamyā saṁyatī madaḥ sākaṁvṛdhā payasā pinvad akṣitā |
9.068.03c mahī apāre rajasī vivevidad abhivrajann akṣitam pāja ā dade ||
9.068.04a sa mātarā vicaran vājayann apaḥ pra medhiraḥ svadhayā pinvate padam |
9.068.04c aṁśur yavena pipiśe yato nṛbhiḥ saṁ jāmibhir nasate rakṣate śiraḥ ||
9.068.05a saṁ dakṣeṇa manasā jāyate kavir ṛtasya garbho nihito yamā paraḥ |
9.068.05c yūnā ha santā prathamaṁ vi jajñatur guhā hitaṁ janima nemam udyatam ||
9.068.06a mandrasya rūpaṁ vividur manīṣiṇaḥ śyeno yad andho abharat parāvataḥ |
9.068.06c tam marjayanta suvṛdhaṁ nadīṣv ām̐ uśantam aṁśum pariyantam ṛgmiyam ||
9.068.07a tvām mṛjanti daśa yoṣaṇaḥ sutaṁ soma ṛṣibhir matibhir dhītibhir hitam |
9.068.07c avyo vārebhir uta devahūtibhir nṛbhir yato vājam ā darṣi sātaye ||
9.068.08a pariprayantaṁ vayyaṁ suṣaṁsadaṁ somam manīṣā abhy anūṣata stubhaḥ |
9.068.08c yo dhārayā madhumām̐ ūrmiṇā diva iyarti vācaṁ rayiṣāḻ amartyaḥ ||
9.068.09a ayaṁ diva iyarti viśvam ā rajaḥ somaḥ punānaḥ kalaśeṣu sīdati |
9.068.09c adbhir gobhir mṛjyate adribhiḥ sutaḥ punāna indur varivo vidat priyam ||
9.068.10a evā naḥ soma pariṣicyamāno vayo dadhac citratamam pavasva |
9.068.10c adveṣe dyāvāpṛthivī huvema devā dhatta rayim asme suvīram ||

9.069.01a iṣur na dhanvan prati dhīyate matir vatso na mātur upa sarjy ūdhani |
9.069.01c urudhāreva duhe agra āyaty asya vrateṣv api soma iṣyate ||
9.069.02a upo matiḥ pṛcyate sicyate madhu mandrājanī codate antar āsani |
9.069.02c pavamānaḥ saṁtaniḥ praghnatām iva madhumān drapsaḥ pari vāram arṣati ||
9.069.03a avye vadhūyuḥ pavate pari tvaci śrathnīte naptīr aditer ṛtaṁ yate |
9.069.03c harir akrān yajataḥ saṁyato mado nṛmṇā śiśāno mahiṣo na śobhate ||
9.069.04a ukṣā mimāti prati yanti dhenavo devasya devīr upa yanti niṣkṛtam |
9.069.04c aty akramīd arjunaṁ vāram avyayam atkaṁ na niktam pari somo avyata ||
9.069.05a amṛktena ruśatā vāsasā harir amartyo nirṇijānaḥ pari vyata |
9.069.05c divas pṛṣṭham barhaṇā nirṇije kṛtopastaraṇaṁ camvor nabhasmayam ||
9.069.06a sūryasyeva raśmayo drāvayitnavo matsarāsaḥ prasupaḥ sākam īrate |
9.069.06c tantuṁ tatam pari sargāsa āśavo nendrād ṛte pavate dhāma kiṁ cana ||
9.069.07a sindhor iva pravaṇe nimna āśavo vṛṣacyutā madāso gātum āśata |
9.069.07c śaṁ no niveśe dvipade catuṣpade 'sme vājāḥ soma tiṣṭhantu kṛṣṭayaḥ ||
9.069.08a ā naḥ pavasva vasumad dhiraṇyavad aśvāvad gomad yavamat suvīryam |
9.069.08c yūyaṁ hi soma pitaro mama sthana divo mūrdhānaḥ prasthitā vayaskṛtaḥ ||
9.069.09a ete somāḥ pavamānāsa indraṁ rathā iva pra yayuḥ sātim accha |
9.069.09c sutāḥ pavitram ati yanty avyaṁ hitvī vavriṁ harito vṛṣṭim accha ||
9.069.10a indav indrāya bṛhate pavasva sumṛḻīko anavadyo riśādāḥ |
9.069.10c bharā candrāṇi gṛṇate vasūni devair dyāvāpṛthivī prāvataṁ naḥ ||

9.070.01a trir asmai sapta dhenavo duduhre satyām āśiram pūrvye vyomani |
9.070.01c catvāry anyā bhuvanāni nirṇije cārūṇi cakre yad ṛtair avardhata ||
9.070.02a sa bhikṣamāṇo amṛtasya cāruṇa ubhe dyāvā kāvyenā vi śaśrathe |
9.070.02c tejiṣṭhā apo maṁhanā pari vyata yadī devasya śravasā sado viduḥ ||
9.070.03a te asya santu ketavo 'mṛtyavo 'dābhyāso januṣī ubhe anu |
9.070.03c yebhir nṛmṇā ca devyā ca punata ād id rājānam mananā agṛbhṇata ||
9.070.04a sa mṛjyamāno daśabhiḥ sukarmabhiḥ pra madhyamāsu mātṛṣu prame sacā |
9.070.04c vratāni pāno amṛtasya cāruṇa ubhe nṛcakṣā anu paśyate viśau ||
9.070.05a sa marmṛjāna indriyāya dhāyasa obhe antā rodasī harṣate hitaḥ |
9.070.05c vṛṣā śuṣmeṇa bādhate vi durmatīr ādediśānaḥ śaryaheva śurudhaḥ ||
9.070.06a sa mātarā na dadṛśāna usriyo nānadad eti marutām iva svanaḥ |
9.070.06c jānann ṛtam prathamaṁ yat svarṇaram praśastaye kam avṛṇīta sukratuḥ ||
9.070.07a ruvati bhīmo vṛṣabhas taviṣyayā śṛṅge śiśāno hariṇī vicakṣaṇaḥ |
9.070.07c ā yoniṁ somaḥ sukṛtaṁ ni ṣīdati gavyayī tvag bhavati nirṇig avyayī ||
9.070.08a śuciḥ punānas tanvam arepasam avye harir ny adhāviṣṭa sānavi |
9.070.08c juṣṭo mitrāya varuṇāya vāyave tridhātu madhu kriyate sukarmabhiḥ ||
9.070.09a pavasva soma devavītaye vṛṣendrasya hārdi somadhānam ā viśa |
9.070.09c purā no bādhād duritāti pāraya kṣetravid dhi diśa āhā vipṛcchate ||
9.070.10a hito na saptir abhi vājam arṣendrasyendo jaṭharam ā pavasva |
9.070.10c nāvā na sindhum ati parṣi vidvāñ chūro na yudhyann ava no nidaḥ spaḥ ||

9.071.01a ā dakṣiṇā sṛjyate śuṣmy āsadaṁ veti druho rakṣasaḥ pāti jāgṛviḥ |
9.071.01c harir opaśaṁ kṛṇute nabhas paya upastire camvor brahma nirṇije ||
9.071.02a pra kṛṣṭiheva śūṣa eti roruvad asuryaṁ varṇaṁ ni riṇīte asya tam |
9.071.02c jahāti vavrim pitur eti niṣkṛtam upaprutaṁ kṛṇute nirṇijaṁ tanā ||
9.071.03a adribhiḥ sutaḥ pavate gabhastyor vṛṣāyate nabhasā vepate matī |
9.071.03c sa modate nasate sādhate girā nenikte apsu yajate parīmaṇi ||
9.071.04a pari dyukṣaṁ sahasaḥ parvatāvṛdham madhvaḥ siñcanti harmyasya sakṣaṇim |
9.071.04c ā yasmin gāvaḥ suhutāda ūdhani mūrdhañ chrīṇanty agriyaṁ varīmabhiḥ ||
9.071.05a sam ī rathaṁ na bhurijor aheṣata daśa svasāro aditer upastha ā |
9.071.05c jigād upa jrayati gor apīcyam padaṁ yad asya matuthā ajījanan ||
9.071.06a śyeno na yoniṁ sadanaṁ dhiyā kṛtaṁ hiraṇyayam āsadaṁ deva eṣati |
9.071.06c e riṇanti barhiṣi priyaṁ girāśvo na devām̐ apy eti yajñiyaḥ ||
9.071.07a parā vyakto aruṣo divaḥ kavir vṛṣā tripṛṣṭho anaviṣṭa gā abhi |
9.071.07c sahasraṇītir yatiḥ parāyatī rebho na pūrvīr uṣaso vi rājati ||
9.071.08a tveṣaṁ rūpaṁ kṛṇute varṇo asya sa yatrāśayat samṛtā sedhati sridhaḥ |
9.071.08c apsā yāti svadhayā daivyaṁ janaṁ saṁ suṣṭutī nasate saṁ goagrayā ||
9.071.09a ukṣeva yūthā pariyann arāvīd adhi tviṣīr adhita sūryasya |
9.071.09c divyaḥ suparṇo 'va cakṣata kṣāṁ somaḥ pari kratunā paśyate jāḥ ||

9.072.01a harim mṛjanty aruṣo na yujyate saṁ dhenubhiḥ kalaśe somo ajyate |
9.072.01c ud vācam īrayati hinvate matī puruṣṭutasya kati cit paripriyaḥ ||
9.072.02a sākaṁ vadanti bahavo manīṣiṇa indrasya somaṁ jaṭhare yad āduhuḥ |
9.072.02c yadī mṛjanti sugabhastayo naraḥ sanīḻābhir daśabhiḥ kāmyam madhu ||
9.072.03a aramamāṇo aty eti gā abhi sūryasya priyaṁ duhitus tiro ravam |
9.072.03c anv asmai joṣam abharad vinaṁgṛsaḥ saṁ dvayībhiḥ svasṛbhiḥ kṣeti jāmibhiḥ ||
9.072.04a nṛdhūto adriṣuto barhiṣi priyaḥ patir gavām pradiva indur ṛtviyaḥ |
9.072.04c puraṁdhivān manuṣo yajñasādhanaḥ śucir dhiyā pavate soma indra te ||
9.072.05a nṛbāhubhyāṁ codito dhārayā suto 'nuṣvadham pavate soma indra te |
9.072.05c āprāḥ kratūn sam ajair adhvare matīr ver na druṣac camvor āsadad dhariḥ ||
9.072.06a aṁśuṁ duhanti stanayantam akṣitaṁ kaviṁ kavayo 'paso manīṣiṇaḥ |
9.072.06c sam ī gāvo matayo yanti saṁyata ṛtasya yonā sadane punarbhuvaḥ ||
9.072.07a nābhā pṛthivyā dharuṇo maho divo 'pām ūrmau sindhuṣv antar ukṣitaḥ |
9.072.07c indrasya vajro vṛṣabho vibhūvasuḥ somo hṛde pavate cāru matsaraḥ ||
9.072.08a sa tū pavasva pari pārthivaṁ rajaḥ stotre śikṣann ādhūnvate ca sukrato |
9.072.08c mā no nir bhāg vasunaḥ sādanaspṛśo rayim piśaṅgam bahulaṁ vasīmahi ||
9.072.09a ā tū na indo śatadātv aśvyaṁ sahasradātu paśumad dhiraṇyavat |
9.072.09c upa māsva bṛhatī revatīr iṣo 'dhi stotrasya pavamāna no gahi ||

9.073.01a srakve drapsasya dhamataḥ sam asvarann ṛtasya yonā sam aranta nābhayaḥ |
9.073.01c trīn sa mūrdhno asuraś cakra ārabhe satyasya nāvaḥ sukṛtam apīparan ||
9.073.02a samyak samyañco mahiṣā aheṣata sindhor ūrmāv adhi venā avīvipan |
9.073.02c madhor dhārābhir janayanto arkam it priyām indrasya tanvam avīvṛdhan ||
9.073.03a pavitravantaḥ pari vācam āsate pitaiṣām pratno abhi rakṣati vratam |
9.073.03c mahaḥ samudraṁ varuṇas tiro dadhe dhīrā ic chekur dharuṇeṣv ārabham ||
9.073.04a sahasradhāre 'va te sam asvaran divo nāke madhujihvā asaścataḥ |
9.073.04c asya spaśo na ni miṣanti bhūrṇayaḥ pade-pade pāśinaḥ santi setavaḥ ||
9.073.05a pitur mātur adhy ā ye samasvarann ṛcā śocantaḥ saṁdahanto avratān |
9.073.05c indradviṣṭām apa dhamanti māyayā tvacam asiknīm bhūmano divas pari ||
9.073.06a pratnān mānād adhy ā ye samasvarañ chlokayantrāso rabhasasya mantavaḥ |
9.073.06c apānakṣāso badhirā ahāsata ṛtasya panthāṁ na taranti duṣkṛtaḥ ||
9.073.07a sahasradhāre vitate pavitra ā vācam punanti kavayo manīṣiṇaḥ |
9.073.07c rudrāsa eṣām iṣirāso adruhaḥ spaśaḥ svañcaḥ sudṛśo nṛcakṣasaḥ ||
9.073.08a ṛtasya gopā na dabhāya sukratus trī ṣa pavitrā hṛdy antar ā dadhe |
9.073.08c vidvān sa viśvā bhuvanābhi paśyaty avājuṣṭān vidhyati karte avratān ||
9.073.09a ṛtasya tantur vitataḥ pavitra ā jihvāyā agre varuṇasya māyayā |
9.073.09c dhīrāś cit tat saminakṣanta āśatātrā kartam ava padāty aprabhuḥ ||

9.074.01a śiśur na jāto 'va cakradad vane svar yad vājy aruṣaḥ siṣāsati |
9.074.01c divo retasā sacate payovṛdhā tam īmahe sumatī śarma saprathaḥ ||
9.074.02a divo yaḥ skambho dharuṇaḥ svātata āpūrṇo aṁśuḥ paryeti viśvataḥ |
9.074.02c seme mahī rodasī yakṣad āvṛtā samīcīne dādhāra sam iṣaḥ kaviḥ ||
9.074.03a mahi psaraḥ sukṛtaṁ somyam madhūrvī gavyūtir aditer ṛtaṁ yate |
9.074.03c īśe yo vṛṣṭer ita usriyo vṛṣāpāṁ netā ya itaūtir ṛgmiyaḥ ||
9.074.04a ātmanvan nabho duhyate ghṛtam paya ṛtasya nābhir amṛtaṁ vi jāyate |
9.074.04c samīcīnāḥ sudānavaḥ prīṇanti taṁ naro hitam ava mehanti peravaḥ ||
9.074.05a arāvīd aṁśuḥ sacamāna ūrmiṇā devāvyam manuṣe pinvati tvacam |
9.074.05c dadhāti garbham aditer upastha ā yena tokaṁ ca tanayaṁ ca dhāmahe ||
9.074.06a sahasradhāre 'va tā asaścatas tṛtīye santu rajasi prajāvatīḥ |
9.074.06c catasro nābho nihitā avo divo havir bharanty amṛtaṁ ghṛtaścutaḥ ||
9.074.07a śvetaṁ rūpaṁ kṛṇute yat siṣāsati somo mīḍhvām̐ asuro veda bhūmanaḥ |
9.074.07c dhiyā śamī sacate sem abhi pravad divas kavandham ava darṣad udriṇam ||
9.074.08a adha śvetaṁ kalaśaṁ gobhir aktaṁ kārṣmann ā vājy akramīt sasavān |
9.074.08c ā hinvire manasā devayantaḥ kakṣīvate śatahimāya gonām ||
9.074.09a adbhiḥ soma papṛcānasya te raso 'vyo vāraṁ vi pavamāna dhāvati |
9.074.09c sa mṛjyamānaḥ kavibhir madintama svadasvendrāya pavamāna pītaye ||

9.075.01a abhi priyāṇi pavate canohito nāmāni yahvo adhi yeṣu vardhate |
9.075.01c ā sūryasya bṛhato bṛhann adhi rathaṁ viṣvañcam aruhad vicakṣaṇaḥ ||
9.075.02a ṛtasya jihvā pavate madhu priyaṁ vaktā patir dhiyo asyā adābhyaḥ |
9.075.02c dadhāti putraḥ pitror apīcyaṁ nāma tṛtīyam adhi rocane divaḥ ||
9.075.03a ava dyutānaḥ kalaśām̐ acikradan nṛbhir yemānaḥ kośa ā hiraṇyaye |
9.075.03c abhīm ṛtasya dohanā anūṣatādhi tripṛṣṭha uṣaso vi rājati ||
9.075.04a adribhiḥ suto matibhiś canohitaḥ prarocayan rodasī mātarā śuciḥ |
9.075.04c romāṇy avyā samayā vi dhāvati madhor dhārā pinvamānā dive-dive ||
9.075.05a pari soma pra dhanvā svastaye nṛbhiḥ punāno abhi vāsayāśiram |
9.075.05c ye te madā āhanaso vihāyasas tebhir indraṁ codaya dātave magham ||

9.076.01a dhartā divaḥ pavate kṛtvyo raso dakṣo devānām anumādyo nṛbhiḥ |
9.076.01c hariḥ sṛjāno atyo na satvabhir vṛthā pājāṁsi kṛṇute nadīṣv ā ||
9.076.02a śūro na dhatta āyudhā gabhastyoḥ svaḥ siṣāsan rathiro gaviṣṭiṣu |
9.076.02c indrasya śuṣmam īrayann apasyubhir indur hinvāno ajyate manīṣibhiḥ ||
9.076.03a indrasya soma pavamāna ūrmiṇā taviṣyamāṇo jaṭhareṣv ā viśa |
9.076.03c pra ṇaḥ pinva vidyud abhreva rodasī dhiyā na vājām̐ upa māsi śaśvataḥ ||
9.076.04a viśvasya rājā pavate svardṛśa ṛtasya dhītim ṛṣiṣāḻ avīvaśat |
9.076.04c yaḥ sūryasyāsireṇa mṛjyate pitā matīnām asamaṣṭakāvyaḥ ||
9.076.05a vṛṣeva yūthā pari kośam arṣasy apām upasthe vṛṣabhaḥ kanikradat |
9.076.05c sa indrāya pavase matsarintamo yathā jeṣāma samithe tvotayaḥ ||

9.077.01a eṣa pra kośe madhumām̐ acikradad indrasya vajro vapuṣo vapuṣṭaraḥ |
9.077.01c abhīm ṛtasya sudughā ghṛtaścuto vāśrā arṣanti payaseva dhenavaḥ ||
9.077.02a sa pūrvyaḥ pavate yaṁ divas pari śyeno mathāyad iṣitas tiro rajaḥ |
9.077.02c sa madhva ā yuvate vevijāna it kṛśānor astur manasāha bibhyuṣā ||
9.077.03a te naḥ pūrvāsa uparāsa indavo mahe vājāya dhanvantu gomate |
9.077.03c īkṣeṇyāso ahyo na cāravo brahma-brahma ye jujuṣur havir-haviḥ ||
9.077.04a ayaṁ no vidvān vanavad vanuṣyata induḥ satrācā manasā puruṣṭutaḥ |
9.077.04c inasya yaḥ sadane garbham ādadhe gavām urubjam abhy arṣati vrajam ||
9.077.05a cakrir divaḥ pavate kṛtvyo raso mahām̐ adabdho varuṇo hurug yate |
9.077.05c asāvi mitro vṛjaneṣu yajñiyo 'tyo na yūthe vṛṣayuḥ kanikradat ||

9.078.01a pra rājā vācaṁ janayann asiṣyadad apo vasāno abhi gā iyakṣati |
9.078.01c gṛbhṇāti ripram avir asya tānvā śuddho devānām upa yāti niṣkṛtam ||
9.078.02a indrāya soma pari ṣicyase nṛbhir nṛcakṣā ūrmiḥ kavir ajyase vane |
9.078.02c pūrvīr hi te srutayaḥ santi yātave sahasram aśvā harayaś camūṣadaḥ ||
9.078.03a samudriyā apsaraso manīṣiṇam āsīnā antar abhi somam akṣaran |
9.078.03c tā īṁ hinvanti harmyasya sakṣaṇiṁ yācante sumnam pavamānam akṣitam ||
9.078.04a gojin naḥ somo rathajid dhiraṇyajit svarjid abjit pavate sahasrajit |
9.078.04c yaṁ devāsaś cakrire pītaye madaṁ svādiṣṭhaṁ drapsam aruṇam mayobhuvam ||
9.078.05a etāni soma pavamāno asmayuḥ satyāni kṛṇvan draviṇāny arṣasi |
9.078.05c jahi śatrum antike dūrake ca ya urvīṁ gavyūtim abhayaṁ ca nas kṛdhi ||

9.079.01a acodaso no dhanvantv indavaḥ pra suvānāso bṛhaddiveṣu harayaḥ |
9.079.01c vi ca naśan na iṣo arātayo 'ryo naśanta saniṣanta no dhiyaḥ ||
9.079.02a pra ṇo dhanvantv indavo madacyuto dhanā vā yebhir arvato junīmasi |
9.079.02c tiro martasya kasya cit parihvṛtiṁ vayaṁ dhanāni viśvadhā bharemahi ||
9.079.03a uta svasyā arātyā arir hi ṣa utānyasyā arātyā vṛko hi ṣaḥ |
9.079.03c dhanvan na tṛṣṇā sam arīta tām̐ abhi soma jahi pavamāna durādhyaḥ ||
9.079.04a divi te nābhā paramo ya ādade pṛthivyās te ruruhuḥ sānavi kṣipaḥ |
9.079.04c adrayas tvā bapsati gor adhi tvacy apsu tvā hastair duduhur manīṣiṇaḥ ||
9.079.05a evā ta indo subhvaṁ supeśasaṁ rasaṁ tuñjanti prathamā abhiśriyaḥ |
9.079.05c nidaṁ-nidam pavamāna ni tāriṣa āvis te śuṣmo bhavatu priyo madaḥ ||

9.080.01a somasya dhārā pavate nṛcakṣasa ṛtena devān havate divas pari |
9.080.01c bṛhaspate ravathenā vi didyute samudrāso na savanāni vivyacuḥ ||
9.080.02a yaṁ tvā vājinn aghnyā abhy anūṣatāyohataṁ yonim ā rohasi dyumān |
9.080.02c maghonām āyuḥ pratiran mahi śrava indrāya soma pavase vṛṣā madaḥ ||
9.080.03a endrasya kukṣā pavate madintama ūrjaṁ vasānaḥ śravase sumaṅgalaḥ |
9.080.03c pratyaṅ sa viśvā bhuvanābhi paprathe krīḻan harir atyaḥ syandate vṛṣā ||
9.080.04a taṁ tvā devebhyo madhumattamaṁ naraḥ sahasradhāraṁ duhate daśa kṣipaḥ |
9.080.04c nṛbhiḥ soma pracyuto grāvabhiḥ suto viśvān devām̐ ā pavasvā sahasrajit ||
9.080.05a taṁ tvā hastino madhumantam adribhir duhanty apsu vṛṣabhaṁ daśa kṣipaḥ |
9.080.05c indraṁ soma mādayan daivyaṁ janaṁ sindhor ivormiḥ pavamāno arṣasi ||

9.081.01a pra somasya pavamānasyormaya indrasya yanti jaṭharaṁ supeśasaḥ |
9.081.01c dadhnā yad īm unnītā yaśasā gavāṁ dānāya śūram udamandiṣuḥ sutāḥ ||
9.081.02a acchā hi somaḥ kalaśām̐ asiṣyadad atyo na voḻhā raghuvartanir vṛṣā |
9.081.02c athā devānām ubhayasya janmano vidvām̐ aśnoty amuta itaś ca yat ||
9.081.03a ā naḥ soma pavamānaḥ kirā vasv indo bhava maghavā rādhaso mahaḥ |
9.081.03c śikṣā vayodho vasave su cetunā mā no gayam āre asmat parā sicaḥ ||
9.081.04a ā naḥ pūṣā pavamānaḥ surātayo mitro gacchantu varuṇaḥ sajoṣasaḥ |
9.081.04c bṛhaspatir maruto vāyur aśvinā tvaṣṭā savitā suyamā sarasvatī ||
9.081.05a ubhe dyāvāpṛthivī viśvaminve aryamā devo aditir vidhātā |
9.081.05c bhago nṛśaṁsa urv antarikṣaṁ viśve devāḥ pavamānaṁ juṣanta ||

9.082.01a asāvi somo aruṣo vṛṣā harī rājeva dasmo abhi gā acikradat |
9.082.01c punāno vāram pary ety avyayaṁ śyeno na yoniṁ ghṛtavantam āsadam ||
9.082.02a kavir vedhasyā pary eṣi māhinam atyo na mṛṣṭo abhi vājam arṣasi |
9.082.02c apasedhan duritā soma mṛḻaya ghṛtaṁ vasānaḥ pari yāsi nirṇijam ||
9.082.03a parjanyaḥ pitā mahiṣasya parṇino nābhā pṛthivyā giriṣu kṣayaṁ dadhe |
9.082.03c svasāra āpo abhi gā utāsaran saṁ grāvabhir nasate vīte adhvare ||
9.082.04a jāyeva patyāv adhi śeva maṁhase pajrāyā garbha śṛṇuhi bravīmi te |
9.082.04c antar vāṇīṣu pra carā su jīvase 'nindyo vṛjane soma jāgṛhi ||
9.082.05a yathā pūrvebhyaḥ śatasā amṛdhraḥ sahasrasāḥ paryayā vājam indo |
9.082.05c evā pavasva suvitāya navyase tava vratam anv āpaḥ sacante ||

9.083.01a pavitraṁ te vitatam brahmaṇas pate prabhur gātrāṇi pary eṣi viśvataḥ |
9.083.01c ataptatanūr na tad āmo aśnute śṛtāsa id vahantas tat sam āśata ||
9.083.02a tapoṣ pavitraṁ vitataṁ divas pade śocanto asya tantavo vy asthiran |
9.083.02c avanty asya pavītāram āśavo divas pṛṣṭham adhi tiṣṭhanti cetasā ||
9.083.03a arūrucad uṣasaḥ pṛśnir agriya ukṣā bibharti bhuvanāni vājayuḥ |
9.083.03c māyāvino mamire asya māyayā nṛcakṣasaḥ pitaro garbham ā dadhuḥ ||
9.083.04a gandharva itthā padam asya rakṣati pāti devānāṁ janimāny adbhutaḥ |
9.083.04c gṛbhṇāti ripuṁ nidhayā nidhāpatiḥ sukṛttamā madhuno bhakṣam āśata ||
9.083.05a havir haviṣmo mahi sadma daivyaṁ nabho vasānaḥ pari yāsy adhvaram |
9.083.05c rājā pavitraratho vājam āruhaḥ sahasrabhṛṣṭir jayasi śravo bṛhat ||

9.084.01a pavasva devamādano vicarṣaṇir apsā indrāya varuṇāya vāyave |
9.084.01c kṛdhī no adya varivaḥ svastimad urukṣitau gṛṇīhi daivyaṁ janam ||
9.084.02a ā yas tasthau bhuvanāny amartyo viśvāni somaḥ pari tāny arṣati |
9.084.02c kṛṇvan saṁcṛtaṁ vicṛtam abhiṣṭaya induḥ siṣakty uṣasaṁ na sūryaḥ ||
9.084.03a ā yo gobhiḥ sṛjyata oṣadhīṣv ā devānāṁ sumna iṣayann upāvasuḥ |
9.084.03c ā vidyutā pavate dhārayā suta indraṁ somo mādayan daivyaṁ janam ||
9.084.04a eṣa sya somaḥ pavate sahasrajid dhinvāno vācam iṣirām uṣarbudham |
9.084.04c induḥ samudram ud iyarti vāyubhir endrasya hārdi kalaśeṣu sīdati ||
9.084.05a abhi tyaṁ gāvaḥ payasā payovṛdhaṁ somaṁ śrīṇanti matibhiḥ svarvidam |
9.084.05c dhanaṁjayaḥ pavate kṛtvyo raso vipraḥ kaviḥ kāvyenā svarcanāḥ ||

9.085.01a indrāya soma suṣutaḥ pari sravāpāmīvā bhavatu rakṣasā saha |
9.085.01c mā te rasasya matsata dvayāvino draviṇasvanta iha santv indavaḥ ||
9.085.02a asmān samarye pavamāna codaya dakṣo devānām asi hi priyo madaḥ |
9.085.02c jahi śatrūm̐r abhy ā bhandanāyataḥ pibendra somam ava no mṛdho jahi ||
9.085.03a adabdha indo pavase madintama ātmendrasya bhavasi dhāsir uttamaḥ |
9.085.03c abhi svaranti bahavo manīṣiṇo rājānam asya bhuvanasya niṁsate ||
9.085.04a sahasraṇīthaḥ śatadhāro adbhuta indrāyenduḥ pavate kāmyam madhu |
9.085.04c jayan kṣetram abhy arṣā jayann apa uruṁ no gātuṁ kṛṇu soma mīḍhvaḥ ||
9.085.05a kanikradat kalaśe gobhir ajyase vy avyayaṁ samayā vāram arṣasi |
9.085.05c marmṛjyamāno atyo na sānasir indrasya soma jaṭhare sam akṣaraḥ ||
9.085.06a svāduḥ pavasva divyāya janmane svādur indrāya suhavītunāmne |
9.085.06c svādur mitrāya varuṇāya vāyave bṛhaspataye madhumām̐ adābhyaḥ ||
9.085.07a atyam mṛjanti kalaśe daśa kṣipaḥ pra viprāṇām matayo vāca īrate |
9.085.07c pavamānā abhy arṣanti suṣṭutim endraṁ viśanti madirāsa indavaḥ ||
9.085.08a pavamāno abhy arṣā suvīryam urvīṁ gavyūtim mahi śarma saprathaḥ |
9.085.08c mākir no asya pariṣūtir īśatendo jayema tvayā dhanaṁ-dhanam ||
9.085.09a adhi dyām asthād vṛṣabho vicakṣaṇo 'rūrucad vi divo rocanā kaviḥ |
9.085.09c rājā pavitram aty eti roruvad divaḥ pīyūṣaṁ duhate nṛcakṣasaḥ ||
9.085.10a divo nāke madhujihvā asaścato venā duhanty ukṣaṇaṁ giriṣṭhām |
9.085.10c apsu drapsaṁ vāvṛdhānaṁ samudra ā sindhor ūrmā madhumantam pavitra ā ||
9.085.11a nāke suparṇam upapaptivāṁsaṁ giro venānām akṛpanta pūrvīḥ |
9.085.11c śiśuṁ rihanti matayaḥ panipnataṁ hiraṇyayaṁ śakunaṁ kṣāmaṇi sthām ||
9.085.12a ūrdhvo gandharvo adhi nāke asthād viśvā rūpā praticakṣāṇo asya |
9.085.12c bhānuḥ śukreṇa śociṣā vy adyaut prārūrucad rodasī mātarā śuciḥ ||

9.086.01a pra ta āśavaḥ pavamāna dhījavo madā arṣanti raghujā iva tmanā |
9.086.01c divyāḥ suparṇā madhumanta indavo madintamāsaḥ pari kośam āsate ||
9.086.02a pra te madāso madirāsa āśavo 'sṛkṣata rathyāso yathā pṛthak |
9.086.02c dhenur na vatsam payasābhi vajriṇam indram indavo madhumanta ūrmayaḥ ||
9.086.03a atyo na hiyāno abhi vājam arṣa svarvit kośaṁ divo adrimātaram |
9.086.03c vṛṣā pavitre adhi sāno avyaye somaḥ punāna indriyāya dhāyase ||
9.086.04a pra ta āśvinīḥ pavamāna dhījuvo divyā asṛgran payasā dharīmaṇi |
9.086.04c prāntar ṛṣayaḥ sthāvirīr asṛkṣata ye tvā mṛjanty ṛṣiṣāṇa vedhasaḥ ||
9.086.05a viśvā dhāmāni viśvacakṣa ṛbhvasaḥ prabhos te sataḥ pari yanti ketavaḥ |
9.086.05c vyānaśiḥ pavase soma dharmabhiḥ patir viśvasya bhuvanasya rājasi ||
9.086.06a ubhayataḥ pavamānasya raśmayo dhruvasya sataḥ pari yanti ketavaḥ |
9.086.06c yadī pavitre adhi mṛjyate hariḥ sattā ni yonā kalaśeṣu sīdati ||
9.086.07a yajñasya ketuḥ pavate svadhvaraḥ somo devānām upa yāti niṣkṛtam |
9.086.07c sahasradhāraḥ pari kośam arṣati vṛṣā pavitram aty eti roruvat ||
9.086.08a rājā samudraṁ nadyo vi gāhate 'pām ūrmiṁ sacate sindhuṣu śritaḥ |
9.086.08c adhy asthāt sānu pavamāno avyayaṁ nābhā pṛthivyā dharuṇo maho divaḥ ||
9.086.09a divo na sānu stanayann acikradad dyauś ca yasya pṛthivī ca dharmabhiḥ |
9.086.09c indrasya sakhyam pavate vivevidat somaḥ punānaḥ kalaśeṣu sīdati ||
9.086.10a jyotir yajñasya pavate madhu priyam pitā devānāṁ janitā vibhūvasuḥ |
9.086.10c dadhāti ratnaṁ svadhayor apīcyam madintamo matsara indriyo rasaḥ ||
9.086.11a abhikrandan kalaśaṁ vājy arṣati patir divaḥ śatadhāro vicakṣaṇaḥ |
9.086.11c harir mitrasya sadaneṣu sīdati marmṛjāno 'vibhiḥ sindhubhir vṛṣā ||
9.086.12a agre sindhūnām pavamāno arṣaty agre vāco agriyo goṣu gacchati |
9.086.12c agre vājasya bhajate mahādhanaṁ svāyudhaḥ sotṛbhiḥ pūyate vṛṣā ||
9.086.13a ayam matavāñ chakuno yathā hito 'vye sasāra pavamāna ūrmiṇā |
9.086.13c tava kratvā rodasī antarā kave śucir dhiyā pavate soma indra te ||
9.086.14a drāpiṁ vasāno yajato divispṛśam antarikṣaprā bhuvaneṣv arpitaḥ |
9.086.14c svar jajñāno nabhasābhy akramīt pratnam asya pitaram ā vivāsati ||
9.086.15a so asya viśe mahi śarma yacchati yo asya dhāma prathamaṁ vyānaśe |
9.086.15c padaṁ yad asya parame vyomany ato viśvā abhi saṁ yāti saṁyataḥ ||
9.086.16a pro ayāsīd indur indrasya niṣkṛtaṁ sakhā sakhyur na pra mināti saṁgiram |
9.086.16c marya iva yuvatibhiḥ sam arṣati somaḥ kalaśe śatayāmnā pathā ||
9.086.17a pra vo dhiyo mandrayuvo vipanyuvaḥ panasyuvaḥ saṁvasaneṣv akramuḥ |
9.086.17c somam manīṣā abhy anūṣata stubho 'bhi dhenavaḥ payasem aśiśrayuḥ ||
9.086.18a ā naḥ soma saṁyatam pipyuṣīm iṣam indo pavasva pavamāno asridham |
9.086.18c yā no dohate trir ahann asaścuṣī kṣumad vājavan madhumat suvīryam ||
9.086.19a vṛṣā matīnām pavate vicakṣaṇaḥ somo ahnaḥ pratarītoṣaso divaḥ |
9.086.19c krāṇā sindhūnāṁ kalaśām̐ avīvaśad indrasya hārdy āviśan manīṣibhiḥ ||
9.086.20a manīṣibhiḥ pavate pūrvyaḥ kavir nṛbhir yataḥ pari kośām̐ acikradat |
9.086.20c tritasya nāma janayan madhu kṣarad indrasya vāyoḥ sakhyāya kartave ||
9.086.21a ayam punāna uṣaso vi rocayad ayaṁ sindhubhyo abhavad u lokakṛt |
9.086.21c ayaṁ triḥ sapta duduhāna āśiraṁ somo hṛde pavate cāru matsaraḥ ||
9.086.22a pavasva soma divyeṣu dhāmasu sṛjāna indo kalaśe pavitra ā |
9.086.22c sīdann indrasya jaṭhare kanikradan nṛbhir yataḥ sūryam ārohayo divi ||
9.086.23a adribhiḥ sutaḥ pavase pavitra ām̐ indav indrasya jaṭhareṣv āviśan |
9.086.23c tvaṁ nṛcakṣā abhavo vicakṣaṇa soma gotram aṅgirobhyo 'vṛṇor apa ||
9.086.24a tvāṁ soma pavamānaṁ svādhyo 'nu viprāso amadann avasyavaḥ |
9.086.24c tvāṁ suparṇa ābharad divas parīndo viśvābhir matibhiḥ pariṣkṛtam ||
9.086.25a avye punānam pari vāra ūrmiṇā hariṁ navante abhi sapta dhenavaḥ |
9.086.25c apām upasthe adhy āyavaḥ kavim ṛtasya yonā mahiṣā aheṣata ||
9.086.26a induḥ punāno ati gāhate mṛdho viśvāni kṛṇvan supathāni yajyave |
9.086.26c gāḥ kṛṇvāno nirṇijaṁ haryataḥ kavir atyo na krīḻan pari vāram arṣati ||
9.086.27a asaścataḥ śatadhārā abhiśriyo hariṁ navante 'va tā udanyuvaḥ |
9.086.27c kṣipo mṛjanti pari gobhir āvṛtaṁ tṛtīye pṛṣṭhe adhi rocane divaḥ ||
9.086.28a tavemāḥ prajā divyasya retasas tvaṁ viśvasya bhuvanasya rājasi |
9.086.28c athedaṁ viśvam pavamāna te vaśe tvam indo prathamo dhāmadhā asi ||
9.086.29a tvaṁ samudro asi viśvavit kave tavemāḥ pañca pradiśo vidharmaṇi |
9.086.29c tvaṁ dyāṁ ca pṛthivīṁ cāti jabhriṣe tava jyotīṁṣi pavamāna sūryaḥ ||
9.086.30a tvam pavitre rajaso vidharmaṇi devebhyaḥ soma pavamāna pūyase |
9.086.30c tvām uśijaḥ prathamā agṛbhṇata tubhyemā viśvā bhuvanāni yemire ||
9.086.31a pra rebha ety ati vāram avyayaṁ vṛṣā vaneṣv ava cakradad dhariḥ |
9.086.31c saṁ dhītayo vāvaśānā anūṣata śiśuṁ rihanti matayaḥ panipnatam ||
9.086.32a sa sūryasya raśmibhiḥ pari vyata tantuṁ tanvānas trivṛtaṁ yathā vide |
9.086.32c nayann ṛtasya praśiṣo navīyasīḥ patir janīnām upa yāti niṣkṛtam ||
9.086.33a rājā sindhūnām pavate patir diva ṛtasya yāti pathibhiḥ kanikradat |
9.086.33c sahasradhāraḥ pari ṣicyate hariḥ punāno vācaṁ janayann upāvasuḥ ||
9.086.34a pavamāna mahy arṇo vi dhāvasi sūro na citro avyayāni pavyayā |
9.086.34c gabhastipūto nṛbhir adribhiḥ suto mahe vājāya dhanyāya dhanvasi ||
9.086.35a iṣam ūrjam pavamānābhy arṣasi śyeno na vaṁsu kalaśeṣu sīdasi |
9.086.35c indrāya madvā madyo madaḥ suto divo viṣṭambha upamo vicakṣaṇaḥ ||
9.086.36a sapta svasāro abhi mātaraḥ śiśuṁ navaṁ jajñānaṁ jenyaṁ vipaścitam |
9.086.36c apāṁ gandharvaṁ divyaṁ nṛcakṣasaṁ somaṁ viśvasya bhuvanasya rājase ||
9.086.37a īśāna imā bhuvanāni vīyase yujāna indo haritaḥ suparṇyaḥ |
9.086.37c tās te kṣarantu madhumad ghṛtam payas tava vrate soma tiṣṭhantu kṛṣṭayaḥ ||
9.086.38a tvaṁ nṛcakṣā asi soma viśvataḥ pavamāna vṛṣabha tā vi dhāvasi |
9.086.38c sa naḥ pavasva vasumad dhiraṇyavad vayaṁ syāma bhuvaneṣu jīvase ||
9.086.39a govit pavasva vasuvid dhiraṇyavid retodhā indo bhuvaneṣv arpitaḥ |
9.086.39c tvaṁ suvīro asi soma viśvavit taṁ tvā viprā upa girema āsate ||
9.086.40a un madhva ūrmir vananā atiṣṭhipad apo vasāno mahiṣo vi gāhate |
9.086.40c rājā pavitraratho vājam āruhat sahasrabhṛṣṭir jayati śravo bṛhat ||
9.086.41a sa bhandanā ud iyarti prajāvatīr viśvāyur viśvāḥ subharā ahardivi |
9.086.41c brahma prajāvad rayim aśvapastyam pīta indav indram asmabhyaṁ yācatāt ||
9.086.42a so agre ahnāṁ harir haryato madaḥ pra cetasā cetayate anu dyubhiḥ |
9.086.42c dvā janā yātayann antar īyate narā ca śaṁsaṁ daivyaṁ ca dhartari ||
9.086.43a añjate vy añjate sam añjate kratuṁ rihanti madhunābhy añjate |
9.086.43c sindhor ucchvāse patayantam ukṣaṇaṁ hiraṇyapāvāḥ paśum āsu gṛbhṇate ||
9.086.44a vipaścite pavamānāya gāyata mahī na dhārāty andho arṣati |
9.086.44c ahir na jūrṇām ati sarpati tvacam atyo na krīḻann asarad vṛṣā hariḥ ||
9.086.45a agrego rājāpyas taviṣyate vimāno ahnām bhuvaneṣv arpitaḥ |
9.086.45c harir ghṛtasnuḥ sudṛśīko arṇavo jyotīrathaḥ pavate rāya okyaḥ ||
9.086.46a asarji skambho diva udyato madaḥ pari tridhātur bhuvanāny arṣati |
9.086.46c aṁśuṁ rihanti matayaḥ panipnataṁ girā yadi nirṇijam ṛgmiṇo yayuḥ ||
9.086.47a pra te dhārā aty aṇvāni meṣyaḥ punānasya saṁyato yanti raṁhayaḥ |
9.086.47c yad gobhir indo camvoḥ samajyasa ā suvānaḥ soma kalaśeṣu sīdasi ||
9.086.48a pavasva soma kratuvin na ukthyo 'vyo vāre pari dhāva madhu priyam |
9.086.48c jahi viśvān rakṣasa indo atriṇo bṛhad vadema vidathe suvīrāḥ ||

9.087.01a pra tu drava pari kośaṁ ni ṣīda nṛbhiḥ punāno abhi vājam arṣa |
9.087.01c aśvaṁ na tvā vājinam marjayanto 'cchā barhī raśanābhir nayanti ||
9.087.02a svāyudhaḥ pavate deva indur aśastihā vṛjanaṁ rakṣamāṇaḥ |
9.087.02c pitā devānāṁ janitā sudakṣo viṣṭambho divo dharuṇaḥ pṛthivyāḥ ||
9.087.03a ṛṣir vipraḥ puraetā janānām ṛbhur dhīra uśanā kāvyena |
9.087.03c sa cid viveda nihitaṁ yad āsām apīcyaṁ guhyaṁ nāma gonām ||
9.087.04a eṣa sya te madhumām̐ indra somo vṛṣā vṛṣṇe pari pavitre akṣāḥ |
9.087.04c sahasrasāḥ śatasā bhūridāvā śaśvattamam barhir ā vājy asthāt ||
9.087.05a ete somā abhi gavyā sahasrā mahe vājāyāmṛtāya śravāṁsi |
9.087.05c pavitrebhiḥ pavamānā asṛgrañ chravasyavo na pṛtanājo atyāḥ ||
9.087.06a pari hi ṣmā puruhūto janānāṁ viśvāsarad bhojanā pūyamānaḥ |
9.087.06c athā bhara śyenabhṛta prayāṁsi rayiṁ tuñjāno abhi vājam arṣa ||
9.087.07a eṣa suvānaḥ pari somaḥ pavitre sargo na sṛṣṭo adadhāvad arvā |
9.087.07c tigme śiśāno mahiṣo na śṛṅge gā gavyann abhi śūro na satvā ||
9.087.08a eṣā yayau paramād antar adreḥ kūcit satīr ūrve gā viveda |
9.087.08c divo na vidyut stanayanty abhraiḥ somasya te pavata indra dhārā ||
9.087.09a uta sma rāśim pari yāsi gonām indreṇa soma saratham punānaḥ |
9.087.09c pūrvīr iṣo bṛhatīr jīradāno śikṣā śacīvas tava tā upaṣṭut ||

9.088.01a ayaṁ soma indra tubhyaṁ sunve tubhyam pavate tvam asya pāhi |
9.088.01c tvaṁ ha yaṁ cakṛṣe tvaṁ vavṛṣa indum madāya yujyāya somam ||
9.088.02a sa īṁ ratho na bhuriṣāḻ ayoji mahaḥ purūṇi sātaye vasūni |
9.088.02c ād īṁ viśvā nahuṣyāṇi jātā svarṣātā vana ūrdhvā navanta ||
9.088.03a vāyur na yo niyutvām̐ iṣṭayāmā nāsatyeva hava ā śambhaviṣṭhaḥ |
9.088.03c viśvavāro draviṇodā iva tman pūṣeva dhījavano 'si soma ||
9.088.04a indro na yo mahā karmāṇi cakrir hantā vṛtrāṇām asi soma pūrbhit |
9.088.04c paidvo na hi tvam ahināmnāṁ hantā viśvasyāsi soma dasyoḥ ||
9.088.05a agnir na yo vana ā sṛjyamāno vṛthā pājāṁsi kṛṇute nadīṣu |
9.088.05c jano na yudhvā mahata upabdir iyarti somaḥ pavamāna ūrmim ||
9.088.06a ete somā ati vārāṇy avyā divyā na kośāso abhravarṣāḥ |
9.088.06c vṛthā samudraṁ sindhavo na nīcīḥ sutāso abhi kalaśām̐ asṛgran ||
9.088.07a śuṣmī śardho na mārutam pavasvānabhiśastā divyā yathā viṭ |
9.088.07c āpo na makṣū sumatir bhavā naḥ sahasrāpsāḥ pṛtanāṣāṇ na yajñaḥ ||
9.088.08a rājño nu te varuṇasya vratāni bṛhad gabhīraṁ tava soma dhāma |
9.088.08c śuciṣ ṭvam asi priyo na mitro dakṣāyyo aryamevāsi soma ||

9.089.01a pro sya vahniḥ pathyābhir asyān divo na vṛṣṭiḥ pavamāno akṣāḥ |
9.089.01c sahasradhāro asadan ny asme mātur upasthe vana ā ca somaḥ ||
9.089.02a rājā sindhūnām avasiṣṭa vāsa ṛtasya nāvam āruhad rajiṣṭhām |
9.089.02c apsu drapso vāvṛdhe śyenajūto duha īm pitā duha īm pitur jām ||
9.089.03a siṁhaṁ nasanta madhvo ayāsaṁ harim aruṣaṁ divo asya patim |
9.089.03c śūro yutsu prathamaḥ pṛcchate gā asya cakṣasā pari pāty ukṣā ||
9.089.04a madhupṛṣṭhaṁ ghoram ayāsam aśvaṁ rathe yuñjanty urucakra ṛṣvam |
9.089.04c svasāra īṁ jāmayo marjayanti sanābhayo vājinam ūrjayanti ||
9.089.05a catasra īṁ ghṛtaduhaḥ sacante samāne antar dharuṇe niṣattāḥ |
9.089.05c tā īm arṣanti namasā punānās tā īṁ viśvataḥ pari ṣanti pūrvīḥ ||
9.089.06a viṣṭambho divo dharuṇaḥ pṛthivyā viśvā uta kṣitayo haste asya |
9.089.06c asat ta utso gṛṇate niyutvān madhvo aṁśuḥ pavata indriyāya ||
9.089.07a vanvann avāto abhi devavītim indrāya soma vṛtrahā pavasva |
9.089.07c śagdhi mahaḥ puruścandrasya rāyaḥ suvīryasya patayaḥ syāma ||

9.090.01a pra hinvāno janitā rodasyo ratho na vājaṁ saniṣyann ayāsīt |
9.090.01c indraṁ gacchann āyudhā saṁśiśāno viśvā vasu hastayor ādadhānaḥ ||
9.090.02a abhi tripṛṣṭhaṁ vṛṣaṇaṁ vayodhām āṅgūṣāṇām avāvaśanta vāṇīḥ |
9.090.02c vanā vasāno varuṇo na sindhūn vi ratnadhā dayate vāryāṇi ||
9.090.03a śūragrāmaḥ sarvavīraḥ sahāvāñ jetā pavasva sanitā dhanāni |
9.090.03c tigmāyudhaḥ kṣipradhanvā samatsv aṣāḻhaḥ sāhvān pṛtanāsu śatrūn ||
9.090.04a urugavyūtir abhayāni kṛṇvan samīcīne ā pavasvā puraṁdhī |
9.090.04c apaḥ siṣāsann uṣasaḥ svar gāḥ saṁ cikrado maho asmabhyaṁ vājān ||
9.090.05a matsi soma varuṇam matsi mitram matsīndram indo pavamāna viṣṇum |
9.090.05c matsi śardho mārutam matsi devān matsi mahām indram indo madāya ||
9.090.06a evā rājeva kratumām̐ amena viśvā ghanighnad duritā pavasva |
9.090.06c indo sūktāya vacase vayo dhā yūyam pāta svastibhiḥ sadā naḥ ||

9.091.01a asarji vakvā rathye yathājau dhiyā manotā prathamo manīṣī |
9.091.01c daśa svasāro adhi sāno avye 'janti vahniṁ sadanāny accha ||
9.091.02a vītī janasya divyasya kavyair adhi suvāno nahuṣyebhir induḥ |
9.091.02c pra yo nṛbhir amṛto martyebhir marmṛjāno 'vibhir gobhir adbhiḥ ||
9.091.03a vṛṣā vṛṣṇe roruvad aṁśur asmai pavamāno ruśad īrte payo goḥ |
9.091.03c sahasram ṛkvā pathibhir vacovid adhvasmabhiḥ sūro aṇvaṁ vi yāti ||
9.091.04a rujā dṛḻhā cid rakṣasaḥ sadāṁsi punāna inda ūrṇuhi vi vājān |
9.091.04c vṛścopariṣṭāt tujatā vadhena ye anti dūrād upanāyam eṣām ||
9.091.05a sa pratnavan navyase viśvavāra sūktāya pathaḥ kṛṇuhi prācaḥ |
9.091.05c ye duḥṣahāso vanuṣā bṛhantas tām̐s te aśyāma purukṛt purukṣo ||
9.091.06a evā punāno apaḥ svar gā asmabhyaṁ tokā tanayāni bhūri |
9.091.06c śaṁ naḥ kṣetram uru jyotīṁṣi soma jyoṅ naḥ sūryaṁ dṛśaye rirīhi ||

9.092.01a pari suvāno harir aṁśuḥ pavitre ratho na sarji sanaye hiyānaḥ |
9.092.01c āpac chlokam indriyam pūyamānaḥ prati devām̐ ajuṣata prayobhiḥ ||
9.092.02a acchā nṛcakṣā asarat pavitre nāma dadhānaḥ kavir asya yonau |
9.092.02c sīdan hoteva sadane camūṣūpem agmann ṛṣayaḥ sapta viprāḥ ||
9.092.03a pra sumedhā gātuvid viśvadevaḥ somaḥ punānaḥ sada eti nityam |
9.092.03c bhuvad viśveṣu kāvyeṣu rantānu janān yatate pañca dhīraḥ ||
9.092.04a tava tye soma pavamāna niṇye viśve devās traya ekādaśāsaḥ |
9.092.04c daśa svadhābhir adhi sāno avye mṛjanti tvā nadyaḥ sapta yahvīḥ ||
9.092.05a tan nu satyam pavamānasyāstu yatra viśve kāravaḥ saṁnasanta |
9.092.05c jyotir yad ahne akṛṇod u lokam prāvan manuṁ dasyave kar abhīkam ||
9.092.06a pari sadmeva paśumānti hotā rājā na satyaḥ samitīr iyānaḥ |
9.092.06c somaḥ punānaḥ kalaśām̐ ayāsīt sīdan mṛgo na mahiṣo vaneṣu ||

9.093.01a sākamukṣo marjayanta svasāro daśa dhīrasya dhītayo dhanutrīḥ |
9.093.01c hariḥ pary adravaj jāḥ sūryasya droṇaṁ nanakṣe atyo na vājī ||
9.093.02a sam mātṛbhir na śiśur vāvaśāno vṛṣā dadhanve puruvāro adbhiḥ |
9.093.02c maryo na yoṣām abhi niṣkṛtaṁ yan saṁ gacchate kalaśa usriyābhiḥ ||
9.093.03a uta pra pipya ūdhar aghnyāyā indur dhārābhiḥ sacate sumedhāḥ |
9.093.03c mūrdhānaṁ gāvaḥ payasā camūṣv abhi śrīṇanti vasubhir na niktaiḥ ||
9.093.04a sa no devebhiḥ pavamāna radendo rayim aśvinaṁ vāvaśānaḥ |
9.093.04c rathirāyatām uśatī puraṁdhir asmadryag ā dāvane vasūnām ||
9.093.05a nū no rayim upa māsva nṛvantam punāno vātāpyaṁ viśvaścandram |
9.093.05c pra vanditur indo tāry āyuḥ prātar makṣū dhiyāvasur jagamyāt ||

9.094.01a adhi yad asmin vājinīva śubhaḥ spardhante dhiyaḥ sūrye na viśaḥ |
9.094.01c apo vṛṇānaḥ pavate kavīyan vrajaṁ na paśuvardhanāya manma ||
9.094.02a dvitā vyūrṇvann amṛtasya dhāma svarvide bhuvanāni prathanta |
9.094.02c dhiyaḥ pinvānāḥ svasare na gāva ṛtāyantīr abhi vāvaśra indum ||
9.094.03a pari yat kaviḥ kāvyā bharate śūro na ratho bhuvanāni viśvā |
9.094.03c deveṣu yaśo martāya bhūṣan dakṣāya rāyaḥ purubhūṣu navyaḥ ||
9.094.04a śriye jātaḥ śriya ā nir iyāya śriyaṁ vayo jaritṛbhyo dadhāti |
9.094.04c śriyaṁ vasānā amṛtatvam āyan bhavanti satyā samithā mitadrau ||
9.094.05a iṣam ūrjam abhy arṣāśvaṁ gām uru jyotiḥ kṛṇuhi matsi devān |
9.094.05c viśvāni hi suṣahā tāni tubhyam pavamāna bādhase soma śatrūn ||

9.095.01a kanikranti harir ā sṛjyamānaḥ sīdan vanasya jaṭhare punānaḥ |
9.095.01c nṛbhir yataḥ kṛṇute nirṇijaṁ gā ato matīr janayata svadhābhiḥ ||
9.095.02a hariḥ sṛjānaḥ pathyām ṛtasyeyarti vācam ariteva nāvam |
9.095.02c devo devānāṁ guhyāni nāmāviṣ kṛṇoti barhiṣi pravāce ||
9.095.03a apām ived ūrmayas tarturāṇāḥ pra manīṣā īrate somam accha |
9.095.03c namasyantīr upa ca yanti saṁ cā ca viśanty uśatīr uśantam ||
9.095.04a tam marmṛjānam mahiṣaṁ na sānāv aṁśuṁ duhanty ukṣaṇaṁ giriṣṭhām |
9.095.04c taṁ vāvaśānam matayaḥ sacante trito bibharti varuṇaṁ samudre ||
9.095.05a iṣyan vācam upavakteva hotuḥ punāna indo vi ṣyā manīṣām |
9.095.05c indraś ca yat kṣayathaḥ saubhagāya suvīryasya patayaḥ syāma ||

9.096.01a pra senānīḥ śūro agre rathānāṁ gavyann eti harṣate asya senā |
9.096.01c bhadrān kṛṇvann indrahavān sakhibhya ā somo vastrā rabhasāni datte ||
9.096.02a sam asya hariṁ harayo mṛjanty aśvahayair aniśitaṁ namobhiḥ |
9.096.02c ā tiṣṭhati ratham indrasya sakhā vidvām̐ enā sumatiṁ yāty accha ||
9.096.03a sa no deva devatāte pavasva mahe soma psarasa indrapānaḥ |
9.096.03c kṛṇvann apo varṣayan dyām utemām uror ā no varivasyā punānaḥ ||
9.096.04a ajītaye 'hataye pavasva svastaye sarvatātaye bṛhate |
9.096.04c tad uśanti viśva ime sakhāyas tad ahaṁ vaśmi pavamāna soma ||
9.096.05a somaḥ pavate janitā matīnāṁ janitā divo janitā pṛthivyāḥ |
9.096.05c janitāgner janitā sūryasya janitendrasya janitota viṣṇoḥ ||
9.096.06a brahmā devānām padavīḥ kavīnām ṛṣir viprāṇām mahiṣo mṛgāṇām |
9.096.06c śyeno gṛdhrāṇāṁ svadhitir vanānāṁ somaḥ pavitram aty eti rebhan ||
9.096.07a prāvīvipad vāca ūrmiṁ na sindhur giraḥ somaḥ pavamāno manīṣāḥ |
9.096.07c antaḥ paśyan vṛjanemāvarāṇy ā tiṣṭhati vṛṣabho goṣu jānan ||
9.096.08a sa matsaraḥ pṛtsu vanvann avātaḥ sahasraretā abhi vājam arṣa |
9.096.08c indrāyendo pavamāno manīṣy aṁśor ūrmim īraya gā iṣaṇyan ||
9.096.09a pari priyaḥ kalaśe devavāta indrāya somo raṇyo madāya |
9.096.09c sahasradhāraḥ śatavāja indur vājī na saptiḥ samanā jigāti ||
9.096.10a sa pūrvyo vasuvij jāyamāno mṛjāno apsu duduhāno adrau |
9.096.10c abhiśastipā bhuvanasya rājā vidad gātum brahmaṇe pūyamānaḥ ||
9.096.11a tvayā hi naḥ pitaraḥ soma pūrve karmāṇi cakruḥ pavamāna dhīrāḥ |
9.096.11c vanvann avātaḥ paridhīm̐r aporṇu vīrebhir aśvair maghavā bhavā naḥ ||
9.096.12a yathāpavathā manave vayodhā amitrahā varivovid dhaviṣmān |
9.096.12c evā pavasva draviṇaṁ dadhāna indre saṁ tiṣṭha janayāyudhāni ||
9.096.13a pavasva soma madhumām̐ ṛtāvāpo vasāno adhi sāno avye |
9.096.13c ava droṇāni ghṛtavānti sīda madintamo matsara indrapānaḥ ||
9.096.14a vṛṣṭiṁ divaḥ śatadhāraḥ pavasva sahasrasā vājayur devavītau |
9.096.14c saṁ sindhubhiḥ kalaśe vāvaśānaḥ sam usriyābhiḥ pratiran na āyuḥ ||
9.096.15a eṣa sya somo matibhiḥ punāno 'tyo na vājī taratīd arātīḥ |
9.096.15c payo na dugdham aditer iṣiram urv iva gātuḥ suyamo na voḻhā ||
9.096.16a svāyudhaḥ sotṛbhiḥ pūyamāno 'bhy arṣa guhyaṁ cāru nāma |
9.096.16c abhi vājaṁ saptir iva śravasyābhi vāyum abhi gā deva soma ||
9.096.17a śiśuṁ jajñānaṁ haryatam mṛjanti śumbhanti vahnim maruto gaṇena |
9.096.17c kavir gīrbhiḥ kāvyenā kaviḥ san somaḥ pavitram aty eti rebhan ||
9.096.18a ṛṣimanā ya ṛṣikṛt svarṣāḥ sahasraṇīthaḥ padavīḥ kavīnām |
9.096.18c tṛtīyaṁ dhāma mahiṣaḥ siṣāsan somo virājam anu rājati ṣṭup ||
9.096.19a camūṣac chyenaḥ śakuno vibhṛtvā govindur drapsa āyudhāni bibhrat |
9.096.19c apām ūrmiṁ sacamānaḥ samudraṁ turīyaṁ dhāma mahiṣo vivakti ||
9.096.20a maryo na śubhras tanvam mṛjāno 'tyo na sṛtvā sanaye dhanānām |
9.096.20c vṛṣeva yūthā pari kośam arṣan kanikradac camvor ā viveśa ||
9.096.21a pavasvendo pavamāno mahobhiḥ kanikradat pari vārāṇy arṣa |
9.096.21c krīḻañ camvor ā viśa pūyamāna indraṁ te raso madiro mamattu ||
9.096.22a prāsya dhārā bṛhatīr asṛgrann akto gobhiḥ kalaśām̐ ā viveśa |
9.096.22c sāma kṛṇvan sāmanyo vipaścit krandann ety abhi sakhyur na jāmim ||
9.096.23a apaghnann eṣi pavamāna śatrūn priyāṁ na jāro abhigīta induḥ |
9.096.23c sīdan vaneṣu śakuno na patvā somaḥ punānaḥ kalaśeṣu sattā ||
9.096.24a ā te rucaḥ pavamānasya soma yoṣeva yanti sudughāḥ sudhārāḥ |
9.096.24c harir ānītaḥ puruvāro apsv acikradat kalaśe devayūnām ||

9.097.01a asya preṣā hemanā pūyamāno devo devebhiḥ sam apṛkta rasam |
9.097.01c sutaḥ pavitram pary eti rebhan miteva sadma paśumānti hotā ||
9.097.02a bhadrā vastrā samanyā vasāno mahān kavir nivacanāni śaṁsan |
9.097.02c ā vacyasva camvoḥ pūyamāno vicakṣaṇo jāgṛvir devavītau ||
9.097.03a sam u priyo mṛjyate sāno avye yaśastaro yaśasāṁ kṣaito asme |
9.097.03c abhi svara dhanvā pūyamāno yūyam pāta svastibhiḥ sadā naḥ ||
9.097.04a pra gāyatābhy arcāma devān somaṁ hinota mahate dhanāya |
9.097.04c svāduḥ pavāte ati vāram avyam ā sīdāti kalaśaṁ devayur naḥ ||
9.097.05a indur devānām upa sakhyam āyan sahasradhāraḥ pavate madāya |
9.097.05c nṛbhiḥ stavāno anu dhāma pūrvam agann indram mahate saubhagāya ||
9.097.06a stotre rāye harir arṣā punāna indram mado gacchatu te bharāya |
9.097.06c devair yāhi sarathaṁ rādho acchā yūyam pāta svastibhiḥ sadā naḥ ||
9.097.07a pra kāvyam uśaneva bruvāṇo devo devānāṁ janimā vivakti |
9.097.07c mahivrataḥ śucibandhuḥ pāvakaḥ padā varāho abhy eti rebhan ||
9.097.08a pra haṁsāsas tṛpalam manyum acchāmād astaṁ vṛṣagaṇā ayāsuḥ |
9.097.08c āṅgūṣyam pavamānaṁ sakhāyo durmarṣaṁ sākam pra vadanti vāṇam ||
9.097.09a sa raṁhata urugāyasya jūtiṁ vṛthā krīḻantam mimate na gāvaḥ |
9.097.09c parīṇasaṁ kṛṇute tigmaśṛṅgo divā harir dadṛśe naktam ṛjraḥ ||
9.097.10a indur vājī pavate gonyoghā indre somaḥ saha invan madāya |
9.097.10c hanti rakṣo bādhate pary arātīr varivaḥ kṛṇvan vṛjanasya rājā ||
9.097.11a adha dhārayā madhvā pṛcānas tiro roma pavate adridugdhaḥ |
9.097.11c indur indrasya sakhyaṁ juṣāṇo devo devasya matsaro madāya ||
9.097.12a abhi priyāṇi pavate punāno devo devān svena rasena pṛñcan |
9.097.12c indur dharmāṇy ṛtuthā vasāno daśa kṣipo avyata sāno avye ||
9.097.13a vṛṣā śoṇo abhikanikradad gā nadayann eti pṛthivīm uta dyām |
9.097.13c indrasyeva vagnur ā śṛṇva ājau pracetayann arṣati vācam emām ||
9.097.14a rasāyyaḥ payasā pinvamāna īrayann eṣi madhumantam aṁśum |
9.097.14c pavamānaḥ saṁtanim eṣi kṛṇvann indrāya soma pariṣicyamānaḥ ||
9.097.15a evā pavasva madiro madāyodagrābhasya namayan vadhasnaiḥ |
9.097.15c pari varṇam bharamāṇo ruśantaṁ gavyur no arṣa pari soma siktaḥ ||
9.097.16a juṣṭvī na indo supathā sugāny urau pavasva varivāṁsi kṛṇvan |
9.097.16c ghaneva viṣvag duritāni vighnann adhi ṣṇunā dhanva sāno avye ||
9.097.17a vṛṣṭiṁ no arṣa divyāṁ jigatnum iḻāvatīṁ śaṁgayīṁ jīradānum |
9.097.17c stukeva vītā dhanvā vicinvan bandhūm̐r imām̐ avarām̐ indo vāyūn ||
9.097.18a granthiṁ na vi ṣya grathitam punāna ṛjuṁ ca gātuṁ vṛjinaṁ ca soma |
9.097.18c atyo na krado harir ā sṛjāno maryo deva dhanva pastyāvān ||
9.097.19a juṣṭo madāya devatāta indo pari ṣṇunā dhanva sāno avye |
9.097.19c sahasradhāraḥ surabhir adabdhaḥ pari srava vājasātau nṛṣahye ||
9.097.20a araśmāno ye 'rathā ayuktā atyāso na sasṛjānāsa ājau |
9.097.20c ete śukrāso dhanvanti somā devāsas tām̐ upa yātā pibadhyai ||
9.097.21a evā na indo abhi devavītim pari srava nabho arṇaś camūṣu |
9.097.21c somo asmabhyaṁ kāmyam bṛhantaṁ rayiṁ dadātu vīravantam ugram ||
9.097.22a takṣad yadī manaso venato vāg jyeṣṭhasya vā dharmaṇi kṣor anīke |
9.097.22c ād īm āyan varam ā vāvaśānā juṣṭam patiṁ kalaśe gāva indum ||
9.097.23a pra dānudo divyo dānupinva ṛtam ṛtāya pavate sumedhāḥ |
9.097.23c dharmā bhuvad vṛjanyasya rājā pra raśmibhir daśabhir bhāri bhūma ||
9.097.24a pavitrebhiḥ pavamāno nṛcakṣā rājā devānām uta martyānām |
9.097.24c dvitā bhuvad rayipatī rayīṇām ṛtam bharat subhṛtaṁ cārv induḥ ||
9.097.25a arvām̐ iva śravase sātim acchendrasya vāyor abhi vītim arṣa |
9.097.25c sa naḥ sahasrā bṛhatīr iṣo dā bhavā soma draviṇovit punānaḥ ||
9.097.26a devāvyo naḥ pariṣicyamānāḥ kṣayaṁ suvīraṁ dhanvantu somāḥ |
9.097.26c āyajyavaḥ sumatiṁ viśvavārā hotāro na diviyajo mandratamāḥ ||
9.097.27a evā deva devatāte pavasva mahe soma psarase devapānaḥ |
9.097.27c mahaś cid dhi ṣmasi hitāḥ samarye kṛdhi suṣṭhāne rodasī punānaḥ ||
9.097.28a aśvo no krado vṛṣabhir yujānaḥ siṁho na bhīmo manaso javīyān |
9.097.28c arvācīnaiḥ pathibhir ye rajiṣṭhā ā pavasva saumanasaṁ na indo ||
9.097.29a śataṁ dhārā devajātā asṛgran sahasram enāḥ kavayo mṛjanti |
9.097.29c indo sanitraṁ diva ā pavasva puraetāsi mahato dhanasya ||
9.097.30a divo na sargā asasṛgram ahnāṁ rājā na mitram pra mināti dhīraḥ |
9.097.30c pitur na putraḥ kratubhir yatāna ā pavasva viśe asyā ajītim ||
9.097.31a pra te dhārā madhumatīr asṛgran vārān yat pūto atyeṣy avyān |
9.097.31c pavamāna pavase dhāma gonāṁ jajñānaḥ sūryam apinvo arkaiḥ ||
9.097.32a kanikradad anu panthām ṛtasya śukro vi bhāsy amṛtasya dhāma |
9.097.32c sa indrāya pavase matsaravān hinvāno vācam matibhiḥ kavīnām ||
9.097.33a divyaḥ suparṇo 'va cakṣi soma pinvan dhārāḥ karmaṇā devavītau |
9.097.33c endo viśa kalaśaṁ somadhānaṁ krandann ihi sūryasyopa raśmim ||
9.097.34a tisro vāca īrayati pra vahnir ṛtasya dhītim brahmaṇo manīṣām |
9.097.34c gāvo yanti gopatim pṛcchamānāḥ somaṁ yanti matayo vāvaśānāḥ ||
9.097.35a somaṁ gāvo dhenavo vāvaśānāḥ somaṁ viprā matibhiḥ pṛcchamānāḥ |
9.097.35c somaḥ sutaḥ pūyate ajyamānaḥ some arkās triṣṭubhaḥ saṁ navante ||
9.097.36a evā naḥ soma pariṣicyamāna ā pavasva pūyamānaḥ svasti |
9.097.36c indram ā viśa bṛhatā raveṇa vardhayā vācaṁ janayā puraṁdhim ||
9.097.37a ā jāgṛvir vipra ṛtā matīnāṁ somaḥ punāno asadac camūṣu |
9.097.37c sapanti yam mithunāso nikāmā adhvaryavo rathirāsaḥ suhastāḥ ||
9.097.38a sa punāna upa sūre na dhātobhe aprā rodasī vi ṣa āvaḥ |
9.097.38c priyā cid yasya priyasāsa ūtī sa tū dhanaṁ kāriṇe na pra yaṁsat ||
9.097.39a sa vardhitā vardhanaḥ pūyamānaḥ somo mīḍhvām̐ abhi no jyotiṣāvīt |
9.097.39c yenā naḥ pūrve pitaraḥ padajñāḥ svarvido abhi gā adrim uṣṇan ||
9.097.40a akrān samudraḥ prathame vidharmañ janayan prajā bhuvanasya rājā |
9.097.40c vṛṣā pavitre adhi sāno avye bṛhat somo vāvṛdhe suvāna induḥ ||
9.097.41a mahat tat somo mahiṣaś cakārāpāṁ yad garbho 'vṛṇīta devān |
9.097.41c adadhād indre pavamāna ojo 'janayat sūrye jyotir induḥ ||
9.097.42a matsi vāyum iṣṭaye rādhase ca matsi mitrāvaruṇā pūyamānaḥ |
9.097.42c matsi śardho mārutam matsi devān matsi dyāvāpṛthivī deva soma ||
9.097.43a ṛjuḥ pavasva vṛjinasya hantāpāmīvām bādhamāno mṛdhaś ca |
9.097.43c abhiśrīṇan payaḥ payasābhi gonām indrasya tvaṁ tava vayaṁ sakhāyaḥ ||
9.097.44a madhvaḥ sūdam pavasva vasva utsaṁ vīraṁ ca na ā pavasvā bhagaṁ ca |
9.097.44c svadasvendrāya pavamāna indo rayiṁ ca na ā pavasvā samudrāt ||
9.097.45a somaḥ suto dhārayātyo na hitvā sindhur na nimnam abhi vājy akṣāḥ |
9.097.45c ā yoniṁ vanyam asadat punānaḥ sam indur gobhir asarat sam adbhiḥ ||
9.097.46a eṣa sya te pavata indra somaś camūṣu dhīra uśate tavasvān |
9.097.46c svarcakṣā rathiraḥ satyaśuṣmaḥ kāmo na yo devayatām asarji ||
9.097.47a eṣa pratnena vayasā punānas tiro varpāṁsi duhitur dadhānaḥ |
9.097.47c vasānaḥ śarma trivarūtham apsu hoteva yāti samaneṣu rebhan ||
9.097.48a nū nas tvaṁ rathiro deva soma pari srava camvoḥ pūyamānaḥ |
9.097.48c apsu svādiṣṭho madhumām̐ ṛtāvā devo na yaḥ savitā satyamanmā ||
9.097.49a abhi vāyuṁ vīty arṣā gṛṇāno 'bhi mitrāvaruṇā pūyamānaḥ |
9.097.49c abhī naraṁ dhījavanaṁ ratheṣṭhām abhīndraṁ vṛṣaṇaṁ vajrabāhum ||
9.097.50a abhi vastrā suvasanāny arṣābhi dhenūḥ sudughāḥ pūyamānaḥ |
9.097.50c abhi candrā bhartave no hiraṇyābhy aśvān rathino deva soma ||
9.097.51a abhī no arṣa divyā vasūny abhi viśvā pārthivā pūyamānaḥ |
9.097.51c abhi yena draviṇam aśnavāmābhy ārṣeyaṁ jamadagnivan naḥ ||
9.097.52a ayā pavā pavasvainā vasūni mām̐ścatva indo sarasi pra dhanva |
9.097.52c bradhnaś cid atra vāto na jūtaḥ purumedhaś cit takave naraṁ dāt ||
9.097.53a uta na enā pavayā pavasvādhi śrute śravāyyasya tīrthe |
9.097.53c ṣaṣṭiṁ sahasrā naiguto vasūni vṛkṣaṁ na pakvaṁ dhūnavad raṇāya ||
9.097.54a mahīme asya vṛṣanāma śūṣe mām̐ścatve vā pṛśane vā vadhatre |
9.097.54c asvāpayan nigutaḥ snehayac cāpāmitrām̐ apācito acetaḥ ||
9.097.55a saṁ trī pavitrā vitatāny eṣy anv ekaṁ dhāvasi pūyamānaḥ |
9.097.55c asi bhago asi dātrasya dātāsi maghavā maghavadbhya indo ||
9.097.56a eṣa viśvavit pavate manīṣī somo viśvasya bhuvanasya rājā |
9.097.56c drapsām̐ īrayan vidatheṣv indur vi vāram avyaṁ samayāti yāti ||
9.097.57a induṁ rihanti mahiṣā adabdhāḥ pade rebhanti kavayo na gṛdhrāḥ |
9.097.57c hinvanti dhīrā daśabhiḥ kṣipābhiḥ sam añjate rūpam apāṁ rasena ||
9.097.58a tvayā vayam pavamānena soma bhare kṛtaṁ vi cinuyāma śaśvat |
9.097.58c tan no mitro varuṇo māmahantām aditiḥ sindhuḥ pṛthivī uta dyauḥ ||

9.098.01a abhi no vājasātamaṁ rayim arṣa puruspṛham |
9.098.01c indo sahasrabharṇasaṁ tuvidyumnaṁ vibhvāsaham ||
9.098.02a pari ṣya suvāno avyayaṁ rathe na varmāvyata |
9.098.02c indur abhi druṇā hito hiyāno dhārābhir akṣāḥ ||
9.098.03a pari ṣya suvāno akṣā indur avye madacyutaḥ |
9.098.03c dhārā ya ūrdhvo adhvare bhrājā naiti gavyayuḥ ||
9.098.04a sa hi tvaṁ deva śaśvate vasu martāya dāśuṣe |
9.098.04c indo sahasriṇaṁ rayiṁ śatātmānaṁ vivāsasi ||
9.098.05a vayaṁ te asya vṛtrahan vaso vasvaḥ puruspṛhaḥ |
9.098.05c ni nediṣṭhatamā iṣaḥ syāma sumnasyādhrigo ||
9.098.06a dvir yam pañca svayaśasaṁ svasāro adrisaṁhatam |
9.098.06c priyam indrasya kāmyam prasnāpayanty ūrmiṇam ||
9.098.07a pari tyaṁ haryataṁ harim babhrum punanti vāreṇa |
9.098.07c yo devān viśvām̐ it pari madena saha gacchati ||
9.098.08a asya vo hy avasā pānto dakṣasādhanam |
9.098.08c yaḥ sūriṣu śravo bṛhad dadhe svar ṇa haryataḥ ||
9.098.09a sa vāṁ yajñeṣu mānavī indur janiṣṭa rodasī |
9.098.09c devo devī giriṣṭhā asredhan taṁ tuviṣvaṇi ||
9.098.10a indrāya soma pātave vṛtraghne pari ṣicyase |
9.098.10c nare ca dakṣiṇāvate devāya sadanāsade ||
9.098.11a te pratnāso vyuṣṭiṣu somāḥ pavitre akṣaran |
9.098.11c apaprothantaḥ sanutar huraścitaḥ prātas tām̐ apracetasaḥ ||
9.098.12a taṁ sakhāyaḥ purorucaṁ yūyaṁ vayaṁ ca sūrayaḥ |
9.098.12c aśyāma vājagandhyaṁ sanema vājapastyam ||

9.099.01a ā haryatāya dhṛṣṇave dhanus tanvanti pauṁsyam |
9.099.01c śukrāṁ vayanty asurāya nirṇijaṁ vipām agre mahīyuvaḥ ||
9.099.02a adha kṣapā pariṣkṛto vājām̐ abhi pra gāhate |
9.099.02c yadī vivasvato dhiyo hariṁ hinvanti yātave ||
9.099.03a tam asya marjayāmasi mado ya indrapātamaḥ |
9.099.03c yaṁ gāva āsabhir dadhuḥ purā nūnaṁ ca sūrayaḥ ||
9.099.04a taṁ gāthayā purāṇyā punānam abhy anūṣata |
9.099.04c uto kṛpanta dhītayo devānāṁ nāma bibhratīḥ ||
9.099.05a tam ukṣamāṇam avyaye vāre punanti dharṇasim |
9.099.05c dūtaṁ na pūrvacittaya ā śāsate manīṣiṇaḥ ||
9.099.06a sa punāno madintamaḥ somaś camūṣu sīdati |
9.099.06c paśau na reta ādadhat patir vacasyate dhiyaḥ ||
9.099.07a sa mṛjyate sukarmabhir devo devebhyaḥ sutaḥ |
9.099.07c vide yad āsu saṁdadir mahīr apo vi gāhate ||
9.099.08a suta indo pavitra ā nṛbhir yato vi nīyase |
9.099.08c indrāya matsarintamaś camūṣv ā ni ṣīdasi ||

9.100.01a abhī navante adruhaḥ priyam indrasya kāmyam |
9.100.01c vatsaṁ na pūrva āyuni jātaṁ rihanti mātaraḥ ||
9.100.02a punāna indav ā bhara soma dvibarhasaṁ rayim |
9.100.02c tvaṁ vasūni puṣyasi viśvāni dāśuṣo gṛhe ||
9.100.03a tvaṁ dhiyam manoyujaṁ sṛjā vṛṣṭiṁ na tanyatuḥ |
9.100.03c tvaṁ vasūni pārthivā divyā ca soma puṣyasi ||
9.100.04a pari te jigyuṣo yathā dhārā sutasya dhāvati |
9.100.04c raṁhamāṇā vy avyayaṁ vāraṁ vājīva sānasiḥ ||
9.100.05a kratve dakṣāya naḥ kave pavasva soma dhārayā |
9.100.05c indrāya pātave suto mitrāya varuṇāya ca ||
9.100.06a pavasva vājasātamaḥ pavitre dhārayā sutaḥ |
9.100.06c indrāya soma viṣṇave devebhyo madhumattamaḥ ||
9.100.07a tvāṁ rihanti mātaro harim pavitre adruhaḥ |
9.100.07c vatsaṁ jātaṁ na dhenavaḥ pavamāna vidharmaṇi ||
9.100.08a pavamāna mahi śravaś citrebhir yāsi raśmibhiḥ |
9.100.08c śardhan tamāṁsi jighnase viśvāni dāśuṣo gṛhe ||
9.100.09a tvaṁ dyāṁ ca mahivrata pṛthivīṁ cāti jabhriṣe |
9.100.09c prati drāpim amuñcathāḥ pavamāna mahitvanā ||

9.101.01a purojitī vo andhasaḥ sutāya mādayitnave |
9.101.01c apa śvānaṁ śnathiṣṭana sakhāyo dīrghajihvyam ||
9.101.02a yo dhārayā pāvakayā pariprasyandate sutaḥ |
9.101.02c indur aśvo na kṛtvyaḥ ||
9.101.03a taṁ duroṣam abhī naraḥ somaṁ viśvācyā dhiyā |
9.101.03c yajñaṁ hinvanty adribhiḥ ||
9.101.04a sutāso madhumattamāḥ somā indrāya mandinaḥ |
9.101.04c pavitravanto akṣaran devān gacchantu vo madāḥ ||
9.101.05a indur indrāya pavata iti devāso abruvan |
9.101.05c vācas patir makhasyate viśvasyeśāna ojasā ||
9.101.06a sahasradhāraḥ pavate samudro vācamīṅkhayaḥ |
9.101.06c somaḥ patī rayīṇāṁ sakhendrasya dive-dive ||
9.101.07a ayam pūṣā rayir bhagaḥ somaḥ punāno arṣati |
9.101.07c patir viśvasya bhūmano vy akhyad rodasī ubhe ||
9.101.08a sam u priyā anūṣata gāvo madāya ghṛṣvayaḥ |
9.101.08c somāsaḥ kṛṇvate pathaḥ pavamānāsa indavaḥ ||
9.101.09a ya ojiṣṭhas tam ā bhara pavamāna śravāyyam |
9.101.09c yaḥ pañca carṣaṇīr abhi rayiṁ yena vanāmahai ||
9.101.10a somāḥ pavanta indavo 'smabhyaṁ gātuvittamāḥ |
9.101.10c mitrāḥ suvānā arepasaḥ svādhyaḥ svarvidaḥ ||
9.101.11a suṣvāṇāso vy adribhiś citānā gor adhi tvaci |
9.101.11c iṣam asmabhyam abhitaḥ sam asvaran vasuvidaḥ ||
9.101.12a ete pūtā vipaścitaḥ somāso dadhyāśiraḥ |
9.101.12c sūryāso na darśatāso jigatnavo dhruvā ghṛte ||
9.101.13a pra sunvānasyāndhaso marto na vṛta tad vacaḥ |
9.101.13c apa śvānam arādhasaṁ hatā makhaṁ na bhṛgavaḥ ||
9.101.14a ā jāmir atke avyata bhuje na putra oṇyoḥ |
9.101.14c saraj jāro na yoṣaṇāṁ varo na yonim āsadam ||
9.101.15a sa vīro dakṣasādhano vi yas tastambha rodasī |
9.101.15c hariḥ pavitre avyata vedhā na yonim āsadam ||
9.101.16a avyo vārebhiḥ pavate somo gavye adhi tvaci |
9.101.16c kanikradad vṛṣā harir indrasyābhy eti niṣkṛtam ||

9.102.01a krāṇā śiśur mahīnāṁ hinvann ṛtasya dīdhitim |
9.102.01c viśvā pari priyā bhuvad adha dvitā ||
9.102.02a upa tritasya pāṣyor abhakta yad guhā padam |
9.102.02c yajñasya sapta dhāmabhir adha priyam ||
9.102.03a trīṇi tritasya dhārayā pṛṣṭheṣv erayā rayim |
9.102.03c mimīte asya yojanā vi sukratuḥ ||
9.102.04a jajñānaṁ sapta mātaro vedhām aśāsata śriye |
9.102.04c ayaṁ dhruvo rayīṇāṁ ciketa yat ||
9.102.05a asya vrate sajoṣaso viśve devāso adruhaḥ |
9.102.05c spārhā bhavanti rantayo juṣanta yat ||
9.102.06a yam ī garbham ṛtāvṛdho dṛśe cārum ajījanan |
9.102.06c kavim maṁhiṣṭham adhvare puruspṛham ||
9.102.07a samīcīne abhi tmanā yahvī ṛtasya mātarā |
9.102.07c tanvānā yajñam ānuṣag yad añjate ||
9.102.08a kratvā śukrebhir akṣabhir ṛṇor apa vrajaṁ divaḥ |
9.102.08c hinvann ṛtasya dīdhitim prādhvare ||

9.103.01a pra punānāya vedhase somāya vaca udyatam |
9.103.01c bhṛtiṁ na bharā matibhir jujoṣate ||
9.103.02a pari vārāṇy avyayā gobhir añjāno arṣati |
9.103.02c trī ṣadhasthā punānaḥ kṛṇute hariḥ ||
9.103.03a pari kośam madhuścutam avyaye vāre arṣati |
9.103.03c abhi vāṇīr ṛṣīṇāṁ sapta nūṣata ||
9.103.04a pari ṇetā matīnāṁ viśvadevo adābhyaḥ |
9.103.04c somaḥ punānaś camvor viśad dhariḥ ||
9.103.05a pari daivīr anu svadhā indreṇa yāhi saratham |
9.103.05c punāno vāghad vāghadbhir amartyaḥ ||
9.103.06a pari saptir na vājayur devo devebhyaḥ sutaḥ |
9.103.06c vyānaśiḥ pavamāno vi dhāvati ||

9.104.01a sakhāya ā ni ṣīdata punānāya pra gāyata |
9.104.01c śiśuṁ na yajñaiḥ pari bhūṣata śriye ||
9.104.02a sam ī vatsaṁ na mātṛbhiḥ sṛjatā gayasādhanam |
9.104.02c devāvyam madam abhi dviśavasam ||
9.104.03a punātā dakṣasādhanaṁ yathā śardhāya vītaye |
9.104.03c yathā mitrāya varuṇāya śaṁtamaḥ ||
9.104.04a asmabhyaṁ tvā vasuvidam abhi vāṇīr anūṣata |
9.104.04c gobhiṣ ṭe varṇam abhi vāsayāmasi ||
9.104.05a sa no madānām pata indo devapsarā asi |
9.104.05c sakheva sakhye gātuvittamo bhava ||
9.104.06a sanemi kṛdhy asmad ā rakṣasaṁ kaṁ cid atriṇam |
9.104.06c apādevaṁ dvayum aṁho yuyodhi naḥ ||

9.105.01a taṁ vaḥ sakhāyo madāya punānam abhi gāyata |
9.105.01c śiśuṁ na yajñaiḥ svadayanta gūrtibhiḥ ||
9.105.02a saṁ vatsa iva mātṛbhir indur hinvāno ajyate |
9.105.02c devāvīr mado matibhiḥ pariṣkṛtaḥ ||
9.105.03a ayaṁ dakṣāya sādhano 'yaṁ śardhāya vītaye |
9.105.03c ayaṁ devebhyo madhumattamaḥ sutaḥ ||
9.105.04a goman na indo aśvavat sutaḥ sudakṣa dhanva |
9.105.04c śuciṁ te varṇam adhi goṣu dīdharam ||
9.105.05a sa no harīṇām pata indo devapsarastamaḥ |
9.105.05c sakheva sakhye naryo ruce bhava ||
9.105.06a sanemi tvam asmad ām̐ adevaṁ kaṁ cid atriṇam |
9.105.06c sāhvām̐ indo pari bādho apa dvayum ||

9.106.01a indram accha sutā ime vṛṣaṇaṁ yantu harayaḥ |
9.106.01c śruṣṭī jātāsa indavaḥ svarvidaḥ ||
9.106.02a ayam bharāya sānasir indrāya pavate sutaḥ |
9.106.02c somo jaitrasya cetati yathā vide ||
9.106.03a asyed indro madeṣv ā grābhaṁ gṛbhṇīta sānasim |
9.106.03c vajraṁ ca vṛṣaṇam bharat sam apsujit ||
9.106.04a pra dhanvā soma jāgṛvir indrāyendo pari srava |
9.106.04c dyumantaṁ śuṣmam ā bharā svarvidam ||
9.106.05a indrāya vṛṣaṇam madam pavasva viśvadarśataḥ |
9.106.05c sahasrayāmā pathikṛd vicakṣaṇaḥ ||
9.106.06a asmabhyaṁ gātuvittamo devebhyo madhumattamaḥ |
9.106.06c sahasraṁ yāhi pathibhiḥ kanikradat ||
9.106.07a pavasva devavītaya indo dhārābhir ojasā |
9.106.07c ā kalaśam madhumān soma naḥ sadaḥ ||
9.106.08a tava drapsā udapruta indram madāya vāvṛdhuḥ |
9.106.08c tvāṁ devāso amṛtāya kam papuḥ ||
9.106.09a ā naḥ sutāsa indavaḥ punānā dhāvatā rayim |
9.106.09c vṛṣṭidyāvo rītyāpaḥ svarvidaḥ ||
9.106.10a somaḥ punāna ūrmiṇāvyo vāraṁ vi dhāvati |
9.106.10c agre vācaḥ pavamānaḥ kanikradat ||
9.106.11a dhībhir hinvanti vājinaṁ vane krīḻantam atyavim |
9.106.11c abhi tripṛṣṭham matayaḥ sam asvaran ||
9.106.12a asarji kalaśām̐ abhi mīḻhe saptir na vājayuḥ |
9.106.12c punāno vācaṁ janayann asiṣyadat ||
9.106.13a pavate haryato harir ati hvarāṁsi raṁhyā |
9.106.13c abhyarṣan stotṛbhyo vīravad yaśaḥ ||
9.106.14a ayā pavasva devayur madhor dhārā asṛkṣata |
9.106.14c rebhan pavitram pary eṣi viśvataḥ ||

9.107.01a parīto ṣiñcatā sutaṁ somo ya uttamaṁ haviḥ |
9.107.01c dadhanvām̐ yo naryo apsv antar ā suṣāva somam adribhiḥ ||
9.107.02a nūnam punāno 'vibhiḥ pari sravādabdhaḥ surabhiṁtaraḥ |
9.107.02c sute cit tvāpsu madāmo andhasā śrīṇanto gobhir uttaram ||
9.107.03a pari suvānaś cakṣase devamādanaḥ kratur indur vicakṣaṇaḥ ||
9.107.04a punānaḥ soma dhārayāpo vasāno arṣasi |
9.107.04c ā ratnadhā yonim ṛtasya sīdasy utso deva hiraṇyayaḥ ||
9.107.05a duhāna ūdhar divyam madhu priyam pratnaṁ sadhastham āsadat |
9.107.05c āpṛcchyaṁ dharuṇaṁ vājy arṣati nṛbhir dhūto vicakṣaṇaḥ ||
9.107.06a punānaḥ soma jāgṛvir avyo vāre pari priyaḥ |
9.107.06c tvaṁ vipro abhavo 'ṅgirastamo madhvā yajñam mimikṣa naḥ ||
9.107.07a somo mīḍhvān pavate gātuvittama ṛṣir vipro vicakṣaṇaḥ |
9.107.07c tvaṁ kavir abhavo devavītama ā sūryaṁ rohayo divi ||
9.107.08a soma u ṣuvāṇaḥ sotṛbhir adhi ṣṇubhir avīnām |
9.107.08c aśvayeva haritā yāti dhārayā mandrayā yāti dhārayā ||
9.107.09a anūpe gomān gobhir akṣāḥ somo dugdhābhir akṣāḥ |
9.107.09c samudraṁ na saṁvaraṇāny agman mandī madāya tośate ||
9.107.10a ā soma suvāno adribhis tiro vārāṇy avyayā |
9.107.10c jano na puri camvor viśad dhariḥ sado vaneṣu dadhiṣe ||
9.107.11a sa māmṛje tiro aṇvāni meṣyo mīḻhe saptir na vājayuḥ |
9.107.11c anumādyaḥ pavamāno manīṣibhiḥ somo viprebhir ṛkvabhiḥ ||
9.107.12a pra soma devavītaye sindhur na pipye arṇasā |
9.107.12c aṁśoḥ payasā madiro na jāgṛvir acchā kośam madhuścutam ||
9.107.13a ā haryato arjune atke avyata priyaḥ sūnur na marjyaḥ |
9.107.13c tam īṁ hinvanty apaso yathā rathaṁ nadīṣv ā gabhastyoḥ ||
9.107.14a abhi somāsa āyavaḥ pavante madyam madam |
9.107.14c samudrasyādhi viṣṭapi manīṣiṇo matsarāsaḥ svarvidaḥ ||
9.107.15a tarat samudram pavamāna ūrmiṇā rājā deva ṛtam bṛhat |
9.107.15c arṣan mitrasya varuṇasya dharmaṇā pra hinvāna ṛtam bṛhat ||
9.107.16a nṛbhir yemāno haryato vicakṣaṇo rājā devaḥ samudriyaḥ ||
9.107.17a indrāya pavate madaḥ somo marutvate sutaḥ |
9.107.17c sahasradhāro aty avyam arṣati tam ī mṛjanty āyavaḥ ||
9.107.18a punānaś camū janayan matiṁ kaviḥ somo deveṣu raṇyati |
9.107.18c apo vasānaḥ pari gobhir uttaraḥ sīdan vaneṣv avyata ||
9.107.19a tavāhaṁ soma rāraṇa sakhya indo dive-dive |
9.107.19c purūṇi babhro ni caranti mām ava paridhīm̐r ati tām̐ ihi ||
9.107.20a utāhaṁ naktam uta soma te divā sakhyāya babhra ūdhani |
9.107.20c ghṛṇā tapantam ati sūryam paraḥ śakunā iva paptima ||
9.107.21a mṛjyamānaḥ suhastya samudre vācam invasi |
9.107.21c rayim piśaṅgam bahulam puruspṛham pavamānābhy arṣasi ||
9.107.22a mṛjāno vāre pavamāno avyaye vṛṣāva cakrado vane |
9.107.22c devānāṁ soma pavamāna niṣkṛtaṁ gobhir añjāno arṣasi ||
9.107.23a pavasva vājasātaye 'bhi viśvāni kāvyā |
9.107.23c tvaṁ samudram prathamo vi dhārayo devebhyaḥ soma matsaraḥ ||
9.107.24a sa tū pavasva pari pārthivaṁ rajo divyā ca soma dharmabhiḥ |
9.107.24c tvāṁ viprāso matibhir vicakṣaṇa śubhraṁ hinvanti dhītibhiḥ ||
9.107.25a pavamānā asṛkṣata pavitram ati dhārayā |
9.107.25c marutvanto matsarā indriyā hayā medhām abhi prayāṁsi ca ||
9.107.26a apo vasānaḥ pari kośam arṣatīndur hiyānaḥ sotṛbhiḥ |
9.107.26c janayañ jyotir mandanā avīvaśad gāḥ kṛṇvāno na nirṇijam ||

9.108.01a pavasva madhumattama indrāya soma kratuvittamo madaḥ |
9.108.01c mahi dyukṣatamo madaḥ ||
9.108.02a yasya te pītvā vṛṣabho vṛṣāyate 'sya pītā svarvidaḥ |
9.108.02c sa supraketo abhy akramīd iṣo 'cchā vājaṁ naitaśaḥ ||
9.108.03a tvaṁ hy aṅga daivyā pavamāna janimāni dyumattamaḥ |
9.108.03c amṛtatvāya ghoṣayaḥ ||
9.108.04a yenā navagvo dadhyaṅṅ aporṇute yena viprāsa āpire |
9.108.04c devānāṁ sumne amṛtasya cāruṇo yena śravāṁsy ānaśuḥ ||
9.108.05a eṣa sya dhārayā suto 'vyo vārebhiḥ pavate madintamaḥ |
9.108.05c krīḻann ūrmir apām iva ||
9.108.06a ya usriyā apyā antar aśmano nir gā akṛntad ojasā |
9.108.06c abhi vrajaṁ tatniṣe gavyam aśvyaṁ varmīva dhṛṣṇav ā ruja ||
9.108.07a ā sotā pari ṣiñcatāśvaṁ na stomam apturaṁ rajasturam |
9.108.07c vanakrakṣam udaprutam ||
9.108.08a sahasradhāraṁ vṛṣabham payovṛdham priyaṁ devāya janmane |
9.108.08c ṛtena ya ṛtajāto vivāvṛdhe rājā deva ṛtam bṛhat ||
9.108.09a abhi dyumnam bṛhad yaśa iṣas pate didīhi deva devayuḥ |
9.108.09c vi kośam madhyamaṁ yuva ||
9.108.10a ā vacyasva sudakṣa camvoḥ suto viśāṁ vahnir na viśpatiḥ |
9.108.10c vṛṣṭiṁ divaḥ pavasva rītim apāṁ jinvā gaviṣṭaye dhiyaḥ ||
9.108.11a etam u tyam madacyutaṁ sahasradhāraṁ vṛṣabhaṁ divo duhuḥ |
9.108.11c viśvā vasūni bibhratam ||
9.108.12a vṛṣā vi jajñe janayann amartyaḥ pratapañ jyotiṣā tamaḥ |
9.108.12c sa suṣṭutaḥ kavibhir nirṇijaṁ dadhe tridhātv asya daṁsasā ||
9.108.13a sa sunve yo vasūnāṁ yo rāyām ānetā ya iḻānām |
9.108.13c somo yaḥ sukṣitīnām ||
9.108.14a yasya na indraḥ pibād yasya maruto yasya vāryamaṇā bhagaḥ |
9.108.14c ā yena mitrāvaruṇā karāmaha endram avase mahe ||
9.108.15a indrāya soma pātave nṛbhir yataḥ svāyudho madintamaḥ |
9.108.15c pavasva madhumattamaḥ ||
9.108.16a indrasya hārdi somadhānam ā viśa samudram iva sindhavaḥ |
9.108.16c juṣṭo mitrāya varuṇāya vāyave divo viṣṭambha uttamaḥ ||

9.109.01a pari pra dhanvendrāya soma svādur mitrāya pūṣṇe bhagāya ||
9.109.02a indras te soma sutasya peyāḥ kratve dakṣāya viśve ca devāḥ ||
9.109.03a evāmṛtāya mahe kṣayāya sa śukro arṣa divyaḥ pīyūṣaḥ ||
9.109.04a pavasva soma mahān samudraḥ pitā devānāṁ viśvābhi dhāma ||
9.109.05a śukraḥ pavasva devebhyaḥ soma dive pṛthivyai śaṁ ca prajāyai ||
9.109.06a divo dhartāsi śukraḥ pīyūṣaḥ satye vidharman vājī pavasva ||
9.109.07a pavasva soma dyumnī sudhāro mahām avīnām anu pūrvyaḥ ||
9.109.08a nṛbhir yemāno jajñānaḥ pūtaḥ kṣarad viśvāni mandraḥ svarvit ||
9.109.09a induḥ punānaḥ prajām urāṇaḥ karad viśvāni draviṇāni naḥ ||
9.109.10a pavasva soma kratve dakṣāyāśvo na nikto vājī dhanāya ||
9.109.11a taṁ te sotāro rasam madāya punanti somam mahe dyumnāya ||
9.109.12a śiśuṁ jajñānaṁ harim mṛjanti pavitre somaṁ devebhya indum ||
9.109.13a induḥ paviṣṭa cārur madāyāpām upasthe kavir bhagāya ||
9.109.14a bibharti cārv indrasya nāma yena viśvāni vṛtrā jaghāna ||
9.109.15a pibanty asya viśve devāso gobhiḥ śrītasya nṛbhiḥ sutasya ||
9.109.16a pra suvāno akṣāḥ sahasradhāras tiraḥ pavitraṁ vi vāram avyam ||
9.109.17a sa vājy akṣāḥ sahasraretā adbhir mṛjāno gobhiḥ śrīṇānaḥ ||
9.109.18a pra soma yāhīndrasya kukṣā nṛbhir yemāno adribhiḥ sutaḥ ||
9.109.19a asarji vājī tiraḥ pavitram indrāya somaḥ sahasradhāraḥ ||
9.109.20a añjanty enam madhvo rasenendrāya vṛṣṇa indum madāya ||
9.109.21a devebhyas tvā vṛthā pājase 'po vasānaṁ harim mṛjanti ||
9.109.22a indur indrāya tośate ni tośate śrīṇann ugro riṇann apaḥ ||

9.110.01a pary ū ṣu pra dhanva vājasātaye pari vṛtrāṇi sakṣaṇiḥ |
9.110.01c dviṣas taradhyā ṛṇayā na īyase ||
9.110.02a anu hi tvā sutaṁ soma madāmasi mahe samaryarājye |
9.110.02c vājām̐ abhi pavamāna pra gāhase ||
9.110.03a ajījano hi pavamāna sūryaṁ vidhāre śakmanā payaḥ |
9.110.03c gojīrayā raṁhamāṇaḥ puraṁdhyā ||
9.110.04a ajījano amṛta martyeṣv ām̐ ṛtasya dharmann amṛtasya cāruṇaḥ |
9.110.04c sadāsaro vājam acchā saniṣyadat ||
9.110.05a abhy-abhi hi śravasā tatardithotsaṁ na kaṁ cij janapānam akṣitam |
9.110.05c śaryābhir na bharamāṇo gabhastyoḥ ||
9.110.06a ād īṁ ke cit paśyamānāsa āpyaṁ vasuruco divyā abhy anūṣata |
9.110.06c vāraṁ na devaḥ savitā vy ūrṇute ||
9.110.07a tve soma prathamā vṛktabarhiṣo mahe vājāya śravase dhiyaṁ dadhuḥ |
9.110.07c sa tvaṁ no vīra vīryāya codaya ||
9.110.08a divaḥ pīyūṣam pūrvyaṁ yad ukthyam maho gāhād diva ā nir adhukṣata |
9.110.08c indram abhi jāyamānaṁ sam asvaran ||
9.110.09a adha yad ime pavamāna rodasī imā ca viśvā bhuvanābhi majmanā |
9.110.09c yūthe na niṣṭhā vṛṣabho vi tiṣṭhase ||
9.110.10a somaḥ punāno avyaye vāre śiśur na krīḻan pavamāno akṣāḥ |
9.110.10c sahasradhāraḥ śatavāja induḥ ||
9.110.11a eṣa punāno madhumām̐ ṛtāvendrāyenduḥ pavate svādur ūrmiḥ |
9.110.11c vājasanir varivovid vayodhāḥ ||
9.110.12a sa pavasva sahamānaḥ pṛtanyūn sedhan rakṣāṁsy apa durgahāṇi |
9.110.12c svāyudhaḥ sāsahvān soma śatrūn ||

9.111.01a ayā rucā hariṇyā punāno viśvā dveṣāṁsi tarati svayugvabhiḥ sūro na svayugvabhiḥ |
9.111.01d dhārā sutasya rocate punāno aruṣo hariḥ |
9.111.01f viśvā yad rūpā pariyāty ṛkvabhiḥ saptāsyebhir ṛkvabhiḥ ||
9.111.02a tvaṁ tyat paṇīnāṁ vido vasu sam mātṛbhir marjayasi sva ā dama ṛtasya dhītibhir dame |
9.111.02d parāvato na sāma tad yatrā raṇanti dhītayaḥ |
9.111.02f tridhātubhir aruṣībhir vayo dadhe rocamāno vayo dadhe ||
9.111.03a pūrvām anu pradiśaṁ yāti cekitat saṁ raśmibhir yatate darśato ratho daivyo darśato rathaḥ |
9.111.03d agmann ukthāni pauṁsyendraṁ jaitrāya harṣayan |
9.111.03f vajraś ca yad bhavatho anapacyutā samatsv anapacyutā ||

9.112.01a nānānaṁ vā u no dhiyo vi vratāni janānām |
9.112.01c takṣā riṣṭaṁ rutam bhiṣag brahmā sunvantam icchatīndrāyendo pari srava ||
9.112.02a jaratībhir oṣadhībhiḥ parṇebhiḥ śakunānām |
9.112.02c kārmāro aśmabhir dyubhir hiraṇyavantam icchatīndrāyendo pari srava ||
9.112.03a kārur ahaṁ tato bhiṣag upalaprakṣiṇī nanā |
9.112.03c nānādhiyo vasūyavo 'nu gā iva tasthimendrāyendo pari srava ||
9.112.04a aśvo voḻhā sukhaṁ rathaṁ hasanām upamantriṇaḥ |
9.112.04c śepo romaṇvantau bhedau vār in maṇḍūka icchatīndrāyendo pari srava ||

9.113.01a śaryaṇāvati somam indraḥ pibatu vṛtrahā |
9.113.01c balaṁ dadhāna ātmani kariṣyan vīryam mahad indrāyendo pari srava ||
9.113.02a ā pavasva diśām pata ārjīkāt soma mīḍhvaḥ |
9.113.02c ṛtavākena satyena śraddhayā tapasā suta indrāyendo pari srava ||
9.113.03a parjanyavṛddham mahiṣaṁ taṁ sūryasya duhitābharat |
9.113.03c taṁ gandharvāḥ praty agṛbhṇan taṁ some rasam ādadhur indrāyendo pari srava ||
9.113.04a ṛtaṁ vadann ṛtadyumna satyaṁ vadan satyakarman |
9.113.04c śraddhāṁ vadan soma rājan dhātrā soma pariṣkṛta indrāyendo pari srava ||
9.113.05a satyamugrasya bṛhataḥ saṁ sravanti saṁsravāḥ |
9.113.05c saṁ yanti rasino rasāḥ punāno brahmaṇā hara indrāyendo pari srava ||
9.113.06a yatra brahmā pavamāna chandasyāṁ vācaṁ vadan |
9.113.06c grāvṇā some mahīyate somenānandaṁ janayann indrāyendo pari srava ||
9.113.07a yatra jyotir ajasraṁ yasmim̐l loke svar hitam |
9.113.07c tasmin māṁ dhehi pavamānāmṛte loke akṣita indrāyendo pari srava ||
9.113.08a yatra rājā vaivasvato yatrāvarodhanaṁ divaḥ |
9.113.08c yatrāmūr yahvatīr āpas tatra mām amṛtaṁ kṛdhīndrāyendo pari srava ||
9.113.09a yatrānukāmaṁ caraṇaṁ trināke tridive divaḥ |
9.113.09c lokā yatra jyotiṣmantas tatra mām amṛtaṁ kṛdhīndrāyendo pari srava ||
9.113.10a yatra kāmā nikāmāś ca yatra bradhnasya viṣṭapam |
9.113.10c svadhā ca yatra tṛptiś ca tatra mām amṛtaṁ kṛdhīndrāyendo pari srava ||
9.113.11a yatrānandāś ca modāś ca mudaḥ pramuda āsate |
9.113.11c kāmasya yatrāptāḥ kāmās tatra mām amṛtaṁ kṛdhīndrāyendo pari srava ||

9.114.01a ya indoḥ pavamānasyānu dhāmāny akramīt |
9.114.01c tam āhuḥ suprajā iti yas te somāvidhan mana indrāyendo pari srava ||
9.114.02a ṛṣe mantrakṛtāṁ stomaiḥ kaśyapodvardhayan giraḥ |
9.114.02c somaṁ namasya rājānaṁ yo jajñe vīrudhām patir indrāyendo pari srava ||
9.114.03a sapta diśo nānāsūryāḥ sapta hotāra ṛtvijaḥ |
9.114.03c devā ādityā ye sapta tebhiḥ somābhi rakṣa na indrāyendo pari srava ||
9.114.04a yat te rājañ chṛtaṁ havis tena somābhi rakṣa naḥ |
9.114.04c arātīvā mā nas tārīn mo ca naḥ kiṁ canāmamad indrāyendo pari srava ||


10.001.01a agre bṛhann uṣasām ūrdhvo asthān nirjaganvān tamaso jyotiṣāgāt |
10.001.01c agnir bhānunā ruśatā svaṅga ā jāto viśvā sadmāny aprāḥ ||
10.001.02a sa jāto garbho asi rodasyor agne cārur vibhṛta oṣadhīṣu |
10.001.02c citraḥ śiśuḥ pari tamāṁsy aktūn pra mātṛbhyo adhi kanikradad gāḥ ||
10.001.03a viṣṇur itthā paramam asya vidvāñ jāto bṛhann abhi pāti tṛtīyam |
10.001.03c āsā yad asya payo akrata svaṁ sacetaso abhy arcanty atra ||
10.001.04a ata u tvā pitubhṛto janitrīr annāvṛdham prati caranty annaiḥ |
10.001.04c tā īm praty eṣi punar anyarūpā asi tvaṁ vikṣu mānuṣīṣu hotā ||
10.001.05a hotāraṁ citraratham adhvarasya yajñasya-yajñasya ketuṁ ruśantam |
10.001.05c pratyardhiṁ devasya-devasya mahnā śriyā tv agnim atithiṁ janānām ||
10.001.06a sa tu vastrāṇy adha peśanāni vasāno agnir nābhā pṛthivyāḥ |
10.001.06c aruṣo jātaḥ pada iḻāyāḥ purohito rājan yakṣīha devān ||
10.001.07a ā hi dyāvāpṛthivī agna ubhe sadā putro na mātarā tatantha |
10.001.07c pra yāhy acchośato yaviṣṭhāthā vaha sahasyeha devān ||

10.002.01a piprīhi devām̐ uśato yaviṣṭha vidvām̐ ṛtūm̐r ṛtupate yajeha |
10.002.01c ye daivyā ṛtvijas tebhir agne tvaṁ hotṝṇām asy āyajiṣṭhaḥ ||
10.002.02a veṣi hotram uta potraṁ janānām mandhātāsi draviṇodā ṛtāvā |
10.002.02c svāhā vayaṁ kṛṇavāmā havīṁṣi devo devān yajatv agnir arhan ||
10.002.03a ā devānām api panthām aganma yac chaknavāma tad anu pravoḻhum |
10.002.03c agnir vidvān sa yajāt sed u hotā so adhvarān sa ṛtūn kalpayāti ||
10.002.04a yad vo vayam pramināma vratāni viduṣāṁ devā aviduṣṭarāsaḥ |
10.002.04c agniṣ ṭad viśvam ā pṛṇāti vidvān yebhir devām̐ ṛtubhiḥ kalpayāti ||
10.002.05a yat pākatrā manasā dīnadakṣā na yajñasya manvate martyāsaḥ |
10.002.05c agniṣ ṭad dhotā kratuvid vijānan yajiṣṭho devām̐ ṛtuśo yajāti ||
10.002.06a viśveṣāṁ hy adhvarāṇām anīkaṁ citraṁ ketuṁ janitā tvā jajāna |
10.002.06c sa ā yajasva nṛvatīr anu kṣāḥ spārhā iṣaḥ kṣumatīr viśvajanyāḥ ||
10.002.07a yaṁ tvā dyāvāpṛthivī yaṁ tvāpas tvaṣṭā yaṁ tvā sujanimā jajāna |
10.002.07c panthām anu pravidvān pitṛyāṇaṁ dyumad agne samidhāno vi bhāhi ||

10.003.01a ino rājann aratiḥ samiddho raudro dakṣāya suṣumām̐ adarśi |
10.003.01c cikid vi bhāti bhāsā bṛhatāsiknīm eti ruśatīm apājan ||
10.003.02a kṛṣṇāṁ yad enīm abhi varpasā bhūj janayan yoṣām bṛhataḥ pitur jām |
10.003.02c ūrdhvam bhānuṁ sūryasya stabhāyan divo vasubhir aratir vi bhāti ||
10.003.03a bhadro bhadrayā sacamāna āgāt svasāraṁ jāro abhy eti paścāt |
10.003.03c supraketair dyubhir agnir vitiṣṭhan ruśadbhir varṇair abhi rāmam asthāt ||
10.003.04a asya yāmāso bṛhato na vagnūn indhānā agneḥ sakhyuḥ śivasya |
10.003.04c īḍyasya vṛṣṇo bṛhataḥ svāso bhāmāso yāmann aktavaś cikitre ||
10.003.05a svanā na yasya bhāmāsaḥ pavante rocamānasya bṛhataḥ sudivaḥ |
10.003.05c jyeṣṭhebhir yas tejiṣṭhaiḥ krīḻumadbhir varṣiṣṭhebhir bhānubhir nakṣati dyām ||
10.003.06a asya śuṣmāso dadṛśānapaver jehamānasya svanayan niyudbhiḥ |
10.003.06c pratnebhir yo ruśadbhir devatamo vi rebhadbhir aratir bhāti vibhvā ||
10.003.07a sa ā vakṣi mahi na ā ca satsi divaspṛthivyor aratir yuvatyoḥ |
10.003.07c agniḥ sutukaḥ sutukebhir aśvai rabhasvadbhī rabhasvām̐ eha gamyāḥ ||

10.004.01a pra te yakṣi pra ta iyarmi manma bhuvo yathā vandyo no haveṣu |
10.004.01c dhanvann iva prapā asi tvam agna iyakṣave pūrave pratna rājan ||
10.004.02a yaṁ tvā janāso abhi saṁcaranti gāva uṣṇam iva vrajaṁ yaviṣṭha |
10.004.02c dūto devānām asi martyānām antar mahām̐ś carasi rocanena ||
10.004.03a śiśuṁ na tvā jenyaṁ vardhayantī mātā bibharti sacanasyamānā |
10.004.03c dhanor adhi pravatā yāsi haryañ jigīṣase paśur ivāvasṛṣṭaḥ ||
10.004.04a mūrā amūra na vayaṁ cikitvo mahitvam agne tvam aṅga vitse |
10.004.04c śaye vavriś carati jihvayādan rerihyate yuvatiṁ viśpatiḥ san ||
10.004.05a kūcij jāyate sanayāsu navyo vane tasthau palito dhūmaketuḥ |
10.004.05c asnātāpo vṛṣabho na pra veti sacetaso yam praṇayanta martāḥ ||
10.004.06a tanūtyajeva taskarā vanargū raśanābhir daśabhir abhy adhītām |
10.004.06c iyaṁ te agne navyasī manīṣā yukṣvā rathaṁ na śucayadbhir aṅgaiḥ ||
10.004.07a brahma ca te jātavedo namaś ceyaṁ ca gīḥ sadam id vardhanī bhūt |
10.004.07c rakṣā ṇo agne tanayāni tokā rakṣota nas tanvo aprayucchan ||

10.005.01a ekaḥ samudro dharuṇo rayīṇām asmad dhṛdo bhūrijanmā vi caṣṭe |
10.005.01c siṣakty ūdhar niṇyor upastha utsasya madhye nihitam padaṁ veḥ ||
10.005.02a samānaṁ nīḻaṁ vṛṣaṇo vasānāḥ saṁ jagmire mahiṣā arvatībhiḥ |
10.005.02c ṛtasya padaṁ kavayo ni pānti guhā nāmāni dadhire parāṇi ||
10.005.03a ṛtāyinī māyinī saṁ dadhāte mitvā śiśuṁ jajñatur vardhayantī |
10.005.03c viśvasya nābhiṁ carato dhruvasya kaveś cit tantum manasā viyantaḥ ||
10.005.04a ṛtasya hi vartanayaḥ sujātam iṣo vājāya pradivaḥ sacante |
10.005.04c adhīvāsaṁ rodasī vāvasāne ghṛtair annair vāvṛdhāte madhūnām ||
10.005.05a sapta svasṝr aruṣīr vāvaśāno vidvān madhva uj jabhārā dṛśe kam |
10.005.05c antar yeme antarikṣe purājā icchan vavrim avidat pūṣaṇasya ||
10.005.06a sapta maryādāḥ kavayas tatakṣus tāsām ekām id abhy aṁhuro gāt |
10.005.06c āyor ha skambha upamasya nīḻe pathāṁ visarge dharuṇeṣu tasthau ||
10.005.07a asac ca sac ca parame vyoman dakṣasya janmann aditer upasthe |
10.005.07c agnir ha naḥ prathamajā ṛtasya pūrva āyuni vṛṣabhaś ca dhenuḥ ||

10.006.01a ayaṁ sa yasya śarmann avobhir agner edhate jaritābhiṣṭau |
10.006.01c jyeṣṭhebhir yo bhānubhir ṛṣūṇām paryeti parivīto vibhāvā ||
10.006.02a yo bhānubhir vibhāvā vibhāty agnir devebhir ṛtāvājasraḥ |
10.006.02c ā yo vivāya sakhyā sakhibhyo 'parihvṛto atyo na saptiḥ ||
10.006.03a īśe yo viśvasyā devavīter īśe viśvāyur uṣaso vyuṣṭau |
10.006.03c ā yasmin manā havīṁṣy agnāv ariṣṭarathaḥ skabhnāti śūṣaiḥ ||
10.006.04a śūṣebhir vṛdho juṣāṇo arkair devām̐ acchā raghupatvā jigāti |
10.006.04c mandro hotā sa juhvā yajiṣṭhaḥ sammiślo agnir ā jigharti devān ||
10.006.05a tam usrām indraṁ na rejamānam agniṁ gīrbhir namobhir ā kṛṇudhvam |
10.006.05c ā yaṁ viprāso matibhir gṛṇanti jātavedasaṁ juhvaṁ sahānām ||
10.006.06a saṁ yasmin viśvā vasūni jagmur vāje nāśvāḥ saptīvanta evaiḥ |
10.006.06c asme ūtīr indravātatamā arvācīnā agna ā kṛṇuṣva ||
10.006.07a adhā hy agne mahnā niṣadyā sadyo jajñāno havyo babhūtha |
10.006.07c taṁ te devāso anu ketam āyann adhāvardhanta prathamāsa ūmāḥ ||

10.007.01a svasti no divo agne pṛthivyā viśvāyur dhehi yajathāya deva |
10.007.01c sacemahi tava dasma praketair uruṣyā ṇa urubhir deva śaṁsaiḥ ||
10.007.02a imā agne matayas tubhyaṁ jātā gobhir aśvair abhi gṛṇanti rādhaḥ |
10.007.02c yadā te marto anu bhogam ānaḍ vaso dadhāno matibhiḥ sujāta ||
10.007.03a agnim manye pitaram agnim āpim agnim bhrātaraṁ sadam it sakhāyam |
10.007.03c agner anīkam bṛhataḥ saparyaṁ divi śukraṁ yajataṁ sūryasya ||
10.007.04a sidhrā agne dhiyo asme sanutrīr yaṁ trāyase dama ā nityahotā |
10.007.04c ṛtāvā sa rohidaśvaḥ purukṣur dyubhir asmā ahabhir vāmam astu ||
10.007.05a dyubhir hitam mitram iva prayogam pratnam ṛtvijam adhvarasya jāram |
10.007.05c bāhubhyām agnim āyavo 'jananta vikṣu hotāraṁ ny asādayanta ||
10.007.06a svayaṁ yajasva divi deva devān kiṁ te pākaḥ kṛṇavad apracetāḥ |
10.007.06c yathāyaja ṛtubhir deva devān evā yajasva tanvaṁ sujāta ||
10.007.07a bhavā no agne 'vitota gopā bhavā vayaskṛd uta no vayodhāḥ |
10.007.07c rāsvā ca naḥ sumaho havyadātiṁ trāsvota nas tanvo aprayucchan ||

10.008.01a pra ketunā bṛhatā yāty agnir ā rodasī vṛṣabho roravīti |
10.008.01c divaś cid antām̐ upamām̐ ud ānaḻ apām upasthe mahiṣo vavardha ||
10.008.02a mumoda garbho vṛṣabhaḥ kakudmān asremā vatsaḥ śimīvām̐ arāvīt |
10.008.02c sa devatāty udyatāni kṛṇvan sveṣu kṣayeṣu prathamo jigāti ||
10.008.03a ā yo mūrdhānam pitror arabdha ny adhvare dadhire sūro arṇaḥ |
10.008.03c asya patmann aruṣīr aśvabudhnā ṛtasya yonau tanvo juṣanta ||
10.008.04a uṣa-uṣo hi vaso agram eṣi tvaṁ yamayor abhavo vibhāvā |
10.008.04c ṛtāya sapta dadhiṣe padāni janayan mitraṁ tanve svāyai ||
10.008.05a bhuvaś cakṣur maha ṛtasya gopā bhuvo varuṇo yad ṛtāya veṣi |
10.008.05c bhuvo apāṁ napāj jātavedo bhuvo dūto yasya havyaṁ jujoṣaḥ ||
10.008.06a bhuvo yajñasya rajasaś ca netā yatrā niyudbhiḥ sacase śivābhiḥ |
10.008.06c divi mūrdhānaṁ dadhiṣe svarṣāṁ jihvām agne cakṛṣe havyavāham ||
10.008.07a asya tritaḥ kratunā vavre antar icchan dhītim pitur evaiḥ parasya |
10.008.07c sacasyamānaḥ pitror upasthe jāmi bruvāṇa āyudhāni veti ||
10.008.08a sa pitryāṇy āyudhāni vidvān indreṣita āptyo abhy ayudhyat |
10.008.08c triśīrṣāṇaṁ saptaraśmiṁ jaghanvān tvāṣṭrasya cin niḥ sasṛje trito gāḥ ||
10.008.09a bhūrīd indra udinakṣantam ojo 'vābhinat satpatir manyamānam |
10.008.09c tvāṣṭrasya cid viśvarūpasya gonām ācakrāṇas trīṇi śīrṣā parā vark ||

10.009.01a āpo hi ṣṭhā mayobhuvas tā na ūrje dadhātana |
10.009.01c mahe raṇāya cakṣase ||
10.009.02a yo vaḥ śivatamo rasas tasya bhājayateha naḥ |
10.009.02c uśatīr iva mātaraḥ ||
10.009.03a tasmā araṁ gamāma vo yasya kṣayāya jinvatha |
10.009.03c āpo janayathā ca naḥ ||
10.009.04a śaṁ no devīr abhiṣṭaya āpo bhavantu pītaye |
10.009.04c śaṁ yor abhi sravantu naḥ ||
10.009.05a īśānā vāryāṇāṁ kṣayantīś carṣaṇīnām |
10.009.05c apo yācāmi bheṣajam ||
10.009.06a apsu me somo abravīd antar viśvāni bheṣajā |
10.009.06c agniṁ ca viśvaśambhuvam ||
10.009.07a āpaḥ pṛṇīta bheṣajaṁ varūthaṁ tanve mama |
10.009.07c jyok ca sūryaṁ dṛśe ||
10.009.08a idam āpaḥ pra vahata yat kiṁ ca duritam mayi |
10.009.08c yad vāham abhidudroha yad vā śepa utānṛtam ||
10.009.09a āpo adyānv acāriṣaṁ rasena sam agasmahi |
10.009.09c payasvān agna ā gahi tam mā saṁ sṛja varcasā ||

10.010.01a o cit sakhāyaṁ sakhyā vavṛtyāṁ tiraḥ purū cid arṇavaṁ jaganvān |
10.010.01c pitur napātam ā dadhīta vedhā adhi kṣami prataraṁ dīdhyānaḥ ||
10.010.02a na te sakhā sakhyaṁ vaṣṭy etat salakṣmā yad viṣurūpā bhavāti |
10.010.02c mahas putrāso asurasya vīrā divo dhartāra urviyā pari khyan ||
10.010.03a uśanti ghā te amṛtāsa etad ekasya cit tyajasam martyasya |
10.010.03c ni te mano manasi dhāyy asme janyuḥ patis tanvam ā viviśyāḥ ||
10.010.04a na yat purā cakṛmā kad dha nūnam ṛtā vadanto anṛtaṁ rapema |
10.010.04c gandharvo apsv apyā ca yoṣā sā no nābhiḥ paramaṁ jāmi tan nau ||
10.010.05a garbhe nu nau janitā dampatī kar devas tvaṣṭā savitā viśvarūpaḥ |
10.010.05c nakir asya pra minanti vratāni veda nāv asya pṛthivī uta dyauḥ ||
10.010.06a ko asya veda prathamasyāhnaḥ ka īṁ dadarśa ka iha pra vocat |
10.010.06c bṛhan mitrasya varuṇasya dhāma kad u brava āhano vīcyā nṝn ||
10.010.07a yamasya mā yamyaṁ kāma āgan samāne yonau sahaśeyyāya |
10.010.07c jāyeva patye tanvaṁ riricyāṁ vi cid vṛheva rathyeva cakrā ||
10.010.08a na tiṣṭhanti na ni miṣanty ete devānāṁ spaśa iha ye caranti |
10.010.08c anyena mad āhano yāhi tūyaṁ tena vi vṛha rathyeva cakrā ||
10.010.09a rātrībhir asmā ahabhir daśasyet sūryasya cakṣur muhur un mimīyāt |
10.010.09c divā pṛthivyā mithunā sabandhū yamīr yamasya bibhṛyād ajāmi ||
10.010.10a ā ghā tā gacchān uttarā yugāni yatra jāmayaḥ kṛṇavann ajāmi |
10.010.10c upa barbṛhi vṛṣabhāya bāhum anyam icchasva subhage patim mat ||
10.010.11a kim bhrātāsad yad anātham bhavāti kim u svasā yan nirṛtir nigacchāt |
10.010.11c kāmamūtā bahv etad rapāmi tanvā me tanvaṁ sam pipṛgdhi ||
10.010.12a na vā u te tanvā tanvaṁ sam papṛcyām pāpam āhur yaḥ svasāraṁ nigacchāt |
10.010.12c anyena mat pramudaḥ kalpayasva na te bhrātā subhage vaṣṭy etat ||
10.010.13a bato batāsi yama naiva te mano hṛdayaṁ cāvidāma |
10.010.13c anyā kila tvāṁ kakṣyeva yuktam pari ṣvajāte libujeva vṛkṣam ||
10.010.14a anyam ū ṣu tvaṁ yamy anya u tvām pari ṣvajāte libujeva vṛkṣam |
10.010.14c tasya vā tvam mana icchā sa vā tavādhā kṛṇuṣva saṁvidaṁ subhadrām ||

10.011.01a vṛṣā vṛṣṇe duduhe dohasā divaḥ payāṁsi yahvo aditer adābhyaḥ |
10.011.01c viśvaṁ sa veda varuṇo yathā dhiyā sa yajñiyo yajatu yajñiyām̐ ṛtūn ||
10.011.02a rapad gandharvīr apyā ca yoṣaṇā nadasya nāde pari pātu me manaḥ |
10.011.02c iṣṭasya madhye aditir ni dhātu no bhrātā no jyeṣṭhaḥ prathamo vi vocati ||
10.011.03a so cin nu bhadrā kṣumatī yaśasvaty uṣā uvāsa manave svarvatī |
10.011.03c yad īm uśantam uśatām anu kratum agniṁ hotāraṁ vidathāya jījanan ||
10.011.04a adha tyaṁ drapsaṁ vibhvaṁ vicakṣaṇaṁ vir ābharad iṣitaḥ śyeno adhvare |
10.011.04c yadī viśo vṛṇate dasmam āryā agniṁ hotāram adha dhīr ajāyata ||
10.011.05a sadāsi raṇvo yavaseva puṣyate hotrābhir agne manuṣaḥ svadhvaraḥ |
10.011.05c viprasya vā yac chaśamāna ukthyaṁ vājaṁ sasavām̐ upayāsi bhūribhiḥ ||
10.011.06a ud īraya pitarā jāra ā bhagam iyakṣati haryato hṛtta iṣyati |
10.011.06c vivakti vahniḥ svapasyate makhas taviṣyate asuro vepate matī ||
10.011.07a yas te agne sumatim marto akṣat sahasaḥ sūno ati sa pra śṛṇve |
10.011.07c iṣaṁ dadhāno vahamāno aśvair ā sa dyumām̐ amavān bhūṣati dyūn ||
10.011.08a yad agna eṣā samitir bhavāti devī deveṣu yajatā yajatra |
10.011.08c ratnā ca yad vibhajāsi svadhāvo bhāgaṁ no atra vasumantaṁ vītāt ||
10.011.09a śrudhī no agne sadane sadhasthe yukṣvā ratham amṛtasya dravitnum |
10.011.09c ā no vaha rodasī devaputre mākir devānām apa bhūr iha syāḥ ||

10.012.01a dyāvā ha kṣāmā prathame ṛtenābhiśrāve bhavataḥ satyavācā |
10.012.01c devo yan martān yajathāya kṛṇvan sīdad dhotā pratyaṅ svam asuṁ yan ||
10.012.02a devo devān paribhūr ṛtena vahā no havyam prathamaś cikitvān |
10.012.02c dhūmaketuḥ samidhā bhāṛjīko mandro hotā nityo vācā yajīyān ||
10.012.03a svāvṛg devasyāmṛtaṁ yadī gor ato jātāso dhārayanta urvī |
10.012.03c viśve devā anu tat te yajur gur duhe yad enī divyaṁ ghṛtaṁ vāḥ ||
10.012.04a arcāmi vāṁ vardhāyāpo ghṛtasnū dyāvābhūmī śṛṇutaṁ rodasī me |
10.012.04c ahā yad dyāvo 'sunītim ayan madhvā no atra pitarā śiśītām ||
10.012.05a kiṁ svin no rājā jagṛhe kad asyāti vrataṁ cakṛmā ko vi veda |
10.012.05c mitraś cid dhi ṣmā juhurāṇo devāñ chloko na yātām api vājo asti ||
10.012.06a durmantv atrāmṛtasya nāma salakṣmā yad viṣurūpā bhavāti |
10.012.06c yamasya yo manavate sumantv agne tam ṛṣva pāhy aprayucchan ||
10.012.07a yasmin devā vidathe mādayante vivasvataḥ sadane dhārayante |
10.012.07c sūrye jyotir adadhur māsy aktūn pari dyotaniṁ carato ajasrā ||
10.012.08a yasmin devā manmani saṁcaranty apīcye na vayam asya vidma |
10.012.08c mitro no atrāditir anāgān savitā devo varuṇāya vocat ||
10.012.09a śrudhī no agne sadane sadhasthe yukṣvā ratham amṛtasya dravitnum |
10.012.09c ā no vaha rodasī devaputre mākir devānām apa bhūr iha syāḥ ||

10.013.01a yuje vām brahma pūrvyaṁ namobhir vi śloka etu pathyeva sūreḥ |
10.013.01c śṛṇvantu viśve amṛtasya putrā ā ye dhāmāni divyāni tasthuḥ ||
10.013.02a yame iva yatamāne yad aitam pra vām bharan mānuṣā devayantaḥ |
10.013.02c ā sīdataṁ svam u lokaṁ vidāne svāsasthe bhavatam indave naḥ ||
10.013.03a pañca padāni rupo anv arohaṁ catuṣpadīm anv emi vratena |
10.013.03c akṣareṇa prati mima etām ṛtasya nābhāv adhi sam punāmi ||
10.013.04a devebhyaḥ kam avṛṇīta mṛtyum prajāyai kam amṛtaṁ nāvṛṇīta |
10.013.04c bṛhaspatiṁ yajñam akṛṇvata ṛṣim priyāṁ yamas tanvam prārirecīt ||
10.013.05a sapta kṣaranti śiśave marutvate pitre putrāso apy avīvatann ṛtam |
10.013.05c ubhe id asyobhayasya rājata ubhe yatete ubhayasya puṣyataḥ ||

10.014.01a pareyivāṁsam pravato mahīr anu bahubhyaḥ panthām anupaspaśānam |
10.014.01c vaivasvataṁ saṁgamanaṁ janānāṁ yamaṁ rājānaṁ haviṣā duvasya ||
10.014.02a yamo no gātum prathamo viveda naiṣā gavyūtir apabhartavā u |
10.014.02c yatrā naḥ pūrve pitaraḥ pareyur enā jajñānāḥ pathyā anu svāḥ ||
10.014.03a mātalī kavyair yamo aṅgirobhir bṛhaspatir ṛkvabhir vāvṛdhānaḥ |
10.014.03c yām̐ś ca devā vāvṛdhur ye ca devān svāhānye svadhayānye madanti ||
10.014.04a imaṁ yama prastaram ā hi sīdāṅgirobhiḥ pitṛbhiḥ saṁvidānaḥ |
10.014.04c ā tvā mantrāḥ kaviśastā vahantv enā rājan haviṣā mādayasva ||
10.014.05a aṅgirobhir ā gahi yajñiyebhir yama vairūpair iha mādayasva |
10.014.05c vivasvantaṁ huve yaḥ pitā te 'smin yajñe barhiṣy ā niṣadya ||
10.014.06a aṅgiraso naḥ pitaro navagvā atharvāṇo bhṛgavaḥ somyāsaḥ |
10.014.06c teṣāṁ vayaṁ sumatau yajñiyānām api bhadre saumanase syāma ||
10.014.07a prehi prehi pathibhiḥ pūrvyebhir yatrā naḥ pūrve pitaraḥ pareyuḥ |
10.014.07c ubhā rājānā svadhayā madantā yamam paśyāsi varuṇaṁ ca devam ||
10.014.08a saṁ gacchasva pitṛbhiḥ saṁ yameneṣṭāpūrtena parame vyoman |
10.014.08c hitvāyāvadyam punar astam ehi saṁ gacchasva tanvā suvarcāḥ ||
10.014.09a apeta vīta vi ca sarpatāto 'smā etam pitaro lokam akran |
10.014.09c ahobhir adbhir aktubhir vyaktaṁ yamo dadāty avasānam asmai ||
10.014.10a ati drava sārameyau śvānau caturakṣau śabalau sādhunā pathā |
10.014.10c athā pitṝn suvidatrām̐ upehi yamena ye sadhamādam madanti ||
10.014.11a yau te śvānau yama rakṣitārau caturakṣau pathirakṣī nṛcakṣasau |
10.014.11c tābhyām enam pari dehi rājan svasti cāsmā anamīvaṁ ca dhehi ||
10.014.12a urūṇasāv asutṛpā udumbalau yamasya dūtau carato janām̐ anu |
10.014.12c tāv asmabhyaṁ dṛśaye sūryāya punar dātām asum adyeha bhadram ||
10.014.13a yamāya somaṁ sunuta yamāya juhutā haviḥ |
10.014.13c yamaṁ ha yajño gacchaty agnidūto araṁkṛtaḥ ||
10.014.14a yamāya ghṛtavad dhavir juhota pra ca tiṣṭhata |
10.014.14c sa no deveṣv ā yamad dīrgham āyuḥ pra jīvase ||
10.014.15a yamāya madhumattamaṁ rājñe havyaṁ juhotana |
10.014.15c idaṁ nama ṛṣibhyaḥ pūrvajebhyaḥ pūrvebhyaḥ pathikṛdbhyaḥ ||
10.014.16a trikadrukebhiḥ patati ṣaḻ urvīr ekam id bṛhat |
10.014.16c triṣṭub gāyatrī chandāṁsi sarvā tā yama āhitā ||

10.015.01a ud īratām avara ut parāsa un madhyamāḥ pitaraḥ somyāsaḥ |
10.015.01c asuṁ ya īyur avṛkā ṛtajñās te no 'vantu pitaro haveṣu ||
10.015.02a idam pitṛbhyo namo astv adya ye pūrvāso ya uparāsa īyuḥ |
10.015.02c ye pārthive rajasy ā niṣattā ye vā nūnaṁ suvṛjanāsu vikṣu ||
10.015.03a āham pitṝn suvidatrām̐ avitsi napātaṁ ca vikramaṇaṁ ca viṣṇoḥ |
10.015.03c barhiṣado ye svadhayā sutasya bhajanta pitvas ta ihāgamiṣṭhāḥ ||
10.015.04a barhiṣadaḥ pitara ūty arvāg imā vo havyā cakṛmā juṣadhvam |
10.015.04c ta ā gatāvasā śaṁtamenāthā naḥ śaṁ yor arapo dadhāta ||
10.015.05a upahūtāḥ pitaraḥ somyāso barhiṣyeṣu nidhiṣu priyeṣu |
10.015.05c ta ā gamantu ta iha śruvantv adhi bruvantu te 'vantv asmān ||
10.015.06a ācyā jānu dakṣiṇato niṣadyemaṁ yajñam abhi gṛṇīta viśve |
10.015.06c mā hiṁsiṣṭa pitaraḥ kena cin no yad va āgaḥ puruṣatā karāma ||
10.015.07a āsīnāso aruṇīnām upasthe rayiṁ dhatta dāśuṣe martyāya |
10.015.07c putrebhyaḥ pitaras tasya vasvaḥ pra yacchata ta ihorjaṁ dadhāta ||
10.015.08a ye naḥ pūrve pitaraḥ somyāso 'nūhire somapīthaṁ vasiṣṭhāḥ |
10.015.08c tebhir yamaḥ saṁrarāṇo havīṁṣy uśann uśadbhiḥ pratikāmam attu ||
10.015.09a ye tātṛṣur devatrā jehamānā hotrāvidaḥ stomataṣṭāso arkaiḥ |
10.015.09c āgne yāhi suvidatrebhir arvāṅ satyaiḥ kavyaiḥ pitṛbhir gharmasadbhiḥ ||
10.015.10a ye satyāso havirado haviṣpā indreṇa devaiḥ sarathaṁ dadhānāḥ |
10.015.10c āgne yāhi sahasraṁ devavandaiḥ paraiḥ pūrvaiḥ pitṛbhir gharmasadbhiḥ ||
10.015.11a agniṣvāttāḥ pitara eha gacchata sadaḥ-sadaḥ sadata supraṇītayaḥ |
10.015.11c attā havīṁṣi prayatāni barhiṣy athā rayiṁ sarvavīraṁ dadhātana ||
10.015.12a tvam agna īḻito jātavedo 'vāḍ ḍhavyāni surabhīṇi kṛtvī |
10.015.12c prādāḥ pitṛbhyaḥ svadhayā te akṣann addhi tvaṁ deva prayatā havīṁṣi ||
10.015.13a ye ceha pitaro ye ca neha yām̐ś ca vidma yām̐ u ca na pravidma |
10.015.13c tvaṁ vettha yati te jātavedaḥ svadhābhir yajñaṁ sukṛtaṁ juṣasva ||
10.015.14a ye agnidagdhā ye anagnidagdhā madhye divaḥ svadhayā mādayante |
10.015.14c tebhiḥ svarāḻ asunītim etāṁ yathāvaśaṁ tanvaṁ kalpayasva ||

10.016.01a mainam agne vi daho mābhi śoco māsya tvacaṁ cikṣipo mā śarīram |
10.016.01c yadā śṛtaṁ kṛṇavo jātavedo 'them enam pra hiṇutāt pitṛbhyaḥ ||
10.016.02a śṛtaṁ yadā karasi jātavedo 'them enam pari dattāt pitṛbhyaḥ |
10.016.02c yadā gacchāty asunītim etām athā devānāṁ vaśanīr bhavāti ||
10.016.03a sūryaṁ cakṣur gacchatu vātam ātmā dyāṁ ca gaccha pṛthivīṁ ca dharmaṇā |
10.016.03c apo vā gaccha yadi tatra te hitam oṣadhīṣu prati tiṣṭhā śarīraiḥ ||
10.016.04a ajo bhāgas tapasā taṁ tapasva taṁ te śocis tapatu taṁ te arciḥ |
10.016.04c yās te śivās tanvo jātavedas tābhir vahainaṁ sukṛtām u lokam ||
10.016.05a ava sṛja punar agne pitṛbhyo yas ta āhutaś carati svadhābhiḥ |
10.016.05c āyur vasāna upa vetu śeṣaḥ saṁ gacchatāṁ tanvā jātavedaḥ ||
10.016.06a yat te kṛṣṇaḥ śakuna ātutoda pipīlaḥ sarpa uta vā śvāpadaḥ |
10.016.06c agniṣ ṭad viśvād agadaṁ kṛṇotu somaś ca yo brāhmaṇām̐ āviveśa ||
10.016.07a agner varma pari gobhir vyayasva sam prorṇuṣva pīvasā medasā ca |
10.016.07c net tvā dhṛṣṇur harasā jarhṛṣāṇo dadhṛg vidhakṣyan paryaṅkhayāte ||
10.016.08a imam agne camasam mā vi jihvaraḥ priyo devānām uta somyānām |
10.016.08c eṣa yaś camaso devapānas tasmin devā amṛtā mādayante ||
10.016.09a kravyādam agnim pra hiṇomi dūraṁ yamarājño gacchatu ripravāhaḥ |
10.016.09c ihaivāyam itaro jātavedā devebhyo havyaṁ vahatu prajānan ||
10.016.10a yo agniḥ kravyāt praviveśa vo gṛham imam paśyann itaraṁ jātavedasam |
10.016.10c taṁ harāmi pitṛyajñāya devaṁ sa gharmam invāt parame sadhasthe ||
10.016.11a yo agniḥ kravyavāhanaḥ pitṝn yakṣad ṛtāvṛdhaḥ |
10.016.11c pred u havyāni vocati devebhyaś ca pitṛbhya ā ||
10.016.12a uśantas tvā ni dhīmahy uśantaḥ sam idhīmahi |
10.016.12c uśann uśata ā vaha pitṝn haviṣe attave ||
10.016.13a yaṁ tvam agne samadahas tam u nir vāpayā punaḥ |
10.016.13c kiyāmbv atra rohatu pākadūrvā vyalkaśā ||
10.016.14a śītike śītikāvati hlādike hlādikāvati |
10.016.14c maṇḍūkyā su saṁ gama imaṁ sv agniṁ harṣaya ||

10.017.01a tvaṣṭā duhitre vahatuṁ kṛṇotītīdaṁ viśvam bhuvanaṁ sam eti |
10.017.01c yamasya mātā paryuhyamānā maho jāyā vivasvato nanāśa ||
10.017.02a apāgūhann amṛtām martyebhyaḥ kṛtvī savarṇām adadur vivasvate |
10.017.02c utāśvināv abharad yat tad āsīd ajahād u dvā mithunā saraṇyūḥ ||
10.017.03a pūṣā tvetaś cyāvayatu pra vidvān anaṣṭapaśur bhuvanasya gopāḥ |
10.017.03c sa tvaitebhyaḥ pari dadat pitṛbhyo 'gnir devebhyaḥ suvidatriyebhyaḥ ||
10.017.04a āyur viśvāyuḥ pari pāsati tvā pūṣā tvā pātu prapathe purastāt |
10.017.04c yatrāsate sukṛto yatra te yayus tatra tvā devaḥ savitā dadhātu ||
10.017.05a pūṣemā āśā anu veda sarvāḥ so asmām̐ abhayatamena neṣat |
10.017.05c svastidā āghṛṇiḥ sarvavīro 'prayucchan pura etu prajānan ||
10.017.06a prapathe pathām ajaniṣṭa pūṣā prapathe divaḥ prapathe pṛthivyāḥ |
10.017.06c ubhe abhi priyatame sadhasthe ā ca parā ca carati prajānan ||
10.017.07a sarasvatīṁ devayanto havante sarasvatīm adhvare tāyamāne |
10.017.07c sarasvatīṁ sukṛto ahvayanta sarasvatī dāśuṣe vāryaṁ dāt ||
10.017.08a sarasvati yā sarathaṁ yayātha svadhābhir devi pitṛbhir madantī |
10.017.08c āsadyāsmin barhiṣi mādayasvānamīvā iṣa ā dhehy asme ||
10.017.09a sarasvatīṁ yām pitaro havante dakṣiṇā yajñam abhinakṣamāṇāḥ |
10.017.09c sahasrārgham iḻo atra bhāgaṁ rāyas poṣaṁ yajamāneṣu dhehi ||
10.017.10a āpo asmān mātaraḥ śundhayantu ghṛtena no ghṛtapvaḥ punantu |
10.017.10c viśvaṁ hi ripram pravahanti devīr ud id ābhyaḥ śucir ā pūta emi ||
10.017.11a drapsaś caskanda prathamām̐ anu dyūn imaṁ ca yonim anu yaś ca pūrvaḥ |
10.017.11c samānaṁ yonim anu saṁcarantaṁ drapsaṁ juhomy anu sapta hotrāḥ ||
10.017.12a yas te drapsaḥ skandati yas te aṁśur bāhucyuto dhiṣaṇāyā upasthāt |
10.017.12c adhvaryor vā pari vā yaḥ pavitrāt taṁ te juhomi manasā vaṣaṭkṛtam ||
10.017.13a yas te drapsaḥ skanno yas te aṁśur avaś ca yaḥ paraḥ srucā |
10.017.13c ayaṁ devo bṛhaspatiḥ saṁ taṁ siñcatu rādhase ||
10.017.14a payasvatīr oṣadhayaḥ payasvan māmakaṁ vacaḥ |
10.017.14c apām payasvad it payas tena mā saha śundhata ||

10.018.01a param mṛtyo anu parehi panthāṁ yas te sva itaro devayānāt |
10.018.01c cakṣuṣmate śṛṇvate te bravīmi mā naḥ prajāṁ rīriṣo mota vīrān ||
10.018.02a mṛtyoḥ padaṁ yopayanto yad aita drāghīya āyuḥ prataraṁ dadhānāḥ |
10.018.02c āpyāyamānāḥ prajayā dhanena śuddhāḥ pūtā bhavata yajñiyāsaḥ ||
10.018.03a ime jīvā vi mṛtair āvavṛtrann abhūd bhadrā devahūtir no adya |
10.018.03c prāñco agāma nṛtaye hasāya drāghīya āyuḥ prataraṁ dadhānāḥ ||
10.018.04a imaṁ jīvebhyaḥ paridhiṁ dadhāmi maiṣāṁ nu gād aparo artham etam |
10.018.04c śataṁ jīvantu śaradaḥ purūcīr antar mṛtyuṁ dadhatām parvatena ||
10.018.05a yathāhāny anupūrvam bhavanti yatha ṛtava ṛtubhir yanti sādhu |
10.018.05c yathā na pūrvam aparo jahāty evā dhātar āyūṁṣi kalpayaiṣām ||
10.018.06a ā rohatāyur jarasaṁ vṛṇānā anupūrvaṁ yatamānā yati ṣṭha |
10.018.06c iha tvaṣṭā sujanimā sajoṣā dīrgham āyuḥ karati jīvase vaḥ ||
10.018.07a imā nārīr avidhavāḥ supatnīr āñjanena sarpiṣā saṁ viśantu |
10.018.07c anaśravo 'namīvāḥ suratnā ā rohantu janayo yonim agre ||
10.018.08a ud īrṣva nāry abhi jīvalokaṁ gatāsum etam upa śeṣa ehi |
10.018.08c hastagrābhasya didhiṣos tavedam patyur janitvam abhi sam babhūtha ||
10.018.09a dhanur hastād ādadāno mṛtasyāsme kṣatrāya varcase balāya |
10.018.09c atraiva tvam iha vayaṁ suvīrā viśvāḥ spṛdho abhimātīr jayema ||
10.018.10a upa sarpa mātaram bhūmim etām uruvyacasam pṛthivīṁ suśevām |
10.018.10c ūrṇamradā yuvatir dakṣiṇāvata eṣā tvā pātu nirṛter upasthāt ||
10.018.11a uc chvañcasva pṛthivi mā ni bādhathāḥ sūpāyanāsmai bhava sūpavañcanā |
10.018.11c mātā putraṁ yathā sicābhy enam bhūma ūrṇuhi ||
10.018.12a ucchvañcamānā pṛthivī su tiṣṭhatu sahasram mita upa hi śrayantām |
10.018.12c te gṛhāso ghṛtaścuto bhavantu viśvāhāsmai śaraṇāḥ santv atra ||
10.018.13a ut te stabhnāmi pṛthivīṁ tvat parīmaṁ logaṁ nidadhan mo ahaṁ riṣam |
10.018.13c etāṁ sthūṇām pitaro dhārayantu te 'trā yamaḥ sādanā te minotu ||
10.018.14a pratīcīne mām ahanīṣvāḥ parṇam ivā dadhuḥ |
10.018.14c pratīcīṁ jagrabhā vācam aśvaṁ raśanayā yathā ||

10.019.01a ni vartadhvam mānu gātāsmān siṣakta revatīḥ |
10.019.01c agnīṣomā punarvasū asme dhārayataṁ rayim ||
10.019.02a punar enā ni vartaya punar enā ny ā kuru |
10.019.02c indra eṇā ni yacchatv agnir enā upājatu ||
10.019.03a punar etā ni vartantām asmin puṣyantu gopatau |
10.019.03c ihaivāgne ni dhārayeha tiṣṭhatu yā rayiḥ ||
10.019.04a yan niyānaṁ nyayanaṁ saṁjñānaṁ yat parāyaṇam |
10.019.04c āvartanaṁ nivartanaṁ yo gopā api taṁ huve ||
10.019.05a ya udānaḍ vyayanaṁ ya udānaṭ parāyaṇam |
10.019.05c āvartanaṁ nivartanam api gopā ni vartatām ||
10.019.06a ā nivarta ni vartaya punar na indra gā dehi |
10.019.06c jīvābhir bhunajāmahai ||
10.019.07a pari vo viśvato dadha ūrjā ghṛtena payasā |
10.019.07c ye devāḥ ke ca yajñiyās te rayyā saṁ sṛjantu naḥ ||
10.019.08a ā nivartana vartaya ni nivartana vartaya |
10.019.08c bhūmyāś catasraḥ pradiśas tābhya enā ni vartaya ||

10.020.01a bhadraṁ no api vātaya manaḥ ||
10.020.02a agnim īḻe bhujāṁ yaviṣṭhaṁ śāsā mitraṁ durdharītum |
10.020.02c yasya dharman svar enīḥ saparyanti mātur ūdhaḥ ||
10.020.03a yam āsā kṛpanīḻam bhāsāketuṁ vardhayanti |
10.020.03c bhrājate śreṇidan ||
10.020.04a aryo viśāṁ gātur eti pra yad ānaḍ divo antān |
10.020.04c kavir abhraṁ dīdyānaḥ ||
10.020.05a juṣad dhavyā mānuṣasyordhvas tasthāv ṛbhvā yajñe |
10.020.05c minvan sadma pura eti ||
10.020.06a sa hi kṣemo havir yajñaḥ śruṣṭīd asya gātur eti |
10.020.06c agniṁ devā vāśīmantam ||
10.020.07a yajñāsāhaṁ duva iṣe 'gnim pūrvasya śevasya |
10.020.07c adreḥ sūnum āyum āhuḥ ||
10.020.08a naro ye ke cāsmad ā viśvet te vāma ā syuḥ |
10.020.08c agniṁ haviṣā vardhantaḥ ||
10.020.09a kṛṣṇaḥ śveto 'ruṣo yāmo asya bradhna ṛjra uta śoṇo yaśasvān |
10.020.09c hiraṇyarūpaṁ janitā jajāna ||
10.020.10a evā te agne vimado manīṣām ūrjo napād amṛtebhiḥ sajoṣāḥ |
10.020.10c gira ā vakṣat sumatīr iyāna iṣam ūrjaṁ sukṣitiṁ viśvam ābhāḥ ||

10.021.01a āgniṁ na svavṛktibhir hotāraṁ tvā vṛṇīmahe |
10.021.01c yajñāya stīrṇabarhiṣe vi vo made śīram pāvakaśociṣaṁ vivakṣase ||
10.021.02a tvām u te svābhuvaḥ śumbhanty aśvarādhasaḥ |
10.021.02c veti tvām upasecanī vi vo mada ṛjītir agna āhutir vivakṣase ||
10.021.03a tve dharmāṇa āsate juhūbhiḥ siñcatīr iva |
10.021.03c kṛṣṇā rūpāṇy arjunā vi vo made viśvā adhi śriyo dhiṣe vivakṣase ||
10.021.04a yam agne manyase rayiṁ sahasāvann amartya |
10.021.04c tam ā no vājasātaye vi vo made yajñeṣu citram ā bharā vivakṣase ||
10.021.05a agnir jāto atharvaṇā vidad viśvāni kāvyā |
10.021.05c bhuvad dūto vivasvato vi vo made priyo yamasya kāmyo vivakṣase ||
10.021.06a tvāṁ yajñeṣv īḻate 'gne prayaty adhvare |
10.021.06c tvaṁ vasūni kāmyā vi vo made viśvā dadhāsi dāśuṣe vivakṣase ||
10.021.07a tvāṁ yajñeṣv ṛtvijaṁ cārum agne ni ṣedire |
10.021.07c ghṛtapratīkam manuṣo vi vo made śukraṁ cetiṣṭham akṣabhir vivakṣase ||
10.021.08a agne śukreṇa śociṣoru prathayase bṛhat |
10.021.08c abhikrandan vṛṣāyase vi vo made garbhaṁ dadhāsi jāmiṣu vivakṣase ||

10.022.01a kuha śruta indraḥ kasminn adya jane mitro na śrūyate |
10.022.01c ṛṣīṇāṁ vā yaḥ kṣaye guhā vā carkṛṣe girā ||
10.022.02a iha śruta indro asme adya stave vajry ṛcīṣamaḥ |
10.022.02c mitro na yo janeṣv ā yaśaś cakre asāmy ā ||
10.022.03a maho yas patiḥ śavaso asāmy ā maho nṛmṇasya tūtujiḥ |
10.022.03c bhartā vajrasya dhṛṣṇoḥ pitā putram iva priyam ||
10.022.04a yujāno aśvā vātasya dhunī devo devasya vajrivaḥ |
10.022.04c syantā pathā virukmatā sṛjānaḥ stoṣy adhvanaḥ ||
10.022.05a tvaṁ tyā cid vātasyāśvāgā ṛjrā tmanā vahadhyai |
10.022.05c yayor devo na martyo yantā nakir vidāyyaḥ ||
10.022.06a adha gmantośanā pṛcchate vāṁ kadarthā na ā gṛham |
10.022.06c ā jagmathuḥ parākād divaś ca gmaś ca martyam ||
10.022.07a ā na indra pṛkṣase 'smākam brahmodyatam |
10.022.07c tat tvā yācāmahe 'vaḥ śuṣṇaṁ yad dhann amānuṣam ||
10.022.08a akarmā dasyur abhi no amantur anyavrato amānuṣaḥ |
10.022.08c tvaṁ tasyāmitrahan vadhar dāsasya dambhaya ||
10.022.09a tvaṁ na indra śūra śūrair uta tvotāso barhaṇā |
10.022.09c purutrā te vi pūrtayo navanta kṣoṇayo yathā ||
10.022.10a tvaṁ tān vṛtrahatye codayo nṝn kārpāṇe śūra vajrivaḥ |
10.022.10c guhā yadī kavīnāṁ viśāṁ nakṣatraśavasām ||
10.022.11a makṣū tā ta indra dānāpnasa ākṣāṇe śūra vajrivaḥ |
10.022.11c yad dha śuṣṇasya dambhayo jātaṁ viśvaṁ sayāvabhiḥ ||
10.022.12a mākudhryag indra śūra vasvīr asme bhūvann abhiṣṭayaḥ |
10.022.12c vayaṁ-vayaṁ ta āsāṁ sumne syāma vajrivaḥ ||
10.022.13a asme tā ta indra santu satyāhiṁsantīr upaspṛśaḥ |
10.022.13c vidyāma yāsām bhujo dhenūnāṁ na vajrivaḥ ||
10.022.14a ahastā yad apadī vardhata kṣāḥ śacībhir vedyānām |
10.022.14c śuṣṇam pari pradakṣiṇid viśvāyave ni śiśnathaḥ ||
10.022.15a pibā-pibed indra śūra somam mā riṣaṇyo vasavāna vasuḥ san |
10.022.15c uta trāyasva gṛṇato maghono mahaś ca rāyo revatas kṛdhī naḥ ||

10.023.01a yajāmaha indraṁ vajradakṣiṇaṁ harīṇāṁ rathyaṁ vivratānām |
10.023.01c pra śmaśru dodhuvad ūrdhvathā bhūd vi senābhir dayamāno vi rādhasā ||
10.023.02a harī nv asya yā vane vide vasv indro maghair maghavā vṛtrahā bhuvat |
10.023.02c ṛbhur vāja ṛbhukṣāḥ patyate śavo 'va kṣṇaumi dāsasya nāma cit ||
10.023.03a yadā vajraṁ hiraṇyam id athā rathaṁ harī yam asya vahato vi sūribhiḥ |
10.023.03c ā tiṣṭhati maghavā sanaśruta indro vājasya dīrghaśravasas patiḥ ||
10.023.04a so cin nu vṛṣṭir yūthyā svā sacām̐ indraḥ śmaśrūṇi haritābhi pruṣṇute |
10.023.04c ava veti sukṣayaṁ sute madhūd id dhūnoti vāto yathā vanam ||
10.023.05a yo vācā vivāco mṛdhravācaḥ purū sahasrāśivā jaghāna |
10.023.05c tat-tad id asya pauṁsyaṁ gṛṇīmasi piteva yas taviṣīṁ vāvṛdhe śavaḥ ||
10.023.06a stomaṁ ta indra vimadā ajījanann apūrvyam purutamaṁ sudānave |
10.023.06c vidmā hy asya bhojanam inasya yad ā paśuṁ na gopāḥ karāmahe ||
10.023.07a mākir na enā sakhyā vi yauṣus tava cendra vimadasya ca ṛṣeḥ |
10.023.07c vidmā hi te pramatiṁ deva jāmivad asme te santu sakhyā śivāni ||

10.024.01a indra somam imam piba madhumantaṁ camū sutam |
10.024.01c asme rayiṁ ni dhāraya vi vo made sahasriṇam purūvaso vivakṣase ||
10.024.02a tvāṁ yajñebhir ukthair upa havyebhir īmahe |
10.024.02c śacīpate śacīnāṁ vi vo made śreṣṭhaṁ no dhehi vāryaṁ vivakṣase ||
10.024.03a yas patir vāryāṇām asi radhrasya coditā |
10.024.03c indra stotṝṇām avitā vi vo made dviṣo naḥ pāhy aṁhaso vivakṣase ||
10.024.04a yuvaṁ śakrā māyāvinā samīcī nir amanthatam |
10.024.04c vimadena yad īḻitā nāsatyā niramanthatam ||
10.024.05a viśve devā akṛpanta samīcyor niṣpatantyoḥ |
10.024.05c nāsatyāv abruvan devāḥ punar ā vahatād iti ||
10.024.06a madhuman me parāyaṇam madhumat punar āyanam |
10.024.06c tā no devā devatayā yuvam madhumatas kṛtam ||

10.025.01a bhadraṁ no api vātaya mano dakṣam uta kratum |
10.025.01c adhā te sakhye andhaso vi vo made raṇan gāvo na yavase vivakṣase ||
10.025.02a hṛdispṛśas ta āsate viśveṣu soma dhāmasu |
10.025.02c adhā kāmā ime mama vi vo made vi tiṣṭhante vasūyavo vivakṣase ||
10.025.03a uta vratāni soma te prāham mināmi pākyā |
10.025.03c adhā piteva sūnave vi vo made mṛḻā no abhi cid vadhād vivakṣase ||
10.025.04a sam u pra yanti dhītayaḥ sargāso 'vatām̐ iva |
10.025.04c kratuṁ naḥ soma jīvase vi vo made dhārayā camasām̐ iva vivakṣase ||
10.025.05a tava tye soma śaktibhir nikāmāso vy ṛṇvire |
10.025.05c gṛtsasya dhīrās tavaso vi vo made vrajaṁ gomantam aśvinaṁ vivakṣase ||
10.025.06a paśuṁ naḥ soma rakṣasi purutrā viṣṭhitaṁ jagat |
10.025.06c samākṛṇoṣi jīvase vi vo made viśvā sampaśyan bhuvanā vivakṣase ||
10.025.07a tvaṁ naḥ soma viśvato gopā adābhyo bhava |
10.025.07c sedha rājann apa sridho vi vo made mā no duḥśaṁsa īśatā vivakṣase ||
10.025.08a tvaṁ naḥ soma sukratur vayodheyāya jāgṛhi |
10.025.08c kṣetravittaro manuṣo vi vo made druho naḥ pāhy aṁhaso vivakṣase ||
10.025.09a tvaṁ no vṛtrahantamendrasyendo śivaḥ sakhā |
10.025.09c yat sīṁ havante samithe vi vo made yudhyamānās tokasātau vivakṣase ||
10.025.10a ayaṁ gha sa turo mada indrasya vardhata priyaḥ |
10.025.10c ayaṁ kakṣīvato maho vi vo made matiṁ viprasya vardhayad vivakṣase ||
10.025.11a ayaṁ viprāya dāśuṣe vājām̐ iyarti gomataḥ |
10.025.11c ayaṁ saptabhya ā varaṁ vi vo made prāndhaṁ śroṇaṁ ca tāriṣad vivakṣase ||

10.026.01a pra hy acchā manīṣāḥ spārhā yanti niyutaḥ |
10.026.01c pra dasrā niyudrathaḥ pūṣā aviṣṭu māhinaḥ ||
10.026.02a yasya tyan mahitvaṁ vātāpyam ayaṁ janaḥ |
10.026.02c vipra ā vaṁsad dhītibhiś ciketa suṣṭutīnām ||
10.026.03a sa veda suṣṭutīnām indur na pūṣā vṛṣā |
10.026.03c abhi psuraḥ pruṣāyati vrajaṁ na ā pruṣāyati ||
10.026.04a maṁsīmahi tvā vayam asmākaṁ deva pūṣan |
10.026.04c matīnāṁ ca sādhanaṁ viprāṇāṁ cādhavam ||
10.026.05a pratyardhir yajñānām aśvahayo rathānām |
10.026.05c ṛṣiḥ sa yo manurhito viprasya yāvayatsakhaḥ ||
10.026.06a ādhīṣamāṇāyāḥ patiḥ śucāyāś ca śucasya ca |
10.026.06c vāsovāyo 'vīnām ā vāsāṁsi marmṛjat ||
10.026.07a ino vājānām patir inaḥ puṣṭīnāṁ sakhā |
10.026.07c pra śmaśru haryato dūdhod vi vṛthā yo adābhyaḥ ||
10.026.08a ā te rathasya pūṣann ajā dhuraṁ vavṛtyuḥ |
10.026.08c viśvasyārthinaḥ sakhā sanojā anapacyutaḥ ||
10.026.09a asmākam ūrjā ratham pūṣā aviṣṭu māhinaḥ |
10.026.09c bhuvad vājānāṁ vṛdha imaṁ naḥ śṛṇavad dhavam ||

10.027.01a asat su me jaritaḥ sābhivego yat sunvate yajamānāya śikṣam |
10.027.01c anāśīrdām aham asmi prahantā satyadhvṛtaṁ vṛjināyantam ābhum ||
10.027.02a yadīd ahaṁ yudhaye saṁnayāny adevayūn tanvā śūśujānān |
10.027.02c amā te tumraṁ vṛṣabham pacāni tīvraṁ sutam pañcadaśaṁ ni ṣiñcam ||
10.027.03a nāhaṁ taṁ veda ya iti bravīty adevayūn samaraṇe jaghanvān |
10.027.03c yadāvākhyat samaraṇam ṛghāvad ād id dha me vṛṣabhā pra bruvanti ||
10.027.04a yad ajñāteṣu vṛjaneṣv āsaṁ viśve sato maghavāno ma āsan |
10.027.04c jināmi vet kṣema ā santam ābhum pra taṁ kṣiṇām parvate pādagṛhya ||
10.027.05a na vā u māṁ vṛjane vārayante na parvatāso yad aham manasye |
10.027.05c mama svanāt kṛdhukarṇo bhayāta eved anu dyūn kiraṇaḥ sam ejāt ||
10.027.06a darśan nv atra śṛtapām̐ anindrān bāhukṣadaḥ śarave patyamānān |
10.027.06c ghṛṣuṁ vā ye niniduḥ sakhāyam adhy ū nv eṣu pavayo vavṛtyuḥ ||
10.027.07a abhūr v aukṣīr vy u āyur ānaḍ darṣan nu pūrvo aparo nu darṣat |
10.027.07c dve pavaste pari taṁ na bhūto yo asya pāre rajaso viveṣa ||
10.027.08a gāvo yavam prayutā aryo akṣan tā apaśyaṁ sahagopāś carantīḥ |
10.027.08c havā id aryo abhitaḥ sam āyan kiyad āsu svapatiś chandayāte ||
10.027.09a saṁ yad vayaṁ yavasādo janānām ahaṁ yavāda urvajre antaḥ |
10.027.09c atrā yukto 'vasātāram icchād atho ayuktaṁ yunajad vavanvān ||
10.027.10a atred u me maṁsase satyam uktaṁ dvipāc ca yac catuṣpāt saṁsṛjāni |
10.027.10c strībhir yo atra vṛṣaṇam pṛtanyād ayuddho asya vi bhajāni vedaḥ ||
10.027.11a yasyānakṣā duhitā jātv āsa kas tāṁ vidvām̐ abhi manyāte andhām |
10.027.11c kataro menim prati tam mucāte ya īṁ vahāte ya īṁ vā vareyāt ||
10.027.12a kiyatī yoṣā maryato vadhūyoḥ pariprītā panyasā vāryeṇa |
10.027.12c bhadrā vadhūr bhavati yat supeśāḥ svayaṁ sā mitraṁ vanute jane cit ||
10.027.13a patto jagāra pratyañcam atti śīrṣṇā śiraḥ prati dadhau varūtham |
10.027.13c āsīna ūrdhvām upasi kṣiṇāti nyaṅṅ uttānām anv eti bhūmim ||
10.027.14a bṛhann acchāyo apalāśo arvā tasthau mātā viṣito atti garbhaḥ |
10.027.14c anyasyā vatsaṁ rihatī mimāya kayā bhuvā ni dadhe dhenur ūdhaḥ ||
10.027.15a sapta vīrāso adharād ud āyann aṣṭottarāttāt sam ajagmiran te |
10.027.15c nava paścātāt sthivimanta āyan daśa prāk sānu vi tiranty aśnaḥ ||
10.027.16a daśānām ekaṁ kapilaṁ samānaṁ taṁ hinvanti kratave pāryāya |
10.027.16c garbham mātā sudhitaṁ vakṣaṇāsv avenantaṁ tuṣayantī bibharti ||
10.027.17a pīvānam meṣam apacanta vīrā nyuptā akṣā anu dīva āsan |
10.027.17c dvā dhanum bṛhatīm apsv antaḥ pavitravantā carataḥ punantā ||
10.027.18a vi krośanāso viṣvañca āyan pacāti nemo nahi pakṣad ardhaḥ |
10.027.18c ayam me devaḥ savitā tad āha drvanna id vanavat sarpirannaḥ ||
10.027.19a apaśyaṁ grāmaṁ vahamānam ārād acakrayā svadhayā vartamānam |
10.027.19c siṣakty aryaḥ pra yugā janānāṁ sadyaḥ śiśnā pramināno navīyān ||
10.027.20a etau me gāvau pramarasya yuktau mo ṣu pra sedhīr muhur in mamandhi |
10.027.20c āpaś cid asya vi naśanty arthaṁ sūraś ca marka uparo babhūvān ||
10.027.21a ayaṁ yo vajraḥ purudhā vivṛtto 'vaḥ sūryasya bṛhataḥ purīṣāt |
10.027.21c śrava id enā paro anyad asti tad avyathī jarimāṇas taranti ||
10.027.22a vṛkṣe-vṛkṣe niyatā mīmayad gaus tato vayaḥ pra patān pūruṣādaḥ |
10.027.22c athedaṁ viśvam bhuvanam bhayāta indrāya sunvad ṛṣaye ca śikṣat ||
10.027.23a devānām māne prathamā atiṣṭhan kṛntatrād eṣām uparā ud āyan |
10.027.23c trayas tapanti pṛthivīm anūpā dvā bṛbūkaṁ vahataḥ purīṣam ||
10.027.24a sā te jīvātur uta tasya viddhi mā smaitādṛg apa gūhaḥ samarye |
10.027.24c āviḥ svaḥ kṛṇute gūhate busaṁ sa pādur asya nirṇijo na mucyate ||

10.028.01a viśvo hy anyo arir ājagāma mamed aha śvaśuro nā jagāma |
10.028.01c jakṣīyād dhānā uta somam papīyāt svāśitaḥ punar astaṁ jagāyāt ||
10.028.02a sa roruvad vṛṣabhas tigmaśṛṅgo varṣman tasthau varimann ā pṛthivyāḥ |
10.028.02c viśveṣv enaṁ vṛjaneṣu pāmi yo me kukṣī sutasomaḥ pṛṇāti ||
10.028.03a adriṇā te mandina indra tūyān sunvanti somān pibasi tvam eṣām |
10.028.03c pacanti te vṛṣabhām̐ atsi teṣām pṛkṣeṇa yan maghavan hūyamānaḥ ||
10.028.04a idaṁ su me jaritar ā cikiddhi pratīpaṁ śāpaṁ nadyo vahanti |
10.028.04c lopāśaḥ siṁham pratyañcam atsāḥ kroṣṭā varāhaṁ nir atakta kakṣāt ||
10.028.05a kathā ta etad aham ā ciketaṁ gṛtsasya pākas tavaso manīṣām |
10.028.05c tvaṁ no vidvām̐ ṛtuthā vi voco yam ardhaṁ te maghavan kṣemyā dhūḥ ||
10.028.06a evā hi māṁ tavasaṁ vardhayanti divaś cin me bṛhata uttarā dhūḥ |
10.028.06c purū sahasrā ni śiśāmi sākam aśatruṁ hi mā janitā jajāna ||
10.028.07a evā hi māṁ tavasaṁ jajñur ugraṁ karman-karman vṛṣaṇam indra devāḥ |
10.028.07c vadhīṁ vṛtraṁ vajreṇa mandasāno 'pa vrajam mahinā dāśuṣe vam ||
10.028.08a devāsa āyan paraśūm̐r abibhran vanā vṛścanto abhi viḍbhir āyan |
10.028.08c ni sudrvaṁ dadhato vakṣaṇāsu yatrā kṛpīṭam anu tad dahanti ||
10.028.09a śaśaḥ kṣuram pratyañcaṁ jagārādriṁ logena vy abhedam ārāt |
10.028.09c bṛhantaṁ cid ṛhate randhayāni vayad vatso vṛṣabhaṁ śūśuvānaḥ ||
10.028.10a suparṇa itthā nakham ā siṣāyāvaruddhaḥ paripadaṁ na siṁhaḥ |
10.028.10c niruddhaś cin mahiṣas tarṣyāvān godhā tasmā ayathaṁ karṣad etat ||
10.028.11a tebhyo godhā ayathaṁ karṣad etad ye brahmaṇaḥ pratipīyanty annaiḥ |
10.028.11c sima ukṣṇo 'vasṛṣṭām̐ adanti svayam balāni tanvaḥ śṛṇānāḥ ||
10.028.12a ete śamībhiḥ suśamī abhūvan ye hinvire tanvaḥ soma ukthaiḥ |
10.028.12c nṛvad vadann upa no māhi vājān divi śravo dadhiṣe nāma vīraḥ ||

10.029.01a vane na vā yo ny adhāyi cākañ chucir vāṁ stomo bhuraṇāv ajīgaḥ |
10.029.01c yasyed indraḥ purudineṣu hotā nṛṇāṁ naryo nṛtamaḥ kṣapāvān ||
10.029.02a pra te asyā uṣasaḥ prāparasyā nṛtau syāma nṛtamasya nṛṇām |
10.029.02c anu triśokaḥ śatam āvahan nṝn kutsena ratho yo asat sasavān ||
10.029.03a kas te mada indra rantyo bhūd duro giro abhy ugro vi dhāva |
10.029.03c kad vāho arvāg upa mā manīṣā ā tvā śakyām upamaṁ rādho annaiḥ ||
10.029.04a kad u dyumnam indra tvāvato nṝn kayā dhiyā karase kan na āgan |
10.029.04c mitro na satya urugāya bhṛtyā anne samasya yad asan manīṣāḥ ||
10.029.05a preraya sūro arthaṁ na pāraṁ ye asya kāmaṁ janidhā iva gman |
10.029.05c giraś ca ye te tuvijāta pūrvīr nara indra pratiśikṣanty annaiḥ ||
10.029.06a mātre nu te sumite indra pūrvī dyaur majmanā pṛthivī kāvyena |
10.029.06c varāya te ghṛtavantaḥ sutāsaḥ svādman bhavantu pītaye madhūni ||
10.029.07a ā madhvo asmā asicann amatram indrāya pūrṇaṁ sa hi satyarādhāḥ |
10.029.07c sa vāvṛdhe varimann ā pṛthivyā abhi kratvā naryaḥ pauṁsyaiś ca ||
10.029.08a vy ānaḻ indraḥ pṛtanāḥ svojā āsmai yatante sakhyāya pūrvīḥ |
10.029.08c ā smā rathaṁ na pṛtanāsu tiṣṭha yam bhadrayā sumatyā codayāse ||

10.030.01a pra devatrā brahmaṇe gātur etv apo acchā manaso na prayukti |
10.030.01c mahīm mitrasya varuṇasya dhāsim pṛthujrayase rīradhā suvṛktim ||
10.030.02a adhvaryavo haviṣmanto hi bhūtācchāpa itośatīr uśantaḥ |
10.030.02c ava yāś caṣṭe aruṇaḥ suparṇas tam āsyadhvam ūrmim adyā suhastāḥ ||
10.030.03a adhvaryavo 'pa itā samudram apāṁ napātaṁ haviṣā yajadhvam |
10.030.03c sa vo dadad ūrmim adyā supūtaṁ tasmai somam madhumantaṁ sunota ||
10.030.04a yo anidhmo dīdayad apsv antar yaṁ viprāsa īḻate adhvareṣu |
10.030.04c apāṁ napān madhumatīr apo dā yābhir indro vāvṛdhe vīryāya ||
10.030.05a yābhiḥ somo modate harṣate ca kalyāṇībhir yuvatibhir na maryaḥ |
10.030.05c tā adhvaryo apo acchā parehi yad āsiñcā oṣadhībhiḥ punītāt ||
10.030.06a eved yūne yuvatayo namanta yad īm uśann uśatīr ety accha |
10.030.06c saṁ jānate manasā saṁ cikitre 'dhvaryavo dhiṣaṇāpaś ca devīḥ ||
10.030.07a yo vo vṛtābhyo akṛṇod u lokaṁ yo vo mahyā abhiśaster amuñcat |
10.030.07c tasmā indrāya madhumantam ūrmiṁ devamādanam pra hiṇotanāpaḥ ||
10.030.08a prāsmai hinota madhumantam ūrmiṁ garbho yo vaḥ sindhavo madhva utsaḥ |
10.030.08c ghṛtapṛṣṭham īḍyam adhvareṣv āpo revatīḥ śṛṇutā havam me ||
10.030.09a taṁ sindhavo matsaram indrapānam ūrmim pra heta ya ubhe iyarti |
10.030.09c madacyutam auśānaṁ nabhojām pari tritantuṁ vicarantam utsam ||
10.030.10a āvarvṛtatīr adha nu dvidhārā goṣuyudho na niyavaṁ carantīḥ |
10.030.10c ṛṣe janitrīr bhuvanasya patnīr apo vandasva savṛdhaḥ sayonīḥ ||
10.030.11a hinotā no adhvaraṁ devayajyā hinota brahma sanaye dhanānām |
10.030.11c ṛtasya yoge vi ṣyadhvam ūdhaḥ śruṣṭīvarīr bhūtanāsmabhyam āpaḥ ||
10.030.12a āpo revatīḥ kṣayathā hi vasvaḥ kratuṁ ca bhadram bibhṛthāmṛtaṁ ca |
10.030.12c rāyaś ca stha svapatyasya patnīḥ sarasvatī tad gṛṇate vayo dhāt ||
10.030.13a prati yad āpo adṛśram āyatīr ghṛtam payāṁsi bibhratīr madhūni |
10.030.13c adhvaryubhir manasā saṁvidānā indrāya somaṁ suṣutam bharantīḥ ||
10.030.14a emā agman revatīr jīvadhanyā adhvaryavaḥ sādayatā sakhāyaḥ |
10.030.14c ni barhiṣi dhattana somyāso 'pāṁ naptrā saṁvidānāsa enāḥ ||
10.030.15a āgmann āpa uśatīr barhir edaṁ ny adhvare asadan devayantīḥ |
10.030.15c adhvaryavaḥ sunutendrāya somam abhūd u vaḥ suśakā devayajyā ||

10.031.01a ā no devānām upa vetu śaṁso viśvebhis turair avase yajatraḥ |
10.031.01c tebhir vayaṁ suṣakhāyo bhavema taranto viśvā duritā syāma ||
10.031.02a pari cin marto draviṇam mamanyād ṛtasya pathā namasā vivāset |
10.031.02c uta svena kratunā saṁ vadeta śreyāṁsaṁ dakṣam manasā jagṛbhyāt ||
10.031.03a adhāyi dhītir asasṛgram aṁśās tīrthe na dasmam upa yanty ūmāḥ |
10.031.03c abhy ānaśma suvitasya śūṣaṁ navedaso amṛtānām abhūma ||
10.031.04a nityaś cākanyāt svapatir damūnā yasmā u devaḥ savitā jajāna |
10.031.04c bhago vā gobhir aryamem anajyāt so asmai cāruś chadayad uta syāt ||
10.031.05a iyaṁ sā bhūyā uṣasām iva kṣā yad dha kṣumantaḥ śavasā samāyan |
10.031.05c asya stutiṁ jaritur bhikṣamāṇā ā naḥ śagmāsa upa yantu vājāḥ ||
10.031.06a asyed eṣā sumatiḥ paprathānābhavat pūrvyā bhūmanā gauḥ |
10.031.06c asya sanīḻā asurasya yonau samāna ā bharaṇe bibhramāṇāḥ ||
10.031.07a kiṁ svid vanaṁ ka u sa vṛkṣa āsa yato dyāvāpṛthivī niṣṭatakṣuḥ |
10.031.07c saṁtasthāne ajare itaūtī ahāni pūrvīr uṣaso jaranta ||
10.031.08a naitāvad enā paro anyad asty ukṣā sa dyāvāpṛthivī bibharti |
10.031.08c tvacam pavitraṁ kṛṇuta svadhāvān yad īṁ sūryaṁ na harito vahanti ||
10.031.09a stego na kṣām aty eti pṛthvīm mihaṁ na vāto vi ha vāti bhūma |
10.031.09c mitro yatra varuṇo ajyamāno 'gnir vane na vy asṛṣṭa śokam ||
10.031.10a starīr yat sūta sadyo ajyamānā vyathir avyathīḥ kṛṇuta svagopā |
10.031.10c putro yat pūrvaḥ pitror janiṣṭa śamyāṁ gaur jagāra yad dha pṛcchān ||
10.031.11a uta kaṇvaṁ nṛṣadaḥ putram āhur uta śyāvo dhanam ādatta vājī |
10.031.11c pra kṛṣṇāya ruśad apinvatodhar ṛtam atra nakir asmā apīpet ||

10.032.01a pra su gmantā dhiyasānasya sakṣaṇi varebhir varām̐ abhi ṣu prasīdataḥ |
10.032.01c asmākam indra ubhayaṁ jujoṣati yat somyasyāndhaso bubodhati ||
10.032.02a vīndra yāsi divyāni rocanā vi pārthivāni rajasā puruṣṭuta |
10.032.02c ye tvā vahanti muhur adhvarām̐ upa te su vanvantu vagvanām̐ arādhasaḥ ||
10.032.03a tad in me chantsad vapuṣo vapuṣṭaram putro yaj jānam pitror adhīyati |
10.032.03c jāyā patiṁ vahati vagnunā sumat puṁsa id bhadro vahatuḥ pariṣkṛtaḥ ||
10.032.04a tad it sadhastham abhi cāru dīdhaya gāvo yac chāsan vahatuṁ na dhenavaḥ |
10.032.04c mātā yan mantur yūthasya pūrvyābhi vāṇasya saptadhātur ij janaḥ ||
10.032.05a pra vo 'cchā ririce devayuṣ padam eko rudrebhir yāti turvaṇiḥ |
10.032.05c jarā vā yeṣv amṛteṣu dāvane pari va ūmebhyaḥ siñcatā madhu ||
10.032.06a nidhīyamānam apagūḻham apsu pra me devānāṁ vratapā uvāca |
10.032.06c indro vidvām̐ anu hi tvā cacakṣa tenāham agne anuśiṣṭa āgām ||
10.032.07a akṣetravit kṣetravidaṁ hy aprāṭ sa praiti kṣetravidānuśiṣṭaḥ |
10.032.07c etad vai bhadram anuśāsanasyota srutiṁ vindaty añjasīnām ||
10.032.08a adyed u prāṇīd amamann imāhāpīvṛto adhayan mātur ūdhaḥ |
10.032.08c em enam āpa jarimā yuvānam aheḻan vasuḥ sumanā babhūva ||
10.032.09a etāni bhadrā kalaśa kriyāma kuruśravaṇa dadato maghāni |
10.032.09c dāna id vo maghavānaḥ so astv ayaṁ ca somo hṛdi yam bibharmi ||

10.033.01a pra mā yuyujre prayujo janānāṁ vahāmi sma pūṣaṇam antareṇa |
10.033.01c viśve devāso adha mām arakṣan duḥśāsur āgād iti ghoṣa āsīt ||
10.033.02a sam mā tapanty abhitaḥ sapatnīr iva parśavaḥ |
10.033.02c ni bādhate amatir nagnatā jasur ver na vevīyate matiḥ ||
10.033.03a mūṣo na śiśnā vy adanti mādhyaḥ stotāraṁ te śatakrato |
10.033.03c sakṛt su no maghavann indra mṛḻayādhā piteva no bhava ||
10.033.04a kuruśravaṇam āvṛṇi rājānaṁ trāsadasyavam |
10.033.04c maṁhiṣṭhaṁ vāghatām ṛṣiḥ ||
10.033.05a yasya mā harito rathe tisro vahanti sādhuyā |
10.033.05c stavai sahasradakṣiṇe ||
10.033.06a yasya prasvādaso gira upamaśravasaḥ pituḥ |
10.033.06c kṣetraṁ na raṇvam ūcuṣe ||
10.033.07a adhi putropamaśravo napān mitrātither ihi |
10.033.07c pituṣ ṭe asmi vanditā ||
10.033.08a yad īśīyāmṛtānām uta vā martyānām |
10.033.08c jīved in maghavā mama ||
10.033.09a na devānām ati vrataṁ śatātmā cana jīvati |
10.033.09c tathā yujā vi vāvṛte ||

10.034.01a prāvepā mā bṛhato mādayanti pravātejā iriṇe varvṛtānāḥ |
10.034.01c somasyeva maujavatasya bhakṣo vibhīdako jāgṛvir mahyam acchān ||
10.034.02a na mā mimetha na jihīḻa eṣā śivā sakhibhya uta mahyam āsīt |
10.034.02c akṣasyāham ekaparasya hetor anuvratām apa jāyām arodham ||
10.034.03a dveṣṭi śvaśrūr apa jāyā ruṇaddhi na nāthito vindate marḍitāram |
10.034.03c aśvasyeva jarato vasnyasya nāhaṁ vindāmi kitavasya bhogam ||
10.034.04a anye jāyām pari mṛśanty asya yasyāgṛdhad vedane vājy akṣaḥ |
10.034.04c pitā mātā bhrātara enam āhur na jānīmo nayatā baddham etam ||
10.034.05a yad ādīdhye na daviṣāṇy ebhiḥ parāyadbhyo 'va hīye sakhibhyaḥ |
10.034.05c nyuptāś ca babhravo vācam akratam̐ emīd eṣāṁ niṣkṛtaṁ jāriṇīva ||
10.034.06a sabhām eti kitavaḥ pṛcchamāno jeṣyāmīti tanvā śūśujānaḥ |
10.034.06c akṣāso asya vi tiranti kāmam pratidīvne dadhata ā kṛtāni ||
10.034.07a akṣāsa id aṅkuśino nitodino nikṛtvānas tapanās tāpayiṣṇavaḥ |
10.034.07c kumāradeṣṇā jayataḥ punarhaṇo madhvā sampṛktāḥ kitavasya barhaṇā ||
10.034.08a tripañcāśaḥ krīḻati vrāta eṣāṁ deva iva savitā satyadharmā |
10.034.08c ugrasya cin manyave nā namante rājā cid ebhyo nama it kṛṇoti ||
10.034.09a nīcā vartanta upari sphuranty ahastāso hastavantaṁ sahante |
10.034.09c divyā aṅgārā iriṇe nyuptāḥ śītāḥ santo hṛdayaṁ nir dahanti ||
10.034.10a jāyā tapyate kitavasya hīnā mātā putrasya carataḥ kva svit |
10.034.10c ṛṇāvā bibhyad dhanam icchamāno 'nyeṣām astam upa naktam eti ||
10.034.11a striyaṁ dṛṣṭvāya kitavaṁ tatāpānyeṣāṁ jāyāṁ sukṛtaṁ ca yonim |
10.034.11c pūrvāhṇe aśvān yuyuje hi babhrūn so agner ante vṛṣalaḥ papāda ||
10.034.12a yo vaḥ senānīr mahato gaṇasya rājā vrātasya prathamo babhūva |
10.034.12c tasmai kṛṇomi na dhanā ruṇadhmi daśāham prācīs tad ṛtaṁ vadāmi ||
10.034.13a akṣair mā dīvyaḥ kṛṣim it kṛṣasva vitte ramasva bahu manyamānaḥ |
10.034.13c tatra gāvaḥ kitava tatra jāyā tan me vi caṣṭe savitāyam aryaḥ ||
10.034.14a mitraṁ kṛṇudhvaṁ khalu mṛḻatā no mā no ghoreṇa caratābhi dhṛṣṇu |
10.034.14c ni vo nu manyur viśatām arātir anyo babhrūṇām prasitau nv astu ||

10.035.01a abudhram u tya indravanto agnayo jyotir bharanta uṣaso vyuṣṭiṣu |
10.035.01c mahī dyāvāpṛthivī cetatām apo 'dyā devānām ava ā vṛṇīmahe ||
10.035.02a divaspṛthivyor ava ā vṛṇīmahe mātṝn sindhūn parvatāñ charyaṇāvataḥ |
10.035.02c anāgāstvaṁ sūryam uṣāsam īmahe bhadraṁ somaḥ suvāno adyā kṛṇotu naḥ ||
10.035.03a dyāvā no adya pṛthivī anāgaso mahī trāyetāṁ suvitāya mātarā |
10.035.03c uṣā ucchanty apa bādhatām aghaṁ svasty agniṁ samidhānam īmahe ||
10.035.04a iyaṁ na usrā prathamā sudevyaṁ revat sanibhyo revatī vy ucchatu |
10.035.04c āre manyuṁ durvidatrasya dhīmahi svasty agniṁ samidhānam īmahe ||
10.035.05a pra yāḥ sisrate sūryasya raśmibhir jyotir bharantīr uṣaso vyuṣṭiṣu |
10.035.05c bhadrā no adya śravase vy ucchata svasty agniṁ samidhānam īmahe ||
10.035.06a anamīvā uṣasa ā carantu na ud agnayo jihatāṁ jyotiṣā bṛhat |
10.035.06c āyukṣātām aśvinā tūtujiṁ rathaṁ svasty agniṁ samidhānam īmahe ||
10.035.07a śreṣṭhaṁ no adya savitar vareṇyam bhāgam ā suva sa hi ratnadhā asi |
10.035.07c rāyo janitrīṁ dhiṣaṇām upa bruve svasty agniṁ samidhānam īmahe ||
10.035.08a pipartu mā tad ṛtasya pravācanaṁ devānāṁ yan manuṣyā amanmahi |
10.035.08c viśvā id usrāḥ spaḻ ud eti sūryaḥ svasty agniṁ samidhānam īmahe ||
10.035.09a adveṣo adya barhiṣaḥ starīmaṇi grāvṇāṁ yoge manmanaḥ sādha īmahe |
10.035.09c ādityānāṁ śarmaṇi sthā bhuraṇyasi svasty agniṁ samidhānam īmahe ||
10.035.10a ā no barhiḥ sadhamāde bṛhad divi devām̐ īḻe sādayā sapta hotṝn |
10.035.10c indram mitraṁ varuṇaṁ sātaye bhagaṁ svasty agniṁ samidhānam īmahe ||
10.035.11a ta ādityā ā gatā sarvatātaye vṛdhe no yajñam avatā sajoṣasaḥ |
10.035.11c bṛhaspatim pūṣaṇam aśvinā bhagaṁ svasty agniṁ samidhānam īmahe ||
10.035.12a tan no devā yacchata supravācanaṁ chardir ādityāḥ subharaṁ nṛpāyyam |
10.035.12c paśve tokāya tanayāya jīvase svasty agniṁ samidhānam īmahe ||
10.035.13a viśve adya maruto viśva ūtī viśve bhavantv agnayaḥ samiddhāḥ |
10.035.13c viśve no devā avasā gamantu viśvam astu draviṇaṁ vājo asme ||
10.035.14a yaṁ devāso 'vatha vājasātau yaṁ trāyadhve yam pipṛthāty aṁhaḥ |
10.035.14c yo vo gopīthe na bhayasya veda te syāma devavītaye turāsaḥ ||

10.036.01a uṣāsānaktā bṛhatī supeśasā dyāvākṣāmā varuṇo mitro aryamā |
10.036.01c indraṁ huve marutaḥ parvatām̐ apa ādityān dyāvāpṛthivī apaḥ svaḥ ||
10.036.02a dyauś ca naḥ pṛthivī ca pracetasa ṛtāvarī rakṣatām aṁhaso riṣaḥ |
10.036.02c mā durvidatrā nirṛtir na īśata tad devānām avo adyā vṛṇīmahe ||
10.036.03a viśvasmān no aditiḥ pātv aṁhaso mātā mitrasya varuṇasya revataḥ |
10.036.03c svarvaj jyotir avṛkaṁ naśīmahi tad devānām avo adyā vṛṇīmahe ||
10.036.04a grāvā vadann apa rakṣāṁsi sedhatu duṣṣvapnyaṁ nirṛtiṁ viśvam atriṇam |
10.036.04c ādityaṁ śarma marutām aśīmahi tad devānām avo adyā vṛṇīmahe ||
10.036.05a endro barhiḥ sīdatu pinvatām iḻā bṛhaspatiḥ sāmabhir ṛkvo arcatu |
10.036.05c supraketaṁ jīvase manma dhīmahi tad devānām avo adyā vṛṇīmahe ||
10.036.06a divispṛśaṁ yajñam asmākam aśvinā jīrādhvaraṁ kṛṇutaṁ sumnam iṣṭaye |
10.036.06c prācīnaraśmim āhutaṁ ghṛtena tad devānām avo adyā vṛṇīmahe ||
10.036.07a upa hvaye suhavam mārutaṁ gaṇam pāvakam ṛṣvaṁ sakhyāya śambhuvam |
10.036.07c rāyas poṣaṁ sauśravasāya dhīmahi tad devānām avo adyā vṛṇīmahe ||
10.036.08a apām peruṁ jīvadhanyam bharāmahe devāvyaṁ suhavam adhvaraśriyam |
10.036.08c suraśmiṁ somam indriyaṁ yamīmahi tad devānām avo adyā vṛṇīmahe ||
10.036.09a sanema tat susanitā sanitvabhir vayaṁ jīvā jīvaputrā anāgasaḥ |
10.036.09c brahmadviṣo viṣvag eno bharerata tad devānām avo adyā vṛṇīmahe ||
10.036.10a ye sthā manor yajñiyās te śṛṇotana yad vo devā īmahe tad dadātana |
10.036.10c jaitraṁ kratuṁ rayimad vīravad yaśas tad devānām avo adyā vṛṇīmahe ||
10.036.11a mahad adya mahatām ā vṛṇīmahe 'vo devānām bṛhatām anarvaṇām |
10.036.11c yathā vasu vīrajātaṁ naśāmahai tad devānām avo adyā vṛṇīmahe ||
10.036.12a maho agneḥ samidhānasya śarmaṇy anāgā mitre varuṇe svastaye |
10.036.12c śreṣṭhe syāma savituḥ savīmani tad devānām avo adyā vṛṇīmahe ||
10.036.13a ye savituḥ satyasavasya viśve mitrasya vrate varuṇasya devāḥ |
10.036.13c te saubhagaṁ vīravad gomad apno dadhātana draviṇaṁ citram asme ||
10.036.14a savitā paścātāt savitā purastāt savitottarāttāt savitādharāttāt |
10.036.14c savitā naḥ suvatu sarvatātiṁ savitā no rāsatāṁ dīrgham āyuḥ ||

10.037.01a namo mitrasya varuṇasya cakṣase maho devāya tad ṛtaṁ saparyata |
10.037.01c dūredṛśe devajātāya ketave divas putrāya sūryāya śaṁsata ||
10.037.02a sā mā satyoktiḥ pari pātu viśvato dyāvā ca yatra tatanann ahāni ca |
10.037.02c viśvam anyan ni viśate yad ejati viśvāhāpo viśvāhod eti sūryaḥ ||
10.037.03a na te adevaḥ pradivo ni vāsate yad etaśebhiḥ patarai ratharyasi |
10.037.03c prācīnam anyad anu vartate raja ud anyena jyotiṣā yāsi sūrya ||
10.037.04a yena sūrya jyotiṣā bādhase tamo jagac ca viśvam udiyarṣi bhānunā |
10.037.04c tenāsmad viśvām anirām anāhutim apāmīvām apa duṣṣvapnyaṁ suva ||
10.037.05a viśvasya hi preṣito rakṣasi vratam aheḻayann uccarasi svadhā anu |
10.037.05c yad adya tvā sūryopabravāmahai taṁ no devā anu maṁsīrata kratum ||
10.037.06a taṁ no dyāvāpṛthivī tan na āpa indraḥ śṛṇvantu maruto havaṁ vacaḥ |
10.037.06c mā śūne bhūma sūryasya saṁdṛśi bhadraṁ jīvanto jaraṇām aśīmahi ||
10.037.07a viśvāhā tvā sumanasaḥ sucakṣasaḥ prajāvanto anamīvā anāgasaḥ |
10.037.07c udyantaṁ tvā mitramaho dive-dive jyog jīvāḥ prati paśyema sūrya ||
10.037.08a mahi jyotir bibhrataṁ tvā vicakṣaṇa bhāsvantaṁ cakṣuṣe-cakṣuṣe mayaḥ |
10.037.08c ārohantam bṛhataḥ pājasas pari vayaṁ jīvāḥ prati paśyema sūrya ||
10.037.09a yasya te viśvā bhuvanāni ketunā pra cerate ni ca viśante aktubhiḥ |
10.037.09c anāgāstvena harikeśa sūryāhnāhnā no vasyasā-vasyasod ihi ||
10.037.10a śaṁ no bhava cakṣasā śaṁ no ahnā śam bhānunā śaṁ himā śaṁ ghṛṇena |
10.037.10c yathā śam adhvañ cham asad duroṇe tat sūrya draviṇaṁ dhehi citram ||
10.037.11a asmākaṁ devā ubhayāya janmane śarma yacchata dvipade catuṣpade |
10.037.11c adat pibad ūrjayamānam āśitaṁ tad asme śaṁ yor arapo dadhātana ||
10.037.12a yad vo devāś cakṛma jihvayā guru manaso vā prayutī devaheḻanam |
10.037.12c arāvā yo no abhi ducchunāyate tasmin tad eno vasavo ni dhetana ||

10.038.01a asmin na indra pṛtsutau yaśasvati śimīvati krandasi prāva sātaye |
10.038.01c yatra goṣātā dhṛṣiteṣu khādiṣu viṣvak patanti didyavo nṛṣāhye ||
10.038.02a sa naḥ kṣumantaṁ sadane vy ūrṇuhi goarṇasaṁ rayim indra śravāyyam |
10.038.02c syāma te jayataḥ śakra medino yathā vayam uśmasi tad vaso kṛdhi ||
10.038.03a yo no dāsa āryo vā puruṣṭutādeva indra yudhaye ciketati |
10.038.03c asmābhiṣ ṭe suṣahāḥ santu śatravas tvayā vayaṁ tān vanuyāma saṁgame ||
10.038.04a yo dabhrebhir havyo yaś ca bhūribhir yo abhīke varivovin nṛṣāhye |
10.038.04c taṁ vikhāde sasnim adya śrutaṁ naram arvāñcam indram avase karāmahe ||
10.038.05a svavṛjaṁ hi tvām aham indra śuśravānānudaṁ vṛṣabha radhracodanam |
10.038.05c pra muñcasva pari kutsād ihā gahi kim u tvāvān muṣkayor baddha āsate ||

10.039.01a yo vām parijmā suvṛd aśvinā ratho doṣām uṣāso havyo haviṣmatā |
10.039.01c śaśvattamāsas tam u vām idaṁ vayam pitur na nāma suhavaṁ havāmahe ||
10.039.02a codayataṁ sūnṛtāḥ pinvataṁ dhiya ut puraṁdhīr īrayataṁ tad uśmasi |
10.039.02c yaśasam bhāgaṁ kṛṇutaṁ no aśvinā somaṁ na cārum maghavatsu nas kṛtam ||
10.039.03a amājuraś cid bhavatho yuvam bhago 'nāśoś cid avitārāpamasya cit |
10.039.03c andhasya cin nāsatyā kṛśasya cid yuvām id āhur bhiṣajā rutasya cit ||
10.039.04a yuvaṁ cyavānaṁ sanayaṁ yathā ratham punar yuvānaṁ carathāya takṣathuḥ |
10.039.04c niṣ ṭaugryam ūhathur adbhyas pari viśvet tā vāṁ savaneṣu pravācyā ||
10.039.05a purāṇā vāṁ vīryā pra bravā jane 'tho hāsathur bhiṣajā mayobhuvā |
10.039.05c tā vāṁ nu navyāv avase karāmahe 'yaṁ nāsatyā śrad arir yathā dadhat ||
10.039.06a iyaṁ vām ahve śṛṇutam me aśvinā putrāyeva pitarā mahyaṁ śikṣatam |
10.039.06c anāpir ajñā asajātyāmatiḥ purā tasyā abhiśaster ava spṛtam ||
10.039.07a yuvaṁ rathena vimadāya śundhyuvaṁ ny ūhathuḥ purumitrasya yoṣaṇām |
10.039.07c yuvaṁ havaṁ vadhrimatyā agacchataṁ yuvaṁ suṣutiṁ cakrathuḥ puraṁdhaye ||
10.039.08a yuvaṁ viprasya jaraṇām upeyuṣaḥ punaḥ kaler akṛṇutaṁ yuvad vayaḥ |
10.039.08c yuvaṁ vandanam ṛśyadād ud ūpathur yuvaṁ sadyo viśpalām etave kṛthaḥ ||
10.039.09a yuvaṁ ha rebhaṁ vṛṣaṇā guhā hitam ud airayatam mamṛvāṁsam aśvinā |
10.039.09c yuvam ṛbīsam uta taptam atraya omanvantaṁ cakrathuḥ saptavadhraye ||
10.039.10a yuvaṁ śvetam pedave 'śvināśvaṁ navabhir vājair navatī ca vājinam |
10.039.10c carkṛtyaṁ dadathur drāvayatsakham bhagaṁ na nṛbhyo havyam mayobhuvam ||
10.039.11a na taṁ rājānāv adite kutaś cana nāṁho aśnoti duritaṁ nakir bhayam |
10.039.11c yam aśvinā suhavā rudravartanī purorathaṁ kṛṇuthaḥ patnyā saha ||
10.039.12a ā tena yātam manaso javīyasā rathaṁ yaṁ vām ṛbhavaś cakrur aśvinā |
10.039.12c yasya yoge duhitā jāyate diva ubhe ahanī sudine vivasvataḥ ||
10.039.13a tā vartir yātaṁ jayuṣā vi parvatam apinvataṁ śayave dhenum aśvinā |
10.039.13c vṛkasya cid vartikām antar āsyād yuvaṁ śacībhir grasitām amuñcatam ||
10.039.14a etaṁ vāṁ stomam aśvināv akarmātakṣāma bhṛgavo na ratham |
10.039.14c ny amṛkṣāma yoṣaṇāṁ na marye nityaṁ na sūnuṁ tanayaṁ dadhānāḥ ||

10.040.01a rathaṁ yāntaṁ kuha ko ha vāṁ narā prati dyumantaṁ suvitāya bhūṣati |
10.040.01c prātaryāvāṇaṁ vibhvaṁ viśe-viśe vastor-vastor vahamānaṁ dhiyā śami ||
10.040.02a kuha svid doṣā kuha vastor aśvinā kuhābhipitvaṁ karataḥ kuhoṣatuḥ |
10.040.02c ko vāṁ śayutrā vidhaveva devaram maryaṁ na yoṣā kṛṇute sadhastha ā ||
10.040.03a prātar jarethe jaraṇeva kāpayā vastor-vastor yajatā gacchatho gṛham |
10.040.03c kasya dhvasrā bhavathaḥ kasya vā narā rājaputreva savanāva gacchathaḥ ||
10.040.04a yuvām mṛgeva vāraṇā mṛgaṇyavo doṣā vastor haviṣā ni hvayāmahe |
10.040.04c yuvaṁ hotrām ṛtuthā juhvate nareṣaṁ janāya vahathaḥ śubhas patī ||
10.040.05a yuvāṁ ha ghoṣā pary aśvinā yatī rājña ūce duhitā pṛcche vāṁ narā |
10.040.05c bhūtam me ahna uta bhūtam aktave 'śvāvate rathine śaktam arvate ||
10.040.06a yuvaṁ kavī ṣṭhaḥ pary aśvinā rathaṁ viśo na kutso jaritur naśāyathaḥ |
10.040.06c yuvor ha makṣā pary aśvinā madhv āsā bharata niṣkṛtaṁ na yoṣaṇā ||
10.040.07a yuvaṁ ha bhujyuṁ yuvam aśvinā vaśaṁ yuvaṁ śiñjāram uśanām upārathuḥ |
10.040.07c yuvo rarāvā pari sakhyam āsate yuvor aham avasā sumnam ā cake ||
10.040.08a yuvaṁ ha kṛśaṁ yuvam aśvinā śayuṁ yuvaṁ vidhantaṁ vidhavām uruṣyathaḥ |
10.040.08c yuvaṁ sanibhyaḥ stanayantam aśvināpa vrajam ūrṇuthaḥ saptāsyam ||
10.040.09a janiṣṭa yoṣā patayat kanīnako vi cāruhan vīrudho daṁsanā anu |
10.040.09c āsmai rīyante nivaneva sindhavo 'smā ahne bhavati tat patitvanam ||
10.040.10a jīvaṁ rudanti vi mayante adhvare dīrghām anu prasitiṁ dīdhiyur naraḥ |
10.040.10c vāmam pitṛbhyo ya idaṁ samerire mayaḥ patibhyo janayaḥ pariṣvaje ||
10.040.11a na tasya vidma tad u ṣu pra vocata yuvā ha yad yuvatyāḥ kṣeti yoniṣu |
10.040.11c priyosriyasya vṛṣabhasya retino gṛhaṁ gamemāśvinā tad uśmasi ||
10.040.12a ā vām agan sumatir vājinīvasū ny aśvinā hṛtsu kāmā ayaṁsata |
10.040.12c abhūtaṁ gopā mithunā śubhas patī priyā aryamṇo duryām̐ aśīmahi ||
10.040.13a tā mandasānā manuṣo duroṇa ā dhattaṁ rayiṁ sahavīraṁ vacasyave |
10.040.13c kṛtaṁ tīrthaṁ suprapāṇaṁ śubhas patī sthāṇum patheṣṭhām apa durmatiṁ hatam ||
10.040.14a kva svid adya katamāsv aśvinā vikṣu dasrā mādayete śubhas patī |
10.040.14c ka īṁ ni yeme katamasya jagmatur viprasya vā yajamānasya vā gṛham ||

10.041.01a samānam u tyam puruhūtam ukthyaṁ rathaṁ tricakraṁ savanā ganigmatam |
10.041.01c parijmānaṁ vidathyaṁ suvṛktibhir vayaṁ vyuṣṭā uṣaso havāmahe ||
10.041.02a prātaryujaṁ nāsatyādhi tiṣṭhathaḥ prātaryāvāṇam madhuvāhanaṁ ratham |
10.041.02c viśo yena gacchatho yajvarīr narā kīreś cid yajñaṁ hotṛmantam aśvinā ||
10.041.03a adhvaryuṁ vā madhupāṇiṁ suhastyam agnidhaṁ vā dhṛtadakṣaṁ damūnasam |
10.041.03c viprasya vā yat savanāni gacchatho 'ta ā yātam madhupeyam aśvinā ||

10.042.01a asteva su prataraṁ lāyam asyan bhūṣann iva pra bharā stomam asmai |
10.042.01c vācā viprās tarata vācam aryo ni rāmaya jaritaḥ soma indram ||
10.042.02a dohena gām upa śikṣā sakhāyam pra bodhaya jaritar jāram indram |
10.042.02c kośaṁ na pūrṇaṁ vasunā nyṛṣṭam ā cyāvaya maghadeyāya śūram ||
10.042.03a kim aṅga tvā maghavan bhojam āhuḥ śiśīhi mā śiśayaṁ tvā śṛṇomi |
10.042.03c apnasvatī mama dhīr astu śakra vasuvidam bhagam indrā bharā naḥ ||
10.042.04a tvāṁ janā mamasatyeṣv indra saṁtasthānā vi hvayante samīke |
10.042.04c atrā yujaṁ kṛṇute yo haviṣmān nāsunvatā sakhyaṁ vaṣṭi śūraḥ ||
10.042.05a dhanaṁ na syandram bahulaṁ yo asmai tīvrān somām̐ āsunoti prayasvān |
10.042.05c tasmai śatrūn sutukān prātar ahno ni svaṣṭrān yuvati hanti vṛtram ||
10.042.06a yasmin vayaṁ dadhimā śaṁsam indre yaḥ śiśrāya maghavā kāmam asme |
10.042.06c ārāc cit san bhayatām asya śatrur ny asmai dyumnā janyā namantām ||
10.042.07a ārāc chatrum apa bādhasva dūram ugro yaḥ śambaḥ puruhūta tena |
10.042.07c asme dhehi yavamad gomad indra kṛdhī dhiyaṁ jaritre vājaratnām ||
10.042.08a pra yam antar vṛṣasavāso agman tīvrāḥ somā bahulāntāsa indram |
10.042.08c nāha dāmānam maghavā ni yaṁsan ni sunvate vahati bhūri vāmam ||
10.042.09a uta prahām atidīvyā jayāti kṛtaṁ yac chvaghnī vicinoti kāle |
10.042.09c yo devakāmo na dhanā ruṇaddhi sam it taṁ rāyā sṛjati svadhāvān ||
10.042.10a gobhiṣ ṭaremāmatiṁ durevāṁ yavena kṣudham puruhūta viśvām |
10.042.10c vayaṁ rājabhiḥ prathamā dhanāny asmākena vṛjanenā jayema ||
10.042.11a bṛhaspatir naḥ pari pātu paścād utottarasmād adharād aghāyoḥ |
10.042.11c indraḥ purastād uta madhyato naḥ sakhā sakhibhyo varivaḥ kṛṇotu ||

10.043.01a acchā ma indram matayaḥ svarvidaḥ sadhrīcīr viśvā uśatīr anūṣata |
10.043.01c pari ṣvajante janayo yathā patim maryaṁ na śundhyum maghavānam ūtaye ||
10.043.02a na ghā tvadrig apa veti me manas tve it kāmam puruhūta śiśraya |
10.043.02c rājeva dasma ni ṣado 'dhi barhiṣy asmin su some 'vapānam astu te ||
10.043.03a viṣūvṛd indro amater uta kṣudhaḥ sa id rāyo maghavā vasva īśate |
10.043.03c tasyed ime pravaṇe sapta sindhavo vayo vardhanti vṛṣabhasya śuṣmiṇaḥ ||
10.043.04a vayo na vṛkṣaṁ supalāśam āsadan somāsa indram mandinaś camūṣadaḥ |
10.043.04c praiṣām anīkaṁ śavasā davidyutad vidat svar manave jyotir āryam ||
10.043.05a kṛtaṁ na śvaghnī vi cinoti devane saṁvargaṁ yan maghavā sūryaṁ jayat |
10.043.05c na tat te anyo anu vīryaṁ śakan na purāṇo maghavan nota nūtanaḥ ||
10.043.06a viśaṁ-viśam maghavā pary aśāyata janānāṁ dhenā avacākaśad vṛṣā |
10.043.06c yasyāha śakraḥ savaneṣu raṇyati sa tīvraiḥ somaiḥ sahate pṛtanyataḥ ||
10.043.07a āpo na sindhum abhi yat samakṣaran somāsa indraṁ kulyā iva hradam |
10.043.07c vardhanti viprā maho asya sādane yavaṁ na vṛṣṭir divyena dānunā ||
10.043.08a vṛṣā na kruddhaḥ patayad rajaḥsv ā yo aryapatnīr akṛṇod imā apaḥ |
10.043.08c sa sunvate maghavā jīradānave 'vindaj jyotir manave haviṣmate ||
10.043.09a uj jāyatām paraśur jyotiṣā saha bhūyā ṛtasya sudughā purāṇavat |
10.043.09c vi rocatām aruṣo bhānunā śuciḥ svar ṇa śukraṁ śuśucīta satpatiḥ ||
10.043.10a gobhiṣ ṭaremāmatiṁ durevāṁ yavena kṣudham puruhūta viśvām |
10.043.10c vayaṁ rājabhiḥ prathamā dhanāny asmākena vṛjanenā jayema ||
10.043.11a bṛhaspatir naḥ pari pātu paścād utottarasmād adharād aghāyoḥ |
10.043.11c indraḥ purastād uta madhyato naḥ sakhā sakhibhyo varivaḥ kṛṇotu ||

10.044.01a ā yātv indraḥ svapatir madāya yo dharmaṇā tūtujānas tuviṣmān |
10.044.01c pratvakṣāṇo ati viśvā sahāṁsy apāreṇa mahatā vṛṣṇyena ||
10.044.02a suṣṭhāmā rathaḥ suyamā harī te mimyakṣa vajro nṛpate gabhastau |
10.044.02c śībhaṁ rājan supathā yāhy arvāṅ vardhāma te papuṣo vṛṣṇyāni ||
10.044.03a endravāho nṛpatiṁ vajrabāhum ugram ugrāsas taviṣāsa enam |
10.044.03c pratvakṣasaṁ vṛṣabhaṁ satyaśuṣmam em asmatrā sadhamādo vahantu ||
10.044.04a evā patiṁ droṇasācaṁ sacetasam ūrjaḥ skambhaṁ dharuṇa ā vṛṣāyase |
10.044.04c ojaḥ kṛṣva saṁ gṛbhāya tve apy aso yathā kenipānām ino vṛdhe ||
10.044.05a gamann asme vasūny ā hi śaṁsiṣaṁ svāśiṣam bharam ā yāhi sominaḥ |
10.044.05c tvam īśiṣe sāsminn ā satsi barhiṣy anādhṛṣyā tava pātrāṇi dharmaṇā ||
10.044.06a pṛthak prāyan prathamā devahūtayo 'kṛṇvata śravasyāni duṣṭarā |
10.044.06c na ye śekur yajñiyāṁ nāvam āruham īrmaiva te ny aviśanta kepayaḥ ||
10.044.07a evaivāpāg apare santu dūḍhyo 'śvā yeṣāṁ duryuja āyuyujre |
10.044.07c itthā ye prāg upare santi dāvane purūṇi yatra vayunāni bhojanā ||
10.044.08a girīm̐r ajrān rejamānām̐ adhārayad dyauḥ krandad antarikṣāṇi kopayat |
10.044.08c samīcīne dhiṣaṇe vi ṣkabhāyati vṛṣṇaḥ pītvā mada ukthāni śaṁsati ||
10.044.09a imam bibharmi sukṛtaṁ te aṅkuśaṁ yenārujāsi maghavañ chaphārujaḥ |
10.044.09c asmin su te savane astv okyaṁ suta iṣṭau maghavan bodhy ābhagaḥ ||
10.044.10a gobhiṣ ṭaremāmatiṁ durevāṁ yavena kṣudham puruhūta viśvām |
10.044.10c vayaṁ rājabhiḥ prathamā dhanāny asmākena vṛjanenā jayema ||
10.044.11a bṛhaspatir naḥ pari pātu paścād utottarasmād adharād aghāyoḥ |
10.044.11c indraḥ purastād uta madhyato naḥ sakhā sakhibhyo varivaḥ kṛṇotu ||

10.045.01a divas pari prathamaṁ jajñe agnir asmad dvitīyam pari jātavedāḥ |
10.045.01c tṛtīyam apsu nṛmaṇā ajasram indhāna enaṁ jarate svādhīḥ ||
10.045.02a vidmā te agne tredhā trayāṇi vidmā te dhāma vibhṛtā purutrā |
10.045.02c vidmā te nāma paramaṁ guhā yad vidmā tam utsaṁ yata ājagantha ||
10.045.03a samudre tvā nṛmaṇā apsv antar nṛcakṣā īdhe divo agna ūdhan |
10.045.03c tṛtīye tvā rajasi tasthivāṁsam apām upasthe mahiṣā avardhan ||
10.045.04a akrandad agniḥ stanayann iva dyauḥ kṣāmā rerihad vīrudhaḥ samañjan |
10.045.04c sadyo jajñāno vi hīm iddho akhyad ā rodasī bhānunā bhāty antaḥ ||
10.045.05a śrīṇām udāro dharuṇo rayīṇām manīṣāṇām prārpaṇaḥ somagopāḥ |
10.045.05c vasuḥ sūnuḥ sahaso apsu rājā vi bhāty agra uṣasām idhānaḥ ||
10.045.06a viśvasya ketur bhuvanasya garbha ā rodasī apṛṇāj jāyamānaḥ |
10.045.06c vīḻuṁ cid adrim abhinat parāyañ janā yad agnim ayajanta pañca ||
10.045.07a uśik pāvako aratiḥ sumedhā marteṣv agnir amṛto ni dhāyi |
10.045.07c iyarti dhūmam aruṣam bharibhrad uc chukreṇa śociṣā dyām inakṣan ||
10.045.08a dṛśāno rukma urviyā vy adyaud durmarṣam āyuḥ śriye rucānaḥ |
10.045.08c agnir amṛto abhavad vayobhir yad enaṁ dyaur janayat suretāḥ ||
10.045.09a yas te adya kṛṇavad bhadraśoce 'pūpaṁ deva ghṛtavantam agne |
10.045.09c pra taṁ naya prataraṁ vasyo acchābhi sumnaṁ devabhaktaṁ yaviṣṭha ||
10.045.10a ā tam bhaja sauśravaseṣv agna uktha-uktha ā bhaja śasyamāne |
10.045.10c priyaḥ sūrye priyo agnā bhavāty uj jātena bhinadad uj janitvaiḥ ||
10.045.11a tvām agne yajamānā anu dyūn viśvā vasu dadhire vāryāṇi |
10.045.11c tvayā saha draviṇam icchamānā vrajaṁ gomantam uśijo vi vavruḥ ||
10.045.12a astāvy agnir narāṁ suśevo vaiśvānara ṛṣibhiḥ somagopāḥ |
10.045.12c adveṣe dyāvāpṛthivī huvema devā dhatta rayim asme suvīram ||

10.046.01a pra hotā jāto mahān nabhovin nṛṣadvā sīdad apām upasthe |
10.046.01c dadhir yo dhāyi sa te vayāṁsi yantā vasūni vidhate tanūpāḥ ||
10.046.02a imaṁ vidhanto apāṁ sadhasthe paśuṁ na naṣṭam padair anu gman |
10.046.02c guhā catantam uśijo namobhir icchanto dhīrā bhṛgavo 'vindan ||
10.046.03a imaṁ trito bhūry avindad icchan vaibhūvaso mūrdhany aghnyāyāḥ |
10.046.03c sa śevṛdho jāta ā harmyeṣu nābhir yuvā bhavati rocanasya ||
10.046.04a mandraṁ hotāram uśijo namobhiḥ prāñcaṁ yajñaṁ netāram adhvarāṇām |
10.046.04c viśām akṛṇvann aratim pāvakaṁ havyavāhaṁ dadhato mānuṣeṣu ||
10.046.05a pra bhūr jayantam mahāṁ vipodhām mūrā amūram purāṁ darmāṇam |
10.046.05c nayanto garbhaṁ vanāṁ dhiyaṁ dhur hiriśmaśruṁ nārvāṇaṁ dhanarcam ||
10.046.06a ni pastyāsu tritaḥ stabhūyan parivīto yonau sīdad antaḥ |
10.046.06c ataḥ saṁgṛbhyā viśāṁ damūnā vidharmaṇāyantrair īyate nṝn ||
10.046.07a asyājarāso damām aritrā arcaddhūmāso agnayaḥ pāvakāḥ |
10.046.07c śvitīcayaḥ śvātrāso bhuraṇyavo vanarṣado vāyavo na somāḥ ||
10.046.08a pra jihvayā bharate vepo agniḥ pra vayunāni cetasā pṛthivyāḥ |
10.046.08c tam āyavaḥ śucayantam pāvakam mandraṁ hotāraṁ dadhire yajiṣṭham ||
10.046.09a dyāvā yam agnim pṛthivī janiṣṭām āpas tvaṣṭā bhṛgavo yaṁ sahobhiḥ |
10.046.09c īḻenyam prathamam mātariśvā devās tatakṣur manave yajatram ||
10.046.10a yaṁ tvā devā dadhire havyavāham puruspṛho mānuṣāso yajatram |
10.046.10c sa yāmann agne stuvate vayo dhāḥ pra devayan yaśasaḥ saṁ hi pūrvīḥ ||

10.047.01a jagṛbhmā te dakṣiṇam indra hastaṁ vasūyavo vasupate vasūnām |
10.047.01c vidmā hi tvā gopatiṁ śūra gonām asmabhyaṁ citraṁ vṛṣaṇaṁ rayiṁ dāḥ ||
10.047.02a svāyudhaṁ svavasaṁ sunīthaṁ catuḥsamudraṁ dharuṇaṁ rayīṇām |
10.047.02c carkṛtyaṁ śaṁsyam bhūrivāram asmabhyaṁ citraṁ vṛṣaṇaṁ rayiṁ dāḥ ||
10.047.03a subrahmāṇaṁ devavantam bṛhantam uruṁ gabhīram pṛthubudhnam indra |
10.047.03c śrutaṛṣim ugram abhimātiṣāham asmabhyaṁ citraṁ vṛṣaṇaṁ rayiṁ dāḥ ||
10.047.04a sanadvājaṁ vipravīraṁ tarutraṁ dhanaspṛtaṁ śūśuvāṁsaṁ sudakṣam |
10.047.04c dasyuhanam pūrbhidam indra satyam asmabhyaṁ citraṁ vṛṣaṇaṁ rayiṁ dāḥ ||
10.047.05a aśvāvantaṁ rathinaṁ vīravantaṁ sahasriṇaṁ śatinaṁ vājam indra |
10.047.05c bhadravrātaṁ vipravīraṁ svarṣām asmabhyaṁ citraṁ vṛṣaṇaṁ rayiṁ dāḥ ||
10.047.06a pra saptagum ṛtadhītiṁ sumedhām bṛhaspatim matir acchā jigāti |
10.047.06c ya āṅgiraso namasopasadyo 'smabhyaṁ citraṁ vṛṣaṇaṁ rayiṁ dāḥ ||
10.047.07a vanīvāno mama dūtāsa indraṁ stomāś caranti sumatīr iyānāḥ |
10.047.07c hṛdispṛśo manasā vacyamānā asmabhyaṁ citraṁ vṛṣaṇaṁ rayiṁ dāḥ ||
10.047.08a yat tvā yāmi daddhi tan na indra bṛhantaṁ kṣayam asamaṁ janānām |
10.047.08c abhi tad dyāvāpṛthivī gṛṇītām asmabhyaṁ citraṁ vṛṣaṇaṁ rayiṁ dāḥ ||

10.048.01a aham bhuvaṁ vasunaḥ pūrvyas patir ahaṁ dhanāni saṁ jayāmi śaśvataḥ |
10.048.01c māṁ havante pitaraṁ na jantavo 'haṁ dāśuṣe vi bhajāmi bhojanam ||
10.048.02a aham indro rodho vakṣo atharvaṇas tritāya gā ajanayam aher adhi |
10.048.02c ahaṁ dasyubhyaḥ pari nṛmṇam ā dade gotrā śikṣan dadhīce mātariśvane ||
10.048.03a mahyaṁ tvaṣṭā vajram atakṣad āyasam mayi devāso 'vṛjann api kratum |
10.048.03c mamānīkaṁ sūryasyeva duṣṭaram mām āryanti kṛtena kartvena ca ||
10.048.04a aham etaṁ gavyayam aśvyam paśum purīṣiṇaṁ sāyakenā hiraṇyayam |
10.048.04c purū sahasrā ni śiśāmi dāśuṣe yan mā somāsa ukthino amandiṣuḥ ||
10.048.05a aham indro na parā jigya id dhanaṁ na mṛtyave 'va tasthe kadā cana |
10.048.05c somam in mā sunvanto yācatā vasu na me pūravaḥ sakhye riṣāthana ||
10.048.06a aham etāñ chāśvasato dvā-dvendraṁ ye vajraṁ yudhaye 'kṛṇvata |
10.048.06c āhvayamānām̐ ava hanmanāhanaṁ dṛḻhā vadann anamasyur namasvinaḥ ||
10.048.07a abhīdam ekam eko asmi niṣṣāḻ abhī dvā kim u trayaḥ karanti |
10.048.07c khale na parṣān prati hanmi bhūri kim mā nindanti śatravo 'nindrāḥ ||
10.048.08a ahaṁ guṅgubhyo atithigvam iṣkaram iṣaṁ na vṛtraturaṁ vikṣu dhārayam |
10.048.08c yat parṇayaghna uta vā karañjahe prāham mahe vṛtrahatye aśuśravi ||
10.048.09a pra me namī sāpya iṣe bhuje bhūd gavām eṣe sakhyā kṛṇuta dvitā |
10.048.09c didyuṁ yad asya samitheṣu maṁhayam ād id enaṁ śaṁsyam ukthyaṁ karam ||
10.048.10a pra nemasmin dadṛśe somo antar gopā nemam āvir asthā kṛṇoti |
10.048.10c sa tigmaśṛṅgaṁ vṛṣabhaṁ yuyutsan druhas tasthau bahule baddho antaḥ ||
10.048.11a ādityānāṁ vasūnāṁ rudriyāṇāṁ devo devānāṁ na mināmi dhāma |
10.048.11c te mā bhadrāya śavase tatakṣur aparājitam astṛtam aṣāḻham ||

10.049.01a ahaṁ dāṁ gṛṇate pūrvyaṁ vasv aham brahma kṛṇavam mahyaṁ vardhanam |
10.049.01c aham bhuvaṁ yajamānasya coditāyajvanaḥ sākṣi viśvasmin bhare ||
10.049.02a māṁ dhur indraṁ nāma devatā divaś ca gmaś cāpāṁ ca jantavaḥ |
10.049.02c ahaṁ harī vṛṣaṇā vivratā raghū ahaṁ vajraṁ śavase dhṛṣṇv ā dade ||
10.049.03a aham atkaṁ kavaye śiśnathaṁ hathair ahaṁ kutsam āvam ābhir ūtibhiḥ |
10.049.03c ahaṁ śuṣṇasya śnathitā vadhar yamaṁ na yo rara āryaṁ nāma dasyave ||
10.049.04a aham piteva vetasūm̐r abhiṣṭaye tugraṁ kutsāya smadibhaṁ ca randhayam |
10.049.04c aham bhuvaṁ yajamānasya rājani pra yad bhare tujaye na priyādhṛṣe ||
10.049.05a ahaṁ randhayam mṛgayaṁ śrutarvaṇe yan mājihīta vayunā canānuṣak |
10.049.05c ahaṁ veśaṁ namram āyave 'karam ahaṁ savyāya paḍgṛbhim arandhayam ||
10.049.06a ahaṁ sa yo navavāstvam bṛhadrathaṁ saṁ vṛtreva dāsaṁ vṛtrahārujam |
10.049.06c yad vardhayantam prathayantam ānuṣag dūre pāre rajaso rocanākaram ||
10.049.07a ahaṁ sūryasya pari yāmy āśubhiḥ praitaśebhir vahamāna ojasā |
10.049.07c yan mā sāvo manuṣa āha nirṇija ṛdhak kṛṣe dāsaṁ kṛtvyaṁ hathaiḥ ||
10.049.08a ahaṁ saptahā nahuṣo nahuṣṭaraḥ prāśrāvayaṁ śavasā turvaśaṁ yadum |
10.049.08c ahaṁ ny anyaṁ sahasā sahas karaṁ nava vrādhato navatiṁ ca vakṣayam ||
10.049.09a ahaṁ sapta sravato dhārayaṁ vṛṣā dravitnvaḥ pṛthivyāṁ sīrā adhi |
10.049.09c aham arṇāṁsi vi tirāmi sukratur yudhā vidam manave gātum iṣṭaye ||
10.049.10a ahaṁ tad āsu dhārayaṁ yad āsu na devaś cana tvaṣṭādhārayad ruśat |
10.049.10c spārhaṁ gavām ūdhaḥsu vakṣaṇāsv ā madhor madhu śvātryaṁ somam āśiram ||
10.049.11a evā devām̐ indro vivye nṝn pra cyautnena maghavā satyarādhāḥ |
10.049.11c viśvet tā te harivaḥ śacīvo 'bhi turāsaḥ svayaśo gṛṇanti ||

10.050.01a pra vo mahe mandamānāyāndhaso 'rcā viśvānarāya viśvābhuve |
10.050.01c indrasya yasya sumakhaṁ saho mahi śravo nṛmṇaṁ ca rodasī saparyataḥ ||
10.050.02a so cin nu sakhyā narya inaḥ stutaś carkṛtya indro māvate nare |
10.050.02c viśvāsu dhūrṣu vājakṛtyeṣu satpate vṛtre vāpsv abhi śūra mandase ||
10.050.03a ke te nara indra ye ta iṣe ye te sumnaṁ sadhanyam iyakṣān |
10.050.03c ke te vājāyāsuryāya hinvire ke apsu svāsūrvarāsu pauṁsye ||
10.050.04a bhuvas tvam indra brahmaṇā mahān bhuvo viśveṣu savaneṣu yajñiyaḥ |
10.050.04c bhuvo nṝm̐ś cyautno viśvasmin bhare jyeṣṭhaś ca mantro viśvacarṣaṇe ||
10.050.05a avā nu kaṁ jyāyān yajñavanaso mahīṁ ta omātrāṁ kṛṣṭayo viduḥ |
10.050.05c aso nu kam ajaro vardhāś ca viśved etā savanā tūtumā kṛṣe ||
10.050.06a etā viśvā savanā tūtumā kṛṣe svayaṁ sūno sahaso yāni dadhiṣe |
10.050.06c varāya te pātraṁ dharmaṇe tanā yajño mantro brahmodyataṁ vacaḥ ||
10.050.07a ye te vipra brahmakṛtaḥ sute sacā vasūnāṁ ca vasunaś ca dāvane |
10.050.07c pra te sumnasya manasā pathā bhuvan made sutasya somyasyāndhasaḥ ||

10.051.01a mahat tad ulbaṁ sthaviraṁ tad āsīd yenāviṣṭitaḥ praviveśithāpaḥ |
10.051.01c viśvā apaśyad bahudhā te agne jātavedas tanvo deva ekaḥ ||
10.051.02a ko mā dadarśa katamaḥ sa devo yo me tanvo bahudhā paryapaśyat |
10.051.02c kvāha mitrāvaruṇā kṣiyanty agner viśvāḥ samidho devayānīḥ ||
10.051.03a aicchāma tvā bahudhā jātavedaḥ praviṣṭam agne apsv oṣadhīṣu |
10.051.03c taṁ tvā yamo acikec citrabhāno daśāntaruṣyād atirocamānam ||
10.051.04a hotrād ahaṁ varuṇa bibhyad āyaṁ ned eva mā yunajann atra devāḥ |
10.051.04c tasya me tanvo bahudhā niviṣṭā etam arthaṁ na ciketāham agniḥ ||
10.051.05a ehi manur devayur yajñakāmo 'raṁkṛtyā tamasi kṣeṣy agne |
10.051.05c sugān pathaḥ kṛṇuhi devayānān vaha havyāni sumanasyamānaḥ ||
10.051.06a agneḥ pūrve bhrātaro artham etaṁ rathīvādhvānam anv āvarīvuḥ |
10.051.06c tasmād bhiyā varuṇa dūram āyaṁ gauro na kṣepnor avije jyāyāḥ ||
10.051.07a kurmas ta āyur ajaraṁ yad agne yathā yukto jātavedo na riṣyāḥ |
10.051.07c athā vahāsi sumanasyamāno bhāgaṁ devebhyo haviṣaḥ sujāta ||
10.051.08a prayājān me anuyājām̐ś ca kevalān ūrjasvantaṁ haviṣo datta bhāgam |
10.051.08c ghṛtaṁ cāpām puruṣaṁ cauṣadhīnām agneś ca dīrgham āyur astu devāḥ ||
10.051.09a tava prayājā anuyājāś ca kevala ūrjasvanto haviṣaḥ santu bhāgāḥ |
10.051.09c tavāgne yajño 'yam astu sarvas tubhyaṁ namantām pradiśaś catasraḥ ||

10.052.01a viśve devāḥ śāstana mā yatheha hotā vṛto manavai yan niṣadya |
10.052.01c pra me brūta bhāgadheyaṁ yathā vo yena pathā havyam ā vo vahāni ||
10.052.02a ahaṁ hotā ny asīdaṁ yajīyān viśve devā maruto mā junanti |
10.052.02c ahar-ahar aśvinādhvaryavaṁ vām brahmā samid bhavati sāhutir vām ||
10.052.03a ayaṁ yo hotā kir u sa yamasya kam apy ūhe yat samañjanti devāḥ |
10.052.03c ahar-ahar jāyate māsi-māsy athā devā dadhire havyavāham ||
10.052.04a māṁ devā dadhire havyavāham apamluktam bahu kṛcchrā carantam |
10.052.04c agnir vidvān yajñaṁ naḥ kalpayāti pañcayāmaṁ trivṛtaṁ saptatantum ||
10.052.05a ā vo yakṣy amṛtatvaṁ suvīraṁ yathā vo devā varivaḥ karāṇi |
10.052.05c ā bāhvor vajram indrasya dheyām athemā viśvāḥ pṛtanā jayāti ||
10.052.06a trīṇi śatā trī sahasrāṇy agniṁ triṁśac ca devā nava cāsaparyan |
10.052.06c aukṣan ghṛtair astṛṇan barhir asmā ād id dhotāraṁ ny asādayanta ||

10.053.01a yam aicchāma manasā so 'yam āgād yajñasya vidvān paruṣaś cikitvān |
10.053.01c sa no yakṣad devatātā yajīyān ni hi ṣatsad antaraḥ pūrvo asmat ||
10.053.02a arādhi hotā niṣadā yajīyān abhi prayāṁsi sudhitāni hi khyat |
10.053.02c yajāmahai yajñiyān hanta devām̐ īḻāmahā īḍyām̐ ājyena ||
10.053.03a sādhvīm akar devavītiṁ no adya yajñasya jihvām avidāma guhyām |
10.053.03c sa āyur āgāt surabhir vasāno bhadrām akar devahūtiṁ no adya ||
10.053.04a tad adya vācaḥ prathamam masīya yenāsurām̐ abhi devā asāma |
10.053.04c ūrjāda uta yajñiyāsaḥ pañca janā mama hotraṁ juṣadhvam ||
10.053.05a pañca janā mama hotraṁ juṣantāṁ gojātā uta ye yajñiyāsaḥ |
10.053.05c pṛthivī naḥ pārthivāt pātv aṁhaso 'ntarikṣaṁ divyāt pātv asmān ||
10.053.06a tantuṁ tanvan rajaso bhānum anv ihi jyotiṣmataḥ patho rakṣa dhiyā kṛtān |
10.053.06c anulbaṇaṁ vayata joguvām apo manur bhava janayā daivyaṁ janam ||
10.053.07a akṣānaho nahyatanota somyā iṣkṛṇudhvaṁ raśanā ota piṁśata |
10.053.07c aṣṭāvandhuraṁ vahatābhito rathaṁ yena devāso anayann abhi priyam ||
10.053.08a aśmanvatī rīyate saṁ rabhadhvam ut tiṣṭhata pra taratā sakhāyaḥ |
10.053.08c atrā jahāma ye asann aśevāḥ śivān vayam ut taremābhi vājān ||
10.053.09a tvaṣṭā māyā ved apasām apastamo bibhrat pātrā devapānāni śaṁtamā |
10.053.09c śiśīte nūnam paraśuṁ svāyasaṁ yena vṛścād etaśo brahmaṇas patiḥ ||
10.053.10a sato nūnaṁ kavayaḥ saṁ śiśīta vāśībhir yābhir amṛtāya takṣatha |
10.053.10c vidvāṁsaḥ padā guhyāni kartana yena devāso amṛtatvam ānaśuḥ ||
10.053.11a garbhe yoṣām adadhur vatsam āsany apīcyena manasota jihvayā |
10.053.11c sa viśvāhā sumanā yogyā abhi siṣāsanir vanate kāra ij jitim ||

10.054.01a tāṁ su te kīrtim maghavan mahitvā yat tvā bhīte rodasī ahvayetām |
10.054.01c prāvo devām̐ ātiro dāsam ojaḥ prajāyai tvasyai yad aśikṣa indra ||
10.054.02a yad acaras tanvā vāvṛdhāno balānīndra prabruvāṇo janeṣu |
10.054.02c māyet sā te yāni yuddhāny āhur nādya śatruṁ nanu purā vivitse ||
10.054.03a ka u nu te mahimanaḥ samasyāsmat pūrva ṛṣayo 'ntam āpuḥ |
10.054.03c yan mātaraṁ ca pitaraṁ ca sākam ajanayathās tanvaḥ svāyāḥ ||
10.054.04a catvāri te asuryāṇi nāmādābhyāni mahiṣasya santi |
10.054.04c tvam aṅga tāni viśvāni vitse yebhiḥ karmāṇi maghavañ cakartha ||
10.054.05a tvaṁ viśvā dadhiṣe kevalāni yāny āvir yā ca guhā vasūni |
10.054.05c kāmam in me maghavan mā vi tārīs tvam ājñātā tvam indrāsi dātā ||
10.054.06a yo adadhāj jyotiṣi jyotir antar yo asṛjan madhunā sam madhūni |
10.054.06c adha priyaṁ śūṣam indrāya manma brahmakṛto bṛhadukthād avāci ||

10.055.01a dūre tan nāma guhyam parācair yat tvā bhīte ahvayetāṁ vayodhai |
10.055.01c ud astabhnāḥ pṛthivīṁ dyām abhīke bhrātuḥ putrān maghavan titviṣāṇaḥ ||
10.055.02a mahat tan nāma guhyam puruspṛg yena bhūtaṁ janayo yena bhavyam |
10.055.02c pratnaṁ jātaṁ jyotir yad asya priyam priyāḥ sam aviśanta pañca ||
10.055.03a ā rodasī apṛṇād ota madhyam pañca devām̐ ṛtuśaḥ sapta-sapta |
10.055.03c catustriṁśatā purudhā vi caṣṭe sarūpeṇa jyotiṣā vivratena ||
10.055.04a yad uṣa aucchaḥ prathamā vibhānām ajanayo yena puṣṭasya puṣṭam |
10.055.04c yat te jāmitvam avaram parasyā mahan mahatyā asuratvam ekam ||
10.055.05a vidhuṁ dadrāṇaṁ samane bahūnāṁ yuvānaṁ santam palito jagāra |
10.055.05c devasya paśya kāvyam mahitvādyā mamāra sa hyaḥ sam āna ||
10.055.06a śākmanā śāko aruṇaḥ suparṇa ā yo mahaḥ śūraḥ sanād anīḻaḥ |
10.055.06c yac ciketa satyam it tan na moghaṁ vasu spārham uta jetota dātā ||
10.055.07a aibhir dade vṛṣṇyā pauṁsyāni yebhir aukṣad vṛtrahatyāya vajrī |
10.055.07c ye karmaṇaḥ kriyamāṇasya mahna ṛtekarmam udajāyanta devāḥ ||
10.055.08a yujā karmāṇi janayan viśvaujā aśastihā viśvamanās turāṣāṭ |
10.055.08c pītvī somasya diva ā vṛdhānaḥ śūro nir yudhādhamad dasyūn ||

10.056.01a idaṁ ta ekam para ū ta ekaṁ tṛtīyena jyotiṣā saṁ viśasva |
10.056.01c saṁveśane tanvaś cārur edhi priyo devānām parame janitre ||
10.056.02a tanūṣ ṭe vājin tanvaṁ nayantī vāmam asmabhyaṁ dhātu śarma tubhyam |
10.056.02c ahruto maho dharuṇāya devān divīva jyotiḥ svam ā mimīyāḥ ||
10.056.03a vājy asi vājinenā suvenīḥ suvitaḥ stomaṁ suvito divaṁ gāḥ |
10.056.03c suvito dharma prathamānu satyā suvito devān suvito 'nu patma ||
10.056.04a mahimna eṣām pitaraś caneśire devā deveṣv adadhur api kratum |
10.056.04c sam avivyacur uta yāny atviṣur aiṣāṁ tanūṣu ni viviśuḥ punaḥ ||
10.056.05a sahobhir viśvam pari cakramū rajaḥ pūrvā dhāmāny amitā mimānāḥ |
10.056.05c tanūṣu viśvā bhuvanā ni yemire prāsārayanta purudha prajā anu ||
10.056.06a dvidhā sūnavo 'suraṁ svarvidam āsthāpayanta tṛtīyena karmaṇā |
10.056.06c svām prajām pitaraḥ pitryaṁ saha āvareṣv adadhus tantum ātatam ||
10.056.07a nāvā na kṣodaḥ pradiśaḥ pṛthivyāḥ svastibhir ati durgāṇi viśvā |
10.056.07c svām prajām bṛhaduktho mahitvāvareṣv adadhād ā pareṣu ||

10.057.01a mā pra gāma patho vayam mā yajñād indra sominaḥ |
10.057.01c māntaḥ sthur no arātayaḥ ||
10.057.02a yo yajñasya prasādhanas tantur deveṣv ātataḥ |
10.057.02c tam āhutaṁ naśīmahi ||
10.057.03a mano nv ā huvāmahe nārāśaṁsena somena |
10.057.03c pitṝṇāṁ ca manmabhiḥ ||
10.057.04a ā ta etu manaḥ punaḥ kratve dakṣāya jīvase |
10.057.04c jyok ca sūryaṁ dṛśe ||
10.057.05a punar naḥ pitaro mano dadātu daivyo janaḥ |
10.057.05c jīvaṁ vrātaṁ sacemahi ||
10.057.06a vayaṁ soma vrate tava manas tanūṣu bibhrataḥ |
10.057.06c prajāvantaḥ sacemahi ||

10.058.01a yat te yamaṁ vaivasvatam mano jagāma dūrakam |
10.058.01c tat ta ā vartayāmasīha kṣayāya jīvase ||
10.058.02a yat te divaṁ yat pṛthivīm mano jagāma dūrakam |
10.058.02c tat ta ā vartayāmasīha kṣayāya jīvase ||
10.058.03a yat te bhūmiṁ caturbhṛṣṭim mano jagāma dūrakam |
10.058.03c tat ta ā vartayāmasīha kṣayāya jīvase ||
10.058.04a yat te catasraḥ pradiśo mano jagāma dūrakam |
10.058.04c tat ta ā vartayāmasīha kṣayāya jīvase ||
10.058.05a yat te samudram arṇavam mano jagāma dūrakam |
10.058.05c tat ta ā vartayāmasīha kṣayāya jīvase ||
10.058.06a yat te marīcīḥ pravato mano jagāma dūrakam |
10.058.06c tat ta ā vartayāmasīha kṣayāya jīvase ||
10.058.07a yat te apo yad oṣadhīr mano jagāma dūrakam |
10.058.07c tat ta ā vartayāmasīha kṣayāya jīvase ||
10.058.08a yat te sūryaṁ yad uṣasam mano jagāma dūrakam |
10.058.08c tat ta ā vartayāmasīha kṣayāya jīvase ||
10.058.09a yat te parvatān bṛhato mano jagāma dūrakam |
10.058.09c tat ta ā vartayāmasīha kṣayāya jīvase ||
10.058.10a yat te viśvam idaṁ jagan mano jagāma dūrakam |
10.058.10c tat ta ā vartayāmasīha kṣayāya jīvase ||
10.058.11a yat te parāḥ parāvato mano jagāma dūrakam |
10.058.11c tat ta ā vartayāmasīha kṣayāya jīvase ||
10.058.12a yat te bhūtaṁ ca bhavyaṁ ca mano jagāma dūrakam |
10.058.12c tat ta ā vartayāmasīha kṣayāya jīvase ||

10.059.01a pra tāry āyuḥ prataraṁ navīyaḥ sthātāreva kratumatā rathasya |
10.059.01c adha cyavāna ut tavīty artham parātaraṁ su nirṛtir jihītām ||
10.059.02a sāman nu rāye nidhiman nv annaṁ karāmahe su purudha śravāṁsi |
10.059.02c tā no viśvāni jaritā mamattu parātaraṁ su nirṛtir jihītām ||
10.059.03a abhī ṣv aryaḥ pauṁsyair bhavema dyaur na bhūmiṁ girayo nājrān |
10.059.03c tā no viśvāni jaritā ciketa parātaraṁ su nirṛtir jihītām ||
10.059.04a mo ṣu ṇaḥ soma mṛtyave parā dāḥ paśyema nu sūryam uccarantam |
10.059.04c dyubhir hito jarimā sū no astu parātaraṁ su nirṛtir jihītām ||
10.059.05a asunīte mano asmāsu dhāraya jīvātave su pra tirā na āyuḥ |
10.059.05c rārandhi naḥ sūryasya saṁdṛśi ghṛtena tvaṁ tanvaṁ vardhayasva ||
10.059.06a asunīte punar asmāsu cakṣuḥ punaḥ prāṇam iha no dhehi bhogam |
10.059.06c jyok paśyema sūryam uccarantam anumate mṛḻayā naḥ svasti ||
10.059.07a punar no asum pṛthivī dadātu punar dyaur devī punar antarikṣam |
10.059.07c punar naḥ somas tanvaṁ dadātu punaḥ pūṣā pathyāṁ yā svastiḥ ||
10.059.08a śaṁ rodasī subandhave yahvī ṛtasya mātarā |
10.059.08c bharatām apa yad rapo dyauḥ pṛthivi kṣamā rapo mo ṣu te kiṁ canāmamat ||
10.059.09a ava dvake ava trikā divaś caranti bheṣajā |
10.059.09c kṣamā cariṣṇv ekakam bharatām apa yad rapo dyauḥ pṛthivi kṣamā rapo mo ṣu te kiṁ canāmamat ||
10.059.10a sam indreraya gām anaḍvāhaṁ ya āvahad uśīnarāṇyā anaḥ |
10.059.10c bharatām apa yad rapo dyauḥ pṛthivi kṣamā rapo mo ṣu te kiṁ canāmamat ||

10.060.01a ā janaṁ tveṣasaṁdṛśam māhīnānām upastutam |
10.060.01c aganma bibhrato namaḥ ||
10.060.02a asamātiṁ nitośanaṁ tveṣaṁ niyayinaṁ ratham |
10.060.02c bhajerathasya satpatim ||
10.060.03a yo janān mahiṣām̐ ivātitasthau pavīravān |
10.060.03c utāpavīravān yudhā ||
10.060.04a yasyekṣvākur upa vrate revān marāyy edhate |
10.060.04c divīva pañca kṛṣṭayaḥ ||
10.060.05a indra kṣatrāsamātiṣu rathaproṣṭheṣu dhāraya |
10.060.05c divīva sūryaṁ dṛśe ||
10.060.06a agastyasya nadbhyaḥ saptī yunakṣi rohitā |
10.060.06c paṇīn ny akramīr abhi viśvān rājann arādhasaḥ ||
10.060.07a ayam mātāyam pitāyaṁ jīvātur āgamat |
10.060.07c idaṁ tava prasarpaṇaṁ subandhav ehi nir ihi ||
10.060.08a yathā yugaṁ varatrayā nahyanti dharuṇāya kam |
10.060.08c evā dādhāra te mano jīvātave na mṛtyave 'tho ariṣṭatātaye ||
10.060.09a yatheyam pṛthivī mahī dādhāremān vanaspatīn |
10.060.09c evā dādhāra te mano jīvātave na mṛtyave 'tho ariṣṭatātaye ||
10.060.10a yamād ahaṁ vaivasvatāt subandhor mana ābharam |
10.060.10c jīvātave na mṛtyave 'tho ariṣṭatātaye ||
10.060.11a nyag vāto 'va vāti nyak tapati sūryaḥ |
10.060.11c nīcīnam aghnyā duhe nyag bhavatu te rapaḥ ||
10.060.12a ayam me hasto bhagavān ayam me bhagavattaraḥ |
10.060.12c ayam me viśvabheṣajo 'yaṁ śivābhimarśanaḥ ||

10.061.01a idam itthā raudraṁ gūrtavacā brahma kratvā śacyām antar ājau |
10.061.01c krāṇā yad asya pitarā maṁhaneṣṭhāḥ parṣat pakthe ahann ā sapta hotṝn ||
10.061.02a sa id dānāya dabhyāya vanvañ cyavānaḥ sūdair amimīta vedim |
10.061.02c tūrvayāṇo gūrtavacastamaḥ kṣodo na reta itaūti siñcat ||
10.061.03a mano na yeṣu havaneṣu tigmaṁ vipaḥ śacyā vanutho dravantā |
10.061.03c ā yaḥ śaryābhis tuvinṛmṇo asyāśrīṇītādiśaṁ gabhastau ||
10.061.04a kṛṣṇā yad goṣv aruṇīṣu sīdad divo napātāśvinā huve vām |
10.061.04c vītam me yajñam ā gatam me annaṁ vavanvāṁsā neṣam asmṛtadhrū ||
10.061.05a prathiṣṭa yasya vīrakarmam iṣṇad anuṣṭhitaṁ nu naryo apauhat |
10.061.05c punas tad ā vṛhati yat kanāyā duhitur ā anubhṛtam anarvā ||
10.061.06a madhyā yat kartvam abhavad abhīke kāmaṁ kṛṇvāne pitari yuvatyām |
10.061.06c manānag reto jahatur viyantā sānau niṣiktaṁ sukṛtasya yonau ||
10.061.07a pitā yat svāṁ duhitaram adhiṣkan kṣmayā retaḥ saṁjagmāno ni ṣiñcat |
10.061.07c svādhyo 'janayan brahma devā vāstoṣ patiṁ vratapāṁ nir atakṣan ||
10.061.08a sa īṁ vṛṣā na phenam asyad ājau smad ā paraid apa dabhracetāḥ |
10.061.08c sarat padā na dakṣiṇā parāvṛṅ na tā nu me pṛśanyo jagṛbhre ||
10.061.09a makṣū na vahniḥ prajāyā upabdir agniṁ na nagna upa sīdad ūdhaḥ |
10.061.09c sanitedhmaṁ sanitota vājaṁ sa dhartā jajñe sahasā yavīyut ||
10.061.10a makṣū kanāyāḥ sakhyaṁ navagvā ṛtaṁ vadanta ṛtayuktim agman |
10.061.10c dvibarhaso ya upa gopam āgur adakṣiṇāso acyutā dudukṣan ||
10.061.11a makṣū kanāyāḥ sakhyaṁ navīyo rādho na reta ṛtam it turaṇyan |
10.061.11c śuci yat te rekṇa āyajanta sabardughāyāḥ paya usriyāyāḥ ||
10.061.12a paśvā yat paścā viyutā budhanteti bravīti vaktarī rarāṇaḥ |
10.061.12c vasor vasutvā kāravo 'nehā viśvaṁ viveṣṭi draviṇam upa kṣu ||
10.061.13a tad in nv asya pariṣadvāno agman purū sadanto nārṣadam bibhitsan |
10.061.13c vi śuṣṇasya saṁgrathitam anarvā vidat puruprajātasya guhā yat ||
10.061.14a bhargo ha nāmota yasya devāḥ svar ṇa ye triṣadhasthe niṣeduḥ |
10.061.14c agnir ha nāmota jātavedāḥ śrudhī no hotar ṛtasya hotādhruk ||
10.061.15a uta tyā me raudrāv arcimantā nāsatyāv indra gūrtaye yajadhyai |
10.061.15c manuṣvad vṛktabarhiṣe rarāṇā mandū hitaprayasā vikṣu yajyū ||
10.061.16a ayaṁ stuto rājā vandi vedhā apaś ca vipras tarati svasetuḥ |
10.061.16c sa kakṣīvantaṁ rejayat so agniṁ nemiṁ na cakram arvato raghudru ||
10.061.17a sa dvibandhur vaitaraṇo yaṣṭā sabardhuṁ dhenum asvaṁ duhadhyai |
10.061.17c saṁ yan mitrāvaruṇā vṛñja ukthair jyeṣṭhebhir aryamaṇaṁ varūthaiḥ ||
10.061.18a tadbandhuḥ sūrir divi te dhiyaṁdhā nābhānediṣṭho rapati pra venan |
10.061.18c sā no nābhiḥ paramāsya vā ghāhaṁ tat paścā katithaś cid āsa ||
10.061.19a iyam me nābhir iha me sadhastham ime me devā ayam asmi sarvaḥ |
10.061.19c dvijā aha prathamajā ṛtasyedaṁ dhenur aduhaj jāyamānā ||
10.061.20a adhāsu mandro aratir vibhāvāva syati dvivartanir vaneṣāṭ |
10.061.20c ūrdhvā yac chreṇir na śiśur dan makṣū sthiraṁ śevṛdhaṁ sūta mātā ||
10.061.21a adhā gāva upamātiṁ kanāyā anu śvāntasya kasya cit pareyuḥ |
10.061.21c śrudhi tvaṁ sudraviṇo nas tvaṁ yāḻ āśvaghnasya vāvṛdhe sūnṛtābhiḥ ||
10.061.22a adha tvam indra viddhy asmān maho rāye nṛpate vajrabāhuḥ |
10.061.22c rakṣā ca no maghonaḥ pāhi sūrīn anehasas te harivo abhiṣṭau ||
10.061.23a adha yad rājānā gaviṣṭau sarat saraṇyuḥ kārave jaraṇyuḥ |
10.061.23c vipraḥ preṣṭhaḥ sa hy eṣām babhūva parā ca vakṣad uta parṣad enān ||
10.061.24a adhā nv asya jenyasya puṣṭau vṛthā rebhanta īmahe tad ū nu |
10.061.24c saraṇyur asya sūnur aśvo vipraś cāsi śravasaś ca sātau ||
10.061.25a yuvor yadi sakhyāyāsme śardhāya stomaṁ jujuṣe namasvān |
10.061.25c viśvatra yasminn ā giraḥ samīcīḥ pūrvīva gātur dāśat sūnṛtāyai ||
10.061.26a sa gṛṇāno adbhir devavān iti subandhur namasā sūktaiḥ |
10.061.26c vardhad ukthair vacobhir ā hi nūnaṁ vy adhvaiti payasa usriyāyāḥ ||
10.061.27a ta ū ṣu ṇo maho yajatrā bhūta devāsa ūtaye sajoṣāḥ |
10.061.27c ye vājām̐ anayatā viyanto ye sthā nicetāro amūrāḥ ||

10.062.01a ye yajñena dakṣiṇayā samaktā indrasya sakhyam amṛtatvam ānaśa |
10.062.01c tebhyo bhadram aṅgiraso vo astu prati gṛbhṇīta mānavaṁ sumedhasaḥ ||
10.062.02a ya udājan pitaro gomayaṁ vasv ṛtenābhindan parivatsare valam |
10.062.02c dīrghāyutvam aṅgiraso vo astu prati gṛbhṇīta mānavaṁ sumedhasaḥ ||
10.062.03a ya ṛtena sūryam ārohayan divy aprathayan pṛthivīm mātaraṁ vi |
10.062.03c suprajāstvam aṅgiraso vo astu prati gṛbhṇīta mānavaṁ sumedhasaḥ ||
10.062.04a ayaṁ nābhā vadati valgu vo gṛhe devaputrā ṛṣayas tac chṛṇotana |
10.062.04c subrahmaṇyam aṅgiraso vo astu prati gṛbhṇīta mānavaṁ sumedhasaḥ ||
10.062.05a virūpāsa id ṛṣayas ta id gambhīravepasaḥ |
10.062.05c te aṅgirasaḥ sūnavas te agneḥ pari jajñire ||
10.062.06a ye agneḥ pari jajñire virūpāso divas pari |
10.062.06c navagvo nu daśagvo aṅgirastamo sacā deveṣu maṁhate ||
10.062.07a indreṇa yujā niḥ sṛjanta vāghato vrajaṁ gomantam aśvinam |
10.062.07c sahasram me dadato aṣṭakarṇyaḥ śravo deveṣv akrata ||
10.062.08a pra nūnaṁ jāyatām ayam manus tokmeva rohatu |
10.062.08c yaḥ sahasraṁ śatāśvaṁ sadyo dānāya maṁhate ||
10.062.09a na tam aśnoti kaś cana diva iva sānv ārabham |
10.062.09c sāvarṇyasya dakṣiṇā vi sindhur iva paprathe ||
10.062.10a uta dāsā pariviṣe smaddiṣṭī goparīṇasā |
10.062.10c yadus turvaś ca māmahe ||
10.062.11a sahasradā grāmaṇīr mā riṣan manuḥ sūryeṇāsya yatamānaitu dakṣiṇā |
10.062.11c sāvarṇer devāḥ pra tirantv āyur yasminn aśrāntā asanāma vājam ||

10.063.01a parāvato ye didhiṣanta āpyam manuprītāso janimā vivasvataḥ |
10.063.01c yayāter ye nahuṣyasya barhiṣi devā āsate te adhi bruvantu naḥ ||
10.063.02a viśvā hi vo namasyāni vandyā nāmāni devā uta yajñiyāni vaḥ |
10.063.02c ye stha jātā aditer adbhyas pari ye pṛthivyās te ma iha śrutā havam ||
10.063.03a yebhyo mātā madhumat pinvate payaḥ pīyūṣaṁ dyaur aditir adribarhāḥ |
10.063.03c ukthaśuṣmān vṛṣabharān svapnasas tām̐ ādityām̐ anu madā svastaye ||
10.063.04a nṛcakṣaso animiṣanto arhaṇā bṛhad devāso amṛtatvam ānaśuḥ |
10.063.04c jyotīrathā ahimāyā anāgaso divo varṣmāṇaṁ vasate svastaye ||
10.063.05a samrājo ye suvṛdho yajñam āyayur aparihvṛtā dadhire divi kṣayam |
10.063.05c tām̐ ā vivāsa namasā suvṛktibhir maho ādityām̐ aditiṁ svastaye ||
10.063.06a ko vaḥ stomaṁ rādhati yaṁ jujoṣatha viśve devāso manuṣo yati ṣṭhana |
10.063.06c ko vo 'dhvaraṁ tuvijātā araṁ karad yo naḥ parṣad aty aṁhaḥ svastaye ||
10.063.07a yebhyo hotrām prathamām āyeje manuḥ samiddhāgnir manasā sapta hotṛbhiḥ |
10.063.07c ta ādityā abhayaṁ śarma yacchata sugā naḥ karta supathā svastaye ||
10.063.08a ya īśire bhuvanasya pracetaso viśvasya sthātur jagataś ca mantavaḥ |
10.063.08c te naḥ kṛtād akṛtād enasas pary adyā devāsaḥ pipṛtā svastaye ||
10.063.09a bhareṣv indraṁ suhavaṁ havāmahe 'ṁhomucaṁ sukṛtaṁ daivyaṁ janam |
10.063.09c agnim mitraṁ varuṇaṁ sātaye bhagaṁ dyāvāpṛthivī marutaḥ svastaye ||
10.063.10a sutrāmāṇam pṛthivīṁ dyām anehasaṁ suśarmāṇam aditiṁ supraṇītim |
10.063.10c daivīṁ nāvaṁ svaritrām anāgasam asravantīm ā ruhemā svastaye ||
10.063.11a viśve yajatrā adhi vocatotaye trāyadhvaṁ no durevāyā abhihrutaḥ |
10.063.11c satyayā vo devahūtyā huvema śṛṇvato devā avase svastaye ||
10.063.12a apāmīvām apa viśvām anāhutim apārātiṁ durvidatrām aghāyataḥ |
10.063.12c āre devā dveṣo asmad yuyotanoru ṇaḥ śarma yacchatā svastaye ||
10.063.13a ariṣṭaḥ sa marto viśva edhate pra prajābhir jāyate dharmaṇas pari |
10.063.13c yam ādityāso nayathā sunītibhir ati viśvāni duritā svastaye ||
10.063.14a yaṁ devāso 'vatha vājasātau yaṁ śūrasātā maruto hite dhane |
10.063.14c prātaryāvāṇaṁ ratham indra sānasim ariṣyantam ā ruhemā svastaye ||
10.063.15a svasti naḥ pathyāsu dhanvasu svasty apsu vṛjane svarvati |
10.063.15c svasti naḥ putrakṛtheṣu yoniṣu svasti rāye maruto dadhātana ||
10.063.16a svastir id dhi prapathe śreṣṭhā rekṇasvaty abhi yā vāmam eti |
10.063.16c sā no amā so araṇe ni pātu svāveśā bhavatu devagopā ||
10.063.17a evā plateḥ sūnur avīvṛdhad vo viśva ādityā adite manīṣī |
10.063.17c īśānāso naro amartyenāstāvi jano divyo gayena ||

10.064.01a kathā devānāṁ katamasya yāmani sumantu nāma śṛṇvatām manāmahe |
10.064.01c ko mṛḻāti katamo no mayas karat katama ūtī abhy ā vavartati ||
10.064.02a kratūyanti kratavo hṛtsu dhītayo venanti venāḥ patayanty ā diśaḥ |
10.064.02c na marḍitā vidyate anya ebhyo deveṣu me adhi kāmā ayaṁsata ||
10.064.03a narā vā śaṁsam pūṣaṇam agohyam agniṁ deveddham abhy arcase girā |
10.064.03c sūryāmāsā candramasā yamaṁ divi tritaṁ vātam uṣasam aktum aśvinā ||
10.064.04a kathā kavis tuvīravān kayā girā bṛhaspatir vāvṛdhate suvṛktibhiḥ |
10.064.04c aja ekapāt suhavebhir ṛkvabhir ahiḥ śṛṇotu budhnyo havīmani ||
10.064.05a dakṣasya vādite janmani vrate rājānā mitrāvaruṇā vivāsasi |
10.064.05c atūrtapanthāḥ pururatho aryamā saptahotā viṣurūpeṣu janmasu ||
10.064.06a te no arvanto havanaśruto havaṁ viśve śṛṇvantu vājino mitadravaḥ |
10.064.06c sahasrasā medhasātāv iva tmanā maho ye dhanaṁ samitheṣu jabhrire ||
10.064.07a pra vo vāyuṁ rathayujam puraṁdhiṁ stomaiḥ kṛṇudhvaṁ sakhyāya pūṣaṇam |
10.064.07c te hi devasya savituḥ savīmani kratuṁ sacante sacitaḥ sacetasaḥ ||
10.064.08a triḥ sapta sasrā nadyo mahīr apo vanaspatīn parvatām̐ agnim ūtaye |
10.064.08c kṛśānum astṝn tiṣyaṁ sadhastha ā rudraṁ rudreṣu rudriyaṁ havāmahe ||
10.064.09a sarasvatī sarayuḥ sindhur ūrmibhir maho mahīr avasā yantu vakṣaṇīḥ |
10.064.09c devīr āpo mātaraḥ sūdayitnvo ghṛtavat payo madhuman no arcata ||
10.064.10a uta mātā bṛhaddivā śṛṇotu nas tvaṣṭā devebhir janibhiḥ pitā vacaḥ |
10.064.10c ṛbhukṣā vājo rathaspatir bhago raṇvaḥ śaṁsaḥ śaśamānasya pātu naḥ ||
10.064.11a raṇvaḥ saṁdṛṣṭau pitumām̐ iva kṣayo bhadrā rudrāṇām marutām upastutiḥ |
10.064.11c gobhiḥ ṣyāma yaśaso janeṣv ā sadā devāsa iḻayā sacemahi ||
10.064.12a yām me dhiyam maruta indra devā adadāta varuṇa mitra yūyam |
10.064.12c tām pīpayata payaseva dhenuṁ kuvid giro adhi rathe vahātha ||
10.064.13a kuvid aṅga prati yathā cid asya naḥ sajātyasya maruto bubodhatha |
10.064.13c nābhā yatra prathamaṁ saṁnasāmahe tatra jāmitvam aditir dadhātu naḥ ||
10.064.14a te hi dyāvāpṛthivī mātarā mahī devī devāñ janmanā yajñiye itaḥ |
10.064.14c ubhe bibhṛta ubhayam bharīmabhiḥ purū retāṁsi pitṛbhiś ca siñcataḥ ||
10.064.15a vi ṣā hotrā viśvam aśnoti vāryam bṛhaspatir aramatiḥ panīyasī |
10.064.15c grāvā yatra madhuṣud ucyate bṛhad avīvaśanta matibhir manīṣiṇaḥ ||
10.064.16a evā kavis tuvīravām̐ ṛtajñā draviṇasyur draviṇasaś cakānaḥ |
10.064.16c ukthebhir atra matibhiś ca vipro 'pīpayad gayo divyāni janma ||
10.064.17a evā plateḥ sūnur avīvṛdhad vo viśva ādityā adite manīṣī |
10.064.17c īśānāso naro amartyenāstāvi jano divyo gayena ||

10.065.01a agnir indro varuṇo mitro aryamā vāyuḥ pūṣā sarasvatī sajoṣasaḥ |
10.065.01c ādityā viṣṇur marutaḥ svar bṛhat somo rudro aditir brahmaṇas patiḥ ||
10.065.02a indrāgnī vṛtrahatyeṣu satpatī mitho hinvānā tanvā samokasā |
10.065.02c antarikṣam mahy ā paprur ojasā somo ghṛtaśrīr mahimānam īrayan ||
10.065.03a teṣāṁ hi mahnā mahatām anarvaṇāṁ stomām̐ iyarmy ṛtajñā ṛtāvṛdhām |
10.065.03c ye apsavam arṇavaṁ citrarādhasas te no rāsantām mahaye sumitryāḥ ||
10.065.04a svarṇaram antarikṣāṇi rocanā dyāvābhūmī pṛthivīṁ skambhur ojasā |
10.065.04c pṛkṣā iva mahayantaḥ surātayo devāḥ stavante manuṣāya sūrayaḥ ||
10.065.05a mitrāya śikṣa varuṇāya dāśuṣe yā samrājā manasā na prayucchataḥ |
10.065.05c yayor dhāma dharmaṇā rocate bṛhad yayor ubhe rodasī nādhasī vṛtau ||
10.065.06a yā gaur vartanim paryeti niṣkṛtam payo duhānā vratanīr avārataḥ |
10.065.06c sā prabruvāṇā varuṇāya dāśuṣe devebhyo dāśad dhaviṣā vivasvate ||
10.065.07a divakṣaso agnijihvā ṛtāvṛdha ṛtasya yoniṁ vimṛśanta āsate |
10.065.07c dyāṁ skabhitvy apa ā cakrur ojasā yajñaṁ janitvī tanvī ni māmṛjuḥ ||
10.065.08a parikṣitā pitarā pūrvajāvarī ṛtasya yonā kṣayataḥ samokasā |
10.065.08c dyāvāpṛthivī varuṇāya savrate ghṛtavat payo mahiṣāya pinvataḥ ||
10.065.09a parjanyāvātā vṛṣabhā purīṣiṇendravāyū varuṇo mitro aryamā |
10.065.09c devām̐ ādityām̐ aditiṁ havāmahe ye pārthivāso divyāso apsu ye ||
10.065.10a tvaṣṭāraṁ vāyum ṛbhavo ya ohate daivyā hotārā uṣasaṁ svastaye |
10.065.10c bṛhaspatiṁ vṛtrakhādaṁ sumedhasam indriyaṁ somaṁ dhanasā u īmahe ||
10.065.11a brahma gām aśvaṁ janayanta oṣadhīr vanaspatīn pṛthivīm parvatām̐ apaḥ |
10.065.11c sūryaṁ divi rohayantaḥ sudānava āryā vratā visṛjanto adhi kṣami ||
10.065.12a bhujyum aṁhasaḥ pipṛtho nir aśvinā śyāvam putraṁ vadhrimatyā ajinvatam |
10.065.12c kamadyuvaṁ vimadāyohathur yuvaṁ viṣṇāpvaṁ viśvakāyāva sṛjathaḥ ||
10.065.13a pāvīravī tanyatur ekapād ajo divo dhartā sindhur āpaḥ samudriyaḥ |
10.065.13c viśve devāsaḥ śṛṇavan vacāṁsi me sarasvatī saha dhībhiḥ puraṁdhyā ||
10.065.14a viśve devāḥ saha dhībhiḥ puraṁdhyā manor yajatrā amṛtā ṛtajñāḥ |
10.065.14c rātiṣāco abhiṣācaḥ svarvidaḥ svar giro brahma sūktaṁ juṣerata ||
10.065.15a devān vasiṣṭho amṛtān vavande ye viśvā bhuvanābhi pratasthuḥ |
10.065.15c te no rāsantām urugāyam adya yūyam pāta svastibhiḥ sadā naḥ ||

10.066.01a devān huve bṛhacchravasaḥ svastaye jyotiṣkṛto adhvarasya pracetasaḥ |
10.066.01c ye vāvṛdhuḥ prataraṁ viśvavedasa indrajyeṣṭhāso amṛtā ṛtāvṛdhaḥ ||
10.066.02a indraprasūtā varuṇapraśiṣṭā ye sūryasya jyotiṣo bhāgam ānaśuḥ |
10.066.02c marudgaṇe vṛjane manma dhīmahi māghone yajñaṁ janayanta sūrayaḥ ||
10.066.03a indro vasubhiḥ pari pātu no gayam ādityair no aditiḥ śarma yacchatu |
10.066.03c rudro rudrebhir devo mṛḻayāti nas tvaṣṭā no gnābhiḥ suvitāya jinvatu ||
10.066.04a aditir dyāvāpṛthivī ṛtam mahad indrāviṣṇū marutaḥ svar bṛhat |
10.066.04c devām̐ ādityām̐ avase havāmahe vasūn rudrān savitāraṁ sudaṁsasam ||
10.066.05a sarasvān dhībhir varuṇo dhṛtavrataḥ pūṣā viṣṇur mahimā vāyur aśvinā |
10.066.05c brahmakṛto amṛtā viśvavedasaḥ śarma no yaṁsan trivarūtham aṁhasaḥ ||
10.066.06a vṛṣā yajño vṛṣaṇaḥ santu yajñiyā vṛṣaṇo devā vṛṣaṇo haviṣkṛtaḥ |
10.066.06c vṛṣaṇā dyāvāpṛthivī ṛtāvarī vṛṣā parjanyo vṛṣaṇo vṛṣastubhaḥ ||
10.066.07a agnīṣomā vṛṣaṇā vājasātaye purupraśastā vṛṣaṇā upa bruve |
10.066.07c yāv ījire vṛṣaṇo devayajyayā tā naḥ śarma trivarūthaṁ vi yaṁsataḥ ||
10.066.08a dhṛtavratāḥ kṣatriyā yajñaniṣkṛto bṛhaddivā adhvarāṇām abhiśriyaḥ |
10.066.08c agnihotāra ṛtasāpo adruho 'po asṛjann anu vṛtratūrye ||
10.066.09a dyāvāpṛthivī janayann abhi vratāpa oṣadhīr vanināni yajñiyā |
10.066.09c antarikṣaṁ svar ā paprur ūtaye vaśaṁ devāsas tanvī ni māmṛjuḥ ||
10.066.10a dhartāro diva ṛbhavaḥ suhastā vātāparjanyā mahiṣasya tanyatoḥ |
10.066.10c āpa oṣadhīḥ pra tirantu no giro bhago rātir vājino yantu me havam ||
10.066.11a samudraḥ sindhū rajo antarikṣam aja ekapāt tanayitnur arṇavaḥ |
10.066.11c ahir budhnyaḥ śṛṇavad vacāṁsi me viśve devāsa uta sūrayo mama ||
10.066.12a syāma vo manavo devavītaye prāñcaṁ no yajñam pra ṇayata sādhuyā |
10.066.12c ādityā rudrā vasavaḥ sudānava imā brahma śasyamānāni jinvata ||
10.066.13a daivyā hotārā prathamā purohita ṛtasya panthām anv emi sādhuyā |
10.066.13c kṣetrasya patim prativeśam īmahe viśvān devām̐ amṛtām̐ aprayucchataḥ ||
10.066.14a vasiṣṭhāsaḥ pitṛvad vācam akrata devām̐ īḻānā ṛṣivat svastaye |
10.066.14c prītā iva jñātayaḥ kāmam etyāsme devāso 'va dhūnutā vasu ||
10.066.15a devān vasiṣṭho amṛtān vavande ye viśvā bhuvanābhi pratasthuḥ |
10.066.15c te no rāsantām urugāyam adya yūyam pāta svastibhiḥ sadā naḥ ||

10.067.01a imāṁ dhiyaṁ saptaśīrṣṇīm pitā na ṛtaprajātām bṛhatīm avindat |
10.067.01c turīyaṁ svij janayad viśvajanyo 'yāsya uktham indrāya śaṁsan ||
10.067.02a ṛtaṁ śaṁsanta ṛju dīdhyānā divas putrāso asurasya vīrāḥ |
10.067.02c vipram padam aṅgiraso dadhānā yajñasya dhāma prathamam mananta ||
10.067.03a haṁsair iva sakhibhir vāvadadbhir aśmanmayāni nahanā vyasyan |
10.067.03c bṛhaspatir abhikanikradad gā uta prāstaud uc ca vidvām̐ agāyat ||
10.067.04a avo dvābhyām para ekayā gā guhā tiṣṭhantīr anṛtasya setau |
10.067.04c bṛhaspatis tamasi jyotir icchann ud usrā ākar vi hi tisra āvaḥ ||
10.067.05a vibhidyā puraṁ śayathem apācīṁ nis trīṇi sākam udadher akṛntat |
10.067.05c bṛhaspatir uṣasaṁ sūryaṁ gām arkaṁ viveda stanayann iva dyauḥ ||
10.067.06a indro valaṁ rakṣitāraṁ dughānāṁ kareṇeva vi cakartā raveṇa |
10.067.06c svedāñjibhir āśiram icchamāno 'rodayat paṇim ā gā amuṣṇāt ||
10.067.07a sa īṁ satyebhiḥ sakhibhiḥ śucadbhir godhāyasaṁ vi dhanasair adardaḥ |
10.067.07c brahmaṇas patir vṛṣabhir varāhair gharmasvedebhir draviṇaṁ vy ānaṭ ||
10.067.08a te satyena manasā gopatiṁ gā iyānāsa iṣaṇayanta dhībhiḥ |
10.067.08c bṛhaspatir mithoavadyapebhir ud usriyā asṛjata svayugbhiḥ ||
10.067.09a taṁ vardhayanto matibhiḥ śivābhiḥ siṁham iva nānadataṁ sadhasthe |
10.067.09c bṛhaspatiṁ vṛṣaṇaṁ śūrasātau bhare-bhare anu madema jiṣṇum ||
10.067.10a yadā vājam asanad viśvarūpam ā dyām arukṣad uttarāṇi sadma |
10.067.10c bṛhaspatiṁ vṛṣaṇaṁ vardhayanto nānā santo bibhrato jyotir āsā ||
10.067.11a satyām āśiṣaṁ kṛṇutā vayodhai kīriṁ cid dhy avatha svebhir evaiḥ |
10.067.11c paścā mṛdho apa bhavantu viśvās tad rodasī śṛṇutaṁ viśvaminve ||
10.067.12a indro mahnā mahato arṇavasya vi mūrdhānam abhinad arbudasya |
10.067.12c ahann ahim ariṇāt sapta sindhūn devair dyāvāpṛthivī prāvataṁ naḥ ||

10.068.01a udapruto na vayo rakṣamāṇā vāvadato abhriyasyeva ghoṣāḥ |
10.068.01c giribhrajo normayo madanto bṛhaspatim abhy arkā anāvan ||
10.068.02a saṁ gobhir āṅgiraso nakṣamāṇo bhaga ived aryamaṇaṁ nināya |
10.068.02c jane mitro na dampatī anakti bṛhaspate vājayāśūm̐r ivājau ||
10.068.03a sādhvaryā atithinīr iṣirāḥ spārhāḥ suvarṇā anavadyarūpāḥ |
10.068.03c bṛhaspatiḥ parvatebhyo vitūryā nir gā ūpe yavam iva sthivibhyaḥ ||
10.068.04a āpruṣāyan madhuna ṛtasya yonim avakṣipann arka ulkām iva dyoḥ |
10.068.04c bṛhaspatir uddharann aśmano gā bhūmyā udneva vi tvacam bibheda ||
10.068.05a apa jyotiṣā tamo antarikṣād udnaḥ śīpālam iva vāta ājat |
10.068.05c bṛhaspatir anumṛśyā valasyābhram iva vāta ā cakra ā gāḥ ||
10.068.06a yadā valasya pīyato jasum bhed bṛhaspatir agnitapobhir arkaiḥ |
10.068.06c dadbhir na jihvā pariviṣṭam ādad āvir nidhīm̐r akṛṇod usriyāṇām ||
10.068.07a bṛhaspatir amata hi tyad āsāṁ nāma svarīṇāṁ sadane guhā yat |
10.068.07c āṇḍeva bhittvā śakunasya garbham ud usriyāḥ parvatasya tmanājat ||
10.068.08a aśnāpinaddham madhu pary apaśyan matsyaṁ na dīna udani kṣiyantam |
10.068.08c niṣ ṭaj jabhāra camasaṁ na vṛkṣād bṛhaspatir viraveṇā vikṛtya ||
10.068.09a soṣām avindat sa svaḥ so agniṁ so arkeṇa vi babādhe tamāṁsi |
10.068.09c bṛhaspatir govapuṣo valasya nir majjānaṁ na parvaṇo jabhāra ||
10.068.10a himeva parṇā muṣitā vanāni bṛhaspatinākṛpayad valo gāḥ |
10.068.10c anānukṛtyam apunaś cakāra yāt sūryāmāsā mitha uccarātaḥ ||
10.068.11a abhi śyāvaṁ na kṛśanebhir aśvaṁ nakṣatrebhiḥ pitaro dyām apiṁśan |
10.068.11c rātryāṁ tamo adadhur jyotir ahan bṛhaspatir bhinad adriṁ vidad gāḥ ||
10.068.12a idam akarma namo abhriyāya yaḥ pūrvīr anv ānonavīti |
10.068.12c bṛhaspatiḥ sa hi gobhiḥ so aśvaiḥ sa vīrebhiḥ sa nṛbhir no vayo dhāt ||

10.069.01a bhadrā agner vadhryaśvasya saṁdṛśo vāmī praṇītiḥ suraṇā upetayaḥ |
10.069.01c yad īṁ sumitrā viśo agra indhate ghṛtenāhuto jarate davidyutat ||
10.069.02a ghṛtam agner vadhryaśvasya vardhanaṁ ghṛtam annaṁ ghṛtam v asya medanam |
10.069.02c ghṛtenāhuta urviyā vi paprathe sūrya iva rocate sarpirāsutiḥ ||
10.069.03a yat te manur yad anīkaṁ sumitraḥ samīdhe agne tad idaṁ navīyaḥ |
10.069.03c sa revac choca sa giro juṣasva sa vājaṁ darṣi sa iha śravo dhāḥ ||
10.069.04a yaṁ tvā pūrvam īḻito vadhryaśvaḥ samīdhe agne sa idaṁ juṣasva |
10.069.04c sa naḥ stipā uta bhavā tanūpā dātraṁ rakṣasva yad idaṁ te asme ||
10.069.05a bhavā dyumnī vādhryaśvota gopā mā tvā tārīd abhimātir janānām |
10.069.05c śūra iva dhṛṣṇuś cyavanaḥ sumitraḥ pra nu vocaṁ vādhryaśvasya nāma ||
10.069.06a sam ajryā parvatyā vasūni dāsā vṛtrāṇy āryā jigetha |
10.069.06c śūra iva dhṛṣṇuś cyavano janānāṁ tvam agne pṛtanāyūm̐r abhi ṣyāḥ ||
10.069.07a dīrghatantur bṛhadukṣāyam agniḥ sahasrastarīḥ śatanītha ṛbhvā |
10.069.07c dyumān dyumatsu nṛbhir mṛjyamānaḥ sumitreṣu dīdayo devayatsu ||
10.069.08a tve dhenuḥ sudughā jātavedo 'saścateva samanā sabardhuk |
10.069.08c tvaṁ nṛbhir dakṣiṇāvadbhir agne sumitrebhir idhyase devayadbhiḥ ||
10.069.09a devāś cit te amṛtā jātavedo mahimānaṁ vādhryaśva pra vocan |
10.069.09c yat sampṛccham mānuṣīr viśa āyan tvaṁ nṛbhir ajayas tvāvṛdhebhiḥ ||
10.069.10a piteva putram abibhar upasthe tvām agne vadhryaśvaḥ saparyan |
10.069.10c juṣāṇo asya samidhaṁ yaviṣṭhota pūrvām̐ avanor vrādhataś cit ||
10.069.11a śaśvad agnir vadhryaśvasya śatrūn nṛbhir jigāya sutasomavadbhiḥ |
10.069.11c samanaṁ cid adahaś citrabhāno 'va vrādhantam abhinad vṛdhaś cit ||
10.069.12a ayam agnir vadhryaśvasya vṛtrahā sanakāt preddho namasopavākyaḥ |
10.069.12c sa no ajāmīm̐r uta vā vijāmīn abhi tiṣṭha śardhato vādhryaśva ||

10.070.01a imām me agne samidhaṁ juṣasveḻas pade prati haryā ghṛtācīm |
10.070.01c varṣman pṛthivyāḥ sudinatve ahnām ūrdhvo bhava sukrato devayajyā ||
10.070.02a ā devānām agrayāveha yātu narāśaṁso viśvarūpebhir aśvaiḥ |
10.070.02c ṛtasya pathā namasā miyedho devebhyo devatamaḥ suṣūdat ||
10.070.03a śaśvattamam īḻate dūtyāya haviṣmanto manuṣyāso agnim |
10.070.03c vahiṣṭhair aśvaiḥ suvṛtā rathenā devān vakṣi ni ṣadeha hotā ||
10.070.04a vi prathatāṁ devajuṣṭaṁ tiraścā dīrghaṁ drāghmā surabhi bhūtv asme |
10.070.04c aheḻatā manasā deva barhir indrajyeṣṭhām̐ uśato yakṣi devān ||
10.070.05a divo vā sānu spṛśatā varīyaḥ pṛthivyā vā mātrayā vi śrayadhvam |
10.070.05c uśatīr dvāro mahinā mahadbhir devaṁ rathaṁ rathayur dhārayadhvam ||
10.070.06a devī divo duhitarā suśilpe uṣāsānaktā sadatāṁ ni yonau |
10.070.06c ā vāṁ devāsa uśatī uśanta urau sīdantu subhage upasthe ||
10.070.07a ūrdhvo grāvā bṛhad agniḥ samiddhaḥ priyā dhāmāny aditer upasthe |
10.070.07c purohitāv ṛtvijā yajñe asmin viduṣṭarā draviṇam ā yajethām ||
10.070.08a tisro devīr barhir idaṁ varīya ā sīdata cakṛmā vaḥ syonam |
10.070.08c manuṣvad yajñaṁ sudhitā havīṁṣīḻā devī ghṛtapadī juṣanta ||
10.070.09a deva tvaṣṭar yad dha cārutvam ānaḍ yad aṅgirasām abhavaḥ sacābhūḥ |
10.070.09c sa devānām pātha upa pra vidvām̐ uśan yakṣi draviṇodaḥ suratnaḥ ||
10.070.10a vanaspate raśanayā niyūyā devānām pātha upa vakṣi vidvān |
10.070.10c svadāti devaḥ kṛṇavad dhavīṁṣy avatāṁ dyāvāpṛthivī havam me ||
10.070.11a āgne vaha varuṇam iṣṭaye na indraṁ divo maruto antarikṣāt |
10.070.11c sīdantu barhir viśva ā yajatrāḥ svāhā devā amṛtā mādayantām ||

10.071.01a bṛhaspate prathamaṁ vāco agraṁ yat prairata nāmadheyaṁ dadhānāḥ |
10.071.01c yad eṣāṁ śreṣṭhaṁ yad aripram āsīt preṇā tad eṣāṁ nihitaṁ guhāviḥ ||
10.071.02a saktum iva titaünā punanto yatra dhīrā manasā vācam akrata |
10.071.02c atrā sakhāyaḥ sakhyāni jānate bhadraiṣāṁ lakṣmīr nihitādhi vāci ||
10.071.03a yajñena vācaḥ padavīyam āyan tām anv avindann ṛṣiṣu praviṣṭām |
10.071.03c tām ābhṛtyā vy adadhuḥ purutrā tāṁ sapta rebhā abhi saṁ navante ||
10.071.04a uta tvaḥ paśyan na dadarśa vācam uta tvaḥ śṛṇvan na śṛṇoty enām |
10.071.04c uto tvasmai tanvaṁ vi sasre jāyeva patya uśatī suvāsāḥ ||
10.071.05a uta tvaṁ sakhye sthirapītam āhur nainaṁ hinvanty api vājineṣu |
10.071.05c adhenvā carati māyayaiṣa vācaṁ śuśruvām̐ aphalām apuṣpām ||
10.071.06a yas tityāja sacividaṁ sakhāyaṁ na tasya vācy api bhāgo asti |
10.071.06c yad īṁ śṛṇoty alakaṁ śṛṇoti nahi praveda sukṛtasya panthām ||
10.071.07a akṣaṇvantaḥ karṇavantaḥ sakhāyo manojaveṣv asamā babhūvuḥ |
10.071.07c ādaghnāsa upakakṣāsa u tve hradā iva snātvā u tve dadṛśre ||
10.071.08a hṛdā taṣṭeṣu manaso javeṣu yad brāhmaṇāḥ saṁyajante sakhāyaḥ |
10.071.08c atrāha tvaṁ vi jahur vedyābhir ohabrahmāṇo vi caranty u tve ||
10.071.09a ime ye nārvāṅ na paraś caranti na brāhmaṇāso na sutekarāsaḥ |
10.071.09c ta ete vācam abhipadya pāpayā sirīs tantraṁ tanvate aprajajñayaḥ ||
10.071.10a sarve nandanti yaśasāgatena sabhāsāhena sakhyā sakhāyaḥ |
10.071.10c kilbiṣaspṛt pituṣaṇir hy eṣām araṁ hito bhavati vājināya ||
10.071.11a ṛcāṁ tvaḥ poṣam āste pupuṣvān gāyatraṁ tvo gāyati śakvarīṣu |
10.071.11c brahmā tvo vadati jātavidyāṁ yajñasya mātrāṁ vi mimīta u tvaḥ ||

10.072.01a devānāṁ nu vayaṁ jānā pra vocāma vipanyayā |
10.072.01c uktheṣu śasyamāneṣu yaḥ paśyād uttare yuge ||
10.072.02a brahmaṇas patir etā saṁ karmāra ivādhamat |
10.072.02c devānām pūrvye yuge 'sataḥ sad ajāyata ||
10.072.03a devānāṁ yuge prathame 'sataḥ sad ajāyata |
10.072.03c tad āśā anv ajāyanta tad uttānapadas pari ||
10.072.04a bhūr jajña uttānapado bhuva āśā ajāyanta |
10.072.04c aditer dakṣo ajāyata dakṣād v aditiḥ pari ||
10.072.05a aditir hy ajaniṣṭa dakṣa yā duhitā tava |
10.072.05c tāṁ devā anv ajāyanta bhadrā amṛtabandhavaḥ ||
10.072.06a yad devā adaḥ salile susaṁrabdhā atiṣṭhata |
10.072.06c atrā vo nṛtyatām iva tīvro reṇur apāyata ||
10.072.07a yad devā yatayo yathā bhuvanāny apinvata |
10.072.07c atrā samudra ā gūḻham ā sūryam ajabhartana ||
10.072.08a aṣṭau putrāso aditer ye jātās tanvas pari |
10.072.08c devām̐ upa prait saptabhiḥ parā mārtāṇḍam āsyat ||
10.072.09a saptabhiḥ putrair aditir upa prait pūrvyaṁ yugam |
10.072.09c prajāyai mṛtyave tvat punar mārtāṇḍam ābharat ||

10.073.01a janiṣṭhā ugraḥ sahase turāya mandra ojiṣṭho bahulābhimānaḥ |
10.073.01c avardhann indram marutaś cid atra mātā yad vīraṁ dadhanad dhaniṣṭhā ||
10.073.02a druho niṣattā pṛśanī cid evaiḥ purū śaṁsena vāvṛdhuṣ ṭa indram |
10.073.02c abhīvṛteva tā mahāpadena dhvāntāt prapitvād ud aranta garbhāḥ ||
10.073.03a ṛṣvā te pādā pra yaj jigāsy avardhan vājā uta ye cid atra |
10.073.03c tvam indra sālāvṛkān sahasram āsan dadhiṣe aśvinā vavṛtyāḥ ||
10.073.04a samanā tūrṇir upa yāsi yajñam ā nāsatyā sakhyāya vakṣi |
10.073.04c vasāvyām indra dhārayaḥ sahasrāśvinā śūra dadatur maghāni ||
10.073.05a mandamāna ṛtād adhi prajāyai sakhibhir indra iṣirebhir artham |
10.073.05c ābhir hi māyā upa dasyum āgān mihaḥ pra tamrā avapat tamāṁsi ||
10.073.06a sanāmānā cid dhvasayo ny asmā avāhann indra uṣaso yathānaḥ |
10.073.06c ṛṣvair agacchaḥ sakhibhir nikāmaiḥ sākam pratiṣṭhā hṛdyā jaghantha ||
10.073.07a tvaṁ jaghantha namucim makhasyuṁ dāsaṁ kṛṇvāna ṛṣaye vimāyam |
10.073.07c tvaṁ cakartha manave syonān patho devatrāñjaseva yānān ||
10.073.08a tvam etāni papriṣe vi nāmeśāna indra dadhiṣe gabhastau |
10.073.08c anu tvā devāḥ śavasā madanty uparibudhnān vaninaś cakartha ||
10.073.09a cakraṁ yad asyāpsv ā niṣattam uto tad asmai madhv ic cacchadyāt |
10.073.09c pṛthivyām atiṣitaṁ yad ūdhaḥ payo goṣv adadhā oṣadhīṣu ||
10.073.10a aśvād iyāyeti yad vadanty ojaso jātam uta manya enam |
10.073.10c manyor iyāya harmyeṣu tasthau yataḥ prajajña indro asya veda ||
10.073.11a vayaḥ suparṇā upa sedur indram priyamedhā ṛṣayo nādhamānāḥ |
10.073.11c apa dhvāntam ūrṇuhi pūrdhi cakṣur mumugdhy asmān nidhayeva baddhān ||

10.074.01a vasūnāṁ vā carkṛṣa iyakṣan dhiyā vā yajñair vā rodasyoḥ |
10.074.01c arvanto vā ye rayimantaḥ sātau vanuṁ vā ye suśruṇaṁ suśruto dhuḥ ||
10.074.02a hava eṣām asuro nakṣata dyāṁ śravasyatā manasā niṁsata kṣām |
10.074.02c cakṣāṇā yatra suvitāya devā dyaur na vārebhiḥ kṛṇavanta svaiḥ ||
10.074.03a iyam eṣām amṛtānāṁ gīḥ sarvatātā ye kṛpaṇanta ratnam |
10.074.03c dhiyaṁ ca yajñaṁ ca sādhantas te no dhāntu vasavyam asāmi ||
10.074.04a ā tat ta indrāyavaḥ panantābhi ya ūrvaṁ gomantaṁ titṛtsān |
10.074.04c sakṛtsvaṁ ye puruputrām mahīṁ sahasradhārām bṛhatīṁ dudukṣan ||
10.074.05a śacīva indram avase kṛṇudhvam anānataṁ damayantam pṛtanyūn |
10.074.05c ṛbhukṣaṇam maghavānaṁ suvṛktim bhartā yo vajraṁ naryam purukṣuḥ ||
10.074.06a yad vāvāna purutamam purāṣāḻ ā vṛtrahendro nāmāny aprāḥ |
10.074.06c aceti prāsahas patis tuviṣmān yad īm uśmasi kartave karat tat ||

10.075.01a pra su va āpo mahimānam uttamaṁ kārur vocāti sadane vivasvataḥ |
10.075.01c pra sapta-sapta tredhā hi cakramuḥ pra sṛtvarīṇām ati sindhur ojasā ||
10.075.02a pra te 'radad varuṇo yātave pathaḥ sindho yad vājām̐ abhy adravas tvam |
10.075.02c bhūmyā adhi pravatā yāsi sānunā yad eṣām agraṁ jagatām irajyasi ||
10.075.03a divi svano yatate bhūmyopary anantaṁ śuṣmam ud iyarti bhānunā |
10.075.03c abhrād iva pra stanayanti vṛṣṭayaḥ sindhur yad eti vṛṣabho na roruvat ||
10.075.04a abhi tvā sindho śiśum in na mātaro vāśrā arṣanti payaseva dhenavaḥ |
10.075.04c rājeva yudhvā nayasi tvam it sicau yad āsām agram pravatām inakṣasi ||
10.075.05a imam me gaṅge yamune sarasvati śutudri stomaṁ sacatā paruṣṇy ā |
10.075.05c asiknyā marudvṛdhe vitastayārjīkīye śṛṇuhy ā suṣomayā ||
10.075.06a tṛṣṭāmayā prathamaṁ yātave sajūḥ susartvā rasayā śvetyā tyā |
10.075.06c tvaṁ sindho kubhayā gomatīṁ krumum mehatnvā sarathaṁ yābhir īyase ||
10.075.07a ṛjīty enī ruśatī mahitvā pari jrayāṁsi bharate rajāṁsi |
10.075.07c adabdhā sindhur apasām apastamāśvā na citrā vapuṣīva darśatā ||
10.075.08a svaśvā sindhuḥ surathā suvāsā hiraṇyayī sukṛtā vājinīvatī |
10.075.08c ūrṇāvatī yuvatiḥ sīlamāvaty utādhi vaste subhagā madhuvṛdham ||
10.075.09a sukhaṁ rathaṁ yuyuje sindhur aśvinaṁ tena vājaṁ saniṣad asminn ājau |
10.075.09c mahān hy asya mahimā panasyate 'dabdhasya svayaśaso virapśinaḥ ||

10.076.01a ā va ṛñjasa ūrjāṁ vyuṣṭiṣv indram maruto rodasī anaktana |
10.076.01c ubhe yathā no ahanī sacābhuvā sadaḥ-sado varivasyāta udbhidā ||
10.076.02a tad u śreṣṭhaṁ savanaṁ sunotanātyo na hastayato adriḥ sotari |
10.076.02c vidad dhy aryo abhibhūti pauṁsyam maho rāye cit tarute yad arvataḥ ||
10.076.03a tad id dhy asya savanaṁ viver apo yathā purā manave gātum aśret |
10.076.03c goarṇasi tvāṣṭre aśvanirṇiji prem adhvareṣv adhvarām̐ aśiśrayuḥ ||
10.076.04a apa hata rakṣaso bhaṅgurāvataḥ skabhāyata nirṛtiṁ sedhatāmatim |
10.076.04c ā no rayiṁ sarvavīraṁ sunotana devāvyam bharata ślokam adrayaḥ ||
10.076.05a divaś cid ā vo 'mavattarebhyo vibhvanā cid āśvapastarebhyaḥ |
10.076.05c vāyoś cid ā somarabhastarebhyo 'gneś cid arca pitukṛttarebhyaḥ ||
10.076.06a bhurantu no yaśasaḥ sotv andhaso grāvāṇo vācā divitā divitmatā |
10.076.06c naro yatra duhate kāmyam madhv āghoṣayanto abhito mithasturaḥ ||
10.076.07a sunvanti somaṁ rathirāso adrayo nir asya rasaṁ gaviṣo duhanti te |
10.076.07c duhanty ūdhar upasecanāya kaṁ naro havyā na marjayanta āsabhiḥ ||
10.076.08a ete naraḥ svapaso abhūtana ya indrāya sunutha somam adrayaḥ |
10.076.08c vāmaṁ-vāmaṁ vo divyāya dhāmne vasu-vasu vaḥ pārthivāya sunvate ||

10.077.01a abhrapruṣo na vācā pruṣā vasu haviṣmanto na yajñā vijānuṣaḥ |
10.077.01c sumārutaṁ na brahmāṇam arhase gaṇam astoṣy eṣāṁ na śobhase ||
10.077.02a śriye maryāso añjīm̐r akṛṇvata sumārutaṁ na pūrvīr ati kṣapaḥ |
10.077.02c divas putrāsa etā na yetira ādityāsas te akrā na vāvṛdhuḥ ||
10.077.03a pra ye divaḥ pṛthivyā na barhaṇā tmanā riricre abhrān na sūryaḥ |
10.077.03c pājasvanto na vīrāḥ panasyavo riśādaso na maryā abhidyavaḥ ||
10.077.04a yuṣmākam budhne apāṁ na yāmani vithuryati na mahī śratharyati |
10.077.04c viśvapsur yajño arvāg ayaṁ su vaḥ prayasvanto na satrāca ā gata ||
10.077.05a yūyaṁ dhūrṣu prayujo na raśmibhir jyotiṣmanto na bhāsā vyuṣṭiṣu |
10.077.05c śyenāso na svayaśaso riśādasaḥ pravāso na prasitāsaḥ paripruṣaḥ ||
10.077.06a pra yad vahadhve marutaḥ parākād yūyam mahaḥ saṁvaraṇasya vasvaḥ |
10.077.06c vidānāso vasavo rādhyasyārāc cid dveṣaḥ sanutar yuyota ||
10.077.07a ya udṛci yajñe adhvareṣṭhā marudbhyo na mānuṣo dadāśat |
10.077.07c revat sa vayo dadhate suvīraṁ sa devānām api gopīthe astu ||
10.077.08a te hi yajñeṣu yajñiyāsa ūmā ādityena nāmnā śambhaviṣṭhāḥ |
10.077.08c te no 'vantu rathatūr manīṣām mahaś ca yāmann adhvare cakānāḥ ||

10.078.01a viprāso na manmabhiḥ svādhyo devāvyo na yajñaiḥ svapnasaḥ |
10.078.01c rājāno na citrāḥ susaṁdṛśaḥ kṣitīnāṁ na maryā arepasaḥ ||
10.078.02a agnir na ye bhrājasā rukmavakṣaso vātāso na svayujaḥ sadyaūtayaḥ |
10.078.02c prajñātāro na jyeṣṭhāḥ sunītayaḥ suśarmāṇo na somā ṛtaṁ yate ||
10.078.03a vātāso na ye dhunayo jigatnavo 'gnīnāṁ na jihvā virokiṇaḥ |
10.078.03c varmaṇvanto na yodhāḥ śimīvantaḥ pitṝṇāṁ na śaṁsāḥ surātayaḥ ||
10.078.04a rathānāṁ na ye 'rāḥ sanābhayo jigīvāṁso na śūrā abhidyavaḥ |
10.078.04c vareyavo na maryā ghṛtapruṣo 'bhisvartāro arkaṁ na suṣṭubhaḥ ||
10.078.05a aśvāso na ye jyeṣṭhāsa āśavo didhiṣavo na rathyaḥ sudānavaḥ |
10.078.05c āpo na nimnair udabhir jigatnavo viśvarūpā aṅgiraso na sāmabhiḥ ||
10.078.06a grāvāṇo na sūrayaḥ sindhumātara ādardirāso adrayo na viśvahā |
10.078.06c śiśūlā na krīḻayaḥ sumātaro mahāgrāmo na yāmann uta tviṣā ||
10.078.07a uṣasāṁ na ketavo 'dhvaraśriyaḥ śubhaṁyavo nāñjibhir vy aśvitan |
10.078.07c sindhavo na yayiyo bhrājadṛṣṭayaḥ parāvato na yojanāni mamire ||
10.078.08a subhāgān no devāḥ kṛṇutā suratnān asmān stotṝn maruto vāvṛdhānāḥ |
10.078.08c adhi stotrasya sakhyasya gāta sanād dhi vo ratnadheyāni santi ||

10.079.01a apaśyam asya mahato mahitvam amartyasya martyāsu vikṣu |
10.079.01c nānā hanū vibhṛte sam bharete asinvatī bapsatī bhūry attaḥ ||
10.079.02a guhā śiro nihitam ṛdhag akṣī asinvann atti jihvayā vanāni |
10.079.02c atrāṇy asmai paḍbhiḥ sam bharanty uttānahastā namasādhi vikṣu ||
10.079.03a pra mātuḥ prataraṁ guhyam icchan kumāro na vīrudhaḥ sarpad urvīḥ |
10.079.03c sasaṁ na pakvam avidac chucantaṁ ririhvāṁsaṁ ripa upasthe antaḥ ||
10.079.04a tad vām ṛtaṁ rodasī pra bravīmi jāyamāno mātarā garbho atti |
10.079.04c nāhaṁ devasya martyaś ciketāgnir aṅga vicetāḥ sa pracetāḥ ||
10.079.05a yo asmā annaṁ tṛṣv ādadhāty ājyair ghṛtair juhoti puṣyati |
10.079.05c tasmai sahasram akṣabhir vi cakṣe 'gne viśvataḥ pratyaṅṅ asi tvam ||
10.079.06a kiṁ deveṣu tyaja enaś cakarthāgne pṛcchāmi nu tvām avidvān |
10.079.06c akrīḻan krīḻan harir attave 'dan vi parvaśaś cakarta gām ivāsiḥ ||
10.079.07a viṣūco aśvān yuyuje vanejā ṛjītibhī raśanābhir gṛbhītān |
10.079.07c cakṣade mitro vasubhiḥ sujātaḥ sam ānṛdhe parvabhir vāvṛdhānaḥ ||

10.080.01a agniḥ saptiṁ vājambharaṁ dadāty agnir vīraṁ śrutyaṁ karmaniḥṣṭhām |
10.080.01c agnī rodasī vi carat samañjann agnir nārīṁ vīrakukṣim puraṁdhim ||
10.080.02a agner apnasaḥ samid astu bhadrāgnir mahī rodasī ā viveśa |
10.080.02c agnir ekaṁ codayat samatsv agnir vṛtrāṇi dayate purūṇi ||
10.080.03a agnir ha tyaṁ jarataḥ karṇam āvāgnir adbhyo nir adahaj jarūtham |
10.080.03c agnir atriṁ gharma uruṣyad antar agnir nṛmedham prajayāsṛjat sam ||
10.080.04a agnir dād draviṇaṁ vīrapeśā agnir ṛṣiṁ yaḥ sahasrā sanoti |
10.080.04c agnir divi havyam ā tatānāgner dhāmāni vibhṛtā purutrā ||
10.080.05a agnim ukthair ṛṣayo vi hvayante 'gniṁ naro yāmani bādhitāsaḥ |
10.080.05c agniṁ vayo antarikṣe patanto 'gniḥ sahasrā pari yāti gonām ||
10.080.06a agniṁ viśa īḻate mānuṣīr yā agnim manuṣo nahuṣo vi jātāḥ |
10.080.06c agnir gāndharvīm pathyām ṛtasyāgner gavyūtir ghṛta ā niṣattā ||
10.080.07a agnaye brahma ṛbhavas tatakṣur agnim mahām avocāmā suvṛktim |
10.080.07c agne prāva jaritāraṁ yaviṣṭhāgne mahi draviṇam ā yajasva ||

10.081.01a ya imā viśvā bhuvanāni juhvad ṛṣir hotā ny asīdat pitā naḥ |
10.081.01c sa āśiṣā draviṇam icchamānaḥ prathamacchad avarām̐ ā viveśa ||
10.081.02a kiṁ svid āsīd adhiṣṭhānam ārambhaṇaṁ katamat svit kathāsīt |
10.081.02c yato bhūmiṁ janayan viśvakarmā vi dyām aurṇon mahinā viśvacakṣāḥ ||
10.081.03a viśvataścakṣur uta viśvatomukho viśvatobāhur uta viśvataspāt |
10.081.03c sam bāhubhyāṁ dhamati sam patatrair dyāvābhūmī janayan deva ekaḥ ||
10.081.04a kiṁ svid vanaṁ ka u sa vṛkṣa āsa yato dyāvāpṛthivī niṣṭatakṣuḥ |
10.081.04c manīṣiṇo manasā pṛcchated u tad yad adhyatiṣṭhad bhuvanāni dhārayan ||
10.081.05a yā te dhāmāni paramāṇi yāvamā yā madhyamā viśvakarmann utemā |
10.081.05c śikṣā sakhibhyo haviṣi svadhāvaḥ svayaṁ yajasva tanvaṁ vṛdhānaḥ ||
10.081.06a viśvakarman haviṣā vāvṛdhānaḥ svayaṁ yajasva pṛthivīm uta dyām |
10.081.06c muhyantv anye abhito janāsa ihāsmākam maghavā sūrir astu ||
10.081.07a vācas patiṁ viśvakarmāṇam ūtaye manojuvaṁ vāje adyā huvema |
10.081.07c sa no viśvāni havanāni joṣad viśvaśambhūr avase sādhukarmā ||

10.082.01a cakṣuṣaḥ pitā manasā hi dhīro ghṛtam ene ajanan nannamāne |
10.082.01c yaded antā adadṛhanta pūrva ād id dyāvāpṛthivī aprathetām ||
10.082.02a viśvakarmā vimanā ād vihāyā dhātā vidhātā paramota saṁdṛk |
10.082.02c teṣām iṣṭāni sam iṣā madanti yatrā saptaṛṣīn para ekam āhuḥ ||
10.082.03a yo naḥ pitā janitā yo vidhātā dhāmāni veda bhuvanāni viśvā |
10.082.03c yo devānāṁ nāmadhā eka eva taṁ sampraśnam bhuvanā yanty anyā ||
10.082.04a ta āyajanta draviṇaṁ sam asmā ṛṣayaḥ pūrve jaritāro na bhūnā |
10.082.04c asūrte sūrte rajasi niṣatte ye bhūtāni samakṛṇvann imāni ||
10.082.05a paro divā para enā pṛthivyā paro devebhir asurair yad asti |
10.082.05c kaṁ svid garbham prathamaṁ dadhra āpo yatra devāḥ samapaśyanta viśve ||
10.082.06a tam id garbham prathamaṁ dadhra āpo yatra devāḥ samagacchanta viśve |
10.082.06c ajasya nābhāv adhy ekam arpitaṁ yasmin viśvāni bhuvanāni tasthuḥ ||
10.082.07a na taṁ vidātha ya imā jajānānyad yuṣmākam antaram babhūva |
10.082.07c nīhāreṇa prāvṛtā jalpyā cāsutṛpa ukthaśāsaś caranti ||

10.083.01a yas te manyo 'vidhad vajra sāyaka saha ojaḥ puṣyati viśvam ānuṣak |
10.083.01c sāhyāma dāsam āryaṁ tvayā yujā sahaskṛtena sahasā sahasvatā ||
10.083.02a manyur indro manyur evāsa devo manyur hotā varuṇo jātavedāḥ |
10.083.02c manyuṁ viśa īḻate mānuṣīr yāḥ pāhi no manyo tapasā sajoṣāḥ ||
10.083.03a abhīhi manyo tavasas tavīyān tapasā yujā vi jahi śatrūn |
10.083.03c amitrahā vṛtrahā dasyuhā ca viśvā vasūny ā bharā tvaṁ naḥ ||
10.083.04a tvaṁ hi manyo abhibhūtyojāḥ svayambhūr bhāmo abhimātiṣāhaḥ |
10.083.04c viśvacarṣaṇiḥ sahuriḥ sahāvān asmāsv ojaḥ pṛtanāsu dhehi ||
10.083.05a abhāgaḥ sann apa pareto asmi tava kratvā taviṣasya pracetaḥ |
10.083.05c taṁ tvā manyo akratur jihīḻāhaṁ svā tanūr baladeyāya mehi ||
10.083.06a ayaṁ te asmy upa mehy arvāṅ pratīcīnaḥ sahure viśvadhāyaḥ |
10.083.06c manyo vajrinn abhi mām ā vavṛtsva hanāva dasyūm̐r uta bodhy āpeḥ ||
10.083.07a abhi prehi dakṣiṇato bhavā me 'dhā vṛtrāṇi jaṅghanāva bhūri |
10.083.07c juhomi te dharuṇam madhvo agram ubhā upāṁśu prathamā pibāva ||

10.084.01a tvayā manyo saratham ārujanto harṣamāṇāso dhṛṣitā marutvaḥ |
10.084.01c tigmeṣava āyudhā saṁśiśānā abhi pra yantu naro agnirūpāḥ ||
10.084.02a agnir iva manyo tviṣitaḥ sahasva senānīr naḥ sahure hūta edhi |
10.084.02c hatvāya śatrūn vi bhajasva veda ojo mimāno vi mṛdho nudasva ||
10.084.03a sahasva manyo abhimātim asme rujan mṛṇan pramṛṇan prehi śatrūn |
10.084.03c ugraṁ te pājo nanv ā rurudhre vaśī vaśaṁ nayasa ekaja tvam ||
10.084.04a eko bahūnām asi manyav īḻito viśaṁ-viśaṁ yudhaye saṁ śiśādhi |
10.084.04c akṛttaruk tvayā yujā vayaṁ dyumantaṁ ghoṣaṁ vijayāya kṛṇmahe ||
10.084.05a vijeṣakṛd indra ivānavabravo 'smākam manyo adhipā bhaveha |
10.084.05c priyaṁ te nāma sahure gṛṇīmasi vidmā tam utsaṁ yata ābabhūtha ||
10.084.06a ābhūtyā sahajā vajra sāyaka saho bibharṣy abhibhūta uttaram |
10.084.06c kratvā no manyo saha medy edhi mahādhanasya puruhūta saṁsṛji ||
10.084.07a saṁsṛṣṭaṁ dhanam ubhayaṁ samākṛtam asmabhyaṁ dattāṁ varuṇaś ca manyuḥ |
10.084.07c bhiyaṁ dadhānā hṛdayeṣu śatravaḥ parājitāso apa ni layantām ||

10.085.01a satyenottabhitā bhūmiḥ sūryeṇottabhitā dyauḥ |
10.085.01c ṛtenādityās tiṣṭhanti divi somo adhi śritaḥ ||
10.085.02a somenādityā balinaḥ somena pṛthivī mahī |
10.085.02c atho nakṣatrāṇām eṣām upasthe soma āhitaḥ ||
10.085.03a somam manyate papivān yat sampiṁṣanty oṣadhim |
10.085.03c somaṁ yam brahmāṇo vidur na tasyāśnāti kaś cana ||
10.085.04a ācchadvidhānair gupito bārhataiḥ soma rakṣitaḥ |
10.085.04c grāvṇām ic chṛṇvan tiṣṭhasi na te aśnāti pārthivaḥ ||
10.085.05a yat tvā deva prapibanti tata ā pyāyase punaḥ |
10.085.05c vāyuḥ somasya rakṣitā samānām māsa ākṛtiḥ ||
10.085.06a raibhy āsīd anudeyī nārāśaṁsī nyocanī |
10.085.06c sūryāyā bhadram id vāso gāthayaiti pariṣkṛtam ||
10.085.07a cittir ā upabarhaṇaṁ cakṣur ā abhyañjanam |
10.085.07c dyaur bhūmiḥ kośa āsīd yad ayāt sūryā patim ||
10.085.08a stomā āsan pratidhayaḥ kurīraṁ chanda opaśaḥ |
10.085.08c sūryāyā aśvinā varāgnir āsīt purogavaḥ ||
10.085.09a somo vadhūyur abhavad aśvināstām ubhā varā |
10.085.09c sūryāṁ yat patye śaṁsantīm manasā savitādadāt ||
10.085.10a mano asyā ana āsīd dyaur āsīd uta cchadiḥ |
10.085.10c śukrāv anaḍvāhāv āstāṁ yad ayāt sūryā gṛham ||
10.085.11a ṛksāmābhyām abhihitau gāvau te sāmanāv itaḥ |
10.085.11c śrotraṁ te cakre āstāṁ divi panthāś carācāraḥ ||
10.085.12a śucī te cakre yātyā vyāno akṣa āhataḥ |
10.085.12c ano manasmayaṁ sūryārohat prayatī patim ||
10.085.13a sūryāyā vahatuḥ prāgāt savitā yam avāsṛjat |
10.085.13c aghāsu hanyante gāvo 'rjunyoḥ pary uhyate ||
10.085.14a yad aśvinā pṛcchamānāv ayātaṁ tricakreṇa vahatuṁ sūryāyāḥ |
10.085.14c viśve devā anu tad vām ajānan putraḥ pitarāv avṛṇīta pūṣā ||
10.085.15a yad ayātaṁ śubhas patī vareyaṁ sūryām upa |
10.085.15c kvaikaṁ cakraṁ vām āsīt kva deṣṭrāya tasthathuḥ ||
10.085.16a dve te cakre sūrye brahmāṇa ṛtuthā viduḥ |
10.085.16c athaikaṁ cakraṁ yad guhā tad addhātaya id viduḥ ||
10.085.17a sūryāyai devebhyo mitrāya varuṇāya ca |
10.085.17c ye bhūtasya pracetasa idaṁ tebhyo 'karaṁ namaḥ ||
10.085.18a pūrvāparaṁ carato māyayaitau śiśū krīḻantau pari yāto adhvaram |
10.085.18c viśvāny anyo bhuvanābhicaṣṭa ṛtūm̐r anyo vidadhaj jāyate punaḥ ||
10.085.19a navo-navo bhavati jāyamāno 'hnāṁ ketur uṣasām ety agram |
10.085.19c bhāgaṁ devebhyo vi dadhāty āyan pra candramās tirate dīrgham āyuḥ ||
10.085.20a sukiṁśukaṁ śalmaliṁ viśvarūpaṁ hiraṇyavarṇaṁ suvṛtaṁ sucakram |
10.085.20c ā roha sūrye amṛtasya lokaṁ syonam patye vahatuṁ kṛṇuṣva ||
10.085.21a ud īrṣvātaḥ pativatī hy eṣā viśvāvasuṁ namasā gīrbhir īḻe |
10.085.21c anyām iccha pitṛṣadaṁ vyaktāṁ sa te bhāgo januṣā tasya viddhi ||
10.085.22a ud īrṣvāto viśvāvaso namaseḻā mahe tvā |
10.085.22c anyām iccha prapharvyaṁ saṁ jāyām patyā sṛja ||
10.085.23a anṛkṣarā ṛjavaḥ santu panthā yebhiḥ sakhāyo yanti no vareyam |
10.085.23c sam aryamā sam bhago no ninīyāt saṁ jāspatyaṁ suyamam astu devāḥ ||
10.085.24a pra tvā muñcāmi varuṇasya pāśād yena tvābadhnāt savitā suśevaḥ |
10.085.24c ṛtasya yonau sukṛtasya loke 'riṣṭāṁ tvā saha patyā dadhāmi ||
10.085.25a preto muñcāmi nāmutaḥ subaddhām amutas karam |
10.085.25c yatheyam indra mīḍhvaḥ suputrā subhagāsati ||
10.085.26a pūṣā tveto nayatu hastagṛhyāśvinā tvā pra vahatāṁ rathena |
10.085.26c gṛhān gaccha gṛhapatnī yathāso vaśinī tvaṁ vidatham ā vadāsi ||
10.085.27a iha priyam prajayā te sam ṛdhyatām asmin gṛhe gārhapatyāya jāgṛhi |
10.085.27c enā patyā tanvaṁ saṁ sṛjasvādhā jivrī vidatham ā vadāthaḥ ||
10.085.28a nīlalohitam bhavati kṛtyāsaktir vy ajyate |
10.085.28c edhante asyā jñātayaḥ patir bandheṣu badhyate ||
10.085.29a parā dehi śāmulyam brahmabhyo vi bhajā vasu |
10.085.29c kṛtyaiṣā padvatī bhūtvy ā jāyā viśate patim ||
10.085.30a aśrīrā tanūr bhavati ruśatī pāpayāmuyā |
10.085.30c patir yad vadhvo vāsasā svam aṅgam abhidhitsate ||
10.085.31a ye vadhvaś candraṁ vahatuṁ yakṣmā yanti janād anu |
10.085.31c punas tān yajñiyā devā nayantu yata āgatāḥ ||
10.085.32a mā vidan paripanthino ya āsīdanti dampatī |
10.085.32c sugebhir durgam atītām apa drāntv arātayaḥ ||
10.085.33a sumaṅgalīr iyaṁ vadhūr imāṁ sameta paśyata |
10.085.33c saubhāgyam asyai dattvāyāthāstaṁ vi paretana ||
10.085.34a tṛṣṭam etat kaṭukam etad apāṣṭhavad viṣavan naitad attave |
10.085.34c sūryāṁ yo brahmā vidyāt sa id vādhūyam arhati ||
10.085.35a āśasanaṁ viśasanam atho adhivikartanam |
10.085.35c sūryāyāḥ paśya rūpāṇi tāni brahmā tu śundhati ||
10.085.36a gṛbhṇāmi te saubhagatvāya hastam mayā patyā jaradaṣṭir yathāsaḥ |
10.085.36c bhago aryamā savitā puraṁdhir mahyaṁ tvādur gārhapatyāya devāḥ ||
10.085.37a tām pūṣañ chivatamām erayasva yasyām bījam manuṣyā vapanti |
10.085.37c yā na ūrū uśatī viśrayāte yasyām uśantaḥ praharāma śepam ||
10.085.38a tubhyam agre pary avahan sūryāṁ vahatunā saha |
10.085.38c punaḥ patibhyo jāyāṁ dā agne prajayā saha ||
10.085.39a punaḥ patnīm agnir adād āyuṣā saha varcasā |
10.085.39c dīrghāyur asyā yaḥ patir jīvāti śaradaḥ śatam ||
10.085.40a somaḥ prathamo vivide gandharvo vivida uttaraḥ |
10.085.40c tṛtīyo agniṣ ṭe patis turīyas te manuṣyajāḥ ||
10.085.41a somo dadad gandharvāya gandharvo dadad agnaye |
10.085.41c rayiṁ ca putrām̐ś cādād agnir mahyam atho imām ||
10.085.42a ihaiva stam mā vi yauṣṭaṁ viśvam āyur vy aśnutam |
10.085.42c krīḻantau putrair naptṛbhir modamānau sve gṛhe ||
10.085.43a ā naḥ prajāṁ janayatu prajāpatir ājarasāya sam anaktv aryamā |
10.085.43c adurmaṅgalīḥ patilokam ā viśa śaṁ no bhava dvipade śaṁ catuṣpade ||
10.085.44a aghoracakṣur apatighny edhi śivā paśubhyaḥ sumanāḥ suvarcāḥ |
10.085.44c vīrasūr devakāmā syonā śaṁ no bhava dvipade śaṁ catuṣpade ||
10.085.45a imāṁ tvam indra mīḍhvaḥ suputrāṁ subhagāṁ kṛṇu |
10.085.45c daśāsyām putrān ā dhehi patim ekādaśaṁ kṛdhi ||
10.085.46a samrājñī śvaśure bhava samrājñī śvaśrvām bhava |
10.085.46c nanāndari samrājñī bhava samrājñī adhi devṛṣu ||
10.085.47a sam añjantu viśve devāḥ sam āpo hṛdayāni nau |
10.085.47c sam mātariśvā saṁ dhātā sam u deṣṭrī dadhātu nau ||

10.086.01a vi hi sotor asṛkṣata nendraṁ devam amaṁsata |
10.086.01c yatrāmadad vṛṣākapir aryaḥ puṣṭeṣu matsakhā viśvasmād indra uttaraḥ ||
10.086.02a parā hīndra dhāvasi vṛṣākaper ati vyathiḥ |
10.086.02c no aha pra vindasy anyatra somapītaye viśvasmād indra uttaraḥ ||
10.086.03a kim ayaṁ tvāṁ vṛṣākapiś cakāra harito mṛgaḥ |
10.086.03c yasmā irasyasīd u nv aryo vā puṣṭimad vasu viśvasmād indra uttaraḥ ||
10.086.04a yam imaṁ tvaṁ vṛṣākapim priyam indrābhirakṣasi |
10.086.04c śvā nv asya jambhiṣad api karṇe varāhayur viśvasmād indra uttaraḥ ||
10.086.05a priyā taṣṭāni me kapir vyaktā vy adūduṣat |
10.086.05c śiro nv asya rāviṣaṁ na sugaṁ duṣkṛte bhuvaṁ viśvasmād indra uttaraḥ ||
10.086.06a na mat strī subhasattarā na suyāśutarā bhuvat |
10.086.06c na mat praticyavīyasī na sakthy udyamīyasī viśvasmād indra uttaraḥ ||
10.086.07a uve amba sulābhike yathevāṅga bhaviṣyati |
10.086.07c bhasan me amba sakthi me śiro me vīva hṛṣyati viśvasmād indra uttaraḥ ||
10.086.08a kiṁ subāho svaṅgure pṛthuṣṭo pṛthujāghane |
10.086.08c kiṁ śūrapatni nas tvam abhy amīṣi vṛṣākapiṁ viśvasmād indra uttaraḥ ||
10.086.09a avīrām iva mām ayaṁ śarārur abhi manyate |
10.086.09c utāham asmi vīriṇīndrapatnī marutsakhā viśvasmād indra uttaraḥ ||
10.086.10a saṁhotraṁ sma purā nārī samanaṁ vāva gacchati |
10.086.10c vedhā ṛtasya vīriṇīndrapatnī mahīyate viśvasmād indra uttaraḥ ||
10.086.11a indrāṇīm āsu nāriṣu subhagām aham aśravam |
10.086.11c nahy asyā aparaṁ cana jarasā marate patir viśvasmād indra uttaraḥ ||
10.086.12a nāham indrāṇi rāraṇa sakhyur vṛṣākaper ṛte |
10.086.12c yasyedam apyaṁ haviḥ priyaṁ deveṣu gacchati viśvasmād indra uttaraḥ ||
10.086.13a vṛṣākapāyi revati suputra ād u susnuṣe |
10.086.13c ghasat ta indra ukṣaṇaḥ priyaṁ kācitkaraṁ havir viśvasmād indra uttaraḥ ||
10.086.14a ukṣṇo hi me pañcadaśa sākam pacanti viṁśatim |
10.086.14c utāham admi pīva id ubhā kukṣī pṛṇanti me viśvasmād indra uttaraḥ ||
10.086.15a vṛṣabho na tigmaśṛṅgo 'ntar yūtheṣu roruvat |
10.086.15c manthas ta indra śaṁ hṛde yaṁ te sunoti bhāvayur viśvasmād indra uttaraḥ ||
10.086.16a na seśe yasya rambate 'ntarā sakthyā kapṛt |
10.086.16c sed īśe yasya romaśaṁ niṣeduṣo vijṛmbhate viśvasmād indra uttaraḥ ||
10.086.17a na seśe yasya romaśaṁ niṣeduṣo vijṛmbhate |
10.086.17c sed īśe yasya rambate 'ntarā sakthyā kapṛd viśvasmād indra uttaraḥ ||
10.086.18a ayam indra vṛṣākapiḥ parasvantaṁ hataṁ vidat |
10.086.18c asiṁ sūnāṁ navaṁ carum ād edhasyāna ācitaṁ viśvasmād indra uttaraḥ ||
10.086.19a ayam emi vicākaśad vicinvan dāsam āryam |
10.086.19c pibāmi pākasutvano 'bhi dhīram acākaśaṁ viśvasmād indra uttaraḥ ||
10.086.20a dhanva ca yat kṛntatraṁ ca kati svit tā vi yojanā |
10.086.20c nedīyaso vṛṣākape 'stam ehi gṛhām̐ upa viśvasmād indra uttaraḥ ||
10.086.21a punar ehi vṛṣākape suvitā kalpayāvahai |
10.086.21c ya eṣa svapnanaṁśano 'stam eṣi pathā punar viśvasmād indra uttaraḥ ||
10.086.22a yad udañco vṛṣākape gṛham indrājagantana |
10.086.22c kva sya pulvagho mṛgaḥ kam agañ janayopano viśvasmād indra uttaraḥ ||
10.086.23a parśur ha nāma mānavī sākaṁ sasūva viṁśatim |
10.086.23c bhadram bhala tyasyā abhūd yasyā udaram āmayad viśvasmād indra uttaraḥ ||

10.087.01a rakṣohaṇaṁ vājinam ā jigharmi mitram prathiṣṭham upa yāmi śarma |
10.087.01c śiśāno agniḥ kratubhiḥ samiddhaḥ sa no divā sa riṣaḥ pātu naktam ||
10.087.02a ayodaṁṣṭro arciṣā yātudhānān upa spṛśa jātavedaḥ samiddhaḥ |
10.087.02c ā jihvayā mūradevān rabhasva kravyādo vṛktvy api dhatsvāsan ||
10.087.03a ubhobhayāvinn upa dhehi daṁṣṭrā hiṁsraḥ śiśāno 'varam paraṁ ca |
10.087.03c utāntarikṣe pari yāhi rājañ jambhaiḥ saṁ dhehy abhi yātudhānān ||
10.087.04a yajñair iṣūḥ saṁnamamāno agne vācā śalyām̐ aśanibhir dihānaḥ |
10.087.04c tābhir vidhya hṛdaye yātudhānān pratīco bāhūn prati bhaṅdhy eṣām ||
10.087.05a agne tvacaṁ yātudhānasya bhindhi hiṁsrāśanir harasā hantv enam |
10.087.05c pra parvāṇi jātavedaḥ śṛṇīhi kravyāt kraviṣṇur vi cinotu vṛkṇam ||
10.087.06a yatredānīm paśyasi jātavedas tiṣṭhantam agna uta vā carantam |
10.087.06c yad vāntarikṣe pathibhiḥ patantaṁ tam astā vidhya śarvā śiśānaḥ ||
10.087.07a utālabdhaṁ spṛṇuhi jātaveda ālebhānād ṛṣṭibhir yātudhānāt |
10.087.07c agne pūrvo ni jahi śośucāna āmādaḥ kṣviṅkās tam adantv enīḥ ||
10.087.08a iha pra brūhi yatamaḥ so agne yo yātudhāno ya idaṁ kṛṇoti |
10.087.08c tam ā rabhasva samidhā yaviṣṭha nṛcakṣasaś cakṣuṣe randhayainam ||
10.087.09a tīkṣṇenāgne cakṣuṣā rakṣa yajñam prāñcaṁ vasubhyaḥ pra ṇaya pracetaḥ |
10.087.09c hiṁsraṁ rakṣāṁsy abhi śośucānam mā tvā dabhan yātudhānā nṛcakṣaḥ ||
10.087.10a nṛcakṣā rakṣaḥ pari paśya vikṣu tasya trīṇi prati śṛṇīhy agrā |
10.087.10c tasyāgne pṛṣṭīr harasā śṛṇīhi tredhā mūlaṁ yātudhānasya vṛśca ||
10.087.11a trir yātudhānaḥ prasitiṁ ta etv ṛtaṁ yo agne anṛtena hanti |
10.087.11c tam arciṣā sphūrjayañ jātavedaḥ samakṣam enaṁ gṛṇate ni vṛṅdhi ||
10.087.12a tad agne cakṣuḥ prati dhehi rebhe śaphārujaṁ yena paśyasi yātudhānam |
10.087.12c atharvavaj jyotiṣā daivyena satyaṁ dhūrvantam acitaṁ ny oṣa ||
10.087.13a yad agne adya mithunā śapāto yad vācas tṛṣṭaṁ janayanta rebhāḥ |
10.087.13c manyor manasaḥ śaravyā jāyate yā tayā vidhya hṛdaye yātudhānān ||
10.087.14a parā śṛṇīhi tapasā yātudhānān parāgne rakṣo harasā śṛṇīhi |
10.087.14c parārciṣā mūradevāñ chṛṇīhi parāsutṛpo abhi śośucānaḥ ||
10.087.15a parādya devā vṛjinaṁ śṛṇantu pratyag enaṁ śapathā yantu tṛṣṭāḥ |
10.087.15c vācāstenaṁ śarava ṛcchantu marman viśvasyaitu prasitiṁ yātudhānaḥ ||
10.087.16a yaḥ pauruṣeyeṇa kraviṣā samaṅkte yo aśvyena paśunā yātudhānaḥ |
10.087.16c yo aghnyāyā bharati kṣīram agne teṣāṁ śīrṣāṇi harasāpi vṛśca ||
10.087.17a saṁvatsarīṇam paya usriyāyās tasya māśīd yātudhāno nṛcakṣaḥ |
10.087.17c pīyūṣam agne yatamas titṛpsāt tam pratyañcam arciṣā vidhya marman ||
10.087.18a viṣaṁ gavāṁ yātudhānāḥ pibantv ā vṛścyantām aditaye durevāḥ |
10.087.18c parainān devaḥ savitā dadātu parā bhāgam oṣadhīnāṁ jayantām ||
10.087.19a sanād agne mṛṇasi yātudhānān na tvā rakṣāṁsi pṛtanāsu jigyuḥ |
10.087.19c anu daha sahamūrān kravyādo mā te hetyā mukṣata daivyāyāḥ ||
10.087.20a tvaṁ no agne adharād udaktāt tvam paścād uta rakṣā purastāt |
10.087.20c prati te te ajarāsas tapiṣṭhā aghaśaṁsaṁ śośucato dahantu ||
10.087.21a paścāt purastād adharād udaktāt kaviḥ kāvyena pari pāhi rājan |
10.087.21c sakhe sakhāyam ajaro jarimṇe 'gne martām̐ amartyas tvaṁ naḥ ||
10.087.22a pari tvāgne puraṁ vayaṁ vipraṁ sahasya dhīmahi |
10.087.22c dhṛṣadvarṇaṁ dive-dive hantāram bhaṅgurāvatām ||
10.087.23a viṣeṇa bhaṅgurāvataḥ prati ṣma rakṣaso daha |
10.087.23c agne tigmena śociṣā tapuragrābhir ṛṣṭibhiḥ ||
10.087.24a praty agne mithunā daha yātudhānā kimīdinā |
10.087.24c saṁ tvā śiśāmi jāgṛhy adabdhaṁ vipra manmabhiḥ ||
10.087.25a praty agne harasā haraḥ śṛṇīhi viśvataḥ prati |
10.087.25c yātudhānasya rakṣaso balaṁ vi ruja vīryam ||

10.088.01a haviṣ pāntam ajaraṁ svarvidi divispṛśy āhutaṁ juṣṭam agnau |
10.088.01c tasya bharmaṇe bhuvanāya devā dharmaṇe kaṁ svadhayā paprathanta ||
10.088.02a gīrṇam bhuvanaṁ tamasāpagūḻham āviḥ svar abhavaj jāte agnau |
10.088.02c tasya devāḥ pṛthivī dyaur utāpo 'raṇayann oṣadhīḥ sakhye asya ||
10.088.03a devebhir nv iṣito yajñiyebhir agniṁ stoṣāṇy ajaram bṛhantam |
10.088.03c yo bhānunā pṛthivīṁ dyām utemām ātatāna rodasī antarikṣam ||
10.088.04a yo hotāsīt prathamo devajuṣṭo yaṁ samāñjann ājyenā vṛṇānāḥ |
10.088.04c sa patatrītvaraṁ sthā jagad yac chvātram agnir akṛṇoj jātavedāḥ ||
10.088.05a yaj jātavedo bhuvanasya mūrdhann atiṣṭho agne saha rocanena |
10.088.05c taṁ tvāhema matibhir gīrbhir ukthaiḥ sa yajñiyo abhavo rodasiprāḥ ||
10.088.06a mūrdhā bhuvo bhavati naktam agnis tataḥ sūryo jāyate prātar udyan |
10.088.06c māyām ū tu yajñiyānām etām apo yat tūrṇiś carati prajānan ||
10.088.07a dṛśenyo yo mahinā samiddho 'rocata diviyonir vibhāvā |
10.088.07c tasminn agnau sūktavākena devā havir viśva ājuhavus tanūpāḥ ||
10.088.08a sūktavākam prathamam ād id agnim ād id dhavir ajanayanta devāḥ |
10.088.08c sa eṣāṁ yajño abhavat tanūpās taṁ dyaur veda tam pṛthivī tam āpaḥ ||
10.088.09a yaṁ devāso 'janayantāgniṁ yasminn ājuhavur bhuvanāni viśvā |
10.088.09c so arciṣā pṛthivīṁ dyām utemām ṛjūyamāno atapan mahitvā ||
10.088.10a stomena hi divi devāso agnim ajījanañ chaktibhī rodasiprām |
10.088.10c tam ū akṛṇvan tredhā bhuve kaṁ sa oṣadhīḥ pacati viśvarūpāḥ ||
10.088.11a yaded enam adadhur yajñiyāso divi devāḥ sūryam āditeyam |
10.088.11c yadā cariṣṇū mithunāv abhūtām ād it prāpaśyan bhuvanāni viśvā ||
10.088.12a viśvasmā agnim bhuvanāya devā vaiśvānaraṁ ketum ahnām akṛṇvan |
10.088.12c ā yas tatānoṣaso vibhātīr apo ūrṇoti tamo arciṣā yan ||
10.088.13a vaiśvānaraṁ kavayo yajñiyāso 'gniṁ devā ajanayann ajuryam |
10.088.13c nakṣatram pratnam aminac cariṣṇu yakṣasyādhyakṣaṁ taviṣam bṛhantam ||
10.088.14a vaiśvānaraṁ viśvahā dīdivāṁsam mantrair agniṁ kavim acchā vadāmaḥ |
10.088.14c yo mahimnā paribabhūvorvī utāvastād uta devaḥ parastāt ||
10.088.15a dve srutī aśṛṇavam pitṝṇām ahaṁ devānām uta martyānām |
10.088.15c tābhyām idaṁ viśvam ejat sam eti yad antarā pitaram mātaraṁ ca ||
10.088.16a dve samīcī bibhṛtaś carantaṁ śīrṣato jātam manasā vimṛṣṭam |
10.088.16c sa pratyaṅ viśvā bhuvanāni tasthāv aprayucchan taraṇir bhrājamānaḥ ||
10.088.17a yatrā vadete avaraḥ paraś ca yajñanyoḥ kataro nau vi veda |
10.088.17c ā śekur it sadhamādaṁ sakhāyo nakṣanta yajñaṁ ka idaṁ vi vocat ||
10.088.18a katy agnayaḥ kati sūryāsaḥ katy uṣāsaḥ katy u svid āpaḥ |
10.088.18c nopaspijaṁ vaḥ pitaro vadāmi pṛcchāmi vaḥ kavayo vidmane kam ||
10.088.19a yāvanmātram uṣaso na pratīkaṁ suparṇyo vasate mātariśvaḥ |
10.088.19c tāvad dadhāty upa yajñam āyan brāhmaṇo hotur avaro niṣīdan ||

10.089.01a indraṁ stavā nṛtamaṁ yasya mahnā vibabādhe rocanā vi jmo antān |
10.089.01c ā yaḥ paprau carṣaṇīdhṛd varobhiḥ pra sindhubhyo riricāno mahitvā ||
10.089.02a sa sūryaḥ pary urū varāṁsy endro vavṛtyād rathyeva cakrā |
10.089.02c atiṣṭhantam apasyaṁ na sargaṁ kṛṣṇā tamāṁsi tviṣyā jaghāna ||
10.089.03a samānam asmā anapāvṛd arca kṣmayā divo asamam brahma navyam |
10.089.03c vi yaḥ pṛṣṭheva janimāny arya indraś cikāya na sakhāyam īṣe ||
10.089.04a indrāya giro aniśitasargā apaḥ prerayaṁ sagarasya budhnāt |
10.089.04c yo akṣeṇeva cakriyā śacībhir viṣvak tastambha pṛthivīm uta dyām ||
10.089.05a āpāntamanyus tṛpalaprabharmā dhuniḥ śimīvāñ charumām̐ ṛjīṣī |
10.089.05c somo viśvāny atasā vanāni nārvāg indram pratimānāni debhuḥ ||
10.089.06a na yasya dyāvāpṛthivī na dhanva nāntarikṣaṁ nādrayaḥ somo akṣāḥ |
10.089.06c yad asya manyur adhinīyamānaḥ śṛṇāti vīḻu rujati sthirāṇi ||
10.089.07a jaghāna vṛtraṁ svadhitir vaneva ruroja puro aradan na sindhūn |
10.089.07c bibheda giriṁ navam in na kumbham ā gā indro akṛṇuta svayugbhiḥ ||
10.089.08a tvaṁ ha tyad ṛṇayā indra dhīro 'sir na parva vṛjinā śṛṇāsi |
10.089.08c pra ye mitrasya varuṇasya dhāma yujaṁ na janā minanti mitram ||
10.089.09a pra ye mitram prāryamaṇaṁ durevāḥ pra saṁgiraḥ pra varuṇam minanti |
10.089.09c ny amitreṣu vadham indra tumraṁ vṛṣan vṛṣāṇam aruṣaṁ śiśīhi ||
10.089.10a indro diva indra īśe pṛthivyā indro apām indra it parvatānām |
10.089.10c indro vṛdhām indra in medhirāṇām indraḥ kṣeme yoge havya indraḥ ||
10.089.11a prāktubhya indraḥ pra vṛdho ahabhyaḥ prāntarikṣāt pra samudrasya dhāseḥ |
10.089.11c pra vātasya prathasaḥ pra jmo antāt pra sindhubhyo ririce pra kṣitibhyaḥ ||
10.089.12a pra śośucatyā uṣaso na ketur asinvā te vartatām indra hetiḥ |
10.089.12c aśmeva vidhya diva ā sṛjānas tapiṣṭhena heṣasā droghamitrān ||
10.089.13a anv aha māsā anv id vanāny anv oṣadhīr anu parvatāsaḥ |
10.089.13c anv indraṁ rodasī vāvaśāne anv āpo ajihata jāyamānam ||
10.089.14a karhi svit sā ta indra cetyāsad aghasya yad bhinado rakṣa eṣat |
10.089.14c mitrakruvo yac chasane na gāvaḥ pṛthivyā āpṛg amuyā śayante ||
10.089.15a śatrūyanto abhi ye nas tatasre mahi vrādhanta ogaṇāsa indra |
10.089.15c andhenāmitrās tamasā sacantāṁ sujyotiṣo aktavas tām̐ abhi ṣyuḥ ||
10.089.16a purūṇi hi tvā savanā janānām brahmāṇi mandan gṛṇatām ṛṣīṇām |
10.089.16c imām āghoṣann avasā sahūtiṁ tiro viśvām̐ arcato yāhy arvāṅ ||
10.089.17a evā te vayam indra bhuñjatīnāṁ vidyāma sumatīnāṁ navānām |
10.089.17c vidyāma vastor avasā gṛṇanto viśvāmitrā uta ta indra nūnam ||
10.089.18a śunaṁ huvema maghavānam indram asmin bhare nṛtamaṁ vājasātau |
10.089.18c śṛṇvantam ugram ūtaye samatsu ghnantaṁ vṛtrāṇi saṁjitaṁ dhanānām ||

10.090.01a sahasraśīrṣā puruṣaḥ sahasrākṣaḥ sahasrapāt |
10.090.01c sa bhūmiṁ viśvato vṛtvāty atiṣṭhad daśāṅgulam ||
10.090.02a puruṣa evedaṁ sarvaṁ yad bhūtaṁ yac ca bhavyam |
10.090.02c utāmṛtatvasyeśāno yad annenātirohati ||
10.090.03a etāvān asya mahimāto jyāyām̐ś ca pūruṣaḥ |
10.090.03c pādo 'sya viśvā bhūtāni tripād asyāmṛtaṁ divi ||
10.090.04a tripād ūrdhva ud ait puruṣaḥ pādo 'syehābhavat punaḥ |
10.090.04c tato viṣvaṅ vy akrāmat sāśanānaśane abhi ||
10.090.05a tasmād virāḻ ajāyata virājo adhi pūruṣaḥ |
10.090.05c sa jāto aty aricyata paścād bhūmim atho puraḥ ||
10.090.06a yat puruṣeṇa haviṣā devā yajñam atanvata |
10.090.06c vasanto asyāsīd ājyaṁ grīṣma idhmaḥ śarad dhaviḥ ||
10.090.07a taṁ yajñam barhiṣi praukṣan puruṣaṁ jātam agrataḥ |
10.090.07c tena devā ayajanta sādhyā ṛṣayaś ca ye ||
10.090.08a tasmād yajñāt sarvahutaḥ sambhṛtam pṛṣadājyam |
10.090.08c paśūn tām̐ś cakre vāyavyān āraṇyān grāmyāś ca ye ||
10.090.09a tasmād yajñāt sarvahuta ṛcaḥ sāmāni jajñire |
10.090.09c chandāṁsi jajñire tasmād yajus tasmād ajāyata ||
10.090.10a tasmād aśvā ajāyanta ye ke cobhayādataḥ |
10.090.10c gāvo ha jajñire tasmāt tasmāj jātā ajāvayaḥ ||
10.090.11a yat puruṣaṁ vy adadhuḥ katidhā vy akalpayan |
10.090.11c mukhaṁ kim asya kau bāhū kā ūrū pādā ucyete ||
10.090.12a brāhmaṇo 'sya mukham āsīd bāhū rājanyaḥ kṛtaḥ |
10.090.12c ūrū tad asya yad vaiśyaḥ padbhyāṁ śūdro ajāyata ||
10.090.13a candramā manaso jātaś cakṣoḥ sūryo ajāyata |
10.090.13c mukhād indraś cāgniś ca prāṇād vāyur ajāyata ||
10.090.14a nābhyā āsīd antarikṣaṁ śīrṣṇo dyauḥ sam avartata |
10.090.14c padbhyām bhūmir diśaḥ śrotrāt tathā lokām̐ akalpayan ||
10.090.15a saptāsyāsan paridhayas triḥ sapta samidhaḥ kṛtāḥ |
10.090.15c devā yad yajñaṁ tanvānā abadhnan puruṣam paśum ||
10.090.16a yajñena yajñam ayajanta devās tāni dharmāṇi prathamāny āsan |
10.090.16c te ha nākam mahimānaḥ sacanta yatra pūrve sādhyāḥ santi devāḥ ||

10.091.01a saṁ jāgṛvadbhir jaramāṇa idhyate dame damūnā iṣayann iḻas pade |
10.091.01c viśvasya hotā haviṣo vareṇyo vibhur vibhāvā suṣakhā sakhīyate ||
10.091.02a sa darśataśrīr atithir gṛhe-gṛhe vane-vane śiśriye takvavīr iva |
10.091.02c janaṁ-janaṁ janyo nāti manyate viśa ā kṣeti viśyo viśaṁ-viśam ||
10.091.03a sudakṣo dakṣaiḥ kratunāsi sukratur agne kaviḥ kāvyenāsi viśvavit |
10.091.03c vasur vasūnāṁ kṣayasi tvam eka id dyāvā ca yāni pṛthivī ca puṣyataḥ ||
10.091.04a prajānann agne tava yonim ṛtviyam iḻāyās pade ghṛtavantam āsadaḥ |
10.091.04c ā te cikitra uṣasām ivetayo 'repasaḥ sūryasyeva raśmayaḥ ||
10.091.05a tava śriyo varṣyasyeva vidyutaś citrāś cikitra uṣasāṁ na ketavaḥ |
10.091.05c yad oṣadhīr abhisṛṣṭo vanāni ca pari svayaṁ cinuṣe annam āsye ||
10.091.06a tam oṣadhīr dadhire garbham ṛtviyaṁ tam āpo agniṁ janayanta mātaraḥ |
10.091.06c tam it samānaṁ vaninaś ca vīrudho 'ntarvatīś ca suvate ca viśvahā ||
10.091.07a vātopadhūta iṣito vaśām̐ anu tṛṣu yad annā veviṣad vitiṣṭhase |
10.091.07c ā te yatante rathyo yathā pṛthak chardhāṁsy agne ajarāṇi dhakṣataḥ ||
10.091.08a medhākāraṁ vidathasya prasādhanam agniṁ hotāram paribhūtamam matim |
10.091.08c tam id arbhe haviṣy ā samānam it tam in mahe vṛṇate nānyaṁ tvat ||
10.091.09a tvām id atra vṛṇate tvāyavo hotāram agne vidatheṣu vedhasaḥ |
10.091.09c yad devayanto dadhati prayāṁsi te haviṣmanto manavo vṛktabarhiṣaḥ ||
10.091.10a tavāgne hotraṁ tava potram ṛtviyaṁ tava neṣṭraṁ tvam agnid ṛtāyataḥ |
10.091.10c tava praśāstraṁ tvam adhvarīyasi brahmā cāsi gṛhapatiś ca no dame ||
10.091.11a yas tubhyam agne amṛtāya martyaḥ samidhā dāśad uta vā haviṣkṛti |
10.091.11c tasya hotā bhavasi yāsi dūtyam upa brūṣe yajasy adhvarīyasi ||
10.091.12a imā asmai matayo vāco asmad ām̐ ṛco giraḥ suṣṭutayaḥ sam agmata |
10.091.12c vasūyavo vasave jātavedase vṛddhāsu cid vardhano yāsu cākanat ||
10.091.13a imām pratnāya suṣṭutiṁ navīyasīṁ voceyam asmā uśate śṛṇotu naḥ |
10.091.13c bhūyā antarā hṛdy asya nispṛśe jāyeva patya uśatī suvāsāḥ ||
10.091.14a yasminn aśvāsa ṛṣabhāsa ukṣaṇo vaśā meṣā avasṛṣṭāsa āhutāḥ |
10.091.14c kīlālape somapṛṣṭhāya vedhase hṛdā matiṁ janaye cārum agnaye ||
10.091.15a ahāvy agne havir āsye te srucīva ghṛtaṁ camvīva somaḥ |
10.091.15c vājasaniṁ rayim asme suvīram praśastaṁ dhehi yaśasam bṛhantam ||

10.092.01a yajñasya vo rathyaṁ viśpatiṁ viśāṁ hotāram aktor atithiṁ vibhāvasum |
10.092.01c śocañ chuṣkāsu hariṇīṣu jarbhurad vṛṣā ketur yajato dyām aśāyata ||
10.092.02a imam añjaspām ubhaye akṛṇvata dharmāṇam agniṁ vidathasya sādhanam |
10.092.02c aktuṁ na yahvam uṣasaḥ purohitaṁ tanūnapātam aruṣasya niṁsate ||
10.092.03a baḻ asya nīthā vi paṇeś ca manmahe vayā asya prahutā āsur attave |
10.092.03c yadā ghorāso amṛtatvam āśatād ij janasya daivyasya carkiran ||
10.092.04a ṛtasya hi prasitir dyaur uru vyaco namo mahy aramatiḥ panīyasī |
10.092.04c indro mitro varuṇaḥ saṁ cikitrire 'tho bhagaḥ savitā pūtadakṣasaḥ ||
10.092.05a pra rudreṇa yayinā yanti sindhavas tiro mahīm aramatiṁ dadhanvire |
10.092.05c yebhiḥ parijmā pariyann uru jrayo vi roruvaj jaṭhare viśvam ukṣate ||
10.092.06a krāṇā rudrā maruto viśvakṛṣṭayo divaḥ śyenāso asurasya nīḻayaḥ |
10.092.06c tebhiś caṣṭe varuṇo mitro aryamendro devebhir arvaśebhir arvaśaḥ ||
10.092.07a indre bhujaṁ śaśamānāsa āśata sūro dṛśīke vṛṣaṇaś ca pauṁsye |
10.092.07c pra ye nv asyārhaṇā tatakṣire yujaṁ vajraṁ nṛṣadaneṣu kāravaḥ ||
10.092.08a sūraś cid ā harito asya rīramad indrād ā kaś cid bhayate tavīyasaḥ |
10.092.08c bhīmasya vṛṣṇo jaṭharād abhiśvaso dive-dive sahuriḥ stann abādhitaḥ ||
10.092.09a stomaṁ vo adya rudrāya śikvase kṣayadvīrāya namasā didiṣṭana |
10.092.09c yebhiḥ śivaḥ svavām̐ evayāvabhir divaḥ siṣakti svayaśā nikāmabhiḥ ||
10.092.10a te hi prajāyā abharanta vi śravo bṛhaspatir vṛṣabhaḥ somajāmayaḥ |
10.092.10c yajñair atharvā prathamo vi dhārayad devā dakṣair bhṛgavaḥ saṁ cikitrire ||
10.092.11a te hi dyāvāpṛthivī bhūriretasā narāśaṁsaś caturaṅgo yamo 'ditiḥ |
10.092.11c devas tvaṣṭā draviṇodā ṛbhukṣaṇaḥ pra rodasī maruto viṣṇur arhire ||
10.092.12a uta sya na uśijām urviyā kavir ahiḥ śṛṇotu budhnyo havīmani |
10.092.12c sūryāmāsā vicarantā divikṣitā dhiyā śamīnahuṣī asya bodhatam ||
10.092.13a pra naḥ pūṣā carathaṁ viśvadevyo 'pāṁ napād avatu vāyur iṣṭaye |
10.092.13c ātmānaṁ vasyo abhi vātam arcata tad aśvinā suhavā yāmani śrutam ||
10.092.14a viśām āsām abhayānām adhikṣitaṁ gīrbhir u svayaśasaṁ gṛṇīmasi |
10.092.14c gnābhir viśvābhir aditim anarvaṇam aktor yuvānaṁ nṛmaṇā adhā patim ||
10.092.15a rebhad atra januṣā pūrvo aṅgirā grāvāṇa ūrdhvā abhi cakṣur adhvaram |
10.092.15c yebhir vihāyā abhavad vicakṣaṇaḥ pāthaḥ sumekaṁ svadhitir vananvati ||

10.093.01a mahi dyāvāpṛthivī bhūtam urvī nārī yahvī na rodasī sadaṁ naḥ |
10.093.01c tebhir naḥ pātaṁ sahyasa ebhir naḥ pātaṁ śūṣaṇi ||
10.093.02a yajñe-yajñe sa martyo devān saparyati |
10.093.02c yaḥ sumnair dīrghaśruttama āvivāsaty enān ||
10.093.03a viśveṣām irajyavo devānāṁ vār mahaḥ |
10.093.03c viśve hi viśvamahaso viśve yajñeṣu yajñiyāḥ ||
10.093.04a te ghā rājāno amṛtasya mandrā aryamā mitro varuṇaḥ parijmā |
10.093.04c kad rudro nṛṇāṁ stuto marutaḥ pūṣaṇo bhagaḥ ||
10.093.05a uta no naktam apāṁ vṛṣaṇvasū sūryāmāsā sadanāya sadhanyā |
10.093.05c sacā yat sādy eṣām ahir budhneṣu budhnyaḥ ||
10.093.06a uta no devāv aśvinā śubhas patī dhāmabhir mitrāvaruṇā uruṣyatām |
10.093.06c mahaḥ sa rāya eṣate 'ti dhanveva duritā ||
10.093.07a uta no rudrā cin mṛḻatām aśvinā viśve devāso rathaspatir bhagaḥ |
10.093.07c ṛbhur vāja ṛbhukṣaṇaḥ parijmā viśvavedasaḥ ||
10.093.08a ṛbhur ṛbhukṣā ṛbhur vidhato mada ā te harī jūjuvānasya vājinā |
10.093.08c duṣṭaraṁ yasya sāma cid ṛdhag yajño na mānuṣaḥ ||
10.093.09a kṛdhī no ahrayo deva savitaḥ sa ca stuṣe maghonām |
10.093.09c saho na indro vahnibhir ny eṣāṁ carṣaṇīnāṁ cakraṁ raśmiṁ na yoyuve ||
10.093.10a aiṣu dyāvāpṛthivī dhātam mahad asme vīreṣu viśvacarṣaṇi śravaḥ |
10.093.10c pṛkṣaṁ vājasya sātaye pṛkṣaṁ rāyota turvaṇe ||
10.093.11a etaṁ śaṁsam indrāsmayuṣ ṭvaṁ kūcit santaṁ sahasāvann abhiṣṭaye |
10.093.11c sadā pāhy abhiṣṭaye medatāṁ vedatā vaso ||
10.093.12a etam me stomaṁ tanā na sūrye dyutadyāmānaṁ vāvṛdhanta nṛṇām |
10.093.12c saṁvananaṁ nāśvyaṁ taṣṭevānapacyutam ||
10.093.13a vāvarta yeṣāṁ rāyā yuktaiṣāṁ hiraṇyayī |
10.093.13c nemadhitā na pauṁsyā vṛtheva viṣṭāntā ||
10.093.14a pra tad duḥśīme pṛthavāne vene pra rāme vocam asure maghavatsu |
10.093.14c ye yuktvāya pañca śatāsmayu pathā viśrāvy eṣām ||
10.093.15a adhīn nv atra saptatiṁ ca sapta ca |
10.093.15b sadyo didiṣṭa tānvaḥ sadyo didiṣṭa pārthyaḥ sadyo didiṣṭa māyavaḥ ||

10.094.01a praite vadantu pra vayaṁ vadāma grāvabhyo vācaṁ vadatā vadadbhyaḥ |
10.094.01c yad adrayaḥ parvatāḥ sākam āśavaḥ ślokaṁ ghoṣam bharathendrāya sominaḥ ||
10.094.02a ete vadanti śatavat sahasravad abhi krandanti haritebhir āsabhiḥ |
10.094.02c viṣṭvī grāvāṇaḥ sukṛtaḥ sukṛtyayā hotuś cit pūrve haviradyam āśata ||
10.094.03a ete vadanty avidann anā madhu ny ūṅkhayante adhi pakva āmiṣi |
10.094.03c vṛkṣasya śākhām aruṇasya bapsatas te sūbharvā vṛṣabhāḥ prem arāviṣuḥ ||
10.094.04a bṛhad vadanti madireṇa mandinendraṁ krośanto 'vidann anā madhu |
10.094.04c saṁrabhyā dhīrāḥ svasṛbhir anartiṣur āghoṣayantaḥ pṛthivīm upabdibhiḥ ||
10.094.05a suparṇā vācam akratopa dyavy ākhare kṛṣṇā iṣirā anartiṣuḥ |
10.094.05c nyaṅ ni yanty uparasya niṣkṛtam purū reto dadhire sūryaśvitaḥ ||
10.094.06a ugrā iva pravahantaḥ samāyamuḥ sākaṁ yuktā vṛṣaṇo bibhrato dhuraḥ |
10.094.06c yac chvasanto jagrasānā arāviṣuḥ śṛṇva eṣām prothatho arvatām iva ||
10.094.07a daśāvanibhyo daśakakṣyebhyo daśayoktrebhyo daśayojanebhyaḥ |
10.094.07c daśābhīśubhyo arcatājarebhyo daśa dhuro daśa yuktā vahadbhyaḥ ||
10.094.08a te adrayo daśayantrāsa āśavas teṣām ādhānam pary eti haryatam |
10.094.08c ta ū sutasya somyasyāndhaso 'ṁśoḥ pīyūṣam prathamasya bhejire ||
10.094.09a te somādo harī indrasya niṁsate 'ṁśuṁ duhanto adhy āsate gavi |
10.094.09c tebhir dugdham papivān somyam madhv indro vardhate prathate vṛṣāyate ||
10.094.10a vṛṣā vo aṁśur na kilā riṣāthaneḻāvantaḥ sadam it sthanāśitāḥ |
10.094.10c raivatyeva mahasā cāravaḥ sthana yasya grāvāṇo ajuṣadhvam adhvaram ||
10.094.11a tṛdilā atṛdilāso adrayo 'śramaṇā aśṛthitā amṛtyavaḥ |
10.094.11c anāturā ajarāḥ sthāmaviṣṇavaḥ supīvaso atṛṣitā atṛṣṇajaḥ ||
10.094.12a dhruvā eva vaḥ pitaro yuge-yuge kṣemakāmāsaḥ sadaso na yuñjate |
10.094.12c ajuryāso hariṣāco haridrava ā dyāṁ raveṇa pṛthivīm aśuśravuḥ ||
10.094.13a tad id vadanty adrayo vimocane yāmann añjaspā iva ghed upabdibhiḥ |
10.094.13c vapanto bījam iva dhānyākṛtaḥ pṛñcanti somaṁ na minanti bapsataḥ ||
10.094.14a sute adhvare adhi vācam akratā krīḻayo na mātaraṁ tudantaḥ |
10.094.14c vi ṣū muñcā suṣuvuṣo manīṣāṁ vi vartantām adrayaś cāyamānāḥ ||

10.095.01a haye jāye manasā tiṣṭha ghore vacāṁsi miśrā kṛṇavāvahai nu |
10.095.01c na nau mantrā anuditāsa ete mayas karan paratare canāhan ||
10.095.02a kim etā vācā kṛṇavā tavāham prākramiṣam uṣasām agriyeva |
10.095.02c purūravaḥ punar astam parehi durāpanā vāta ivāham asmi ||
10.095.03a iṣur na śriya iṣudher asanā goṣāḥ śatasā na raṁhiḥ |
10.095.03c avīre kratau vi davidyutan norā na māyuṁ citayanta dhunayaḥ ||
10.095.04a sā vasu dadhatī śvaśurāya vaya uṣo yadi vaṣṭy antigṛhāt |
10.095.04c astaṁ nanakṣe yasmiñ cākan divā naktaṁ śnathitā vaitasena ||
10.095.05a triḥ sma māhnaḥ śnathayo vaitasenota sma me 'vyatyai pṛṇāsi |
10.095.05c purūravo 'nu te ketam āyaṁ rājā me vīra tanvas tad āsīḥ ||
10.095.06a yā sujūrṇiḥ śreṇiḥ sumnaāpir hradecakṣur na granthinī caraṇyuḥ |
10.095.06c tā añjayo 'ruṇayo na sasruḥ śriye gāvo na dhenavo 'navanta ||
10.095.07a sam asmiñ jāyamāna āsata gnā utem avardhan nadyaḥ svagūrtāḥ |
10.095.07c mahe yat tvā purūravo raṇāyāvardhayan dasyuhatyāya devāḥ ||
10.095.08a sacā yad āsu jahatīṣv atkam amānuṣīṣu mānuṣo niṣeve |
10.095.08c apa sma mat tarasantī na bhujyus tā atrasan rathaspṛśo nāśvāḥ ||
10.095.09a yad āsu marto amṛtāsu nispṛk saṁ kṣoṇībhiḥ kratubhir na pṛṅkte |
10.095.09c tā ātayo na tanvaḥ śumbhata svā aśvāso na krīḻayo dandaśānāḥ ||
10.095.10a vidyun na yā patantī davidyod bharantī me apyā kāmyāni |
10.095.10c janiṣṭo apo naryaḥ sujātaḥ prorvaśī tirata dīrgham āyuḥ ||
10.095.11a jajñiṣa itthā gopīthyāya hi dadhātha tat purūravo ma ojaḥ |
10.095.11c aśāsaṁ tvā viduṣī sasminn ahan na ma āśṛṇoḥ kim abhug vadāsi ||
10.095.12a kadā sūnuḥ pitaraṁ jāta icchāc cakran nāśru vartayad vijānan |
10.095.12c ko dampatī samanasā vi yūyod adha yad agniḥ śvaśureṣu dīdayat ||
10.095.13a prati bravāṇi vartayate aśru cakran na krandad ādhye śivāyai |
10.095.13c pra tat te hinavā yat te asme parehy astaṁ nahi mūra māpaḥ ||
10.095.14a sudevo adya prapated anāvṛt parāvatam paramāṁ gantavā u |
10.095.14c adhā śayīta nirṛter upasthe 'dhainaṁ vṛkā rabhasāso adyuḥ ||
10.095.15a purūravo mā mṛthā mā pra papto mā tvā vṛkāso aśivāsa u kṣan |
10.095.15c na vai straiṇāni sakhyāni santi sālāvṛkāṇāṁ hṛdayāny etā ||
10.095.16a yad virūpācaram martyeṣv avasaṁ rātrīḥ śaradaś catasraḥ |
10.095.16c ghṛtasya stokaṁ sakṛd ahna āśnāṁ tād evedaṁ tātṛpāṇā carāmi ||
10.095.17a antarikṣaprāṁ rajaso vimānīm upa śikṣāmy urvaśīṁ vasiṣṭhaḥ |
10.095.17c upa tvā rātiḥ sukṛtasya tiṣṭhān ni vartasva hṛdayaṁ tapyate me ||
10.095.18a iti tvā devā ima āhur aiḻa yathem etad bhavasi mṛtyubandhuḥ |
10.095.18c prajā te devān haviṣā yajāti svarga u tvam api mādayāse ||

10.096.01a pra te mahe vidathe śaṁsiṣaṁ harī pra te vanve vanuṣo haryatam madam |
10.096.01c ghṛtaṁ na yo haribhiś cāru secata ā tvā viśantu harivarpasaṁ giraḥ ||
10.096.02a hariṁ hi yonim abhi ye samasvaran hinvanto harī divyaṁ yathā sadaḥ |
10.096.02c ā yam pṛṇanti haribhir na dhenava indrāya śūṣaṁ harivantam arcata ||
10.096.03a so asya vajro harito ya āyaso harir nikāmo harir ā gabhastyoḥ |
10.096.03c dyumnī suśipro harimanyusāyaka indre ni rūpā haritā mimikṣire ||
10.096.04a divi na ketur adhi dhāyi haryato vivyacad vajro harito na raṁhyā |
10.096.04c tudad ahiṁ hariśipro ya āyasaḥ sahasraśokā abhavad dharimbharaḥ ||
10.096.05a tvaṁ-tvam aharyathā upastutaḥ pūrvebhir indra harikeśa yajvabhiḥ |
10.096.05c tvaṁ haryasi tava viśvam ukthyam asāmi rādho harijāta haryatam ||
10.096.06a tā vajriṇam mandinaṁ stomyam mada indraṁ rathe vahato haryatā harī |
10.096.06c purūṇy asmai savanāni haryata indrāya somā harayo dadhanvire ||
10.096.07a araṁ kāmāya harayo dadhanvire sthirāya hinvan harayo harī turā |
10.096.07c arvadbhir yo haribhir joṣam īyate so asya kāmaṁ harivantam ānaśe ||
10.096.08a hariśmaśārur harikeśa āyasas turaspeye yo haripā avardhata |
10.096.08c arvadbhir yo haribhir vājinīvasur ati viśvā duritā pāriṣad dharī ||
10.096.09a sruveva yasya hariṇī vipetatuḥ śipre vājāya hariṇī davidhvataḥ |
10.096.09c pra yat kṛte camase marmṛjad dharī pītvā madasya haryatasyāndhasaḥ ||
10.096.10a uta sma sadma haryatasya pastyor atyo na vājaṁ harivām̐ acikradat |
10.096.10c mahī cid dhi dhiṣaṇāharyad ojasā bṛhad vayo dadhiṣe haryataś cid ā ||
10.096.11a ā rodasī haryamāṇo mahitvā navyaṁ-navyaṁ haryasi manma nu priyam |
10.096.11c pra pastyam asura haryataṁ gor āviṣ kṛdhi haraye sūryāya ||
10.096.12a ā tvā haryantam prayujo janānāṁ rathe vahantu hariśipram indra |
10.096.12c pibā yathā pratibhṛtasya madhvo haryan yajñaṁ sadhamāde daśoṇim ||
10.096.13a apāḥ pūrveṣāṁ harivaḥ sutānām atho idaṁ savanaṁ kevalaṁ te |
10.096.13c mamaddhi somam madhumantam indra satrā vṛṣañ jaṭhara ā vṛṣasva ||

10.097.01a yā oṣadhīḥ pūrvā jātā devebhyas triyugam purā |
10.097.01c manai nu babhrūṇām ahaṁ śataṁ dhāmāni sapta ca ||
10.097.02a śataṁ vo amba dhāmāni sahasram uta vo ruhaḥ |
10.097.02c adhā śatakratvo yūyam imam me agadaṁ kṛta ||
10.097.03a oṣadhīḥ prati modadhvam puṣpavatīḥ prasūvarīḥ |
10.097.03c aśvā iva sajitvarīr vīrudhaḥ pārayiṣṇvaḥ ||
10.097.04a oṣadhīr iti mātaras tad vo devīr upa bruve |
10.097.04c saneyam aśvaṁ gāṁ vāsa ātmānaṁ tava pūruṣa ||
10.097.05a aśvatthe vo niṣadanam parṇe vo vasatiṣ kṛtā |
10.097.05c gobhāja it kilāsatha yat sanavatha pūruṣam ||
10.097.06a yatrauṣadhīḥ samagmata rājānaḥ samitāv iva |
10.097.06c vipraḥ sa ucyate bhiṣag rakṣohāmīvacātanaḥ ||
10.097.07a aśvāvatīṁ somāvatīm ūrjayantīm udojasam |
10.097.07c āvitsi sarvā oṣadhīr asmā ariṣṭatātaye ||
10.097.08a uc chuṣmā oṣadhīnāṁ gāvo goṣṭhād iverate |
10.097.08c dhanaṁ saniṣyantīnām ātmānaṁ tava pūruṣa ||
10.097.09a iṣkṛtir nāma vo mātātho yūyaṁ stha niṣkṛtīḥ |
10.097.09c sīrāḥ patatriṇīḥ sthana yad āmayati niṣ kṛtha ||
10.097.10a ati viśvāḥ pariṣṭhāḥ stena iva vrajam akramuḥ |
10.097.10c oṣadhīḥ prācucyavur yat kiṁ ca tanvo rapaḥ ||
10.097.11a yad imā vājayann aham oṣadhīr hasta ādadhe |
10.097.11c ātmā yakṣmasya naśyati purā jīvagṛbho yathā ||
10.097.12a yasyauṣadhīḥ prasarpathāṅgam-aṅgam paruṣ-paruḥ |
10.097.12c tato yakṣmaṁ vi bādhadhva ugro madhyamaśīr iva ||
10.097.13a sākaṁ yakṣma pra pata cāṣeṇa kikidīvinā |
10.097.13c sākaṁ vātasya dhrājyā sākaṁ naśya nihākayā ||
10.097.14a anyā vo anyām avatv anyānyasyā upāvata |
10.097.14c tāḥ sarvāḥ saṁvidānā idam me prāvatā vacaḥ ||
10.097.15a yāḥ phalinīr yā aphalā apuṣpā yāś ca puṣpiṇīḥ |
10.097.15c bṛhaspatiprasūtās tā no muñcantv aṁhasaḥ ||
10.097.16a muñcantu mā śapathyād atho varuṇyād uta |
10.097.16c atho yamasya paḍbīśāt sarvasmād devakilbiṣāt ||
10.097.17a avapatantīr avadan diva oṣadhayas pari |
10.097.17c yaṁ jīvam aśnavāmahai na sa riṣyāti pūruṣaḥ ||
10.097.18a yā oṣadhīḥ somarājñīr bahvīḥ śatavicakṣaṇāḥ |
10.097.18c tāsāṁ tvam asy uttamāraṁ kāmāya śaṁ hṛde ||
10.097.19a yā oṣadhīḥ somarājñīr viṣṭhitāḥ pṛthivīm anu |
10.097.19c bṛhaspatiprasūtā asyai saṁ datta vīryam ||
10.097.20a mā vo riṣat khanitā yasmai cāhaṁ khanāmi vaḥ |
10.097.20c dvipac catuṣpad asmākaṁ sarvam astv anāturam ||
10.097.21a yāś cedam upaśṛṇvanti yāś ca dūram parāgatāḥ |
10.097.21c sarvāḥ saṁgatya vīrudho 'syai saṁ datta vīryam ||
10.097.22a oṣadhayaḥ saṁ vadante somena saha rājñā |
10.097.22c yasmai kṛṇoti brāhmaṇas taṁ rājan pārayāmasi ||
10.097.23a tvam uttamāsy oṣadhe tava vṛkṣā upastayaḥ |
10.097.23c upastir astu so 'smākaṁ yo asmām̐ abhidāsati ||

10.098.01a bṛhaspate prati me devatām ihi mitro vā yad varuṇo vāsi pūṣā |
10.098.01c ādityair vā yad vasubhir marutvān sa parjanyaṁ śaṁtanave vṛṣāya ||
10.098.02a ā devo dūto ajiraś cikitvān tvad devāpe abhi mām agacchat |
10.098.02c pratīcīnaḥ prati mām ā vavṛtsva dadhāmi te dyumatīṁ vācam āsan ||
10.098.03a asme dhehi dyumatīṁ vācam āsan bṛhaspate anamīvām iṣirām |
10.098.03c yayā vṛṣṭiṁ śaṁtanave vanāva divo drapso madhumām̐ ā viveśa ||
10.098.04a ā no drapsā madhumanto viśantv indra dehy adhirathaṁ sahasram |
10.098.04c ni ṣīda hotram ṛtuthā yajasva devān devāpe haviṣā saparya ||
10.098.05a ārṣṭiṣeṇo hotram ṛṣir niṣīdan devāpir devasumatiṁ cikitvān |
10.098.05c sa uttarasmād adharaṁ samudram apo divyā asṛjad varṣyā abhi ||
10.098.06a asmin samudre adhy uttarasminn āpo devebhir nivṛtā atiṣṭhan |
10.098.06c tā adravann ārṣṭiṣeṇena sṛṣṭā devāpinā preṣitā mṛkṣiṇīṣu ||
10.098.07a yad devāpiḥ śaṁtanave purohito hotrāya vṛtaḥ kṛpayann adīdhet |
10.098.07c devaśrutaṁ vṛṣṭivaniṁ rarāṇo bṛhaspatir vācam asmā ayacchat ||
10.098.08a yaṁ tvā devāpiḥ śuśucāno agna ārṣṭiṣeṇo manuṣyaḥ samīdhe |
10.098.08c viśvebhir devair anumadyamānaḥ pra parjanyam īrayā vṛṣṭimantam ||
10.098.09a tvām pūrva ṛṣayo gīrbhir āyan tvām adhvareṣu puruhūta viśve |
10.098.09c sahasrāṇy adhirathāny asme ā no yajñaṁ rohidaśvopa yāhi ||
10.098.10a etāny agne navatir nava tve āhutāny adhirathā sahasrā |
10.098.10c tebhir vardhasva tanvaḥ śūra pūrvīr divo no vṛṣṭim iṣito rirīhi ||
10.098.11a etāny agne navatiṁ sahasrā sam pra yaccha vṛṣṇa indrāya bhāgam |
10.098.11c vidvān patha ṛtuśo devayānān apy aulānaṁ divi deveṣu dhehi ||
10.098.12a agne bādhasva vi mṛdho vi durgahāpāmīvām apa rakṣāṁsi sedha |
10.098.12c asmāt samudrād bṛhato divo no 'pām bhūmānam upa naḥ sṛjeha ||

10.099.01a kaṁ naś citram iṣaṇyasi cikitvān pṛthugmānaṁ vāśraṁ vāvṛdhadhyai |
10.099.01c kat tasya dātu śavaso vyuṣṭau takṣad vajraṁ vṛtraturam apinvat ||
10.099.02a sa hi dyutā vidyutā veti sāma pṛthuṁ yonim asuratvā sasāda |
10.099.02c sa sanīḻebhiḥ prasahāno asya bhrātur na ṛte saptathasya māyāḥ ||
10.099.03a sa vājaṁ yātāpaduṣpadā yan svarṣātā pari ṣadat saniṣyan |
10.099.03c anarvā yac chatadurasya vedo ghnañ chiśnadevām̐ abhi varpasā bhūt ||
10.099.04a sa yahvyo 'vanīr goṣv arvā juhoti pradhanyāsu sasriḥ |
10.099.04c apādo yatra yujyāso 'rathā droṇyaśvāsa īrate ghṛtaṁ vāḥ ||
10.099.05a sa rudrebhir aśastavāra ṛbhvā hitvī gayam āreavadya āgāt |
10.099.05c vamrasya manye mithunā vivavrī annam abhītyārodayan muṣāyan ||
10.099.06a sa id dāsaṁ tuvīravam patir dan ṣaḻakṣaṁ triśīrṣāṇaṁ damanyat |
10.099.06c asya trito nv ojasā vṛdhāno vipā varāham ayoagrayā han ||
10.099.07a sa druhvaṇe manuṣa ūrdhvasāna ā sāviṣad arśasānāya śarum |
10.099.07c sa nṛtamo nahuṣo 'smat sujātaḥ puro 'bhinad arhan dasyuhatye ||
10.099.08a so abhriyo na yavasa udanyan kṣayāya gātuṁ vidan no asme |
10.099.08c upa yat sīdad induṁ śarīraiḥ śyeno 'yopāṣṭir hanti dasyūn ||
10.099.09a sa vrādhataḥ śavasānebhir asya kutsāya śuṣṇaṁ kṛpaṇe parādāt |
10.099.09c ayaṁ kavim anayac chasyamānam atkaṁ yo asya sanitota nṛṇām ||
10.099.10a ayaṁ daśasyan naryebhir asya dasmo devebhir varuṇo na māyī |
10.099.10c ayaṁ kanīna ṛtupā avedy amimītāraruṁ yaś catuṣpāt ||
10.099.11a asya stomebhir auśija ṛjiśvā vrajaṁ darayad vṛṣabheṇa piproḥ |
10.099.11c sutvā yad yajato dīdayad gīḥ pura iyāno abhi varpasā bhūt ||
10.099.12a evā maho asura vakṣathāya vamrakaḥ paḍbhir upa sarpad indram |
10.099.12c sa iyānaḥ karati svastim asmā iṣam ūrjaṁ sukṣitiṁ viśvam ābhāḥ ||

10.100.01a indra dṛhya maghavan tvāvad id bhuja iha stutaḥ sutapā bodhi no vṛdhe |
10.100.01c devebhir naḥ savitā prāvatu śrutam ā sarvatātim aditiṁ vṛṇīmahe ||
10.100.02a bharāya su bharata bhāgam ṛtviyam pra vāyave śucipe krandadiṣṭaye |
10.100.02c gaurasya yaḥ payasaḥ pītim ānaśa ā sarvatātim aditiṁ vṛṇīmahe ||
10.100.03a ā no devaḥ savitā sāviṣad vaya ṛjūyate yajamānāya sunvate |
10.100.03c yathā devān pratibhūṣema pākavad ā sarvatātim aditiṁ vṛṇīmahe ||
10.100.04a indro asme sumanā astu viśvahā rājā somaḥ suvitasyādhy etu naḥ |
10.100.04c yathā-yathā mitradhitāni saṁdadhur ā sarvatātim aditiṁ vṛṇīmahe ||
10.100.05a indra ukthena śavasā parur dadhe bṛhaspate pratarītāsy āyuṣaḥ |
10.100.05c yajño manuḥ pramatir naḥ pitā hi kam ā sarvatātim aditiṁ vṛṇīmahe ||
10.100.06a indrasya nu sukṛtaṁ daivyaṁ saho 'gnir gṛhe jaritā medhiraḥ kaviḥ |
10.100.06c yajñaś ca bhūd vidathe cārur antama ā sarvatātim aditiṁ vṛṇīmahe ||
10.100.07a na vo guhā cakṛma bhūri duṣkṛtaṁ nāviṣṭyaṁ vasavo devaheḻanam |
10.100.07c mākir no devā anṛtasya varpasa ā sarvatātim aditiṁ vṛṇīmahe ||
10.100.08a apāmīvāṁ savitā sāviṣan nyag varīya id apa sedhantv adrayaḥ |
10.100.08c grāvā yatra madhuṣud ucyate bṛhad ā sarvatātim aditiṁ vṛṇīmahe ||
10.100.09a ūrdhvo grāvā vasavo 'stu sotari viśvā dveṣāṁsi sanutar yuyota |
10.100.09c sa no devaḥ savitā pāyur īḍya ā sarvatātim aditiṁ vṛṇīmahe ||
10.100.10a ūrjaṁ gāvo yavase pīvo attana ṛtasya yāḥ sadane kośe aṅgdhve |
10.100.10c tanūr eva tanvo astu bheṣajam ā sarvatātim aditiṁ vṛṇīmahe ||
10.100.11a kratuprāvā jaritā śaśvatām ava indra id bhadrā pramatiḥ sutāvatām |
10.100.11c pūrṇam ūdhar divyaṁ yasya siktaya ā sarvatātim aditiṁ vṛṇīmahe ||
10.100.12a citras te bhānuḥ kratuprā abhiṣṭiḥ santi spṛdho jaraṇiprā adhṛṣṭāḥ |
10.100.12c rajiṣṭhayā rajyā paśva ā gos tūtūrṣati pary agraṁ duvasyuḥ ||

10.101.01a ud budhyadhvaṁ samanasaḥ sakhāyaḥ sam agnim indhvam bahavaḥ sanīḻāḥ |
10.101.01c dadhikrām agnim uṣasaṁ ca devīm indrāvato 'vase ni hvaye vaḥ ||
10.101.02a mandrā kṛṇudhvaṁ dhiya ā tanudhvaṁ nāvam aritraparaṇīṁ kṛṇudhvam |
10.101.02c iṣkṛṇudhvam āyudhāraṁ kṛṇudhvam prāñcaṁ yajñam pra ṇayatā sakhāyaḥ ||
10.101.03a yunakta sīrā vi yugā tanudhvaṁ kṛte yonau vapateha bījam |
10.101.03c girā ca śruṣṭiḥ sabharā asan no nedīya it sṛṇyaḥ pakvam eyāt ||
10.101.04a sīrā yuñjanti kavayo yugā vi tanvate pṛthak |
10.101.04c dhīrā deveṣu sumnayā ||
10.101.05a nir āhāvān kṛṇotana saṁ varatrā dadhātana |
10.101.05c siñcāmahā avatam udriṇaṁ vayaṁ suṣekam anupakṣitam ||
10.101.06a iṣkṛtāhāvam avataṁ suvaratraṁ suṣecanam |
10.101.06c udriṇaṁ siñce akṣitam ||
10.101.07a prīṇītāśvān hitaṁ jayātha svastivāhaṁ ratham it kṛṇudhvam |
10.101.07c droṇāhāvam avatam aśmacakram aṁsatrakośaṁ siñcatā nṛpāṇam ||
10.101.08a vrajaṁ kṛṇudhvaṁ sa hi vo nṛpāṇo varma sīvyadhvam bahulā pṛthūni |
10.101.08c puraḥ kṛṇudhvam āyasīr adhṛṣṭā mā vaḥ susroc camaso dṛṁhatā tam ||
10.101.09a ā vo dhiyaṁ yajñiyāṁ varta ūtaye devā devīṁ yajatāṁ yajñiyām iha |
10.101.09c sā no duhīyad yavaseva gatvī sahasradhārā payasā mahī gauḥ ||
10.101.10a ā tū ṣiñca harim īṁ dror upasthe vāśībhis takṣatāśmanmayībhiḥ |
10.101.10c pari ṣvajadhvaṁ daśa kakṣyābhir ubhe dhurau prati vahniṁ yunakta ||
10.101.11a ubhe dhurau vahnir āpibdamāno 'ntar yoneva carati dvijāniḥ |
10.101.11c vanaspatiṁ vana āsthāpayadhvaṁ ni ṣū dadhidhvam akhananta utsam ||
10.101.12a kapṛn naraḥ kapṛtham ud dadhātana codayata khudata vājasātaye |
10.101.12c niṣṭigryaḥ putram ā cyāvayotaya indraṁ sabādha iha somapītaye ||

10.102.01a pra te ratham mithūkṛtam indro 'vatu dhṛṣṇuyā |
10.102.01c asminn ājau puruhūta śravāyye dhanabhakṣeṣu no 'va ||
10.102.02a ut sma vāto vahati vāso 'syā adhirathaṁ yad ajayat sahasram |
10.102.02c rathīr abhūn mudgalānī gaviṣṭau bhare kṛtaṁ vy aced indrasenā ||
10.102.03a antar yaccha jighāṁsato vajram indrābhidāsataḥ |
10.102.03c dāsasya vā maghavann āryasya vā sanutar yavayā vadham ||
10.102.04a udno hradam apibaj jarhṛṣāṇaḥ kūṭaṁ sma tṛṁhad abhimātim eti |
10.102.04c pra muṣkabhāraḥ śrava icchamāno 'jiram bāhū abharat siṣāsan ||
10.102.05a ny akrandayann upayanta enam amehayan vṛṣabham madhya ājeḥ |
10.102.05c tena sūbharvaṁ śatavat sahasraṁ gavām mudgalaḥ pradhane jigāya ||
10.102.06a kakardave vṛṣabho yukta āsīd avāvacīt sārathir asya keśī |
10.102.06c dudher yuktasya dravataḥ sahānasa ṛcchanti ṣmā niṣpado mudgalānīm ||
10.102.07a uta pradhim ud ahann asya vidvān upāyunag vaṁsagam atra śikṣan |
10.102.07c indra ud āvat patim aghnyānām araṁhata padyābhiḥ kakudmān ||
10.102.08a śunam aṣṭrāvy acarat kapardī varatrāyāṁ dārv ānahyamānaḥ |
10.102.08c nṛmṇāni kṛṇvan bahave janāya gāḥ paspaśānas taviṣīr adhatta ||
10.102.09a imaṁ tam paśya vṛṣabhasya yuñjaṁ kāṣṭhāyā madhye drughaṇaṁ śayānam |
10.102.09c yena jigāya śatavat sahasraṁ gavām mudgalaḥ pṛtanājyeṣu ||
10.102.10a āre aghā ko nv itthā dadarśa yaṁ yuñjanti tam v ā sthāpayanti |
10.102.10c nāsmai tṛṇaṁ nodakam ā bharanty uttaro dhuro vahati pradediśat ||
10.102.11a parivṛkteva patividyam ānaṭ pīpyānā kūcakreṇeva siñcan |
10.102.11c eṣaiṣyā cid rathyā jayema sumaṅgalaṁ sinavad astu sātam ||
10.102.12a tvaṁ viśvasya jagataś cakṣur indrāsi cakṣuṣaḥ |
10.102.12c vṛṣā yad ājiṁ vṛṣaṇā siṣāsasi codayan vadhriṇā yujā ||

10.103.01a āśuḥ śiśāno vṛṣabho na bhīmo ghanāghanaḥ kṣobhaṇaś carṣaṇīnām |
10.103.01c saṁkrandano 'nimiṣa ekavīraḥ śataṁ senā ajayat sākam indraḥ ||
10.103.02a saṁkrandanenānimiṣeṇa jiṣṇunā yutkāreṇa duścyavanena dhṛṣṇunā |
10.103.02c tad indreṇa jayata tat sahadhvaṁ yudho nara iṣuhastena vṛṣṇā ||
10.103.03a sa iṣuhastaiḥ sa niṣaṅgibhir vaśī saṁsraṣṭā sa yudha indro gaṇena |
10.103.03c saṁsṛṣṭajit somapā bāhuśardhy ugradhanvā pratihitābhir astā ||
10.103.04a bṛhaspate pari dīyā rathena rakṣohāmitrām̐ apabādhamānaḥ |
10.103.04c prabhañjan senāḥ pramṛṇo yudhā jayann asmākam edhy avitā rathānām ||
10.103.05a balavijñāyaḥ sthaviraḥ pravīraḥ sahasvān vājī sahamāna ugraḥ |
10.103.05c abhivīro abhisatvā sahojā jaitram indra ratham ā tiṣṭha govit ||
10.103.06a gotrabhidaṁ govidaṁ vajrabāhuṁ jayantam ajma pramṛṇantam ojasā |
10.103.06c imaṁ sajātā anu vīrayadhvam indraṁ sakhāyo anu saṁ rabhadhvam ||
10.103.07a abhi gotrāṇi sahasā gāhamāno 'dayo vīraḥ śatamanyur indraḥ |
10.103.07c duścyavanaḥ pṛtanāṣāḻ ayudhyo 'smākaṁ senā avatu pra yutsu ||
10.103.08a indra āsāṁ netā bṛhaspatir dakṣiṇā yajñaḥ pura etu somaḥ |
10.103.08c devasenānām abhibhañjatīnāṁ jayantīnām maruto yantv agram ||
10.103.09a indrasya vṛṣṇo varuṇasya rājña ādityānām marutāṁ śardha ugram |
10.103.09c mahāmanasām bhuvanacyavānāṁ ghoṣo devānāṁ jayatām ud asthāt ||
10.103.10a ud dharṣaya maghavann āyudhāny ut satvanām māmakānām manāṁsi |
10.103.10c ud vṛtrahan vājināṁ vājināny ud rathānāṁ jayatāṁ yantu ghoṣāḥ ||
10.103.11a asmākam indraḥ samṛteṣu dhvajeṣv asmākaṁ yā iṣavas tā jayantu |
10.103.11c asmākaṁ vīrā uttare bhavantv asmām̐ u devā avatā haveṣu ||
10.103.12a amīṣāṁ cittam pratilobhayantī gṛhāṇāṅgāny apve parehi |
10.103.12c abhi prehi nir daha hṛtsu śokair andhenāmitrās tamasā sacantām ||
10.103.13a pretā jayatā nara indro vaḥ śarma yacchatu |
10.103.13c ugrā vaḥ santu bāhavo 'nādhṛṣyā yathāsatha ||

10.104.01a asāvi somaḥ puruhūta tubhyaṁ haribhyāṁ yajñam upa yāhi tūyam |
10.104.01c tubhyaṁ giro vipravīrā iyānā dadhanvira indra pibā sutasya ||
10.104.02a apsu dhūtasya harivaḥ pibeha nṛbhiḥ sutasya jaṭharam pṛṇasva |
10.104.02c mimikṣur yam adraya indra tubhyaṁ tebhir vardhasva madam ukthavāhaḥ ||
10.104.03a progrām pītiṁ vṛṣṇa iyarmi satyām prayai sutasya haryaśva tubhyam |
10.104.03c indra dhenābhir iha mādayasva dhībhir viśvābhiḥ śacyā gṛṇānaḥ ||
10.104.04a ūtī śacīvas tava vīryeṇa vayo dadhānā uśija ṛtajñāḥ |
10.104.04c prajāvad indra manuṣo duroṇe tasthur gṛṇantaḥ sadhamādyāsaḥ ||
10.104.05a praṇītibhiṣ ṭe haryaśva suṣṭoḥ suṣumnasya pururuco janāsaḥ |
10.104.05c maṁhiṣṭhām ūtiṁ vitire dadhānāḥ stotāra indra tava sūnṛtābhiḥ ||
10.104.06a upa brahmāṇi harivo haribhyāṁ somasya yāhi pītaye sutasya |
10.104.06c indra tvā yajñaḥ kṣamamāṇam ānaḍ dāśvām̐ asy adhvarasya praketaḥ ||
10.104.07a sahasravājam abhimātiṣāhaṁ suteraṇam maghavānaṁ suvṛktim |
10.104.07c upa bhūṣanti giro apratītam indraṁ namasyā jarituḥ pananta ||
10.104.08a saptāpo devīḥ suraṇā amṛktā yābhiḥ sindhum atara indra pūrbhit |
10.104.08c navatiṁ srotyā nava ca sravantīr devebhyo gātum manuṣe ca vindaḥ ||
10.104.09a apo mahīr abhiśaster amuñco 'jāgar āsv adhi deva ekaḥ |
10.104.09c indra yās tvaṁ vṛtratūrye cakartha tābhir viśvāyus tanvam pupuṣyāḥ ||
10.104.10a vīreṇyaḥ kratur indraḥ suśastir utāpi dhenā puruhūtam īṭṭe |
10.104.10c ārdayad vṛtram akṛṇod u lokaṁ sasāhe śakraḥ pṛtanā abhiṣṭiḥ ||
10.104.11a śunaṁ huvema maghavānam indram asmin bhare nṛtamaṁ vājasātau |
10.104.11c śṛṇvantam ugram ūtaye samatsu ghnantaṁ vṛtrāṇi saṁjitaṁ dhanānām ||

10.105.01a kadā vaso stotraṁ haryata āva śmaśā rudhad vāḥ |
10.105.01c dīrghaṁ sutaṁ vātāpyāya ||
10.105.02a harī yasya suyujā vivratā ver arvantānu śepā |
10.105.02c ubhā rajī na keśinā patir dan ||
10.105.03a apa yor indraḥ pāpaja ā marto na śaśramāṇo bibhīvān |
10.105.03c śubhe yad yuyuje taviṣīvān ||
10.105.04a sacāyor indraś carkṛṣa ām̐ upānasaḥ saparyan |
10.105.04c nadayor vivratayoḥ śūra indraḥ ||
10.105.05a adhi yas tasthau keśavantā vyacasvantā na puṣṭyai |
10.105.05c vanoti śiprābhyāṁ śipriṇīvān ||
10.105.06a prāstaud ṛṣvaujā ṛṣvebhis tatakṣa śūraḥ śavasā |
10.105.06c ṛbhur na kratubhir mātariśvā ||
10.105.07a vajraṁ yaś cakre suhanāya dasyave hirīmaśo hirīmān |
10.105.07c arutahanur adbhutaṁ na rajaḥ ||
10.105.08a ava no vṛjinā śiśīhy ṛcā vanemānṛcaḥ |
10.105.08c nābrahmā yajña ṛdhag joṣati tve ||
10.105.09a ūrdhvā yat te tretinī bhūd yajñasya dhūrṣu sadman |
10.105.09c sajūr nāvaṁ svayaśasaṁ sacāyoḥ ||
10.105.10a śriye te pṛśnir upasecanī bhūc chriye darvir arepāḥ |
10.105.10c yayā sve pātre siñcasa ut ||
10.105.11a śataṁ vā yad asurya prati tvā sumitra itthāstaud durmitra itthāstaut |
10.105.11c āvo yad dasyuhatye kutsaputram prāvo yad dasyuhatye kutsavatsam ||

10.106.01a ubhā u nūnaṁ tad id arthayethe vi tanvāthe dhiyo vastrāpaseva |
10.106.01c sadhrīcīnā yātave prem ajīgaḥ sudineva pṛkṣa ā taṁsayethe ||
10.106.02a uṣṭāreva pharvareṣu śrayethe prāyogeva śvātryā śāsur ethaḥ |
10.106.02c dūteva hi ṣṭho yaśasā janeṣu māpa sthātam mahiṣevāvapānāt ||
10.106.03a sākaṁyujā śakunasyeva pakṣā paśveva citrā yajur ā gamiṣṭam |
10.106.03c agnir iva devayor dīdivāṁsā parijmāneva yajathaḥ purutrā ||
10.106.04a āpī vo asme pitareva putrogreva rucā nṛpatīva turyai |
10.106.04c iryeva puṣṭyai kiraṇeva bhujyai śruṣṭīvāneva havam ā gamiṣṭam ||
10.106.05a vaṁsageva pūṣaryā śimbātā mitreva ṛtā śatarā śātapantā |
10.106.05c vājevoccā vayasā gharmyeṣṭhā meṣeveṣā saparyā purīṣā ||
10.106.06a sṛṇyeva jarbharī turpharītū naitośeva turpharī parpharīkā |
10.106.06c udanyajeva jemanā maderū tā me jarāyv ajaram marāyu ||
10.106.07a pajreva carcaraṁ jāram marāyu kṣadmevārtheṣu tartarītha ugrā |
10.106.07c ṛbhū nāpat kharamajrā kharajrur vāyur na parpharat kṣayad rayīṇām ||
10.106.08a gharmeva madhu jaṭhare sanerū bhagevitā turpharī phārivāram |
10.106.08c patareva cacarā candranirṇiṅ manaṛṅgā mananyā na jagmī ||
10.106.09a bṛhanteva gambhareṣu pratiṣṭhām pādeva gādhaṁ tarate vidāthaḥ |
10.106.09c karṇeva śāsur anu hi smarātho 'ṁśeva no bhajataṁ citram apnaḥ ||
10.106.10a āraṅgareva madhv erayethe sāragheva gavi nīcīnabāre |
10.106.10c kīnāreva svedam āsiṣvidānā kṣāmevorjā sūyavasāt sacethe ||
10.106.11a ṛdhyāma stomaṁ sanuyāma vājam ā no mantraṁ sarathehopa yātam |
10.106.11c yaśo na pakvam madhu goṣv antar ā bhūtāṁśo aśvinoḥ kāmam aprāḥ ||

10.107.01a āvir abhūn mahi māghonam eṣāṁ viśvaṁ jīvaṁ tamaso nir amoci |
10.107.01c mahi jyotiḥ pitṛbhir dattam āgād uruḥ panthā dakṣiṇāyā adarśi ||
10.107.02a uccā divi dakṣiṇāvanto asthur ye aśvadāḥ saha te sūryeṇa |
10.107.02c hiraṇyadā amṛtatvam bhajante vāsodāḥ soma pra tiranta āyuḥ ||
10.107.03a daivī pūrtir dakṣiṇā devayajyā na kavāribhyo nahi te pṛṇanti |
10.107.03c athā naraḥ prayatadakṣiṇāso 'vadyabhiyā bahavaḥ pṛṇanti ||
10.107.04a śatadhāraṁ vāyum arkaṁ svarvidaṁ nṛcakṣasas te abhi cakṣate haviḥ |
10.107.04c ye pṛṇanti pra ca yacchanti saṁgame te dakṣiṇāṁ duhate saptamātaram ||
10.107.05a dakṣiṇāvān prathamo hūta eti dakṣiṇāvān grāmaṇīr agram eti |
10.107.05c tam eva manye nṛpatiṁ janānāṁ yaḥ prathamo dakṣiṇām āvivāya ||
10.107.06a tam eva ṛṣiṁ tam u brahmāṇam āhur yajñanyaṁ sāmagām ukthaśāsam |
10.107.06c sa śukrasya tanvo veda tisro yaḥ prathamo dakṣiṇayā rarādha ||
10.107.07a dakṣiṇāśvaṁ dakṣiṇā gāṁ dadāti dakṣiṇā candram uta yad dhiraṇyam |
10.107.07c dakṣiṇānnaṁ vanute yo na ātmā dakṣiṇāṁ varma kṛṇute vijānan ||
10.107.08a na bhojā mamrur na nyartham īyur na riṣyanti na vyathante ha bhojāḥ |
10.107.08c idaṁ yad viśvam bhuvanaṁ svaś caitat sarvaṁ dakṣiṇaibhyo dadāti ||
10.107.09a bhojā jigyuḥ surabhiṁ yonim agre bhojā jigyur vadhvaṁ yā suvāsāḥ |
10.107.09c bhojā jigyur antaḥpeyaṁ surāyā bhojā jigyur ye ahūtāḥ prayanti ||
10.107.10a bhojāyāśvaṁ sam mṛjanty āśum bhojāyāste kanyā śumbhamānā |
10.107.10c bhojasyedam puṣkariṇīva veśma pariṣkṛtaṁ devamāneva citram ||
10.107.11a bhojam aśvāḥ suṣṭhuvāho vahanti suvṛd ratho vartate dakṣiṇāyāḥ |
10.107.11c bhojaṁ devāso 'vatā bhareṣu bhojaḥ śatrūn samanīkeṣu jetā ||

10.108.01a kim icchantī saramā predam ānaḍ dūre hy adhvā jaguriḥ parācaiḥ |
10.108.01c kāsmehitiḥ kā paritakmyāsīt kathaṁ rasāyā ataraḥ payāṁsi ||
10.108.02a indrasya dūtīr iṣitā carāmi maha icchantī paṇayo nidhīn vaḥ |
10.108.02c atiṣkado bhiyasā tan na āvat tathā rasāyā ataram payāṁsi ||
10.108.03a kīdṛṅṅ indraḥ sarame kā dṛśīkā yasyedaṁ dūtīr asaraḥ parākāt |
10.108.03c ā ca gacchān mitram enā dadhāmāthā gavāṁ gopatir no bhavāti ||
10.108.04a nāhaṁ taṁ veda dabhyaṁ dabhat sa yasyedaṁ dūtīr asaram parākāt |
10.108.04c na taṁ gūhanti sravato gabhīrā hatā indreṇa paṇayaḥ śayadhve ||
10.108.05a imā gāvaḥ sarame yā aicchaḥ pari divo antān subhage patantī |
10.108.05c kas ta enā ava sṛjād ayudhvy utāsmākam āyudhā santi tigmā ||
10.108.06a asenyā vaḥ paṇayo vacāṁsy aniṣavyās tanvaḥ santu pāpīḥ |
10.108.06c adhṛṣṭo va etavā astu panthā bṛhaspatir va ubhayā na mṛḻāt ||
10.108.07a ayaṁ nidhiḥ sarame adribudhno gobhir aśvebhir vasubhir nyṛṣṭaḥ |
10.108.07c rakṣanti tam paṇayo ye sugopā reku padam alakam ā jagantha ||
10.108.08a eha gamann ṛṣayaḥ somaśitā ayāsyo aṅgiraso navagvāḥ |
10.108.08c ta etam ūrvaṁ vi bhajanta gonām athaitad vacaḥ paṇayo vamann it ||
10.108.09a evā ca tvaṁ sarama ājagantha prabādhitā sahasā daivyena |
10.108.09c svasāraṁ tvā kṛṇavai mā punar gā apa te gavāṁ subhage bhajāma ||
10.108.10a nāhaṁ veda bhrātṛtvaṁ no svasṛtvam indro vidur aṅgirasaś ca ghorāḥ |
10.108.10c gokāmā me acchadayan yad āyam apāta ita paṇayo varīyaḥ ||
10.108.11a dūram ita paṇayo varīya ud gāvo yantu minatīr ṛtena |
10.108.11c bṛhaspatir yā avindan nigūḻhāḥ somo grāvāṇa ṛṣayaś ca viprāḥ ||

10.109.01a te 'vadan prathamā brahmakilbiṣe 'kūpāraḥ salilo mātariśvā |
10.109.01c vīḻuharās tapa ugro mayobhūr āpo devīḥ prathamajā ṛtena ||
10.109.02a somo rājā prathamo brahmajāyām punaḥ prāyacchad ahṛṇīyamānaḥ |
10.109.02c anvartitā varuṇo mitra āsīd agnir hotā hastagṛhyā nināya ||
10.109.03a hastenaiva grāhya ādhir asyā brahmajāyeyam iti ced avocan |
10.109.03c na dūtāya prahye tastha eṣā tathā rāṣṭraṁ gupitaṁ kṣatriyasya ||
10.109.04a devā etasyām avadanta pūrve saptaṛṣayas tapase ye niṣeduḥ |
10.109.04c bhīmā jāyā brāhmaṇasyopanītā durdhāṁ dadhāti parame vyoman ||
10.109.05a brahmacārī carati veviṣad viṣaḥ sa devānām bhavaty ekam aṅgam |
10.109.05c tena jāyām anv avindad bṛhaspatiḥ somena nītāṁ juhvaṁ na devāḥ ||
10.109.06a punar vai devā adaduḥ punar manuṣyā uta |
10.109.06c rājānaḥ satyaṁ kṛṇvānā brahmajāyām punar daduḥ ||
10.109.07a punardāya brahmajāyāṁ kṛtvī devair nikilbiṣam |
10.109.07c ūrjam pṛthivyā bhaktvāyorugāyam upāsate ||

10.110.01a samiddho adya manuṣo duroṇe devo devān yajasi jātavedaḥ |
10.110.01c ā ca vaha mitramahaś cikitvān tvaṁ dūtaḥ kavir asi pracetāḥ ||
10.110.02a tanūnapāt patha ṛtasya yānān madhvā samañjan svadayā sujihva |
10.110.02c manmāni dhībhir uta yajñam ṛndhan devatrā ca kṛṇuhy adhvaraṁ naḥ ||
10.110.03a ājuhvāna īḍyo vandyaś cā yāhy agne vasubhiḥ sajoṣāḥ |
10.110.03c tvaṁ devānām asi yahva hotā sa enān yakṣīṣito yajīyān ||
10.110.04a prācīnam barhiḥ pradiśā pṛthivyā vastor asyā vṛjyate agre ahnām |
10.110.04c vy u prathate vitaraṁ varīyo devebhyo aditaye syonam ||
10.110.05a vyacasvatīr urviyā vi śrayantām patibhyo na janayaḥ śumbhamānāḥ |
10.110.05c devīr dvāro bṛhatīr viśvaminvā devebhyo bhavata suprāyaṇāḥ ||
10.110.06a ā suṣvayantī yajate upāke uṣāsānaktā sadatāṁ ni yonau |
10.110.06c divye yoṣaṇe bṛhatī surukme adhi śriyaṁ śukrapiśaṁ dadhāne ||
10.110.07a daivyā hotārā prathamā suvācā mimānā yajñam manuṣo yajadhyai |
10.110.07c pracodayantā vidatheṣu kārū prācīnaṁ jyotiḥ pradiśā diśantā ||
10.110.08a ā no yajñam bhāratī tūyam etv iḻā manuṣvad iha cetayantī |
10.110.08c tisro devīr barhir edaṁ syonaṁ sarasvatī svapasaḥ sadantu ||
10.110.09a ya ime dyāvāpṛthivī janitrī rūpair apiṁśad bhuvanāni viśvā |
10.110.09c tam adya hotar iṣito yajīyān devaṁ tvaṣṭāram iha yakṣi vidvān ||
10.110.10a upāvasṛja tmanyā samañjan devānām pātha ṛtuthā havīṁṣi |
10.110.10c vanaspatiḥ śamitā devo agniḥ svadantu havyam madhunā ghṛtena ||
10.110.11a sadyo jāto vy amimīta yajñam agnir devānām abhavat purogāḥ |
10.110.11c asya hotuḥ pradiśy ṛtasya vāci svāhākṛtaṁ havir adantu devāḥ ||

10.111.01a manīṣiṇaḥ pra bharadhvam manīṣāṁ yathā-yathā matayaḥ santi nṛṇām |
10.111.01c indraṁ satyair erayāmā kṛtebhiḥ sa hi vīro girvaṇasyur vidānaḥ ||
10.111.02a ṛtasya hi sadaso dhītir adyaut saṁ gārṣṭeyo vṛṣabho gobhir ānaṭ |
10.111.02c ud atiṣṭhat taviṣeṇā raveṇa mahānti cit saṁ vivyācā rajāṁsi ||
10.111.03a indraḥ kila śrutyā asya veda sa hi jiṣṇuḥ pathikṛt sūryāya |
10.111.03c ān menāṁ kṛṇvann acyuto bhuvad goḥ patir divaḥ sanajā apratītaḥ ||
10.111.04a indro mahnā mahato arṇavasya vratāminād aṅgirobhir gṛṇānaḥ |
10.111.04c purūṇi cin ni tatānā rajāṁsi dādhāra yo dharuṇaṁ satyatātā ||
10.111.05a indro divaḥ pratimānam pṛthivyā viśvā veda savanā hanti śuṣṇam |
10.111.05c mahīṁ cid dyām ātanot sūryeṇa cāskambha cit kambhanena skabhīyān ||
10.111.06a vajreṇa hi vṛtrahā vṛtram astar adevasya śūśuvānasya māyāḥ |
10.111.06c vi dhṛṣṇo atra dhṛṣatā jaghanthāthābhavo maghavan bāhvojāḥ ||
10.111.07a sacanta yad uṣasaḥ sūryeṇa citrām asya ketavo rām avindan |
10.111.07c ā yan nakṣatraṁ dadṛśe divo na punar yato nakir addhā nu veda ||
10.111.08a dūraṁ kila prathamā jagmur āsām indrasya yāḥ prasave sasrur āpaḥ |
10.111.08c kva svid agraṁ kva budhna āsām āpo madhyaṁ kva vo nūnam antaḥ ||
10.111.09a sṛjaḥ sindhūm̐r ahinā jagrasānām̐ ād id etāḥ pra vivijre javena |
10.111.09c mumukṣamāṇā uta yā mumucre 'dhed etā na ramante nitiktāḥ ||
10.111.10a sadhrīcīḥ sindhum uśatīr ivāyan sanāj jāra āritaḥ pūrbhid āsām |
10.111.10c astam ā te pārthivā vasūny asme jagmuḥ sūnṛtā indra pūrvīḥ ||

10.112.01a indra piba pratikāmaṁ sutasya prātaḥsāvas tava hi pūrvapītiḥ |
10.112.01c harṣasva hantave śūra śatrūn ukthebhiṣ ṭe vīryā pra bravāma ||
10.112.02a yas te ratho manaso javīyān endra tena somapeyāya yāhi |
10.112.02c tūyam ā te harayaḥ pra dravantu yebhir yāsi vṛṣabhir mandamānaḥ ||
10.112.03a haritvatā varcasā sūryasya śreṣṭhai rūpais tanvaṁ sparśayasva |
10.112.03c asmābhir indra sakhibhir huvānaḥ sadhrīcīno mādayasvā niṣadya ||
10.112.04a yasya tyat te mahimānam madeṣv ime mahī rodasī nāviviktām |
10.112.04c tad oka ā haribhir indra yuktaiḥ priyebhir yāhi priyam annam accha ||
10.112.05a yasya śaśvat papivām̐ indra śatrūn anānukṛtyā raṇyā cakartha |
10.112.05c sa te puraṁdhiṁ taviṣīm iyarti sa te madāya suta indra somaḥ ||
10.112.06a idaṁ te pātraṁ sanavittam indra pibā somam enā śatakrato |
10.112.06c pūrṇa āhāvo madirasya madhvo yaṁ viśva id abhiharyanti devāḥ ||
10.112.07a vi hi tvām indra purudhā janāso hitaprayaso vṛṣabha hvayante |
10.112.07c asmākaṁ te madhumattamānīmā bhuvan savanā teṣu harya ||
10.112.08a pra ta indra pūrvyāṇi pra nūnaṁ vīryā vocam prathamā kṛtāni |
10.112.08c satīnamanyur aśrathāyo adriṁ suvedanām akṛṇor brahmaṇe gām ||
10.112.09a ni ṣu sīda gaṇapate gaṇeṣu tvām āhur vipratamaṁ kavīnām |
10.112.09c na ṛte tvat kriyate kiṁ canāre mahām arkam maghavañ citram arca ||
10.112.10a abhikhyā no maghavan nādhamānān sakhe bodhi vasupate sakhīnām |
10.112.10c raṇaṁ kṛdhi raṇakṛt satyaśuṣmābhakte cid ā bhajā rāye asmān ||

10.113.01a tam asya dyāvāpṛthivī sacetasā viśvebhir devair anu śuṣmam āvatām |
10.113.01c yad ait kṛṇvāno mahimānam indriyam pītvī somasya kratumām̐ avardhata ||
10.113.02a tam asya viṣṇur mahimānam ojasāṁśuṁ dadhanvān madhuno vi rapśate |
10.113.02c devebhir indro maghavā sayāvabhir vṛtraṁ jaghanvām̐ abhavad vareṇyaḥ ||
10.113.03a vṛtreṇa yad ahinā bibhrad āyudhā samasthithā yudhaye śaṁsam āvide |
10.113.03c viśve te atra marutaḥ saha tmanāvardhann ugra mahimānam indriyam ||
10.113.04a jajñāna eva vy abādhata spṛdhaḥ prāpaśyad vīro abhi pauṁsyaṁ raṇam |
10.113.04c avṛścad adrim ava sasyadaḥ sṛjad astabhnān nākaṁ svapasyayā pṛthum ||
10.113.05a ād indraḥ satrā taviṣīr apatyata varīyo dyāvāpṛthivī abādhata |
10.113.05c avābharad dhṛṣito vajram āyasaṁ śevam mitrāya varuṇāya dāśuṣe ||
10.113.06a indrasyātra taviṣībhyo virapśina ṛghāyato araṁhayanta manyave |
10.113.06c vṛtraṁ yad ugro vy avṛścad ojasāpo bibhrataṁ tamasā parīvṛtam ||
10.113.07a yā vīryāṇi prathamāni kartvā mahitvebhir yatamānau samīyatuḥ |
10.113.07c dhvāntaṁ tamo 'va dadhvase hata indro mahnā pūrvahūtāv apatyata ||
10.113.08a viśve devāso adha vṛṣṇyāni te 'vardhayan somavatyā vacasyayā |
10.113.08c raddhaṁ vṛtram ahim indrasya hanmanāgnir na jambhais tṛṣv annam āvayat ||
10.113.09a bhūri dakṣebhir vacanebhir ṛkvabhiḥ sakhyebhiḥ sakhyāni pra vocata |
10.113.09c indro dhuniṁ ca cumuriṁ ca dambhayañ chraddhāmanasyā śṛṇute dabhītaye ||
10.113.10a tvam purūṇy ā bharā svaśvyā yebhir maṁsai nivacanāni śaṁsan |
10.113.10c sugebhir viśvā duritā tarema vido ṣu ṇa urviyā gādham adya ||

10.114.01a gharmā samantā trivṛtaṁ vy āpatus tayor juṣṭim mātariśvā jagāma |
10.114.01c divas payo didhiṣāṇā aveṣan vidur devāḥ sahasāmānam arkam ||
10.114.02a tisro deṣṭrāya nirṛtīr upāsate dīrghaśruto vi hi jānanti vahnayaḥ |
10.114.02c tāsāṁ ni cikyuḥ kavayo nidānam pareṣu yā guhyeṣu vrateṣu ||
10.114.03a catuṣkapardā yuvatiḥ supeśā ghṛtapratīkā vayunāni vaste |
10.114.03c tasyāṁ suparṇā vṛṣaṇā ni ṣedatur yatra devā dadhire bhāgadheyam ||
10.114.04a ekaḥ suparṇaḥ sa samudram ā viveśa sa idaṁ viśvam bhuvanaṁ vi caṣṭe |
10.114.04c tam pākena manasāpaśyam antitas tam mātā reḻhi sa u reḻhi mātaram ||
10.114.05a suparṇaṁ viprāḥ kavayo vacobhir ekaṁ santam bahudhā kalpayanti |
10.114.05c chandāṁsi ca dadhato adhvareṣu grahān somasya mimate dvādaśa ||
10.114.06a ṣaṭtriṁśām̐ś ca caturaḥ kalpayantaś chandāṁsi ca dadhata ādvādaśam |
10.114.06c yajñaṁ vimāya kavayo manīṣa ṛksāmābhyām pra rathaṁ vartayanti ||
10.114.07a caturdaśānye mahimāno asya taṁ dhīrā vācā pra ṇayanti sapta |
10.114.07c āpnānaṁ tīrthaṁ ka iha pra vocad yena pathā prapibante sutasya ||
10.114.08a sahasradhā pañcadaśāny ukthā yāvad dyāvāpṛthivī tāvad it tat |
10.114.08c sahasradhā mahimānaḥ sahasraṁ yāvad brahma viṣṭhitaṁ tāvatī vāk ||
10.114.09a kaś chandasāṁ yogam ā veda dhīraḥ ko dhiṣṇyām prati vācam papāda |
10.114.09c kam ṛtvijām aṣṭamaṁ śūram āhur harī indrasya ni cikāya kaḥ svit ||
10.114.10a bhūmyā antam pary eke caranti rathasya dhūrṣu yuktāso asthuḥ |
10.114.10c śramasya dāyaṁ vi bhajanty ebhyo yadā yamo bhavati harmye hitaḥ ||

10.115.01a citra ic chiśos taruṇasya vakṣatho na yo mātarāv apyeti dhātave |
10.115.01c anūdhā yadi jījanad adhā ca nu vavakṣa sadyo mahi dūtyaṁ caran ||
10.115.02a agnir ha nāma dhāyi dann apastamaḥ saṁ yo vanā yuvate bhasmanā datā |
10.115.02c abhipramurā juhvā svadhvara ino na prothamāno yavase vṛṣā ||
10.115.03a taṁ vo viṁ na druṣadaṁ devam andhasa indum prothantam pravapantam arṇavam |
10.115.03c āsā vahniṁ na śociṣā virapśinam mahivrataṁ na sarajantam adhvanaḥ ||
10.115.04a vi yasya te jrayasānasyājara dhakṣor na vātāḥ pari santy acyutāḥ |
10.115.04c ā raṇvāso yuyudhayo na satvanaṁ tritaṁ naśanta pra śiṣanta iṣṭaye ||
10.115.05a sa id agniḥ kaṇvatamaḥ kaṇvasakhāryaḥ parasyāntarasya taruṣaḥ |
10.115.05c agniḥ pātu gṛṇato agniḥ sūrīn agnir dadātu teṣām avo naḥ ||
10.115.06a vājintamāya sahyase supitrya tṛṣu cyavāno anu jātavedase |
10.115.06c anudre cid yo dhṛṣatā varaṁ sate mahintamāya dhanvaned aviṣyate ||
10.115.07a evāgnir martaiḥ saha sūribhir vasuḥ ṣṭave sahasaḥ sūnaro nṛbhiḥ |
10.115.07c mitrāso na ye sudhitā ṛtāyavo dyāvo na dyumnair abhi santi mānuṣān ||
10.115.08a ūrjo napāt sahasāvann iti tvopastutasya vandate vṛṣā vāk |
10.115.08c tvāṁ stoṣāma tvayā suvīrā drāghīya āyuḥ prataraṁ dadhānāḥ ||
10.115.09a iti tvāgne vṛṣṭihavyasya putrā upastutāsa ṛṣayo 'vocan |
10.115.09c tām̐ś ca pāhi gṛṇataś ca sūrīn vaṣaḍ vaṣaḻ ity ūrdhvāso anakṣan namo nama ity ūrdhvāso anakṣan ||

10.116.01a pibā somam mahata indriyāya pibā vṛtrāya hantave śaviṣṭha |
10.116.01c piba rāye śavase hūyamānaḥ piba madhvas tṛpad indrā vṛṣasva ||
10.116.02a asya piba kṣumataḥ prasthitasyendra somasya varam ā sutasya |
10.116.02c svastidā manasā mādayasvārvācīno revate saubhagāya ||
10.116.03a mamattu tvā divyaḥ soma indra mamattu yaḥ sūyate pārthiveṣu |
10.116.03c mamattu yena varivaś cakartha mamattu yena niriṇāsi śatrūn ||
10.116.04a ā dvibarhā amino yātv indro vṛṣā haribhyām pariṣiktam andhaḥ |
10.116.04c gavy ā sutasya prabhṛtasya madhvaḥ satrā khedām aruśahā vṛṣasva ||
10.116.05a ni tigmāni bhrāśayan bhrāśyāny ava sthirā tanuhi yātujūnām |
10.116.05c ugrāya te saho balaṁ dadāmi pratītyā śatrūn vigadeṣu vṛśca ||
10.116.06a vy arya indra tanuhi śravāṁsy ojaḥ sthireva dhanvano 'bhimātīḥ |
10.116.06c asmadryag vāvṛdhānaḥ sahobhir anibhṛṣṭas tanvaṁ vāvṛdhasva ||
10.116.07a idaṁ havir maghavan tubhyaṁ rātam prati samrāḻ ahṛṇāno gṛbhāya |
10.116.07c tubhyaṁ suto maghavan tubhyam pakvo 'ddhīndra piba ca prasthitasya ||
10.116.08a addhīd indra prasthitemā havīṁṣi cano dadhiṣva pacatota somam |
10.116.08c prayasvantaḥ prati haryāmasi tvā satyāḥ santu yajamānasya kāmāḥ ||
10.116.09a prendrāgnibhyāṁ suvacasyām iyarmi sindhāv iva prerayaṁ nāvam arkaiḥ |
10.116.09c ayā iva pari caranti devā ye asmabhyaṁ dhanadā udbhidaś ca ||

10.117.01a na vā u devāḥ kṣudham id vadhaṁ dadur utāśitam upa gacchanti mṛtyavaḥ |
10.117.01c uto rayiḥ pṛṇato nopa dasyaty utāpṛṇan marḍitāraṁ na vindate ||
10.117.02a ya ādhrāya cakamānāya pitvo 'nnavān san raphitāyopajagmuṣe |
10.117.02c sthiram manaḥ kṛṇute sevate puroto cit sa marḍitāraṁ na vindate ||
10.117.03a sa id bhojo yo gṛhave dadāty annakāmāya carate kṛśāya |
10.117.03c aram asmai bhavati yāmahūtā utāparīṣu kṛṇute sakhāyam ||
10.117.04a na sa sakhā yo na dadāti sakhye sacābhuve sacamānāya pitvaḥ |
10.117.04c apāsmāt preyān na tad oko asti pṛṇantam anyam araṇaṁ cid icchet ||
10.117.05a pṛṇīyād in nādhamānāya tavyān drāghīyāṁsam anu paśyeta panthām |
10.117.05c o hi vartante rathyeva cakrānyam-anyam upa tiṣṭhanta rāyaḥ ||
10.117.06a mogham annaṁ vindate apracetāḥ satyam bravīmi vadha it sa tasya |
10.117.06c nāryamaṇam puṣyati no sakhāyaṁ kevalāgho bhavati kevalādī ||
10.117.07a kṛṣann it phāla āśitaṁ kṛṇoti yann adhvānam apa vṛṅkte caritraiḥ |
10.117.07c vadan brahmāvadato vanīyān pṛṇann āpir apṛṇantam abhi ṣyāt ||
10.117.08a ekapād bhūyo dvipado vi cakrame dvipāt tripādam abhy eti paścāt |
10.117.08c catuṣpād eti dvipadām abhisvare sampaśyan paṅktīr upatiṣṭhamānaḥ ||
10.117.09a samau cid dhastau na samaṁ viviṣṭaḥ sammātarā cin na samaṁ duhāte |
10.117.09c yamayoś cin na samā vīryāṇi jñātī cit santau na samam pṛṇītaḥ ||

10.118.01a agne haṁsi ny atriṇaṁ dīdyan martyeṣv ā |
10.118.01c sve kṣaye śucivrata ||
10.118.02a ut tiṣṭhasi svāhuto ghṛtāni prati modase |
10.118.02c yat tvā srucaḥ samasthiran ||
10.118.03a sa āhuto vi rocate 'gnir īḻenyo girā |
10.118.03c srucā pratīkam ajyate ||
10.118.04a ghṛtenāgniḥ sam ajyate madhupratīka āhutaḥ |
10.118.04c rocamāno vibhāvasuḥ ||
10.118.05a jaramāṇaḥ sam idhyase devebhyo havyavāhana |
10.118.05c taṁ tvā havanta martyāḥ ||
10.118.06a tam martā amartyaṁ ghṛtenāgniṁ saparyata |
10.118.06c adābhyaṁ gṛhapatim ||
10.118.07a adābhyena śociṣāgne rakṣas tvaṁ daha |
10.118.07c gopā ṛtasya dīdihi ||
10.118.08a sa tvam agne pratīkena praty oṣa yātudhānyaḥ |
10.118.08c urukṣayeṣu dīdyat ||
10.118.09a taṁ tvā gīrbhir urukṣayā havyavāhaṁ sam īdhire |
10.118.09c yajiṣṭham mānuṣe jane ||

10.119.01a iti vā iti me mano gām aśvaṁ sanuyām iti |
10.119.01c kuvit somasyāpām iti ||
10.119.02a pra vātā iva dodhata un mā pītā ayaṁsata |
10.119.02c kuvit somasyāpām iti ||
10.119.03a un mā pītā ayaṁsata ratham aśvā ivāśavaḥ |
10.119.03c kuvit somasyāpām iti ||
10.119.04a upa mā matir asthita vāśrā putram iva priyam |
10.119.04c kuvit somasyāpām iti ||
10.119.05a ahaṁ taṣṭeva vandhuram pary acāmi hṛdā matim |
10.119.05c kuvit somasyāpām iti ||
10.119.06a nahi me akṣipac canācchāntsuḥ pañca kṛṣṭayaḥ |
10.119.06c kuvit somasyāpām iti ||
10.119.07a nahi me rodasī ubhe anyam pakṣaṁ cana prati |
10.119.07c kuvit somasyāpām iti ||
10.119.08a abhi dyām mahinā bhuvam abhīmām pṛthivīm mahīm |
10.119.08c kuvit somasyāpām iti ||
10.119.09a hantāham pṛthivīm imāṁ ni dadhānīha veha vā |
10.119.09c kuvit somasyāpām iti ||
10.119.10a oṣam it pṛthivīm ahaṁ jaṅghanānīha veha vā |
10.119.10c kuvit somasyāpām iti ||
10.119.11a divi me anyaḥ pakṣo 'dho anyam acīkṛṣam |
10.119.11c kuvit somasyāpām iti ||
10.119.12a aham asmi mahāmaho 'bhinabhyam udīṣitaḥ |
10.119.12c kuvit somasyāpām iti ||
10.119.13a gṛho yāmy araṁkṛto devebhyo havyavāhanaḥ |
10.119.13c kuvit somasyāpām iti ||

10.120.01a tad id āsa bhuvaneṣu jyeṣṭhaṁ yato jajña ugras tveṣanṛmṇaḥ |
10.120.01c sadyo jajñāno ni riṇāti śatrūn anu yaṁ viśve madanty ūmāḥ ||
10.120.02a vāvṛdhānaḥ śavasā bhūryojāḥ śatrur dāsāya bhiyasaṁ dadhāti |
10.120.02c avyanac ca vyanac ca sasni saṁ te navanta prabhṛtā madeṣu ||
10.120.03a tve kratum api vṛñjanti viśve dvir yad ete trir bhavanty ūmāḥ |
10.120.03c svādoḥ svādīyaḥ svādunā sṛjā sam adaḥ su madhu madhunābhi yodhīḥ ||
10.120.04a iti cid dhi tvā dhanā jayantam made-made anumadanti viprāḥ |
10.120.04c ojīyo dhṛṣṇo sthiram ā tanuṣva mā tvā dabhan yātudhānā durevāḥ ||
10.120.05a tvayā vayaṁ śāśadmahe raṇeṣu prapaśyanto yudhenyāni bhūri |
10.120.05c codayāmi ta āyudhā vacobhiḥ saṁ te śiśāmi brahmaṇā vayāṁsi ||
10.120.06a stuṣeyyam puruvarpasam ṛbhvam inatamam āptyam āptyānām |
10.120.06c ā darṣate śavasā sapta dānūn pra sākṣate pratimānāni bhūri ||
10.120.07a ni tad dadhiṣe 'varam paraṁ ca yasminn āvithāvasā duroṇe |
10.120.07c ā mātarā sthāpayase jigatnū ata inoṣi karvarā purūṇi ||
10.120.08a imā brahma bṛhaddivo vivaktīndrāya śūṣam agriyaḥ svarṣāḥ |
10.120.08c maho gotrasya kṣayati svarājo duraś ca viśvā avṛṇod apa svāḥ ||
10.120.09a evā mahān bṛhaddivo atharvāvocat svāṁ tanvam indram eva |
10.120.09c svasāro mātaribhvarīr ariprā hinvanti ca śavasā vardhayanti ca ||

10.121.01a hiraṇyagarbhaḥ sam avartatāgre bhūtasya jātaḥ patir eka āsīt |
10.121.01c sa dādhāra pṛthivīṁ dyām utemāṁ kasmai devāya haviṣā vidhema ||
10.121.02a ya ātmadā baladā yasya viśva upāsate praśiṣaṁ yasya devāḥ |
10.121.02c yasya chāyāmṛtaṁ yasya mṛtyuḥ kasmai devāya haviṣā vidhema ||
10.121.03a yaḥ prāṇato nimiṣato mahitvaika id rājā jagato babhūva |
10.121.03c ya īśe asya dvipadaś catuṣpadaḥ kasmai devāya haviṣā vidhema ||
10.121.04a yasyeme himavanto mahitvā yasya samudraṁ rasayā sahāhuḥ |
10.121.04c yasyemāḥ pradiśo yasya bāhū kasmai devāya haviṣā vidhema ||
10.121.05a yena dyaur ugrā pṛthivī ca dṛḻhā yena svaḥ stabhitaṁ yena nākaḥ |
10.121.05c yo antarikṣe rajaso vimānaḥ kasmai devāya haviṣā vidhema ||
10.121.06a yaṁ krandasī avasā tastabhāne abhy aikṣetām manasā rejamāne |
10.121.06c yatrādhi sūra udito vibhāti kasmai devāya haviṣā vidhema ||
10.121.07a āpo ha yad bṛhatīr viśvam āyan garbhaṁ dadhānā janayantīr agnim |
10.121.07c tato devānāṁ sam avartatāsur ekaḥ kasmai devāya haviṣā vidhema ||
10.121.08a yaś cid āpo mahinā paryapaśyad dakṣaṁ dadhānā janayantīr yajñam |
10.121.08c yo deveṣv adhi deva eka āsīt kasmai devāya haviṣā vidhema ||
10.121.09a mā no hiṁsīj janitā yaḥ pṛthivyā yo vā divaṁ satyadharmā jajāna |
10.121.09c yaś cāpaś candrā bṛhatīr jajāna kasmai devāya haviṣā vidhema ||
10.121.10a prajāpate na tvad etāny anyo viśvā jātāni pari tā babhūva |
10.121.10c yatkāmās te juhumas tan no astu vayaṁ syāma patayo rayīṇām ||

10.122.01a vasuṁ na citramahasaṁ gṛṇīṣe vāmaṁ śevam atithim adviṣeṇyam |
10.122.01c sa rāsate śurudho viśvadhāyaso 'gnir hotā gṛhapatiḥ suvīryam ||
10.122.02a juṣāṇo agne prati harya me vaco viśvāni vidvān vayunāni sukrato |
10.122.02c ghṛtanirṇig brahmaṇe gātum eraya tava devā ajanayann anu vratam ||
10.122.03a sapta dhāmāni pariyann amartyo dāśad dāśuṣe sukṛte māmahasva |
10.122.03c suvīreṇa rayiṇāgne svābhuvā yas ta ānaṭ samidhā taṁ juṣasva ||
10.122.04a yajñasya ketum prathamam purohitaṁ haviṣmanta īḻate sapta vājinam |
10.122.04c śṛṇvantam agniṁ ghṛtapṛṣṭham ukṣaṇam pṛṇantaṁ devam pṛṇate suvīryam ||
10.122.05a tvaṁ dūtaḥ prathamo vareṇyaḥ sa hūyamāno amṛtāya matsva |
10.122.05c tvām marjayan maruto dāśuṣo gṛhe tvāṁ stomebhir bhṛgavo vi rurucuḥ ||
10.122.06a iṣaṁ duhan sudughāṁ viśvadhāyasaṁ yajñapriye yajamānāya sukrato |
10.122.06c agne ghṛtasnus trir ṛtāni dīdyad vartir yajñam pariyan sukratūyase ||
10.122.07a tvām id asyā uṣaso vyuṣṭiṣu dūtaṁ kṛṇvānā ayajanta mānuṣāḥ |
10.122.07c tvāṁ devā mahayāyyāya vāvṛdhur ājyam agne nimṛjanto adhvare ||
10.122.08a ni tvā vasiṣṭhā ahvanta vājinaṁ gṛṇanto agne vidatheṣu vedhasaḥ |
10.122.08c rāyas poṣaṁ yajamāneṣu dhāraya yūyam pāta svastibhiḥ sadā naḥ ||

10.123.01a ayaṁ venaś codayat pṛśnigarbhā jyotirjarāyū rajaso vimāne |
10.123.01c imam apāṁ saṁgame sūryasya śiśuṁ na viprā matibhī rihanti ||
10.123.02a samudrād ūrmim ud iyarti veno nabhojāḥ pṛṣṭhaṁ haryatasya darśi |
10.123.02c ṛtasya sānāv adhi viṣṭapi bhrāṭ samānaṁ yonim abhy anūṣata vrāḥ ||
10.123.03a samānam pūrvīr abhi vāvaśānās tiṣṭhan vatsasya mātaraḥ sanīḻāḥ |
10.123.03c ṛtasya sānāv adhi cakramāṇā rihanti madhvo amṛtasya vāṇīḥ ||
10.123.04a jānanto rūpam akṛpanta viprā mṛgasya ghoṣam mahiṣasya hi gman |
10.123.04c ṛtena yanto adhi sindhum asthur vidad gandharvo amṛtāni nāma ||
10.123.05a apsarā jāram upasiṣmiyāṇā yoṣā bibharti parame vyoman |
10.123.05c carat priyasya yoniṣu priyaḥ san sīdat pakṣe hiraṇyaye sa venaḥ ||
10.123.06a nāke suparṇam upa yat patantaṁ hṛdā venanto abhy acakṣata tvā |
10.123.06c hiraṇyapakṣaṁ varuṇasya dūtaṁ yamasya yonau śakunam bhuraṇyum ||
10.123.07a ūrdhvo gandharvo adhi nāke asthāt pratyaṅ citrā bibhrad asyāyudhāni |
10.123.07c vasāno atkaṁ surabhiṁ dṛśe kaṁ svar ṇa nāma janata priyāṇi ||
10.123.08a drapsaḥ samudram abhi yaj jigāti paśyan gṛdhrasya cakṣasā vidharman |
10.123.08c bhānuḥ śukreṇa śociṣā cakānas tṛtīye cakre rajasi priyāṇi ||

10.124.01a imaṁ no agna upa yajñam ehi pañcayāmaṁ trivṛtaṁ saptatantum |
10.124.01c aso havyavāḻ uta naḥ purogā jyog eva dīrghaṁ tama āśayiṣṭhāḥ ||
10.124.02a adevād devaḥ pracatā guhā yan prapaśyamāno amṛtatvam emi |
10.124.02c śivaṁ yat santam aśivo jahāmi svāt sakhyād araṇīṁ nābhim emi ||
10.124.03a paśyann anyasyā atithiṁ vayāyā ṛtasya dhāma vi mime purūṇi |
10.124.03c śaṁsāmi pitre asurāya śevam ayajñiyād yajñiyam bhāgam emi ||
10.124.04a bahvīḥ samā akaram antar asminn indraṁ vṛṇānaḥ pitaraṁ jahāmi |
10.124.04c agniḥ somo varuṇas te cyavante paryāvard rāṣṭraṁ tad avāmy āyan ||
10.124.05a nirmāyā u tye asurā abhūvan tvaṁ ca mā varuṇa kāmayāse |
10.124.05c ṛtena rājann anṛtaṁ viviñcan mama rāṣṭrasyādhipatyam ehi ||
10.124.06a idaṁ svar idam id āsa vāmam ayam prakāśa urv antarikṣam |
10.124.06c hanāva vṛtraṁ nirehi soma haviṣ ṭvā santaṁ haviṣā yajāma ||
10.124.07a kaviḥ kavitvā divi rūpam āsajad aprabhūtī varuṇo nir apaḥ sṛjat |
10.124.07c kṣemaṁ kṛṇvānā janayo na sindhavas tā asya varṇaṁ śucayo bharibhrati ||
10.124.08a tā asya jyeṣṭham indriyaṁ sacante tā īm ā kṣeti svadhayā madantīḥ |
10.124.08c tā īṁ viśo na rājānaṁ vṛṇānā bībhatsuvo apa vṛtrād atiṣṭhan ||
10.124.09a bībhatsūnāṁ sayujaṁ haṁsam āhur apāṁ divyānāṁ sakhye carantam |
10.124.09c anuṣṭubham anu carcūryamāṇam indraṁ ni cikyuḥ kavayo manīṣā ||

10.125.01a ahaṁ rudrebhir vasubhiś carāmy aham ādityair uta viśvadevaiḥ |
10.125.01c aham mitrāvaruṇobhā bibharmy aham indrāgnī aham aśvinobhā ||
10.125.02a ahaṁ somam āhanasam bibharmy ahaṁ tvaṣṭāram uta pūṣaṇam bhagam |
10.125.02c ahaṁ dadhāmi draviṇaṁ haviṣmate suprāvye yajamānāya sunvate ||
10.125.03a ahaṁ rāṣṭrī saṁgamanī vasūnāṁ cikituṣī prathamā yajñiyānām |
10.125.03c tām mā devā vy adadhuḥ purutrā bhūristhātrām bhūry āveśayantīm ||
10.125.04a mayā so annam atti yo vipaśyati yaḥ prāṇiti ya īṁ śṛṇoty uktam |
10.125.04c amantavo māṁ ta upa kṣiyanti śrudhi śruta śraddhivaṁ te vadāmi ||
10.125.05a aham eva svayam idaṁ vadāmi juṣṭaṁ devebhir uta mānuṣebhiḥ |
10.125.05c yaṁ kāmaye taṁ-tam ugraṁ kṛṇomi tam brahmāṇaṁ tam ṛṣiṁ taṁ sumedhām ||
10.125.06a ahaṁ rudrāya dhanur ā tanomi brahmadviṣe śarave hantavā u |
10.125.06c ahaṁ janāya samadaṁ kṛṇomy ahaṁ dyāvāpṛthivī ā viveśa ||
10.125.07a ahaṁ suve pitaram asya mūrdhan mama yonir apsv antaḥ samudre |
10.125.07c tato vi tiṣṭhe bhuvanānu viśvotāmūṁ dyāṁ varṣmaṇopa spṛśāmi ||
10.125.08a aham eva vāta iva pra vāmy ārabhamāṇā bhuvanāni viśvā |
10.125.08c paro divā para enā pṛthivyaitāvatī mahinā sam babhūva ||

10.126.01a na tam aṁho na duritaṁ devāso aṣṭa martyam |
10.126.01c sajoṣaso yam aryamā mitro nayanti varuṇo ati dviṣaḥ ||
10.126.02a tad dhi vayaṁ vṛṇīmahe varuṇa mitrāryaman |
10.126.02c yenā nir aṁhaso yūyam pātha nethā ca martyam ati dviṣaḥ ||
10.126.03a te nūnaṁ no 'yam ūtaye varuṇo mitro aryamā |
10.126.03c nayiṣṭhā u no neṣaṇi parṣiṣṭhā u naḥ parṣaṇy ati dviṣaḥ ||
10.126.04a yūyaṁ viśvam pari pātha varuṇo mitro aryamā |
10.126.04c yuṣmākaṁ śarmaṇi priye syāma supraṇītayo 'ti dviṣaḥ ||
10.126.05a ādityāso ati sridho varuṇo mitro aryamā |
10.126.05c ugram marudbhī rudraṁ huvemendram agniṁ svastaye 'ti dviṣaḥ ||
10.126.06a netāra ū ṣu ṇas tiro varuṇo mitro aryamā |
10.126.06c ati viśvāni duritā rājānaś carṣaṇīnām ati dviṣaḥ ||
10.126.07a śunam asmabhyam ūtaye varuṇo mitro aryamā |
10.126.07c śarma yacchantu sapratha ādityāso yad īmahe ati dviṣaḥ ||
10.126.08a yathā ha tyad vasavo gauryaṁ cit padi ṣitām amuñcatā yajatrāḥ |
10.126.08c evo ṣv asman muñcatā vy aṁhaḥ pra tāry agne prataraṁ na āyuḥ ||

10.127.01a rātrī vy akhyad āyatī purutrā devy akṣabhiḥ |
10.127.01c viśvā adhi śriyo 'dhita ||
10.127.02a orv aprā amartyā nivato devy udvataḥ |
10.127.02c jyotiṣā bādhate tamaḥ ||
10.127.03a nir u svasāram askṛtoṣasaṁ devy āyatī |
10.127.03c aped u hāsate tamaḥ ||
10.127.04a sā no adya yasyā vayaṁ ni te yāmann avikṣmahi |
10.127.04c vṛkṣe na vasatiṁ vayaḥ ||
10.127.05a ni grāmāso avikṣata ni padvanto ni pakṣiṇaḥ |
10.127.05c ni śyenāsaś cid arthinaḥ ||
10.127.06a yāvayā vṛkyaṁ vṛkaṁ yavaya stenam ūrmye |
10.127.06c athā naḥ sutarā bhava ||
10.127.07a upa mā pepiśat tamaḥ kṛṣṇaṁ vyaktam asthita |
10.127.07c uṣa ṛṇeva yātaya ||
10.127.08a upa te gā ivākaraṁ vṛṇīṣva duhitar divaḥ |
10.127.08c rātri stomaṁ na jigyuṣe ||

10.128.01a mamāgne varco vihaveṣv astu vayaṁ tvendhānās tanvam puṣema |
10.128.01c mahyaṁ namantām pradiśaś catasras tvayādhyakṣeṇa pṛtanā jayema ||
10.128.02a mama devā vihave santu sarva indravanto maruto viṣṇur agniḥ |
10.128.02c mamāntarikṣam urulokam astu mahyaṁ vātaḥ pavatāṁ kāme asmin ||
10.128.03a mayi devā draviṇam ā yajantām mayy āśīr astu mayi devahūtiḥ |
10.128.03c daivyā hotāro vanuṣanta pūrve 'riṣṭāḥ syāma tanvā suvīrāḥ ||
10.128.04a mahyaṁ yajantu mama yāni havyākūtiḥ satyā manaso me astu |
10.128.04c eno mā ni gāṁ katamac canāhaṁ viśve devāso adhi vocatā naḥ ||
10.128.05a devīḥ ṣaḻ urvīr uru naḥ kṛṇota viśve devāsa iha vīrayadhvam |
10.128.05c mā hāsmahi prajayā mā tanūbhir mā radhāma dviṣate soma rājan ||
10.128.06a agne manyum pratinudan pareṣām adabdho gopāḥ pari pāhi nas tvam |
10.128.06c pratyañco yantu nigutaḥ punas te 'maiṣāṁ cittam prabudhāṁ vi neśat ||
10.128.07a dhātā dhātṝṇām bhuvanasya yas patir devaṁ trātāram abhimātiṣāham |
10.128.07c imaṁ yajñam aśvinobhā bṛhaspatir devāḥ pāntu yajamānaṁ nyarthāt ||
10.128.08a uruvyacā no mahiṣaḥ śarma yaṁsad asmin have puruhūtaḥ purukṣuḥ |
10.128.08c sa naḥ prajāyai haryaśva mṛḻayendra mā no rīriṣo mā parā dāḥ ||
10.128.09a ye naḥ sapatnā apa te bhavantv indrāgnibhyām ava bādhāmahe tān |
10.128.09c vasavo rudrā ādityā uparispṛśam mograṁ cettāram adhirājam akran ||

10.129.01a nāsad āsīn no sad āsīt tadānīṁ nāsīd rajo no vyomā paro yat |
10.129.01c kim āvarīvaḥ kuha kasya śarmann ambhaḥ kim āsīd gahanaṁ gabhīram ||
10.129.02a na mṛtyur āsīd amṛtaṁ na tarhi na rātryā ahna āsīt praketaḥ |
10.129.02c ānīd avātaṁ svadhayā tad ekaṁ tasmād dhānyan na paraḥ kiṁ canāsa ||
10.129.03a tama āsīt tamasā gūḻham agre 'praketaṁ salilaṁ sarvam ā idam |
10.129.03c tucchyenābhv apihitaṁ yad āsīt tapasas tan mahinājāyataikam ||
10.129.04a kāmas tad agre sam avartatādhi manaso retaḥ prathamaṁ yad āsīt |
10.129.04c sato bandhum asati nir avindan hṛdi pratīṣyā kavayo manīṣā ||
10.129.05a tiraścīno vitato raśmir eṣām adhaḥ svid āsī3d upari svid āsī3t |
10.129.05c retodhā āsan mahimāna āsan svadhā avastāt prayatiḥ parastāt ||
10.129.06a ko addhā veda ka iha pra vocat kuta ājātā kuta iyaṁ visṛṣṭiḥ |
10.129.06c arvāg devā asya visarjanenāthā ko veda yata ābabhūva ||
10.129.07a iyaṁ visṛṣṭir yata ābabhūva yadi vā dadhe yadi vā na |
10.129.07c yo asyādhyakṣaḥ parame vyoman so aṅga veda yadi vā na veda ||

10.130.01a yo yajño viśvatas tantubhis tata ekaśataṁ devakarmebhir āyataḥ |
10.130.01c ime vayanti pitaro ya āyayuḥ pra vayāpa vayety āsate tate ||
10.130.02a pumām̐ enaṁ tanuta ut kṛṇatti pumān vi tatne adhi nāke asmin |
10.130.02c ime mayūkhā upa sedur ū sadaḥ sāmāni cakrus tasarāṇy otave ||
10.130.03a kāsīt pramā pratimā kiṁ nidānam ājyaṁ kim āsīt paridhiḥ ka āsīt |
10.130.03c chandaḥ kim āsīt praügaṁ kim ukthaṁ yad devā devam ayajanta viśve ||
10.130.04a agner gāyatry abhavat sayugvoṣṇihayā savitā sam babhūva |
10.130.04c anuṣṭubhā soma ukthair mahasvān bṛhaspater bṛhatī vācam āvat ||
10.130.05a virāṇ mitrāvaruṇayor abhiśrīr indrasya triṣṭub iha bhāgo ahnaḥ |
10.130.05c viśvān devāñ jagaty ā viveśa tena cākḷpra ṛṣayo manuṣyāḥ ||
10.130.06a cākḷpre tena ṛṣayo manuṣyā yajñe jāte pitaro naḥ purāṇe |
10.130.06c paśyan manye manasā cakṣasā tān ya imaṁ yajñam ayajanta pūrve ||
10.130.07a sahastomāḥ sahachandasa āvṛtaḥ sahapramā ṛṣayaḥ sapta daivyāḥ |
10.130.07c pūrveṣām panthām anudṛśya dhīrā anvālebhire rathyo na raśmīn ||

10.131.01a apa prāca indra viśvām̐ amitrān apāpāco abhibhūte nudasva |
10.131.01c apodīco apa śūrādharāca urau yathā tava śarman madema ||
10.131.02a kuvid aṅga yavamanto yavaṁ cid yathā dānty anupūrvaṁ viyūya |
10.131.02c ihehaiṣāṁ kṛṇuhi bhojanāni ye barhiṣo namovṛktiṁ na jagmuḥ ||
10.131.03a nahi sthūry ṛtuthā yātam asti nota śravo vivide saṁgameṣu |
10.131.03c gavyanta indraṁ sakhyāya viprā aśvāyanto vṛṣaṇaṁ vājayantaḥ ||
10.131.04a yuvaṁ surāmam aśvinā namucāv āsure sacā |
10.131.04c vipipānā śubhas patī indraṁ karmasv āvatam ||
10.131.05a putram iva pitarāv aśvinobhendrāvathuḥ kāvyair daṁsanābhiḥ |
10.131.05c yat surāmaṁ vy apibaḥ śacībhiḥ sarasvatī tvā maghavann abhiṣṇak ||
10.131.06a indraḥ sutrāmā svavām̐ avobhiḥ sumṛḻīko bhavatu viśvavedāḥ |
10.131.06c bādhatāṁ dveṣo abhayaṁ kṛṇotu suvīryasya patayaḥ syāma ||
10.131.07a tasya vayaṁ sumatau yajñiyasyāpi bhadre saumanase syāma |
10.131.07c sa sutrāmā svavām̐ indro asme ārāc cid dveṣaḥ sanutar yuyotu ||

10.132.01a ījānam id dyaur gūrtāvasur ījānam bhūmir abhi prabhūṣaṇi |
10.132.01c ījānaṁ devāv aśvināv abhi sumnair avardhatām ||
10.132.02a tā vām mitrāvaruṇā dhārayatkṣitī suṣumneṣitatvatā yajāmasi |
10.132.02c yuvoḥ krāṇāya sakhyair abhi ṣyāma rakṣasaḥ ||
10.132.03a adhā cin nu yad didhiṣāmahe vām abhi priyaṁ rekṇaḥ patyamānāḥ |
10.132.03c dadvām̐ vā yat puṣyati rekṇaḥ sam v āran nakir asya maghāni ||
10.132.04a asāv anyo asura sūyata dyaus tvaṁ viśveṣāṁ varuṇāsi rājā |
10.132.04c mūrdhā rathasya cākan naitāvatainasāntakadhruk ||
10.132.05a asmin sv etac chakapūta eno hite mitre nigatān hanti vīrān |
10.132.05c avor vā yad dhāt tanūṣv avaḥ priyāsu yajñiyāsv arvā ||
10.132.06a yuvor hi mātāditir vicetasā dyaur na bhūmiḥ payasā pupūtani |
10.132.06c ava priyā didiṣṭana sūro ninikta raśmibhiḥ ||
10.132.07a yuvaṁ hy apnarājāv asīdataṁ tiṣṭhad rathaṁ na dhūrṣadaṁ vanarṣadam |
10.132.07c tā naḥ kaṇūkayantīr nṛmedhas tatre aṁhasaḥ sumedhas tatre aṁhasaḥ ||

10.133.01a pro ṣv asmai puroratham indrāya śūṣam arcata |
10.133.01c abhīke cid u lokakṛt saṁge samatsu vṛtrahāsmākam bodhi coditā nabhantām anyakeṣāṁ jyākā adhi dhanvasu ||
10.133.02a tvaṁ sindhūm̐r avāsṛjo 'dharāco ahann ahim |
10.133.02c aśatrur indra jajñiṣe viśvam puṣyasi vāryaṁ taṁ tvā pari ṣvajāmahe nabhantām anyakeṣāṁ jyākā adhi dhanvasu ||
10.133.03a vi ṣu viśvā arātayo 'ryo naśanta no dhiyaḥ |
10.133.03c astāsi śatrave vadhaṁ yo na indra jighāṁsati yā te rātir dadir vasu nabhantām anyakeṣāṁ jyākā adhi dhanvasu ||
10.133.04a yo na indrābhito jano vṛkāyur ādideśati |
10.133.04c adhaspadaṁ tam īṁ kṛdhi vibādho asi sāsahir nabhantām anyakeṣāṁ jyākā adhi dhanvasu ||
10.133.05a yo na indrābhidāsati sanābhir yaś ca niṣṭyaḥ |
10.133.05c ava tasya balaṁ tira mahīva dyaur adha tmanā nabhantām anyakeṣāṁ jyākā adhi dhanvasu ||
10.133.06a vayam indra tvāyavaḥ sakhitvam ā rabhāmahe |
10.133.06c ṛtasya naḥ pathā nayāti viśvāni duritā nabhantām anyakeṣāṁ jyākā adhi dhanvasu ||
10.133.07a asmabhyaṁ su tvam indra tāṁ śikṣa yā dohate prati varaṁ jaritre |
10.133.07c acchidrodhnī pīpayad yathā naḥ sahasradhārā payasā mahī gauḥ ||

10.134.01a ubhe yad indra rodasī āpaprāthoṣā iva |
10.134.01c mahāntaṁ tvā mahīnāṁ samrājaṁ carṣaṇīnāṁ devī janitry ajījanad bhadrā janitry ajījanat ||
10.134.02a ava sma durhaṇāyato martasya tanuhi sthiram |
10.134.02c adhaspadaṁ tam īṁ kṛdhi yo asmām̐ ādideśati devī janitry ajījanad bhadrā janitry ajījanat ||
10.134.03a ava tyā bṛhatīr iṣo viśvaścandrā amitrahan |
10.134.03c śacībhiḥ śakra dhūnuhīndra viśvābhir ūtibhir devī janitry ajījanad bhadrā janitry ajījanat ||
10.134.04a ava yat tvaṁ śatakratav indra viśvāni dhūnuṣe |
10.134.04c rayiṁ na sunvate sacā sahasriṇībhir ūtibhir devī janitry ajījanad bhadrā janitry ajījanat ||
10.134.05a ava svedā ivābhito viṣvak patantu didyavaḥ |
10.134.05c dūrvāyā iva tantavo vy asmad etu durmatir devī janitry ajījanad bhadrā janitry ajījanat ||
10.134.06a dīrghaṁ hy aṅkuśaṁ yathā śaktim bibharṣi mantumaḥ |
10.134.06c pūrveṇa maghavan padājo vayāṁ yathā yamo devī janitry ajījanad bhadrā janitry ajījanat ||
10.134.07a nakir devā minīmasi nakir ā yopayāmasi mantraśrutyaṁ carāmasi |
10.134.07c pakṣebhir apikakṣebhir atrābhi saṁ rabhāmahe ||

10.135.01a yasmin vṛkṣe supalāśe devaiḥ sampibate yamaḥ |
10.135.01c atrā no viśpatiḥ pitā purāṇām̐ anu venati ||
10.135.02a purāṇām̐ anuvenantaṁ carantam pāpayāmuyā |
10.135.02c asūyann abhy acākaśaṁ tasmā aspṛhayam punaḥ ||
10.135.03a yaṁ kumāra navaṁ ratham acakram manasākṛṇoḥ |
10.135.03c ekeṣaṁ viśvataḥ prāñcam apaśyann adhi tiṣṭhasi ||
10.135.04a yaṁ kumāra prāvartayo rathaṁ viprebhyas pari |
10.135.04c taṁ sāmānu prāvartata sam ito nāvy āhitam ||
10.135.05a kaḥ kumāram ajanayad rathaṁ ko nir avartayat |
10.135.05c kaḥ svit tad adya no brūyād anudeyī yathābhavat ||
10.135.06a yathābhavad anudeyī tato agram ajāyata |
10.135.06c purastād budhna ātataḥ paścān nirayaṇaṁ kṛtam ||
10.135.07a idaṁ yamasya sādanaṁ devamānaṁ yad ucyate |
10.135.07c iyam asya dhamyate nāḻīr ayaṁ gīrbhiḥ pariṣkṛtaḥ ||

10.136.01a keśy agniṁ keśī viṣaṁ keśī bibharti rodasī |
10.136.01c keśī viśvaṁ svar dṛśe keśīdaṁ jyotir ucyate ||
10.136.02a munayo vātaraśanāḥ piśaṅgā vasate malā |
10.136.02c vātasyānu dhrājiṁ yanti yad devāso avikṣata ||
10.136.03a unmaditā mauneyena vātām̐ ā tasthimā vayam |
10.136.03c śarīred asmākaṁ yūyam martāso abhi paśyatha ||
10.136.04a antarikṣeṇa patati viśvā rūpāvacākaśat |
10.136.04c munir devasya-devasya saukṛtyāya sakhā hitaḥ ||
10.136.05a vātasyāśvo vāyoḥ sakhātho deveṣito muniḥ |
10.136.05c ubhau samudrāv ā kṣeti yaś ca pūrva utāparaḥ ||
10.136.06a apsarasāṁ gandharvāṇām mṛgāṇāṁ caraṇe caran |
10.136.06c keśī ketasya vidvān sakhā svādur madintamaḥ ||
10.136.07a vāyur asmā upāmanthat pinaṣṭi smā kunannamā |
10.136.07c keśī viṣasya pātreṇa yad rudreṇāpibat saha ||

10.137.01a uta devā avahitaṁ devā un nayathā punaḥ |
10.137.01c utāgaś cakruṣaṁ devā devā jīvayathā punaḥ ||
10.137.02a dvāv imau vātau vāta ā sindhor ā parāvataḥ |
10.137.02c dakṣaṁ te anya ā vātu parānyo vātu yad rapaḥ ||
10.137.03a ā vāta vāhi bheṣajaṁ vi vāta vāhi yad rapaḥ |
10.137.03c tvaṁ hi viśvabheṣajo devānāṁ dūta īyase ||
10.137.04a ā tvāgamaṁ śaṁtātibhir atho ariṣṭatātibhiḥ |
10.137.04c dakṣaṁ te bhadram ābhārṣam parā yakṣmaṁ suvāmi te ||
10.137.05a trāyantām iha devās trāyatām marutāṁ gaṇaḥ |
10.137.05c trāyantāṁ viśvā bhūtāni yathāyam arapā asat ||
10.137.06a āpa id vā u bheṣajīr āpo amīvacātanīḥ |
10.137.06c āpaḥ sarvasya bheṣajīs tās te kṛṇvantu bheṣajam ||
10.137.07a hastābhyāṁ daśaśākhābhyāṁ jihvā vācaḥ purogavī |
10.137.07c anāmayitnubhyāṁ tvā tābhyāṁ tvopa spṛśāmasi ||

10.138.01a tava tya indra sakhyeṣu vahnaya ṛtam manvānā vy adardirur valam |
10.138.01c yatrā daśasyann uṣaso riṇann apaḥ kutsāya manmann ahyaś ca daṁsayaḥ ||
10.138.02a avāsṛjaḥ prasvaḥ śvañcayo girīn ud āja usrā apibo madhu priyam |
10.138.02c avardhayo vanino asya daṁsasā śuśoca sūrya ṛtajātayā girā ||
10.138.03a vi sūryo madhye amucad rathaṁ divo vidad dāsāya pratimānam āryaḥ |
10.138.03c dṛḻhāni pipror asurasya māyina indro vy āsyac cakṛvām̐ ṛjiśvanā ||
10.138.04a anādhṛṣṭāni dhṛṣito vy āsyan nidhīm̐r adevām̐ amṛṇad ayāsyaḥ |
10.138.04c māseva sūryo vasu puryam ā dade gṛṇānaḥ śatrūm̐r aśṛṇād virukmatā ||
10.138.05a ayuddhaseno vibhvā vibhindatā dāśad vṛtrahā tujyāni tejate |
10.138.05c indrasya vajrād abibhed abhiśnathaḥ prākrāmac chundhyūr ajahād uṣā anaḥ ||
10.138.06a etā tyā te śrutyāni kevalā yad eka ekam akṛṇor ayajñam |
10.138.06c māsāṁ vidhānam adadhā adhi dyavi tvayā vibhinnam bharati pradhim pitā ||

10.139.01a sūryaraśmir harikeśaḥ purastāt savitā jyotir ud ayām̐ ajasram |
10.139.01c tasya pūṣā prasave yāti vidvān sampaśyan viśvā bhuvanāni gopāḥ ||
10.139.02a nṛcakṣā eṣa divo madhya āsta āpaprivān rodasī antarikṣam |
10.139.02c sa viśvācīr abhi caṣṭe ghṛtācīr antarā pūrvam aparaṁ ca ketum ||
10.139.03a rāyo budhnaḥ saṁgamano vasūnāṁ viśvā rūpābhi caṣṭe śacībhiḥ |
10.139.03c deva iva savitā satyadharmendro na tasthau samare dhanānām ||
10.139.04a viśvāvasuṁ soma gandharvam āpo dadṛśuṣīs tad ṛtenā vy āyan |
10.139.04c tad anvavaid indro rārahāṇa āsām pari sūryasya paridhīm̐r apaśyat ||
10.139.05a viśvāvasur abhi tan no gṛṇātu divyo gandharvo rajaso vimānaḥ |
10.139.05c yad vā ghā satyam uta yan na vidma dhiyo hinvāno dhiya in no avyāḥ ||
10.139.06a sasnim avindac caraṇe nadīnām apāvṛṇod duro aśmavrajānām |
10.139.06c prāsāṁ gandharvo amṛtāni vocad indro dakṣam pari jānād ahīnām ||

10.140.01a agne tava śravo vayo mahi bhrājante arcayo vibhāvaso |
10.140.01c bṛhadbhāno śavasā vājam ukthyaṁ dadhāsi dāśuṣe kave ||
10.140.02a pāvakavarcāḥ śukravarcā anūnavarcā ud iyarṣi bhānunā |
10.140.02c putro mātarā vicarann upāvasi pṛṇakṣi rodasī ubhe ||
10.140.03a ūrjo napāj jātavedaḥ suśastibhir mandasva dhītibhir hitaḥ |
10.140.03c tve iṣaḥ saṁ dadhur bhūrivarpasaś citrotayo vāmajātāḥ ||
10.140.04a irajyann agne prathayasva jantubhir asme rāyo amartya |
10.140.04c sa darśatasya vapuṣo vi rājasi pṛṇakṣi sānasiṁ kratum ||
10.140.05a iṣkartāram adhvarasya pracetasaṁ kṣayantaṁ rādhaso mahaḥ |
10.140.05c rātiṁ vāmasya subhagām mahīm iṣaṁ dadhāsi sānasiṁ rayim ||
10.140.06a ṛtāvānam mahiṣaṁ viśvadarśatam agniṁ sumnāya dadhire puro janāḥ |
10.140.06c śrutkarṇaṁ saprathastamaṁ tvā girā daivyam mānuṣā yugā ||

10.141.01a agne acchā vadeha naḥ pratyaṅ naḥ sumanā bhava |
10.141.01c pra no yaccha viśas pate dhanadā asi nas tvam ||
10.141.02a pra no yacchatv aryamā pra bhagaḥ pra bṛhaspatiḥ |
10.141.02c pra devāḥ prota sūnṛtā rāyo devī dadātu naḥ ||
10.141.03a somaṁ rājānam avase 'gniṁ gīrbhir havāmahe |
10.141.03c ādityān viṣṇuṁ sūryam brahmāṇaṁ ca bṛhaspatim ||
10.141.04a indravāyū bṛhaspatiṁ suhaveha havāmahe |
10.141.04c yathā naḥ sarva ij janaḥ saṁgatyāṁ sumanā asat ||
10.141.05a aryamaṇam bṛhaspatim indraṁ dānāya codaya |
10.141.05c vātaṁ viṣṇuṁ sarasvatīṁ savitāraṁ ca vājinam ||
10.141.06a tvaṁ no agne agnibhir brahma yajñaṁ ca vardhaya |
10.141.06c tvaṁ no devatātaye rāyo dānāya codaya ||

10.142.01a ayam agne jaritā tve abhūd api sahasaḥ sūno nahy anyad asty āpyam |
10.142.01c bhadraṁ hi śarma trivarūtham asti ta āre hiṁsānām apa didyum ā kṛdhi ||
10.142.02a pravat te agne janimā pitūyataḥ sācīva viśvā bhuvanā ny ṛñjase |
10.142.02c pra saptayaḥ pra saniṣanta no dhiyaḥ puraś caranti paśupā iva tmanā ||
10.142.03a uta vā u pari vṛṇakṣi bapsad bahor agna ulapasya svadhāvaḥ |
10.142.03c uta khilyā urvarāṇām bhavanti mā te hetiṁ taviṣīṁ cukrudhāma ||
10.142.04a yad udvato nivato yāsi bapsat pṛthag eṣi pragardhinīva senā |
10.142.04c yadā te vāto anuvāti śocir vapteva śmaśru vapasi pra bhūma ||
10.142.05a praty asya śreṇayo dadṛśra ekaṁ niyānam bahavo rathāsaḥ |
10.142.05c bāhū yad agne anumarmṛjāno nyaṅṅ uttānām anveṣi bhūmim ||
10.142.06a ut te śuṣmā jihatām ut te arcir ut te agne śaśamānasya vājāḥ |
10.142.06c uc chvañcasva ni nama vardhamāna ā tvādya viśve vasavaḥ sadantu ||
10.142.07a apām idaṁ nyayanaṁ samudrasya niveśanam |
10.142.07c anyaṁ kṛṇuṣvetaḥ panthāṁ tena yāhi vaśām̐ anu ||
10.142.08a āyane te parāyaṇe dūrvā rohantu puṣpiṇīḥ |
10.142.08c hradāś ca puṇḍarīkāṇi samudrasya gṛhā ime ||

10.143.01a tyaṁ cid atrim ṛtajuram artham aśvaṁ na yātave |
10.143.01c kakṣīvantaṁ yadī punā rathaṁ na kṛṇutho navam ||
10.143.02a tyaṁ cid aśvaṁ na vājinam areṇavo yam atnata |
10.143.02c dṛḻhaṁ granthiṁ na vi ṣyatam atriṁ yaviṣṭham ā rajaḥ ||
10.143.03a narā daṁsiṣṭhāv atraye śubhrā siṣāsataṁ dhiyaḥ |
10.143.03c athā hi vāṁ divo narā punaḥ stomo na viśase ||
10.143.04a cite tad vāṁ surādhasā rātiḥ sumatir aśvinā |
10.143.04c ā yan naḥ sadane pṛthau samane parṣatho narā ||
10.143.05a yuvam bhujyuṁ samudra ā rajasaḥ pāra īṅkhitam |
10.143.05c yātam acchā patatribhir nāsatyā sātaye kṛtam ||
10.143.06a ā vāṁ sumnaiḥ śaṁyū iva maṁhiṣṭhā viśvavedasā |
10.143.06c sam asme bhūṣataṁ narotsaṁ na pipyuṣīr iṣaḥ ||

10.144.01a ayaṁ hi te amartya indur atyo na patyate |
10.144.01c dakṣo viśvāyur vedhase ||
10.144.02a ayam asmāsu kāvya ṛbhur vajro dāsvate |
10.144.02c ayam bibharty ūrdhvakṛśanam madam ṛbhur na kṛtvyam madam ||
10.144.03a ghṛṣuḥ śyenāya kṛtvana āsu svāsu vaṁsagaḥ |
10.144.03c ava dīdhed ahīśuvaḥ ||
10.144.04a yaṁ suparṇaḥ parāvataḥ śyenasya putra ābharat |
10.144.04c śatacakraṁ yo 'hyo vartaniḥ ||
10.144.05a yaṁ te śyenaś cārum avṛkam padābharad aruṇam mānam andhasaḥ |
10.144.05c enā vayo vi tāry āyur jīvasa enā jāgāra bandhutā ||
10.144.06a evā tad indra indunā deveṣu cid dhārayāte mahi tyajaḥ |
10.144.06c kratvā vayo vi tāry āyuḥ sukrato kratvāyam asmad ā sutaḥ ||

10.145.01a imāṁ khanāmy oṣadhiṁ vīrudham balavattamām |
10.145.01c yayā sapatnīm bādhate yayā saṁvindate patim ||
10.145.02a uttānaparṇe subhage devajūte sahasvati |
10.145.02c sapatnīm me parā dhama patim me kevalaṁ kuru ||
10.145.03a uttarāham uttara uttared uttarābhyaḥ |
10.145.03c athā sapatnī yā mamādharā sādharābhyaḥ ||
10.145.04a nahy asyā nāma gṛbhṇāmi no asmin ramate jane |
10.145.04c parām eva parāvataṁ sapatnīṁ gamayāmasi ||
10.145.05a aham asmi sahamānātha tvam asi sāsahiḥ |
10.145.05c ubhe sahasvatī bhūtvī sapatnīm me sahāvahai ||
10.145.06a upa te 'dhāṁ sahamānām abhi tvādhāṁ sahīyasā |
10.145.06c mām anu pra te mano vatsaṁ gaur iva dhāvatu pathā vār iva dhāvatu ||

10.146.01a araṇyāny araṇyāny asau yā preva naśyasi |
10.146.01c kathā grāmaṁ na pṛcchasi na tvā bhīr iva vindatī3m̐ ||
10.146.02a vṛṣāravāya vadate yad upāvati ciccikaḥ |
10.146.02c āghāṭibhir iva dhāvayann araṇyānir mahīyate ||
10.146.03a uta gāva ivādanty uta veśmeva dṛśyate |
10.146.03c uto araṇyāniḥ sāyaṁ śakaṭīr iva sarjati ||
10.146.04a gām aṅgaiṣa ā hvayati dārv aṅgaiṣo apāvadhīt |
10.146.04c vasann araṇyānyāṁ sāyam akrukṣad iti manyate ||
10.146.05a na vā araṇyānir hanty anyaś cen nābhigacchati |
10.146.05c svādoḥ phalasya jagdhvāya yathākāmaṁ ni padyate ||
10.146.06a āñjanagandhiṁ surabhim bahvannām akṛṣīvalām |
10.146.06c prāham mṛgāṇām mātaram araṇyānim aśaṁsiṣam ||

10.147.01a śrat te dadhāmi prathamāya manyave 'han yad vṛtraṁ naryaṁ viver apaḥ |
10.147.01c ubhe yat tvā bhavato rodasī anu rejate śuṣmāt pṛthivī cid adrivaḥ ||
10.147.02a tvam māyābhir anavadya māyinaṁ śravasyatā manasā vṛtram ardayaḥ |
10.147.02c tvām in naro vṛṇate gaviṣṭiṣu tvāṁ viśvāsu havyāsv iṣṭiṣu ||
10.147.03a aiṣu cākandhi puruhūta sūriṣu vṛdhāso ye maghavann ānaśur magham |
10.147.03c arcanti toke tanaye pariṣṭiṣu medhasātā vājinam ahraye dhane ||
10.147.04a sa in nu rāyaḥ subhṛtasya cākanan madaṁ yo asya raṁhyaṁ ciketati |
10.147.04c tvāvṛdho maghavan dāśvadhvaro makṣū sa vājam bharate dhanā nṛbhiḥ ||
10.147.05a tvaṁ śardhāya mahinā gṛṇāna uru kṛdhi maghavañ chagdhi rāyaḥ |
10.147.05c tvaṁ no mitro varuṇo na māyī pitvo na dasma dayase vibhaktā ||

10.148.01a suṣvāṇāsa indra stumasi tvā sasavāṁsaś ca tuvinṛmṇa vājam |
10.148.01c ā no bhara suvitaṁ yasya cākan tmanā tanā sanuyāma tvotāḥ ||
10.148.02a ṛṣvas tvam indra śūra jāto dāsīr viśaḥ sūryeṇa sahyāḥ |
10.148.02c guhā hitaṁ guhyaṁ gūḻham apsu bibhṛmasi prasravaṇe na somam ||
10.148.03a aryo vā giro abhy arca vidvān ṛṣīṇāṁ vipraḥ sumatiṁ cakānaḥ |
10.148.03c te syāma ye raṇayanta somair enota tubhyaṁ rathoḻha bhakṣaiḥ ||
10.148.04a imā brahmendra tubhyaṁ śaṁsi dā nṛbhyo nṛṇāṁ śūra śavaḥ |
10.148.04c tebhir bhava sakratur yeṣu cākann uta trāyasva gṛṇata uta stīn ||
10.148.05a śrudhī havam indra śūra pṛthyā uta stavase venyasyārkaiḥ |
10.148.05c ā yas te yoniṁ ghṛtavantam asvār ūrmir na nimnair dravayanta vakvāḥ ||

10.149.01a savitā yantraiḥ pṛthivīm aramṇād askambhane savitā dyām adṛṁhat |
10.149.01c aśvam ivādhukṣad dhunim antarikṣam atūrte baddhaṁ savitā samudram ||
10.149.02a yatrā samudraḥ skabhito vy aunad apāṁ napāt savitā tasya veda |
10.149.02c ato bhūr ata ā utthitaṁ rajo 'to dyāvāpṛthivī aprathetām ||
10.149.03a paścedam anyad abhavad yajatram amartyasya bhuvanasya bhūnā |
10.149.03c suparṇo aṅga savitur garutmān pūrvo jātaḥ sa u asyānu dharma ||
10.149.04a gāva iva grāmaṁ yūyudhir ivāśvān vāśreva vatsaṁ sumanā duhānā |
10.149.04c patir iva jāyām abhi no ny etu dhartā divaḥ savitā viśvavāraḥ ||
10.149.05a hiraṇyastūpaḥ savitar yathā tvāṅgiraso juhve vāje asmin |
10.149.05c evā tvārcann avase vandamānaḥ somasyevāṁśum prati jāgarāham ||

10.150.01a samiddhaś cit sam idhyase devebhyo havyavāhana |
10.150.01c ādityai rudrair vasubhir na ā gahi mṛḻīkāya na ā gahi ||
10.150.02a imaṁ yajñam idaṁ vaco jujuṣāṇa upāgahi |
10.150.02c martāsas tvā samidhāna havāmahe mṛḻīkāya havāmahe ||
10.150.03a tvām u jātavedasaṁ viśvavāraṁ gṛṇe dhiyā |
10.150.03c agne devām̐ ā vaha naḥ priyavratān mṛḻīkāya priyavratān ||
10.150.04a agnir devo devānām abhavat purohito 'gnim manuṣyā ṛṣayaḥ sam īdhire |
10.150.04c agnim maho dhanasātāv ahaṁ huve mṛḻīkaṁ dhanasātaye ||
10.150.05a agnir atrim bharadvājaṁ gaviṣṭhiram prāvan naḥ kaṇvaṁ trasadasyum āhave |
10.150.05c agniṁ vasiṣṭho havate purohito mṛḻīkāya purohitaḥ ||

10.151.01a śraddhayāgniḥ sam idhyate śraddhayā hūyate haviḥ |
10.151.01c śraddhām bhagasya mūrdhani vacasā vedayāmasi ||
10.151.02a priyaṁ śraddhe dadataḥ priyaṁ śraddhe didāsataḥ |
10.151.02c priyam bhojeṣu yajvasv idam ma uditaṁ kṛdhi ||
10.151.03a yathā devā asureṣu śraddhām ugreṣu cakrire |
10.151.03c evam bhojeṣu yajvasv asmākam uditaṁ kṛdhi ||
10.151.04a śraddhāṁ devā yajamānā vāyugopā upāsate |
10.151.04c śraddhāṁ hṛdayyayākūtyā śraddhayā vindate vasu ||
10.151.05a śraddhām prātar havāmahe śraddhām madhyaṁdinam pari |
10.151.05c śraddhāṁ sūryasya nimruci śraddhe śrad dhāpayeha naḥ ||

10.152.01a śāsa itthā mahām̐ asy amitrakhādo adbhutaḥ |
10.152.01c na yasya hanyate sakhā na jīyate kadā cana ||
10.152.02a svastidā viśas patir vṛtrahā vimṛdho vaśī |
10.152.02c vṛṣendraḥ pura etu naḥ somapā abhayaṁkaraḥ ||
10.152.03a vi rakṣo vi mṛdho jahi vi vṛtrasya hanū ruja |
10.152.03c vi manyum indra vṛtrahann amitrasyābhidāsataḥ ||
10.152.04a vi na indra mṛdho jahi nīcā yaccha pṛtanyataḥ |
10.152.04c yo asmām̐ abhidāsaty adharaṁ gamayā tamaḥ ||
10.152.05a apendra dviṣato mano 'pa jijyāsato vadham |
10.152.05c vi manyoḥ śarma yaccha varīyo yavayā vadham ||

10.153.01a īṅkhayantīr apasyuva indraṁ jātam upāsate |
10.153.01c bhejānāsaḥ suvīryam ||
10.153.02a tvam indra balād adhi sahaso jāta ojasaḥ |
10.153.02c tvaṁ vṛṣan vṛṣed asi ||
10.153.03a tvam indrāsi vṛtrahā vy antarikṣam atiraḥ |
10.153.03c ud dyām astabhnā ojasā ||
10.153.04a tvam indra sajoṣasam arkam bibharṣi bāhvoḥ |
10.153.04c vajraṁ śiśāna ojasā ||
10.153.05a tvam indrābhibhūr asi viśvā jātāny ojasā |
10.153.05c sa viśvā bhuva ābhavaḥ ||

10.154.01a soma ekebhyaḥ pavate ghṛtam eka upāsate |
10.154.01c yebhyo madhu pradhāvati tām̐ś cid evāpi gacchatāt ||
10.154.02a tapasā ye anādhṛṣyās tapasā ye svar yayuḥ |
10.154.02c tapo ye cakrire mahas tām̐ś cid evāpi gacchatāt ||
10.154.03a ye yudhyante pradhaneṣu śūrāso ye tanūtyajaḥ |
10.154.03c ye vā sahasradakṣiṇās tām̐ś cid evāpi gacchatāt ||
10.154.04a ye cit pūrva ṛtasāpa ṛtāvāna ṛtāvṛdhaḥ |
10.154.04c pitṝn tapasvato yama tām̐ś cid evāpi gacchatāt ||
10.154.05a sahasraṇīthāḥ kavayo ye gopāyanti sūryam |
10.154.05c ṛṣīn tapasvato yama tapojām̐ api gacchatāt ||

10.155.01a arāyi kāṇe vikaṭe giriṁ gaccha sadānve |
10.155.01c śirimbiṭhasya satvabhis tebhiṣ ṭvā cātayāmasi ||
10.155.02a catto itaś cattāmutaḥ sarvā bhrūṇāny āruṣī |
10.155.02c arāyyam brahmaṇas pate tīkṣṇaśṛṇgodṛṣann ihi ||
10.155.03a ado yad dāru plavate sindhoḥ pāre apūruṣam |
10.155.03c tad ā rabhasva durhaṇo tena gaccha parastaram ||
10.155.04a yad dha prācīr ajagantoro maṇḍūradhāṇikīḥ |
10.155.04c hatā indrasya śatravaḥ sarve budbudayāśavaḥ ||
10.155.05a parīme gām aneṣata pary agnim ahṛṣata |
10.155.05c deveṣv akrata śravaḥ ka imām̐ ā dadharṣati ||

10.156.01a agniṁ hinvantu no dhiyaḥ saptim āśum ivājiṣu |
10.156.01c tena jeṣma dhanaṁ-dhanam ||
10.156.02a yayā gā ākarāmahe senayāgne tavotyā |
10.156.02c tāṁ no hinva maghattaye ||
10.156.03a āgne sthūraṁ rayim bhara pṛthuṁ gomantam aśvinam |
10.156.03c aṅdhi khaṁ vartayā paṇim ||
10.156.04a agne nakṣatram ajaram ā sūryaṁ rohayo divi |
10.156.04c dadhaj jyotir janebhyaḥ ||
10.156.05a agne ketur viśām asi preṣṭhaḥ śreṣṭha upasthasat |
10.156.05c bodhā stotre vayo dadhat ||

10.157.01a imā nu kam bhuvanā sīṣadhāmendraś ca viśve ca devāḥ ||
10.157.02a yajñaṁ ca nas tanvaṁ ca prajāṁ cādityair indraḥ saha cīkḷpāti ||
10.157.03a ādityair indraḥ sagaṇo marudbhir asmākam bhūtv avitā tanūnām ||
10.157.04a hatvāya devā asurān yad āyan devā devatvam abhirakṣamāṇāḥ ||
10.157.05a pratyañcam arkam anayañ chacībhir ād it svadhām iṣirām pary apaśyan ||

10.158.01a sūryo no divas pātu vāto antarikṣāt |
10.158.01c agnir naḥ pārthivebhyaḥ ||
10.158.02a joṣā savitar yasya te haraḥ śataṁ savām̐ arhati |
10.158.02c pāhi no didyutaḥ patantyāḥ ||
10.158.03a cakṣur no devaḥ savitā cakṣur na uta parvataḥ |
10.158.03c cakṣur dhātā dadhātu naḥ ||
10.158.04a cakṣur no dhehi cakṣuṣe cakṣur vikhyai tanūbhyaḥ |
10.158.04c saṁ cedaṁ vi ca paśyema ||
10.158.05a susaṁdṛśaṁ tvā vayam prati paśyema sūrya |
10.158.05c vi paśyema nṛcakṣasaḥ ||

10.159.01a ud asau sūryo agād ud ayam māmako bhagaḥ |
10.159.01c ahaṁ tad vidvalā patim abhy asākṣi viṣāsahiḥ ||
10.159.02a ahaṁ ketur aham mūrdhāham ugrā vivācanī |
10.159.02c mamed anu kratum patiḥ sehānāyā upācaret ||
10.159.03a mama putrāḥ śatruhaṇo 'tho me duhitā virāṭ |
10.159.03c utāham asmi saṁjayā patyau me śloka uttamaḥ ||
10.159.04a yenendro haviṣā kṛtvy abhavad dyumny uttamaḥ |
10.159.04c idaṁ tad akri devā asapatnā kilābhuvam ||
10.159.05a asapatnā sapatnaghnī jayanty abhibhūvarī |
10.159.05c āvṛkṣam anyāsāṁ varco rādho astheyasām iva ||
10.159.06a sam ajaiṣam imā ahaṁ sapatnīr abhibhūvarī |
10.159.06c yathāham asya vīrasya virājāni janasya ca ||

10.160.01a tīvrasyābhivayaso asya pāhi sarvarathā vi harī iha muñca |
10.160.01c indra mā tvā yajamānāso anye ni rīraman tubhyam ime sutāsaḥ ||
10.160.02a tubhyaṁ sutās tubhyam u sotvāsas tvāṁ giraḥ śvātryā ā hvayanti |
10.160.02c indredam adya savanaṁ juṣāṇo viśvasya vidvām̐ iha pāhi somam ||
10.160.03a ya uśatā manasā somam asmai sarvahṛdā devakāmaḥ sunoti |
10.160.03c na gā indras tasya parā dadāti praśastam ic cārum asmai kṛṇoti ||
10.160.04a anuspaṣṭo bhavaty eṣo asya yo asmai revān na sunoti somam |
10.160.04c nir aratnau maghavā taṁ dadhāti brahmadviṣo hanty anānudiṣṭaḥ ||
10.160.05a aśvāyanto gavyanto vājayanto havāmahe tvopagantavā u |
10.160.05c ābhūṣantas te sumatau navāyāṁ vayam indra tvā śunaṁ huvema ||

10.161.01a muñcāmi tvā haviṣā jīvanāya kam ajñātayakṣmād uta rājayakṣmāt |
10.161.01c grāhir jagrāha yadi vaitad enaṁ tasyā indrāgnī pra mumuktam enam ||
10.161.02a yadi kṣitāyur yadi vā pareto yadi mṛtyor antikaṁ nīta eva |
10.161.02c tam ā harāmi nirṛter upasthād aspārṣam enaṁ śataśāradāya ||
10.161.03a sahasrākṣeṇa śataśāradena śatāyuṣā haviṣāhārṣam enam |
10.161.03c śataṁ yathemaṁ śarado nayātīndro viśvasya duritasya pāram ||
10.161.04a śataṁ jīva śarado vardhamānaḥ śataṁ hemantāñ chatam u vasantān |
10.161.04c śatam indrāgnī savitā bṛhaspatiḥ śatāyuṣā haviṣemam punar duḥ ||
10.161.05a āhārṣaṁ tvāvidaṁ tvā punar āgāḥ punarnava |
10.161.05c sarvāṅga sarvaṁ te cakṣuḥ sarvam āyuś ca te 'vidam ||

10.162.01a brahmaṇāgniḥ saṁvidāno rakṣohā bādhatām itaḥ |
10.162.01c amīvā yas te garbhaṁ durṇāmā yonim āśaye ||
10.162.02a yas te garbham amīvā durṇāmā yonim āśaye |
10.162.02c agniṣ ṭam brahmaṇā saha niṣ kravyādam anīnaśat ||
10.162.03a yas te hanti patayantaṁ niṣatsnuṁ yaḥ sarīsṛpam |
10.162.03c jātaṁ yas te jighāṁsati tam ito nāśayāmasi ||
10.162.04a yas ta ūrū viharaty antarā dampatī śaye |
10.162.04c yoniṁ yo antar āreḻhi tam ito nāśayāmasi ||
10.162.05a yas tvā bhrātā patir bhūtvā jāro bhūtvā nipadyate |
10.162.05c prajāṁ yas te jighāṁsati tam ito nāśayāmasi ||
10.162.06a yas tvā svapnena tamasā mohayitvā nipadyate |
10.162.06c prajāṁ yas te jighāṁsati tam ito nāśayāmasi ||

10.163.01a akṣībhyāṁ te nāsikābhyāṁ karṇābhyāṁ chubukād adhi |
10.163.01c yakṣmaṁ śīrṣaṇyam mastiṣkāj jihvāyā vi vṛhāmi te ||
10.163.02a grīvābhyas ta uṣṇihābhyaḥ kīkasābhyo anūkyāt |
10.163.02c yakṣmaṁ doṣaṇyam aṁsābhyām bāhubhyāṁ vi vṛhāmi te ||
10.163.03a āntrebhyas te gudābhyo vaniṣṭhor hṛdayād adhi |
10.163.03c yakṣmam matasnābhyāṁ yaknaḥ plāśibhyo vi vṛhāmi te ||
10.163.04a ūrubhyāṁ te aṣṭhīvadbhyām pārṣṇibhyām prapadābhyām |
10.163.04c yakṣmaṁ śroṇibhyām bhāsadād bhaṁsaso vi vṛhāmi te ||
10.163.05a mehanād vanaṁkaraṇāl lomabhyas te nakhebhyaḥ |
10.163.05c yakṣmaṁ sarvasmād ātmanas tam idaṁ vi vṛhāmi te ||
10.163.06a aṅgād-aṅgāl lomno-lomno jātam parvaṇi-parvaṇi |
10.163.06c yakṣmaṁ sarvasmād ātmanas tam idaṁ vi vṛhāmi te ||

10.164.01a apehi manasas pate 'pa krāma paraś cara |
10.164.01c paro nirṛtyā ā cakṣva bahudhā jīvato manaḥ ||
10.164.02a bhadraṁ vai varaṁ vṛṇate bhadraṁ yuñjanti dakṣiṇam |
10.164.02c bhadraṁ vaivasvate cakṣur bahutrā jīvato manaḥ ||
10.164.03a yad āśasā niḥśasābhiśasopārima jāgrato yat svapantaḥ |
10.164.03c agnir viśvāny apa duṣkṛtāny ajuṣṭāny āre asmad dadhātu ||
10.164.04a yad indra brahmaṇas pate 'bhidrohaṁ carāmasi |
10.164.04c pracetā na āṅgiraso dviṣatām pātv aṁhasaḥ ||
10.164.05a ajaiṣmādyāsanāma cābhūmānāgaso vayam |
10.164.05c jāgratsvapnaḥ saṁkalpaḥ pāpo yaṁ dviṣmas taṁ sa ṛcchatu yo no dveṣṭi tam ṛcchatu ||

10.165.01a devāḥ kapota iṣito yad icchan dūto nirṛtyā idam ājagāma |
10.165.01c tasmā arcāma kṛṇavāma niṣkṛtiṁ śaṁ no astu dvipade śaṁ catuṣpade ||
10.165.02a śivaḥ kapota iṣito no astv anāgā devāḥ śakuno gṛheṣu |
10.165.02c agnir hi vipro juṣatāṁ havir naḥ pari hetiḥ pakṣiṇī no vṛṇaktu ||
10.165.03a hetiḥ pakṣiṇī na dabhāty asmān āṣṭryām padaṁ kṛṇute agnidhāne |
10.165.03c śaṁ no gobhyaś ca puruṣebhyaś cāstu mā no hiṁsīd iha devāḥ kapotaḥ ||
10.165.04a yad ulūko vadati mogham etad yat kapotaḥ padam agnau kṛṇoti |
10.165.04c yasya dūtaḥ prahita eṣa etat tasmai yamāya namo astu mṛtyave ||
10.165.05a ṛcā kapotaṁ nudata praṇodam iṣam madantaḥ pari gāṁ nayadhvam |
10.165.05c saṁyopayanto duritāni viśvā hitvā na ūrjam pra patāt patiṣṭhaḥ ||

10.166.01a ṛṣabham mā samānānāṁ sapatnānāṁ viṣāsahim |
10.166.01c hantāraṁ śatrūṇāṁ kṛdhi virājaṁ gopatiṁ gavām ||
10.166.02a aham asmi sapatnahendra ivāriṣṭo akṣataḥ |
10.166.02c adhaḥ sapatnā me pador ime sarve abhiṣṭhitāḥ ||
10.166.03a atraiva vo 'pi nahyāmy ubhe ārtnī iva jyayā |
10.166.03c vācas pate ni ṣedhemān yathā mad adharaṁ vadān ||
10.166.04a abhibhūr aham āgamaṁ viśvakarmeṇa dhāmnā |
10.166.04c ā vaś cittam ā vo vratam ā vo 'haṁ samitiṁ dade ||
10.166.05a yogakṣemaṁ va ādāyāham bhūyāsam uttama ā vo mūrdhānam akramīm |
10.166.05d adhaspadān ma ud vadata maṇḍūkā ivodakān maṇḍūkā udakād iva ||

10.167.01a tubhyedam indra pari ṣicyate madhu tvaṁ sutasya kalaśasya rājasi |
10.167.01c tvaṁ rayim puruvīrām u nas kṛdhi tvaṁ tapaḥ paritapyājayaḥ svaḥ ||
10.167.02a svarjitam mahi mandānam andhaso havāmahe pari śakraṁ sutām̐ upa |
10.167.02c imaṁ no yajñam iha bodhy ā gahi spṛdho jayantam maghavānam īmahe ||
10.167.03a somasya rājño varuṇasya dharmaṇi bṛhaspater anumatyā u śarmaṇi |
10.167.03c tavāham adya maghavann upastutau dhātar vidhātaḥ kalaśām̐ abhakṣayam ||
10.167.04a prasūto bhakṣam akaraṁ carāv api stomaṁ cemam prathamaḥ sūrir un mṛje |
10.167.04c sute sātena yady āgamaṁ vām prati viśvāmitrajamadagnī dame ||

10.168.01a vātasya nu mahimānaṁ rathasya rujann eti stanayann asya ghoṣaḥ |
10.168.01c divispṛg yāty aruṇāni kṛṇvann uto eti pṛthivyā reṇum asyan ||
10.168.02a sam prerate anu vātasya viṣṭhā ainaṁ gacchanti samanaṁ na yoṣāḥ |
10.168.02c tābhiḥ sayuk sarathaṁ deva īyate 'sya viśvasya bhuvanasya rājā ||
10.168.03a antarikṣe pathibhir īyamāno na ni viśate katamac canāhaḥ |
10.168.03c apāṁ sakhā prathamajā ṛtāvā kva svij jātaḥ kuta ā babhūva ||
10.168.04a ātmā devānām bhuvanasya garbho yathāvaśaṁ carati deva eṣaḥ |
10.168.04c ghoṣā id asya śṛṇvire na rūpaṁ tasmai vātāya haviṣā vidhema ||

10.169.01a mayobhūr vāto abhi vātūsrā ūrjasvatīr oṣadhīr ā riśantām |
10.169.01c pīvasvatīr jīvadhanyāḥ pibantv avasāya padvate rudra mṛḻa ||
10.169.02a yāḥ sarūpā virūpā ekarūpā yāsām agnir iṣṭyā nāmāni veda |
10.169.02c yā aṅgirasas tapaseha cakrus tābhyaḥ parjanya mahi śarma yaccha ||
10.169.03a yā deveṣu tanvam airayanta yāsāṁ somo viśvā rūpāṇi veda |
10.169.03c tā asmabhyam payasā pinvamānāḥ prajāvatīr indra goṣṭhe rirīhi ||
10.169.04a prajāpatir mahyam etā rarāṇo viśvair devaiḥ pitṛbhiḥ saṁvidānaḥ |
10.169.04c śivāḥ satīr upa no goṣṭham ākas tāsāṁ vayam prajayā saṁ sadema ||

10.170.01a vibhrāḍ bṛhat pibatu somyam madhv āyur dadhad yajñapatāv avihrutam |
10.170.01c vātajūto yo abhirakṣati tmanā prajāḥ pupoṣa purudhā vi rājati ||
10.170.02a vibhrāḍ bṛhat subhṛtaṁ vājasātamaṁ dharman divo dharuṇe satyam arpitam |
10.170.02c amitrahā vṛtrahā dasyuhaṁtamaṁ jyotir jajñe asurahā sapatnahā ||
10.170.03a idaṁ śreṣṭhaṁ jyotiṣāṁ jyotir uttamaṁ viśvajid dhanajid ucyate bṛhat |
10.170.03c viśvabhrāḍ bhrājo mahi sūryo dṛśa uru paprathe saha ojo acyutam ||
10.170.04a vibhrājañ jyotiṣā svar agaccho rocanaṁ divaḥ |
10.170.04c yenemā viśvā bhuvanāny ābhṛtā viśvakarmaṇā viśvadevyāvatā ||

10.171.01a tvaṁ tyam iṭato ratham indra prāvaḥ sutāvataḥ |
10.171.01c aśṛṇoḥ somino havam ||
10.171.02a tvam makhasya dodhataḥ śiro 'va tvaco bharaḥ |
10.171.02c agacchaḥ somino gṛham ||
10.171.03a tvaṁ tyam indra martyam āstrabudhnāya venyam |
10.171.03c muhuḥ śrathnā manasyave ||
10.171.04a tvaṁ tyam indra sūryam paścā santam puras kṛdhi |
10.171.04c devānāṁ cit tiro vaśam ||

10.172.01a ā yāhi vanasā saha gāvaḥ sacanta vartaniṁ yad ūdhabhiḥ ||
10.172.02a ā yāhi vasvyā dhiyā maṁhiṣṭho jārayanmakhaḥ sudānubhiḥ ||
10.172.03a pitubhṛto na tantum it sudānavaḥ prati dadhmo yajāmasi ||
10.172.04a uṣā apa svasus tamaḥ saṁ vartayati vartaniṁ sujātatā ||

10.173.01a ā tvāhārṣam antar edhi dhruvas tiṣṭhāvicācaliḥ |
10.173.01c viśas tvā sarvā vāñchantu mā tvad rāṣṭram adhi bhraśat ||
10.173.02a ihaivaidhi māpa cyoṣṭhāḥ parvata ivāvicācaliḥ |
10.173.02c indra iveha dhruvas tiṣṭheha rāṣṭram u dhāraya ||
10.173.03a imam indro adīdharad dhruvaṁ dhruveṇa haviṣā |
10.173.03c tasmai somo adhi bravat tasmā u brahmaṇas patiḥ ||
10.173.04a dhruvā dyaur dhruvā pṛthivī dhruvāsaḥ parvatā ime |
10.173.04c dhruvaṁ viśvam idaṁ jagad dhruvo rājā viśām ayam ||
10.173.05a dhruvaṁ te rājā varuṇo dhruvaṁ devo bṛhaspatiḥ |
10.173.05c dhruvaṁ ta indraś cāgniś ca rāṣṭraṁ dhārayatāṁ dhruvam ||
10.173.06a dhruvaṁ dhruveṇa haviṣābhi somam mṛśāmasi |
10.173.06c atho ta indraḥ kevalīr viśo balihṛtas karat ||

10.174.01a abhīvartena haviṣā yenendro abhivāvṛte |
10.174.01c tenāsmān brahmaṇas pate 'bhi rāṣṭrāya vartaya ||
10.174.02a abhivṛtya sapatnān abhi yā no arātayaḥ |
10.174.02c abhi pṛtanyantaṁ tiṣṭhābhi yo na irasyati ||
10.174.03a abhi tvā devaḥ savitābhi somo avīvṛtat |
10.174.03c abhi tvā viśvā bhūtāny abhīvarto yathāsasi ||
10.174.04a yenendro haviṣā kṛtvy abhavad dyumny uttamaḥ |
10.174.04c idaṁ tad akri devā asapatnaḥ kilābhuvam ||
10.174.05a asapatnaḥ sapatnahābhirāṣṭro viṣāsahiḥ |
10.174.05c yathāham eṣām bhūtānāṁ virājāni janasya ca ||

10.175.01a pra vo grāvāṇaḥ savitā devaḥ suvatu dharmaṇā |
10.175.01c dhūrṣu yujyadhvaṁ sunuta ||
10.175.02a grāvāṇo apa ducchunām apa sedhata durmatim |
10.175.02c usrāḥ kartana bheṣajam ||
10.175.03a grāvāṇa upareṣv ā mahīyante sajoṣasaḥ |
10.175.03c vṛṣṇe dadhato vṛṣṇyam ||
10.175.04a grāvāṇaḥ savitā nu vo devaḥ suvatu dharmaṇā |
10.175.04c yajamānāya sunvate ||

10.176.01a pra sūnava ṛbhūṇām bṛhan navanta vṛjanā |
10.176.01c kṣāmā ye viśvadhāyaso 'śnan dhenuṁ na mātaram ||
10.176.02a pra devaṁ devyā dhiyā bharatā jātavedasam |
10.176.02c havyā no vakṣad ānuṣak ||
10.176.03a ayam u ṣya pra devayur hotā yajñāya nīyate |
10.176.03c ratho na yor abhīvṛto ghṛṇīvāñ cetati tmanā ||
10.176.04a ayam agnir uruṣyaty amṛtād iva janmanaḥ |
10.176.04c sahasaś cit sahīyān devo jīvātave kṛtaḥ ||

10.177.01a pataṁgam aktam asurasya māyayā hṛdā paśyanti manasā vipaścitaḥ |
10.177.01c samudre antaḥ kavayo vi cakṣate marīcīnām padam icchanti vedhasaḥ ||
10.177.02a pataṁgo vācam manasā bibharti tāṁ gandharvo 'vadad garbhe antaḥ |
10.177.02c tāṁ dyotamānāṁ svaryam manīṣām ṛtasya pade kavayo ni pānti ||
10.177.03a apaśyaṁ gopām anipadyamānam ā ca parā ca pathibhiś carantam |
10.177.03c sa sadhrīcīḥ sa viṣūcīr vasāna ā varīvarti bhuvaneṣv antaḥ ||

10.178.01a tyam ū ṣu vājinaṁ devajūtaṁ sahāvānaṁ tarutāraṁ rathānām |
10.178.01c ariṣṭanemim pṛtanājam āśuṁ svastaye tārkṣyam ihā huvema ||
10.178.02a indrasyeva rātim ājohuvānāḥ svastaye nāvam ivā ruhema |
10.178.02c urvī na pṛthvī bahule gabhīre mā vām etau mā paretau riṣāma ||
10.178.03a sadyaś cid yaḥ śavasā pañca kṛṣṭīḥ sūrya iva jyotiṣāpas tatāna |
10.178.03c sahasrasāḥ śatasā asya raṁhir na smā varante yuvatiṁ na śaryām ||

10.179.01a ut tiṣṭhatāva paśyatendrasya bhāgam ṛtviyam |
10.179.01c yadi śrāto juhotana yady aśrāto mamattana ||
10.179.02a śrātaṁ havir o ṣv indra pra yāhi jagāma sūro adhvano vimadhyam |
10.179.02c pari tvāsate nidhibhiḥ sakhāyaḥ kulapā na vrājapatiṁ carantam ||
10.179.03a śrātam manya ūdhani śrātam agnau suśrātam manye tad ṛtaṁ navīyaḥ |
10.179.03c mādhyaṁdinasya savanasya dadhnaḥ pibendra vajrin purukṛj juṣāṇaḥ ||

10.180.01a pra sasāhiṣe puruhūta śatrūñ jyeṣṭhas te śuṣma iha rātir astu |
10.180.01c indrā bhara dakṣiṇenā vasūni patiḥ sindhūnām asi revatīnām ||
10.180.02a mṛgo na bhīmaḥ kucaro giriṣṭhāḥ parāvata ā jaganthā parasyāḥ |
10.180.02c sṛkaṁ saṁśāya pavim indra tigmaṁ vi śatrūn tāḻhi vi mṛdho nudasva ||
10.180.03a indra kṣatram abhi vāmam ojo 'jāyathā vṛṣabha carṣaṇīnām |
10.180.03c apānudo janam amitrayantam uruṁ devebhyo akṛṇor u lokam ||

10.181.01a prathaś ca yasya saprathaś ca nāmānuṣṭubhasya haviṣo havir yat |
10.181.01c dhātur dyutānāt savituś ca viṣṇo rathaṁtaram ā jabhārā vasiṣṭhaḥ ||
10.181.02a avindan te atihitaṁ yad āsīd yajñasya dhāma paramaṁ guhā yat |
10.181.02c dhātur dyutānāt savituś ca viṣṇor bharadvājo bṛhad ā cakre agneḥ ||
10.181.03a te 'vindan manasā dīdhyānā yajuḥ ṣkannam prathamaṁ devayānam |
10.181.03c dhātur dyutānāt savituś ca viṣṇor ā sūryād abharan gharmam ete ||

10.182.01a bṛhaspatir nayatu durgahā tiraḥ punar neṣad aghaśaṁsāya manma |
10.182.01c kṣipad aśastim apa durmatiṁ hann athā karad yajamānāya śaṁ yoḥ ||
10.182.02a narāśaṁso no 'vatu prayāje śaṁ no astv anuyājo haveṣu |
10.182.02c kṣipad aśastim apa durmatiṁ hann athā karad yajamānāya śaṁ yoḥ ||
10.182.03a tapurmūrdhā tapatu rakṣaso ye brahmadviṣaḥ śarave hantavā u |
10.182.03c kṣipad aśastim apa durmatiṁ hann athā karad yajamānāya śaṁ yoḥ ||

10.183.01a apaśyaṁ tvā manasā cekitānaṁ tapaso jātaṁ tapaso vibhūtam |
10.183.01c iha prajām iha rayiṁ rarāṇaḥ pra jāyasva prajayā putrakāma ||
10.183.02a apaśyaṁ tvā manasā dīdhyānāṁ svāyāṁ tanū ṛtvye nādhamānām |
10.183.02c upa mām uccā yuvatir babhūyāḥ pra jāyasva prajayā putrakāme ||
10.183.03a ahaṁ garbham adadhām oṣadhīṣv ahaṁ viśveṣu bhuvaneṣv antaḥ |
10.183.03c aham prajā ajanayam pṛthivyām ahaṁ janibhyo aparīṣu putrān ||

10.184.01a viṣṇur yoniṁ kalpayatu tvaṣṭā rūpāṇi piṁśatu |
10.184.01c ā siñcatu prajāpatir dhātā garbhaṁ dadhātu te ||
10.184.02a garbhaṁ dhehi sinīvāli garbhaṁ dhehi sarasvati |
10.184.02c garbhaṁ te aśvinau devāv ā dhattām puṣkarasrajā ||
10.184.03a hiraṇyayī araṇī yaṁ nirmanthato aśvinā |
10.184.03c taṁ te garbhaṁ havāmahe daśame māsi sūtave ||

10.185.01a mahi trīṇām avo 'stu dyukṣam mitrasyāryamṇaḥ |
10.185.01c durādharṣaṁ varuṇasya ||
10.185.02a nahi teṣām amā cana nādhvasu vāraṇeṣu |
10.185.02c īśe ripur aghaśaṁsaḥ ||
10.185.03a yasmai putrāso aditeḥ pra jīvase martyāya |
10.185.03c jyotir yacchanty ajasram ||

10.186.01a vāta ā vātu bheṣajaṁ śambhu mayobhu no hṛde |
10.186.01c pra ṇa āyūṁṣi tāriṣat ||
10.186.02a uta vāta pitāsi na uta bhrātota naḥ sakhā |
10.186.02c sa no jīvātave kṛdhi ||
10.186.03a yad ado vāta te gṛhe 'mṛtasya nidhir hitaḥ |
10.186.03c tato no dehi jīvase ||

10.187.01a prāgnaye vācam īraya vṛṣabhāya kṣitīnām |
10.187.01c sa naḥ parṣad ati dviṣaḥ ||
10.187.02a yaḥ parasyāḥ parāvatas tiro dhanvātirocate |
10.187.02c sa naḥ parṣad ati dviṣaḥ ||
10.187.03a yo rakṣāṁsi nijūrvati vṛṣā śukreṇa śociṣā |
10.187.03c sa naḥ parṣad ati dviṣaḥ ||
10.187.04a yo viśvābhi vipaśyati bhuvanā saṁ ca paśyati |
10.187.04c sa naḥ parṣad ati dviṣaḥ ||
10.187.05a yo asya pāre rajasaḥ śukro agnir ajāyata |
10.187.05c sa naḥ parṣad ati dviṣaḥ ||

10.188.01a pra nūnaṁ jātavedasam aśvaṁ hinota vājinam |
10.188.01c idaṁ no barhir āsade ||
10.188.02a asya pra jātavedaso vipravīrasya mīḻhuṣaḥ |
10.188.02c mahīm iyarmi suṣṭutim ||
10.188.03a yā ruco jātavedaso devatrā havyavāhanīḥ |
10.188.03c tābhir no yajñam invatu ||

10.189.01a āyaṁ gauḥ pṛśnir akramīd asadan mātaram puraḥ |
10.189.01c pitaraṁ ca prayan svaḥ ||
10.189.02a antaś carati rocanāsya prāṇād apānatī |
10.189.02c vy akhyan mahiṣo divam ||
10.189.03a triṁśad dhāma vi rājati vāk pataṁgāya dhīyate |
10.189.03c prati vastor aha dyubhiḥ ||

10.190.01a ṛtaṁ ca satyaṁ cābhīddhāt tapaso 'dhy ajāyata |
10.190.01c tato rātry ajāyata tataḥ samudro arṇavaḥ ||
10.190.02a samudrād arṇavād adhi saṁvatsaro ajāyata |
10.190.02c ahorātrāṇi vidadhad viśvasya miṣato vaśī ||
10.190.03a sūryācandramasau dhātā yathāpūrvam akalpayat |
10.190.03c divaṁ ca pṛthivīṁ cāntarikṣam atho svaḥ ||

10.191.01a saṁ-sam id yuvase vṛṣann agne viśvāny arya ā |
10.191.01c iḻas pade sam idhyase sa no vasūny ā bhara ||
10.191.02a saṁ gacchadhvaṁ saṁ vadadhvaṁ saṁ vo manāṁsi jānatām |
10.191.02c devā bhāgaṁ yathā pūrve saṁjānānā upāsate ||
10.191.03a samāno mantraḥ samitiḥ samānī samānam manaḥ saha cittam eṣām |
10.191.03c samānam mantram abhi mantraye vaḥ samānena vo haviṣā juhomi ||
10.191.04a samānī va ākūtiḥ samānā hṛdayāni vaḥ |
10.191.04c samānam astu vo mano yathā vaḥ susahāsati ||


Notes by Detlef Eichler : 1. Please note that this text is not for commercial use and released only for personal scholarly activity. This transliteration version of Rigveda is from an ITRANS file which I have created on the basis of The Aufrecht/van Nooten/Holland (Samhita) version of theRigveda. 2. Font: URW Palladio ITU / Unicode 3. Hiatus ai, au are shown as aï, aü 4. Transliteration:
a ā i ï ī ī3 u ü ū ṛ ṝ ḷ e ai o au ṁ ḥ m̐ ' | k kh g gh ṅ c ch j jh ñ ṭ ṭh ḍ ḍh ṇ t th d dh n p ph b bh m y r l v ś ṣ s h ḻ ḻh 5. Last update: 18 Sept 2017; 29 Oct 2016 (8.012.07a ketava uta); 30 Oct 2013 (with restored visargas)