Ṛgveda-Saṁhitā with Padapāṭha
Maṇḍala 10
Transliterated text without accents


10.001.01a agre bṛhann uṣasām ūrdhvo asthān nirjaganvān tamaso jyotiṣāgāt |
10.001.01c agnir bhānunā ruśatā svaṅga ā jāto viśvā sadmāny aprāḥ ||

agre | bṛhan | uṣasām | ūrdhvaḥ | asthāt | niḥ-jaganvān | tamasaḥ | jyotiṣā | ā | agāt |
agniḥ | bhānunā | ruśatā | su-aṅgaḥ | ā | jātaḥ | viśvā | sadmāni | aprāḥ ||10.001.01||

10.001.02a sa jāto garbho asi rodasyor agne cārur vibhṛta oṣadhīṣu |
10.001.02c citraḥ śiśuḥ pari tamāṁsy aktūn pra mātṛbhyo adhi kanikradad gāḥ ||

saḥ | jātaḥ | garbhaḥ | asi | rodasyoḥ | agne | cāruḥ | vi-bhṛtaḥ | oṣadhīṣu |
citraḥ | śiśuḥ | pari | tamāṁsi | aktūn | pra | mātṛ-bhyaḥ | adhi | kanikradat | gāḥ ||10.001.02||

10.001.03a viṣṇur itthā paramam asya vidvāñ jāto bṛhann abhi pāti tṛtīyam |
10.001.03c āsā yad asya payo akrata svaṁ sacetaso abhy arcanty atra ||

viṣṇuḥ | itthā | paramam | asya | vidvān | jātaḥ | bṛhan | abhi | pāti | tṛtīyam |
āsā | yat | asya | payaḥ | akrata | svam | sa-cetasaḥ | abhi | arcanti | atra ||10.001.03||

10.001.04a ata u tvā pitubhṛto janitrīr annāvṛdham prati caranty annaiḥ |
10.001.04c tā īm praty eṣi punar anyarūpā asi tvaṁ vikṣu mānuṣīṣu hotā ||

ataḥ | ūm̐ iti | tvā | pitu-bhṛtaḥ | janitrīḥ | anna-vṛdham | prati | caranti | annaiḥ |
tāḥ | īm | prati | eṣi | punaḥ | anya-rūpāḥ | asi | tvam | vikṣu | mānuṣīṣu | hotā ||10.001.04||

10.001.05a hotāraṁ citraratham adhvarasya yajñasya-yajñasya ketuṁ ruśantam |
10.001.05c pratyardhiṁ devasya-devasya mahnā śriyā tv agnim atithiṁ janānām ||

hotāram | citra-ratham | adhvarasya | yajñasya-yajñasya | ketum | ruśantam |
prati-ardhim | devasya-devasya | mahnā | śriyā | tvam | agnim | atithim | janānām ||10.001.05||

10.001.06a sa tu vastrāṇy adha peśanāni vasāno agnir nābhā pṛthivyāḥ |
10.001.06c aruṣo jātaḥ pada iḻāyāḥ purohito rājan yakṣīha devān ||

saḥ | tu | vastrāṇi | adha | peśanāni | vasānaḥ | agniḥ | nābhā | pṛthivyāḥ |
aruṣaḥ | jātaḥ | pade | iḻāyāḥ | puraḥ-hitaḥ | rājan | yakṣi | iha | devān ||10.001.06||

10.001.07a ā hi dyāvāpṛthivī agna ubhe sadā putro na mātarā tatantha |
10.001.07c pra yāhy acchośato yaviṣṭhāthā vaha sahasyeha devān ||

ā | hi | dyāvāpṛthivī iti | agne | ubhe iti | sadā | putraḥ | na | mātarā | tatantha |
pra | yāhi | accha | uśataḥ | yaviṣṭha | atha | ā | vaha | sahasya | iha | devān ||10.001.07||


10.002.01a piprīhi devām̐ uśato yaviṣṭha vidvām̐ ṛtūm̐r ṛtupate yajeha |
10.002.01c ye daivyā ṛtvijas tebhir agne tvaṁ hotṝṇām asy āyajiṣṭhaḥ ||

piprīhi | devān | uśataḥ | yaviṣṭha | vidvān | ṛtūn | ṛtu-pate | yaja | iha |
ye | daivyāḥ | ṛtvijaḥ | tebhiḥ | agne | tvam | hotṝṇām | asi | ā-yajiṣṭhaḥ ||10.002.01||

10.002.02a veṣi hotram uta potraṁ janānām mandhātāsi draviṇodā ṛtāvā |
10.002.02c svāhā vayaṁ kṛṇavāmā havīṁṣi devo devān yajatv agnir arhan ||

veṣi | hotram | uta | potram | janānām | mandhātā | asi | draviṇaḥ-dāḥ | ṛta-vā |
svāhā | vayam | kṛṇavāma | havīṁṣi | devaḥ | devān | yajatu | agniḥ | arhan ||10.002.02||

10.002.03a ā devānām api panthām aganma yac chaknavāma tad anu pravoḻhum |
10.002.03c agnir vidvān sa yajāt sed u hotā so adhvarān sa ṛtūn kalpayāti ||

ā | devānām | api | panthām | aganma | yat | śaknavāma | tat | anu | pra-voḻhum |
agniḥ | vidvān | saḥ | yajat | saḥ | it | ūm̐ iti | hotā | saḥ | adhvarān | saḥ | ṛtūn | kalpayāti ||10.002.03||

10.002.04a yad vo vayam pramināma vratāni viduṣāṁ devā aviduṣṭarāsaḥ |
10.002.04c agniṣ ṭad viśvam ā pṛṇāti vidvān yebhir devām̐ ṛtubhiḥ kalpayāti ||

tat | vaḥ | vayam | pra-mināma | vratāni | viduṣām | devāḥ | aviduḥ-tarāsaḥ |
agniḥ | tat | viśvam | ā | pṛṇāti | vidvān | yebhiḥ | devān | ṛtu-bhiḥ | kalpayāti ||10.002.04||

10.002.05a yat pākatrā manasā dīnadakṣā na yajñasya manvate martyāsaḥ |
10.002.05c agniṣ ṭad dhotā kratuvid vijānan yajiṣṭho devām̐ ṛtuśo yajāti ||

yat | pāka-trā | manasā | dīna-dakṣāḥ | na | yajñasya | manvate | martyāsaḥ |
agniḥ | tat | hotā | kratu-vit | vi-jānan | yajiṣṭhaḥ | devān | ṛtu-śaḥ | yajāti ||10.002.05||

10.002.06a viśveṣāṁ hy adhvarāṇām anīkaṁ citraṁ ketuṁ janitā tvā jajāna |
10.002.06c sa ā yajasva nṛvatīr anu kṣāḥ spārhā iṣaḥ kṣumatīr viśvajanyāḥ ||

viśveṣām | hi | adhvarāṇām | anīkam | citram | ketum | janitā | tvā | jajāna |
saḥ | ā | yajasva | nṛ-vatīḥ | anu | kṣāḥ | spārhāḥ | iṣaḥ | kṣu-matīḥ | visva-janyāḥ ||10.002.06||

10.002.07a yaṁ tvā dyāvāpṛthivī yaṁ tvāpas tvaṣṭā yaṁ tvā sujanimā jajāna |
10.002.07c panthām anu pravidvān pitṛyāṇaṁ dyumad agne samidhāno vi bhāhi ||

yam | tvā | dyāvāpṛthivī iti | yam | tvā | āpaḥ | tvaṣṭā | yam | tvā | su-jamimā | jajāna |
panthām | anu | pra-vidvān | pitṛ-yānam | dyu-mat | agne | sam-idhānaḥ | vi | bhāhi ||10.002.07||


10.003.01a ino rājann aratiḥ samiddho raudro dakṣāya suṣumām̐ adarśi |
10.003.01c cikid vi bhāti bhāsā bṛhatāsiknīm eti ruśatīm apājan ||

inaḥ | rājan | aratiḥ | sam-iddhaḥ | raudraḥ | dakṣāya | susu-mān | adarśi |
cikit | vi | bhāti | bhāsā | bṛhatā | asiknīm | eti | ruśatīm | apa-ajan ||10.003.01||

10.003.02a kṛṣṇāṁ yad enīm abhi varpasā bhūj janayan yoṣām bṛhataḥ pitur jām |
10.003.02c ūrdhvam bhānuṁ sūryasya stabhāyan divo vasubhir aratir vi bhāti ||

kṛṣṇām | yat | enīm | abhi | varpasā | bhūt | janayan | yoṣām | bṛhataḥ | pituḥ | jām |
ūrdhvam | bhānum | sūryasya | stabhāyan | divaḥ | vasu-bhiḥ | aratiḥ | vi | bhāti ||10.003.02||

10.003.03a bhadro bhadrayā sacamāna āgāt svasāraṁ jāro abhy eti paścāt |
10.003.03c supraketair dyubhir agnir vitiṣṭhan ruśadbhir varṇair abhi rāmam asthāt ||

bhadraḥ | bhadrayā | sacamānaḥ | ā | agāt | svasāram | jāraḥ | abhi | eti | paścāt |
su-praketaiḥ | dyu-bhiḥ | agniḥ | vi-tiṣṭhan | ruśat-bhiḥ | varṇaiḥ | abhi | rāmam | asthāt ||10.003.03||

10.003.04a asya yāmāso bṛhato na vagnūn indhānā agneḥ sakhyuḥ śivasya |
10.003.04c īḍyasya vṛṣṇo bṛhataḥ svāso bhāmāso yāmann aktavaś cikitre ||

asya | yāmāsaḥ | bṛhataḥ | na | vagnūn | indhānāḥ | agneḥ | sakhyuḥ | śivasya |
īḍyasya | vṛṣṇaḥ | bṛhataḥ | su-āsaḥ | bhāmāsaḥ | yāman | aktavaḥ | cikitre ||10.003.04||

10.003.05a svanā na yasya bhāmāsaḥ pavante rocamānasya bṛhataḥ sudivaḥ |
10.003.05c jyeṣṭhebhir yas tejiṣṭhaiḥ krīḻumadbhir varṣiṣṭhebhir bhānubhir nakṣati dyām ||

svanāḥ | na | yasya | bhāmāsaḥ | pavante | rocamānasya | bṛhataḥ | su-divaḥ |
jyeṣṭhebhiḥ | yaḥ | tejiṣṭhaiḥ | krīḻumat-bhiḥ | varṣiṣṭhebhiḥ | bhānu-bhiḥ | nakṣati | dyām ||10.003.05||

10.003.06a asya śuṣmāso dadṛśānapaver jehamānasya svanayan niyudbhiḥ |
10.003.06c pratnebhir yo ruśadbhir devatamo vi rebhadbhir aratir bhāti vibhvā ||

asya | śuṣmāsaḥ | dadṛśāna-paveḥ | jehamānasya | svanayan | niyut-bhiḥ |
pratnebhiḥ | yaḥ | ruśat-bhiḥ | deva-tamaḥ | vi | rebhat-bhiḥ | aratiḥ | bhāti | vi-bhvā ||10.003.06||

10.003.07a sa ā vakṣi mahi na ā ca satsi divaspṛthivyor aratir yuvatyoḥ |
10.003.07c agniḥ sutukaḥ sutukebhir aśvai rabhasvadbhī rabhasvām̐ eha gamyāḥ ||

saḥ | ā | vakṣi | mahi | naḥ | ā | ca | satsi | divaḥpṛthivyoḥ | aratiḥ | yuvatyoḥ |
agniḥ | su-tukaḥ | sut-ukebhiḥ | aśvaiḥ | rabhasvat-bhiḥ | rabhasvān | ā | iha | gamyāḥ ||10.003.07||


10.004.01a pra te yakṣi pra ta iyarmi manma bhuvo yathā vandyo no haveṣu |
10.004.01c dhanvann iva prapā asi tvam agna iyakṣave pūrave pratna rājan ||

pra | te | yakṣi | pra | te | iyarmi | manma | bhuvaḥ | yathā | vandyaḥ | naḥ | haveṣu |
dhanvan-iva | pra-pā | asi | tvam | agne | iyakṣave | pūrave | pratna | rājan ||10.004.01||

10.004.02a yaṁ tvā janāso abhi saṁcaranti gāva uṣṇam iva vrajaṁ yaviṣṭha |
10.004.02c dūto devānām asi martyānām antar mahām̐ś carasi rocanena ||

yam | tvā | janāsaḥ | abhi | sam-caranti | gāvaḥ | uṣṇam-iva | vrajam | yaviṣṭha |
dūtaḥ | devānām | asi | martyānām | antaḥ | mahān | carasi | rocanena ||10.004.02||

10.004.03a śiśuṁ na tvā jenyaṁ vardhayantī mātā bibharti sacanasyamānā |
10.004.03c dhanor adhi pravatā yāsi haryañ jigīṣase paśur ivāvasṛṣṭaḥ ||

śiśum | na | tvā | jenyam | vardhayantī | mātā | bibharti | sacanasyamānā |
dhanoḥ | adhi | pra-vatā | yāsi | haryam | jagīṣase | paśuḥ-iva | ava-sṛṣṭaḥ ||10.004.03||

10.004.04a mūrā amūra na vayaṁ cikitvo mahitvam agne tvam aṅga vitse |
10.004.04c śaye vavriś carati jihvayādan rerihyate yuvatiṁ viśpatiḥ san ||

mūrāḥ | amūra | na | vayam | cikitvaḥ | mahi-tvam | agne | tvam | aṅga | vitse |
śaye | vavriḥ | carati | jihvayā | adan | rerihyate | yuvatim | viśpatiḥ | san ||10.004.04||

10.004.05a kūcij jāyate sanayāsu navyo vane tasthau palito dhūmaketuḥ |
10.004.05c asnātāpo vṛṣabho na pra veti sacetaso yam praṇayanta martāḥ ||

kū-cit | jāyate | sanayāsu | navyaḥ | vane | tasthau | palitaḥ | dhūma-ketuḥ |
asnātā | āpaḥ | vṛṣabhaḥ | na | pra | veti | sa-cetasaḥ | yam | pra-nayanta | martāḥ ||10.004.05||

10.004.06a tanūtyajeva taskarā vanargū raśanābhir daśabhir abhy adhītām |
10.004.06c iyaṁ te agne navyasī manīṣā yukṣvā rathaṁ na śucayadbhir aṅgaiḥ ||

tanūtyajā-iva | taskarā | vanargū iti | raśanābhiḥ | daśa-bhiḥ | abhi | adhītām |
iyam | te | agne | navyasī | manīṣā | yukṣva | ratham | na | śucayat-bhiḥ | aṅgaiḥ ||10.004.06||

10.004.07a brahma ca te jātavedo namaś ceyaṁ ca gīḥ sadam id vardhanī bhūt |
10.004.07c rakṣā ṇo agne tanayāni tokā rakṣota nas tanvo aprayucchan ||

brahma | ca | te | jāta-vedaḥ | namaḥ | ca | iyam | ca | gīḥ | sadam | it | vardhanī | bhūt |
rakṣa | naḥ | agne | tanayāni | tokā | rakṣa | uta | naḥ | tanvaḥ | apra-yucchan ||10.004.07||


10.005.01a ekaḥ samudro dharuṇo rayīṇām asmad dhṛdo bhūrijanmā vi caṣṭe |
10.005.01c siṣakty ūdhar niṇyor upastha utsasya madhye nihitam padaṁ veḥ ||

ekaḥ | samudraḥ | dharuṇaḥ | rayīṇām | asmat | hṛdaḥ | bhūri-janmā | vi | caṣṭe |
sisakti | ūdhaḥ | niṇyoḥ | upa-sthe | utsasya | madhye | ni-hitam | padam | veriti veḥ ||10.005.01||

10.005.02a samānaṁ nīḻaṁ vṛṣaṇo vasānāḥ saṁ jagmire mahiṣā arvatībhiḥ |
10.005.02c ṛtasya padaṁ kavayo ni pānti guhā nāmāni dadhire parāṇi ||

samānam | nīḻam | vṛṣaṇaḥ | vasānāḥ | sam | jagmire | mahiṣāḥ | arvatībhiḥ |
ṛtasya | padam | kavayaḥ | ni | pānti | guhā | nāmāni | dadhire | parāṇi ||10.005.02||

10.005.03a ṛtāyinī māyinī saṁ dadhāte mitvā śiśuṁ jajñatur vardhayantī |
10.005.03c viśvasya nābhiṁ carato dhruvasya kaveś cit tantum manasā viyantaḥ ||

ṛtayinī ityṛta-yinī | māyinī iti | sam | dadhāte iti | mitvā | śiśum | jajñatuḥ | vardhayantī iti |
viśvasya | nābhim | carataḥ | dhruvasya | kaveḥ | cit | tantum | manasā | vi-yantaḥ ||10.005.03||

10.005.04a ṛtasya hi vartanayaḥ sujātam iṣo vājāya pradivaḥ sacante |
10.005.04c adhīvāsaṁ rodasī vāvasāne ghṛtair annair vāvṛdhāte madhūnām ||

ṛtasya | hi | vartanayaḥ | su-jātam | iṣaḥ | vājāya | pra-divaḥ | sacante |
adhīvāsam | rodasī iti | vavasāne iti | ghṛtaiḥ | annaiḥ | vavṛdhāte iti | madhūnām ||10.005.04||

10.005.05a sapta svasṝr aruṣīr vāvaśāno vidvān madhva uj jabhārā dṛśe kam |
10.005.05c antar yeme antarikṣe purājā icchan vavrim avidat pūṣaṇasya ||

sapta | svasṝḥ | aruṣīḥ | vāvaśānaḥ | vidvān | madhvaḥ | ut | jabhāra | dṛśe | kam |
antaḥ | yeme | antarikṣe | purā-jāḥ | icchan | vavrim | avidat | pūṣaṇasya ||10.005.05||

10.005.06a sapta maryādāḥ kavayas tatakṣus tāsām ekām id abhy aṁhuro gāt |
10.005.06c āyor ha skambha upamasya nīḻe pathāṁ visarge dharuṇeṣu tasthau ||

sapta | maryādāḥ | kavayaḥ | tatakṣuḥ | tāsām | ekām | it | abhi | aṁhuraḥ | gāt |
āyoḥ | ha | skambhaḥ | upa-masya | nīḻe | pathām | vi-sarge | dharuṇeṣu | tasthau ||10.005.06||

10.005.07a asac ca sac ca parame vyoman dakṣasya janmann aditer upasthe |
10.005.07c agnir ha naḥ prathamajā ṛtasya pūrva āyuni vṛṣabhaś ca dhenuḥ ||

asat | ca | sat | ca | parame | vi-oman | dakṣasya | janman | aditeḥ | upa-sthe |
agniḥ | ha | naḥ | prathama-jāḥ | ṛtasya | pūrve | āyuni | vṛṣabhaḥ | ca | dhenuḥ ||10.005.07||


10.006.01a ayaṁ sa yasya śarmann avobhir agner edhate jaritābhiṣṭau |
10.006.01c jyeṣṭhebhir yo bhānubhir ṛṣūṇām paryeti parivīto vibhāvā ||

ayam | saḥ | yasya | śarman | avaḥ-bhiḥ | agneḥ | edhate | jaritā | abhiṣṭau |
jyeṣṭhebhiḥ | yaḥ | bhānu-bhiḥ | ṛṣūṇām | pari-eti | pari-vītaḥ | vibhā-vā ||10.006.01||

10.006.02a yo bhānubhir vibhāvā vibhāty agnir devebhir ṛtāvājasraḥ |
10.006.02c ā yo vivāya sakhyā sakhibhyo 'parihvṛto atyo na saptiḥ ||

yaḥ | bhānu-bhiḥ | vibhā-vā | vi-bhāti | agniḥ | devebhiḥ | ṛta-vā | ajasraḥ |
ā | yaḥ | vivāya | sakhyā | sakhi-bhyaḥ | pari-hvṛtaḥ | atyaḥ | na | saptiḥ ||10.006.02||

10.006.03a īśe yo viśvasyā devavīter īśe viśvāyur uṣaso vyuṣṭau |
10.006.03c ā yasmin manā havīṁṣy agnāv ariṣṭarathaḥ skabhnāti śūṣaiḥ ||

īśe | yaḥ | viśvasyāḥ | deva-vīteḥ | īśe | viśva-āyuḥ | uṣasaḥ | vi-uṣṭau |
ā | yasmin | manā | havīṁṣi | agnau | ariṣṭa-rathaḥ | skabhnāti | śūṣaiḥ ||10.006.03||

10.006.04a śūṣebhir vṛdho juṣāṇo arkair devām̐ acchā raghupatvā jigāti |
10.006.04c mandro hotā sa juhvā yajiṣṭhaḥ sammiślo agnir ā jigharti devān ||

śūṣebhiḥ | vṛdhaḥ | juṣāṇaḥ | arkaiḥ | devān | accha | raghu-patvā | jagāti |
mandraḥ | hotā | saḥ | juhvā | yajiṣṭhaḥ | sam-miślaḥ | agniḥ | ā | jigharti | devān ||10.006.04||

10.006.05a tam usrām indraṁ na rejamānam agniṁ gīrbhir namobhir ā kṛṇudhvam |
10.006.05c ā yaṁ viprāso matibhir gṛṇanti jātavedasaṁ juhvaṁ sahānām ||

tam | usrām | indram | na | rejamānam | agnim | gīḥ-bhiḥ | namaḥ-bhiḥ | ā | kṛṇudhvam |
ā | yam | viprāsaḥ | mati-bhiḥ | gṛṇanti | jāta-vedasam | juhvam | sahānām ||10.006.05||

10.006.06a saṁ yasmin viśvā vasūni jagmur vāje nāśvāḥ saptīvanta evaiḥ |
10.006.06c asme ūtīr indravātatamā arvācīnā agna ā kṛṇuṣva ||

sam | yasmin | viśvā | vasūni | jagmuḥ | vāje | na | aśvāḥ | sapti-vantaḥ | evaiḥ |
asme iti | ūtīḥ | indravāta-tamāḥ | arvācīnāḥ | agne | ā | kṛṇuṣva ||10.006.06||

10.006.07a adhā hy agne mahnā niṣadyā sadyo jajñāno havyo babhūtha |
10.006.07c taṁ te devāso anu ketam āyann adhāvardhanta prathamāsa ūmāḥ ||

adha | hi | agne | mahnā | ni-sadya | sadyaḥ | jajñānaḥ | havyaḥ | babhūtha |
tam | te | devāsaḥ | anu | ketam | āyan | adha | avardhanta | prathamāsaḥ | ūmāḥ ||10.006.07||


10.007.01a svasti no divo agne pṛthivyā viśvāyur dhehi yajathāya deva |
10.007.01c sacemahi tava dasma praketair uruṣyā ṇa urubhir deva śaṁsaiḥ ||

svasti | naḥ | divaḥ | agne | pṛthivyāḥ | viśva-āyuḥ | dhehi | yajathāya | deva |
sacemahi | tava | dasma | pra-ketaiḥ | uruṣya | naḥ | uru-bhiḥ | deva | śaṁsaiḥ ||10.007.01||

10.007.02a imā agne matayas tubhyaṁ jātā gobhir aśvair abhi gṛṇanti rādhaḥ |
10.007.02c yadā te marto anu bhogam ānaḍ vaso dadhāno matibhiḥ sujāta ||

imāḥ | agne | matayaḥ | tubhyam | jātāḥ | gobhiḥ | aśvaiḥ | abhi | gṛṇanti | rādhaḥ |
yadā | te | martaḥ | anu | bhogam | ānaṭ | vaso iti | dadhānaḥ | mati-bhiḥ | su-jāta ||10.007.02||

10.007.03a agnim manye pitaram agnim āpim agnim bhrātaraṁ sadam it sakhāyam |
10.007.03c agner anīkam bṛhataḥ saparyaṁ divi śukraṁ yajataṁ sūryasya ||

agnim | manye | pitaram | agnim | āpim | agnim | bhrātaram | sadam | it | sakhāyam |
agneḥ | anīkam | bṛhataḥ | saparyan | divi | śukram | yajatam | sūryasya ||10.007.03||

10.007.04a sidhrā agne dhiyo asme sanutrīr yaṁ trāyase dama ā nityahotā |
10.007.04c ṛtāvā sa rohidaśvaḥ purukṣur dyubhir asmā ahabhir vāmam astu ||

sidhrāḥ | agne | dhiyaḥ | asme iti | sanutrīḥ | yam | trāyase | dame | ā | nitya-hotā |
ṛta-vā | saḥ | rohit-aśvaḥ | puru-kṣuḥ | dyu-bhiḥ | asmai | aha-bhiḥ | vāmam | astu ||10.007.04||

10.007.05a dyubhir hitam mitram iva prayogam pratnam ṛtvijam adhvarasya jāram |
10.007.05c bāhubhyām agnim āyavo 'jananta vikṣu hotāraṁ ny asādayanta ||

dyu-bhiḥ | hitam | mitram-iva | pra-yogam | pratnam | ṛtvijam | adhvarasya | jāram |
bāhu-bhyām | agnim | āyavaḥ | ajananta | vikṣu | hotāram | ni | asādayanta ||10.007.05||

10.007.06a svayaṁ yajasva divi deva devān kiṁ te pākaḥ kṛṇavad apracetāḥ |
10.007.06c yathāyaja ṛtubhir deva devān evā yajasva tanvaṁ sujāta ||

svayam | yajasva | divi | deva | devān | kim | te | pākaḥ | kṛṇavat | apra-cetāḥ |
yathā | ayajaḥ | ṛtu-bhiḥ | deva | devān | eva | yajasva | tanvam | su-jāta ||10.007.06||

10.007.07a bhavā no agne 'vitota gopā bhavā vayaskṛd uta no vayodhāḥ |
10.007.07c rāsvā ca naḥ sumaho havyadātiṁ trāsvota nas tanvo aprayucchan ||

bhava | naḥ | agne | avitā | uta | gopāḥ | bhava | vayaḥ-kṛt | uta | naḥ | vayaḥ-dhāḥ |
rāsva | ca | naḥ | su-mahaḥ | havya-dātim | trāsva | uta | naḥ | tanvaḥ | apra-yucchan ||10.007.07||


10.008.01a pra ketunā bṛhatā yāty agnir ā rodasī vṛṣabho roravīti |
10.008.01c divaś cid antām̐ upamām̐ ud ānaḻ apām upasthe mahiṣo vavardha ||

pra | ketunā | bṛhatā | yāti | agniḥ | ā | rodasī iti | vṛṣabhaḥ | roravīti |
divaḥ | cit | antān | upa-mān | ut | ānaṭ | apām | upa-sthe | mahiṣaḥ | vavardha ||10.008.01||

10.008.02a mumoda garbho vṛṣabhaḥ kakudmān asremā vatsaḥ śimīvām̐ arāvīt |
10.008.02c sa devatāty udyatāni kṛṇvan sveṣu kṣayeṣu prathamo jigāti ||

mumoda | garbhaḥ | vṛṣabhaḥ | kakut-mān | asremā | vatsaḥ | śimī-vān | arāvīt |
saḥ | deva-tāti | ut-yatāni | kṛṇvan | sveṣu | kṣayeṣu | prathamaḥ | jigāti ||10.008.02||

10.008.03a ā yo mūrdhānam pitror arabdha ny adhvare dadhire sūro arṇaḥ |
10.008.03c asya patmann aruṣīr aśvabudhnā ṛtasya yonau tanvo juṣanta ||

ā | yaḥ | mūrdhānam | pitroḥ | arabdha | ni | adhvare | dadhire | sūraḥ | arṇaḥ |
asya | patman | aruṣīḥ | aśva-budhnāḥ | ṛtasya | yonau | tanvaḥ | juṣanta ||10.008.03||

10.008.04a uṣa-uṣo hi vaso agram eṣi tvaṁ yamayor abhavo vibhāvā |
10.008.04c ṛtāya sapta dadhiṣe padāni janayan mitraṁ tanve svāyai ||

uṣaḥ-uṣaḥ | hi | vaso iti | agram | eṣi | tvam | yamayoḥ | abhavaḥ | vibhā-vā |
ṛtāya | sapta | dadhiṣe | padāni | janayan | mitram | tanve | svāyai ||10.008.04||

10.008.05a bhuvaś cakṣur maha ṛtasya gopā bhuvo varuṇo yad ṛtāya veṣi |
10.008.05c bhuvo apāṁ napāj jātavedo bhuvo dūto yasya havyaṁ jujoṣaḥ ||

bhuvaḥ | cakṣuḥ | mahaḥ | ṛtasya | gopāḥ | bhuvaḥ | varuṇaḥ | yat | ṛtāya | veṣi |
bhuvaḥ | apām | napāt | jāta-vedaḥ | bhuvaḥ | dūtaḥ | yasya | havyam | jujoṣaḥ ||10.008.05||

10.008.06a bhuvo yajñasya rajasaś ca netā yatrā niyudbhiḥ sacase śivābhiḥ |
10.008.06c divi mūrdhānaṁ dadhiṣe svarṣāṁ jihvām agne cakṛṣe havyavāham ||

bhuvaḥ | yajñasya | rajasaḥ | ca | netā | yatra | niyut-bhiḥ | sacase | śivābhiḥ |
divi | mūrdhānam | dadhiṣe | svaḥ-sām | jihvām | agne | cakṛṣe | havya-vāham ||10.008.06||

10.008.07a asya tritaḥ kratunā vavre antar icchan dhītim pitur evaiḥ parasya |
10.008.07c sacasyamānaḥ pitror upasthe jāmi bruvāṇa āyudhāni veti ||

asya | tritaḥ | kratunā | vavre | antaḥ | icchan | dhītim | pituḥ | evaiḥ | parasya |
sacasyamānaḥ | pitroḥ | upa-sthe | jāmi | bruvāṇaḥ | āyudhāni | veti ||10.008.07||

10.008.08a sa pitryāṇy āyudhāni vidvān indreṣita āptyo abhy ayudhyat |
10.008.08c triśīrṣāṇaṁ saptaraśmiṁ jaghanvān tvāṣṭrasya cin niḥ sasṛje trito gāḥ ||

saḥ | pitryāṇi | āyudhāni | vidvān | indra-iṣitaḥ | āptyaḥ | abhi | ayudhyat |
tri-śīrṣāṇam | sapta-raśmim | jaghanvān | tvāṣṭrasya | cit | niḥ | sasṛje | tritaḥ | gāḥ ||10.008.08||

10.008.09a bhūrīd indra udinakṣantam ojo 'vābhinat satpatir manyamānam |
10.008.09c tvāṣṭrasya cid viśvarūpasya gonām ācakrāṇas trīṇi śīrṣā parā vark ||

bhūri | it | indraḥ | ut-inakṣantam | ojaḥ | ava | abhinat | sat-patiḥ | manyamānam |
tvāṣṭrasya | cit | viśva-rūpasya | gonām | ā-cakrāṇaḥ | trīṇi | śīrṣā | parā | vark ||10.008.09||


10.009.01a āpo hi ṣṭhā mayobhuvas tā na ūrje dadhātana |
10.009.01c mahe raṇāya cakṣase ||

āpaḥ | hi | stha | mayaḥ-bhuvaḥ | tāḥ | naḥ | ūrje | dadhātana |
mahe | raṇāya | cakṣase ||10.009.01||

10.009.02a yo vaḥ śivatamo rasas tasya bhājayateha naḥ |
10.009.02c uśatīr iva mātaraḥ ||

yaḥ | vaḥ | śiva-tamaḥ | rasaḥ | tasya | bhājayata | iha | naḥ |
uśatīḥ-iva | mātaraḥ ||10.009.02||

10.009.03a tasmā araṁ gamāma vo yasya kṣayāya jinvatha |
10.009.03c āpo janayathā ca naḥ ||

tasmai | aram | gamāma | vaḥ | yasya | kṣayāya | jinvatha |
āpaḥ | janayatha | ca | naḥ ||10.009.03||

10.009.04a śaṁ no devīr abhiṣṭaya āpo bhavantu pītaye |
10.009.04c śaṁ yor abhi sravantu naḥ ||

śam | naḥ | devīḥ | abhiṣṭaye | āpaḥ | bhavantu | pītaye |
śam | yoḥ | abhi | sravantu | naḥ ||10.009.04||

10.009.05a īśānā vāryāṇāṁ kṣayantīś carṣaṇīnām |
10.009.05c apo yācāmi bheṣajam ||

īśānāḥ | vāryāṇām | kṣayantīḥ | carṣaṇīnām |
apaḥ | yācāmi | bheṣajam ||10.009.05||

10.009.06a apsu me somo abravīd antar viśvāni bheṣajā |
10.009.06c agniṁ ca viśvaśambhuvam ||

ap-su | me | somaḥ | abravīt | antaḥ | viśvāni | bheṣajā |
agnim | ca | viśva-śambhuvam ||10.009.06||

10.009.07a āpaḥ pṛṇīta bheṣajaṁ varūthaṁ tanve mama |
10.009.07c jyok ca sūryaṁ dṛśe ||

āpaḥ | pṛṇīta | bheṣajam | varūtham | tanve | mama |
jyok | ca | sūryam | dṛśe ||10.009.07||

10.009.08a idam āpaḥ pra vahata yat kiṁ ca duritam mayi |
10.009.08c yad vāham abhidudroha yad vā śepa utānṛtam ||

idam | āpaḥ | pra | vahata | yat | kim | ca | duḥ-itam | mayi |
yat | vā | aham | abhi-dudroha | yat | vā | śepe | uta | anṛtam ||10.009.08||

10.009.09a āpo adyānv acāriṣaṁ rasena sam agasmahi |
10.009.09c payasvān agna ā gahi tam mā saṁ sṛja varcasā ||

āpaḥ | adya | anu | acāriṣam | rasena | sam | agasmahi |
payasvān | agne | ā | gahi | tam | mā | sam | sṛja | varcasā ||10.009.09||


10.010.01a o cit sakhāyaṁ sakhyā vavṛtyāṁ tiraḥ purū cid arṇavaṁ jaganvān |
10.010.01c pitur napātam ā dadhīta vedhā adhi kṣami prataraṁ dīdhyānaḥ ||

o iti | cit | sakhāyam | sakhyā | vavṛtyām | tiraḥ | puru | cit | arṇavam | jaganvān |
pituḥ | napātam | ā | dadhīta | vedhāḥ | adhi | kṣami | pra-taram | dīdhyānaḥ ||10.010.01||

10.010.02a na te sakhā sakhyaṁ vaṣṭy etat salakṣmā yad viṣurūpā bhavāti |
10.010.02c mahas putrāso asurasya vīrā divo dhartāra urviyā pari khyan ||

na | te | sakhā | sakhyam | vaṣṭi | etat | sa-lakṣmā | yat | viṣu-rūpā | bhavāti |
mahaḥ | putrāsaḥ | asurasya | vīrāḥ | divaḥ | dhartāraḥ | urviyā | pari | khyan ||10.010.02||

10.010.03a uśanti ghā te amṛtāsa etad ekasya cit tyajasam martyasya |
10.010.03c ni te mano manasi dhāyy asme janyuḥ patis tanvam ā viviśyāḥ ||

uśanti | gha | te | amṛtāsaḥ | etat | ekasya | cit | tyajasam | martyasya |
ni | te | manaḥ | manasi | dhāyi | asme iti | janyuḥ | patiḥ | tanvam | ā | viviśyāḥ ||10.010.03||

10.010.04a na yat purā cakṛmā kad dha nūnam ṛtā vadanto anṛtaṁ rapema |
10.010.04c gandharvo apsv apyā ca yoṣā sā no nābhiḥ paramaṁ jāmi tan nau ||

na | yat | purā | cakṛma | kat | ha | nūnam | ṛtā | vadantaḥ | anṛtam | rapema |
gandharvaḥ | ap-su | apyā | ca | yoṣā | sā | naḥ | nābhiḥ | paramam | jāmi | tat | nau ||10.010.04||

10.010.05a garbhe nu nau janitā dampatī kar devas tvaṣṭā savitā viśvarūpaḥ |
10.010.05c nakir asya pra minanti vratāni veda nāv asya pṛthivī uta dyauḥ ||

garbhe | nu | nau | janitā | dampatī iti dam-patī | kaḥ | devaḥ | tvaṣṭā | savitā | viśva-rūpaḥ |
nakiḥ | asya | pra | minanti | vratāni | veda | nau | asya | pṛthivī | uta | dyauḥ ||10.010.05||

10.010.06a ko asya veda prathamasyāhnaḥ ka īṁ dadarśa ka iha pra vocat |
10.010.06c bṛhan mitrasya varuṇasya dhāma kad u brava āhano vīcyā nṝn ||

kaḥ | asya | veda | prathamasya | ahnaḥ | kaḥ | īm | dadarśa | kaḥ | iha | pra | vocat |
bṛhat | mitrasya | varuṇasya | dhāma | kat | ūm̐ iti | bravaḥ | āhanaḥ | vīcyā | nṝn ||10.010.06||

10.010.07a yamasya mā yamyaṁ kāma āgan samāne yonau sahaśeyyāya |
10.010.07c jāyeva patye tanvaṁ riricyāṁ vi cid vṛheva rathyeva cakrā ||

yamasya | mā | yamyam | kāmaḥ | ā | agan | samāne | yonau | saha-śeyyāya |
jāyā-iva | patye | tanvam | riricyām | vi | cit | vṛheva | rathyā-iva | cakrā ||10.010.07||

10.010.08a na tiṣṭhanti na ni miṣanty ete devānāṁ spaśa iha ye caranti |
10.010.08c anyena mad āhano yāhi tūyaṁ tena vi vṛha rathyeva cakrā ||

na | tiṣṭhanti | na | ni | miṣanti | ete | devānām | spaśaḥ | iha | ye | caranti |
anyena | mat | āhanaḥ | yāhi | tūyam | tena | vi | vṛheva | rathyā-iva | cakrā ||10.010.08||

10.010.09a rātrībhir asmā ahabhir daśasyet sūryasya cakṣur muhur un mimīyāt |
10.010.09c divā pṛthivyā mithunā sabandhū yamīr yamasya bibhṛyād ajāmi ||

rātrībhiḥ | asmai | aha-bhiḥ | daśasyet | sūryasya | cakṣuḥ | muhuḥ | ut | mimīyāt |
divā | pṛthivyā | mithunā | sabandhū iti sa-bandhū | yamīḥ | yamasya | bibhṛyāt | ajāmi ||10.010.09||

10.010.10a ā ghā tā gacchān uttarā yugāni yatra jāmayaḥ kṛṇavann ajāmi |
10.010.10c upa barbṛhi vṛṣabhāya bāhum anyam icchasva subhage patim mat ||

ā | gha | tā | gacchān | ut-tarā | yugāni | yatra | jāmayaḥ | kṛṇavan | ajāmi |
upa | barbṛhi | vṛṣabhāya | bāhum | anyam | icchasva | su-bhage | patim | mat ||10.010.10||

10.010.11a kim bhrātāsad yad anātham bhavāti kim u svasā yan nirṛtir nigacchāt |
10.010.11c kāmamūtā bahv etad rapāmi tanvā me tanvaṁ sam pipṛgdhi ||

kim | bhrātā | asat | yat | anātham | bhavāti | kim | ūm̐ iti | svasā | yat | niḥ-ṛtiḥ | ni-gacchāt |
kāma-mūtā | bahu | etat | rapāmi | tanvā | me | tanvam | sam | pipṛgdhi ||10.010.11||

10.010.12a na vā u te tanvā tanvaṁ sam papṛcyām pāpam āhur yaḥ svasāraṁ nigacchāt |
10.010.12c anyena mat pramudaḥ kalpayasva na te bhrātā subhage vaṣṭy etat ||

na | vai | ūm̐ iti | te | tanvā | tanvam | sam | papṛcyām | pāpam | āhuḥ | yaḥ | svasāram | ni-gacchāt |
anyena | mat | pra-mudaḥ | kalpayasva | na | te | bhrātā | su-bhage | vaṣṭi | etat ||10.010.12||

10.010.13a bato batāsi yama naiva te mano hṛdayaṁ cāvidāma |
10.010.13c anyā kila tvāṁ kakṣyeva yuktam pari ṣvajāte libujeva vṛkṣam ||

bataḥ | bata | asi | yama | na | eva | te | manaḥ | hṛdayam | ca | avidāma |
anyā | kila | tvām | kakṣyā-iva | yuktam | pari | svajāte | libujā-iva | vṛkṣam ||10.010.13||

10.010.14a anyam ū ṣu tvaṁ yamy anya u tvām pari ṣvajāte libujeva vṛkṣam |
10.010.14c tasya vā tvam mana icchā sa vā tavādhā kṛṇuṣva saṁvidaṁ subhadrām ||

anyam | ūm̐ iti | su | tvam | yami | anyaḥ | ūm̐ iti | tvām | pari | svajāte | libujā-iva | vṛkṣam |
tasya | vā | tvam | manaḥ | icchā | saḥ | vā | tava | adha | kṛṇuṣva | sam-vidam | su-bhadrām ||10.010.14||


10.011.01a vṛṣā vṛṣṇe duduhe dohasā divaḥ payāṁsi yahvo aditer adābhyaḥ |
10.011.01c viśvaṁ sa veda varuṇo yathā dhiyā sa yajñiyo yajatu yajñiyām̐ ṛtūn ||

vṛṣā | vṛṣṇe | duduhe | dohasā | divaḥ | payāṁsi | yahvaḥ | aditeḥ | adābhyaḥ |
viśvam | saḥ | veda | varuṇaḥ | yathā | dhiyā | saḥ | yajñiyaḥ | yajatu | yajñiyān | ṛtūn ||10.011.01||

10.011.02a rapad gandharvīr apyā ca yoṣaṇā nadasya nāde pari pātu me manaḥ |
10.011.02c iṣṭasya madhye aditir ni dhātu no bhrātā no jyeṣṭhaḥ prathamo vi vocati ||

rapat | gandharvīḥ | apyā | ca | yoṣaṇā | nadasya | nāde | pari | pātu | me | manaḥ |
iṣṭasya | madhye | aditiḥ | ni | dhātu | naḥ | bhrātā | naḥ | jyeṣṭhaḥ | prathamaḥ | vi | vocati ||10.011.02||

10.011.03a so cin nu bhadrā kṣumatī yaśasvaty uṣā uvāsa manave svarvatī |
10.011.03c yad īm uśantam uśatām anu kratum agniṁ hotāraṁ vidathāya jījanan ||

so iti | cit | nu | bhadrā | kṣu-matī | yaśasvatī | uṣāḥ | uvāsa | manave | svaḥ-vatī |
yat | īm | uśantam | uśatām | anu | ṛtum | agnim | hotāram | vidathāya | jījanan ||10.011.03||

10.011.04a adha tyaṁ drapsaṁ vibhvaṁ vicakṣaṇaṁ vir ābharad iṣitaḥ śyeno adhvare |
10.011.04c yadī viśo vṛṇate dasmam āryā agniṁ hotāram adha dhīr ajāyata ||

adha | tyam | drapsam | vibhvam | vi-cakṣaṇam | viḥ | ā | abharat | iṣitaḥ | śyenaḥ | adhvare |
yadi | viśaḥ | vṛṇate | dasmam | āryāḥ | agnim | hotāram | adha | dhīḥ | ajāyata ||10.011.04||

10.011.05a sadāsi raṇvo yavaseva puṣyate hotrābhir agne manuṣaḥ svadhvaraḥ |
10.011.05c viprasya vā yac chaśamāna ukthyaṁ vājaṁ sasavām̐ upayāsi bhūribhiḥ ||

sadā | asi | raṇvaḥ | yavasā-iva | puṣyate | hotrābhiḥ | agne | manuṣaḥ | su-adhvaraḥ |
viprasya | vā | yat | śaśamānaḥ | ukthyam | vājam | sasa-vān | upa-yāsi | bhūri-bhiḥ ||10.011.05||

10.011.06a ud īraya pitarā jāra ā bhagam iyakṣati haryato hṛtta iṣyati |
10.011.06c vivakti vahniḥ svapasyate makhas taviṣyate asuro vepate matī ||

ut | īraya | pitarā | jāraḥ | ā | bhagam | iyakṣati | haryataḥ | hṛttaḥ | iṣyati |
vivakti | vahniḥ | su-apasyate | makhaḥ | taviṣyate | asuraḥ | vepate | matī ||10.011.06||

10.011.07a yas te agne sumatim marto akṣat sahasaḥ sūno ati sa pra śṛṇve |
10.011.07c iṣaṁ dadhāno vahamāno aśvair ā sa dyumām̐ amavān bhūṣati dyūn ||

yaḥ | te | agne | su-matim | martaḥ | akṣat | sahasaḥ | sūno iti | ati | saḥ | pra | śṛṇve |
iṣam | dadhānaḥ | vahamānaḥ | aśvaiḥ | ā | saḥ | dyu-mān | ama-vān | bhūṣati | dyūn ||10.011.07||

10.011.08a yad agna eṣā samitir bhavāti devī deveṣu yajatā yajatra |
10.011.08c ratnā ca yad vibhajāsi svadhāvo bhāgaṁ no atra vasumantaṁ vītāt ||

yat | agne | eṣā | sam-itiḥ | bhavāti | devī | deveṣu | yajatā | yajatra |
ratnā | ca | yat | vi-bhajāsi | svadhā-vaḥ | bhāgam | naḥ | atra | vasu-mantam | vītāt ||10.011.08||

10.011.09a śrudhī no agne sadane sadhasthe yukṣvā ratham amṛtasya dravitnum |
10.011.09c ā no vaha rodasī devaputre mākir devānām apa bhūr iha syāḥ ||

śrudhi | naḥ | agne | sadane | sadha-sthe | yukṣva | ratham | amṛtasya | dravitnum |
ā | naḥ | vaha | rodasī iti | devaputre iti deva-putre | mākiḥ | devānām | apa | bhūḥ | iha | syāḥ ||10.011.09||


10.012.01a dyāvā ha kṣāmā prathame ṛtenābhiśrāve bhavataḥ satyavācā |
10.012.01c devo yan martān yajathāya kṛṇvan sīdad dhotā pratyaṅ svam asuṁ yan ||

dyāvā | ha | kṣāmā | prathame iti | ṛtena | abhi-śrāve | bhavataḥ | satya-vācā |
devaḥ | yat | martān | yajathāya | kṛṇvan | sīdat | hotā | pratyaṅ | svam | asum | yan ||10.012.01||

10.012.02a devo devān paribhūr ṛtena vahā no havyam prathamaś cikitvān |
10.012.02c dhūmaketuḥ samidhā bhāṛjīko mandro hotā nityo vācā yajīyān ||

devaḥ | devān | pari-bhūḥ | ṛtena | vaha | naḥ | havyam | prathamaḥ | cikitvān |
dhūma-ketuḥ | sam-idhā | bhāḥ-ṛjīkaḥ | mandraḥ | hotā | nityaḥ | vācā | yajīyān ||10.012.02||

10.012.03a svāvṛg devasyāmṛtaṁ yadī gor ato jātāso dhārayanta urvī |
10.012.03c viśve devā anu tat te yajur gur duhe yad enī divyaṁ ghṛtaṁ vāḥ ||

svāvṛk | devasya | amṛtam | yadi | goḥ | ataḥ | jātāsaḥ | dhārayante | urvī iti |
viśve | devāḥ | anu | tat | te | yajuḥ | guḥ | duhe | yat | enī | divyam | ghṛtam | vāriti vāḥ ||10.012.03||

10.012.04a arcāmi vāṁ vardhāyāpo ghṛtasnū dyāvābhūmī śṛṇutaṁ rodasī me |
10.012.04c ahā yad dyāvo 'sunītim ayan madhvā no atra pitarā śiśītām ||

arcāmi | vām | vardhāya | apaḥ | ghṛtasnū iti ghṛta-snū | dyāvābhūmī iti | śṛṇutam | rodasī iti | me |
ahā | yat | dyāvaḥ | asu-nītim | ayan | madhvā | naḥ | atra | pitarā | śiśītām ||10.012.04||

10.012.05a kiṁ svin no rājā jagṛhe kad asyāti vrataṁ cakṛmā ko vi veda |
10.012.05c mitraś cid dhi ṣmā juhurāṇo devāñ chloko na yātām api vājo asti ||

kim | svit | naḥ | rājā | jagṛhe | kat | asya | ati | vratam | cakṛma | kaḥ | vi | veda |
mitraḥ | cit | hi | sma | juhurāṇaḥ | devān | ślokaḥ | na | yātām | api | vājaḥ | asti ||10.012.05||

10.012.06a durmantv atrāmṛtasya nāma salakṣmā yad viṣurūpā bhavāti |
10.012.06c yamasya yo manavate sumantv agne tam ṛṣva pāhy aprayucchan ||

duḥ-mantu | atra | amṛtasya | nāma | sa-lakṣmā | yat | viṣu-rūpā | bhavāti |
yamasya | yaḥ | manavate | su-mantu | agne | tam | ṛṣva | pāhi | apra-yucchan ||10.012.06||

10.012.07a yasmin devā vidathe mādayante vivasvataḥ sadane dhārayante |
10.012.07c sūrye jyotir adadhur māsy aktūn pari dyotaniṁ carato ajasrā ||

yasmin | devāḥ | vidathe | mādayante | vivasvataḥ | sadane | dhārayante |
sūrye | jyotiḥ | adadhuḥ | māsi | aktūn | pari | dyotanim | carataḥ | ajasrā ||10.012.07||

10.012.08a yasmin devā manmani saṁcaranty apīcye na vayam asya vidma |
10.012.08c mitro no atrāditir anāgān savitā devo varuṇāya vocat ||

yasmin | devāḥ | manmani | sam-caranti | apīcye | na | vayam | asya | vidma |
mitraḥ | naḥ | atra | aditiḥ | anāgān | savitā | devaḥ | varuṇāya | vocat ||10.012.08||

10.012.09a śrudhī no agne sadane sadhasthe yukṣvā ratham amṛtasya dravitnum |
10.012.09c ā no vaha rodasī devaputre mākir devānām apa bhūr iha syāḥ ||

śrudhi | naḥ | agne | sadane | sadha-sthe | yukṣva | ratham | amṛtasya | dravitnum |
ā | naḥ | vaha | rodasī iti | devaputre iti deva-putre | mākiḥ | devānām | apa | bhūḥ | iha | syāḥ ||10.012.09||


10.013.01a yuje vām brahma pūrvyaṁ namobhir vi śloka etu pathyeva sūreḥ |
10.013.01c śṛṇvantu viśve amṛtasya putrā ā ye dhāmāni divyāni tasthuḥ ||

yuje | vām | brahma | pūrvyam | namaḥ-bhiḥ | vi | ślokaḥ | etu | pathyā-iva | sūreḥ |
śṛṇvantu | viśve | amṛtasya | putrāḥ | ā | ye | dhāmāni | divyāni | tasthuḥ ||10.013.01||

10.013.02a yame iva yatamāne yad aitam pra vām bharan mānuṣā devayantaḥ |
10.013.02c ā sīdataṁ svam u lokaṁ vidāne svāsasthe bhavatam indave naḥ ||

yame iveti yame-iva | yatamāne iti | yat | aitam | pra | vām | bharan | mānuṣāḥ | deva-yantaḥ |
ā | sīdatam | svam | ūm̐ iti | lokam | vidāne iti | svāsasthe iti su-āsasthe | bhavatam | indave | naḥ ||10.013.02||

10.013.03a pañca padāni rupo anv arohaṁ catuṣpadīm anv emi vratena |
10.013.03c akṣareṇa prati mima etām ṛtasya nābhāv adhi sam punāmi ||

pañca | padāni | rupaḥ | anu | aroham | catuḥ-padīm | anu | emi | vratena |
akṣareṇa | prati | mime | etām | ṛtasya | nābhau | adhi | sam | punāmi ||10.013.03||

10.013.04a devebhyaḥ kam avṛṇīta mṛtyum prajāyai kam amṛtaṁ nāvṛṇīta |
10.013.04c bṛhaspatiṁ yajñam akṛṇvata ṛṣim priyāṁ yamas tanvam prārirecīt ||

devebhyaḥ | kam | avṛṇīta | mṛtyum | pra-jāyai | kam | amṛtam | na | avṛṇīta |
bṛhaspatim | yajñam | akṛṇvata | ṛṣim | priyām | yamaḥ | tanvam | pra | arirecīt ||10.013.04||

10.013.05a sapta kṣaranti śiśave marutvate pitre putrāso apy avīvatann ṛtam |
10.013.05c ubhe id asyobhayasya rājata ubhe yatete ubhayasya puṣyataḥ ||

sapta | kṣaranti | śiśave | marutvate | pitre | putrāsaḥ | api | avīvatan | ṛtam |
ubhe iti | it | asya | ubhayasya | rājataḥ | ubhe iti | yatete iti | ubhayasya | puṣyataḥ ||10.013.05||


10.014.01a pareyivāṁsam pravato mahīr anu bahubhyaḥ panthām anupaspaśānam |
10.014.01c vaivasvataṁ saṁgamanaṁ janānāṁ yamaṁ rājānaṁ haviṣā duvasya ||

pareyi-vāṁsam | pra-vataḥ | mahīḥ | anu | bahu-bhyaḥ | panthām | anu-paspaśānam |
vaivasvatam | sam-gamanam | janānām | yamam | rājānam | haviṣā | duvasya ||10.014.01||

10.014.02a yamo no gātum prathamo viveda naiṣā gavyūtir apabhartavā u |
10.014.02c yatrā naḥ pūrve pitaraḥ pareyur enā jajñānāḥ pathyā anu svāḥ ||

yamaḥ | naḥ | gātum | prathamaḥ | viveda | na | eṣā | gavyūtiḥ | apa-bhartavai | ūm̐ iti |
yatra | naḥ | pūrve | pitaraḥ | parā-īyuḥ | enā | jajñānāḥ | pathyāḥ | anu | svāḥ ||10.014.02||

10.014.03a mātalī kavyair yamo aṅgirobhir bṛhaspatir ṛkvabhir vāvṛdhānaḥ |
10.014.03c yām̐ś ca devā vāvṛdhur ye ca devān svāhānye svadhayānye madanti ||

mātalī | kavyaiḥ | yamaḥ | aṅgiraḥ-bhiḥ | bṛhaspatiḥ | ṛkva-bhiḥ | vavṛdhānaḥ |
yān | ca | devāḥ | vavṛdhuḥ | ye | ca | devān | svāhā | anye | svadhayā | anye | madanti ||10.014.03||

10.014.04a imaṁ yama prastaram ā hi sīdāṅgirobhiḥ pitṛbhiḥ saṁvidānaḥ |
10.014.04c ā tvā mantrāḥ kaviśastā vahantv enā rājan haviṣā mādayasva ||

imam | yama | pra-staram | ā | hi | sīda | aṅgiraḥ-bhiḥ | pitṛ-bhiḥ | sam-vidānaḥ |
ā | tvā | mantrāḥ | kavi-śastāḥ | vahantu | enā | rājan | haviṣā | mādayasva ||10.014.04||

10.014.05a aṅgirobhir ā gahi yajñiyebhir yama vairūpair iha mādayasva |
10.014.05c vivasvantaṁ huve yaḥ pitā te 'smin yajñe barhiṣy ā niṣadya ||

aṅgiraḥ-bhiḥ | ā | gahi | yajñiyebhiḥ | yama | vairūpaiḥ | iha | mādayasva |
vivasvantam | huve | yaḥ | pitā | te | asmin | yajñe | barhiṣi | ā | ni-sadya ||10.014.05||

10.014.06a aṅgiraso naḥ pitaro navagvā atharvāṇo bhṛgavaḥ somyāsaḥ |
10.014.06c teṣāṁ vayaṁ sumatau yajñiyānām api bhadre saumanase syāma ||

aṅgirasaḥ | naḥ | pitaraḥ | nava-gvāḥ | atharvāṇaḥ | bhṛgavaḥ | somyāsaḥ |
teṣām | vayam | su-matau | yajñiyānām | api | bhadre | saumanase | syāma ||10.014.06||

10.014.07a prehi prehi pathibhiḥ pūrvyebhir yatrā naḥ pūrve pitaraḥ pareyuḥ |
10.014.07c ubhā rājānā svadhayā madantā yamam paśyāsi varuṇaṁ ca devam ||

pra | ihi | pra | ihi | pathi-bhiḥ | pūrvyebhiḥ | yatra | naḥ | pūrve | pitaraḥ | parā-īyuḥ |
ubhā | rājānā | svadhayā | madantā | yamam | paśyāsi | varuṇam | ca | devam ||10.014.07||

10.014.08a saṁ gacchasva pitṛbhiḥ saṁ yameneṣṭāpūrtena parame vyoman |
10.014.08c hitvāyāvadyam punar astam ehi saṁ gacchasva tanvā suvarcāḥ ||

sam | gacchasva | pitṛ-bhiḥ | sam | yamena | iṣṭāpūrtena | parame | vi-oman |
hitvāya | avadyam | punaḥ | astam | ā | ihi | sam | gacchasva | tanvā | su-varcāḥ ||10.014.08||

10.014.09a apeta vīta vi ca sarpatāto 'smā etam pitaro lokam akran |
10.014.09c ahobhir adbhir aktubhir vyaktaṁ yamo dadāty avasānam asmai ||

apa | ita | vi | ita | vi | ca | sarpata | ataḥ | asmai | etam | pitaraḥ | lokam | akran |
ahaḥ-bhiḥ | at-bhiḥ | aktu-bhiḥ | vi-aktam | yamaḥ | dadāti | ava-sānam | asmai ||10.014.09||

10.014.10a ati drava sārameyau śvānau caturakṣau śabalau sādhunā pathā |
10.014.10c athā pitṝn suvidatrām̐ upehi yamena ye sadhamādam madanti ||

ati | drava | sārameyau | śvānau | catuḥ-akṣau | śabalau | sādhunā | pathā |
atha | pitṝn | su-vidatrān | upa | ihi | yamena | ye | sadha-mādam | madanti ||10.014.10||

10.014.11a yau te śvānau yama rakṣitārau caturakṣau pathirakṣī nṛcakṣasau |
10.014.11c tābhyām enam pari dehi rājan svasti cāsmā anamīvaṁ ca dhehi ||

yau | te | śvānau | yama | rakṣitārau | catuḥ-akṣau | pathirakṣī iti pathi-rakṣī | nṛ-cakṣasau |
tābhyām | enam | pari | dehi | rājan | svasti | ca | asmai | anamīvam | ca | dhehi ||10.014.11||

10.014.12a urūṇasāv asutṛpā udumbalau yamasya dūtau carato janām̐ anu |
10.014.12c tāv asmabhyaṁ dṛśaye sūryāya punar dātām asum adyeha bhadram ||

uru-nasau | asu-tṛpau | udumbalau | yamasya | dūtau | carataḥ | janān | anu |
tau | asmabhyam | dṛśaye | sūryāya | punaḥ | dātām | asum | adya | iha | bhadram ||10.014.12||

10.014.13a yamāya somaṁ sunuta yamāya juhutā haviḥ |
10.014.13c yamaṁ ha yajño gacchaty agnidūto araṁkṛtaḥ ||

yamāya | somam | sunuta | yamāya | juhuta | haviḥ |
yamam | ha | yajñaḥ | gacchati | agni-dūtaḥ | aram-kṛtaḥ ||10.014.13||

10.014.14a yamāya ghṛtavad dhavir juhota pra ca tiṣṭhata |
10.014.14c sa no deveṣv ā yamad dīrgham āyuḥ pra jīvase ||

yamāya | ghṛta-vat | haviḥ | juhota | pra | ca | tiṣṭhata |
saḥ | naḥ | deveṣu | ā | yamat | dīrgham | āyuḥ | pra | jīvase ||10.014.14||

10.014.15a yamāya madhumattamaṁ rājñe havyaṁ juhotana |
10.014.15c idaṁ nama ṛṣibhyaḥ pūrvajebhyaḥ pūrvebhyaḥ pathikṛdbhyaḥ ||

yamāya | madhumat-tamam | rājñe | havyam | juhotana |
idam | namaḥ | ṛṣi-bhyaḥ | pūrva-jebhyaḥ | pūrvebhyaḥ | pathikṛt-bhyaḥ ||10.014.15||

10.014.16a trikadrukebhiḥ patati ṣaḻ urvīr ekam id bṛhat |
10.014.16c triṣṭub gāyatrī chandāṁsi sarvā tā yama āhitā ||

tri-kadrukebhiḥ | patati | ṣaṭ | urvīḥ | ekam | it | bṛhat |
tri-stup | gāyatrī | chandāṁsi | sarvā | tā | yame | ā-hitā ||10.014.16||


10.015.01a ud īratām avara ut parāsa un madhyamāḥ pitaraḥ somyāsaḥ |
10.015.01c asuṁ ya īyur avṛkā ṛtajñās te no 'vantu pitaro haveṣu ||

ut | īratām | avare | ut | parāsaḥ | ut | madhyamāḥ | pitaraḥ | somyāsaḥ |
asum | ye | īyuḥ | avṛkāḥ | ṛta-jñāḥ | te | naḥ | avantu | pitaraḥ | haveṣu ||10.015.01||

10.015.02a idam pitṛbhyo namo astv adya ye pūrvāso ya uparāsa īyuḥ |
10.015.02c ye pārthive rajasy ā niṣattā ye vā nūnaṁ suvṛjanāsu vikṣu ||

idam | pitṛ-bhyaḥ | namaḥ | astu | adya | ye | pūrvāsaḥ | ye | uparāsaḥ | īyuḥ |
ye | pārthive | rajasi | ā | ni-sattāḥ | ye | vā | nūnam | su-vṛjanāsu | vikṣu ||10.015.02||

10.015.03a āham pitṝn suvidatrām̐ avitsi napātaṁ ca vikramaṇaṁ ca viṣṇoḥ |
10.015.03c barhiṣado ye svadhayā sutasya bhajanta pitvas ta ihāgamiṣṭhāḥ ||

ā | aham | pitṝn | su-vidatrān | avitsi | napātam | ca | vi-kramaṇam | ca | viṣṇoḥ |
barhi-sadaḥ | ye | svadhayā | sutasya | bhajanta | pitvaḥ | te | iha | ā-gamiṣṭhāḥ ||10.015.03||

10.015.04a barhiṣadaḥ pitara ūty arvāg imā vo havyā cakṛmā juṣadhvam |
10.015.04c ta ā gatāvasā śaṁtamenāthā naḥ śaṁ yor arapo dadhāta ||

barhi-sadaḥ | pitaraḥ | ūtī | arvāk | imā | vaḥ | havyā | cakṛma | juṣadhvam |
te | ā | gata | avasā | śam-tamena | atha | naḥ | śam | yoḥ | arapaḥ | dadhāta ||10.015.04||

10.015.05a upahūtāḥ pitaraḥ somyāso barhiṣyeṣu nidhiṣu priyeṣu |
10.015.05c ta ā gamantu ta iha śruvantv adhi bruvantu te 'vantv asmān ||

upa-hūtāḥ | pitaraḥ | somyāsaḥ | barhiṣyeṣu | ni-dhiṣu | priyeṣu |
te | ā | gamantu | te | iha | śrivantu | adhi | bruvantu | te | avantu | asmān ||10.015.05||

10.015.06a ācyā jānu dakṣiṇato niṣadyemaṁ yajñam abhi gṛṇīta viśve |
10.015.06c mā hiṁsiṣṭa pitaraḥ kena cin no yad va āgaḥ puruṣatā karāma ||

ā-acya | jānu | dakṣiṇataḥ | ni-sadya | imam | yajñam | abhi | gṛṇīta | viśve |
mā | hiṁsiṣṭa | pitaraḥ | kena | cit | naḥ | yat | vaḥ | āgaḥ | puruṣatā | karāma ||10.015.06||

10.015.07a āsīnāso aruṇīnām upasthe rayiṁ dhatta dāśuṣe martyāya |
10.015.07c putrebhyaḥ pitaras tasya vasvaḥ pra yacchata ta ihorjaṁ dadhāta ||

āsīnāsaḥ | aruṇīnām | upa-sthe | rayim | dhatta | dāśuṣe | martyāya |
putrebhyaḥ | pitaraḥ | tasya | vasvaḥ | pra | yacchata | te | iha | ūrjam | dadhāta ||10.015.07||

10.015.08a ye naḥ pūrve pitaraḥ somyāso 'nūhire somapīthaṁ vasiṣṭhāḥ |
10.015.08c tebhir yamaḥ saṁrarāṇo havīṁṣy uśann uśadbhiḥ pratikāmam attu ||

ye | naḥ | pūrve | pitaraḥ | somyāsaḥ | anu-ūhire | soma-pītham | vasiṣṭhāḥ |
tebhiḥ | yamaḥ | sam-rarāṇaḥ | havīṁṣi | uśan | eśat-bhiḥ | prati-kāmam | attu ||10.015.08||

10.015.09a ye tātṛṣur devatrā jehamānā hotrāvidaḥ stomataṣṭāso arkaiḥ |
10.015.09c āgne yāhi suvidatrebhir arvāṅ satyaiḥ kavyaiḥ pitṛbhir gharmasadbhiḥ ||

ye | tatṛṣuḥ | devatrā | jehamānāḥ | hotrā-vidaḥ | stoma-taṣṭāsaḥ | arkaiḥ |
ā | agne | yāhi | su-vidatrebhiḥ | arvāṅ | satyaiḥ | kavyaiḥ | pitṛ-bhiḥ | gharmasat-bhiḥ ||10.015.09||

10.015.10a ye satyāso havirado haviṣpā indreṇa devaiḥ sarathaṁ dadhānāḥ |
10.015.10c āgne yāhi sahasraṁ devavandaiḥ paraiḥ pūrvaiḥ pitṛbhir gharmasadbhiḥ ||

ye | satyāsaḥ | haviḥ-adaḥ | haviḥ-pāḥ | indreṇa | devaiḥ | sa-ratham | dadhānāḥ |
ā | agne | yāhi | sahasram | deva-vandaiḥ | paraiḥ | pūrvaiḥ | pitṛ-bhiḥ | gharmasat-bhiḥ ||10.015.10||

10.015.11a agniṣvāttāḥ pitara eha gacchata sadaḥ-sadaḥ sadata supraṇītayaḥ |
10.015.11c attā havīṁṣi prayatāni barhiṣy athā rayiṁ sarvavīraṁ dadhātana ||

agni-svāttāḥ | pitaraḥ | ā | iha | gacchata | sadaḥ-sadaḥ | sadata | su-pranītayaḥ |
atta | havīṁṣi | pra-yatāni | barhiṣi | atha | rayim | sarva-vīram | dadhātana ||10.015.11||

10.015.12a tvam agna īḻito jātavedo 'vāḍ ḍhavyāni surabhīṇi kṛtvī |
10.015.12c prādāḥ pitṛbhyaḥ svadhayā te akṣann addhi tvaṁ deva prayatā havīṁṣi ||

tvam | agne | īḻitaḥ | jāta-vedaḥ | avāṭ | havyāni | surabhīṇi | kṛtvī |
pra | adāḥ | pitṛ-bhyaḥ | svadhayā | te | akṣan | addhi | tvam | deva | pra-yatā | havīṁṣi ||10.015.12||

10.015.13a ye ceha pitaro ye ca neha yām̐ś ca vidma yām̐ u ca na pravidma |
10.015.13c tvaṁ vettha yati te jātavedaḥ svadhābhir yajñaṁ sukṛtaṁ juṣasva ||

ye | ca | iha | pitaraḥ | ye | ca | na | iha | yān | ca | vidma | yān | ūm̐ iti | ca | na | pra-vidma |
tvam | vettha | yati | te | jāta-vedaḥ | svadhābhiḥ | yajñam | su-kṛtam | juṣasva ||10.015.13||

10.015.14a ye agnidagdhā ye anagnidagdhā madhye divaḥ svadhayā mādayante |
10.015.14c tebhiḥ svarāḻ asunītim etāṁ yathāvaśaṁ tanvaṁ kalpayasva ||

ye | agni-dagdhāḥ | ye | anagni-dagdhāḥ | madhye | divaḥ | svadhayā | mādayante |
tebhiḥ | sva-rāṭ | asu-nītim | etām | yathā-vaśam | tanvam | kalpayasva ||10.015.14||


10.016.01a mainam agne vi daho mābhi śoco māsya tvacaṁ cikṣipo mā śarīram |
10.016.01c yadā śṛtaṁ kṛṇavo jātavedo 'them enam pra hiṇutāt pitṛbhyaḥ ||

mā | enam | agne | vi | dahaḥ | mā | abhi | śocaḥ | mā | asya | tvacam | cikṣipaḥ | mā | śarīram |
yadā | śṛtam | kṛṇavaḥ | jāta-vedaḥ | atha | īm | enam | pra | hiṇutāt | pitṛ-bhyaḥ ||10.016.01||

10.016.02a śṛtaṁ yadā karasi jātavedo 'them enam pari dattāt pitṛbhyaḥ |
10.016.02c yadā gacchāty asunītim etām athā devānāṁ vaśanīr bhavāti ||

śṛtam | yadā | karasi | jāta-vedaḥ | atha | īm | enam | pari | dattāt | pitṛ-bhyaḥ |
yadā | gacchāti | asu-nītim | etām | atha | devānām | vaśa-nīḥ | bhavāti ||10.016.02||

10.016.03a sūryaṁ cakṣur gacchatu vātam ātmā dyāṁ ca gaccha pṛthivīṁ ca dharmaṇā |
10.016.03c apo vā gaccha yadi tatra te hitam oṣadhīṣu prati tiṣṭhā śarīraiḥ ||

sūryam | cakṣuḥ | gacchatu | vātam | ātmā | dyām | ca | gaccha | pṛthivīm | ca | dharmaṇā |
apaḥ | vā | gaccha | yadi | tatra | te | hitam | oṣadhīṣu | prati | tiṣṭha | śarīraiḥ ||10.016.03||

10.016.04a ajo bhāgas tapasā taṁ tapasva taṁ te śocis tapatu taṁ te arciḥ |
10.016.04c yās te śivās tanvo jātavedas tābhir vahainaṁ sukṛtām u lokam ||

ajaḥ | bhāgaḥ | tapasā | tam | tapasva | tam | te | śociḥ | tapatu | tam | te | arciḥ |
yāḥ | te | śivāḥ | tanvaḥ | jāta-vedaḥ | tābhiḥ | vaha | enam | su-kṛtām | ūm̐ iti | lokam ||10.016.04||

10.016.05a ava sṛja punar agne pitṛbhyo yas ta āhutaś carati svadhābhiḥ |
10.016.05c āyur vasāna upa vetu śeṣaḥ saṁ gacchatāṁ tanvā jātavedaḥ ||

ava | sṛja | punaḥ | agne | pitṛ-bhyaḥ | yaḥ | te | ā-hutaḥ | carati | svadhābhiḥ |
āyuḥ | vasānaḥ | upa | vetu | śeṣaḥ | sam | gacchatām | tanvā | jāta-vedaḥ ||10.016.05||

10.016.06a yat te kṛṣṇaḥ śakuna ātutoda pipīlaḥ sarpa uta vā śvāpadaḥ |
10.016.06c agniṣ ṭad viśvād agadaṁ kṛṇotu somaś ca yo brāhmaṇām̐ āviveśa ||

yat | te | kṛṣṇaḥ | śakunaḥ | ā-tutoda | pipīlaḥ | sarpaḥ | uta | vā | śvāpadaḥ |
agniḥ | tat | viśva-at | agadam | kṛṇotu | somaḥ | ca | yaḥ | brāhmaṇān | ā-viveśa ||10.016.06||

10.016.07a agner varma pari gobhir vyayasva sam prorṇuṣva pīvasā medasā ca |
10.016.07c net tvā dhṛṣṇur harasā jarhṛṣāṇo dadhṛg vidhakṣyan paryaṅkhayāte ||

agneḥ | varma | pari | gobhiḥ | vyayasva | sam | pra | ūṇuṣva | pīvasā | medasā | ca |
na | it | tvā | dhṛṣṇuḥ | harasā | jarhṛṣāṇaḥ | dadhṛk | vi-dhakṣyan | pari-aṅkhayāte ||10.016.07||

10.016.08a imam agne camasam mā vi jihvaraḥ priyo devānām uta somyānām |
10.016.08c eṣa yaś camaso devapānas tasmin devā amṛtā mādayante ||

imam | agne | camasam | mā | vi | jihvaraḥ | priyaḥ | devānām | uta | somyānām |
eṣaḥ | yaḥ | camasaḥ | deva-pānaḥ | tasmin | devāḥ | amṛtāḥ | mādayante ||10.016.08||

10.016.09a kravyādam agnim pra hiṇomi dūraṁ yamarājño gacchatu ripravāhaḥ |
10.016.09c ihaivāyam itaro jātavedā devebhyo havyaṁ vahatu prajānan ||

kravya-adam | agnim | pra | hiṇomi | dūram | yama-rājñaḥ | gacchatu | ripra-vāhaḥ |
iha | eva | ayam | itaraḥ | jāta-vedāḥ | devebhyaḥ | havyam | vahatu | pra-jānan ||10.016.09||

10.016.10a yo agniḥ kravyāt praviveśa vo gṛham imam paśyann itaraṁ jātavedasam |
10.016.10c taṁ harāmi pitṛyajñāya devaṁ sa gharmam invāt parame sadhasthe ||

yaḥ | agniḥ | kravya-at | pra-viveśa | vaḥ | gṛham | imam | paśyan | itaram | jāta-vedasam |
tam | harāmi | pitṛ-yajñāya | devam | saḥ | gharmam | invāt | parame | sadha-sthe ||10.016.10||

10.016.11a yo agniḥ kravyavāhanaḥ pitṝn yakṣad ṛtāvṛdhaḥ |
10.016.11c pred u havyāni vocati devebhyaś ca pitṛbhya ā ||

yaḥ | agniḥ | kravya-vāhanaḥ | pitṝn | yakṣat | ṛta-vṛdhaḥ |
pra | it | ūm̐ iti | havyāni | vocati | devebhyaḥ | ca | pitṛ-bhyaḥ | ā ||10.016.11||

10.016.12a uśantas tvā ni dhīmahy uśantaḥ sam idhīmahi |
10.016.12c uśann uśata ā vaha pitṝn haviṣe attave ||

uśantaḥ | tvā | ni | dhīmahi | uśantaḥ | sam | idhīmahi |
uśan | uśataḥ | ā | vaha | pitṝn | haviṣe | attave ||10.016.12||

10.016.13a yaṁ tvam agne samadahas tam u nir vāpayā punaḥ |
10.016.13c kiyāmbv atra rohatu pākadūrvā vyalkaśā ||

yam | tvam | agne | sam-adahaḥ | tam | ūm̐ iti | niḥ | vāpaya | punariti |
kiyāmbu | atra | rohatu | pāka-dūrvā | vi-alkaśā ||10.016.13||

10.016.14a śītike śītikāvati hlādike hlādikāvati |
10.016.14c maṇḍūkyā su saṁ gama imaṁ sv agniṁ harṣaya ||

śītike | śītikā-vati | hlādike | hlādikā-vati |
maṇḍūkyā | su | sam | gamaḥ | imam | su | agnim | harṣaya ||10.016.14||


10.017.01a tvaṣṭā duhitre vahatuṁ kṛṇotītīdaṁ viśvam bhuvanaṁ sam eti |
10.017.01c yamasya mātā paryuhyamānā maho jāyā vivasvato nanāśa ||

tvaṣṭā | duhitre | vahatum | kṛṇoti | iti | idam | viśvam | bhuvanam | sam | eti |
yamasya | mātā | pari-uhyamānā | mahaḥ | jāyā | vivavasvataḥ | nanāśa ||10.017.01||

10.017.02a apāgūhann amṛtām martyebhyaḥ kṛtvī savarṇām adadur vivasvate |
10.017.02c utāśvināv abharad yat tad āsīd ajahād u dvā mithunā saraṇyūḥ ||

apa | agūhan | amṛtām | martyebhyaḥ | kṛtvī | sa-varṇām | adaduḥ | vivasvate |
uta | aśvinau | abharat | yat | tat | āsīt | ajahāt | ūm̐ iti | dvā | mithunā | saraṇyūḥ ||10.017.02||

10.017.03a pūṣā tvetaś cyāvayatu pra vidvān anaṣṭapaśur bhuvanasya gopāḥ |
10.017.03c sa tvaitebhyaḥ pari dadat pitṛbhyo 'gnir devebhyaḥ suvidatriyebhyaḥ ||

pūṣā | tvā | itaḥ | cyavayatu | pra | vidvān | anaṣṭa-paśuḥ | bhuvanasya | gopāḥ |
saḥ | tvā | etebhyaḥ | pari | dadat | pitṛ-bhyaḥ | agniḥ | devebhyaḥ | su-vidatriyebhyaḥ ||10.017.03||

10.017.04a āyur viśvāyuḥ pari pāsati tvā pūṣā tvā pātu prapathe purastāt |
10.017.04c yatrāsate sukṛto yatra te yayus tatra tvā devaḥ savitā dadhātu ||

āyuḥ | viśva-āyuḥ | pari | pāsati | tvā | pūṣā | tvā | pātu | pra-pathe | purastāt |
yatra | āsate | su-kṛtaḥ | yatra | te | yayuḥ | tatra | tvā | devaḥ | savitā | dadhātu ||10.017.04||

10.017.05a pūṣemā āśā anu veda sarvāḥ so asmām̐ abhayatamena neṣat |
10.017.05c svastidā āghṛṇiḥ sarvavīro 'prayucchan pura etu prajānan ||

pūṣā | imāḥ | āśāḥ | anu | veda | sarvāḥ | saḥ | asmān | abhaya-tamena | neṣat |
svasti-dāḥ | āghṛṇiḥ | sarva-vīraḥ | apra-yucchan | puraḥ | etu | pra-jānan ||10.017.05||

10.017.06a prapathe pathām ajaniṣṭa pūṣā prapathe divaḥ prapathe pṛthivyāḥ |
10.017.06c ubhe abhi priyatame sadhasthe ā ca parā ca carati prajānan ||

pra-pathe | pathām | ajaniṣṭa | pūṣā | pra-pathe | divaḥ | pra-pathe | pṛthivyāḥ |
ubhe iti | abhi | priya-tame | sadha-sthe | ā | ca | parā | ca | carati | pra-jānan ||10.017.06||

10.017.07a sarasvatīṁ devayanto havante sarasvatīm adhvare tāyamāne |
10.017.07c sarasvatīṁ sukṛto ahvayanta sarasvatī dāśuṣe vāryaṁ dāt ||

sarasvatīm | deva-yantaḥ | havante | sarasvatīm | adhvare | tāyamāne |
sarasvatīm | su-kṛtaḥ | ahvayanta | sarasvatī | dāśuṣe | vāryam | dāt ||10.017.07||

10.017.08a sarasvati yā sarathaṁ yayātha svadhābhir devi pitṛbhir madantī |
10.017.08c āsadyāsmin barhiṣi mādayasvānamīvā iṣa ā dhehy asme ||

sarasvati | yā | sa-ratham | yayātha | svadhābhiḥ | devi | pitṛ-bhiḥ | madantī |
ā-sadya | asmin | barhiṣi | mādayasva | anamīvāḥ | iṣaḥ | ā | dhehi | asme iti ||10.017.08||

10.017.09a sarasvatīṁ yām pitaro havante dakṣiṇā yajñam abhinakṣamāṇāḥ |
10.017.09c sahasrārgham iḻo atra bhāgaṁ rāyas poṣaṁ yajamāneṣu dhehi ||

sarasvatīm | yām | pitaraḥ | havante | dakṣiṇā | yajñam | abhi-nakṣamāṇāḥ |
sahasra-argham | iḻaḥ | atra | bhāgam | rāyaḥ | poṣam | yajamāneṣu | dhehi ||10.017.09||

10.017.10a āpo asmān mātaraḥ śundhayantu ghṛtena no ghṛtapvaḥ punantu |
10.017.10c viśvaṁ hi ripram pravahanti devīr ud id ābhyaḥ śucir ā pūta emi ||

āpaḥ | asmān | mātaraḥ | śundhayantu | ghṛtena | naḥ | ghṛta-pvaḥ | punantu |
viśvam | hi | ripram | pra-vahanti | devīḥ | ut | it | ābhyaḥ | śuciḥ | ā | pūtaḥ | emi ||10.017.10||

10.017.11a drapsaś caskanda prathamām̐ anu dyūn imaṁ ca yonim anu yaś ca pūrvaḥ |
10.017.11c samānaṁ yonim anu saṁcarantaṁ drapsaṁ juhomy anu sapta hotrāḥ ||

drapsaḥ | caskanda | prathamām | anu | dyūn | imam | ca | yonim | anu | yaḥ | ca | pūrvaḥ |
samānam | yonim | anu | sam-carantam | drapsam | juhomi | anu | sapta | hotrāḥ ||10.017.11||

10.017.12a yas te drapsaḥ skandati yas te aṁśur bāhucyuto dhiṣaṇāyā upasthāt |
10.017.12c adhvaryor vā pari vā yaḥ pavitrāt taṁ te juhomi manasā vaṣaṭkṛtam ||

yaḥ | te | drapsaḥ | skandati | yaḥ | te | aṁśuḥ | bāhu-cyutaḥ | dhiṣaṇāyāḥ | upa-sthāt |
adhvaryoḥ | vā | pari | vā | yaḥ | pavitrāt | tam | te | juhomi | manasā | vaṣaṭ-kṛtam ||10.017.12||

10.017.13a yas te drapsaḥ skanno yas te aṁśur avaś ca yaḥ paraḥ srucā |
10.017.13c ayaṁ devo bṛhaspatiḥ saṁ taṁ siñcatu rādhase ||

yaḥ | te | drapsaḥ | skannaḥ | yaḥ | te | aṁśuḥ | avaḥ | ca | yaḥ | paraḥ | srucā |
ayam | devaḥ | bṛhaspatiḥ | sam | tam | siñcatu | rādhase ||10.017.13||

10.017.14a payasvatīr oṣadhayaḥ payasvan māmakaṁ vacaḥ |
10.017.14c apām payasvad it payas tena mā saha śundhata ||

payasvatīḥ | oṣadhayaḥ | payasvat | māmakam | vacaḥ |
apām | payasvat | it | payaḥ | tena | mā | saha | śundhata ||10.017.14||


10.018.01a param mṛtyo anu parehi panthāṁ yas te sva itaro devayānāt |
10.018.01c cakṣuṣmate śṛṇvate te bravīmi mā naḥ prajāṁ rīriṣo mota vīrān ||

param | mṛtyo iti | anu | parā | ihi | panthām | yaḥ | te | svaḥ | itaraḥ | deva-yānāt |
cakṣuṣmate | śṛṇvate | te | bravīmi | mā | naḥ | pra-jām | ririṣaḥ | mā | uta | vīrān ||10.018.01||

10.018.02a mṛtyoḥ padaṁ yopayanto yad aita drāghīya āyuḥ prataraṁ dadhānāḥ |
10.018.02c āpyāyamānāḥ prajayā dhanena śuddhāḥ pūtā bhavata yajñiyāsaḥ ||

mṛtyoḥ | padam | yopayantaḥ | yat | aita | drāghīyaḥ | āyuḥ | pra-taram | dadhānāḥ |
āpyāyamānāḥ | pra-jayā | dhanena | śuddhāḥ | pūtāḥ | bhavata | yajñiyāsaḥ ||10.018.02||

10.018.03a ime jīvā vi mṛtair āvavṛtrann abhūd bhadrā devahūtir no adya |
10.018.03c prāñco agāma nṛtaye hasāya drāghīya āyuḥ prataraṁ dadhānāḥ ||

ime | jīvāḥ | vi | mṛtaiḥ | ā | avavṛtran | abhūt | bhadrā | deva-hūtiḥ | naḥ | adya |
prāñcaḥ | agāma | nṛtaye | hasāya | drāghīyaḥ | āyuḥ | pra-taram | dadhānāḥ ||10.018.03||

10.018.04a imaṁ jīvebhyaḥ paridhiṁ dadhāmi maiṣāṁ nu gād aparo artham etam |
10.018.04c śataṁ jīvantu śaradaḥ purūcīr antar mṛtyuṁ dadhatām parvatena ||

imam | jīvebhyaḥ | pari-dhim | dādhāmi | mā | eṣām | nu | gāt | aparaḥ | artham | etam |
śatam | jīvantu | śaradaḥ | purūcīḥ | antaḥ | mṛtyum | dadhatām | parvatena ||10.018.04||

10.018.05a yathāhāny anupūrvam bhavanti yatha ṛtava ṛtubhir yanti sādhu |
10.018.05c yathā na pūrvam aparo jahāty evā dhātar āyūṁṣi kalpayaiṣām ||

yathā | ahāni | anu-pūrvam | bhavanti | yathā | ṛtavaḥ | ṛtu-bhiḥ | yanti | sādhu |
yathā | na | pūrvam | aparaḥ | jahāti | eva | dhātaḥ | āyūṁṣi | kalpaya | eṣām ||10.018.05||

10.018.06a ā rohatāyur jarasaṁ vṛṇānā anupūrvaṁ yatamānā yati ṣṭha |
10.018.06c iha tvaṣṭā sujanimā sajoṣā dīrgham āyuḥ karati jīvase vaḥ ||

ā | rahata | āyuḥ | jarasam | vṛṇānāḥ | anu-pūrvam | yatamānāḥ | yati | stha |
iha | tvaṣṭā | su-janimā | sa-joṣāḥ | dīrgham | āyuḥ | karati | jīvase | vaḥ ||10.018.06||

10.018.07a imā nārīr avidhavāḥ supatnīr āñjanena sarpiṣā saṁ viśantu |
10.018.07c anaśravo 'namīvāḥ suratnā ā rohantu janayo yonim agre ||

imāḥ | nārīḥ | avidhavāḥ | su-patnīḥ | ā-añjanena | sarpiṣā | sam | viśantu |
anaśravaḥ | anamīvāḥ | su-ratnāḥ | ā | rohantu | janayaḥ | yonim | agre ||10.018.07||

10.018.08a ud īrṣva nāry abhi jīvalokaṁ gatāsum etam upa śeṣa ehi |
10.018.08c hastagrābhasya didhiṣos tavedam patyur janitvam abhi sam babhūtha ||

ut | īrṣva | nāri | abhi | jīva-lokam | gata-asum | etam | upa | śeṣe | ā | ihi |
hasta-grābhasya | didhiṣoḥ | tava | idam | patyuḥ | jani-tvam | abhi | sam | babhūtha ||10.018.08||

10.018.09a dhanur hastād ādadāno mṛtasyāsme kṣatrāya varcase balāya |
10.018.09c atraiva tvam iha vayaṁ suvīrā viśvāḥ spṛdho abhimātīr jayema ||

dhanuḥ | hastāt | ā-dadānaḥ | mṛtasya | asme iti | kṣatrāya | varcase | balāya |
atra | eva | tvam | iha | vayam | su-vīrāḥ | viśvāḥ | spṛdhaḥ | abhi-mātīḥ | jayema ||10.018.09||

10.018.10a upa sarpa mātaram bhūmim etām uruvyacasam pṛthivīṁ suśevām |
10.018.10c ūrṇamradā yuvatir dakṣiṇāvata eṣā tvā pātu nirṛter upasthāt ||

upa | sarpa | mātaram | bhūmim | etām | uru-vyacasam | pṛthivīm | su-śevām |
ūrṇa-mradāḥ | yuvatiḥ | dakṣiṇā-vate | eṣā | tvā | pātu | niḥ-ṛteḥ | upa-sthāt ||10.018.10||

10.018.11a uc chvañcasva pṛthivi mā ni bādhathāḥ sūpāyanāsmai bhava sūpavañcanā |
10.018.11c mātā putraṁ yathā sicābhy enam bhūma ūrṇuhi ||

ut | śvañcasva | pṛthivi | mā | ni | bādhathāḥ | su-upāyanā | asmai | bhava | su-upavañcanā |
mātā | putram | yathā | sicā | abhi | enam | bhūme | ūrṇuhi ||10.018.11||

10.018.12a ucchvañcamānā pṛthivī su tiṣṭhatu sahasram mita upa hi śrayantām |
10.018.12c te gṛhāso ghṛtaścuto bhavantu viśvāhāsmai śaraṇāḥ santv atra ||

ut-śvañcamānā | pṛthivī | su | tiṣṭhatu | sahasram | mitaḥ | upa | hi | śrayantām |
te | gṛhāsaḥ | ghṛta-ścutaḥ | bhavantu | viśvāhā | asmai | śaraṇāḥ | santu | atra ||10.018.12||

10.018.13a ut te stabhnāmi pṛthivīṁ tvat parīmaṁ logaṁ nidadhan mo ahaṁ riṣam |
10.018.13c etāṁ sthūṇām pitaro dhārayantu te 'trā yamaḥ sādanā te minotu ||

ut | te | stabhnāmi | pṛthivīm | tvat | pari | imam | logam | ni-dadhat | mo iti | aham | riṣam |
etām | sthūṇām | pitaraḥ | dhārayantu | te | atra | yamaḥ | sadanā | te | minotu ||10.018.13||

10.018.14a pratīcīne mām ahanīṣvāḥ parṇam ivā dadhuḥ |
10.018.14c pratīcīṁ jagrabhā vācam aśvaṁ raśanayā yathā ||

pratīcīne | mām | ahani | iṣvāḥ | parṇam-iva | ā | dadhuḥ |
pratīcīm | jagrabha | vācam | aśvam | raśanayā | yathā ||10.018.14||


10.019.01a ni vartadhvam mānu gātāsmān siṣakta revatīḥ |
10.019.01c agnīṣomā punarvasū asme dhārayataṁ rayim ||

ni | vartadhvam | mā | anu | gāta | asmān | sisakta | revatīḥ |
agnīṣomā | punarvasū iti punaḥ-vasū | asme iti | dhārayatam | rayim ||10.019.01||

10.019.02a punar enā ni vartaya punar enā ny ā kuru |
10.019.02c indra eṇā ni yacchatv agnir enā upājatu ||

punaḥ | enāḥ | ni | vartaya | punaḥ | enāḥ | ni | ā | kuru |
indra | enāḥ | ni | yacchatu | agniḥ | enāḥ | upa-ājatu ||10.019.02||

10.019.03a punar etā ni vartantām asmin puṣyantu gopatau |
10.019.03c ihaivāgne ni dhārayeha tiṣṭhatu yā rayiḥ ||

punaḥ | etāḥ | ni | vartantām | asmin | puṣyantu | go-patau |
iha | eva | agne | ni | dhāraya | iha | tiṣṭhatu | yā | rayiḥ ||10.019.03||

10.019.04a yan niyānaṁ nyayanaṁ saṁjñānaṁ yat parāyaṇam |
10.019.04c āvartanaṁ nivartanaṁ yo gopā api taṁ huve ||

yat | ni-yānam | ni-ayanam | sam-jñānam | yat | parā-ayanam |
ā-vartanam | ni-vartanam | yaḥ | gopāḥ | api | tam | huve ||10.019.04||

10.019.05a ya udānaḍ vyayanaṁ ya udānaṭ parāyaṇam |
10.019.05c āvartanaṁ nivartanam api gopā ni vartatām ||

yaḥ | ut-ānaṭ | vi-ayanam | yaḥ | ut-ānaṭ | parā-ayanam |
ā-vartanam | ni-vartanam | api | gopāḥ | ni | vartatām ||10.019.05||

10.019.06a ā nivarta ni vartaya punar na indra gā dehi |
10.019.06c jīvābhir bhunajāmahai ||

ā | ni-varta | ni | vartaya | punaḥ | naḥ | indra | gāḥ | dehi |
jīvābhiḥ | bhunajāmahai ||10.019.06||

10.019.07a pari vo viśvato dadha ūrjā ghṛtena payasā |
10.019.07c ye devāḥ ke ca yajñiyās te rayyā saṁ sṛjantu naḥ ||

pari | vaḥ | viśvataḥ | dadhe | ūrjā | ghṛtena | payasā |
ye | devāḥ | ke | ca | yajñiyāḥ | te | rayyā | sam | sṛjantu | naḥ ||10.019.07||

10.019.08a ā nivartana vartaya ni nivartana vartaya |
10.019.08c bhūmyāś catasraḥ pradiśas tābhya enā ni vartaya ||

ā | ni-vartana | vartaya | ni | ni-vartana | vartaya |
bhūmyāḥ | catasraḥ | pra-diśaḥ | tābhyaḥ | enāḥ | ni | vartaya ||10.019.08||


10.020.01a bhadraṁ no api vātaya manaḥ ||

bhadram | naḥ | api | vātaya | manaḥ ||10.020.01||

10.020.02a agnim īḻe bhujāṁ yaviṣṭhaṁ śāsā mitraṁ durdharītum |
10.020.02c yasya dharman svar enīḥ saparyanti mātur ūdhaḥ ||

agnim | īḻe | bhujām | yaviṣṭham | śāsā | mitram | duḥ-dharītum |
yasya | dharman | svaḥ | enīḥ | saparyanti | mātuḥ | ūdhaḥ ||10.020.02||

10.020.03a yam āsā kṛpanīḻam bhāsāketuṁ vardhayanti |
10.020.03c bhrājate śreṇidan ||

yam | āsāḥ | kṛpa-nīḻam | bhāsā-ketum | vardhayanti |
bhrājate | śreṇi-dan ||10.020.03||

10.020.04a aryo viśāṁ gātur eti pra yad ānaḍ divo antān |
10.020.04c kavir abhraṁ dīdyānaḥ ||

aryaḥ | viśām | gātuḥ | eti | pra | yat | ānaṭ | divaḥ | antān |
kaviḥ | abhram | dīdyānaḥ ||10.020.04||

10.020.05a juṣad dhavyā mānuṣasyordhvas tasthāv ṛbhvā yajñe |
10.020.05c minvan sadma pura eti ||

juṣat | havyā | mānuṣasya | ūrdhvaḥ | tasthau | ṛbhvā | yajñe |
minvan | sadma | puraḥ | eti ||10.020.05||

10.020.06a sa hi kṣemo havir yajñaḥ śruṣṭīd asya gātur eti |
10.020.06c agniṁ devā vāśīmantam ||

saḥ | hi | kṣemaḥ | haviḥ | yajñaḥ | śruṣṭī | it | asya | gātuḥ | eti |
agnim | devāḥ | vāśī-mantam ||10.020.06||

10.020.07a yajñāsāhaṁ duva iṣe 'gnim pūrvasya śevasya |
10.020.07c adreḥ sūnum āyum āhuḥ ||

yajña-saham | duvaḥ | iṣe | agnim | pūrvasya | śevasya |
adreḥ | sūnum | āyum | āhuḥ ||10.020.07||

10.020.08a naro ye ke cāsmad ā viśvet te vāma ā syuḥ |
10.020.08c agniṁ haviṣā vardhantaḥ ||

naraḥ | ye | ke | ca | asmat | ā | viśvā | it | te | vāme | ā | syuriti syuḥ |
agnim | haviṣā | vardhantaḥ ||10.020.08||

10.020.09a kṛṣṇaḥ śveto 'ruṣo yāmo asya bradhna ṛjra uta śoṇo yaśasvān |
10.020.09c hiraṇyarūpaṁ janitā jajāna ||

kṛṣṇaḥ | śvetaḥ | aruṣaḥ | yāmaḥ | asya | bradhnaḥ | ṛjraḥ | uta | śoṇaḥ | yaśasvān |
hiraṇya-rūpam | janitā | jajāna ||10.020.09||

10.020.10a evā te agne vimado manīṣām ūrjo napād amṛtebhiḥ sajoṣāḥ |
10.020.10c gira ā vakṣat sumatīr iyāna iṣam ūrjaṁ sukṣitiṁ viśvam ābhāḥ ||

eva | te | agne | vi-madaḥ | manīṣām | ūrjaḥ | napāt | amṛtebhiḥ | sa-joṣāḥ |
giraḥ | ā | vakṣat | su-matīḥ | iyānaḥ | iṣam | ūrjam | su-kṣitim | viśvam | ā | abhārityabhāḥ ||10.020.10||


10.021.01a āgniṁ na svavṛktibhir hotāraṁ tvā vṛṇīmahe |
10.021.01c yajñāya stīrṇabarhiṣe vi vo made śīram pāvakaśociṣaṁ vivakṣase ||

ā | agnim | na | svavṛkti-bhiḥ | hotāram | tvā | vṛṇīmahe |
yajñāya | stīrṇa-barhiṣe | vi | vaḥ | made | śīram | pāvaka-śociṣam | vivakṣase ||10.021.01||

10.021.02a tvām u te svābhuvaḥ śumbhanty aśvarādhasaḥ |
10.021.02c veti tvām upasecanī vi vo mada ṛjītir agna āhutir vivakṣase ||

tvām | ūm̐ iti | te | su-ābhuvaḥ | śumbhanti | aśva-rādhasaḥ |
veti | tvām | upa-secanī | vi | vaḥ | made | ṛjītiḥ | agne | ā-hutiḥ | vivakṣase ||10.021.02||

10.021.03a tve dharmāṇa āsate juhūbhiḥ siñcatīr iva |
10.021.03c kṛṣṇā rūpāṇy arjunā vi vo made viśvā adhi śriyo dhiṣe vivakṣase ||

tve iti | dharmāṇaḥ | āsate | juhūbhiḥ | siñcatīḥ-iva |
kṛṣṇā | rūpāṇi | arjunā | vi | vaḥ | made | viśvāḥ | adhi | śriyaḥ | dhiṣe | vivakṣase ||10.021.03||

10.021.04a yam agne manyase rayiṁ sahasāvann amartya |
10.021.04c tam ā no vājasātaye vi vo made yajñeṣu citram ā bharā vivakṣase ||

yam | agne | manyase | rayim | sahasā-van | amartya |
tam | ā | naḥ | vāja-sātaye | vi | vaḥ | made | yajñeṣu | citram | ā | bhara | vivakṣase ||10.021.04||

10.021.05a agnir jāto atharvaṇā vidad viśvāni kāvyā |
10.021.05c bhuvad dūto vivasvato vi vo made priyo yamasya kāmyo vivakṣase ||

agniḥ | jātaḥ | atharvaṇā | vidat | viśvāni | kāvyā |
bhuvat | dūtaḥ | vivasvataḥ | vi | vaḥ | made | priyaḥ | yamasya | kāmyaḥ | vivakṣase ||10.021.05||

10.021.06a tvāṁ yajñeṣv īḻate 'gne prayaty adhvare |
10.021.06c tvaṁ vasūni kāmyā vi vo made viśvā dadhāsi dāśuṣe vivakṣase ||

tvām | yajñeṣu | īḻate | agne | pra-yati | adhvare |
tvam | vasūni | kāmyā | vi | vaḥ | made | viśvā | dadhāsi | dāśuṣe | vivakṣase ||10.021.06||

10.021.07a tvāṁ yajñeṣv ṛtvijaṁ cārum agne ni ṣedire |
10.021.07c ghṛtapratīkam manuṣo vi vo made śukraṁ cetiṣṭham akṣabhir vivakṣase ||

tvām | yajñeṣu | ṛtvijam | cārum | agne | ni | sedire |
ghṛta-pratīkam | manuṣaḥ | vi | vaḥ | made | śukam | cetiṣṭham | akṣa-bhiḥ | vivakṣase ||10.021.07||

10.021.08a agne śukreṇa śociṣoru prathayase bṛhat |
10.021.08c abhikrandan vṛṣāyase vi vo made garbhaṁ dadhāsi jāmiṣu vivakṣase ||

agne | śukreṇa | śociṣā | uru | prathayase | bṛhat |
abhi-krandan | vṛṣa-yase | vi | vaḥ | made | garbham | dadhāsi | jāmiṣu | vivakṣase ||10.021.08||


10.022.01a kuha śruta indraḥ kasminn adya jane mitro na śrūyate |
10.022.01c ṛṣīṇāṁ vā yaḥ kṣaye guhā vā carkṛṣe girā ||

kuha | śrutaḥ | indraḥ | kasmin | adya | jane | mitraḥ | na | śrūyate |
ṛṣīṇām | vā | yaḥ | kṣaye | guhā | vā | carkṛṣe | girā ||10.022.01||

10.022.02a iha śruta indro asme adya stave vajry ṛcīṣamaḥ |
10.022.02c mitro na yo janeṣv ā yaśaś cakre asāmy ā ||

iha | śrutaḥ | indraḥ | asme iti | adya | stave | vajrī | ṛcīṣamaḥ |
mitraḥ | na | yaḥ | janeṣu | ā | yaśaḥ | cakre | asāmi | ā ||10.022.02||

10.022.03a maho yas patiḥ śavaso asāmy ā maho nṛmṇasya tūtujiḥ |
10.022.03c bhartā vajrasya dhṛṣṇoḥ pitā putram iva priyam ||

mahaḥ | yaḥ | patiḥ | śavasaḥ | asāmi | ā | mahaḥ | nṛmṇasya | tūtujiḥ |
bhartā | vajrasya | dhṛṣṇoḥ | pitā | putram-iva | priyam ||10.022.03||

10.022.04a yujāno aśvā vātasya dhunī devo devasya vajrivaḥ |
10.022.04c syantā pathā virukmatā sṛjānaḥ stoṣy adhvanaḥ ||

yujānaḥ | aśvā | vātasya | dhunī iti | devaḥ | devasya | vajri-vaḥ |
syantā | pathā | virukmatā | sṛjānaḥ | stoṣi | adhvanaḥ ||10.022.04||

10.022.05a tvaṁ tyā cid vātasyāśvāgā ṛjrā tmanā vahadhyai |
10.022.05c yayor devo na martyo yantā nakir vidāyyaḥ ||

tvam | tyā | cit | vātasya | aśvā | ā | agāḥ | ṛjrā | tmanā | vahadhyai |
yayoḥ | devaḥ | na | martyaḥ | yantā | nakiḥ | vidāyyaḥ ||10.022.05||

10.022.06a adha gmantośanā pṛcchate vāṁ kadarthā na ā gṛham |
10.022.06c ā jagmathuḥ parākād divaś ca gmaś ca martyam ||

adha | gmantā | uśanā | pṛcchate | vām | kat-arthā | naḥ | ā | gṛham |
ā | jagmathuḥ | parākāt | divaḥ | ca | gmaḥ | ca | martyam ||10.022.06||

10.022.07a ā na indra pṛkṣase 'smākam brahmodyatam |
10.022.07c tat tvā yācāmahe 'vaḥ śuṣṇaṁ yad dhann amānuṣam ||

ā | naḥ | indra | pṛkṣase | asmākam | brahma | ut-yatam |
tat | tvā | yācāmahe | avaḥ | śuṣṇam | yat | han | amānuṣam ||10.022.07||

10.022.08a akarmā dasyur abhi no amantur anyavrato amānuṣaḥ |
10.022.08c tvaṁ tasyāmitrahan vadhar dāsasya dambhaya ||

akarmā | dasuḥ | abhi | naḥ | amantuḥ | anya-vrataḥ | amānuṣaḥ |
tvam | tasya | amitra-han | vadhaḥ | dāsasya | dambhaya ||10.022.08||

10.022.09a tvaṁ na indra śūra śūrair uta tvotāso barhaṇā |
10.022.09c purutrā te vi pūrtayo navanta kṣoṇayo yathā ||

tvam | naḥ | indra | śūra | śūraiḥ | uta | tvā-ūtāsaḥ | barhanā |
puru-trā | te | vi | pūrtayaḥ | navanta | kṣoṇayaḥ | yathā ||10.022.09||

10.022.10a tvaṁ tān vṛtrahatye codayo nṝn kārpāṇe śūra vajrivaḥ |
10.022.10c guhā yadī kavīnāṁ viśāṁ nakṣatraśavasām ||

tvam | tān | vṛtra-hatye | codayaḥ | nṝn | kārpāṇe | śūra | vajri-vaḥ |
guhā | yadi | kavīnām | viśām | nakṣatra-śavasām ||10.022.10||

10.022.11a makṣū tā ta indra dānāpnasa ākṣāṇe śūra vajrivaḥ |
10.022.11c yad dha śuṣṇasya dambhayo jātaṁ viśvaṁ sayāvabhiḥ ||

makṣu | tā | te | indra | dāna-apnasaḥ | ākṣāṇe | śūra | vajri-vaḥ |
yat | ha | śuṣṇasya | dambhayaḥ | jātam | viśvam | sayāva-bhiḥ ||10.022.11||

10.022.12a mākudhryag indra śūra vasvīr asme bhūvann abhiṣṭayaḥ |
10.022.12c vayaṁ-vayaṁ ta āsāṁ sumne syāma vajrivaḥ ||

mā | akudhryak | indra | śūra | vasvīḥ | asme iti | bhūvan | abhiṣṭayaḥ |
vayam-vayam | te | āsām | sumne | syāma | vajri-vaḥ ||10.022.12||

10.022.13a asme tā ta indra santu satyāhiṁsantīr upaspṛśaḥ |
10.022.13c vidyāma yāsām bhujo dhenūnāṁ na vajrivaḥ ||

asme iti | tā | te | indra | santu | satyā | ahiṁsantīḥ | upa-spṛṣaḥ |
vidyāma | yāsām | bhujaḥ | dhenūnām | na | vajri-vaḥ ||10.022.13||

10.022.14a ahastā yad apadī vardhata kṣāḥ śacībhir vedyānām |
10.022.14c śuṣṇam pari pradakṣiṇid viśvāyave ni śiśnathaḥ ||

ahastā | yat | apadī | vardhata | kṣāḥ | śacībhiḥ | vedyānām |
śuṣṇam | pari | pra-dakṣiṇit | viśva-āyave | ni | śiśnathaḥ ||10.022.14||

10.022.15a pibā-pibed indra śūra somam mā riṣaṇyo vasavāna vasuḥ san |
10.022.15c uta trāyasva gṛṇato maghono mahaś ca rāyo revatas kṛdhī naḥ ||

piba-piba | it | indra | śūra | somam | mā | riṣaṇyaḥ | vasavāna | vasuḥ | san |
uta | trāyasva | gṛṇataḥ | maghonaḥ | mahaḥ | ca | rāyaḥ | revataḥ | kṛdhi | naḥ ||10.022.15||


10.023.01a yajāmaha indraṁ vajradakṣiṇaṁ harīṇāṁ rathyaṁ vivratānām |
10.023.01c pra śmaśru dodhuvad ūrdhvathā bhūd vi senābhir dayamāno vi rādhasā ||

yajāmahe | indram | vajra-dakṣiṇam | harīnām | rathyam | vi-vratānām |
pra | śmaśru | dodhuvat | ūrdhva-thā | bhūt | vi | senābhiḥ | dayamānaḥ | vi | rādhasā ||10.023.01||

10.023.02a harī nv asya yā vane vide vasv indro maghair maghavā vṛtrahā bhuvat |
10.023.02c ṛbhur vāja ṛbhukṣāḥ patyate śavo 'va kṣṇaumi dāsasya nāma cit ||

harī iti | nu | asya | yā | vane | vide | vasu | indraḥ | maghaiḥ | magha-vā | vṛtra-hā | bhuvat |
ṛbhuḥ | vājaḥ | ṛbhukṣāḥ | patyate | śavaḥ | ava | kṣṇaumi | dāsasya | nāma | cit ||10.023.02||

10.023.03a yadā vajraṁ hiraṇyam id athā rathaṁ harī yam asya vahato vi sūribhiḥ |
10.023.03c ā tiṣṭhati maghavā sanaśruta indro vājasya dīrghaśravasas patiḥ ||

yadā | vajram | hiraṇyam | it | atha | ratham | harī iti | yam | asya | vahataḥ | vi | sūri-bhiḥ |
ā | tiṣṭhati | magha-vā | sana-śrutaḥ | indraḥ | vājasya | dīrgha-śravasaḥ | patiḥ ||10.023.03||

10.023.04a so cin nu vṛṣṭir yūthyā svā sacām̐ indraḥ śmaśrūṇi haritābhi pruṣṇute |
10.023.04c ava veti sukṣayaṁ sute madhūd id dhūnoti vāto yathā vanam ||

so iti | cit | nu | vṛṣṭiḥ | yūthyā | svā | sacā | indraḥ | śmaśrūṇi | haritā | abhi | pruṣṇute |
ava | veti | su-kṣayam | sute | madhu | ut | it | dhūnoti | vātaḥ | yathā | vanam ||10.023.04||

10.023.05a yo vācā vivāco mṛdhravācaḥ purū sahasrāśivā jaghāna |
10.023.05c tat-tad id asya pauṁsyaṁ gṛṇīmasi piteva yas taviṣīṁ vāvṛdhe śavaḥ ||

yaḥ | vācā | vi-vācaḥ | mṛdhra-vācaḥ | puru | sahasrā | asivā | jaghāna |
tat-tat | it | asya | pauṁsyam | gṛṇīmasi | pitā-iva | yaḥ | taviṣīm | vavṛdhe | śavaḥ ||10.023.05||

10.023.06a stomaṁ ta indra vimadā ajījanann apūrvyam purutamaṁ sudānave |
10.023.06c vidmā hy asya bhojanam inasya yad ā paśuṁ na gopāḥ karāmahe ||

stomam | te | indra | vi-madāḥ | ajījanan | apūrvyam | puru-tamam | su-dānave |
vidma | hi | asya | bhojanam | inasya | yat | ā | paśum | na | gopāḥ | karāmahe ||10.023.06||

10.023.07a mākir na enā sakhyā vi yauṣus tava cendra vimadasya ca ṛṣeḥ |
10.023.07c vidmā hi te pramatiṁ deva jāmivad asme te santu sakhyā śivāni ||

mākiḥ | naḥ | enā | sakhyā | vi | yauṣuḥ | tava | ca | indra | vi-madasya | ca | ṛṣeḥ |
vidma | hi | te | pra-matim | deva | jāmi-vat | asme iti | te | santu | sakhyā | śivāni ||10.023.07||


10.024.01a indra somam imam piba madhumantaṁ camū sutam |
10.024.01c asme rayiṁ ni dhāraya vi vo made sahasriṇam purūvaso vivakṣase ||

indra | somam | imam | piba | madhu-mantam | camū iti | sutam |
asme iti | rayim | ni | dhāraya | vi | vaḥ | made | sahasriṇam | puruvaso iti puru-vaso | vivakṣase ||10.024.01||

10.024.02a tvāṁ yajñebhir ukthair upa havyebhir īmahe |
10.024.02c śacīpate śacīnāṁ vi vo made śreṣṭhaṁ no dhehi vāryaṁ vivakṣase ||

tvām | yajñebhiḥ | ukthaiḥ | upa | havyebhiḥ | īmahe |
śacī-pate | śacīnam | vi | vaḥ | made | śreṣṭham | naḥ | dhehi | vāryam | vivakṣase ||10.024.02||

10.024.03a yas patir vāryāṇām asi radhrasya coditā |
10.024.03c indra stotṝṇām avitā vi vo made dviṣo naḥ pāhy aṁhaso vivakṣase ||

yaḥ | patim | vāryāṇām | asi | radhrasya | coditā |
indra | stotṝṇām | avitā | vi | vaḥ | made | dviṣaḥ | naḥ | pāhi | aṁhasaḥ | vivakṣase ||10.024.03||

10.024.04a yuvaṁ śakrā māyāvinā samīcī nir amanthatam |
10.024.04c vimadena yad īḻitā nāsatyā niramanthatam ||

yuvam | śakrā | māyā-vinā | samīcī iti sam-īcī | niḥ | amanthatam |
vi-madena | yat | īḻitā | nāsatyā | niḥ-amanthatam ||10.024.04||

10.024.05a viśve devā akṛpanta samīcyor niṣpatantyoḥ |
10.024.05c nāsatyāv abruvan devāḥ punar ā vahatād iti ||

viśve | devāḥ | akṛpanta | sam-īcyoḥ | niḥ-patantyoḥ |
nāsatyau | abruvan | devāḥ | punaḥ | ā | vahatāt | iti ||10.024.05||

10.024.06a madhuman me parāyaṇam madhumat punar āyanam |
10.024.06c tā no devā devatayā yuvam madhumatas kṛtam ||

madhu-mat | me | parā-ayaṇam | madhu-mat | punaḥ | ā-ayanam |
tā | naḥ | devā | devatayā | yuvam | madhu-mataḥ | kṛtam ||10.024.06||


10.025.01a bhadraṁ no api vātaya mano dakṣam uta kratum |
10.025.01c adhā te sakhye andhaso vi vo made raṇan gāvo na yavase vivakṣase ||

bhadram | naḥ | api | vātaya | manaḥ | dakṣam | uta | kratum |
adha | te | sakhye | andhasaḥ | vi | vaḥ | made | raṇan | gāvaḥ | na | yavase | vivakṣase ||10.025.01||

10.025.02a hṛdispṛśas ta āsate viśveṣu soma dhāmasu |
10.025.02c adhā kāmā ime mama vi vo made vi tiṣṭhante vasūyavo vivakṣase ||

hṛdi-spṛśaḥ | te | āsate | viśveṣu | soma | dhāma-su |
adha | kāmāḥ | ime | mama | vi | vaḥ | made | vi | tiṣṭhante | vasu-yavaḥ | vivakṣase ||10.025.02||

10.025.03a uta vratāni soma te prāham mināmi pākyā |
10.025.03c adhā piteva sūnave vi vo made mṛḻā no abhi cid vadhād vivakṣase ||

uta | vratāni | soma | te | pra | aham | mināmi | pākyā |
adha | pitā-iva | sūnave | vi | vaḥ | made | mṛḻa | naḥ | abhi | cit | vadhāt | vivakṣase ||10.025.03||

10.025.04a sam u pra yanti dhītayaḥ sargāso 'vatām̐ iva |
10.025.04c kratuṁ naḥ soma jīvase vi vo made dhārayā camasām̐ iva vivakṣase ||

sam | ūm̐ iti | pra | yanti | dhītayaḥ | sargāsaḥ | avatān-iva |
kratum | naḥ | soma | jīvase | vi | vaḥ | made | dhāraya | camasān-iva | vivakṣase ||10.025.04||

10.025.05a tava tye soma śaktibhir nikāmāso vy ṛṇvire |
10.025.05c gṛtsasya dhīrās tavaso vi vo made vrajaṁ gomantam aśvinaṁ vivakṣase ||

tava | tye | soma | śakti-bhiḥ | ni-kāmāsaḥ | vi | ṛṇvire |
gṛtsasya | dhīrāḥ | tavasaḥ | vi | vaḥ | made | vrajam | go-mantam | aśvinam | vivakṣase ||10.025.05||

10.025.06a paśuṁ naḥ soma rakṣasi purutrā viṣṭhitaṁ jagat |
10.025.06c samākṛṇoṣi jīvase vi vo made viśvā sampaśyan bhuvanā vivakṣase ||

paśum | naḥ | soma | rakṣasi | puru-trā | vi-sthitam | jagat |
sam-ākṛṇoṣi | jīvase | vi | vaḥ | made | viśvā | sam-paśyan | bhuvanā | vivakṣase ||10.025.06||

10.025.07a tvaṁ naḥ soma viśvato gopā adābhyo bhava |
10.025.07c sedha rājann apa sridho vi vo made mā no duḥśaṁsa īśatā vivakṣase ||

tvam | naḥ | soma | viśvataḥ | gopāḥ | adābhyaḥ | bhava |
sedha | rājan | apa | sridhaḥ | vi | vaḥ | made | mā | naḥ | duḥ-śaṁsaḥ | īśata | vivakṣase ||10.025.07||

10.025.08a tvaṁ naḥ soma sukratur vayodheyāya jāgṛhi |
10.025.08c kṣetravittaro manuṣo vi vo made druho naḥ pāhy aṁhaso vivakṣase ||

tvam | naḥ | soma | su-kratuḥ | vayaḥ-dheyāya | jāgṛhi |
kṣetravit-taraḥ | manuṣaḥ | vi | vaḥ | made | druhaḥ | naḥ | pāhi | aṁhasaḥ | vivakṣase ||10.025.08||

10.025.09a tvaṁ no vṛtrahantamendrasyendo śivaḥ sakhā |
10.025.09c yat sīṁ havante samithe vi vo made yudhyamānās tokasātau vivakṣase ||

tvam | naḥ | vṛtrahan-tama | indrasya | indo iti | śivaḥ | sakhā |
yat | sīm | havante | sam-ithe | vi | vaḥ | made | yudhyamānāḥ | toka-sātau | vivakṣase ||10.025.09||

10.025.10a ayaṁ gha sa turo mada indrasya vardhata priyaḥ |
10.025.10c ayaṁ kakṣīvato maho vi vo made matiṁ viprasya vardhayad vivakṣase ||

ayam | gha | saḥ | turaḥ | madaḥ | indrasya | vardhata | priyaḥ |
ayam | kakṣīvataḥ | mahaḥ | vi | vaḥ | made | matim | viprasya | vardhayat | vivakṣase ||10.025.10||

10.025.11a ayaṁ viprāya dāśuṣe vājām̐ iyarti gomataḥ |
10.025.11c ayaṁ saptabhya ā varaṁ vi vo made prāndhaṁ śroṇaṁ ca tāriṣad vivakṣase ||

ayam | viprāya | dāśuṣe | vājān | iyarti | go-mataḥ |
ayam | sapta-bhyaḥ | ā | varam | vi | vaḥ | made | pra | andham | śroṇam | ca | tāriṣat | vivakṣase ||10.025.11||


10.026.01a pra hy acchā manīṣā spārhā yanti niyutaḥ |
10.026.01c pra dasrā niyudrathaḥ pūṣā aviṣṭu māhinaḥ ||

pra | hi | accha | manīṣāḥ | spārhāḥ | yanti | ni-yutaḥ |
pra | dasrā | niyut-rathaḥ | pūṣā | aviṣṭu | māhinaḥ ||10.026.01||

10.026.02a yasya tyan mahitvaṁ vātāpyam ayaṁ janaḥ |
10.026.02c vipra ā vaṁsad dhītibhiś ciketa suṣṭutīnām ||

yasya | tyat | mahi-tvam | vātāpyam | ayam | janaḥ |
vipraḥ | ā | vaṁsat | dhīti-bhiḥ | ciketa | su-stutīnām ||10.026.02||

10.026.03a sa veda suṣṭutīnām indur na pūṣā vṛṣā |
10.026.03c abhi psuraḥ pruṣāyati vrajaṁ na ā pruṣāyati ||

saḥ | veda | su-stutīnām | induḥ | na | pūṣā | vṛṣā |
abhi | psuraḥ | pruṣāyati | vrajam | naḥ | ā | pruṣāyati ||10.026.03||

10.026.04a maṁsīmahi tvā vayam asmākaṁ deva pūṣan |
10.026.04c matīnāṁ ca sādhanaṁ viprāṇāṁ cādhavam ||

maṁsīmahi | tvā | vayam | asmākam | deva | pūṣan |
matīnām | ca | sādhanam | viprāṇām | ca | ā-dhavam ||10.026.04||

10.026.05a pratyardhir yajñānām aśvahayo rathānām |
10.026.05c ṛṣiḥ sa yo manurhito viprasya yāvayatsakhaḥ ||

prati-ardhiḥ | yajñānām | aśva-hayaḥ | rathānām |
ṛṣiḥ | saḥ | yaḥ | manuḥ-hitaḥ | viprasya | yavayat-sakhaḥ ||10.026.05||

10.026.06a ādhīṣamāṇāyāḥ patiḥ śucāyāś ca śucasya ca |
10.026.06c vāsovāyo 'vīnām ā vāsāṁsi marmṛjat ||

ā-dhīṣamāṇāyāḥ | patiḥ | śucāyāḥ | ca | śucasya | ca |
vāsaḥ-vāyaḥ | avīnām | ā | vāsāṁsi | marmṛjat ||10.026.06||

10.026.07a ino vājānām patir inaḥ puṣṭīnāṁ sakhā |
10.026.07c pra śmaśru haryato dūdhod vi vṛthā yo adābhyaḥ ||

inaḥ | vājānām | patiḥ | inaḥ | puṣṭīnām | sakhā |
pra | śmaśru | haryataḥ | dūdhot | vi | vṛthā | yaḥ | adābhyaḥ ||10.026.07||

10.026.08a ā te rathasya pūṣann ajā dhuraṁ vavṛtyuḥ |
10.026.08c viśvasyārthinaḥ sakhā sanojā anapacyutaḥ ||

ā | te | rathasya | pūṣan | ajāḥ | dhuram | vavṛtyuḥ |
viśvasya | arthinaḥ | sakhā | sanaḥ-jāḥ | anapa-cyutaḥ ||10.026.08||

10.026.09a asmākam ūrjā ratham pūṣā aviṣṭu māhinaḥ |
10.026.09c bhuvad vājānāṁ vṛdha imaṁ naḥ śṛṇavad dhavam ||

asmākam | ūrjā | ratham | pūṣā | aviṣṭu | māhinaḥ |
bhuvat | vājānām | vṛdhaḥ | imam | naḥ | śṛṇavat | havam ||10.026.09||


10.027.01a asat su me jaritaḥ sābhivego yat sunvate yajamānāya śikṣam |
10.027.01c anāśīrdām aham asmi prahantā satyadhvṛtaṁ vṛjināyantam ābhum ||

asat | su | me | jaritariti | saḥ | abhi-vegaḥ | yat | sunvate | yajamānāya | śikṣam |
anāśīḥ-dām | aham | asmi | pra-hantā | satya-dhvṛtam | vṛjina-yantam | ābhum ||10.027.01||

10.027.02a yadīd ahaṁ yudhaye saṁnayāny adevayūn tanvā śūśujānān |
10.027.02c amā te tumraṁ vṛṣabham pacāni tīvraṁ sutam pañcadaśaṁ ni ṣiñcam ||

yadi | it | aham | yudhaye | sam-nayāni | adeva-yūn | tanvā | śūśujānān |
amā | te | tumram | vṛṣabham | pacāni | tīvram | sutam | pañca-daśam | ni | siñcam ||10.027.02||

10.027.03a nāhaṁ taṁ veda ya iti bravīty adevayūn samaraṇe jaghanvān |
10.027.03c yadāvākhyat samaraṇam ṛghāvad ād id dha me vṛṣabhā pra bruvanti ||

na | aham | tam | veda | yaḥ | iti | bravīti | adeva-yūn | sam-araṇe | jaghanvān |
yadā | ava-akhyat | sam-araṇam | ṛghāvat | āt | it | ha | me | vṛṣabhā | pra | bruvanti ||10.027.03||

10.027.04a yad ajñāteṣu vṛjaneṣv āsaṁ viśve sato maghavāno ma āsan |
10.027.04c jināmi vet kṣema ā santam ābhum pra taṁ kṣiṇām parvate pādagṛhya ||

yat | ajñāteṣu | vṛjaneṣu | āsam | viśve | sataḥ | magha-vānaḥ | me | āsan |
jināmi | vā | it | kṣeme | ā | santam | ābhum | pra | tam | kṣiṇām | parvate | pāda-gṛhya ||10.027.04||

10.027.05a na vā u māṁ vṛjane vārayante na parvatāso yad aham manasye |
10.027.05c mama svanāt kṛdhukarṇo bhayāta eved anu dyūn kiraṇaḥ sam ejāt ||

na | vai | ūm̐ iti | mām | vṛjane | vārayante | na | parvatāsaḥ | yat | aham | manasye |
mama | svanāt | kṛdhu-karṇaḥ | bhayāte | eva | it | anu | dyūn | kiraṇaḥ | sam | ejāt ||10.027.05||

10.027.06a darśan nv atra śṛtapām̐ anindrān bāhukṣadaḥ śarave patyamānān |
10.027.06c ghṛṣuṁ vā ye niniduḥ sakhāyam adhy ū nv eṣu pavayo vavṛtyuḥ ||

darśan | nu | atra | śṛta-pān | anindrān | bāhu-kṣadaḥ | śarave | patyamānān |
ghṛṣum | vā | ye | niniduḥ | sakhāyam | adhi | ūm̐ iti | nu | eṣu | pavayaḥ | vavṛtyuḥ ||10.027.06||

10.027.07a abhūr v aukṣīr vy u āyur ānaḍ darṣan nu pūrvo aparo nu darṣat |
10.027.07c dve pavaste pari taṁ na bhūto yo asya pāre rajaso viveṣa ||

abhūḥ | ūm̐ iti | aukṣīḥ | vi | ūm̐ iti | āyuḥ | ānaṭ | darṣat | nu | pūrvaḥ | aparaḥ | nu | darṣat |
dve iti | pavaste iti | pari | tam | na | bhūtaḥ | yaḥ | asya | pāre | rajasaḥ | viveṣa ||10.027.07||

10.027.08a gāvo yavam prayutā aryo akṣan tā apaśyaṁ sahagopāś carantīḥ |
10.027.08c havā id aryo abhitaḥ sam āyan kiyad āsu svapatiś chandayāte ||

gāva | yavam | pra-yutāḥ | aryaḥ | akṣan | tāḥ | apaśyam | saha-gopāḥ | carantīḥ |
havāḥ | it | aryaḥ | abhitaḥ | sam | āyan | kiyat | āsu | sva-patiḥ | chandayāte ||10.027.08||

10.027.09a saṁ yad vayaṁ yavasādo janānām ahaṁ yavāda urvajre antaḥ |
10.027.09c atrā yukto 'vasātāram icchād atho ayuktaṁ yunajad vavanvān ||

sam | yat | vayam | yavasa-adaḥ | janānām | aham | yava-adaḥ | uru-ajre | antariti |
atra | yuktaḥ | ava-sātāram | icchāt | atho iti | ayuktam | yunajat | vavanvān ||10.027.09||

10.027.10a atred u me maṁsase satyam uktaṁ dvipāc ca yac catuṣpāt saṁsṛjāni |
10.027.10c strībhir yo atra vṛṣaṇam pṛtanyād ayuddho asya vi bhajāni vedaḥ ||

atra | it | ūm̐ iti | me | maṁsase | satyam | uktam | dvi-pāt | ca | yat | catuḥ-pāt | sam-sṛjāni |
strī-bhiḥ | yaḥ | atra | vṛṣaṇam | pṛtanyāt | ayuddhaḥ | asya | vi | bhajāni | vedaḥ ||10.027.10||

10.027.11a yasyānakṣā duhitā jātv āsa kas tāṁ vidvām̐ abhi manyāte andhām |
10.027.11c kataro menim prati tam mucāte ya īṁ vahāte ya īṁ vā vareyāt ||

yasya | anakṣā | duhitā | jātu | āsa | kaḥ | tām | vidvān | abhi | manyāte | andhām |
kataraḥ | menim | prati | tam | mucāte | yaḥ | īm | vahāte | yaḥ | īm | vā | vare-yāt ||10.027.11||

10.027.12a kiyatī yoṣā maryato vadhūyoḥ pariprītā panyasā vāryeṇa |
10.027.12c bhadrā vadhūr bhavati yat supeśāḥ svayaṁ sā mitraṁ vanute jane cit ||

kiyatī | yoṣā | maryataḥ | vadhū-yoḥ | pari-prītā | panyasā | vāryeṇa |
bhadrā | vadhūḥ | bhavati | yat | su-peśāḥ | svayam | sā | mitram | vanute | jane | cit ||10.027.12||

10.027.13a patto jagāra pratyañcam atti śīrṣṇā śiraḥ prati dadhau varūtham |
10.027.13c āsīna ūrdhvām upasi kṣiṇāti nyaṅṅ uttānām anv eti bhūmim ||

pattaḥ | jagāra | pratyañcam | atti | śīrṣṇā | śiraḥ | prati | dadhau | varūtham |
āsīnaḥ | ūrdhvām | upasi | kṣiṇāti | nyaṅ | uttānām | anu | eti | bhūmim ||10.027.13||

10.027.14a bṛhann acchāyo apalāśo arvā tasthau mātā viṣito atti garbhaḥ |
10.027.14c anyasyā vatsaṁ rihatī mimāya kayā bhuvā ni dadhe dhenur ūdhaḥ ||

bṛhan | acchāyaḥ | apalāśaḥ | arvā | tasthau | mātā | vi-sitaḥ | atti | garbhaḥ |
anyasyāḥ | vatsam | rihatī | mimāya | kayā | bhuvā | ni | dadhe | dhenuḥ | ūdhaḥ ||10.027.14||

10.027.15a sapta vīrāso adharād ud āyann aṣṭottarāttāt sam ajagmiran te |
10.027.15c nava paścātāt sthivimanta āyan daśa prāk sānu vi tiranty aśnaḥ ||

sapta | vīrāsaḥ | adharāt | ut | āyan | aṣṭa | uttarāttāt | sam | ajagmiran | te |
nava | paścātāt | sthivi-mantaḥ | āyan | daśa | prāk | sānu | vi | tiranti | aśnaḥ ||10.027.15||

10.027.16a daśānām ekaṁ kapilaṁ samānaṁ taṁ hinvanti kratave pāryāya |
10.027.16c garbham mātā sudhitaṁ vakṣaṇāsv avenantaṁ tuṣayantī bibharti ||

daśānām | ekam | kapilam | samānam | tam | hinvanti | kratave | pāryāya |
garbham | mātā | su-dhitam | vakṣaṇāsu | avenantam | tuṣayantī | bibharti ||10.027.16||

10.027.17a pīvānam meṣam apacanta vīrā nyuptā akṣā anu dīva āsan |
10.027.17c dvā dhanum bṛhatīm apsv antaḥ pavitravantā carataḥ punantā ||

pīvānam | meṣam | apacanta | vīrāḥ | ni-uptāḥ | akṣāḥ | anu | dīve | āsan |
dvā | dhanum | bṛhatīm | ap-su | antariti | pavitra-vantā | carataḥ | punantā ||10.027.17||

10.027.18a vi krośanāso viṣvañca āyan pacāti nemo nahi pakṣad ardhaḥ |
10.027.18c ayam me devaḥ savitā tad āha drvanna id vanavat sarpirannaḥ ||

vi | krośanāsaḥ | viṣvañcaḥ | āyan | pacāti | nemaḥ | nahi | pakṣat | ardhaḥ |
ayam | me | devaḥ | savitā | tat | āha | dru-annaḥ | it | vanavat | sarpiḥ-annaḥ ||10.027.18||

10.027.19a apaśyaṁ grāmaṁ vahamānam ārād acakrayā svadhayā vartamānam |
10.027.19c siṣakty aryaḥ pra yugā janānāṁ sadyaḥ śiśnā pramināno navīyān ||

apaśyam | grāmam | vahamānam | ārāt | acakrayā | svadhayā | vartamānam |
sisakti | aryaḥ | pra | yugā | janānām | sadyaḥ | śiśnā | pra-minānaḥ | navīyān ||10.027.19||

10.027.20a etau me gāvau pramarasya yuktau mo ṣu pra sedhīr muhur in mamandhi |
10.027.20c āpaś cid asya vi naśanty arthaṁ sūraś ca marka uparo babhūvān ||

etau | me | gāvau | pra-marasya | yuktau | mo iti | su | pra | sedhīḥ | muhuḥ | it | mamandhi |
āpaḥ | cit | asya | vi | naśanti | artham | sūraḥ | ca | markaḥ | uparaḥ | babhūvān ||10.027.20||

10.027.21a ayaṁ yo vajraḥ purudhā vivṛtto 'vaḥ sūryasya bṛhataḥ purīṣāt |
10.027.21c śrava id enā paro anyad asti tad avyathī jarimāṇas taranti ||

ayam | yaḥ | vajraḥ | purudhā | vi-vṛttaḥ | avaḥ | sūryasya | bṛhataḥ | purīṣāt |
śravaḥ | it | enā | paraḥ | anyat | asti | tat | avyathī | jarimāṇaḥ | taranti ||10.027.21||

10.027.22a vṛkṣe-vṛkṣe niyatā mīmayad gaus tato vayaḥ pra patān pūruṣādaḥ |
10.027.22c athedaṁ viśvam bhuvanam bhayāta indrāya sunvad ṛṣaye ca śikṣat ||

vṛkṣe-vṛkṣe | ni-yatā | mīmayat | gauḥ | tataḥ | vayaḥ | pra | patān | puruṣa-adaḥ |
atha | idam | viśvam | bhuvanam | bhayāte | indrāya | sunvat | ṛṣaye | ca | śikṣat ||10.027.22||

10.027.23a devānām māne prathamā atiṣṭhan kṛntatrād eṣām uparā ud āyan |
10.027.23c trayas tapanti pṛthivīm anūpā dvā bṛbūkaṁ vahataḥ purīṣam ||

devānām | māne | prathamāḥ | atiṣṭhan | kṛntatrāt | eṣām | uparāḥ | ut | āyan |
trayaḥ | tapanti | pṛthivīm | anūpāḥ | dvā | bṛbūkam | vahataḥ | purīṣam ||10.027.23||

10.027.24a sā te jīvātur uta tasya viddhi mā smaitādṛg apa gūhaḥ samarye |
10.027.24c āviḥ svaḥ kṛṇute gūhate busaṁ sa pādur asya nirṇijo na mucyate ||

sā | te | jīvātuḥ | uta | tasya | viddhi | mā | sma | etādṛk | apa | gūhaḥ | samarye |
āviḥ | svariti svaḥ | kṛṇute | gūhate | busam | saḥ | pāduḥ | asya | niḥ-nijaḥ | na | mucyate ||10.027.24||


10.028.01a viśvo hy anyo arir ājagāma mamed aha śvaśuro nā jagāma |
10.028.01c jakṣīyād dhānā uta somam papīyāt svāśitaḥ punar astaṁ jagāyāt ||

viśvaḥ | hi | anyaḥ | ariḥ | ājagāma | mama | it | aha | śvaśuraḥ | na | ā | jagāma |
jakṣīyāt | dhānāḥ | uta | somam | papīyāt | su-āśitaḥ | punaḥ | astam | jagāyāt ||10.028.01||

10.028.02a sa roruvad vṛṣabhas tigmaśṛṅgo varṣman tasthau varimann ā pṛthivyāḥ |
10.028.02c viśveṣv enaṁ vṛjaneṣu pāmi yo me kukṣī sutasomaḥ pṛṇāti ||

saḥ | roruvat | vṛṣabhaḥ | tigma-śṛṅgaḥ | varṣman | tasthau | variman | ā | pṛthivyāḥ |
viśveṣu | enam | vṛjaneṣu | pāmi | yaḥ | me | kukṣī iti | suta-somaḥ | pṛṇāti ||10.028.02||

10.028.03a adriṇā te mandina indra tūyān sunvanti somān pibasi tvam eṣām |
10.028.03c pacanti te vṛṣabhām̐ atsi teṣām pṛkṣeṇa yan maghavan hūyamānaḥ ||

adriṇā | te | mandinaḥ | indra | tūyān | sunvanti | somān | pibasi | tvam | eṣām |
pacanti | te | vṛṣabhān | atsi | teṣām | pṛkṣeṇa | yat | magha-van | hūyamānaḥ ||10.028.03||

10.028.04a idaṁ su me jaritar ā cikiddhi pratīpaṁ śāpaṁ nadyo vahanti |
10.028.04c lopāśaḥ siṁham pratyañcam atsāḥ kroṣṭā varāhaṁ nir atakta kakṣāt ||

idam | su | me | jaritaḥ | ā | cikiddhi | prati-īpam | śāpam | nadyaḥ | vahanti |
lopāśaḥ | siṁham | pratyañcam | atsāriti | kroṣṭā | varāham | niḥ | atakta | kakṣāt ||10.028.04||

10.028.05a kathā ta etad aham ā ciketaṁ gṛtsasya pākas tavaso manīṣām |
10.028.05c tvaṁ no vidvām̐ ṛtuthā vi voco yam ardhaṁ te maghavan kṣemyā dhūḥ ||

kathā | te | etat | aham | ā | ciketam | gṛtsasya | pākaḥ | tavasaḥ | manīṣām |
tvam | naḥ | vidvān | ṛtu-thā | vi | vocaḥ | yam | ardham | te | magha-van | kṣemyā | dhūḥ ||10.028.05||

10.028.06a evā hi māṁ tavasaṁ vardhayanti divaś cin me bṛhata uttarā dhūḥ |
10.028.06c purū sahasrā ni śiśāmi sākam aśatruṁ hi mā janitā jajāna ||

eva | hi | mām | tavasam | vardhayanti | divaḥ | cit | me | bṛhataḥ | ut-tarā | dhūḥ |
puru | sahasrā | ni | śiśāmi | sākam | aśatrum | hi | mā | janitā | jajāna ||10.028.06||

10.028.07a evā hi māṁ tavasaṁ jajñur ugraṁ karman-karman vṛṣaṇam indra devāḥ |
10.028.07c vadhīṁ vṛtraṁ vajreṇa mandasāno 'pa vrajam mahinā dāśuṣe vam ||

eva | hi | mām | tavasam | jajñuḥ | ugram | karman-karman | vṛṣaṇam | indra | devāḥ |
vadhīm | vṛtram | vajreṇa | mandasānaḥ | apa | vrajam | mahinā | dāśuṣe | vam ||10.028.07||

10.028.08a devāsa āyan paraśūm̐r abibhran vanā vṛścanto abhi viḍbhir āyan |
10.028.08c ni sudrvaṁ dadhato vakṣaṇāsu yatrā kṛpīṭam anu tad dahanti ||

devāsaḥ | āyan | paraśūn | abibhran | vanā | vṛścantaḥ | abhi | viṭ-bhiḥ | āyan |
ni | su-drvam | dadhataḥ | vakṣaṇāsu | yatra | kṛpīṭam | anu | tat | dahanti ||10.028.08||

10.028.09a śaśaḥ kṣuram pratyañcaṁ jagārādriṁ logena vy abhedam ārāt |
10.028.09c bṛhantaṁ cid ṛhate randhayāni vayad vatso vṛṣabhaṁ śūśuvānaḥ ||

śaśaḥ | kṣuram | pratyañcam | jagāra | adrim | logena | vi | abhedam | ārāt |
bṛhantam | cit | ṛhate | randhayāni | vayat | vatsaḥ | vṛṣabham | śūśuvānaḥ ||10.028.09||

10.028.10a suparṇa itthā nakham ā siṣāyāvaruddhaḥ paripadaṁ na siṁhaḥ |
10.028.10c niruddhaś cin mahiṣas tarṣyāvān godhā tasmā ayathaṁ karṣad etat ||

su-parṇaḥ | itthā | nakham | ā | sisāya | ava-ruddhaḥ | pari-padam | na | siṁhaḥ |
ni-ruddhaḥ | cit | mahiṣaḥ | tarṣyā-vān | godhā | tasmai | ayatham | karṣat | etat ||10.028.10||

10.028.11a tebhyo godhā ayathaṁ karṣad etad ye brahmaṇaḥ pratipīyanty annaiḥ |
10.028.11c sima ukṣṇo 'vasṛṣṭām̐ adanti svayam balāni tanvaḥ śṛṇānāḥ ||

tebhyaḥ | godhāḥ | ayatham | karṣat | etat | ye | brahmaṇaḥ | prati-pīyanti | annaiḥ |
simaḥ | ukṣṇaḥ | ava-sṛṣṭān | adanti | svayam | balāni | tanvaḥ | śṛṇānāḥ ||10.028.11||

10.028.12a ete śamībhiḥ suśamī abhūvan ye hinvire tanvaḥ soma ukthaiḥ |
10.028.12c nṛvad vadann upa no māhi vājān divi śravo dadhiṣe nāma vīraḥ ||

ete | śamībhiḥ | su-śamī | abhūvan | ye | hinvire | tanvaḥ | some | ukthaiḥ |
nṛ-vat | vadan | upa | naḥ | māhi | vājān | divi | śravaḥ | dadhiṣe | nāma | vīraḥ ||10.028.12||


10.029.01a vane na vā yo ny adhāyi cākañ chucir vāṁ stomo bhuraṇāv ajīgaḥ |
10.029.01c yasyed indraḥ purudineṣu hotā nṛṇāṁ naryo nṛtamaḥ kṣapāvān ||

vane | na | vā | yaḥ | ni | adhāyi | cākan | śuciḥ | vām | stomaḥ | bhuraṇau | ajīgariti |
yasya | it | indraḥ | puru-dineṣu | hotā | nṛṇām | naryaḥ | nṛ-tamaḥ | kṣapā-vān ||10.029.01||

10.029.02a pra te asyā uṣasaḥ prāparasyā nṛtau syāma nṛtamasya nṛṇām |
10.029.02c anu triśokaḥ śatam āvahan nṝn kutsena ratho yo asat sasavān ||

pra | te | asyāḥ | uṣasaḥ | pra | aparasyāḥ | nṛtau | syāma | nṛ-tamasya | nṛṇām |
anu | tri-śokaḥ | śatam | ā | avahan | nṝn | kutsena | rathaḥ | yaḥ | asat | sasa-vān ||10.029.02||

10.029.03a kas te mada indra rantyo bhūd duro giro abhy ugro vi dhāva |
10.029.03c kad vāho arvāg upa mā manīṣā ā tvā śakyām upamaṁ rādho annaiḥ ||

kaḥ | te | madaḥ | indra | rantyaḥ | bhūt | duraḥ | giraḥ | abhi | ugraḥ | vi | dhāva |
kat | vāhaḥ | arvāk | upa | mā | manīṣā | ā | tvā | śakyām | upa-mam | rādhaḥ | annaiḥ ||10.029.03||

10.029.04a kad u dyumnam indra tvāvato nṝn kayā dhiyā karase kan na āgan |
10.029.04c mitro na satya urugāya bhṛtyā anne samasya yad asan manīṣāḥ ||

kat | ūm̐ iti | dyumnam | indra | tvā-vataḥ | nṝn | kayā | dhiyā | karase | kat | naḥ | ā | agan |
mitraḥ | na | satyaḥ | uru-gāya | bhṛtyai | anne | samasya | yat | asan | manīṣāḥ ||10.029.04||

10.029.05a preraya sūro arthaṁ na pāraṁ ye asya kāmaṁ janidhā iva gman |
10.029.05c giraś ca ye te tuvijāta pūrvīr nara indra pratiśikṣanty annaiḥ ||

pra | īraya | sūraḥ | artham | na | pāram | ye | asya | kāmam | janidhāḥ-iva | gman |
giraḥ | ca | ye | te | tuvi-jāta | pūrvīḥ | naraḥ | indra | prati-śikṣanti | annaiḥ ||10.029.05||

10.029.06a mātre nu te sumite indra pūrvī dyaur majmanā pṛthivī kāvyena |
10.029.06c varāya te ghṛtavantaḥ sutāsaḥ svādman bhavantu pītaye madhūni ||

mātre iti | nu | te | sumite iti su-mite | indra | pūrvī iti | dyauḥ | majmanā | pṛthivī | kāvyena |
varāya | te | ghṛta-vantaḥ | sutāsaḥ | svādman | bhavantu | pītaye | madhūni ||10.029.06||

10.029.07a ā madhvo asmā asicann amatram indrāya pūrṇaṁ sa hi satyarādhāḥ |
10.029.07c sa vāvṛdhe varimann ā pṛthivyā abhi kratvā naryaḥ pauṁsyaiś ca ||

ā | madhvaḥ | asmai | asican | amatram | indrāya | pūrṇam | saḥ | hi | satya-rādhāḥ |
saḥ | vavṛdhe | variman | ā | pṛthivyāḥ | abhi | kratvā | naryaḥ | pauṁsyaiḥ | ca ||10.029.07||

10.029.08a vy ānaḻ indraḥ pṛtanāḥ svojā āsmai yatante sakhyāya pūrvīḥ |
10.029.08c ā smā rathaṁ na pṛtanāsu tiṣṭha yam bhadrayā sumatyā codayāse ||

vi | ānaṭ | indraḥ | pṛtanāḥ | su-ojāḥ | ā | asmai | yatante | sakhyāya | pūrvīḥ |
ā | sma | ratham | na | pṛtanāsu | tiṣṭha | yam | bhadrayā | su-matyā | codayāse ||10.029.08||


10.030.01a pra devatrā brahmaṇe gātur etv apo acchā manaso na prayukti |
10.030.01c mahīm mitrasya varuṇasya dhāsim pṛthujrayase rīradhā suvṛktim ||

pra | deva-trā | brahmaṇe | gātuḥ | etu | apaḥ | accha | manasaḥ | na | pra-yukti |
mahīm | mitrasya | varuṇasya | dhāsim | pṛthu-jrayase | rīradha | su-vṛktim ||10.030.01||

10.030.02a adhvaryavo haviṣmanto hi bhūtācchāpa itośatīr uśantaḥ |
10.030.02c ava yāś caṣṭe aruṇaḥ suparṇas tam āsyadhvam ūrmim adyā suhastāḥ ||

adhvaryavaḥ | haviṣmantaḥ | hi | bhūta | accha | apaḥ | ita | uśatīḥ | uśantaḥ |
ava | yāḥ | caṣṭe | aruṇaḥ | su-parṇaḥ | tam | ā | asyadhvam | ūrmim | adya | su-hastāḥ ||10.030.02||

10.030.03a adhvaryavo 'pa itā samudram apāṁ napātaṁ haviṣā yajadhvam |
10.030.03c sa vo dadad ūrmim adyā supūtaṁ tasmai somam madhumantaṁ sunota ||

adhvaryavaḥ | apaḥ | ita | samudram | apām | napātam | haviṣā | yajadhvam |
saḥ | vaḥ | dadat | ūrmim | adya | su-pūtam | tasmai | somam | madhu-mantam | sunota ||10.030.03||

10.030.04a yo anidhmo dīdayad apsv antar yaṁ viprāsa īḻate adhvareṣu |
10.030.04c apāṁ napān madhumatīr apo dā yābhir indro vāvṛdhe vīryāya ||

yaḥ | anidhmaḥ | dīdayat | ap-su | antaḥ | yam | viprāsaḥ | īḻate | adhvareṣu |
apām | napāt | madhu-matīḥ | apaḥ | dāḥ | yābhiḥ | indraḥ | vavṛdhe | vīryāya ||10.030.04||

10.030.05a yābhiḥ somo modate harṣate ca kalyāṇībhir yuvatibhir na maryaḥ |
10.030.05c tā adhvaryo apo acchā parehi yad āsiñcā oṣadhībhiḥ punītāt ||

yābhiḥ | somaḥ | modate | harṣate | ca | kalyāṇībhiḥ | yuvati-bhiḥ | na | maryaḥ |
tāḥ | adhvaryo iti | apaḥ | accha | parā | ihi | yat | ā-siñcāḥ | oṣadhībhiḥ | punītāt ||10.030.05||

10.030.06a eved yūne yuvatayo namanta yad īm uśann uśatīr ety accha |
10.030.06c saṁ jānate manasā saṁ cikitre 'dhvaryavo dhiṣaṇāpaś ca devīḥ ||

eva | it | yūne | yuvatayaḥ | namanta | yat | īm | uśan | uṣatīḥ | eti | accha |
sam | jānate | manasā | sam | cikitre | adhvaryavaḥ | dhiṣaṇā | āpaḥ | ca | devīḥ ||10.030.06||

10.030.07a yo vo vṛtābhyo akṛṇod u lokaṁ yo vo mahyā abhiśaster amuñcat |
10.030.07c tasmā indrāya madhumantam ūrmiṁ devamādanam pra hiṇotanāpaḥ ||

yaḥ | vaḥ | vṛtābhyaḥ | akṛṇot | ūm̐ iti | lokam | yaḥ | vaḥ | mahyāḥ | abhi-śasteḥ | amuñcat |
tasmai | indrāya | madhu-mantam | ūrmim | deva-mādanam | pra | hiṇotana | āpaḥ ||10.030.07||

10.030.08a prāsmai hinota madhumantam ūrmiṁ garbho yo vaḥ sindhavo madhva utsaḥ |
10.030.08c ghṛtapṛṣṭham īḍyam adhvareṣv āpo revatīḥ śṛṇutā havam me ||

pra | asmai | hinota | madhu-mantam | ūrmim | garbhaḥ | yaḥ | vaḥ | sindhavaḥ | madhvaḥ | utsaḥ |
ghṛta-pṛṣṭham | īḍyam | adhvareṣu | āpaḥ | revatīḥ | śṛṇuta | havam | me ||10.030.08||

10.030.09a taṁ sindhavo matsaram indrapānam ūrmim pra heta ya ubhe iyarti |
10.030.09c madacyutam auśānaṁ nabhojām pari tritantuṁ vicarantam utsam ||

tam | sindhavaḥ | matsaram | indra-pānam | ūrmim | pra | heta | yaḥ | ubhe iti | iyarti |
mada-cyutam | auśānam | nabhaḥ-jām | pari | tri-tantum | vi-carantam | utsam ||10.030.09||

10.030.10a āvarvṛtatīr adha nu dvidhārā goṣuyudho na niyavaṁ carantīḥ |
10.030.10c ṛṣe janitrīr bhuvanasya patnīr apo vandasva savṛdhaḥ sayonīḥ ||

ā-varvṛtatīḥ | adha | nu | dvi-dhārāḥ | goṣu-yudhaḥ | na | ni-yavam | carantīḥ |
ṛṣe | janitrīḥ | bhuvanasya | patnīḥ | apaḥ | vandasva | sa-vṛdhaḥ | sa-yonīḥ ||10.030.10||

10.030.11a hinotā no adhvaraṁ devayajyā hinota brahma sanaye dhanānām |
10.030.11c ṛtasya yoge vi ṣyadhvam ūdhaḥ śruṣṭīvarīr bhūtanāsmabhyam āpaḥ ||

hinota | naḥ | adhvaram | deva-yajyā | hinota | brahma | sanaye | dhanānām |
ṛtasya | yoge | vi | syadhvam | ūdhaḥ | śruṣṭī-varīḥ | bhūtana | asmabhyam | āpaḥ ||10.030.11||

10.030.12a āpo revatīḥ kṣayathā hi vasvaḥ kratuṁ ca bhadram bibhṛthāmṛtaṁ ca |
10.030.12c rāyaś ca stha svapatyasya patnīḥ sarasvatī tad gṛṇate vayo dhāt ||

āpaḥ | revatīḥ | kṣayatha | hi | vasvaḥ | kratum | ca | bhadram | bibhṛthām | ṛtam | ca |
rāyaḥ | ca | stha | su-apatyasya | patnīḥ | sarasvatī | tat | gṛṇate | vayaḥ | dhāt ||10.030.12||

10.030.13a prati yad āpo adṛśram āyatīr ghṛtam payāṁsi bibhratīr madhūni |
10.030.13c adhvaryubhir manasā saṁvidānā indrāya somaṁ suṣutam bharantīḥ ||

prati | yat | āpaḥ | adṛśram | ā-yatīḥ | ghṛtam | payāṁsi | bibhratīḥ | madhūni |
adhvaryu-bhiḥ | manasā | sam-vidānāḥ | indrāya | somam | su-sutam | bharantīḥ ||10.030.13||

10.030.14a emā agman revatīr jīvadhanyā adhvaryavaḥ sādayatā sakhāyaḥ |
10.030.14c ni barhiṣi dhattana somyāso 'pāṁ naptrā saṁvidānāsa enāḥ ||

ā | imāḥ | agman | revatīḥ | jīva-dhanyāḥ | adhvaryavaḥ | sādayata | sakhāyaḥ |
ni | barhiṣi | dhattana | somyāsaḥ | apām | naptrā | sam-vidānāsaḥ | enāḥ ||10.030.14||

10.030.15a āgmann āpa uśatīr barhir edaṁ ny adhvare asadan devayantīḥ |
10.030.15c adhvaryavaḥ sunutendrāya somam abhūd u vaḥ suśakā devayajyā ||

ā | agman | āpaḥ | uśatīḥ | barhiḥ | ā | idam | ni | adhvare | asadan | deva-yantīḥ |
adhvaryavaḥ | sunuta | indrāya | somam | abhūt | ūm̐ iti | vaḥ | su-śakā | deva-yajyā ||10.030.15||


10.031.01a ā no devānām upa vetu śaṁso viśvebhis turair avase yajatraḥ |
10.031.01c tebhir vayaṁ suṣakhāyo bhavema taranto viśvā duritā syāma ||

ā | naḥ | devānām | upa | vetu | śaṁsaḥ | viśvebhiḥ | turaiḥ | avase | yajatraḥ |
tebhiḥ | vayam | su-sakhāyaḥ | bhavema | tarantaḥ | viśvā | duḥ-itā | syāma ||10.031.01||

10.031.02a pari cin marto draviṇam mamanyād ṛtasya pathā namasā vivāset |
10.031.02c uta svena kratunā saṁ vadeta śreyāṁsaṁ dakṣam manasā jagṛbhyāt ||

pari | cit | martaḥ | draviṇam | mamanyāt | ṛtasya | pathā | namasā | ā | vivāset |
uta | svena | kratunā | sam | vadeta | śreyāṁsam | dakṣam | manasā | jagṛbhyāt ||10.031.02||

10.031.03a adhāyi dhītir asasṛgram aṁśās tīrthe na dasmam upa yanty ūmāḥ |
10.031.03c abhy ānaśma suvitasya śūṣaṁ navedaso amṛtānām abhūma ||

adhāyi | dhītiḥ | asasṛgram | aṁśāḥ | tīrthe | na | dasmam | upa | yanti | ūmāḥ |
abhi | ānaśma | suvitasya | śūṣam | navedasaḥ | amṛtānām | abhūma ||10.031.03||

10.031.04a nityaś cākanyāt svapatir damūnā yasmā u devaḥ savitā jajāna |
10.031.04c bhago vā gobhir aryamem anajyāt so asmai cāruś chadayad uta syāt ||

nityaḥ | cākanyāt | sva-patiḥ | damūnāḥ | yasmai | ūm̐ iti | devaḥ | savitā | jajāna |
bhagaḥ | vā | gobhiḥ | aryamā | īm | anajyāt | saḥ | asmai | cāruḥ | chadayat | uta | syāt ||10.031.04||

10.031.05a iyaṁ sā bhūyā uṣasām iva kṣā yad dha kṣumantaḥ śavasā samāyan |
10.031.05c asya stutiṁ jaritur bhikṣamāṇā ā naḥ śagmāsa upa yantu vājāḥ ||

iyam | sā | bhūyāḥ | uṣasām-iva | kṣāḥ | yat | ha | kṣu-mantaḥ | śavasā | sam-āyan |
asya | stutim | jarituḥ | bhikṣamāṇāḥ | ā | naḥ | śagmāsaḥ | upa | yantu | vājāḥ ||10.031.05||

10.031.06a asyed eṣā sumatiḥ paprathānābhavat pūrvyā bhūmanā gauḥ |
10.031.06c asya sanīḻā asurasya yonau samāna ā bharaṇe bibhramāṇāḥ ||

asya | it | eṣā | su-matiḥ | paprathānā | abhavat | pūrvyā | bhūmanā | gauḥ |
asya | sa-nīḻāḥ | asurasya | yonau | samāne | ā | bharaṇe | bibhramāṇāḥ ||10.031.06||

10.031.07a kiṁ svid vanaṁ ka u sa vṛkṣa āsa yato dyāvāpṛthivī niṣṭatakṣuḥ |
10.031.07c saṁtasthāne ajare itaūtī ahāni pūrvīr uṣaso jaranta ||

kim | svit | vanam | kaḥ | ūm̐ iti | saḥ | vṛkṣaḥ | āsa | yataḥ | dyāvāpṛthivī iti | niḥ-tatakṣuḥ |
saṁtasthāne iti sam-tasthāne | ajare iti | itaūtī itītaḥ-ūtī | ahāni | pūrvīḥ | uṣasaḥ | jaranta ||10.031.07||

10.031.08a naitāvad enā paro anyad asty ukṣā sa dyāvāpṛthivī bibharti |
10.031.08c tvacam pavitraṁ kṛṇuta svadhāvān yad īṁ sūryaṁ na harito vahanti ||

na | etāvat | enā | paraḥ | anyat | asti | ukṣā | saḥ | dyāvāpṛthivī iti | bibharti |
tvacam | pavitram | kṛṇuta | svadhā-vān | yat | īm | sūryam | na | haritaḥ | vahanti ||10.031.08||

10.031.09a stego na kṣām aty eti pṛthvīm mihaṁ na vāto vi ha vāti bhūma |
10.031.09c mitro yatra varuṇo ajyamāno 'gnir vane na vy asṛṣṭa śokam ||

stegaḥ | na | kṣam | ati | eti | pṛthvīm | miham | na | vātaḥ | vi | ha | vāti | bhūma |
mitraḥ | yatra | varuṇaḥ | ajyamānaḥ | agniḥ | vane | na | vi | asṛṣṭa | śokam ||10.031.09||

10.031.10a starīr yat sūta sadyo ajyamānā vyathir avyathīḥ kṛṇuta svagopā |
10.031.10c putro yat pūrvaḥ pitror janiṣṭa śamyāṁ gaur jagāra yad dha pṛcchān ||

starīḥ | yat | sūta | sadyaḥ | ajyamānā | vyathiḥ | avyathīḥ | kṛṇuta | sva-gopā |
putraḥ | yat | pūrvaḥ | pitroḥ | janiṣṭa | śamyām | gauḥ | jagāra | yat | ha | pṛcchān ||10.031.10||

10.031.11a uta kaṇvaṁ nṛṣadaḥ putram āhur uta śyāvo dhanam ādatta vājī |
10.031.11c pra kṛṣṇāya ruśad apinvatodhar ṛtam atra nakir asmā apīpet ||

uta | kaṇvam | nṛ-sadaḥ | putram | āhuḥ | uta | śyāvaḥ | dhanam | ā | adatta | vājī |
pra | kṛṣṇāya | ruśat | apinvata | ūdhaḥ | ṛtam | atra | nakiḥ | asmai | apīpet ||10.031.11||


10.032.01a pra su gmantā dhiyasānasya sakṣaṇi varebhir varām̐ abhi ṣu prasīdataḥ |
10.032.01c asmākam indra ubhayaṁ jujoṣati yat somyasyāndhaso bubodhati ||

pra | su | gmantā | dhiyasānasya | sakṣaṇi | varebhiḥ | varān | abhi | su | pra-sīdataḥ |
asmākam | indraḥ | ubhayam | jujoṣati | yat | somyasya | andhasaḥ | bubodhati ||10.032.01||

10.032.02a vīndra yāsi divyāni rocanā vi pārthivāni rajasā puruṣṭuta |
10.032.02c ye tvā vahanti muhur adhvarām̐ upa te su vanvantu vagvanām̐ arādhasaḥ ||

vi | indra | yāsi | divyāni | rocanā | vi | pārthivāni | rajasā | puru-stuta |
ye | tvā | vahanti | muhuḥ | adhvarān | upa | te | su | vanvantu | vagvanān | arādhasaḥ ||10.032.02||

10.032.03a tad in me chantsad vapuṣo vapuṣṭaram putro yaj jānam pitror adhīyati |
10.032.03c jāyā patiṁ vahati vagnunā sumat puṁsa id bhadro vahatuḥ pariṣkṛtaḥ ||

tat | it | me | chantsat | vapuṣaḥ | vapuḥ-taram | putraḥ | yat | jānam | pitroḥ | adhi-iyati |
jāyā | patim | vahati | vanunā | su-mat | puṁsaḥ | it | bhadraḥ | vahatuḥ | pari-kṛtaḥ ||10.032.03||

10.032.04a tad it sadhastham abhi cāru dīdhaya gāvo yac chāsan vahatuṁ na dhenavaḥ |
10.032.04c mātā yan mantur yūthasya pūrvyābhi vāṇasya saptadhātur ij janaḥ ||

tat | it | sadha-stham | abhi | cāru | dīdhaya | gāvaḥ | yat | śāsan | vahatum | na | dhenavaḥ |
mātā | yat | mantuḥ | yūthasya | pūrvyā | abhi | vāṇasya | sapta-dhātuḥ | it | janaḥ ||10.032.04||

10.032.05a pra vo 'cchā ririce devayuṣ padam eko rudrebhir yāti turvaṇiḥ |
10.032.05c jarā vā yeṣv amṛteṣu dāvane pari va ūmebhyaḥ siñcatā madhu ||

pra | vaḥ | accha | ririce | deva-yuḥ | padam | ekaḥ | rudrebhiḥ | yāti | turvaṇiḥ |
jarā | vā | yeṣu | amṛteṣu | dāvane | pari | vaḥ | ūmebhyaḥ | siñcata | madhu ||10.032.05||

10.032.06a nidhīyamānam apagūḻham apsu pra me devānāṁ vratapā uvāca |
10.032.06c indro vidvām̐ anu hi tvā cacakṣa tenāham agne anuśiṣṭa āgām ||

ni-dhīyamānam | apa-gūḻham | ap-su | pra | me | devānām | vrata-pāḥ | uvāca |
indraḥ | vidvān | anu | hi | tvā | cacakṣa | tena | aham | agne | anu-śiṣṭaḥ | ā | agām ||10.032.06||

10.032.07a akṣetravit kṣetravidaṁ hy aprāṭ sa praiti kṣetravidānuśiṣṭaḥ |
10.032.07c etad vai bhadram anuśāsanasyota srutiṁ vindaty añjasīnām ||

akṣetra-vit | kṣetra-vidam | hi | aprāṭ | saḥ | pra | eti | kṣetra-vidā | anu-śiṣṭaḥ |
etat | vai | bhadram | anu-śāsanasya | uta | srutim | vindati | añjasīnām ||10.032.07||

10.032.08a adyed u prāṇīd amamann imāhāpīvṛto adhayan mātur ūdhaḥ |
10.032.08c em enam āpa jarimā yuvānam aheḻan vasuḥ sumanā babhūva ||

adya | it | ūm̐ iti | pra | āṇīt | amaman | imā | ahā | api-vṛtaḥ | adhayat | mātuḥ | ūdhaḥ |
ā | īm | enam | āpa | jarimā | yuvānam | aheḻan | vasuḥ | su-manāḥ | babhūva ||10.032.08||

10.032.09a etāni bhadrā kalaśa kriyāma kuruśravaṇa dadato maghāni |
10.032.09c dāna id vo maghavānaḥ so astv ayaṁ ca somo hṛdi yam bibharmi ||

etāni | bhadrā | kalaśa | kriyāma | kuru-śravaṇa | dadataḥ | maghāni |
dānaḥ | it | vaḥ | magha-vānaḥ | saḥ | astu | ayam | ca | somaḥ | hṛdi | yam | bibharmi ||10.032.09||


10.033.01a pra mā yuyujre prayujo janānāṁ vahāmi sma pūṣaṇam antareṇa |
10.033.01c viśve devāso adha mām arakṣan duḥśāsur āgād iti ghoṣa āsīt ||

pra | mā | yuyujre | pra-yujaḥ | janānām | vahāmi | sma | pūṣaṇam | antareṇa |
viśve | devāsaḥ | adha | mām | arakṣan | duḥ-śāsuḥ | ā | agāt | iti | ghoṣaḥ | āsīt ||10.033.01||

10.033.02a sam mā tapanty abhitaḥ sapatnīr iva parśavaḥ |
10.033.02c ni bādhate amatir nagnatā jasur ver na vevīyate matiḥ ||

sam | mā | tapanti | abhitaḥ | sapatnīḥ-iva | parśavaḥ |
ni | bādhate | amatiḥ | nagnatā | jasuḥ | veḥ | na | vevīyate | matiḥ ||10.033.02||

10.033.03a mūṣo na śiśnā vy adanti mādhyaḥ stotāraṁ te śatakrato |
10.033.03c sakṛt su no maghavann indra mṛḻayādhā piteva no bhava ||

mūṣaḥ | na | śiśnā | vi | adanti | mā | ā-dhyaḥ | stotāram | te | śatakrato iti śata-krato |
sakṛt | su | naḥ | magha-van | indra | mṛḻaya | adha | pitā-iva | naḥ | bhava ||10.033.03||

10.033.04a kuruśravaṇam āvṛṇi rājānaṁ trāsadasyavam |
10.033.04c maṁhiṣṭhaṁ vāghatām ṛṣiḥ ||

kuru-śravaṇam | avṛṇi | rājānam | trāsadasyavam |
maṁhiṣṭham | vāghatām | ṛṣiḥ ||10.033.04||

10.033.05a yasya mā harito rathe tisro vahanti sādhuyā |
10.033.05c stavai sahasradakṣiṇe ||

yasya | mā | haritaḥ | rathe | tisraḥ | vahanti | sādhu-yā |
stavai | sahasra-dakṣiṇe ||10.033.05||

10.033.06a yasya prasvādaso gira upamaśravasaḥ pituḥ |
10.033.06c kṣetraṁ na raṇvam ūcuṣe ||

yasya | pra-svādasaḥ | giraḥ | upama-śravasaḥ | pituḥ |
kṣetram | na | raṇvam | ūcuṣe ||10.033.06||

10.033.07a adhi putropamaśravo napān mitrātither ihi |
10.033.07c pituṣ ṭe asmi vanditā ||

adhi | putra | upama-śravaḥ | napāt | mitra-atitheḥ | ihi |
pituḥ | te | asmi | vanditā ||10.033.07||

10.033.08a yad īśīyāmṛtānām uta vā martyānām |
10.033.08c jīved in maghavā mama ||

yat | īśīya | amṛtānām | uta | vā | martyānām |
jīvet | it | magha-vā | mama ||10.033.08||

10.033.09a na devānām ati vrataṁ śatātmā cana jīvati |
10.033.09c tathā yujā vi vāvṛte ||

na | devānām | ati | vratam | śata-ātmā | cana | jīvati |
tathā | yujā | vi | vavṛte ||10.033.09||


10.034.01a prāvepā mā bṛhato mādayanti pravātejā iriṇe varvṛtānāḥ |
10.034.01c somasyeva maujavatasya bhakṣo vibhīdako jāgṛvir mahyam acchān ||

prāvepāḥ | mā | bṛhataḥ | mādayanti | pravāte-jāḥ | iriṇe | varvṛtānāḥ |
somasya-iva | mauja-vatasya | bhakṣaḥ | vi-bhīdakaḥ | jāgṛviḥ | mahyam | acchān ||10.034.01||

10.034.02a na mā mimetha na jihīḻa eṣā śivā sakhibhya uta mahyam āsīt |
10.034.02c akṣasyāham ekaparasya hetor anuvratām apa jāyām arodham ||

na | mā | mimetha | na | jihīḻe | eṣā | śivā | sakhi-bhyaḥ | uta | mahyam | āsīt |
akṣasya | aham | eka-parasya | hetoḥ | anu-vratām | apa | jāyām | arodham ||10.034.02||

10.034.03a dveṣṭi śvaśrūr apa jāyā ruṇaddhi na nāthito vindate marḍitāram |
10.034.03c aśvasyeva jarato vasnyasya nāhaṁ vindāmi kitavasya bhogam ||

dveṣṭi | śvaśrūḥ | apa | jāyā | ruṇaddhi | na | nāthitaḥ | vindate | marḍitāram |
aśvasya-iva | jarataḥ | vasnyasya | na | aham | vindāmi | kitavasya | bhogam ||10.034.03||

10.034.04a anye jāyām pari mṛśanty asya yasyāgṛdhad vedane vājy akṣaḥ |
10.034.04c pitā mātā bhrātara enam āhur na jānīmo nayatā baddham etam ||

anye | jāyām | pari | mṛśanti | asya | yasya | agṛdhat | vedane | vājī | akṣaḥ |
pitā | mātā | bhrātaraḥ | enam | āhuḥ | na | jānīmaḥ | nayata | baddham | etam ||10.034.04||

10.034.05a yad ādīdhye na daviṣāṇy ebhiḥ parāyadbhyo 'va hīye sakhibhyaḥ |
10.034.05c nyuptāś ca babhravo vācam akratam̐ emīd eṣāṁ niṣkṛtaṁ jāriṇīva ||

yat | ā-dīdhye | na | daviṣāṇi | ebhiḥ | parāyat-bhyaḥ | ava | hīye | sakhi-bhyaḥ |
ni-uptāḥ | ca | babhravaḥ | vācam | akrata | emi | it | eṣām | niḥ-kṛtam | jāriṇī-iva ||10.034.05||

10.034.06a sabhām eti kitavaḥ pṛcchamāno jeṣyāmīti tanvā śūśujānaḥ |
10.034.06c akṣāso asya vi tiranti kāmam pratidīvne dadhata ā kṛtāni ||

sabhām | eti | kitavaḥ | pṛcchamānaḥ | jeṣyāmi | iti | tanvā | śūśujānaḥ |
akṣāsaḥ | asya | vi | tiranti | kāmam | prati-dīvne | dadhataḥ | ā | kṛtāni ||10.034.06||

10.034.07a akṣāsa id aṅkuśino nitodino nikṛtvānas tapanās tāpayiṣṇavaḥ |
10.034.07c kumāradeṣṇā jayataḥ punarhaṇo madhvā sampṛktāḥ kitavasya barhaṇā ||

akṣāsaḥ | it | aṅkuśinaḥ | ni-todinaḥ | ni-kṛtvānaḥ | tapanāḥ | tāpayiṣṇavaḥ |
kumāra-deṣṇāḥ | jayataḥ | punaḥ-hanaḥ | madhvā | sam-pṛktāḥ | kitavasya | barhaṇā ||10.034.07||

10.034.08a tripañcāśaḥ krīḻati vrāta eṣāṁ deva iva savitā satyadharmā |
10.034.08c ugrasya cin manyave nā namante rājā cid ebhyo nama it kṛṇoti ||

tri-pañcāśaḥ | krīḻati | vrātaḥ | eṣām | devaḥ-iva | savitā | satya-dharmā |
ugrasya | cit | manyave | na | namante | rājā | cit | ebhyaḥ | namaḥ | it | kṛṇoti ||10.034.08||

10.034.09a nīcā vartanta upari sphuranty ahastāso hastavantaṁ sahante |
10.034.09c divyā aṅgārā iriṇe nyuptāḥ śītāḥ santo hṛdayaṁ nir dahanti ||

nīcāḥ | vartante | upari | sphuranti | ahastāsaḥ | hasta-vantam | sahante |
divyāḥ | aṅgārāḥ | iriṇe | ni-uptāḥ | śītāḥ | santaḥ | hṛdayam | niḥ | dahanti ||10.034.09||

10.034.10a jāyā tapyate kitavasya hīnā mātā putrasya carataḥ kva svit |
10.034.10c ṛṇāvā bibhyad dhanam icchamāno 'nyeṣām astam upa naktam eti ||

jāyā | tapyate | kitavasya | hīnā | mātā | putrasya | carataḥ | kva | svit |
ṛṇa-vā | bibhyat | dhanam | icchamānaḥ | anyeṣām | astam | upa | naktam | eti ||10.034.10||

10.034.11a striyaṁ dṛṣṭvāya kitavaṁ tatāpānyeṣāṁ jāyāṁ sukṛtaṁ ca yonim |
10.034.11c pūrvāhṇe aśvān yuyuje hi babhrūn so agner ante vṛṣalaḥ papāda ||

striyam | dṛṣṭvāya | kitavam | tatāpa | anyeṣām | jāyām | su-kṛtam | ca | yonim |
pūrvāhṇe | aśvān | yuyuje | hi | babhrūn | saḥ | agneḥ | ante | vṛṣalaḥ | papāda ||10.034.11||

10.034.12a yo vaḥ senānīr mahato gaṇasya rājā vrātasya prathamo babhūva |
10.034.12c tasmai kṛṇomi na dhanā ruṇadhmi daśāham prācīs tad ṛtaṁ vadāmi ||

yaḥ | vaḥ | senā-nīḥ | mahataḥ | gaṇasya | rājā | vrātasya | prathamaḥ | babhūva |
tasmai | kṛṇomi | na | dhanā | ruṇadhmi | daśa | aham | prācīḥ | tat | ṛtam | vadāmi ||10.034.12||

10.034.13a akṣair mā dīvyaḥ kṛṣim it kṛṣasva vitte ramasva bahu manyamānaḥ |
10.034.13c tatra gāvaḥ kitava tatra jāyā tan me vi caṣṭe savitāyam aryaḥ ||

akṣaiḥ | mā | dīvyah | kṛṣim | it | kṛṣasva | vitte | ramasva | bahu | manyamānaḥ |
tattra | gāvaḥ | kitava | tatra | jāyā | tat | me | vi | caṣṭe | savitā | ayam | aryaḥ ||10.034.13||

10.034.14a mitraṁ kṛṇudhvaṁ khalu mṛḻatā no mā no ghoreṇa caratābhi dhṛṣṇu |
10.034.14c ni vo nu manyur viśatām arātir anyo babhrūṇām prasitau nv astu ||

mitram | kṛṇudhvam | khalu | mṛḻata | naḥ | mā | naḥ | ghoreṇa | carata | abhi | dhṛṣṇu |
ni | vaḥ | nu | manyuḥ | viśatām | arātiḥ | anyaḥ | babhrūṇām | pra-sitau | nu | astu ||10.034.14||


10.035.01a abudhram u tya indravanto agnayo jyotir bharanta uṣaso vyuṣṭiṣu |
10.035.01c mahī dyāvāpṛthivī cetatām apo 'dyā devānām ava ā vṛṇīmahe ||

abudhram | ūm̐ iti | tye | indra-vantaḥ | agnayaḥ | jyotiḥ | bharantaḥ | uṣasaḥ | vi-uṣṭiṣu |
mahī iti | dyāvāpṛthivī iti | cetatām | apaḥ | adya | devānām | avaḥ | ā | vṛṇīmahe ||10.035.01||

10.035.02a divaspṛthivyor ava ā vṛṇīmahe mātṝn sindhūn parvatāñ charyaṇāvataḥ |
10.035.02c anāgāstvaṁ sūryam uṣāsam īmahe bhadraṁ somaḥ suvāno adyā kṛṇotu naḥ ||

divaḥpṛthivyoḥ | avaḥ | ā | vṛṇīmahe | mātṝn | sindhūn | parvatān | śaryaṇā-vataḥ |
anāgāḥ-tvam | sūryam | uṣasam | īmahe | bhadram | somaḥ | suvānaḥ | adya | kṛṇotu | naḥ ||10.035.02||

10.035.03a dyāvā no adya pṛthivī anāgaso mahī trāyetāṁ suvitāya mātarā |
10.035.03c uṣā ucchanty apa bādhatām aghaṁ svasty agniṁ samidhānam īmahe ||

dyāvā | naḥ | adya | pṛthivī iti | anāgasaḥ | mahī iti | trāyetām | suvitāya | mātarā |
uṣāḥ | ucchantī | apa | bādhatām | agham | svasti | agnim | sam-idhānam | īmahe ||10.035.03||

10.035.04a iyaṁ na usrā prathamā sudevyaṁ revat sanibhyo revatī vy ucchatu |
10.035.04c āre manyuṁ durvidatrasya dhīmahi svasty agniṁ samidhānam īmahe ||

iyam | naḥ | usrā | prathamā | su-devyam | revat | sani-bhyaḥ | revatī | vi | ucchatu |
āre | manyum | duḥ-vidatrasya | dhīmahi | svasti | agnim | sam-idhānam | īmahe ||10.035.04||

10.035.05a pra yāḥ sisrate sūryasya raśmibhir jyotir bharantīr uṣaso vyuṣṭiṣu |
10.035.05c bhadrā no adya śravase vy ucchata svasty agniṁ samidhānam īmahe ||

pra | yāḥ | sisrate | sūryasya | raśmi-bhiḥ | jyotiḥ | bharantīḥ | uṣasaḥ | vi-uṣṭiṣu |
bhadrāḥ | naḥ | adya | śravase | vi | ucchata | svasti | agnim | sam-idhānam | īmahe ||10.035.05||

10.035.06a anamīvā uṣasa ā carantu na ud agnayo jihatāṁ jyotiṣā bṛhat |
10.035.06c āyukṣātām aśvinā tūtujiṁ rathaṁ svasty agniṁ samidhānam īmahe ||

anamīvāḥ | uṣasaḥ | ā | carantu | naḥ | ut | agnayaḥ | jihatām | jyotiṣā | bṛhat |
ayukṣātām | aśvinā | tūtujim | ratham | svasti | agnim | sam-idhānam | īmahe ||10.035.06||

10.035.07a śreṣṭhaṁ no adya savitar vareṇyam bhāgam ā suva sa hi ratnadhā asi |
10.035.07c rāyo janitrīṁ dhiṣaṇām upa bruve svasty agniṁ samidhānam īmahe ||

śreṣṭham | naḥ | adya | savitaḥ | vareṇyam | bhāgam | ā | suva | saḥ | hi | ratna-dhāḥ | asi |
rāyaḥ | janitrīn | dhiṣaṇām | upa | bruve | svasti | agnim | sam-idhānam | īmahe ||10.035.07||

10.035.08a pipartu mā tad ṛtasya pravācanaṁ devānāṁ yan manuṣyā amanmahi |
10.035.08c viśvā id usrāḥ spaḻ ud eti sūryaḥ svasty agniṁ samidhānam īmahe ||

pipartu | mā | tat | ṛtasya | pra-vācanam | devānām | yat | manuṣyāḥ | amanmahi |
viśvāḥ | it | usrāḥ | spaṭ | ut | eti | sūryaḥ | svasti | agnim | sam-idhānam | īmahe ||10.035.08||

10.035.09a adveṣo adya barhiṣaḥ starīmaṇi grāvṇāṁ yoge manmanaḥ sādha īmahe |
10.035.09c ādityānāṁ śarmaṇi sthā bhuraṇyasi svasty agniṁ samidhānam īmahe ||

adveṣaḥ | adya | barhiṣaḥ | starīmaṇi | grāvṇām | yoge | manmanaḥ | sādhe | īmahe |
ādityānām | śarmaṇi | sthāḥ | bhuraṇyasi | svasti | agnim | sam-idhānam | īmahe ||10.035.09||

10.035.10a ā no barhiḥ sadhamāde bṛhad divi devām̐ īḻe sādayā sapta hotṝn |
10.035.10c indram mitraṁ varuṇaṁ sātaye bhagaṁ svasty agniṁ samidhānam īmahe ||

ā | naḥ | barhiḥ | sadha-māde | bṛhat | divi | devān | īḻe | sādaya | sapta | hotṝn |
indram | mitram | varuṇam | sātaye | bhagam | svasti | agnim | sam-idhānam | īmahe ||10.035.10||

10.035.11a ta ādityā ā gatā sarvatātaye vṛdhe no yajñam avatā sajoṣasaḥ |
10.035.11c bṛhaspatim pūṣaṇam aśvinā bhagaṁ svasty agniṁ samidhānam īmahe ||

te | ādityāḥ | ā | gata | sarvatātaye | vṛdhe | naḥ | yajñam | avata | sa-joṣasaḥ |
bṛhaspatim | pūṣaṇam | aśvinā | bhagam | svasti | agnim | sam-idhānam | īmahe ||10.035.11||

10.035.12a tan no devā yacchata supravācanaṁ chardir ādityāḥ subharaṁ nṛpāyyam |
10.035.12c paśve tokāya tanayāya jīvase svasty agniṁ samidhānam īmahe ||

tat | naḥ | devāḥ | yacchata | su-pravācanam | chardiḥ | ādityāḥ | su-bharam | nṛ-pāyyam |
paśve | tokāya | tanayāya | jīvase | svasti | agnim | sam-idhānam | īmahe ||10.035.12||

10.035.13a viśve adya maruto viśva ūtī viśve bhavantv agnayaḥ samiddhāḥ |
10.035.13c viśve no devā avasā gamantu viśvam astu draviṇaṁ vājo asme ||

viśve | adya | marutaḥ | viśve | ūtī | viśve | bhavantu | agnayaḥ | sam-iddhāḥ |
viśve | naḥ | devāḥ | avasā | ā | gamantu | viśvam | astu | draviṇam | vājaḥ | asme iti ||10.035.13||

10.035.14a yaṁ devāso 'vatha vājasātau yaṁ trāyadhve yam pipṛthāty aṁhaḥ |
10.035.14c yo vo gopīthe na bhayasya veda te syāma devavītaye turāsaḥ ||

yam | devāsaḥ | avatha | vāja-sātau | yam | trāyadhve | yam | pipṛtha | ati | aṁhaḥ |
yaḥ | vaḥ | go-pīthe | na | bhayasya | veda | te | syāma | deva-vītaye | turāsaḥ ||10.035.14||


10.036.01a uṣāsānaktā bṛhatī supeśasā dyāvākṣāmā varuṇo mitro aryamā |
10.036.01c indraṁ huve marutaḥ parvatām̐ apa ādityān dyāvāpṛthivī apaḥ svaḥ ||

uṣasānaktā | bṛhatī iti | su-peśasā | dyāvākṣāmā | varuṇaḥ | mitraḥ | aryamā |
indram | huve | marutaḥ | parvatān | apaḥ | ādityān | dyāvāpṛthivī iti | apaḥ | svariti svaḥ ||10.036.01||

10.036.02a dyauś ca naḥ pṛthivī ca pracetasa ṛtāvarī rakṣatām aṁhaso riṣaḥ |
10.036.02c mā durvidatrā nirṛtir na īśata tad devānām avo adyā vṛṇīmahe ||

dyauḥ | ca | naḥ | pṛthivī | ca | pra-cetasā | ṛtavarī ityṛta-varī | rakṣatām | aṁhasaḥ | riṣaḥ |
mā | duḥ-vidatrā | niḥ-ṛtiḥ | naḥ | īśata | tat | devānām | avaḥ | adya | vṛṇīmahe ||10.036.02||

10.036.03a viśvasmān no aditiḥ pātv aṁhaso mātā mitrasya varuṇasya revataḥ |
10.036.03c svarvaj jyotir avṛkaṁ naśīmahi tad devānām avo adyā vṛṇīmahe ||

viśvasmāt | naḥ | aditiḥ | pātu | aṁhasaḥ | mātā | mitrasya | varuṇasya | revataḥ |
svaḥ-vat | jyotiḥ | avṛkam | naśīmahi | tat | devānām | avaḥ | adya | vṛṇīmahe ||10.036.03||

10.036.04a grāvā vadann apa rakṣāṁsi sedhatu duṣṣvapnyaṁ nirṛtiṁ viśvam atriṇam |
10.036.04c ādityaṁ śarma marutām aśīmahi tad devānām avo adyā vṛṇīmahe ||

grāvā | vadan | apa | rakṣāṁsi | sedhatu | duḥ-svapnyam | niḥ-ṛtim | viśvam | atriṇam |
ādityam | śarma | marutām | aśīmahi | tat | devānām | avaḥ | adya | vṛṇīmahe ||10.036.04||

10.036.05a endro barhiḥ sīdatu pinvatām iḻā bṛhaspatiḥ sāmabhir ṛkvo arcatu |
10.036.05c supraketaṁ jīvase manma dhīmahi tad devānām avo adyā vṛṇīmahe ||

ā | indraḥ | barhiḥ | sīdatu | pinvatām | iḻā | bṛhaspatiḥ | sāma-bhiḥ | ṛkvaḥ | arcatu |
su-praketam | jīvase | manma | dhīmahi | tat | devānām | avaḥ | adya | vṛṇīmahe ||10.036.05||

10.036.06a divispṛśaṁ yajñam asmākam aśvinā jīrādhvaraṁ kṛṇutaṁ sumnam iṣṭaye |
10.036.06c prācīnaraśmim āhutaṁ ghṛtena tad devānām avo adyā vṛṇīmahe ||

divi-spṛśam | yajñam | asmākam | aśvinā | jīra-adhvaram | kṛṇutam | sumnam | iṣṭaye |
prācīna-raśmim | ā-hutam | ghṛtena | tat | devānām | avaḥ | adya | vṛṇīmahe ||10.036.06||

10.036.07a upa hvaye suhavam mārutaṁ gaṇam pāvakam ṛṣvaṁ sakhyāya śambhuvam |
10.036.07c rāyas poṣaṁ sauśravasāya dhīmahi tad devānām avo adyā vṛṇīmahe ||

upa | hvaye | su-havam | mārutam | gaṇam | pāvakam | ṛṣvam | sakhyāya | śam-bhuvam |
rāyaḥ | poṣam | sauśravasāya | dhīmahi | tat | devānām | avaḥ | adya | vṛṇīmahe ||10.036.07||

10.036.08a apām peruṁ jīvadhanyam bharāmahe devāvyaṁ suhavam adhvaraśriyam |
10.036.08c suraśmiṁ somam indriyaṁ yamīmahi tad devānām avo adyā vṛṇīmahe ||

apām | perum | jīva-dhanyam | bharāmahe | deva-avyam | su-havam | adhvara-śriyam |
su-raśmim | somam | indriyam | yamīmahi | tat | devānām | avaḥ | adya | vṛṇīmahe ||10.036.08||

10.036.09a sanema tat susanitā sanitvabhir vayaṁ jīvā jīvaputrā anāgasaḥ |
10.036.09c brahmadviṣo viṣvag eno bharerata tad devānām avo adyā vṛṇīmahe ||

sanema | tat | su-sanitā | sanitva-bhiḥ | vayam | jīvāḥ | jīva-putrāḥ | anāgasaḥ |
brahma-dviṣaḥ | viṣvak | enaḥ | bharerata | tat | devānām | avaḥ | adya | vṛṇīmahe ||10.036.09||

10.036.10a ye sthā manor yajñiyās te śṛṇotana yad vo devā īmahe tad dadātana |
10.036.10c jaitraṁ kratuṁ rayimad vīravad yaśas tad devānām avo adyā vṛṇīmahe ||

ye | sthāḥ | manoḥ | yajñiyāḥ | te | śṛṇotana | yat | vaḥ | devāḥ | īmahe | tat | dadātana |
jaitram | kratum | rayimat | vīra-vat | yaśaḥ | tat | devānām | avaḥ | adya | vṛṇīmahe ||10.036.10||

10.036.11a mahad adya mahatām ā vṛṇīmahe 'vo devānām bṛhatām anarvaṇām |
10.036.11c yathā vasu vīrajātaṁ naśāmahai tad devānām avo adyā vṛṇīmahe ||

mahat | adya | mahatām | ā | vṛṇīmahe | avaḥ | devānām | bṛhatām | anarvaṇām |
yathā | vasu | vīra-jātam | naśāmahai | tat | devānām | avaḥ | adya | vṛṇīmahe ||10.036.11||

10.036.12a maho agneḥ samidhānasya śarmaṇy anāgā mitre varuṇe svastaye |
10.036.12c śreṣṭhe syāma savituḥ savīmani tad devānām avo adyā vṛṇīmahe ||

mahaḥ | agneḥ | sam-idhānasya | śarmaṇi | anāgāḥ | mitre | varuṇe | svastaye |
śreṣṭhe | syāma | savituḥ | savīmani | tat | devānām | avaḥ | adya | vṛṇīmahe ||10.036.12||

10.036.13a ye savituḥ satyasavasya viśve mitrasya vrate varuṇasya devāḥ |
10.036.13c te saubhagaṁ vīravad gomad apno dadhātana draviṇaṁ citram asme ||

ye | savituḥ | satya-savasya | viśve | mitrasya | vrate | varuṇasya | devāḥ |
te | saubhagam | vīra-vat | go-mat | apnaḥ | dadhātana | draviṇam | citram | asme iti ||10.036.13||

10.036.14a savitā paścātāt savitā purastāt savitottarāttāt savitādharāttāt |
10.036.14c savitā naḥ suvatu sarvatātiṁ savitā no rāsatāṁ dīrgham āyuḥ ||

savitā | paścātāt | savitā | purastāt | savitā | uttarāttāt | savitā | adharāttāt |
savitā | naḥ | suvatu | sarva-tātim | savitā | naḥ | rāsatām | dīrgham | āyuḥ ||10.036.14||


10.037.01a namo mitrasya varuṇasya cakṣase maho devāya tad ṛtaṁ saparyata |
10.037.01c dūredṛśe devajātāya ketave divas putrāya sūryāya śaṁsata ||

namaḥ | mitrasya | varuṇasya | cakṣase | mahaḥ | devāya | tat | ṛtam | saparyata |
dūre-dṛśe | deva-jātāya | ketave | divaḥ | putrāya | sūryāya | śaṁsata ||10.037.01||

10.037.02a sā mā satyoktiḥ pari pātu viśvato dyāvā ca yatra tatanann ahāni ca |
10.037.02c viśvam anyan ni viśate yad ejati viśvāhāpo viśvāhod eti sūryaḥ ||

sā | mā | satya-uktiḥ | pari | pātu | viśvataḥ | dyāvā | ca | yatra | tatanan | ahāni | ca |
viśvam | anyat | ni | viśate | yat | ejati | viśvāhā | āpaḥ | viśvāhā | ut | eti | sūryaḥ ||10.037.02||

10.037.03a na te adevaḥ pradivo ni vāsate yad etaśebhiḥ patarai ratharyasi |
10.037.03c prācīnam anyad anu vartate raja ud anyena jyotiṣā yāsi sūrya ||

na | te | adevaḥ | pra-divaḥ | ni | vāsate | yat | etaśebhiḥ | pataraiḥ | ratharyasi |
prācīnam | anyat | anu | vartate | rajaḥ | ut | anyena | jyotiṣā | yāsi | sūrya ||10.037.03||

10.037.04a yena sūrya jyotiṣā bādhase tamo jagac ca viśvam udiyarṣi bhānunā |
10.037.04c tenāsmad viśvām anirām anāhutim apāmīvām apa duṣṣvapnyaṁ suva ||

yena | sūrya | jyotiṣā | bādhase | tamaḥ | jagat | ca | viśvam | ut-iyarṣi | bhānunā |
tena | asmat | viśvām | anirām | anāhutim | apa | amīvām | apa | duḥ-svapnyam | suva ||10.037.04||

10.037.05a viśvasya hi preṣito rakṣasi vratam aheḻayann uccarasi svadhā anu |
10.037.05c yad adya tvā sūryopabravāmahai taṁ no devā anu maṁsīrata kratum ||

viśvasya | hi | pra-iṣitaḥ | rakṣasi | vratam | aheḻayan | ut-carasi | svadhāḥ | anu |
yat | adya | tvā | sūrya | upa-bravāmahai | tat | naḥ | devāḥ | anu | maṁsīrata | kratum ||10.037.05||

10.037.06a taṁ no dyāvāpṛthivī tan na āpa indraḥ śṛṇvantu maruto havaṁ vacaḥ |
10.037.06c mā śūne bhūma sūryasya saṁdṛśi bhadraṁ jīvanto jaraṇām aśīmahi ||

tam | naḥ | dyāvāpṛthivī iti | tat | naḥ | āpaḥ | indraḥ | śṛṇvantu | marutaḥ | havam | vacaḥ |
mā | śūne | bhūma | sūryasya | sam-dṛśi | bhadram | jīvantaḥ | jaraṇām | aśīmahi ||10.037.06||

10.037.07a viśvāhā tvā sumanasaḥ sucakṣasaḥ prajāvanto anamīvā anāgasaḥ |
10.037.07c udyantaṁ tvā mitramaho dive-dive jyog jīvāḥ prati paśyema sūrya ||

viśvāhā | tvā | su-manasaḥ | su-cakṣasaḥ | prajā-vantaḥ | anamīvāḥ | anāgasaḥ |
ut-yantam | tvā | mitra-mahaḥ | dive-dive | jyok | jīvāḥ | prati | paśyema | sūrya ||10.037.07||

10.037.08a mahi jyotir bibhrataṁ tvā vicakṣaṇa bhāsvantaṁ cakṣuṣe-cakṣuṣe mayaḥ |
10.037.08c ārohantam bṛhataḥ pājasas pari vayaṁ jīvāḥ prati paśyema sūrya ||

mahi | jyotiḥ | bibhratam | tvā | vi-cakṣaṇa | bhāsvantam | cakṣuṣe-cakṣuṣe | mayaḥ |
ā-rohantam | bṛhataḥ | pājasaḥ | pari | vayam | jīvāḥ | prati | paśyema | sūrya ||10.037.08||

10.037.09a yasya te viśvā bhuvanāni ketunā pra cerate ni ca viśante aktubhiḥ |
10.037.09c anāgāstvena harikeśa sūryāhnāhnā no vasyasā-vasyasod ihi ||

yasya | te | viśvā | bhuvanāni | ketunā | pra | ca | īrate | ni | ca | viśante | aktu-bhiḥ |
anāgāḥ-tvena | hari-keśa | sūrya | ahnā-ahnā | naḥ | vasyasā-vasyasā | ut | ihi ||10.037.09||

10.037.10a śaṁ no bhava cakṣasā śaṁ no ahnā śam bhānunā śaṁ himā śaṁ ghṛṇena |
10.037.10c yathā śam adhvañ cham asad duroṇe tat sūrya draviṇaṁ dhehi citram ||

śam | naḥ | bhava | cakṣasā | sam | naḥ | ahnā | śam | bhānunā | śam | himāḥ | śam | ghṛṇena |
yathā | śam | adhvan | śam | asat | duroṇe | tat | sūrya | draviṇam | dhehi | citram ||10.037.10||

10.037.11a asmākaṁ devā ubhayāya janmane śarma yacchata dvipade catuṣpade |
10.037.11c adat pibad ūrjayamānam āśitaṁ tad asme śaṁ yor arapo dadhātana ||

asmākam | devāḥ | ubhayāya | janmane | śarma | yacchata | dvi-pade | catuḥ-pade |
adat | pibat | ūrjayamānam | āśitam | tat | asme iti | śam | yoḥ | arapaḥ | dadhātana ||10.037.11||

10.037.12a yad vo devāś cakṛma jihvayā guru manaso vā prayutī devaheḻanam |
10.037.12c arāvā yo no abhi ducchunāyate tasmin tad eno vasavo ni dhetana ||

yat | vaḥ | devāḥ | cakṛma | jihvayā | guru | manasaḥ | vā | pra-yutī | deva-heḻanam |
arāvā | yaḥ | naḥ | abhi | ducchuna-yate | tasmin | tat | enaḥ | vasavaḥ | ni | dhetana ||10.037.12||


10.038.01a asmin na indra pṛtsutau yaśasvati śimīvati krandasi prāva sātaye |
10.038.01c yatra goṣātā dhṛṣiteṣu khādiṣu viṣvak patanti didyavo nṛṣāhye ||

asmin | naḥ | indra | pṛtsutau | yaśasvati | śimī-vati | krandasi | pra | ava | sātaye |
yatra | go-sātā | dhṛṣiteṣu | khādiṣu | viṣvak | patanti | didyavaḥ | nṛ-sahye ||10.038.01||

10.038.02a sa naḥ kṣumantaṁ sadane vy ūrṇuhi goarṇasaṁ rayim indra śravāyyam |
10.038.02c syāma te jayataḥ śakra medino yathā vayam uśmasi tad vaso kṛdhi ||

saḥ | naḥ | kṣu-mantam | sadane | vi | ūrṇuhi | go-arṇasam | rayim | indra | śravāyyam |
syāma | te | jayataḥ | śakra | medinaḥ | yathā | vayam | uśmasi | tat | vaso iti | kṛdhi ||10.038.02||

10.038.03a yo no dāsa āryo vā puruṣṭutādeva indra yudhaye ciketati |
10.038.03c asmābhiṣ ṭe suṣahāḥ santu śatravas tvayā vayaṁ tān vanuyāma saṁgame ||

yaḥ | naḥ | dāsaḥ | āryaḥ | vā | puru-stuta | adevaḥ | indra | yudhaye | ciketati |
asmābhiḥ | te | su-sahāḥ | santu | śatravaḥ | tvayā | vayam | tān | vanuyāma | sam-game ||10.038.03||

10.038.04a yo dabhrebhir havyo yaś ca bhūribhir yo abhīke varivovin nṛṣāhye |
10.038.04c taṁ vikhāde sasnim adya śrutaṁ naram arvāñcam indram avase karāmahe ||

yaḥ | dabhrebhiḥ | havyaḥ | yaḥ | ca | bhūri-bhiḥ | yaḥ | abhīke | varivaḥ-vit | nṛ-sahye |
tam | vi-khāde | sasnim | adya | śrutam | naram | arvāñcam | indram | avase | karāmahe ||10.038.04||

10.038.05a svavṛjaṁ hi tvām aham indra śuśravānānudaṁ vṛṣabha radhracodanam |
10.038.05c pra muñcasva pari kutsād ihā gahi kim u tvāvān muṣkayor baddha āsate ||

sva-vṛjam | hi | tvām | aham | indra | śuśrava | ananu-dam | vṛṣabha | radhra-codanam |
pra | muñcasva | pari | kutsāt | iha | ā | gahi | kim | ūm̐ iti | tvā-vān | muṣkayoḥ | baddhaḥ | āsate ||10.038.05||


10.039.01a yo vām parijmā suvṛd aśvinā ratho doṣām uṣāso havyo haviṣmatā |
10.039.01c śaśvattamāsas tam u vām idaṁ vayam pitur na nāma suhavaṁ havāmahe ||

yaḥ | vām | pari-jmā | su-vṛt | aśvinā | rathaḥ | doṣām | uṣasaḥ | havyaḥ | haviṣmatā |
śaśvat-tamāsaḥ | tam | ūm̐ iti | vām | idam | vayam | pituḥ | na | nāma | su-havam | havāmahe ||10.039.01||

10.039.02a codayataṁ sūnṛtāḥ pinvataṁ dhiya ut puraṁdhīr īrayataṁ tad uśmasi |
10.039.02c yaśasam bhāgaṁ kṛṇutaṁ no aśvinā somaṁ na cārum maghavatsu nas kṛtam ||

codayatam | sūnṛtāḥ | pinvatam | dhiyaḥ | ut | puram-dhīḥ | īrayatam | tat | uśmasi |
yaśasam | bhāgam | kṛṇutam | naḥ | aśvinā | somam | na | cārum | maghavat-su | naḥ | kṛtam ||10.039.02||

10.039.03a amājuraś cid bhavatho yuvam bhago 'nāśoś cid avitārāpamasya cit |
10.039.03c andhasya cin nāsatyā kṛśasya cid yuvām id āhur bhiṣajā rutasya cit ||

amā-juraḥ | cit | bhavathaḥ | yuvam | bhagaḥ | anāśoḥ | cit | avitārā | apamasya | cit |
andhasya | cit | nāsatyā | kṛśasya | cit | yuvām | it | āhuḥ | bhiṣajā | rutasya | cit ||10.039.03||

10.039.04a yuvaṁ cyavānaṁ sanayaṁ yathā ratham punar yuvānaṁ carathāya takṣathuḥ |
10.039.04c niṣ ṭaugryam ūhathur adbhyas pari viśvet tā vāṁ savaneṣu pravācyā ||

yuvam | cyavānam | sanayam | yathā | ratham | punaḥ | yuvānam | carathāya | takṣathuḥ |
niḥ | taugryam | ūhathuḥ | at-bhyaḥ | pari | viśvā | it | tā | vām | savaneṣu | pra-vācyā ||10.039.04||

10.039.05a purāṇā vāṁ vīryā pra bravā jane 'tho hāsathur bhiṣajā mayobhuvā |
10.039.05c tā vāṁ nu navyāv avase karāmahe 'yaṁ nāsatyā śrad arir yathā dadhat ||

purāṇā | vām | vīryā | pra | brava | jane | atho iti | ha | āsathuḥ | bhiṣajā | mayaḥ-bhuvā |
tā | vām | nu | navyau | avase | karāmahe | ayam | nāsatyā | śrat | ariḥ | yathā | dadhat ||10.039.05||

10.039.06a iyaṁ vām ahve śṛṇutam me aśvinā putrāyeva pitarā mahyaṁ śikṣatam |
10.039.06c anāpir ajñā asajātyāmatiḥ purā tasyā abhiśaster ava spṛtam ||

iyam | vām | ahve | śṛṇutam | me | aśvinā | putrāya-iva | pitarā | mahyam | śikṣatam |
anāpiḥ | ajñāḥ | asajātyā | amatiḥ | purā | tasyāḥ | abhi-śasteḥ | ava | spṛtam ||10.039.06||

10.039.07a yuvaṁ rathena vimadāya śundhyuvaṁ ny ūhathuḥ purumitrasya yoṣaṇām |
10.039.07c yuvaṁ havaṁ vadhrimatyā agacchataṁ yuvaṁ suṣutiṁ cakrathuḥ puraṁdhaye ||

yuvam | rathena | vi-madāya | śundhyuvam | ni | ūhathuḥ | puru-mitrasya | yoṣaṇam |
yuvam | havam | vadhri-matyāḥ | agacchatam | yuvam | su-sutim | cakrathuḥ | puram-dhaye ||10.039.07||

10.039.08a yuvaṁ viprasya jaraṇām upeyuṣaḥ punaḥ kaler akṛṇutaṁ yuvad vayaḥ |
10.039.08c yuvaṁ vandanam ṛśyadād ud ūpathur yuvaṁ sadyo viśpalām etave kṛthaḥ ||

yuvam | viprasya | jaraṇām | upa-īyuṣaḥ | punariti | kaleḥ | akṛṇutam | yuvat | vayaḥ |
yuvam | vandanam | ṛśya-dāt | ut | ūpathuḥ | yuvam | sadyaḥ | viśpalām | etave | kṛthaḥ ||10.039.08||

10.039.09a yuvaṁ ha rebhaṁ vṛṣaṇā guhā hitam ud airayatam mamṛvāṁsam aśvinā |
10.039.09c yuvam ṛbīsam uta taptam atraya omanvantaṁ cakrathuḥ saptavadhraye ||

yuvam | ha | rebham | vṛṣaṇā | guhā | hitam | ut | airayatam | mamṛ-vāṁsam | aśvinā |
yuvam | ṛbīsam | uta | taptam | atraye | oman-vantam | cakrathuḥ | sapta-vadhraye ||10.039.09||

10.039.10a yuvaṁ śvetam pedave 'śvināśvaṁ navabhir vājair navatī ca vājinam |
10.039.10c carkṛtyaṁ dadathur drāvayatsakham bhagaṁ na nṛbhyo havyam mayobhuvam ||

yuvam | śvetam | pedave | aśvinā | aśvam | nava-bhiḥ | vājaiḥ | navatī | ca | vājinam |
carkṛtyam | dadathuḥ | dravayat-sakham | bhagam | na | nṛ-bhyaḥ | havyam | mayaḥ-bhuvam ||10.039.10||

10.039.11a na taṁ rājānāv adite kutaś cana nāṁho aśnoti duritaṁ nakir bhayam |
10.039.11c yam aśvinā suhavā rudravartanī purorathaṁ kṛṇuthaḥ patnyā saha ||

na | tam | rājānau | adite | kutaḥ | cana | na | aṁhaḥ | aśnoti | duḥ-itam | nakiḥ | bhayam |
yam | aśvinā | su-havā | rudravartanī iti rudra-vartanī | puraḥ-ratham | kṛṇuthaḥ | patnyā | saha ||10.039.11||

10.039.12a ā tena yātam manaso javīyasā rathaṁ yaṁ vām ṛbhavaś cakrur aśvinā |
10.039.12c yasya yoge duhitā jāyate diva ubhe ahanī sudine vivasvataḥ ||

ā | tena | yātam | manasaḥ | javīyasā | ratham | yam | vām | ṛbhavaḥ | cakruḥ | aśvinā |
yasya | yoge | duhitā | jāyate | divaḥ | ubhe iti | ahanī iti | sudine iti su-dine | vivasvataḥ ||10.039.12||

10.039.13a tā vartir yātaṁ jayuṣā vi parvatam apinvataṁ śayave dhenum aśvinā |
10.039.13c vṛkasya cid vartikām antar āsyād yuvaṁ śacībhir grasitām amuñcatam ||

tā | vartiḥ | yātam | jayuṣā | vi | parvatam | apinvatam | śayave | dhenum | aśvinā |
vṛkasya | cit | varikām | antaḥ | āsyāt | yuvam | śacībhiḥ | grasitām | amuñcatam ||10.039.13||

10.039.14a etaṁ vāṁ stomam aśvināv akarmātakṣāma bhṛgavo na ratham |
10.039.14c ny amṛkṣāma yoṣaṇāṁ na marye nityaṁ na sūnuṁ tanayaṁ dadhānāḥ ||

etam | vām | stomam | aśvinau | akarma | atakṣāma | bhṛgavaḥ | na | ratham |
ni | amṛkṣāma | yoṣaṇām | na | marye | nityam | na | sūnum | tanayam | dadhānāḥ ||10.039.14||


10.040.01a rathaṁ yāntaṁ kuha ko ha vāṁ narā prati dyumantaṁ suvitāya bhūṣati |
10.040.01c prātaryāvāṇaṁ vibhvaṁ viśe-viśe vastor-vastor vahamānaṁ dhiyā śami ||

ratham | yāntam | kuha | kaḥ | ha | vām | narā | prati | dyu-mantam | su-vitāya | bhūṣati |
prātaḥ-yāvāṇam | vi-bhvam | viśe-viśe | vastoḥ-vastoḥ | vahamānam | dhiyā | śami ||10.040.01||

10.040.02a kuha svid doṣā kuha vastor aśvinā kuhābhipitvaṁ karataḥ kuhoṣatuḥ |
10.040.02c ko vāṁ śayutrā vidhaveva devaram maryaṁ na yoṣā kṛṇute sadhastha ā ||

kuha | svit | doṣā | kuha | vastoḥ | aśvinā | kuha | abhi-pitvam | karataḥ | kuha | ūṣatuḥ |
kaḥ | vām | śayu-trā | vidhavā-iva | devaram | maryam | na | yoṣā | kṛṇute | sadha-sthe | ā ||10.040.02||

10.040.03a prātar jarethe jaraṇeva kāpayā vastor-vastor yajatā gacchatho gṛham |
10.040.03c kasya dhvasrā bhavathaḥ kasya vā narā rājaputreva savanāva gacchathaḥ ||

prātaḥ | jarethe iti | jaraṇā-iva | kāpayā | vastoḥ-vastoḥ | yajatā | gacchathaḥ | gṛham |
kasya | dhvasrā | bhavathaḥ | kasya | vā | narā | rāja-putrā-iva | savanā | ava | gacchathaḥ ||10.040.03||

10.040.04a yuvām mṛgeva vāraṇā mṛgaṇyavo doṣā vastor haviṣā ni hvayāmahe |
10.040.04c yuvaṁ hotrām ṛtuthā juhvate nareṣaṁ janāya vahathaḥ śubhas patī ||

yuvām | mṛgā-iva | vāraṇā | mṛgaṇyavaḥ | doṣā | vastoḥ | haviṣā | ni | hvayāmahe |
yuvam | hotrām | ṛtu-thā | juhvate | narā | iṣam | janāya | vahathaḥ | śubhaḥ | patī iti ||10.040.04||

10.040.05a yuvāṁ ha ghoṣā pary aśvinā yatī rājña ūce duhitā pṛcche vāṁ narā |
10.040.05c bhūtam me ahna uta bhūtam aktave 'śvāvate rathine śaktam arvate ||

yuvā | ha | ghoṣā | pari | aśvinā | yatī | rājñaḥ | ūce | duhitā | pṛcche | vām | narā |
bhūtam | me | ahne | uta | bhūtam | aktave | aśva-vate | rathine | śaktam | arvate ||10.040.05||

10.040.06a yuvaṁ kavī ṣṭhaḥ pary aśvinā rathaṁ viśo na kutso jaritur naśāyathaḥ |
10.040.06c yuvor ha makṣā pary aśvinā madhv āsā bharata niṣkṛtaṁ na yoṣaṇā ||

yuvam | kavī iti | sthaḥ | pari | aśvinā | ratham | viśaḥ | na | kutsaḥ | jarituḥ | naśāyathaḥ |
yuvoḥ | ha | makṣā | pari | aśvinā | madhu | āsā | bharata | niḥ-kṛtam | na | yoṣaṇā ||10.040.06||

10.040.07a yuvaṁ ha bhujyuṁ yuvam aśvinā vaśaṁ yuvaṁ śiñjāram uśanām upārathuḥ |
10.040.07c yuvo rarāvā pari sakhyam āsate yuvor aham avasā sumnam ā cake ||

yuvam | ha | bhujyum | yuvam | aśvinā | vaśam | yuvam | śiñjāram | uśanām | upa | ārathuḥ |
yuvaḥ | rarāvā | pari | sakhyam | āsate | yuvoḥ | aham | avasā | sumnam | ā | cake ||10.040.07||

10.040.08a yuvaṁ ha kṛśaṁ yuvam aśvinā śayuṁ yuvaṁ vidhantaṁ vidhavām uruṣyathaḥ |
10.040.08c yuvaṁ sanibhyaḥ stanayantam aśvināpa vrajam ūrṇuthaḥ saptāsyam ||

yuvam | ha | kṛśam | yuvam | aśvinā | śayum | yuvam | vidhantam | vidhavām | uruṣyathaḥ |
yuvam | sani-bhyaḥ | stanayantam | aśvinā | apa | vrajam | ūrṇuthaḥ | sapta-āsyam ||10.040.08||

10.040.09a janiṣṭa yoṣā patayat kanīnako vi cāruhan vīrudho daṁsanā anu |
10.040.09c āsmai rīyante nivaneva sindhavo 'smā ahne bhavati tat patitvanam ||

janiṣṭha | yoṣā | patayat | kanīnakaḥ | vi | ca | aruham | vīrudhaḥ | daṁsanāḥ | anu |
ā | asmai | rīyante | nivanā-iva | sindhavaḥ | asmai | ahne | bhavati | tat | pati-tvanam ||10.040.09||

10.040.10a jīvaṁ rudanti vi mayante adhvare dīrghām anu prasitiṁ dīdhiyur naraḥ |
10.040.10c vāmam pitṛbhyo ya idaṁ samerire mayaḥ patibhyo janayaḥ pariṣvaje ||

jīvam | rudanti | vi | mayante | adhvare | dīrghām | anu | pra-sitim | dīdhiyuḥ | naraḥ |
vāmam | pitṛ-bhyaḥ | ye | idam | sam-erire | mayaḥ | pati-bhyaḥ | janayaḥ | pari-svaje ||10.040.10||

10.040.11a na tasya vidma tad u ṣu pra vocata yuvā ha yad yuvatyāḥ kṣeti yoniṣu |
10.040.11c priyosriyasya vṛṣabhasya retino gṛhaṁ gamemāśvinā tad uśmasi ||

na | tasya | vidma | tat | ūm̐ iti | su | pra | vocata | yuvā | ha | yat | yuvatyāḥ | kṣeti | yoniṣu |
priya-usriyasya | vṛṣabhasya | retinaḥ | gṛham | gamema | aśvinā | tat | uśmasi ||10.040.11||

10.040.12a ā vām agan sumatir vājinīvasū ny aśvinā hṛtsu kāmā ayaṁsata |
10.040.12c abhūtaṁ gopā mithunā śubhas patī priyā aryamṇo duryām̐ aśīmahi ||

ā | vām | agan | su-matiḥ | vājinīvasū iti vājinī-vasū | ni | aśvinā | hṛt-su | kāmāḥ | ayaṁsata |
abhūtam | gopā | mithunā | śubhaḥ | patī iti | priyāḥ | aryamṇaḥ | duryān | aśīmahi ||10.040.12||

10.040.13a tā mandasānā manuṣo duroṇa ā dhattaṁ rayiṁ sahavīraṁ vacasyave |
10.040.13c kṛtaṁ tīrthaṁ suprapāṇaṁ śubhas patī sthāṇum patheṣṭhām apa durmatiṁ hatam ||

tā | mandasānā | manuṣaḥ | duroṇe | ā | dhattam | rayim | saha-vīram | vacasyave |
kṛtam | tīrtham | su-prapānam | śubhaḥ | patī iti | sthāṇum | pathe-sthām | apa | duḥ-matim | hatam ||10.040.13||

10.040.14a kva svid adya katamāsv aśvinā vikṣu dasrā mādayete śubhas patī |
10.040.14c ka īṁ ni yeme katamasya jagmatur viprasya vā yajamānasya vā gṛham ||

kva | svit | adya | katamāsu | aśvinā | vikṣu | dasrā | mādayete iti | śubhaḥ | patī iti |
kaḥ | īm | ni | yeme | katamasya | jagmatuḥ | viprasya | vā | yajamānasya | vā | gṛham ||10.040.14||


10.041.01a samānam u tyam puruhūtam ukthyaṁ rathaṁ tricakraṁ savanā ganigmatam |
10.041.01c parijmānaṁ vidathyaṁ suvṛktibhir vayaṁ vyuṣṭā uṣaso havāmahe ||

samānam | ūm̐ iti | tyam | puru-hūtam | ukthyam | ratham | tri-cakram | savanā | ganigmatam |
pari-jmānam | vidathyam | suvṛkti-bhiḥ | vayam | vi-uṣṭau | uṣasaḥ | havāmahe ||10.041.01||

10.041.02a prātaryujaṁ nāsatyādhi tiṣṭhathaḥ prātaryāvāṇam madhuvāhanaṁ ratham |
10.041.02c viśo yena gacchatho yajvarīr narā kīreś cid yajñaṁ hotṛmantam aśvinā ||

prātaḥ-yujam | nāsatyā | adhi | tiṣṭhathaḥ | prātaḥ-yāvānam | madhu-vāhanam | ratham |
viśaḥ | yena | gacchataḥ | yajvarīḥ | narā | kīreḥ | cit | yajñam | hotṛ-mantam | aśvinā ||10.041.02||

10.041.03a adhvaryuṁ vā madhupāṇiṁ suhastyam agnidhaṁ vā dhṛtadakṣaṁ damūnasam |
10.041.03c viprasya vā yat savanāni gacchatho 'ta ā yātam madhupeyam aśvinā ||

adhvaryum | vā | madhu-pāṇim | su-hastyam | agnidham | vā | dhṛta-dakṣam | damūnasam |
viprasya | vā | yat | savanāni | gacchathaḥ | ataḥ | ā | yātam | madhu-peyam | aśvincā ||10.041.03||


10.042.01a asteva su prataraṁ lāyam asyan bhūṣann iva pra bharā stomam asmai |
10.042.01c vācā viprās tarata vācam aryo ni rāmaya jaritaḥ soma indram ||

astā-iva | su | pra-taram | lāyam | asyan | bhūṣan-iva | pra | bhara | stomam | asmai |
vācā | viprāḥ | tarata | vācam | aryaḥ | ni | ramaya | jaritariti | some | indram ||10.042.01||

10.042.02a dohena gām upa śikṣā sakhāyam pra bodhaya jaritar jāram indram |
10.042.02c kośaṁ na pūrṇaṁ vasunā nyṛṣṭam ā cyāvaya maghadeyāya śūram ||

dohena | gām | upa | śikṣa | sakhāyam | pra | bodhaya | jaritaḥ | jāram | indram |
kośam | na | pūrṇam | vasunā | ni-ṛṣṭam | ā | cyavaya | magha-deyāya | śūram ||10.042.02||

10.042.03a kim aṅga tvā maghavan bhojam āhuḥ śiśīhi mā śiśayaṁ tvā śṛṇomi |
10.042.03c apnasvatī mama dhīr astu śakra vasuvidam bhagam indrā bharā naḥ ||

kim | aṅga | tvā | magha-van | bhojam | āhuḥ | śiśīhi | mā | śiśayam | tvā | śṛṇomi |
apnasvatī | mama | dhīḥ | astu | śakra | vasu-vidam | bhagam | indra | ā | bhara | naḥ ||10.042.03||

10.042.04a tvāṁ janā mamasatyeṣv indra saṁtasthānā vi hvayante samīke |
10.042.04c atrā yujaṁ kṛṇute yo haviṣmān nāsunvatā sakhyaṁ vaṣṭi śūraḥ ||

tvām | janāḥ | mama-satyeṣu | indra | sam-tasthānāḥ | vi | hvayante | sam-īke |
atra | yujam | kṛṇute | yaḥ | haviṣmān | na | asunvatā | sakhyam | vaṣṭi | śūraḥ ||10.042.04||

10.042.05a dhanaṁ na syandram bahulaṁ yo asmai tīvrān somām̐ āsunoti prayasvān |
10.042.05c tasmai śatrūn sutukān prātar ahno ni svaṣṭrān yuvati hanti vṛtram ||

dhanam | na | spandram | bahulam | yaḥ | asmai | tīvrān | somān | ā-sunoti | prayasvān |
tasmai | śatrūn | su-tukān | prātaḥ | ahnaḥ | ni | su-aṣṭrān | yuvati | hanti | vṛtram ||10.042.05||

10.042.06a yasmin vayaṁ dadhimā śaṁsam indre yaḥ śiśrāya maghavā kāmam asme |
10.042.06c ārāc cit san bhayatām asya śatrur ny asmai dyumnā janyā namantām ||

yasmin | vayam | dadhima | śaṁsam | indre | yaḥ | śiśrāya | magha-vā | kāmam | asme iti |
ārāt | cit | san | bhayatām | asya | śatruḥ | ni | asmai | dyumnā | janyā | namantām ||10.042.06||

10.042.07a ārāc chatrum apa bādhasva dūram ugro yaḥ śambaḥ puruhūta tena |
10.042.07c asme dhehi yavamad gomad indra kṛdhī dhiyaṁ jaritre vājaratnām ||

ārāt | śatrum | apa | bādhasva | dūram | ugraḥ | yaḥ | śambaḥ | puru-hūta | tena |
asme iti | dhehi | yava-mat | go-mat | indra | kṛdhi | dhiyam | jaritre | vāja-ratnām ||10.042.07||

10.042.08a pra yam antar vṛṣasavāso agman tīvrāḥ somā bahulāntāsa indram |
10.042.08c nāha dāmānam maghavā ni yaṁsan ni sunvate vahati bhūri vāmam ||

pra | yam | antaḥ | vṛṣa-savāsaḥ | agman | tīvrāḥ | somāḥ | bahula-antāsaḥ | indram |
na | aha | dāmānam | magha-vā | ni | yaṁsat | ni | sunvate | vahati | bhūri | vāmam ||10.042.08||

10.042.09a uta prahām atidīvyā jayāti kṛtaṁ yac chvaghnī vicinoti kāle |
10.042.09c yo devakāmo na dhanā ruṇaddhi sam it taṁ rāyā sṛjati svadhāvān ||

uta | pra-hām | ati-dīvya | jayāti | kṛtam | yat | śva-ghnī | vi-cinoti | kāle |
yaḥ | deva-kāmaḥ | na | dhanā | ruṇaddhi | sam | it | tam | rāyā | sṛjati | svadhā-vān ||10.042.09||

10.042.10a gobhiṣ ṭaremāmatiṁ durevāṁ yavena kṣudham puruhūta viśvām |
10.042.10c vayaṁ rājabhiḥ prathamā dhanāny asmākena vṛjanenā jayema ||

gobhiḥ | tarema | amatim | duḥ-evām | yavena | kṣudham | puru-hūta | viśvām |
vayam | rāja-bhiḥ | prathamā | dhanāni | asmākena | vṛjanena | jayema ||10.042.10||

10.042.11a bṛhaspatir naḥ pari pātu paścād utottarasmād adharād aghāyoḥ |
10.042.11c indraḥ purastād uta madhyato naḥ sakhā sakhibhyo varivaḥ kṛṇotu ||

bṛhaspatiḥ | naḥ | pari | pātu | paścāt | uta | ut-tarasmāt | adharāt | agha-yoḥ |
indraḥ | purastāt | uta | madhyataḥ | naḥ | sakhā | sakhi-bhyaḥ | vari-vaḥ | kṛṇotu ||10.042.11||


10.043.01a acchā ma indram matayaḥ svarvidaḥ sadhrīcīr viśvā uśatīr anūṣata |
10.043.01c pari ṣvajante janayo yathā patim maryaṁ na śundhyum maghavānam ūtaye ||

accha | me | indram | matayaḥ | svaḥ-vidaḥ | sadhrīcīḥ | viśvāḥ | uśatīḥ | anūṣata |
pari | svajante | janayaḥ | yathā | patim | maryam | na | śundhyum | magha-vānam | ūtaye ||10.043.01||

10.043.02a na ghā tvadrig apa veti me manas tve it kāmam puruhūta śiśraya |
10.043.02c rājeva dasma ni ṣado 'dhi barhiṣy asmin su some 'vapānam astu te ||

na | gha | tvadrik | apa | veti | me | manaḥ | tve iti | it | kāmam | puru-hūta | śiśraya |
rājā-iva | dasma | ni | sadaḥ | adhi | barhiṣi | asmin | su | some | ava-pānam | astu | te ||10.043.02||

10.043.03a viṣūvṛd indro amater uta kṣudhaḥ sa id rāyo maghavā vasva īśate |
10.043.03c tasyed ime pravaṇe sapta sindhavo vayo vardhanti vṛṣabhasya śuṣmiṇaḥ ||

viṣu-vṛt | indraḥ | amateḥ | ut | kṣudhaḥ | saḥ | it | rāyaḥ | magha-vā | vasvaḥ | īśate |
tasya | it | ime | pravaṇe | sapta | sindhavaḥ | vayaḥ | vardhanti | vṛṣabhasya | śuṣmiṇaḥ ||10.043.03||

10.043.04a vayo na vṛkṣaṁ supalāśam āsadan somāsa indram mandinaś camūṣadaḥ |
10.043.04c praiṣām anīkaṁ śavasā davidyutad vidat svar manave jyotir āryam ||

vayaḥ | na | vṛkṣam | su-palāśam | ā | asadan | somāsaḥ | indram | mandinaḥ | camū-sadaḥ |
pra | eṣām | anīkam | śavasā | davidyutat | vidat | svaḥ | manave | jyotiḥ | āryam ||10.043.04||

10.043.05a kṛtaṁ na śvaghnī vi cinoti devane saṁvargaṁ yan maghavā sūryaṁ jayat |
10.043.05c na tat te anyo anu vīryaṁ śakan na purāṇo maghavan nota nūtanaḥ ||

kṛtam | na | śva-ghnī | vi | cinoti | devane | sam-vargam | yat | magha-vā | sūryam | jayat |
na | tat | te | anyaḥ | anu | vīryam | śakat | na | purāṇaḥ | magha-van | na | uta | nūtanaḥ ||10.043.05||

10.043.06a viśaṁ-viśam maghavā pary aśāyata janānāṁ dhenā avacākaśad vṛṣā |
10.043.06c yasyāha śakraḥ savaneṣu raṇyati sa tīvraiḥ somaiḥ sahate pṛtanyataḥ ||

viśam-viśam | magha-vā | pari | aśāyata | janānām | dhenāḥ | ava-cākaśat | vṛṣā |
yasya | aha | śakraḥ | savaneṣu | raṇyati | saḥ | tīvraiḥ | somaiḥ | sahate | pṛtanyataḥ ||10.043.06||

10.043.07a āpo na sindhum abhi yat samakṣaran somāsa indraṁ kulyā iva hradam |
10.043.07c vardhanti viprā maho asya sādane yavaṁ na vṛṣṭir divyena dānunā ||

āpaḥ | na | sindhum | abhi | yat | sam-akṣaran | somāsaḥ | indram | kulyāḥ-iva | hradam |
vardhanti | viprāḥ | mahaḥ | asya | sādane | yavam | na | vṛṣṭiḥ | divyena | dānunā ||10.043.07||

10.043.08a vṛṣā na kruddhaḥ patayad rajassv ā yo aryapatnīr akṛṇod imā apaḥ |
10.043.08c sa sunvate maghavā jīradānave 'vindaj jyotir manave haviṣmate ||

vṛṣā | na | kruddhaḥ | patayat | rajaḥ-su | ā | yaḥ | arya-patnīḥ | akṛṇot | imāḥ | apaḥ |
saḥ | sunvate | magha-vā | jīra-dānave | avindat | jyotiḥ | manave | haviṣmate ||10.043.08||

10.043.09a uj jāyatām paraśur jyotiṣā saha bhūyā ṛtasya sudughā purāṇavat |
10.043.09c vi rocatām aruṣo bhānunā śuciḥ svar ṇa śukraṁ śuśucīta satpatiḥ ||

ut | jāyatām | paraśuḥ | jyotiṣā | saha | bhūyāḥ | ṛtasya | su-dughā | purāṇa-vat |
vi | rocatām | aruṣaḥ | bhānunā | śuciḥ | svaḥ | na | śukram | śuśucīta | sat-patiḥ ||10.043.09||

10.043.10a gobhiṣ ṭaremāmatiṁ durevāṁ yavena kṣudham puruhūta viśvām |
10.043.10c vayaṁ rājabhiḥ prathamā dhanāny asmākena vṛjanenā jayema ||

gobhiḥ | tarema | amatim | duḥ-evām | yavena | kṣudham | puru-hūta | viśvām |
vayam | rāja-bhiḥ | prathamā | dhanāni | asmākena | vṛjanena | jayema ||10.043.10||

10.043.11a bṛhaspatir naḥ pari pātu paścād utottarasmād adharād aghāyoḥ |
10.043.11c indraḥ purastād uta madhyato naḥ sakhā sakhibhyo varivaḥ kṛṇotu ||

bṛhaspatiḥ | naḥ | pari | pātu | paścāt | uta | ut-tarasmāt | adharāt | agha-yoḥ |
indraḥ | purastāt | uta | madhyataḥ | naḥ | sakhā | sakhi-bhyaḥ | vari-vaḥ | kṛṇotu ||10.043.11||


10.044.01a ā yātv indraḥ svapatir madāya yo dharmaṇā tūtujānas tuviṣmān |
10.044.01c pratvakṣāṇo ati viśvā sahāṁsy apāreṇa mahatā vṛṣṇyena ||

ā | yātu | indraḥ | sva-patiḥ | madāya | yaḥ | dharmaṇā | tūtujānaḥ | tuviṣmān |
pra-tvakṣāṇaḥ | ati | viśvā | sahāṁsi | apāreṇa | mahatā | vṛṣṇyena ||10.044.01||

10.044.02a suṣṭhāmā rathaḥ suyamā harī te mimyakṣa vajro nṛpate gabhastau |
10.044.02c śībhaṁ rājan supathā yāhy arvāṅ vardhāma te papuṣo vṛṣṇyāni ||

su-sthāmā | rathaḥ | su-yamā | harī iti | te | mimyakṣa | vajraḥ | nṛ-pate | gabhastau |
śībham | rājan | su-pathā | ā | yāhi | arvāṅ | vardhāma | te | papuṣaḥ | vṛṣṇyāni ||10.044.02||

10.044.03a endravāho nṛpatiṁ vajrabāhum ugram ugrāsas taviṣāsa enam |
10.044.03c pratvakṣasaṁ vṛṣabhaṁ satyaśuṣmam em asmatrā sadhamādo vahantu ||

ā | indra-vāhaḥ | nṛ-patim | vajra-bāhum | ugram | ugrāsaḥ | taviṣāsaḥ | enam |
pra-tvakṣasam | vṛṣabham | satya-śuṣmam | ā | īm | asma-trā | sadha-mādaḥ | vahantu ||10.044.03||

10.044.04a evā patiṁ droṇasācaṁ sacetasam ūrjaḥ skambhaṁ dharuṇa ā vṛṣāyase |
10.044.04c ojaḥ kṛṣva saṁ gṛbhāya tve apy aso yathā kenipānām ino vṛdhe ||

eva | patim | droṇa-sācam | sa-cetasam | ūrjaḥ | skambham | dharuṇe | ā | vṛṣa-yase |
ojaḥ | kṛṣva | sam | gṛbhāya | tve iti | api | asaḥ | yathā | ke-nipānām | inaḥ | vṛdhe ||10.044.04||

10.044.05a gamann asme vasūny ā hi śaṁsiṣaṁ svāśiṣam bharam ā yāhi sominaḥ |
10.044.05c tvam īśiṣe sāsminn ā satsi barhiṣy anādhṛṣyā tava pātrāṇi dharmaṇā ||

gaman | asme iti | vasūni | ā | hi | śaṁsiṣam | su-āśiṣam | bharam | ā | yāhi | sominaḥ |
tvam | īśiṣe | saḥ | asmin | ā | satsi | barhiṣi | anādhṛṣyā | tava | pātrāṇi | dharmaṇā ||10.044.05||

10.044.06a pṛthak prāyan prathamā devahūtayo 'kṛṇvata śravasyāni duṣṭarā |
10.044.06c na ye śekur yajñiyāṁ nāvam āruham īrmaiva te ny aviśanta kepayaḥ ||

pṛthak | pra | āyan | prathamāḥ | deva-hūtayaḥ | akṛṇvata | śravasyāni | dustarā |
na | ye | śekuḥ | yajñiyām | nāvam | ā-ruham | īrmā | eva | te | ni | aviśanta | kepayaḥ ||10.044.06||

10.044.07a evaivāpāg apare santu dūḍhyo 'śvā yeṣāṁ duryuja āyuyujre |
10.044.07c itthā ye prāg upare santi dāvane purūṇi yatra vayunāni bhojanā ||

eva | eva | apāk | apare | santu | duḥ-dhyaḥ | aśvāḥ | yeṣām | duḥ-yujaḥ | ā-yuyujre |
itthā | ye | prāk | upare | santi | dāvane | purūṇi | yatra | vayunāni | bhojanā ||10.044.07||

10.044.08a girīm̐r ajrān rejamānām̐ adhārayad dyauḥ krandad antarikṣāṇi kopayat |
10.044.08c samīcīne dhiṣaṇe vi ṣkabhāyati vṛṣṇaḥ pītvā mada ukthāni śaṁsati ||

girīn | ajrān | rejamānān | adhārayat | dyauḥ | krandat | antarikṣāṇi | kopayat |
samīcīne iti sam-īcīne | dhiṣaṇe iti | vi | skabhāyati | vṛṣṇaḥ | pītvā | made | ukthāni | śaṁsati ||10.044.08||

10.044.09a imam bibharmi sukṛtaṁ te aṅkuśaṁ yenārujāsi maghavañ chaphārujaḥ |
10.044.09c asmin su te savane astv okyaṁ suta iṣṭau maghavan bodhy ābhagaḥ ||

imam | bibharmi | su-kṛtam | te | aṅkuśam | yena | ā-rujāsi | magha-van | śapha-ārujaḥ |
asmin | su | te | savane | astu | okyam | sute | iṣṭau | magha-van | bodhi | ā-bhagaḥ ||10.044.09||

10.044.10a gobhiṣ ṭaremāmatiṁ durevāṁ yavena kṣudham puruhūta viśvām |
10.044.10c vayaṁ rājabhiḥ prathamā dhanāny asmākena vṛjanenā jayema ||

gobhiḥ | tarema | amatim | duḥ-evām | yavena | kṣudham | puru-hūta | viśvām |
vayam | rāja-bhiḥ | prathamāḥ | dhanāni | asmākena | vṛjanena | jayema ||10.044.10||

10.044.11a bṛhaspatir naḥ pari pātu paścād utottarasmād adharād aghāyoḥ |
10.044.11c indraḥ purastād uta madhyato naḥ sakhā sakhibhyo varivaḥ kṛṇotu ||

bṛhaspatiḥ | naḥ | pari | pātu | paścāt | uta | ut-tarasmāt | adharāt | agha-yoḥ |
indraḥ | purastāt | uta | madhyataḥ | naḥ | sakhā | sakhi-bhyaḥ | vari-vaḥ | kṛṇotu ||10.044.11||


10.045.01a divas pari prathamaṁ jajñe agnir asmad dvitīyam pari jātavedāḥ |
10.045.01c tṛtīyam apsu nṛmaṇā ajasram indhāna enaṁ jarate svādhīḥ ||

divaḥ | pari | prathamam | jajñe | agniḥ | asmat | dvitīyam | pari | jāta-vedāḥ |
tṛtīyam | ap-su | nṛ-manāḥ | ajasram | indhānaḥ | enam | jarate | su-ādhīḥ ||10.045.01||

10.045.02a vidmā te agne tredhā trayāṇi vidmā te dhāma vibhṛtā purutrā |
10.045.02c vidmā te nāma paramaṁ guhā yad vidmā tam utsaṁ yata ājagantha ||

vidma | te | agne | tredhā | trayāṇi | vidma | te | dhāma | vi-bhṛtā | puru-trā |
vidma | te | nāma | paramam | guhā | yat | vidma | tam | utsam | yataḥ | ā-jagantha ||10.045.02||

10.045.03a samudre tvā nṛmaṇā apsv antar nṛcakṣā īdhe divo agna ūdhan |
10.045.03c tṛtīye tvā rajasi tasthivāṁsam apām upasthe mahiṣā avardhan ||

samudre | tvā | nṛ-manāḥ | ap-su | antaḥ | nṛ-cakṣāḥ | īdhe | divaḥ | agne | ūdhan |
tṛtīye | tvā | rajasi | tasthi-vāṁsam | apām | upa-sthe | mahiṣāḥ | avardhan ||10.045.03||

10.045.04a akrandad agniḥ stanayann iva dyauḥ kṣāmā rerihad vīrudhaḥ samañjan |
10.045.04c sadyo jajñāno vi hīm iddho akhyad ā rodasī bhānunā bhāty antaḥ ||

akrandat | agniḥ | stanayan-iva | dyauḥ | kṣāma | rerihat | vīrudhaḥ | sam-añjan |
sadyaḥ | jajñānaḥ | vi | hi | īm | iddhaḥ | akhyat | ā | rodasī iti | bhānunā | bhāti | antariti ||10.045.04||

10.045.05a śrīṇām udāro dharuṇo rayīṇām manīṣāṇām prārpaṇaḥ somagopāḥ |
10.045.05c vasuḥ sūnuḥ sahaso apsu rājā vi bhāty agra uṣasām idhānaḥ ||

śrīṇām | ut-āraḥ | dharuṇaḥ | rayīṇām | manīṣāṇām | pra-arpaṇaḥ | soma-gopāḥ |
vasuḥ | sūnuḥ | sahasaḥ | ap-su | rājā | vi | bhāti | agre | uṣasām | idhānaḥ ||10.045.05||

10.045.06a viśvasya ketur bhuvanasya garbha ā rodasī apṛṇāj jāyamānaḥ |
10.045.06c vīḻuṁ cid adrim abhinat parāyañ janā yad agnim ayajanta pañca ||

viśvasya | ketuḥ | bhuvanasya | garbhaḥ | ā | rodasī iti | apṛṇāt | jāyamānaḥ |
vīḻum | cit | adrim | abhinat | parā-yan | janāḥ | yat | agnim | ayajanta | pañca ||10.045.06||

10.045.07a uśik pāvako aratiḥ sumedhā marteṣv agnir amṛto ni dhāyi |
10.045.07c iyarti dhūmam aruṣam bharibhrad uc chukreṇa śociṣā dyām inakṣan ||

uśik | pāvakaḥ | aratiḥ | su-medhāḥ | marteṣu | agniḥ | amṛtaḥ | ni | dhāyi |
iyarti | dhūmam | aruṣam | bharibhrat | ut | śukreṇa | śociṣā | dyām | inakṣan ||10.045.07||

10.045.08a dṛśāno rukma urviyā vy adyaud durmarṣam āyuḥ śriye rucānaḥ |
10.045.08c agnir amṛto abhavad vayobhir yad enaṁ dyaur janayat suretāḥ ||

dṛśānaḥ | rukmaḥ | urviyā | vi | adyaut | duḥ-marṣam | āyuḥ | śriye | rucānaḥ |
agniḥ | amṛtaḥ | abhavat | vayaḥ-bhiḥ | yat | enam | dyauḥ | janayat | su-retāḥ ||10.045.08||

10.045.09a yas te adya kṛṇavad bhadraśoce 'pūpaṁ deva ghṛtavantam agne |
10.045.09c pra taṁ naya prataraṁ vasyo acchābhi sumnaṁ devabhaktaṁ yaviṣṭha ||

yaḥ | te | adya | kṛṇavat | bhadra-śoce | apūpam | deva | ghṛta-vantam | agne |
pra | tam | naya | pra-taram | vasyaḥ | accha | abhi | sumnam | deva-bhaktam | yaviṣṭha ||10.045.09||

10.045.10a ā tam bhaja sauśravaseṣv agna uktha-uktha ā bhaja śasyamāne |
10.045.10c priyaḥ sūrye priyo agnā bhavāty uj jātena bhinadad uj janitvaiḥ ||

ā | tam | bhaja | sauśravaseṣu | agne | ukthe-ukthe | ā | bhaja | śasyamāne |
priyaḥ | sūrye | priyaḥ | agnā | bhavāti | ut | jātena | bhinadat | ut | jani-tvaiḥ ||10.045.10||

10.045.11a tvām agne yajamānā anu dyūn viśvā vasu dadhire vāryāṇi |
10.045.11c tvayā saha draviṇam icchamānā vrajaṁ gomantam uśijo vi vavruḥ ||

tvām | agne | yajamānāḥ | anu | dyūn | viśvā | vasu | dadhire | vāryāṇi |
tvayā | saha | draviṇam | icchamānāḥ | vrajam | go-mantam | uśijaḥ | vi | vavruḥ ||10.045.11||

10.045.12a astāvy agnir narāṁ suśevo vaiśvānara ṛṣibhiḥ somagopāḥ |
10.045.12c adveṣe dyāvāpṛthivī huvema devā dhatta rayim asme suvīram ||

astāvi | agniḥ | narām | su-śevaḥ | vaiśvānaraḥ | ṛṣi-bhiḥ | soma-gopāḥ |
adveṣe | dyāvāpṛthivī iti | huvema | devāḥ | dhatta | rayim | asme iti | su-vīram ||10.045.12||


10.046.01a pra hotā jāto mahān nabhovin nṛṣadvā sīdad apām upasthe |
10.046.01c dadhir yo dhāyi sa te vayāṁsi yantā vasūni vidhate tanūpāḥ ||

pra | hotā | jātaḥ | mahān | nabhaḥ-vit | nṛ-sadvā | sīdat | apām | upa-sthe |
dadhiḥ | yaḥ | dhāyi | saḥ | te | vayāṁsi | yantā | vasūni | vidhate | tanū-pāḥ ||10.046.01||

10.046.02a imaṁ vidhanto apāṁ sadhasthe paśuṁ na naṣṭam padair anu gman |
10.046.02c guhā catantam uśijo namobhir icchanto dhīrā bhṛgavo 'vindan ||

imam | vidhantaḥ | apām | sadha-sthe | paśum | na | naṣṭam | padaiḥ | anu | gman |
guhā | catantam | uśijaḥ | namaḥ-bhiḥ | icchantaḥ | dhīrāḥ | bhṛgavaḥ | avindan ||10.046.02||

10.046.03a imaṁ trito bhūry avindad icchan vaibhūvaso mūrdhany aghnyāyāḥ |
10.046.03c sa śevṛdho jāta ā harmyeṣu nābhir yuvā bhavati rocanasya ||

imam | tritaḥ | bhūri | avindat | icchan | vaibhu-vasaḥ | mūrdhani | aghnyāyāḥ |
saḥ | śevṛdhaḥ | jātaḥ | ā | harmyeṣu | nābhiḥ | yuvā | bhavati | rocanasya ||10.046.03||

10.046.04a mandraṁ hotāram uśijo namobhiḥ prāñcaṁ yajñaṁ netāram adhvarāṇām |
10.046.04c viśām akṛṇvann aratim pāvakaṁ havyavāhaṁ dadhato mānuṣeṣu ||

mandram | hotāram | uśijaḥ | namaḥ-bhiḥ | prāñcam | yajñam | netāram | adhvarāṇām |
viśām | akṛṇvan | aratim | pāvakam | havya-vāham | dadhataḥ | mānuṣeṣu ||10.046.04||

10.046.05a pra bhūr jayantam mahāṁ vipodhām mūrā amūram purāṁ darmāṇam |
10.046.05c nayanto garbhaṁ vanāṁ dhiyaṁ dhur hiriśmaśruṁ nārvāṇaṁ dhanarcam ||

pra | bhūḥ | jayantam | mahān | vipaḥ-dhām | mūrāḥ | amūram | purām | darmāṇam |
nayantaḥ | garbham | vanām | dhiyam | dhuḥ | hiri-śmaśrum | na | arvāṇam | dhana-arcam ||10.046.05||

10.046.06a ni pastyāsu tritaḥ stabhūyan parivīto yonau sīdad antaḥ |
10.046.06c ataḥ saṁgṛbhyā viśāṁ damūnā vidharmaṇāyantrair īyate nṝn ||

ni | pastyāsu | tritaḥ | stabhu-yan | pari-vītaḥ | yonau | sīdat | antariti |
ataḥ | sam-gṛbhya | viśām | damūnāḥ | vi-dharmaṇā | ayantraiḥ | īyate | nṝn ||10.046.06||

10.046.07a asyājarāso damām aritrā arcaddhūmāso agnayaḥ pāvakāḥ |
10.046.07c śvitīcayaḥ śvātrāso bhuraṇyavo vanarṣado vāyavo na somāḥ ||

asya | ajarāsaḥ | damām | aritrāḥ | arcat-dhūmāsaḥ | agnayaḥ | pāvakāḥ |
śvitīcayaḥ | śvātrāsaḥ | bhuraṇyavaḥ | vana-sadaḥ | vāyavaḥ | na | somāḥ ||10.046.07||

10.046.08a pra jihvayā bharate vepo agniḥ pra vayunāni cetasā pṛthivyāḥ |
10.046.08c tam āyavaḥ śucayantam pāvakam mandraṁ hotāraṁ dadhire yajiṣṭham ||

pra | jihvayā | bharate | vepaḥ | agniḥ | pra | vayunāni | cetasā | pṛthivyāḥ |
tam | āyavaḥ | śucayantam | pāvakam | mandram | hotāram | dadhire | yajiṣṭham ||10.046.08||

10.046.09a dyāvā yam agnim pṛthivī janiṣṭām āpas tvaṣṭā bhṛgavo yaṁ sahobhiḥ |
10.046.09c īḻenyam prathamam mātariśvā devās tatakṣur manave yajatram ||

dyāvā | yam | agnim | pṛthivī iti | janiṣṭām | āpaḥ | tvaṣṭā | bhṛgavaḥ | yam | sahaḥ-bhiḥ |
īḻenyam | prathamam | mātariśvā | devāḥ | tatakṣuḥ | manave | yajatram ||10.046.09||

10.046.10a yaṁ tvā devā dadhire havyavāham puruspṛho mānuṣāso yajatram |
10.046.10c sa yāmann agne stuvate vayo dhāḥ pra devayan yaśasaḥ saṁ hi pūrvīḥ ||

yam | tvā | devāḥ | dadhire | havya-vāham | puru-spṛhaḥ | mānuṣāsaḥ | yajatram |
saḥ | yāman | agne | stuvate | vayaḥ | dhāḥ | pra | deva-yan | yaśasaḥ | sam | hi | pūrvīḥ ||10.046.10||


10.047.01a jagṛbhmā te dakṣiṇam indra hastaṁ vasūyavo vasupate vasūnām |
10.047.01c vidmā hi tvā gopatiṁ śūra gonām asmabhyaṁ citraṁ vṛṣaṇaṁ rayiṁ dāḥ ||

jagṛbhma | te | dakṣiṇam | indra | hastam | vasu-yavaḥ | vasu-pate | vasūnām |
vidma | hi | tvā | go-patim | śūra | gonām | asmabhyam | citram | vṛṣaṇam | rayim | dāḥ ||10.047.01||

10.047.02a svāyudhaṁ svavasaṁ sunīthaṁ catuḥsamudraṁ dharuṇaṁ rayīṇām |
10.047.02c carkṛtyaṁ śaṁsyam bhūrivāram asmabhyaṁ citraṁ vṛṣaṇaṁ rayiṁ dāḥ ||

su-āyudham | su-avasam | su-nītham | catuḥ-samudram | dharuṇam | rayīṇām |
carkṛtyam | śaṁsyam | bhūri-vāram | asmabhyam | citram | vṛṣaṇam | rayim | dāḥ ||10.047.02||

10.047.03a subrahmāṇaṁ devavantam bṛhantam uruṁ gabhīram pṛthubudhnam indra |
10.047.03c śrutaṛṣim ugram abhimātiṣāham asmabhyaṁ citraṁ vṛṣaṇaṁ rayiṁ dāḥ ||

su-brahmāṇam | deva-vantam | bṛhantam | urum | gabhīram | pṛthu-budhnam | indra |
śruta-ṛṣim | ugram | abhimāti-saham | asmabhyam | citram | vṛṣaṇam | rayim | dāḥ ||10.047.03||

10.047.04a sanadvājaṁ vipravīraṁ tarutraṁ dhanaspṛtaṁ śūśuvāṁsaṁ sudakṣam |
10.047.04c dasyuhanam pūrbhidam indra satyam asmabhyaṁ citraṁ vṛṣaṇaṁ rayiṁ dāḥ ||

sanat-vājam | vipra-vīram | tarutram | dhana-spṛtam | śūśu-vāṁsam | su-dakṣam |
dasyuhanam | pūḥ-bhidam | indra | satyam | asmabhyam | citram | vṛṣaṇam | rayim | dāḥ ||10.047.04||

10.047.05a aśvāvantaṁ rathinaṁ vīravantaṁ sahasriṇaṁ śatinaṁ vājam indra |
10.047.05c bhadravrātaṁ vipravīraṁ svarṣām asmabhyaṁ citraṁ vṛṣaṇaṁ rayiṁ dāḥ ||

aśva-vantam | rathinam | vīra-vantam | sahasriṇam | śatinam | vājam | indra |
bhadra-vrātam | vipra-vīram | svaḥ-sām | asmabhyam | citram | vṛṣaṇam | rayim | dāḥ ||10.047.05||

10.047.06a pra saptagum ṛtadhītiṁ sumedhām bṛhaspatim matir acchā jigāti |
10.047.06c ya āṅgiraso namasopasadyo 'smabhyaṁ citraṁ vṛṣaṇaṁ rayiṁ dāḥ ||

pra | sapta-gum | ṛta-dhītim | su-medhām | bṛhaspatim | matiḥ | accha | jigāti |
yaḥ | āṅgirasaḥ | namasā | upa-sadyaḥ | asmabhyam | citram | vṛṣaṇam | rayim | dāḥ ||10.047.06||

10.047.07a vanīvāno mama dūtāsa indraṁ stomāś caranti sumatīr iyānāḥ |
10.047.07c hṛdispṛśo manasā vacyamānā asmabhyaṁ citraṁ vṛṣaṇaṁ rayiṁ dāḥ ||

vanīvānaḥ | mama | dūtāsaḥ | indram | somāḥ | caranti | su-matīḥ | iyānāḥ |
hṛdi-spṛśaḥ | manasā | vacyamānāḥ | asmabhyam | citram | vṛṣaṇam | rayim | dāḥ ||10.047.07||

10.047.08a yat tvā yāmi daddhi tan na indra bṛhantaṁ kṣayam asamaṁ janānām |
10.047.08c abhi tad dyāvāpṛthivī gṛṇītām asmabhyaṁ citraṁ vṛṣaṇaṁ rayiṁ dāḥ ||

yat | tvā | yāmi | daddhi | tat | naḥ | indra | bṛhantam | kṣayam | asamam | janānām |
abhi | tat | dyāvāpṛthivī iti | gṛṇītām | asmabhyam | citram | vṛṣaṇam | rayim | dāḥ ||10.047.08||


10.048.01a aham bhuvaṁ vasunaḥ pūrvyas patir ahaṁ dhanāni saṁ jayāmi śaśvataḥ |
10.048.01c māṁ havante pitaraṁ na jantavo 'haṁ dāśuṣe vi bhajāmi bhojanam ||

aham | bhuvam | vasunaḥ | pūrvyaḥ | patiḥ | aham | dhanāni | sam | jajāmi | śaśvataḥ |
mām | havante | pitaram | na | jantavaḥ | aham | dāśuṣe | vi | bhajāmi | bhojanam ||10.048.01||

10.048.02a aham indro rodho vakṣo atharvaṇas tritāya gā ajanayam aher adhi |
10.048.02c ahaṁ dasyubhyaḥ pari nṛmṇam ā dade gotrā śikṣan dadhīce mātariśvane ||

aham | indraḥ | rodhaḥ | vakṣaḥ | atharvaṇaḥ | tritāyaḥ | gāḥ | ajanayam | aheḥ | adhi |
aham | dasyu-bhyaḥ | pari | nṛmṇam | ā | dade | gotrā | śikṣan | dadhīce | mātariśvane ||10.048.02||

10.048.03a mahyaṁ tvaṣṭā vajram atakṣad āyasam mayi devāso 'vṛjann api kratum |
10.048.03c mamānīkaṁ sūryasyeva duṣṭaram mām āryanti kṛtena kartvena ca ||

mahyam | tvaṣṭā | vajram | atakṣat | āyasam | mayi | devāsaḥ | avṛjan | api | kratum |
mama | anīkam | sūryasya-iva | dustaram | mām | āryanti | kṛtena | kartvena | ca ||10.048.03||

10.048.04a aham etaṁ gavyayam aśvyam paśum purīṣiṇaṁ sāyakenā hiraṇyayam |
10.048.04c purū sahasrā ni śiśāmi dāśuṣe yan mā somāsa ukthino amandiṣuḥ ||

aham | etam | gavyayam | aśvyam | paśum | purīṣiṇam | sāyakena | hiraṇyayam |
puru | sahasrā | ni | śiśāmi | dāśuṣe | yat | mā | somāsaḥ | ukthinaḥ | amandiṣuḥ ||10.048.04||

10.048.05a aham indro na parā jigya id dhanaṁ na mṛtyave 'va tasthe kadā cana |
10.048.05c somam in mā sunvanto yācatā vasu na me pūravaḥ sakhye riṣāthana ||

aham | indraḥ | na | parā | jigye | it | dhanam | na | mṛtyave | ava | tasthe | kadā | cana |
somam | it | mā | sunvantaḥ | yācata | vasu | na | me | pūravaḥ | sakhye | riṣāthana ||10.048.05||

10.048.06a aham etāñ chāśvasato dvā-dvendraṁ ye vajraṁ yudhaye 'kṛṇvata |
10.048.06c āhvayamānām̐ ava hanmanāhanaṁ dṛḻhā vadann anamasyur namasvinaḥ ||

aham | etān | śāśvasataḥ | dvā-dvā | indram | ye | vajram | yudhaye | akṛṇvata |
ā-hvayamānān | ava | hanmanā | ahanam | dṛḻhā | vadan | anamasyuḥ | namasvinaḥ ||10.048.06||

10.048.07a abhīdam ekam eko asmi niṣṣāḻ abhī dvā kim u trayaḥ karanti |
10.048.07c khale na parṣān prati hanmi bhūri kim mā nindanti śatravo 'nindrāḥ ||

abhi | idam | ekam | ekaḥ | asmi | niṣṣāṭ | abhi | dvā | kim | ūm̐ iti | trayaḥ | karanti |
khale | na | parṣān | prati | hanmi | bhūri | kim | mā | nindanti | śatravaḥ | anindrāḥ ||10.048.07||

10.048.08a ahaṁ guṅgubhyo atithigvam iṣkaram iṣaṁ na vṛtraturaṁ vikṣu dhārayam |
10.048.08c yat parṇayaghna uta vā karañjahe prāham mahe vṛtrahatye aśuśravi ||

aham | guṅgu-bhyaḥ | atithi-gvam | iṣkaram | iṣam | na | vṛtra-turam | vikṣu | dhārayam |
yat | parṇaya-ghne | uta | vā | karañja-he | pra | aham | mahe | vṛtra-hatye | aśuśravi ||10.048.08||

10.048.09a pra me namī sāpya iṣe bhuje bhūd gavām eṣe sakhyā kṛṇuta dvitā |
10.048.09c didyuṁ yad asya samitheṣu maṁhayam ād id enaṁ śaṁsyam ukthyaṁ karam ||

pra | me | namī | sāpyaḥ | iṣe | bhuje | bhūt | gavām | eṣe | sakhyā | kṛṇuta | dvitā |
didyum | yat | asya | samitheṣu | maṁhayam | āt | it | enam | śaṁsyam | ukthyam | karam ||10.048.09||

10.048.10a pra nemasmin dadṛśe somo antar gopā nemam āvir asthā kṛṇoti |
10.048.10c sa tigmaśṛṅgaṁ vṛṣabhaṁ yuyutsan druhas tasthau bahule baddho antaḥ ||

pra | nemasmin | dadṛśe | somaḥ | antaḥ | gopāḥ | nemam | āviḥ | asthā | kṛṇoti |
saḥ | tigma-śṛṅgam | vṛṣabham | yuyutsan | druhaḥ | tasthau | bahule | baddhaḥ | antariti ||10.048.10||

10.048.11a ādityānāṁ vasūnāṁ rudriyāṇāṁ devo devānāṁ na mināmi dhāma |
10.048.11c te mā bhadrāya śavase tatakṣur aparājitam astṛtam aṣāḻham ||

ādityānām | vasūnām | rudriyāṇām | devaḥ | devānām | na | mināmi | dhāma |
te | mā | bhadrāya | śavase | tatakṣuḥ | aparā-jitam | astṛtam | aṣāḻham ||10.048.11||


10.049.01a ahaṁ dāṁ gṛṇate pūrvyaṁ vasv aham brahma kṛṇavam mahyaṁ vardhanam |
10.049.01c aham bhuvaṁ yajamānasya coditāyajvanaḥ sākṣi viśvasmin bhare ||

aham | dām | gṛṇate | pūrvyam | vasu | aham | brahma | kṛṇavam | mahyam | vardhanam |
aham | bhuvam | yajamānasya | coditā | ayajvanaḥ | sākṣi | viśvasmin | bhare ||10.049.01||

10.049.02a māṁ dhur indraṁ nāma devatā divaś ca gmaś cāpāṁ ca jantavaḥ |
10.049.02c ahaṁ harī vṛṣaṇā vivratā raghū ahaṁ vajraṁ śavase dhṛṣṇv ā dade ||

mām | dhuḥ | indram | nāma | devatā | divaḥ | ca | gmaḥ | ca | apām | ca | jantavaḥ |
aham | harī iti | vṛṣaṇā | vi-vratā | raghū iti | aham | vajram | śavase | dhṛṣṇu | ā | dade ||10.049.02||

10.049.03a aham atkaṁ kavaye śiśnathaṁ hathair ahaṁ kutsam āvam ābhir ūtibhiḥ |
10.049.03c ahaṁ śuṣṇasya śnathitā vadhar yamaṁ na yo rara āryaṁ nāma dasyave ||

aham | atkam | kavaye | śiśnatham | hathaiḥ | aham | kutsam | āvam | ābhiḥ | ūti-bhiḥ |
aham | śuṣṇasya | śnathitā | vadhaḥ | yamam | na | yaḥ | rare | āryam | nāma | dasyave ||10.049.03||

10.049.04a aham piteva vetasūm̐r abhiṣṭaye tugraṁ kutsāya smadibhaṁ ca randhayam |
10.049.04c aham bhuvaṁ yajamānasya rājani pra yad bhare tujaye na priyādhṛṣe ||

aham | pitā-iva | vetasūn | abhiṣṭaye | tugram | kutsāya | smat-ibham | ca | randhayam |
aham | bhuvam | yajamānasya | rājani | pra | yat | bhare | tujaye | na | priyā | ā-dhṛṣe ||10.049.04||

10.049.05a ahaṁ randhayam mṛgayaṁ śrutarvaṇe yan mājihīta vayunā canānuṣak |
10.049.05c ahaṁ veśaṁ namram āyave 'karam ahaṁ savyāya paḍgṛbhim arandhayam ||

aham | radhayam | mṛgayam | śrutarvaṇe | yat | mā | ajihīta | vayunā | cana | ānuṣak |
aham | veśam | namram | āyave | akaram | aham | savyāya | paṭ-gṛbhim | arandhayam ||10.049.05||

10.049.06a ahaṁ sa yo navavāstvam bṛhadrathaṁ saṁ vṛtreva dāsaṁ vṛtrahārujam |
10.049.06c yad vardhayantam prathayantam ānuṣag dūre pāre rajaso rocanākaram ||

aham | saḥ | yaḥ | nava-vāstvam | bṛhat-ratham | sam | vṛtrā-iva | dāsam | vṛtra-hā | arujam |
yat | vardhayantam | prathayantam | ānuṣak | dūre | pāre | rajasaḥ | rocanā | akaram ||10.049.06||

10.049.07a ahaṁ sūryasya pari yāmy āśubhiḥ praitaśebhir vahamāna ojasā |
10.049.07c yan mā sāvo manuṣa āha nirṇija ṛdhak kṛṣe dāsaṁ kṛtvyaṁ hathaiḥ ||

aham | sūryasya | pari | yāmi | āśu-bhiḥ | pra | etaśebhiḥ | vahamānaḥ | ojasā |
yat | mā | sāvaḥ | manuṣaḥ | āha | niḥ-nije | ṛdhak | kṛṣe | dāsam | kṛtvyam | hathaiḥ ||10.049.07||

10.049.08a ahaṁ saptahā nahuṣo nahuṣṭaraḥ prāśrāvayaṁ śavasā turvaśaṁ yadum |
10.049.08c ahaṁ ny anyaṁ sahasā sahas karaṁ nava vrādhato navatiṁ ca vakṣayam ||

aham | sapta-hā | nahuṣaḥ | nahuḥ-taraḥ | pra | aśravayam | śavasā | turvaśam | yadum |
aham | ni | anyam | sahasā | sahaḥ | karam | nava | vrādhataḥ | navatim | ca | vakṣayam ||10.049.08||

10.049.09a ahaṁ sapta sravato dhārayaṁ vṛṣā dravitnvaḥ pṛthivyāṁ sīrā adhi |
10.049.09c aham arṇāṁsi vi tirāmi sukratur yudhā vidam manave gātum iṣṭaye ||

aham | sapta | sravataḥ | dhārayam | vṛṣā | dravitnvaḥ | pṛthivyām | sīrāḥ | adhi |
aham | arṇāṁsi | vi | tirāmi | su-kratuḥ | yudhā | vidam | manave | gātum | iṣṭaye ||10.049.09||

10.049.10a ahaṁ tad āsu dhārayaṁ yad āsu na devaś cana tvaṣṭādhārayad ruśat |
10.049.10c spārhaṁ gavām ūdhassu vakṣaṇāsv ā madhor madhu śvātryaṁ somam āśiram ||

aham | tat | āsu | dhārayam | yat | āsu | na | devaḥ | cana | tvaṣṭā | adhārayat | ruśat |
spārham | gavām | ūdhaḥ-su | vakṣaṇāsu | ā | madhoḥ | madhu | śvātryam | somam | ā-śiram ||10.049.10||

10.049.11a evā devām̐ indro vivye nṝn pra cyautnena maghavā satyarādhāḥ |
10.049.11c viśvet tā te harivaḥ śacīvo 'bhi turāsaḥ svayaśo gṛṇanti ||

eva | devān | indraḥ | vivye | nṝn | pra | cyautnena | magha-vā | satya-rādhāḥ |
viśvā | it | tā | te | hari-vaḥ | śacī-vaḥ | abhi | turāsaḥ | sva-yaśaḥ | gṛṇanti ||10.049.11||


10.050.01a pra vo mahe mandamānāyāndhaso 'rcā viśvānarāya viśvābhuve |
10.050.01c indrasya yasya sumakhaṁ saho mahi śravo nṛmṇaṁ ca rodasī saparyataḥ ||

pra | vaḥ | mahe | mandamānāya | andhasaḥ | arca | viśvānarāya | viśva-bhuve |
indrasya | yasya | su-makham | sahaḥ | mahi | śravaḥ | nṛmṇam | ca | rodasī iti | saparyataḥ ||10.050.01||

10.050.02a so cin nu sakhyā narya inaḥ stutaś carkṛtya indro māvate nare |
10.050.02c viśvāsu dhūrṣu vājakṛtyeṣu satpate vṛtre vāpsv abhi śūra mandase ||

saḥ | cit | nu | sakhyā | naryaḥ | inaḥ | stutaḥ | carkṛtyaḥ | indraḥ | mā-vate | nare |
viśvāsu | dhūḥ-su | vāja-kṛtyeṣu | sat-pate | vṛtre | vā | ap-su | abhi | śūra | mandase ||10.050.02||

10.050.03a ke te nara indra ye ta iṣe ye te sumnaṁ sadhanyam iyakṣān |
10.050.03c ke te vājāyāsuryāya hinvire ke apsu svāsūrvarāsu pauṁsye ||

ke | te | naraḥ | indra | ye | te | iṣe | ye | te | sumnam | sa-dhanyam | iyakṣān |
ke | te | vājāya | asuryāya | hinvire | ke | ap-su | svāsu | urvarāsu | pauṁsye ||10.050.03||

10.050.04a bhuvas tvam indra brahmaṇā mahān bhuvo viśveṣu savaneṣu yajñiyaḥ |
10.050.04c bhuvo nṝm̐ś cyautno viśvasmin bhare jyeṣṭhaś ca mantro viśvacarṣaṇe ||

bhuvaḥ | tvam | indra | brahmaṇā | mahān | bhuvaḥ | viśveṣu | savaneṣu | yajñiyaḥ |
bhuvaḥ | nṝn | cyautnaḥ | viśvasmin | bhare | jyeṣṭhaḥ | ca | mantraḥ | viśva-carṣaṇe ||10.050.04||

10.050.05a avā nu kaṁ jyāyān yajñavanaso mahīṁ ta omātrāṁ kṛṣṭayo viduḥ |
10.050.05c aso nu kam ajaro vardhāś ca viśved etā savanā tūtumā kṛṣe ||

ava | nu | kam | jyāyān | yajña-vanasaḥ | mahīm | te | omātrām | kṛṣṭayaḥ | viduḥ |
asaḥ | nu | kam | ajaraḥ | vardhāḥ | ca | viśvā | it | etā | savanā | tūtumā | kṛṣe ||10.050.05||

10.050.06a etā viśvā savanā tūtumā kṛṣe svayaṁ sūno sahaso yāni dadhiṣe |
10.050.06c varāya te pātraṁ dharmaṇe tanā yajño mantro brahmodyataṁ vacaḥ ||

etā | viśvā | savanā | tūtumā | kṛṣe | svayam | sūno iti | sahasaḥ | yāni | dadhiṣe |
varāya | te | pātram | dharmaṇe | tanā | yajñaḥ | mantraḥ | brahma | ut-yatam | vacaḥ ||10.050.06||

10.050.07a ye te vipra brahmakṛtaḥ sute sacā vasūnāṁ ca vasunaś ca dāvane |
10.050.07c pra te sumnasya manasā pathā bhuvan made sutasya somyasyāndhasaḥ ||

ye | te | vipra | brahma-kṛtaḥ | sute | sacā | vasūnām | ca | vasunaḥ | ca | dāvane |
pra | te | sumnasya | manasā | pathā | bhuvan | made | sutasya | somyasya | andhasaḥ ||10.050.07||


10.051.01a mahat tad ulbaṁ sthaviraṁ tad āsīd yenāviṣṭitaḥ praviveśithāpaḥ |
10.051.01c viśvā apaśyad bahudhā te agne jātavedas tanvo deva ekaḥ ||

mahat | tat | ulbam | sthaviram | tat | āsīt | yena | ā-viṣṭitaḥ | pra-viveśitha | apaḥ |
viśvāḥ | apaśyat | bahudhā | te | agne | jāta-vedaḥ | tanvaḥ | devaḥ | ekaḥ ||10.051.01||

10.051.02a ko mā dadarśa katamaḥ sa devo yo me tanvo bahudhā paryapaśyat |
10.051.02c kvāha mitrāvaruṇā kṣiyanty agner viśvāḥ samidho devayānīḥ ||

kaḥ | mā | dadarśa | katamaḥ | saḥ | devaḥ | yaḥ | me | tanvaḥ | bahudhā | pari-apaśyat |
kva | aha | mitrāvaruṇā | kṣiyanti | agneḥ | viśvāḥ | sam-idhaḥ | deva-yānīḥ ||10.051.02||

10.051.03a aicchāma tvā bahudhā jātavedaḥ praviṣṭam agne apsv oṣadhīṣu |
10.051.03c taṁ tvā yamo acikec citrabhāno daśāntaruṣyād atirocamānam ||

aicchāma | tvā | bahudhā | jāta-vedaḥ | pra-viṣṭam | agne | ap-su | oṣadhīṣu |
tam | tvā | yamaḥ | aciket | citrabhāno iti citra-bhāno | daśa-antaruṣyāt | ati-rocamānam ||10.051.03||

10.051.04a hotrād ahaṁ varuṇa bibhyad āyaṁ ned eva mā yunajann atra devāḥ |
10.051.04c tasya me tanvo bahudhā niviṣṭā etam arthaṁ na ciketāham agniḥ ||

hotrāt | aham | varuṇa | bibhyat | āyam | na | it | eva | mā | yunajan | atra | devāḥ |
tasya | me | tanvaḥ | bahudhā | ni-viṣṭāḥ | etam | artham | na | ciketa | aham | agniḥ ||10.051.04||

10.051.05a ehi manur devayur yajñakāmo 'raṁkṛtyā tamasi kṣeṣy agne |
10.051.05c sugān pathaḥ kṛṇuhi devayānān vaha havyāni sumanasyamānaḥ ||

ā | ihi | manuḥ | deva-yuḥ | yajña-kāmaḥ | aram-kṛtya | tamasi | kṣeṣi | agne |
su-gān | pathaḥ | kṛṇuhi | deva-yānān | vaha | havyāni | su-manasyamānaḥ ||10.051.05||

10.051.06a agneḥ pūrve bhrātaro artham etaṁ rathīvādhvānam anv āvarīvuḥ |
10.051.06c tasmād bhiyā varuṇa dūram āyaṁ gauro na kṣepnor avije jyāyāḥ ||

agneḥ | pūrve | bhrātaraḥ | artham | etam | rathī-iva | adhvānam | anu | ā | avarīvuriti |
tasmāt | bhiyā | varuṇa | dūram | āyam | gauraḥ | na | kṣepnoḥ | āvije | jyāyāḥ ||10.051.06||

10.051.07a kurmas ta āyur ajaraṁ yad agne yathā yukto jātavedo na riṣyāḥ |
10.051.07c athā vahāsi sumanasyamāno bhāgaṁ devebhyo haviṣaḥ sujāta ||

kurmaḥ | te | āyuḥ | ajaram | yat | agne | yathā | yuktaḥ | jāta-vedaḥ | na | riṣyāḥ |
atha | vahāsi | su-manasyamānaḥ | bhāgam | devebhyaḥ | haviṣaḥ | su-jāta ||10.051.07||

10.051.08a prayājān me anuyājām̐ś ca kevalān ūrjasvantaṁ haviṣo datta bhāgam |
10.051.08c ghṛtaṁ cāpām puruṣaṁ cauṣadhīnām agneś ca dīrgham āyur astu devāḥ ||

pra-yājān | me | anu-yājān | ca | kevalān | ūrjasvantam | haviṣaḥ | datta | bhāgam |
ghṛtam | ca | apām | puruṣam | ca | oṣadhīnām | agneḥ | ca | dīrgham | āyuḥ | astu | devāḥ ||10.051.08||

10.051.09a tava prayājā anuyājāś ca kevala ūrjasvanto haviṣaḥ santu bhāgāḥ |
10.051.09c tavāgne yajño 'yam astu sarvas tubhyaṁ namantām pradiśaś catasraḥ ||

tava | pra-yājāḥ | anu-yājāḥ | ca | kevale | ūrjasvantaḥ | haviṣaḥ | santu | bhāgāḥ |
tava | agne | yajñaḥ | ayam | astu | sarvaḥ | tubhyam | namantām | pra-diśaḥ | catasraḥ ||10.051.09||


10.052.01a viśve devāḥ śāstana mā yatheha hotā vṛto manavai yan niṣadya |
10.052.01c pra me brūta bhāgadheyaṁ yathā vo yena pathā havyam ā vo vahāni ||

viśve | devāḥ | śāstana | mā | yathā | iha | hotā | vṛtaḥ | manavai | yat | ni-sadya |
pra | me | brūta | bhāga-dheyam | yathā | vaḥ | yena | pathā | havyam | ā | vaḥ | vahāni ||10.052.01||

10.052.02a ahaṁ hotā ny asīdaṁ yajīyān viśve devā maruto mā junanti |
10.052.02c ahar-ahar aśvinādhvaryavaṁ vām brahmā samid bhavati sāhutir vām ||

aham | hotā | ni | asīdam | yajīyān | viśve | devāḥ | marutaḥ | mā | junanti |
ahaḥ-ahaḥ | aśvinā | ādhvaryavam | vām | brahmā | sam-it | bhavati | sā | ā-hutiḥ | vām ||10.052.02||

10.052.03a ayaṁ yo hotā kir u sa yamasya kam apy ūhe yat samañjanti devāḥ |
10.052.03c ahar-ahar jāyate māsi-māsy athā devā dadhire havyavāham ||

ayam | yaḥ | hotā | kiḥ | ūm̐ iti | saḥ | yamasya | kam | api | ūhe | yat | sam-añjanti | devāḥ |
ahaḥ-ahaḥ | jāyate | māsi-māsi | atha | devāḥ | dadhire | havya-vāham ||10.052.03||

10.052.04a māṁ devā dadhire havyavāham apamluktam bahu kṛcchrā carantam |
10.052.04c agnir vidvān yajñaṁ naḥ kalpayāti pañcayāmaṁ trivṛtaṁ saptatantum ||

mām | devāḥ | dadhire | havya-vāham | apa-mluktam | bahu | kṛcchrā | carantam |
agniḥ | vidvān | yajñam | naḥ | kalpayāti | pañca-yāmam | tri-vṛtam | sapta-tantum ||10.052.04||

10.052.05a ā vo yakṣy amṛtatvaṁ suvīraṁ yathā vo devā varivaḥ karāṇi |
10.052.05c ā bāhvor vajram indrasya dheyām athemā viśvāḥ pṛtanā jayāti ||

ā | vaḥ | yakṣi | amṛta-tvam | su-vīram | yathā | vaḥ | devāḥ | varivaḥ | karāṇi |
ā | bāhvoḥ | vajram | indrasya | dheyām | atha | imāḥ | viśvāḥ | pṛtanāḥ | jayāti ||10.052.05||

10.052.06a trīṇi śatā trī sahasrāṇy agniṁ triṁśac ca devā nava cāsaparyan |
10.052.06c aukṣan ghṛtair astṛṇan barhir asmā ād id dhotāraṁ ny asādayanta ||

trīṇi | śatā | trī | sahasrāṇi | agnim | triṁśat | ca | devāḥ | nava | ca | asaparyan |
aukṣan | ghṛtaiḥ | astṛṇan | barhiḥ | asmai | āt | it | hotāram | ni | asādayanta ||10.052.06||


10.053.01a yam aicchāma manasā so 'yam āgād yajñasya vidvān paruṣaś cikitvān |
10.053.01c sa no yakṣad devatātā yajīyān ni hi ṣatsad antaraḥ pūrvo asmat ||

yam | aicchāma | manasā | saḥ | ayam | ā | agāt | yajñasya | vidvān | paruṣaḥ | cikitvān |
saḥ | naḥ | yakṣat | deva-tātā | yajīyān | ni | hi | satsat | antaraḥ | pūrvaḥ | asmat ||10.053.01||

10.053.02a arādhi hotā niṣadā yajīyān abhi prayāṁsi sudhitāni hi khyat |
10.053.02c yajāmahai yajñiyān hanta devām̐ īḻāmahā īḍyām̐ ājyena ||

arādhi | hotā | ni-sadā | yajīyān | abhi | prayāṁsi | su-dhitāni | hi | khyat |
yajāmahai | yajñiyān | hanta | devān | īḻāmahai | īḍyān | ājyena ||10.053.02||

10.053.03a sādhvīm akar devavītiṁ no adya yajñasya jihvām avidāma guhyām |
10.053.03c sa āyur āgāt surabhir vasāno bhadrām akar devahūtiṁ no adya ||

sādhvīm | akaḥ | deva-vītim | naḥ | adya | yajñasya | jihvām | avidāma | guhyām |
saḥ | āyuḥ | ā | agāt | surabhiḥ | vasānaḥ | bhadrām | akaḥ | deva-hūtim | naḥ | adya ||10.053.03||

10.053.04a tad adya vācaḥ prathamam masīya yenāsurām̐ abhi devā asāma |
10.053.04c ūrjāda uta yajñiyāsaḥ pañca janā mama hotraṁ juṣadhvam ||

tat | adya | vāca | prathamam | masīya | yena | asurān | abhi | devāḥ | asāma |
ūrja-adaḥ | uta | yajñiyāsaḥ | pañca | janāḥ | mama | hotram | juṣadhvam ||10.053.04||

10.053.05a pañca janā mama hotraṁ juṣantāṁ gojātā uta ye yajñiyāsaḥ |
10.053.05c pṛthivī naḥ pārthivāt pātv aṁhaso 'ntarikṣaṁ divyāt pātv asmān ||

pañca | janāḥ | mama | hotram | juṣantām | go-jātāḥ | uta | ye | yajñiyāsaḥ |
pṛthivī | naḥ | pārthivāt | pātu | aṁhasaḥ | antarikṣam | divyāt | pātu | asmān ||10.053.05||

10.053.06a tantuṁ tanvan rajaso bhānum anv ihi jyotiṣmataḥ patho rakṣa dhiyā kṛtān |
10.053.06c anulbaṇaṁ vayata joguvām apo manur bhava janayā daivyaṁ janam ||

tantum | tanvan | rajasaḥ | bhānum | anu | ihi | jyotiṣmataḥ | pathaḥ | rakṣa | dhiyā | kṛtān |
anulbaṇam | vayata | joguvām | apaḥ | manuḥ | bhava | janaya | daivyam | janam ||10.053.06||

10.053.07a akṣānaho nahyatanota somyā iṣkṛṇudhvaṁ raśanā ota piṁśata |
10.053.07c aṣṭāvandhuraṁ vahatābhito rathaṁ yena devāso anayann abhi priyam ||

akṣa-nahaḥ | nahyatana | uta | somyāḥ | iṣkṛṇudhvam | raśanāḥ | ā | uta | piṁśata |
aṣṭā-vandhuram | vahata | abhitaḥ | ratham | yena | devāsaḥ | anayan | abhi | priyam ||10.053.07||

10.053.08a aśmanvatī rīyate saṁ rabhadhvam ut tiṣṭhata pra taratā sakhāyaḥ |
10.053.08c atrā jahāma ye asann aśevāḥ śivān vayam ut taremābhi vājān ||

aśman-vatī | rīyate | sam | rabhadhvam | ut | tiṣṭhata | pra | tarata | sakhāyaḥ |
atra | jahāma | ye | asan | aśevāḥ | śivān | vayam | ut | tarema | abhi | vājān ||10.053.08||

10.053.09a tvaṣṭā māyā ved apasām apastamo bibhrat pātrā devapānāni śaṁtamā |
10.053.09c śiśīte nūnam paraśuṁ svāyasaṁ yena vṛścād etaśo brahmaṇas patiḥ ||

tvaṣṭā | māyā | vet | apasām | apaḥ-tamaḥ | bibhrat | pātrā | deva-pānāni | śam-tamā |
śiśīte | nūnam | paraśum | su-āyasam | yena | vṛścāt | etaśaḥ | brahmaṇaḥ | patiḥ ||10.053.09||

10.053.10a sato nūnaṁ kavayaḥ saṁ śiśīta vāśībhir yābhir amṛtāya takṣatha |
10.053.10c vidvāṁsaḥ padā guhyāni kartana yena devāso amṛtatvam ānaśuḥ ||

sataḥ | nūnam | kavayaḥ | sam | śiśīta | vāśībhiḥ | yābhiḥ | amṛtāya | takṣatha |
vidvāṁsaḥ | padā | guhyāni | kartana | yena | devāsaḥ | amṛta-tvam | ānaśuḥ ||10.053.10||

10.053.11a garbhe yoṣām adadhur vatsam āsany apīcyena manasota jihvayā |
10.053.11c sa viśvāhā sumanā yogyā abhi siṣāsanir vanate kāra ij jitim ||

garbhe | yoṣām | adadhuḥ | vatsam | āsani | apīcyena | manasā | uta | jihvayā |
saḥ | viśvāhā | su-manāḥ | yogyāḥ | abhi | sasāsaniḥ | vanate | kāraḥ | it | jitim ||10.053.11||


10.054.01a tāṁ su te kīrtim maghavan mahitvā yat tvā bhīte rodasī ahvayetām |
10.054.01c prāvo devām̐ ātiro dāsam ojaḥ prajāyai tvasyai yad aśikṣa indra ||

tām | su | te | kīrtim | magha-van | mahi-tvā | yat | tvā | bhīte iti | rodasī iti | ahvayetām |
pra | āvaḥ | devān | ā | atiraḥ | dāsam | ojaḥ | pra-jāyai | tvasyai | yat | aśikṣaḥ | indra ||10.054.01||

10.054.02a yad acaras tanvā vāvṛdhāno balānīndra prabruvāṇo janeṣu |
10.054.02c māyet sā te yāni yuddhāny āhur nādya śatruṁ nanu purā vivitse ||

yat | acaraḥ | tanvā | vavṛdhānaḥ | balāni | indra | pra-bruvāṇaḥ | janeṣu |
māyā | it | sā | te | yāni | yuddhāni | āhuḥ | na | adya | śatrum | nanu | purā | vivitse ||10.054.02||

10.054.03a ka u nu te mahimanaḥ samasyāsmat pūrva ṛṣayo 'ntam āpuḥ |
10.054.03c yan mātaraṁ ca pitaraṁ ca sākam ajanayathās tanvaḥ svāyāḥ ||

ke | ūm̐ iti | nu | te | mahimanaḥ | samasya | asmat | pūrve | ṛṣayaḥ | antam | āpuḥ |
yat | mātaram | ca | pitaram | ca | sākam | ajanayathāḥ | tanvaḥ | svāyāḥ ||10.054.03||

10.054.04a catvāri te asuryāṇi nāmādābhyāni mahiṣasya santi |
10.054.04c tvam aṅga tāni viśvāni vitse yebhiḥ karmāṇi maghavañ cakartha ||

catvāri | te | asuryāṇi | nāma | adābhyāni | mahiṣasya | santi |
tvam | aṅga | tāni | viśvāni | vitse | yebhiḥ | karmāṇi | magha-van | cakartha ||10.054.04||

10.054.05a tvaṁ viśvā dadhiṣe kevalāni yāny āvir yā ca guhā vasūni |
10.054.05c kāmam in me maghavan mā vi tārīs tvam ājñātā tvam indrāsi dātā ||

tvam | viśvā | dadhiṣe | kevalāni | yāni | āviḥ | yā | ca | guhā | vasūni |
kāmam | it | me | magha-van | mā | vi | tārīḥ | tvam | ā-jñātā | tvam | indra | asi | dātā ||10.054.05||

10.054.06a yo adadhāj jyotiṣi jyotir antar yo asṛjan madhunā sam madhūni |
10.054.06c adha priyaṁ śūṣam indrāya manma brahmakṛto bṛhadukthād avāci ||

yaḥ | adadhāt | jyotiṣi | jyotiḥ | antaḥ | yaḥ | asṛjat | madhunā | sam | madhūni |
adha | priyam | śūṣam | indrāya | manma | brahma-kṛtaḥ | bṛhat-ukthāt | avāci ||10.054.06||


10.055.01a dūre tan nāma guhyam parācair yat tvā bhīte ahvayetāṁ vayodhai |
10.055.01c ud astabhnāḥ pṛthivīṁ dyām abhīke bhrātuḥ putrān maghavan titviṣāṇaḥ ||

dūre | tat | nāma | guhyam | parācaiḥ | yat | tvā | bhīte iti | ahvayetām | vayaḥ-dhai |
ut | astabhnāḥ | pṛthivīm | dyām | abhīke | bhrātuḥ | putrān | magha-van | titviṣāṇaḥ ||10.055.01||

10.055.02a mahat tan nāma guhyam puruspṛg yena bhūtaṁ janayo yena bhavyam |
10.055.02c pratnaṁ jātaṁ jyotir yad asya priyam priyāḥ sam aviśanta pañca ||

mahat | tat | nāma | guhyam | puru-spṛk | yena | bhūtam | janayaḥ | yena | bhavyam |
pratnam | jātam | jyotiḥ | yat | asya | priyam | priyāḥ | sam | aviśanta | pañca ||10.055.02||

10.055.03a ā rodasī apṛṇād ota madhyam pañca devām̐ ṛtuśaḥ sapta-sapta |
10.055.03c catustriṁśatā purudhā vi caṣṭe sarūpeṇa jyotiṣā vivratena ||

ā | rodasī iti | apṛṇāt | ā | uta | madhyam | pañca | devān | ṛtu-śaḥ | sapta-sapta |
catuḥ-triṁśatā | purudhā | vi | caṣṭe | sa-rūpeṇa | jyotiṣā | vi-vratena ||10.055.03||

10.055.04a yad uṣa aucchaḥ prathamā vibhānām ajanayo yena puṣṭasya puṣṭam |
10.055.04c yat te jāmitvam avaram parasyā mahan mahatyā asuratvam ekam ||

yat | uṣaḥ | aucchaḥ | prathamā | vi-bhānām | ajanayaḥ | yena | puṣṭasya | puṣṭam |
yat | te | jāmi-tvam | avaram | parasyāḥ | mahat | mahatyāḥ | asura-tvam | ekam ||10.055.04||

10.055.05a vidhuṁ dadrāṇaṁ samane bahūnāṁ yuvānaṁ santam palito jagāra |
10.055.05c devasya paśya kāvyam mahitvādyā mamāra sa hyaḥ sam āna ||

vidhum | dadrāṇam | samane | bahūnām | yuvānam | santam | palitaḥ | jagāra |
devasya | paśya | kāvyam | mahi-tvā | adya | mamāra | saḥ | hyaḥ | sam | āna ||10.055.05||

10.055.06a śākmanā śāko aruṇaḥ suparṇa ā yo mahaḥ śūraḥ sanād anīḻaḥ |
10.055.06c yac ciketa satyam it tan na moghaṁ vasu spārham uta jetota dātā ||

śākmanā | śākaḥ | aruṇaḥ | su-parṇaḥ | ā | yaḥ | mahaḥ | śūraḥ | sanāt | anīḻaḥ |
yat | ciketa | satyam | it | tat | na | mogham | vasu | spārham | uta | jetā | uta | dātā ||10.055.06||

10.055.07a aibhir dade vṛṣṇyā pauṁsyāni yebhir aukṣad vṛtrahatyāya vajrī |
10.055.07c ye karmaṇaḥ kriyamāṇasya mahna ṛtekarmam udajāyanta devāḥ ||

ā | ebhiḥ | dade | vṛṣṇyā | pauṁsyāni | yebhiḥ | aukṣat | vṛtra-hatyāya | vajrī |
ye | karmaṇaḥ | kriyamāṇasya | mahnā | ṛte-karmam | ut-ajāyanta | devāḥ ||10.055.07||

10.055.08a yujā karmāṇi janayan viśvaujā aśastihā viśvamanās turāṣāṭ |
10.055.08c pītvī somasya diva ā vṛdhānaḥ śūro nir yudhādhamad dasyūn ||

yujā | karmāṇi | janayan | viśvā-ojāḥ | aśasti-hā | viśva-manāḥ | turāṣāṭ |
pītvī | somasya | divaḥ | ā | vṛdhānaḥ | śūraḥ | niḥ | yudhā | adhamat | dasyūn ||10.055.08||


10.056.01a idaṁ ta ekam para ū ta ekaṁ tṛtīyena jyotiṣā saṁ viśasva |
10.056.01c saṁveśane tanvaś cārur edhi priyo devānām parame janitre ||

idam | te | ekam | paraḥ | ūm̐ iti | te | ekam | tṛtīyena | jyotiṣā | sam | viśasva |
sam-veśane | tanvaḥ | cāruḥ | edhi | priyaḥ | devānām | parame | janitre ||10.056.01||

10.056.02a tanūṣ ṭe vājin tanvaṁ nayantī vāmam asmabhyaṁ dhātu śarma tubhyam |
10.056.02c ahruto maho dharuṇāya devān divīva jyotiḥ svam ā mimīyāḥ ||

tanūḥ | te | vājin | tanvam | nayantī | vāmam | asmabhyam | dhātu | śarma | tubhyam |
ahrutaḥ | mahaḥ | dharuṇāya | devān | divi-iva | jyotiḥ | svam | ā | mimīyāḥ ||10.056.02||

10.056.03a vājy asi vājinenā suvenīḥ suvitaḥ stomaṁ suvito divaṁ gāḥ |
10.056.03c suvito dharma prathamānu satyā suvito devān suvito 'nu patma ||

vājī | asi | vājinena | su-venīḥ | suvitaḥ | stomam | suvitaḥ | divam | gāḥ |
suvitaḥ | dharma | prathamā | anu | satyā | suvitaḥ | devān | suvitaḥ | anu | patma ||10.056.03||

10.056.04a mahimna eṣām pitaraś caneśire devā deveṣv adadhur api kratum |
10.056.04c sam avivyacur uta yāny atviṣur aiṣāṁ tanūṣu ni viviśuḥ punaḥ ||

mahimnaḥ | eṣām | pitaraḥ | cana | īśire | devāḥ | deveṣu | adadhuḥ | api | kratum |
sam | avivyacuḥ | uta | yāni | atviṣuḥ | ā | eṣām | tanūṣu | ni | viviśuḥ | punariti ||10.056.04||

10.056.05a sahobhir viśvam pari cakramū rajaḥ pūrvā dhāmāny amitā mimānāḥ |
10.056.05c tanūṣu viśvā bhuvanā ni yemire prāsārayanta purudha prajā anu ||

sahaḥ-bhiḥ | viśvam | pari | cakramuḥ | rajaḥ | pūrvā | dhāmāni | amitā | mimānāḥ |
tanūṣu | viśvā | bhuvanā | ni | yemire | pra | asārayanta | purudha | pra-jāḥ | anu ||10.056.05||

10.056.06a dvidhā sūnavo 'suraṁ svarvidam āsthāpayanta tṛtīyena karmaṇā |
10.056.06c svām prajām pitaraḥ pitryaṁ saha āvareṣv adadhus tantum ātatam ||

dvidhā | sūnavaḥ | asuram | svaḥ-vidam | ā | asthāpayanta | tṛtīyena | karmaṇā |
svām | pra-jām | pitaraḥ | pitryam | sahaḥ | ā | avareṣu | adadhuḥ | tantum | ā-tatam ||10.056.06||

10.056.07a nāvā na kṣodaḥ pradiśaḥ pṛthivyāḥ svastibhir ati durgāṇi viśvā |
10.056.07c svām prajām bṛhaduktho mahitvāvareṣv adadhād ā pareṣu ||

nāvā | na | kṣodaḥ | pra-diśaḥ | pṛthivyāḥ | svasti-bhiḥ | ati | duḥ-gāni | viśvā |
svām | pra-jām | bṛhat-ukthaḥ | mahi-tvā | ā | avareṣu | adadhāt | ā | pareṣu ||10.056.07||


10.057.01a mā pra gāma patho vayam mā yajñād indra sominaḥ |
10.057.01c mānta sthur no arātayaḥ ||

mā | pra | gāma | pathaḥ | vayam | mā | yajñāt | indra | sominaḥ |
mā | antariti | sthuḥ | naḥ | arātayaḥ ||10.057.01||

10.057.02a yo yajñasya prasādhanas tantur deveṣv ātataḥ |
10.057.02c tam āhutaṁ naśīmahi ||

yaḥ | yajñasya | pra-sādhanaḥ | tantuḥ | deveṣu | ā-tataḥ |
tam | ā-hutam | naśīmahi ||10.057.02||

10.057.03a mano nv ā huvāmahe nārāśaṁsena somena |
10.057.03c pitṝṇāṁ ca manmabhiḥ ||

manaḥ | nu | ā | huvāmahe | nārāśaṁsena | somena |
pitṝṇām | ca | manma-bhiḥ ||10.057.03||

10.057.04a ā ta etu manaḥ punaḥ kratve dakṣāya jīvase |
10.057.04c jyok ca sūryaṁ dṛśe ||

ā | te | etu | manaḥ | punariti | kratve | dakṣāya | jīvase |
jyok | ca | sūryam | dṛśe ||10.057.04||

10.057.05a punar naḥ pitaro mano dadātu daivyo janaḥ |
10.057.05c jīvaṁ vrātaṁ sacemahi ||

punaḥ | naḥ | pitaraḥ | manaḥ | dadātu | daivyaḥ | janaḥ |
jīvam | vrātam | sacemahi ||10.057.05||

10.057.06a vayaṁ soma vrate tava manas tanūṣu bibhrataḥ |
10.057.06c prajāvantaḥ sacemahi ||

vayam | soma | vrate | tava | manaḥ | tanūṣu | bibhrataḥ |
prajā-vantaḥ | sacemahi ||10.057.06||


10.058.01a yat te yamaṁ vaivasvatam mano jagāma dūrakam |
10.058.01c tat ta ā vartayāmasīha kṣayāya jīvase ||

yat | te | yamam | vaivasvatam | manaḥ | jagāma | dūrakam |
tat | te | ā | vartayāmasi | iha | kṣayāya | jīvase ||10.058.01||

10.058.02a yat te divaṁ yat pṛthivīm mano jagāma dūrakam |
10.058.02c tat ta ā vartayāmasīha kṣayāya jīvase ||

yat | te | divam | yat | pṛthivīm | manaḥ | jagāma | dūrakam |
tat | te | ā | vartayāmasi | iha | kṣayāya | jīvase ||10.058.02||

10.058.03a yat te bhūmiṁ caturbhṛṣṭim mano jagāma dūrakam |
10.058.03c tat ta ā vartayāmasīha kṣayāya jīvase ||

yat | te | bhūmim | catuḥ-bhṛṣṭim | manaḥ | jagāma | dūrakam |
tat | te | ā | vartayāmasi | iha | kṣayāya | jīvase ||10.058.03||

10.058.04a yat te catasraḥ pradiśo mano jagāma dūrakam |
10.058.04c tat ta ā vartayāmasīha kṣayāya jīvase ||

yat | te | catasraḥ | pra-diśaḥ | manaḥ | jagāma | dūrakam |
tat | te | ā | vartayāmasi | iha | kṣayāya | jīvase ||10.058.04||

10.058.05a yat te samudram arṇavam mano jagāma dūrakam |
10.058.05c tat ta ā vartayāmasīha kṣayāya jīvase ||

yat | te | samudram | arṇavam | manaḥ | jagāma | dūrakam |
tat | te | ā | vartayāmasi | iha | kṣayāya | jīvase ||10.058.05||

10.058.06a yat te marīcīḥ pravato mano jagāma dūrakam |
10.058.06c tat ta ā vartayāmasīha kṣayāya jīvase ||

yat | te | marīcīḥ | pra-vataḥ | manaḥ | jagāma | dūrakam |
tat | te | ā | vartayāmasi | iha | kṣayāya | jīvase ||10.058.06||

10.058.07a yat te apo yad oṣadhīr mano jagāma dūrakam |
10.058.07c tat ta ā vartayāmasīha kṣayāya jīvase ||

yat | te | apaḥ | yat | oṣadhīḥ | manaḥ | jagāma | dūrakam |
tat | te | ā | vartayāmasi | iha | kṣayāya | jīvase ||10.058.07||

10.058.08a yat te sūryaṁ yad uṣasam mano jagāma dūrakam |
10.058.08c tat ta ā vartayāmasīha kṣayāya jīvase ||

yat | te | sūryam | yat | uṣasam | manaḥ | jagāma | dūrakam |
tat | te | ā | vartayāmasi | iha | kṣayāya | jīvase ||10.058.08||

10.058.09a yat te parvatān bṛhato mano jagāma dūrakam |
10.058.09c tat ta ā vartayāmasīha kṣayāya jīvase ||

yat | te | parvatān | bṛhataḥ | manaḥ | jagāma | dūrakam |
tat | te | ā | vartayāmasi | iha | kṣayāya | jīvase ||10.058.09||

10.058.10a yat te viśvam idaṁ jagan mano jagāma dūrakam |
10.058.10c tat ta ā vartayāmasīha kṣayāya jīvase ||

yat | te | viśvam | idam | jagat | manaḥ | jagāma | dūrakam |
tat | te | ā | vartayāmasi | iha | kṣayāya | jīvase ||10.058.10||

10.058.11a yat te parāḥ parāvato mano jagāma dūrakam |
10.058.11c tat ta ā vartayāmasīha kṣayāya jīvase ||

yat | te | parāḥ | parā-vataḥ | manaḥ | jagāma | dūrakam |
tat | te | ā | vartayāmasi | iha | kṣayāya | jīvase ||10.058.11||

10.058.12a yat te bhūtaṁ ca bhavyaṁ ca mano jagāma dūrakam |
10.058.12c tat ta ā vartayāmasīha kṣayāya jīvase ||

yat | te | bhūtam | ca | bhavyam | ca | manaḥ | jagāma | dūrakam |
tat | te | ā | vartayāmasi | iha | kṣayāya | jīvase ||10.058.12||


10.059.01a pra tāry āyuḥ prataraṁ navīyaḥ sthātāreva kratumatā rathasya |
10.059.01c adha cyavāna ut tavīty artham parātaraṁ su nirṛtir jihītām ||

pra | tāri | āyuḥ | pra-taram | navīyaḥ | sthātārā-iva | kratu-matā | rathasya |
adha | cyavānaḥ | ut | tavīti | artham | parā-taram | su | niḥ-ṛtiḥ | jihītām ||10.059.01||

10.059.02a sāman nu rāye nidhiman nv annaṁ karāmahe su purudha śravāṁsi |
10.059.02c tā no viśvāni jaritā mamattu parātaraṁ su nirṛtir jihītām ||

sāman | nu | rāye | nidhi-mat | nu | annam | karāmahe | su | purudha | śravāṁsi |
tā | naḥ | viśvāni | jaritā | mamattu | parā-taram | su | niḥ-ṛtiḥ | jihītām ||10.059.02||

10.059.03a abhī ṣv aryaḥ pauṁsyair bhavema dyaur na bhūmiṁ girayo nājrān |
10.059.03c tā no viśvāni jaritā ciketa parātaraṁ su nirṛtir jihītām ||

abhi | su | aryaḥ | pauṁsyaiḥ | bhavema | dyauḥ | na | bhūmim | girayaḥ | na | ajrān |
tā | naḥ | viśvāni | jaritā | ciketa | parā-taram | su | niḥ-ṛtiḥ | jihītām ||10.059.03||

10.059.04a mo ṣu ṇaḥ soma mṛtyave parā dāḥ paśyema nu sūryam uccarantam |
10.059.04c dyubhir hito jarimā sū no astu parātaraṁ su nirṛtir jihītām ||

mo iti | su | naḥ | soma | mṛtyave | parā | dāḥ | paśyema | nu | sūryam | ut-carantam |
dyu-bhiḥ | hitaḥ | jarimā | su | naḥ | astu | parā-taram | su | niḥ-ṛtiḥ | jihītām ||10.059.04||

10.059.05a asunīte mano asmāsu dhāraya jīvātave su pra tirā na āyuḥ |
10.059.05c rārandhi naḥ sūryasya saṁdṛśi ghṛtena tvaṁ tanvaṁ vardhayasva ||

asu-nīte | manaḥ | asmāsu | dhāraya | jīvātave | su | pra | tira | naḥ | āyuḥ |
rarandhi | naḥ | sūryasya | sam-dṛśi | ghṛtena | tvam | tanvam | vardhayasva ||10.059.05||

10.059.06a asunīte punar asmāsu cakṣuḥ punaḥ prāṇam iha no dhehi bhogam |
10.059.06c jyok paśyema sūryam uccarantam anumate mṛḻayā naḥ svasti ||

asu-nīte | punaḥ | asmāsu | cakṣuḥ | punariti | prāṇam | iha | naḥ | dhehi | bhogam |
jyok | paśyema | sūryam | ut-carantam | anu-mate | mṛḻaya | naḥ | svasti ||10.059.06||

10.059.07a punar no asum pṛthivī dadātu punar dyaur devī punar antarikṣam |
10.059.07c punar naḥ somas tanvaṁ dadātu punaḥ pūṣā pathyāṁ yā svastiḥ ||

punaḥ | naḥ | asum | pṛthivī | dadātu | punaḥ | dyauḥ | devī | punaḥ | antarikṣam |
punaḥ | naḥ | somaḥ | tanvam | dadātu | punariti | pūṣā | pathyām | yā | svastiḥ ||10.059.07||

10.059.08a śaṁ rodasī subandhave yahvī ṛtasya mātarā |
10.059.08c bharatām apa yad rapo dyauḥ pṛthivi kṣamā rapo mo ṣu te kiṁ canāmamat ||

śam | rodasī iti | su-bandhave | yahvī iti | ṛtasya | mātarā |
bharatām | apa | yat | rapaḥ | dyauḥ | pṛthivi | kṣamā | rapaḥ | mo iti | su | te | kim | cana | āmamat ||10.059.08||

10.059.09a ava dvake ava trikā divaś caranti bheṣajā |
10.059.09c kṣamā cariṣṇv ekakam bharatām apa yad rapo dyauḥ pṛthivi kṣamā rapo mo ṣu te kiṁ canāmamat ||

ava | dvake iti | ava | trikā | divaḥ | caranti | bheṣajā |
kṣamā | cariṣṇu | ekakam | bharatām | apa | yat | rapaḥ | dyauḥ | pṛthivi | kṣamā | rapaḥ | mo iti | su | te | kim | cana | āmamat ||10.059.09||

10.059.10a sam indreraya gām anaḍvāhaṁ ya āvahad uśīnarāṇyā anaḥ |
10.059.10c bharatām apa yad rapo dyauḥ pṛthivi kṣamā rapo mo ṣu te kiṁ canāmamat ||

sam | indra | īraya | gām | anaḍvāham | yaḥ | ā | svahat | uśīnarāṇyāḥ | anaḥ |
bharatām | apa | yat | rapaḥ | dyauḥ | pṛthivi | kṣamā | rapaḥ | mo iti | su | te | kim | cana | āmamat ||10.059.10||


10.060.01a ā janaṁ tveṣasaṁdṛśam māhīnānām upastutam |
10.060.01c aganma bibhrato namaḥ ||

ā | janam | tveṣa-sandṛśam | māhīnānām | upa-stutam |
aganma | bibhrataḥ | namaḥ ||10.060.01||

10.060.02a asamātiṁ nitośanaṁ tveṣaṁ niyayinaṁ ratham |
10.060.02c bhajerathasya satpatim ||

asamātim | ni-tośanam | tveṣam | ni-yayinam | ratham |
bhaje-rathasya | sat-patim ||10.060.02||

10.060.03a yo janān mahiṣām̐ ivātitasthau pavīravān |
10.060.03c utāpavīravān yudhā ||

yaḥ | janān | mahiṣān-iva | ati-tasthau | pavīravān |
uta | apavīravān | yudhā ||10.060.03||

10.060.04a yasyekṣvākur upa vrate revān marāyy edhate |
10.060.04c divīva pañca kṛṣṭayaḥ ||

yasya | ikṣvākuḥ | upa | vrate | revān | marāyī | edhate |
divi-iva | pañca | kṛṣṭayaḥ ||10.060.04||

10.060.05a indra kṣatrāsamātiṣu rathaproṣṭheṣu dhāraya |
10.060.05c divīva sūryaṁ dṛśe ||

indra | kṣatrā | asamātiṣu | ratha-proṣṭheṣu | dhāraya |
divi-iva | sūryam | dṛśe ||10.060.05||

10.060.06a agastyasya nadbhyaḥ saptī yunakṣi rohitā |
10.060.06c paṇīn ny akramīr abhi viśvān rājann arādhasaḥ ||

agastyasya | nat-bhyaḥ | saptī iti | yunakṣi | rohitā |
paṇīn | ni | akramīḥ | abhi | viśvān | rājan | arādhasaḥ ||10.060.06||

10.060.07a ayam mātāyam pitāyaṁ jīvātur āgamat |
10.060.07c idaṁ tava prasarpaṇaṁ subandhav ehi nir ihi ||

ayam | mātā | ayam | pitā | ayam | jīvātuḥ | ā | agamat |
idam | tava | pra-sarpaṇam | subandho iti su-bandho | ā | ihi | niḥ | ihi ||10.060.07||

10.060.08a yathā yugaṁ varatrayā nahyanti dharuṇāya kam |
10.060.08c evā dādhāra te mano jīvātave na mṛtyave 'tho ariṣṭatātaye ||

yathā | yugam | varatrayā | nahyanti | dharuṇāya | kam |
eva | dādhāra | te | manaḥ | jīvātave | na | mṛtyave | atho iti | ariṣṭa-tātaye ||10.060.08||

10.060.09a yatheyam pṛthivī mahī dādhāremān vanaspatīn |
10.060.09c evā dādhāra te mano jīvātave na mṛtyave 'tho ariṣṭatātaye ||

yathā | iyam | pṛthivī | mahī | dādhāra | imān | vanaspatīn |
eva | dādhāra | te | manaḥ | jīvātave | na | mṛtyave | atho iti | ariṣṭa-tātaye ||10.060.09||

10.060.10a yamād ahaṁ vaivasvatāt subandhor mana ābharam |
10.060.10c jīvātave na mṛtyave 'tho ariṣṭatātaye ||

yamāt | aham | vaivasvatāt | su-bandhoḥ | manaḥ | ā | abharam |
jīvātave | na | mṛtyave | atho iti | ariṣṭa-tātaye ||10.060.10||

10.060.11a nyag vāto 'va vāti nyak tapati sūryaḥ |
10.060.11c nīcīnam aghnyā duhe nyag bhavatu te rapaḥ ||

nyak | vātaḥ | ava | vāti | nyak | tapati | sūryaḥ |
nīcīnam | aghnyā | duhe | nyak | bhavatu | te | rapaḥ ||10.060.11||

10.060.12a ayam me hasto bhagavān ayam me bhagavattaraḥ |
10.060.12c ayam me viśvabheṣajo 'yaṁ śivābhimarśanaḥ ||

ayam | me | hastaḥ | bhaga-vān | ayam | me | bhagavat-taraḥ |
ayam | me | viśva-bheṣajaḥ | ayam | śiva-abhimarśanaḥ ||10.060.12||


10.061.01a idam itthā raudraṁ gūrtavacā brahma kratvā śacyām antar ājau |
10.061.01c krāṇā yad asya pitarā maṁhaneṣṭhāḥ parṣat pakthe ahann ā sapta hotṝn ||

idam | itthā | raudram | gūrta-vacāḥ | brahma | kratvā | śacyām | antaḥ | ājau |
krāṇā | yat | asya | pitarā | maṁhane-sthāḥ | parṣat | pakthe | ahan | ā | sapta | hotṝn ||10.061.01||

10.061.02a sa id dānāya dabhyāya vanvañ cyavānaḥ sūdair amimīta vedim |
10.061.02c tūrvayāṇo gūrtavacastamaḥ kṣodo na reta itaūti siñcat ||

saḥ | it | dānāya | dabhyāya | vanvan | cyavānaḥ | sūdaiḥ | amimīta | vedim |
tūrvayāṇaḥ | gūrtavacaḥ-tamaḥ | kṣodaḥ | na | retaḥ | itaḥ-ūti | siñcat ||10.061.02||

10.061.03a mano na yeṣu havaneṣu tigmaṁ vipaḥ śacyā vanutho dravantā |
10.061.03c ā yaḥ śaryābhis tuvinṛmṇo asyāśrīṇītādiśaṁ gabhastau ||

manaḥ | na | yeṣu | havaneṣu | tigmam | vipaḥ | śacyā | vanuthaḥ | dravantā |
ā | yaḥ | śaryābhiḥ | tuvi-nṛmṇaḥ | asya | aśrīṇīta | ā-diśam | gabhastau ||10.061.03||

10.061.04a kṛṣṇā yad goṣv aruṇīṣu sīdad divo napātāśvinā huve vām |
10.061.04c vītam me yajñam ā gatam me annaṁ vavanvāṁsā neṣam asmṛtadhrū ||

kṛṣṇā | yat | goṣu | aruṇīṣu | sīdat | divaḥ | napātā | aśvinā | huve | vām |
vītam | me | yajñam | ā | gatam | me | annam | vavanvāṁsā | na | iṣam | asmṛtadhrū ityasmṛta-dhrū ||10.061.04||

10.061.05a prathiṣṭa yasya vīrakarmam iṣṇad anuṣṭhitaṁ nu naryo apauhat |
10.061.05c punas tad ā vṛhati yat kanāyā duhitur ā anubhṛtam anarvā ||

prathiṣṭa | yasya | vīra-karmam | iṣṇat | anu-sthitam | nu | naryaḥ | apa | auhat |
punariti | tat | ā | vṛhati | yat | kanāyāḥ | duhituḥ | āḥ | anu-bhṛtam | anarvā ||10.061.05||

10.061.06a madhyā yat kartvam abhavad abhīke kāmaṁ kṛṇvāne pitari yuvatyām |
10.061.06c manānag reto jahatur viyantā sānau niṣiktaṁ sukṛtasya yonau ||

madhyā | yat | kartvam | abhavat | abhīke | kāmam | kṛṇvāne | pitari | yuvatyām |
manānak | retaḥ | jahatuḥ | vi-yantā | sānau | ni-siktam | su-kṛtasya | yonau ||10.061.06||

10.061.07a pitā yat svāṁ duhitaram adhiṣkan kṣmayā retaḥ saṁjagmāno ni ṣiñcat |
10.061.07c svādhyo 'janayan brahma devā vāstoṣ patiṁ vratapāṁ nir atakṣan ||

pitā | yat | svām | duhitaram | adhi-skan | kṣmayā | retaḥ | sam-jagmānaḥ | ni | siñcat |
su-ādhyaḥ | ajanayan | brahma | devāḥ | vāstoḥ | patim | vrata-pām | niḥ | atakṣan ||10.061.07||

10.061.08a sa īṁ vṛṣā na phenam asyad ājau smad ā paraid apa dabhracetāḥ |
10.061.08c sarat padā na dakṣiṇā parāvṛṅ na tā nu me pṛśanyo jagṛbhre ||

saḥ | īm | vṛṣā | na | phenam | asyat | ājau | smat | ā | parā | ait | apa | dabhra-cetāḥ |
sarat | padā | na | dakṣiṇā | parā-vṛk | na | tāḥ | nu | me | pṛśanyaḥ | jagṛbhre ||10.061.08||

10.061.09a makṣū na vahniḥ prajāyā upabdir agniṁ na nagna upa sīdad ūdhaḥ |
10.061.09c sanitedhmaṁ sanitota vājaṁ sa dhartā jajñe sahasā yavīyut ||

makṣu | na | vahniḥ | pra-jāyāḥ | upabdiḥ | agnim | na | nagnaḥ | upa | sīdat | ūdhaḥ |
sanitā | idhmam | sanitā | uta | vājam | saḥ | dhartā | jajñe | sahasā | yavi-yut ||10.061.09||

10.061.10a makṣū kanāyāḥ sakhyaṁ navagvā ṛtaṁ vadanta ṛtayuktim agman |
10.061.10c dvibarhaso ya upa gopam āgur adakṣiṇāso acyutā dudukṣan ||

makṣu | kanāyāḥ | sakhyam | nava-gvāḥ | ṛtam | vadantaḥ | ṛta-yuktim | agman |
dvi-barhasaḥ | ye | upa | gopam | ā | aguḥ | adakṣiṇāsaḥ | acyutā | dudukṣan ||10.061.10||

10.061.11a makṣū kanāyāḥ sakhyaṁ navīyo rādho na reta ṛtam it turaṇyan |
10.061.11c śuci yat te rekṇa āyajanta sabardughāyāḥ paya usriyāyāḥ ||

makṣu | kanāyāḥ | sakhyam | navīyaḥ | rādhaḥ | na | retaḥ | ṛtam | it | turaṇyan |
śuci | yat | te | rekṇaḥ | ā | ayajanta | sabaḥ-dughāyāḥ | payaḥ | usriyāyāḥ ||10.061.11||

10.061.12a paśvā yat paścā viyutā budhanteti bravīti vaktarī rarāṇaḥ |
10.061.12c vasor vasutvā kāravo 'nehā viśvaṁ viveṣṭi draviṇam upa kṣu ||

paśvā | yat | paścā | vi-yutā | budhanta | iti | bravīti | vaktari | rarāṇaḥ |
vasoḥ | vasu-tvā | kāravaḥ | anehā | viśvam | viveṣṭi | draviṇam | upa | kṣu ||10.061.12||

10.061.13a tad in nv asya pariṣadvāno agman purū sadanto nārṣadam bibhitsan |
10.061.13c vi śuṣṇasya saṁgrathitam anarvā vidat puruprajātasya guhā yat ||

tat | it | nu | asya | pari-sadvānaḥ | agman | puru | sadantaḥ | nārsadam | bibhitsan |
vi | śuṣṇasya | sam-grathitam | anarvā | vidat | puru-prajātasya | guhā | yat ||10.061.13||

10.061.14a bhargo ha nāmota yasya devāḥ svar ṇa ye triṣadhasthe niṣeduḥ |
10.061.14c agnir ha nāmota jātavedāḥ śrudhī no hotar ṛtasya hotādhruk ||

bhargaḥ | ha | nāma | uta | yasya | devāḥ | svaḥ | na | ye | tri-sadhasthe | ni-seduḥ |
agniḥ | ha | nāma | uta | jāta-vedāḥ | śrudhi | naḥ | hotaḥ | ṛtasya | hotā | adhruk ||10.061.14||

10.061.15a uta tyā me raudrāv arcimantā nāsatyāv indra gūrtaye yajadhyai |
10.061.15c manuṣvad vṛktabarhiṣe rarāṇā mandū hitaprayasā vikṣu yajyū ||

uta | tyā | me | raudrau | arci-mantā | nāsatyau | indra | gṛtaye | yajadhyai |
manuṣvat | vṛkta-barhiṣe | rarāṇā | mandū iti | hita-prayasā | vikṣu | yajyū iti ||10.061.15||

10.061.16a ayaṁ stuto rājā vandi vedhā apaś ca vipras tarati svasetuḥ |
10.061.16c sa kakṣīvantaṁ rejayat so agniṁ nemiṁ na cakram arvato raghudru ||

ayam | stutaḥ | rājā | vandi | vedhāḥ | apaḥ | ca | vipraḥ | tarati | sva-setuḥ |
saḥ | kakṣīvantam | rejayat | saḥ | agnim | nemim | na | cakram | arvataḥ | raghu-dru ||10.061.16||

10.061.17a sa dvibandhur vaitaraṇo yaṣṭā sabardhuṁ dhenum asvaṁ duhadhyai |
10.061.17c saṁ yan mitrāvaruṇā vṛñja ukthair jyeṣṭhebhir aryamaṇaṁ varūthaiḥ ||

saḥ | dvi-bandhuḥ | vaitaraṇaḥ | yaṣṭā | sabaḥ-dhum | dhenum | asvam | duhadhyai |
sam | yat | mitrāvaruṇā | vṛñje | ukthaiḥ | jyeṣṭhebhiḥ | aryamaṇam | varūthaiḥ ||10.061.17||

10.061.18a tadbandhuḥ sūrir divi te dhiyaṁdhā nābhānediṣṭho rapati pra venan |
10.061.18c sā no nābhiḥ paramāsya vā ghāhaṁ tat paścā katithaś cid āsa ||

tat-bandhuḥ | sūriḥ | divi | te | dhiyam-dhāḥ | nābhānediṣṭhaḥ | rapati | pra | venan |
sā | naḥ | nābhiḥ | paramā | asya | vā | gha | aham | tat | paścā | katithaḥ | cit | āsa ||10.061.18||

10.061.19a iyam me nābhir iha me sadhastham ime me devā ayam asmi sarvaḥ |
10.061.19c dvijā aha prathamajā ṛtasyedaṁ dhenur aduhaj jāyamānā ||

iyam | me | nābhiḥ | iha | me | sadha-stham | ime | me | devāḥ | ayam | asmi | sarvaḥ |
dvi-jāḥ | aha | prathama-jāḥ | ṛtasya | idam | dhenuḥ | aduhat | jāyamānā ||10.061.19||

10.061.20a adhāsu mandro aratir vibhāvāva syati dvivartanir vaneṣāṭ |
10.061.20c ūrdhvā yac chreṇir na śiśur dan makṣū sthiraṁ śevṛdhaṁ sūta mātā ||

adha | āsu | mandraḥ | aratiḥ | vibhā-vā | ava | syati | dvi-vartaniḥ | vaneṣāṭ |
ūrdhvā | yat | śreṇiḥ | na | śiśuḥ | dan | makṣu | sthiram | śe-vṛdham | sūta | mātā ||10.061.20||

10.061.21a adhā gāva upamātiṁ kanāyā anu śvāntasya kasya cit pareyuḥ |
10.061.21c śrudhi tvaṁ sudraviṇo nas tvaṁ yāḻ āśvaghnasya vāvṛdhe sūnṛtābhiḥ ||

adha | gāvaḥ | upa-mātim | kanāyāḥ | anu | śvāntasya | kasya | cit | parā | īyuḥ |
śrudhi | tvam | su-draviṇaḥ | naḥ | tvam | yāṭ | āśva-ghnasya | vavṛdhe | sūnṛtābhiḥ ||10.061.21||

10.061.22a adha tvam indra viddhy asmān maho rāye nṛpate vajrabāhuḥ |
10.061.22c rakṣā ca no maghonaḥ pāhi sūrīn anehasas te harivo abhiṣṭau ||

adha | tvam | indra | viddhi | asmān | mahaḥ | rāye | nṛ-pate | vajra-bāhuḥ |
rakṣa | ca | naḥ | maghonaḥ | pāhi | sūrīn | anehasaḥ | te | hari-vaḥ | abhiṣṭau ||10.061.22||

10.061.23a adha yad rājānā gaviṣṭau sarat saraṇyuḥ kārave jaraṇyuḥ |
10.061.23c vipraḥ preṣṭhaḥ sa hy eṣām babhūva parā ca vakṣad uta parṣad enān ||

adha | yat | rājānā | go-iṣṭau | sarat | saraṇyuḥ | kārave | jaraṇyuḥ |
vipraḥ | preṣṭhaḥ | saḥ | hi | eṣām | babhūva | parā | ca | vakṣat | uta | parṣat | enān ||10.061.23||

10.061.24a adhā nv asya jenyasya puṣṭau vṛthā rebhanta īmahe tad ū nu |
10.061.24c saraṇyur asya sūnur aśvo vipraś cāsi śravasaś ca sātau ||

adha | nu | asya | jenyasya | puṣṭau | vṛthā | rebhantaḥ | īmahe | tat | ūm̐ iti | nu |
saraṇyuḥ | asya | sūnuḥ | aśvaḥ | vipraḥ | ca | asi | śravasaḥ | ca | sātau ||10.061.24||

10.061.25a yuvor yadi sakhyāyāsme śardhāya stomaṁ jujuṣe namasvān |
10.061.25c viśvatra yasminn ā giraḥ samīcīḥ pūrvīva gātur dāśat sūnṛtāyai ||

yuvoḥ | yadi | sakhyāya | asme iti | śardhāya | stomam | jujuṣe | namasvān |
viśvatra | yasmin | ā | giraḥ | sam-īcīḥ | pūrvī-iva | gātuḥ | dāśat | sūnṛtāyai ||10.061.25||

10.061.26a sa gṛṇāno adbhir devavān iti subandhur namasā sūktaiḥ |
10.061.26c vardhad ukthair vacobhir ā hi nūnaṁ vy adhvaiti payasa usriyāyāḥ ||

saḥ | gṛṇānaḥ | at-bhiḥ | deva-vān | iti | su-bandhuḥ | namasā | su-uktaiḥ |
vardhat | ukthaiḥ | vacaḥ-bhiḥ | ā | hi | nūnam | vi | adhvā | eti | payasaḥ | usriyāyāḥ ||10.061.26||

10.061.27a ta ū ṣu ṇo maho yajatrā bhūta devāsa ūtaye sajoṣāḥ |
10.061.27c ye vājām̐ anayatā viyanto ye sthā nicetāro amūrāḥ ||

te | ūm̐ iti | su | naḥ | mahaḥ | yajatrāḥ | bhūta | devāsaḥ | ūtaye | sa-joṣāḥ |
ye | vājān | anayata | vi-yantaḥ | ye | stha | ni-cetāraḥ | amūrāḥ ||10.061.27||


10.062.01a ye yajñena dakṣiṇayā samaktā indrasya sakhyam amṛtatvam ānaśa |
10.062.01c tebhyo bhadram aṅgiraso vo astu prati gṛbhṇīta mānavaṁ sumedhasaḥ ||

ye | yajñena | dakṣiṇayā | sam-aktāḥ | indrasya | sakhyam | amṛta-tvam | ānaśa |
tebhyaḥ | bhadram | aṅgirasaḥ | vaḥ | astu | prati | gṛbhṇīta | mānavam | su-medhasaḥ ||10.062.01||

10.062.02a ya udājan pitaro gomayaṁ vasv ṛtenābhindan parivatsare valam |
10.062.02c dīrghāyutvam aṅgiraso vo astu prati gṛbhṇīta mānavaṁ sumedhasaḥ ||

ye | ut-ājan | pitaraḥ | go-mayam | vasu | ṛtena | abhindan | pari-vatsare | valam |
dīrghāyu-tvam | aṅgirasaḥ | vaḥ | astu | prati | gṛbhṇīta | mānavam | su-medhasaḥ ||10.062.02||

10.062.03a ya ṛtena sūryam ārohayan divy aprathayan pṛthivīm mātaraṁ vi |
10.062.03c suprajāstvam aṅgiraso vo astu prati gṛbhṇīta mānavaṁ sumedhasaḥ ||

ye | ṛtena | sūryam | ā | arohayan | divi | aprathayan | pṛthivīm | mātaram | vi |
suprajāḥ-tvam | aṅgirasaḥ | vaḥ | astu | prati | gṛbhṇīta | mānavam | su-medhasaḥ ||10.062.03||

10.062.04a ayaṁ nābhā vadati valgu vo gṛhe devaputrā ṛṣayas tac chṛṇotana |
10.062.04c subrahmaṇyam aṅgiraso vo astu prati gṛbhṇīta mānavaṁ sumedhasaḥ ||

ayam | nābhā | vadati | valgu | vaḥ | gṛhe | deva-putrāḥ | ṛṣayaḥ | tat | śṛṇotana |
su-brahmaṇyam | aṅgirasaḥ | vaḥ | astu | prati | gṛbhṇīta | mānavam | su-medhasaḥ ||10.062.04||

10.062.05a virūpāsa id ṛṣayas ta id gambhīravepasaḥ |
10.062.05c te aṅgirasaḥ sūnavas te agneḥ pari jajñire ||

vi-rūpāsaḥ | it | ṛṣayaḥ | te | it | gambhīra-vepasaḥ |
te | aṅgirasaḥ | sūnavaḥ | te | agneḥ | pari | jajñire ||10.062.05||

10.062.06a ye agneḥ pari jajñire virūpāso divas pari |
10.062.06c navagvo nu daśagvo aṅgirastamo sacā deveṣu maṁhate ||

ye | agneḥ | pari | jajñire | vi-rūpāsaḥ | divaḥ | pari |
nava-gvaḥ | nu | daśa-gvaḥ | aṅgiraḥ-tamaḥ | sacā | deveṣu | maṁhate ||10.062.06||

10.062.07a indreṇa yujā niḥ sṛjanta vāghato vrajaṁ gomantam aśvinam |
10.062.07c sahasram me dadato aṣṭakarṇyaḥ śravo deveṣv akrata ||

indreṇa | yujā | niḥ | sṛjanta | vāghataḥ | vrajam | go-mantam | aśvinam |
sahasram | me | dadataḥ | aṣṭa-karṇyaḥ | śravaḥ | deveṣu | akrata ||10.062.07||

10.062.08a pra nūnaṁ jāyatām ayam manus tokmeva rohatu |
10.062.08c yaḥ sahasraṁ śatāśvaṁ sadyo dānāya maṁhate ||

pra | nūnam | jāyatām | ayam | manuḥ | tokma-iva | rohatu |
yaḥ | sahasram | śata-aśvam | sadyaḥ | dānāya | maṁhate ||10.062.08||

10.062.09a na tam aśnoti kaś cana diva iva sānv ārabham |
10.062.09c sāvarṇyasya dakṣiṇā vi sindhur iva paprathe ||

na | tam | aśnoti | kaḥ | cana | divaḥ-iva | sānu | ā-rabham |
sāvarṇyasya | dakṣiṇā | vi | sindhuḥ-iva | paprathe ||10.062.09||

10.062.10a uta dāsā pariviṣe smaddiṣṭī goparīṇasā |
10.062.10c yadus turvaś ca māmahe ||

uta | dāsā | pari-viṣe | smaddiṣṭī iti smat-diṣṭī | go-parīṇasā |
yaduḥ | turvaḥ | ca | māmahe ||10.062.10||

10.062.11a sahasradā grāmaṇīr mā riṣan manuḥ sūryeṇāsya yatamānaitu dakṣiṇā |
10.062.11c sāvarṇer devāḥ pra tirantv āyur yasminn aśrāntā asanāma vājam ||

sahasra-dāḥ | grāma-nīḥ | mā | riṣat | manuḥ | sūryeṇa | asya | yatamānā | etu | dakṣiṇā |
sāvarṇeḥ | devāḥ | pra | tirantu | āyuḥ | yasmin | asrāntāḥ | asanāma | vājam ||10.062.11||


10.063.01a parāvato ye didhiṣanta āpyam manuprītāso janimā vivasvataḥ |
10.063.01c yayāter ye nahuṣyasya barhiṣi devā āsate te adhi bruvantu naḥ ||

parā-vataḥ | ye | didhiṣante | āpyam | manu-prītāsaḥ | janima | vivasvataḥ |
yayāteḥ | ye | nahuṣyasya | barhiṣi | devāḥ | āsate | te | adhi | bruvantu | naḥ ||10.063.01||

10.063.02a viśvā hi vo namasyāni vandyā nāmāni devā uta yajñiyāni vaḥ |
10.063.02c ye stha jātā aditer adbhyas pari ye pṛthivyās te ma iha śrutā havam ||

viśvā | hi | vaḥ | namasyāni | vandyā | nāmāni | devāḥ | uta | yajñiyāni | vaḥ |
ye | stha | jātāḥ | aditeḥ | at-bhyaḥ | pari | ye | pṛthivyāḥ | te | me | iha | śruta | havam ||10.063.02||

10.063.03a yebhyo mātā madhumat pinvate payaḥ pīyūṣaṁ dyaur aditir adribarhāḥ |
10.063.03c ukthaśuṣmān vṛṣabharān svapnasas tām̐ ādityām̐ anu madā svastaye ||

yebhyaḥ | mātā | madhu-mat | pinvate | payaḥ | pīyūṣam | dyauḥ | aditiḥ | adri-barhāḥ |
uktha-śuṣmān | vṛṣa-bharān | svapnasaḥ | tān | ādityān | anu | mada | svastaye ||10.063.03||

10.063.04a nṛcakṣaso animiṣanto arhaṇā bṛhad devāso amṛtatvam ānaśuḥ |
10.063.04c jyotīrathā ahimāyā anāgaso divo varṣmāṇaṁ vasate svastaye ||

nṛ-cakṣasaḥ | ani-miṣantaḥ | arhaṇā | bṛhat | devāsaḥ | amṛta-tvam | ānaśuḥ |
jyotiḥ-rathāḥ | ahi-māyāḥ | anāgasaḥ | divaḥ | varṣmāṇam | vasate | svastaye ||10.063.04||

10.063.05a samrājo ye suvṛdho yajñam āyayur aparihvṛtā dadhire divi kṣayam |
10.063.05c tām̐ ā vivāsa namasā suvṛktibhir maho ādityām̐ aditiṁ svastaye ||

sam-rājaḥ | ye | su-vṛdhaḥ | yajñam | ā-yayuḥ | apari-hvṛtāḥ | dadhire | divi | kṣayam |
tān | ā | vivāsa | namasā | suvṛkti-bhiḥ | mahaḥ | ādityān | aditim | svastaye ||10.063.05||

10.063.06a ko vaḥ stomaṁ rādhati yaṁ jujoṣatha viśve devāso manuṣo yati ṣṭhana |
10.063.06c ko vo 'dhvaraṁ tuvijātā araṁ karad yo naḥ parṣad aty aṁhaḥ svastaye ||

kaḥ | vaḥ | stomam | rādhati | yam | jujoṣatha | viśve | devāsaḥ | manuṣaḥ | yati | sthana |
kaḥ | vaḥ | adhvaram | tuvi-jātāḥ | aram | karat | yaḥ | naḥ | parṣat | ati | aṁhaḥ | svastaye ||10.063.06||

10.063.07a yebhyo hotrām prathamām āyeje manuḥ samiddhāgnir manasā sapta hotṛbhiḥ |
10.063.07c ta ādityā abhayaṁ śarma yacchata sugā naḥ karta supathā svastaye ||

yebhyaḥ | hotrām | prathamām | ā-yeje | manuḥ | samiddha-agniḥ | manasā | sapta | hotṛ-bhiḥ |
te | ādityāḥ | abhayam | śarma | yacchata | su-gā | naḥ | karta | su-pathā | svastaye ||10.063.07||

10.063.08a ya īśire bhuvanasya pracetaso viśvasya sthātur jagataś ca mantavaḥ |
10.063.08c te naḥ kṛtād akṛtād enasas pary adyā devāsaḥ pipṛtā svastaye ||

ye | īśire | bhuvanasya | pra-cetasaḥ | viśvasya | sthātuḥ | jagataḥ | ca | mantavaḥ |
te | naḥ | kṛtāt | akṛtāt | enasaḥ | pari | adya | devāsaḥ | pipṛta | svastaye ||10.063.08||

10.063.09a bhareṣv indraṁ suhavaṁ havāmahe 'ṁhomucaṁ sukṛtaṁ daivyaṁ janam |
10.063.09c agnim mitraṁ varuṇaṁ sātaye bhagaṁ dyāvāpṛthivī marutaḥ svastaye ||

bhareṣu | indram | su-havam | havāmahe | aṁhaḥ-mucam | su-kṛtam | daivyam | janam |
agnim | mitram | varuṇam | sātaye | bhagam | dyāvāpṛthivī iti | marutaḥ | svastaye ||10.063.09||

10.063.10a sutrāmāṇam pṛthivīṁ dyām anehasaṁ suśarmāṇam aditiṁ supraṇītim |
10.063.10c daivīṁ nāvaṁ svaritrām anāgasam asravantīm ā ruhemā svastaye ||

su-trāmāṇam | pṛthivīm | dyām | anehasam | su-śarmāṇam | aditim | su-pranītim |
daivīm | nāvam | su-aritrām | anāgasam | asravantīm | ā | ruhema | svastaye ||10.063.10||

10.063.11a viśve yajatrā adhi vocatotaye trāyadhvaṁ no durevāyā abhihrutaḥ |
10.063.11c satyayā vo devahūtyā huvema śṛṇvato devā avase svastaye ||

viśve | yajatrāḥ | adhi | vocata | ūtaye | trāyadhvam | naḥ | duḥ-evāyāḥ | abhi-hrutaḥ |
satyayā | vaḥ | deva-hūtyā | huvema | śṛṇvataḥ | devāḥ | avase | svastaye ||10.063.11||

10.063.12a apāmīvām apa viśvām anāhutim apārātiṁ durvidatrām aghāyataḥ |
10.063.12c āre devā dveṣo asmad yuyotanoru ṇaḥ śarma yacchatā svastaye ||

apa | amīvām | apa | viśvām | anāhutim | apa | arātim | duḥ-vidatrām | agha-yataḥ |
āre | devāḥ | dveṣaḥ | asmat | yuyotana | uru | naḥ | śarma | yacchata | svastaye ||10.063.12||

10.063.13a ariṣṭaḥ sa marto viśva edhate pra prajābhir jāyate dharmaṇas pari |
10.063.13c yam ādityāso nayathā sunītibhir ati viśvāni duritā svastaye ||

ariṣṭaḥ | saḥ | martaḥ | viśvaḥ | edhate | pra | pra-jābhiḥ | jāyate | dharmaṇaḥ | pari |
yam | ādityāsaḥ | nayatha | sunīti-bhiḥ | ati | viśvāni | duḥ-itā | svastaye ||10.063.13||

10.063.14a yaṁ devāso 'vatha vājasātau yaṁ śūrasātā maruto hite dhane |
10.063.14c prātaryāvāṇaṁ ratham indra sānasim ariṣyantam ā ruhemā svastaye ||

yam | devāsaḥ | avatha | vāja-sātau | yam | śūra-sātā | marutaḥ | hite | dhane |
prātaḥ-yāvānam | ratham | indra | sānasim | ariṣyantam | ā | ruhema | svastaye ||10.063.14||

10.063.15a svasti naḥ pathyāsu dhanvasu svasty apsu vṛjane svarvati |
10.063.15c svasti naḥ putrakṛtheṣu yoniṣu svasti rāye maruto dadhātana ||

svasti | naḥ | pathyāsu | dhanva-su | svasti | ap-su | vṛjane | svaḥ-vati |
svasti | naḥ | putra-kṛtheṣu | yoniṣu | svasti | rāye | marutaḥ | dadhātana ||10.063.15||

10.063.16a svastir id dhi prapathe śreṣṭhā rekṇasvaty abhi yā vāmam eti |
10.063.16c sā no amā so araṇe ni pātu svāveśā bhavatu devagopā ||

svastiḥ | it | hi | pra-pathe | śreṣṭhā | rekṇasvatī | abhi | yā | vāmam | eti |
sā | naḥ | amā | so iti | araṇe | ni | pātu | su-āveśā | bhavatu | deva-gopā ||10.063.16||

10.063.17a evā plateḥ sūnur avīvṛdhad vo viśva ādityā adite manīṣī |
10.063.17c īśānāso naro amartyenāstāvi jano divyo gayena ||

eva | plateḥ | sūnuḥ | avīvṛdhat | vaḥ | viśve | ādityāḥ | adite | manīṣī |
īśānāsaḥ | naraḥ | amartyena | astāvi | janaḥ | divyaḥ | gayena ||10.063.17||


10.064.01a kathā devānāṁ katamasya yāmani sumantu nāma śṛṇvatām manāmahe |
10.064.01c ko mṛḻāti katamo no mayas karat katama ūtī abhy ā vavartati ||

kathā | devānām | katamasya | yāmani | su-mantu | nāma | śṛṇvatām | manāmahe |
kaḥ | mṛḻāti | katamaḥ | naḥ | mayaḥ | karat | katamaḥ | ūtī | abhi | ā | vavartati ||10.064.01||

10.064.02a kratūyanti kratavo hṛtsu dhītayo venanti venāḥ patayanty ā diśaḥ |
10.064.02c na marḍitā vidyate anya ebhyo deveṣu me adhi kāmā ayaṁsata ||

ṛtu-yanti | kratavaḥ | hṛt-su | dhītayaḥ | venanti | venāḥ | patayanti | ā | diśaḥ |
na | marḍitā | vidyate | anyaḥ | ebhyaḥ | deveṣu | me | adhi | kāmāḥ | ayaṁsata ||10.064.02||

10.064.03a narā vā śaṁsam pūṣaṇam agohyam agniṁ deveddham abhy arcase girā |
10.064.03c sūryāmāsā candramasā yamaṁ divi tritaṁ vātam uṣasam aktum aśvinā ||

narāśaṁsam | vā | pūṣaṇam | agohyam | agnim | deva-iddham | abhi | arcase | girā |
sūryāmāsā | candramasā | yamam | divi | tritam | vātam | uṣasam | aktum | aśvinā ||10.064.03||

10.064.04a kathā kavis tuvīravān kayā girā bṛhaspatir vāvṛdhate suvṛktibhiḥ |
10.064.04c aja ekapāt suhavebhir ṛkvabhir ahiḥ śṛṇotu budhnyo havīmani ||

kathā | kaviḥ | tuvi-ravān | kayā | girā | bṛhaspatiḥ | vavṛdhate | suvṛkti-bhiḥ |
ajaḥ | eka-pāt | su-havebhiḥ | ṛkva-bhiḥ | ahiḥ | śṛṇotu | budhnyaḥ | havīmani ||10.064.04||

10.064.05a dakṣasya vādite janmani vrate rājānā mitrāvaruṇā vivāsasi |
10.064.05c atūrtapanthāḥ pururatho aryamā saptahotā viṣurūpeṣu janmasu ||

dakṣasya | vā | adite | janmani | vrate | rājānā | mitrāvaruṇā | ā | vivāsasi |
atūrta-panthāḥ | puru-rathaḥ | aryamā | sapta-hotā | viṣu-rūpeṣu | janma-su ||10.064.05||

10.064.06a te no arvanto havanaśruto havaṁ viśve śṛṇvantu vājino mitadravaḥ |
10.064.06c sahasrasā medhasātāv iva tmanā maho ye dhanaṁ samitheṣu jabhrire ||

te | naḥ | arvantaḥ | havana-śrutaḥ | havam | viśve | śṛṇvantu | vājinaḥ | mita-dravaḥ |
sahasra-sāḥ | medhasātau-iva | tmanā | mahaḥ | ye | dhanam | sam-itheṣu | jabhrire ||10.064.06||

10.064.07a pra vo vāyuṁ rathayujam puraṁdhiṁ stomaiḥ kṛṇudhvaṁ sakhyāya pūṣaṇam |
10.064.07c te hi devasya savituḥ savīmani kratuṁ sacante sacitaḥ sacetasaḥ ||

pra | vaḥ | vāyum | ratha-yujam | puram-dhim | stomaiḥ | kṛṇudhvam | sakhyāya | pūṣaṇam |
te | hi | devasya | savituḥ | savīmani | kratum | sacante | sa-citaḥ | sa-cetasaḥ ||10.064.07||

10.064.08a triḥ sapta sasrā nadyo mahīr apo vanaspatīn parvatām̐ agnim ūtaye |
10.064.08c kṛśānum astṝn tiṣyaṁ sadhastha ā rudraṁ rudreṣu rudriyaṁ havāmahe ||

triḥ | sapta | sasrāḥ | nadyaḥ | mahīḥ | apaḥ | vanaspatīn | parvatān | agnim | ūtaye |
kṛśānum | astṝn | tiṣyam | sadha-sthe | ā | rudram | rudreṣu | rudriyam | havāmahe ||10.064.08||

10.064.09a sarasvatī sarayuḥ sindhur ūrmibhir maho mahīr avasā yantu vakṣaṇīḥ |
10.064.09c devīr āpo mātaraḥ sūdayitnvo ghṛtavat payo madhuman no arcata ||

sarasvatī | sarayuḥ | sindhuḥ | ūrmi-bhiḥ | mahaḥ | mahīḥ | avasā | ā | yantu | vakṣaṇīḥ |
devīḥ | āpaḥ | mātaraḥ | sūdayitnvaḥ | ghṛta-vat | payaḥ | madhu-mat | naḥ | arcata ||10.064.09||

10.064.10a uta mātā bṛhaddivā śṛṇotu nas tvaṣṭā devebhir janibhiḥ pitā vacaḥ |
10.064.10c ṛbhukṣā vājo rathaspatir bhago raṇvaḥ śaṁsaḥ śaśamānasya pātu naḥ ||

uta | mātā | bṛhat-divā | śṛṇotu | naḥ | tvaṣṭā | devebhiḥ | jani-bhiḥ | pitā | vacaḥ |
ṛbhukṣāḥ | vājaḥ | rathaḥ-patiḥ | bhagaḥ | raṇvaḥ | śaṁsaḥ | śaśamānasya | pātu | naḥ ||10.064.10||

10.064.11a raṇvaḥ saṁdṛṣṭau pitumām̐ iva kṣayo bhadrā rudrāṇām marutām upastutiḥ |
10.064.11c gobhiḥ ṣyāma yaśaso janeṣv ā sadā devāsa iḻayā sacemahi ||

raṇvaḥ | sam-dṛṣṭau | pitumān-iva | kṣayaḥ | bhadrā | rudrāṇām | marutām | upa-stutiḥ |
gobhiḥ | syāma | yaśasaḥ | janeṣu | ā | sadā | devāsaḥ | iḻayā | sacemahi ||10.064.11||

10.064.12a yām me dhiyam maruta indra devā adadāta varuṇa mitra yūyam |
10.064.12c tām pīpayata payaseva dhenuṁ kuvid giro adhi rathe vahātha ||

yam | me | dhiyam | marutaḥ | indra | devāḥ | adadāta | varuṇa | mitra | yūyam |
tām | pīpayata | payasā-iva | dhenum | kuvit | giraḥ | adhi | rathe | vahātha ||10.064.12||

10.064.13a kuvid aṅga prati yathā cid asya naḥ sajātyasya maruto bubodhatha |
10.064.13c nābhā yatra prathamaṁ saṁnasāmahe tatra jāmitvam aditir dadhātu naḥ ||

kuvit | aṅga | prati | yathā | cit | asya | naḥ | sa-jātyasya | marutaḥ | bubodhatha |
nābhā | yatra | prathamam | sam-nasāmahe | tatra | jāmi-tvam | aditiḥ | dadhātu | naḥ ||10.064.13||

10.064.14a te hi dyāvāpṛthivī mātarā mahī devī devāñ janmanā yajñiye itaḥ |
10.064.14c ubhe bibhṛta ubhayam bharīmabhiḥ purū retāṁsi pitṛbhiś ca siñcataḥ ||

te | hi | dyāvāpṛthivī iti | mātarā | mahī | devī | devān | janmanā | yajñiye iti | itaḥ |
ubhe iti | bibhṛtaḥ | ubhayam | bharīma-bhiḥ | puru | retāṁsi | pitṛ-bhiḥ | ca | siñcataḥ ||10.064.14||

10.064.15a vi ṣā hotrā viśvam aśnoti vāryam bṛhaspatir aramatiḥ panīyasī |
10.064.15c grāvā yatra madhuṣud ucyate bṛhad avīvaśanta matibhir manīṣiṇaḥ ||

vi | sā | hotrā | viśvam | aśnoti | vāryam | bṛhaspatiḥ | aramatiḥ | panīyasī |
grāvā | yatra | madhu-sut | ucyate | bṛhat | avīvaśanta | mati-bhiḥ | manīṣiṇaḥ ||10.064.15||

10.064.16a evā kavis tuvīravām̐ ṛtajñā draviṇasyur draviṇasaś cakānaḥ |
10.064.16c ukthebhir atra matibhiś ca vipro 'pīpayad gayo divyāni janma ||

eva | kaviḥ | tuvi-ravān | ṛta-jñāḥ | draviṇasyuḥ | draviṇasaḥ | cakānaḥ |
ukthebhiḥ | atra | mati-bhiḥ | ca | vipraḥ | apīpayat | gayaḥ | divyāni | janma ||10.064.16||

10.064.17a evā plateḥ sūnur avīvṛdhad vo viśva ādityā adite manīṣī |
10.064.17c īśānāso naro amartyenāstāvi jano divyo gayena ||

eva | plateḥ | sūnuḥ | avīvṛdhat | vaḥ | viśve | ādityāḥ | adite | manīṣī |
īśānāsaḥ | naraḥ | amartyena | astāvi | janaḥ | divyaḥ | gayena ||10.064.17||


10.065.01a agnir indro varuṇo mitro aryamā vāyuḥ pūṣā sarasvatī sajoṣasaḥ |
10.065.01c ādityā viṣṇur marutaḥ svar bṛhat somo rudro aditir brahmaṇas patiḥ ||

agniḥ | indraḥ | varuṇaḥ | mitraḥ | āryamā | vāyuḥ | pūṣā | sarasvatī | sa-joṣasaḥ |
ādityāḥ | viṣṇuḥ | marutaḥ | svaḥ | bṛhat | somaḥ | rudraḥ | aditiḥ | brahmaṇaḥ | patiḥ ||10.065.01||

10.065.02a indrāgnī vṛtrahatyeṣu satpatī mitho hinvānā tanvā samokasā |
10.065.02c antarikṣam mahy ā paprur ojasā somo ghṛtaśrīr mahimānam īrayan ||

indrāgnī iti | vṛtra-hatyeṣu | satpatī iti sat-patī | mithaḥ | hinvānā | tanvā | sam-okasā |
antarikṣam | mahi | ā | papruḥ | ojasā | somaḥ | ghṛta-śrīḥ | mahimānam | īrayan ||10.065.02||

10.065.03a teṣāṁ hi mahnā mahatām anarvaṇāṁ stomām̐ iyarmy ṛtajñā ṛtāvṛdhām |
10.065.03c ye apsavam arṇavaṁ citrarādhasas te no rāsantām mahaye sumitryāḥ ||

teṣām | hi | mahnā | māhatām | anarvaṇām | stomān | iyarmi | ṛta-jñāḥ | ṛta-vṛdhām |
ye | apsavam | arṇavam | citra-rādhasaḥ | te | naḥ | rāsantām | mahaye | su-mitryāḥ ||10.065.03||

10.065.04a svarṇaram antarikṣāṇi rocanā dyāvābhūmī pṛthivīṁ skambhur ojasā |
10.065.04c pṛkṣā iva mahayantaḥ surātayo devāḥ stavante manuṣāya sūrayaḥ ||

svaḥ-naram | antarikṣāṇi | rocanā | dyāvābhūmī iti | pṛthivīm | skambhuḥ | ojasā |
pṛkṣāḥ-iva | mahayantaḥ | su-rātayaḥ | devāḥ | stavante | manuṣāya | sūrayaḥ ||10.065.04||

10.065.05a mitrāya śikṣa varuṇāya dāśuṣe yā samrājā manasā na prayucchataḥ |
10.065.05c yayor dhāma dharmaṇā rocate bṛhad yayor ubhe rodasī nādhasī vṛtau ||

mitrāya | śikṣa | varuṇāya | dāśuṣe | yā | sam-rājā | manasā | na | pra-yucchataḥ |
yayoḥ | dhāma | dharmaṇā | rocate | bṛhat | yayoḥ | ubhe iti | rodasī iti | nādhasī iti | vṛtau ||10.065.05||

10.065.06a yā gaur vartanim paryeti niṣkṛtam payo duhānā vratanīr avārataḥ |
10.065.06c sā prabruvāṇā varuṇāya dāśuṣe devebhyo dāśad dhaviṣā vivasvate ||

yā | gauḥ | vartanim | pari-eti | niḥ-kṛtam | payaḥ | duhānā | vrata-nīḥ | avārataḥ |
sā | pra-bruvāṇā | varuṇāya | dāśuṣe | devebhyaḥ | dāśat | haviṣā | vivasvate ||10.065.06||

10.065.07a divakṣaso agnijihvā ṛtāvṛdha ṛtasya yoniṁ vimṛśanta āsate |
10.065.07c dyāṁ skabhitvy apa ā cakrur ojasā yajñaṁ janitvī tanvī ni māmṛjuḥ ||

divakṣasaḥ | agni-jihvāḥ | ṛta-vṛdhaḥ | ṛtasya | yonim | vi-mṛśantaḥ | āsate |
dyām | skabhitvī | apaḥ | ā | cakruḥ | ojasā | yajñam | janitvī | tanvi | ni | mamṛjuḥ ||10.065.07||

10.065.08a parikṣitā pitarā pūrvajāvarī ṛtasya yonā kṣayataḥ samokasā |
10.065.08c dyāvāpṛthivī varuṇāya savrate ghṛtavat payo mahiṣāya pinvataḥ ||

pari-kṣitā | pitarā | pūrvajāvarī iti pūrva-jāvarī | ṛtasya | yonā | kṣayataḥ | sam-okasā |
dyāvāpṛthivī iti | varuṇāya | savrate iti sa-vrate | ghṛta-vat | payaḥ | mahiṣāya | pinvataḥ ||10.065.08||

10.065.09a parjanyāvātā vṛṣabhā purīṣiṇendravāyū varuṇo mitro aryamā |
10.065.09c devām̐ ādityām̐ aditiṁ havāmahe ye pārthivāso divyāso apsu ye ||

parjanyāvātā | vṛṣabhā | purīṣiṇā | indravāyū iti | varuṇaḥ | mitraḥ | aryamā |
devān | ādityān | aditim | havāmahe | ye | pārthivāsaḥ | divyāsaḥ | ap-su | ye ||10.065.09||

10.065.10a tvaṣṭāraṁ vāyum ṛbhavo ya ohate daivyā hotārā uṣasaṁ svastaye |
10.065.10c bṛhaspatiṁ vṛtrakhādaṁ sumedhasam indriyaṁ somaṁ dhanasā u īmahe ||

tvaṣṭāram | vāyum | ṛbhavaḥ | yaḥ | ohate | daivyā | hotārau | uṣasam | svastaye |
bṛhaspatim | vṛtra-khādam | su-medhasam | indriyam | somam | dhana-sāḥ | ūm̐ iti | īmahe ||10.065.10||

10.065.11a brahma gām aśvaṁ janayanta oṣadhīr vanaspatīn pṛthivīm parvatām̐ apaḥ |
10.065.11c sūryaṁ divi rohayantaḥ sudānava āryā vratā visṛjanto adhi kṣami ||

brahma | gām | aśvam | janayantaḥ | oṣadhīḥ | vanaspatīn | pṛthivīm | parvatān | apaḥ |
sūrya | divi | rohayantaḥ | su-dānavaḥ | āryā | vratā | vi-sṛjantaḥ | adhi | kṣami ||10.065.11||

10.065.12a bhujyum aṁhasaḥ pipṛtho nir aśvinā śyāvam putraṁ vadhrimatyā ajinvatam |
10.065.12c kamadyuvaṁ vimadāyohathur yuvaṁ viṣṇāpvaṁ viśvakāyāva sṛjathaḥ ||

bhujyum | aṁhasaḥ | pipṛthaḥ | niḥ | aśvinā | śyāvam | putram | vadhri-matyāḥ | ajinvatam |
kama-dyuvam | vi-madāya | ūhathuḥ | yuvam | viṣṇāpvam | viśvakāya | ava | sṛjathaḥ ||10.065.12||

10.065.13a pāvīravī tanyatur ekapād ajo divo dhartā sindhur āpaḥ samudriyaḥ |
10.065.13c viśve devāsaḥ śṛṇavan vacāṁsi me sarasvatī saha dhībhiḥ puraṁdhyā ||

pāvīravī | tanyatuḥ | eka-pāt | ajaḥ | divaḥ | dhartā | sindhuḥ | āpaḥ | samudriyaḥ |
viśve | devāsaḥ | śṛṇavan | vacāṁsi | me | sarasvatī | saha | dhībhiḥ | puram-dhyā ||10.065.13||

10.065.14a viśve devāḥ saha dhībhiḥ puraṁdhyā manor yajatrā amṛtā ṛtajñāḥ |
10.065.14c rātiṣāco abhiṣācaḥ svarvidaḥ svar giro brahma sūktaṁ juṣerata ||

viśve | devāḥ | saha | dhībhiḥ | puram-dhyā | manoḥ | yajatrāḥ | amṛtāḥ | ṛta-jñāḥ |
rāti-sācaḥ | abhi-sācaḥ | svaḥ-vidaḥ | svaḥ | giraḥ | brahma | su-uktam | juṣerata ||10.065.14||

10.065.15a devān vasiṣṭho amṛtān vavande ye viśvā bhuvanābhi pratasthuḥ |
10.065.15c te no rāsantām urugāyam adya yūyam pāta svastibhiḥ sadā naḥ ||

devān | vasiṣṭhaḥ | amṛtān | vavande | ye | viśvā | bhuvanā | abhi | pra-tasthuḥ |
te | naḥ | rāsantām | uru-gāyam | adya | yūyam | pāta | svasti-bhiḥ | sadā | naḥ ||10.065.15||


10.066.01a devān huve bṛhacchravasaḥ svastaye jyotiṣkṛto adhvarasya pracetasaḥ |
10.066.01c ye vāvṛdhuḥ prataraṁ viśvavedasa indrajyeṣṭhāso amṛtā ṛtāvṛdhaḥ ||

devān | huve | bṛhat-śravasaḥ | svastaye | jyotiḥ-kṛtaḥ | adhvarasya | pra-cetasaḥ |
ye | vavṛdhuḥ | pra-taram | viśva-vedasaḥ | indra-jyeṣṭhāsaḥ | amṛtāḥ | ṛta-vṛdhaḥ ||10.066.01||

10.066.02a indraprasūtā varuṇapraśiṣṭā ye sūryasya jyotiṣo bhāgam ānaśuḥ |
10.066.02c marudgaṇe vṛjane manma dhīmahi māghone yajñaṁ janayanta sūrayaḥ ||

indra-prasūtāḥ | varuṇa-praśiṣṭāḥ | ye | sūryasya | jyotiṣaḥ | bhāgam | ānaśuḥ |
marut-gaṇe | vṛjane | manma | dhīmahi | māghone | yajñam | janayanta | sūrayaḥ ||10.066.02||

10.066.03a indro vasubhiḥ pari pātu no gayam ādityair no aditiḥ śarma yacchatu |
10.066.03c rudro rudrebhir devo mṛḻayāti nas tvaṣṭā no gnābhiḥ suvitāya jinvatu ||

indraḥ | vasu-bhiḥ | pari | pātu | naḥ | gayam | ādityaiḥ | naḥ | aditiḥ | śarma | yacchatu |
rudraḥ | rudrebhiḥ | devaḥ | mṛḻayāti | naḥ | tvaṣṭā | naḥ | gnābhiḥ | suvitāya | jinvatu ||10.066.03||

10.066.04a aditir dyāvāpṛthivī ṛtam mahad indrāviṣṇū marutaḥ svar bṛhat |
10.066.04c devām̐ ādityām̐ avase havāmahe vasūn rudrān savitāraṁ sudaṁsasam ||

aditiḥ | dyāvāpṛthivī iti | ṛtam | mahat | indrāviṣṇū iti | marutaḥ | svaḥ | bṛhat |
devān | ādityān | avase | havāmahe | vasūn | rudrān | savitāram | su-daṁsasam ||10.066.04||

10.066.05a sarasvān dhībhir varuṇo dhṛtavrataḥ pūṣā viṣṇur mahimā vāyur aśvinā |
10.066.05c brahmakṛto amṛtā viśvavedasaḥ śarma no yaṁsan trivarūtham aṁhasaḥ ||

sarasvān | dhībhiḥ | varuṇaḥ | dhṛta-vrataḥ | pūṣā | viṣṇuḥ | mahimā | vāyuḥ | aśvinā |
brahma-kṛtaḥ | amṛtāḥ | viśva-vedasaḥ | śarma | naḥ | yaṁsan | tri-varūtham | aṁhasaḥ ||10.066.05||

10.066.06a vṛṣā yajño vṛṣaṇaḥ santu yajñiyā vṛṣaṇo devā vṛṣaṇo haviṣkṛtaḥ |
10.066.06c vṛṣaṇā dyāvāpṛthivī ṛtāvarī vṛṣā parjanyo vṛṣaṇo vṛṣastubhaḥ ||

vṛṣā | yajñaḥ | vṛṣaṇaḥ | santu | yajñiyāḥ | vṛṣaṇaḥ | devāḥ | vṛṣaṇaḥ | haviḥ-kṛtaḥ |
vṛṣaṇā | dyāvāpṛthivī iti | ṛta-varī ityṛta-varī | vṛṣā | parjanyaḥ | vṛṣaṇaḥ | vṛṣa-stubhaḥ ||10.066.06||

10.066.07a agnīṣomā vṛṣaṇā vājasātaye purupraśastā vṛṣaṇā upa bruve |
10.066.07c yāv ījire vṛṣaṇo devayajyayā tā naḥ śarma trivarūthaṁ vi yaṁsataḥ ||

agnīṣomā | vṛṣaṇā | vāja-sātaye | puru-praśastā | vṛṣaṇau | upa | bruve |
yau | ījire | vṛṣaṇaḥ | deva-yajyayā | tā | naḥ | śarma | tri-varūtham | vi | yāṁsataḥ ||10.066.07||

10.066.08a dhṛtavratāḥ kṣatriyā yajñaniṣkṛto bṛhaddivā adhvarāṇām abhiśriyaḥ |
10.066.08c agnihotāra ṛtasāpo adruho 'po asṛjann anu vṛtratūrye ||

dhṛta-vratāḥ | kṣatriyāḥ | yajñaniḥ-kṛtaḥ | bṛhat-divāḥ | adhvarāṇām | abhi-śriyaḥ |
agni-hotāraḥ | ṛta-sāpaḥ | adruhaḥ | apaḥ | asṛjan | anu | vṛtra-tūrye ||10.066.08||

10.066.09a dyāvāpṛthivī janayann abhi vratāpa oṣadhīr vanināni yajñiyā |
10.066.09c antarikṣaṁ svar ā paprur ūtaye vaśaṁ devāsas tanvī ni māmṛjuḥ ||

dyāvāpṛthivī iti | janayan | abhi | vratā | āpaḥ | oṣadhīḥ | vanināni | yajñiyā |
antarikṣam | svaḥ | ā | papruḥ | ūtaye | vaśam | devāsaḥ | tanvi | ni | mamṛjuḥ ||10.066.09||

10.066.10a dhartāro diva ṛbhavaḥ suhastā vātāparjanyā mahiṣasya tanyatoḥ |
10.066.10c āpa oṣadhīḥ pra tirantu no giro bhago rātir vājino yantu me havam ||

dhartāraḥ | divaḥ | ṛbhavaḥ | su-hastāḥ | vātāparjanyā | mahiṣasya | tanyatoḥ |
āpaḥ | oṣadhīḥ | pra | tirantu | naḥ | giraḥ | bhagaḥ | rātiḥ | vājinaḥ | yantu | me | havam ||10.066.10||

10.066.11a samudraḥ sindhū rajo antarikṣam aja ekapāt tanayitnur arṇavaḥ |
10.066.11c ahir budhnyaḥ śṛṇavad vacāṁsi me viśve devāsa uta sūrayo mama ||

samudraḥ | sindhuḥ | rajaḥ | antarikṣam | ajaḥ | eka-pāt | tanayitnuḥ | arṇavaḥ |
ahiḥ | budhnyaḥ | śṛṇavat | vacāṁsi | me | viśve | devāsaḥ | uta | sūrayaḥ | mama ||10.066.11||

10.066.12a syāma vo manavo devavītaye prāñcaṁ no yajñam pra ṇayata sādhuyā |
10.066.12c ādityā rudrā vasavaḥ sudānava imā brahma śasyamānāni jinvata ||

syāma | vaḥ | manavaḥ | deva-vītaye | prāñcam | naḥ | yajñam | pra | nayata | sādhu-yā |
ādītyāḥ | rudrāḥ | vasavaḥ | su-dānavaḥ | imā | brahma | śasyamānāni | jinvata ||10.066.12||

10.066.13a daivyā hotārā prathamā purohita ṛtasya panthām anv emi sādhuyā |
10.066.13c kṣetrasya patim prativeśam īmahe viśvān devām̐ amṛtām̐ aprayucchataḥ ||

daivyā | hotārā | prathamā | puraḥ-hitā | ṛtasya | panthām | anu | emi | sādhu-yā |
kṣetrasya | patim | prati-veśam | īmahe | viśvān | devān | amṛtān | apra-yucchataḥ ||10.066.13||

10.066.14a vasiṣṭhāsaḥ pitṛvad vācam akrata devām̐ īḻānā ṛṣivat svastaye |
10.066.14c prītā iva jñātayaḥ kāmam etyāsme devāso 'va dhūnutā vasu ||

vasiṣṭhāsaḥ | pitṛ-vat | vācam | akrata | devān | īḻānāḥ | ṛṣi-vat | svastaye |
prītāḥ-iva | jñātayaḥ | kāmam | ā-itya | asme iti | devāsaḥ | ava | dhūnuta | vasu ||10.066.14||

10.066.15a devān vasiṣṭho amṛtān vavande ye viśvā bhuvanābhi pratasthuḥ |
10.066.15c te no rāsantām urugāyam adya yūyam pāta svastibhiḥ sadā naḥ ||

devān | vasiṣṭhaḥ | amṛtān | vavande | ye | viśvā | bhuvanā | abhi | pra-tasthuḥ |
te | naḥ | rāsantām | uru-gāyam | adya | yūyam | pāta | svasti-bhiḥ | sadā | naḥ ||10.066.15||


10.067.01a imāṁ dhiyaṁ saptaśīrṣṇīm pitā na ṛtaprajātām bṛhatīm avindat |
10.067.01c turīyaṁ svij janayad viśvajanyo 'yāsya uktham indrāya śaṁsan ||

imām | dhiyam | sapta-śīrṣṇīm | pitā | naḥ | ṛta-prajātām | bṛhatīm | avindat |
turīyam | svit | janayat | viśva-janyaḥ | ayāsyaḥ | uktham | indrāya | śaṁsan ||10.067.01||

10.067.02a ṛtaṁ śaṁsanta ṛju dīdhyānā divas putrāso asurasya vīrāḥ |
10.067.02c vipram padam aṅgiraso dadhānā yajñasya dhāma prathamam mananta ||

ṛtam | śaṁsantaḥ | ṛju | dīdhyānāḥ | divaḥ | putrāsaḥ | asurasya | vīrāḥ |
vipram | padam | aṅgirasaḥ | dadhānāḥ | yajñasya | dhāma | prathamam | mananta ||10.067.02||

10.067.03a haṁsair iva sakhibhir vāvadadbhir aśmanmayāni nahanā vyasyan |
10.067.03c bṛhaspatir abhikanikradad gā uta prāstaud uc ca vidvām̐ agāyat ||

haṁsaiḥ-iva | sakhi-bhiḥ | vāvadat-bhiḥ | aśman-mayāni | nahanā | vi-asyan |
bṛhaspatiḥ | abhi-kanikradat | gāḥ | uta | pra | astaut | ut | ca | vidvān | agāyat ||10.067.03||

10.067.04a avo dvābhyām para ekayā gā guhā tiṣṭhantīr anṛtasya setau |
10.067.04c bṛhaspatis tamasi jyotir icchann ud usrā ākar vi hi tisra āvaḥ ||

avaḥ | dvābhyām | paraḥ | ekayā | gāḥ | guhā | tiṣṭhantīḥ | anṛtasya | setau |
bṛhaspatiḥ | tamasi | jyotiḥ | icchan | ut | usrāḥ | ā | akaḥ | vi | hi | tiśraḥ | āvarityāvaḥ ||10.067.04||

10.067.05a vibhidyā puraṁ śayathem apācīṁ nis trīṇi sākam udadher akṛntat |
10.067.05c bṛhaspatir uṣasaṁ sūryaṁ gām arkaṁ viveda stanayann iva dyauḥ ||

vi-bhidya | puram | śayathā | īm | apācīm | niḥ | trīṇi | sākam | uda-dheḥ | akṛntat |
bṛhaspatiḥ | uṣasam | sūryam | gām | arkam | viveda | stanayan-iva | dyauḥ ||10.067.05||

10.067.06a indro valaṁ rakṣitāraṁ dughānāṁ kareṇeva vi cakartā raveṇa |
10.067.06c svedāñjibhir āśiram icchamāno 'rodayat paṇim ā gā amuṣṇāt ||

indraḥ | valam | rakṣitāram | dughānām | kareṇa-iva | vi | cakarta | raveṇa |
svedāñji-bhiḥ | ā-śiram | icchamānaḥ | arodayat | paṇim | ā | gāḥ | amuṣṇāt ||10.067.06||

10.067.07a sa īṁ satyebhiḥ sakhibhiḥ śucadbhir godhāyasaṁ vi dhanasair adardaḥ |
10.067.07c brahmaṇas patir vṛṣabhir varāhair gharmasvedebhir draviṇaṁ vy ānaṭ ||

saḥ | īm | satyebhiḥ | sakhi-bhiḥ | śucat-bhiḥ | go-dhāyasam | vi | dhana-saiḥ | adardarityadardaḥ |
brahmaṇaḥ | patiḥ | vṛṣa-bhiḥ | varāhaiḥ | gharma-svedebhiḥ | draviṇam | vi | ānaṭ ||10.067.07||

10.067.08a te satyena manasā gopatiṁ gā iyānāsa iṣaṇayanta dhībhiḥ |
10.067.08c bṛhaspatir mithoavadyapebhir ud usriyā asṛjata svayugbhiḥ ||

te | satyena | manasā | go-patim | gāḥ | iyānāsaḥ | iṣaṇayanta | dhībhiḥ |
bṛhaspatiḥ | mithaḥ-avadyapebhiḥ | ut | usriyāḥ | asṛjata | svayuk-bhiḥ ||10.067.08||

10.067.09a taṁ vardhayanto matibhiḥ śivābhiḥ siṁham iva nānadataṁ sadhasthe |
10.067.09c bṛhaspatiṁ vṛṣaṇaṁ śūrasātau bhare-bhare anu madema jiṣṇum ||

tam | vardhayantaḥ | mati-bhiḥ | śivābhiḥ | siṁham-iva | nānadatam | sadha-sthe |
bṛhaspatim | vṛṣaṇam | śūra-sātau | bhare-bhare | anu | madema | jiṣṇum ||10.067.09||

10.067.10a yadā vājam asanad viśvarūpam ā dyām arukṣad uttarāṇi sadma |
10.067.10c bṛhaspatiṁ vṛṣaṇaṁ vardhayanto nānā santo bibhrato jyotir āsā ||

yadā | vājam | asanat | viśva-rūpam | ā | dyām | arukṣat | ut-tarāṇi | sadma |
bṛhaspatim | vṛṣaṇam | vardhayantaḥ | nānā | santaḥ | bibhrataḥ | jyotiḥ | āsā ||10.067.10||

10.067.11a satyām āśiṣaṁ kṛṇutā vayodhai kīriṁ cid dhy avatha svebhir evaiḥ |
10.067.11c paścā mṛdho apa bhavantu viśvās tad rodasī śṛṇutaṁ viśvaminve ||

satyām | ā-śiṣam | kṛṇuta | vayaḥ-dhai | kīrim | cit | hi | avatha | svebhiḥ | evaiḥ |
paścā | mṛdhaḥ | apa | bhavantu | viśvāḥ | tat | rodasī iti | śṛṇutam | viśvaminve iti viśvam-inve ||10.067.11||

10.067.12a indro mahnā mahato arṇavasya vi mūrdhānam abhinad arbudasya |
10.067.12c ahann ahim ariṇāt sapta sindhūn devair dyāvāpṛthivī prāvataṁ naḥ ||

indraḥ | mahnā | mahataḥ | arṇavasya | vi | mūrdhānam | abhinat | arbudasya |
ahan | ahim | ariṇāt | sapta | sindhūn | devaiḥ | dyāvāpṛthivī iti | pra | avatam | naḥ ||10.067.12||


10.068.01a udapruto na vayo rakṣamāṇā vāvadato abhriyasyeva ghoṣāḥ |
10.068.01c giribhrajo normayo madanto bṛhaspatim abhy arkā anāvan ||

uda-prutaḥ | na | vayaḥ | rakṣamāṇāḥ | vāvadataḥ | abhriyasya-iva | ghoṣāḥ |
giri-bhrajaḥ | na | ūrmayaḥ | madantaḥ | bṛhaspatim | abhi | arkāḥ | anāvan ||10.068.01||

10.068.02a saṁ gobhir āṅgiraso nakṣamāṇo bhaga ived aryamaṇaṁ nināya |
10.068.02c jane mitro na dampatī anakti bṛhaspate vājayāśūm̐r ivājau ||

sam | gobhiḥ | āṅgirasaḥ | nakṣamāṇaḥ | bhagaḥ-iva | it | aryamaṇam | nināya |
jane | mitraḥ | na | dampatī iti dam-patī | anakti | bṛhaspate | vājaya | āśūn-iva | ājau ||10.068.02||

10.068.03a sādhvaryā atithinīr iṣirāḥ spārhāḥ suvarṇā anavadyarūpāḥ |
10.068.03c bṛhaspatiḥ parvatebhyo vitūryā nir gā ūpe yavam iva sthivibhyaḥ ||

sādhu-aryāḥ | atithinīḥ | iṣirāḥ | spārhāḥ | su-varṇāḥ | anavadya-rūpāḥ |
bṛhaspatiḥ | parvatebhyaḥ | vi-tūrya | niḥ | gāḥ | ūpe | yavam-iva | sthivi-bhyaḥ ||10.068.03||

10.068.04a āpruṣāyan madhuna ṛtasya yonim avakṣipann arka ulkām iva dyoḥ |
10.068.04c bṛhaspatir uddharann aśmano gā bhūmyā udneva vi tvacam bibheda ||

ā-pruṣāyan | madhunā | ṛtasya | yonim | ava-kṣipan | arkaḥ | ulkām-iva | dyoḥ |
bṛhaspatiḥ | uddharan | aśmanaḥ | gāḥ | bhūmyāḥ | udnā-iva | vi | tvacam | bibheda ||10.068.04||

10.068.05a apa jyotiṣā tamo antarikṣād udnaḥ śīpālam iva vāta ājat |
10.068.05c bṛhaspatir anumṛśyā valasyābhram iva vāta ā cakra ā gāḥ ||

apa | jyotiṣā | tamaḥ | antarikṣāt | udnaḥ | śīpālam-iva | vātaḥ | ājat |
bṛhaspatiḥ | anu-mṛśya | valasya | abhram-iva | vātaḥ | ā | cakre | ā | gāḥ ||10.068.05||

10.068.06a yadā valasya pīyato jasum bhed bṛhaspatir agnitapobhir arkaiḥ |
10.068.06c dadbhir na jihvā pariviṣṭam ādad āvir nidhīm̐r akṛṇod usriyāṇām ||

yadā | valasya | pīyataḥ | jasum | bhet | bṛhaspatiḥ | agnitapaḥ-bhiḥ | arkaiḥ |
dat-bhiḥ | na | jihvā | pari-viṣṭam | ādat | āviḥ | nidhīn | akṛṇot | usriyāṇām ||10.068.06||

10.068.07a bṛhaspatir amata hi tyad āsāṁ nāma svarīṇāṁ sadane guhā yat |
10.068.07c āṇḍeva bhittvā śakunasya garbham ud usriyāḥ parvatasya tmanājat ||

bṛhaspatiḥ | amata | hi | tyat | āsām | nāma | svarīṇām | sadane | guhā | yat |
āṇḍā-iva | bhittvā | śakunasya | garbham | ut | usriyāḥ | parvatasya | tmanā | ājat ||10.068.07||

10.068.08a aśnāpinaddham madhu pary apaśyan matsyaṁ na dīna udani kṣiyantam |
10.068.08c niṣ ṭaj jabhāra camasaṁ na vṛkṣād bṛhaspatir viraveṇā vikṛtya ||

aśnā | api-naddham | madhu | pari | apaśyat | matsyam | na | dīne | udani | kṣiyantam |
niḥ | tat | jabhāra | camasam | na | vṛkṣāt | bṛhaspatiḥ | vi-raveṇa | vi-kṛtya ||10.068.08||

10.068.09a soṣām avindat sa svaḥ so agniṁ so arkeṇa vi babādhe tamāṁsi |
10.068.09c bṛhaspatir govapuṣo valasya nir majjānaṁ na parvaṇo jabhāra ||

saḥ | uṣām | avindat | saḥ | svariti svaḥ | saḥ | agnim | saḥ | arkeṇa | vi | babādhe | tamāṁsi |
bṛhaspatiḥ | go-vapuṣaḥ | valasya | niḥ | majjānam | na | parvaṇaḥ | jabhāra ||10.068.09||

10.068.10a himeva parṇā muṣitā vanāni bṛhaspatinākṛpayad valo gāḥ |
10.068.10c anānukṛtyam apunaś cakāra yāt sūryāmāsā mitha uccarātaḥ ||

himā-iva | parṇā | muṣitā | vanāni | bṛhaspatinā | akṛpayat | valaḥ | gāḥ |
ananu-kṛtyam | apunariti | cakāra | yāt | sūryāmāsā | mithaḥ | ut-carātaḥ ||10.068.10||

10.068.11a abhi śyāvaṁ na kṛśanebhir aśvaṁ nakṣatrebhiḥ pitaro dyām apiṁśan |
10.068.11c rātryāṁ tamo adadhur jyotir ahan bṛhaspatir bhinad adriṁ vidad gāḥ ||

abhi | śyāvam | na | kṛśanebhiḥ | aśvam | nakṣatrebhiḥ | pitaraḥ | dyām | apiṁśan |
rātryām | tamaḥ | adadhuḥ | jyotiḥ | ahan | bṛhaspatiḥ | bhinat | adrim | vidat | gāḥ ||10.068.11||

10.068.12a idam akarma namo abhriyāya yaḥ pūrvīr anv ānonavīti |
10.068.12c bṛhaspatiḥ sa hi gobhiḥ so aśvaiḥ sa vīrebhiḥ sa nṛbhir no vayo dhāt ||

idam | akarma | namaḥ | abhriyāya | yaḥ | pūrvīḥ | anu | ā-nonavīti |
bṛhaspatiḥ | saḥ | hi | gobhiḥ | saḥ | aśvaḥ | saḥ | vīrebhiḥ | saḥ | nṛ-bhiḥ | naḥ | vayaḥ | dhāt ||10.068.12||


10.069.01a bhadrā agner vadhryaśvasya saṁdṛśo vāmī praṇītiḥ suraṇā upetayaḥ |
10.069.01c yad īṁ sumitrā viśo agra indhate ghṛtenāhuto jarate davidyutat ||

bhadrāḥ | agneḥ | vadhri-aśvasya | sam-dṛśaḥ | vāmī | pra-ṇītiḥ | su-raṇāḥ | upa-itayaḥ |
yat | īm | su-mitrāḥ | viśaḥ | agre | indhate | ghṛtena | ā-hutaḥ | jarate | davidyutat ||10.069.01||

10.069.02a ghṛtam agner vadhryaśvasya vardhanaṁ ghṛtam annaṁ ghṛtam v asya medanam |
10.069.02c ghṛtenāhuta urviyā vi paprathe sūrya iva rocate sarpirāsutiḥ ||

ghṛtam | agneḥ | vadhri-aśvasya | vardhanam | ghṛtam | annam | ghṛtam | ūm̐ iti | asya | bhedanam |
ghṛtena | ā-hutaḥ | urviyā | vi | paprathe | sūryaḥ-iva | rocate | sarpiḥ-āsutiḥ ||10.069.02||

10.069.03a yat te manur yad anīkaṁ sumitraḥ samīdhe agne tad idaṁ navīyaḥ |
10.069.03c sa revac choca sa giro juṣasva sa vājaṁ darṣi sa iha śravo dhāḥ ||

yat | te | manuḥ | yat | anīkam | su-mitraḥ | sam-īdhe | agne | tat | idam | navīyaḥ |
saḥ | revat | śoca | saḥ | giraḥ | juṣasva | saḥ | vājam | darṣi | saḥ | iha | śravaḥ | dhāḥ ||10.069.03||

10.069.04a yaṁ tvā pūrvam īḻito vadhryaśvaḥ samīdhe agne sa idaṁ juṣasva |
10.069.04c sa naḥ stipā uta bhavā tanūpā dātraṁ rakṣasva yad idaṁ te asme ||

yam | tvā | pūrvam | īḻitaḥ | vadhri-aśvaḥ | sam-īdhe | agne | saḥ | idam | juṣasva |
saḥ | naḥ | sti-pāḥ | uta | bhava | tanū-pāḥ | dātram | rakṣasva | yat | idam | te | asme iti ||10.069.04||

10.069.05a bhavā dyumnī vādhryaśvota gopā mā tvā tārīd abhimātir janānām |
10.069.05c śūra iva dhṛṣṇuś cyavanaḥ sumitraḥ pra nu vocaṁ vādhryaśvasya nāma ||

bhava | dyumnī | vādhri-aśva | uta | gopāḥ | mā | tvā | tārīt | abhi-mātiḥ | janānām |
śūraḥ-iva | ghṛṣṇuḥ | cyavanaḥ | su-mitraḥ | pra | nu | vocam | vādhri-aśvasya | nāma ||10.069.05||

10.069.06a sam ajryā parvatyā vasūni dāsā vṛtrāṇy āryā jigetha |
10.069.06c śūra iva dhṛṣṇuś cyavano janānāṁ tvam agne pṛtanāyūm̐r abhi ṣyāḥ ||

sam | ajryā | parvatyā | vasūni | dāsā | vṛtrāṇi | āryā | jigetha |
śūraḥ-iva | ghṛṣṇuḥ | cyavanaḥ | janānām | tvam | agne | pṛtanā-yūn | abhi | syāḥ ||10.069.06||

10.069.07a dīrghatantur bṛhadukṣāyam agniḥ sahasrastarīḥ śatanītha ṛbhvā |
10.069.07c dyumān dyumatsu nṛbhir mṛjyamānaḥ sumitreṣu dīdayo devayatsu ||

dīrgha-tantuḥ | bṛhat-ukṣā | ayam | agniḥ | sahasra-starīḥ | śata-nīthaḥ | ṛbhvā |
dyu-mān | dyumat-su | nṛ-bhiḥ | mṛjyamānaḥ | su-mitreṣu | dīdayaḥ | devayat-su ||10.069.07||

10.069.08a tve dhenuḥ sudughā jātavedo 'saścateva samanā sabardhuk |
10.069.08c tvaṁ nṛbhir dakṣiṇāvadbhir agne sumitrebhir idhyase devayadbhiḥ ||

tve iti | dhenuḥ | su-dughā | jātavedaḥ | asaścatā-iva | samanā | sabaḥ-dhuk |
tvam | nṛ-bhiḥ | dakṣiṇāvat-bhiḥ | agne | su-mitrebhiḥ | idhyase | devayat-bhiḥ ||10.069.08||

10.069.09a devāś cit te amṛtā jātavedo mahimānaṁ vādhryaśva pra vocan |
10.069.09c yat sampṛccham mānuṣīr viśa āyan tvaṁ nṛbhir ajayas tvāvṛdhebhiḥ ||

devāḥ | cit | te | amṛtāḥ | jāta-vedaḥ | mahimānam | vādhi-aśva | pra | vocan |
yat | sam-pṛccham | mānuṣīḥ | viśaḥ | āyan | tvam | nṛ-bhiḥ | ajayaḥ | tvā-vṛdhebhiḥ ||10.069.09||

10.069.10a piteva putram abibhar upasthe tvām agne vadhryaśvaḥ saparyan |
10.069.10c juṣāṇo asya samidhaṁ yaviṣṭhota pūrvām̐ avanor vrādhataś cit ||

pitā-iva | putram | abibhaḥ | upa-sthe | tvām | agne | vadhri-aśvaḥ | saparyan |
juṣāṇaḥ | asya | sam-idham | yaviṣṭha | uta | pūrvān | avanoḥ | vrādhataḥ | cit ||10.069.10||

10.069.11a śaśvad agnir vadhryaśvasya śatrūn nṛbhir jigāya sutasomavadbhiḥ |
10.069.11c samanaṁ cid adahaś citrabhāno 'va vrādhantam abhinad vṛdhaś cit ||

śaśvat | agniḥ | vadhri-aśvasya | śatrūn | nṛ-bhiḥ | jigāya | sutasomavat-bhiḥ |
samanam | cit | adahaḥ | citrabhāno iti citra-bhāno | ava | vrādhantam | abhinat | vṛdhaḥ | cit ||10.069.11||

10.069.12a ayam agnir vadhryaśvasya vṛtrahā sanakāt preddho namasopavākyaḥ |
10.069.12c sa no ajāmīm̐r uta vā vijāmīn abhi tiṣṭha śardhato vādhryaśva ||

ayam | agniḥ | vadhri-aśvasya | vṛtra-hā | sanakāt | pra-iddhaḥ | namasā | upa-vākyaḥ |
saḥ | naḥ | ajāmīn | uta | vā | vi-jāmīn | abhi | tiṣṭha | śardhataḥ | vādhri-aśva ||10.069.12||


10.070.01a imām me agne samidhaṁ juṣasveḻas pade prati haryā ghṛtācīm |
10.070.01c varṣman pṛthivyāḥ sudinatve ahnām ūrdhvo bhava sukrato devayajyā ||

imām | me | agne | sam-idham | juṣasva | iḻaḥ | pade | prati | harya | ghṛtācīm |
varṣman | pṛthivyāḥ | sudina-tve | ahnām | ūrdhvaḥ | bhava | sukrato iti su-krato | deva-yajyā ||10.070.01||

10.070.02a ā devānām agrayāveha yātu narāśaṁso viśvarūpebhir aśvaiḥ |
10.070.02c ṛtasya pathā namasā miyedho devebhyo devatamaḥ suṣūdat ||

ā | devānām | agra-yāvā | iha | yātu | narāśaṁsaḥ | viśva-rūpebhiḥ | aśvaiḥ |
ṛtasya | pathā | namasā | miyedhaḥ | devebhyaḥ | deva-tamaḥ | susūdat ||10.070.02||

10.070.03a śaśvattamam īḻate dūtyāya haviṣmanto manuṣyāso agnim |
10.070.03c vahiṣṭhair aśvaiḥ suvṛtā rathenā devān vakṣi ni ṣadeha hotā ||

śaśvat-tamam | īḻate | dūtyāya | haviṣmantaḥ | manuṣyāsaḥ | agnim |
vahiṣṭhaiḥ | aśvaiḥ | su-vṛtā | rathena | ā | devān | vakṣi | ni | sada | iha | hotā ||10.070.03||

10.070.04a vi prathatāṁ devajuṣṭaṁ tiraścā dīrghaṁ drāghmā surabhi bhūtv asme |
10.070.04c aheḻatā manasā deva barhir indrajyeṣṭhām̐ uśato yakṣi devān ||

vi | prathatām | deva-juṣṭam | tiraścā | dīrgham | drāghmā | surabhi | bhūtu | asme iti |
aheḻata | manasā | deva | barhiḥ | indra-jyeṣṭhān | uśataḥ | yakṣi | devān ||10.070.04||

10.070.05a divo vā sānu spṛśatā varīyaḥ pṛthivyā vā mātrayā vi śrayadhvam |
10.070.05c uśatīr dvāro mahinā mahadbhir devaṁ rathaṁ rathayur dhārayadhvam ||

divaḥ | vā | sānu | spṛśata | varīyaḥ | pṛthivyā | vā | mātrayā | vi | śrayadhvam |
uśatīḥ | dvāraḥ | mahinā | mahat-bhiḥ | devam | ratham | ratha-yuḥ | dhārayadhvam ||10.070.05||

10.070.06a devī divo duhitarā suśilpe uṣāsānaktā sadatāṁ ni yonau |
10.070.06c ā vāṁ devāsa uśatī uśanta urau sīdantu subhage upasthe ||

devī iti | divaḥ | duhitarā | suśilpe iti su-śilpe | uṣasānaktā | sadatām | ni | yonau |
ā | vām | devāsaḥ | uśatī iti | uśantaḥ | urau | sīdantu | subhage iti su-bhage | upa-sthe ||10.070.06||

10.070.07a ūrdhvo grāvā bṛhad agniḥ samiddhaḥ priyā dhāmāny aditer upasthe |
10.070.07c purohitāv ṛtvijā yajñe asmin viduṣṭarā draviṇam ā yajethām ||

ūrdhvaḥ | grāvā | bṛhat | agniḥ | sam-iddhaḥ | priyā | dhāmāni | aditeḥ | upa-sthe |
puraḥ-hitau | ṛtvijā | yajñe | asmin | viduḥ-tarā | draviṇam | ā | yajethām ||10.070.07||

10.070.08a tisro devīr barhir idaṁ varīya ā sīdata cakṛmā vaḥ syonam |
10.070.08c manuṣvad yajñaṁ sudhitā havīṁṣīḻā devī ghṛtapadī juṣanta ||

tisraḥ | devīḥ | barhiḥ | idam | varīyaḥ | ā | sīdata | cakṛma | vaḥ | syonam |
manuṣvat | yajñam | su-dhitā | havīṁṣi | iḻā | devī | ghṛta-padī | juṣanta ||10.070.08||

10.070.09a deva tvaṣṭar yad dha cārutvam ānaḍ yad aṅgirasām abhavaḥ sacābhūḥ |
10.070.09c sa devānām pātha upa pra vidvām̐ uśan yakṣi draviṇodaḥ suratnaḥ ||

deva | tvaṣṭaḥ | yat | ha | cāru-tvam | ānaṭ | yat | aṅgirasām | abhavaḥ | sacā-bhūḥ |
saḥ | devānām | pāthaḥ | upa | pra | vidvān | uśan | yakṣi | draviṇaḥ-daḥ | su-ratnaḥ ||10.070.09||

10.070.10a vanaspate raśanayā niyūyā devānām pātha upa vakṣi vidvān |
10.070.10c svadāti devaḥ kṛṇavad dhavīṁṣy avatāṁ dyāvāpṛthivī havam me ||

vanaspate | raśanayā | ni-yūya | devānām | pāthaḥ | upa | vakṣi | vidvān |
svadāti | devaḥ | kṛṇavat | havīṁṣi | avatām | dyāvāpṛthivī iti | havam | me ||10.070.10||

10.070.11a āgne vaha varuṇam iṣṭaye na indraṁ divo maruto antarikṣāt |
10.070.11c sīdantu barhir viśva ā yajatrāḥ svāhā devā amṛtā mādayantām ||

ā | agne | vaha | varuṇam | iṣṭaye | naḥ | indram | divaḥ | marutaḥ | antarikṣāt |
sīdantu | barhiḥ | viśve | ā | yajatrāḥ | svāhā | devāḥ | amṛtāḥ | mādayantām ||10.070.11||


10.071.01a bṛhaspate prathamaṁ vāco agraṁ yat prairata nāmadheyaṁ dadhānāḥ |
10.071.01c yad eṣāṁ śreṣṭhaṁ yad aripram āsīt preṇā tad eṣāṁ nihitaṁ guhāviḥ ||

bṛhaspate | prathamam | vācaḥ | agram | yat | pra | airata | nāma-dheyam | dadhānāḥ |
yat | eṣām | śreṣṭham | yat | aripram | āsīt | preṇā | tat | eṣām | ni-hitam | guhā | āviḥ ||10.071.01||

10.071.02a saktum iva titaünā punanto yatra dhīrā manasā vācam akrata |
10.071.02c atrā sakhāyaḥ sakhyāni jānate bhadraiṣāṁ lakṣmīr nihitādhi vāci ||

saktum-iva | titaünā | punantaḥ | yatra | dhīrāḥ | manasā | vācam | akrata |
atra | sakhāyaḥ | sakhyāni | jānate | bhadrā | eṣām | lakṣmīḥ | nihitā | adhi | vāci ||10.071.02||

10.071.03a yajñena vācaḥ padavīyam āyan tām anv avindann ṛṣiṣu praviṣṭām |
10.071.03c tām ābhṛtyā vy adadhuḥ purutrā tāṁ sapta rebhā abhi saṁ navante ||

yajñena | vācaḥ | pada-vīyam | āyan | tām | anu | avindan | ṛṣiṣu | pra-viṣṭām |
tām | ā-bhṛtya | vi | adadhuḥ | puru-trā | tām | sapta | rebhāḥ | abhi | sam | navante ||10.071.03||

10.071.04a uta tvaḥ paśyan na dadarśa vācam uta tvaḥ śṛṇvan na śṛṇoty enām |
10.071.04c uto tvasmai tanvaṁ vi sasre jāyeva patya uśatī suvāsāḥ ||

uta | tvaḥ | paśyan | na | dadarśa | vācam | uta | tvaḥ | śṛṇvan | na | śṛṇoti | enām |
uto iti | tvasmai | tanvam | vi | sasre | jāyā-iva | patye | uśatī | su-vāsāḥ ||10.071.04||

10.071.05a uta tvaṁ sakhye sthirapītam āhur nainaṁ hinvanty api vājineṣu |
10.071.05c adhenvā carati māyayaiṣa vācaṁ śuśruvām̐ aphalām apuṣpām ||

uta | tvam | sakhye | sthira-pītam | āhuḥ | na | enam | hinvanti | api | vājineṣu |
adhenvā | carati | māyayā | eṣaḥ | vācam | śuśru-vān | aphalām | āpuṣpām ||10.071.05||

10.071.06a yas tityāja sacividaṁ sakhāyaṁ na tasya vācy api bhāgo asti |
10.071.06c yad īṁ śṛṇoty alakaṁ śṛṇoti nahi praveda sukṛtasya panthām ||

yaḥ | tityāja | saci-vidam | sakhāyam | na | tasya | vāci | api | bhāgaḥ | asti |
yat | īm | śṛṇoti | alakam | śṛṇoti | nahi | pra-veda | su-kṛtasya | panthām ||10.071.06||

10.071.07a akṣaṇvantaḥ karṇavantaḥ sakhāyo manojaveṣv asamā babhūvuḥ |
10.071.07c ādaghnāsa upakakṣāsa u tve hradā iva snātvā u tve dadṛśre ||

akṣaṇ-vantaḥ | karṇa-vantaḥ | sakhāyaḥ | manaḥ-javeṣu | asamāḥ | babhūvuḥ |
ādaghnāsaḥ | upa-kakṣāsaḥ | ūm̐ iti | tve | hradāḥ-iva | snātvāḥ | ūm̐ iti | tve | dadṛśre ||10.071.07||

10.071.08a hṛdā taṣṭeṣu manaso javeṣu yad brāhmaṇāḥ saṁyajante sakhāyaḥ |
10.071.08c atrāha tvaṁ vi jahur vedyābhir ohabrahmāṇo vi caranty u tve ||

hṛdā | taṣṭeṣu | manasaḥ | javeṣu | yat | brāhmaṇāḥ | sam-yajante | sakhāyaḥ |
atra | aha | tvam | vi | jahuḥ | vedyābhiḥ | oha-brahmāṇaḥ | vi | caranti | ūm̐ iti | tve ||10.071.08||

10.071.09a ime ye nārvāṅ na paraś caranti na brāhmaṇāso na sutekarāsaḥ |
10.071.09c ta ete vācam abhipadya pāpayā sirīs tantraṁ tanvate aprajajñayaḥ ||

ime | ye | na | arvāk | na | paraḥ | caranti | na | brāhmaṇāsaḥ | na | sute-karāsaḥ |
te | ete | vācam | abhi-padya | pāpayā | sirīḥ | tantram | tanvate | apra-jajñayaḥ ||10.071.09||

10.071.10a sarve nandanti yaśasāgatena sabhāsāhena sakhyā sakhāyaḥ |
10.071.10c kilbiṣaspṛt pituṣaṇir hy eṣām araṁ hito bhavati vājināya ||

sarve | nandanti | yaśasā | ā-gatena | sabhā-sāhena | sakhyā | sakhāyaḥ |
kilbiṣa-spṛt | pitu-saṇiḥ | hi | eṣām | aram | hitaḥ | bhavati | vājināya ||10.071.10||

10.071.11a ṛcāṁ tvaḥ poṣam āste pupuṣvān gāyatraṁ tvo gāyati śakvarīṣu |
10.071.11c brahmā tvo vadati jātavidyāṁ yajñasya mātrāṁ vi mimīta u tvaḥ ||

ṛcām | tvaḥ | poṣam | āste | pupuṣvān | gāyatram | tvaḥ | gāyati | śakvarīṣu |
brahmā | tvaḥ | vadati | jāta-vidyām | yajñasya | mātrām | vi | mimīte | ūm̐ iti | tvaḥ ||10.071.11||


10.072.01a devānāṁ nu vayaṁ jānā pra vocāma vipanyayā |
10.072.01c uktheṣu śasyamāneṣu yaḥ paśyād uttare yuge ||

devānām | nu | vayam | jānā | pra | vocāma | vipanyayā |
uktheṣu | śasyamāneṣu | yaḥ | paśyāt | ut-tare | yuge ||10.072.01||

10.072.02a brahmaṇas patir etā saṁ karmāra ivādhamat |
10.072.02c devānām pūrvye yuge 'sataḥ sad ajāyata ||

brahmaṇaḥ | patiḥ | etā | sam | karmāraḥ-iva | adhamat |
devānām | pūrvye | yuge | asataḥ | sat | ajāyata ||10.072.02||

10.072.03a devānāṁ yuge prathame 'sataḥ sad ajāyata |
10.072.03c tad āśā anv ajāyanta tad uttānapadas pari ||

devānām | pūrvye | yuge | asataḥ | sat | ajāyata |
tat | āśāḥ | anu | ajāyanta | tat | uttāna-padaḥ | pari ||10.072.03||

10.072.04a bhūr jajña uttānapado bhuva āśā ajāyanta |
10.072.04c aditer dakṣo ajāyata dakṣād v aditiḥ pari ||

bhūḥ | jajñe | uttāna-padaḥ | bhuvaḥ | āśāḥ | ajāyanta |
aditeḥ | dakṣaḥ | ajāyata | dakṣāt | ūm̐ iti | aditiḥ | pari ||10.072.04||

10.072.05a aditir hy ajaniṣṭa dakṣa yā duhitā tava |
10.072.05c tāṁ devā anv ajāyanta bhadrā amṛtabandhavaḥ ||

aditiḥ | hi | ajaniṣṭa | dakṣa | yā | duhitā | tava |
tām | devāḥ | anu | ajāyanta | bhadrāḥ | amṛta-bandhavaḥ ||10.072.05||

10.072.06a yad devā adaḥ salile susaṁrabdhā atiṣṭhata |
10.072.06c atrā vo nṛtyatām iva tīvro reṇur apāyata ||

yat | devāḥ | adaḥ | salile | su-saṁrabdhāḥ | atiṣṭhata |
atra | vaḥ | nṛtyatām-iva | tīvraḥ | reṇuḥ | apa | āyata ||10.072.06||

10.072.07a yad devā yatayo yathā bhuvanāny apinvata |
10.072.07c atrā samudra ā gūḻham ā sūryam ajabhartana ||

yat | devāḥ | yatayaḥ | yathā | bhuvanāni | apinvata |
atra | samudre | ā | gūḻham | ā | sūryam | ajabhartana ||10.072.07||

10.072.08a aṣṭau putrāso aditer ye jātās tanvas pari |
10.072.08c devām̐ upa prait saptabhiḥ parā mārtāṇḍam āsyat ||

aṣṭau | putrāsaḥ | aditeḥ | ye | jātāḥ | tanvaḥ | pari |
devān | upa | pra | ait | sapta-bhiḥ | parā | mārtāṇḍam | āsyat ||10.072.08||

10.072.09a saptabhiḥ putrair aditir upa prait pūrvyaṁ yugam |
10.072.09c prajāyai mṛtyave tvat punar mārtāṇḍam ābharat ||

sapta-bhiḥ | putraiḥ | aditiḥ | upa | pra | ait | pūrvyam | yugam |
pra-jāyai | mṛtyave | tvat | punaḥ | mārtāṇḍam | ā | abharat ||10.072.09||


10.073.01a janiṣṭhā ugraḥ sahase turāya mandra ojiṣṭho bahulābhimānaḥ |
10.073.01c avardhann indram marutaś cid atra mātā yad vīraṁ dadhanad dhaniṣṭhā ||

janiṣṭhāḥ | ugraḥ | sahase | turāya | mandraḥ | ojiṣṭhaḥ | bahula-abhimānaḥ |
avardhan | indram | marutaḥ | cit | atra | mātā | yat | vīram | dadhanat | dhaniṣṭhā ||10.073.01||

10.073.02a druho niṣattā pṛśanī cid evaiḥ purū śaṁsena vāvṛdhuṣ ṭa indram |
10.073.02c abhīvṛteva tā mahāpadena dhvāntāt prapitvād ud aranta garbhāḥ ||

druhaḥ | ni-sattā | pṛśanī | cit | evaiḥ | puru | śaṁsena | vavṛdhuḥ | te | indram |
abhivṛtā-iva | tā | mahā-padena | dhvāntāt | pra-pitvāt | ut | aranta | garbhāḥ ||10.073.02||

10.073.03a ṛṣvā te pādā pra yaj jigāsy avardhan vājā uta ye cid atra |
10.073.03c tvam indra sālāvṛkān sahasram āsan dadhiṣe aśvinā vavṛtyāḥ ||

ṛṣvā | te | pādā | pra | yat | jigāsi | avardhan | vājāḥ | uta | ye | cit | atra |
tvam | indra | sālāvṛkān | sahasram | āsan | dadhiṣe | aśvinā | ā | vavṛtyāḥ ||10.073.03||

10.073.04a samanā tūrṇir upa yāsi yajñam ā nāsatyā sakhyāya vakṣi |
10.073.04c vasāvyām indra dhārayaḥ sahasrāśvinā śūra dadatur maghāni ||

samanā | tūrṇiḥ | upa | yāsi | yajñam | ā | nāsatyā | sakhyāya | vakṣi |
vasāvyām | indra | dhārayaḥ | sahasrā | aśvinā | śūra | dadatuḥ | maghāni ||10.073.04||

10.073.05a mandamāna ṛtād adhi prajāyai sakhibhir indra iṣirebhir artham |
10.073.05c ābhir hi māyā upa dasyum āgān mihaḥ pra tamrā avapat tamāṁsi ||

mandamānaḥ | ṛtāt | adhi | pra-jāyai | sakhi-bhiḥ | indraḥ | iṣirebhiḥ | artham |
ā | ābhiḥ | hi | māyāḥ | upa | dasyum | ā | agāt | mihaḥ | pra | tamrāḥ | avapat | tamāṁsi ||10.073.05||

10.073.06a sanāmānā cid dhvasayo ny asmā avāhann indra uṣaso yathānaḥ |
10.073.06c ṛṣvair agacchaḥ sakhibhir nikāmaiḥ sākam pratiṣṭhā hṛdyā jaghantha ||

sa-nāmānā | cit | dhvasayaḥ | ni | asmai | ava | ahan | indraḥ | uṣasaḥ | yathā | anaḥ |
ṛṣvaiḥ | agacchaḥ | sakhi-bhiḥ | ni-kāmaiḥ | sākam | prati-sthā | hṛdyā | jaghantha ||10.073.06||

10.073.07a tvaṁ jaghantha namucim makhasyuṁ dāsaṁ kṛṇvāna ṛṣaye vimāyam |
10.073.07c tvaṁ cakartha manave syonān patho devatrāñjaseva yānān ||

tvam | jāghantha | namucim | makhasyum | dāsam | kṛṇvānaḥ | ṛṣaye | vi-māyam |
tvam | cakartha | manave | syonān | pathaḥ | deva-trā | añjasā-iva | yānān ||10.073.07||

10.073.08a tvam etāni papriṣe vi nāmeśāna indra dadhiṣe gabhastau |
10.073.08c anu tvā devāḥ śavasā madanty uparibudhnān vaninaś cakartha ||

tvam | etāni | papriṣe | vi | nāma | īśānaḥ | indra | dadhiṣe | gabhastau |
anu | tvā | devāḥ | śavasā | madanti | upari-budhnān | vaninaḥ | cakartha ||10.073.08||

10.073.09a cakraṁ yad asyāpsv ā niṣattam uto tad asmai madhv ic cacchadyāt |
10.073.09c pṛthivyām atiṣitaṁ yad ūdhaḥ payo goṣv adadhā oṣadhīṣu ||

cakram | yat | asya | ap-su | ā | ni-sattam | uto iti | tat | asmai | madhu | it | cacchadyāt |
pṛthivyām | ati-sitam | yat | ūdhaḥ | payaḥ | goṣu | adadhāḥ | oṣadhīṣu ||10.073.09||

10.073.10a aśvād iyāyeti yad vadanty ojaso jātam uta manya enam |
10.073.10c manyor iyāya harmyeṣu tasthau yataḥ prajajña indro asya veda ||

aśvāt | iyāya | iti | yat | vadanti | ojasaḥ | jātam | uta | manye | enam |
manyoḥ | iyāya | harmyeṣu | tasthau | yataḥ | pra-jajñe | indraḥ | asya | veda ||10.073.10||

10.073.11a vayaḥ suparṇā upa sedur indram priyamedhā ṛṣayo nādhamānāḥ |
10.073.11c apa dhvāntam ūrṇuhi pūrdhi cakṣur mumugdhy asmān nidhayeva baddhān ||

vayaḥ | su-parṇāḥ | upa | seduḥ | indram | priya-medhāḥ | ṛṣayaḥ | nādhamānāḥ |
apa | dhvāntam | ūrṇuhi | pūrdhi | cakṣuḥ | mumugdhi | asmān | nidhayā-iva | baddhān ||10.073.11||


10.074.01a vasūnāṁ vā carkṛṣa iyakṣan dhiyā vā yajñair vā rodasyoḥ |
10.074.01c arvanto vā ye rayimantaḥ sātau vanuṁ vā ye suśruṇaṁ suśruto dhuḥ ||

vasūnām | vā | carkṛṣe | iyakṣan | dhiyā | vā | yajñaiḥ | vā | rodasyoḥ |
arvantaḥ | vā | ye | rayi-mantaḥ | sātau | vanum | vā | ye | su-śruṇam | su-śrutaḥ | dhuriti dhuḥ ||10.074.01||

10.074.02a hava eṣām asuro nakṣata dyāṁ śravasyatā manasā niṁsata kṣām |
10.074.02c cakṣāṇā yatra suvitāya devā dyaur na vārebhiḥ kṛṇavanta svaiḥ ||

havaḥ | eṣām | asuraḥ | nakṣata | dyām | śravasyatā | manasā | niṁsata | kṣām |
cakṣāṇāḥ | yatra | suvitāya | devāḥ | dyauḥ | na | vārebhiḥ | kṛṇavanta | svaiḥ ||10.074.02||

10.074.03a iyam eṣām amṛtānāṁ gīḥ sarvatātā ye kṛpaṇanta ratnam |
10.074.03c dhiyaṁ ca yajñaṁ ca sādhantas te no dhāntu vasavyam asāmi ||

iyam | eṣām | amṛtānām | gīḥ | sarva-tātā | ye | kṛpaṇanta | ratnam |
dhiyam | ca | yajñam | ca | sādhantaḥ | te | naḥ | dhāntu | vasavyam | asāmi ||10.074.03||

10.074.04a ā tat ta indrāyavaḥ panantābhi ya ūrvaṁ gomantaṁ titṛtsān |
10.074.04c sakṛtsvaṁ ye puruputrām mahīṁ sahasradhārām bṛhatīṁ dudukṣan ||

ā | tat | te | indra | āyavaḥ | pananta | abhi | ye | ūrvam | go-mantam | titṛtsān |
sakṛt-svam | ye | puru-putrām | mahīm | sahasra-dhārām | bṛhatīm | dudhukṣan ||10.074.04||

10.074.05a śacīva indram avase kṛṇudhvam anānataṁ damayantam pṛtanyūn |
10.074.05c ṛbhukṣaṇam maghavānaṁ suvṛktim bhartā yo vajraṁ naryam purukṣuḥ ||

śacī-vaḥ | indram | avase | kṛṇudhvam | anānatam | damayantam | pṛtanyūn |
ṛbhukṣaṇam | magha-vānam | su-vṛktim | bhartā | yaḥ | vajram | naryam | puru-kṣuḥ ||10.074.05||

10.074.06a yad vāvāna purutamam purāṣāḻ ā vṛtrahendro nāmāny aprāḥ |
10.074.06c aceti prāsahas patis tuviṣmān yad īm uśmasi kartave karat tat ||

yat | vavāna | puru-tamam | purāṣāṭ | ā | vṛtra-hā | indraḥ | nāmāni | aprāḥ |
aceti | pra-sahaḥ | patiḥ | tuviṣmān | yat | īm | uśmasi | kartave | karat | tat ||10.074.06||


10.075.01a pra su va āpo mahimānam uttamaṁ kārur vocāti sadane vivasvataḥ |
10.075.01c pra sapta-sapta tredhā hi cakramuḥ pra sṛtvarīṇām ati sindhur ojasā ||

pra | su | vaḥ | āpaḥ | mahimānam | ut-tamam | kāruḥ | vocāti | sadane | vivasvataḥ |
pra | sapta-sapta | tredhā | hi | cakramuḥ | pra | sṛtvarīṇām | ati | sindhuḥ | ojasā ||10.075.01||

10.075.02a pra te 'radad varuṇo yātave pathaḥ sindho yad vājām̐ abhy adravas tvam |
10.075.02c bhūmyā adhi pravatā yāsi sānunā yad eṣām agraṁ jagatām irajyasi ||

pra | te | aradat | varuṇaḥ | yātave | pathaḥ | sindho iti | yat | vājān | abhi | adravaḥ | tvam |
bhūmyāḥ | adhi | pra-vatā | yāsi | sānunā | yat | eṣām | agram | jagatām | irajyasi ||10.075.02||

10.075.03a divi svano yatate bhūmyopary anantaṁ śuṣmam ud iyarti bhānunā |
10.075.03c abhrād iva pra stanayanti vṛṣṭayaḥ sindhur yad eti vṛṣabho na roruvat ||

divi | svanaḥ | yatate | bhūmyā | upari | anantam | śuṣmam | ut | iyarti | bhānunā |
abhrāt-iva | pra | stanayanti | vṛṣṭayaḥ | sindhuḥ | yat | eti | vṛṣabhaḥ | na | roruvat ||10.075.03||

10.075.04a abhi tvā sindho śiśum in na mātaro vāśrā arṣanti payaseva dhenavaḥ |
10.075.04c rājeva yudhvā nayasi tvam it sicau yad āsām agram pravatām inakṣasi ||

abhi | tvā | sindho iti | śiśum | it | na | mātaraḥ | vāśrāḥ | arṣanti | payasā-iva | dhenavaḥ |
rājā-iva | yudhvā | nayasi | tvam | it | sicau | yat | āsām | agram | pra-vatām | inakṣasi ||10.075.04||

10.075.05a imam me gaṅge yamune sarasvati śutudri stomaṁ sacatā paruṣṇy ā |
10.075.05c asiknyā marudvṛdhe vitastayārjīkīye śṛṇuhy ā suṣomayā ||

imam | me | gaṅge | yamune | sarasvati | śutudri | stomam | sacata | paruṣṇi | ā |
asiknyā | marut-vṛdhe | vitastayā | ājrjīkīye | śṛṇuhi | ā | su-somayā ||10.075.05||

10.075.06a tṛṣṭāmayā prathamaṁ yātave sajūḥ susartvā rasayā śvetyā tyā |
10.075.06c tvaṁ sindho kubhayā gomatīṁ krumum mehatnvā sarathaṁ yābhir īyase ||

tṛṣṭa-amayā | prathamam | yātave | sa-jūḥ | su-sartvā | rasayā | śvetyā | tyā |
tvam | sindho iti | kubhayā | go-matīm | krumum | mehatnvā | sa-ratham | yābhiḥ | īyase ||10.075.06||

10.075.07a ṛjīty enī ruśatī mahitvā pari jrayāṁsi bharate rajāṁsi |
10.075.07c adabdhā sindhur apasām apastamāśvā na citrā vapuṣīva darśatā ||

ṛjītī | enī | ruśatī | mahi-tvā | pari | jrayāṁsi | bharate | rajāṁsi |
adabdhā | sindhuḥ | apasām | apaḥ-tamā | aśvā | na | citrā | vapuṣī-iva | darśatā ||10.075.07||

10.075.08a svaśvā sindhuḥ surathā suvāsā hiraṇyayī sukṛtā vājinīvatī |
10.075.08c ūrṇāvatī yuvatiḥ sīlamāvaty utādhi vaste subhagā madhuvṛdham ||

su-aśvā | sindhuḥ | su-rathā | su-vāsāḥ | hiraṇyayī | su-kṛtā | vājinī-vatī |
ūrṇā-vatī | yuvatiḥ | sīlamā-vatī | uta | adhi | vaste | su-bhagā | madhu-vṛdham ||10.075.08||

10.075.09a sukhaṁ rathaṁ yuyuje sindhur aśvinaṁ tena vājaṁ saniṣad asminn ājau |
10.075.09c mahān hy asya mahimā panasyate 'dabdhasya svayaśaso virapśinaḥ ||

sukham | ratham | yuyuje | sindhuḥ | aśvinam | tena | vājam | saniṣat | asmin | ājau |
mahān | hi | asya | mahimā | panasyate | adabdhasya | sva-yaśasaḥ | vi-rapśinaḥ ||10.075.09||


10.076.01a ā va ṛñjasa ūrjāṁ vyuṣṭiṣv indram maruto rodasī anaktana |
10.076.01c ubhe yathā no ahanī sacābhuvā sadaḥ-sado varivasyāta udbhidā ||

ā | vaḥ | ṛñjase | ūrjām | vi-uṣṭiṣu | indram | marutaḥ | rodasī iti | anaktana |
ubhe iti | yathā | naḥ | ahanī iti | sacā-bhuvā | sadaḥ-sadaḥ | varivasyātaḥ | ut-bhidā ||10.076.01||

10.076.02a tad u śreṣṭhaṁ savanaṁ sunotanātyo na hastayato adriḥ sotari |
10.076.02c vidad dhy aryo abhibhūti pauṁsyam maho rāye cit tarute yad arvataḥ ||

tat | ūm̐ iti | śreṣṭham | savanam | sunotana | atyaḥ | na | hasta-yataḥ | adriḥ | sotari |
vidat | hi | aryaḥ | abhi-bhūti | pauṁsyam | mahaḥ | rāye | cit | tarute | yat | arvataḥ ||10.076.02||

10.076.03a tad id dhy asya savanaṁ viver apo yathā purā manave gātum aśret |
10.076.03c goarṇasi tvāṣṭre aśvanirṇiji prem adhvareṣv adhvarām̐ aśiśrayuḥ ||

tat | it | hi | asya | savanam | viveḥ | apaḥ | yathā | purā | manave | gātum | aśret |
go-arṇasi | tvāṣṭre | aśva-nirniji | pra | īm | adhvareṣu | adhvarān | aśiśrayuḥ ||10.076.03||

10.076.04a apa hata rakṣaso bhaṅgurāvataḥ skabhāyata nirṛtiṁ sedhatāmatim |
10.076.04c ā no rayiṁ sarvavīraṁ sunotana devāvyam bharata ślokam adrayaḥ ||

apa | hata | rakṣasaḥ | bhaṅgura-vataḥ | skabhāyata | niḥ-ṛtim | sedhata | amatim |
ā | naḥ | rayim | sarva-vīram | sunotana | deva-avyam | bharata | ślokam | adrayaḥ ||10.076.04||

10.076.05a divaś cid ā vo 'mavattarebhyo vibhvanā cid āśvapastarebhyaḥ |
10.076.05c vāyoś cid ā somarabhastarebhyo 'gneś cid arca pitukṛttarebhyaḥ ||

divaḥ | cit | ā | vaḥ | amavat-tarebhyaḥ | vi-bhvanā | cit | āśvapaḥ-tarebhyaḥ |
vāyoḥ | cit | ā | somarabhaḥ-tarebhyaḥ | agneḥ | cit | arca | pitukṛt-tarebhyaḥ ||10.076.05||

10.076.06a bhurantu no yaśasaḥ sotv andhaso grāvāṇo vācā divitā divitmatā |
10.076.06c naro yatra duhate kāmyam madhv āghoṣayanto abhito mithasturaḥ ||

bhurantu | naḥ | yaśasaḥ | sotu | andhasaḥ | grāvāṇaḥ | vācā | divitā | divitmatā |
naraḥ | yatra | duhate | kāmyam | madhu | ā-ghoṣayantaḥ | abhitaḥ | mithaḥ-turaḥ ||10.076.06||

10.076.07a sunvanti somaṁ rathirāso adrayo nir asya rasaṁ gaviṣo duhanti te |
10.076.07c duhanty ūdhar upasecanāya kaṁ naro havyā na marjayanta āsabhiḥ ||

sunvanti | somam | rathirāsaḥ | adrayaḥ | niḥ | asya | rasam | go-iṣaḥ | duhanti | te |
duhanti | ūdhaḥ | upa-secanāya | kam | naraḥ | havyā | na | marjayante | āsa-bhiḥ ||10.076.07||

10.076.08a ete naraḥ svapaso abhūtana ya indrāya sunutha somam adrayaḥ |
10.076.08c vāmaṁ-vāmaṁ vo divyāya dhāmne vasu-vasu vaḥ pārthivāya sunvate ||

ete | naraḥ | su-apasaḥ | abhūtana | ye | indrāya | sunutha | somam | adrayaḥ |
vāmam-vāmam | vaḥ | divyāya | dhāmne | vasu-vasu | vaḥ | pārthivāya | sunvate ||10.076.08||


10.077.01a abhrapruṣo na vācā pruṣā vasu haviṣmanto na yajñā vijānuṣaḥ |
10.077.01c sumārutaṁ na brahmāṇam arhase gaṇam astoṣy eṣāṁ na śobhase ||

abhra-pruṣaḥ | na | vācā | pruṣa | vasu | haviṣmantaḥ | na | yajñāḥ | vi-jānuṣaḥ |
su-mārutam | na | brahmāṇam | arhase | gaṇam | astoṣi | eṣām | na | śobhase ||10.077.01||

10.077.02a śriye maryāso añjīm̐r akṛṇvata sumārutaṁ na pūrvīr ati kṣapaḥ |
10.077.02c divas putrāsa etā na yetira ādityāsas te akrā na vāvṛdhuḥ ||

śriye | maryāsaḥ | añjīn | akṛṇvata | su-mārutam | na | pūrvīḥ | ati | kṣapaḥ |
divaḥ | putrāsaḥ | etāḥ | na | yetire | ādityāsaḥ | te | akrāḥ | na | vavṛdhuḥ ||10.077.02||

10.077.03a pra ye divaḥ pṛthivyā na barhaṇā tmanā riricre abhrān na sūryaḥ |
10.077.03c pājasvanto na vīrāḥ panasyavo riśādaso na maryā abhidyavaḥ ||

pra | ye | divaḥ | pṛthivyāḥ | na | barhaṇā | tmanā | riricre | abhrāt | na | sūryaḥ |
pājasvantaḥ | na | vīrāḥ | panasyavaḥ | riśādasaḥ | na | maryāḥ | abhi-dyavaḥ ||10.077.03||

10.077.04a yuṣmākam budhne apāṁ na yāmani vithuryati na mahī śratharyati |
10.077.04c viśvapsur yajño arvāg ayaṁ su vaḥ prayasvanto na satrāca ā gata ||

yuṣmākam | budhne | apām | na | yāmani | vithuryati | na | mahī | śratharyati |
viśva-psuḥ | yajñaḥ | arvāk | ayam | su | vaḥ | prayasvantaḥ | na | satrācaḥ | ā | gata ||10.077.04||

10.077.05a yūyaṁ dhūrṣu prayujo na raśmibhir jyotiṣmanto na bhāsā vyuṣṭiṣu |
10.077.05c śyenāso na svayaśaso riśādasaḥ pravāso na prasitāsaḥ paripruṣaḥ ||

yūyam | dhūḥ-su | pra-yujaḥ | na | raśmi-bhiḥ | jyotiṣmantaḥ | na | bhāsā | vi-uṣṭiṣu |
śyenāsaḥ | na | sva-yaśasaḥ | riśādasaḥ | pravāsaḥ | na | pra-sitāsaḥ | pari-pruṣaḥ ||10.077.05||

10.077.06a pra yad vahadhve marutaḥ parākād yūyam mahaḥ saṁvaraṇasya vasvaḥ |
10.077.06c vidānāso vasavo rādhyasyārāc cid dveṣaḥ sanutar yuyota ||

pra | yat | vahadhve | marutaḥ | parākāt | yūyam | mahaḥ | sam-varaṇasya | vasvaḥ |
vidānāsaḥ | vasavaḥ | rādhyasya | ārāt | cit | dveṣaḥ | sanutaḥ | yuyota ||10.077.06||

10.077.07a ya udṛci yajñe adhvareṣṭhā marudbhyo na mānuṣo dadāśat |
10.077.07c revat sa vayo dadhate suvīraṁ sa devānām api gopīthe astu ||

yaḥ | ut-ṛci | yajñe | adhvare-sthāḥ | marut-bhyaḥ | na | mānuṣaḥ | dadāśat |
revat | saḥ | vayaḥ | dadhate | su-vīram | saḥ | devānām | api | go-pīthe | astu ||10.077.07||

10.077.08a te hi yajñeṣu yajñiyāsa ūmā ādityena nāmnā śambhaviṣṭhāḥ |
10.077.08c te no 'vantu rathatūr manīṣām mahaś ca yāmann adhvare cakānāḥ ||

te | hi | yajñeṣu | yajñiyāsaḥ | ūmāḥ | ādityena | nāmnā | śam-bhaviṣṭhāḥ |
te | naḥ | avantu | ratha-tūḥ | manīṣām | mahaḥ | ca | yāman | adhvare | cakānāḥ ||10.077.08||


10.078.01a viprāso na manmabhiḥ svādhyo devāvyo na yajñaiḥ svapnasaḥ |
10.078.01c rājāno na citrāḥ susaṁdṛśaḥ kṣitīnāṁ na maryā arepasaḥ ||

viprāsaḥ | na | manma-bhiḥ | su-ādhyaḥ | deva-avyaḥ | na | yajñaiḥ | su-apnasaḥ |
rājānaḥ | na | citrāḥ | su-sandṛśaḥ | kṣitīnām | na | maryāḥ | arepasaḥ ||10.078.01||

10.078.02a agnir na ye bhrājasā rukmavakṣaso vātāso na svayujaḥ sadyaūtayaḥ |
10.078.02c prajñātāro na jyeṣṭhāḥ sunītayaḥ suśarmāṇo na somā ṛtaṁ yate ||

agniḥ | na | ye | bhrājasā | rukma-vakṣasaḥ | vātāsaḥ | na | sva-yujaḥ | sadyaḥ-ūtayaḥ |
pra-jñātāraḥ | na | jyeṣṭhāḥ | su-nītayaḥ | su-śarmāṇaḥ | na | somāḥ | ṛtam | yate ||10.078.02||

10.078.03a vātāso na ye dhunayo jigatnavo 'gnīnāṁ na jihvā virokiṇaḥ |
10.078.03c varmaṇvanto na yodhāḥ śimīvantaḥ pitṝṇāṁ na śaṁsāḥ surātayaḥ ||

vātāsaḥ | na | ye | dhunayaḥ | jigatnavaḥ | agnīnām | na | jihvāḥ | vi-rokiṇaḥ |
varmaṇ-vantaḥ | na | yodhāḥ | śimī-vantaḥ | pitṝṇām | na | śaṁsāḥ | su-rātayaḥ ||10.078.03||

10.078.04a rathānāṁ na ye 'rāḥ sanābhayo jigīvāṁso na śūrā abhidyavaḥ |
10.078.04c vareyavo na maryā ghṛtapruṣo 'bhisvartāro arkaṁ na suṣṭubhaḥ ||

rathānām | na | ye | arāḥ | sa-nābhayaḥ | jigīvāṁsaḥ | na | śūrāḥ | abhi-dyavaḥ |
vare-yavaḥ | na | maryāḥ | ghṛta-pruṣaḥ | abhi-svartāraḥ | arkam | na | su-stubhaḥ ||10.078.04||

10.078.05a aśvāso na ye jyeṣṭhāsa āśavo didhiṣavo na rathyaḥ sudānavaḥ |
10.078.05c āpo na nimnair udabhir jigatnavo viśvarūpā aṅgiraso na sāmabhiḥ ||

aśvāsaḥ | na | ye | jyeṣṭhāsaḥ | āśavaḥ | didhiṣavaḥ | na | rathyaḥ | su-dānavaḥ |
āpaḥ | na | nimnaiḥ | uda-bhiḥ | jigatnavaḥ | viśva-rūpāḥ | aṅgirasaḥ | na | sāma-bhiḥ ||10.078.05||

10.078.06a grāvāṇo na sūrayaḥ sindhumātara ādardirāso adrayo na viśvahā |
10.078.06c śiśūlā na krīḻayaḥ sumātaro mahāgrāmo na yāmann uta tviṣā ||

grāvāṇaḥ | na | sūrayaḥ | sindhu-mātaraḥ | ā-dardirāsaḥ | adrayaḥ | na | viśvahā |
śiśūlāḥ | na | krīḻayaḥ | su-mātaraḥ | mahā-grāmaḥ | na | yāman | uta | tviṣā ||10.078.06||

10.078.07a uṣasāṁ na ketavo 'dhvaraśriyaḥ śubhaṁyavo nāñjibhir vy aśvitan |
10.078.07c sindhavo na yayiyo bhrājadṛṣṭayaḥ parāvato na yojanāni mamire ||

uṣasām | na | ketavaḥ | adhvara-śriyaḥ | śubham-yavaḥ | na | añji-bhiḥ | vi | aśvitan |
sindhavaḥ | na | yayiyaḥ | bhrājat-ṛṣṭayaḥ | parā-vataḥ | na | yojanāni | mamire ||10.078.07||

10.078.08a subhāgān no devāḥ kṛṇutā suratnān asmān stotṝn maruto vāvṛdhānāḥ |
10.078.08c adhi stotrasya sakhyasya gāta sanād dhi vo ratnadheyāni santi ||

su-bhāgān | naḥ | devāḥ | kṛṇuta | su-ratnān | asmān | stotṝn | marutaḥ | vavṛdhānāḥ |
adhi | stotrasya | sakhyasya | gāta | sanāt | hi | vaḥ | ratna-dheyāni | santi ||10.078.08||


10.079.01a apaśyam asya mahato mahitvam amartyasya martyāsu vikṣu |
10.079.01c nānā hanū vibhṛte sam bharete asinvatī bapsatī bhūry attaḥ ||

apaśyam | asya | mahataḥ | mahi-tvam | amartyasya | martyāsu | vikṣu |
nānā | hanū iti | vibhṛte iti vi-bhṛte | sam | bharete iti | asinvatī iti | bapsatī iti | bhūri | attaḥ ||10.079.01||

10.079.02a guhā śiro nihitam ṛdhag akṣī asinvann atti jihvayā vanāni |
10.079.02c atrāṇy asmai paḍbhiḥ sam bharanty uttānahastā namasādhi vikṣu ||

guhā | śiraḥ | ni-hitam | ṛdhak | akṣī iti | asinvan | atti | jihvayā | vanāni |
atrāṇi | asmai | paṭ-bhiḥ | sam | bharanti | uttāna-hastāḥ | namasā | adhi | vikṣu ||10.079.02||

10.079.03a pra mātuḥ prataraṁ guhyam icchan kumāro na vīrudhaḥ sarpad urvīḥ |
10.079.03c sasaṁ na pakvam avidac chucantaṁ ririhvāṁsaṁ ripa upasthe antaḥ ||

pra | mātuḥ | pra-taram | guhyam | icchan | kumāraḥ | na | vīrudhaḥ | sarpat | urvīḥ |
samam | na | pakvam | avidat | śucantam | ririhvāṁsam | ripaḥ | upa-sthe | antariti ||10.079.03||

10.079.04a tad vām ṛtaṁ rodasī pra bravīmi jāyamāno mātarā garbho atti |
10.079.04c nāhaṁ devasya martyaś ciketāgnir aṅga vicetāḥ sa pracetāḥ ||

tat | vām | ṛtam | rodasī iti | pra | bravīmi | jāyamānaḥ | mātarā | garbhaḥ | atti |
na | aham | devasya | martyaḥ | ciketa | agniḥ | aṅga | vi-cetāḥ | saḥ | pra-cetāḥ ||10.079.04||

10.079.05a yo asmā annaṁ tṛṣv ādadhāty ājyair ghṛtair juhoti puṣyati |
10.079.05c tasmai sahasram akṣabhir vi cakṣe 'gne viśvataḥ pratyaṅṅ asi tvam ||

yaḥ | asmai | annam | tṛṣu | ā-dadhāti | ājyaiḥ | ghṛtaiḥ | juhoti | puṣyati |
tasmai | sahasram | akṣa-bhiḥ | vi | cakṣe | agne | viśvataḥ | pratyaṅ | asi | tvam ||10.079.05||

10.079.06a kiṁ deveṣu tyaja enaś cakarthāgne pṛcchāmi nu tvām avidvān |
10.079.06c akrīḻan krīḻan harir attave 'dan vi parvaśaś cakarta gām ivāsiḥ ||

kim | deveṣu | tyajaḥ | enaḥ | cakartha | agne | pṛcchāmi | nu | tvām | avidvān |
akrīḻan | krīḻan | hariḥ | attave | adan | vi | parva-śaḥ | cakarta | gām-iva | asiḥ ||10.079.06||

10.079.07a viṣūco aśvān yuyuje vanejā ṛjītibhī raśanābhir gṛbhītān |
10.079.07c cakṣade mitro vasubhiḥ sujātaḥ sam ānṛdhe parvabhir vāvṛdhānaḥ ||

viṣūcaḥ | aśvān | yuyuje | vane-jāḥ | ṛjīti-bhiḥ | raśanābhiḥ | gṛbhītān |
cakṣade | mitraḥ | vasu-bhiḥ | su-jātaḥ | sam | ānṛdhe | parva-bhiḥ | vavṛdhānaḥ ||10.079.07||


10.080.01a agniḥ saptiṁ vājambharaṁ dadāty agnir vīraṁ śrutyaṁ karmaniḥṣṭhām |
10.080.01c agnī rodasī vi carat samañjann agnir nārīṁ vīrakukṣim puraṁdhim ||

agniḥ | saptim | vājam-bharam | dadāti | agniḥ | vīram | śrutyam | karmaniḥ-sthām |
agniḥ | rodasī iti | vi | carat | sam-añjan | agniḥ | nārīm | vīra-kukṣim | puram-dhim ||10.080.01||

10.080.02a agner apnasaḥ samid astu bhadrāgnir mahī rodasī ā viveśa |
10.080.02c agnir ekaṁ codayat samatsv agnir vṛtrāṇi dayate purūṇi ||

agneḥ | apnasaḥ | sam-it | astu | bhadrā | agniḥ | mahī iti | rodasī iti | ā | viveśa |
agniḥ | ekam | codayat | samat-su | agniḥ | vṛtrāṇi | dayate | purūṇi ||10.080.02||

10.080.03a agnir ha tyaṁ jarataḥ karṇam āvāgnir adbhyo nir adahaj jarūtham |
10.080.03c agnir atriṁ gharma uruṣyad antar agnir nṛmedham prajayāsṛjat sam ||

agniḥ | ha | tyam | jarataḥ | karṇam | āva | agniḥ | at-bhyaḥ | niḥ | adahat | jarūtham |
agniḥ | atrim | gharme | uruṣyat | antaḥ | agniḥ | nṛ-medham | pra-jayā | asṛjat | sam ||10.080.03||

10.080.04a agnir dād draviṇaṁ vīrapeśā agnir ṛṣiṁ yaḥ sahasrā sanoti |
10.080.04c agnir divi havyam ā tatānāgner dhāmāni vibhṛtā purutrā ||

agniḥ | dāt | draviṇam | vīra-peśāḥ | agniḥ | ṛṣim | yaḥ | sahasrā | sanoti |
agniḥ | divi | havyam | ā | tatāna | agneḥ | dhāmāni | vi-bhṛtā | puru-trā ||10.080.04||

10.080.05a agnim ukthair ṛṣayo vi hvayante 'gniṁ naro yāmani bādhitāsaḥ |
10.080.05c agniṁ vayo antarikṣe patanto 'gniḥ sahasrā pari yāti gonām ||

agnim | ukthaiḥ | ṛṣayaḥ | vi | hvayante | agnim | naraḥ | yāmani | bādhitāsaḥ |
agnim | vayaḥ | antarikṣe | patantaḥ | agniḥ | sahasrā | pari | yāti | gonām ||10.080.05||

10.080.06a agniṁ viśa īḻate mānuṣīr yā agnim manuṣo nahuṣo vi jātāḥ |
10.080.06c agnir gāndharvīm pathyām ṛtasyāgner gavyūtir ghṛta ā niṣattā ||

agnim | viśaḥ | īḻate | mānuṣīḥ | yāḥ | agnim | manuṣaḥ | nahuṣaḥ | vi | jātāḥ |
agniḥ | gāndharvīm | pathyām | ṛtasya | agneḥ | gavyūtiḥ | ghṛte | ā | ni-sattā ||10.080.06||

10.080.07a agnaye brahma ṛbhavas tatakṣur agnim mahām avocāmā suvṛktim |
10.080.07c agne prāva jaritāraṁ yaviṣṭhāgne mahi draviṇam ā yajasva ||

agnaye | brahma | ṛbhavaḥ | tatakṣuḥ | agnim | mahām | avocāma | su-vṛktim |
agne | pra | ava | jaritāram | yaviṣṭha | agne | mahi | draviṇam | ā | yajasva ||10.080.07||


10.081.01a ya imā viśvā bhuvanāni juhvad ṛṣir hotā ny asīdat pitā naḥ |
10.081.01c sa āśiṣā draviṇam icchamānaḥ prathamacchad avarām̐ ā viveśa ||

yaḥ | imā | viśvā | bhuvanāni | juhvat | ṛṣiḥ | hotā | ni | asīdat | pitā | naḥ |
saḥ | ā-śiṣā | draviṇam | icchamānaḥ | prathama-cchat | avarān | ā | viveśa ||10.081.01||

10.081.02a kiṁ svid āsīd adhiṣṭhānam ārambhaṇaṁ katamat svit kathāsīt |
10.081.02c yato bhūmiṁ janayan viśvakarmā vi dyām aurṇon mahinā viśvacakṣāḥ ||

kim | svit | āsīt | adhi-sthānam | ā-rambhaṇam | katamat | svit | kathā | āsīt |
yataḥ | bhūmim | janayan | viśva-karmā | vi | dyām | aurṇot | mahinā | viśva-cakṣāḥ ||10.081.02||

10.081.03a viśvataścakṣur uta viśvatomukho viśvatobāhur uta viśvataspāt |
10.081.03c sam bāhubhyāṁ dhamati sam patatrair dyāvābhūmī janayan deva ekaḥ ||

viśvataḥ-cakṣuḥ | uta | viśvataḥ-mukhaḥ | viśvataḥ-bāhuḥ | uta | viśvataḥ-pāt |
sam | bāhu-bhyām | dhamati | sam | patatraiḥ | dyāvābhūmī iti | janayan | devaḥ | ekaḥ ||10.081.03||

10.081.04a kiṁ svid vanaṁ ka u sa vṛkṣa āsa yato dyāvāpṛthivī niṣṭatakṣuḥ |
10.081.04c manīṣiṇo manasā pṛcchated u tad yad adhyatiṣṭhad bhuvanāni dhārayan ||

kim | svit | vanam | kaḥ | ūm̐ iti | saḥ | vṛkṣaḥ | āsa | yataḥ | dyāvāpṛthivī iti | niḥ-tatakṣuḥ |
manīṣiṇaḥ | manasā | pṛcchata | it | ūm̐ iti | tat | yat | adhi-atiṣṭhat | bhuvanāni | dhārayan ||10.081.04||

10.081.05a yā te dhāmāni paramāṇi yāvamā yā madhyamā viśvakarmann utemā |
10.081.05c śikṣā sakhibhyo haviṣi svadhāvaḥ svayaṁ yajasva tanvaṁ vṛdhānaḥ ||

yā | te | dhāmāni | paramāṇi | yā | avamā | yā | madhyamā | viśva-karman | uta | imā |
śikṣa | sakhi-bhyaḥ | haviṣi | svadhā-vaḥ | svayam | yajasva | tanvam | vṛdhānaḥ ||10.081.05||

10.081.06a viśvakarman haviṣā vāvṛdhānaḥ svayaṁ yajasva pṛthivīm uta dyām |
10.081.06c muhyantv anye abhito janāsa ihāsmākam maghavā sūrir astu ||

viśva-karman | haviṣā | vavṛdhānaḥ | svayam | yajasva | pṛthivīm | uta | dyām |
muhyantu | anye | abhitaḥ | janāsaḥ | iha | asmākam | magha-vā | sūriḥ | astu ||10.081.06||

10.081.07a vācas patiṁ viśvakarmāṇam ūtaye manojuvaṁ vāje adyā huvema |
10.081.07c sa no viśvāni havanāni joṣad viśvaśambhūr avase sādhukarmā ||

vācaḥ | patim | viśva-karmāṇam | ūtaye | manaḥ-juvam | vāje | adya | huvema |
saḥ | naḥ | viśvāni | havanāni | joṣat | viśva-śambhūḥ | avase | sādhu-karmā ||10.081.07||


10.082.01a cakṣuṣaḥ pitā manasā hi dhīro ghṛtam ene ajanan nannamāne |
10.082.01c yaded antā adadṛhanta pūrva ād id dyāvāpṛthivī aprathetām ||

cakṣuṣaḥ | pitā | manasā | hi | dhīraḥ | ghṛtam | ene | ajanat | namnamāne iti |
yadā | it | antāḥ | adadṛhanta | pūrve | āt | it | dyāvāpṛthivī iti | aprathetām ||10.082.01||

10.082.02a viśvakarmā vimanā ād vihāyā dhātā vidhātā paramota saṁdṛk |
10.082.02c teṣām iṣṭāni sam iṣā madanti yatrā saptaṛṣīn para ekam āhuḥ ||

viśva-karmā | vi-manāḥ | āt | vi-hāyāḥ | dhātā | vi-dhātā | paramā | uta | sam-dṛk |
teṣām | iṣṭāni | sam | iṣā | madanti | yatra | sapta-ṛṣīn | paraḥ | ekam | āhuḥ ||10.082.02||

10.082.03a yo naḥ pitā janitā yo vidhātā dhāmāni veda bhuvanāni viśvā |
10.082.03c yo devānāṁ nāmadhā eka eva taṁ sampraśnam bhuvanā yanty anyā ||

yaḥ | naḥ | pitā | janitā | yaḥ | vi-dhātā | dhāmāni | veda | bhuvanāni | viśvā |
yaḥ | devānām | nāma-dhāḥ | ekaḥ | eva | tam | sam-praśnam | bhuvanā | yanti | anyā ||10.082.03||

10.082.04a ta āyajanta draviṇaṁ sam asmā ṛṣayaḥ pūrve jaritāro na bhūnā |
10.082.04c asūrte sūrte rajasi niṣatte ye bhūtāni samakṛṇvann imāni ||

te | ā | ayajanta | draviṇam | sam | asmai | ṛṣayaḥ | pūrve | jaritāraḥ | na | bhūnā |
asūrte | sūrte | rajasi | ni-satte | ye | bhūtāni | sam-akṛṇvan | imāni ||10.082.04||

10.082.05a paro divā para enā pṛthivyā paro devebhir asurair yad asti |
10.082.05c kaṁ svid garbham prathamaṁ dadhra āpo yatra devāḥ samapaśyanta viśve ||

paraḥ | divā | paraḥ | enā | pṛthivyā | paraḥ | devebhiḥ | asuraiḥ | yat | asti |
kam | svit | garbham | prathamam | dadhre | āpaḥ | yatra | devāḥ | sam-apaśyanta | viśve ||10.082.05||

10.082.06a tam id garbham prathamaṁ dadhra āpo yatra devāḥ samagacchanta viśve |
10.082.06c ajasya nābhāv adhy ekam arpitaṁ yasmin viśvāni bhuvanāni tasthuḥ ||

tam | it | garbham | prathamam | dadhre | āpaḥ | yatra | devāḥ | sam-agacchanta | viśve |
ajasya | nābhau | adhi | ekam | arpitam | yasmin | viśvāni | bhuvanāni | tasthuḥ ||10.082.06||

10.082.07a na taṁ vidātha ya imā jajānānyad yuṣmākam antaram babhūva |
10.082.07c nīhāreṇa prāvṛtā jalpyā cāsutṛpa ukthaśāsaś caranti ||

na | tam | vidātha | yaḥ | imā | jajāna | anyat | yuṣmākam | antaram | babhūva |
nīhāreṇa | prāvṛtāḥ | jalpyā | ca | asu-tṛpaḥ | uktha-śāsaḥ | caranti ||10.082.07||


10.083.01a yas te manyo 'vidhad vajra sāyaka saha ojaḥ puṣyati viśvam ānuṣak |
10.083.01c sāhyāma dāsam āryaṁ tvayā yujā sahaskṛtena sahasā sahasvatā ||

yaḥ | te | manyo iti | avidhat | vajra | sāyaka | sahaḥ | ojaḥ | puṣyati | viśvam | ānuṣak |
sāhyāma | dāsam | āryam | tvayā | yujā | sahaḥ-kṛtena | sahasā | sahasvatā ||10.083.01||

10.083.02a manyur indro manyur evāsa devo manyur hotā varuṇo jātavedāḥ |
10.083.02c manyuṁ viśa īḻate mānuṣīr yāḥ pāhi no manyo tapasā sajoṣāḥ ||

manyuḥ | indraḥ | manyuḥ | eva | āsa | devaḥ | manyuḥ | hotā | varuṇaḥ | jāta-vedāḥ |
manyum | viśaḥ | īḻate | mānuṣīḥ | yāḥ | pāhi | naḥ | manyo iti | tapasā | sa-joṣāḥ ||10.083.02||

10.083.03a abhīhi manyo tavasas tavīyān tapasā yujā vi jahi śatrūn |
10.083.03c amitrahā vṛtrahā dasyuhā ca viśvā vasūny ā bharā tvaṁ naḥ ||

abhi | ihi | manyo iti | tavasaḥ | tavīyān | tapasā | yujā | vi | jahi | śatrūn |
amitra-hā | vṛtra-hā | dasyu-hā | ca | viśvā | vasūni | ā | bhara | tvam | naḥ ||10.083.03||

10.083.04a tvaṁ hi manyo abhibhūtyojāḥ svayambhūr bhāmo abhimātiṣāhaḥ |
10.083.04c viśvacarṣaṇiḥ sahuriḥ sahāvān asmāsv ojaḥ pṛtanāsu dhehi ||

tvam | hi | manyo iti | abhibhūti-ojāḥ | svayam-bhūḥ | bhāmaḥ | abhimāti-sahaḥ |
viśva-carṣaṇiḥ | sahuriḥ | sahāvān | asmāsu | ojaḥ | pṛtanāsu | dhehi ||10.083.04||

10.083.05a abhāgaḥ sann apa pareto asmi tava kratvā taviṣasya pracetaḥ |
10.083.05c taṁ tvā manyo akratur jihīḻāhaṁ svā tanūr baladeyāya mehi ||

abhāgaḥ | san | apa | parā-itaḥ | asmi | tava | kratvā | taviṣasya | praceta iti pra-cetaḥ |
tam | tvā | manyo iti | akratuḥ | jihīḻa | aham | svā | tanūḥ | bala-deyāya | mā | ā | ihi ||10.083.05||

10.083.06a ayaṁ te asmy upa mehy arvāṅ pratīcīnaḥ sahure viśvadhāyaḥ |
10.083.06c manyo vajrinn abhi mām ā vavṛtsva hanāva dasyūm̐r uta bodhy āpeḥ ||

ayam | te | asmi | upa | mā | ā | ihi | arvāṅ | pratīcīnaḥ | sahure | viśva-dhāyaḥ |
manyo iti | vajrin | abhi | mām | ā | vavṛtsva | hanāva | dasyūn | uta | bodhi | āpeḥ ||10.083.06||

10.083.07a abhi prehi dakṣiṇato bhavā me 'dhā vṛtrāṇi jaṅghanāva bhūri |
10.083.07c juhomi te dharuṇam madhvo agram ubhā upāṁśu prathamā pibāva ||

abhi | pra | ihi | dakṣiṇataḥ | bhava | me | adha | vṛtrāṇi | jaṅghanāva | bhūri |
juhomi | te | dharuṇam | madhvaḥ | agram | ubhau | upa-aṁśu | prathamā | pibāva ||10.083.07||


10.084.01a tvayā manyo saratham ārujanto harṣamāṇāso dhṛṣitā marutvaḥ |
10.084.01c tigmeṣava āyudhā saṁśiśānā abhi pra yantu naro agnirūpāḥ ||

tvayā | manyo iti | sa-ratham | ā-rujantaḥ | harṣamānāsaḥ | dhṛṣitāḥ | marutvaḥ |
tigma-iṣavaḥ | āyudhā | sam-śiśānāḥ | abhi | pra | yantu | naraḥ | agni-rūpāḥ ||10.084.01||

10.084.02a agnir iva manyo tviṣitaḥ sahasva senānīr naḥ sahure hūta edhi |
10.084.02c hatvāya śatrūn vi bhajasva veda ojo mimāno vi mṛdho nudasva ||

agniḥ-iva | manyo iti | tviṣitaḥ | sahasva | senā-nīḥ | naḥ | sahure | hūtaḥ | edhi |
hatvāya | śatrūn | vi | bhajasva | vedaḥ | ojaḥ | mimānaḥ | vi | mṛdhaḥ | nudasva ||10.084.02||

10.084.03a sahasva manyo abhimātim asme rujan mṛṇan pramṛṇan prehi śatrūn |
10.084.03c ugraṁ te pājo nanv ā rurudhre vaśī vaśaṁ nayasa ekaja tvam ||

sahasva | manyo iti | abhi-mātim | asme iti | rujan | mṛṇan | pra-mṛṇan | pra | ihi | śatrūn |
ugram | te | pājaḥ | nanu | ā | rurudhre | vaśī | vaśam | nayase | eka-ja | tvam ||10.084.03||

10.084.04a eko bahūnām asi manyav īḻito viśaṁ-viśaṁ yudhaye saṁ śiśādhi |
10.084.04c akṛttaruk tvayā yujā vayaṁ dyumantaṁ ghoṣaṁ vijayāya kṛṇmahe ||

ekaḥ | bahūnām | asi | manyo iti | īḻitaḥ | viśam-viśam | yudhaye | sam | śiśādhi |
akṛtta-ruk | tvayā | yujā | vayam | dyu-mantam | ghoṣam | vi-jayāya | kṛṇmahe ||10.084.04||

10.084.05a vijeṣakṛd indra ivānavabravo 'smākam manyo adhipā bhaveha |
10.084.05c priyaṁ te nāma sahure gṛṇīmasi vidmā tam utsaṁ yata ābabhūtha ||

vijeṣa-kṛt | indraḥ-iva | anava-bravaḥ | asmākam | manyo iti | adhi-pāḥ | bhava | iha |
priyam | te | nāma | sahure | gṛṇīmasi | vidma | tam | utsam | yataḥ | ā-babhūtha ||10.084.05||

10.084.06a ābhūtyā sahajā vajra sāyaka saho bibharṣy abhibhūta uttaram |
10.084.06c kratvā no manyo saha medy edhi mahādhanasya puruhūta saṁsṛji ||

ā-bhūtyā | saha-jāḥ | vajra | sāyaka | sahaḥ | bibharṣi | abhi-bhūte | ut-taram |
kratvā | naḥ | manyo iti | saha | medī | edhi | mahā-dhanasya | puru-hūta | sam-sṛji ||10.084.06||

10.084.07a saṁsṛṣṭaṁ dhanam ubhayaṁ samākṛtam asmabhyaṁ dattāṁ varuṇaś ca manyuḥ |
10.084.07c bhiyaṁ dadhānā hṛdayeṣu śatravaḥ parājitāso apa ni layantām ||

sam-sṛṣṭam | dhanam | ubhayam | sam-ākṛtam | asmabhyam | dattām | varuṇaḥ | ca | manyuḥ |
bhiyam | dadhānāḥ | hṛdayeṣu | śatravaḥ | parā-jitāsaḥ | apa | ni | layantām ||10.084.07||


10.085.01a satyenottabhitā bhūmiḥ sūryeṇottabhitā dyauḥ |
10.085.01c ṛtenādityās tiṣṭhanti divi somo adhi śritaḥ ||

satyena | uttabhitā | bhūmiḥ | sūryeṇa | uttabhitā | dyauḥ |
ṛtena | ādityāḥ | tiṣṭhanti | divi | somaḥ | adhi | śritaḥ ||10.085.01||

10.085.02a somenādityā balinaḥ somena pṛthivī mahī |
10.085.02c atho nakṣatrāṇām eṣām upasthe soma āhitaḥ ||

somena | ādityāḥ | balinaḥ | somena | pṛthivī | mahī |
atho iti | nakṣatrāṇām | eṣām | upa-sthe | somaḥ | ā-hitaḥ ||10.085.02||

10.085.03a somam manyate papivān yat sampiṁṣanty oṣadhim |
10.085.03c somaṁ yam brahmāṇo vidur na tasyāśnāti kaś cana ||

somam | manyate | papi-vān | yat | sam-piṁṣanti | oṣadhim |
somam | yam | brahmāṇaḥ | viduḥ | na | tasya | aśnāti | kaḥ | cana ||10.085.03||

10.085.04a ācchadvidhānair gupito bārhataiḥ soma rakṣitaḥ |
10.085.04c grāvṇām ic chṛṇvan tiṣṭhasi na te aśnāti pārthivaḥ ||

ācchat-vidhānaiḥ | gupitaḥ | bārhataiḥ | soma | rakṣitaḥ |
grāvṇām | it | śṛṇvan | tiṣṭhasi | na | te | aśnāti | pārthivaḥ ||10.085.04||

10.085.05a yat tvā deva prapibanti tata ā pyāyase punaḥ |
10.085.05c vāyuḥ somasya rakṣitā samānām māsa ākṛtiḥ ||

yat | tvā | deva | pra-pibanti | tataḥ | ā | pyāyase | punariti |
vāyuḥ | somasya | rakṣitā | samānām | māsaḥ | ā-kṛtiḥ ||10.085.05||

10.085.06a raibhy āsīd anudeyī nārāśaṁsī nyocanī |
10.085.06c sūryāyā bhadram id vāso gāthayaiti pariṣkṛtam ||

raibhī | āsīt | anu-deyī | nārāśaṁsī | ni-ocanī |
sūryāyāḥ | bhadram | it | vāsaḥ | gāthayā | eti | pari-kṛtam ||10.085.06||

10.085.07a cittir ā upabarhaṇaṁ cakṣur ā abhyañjanam |
10.085.07c dyaur bhūmiḥ kośa āsīd yad ayāt sūryā patim ||

cittiḥ | āḥ | upa-barhaṇam | cakṣuḥ | āḥ | abhi-añjanam |
dyauḥ | bhūmiḥ | kośaḥ | āsīt | yat | ayāt | sūryā | patim ||10.085.07||

10.085.08a stomā āsan pratidhayaḥ kurīraṁ chanda opaśaḥ |
10.085.08c sūryāyā aśvinā varāgnir āsīt purogavaḥ ||

stomāḥ | āsan | prati-dhayaḥ | kurīram | chandaḥ | opaśaḥ |
sūryāyāḥ | aśvinā | varā | agniḥ | āsīt | puraḥ-gavaḥ ||10.085.08||

10.085.09a somo vadhūyur abhavad aśvināstām ubhā varā |
10.085.09c sūryāṁ yat patye śaṁsantīm manasā savitādadāt ||

somaḥ | vadhū-yuḥ | abhavat | aśvinā | āstām | ubhā | varā |
sūryām | yat | patye | śaṁsantīm | manasā | savitā | adadāt ||10.085.09||

10.085.10a mano asyā ana āsīd dyaur āsīd uta cchadiḥ |
10.085.10c śukrāv anaḍvāhāv āstāṁ yad ayāt sūryā gṛham ||

manaḥ | asyāḥ | anaḥ | āsīt | dyauḥ | āsīt | uta | chadiḥ |
śukrau | anaḍvāhau | āstām | yat | ayāt | sūryā | gṛham ||10.085.10||

10.085.11a ṛksāmābhyām abhihitau gāvau te sāmanāv itaḥ |
10.085.11c śrotraṁ te cakre āstāṁ divi panthāś carācāraḥ ||

ṛk-sāmābhyām | abhi-hitau | gāvau | te | sāmanau | itaḥ |
śrotram | te | cakre iti | āstām | divi | panthāḥ | carācaraḥ ||10.085.11||

10.085.12a śucī te cakre yātyā vyāno akṣa āhataḥ |
10.085.12c ano manasmayaṁ sūryārohat prayatī patim ||

śucī | te | cakre iti | yātyāḥ | vi-ānaḥ | akṣaḥ | ā-hataḥ |
anaḥ | manasmayam | sūryā | ā | arohat | pra-yatī | patim ||10.085.12||

10.085.13a sūryāyā vahatuḥ prāgāt savitā yam avāsṛjat |
10.085.13c aghāsu hanyante gāvo 'rjunyoḥ pary uhyate ||

sūryāyāḥ | vahatuḥ | pra | agāt | savitā | yam | ava-asṛjat |
aghāsu | hanyante | gāvaḥ | arjunyoḥ | pari | uhyate ||10.085.13||

10.085.14a yad aśvinā pṛcchamānāv ayātaṁ tricakreṇa vahatuṁ sūryāyāḥ |
10.085.14c viśve devā anu tad vām ajānan putraḥ pitarāv avṛṇīta pūṣā ||

yat | aśvinā | pṛcchamānau | ayātam | tri-cakreṇa | vahatum | sūryāyāḥ |
viśve | devāḥ | anu | tat | vām | ajānan | putraḥ | pitarau | avṛṇīta | pūṣā ||10.085.14||

10.085.15a yad ayātaṁ śubhas patī vareyaṁ sūryām upa |
10.085.15c kvaikaṁ cakraṁ vām āsīt kva deṣṭrāya tasthathuḥ ||

yat | ayātam | śubhaḥ | patī iti | vare-yam | sūryām | upa |
kva | ekam | cakram | vām | āsīt | kva | deṣṭrāya | tasthathuḥ ||10.085.15||

10.085.16a dve te cakre sūrye brahmāṇa ṛtuthā viduḥ |
10.085.16c athaikaṁ cakraṁ yad guhā tad addhātaya id viduḥ ||

dve iti | te | cakre iti | sūrye | brahmāṇaḥ | ṛtu-thā | viduḥ |
atha | ekam | cakram | yat | guhā | tat | addhātayaḥ | it | viduḥ ||10.085.16||

10.085.17a sūryāyai devebhyo mitrāya varuṇāya ca |
10.085.17c ye bhūtasya pracetasa idaṁ tebhyo 'karaṁ namaḥ ||

sūryāyai | devebhyaḥ | mitrāya | varuṇāya | ca |
ye | bhūtasya | pra-cetasaḥ | idam | tebhyaḥ | akaram | namaḥ ||10.085.17||

10.085.18a pūrvāparaṁ carato māyayaitau śiśū krīḻantau pari yāto adhvaram |
10.085.18c viśvāny anyo bhuvanābhicaṣṭa ṛtūm̐r anyo vidadhaj jāyate punaḥ ||

pūrva-aparam | carataḥ | māyayā | etau | śiśū iti | krīḻantau | pari | yātaḥ | adhvaram |
viśvāni | anyaḥ | bhuvanā | abhi-caṣṭe | ṛtūn | anyaḥ | vi-dadhat | jāyate | punariti ||10.085.18||

10.085.19a navo-navo bhavati jāyamāno 'hnāṁ ketur uṣasām ety agram |
10.085.19c bhāgaṁ devebhyo vi dadhāty āyan pra candramās tirate dīrgham āyuḥ ||

navaḥ-navaḥ | bhavati | jāyamānaḥ | ahnām | ketuḥ | uṣasām | eti | agram |
bhāgam | devebhyaḥ | vi | dadhāti | ā-yan | pra | candramāḥ | tirate | dīrgham | āyuḥ ||10.085.19||

10.085.20a sukiṁśukaṁ śalmaliṁ viśvarūpaṁ hiraṇyavarṇaṁ suvṛtaṁ sucakram |
10.085.20c ā roha sūrye amṛtasya lokaṁ syonam patye vahatuṁ kṛṇuṣva ||

su-kiṁśukam | śalmalim | viśva-rūpam | hiraṇya-varṇam | su-vṛtam | su-cakram |
ā | roha | sūrye | amṛtasya | lokam | syonam | patye | vahatum | kṛṇuṣva ||10.085.20||

10.085.21a ud īrṣvātaḥ pativatī hy eṣā viśvāvasuṁ namasā gīrbhir īḻe |
10.085.21c anyām iccha pitṛṣadaṁ vyaktāṁ sa te bhāgo januṣā tasya viddhi ||

ut | īrṣva | ataḥ | pati-vatī | hi | eṣā | viśva-vasum | namasā | gīḥ-bhiḥ | īḻe |
anyām | iccha | pitṛ-sadam | vi-aktām | saḥ | te | bhāgaḥ | januṣā | tasya | viddhi ||10.085.21||

10.085.22a ud īrṣvāto viśvāvaso namaseḻā mahe tvā |
10.085.22c anyām iccha prapharvyaṁ saṁ jāyām patyā sṛja ||

ut | īrṣva | ataḥ | viśvavaso iti viśva-vaso | namasā | īḻāmahe | tvā |
anyām | iccha | pra-pharvyam | sam | jāyām | patyā | sṛja ||10.085.22||

10.085.23a anṛkṣarā ṛjavaḥ santu panthā yebhiḥ sakhāyo yanti no vareyam |
10.085.23c sam aryamā sam bhago no ninīyāt saṁ jāspatyaṁ suyamam astu devāḥ ||

anṛkṣarāḥ | ṛjavaḥ | santu | panthāḥ | yebhiḥ | sakhāyaḥ | yanti | naḥ | vare-yam |
sam | aryamā | sam | bhagaḥ | naḥ | ninīyāt | sam | jāḥ-patyam | su-yamam | astu | devāḥ ||10.085.23||

10.085.24a pra tvā muñcāmi varuṇasya pāśād yena tvābadhnāt savitā suśevaḥ |
10.085.24c ṛtasya yonau sukṛtasya loke 'riṣṭāṁ tvā saha patyā dadhāmi ||

pra | tvā | muñcāmi | varuṇasya | pāśāt | yena | tvā | abadhnāt | savitā | su-śevaḥ |
ṛtasya | yonau | su-kṛtasya | loke | ariṣṭām | tvā | saha | patyā | dadhāmi ||10.085.24||

10.085.25a preto muñcāmi nāmutaḥ subaddhām amutas karam |
10.085.25c yatheyam indra mīḍhvaḥ suputrā subhagāsati ||

pra | itaḥ | muñcāmi | na | amutaḥ | su-baddhām | amutaḥ | karam |
yathā | iyam | indra | mīḍhvaḥ | su-putrā | su-bhagā | asati ||10.085.25||

10.085.26a pūṣā tveto nayatu hastagṛhyāśvinā tvā pra vahatāṁ rathena |
10.085.26c gṛhān gaccha gṛhapatnī yathāso vaśinī tvaṁ vidatham ā vadāsi ||

pūṣā | tvā | itaḥ | nayatu | hasta-gṛhya | aśvinā | tvā | pra | vahatām | rathena |
gṛhān | gaccha | gṛha-patnī | yathā | asaḥ | vaśinī | tvam | vidatham | ā | vadāsi ||10.085.26||

10.085.27a iha priyam prajayā te sam ṛdhyatām asmin gṛhe gārhapatyāya jāgṛhi |
10.085.27c enā patyā tanvaṁ saṁ sṛjasvādhā jivrī vidatham ā vadāthaḥ ||

iha | priyam | pra-jayā | te | sam | ṛdhyatām | asmin | gṛhe | gārha-patyāya | jāgṛhi |
enā | patyā | tanvam | sam | sṛjasva | adha | jivrī iti | vidatham | ā | vadāthaḥ ||10.085.27||

10.085.28a nīlalohitam bhavati kṛtyāsaktir vy ajyate |
10.085.28c edhante asyā jñātayaḥ patir bandheṣu badhyate ||

nīla-lohitam | bhavati | kṛtyā | āsaktiḥ | vi | ajyate |
edhante | asyāḥ | jñātayaḥ | patiḥ | bandheṣu | badhyate ||10.085.28||

10.085.29a parā dehi śāmulyam brahmabhyo vi bhajā vasu |
10.085.29c kṛtyaiṣā padvatī bhūtvy ā jāyā viśate patim ||

parā | dehi | śāmulyam | brahma-bhyaḥ | vi | bhaja | vasu |
kṛtyā | eṣā | pat-vatī | bhūtvī | ā | jāyā | viśate | patim ||10.085.29||

10.085.30a aśrīrā tanūr bhavati ruśatī pāpayāmuyā |
10.085.30c patir yad vadhvo vāsasā svam aṅgam abhidhitsate ||

aśrīrā | tanūḥ | bhavati | ruśatī | pāpayā | amuyā |
patiḥ | yat | vadhvaḥ | vāsasā | svam | aṅgam | abhi-dhitsate ||10.085.30||

10.085.31a ye vadhvaś candraṁ vahatuṁ yakṣmā yanti janād anu |
10.085.31c punas tān yajñiyā devā nayantu yata āgatāḥ ||

ye | vadhvaḥ | candram | vahatum | yakṣmāḥ | yanti | janāt | anu |
punariti | tān | yajñiyāḥ | devāḥ | nayantu | yataḥ | ā-gatāḥ ||10.085.31||

10.085.32a mā vidan paripanthino ya āsīdanti dampatī |
10.085.32c sugebhir durgam atītām apa drāntv arātayaḥ ||

mā | vidan | pari-panthinaḥ | ye | ā-sīdanti | dampatī iti dam-patī |
su-gebhiḥ | duḥ-gam | ati | itām | apa | drāntu | arātayaḥ ||10.085.32||

10.085.33a sumaṅgalīr iyaṁ vadhūr imāṁ sameta paśyata |
10.085.33c saubhāgyam asyai dattvāyāthāstaṁ vi paretana ||

su-maṅgalīḥ | iyam | vadhūḥ | imām | sam-eta | paśyata |
saubhāgyam | asyai | dattvāya | atha | astam | vi | parā | itana ||10.085.33||

10.085.34a tṛṣṭam etat kaṭukam etad apāṣṭhavad viṣavan naitad attave |
10.085.34c sūryāṁ yo brahmā vidyāt sa id vādhūyam arhati ||

tṛṣṭam | etat | kaṭukam | etat | apāṣṭha-vat | viṣa-vat | na | etat | attave |
sūryām | yaḥ | brahmā | vidyāt | saḥ | it | vādhū-yam | arhati ||10.085.34||

10.085.35a āśasanaṁ viśasanam atho adhivikartanam |
10.085.35c sūryāyāḥ paśya rūpāṇi tāni brahmā tu śundhati ||

ā-śasanam | vi-śasanam | atho iti | adhi-vikartanam |
sūryāyāḥ | paśya | rūpāṇi | tāni | brahmā | tu | śundhati ||10.085.35||

10.085.36a gṛbhṇāmi te saubhagatvāya hastam mayā patyā jaradaṣṭir yathāsaḥ |
10.085.36c bhago aryamā savitā puraṁdhir mahyaṁ tvādur gārhapatyāya devāḥ ||

gṛbhṇāmi | te | saubhaga-tvāya | hastam | mayā | patyā | jarat-aṣṭiḥ | yathā | asaḥ |
bhagaḥ | aryamā | savitā | puram-dhiḥ | mahyam | tvā | aduḥ | gārha-patyāya | devāḥ ||10.085.36||

10.085.37a tām pūṣañ chivatamām erayasva yasyām bījam manuṣyā vapanti |
10.085.37c yā na ūrū uśatī viśrayāte yasyām uśantaḥ praharāma śepam ||

tām | pūṣan | śiva-tamām | ā | īrayasva | yasyām | bījam | manuṣyāḥ | vapanti |
yā | naḥ | ūrū iti | uśatī | vi-śrayāte | yasyām | uśantaḥ | pra-harāma | śepam ||10.085.37||

10.085.38a tubhyam agre pary avahan sūryāṁ vahatunā saha |
10.085.38c punaḥ patibhyo jāyāṁ dā agne prajayā saha ||

tubhyam | agre | pari | avahan | sūryām | vahatunā | saha |
punariti | pati-bhyaḥ | jāyām | dāḥ | agne | pra-jayā | saha ||10.085.38||

10.085.39a punaḥ patnīm agnir adād āyuṣā saha varcasā |
10.085.39c dīrghāyur asyā yaḥ patir jīvāti śaradaḥ śatam ||

punariti | patnīm | agniḥ | adāt | āyuṣā | saha | varcasā |
dīrgha-āyuḥ | asyāḥ | yaḥ | patiḥ | jīvāti | śaradaḥ | śatam ||10.085.39||

10.085.40a somaḥ prathamo vivide gandharvo vivida uttaraḥ |
10.085.40c tṛtīyo agniṣ ṭe patis turīyas te manuṣyajāḥ ||

somaḥ | prathamaḥ | vivide | gandharvaḥ | vivide | ut-taraḥ |
tṛtīyaḥ | agniḥ | te | patiḥ | turīyaḥ | te | manuṣya-jāḥ ||10.085.40||

10.085.41a somo dadad gandharvāya gandharvo dadad agnaye |
10.085.41c rayiṁ ca putrām̐ś cādād agnir mahyam atho imām ||

somaḥ | dadat | gandharvāya | gandharvaḥ | dadat | agnaye |
rayim | ca | putrān | ca | adāt | agniḥ | mahyam | atho iti | imām ||10.085.41||

10.085.42a ihaiva stam mā vi yauṣṭaṁ viśvam āyur vy aśnutam |
10.085.42c krīḻantau putrair naptṛbhir modamānau sve gṛhe ||

iha | eva | stam | mā | vi | yauṣṭam | viśvam | āyuḥ | vi | aśnutam |
krīḻantau | putraiḥ | naptṛ-bhiḥ | modamānau | sve | gṛhe ||10.085.42||

10.085.43a ā naḥ prajāṁ janayatu prajāpatir ājarasāya sam anaktv aryamā |
10.085.43c adurmaṅgalīḥ patilokam ā viśa śaṁ no bhava dvipade śaṁ catuṣpade ||

ā | naḥ | pra-jām | janayatu | prajā-patiḥ | ā-jarasāya | sam | anaktu | aryamā |
aduḥ-maṅgalīḥ | pati-lokam | ā | viśa | śam | naḥ | bhava | dvi-pade | śam | catuḥ-pade ||10.085.43||

10.085.44a aghoracakṣur apatighny edhi śivā paśubhyaḥ sumanāḥ suvarcāḥ |
10.085.44c vīrasūr devakāmā syonā śaṁ no bhava dvipade śaṁ catuṣpade ||

aghora-cakṣuḥ | apati-ghnī | edhi | śivā | paśu-bhyaḥ | su-manāḥ | su-varcāḥ |
vīra-sūḥ | deva-kāmā | syonā | śam | naḥ | bhava | dvi-pade | śam | catuḥ-pade ||10.085.44||

10.085.45a imāṁ tvam indra mīḍhvaḥ suputrāṁ subhagāṁ kṛṇu |
10.085.45c daśāsyām putrān ā dhehi patim ekādaśaṁ kṛdhi ||

imām | tvam | indra | mīḍhvaḥ | su-putrām | su-bhagām | kṛṇu |
daśa | asyām | putrān | ā | dhehi | patim | ekādaśam | kṛdhi ||10.085.45||

10.085.46a samrājñī śvaśure bhava samrājñī śvaśrvām bhava |
10.085.46c nanāndari samrājñī bhava samrājñī adhi devṛṣu ||

sam-rājñī | śvaśure | bhava | sam-rājñī | śvaśrvām | bhava |
nanāndari | sam-rājñī | bhava | sam-rājñī | adhi | devṛṣu ||10.085.46||

10.085.47a sam añjantu viśve devāḥ sam āpo hṛdayāni nau |
10.085.47c sam mātariśvā saṁ dhātā sam u deṣṭrī dadhātu nau ||

sam | añjantu | viśve | devāḥ | sam | āpaḥ | hṛdayāni | nau |
sam | mātariśvā | sam | dhātā | sam | ūm̐ iti | deṣṭrī | dadhātu | nau ||10.085.47||


10.086.01a vi hi sotor asṛkṣata nendraṁ devam amaṁsata |
10.086.01c yatrāmadad vṛṣākapir aryaḥ puṣṭeṣu matsakhā viśvasmād indra uttaraḥ ||

vi | hi | sotoḥ | asṛkṣata | na | indram | devam | amaṁsata |
yatra | amadat | vṛṣākapiḥ | aryaḥ | puṣṭeṣu | mat-sakhā | viśvasmāt | indraḥ | ut-taraḥ ||10.086.01||

10.086.02a parā hīndra dhāvasi vṛṣākaper ati vyathiḥ |
10.086.02c no aha pra vindasy anyatra somapītaye viśvasmād indra uttaraḥ ||

parā | hi | indra | dhāvasi | vṛṣākapeḥ | ati | vyathiḥ |
no iti | aha | pra | vindasi | anyatra | soma-pītaye | viśvasmāt | indraḥ | ut-taraḥ ||10.086.02||

10.086.03a kim ayaṁ tvāṁ vṛṣākapiś cakāra harito mṛgaḥ |
10.086.03c yasmā irasyasīd u nv aryo vā puṣṭimad vasu viśvasmād indra uttaraḥ ||

kim | ayam | tvām | vṛṣākapiḥ | cakāra | haritaḥ | mṛgaḥ |
yasmai | irasyasi | it | ūm̐ iti | nu | aryaḥ | vā | puṣṭi-mat | vasu | viśvasmāt | indraḥ | ut-taraḥ ||10.086.03||

10.086.04a yam imaṁ tvaṁ vṛṣākapim priyam indrābhirakṣasi |
10.086.04c śvā nv asya jambhiṣad api karṇe varāhayur viśvasmād indra uttaraḥ ||

yam | imam | tvam | vṛṣākapim | priyam | indra | abhi-rakṣasi |
śvā | nu | asya | jambhiṣat | api | karṇe | varāha-yuḥ | viśvasmāt | indraḥ | ut-taraḥ ||10.086.04||

10.086.05a priyā taṣṭāni me kapir vyaktā vy adūduṣat |
10.086.05c śiro nv asya rāviṣaṁ na sugaṁ duṣkṛte bhuvaṁ viśvasmād indra uttaraḥ ||

priyā | taṣṭāni | me | kapiḥ | vi-aktā | vi | adūduṣat |
śiraḥ | nu | asya | rāviṣam | na | su-gam | duḥ-kṛte | bhuvam | viśvasmāt | indraḥ | ut-taraḥ ||10.086.05||

10.086.06a na mat strī subhasattarā na suyāśutarā bhuvat |
10.086.06c na mat praticyavīyasī na sakthy udyamīyasī viśvasmād indra uttaraḥ ||

na | mat | strī | subhasat-tarā | na | suyāśu-tarā | bhuvat |
na | mat | prati-cyavīyasī | na | sakthi | ut-yamīyasī | viśvasmāt | indraḥ | ut-taraḥ ||10.086.06||

10.086.07a uve amba sulābhike yathevāṅga bhaviṣyati |
10.086.07c bhasan me amba sakthi me śiro me vīva hṛṣyati viśvasmād indra uttaraḥ ||

suve | amba | sulābhike | yathā-iva | aṅga | bhaviṣyati |
bhasat | me | amba | sakthi | me | śiraḥ | me | vi-iva | hṛṣyati | viśvasmāt | indraḥ | ut-taraḥ ||10.086.07||

10.086.08a kiṁ subāho svaṅgure pṛthuṣṭo pṛthujāghane |
10.086.08c kiṁ śūrapatni nas tvam abhy amīṣi vṛṣākapiṁ viśvasmād indra uttaraḥ ||

kim | subāho iti su-bāho | su-aṅgure | pṛthusto iti pṛthu-sto | pṛthu-jaghane |
kim | śūra-patni | naḥ | tvam | abhi | amīṣi | vṛṣākapim | viśvasmāt | indraḥ | ut-taraḥ ||10.086.08||

10.086.09a avīrām iva mām ayaṁ śarārur abhi manyate |
10.086.09c utāham asmi vīriṇīndrapatnī marutsakhā viśvasmād indra uttaraḥ ||

avīrām-iva | mām | ayam | śarāruḥ | abhi | manyate |
uta | aham | asmi | vīriṇī | indra-patnī | marut-sakhā | viśvasmāt | indraḥ | ut-taraḥ ||10.086.09||

10.086.10a saṁhotraṁ sma purā nārī samanaṁ vāva gacchati |
10.086.10c vedhā ṛtasya vīriṇīndrapatnī mahīyate viśvasmād indra uttaraḥ ||

sam-hotram | sma | purā | nārī | samanam | vā | ava | gacchati |
vedhāḥ | ṛtasya | vīriṇī | indra-patnī | mahīyate | viśvasmāt | indraḥ | ut-taraḥ ||10.086.10||

10.086.11a indrāṇīm āsu nāriṣu subhagām aham aśravam |
10.086.11c nahy asyā aparaṁ cana jarasā marate patir viśvasmād indra uttaraḥ ||

indrāṇīm | āsu | nāriṣu | su-bhagām | aham | aśravam |
nahi | asyāḥ | aparam | cana | jarasā | marate | patiḥ | viśvasmāt | indraḥ | ut-taraḥ ||10.086.11||

10.086.12a nāham indrāṇi rāraṇa sakhyur vṛṣākaper ṛte |
10.086.12c yasyedam apyaṁ haviḥ priyaṁ deveṣu gacchati viśvasmād indra uttaraḥ ||

na | aham | indrāṇi | raraṇa | sakhyuḥ | vṛṣākapeḥ | ṛte |
yasya | idam | apyam | haviḥ | priyam | deveṣu | gacchati | viśvasmāt | indraḥ | ut-taraḥ ||10.086.12||

10.086.13a vṛṣākapāyi revati suputra ād u susnuṣe |
10.086.13c ghasat ta indra ukṣaṇaḥ priyaṁ kācitkaraṁ havir viśvasmād indra uttaraḥ ||

vṛṣākapāyi | revati | su-putre | āt | ūm̐ iti | su-snuṣe |
ghasat | te | indraḥ | ukṣaṇaḥ | priyam | kācit-karam | haviḥ | viśvasmāt | indraḥ | ut-taraḥ ||10.086.13||

10.086.14a ukṣṇo hi me pañcadaśa sākam pacanti viṁśatim |
10.086.14c utāham admi pīva id ubhā kukṣī pṛṇanti me viśvasmād indra uttaraḥ ||

ukṣṇaḥ | hi | me | pañca-daśa | sākam | pacanti | viṁśatim |
uta | aham | admi | pīvaḥ | it | ubhā | kukṣī iti | pṛṇanti | me | viśvasmāt | indraḥ | ut-taraḥ ||10.086.14||

10.086.15a vṛṣabho na tigmaśṛṅgo 'ntar yūtheṣu roruvat |
10.086.15c manthas ta indra śaṁ hṛde yaṁ te sunoti bhāvayur viśvasmād indra uttaraḥ ||

vṛṣabhaḥ | na | tigma-śṛṅgaḥ | antaḥ | yūtheṣu | roruvat |
manthaḥ | te | indra | śam | hṛde | yam | te | sunoti | bhāvayuḥ | viśvasmāt | indraḥ | ut-taraḥ ||10.086.15||

10.086.16a na seśe yasya rambate 'ntarā sakthyā kapṛt |
10.086.16c sed īśe yasya romaśaṁ niṣeduṣo vijṛmbhate viśvasmād indra uttaraḥ ||

na | saḥ | īśe | yasya | rambate | antarā | sakthyā | kapṛt |
saḥ | it | īśe | yasya | romaśam | ni-seduṣaḥ | vi-jṛmbhate | viśvasmāt | indraḥ | ut-taraḥ ||10.086.16||

10.086.17a na seśe yasya romaśaṁ niṣeduṣo vijṛmbhate |
10.086.17c sed īśe yasya rambate 'ntarā sakthyā kapṛd viśvasmād indra uttaraḥ ||

na | saḥ | īśe | yasya | romaśam | ni-seduṣaḥ | vi-jṛmbhate |
saḥ | it | īśe | yasya | rambate | antarā | sakthyā | kapṛt | viśvasmāt | indraḥ | ut-taraḥ ||10.086.17||

10.086.18a ayam indra vṛṣākapiḥ parasvantaṁ hataṁ vidat |
10.086.18c asiṁ sūnāṁ navaṁ carum ād edhasyāna ācitaṁ viśvasmād indra uttaraḥ ||

ayam | indra | vṛṣākapiḥ | parasvantam | hatam | vidat |
asim | sūnām | navam | carum | āt | edhasya | anaḥ | ā-citam | viśvasmāt | indraḥ | ut-taraḥ ||10.086.18||

10.086.19a ayam emi vicākaśad vicinvan dāsam āryam |
10.086.19c pibāmi pākasutvano 'bhi dhīram acākaśaṁ viśvasmād indra uttaraḥ ||

ayam | emi | vi-cākaśat | vi-cinvan | dāsam | āryam |
pibāmi | pāka-sutvanaḥ | abhi | dhīram | acākaśam | viśvasmāt | indraḥ | ut-taraḥ ||10.086.19||

10.086.20a dhanva ca yat kṛntatraṁ ca kati svit tā vi yojanā |
10.086.20c nedīyaso vṛṣākape 'stam ehi gṛhām̐ upa viśvasmād indra uttaraḥ ||

dhanva | ca | yat | kṛntatram | ca | kati | svit | tā | vi | yojanā |
nedīyasaḥ | vṛṣākape | astam | ā | ihi | gṛhān | upa | viśvasmāt | indraḥ | ut-taraḥ ||10.086.20||

10.086.21a punar ehi vṛṣākape suvitā kalpayāvahai |
10.086.21c ya eṣa svapnanaṁśano 'stam eṣi pathā punar viśvasmād indra uttaraḥ ||

punaḥ | ā | ihi | vṛṣākape | suvitā | kalpayāvahai |
yaḥ | eṣaḥ | svapna-naṁśanaḥ | astam | eṣi | pathā | punaḥ | viśvasmāt | indraḥ | ut-taraḥ ||10.086.21||

10.086.22a yad udañco vṛṣākape gṛham indrājagantana |
10.086.22c kva sya pulvagho mṛgaḥ kam agañ janayopano viśvasmād indra uttaraḥ ||

yat | udañcaḥ | vṛṣākape | gṛham | indra | ajagantana |
kva | syaḥ | pulvaghaḥ | mṛgaḥ | kam | agan | jana-yopanaḥ | viśvasmāt | indraḥ | ut-taraḥ ||10.086.22||

10.086.23a parśur ha nāma mānavī sākaṁ sasūva viṁśatim |
10.086.23c bhadram bhala tyasyā abhūd yasyā udaram āmayad viśvasmād indra uttaraḥ ||

paśuḥ | ha | nāma | mānavī | sākam | sasūva | viṁśatim |
bhadram | bhala | tyasyai | abhūt | yasyāḥ | udaram | āmayat | viśvasmāt | indraḥ | ut-taraḥ ||10.086.23||


10.087.01a rakṣohaṇaṁ vājinam ā jigharmi mitram prathiṣṭham upa yāmi śarma |
10.087.01c śiśāno agniḥ kratubhiḥ samiddhaḥ sa no divā sa riṣaḥ pātu naktam ||

rakṣaḥ-hanam | vājinam | ā | jigharmi | mitram | prathiṣṭham | upa | yāmi | śarma |
śiśānaḥ | agniḥ | kratu-bhiḥ | sam-iddhaḥ | saḥ | naḥ | divā | saḥ | riṣaḥ | pātu | naktam ||10.087.01||

10.087.02a ayodaṁṣṭro arciṣā yātudhānān upa spṛśa jātavedaḥ samiddhaḥ |
10.087.02c ā jihvayā mūradevān rabhasva kravyādo vṛktvy api dhatsvāsan ||

ayaḥ-daṁṣṭraḥ | arciṣā | yātu-dhānān | upa | spṛśa | jāta-vedaḥ | sam-iddhaḥ |
ā | jihvayā | mūra-devān | rabhasva | kravya-adaḥ | vṛktvī | api | dhatsva | āsan ||10.087.02||

10.087.03a ubhobhayāvinn upa dhehi daṁṣṭrā hiṁsraḥ śiśāno 'varam paraṁ ca |
10.087.03c utāntarikṣe pari yāhi rājañ jambhaiḥ saṁ dhehy abhi yātudhānān ||

ubhā | ubhayāvin | upa | dhehi | daṁṣṭrā | hiṁsraḥ | śiśānaḥ | avaram | param | ca |
uta | antarikṣe | pari | yāhi | rājan | jambhaiḥ | sam | dhehi | abhi | yātu-dhānān ||10.087.03||

10.087.04a yajñair iṣūḥ saṁnamamāno agne vācā śalyām̐ aśanibhir dihānaḥ |
10.087.04c tābhir vidhya hṛdaye yātudhānān pratīco bāhūn prati bhaṅdhy eṣām ||

yajñaiḥ | iṣūḥ | sam-namamānaḥ | agne | vācā | śalyān | aśani-bhiḥ | dihānaḥ |
tābhiḥ | vidhya | hṛdaye | yātu-dhānān | pratīcaḥ | bāhūn | prati | bhaṅdhi | eṣām ||10.087.04||

10.087.05a agne tvacaṁ yātudhānasya bhindhi hiṁsrāśanir harasā hantv enam |
10.087.05c pra parvāṇi jātavedaḥ śṛṇīhi kravyāt kraviṣṇur vi cinotu vṛkṇam ||

agne | tvacam | yātu-dhānasya | bhindhi | hiṁsrā | aśaniḥ | harasā | hantu | enam |
pra | parvāṇi | jāta-vedaḥ | śṛṇīhi | kravyāt | kraviṣṇuḥ | vi | cinotu | vṛkṇam ||10.087.05||

10.087.06a yatredānīm paśyasi jātavedas tiṣṭhantam agna uta vā carantam |
10.087.06c yad vāntarikṣe pathibhiḥ patantaṁ tam astā vidhya śarvā śiśānaḥ ||

yatra | idānīm | paśyasi | jāta-vedaḥ | tiṣṭhantam | agne | uta | vā | carantam |
yat | vā | antarikṣe | pathi-bhiḥ | patantam | tam | astā | vidhya | śarvā | śiśānaḥ ||10.087.06||

10.087.07a utālabdhaṁ spṛṇuhi jātaveda ālebhānād ṛṣṭibhir yātudhānāt |
10.087.07c agne pūrvo ni jahi śośucāna āmādaḥ kṣviṅkās tam adantv enīḥ ||

uta | ā-labdham | spṛṇuhi | jāta-vedaḥ | ā-lebhānāt | ṛṣṭi-bhiḥ | yātu-dhānāt |
agne | pūrvaḥ | ni | jahi | śośucānaḥ | āma-adaḥ | kṣviṅkāḥ | tam | adantu | enīḥ ||10.087.07||

10.087.08a iha pra brūhi yatamaḥ so agne yo yātudhāno ya idaṁ kṛṇoti |
10.087.08c tam ā rabhasva samidhā yaviṣṭha nṛcakṣasaś cakṣuṣe randhayainam ||

iha | pra | brūhi | yatamaḥ | saḥ | agne | yaḥ | yātu-dhānaḥ | yaḥ | idam | kṛṇoti |
tam | ā | rabhasva | sam-idhā | yaviṣṭha | nṛ-cakṣasaḥ | cakṣuṣe | randhaya | enam ||10.087.08||

10.087.09a tīkṣṇenāgne cakṣuṣā rakṣa yajñam prāñcaṁ vasubhyaḥ pra ṇaya pracetaḥ |
10.087.09c hiṁsraṁ rakṣāṁsy abhi śośucānam mā tvā dabhan yātudhānā nṛcakṣaḥ ||

tīkṣṇena | agne | cakṣuṣā | rakṣa | yajñam | prāñcam | vasu-bhyaḥ | pra | naya | pra-cetaḥ |
hiṁsram | rakṣāṁsi | abhi | śośucānam | mā | tvā | dabhan | yātu-dhānāḥ | nṛ-cakṣaḥ ||10.087.09||

10.087.10a nṛcakṣā rakṣaḥ pari paśya vikṣu tasya trīṇi prati śṛṇīhy agrā |
10.087.10c tasyāgne pṛṣṭīr harasā śṛṇīhi tredhā mūlaṁ yātudhānasya vṛśca ||

nṛ-cakṣāḥ | rakṣaḥ | pari | paśya | vikṣu | tasya | trīṇi | prati | śṛṇīhi | agrā |
tasya | agne | pṛṣṭīḥ | harasā | śṛṇīhi | tredhā | mūlam | yātu-dhānasya | vṛśca ||10.087.10||

10.087.11a trir yātudhānaḥ prasitiṁ ta etv ṛtaṁ yo agne anṛtena hanti |
10.087.11c tam arciṣā sphūrjayañ jātavedaḥ samakṣam enaṁ gṛṇate ni vṛṅdhi ||

triḥ | yātu-dhānaḥ | pra-sitim | te | etu | ṛtam | yaḥ | agne | anṛtena | hanti |
tam | arciṣā | sphūrjayan | jāta-vedaḥ | sam-akṣam | enam | gṛṇate | ni | vṛṅdhi ||10.087.11||

10.087.12a tad agne cakṣuḥ prati dhehi rebhe śaphārujaṁ yena paśyasi yātudhānam |
10.087.12c atharvavaj jyotiṣā daivyena satyaṁ dhūrvantam acitaṁ ny oṣa ||

tat | agne | cakṣuḥ | prati | dhehi | rebhe | śapha-ārujam | yena | paśyasi | yātu-dhānam |
atharva-vat | jyotiṣā | daivyena | satyam | dhūrvantam | acitam | ni | oṣa ||10.087.12||

10.087.13a yad agne adya mithunā śapāto yad vācas tṛṣṭaṁ janayanta rebhāḥ |
10.087.13c manyor manasaḥ śaravyā jāyate yā tayā vidhya hṛdaye yātudhānān ||

yat | agne | adya | mithunā | śapātaḥ | yat | vācaḥ | tṛṣṭam | janayanta | rebhāḥ |
manyoḥ | manasaḥ | śaravyā | jāyate | yā | tayā | vidhya | hṛdaye | yātu-dhānān ||10.087.13||

10.087.14a parā śṛṇīhi tapasā yātudhānān parāgne rakṣo harasā śṛṇīhi |
10.087.14c parārciṣā mūradevāñ chṛṇīhi parāsutṛpo abhi śośucānaḥ ||

parā | śṛṇīhi | tapasā | yātu-dhānān | parā | agne | rakṣaḥ | harasā | śṛṇīhi |
parā | arciṣā | mūra-devān | śṛṇīhi | parā | asu-tṛpaḥ | abhi | śośucānaḥ ||10.087.14||

10.087.15a parādya devā vṛjinaṁ śṛṇantu pratyag enaṁ śapathā yantu tṛṣṭāḥ |
10.087.15c vācāstenaṁ śarava ṛcchantu marman viśvasyaitu prasitiṁ yātudhānaḥ ||

parā | adya | devāḥ | vṛjinam | śṛṇantu | pratyak | enam | śapathāḥ | yantu | tṛṣṭāḥ |
vācā-stenam | śaravaḥ | ṛcchantu | marman | viśvasya | etu | pra-sitim | yātu-dhānaḥ ||10.087.15||

10.087.16a yaḥ pauruṣeyeṇa kraviṣā samaṅkte yo aśvyena paśunā yātudhānaḥ |
10.087.16c yo aghnyāyā bharati kṣīram agne teṣāṁ śīrṣāṇi harasāpi vṛśca ||

yaḥ | pauruṣeyeṇa | kraviṣā | sam-aṅkte | yaḥ | aśvyena | paśunā | yātu-dhānaḥ |
yaḥ | aghnyāyāḥ | bharati | kṣīram | agne | teṣām | śīrṣāṇi | harasā | api | vṛśca ||10.087.16||

10.087.17a saṁvatsarīṇam paya usriyāyās tasya māśīd yātudhāno nṛcakṣaḥ |
10.087.17c pīyūṣam agne yatamas titṛpsāt tam pratyañcam arciṣā vidhya marman ||

saṁvatsarīṇam | payaḥ | usriyāyāḥ | tasya | mā | aśīt | yātu-dhānaḥ | nṛ-cakṣaḥ |
pīyūṣam | agne | yatamaḥ | titṛpsāt | tam | pratyañcam | arciṣā | vidhya | marman ||10.087.17||

10.087.18a viṣaṁ gavāṁ yātudhānāḥ pibantv ā vṛścyantām aditaye durevāḥ |
10.087.18c parainān devaḥ savitā dadātu parā bhāgam oṣadhīnāṁ jayantām ||

viṣam | gavām | yātu-dhānāḥ | pibantu | ā | vṛścyantām | aditaye | duḥ-evāḥ |
parā | enān | devaḥ | savitā | dadātu | parā | bhāgam | oṣadhīnām | jayantām ||10.087.18||

10.087.19a sanād agne mṛṇasi yātudhānān na tvā rakṣāṁsi pṛtanāsu jigyuḥ |
10.087.19c anu daha sahamūrān kravyādo mā te hetyā mukṣata daivyāyāḥ ||

sanāt | agne | mṛṇasi | yātu-dhānān | na | tvā | rakṣāṁsi | pṛtanāsu | jigyuḥ |
anu | daha | saha-mūrān | kravya-adaḥ | mā | te | hetyāḥ | mukṣata | daivyāyāḥ ||10.087.19||

10.087.20a tvaṁ no agne adharād udaktāt tvam paścād uta rakṣā purastāt |
10.087.20c prati te te ajarāsas tapiṣṭhā aghaśaṁsaṁ śośucato dahantu ||

tvam | naḥ | agne | adharāt | udaktāt | tvam | paścāt | uta | rakṣa | purastāt |
prati | te | te | ajarāsaḥ | tapiṣṭhāḥ | agha-śaṁsam | śośucataḥ | dahantu ||10.087.20||

10.087.21a paścāt purastād adharād udaktāt kaviḥ kāvyena pari pāhi rājan |
10.087.21c sakhe sakhāyam ajaro jarimṇe 'gne martām̐ amartyas tvaṁ naḥ ||

paścāt | purastāt | adharāt | udaktāt | kaviḥ | kāvyena | pari | pāhi | rājan |
sakhe | sakhāyam | ajaraḥ | jarimṇe | agne | martān | amartyaḥ | tvam | naḥ ||10.087.21||

10.087.22a pari tvāgne puraṁ vayaṁ vipraṁ sahasya dhīmahi |
10.087.22c dhṛṣadvarṇaṁ dive-dive hantāram bhaṅgurāvatām ||

pari | tvā | agne | puram | vayam | vipram | sahasya | dhīmahi |
dhṛṣat-varṇam | dive-dive | hantāram | bhaṅgura-vatām ||10.087.22||

10.087.23a viṣeṇa bhaṅgurāvataḥ prati ṣma rakṣaso daha |
10.087.23c agne tigmena śociṣā tapuragrābhir ṛṣṭibhiḥ ||

viṣeṇa | bhaṅgura-vataḥ | prati | sma | rakṣasaḥ | daha |
agne | tigmena | śociṣā | tapuḥ-agrābhiḥ | ṛṣṭi-bhiḥ ||10.087.23||

10.087.24a praty agne mithunā daha yātudhānā kimīdinā |
10.087.24c saṁ tvā śiśāmi jāgṛhy adabdhaṁ vipra manmabhiḥ ||

prati | agne | mithunā | daha | yātu-dhānā | kimīdinā |
sam | tvā | śiśāmi | jāgṛhi | adabdham | vipra | manma-bhiḥ ||10.087.24||

10.087.25a praty agne harasā haraḥ śṛṇīhi viśvataḥ prati |
10.087.25c yātudhānasya rakṣaso balaṁ vi ruja vīryam ||

prati | agne | harasā | haraḥ | śṛṇīhi | viśvataḥ | prati |
yātu-dhānasya | rakṣasaḥ | balam | vi | ruja | vīryam ||10.087.25||


10.088.01a haviṣ pāntam ajaraṁ svarvidi divispṛśy āhutaṁ juṣṭam agnau |
10.088.01c tasya bharmaṇe bhuvanāya devā dharmaṇe kaṁ svadhayā paprathanta ||

haviḥ | pāntam | ajaram | svaḥ-vidi | divi-spṛśi | ā-hutam | juṣṭam | agnau |
tasya | bharmaṇe | bhuvanāya | devāḥ | dharmaṇe | kam | svadhayā | paprathanta ||10.088.01||

10.088.02a gīrṇam bhuvanaṁ tamasāpagūḻham āviḥ svar abhavaj jāte agnau |
10.088.02c tasya devāḥ pṛthivī dyaur utāpo 'raṇayann oṣadhīḥ sakhye asya ||

gīrṇam | bhuvanam | tamasā | apa-gūḻham | āviḥ | svaḥ | abhavat | jāte | agnau |
tasya | devāḥ | pṛthivī | dyauḥ | uta | āpaḥ | araṇayan | oṣadhīḥ | sakhye | asya ||10.088.02||

10.088.03a devebhir nv iṣito yajñiyebhir agniṁ stoṣāṇy ajaram bṛhantam |
10.088.03c yo bhānunā pṛthivīṁ dyām utemām ātatāna rodasī antarikṣam ||

devebhiḥ | nu | iṣitaḥ | yajñiyebhiḥ | agnim | stoṣāṇi | ajaram | bṛhantam |
yaḥ | bhānunā | pṛthivīm | dyām | uta | imām | ātatāna | rodasī iti | antarikṣam ||10.088.03||

10.088.04a yo hotāsīt prathamo devajuṣṭo yaṁ samāñjann ājyenā vṛṇānāḥ |
10.088.04c sa patatrītvaraṁ sthā jagad yac chvātram agnir akṛṇoj jātavedāḥ ||

yaḥ | hotā | āsīt | prathamaḥ | deva-juṣṭaḥ | yam | sam-āñjan | ājyena | vṛṇānāḥ |
saḥ | patatri | itvaram | sthāḥ | jagat | yat | śvātram | agniḥ | akṛṇot | jāta-vedāḥ ||10.088.04||

10.088.05a yaj jātavedo bhuvanasya mūrdhann atiṣṭho agne saha rocanena |
10.088.05c taṁ tvāhema matibhir gīrbhir ukthaiḥ sa yajñiyo abhavo rodasiprāḥ ||

yat | jāta-vedaḥ | bhuvanasya | mūrdhan | atiṣṭhaḥ | agne | saha | rocanena |
tam | tvā | ahema | mati-bhiḥ | gīḥ-bhiḥ | ukthaiḥ | saḥ | yajñiyaḥ | abhavaḥ | rodasi-prāḥ ||10.088.05||

10.088.06a mūrdhā bhuvo bhavati naktam agnis tataḥ sūryo jāyate prātar udyan |
10.088.06c māyām ū tu yajñiyānām etām apo yat tūrṇiś carati prajānan ||

mūrdhā | bhuvaḥ | bhavati | naktam | agniḥ | tataḥ | sūryaḥ | jāyate | prātaḥ | ut-yan |
māyām | ūm̐ iti | tu | yajñiyānām | etām | apaḥ | yat | tūrṇiḥ | carati | pra-jānan ||10.088.06||

10.088.07a dṛśenyo yo mahinā samiddho 'rocata diviyonir vibhāvā |
10.088.07c tasminn agnau sūktavākena devā havir viśva ājuhavus tanūpāḥ ||

dṛśenyaḥ | yaḥ | mahinā | sam-iddhaḥ | arocata | divi-yoniḥ | vibhā-vā |
tasmin | agnau | sūkta-vākena | devāḥ | haviḥ | viśve | ā | ajuhavuḥ | tanū-pāḥ ||10.088.07||

10.088.08a sūktavākam prathamam ād id agnim ād id dhavir ajanayanta devāḥ |
10.088.08c sa eṣāṁ yajño abhavat tanūpās taṁ dyaur veda tam pṛthivī tam āpaḥ ||

sūkta-vākam | prathamam | āt | it | agnim | āt | it | haviḥ | ajanayanta | devāḥ |
saḥ | eṣām | yajñaḥ | abhavat | tanū-pāḥ | tam | dyauḥ | veda | tam | pṛthivī | tam | āpaḥ ||10.088.08||

10.088.09a yaṁ devāso 'janayantāgniṁ yasminn ājuhavur bhuvanāni viśvā |
10.088.09c so arciṣā pṛthivīṁ dyām utemām ṛjūyamāno atapan mahitvā ||

yam | devāsaḥ | ajanayanta | agnim | yasmin | ā | ajuhavuḥ | bhuvanāni | viśvā |
saḥ | arciṣā | pṛthivīm | dyām | uta | imām | ṛju-yamānaḥ | atapat | mahi-tvā ||10.088.09||

10.088.10a stomena hi divi devāso agnim ajījanañ chaktibhī rodasiprām |
10.088.10c tam ū akṛṇvan tredhā bhuve kaṁ sa oṣadhīḥ pacati viśvarūpāḥ ||

stomena | hi | divi | devāsaḥ | agnim | ajījanan | śakti-bhiḥ | rodasi-prām |
tam | ūm̐ iti | akṛṇvan | tredhā | bhuve | kam | saḥ | oṣadhīḥ | pacati | viśva-rūpāḥ ||10.088.10||

10.088.11a yaded enam adadhur yajñiyāso divi devāḥ sūryam āditeyam |
10.088.11c yadā cariṣṇū mithunāv abhūtām ād it prāpaśyan bhuvanāni viśvā ||

yadā | it | enam | adadhuḥ | yajñiyāsaḥ | divi | devāḥ | sūryam | āditeyam |
yadā | cariṣṇū iti | mithunau | abhūtām | āt | it | pra | apaśyan | bhuvanāni | viśvā ||10.088.11||

10.088.12a viśvasmā agnim bhuvanāya devā vaiśvānaraṁ ketum ahnām akṛṇvan |
10.088.12c ā yas tatānoṣaso vibhātīr apo ūrṇoti tamo arciṣā yan ||

viśvasmai | agnim | bhuvanāya | devāḥ | vaiśvānaram | ketum | ahnām | akṛṇvan |
ā | yaḥ | tatāna | uṣasaḥ | vi-bhātīḥ | apo iti | ūrṇoti | tamaḥ | arciṣā | yan ||10.088.12||

10.088.13a vaiśvānaraṁ kavayo yajñiyāso 'gniṁ devā ajanayann ajuryam |
10.088.13c nakṣatram pratnam aminac cariṣṇu yakṣasyādhyakṣaṁ taviṣam bṛhantam ||

vaiśvānaram | kavayaḥ | yajñiyāḥ | agnim | devāḥ | ajanayan | ajuryam |
nakṣatram | pratnam | aminat | cariṣṇu | yakṣasya | adhi-akṣam | taviṣam | bṛhantam ||10.088.13||

10.088.14a vaiśvānaraṁ viśvahā dīdivāṁsam mantrair agniṁ kavim acchā vadāmaḥ |
10.088.14c yo mahimnā paribabhūvorvī utāvastād uta devaḥ parastāt ||

vaiśvānaram | viśvahā | dīdi-vāṁsam | mantraiḥ | agnim | kavim | accha | vadāmaḥ |
yaḥ | mahimnā | pari-babhūva | urvī iti | uta | avastāt | uta | devaḥ | parastāt ||10.088.14||

10.088.15a dve srutī aśṛṇavam pitṝṇām ahaṁ devānām uta martyānām |
10.088.15c tābhyām idaṁ viśvam ejat sam eti yad antarā pitaram mātaraṁ ca ||

dve iti | srutī iti | aśṛṇavam | pitṝṇām | aham | devānām | uta | martyānām |
tābhyām | idam | viśvam | ejat | sam | eti | yat | antarā | pitaram | mātaram | ca ||10.088.15||

10.088.16a dve samīcī bibhṛtaś carantaṁ śīrṣato jātam manasā vimṛṣṭam |
10.088.16c sa pratyaṅ viśvā bhuvanāni tasthāv aprayucchan taraṇir bhrājamānaḥ ||

dve iti | samīcī iti sam-īcī | bibhṛtaḥ | carantam | śīrṣataḥ | jātam | manasā | vi-mṛṣṭam |
saḥ | pratyaṅ | viśvā | bhuvanāni | tasthau | apra-yucchan | taraṇiḥ | bhrājamānaḥ ||10.088.16||

10.088.17a yatrā vadete avaraḥ paraś ca yajñanyoḥ kataro nau vi veda |
10.088.17c ā śekur it sadhamādaṁ sakhāyo nakṣanta yajñaṁ ka idaṁ vi vocat ||

yatra | vadete iti | avaraḥ | paraḥ | ca | yajña-nyoḥ | kataraḥ | nau | vi | veda |
ā | śekuḥ | it | sadha-mādam | sakhāyaḥ | nakṣanta | yajñam | kaḥ | idam | vi | vocat ||10.088.17||

10.088.18a katy agnayaḥ kati sūryāsaḥ katy uṣāsaḥ katy u svid āpaḥ |
10.088.18c nopaspijaṁ vaḥ pitaro vadāmi pṛcchāmi vaḥ kavayo vidmane kam ||

kati | agnayaḥ | kati | sūryāsaḥ | kati | uṣasaḥ | kati | ūm̐ iti | svit | āpaḥ |
na | upa-spijam | vaḥ | pitaraḥ | vadāmi | pṛcchāmi | vaḥ | kavayaḥ | vidmane | kam ||10.088.18||

10.088.19a yāvanmātram uṣaso na pratīkaṁ suparṇyo vasate mātariśvaḥ |
10.088.19c tāvad dadhāty upa yajñam āyan brāhmaṇo hotur avaro niṣīdan ||

yāvat-mātram | uṣasaḥ | na | pratīkam | su-parṇyaḥ | vasate | mātariśvaḥ |
tāvat | dadhāti | upa | yajñam | ā-yan | brāhmaṇaḥ | hotuḥ | avaraḥ | ni-sīdan ||10.088.19||


10.089.01a indraṁ stavā nṛtamaṁ yasya mahnā vibabādhe rocanā vi jmo antān |
10.089.01c ā yaḥ paprau carṣaṇīdhṛd varobhiḥ pra sindhubhyo riricāno mahitvā ||

indram | stava | nṛ-tamam | yasya | mahnā | vi-babādhe | rocanā | vi | jmaḥ | antān |
ā | yaḥ | paprau | carṣaṇi-dhṛt | varaḥ-bhiḥ | pra | sindhu-bhyaḥ | riricānaḥ | mahi-tvā ||10.089.01||

10.089.02a sa sūryaḥ pary urū varāṁsy endro vavṛtyād rathyeva cakrā |
10.089.02c atiṣṭhantam apasyaṁ na sargaṁ kṛṣṇā tamāṁsi tviṣyā jaghāna ||

saḥ | sūryaḥ | pari | uru | varāṁsi | ā | indraḥ | vavṛtyāt | rathyā-iva | cakrā |
atiṣṭhantam | apasyam | na | sargam | kṛṣṇā | tamāṁsi | tviṣyā | jaghāna ||10.089.02||

10.089.03a samānam asmā anapāvṛd arca kṣmayā divo asamam brahma navyam |
10.089.03c vi yaḥ pṛṣṭheva janimāny arya indraś cikāya na sakhāyam īṣe ||

samānam | asmai | anapa-vṛt | arca | kṣmayā | divaḥ | asamam | brahma | navyam |
vi | yaḥ | pṛṣṭhā-iva | janimāni | aryaḥ | indraḥ | cikāya | na | sakhāyam | īṣe ||10.089.03||

10.089.04a indrāya giro aniśitasargā apaḥ prerayaṁ sagarasya budhnāt |
10.089.04c yo akṣeṇeva cakriyā śacībhir viṣvak tastambha pṛthivīm uta dyām ||

indrāya | giraḥ | aniśita-sargāḥ | apaḥ | pra | īrayam | sagarasya | budhnāt |
yaḥ | akṣeṇa-iva | cakriyā | śacībhiḥ | viṣvak | tastambha | pṛthivīm | uta | dyām ||10.089.04||

10.089.05a āpāntamanyus tṛpalaprabharmā dhuniḥ śimīvāñ charumām̐ ṛjīṣī |
10.089.05c somo viśvāny atasā vanāni nārvāg indram pratimānāni debhuḥ ||

āpānta-manyuḥ | tṛpala-prabharmā | dhuniḥ | śimī-vān | śaru-mān | ṛjīṣī |
somaḥ | viśvāni | atasā | vanāni | na | arvāk | indram | prati-mānāni | debhuḥ ||10.089.05||

10.089.06a na yasya dyāvāpṛthivī na dhanva nāntarikṣaṁ nādrayaḥ somo akṣāḥ |
10.089.06c yad asya manyur adhinīyamānaḥ śṛṇāti vīḻu rujati sthirāṇi ||

na | yasya | dyāvāpṛthivī iti | na | dhanva | na | antarikṣam | na | adrayaḥ | somaḥ | akṣāriti |
yat | asya | manyuḥ | adhi-nīyamānaḥ | śṛṇāti | vīḻu | rujati | sthirāṇi ||10.089.06||

10.089.07a jaghāna vṛtraṁ svadhitir vaneva ruroja puro aradan na sindhūn |
10.089.07c bibheda giriṁ navam in na kumbham ā gā indro akṛṇuta svayugbhiḥ ||

jaghāna | vṛtram | sva-dhitiḥ | vanā-iva | ruroja | puraḥ | aradat | na | sindhūn |
bibheda | girim | navam | it | na | kumbham | ā | gāḥ | indraḥ | akṛṇuta | svayuk-bhiḥ ||10.089.07||

10.089.08a tvaṁ ha tyad ṛṇayā indra dhīro 'sir na parva vṛjinā śṛṇāsi |
10.089.08c pra ye mitrasya varuṇasya dhāma yujaṁ na janā minanti mitram ||

tvam | ha | tyat | ṛṇa-yāḥ | indra | dhīraḥ | asiḥ | na | parva | vṛjinā | śṛṇāsi |
pra | ye | mitrasya | varuṇasya | dhāma | yujam | na | janāḥ | minanti | mitram ||10.089.08||

10.089.09a pra ye mitram prāryamaṇaṁ durevāḥ pra saṁgiraḥ pra varuṇam minanti |
10.089.09c ny amitreṣu vadham indra tumraṁ vṛṣan vṛṣāṇam aruṣaṁ śiśīhi ||

pra | ye | mitram | pra | aryamaṇam | duḥ-evāḥ | pra | sam-giraḥ | pra | varuṇam | minanti |
ni | amitreṣu | vadham | indra | tumram | vṛṣan | vṛṣāṇam | aruṣam | śiśīhi ||10.089.09||

10.089.10a indro diva indra īśe pṛthivyā indro apām indra it parvatānām |
10.089.10c indro vṛdhām indra in medhirāṇām indraḥ kṣeme yoge havya indraḥ ||

indraḥ | divaḥ | indraḥ | īśe | pṛthivyāḥ | indraḥ | apām | indraḥ | it | parvatānām |
indraḥ | vṛdhām | indraḥ | it | medhirāṇām | indraḥ | kṣeme | yoge | havyaḥ | indraḥ ||10.089.10||

10.089.11a prāktubhya indraḥ pra vṛdho ahabhyaḥ prāntarikṣāt pra samudrasya dhāseḥ |
10.089.11c pra vātasya prathasaḥ pra jmo antāt pra sindhubhyo ririce pra kṣitibhyaḥ ||

pra | aktu-bhyaḥ | indraḥ | pra | vṛdhaḥ | aha-bhyaḥ | pra | antarikṣāt | pra | samudrasya | dhāseḥ |
pra | vātasya | prathasaḥ | pra | jmaḥ | antāt | pra | sindhu-bhyaḥ | ririce | pra | kṣiti-bhyaḥ ||10.089.11||

10.089.12a pra śośucatyā uṣaso na ketur asinvā te vartatām indra hetiḥ |
10.089.12c aśmeva vidhya diva ā sṛjānas tapiṣṭhena heṣasā droghamitrān ||

pra | śośucatyāḥ | uṣasaḥ | na | ketuḥ | asinvā | te | vartatām | indra | hetiḥ |
aśmā-iva | vidhya | divaḥ | ā | sṛjānaḥ | tapiṣṭhena | heṣasā | drogha-mitrān ||10.089.12||

10.089.13a anv aha māsā anv id vanāny anv oṣadhīr anu parvatāsaḥ |
10.089.13c anv indraṁ rodasī vāvaśāne anv āpo ajihata jāyamānam ||

anu | aha | māsāḥ | anu | it | vanāni | anu | oṣadhīḥ | anu | parvatāsaḥ |
anu | indram | rodasī iti | vāvaśāne iti | anu | āpaḥ | ajihata | jāyamānam ||10.089.13||

10.089.14a karhi svit sā ta indra cetyāsad aghasya yad bhinado rakṣa eṣat |
10.089.14c mitrakruvo yac chasane na gāvaḥ pṛthivyā āpṛg amuyā śayante ||

karhi | svit | sā | te | indra | cetyā | asat | aghasya | yat | bhinadaḥ | rakṣaḥ | ā-īṣat |
mitra-kruvaḥ | yat | śasane | na | gāvaḥ | pṛthivyāḥ | ā-pṛk | amuyā | śayante ||10.089.14||

10.089.15a śatrūyanto abhi ye nas tatasre mahi vrādhanta ogaṇāsa indra |
10.089.15c andhenāmitrās tamasā sacantāṁ sujyotiṣo aktavas tām̐ abhi ṣyuḥ ||

śatru-yantaḥ | abhi | ye | naḥ | tatasre | mahi | vrādhantaḥ | ogaṇāsaḥ | indra |
andhena | amitrāḥ | tamasā | sacantām | su-jyotiṣaḥ | aktavaḥ | tān | abhi | syuriti syuḥ ||10.089.15||

10.089.16a purūṇi hi tvā savanā janānām brahmāṇi mandan gṛṇatām ṛṣīṇām |
10.089.16c imām āghoṣann avasā sahūtiṁ tiro viśvām̐ arcato yāhy arvāṅ ||

purūṇi | hi | tvā | savanā | janānām | brahmāṇi | mandan | gṛṇatām | ṛṣīṇām |
imām | ā-ghoṣan | avasā | sa-hūtim | tiraḥ | viśvān | arcataḥ | yāhi | arvāṅ ||10.089.16||

10.089.17a evā te vayam indra bhuñjatīnāṁ vidyāma sumatīnāṁ navānām |
10.089.17c vidyāma vastor avasā gṛṇanto viśvāmitrā uta ta indra nūnam ||

eva | te | vayam | indra | bhuñjatīnām | vidyāma | su-matīnām | navānām |
vidyāma | vastoḥ | avasā | gṛṇantaḥ | viśvāmitrāḥ | uta | te | indra | nūnam ||10.089.17||

10.089.18a śunaṁ huvema maghavānam indram asmin bhare nṛtamaṁ vājasātau |
10.089.18c śṛṇvantam ugram ūtaye samatsu ghnantaṁ vṛtrāṇi saṁjitaṁ dhanānām ||

śunam | huvema | magha-vānam | indram | asmin | bhare | nṛ-tamam | vāja-sātau |
śṛṇvantam | ugram | ūtaye | samat-su | ghnantam | vṛtrāṇi | sam-jitam | dhanānām ||10.089.18||


10.090.01a sahasraśīrṣā puruṣaḥ sahasrākṣaḥ sahasrapāt |
10.090.01c sa bhūmiṁ viśvato vṛtvāty atiṣṭhad daśāṅgulam ||

sahasra-śīrṣā | puruṣaḥ | sahasra-akṣaḥ | sahasra-pāt |
saḥ | bhūmim | viśvataḥ | vṛtvā | ati | atiṣṭhat | daśa-aṅgulam ||10.090.01||

10.090.02a puruṣa evedaṁ sarvaṁ yad bhūtaṁ yac ca bhavyam |
10.090.02c utāmṛtatvasyeśāno yad annenātirohati ||

puruṣaḥ | eva | idam | sarvam | yat | bhūtam | yat | ca | bhavyam |
uta | amṛta-tvasya | īśānaḥ | yat | annena | ati-rohati ||10.090.02||

10.090.03a etāvān asya mahimāto jyāyām̐ś ca pūruṣaḥ |
10.090.03c pādo 'sya viśvā bhūtāni tripād asyāmṛtaṁ divi ||

etāvān | asya | mahimā | ataḥ | jyāyān | ca | puruṣaḥ |
pādaḥ | asya | viśvā | bhūtāni | tri-pāt | asya | amṛtam | divi ||10.090.03||

10.090.04a tripād ūrdhva ud ait puruṣaḥ pādo 'syehābhavat punaḥ |
10.090.04c tato viṣvaṅ vy akrāmat sāśanānaśane abhi ||

tri-pāt | ūrdhva | ut | ait | puruṣaḥ | pādaḥ | asya | iha | abhavat | punariti |
tataḥ | viṣvaṅ | vi | akrāmat | sāśanānaśane iti | abhi ||10.090.04||

10.090.05a tasmād virāḻ ajāyata virājo adhi pūruṣaḥ |
10.090.05c sa jāto aty aricyata paścād bhūmim atho puraḥ ||

tasmāt | virāṭ | ajāyata | vi-rājaḥ | adhi | puruṣaḥ |
saḥ | jātaḥ | ati | aricyata | paścāt | bhūmim | atho iti | puraḥ ||10.090.05||

10.090.06a yat puruṣeṇa haviṣā devā yajñam atanvata |
10.090.06c vasanto asyāsīd ājyaṁ grīṣma idhmaḥ śarad dhaviḥ ||

yat | puruṣeṇa | haviṣā | devāḥ | yajñam | atanvata |
vasantaḥ | asya | āsīt | ājyam | grīṣmaḥ | idmaḥ | śarat | haviḥ ||10.090.06||

10.090.07a taṁ yajñam barhiṣi praukṣan puruṣaṁ jātam agrataḥ |
10.090.07c tena devā ayajanta sādhyā ṛṣayaś ca ye ||

tam | yajñam | barhiṣi | pra | aukṣan | puruṣam | jātam | agrataḥ |
tena | devāḥ | ayajanta | sādhyāḥ | ṛṣayaḥ | ca | ye ||10.090.07||

10.090.08a tasmād yajñāt sarvahutaḥ sambhṛtam pṛṣadājyam |
10.090.08c paśūn tām̐ś cakre vāyavyān āraṇyān grāmyāś ca ye ||

tasmāt | yajñāt | sarva-hutaḥ | sam-bhṛtam | pṛṣat-ājyam |
paśūn | tān | cakre | vāyavyān | āraṇyān | grāmyāḥ | ca | ye ||10.090.08||

10.090.09a tasmād yajñāt sarvahuta ṛcaḥ sāmāni jajñire |
10.090.09c chandāṁsi jajñire tasmād yajus tasmād ajāyata ||

tasmāt | yajñāt | sarva-hutaḥ | ṛcaḥ | sāmāni | jajñire |
chandāṁsi | jajñire | tasmāt | yajuḥ | tasmāt | ajāyata ||10.090.09||

10.090.10a tasmād aśvā ajāyanta ye ke cobhayādataḥ |
10.090.10c gāvo ha jajñire tasmāt tasmāj jātā ajāvayaḥ ||

tasmāt | aśvāḥ | ajāyanta | ye | ke | ca | ubhayādataḥ |
gāvaḥ | ha | jajñire | tasmāt | tasmāt | jātāḥ | ajāvayaḥ ||10.090.10||

10.090.11a yat puruṣaṁ vy adadhuḥ katidhā vy akalpayan |
10.090.11c mukhaṁ kim asya kau bāhū kā ūrū pādā ucyete ||

yat | puruṣam | vi | adadhuḥ | katidhā | vi | akalpayan |
mukham | kim | asya | kau | bāhū iti | kau | ūrū iti | pādau | ucyete iti ||10.090.11||

10.090.12a brāhmaṇo 'sya mukham āsīd bāhū rājanyaḥ kṛtaḥ |
10.090.12c ūrū tad asya yad vaiśyaḥ padbhyāṁ śūdro ajāyata ||

brāhmaṇaḥ | asya | mukham | āsīt | bāhū iti | rājanyaḥ | kṛtaḥ |
ūrū iti | tat | asya | yat | vaiśyaḥ | pat-bhyām | śūdraḥ | ajāyata ||10.090.12||

10.090.13a candramā manaso jātaś cakṣoḥ sūryo ajāyata |
10.090.13c mukhād indraś cāgniś ca prāṇād vāyur ajāyata ||

candramā | manasaḥ | jātaḥ | cakṣoḥ | sūryaḥ | ajāyata |
mukhāt | indraḥ | ca | agniḥ | ca | prāṇāt | vāyuḥ | ajāyata ||10.090.13||

10.090.14a nābhyā āsīd antarikṣaṁ śīrṣṇo dyauḥ sam avartata |
10.090.14c padbhyām bhūmir diśaḥ śrotrāt tathā lokām̐ akalpayan ||

nābhyāḥ | āsīt | antarikṣam | śīrṣṇaḥ | dyauḥ | sam | avartata |
pat-bhyām | bhūmiḥ | diśaḥ | śrotrāt | tathā | lokān | akalpayan ||10.090.14||

10.090.15a saptāsyāsan paridhayas triḥ sapta samidhaḥ kṛtāḥ |
10.090.15c devā yad yajñaṁ tanvānā abadhnan puruṣam paśum ||

sapta | asya | āsan | pari-dhayaḥ | triḥ | sapta | sam-idhaḥ | kṛtāḥ |
devāḥ | yat | yajñam | tanvānāḥ | abadhnan | puruṣam | paśum ||10.090.15||

10.090.16a yajñena yajñam ayajanta devās tāni dharmāṇi prathamāny āsan |
10.090.16c te ha nākam mahimānaḥ sacanta yatra pūrve sādhyāḥ santi devāḥ ||

yajñena | yajñam | ayajanta | devāḥ | tāni | dharmāṇi | prathamāni | āsan |
te | ha | nākam | mahimānaḥ | sacanta | yatra | pūrve | sādhyāḥ | santi | devāḥ ||10.090.16||


10.091.01a saṁ jāgṛvadbhir jaramāṇa idhyate dame damūnā iṣayann iḻas pade |
10.091.01c viśvasya hotā haviṣo vareṇyo vibhur vibhāvā suṣakhā sakhīyate ||

sam | jāgṛvat-bhiḥ | jaramāṇaḥ | idyate | dame | damūnāḥ | iṣayan | iḻaḥ | pade |
viśvasya | hotā | haviṣaḥ | vareṇyaḥ | vi-bhuḥ | vibhā-vā | su-sakhā | sakhi-yate ||10.091.01||

10.091.02a sa darśataśrīr atithir gṛhe-gṛhe vane-vane śiśriye takvavīr iva |
10.091.02c janaṁ-janaṁ janyo nāti manyate viśa ā kṣeti viśyo viśaṁ-viśam ||

saḥ | darśata-śrīḥ | atithiḥ | gṛhe-gṛhe | vane-vane | śiśra | takvavīḥ-iva |
janam-janam | janyaḥ | na | ati | manyate | viśaḥ | ā | kṣeti | viśyaḥ | viśam-viśam ||10.091.02||

10.091.03a sudakṣo dakṣaiḥ kratunāsi sukratur agne kaviḥ kāvyenāsi viśvavit |
10.091.03c vasur vasūnāṁ kṣayasi tvam eka id dyāvā ca yāni pṛthivī ca puṣyataḥ ||

su-dakṣaḥ | dakṣaḥ | kratunā | asi | su-kratuḥ | agne | kaviḥ | kāvyena | asi | viśva-vit |
vasuḥ | vasūnām | kṣayasi | tvam | ekaḥ | it | dyāvā | ca | yāni | pṛthivī iti | ca | puṣyataḥ ||10.091.03||

10.091.04a prajānann agne tava yonim ṛtviyam iḻāyās pade ghṛtavantam āsadaḥ |
10.091.04c ā te cikitra uṣasām ivetayo 'repasaḥ sūryasyeva raśmayaḥ ||

pra-jānan | agne | tava | yonim | ṛtviyam | iḻāyāḥ | pade | ghṛta-vantam | ā | asadaḥ |
ā | te | cikitre | uṣasām-iva | etayaḥ | arepasaḥ | sūryasya-iva | raśmayaḥ ||10.091.04||

10.091.05a tava śriyo varṣyasyeva vidyutaś citrāś cikitra uṣasāṁ na ketavaḥ |
10.091.05c yad oṣadhīr abhisṛṣṭo vanāni ca pari svayaṁ cinuṣe annam āsye ||

tava | śriyaḥ | varṣyasya-iva | vi-dyutaḥ | citrāḥ | cikitre | uṣasām | na | ketavaḥ |
yat | oṣadhīḥ | abhi-sṛṣṭaḥ | vanāni | ca | pari | svayam | cinuṣe | annam | āsye ||10.091.05||

10.091.06a tam oṣadhīr dadhire garbham ṛtviyaṁ tam āpo agniṁ janayanta mātaraḥ |
10.091.06c tam it samānaṁ vaninaś ca vīrudho 'ntarvatīś ca suvate ca viśvahā ||

tam | oṣadhīḥ | dadhire | garbham | ṛtviyam | tam | āpaḥ | agnim | janayanta | mātaraḥ |
tam | it | samānam | vaninaḥ | ca | vīrudhaḥ | antaḥ-vatīḥ | ca | suvate | ca | viśvahā ||10.091.06||

10.091.07a vātopadhūta iṣito vaśām̐ anu tṛṣu yad annā veviṣad vitiṣṭhase |
10.091.07c ā te yatante rathyo yathā pṛthak chardhāṁsy agne ajarāṇi dhakṣataḥ ||

vāta-upadhūtaḥ | iṣitaḥ | vaśān | anu | tṛṣu | yat | annā | veviṣat | v-tiṣṭhase |
ā | te | yatante | rathyaḥ | yathā | pṛthak | śardhāṁsi | agne | ajarāṇi | dhakṣataḥ ||10.091.07||

10.091.08a medhākāraṁ vidathasya prasādhanam agniṁ hotāram paribhūtamam matim |
10.091.08c tam id arbhe haviṣy ā samānam it tam in mahe vṛṇate nānyaṁ tvat ||

medhā-kāram | vidathasya | pra-sādhanam | agnim | hotāram | pari-bhūtamam | matim |
tam | it | arbhe | haviṣi | ā | samānam | it | tam | it | mahe | vṛṇate | na | anyam | tvat ||10.091.08||

10.091.09a tvām id atra vṛṇate tvāyavo hotāram agne vidatheṣu vedhasaḥ |
10.091.09c yad devayanto dadhati prayāṁsi te haviṣmanto manavo vṛktabarhiṣaḥ ||

tvām | it | atra | vṛṇate | tvā-yavaḥ | hotāram | agne | vidatheṣu | vedhasaḥ |
yat | deva-yantaḥ | dadhati | prayāṁsi | te | haviṣmantaḥ | manavaḥ | vṛkta-barhiṣaḥ ||10.091.09||

10.091.10a tavāgne hotraṁ tava potram ṛtviyaṁ tava neṣṭraṁ tvam agnid ṛtāyataḥ |
10.091.10c tava praśāstraṁ tvam adhvarīyasi brahmā cāsi gṛhapatiś ca no dame ||

tava | agne | hotram | tava | potram | ṛtviyam | tava | neṣṭram | tvam | agnit | ṛta-yataḥ |
tava | pra-śāstram | tvam | adhvari-yasi | brahmā | ca | asi | gṛha-patiḥ | ca | naḥ | dame ||10.091.10||

10.091.11a yas tubhyam agne amṛtāya martyaḥ samidhā dāśad uta vā haviṣkṛti |
10.091.11c tasya hotā bhavasi yāsi dūtyam upa brūṣe yajasy adhvarīyasi ||

yaḥ | tubhyam | agne | amṛtāya | martyaḥ | sam-idhā | dāśat | uta | vā | haviḥ-kṛti |
tasya | hotā | bhavasi | yāsi | dūtyam | upa | brūṣe | yajasi | adhvari-yasi ||10.091.11||

10.091.12a imā asmai matayo vāco asmad ām̐ ṛco giraḥ suṣṭutayaḥ sam agmata |
10.091.12c vasūyavo vasave jātavedase vṛddhāsu cid vardhano yāsu cākanat ||

imāḥ | asmai | matayaḥ | vācaḥ | asmat | ā | ṛcaḥ | giraḥ | su-stutayaḥ | sam | agmata |
vasu-yavaḥ | vasave | jāta-vedaḥ | vṛddhāsu | cit | vardhanaḥ | yāsu | cākanat ||10.091.12||

10.091.13a imām pratnāya suṣṭutiṁ navīyasīṁ voceyam asmā uśate śṛṇotu naḥ |
10.091.13c bhūyā antarā hṛdy asya nispṛśe jāyeva patya uśatī suvāsāḥ ||

imām | pratnāya | su-stutim | navīyasīm | voceyam | asmai | uśate | śṛṇotu | naḥ |
bhūyāḥ | antarā | hṛdi | asya | ni-spṛśe | jāyā-iva | patye | uśatī | su-vāsāḥ ||10.091.13||

10.091.14a yasminn aśvāsa ṛṣabhāsa ukṣaṇo vaśā meṣā avasṛṣṭāsa āhutāḥ |
10.091.14c kīlālape somapṛṣṭhāya vedhase hṛdā matiṁ janaye cārum agnaye ||

yasmin | aśvāsaḥ | ṛṣabhāsaḥ | ukṣaṇaḥ | vaśāḥ | meṣāḥ | ava-sṛṣṭāsaḥ | ā-hutāḥ |
kīlāla-pe | soma-pṛṣṭhāya | vedhase | hṛdā | matim | janaye | cārum | agnaye ||10.091.14||

10.091.15a ahāvy agne havir āsye te srucīva ghṛtaṁ camvīva somaḥ |
10.091.15c vājasaniṁ rayim asme suvīram praśastaṁ dhehi yaśasam bṛhantam ||

ahāvi | agne | haviḥ | āsye | te | sruci-iva | ghṛtam | camvi-iva | somaḥ |
vāja-sanim | rayim | asme iti | su-vīram | pra-śastam | dhehi | yaśasam | bṛhantam ||10.091.15||


10.092.01a yajñasya vo rathyaṁ viśpatiṁ viśāṁ hotāram aktor atithiṁ vibhāvasum |
10.092.01c śocañ chuṣkāsu hariṇīṣu jarbhurad vṛṣā ketur yajato dyām aśāyata ||

yajñasya | vaḥ | rathyam | viśpatim | viśām | hotāram | aktoḥ | atithim | vibhā-vasum |
śocan | śuṣkāsu | hariṇīṣu | jarbhurat | vṛṣā | ketuḥ | yajataḥ | dyām | aśāyata ||10.092.01||

10.092.02a imam añjaspām ubhaye akṛṇvata dharmāṇam agniṁ vidathasya sādhanam |
10.092.02c aktuṁ na yahvam uṣasaḥ purohitaṁ tanūnapātam aruṣasya niṁsate ||

imam | añjaḥ-pām | ubhaye | akṛṇvata | dharmāṇam | agnim | vidathasya | sādhanam |
aktum | na | yahvam | uṣasaḥ | puraḥ-hitam | tanū-napātam | aruṣasya | niṁsate ||10.092.02||

10.092.03a baḻ asya nīthā vi paṇeś ca manmahe vayā asya prahutā āsur attave |
10.092.03c yadā ghorāso amṛtatvam āśatād ij janasya daivyasya carkiran ||

baṭ | asya | nīthā | vi | paṇeḥ | ca | manmahe | vayāḥ | asya | pra-hutāḥ | āsuḥ | attave |
yadā | ghorāsaḥ | amṛta-tvam | āśata | āt | it | janasya | daivyasya | carkiran ||10.092.03||

10.092.04a ṛtasya hi prasitir dyaur uru vyaco namo mahy aramatiḥ panīyasī |
10.092.04c indro mitro varuṇaḥ saṁ cikitrire 'tho bhagaḥ savitā pūtadakṣasaḥ ||

ṛtasya | hi | pra-sitiḥ | dyauḥ | uru | vyacaḥ | namaḥ | mahī | aramatiḥ | panāyasī |
indraḥ | mitraḥ | varuṇaḥ | sam | cikitrire | atho iti | bhagaḥ | savitā | pūta-dakṣasaḥ ||10.092.04||

10.092.05a pra rudreṇa yayinā yanti sindhavas tiro mahīm aramatiṁ dadhanvire |
10.092.05c yebhiḥ parijmā pariyann uru jrayo vi roruvaj jaṭhare viśvam ukṣate ||

pra | rudreṇa | yayinā | yanti | sindhavaḥ | tiraḥ | mahīm | aramatim | dadhanvire |
yebhiḥ | pari-jmā | pari-yan | uru | jrayaḥ | vi | roruvat | jaṭhare | viśvam | ukṣate ||10.092.05||

10.092.06a krāṇā rudrā maruto viśvakṛṣṭayo divaḥ śyenāso asurasya nīḻayaḥ |
10.092.06c tebhiś caṣṭe varuṇo mitro aryamendro devebhir arvaśebhir arvaśaḥ ||

krāṇāḥ | rudrāḥ | marutaḥ | viśva-kṛṣṭayaḥ | divaḥ | śyenāsaḥ | asurasya | nīḻayaḥ |
tebhiḥ | caṣṭe | varuṇaḥ | mitraḥ | aryamā | indraḥ | devebhiḥ | arvaśebhiḥ | arvaśaḥ ||10.092.06||

10.092.07a indre bhujaṁ śaśamānāsa āśata sūro dṛśīke vṛṣaṇaś ca pauṁsye |
10.092.07c pra ye nv asyārhaṇā tatakṣire yujaṁ vajraṁ nṛṣadaneṣu kāravaḥ ||

indre | bhujam | śaśamānāsaḥ | āśata | sūraḥ | dṛśīke | vṛṣaṇaḥ | ca | pauṁsye |
pra | ye | nu | asya | arhaṇā | tatakṣire | yujam | vajram | nṛ-sadaneṣu | kāravaḥ ||10.092.07||

10.092.08a sūraś cid ā harito asya rīramad indrād ā kaś cid bhayate tavīyasaḥ |
10.092.08c bhīmasya vṛṣṇo jaṭharād abhiśvaso dive-dive sahuriḥ stann abādhitaḥ ||

sūraḥ | cit | ā | haritaḥ | asya | rīramat | indrāt | ā | kaḥ | cit | bhayate | tavīyasaḥ |
bhīmasya | vṛṣṇaḥ | jaṭharāt | abhi-śvasaḥ | dive-dive | sahuriḥ | stan | abādhitaḥ ||10.092.08||

10.092.09a stomaṁ vo adya rudrāya śikvase kṣayadvīrāya namasā didiṣṭana |
10.092.09c yebhiḥ śivaḥ svavām̐ evayāvabhir divaḥ siṣakti svayaśā nikāmabhiḥ ||

stomam | vaḥ | adya | rudrāya | śikvase | kṣayat-vīrāya | namasā | didiṣṭana |
yebhiḥ | śivaḥ | sva-vān | evayāva-bhiḥ | divaḥ | sisakti | sva-yaśāḥ | nikāma-bhiḥ ||10.092.09||

10.092.10a te hi prajāyā abharanta vi śravo bṛhaspatir vṛṣabhaḥ somajāmayaḥ |
10.092.10c yajñair atharvā prathamo vi dhārayad devā dakṣair bhṛgavaḥ saṁ cikitrire ||

te | hi | pra-jāyāḥ | abharanta | vi | śravaḥ | bṛhaspatiḥ | vṛṣabhaḥ | soma-jāmayaḥ |
yajñaiḥ | atharvā | prathamaḥ | vi | dhārayat | devāḥ | dakṣaiḥ | bhṛgavaḥ | sam | cikitrire ||10.092.10||

10.092.11a te hi dyāvāpṛthivī bhūriretasā narāśaṁsaś caturaṅgo yamo 'ditiḥ |
10.092.11c devas tvaṣṭā draviṇodā ṛbhukṣaṇaḥ pra rodasī maruto viṣṇur arhire ||

te | hi | dyāvāpṛthivī iti | bhūri-retasā | narāśaṁsaḥ | catuḥ-aṅgaḥ | yamaḥ | aditiḥ |
devaḥ | tvaṣṭā | draviṇaḥ-dāḥ | ṛbhukṣaṇaḥ | pra | rodasī iti | marutaḥ | viṣṇuḥ | arhire ||10.092.11||

10.092.12a uta sya na uśijām urviyā kavir ahiḥ śṛṇotu budhnyo havīmani |
10.092.12c sūryāmāsā vicarantā divikṣitā dhiyā śamīnahuṣī asya bodhatam ||

uta | syaḥ | naḥ | uśijām | urviyā | kaviḥ | ahiḥ | śṛṇotu | budhnyaḥ | havīmani |
sūryāmāsā | vi-carantā | divi-kṣitā | dhiyā | śamīnahuṣī iti | asya | bodhatam ||10.092.12||

10.092.13a pra naḥ pūṣā carathaṁ viśvadevyo 'pāṁ napād avatu vāyur iṣṭaye |
10.092.13c ātmānaṁ vasyo abhi vātam arcata tad aśvinā suhavā yāmani śrutam ||

pra | naḥ | pūṣā | caratham | viśva-devyaḥ | apām | napāt | avatu | vāyuḥ | iṣṭaye |
ātmānam | vasyaḥ | abhi | vātam | arcata | tat | aśvinā | su-havā | yāmani | śrutam ||10.092.13||

10.092.14a viśām āsām abhayānām adhikṣitaṁ gīrbhir u svayaśasaṁ gṛṇīmasi |
10.092.14c gnābhir viśvābhir aditim anarvaṇam aktor yuvānaṁ nṛmaṇā adhā patim ||

viśām | āsām | abhayānām | adhi-kṣitam | gīḥ-bhiḥ | ūm̐ iti | sva-yaśasam | gṛṇīmasi |
gnābhiḥ | viśvābhiḥ | aditim | anarvaṇam | aktoḥ | yuvānam | nṛ-manāḥ | adha | patim ||10.092.14||

10.092.15a rebhad atra januṣā pūrvo aṅgirā grāvāṇa ūrdhvā abhi cakṣur adhvaram |
10.092.15c yebhir vihāyā abhavad vicakṣaṇaḥ pāthaḥ sumekaṁ svadhitir vananvati ||

rebhat | atra | januṣā | pūrvaḥ | aṅgirāḥ | grāvāṇaḥ | ūrdhvāḥ | abhi | cakṣuḥ | adhvaram |
yebhiḥ | vi-hāyāḥ | abhavat | vi-cakṣaṇaḥ | pāthaḥ | su-mekam | sva-dhitiḥ | vanan-vati ||10.092.15||


10.093.01a mahi dyāvāpṛthivī bhūtam urvī nārī yahvī na rodasī sadaṁ naḥ |
10.093.01c tebhir naḥ pātaṁ sahyasa ebhir naḥ pātaṁ śūṣaṇi ||

mahi | dyāvāpṛthivī iti | bhūtam | urvī iti | nārī iti | yahvī iti | na | rodasī iti | sadam | naḥ |
tebhiḥ | naḥ | pātam | sahyasaḥ | ebhiḥ | naḥ | pātam | śūṣaṇi ||10.093.01||

10.093.02a yajñe-yajñe sa martyo devān saparyati |
10.093.02c yaḥ sumnair dīrghaśruttama āvivāsaty enān ||

yajñe-yajñe | saḥ | martyaḥ | devān | saparyati |
yaḥ | sumnaiḥ | dīrghaśrut-tamaḥ | ā-vivāsāti | enān ||10.093.02||

10.093.03a viśveṣām irajyavo devānāṁ vār mahaḥ |
10.093.03c viśve hi viśvamahaso viśve yajñeṣu yajñiyāḥ ||

viśveṣām | irajyavaḥ | devānām | vāḥ | mahaḥ |
viśve | hi | viśva-mahasaḥ | viśve | yajñeṣu | yajñiyāḥ ||10.093.03||

10.093.04a te ghā rājāno amṛtasya mandrā aryamā mitro varuṇaḥ parijmā |
10.093.04c kad rudro nṛṇāṁ stuto marutaḥ pūṣaṇo bhagaḥ ||

te | gha | rājānaḥ | amṛtasya | mandrāḥ | aryamā | mitraḥ | varuṇaḥ | pari-jmā |
kat | rudraḥ | nṛṇām | stutaḥ | marutaḥ | pūṣaṇaḥ | bhagaḥ ||10.093.04||

10.093.05a uta no naktam apāṁ vṛṣaṇvasū sūryāmāsā sadanāya sadhanyā |
10.093.05c sacā yat sādy eṣām ahir budhneṣu budhnyaḥ ||

uta | naḥ | naktam | apām | vṛṣaṇvasū iti vṛṣaṇ-vasū | sūryāmāsā | sadanāya | sa-dhanyā |
sacā | yat | sādi | eṣām | ahiḥ | budhneṣu | budhnyaḥ ||10.093.05||

10.093.06a uta no devāv aśvinā śubhas patī dhāmabhir mitrāvaruṇā uruṣyatām |
10.093.06c mahaḥ sa rāya eṣate 'ti dhanveva duritā ||

uta | naḥ | devau | aśvinā | śubhaḥ | patī iti | dhāma-bhiḥ | mitrāvaruṇau | uruṣyatām |
mahaḥ | saḥ | rāyaḥ | ā | īṣate | ati | dhanvā-iva | duḥ-itā ||10.093.06||

10.093.07a uta no rudrā cin mṛḻatām aśvinā viśve devāso rathaspatir bhagaḥ |
10.093.07c ṛbhur vāja ṛbhukṣaṇaḥ parijmā viśvavedasaḥ ||

uta | naḥ | rudrā | cit | mṛḻatām | aśvinā | viśve | devāsaḥ | rathaḥpatiḥ | bhagaḥ |
ṛbhuḥ | vājaḥ | ṛbhukṣaṇaḥ | pari-jmā | viśva-vedasaḥ ||10.093.07||

10.093.08a ṛbhur ṛbhukṣā ṛbhur vidhato mada ā te harī jūjuvānasya vājinā |
10.093.08c duṣṭaraṁ yasya sāma cid ṛdhag yajño na mānuṣaḥ ||

ṛbhuḥ | ṛbhukṣāḥ | ṛbhuḥ | vidhataḥ | madaḥ | ā | te | harī iti | jūjuvānasya | vājinā |
dustaram | yasya | sāma | cit | ṛdhak | yajñaḥ | na | mānuṣaḥ ||10.093.08||

10.093.09a kṛdhī no ahrayo deva savitaḥ sa ca stuṣe maghonām |
10.093.09c saho na indro vahnibhir ny eṣāṁ carṣaṇīnāṁ cakraṁ raśmiṁ na yoyuve ||

kṛdhi | naḥ | ahrayaḥ | deva | savitariti | saḥ | ca | stuṣe | maghonām |
sahaḥ | naḥ | indraḥ | vahni-bhiḥ | ni | eṣām | carṣaṇīnām | cakram | raśmim | na | yoyuve ||10.093.09||

10.093.10a aiṣu dyāvāpṛthivī dhātam mahad asme vīreṣu viśvacarṣaṇi śravaḥ |
10.093.10c pṛkṣaṁ vājasya sātaye pṛkṣaṁ rāyota turvaṇe ||

ā | eṣu | dyāvāpṛthivī iti | dhātam | mahat | asme iti | vīreṣu | viśva-carṣaṇi | śravaḥ |
pṛkṣam | vājasya | sātaye | pṛkṣam | rāyā | uta | turvaṇe ||10.093.10||

10.093.11a etaṁ śaṁsam indrāsmayuṣ ṭvaṁ kūcit santaṁ sahasāvann abhiṣṭaye |
10.093.11c sadā pāhy abhiṣṭaye medatāṁ vedatā vaso ||

etam | śaṁsam | indra | asma-yuḥ | tvam | kū-cit | santam | sahasā-van | abhiṣṭaye | sadā | pāhi | abhiṣṭaye |
medatām | vedatā | vaso iti ||10.093.11||

10.093.12a etam me stomaṁ tanā na sūrye dyutadyāmānaṁ vāvṛdhanta nṛṇām |
10.093.12c saṁvananaṁ nāśvyaṁ taṣṭevānapacyutam ||

etam | me | stomam | tanā | na | sūrye | dyutat-yāmānam | vavṛdhanta | nṛṇām |
sam-vananam | na | asvyam | taṣṭā-iva | anapa-cyutam ||10.093.12||

10.093.13a vāvarta yeṣāṁ rāyā yuktaiṣāṁ hiraṇyayī |
10.093.13c nemadhitā na pauṁsyā vṛtheva viṣṭāntā ||

vavarta | yeṣām | rāyā | yuktā | eṣām | hiraṇyayī |
nema-dhitā | na | pauṁsyā | vṛthā-iva | viṣṭa-antā ||10.093.13||

10.093.14a pra tad duḥśīme pṛthavāne vene pra rāme vocam asure maghavatsu |
10.093.14c ye yuktvāya pañca śatāsmayu pathā viśrāvy eṣām ||

pra | tat | duḥ-śīme | pṛthavāne | vene | pra | rāme | vocam | asure | maghavat-su |
ye | yuktvāya | pañca | śatā | asma-yu | pathā | vi-śrāvi | eṣām ||10.093.14||

10.093.15a adhīn nv atra saptatiṁ ca sapta ca |
10.093.15b sadyo didiṣṭa tānvaḥ sadyo didiṣṭa pārthyaḥ sadyo didiṣṭa māyavaḥ ||

adhi | it | nu | atra | saptatim | ca | sapta | ca |
sadyaḥ | didiṣṭa | tānvaḥ | sadyaḥ | didiṣṭa | pārthyaḥ | sadyaḥ | didiṣṭa | māyavaḥ ||10.093.15||


10.094.01a praite vadantu pra vayaṁ vadāma grāvabhyo vācaṁ vadatā vadadbhyaḥ |
10.094.01c yad adrayaḥ parvatāḥ sākam āśavaḥ ślokaṁ ghoṣam bharathendrāya sominaḥ ||

pra | ete | vadantu | pra | vayam | vadāma | grāva-bhyaḥ | vācam | vadata | vadat-bhyaḥ |
yat | adrayaḥ | parvatāḥ | sākam | āśavaḥ | ślokam | ghoṣam | bharatha | indrāya | sominaḥ ||10.094.01||

10.094.02a ete vadanti śatavat sahasravad abhi krandanti haritebhir āsabhiḥ |
10.094.02c viṣṭvī grāvāṇaḥ sukṛtaḥ sukṛtyayā hotuś cit pūrve haviradyam āśata ||

ete | vadanti | śata-vat | sahasra-vat | abhi | krandanti | haritebhiḥ | āsa-bhiḥ |
viṣṭvī | grāvāṇaḥ | su-kṛtaḥ | su-kṛtyayā | hotuḥ | cit | pūrve | haviḥ-adyam | āśata ||10.094.02||

10.094.03a ete vadanty avidann anā madhu ny ūṅkhayante adhi pakva āmiṣi |
10.094.03c vṛkṣasya śākhām aruṇasya bapsatas te sūbharvā vṛṣabhāḥ prem arāviṣuḥ ||

ete | vadanti | avidan | anā | madhu | ni | ūṅkhayante | adhi | pakve | āmiṣi |
vṛkṣasya | śākhām | aruṇasya | bapsataḥ | te | sūbharvāḥ | vṛṣabhāḥ | pra | īm | arāviṣuḥ ||10.094.03||

10.094.04a bṛhad vadanti madireṇa mandinendraṁ krośanto 'vidann anā madhu |
10.094.04c saṁrabhyā dhīrāḥ svasṛbhir anartiṣur āghoṣayantaḥ pṛthivīm upabdibhiḥ ||

bṛhat | vadanti | madireṇa | mandinā | indram | krośantaḥ | avidan | anā | madhu |
sam-rabhya | dhīrāḥ | svasṛ-bhiḥ | anartiṣuḥ | ā-ghoṣayantaḥ | pṛthivīm | upabdi-bhiḥ ||10.094.04||

10.094.05a suparṇā vācam akratopa dyavy ākhare kṛṣṇā iṣirā anartiṣuḥ |
10.094.05c nyaṅ ni yanty uparasya niṣkṛtam purū reto dadhire sūryaśvitaḥ ||

su-parṇāḥ | vācam | akrata | upa | dyavi | ā-khare | kṛṣṇāḥ | iṣirāḥ | anartiṣuḥ |
nyak | ni | yanti | uparasya | niḥ-kṛtam | puru | retaḥ | dadhire | sūrya-śvitaḥ ||10.094.05||

10.094.06a ugrā iva pravahantaḥ samāyamuḥ sākaṁ yuktā vṛṣaṇo bibhrato dhuraḥ |
10.094.06c yac chvasanto jagrasānā arāviṣuḥ śṛṇva eṣām prothatho arvatām iva ||

ugrāḥ-iva | pra-vahantaḥ | sam-āyamuḥ | sākam | yuktāḥ | vṛṣaṇaḥ | bibhrataḥ | dhuraḥ |
yad | śvasantaḥ | jagrasānāḥ | arāviṣuḥ | śṛṇve | eṣām | prothathaḥ | arvatām-iva ||10.094.06||

10.094.07a daśāvanibhyo daśakakṣyebhyo daśayoktrebhyo daśayojanebhyaḥ |
10.094.07c daśābhīśubhyo arcatājarebhyo daśa dhuro daśa yuktā vahadbhyaḥ ||

daśāvani-bhyaḥ | daśakakṣyebhyaḥ | daśa-yoktrebhyaḥ | daśa-yojanebhyaḥ |
daśābhīśu-bhyaḥ | arcata | ajarebhyaḥ | daśa | dhuraḥ | daśa | yuktāḥ | vahat-bhyaḥ ||10.094.07||

10.094.08a te adrayo daśayantrāsa āśavas teṣām ādhānam pary eti haryatam |
10.094.08c ta ū sutasya somyasyāndhaso 'ṁśoḥ pīyūṣam prathamasya bhejire ||

te | adrayaḥ | daśa-yantrāsaḥ | āśavaḥ | teṣām | ā-dhānam | pari | eti | haryatam |
te | ūm̐ iti | sutasya | somyasya | andhasaḥ | aṁśoḥ | pīyūṣam | prathamasya | bhejire ||10.094.08||

10.094.09a te somādo harī indrasya niṁsate 'ṁśuṁ duhanto adhy āsate gavi |
10.094.09c tebhir dugdham papivān somyam madhv indro vardhate prathate vṛṣāyate ||

te | soma-adaḥ | harī iti | indrasya | niṁsate | aṁśum | duhantaḥ | adhi | āsate | gavi |
tebhiḥ | dugdham | papi-vān | somyam | madhu | indraḥ | vardhate | prathate | vṛṣa-yate ||10.094.09||

10.094.10a vṛṣā vo aṁśur na kilā riṣāthaneḻāvantaḥ sadam it sthanāśitāḥ |
10.094.10c raivatyeva mahasā cāravaḥ sthana yasya grāvāṇo ajuṣadhvam adhvaram ||

vṛṣā | vaḥ | aṁśuḥ | na | kila | riṣāthana | iḻā-vantaḥ | sadam | it | sthana | āśitāḥ |
raivatyā-iva | mahasā | cāravaḥ | sthana | yasya | grāvāṇaḥ | ajuṣadhvam | adhvaram ||10.094.10||

10.094.11a tṛdilā atṛdilāso adrayo 'śramaṇā aśṛthitā amṛtyavaḥ |
10.094.11c anāturā ajarāḥ sthāmaviṣṇavaḥ supīvaso atṛṣitā atṛṣṇajaḥ ||

tṛdilāḥ | atṛdilāsaḥ | adrayaḥ | aśramaṇāḥ | aśṛthitāḥ | amṛtyavaḥ |
anāturāḥ | ajarāḥ | stha | amaviṣṇavaḥ | su-pīvasaḥ | atṛṣitāḥ | atṛṣṇa-jaḥ ||10.094.11||

10.094.12a dhruvā eva vaḥ pitaro yuge-yuge kṣemakāmāsaḥ sadaso na yuñjate |
10.094.12c ajuryāso hariṣāco haridrava ā dyāṁ raveṇa pṛthivīm aśuśravuḥ ||

dhruvāḥ | eva | vaḥ | pitaraḥ | yuge-yuge | kṣema-kāmāsaḥ | sadasaḥ | na | yuñjate |
ajuryāsaḥ | hari-sācaḥ | haridravaḥ | ā | dyām | raveṇa | pṛthivīm | aśuśravuḥ ||10.094.12||

10.094.13a tad id vadanty adrayo vimocane yāmann añjaspā iva ghed upabdibhiḥ |
10.094.13c vapanto bījam iva dhānyākṛtaḥ pṛñcanti somaṁ na minanti bapsataḥ ||

tat | it | vadanti | adrayaḥ | vi-mocane | yāman | añjaḥpāḥ-iva | gha | it | upabdi-bhiḥ |
vapantaḥ | bījam-iva | dhānya-kṛtaḥ | pṛñcanti | somam | na | minanti | bapsataḥ ||10.094.13||

10.094.14a sute adhvare adhi vācam akratā krīḻayo na mātaraṁ tudantaḥ |
10.094.14c vi ṣū muñcā suṣuvuṣo manīṣāṁ vi vartantām adrayaś cāyamānāḥ ||

sute | adhvare | adhi | vācam | akrata | ā | krīḻayaḥ | na | mātaram | tudantaḥ |
vi | su | muñca | susu-vuṣaḥ | manīṣām | vi | vartantām | adrayaḥ | cāyamānāḥ ||10.094.14||


10.095.01a haye jāye manasā tiṣṭha ghore vacāṁsi miśrā kṛṇavāvahai nu |
10.095.01c na nau mantrā anuditāsa ete mayas karan paratare canāhan ||

haye | jāye | manasā | tiṣṭha | ghore | vacāṁsi | miśrā | kṛṇavāvahai | nu |
na | nau | mantrāḥ | anuditāsaḥ | ete | mayaḥ | karan | para-tare | cana | ahan ||10.095.01||

10.095.02a kim etā vācā kṛṇavā tavāham prākramiṣam uṣasām agriyeva |
10.095.02c purūravaḥ punar astam parehi durāpanā vāta ivāham asmi ||

kim | etā | vācā | kṛṇava | tava | aham | pra | akramiṣam | uṣasām | agriyā-iva |
purūravaḥ | punaḥ | astam | parā | ihi | duḥ-āpanā | vātaḥ-iva | aham | asmi ||10.095.02||

10.095.03a iṣur na śriya iṣudher asanā goṣāḥ śatasā na raṁhiḥ |
10.095.03c avīre kratau vi davidyutan norā na māyuṁ citayanta dhunayaḥ ||

iṣuḥ | na | śriye | iṣu-dheḥ | asanā | go-sāḥ | śata-sāḥ | na | raṁhiḥ |
avīre | kratau | vi | davidyutat | na | urā | na | māyum | citayanta | dhunayaḥ ||10.095.03||

10.095.04a sā vasu dadhatī śvaśurāya vaya uṣo yadi vaṣṭy antigṛhāt |
10.095.04c astaṁ nanakṣe yasmiñ cākan divā naktaṁ śnathitā vaitasena ||

sā | vasu | dadhatī | śvaśurāya | vayaḥ | uṣaḥ | yadi | vaṣṭi | anti-gṛhāt |
astam | nanakṣe | yasmim | cākan | divā | naktam | śnathitā | vaitasena ||10.095.04||

10.095.05a triḥ sma māhnaḥ śnathayo vaitasenota sma me 'vyatyai pṛṇāsi |
10.095.05c purūravo 'nu te ketam āyaṁ rājā me vīra tanvas tad āsīḥ ||

triḥ | sma | mā | ahnaḥ | śnathayaḥ | vaitasena | uta | sma | me | avyatyai | pṛṇāsi |
purūravaḥ | anu | te | ketam | āyam | rājā | me | vīra | tanvaḥ | tat | āsīḥ ||10.095.05||

10.095.06a yā sujūrṇiḥ śreṇiḥ sumnaāpir hradecakṣur na granthinī caraṇyuḥ |
10.095.06c tā añjayo 'ruṇayo na sasruḥ śriye gāvo na dhenavo 'navanta ||

yā | su-jūrṇiḥ | śreṇiḥ | sumne-āpiḥ | hrade-cakṣuḥ | na | granthināī | caraṇyuḥ |
tāḥ | añjayaḥ | aruṇayaḥ | na | sasruḥ | śriye | gāvaḥ | na | dhenavaḥ | anavanta ||10.095.06||

10.095.07a sam asmiñ jāyamāna āsata gnā utem avardhan nadyaḥ svagūrtāḥ |
10.095.07c mahe yat tvā purūravo raṇāyāvardhayan dasyuhatyāya devāḥ ||

sam | asmin | jāyamāne | āsata | gnāḥ | uta | īm | avardhan | nadyaḥ | sva-gūrtāḥ |
mahe | yat | tvā | purūravaḥ | raṇāya | avardhayan | dasyu-hatyāya | devāḥ ||10.095.07||

10.095.08a sacā yad āsu jahatīṣv atkam amānuṣīṣu mānuṣo niṣeve |
10.095.08c apa sma mat tarasantī na bhujyus tā atrasan rathaspṛśo nāśvāḥ ||

sacā | yat | āsu | jahatīṣu | atkam | amānuṣīṣu | mānuṣaḥ | ni-seve |
apa | sma | mat | tarasantī | na | bhujyuḥ | tāḥ | atrasan | ratha-spṛśaḥ | na | aśvāḥ ||10.095.08||

10.095.09a yad āsu marto amṛtāsu nispṛk saṁ kṣoṇībhiḥ kratubhir na pṛṅkte |
10.095.09c tā ātayo na tanvaḥ śumbhata svā aśvāso na krīḻayo dandaśānāḥ ||

yat | āsu | martaḥ | amṛtāsu | ni-spṛk | sam | kṣoṇībhiḥ | kratu-bhiḥ | na | pṛṅkte |
tāḥ | ātayaḥ | na | tanvaḥ | śumbhata | svāḥ | aśvāsaḥ | na | krīḻayaḥ | dandaśānāḥ ||10.095.09||

10.095.10a vidyun na yā patantī davidyod bharantī me apyā kāmyāni |
10.095.10c janiṣṭo apo naryaḥ sujātaḥ prorvaśī tirata dīrgham āyuḥ ||

vi-dyut | na | yā | patantī | davidyot | bharantī | me | apyā | kāmyāni |
janiṣṭo iti | apaḥ | naryaḥ | su-jātaḥ | pra | urvaśī | tirata | dīrgham | āyuḥ ||10.095.10||

10.095.11a jajñiṣa itthā gopīthyāya hi dadhātha tat purūravo ma ojaḥ |
10.095.11c aśāsaṁ tvā viduṣī sasminn ahan na ma āśṛṇoḥ kim abhug vadāsi ||

jajñiṣe | itthā | go-pīthyāya | hi | dadhātha | tat | purūravaḥ | me | ojaḥ |
aśāsam | tvā | viduṣī | sasmin | ahan | na | me | ā | aśṛṇoḥ | kim | abhuk | vadāsi ||10.095.11||

10.095.12a kadā sūnuḥ pitaraṁ jāta icchāc cakran nāśru vartayad vijānan |
10.095.12c ko dampatī samanasā vi yūyod adha yad agniḥ śvaśureṣu dīdayat ||

kadā | sūnuḥ | pitaram | jātaḥ | icchāt | cakran | na | aśru | vartayat | vi-jānan |
kaḥ | dampatī iti dam-patī | sa-manasā | vi | yūyot | adha | yat | agniḥ | śvaśureṣu | dīdayat ||10.095.12||

10.095.13a prati bravāṇi vartayate aśru cakran na krandad ādhye śivāyai |
10.095.13c pra tat te hinavā yat te asme parehy astaṁ nahi mūra māpaḥ ||

prati | bravāṇi | vartayate | aśru | cakran | na | krandat | ā-dhye | śivāyai |
pra | tat | te | hinava | yat | te | asme iti | parā | ihi | astam | nahi | mūra | mā | āpaḥ ||10.095.13||

10.095.14a sudevo adya prapated anāvṛt parāvatam paramāṁ gantavā u |
10.095.14c adhā śayīta nirṛter upasthe 'dhainaṁ vṛkā rabhasāso adyuḥ ||

su-devaḥ | adya | pra-patet | anāvṛt | parā-vatam | paramām | gantavai | ūm̐ iti |
adha | śayīta | niḥ-ṛteḥ | upa-sthe | adha | enam | vṛkāḥ | rabhasāsaḥ | adyuḥ ||10.095.14||

10.095.15a purūravo mā mṛthā mā pra papto mā tvā vṛkāso aśivāsa u kṣan |
10.095.15c na vai straiṇāni sakhyāni santi sālāvṛkāṇāṁ hṛdayāny etā ||

purūravaḥ | mā | mṛthāḥ | mā | pra | paptaḥ | mā | tvā | vṛkāsaḥ | aśivāsaḥ | ūm̐ iti | kṣan |
na | vai | straiṇāni | sakhyāni | santi | sālāvṛkāṇām | hṛdayāni | etā ||10.095.15||

10.095.16a yad virūpācaram martyeṣv avasaṁ rātrīḥ śaradaś catasraḥ |
10.095.16c ghṛtasya stokaṁ sakṛd ahna āśnāṁ tād evedaṁ tātṛpāṇā carāmi ||

yat | vi-rūpā | acaram | martyeṣu | avasam | rātrīḥ | śaradaḥ | catasraḥ |
ghṛtasya | stokam | sakṛt | ahnaḥ | āśnām | tāt | eva | idam | tatṛpāṇā | carāmi ||10.095.16||

10.095.17a antarikṣaprāṁ rajaso vimānīm upa śikṣāmy urvaśīṁ vasiṣṭhaḥ |
10.095.17c upa tvā rātiḥ sukṛtasya tiṣṭhān ni vartasva hṛdayaṁ tapyate me ||

antarikṣa-prām | rajasaḥ | vi-mānīm | upa | śikṣāmi | urvaśīm | vasiṣṭhaḥ |
upa | tvā | rātiḥ | su-kṛtasya | tiṣṭhāt | ni | vartasva | hṛdayam | tapyate | me ||10.095.17||

10.095.18a iti tvā devā ima āhur aiḻa yathem etad bhavasi mṛtyubandhuḥ |
10.095.18c prajā te devān haviṣā yajāti svarga u tvam api mādayāse ||

iti | tvā | devāḥ | ime | āhuḥ | aiḻa | yathā | īm | etat | bhavasi | mṛtyu-bandhuḥ |
pra-jā | te | devān | haviṣā | yajāti | svaḥ-ge | ūm̐ iti | tvam | api | mādayāse ||10.095.18||


10.096.01a pra te mahe vidathe śaṁsiṣaṁ harī pra te vanve vanuṣo haryatam madam |
10.096.01c ghṛtaṁ na yo haribhiś cāru secata ā tvā viśantu harivarpasaṁ giraḥ ||

pra | te | mahe | vidathe | śamsiṣam | harī iti | pra | te | vanve | vanuṣaḥ | haryatam | madam |
ghṛtam | na | yaḥ | hari-bhiḥ | cāru | secate | ā | tvā | viśantu | hari-varpasam | giraḥ ||10.096.01||

10.096.02a hariṁ hi yonim abhi ye samasvaran hinvanto harī divyaṁ yathā sadaḥ |
10.096.02c ā yam pṛṇanti haribhir na dhenava indrāya śūṣaṁ harivantam arcata ||

harim | hi | yonim | abhi | ye | sam-asvaran | hinvantaḥ | harī iti | divyam | yathā | sadaḥ |
ā | yam | pṛṇanti | hari-bhiḥ | na | dhenavaḥ | indrāya | śūṣam | hari-vantam | arcata ||10.096.02||

10.096.03a so asya vajro harito ya āyaso harir nikāmo harir ā gabhastyoḥ |
10.096.03c dyumnī suśipro harimanyusāyaka indre ni rūpā haritā mimikṣire ||

saḥ | asya | vajraḥ | haritaḥ | yaḥ | āyasaḥ | hariḥ | ni-kāmaḥ | hariḥ | ā | gabhastyoḥ |
dyumnī | su-śipraḥ | harimanyu-sāyakaḥ | indre | ni | rūpā | haritā | mimikṣire ||10.096.03||

10.096.04a divi na ketur adhi dhāyi haryato vivyacad vajro harito na raṁhyā |
10.096.04c tudad ahiṁ hariśipro ya āyasaḥ sahasraśokā abhavad dharimbharaḥ ||

divi | na | ketuḥ | adhi | dhāyi | haryataḥ | vivyacat | vajraḥ | haritaḥ | na | raṁhyā |
tudat | ahim | hari-śipraḥ | yaḥ | āyasaḥ | sahasra-śokāḥ | abhavat | harim-bharaḥ ||10.096.04||

10.096.05a tvaṁ-tvam aharyathā upastutaḥ pūrvebhir indra harikeśa yajvabhiḥ |
10.096.05c tvaṁ haryasi tava viśvam ukthyam asāmi rādho harijāta haryatam ||

tvam-tvam | aharyathāḥ | upa-stutaḥ | pūrvebhiḥ | indra | hari-keśa | yajva-bhiḥ |
tvam | haryasi | tava | viśvam | ukthyam | asāmi | rādhaḥ | hari-jāta | haryatam ||10.096.05||

10.096.06a tā vajriṇam mandinaṁ stomyam mada indraṁ rathe vahato haryatā harī |
10.096.06c purūṇy asmai savanāni haryata indrāya somā harayo dadhanvire ||

tā | vajriṇam | mandinam | stomyam | made | indram | rathe | vahataḥ | haryatā | harī iti |
purūṇi | asmai | savanāni | haryate | indrāya | somāḥ | harayaḥ | dadhanvire ||10.096.06||

10.096.07a araṁ kāmāya harayo dadhanvire sthirāya hinvan harayo harī turā |
10.096.07c arvadbhir yo haribhir joṣam īyate so asya kāmaṁ harivantam ānaśe ||

aram | kāmāya | harayaḥ | dadhanvire | sthirāya | hinvan | harayaḥ | harī iti | turā |
arvat-bhiḥ | yaḥ | hari-bhiḥ | joṣam | īyate | saḥ | asya | kāmam | hari-vantam | ānaśe ||10.096.07||

10.096.08a hariśmaśārur harikeśa āyasas turaspeye yo haripā avardhata |
10.096.08c arvadbhir yo haribhir vājinīvasur ati viśvā duritā pāriṣad dharī ||

hari-śmaśāruḥ | hari-keśaḥ | āyasaḥ | turaḥ-peye | yaḥ | hari-pāḥ | avardhata |
arvat-bhiḥ | yaḥ | hari-bhiḥ | vājinī-vasuḥ | ati | viśvā | duḥ-itā | pāriṣat | harī iti ||10.096.08||

10.096.09a sruveva yasya hariṇī vipetatuḥ śipre vājāya hariṇī davidhvataḥ |
10.096.09c pra yat kṛte camase marmṛjad dharī pītvā madasya haryatasyāndhasaḥ ||

sruvā-iva | yasya | hariṇī iti | vi-petatuḥ | śipre iti | vājāya | hariṇī iti | davidhvataḥ |
pra | yat | kṛte | camase | marmṛjat | harī iti | pītvā | madasya | haryatasya | andhasaḥ ||10.096.09||

10.096.10a uta sma sadma haryatasya pastyor atyo na vājaṁ harivām̐ acikradat |
10.096.10c mahī cid dhi dhiṣaṇāharyad ojasā bṛhad vayo dadhiṣe haryataś cid ā ||

uta | sma | sadma | haryatasya | pastyoḥ | atyaḥ | na | vājam | hari-vān | acikradat |
mahī | cit | hi | dhiṣaṇā | aharyat | ojasā | bṛhat | vayaḥ | dadhiṣe | haryataḥ | cit | ā ||10.096.10||

10.096.11a ā rodasī haryamāṇo mahitvā navyaṁ-navyaṁ haryasi manma nu priyam |
10.096.11c pra pastyam asura haryataṁ gor āviṣ kṛdhi haraye sūryāya ||

ā | rodasī iti | haryamāṇaḥ | mahi-tvā | navyam-navyam | haryasi | manma | nu | priyam |
pra | pastyam | asura | haryatam | goḥ | āviḥ | kṛdhi | haraye | sūryāya ||10.096.11||

10.096.12a ā tvā haryantam prayujo janānāṁ rathe vahantu hariśipram indra |
10.096.12c pibā yathā pratibhṛtasya madhvo haryan yajñaṁ sadhamāde daśoṇim ||

ā | tvā | haryantam | pra-yujaḥ | janānām | rathe | vahantu | hari-śipram | indra |
piba | yathā | prati-bhṛtasya | madhvaḥ | haryan | yajñam | sadha-māde | daśa-oṇim ||10.096.12||

10.096.13a apāḥ pūrveṣāṁ harivaḥ sutānām atho idaṁ savanaṁ kevalaṁ te |
10.096.13c mamaddhi somam madhumantam indra satrā vṛṣañ jaṭhara ā vṛṣasva ||

apāḥ | pūrveṣām | hari-vaḥ | sutānām | atho iti | idam | savanam | kevalam | te |
mamaddhi | somam | madhu-mantam | indra | satrā | vṛṣan | jaṭhare | ā | vṛṣasva ||10.096.13||


10.097.01a yā oṣadhīḥ pūrvā jātā devebhyas triyugam purā |
10.097.01c manai nu babhrūṇām ahaṁ śataṁ dhāmāni sapta ca ||

yāḥ | oṣadhīḥ | pūrvāḥ | jātāḥ | devebhyaḥ | tri-yugam | purā |
manai | nu | babhrūṇām | aham | śatam | dhāmāni | sapta | ca ||10.097.01||

10.097.02a śataṁ vo amba dhāmāni sahasram uta vo ruhaḥ |
10.097.02c adhā śatakratvo yūyam imam me agadaṁ kṛta ||

śatam | vaḥ | amba | dhāmāni | sahasram | uta | vaḥ | ruhaḥ |
adha | śata-kratvaḥ | yūyam | imam | me | agadam | kṛta ||10.097.02||

10.097.03a oṣadhīḥ prati modadhvam puṣpavatīḥ prasūvarīḥ |
10.097.03c aśvā iva sajitvarīr vīrudhaḥ pārayiṣṇvaḥ ||

oṣadhīḥ | prati | modadhvam | puṣpa-vatīḥ | pra-sūvarīḥ |
aśvāḥ-iva | sa-jitvarīḥ | vīrudhaḥ | pārayiṣṇvaḥ ||10.097.03||

10.097.04a oṣadhīr iti mātaras tad vo devīr upa bruve |
10.097.04c saneyam aśvaṁ gāṁ vāsa ātmānaṁ tava pūruṣa ||

oṣadhīḥ | iti | mātaraḥ | tat | vaḥ | devīḥ | upa | bruve |
saneyam | aśvam | gām | vāsaḥ | ātmānam | tava | puruṣa ||10.097.04||

10.097.05a aśvatthe vo niṣadanam parṇe vo vasatiṣ kṛtā |
10.097.05c gobhāja it kilāsatha yat sanavatha pūruṣam ||

aśvatthe | vaḥ | ni-sadanam | parṇe | vaḥ | vasatiḥ | kṛtā |
go-bhājaḥ | it | kila | asatha | yat | sanavatha | puruṣam ||10.097.05||

10.097.06a yatrauṣadhīḥ samagmata rājānaḥ samitāv iva |
10.097.06c vipraḥ sa ucyate bhiṣag rakṣohāmīvacātanaḥ ||

yatra | oṣadhīḥ | sam-agmata | rājānaḥ | samitau-iva |
vipraḥ | saḥ | ucyate | bhiṣak | rakṣaḥ-hā | amīva-cātanaḥ ||10.097.06||

10.097.07a aśvāvatīṁ somāvatīm ūrjayantīm udojasam |
10.097.07c āvitsi sarvā oṣadhīr asmā ariṣṭatātaye ||

aśva-vatīm | sama-vatīm | ūrjayantīm | ut-ojasam |
ā | avitsi | sarvāḥ | oṣadhīḥ | asmai | ariṣṭa-tātaye ||10.097.07||

10.097.08a uc chuṣmā oṣadhīnāṁ gāvo goṣṭhād iverate |
10.097.08c dhanaṁ saniṣyantīnām ātmānaṁ tava pūruṣa ||

ut | śuṣmāḥ | oṣadhīnām | gāvaḥ | goṣṭhāt-iva | īrate |
dhanam | saniṣyantīnām | ātmānam | tava | puruṣa ||10.097.08||

10.097.09a iṣkṛtir nāma vo mātātho yūyaṁ stha niṣkṛtīḥ |
10.097.09c sīrāḥ patatriṇīḥ sthana yad āmayati niṣ kṛtha ||

iṣkṛtiḥ | nāma | vaḥ | mātā | atho iti | yūyam | stha | niḥ-kṛtīḥ |
sīrāḥ | patatriṇīḥ | sthana | yat | āmayati | niḥ | kṛtha ||10.097.09||

10.097.10a ati viśvāḥ pariṣṭhāḥ stena iva vrajam akramuḥ |
10.097.10c oṣadhīḥ prācucyavur yat kiṁ ca tanvo rapaḥ ||

ati | viśvāḥ | pari-sthāḥ | stenaḥ-iva | vrajam | akramuḥ |
oṣadhīḥ | pra | acucyavuḥ | yat | kim | ca | tanvaḥ | rapaḥ ||10.097.10||

10.097.11a yad imā vājayann aham oṣadhīr hasta ādadhe |
10.097.11c ātmā yakṣmasya naśyati purā jīvagṛbho yathā ||

yat | imāḥ | vājayan | aham | oṣadhīḥ | haste | ā-dadhe |
ātmā | yakṣmasya | naśyati | purā | jīva-gṛbhaḥ | yathā ||10.097.11||

10.097.12a yasyauṣadhīḥ prasarpathāṅgam-aṅgam paruṣ-paruḥ |
10.097.12c tato yakṣmaṁ vi bādhadhva ugro madhyamaśīr iva ||

yasya | oṣadhīḥ | pra-sarpatha | aṅgam-aṅgam | paruḥ-paruḥ |
tataḥ | yakṣmam | vi | bādhadhve | ugraḥ | madhyamaśīḥ-iva ||10.097.12||

10.097.13a sākaṁ yakṣma pra pata cāṣeṇa kikidīvinā |
10.097.13c sākaṁ vātasya dhrājyā sākaṁ naśya nihākayā ||

sākam | yakṣma | pra | pata | cāṣeṇa | kikidīvinā |
sākam | vātasya | dhrājyā | sākam | naśya | ni-hākayā ||10.097.13||

10.097.14a anyā vo anyām avatv anyānyasyā upāvata |
10.097.14c tāḥ sarvāḥ saṁvidānā idam me prāvatā vacaḥ ||

anyā | vaḥ | anyām | avatu | anyā | anyasyāḥ | upa | avata |
tāḥ | sarvāḥ | sam-vidānāḥ | idam | me | pra | avata | vacaḥ ||10.097.14||

10.097.15a yāḥ phalinīr yā aphalā apuṣpā yāś ca puṣpiṇīḥ |
10.097.15c bṛhaspatiprasūtās tā no muñcantv aṁhasaḥ ||

yāḥ | phalinīḥ | yāḥ | aphalāḥ | apuṣpāḥ | yāḥ | ca | puṣpiṇīḥ |
bṛhaspati-prasūtāḥ | tāḥ | naḥ | muñcantu | aṁhasaḥ ||10.097.15||

10.097.16a muñcantu mā śapathyād atho varuṇyād uta |
10.097.16c atho yamasya paḍbīśāt sarvasmād devakilbiṣāt ||

muñcantu | mā | śapathyāt | atho iti | varuṇyāt | uta |
atho iti | yamasya | paḍbīśāt | sarvasmāt | deva-kilbiṣāt ||10.097.16||

10.097.17a avapatantīr avadan diva oṣadhayas pari |
10.097.17c yaṁ jīvam aśnavāmahai na sa riṣyāti pūruṣaḥ ||

ava-patantīḥ | avadan | divaḥ | oṣadhayaḥ | pari |
yam | jīvam | aśnavāmahai | na | saḥ | riṣyāti | puruṣaḥ ||10.097.17||

10.097.18a yā oṣadhīḥ somarājñīr bahvīḥ śatavicakṣaṇāḥ |
10.097.18c tāsāṁ tvam asy uttamāraṁ kāmāya śaṁ hṛde ||

yāḥ | oṣadhīḥ | soma-rājñīḥ | bahvīḥ | śata-vicakṣaṇāḥ |
tāsām | tvam | asi | ut-tamā | aram | kāmāya | śam | hṛde ||10.097.18||

10.097.19a yā oṣadhīḥ somarājñīr viṣṭhitāḥ pṛthivīm anu |
10.097.19c bṛhaspatiprasūtā asyai saṁ datta vīryam ||

yāḥ | oṣadhīḥ | soma-rājñīḥ | vi-sthitāḥ | pṛthivīm | anu |
bṛhaspati-prasūtāḥ | asyai | sam | datta | vīryam ||10.097.19||

10.097.20a mā vo riṣat khanitā yasmai cāhaṁ khanāmi vaḥ |
10.097.20c dvipac catuṣpad asmākaṁ sarvam astv anāturam ||

mā | vaḥ | riṣat | khanitā | yasmai | ca | aham | khanāmi | vaḥ |
dvi-pat | catuḥ-pat | asmākam | sarvam | astu | anāturam ||10.097.20||

10.097.21a yāś cedam upaśṛṇvanti yāś ca dūram parāgatāḥ |
10.097.21c sarvāḥ saṁgatya vīrudho 'syai saṁ datta vīryam ||

yāḥ | ca | idam | upa-śṛṇvanti | yāḥ | ca | dūram | parā-gatāḥ |
sarvāḥ | sam-gatya | vīrudhaḥ | asyai | sam | datta | vīryam ||10.097.21||

10.097.22a oṣadhayaḥ saṁ vadante somena saha rājñā |
10.097.22c yasmai kṛṇoti brāhmaṇas taṁ rājan pārayāmasi ||

oṣadhayaḥ | sam | vadante | somena | saha | rājñā |
yasmai | kṛṇoti | brāhmaṇaḥ | tam | rājan | pārayāmasi ||10.097.22||

10.097.23a tvam uttamāsy oṣadhe tava vṛkṣā upastayaḥ |
10.097.23c upastir astu so 'smākaṁ yo asmām̐ abhidāsati ||

tvam | ut-tamā | asi | oṣadhe | tava | vṛkṣāḥ | upastayaḥ |
upastiḥ | astu | saḥ | asmākam | yaḥ | asmān | abhi-dāsati ||10.097.23||


10.098.01a bṛhaspate prati me devatām ihi mitro vā yad varuṇo vāsi pūṣā |
10.098.01c ādityair vā yad vasubhir marutvān sa parjanyaṁ śaṁtanave vṛṣāya ||

bṛhaspate | prati | me | devatām | ihi | mitraḥ | vā | yat | varuṇaḥ | vā | asi | pūṣā |
ādityaiḥ | vā | yat | vasu-bhiḥ | marutvān | saḥ | parjanyam | śam-tanave | vṛṣaya ||10.098.01||

10.098.02a ā devo dūto ajiraś cikitvān tvad devāpe abhi mām agacchat |
10.098.02c pratīcīnaḥ prati mām ā vavṛtsva dadhāmi te dyumatīṁ vācam āsan ||

ā | devaḥ | dūtaḥ | ajiraḥ | cikitvān | tvat | deva-āpe | abhi | mām | agacchat |
pratīcīnaḥ | prati | mām | ā | vavṛtsva | dadhāmi | te | dyu-matīm | vācam | āsan ||10.098.02||

10.098.03a asme dhehi dyumatīṁ vācam āsan bṛhaspate anamīvām iṣirām |
10.098.03c yayā vṛṣṭiṁ śaṁtanave vanāva divo drapso madhumām̐ ā viveśa ||

asme iti | dhehi | dyu-matīm | vācam | āsan | bṛhaspate | anamīvām | iṣirām |
yayā | vṛṣṭim | śam-tanave | vanāva | divaḥ | drapsaḥ | madhu-mān | ā | viveśa ||10.098.03||

10.098.04a ā no drapsā madhumanto viśantv indra dehy adhirathaṁ sahasram |
10.098.04c ni ṣīda hotram ṛtuthā yajasva devān devāpe haviṣā saparya ||

ā | naḥ | drapsāḥ | madhu-mantaḥ | viśantu | indra | dehi | adhi-ratham | sahasram |
ni | sīda | hotram | ṛtu-thā | yajasva | devān | deva-āpe | haviṣā | saparya ||10.098.04||

10.098.05a ārṣṭiṣeṇo hotram ṛṣir niṣīdan devāpir devasumatiṁ cikitvān |
10.098.05c sa uttarasmād adharaṁ samudram apo divyā asṛjad varṣyā abhi ||

ārṣṭiṣeṇaḥ | hotram | ṛṣiḥ | ni-sīdan | deva-āpiḥ | deva-sumatim | cikitvān |
saḥ | ut-tarasmāt | adharam | samudram | apaḥ | divyāḥ | asṛjat | varṣyāḥ | abhi ||10.098.05||

10.098.06a asmin samudre adhy uttarasminn āpo devebhir nivṛtā atiṣṭhan |
10.098.06c tā adravann ārṣṭiṣeṇena sṛṣṭā devāpinā preṣitā mṛkṣiṇīṣu ||

asmin | samudre | adhi | ut-tarasmin | āpaḥ | devebhiḥ | ni-vṛtāḥ | atiṣṭhan |
tāḥ | adravan | āṛṣṭiṣeṇena | sṛṣṭāḥ | deva-āpinā | pra-iṣitāḥ | mṛkṣiṇīṣu ||10.098.06||

10.098.07a yad devāpiḥ śaṁtanave purohito hotrāya vṛtaḥ kṛpayann adīdhet |
10.098.07c devaśrutaṁ vṛṣṭivaniṁ rarāṇo bṛhaspatir vācam asmā ayacchat ||

yat | deva-āpiḥ | śam-tanave | puraḥ-hitaḥ | hotrāya | vṛtaḥ | kṛpayan | adīdhet |
deva-śrutam | vṛṣṭi-vanim | rarāṇaḥ | bṛhaspatiḥ | vācam | asmai | ayacchat ||10.098.07||

10.098.08a yaṁ tvā devāpiḥ śuśucāno agna ārṣṭiṣeṇo manuṣyaḥ samīdhe |
10.098.08c viśvebhir devair anumadyamānaḥ pra parjanyam īrayā vṛṣṭimantam ||

yam | tvā | deva-āpiḥ | śuśucānaḥ | agne | ārṣṭiṣeṇaḥ | manuṣyaḥ | sam-īdhe |
viśvebhiḥ | devaiḥ | anu-madyamānaḥ | pra | parjanyam | īraya | vṛṣṭi-mantam ||10.098.08||

10.098.09a tvām pūrva ṛṣayo gīrbhir āyan tvām adhvareṣu puruhūta viśve |
10.098.09c sahasrāṇy adhirathāny asme ā no yajñaṁ rohidaśvopa yāhi ||

tvām | pūrve | ṛṣayaḥ | gīḥ-bhiḥ | āyan | tvām | adhvareṣu | puru-hūta | viśve |
sahasrāṇi | adhi-rathāni | asme iti | ā | naḥ | yajñam | rihit-aśvā | upa | yāhi ||10.098.09||

10.098.10a etāny agne navatir nava tve āhutāny adhirathā sahasrā |
10.098.10c tebhir vardhasva tanvaḥ śūra pūrvīr divo no vṛṣṭim iṣito rirīhi ||

etāni | agne | navatiḥ | nava | tve iti | ā-hutāni | adhi-rathā | sahasrā |
tebhiḥ | vardhasva | tanvaḥ | śūra | pūrvīḥ | divaḥ | naḥ | vṛṣṭim | iṣitaḥ | rirīhi ||10.098.10||

10.098.11a etāny agne navatiṁ sahasrā sam pra yaccha vṛṣṇa indrāya bhāgam |
10.098.11c vidvān patha ṛtuśo devayānān apy aulānaṁ divi deveṣu dhehi ||

etāni | agne | navatim | sahasrā | sam | pra | yaccha | vṛṣṇe | indrāya | bhāgam |
vidvān | pathaḥ | ṛtu-śaḥ | deva-yānān | api | aulānam | divi | deveṣu | dhehi ||10.098.11||

10.098.12a agne bādhasva vi mṛdho vi durgahāpāmīvām apa rakṣāṁsi sedha |
10.098.12c asmāt samudrād bṛhato divo no 'pām bhūmānam upa naḥ sṛjeha ||

agne | bādhasva | vi | mṛdhaḥ | vi | duḥ-gahā | apa | amīvām | apa | rakṣāṁsi | sedha |
asmāt | samudrāt | bṛhataḥ | divaḥ | naḥ | apām | bhūmānam | upa | naḥ | sṛja | iha ||10.098.12||


10.099.01a kaṁ naś citram iṣaṇyasi cikitvān pṛthugmānaṁ vāśraṁ vāvṛdhadhyai |
10.099.01c kat tasya dātu śavaso vyuṣṭau takṣad vajraṁ vṛtraturam apinvat ||

kam | naḥ | citram | iṣaṇyasi | cikitvān | pṛthu-gmānam | vāśram | vavṛdhadhyai |
kat | tasya | dātu | śavasaḥ | vi-uṣṭau | takṣat | vajram | vṛtra-turam | apinvat ||10.099.01||

10.099.02a sa hi dyutā vidyutā veti sāma pṛthuṁ yonim asuratvā sasāda |
10.099.02c sa sanīḻebhiḥ prasahāno asya bhrātur na ṛte saptathasya māyāḥ ||

saḥ | hi | dyutā | vi-dyutā | veti | sāma | pṛthum | yonim | asura-tvā | ā | sasāda |
saḥ | sa-nīḻebhiḥ | pra-sahānaḥ | asya | bhrātuḥ | na | ṛte | saptathasya | māyāḥ ||10.099.02||

10.099.03a sa vājaṁ yātāpaduṣpadā yan svarṣātā pari ṣadat saniṣyan |
10.099.03c anarvā yac chatadurasya vedo ghnañ chiśnadevām̐ abhi varpasā bhūt ||

saḥ | vājam | yātā | apaduḥ-padā | yan | svaḥ-sātā | pari | sadat | saniṣyan |
anarvā | yat | śata-durasya | vedaḥ | ghnan | śiśna-devān | abhi | varpasā | bhūt ||10.099.03||

10.099.04a sa yahvyo 'vanīr goṣv arvā juhoti pradhanyāsu sasriḥ |
10.099.04c apādo yatra yujyāso 'rathā droṇyaśvāsa īrate ghṛtaṁ vāḥ ||

saḥ | yahvyaḥ | avanīḥ | goṣu | arvā | ā | juhoti | pra-dhanyāsu | sasriḥ |
apādaḥ | yatra | yujyāsaḥ | arathāḥ | droṇi-aśvāsaḥ | īrate | ghṛtam | vāḥ ||10.099.04||

10.099.05a sa rudrebhir aśastavāra ṛbhvā hitvī gayam āreavadya āgāt |
10.099.05c vamrasya manye mithunā vivavrī annam abhītyārodayan muṣāyan ||

saḥ | rudrebhiḥ | aśasta-vāraḥ | ṛbhvā | hitvī | gayam | āre-avadyaḥ | ā | agāt |
vamrasya | manye | mithunā | vivavrī iti vi-vavrī | annam | abhi-itya | arodayat | muṣāyan ||10.099.05||

10.099.06a sa id dāsaṁ tuvīravam patir dan ṣaḻakṣaṁ triśīrṣāṇaṁ damanyat |
10.099.06c asya trito nv ojasā vṛdhāno vipā varāham ayoagrayā han ||

saḥ | it | dāsam | tuvi-ravam | patiḥ | dan | ṣaṭ-akṣam | tri-śīrṣāṇam | damanyat |
asya | tritaḥ | nu | ojasā | vṛdhānaḥ | vipā | varāham | ayaḥ-agrayā | hanniti han ||10.099.06||

10.099.07a sa druhvaṇe manuṣa ūrdhvasāna ā sāviṣad arśasānāya śarum |
10.099.07c sa nṛtamo nahuṣo 'smat sujātaḥ puro 'bhinad arhan dasyuhatye ||

saḥ | druhvaṇe | manuṣe | ūrdhvasānaḥ | ā | sāviṣat | arśasānāya | śarum |
saḥ | nṛ-tamaḥ | nahuṣaḥ | asmat | su-jātaḥ | puraḥ | abhinat | arhan | dasyu-hatye ||10.099.07||

10.099.08a so abhriyo na yavasa udanyan kṣayāya gātuṁ vidan no asme |
10.099.08c upa yat sīdad induṁ śarīraiḥ śyeno 'yopāṣṭir hanti dasyūn ||

saḥ | abhriyaḥ | na | yavase | udanyan | kṣayāya | gātum | vidat | naḥ | asme iti |
upa | yat | sīdat | indum | śarīraiḥ | śyenaḥ | ayaḥ-apāṣṭiḥ | hanti | dasyūn ||10.099.08||

10.099.09a sa vrādhataḥ śavasānebhir asya kutsāya śuṣṇaṁ kṛpaṇe parādāt |
10.099.09c ayaṁ kavim anayac chasyamānam atkaṁ yo asya sanitota nṛṇām ||

saḥ | vrādhataḥ | śavasānebhiḥ | asya | kutsāya | śuṣṇam | kṛpaṇe | parā | adāt |
ayam | kavim | anayat | śasyamānam | atkam | yaḥ | asya | sanitā | uta | nṛṇām ||10.099.09||

10.099.10a ayaṁ daśasyan naryebhir asya dasmo devebhir varuṇo na māyī |
10.099.10c ayaṁ kanīna ṛtupā avedy amimītāraruṁ yaś catuṣpāt ||

ayam | daśasyan | naryebhiḥ | asya | dasmaḥ | devebhiḥ | varuṇaḥ | na | māyī |
ayam | kanīnaḥ | ṛtu-pāḥ | avedi | amimīta | ararum | yaḥ | catuḥ-pāt ||10.099.10||

10.099.11a asya stomebhir auśija ṛjiśvā vrajaṁ darayad vṛṣabheṇa piproḥ |
10.099.11c sutvā yad yajato dīdayad gīḥ pura iyāno abhi varpasā bhūt ||

asya | stomebhiḥ | auśijaḥ | ṛjiśvā | vrajam | darayat | vṛṣabheṇa | piproḥ |
sutvā | yat | yajataḥ | dīdayat | gīḥ | puraḥ | iyānaḥ | abhi | varpasā | bhūt ||10.099.11||

10.099.12a evā maho asura vakṣathāya vamrakaḥ paḍbhir upa sarpad indram |
10.099.12c sa iyānaḥ karati svastim asmā iṣam ūrjaṁ sukṣitiṁ viśvam ābhāḥ ||

eva | mahaḥ | asura | vakṣathāya | vamrakaḥ | paṭ-bhiḥ | upa | sarpat | indram |
saḥ | iyānaḥ | karati | svastim | asmai | iṣam | ūrjam | su-kṣitim | viśvam | ā | abhārityabhāḥ ||10.099.12||


10.100.01a indra dṛhya maghavan tvāvad id bhuja iha stutaḥ sutapā bodhi no vṛdhe |
10.100.01c devebhir naḥ savitā prāvatu śrutam ā sarvatātim aditiṁ vṛṇīmahe ||

indra | dṛhya | magha-van | tvā-vat | it | bhuje | iha | stutaḥ | suta-pāḥ | bodhi | naḥ | vṛdhe |
devebhiḥ | naḥ | savitā | pra | avatu | śrutam | ā | sarva-tātim | aditim | vṛṇīmahe ||10.100.01||

10.100.02a bharāya su bharata bhāgam ṛtviyam pra vāyave śucipe krandadiṣṭaye |
10.100.02c gaurasya yaḥ payasaḥ pītim ānaśa ā sarvatātim aditiṁ vṛṇīmahe ||

bharāya | su | bharata | bhāgam | ṛtviyam | pra | vāyave | śuci-pe | krandat-iṣṭaye |
gaurasya | yaḥ | payasaḥ | pītim | ānaśe | ā | sarva-tātim | aditim | vṛṇīmahe ||10.100.02||

10.100.03a ā no devaḥ savitā sāviṣad vaya ṛjūyate yajamānāya sunvate |
10.100.03c yathā devān pratibhūṣema pākavad ā sarvatātim aditiṁ vṛṇīmahe ||

ā | naḥ | devaḥ | savitā | sāviṣat | vayaḥ | ṛju-yate | yajamānāya | sunvate |
yathā | devān | prati-bhūṣema | pāka-vat | ā | sarva-tātim | aditim | vṛṇīmahe ||10.100.03||

10.100.04a indro asme sumanā astu viśvahā rājā somaḥ suvitasyādhy etu naḥ |
10.100.04c yathā-yathā mitradhitāni saṁdadhur ā sarvatātim aditiṁ vṛṇīmahe ||

indraḥ | asme iti | su-manāḥ | astu | viśvahā | rājā | somaḥ | suvitasya | adhi | etu | naḥ |
yathā-yathā | mitra-dhitāni | sam-dadhuḥ | ā | sarva-tātim | aditim | vṛṇīmahe ||10.100.04||

10.100.05a indra ukthena śavasā parur dadhe bṛhaspate pratarītāsy āyuṣaḥ |
10.100.05c yajño manuḥ pramatir naḥ pitā hi kam ā sarvatātim aditiṁ vṛṇīmahe ||

indraḥ | ukthena | śavasā | paruḥ | dadhe | bṛhaspate | pra-tarītā | asi | āyuṣaḥ |
yajñaḥ | manuḥ | pra-matiḥ | naḥ | pitā | hi | kam | ā | sarva-tātim | aditim | vṛṇīmahe ||10.100.05||

10.100.06a indrasya nu sukṛtaṁ daivyaṁ saho 'gnir gṛhe jaritā medhiraḥ kaviḥ |
10.100.06c yajñaś ca bhūd vidathe cārur antama ā sarvatātim aditiṁ vṛṇīmahe ||

indrasya | nu | su-kṛtam | daivyam | sahaḥ | agniḥ | gṛhe | jaritā | medhiraḥ | kaviḥ |
yajñaḥ | ca | bhūt | vidathe | cāruḥ | antamaḥ | ā | sarva-tātim | aditim | vṛṇīmahe ||10.100.06||

10.100.07a na vo guhā cakṛma bhūri duṣkṛtaṁ nāviṣṭyaṁ vasavo devaheḻanam |
10.100.07c mākir no devā anṛtasya varpasa ā sarvatātim aditiṁ vṛṇīmahe ||

na | vaḥ | guhā | cakṛma | bhūri | duḥ-kṛtam | na | āviḥ-tyam | vasavaḥ | deva-heḻanam |
mākiḥ | naḥ | devāḥ | anṛtasya | varpasaḥ | ā | sarva-tātim | aditim | vṛṇīmahe ||10.100.07||

10.100.08a apāmīvāṁ savitā sāviṣan nyag varīya id apa sedhantv adrayaḥ |
10.100.08c grāvā yatra madhuṣud ucyate bṛhad ā sarvatātim aditiṁ vṛṇīmahe ||

apa | amīvām | savitā | sāviṣat | nyak | varīyaḥ | it | apa | sedhantu | adrayaḥ |
grāvā | yatra | madhu-sut | ucyate | bṛhat | ā | sarva-tātim | aditim | vṛṇīmahe ||10.100.08||

10.100.09a ūrdhvo grāvā vasavo 'stu sotari viśvā dveṣāṁsi sanutar yuyota |
10.100.09c sa no devaḥ savitā pāyur īḍya ā sarvatātim aditiṁ vṛṇīmahe ||

ūrdhvaḥ | grāvā | vasavaḥ | astu | sotari | viśvā | dveṣāṁsi | sanutaḥ | yuyota |
saḥ | naḥ | devaḥ | savitā | pāyuḥ | īḍyaḥ | ā | sarva-tātim | aditim | vṛṇīmahe ||10.100.09||

10.100.10a ūrjaṁ gāvo yavase pīvo attana ṛtasya yāḥ sadane kośe aṅgdhve |
10.100.10c tanūr eva tanvo astu bheṣajam ā sarvatātim aditiṁ vṛṇīmahe ||

ūrjam | gāvaḥ | yavase | pīvaḥ | attana | ṛtasya | yāḥ | sadane | kośe | aṅdhve |
tanūḥ | eva | tanvaḥ | astu | bheṣajam | ā | sarva-tātim | aditim | vṛṇīmahe ||10.100.10||

10.100.11a kratuprāvā jaritā śaśvatām ava indra id bhadrā pramatiḥ sutāvatām |
10.100.11c pūrṇam ūdhar divyaṁ yasya siktaya ā sarvatātim aditiṁ vṛṇīmahe ||

kratu-prāvā | jaritā | śaśvatām | avaḥ | indraḥ | it | bhadrā | pra-matiḥ | suta-vatām |
pūrṇam | ūdhaḥ | divyam | yasya | siktaye | ā | sarva-tātim | aditim | vṛṇīmahe ||10.100.11||

10.100.12a citras te bhānuḥ kratuprā abhiṣṭiḥ santi spṛdho jaraṇiprā adhṛṣṭāḥ |
10.100.12c rajiṣṭhayā rajyā paśva ā gos tūtūrṣati pary agraṁ duvasyuḥ ||

citraḥ | te | bhānuḥ | kratu-prāḥ | abhiṣṭiḥ | santi | spṛdhaḥ | jaraṇi-prāḥ | adhṛṣṭāḥ |
rajiṣṭayā | rajyā | paśvaḥ | ā | goḥ | tūtūrṣati | pari | agram | duvasyuḥ ||10.100.12||


10.101.01a ud budhyadhvaṁ samanasaḥ sakhāyaḥ sam agnim indhvam bahavaḥ sanīḻāḥ |
10.101.01c dadhikrām agnim uṣasaṁ ca devīm indrāvato 'vase ni hvaye vaḥ ||

ut | budhyadhvam | sa-manasaḥ | sakhāyaḥ | sam | agnim | indhvam | bahavaḥ | sa-nīḻāḥ |
dadhi-krām | agnim | uṣasam | ca | devīm | indra-vataḥ | avase | ni | hvaye | vaḥ ||10.101.01||

10.101.02a mandrā kṛṇudhvaṁ dhiya ā tanudhvaṁ nāvam aritraparaṇīṁ kṛṇudhvam |
10.101.02c iṣkṛṇudhvam āyudhāraṁ kṛṇudhvam prāñcaṁ yajñam pra ṇayatā sakhāyaḥ ||

mandrā | kṛṇudhvam | dhiyaḥ | ā | tanudhvam | nāvam | aritra-paraṇīm | kṛṇudhvam |
iṣkṛṇudhvam | āyudhā | aram | kṛṇudhvam | prāñcam | yajñam | pra | nayata | sakhāyaḥ ||10.101.02||

10.101.03a yunakta sīrā vi yugā tanudhvaṁ kṛte yonau vapateha bījam |
10.101.03c girā ca śruṣṭiḥ sabharā asan no nedīya it sṛṇyaḥ pakvam eyāt ||

yunakta | sīrā | vi | yugā | tanudhvam | kṛte | yonau | vapata | iha | bījam |
girā | ca | śruṣṭiḥ | sa-bharāḥ | asat | naḥ | nedīyaḥ | it | sṛṇyaḥ | pakvam | ā | iyāt ||10.101.03||

10.101.04a sīrā yuñjanti kavayo yugā vi tanvate pṛthak |
10.101.04c dhīrā deveṣu sumnayā ||

sīrā | yuñjanti | kavayaḥ | yugā | vi | tanvate | pṛthak |
dhīrāḥ | deveṣu | sumna-yā ||10.101.04||

10.101.05a nir āhāvān kṛṇotana saṁ varatrā dadhātana |
10.101.05c siñcāmahā avatam udriṇaṁ vayaṁ suṣekam anupakṣitam ||

niḥ | ā-hāvān | kṛṇotana | sam | varatrāḥ | dadhātana |
siñcāmahai | avatam | udriṇam | vayam | su-sekam | anupa-kṣitam ||10.101.05||

10.101.06a iṣkṛtāhāvam avataṁ suvaratraṁ suṣecanam |
10.101.06c udriṇaṁ siñce akṣitam ||

iṣkṛta-āhāvam | avatam | su-varatram | su-secanam |
udriṇam | siñce | akṣitam ||10.101.06||

10.101.07a prīṇītāśvān hitaṁ jayātha svastivāhaṁ ratham it kṛṇudhvam |
10.101.07c droṇāhāvam avatam aśmacakram aṁsatrakośaṁ siñcatā nṛpāṇam ||

prīṇīta | aśvān | hitam | jayātha | svasti-vāham | ratham | it | kṛṇudhvam |
droṇa-āhāvam | avatam | aśma-cakram | aṁsatra-kośam | siñcata | nṛ-pānam ||10.101.07||

10.101.08a vrajaṁ kṛṇudhvaṁ sa hi vo nṛpāṇo varma sīvyadhvam bahulā pṛthūni |
10.101.08c puraḥ kṛṇudhvam āyasīr adhṛṣṭā mā vaḥ susroc camaso dṛṁhatā tam ||

vrajam | kṛṇudhvam | saḥ | hi | vaḥ | nṛ-pānaḥ | varma | sīvyadhvam | bahulā | pṛthūni |
puraḥ | kṛṇudhvam | āyasīḥ | adhṛṣṭāḥ | mā | vaḥ | susrot | camasaḥ | dṛṁhata | tam ||10.101.08||

10.101.09a ā vo dhiyaṁ yajñiyāṁ varta ūtaye devā devīṁ yajatāṁ yajñiyām iha |
10.101.09c sā no duhīyad yavaseva gatvī sahasradhārā payasā mahī gauḥ ||

ā | vaḥ | dhiyam | yajñiyām | varte | ūtaye | devāḥ | devīm | yajatām | yajñiyām | iha |
sā | naḥ | duhīyat | yavasā-iva | gatvī | sahasra-dhārā | payasā | mahī | gauḥ ||10.101.09||

10.101.10a ā tū ṣiñca harim īṁ dror upasthe vāśībhis takṣatāśmanmayībhiḥ |
10.101.10c pari ṣvajadhvaṁ daśa kakṣyābhir ubhe dhurau prati vahniṁ yunakta ||

ā | tu | siñca | harim | īm | droḥ | upa-sthe | vāśībhiḥ | takṣata | aśman-mayībhiḥ |
pari | svajadhvam | daśa | kakṣyābhiḥ | ubhe iti | dhurau | prati | vahnim | yunakta ||10.101.10||

10.101.11a ubhe dhurau vahnir āpibdamāno 'ntar yoneva carati dvijāniḥ |
10.101.11c vanaspatiṁ vana āsthāpayadhvaṁ ni ṣū dadhidhvam akhananta utsam ||

ubhe iti | dhurau | vahniḥ | ā-pibdamānaḥ | antaḥ | yonā-iva | carati | dvi-jāniḥ |
vanaspatim | vane | ā | asthāpayadhvam | ni | su | dadhidhvam | akhanantaḥ | utsam ||10.101.11||

10.101.12a kapṛn naraḥ kapṛtham ud dadhātana codayata khudata vājasātaye |
10.101.12c niṣṭigryaḥ putram ā cyāvayotaya indraṁ sabādha iha somapītaye ||

kapṛt | naraḥ | kapṛtham | ut | dadhātana | codayata | khudata | vāja-sātaye |
niṣṭigryaḥ | putram | ā | cyāvaya | ūtaye | indram | sa-bādhaḥ | iha | soma-pītaye ||10.101.12||


10.102.01a pra te ratham mithūkṛtam indro 'vatu dhṛṣṇuyā |
10.102.01c asminn ājau puruhūta śravāyye dhanabhakṣeṣu no 'va ||

pra | te | ratham | mithu-kṛtam | indraḥ | avatu | dhṛṣṇu-yā |
asmin | ājau | puru-hūta | śravāyye | dhana-bhakṣeṣu | naḥ | ava ||10.102.01||

10.102.02a ut sma vāto vahati vāso 'syā adhirathaṁ yad ajayat sahasram |
10.102.02c rathīr abhūn mudgalānī gaviṣṭau bhare kṛtaṁ vy aced indrasenā ||

ut | sma | vātaḥ | vahati | vāsaḥ | asyāḥ | adhi-ratham | yat | ajayat | sahasram |
rathīḥ | abhūt | mudgalānī | gaviṣṭau | bhare | kṛtam | vi | acet | indra-senā ||10.102.02||

10.102.03a antar yaccha jighāṁsato vajram indrābhidāsataḥ |
10.102.03c dāsasya vā maghavann āryasya vā sanutar yavayā vadham ||

antaḥ | yaccha | jighāṁsataḥ | vajram | indra | abhi-dāsataḥ |
dāsasya | vā | magha-van | āryasya | vā | sanutaḥ | yavaya | vadham ||10.102.03||

10.102.04a udno hradam apibaj jarhṛṣāṇaḥ kūṭaṁ sma tṛṁhad abhimātim eti |
10.102.04c pra muṣkabhāraḥ śrava icchamāno 'jiram bāhū abharat siṣāsan ||

udnaḥ | hradam | apibat | jarhṛṣāṇaḥ | kūṭam | sma | tṛṁhat | abhi-mātim | eti |
pra | muṣka-bhāraḥ | śravaḥ | icchamānaḥ | ajiram | bāhū iti | abharat | sisāsan ||10.102.04||

10.102.05a ny akrandayann upayanta enam amehayan vṛṣabham madhya ājeḥ |
10.102.05c tena sūbharvaṁ śatavat sahasraṁ gavām mudgalaḥ pradhane jigāya ||

ni | akrandayan | upa-yantaḥ | enam | amehayan | vṛṣabham | madhye | ājeḥ |
tena | sūbharvam | śata-vat | sahasram | gavām | mudgalaḥ | pra-dhane | jigāya ||10.102.05||

10.102.06a kakardave vṛṣabho yukta āsīd avāvacīt sārathir asya keśī |
10.102.06c dudher yuktasya dravataḥ sahānasa ṛcchanti ṣmā niṣpado mudgalānīm ||

kakardave | vṛṣabhaḥ | yuktaḥ | āsīt | avāvacīt | sārathiḥ | asya | keśī |
dudheḥ | yuktasya | dravataḥ | saha | anasā | ṛcchanti | sma | niḥ-padaḥ | mudgalānīm ||10.102.06||

10.102.07a uta pradhim ud ahann asya vidvān upāyunag vaṁsagam atra śikṣan |
10.102.07c indra ud āvat patim aghnyānām araṁhata padyābhiḥ kakudmān ||

uta | pra-dhim | ut | ahan | asya | vidvān | upa | ayunak | vaṁsagam | atra | śikṣan |
indraḥ | ut | āvat | patim | aghnyānām | araṁhata | padyābhiḥ | kakut-mān ||10.102.07||

10.102.08a śunam aṣṭrāvy acarat kapardī varatrāyāṁ dārv ānahyamānaḥ |
10.102.08c nṛmṇāni kṛṇvan bahave janāya gāḥ paspaśānas taviṣīr adhatta ||

śunam | aṣṭrā-vī | acarat | kapardī | varatrāyām | dāru | ā-nahyamānaḥ |
nṛmnāni | kṛṇvan | bahave | janāya | gāḥ | paspaśānaḥ | taviṣīḥ | adhatta ||10.102.08||

10.102.09a imaṁ tam paśya vṛṣabhasya yuñjaṁ kāṣṭhāyā madhye drughaṇaṁ śayānam |
10.102.09c yena jigāya śatavat sahasraṁ gavām mudgalaḥ pṛtanājyeṣu ||

imam | tam | paśya | vṛṣabhasya | yuñjam | kāṣṭhāyāḥ | madhye | dru-ghaṇam | śayānam |
yena | jigāya | śata-vat | sahasram | gavām | mudgalaḥ | pṛtanājyeṣu ||10.102.09||

10.102.10a āre aghā ko nv itthā dadarśa yaṁ yuñjanti tam v ā sthāpayanti |
10.102.10c nāsmai tṛṇaṁ nodakam ā bharanty uttaro dhuro vahati pradediśat ||

āre | aghā | kaḥ | nu | itthā | dadarśa | yam | yuñjanti | tam | ūm̐ iti | ā | sthāpayanti |
na | asmai | tṛṇam | na | udakam | ā | bharanti | ut-taraḥ | dhuraḥ | vahati | pra-dediśat ||10.102.10||

10.102.11a parivṛkteva patividyam ānaṭ pīpyānā kūcakreṇeva siñcan |
10.102.11c eṣaiṣyā cid rathyā jayema sumaṅgalaṁ sinavad astu sātam ||

parivṛktā-iva | pati-vidyam | ānaṭ | pīpyānā | kūcakreṇa-iva | siñcan |
eṣa-eṣyā | cit | rathyā | jayema | su-maṅgalam | sina-vat | astu | sātam ||10.102.11||

10.102.12a tvaṁ viśvasya jagataś cakṣur indrāsi cakṣuṣaḥ |
10.102.12c vṛṣā yad ājiṁ vṛṣaṇā siṣāsasi codayan vadhriṇā yujā ||

tvam | viśvasya | jagataḥ | cakṣuḥ | indra | asi | cakṣuṣaḥ |
vṛṣā | yat | ājim | vṛṣaṇā | sisāsasi | codayan | vadhriṇā | yujā ||10.102.12||


10.103.01a āśuḥ śiśāno vṛṣabho na bhīmo ghanāghanaḥ kṣobhaṇaś carṣaṇīnām |
10.103.01c saṁkrandano 'nimiṣa ekavīraḥ śataṁ senā ajayat sākam indraḥ ||

āśuḥ | śiśānaḥ | vṛṣabhaḥ | na | bhīmaḥ | ghanāghanaḥ | kṣobhaṇaḥ | carṣaṇīnām |
sam-krandanaḥ | ani-miṣaḥ | eka-vīraḥ | śatam | senāḥ | ajayat | sākam | indraḥ ||10.103.01||

10.103.02a saṁkrandanenānimiṣeṇa jiṣṇunā yutkāreṇa duścyavanena dhṛṣṇunā |
10.103.02c tad indreṇa jayata tat sahadhvaṁ yudho nara iṣuhastena vṛṣṇā ||

sam-krandanena | ani-miṣeṇa | jiṣṇunā | yut-kāreṇa | duḥ-cyavanena | dhṛṣṇunā |
tat | indreṇa | jayata | tat | sahadhvam | yudhaḥ | naraḥ | iṣu-hastena | vṛṣṇā ||10.103.02||

10.103.03a sa iṣuhastaiḥ sa niṣaṅgibhir vaśī saṁsraṣṭā sa yudha indro gaṇena |
10.103.03c saṁsṛṣṭajit somapā bāhuśardhy ugradhanvā pratihitābhir astā ||

saḥ | iṣu-hastaiḥ | saḥ | niṣaṅgi-bhiḥ | vaśī | sam-sraṣṭā | saḥ | yudhaḥ | indraḥ | gaṇena |
saṁsṛṣṭa-jit | soma-pāḥ | bāhu-śardhī | ugra-dhanvā | prati-hitābhiḥ | astā ||10.103.03||

10.103.04a bṛhaspate pari dīyā rathena rakṣohāmitrām̐ apabādhamānaḥ |
10.103.04c prabhañjan senāḥ pramṛṇo yudhā jayann asmākam edhy avitā rathānām ||

bṛhaspate | pari | dīya | rathena | rakṣaḥ-hā | amitrān | apa-bādhamānaḥ |
pra-bhañjan | senāḥ | pra-mṛṇaḥ | yudhā | jayan | asmākam | edhi | avitā | rathānām ||10.103.04||

10.103.05a balavijñāyaḥ sthaviraḥ pravīraḥ sahasvān vājī sahamāna ugraḥ |
10.103.05c abhivīro abhisatvā sahojā jaitram indra ratham ā tiṣṭha govit ||

bala-vijñāyaḥ | sthaviraḥ | pra-vīraḥ | sahasvān | vājī | sahamānaḥ | ugraḥ |
abhi-vīraḥ | abhi-satvā | sahaḥ-jāḥ | jaitram | indra | ratham | ā | tiṣṭha | go-vit ||10.103.05||

10.103.06a gotrabhidaṁ govidaṁ vajrabāhuṁ jayantam ajma pramṛṇantam ojasā |
10.103.06c imaṁ sajātā anu vīrayadhvam indraṁ sakhāyo anu saṁ rabhadhvam ||

gotra-bhidam | go-vidam | vajra-bāhum | jayantam | ajma | pra-mṛṇantam | ojasā |
imam | sa-jātāḥ | anu | vīrayadhvam | indram | sakhāyaḥ | anu | sam | rabhadhvam ||10.103.06||

10.103.07a abhi gotrāṇi sahasā gāhamāno 'dayo vīraḥ śatamanyur indraḥ |
10.103.07c duścyavanaḥ pṛtanāṣāḻ ayudhyo 'smākaṁ senā avatu pra yutsu ||

abhi | gotrāṇi | sahasā | gāhamānaḥ | adayaḥ | vīraḥ | śata-manyuḥ | indraḥ |
duḥ-cyavanaḥ | pṛtanāṣāṭ | ayudhyaḥ | asmākam | senāḥ | avatu | pra | yut-su ||10.103.07||

10.103.08a indra āsāṁ netā bṛhaspatir dakṣiṇā yajñaḥ pura etu somaḥ |
10.103.08c devasenānām abhibhañjatīnāṁ jayantīnām maruto yantv agram ||

indraḥ | āsām | netā | bṛhaspatiḥ | dakṣiṇā | yajñaḥ | puraḥ | etu | somaḥ |
deva-senānām | abhi-bhañjatīnām | jayantīnām | marutaḥ | yantu | agram ||10.103.08||

10.103.09a indrasya vṛṣṇo varuṇasya rājña ādityānām marutāṁ śardha ugram |
10.103.09c mahāmanasām bhuvanacyavānāṁ ghoṣo devānāṁ jayatām ud asthāt ||

indrasya | vṛṣṇaḥ | varuṇasya | rājñaḥ | ādityānām | marutām | śardhaḥ | ugram |
mahā-manasām | bhuvana-cyavānām | ghoṣaḥ | devānām | jayatām | ut | asthāt ||10.103.09||

10.103.10a ud dharṣaya maghavann āyudhāny ut satvanām māmakānām manāṁsi |
10.103.10c ud vṛtrahan vājināṁ vājināny ud rathānāṁ jayatāṁ yantu ghoṣāḥ ||

ut | harṣaya | magha-van | āyudhāni | ut | satvanām | māmakānām | manāṁsi |
ut | vṛtra-han | vājinām | vājināni | ut | rathānām | jayatām | yantu | ghoṣāḥ ||10.103.10||

10.103.11a asmākam indraḥ samṛteṣu dhvajeṣv asmākaṁ yā iṣavas tā jayantu |
10.103.11c asmākaṁ vīrā uttare bhavantv asmām̐ u devā avatā haveṣu ||

asmākam | indraḥ | sam-ṛteṣu | dhvajeṣu | asmākam | yāḥ | iṣavaḥ | tāḥ | jayantu |
asmākam | vīrāḥ | ut-tare | bhavantu | asmān | ūm̐ iti | devāḥ | avata | haveṣu ||10.103.11||

10.103.12a amīṣāṁ cittam pratilobhayantī gṛhāṇāṅgāny apve parehi |
10.103.12c abhi prehi nir daha hṛtsu śokair andhenāmitrās tamasā sacantām ||

amīṣām | cittam | prati-lobhayantī | gṛhāṇa | aṅgāni | apve | parā | ihi |
abhi | pra | ihi | niḥ | daha | hṛt-su | śokaiḥ | andhena | amitrāḥ | tamasā | sacantām ||10.103.12||

10.103.13a pretā jayatā nara indro vaḥ śarma yacchatu |
10.103.13c ugrā vaḥ santu bāhavo 'nādhṛṣyā yathāsatha ||

pra | ita | jayata | naraḥ | indraḥ | vaḥ | śarma | yacchatu |
ugrāḥ | vaḥ | santu | bāhavaḥ | anādhṛṣyāḥ | yathā | asatha ||10.103.13||


10.104.01a asāvi somaḥ puruhūta tubhyaṁ haribhyāṁ yajñam upa yāhi tūyam |
10.104.01c tubhyaṁ giro vipravīrā iyānā dadhanvira indra pibā sutasya ||

asāvi | somaḥ | puru-hūta | tubhyam | hari-bhyām | yajñam | upa | yāhi | tūyam |
tubhyam | giraḥ | vipra-vīrāḥ | iyānāḥ | dadhanvire | indra | piba | sutasya ||10.104.01||

10.104.02a apsu dhūtasya harivaḥ pibeha nṛbhiḥ sutasya jaṭharam pṛṇasva |
10.104.02c mimikṣur yam adraya indra tubhyaṁ tebhir vardhasva madam ukthavāhaḥ ||

ap-su | dhūtasya | hari-vaḥ | piba | iha | nṛ-bhiḥ | sutasya | jaṭharam | pṛṇasva |
mimikṣuḥ | yam | adrayaḥ | indra | tubhyam | tebhiḥ | vardhasva | madam | uktha-vāhaḥ ||10.104.02||

10.104.03a progrām pītiṁ vṛṣṇa iyarmi satyām prayai sutasya haryaśva tubhyam |
10.104.03c indra dhenābhir iha mādayasva dhībhir viśvābhiḥ śacyā gṛṇānaḥ ||

pra | ugrām | pītim | vṛṣṇe | iyarmi | satyām | pra-yai | sutasya | hari-aśva | tubhyam |
indra | dhenābhiḥ | iha | mādayasva | dhībhiḥ | viśvābhiḥ | śacyā | gṛṇānaḥ ||10.104.03||

10.104.04a ūtī śacīvas tava vīryeṇa vayo dadhānā uśija ṛtajñāḥ |
10.104.04c prajāvad indra manuṣo duroṇe tasthur gṛṇantaḥ sadhamādyāsaḥ ||

ūtī | śacī-vaḥ | tava | vīryeṇa | vayaḥ | dadhānāḥ | uśijaḥ | ṛta-jñāḥ |
prajā-vat | indra | manuṣaḥ | duroṇe | tasthuḥ | gṛṇantaḥ | sadha-mādyāsaḥ ||10.104.04||

10.104.05a praṇītibhiṣ ṭe haryaśva suṣṭoḥ suṣumnasya pururuco janāsaḥ |
10.104.05c maṁhiṣṭhām ūtiṁ vitire dadhānāḥ stotāra indra tava sūnṛtābhiḥ ||

pranīti-bhiḥ | te | hari-aśva | su-stoḥ | susumnasya | puru-rucaḥ | janāsaḥ |
maṁhiṣṭhām | ūtim | vi-tire | dadhānāḥ | stotāraḥ | indra | tava | sūnṛtābhiḥ ||10.104.05||

10.104.06a upa brahmāṇi harivo haribhyāṁ somasya yāhi pītaye sutasya |
10.104.06c indra tvā yajñaḥ kṣamamāṇam ānaḍ dāśvām̐ asy adhvarasya praketaḥ ||

upa | brahmāṇi | hari-vaḥ | hari-bhyām | somasya | yāhi | pītaye | sutasya |
indra | tvā | yajñaḥ | kṣamamāṇam | ānaṭ | dāśvān | asi | adhvarasya | pra-ketaḥ ||10.104.06||

10.104.07a sahasravājam abhimātiṣāhaṁ suteraṇam maghavānaṁ suvṛktim |
10.104.07c upa bhūṣanti giro apratītam indraṁ namasyā jarituḥ pananta ||

sahasra-vājam | abhimāti-saham | sute-raṇam | magha-vānam | su-vṛktim |
upa | bhūṣanti | giraḥ | aprati-itam | indram | namasyāḥ | jarituḥ | pananta ||10.104.07||

10.104.08a saptāpo devīḥ suraṇā amṛktā yābhiḥ sindhum atara indra pūrbhit |
10.104.08c navatiṁ srotyā nava ca sravantīr devebhyo gātum manuṣe ca vindaḥ ||

sapta | āpaḥ | devīḥ | su-raṇāḥ | amṛktāḥ | yābhiḥ | sindhum | ataraḥ | indra | pūḥ-bhit |
navatim | srotyāḥ | nava | ca | sravantīḥ | devebhyaḥ | gātum | manuṣe | ca | vindaḥ ||10.104.08||

10.104.09a apo mahīr abhiśaster amuñco 'jāgar āsv adhi deva ekaḥ |
10.104.09c indra yās tvaṁ vṛtratūrye cakartha tābhir viśvāyus tanvam pupuṣyāḥ ||

apaḥ | mahīḥ | abhi-śasteḥ | amuñcaḥ | ajāgaḥ | āsu | adhi | devaḥ | ekaḥ |
indra | yāḥ | tvam | vṛtra-tūrye | cakartha | tābhiḥ | viśva-āyuḥ | tanvam | pupuṣyāḥ ||10.104.09||

10.104.10a vīreṇyaḥ kratur indraḥ suśastir utāpi dhenā puruhūtam īṭṭe |
10.104.10c ārdayad vṛtram akṛṇod u lokaṁ sasāhe śakraḥ pṛtanā abhiṣṭiḥ ||

vīreṇyaḥ | kratuḥ | indraḥ | su-śastiḥ | uta | api | dhenā | puru-hūtam | īṭṭe |
ārdayat | vṛtram | akṛṇot | ūm̐ iti | lokam | sasahe | śakraḥ | pṛtanāḥ | abhiṣṭiḥ ||10.104.10||

10.104.11a śunaṁ huvema maghavānam indram asmin bhare nṛtamaṁ vājasātau |
10.104.11c śṛṇvantam ugram ūtaye samatsu ghnantaṁ vṛtrāṇi saṁjitaṁ dhanānām ||

śunam | huvema | magha-vānam | indram | asmin | bhare | nṛ-tamam | vāja-sātau |
śṛṇvantam | ugram | ūtaye | samat-su | ghnantam | vṛtrāṇi | sam-jitam | dhanānām ||10.104.11||


10.105.01a kadā vaso stotraṁ haryata āva śmaśā rudhad vāḥ |
10.105.01c dīrghaṁ sutaṁ vātāpyāya ||

kadā | vaso iti | stotram | haryate | ā | ava | śmaśā | rudhat | vāriti vāḥ |
dīrgham | sutam | vātāpyāya ||10.105.01||

10.105.02a harī yasya suyujā vivratā ver arvantānu śepā |
10.105.02c ubhā rajī na keśinā patir dan ||

harī iti | yasya | su-yujā | vi-vratā | veḥ | arvantā | anu | śepā |
ubhā | rajī iti | na | keśinā | patiḥ | dan ||10.105.02||

10.105.03a apa yor indraḥ pāpaja ā marto na śaśramāṇo bibhīvān |
10.105.03c śubhe yad yuyuje taviṣīvān ||

apa | yoḥ | indraḥ | pāpaje | ā | martaḥ | na | śaśramāṇaḥ | bibhīvān |
śubhe | yat | yuyuje | taviṣī-vān ||10.105.03||

10.105.04a sacāyor indraś carkṛṣa ām̐ upānasaḥ saparyan |
10.105.04c nadayor vivratayoḥ śūra indraḥ ||

sacā | āyoḥ | indraḥ | carkṛṣe | ā | upānasaḥ | saparyan |
nadayoḥ | vi-vratayoḥ | śūraḥ | indraḥ ||10.105.04||

10.105.05a adhi yas tasthau keśavantā vyacasvantā na puṣṭyai |
10.105.05c vanoti śiprābhyāṁ śipriṇīvān ||

adhi | yaḥ | tasthau | keṣa-vantā | vyacasvantā | na | puṣṭyai |
vanoti | śiprābhyām | śipriṇī-vān ||10.105.05||

10.105.06a prāstaud ṛṣvaujā ṛṣvebhis tatakṣa śūraḥ śavasā |
10.105.06c ṛbhur na kratubhir mātariśvā ||

pra | astaut | ṛṣva-ojāḥ | ṛṣvebhiḥ | tatakṣa | śūraḥ | śavasā |
ṛbhuḥ | na | kratu-bhiḥ | mātariśvā ||10.105.06||

10.105.07a vajraṁ yaś cakre suhanāya dasyave hirīmaśo hirīmān |
10.105.07c arutahanur adbhutaṁ na rajaḥ ||

vajram | yaḥ | cakre | su-hanāya | dasyave | hirīmaśaḥ | harīmān |
aruta-hanuḥ | adbhutam | na | rajaḥ ||10.105.07||

10.105.08a ava no vṛjinā śiśīhy ṛcā vanemānṛcaḥ |
10.105.08c nābrahmā yajña ṛdhag joṣati tve ||

ava | naḥ | vṛjinā | śiśīhi | ṛcā | vanema | anṛcaḥ |
na | abrahmā | yajñaḥ | ṛdhak | joṣati | tve iti ||10.105.08||

10.105.09a ūrdhvā yat te tretinī bhūd yajñasya dhūrṣu sadman |
10.105.09c sajūr nāvaṁ svayaśasaṁ sacāyoḥ ||

ūrdhvā | yat | te | tretinī | bhūt | yajñasya | dhūḥ-su | sadman |
sa-jūḥ | nāvam | sva-yaśasam | sacā | āyoḥ ||10.105.09||

10.105.10a śriye te pṛśnir upasecanī bhūc chriye darvir arepāḥ |
10.105.10c yayā sve pātre siñcasa ut ||

śriye | te | pṛśniḥ | upa-secanī | bhūt | śriye | darviḥ | arepāḥ |
yayā | sve | pātre | siñcase | ut ||10.105.10||

10.105.11a śataṁ vā yad asurya prati tvā sumitra itthāstaud durmitra itthāstaut |
10.105.11c āvo yad dasyuhatye kutsaputram prāvo yad dasyuhatye kutsavatsam ||

śatam | vā | yat | asurya | prati | tvā | su-mitraḥ | itthā | astaut | duḥ-mitraḥ | itthā | astaut |
āvaḥ | yat | dasyu-hatye | kutsa-putram | pra | āvaḥ | yat | dasyu-hatye | kutsa-vatsam ||10.105.11||


10.106.01a ubhā u nūnaṁ tad id arthayethe vi tanvāthe dhiyo vastrāpaseva |
10.106.01c sadhrīcīnā yātave prem ajīgaḥ sudineva pṛkṣa ā taṁsayethe ||

ubhau | ūm̐ iti | nūnam | tat | it | arthayethe iti | vi | tanvāthe iti | dhiyaḥ | vastrā | apasā-iva |
sadhrīcīnā | yātave | pra | īm | ajīgariti | sudinā-iva | pṛkṣaḥ | ā | taṁsayethe iti ||10.106.01||

10.106.02a uṣṭāreva pharvareṣu śrayethe prāyogeva śvātryā śāsur ethaḥ |
10.106.02c dūteva hi ṣṭho yaśasā janeṣu māpa sthātam mahiṣevāvapānāt ||

uṣṭārā-iva | pharvareṣu | śrayethe iti | prāyogā-iva | śvātryā | śāsuḥ | ā | ithaḥ |
dūtā-iva | hi | sthaḥ | yaśasā | janeṣu | mā | apa | sthātam | mahiṣā-iva | ava-pānāt ||10.106.02||

10.106.03a sākaṁyujā śakunasyeva pakṣā paśveva citrā yajur ā gamiṣṭam |
10.106.03c agnir iva devayor dīdivāṁsā parijmāneva yajathaḥ purutrā ||

sākam-yujā | śakunasya-iva | pakṣā | paśvā-iva | citrā | yajuḥ | ā | gamiṣṭam |
agniḥ-iva | deva-yoḥ | dīdi-vāṁsā | parijmānā-iva | yajathaḥ | puru-trā ||10.106.03||

10.106.04a āpī vo asme pitareva putrogreva rucā nṛpatīva turyai |
10.106.04c iryeva puṣṭyai kiraṇeva bhujyai śruṣṭīvāneva havam ā gamiṣṭam ||

āpī iti | vaḥ | asme iti | pitarā-iva | putrā | ugrā-iva | rucā | nṛpatī iveti nṛpatī-iva | turyai |
iryā-iva | puṣṭyai | kiraṇā-iva | bhujyai | śruṣṭīvānā-iva | havam | ā | gamiṣṭam ||10.106.04||

10.106.05a vaṁsageva pūṣaryā śimbātā mitreva ṛtā śatarā śātapantā |
10.106.05c vājevoccā vayasā gharmyeṣṭhā meṣeveṣā saparyā purīṣā ||

vaṁsagā-iva | pūṣaryā | śimbātā | mitrā-iva | ṛtā | śatarā | śātapantā |
vājā-iva | uccā | vayasā | gharmye-sthā | meṣā-iva | iṣā | saparyā | purīṣā ||10.106.05||

10.106.06a sṛṇyeva jarbharī turpharītū naitośeva turpharī parpharīkā |
10.106.06c udanyajeva jemanā maderū tā me jarāyv ajaram marāyu ||

sṛṇyā-iva | jarbharī iti | turpharītū iti | naitośā-iva | turpharī iti | parpharīkā |
udanyajā-iva | jemanā | maderū iti | tā | me | jarāyu | ajaram | marāyu ||10.106.06||

10.106.07a pajreva carcaraṁ jāram marāyu kṣadmevārtheṣu tartarītha ugrā |
10.106.07c ṛbhū nāpat kharamajrā kharajrur vāyur na parpharat kṣayad rayīṇām ||

pajrā-iva | carcaram | jāram | marāyu | kṣadma-iva | artheṣu | tartarīthaḥ | ugrā |
ṛbhū iti | na | āpat | kharamajrā | khara-jruḥ | vāyuḥ | na | parpharat | kṣayat | rayīṇām ||10.106.07||

10.106.08a gharmeva madhu jaṭhare sanerū bhagevitā turpharī phārivāram |
10.106.08c patareva cacarā candranirṇiṅ manaṛṅgā mananyā na jagmī ||

gharmā-iva | madhu | jaṭhare | sanerū iti | bhage-avitā | turpharī iti | phārivā | aram |
patarā-iva | cacarā | candra-nirnik | manaḥ-ṛṅgā | mananyā | na | jagmī iti ||10.106.08||

10.106.09a bṛhanteva gambhareṣu pratiṣṭhām pādeva gādhaṁ tarate vidāthaḥ |
10.106.09c karṇeva śāsur anu hi smarātho 'ṁśeva no bhajataṁ citram apnaḥ ||

bṛhantā-iva | gambhareṣu | prati-sthām | pādā-iva | gādham | tarate | vidāthaḥ |
karṇā-iva | śāsuḥ | anu | hi | smarāthaḥ | aṁśā-iva | naḥ | bhajatam | citram | apnaḥ ||10.106.09||

10.106.10a āraṅgareva madhv erayethe sāragheva gavi nīcīnabāre |
10.106.10c kīnāreva svedam āsiṣvidānā kṣāmevorjā sūyavasāt sacethe ||

āraṅgarā-iva | madhu | ā | īrayethe iti | sāraghā-iva | gavi | nīcīna-bāre |
kīnārā-iva | svedam | ā-sisvidānā | kṣāma-iva | ūrjā | suyavasa-at | sacethe iti ||10.106.10||

10.106.11a ṛdhyāma stomaṁ sanuyāma vājam ā no mantraṁ sarathehopa yātam |
10.106.11c yaśo na pakvam madhu goṣv antar ā bhūtāṁśo aśvinoḥ kāmam aprāḥ ||

ṛdhyāma | stomam | sanuyāma | vājam | ā | naḥ | mantram | sa-rathā | iha | upa | yātam |
yaśaḥ | na | pakvam | madhu | goṣu | antaḥ | ā | bhūta-aṁśaḥ | aśvinoḥ | kāmam | aprāḥ ||10.106.11||


10.107.01a āvir abhūn mahi māghonam eṣāṁ viśvaṁ jīvaṁ tamaso nir amoci |
10.107.01c mahi jyotiḥ pitṛbhir dattam āgād uruḥ panthā dakṣiṇāyā adarśi ||

āviḥ | abhūt | mahi | māghonam | eṣām | viśvam | jīvam | tamasaḥ | niḥ | amoci |
mahi | jyotiḥ | pitṛ-bhiḥ | dattam | ā | agāt | uruḥ | panthāḥ | dakṣiṇāyāḥ | adarśi ||10.107.01||

10.107.02a uccā divi dakṣiṇāvanto asthur ye aśvadāḥ saha te sūryeṇa |
10.107.02c hiraṇyadā amṛtatvam bhajante vāsodāḥ soma pra tiranta āyuḥ ||

uccā | divi | dakṣiṇā-vantaḥ | asthuḥ | ye | aśva-dāḥ | saha | te | sūryeṇa |
hiraṇya-dāḥ | amṛta-tvam | bhajante | vāsaḥ-dāḥ | soma | pra | tirante | āyuḥ ||10.107.02||

10.107.03a daivī pūrtir dakṣiṇā devayajyā na kavāribhyo nahi te pṛṇanti |
10.107.03c athā naraḥ prayatadakṣiṇāso 'vadyabhiyā bahavaḥ pṛṇanti ||

daivī | pūrtiḥ | dakṣiṇā | deva-yajyā | na | kava-aribhyaḥ | nahi | te | pṛṇanti |
atha | naraḥ | prayata-dakṣiṇāsaḥ | avadya-bhiyā | bahavaḥ | pṛṇanti ||10.107.03||

10.107.04a śatadhāraṁ vāyum arkaṁ svarvidaṁ nṛcakṣasas te abhi cakṣate haviḥ |
10.107.04c ye pṛṇanti pra ca yacchanti saṁgame te dakṣiṇāṁ duhate saptamātaram ||

śata-dhāram | vāyum | arkam | svaḥ-vidam | nṛ-cakṣasaḥ | te | abhi | cakṣate | haviḥ |
ye | pṛṇanti | pra | ca | yacchanti | sam-game | te | dakṣiṇām | duhate | sapta-mātaram ||10.107.04||

10.107.05a dakṣiṇāvān prathamo hūta eti dakṣiṇāvān grāmaṇīr agram eti |
10.107.05c tam eva manye nṛpatiṁ janānāṁ yaḥ prathamo dakṣiṇām āvivāya ||

dakṣiṇā-vān | prathamaḥ | hūtaḥ | eti | dakṣiṇā-vān | grāma-nīḥ | agram | eti |
tam | eva | manye | nṛ-patim | janānām | yaḥ | prathamaḥ | dakṣiṇām | ā-vivāya ||10.107.05||

10.107.06a tam eva ṛṣiṁ tam u brahmāṇam āhur yajñanyaṁ sāmagām ukthaśāsam |
10.107.06c sa śukrasya tanvo veda tisro yaḥ prathamo dakṣiṇayā rarādha ||

tam | eva | ṛṣim | tam | ūm̐ iti | brahmāṇam | āhuḥ | yajña-nyam | sāma-gām | uktha-śāsam |
saḥ | śukrasya | tanvaḥ | veda | tisraḥ | yaḥ | prathamaḥ | dakṣiṇayā | rarādha ||10.107.06||

10.107.07a dakṣiṇāśvaṁ dakṣiṇā gāṁ dadāti dakṣiṇā candram uta yad dhiraṇyam |
10.107.07c dakṣiṇānnaṁ vanute yo na ātmā dakṣiṇāṁ varma kṛṇute vijānan ||

dakṣiṇā | aśvam | dakṣiṇā | gām | dadāti | dakṣiṇā | candram | uta | yat | hiraṇyam |
dakṣiṇā | annam | vanute | yaḥ | naḥ | ātmā | dakṣiṇām | varma | kṛṇute | vi-jānan ||10.107.07||

10.107.08a na bhojā mamrur na nyartham īyur na riṣyanti na vyathante ha bhojāḥ |
10.107.08c idaṁ yad viśvam bhuvanaṁ svaś caitat sarvaṁ dakṣiṇaibhyo dadāti ||

na | bhojāḥ | mamruḥ | na | ni-artham | īyuḥ | na | riṣyanti | na | vyathante | ha | bhojāḥ |
idam | yat | viśvam | bhuvanam | svaḥ | ca | etat | sarvam | dakṣiṇā | ebhyaḥ | dadāti ||10.107.08||

10.107.09a bhojā jigyuḥ surabhiṁ yonim agre bhojā jigyur vadhvaṁ yā suvāsāḥ |
10.107.09c bhojā jigyur antaḥpeyaṁ surāyā bhojā jigyur ye ahūtāḥ prayanti ||

bhojāḥ | jigyuḥ | surabhim | yonim | agre | bhojāḥ | jigyuḥ | vadhvam | yā | su-vāsāḥ |
bhojāḥ | jigyuḥ | antaḥ-peyam | surāyāḥ | bhojāḥ | jigyuḥ | ye | ahūtāḥ | pra-yanti ||10.107.09||

10.107.10a bhojāyāśvaṁ sam mṛjanty āśum bhojāyāste kanyā śumbhamānā |
10.107.10c bhojasyedam puṣkariṇīva veśma pariṣkṛtaṁ devamāneva citram ||

bhojāya | aśvam | sam | mṛjanti | āśum | bhojāya | āste | kanyā | śumbhamānā |
bhojasya | idam | puṣkariṇī-iva | veśma | pari-kṛtam | devamānā-iva | citram ||10.107.10||

10.107.11a bhojam aśvāḥ suṣṭhuvāho vahanti suvṛd ratho vartate dakṣiṇāyāḥ |
10.107.11c bhojaṁ devāso 'vatā bhareṣu bhojaḥ śatrūn samanīkeṣu jetā ||

bhojam | aśvāḥ | suṣṭhu-vāhaḥ | vahanti | su-vṛt | rathaḥ | vartate | dakṣiṇāyāḥ |
bhojam | devāsaḥ | avata | bhareṣu | bhojaḥ | śatrūn | sam-anīkeṣu | jetā ||10.107.11||


10.108.01a kim icchantī saramā predam ānaḍ dūre hy adhvā jaguriḥ parācaiḥ |
10.108.01c kāsmehitiḥ kā paritakmyāsīt kathaṁ rasāyā ataraḥ payāṁsi ||

kim | icchantī | saramā | pra | idam | ānaṭ | dūre | hi | adhvā | jaguriḥ | parācaiḥ |
kā | asme-hitiḥ | kā | pari-takmyā | āsīt | katham | rasāyāḥ | ataraḥ | payāṁsi ||10.108.01||

10.108.02a indrasya dūtīr iṣitā carāmi maha icchantī paṇayo nidhīn vaḥ |
10.108.02c atiṣkado bhiyasā tan na āvat tathā rasāyā ataram payāṁsi ||

indrasya | dūtīḥ | iṣitā | carāmi | mahaḥ | icchantī | paṇayaḥ | ni-dhīn | vaḥ |
ati-skadaḥ | bhiyasā | tam | naḥ | āvat | tathā | rasāyāḥ | ataram | payāṁsi ||10.108.02||

10.108.03a kīdṛṅṅ indraḥ sarame kā dṛśīkā yasyedaṁ dūtīr asaraḥ parākāt |
10.108.03c ā ca gacchān mitram enā dadhāmāthā gavāṁ gopatir no bhavāti ||

kīdṛk | indraḥ | sarame | kā | dṛśīkā | yasya | idam | dūtīḥ | asaraḥ | parākāt |
ā | ca | gacchāt | mitram | ena | dadhāma | atha | gavām | go-patiḥ | naḥ | bhavāti ||10.108.03||

10.108.04a nāhaṁ taṁ veda dabhyaṁ dabhat sa yasyedaṁ dūtīr asaram parākāt |
10.108.04c na taṁ gūhanti sravato gabhīrā hatā indreṇa paṇayaḥ śayadhve ||

na | aham | tam | veda | dabhyam | dabhat | saḥ | yasya | idam | dūtīḥ | asaram | parākāt |
na | tam | gūhanti | sravataḥ | gabhīrāḥ | hatāḥ | indreṇa | paṇayaḥ | śayadhve ||10.108.04||

10.108.05a imā gāvaḥ sarame yā aicchaḥ pari divo antān subhage patantī |
10.108.05c kas ta enā ava sṛjād ayudhvy utāsmākam āyudhā santi tigmā ||

imāḥ | gāvaḥ | sarame | yāḥ | aicchaḥ | pari | divaḥ | antān | su-bhage | patantī |
kaḥ | te | enāḥ | ava | sṛjāt | ayudhvī | uta | asmākam | āyudhā | santi | tigmā ||10.108.05||

10.108.06a asenyā vaḥ paṇayo vacāṁsy aniṣavyās tanvaḥ santu pāpīḥ |
10.108.06c adhṛṣṭo va etavā astu panthā bṛhaspatir va ubhayā na mṛḻāt ||

asenyā | vaḥ | paṇayaḥ | vacāṁsi | aniṣavyāḥ | tanvaḥ | santu | pāpīḥ |
adhṛṣṭaḥ | vaḥ | etavai | astu | panthāḥ | bṛhaspatiḥ | vaḥ | ubhayā | na | mṛḻāt ||10.108.06||

10.108.07a ayaṁ nidhiḥ sarame adribudhno gobhir aśvebhir vasubhir nyṛṣṭaḥ |
10.108.07c rakṣanti tam paṇayo ye sugopā reku padam alakam ā jagantha ||

ayam | ni-dhiḥ | sarame | adri-budhnaḥ | gobhiḥ | aśvebhiḥ | vasu-bhiḥ | ni-ṛṣṭaḥ |
rakṣanti | tam | paṇayaḥ | ye | su-gopāḥ | reku | padam | alakam | ā | jagantha ||10.108.07||

10.108.08a eha gamann ṛṣayaḥ somaśitā ayāsyo aṅgiraso navagvāḥ |
10.108.08c ta etam ūrvaṁ vi bhajanta gonām athaitad vacaḥ paṇayo vamann it ||

ā | iha | gāman | ṛṣayaḥ | soma-śitāḥ | ayāsyaḥ | aṅgirasaḥ | nava-gvāḥ |
te | etam | ūrvam | vi | bhajanta | gonām | atha | etat | vacaḥ | paṇayaḥ | vaman | it ||10.108.08||

10.108.09a evā ca tvaṁ sarama ājagantha prabādhitā sahasā daivyena |
10.108.09c svasāraṁ tvā kṛṇavai mā punar gā apa te gavāṁ subhage bhajāma ||

eva | ca | tvam | sarame | ā-jagantha | pra-bādhitā | sahasā | daivyena |
svasāram | tvā | kṛṇavai | mā | punaḥ | gāḥ | apa | te | gavām | su-bhage | bhajāma ||10.108.09||

10.108.10a nāhaṁ veda bhrātṛtvaṁ no svasṛtvam indro vidur aṅgirasaś ca ghorāḥ |
10.108.10c gokāmā me acchadayan yad āyam apāta ita paṇayo varīyaḥ ||

na | aham | veda | bhrātṛ-tvam | no iti | svasṛ-tvam | indraḥ | viduḥ | aṅgirasaḥ | ca | ghorāḥ |
go-kāmāḥ | me | acchadayan | yat | āyam | apa | ataḥ | ita | paṇayaḥ | varīyaḥ ||10.108.10||

10.108.11a dūram ita paṇayo varīya ud gāvo yantu minatīr ṛtena |
10.108.11c bṛhaspatir yā avindan nigūḻhāḥ somo grāvāṇa ṛṣayaś ca viprāḥ ||

dūram | ita | paṇayaḥ | varīyaḥ | ut | gāvaḥ | yantu | minatīḥ | ṛtena |
bṛhaspatiḥ | yāḥ | avindat | ni-gūḻhāḥ | somaḥ | grāvānaḥ | ṛṣayaḥ | ca | viprāḥ ||10.108.11||


10.109.01a te 'vadan prathamā brahmakilbiṣe 'kūpāraḥ salilo mātariśvā |
10.109.01c vīḻuharās tapa ugro mayobhūr āpo devīḥ prathamajā ṛtena ||

te | avadan | prathamāḥ | brahma-kilbiṣe | akūpāraḥ | salilaḥ | mātariśvā |
vīḻu-harāḥ | tapaḥ | ugraḥ | mayaḥ-bhūḥ | āpaḥ | devīḥ | prathama-jāḥ | ṛtena ||10.109.01||

10.109.02a somo rājā prathamo brahmajāyām punaḥ prāyacchad ahṛṇīyamānaḥ |
10.109.02c anvartitā varuṇo mitra āsīd agnir hotā hastagṛhyā nināya ||

somaḥ | rājā | prathamaḥ | brahma-jāyām | punariti | pra | ayacchat | ahṛṇīyamānaḥ |
anu-artitā | varuṇaḥ | mitraḥ | āsīt | agniḥ | hotā | hasta-gṛhya | ā | nināya ||10.109.02||

10.109.03a hastenaiva grāhya ādhir asyā brahmajāyeyam iti ced avocan |
10.109.03c na dūtāya prahye tastha eṣā tathā rāṣṭraṁ gupitaṁ kṣatriyasya ||

hastena | eva | grāhyaḥ | ā-dhiḥ | asyāḥ | brahma-jāyā | iyam | iti | ca | it | avocat |
na | dūtāya | pra-hye | tasthe | eṣā | tathā | rāṣṭram | gupitam | kṣatriyasya ||10.109.03||

10.109.04a devā etasyām avadanta pūrve saptaṛṣayas tapase ye niṣeduḥ |
10.109.04c bhīmā jāyā brāhmaṇasyopanītā durdhāṁ dadhāti parame vyoman ||

devāḥ | etasyām | avadanta | pūrve | sapta-ṛṣayaḥ | tapase | ye | ni-seduḥ |
bhīmā | jāyā | brāhmaṇasya | upa-nītā | duḥ-dhām | dadhāti | parame | vi-oman ||10.109.04||

10.109.05a brahmacārī carati veviṣad viṣaḥ sa devānām bhavaty ekam aṅgam |
10.109.05c tena jāyām anv avindad bṛhaspatiḥ somena nītāṁ juhvaṁ na devāḥ ||

brahma-cārī | carati | veviṣat | viṣaḥ | saḥ | devānām | bhavati | ekam | aṅgam |
tena | jāyām | anu | avindat | bṛhaspatiḥ | somena | nītām | juhvam | na | devāḥ ||10.109.05||

10.109.06a punar vai devā adaduḥ punar manuṣyā uta |
10.109.06c rājānaḥ satyaṁ kṛṇvānā brahmajāyām punar daduḥ ||

punaḥ | vai | devāḥ | adaduḥ | punaḥ | manuṣyāḥ | uta |
rājānaḥ | satyam | kṛṇvānāḥ | brahma-jāyām | punaḥ | daduḥ ||10.109.06||

10.109.07a punardāya brahmajāyāṁ kṛtvī devair nikilbiṣam |
10.109.07c ūrjam pṛthivyā bhaktvāyorugāyam upāsate ||

punaḥ-dāya | brahma-jāyām | kṛtvī | devaiḥ | ni-kilbiṣam |
ūrjam | pṛthivyāḥ | bhaktvāya | uru-gāyam | upa | āsate ||10.109.07||


10.110.01a samiddho adya manuṣo duroṇe devo devān yajasi jātavedaḥ |
10.110.01c ā ca vaha mitramahaś cikitvān tvaṁ dūtaḥ kavir asi pracetāḥ ||

sam-iddhaḥ | adya | manuṣaḥ | duroṇe | devaḥ | devān | yajasi | jāta-vedaḥ |
ā | ca | vaha | mitra-mahaḥ | cikitvān | tvam | dūtaḥ | kaviḥ | asi | pra-cetāḥ ||10.110.01||

10.110.02a tanūnapāt patha ṛtasya yānān madhvā samañjan svadayā sujihva |
10.110.02c manmāni dhībhir uta yajñam ṛndhan devatrā ca kṛṇuhy adhvaraṁ naḥ ||

tanū-napāt | pathaḥ | ṛtasya | yānān | madhvā | sam-añjan | svadaya | su-jihva |
manmāni | dhībhiḥ | uta | yajñam | ṛndhan | deva-trā | ca | kṛṇuhi | adhvaram | naḥ ||10.110.02||

10.110.03a ājuhvāna īḍyo vandyaś cā yāhy agne vasubhiḥ sajoṣāḥ |
10.110.03c tvaṁ devānām asi yahva hotā sa enān yakṣīṣito yajīyān ||

ā-juhvānaḥ | īḍyaḥ | vandyaḥ | ca | ā | yāhi | agne | vasu-bhiḥ | sa-joṣāḥ |
tvam | devānām | asi | yahva | hotā | saḥ | etān | yakṣi | iṣitaḥ | yajīyān ||10.110.03||

10.110.04a prācīnam barhiḥ pradiśā pṛthivyā vastor asyā vṛjyate agre ahnām |
10.110.04c vy u prathate vitaraṁ varīyo devebhyo aditaye syonam ||

prācīnam | barhiḥ | pra-diśā | pṛthivyāḥ | vastoḥ | asyāḥ | vṛjyate | agre | ahnām |
vi | ūm̐ iti | prathate | vi-taram | varīyaḥ | devebhyaḥ | aditaye | syonam ||10.110.04||

10.110.05a vyacasvatīr urviyā vi śrayantām patibhyo na janayaḥ śumbhamānāḥ |
10.110.05c devīr dvāro bṛhatīr viśvaminvā devebhyo bhavata suprāyaṇāḥ ||

vyacasvatīḥ | urviyā | vi | śrayantām | pati-bhyaḥ | na | janayaḥ | śumbhamānāḥ |
devīḥ | dvāraḥ | bṛhatīḥ | viśvam-invāḥ | devebhyaḥ | bhavata | supra-ayaṇāḥ ||10.110.05||

10.110.06a ā suṣvayantī yajate upāke uṣāsānaktā sadatāṁ ni yonau |
10.110.06c divye yoṣaṇe bṛhatī surukme adhi śriyaṁ śukrapiśaṁ dadhāne ||

ā | susvayantī iti | yajate iti | upāke iti | uṣasānaktā | sadatām | ni | yonau |
divye | yoṣaṇe iti | bṛhatī iti | surukme iti su-rukme | adhi | śriyam | śukra-piśam | dadhāne ||10.110.06||

10.110.07a daivyā hotārā prathamā suvācā mimānā yajñam manuṣo yajadhyai |
10.110.07c pracodayantā vidatheṣu kārū prācīnaṁ jyotiḥ pradiśā diśantā ||

daivyā | hotārā | prathamā | su-vācā | mimānā | yajñam | manuṣaḥ | yajadhyai |
pra-codayantā | vidatheṣu | kārū iti | prācīnam | jyotiḥ | pra-diśā | diśantā ||10.110.07||

10.110.08a ā no yajñam bhāratī tūyam etv iḻā manuṣvad iha cetayantī |
10.110.08c tisro devīr barhir edaṁ syonaṁ sarasvatī svapasaḥ sadantu ||

ā | naḥ | yajñam | bhāratī | tūyam | etu | iḻā | manuṣvat | iha | cetayantī |
tisraḥ | devīḥ | barhiḥ | ā | idam | syonam | sarasvatī | su-apasaḥ | sadantu ||10.110.08||

10.110.09a ya ime dyāvāpṛthivī janitrī rūpair apiṁśad bhuvanāni viśvā |
10.110.09c tam adya hotar iṣito yajīyān devaṁ tvaṣṭāram iha yakṣi vidvān ||

yaḥ | ime iti | dyāvāpṛthivī iti | janitrī iti | rūpaiḥ | apiṁśat | bhuvanāni | viśvā |
tam | adya | hotaḥ | iṣitaḥ | yajīyān | devam | tvaṣṭāram | iha | yakṣi | vidvān ||10.110.09||

10.110.10a upāvasṛja tmanyā samañjan devānām pātha ṛtuthā havīṁṣi |
10.110.10c vanaspatiḥ śamitā devo agniḥ svadantu havyam madhunā ghṛtena ||

upa-avasṛja | tmanyā | sam-añjan | devānām | pāthaḥ | ṛtu-thā | havīṁṣi |
vanaspatiḥ | śamitā | devaḥ | agniḥ | svadantu | havyam | madhunā | ghṛtena ||10.110.10||

10.110.11a sadyo jāto vy amimīta yajñam agnir devānām abhavat purogāḥ |
10.110.11c asya hotuḥ pradiśy ṛtasya vāci svāhākṛtaṁ havir adantu devāḥ ||

sadyaḥ | jātaḥ | vi | amimīta | yajñam | agniḥ | devānām | abhavat | puraḥ-gāḥ |
asya | hotuḥ | pra-diśi | ṛtasya | vāci | svāhā-kṛtam | haviḥ | adantu | devāḥ ||10.110.11||


10.111.01a manīṣiṇaḥ pra bharadhvam manīṣāṁ yathā-yathā matayaḥ santi nṛṇām |
10.111.01c indraṁ satyair erayāmā kṛtebhiḥ sa hi vīro girvaṇasyur vidānaḥ ||

manīṣiṇaḥ | pra | bharadhvam | manīṣām | yathā-yathā | matayaḥ | santi | nṛṇām |
indram | satyaiḥ | ā | īrayāma | kṛtebhiḥ | saḥ | hi | vīraḥ | girvaṇasyuḥ | vidānaḥ ||10.111.01||

10.111.02a ṛtasya hi sadaso dhītir adyaut saṁ gārṣṭeyo vṛṣabho gobhir ānaṭ |
10.111.02c ud atiṣṭhat taviṣeṇā raveṇa mahānti cit saṁ vivyācā rajāṁsi ||

ṛtasya | hi | sadasaḥ | dhītiḥ | adyaut | sam | gāṛṣṭeyaḥ | vṛṣabhaḥ | gobhiḥ | ānaṭ |
ut | atiṣṭhat | taviṣeṇa | raveṇa | mahānti | cit | sam | vivyāca | rajāṁsi ||10.111.02||

10.111.03a indraḥ kila śrutyā asya veda sa hi jiṣṇuḥ pathikṛt sūryāya |
10.111.03c ān menāṁ kṛṇvann acyuto bhuvad goḥ patir divaḥ sanajā apratītaḥ ||

indraḥ | kila | śrutyai | asya | veda | saḥ | hi | jiṣṇuḥ | pathi-kṛt | sūryāya |
āt | menām | kṛṇvan | acyutaḥ | bhuvat | goḥ | patiḥ | divaḥ | sana-jāḥ | aprati-itaḥ ||10.111.03||

10.111.04a indro mahnā mahato arṇavasya vratāminād aṅgirobhir gṛṇānaḥ |
10.111.04c purūṇi cin ni tatānā rajāṁsi dādhāra yo dharuṇaṁ satyatātā ||

indraḥ | mahnā | mahataḥ | arṇavasya | vratā | amināt | aṅgiraḥ-bhiḥ | gṛṇānaḥ |
purūṇi | cit | ni | tatāna | rajāṁsi | dādhāra | yaḥ | dharuṇam | satya-tātā ||10.111.04||

10.111.05a indro divaḥ pratimānam pṛthivyā viśvā veda savanā hanti śuṣṇam |
10.111.05c mahīṁ cid dyām ātanot sūryeṇa cāskambha cit kambhanena skabhīyān ||

indraḥ | divaḥ | prati-mānam | pṛthivyāḥ | viśvā | veda | savanā | hanti | śuṣṇam |
mahīm | cit | dyām | ā | atanot | sūryeṇa | cāskambha | cit | kambhanena | skabhīyān ||10.111.05||

10.111.06a vajreṇa hi vṛtrahā vṛtram astar adevasya śūśuvānasya māyāḥ |
10.111.06c vi dhṛṣṇo atra dhṛṣatā jaghanthāthābhavo maghavan bāhvojāḥ ||

vajreṇa | hi | vṛtra-hā | vṛtram | astaḥ | adevasya | śūśuvānasya | māyāḥ |
vi | dhṛṣṇo iti | atra | dhṛṣatā | jaghantha | atha | abhavaḥ | magha-van | bāhvu-ojāḥ ||10.111.06||

10.111.07a sacanta yad uṣasaḥ sūryeṇa citrām asya ketavo rām avindan |
10.111.07c ā yan nakṣatraṁ dadṛśe divo na punar yato nakir addhā nu veda ||

sacanta | yat | uṣasaḥ | sūryeṇa | citrām | asya | ketavaḥ | rām | avindan |
ā | yat | nakṣatram | dadṛśe | divaḥ | na | punaḥ | yataḥ | nakiḥ | addhā | nu | veda ||10.111.07||

10.111.08a dūraṁ kila prathamā jagmur āsām indrasya yāḥ prasave sasrur āpaḥ |
10.111.08c kva svid agraṁ kva budhna āsām āpo madhyaṁ kva vo nūnam antaḥ ||

dūram | kila | prathamāḥ | jagmuḥ | āsām | indrasya | yāḥ | pra-save | sasruḥ | āpaḥ |
kva | svit | agram | kva | budhnaḥ | āsām | āpaḥ | madhyam | kva | vaḥ | nūnam | antaḥ ||10.111.08||

10.111.09a sṛjaḥ sindhūm̐r ahinā jagrasānām̐ ād id etāḥ pra vivijre javena |
10.111.09c mumukṣamāṇā uta yā mumucre 'dhed etā na ramante nitiktāḥ ||

sṛjaḥ | sindhūn | ahinā | jagrasānān | āt | it | etāḥ | pra | vivijre | javena |
mumukṣamāṇāḥ | uta | yāḥ | mumucre | adha | it | etāḥ | na | ramante | ni-tiktāḥ ||10.111.09||

10.111.10a sadhrīcīḥ sindhum uśatīr ivāyan sanāj jāra āritaḥ pūrbhid āsām |
10.111.10c astam ā te pārthivā vasūny asme jagmuḥ sūnṛtā indra pūrvīḥ ||

sadhrīcīḥ | sindhum | uśatīḥ-iva | āyan | sanāt | jāraḥ | āritaḥ | pūḥ-bhit | āsām |
astam | ā | te | pārthivā | vasūni | asme iti | jagmuḥ | sūnṛtāḥ | indra | pūrvīḥ ||10.111.10||


10.112.01a indra piba pratikāmaṁ sutasya prātaḥsāvas tava hi pūrvapītiḥ |
10.112.01c harṣasva hantave śūra śatrūn ukthebhiṣ ṭe vīryā pra bravāma ||

indra | piba | prati-kāmam | sutasya | prātaḥ-sāvaḥ | tava | hi | pūrva-pītiḥ |
harṣasva | hantave | śūra | śatrūn | ukthebhiḥ | te | vīryā | pra | bravāma ||10.112.01||

10.112.02a yas te ratho manaso javīyān endra tena somapeyāya yāhi |
10.112.02c tūyam ā te harayaḥ pra dravantu yebhir yāsi vṛṣabhir mandamānaḥ ||

yaḥ | te | rathaḥ | manasaḥ | javīyān | ā | indra | tena | soma-peyāya | yāhi |
tūyam | ā | te | harayaḥ | pra | dravantu | yebhiḥ | yāsi | vṛṣa-bhiḥ | mandamānaḥ ||10.112.02||

10.112.03a haritvatā varcasā sūryasya śreṣṭhai rūpais tanvaṁ sparśayasva |
10.112.03c asmābhir indra sakhibhir huvānaḥ sadhrīcīno mādayasvā niṣadya ||

haritvatā | varcasā | sūryasya | śreṣṭhaiḥ | rūpaiḥ | tanvam | sparśayasva |
asmābhiḥ | indra | sakhi-bhiḥ | huvānaḥ | sadhrīcīnaḥ | mādayasva | ni-sadya ||10.112.03||

10.112.04a yasya tyat te mahimānam madeṣv ime mahī rodasī nāviviktām |
10.112.04c tad oka ā haribhir indra yuktaiḥ priyebhir yāhi priyam annam accha ||

yasya | tyat | te | mahimānam | madeṣu | ime iti | mahī iti | rodasī iti | na | aviviktām |
tat | okaḥ | ā | hari-bhiḥ | indra | yuktaiḥ | priyebhiḥ | yāhi | priyam | annam | accha ||10.112.04||

10.112.05a yasya śaśvat papivām̐ indra śatrūn anānukṛtyā raṇyā cakartha |
10.112.05c sa te puraṁdhiṁ taviṣīm iyarti sa te madāya suta indra somaḥ ||

yasya | śaśvat | papi-vān | indra | śatrūn | ananu-kṛtyā | raṇyā | cakartha |
saḥ | te | puram-dhim | taviṣīm | iyarti | saḥ | te | madāya | sutaḥ | indra | somaḥ ||10.112.05||

10.112.06a idaṁ te pātraṁ sanavittam indra pibā somam enā śatakrato |
10.112.06c pūrṇa āhāvo madirasya madhvo yaṁ viśva id abhiharyanti devāḥ ||

idam | te | pātram | sana-vittam | indra | piba | somam | enā | śatakrato iti śata-krato |
pūrṇaḥ | ā-hāvaḥ | madirasya | madhvaḥ | yam | viśve | it | abhi-haryanti | devāḥ ||10.112.06||

10.112.07a vi hi tvām indra purudhā janāso hitaprayaso vṛṣabha hvayante |
10.112.07c asmākaṁ te madhumattamānīmā bhuvan savanā teṣu harya ||

vi | hi | tvām | indra | purudhā | janāsaḥ | hita-prayasaḥ | vṛṣabha | hvayante |
asmākam | te | madhumat-tamāni | imā | bhuvan | savanā | teṣu | harya ||10.112.07||

10.112.08a pra ta indra pūrvyāṇi pra nūnaṁ vīryā vocam prathamā kṛtāni |
10.112.08c satīnamanyur aśrathāyo adriṁ suvedanām akṛṇor brahmaṇe gām ||

pra | te | indra | pūrvyāṇi | pra | nūnam | vīryā | vocam | prathamā | kṛtāni |
satīna-manyuḥ | aśrathayaḥ | adrim | su-vedanām | akṛṇoḥ | brahmaṇe | gām ||10.112.08||

10.112.09a ni ṣu sīda gaṇapate gaṇeṣu tvām āhur vipratamaṁ kavīnām |
10.112.09c na ṛte tvat kriyate kiṁ canāre mahām arkam maghavañ citram arca ||

ni | su | sīda | gaṇa-pate | gaṇeṣu | tvām | āhuḥ | vipra-tamam | kavīnām |
na | ṛte | tvat | kriyate | kim | cana | āre | mahām | arkam | magha-van | citram | arca ||10.112.09||

10.112.10a abhikhyā no maghavan nādhamānān sakhe bodhi vasupate sakhīnām |
10.112.10c raṇaṁ kṛdhi raṇakṛt satyaśuṣmābhakte cid ā bhajā rāye asmān ||

abhi-khyā | naḥ | magha-van | nādhamānān | sakhe | bodhi | vasu-pate | sakhīnām |
raṇam | kṛdhi | raṇa-kṛt | satya-śuṣma | abhakte | cit | ā | bhaja | rāye | asmān ||10.112.10||


10.113.01a tam asya dyāvāpṛthivī sacetasā viśvebhir devair anu śuṣmam āvatām |
10.113.01c yad ait kṛṇvāno mahimānam indriyam pītvī somasya kratumām̐ avardhata ||

tam | asya | dyāvāpṛthivī iti | sa-cetasā | viśvebhiḥ | devaiḥ | anu | śuṣmam | āvatām |
yat | ait | kṛṇvānaḥ | mahimānam | indriyam | pītvī | somasya | kratu-mān | avardhata ||10.113.01||

10.113.02a tam asya viṣṇur mahimānam ojasāṁśuṁ dadhanvān madhuno vi rapśate |
10.113.02c devebhir indro maghavā sayāvabhir vṛtraṁ jaghanvām̐ abhavad vareṇyaḥ ||

tam | asya | viṣṇuḥ | mahimānam | ojasā | aṁśum | dadhanvān | madhunaḥ | vi | rapśate |
devebhiḥ | indraḥ | magha-vā | sayāva-bhiḥ | vṛtram | jaghanvān | abhavat | vareṇyaḥ ||10.113.02||

10.113.03a vṛtreṇa yad ahinā bibhrad āyudhā samasthithā yudhaye śaṁsam āvide |
10.113.03c viśve te atra marutaḥ saha tmanāvardhann ugra mahimānam indriyam ||

vṛtreṇa | yat | ahinā | bibhrat | āyudhā | sam-asthithāḥ | yudhaye | śaṁsam | ā-vide |
viśve | te | atra | marutaḥ | saha | tmanā | avardhan | ugra | mahimānam | indriyam ||10.113.03||

10.113.04a jajñāna eva vy abādhata spṛdhaḥ prāpaśyad vīro abhi pauṁsyaṁ raṇam |
10.113.04c avṛścad adrim ava sasyadaḥ sṛjad astabhnān nākaṁ svapasyayā pṛthum ||

jajñānaḥ | eva | vi | abādhata | spṛdhaḥ | pra | apaśyat | vīraḥ | abhi | pauṁsyam | raṇam |
avṛścat | adrim | ava | sa-syadaḥ | sṛjat | astabhnāt | nākam | su-apasyayā | pṛthum ||10.113.04||

10.113.05a ād indraḥ satrā taviṣīr apatyata varīyo dyāvāpṛthivī abādhata |
10.113.05c avābharad dhṛṣito vajram āyasaṁ śevam mitrāya varuṇāya dāśuṣe ||

āt | indraḥ | satrā | taviṣīḥ | apatyata | varīyaḥ | dyāvāpṛthivī iti | abādhata |
ava | abharat | dhṛṣitaḥ | vajram | āyasam | śevam | mitrāya | varuṇāya | dāśuṣe ||10.113.05||

10.113.06a indrasyātra taviṣībhyo virapśina ṛghāyato araṁhayanta manyave |
10.113.06c vṛtraṁ yad ugro vy avṛścad ojasāpo bibhrataṁ tamasā parīvṛtam ||

indrasya | atra | taviṣībhyaḥ | vi-rapśinaḥ | ṛghāyataḥ | araṁhayanta | manyave |
vṛtram | yat | ugraḥ | vi | avṛścat | ojasā | apaḥ | bibhratam | tamasā | pari-vṛtam ||10.113.06||

10.113.07a yā vīryāṇi prathamāni kartvā mahitvebhir yatamānau samīyatuḥ |
10.113.07c dhvāntaṁ tamo 'va dadhvase hata indro mahnā pūrvahūtāv apatyata ||

yā | vīryāṇi | prathamāni | kartvā | mahi-tvebhiḥ | yatamānau | sam-īyatuḥ |
dhvāntam | tamaḥ | ava | dadhvase | hate | indraḥ | mahnā | pūrva-hūtau | apatyata ||10.113.07||

10.113.08a viśve devāso adha vṛṣṇyāni te 'vardhayan somavatyā vacasyayā |
10.113.08c raddhaṁ vṛtram ahim indrasya hanmanāgnir na jambhais tṛṣv annam āvayat ||

viśve | devāsaḥ | adha | vṛṣṇyāni | te | avardhayan | soma-vatyā | vacasyayā |
raddham | vṛtram | ahim | indrasya | hanmanā | agniḥ | na | jambhaiḥ | tṛṣu | annam | āvayat ||10.113.08||

10.113.09a bhūri dakṣebhir vacanebhir ṛkvabhiḥ sakhyebhiḥ sakhyāni pra vocata |
10.113.09c indro dhuniṁ ca cumuriṁ ca dambhayañ chraddhāmanasyā śṛṇute dabhītaye ||

bhūri | dakṣebhiḥ | vacanebhiḥ | ṛkva-bhiḥ | sakhyebhiḥ | sakhyāni | pra | vocata |
indraḥ | dhunim | ca | cumurim | ca | dambhayan | śraddhā-manasyā | śṛṇute | dabhītaye ||10.113.09||

10.113.10a tvam purūṇy ā bharā svaśvyā yebhir maṁsai nivacanāni śaṁsan |
10.113.10c sugebhir viśvā duritā tarema vido ṣu ṇa urviyā gādham adya ||

tvam | purūṇi | ā | bhara | su-aśvyā | yebhiḥ | maṁsai | ni-vacanāni | śaṁsan |
su-gebhiḥ | viśvā | duḥ-itā | tarema | vidaḥ | su | naḥ | urviyā | gādham | adya ||10.113.10||


10.114.01a gharmā samantā trivṛtaṁ vy āpatus tayor juṣṭim mātariśvā jagāma |
10.114.01c divas payo didhiṣāṇā aveṣan vidur devāḥ sahasāmānam arkam ||

gharmā | sam-antā | tri-vṛtam | vi | āpatuḥ | tayoḥ | juṣṭim | mātariśvā | jagāma |
divaḥ | payaḥ | didhiṣāṇāḥ | aveṣan | viduḥ | devāḥ | saha-sāmānam | arkam ||10.114.01||

10.114.02a tisro deṣṭrāya nirṛtīr upāsate dīrghaśruto vi hi jānanti vahnayaḥ |
10.114.02c tāsāṁ ni cikyuḥ kavayo nidānam pareṣu yā guhyeṣu vrateṣu ||

tisraḥ | deṣṭrāya | niḥ-ṛtīḥ | upa | āsate | dīrgha-śrutaḥ | vi | hi | jānanti | vahnayaḥ |
tāsām | ni | cikyuḥ | kavayaḥ | ni-dānam | pareṣu | yāḥ | guhyeṣu | vrateṣu ||10.114.02||

10.114.03a catuṣkapardā yuvatiḥ supeśā ghṛtapratīkā vayunāni vaste |
10.114.03c tasyāṁ suparṇā vṛṣaṇā ni ṣedatur yatra devā dadhire bhāgadheyam ||

catuḥ-kapardā | yuvatiḥ | su-peśāḥ | ghṛta-pratīkā | vayunāni | vaste |
tasyām | su-parṇā | vṛṣaṇā | ni | sedatuḥ | yatra | devāḥ | dadhire | bhāga-dheyam ||10.114.03||

10.114.04a ekaḥ suparṇaḥ sa samudram ā viveśa sa idaṁ viśvam bhuvanaṁ vi caṣṭe |
10.114.04c tam pākena manasāpaśyam antitas tam mātā reḻhi sa u reḻhi mātaram ||

ekaḥ | su-parṇaḥ | saḥ | samudram | ā | viveśa | saḥ | idam | viśvam | bhuvanam | vi | caṣṭe |
tam | pākena | manasā | apaśyam | antitaḥ | tam | mātā | reḻhi | saḥ | ūm̐ iti | reḻhi | mātaram ||10.114.04||

10.114.05a suparṇaṁ viprāḥ kavayo vacobhir ekaṁ santam bahudhā kalpayanti |
10.114.05c chandāṁsi ca dadhato adhvareṣu grahān somasya mimate dvādaśa ||

su-parṇam | viprā | kavayaḥ | vacaḥ-bhiḥ | ekam | santam | bahudhā | kalpayanti |
chandāṁsi | ca | dadhataḥ | adhvareṣu | grahān | somasya | mimate | dvādaśa ||10.114.05||

10.114.06a ṣaṭtriṁśām̐ś ca caturaḥ kalpayantaś chandāṁsi ca dadhata ādvādaśam |
10.114.06c yajñaṁ vimāya kavayo manīṣa ṛksāmābhyām pra rathaṁ vartayanti ||

ṣaṭ-triṁśān | ca | caturaḥ | kalpayantaḥ | chandāṁsi | ca | dadhataḥ | ā-dvādaśam |
yajñam | vi-māya | kavayaḥ | manīṣā | ṛk-sāmābhyām | pra | ratham | vartayanti ||10.114.06||

10.114.07a caturdaśānye mahimāno asya taṁ dhīrā vācā pra ṇayanti sapta |
10.114.07c āpnānaṁ tīrthaṁ ka iha pra vocad yena pathā prapibante sutasya ||

catuḥ-daśa | anye | mahimānaḥ | asya | tam | dhīrāḥ | vācā | pra | nayanti | sapta |
āpnānam | tīrtham | kaḥ | iha | pra | vocat | yena | pathā | pra-pibante | sutasya ||10.114.07||

10.114.08a sahasradhā pañcadaśāny ukthā yāvad dyāvāpṛthivī tāvad it tat |
10.114.08c sahasradhā mahimānaḥ sahasraṁ yāvad brahma viṣṭhitaṁ tāvatī vāk ||

sahasradhā | pañca-daśāni | ukthā | yāvat | dyāvāpṛthivī iti | tāvat | it | tat |
sahasradhā | mahimānaḥ | sahasram | yāvat | brahma | vi-sthitam | tāvatī | vāk ||10.114.08||

10.114.09a kaś chandasāṁ yogam ā veda dhīraḥ ko dhiṣṇyām prati vācam papāda |
10.114.09c kam ṛtvijām aṣṭamaṁ śūram āhur harī indrasya ni cikāya kaḥ svit ||

kaḥ | chandasām | yogam | ā | veda | dhīraḥ | kaḥ | dhiṣṇyām | prati | vācam | papāda |
kam | ṛtvijām | aṣṭamam | śūram | āhuḥ | harī iti | indrasya | ni | cikāya | kaḥ | svit ||10.114.09||

10.114.10a bhūmyā antam pary eke caranti rathasya dhūrṣu yuktāso asthuḥ |
10.114.10c śramasya dāyaṁ vi bhajanty ebhyo yadā yamo bhavati harmye hitaḥ ||

bhūmyāḥ | antam | pari | eke | caranti | rathasya | dhūḥ-su | yuktāsaḥ | asthuḥ |
śramasya | dāyam | vi | bhajanti | ebhyaḥ | yadā | yamaḥ | bhavati | harmye | hitaḥ ||10.114.10||


10.115.01a citra ic chiśos taruṇasya vakṣatho na yo mātarāv apyeti dhātave |
10.115.01c anūdhā yadi jījanad adhā ca nu vavakṣa sadyo mahi dūtyaṁ caran ||

citraḥ | it | śiśoḥ | taruṇasya | vakṣathaḥ | na | yaḥ | mātarau | api-eti | dhātave |
anūdhāḥ | yadi | jījanat | adhā | ca | nu | vavakṣa | sadyaḥ | mahi | dūtyam | caran ||10.115.01||

10.115.02a agnir ha nāma dhāyi dann apastamaḥ saṁ yo vanā yuvate bhasmanā datā |
10.115.02c abhipramurā juhvā svadhvara ino na prothamāno yavase vṛṣā ||

agniḥ | ha | nāma | dhāyi | dan | apaḥ-tamaḥ | sam | yaḥ | vanā | yuvate | bhasmanā | datā |
abhi-pramurā | juhvā | su-adhvaraḥ | inaḥ | na | prothamānaḥ | yavase | vṛṣā ||10.115.02||

10.115.03a taṁ vo viṁ na druṣadaṁ devam andhasa indum prothantam pravapantam arṇavam |
10.115.03c āsā vahniṁ na śociṣā virapśinam mahivrataṁ na sarajantam adhvanaḥ ||

tam | vaḥ | vim | na | dru-sadam | devam | andhasaḥ | indum | prothantam | pra-vapantam | arṇavam |
āsā | vahnim | na | śociṣā | vi-rapśinam | mahi-vratam | na | sarajantam | adhvanaḥ ||10.115.03||

10.115.04a vi yasya te jrayasānasyājara dhakṣor na vātāḥ pari santy acyutāḥ |
10.115.04c ā raṇvāso yuyudhayo na satvanaṁ tritaṁ naśanta pra śiṣanta iṣṭaye ||

vi | yasya | te | jrayasānasya | ajara | dhakṣoḥ | na | vātāḥ | pari | santi | acyutāḥ |
ā | raṇvāsaḥ | yuyudhayaḥ | na | satvanam | tritam | naśanta | pra | śiṣantaḥ | iṣṭaye ||10.115.04||

10.115.05a sa id agniḥ kaṇvatamaḥ kaṇvasakhāryaḥ parasyāntarasya taruṣaḥ |
10.115.05c agniḥ pātu gṛṇato agniḥ sūrīn agnir dadātu teṣām avo naḥ ||

saḥ | it | agniḥ | kaṇva-tamaḥ | kaṇva-sakhā | aryaḥ | parasya | antarasya | taruṣaḥ |
agniḥ | pātu | gṛṇataḥ | agniḥ | sūrīn | agniḥ | dadātu | teṣām | avaḥ | naḥ ||10.115.05||

10.115.06a vājintamāya sahyase supitrya tṛṣu cyavāno anu jātavedase |
10.115.06c anudre cid yo dhṛṣatā varaṁ sate mahintamāya dhanvaned aviṣyate ||

vājin-tamāya | sahyase | su-pitrya | tṛṣu | cyavānaḥ | anu | jāta-vedase |
anudre | cit | yaḥ | dhṛṣatā | varam | sate | mahin-tamāya | dhanvanā | it | aviṣyate ||10.115.06||

10.115.07a evāgnir martaiḥ saha sūribhir vasuḥ ṣṭave sahasaḥ sūnaro nṛbhiḥ |
10.115.07c mitrāso na ye sudhitā ṛtāyavo dyāvo na dyumnair abhi santi mānuṣān ||

eva | agniḥ | martaiḥ | saha | sūri-bhiḥ | vasuḥ | stave | sahasaḥ | sūnaraḥ | nṛ-bhiḥ |
mitrāsaḥ | na | ye | su-dhitāḥ | ṛta-yavaḥ | dyāvaḥ | na | dyumnaiḥ | abhi | santi | mānuṣān ||10.115.07||

10.115.08a ūrjo napāt sahasāvann iti tvopastutasya vandate vṛṣā vāk |
10.115.08c tvāṁ stoṣāma tvayā suvīrā drāghīya āyuḥ prataraṁ dadhānāḥ ||

ūrjaḥ | napāt | sahasā-van | iti | tvā | upa-stutasya | vandate | vṛṣā | vāk |
tvām | stoṣāma | tvayā | su-vīrāḥ | drāghīyaḥ | āyuḥ | pra-taram | dadhānāḥ ||10.115.08||

10.115.09a iti tvāgne vṛṣṭihavyasya putrā upastutāsa ṛṣayo 'vocan |
10.115.09c tām̐ś ca pāhi gṛṇataś ca sūrīn vaṣaḍ vaṣaḻ ity ūrdhvāso anakṣan namo nama ity ūrdhvāso anakṣan ||

iti | tvā | agne | vṛṣṭi-havyasya | putrāḥ | upa-stutāsaḥ | ṛṣayaḥ | avocan |
tān | ca | pāhi | gṛṇataḥ | ca | sūrīn | vaṣaṭ | vaṣaṭ | iti | ūrdhvāsaḥ | anakṣan | namaḥ | namaḥ | iti | ūrdhvāsaḥ | anakṣan ||10.115.09||


10.116.01a pibā somam mahata indriyāya pibā vṛtrāya hantave śaviṣṭha |
10.116.01c piba rāye śavase hūyamānaḥ piba madhvas tṛpad indrā vṛṣasva ||

piba | somam | mahate | indriyāya | piba | vṛtrāya | hantave | śaviṣṭha |
piba | rāye | śavase | hūyamānaḥ | piba | madhvaḥ | tṛpat | indra | ā | vṛṣasva ||10.116.01||

10.116.02a asya piba kṣumataḥ prasthitasyendra somasya varam ā sutasya |
10.116.02c svastidā manasā mādayasvārvācīno revate saubhagāya ||

asya | piba | kṣu-mataḥ | pra-sthitasya | indra | somasya | varam | ā | sutasya |
svasti-dāḥ | manasā | mādayasva | arvācīnaḥ | revate | saubhagāya ||10.116.02||

10.116.03a mamattu tvā divyaḥ soma indra mamattu yaḥ sūyate pārthiveṣu |
10.116.03c mamattu yena varivaś cakartha mamattu yena niriṇāsi śatrūn ||

mamattu | tvā | divyaḥ | somaḥ | indra | mamattu | yaḥ | sūyate | pārthiveṣu |
mamattu | yena | vari-vaḥ | cakartha | mamattu | yena | ni-riṇāsi | śatrūn ||10.116.03||

10.116.04a ā dvibarhā amino yātv indro vṛṣā haribhyām pariṣiktam andhaḥ |
10.116.04c gavy ā sutasya prabhṛtasya madhvaḥ satrā khedām aruśahā vṛṣasva ||

ā | dvi-barhāḥ | aminaḥ | yātu | indraḥ | vṛṣā | hari-bhyām | pari-siktam | andhaḥ |
gavi | ā | sutasya | pra-bhṛtasya | madhvaḥ | satrā | khedām | aruśa-hā | ā | vṛṣasva ||10.116.04||

10.116.05a ni tigmāni bhrāśayan bhrāśyāny ava sthirā tanuhi yātujūnām |
10.116.05c ugrāya te saho balaṁ dadāmi pratītyā śatrūn vigadeṣu vṛśca ||

ni | tigmāni | bhrāśayan | bhrāśyāni | ava | sthirā | tanuhi | yātu-jūnām |
ugrāya | te | sahaḥ | balam | dadāmi | prati-itya | śatrūn | vi-gadeṣu | vṛśca ||10.116.05||

10.116.06a vy arya indra tanuhi śravāṁsy ojaḥ sthireva dhanvano 'bhimātīḥ |
10.116.06c asmadryag vāvṛdhānaḥ sahobhir anibhṛṣṭas tanvaṁ vāvṛdhasva ||

vi | aryaḥ | indra | tanuhi | śravāṁsi | ojaḥ | sthirā-iva | dhanvanaḥ | abhi-mātīḥ |
asmadryak | vavṛdhānaḥ | sahaḥ-bhiḥ | ani-bhṛṣṭaḥ | tanvam | vavṛdhasva ||10.116.06||

10.116.07a idaṁ havir maghavan tubhyaṁ rātam prati samrāḻ ahṛṇāno gṛbhāya |
10.116.07c tubhyaṁ suto maghavan tubhyam pakvo 'ddhīndra piba ca prasthitasya ||

idam | haviḥ | magha-van | tubhyam | rātam | prati | sam-rāṭ | ahṛṇānaḥ | gṛbhāya |
tubhyam | sutaḥ | magha-van | tubhyam | pakvaḥ | addhi | indra | piba | ca | pra-sthitasya ||10.116.07||

10.116.08a addhīd indra prasthitemā havīṁṣi cano dadhiṣva pacatota somam |
10.116.08c prayasvantaḥ prati haryāmasi tvā satyāḥ santu yajamānasya kāmāḥ ||

addhi | it | indra | pra-sthitā | imā | havīṁṣi | canaḥ | dadhiṣva | pacatā | uta | somam |
prayasvantaḥ | prati | haryāmasi | tvā | satyāḥ | santu | yajamānasya | kāmāḥ ||10.116.08||

10.116.09a prendrāgnibhyāṁ suvacasyām iyarmi sindhāv iva prerayaṁ nāvam arkaiḥ |
10.116.09c ayā iva pari caranti devā ye asmabhyaṁ dhanadā udbhidaś ca ||

pra | indrāgni-bhyām | su-vacasyām | iyarmi | sindhau-iva | pra | īrayam | nāvam | arkaiḥ |
ayāḥ-iva | pari | caranti | devāḥ | ye | asmabhyam | dhana-dāḥ | ut-bhidaḥ | ca ||10.116.09||


10.117.01a na vā u devāḥ kṣudham id vadhaṁ dadur utāśitam upa gacchanti mṛtyavaḥ |
10.117.01c uto rayiḥ pṛṇato nopa dasyaty utāpṛṇan marḍitāraṁ na vindate ||

na | vai | ūm̐ iti | devāḥ | kṣudham | it | vadham | daduḥ | uta | āśitam | upa | gacchanti | mṛtyavaḥ |
uto iti | rayiḥ | pṛṇataḥ | na | upa | dasyati | uta | apṛṇan | marḍitāram | na | vindate ||10.117.01||

10.117.02a ya ādhrāya cakamānāya pitvo 'nnavān san raphitāyopajagmuṣe |
10.117.02c sthiram manaḥ kṛṇute sevate puroto cit sa marḍitāraṁ na vindate ||

yaḥ | ādhrāya | cakamānāya | pitvaḥ | anna-vān | san | raphitāya | upa-jagmuṣe |
sthiram | manaḥ | kṛṇute | sevate | purā | uto iti | cit | saḥ | marḍitāram | na | vindate ||10.117.02||

10.117.03a sa id bhojo yo gṛhave dadāty annakāmāya carate kṛśāya |
10.117.03c aram asmai bhavati yāmahūtā utāparīṣu kṛṇute sakhāyam ||

saḥ | it | bhojaḥ | yaḥ | gṛhave | dadāti | anna-kāmāya | carate | kṛśāya |
aram | asmai | bhavati | yāma-hūtau | uta | aparīṣu | kṛṇute | sakhāyam ||10.117.03||

10.117.04a na sa sakhā yo na dadāti sakhye sacābhuve sacamānāya pitvaḥ |
10.117.04c apāsmāt preyān na tad oko asti pṛṇantam anyam araṇaṁ cid icchet ||

na | saḥ | sakhā | yaḥ | na | dadāti | sakhye | sacā-bhuve | sacamānāya | pitvaḥ |
apa | asmāt | pra | iyāt | na | tat | okaḥ | asti | pṛṇantam | anyam | araṇam | cit | icchet ||10.117.04||

10.117.05a pṛṇīyād in nādhamānāya tavyān drāghīyāṁsam anu paśyeta panthām |
10.117.05c o hi vartante rathyeva cakrānyam-anyam upa tiṣṭhanta rāyaḥ ||

pṛṇīyāt | it | nādhamānāya | tavyān | drāghīyāṁsam | anu | paśyeta | panthām |
o iti | hi | vartante | rathyā-iva | cakrā | anyam-anyam | upa | tiṣṭhanta | rāyaḥ ||10.117.05||

10.117.06a mogham annaṁ vindate apracetāḥ satyam bravīmi vadha it sa tasya |
10.117.06c nāryamaṇam puṣyati no sakhāyaṁ kevalāgho bhavati kevalādī ||

mogham | annam | vindate | apra-cetāḥ | satyam | bravīmi | vadhaḥ | it | saḥ | tasya |
na | aryamaṇam | puṣyati | no iti | sakhāyam | kevala-aghaḥ | bhavati | kevala-ādī ||10.117.06||

10.117.07a kṛṣann it phāla āśitaṁ kṛṇoti yann adhvānam apa vṛṅkte caritraiḥ |
10.117.07c vadan brahmāvadato vanīyān pṛṇann āpir apṛṇantam abhi ṣyāt ||

kṛṣan | it | phālaḥ | āśitam | kṛṇoti | yan | adhvānam | apa | vṛṅkte | caritraiḥ |
vadan | brahmā | avadataḥ | vanīyān | pṛṇan | āpiḥ | apṛṇantam | abhi | syāt ||10.117.07||

10.117.08a ekapād bhūyo dvipado vi cakrame dvipāt tripādam abhy eti paścāt |
10.117.08c catuṣpād eti dvipadām abhisvare sampaśyan paṅktīr upatiṣṭhamānaḥ ||

eka-pāt | bhūyaḥ | dvi-padaḥ | vi | cakrame | dvi-pāt | tri-pādam | abhi | eti | paścāt |
catuḥ-pāt | eti | dvi-padām | abhi-svare | sam-paśyan | paṅktīḥ | upa-tiṣṭhamānaḥ ||10.117.08||

10.117.09a samau cid dhastau na samaṁ viviṣṭaḥ sammātarā cin na samaṁ duhāte |
10.117.09c yamayoś cin na samā vīryāṇi jñātī cit santau na samam pṛṇītaḥ ||

samau | cit | hastau | na | samam | viviṣṭaḥ | sam-mātarā | cit | na | samam | duhāte iti |
yamayoḥ | cit | na | samā | vīryāṇi | jñātī iti | cit | santau | na | samam | pṛṇītaḥ ||10.117.09||


10.118.01a agne haṁsi ny atriṇaṁ dīdyan martyeṣv ā |
10.118.01c sve kṣaye śucivrata ||

agne | haṁsi | ni | atriṇam | dīdyat | martyeṣu | ā |
sve | kṣaye | śuci-vrata ||10.118.01||

10.118.02a ut tiṣṭhasi svāhuto ghṛtāni prati modase |
10.118.02c yat tvā srucaḥ samasthiran ||

ut | tiṣṭhasi | su-āhutaḥ | ghṛtāni | prati | modase |
yat | tvā | srucaḥ | sam-asthiran ||10.118.02||

10.118.03a sa āhuto vi rocate 'gnir īḻenyo girā |
10.118.03c srucā pratīkam ajyate ||

saḥ | ā-hutaḥ | vi | rocate | agniḥ | īḻenyaḥ | girā |
srucā | pratīkam | ajyate ||10.118.03||

10.118.04a ghṛtenāgniḥ sam ajyate madhupratīka āhutaḥ |
10.118.04c rocamāno vibhāvasuḥ ||

ghṛtena | agniḥ | sam | ajyate | madhu-pratīkaḥ | ā-hutaḥ |
rocamānaḥ | vibhā-vasuḥ ||10.118.04||

10.118.05a jaramāṇaḥ sam idhyase devebhyo havyavāhana |
10.118.05c taṁ tvā havanta martyāḥ ||

jaramāṇaḥ | sam | idhyase | devebhyaḥ | havya-vāhana |
tam | tvā | havanta | martyāḥ ||10.118.05||

10.118.06a tam martā amartyaṁ ghṛtenāgniṁ saparyata |
10.118.06c adābhyaṁ gṛhapatim ||

tam | martāḥ | amartyam | ghṛtena | agnim | saparyata |
adābhyam | gṛha-patim ||10.118.06||

10.118.07a adābhyena śociṣāgne rakṣas tvaṁ daha |
10.118.07c gopā ṛtasya dīdihi ||

adābhyena | śociṣā | agne | rakṣaḥ | tvam | daha |
gopāḥ | ṛtasya | dīdihi ||10.118.07||

10.118.08a sa tvam agne pratīkena praty oṣa yātudhānyaḥ |
10.118.08c urukṣayeṣu dīdyat ||

saḥ | tvam | agne | pratīkena | prati | oṣa | yātu-dhānyaḥ |
uru-kṣayeṣu | dīdyat ||10.118.08||

10.118.09a taṁ tvā gīrbhir urukṣayā havyavāhaṁ sam īdhire |
10.118.09c yajiṣṭham mānuṣe jane ||

tam | tvā | gīḥ-bhiḥ | uru-kṣayāḥ | havya-vāham | sam | īdhire |
yajiṣṭham | mānuṣe | jane ||10.118.09||


10.119.01a iti vā iti me mano gām aśvaṁ sanuyām iti |
10.119.01c kuvit somasyāpām iti ||

iti | vai | iti | me | manaḥ | gām | aśvam | sanuyām | iti |
kuvit | somasya | apām | iti ||10.119.01||

10.119.02a pra vātā iva dodhata un mā pītā ayaṁsata |
10.119.02c kuvit somasyāpām iti ||

pra | vātāḥ-iva | dodhataḥ | ut | mā | pītāḥ | ayaṁsata |
kuvit | somasya | apām | iti ||10.119.02||

10.119.03a un mā pītā ayaṁsata ratham aśvā ivāśavaḥ |
10.119.03c kuvit somasyāpām iti ||

ut | mā | pītāḥ | ayaṁsata | ratham | aśvāḥ-iva | āśavaḥ |
kuvit | somasya | apām | iti ||10.119.03||

10.119.04a upa mā matir asthita vāśrā putram iva priyam |
10.119.04c kuvit somasyāpām iti ||

upa | mā | matiḥ | asthita | vāśrā | putram-iva | priyam |
kuvit | somasya | apām | iti ||10.119.04||

10.119.05a ahaṁ taṣṭeva vandhuram pary acāmi hṛdā matim |
10.119.05c kuvit somasyāpām iti ||

aham | taṣṭā-iva | vandhuram | pari | acāmi | hṛdā | matim |
kuvit | somasya | apām | iti ||10.119.05||

10.119.06a nahi me akṣipac canācchāntsuḥ pañca kṛṣṭayaḥ |
10.119.06c kuvit somasyāpām iti ||

nahi | me | akṣi-pat | cana | acchāntsuḥ | pañca | kṛṣṭayaḥ |
kuvit | somasya | apām | iti ||10.119.06||

10.119.07a nahi me rodasī ubhe anyam pakṣaṁ cana prati |
10.119.07c kuvit somasyāpām iti ||

nahi | me | rodasī iti | ubhe iti | anyam | pakṣam | cana | prati |
kuvit | somasya | apām | iti ||10.119.07||

10.119.08a abhi dyām mahinā bhuvam abhīmām pṛthivīm mahīm |
10.119.08c kuvit somasyāpām iti ||

abhi | dyām | mahinā | bhuvam | abhi | imām | pṛthivīm | mahīm |
kuvit | somasya | apām | iti ||10.119.08||

10.119.09a hantāham pṛthivīm imāṁ ni dadhānīha veha vā |
10.119.09c kuvit somasyāpām iti ||

hanta | aham | pṛthivīm | imām | ni | dadhāni | iha | vā | iha | vā |
kuvit | somasya | apām | iti ||10.119.09||

10.119.10a oṣam it pṛthivīm ahaṁ jaṅghanānīha veha vā |
10.119.10c kuvit somasyāpām iti ||

oṣam | it | pṛthivīm | aham | jaṅghanāni | iha | vā | iha | vā |
kuvit | somasya | apām | iti ||10.119.10||

10.119.11a divi me anyaḥ pakṣo 'dho anyam acīkṛṣam |
10.119.11c kuvit somasyāpām iti ||

divi | me | anyaḥ | pakṣaḥ | adhaḥ | anyam | acīkṛṣam |
kuvit | somasya | apām | iti ||10.119.11||

10.119.12a aham asmi mahāmaho 'bhinabhyam udīṣitaḥ |
10.119.12c kuvit somasyāpām iti ||

aham | asmi | mahā-mahaḥ | abhi-nabhyam | ut-īṣitaḥ |
kuvit | somasya | apām | iti ||10.119.12||

10.119.13a gṛho yāmy araṁkṛto devebhyo havyavāhanaḥ |
10.119.13c kuvit somasyāpām iti ||

gṛhaḥ | yāmi | aram-kṛtaḥ | devebhyaḥ | havya-vāhanaḥ |
kuvit | somasya | apām | iti ||10.119.13||


10.120.01a tad id āsa bhuvaneṣu jyeṣṭhaṁ yato jajña ugras tveṣanṛmṇaḥ |
10.120.01c sadyo jajñāno ni riṇāti śatrūn anu yaṁ viśve madanty ūmāḥ ||

tat | it | āsa | bhuvaneṣu | jyeṣṭham | yataḥ | jajñe | ugraḥ | tveṣa-nṛmṇaḥ |
sadyaḥ | jajñānaḥ | ni | riṇāti | śatrūn | anu | yam | viśve | madanti | ūmāḥ ||10.120.01||

10.120.02a vāvṛdhānaḥ śavasā bhūryojāḥ śatrur dāsāya bhiyasaṁ dadhāti |
10.120.02c avyanac ca vyanac ca sasni saṁ te navanta prabhṛtā madeṣu ||

vavṛdhānaḥ | śavasā | bhūri-ojāḥ | śatruḥ | dāsāya | bhiyasam | dadhāti |
avi-anat | ca | vi-anat | ca | sasni | sam | te | navanta | pra-bhṛtā | madeṣu ||10.120.02||

10.120.03a tve kratum api vṛñjanti viśve dvir yad ete trir bhavanty ūmāḥ |
10.120.03c svādoḥ svādīyaḥ svādunā sṛjā sam adaḥ su madhu madhunābhi yodhīḥ ||

tve iti | kratum | api | vṛñjanti | viśve | dviḥ | yat | ete | triḥ | bhavanti | ūmāḥ |
svādoḥ | svādīyaḥ | svādunā | sṛja | sam | adaḥ | su | madhu | madhunā | abhi | yodhīḥ ||10.120.03||

10.120.04a iti cid dhi tvā dhanā jayantam made-made anumadanti viprāḥ |
10.120.04c ojīyo dhṛṣṇo sthiram ā tanuṣva mā tvā dabhan yātudhānā durevāḥ ||

iti | cit | hi | tvā | dhanā | jayantam | made-made | anu-madanti | viprāḥ |
ojīyaḥ | dhṛṣṇo iti | sthiram | ā | tanuṣva | mā | tvā | dabhan | yātu-dhānāḥ | duḥ-evāḥ ||10.120.04||

10.120.05a tvayā vayaṁ śāśadmahe raṇeṣu prapaśyanto yudhenyāni bhūri |
10.120.05c codayāmi ta āyudhā vacobhiḥ saṁ te śiśāmi brahmaṇā vayāṁsi ||

tvayā | vayam | śāśadmahe | raṇeṣu | pra-paśyantaḥ | yudhenyāni | bhūri |
codayāmi | te | āyudhā | vacaḥ-bhiḥ | sam | te | śiśāmi | brahmaṇā | vayāṁsi ||10.120.05||

10.120.06a stuṣeyyam puruvarpasam ṛbhvam inatamam āptyam āptyānām |
10.120.06c ā darṣate śavasā sapta dānūn pra sākṣate pratimānāni bhūri ||

stuṣeyyam | puru-varpasam | ṛbhvam | ina-tamam | āptyam | āptyānām |
ā | darṣate | śavasā | sapta | dānūn | pra | sākṣate | prati-mānāni | bhūri ||10.120.06||

10.120.07a ni tad dadhiṣe 'varam paraṁ ca yasminn āvithāvasā duroṇe |
10.120.07c ā mātarā sthāpayase jigatnū ata inoṣi karvarā purūṇi ||

ni | tat | dadhiṣe | avaram | param | ca | yasmin | āvitha | avasā | duroṇe |
ā | mātarā | sthāpayase | jigatnū iti | ataḥ | inoṣi | karvarā | purūṇi ||10.120.07||

10.120.08a imā brahma bṛhaddivo vivaktīndrāya śūṣam agriyaḥ svarṣāḥ |
10.120.08c maho gotrasya kṣayati svarājo duraś ca viśvā avṛṇod apa svāḥ ||

imā | brahma | bṛhat-divaḥ | vivakti | indrāya | śūṣam | agriyaḥ | svaḥ-sāḥ |
mahaḥ | gotrasya | kṣayati | sva-rājaḥ | duraḥ | ca | viśvāḥ | avṛṇot | apa | svāḥ ||10.120.08||

10.120.09a evā mahān bṛhaddivo atharvāvocat svāṁ tanvam indram eva |
10.120.09c svasāro mātaribhvarīr ariprā hinvanti ca śavasā vardhayanti ca ||

eva | mahān | bṛhat-divaḥ | atharvā | avocat | svām | tanvam | indram | eva |
svasāraḥ | mātaribhvarīḥ | ariprāḥ | hinvanti | ca | śavasā | vardhayanti | ca ||10.120.09||


10.121.01a hiraṇyagarbhaḥ sam avartatāgre bhūtasya jātaḥ patir eka āsīt |
10.121.01c sa dādhāra pṛthivīṁ dyām utemāṁ kasmai devāya haviṣā vidhema ||

hiraṇya-garbhaḥ | sam | avartata | agre | bhūtasya | jātaḥ | patiḥ | ekaḥ | āsīt |
saḥ | dādhāra | pṛthivīm | dyām | uta | imām | kasmai | devāya | haviṣā | vidhema ||10.121.01||

10.121.02a ya ātmadā baladā yasya viśva upāsate praśiṣaṁ yasya devāḥ |
10.121.02c yasya chāyāmṛtaṁ yasya mṛtyuḥ kasmai devāya haviṣā vidhema ||

yaḥ | ātma-dāḥ | bala-dāḥ | yasya | viśve | upa-āsate | pra-śiṣam | yasya | devāḥ |
yasya | chāyām | ṛtam | yasya | mṛtyuḥ | kasmai | devāya | haviṣā | vidhema ||10.121.02||

10.121.03a yaḥ prāṇato nimiṣato mahitvaika id rājā jagato babhūva |
10.121.03c ya īśe asya dvipadaś catuṣpadaḥ kasmai devāya haviṣā vidhema ||

yaḥ | prāṇataḥ | ni-miṣataḥ | mahi-tvā | ekaḥ | it | rājā | jagataḥ | babhūva |
yaḥ | īśe | asya | dvi-padaḥ | catuḥ-padaḥ | kasmai | devāya | haviṣā | vidhema ||10.121.03||

10.121.04a yasyeme himavanto mahitvā yasya samudraṁ rasayā sahāhuḥ |
10.121.04c yasyemāḥ pradiśo yasya bāhū kasmai devāya haviṣā vidhema ||

yasya | ime | hima-vantaḥ | mahi-tvā | yasya | samudram | rasayā | saha | āhuḥ |
yasya | imāḥ | pra-diśaḥ | yasya | bāhū iti | kasmai | devāya | haviṣā | vidhema ||10.121.04||

10.121.05a yena dyaur ugrā pṛthivī ca dṛḻhā yena svaḥ stabhitaṁ yena nākaḥ |
10.121.05c yo antarikṣe rajaso vimānaḥ kasmai devāya haviṣā vidhema ||

yena | dyauḥ | ugrā | pṛthivī | ca | dṛḻhā | yena | svariti svaḥ | stabhitam | yena | nākaḥ |
yaḥ | antarikṣe | rajasaḥ | vi-mānaḥ | kasmai | devāya | haviṣā | vidhema ||10.121.05||

10.121.06a yaṁ krandasī avasā tastabhāne abhy aikṣetām manasā rejamāne |
10.121.06c yatrādhi sūra udito vibhāti kasmai devāya haviṣā vidhema ||

yam | krandasī iti | avasā | tastabhāne iti | abhi | aikṣetām | manasā | rejamāne |
yatra | adhi | sūraḥ | ut-itaḥ | vi-bhāti | kasmai | devāya | haviṣā | vidhema ||10.121.06||

10.121.07a āpo ha yad bṛhatīr viśvam āyan garbhaṁ dadhānā janayantīr agnim |
10.121.07c tato devānāṁ sam avartatāsur ekaḥ kasmai devāya haviṣā vidhema ||

āpaḥ | ha | yat | bṛhatīḥ | viśvam | āyan | garbham | dadhānāḥ | janayantīḥ | agnim |
tataḥ | devānām | sam | avartata | asuḥ | ekaḥ | kasmai | devāya | haviṣā | vidhema ||10.121.07||

10.121.08a yaś cid āpo mahinā paryapaśyad dakṣaṁ dadhānā janayantīr yajñam |
10.121.08c yo deveṣv adhi deva eka āsīt kasmai devāya haviṣā vidhema ||

yaḥ | cit | āpaḥ | mahinā | pari-apaśyat | dakṣam | dadhānāḥ | janayantīḥ | yajñam |
yaḥ | deveṣu | adhi | devaḥ | ekaḥ | āsīt | kasmai | devāya | haviṣā | vidhema ||10.121.08||

10.121.09a mā no hiṁsīj janitā yaḥ pṛthivyā yo vā divaṁ satyadharmā jajāna |
10.121.09c yaś cāpaś candrā bṛhatīr jajāna kasmai devāya haviṣā vidhema ||

mā | naḥ | hiṁsīt | janitā | yaḥ | pṛthivyāḥ | yaḥ | vā | divam | satya-dharmā | jajāna |
yaḥ | ca | apaḥ | candrāḥ | bṛhatīḥ | jajāna | kasmai | devāya | haviṣā | vidhema ||10.121.09||

10.121.10a prajāpate na tvad etāny anyo viśvā jātāni pari tā babhūva |
10.121.10c yatkāmās te juhumas tan no astu vayaṁ syāma patayo rayīṇām ||

prajā-pate | na | tvat | etāni | anyaḥ | viśvā | jātāni | pari | tā | babhūva |
yat-kāmāḥ | te | juhumaḥ | tat | naḥ | astu | vayam | syāma | patayaḥ | rayīṇām ||10.121.10||


10.122.01a vasuṁ na citramahasaṁ gṛṇīṣe vāmaṁ śevam atithim adviṣeṇyam |
10.122.01c sa rāsate śurudho viśvadhāyaso 'gnir hotā gṛhapatiḥ suvīryam ||

vasum | na | citra-mahasam | gṛṇīṣe | vāmam | śevam | atithim | adviṣeṇyam |
saḥ | rāsate | śurudhaḥ | viśva-dhāyasaḥ | agniḥ | hotā | gṛha-patiḥ | su-vīryam ||10.122.01||

10.122.02a juṣāṇo agne prati harya me vaco viśvāni vidvān vayunāni sukrato |
10.122.02c ghṛtanirṇig brahmaṇe gātum eraya tava devā ajanayann anu vratam ||

juṣāṇaḥ | agne | prati | harya | me | vacaḥ | viśvāni | vidvān | vayunāni | sukrato iti su-krato |
ghṛta-nirnik | brahmaṇe | gātum | ā | īraya | tava | devāḥ | ajanayan | anu | vratam ||10.122.02||

10.122.03a sapta dhāmāni pariyann amartyo dāśad dāśuṣe sukṛte māmahasva |
10.122.03c suvīreṇa rayiṇāgne svābhuvā yas ta ānaṭ samidhā taṁ juṣasva ||

sapta | dhāmāni | pari-yan | amartyaḥ | dāśat | dāśuṣe | su-kṛte | mamahasva |
su-vīreṇa | rayiṇā | agne | su-ābhuvā | yaḥ | te | ānaṭ | sam-idhā | tam | juṣasva ||10.122.03||

10.122.04a yajñasya ketum prathamam purohitaṁ haviṣmanta īḻate sapta vājinam |
10.122.04c śṛṇvantam agniṁ ghṛtapṛṣṭham ukṣaṇam pṛṇantaṁ devam pṛṇate suvīryam ||

yajñasya | ketum | prathamam | puraḥ-hitam | haviṣmantaḥ | īḻate | sapta | vājinam |
śṛṇvantam | agnim | ghṛta-pṛṣṭham | ukṣaṇam | pṛṇantam | devam | pṛṇate | su-vīryam ||10.122.04||

10.122.05a tvaṁ dūtaḥ prathamo vareṇyaḥ sa hūyamāno amṛtāya matsva |
10.122.05c tvām marjayan maruto dāśuṣo gṛhe tvāṁ stomebhir bhṛgavo vi rurucuḥ ||

tvam | dūtaḥ | prathamaḥ | vareṇyaḥ | saḥ | hūyamānaḥ | amṛtāya | matsva |
tvām | marjayan | marutaḥ | dāśuṣaḥ | gṛhe | tvām | stomebhiḥ | bhṛgavaḥ | vi | rirucuḥ ||10.122.05||

10.122.06a iṣaṁ duhan sudughāṁ viśvadhāyasaṁ yajñapriye yajamānāya sukrato |
10.122.06c agne ghṛtasnus trir ṛtāni dīdyad vartir yajñam pariyan sukratūyase ||

iṣam | duhan | su-dughām | viśva-dhāyasam | yajña-priye | yajamānāya | sukrato iti su-krato |
agre | ghṛta-snuḥ | triḥ | ṛtāni | dīdyat | vartiḥ | yajñam | pari-yan | sukratu-yase ||10.122.06||

10.122.07a tvām id asyā uṣaso vyuṣṭiṣu dūtaṁ kṛṇvānā ayajanta mānuṣāḥ |
10.122.07c tvāṁ devā mahayāyyāya vāvṛdhur ājyam agne nimṛjanto adhvare ||

tvām | it | asyāḥ | uṣasaḥ | vi-uṣṭiṣu | dūtam | kṛṇvānāḥ | ayajanta | mānuṣāḥ |
tvām | devāḥ | mahayāyyāya | vavṛdhuḥ | ājyam | agne | ni-mṛjantaḥ | adhvare ||10.122.07||

10.122.08a ni tvā vasiṣṭhā ahvanta vājinaṁ gṛṇanto agne vidatheṣu vedhasaḥ |
10.122.08c rāyas poṣaṁ yajamāneṣu dhāraya yūyam pāta svastibhiḥ sadā naḥ ||

ni | tvā | vasiṣṭhāḥ | ahvanta | vājinam | gṛṇantaḥ | agne | vidatheṣu | vedhasaḥ |
rāyaḥ | poṣam | yajamāneṣu | dhāraya | yūyam | pāta | svasti-bhiḥ | sadā | naḥ ||10.122.08||


10.123.01a ayaṁ venaś codayat pṛśnigarbhā jyotirjarāyū rajaso vimāne |
10.123.01c imam apāṁ saṁgame sūryasya śiśuṁ na viprā matibhī rihanti ||

ayam | venaḥ | codayat | pṛśni-garbhāḥ | jyotiḥ-jarāyuḥ | rajasaḥ | vi-māne |
imam | apām | sam-game | sūryasya | śiśum | na | viprāḥ | mati-bhiḥ | rihanti ||10.123.01||

10.123.02a samudrād ūrmim ud iyarti veno nabhojāḥ pṛṣṭhaṁ haryatasya darśi |
10.123.02c ṛtasya sānāv adhi viṣṭapi bhrāṭ samānaṁ yonim abhy anūṣata vrāḥ ||

samudrāt | ūrmim | ut | iyarti | venaḥ | nabhaḥ-jāḥ | pṛṣṭham | haryatasya | darśi |
ṛtasya | sānau | adhi | viṣṭapi | bhrāṭ | samānam | yonim | abhi | anūṣata | vrāḥ ||10.123.02||

10.123.03a samānam pūrvīr abhi vāvaśānās tiṣṭhan vatsasya mātaraḥ sanīḻāḥ |
10.123.03c ṛtasya sānāv adhi cakramāṇā rihanti madhvo amṛtasya vāṇīḥ ||

samānam | pūrvīḥ | abhi | vavaśānāḥ | tiṣṭhan | vatsasya | mātaraḥ | sa-nīḻāḥ |
ṛtasya | sānau | adhi | cakramāṇāḥ | rihanti | madhvaḥ | amṛtasya | vāṇīḥ ||10.123.03||

10.123.04a jānanto rūpam akṛpanta viprā mṛgasya ghoṣam mahiṣasya hi gman |
10.123.04c ṛtena yanto adhi sindhum asthur vidad gandharvo amṛtāni nāma ||

jānantaḥ | rūpam | akṛpanta | viprāḥ | mṛgasya | ghoṣam | mahiṣasya | hi | gman |
ṛtena | yantaḥ | adhi | sindhum | asthuḥ | vidat | gandharvaḥ | amṛtāni | nāma ||10.123.04||

10.123.05a apsarā jāram upasiṣmiyāṇā yoṣā bibharti parame vyoman |
10.123.05c carat priyasya yoniṣu priyaḥ san sīdat pakṣe hiraṇyaye sa venaḥ ||

apsarāḥ | jāram | upa-siṣmiyāṇā | yoṣā | bibharti | parame | vi-oman |
carat | priyasya | yoniṣu | priyaḥ | san | sīdat | pakṣe | hiraṇyaye | saḥ | venaḥ ||10.123.05||

10.123.06a nāke suparṇam upa yat patantaṁ hṛdā venanto abhy acakṣata tvā |
10.123.06c hiraṇyapakṣaṁ varuṇasya dūtaṁ yamasya yonau śakunam bhuraṇyum ||

nāke | su-parṇam | upa | yat | patantam | hṛdā | venantaḥ | abhi | acakṣata | tvā |
hiraṇya-pakṣam | varuṇasya | dūtam | yamasya | yonau | śakunam | bhuraṇyum ||10.123.06||

10.123.07a ūrdhvo gandharvo adhi nāke asthāt pratyaṅ citrā bibhrad asyāyudhāni |
10.123.07c vasāno atkaṁ surabhiṁ dṛśe kaṁ svar ṇa nāma janata priyāṇi ||

ūrdhvaḥ | gandharvaḥ | adhi | nāke | asthāt | pratyaṅ | citrā | bibhrat | asya | āyudhāni |
vasānaḥ | atkam | su-rabhim | dṛśe | kam | svaḥ | na | nāma | janata | priyāṇi ||10.123.07||

10.123.08a drapsaḥ samudram abhi yaj jigāti paśyan gṛdhrasya cakṣasā vidharman |
10.123.08c bhānuḥ śukreṇa śociṣā cakānas tṛtīye cakre rajasi priyāṇi ||

drapsaḥ | samudram | abhi | yat | jigāti | paśyan | gṛdhrasya | cakṣasā | vi-dharman |
bhānuḥ | śukreṇa | śociṣā | cakānaḥ | tṛtīye | cakre | rajasi | priyāṇi ||10.123.08||


10.124.01a imaṁ no agna upa yajñam ehi pañcayāmaṁ trivṛtaṁ saptatantum |
10.124.01c aso havyavāḻ uta naḥ purogā jyog eva dīrghaṁ tama āśayiṣṭhāḥ ||

imam | naḥ | agne | upa | yajñam | ā | ihi | pañca-yāmam | tri-vṛtam | sapta-tantum |
asaḥ | havya-vāṭ | uta | naḥ | puraḥ-gāḥ | jyok | eva | dīrgham | tamaḥ | ā | aśayiṣṭhāḥ ||10.124.01||

10.124.02a adevād devaḥ pracatā guhā yan prapaśyamāno amṛtatvam emi |
10.124.02c śivaṁ yat santam aśivo jahāmi svāt sakhyād araṇīṁ nābhim emi ||

adevāt | devaḥ | pra-catā | guhā | yan | pra-paśyamānaḥ | amṛta-tvam | emi |
śivam | yat | santam | aśivaḥ | jahāmi | svāt | sakhyāt | araṇīm | nābhim | emi ||10.124.02||

10.124.03a paśyann anyasyā atithiṁ vayāyā ṛtasya dhāma vi mime purūṇi |
10.124.03c śaṁsāmi pitre asurāya śevam ayajñiyād yajñiyam bhāgam emi ||

paśyan | anyasyāḥ | atithim | vayāyāḥ | ṛtasya | dhāma | vi | mime | purūṇi |
śaṁsāmi | pitre | asurāya | śevam | ayajñiyāt | yajñiyam | bhāgam | emi ||10.124.03||

10.124.04a bahvīḥ samā akaram antar asminn indraṁ vṛṇānaḥ pitaraṁ jahāmi |
10.124.04c agniḥ somo varuṇas te cyavante paryāvard rāṣṭraṁ tad avāmy āyan ||

bahvīḥ | samāḥ | akaram | antaḥ | asmin | indram | vṛṇānaḥ | pitaram | jahāmi |
agniḥ | somaḥ | varuṇaḥ | te | cyavante | pari-āvart | rāṣṭram | tat | avāmi | ā-yan ||10.124.04||

10.124.05a nirmāyā u tye asurā abhūvan tvaṁ ca mā varuṇa kāmayāse |
10.124.05c ṛtena rājann anṛtaṁ viviñcan mama rāṣṭrasyādhipatyam ehi ||

niḥ-māyāḥ | ūm̐ iti | tye | asurāḥ | abhūvan | tvam | ca | mā | varuṇa | kāmayāse |
ṛtena | rājan | anṛtam | vi-viñcan | mama | rāṣṭrasya | adhi-patyam | ā | ihi ||10.124.05||

10.124.06a idaṁ svar idam id āsa vāmam ayam prakāśa urv antarikṣam |
10.124.06c hanāva vṛtraṁ nirehi soma haviṣ ṭvā santaṁ haviṣā yajāma ||

idam | svaḥ | idam | it | āsa | vāmam | ayam | pra-kāśaḥ | uru | antarikṣam |
hanāva | vṛtram | niḥ-ehi | soma | haviḥ | tvā | santam | haviṣā | yajāma ||10.124.06||

10.124.07a kaviḥ kavitvā divi rūpam āsajad aprabhūtī varuṇo nir apaḥ sṛjat |
10.124.07c kṣemaṁ kṛṇvānā janayo na sindhavas tā asya varṇaṁ śucayo bharibhrati ||

kaviḥ | kavi-tvā | divi | rūpam | ā | asajat | apra-bhūtī | varuṇaḥ | niḥ | apaḥ | sṛjat |
kṣemam | kṛṇvānāḥ | janayaḥ | na | sindhavaḥ | tāḥ | asya | varṇam | śucayaḥ | bharibhrati ||10.124.07||

10.124.08a tā asya jyeṣṭham indriyaṁ sacante tā īm ā kṣeti svadhayā madantīḥ |
10.124.08c tā īṁ viśo na rājānaṁ vṛṇānā bībhatsuvo apa vṛtrād atiṣṭhan ||

tāḥ | asya | jyeṣṭham | indriyam | sacante | tāḥ | īm | ā | kṣeti | svadhayā | madantīḥ |
tāḥ | īm | viśaḥ | na | rājānam | vṛṇānāḥ | bībhatsuvaḥ | apa | vṛtrāt | atiṣṭhan ||10.124.08||

10.124.09a bībhatsūnāṁ sayujaṁ haṁsam āhur apāṁ divyānāṁ sakhye carantam |
10.124.09c anuṣṭubham anu carcūryamāṇam indraṁ ni cikyuḥ kavayo manīṣā ||

bībhatsūnām | sa-yujam | haṁsam | āhuḥ | apām | divyānām | sakhye | carantam |
anu-stubham | anu | carcūryamāṇam | indram | ni | cikyuḥ | kavayaḥ | manīṣā ||10.124.09||


10.125.01a ahaṁ rudrebhir vasubhiś carāmy aham ādityair uta viśvadevaiḥ |
10.125.01c aham mitrāvaruṇobhā bibharmy aham indrāgnī aham aśvinobhā ||

aham | rudrebhiḥ | vasu-bhiḥ | carāmi | aham | ādityaiḥ | uta | viśva-devaiḥ |
aham | mitrāvaruṇā | ubhā | bibharmi | aham | indrāgnī iti | aham | aśvinā | ubhā ||10.125.01||

10.125.02a ahaṁ somam āhanasam bibharmy ahaṁ tvaṣṭāram uta pūṣaṇam bhagam |
10.125.02c ahaṁ dadhāmi draviṇaṁ haviṣmate suprāvye yajamānāya sunvate ||

aham | somam | āhanasam | bibharmi | aham | tvaṣṭāram | uta | pūṣaṇam | bhagam |
aham | dadhāmi | draviṇam | haviṣmate | supra-avye | yajamānāya | sunvate ||10.125.02||

10.125.03a ahaṁ rāṣṭrī saṁgamanī vasūnāṁ cikituṣī prathamā yajñiyānām |
10.125.03c tām mā devā vy adadhuḥ purutrā bhūristhātrām bhūry āveśayantīm ||

aham | rāṣṭrī | sam-gamanī | vasūnām | cikituṣī | prathamā | yajñiyānām |
tām | mā | devāḥ | vi | adadhuḥ | puru-trā | bhūri-sthātrām | bhūri | ā-veśayantīm ||10.125.03||

10.125.04a mayā so annam atti yo vipaśyati yaḥ prāṇiti ya īṁ śṛṇoty uktam |
10.125.04c amantavo māṁ ta upa kṣiyanti śrudhi śruta śraddhivaṁ te vadāmi ||

mayā | saḥ | annam | atti | yaḥ | vi-paśyati | yaḥ | prāṇiti | yaḥ | īm | śṛṇoti | uktam |
amantavaḥ | mām | te | upa | kṣiyanti | śrudhi | śruta | śraddhi-vam | te | vadāmi ||10.125.04||

10.125.05a aham eva svayam idaṁ vadāmi juṣṭaṁ devebhir uta mānuṣebhiḥ |
10.125.05c yaṁ kāmaye taṁ-tam ugraṁ kṛṇomi tam brahmāṇaṁ tam ṛṣiṁ taṁ sumedhām ||

aham | eva | svayam | idam | vadāmi | juṣṭam | devebhiḥ | uta | mānuṣebhiḥ |
yam | kāmaye | tam-tam | ugram | kṛṇomi | tam | brahmāṇam | tam | ṛṣim | tam | su-medhām ||10.125.05||

10.125.06a ahaṁ rudrāya dhanur ā tanomi brahmadviṣe śarave hantavā u |
10.125.06c ahaṁ janāya samadaṁ kṛṇomy ahaṁ dyāvāpṛthivī ā viveśa ||

aham | rudrāya | dhanuḥ | ā | tanomi | brahma-dviṣe | śarave | hantavai | ūm̐ iti |
aham | janāya | sa-madam | kṛṇomi | aham | dyāvāpṛthivī iti | ā | viveśa ||10.125.06||

10.125.07a ahaṁ suve pitaram asya mūrdhan mama yonir apsv antaḥ samudre |
10.125.07c tato vi tiṣṭhe bhuvanānu viśvotāmūṁ dyāṁ varṣmaṇopa spṛśāmi ||

aham | suve | pitaram | asya | mūrdhan | mama | yoniḥ | ap-su | antariti | samudre |
tataḥ | vi | tiṣṭhe | bhuvanā | anu | viśvā | uta | amūm | dyām | varṣmaṇā | upa | spṛśāmi ||10.125.07||

10.125.08a aham eva vāta iva pra vāmy ārabhamāṇā bhuvanāni viśvā |
10.125.08c paro divā para enā pṛthivyaitāvatī mahinā sam babhūva ||

aham | eva | vātaḥ-iva | pra | vāmi | ā-rabhamāṇā | bhuvanāni | viśvā |
paraḥ | divā | paraḥ | enā | pṛthivyā | etāvatī | mahinā | sam | babhūva ||10.125.08||


10.126.01a na tam aṁho na duritaṁ devāso aṣṭa martyam |
10.126.01c sajoṣaso yam aryamā mitro nayanti varuṇo ati dviṣaḥ ||

na | tam | aṁhaḥ | na | duḥ-itam | devāsaḥ | aṣṭa | martyam |
sa-joṣasaḥ | yam | aryamā | mitraḥ | nayanti | varuṇaḥ | ati | dviṣaḥ ||10.126.01||

10.126.02a tad dhi vayaṁ vṛṇīmahe varuṇa mitrāryaman |
10.126.02c yenā nir aṁhaso yūyam pātha nethā ca martyam ati dviṣaḥ ||

tat | hi | vayam | vṛṇīmahe | varuṇa | mitra | aryaman |
yena | niḥ | aṁhasaḥ | yūyam | pātha | netha | ca | martyam | ati | dviṣaḥ ||10.126.02||

10.126.03a te nūnaṁ no 'yam ūtaye varuṇo mitro aryamā |
10.126.03c nayiṣṭhā u no neṣaṇi parṣiṣṭhā u naḥ parṣaṇy ati dviṣaḥ ||

te | nūnam | naḥ | ayam | ūtaye | varuṇaḥ | mitraḥ | aryamā |
nayiṣṭhāḥ | ūm̐ iti | naḥ | neṣaṇi | parṣiṣṭhāḥ | ūm̐ iti | naḥ | parṣaṇi | ati | dviṣaḥ ||10.126.03||

10.126.04a yūyaṁ viśvam pari pātha varuṇo mitro aryamā |
10.126.04c yuṣmākaṁ śarmaṇi priye syāma supraṇītayo 'ti dviṣaḥ ||

yūyam | viśvam | pari | pātha | varuṇaḥ | mitraḥ | aryamā |
yuṣmākam | śarmaṇi | priye | syāma | su-pranītayaḥ | ati | dviṣaḥ ||10.126.04||

10.126.05a ādityāso ati sridho varuṇo mitro aryamā |
10.126.05c ugram marudbhī rudraṁ huvemendram agniṁ svastaye 'ti dviṣaḥ ||

ādityāsaḥ | ati | sridhaḥ | varuṇaḥ | mitraḥ | aryamā |
ugram | marut-bhiḥ | rudram | huvema | indram | agnim | svastaye | ati | dviṣaḥ ||10.126.05||

10.126.06a netāra ū ṣu ṇas tiro varuṇo mitro aryamā |
10.126.06c ati viśvāni duritā rājānaś carṣaṇīnām ati dviṣaḥ ||

netāraḥ | ūm̐ iti | su | naḥ | tiraḥ | varuṇaḥ | mitraḥ | aryamā |
ati | viśvāni | duḥ-itā | rājānaḥ | carṣaṇīnām | ati | dviṣaḥ ||10.126.06||

10.126.07a śunam asmabhyam ūtaye varuṇo mitro aryamā |
10.126.07c śarma yacchantu sapratha ādityāso yad īmahe ati dviṣaḥ ||

śunam | asmabhyam | ūtaye | varuṇaḥ | mitraḥ | aryamā |
śarma | yacchantu | sa-prathaḥ | ādityāsaḥ | yat | īmahe | ati | dviṣaḥ ||10.126.07||

10.126.08a yathā ha tyad vasavo gauryaṁ cit padi ṣitām amuñcatā yajatrāḥ |
10.126.08c evo ṣv asman muñcatā vy aṁhaḥ pra tāry agne prataraṁ na āyuḥ ||

yathā | ha | tyat | vasavaḥ | gauryam | cit | padi | sitām | amuñcata | yajatrāḥ |
evo iti | su | asmat | muñcata | vi | aṁhaḥ | pra | tāri | agne | pra-taram | naḥ | āyuḥ ||10.126.08||


10.127.01a rātrī vy akhyad āyatī purutrā devy akṣabhiḥ |
10.127.01c viśvā adhi śriyo 'dhita ||

rātrī | vi | akhyat | ā-yatī | puru-trā | devī | akṣa-bhiḥ |
viśvāḥ | adhi | śriyaḥ | adhita ||10.127.01||

10.127.02a orv aprā amartyā nivato devy udvataḥ |
10.127.02c jyotiṣā bādhate tamaḥ ||

ā | uru | aprāḥ | amartyā | ni-vataḥ | devī | ut-vataḥ |
jyotiṣā | bādhate | tamaḥ ||10.127.02||

10.127.03a nir u svasāram askṛtoṣasaṁ devy āyatī |
10.127.03c aped u hāsate tamaḥ ||

niḥ | ūm̐ iti | svasāram | akṛta | uṣasam | devī | ā-yatī |
apa | it | ūm̐ iti | hāsate | tamaḥ ||10.127.03||

10.127.04a sā no adya yasyā vayaṁ ni te yāmann avikṣmahi |
10.127.04c vṛkṣe na vasatiṁ vayaḥ ||

sā | naḥ | adya | yasyāḥ | vayam | ni | te | yāman | avikṣmahi |
vṛkṣe | na | vasatim | vayaḥ ||10.127.04||

10.127.05a ni grāmāso avikṣata ni padvanto ni pakṣiṇaḥ |
10.127.05c ni śyenāsaś cid arthinaḥ ||

ni | grāmāsaḥ | avikṣata | ni | pat-vantaḥ | ni | pakṣiṇaḥ |
ni | śyenāsaḥ | cit | arthinaḥ ||10.127.05||

10.127.06a yāvayā vṛkyaṁ vṛkaṁ yavaya stenam ūrmye |
10.127.06c athā naḥ sutarā bhava ||

yavaya | vṛkyam | vṛkam | yavaya | stenam | ūrmye |
atha | naḥ | su-tarā | bhava ||10.127.06||

10.127.07a upa mā pepiśat tamaḥ kṛṣṇaṁ vyaktam asthita |
10.127.07c uṣa ṛṇeva yātaya ||

upa | mā | pepiśat | tamaḥ | kṛṣṇam | vi-aktam | asthita |
uṣaḥ | ṛṇā-iva | yātaya ||10.127.07||

10.127.08a upa te gā ivākaraṁ vṛṇīṣva duhitar divaḥ |
10.127.08c rātri stomaṁ na jigyuṣe ||

upa | te | gāḥ-iva | ā | akaram | vṛṇīṣva | duhitaḥ | divaḥ |
rātri | stomam | na | jigyuṣe ||10.127.08||


10.128.01a mamāgne varco vihaveṣv astu vayaṁ tvendhānās tanvam puṣema |
10.128.01c mahyaṁ namantām pradiśaś catasras tvayādhyakṣeṇa pṛtanā jayema ||

mama | agne | varcaḥ | vi-haveṣu | astu | vayam | tvā | indhānāḥ | tanvam | puṣema |
mahyam | namantām | pra-diśaḥ | catasraḥ | tvayā | adhi-akṣeṇa | pṛtanāḥ | jayema ||10.128.01||

10.128.02a mama devā vihave santu sarva indravanto maruto viṣṇur agniḥ |
10.128.02c mamāntarikṣam urulokam astu mahyaṁ vātaḥ pavatāṁ kāme asmin ||

mama | devāḥ | vi-have | santu | sarve | indra-vantaḥ | marutaḥ | viṣṇuḥ | agniḥ |
mama | antarikṣam | uru-lokam | astu | mahyam | vātaḥ | pavatām | kāme | asmin ||10.128.02||

10.128.03a mayi devā draviṇam ā yajantām mayy āśīr astu mayi devahūtiḥ |
10.128.03c daivyā hotāro vanuṣanta pūrve 'riṣṭāḥ syāma tanvā suvīrāḥ ||

mayi | devāḥ | draviṇam | ā | yajantām | mayi | ā-śīḥ | astu | mayi | deva-hūtiḥ |
daivyāḥ | hotāraḥ | vanuṣanta | pūrve | ariṣṭāḥ | syāma | tanvā | su-vīrāḥ ||10.128.03||

10.128.04a mahyaṁ yajantu mama yāni havyākūtiḥ satyā manaso me astu |
10.128.04c eno mā ni gāṁ katamac canāhaṁ viśve devāso adhi vocatā naḥ ||

mahyam | yajantu | mama | yāni | havyā | ā-kūtiḥ | satyā | manasaḥ | me | astu |
enaḥ | mā | ni | gām | katamat | cana | aham | viśve | devāsaḥ | adhi | vocata | naḥ ||10.128.04||

10.128.05a devīḥ ṣaḻ urvīr uru naḥ kṛṇota viśve devāsa iha vīrayadhvam |
10.128.05c mā hāsmahi prajayā mā tanūbhir mā radhāma dviṣate soma rājan ||

devīḥ | ṣaṭ | urvīḥ | uru | naḥ | kṛṇota | viśve | devāsaḥ | iha | vīrayadhvam |
mā | hāsmahi | pra-jayā | mā | tanūbhiḥ | mā | radhāma | dviṣate | soma | rājan ||10.128.05||

10.128.06a agne manyum pratinudan pareṣām adabdho gopāḥ pari pāhi nas tvam |
10.128.06c pratyañco yantu nigutaḥ punas te 'maiṣāṁ cittam prabudhāṁ vi neśat ||

agne | manyum | prati-nudan | pareṣām | adabdhaḥ | gopāḥ | pari | pāhi | naḥ | tvam |
pratyañcaḥ | yantu | ni-gutaḥ | punariti | te | amā | eṣām | cittam | pra-budhām | vi | neśat ||10.128.06||

10.128.07a dhātā dhātṝṇām bhuvanasya yas patir devaṁ trātāram abhimātiṣāham |
10.128.07c imaṁ yajñam aśvinobhā bṛhaspatir devāḥ pāntu yajamānaṁ nyarthāt ||

dhātā | dhātṝṇām | bhuvanasya | yaḥ | patiḥ | devam | trātāram | abhimāti-saham |
imam | yajñam | aśvinā | ubhā | bṛhaspatiḥ | devāḥ | pāntu | yajamānam | ni-arthāt ||10.128.07||

10.128.08a uruvyacā no mahiṣaḥ śarma yaṁsad asmin have puruhūtaḥ purukṣuḥ |
10.128.08c sa naḥ prajāyai haryaśva mṛḻayendra mā no rīriṣo mā parā dāḥ ||

uru-vyacāḥ | naḥ | mahiṣaḥ | śarma | yaṁsat | asmin | have | puru-hūtaḥ | puru-kṣuḥ |
saḥ | naḥ | pra-jāyai | hari-aśva | mṛḻaya | indra | mā | naḥ | ririṣaḥ | mā | parā | dāḥ ||10.128.08||

10.128.09a ye naḥ sapatnā apa te bhavantv indrāgnibhyām ava bādhāmahe tān |
10.128.09c vasavo rudrā ādityā uparispṛśam mograṁ cettāram adhirājam akran ||

ye | naḥ | sa-patnāḥ | apa | te | bhavantu | indrāgni-bhyām | ava | bādhāmahe | tān |
vasavaḥ | rudrāḥ | ādityāḥ | upari-spṛśam | mā | ugram | cettāram | adhi-rājam | akran ||10.128.09||


10.129.01a nāsad āsīn no sad āsīt tadānīṁ nāsīd rajo no vyomā paro yat |
10.129.01c kim āvarīvaḥ kuha kasya śarmann ambhaḥ kim āsīd gahanaṁ gabhīram ||

na | asat | āsīt | no iti | sat | āsīt | tadānīm | na | āsīt | rajaḥ | no iti | vi-oma | paraḥ | yat |
kim | ā | avarīvariti | kuha | kasya | śarman | ambhaḥ | kim | āsīt | gahanam | gabhīram ||10.129.01||

10.129.02a na mṛtyur āsīd amṛtaṁ na tarhi na rātryā ahna āsīt praketaḥ |
10.129.02c ānīd avātaṁ svadhayā tad ekaṁ tasmād dhānyan na paraḥ kiṁ canāsa ||

na | mṛtyuḥ | āsīt | amṛtam | na | tarhi | na | rātryāḥ | ahnaḥ | āsīt | pra-ketaḥ |
ānīt | avātam | svadhayā | tat | ekam | tasmāt | ha | anyat | na | paraḥ | kim | cana | āsa ||10.129.02||

10.129.03a tama āsīt tamasā gūḻham agre 'praketaṁ salilaṁ sarvam ā idam |
10.129.03c tucchyenābhv apihitaṁ yad āsīt tapasas tan mahinājāyataikam ||

tamaḥ | āsīt | tamasā | gūḻham | agre | apra-ketam | salilam | sarvam | āḥ | idam |
tucchyena | ābhu | api-hitam | yat | āsīt | tapasaḥ | tat | mahinā | ajāyata | ekam ||10.129.03||

10.129.04a kāmas tad agre sam avartatādhi manaso retaḥ prathamaṁ yad āsīt |
10.129.04c sato bandhum asati nir avindan hṛdi pratīṣyā kavayo manīṣā ||

kāmaḥ | tat | agre | sam | avartata | adhi | manasaḥ | retaḥ | prathamam | yat | āsīt |
sataḥ | bandhum | asati | niḥ | avindan | hṛdi | pratīṣyā | kavayaḥ | manīṣā ||10.129.04||

10.129.05a tiraścīno vitato raśmir eṣām adhaḥ svid āsī3d upari svid āsī3t |
10.129.05c retodhā āsan mahimāna āsan svadhā avastāt prayatiḥ parastāt ||

tiraścīnaḥ | vi-tataḥ | raśmiḥ | eṣām | adhaḥ | svit | āsī3t | upari | svit | āsī3t |
retaḥ-dhāḥ | āsan | mahimānaḥ | āsan | svadhā | avastāt | pra-yatiḥ | parastāt ||10.129.05||

10.129.06a ko addhā veda ka iha pra vocat kuta ājātā kuta iyaṁ visṛṣṭiḥ |
10.129.06c arvāg devā asya visarjanenāthā ko veda yata ābabhūva ||

kaḥ | addhā | veda | kaḥ | iha | pra | vocat | kutaḥ | ā-jātā | kutaḥ | iyam | vi-sṛṣṭiḥ |
arvāk | devāḥ | asya | vi-sarjanena | atha | kaḥ | veda | yataḥ | ā-babhūva ||10.129.06||

10.129.07a iyaṁ visṛṣṭir yata ābabhūva yadi vā dadhe yadi vā na |
10.129.07c yo asyādhyakṣaḥ parame vyoman so aṅga veda yadi vā na veda ||

iyam | vi-sṛṣṭiḥ | yataḥ | ā-babhūva | yadi | vā | dadhe | yadi | vā | na |
yaḥ | asya | adhi-akṣaḥ | parame | vi-oman | saḥ | aṅga | veda | yadi | vā | na | veda ||10.129.07||


10.130.01a yo yajño viśvatas tantubhis tata ekaśataṁ devakarmebhir āyataḥ |
10.130.01c ime vayanti pitaro ya āyayuḥ pra vayāpa vayety āsate tate ||

yaḥ | yajñaḥ | viśvataḥ | tantu-bhiḥ | tataḥ | eka-śatam | deva-karmebhiḥ | ā-yataḥ |
ime | vayanti | pitaraḥ | ye | ā-yayuḥ | pra | vaya | apa | vaya | iti | āsate | tate ||10.130.01||

10.130.02a pumām̐ enaṁ tanuta ut kṛṇatti pumān vi tatne adhi nāke asmin |
10.130.02c ime mayūkhā upa sedur ū sadaḥ sāmāni cakrus tasarāṇy otave ||

pumān | enam | tanute | ut | kṛṇatti | pumān | vi | tatne | adhi | nāke | asmin |
ime | mayūkhāḥ | upa | seduḥ | ūm̐ iti | sadaḥ | sāmāni | cakruḥ | tasarāṇi | otave ||10.130.02||

10.130.03a kāsīt pramā pratimā kiṁ nidānam ājyaṁ kim āsīt paridhiḥ ka āsīt |
10.130.03c chandaḥ kim āsīt praügaṁ kim ukthaṁ yad devā devam ayajanta viśve ||

kā | āsīt | pra-mā | prati-mā | kim | ni-dānam | ājyam | kim | āsīt | pari-dhiḥ | kaḥ | āsīt |
chandaḥ | kim | āsīt | praügam | kim | uktham | yat | devāḥ | devam | ayajanta | viśve ||10.130.03||

10.130.04a agner gāyatry abhavat sayugvoṣṇihayā savitā sam babhūva |
10.130.04c anuṣṭubhā soma ukthair mahasvān bṛhaspater bṛhatī vācam āvat ||

agneḥ | gāyatrī | abhavat | sa-yugvā | uṣṇihayā | savitā | sam | babhūva |
anu-stubhā | somaḥ | ukthaiḥ | mahasvān | bṛhaspateḥ | bṛhatī | vācam | āvat ||10.130.04||

10.130.05a virāṇ mitrāvaruṇayor abhiśrīr indrasya triṣṭub iha bhāgo ahnaḥ |
10.130.05c viśvān devāñ jagaty ā viveśa tena cākḷpra ṛṣayo manuṣyāḥ ||

virāṭ | mitrāvaruṇayoḥ | abhi-śrīḥ | indrasya | tri-stup | iha | bhāgaḥ | ahnaḥ |
viśvān | devān | jagatī | ā | viveśa | tena | cākḷpre | ṛṣayaḥ | manuṣyāḥ ||10.130.05||

10.130.06a cākḷpre tena ṛṣayo manuṣyā yajñe jāte pitaro naḥ purāṇe |
10.130.06c paśyan manye manasā cakṣasā tān ya imaṁ yajñam ayajanta pūrve ||

cākḷpre | tena | ṛṣayaḥ | manuṣyāḥ | yajñe | jāte | pitaraḥ | naḥ | purāṇe |
paśyan | manye | manasā | cakṣasā | tān | ye | imam | yajñam | ayajanta | pūrve ||10.130.06||

10.130.07a sahastomāḥ sahachandasa āvṛtaḥ sahapramā ṛṣayaḥ sapta daivyāḥ |
10.130.07c pūrveṣām panthām anudṛśya dhīrā anvālebhire rathyo na raśmīn ||

saha-stomāḥ | saha-chandasaḥ | ā-vṛtaḥ | saha-pramāḥ | ṛṣayaḥ | sapta | daivyāḥ |
pūrveṣām | panthām | anu-dṛśya | dhīrāḥ | anu-ālebhire | rathyaḥ | na | raśmīn ||10.130.07||


10.131.01a apa prāca indra viśvām̐ amitrān apāpāco abhibhūte nudasva |
10.131.01c apodīco apa śūrādharāca urau yathā tava śarman madema ||

apa | prācaḥ | indra | viśvān | amitrān | apa | apācaḥ | abhi-bhūte | nudasva |
apa | udīcaḥ | apa | śūra | adharācaḥ | urau | yathā | tava | śarman | madema ||10.131.01||

10.131.02a kuvid aṅga yavamanto yavaṁ cid yathā dānty anupūrvaṁ viyūya |
10.131.02c ihehaiṣāṁ kṛṇuhi bhojanāni ye barhiṣo namovṛktiṁ na jagmuḥ ||

kuvit | aṅga | yava-mantaḥ | yavam | cit | yathā | dānti | anu-pūrvam | vi-yūya |
iha-iha | eṣām | kṛṇuhi | bhojanāni | ye | barhiṣaḥ | namaḥ-vṛktim | na | jagmuḥ ||10.131.02||

10.131.03a nahi sthūry ṛtuthā yātam asti nota śravo vivide saṁgameṣu |
10.131.03c gavyanta indraṁ sakhyāya viprā aśvāyanto vṛṣaṇaṁ vājayantaḥ ||

nahi | sthūri | ṛtu-thā | yātam | asti | na | uta | śravaḥ | vivide | sam-gameṣu |
gavyantaḥ | indram | sakhyāya | viprāḥ | aśva-yantaḥ | vṛṣaṇam | vāja-yantaḥ ||10.131.03||

10.131.04a yuvaṁ surāmam aśvinā namucāv āsure sacā |
10.131.04c vipipānā śubhas patī indraṁ karmasv āvatam ||

yuvam | surāmam | aśvinā | namucau | āsure | sacā |
vi-pipānā | śubhaḥ | patī iti | indram | karma-su | āvatam ||10.131.04||

10.131.05a putram iva pitarāv aśvinobhendrāvathuḥ kāvyair daṁsanābhiḥ |
10.131.05c yat surāmaṁ vy apibaḥ śacībhiḥ sarasvatī tvā maghavann abhiṣṇak ||

putram-iva | pitarau | aśvinā | ubhā | indra | āvathuḥ | kāvyaiḥ | daṁsanābhiḥ |
yat | surāmam | vi | apibaḥ | śacībhiḥ | sarasvatī | tvā | magha-van | abhiṣṇak ||10.131.05||

10.131.06a indraḥ sutrāmā svavām̐ avobhiḥ sumṛḻīko bhavatu viśvavedāḥ |
10.131.06c bādhatāṁ dveṣo abhayaṁ kṛṇotu suvīryasya patayaḥ syāma ||

indraḥ | su-trāmā | sva-vān | avaḥ-bhiḥ | su-mṛḻīkaḥ | bhavatu | viśva-vedāḥ |
bādhatām | dveṣaḥ | abhayam | kṛṇotu | su-vīryasya | patayaḥ | syāma ||10.131.06||

10.131.07a tasya vayaṁ sumatau yajñiyasyāpi bhadre saumanase syāma |
10.131.07c sa sutrāmā svavām̐ indro asme ārāc cid dveṣaḥ sanutar yuyotu ||

tasya | vayam | su-matau | yajñiyasya | api | bhadre | saumanase | syāma |
saḥ | sutrāmā | sva-vān | indraḥ | asme iti | ārāt | cit | dveṣaḥ | sanuta | yuyotu ||10.131.07||


10.132.01a ījānam id dyaur gūrtāvasur ījānam bhūmir abhi prabhūṣaṇi |
10.132.01c ījānaṁ devāv aśvināv abhi sumnair avardhatām ||

ījānam | it | dyauḥ | gūrta-vasuḥ | ījānam | bhūmiḥ | abhi | pra-bhūṣaṇi |
ījānam | devau | aśvinau | abhi | sumnaiḥ | avardhatām ||10.132.01||

10.132.02a tā vām mitrāvaruṇā dhārayatkṣitī suṣumneṣitatvatā yajāmasi |
10.132.02c yuvoḥ krāṇāya sakhyair abhi ṣyāma rakṣasaḥ ||

tā | vām | mitrāvaruṇā | dhārayatkṣitī iti dhārayat-kṣitī | su-sumnā | iṣitatvatā | yajāmasi |
yuvoḥ | krāṇāya | sakhyaiḥ | abhi | syāma | rakṣasaḥ ||10.132.02||

10.132.03a adhā cin nu yad didhiṣāmahe vām abhi priyaṁ rekṇaḥ patyamānāḥ |
10.132.03c dadvām̐ vā yat puṣyati rekṇaḥ sam v āran nakir asya maghāni ||

adha | cit | nu | yat | dadhiṣāmahe | vām | abhi | priyam | rekṇaḥ | patyamānāḥ |
dadvān | vā | yat | puṣyati | rekṇaḥ | sam | ūm̐ iti | āran | nakiḥ | asya | maghāni ||10.132.03||

10.132.04a asāv anyo asura sūyata dyaus tvaṁ viśveṣāṁ varuṇāsi rājā |
10.132.04c mūrdhā rathasya cākan naitāvatainasāntakadhruk ||

asau | anyaḥ | asura | sūyata | dyauḥ | tvam | viśveṣām | varuṇa | asi | rājā |
mūrdhā | rathasya | cākan | na | etāvatā | enasā | antaka-dhruk ||10.132.04||

10.132.05a asmin sv etac chakapūta eno hite mitre nigatān hanti vīrān |
10.132.05c avor vā yad dhāt tanūṣv avaḥ priyāsu yajñiyāsv arvā ||

asmin | su | etat | śaka-pūte | enaḥ | hite | mitre | ni-gatān | hanti | vīrān |
avoḥ | vā | yat | dhāt | tanūṣu | avaḥ | priyāsu | yajñiyāsu | arvā ||10.132.05||

10.132.06a yuvor hi mātāditir vicetasā dyaur na bhūmiḥ payasā pupūtani |
10.132.06c ava priyā didiṣṭana sūro ninikta raśmibhiḥ ||

yuvoḥ | hi | mātā | aditiḥ | vi-cetasā | dyauḥ | na | bhūmiḥ | payasā | pupūtani |
ava | priyā | didiṣṭana | sūraḥ | ninikta | raśmi-bhiḥ ||10.132.06||

10.132.07a yuvaṁ hy apnarājāv asīdataṁ tiṣṭhad rathaṁ na dhūrṣadaṁ vanarṣadam |
10.132.07c tā naḥ kaṇūkayantīr nṛmedhas tatre aṁhasaḥ sumedhas tatre aṁhasaḥ ||

yuvam | hi | apna-rājau | asīdatam | tiṣṭhat | ratham | na | dhūḥ-sadam | vana-sadam |
tāḥ | naḥ | kaṇūka-yantīḥ | nṛ-medhaḥ | tatre | aṁhasaḥ | su-medhaḥ | tatre | aṁhasaḥ ||10.132.07||


10.133.01a pro ṣv asmai puroratham indrāya śūṣam arcata |
10.133.01c abhīke cid u lokakṛt saṁge samatsu vṛtrahāsmākam bodhi coditā nabhantām anyakeṣāṁ jyākā adhi dhanvasu ||

pro iti | su | asmai | puraḥ-ratham | indrāya | śūṣam | arcata |
abhīke | cit | ūm̐ iti | loka-kṛt | sam-ge | samat-su | vṛtra-hā | asmākam | bodhi | coditā | nabhantām | anyakeṣām | jyākāḥ | adhi | dhanva-su ||10.133.01||

10.133.02a tvaṁ sindhūm̐r avāsṛjo 'dharāco ahann ahim |
10.133.02c aśatrur indra jajñiṣe viśvam puṣyasi vāryaṁ taṁ tvā pari ṣvajāmahe nabhantām anyakeṣāṁ jyākā adhi dhanvasu ||

tvam | sindhūn | ava | asṛjaḥ | adharācaḥ | ahan | ahim |
aśatruḥ | indra | jajñiṣe | viśvam | puṣyasi | vāryam | tam | tvā | pari | svajāmahe | nabhantām | anyakeṣām | jyākāḥ | adhi | dhanva-su ||10.133.02||

10.133.03a vi ṣu viśvā arātayo 'ryo naśanta no dhiyaḥ |
10.133.03c astāsi śatrave vadhaṁ yo na indra jighāṁsati yā te rātir dadir vasu nabhantām anyakeṣāṁ jyākā adhi dhanvasu ||

vi | su | viśvā | arātayaḥ | aryaḥ | naśanta | naḥ | dhiyaḥ |
astā | asi | śatrave | vadham | yaḥ | naḥ | indra | jighāṁsati | yā | te | rātiḥ | dadiḥ | vasu | nabhantām | anyakeṣām | jyākāḥ | adhi | dhanva-su ||10.133.03||

10.133.04a yo na indrābhito jano vṛkāyur ādideśati |
10.133.04c adhaspadaṁ tam īṁ kṛdhi vibādho asi sāsahir nabhantām anyakeṣāṁ jyākā adhi dhanvasu ||

yaḥ | naḥ | indra | abhitaḥ | janaḥ | vṛka-yuḥ | ā-dideśati |
adhaḥ-padam | tam | īm | kṛdhi | vi-bādhaḥ | asi | sasahiḥ | nabhantām | anyakeṣām | jyākāḥ | adhi | dhanva-su ||10.133.04||

10.133.05a yo na indrābhidāsati sanābhir yaś ca niṣṭyaḥ |
10.133.05c ava tasya balaṁ tira mahīva dyaur adha tmanā nabhantām anyakeṣāṁ jyākā adhi dhanvasu ||

yaḥ | naḥ | indra | abhi-dāsati | sa-nābhiḥ | yaḥ | ca | niṣṭyaḥ |
ava | tasya | balam | tira | mahī-iva | dyauḥ | adha | tmanā | nabhantām | anyakeṣām | jyākāḥ | adhi | dhanva-su ||10.133.05||

10.133.06a vayam indra tvāyavaḥ sakhitvam ā rabhāmahe |
10.133.06c ṛtasya naḥ pathā nayāti viśvāni duritā nabhantām anyakeṣāṁ jyākā adhi dhanvasu ||

vayam | indra | tvā-yavaḥ | sakhi-tvam | ā | rabhāmahe |
ṛtasya | naḥ | pathā | naya | ati | viśvāni | duḥ-itā | nabhantām | anyakeṣām | jyākāḥ | adhi | dhanva-su ||10.133.06||

10.133.07a asmabhyaṁ su tvam indra tāṁ śikṣa yā dohate prati varaṁ jaritre |
10.133.07c acchidrodhnī pīpayad yathā naḥ sahasradhārā payasā mahī gauḥ ||

asmabhyam | su | tvam | indra | tām | śikṣa | yā | dohate | prati | varam | jaritre |
acchidra-ūdhnī | pīpayat | yathā | naḥ | sahasra-dhārā | payasā | mahī | gauḥ ||10.133.07||


10.134.01a ubhe yad indra rodasī āpaprāthoṣā iva |
10.134.01c mahāntaṁ tvā mahīnāṁ samrājaṁ carṣaṇīnāṁ devī janitry ajījanad bhadrā janitry ajījanat ||

ubhe iti | yat | indra | rodasī iti | ā-paprātha | uṣāḥ-iva |
mahāntam | tvā | mahīnām | sam-rājam | carṣaṇīnām | devī | janitrī | ajījanat | bhadrā | janitrī | ajījanat ||10.134.01||

10.134.02a ava sma durhaṇāyato martasya tanuhi sthiram |
10.134.02c adhaspadaṁ tam īṁ kṛdhi yo asmām̐ ādideśati devī janitry ajījanad bhadrā janitry ajījanat ||

ava | sma | duḥ-hanāyataḥ | martasya | tanuhi | sthiram |
adhaḥ-padam | tam | īm | kṛdhi | yaḥ | asmān | ā-dideśati | devī | janitrī | ajījanat | bhadrā | janitrī | ajījanat ||10.134.02||

10.134.03a ava tyā bṛhatīr iṣo viśvaścandrā amitrahan |
10.134.03c śacībhiḥ śakra dhūnuhīndra viśvābhir ūtibhir devī janitry ajījanad bhadrā janitry ajījanat ||

ava | tyāḥ | bṛhatīḥ | iṣaḥ | viśva-candrāḥ | amitra-han |
śacībhiḥ | śakra | dhūnuhi | indra | viśvābhiḥ | ūti-bhiḥ | devī | janitrī | ajījanat | bhadrā | janitrī | ajījanat ||10.134.03||

10.134.04a ava yat tvaṁ śatakratav indra viśvāni dhūnuṣe |
10.134.04c rayiṁ na sunvate sacā sahasriṇībhir ūtibhir devī janitry ajījanad bhadrā janitry ajījanat ||

ava | yat | tvam | śata-krato iti śata-krato | indra | viśvāni | dhūnuṣe |
rayim | na | sunvate | sacā | sahasriṇībhiḥ | ūti-bhiḥ | devī | janitrī | ajījanat | bhadrā | janitrī | ajījanat ||10.134.04||

10.134.05a ava svedā ivābhito viṣvak patantu didyavaḥ |
10.134.05c dūrvāyā iva tantavo vy asmad etu durmatir devī janitry ajījanad bhadrā janitry ajījanat ||

ava | svedāḥ-iva | abhitaḥ | viṣvak | patantu | didyavaḥ |
dūrvāyāḥ-iva | tantavaḥ | vi | asmat | etu | duḥ-matiḥ | devī | janitrī | ajījanat | bhadrā | janitrī | ajījanat ||10.134.05||

10.134.06a dīrghaṁ hy aṅkuśaṁ yathā śaktim bibharṣi mantumaḥ |
10.134.06c pūrveṇa maghavan padājo vayāṁ yathā yamo devī janitry ajījanad bhadrā janitry ajījanat ||

dīrgham | hi | aṅkuśam | yathā | śaktim | bibharṣi | mantu-maḥ |
pūrveṇa | magha-van | padā | ajaḥ | vayām | yathā | yamaḥ | devī | janitrī | ajījanat | bhadrā | janitrī | ajījanat ||10.134.06||

10.134.07a nakir devā minīmasi nakir ā yopayāmasi mantraśrutyaṁ carāmasi |
10.134.07c pakṣebhir apikakṣebhir atrābhi saṁ rabhāmahe ||

nakiḥ | devāḥ | minīmasi | nakiḥ | ā | yopayāmasi | mantra-śrutyam | carāmasi |
pakṣebhiḥ | api-kakṣebhiḥ | atra | abhi | sam | rabhāmahe ||10.134.07||


10.135.01a yasmin vṛkṣe supalāśe devaiḥ sampibate yamaḥ |
10.135.01c atrā no viśpatiḥ pitā purāṇām̐ anu venati ||

yasmin | vṛkṣe | su-palāśe | devaiḥ | sam-pibate | yamaḥ |
atra | naḥ | viśpatiḥ | pitā | purāṇān | anu | venati ||10.135.01||

10.135.02a purāṇām̐ anuvenantaṁ carantam pāpayāmuyā |
10.135.02c asūyann abhy acākaśaṁ tasmā aspṛhayam punaḥ ||

purāṇān | anu-venantam | carantam | pāpayā | amuyā |
asūyan | abhi | acākaśam | tasmai | aspṛhayam | punariti ||10.135.02||

10.135.03a yaṁ kumāra navaṁ ratham acakram manasākṛṇoḥ |
10.135.03c ekeṣaṁ viśvataḥ prāñcam apaśyann adhi tiṣṭhasi ||

yam | kumāra | navam | ratham | acakram | manasā | akṛṇoḥ |
eka-īṣam | viśvataḥ | prāñcam | apaśyan | adhi | tiṣṭhasi ||10.135.03||

10.135.04a yaṁ kumāra prāvartayo rathaṁ viprebhyas pari |
10.135.04c taṁ sāmānu prāvartata sam ito nāvy āhitam ||

yam | kumāra | pra | avartayaḥ | ratham | viprebhyaḥ | pari |
tam | sāma | anu | pra | avartata | sam | itaḥ | nāvi | ā-hitam ||10.135.04||

10.135.05a kaḥ kumāram ajanayad rathaṁ ko nir avartayat |
10.135.05c kaḥ svit tad adya no brūyād anudeyī yathābhavat ||

kaḥ | kumāram | ajanayat | ratham | kaḥ | niḥ | avartayat |
kaḥ | svit | tat | adya | naḥ | brūyāt | anu-deyī | yathā | abhavat ||10.135.05||

10.135.06a yathābhavad anudeyī tato agram ajāyata |
10.135.06c purastād budhna ātataḥ paścān nirayaṇaṁ kṛtam ||

yathā | abhavat | anu-deyī | tataḥ | agram | ajāyata |
purastāt | budhnaḥ | ā-tataḥ | paścāt | niḥ-ayanam | kṛtam ||10.135.06||

10.135.07a idaṁ yamasya sādanaṁ devamānaṁ yad ucyate |
10.135.07c iyam asya dhamyate nāḻīr ayaṁ gīrbhiḥ pariṣkṛtaḥ ||

idam | yamasya | sadanam | deva-mānam | yat | ucyate |
iyam | asya | dhamyate | nāḻīḥ | ayam | gīḥ-bhiḥ | pari-kṛtaḥ ||10.135.07||


10.136.01a keśy agniṁ keśī viṣaṁ keśī bibharti rodasī |
10.136.01c keśī viśvaṁ svar dṛśe keśīdaṁ jyotir ucyate ||

keśī | agnim | keśī | viṣam | keśī | bibharti | rodasī iti |
keśī | viśvam | svaḥ | dṛśe | keśī | idam | jyotiḥ | ucyate ||10.136.01||

10.136.02a munayo vātaraśanāḥ piśaṅgā vasate malā |
10.136.02c vātasyānu dhrājiṁ yanti yad devāso avikṣata ||

munayaḥ | vāta-raśanāḥ | piśaṅgāḥ | vasate | malā |
vātasya | anu | dhrājim | yanti | yat | devāsaḥ | avikṣata ||10.136.02||

10.136.03a unmaditā mauneyena vātām̐ ā tasthimā vayam |
10.136.03c śarīred asmākaṁ yūyam martāso abhi paśyatha ||

ut-maditāḥ | mauneyena | vātān | ā | tasthima | vayam |
śarīrā | it | asmākam | yūyam | martāsaḥ | abhi | paśyatha ||10.136.03||

10.136.04a antarikṣeṇa patati viśvā rūpāvacākaśat |
10.136.04c munir devasya-devasya saukṛtyāya sakhā hitaḥ ||

antarikṣeṇa | patati | viśvā | rūpā | ava-cākaśat |
muniḥ | devasya-devasya | saukṛtyāya | sakhā | hitaḥ ||10.136.04||

10.136.05a vātasyāśvo vāyoḥ sakhātho deveṣito muniḥ |
10.136.05c ubhau samudrāv ā kṣeti yaś ca pūrva utāparaḥ ||

vātasya | aśvaḥ | vāyoḥ | sakhā | atho iti | deva-iṣitaḥ | muniḥ |
ubhau | samudrau | ā | kṣeti | yaḥ | ca | pūrvaḥ | uta | aparaḥ ||10.136.05||

10.136.06a apsarasāṁ gandharvāṇām mṛgāṇāṁ caraṇe caran |
10.136.06c keśī ketasya vidvān sakhā svādur madintamaḥ ||

apsarasām | gandharvāṇām | mṛgāṇām | caraṇe | caran |
keśī | ketasya | vidvān | sakhā | svāduḥ | madin-tamaḥ ||10.136.06||

10.136.07a vāyur asmā upāmanthat pinaṣṭi smā kunannamā |
10.136.07c keśī viṣasya pātreṇa yad rudreṇāpibat saha ||

vāyur | asmai | upa | amanthat | pinaṣṭi | sma | kunannamā |
keśī | viṣasya | pātreṇa | yat | rudreṇa | apibat | saha ||10.136.07||


10.137.01a uta devā avahitaṁ devā un nayathā punaḥ |
10.137.01c utāgaś cakruṣaṁ devā devā jīvayathā punaḥ ||

uta | devāḥ | ava-hitam | devāḥ | ut | nayatha | punariti |
uta | āgaḥ | cakruṣam | devaḥ | devāḥ | jīvayatha | punariti ||10.137.01||

10.137.02a dvāv imau vātau vāta ā sindhor ā parāvataḥ |
10.137.02c dakṣaṁ te anya ā vātu parānyo vātu yad rapaḥ ||

dvau | imau | vātau | vātaḥ | ā | sindhoḥ | ā | parā-vataḥ |
dakṣam | te | anyaḥ | ā | vātu | parā | anyaḥ | vātu | yat | rapaḥ ||10.137.02||

10.137.03a ā vāta vāhi bheṣajaṁ vi vāta vāhi yad rapaḥ |
10.137.03c tvaṁ hi viśvabheṣajo devānāṁ dūta īyase ||

ā | vāta | vāhi | bheṣajam | vi | vāta | vāhi | yat | rapaḥ |
tvam | hi | viśva-bheṣajaḥ | devānām | dūtaḥ | īyase ||10.137.03||

10.137.04a ā tvāgamaṁ śaṁtātibhir atho ariṣṭatātibhiḥ |
10.137.04c dakṣaṁ te bhadram ābhārṣam parā yakṣmaṁ suvāmi te ||

ā | tvā | agamam | śantāti-bhiḥ | atho iti | ariṣṭatāti-bhiḥ |
dakṣam | te | bhadram | ā | abhārṣam | parā | yakṣmam | suvāmi | te ||10.137.04||

10.137.05a trāyantām iha devās trāyatām marutāṁ gaṇaḥ |
10.137.05c trāyantāṁ viśvā bhūtāni yathāyam arapā asat ||

trāyantām | iha | devāḥ | trāyatām | marutām | gaṇaḥ |
trāyantām | viśvā | bhūtāni | yathā | ayam | arapāḥ | asat ||10.137.05||

10.137.06a āpa id vā u bheṣajīr āpo amīvacātanīḥ |
10.137.06c āpaḥ sarvasya bheṣajīs tās te kṛṇvantu bheṣajam ||

āpaḥ | it | vā | ūm̐ iti | bheṣajīḥ | āpaḥ | amīva-cātanīḥ |
āpaḥ | sarvasya | bheṣajīḥ | tāḥ | te | kṛṇvantu | bheṣajam ||10.137.06||

10.137.07a hastābhyāṁ daśaśākhābhyāṁ jihvā vācaḥ purogavī |
10.137.07c anāmayitnubhyāṁ tvā tābhyāṁ tvopa spṛśāmasi ||

hastābhyām | daśa-śākhābhyām | jihvā | vācaḥ | puraḥ-gavī |
anāmayitnu-bhyām | tvā | tābhyām | tvā | upa | spṛśāmasi ||10.137.07||


10.138.01a tava tya indra sakhyeṣu vahnaya ṛtam manvānā vy adardirur valam |
10.138.01c yatrā daśasyann uṣaso riṇann apaḥ kutsāya manmann ahyaś ca daṁsayaḥ ||

tava | tye | indra | sakhyeṣu | vahnayaḥ | ṛtam | manvānāḥ | vi | adardiruḥ | valam |
yatra | daśasyan | uṣasaḥ | riṇan | āpaḥ | kutsāya | manman | ahyaḥ | ca | daṁsayaḥ ||10.138.01||

10.138.02a avāsṛjaḥ prasvaḥ śvañcayo girīn ud āja usrā apibo madhu priyam |
10.138.02c avardhayo vanino asya daṁsasā śuśoca sūrya ṛtajātayā girā ||

ava | asṛjaḥ | pra-svaḥ | śvañcayaḥ | girīn | ut | ājaḥ | usrāḥ | apibaḥ | madhu | priyam |
avardhayaḥ | vaninaḥ | asya | daṁsasā | śuśoca | sūryaḥ | ṛta-jātayā | girā ||10.138.02||

10.138.03a vi sūryo madhye amucad rathaṁ divo vidad dāsāya pratimānam āryaḥ |
10.138.03c dṛḻhāni pipror asurasya māyina indro vy āsyac cakṛvām̐ ṛjiśvanā ||

vi | sūryaḥ | madhye | amucat | ratham | divaḥ | vidat | dāsāya | prati-mānam | āryaḥ |
dṛḻhāni | piproḥ | asurasya | māyinaḥ | indraḥ | vi | āsyat | cakṛ-vān | ṛjiśvanā ||10.138.03||

10.138.04a anādhṛṣṭāni dhṛṣito vy āsyan nidhīm̐r adevām̐ amṛṇad ayāsyaḥ |
10.138.04c māseva sūryo vasu puryam ā dade gṛṇānaḥ śatrūm̐r aśṛṇād virukmatā ||

anādhṛṣṭāni | dhṛṣitaḥ | vi | āsyat | ni-dhīn | adevān | amṛṇat | ayāsyaḥ |
māsā-iva | sūryaḥ | vasu | puryam | ā | dade | gṛṇānaḥ | śatrūn | aśṛṇāt | vi-rukmatā ||10.138.04||

10.138.05a ayuddhaseno vibhvā vibhindatā dāśad vṛtrahā tujyāni tejate |
10.138.05c indrasya vajrād abibhed abhiśnathaḥ prākrāmac chundhyūr ajahād uṣā anaḥ ||

ayuddha-senaḥ | vi-bhvā | vi-bhindatā | dāśat | vṛtra-hā | tujyāni | tejate |
indrasya | vajrāt | abibhet | abhi-śnathaḥ | pra | akrāmat | śundhyūḥ | ajahāt | uṣāḥ | anaḥ ||10.138.05||

10.138.06a etā tyā te śrutyāni kevalā yad eka ekam akṛṇor ayajñam |
10.138.06c māsāṁ vidhānam adadhā adhi dyavi tvayā vibhinnam bharati pradhim pitā ||

etā | tyā | te | śrutyāni | kevalā | yat | ekaḥ | ekam | akṛṇoḥ | ayajñam |
māsām | vi-dhānam | adadhāḥ | adhi | dyavi | tvayā | vi-bhinnam | bharati | pra-ghim | pitā ||10.138.06||


10.139.01a sūryaraśmir harikeśaḥ purastāt savitā jyotir ud ayām̐ ajasram |
10.139.01c tasya pūṣā prasave yāti vidvān sampaśyan viśvā bhuvanāni gopāḥ ||

sūrya-raśmiḥ | hari-keśaḥ | purastāt | savitā | jyotiḥ | ut | ayān | ajasram |
tasya | pūṣā | pra-save | yāti | vidvān | sam-paśyan | viśvā | bhuvanāni | gopāḥ ||10.139.01||

10.139.02a nṛcakṣā eṣa divo madhya āsta āpaprivān rodasī antarikṣam |
10.139.02c sa viśvācīr abhi caṣṭe ghṛtācīr antarā pūrvam aparaṁ ca ketum ||

nṛ-cakṣāḥ | eṣaḥ | divaḥ | madhye | āste | āpapri-vān | rodasī iti | antarikṣam |
saḥ | viśvācīḥ | abhi | caṣṭi | ghṛtācīḥ | antarā | pūrvam | aparam | ca | ketum ||10.139.02||

10.139.03a rāyo budhnaḥ saṁgamano vasūnāṁ viśvā rūpābhi caṣṭe śacībhiḥ |
10.139.03c deva iva savitā satyadharmendro na tasthau samare dhanānām ||

rāyaḥ | budhnaḥ | sam-gamanaḥ | vasūnām | viśvā | rūpā | abhi | caṣṭe | śacībhiḥ |
devaḥ-iva | savitā | satya-dharmā | indraḥ | na | tasthau | sam-are | dhanānām ||10.139.03||

10.139.04a viśvāvasuṁ soma gandharvam āpo dadṛśuṣīs tad ṛtenā vy āyan |
10.139.04c tad anvavaid indro rārahāṇa āsām pari sūryasya paridhīm̐r apaśyat ||

viśva-vasum | soma | gandharvam | āpaḥ | dadṛśuṣīḥ | tat | ṛtena | vi | āyan |
tat | anu-avait | indraḥ | rarahāṇaḥ | āsām | pari | sūryasya | pari-dhīn | apaśyat ||10.139.04||

10.139.05a viśvāvasur abhi tan no gṛṇātu divyo gandharvo rajaso vimānaḥ |
10.139.05c yad vā ghā satyam uta yan na vidma dhiyo hinvāno dhiya in no avyāḥ ||

viśva-vasuḥ | abhi | tat | naḥ | gṛṇātu | divyaḥ | gandharvaḥ | rajasaḥ | vi-mānaḥ |
yat | vā | gha | satyam | uta | yat | na | vidma | dhiyaḥ | hinvānaḥ | dhiyaḥ | it | naḥ | avyāḥ ||10.139.05||

10.139.06a sasnim avindac caraṇe nadīnām apāvṛṇod duro aśmavrajānām |
10.139.06c prāsāṁ gandharvo amṛtāni vocad indro dakṣam pari jānād ahīnām ||

sasnim | avindat | caraṇe | nadīnām | apa | avṛṇot | duraḥ | aśma-vrajānām |
pra | āsām | gandharvaḥ | amṛtāni | vocat | indraḥ | dakṣam | pari | jānāt | ahīnām ||10.139.06||


10.140.01a agne tava śravo vayo mahi bhrājante arcayo vibhāvaso |
10.140.01c bṛhadbhāno śavasā vājam ukthyaṁ dadhāsi dāśuṣe kave ||

agne | tava | śravaḥ | vayaḥ | mahi | bhrājante | arcayaḥ | vibhāvaso iti vibhā-vaso |
bṛhadbhāno iti bṛhat-bhāno | śavasā | vājam | ukthyam | dadhāsi | dāśuṣe | kave ||10.140.01||

10.140.02a pāvakavarcāḥ śukravarcā anūnavarcā ud iyarṣi bhānunā |
10.140.02c putro mātarā vicarann upāvasi pṛṇakṣi rodasī ubhe ||

pāvaka-varcāḥ | śukra-varcāḥ | anūna-varcāḥ | ut | iyarṣi | bhānunā |
putraḥ | mātarā | vi-caran | upa | avasi | pṛṇakṣi | rodasī iti | ubhe iti ||10.140.02||

10.140.03a ūrjo napāj jātavedaḥ suśastibhir mandasva dhītibhir hitaḥ |
10.140.03c tve iṣaḥ saṁ dadhur bhūrivarpasaś citrotayo vāmajātāḥ ||

ūrjaḥ | napāt | jāta-vedaḥ | suśasti-bhiḥ | mandasva | dhīti-bhiḥ | hitaḥ |
tve iti | iṣaḥ | sam | dadhuḥ | bhūri-varpasaḥ | citra-ūtayaḥ | vāma-jātāḥ ||10.140.03||

10.140.04a irajyann agne prathayasva jantubhir asme rāyo amartya |
10.140.04c sa darśatasya vapuṣo vi rājasi pṛṇakṣi sānasiṁ kratum ||

irajyan | agne | prathayasva | jantu-bhiḥ | asme iti | rāyaḥ | amartya |
saḥ | darśatasya | vapuṣaḥ | vi | rājasi | pṛṇakṣi | sānasim | kratum ||10.140.04||

10.140.05a iṣkartāram adhvarasya pracetasaṁ kṣayantaṁ rādhaso mahaḥ |
10.140.05c rātiṁ vāmasya subhagām mahīm iṣaṁ dadhāsi sānasiṁ rayim ||

iṣkartāram | adhvarasya | pra-cetasam | kṣayantam | rādhasaḥ | mahaḥ |
rātim | vāmasya | su-bhagām | mahīm | iṣam | dadhāsi | sānasim | rayim ||10.140.05||

10.140.06a ṛtāvānam mahiṣaṁ viśvadarśatam agniṁ sumnāya dadhire puro janāḥ |
10.140.06c śrutkarṇaṁ saprathastamaṁ tvā girā daivyam mānuṣā yugā ||

ṛta-vānam | mahiṣam | viśva-darśatam | agnim | sumnāya | dadhire | puraḥ | janāḥ |
śrut-karṇam | saprathaḥ-tamam | tvā | girā | daivyam | mānuṣā | yugā ||10.140.06||


10.141.01a agne acchā vadeha naḥ pratyaṅ naḥ sumanā bhava |
10.141.01c pra no yaccha viśas pate dhanadā asi nas tvam ||

agne | accha | vada | iha | naḥ | pratyaṅ | naḥ | su-manāḥ | bhava |
pra | naḥ | yaccha | viśaḥ | pate | dhana-dāḥ | asi | naḥ | tvam ||10.141.01||

10.141.02a pra no yacchatv aryamā pra bhagaḥ pra bṛhaspatiḥ |
10.141.02c pra devāḥ prota sūnṛtā rāyo devī dadātu naḥ ||

pra | naḥ | yacchatu | aryamā | pra | bhagaḥ | pra | bṛhaspatiḥ |
pra | devāḥ | pra | uta | sūnṛtā | rāyaḥ | devī | dadātu | naḥ ||10.141.02||

10.141.03a somaṁ rājānam avase 'gniṁ gīrbhir havāmahe |
10.141.03c ādityān viṣṇuṁ sūryam brahmāṇaṁ ca bṛhaspatim ||

somam | rājānam | avase | agnim | gīḥ-bhiḥ | havāmahe |
ādityān | viṣṇum | sūryam | brahmāṇam | ca | bṛhaspatim ||10.141.03||

10.141.04a indravāyū bṛhaspatiṁ suhaveha havāmahe |
10.141.04c yathā naḥ sarva ij janaḥ saṁgatyāṁ sumanā asat ||

indravāyū iti | bṛhaspatim | su-havā | iha | havāmahe |
yathā | naḥ | sarvaḥ | it | janaḥ | sam-gatyām | su-manāḥ | asat ||10.141.04||

10.141.05a aryamaṇam bṛhaspatim indraṁ dānāya codaya |
10.141.05c vātaṁ viṣṇuṁ sarasvatīṁ savitāraṁ ca vājinam ||

aryamaṇam | bṛhaspatim | indram | dānāya | codaya |
vātam | viṣṇum | sarasvatīm | savitāram | ca | vājinam ||10.141.05||

10.141.06a tvaṁ no agne agnibhir brahma yajñaṁ ca vardhaya |
10.141.06c tvaṁ no devatātaye rāyo dānāya codaya ||

tvam | naḥ | agne | agni-bhiḥ | brahma | yajñam | ca | vardhaya |
tvam | naḥ | deva-tātaye | rāyaḥ | dānāya | codaya ||10.141.06||


10.142.01a ayam agne jaritā tve abhūd api sahasaḥ sūno nahy anyad asty āpyam |
10.142.01c bhadraṁ hi śarma trivarūtham asti ta āre hiṁsānām apa didyum ā kṛdhi ||

ayam | agne | jaritā | tve iti | abhūt | api | sahasaḥ | sūno iti | nahi | anyat | asti | āpyam |
bhadram | hi | śarma | tri-varūtham | asti | te | āre | hiṁsānām | apa | didyum | ā | kṛdhi ||10.142.01||

10.142.02a pravat te agne janimā pitūyataḥ sācīva viśvā bhuvanā ny ṛñjase |
10.142.02c pra saptayaḥ pra saniṣanta no dhiyaḥ puraś caranti paśupā iva tmanā ||

pra-vat | te | agne | janima | pitu-yataḥ | sācī-iva | viśvā | bhuvanā | ni | ṛñjase |
pra | saptayaḥ | pra | saniṣanta | naḥ | dhiyaḥ | puraḥ | caranti | paśu-pāḥ-iva | tmanā ||10.142.02||

10.142.03a uta vā u pari vṛṇakṣi bapsad bahor agna ulapasya svadhāvaḥ |
10.142.03c uta khilyā urvarāṇām bhavanti mā te hetiṁ taviṣīṁ cukrudhāma ||

uta | vā | ūm̐ iti | pari | vṛṇakṣi | bapsat | bahoḥ | agne | ulapasya | svadhā-vaḥ |
uta | khilyāḥ | urvarāṇām | bhavanti | mā | te | hetim | taviṣīm | cukrudhāma ||10.142.03||

10.142.04a yad udvato nivato yāsi bapsat pṛthag eṣi pragardhinīva senā |
10.142.04c yadā te vāto anuvāti śocir vapteva śmaśru vapasi pra bhūma ||

yat | ut-vataḥ | ni-vataḥ | yāsi | bapsat | pṛthak | eṣi | pragardhinī-iva | senā |
yadā | te | vātaḥ | anu-vāti | śociḥ | vaptā-iva | śmaśru | vapasi | pra | bhūma ||10.142.04||

10.142.05a praty asya śreṇayo dadṛśra ekaṁ niyānam bahavo rathāsaḥ |
10.142.05c bāhū yad agne anumarmṛjāno nyaṅṅ uttānām anveṣi bhūmim ||

prati | asya | śreṇayaḥ | dadṛśre | ekam | ni-yānam | bahavaḥ | rathāsaḥ |
bāhū iti | yat | agne | anu-marmṛjānaḥ | nyaṅ | uttānām | anu-eṣi | bhūmim ||10.142.05||

10.142.06a ut te śuṣmā jihatām ut te arcir ut te agne śaśamānasya vājāḥ |
10.142.06c uc chvañcasva ni nama vardhamāna ā tvādya viśve vasavaḥ sadantu ||

ut | te | śuṣmāḥ | jihatām | ut | te | arciḥ | ut | te | agne | śaśamānasya | vājāḥ |
ut | śvañcasva | ni | nama | vardhamānaḥ | ā | tvā | adya | viśve | vasavaḥ | sadantu ||10.142.06||

10.142.07a apām idaṁ nyayanaṁ samudrasya niveśanam |
10.142.07c anyaṁ kṛṇuṣvetaḥ panthāṁ tena yāhi vaśām̐ anu ||

apām | idam | ni-ayanam | samudrasya | ni-veśanam |
anyam | kṛṇuṣva | itaḥ | panthām | tena | yāhi | vaśān | anu ||10.142.07||

10.142.08a āyane te parāyaṇe dūrvā rohantu puṣpiṇīḥ |
10.142.08c hradāś ca puṇḍarīkāṇi samudrasya gṛhā ime ||

ā-ayane | te | parā-ayane | dūrvāḥ | rohantu | puṣpiṇīḥ |
hradāḥ | ca | puṇḍarīkāṇi | samudrasya | gṛhāḥ | ime ||10.142.08||


10.143.01a tyaṁ cid atrim ṛtajuram artham aśvaṁ na yātave |
10.143.01c kakṣīvantaṁ yadī punā rathaṁ na kṛṇutho navam ||

tyam | cit | atrim | ṛta-juram | artham | aśvam | na | yātave |
kakṣīvantam | yadi | punariti | ratham | na | kṛṇuthaḥ | navam ||10.143.01||

10.143.02a tyaṁ cid aśvaṁ na vājinam areṇavo yam atnata |
10.143.02c dṛḻhaṁ granthiṁ na vi ṣyatam atriṁ yaviṣṭham ā rajaḥ ||

tyam | cit | aśvam | na | vājinam | areṇavaḥ | yam | atnata |
dṛḻham | granthim | na | vi | syatam | atrim | yaviṣṭham | ā | rajaḥ ||10.143.02||

10.143.03a narā daṁsiṣṭhāv atraye śubhrā siṣāsataṁ dhiyaḥ |
10.143.03c athā hi vāṁ divo narā puna stomo na viśase ||

narā | daṁsiṣṭhau | atraye | śubhrā | sisāsatam | dhiyaḥ |
atha | hi | vām | divaḥ | narā | punariti | stomaḥ | na | viśase ||10.143.03||

10.143.04a cite tad vāṁ surādhasā rātiḥ sumatir aśvinā |
10.143.04c ā yan naḥ sadane pṛthau samane parṣatho narā ||

cite | tat | vām | su-rādhasā | rātiḥ | su-matiḥ | aśvinā |
ā | yat | naḥ | sadane | pṛthau | samane | parṣathaḥ | narā ||10.143.04||

10.143.05a yuvam bhujyuṁ samudra ā rajasaḥ pāra īṅkhitam |
10.143.05c yātam acchā patatribhir nāsatyā sātaye kṛtam ||

yuvam | bhujyum | samudre | ā | rajasaḥ | pāre | īṅkhitam |
yātam | accha | patatri-bhiḥ | nāsatyā | sātaye | kṛtam ||10.143.05||

10.143.06a ā vāṁ sumnaiḥ śaṁyū iva maṁhiṣṭhā viśvavedasā |
10.143.06c sam asme bhūṣataṁ narotsaṁ na pipyuṣīr iṣaḥ ||

ā | vām | sumnaiḥ | śaṁyū iveti śaṁyū-iva | maṁhiṣṭhā | viśva-vedasā |
sam | asme iti | bhūṣatam | narā | utsam | na | pipyuṣīḥ | iṣaḥ ||10.143.06||


10.144.01a ayaṁ hi te amartya indur atyo na patyate |
10.144.01c dakṣo viśvāyur vedhase ||

ayam | hi | te | amartyaḥ | induḥ | atyaḥ | na | patyate |
dakṣaḥ | viśva-āyuḥ | vedhase ||10.144.01||

10.144.02a ayam asmāsu kāvya ṛbhur vajro dāsvate |
10.144.02c ayam bibharty ūrdhvakṛśanam madam ṛbhur na kṛtvyam madam ||

ayam | asmāsu | kāvyaḥ | ṛbhuḥ | vajraḥ | dāsvate |
ayam | bibharti | ūrdhva-kṛśanam | madam | ṛbhuḥ | na | kṛtvyam | madam ||10.144.02||

10.144.03a ghṛṣuḥ śyenāya kṛtvana āsu svāsu vaṁsagaḥ |
10.144.03c ava dīdhed ahīśuvaḥ ||

ghṛṣuḥ | śyenāya | kṛtvane | āsu | svāsu | vaṁsagaḥ |
ava | dīdhet | ahīśuvaḥ ||10.144.03||

10.144.04a yaṁ suparṇaḥ parāvataḥ śyenasya putra ābharat |
10.144.04c śatacakraṁ yo 'hyo vartaniḥ ||

yam | su-parṇaḥ | parā-vataḥ | śyenasya | putraḥ | ā | abharat |
śata-cakram | yaḥ | ahyaḥ | vartaniḥ ||10.144.04||

10.144.05a yaṁ te śyenaś cārum avṛkam padābharad aruṇam mānam andhasaḥ |
10.144.05c enā vayo vi tāry āyur jīvasa enā jāgāra bandhutā ||

yam | te | śyenaḥ | cārum | avṛkam | padā | ā | abharat | aruṇam | mānam | andhasaḥ |
enā | vayaḥ | vi | tāri | āyuḥ | jīvase | enā | jāgāra | bandhutā ||10.144.05||

10.144.06a evā tad indra indunā deveṣu cid dhārayāte mahi tyajaḥ |
10.144.06c kratvā vayo vi tāry āyuḥ sukrato kratvāyam asmad ā sutaḥ ||

eva | tat | indraḥ | indunā | deveṣu | cit | dhārayāte | mahi | tyajaḥ |
kratvā | vayaḥ | vi | tāri | āyuḥ | sukrato iti su-krato | kratvā | ayam | asmat | ā | sutaḥ ||10.144.06||


10.145.01a imāṁ khanāmy oṣadhiṁ vīrudham balavattamām |
10.145.01c yayā sapatnīm bādhate yayā saṁvindate patim ||

imām | khanāmi | oṣadhim | vīrudham | balavat-tamām |
yayā | sa-patnīm | bādhate | yayā | sam-vindate | patim ||10.145.01||

10.145.02a uttānaparṇe subhage devajūte sahasvati |
10.145.02c sapatnīm me parā dhama patim me kevalaṁ kuru ||

uttāna-parṇe | su-bhage | deva-jūte | sahasvati |
sa-patnīm | me | parā | dhama | patim | me | kevalam | kuru ||10.145.02||

10.145.03a uttarāham uttara uttared uttarābhyaḥ |
10.145.03c athā sapatnī yā mamādharā sādharābhyaḥ ||

ut-tarā | aham | ut-tare | ut-tarā | it | ut-tarābhyaḥ |
atha | sa-patnī | yā | mama | adharā | sā | adharābhyaḥ ||10.145.03||

10.145.04a nahy asyā nāma gṛbhṇāmi no asmin ramate jane |
10.145.04c parām eva parāvataṁ sapatnīṁ gamayāmasi ||

nahi | asyāḥ | nāma | gṛbhṇāmi | no iti | asmin | ramate | jane |
parām | eva | parā-vatam | sa-patnīm | gamayāmasi ||10.145.04||

10.145.05a aham asmi sahamānātha tvam asi sāsahiḥ |
10.145.05c ubhe sahasvatī bhūtvī sapatnīm me sahāvahai ||

aham | asmi | sahamānā | atha | tvam | asi | sasahiḥ |
ubhe iti | sahasvatī iti | bhūtvī | sa-ptnīm | me | sahāvahai ||10.145.05||

10.145.06a upa te 'dhāṁ sahamānām abhi tvādhāṁ sahīyasā |
10.145.06c mām anu pra te mano vatsaṁ gaur iva dhāvatu pathā vār iva dhāvatu ||

upa | te | adhām | sahamānām | abhi | tvā | adhām | sahīyasā |
mām | anu | pra | te | manaḥ | vatsam | gauḥ-iva | dhāvatu | pathā | vāḥ-iva | dhāvatu ||10.145.06||


10.146.01a araṇyāny araṇyāny asau yā preva naśyasi |
10.146.01c kathā grāmaṁ na pṛcchasi na tvā bhīr iva vindatī3m̐ ||

araṇyāni | araṇyānyi | asau | yā | pra-iva | naśyasi |
kathā | grāmam | na | pṛcchasi | na | tvā | bhīḥ-iva | vindatī3m̐ ||10.146.01||

10.146.02a vṛṣāravāya vadate yad upāvati ciccikaḥ |
10.146.02c āghāṭibhir iva dhāvayann araṇyānir mahīyate ||

vṛṣā-ravāya | vadate | yat | upa-avati | ciccikaḥ |
āghāṭibhiḥ-iva | dhāvayan | araṇyāniḥ | mahīyate ||10.146.02||

10.146.03a uta gāva ivādanty uta veśmeva dṛśyate |
10.146.03c uto araṇyāniḥ sāyaṁ śakaṭīr iva sarjati ||

uta | gāvaḥ-iva | adanti | uta | veśma-iva | dṛśyate |
uto iti | araṇyāniḥ | sāyam | śakaṭīḥ-iva | sarjati ||10.146.03||

10.146.04a gām aṅgaiṣa ā hvayati dārv aṅgaiṣo apāvadhīt |
10.146.04c vasann araṇyānyāṁ sāyam akrukṣad iti manyate ||

gām | aṅga | eṣaḥ | ā | hvayati | dāru | aṅga | eṣaḥ | apa | avadhīt |
vasan | araṇyānyām | sāyam | akrukṣat | iti | manyate ||10.146.04||

10.146.05a na vā araṇyānir hanty anyaś cen nābhigacchati |
10.146.05c svādoḥ phalasya jagdhvāya yathākāmaṁ ni padyate ||

na | vai | araṇyāniḥ | hanti | anyaḥ | ca | it | na | abhi-gacchati |
svādoḥ | phalasya | jagdhvāya | yathā-kāmam | ni | padyate ||10.146.05||

10.146.06a āñjanagandhiṁ surabhim bahvannām akṛṣīvalām |
10.146.06c prāham mṛgāṇām mātaram araṇyānim aśaṁsiṣam ||

āñjana-gandhim | surabhim | bahu-annām | akṛṣi-valām |
pra | aham | mṛgāṇām | mātaram | araṇyānim | aśaṁsiṣam ||10.146.06||


10.147.01a śrat te dadhāmi prathamāya manyave 'han yad vṛtraṁ naryaṁ viver apaḥ |
10.147.01c ubhe yat tvā bhavato rodasī anu rejate śuṣmāt pṛthivī cid adrivaḥ ||

śrat | te | dadhāmi | prathamāya | manyave | ahan | yat | vṛtram | naryam | viveḥ | apaḥ |
ubhe iti | yat | tvā | bhavataḥ | rodasī iti | anu | rejate | śuṣmāt | pṛthivī | cit | adri-vaḥ ||10.147.01||

10.147.02a tvam māyābhir anavadya māyinaṁ śravasyatā manasā vṛtram ardayaḥ |
10.147.02c tvām in naro vṛṇate gaviṣṭiṣu tvāṁ viśvāsu havyāsv iṣṭiṣu ||

tvam | māyābhiḥ | anavadya | māyinam | śravasyatā | manasā | vṛtram | ardaya |
tvām | it | naraḥ | vṛṇate | gaviṣṭiṣu | tvām | viśvāsu | havyāsu | iṣṭiṣu ||10.147.02||

10.147.03a aiṣu cākandhi puruhūta sūriṣu vṛdhāso ye maghavann ānaśur magham |
10.147.03c arcanti toke tanaye pariṣṭiṣu medhasātā vājinam ahraye dhane ||

ā | eṣu | cākandhi | puru-hūta | sūriṣu | vṛdhāsaḥ | ye | magha-van | ānaśuḥ | magham |
arcanti | toke | tanaye | pariṣṭiṣu | medha-sātā | vājinam | ahvaye | dhane ||10.147.03||

10.147.04a sa in nu rāyaḥ subhṛtasya cākanan madaṁ yo asya raṁhyaṁ ciketati |
10.147.04c tvāvṛdho maghavan dāśvadhvaro makṣū sa vājam bharate dhanā nṛbhiḥ ||

saḥ | it | nu | rāyaḥ | su-bhṛtasya | cākanat | madam | yaḥ | asya | raṁhyam | ciketati |
tvā-vṛdhaḥ | magha-van | dāśu-adhvaraḥ | makṣu | saḥ | vājam | bharate | dhanā | nṛ-bhiḥ ||10.147.04||

10.147.05a tvaṁ śardhāya mahinā gṛṇāna uru kṛdhi maghavañ chagdhi rāyaḥ |
10.147.05c tvaṁ no mitro varuṇo na māyī pitvo na dasma dayase vibhaktā ||

tvam | śardhāya | mahinā | gṛṇānaḥ | uru | kṛdhi | magha-van | śagdhi | rāyaḥ |
tvam | naḥ | mitraḥ | varuṇaḥ | na | māyī | pitvaḥ | na | dasma | dayase | vi-bhaktā ||10.147.05||


10.148.01a suṣvāṇāsa indra stumasi tvā sasavāṁsaś ca tuvinṛmṇa vājam |
10.148.01c ā no bhara suvitaṁ yasya cākan tmanā tanā sanuyāma tvotāḥ ||

susvānāsaḥ | indra | stumasi | tvā | sasa-vāṁsaḥ | ca | tuvi-nṛmṇa | vājam |
ā | naḥ | bhara | suvitam | yasya | cākan | tmanā | tanā | sanuyāma | tvā-ūtāḥ ||10.148.01||

10.148.02a ṛṣvas tvam indra śūra jāto dāsīr viśaḥ sūryeṇa sahyāḥ |
10.148.02c guhā hitaṁ guhyaṁ gūḻham apsu bibhṛmasi prasravaṇe na somam ||

ṛṣvaḥ | tvam | indra | śūra | jātaḥ | dāsīḥ | viśaḥ | sūryeṇa | sahyāḥ |
guhā | hitam | guhyam | gūḻham | ap-su | bibhṛmasi | pra-sravaṇe | na | somam ||10.148.02||

10.148.03a aryo vā giro abhy arca vidvān ṛṣīṇāṁ vipraḥ sumatiṁ cakānaḥ |
10.148.03c te syāma ye raṇayanta somair enota tubhyaṁ rathoḻha bhakṣaiḥ ||

aryaḥ | vā | giraḥ | abhi | arca | vidvān | ṛṣīṇām | vipraḥ | su-matim | cakānaḥ |
te | syāma | ye | raṇayanta | somaiḥ | enā | uta | tubhyam | ratha-oḻha | bhakṣaiḥ ||10.148.03||

10.148.04a imā brahmendra tubhyaṁ śaṁsi dā nṛbhyo nṛṇāṁ śūra śavaḥ |
10.148.04c tebhir bhava sakratur yeṣu cākann uta trāyasva gṛṇata uta stīn ||

imā | brahma | indra | tubhyam | śaṁsi | dāḥ | nṛ-bhyaḥ | nṛṇām | śūra | śavaḥ |
tebhiḥ | bhava | sa-kratuḥ | yeṣu | cākan | uta | trāyasva | gṛṇataḥ | uta | stīn ||10.148.04||

10.148.05a śrudhī havam indra śūra pṛthyā uta stavase venyasyārkaiḥ |
10.148.05c ā yas te yoniṁ ghṛtavantam asvār ūrmir na nimnair dravayanta vakvāḥ ||

śrudhi | havam | indra | śūra | pṛthyāḥ | uta | stavate | venyasya | arkaiḥ |
ā | yaḥ | te | yonim | ghṛta-vantam | asvāḥ | ūrmiḥ | na | nimnaiḥ | dravayanta | vakvāḥ ||10.148.05||


10.149.01a savitā yantraiḥ pṛthivīm aramṇād askambhane savitā dyām adṛṁhat |
10.149.01c aśvam ivādhukṣad dhunim antarikṣam atūrte baddhaṁ savitā samudram ||

savitā | yantraiḥ | pṛthivīm | aramṇāt | askambhane | savitā | dyām | adṛṁhat |
aśvam-iva | adhukṣat | dhunim | antarikṣam | atūrte | baddham | savitā | samudram ||10.149.01||

10.149.02a yatrā samudraḥ skabhito vy aunad apāṁ napāt savitā tasya veda |
10.149.02c ato bhūr ata ā utthitaṁ rajo 'to dyāvāpṛthivī aprathetām ||

yatra | samudraḥ | skabhitaḥ | vi | aunat | apām | napāt | savitā | tasya | veda |
ataḥ | bhūḥ | ataḥ | āḥ | utthitam | rajaḥ | ataḥ | dyāvāpṛthivī iti | aprathetām ||10.149.02||

10.149.03a paścedam anyad abhavad yajatram amartyasya bhuvanasya bhūnā |
10.149.03c suparṇo aṅga savitur garutmān pūrvo jātaḥ sa u asyānu dharma ||

paścā | idam | anyat | abhavat | yajatram | amartyasya | bhuvanasya | bhūnā |
su-parṇaḥ | aṅga | savituḥ | garutmān | pūrvaḥ | jātaḥ | saḥ | ūm̐ iti | asya | anu | dharma ||10.149.03||

10.149.04a gāva iva grāmaṁ yūyudhir ivāśvān vāśreva vatsaṁ sumanā duhānā |
10.149.04c patir iva jāyām abhi no ny etu dhartā divaḥ savitā viśvavāraḥ ||

gāvaḥ-iva | grāmam | yūyudhiḥ-iva | aśvān | vāśrā-iva | vatsam | su-manāḥ | duhānā |
patiḥ-iva | jāyām | abhi | naḥ | ni | etu | dhartā | divaḥ | savitā | viśva-vāraḥ ||10.149.04||

10.149.05a hiraṇyastūpaḥ savitar yathā tvāṅgiraso juhve vāje asmin |
10.149.05c evā tvārcann avase vandamānaḥ somasyevāṁśum prati jāgarāham ||

hiraṇya-stūpaḥ | savitaḥ | yathā | tvā | āṅgirasaḥ | juhve | vāje | asmin |
eva | tvā | arcan | avase | vandamānaḥ | somasya-iva | aṁśum | prati | jāgara | aham ||10.149.05||


10.150.01a samiddhaś cit sam idhyase devebhyo havyavāhana |
10.150.01c ādityai rudrair vasubhir na ā gahi mṛḻīkāya na ā gahi ||

sam-iddhaḥ | cit | sam | idhyase | devebhyaḥ | havya-vāhana |
ādityaiḥ | rudraiḥ | vasu-bhiḥ | naḥ | ā | gahi | mṛḻīkāya | naḥ | ā | gahi ||10.150.01||

10.150.02a imaṁ yajñam idaṁ vaco jujuṣāṇa upāgahi |
10.150.02c martāsas tvā samidhāna havāmahe mṛḻīkāya havāmahe ||

imam | yajñam | idam | vacaḥ | jujuṣāṇaḥ | upa-āgahi |
martāsaḥ | tvā | sam-idhāna | havāmahe | mṛḻīkāya | havāmahe ||10.150.02||

10.150.03a tvām u jātavedasaṁ viśvavāraṁ gṛṇe dhiyā |
10.150.03c agne devām̐ ā vaha naḥ priyavratān mṛḻīkāya priyavratān ||

tvām | ūm̐ iti | jāta-vedasam | viśva-vāram | gṛṇe | dhiyā |
agne | devān | ā | vaha | naḥ | priya-vratān | mṛḻīkāya | priya-vratān ||10.150.03||

10.150.04a agnir devo devānām abhavat purohito 'gnim manuṣyā ṛṣayaḥ sam īdhire |
10.150.04c agnim maho dhanasātāv ahaṁ huve mṛḻīkaṁ dhanasātaye ||

agniḥ | devaḥ | devānām | abhavat | puraḥ-hitaḥ | agnim | manuṣyāḥ | ṛṣayaḥ | sam | īdhire |
agnim | mahaḥ | dhana-sātau | aham | huve | mṛḻīkam | dhana-sātaye ||10.150.04||

10.150.05a agnir atrim bharadvājaṁ gaviṣṭhiram prāvan naḥ kaṇvaṁ trasadasyum āhave |
10.150.05c agniṁ vasiṣṭho havate purohito mṛḻīkāya purohitaḥ ||

agniḥ | atrim | bharat-vājam | gaviṣṭhiram | pra | āvat | naḥ | kaṇvam | trasadasyum | ā-have |
agnim | vasiṣṭhaḥ | havate | puraḥ-hitaḥ | mṛḻīkāya | puraḥ-hitaḥ ||10.150.05||


10.151.01a śraddhayāgniḥ sam idhyate śraddhayā hūyate haviḥ |
10.151.01c śraddhām bhagasya mūrdhani vacasā vedayāmasi ||

śraddhayā | agniḥ | sam | idhyate | śraddhayā | hūyate | haviḥ |
śraddhām | bhagasya | mūrdhani | vacasā | ā | vedayāmasi ||10.151.01||

10.151.02a priyaṁ śraddhe dadataḥ priyaṁ śraddhe didāsataḥ |
10.151.02c priyam bhojeṣu yajvasv idam ma uditaṁ kṛdhi ||

priyam | śraddhe | dadataḥ | priyam | śraddhe | didāsataḥ |
priyam | bhojeṣu | yajvasu | idam | me | uditam | kṛdhi ||10.151.02||

10.151.03a yathā devā asureṣu śraddhām ugreṣu cakrire |
10.151.03c evam bhojeṣu yajvasv asmākam uditaṁ kṛdhi ||

yathā | devāḥ | asureṣu | śraddhām | ugreṣu | cakrire |
evam | bhojeṣu | yajva-su | asmākam | uditam | kṛdhi ||10.151.03||

10.151.04a śraddhāṁ devā yajamānā vāyugopā upāsate |
10.151.04c śraddhāṁ hṛdayyayākūtyā śraddhayā vindate vasu ||

śraddhām | devāḥ | yajamānāḥ | vāyu-gopāḥ | upa | āsate |
śraddhām | hṛdayyayā | ā-kūtyā | śraddhayā | vindate | vasu ||10.151.04||

10.151.05a śraddhām prātar havāmahe śraddhām madhyaṁdinam pari |
10.151.05c śraddhāṁ sūryasya nimruci śraddhe śrad dhāpayeha naḥ ||

śraddhām | prātaḥ | havāmahe | śraddhām | madhyandinam | pari |
śraddhām | sūryasya | ni-mruci | śraddhe | śrat | dhāpaya | iha | naḥ ||10.151.05||


10.152.01a śāsa itthā mahām̐ asy amitrakhādo adbhutaḥ |
10.152.01c na yasya hanyate sakhā na jīyate kadā cana ||

śāsaḥ | itthā | mahān | asi | amitra-khādaḥ | adbhutaḥ |
na | yasya | hanyate | sakhā | na | jīyate | kadā | cana ||10.152.01||

10.152.02a svastidā viśas patir vṛtrahā vimṛdho vaśī |
10.152.02c vṛṣendraḥ pura etu naḥ somapā abhayaṁkaraḥ ||

svasti-dāḥ | viśaḥ | patiḥ | vṛtra-hā | vi-mṛdhaḥ | vaśī |
vṛṣā | indraḥ | puraḥ | etu | naḥ | soma-pāḥ | abhayam-karaḥ ||10.152.02||

10.152.03a vi rakṣo vi mṛdho jahi vi vṛtrasya hanū ruja |
10.152.03c vi manyum indra vṛtrahann amitrasyābhidāsataḥ ||

vi | rakṣaḥ | vi | mṛdhaḥ | jahi | vi | vṛtrasya | hanū iti | ruja |
vi | manyum | indra | vṛtra-han | amitrasya | abhi-dāsataḥ ||10.152.03||

10.152.04a vi na indra mṛdho jahi nīcā yaccha pṛtanyataḥ |
10.152.04c yo asmām̐ abhidāsaty adharaṁ gamayā tamaḥ ||

vi | naḥ | indra | mṛdhaḥ | jahi | nīcā | yaccha | pṛtanyataḥ |
yaḥ | asmān | abhi-dāsati | adharam | gamaya | tamaḥ ||10.152.04||

10.152.05a apendra dviṣato mano 'pa jijyāsato vadham |
10.152.05c vi manyoḥ śarma yaccha varīyo yavayā vadham ||

apa | indra | dviṣataḥ | manaḥ | apa | jijyāsataḥ | vadham |
vi | manyoḥ | śarma | yaccha | varīyaḥ | yavaya | vadham ||10.152.05||


10.153.01a īṅkhayantīr apasyuva indraṁ jātam upāsate |
10.153.01c bhejānāsaḥ suvīryam ||

īṅkhayantīḥ | apasyuvaḥ | indram | jātam | upa | āsate |
bhejānāsaḥ | su-vīryam ||10.153.01||

10.153.02a tvam indra balād adhi sahaso jāta ojasaḥ |
10.153.02c tvaṁ vṛṣan vṛṣed asi ||

tvam | indra | balāt | adhi | sahasaḥ | jātaḥ | ojasaḥ |
tvam | vṛṣan | vṛṣā | it | asi ||10.153.02||

10.153.03a tvam indrāsi vṛtrahā vy antarikṣam atiraḥ |
10.153.03c ud dyām astabhnā ojasā ||

tvam | indra | asi | vṛtra-hā | vi | antarikṣam | atiraḥ |
ut | dyām | astabhnāḥ | ojasā ||10.153.03||

10.153.04a tvam indra sajoṣasam arkam bibharṣi bāhvoḥ |
10.153.04c vajraṁ śiśāna ojasā ||

tvam | indra | sa-joṣasam | arkam | bibharṣi | bāhvoḥ |
vajram | śiśānaḥ | ojasā ||10.153.04||

10.153.05a tvam indrābhibhūr asi viśvā jātāny ojasā |
10.153.05c sa viśvā bhuva ābhavaḥ ||

tvam | indra | abhi-bhūḥ | asi | viśvāḥ | jātāni | ojasā |
saḥ | viśvā | bhuvaḥ | ā | abhavaḥ ||10.153.05||


10.154.01a soma ekebhyaḥ pavate ghṛtam eka upāsate |
10.154.01c yebhyo madhu pradhāvati tām̐ś cid evāpi gacchatāt ||

somaḥ | ekebhyaḥ | pavate | ghṛtam | eke | upa | āsate |
yebhyaḥ | madhu | pra-dhāvati | tān | cit | eva | api | gacchatāt ||10.154.01||

10.154.02a tapasā ye anādhṛṣyās tapasā ye svar yayuḥ |
10.154.02c tapo ye cakrire mahas tām̐ś cid evāpi gacchatāt ||

tapasā | ye | anādhṛṣyāḥ | tapasā | ye | svaḥ | yayuḥ |
tapaḥ | ye | cakrire | mahaḥ | tān | cit | eva | api | gacchatāt ||10.154.02||

10.154.03a ye yudhyante pradhaneṣu śūrāso ye tanūtyajaḥ |
10.154.03c ye vā sahasradakṣiṇās tām̐ś cid evāpi gacchatāt ||

ye | yudhyante | pra-dhaneṣu | śūrāsaḥ | ye | tanū-tyajaḥ |
ye | vā | sahasra-dakṣiṇāḥ | tān | cit | eva | api | gacchatāt ||10.154.03||

10.154.04a ye cit pūrva ṛtasāpa ṛtāvāna ṛtāvṛdhaḥ |
10.154.04c pitṝn tapasvato yama tām̐ś cid evāpi gacchatāt ||

ye | cit | pūrve | ṛta-sāpaḥ | ṛta-vānaḥ | ṛta-vṛdhaḥ |
pitṝn | tapasvataḥ | yama | tān | cit | eva | api | gacchatāt ||10.154.04||

10.154.05a sahasraṇīthāḥ kavayo ye gopāyanti sūryam |
10.154.05c ṛṣīn tapasvato yama tapojām̐ api gacchatāt ||

sahasra-nīthāḥ | kavayaḥ | ye | gopāyanti | sūryam |
ṛṣīn | tapasvataḥ | yama | tapaḥ-jān | api | gacchatāt ||10.154.05||


10.155.01a arāyi kāṇe vikaṭe giriṁ gaccha sadānve |
10.155.01c śirimbiṭhasya satvabhis tebhiṣ ṭvā cātayāmasi ||

arāyi | kāṇe | vi-kaṭe | girim | gaccha | sadānve |
śirimbiṭhasya | satva-bhiḥ | tebhiḥ | tvā | cātayāmasi ||10.155.01||

10.155.02a catto itaś cattāmutaḥ sarvā bhrūṇāny āruṣī |
10.155.02c arāyyam brahmaṇas pate tīkṣṇaśṛṇgodṛṣann ihi ||

catto iti | itaḥ | cattā | amutaḥ | sarvā | bhrūṇāni | āruṣī |
arāyyam | brahmaṇaḥ | pate | tīkṣṇa-śṛṅga | ut-ṛṣan | ihi ||10.155.02||

10.155.03a ado yad dāru plavate sindhoḥ pāre apūruṣam |
10.155.03c tad ā rabhasva durhaṇo tena gaccha parastaram ||

adaḥ | yat | dāru | plavate | sindhoḥ | pāre | apuruṣam |
tat | ā | rabhasva | durhano iti duḥ-hano | tena | gaccha | paraḥ-taram ||10.155.03||

10.155.04a yad dha prācīr ajagantoro maṇḍūradhāṇikīḥ |
10.155.04c hatā indrasya śatravaḥ sarve budbudayāśavaḥ ||

yat | ha | prācīḥ | ajaganta | uraḥ | maṇḍūra-dhāṇikīḥ |
hatāḥ | indrasya | śatravaḥ | sarve | budbuda-yāśavaḥ ||10.155.04||

10.155.05a parīme gām aneṣata pary agnim ahṛṣata |
10.155.05c deveṣv akrata śravaḥ ka imām̐ ā dadharṣati ||

pari | ime | gām | aneṣata | pari | agnim | ahṛṣata |
deveṣu | akrata | śravaḥ | kaḥ | imān | ā | dadharṣati ||10.155.05||


10.156.01a agniṁ hinvantu no dhiyaḥ saptim āśum ivājiṣu |
10.156.01c tena jeṣma dhanaṁ-dhanam ||

agnim | hinvantu | naḥ | dhiyaḥ | saptim | āśum-iva | ājiṣu |
tena | jeṣma | dhanam-dhanam ||10.156.01||

10.156.02a yayā gā ākarāmahe senayāgne tavotyā |
10.156.02c tāṁ no hinva maghattaye ||

yayā | gāḥ | ā-karāmahe | senayā | agne | tava | ūtyā |
tām | naḥ | hinva | maghattaye ||10.156.02||

10.156.03a āgne sthūraṁ rayim bhara pṛthuṁ gomantam aśvinam |
10.156.03c aṅdhi khaṁ vartayā paṇim ||

ā | agne | sthūram | rayim | bhara | pṛthum | go-mantam | aśvinam |
aṅdhi | kham | vartaya | paṇim ||10.156.03||

10.156.04a agne nakṣatram ajaram ā sūryaṁ rohayo divi |
10.156.04c dadhaj jyotir janebhyaḥ ||

agne | nakṣatram | ajaram | ā | sūryam | rohayaḥ | divi |
dadhat | jyotiḥ | janebhyaḥ ||10.156.04||

10.156.05a agne ketur viśām asi preṣṭhaḥ śreṣṭha upasthasat |
10.156.05c bodhā stotre vayo dadhat ||

agne | ketuḥ | viśām | asi | preṣṭhaḥ | śreṣṭhaḥ | upastha-sat |
bodha | stotre | vayaḥ | dadhat ||10.156.05||


10.157.01a imā nu kam bhuvanā sīṣadhāmendraś ca viśve ca devāḥ ||

imā | nu | kam | bhuvanā | sīsadhāma | indraḥ | ca | viśve | ca | devāḥ ||10.157.01||

10.157.02a yajñaṁ ca nas tanvaṁ ca prajāṁ cādityair indraḥ saha cīkḷpāti ||

yajñam | ca | naḥ | tanvam | ca | pra-jām | ca | ādityaiḥ | indraḥ | saha | cīkḷpāti ||10.157.02||

10.157.03a ādityair indraḥ sagaṇo marudbhir asmākam bhūtv avitā tanūnām ||

ādityaiḥ | indraḥ | sa-gaṇaḥ | marut-bhiḥ | asmākam | bhūtu | avitā | tanūnām ||10.157.03||

10.157.04a hatvāya devā asurān yad āyan devā devatvam abhirakṣamāṇāḥ ||

hatvāya | devāḥ | asurān | yat | āyan | devāḥ | deva-tvam | abhi-rakṣamāṇāḥ ||10.157.04||

10.157.05a pratyañcam arkam anayañ chacībhir ād it svadhām iṣirām pary apaśyan ||

pratyañcam | arkam | anayan | śacībhiḥ | āt | it | svadhām | iṣirām | pari | apaśyan ||10.157.05||


10.158.01a sūryo no divas pātu vāto antarikṣāt |
10.158.01c agnir naḥ pārthivebhyaḥ ||

sūryaḥ | naḥ | divaḥ | pātu | vātaḥ | antarikṣāt |
agniḥ | naḥ | pārthivebhyaḥ ||10.158.01||

10.158.02a joṣā savitar yasya te haraḥ śataṁ savām̐ arhati |
10.158.02c pāhi no didyutaḥ patantyāḥ ||

joṣa | savitaḥ | yasya | te | haraḥ | śatam | savān | arhati |
pāhi | naḥ | didyutaḥ | patantyāḥ ||10.158.02||

10.158.03a cakṣur no devaḥ savitā cakṣur na uta parvataḥ |
10.158.03c cakṣur dhātā dadhātu naḥ ||

cakṣuḥ | naḥ | devaḥ | savitā | cakṣuḥ | naḥ | uta | parvataḥ |
cakṣuḥ | dhātā | dadhātu | naḥ ||10.158.03||

10.158.04a cakṣur no dhehi cakṣuṣe cakṣur vikhyai tanūbhyaḥ |
10.158.04c saṁ cedaṁ vi ca paśyema ||

cakṣuḥ | naḥ | dhehi | cakṣuṣe | cakṣuḥ | vi-khyai | tanūbhyaḥ |
sam | ca | idam | vi | ca | paśyema ||10.158.04||

10.158.05a susaṁdṛśaṁ tvā vayam prati paśyema sūrya |
10.158.05c vi paśyema nṛcakṣasaḥ ||

su-sandṛśam | tvā | vayam | prati | paśyema | sūrya |
vi | paśyema | nṛ-cakṣasaḥ ||10.158.05||


10.159.01a ud asau sūryo agād ud ayam māmako bhagaḥ |
10.159.01c ahaṁ tad vidvalā patim abhy asākṣi viṣāsahiḥ ||

ut | asau | sūryaḥ | agāt | ut | ayam | māmakaḥ | bhagaḥ |
aham | tat | vidvalā | patim | abhi | āsākṣi | vi-sasahiḥ ||10.159.01||

10.159.02a ahaṁ ketur aham mūrdhāham ugrā vivācanī |
10.159.02c mamed anu kratum patiḥ sehānāyā upācaret ||

aham | ketuḥ | aham | mūrdhā | aham | ugrā | vi-vācanī |
mama | it | anu | kratum | patiḥ | sehānāyāḥ | upa-ācaret ||10.159.02||

10.159.03a mama putrāḥ śatruhaṇo 'tho me duhitā virāṭ |
10.159.03c utāham asmi saṁjayā patyau me śloka uttamaḥ ||

mama | putrāḥ | śatru-hanaḥ | atho iti | me | duhitā | virāṭ |
uta | aham | asmi | sam-jayā | patyau | me | ślokaḥ | ut-tamaḥ ||10.159.03||

10.159.04a yenendro haviṣā kṛtvy abhavad dyumny uttamaḥ |
10.159.04c idaṁ tad akri devā asapatnā kilābhuvam ||

yena | indraḥ | haviṣā | kṛtvī | abhavat | dyumnī | ut-tamaḥ |
idanm | tat | akri | devāḥ | asapatnā | kila | abhuvam ||10.159.04||

10.159.05a asapatnā sapatnaghnī jayanty abhibhūvarī |
10.159.05c āvṛkṣam anyāsāṁ varco rādho astheyasām iva ||

asapatnā | sapatna-ghnī | jayantī | abhi-bhūvarī |
ā | avṛkṣam | anyāsām | varcaḥ | rādhaḥ | astheyasām-iva ||10.159.05||

10.159.06a sam ajaiṣam imā ahaṁ sapatnīr abhibhūvarī |
10.159.06c yathāham asya vīrasya virājāni janasya ca ||

sam | ajaiṣam | imāḥ | aham | sa-patnīḥ | abhi-bhūvarī |
yathā | aham | asya | vīrasya | vi-rājāni | janasya | ca ||10.159.06||


10.160.01a tīvrasyābhivayaso asya pāhi sarvarathā vi harī iha muñca |
10.160.01c indra mā tvā yajamānāso anye ni rīraman tubhyam ime sutāsaḥ ||

tīvrasya | abhi-vayasaḥ | asya | pāhi | sarva-rathā | vi | harī iti | iha | muñca |
indra | mā | tvā | yajamānāsaḥ | anye | ni | rīraman | tubhyam | ime | sutāsaḥ ||10.160.01||

10.160.02a tubhyaṁ sutās tubhyam u sotvāsas tvāṁ giraḥ śvātryā ā hvayanti |
10.160.02c indredam adya savanaṁ juṣāṇo viśvasya vidvām̐ iha pāhi somam ||

tubhyam | sutāḥ | tubhyam | ūm̐ iti | sotvāsaḥ | tvām | giraḥ | śvātryāḥ | ā | hvayanti |
indra | idam | adya | savanam | juṣāṇaḥ | viśvasya | vidvān | iha | pāhi | somam ||10.160.02||

10.160.03a ya uśatā manasā somam asmai sarvahṛdā devakāmaḥ sunoti |
10.160.03c na gā indras tasya parā dadāti praśastam ic cārum asmai kṛṇoti ||

yaḥ | uśatā | manasā | somam | asmai | sarva-hṛdā | deva-kāmaḥ | sunoti |
na | gāḥ | indraḥ | tasya | parā | dadāti | pra-śastam | it | cārum | asmai | kṛṇoti ||10.160.03||

10.160.04a anuspaṣṭo bhavaty eṣo asya yo asmai revān na sunoti somam |
10.160.04c nir aratnau maghavā taṁ dadhāti brahmadviṣo hanty anānudiṣṭaḥ ||

anu-spaṣṭaḥ | bhavati | eṣaḥ | asya | yaḥ | asmai | revān | na | sunoti | somam |
niḥ | aratnau | magha-vā | tam | dadhāti | brahma-dviṣaḥ | hanti | ananu-diṣṭaḥ ||10.160.04||

10.160.05a aśvāyanto gavyanto vājayanto havāmahe tvopagantavā u |
10.160.05c ābhūṣantas te sumatau navāyāṁ vayam indra tvā śunaṁ huvema ||

aśvayantaḥ | gavyantaḥ | vājayantaḥ | havāmahe | tvā | upa-gantavai | ūm̐ iti |
ā-bhūṣantaḥ | te | su-matau | navāyām | vayam | indra | tvā | śunam | huvema ||10.160.05||


10.161.01a muñcāmi tvā haviṣā jīvanāya kam ajñātayakṣmād uta rājayakṣmāt |
10.161.01c grāhir jagrāha yadi vaitad enaṁ tasyā indrāgnī pra mumuktam enam ||

muñcāmi | tvā | haviṣā | jīvanāya | kam | ajñāta-yakṣmāt | uta | rāja-yakṣmāt |
grāhiḥ | jagrāha | yadi | vā | etat | enam | tasyāḥ | indrāgnī iti | pra | mumuktam | enam ||10.161.01||

10.161.02a yadi kṣitāyur yadi vā pareto yadi mṛtyor antikaṁ nīta eva |
10.161.02c tam ā harāmi nirṛter upasthād aspārṣam enaṁ śataśāradāya ||

yadi | kṣita-āyuḥ | yadi | vā | parā-itaḥ | yadi | mṛtyoḥ | antikam | ni-itaḥ | eva |
tam | ā | harāmi | niḥ-ṛteḥ | upa-sthāt | aspārṣam | enam | śata-śāradāya ||10.161.02||

10.161.03a sahasrākṣeṇa śataśāradena śatāyuṣā haviṣāhārṣam enam |
10.161.03c śataṁ yathemaṁ śarado nayātīndro viśvasya duritasya pāram ||

sahasra-akṣeṇa | śata-śāradena | śata-āyuṣā | haviṣā | ā | ahārṣam | enam |
śatam | yathā | imam | śaradaḥ | nayāti | indraḥ | viśvasya | duḥ-itasya | pāram ||10.161.03||

10.161.04a śataṁ jīva śarado vardhamānaḥ śataṁ hemantāñ chatam u vasantān |
10.161.04c śatam indrāgnī savitā bṛhaspatiḥ śatāyuṣā haviṣemam punar duḥ ||

śatam | jīva | śaradaḥ | vardhamānaḥ | śatam | hemantān | śatam | ūm̐ iti | vasantān |
śatam | indrāgnī iti | savitā | bṛhaspatiḥ | śata-āyuṣā | haviṣā | imam | punaḥ | duḥ ||10.161.04||

10.161.05a āhārṣaṁ tvāvidaṁ tvā punar āgāḥ punarnava |
10.161.05c sarvāṅga sarvaṁ te cakṣuḥ sarvam āyuś ca te 'vidam ||

ā | ahārṣam | tvā | avidam | tvā | punaḥ | ā | agāḥ | punaḥ-nava |
sarva-aṅga | sarvam | te | cakṣuḥ | sarvam | āyuḥ | ca | te | avidam ||10.161.05||


10.162.01a brahmaṇāgniḥ saṁvidāno rakṣohā bādhatām itaḥ |
10.162.01c amīvā yas te garbhaṁ durṇāmā yonim āśaye ||

brahmaṇā | agniḥ | sām-vidānaḥ | rakṣaḥ-hā | bādhatām | itaḥ |
amīvā | yaḥ | te | garbham | duḥ-nāmā | yonim | āśaye ||10.162.01||

10.162.02a yas te garbham amīvā durṇāmā yonim āśaye |
10.162.02c agniṣ ṭam brahmaṇā saha niṣ kravyādam anīnaśat ||

yaḥ | te | garbham | amīvā | duḥ-nāmā | yonim | ā-śaye |
agniḥ | tam | brahmaṇā | saha | niḥ | kravya-adam | anīnaśat ||10.162.02||

10.162.03a yas te hanti patayantaṁ niṣatsnuṁ yaḥ sarīsṛpam |
10.162.03c jātaṁ yas te jighāṁsati tam ito nāśayāmasi ||

yaḥ | te | hanti | patayantam | ni-satsnum | yaḥ | sarīsṛpam |
jātam | yaḥ | te | jighāṁsati | tam | itaḥ | nāśayāmasi ||10.162.03||

10.162.04a yas ta ūrū viharaty antarā dampatī śaye |
10.162.04c yoniṁ yo antar āreḻhi tam ito nāśayāmasi ||

yaḥ | te | ūrū iti | vi-harati | antarā | dampatī iti dam-patī | śaye |
yonim | yaḥ | antaḥ | ā-reḻhi | tam | itaḥ | nāśayāmasi ||10.162.04||

10.162.05a yas tvā bhrātā patir bhūtvā jāro bhūtvā nipadyate |
10.162.05c prajāṁ yas te jighāṁsati tam ito nāśayāmasi ||

yaḥ | tvā | bhrātā | patiḥ | bhūtvā | jāraḥ | bhūtvā | ni-padyate |
pra-jām | yaḥ | te | jighāṁsati | tam | itaḥ | nāśayāmasi ||10.162.05||

10.162.06a yas tvā svapnena tamasā mohayitvā nipadyate |
10.162.06c prajāṁ yas te jighāṁsati tam ito nāśayāmasi ||

yaḥ | tvā | svapnena | tamasā | mohayitvā | ni-padyate |
pra-jām | yaḥ | te | jighāṁsati | tam | itaḥ | nāśayāmasi ||10.162.06||


10.163.01a akṣībhyāṁ te nāsikābhyāṁ karṇābhyāṁ chubukād adhi |
10.163.01c yakṣmaṁ śīrṣaṇyam mastiṣkāj jihvāyā vi vṛhāmi te ||

akṣībhyām | te | nāsikābhyām | karṇābhyām | chubukāt | adhi |
yakṣmam | śīrṣaṇyam | mastiṣkāt | jihvāyāḥ | vi | vṛhāmi | te ||10.163.01||

10.163.02a grīvābhyas ta uṣṇihābhyaḥ kīkasābhyo anūkyāt |
10.163.02c yakṣmaṁ doṣaṇyam aṁsābhyām bāhubhyāṁ vi vṛhāmi te ||

grīvābhyaḥ | te | uṣṇihābhyaḥ | kīkasābhyaḥ | anūkyāt |
yakṣmam | doṣaṇyam | aṁsābhyām | bāhu-bhyām | vi | vṛhāmi | te ||10.163.02||

10.163.03a āntrebhyas te gudābhyo vaniṣṭhor hṛdayād adhi |
10.163.03c yakṣmam matasnābhyāṁ yaknaḥ plāśibhyo vi vṛhāmi te ||

āntrebhyaḥ | te | gudābhyaḥ | vaniṣṭhoḥ | hṛdayāt | adhi |
yakṣmam | matasnābhyām | yaknaḥ | plāśi-bhyaḥ | vi | vṛhāmi | te ||10.163.03||

10.163.04a ūrubhyāṁ te aṣṭhīvadbhyām pārṣṇibhyām prapadābhyām |
10.163.04c yakṣmaṁ śroṇibhyām bhāsadād bhaṁsaso vi vṛhāmi te ||

ūru-bhyām | te | aṣṭhīvat-bhyām | pārṣṇi-bhyām | pra-padābhyām |
yakṣmam | śroṇi-bhym | bhāsadāt | bhaṁsasaḥ | vi | vṛhāmi | te ||10.163.04||

10.163.05a mehanād vanaṁkaraṇāl lomabhyas te nakhebhyaḥ |
10.163.05c yakṣmaṁ sarvasmād ātmanas tam idaṁ vi vṛhāmi te ||

mehanāt | vanam-karaṇāt | loma-bhyaḥ | te | nakhebhyaḥ |
yakṣmam | sarvasmāt | ātmanaḥ | tam | idam | vi | vṛhāmi | te ||10.163.05||

10.163.06a aṅgād-aṅgāl lomno-lomno jātam parvaṇi-parvaṇi |
10.163.06c yakṣmaṁ sarvasmād ātmanas tam idaṁ vi vṛhāmi te ||

aṅgāt-aṅgāt | lomnaḥ-lomnaḥ | jātam | parvaṇi-parvaṇi |
yakṣmam | sarvasmāt | ātmanaḥ | tam | idam | vi | vṛhāmi | te ||10.163.06||


10.164.01a apehi manasas pate 'pa krāma paraś cara |
10.164.01c paro nirṛtyā ā cakṣva bahudhā jīvato manaḥ ||

apa | ihi | manasaḥ | pate | apa | krāma | paraḥ | cara |
paraḥ | niḥ-ṛtyai | ā | cakṣva | bahudhā | jīvataḥ | manaḥ ||10.164.01||

10.164.02a bhadraṁ vai varaṁ vṛṇate bhadraṁ yuñjanti dakṣiṇam |
10.164.02c bhadraṁ vaivasvate cakṣur bahutrā jīvato manaḥ ||

bhadram | vai | varam | vṛṇate | bhadram | yuñjanti | dakṣiṇam |
bhadram | vaivasvate | cakṣuḥ | bahu-trā | jīvataḥ | manaḥ ||10.164.02||

10.164.03a yad āśasā niḥśasābhiśasopārima jāgrato yat svapantaḥ |
10.164.03c agnir viśvāny apa duṣkṛtāny ajuṣṭāny āre asmad dadhātu ||

yat | ā-śasā | niḥ-śasā | abhi-śasā | upa-ārima | jāgrataḥ | yat | svapantaḥ |
agniḥ | viśvāni | apa | duḥ-kṛtāni | ajuṣṭāni | āre | asmat | dādhātu ||10.164.03||

10.164.04a yad indra brahmaṇas pate 'bhidrohaṁ carāmasi |
10.164.04c pracetā na āṅgiraso dviṣatām pātv aṁhasaḥ ||

yat | indra | brahmaṇaḥ | pate | abhi-droham | carāmasi |
pra-cetāḥ | naḥ | āṅgirasaḥ | dviṣatām | pātu | aṁhasaḥ ||10.164.04||

10.164.05a ajaiṣmādyāsanāma cābhūmānāgaso vayam |
10.164.05c jāgratsvapnaḥ saṁkalpaḥ pāpo yaṁ dviṣmas taṁ sa ṛcchatu yo no dveṣṭi tam ṛcchatu ||

ajaiṣma | adya | asanāma | ca | abhūma | anāgasaḥ | vayam |
jāgrat-svapnaḥ | sam-kalpaḥ | pāpaḥ | yam | dviṣmaḥ | tam | saḥ | ṛcchatu | yaḥ | naḥ | dveṣṭi | tam | ṛcchatu ||10.164.05||


10.165.01a devāḥ kapota iṣito yad icchan dūto nirṛtyā idam ājagāma |
10.165.01c tasmā arcāma kṛṇavāma niṣkṛtiṁ śaṁ no astu dvipade śaṁ catuṣpade ||

devāḥ | kapotaḥ | iṣitaḥ | yat | icchan | dūtaḥ | niḥ-ṛtyāḥ | idam | ā-jagāma |
tasmai | arcāma | kṛṇavāma | niḥ-kṛtim | śam | naḥ | astu | dvi-pade | śam | catuḥ-pade ||10.165.01||

10.165.02a śivaḥ kapota iṣito no astv anāgā devāḥ śakuno gṛheṣu |
10.165.02c agnir hi vipro juṣatāṁ havir naḥ pari hetiḥ pakṣiṇī no vṛṇaktu ||

śivaḥ | kapotaḥ | iṣitaḥ | naḥ | astu | anāgāḥ | devāḥ | śakunaḥ | gṛheṣu |
agniḥ | hi | vipraḥ | juṣatām | haviḥ | naḥ | pari | hetiḥ | pakṣiṇī | naḥ | vṛṇaktu ||10.165.02||

10.165.03a hetiḥ pakṣiṇī na dabhāty asmān āṣṭryām padaṁ kṛṇute agnidhāne |
10.165.03c śaṁ no gobhyaś ca puruṣebhyaś cāstu mā no hiṁsīd iha devāḥ kapotaḥ ||

hetiḥ | pakṣiṇī | na | dabhāti | asmān | āṣṭryām | padam | kṛṇute | agni-dhāne |
śam | naḥ | gobhyaḥ | ca | puruṣebhyaḥ | ca | astu | mā | naḥ | hiṁsīt | iha | devāḥ | kapotaḥ ||10.165.03||

10.165.04a yad ulūko vadati mogham etad yat kapotaḥ padam agnau kṛṇoti |
10.165.04c yasya dūtaḥ prahita eṣa etat tasmai yamāya namo astu mṛtyave ||

yat | ulūkaḥ | vadati | mogham | etat | yat | kapotaḥ | padam | agnau | kṛṇoti |
yasya | dūtaḥ | pra-hitaḥ | eṣaḥ | etat | tasmai | yamāya | namaḥ | astu | mṛtyave ||10.165.04||

10.165.05a ṛcā kapotaṁ nudata praṇodam iṣam madantaḥ pari gāṁ nayadhvam |
10.165.05c saṁyopayanto duritāni viśvā hitvā na ūrjam pra patāt patiṣṭhaḥ ||

ṛcā | kapotam | nudata | pra-nodam | iṣam | madantaḥ | pari | gām | nayadhvam |
sam-yopayantaḥ | duḥ-itāni | viśvā | hitvā | naḥ | ūrjam | pra | patāt | patiṣṭhaḥ ||10.165.05||


10.166.01a ṛṣabham mā samānānāṁ sapatnānāṁ viṣāsahim |
10.166.01c hantāraṁ śatrūṇāṁ kṛdhi virājaṁ gopatiṁ gavām ||

ṛṣabham | mā | samānānām | sa-patnānām | vi-sasahim |
hantāram | śatrūṇām | kṛdhi | vi-rājam | go-patim | gavām ||10.166.01||

10.166.02a aham asmi sapatnahendra ivāriṣṭo akṣataḥ |
10.166.02c adhaḥ sapatnā me pador ime sarve abhiṣṭhitāḥ ||

aham | asmi | sapatna-hā | indraḥ-iva | ariṣṭaḥ | akṣataḥ |
adhaḥ | sa-patnāḥ | me | padoḥ | ime | sarve | abhi-sthitāḥ ||10.166.02||

10.166.03a atraiva vo 'pi nahyāmy ubhe ārtnī iva jyayā |
10.166.03c vācas pate ni ṣedhemān yathā mad adharaṁ vadān ||

atra | eva | vaḥ | api | nahyāmi | ubhe iti | ārtnī ivetyārtnī-iva | jyayā |
vācaḥ | pate | ni | sedha | imān | yathā | mat | adharam | vadān ||10.166.03||

10.166.04a abhibhūr aham āgamaṁ viśvakarmeṇa dhāmnā |
10.166.04c ā vaś cittam ā vo vratam ā vo 'haṁ samitiṁ dade ||

abhi-bhūḥ | aham | ā | agamam | viśva-karmeṇa | dhāmnā |
ā | vaḥ | cittam | ā | vaḥ | vratam | ā | vaḥ | aham | sam-itim | dade ||10.166.04||

10.166.05a yogakṣemaṁ va ādāyāham bhūyāsam uttama ā vo mūrdhānam akramīm |
10.166.05d adhaspadān ma ud vadata maṇḍūkā ivodakān maṇḍūkā udakād iva ||

yoga-kṣemam | vaḥ | ā-dāya | aham | bhūyāsam | ut-tamaḥ | ā | vaḥ | mūrdhānam | akramīm |
adhaḥ-padāt | me | ut | vadata | maṇḍūkāḥ-iva | udakāt | maṇḍūkāḥ | udakāt-iva ||10.166.05||


10.167.01a tubhyedam indra pari ṣicyate madhu tvaṁ sutasya kalaśasya rājasi |
10.167.01c tvaṁ rayim puruvīrām u nas kṛdhi tvaṁ tapaḥ paritapyājayaḥ svaḥ ||

tubhya | idam | indra | pari | sicyate | madhu | tvam | sutasya | kalaśasya | rājasi |
tvam | rayim | puru-vīrām | ūm̐ iti | naḥ | kṛdhi | tvam | tapaḥ | pari-tapya | ajayaḥ | svariti svaḥ ||10.167.01||

10.167.02a svarjitam mahi mandānam andhaso havāmahe pari śakraṁ sutām̐ upa |
10.167.02c imaṁ no yajñam iha bodhy ā gahi spṛdho jayantam maghavānam īmahe ||

svaḥ-jitam | mahi | mandānam | andhasaḥ | havāmahe | pari | śakram | sutān | upa |
imam | naḥ | yajñam | iha | bodhi | ā | gahi | spṛdhaḥ | jayantam | magha-vānam | īmahe ||10.167.02||

10.167.03a somasya rājño varuṇasya dharmaṇi bṛhaspater anumatyā u śarmaṇi |
10.167.03c tavāham adya maghavann upastutau dhātar vidhātaḥ kalaśām̐ abhakṣayam ||

somasya | rājñaḥ | varuṇasya | dharmaṇi | bṛhaspateḥ | anu-matyāḥ | ūm̐ iti | śarmaṇi |
tava | aham | adya | magha-van | upa-stutau | dhātaḥ | vi-dhātariti vi-dhātaḥ | kalaśān | abhakṣayam ||10.167.03||

10.167.04a prasūto bhakṣam akaraṁ carāv api stomaṁ cemam prathamaḥ sūrir un mṛje |
10.167.04c sute sātena yady āgamaṁ vām prati viśvāmitrajamadagnī dame ||

pra-sūtaḥ | bhakṣam | akaram | carau | api | stomam | ca | imam | prathamaḥ | sūriḥ | ut | mṛje |
sute | sātena | yadi | ā | agamam | vām | prati | viśvāmitrajamadagnī iti | dame ||10.167.04||


10.168.01a vātasya nu mahimānaṁ rathasya rujann eti stanayann asya ghoṣaḥ |
10.168.01c divispṛg yāty aruṇāni kṛṇvann uto eti pṛthivyā reṇum asyan ||

vātasya | nu | mahimānam | rathasya | rujan | eti | stanayan | asya | ghoṣaḥ |
divi-spṛk | yāti | aruṇāni | kṛṇvan | uto iti | eti | pṛthivyā | reṇum | asyan ||10.168.01||

10.168.02a sam prerate anu vātasya viṣṭhā ainaṁ gacchanti samanaṁ na yoṣāḥ |
10.168.02c tābhiḥ sayuk sarathaṁ deva īyate 'sya viśvasya bhuvanasya rājā ||

sam | pra | īrate | anu | vātasya | vi-sthāḥ | ā | enam | gacchanti | samanam | na | yoṣāḥ |
tābhiḥ | sa-yuk | sa-ratham | devaḥ | īyate | asya | viśvasya | bhuvanasya | rājā ||10.168.02||

10.168.03a antarikṣe pathibhir īyamāno na ni viśate katamac canāhaḥ |
10.168.03c apāṁ sakhā prathamajā ṛtāvā kva svij jātaḥ kuta ā babhūva ||

antarikṣe | pathi-bhiḥ | īyamānaḥ | na | ni | viśate | katamat | cana | ahariti |
apām | sakhā | prathama-jāḥ | ṛta-vā | kva | svit | jātaḥ | kutaḥ | ā | babhūva ||10.168.03||

10.168.04a ātmā devānām bhuvanasya garbho yathāvaśaṁ carati deva eṣaḥ |
10.168.04c ghoṣā id asya śṛṇvire na rūpaṁ tasmai vātāya haviṣā vidhema ||

ātmā | devānām | bhuvanasya | garbhaḥ | yathā-vaśam | carati | devaḥ | eṣaḥ |
ghoṣāḥ | it | asya | śṛṇvire | na | rūpam | tasmai | vātāya | haviṣā | vidhema ||10.168.04||


10.169.01a mayobhūr vāto abhi vātūsrā ūrjasvatīr oṣadhīr ā riśantām |
10.169.01c pīvasvatīr jīvadhanyāḥ pibantv avasāya padvate rudra mṛḻa ||

mayaḥ-bhūḥ | vātaḥ | abhi | vātu | usrāḥ | ūrjasvatīḥ | oṣadhīḥ | ā | riśantām |
pīvasvatīḥ | jīva-dhanyāḥ | pibantu | avasāya | pat-vate | rudra | mṛḻa ||10.169.01||

10.169.02a yāḥ sarūpā virūpā ekarūpā yāsām agnir iṣṭyā nāmāni veda |
10.169.02c yā aṅgirasas tapaseha cakrus tābhyaḥ parjanya mahi śarma yaccha ||

yāḥ | sa-rūpāḥ | vi-rūpāḥ | eka-rūpāḥ | yāsām | agniḥ | iṣṭyā | nāmāni | veda |
yāḥ | aṅgirasaḥ | tapasā | iha | cakruḥ | tābhyaḥ | parjanya | mahi | śarma | yaccha ||10.169.02||

10.169.03a yā deveṣu tanvam airayanta yāsāṁ somo viśvā rūpāṇi veda |
10.169.03c tā asmabhyam payasā pinvamānāḥ prajāvatīr indra goṣṭhe rirīhi ||

yāḥ | deveṣu | tanvam | airayanta | yāsām | somaḥ | viśvā | rūpāṇi | veda |
tāḥ | asmabhyam | payasā | pinvamānāḥ | prajā-vatīḥ | indra | go-sthe | rirīhi ||10.169.03||

10.169.04a prajāpatir mahyam etā rarāṇo viśvair devaiḥ pitṛbhiḥ saṁvidānaḥ |
10.169.04c śivāḥ satīr upa no goṣṭham ākas tāsāṁ vayam prajayā saṁ sadema ||

prajā-patiḥ | mahyam | etāḥ | rarāṇaḥ | viśvaiḥ | devaiḥ | pitṛ-bhiḥ | sam-vidānaḥ |
śivāḥ | satīḥ | upa | naḥ | go-stham | ā | akarityakaḥ | tāsām | vayam | pra-jayā | sam | sadema ||10.169.04||


10.170.01a vibhrāḍ bṛhat pibatu somyam madhv āyur dadhad yajñapatāv avihrutam |
10.170.01c vātajūto yo abhirakṣati tmanā prajāḥ pupoṣa purudhā vi rājati ||

vi-bhrāṭ | bṛhat | pibatu | somyam | madhu | āyuḥ | dadhat | yajña-patau | avi-hutam |
vāta-jūtaḥ | yaḥ | abhi-rakṣati | tmanā | pra-jāḥ | pupoṣa | purudhā | vi | rājati ||10.170.01||

10.170.02a vibhrāḍ bṛhat subhṛtaṁ vājasātamaṁ dharman divo dharuṇe satyam arpitam |
10.170.02c amitrahā vṛtrahā dasyuhantamaṁ jyotir jajñe asurahā sapatnahā ||

vi-bhrāṭ | bṛhat | su-bhṛtam | vāja-sātamam | dharmam | divaḥ | dharuṇe | satyam | arpitam |
amitra-hā | vṛtra-hā | dasyuhan-tamam | jyotiḥ | jajñe | asura-hā | sapatna-hā ||10.170.02||

10.170.03a idaṁ śreṣṭhaṁ jyotiṣāṁ jyotir uttamaṁ viśvajid dhanajid ucyate bṛhat |
10.170.03c viśvabhrāḍ bhrājo mahi sūryo dṛśa uru paprathe saha ojo acyutam ||

idam | śreṣṭham | jyotiṣām | jyotiḥ | ut-tamam | viśva-jit | dhana-jit | ucyate | bṛhat |
viśva-bhrāṭ | bhrājaḥ | mahi | sūryaḥ | dṛśe | uru | paprathe | sahaḥ | ojaḥ | acyutam ||10.170.03||

10.170.04a vibhrājañ jyotiṣā svar agaccho rocanaṁ divaḥ |
10.170.04c yenemā viśvā bhuvanāny ābhṛtā viśvakarmaṇā viśvadevyāvatā ||

vi-bhrājam | jyotiṣā | svaḥ | agacchaḥ | rocanam | divaḥ |
yena | imā | viśvā | bhuvanāni | ā-bhṛtā | viśva-karmaṇā | viśvadevya-vatā ||10.170.04||


10.171.01a tvaṁ tyam iṭato ratham indra prāvaḥ sutāvataḥ |
10.171.01c aśṛṇoḥ somino havam ||

tvam | tyam | iṭataḥ | ratham | indra | pra | āvaḥ | suta-vataḥ |
aśṛṇoḥ | somina | havam ||10.171.01||

10.171.02a tvam makhasya dodhataḥ śiro 'va tvaco bharaḥ |
10.171.02c agacchaḥ somino gṛham ||

tvam | makhasya | dodhataḥ | śiraḥ | ava | tvacaḥ | bharaḥ |
agacchaḥ | sominaḥ | gṛham ||10.171.02||

10.171.03a tvaṁ tyam indra martyam āstrabudhnāya venyam |
10.171.03c muhuḥ śrathnā manasyave ||

tvam | tyam | indra | martyam | āstra-budhnāya | venyam |
muhuḥ | śrathnāḥ | manasyave ||10.171.03||

10.171.04a tvaṁ tyam indra sūryam paścā santam puras kṛdhi |
10.171.04c devānāṁ cit tiro vaśam ||

tvam | tyam | indra | sūryam | paścā | santam | puraḥ | kṛdhi |
devānām | cit | tiraḥ | vaśam ||10.171.04||


10.172.01a ā yāhi vanasā saha gāvaḥ sacanta vartaniṁ yad ūdhabhiḥ ||

ā | yāhi | vanasā | saha | gāvaḥ | sacanta | vartanim | yat | ūdha-bhiḥ ||10.172.01||

10.172.02a ā yāhi vasvyā dhiyā maṁhiṣṭho jārayanmakhaḥ sudānubhiḥ ||

ā | yāhi | vasvyā | dhiyā | maṁhiṣṭhaḥ | jārayat-makhaḥ | sudānu-bhiḥ ||10.172.02||

10.172.03a pitubhṛto na tantum it sudānavaḥ prati dadhmo yajāmasi ||

pitu-bhṛtaḥ | na | tantum | it | su-dānavaḥ | prati | dadhmaḥ | yajāmasi ||10.172.03||

10.172.04a uṣā apa svasus tamaḥ saṁ vartayati vartaniṁ sujātatā ||

uṣāḥ | apa | svasuḥ | tamaḥ | sam | vartayati | vartanim | su-jātatā ||10.172.04||


10.173.01a ā tvāhārṣam antar edhi dhruvas tiṣṭhāvicācaliḥ |
10.173.01c viśas tvā sarvā vāñchantu mā tvad rāṣṭram adhi bhraśat ||

ā | tvā | ahārṣam | antaḥ | edhi | dhruvaḥ | tiṣṭha | avi-cācaliḥ |
viśaḥ | tvā | sarvāḥ | vāñchantu | mā | tvat | rāṣṭram | adhi | bhraśat ||10.173.01||

10.173.02a ihaivaidhi māpa cyoṣṭhāḥ parvata ivāvicācaliḥ |
10.173.02c indra iveha dhruvas tiṣṭheha rāṣṭram u dhāraya ||

iha | eva | edhi | mā | apa | cyoṣṭhāḥ | parvataḥ-iva | avi-cācaliḥ |
indra-iva | iha | dhruvaḥ | tiṣṭha | iha | rāṣṭram | ūm̐ iti | dhāraya ||10.173.02||

10.173.03a imam indro adīdharad dhruvaṁ dhruveṇa haviṣā |
10.173.03c tasmai somo adhi bravat tasmā u brahmaṇas patiḥ ||

imam | indraḥ | adīdharat | dhruvam | dhruveṇa | haviṣā |
tasmai | somaḥ | adhi | bravat | tasmai | ūm̐ iti | brahmaṇaḥ | patiḥ ||10.173.03||

10.173.04a dhruvā dyaur dhruvā pṛthivī dhruvāsaḥ parvatā ime |
10.173.04c dhruvaṁ viśvam idaṁ jagad dhruvo rājā viśām ayam ||

dhruvā | dyauḥ | dhruvā | pṛthivī | dhruvāsaḥ | parvatāḥ | ime |
dhruvam | viśvam | idam | jagat | dhruvaḥ | rājā | viśām | ayam ||10.173.04||

10.173.05a dhruvaṁ te rājā varuṇo dhruvaṁ devo bṛhaspatiḥ |
10.173.05c dhruvaṁ ta indraś cāgniś ca rāṣṭraṁ dhārayatāṁ dhruvam ||

dhruvam | te | rājā | varuṇaḥ | dhruvam | devaḥ | bṛhaspatiḥ |
dhruvam | te | indraḥ | ca | agniḥ | ca | rāṣṭram | dhārayatām | dhruvam ||10.173.05||

10.173.06a dhruvaṁ dhruveṇa haviṣābhi somam mṛśāmasi |
10.173.06c atho ta indraḥ kevalīr viśo balihṛtas karat ||

dhruvam | dhruveṇa | haviṣā | abhi | somam | mṛśāmasi |
atho iti | te | indraḥ | kevalīḥ | viśaḥ | bali-hṛtaḥ | karat ||10.173.06||


10.174.01a abhīvartena haviṣā yenendro abhivāvṛte |
10.174.01c tenāsmān brahmaṇas pate 'bhi rāṣṭrāya vartaya ||

abhi-vartena | haviṣā | yena | indraḥ | abhi-vavṛte |
tena | asmān | brahmaṇaḥ | pate | abhi | rāṣṭrāya | vartaya ||10.174.01||

10.174.02a abhivṛtya sapatnān abhi yā no arātayaḥ |
10.174.02c abhi pṛtanyantaṁ tiṣṭhābhi yo na irasyati ||

abhi-vṛtya | sa-patnān | abhi | yāḥ | naḥ | arātayaḥ |
abhi | pṛtanyantam | tiṣṭha | abhi | yaḥ | naḥ | irasyati ||10.174.02||

10.174.03a abhi tvā devaḥ savitābhi somo avīvṛtat |
10.174.03c abhi tvā viśvā bhūtāny abhīvarto yathāsasi ||

abhi | tvā | devaḥ | savitā | abhi | somaḥ | avīvṛtat |
abhi | tvā | viśvā | bhūtāni | abhi-vartaḥ | yathā | asasi ||10.174.03||

10.174.04a yenendro haviṣā kṛtvy abhavad dyumny uttamaḥ |
10.174.04c idaṁ tad akri devā asapatnaḥ kilābhuvam ||

yena | indraḥ | haviṣā | kṛtvī | abhavat | dyumnī | ut-tamaḥ |
idam | tat | akri | devāḥ | asapatnaḥ | kila | abhuvam ||10.174.04||

10.174.05a asapatnaḥ sapatnahābhirāṣṭro viṣāsahiḥ |
10.174.05c yathāham eṣām bhūtānāṁ virājāni janasya ca ||

asapatnaḥ | sapatna-hā | abhi-rāṣṭraḥ | vi-sasahiḥ |
yathā | aham | eṣām | bhūtānām | vi-rājāni | janasya | ca ||10.174.05||


10.175.01a pra vo grāvāṇaḥ savitā devaḥ suvatu dharmaṇā |
10.175.01c dhūrṣu yujyadhvaṁ sunuta ||

pra | vaḥ | grāvāṇaḥ | savitā | devaḥ | suvatu | dharmaṇā |
dhūḥ-su | yujyadhvam | sunuta ||10.175.01||

10.175.02a grāvāṇo apa ducchunām apa sedhata durmatim |
10.175.02c usrāḥ kartana bheṣajam ||

grāvāṇaḥ | apa | ducchunām | apa | sedhata | duḥ-matim |
usrāḥ | kartana | bheṣajam ||10.175.02||

10.175.03a grāvāṇa upareṣv ā mahīyante sajoṣasaḥ |
10.175.03c vṛṣṇe dadhato vṛṣṇyam ||

grāvāṇaḥ | upareṣu | ā | mahīyante | sa-joṣasaḥ |
vṛṣṇe | dadhataḥ | vṛṣṇyam ||10.175.03||

10.175.04a grāvāṇaḥ savitā nu vo devaḥ suvatu dharmaṇā |
10.175.04c yajamānāya sunvate ||

grāvāṇaḥ | savitā | nu | vaḥ | devaḥ | suvatu | dharmaṇā |
yajamānāya | sunvate ||10.175.04||


10.176.01a pra sūnava ṛbhūṇām bṛhan navanta vṛjanā |
10.176.01c kṣāmā ye viśvadhāyaso 'śnan dhenuṁ na mātaram ||

pra | sūnavaḥ | ṛbhūṇām | bṛhat | navanta | vṛjanā |
kṣāma | ye | viśva-dhāyasaḥ | aśnan | dhenum | na | mātaram ||10.176.01||

10.176.02a pra devaṁ devyā dhiyā bharatā jātavedasam |
10.176.02c havyā no vakṣad ānuṣak ||

pra | devam | devyā | dhiyā | bharata | jāta-vedasam |
havyā | naḥ | vakṣat | ānuṣak ||10.176.02||

10.176.03a ayam u ṣya pra devayur hotā yajñāya nīyate |
10.176.03c ratho na yor abhīvṛto ghṛṇīvāñ cetati tmanā ||

ayam | ūm̐ iti | syaḥ | pra | deva-yuḥ | hotā | yajñāya | nīyate |
rathaḥ | na | yoḥ | abhi-vṛtaḥ | ghṛṇi-vān | cetati | tmanā ||10.176.03||

10.176.04a ayam agnir uruṣyaty amṛtād iva janmanaḥ |
10.176.04c sahasaś cit sahīyān devo jīvātave kṛtaḥ ||

ayam | agniḥ | uruṣyati | amṛtāt-iva | janmanaḥ |
sahasaḥ | cit | sahīyān | devaḥ | jīvātave | kṛtaḥ ||10.176.04||


10.177.01a pataṁgam aktam asurasya māyayā hṛdā paśyanti manasā vipaścitaḥ |
10.177.01c samudre antaḥ kavayo vi cakṣate marīcīnām padam icchanti vedhasaḥ ||

pataṅgam | aktam | asurasya | māyayā | hṛdā | paśyanti | manasā | vipaḥ-citaḥ |
samudre | antariti | kavayaḥ | vi | cakṣate | marīcīnām | padam | icchanti | vedhasaḥ ||10.177.01||

10.177.02a pataṁgo vācam manasā bibharti tāṁ gandharvo 'vadad garbhe antaḥ |
10.177.02c tāṁ dyotamānāṁ svaryam manīṣām ṛtasya pade kavayo ni pānti ||

pataṅgaḥ | vācam | manasā | bibharti | tān | gandharvaḥ | avadat | garbhe | antariti |
tām | dyotamānām | svaryam | manīṣām | ṛtasya | pade | kavayaḥ | ni | pānti ||10.177.02||

10.177.03a apaśyaṁ gopām anipadyamānam ā ca parā ca pathibhiś carantam |
10.177.03c sa sadhrīcīḥ sa viṣūcīr vasāna ā varīvarti bhuvaneṣv antaḥ ||

apaśyam | gopām | ani-padyamānam | ā | ca | parā | ca | pathi-bhiḥ | carantam |
saḥ | sadhrīcīḥ | saḥ | viṣūcīḥ | vasānaḥ | ā | varīvarti | bhuvaneṣu | antariti ||10.177.03||


10.178.01a tyam ū ṣu vājinaṁ devajūtaṁ sahāvānaṁ tarutāraṁ rathānām |
10.178.01c ariṣṭanemim pṛtanājam āśuṁ svastaye tārkṣyam ihā huvema ||

tyam | ūm̐ iti | su | vājinam | deva-jūtam | saha-vānam | taru-tāram | rathānām |
ariṣṭa-nemim | pṛtanājam | āśum | svastaye | tārkṣyam | iha | huvema ||10.178.01||

10.178.02a indrasyeva rātim ājohuvānāḥ svastaye nāvam ivā ruhema |
10.178.02c urvī na pṛthvī bahule gabhīre mā vām etau mā paretau riṣāma ||

indrasya-iva | rātim | ā-johuvānāḥ | svastaye | nāvam-iva | ā | ruhema |
urvī iti | na | pṛthvī iti | bahule iti | gabhīre iti | mā | vām | ā-itau | mā | parā-itau | riṣāma ||10.178.02||

10.178.03a sadyaś cid yaḥ śavasā pañca kṛṣṭīḥ sūrya iva jyotiṣāpas tatāna |
10.178.03c sahasrasāḥ śatasā asya raṁhir na smā varante yuvatiṁ na śaryām ||

sadyaḥ | cit | yaḥ | śavasā | pañca | kṛṣṭīḥ | sūryaḥ-iva | jyotiṣā | apaḥ | tatāna |
sahasra-sāḥ | śata-sāḥ | asya | raṁhiḥ | na | sma | varante | yuvatim | na | śaryām ||10.178.03||


10.179.01a ut tiṣṭhatāva paśyatendrasya bhāgam ṛtviyam |
10.179.01c yadi śrāto juhotana yady aśrāto mamattana ||

ut | tiṣṭhata | ava | paśyata | indrasya | bhāgam | ṛtviyam |
yadi | śrātaḥ | juhotana | yadi | aśrātaḥ | mamattana ||10.179.01||

10.179.02a śrātaṁ havir o ṣv indra pra yāhi jagāma sūro adhvano vimadhyam |
10.179.02c pari tvāsate nidhibhiḥ sakhāyaḥ kulapā na vrājapatiṁ carantam ||

śrātam | haviḥ | o iti | su | indra | pra | yāhi | jagāma | sūraḥ | adhvanaḥ | vi-madhyam |
pari | tvā | āsate | nidhi-bhiḥ | sakhāyaḥ | kula-pāḥ | na | vrāja-patim | carantam ||10.179.02||

10.179.03a śrātam manya ūdhani śrātam agnau suśrātam manye tad ṛtaṁ navīyaḥ |
10.179.03c mādhyaṁdinasya savanasya dadhnaḥ pibendra vajrin purukṛj juṣāṇaḥ ||

śrātam | manye | ūdhani | śrātam | agnau | su-śrātam | manye | tat | ṛtam | navīyaḥ |
mādhyandinasya | savanasya | dadhnaḥ | piba | indra | vajrin | puru-kṛt | juṣāṇaḥ ||10.179.03||


10.180.01a pra sasāhiṣe puruhūta śatrūñ jyeṣṭhas te śuṣma iha rātir astu |
10.180.01c indrā bhara dakṣiṇenā vasūni patiḥ sindhūnām asi revatīnām ||

pra | sasahiṣe | puru-hūta | śatrūn | jyeṣṭhaḥ | te | śuṣmaḥ | iha | rātiḥ | astu |
indra | ā | bhara | dakṣiṇena | vasūni | patiḥ | sindhūnām | asi | revatīnām ||10.180.01||

10.180.02a mṛgo na bhīmaḥ kucaro giriṣṭhāḥ parāvata ā jaganthā parasyāḥ |
10.180.02c sṛkaṁ saṁśāya pavim indra tigmaṁ vi śatrūn tāḻhi vi mṛdho nudasva ||

mṛgaḥ | na | bhīmaḥ | kucaraḥ | giri-sthāḥ | parā-vataḥ | ā | jagantha | parasyāḥ |
sṛkam | sam-śāya | pavim | indra | tigmam | vi | śatrūn | tāḻhi | vi | mṛdhaḥ | nudasva ||10.180.02||

10.180.03a indra kṣatram abhi vāmam ojo 'jāyathā vṛṣabha carṣaṇīnām |
10.180.03c apānudo janam amitrayantam uruṁ devebhyo akṛṇor u lokam ||

indra | kṣatram | abhi | vāmam | ojaḥ | ajāyathāḥ | vṛṣabha | carṣaṇīnām |
apa | anudaḥ | janam | amitra-yantam | urum | devebhyaḥ | akṛṇoḥ | ūm̐ iti | lokam ||10.180.03||


10.181.01a prathaś ca yasya saprathaś ca nāmānuṣṭubhasya haviṣo havir yat |
10.181.01c dhātur dyutānāt savituś ca viṣṇo rathaṁtaram ā jabhārā vasiṣṭhaḥ ||

prathaḥ | ca | yasya | sa-prathaḥ | ca | nāma | ānu-stubhasya | haviṣaḥ | haviḥ | yat |
dhātuḥ | dyutānāt | savituḥ | ca | viṣṇoḥ | ratham-taram | ā | jabhāra | vasiṣṭhaḥ ||10.181.01||

10.181.02a avindan te atihitaṁ yad āsīd yajñasya dhāma paramaṁ guhā yat |
10.181.02c dhātur dyutānāt savituś ca viṣṇor bharadvājo bṛhad ā cakre agneḥ ||

avindan | te | ati-hitam | yat | āsīt | yajñasya | dhāma | paramam | guhā | yat |
dhātuḥ | dyutānāt | savituḥ | ca | viṣṇoḥ | bharat-vājaḥ | bṛhat | ā | cakre | agneḥ ||10.181.02||

10.181.03a te 'vindan manasā dīdhyānā yajuḥ ṣkannam prathamaṁ devayānam |
10.181.03c dhātur dyutānāt savituś ca viṣṇor ā sūryād abharan gharmam ete ||

te | avindan | manasā | dīdhyānāḥ | yajuḥ | skannam | prathamam | deva-yānam |
dhātuḥ | dyutānāt | savituḥ | ca | viṣṇoḥ | ā | sūryāt | abharan | gharmam | ete ||10.181.03||


10.182.01a bṛhaspatir nayatu durgahā tiraḥ punar neṣad aghaśaṁsāya manma |
10.182.01c kṣipad aśastim apa durmatiṁ hann athā karad yajamānāya śaṁ yoḥ ||

bṛhaspatiḥ | nayatu | duḥ-gahā | tiraḥ | punaḥ | neṣat | agha-śaṁsāya | manma |
kṣipat | aśastim | apa | duḥ-matim | han | atha | karat | yajamānāya | śam | yoḥ ||10.182.01||

10.182.02a narāśaṁso no 'vatu prayāje śaṁ no astv anuyājo haveṣu |
10.182.02c kṣipad aśastim apa durmatiṁ hann athā karad yajamānāya śaṁ yoḥ ||

narāśaṁsaḥ | naḥ | avatu | pra-yāje | śam | naḥ | astu | anu-yājaḥ | haveṣu |
kṣipat | aśastim | apa | duḥ-matim | han | atha | karat | yajamānāya | śam | yoḥ ||10.182.02||

10.182.03a tapurmūrdhā tapatu rakṣaso ye brahmadviṣaḥ śarave hantavā u |
10.182.03c kṣipad aśastim apa durmatiṁ hann athā karad yajamānāya śaṁ yoḥ ||

tapuḥ-mūrdhā | tapatu | rakṣasaḥ | ye | brahma-dviṣaḥ | śarave | hantavai | ūm̐ iti |
kṣipat | aśastim | apa | duḥ-matim | han | atha | karat | yajamānāya | śam | yoḥ ||10.182.03||


10.183.01a apaśyaṁ tvā manasā cekitānaṁ tapaso jātaṁ tapaso vibhūtam |
10.183.01c iha prajām iha rayiṁ rarāṇaḥ pra jāyasva prajayā putrakāma ||

apaśyam | tvā | manasā | cekitānam | tapasaḥ | jātam | tapasaḥ | vi-bhūtam |
iha | pra-jām | iha | rayim | rarāṇaḥ | pra | jāyasva | pra-jayā | putra-kāma ||10.183.01||

10.183.02a apaśyaṁ tvā manasā dīdhyānāṁ svāyāṁ tanū ṛtvye nādhamānām |
10.183.02c upa mām uccā yuvatir babhūyāḥ pra jāyasva prajayā putrakāme ||

apaśyam | tvā | manasā | dīdhyānām | svāyām | tanū iti | ṛtvye | nādhamānām |
upa | mām | uccā | yuvatiḥ | babhūyāḥ | pra | jāyasva | pra-jayā | putra-kāma ||10.183.02||

10.183.03a ahaṁ garbham adadhām oṣadhīṣv ahaṁ viśveṣu bhuvaneṣv antaḥ |
10.183.03c aham prajā ajanayam pṛthivyām ahaṁ janibhyo aparīṣu putrān ||

aham | garbham | adadhām | oṣadhīṣu | aham | viśveṣu | bhuvaneṣu | antariti |
aham | pra-jāḥ | ajanayam | pṛthivyām | aham | jani-bhyaḥ | aparīṣu | putrān ||10.183.03||


10.184.01a viṣṇur yoniṁ kalpayatu tvaṣṭā rūpāṇi piṁśatu |
10.184.01c ā siñcatu prajāpatir dhātā garbhaṁ dadhātu te ||

viṣṇuḥ | yonim | kalpayatu | tvaṣṭā | rūpāṇi | piṁśatu |
ā | siñcatu | prajā-patiḥ | dhātā | garbham | dadhātu | te ||10.184.01||

10.184.02a garbhaṁ dhehi sinīvāli garbhaṁ dhehi sarasvati |
10.184.02c garbhaṁ te aśvinau devāv ā dhattām puṣkarasrajā ||

garbham | dhehi | sinīvāli | garbham | dhehi | sarasvati |
garbham | te | aśvinau | devau | ā | dhattām | puṣkara-srajā ||10.184.02||

10.184.03a hiraṇyayī araṇī yaṁ nirmanthato aśvinā |
10.184.03c taṁ te garbhaṁ havāmahe daśame māsi sūtave ||

hiraṇyayī iti | araṇī iti | yam | niḥ-manthataḥ | aśvinā |
tam | te | garbham | havāmahe | daśame | māsi | sūtave ||10.184.03||


10.185.01a mahi trīṇām avo 'stu dyukṣam mitrasyāryamṇaḥ |
10.185.01c durādharṣaṁ varuṇasya ||

mahi | trīṇām | avaḥ | astu | dyukṣam | mitrasya | aryamṇaḥ |
duḥ-ādharṣam | varuṇasya ||10.185.01||

10.185.02a nahi teṣām amā cana nādhvasu vāraṇeṣu |
10.185.02c īśe ripur aghaśaṁsaḥ ||

nahi | teṣām | amā | cana | na | adhva-su | vāraṇeṣu |
īśe | ripuḥ | agha-śaṁsaḥ ||10.185.02||

10.185.03a yasmai putrāso aditeḥ pra jīvase martyāya |
10.185.03c jyotir yacchanty ajasram ||

yasmai | putrāsaḥ | aditeḥ | pra | jīvase | martyāya |
jyotiḥ | yacchanti | ajasram ||10.185.03||


10.186.01a vāta ā vātu bheṣajaṁ śambhu mayobhu no hṛde |
10.186.01c pra ṇa āyūṁṣi tāriṣat ||

vātaḥ | ā | vātu | bheṣajam | śam-bhu | māyaḥ-bhu | naḥ | hṛde |
pra | naḥ | āyūṁṣi | tāriṣat ||10.186.01||

10.186.02a uta vāta pitāsi na uta bhrātota naḥ sakhā |
10.186.02c sa no jīvātave kṛdhi ||

uta | vāta | pitā | asi | naḥ | uta | bhrātā | uta | naḥ | sakhā |
saḥ | naḥ | jīvātave | kṛdhi ||10.186.02||

10.186.03a yad ado vāta te gṛhe 'mṛtasya nidhir hitaḥ |
10.186.03c tato no dehi jīvase ||

yat | adaḥ | vāta | te | gṛhe | amṛtasya | nidhiḥ | hitaḥ |
tataḥ | naḥ | dehi | jīvase ||10.186.03||


10.187.01a prāgnaye vācam īraya vṛṣabhāya kṣitīnām |
10.187.01c sa naḥ parṣad ati dviṣaḥ ||

pra | agnaye | vācam | īraya | vṛṣabhāya | kṣitīnām |
saḥ | naḥ | parṣat | ati | dviṣaḥ ||10.187.01||

10.187.02a yaḥ parasyāḥ parāvatas tiro dhanvātirocate |
10.187.02c sa naḥ parṣad ati dviṣaḥ ||

yaḥ | parasyāḥ | parā-vataḥ | tiraḥ | dhanva | ati-rocate |
saḥ | naḥ | parṣat | ati | dviṣaḥ ||10.187.02||

10.187.03a yo rakṣāṁsi nijūrvati vṛṣā śukreṇa śociṣā |
10.187.03c sa naḥ parṣad ati dviṣaḥ ||

yaḥ | rakṣāṁsi | ni-jūrvati | vṛṣā | śukreṇa | śociṣā |
saḥ | naḥ | parṣat | ati | dviṣaḥ ||10.187.03||

10.187.04a yo viśvābhi vipaśyati bhuvanā saṁ ca paśyati |
10.187.04c sa naḥ parṣad ati dviṣaḥ ||

yaḥ | viśvā | abhi | vi-paśyati | bhuvanā | sam | ca | paśyati |
saḥ | naḥ | parṣat | ati | dviṣaḥ ||10.187.04||

10.187.05a yo asya pāre rajasaḥ śukro agnir ajāyata |
10.187.05c sa naḥ parṣad ati dviṣaḥ ||

yaḥ | asya | pāre | rajasaḥ | śukraḥ | agniḥ | ajāyata |
saḥ | naḥ | parṣat | ati | dviṣaḥ ||10.187.05||


10.188.01a pra nūnaṁ jātavedasam aśvaṁ hinota vājinam |
10.188.01c idaṁ no barhir āsade ||

pra | nūnam | jāta-vedasam | aśvam | hinota | vājinam |
idam | naḥ | barhiḥ | ā-sade ||10.188.01||

10.188.02a asya pra jātavedaso vipravīrasya mīḻhuṣaḥ |
10.188.02c mahīm iyarmi suṣṭutim ||

asya | pra | jāta-vedasaḥ | vipra-vīrasya | mīḻhuṣaḥ |
mahīm | iyarmi | su-stutim ||10.188.02||

10.188.03a yā ruco jātavedaso devatrā havyavāhanīḥ |
10.188.03c tābhir no yajñam invatu ||

yāḥ | rucaḥ | jāta-vedasaḥ | deva-trā | havya-vāhanīḥ |
tābhiḥ | naḥ | yajñam | invatu ||10.188.03||


10.189.01a āyaṁ gauḥ pṛśnir akramīd asadan mātaram puraḥ |
10.189.01c pitaraṁ ca prayan svaḥ ||

ā | ayam | gauḥ | pṛśniḥ | akramīt | asadat | mātaram | puraḥ |
pitaram | ca | pra-yan | svariti svaḥ ||10.189.01||

10.189.02a antaś carati rocanāsya prāṇād apānatī |
10.189.02c vy akhyan mahiṣo divam ||

antariti | carati | rocanā | asya | prāṇāt | apa-anatī |
vi | akhyat | mahiṣaḥ | divam ||10.189.02||

10.189.03a triṁśad dhāma vi rājati vāk pataṁgāya dhīyate |
10.189.03c prati vastor aha dyubhiḥ ||

triṁśat | dhāma | vi | rājati | vāk | pataṁgāya | dhīyate |
prati | vastoḥ | aha | dyu-bhiḥ ||10.189.03||


10.190.01a ṛtaṁ ca satyaṁ cābhīddhāt tapaso 'dhy ajāyata |
10.190.01c tato rātry ajāyata tataḥ samudro arṇavaḥ ||

ṛtam | ca | satyam | ca | abhīddhāt | tapasaḥ | adhi | ajāyata |
tataḥ | rātrī | ajāyata | tataḥ | samudraḥ | arṇavaḥ ||10.190.01||

10.190.02a samudrād arṇavād adhi saṁvatsaro ajāyata |
10.190.02c ahorātrāṇi vidadhad viśvasya miṣato vaśī ||

samudrāt | arṇavāt | adhi | saṁvatsaraḥ | ajāyata |
ahorātrāṇi | vi-dadhat | viśvasya | miṣataḥ | vaśī ||10.190.02||

10.190.03a sūryācandramasau dhātā yathāpūrvam akalpayat |
10.190.03c divaṁ ca pṛthivīṁ cāntarikṣam atho svaḥ ||

sūryācandramasau | dhātā | yathāpūrvam | akalpayat |
divam | ca | pṛthivīm | ca | antarikṣam | atho iti | svaḥ ||10.190.03||


10.191.01a saṁ-sam id yuvase vṛṣann agne viśvāny arya ā |
10.191.01c iḻas pade sam idhyase sa no vasūny ā bhara ||

sam-sam | it | yuvase | vṛṣan | agne | viśvāni | aryaḥ | ā |
iḻaḥ | pade | sam | idhyase | saḥ | naḥ | vasūni | ā | bhara ||10.191.01||

10.191.02a saṁ gacchadhvaṁ saṁ vadadhvaṁ saṁ vo manāṁsi jānatām |
10.191.02c devā bhāgaṁ yathā pūrve saṁjānānā upāsate ||

sam | gacchadhvam | sam | vadadhvam | sam | vaḥ | manāṁsi | jānatām |
devāḥ | bhāgam | yathā | pūrve | sam-jānānāḥ | upa-āsate ||10.191.02||

10.191.03a samāno mantraḥ samitiḥ samānī samānam manaḥ saha cittam eṣām |
10.191.03c samānam mantram abhi mantraye vaḥ samānena vo haviṣā juhomi ||

samānaḥ | mantraḥ | sam-itiḥ | samānī | samānam | manaḥ | saha | cittam | eṣām |
samānam | mantram | abhi | mantraye | vaḥ | samānena | vaḥ | haviṣā | juhomi ||10.191.03||

10.191.04a samānī va ākūtiḥ samānā hṛdayāni vaḥ |
10.191.04c samānam astu vo mano yathā vaḥ susahāsati ||

samānī | vaḥ | ā-kūtiḥ | samānā | hṛdayāni | vaḥ |
samānam | astu | vaḥ | manaḥ | yathā | vaḥ | su-saha | asati ||10.191.04||



Notes by Detlef Eichler : 1. Please note that this text is not for commercial use and released only for personal scholarly activity. This transliteration version of Rigveda-Saṁhitā is from an ITRANS file which I have created on the basis of The Aufrecht/van Nooten/Holland (Samhita) version of theRigveda. The revised Padapāṭha is based on the text entered by the members of the Sansknet project. 2. Font: times new roman / Unicode 3. Hiatus ai, au are shown as aï, aü 4. Transliteration:
a ā i ï ī ī3 u ü ū ṛ ṝ ḷ e ai o au ṁ ḥ m̐ ' | k kh g gh ṅ c ch j jh ñ ṭ ṭh ḍ ḍh ṇ t th d dh n p ph b bh m y r l v ś ṣ s h ḻ ḻh 5. Last updated 8 September 2016