Ṛgveda-Saṁhitā with Padapāṭha
Maṇḍala 8
Transliterated text without accents


8.001.01a mā cid anyad vi śaṁsata sakhāyo mā riṣaṇyata |
8.001.01c indram it stotā vṛṣaṇaṁ sacā sute muhur ukthā ca śaṁsata ||

mā | cit | anyat | vi | śaṁsata | sakhāyaḥ | mā | riṣaṇyata |
indram | it | stota | vṛṣaṇam | saca | sute | muhuḥ | ukthā | ca | śaṁsata ||8.001.01||

8.001.02a avakrakṣiṇaṁ vṛṣabhaṁ yathājuraṁ gāṁ na carṣaṇīsaham |
8.001.02c vidveṣaṇaṁ saṁvananobhayaṁkaram maṁhiṣṭham ubhayāvinam ||

ava-krakṣiṇam | vṛṣabham | yathā | ajuram | gām | na | carṣaṇi-saham |
vi-dveṣaṇam | sam-vananā | ubhayam-karam | maṁhiṣṭham | ubhayāvinam ||8.001.02||

8.001.03a yac cid dhi tvā janā ime nānā havanta ūtaye |
8.001.03c asmākam brahmedam indra bhūtu te 'hā viśvā ca vardhanam ||

yat | cit | hi | tvā | janāḥ | ime | nānā | havante | ūtaye |
asmākam | brahma | idam | indra | bhūtu | te | ahā | viśvā | ca | vardhanam ||8.001.03||

8.001.04a vi tartūryante maghavan vipaścito 'ryo vipo janānām |
8.001.04c upa kramasva pururūpam ā bhara vājaṁ nediṣṭham ūtaye ||

vi | tartūryante | magha-van | vipaḥ-citaḥ | aryaḥ | vipaḥ | janānām |
upa | kramasva | puru-rūpam | ā | bhara | vājam | nediṣṭham | ūtaye ||8.001.04||

8.001.05a mahe cana tvām adrivaḥ parā śulkāya deyām |
8.001.05c na sahasrāya nāyutāya vajrivo na śatāya śatāmagha ||

mahe | cana | tvām | adri-vaḥ | parā | śulkāya | deyām |
na | sahasrāya | na | ayutāya | vajri-vaḥ | na | śatāya | śata-magha ||8.001.05||

8.001.06a vasyām̐ indrāsi me pitur uta bhrātur abhuñjataḥ |
8.001.06c mātā ca me chadayathaḥ samā vaso vasutvanāya rādhase ||

vasyān | indra | asi | me | pituḥ | uta | bhrātuḥ | abhuñjataḥ |
mātā | ca | me | chadayathaḥ | samā | vaso iti | vasu-tvanāya | rādhase ||8.001.06||

8.001.07a kveyatha kved asi purutrā cid dhi te manaḥ |
8.001.07c alarṣi yudhma khajakṛt puraṁdara pra gāyatrā agāsiṣuḥ ||

kva | iyatha | kva | it | asi | puru-trā | cit | hi | te | manaḥ |
alarṣi | yudhma | khaja-kṛt | puram-dara | pra | gāyatrāḥ | agāsiṣuḥ ||8.001.07||

8.001.08a prāsmai gāyatram arcata vāvātur yaḥ puraṁdaraḥ |
8.001.08c yābhiḥ kāṇvasyopa barhir āsadaṁ yāsad vajrī bhinat puraḥ ||

pra | asmai | gāyatram | arcata | vavātuḥ | yaḥ | param-daraḥ |
yābhiḥ | kāṇvasya | upa | barhiḥ | ā-sadam | yāsat | vajrī | bhinat | puraḥ ||8.001.08||

8.001.09a ye te santi daśagvinaḥ śatino ye sahasriṇaḥ |
8.001.09c aśvāso ye te vṛṣaṇo raghudruvas tebhir nas tūyam ā gahi ||

ye | te | santi | daśa-gvinaḥ | śatinaḥ | ye | sahasriṇaḥ |
aśvāsaḥ | ye | te | vṛṣaṇaḥ | raghu-druvaḥ | tebhiḥ | naḥ | tūyam | ā | gahi ||8.001.09||

8.001.10a ā tv adya sabardughāṁ huve gāyatravepasam |
8.001.10c indraṁ dhenuṁ sudughām anyām iṣam urudhārām araṁkṛtam ||

ā | tu | adya | sabaḥ-dughām | huve | gāyatra-vepasam |
indram | dhenum | su-dughām | anyām | iṣam | uru-dhārām | aram-kṛtam ||8.001.10||

8.001.11a yat tudat sūra etaśaṁ vaṅkū vātasya parṇinā |
8.001.11c vahat kutsam ārjuneyaṁ śatakratuḥ tsarad gandharvam astṛtam ||

yat | tudat | sūraḥ | etaśam | vaṅkū iti | vātasya | parṇinā |
vahat | kutsam | ārjuneyam | śata-kratuḥ | tsarat | gandharvam | astṛtam ||8.001.11||

8.001.12a ya ṛte cid abhiśriṣaḥ purā jatrubhya ātṛdaḥ |
8.001.12c saṁdhātā saṁdhim maghavā purūvasur iṣkartā vihrutam punaḥ ||

yaḥ | ṛte | cit | abhi-śriṣaḥ | purā | jatru-bhyaḥ | ā-tṛdaḥ |
sam-dhātā | sandhim | magha-vā | puru-vasuḥ | iṣkartā | vi-hrutam | punariti ||8.001.12||

8.001.13a mā bhūma niṣṭyā ivendra tvad araṇā iva |
8.001.13c vanāni na prajahitāny adrivo duroṣāso amanmahi ||

mā | bhūma | niṣṭyāḥ-iva | indra | tvat | araṇāḥ-iva |
vanāni | na | pra-jahitāni | adri-vaḥ | duroṣāsaḥ | amanmahi ||8.001.13||

8.001.14a amanmahīd anāśavo 'nugrāsaś ca vṛtrahan |
8.001.14c sakṛt su te mahatā śūra rādhasā anu stomam mudīmahi ||

amanmahi | it | anāśavaḥ | anugrāsaḥ | ca | vṛtra-han |
sakṛt | su | te | mahatā | śūra | rādhasā | anu | stomam | mudīmahi ||8.001.14||

8.001.15a yadi stomam mama śravad asmākam indram indavaḥ |
8.001.15c tiraḥ pavitraṁ sasṛvāṁsa āśavo mandantu tugryāvṛdhaḥ ||

yadi | stomam | mama | śravat | asmākam | indram | indavaḥ |
tiraḥ | pavitram | sasṛ-vāṁsaḥ | āśavaḥ | mandantu | tugrya-vṛdhaḥ ||8.001.15||

8.001.16a ā tv adya sadhastutiṁ vāvātuḥ sakhyur ā gahi |
8.001.16c upastutir maghonām pra tvāvatv adhā te vaśmi suṣṭutim ||

ā | tu | adya | sadha-stutim | vavātuḥ | sakhyuḥ | ā | gahi |
upa-stutiḥ | maghonām | pra | tvā | avatu | adha | te | vaśmi | su-stutim ||8.001.16||

8.001.17a sotā hi somam adribhir em enam apsu dhāvata |
8.001.17c gavyā vastreva vāsayanta in naro nir dhukṣan vakṣaṇābhyaḥ ||

sotā | hi | somam | adri-bhiḥ | ā | īm | enam | ap-su | dhāvata |
gavyā | vastrā-iva | vāsayantaḥ | it | naraḥ | niḥ | dhukṣan | vakṣaṇābhyaḥ ||8.001.17||

8.001.18a adha jmo adha vā divo bṛhato rocanād adhi |
8.001.18c ayā vardhasva tanvā girā mamā jātā sukrato pṛṇa ||

adha | jmaḥ | adha | vā | divaḥ | bṛhataḥ | rocanāt | adhi |
ayā | vardhasva | tanvā | girā | mama | ā | jātā | sukrato iti su-krato | pṛṇa ||8.001.18||

8.001.19a indrāya su madintamaṁ somaṁ sotā vareṇyam |
8.001.19c śakra eṇam pīpayad viśvayā dhiyā hinvānaṁ na vājayum ||

indrāya | su | madin-tamam | somam | sota | vareṇyam |
śakraḥ | eṇam | pīpayat | viśvayā | dhiyā | hinvānam | na | vāja-yum ||8.001.19||

8.001.20a mā tvā somasya galdayā sadā yācann ahaṁ girā |
8.001.20c bhūrṇim mṛgaṁ na savaneṣu cukrudhaṁ ka īśānaṁ na yāciṣat ||

mā | tvā | somasya | galdayā | sadā | yācan | aham | girā |
bhūrṇim | mṛgam | na | savaneṣu | cukrudham | kaḥ | īśānam | na | yāciṣat ||8.001.20||

8.001.21a madeneṣitam madam ugram ugreṇa śavasā |
8.001.21c viśveṣāṁ tarutāram madacyutam made hi ṣmā dadāti naḥ ||

madena | iṣitam | madam | ugram | ugreṇa | śavasā |
viśveṣām | tarutāram | mada-cyutam | made | hi | sma | dadāti | naḥ ||8.001.21||

8.001.22a śevāre vāryā puru devo martāya dāśuṣe |
8.001.22c sa sunvate ca stuvate ca rāsate viśvagūrto ariṣṭutaḥ ||

śevāre | vāryā | puru | devaḥ | martāya | dāśuṣe |
saḥ | sunvate | ca | stuvate | ca | rāsate | viśva-gūrtaḥ | ari-stutaḥ ||8.001.22||

8.001.23a endra yāhi matsva citreṇa deva rādhasā |
8.001.23c saro na prāsy udaraṁ sapītibhir ā somebhir uru sphiram ||

ā | indra | yāhi | matsva | citreṇa | deva | rādhasā |
saraḥ | na | prāsi | udaram | sapīti-bhiḥ | ā | somebhiḥ | uru | sphiram ||8.001.23||

8.001.24a ā tvā sahasram ā śataṁ yuktā rathe hiraṇyaye |
8.001.24c brahmayujo haraya indra keśino vahantu somapītaye ||

ā | tvā | sahasram | ā | śatam | yuktāḥ | rathe | hiraṇyaye |
brahma-yujaḥ | harayaḥ | indra | keśinaḥ | vahantu | soma-pītaye ||8.001.24||

8.001.25a ā tvā rathe hiraṇyaye harī mayūraśepyā |
8.001.25c śitipṛṣṭhā vahatām madhvo andhaso vivakṣaṇasya pītaye ||

ā | tvā | rathe | hiraṇyaye | harī iti | mayūra-śepyā |
śiti-pṛṣṭhā | vahatām | madhvaḥ | andhasaḥ | vivakṣaṇasya | pītaye ||8.001.25||

8.001.26a pibā tv asya girvaṇaḥ sutasya pūrvapā iva |
8.001.26c pariṣkṛtasya rasina iyam āsutiś cārur madāya patyate ||

piba | tu | asya | girvaṇaḥ | sutasya | pūrvapāḥ-iva |
pari-kṛtasya | rasinaḥ | iyam | ā-sutiḥ | cāruḥ | madāya | patyate ||8.001.26||

8.001.27a ya eko asti daṁsanā mahām̐ ugro abhi vrataiḥ |
8.001.27c gamat sa śiprī na sa yoṣad ā gamad dhavaṁ na pari varjati ||

yaḥ | ekaḥ | asti | daṁsanā | mahām | ugraḥ | abhi | vrataiḥ |
gamat | saḥ | śiprī | na | saḥ | yoṣat | ā | gamat | havam | na | pari | varjati ||8.001.27||

8.001.28a tvam puraṁ cariṣṇvaṁ vadhaiḥ śuṣṇasya sam piṇak |
8.001.28c tvam bhā anu caro adha dvitā yad indra havyo bhuvaḥ ||

tvam | puram | cariṣṇvam | vadhaiḥ | śuṣṇasya | sam | piṇak |
tvam | bhāḥ | anu | caraḥ | adha | dvitā | yat | indra | havyaḥ | bhuvaḥ ||8.001.28||

8.001.29a mama tvā sūra udite mama madhyaṁdine divaḥ |
8.001.29c mama prapitve apiśarvare vasav ā stomāso avṛtsata ||

mama | tvā | sūre | ut-ite | mama | madhyandine | divaḥ |
mama | pra-pitve | api-śarvare | vaso iti | ā | stomāsaḥ | avṛtsata ||8.001.29||

8.001.30a stuhi stuhīd ete ghā te maṁhiṣṭhāso maghonām |
8.001.30c ninditāśvaḥ prapathī paramajyā maghasya medhyātithe ||

stuhi | stuhi | it | ete | gha | te | maṁhiṣṭhāsaḥ | maghonām |
nindita-aśvaḥ | pra-pathī | parama-jyāḥ | maghasya | medhya-atithe ||8.001.30||

8.001.31a ā yad aśvān vananvataḥ śraddhayāhaṁ rathe ruham |
8.001.31c uta vāmasya vasunaś ciketati yo asti yādvaḥ paśuḥ ||

ā | yat | aśvān | vanan-vataḥ | śraddhayā | aham | rathe | ruham |
uta | vāmasya | vasunaḥ | ciketati | yaḥ | asti | yādvaḥ | paśuḥ ||8.001.31||

8.001.32a ya ṛjrā mahyam māmahe saha tvacā hiraṇyayā |
8.001.32c eṣa viśvāny abhy astu saubhagāsaṅgasya svanadrathaḥ ||

yaḥ | ṛjrā | mahyam | mamahe | saha | tvacā | hiraṇyayā |
eṣaḥ | viśvāni | abhi | astu | saubhagā | āsaṅgasya | svanat-rathaḥ ||8.001.32||

8.001.33a adha plāyogir ati dāsad anyān āsaṅgo agne daśabhiḥ sahasraiḥ |
8.001.33c adhokṣaṇo daśa mahyaṁ ruśanto naḻā iva saraso nir atiṣṭhan ||

adha | plāyogiḥ | ati | dāsat | anyān | ā-saṅgaḥ | agne | daśa-bhiḥ | sahasraiḥ |
adha | ukṣaṇaḥ | daśa | mahyam | ruśantaḥ | naḻāḥ-iva | sarasaḥ | niḥ | atiṣṭhan ||8.001.33||

8.001.34a anv asya sthūraṁ dadṛśe purastād anastha ūrur avarambamāṇaḥ |
8.001.34c śaśvatī nāry abhicakṣyāha subhadram arya bhojanam bibharṣi ||

anu | asya | sthūram | dadṛśe | purastāt | anasthaḥ | ūruḥ | ava-rambamāṇaḥ |
śaśvatī | nārī | abhi-cakṣya | āha | su-bhadram | arya | bhojanam | bibharṣi ||8.001.34||


8.002.01a idaṁ vaso sutam andhaḥ pibā supūrṇam udaram |
8.002.01c anābhayin rarimā te ||

idam | vaso iti | sutam | andhaḥ | piba | su-pūrṇam | udaram |
anābhayin | rarima | te ||8.002.01||

8.002.02a nṛbhir dhūtaḥ suto aśnair avyo vāraiḥ paripūtaḥ |
8.002.02c aśvo na nikto nadīṣu ||

nṛ-bhiḥ | dhūtaḥ | sutaḥ | aśnaiḥ | avyaḥ | vāraiḥ | pari-pūtaḥ |
aśvaḥ | na | niktaḥ | nadīṣu ||8.002.02||

8.002.03a taṁ te yavaṁ yathā gobhiḥ svādum akarma śrīṇantaḥ |
8.002.03c indra tvāsmin sadhamāde ||

tam | te | yavam | yathā | gobhiḥ | svādum | akarma | śrīṇantaḥ |
indra | tvā | asmin | sadha-māde ||8.002.03||

8.002.04a indra it somapā eka indraḥ sutapā viśvāyuḥ |
8.002.04c antar devān martyām̐ś ca ||

indra | it | soma-pāḥ | ekaḥ | indraḥ | suta-pāḥ | viśva-āyuḥ |
antaḥ | devān | martyān | ca ||8.002.04||

8.002.05a na yaṁ śukro na durāśīr na tṛprā uruvyacasam |
8.002.05c apaspṛṇvate suhārdam ||

na | yam | śukraḥ | na | duḥ-āśīḥ | na | tṛprāḥ | uru-vyacasam |
apa-spṛṇvate | su-hārdam ||8.002.05||

8.002.06a gobhir yad īm anye asman mṛgaṁ na vrā mṛgayante |
8.002.06c abhitsaranti dhenubhiḥ ||

gobhiḥ | yat | īm | anye | asmat | mṛgam | na | vrāḥ | mṛgayante |
abhi-tsaranti | dhenu-bhiḥ ||8.002.06||

8.002.07a traya indrasya somāḥ sutāsaḥ santu devasya |
8.002.07c sve kṣaye sutapāvnaḥ ||

trayaḥ | indrasya | somāḥ | sutāsaḥ | santu | devasya |
sve | kṣaye | suta-pāvnaḥ ||8.002.07||

8.002.08a trayaḥ kośāsaḥ ścotanti tisraś camvaḥ supūrṇāḥ |
8.002.08c samāne adhi bhārman ||

trayaḥ | kośāsaḥ | ścotanti | tisraḥ | camvaḥ | su-pūrṇāḥ |
samāne | adhi | bhārman ||8.002.08||

8.002.09a śucir asi puruniḥṣṭhāḥ kṣīrair madhyata āśīrtaḥ |
8.002.09c dadhnā mandiṣṭhaḥ śūrasya ||

śuciḥ | asi | puruniḥ-sthāḥ | kṣīraiḥ | madhyataḥ | ā-śīrtaḥ |
dadhnā | mandiṣṭhaḥ | śūrasya ||8.002.09||

8.002.10a ime ta indra somās tīvrā asme sutāsaḥ |
8.002.10c śukrā āśiraṁ yācante ||

ime | te | indra | somāḥ | tīvrāḥ | asme iti | sutāsaḥ |
śukrāḥ | ā-śiram | yācante ||8.002.10||

8.002.11a tām̐ āśiram puroḻāśam indremaṁ somaṁ śrīṇīhi |
8.002.11c revantaṁ hi tvā śṛṇomi ||

tān | ā-śiram | puroḻāśam | indra | imam | somam | śrīṇīhi |
revantam | hi | tvā | śṛṇomi ||8.002.11||

8.002.12a hṛtsu pītāso yudhyante durmadāso na surāyām |
8.002.12c ūdhar na nagnā jarante ||

hṛt-su | pītāsaḥ | yudhyante | duḥ-madāsaḥ | na | surāyām |
ūdhaḥ | na | nagnāḥ | jarante ||8.002.12||

8.002.13a revām̐ id revataḥ stotā syāt tvāvato maghonaḥ |
8.002.13c pred u harivaḥ śrutasya ||

revān | it | revataḥ | stotā | syāt | tvā-vataḥ | maghonaḥ |
pra | it | ūm̐ iti | hari-vaḥ | śrutasya ||8.002.13||

8.002.14a ukthaṁ cana śasyamānam agor arir ā ciketa |
8.002.14c na gāyatraṁ gīyamānam ||

uktham | cana | śasyamānam | agoḥ | ariḥ | ā | ciketa |
na | gāyatram | gīyamānam ||8.002.14||

8.002.15a mā na indra pīyatnave mā śardhate parā dāḥ |
8.002.15c śikṣā śacīvaḥ śacībhiḥ ||

mā | naḥ | indra | pīyatnave | mā | śardhate | parā | dāḥ |
śikṣā | śacī-vaḥ | śacībhiḥ ||8.002.15||

8.002.16a vayam u tvā tadidarthā indra tvāyantaḥ sakhāyaḥ |
8.002.16c kaṇvā ukthebhir jarante ||

vayam | ūm̐ iti | tvā | tatit-arthāḥ | indra | tvā-yantaḥ | sakhāyaḥ |
kaṇvāḥ | ukthebhiḥ | jarante ||8.002.16||

8.002.17a na ghem anyad ā papana vajrinn apaso naviṣṭau |
8.002.17c taved u stomaṁ ciketa ||

na | gha | īm | anyat | ā | papana | vajrin | apasaḥ | naviṣṭau |
tava | it | ūm̐ iti | stomam | ciketa ||8.002.17||

8.002.18a icchanti devāḥ sunvantaṁ na svapnāya spṛhayanti |
8.002.18c yanti pramādam atandrāḥ ||

icchanti | devāḥ | sunvantam | na | svapnāya | spṛhayanti |
yanti | pra-mādam | atandrāḥ ||8.002.18||

8.002.19a o ṣu pra yāhi vājebhir mā hṛṇīthā abhy asmān |
8.002.19c mahām̐ iva yuvajāniḥ ||

o iti | su | pra | yāhi | vājebhiḥ | mā | hṛṇīthāḥ | abhi | asmān |
mahān-iva | yuva-jāniḥ ||8.002.19||

8.002.20a mo ṣv adya durhaṇāvān sāyaṁ karad āre asmat |
8.002.20c aśrīra iva jāmātā ||

mo iti | su | adya | duḥ-hanāvān | sāyam | karat | āre | asmat |
aśrīraḥ-iva | jāmātā ||8.002.20||

8.002.21a vidmā hy asya vīrasya bhūridāvarīṁ sumatim |
8.002.21c triṣu jātasya manāṁsi ||

vidma | hi | asya | vīrasya | bhūri-dāvārīm | su-matim |
triṣu | jātasya | manāṁsi ||8.002.21||

8.002.22a ā tū ṣiñca kaṇvamantaṁ na ghā vidma śavasānāt |
8.002.22c yaśastaraṁ śatamūteḥ ||

ā | tu | siñca | kaṇva-mantam | na | gha | vidma | śavasānāt |
yaśaḥ-taram | śatam-ūteḥ ||8.002.22||

8.002.23a jyeṣṭhena sotar indrāya somaṁ vīrāya śakrāya |
8.002.23c bharā piban naryāya ||

jyeṣṭhena | sotaḥ | indrāya | somam | vīrāya | śakrāya |
bhara | pibat | naryāya ||8.002.23||

8.002.24a yo vediṣṭho avyathiṣv aśvāvantaṁ jaritṛbhyaḥ |
8.002.24c vājaṁ stotṛbhyo gomantam ||

yaḥ | vediṣṭhaḥ | avyathiṣu | aśva-vantam | jaritṛ-bhyaḥ |
vājam | stotṛ-bhyaḥ | go-mantam ||8.002.24||

8.002.25a panyam-panyam it sotāra ā dhāvata madyāya |
8.002.25c somaṁ vīrāya śūrāya ||

panyam-panyam | it | sotāraḥ | ā | dhāvata | madyāya |
somam | vīrāya | śūrāya ||8.002.25||

8.002.26a pātā vṛtrahā sutam ā ghā gaman nāre asmat |
8.002.26c ni yamate śatamūtiḥ ||

pātā | vṛtra-hā | sutam | ā | gha | gamat | na | āre | asmat |
ni | yamate | śatam-ūtiḥ ||8.002.26||

8.002.27a eha harī brahmayujā śagmā vakṣataḥ sakhāyam |
8.002.27c gīrbhiḥ śrutaṁ girvaṇasam ||

ā | iha | harī iti | brahma-yujā | śagmā | vakṣataḥ | sakhāyam |
gīḥ-bhiḥ | śrutam | girvaṇasam ||8.002.27||

8.002.28a svādavaḥ somā ā yāhi śrītāḥ somā ā yāhi |
8.002.28c śiprinn ṛṣīvaḥ śacīvo nāyam acchā sadhamādam ||

svādavaḥ | somāḥ | ā | yāhi | śrītāḥ | somāḥ | ā | yāhi |
śiprin | ṛṣi-vaḥ | śacī-vaḥ | na | ayam | accha | sadha-mādam ||8.002.28||

8.002.29a stutaś ca yās tvā vardhanti mahe rādhase nṛmṇāya |
8.002.29c indra kāriṇaṁ vṛdhantaḥ ||

stutaḥ | ca | yāḥ | tvā | vardhanti | mahe | rādhase | nṛmṇāya |
indra | kāriṇam | vṛdhantaḥ ||8.002.29||

8.002.30a giraś ca yās te girvāha ukthā ca tubhyaṁ tāni |
8.002.30c satrā dadhire śavāṁsi ||

giraḥ | ca | yāḥ | te | girvāhaḥ | ukthā | ca | tubhyam | tāni |
satrā | dadhire | śavāṁsi ||8.002.30||

8.002.31a eved eṣa tuvikūrmir vājām̐ eko vajrahastaḥ |
8.002.31c sanād amṛkto dayate ||

eva | it | eṣaḥ | tuvi-kūrmiḥ | vājān | ekaḥ | vajra-hastaḥ |
sanāt | amṛktaḥ | dayate ||8.002.31||

8.002.32a hantā vṛtraṁ dakṣiṇenendraḥ purū puruhūtaḥ |
8.002.32c mahān mahībhiḥ śacībhiḥ ||

hanta | vṛtram | dakṣiṇena | indraḥ | puru | puru-hūtaḥ |
mahān | mahībhiḥ | śacībhiḥ ||8.002.32||

8.002.33a yasmin viśvāś carṣaṇaya uta cyautnā jrayāṁsi ca |
8.002.33c anu ghen mandī maghonaḥ ||

yasmin | viśvāḥ | carṣaṇayaḥ | uta | cyautnā | jrayāṁsi | ca |
anu | gha | it | mandī | maghonaḥ ||8.002.33||

8.002.34a eṣa etāni cakārendro viśvā yo 'ti śṛṇve |
8.002.34c vājadāvā maghonām ||

eṣaḥ | etāni | cakāra | indraḥ | viśvā | yaḥ | ati | śṛṇve |
vāja-dāvā | maghonām ||8.002.34||

8.002.35a prabhartā rathaṁ gavyantam apākāc cid yam avati |
8.002.35c ino vasu sa hi voḻhā ||

pra-bhartā | ratham | gavyantam | apākāt | cit | yam | avati |
inaḥ | vasu | saḥ | hi | voḻhā ||8.002.35||

8.002.36a sanitā vipro arvadbhir hantā vṛtraṁ nṛbhiḥ śūraḥ |
8.002.36c satyo 'vitā vidhantam ||

sanitā | vipraḥ | arvat-bhiḥ | hantā | vṛtram | nṛ-bhiḥ | śūraḥ |
satyaḥ | avitā | vidhantam ||8.002.36||

8.002.37a yajadhvainam priyamedhā indraṁ satrācā manasā |
8.002.37c yo bhūt somaiḥ satyamadvā ||

yajadhva | enam | priya-medhāḥ | indram | satrācā | manasā |
yaḥ | bhūt | somaiḥ | satya-madvā ||8.002.37||

8.002.38a gāthaśravasaṁ satpatiṁ śravaskāmam purutmānam |
8.002.38c kaṇvāso gāta vājinam ||

gātha-śravasam | sat-patim | śravaḥ-kāmam | puru-tmānam |
kaṇvāsaḥ | gāta | vājinam ||8.002.38||

8.002.39a ya ṛte cid gās padebhyo dāt sakhā nṛbhyaḥ śacīvān |
8.002.39c ye asmin kāmam aśriyan ||

yaḥ | ṛte | cit | gāḥ | padebhyaḥ | dāt | sakhā | nṛ-bhyaḥ | śacī-vān |
ye | asmin | kāmam | aśriyan ||8.002.39||

8.002.40a itthā dhīvantam adrivaḥ kāṇvam medhyātithim |
8.002.40c meṣo bhūto 'bhi yann ayaḥ ||

itthā | dhī-vantam | adri-vaḥ | kāṇvam | medhya-atithim |
meṣaḥ | bhūtaḥ | abhi | yan | ayaḥ ||8.002.40||

8.002.41a śikṣā vibhindo asmai catvāry ayutā dadat |
8.002.41c aṣṭā paraḥ sahasrā ||

śikṣa | vibhindo iti vi-bhindo | asmai | catvāri | ayutā | dadat |
aṣṭa | paraḥ | sahasrā ||8.002.41||

8.002.42a uta su tye payovṛdhā mākī raṇasya naptyā |
8.002.42c janitvanāya māmahe ||

uta | su | tye iti | payaḥ-vṛdhā | mākī iti | raṇasya | naptyā |
jani-tvanāya | mamahe ||8.002.42||


8.003.01a pibā sutasya rasino matsvā na indra gomataḥ |
8.003.01c āpir no bodhi sadhamādyo vṛdhe 'smām̐ avantu te dhiyaḥ ||

pibāa | sutasya | rasinaḥ | matsva | naḥ | indra | go-mataḥ |
āpiḥ | naḥ | bodhi | sadha-mādyaḥ | vṛdhe | asmān | avantu | te | dhiyaḥ ||8.003.01||

8.003.02a bhūyāma te sumatau vājino vayam mā naḥ star abhimātaye |
8.003.02c asmāñ citrābhir avatād abhiṣṭibhir ā naḥ sumneṣu yāmaya ||

bhūyāma | te | su-matau | vājinaḥ | vayam | mā | naḥ | staḥ | abhi-mātaye |
asmān | citrābhiḥ | avatāt | abhiṣṭi-bhiḥ | ā | naḥ | sumneṣu | yamaya ||8.003.02||

8.003.03a imā u tvā purūvaso giro vardhantu yā mama |
8.003.03c pāvakavarṇāḥ śucayo vipaścito 'bhi stomair anūṣata ||

imāḥ | ūm̐ iti | tvā | puruvaso iti puru-vaso | giraḥ | vardhantu | yāḥ | mama |
pāvaka-varṇāḥ | śucayaḥ | vipaḥ-citaḥ | abhi | stomaiḥ | anūṣata ||8.003.03||

8.003.04a ayaṁ sahasram ṛṣibhiḥ sahaskṛtaḥ samudra iva paprathe |
8.003.04c satyaḥ so asya mahimā gṛṇe śavo yajñeṣu viprarājye ||

ayam | sahasram | ṛṣi-bhiḥ | sahaḥ-kṛtaḥ | samudraḥ-iva | paprathe |
satyaḥ | saḥ | asya | mahimā | gṛṇe | śavaḥ | yajñeṣu | vipra-rājye ||8.003.04||

8.003.05a indram id devatātaya indram prayaty adhvare |
8.003.05c indraṁ samīke vanino havāmaha indraṁ dhanasya sātaye ||

indram | it | deva-tātaye | indram | pra-yati | adhvare |
indram | sam-īke | vaninaḥ | havāmahe | indram | dhanasya | sātaye ||8.003.05||

8.003.06a indro mahnā rodasī paprathac chava indraḥ sūryam arocayat |
8.003.06c indre ha viśvā bhuvanāni yemira indre suvānāsa indavaḥ ||

indraḥ | mahnā | rodasī iti | paprathat | śavaḥ | indraḥ | sūryam | arocayat |
indre | ha | viśvā | bhuvanāni | yemire | indre | suvānāsaḥ | indavaḥ ||8.003.06||

8.003.07a abhi tvā pūrvapītaya indra stomebhir āyavaḥ |
8.003.07c samīcīnāsa ṛbhavaḥ sam asvaran rudrā gṛṇanta pūrvyam ||

abhi | tvā | pūrva-pītaye | indra | stomebhiḥ | āyavaḥ |
sam-īcīnāsaḥ | ṛbhavaḥ | sam | asvaran | rudrāḥ | gṛṇanta | pūrvyam ||8.003.07||

8.003.08a asyed indro vāvṛdhe vṛṣṇyaṁ śavo made sutasya viṣṇavi |
8.003.08c adyā tam asya mahimānam āyavo 'nu ṣṭuvanti pūrvathā ||

asya | it | indraḥ | vavṛdhe | vṛṣṇyam | śavaḥ | made | sutasya | viṣṇavi |
adya | tam | asya | mahimānam | āyavaḥ | anu | stuvanti | pūrva-thā ||8.003.08||

8.003.09a tat tvā yāmi suvīryaṁ tad brahma pūrvacittaye |
8.003.09c yenā yatibhyo bhṛgave dhane hite yena praskaṇvam āvitha ||

tat | tva | yāmi | su-vīryam | tat | brahma | pūrva-cittaye |
yena | yati-bhyaḥ | bhṛgave | dhane | hite | yena | praskaṇvam | āvitha ||8.003.09||

8.003.10a yenā samudram asṛjo mahīr apas tad indra vṛṣṇi te śavaḥ |
8.003.10c sadyaḥ so asya mahimā na saṁnaśe yaṁ kṣoṇīr anucakrade ||

yena | samudram | asṛjaḥ | mahīḥ | apaḥ | tat | indra | vṛṣṇi | te | śavaḥ |
sadyaḥ | saḥ | asya | mahimā | na | sam-naśe | yam | kṣoṇīḥ | anu-cakrade ||8.003.10||

8.003.11a śagdhī na indra yat tvā rayiṁ yāmi suvīryam |
8.003.11c śagdhi vājāya prathamaṁ siṣāsate śagdhi stomāya pūrvya ||

śagdhi | naḥ | indra | yat | tvā | rayim | yāmi | su-vīryam |
śagdhi | vājāya | prathamam | sisāsate | śagdhi | stomāya | pūrvya ||8.003.11||

8.003.12a śagdhī no asya yad dha pauram āvitha dhiya indra siṣāsataḥ |
8.003.12c śagdhi yathā ruśamaṁ śyāvakaṁ kṛpam indra prāvaḥ svarṇaram ||

śagdhi | naḥ | asya | yat | ha | pauram | āvitha | dhiyaḥ | indra | sisāsataḥ |
śagdhi | yathā | ruśamam | śyāvakam | kṛpam | indra | pra | āvaḥ | svaḥ-naram ||8.003.12||

8.003.13a kan navyo atasīnāṁ turo gṛṇīta martyaḥ |
8.003.13c nahī nv asya mahimānam indriyaṁ svar gṛṇanta ānaśuḥ ||

kat | navyaḥ | atasīnām | turaḥ | gṛṇīta | martyaḥ |
nah | nu | asya | mahimānam | indriyam | svaḥ | gṛṇantaḥ | ānaśuḥ ||8.003.13||

8.003.14a kad u stuvanta ṛtayanta devata ṛṣiḥ ko vipra ohate |
8.003.14c kadā havam maghavann indra sunvataḥ kad u stuvata ā gamaḥ ||

kat | ūm̐ iti | stuvantaḥ | ṛta-yanta | devatā | ṛṣiḥ | kaḥ | vipraḥ | ohate |
kadā | havam | maghavan | indra | sunvataḥ | kat | ūm̐ iti | stuvataḥ | ā | gamaḥ ||8.003.14||

8.003.15a ud u tye madhumattamā giraḥ stomāsa īrate |
8.003.15c satrājito dhanasā akṣitotayo vājayanto rathā iva ||

ut | ūm̐ iti | tye | madhumat-tamāḥ | giraḥ | stomāsaḥ | īrate |
satrā-jitaḥ | dhana-sāḥ | akṣita-ūtayaḥ | vājayantaḥ | rathāḥ-iva ||8.003.15||

8.003.16a kaṇvā iva bhṛgavaḥ sūryā iva viśvam id dhītam ānaśuḥ |
8.003.16c indraṁ stomebhir mahayanta āyavaḥ priyamedhāso asvaran ||

kaṇvāḥ-iva | bhṛgavaḥ | sūryā-iva | viśvam | it | dhītan | ānaśuḥ |
indram | stomebhiḥ | mahayantaḥ | āyavaḥ | priya-medhāsaḥ | asvaran ||8.003.16||

8.003.17a yukṣvā hi vṛtrahantama harī indra parāvataḥ |
8.003.17c arvācīno maghavan somapītaya ugra ṛṣvebhir ā gahi ||

yukṣva | hi | vṛtrahan-tama | harī iti | indra | parā-vataḥ |
arvācīnaḥ | magha-van | soma-pītaye | ugraḥ | ṛṣvebhiḥ | ā | gahi ||8.003.17||

8.003.18a ime hi te kāravo vāvaśur dhiyā viprāso medhasātaye |
8.003.18c sa tvaṁ no maghavann indra girvaṇo veno na śṛṇudhī havam ||

ime | hi | te | kāravaḥ | vāvaśuḥ | dhiyā | viprāsaḥ | medha-sātaye |
saḥ | tvam | naḥ | magha-van | indra | girvaṇaḥ | venaḥ | na | śṛṇudhi | havam ||8.003.18||

8.003.19a nir indra bṛhatībhyo vṛtraṁ dhanubhyo asphuraḥ |
8.003.19c nir arbudasya mṛgayasya māyino niḥ parvatasya gā ājaḥ ||

niḥ | indra | bṛhatībhyaḥ | vṛtram | dhanu-bhyaḥ | asphuraḥ |
niḥ | arbudasya | mṛgayasya | māyinaḥ | niḥ | parvatasya | gāḥ | ājaḥ ||8.003.19||

8.003.20a nir agnayo rurucur nir u sūryo niḥ soma indriyo rasaḥ |
8.003.20c nir antarikṣād adhamo mahām ahiṁ kṛṣe tad indra pauṁsyam ||

niḥ | agnayaḥ | rurucuḥ | niḥ | ūm̐ iti | sūryaḥ | niḥ | somaḥ | indriyaḥ | rasaḥ |
niḥ | antarikṣāt | adhamaḥ | mahām | ahim | kṛṣe | tat | indra | pauṁsyam ||8.003.20||

8.003.21a yam me dur indro marutaḥ pākasthāmā kaurayāṇaḥ |
8.003.21c viśveṣāṁ tmanā śobhiṣṭham upeva divi dhāvamānam ||

yam | me | duḥ | indraḥ | marutaḥ | pāka-sthāmā | kaurayāṇaḥ |
viśveṣām | tmanā | śobhiṣṭham | upa-iva | divi | dhāvamānam ||8.003.21||

8.003.22a rohitam me pākasthāmā sudhuraṁ kakṣyaprām |
8.003.22c adād rāyo vibodhanam ||

rohitam | me | pāka-sthāmā | su-dhuram | kakṣya-prām |
adāt | rāyaḥ | vi-bodhanam ||8.003.22||

8.003.23a yasmā anye daśa prati dhuraṁ vahanti vahnayaḥ |
8.003.23c astaṁ vayo na tugryam ||

yasmai | anye | daśa | prati | dhuram | vahanti | vahnayaḥ |
astam | vayaḥ | na | tugryam ||8.003.23||

8.003.24a ātmā pitus tanūr vāsa ojodā abhyañjanam |
8.003.24c turīyam id rohitasya pākasthāmānam bhojaṁ dātāram abravam ||

ātmā | pituḥ | tanūḥ | vāsaḥ | ojaḥ-dāḥ | abhi-añjanam |
turīyam | it | rohitasya | pāka-sthāmānam | bhojam | dātāram | abravam ||8.003.24||


8.004.01a yad indra prāg apāg udaṅ nyag vā hūyase nṛbhiḥ |
8.004.01c simā purū nṛṣūto asy ānave 'si praśardha turvaśe ||

yat | indra | prāk | apāk | udak | nyak | vā | hūyase | nṛ-bhiḥ |
sima | puru | nṛ-sūtaḥ | asi | ānave | asi | pra-śardha | turvaśe ||8.004.01||

8.004.02a yad vā rume ruśame śyāvake kṛpa indra mādayase sacā |
8.004.02c kaṇvāsas tvā brahmabhiḥ stomavāhasa indrā yacchanty ā gahi ||

yat | vā | rume | ruśame | śyāvake | kṛpe | indra | mādayase | sacā |
kaṇvāsaḥ | tvā | brahma-bhiḥ | stoma-vāhasaḥ | indra | ā | yacchanti | ā | gahi ||8.004.02||

8.004.03a yathā gauro apā kṛtaṁ tṛṣyann ety averiṇam |
8.004.03c āpitve naḥ prapitve tūyam ā gahi kaṇveṣu su sacā piba ||

yathā | gauraḥ | apā | kṛtam | tṛṣyan | eti | ava | iriṇam |
ā-pitve | naḥ | pra-pitve | tūyam | ā | gahi | kaṇveṣu | su | sacā | piba ||8.004.03||

8.004.04a mandantu tvā maghavann indrendavo rādhodeyāya sunvate |
8.004.04c āmuṣyā somam apibaś camū sutaṁ jyeṣṭhaṁ tad dadhiṣe sahaḥ ||

mandantu | tvā | magha-van | indra | indavaḥ | rādhaḥ-dayāya | sunvate |
ā-muṣya | somam | apibaḥ | camū iti | sutam | jyeṣṭham | tat | dadhiṣe | sahaḥ ||8.004.04||

8.004.05a pra cakre sahasā saho babhañja manyum ojasā |
8.004.05c viśve ta indra pṛtanāyavo yaho ni vṛkṣā iva yemire ||

pra | cakre | sahasā | sahaḥ | babhañja | manyum | ojasā |
viśve | te | indra | pṛtanā-yavaḥ | yaho iti | ni | vṛkṣāḥ-iva | yemire ||8.004.05||

8.004.06a sahasreṇeva sacate yavīyudhā yas ta ānaḻ upastutim |
8.004.06c putram prāvargaṁ kṛṇute suvīrye dāśnoti namaüktibhiḥ ||

sahasreṇa-iva | sacate | yavi-yudhā | yaḥ | te | ānaṭ | upa-stutim |
putram | prāvargam | kṛṇute | su-vīrye | dāśnoti | namaükti-bhiḥ ||8.004.06||

8.004.07a mā bhema mā śramiṣmograsya sakhye tava |
8.004.07c mahat te vṛṣṇo abhicakṣyaṁ kṛtam paśyema turvaśaṁ yadum ||

mā | bhema | mā | śramiṣma | ugrasya | sakhye | tava |
mahat | te | vṛṣṇaḥ | abhi-cakṣyam | kṛtam | paśyema | turvaśam | yadum ||8.004.07||

8.004.08a savyām anu sphigyaṁ vāvase vṛṣā na dāno asya roṣati |
8.004.08c madhvā sampṛktāḥ sāragheṇa dhenavas tūyam ehi dravā piba ||

savyām | anu | sphigyam | vavase | vṛṣā | na | dānaḥ | asya | roṣati |
madhvā | sam-pṛktāḥ | sāragheṇa | dhenavaḥ | tūyam | ā | ihi | drava | piba ||8.004.08||

8.004.09a aśvī rathī surūpa id gomām̐ id indra te sakhā |
8.004.09c śvātrabhājā vayasā sacate sadā candro yāti sabhām upa ||

aśvī | rathī | su-rūpaḥ | it | go-mān | it | indra | te | sakhā |
śvātra-bhājā | vayasā | sacate | sadā | candraḥ | yāti | sabhām | upa ||8.004.09||

8.004.10a ṛśyo na tṛṣyann avapānam ā gahi pibā somaṁ vaśām̐ anu |
8.004.10c nimeghamāno maghavan dive-diva ojiṣṭhaṁ dadhiṣe sahaḥ ||

ṛśyaḥ | na | tṛṣyan | ava-pānam | ā | gahi | piba | somam | vaśān | anu |
ni-meghamānaḥ | magha-van | dive-dive | ojiṣṭham | dadhiṣe | sahaḥ ||8.004.10||

8.004.11a adhvaryo drāvayā tvaṁ somam indraḥ pipāsati |
8.004.11c upa nūnaṁ yuyuje vṛṣaṇā harī ā ca jagāma vṛtrahā ||

adhvaryo iti | drāvaya | tvam | somam | indraḥ | pipāsati |
upa | nūnam | yuyuje | vṛṣaṇā | harī iti | ā | ca | jagāma | vṛtra-hā ||8.004.11||

8.004.12a svayaṁ cit sa manyate dāśurir jano yatrā somasya tṛmpasi |
8.004.12c idaṁ te annaṁ yujyaṁ samukṣitaṁ tasyehi pra dravā piba ||

svayam | cit | saḥ | manyate | dāśuriḥ | janaḥ | yatra | somasya | tṛmpasi |
idam | te | annam | yujyam | sam-ukṣitam | tasya | ā | ihi | pra | drava | piba ||8.004.12||

8.004.13a ratheṣṭhāyādhvaryavaḥ somam indrāya sotana |
8.004.13c adhi bradhnasyādrayo vi cakṣate sunvanto dāśvadhvaram ||

ratheṣṭhāya | adhvaryavaḥ | somam | indrāya | sotana |
adhi | bradhnasya | adrayaḥ | vi | cakṣate | sunvantaḥ | dāśu-adhvaram ||8.004.13||

8.004.14a upa bradhnaṁ vāvātā vṛṣaṇā harī indram apasu vakṣataḥ |
8.004.14c arvāñcaṁ tvā saptayo 'dhvaraśriyo vahantu savaned upa ||

upa | bradhnam | vavātā | vṛṣaṇā | harī iti | indram | apa-su | vakṣataḥ |
arvāñcam | tvā | saptayaḥ | adhvara-śriyaḥ | vahantu | savanā | it | upa ||8.004.14||

8.004.15a pra pūṣaṇaṁ vṛṇīmahe yujyāya purūvasum |
8.004.15c sa śakra śikṣa puruhūta no dhiyā tuje rāye vimocana ||

pra | pūṣaṇam | vṛṇīmahe | yujyāya | puru-vasum |
saḥ | śakra | śikṣa | puru-hūta | naḥ | dhiyā | tuje | rāye | vi-mocana ||8.004.15||

8.004.16a saṁ naḥ śiśīhi bhurijor iva kṣuraṁ rāsva rāyo vimocana |
8.004.16c tve tan naḥ suvedam usriyaṁ vasu yaṁ tvaṁ hinoṣi martyam ||

sam | naḥ | śiśīhi | bhurijoḥ-iva | kṣuram | rāsva | rāyaḥ | vi-mocana |
tve iti | tat | naḥ | su-vedam | usriyam | vasu | yam | tvam | hinoṣi | martyam ||8.004.16||

8.004.17a vemi tvā pūṣann ṛñjase vemi stotava āghṛṇe |
8.004.17c na tasya vemy araṇaṁ hi tad vaso stuṣe pajrāya sāmne ||

vemi | tvā | pūṣan | ṛñjase | vemi | stotave | āghṛṇe |
na | tasya | vemi | araṇam | hi | tat | vaso iti | stuṣe | pajrāya | sāmne ||8.004.17||

8.004.18a parā gāvo yavasaṁ kac cid āghṛṇe nityaṁ rekṇo amartya |
8.004.18c asmākam pūṣann avitā śivo bhava maṁhiṣṭho vājasātaye ||

parā | gāvaḥ | yavasam | kat | cit | āghṛṇe | nityam | rekṇaḥ | amartya |
asmākam | pūṣan | avitā | śivaḥ | bhava | maṁhiṣṭhaḥ | vāja-sātaye ||8.004.18||

8.004.19a sthūraṁ rādhaḥ śatāśvaṁ kuruṅgasya diviṣṭiṣu |
8.004.19c rājñas tveṣasya subhagasya rātiṣu turvaśeṣv amanmahi ||

sthūram | rādhaḥ | śata-aśvam | kuruṅgasya | diviṣṭiṣu |
rājñaḥ | tveṣasya | su-bhagasya | rātiṣu | turvaśeṣu | amanmahi ||8.004.19||

8.004.20a dhībhiḥ sātāni kāṇvasya vājinaḥ priyamedhair abhidyubhiḥ |
8.004.20c ṣaṣṭiṁ sahasrānu nirmajām aje nir yūthāni gavām ṛṣiḥ ||

dhībhiḥ | sātāni | kāṇvasya | vājinaḥ | priya-medhaiḥ | abhidyu-bhiḥ |
ṣaṣṭim | sahasrā | anu | niḥ-majām | aje | niḥ | yūthāni | gavām | ṛṣiḥ ||8.004.20||

8.004.21a vṛkṣāś cin me abhipitve arāraṇuḥ |
8.004.21c gām bhajanta mehanāśvam bhajanta mehanā ||

vṛkṣāḥ | cit | me | abhi-pitve | araraṇuḥ |
gām | bhajanta | mehanā | aśvam | bhajanta | mehanā ||8.004.21||


8.005.01a dūrād iheva yat saty aruṇapsur aśiśvitat |
8.005.01c vi bhānuṁ viśvadhātanat ||

dūrāt | iha-iva | yat | satī | aruṇa-pśuḥ | aśiśvitat |
vi | bhānum | viśvadhā | atanat ||8.005.01||

8.005.02a nṛvad dasrā manoyujā rathena pṛthupājasā |
8.005.02c sacethe aśvinoṣasam ||

nṛ-vat | dasrā | manaḥ-yujā | rathena | pṛthu-pājasā |
sacethe iti | aśvinā | uṣasam ||8.005.02||

8.005.03a yuvābhyāṁ vājinīvasū prati stomā adṛkṣata |
8.005.03c vācaṁ dūto yathohiṣe ||

yuvābhyām | vājinīvasū iti vājinī-vasū | prati | stomāḥ | adṛkṣata |
vācam | dūtaḥ | yathā | ohiṣe ||8.005.03||

8.005.04a purupriyā ṇa ūtaye purumandrā purūvasū |
8.005.04c stuṣe kaṇvāso aśvinā ||

puru-priyā | naḥ | ūtaye | puru-mandrā | puruvasū iti puru-vasū |
stuṣe | kaṇvāsaḥ | aśvinā ||8.005.04||

8.005.05a maṁhiṣṭhā vājasātameṣayantā śubhas patī |
8.005.05c gantārā dāśuṣo gṛham ||

maṁhiṣṭhā | vāja-sātamā | iṣayantā | śubhaḥ | patī iti |
gantārā | dāśuṣaḥ | gṛham ||8.005.05||

8.005.06a tā sudevāya dāśuṣe sumedhām avitāriṇīm |
8.005.06c ghṛtair gavyūtim ukṣatam ||

tā | su-devāya | dāśuṣe | su-medhām | avi-tāriṇīm |
ghṛtaiḥ | gavyūtim | ukṣatam ||8.005.06||

8.005.07a ā naḥ stomam upa dravat tūyaṁ śyenebhir āśubhiḥ |
8.005.07c yātam aśvebhir aśvinā ||

ā | naḥ | stomam | upa | dravat | tūyam | śyenebhiḥ | āśu-bhiḥ |
yātam | aśvebhiḥ | aśvinā ||8.005.07||

8.005.08a yebhis tisraḥ parāvato divo viśvāni rocanā |
8.005.08c trīm̐r aktūn paridīyathaḥ ||

yebhiḥ | tisraḥ | parā-vataḥ | divaḥ | viśvāni | rocanā |
trīn | aktūn | pari-dīyathaḥ ||8.005.08||

8.005.09a uta no gomatīr iṣa uta sātīr aharvidā |
8.005.09c vi pathaḥ sātaye sitam ||

uta | naḥ | go-matīḥ | iṣaḥ | uta | sātīḥ | ahaḥ-vidā |
vi | pathaḥ | sātaye | sitam ||8.005.09||

8.005.10a ā no gomantam aśvinā suvīraṁ surathaṁ rayim |
8.005.10c voḻham aśvāvatīr iṣaḥ ||

ā | naḥ | go-mantam | aśvinā | su-vīram | su-ratham | rayim |
voḻham | aśva-vatīḥ | iṣaḥ ||8.005.10||

8.005.11a vāvṛdhānā śubhas patī dasrā hiraṇyavartanī |
8.005.11c pibataṁ somyam madhu ||

vāvṛdhānā | śubhaḥ | patī iti | dasrā | hiraṇya-vartanī iti hiraṇya-vartanī |
pibatam | somyam | madhu ||8.005.11||

8.005.12a asmabhyaṁ vājinīvasū maghavadbhyaś ca saprathaḥ |
8.005.12c chardir yantam adābhyam ||

asmabhyam | vājinīvasū iti vājinī-vasū | maghavat-bhyaḥ | ca | sa-prathaḥ |
chardiḥ | yantam | adābhyam ||8.005.12||

8.005.13a ni ṣu brahma janānāṁ yāviṣṭaṁ tūyam ā gatam |
8.005.13c mo ṣv anyām̐ upāratam ||

ni | su | brahma | janānām | yā | aviṣṭam | tūyam | ā | gatam |
mo iti | su | anyān | upa | aratam ||8.005.13||

8.005.14a asya pibatam aśvinā yuvam madasya cāruṇaḥ |
8.005.14c madhvo rātasya dhiṣṇyā ||

asya | pibatam | aśvinā | yuvam | madasya | cāruṇaḥ |
madhvaḥ | rātasya | dhiṣṇyā ||8.005.14||

8.005.15a asme ā vahataṁ rayiṁ śatavantaṁ sahasriṇam |
8.005.15c purukṣuṁ viśvadhāyasam ||

asme iti | ā | vahatam | rayim | śata-vantam | sahasriṇam |
puru-kṣum | viśva-dhāyasam ||8.005.15||

8.005.16a purutrā cid dhi vāṁ narā vihvayante manīṣiṇaḥ |
8.005.16c vāghadbhir aśvinā gatam ||

puru-trā | cit | hi | vām | narā | vi-hvayante | manīṣiṇaḥ |
vāghat-bhiḥ | aśvinā | ā | gatam ||8.005.16||

8.005.17a janāso vṛktabarhiṣo haviṣmanto araṁkṛtaḥ |
8.005.17c yuvāṁ havante aśvinā ||

janāsaḥ | vṛkta-barhiṣaḥ | haviṣmantaḥ | aram-kṛtaḥ |
yuvām | havante | aśvinā ||8.005.17||

8.005.18a asmākam adya vām ayaṁ stomo vāhiṣṭho antamaḥ |
8.005.18c yuvābhyām bhūtv aśvinā ||

asmākam | adya | vām | ayam | stomaḥ | vāhiṣṭhaḥ | antamaḥ |
yuvābhyām | bhūtu | aśvinā ||8.005.18||

8.005.19a yo ha vām madhuno dṛtir āhito rathacarṣaṇe |
8.005.19c tataḥ pibatam aśvinā ||

yaḥ | ha | vām | madhunaḥ | dṛtiḥ | ā-hitaḥ | ratha-carṣaṇe |
tataḥ | pibatam | aśvinā ||8.005.19||

8.005.20a tena no vājinīvasū paśve tokāya śaṁ gave |
8.005.20c vahatam pīvarīr iṣaḥ ||

tena | naḥ | vājinīvasū iti vājinī-vasū | paśve | tokāya | śam | gave |
vahatam | pīvarīḥ | iṣaḥ ||8.005.20||

8.005.21a uta no divyā iṣa uta sindhūm̐r aharvidā |
8.005.21c apa dvāreva varṣathaḥ ||

uta | naḥ | divyāḥ | iṣaḥ | uta | sindhūn | ahaḥ-vidā |
apa | dvārā-iva | varṣathaḥ ||8.005.21||

8.005.22a kadā vāṁ taugryo vidhat samudre jahito narā |
8.005.22c yad vāṁ ratho vibhiṣ patāt ||

kadā | vām | taugryaḥ | vidhat | samudre | jahitaḥ | narā |
yat | vām | rathaḥ | vi-bhiḥ | patāt ||8.005.22||

8.005.23a yuvaṁ kaṇvāya nāsatyā ṛpiriptāya harmye |
8.005.23c śaśvad ūtīr daśasyathaḥ ||

yuvam | kaṇvāya | nāsatyā | api-riptāya | harmye |
śaśvat | ūtīḥ | daśasyathaḥ ||8.005.23||

8.005.24a tābhir ā yātam ūtibhir navyasībhiḥ suśastibhiḥ |
8.005.24c yad vāṁ vṛṣaṇvasū huve ||

tābhiḥ | ā | yātam | ūti-bhiḥ | navyasībhiḥ | suśasti-bhiḥ |
yat | vām | vṛṣaṇvasū iti vṛṣaṇ-vasū | huve ||8.005.24||

8.005.25a yathā cit kaṇvam āvatam priyamedham upastutam |
8.005.25c atriṁ śiñjāram aśvinā ||

yathā | cit | kaṇvam | āvatam | priya-medham | upa-stutam |
atrim | śiñjāram | aśvinā ||8.005.25||

8.005.26a yathota kṛtvye dhane 'ṁśuṁ goṣv agastyam |
8.005.26c yathā vājeṣu sobharim ||

yathā | uta | kṛtvye | dhane | aṁśum | goṣu | agastyam |
yathā | vājeṣu | sobharim ||8.005.26||

8.005.27a etāvad vāṁ vṛṣaṇvasū ato vā bhūyo aśvinā |
8.005.27c gṛṇantaḥ sumnam īmahe ||

etāvat | vām | vṛṣaṇvasū iti vṛṣaṇ-vasū | ataḥ | vā | bhūyaḥ | aśvinā |
gṛṇantaḥ | sumnam | īmahe ||8.005.27||

8.005.28a rathaṁ hiraṇyavandhuraṁ hiraṇyābhīśum aśvinā |
8.005.28c ā hi sthātho divispṛśam ||

ratham | hiraṇya-vandhuram | hiraṇya-abhīśum | aśvinā |
ā | hi | sthāthaḥ | divi-spṛśam ||8.005.28||

8.005.29a hiraṇyayī vāṁ rabhir īṣā akṣo hiraṇyayaḥ |
8.005.29c ubhā cakrā hiraṇyayā ||

hiraṇyayīm | vām | rabhiḥ | īṣā | akṣaḥ | hiraṇyayaḥ |
ubhā | cakrā | hiraṇyayā ||8.005.29||

8.005.30a tena no vājinīvasū parāvataś cid ā gatam |
8.005.30c upemāṁ suṣṭutim mama ||

tena | naḥ | vājinīvasū iti vājinī-vasū | parā-vataḥ | cit | ā | gatam |
upa | imām | su-stutim | mama ||8.005.30||

8.005.31a ā vahethe parākāt pūrvīr aśnantāv aśvinā |
8.005.31c iṣo dāsīr amartyā ||

ā | vahethe iti | parākāt | pūrvīḥ | aśnantau | aśvinā |
iṣaḥ | dāsīḥ | amartyā ||8.005.31||

8.005.32a ā no dyumnair ā śravobhir ā rāyā yātam aśvinā |
8.005.32c puruścandrā nāsatyā ||

ā | naḥ | dyumaiḥ | ā | śravaḥ-bhiḥ | ā | rāyā | yātam | aśvinā |
puru-candrā | nāsatyā ||8.005.32||

8.005.33a eha vām pruṣitapsavo vayo vahantu parṇinaḥ |
8.005.33c acchā svadhvaraṁ janam ||

ā | iha | vām | pruṣita-psavaḥ | vayaḥ | vahantu | parṇinaḥ |
accha | su-adhvaram | janam ||8.005.33||

8.005.34a rathaṁ vām anugāyasaṁ ya iṣā vartate saha |
8.005.34c na cakram abhi bādhate ||

ratham | vām | anu-gāyasam | ya | iṣā | vartate | saha |
na | cakram | abhi | bādhate ||8.005.34||

8.005.35a hiraṇyayena rathena dravatpāṇibhir aśvaiḥ |
8.005.35c dhījavanā nāsatyā ||

hiraṇyayena | rathena | dravatpāṇi-bhiḥ | aśvaiḥ |
dhī-javanā | nāsatyā ||8.005.35||

8.005.36a yuvam mṛgaṁ jāgṛvāṁsaṁ svadatho vā vṛṣaṇvasū |
8.005.36c tā naḥ pṛṅktam iṣā rayim ||

yuvam | mṛgam | jāgṛ-vāṁsam | svadathaḥ | vā | vṛṣaṇvasū iti vṛṣaṇ-vasū |
tā | naḥ | pṛṅktam | iṣā | rayim ||8.005.36||

8.005.37a tā me aśvinā sanīnāṁ vidyātaṁ navānām |
8.005.37c yathā cic caidyaḥ kaśuḥ śatam uṣṭrānāṁ dadat sahasrā daśa gonām ||

tā | me | aśvinā | sanīnām | vidhyātam | navānām |
yathā | cit | caidyaḥ | kaśum | śatam | uṣṭrānām | dadat | sahasrā | daśa | gonām ||8.005.37||

8.005.38a yo me hiraṇyasaṁdṛśo daśa rājño amaṁhata |
8.005.38c adhaspadā ic caidyasya kṛṣṭayaś carmamnā abhito janāḥ ||

yaḥ | me | hiraṇya-sandṛśaḥ | daśa | rājñaḥ | amaṁhata |
adhaḥ-padāḥ | it | caidyasya | kṛṣṭayaḥ | carma-mnāḥ | abhitaḥ | janāḥ ||8.005.38||

8.005.39a mākir enā pathā gād yeneme yanti cedayaḥ |
8.005.39c anyo net sūrir ohate bhūridāvattaro janaḥ ||

mākiḥ | enā | pathā | gāt | yena | ime | yanti | cedayaḥ |
anyaḥ | na | it | sūriḥ | ohate | bhūrdat-taraḥ | janaḥ ||8.005.39||


8.006.01a mahām̐ indro ya ojasā parjanyo vṛṣṭimām̐ iva |
8.006.01c stomair vatsasya vāvṛdhe ||

mahān | indraḥ | yaḥ | ojasā | parjanyaḥ | vṛṣṭimān-iva |
stomaiḥ | vatsasya | vavṛdhe ||8.006.01||

8.006.02a prajām ṛtasya piprataḥ pra yad bharanta vahnayaḥ |
8.006.02c viprā ṛtasya vāhasā ||

pra-jām | ṛtasya | piprataḥ | pra | yat | bharanta | vahnayaḥ |
viprāḥ | ṛtasya | vāhasā ||8.006.02||

8.006.03a kaṇvā indraṁ yad akrata stomair yajñasya sādhanam |
8.006.03c jāmi bruvata āyudham ||

kaṇvāḥ | indram | yat | akrata | stomaiḥ | yajñasya | sādhanam |
jāmi | bruvate | āyudham ||8.006.03||

8.006.04a sam asya manyave viśo viśvā namanta kṛṣṭayaḥ |
8.006.04c samudrāyeva sindhavaḥ ||

sam | asya | manyave | viśaḥ | viśvāḥ | namanta | kṛṣṭayaḥ |
samudrāya-iva | sindhavaḥ ||8.006.04||

8.006.05a ojas tad asya titviṣa ubhe yat samavartayat |
8.006.05c indraś carmeva rodasī ||

ojaḥ | tat | asya | titviṣe | ubhe iti | yat | sam-avartayat |
indraḥ | carma-iva | rodasī iti ||8.006.05||

8.006.06a vi cid vṛtrasya dodhato vajreṇa śataparvaṇā |
8.006.06c śiro bibheda vṛṣṇinā ||

vi | cit | vṛtrasya | dodhataḥ | vajreṇa | śata-parvaṇā |
śiraḥ | bibheda | vṛṣṇinā ||8.006.06||

8.006.07a imā abhi pra ṇonumo vipām agreṣu dhītayaḥ |
8.006.07c agneḥ śocir na didyutaḥ ||

imāḥ | abhi | pra | nonumaḥ | vipām | agreṣu | dhītayaḥ |
agneḥ | śociḥ | na | didyutaḥ ||8.006.07||

8.006.08a guhā satīr upa tmanā pra yac chocanta dhītayaḥ |
8.006.08c kaṇvā ṛtasya dhārayā ||

guhā | satīḥ | upa | tmanā | pra | yat | śocanta | dhītayaḥ |
kaṇvāḥ | ṛtasya | dhārayā ||8.006.08||

8.006.09a pra tam indra naśīmahi rayiṁ gomantam aśvinam |
8.006.09c pra brahma pūrvacittaye ||

pra | tam | indra | naśīmahi | rayim | go-mantam | aśvinam |
pra | brahma | pūrva-cittaye ||8.006.09||

8.006.10a aham id dhi pituṣ pari medhām ṛtasya jagrabha |
8.006.10c ahaṁ sūrya ivājani ||

aham | it | hi | pituḥ | pari | medhām | ṛtasya | jagrabha |
aham | sūryaḥ-iva | ajani ||8.006.10||

8.006.11a aham pratnena manmanā giraḥ śumbhāmi kaṇvavat |
8.006.11c yenendraḥ śuṣmam id dadhe ||

aham | pratnena | manmanā | giraḥ | śumbhāmi | kaṇva-vat |
yena | indraḥ | śuṣmam | it | dadhe ||8.006.11||

8.006.12a ye tvām indra na tuṣṭuvur ṛṣayo ye ca tuṣṭuvuḥ |
8.006.12c mamed vardhasva suṣṭutaḥ ||

ye | tvām | indra | na | tustuvuḥ | ṛṣayaḥ | ye | ca | tustuvuḥ |
mama | it | vardhasva | su-stutaḥ ||8.006.12||

8.006.13a yad asya manyur adhvanīd vi vṛtram parvaśo rujan |
8.006.13c apaḥ samudram airayat ||

yat | asya | manyuḥ | adhvanīt | vi | vṛtram | parva-śaḥ | rujan |
apaḥ | samudram | airayat ||8.006.13||

8.006.14a ni śuṣṇa indra dharṇasiṁ vajraṁ jaghantha dasyavi |
8.006.14c vṛṣā hy ugra śṛṇviṣe ||

ni | śuṣṇe | indra | dharṇasim | vajram | jaghantha | dasyavi |
vṛṣā | hi | ugra | śṛṇviṣe ||8.006.14||

8.006.15a na dyāva indram ojasā nāntarikṣāṇi vajriṇam |
8.006.15c na vivyacanta bhūmayaḥ ||

na | dyāvaḥ | indram | ojasā | na | antarikṣāṇi | vajriṇam |
na | vivyacanta | bhūmayaḥ ||8.006.15||

8.006.16a yas ta indra mahīr apaḥ stabhūyamāna āśayat |
8.006.16c ni tam padyāsu śiśnathaḥ ||

yaḥ | te | indra | mahīḥ | apaḥ | stabhu-yamānaḥ | ā | aśayat |
ni | tam | padyāsu | śiśnathaḥ ||8.006.16||

8.006.17a ya ime rodasī mahī samīcī samajagrabhīt |
8.006.17c tamobhir indra taṁ guhaḥ ||

yaḥ | ime iti | rodasī iti | mahī iti | samīcī iti sam-īcī | sam-ajagrabhīt |
tamaḥ-bhiḥ | indra | tam | guhaḥ ||8.006.17||

8.006.18a ya indra yatayas tvā bhṛgavo ye ca tuṣṭuvuḥ |
8.006.18c mamed ugra śrudhī havam ||

ye | indra | yatayaḥ | tvā | bhṛgavaḥ | ye | ca | tustuvuḥ |
mama | it | ugra | srudhi | havam ||8.006.18||

8.006.19a imās ta indra pṛśnayo ghṛtaṁ duhata āśiram |
8.006.19c enām ṛtasya pipyuṣīḥ ||

imāḥ | te | indra | pṛśnayaḥ | ghṛtam | duhate | ā-śiram |
enām | ṛtasya | pipyuṣīḥ ||8.006.19||

8.006.20a yā indra prasvas tvāsā garbham acakriran |
8.006.20c pari dharmeva sūryam ||

yāḥ | indra | pra-svaḥ | tvā | āsā | garbham | acakriran |
pari | dharma-iva | sūryam ||8.006.20||

8.006.21a tvām ic chavasas pate kaṇvā ukthena vāvṛdhuḥ |
8.006.21c tvāṁ sutāsa indavaḥ ||

tvām | it | śavasaḥ | pate | kaṇvāḥ | ukthena | vavṛdhuḥ |
tvām | sutāsaḥ | indavaḥ ||8.006.21||

8.006.22a taved indra praṇītiṣūta praśastir adrivaḥ |
8.006.22c yajño vitantasāyyaḥ ||

tava | it | indra | pra-nītiṣu | uta | pra-śastiḥ | adri-vaḥ |
yajñaḥ | vitantasāyyaḥ ||8.006.22||

8.006.23a ā na indra mahīm iṣam puraṁ na darṣi gomatīm |
8.006.23c uta prajāṁ suvīryam ||

ā | naḥ | indra | mahīm | iṣam | puram | na | darṣi | go-matīm |
uta | pra-jām | su-vīryam ||8.006.23||

8.006.24a uta tyad āśvaśvyaṁ yad indra nāhuṣīṣv ā |
8.006.24c agre vikṣu pradīdayat ||

uta | tyat | āśu-aśvyam | yat | indra | nāhuṣīṣu | ā |
agre | vikṣu | pra-dīdayat ||8.006.24||

8.006.25a abhi vrajaṁ na tatniṣe sūra upākacakṣasam |
8.006.25c yad indra mṛḻayāsi naḥ ||

abhi | vrajam | na | tatniṣe | sūraḥ | upāka-cakṣasam |
yat | indra | mṛḻayāsi | naḥ ||8.006.25||

8.006.26a yad aṅga taviṣīyasa indra prarājasi kṣitīḥ |
8.006.26c mahām̐ apāra ojasā ||

yat | aṅga | taviṣī-yase | indra | pra-rājasi | kṣitīḥ |
mahān | apāraḥ | ojasā ||8.006.26||

8.006.27a taṁ tvā haviṣmatīr viśa upa bruvata ūtaye |
8.006.27c urujrayasam indubhiḥ ||

tam | tvā | haviṣmatīḥ | viśaḥ | upa | bruvate | ūtaye |
uru-jrayasam | indu-bhiḥ ||8.006.27||

8.006.28a upahvare girīṇāṁ saṁgathe ca nadīnām |
8.006.28c dhiyā vipro ajāyata ||

upa-hvare | girīṇām | sam-gathe | ca | nadīnām |
dhiyā | vipraḥ | ajāyata ||8.006.28||

8.006.29a ataḥ samudram udvataś cikitvām̐ ava paśyati |
8.006.29c yato vipāna ejati ||

ataḥ | samudram | ut-vataḥ | cikitvān | ava | paśyati |
yataḥ | vipānaḥ | ejati ||8.006.29||

8.006.30a ād it pratnasya retaso jyotiṣ paśyanti vāsaram |
8.006.30c paro yad idhyate divā ||

āt | it | pratnasya | retasaḥ | jyotiḥ | paśyanti | vāsaram |
paraḥ | yat | idhyate | divā ||8.006.30||

8.006.31a kaṇvāsa indra te matiṁ viśve vardhanti pauṁsyam |
8.006.31c uto śaviṣṭha vṛṣṇyam ||

kaṇvāsaḥ | indra | te | matim | viśve | vardhanti | pauṁsyam |
uto iti | śaviṣṭha | vṛṣṇyam ||8.006.31||

8.006.32a imām ma indra suṣṭutiṁ juṣasva pra su mām ava |
8.006.32c uta pra vardhayā matim ||

imām | me | indra | su-stutim | juṣasva | pra | su | mām | ava |
uta | pra | vardhaya | matim ||8.006.32||

8.006.33a uta brahmaṇyā vayaṁ tubhyam pravṛddha vajrivaḥ |
8.006.33c viprā atakṣma jīvase ||

uta | brahmaṇyā | vayam | tubhyam | pra-vṛddha | vajri-vaḥ |
viprāḥ | atakṣma | jīvase ||8.006.33||

8.006.34a abhi kaṇvā anūṣatāpo na pravatā yatīḥ |
8.006.34c indraṁ vananvatī matiḥ ||

abhi | kaṇvāḥ | anūṣata | āpaḥ | na | pra-vatā | yatīḥ |
indram | vanan-vatī | matiḥ ||8.006.34||

8.006.35a indram ukthāni vāvṛdhuḥ samudram iva sindhavaḥ |
8.006.35c anuttamanyum ajaram ||

indram | ukthāni | vavṛdhuḥ | samudram-iva | sindhavaḥ |
anutta-manyum | ajaram ||8.006.35||

8.006.36a ā no yāhi parāvato haribhyāṁ haryatābhyām |
8.006.36c imam indra sutam piba ||

ā | naḥ | yāhi | parā-vataḥ | hari-bhyām | haryatābhyām |
imam | indra | sutam | piba ||8.006.36||

8.006.37a tvām id vṛtrahantama janāso vṛktabarhiṣaḥ |
8.006.37c havante vājasātaye ||

tvām | it | vṛtrahan-tama | janāsaḥ | vṛkta-barhiṣaḥ |
havante | vāja-sātaye ||8.006.37||

8.006.38a anu tvā rodasī ubhe cakraṁ na varty etaśam |
8.006.38c anu suvānāsa indavaḥ ||

anu | tvā | rodasī iti | ubhe iti | cakram | na | varti | etaśam |
anu | suvānāsaḥ | indavaḥ ||8.006.38||

8.006.39a mandasvā su svarṇara utendra śaryaṇāvati |
8.006.39c matsvā vivasvato matī ||

mandasva | su | svaḥ-nare | uta | indra | śaryaṇā-vati |
matsva | vivasvataḥ | matī ||8.006.39||

8.006.40a vāvṛdhāna upa dyavi vṛṣā vajry aroravīt |
8.006.40c vṛtrahā somapātamaḥ ||

vavṛdhānaḥ | upa | dyavi | vṛṣā | vajrī | aroravīt |
vṛtra-hā | soma-pātamaḥ ||8.006.40||

8.006.41a ṛṣir hi pūrvajā asy eka īśāna ojasā |
8.006.41c indra coṣkūyase vasu ||

ṛṣiḥ | hi | pūrva-jāḥ | asi | ekaḥ | īśānaḥ | ojasā |
indra | coṣkūyase | vasu ||8.006.41||

8.006.42a asmākaṁ tvā sutām̐ upa vītapṛṣṭhā abhi prayaḥ |
8.006.42c śataṁ vahantu harayaḥ ||

asmākam | tvā | sutān | upa | vīta-pṛṣṭhāḥ | abhi | prayaḥ |
śatam | vahantu | harayaḥ ||8.006.42||

8.006.43a imāṁ su pūrvyāṁ dhiyam madhor ghṛtasya pipyuṣīm |
8.006.43c kaṇvā ukthena vāvṛdhuḥ ||

imām | su | pūrvyām | dhiyam | madhoḥ | ghṛtasya | pipyuṣīm |
kaṇvāḥ | ukthena | vavṛdhuḥ ||8.006.43||

8.006.44a indram id vimahīnām medhe vṛṇīta martyaḥ |
8.006.44c indraṁ saniṣyur ūtaye ||

indram | it | vi-mahīnām | medhe | vṛṇīta | martyaḥ |
indram | saniṣyuḥ | ūtaye ||8.006.44||

8.006.45a arvāñcaṁ tvā puruṣṭuta priyamedhastutā harī |
8.006.45c somapeyāya vakṣataḥ ||

arvāñcam | tvā | puru-stuta | priyamedha-stutā | harī |
soma-peyāya | vakṣataḥ ||8.006.45||

8.006.46a śatam ahaṁ tirindire sahasram parśāv ā dade |
8.006.46c rādhāṁsi yādvānām ||

śatam | aham | tirindire | sahasram | parśau | ā | dade |
rādhāṁsi | yādvānām ||8.006.46||

8.006.47a trīṇi śatāny arvatāṁ sahasrā daśa gonām |
8.006.47c daduṣ pajrāya sāmne ||

trīṇi | śatāni | arvatām | sahasrā | daśa | gonām |
daduḥ | pajrāya | sāmne ||8.006.47||

8.006.48a ud ānaṭ kakuho divam uṣṭrāñ caturyujo dadat |
8.006.48c śravasā yādvaṁ janam ||

ut | ānaṭ | kakuhaḥ | divam | uṣṭrān | catuḥ-yujaḥ | dadat |
śravasā | yādvam | janam ||8.006.48||


8.007.01a pra yad vas triṣṭubham iṣam maruto vipro akṣarat |
8.007.01c vi parvateṣu rājatha ||

pra | yat | vaḥ | tri-stubham | iṣam | marutaḥ | vipraḥ | akṣarat |
vi | parvateṣu | rājatha ||8.007.01||

8.007.02a yad aṅga taviṣīyavo yāmaṁ śubhrā acidhvam |
8.007.02c ni parvatā ahāsata ||

yat | aṅga | taviṣī-yavaḥ | yāmam | śubhrāḥ | acidhvam |
ni | parvatāḥ | ahāsata ||8.007.02||

8.007.03a ud īrayanta vāyubhir vāśrāsaḥ pṛśnimātaraḥ |
8.007.03c dhukṣanta pipyuṣīm iṣam ||

ut | īrayanta | vāyu-bhiḥ | vāśrāsaḥ | pṛśni-mātaraḥ |
dhukṣanta | pipyuṣīm | iṣam ||8.007.03||

8.007.04a vapanti maruto miham pra vepayanti parvatān |
8.007.04c yad yāmaṁ yānti vāyubhiḥ ||

vapanti | marutaḥ | miham | pra | vepayanti | parvatān |
yat | yāmam | yānti | vāyu-bhiḥ ||8.007.04||

8.007.05a ni yad yāmāya vo girir ni sindhavo vidharmaṇe |
8.007.05c mahe śuṣmāya yemire ||

ni | yat | yāmāya | vaḥ | giriḥ | ni | sindhavaḥ | vi-dharmaṇe |
mahe | śuṣmāya | yemire ||8.007.05||

8.007.06a yuṣmām̐ u naktam ūtaye yuṣmān divā havāmahe |
8.007.06c yuṣmān prayaty adhvare ||

yuṣmān | ūm̐ iti | naktam | ūtaye | yuṣmān | divā | havāmahe |
yuṣmān | pra-yati | adhvare ||8.007.06||

8.007.07a ud u tye aruṇapsavaś citrā yāmebhir īrate |
8.007.07c vāśrā adhi ṣṇunā divaḥ ||

ut | ūm̐ iti | tye | aruṇa-psavaḥ | citrāḥ | yāmebhiḥ | īrate |
vāśrāḥ | adhi | snunā | divaḥ ||8.007.07||

8.007.08a sṛjanti raśmim ojasā panthāṁ sūryāya yātave |
8.007.08c te bhānubhir vi tasthire ||

sṛjanti | raśmim | ojasā | panthām | sūryāya | yātave |
te | bhānu-bhiḥ | vi | tasthire ||8.007.08||

8.007.09a imām me maruto giram imaṁ stomam ṛbhukṣaṇaḥ |
8.007.09c imam me vanatā havam ||

imām | me | marutaḥ | giram | imam | stomam | ṛbhukṣaṇaḥ |
imam | me | vanata | havam ||8.007.09||

8.007.10a trīṇi sarāṁsi pṛśnayo duduhre vajriṇe madhu |
8.007.10c utsaṁ kavandham udriṇam ||

trīṇi | sarāṁsi | pṛśnayaḥ | duduhre | vajriṇe | madhu |
utsam | kavandham | udriṇam ||8.007.10||

8.007.11a maruto yad dha vo divaḥ sumnāyanto havāmahe |
8.007.11c ā tū na upa gantana ||

marutaḥ | yat | ha | vaḥ | divaḥ | sumna-yantaḥ | havāmahe |
ā | tu | naḥ | upa | gantana ||8.007.11||

8.007.12a yūyaṁ hi ṣṭhā sudānavo rudrā ṛbhukṣaṇo dame |
8.007.12c uta pracetaso made ||

yūyam | hi | stha | su-dānavaḥ | rudrāḥ | ṛbhukṣaṇaḥ | dame |
uta | pra-cetasaḥ | made ||8.007.12||

8.007.13a ā no rayim madacyutam purukṣuṁ viśvadhāyasam |
8.007.13c iyartā maruto divaḥ ||

ā | naḥ | rayim | mada-cyutam | puru-kṣum | viśva-dhāyasam |
iyarta | marutaḥ | divaḥ ||8.007.13||

8.007.14a adhīva yad girīṇāṁ yāmaṁ śubhrā acidhvam |
8.007.14c suvānair mandadhva indubhiḥ ||

adhi-iva | yat | girīṇām | yāmam | śubhrāḥ | acidhvam |
suvānaiḥ | mandadhve | indu-bhiḥ ||8.007.14||

8.007.15a etāvataś cid eṣāṁ sumnam bhikṣeta martyaḥ |
8.007.15c adābhyasya manmabhiḥ ||

etāvataḥ | cit | eṣām | sumnam | bhikṣeta | martyaḥ |
adābhyasya | manma-bhiḥ ||8.007.15||

8.007.16a ye drapsā iva rodasī dhamanty anu vṛṣṭibhiḥ |
8.007.16c utsaṁ duhanto akṣitam ||

ye | drapsāḥ-iva | rodasī iti | dhamanti | anu | vṛṣṭi-bhiḥ |
utsam | duhantaḥ | akṣitam ||8.007.16||

8.007.17a ud u svānebhir īrata ud rathair ud u vāyubhiḥ |
8.007.17c ut stomaiḥ pṛśnimātaraḥ ||

ut | ūm̐ iti | svanebhiḥ | īrate | ut | rathaiḥ | ut | ūm̐ iti | vāyu-bhiḥ |
ut | stomaiḥ | pṛśni-mātaraḥ ||8.007.17||

8.007.18a yenāva turvaśaṁ yaduṁ yena kaṇvaṁ dhanaspṛtam |
8.007.18c rāye su tasya dhīmahi ||

yena | āva | turvaśam | yadum | yena | kaṇvam | dhana-spṛtam |
rāye | su | tasya | dhīmahi ||8.007.18||

8.007.19a imā u vaḥ sudānavo ghṛtaṁ na pipyuṣīr iṣaḥ |
8.007.19c vardhān kāṇvasya manmabhiḥ ||

imāḥ | ūm | vaḥ | su-dānavaḥ | ghṛtam | na | piṣyuṣīḥ | iṣaḥ |
vardhān | kāṇvasya | manma-bhiḥ ||8.007.19||

8.007.20a kva nūnaṁ sudānavo madathā vṛktabarhiṣaḥ |
8.007.20c brahmā ko vaḥ saparyati ||

kva | nūnam | su-dānavaḥ | madatha | vṛkta-barhiṣaḥ |
brahmā | kaḥ | vaḥ | saparyati ||8.007.20||

8.007.21a nahi ṣma yad dha vaḥ purā stomebhir vṛktabarhiṣaḥ |
8.007.21c śardhām̐ ṛtasya jinvatha ||

nahi | sma | yat | ha | vaḥ | purā | stomebhiḥ | vṛkta-barhiṣaḥ |
śardhān | ṛtasya | jinvatha ||8.007.21||

8.007.22a sam u tye mahatīr apaḥ saṁ kṣoṇī sam u sūryam |
8.007.22c saṁ vajram parvaśo dadhuḥ ||

sam | ūm̐ iti | tye | mahatīḥ | apaḥ | sam | kṣoṇī | sam | ūm̐ iti | sūryam |
sam | vajram | parva-śaḥ | dadhuḥ ||8.007.22||

8.007.23a vi vṛtram parvaśo yayur vi parvatām̐ arājinaḥ |
8.007.23c cakrāṇā vṛṣṇi pauṁsyam ||

vi | vṛtram | parva-śaḥ | yayuḥ | vi | parvatān | arājinaḥ |
cakrāṇāḥ | vṛṣṇi | pauṁsyam ||8.007.23||

8.007.24a anu tritasya yudhyataḥ śuṣmam āvann uta kratum |
8.007.24c anv indraṁ vṛtratūrye ||

anu | tritasya | yudhyataḥ | śuṣmam | āvan | uta | kratum |
anu | indram | vṛtra-tūrye ||8.007.24||

8.007.25a vidyuddhastā abhidyavaḥ śiprāḥ śīrṣan hiraṇyayīḥ |
8.007.25c śubhrā vy añjata śriye ||

vidyut-hastāḥ | abhi-dyavaḥ | śiprāḥ | śīrṣan | hiraṇyayīḥ |
śubhrāḥ | vi | añjata | śriye ||8.007.25||

8.007.26a uśanā yat parāvata ukṣṇo randhram ayātana |
8.007.26c dyaur na cakradad bhiyā ||

usanā | yat | parā-vataḥ | ukṣṇaḥ | randhram | ayātana |
dyauḥ | na | cakradat | bhiyā ||8.007.26||

8.007.27a ā no makhasya dāvane 'śvair hiraṇyapāṇibhiḥ |
8.007.27c devāsa upa gantana ||

ā | naḥ | makhasya | dāvane | aśvaiḥ | hiraṇyapāṇi-bhiḥ |
devāsaḥ | upa | gantana ||8.007.27||

8.007.28a yad eṣām pṛṣatī rathe praṣṭir vahati rohitaḥ |
8.007.28c yānti śubhrā riṇann apaḥ ||

yat | eṣām | pṛṣatīḥ | rathe | praṣṭiḥ | vahati | rohitaḥ |
yānti | śubhrāḥ | riṇan | apaḥ ||8.007.28||

8.007.29a suṣome śaryaṇāvaty ārjīke pastyāvati |
8.007.29c yayur nicakrayā naraḥ ||

su-some | śaryaṇā-vati | ārjīke | pastya-vati |
yayuḥ | ni-cakrayā | naraḥ ||8.007.29||

8.007.30a kadā gacchātha maruta itthā vipraṁ havamānam |
8.007.30c mārḍīkebhir nādhamānam ||

kadā | gacchātha | marutaḥ | itthā | vipram | havamānam |
mārḍīkebhiḥ | nādhamānam ||8.007.30||

8.007.31a kad dha nūnaṁ kadhapriyo yad indram ajahātana |
8.007.31c ko vaḥ sakhitva ohate ||

kat | ha | nūnam | kadha-priyaḥ | yat | indram | ajahātana |
kaḥ | vaḥ | sakhi-tve | ohate ||8.007.31||

8.007.32a saho ṣu ṇo vajrahastaiḥ kaṇvāso agnim marudbhiḥ |
8.007.32c stuṣe hiraṇyavāśībhiḥ ||

saho iti | su | naḥ | vajra-hastaiḥ | kaṇvāsaḥ | agnim | marut-bhiḥ |
stuṣe | hiraṇya-vāśībhiḥ ||8.007.32||

8.007.33a o ṣu vṛṣṇaḥ prayajyūn ā navyase suvitāya |
8.007.33c vavṛtyāṁ citravājān ||

o iti | su | vṛṣṇaḥ | pra-yajyūn | ā | navyase | suvitāya |
vavṛtyām | citra-vājān ||8.007.33||

8.007.34a girayaś cin ni jihate parśānāso manyamānāḥ |
8.007.34c parvatāś cin ni yemire ||

girayaḥ | cit | ni | jihate | parśānāsaḥ | manyamānāḥ |
parvatāḥ | cit | ni | yemire ||8.007.34||

8.007.35a ākṣṇayāvāno vahanty antarikṣeṇa patataḥ |
8.007.35c dhātāraḥ stuvate vayaḥ ||

ā | akṣṇa-yāvānaḥ | vahanti | antarikṣeṇa | patataḥ |
dhātāraḥ | stuvate | vayaḥ ||8.007.35||

8.007.36a agnir hi jāni pūrvyaś chando na sūro arciṣā |
8.007.36c te bhānubhir vi tasthire ||

agniḥ | hi | jāni | pūrvyaḥ | chandaḥ | na | sūraḥ | arciṣā |
te | bhānu-bhiḥ | vi | tasthire ||8.007.36||


8.008.01a ā no viśvābhir ūtibhir aśvinā gacchataṁ yuvam |
8.008.01c dasrā hiraṇyavartanī pibataṁ somyam madhu ||

ā | naḥ | viśvābhiḥ | ūti-bhiḥ | aśvinā | gacchatam | yuvam |
dasrā | hiraṇya-vartanī iti hiraṇya-vartanī | pibatam | somyam | madhu ||8.008.01||

8.008.02a ā nūnaṁ yātam aśvinā rathena sūryatvacā |
8.008.02c bhujī hiraṇyapeśasā kavī gambhīracetasā ||

ā | nūnam | yātam | aśvinā | rathena | sūrya-tvacā |
bhujī iti | hiraṇya-peśasā | kavī iti | gambhīra-cetasā ||8.008.02||

8.008.03a ā yātaṁ nahuṣas pary āntarikṣāt suvṛktibhiḥ |
8.008.03c pibātho aśvinā madhu kaṇvānāṁ savane sutam ||

ā | yātam | nahuṣaḥ | pari | ā | antarikṣāt | suvṛkti-bhiḥ |
pibāthaḥ | aśvinā | madhu | kaṇvānām | savane | sutam ||8.008.03||

8.008.04a ā no yātaṁ divas pary āntarikṣād adhapriyā |
8.008.04c putraḥ kaṇvasya vām iha suṣāva somyam madhu ||

ā | naḥ | yātam | divaḥ | pari | ā | antarikṣāt | adha-priyā |
putraḥ | kaṇvasya | vām | iha | susāva | somyam | madhu ||8.008.04||

8.008.05a ā no yātam upaśruty aśvinā somapītaye |
8.008.05c svāhā stomasya vardhanā pra kavī dhītibhir narā ||

ā | naḥ | yātam | upa-śruti | aśvinā | soma-pītaye |
svāhā | stomasya | vardhanā | pra | kavī iti | dhīti-bhiḥ | narā ||8.008.05||

8.008.06a yac cid dhi vām pura ṛṣayo juhūre 'vase narā |
8.008.06c ā yātam aśvinā gatam upemāṁ suṣṭutim mama ||

yat | cit | hi | vām | purā | ṛṣayaḥ | juhūre | avase | narā |
ā | yātam | aśvinā | ā | gatam | upa | imām | su-stutim | mama ||8.008.06||

8.008.07a divaś cid rocanād adhy ā no gantaṁ svarvidā |
8.008.07c dhībhir vatsapracetasā stomebhir havanaśrutā ||

divaḥ | cit | rocanāt | adhi | ā | naḥ | gantam | svaḥ-vidā |
dhībhiḥ | vatsa-pracetasā | stomebhiḥ | havana-śrutā ||8.008.07||

8.008.08a kim anye pary āsate 'smat stomebhir aśvinā |
8.008.08c putraḥ kaṇvasya vām ṛṣir gīrbhir vatso avīvṛdhat ||

kim | anye | pari | āsate | asmat | stomebhiḥ | aśvinā |
putraḥ | kaṇvasya | vām | ṛṣiḥ | gīḥ-bhiḥ | vatsaḥ | avīvṛdhat ||8.008.08||

8.008.09a ā vāṁ vipra ihāvase 'hvat stomebhir aśvinā |
8.008.09c ariprā vṛtrahantamā tā no bhūtam mayobhuvā ||

ā | vām | vipraḥ | iha | avase | ahvat | stomebhiḥ | aśvinā |
ariprā | vṛtrahan-tamā | tā | naḥ | bhūtam | mayaḥ-bhuvā ||8.008.09||

8.008.10a ā yad vāṁ yoṣaṇā ratham atiṣṭhad vājinīvasū |
8.008.10c viśvāny aśvinā yuvam pra dhītāny agacchatam ||

ā | yat | vām | yoṣaṇā | ratham | atiṣṭhat | vājinīvasū iti vājinī-vasū |
viśvāni | aśvinā | yuvam | pra | dhītāni | agacchatam ||8.008.10||

8.008.11a ataḥ sahasranirṇijā rathenā yātam aśvinā |
8.008.11c vatso vām madhumad vaco 'śaṁsīt kāvyaḥ kaviḥ ||

ataḥ | sahasra-nirnijā | rathena | ā | yātam | aśvinā |
vatsaḥ | vām | madhu-mat | vacaḥ | aśaṁsīt | kāvyaḥ | kaviḥ ||8.008.11||

8.008.12a purumandrā purūvasū manotarā rayīṇām |
8.008.12c stomam me aśvināv imam abhi vahnī anūṣātām ||

puru-mandrā | puruvasū iti puru-vasū | manotarā | rayīṇām |
stomam | me | aśvinau | imam | abhi | vahnī iti | anūṣātām ||8.008.12||

8.008.13a ā no viśvāny aśvinā dhattaṁ rādhāṁsy ahrayā |
8.008.13c kṛtaṁ na ṛtviyāvato mā no rīradhataṁ nide ||

ā | naḥ | viśvāni | aśvinā | dhattam | rādhāṁsi | ahūyā |
kṛtam | naḥ | ṛtviya-vataḥ | mā | naḥ | rīradhatam | nide ||8.008.13||

8.008.14a yan nāsatyā parāvati yad vā stho adhy ambare |
8.008.14c ataḥ sahasranirṇijā rathenā yātam aśvinā ||

yat | nāsatyā | parā-vati | yat | vā | sthaḥ | adhi | ambare |
ataḥ | sahasra-nirnijā | rathena | ā | yātam | aśvinā ||8.008.14||

8.008.15a yo vāṁ nāsatyāv ṛṣir gīrbhir vatso avīvṛdhat |
8.008.15c tasmai sahasranirṇijam iṣaṁ dhattaṁ ghṛtaścutam ||

yaḥ | vām | nāsatyau | ṛṣiḥ | gīḥ-bhiḥ | vatsaḥ | avīvṛdhat |
tasmai | sahasra-nirnijam | iṣam | dhattam | ghṛta-ścutam ||8.008.15||

8.008.16a prāsmā ūrjaṁ ghṛtaścutam aśvinā yacchataṁ yuvam |
8.008.16c yo vāṁ sumnāya tuṣṭavad vasūyād dānunas patī ||

pra | asmai | ūrjam | ghṛta-ścutam | aśvinā | yacchatam | yuvam |
yaḥ | vām | sumnāya | tustavat | vasu-yāt | dānunaḥ | patī iti ||8.008.16||

8.008.17a ā no gantaṁ riśādasemaṁ stomam purubhujā |
8.008.17c kṛtaṁ naḥ suśriyo naremā dātam abhiṣṭaye ||

ā | naḥ | gantam | riśādasā | imam | stomam | puru-bhujā |
kṛtam | naḥ | su-śriyaḥ | narā | imā | dātam | abhiṣṭaye ||8.008.17||

8.008.18a ā vāṁ viśvābhir ūtibhiḥ priyamedhā ahūṣata |
8.008.18c rājantāv adhvarāṇām aśvinā yāmahūtiṣu ||

ā | vām | viśvābhiḥ | ūti-bhiḥ | priya-medhāḥ | ahūṣata |
rājantau | adhvarāṇām | aśvinā | yāma-hūtiṣu ||8.008.18||

8.008.19a ā no gantam mayobhuvāśvinā śambhuvā yuvam |
8.008.19c yo vāṁ vipanyū dhītibhir gīrbhir vatso avīvṛdhat ||

ā | naḥ | gantam | mayaḥ-bhuvā | aśvinā | śam-bhuvā | yuvam |
yaḥ | vām | vipanyū iti | dhīti-bhiḥ | gīḥ-bhiḥ | vatsaḥ | avīvṛdhat ||8.008.19||

8.008.20a yābhiḥ kaṇvam medhātithiṁ yābhir vaśaṁ daśavrajam |
8.008.20c yābhir gośaryam āvataṁ tābhir no 'vataṁ narā ||

yābhiḥ | kaṇvam | medha-atithim | yābhiḥ | vaśam | daśa-vrajam |
yābhiḥ | go-śaryam | āvatam | tābhiḥ | naḥ | avatam | narā ||8.008.20||

8.008.21a yābhir narā trasadasyum āvataṁ kṛtvye dhane |
8.008.21c tābhiḥ ṣv asmām̐ aśvinā prāvataṁ vājasātaye ||

yābhiḥ | narā | trasadasyum | āvatam | kṛtvye | dhane |
tābhiḥ | su | asmān | aśvinā | pra | avatam | vāja-sātaye ||8.008.21||

8.008.22a pra vāṁ stomāḥ suvṛktayo giro vardhantv aśvinā |
8.008.22c purutrā vṛtrahantamā tā no bhūtam puruspṛhā ||

pra | vām | stomāḥ | su-vṛktayaḥ | giraḥ | vardhantu | aśvinā |
puru-trā | vṛtrahan-tamā | tā | naḥ | bhūtam | puru-spṛhā ||8.008.22||

8.008.23a trīṇi padāny aśvinor āviḥ sānti guhā paraḥ |
8.008.23c kavī ṛtasya patmabhir arvāg jīvebhyas pari ||

trīṇi | padāni | aśvinoḥ | āviḥ | santi | guihā | paraḥ |
kavī iti | ṛtasya | patma-bhiḥ | arvāk | jīvebhyaḥ | pari ||8.008.23||


8.009.01a ā nūnam aśvinā yuvaṁ vatsasya gantam avase |
8.009.01c prāsmai yacchatam avṛkam pṛthu cchardir yuyutaṁ yā arātayaḥ ||

ā | nūnam | aśvinā | yuvam | vatsasya | gantam | avase |
pra | asmai | yacchatam | avṛkam | pṛthu | chardiḥ | yuyutam | yāḥ | arātayaḥ ||8.009.01||

8.009.02a yad antarikṣe yad divi yat pañca mānuṣām̐ anu |
8.009.02c nṛmṇaṁ tad dhattam aśvinā ||

yat | antarikṣe | yat | divi | yat | pañca | mānuṣān | anu |
nṛmṇam | tat | dhattam | aśvinā ||8.009.02||

8.009.03a ye vāṁ daṁsāṁsy aśvinā viprāsaḥ parimāmṛśuḥ |
8.009.03c evet kāṇvasya bodhatam ||

ye | vām | daṁsāṁsi | aśvinā | viprāsaḥ | pari-mamṛśuḥ |
eva | it | kāṇvasya | bodhatam ||8.009.03||

8.009.04a ayaṁ vāṁ gharmo aśvinā stomena pari ṣicyate |
8.009.04c ayaṁ somo madhumān vājinīvasū yena vṛtraṁ ciketathaḥ ||

ayam | vām | gharmaḥ | aśvinā | stomena | pari | sicyate |
ayam | somaḥ | madhu-mān | vājinīvasū iti vājinī-vasū | yena | vṛtram | ciketathaḥ ||8.009.04||

8.009.05a yad apsu yad vanaspatau yad oṣadhīṣu purudaṁsasā kṛtam |
8.009.05c tena māviṣṭam aśvinā ||

yat | ap-su | yat | vanaspatau | yat | oṣadhīṣu | puru-daṁsasā | kṛtam |
tena | mā | aviṣṭam | aśvinā ||8.009.05||

8.009.06a yan nāsatyā bhuraṇyatho yad vā deva bhiṣajyathaḥ |
8.009.06c ayaṁ vāṁ vatso matibhir na vindhate haviṣmantaṁ hi gacchathaḥ ||

yat | nāsatyā | bhuraṇyathaḥ | yat | vā | deva | bhiṣajyathaḥ |
ayam | vām | vatsaḥ | mati-bhiḥ | na | vindhate | haviṣmantam | hi | gacchathaḥ ||8.009.06||

8.009.07a ā nūnam aśvinor ṛṣiḥ stomaṁ ciketa vāmayā |
8.009.07c ā somam madhumattamaṁ gharmaṁ siñcād atharvaṇi ||

ā | nūnam | aśvinoḥ | ṛṣiḥ | stomam | ciketa | vāmayā |
ā | somam | madhumat-tamam | gharmam | siñcāt | atharvaṇi ||8.009.07||

8.009.08a ā nūnaṁ raghuvartaniṁ rathaṁ tiṣṭhātho aśvinā |
8.009.08c ā vāṁ stomā ime mama nabho na cucyavīrata ||

ā | nūnam | raghu-vartanim | ratham | tiṣṭhāthaḥ | aśvinā |
ā | vām | stomāḥ | ime | mama | nabhaḥ | na | cucyavīrata ||8.009.08||

8.009.09a yad adya vāṁ nāsatyokthair ācucyuvīmahi |
8.009.09c yad vā vāṇībhir aśvinevet kāṇvasya bodhatam ||

yat | adya | vām | nāsatyā | ukthaiḥ | ā-cucyuvīmahi |
yat | vā | vāṇībhiḥ | aśvinā | eva | it | kāṇvasya | bodhatam ||8.009.09||

8.009.10a yad vāṁ kakṣīvām̐ uta yad vyaśva ṛṣir yad vāṁ dīrghatamā juhāva |
8.009.10c pṛthī yad vāṁ vainyaḥ sādaneṣv eved ato aśvinā cetayethām ||

yat | vām | kakṣīvān | uta | yat | vi-aśvaḥ | ṛṣiḥ | yat | vām | dīrgha-tamāḥ | juhāva |
pṛthī | yat | vām | vainyaḥ | sadaneṣu | eva | it | ataḥ | aśvinā | cetayethām ||8.009.10||

8.009.11a yātaṁ chardiṣpā uta naḥ paraspā bhūtaṁ jagatpā uta nas tanūpā |
8.009.11c vartis tokāya tanayāya yātam ||

yātam | chardiḥ-pau | uta | naḥ | paraḥ-pā | bhūtam | jagat-pau | uta | naḥ | tanū-pā |
vartiḥ | tokāya | tanayāya | yātam ||8.009.11||

8.009.12a yad indreṇa sarathaṁ yātho aśvinā yad vā vāyunā bhavathaḥ samokasā |
8.009.12c yad ādityebhir ṛbhubhiḥ sajoṣasā yad vā viṣṇor vikramaṇeṣu tiṣṭhathaḥ ||

yat | indreṇa | saratham | yāthaḥ | aśvinā | yat | vā | vāyunā | bhavathaḥ | sam-okasā |
yat | ādityebhiḥ | ṛbhu-bhiḥ | sa-joṣasā | yat | vā | viṣṇoḥ | vi-kramaṇeṣu | tiṣṭhathaḥ ||8.009.12||

8.009.13a yad adyāśvināv ahaṁ huveya vājasātaye |
8.009.13c yat pṛtsu turvaṇe sahas tac chreṣṭham aśvinor avaḥ ||

yat | adya | aśvinau | aham | huveya | vāja-sātaye |
yat | pṛt-su | turvaṇe | sahaḥ | tat | śreṣṭham | aśvinoḥ | avaḥ ||8.009.13||

8.009.14a ā nūnaṁ yātam aśvinemā havyāni vāṁ hitā |
8.009.14c ime somāso adhi turvaśe yadāv ime kaṇveṣu vām atha ||

ā | nūnam | yātam | aśvinā | imā | havyāni | vām | hitā |
ime | somāsaḥ | adhi | turvaśe | yadau | ime | kaṇveṣu | vām | atha ||8.009.14||

8.009.15a yan nāsatyā parāke arvāke asti bheṣajam |
8.009.15c tena nūnaṁ vimadāya pracetasā chardir vatsāya yacchatam ||

yat | nāsatyā | parāke | arvāke | asti | bheṣajam |
tena | nūnam | vi-madāya | pra-cetasā | chardiḥ | vatsāya | yacchatam ||8.009.15||

8.009.16a abhutsy u pra devyā sākaṁ vācāham aśvinoḥ |
8.009.16c vy āvar devy ā matiṁ vi rātim martyebhyaḥ ||

abhutsi | ūm̐ iti | pra | devyā | sākam | vācā | aham | aśvinoḥ |
vi | āvaḥ | devi | ā | matim | vi | rātim | martyebhyaḥ ||8.009.16||

8.009.17a pra bodhayoṣo aśvinā pra devi sūnṛte mahi |
8.009.17c pra yajñahotar ānuṣak pra madāya śravo bṛhat ||

pra | bodhaya | uṣaḥ | aśvinā | pra | devi | sūnṛte | mahi |
pra | yajña-hotaḥ | ānuṣak | pra | madāya | śravaḥ | bṛhat ||8.009.17||

8.009.18a yad uṣo yāsi bhānunā saṁ sūryeṇa rocase |
8.009.18c ā hāyam aśvino ratho vartir yāti nṛpāyyam ||

yat | uṣaḥ | yāsi | bhānunā | sam | sūryeṇa | rocase |
ā | ha | ayam | aśvinoḥ | rathaḥ | vartiḥ | yāti | nṛ-pāyyam ||8.009.18||

8.009.19a yad āpītāso aṁśavo gāvo na duhra ūdhabhiḥ |
8.009.19c yad vā vāṇīr anūṣata pra devayanto aśvinā ||

yat | ā-pītāsaḥ | aṁśavaḥ | gāvaḥ | na | duhre | ūdha-bhiḥ |
yat | vā | vāṇīḥ | anūṣata | pra | deva-yantaḥ | aśvinā ||8.009.19||

8.009.20a pra dyumnāya pra śavase pra nṛṣāhyāya śarmaṇe |
8.009.20c pra dakṣāya pracetasā ||

pra | dyumnāya | pra | śavase | pra | nṛ-sahyāya | śarmaṇe |
pra | dakṣāya | pra-cetasā ||8.009.20||

8.009.21a yan nūnaṁ dhībhir aśvinā pitur yonā niṣīdathaḥ |
8.009.21c yad vā sumnebhir ukthyā ||

yat | nūnam | dhībhiḥ | aśvinā | pituḥ | yonā | ni-sīdathaḥ |
yat | vā | sumnebhiḥ | ukthyā ||8.009.21||


8.010.01a yat stho dīrghaprasadmani yad vādo rocane divaḥ |
8.010.01c yad vā samudre adhy ākṛte gṛhe 'ta ā yātam aśvinā ||

yat | sthaḥ | dīrgha-prasadmani | yat | vā | adaḥ | rocane | divaḥ |
yat | vā | samudre | adhi | ā-kṛte | gṛhe | ataḥ | ā | yātam | aśvinā ||8.010.01||

8.010.02a yad vā yajñam manave sammimikṣathur evet kāṇvasya bodhatam |
8.010.02c bṛhaspatiṁ viśvān devām̐ ahaṁ huva indrāviṣṇū aśvināv āśuheṣasā ||

yat | vā | yajñam | manave | sam-mimikṣathuḥ | eva | it | kāṇvasya | bodhatam |
bṛhaspatim | viśvān | devān | aham | huve | indrāviṣṇū iti | aśvinau | āśu-heṣasā ||8.010.02||

8.010.03a tyā nv aśvinā huve sudaṁsasā gṛbhe kṛtā |
8.010.03c yayor asti pra ṇaḥ sakhyaṁ deveṣv adhy āpyam ||

tyā | nu | aśvinā | huve | su-daṁsasā | gṛbhe | kṛtā |
yayoḥ | asti | pra | naḥ | sakhyam | deveṣu | adhi | āpyam ||8.010.03||

8.010.04a yayor adhi pra yajñā asūre santi sūrayaḥ |
8.010.04c tā yajñasyādhvarasya pracetasā svadhābhir yā pibataḥ somyam madhu ||

yayoḥ | adhi | pra | yajñāḥ | asūre | santi | sūrayaḥ |
tā | yajñasya | adhvarasya | pra-cetasā | svadhābhiḥ | yā | pibataḥ | somyam | madhu ||8.010.04||

8.010.05a yad adyāśvināv apāg yat prāk stho vājinīvasū |
8.010.05c yad druhyavy anavi turvaśe yadau huve vām atha mā gatam ||

yat | adya | aśvinau | apāk | yat | prāk | sthaḥ | vājinīvasū iti vājinī-vasū |
yat | druhyavi | anavi | turvaśe | yadau | huve | vām | atha | mā | ā | gatam ||8.010.05||

8.010.06a yad antarikṣe patathaḥ purubhujā yad veme rodasī anu |
8.010.06c yad vā svadhābhir adhitiṣṭhatho ratham ata ā yātam aśvinā ||

yat | antarikṣe | patathaḥ | puru-bhujā | yat | vā | ime iti | rodasī iti | anu |
yat | vā | svadhābhiḥ | adhi-tiṣṭhathaḥ | ratham | ataḥ | ā | yātam | aśvinā ||8.010.06||


8.011.01a tvam agne vratapā asi deva ā martyeṣv ā |
8.011.01c tvaṁ yajñeṣv īḍyaḥ ||

tvam | agne | vrata-pāḥ | asi | devaḥ | ā | martyeṣu | ā |
tvam | yajñeṣu | īḍyaḥ ||8.011.01||

8.011.02a tvam asi praśasyo vidatheṣu sahantya |
8.011.02c agne rathīr adhvarāṇām ||

tvam | asi | pra-śasyaḥ | vidatheṣu | sahantya |
agne | rathīḥ | adhvarāṇām ||8.011.02||

8.011.03a sa tvam asmad apa dviṣo yuyodhi jātavedaḥ |
8.011.03c adevīr agne arātīḥ ||

saḥ | tvam | asmat | apa | dviṣaḥ | yuyodhi | jāta-vedaḥ |
adevīḥ | agne | arātīḥ ||8.011.03||

8.011.04a anti cit santam aha yajñam martasya ripoḥ |
8.011.04c nopa veṣi jātavedaḥ ||

anti | cit | santam | aha | yajñam | martasya | ripoḥ |
na | upa | veṣi | jāta-vedaḥ ||8.011.04||

8.011.05a martā amartyasya te bhūri nāma manāmahe |
8.011.05c viprāso jātavedasaḥ ||

martāḥ | amartyasya | te | bhūri | nāma | manāmahe |
viprāsaḥ | jāta-vedasaḥ ||8.011.05||

8.011.06a vipraṁ viprāso 'vase devam martāsa ūtaye |
8.011.06c agniṁ gīrbhir havāmahe ||

vipram | viprāsaḥ | avase | devam | martāsaḥ | ūtaye |
agnim | gīḥ-bhiḥ | havāmahe ||8.011.06||

8.011.07a ā te vatso mano yamat paramāc cit sadhasthāt |
8.011.07c agne tvāṁkāmayā girā ||

ā | te | vatsaḥ | manaḥ | yamat | paramāt | cit | sadha-sthāt |
agne | tvām-kāmayā | girā ||8.011.07||

8.011.08a purutrā hi sadṛṅṅ asi viśo viśvā anu prabhuḥ |
8.011.08c samatsu tvā havāmahe ||

puru-trā | hi | sa-dṛṅ | asi | viśaḥ | viśvāḥ | anu | pra-bhuḥ |
samat-su | tvā | havāmahe ||8.011.08||

8.011.09a samatsv agnim avase vājayanto havāmahe |
8.011.09c vājeṣu citrarādhasam ||

samat-su | agnim | avase | vāja-yantaḥ | havāmahe |
vājeṣu | citra-rādhasam ||8.011.09||

8.011.10a pratno hi kam īḍyo adhvareṣu sanāc ca hotā navyaś ca satsi |
8.011.10c svāṁ cāgne tanvam piprayasvāsmabhyaṁ ca saubhagam ā yajasva ||

pratnaḥ | hi | kam | īḍyaḥ | adhvareṣu | sanāt | ca | hotā | navyaḥ | ca | satsi |
svām | ca | agne | tanvam | piprayasva | asmabhyam | ca | saubhagam | ā | yajasva ||8.011.10||


8.012.01a ya indra somapātamo madaḥ śaviṣṭha cetati |
8.012.01c yenā haṁsi ny atriṇaṁ tam īmahe ||

yaḥ | indra | soma-pātamaḥ | madaḥ | śaviṣṭha | cetati |
yena | haṁsi | ni | atriṇam | tam | īmahe ||8.012.01||

8.012.02a yenā daśagvam adhriguṁ vepayantaṁ svarṇaram |
8.012.02c yenā samudram āvithā tam īmahe ||

yena | daśa-gvam | adhri-gum | vepa-yantam | svaḥ-naram |
yena | samudram | āvitha | tam | īmahe ||8.012.02||

8.012.03a yena sindhum mahīr apo rathām̐ iva pracodayaḥ |
8.012.03c panthām ṛtasya yātave tam īmahe ||

yena | sindhum | mahīḥ | apaḥ | rathān-iva | pra-codayaḥ |
panthām | ṛtasya | yātave | tam | īmahe ||8.012.03||

8.012.04a imaṁ stomam abhiṣṭaye ghṛtaṁ na pūtam adrivaḥ |
8.012.04c yenā nu sadya ojasā vavakṣitha ||

imam | stomam | abhiṣṭaye | ghṛtam | na | pūtam | adri-vaḥ |
yena | nu | sadyaḥ | ojasā | vavakṣitha ||8.012.04||

8.012.05a imaṁ juṣasva girvaṇaḥ samudra iva pinvate |
8.012.05c indra viśvābhir ūtibhir vavakṣitha ||

imam | juṣasva | girvaṇaḥ | samudraḥ-iva | pinvate |
indra | viśvābhiḥ | ūti-bhiḥ | vavakṣitha ||8.012.05||

8.012.06a yo no devaḥ parāvataḥ sakhitvanāya māmahe |
8.012.06c divo na vṛṣṭim prathayan vavakṣitha ||

yaḥ | naḥ | devaḥ | parā-vataḥ | sakhi-tvanāya | mamahe |
divaḥ | na | vṛṣṭim | prathayan | vavakṣitha ||8.012.06||

8.012.07a vavakṣur asya ketava uta vajro gabhastyoḥ |
8.012.07c yat sūryo na rodasī avardhayat ||

vavakṣuḥ | asya | ketavaḥ | uta | vajraḥ | gabhastyoḥ |
yat | sūryaḥ | na | rodasī iti | avardhayat ||8.012.07||

8.012.08a yadi pravṛddha satpate sahasram mahiṣām̐ aghaḥ |
8.012.08c ād it ta indriyam mahi pra vāvṛdhe ||

yadi | pra-vṛddha | sat-pate | sahasram | mahiṣān | aghaḥ |
āt | it | te | indriyam | mahi | pra | vavṛdhe ||8.012.08||

8.012.09a indraḥ sūryasya raśmibhir ny arśasānam oṣati |
8.012.09c agnir vaneva sāsahiḥ pra vāvṛdhe ||

indraḥ | sūryasya | raśmi-bhiḥ | ni | arśasānam | oṣati |
agniḥ | vanā-iva | sasahiḥ | pra | vavṛdhe ||8.012.09||

8.012.10a iyaṁ ta ṛtviyāvatī dhītir eti navīyasī |
8.012.10c saparyantī purupriyā mimīta it ||

iyam | te | ṛtviya-vatī | dhītiḥ | eti | navīyasī |
saparyantī | puru-priyā | mimīte | it ||8.012.10||

8.012.11a garbho yajñasya devayuḥ kratum punīta ānuṣak |
8.012.11c stomair indrasya vāvṛdhe mimīta it ||

garbhaḥ | yajñasya | deva-yuḥ | kratum | punīte | ānuṣak |
stomaiḥ | indrasya | vavṛdhe | mimīte | it ||8.012.11||

8.012.12a sanir mitrasya papratha indraḥ somasya pītaye |
8.012.12c prācī vāśīva sunvate mimīta it ||

saniḥ | mitrasya | paprathe | indraḥ | somasya | pītaye |
prācī | vāśī-iva | sunvate | mimīte | it ||8.012.12||

8.012.13a yaṁ viprā ukthavāhaso 'bhipramandur āyavaḥ |
8.012.13c ghṛtaṁ na pipya āsany ṛtasya yat ||

yam | viprāḥ | uktha-vāhasaḥ | abhi-pramanduḥ | āyavaḥ |
ghṛtam | na | pipye | āsani | ṛtasya | yat ||8.012.13||

8.012.14a uta svarāje aditiḥ stomam indrāya jījanat |
8.012.14c purupraśastam ūtaya ṛtasya yat ||

uta | sva-rāje | aditiḥ | stomam | indrāya | jījanat |
puru-praśastam | ūtaye | ṛtasya | yat ||8.012.14||

8.012.15a abhi vahnaya ūtaye 'nūṣata praśastaye |
8.012.15c na deva vivratā harī ṛtasya yat ||

abhi | vahnayaḥ | ūtaye | anūṣata | pra-śastaye |
na | deva | vi-vratā | harī iti | ṛtasya | yat ||8.012.15||

8.012.16a yat somam indra viṣṇavi yad vā gha trita āptye |
8.012.16c yad vā marutsu mandase sam indubhiḥ ||

yat | somam | indra | viṣṇavi | yat | vā | gha | trite | āptye |
yat | vā | marut-su | mandase | sam | indu-bhiḥ ||8.012.16||

8.012.17a yad vā śakra parāvati samudre adhi mandase |
8.012.17c asmākam it sute raṇā sam indubhiḥ ||

yat | vā | śakra | parā-vati | samudre | adhi | mandase |
asmākam | it | sute | raṇa | sam | indu-bhiḥ ||8.012.17||

8.012.18a yad vāsi sunvato vṛdho yajamānasya satpate |
8.012.18c ukthe vā yasya raṇyasi sam indubhiḥ ||

yat | vā | asi | sunvataḥ | vṛdhaḥ | yajamānasya | sat-pate |
ukthe | vā | yasya | raṇyasi | sam | indu-bhiḥ ||8.012.18||

8.012.19a devaṁ-devaṁ vo 'vasa indram-indraṁ gṛṇīṣaṇi |
8.012.19c adhā yajñāya turvaṇe vy ānaśuḥ ||

devam-devam | vaḥ | avase | indram-indram | gṛṇīṣaṇi |
adha | yajñāya | turvaṇe | vi | ānaśuḥ ||8.012.19||

8.012.20a yajñebhir yajñavāhasaṁ somebhiḥ somapātamam |
8.012.20c hotrābhir indraṁ vāvṛdhur vy ānaśuḥ ||

yajñebhiḥ | yajña-vāhasam | somebhiḥ | soma-pātamam |
hotrābhiḥ | indram | vavṛdhuḥ | vi | ānaśuḥ ||8.012.20||

8.012.21a mahīr asya praṇītayaḥ pūrvīr uta praśastayaḥ |
8.012.21c viśvā vasūni dāśuṣe vy ānaśuḥ ||

mahīḥ | asya | pra-nītayaḥ | pūrvīḥ | uta | pra-śastayaḥ |
viśvā | vasūni | dāśuṣe | vi | ānaśuḥ ||8.012.21||

8.012.22a indraṁ vṛtrāya hantave devāso dadhire puraḥ |
8.012.22c indraṁ vāṇīr anūṣatā sam ojase ||

indram | vṛtrāya | hantave | devāsaḥ | dadhire | puraḥ |
indram | vāṇīḥ | anūṣata | sam | ojase ||8.012.22||

8.012.23a mahāntam mahinā vayaṁ stomebhir havanaśrutam |
8.012.23c arkair abhi pra ṇonumaḥ sam ojase ||

mahāntam | mahinā | vayam | stomebhiḥ | havana-śrutam |
arkaiḥ | abhi | pra | nonumaḥ | sam | ojase ||8.012.23||

8.012.24a na yaṁ vivikto rodasī nāntarikṣāṇi vajriṇam |
8.012.24c amād id asya titviṣe sam ojasaḥ ||

na | yam | viviktaḥ | rodasī iti | na | antarikṣāṇi | vajriṇam |
amāt | it | asya | titviṣe | sam | ojasaḥ ||8.012.24||

8.012.25a yad indra pṛtanājye devās tvā dadhire puraḥ |
8.012.25c ād it te haryatā harī vavakṣatuḥ ||

yat | indra | pṛtanājye | devāḥ | tvā | dadhire | puraḥ |
āt | it | te | haryatā | harī iti | vavakṣatuḥ ||8.012.25||

8.012.26a yadā vṛtraṁ nadīvṛtaṁ śavasā vajrinn avadhīḥ |
8.012.26c ād it te haryatā harī vavakṣatuḥ ||

yadā | vṛtram | nadī-vṛtam | śavasā | vajrin | avadhīḥ |
āt | it | te | haryatā | harī iti | vavakṣatuḥ ||8.012.26||

8.012.27a yadā te viṣṇur ojasā trīṇi padā vicakrame |
8.012.27c ād it te haryatā harī vavakṣatuḥ ||

yadā | te | viṣṇuḥ | ojasā | trīṇi | padā | vi-cakrame |
āt | it | te | haryatā | harī iti | vavakṣatuḥ ||8.012.27||

8.012.28a yadā te haryatā harī vāvṛdhāte dive-dive |
8.012.28c ād it te viśvā bhuvanāni yemire ||

yadā | te | haryatā | harī iti | vavṛdhāte iti | dive-dive |
āt | it | te | viśvā | bhuvanāni | yemire ||8.012.28||

8.012.29a yadā te mārutīr viśas tubhyam indra niyemire |
8.012.29c ād it te viśvā bhuvanāni yemire ||

yadā | te | mārutīḥ | viśaḥ | tubhyam | indra | ni-yemire |
āt | it | te | viśvā | bhuvanāni | yemire ||8.012.29||

8.012.30a yadā sūryam amuṁ divi śukraṁ jyotir adhārayaḥ |
8.012.30c ād it te viśvā bhuvanāni yemire ||

yadā | sūryam | amum | divi | śukram | jyotiḥ | adhārayaḥ |
āt | it | te | viśvā | bhuvanāni | yemire ||8.012.30||

8.012.31a imāṁ ta indra suṣṭutiṁ vipra iyarti dhītibhiḥ |
8.012.31c jāmim padeva pipratīm prādhvare ||

imām | te | indra | su-stutim | vipraḥ | iyarti | dhīti-bhiḥ |
jāmim | padā-iva | pipratīm | pra | adhvare ||8.012.31||

8.012.32a yad asya dhāmani priye samīcīnāso asvaran |
8.012.32c nābhā yajñasya dohanā prādhvare ||

yat | asya | dhāmani | priye | samīcīnāsaḥ | asvaran |
nābhā | yajñasya | dohanā | pra | adhvare ||8.012.32||

8.012.33a suvīryaṁ svaśvyaṁ sugavyam indra daddhi naḥ |
8.012.33c hoteva pūrvacittaye prādhvare ||

su-vīryam | su-aśvyam | su-gavyam | indra | daddhi | naḥ |
hotā-iva | pūrva-cittaye | pra | adhvare ||8.012.33||


8.013.01a indraḥ suteṣu someṣu kratum punīta ukthyam |
8.013.01c vide vṛdhasya dakṣaso mahān hi ṣaḥ ||

indraḥ | suteṣu | someṣu | kratum | punīte | ukthyam |
vide | vṛdhasya | dakṣasaḥ | mahān | hi | saḥ ||8.013.01||

8.013.02a sa prathame vyomani devānāṁ sadane vṛdhaḥ |
8.013.02c supāraḥ suśravastamaḥ sam apsujit ||

saḥ | prathame | vi-omani | devānām | sadane | vṛdhaḥ |
su-pāraḥ | suśravaḥ-tamaḥ | sam | apsu-jit ||8.013.02||

8.013.03a tam ahve vājasātaya indram bharāya śuṣmiṇam |
8.013.03c bhavā naḥ sumne antamaḥ sakhā vṛdhe ||

tam | ahve | vāja-sātaye | indram | bharāya | śuṣmiṇam |
bhava | naḥ | sumne | antamaḥ | sakhā | vṛdhe ||8.013.03||

8.013.04a iyaṁ ta indra girvaṇo rātiḥ kṣarati sunvataḥ |
8.013.04c mandāno asya barhiṣo vi rājasi ||

iyam | te | indra | girvaṇaḥ | rātiḥ | kṣarati | sunvataḥ |
mandānaḥ | asya | barhiṣaḥ | vi | rājasi ||8.013.04||

8.013.05a nūnaṁ tad indra daddhi no yat tvā sunvanta īmahe |
8.013.05c rayiṁ naś citram ā bharā svarvidam ||

nūnam | tat | indra | daddhi | naḥ | yat | tvā | sunvantaḥ | īmahe |
rayim | naḥ | citram | ā | bhara | svaḥ-vidam ||8.013.05||

8.013.06a stotā yat te vicarṣaṇir atipraśardhayad giraḥ |
8.013.06c vayā ivānu rohate juṣanta yat ||

stotā | yat | te | vi-carṣaṇiḥ | ati-praśardhayat | giraḥ |
vayāḥ-iva | anu | rohate | juṣanta | yat ||8.013.06||

8.013.07a pratnavaj janayā giraḥ śṛṇudhī jaritur havam |
8.013.07c made-made vavakṣithā sukṛtvane ||

pratna-vat | janaya | giraḥ | śṛṇudhi | jarituḥ | havam |
made-made | vavakṣitha | su-kṛtvane ||8.013.07||

8.013.08a krīḻanty asya sūnṛtā āpo na pravatā yatīḥ |
8.013.08c ayā dhiyā ya ucyate patir divaḥ ||

krīḻanti | asya | sūnṛtāḥ | āpaḥ | na | pra-vatā | yatīḥ |
ayā | dhiyā | yaḥ | ucyate | patiḥ | divaḥ ||8.013.08||

8.013.09a uto patir ya ucyate kṛṣṭīnām eka id vaśī |
8.013.09c namovṛdhair avasyubhiḥ sute raṇa ||

uto iti | patiḥ | yaḥ | ucyate | kṛṣṭīnām | ekaḥ | it | vaśī |
namaḥ-vṛdhaiḥ | avasyu-bhiḥ | sute | raṇa ||8.013.09||

8.013.10a stuhi śrutaṁ vipaścitaṁ harī yasya prasakṣiṇā |
8.013.10c gantārā dāśuṣo gṛhaṁ namasvinaḥ ||

stuhi | śrutam | vipaḥ-citam | harī iti | yasya | pra-sakṣiṇā |
gantārā | dāśuṣaḥ | gṛham | namasvinaḥ ||8.013.10||

8.013.11a tūtujāno mahemate 'śvebhiḥ pruṣitapsubhiḥ |
8.013.11c ā yāhi yajñam āśubhiḥ śam id dhi te ||

tūtujānaḥ | mahe-mate | aśvebhiḥ | pruṣitapsu-bhiḥ |
ā | yāhi | yajñam | āśu-bhiḥ | śam | it | hi | te ||8.013.11||

8.013.12a indra śaviṣṭha satpate rayiṁ gṛṇatsu dhāraya |
8.013.12c śravaḥ sūribhyo amṛtaṁ vasutvanam ||

indra | śaviṣṭha | sat-pate | rayim | gṛṇat-su | dhāraya |
śravaḥ | sūri-bhyaḥ | amṛtam | vasu-tvanam ||8.013.12||

8.013.13a have tvā sūra udite have madhyaṁdine divaḥ |
8.013.13c juṣāṇa indra saptibhir na ā gahi ||

have | tvā | sūre | ut-ite | have | madhyandine | divaḥ |
juṣāṇaḥ | indra | sapti-bhiḥ | naḥ | ā | gahi ||8.013.13||

8.013.14a ā tū gahi pra tu drava matsvā sutasya gomataḥ |
8.013.14c tantuṁ tanuṣva pūrvyaṁ yathā vide ||

ā | tu | gahi | pra | tu | drava | matsva | sutasya | go-mataḥ |
tantum | tanuṣva | pūrvyam | yathā | vide ||8.013.14||

8.013.15a yac chakrāsi parāvati yad arvāvati vṛtrahan |
8.013.15c yad vā samudre andhaso 'vited asi ||

yat | śakra | asi | parā-vati | yat | arvā-vati | vṛtra-han |
yat | vā | samudre | andhasaḥ | avitā | it | asi ||8.013.15||

8.013.16a indraṁ vardhantu no gira indraṁ sutāsa indavaḥ |
8.013.16c indre haviṣmatīr viśo arāṇiṣuḥ ||

indram | vardhantu | naḥ | giraḥ | indram | sutāsaḥ | indavaḥ |
indre | haviṣmatīḥ | viśaḥ | arāṇiṣuḥ ||8.013.16||

8.013.17a tam id viprā avasyavaḥ pravatvatībhir ūtibhiḥ |
8.013.17c indraṁ kṣoṇīr avardhayan vayā iva ||

tam | it | viprāḥ | avasyavaḥ | pravatvatībhiḥ | ūti-bhiḥ |
indram | kṣoṇīḥ | avardhayan | vayāḥ-iva ||8.013.17||

8.013.18a trikadrukeṣu cetanaṁ devāso yajñam atnata |
8.013.18c tam id vardhantu no giraḥ sadāvṛdham ||

tri-kadrukeṣu | cetanam | devāsaḥ | yajñam | atnata |
tam | it | vardhantu | naḥ | giraḥ | sadā-vṛdham ||8.013.18||

8.013.19a stotā yat te anuvrata ukthāny ṛtuthā dadhe |
8.013.19c śuciḥ pāvaka ucyate so adbhutaḥ ||

stotā | yat | te | anu-vrataḥ | ukthāni | ṛtu-thā | dadhe |
śuciḥ | pāvakaḥ | ucyate | saḥ | adbhutaḥ ||8.013.19||

8.013.20a tad id rudrasya cetati yahvam pratneṣu dhāmasu |
8.013.20c mano yatrā vi tad dadhur vicetasaḥ ||

tat | it | rudrasya | cetati | yahvam | pratneṣu | dhāma-su |
manaḥ | yatra | vi | tat | dadhuḥ | vi-cetasaḥ ||8.013.20||

8.013.21a yadi me sakhyam āvara imasya pāhy andhasaḥ |
8.013.21c yena viśvā ati dviṣo atārima ||

yadi | me | sakhyam | ā-varaḥ | imasya | pāhi | andhasaḥ |
yena | viśvāḥ | ati | dviṣaḥ | atārima ||8.013.21||

8.013.22a kadā ta indra girvaṇaḥ stotā bhavāti śaṁtamaḥ |
8.013.22c kadā no gavye aśvye vasau dadhaḥ ||

kadā | te | indra | girvaṇaḥ | stotā | bhavāti | śam-tamaḥ |
kadā | naḥ | gavye | aśvye | vasau | dadhaḥ ||8.013.22||

8.013.23a uta te suṣṭutā harī vṛṣaṇā vahato ratham |
8.013.23c ajuryasya madintamaṁ yam īmahe ||

uta | te | su-stutā | harī iti | vṛṣaṇā | vahataḥ | ratham |
ajuryasya | madin-tamam | yam | īmahe ||8.013.23||

8.013.24a tam īmahe puruṣṭutaṁ yahvam pratnābhir ūtibhiḥ |
8.013.24c ni barhiṣi priye sadad adha dvitā ||

tam | īmahe | puru-stutam | yahvam | pratnābhiḥ | ūti-bhiḥ |
ni | barhiṣi | priye | sadat | adha | dvitā ||8.013.24||

8.013.25a vardhasvā su puruṣṭuta ṛṣiṣṭutābhir ūtibhiḥ |
8.013.25c dhukṣasva pipyuṣīm iṣam avā ca naḥ ||

vardhasva | su | puru-stuta | ṛṣi-stutābhiḥ | ūti-bhiḥ |
dhukṣasva | pipyuṣīm | iṣam | ava | ca | naḥ ||8.013.25||

8.013.26a indra tvam avited asītthā stuvato adrivaḥ |
8.013.26c ṛtād iyarmi te dhiyam manoyujam ||

indra | tvam | avitā | it | asi | itthā | stuvataḥ | adri-vaḥ |
ṛtāt | iyarmi | te | dhiyam | manaḥ-yujam ||8.013.26||

8.013.27a iha tyā sadhamādyā yujānaḥ somapītaye |
8.013.27c harī indra pratadvasū abhi svara ||

iha | tyā | sadha-mādyā | yujānaḥ | soma-pītaye |
harī iti | indra | pratadvasū irti pratat-vasū | abhi | svara ||8.013.27||

8.013.28a abhi svarantu ye tava rudrāsaḥ sakṣata śriyam |
8.013.28c uto marutvatīr viśo abhi prayaḥ ||

abhi | svarantu | ye | tava | rudrāsaḥ | sakṣata | śriyam |
uto iti | marutvatīḥ | viśaḥ | abhi | prayaḥ ||8.013.28||

8.013.29a imā asya pratūrtayaḥ padaṁ juṣanta yad divi |
8.013.29c nābhā yajñasya saṁ dadhur yathā vide ||

imāḥ | asya | pra-tūrtayaḥ | padam | juṣanta | yat | divi |
nābhā | yajñasya | sam | dadhuḥ | yathā | vide ||8.013.29||

8.013.30a ayaṁ dīrghāya cakṣase prāci prayaty adhvare |
8.013.30c mimīte yajñam ānuṣag vicakṣya ||

ayam | dīrghāya | cakṣase | prāci | pra-yati | adhvare |
mimīte | yajñam | ānuṣak | vi-cakṣya ||8.013.30||

8.013.31a vṛṣāyam indra te ratha uto te vṛṣaṇā harī |
8.013.31c vṛṣā tvaṁ śatakrato vṛṣā havaḥ ||

vṛṣā | ayam | indra | te | rathaḥ | uto iti | te | vṛṣaṇā | harī iti |
vṛṣā | tvam | śata-krato iti śata-krato | vṛṣā | havaḥ ||8.013.31||

8.013.32a vṛṣā grāvā vṛṣā mado vṛṣā somo ayaṁ sutaḥ |
8.013.32c vṛṣā yajño yam invasi vṛṣā havaḥ ||

vṛṣā | grāvā | vṛṣā | madaḥ | vṛṣā | somaḥ | ayam | sutaḥ |
vṛṣā | yajñaḥ | yam | invasi | vṛṣā | havaḥ ||8.013.32||

8.013.33a vṛṣā tvā vṛṣaṇaṁ huve vajriñ citrābhir ūtibhiḥ |
8.013.33c vāvantha hi pratiṣṭutiṁ vṛṣā havaḥ ||

vṛṣā | tvā | vṛṣaṇam | huve | vajrin | citrābhiḥ | ūti-bhiḥ |
vavantha | hi | prati-stutim | vṛṣā | havaḥ ||8.013.33||


8.014.01a yad indrāhaṁ yathā tvam īśīya vasva eka it |
8.014.01c stotā me goṣakhā syāt ||

yat | indra | aham | yathā | tvam | īśīya | vasvaḥ | ekaḥ | it |
stotā | me | go-sakhā | syāt ||8.014.01||

8.014.02a śikṣeyam asmai ditseyaṁ śacīpate manīṣiṇe |
8.014.02c yad ahaṁ gopatiḥ syām ||

śikṣeyam | asmai | ditseyam | śacī-pate | manīṣiṇe |
yat | aham | go-patiḥ | syām ||8.014.02||

8.014.03a dhenuṣ ṭa indra sūnṛtā yajamānāya sunvate |
8.014.03c gām aśvam pipyuṣī duhe ||

dhenuḥ | te | indra | sūnṛtā | yajamānāya | sunvate |
gām | aśvam | pipyuṣī | duhe ||8.014.03||

8.014.04a na te vartāsti rādhasa indra devo na martyaḥ |
8.014.04c yad ditsasi stuto magham ||

na | te | vartā | asti | rādhasaḥ | indra | devaḥ | na | martyaḥ |
yat | ditsasi | stutaḥ | magham ||8.014.04||

8.014.05a yajña indram avardhayad yad bhūmiṁ vy avartayat |
8.014.05c cakrāṇa opaśaṁ divi ||

yajñaḥ | indram | avardhayat | yat | bhūmim | vi | avartayat |
cakrāṇaḥ | opaśam | divi ||8.014.05||

8.014.06a vāvṛdhānasya te vayaṁ viśvā dhanāni jigyuṣaḥ |
8.014.06c ūtim indrā vṛṇīmahe ||

vāvṛdhānasya | te | vayam | viśvā | dhanāni | jigyuṣaḥ |
ūtim | indra | ā | vṛṇīmahe ||8.014.06||

8.014.07a vy antarikṣam atiran made somasya rocanā |
8.014.07c indro yad abhinad valam ||

vi | antarikṣam | atirat | made | somasya | rocanā |
indraḥ | yat | abhinat | valam ||8.014.07||

8.014.08a ud gā ājad aṅgirobhya āviṣ kṛṇvan guhā satīḥ |
8.014.08c arvāñcaṁ nunude valam ||

ut | gāḥ | ājat | aṅgiraḥ-bhyaḥ | āviḥ | kṛṇvan | guhā | satīḥ |
arvāñcam | nunude | valam ||8.014.08||

8.014.09a indreṇa rocanā divo dṛḻhāni dṛṁhitāni ca |
8.014.09c sthirāṇi na parāṇude ||

indreṇa | rocanā | divaḥ | dṛḻhāni | dṛṁhitāni | ca |
sthirāṇi | na | parā-nude ||8.014.09||

8.014.10a apām ūrmir madann iva stoma indrājirāyate |
8.014.10c vi te madā arājiṣuḥ ||

apām | ūrmiḥ | madan-iva | stomaḥ | indra | ajira-yate |
vi | te | madāḥ | arājiṣuḥ ||8.014.10||

8.014.11a tvaṁ hi stomavardhana indrāsy ukthavardhanaḥ |
8.014.11c stotṝṇām uta bhadrakṛt ||

tvam | hi | stoma-vardhanaḥ | indra | asi | uktha-vardhanaḥ |
stotṝṇām | uta | bhadra-kṛt ||8.014.11||

8.014.12a indram it keśinā harī somapeyāya vakṣataḥ |
8.014.12c upa yajñaṁ surādhasam ||

indram | it | keśinā | harī iti | soma-peyāya | vakṣataḥ |
upa | yajñam | su-rādhasam ||8.014.12||

8.014.13a apām phenena namuceḥ śira indrod avartayaḥ |
8.014.13c viśvā yad ajayaḥ spṛdhaḥ ||

apām | phenena | namuceḥ | śiraḥ | indra | ut | avartaycaḥ |
viśvāḥ | yat | ajayaḥ | spṛdhaḥ ||8.014.13||

8.014.14a māyābhir utsisṛpsata indra dyām ārurukṣataḥ |
8.014.14c ava dasyūm̐r adhūnuthāḥ ||

māyābhiḥ | ut-sisṛpsataḥ | indra | dyām | ā-rurukṣataḥ |
ava | dasyūn | adhūnuthāḥ ||8.014.14||

8.014.15a asunvām indra saṁsadaṁ viṣūcīṁ vy anāśayaḥ |
8.014.15c somapā uttaro bhavan ||

asunvām | indra | sam-sadam | viṣūcīm | vi | anāśayaḥ |
soma-pāḥ | ut-taraḥ | bhavan ||8.014.15||


8.015.01a tam v abhi pra gāyata puruhūtam puruṣṭutam |
8.015.01c indraṁ gīrbhis taviṣam ā vivāsata ||

tam | ūm̐ iti | abhi | pra | gāyata | puru-hūtam | puru-stutam |
indram | gīḥ-bhiḥ | taviṣam | ā | vivāsata ||8.015.01||

8.015.02a yasya dvibarhaso bṛhat saho dādhāra rodasī |
8.015.02c girīm̐r ajrām̐ apaḥ svar vṛṣatvanā ||

yasya | dvi-barhasaḥ | bṛhat | sahaḥ | dādhāra | rodasī iti |
girīn | ajrān | apaḥ | svaḥ | vṛṣa-tvanā ||8.015.02||

8.015.03a sa rājasi puruṣṭutam̐ eko vṛtrāṇi jighnase |
8.015.03c indra jaitrā śravasyā ca yantave ||

saḥ | rājasi | puru-stuta | ekaḥ | vṛtrāṇi | jighnase |
indra | jaitrā | śravasyā | ca | yantave ||8.015.03||

8.015.04a taṁ te madaṁ gṛṇīmasi vṛṣaṇam pṛtsu sāsahim |
8.015.04c u lokakṛtnum adrivo hariśriyam ||

tam | te | madam | gṛṇīmasi | vṛṣaṇam | pṛt-su | sasahim |
ūm̐ iti | loka-kṛtnum | adri-vaḥ | hari-śriyam ||8.015.04||

8.015.05a yena jyotīṁṣy āyave manave ca viveditha |
8.015.05c mandāno asya barhiṣo vi rājasi ||

yena | jyotīṁṣi | āyave | manave | ca | viveditha |
mandānaḥ | asya | barhiṣaḥ | vi | rājasi ||8.015.05||

8.015.06a tad adyā cit ta ukthino 'nu ṣṭuvanti pūrvathā |
8.015.06c vṛṣapatnīr apo jayā dive-dive ||

tat | adya | cit | te | ukthinaḥ | anu | stuvanti | pūrva-thā |
vṛṣa-patnīḥ | apaḥ | jaya | dive-dive ||8.015.06||

8.015.07a tava tyad indriyam bṛhat tava śuṣmam uta kratum |
8.015.07c vajraṁ śiśāti dhiṣaṇā vareṇyam ||

tava | tyat | indriyam | bṛhat | tava | śuṣmam | uta | kratum |
vajram | śiśāti | dhiṣaṇā | vareṇyam ||8.015.07||

8.015.08a tava dyaur indra pauṁsyam pṛthivī vardhati śravaḥ |
8.015.08c tvām āpaḥ parvatāsaś ca hinvire ||

tava | dyauḥ | indra | pauṁsyam | pṛthivī | vardhati | śravaḥ |
tvām | āpaḥ | parvatāsaḥ | ca | hinvire ||8.015.08||

8.015.09a tvāṁ viṣṇur bṛhan kṣayo mitro gṛṇāti varuṇaḥ |
8.015.09c tvāṁ śardho madaty anu mārutam ||

tvām | viṣṇuḥ | bṛhan | kṣayaḥ | mitraḥ | gṛṇāti | varuṇaḥ |
tvām | śardhaḥ | madati | anu | mārutam ||8.015.09||

8.015.10a tvaṁ vṛṣā janānām maṁhiṣṭha indra jajñiṣe |
8.015.10c satrā viśvā svapatyāni dadhiṣe ||

tvam | vṛṣā | janānām | maṁhiṣṭhaḥ | indra | jajñiṣe |
satrā | viśvā | su-apatyāni | dadhiṣe ||8.015.10||

8.015.11a satrā tvam puruṣṭutam̐ eko vṛtrāṇi tośase |
8.015.11c nānya indrāt karaṇam bhūya invati ||

satrā | tvam | puru-stuta | ekaḥ | vṛtrāṇi | tośase |
na | anyaḥ | indrāt | karaṇam | bhūyaḥ | invati ||8.015.11||

8.015.12a yad indra manmaśas tvā nānā havanta ūtaye |
8.015.12c asmākebhir nṛbhir atrā svar jaya ||

yat | indra | manma-śaḥ | tvā | nānā | havante | ūtaye |
asmākebhiḥ | nṛ-bhiḥ | atra | svaḥ | jaya ||8.015.12||

8.015.13a araṁ kṣayāya no mahe viśvā rūpāṇy āviśan |
8.015.13c indraṁ jaitrāya harṣayā śacīpatim ||

aram | kṣayāya | naḥ | mahe | viśvā | rūpāṇi | ā-viśan |
indram | jaitrāya | harṣaya | śacī-patim ||8.015.13||


8.016.01a pra samrājaṁ carṣaṇīnām indraṁ stotā navyaṁ gīrbhiḥ |
8.016.01c naraṁ nṛṣāham maṁhiṣṭham ||

pra | sam-rājam | carṣaṇīnām | indram | stotā | navyam | gīḥ-bhiḥ |
naram | nṛ-sāham | maṁhiṣṭham ||8.016.01||

8.016.02a yasminn ukthāni raṇyanti viśvāni ca śravasyā |
8.016.02c apām avo na samudre ||

yasmin | ukthāni | raṇyanti | viśvāni | ca | śravasyā |
apām | avaḥ | na | samudre ||8.016.02||

8.016.03a taṁ suṣṭutyā vivāse jyeṣṭharājam bhare kṛtnum |
8.016.03c maho vājinaṁ sanibhyaḥ ||

tam | su-stutyā | ā | vivāse | jyeṣṭha-rājam | bhare | kṛtnum |
mahaḥ | vājinam | sani-bhyaḥ ||8.016.03||

8.016.04a yasyānūnā gabhīrā madā uravas tarutrāḥ |
8.016.04c harṣumantaḥ śūrasātau ||

yasya | anūnāḥ | gabhīrāḥ | madāḥ | uravaḥ | tarutrāḥ |
harṣu-mantaḥ | śūra-sātau ||8.016.04||

8.016.05a tam id dhaneṣu hiteṣv adhivākāya havante |
8.016.05c yeṣām indras te jayanti ||

tam | it | dhaneṣu | hiteṣu | adhi-vākāya | havante |
yeṣām | indraḥ | te | jayanti ||8.016.05||

8.016.06a tam ic cyautnair āryanti taṁ kṛtebhiś carṣaṇayaḥ |
8.016.06c eṣa indro varivaskṛt ||

tam | it | cyautnaiḥ | āryanti | tam | kṛtebhiḥ | carṣaṇayaḥ |
eṣaḥ | indraḥ | varivaḥ-kṛt ||8.016.06||

8.016.07a indro brahmendra ṛṣir indraḥ purū puruhūtaḥ |
8.016.07c mahān mahībhiḥ śacībhiḥ ||

indraḥ | brahmā | indraḥ | ṛṣiḥ | indraḥ | puru | puru-hūtaḥ |
mahān | mahībhiḥ | śacībhiḥ ||8.016.07||

8.016.08a sa stomyaḥ sa havyaḥ satyaḥ satvā tuvikūrmiḥ |
8.016.08c ekaś cit sann abhibhūtiḥ ||

saḥ | stomyaḥ | saḥ | havyaḥ | satyaḥ | satvā | tuvi-kūrmiḥ |
ekaḥ | cit | san | abhi-bhūtiḥ ||8.016.08||

8.016.09a tam arkebhis taṁ sāmabhis taṁ gāyatraiś carṣaṇayaḥ |
8.016.09c indraṁ vardhanti kṣitayaḥ ||

tam | arkebhiḥ | tam | sāma-bhiḥ | tam | gāyatraiḥ | carṣaṇayaḥ |
indram | vardhanti | kṣitayaḥ ||8.016.09||

8.016.10a praṇetāraṁ vasyo acchā kartāraṁ jyotiḥ samatsu |
8.016.10c sāsahvāṁsaṁ yudhāmitrān ||

pra-netāram | vasyaḥ | accha | kartāram | jyotiḥ | samat-su |
sasahvāṁsam | yudhā | amitrān ||8.016.10||

8.016.11a sa naḥ papriḥ pārayāti svasti nāvā puruhūtaḥ |
8.016.11c indro viśvā ati dviṣaḥ ||

saḥ | naḥ | papriḥ | pārayāti | svasti | nāvā | puru-hūtaḥ |
indraḥ | viśvā | ati | dviṣaḥ ||8.016.11||

8.016.12a sa tvaṁ na indra vājebhir daśasyā ca gātuyā ca |
8.016.12c acchā ca naḥ sumnaṁ neṣi ||

saḥ | tvam | naḥ | indra | vājebhiḥ | daśasya | ca | gātu-ya | ca |
accha | ca | naḥ | sumnam | neṣi ||8.016.12||


8.017.01a ā yāhi suṣumā hi ta indra somam pibā imam |
8.017.01c edam barhiḥ sado mama ||

ā | yāhi | susuma | hi | te | indra | somam | piba | imam |
ā | idam | barhiḥ | sadaḥ | mama ||8.017.01||

8.017.02a ā tvā brahmayujā harī vahatām indra keśinā |
8.017.02c upa brahmāṇi naḥ śṛṇu ||

ā | tvā | brahma-yujā | harī iti | vahatām | indra | keśinā |
upa | brahmāṇi | naḥ | śṛṇu ||8.017.02||

8.017.03a brahmāṇas tvā vayaṁ yujā somapām indra sominaḥ |
8.017.03c sutāvanto havāmahe ||

brahmāṇaḥ | tvā | vayam | yujā | soma-pām | indra | sominaḥ |
suta-vantaḥ | havāmahe ||8.017.03||

8.017.04a ā no yāhi sutāvato 'smākaṁ suṣṭutīr upa |
8.017.04c pibā su śiprinn andhasaḥ ||

ā | naḥ | yāhi | suta-vataḥ | asmākam | su-stutīḥ | upa |
piba | su | śiprin | andhasaḥ ||8.017.04||

8.017.05a ā te siñcāmi kukṣyor anu gātrā vi dhāvatu |
8.017.05c gṛbhāya jihvayā madhu ||

ā | te | siñcāmi | kukṣyoḥ | anu | gātrā | vi | dhāvatu |
gṛbhāya | jihvayā | madhu ||8.017.05||

8.017.06a svāduṣ ṭe astu saṁsude madhumān tanve tava |
8.017.06c somaḥ śam astu te hṛde ||

svāduḥ | te | astu | sam-sude | madhu-mān | tanve | tava |
somaḥ | śam | astu | te | hṛde ||8.017.06||

8.017.07a ayam u tvā vicarṣaṇe janīr ivābhi saṁvṛtaḥ |
8.017.07c pra soma indra sarpatu ||

ayam | ūm̐ iti | tvā | vi-carṣaṇe | janīḥ-iva | abhi | sam-vṛtaḥ |
pra | somaḥ | indra | sarpatu ||8.017.07||

8.017.08a tuvigrīvo vapodaraḥ subāhur andhaso made |
8.017.08c indro vṛtrāṇi jighnate ||

tuvi-grīvaḥ | vapā-udaraḥ | su-bāhuḥ | andhasaḥ | made |
indraḥ | vṛtrāṇi | jighnate ||8.017.08||

8.017.09a indra prehi puras tvaṁ viśvasyeśāna ojasā |
8.017.09c vṛtrāṇi vṛtrahañ jahi ||

indra | pra | ihi | puraḥ | tvam | viśvasya | īśānaḥ | ojasā |
vṛtrāṇi | vṛtra-han | jahi ||8.017.09||

8.017.10a dīrghas te astv aṅkuśo yenā vasu prayacchasi |
8.017.10c yajamānāya sunvate ||

dīrghaḥ | te | astu | aṅkuśaḥ | yena | vasu | pra-yacchasi |
yajamānāya | sunvate ||8.017.10||

8.017.11a ayaṁ ta indra somo nipūto adhi barhiṣi |
8.017.11c ehīm asya dravā piba ||

ayam | te | indra | somaḥ | ni-pūtaḥ | adhi | barhiṣi |
ā | ihi | īm | asya | drava | piba ||8.017.11||

8.017.12a śācigo śācipūjanāyaṁ raṇāya te sutaḥ |
8.017.12c ākhaṇḍala pra hūyase ||

śācigo iti śāci-go | śāci-pūjana | ayam | raṇāya | te | sutaḥ |
ākhaṇḍala | pra | hūyase ||8.017.12||

8.017.13a yas te śṛṅgavṛṣo napāt praṇapāt kuṇḍapāyyaḥ |
8.017.13c ny asmin dadhra ā manaḥ ||

yaḥ | te | śṛṅga-vṛṣaḥ | napāt | pranapād iti pra-napāt | kuṇḍa-pāyyaḥ |
ni | asmin | dadhre | ā | manaḥ ||8.017.13||

8.017.14a vāstoṣ pate dhruvā sthūṇāṁsatraṁ somyānām |
8.017.14c drapso bhettā purāṁ śaśvatīnām indro munīnāṁ sakhā ||

vāstoḥ | pate | dhruvā | sthūṇā | aṁsatram | somyānām |
drapsaḥ | bhettā | purām | śaśvatīnām | indraḥ | munīnām | sakhā ||8.017.14||

8.017.15a pṛdākusānur yajato gaveṣaṇa ekaḥ sann abhi bhūyasaḥ |
8.017.15c bhūrṇim aśvaṁ nayat tujā puro gṛbhendraṁ somasya pītaye ||

pṛdāku-sānuḥ | yajataḥ | go-eṣaṇaḥ | ekaḥ | san | abhi | bhūyasaḥ |
bhūrṇim | aśvam | nayat | tujā | puraḥ | gṛbhā | indram | somasya | pītaye ||8.017.15||


8.018.01a idaṁ ha nūnam eṣāṁ sumnam bhikṣeta martyaḥ |
8.018.01c ādityānām apūrvyaṁ savīmani ||

idam | ha | nūnam | eṣām | sumnam | bhikṣeta | martyaḥ |
ādityānām | apūrvyam | savīmani ||8.018.01||

8.018.02a anarvāṇo hy eṣām panthā ādityānām |
8.018.02c adabdhāḥ santi pāyavaḥ sugevṛdhaḥ ||

anarvāṇaḥ | hi | eṣām | panthā | ādityānām |
adabdhāḥ | santi | pāyavaḥ | suge-vṛdhaḥ ||8.018.02||

8.018.03a tat su naḥ savitā bhago varuṇo mitro aryamā |
8.018.03c śarma yacchantu sapratho yad īmahe ||

tat | su | naḥ | savitā | bhagaḥ | varuṇaḥ | mitraḥ | aryamā |
śarma | yacchantu | sa-prathaḥ | yat | īmahe ||8.018.03||

8.018.04a devebhir devy adite 'riṣṭabharmann ā gahi |
8.018.04c smat sūribhiḥ purupriye suśarmabhiḥ ||

devebhiḥ | devi | adite | ariṣṭa-bharman | ā | gahi |
smat | sūri-bhiḥ | puru-priye | suśarma-bhiḥ ||8.018.04||

8.018.05a te hi putrāso aditer vidur dveṣāṁsi yotave |
8.018.05c aṁhoś cid urucakrayo 'nehasaḥ ||

te | hi | putrāsaḥ | aditeḥ | viduḥ | dveṣāṁsi | yotave |
aṁhoḥ | cit | uru-cakrayaḥ | anehasaḥ ||8.018.05||

8.018.06a aditir no divā paśum aditir naktam advayāḥ |
8.018.06c aditiḥ pātv aṁhasaḥ sadāvṛdhā ||

aditiḥ | naḥ | divā | paśum | aditiḥ | naktam | advayāḥ |
aditiḥ | pātu | aṁhasaḥ | sadā-vṛdhā ||8.018.06||

8.018.07a uta syā no divā matir aditir ūtyā gamat |
8.018.07c sā śaṁtāti mayas karad apa sridhaḥ ||

uta | syā | naḥ | divā | matiḥ | aditiḥ | ūtyā | ā | gamat |
sā | śam-tāti | mayaḥ | karat | apa | sridhaḥ ||8.018.07||

8.018.08a uta tyā daivyā bhiṣajā śaṁ naḥ karato aśvinā |
8.018.08c yuyuyātām ito rapo apa sridhaḥ ||

uta | tyā | daivyā | bhiṣajā | śam | naḥ | karataḥ | aśvinā |
yuyuyātām | itaḥ | rapaḥ | apa | sridhaḥ ||8.018.08||

8.018.09a śam agnir agnibhiḥ karac chaṁ nas tapatu sūryaḥ |
8.018.09c śaṁ vāto vātv arapā apa sridhaḥ ||

śam | agniḥ | agni-bhiḥ | karat | śam | naḥ | tapatu | sūryaḥ |
śam | vātaḥ | vātu | arapāḥ | apa | sridhaḥ ||8.018.09||

8.018.10a apāmīvām apa sridham apa sedhata durmatim |
8.018.10c ādityāso yuyotanā no aṁhasaḥ ||

apa | amīvām | apa | sridham | apa | sedhata | duḥ-matim |
ādityāsaḥ | yuyotana | naḥ | aṁhasaḥ ||8.018.10||

8.018.11a yuyotā śarum asmad ām̐ ādityāsa utāmatim |
8.018.11c ṛdhag dveṣaḥ kṛṇuta viśvavedasaḥ ||

yuyota | śarum | asmat | ā | ādityāsaḥ | uta | amatim |
ṛdhak | dveṣaḥ | kṛṇuta | viśva-vedasaḥ ||8.018.11||

8.018.12a tat su naḥ śarma yacchatādityā yan mumocati |
8.018.12c enasvantaṁ cid enasaḥ sudānavaḥ ||

tat | su | naḥ | śarma | yacchata | ādityāḥ | yat | mumocati |
enasvantam | cit | enasaḥ | su-dānavaḥ ||8.018.12||

8.018.13a yo naḥ kaś cid ririkṣati rakṣastvena martyaḥ |
8.018.13c svaiḥ ṣa evai ririṣīṣṭa yur janaḥ ||

yaḥ | naḥ | kaḥ | cit | ririkṣati | rakṣaḥ-tvena | martyaḥ |
svaiḥ | saḥ | evaiḥ | ririṣīṣṭa | yuḥ | janaḥ ||8.018.13||

8.018.14a sam it tam agham aśnavad duḥśaṁsam martyaṁ ripum |
8.018.14c yo asmatrā durhaṇāvām̐ upa dvayuḥ ||

sam | it | tam | agham | aśnavat | duḥ-śaṁsam | martyam | ripum |
yaḥ | asma-trā | duḥ-hanāvān | upa | dvayuḥ ||8.018.14||

8.018.15a pākatrā sthana devā hṛtsu jānītha martyam |
8.018.15c upa dvayuṁ cādvayuṁ ca vasavaḥ ||

pāka-trā | sthana | devāḥ | hṛt-su | jānītha | martyam |
upa | dvayum | ca | advayum | ca | vasavaḥ ||8.018.15||

8.018.16a ā śarma parvatānām otāpāṁ vṛṇīmahe |
8.018.16c dyāvākṣāmāre asmad rapas kṛtam ||

ā | śarma | parvatānām | ā | uta | apām | vṛṇīmahe |
dyāvākṣāmā | āre | asmat | rapaḥ | kṛtam ||8.018.16||

8.018.17a te no bhadreṇa śarmaṇā yuṣmākaṁ nāvā vasavaḥ |
8.018.17c ati viśvāni duritā pipartana ||

te | naḥ | bhadreṇa | śarmaṇā | yuṣmākam | nāvā | vasavaḥ |
ati | viśvāni | duḥ-itā | pipartana ||8.018.17||

8.018.18a tuce tanāya tat su no drāghīya āyur jīvase |
8.018.18c ādityāsaḥ sumahasaḥ kṛṇotana ||

tuce | tanāya | tat | su | naḥ | drāghīyaḥ | āyuḥ | jīvase |
ādityāsaḥ | su-mahasaḥ | kṛṇotana ||8.018.18||

8.018.19a yajño hīḻo vo antara ādityā asti mṛḻata |
8.018.19c yuṣme id vo api ṣmasi sajātye ||

yajñaḥ | hīḻaḥ | vaḥ | antaraḥ | ādityāḥ | asti | mṛḻata |
yuṣme iti | it | vaḥ | api | smasi | sa-jātye ||8.018.19||

8.018.20a bṛhad varūtham marutāṁ devaṁ trātāram aśvinā |
8.018.20c mitram īmahe varuṇaṁ svastaye ||

bṛhat | varūtham | marutām | devam | trātaram | aśvinā |
mitram | īmahe | varuṇam | svastaye ||8.018.20||

8.018.21a aneho mitrāryaman nṛvad varuṇa śaṁsyam |
8.018.21c trivarūtham maruto yanta naś chardiḥ ||

anehaḥ | mitra | aryaman | nṛ-vat | varuṇa | śaṁsyam |
tri-varūtham | marutaḥ | yanta | naḥ | chardiḥ ||8.018.21||

8.018.22a ye cid dhi mṛtyubandhava ādityā manavaḥ smasi |
8.018.22c pra sū na āyur jīvase tiretana ||

ye | cit | hi | mṛtyu-bandhavaḥ | ādityāḥ | manavaḥ | smasi |
pra | su | naḥ | āyuḥ | jīvase | tiretana ||8.018.22||


8.019.01a taṁ gūrdhayā svarṇaraṁ devāso devam aratiṁ dadhanvire |
8.019.01c devatrā havyam ohire ||

tam | gūrdhaya | svaḥ-naram | devāsaḥ | devam | aratim | dadhanvire |
deva-trā | havyam | ā | ūhire ||8.019.01||

8.019.02a vibhūtarātiṁ vipra citraśociṣam agnim īḻiṣva yanturam |
8.019.02c asya medhasya somyasya sobhare prem adhvarāya pūrvyam ||

vibhūta-rātim | vipra | citra-śociṣam | agnim | īḻiṣva | yanturam |
asya | meghasya | somyasya | sobhare | pra | īm | adhvarāya | pūrvyam ||8.019.02||

8.019.03a yajiṣṭhaṁ tvā vavṛmahe devaṁ devatrā hotāram amartyam |
8.019.03c asya yajñasya sukratum ||

yajiṣṭham | tvā | vavṛmahe | devam | deva-trā | hotāram | amartyam |
asya | yajñasya | su-kratum ||8.019.03||

8.019.04a ūrjo napātaṁ subhagaṁ sudīditim agniṁ śreṣṭhaśociṣam |
8.019.04c sa no mitrasya varuṇasya so apām ā sumnaṁ yakṣate divi ||

ūrjaḥ | napātam | su-bhagam | su-dīditim | agnim | śreṣṭha-śociṣam |
saḥ | naḥ | mitrasya | varuṇasya | saḥ | apām | ā | sumnam | yakṣate | divi ||8.019.04||

8.019.05a yaḥ samidhā ya āhutī yo vedena dadāśa marto agnaye |
8.019.05c yo namasā svadhvaraḥ ||

yaḥ | sam-idhā | yaḥ | ā-hutī | yaḥ | vedena | dadāśa | martaḥ | agnaye |
yaḥ | namasā | su-adhvaraḥ ||8.019.05||

8.019.06a tasyed arvanto raṁhayanta āśavas tasya dyumnitamaṁ yaśaḥ |
8.019.06c na tam aṁho devakṛtaṁ kutaś cana na martyakṛtaṁ naśat ||

tasya | it | arvantaḥ | raṁhayante | āśavaḥ | tasya | dyumni-tamam | yaśaḥ |
na | tam | aṁhaḥ | deva-kṛtam | kutaḥ | cana | na | martya-kṛtam | naśat ||8.019.06||

8.019.07a svagnayo vo agnibhiḥ syāma sūno sahasa ūrjām pate |
8.019.07c suvīras tvam asmayuḥ ||

su-agnayaḥ | vaḥ | agni-bhiḥ | syāma | sūno iti | sahasaḥ | ūrjām | pate |
su-vīraḥ | tvam | asma-yuḥ ||8.019.07||

8.019.08a praśaṁsamāno atithir na mitriyo 'gnī ratho na vedyaḥ |
8.019.08c tve kṣemāso api santi sādhavas tvaṁ rājā rayīṇām ||

pra-śaṁsamānaḥ | atithiḥ | na | mitriyaḥ | agniḥ | rathaḥ | na | vedyaḥ |
tve iti | kṣemāsaḥ | api | santi | sādhavaḥ | tvam | rājā | rayīṇām ||8.019.08||

8.019.09a so addhā dāśvadhvaro 'gne martaḥ subhaga sa praśaṁsyaḥ |
8.019.09c sa dhībhir astu sanitā ||

saḥ | addhā | dāśu-adhvaraḥ | agne | martaḥ | su-bhaga | saḥ | pra-śaṁsyaḥ |
saḥ | dhībhiḥ | astu | sanitā ||8.019.09||

8.019.10a yasya tvam ūrdhvo adhvarāya tiṣṭhasi kṣayadvīraḥ sa sādhate |
8.019.10c so arvadbhiḥ sanitā sa vipanyubhiḥ sa śūraiḥ sanitā kṛtam ||

yasya | tvam | ūrdhvaḥ | adhvarāya | tiṣṭhasi | kṣayat-vīraḥ | saḥ | sādhate |
saḥ | arvat-bhiḥ | sanitā | saḥ | vipanyu-bhiḥ | saḥ | śūraiḥ | sanitā | kṛtam ||8.019.10||

8.019.11a yasyāgnir vapur gṛhe stomaṁ cano dadhīta viśvavāryaḥ |
8.019.11c havyā vā veviṣad viṣaḥ ||

yasya | agniḥ | vapuḥ | gṛhe | stomam | canaḥ | dadhīta | viśva-vāryaḥ |
havyā | vā | veviṣat | viṣaḥ ||8.019.11||

8.019.12a viprasya vā stuvataḥ sahaso yaho makṣūtamasya rātiṣu |
8.019.12c avodevam uparimartyaṁ kṛdhi vaso vividuṣo vacaḥ ||

viprasya | vā | stuvataḥ | sahasaḥ | yaho iti | makṣu-tamasya | rātiṣu |
avaḥ-devam | upari-martyam | kṛdhi | vaso iti | vividuṣaḥ | vacaḥ ||8.019.12||

8.019.13a yo agniṁ havyadātibhir namobhir vā sudakṣam āvivāsati |
8.019.13c girā vājiraśociṣam ||

yaḥ | agnim | havyadāti-bhiḥ | namaḥ-bhiḥ | vā | su-dakṣam | ā-vivāsati |
girā | vā | ajira-śociṣam ||8.019.13||

8.019.14a samidhā yo niśitī dāśad aditiṁ dhāmabhir asya martyaḥ |
8.019.14c viśvet sa dhībhiḥ subhago janām̐ ati dyumnair udna iva tāriṣat ||

sam-idhā | yaḥ | ni-śitī | dāśat | aditim | dhāma-bhiḥ | asya | martyaḥ |
viśvā | it | saḥ | dhībhiḥ | su-bhagaḥ | janān | ati | dyumnaiḥ | udgaḥ-iva | tāriṣat ||8.019.14||

8.019.15a tad agne dyumnam ā bhara yat sāsahat sadane kaṁ cid atriṇam |
8.019.15c manyuṁ janasya dūḍhyaḥ ||

tat | agne | dyumnam | ā | bhara | yat | sasahat | sadane | kam | cit | atriṇam |
manyum | janasya | duḥ-dhyaḥ ||8.019.15||

8.019.16a yena caṣṭe varuṇo mitro aryamā yena nāsatyā bhagaḥ |
8.019.16c vayaṁ tat te śavasā gātuvittamā indratvotā vidhemahi ||

yena | caṣṭe | varuṇaḥ | mitraḥ | aryamā | yena | nāsatyā | bhagaḥ |
vayam | tat | te | śavasā | gātuvit-tamāḥ | indratvā-ūtāḥ | vidhemahi ||8.019.16||

8.019.17a te ghed agne svādhyo ye tvā vipra nidadhire nṛcakṣasam |
8.019.17c viprāso deva sukratum ||

te | gha | it | agne | su-ādhyaḥ | ye | tvā | vipra | ni-dadhire | nṛ-cakṣasam |
viprāsaḥ | deva | su-kratum ||8.019.17||

8.019.18a ta id vediṁ subhaga ta āhutiṁ te sotuṁ cakrire divi |
8.019.18c ta id vājebhir jigyur mahad dhanaṁ ye tve kāmaṁ nyerire ||

te | it | vedim | su-bhaga | te | ā-hutim | te | sotum | cakrire | divi |
t e | it | vājebhiḥ | jigyuḥ | mahat | dhanam | ye | tve iti | kāmam | ni- erire ||8.019.18||

8.019.19a bhadro no agnir āhuto bhadrā rātiḥ subhaga bhadro adhvaraḥ |
8.019.19c bhadrā uta praśastayaḥ ||

bhadraḥ | naḥ | agniḥ | ā-hutaḥ | bhadrā | rātiḥ | su-bhaga | bhadraḥ | adhvaraḥ |
bhadrāḥ | uta | pra-śastayaḥ ||8.019.19||

8.019.20a bhadram manaḥ kṛṇuṣva vṛtratūrye yenā samatsu sāsahaḥ |
8.019.20c ava sthirā tanuhi bhūri śardhatāṁ vanemā te abhiṣṭibhiḥ ||

bhadram | manaḥ | kṛṇuṣva | vṛtra-tūrye | yena | samat-su | sasahaḥ |
ava | sthirā | tanuhi | bhūri | śardhatām | vanema | te | abhiṣṭi-bhiḥ ||8.019.20||

8.019.21a īḻe girā manurhitaṁ yaṁ devā dūtam aratiṁ nyerire |
8.019.21c yajiṣṭhaṁ havyavāhanam ||

iḻe | girā | manuḥ-hitam | yam | devāḥ | dūtam | aratim | ni-erire |
yajiṣṭham | havya-vāhanam ||8.019.21||

8.019.22a tigmajambhāya taruṇāya rājate prayo gāyasy agnaye |
8.019.22c yaḥ piṁśate sūnṛtābhiḥ suvīryam agnir ghṛtebhir āhutaḥ ||

tigma-jambhāya | taruṇāya | rājate | prayaḥ | gāyasi | agnaye |
yaḥ | piṁśate | sūnṛtābhiḥ | su-vīryam | agniḥ | ghṛtebhiḥ | ā-hutaḥ ||8.019.22||

8.019.23a yadī ghṛtebhir āhuto vāśīm agnir bharata uc cāva ca |
8.019.23c asura iva nirṇijam ||

yadi | ghṛtebhiḥ | ā-hutaḥ | vāśīm | agniḥ | bharate | ut | ca | ava | ca |
asuraḥ-iva | niḥ-nijam ||8.019.23||

8.019.24a yo havyāny airayatā manurhito deva āsā sugandhinā |
8.019.24c vivāsate vāryāṇi svadhvaro hotā devo amartyaḥ ||

yaḥ | havyāni | airayata | manuḥ-hitaḥ | devaḥ | āsā | su-gandhinā |
vivāsate | vāryāṇi | su-adhvaraḥ | hotā | devaḥ | amartyaḥ ||8.019.24||

8.019.25a yad agne martyas tvaṁ syām aham mitramaho amartyaḥ |
8.019.25c sahasaḥ sūnav āhuta ||

yat | agne | martyaḥ | tvam | syām | aham | mitra-mahaḥ | amartyaḥ |
sahasaḥ | sūno iti | ā-huta ||8.019.25||

8.019.26a na tvā rāsīyābhiśastaye vaso na pāpatvāya santya |
8.019.26c na me stotāmatīvā na durhitaḥ syād agne na pāpayā ||

na | tvā | rāsīya | abhi-śastaye | vaso iti | na | pāpa-tvāya | santya |
na | me | stotā | amati-vā | na | duḥ-hitaḥ | syāt | agne | na | pāpayā ||8.019.26||

8.019.27a pitur na putraḥ subhṛto duroṇa ā devām̐ etu pra ṇo haviḥ ||

pituḥ | na | putraḥ | su-bhṛtaḥ | duroṇe | ā | devān | etu | pra | naḥ | haviḥ ||8.019.27||

8.019.28a tavāham agna ūtibhir nediṣṭhābhiḥ saceya joṣam ā vaso |
8.019.28c sadā devasya martyaḥ ||

tava | aham | agne | ūti-bhiḥ | nediṣṭhābhiḥ | saceya | joṣam | ā | vaso iti |
sadā | devasya | martyaḥ ||8.019.28||

8.019.29a tava kratvā saneyaṁ tava rātibhir agne tava praśastibhiḥ |
8.019.29c tvām id āhuḥ pramatiṁ vaso mamāgne harṣasva dātave ||

tava | kratvā | saneyam | tava | rāti-bhiḥ | agne | tava | praśasti-bhiḥ |
tvām | it | āhuḥ | pra-matim | vaso iti | mama | agne | harṣasva | dātave ||8.019.29||

8.019.30a pra so agne tavotibhiḥ suvīrābhis tirate vājabharmabhiḥ |
8.019.30c yasya tvaṁ sakhyam āvaraḥ ||

pra | saḥ | agne | tava | ūti-bhiḥ | su-vīrābhiḥ | tirate | vājabharma-bhiḥ |
yasya | tvam | sakhyam | ā-varaḥ ||8.019.30||

8.019.31a tava drapso nīlavān vāśa ṛtviya indhānaḥ siṣṇav ā dade |
8.019.31c tvam mahīnām uṣasām asi priyaḥ kṣapo vastuṣu rājasi ||

tava | drapsaḥ | nīla-vān | vāśaḥ | ṛtviyaḥ | indhānaḥ | siṣṇo iti | ā | dade |
tvam | mahīnām | uṣasām | asi | priyaḥ | kṣapaḥ | vastuṣu | rājasi ||8.019.31||

8.019.32a tam āganma sobharayaḥ sahasramuṣkaṁ svabhiṣṭim avase |
8.019.32c samrājaṁ trāsadasyavam ||

tam | ā | aganma | sobharayaḥ | sahasra-muṣkam | su-abhiṣṭim | avase |
sam-rājan | trāsadasyavam ||8.019.32||

8.019.33a yasya te agne anye agnaya upakṣito vayā iva |
8.019.33c vipo na dyumnā ni yuve janānāṁ tava kṣatrāṇi vardhayan ||

yasya | te | agne | anye | agnayaḥ | upa-kṣitaḥ | vayāḥ-iva |
vipaḥ | na | dyumnā | ni | yuve | janānām | tava | kṣatrāṇi | vardhayan ||8.019.33||

8.019.34a yam ādityāso adruhaḥ pāraṁ nayatha martyam |
8.019.34c maghonāṁ viśveṣāṁ sudānavaḥ ||

yam | ādityāsaḥ | adruhaḥ | pāram | nayatha | martyam |
maghonām | viśveṣām | su-dānavaḥ ||8.019.34||

8.019.35a yūyaṁ rājānaḥ kaṁ cic carṣaṇīsahaḥ kṣayantam mānuṣām̐ anu |
8.019.35c vayaṁ te vo varuṇa mitrāryaman syāmed ṛtasya rathyaḥ ||

yūyam | rājānaḥ | kam | cit | carṣaṇi-sahaḥ | kṣayantam | mānuṣān | anu |
vayam | te | vaḥ | varuṇa | mitra | aryaman | syāma | it | ṛtasya | rathyaḥ ||8.019.35||

8.019.36a adān me paurukutsyaḥ pañcāśataṁ trasadasyur vadhūnām |
8.019.36c maṁhiṣṭho aryaḥ satpatiḥ ||

adāt | me | pauru-kutsyaḥ | pañcāśatam | trasadasyuḥ | vadhūnām |
maṁhiṣṭhaḥ | aryaḥ | sat-patiḥ ||8.019.36||

8.019.37a uta me prayiyor vayiyoḥ suvāstvā adhi tugvani |
8.019.37c tisṝṇāṁ saptatīnāṁ śyāvaḥ praṇetā bhuvad vasur diyānām patiḥ ||

uta | me | prayiyoḥ | vayiyoḥ | su-vāstvāḥ | adhi | tugvani |
tisṝṇām | saptatīnām | śyāvaḥ | pra-netā | bhuvat | vasuḥ | diyānām | patiḥ ||8.019.37||


8.020.01a ā gantā mā riṣaṇyata prasthāvāno māpa sthātā samanyavaḥ |
8.020.01c sthirā cin namayiṣṇavaḥ ||

ā | gantā | mā | riṣaṇyata | pra-sthāvānaḥ | mā | apa | sthāta | sa-manyavaḥ |
sthirā | cit | namayiṣṇavaḥ ||8.020.01||

8.020.02a vīḻupavibhir maruta ṛbhukṣaṇa ā rudrāsaḥ sudītibhiḥ |
8.020.02c iṣā no adyā gatā puruspṛho yajñam ā sobharīyavaḥ ||

vīḻupavi-bhiḥ | marutaḥ | ṛbhukṣaṇaḥ | ā | rudrāsaḥ | sudīti-bhiḥ |
iṣā | naḥ | adya | ā | gata | puru-spṛhaḥ | yajñam | ā | sobharī-yavaḥ ||8.020.02||

8.020.03a vidmā hi rudriyāṇāṁ śuṣmam ugram marutāṁ śimīvatām |
8.020.03c viṣṇor eṣasya mīḻhuṣām ||

vidma | hi | rudriyāṇām | śuṣmam | ugram | marutām | śamī-vatām |
viṣṇoḥ | eṣasya | mīḻhuṣām ||8.020.03||

8.020.04a vi dvīpāni pāpatan tiṣṭhad ducchunobhe yujanta rodasī |
8.020.04c pra dhanvāny airata śubhrakhādayo yad ejatha svabhānavaḥ ||

vi | dvīpāni | pāpatan | tiṣṭhat | ducchunā | ubhe iti | yujanta | rodasī iti |
pra | dhanvāni | airata | śubhra-khādayaḥ | yat | ejatha | sva-bhānavaḥ ||8.020.04||

8.020.05a acyutā cid vo ajmann ā nānadati parvatāso vanaspatiḥ |
8.020.05c bhūmir yāmeṣu rejate ||

acyutā | cit | vaḥ | ajman | ā | nānadati | parvatāsaḥ | vancaspatiḥ |
bhūmiḥ | yāmeṣu | rejate ||8.020.05||

8.020.06a amāya vo maruto yātave dyaur jihīta uttarā bṛhat |
8.020.06c yatrā naro dediśate tanūṣv ā tvakṣāṁsi bāhvojasaḥ ||

amāya | vaḥ | marutaḥ | yātave | dyauḥ | jihīte | ut-tarā | bṛhat |
yatra | naraḥ | dediśate | tanūṣu | ā | tvakṣāṁsi | bahu-ojasaḥ ||8.020.06||

8.020.07a svadhām anu śriyaṁ naro mahi tveṣā amavanto vṛṣapsavaḥ |
8.020.07c vahante ahrutapsavaḥ ||

svadhām | anu | śriyam | naraḥ | mahi | tveṣāḥ | ama-vantaḥ | vṛṣa-psavaḥ |
vahante | ahruta-psavaḥ ||8.020.07||

8.020.08a gobhir vāṇo ajyate sobharīṇāṁ rathe kośe hiraṇyaye |
8.020.08c gobandhavaḥ sujātāsa iṣe bhuje mahānto naḥ sparase nu ||

gobhiḥ | vāṇaḥ | ajyate | sobharīṇām | rathe | kośe | hiraṇyaye |
go-bandhavaḥ | su-jātāsaḥ | iṣe | bhuje | mahāntaḥ | naḥ | sparase | nu ||8.020.08||

8.020.09a prati vo vṛṣadañjayo vṛṣṇe śardhāya mārutāya bharadhvam |
8.020.09c havyā vṛṣaprayāvṇe ||

prati | vaḥ | vṛṣat-añjayaḥ | vṛṣṇe | śardhāya | mārutāya | bharadhvam |
havyā | vṛṣa-prayāvṇe ||8.020.09||

8.020.10a vṛṣaṇaśvena maruto vṛṣapsunā rathena vṛṣanābhinā |
8.020.10c ā śyenāso na pakṣiṇo vṛthā naro havyā no vītaye gata ||

vṛṣaṇaśvena | marutaḥ | vṛṣa-psunā | rathena | vṛṣa-nābhinā |
ā | śyenāsaḥ | na | pakṣiṇaḥ | vṛthā | naraḥ | havyā | naḥ | vītaye | gata ||8.020.10||

8.020.11a samānam añjy eṣāṁ vi bhrājante rukmāso adhi bāhuṣu |
8.020.11c davidyutaty ṛṣṭayaḥ ||

samānam | añji | eṣām | vi | bhrājante | rukmāsaḥ | adhi | bāhuṣu |
davidyutati | ṛṣṭayaḥ ||8.020.11||

8.020.12a ta ugrāso vṛṣaṇa ugrabāhavo nakiṣ ṭanūṣu yetire |
8.020.12c sthirā dhanvāny āyudhā ratheṣu vo 'nīkeṣv adhi śriyaḥ ||

te | ugrāsaḥ | vṛṣaṇaḥ | ugra-bāhavaḥ | nakiḥ | tanūṣu | yetire |
sthirā | dhanvāni | ā-yudhā | ratheṣu | vaḥ | anīkeṣu | adhi | śriyaḥ ||8.020.12||

8.020.13a yeṣām arṇo na sapratho nāma tveṣaṁ śaśvatām ekam id bhuje |
8.020.13c vayo na pitryaṁ sahaḥ ||

yeṣām | arṇaḥ | na | sa-prathaḥ | nāma | tveṣam | śaśvatām | ekam | it | bhuje |
vayaḥ | na | pitryam | sahaḥ ||8.020.13||

8.020.14a tān vandasva marutas tām̐ upa stuhi teṣāṁ hi dhunīnām |
8.020.14c arāṇāṁ na caramas tad eṣāṁ dānā mahnā tad eṣām ||

tān | vandasva | marutaḥ | tān | upa | stuhi | teṣām | hi | dhunīnām |
arāṇām | na | caramaḥ | tat | eṣām | dānā | mahnā | tat | eṣām ||8.020.14||

8.020.15a subhagaḥ sa va ūtiṣv āsa pūrvāsu maruto vyuṣṭiṣu |
8.020.15c yo vā nūnam utāsati ||

su-bhagaḥ | saḥ | vaḥ | ūtiṣu | āsa | pūrvāsu | marutaḥ | vi-uṣṭiṣu |
yaḥ | vā | nūnam | uta | asati ||8.020.15||

8.020.16a yasya vā yūyam prati vājino nara ā havyā vītaye gatha |
8.020.16c abhi ṣa dyumnair uta vājasātibhiḥ sumnā vo dhūtayo naśat ||

yasya | vā | yūyam | prati | vājinaḥ | naraḥ | ā | havyā | vītaye | gatha |
abhi | saḥ | dyumnaiḥ | uta | vājasāti-bhiḥ | sumnā | vaḥ | dhūtayaḥ | naśat ||8.020.16||

8.020.17a yathā rudrasya sūnavo divo vaśanty asurasya vedhasaḥ |
8.020.17c yuvānas tathed asat ||

yathā | rudrasya | sūnavaḥ | divaḥ | vaśanti | asurasya | vedhasaḥ |
yuvānaḥ | tathā | it | asat ||8.020.17||

8.020.18a ye cārhanti marutaḥ sudānavaḥ sman mīḻhuṣaś caranti ye |
8.020.18c ataś cid ā na upa vasyasā hṛdā yuvāna ā vavṛdhvam ||

ye | ca | arhanti | marutaḥ | su-dānavaḥ | smat | mīḻhuṣaḥ | caranti | ye |
ataḥ | cit | ā | naḥ | upa | vasyasā | hṛdā | yuvānaḥ | ā | vavṛdhvam ||8.020.18||

8.020.19a yūna ū ṣu naviṣṭhayā vṛṣṇaḥ pāvakām̐ abhi sobhare girā |
8.020.19c gāya gā iva carkṛṣat ||

yūnaḥ | ūm̐ iti | su | naviṣṭhayā | vṛṣṇaḥ | pāvakān | abhi | sobhare | girā |
gāya | gāḥ-iva | carkṛṣat ||8.020.19||

8.020.20a sāhā ye santi muṣṭiheva havyo viśvāsu pṛtsu hotṛṣu |
8.020.20c vṛṣṇaś candrān na suśravastamān girā vandasva maruto aha ||

sahāḥ | ye | santi | muṣṭihā-iva | havyaḥ | viśvāsu | pṛt-su | hotṛṣu |
vṛṣṇaḥ | candrān | na | suśravaḥ-tamān | girā | vandasva | marutaḥ | aha ||8.020.20||

8.020.21a gāvaś cid ghā samanyavaḥ sajātyena marutaḥ sabandhavaḥ |
8.020.21c rihate kakubho mithaḥ ||

gāvaḥ | cit | gha | sa-manyavaḥ | sa-jātyena | marutaḥ | sa-bandhavaḥ |
rihate | kakubhaḥ | mithaḥ ||8.020.21||

8.020.22a martaś cid vo nṛtavo rukmavakṣasa upa bhrātṛtvam āyati |
8.020.22c adhi no gāta marutaḥ sadā hi va āpitvam asti nidhruvi ||

martaḥ | cit | vaḥ | nṛtavaḥ | rukma-vakṣasaḥ | upa | bhrātṛ-tvam | ā | ayati |
adhi | naḥ | gāta | marutaḥ | sadā | hi | vaḥ | āpi-tvam | asti | ni-dhruvi ||8.020.22||

8.020.23a maruto mārutasya na ā bheṣajasya vahatā sudānavaḥ |
8.020.23c yūyaṁ sakhāyaḥ saptayaḥ ||

marutaḥ | mārutasya | naḥ | ā | bheṣajasya | vahata | su-dānavaḥ |
yūyam | sakhāyaḥ | saptayaḥ ||8.020.23||

8.020.24a yābhiḥ sindhum avatha yābhis tūrvatha yābhir daśasyathā krivim |
8.020.24c mayo no bhūtotibhir mayobhuvaḥ śivābhir asacadviṣaḥ ||

yābhiḥ | sindhum | avatha | yābhiḥ | tūrvatha | yābhiḥ | daśasyatha | krivim |
mayaḥ | naḥ | bhūta | ūti-bhiḥ | mayaḥ-bhuvaḥ | śivābhiḥ | asaca-dviṣaḥ ||8.020.24||

8.020.25a yat sindhau yad asiknyāṁ yat samudreṣu marutaḥ subarhiṣaḥ |
8.020.25c yat parvateṣu bheṣajam ||

yat | sindhau | yat | asiknyām | yat | samudreṣu | marutaḥ | su-barhiṣaḥ |
yat | parvateṣu | bheṣajam ||8.020.25||

8.020.26a viśvam paśyanto bibhṛthā tanūṣv ā tenā no adhi vocata |
8.020.26c kṣamā rapo maruta āturasya na iṣkartā vihrutam punaḥ ||

viśvam | paśyantaḥ | vibhṛtha | tanūṣu | ā | tena | naḥ | adhi | vocata |
kṣamā | rapaḥ | marutaḥ | āturasya | naḥ | iṣkarta | vi-hrutam | punariti ||8.020.26||


8.021.01a vayam u tvām apūrvya sthūraṁ na kac cid bharanto 'vasyavaḥ |
8.021.01c vāje citraṁ havāmahe ||

vayam | ūm̐ iti | tvām | apūrvya | sthūram | na | kat | cit | bharantaḥ | avasyavaḥ |
vāje | citram | havāmahe ||8.021.01||

8.021.02a upa tvā karmann ūtaye sa no yuvograś cakrāma yo dhṛṣat |
8.021.02c tvām id dhy avitāraṁ vavṛmahe sakhāya indra sānasim ||

upa | tvā | karman | ūtaye | saḥ | naḥ | yuvā | ugraḥ | cakāma | yaḥ | dhṛṣat |
tvām | it | hi | avitāram | vavṛmahe | sakhāyaḥ | indra | sānasim ||8.021.02||

8.021.03a ā yāhīma indavo 'śvapate gopata urvarāpate |
8.021.03c somaṁ somapate piba ||

ā | yāhi | ime | indavaḥ | aśva-pate | go-pate | urvarā-pate |
somam | soma-pate | piba ||8.021.03||

8.021.04a vayaṁ hi tvā bandhumantam abandhavo viprāsa indra yemima |
8.021.04c yā te dhāmāni vṛṣabha tebhir ā gahi viśvebhiḥ somapītaye ||

vayam | hi | tvā | bandhu-mantam | abandhavaḥ | viprāsaḥ | indra | yemima |
yā | te | dhāmāni | vṛṣabha | tebhiḥ | ā | gahi | viśvebhiḥ | soma-pītaye ||8.021.04||

8.021.05a sīdantas te vayo yathā gośrīte madhau madire vivakṣaṇe |
8.021.05c abhi tvām indra nonumaḥ ||

sīdantaḥ | te | vayaḥ | yathā | go-śrīte | madhau | madire | vivakṣaṇe |
abhi | tvām | indra | nonumaḥ ||8.021.05||

8.021.06a acchā ca tvainā namasā vadāmasi kim muhuś cid vi dīdhayaḥ |
8.021.06c santi kāmāso harivo dadiṣ ṭvaṁ smo vayaṁ santi no dhiyaḥ ||

accha | ca | tvā | enā | namasā | vadāmasi | kim | muhuḥ | cit | vi | dīdhayaḥ |
santi | kāmāsaḥ | hari-vaḥ | dadiḥ | tvam | smaḥ | vayam | santi | naḥ | dhiyaḥ ||8.021.06||

8.021.07a nūtnā id indra te vayam ūtī abhūma nahi nū te adrivaḥ |
8.021.07c vidmā purā parīṇasaḥ ||

nūtnāḥ | it | indra | te | vayam | ūtī | abhūma | nahi | nu | te | adri-vaḥ |
vidma | purā | parīṇasaḥ ||8.021.07||

8.021.08a vidmā sakhitvam uta śūra bhojyam ā te tā vajrinn īmahe |
8.021.08c uto samasminn ā śiśīhi no vaso vāje suśipra gomati ||

vidma | sakhi-tvam | uta | śūra | bhojyam | ā | te | tā | vajrin | īmahe |
uto iti | samasmin | ā | śiśīhi | naḥ | vaso iti | vāje | su-śipra | go-mati ||8.021.08||

8.021.09a yo na idam-idam purā pra vasya ānināya tam u vaḥ stuṣe |
8.021.09c sakhāya indram ūtaye ||

yaḥ | naḥ | idam-idam | purā | pra | vasyaḥ | ā-nināya | tam | ūm̐ iti | vaḥ | stuṣe |
sakhāyaḥ | indram | ūtaye ||8.021.09||

8.021.10a haryaśvaṁ satpatiṁ carṣaṇīsahaṁ sa hi ṣmā yo amandata |
8.021.10c ā tu naḥ sa vayati gavyam aśvyaṁ stotṛbhyo maghavā śatam ||

hari-aśvam | sat-patim | carṣaṇi-saham | saḥ | hi | sma | yaḥ | amandata |
ā | tu | naḥ | saḥ | vayati | gavyam | aśvyam | stotṛ-bhyaḥ | magha-vā | śatam ||8.021.10||

8.021.11a tvayā ha svid yujā vayam prati śvasantaṁ vṛṣabha bruvīmahi |
8.021.11c saṁsthe janasya gomataḥ ||

tvayā | ha | svit | yujā | vayam | prati | śvasantam | vṛṣabha | bruvīmahi |
saṁsthe | janasya | go-mataḥ ||8.021.11||

8.021.12a jayema kāre puruhūta kāriṇo 'bhi tiṣṭhema dūḍhyaḥ |
8.021.12c nṛbhir vṛtraṁ hanyāma śūśuyāma cāver indra pra ṇo dhiyaḥ ||

jayema | kāre | puru-hūta | kāriṇaḥ | abhi | tiṣṭhema | duḥ-dhyaḥ |
nṛ-bhiḥ | vṛtram | hanyāma | śūśuyāma | ca | aveḥ | indra | pra | naḥ | dhiyaḥ ||8.021.12||

8.021.13a abhrātṛvyo anā tvam anāpir indra januṣā sanād asi |
8.021.13c yudhed āpitvam icchase ||

abhrātṛvyaḥ | anā | tvam | anāpiḥ | indra | januṣā | sanāt | asi |
yudhā | it | āpi-tvam | icchase ||8.021.13||

8.021.14a nakī revantaṁ sakhyāya vindase pīyanti te surāśvaḥ |
8.021.14c yadā kṛṇoṣi nadanuṁ sam ūhasy ād it piteva hūyase ||

nakiḥ | revantam | sakhyāya | vindase | pīyanti | te | surāśvaḥ |
yadā | kṛṇoṣi | nadanum | sam | ūhasi | āt | it | pitā-iva | hūyase ||8.021.14||

8.021.15a mā te amājuro yathā mūrāsa indra sakhye tvāvataḥ |
8.021.15c ni ṣadāma sacā sute ||

mā | te | amā-juraḥ | yathā | mūrāsaḥ | indra | sakhye | tvā-vataḥ |
ni | sadāma | sacā | sute ||8.021.15||

8.021.16a mā te godatra nir arāma rādhasa indra mā te gṛhāmahi |
8.021.16c dṛḻhā cid aryaḥ pra mṛśābhy ā bhara na te dāmāna ādabhe ||

mā | te | go-datra | niḥ | arāma | rādhasaḥ | indra | mā | te | gṛhāmahi |
dṛḻhā | cit | aryaḥ | pra | mṛśa | abhi | ā | bhara | na | te | dāmānaḥ | ā-dabhe ||8.021.16||

8.021.17a indro vā ghed iyan maghaṁ sarasvatī vā subhagā dadir vasu |
8.021.17c tvaṁ vā citra dāśuṣe ||

indraḥ | vā | gha | it | iyat | magham | sarasvatī | vā | su-bhagā | dadiḥ | vasu |
tvam | vā | citra | dāśuṣe ||8.021.17||

8.021.18a citra id rājā rājakā id anyake yake sarasvatīm anu |
8.021.18c parjanya iva tatanad dhi vṛṣṭyā sahasram ayutā dadat ||

citraḥ | it | rājā | rājakāḥ | it | anyake | yake | sarasvatīm | anu |
parjanyaḥ-iva | tatanat | hi | vṛṣṭyā | sahasram | ayutā | dadat ||8.021.18||


8.022.01a o tyam ahva ā ratham adyā daṁsiṣṭham ūtaye |
8.022.01c yam aśvinā suhavā rudravartanī ā sūryāyai tasthathuḥ ||

o iti | tyam | ahve | ā | ratham | adya | daṁsiṣṭham | ūtaye |
yam | aśvinā | su-havā | rudra-vartanī iti rudra-vartanī | ā | sūryāyai | tasthathuḥ ||8.022.01||

8.022.02a pūrvāyuṣaṁ suhavam puruspṛham bhujyuṁ vājeṣu pūrvyam |
8.022.02c sacanāvantaṁ sumatibhiḥ sobhare vidveṣasam anehasam ||

pūrva-āpuṣam | su-havam | puru-spṛham | bhujyum | vājeṣu | pūrvyam |
sacanā-vantam | sumati-bhiḥ | sobhare | vi-dveṣasam | anehasam ||8.022.02||

8.022.03a iha tyā purubhūtamā devā namobhir aśvinā |
8.022.03c arvācīnā sv avase karāmahe gantārā dāśuṣo gṛham ||

iha | tyā | puru-bhūtamā | devā | namaḥ-bhiḥ | aśvinā |
arvācīnā | su | avase | karāmahe | gantārā | dāśuṣaḥ | gṛham ||8.022.03||

8.022.04a yuvo rathasya pari cakram īyata īrmānyad vām iṣaṇyati |
8.022.04c asmām̐ acchā sumatir vāṁ śubhas patī ā dhenur iva dhāvatu ||

yuvaḥ | rathasya | pari | cakram | īyate | īrmā | anyat | vām | iṣaṇyati |
asmān | accha | su-matiḥ | vām | śubhaḥ | patī iti | ā | dhenuḥ-iva | dhāvatu ||8.022.04||

8.022.05a ratho yo vāṁ trivandhuro hiraṇyābhīśur aśvinā |
8.022.05c pari dyāvāpṛthivī bhūṣati śrutas tena nāsatyā gatam ||

rathaḥ | yaḥ | vām | tri-vandhuraḥ | hiraṇya-abhīśuḥ | aśvinā |
pari | dyāvāpṛthivī iti | bhūṣati | śrutaḥ | tena | nāsatyā | ā | gatam ||8.022.05||

8.022.06a daśasyantā manave pūrvyaṁ divi yavaṁ vṛkeṇa karṣathaḥ |
8.022.06c tā vām adya sumatibhiḥ śubhas patī aśvinā pra stuvīmahi ||

daśasyantā | manave | pūrvyam | divi | yavam | vṛkeṇa | karṣathaḥ |
tā | vām | adya | sumati-bhiḥ | śubhaḥ | patī iti | aśvinā | pra | stuvīmahi ||8.022.06||

8.022.07a upa no vājinīvasū yātam ṛtasya pathibhiḥ |
8.022.07c yebhis tṛkṣiṁ vṛṣaṇā trāsadasyavam mahe kṣatrāya jinvathaḥ ||

upa | naḥ | vājinīvasū iti vājinī-vasū | yātam | ṛtasya | pathi-bhiḥ |
yebhiḥ | tṛkṣim | vṛṣaṇā | trāsadasyavam | mahe | kṣatrāya | jinvathaḥ ||8.022.07||

8.022.08a ayaṁ vām adribhiḥ sutaḥ somo narā vṛṣaṇvasū |
8.022.08c ā yātaṁ somapītaye pibataṁ dāśuṣo gṛhe ||

ayam | vām | adri-bhiḥ | sutaḥ | somaḥ | narā | vṛṣaṇvasū iti vṛṣaṇ-vasū |
ā | yātam | soma-pītaye | pibatam | dāśuṣaḥ | gṛhe ||8.022.08||

8.022.09a ā hi ruhatam aśvinā rathe kośe hiraṇyaye vṛṣaṇvasū |
8.022.09c yuñjāthām pīvarīr iṣaḥ ||

ā | hi | ruhatam | aśvinā | rathe | kośe | hiraṇyaye | vṛṣaṇvasū iti vṛṣaṇ-vasū |
yuñjāthām | pīvarīḥ | iṣaḥ ||8.022.09||

8.022.10a yābhiḥ paktham avatho yābhir adhriguṁ yābhir babhruṁ vijoṣasam |
8.022.10c tābhir no makṣū tūyam aśvinā gatam bhiṣajyataṁ yad āturam ||

yābhiḥ | paktham | avathaḥ | yābhiḥ | adhri-gum | yābhiḥ | babhrum | vi-joṣasam |
tābhiḥ | naḥ | makṣu | tūyam | aśvinā | ā | gatam | bhiṣajyatam | yat | āturam ||8.022.10||

8.022.11a yad adhrigāvo adhrigū idā cid ahno aśvinā havāmahe |
8.022.11c vayaṁ gīrbhir vipanyavaḥ ||

yat | adhri-gāvaḥ | adhrigū ityadhri-gū | idā | cit | ahnaḥ | aśvinā | havāmahe |
vayam | gīḥ-bhiḥ | vipanyavaḥ ||8.022.11||

8.022.12a tābhir ā yātaṁ vṛṣaṇopa me havaṁ viśvapsuṁ viśvavāryam |
8.022.12c iṣā maṁhiṣṭhā purubhūtamā narā yābhiḥ kriviṁ vāvṛdhus tābhir ā gatam ||

tābhiḥ | ā | yātam | vṛṣaṇā | upa | me | havam | viśva-psum | viśva-vāryam |
iṣā | maṁhiṣṭhā | puru-bhūtamā | narā | yābhiḥ | krivim | vavṛdhuḥ | tābhiḥ | ā | gatam ||8.022.12||

8.022.13a tāv idā cid ahānāṁ tāv aśvinā vandamāna upa bruve |
8.022.13c tā u namobhir īmahe ||

tau | idā | cit | ahānām | tau | aśvinā | vandamānaḥ | upa | bruve |
tau | ūm̐ iti | namaḥ-bhiḥ | īmahe ||8.022.13||

8.022.14a tāv id doṣā tā uṣasi śubhas patī tā yāman rudravartanī |
8.022.14c mā no martāya ripave vājinīvasū paro rudrāv ati khyatam ||

tau | it | doṣā | tau | uṣasi | śubhaḥ | patī iti | tā | yāman | rudravartanī iti rudra-vartanī |
mā | naḥ | martāya | ripave | vājinīvasū iti vājinī-vasū | paraḥ | rudrau | ati | khyatam ||8.022.14||

8.022.15a ā sugmyāya sugmyam prātā rathenāśvinā vā sakṣaṇī |
8.022.15c huve piteva sobharī ||

ā | sugmyāya | sugmyam | prātariti | rathena | aśvinā | vā | sakṣaṇī iti |
huve | pitā-iva | sobharī ||8.022.15||

8.022.16a manojavasā vṛṣaṇā madacyutā makṣuṁgamābhir ūtibhiḥ |
8.022.16c ārāttāc cid bhūtam asme avase pūrvībhiḥ purubhojasā ||

manaḥ-javasā | vṛṣaṇā | mada-cyutā | makṣum-gamābhiḥ | ūti-bhiḥ |
ārāttāt | cit | bhūtam | asme iti | avase | pūrvī-bhiḥ | puru-bhojasā ||8.022.16||

8.022.17a ā no aśvāvad aśvinā vartir yāsiṣṭam madhupātamā narā |
8.022.17c gomad dasrā hiraṇyavat ||

ā | naḥ | aśva-vat | aśvinā | vartiḥ | yāsiṣṭam | madhu-pātamā | narā |
go-mat | dasrā | hiraṇya-vat ||8.022.17||

8.022.18a suprāvargaṁ suvīryaṁ suṣṭhu vāryam anādhṛṣṭaṁ rakṣasvinā |
8.022.18c asminn ā vām āyāne vājinīvasū viśvā vāmāni dhīmahi ||

su-prāvargam | su-vīryam | suṣṭhu | vāryam | anādhṛṣṭam | rakṣasvinā |
asmin | ā | vām | ā-yāne | vājinīvasū iti vājinī-vasū | viśvā | vāmāni | dhīmahi ||8.022.18||


8.023.01a īḻiṣvā hi pratīvyaṁ yajasva jātavedasam |
8.023.01c cariṣṇudhūmam agṛbhītaśociṣam ||

īḻiṣva | hi | pratīvyam | yajasva | jāta-vedasam |
cariṣṇu-dhūmam | agṛbhīta-śociṣam ||8.023.01||

8.023.02a dāmānaṁ viśvacarṣaṇe 'gniṁ viśvamano girā |
8.023.02c uta stuṣe viṣpardhaso rathānām ||

dāmānam | viśva-carṣaṇe | agnim | viśva-manaḥ | girā |
uta | stuṣe | vi-spardhasaḥ | rathānām ||8.023.02||

8.023.03a yeṣām ābādha ṛgmiya iṣaḥ pṛkṣaś ca nigrabhe |
8.023.03c upavidā vahnir vindate vasu ||

yeṣām | ā-bādhaḥ | ṛgmiyaḥ | iṣaḥ | pṛkṣaḥ | ca | ni-grabhe |
upa-vidā | vahniḥ | vindate | vasu ||8.023.03||

8.023.04a ud asya śocir asthād dīdiyuṣo vy ajaram |
8.023.04c tapurjambhasya sudyuto gaṇaśriyaḥ ||

ut | asya | śociḥ | asthāt | dīdiyuṣaḥ | vi | ajaram |
tapuḥ-jambhasya | su-dyutaḥ | gaṇa-śriyaḥ ||8.023.04||

8.023.05a ud u tiṣṭha svadhvara stavāno devyā kṛpā |
8.023.05c abhikhyā bhāsā bṛhatā śuśukvaniḥ ||

ut | ūm̐ iti | tiṣṭha | su-adhvara | stavānaḥ | devyā | kṛpā |
abhi-khyā | bhāsā | bṛhatā | śuśukvaniḥ ||8.023.05||

8.023.06a agne yāhi suśastibhir havyā juhvāna ānuṣak |
8.023.06c yathā dūto babhūtha havyavāhanaḥ ||

agne | yāhi | suśasti-bhiḥ | havyā | juhvānaḥ | ānuṣak |
yathā | dūtaḥ | babhūtha | havya-vāhanaḥ ||8.023.06||

8.023.07a agniṁ vaḥ pūrvyaṁ huve hotāraṁ carṣaṇīnām |
8.023.07c tam ayā vācā gṛṇe tam u vaḥ stuṣe ||

agnim | vaḥ | pūrvyam | huve | hotāram | carṣaṇīnām |
tam | ayā | vācā | gṛṇe | tam | ūm̐ iti | vaḥ | stuṣe ||8.023.07||

8.023.08a yajñebhir adbhutakratuṁ yaṁ kṛpā sūdayanta it |
8.023.08c mitraṁ na jane sudhitam ṛtāvani ||

yajñebhiḥ | adbhuta-kratum | yam | kṛpā | sūdayante | it |
mitram | na | jane | su-dhitam | ṛta-vani ||8.023.08||

8.023.09a ṛtāvānam ṛtāyavo yajñasya sādhanaṁ girā |
8.023.09c upo enaṁ jujuṣur namasas pade ||

ṛta-vānam | ṛta-yavaḥ | yajñasya | sādhanam | girā |
uṣaḥ | enam | jujuṣuḥ | namasaḥ | pade ||8.023.09||

8.023.10a acchā no aṅgirastamaṁ yajñāso yantu saṁyataḥ |
8.023.10c hotā yo asti vikṣv ā yaśastamaḥ ||

accha | naḥ | aṅgiraḥ-tamam | yajñāsaḥ | yantu | sam-yataḥ |
hotā | yaḥ | asti | vikṣu | ā | yaśaḥ-tamaḥ ||8.023.10||

8.023.11a agne tava tye ajarendhānāso bṛhad bhāḥ |
8.023.11c aśvā iva vṛṣaṇas taviṣīyavaḥ ||

agne | tava | tye | ajara | indhānāsaḥ | bṛhat | bhāḥ |
aśvāḥ-iva | vṛṣaṇaḥ | taviṣī-yavaḥ ||8.023.11||

8.023.12a sa tvaṁ na ūrjām pate rayiṁ rāsva suvīryam |
8.023.12c prāva nas toke tanaye samatsv ā ||

saḥ | tvam | naḥ | ūrjām | pate | rayim | rāsva | su-vīryam |
pra | ava | naḥ | toke | tanaye | samat-su | ā ||8.023.12||

8.023.13a yad vā u viśpatiḥ śitaḥ suprīto manuṣo viśi |
8.023.13c viśved agniḥ prati rakṣāṁsi sedhati ||

yat | vai | ūm̐ iti | viśpatiḥ | śitaḥ | su-prītaḥ | manuṣaḥ | viśi |
viśvā | it | agniḥ | prati | rakṣāṁsi | sedhati ||8.023.13||

8.023.14a śruṣṭy agne navasya me stomasya vīra viśpate |
8.023.14c ni māyinas tapuṣā rakṣaso daha ||

śruṣṭī | agne | navasya | me | stomasya | vīra | viśpate |
ni | māyinaḥ | tapuṣā | rakṣasaḥ | daha ||8.023.14||

8.023.15a na tasya māyayā cana ripur īśīta martyaḥ |
8.023.15c yo agnaye dadāśa havyadātibhiḥ ||

na | tasya | māyayā | cana | ripuḥ | īśīta | martyaḥ |
yaḥ | agnaye | dadāśa | havyadāti-bhiḥ ||8.023.15||

8.023.16a vyaśvas tvā vasuvidam ukṣaṇyur aprīṇād ṛṣiḥ |
8.023.16c maho rāye tam u tvā sam idhīmahi ||

vi-aśvaḥ | tvā | vasu-vidam | ukṣaṇyuḥ | aprīṇāt | ṛṣiḥ |
mahaḥ | rāye | tam | ūm̐ iti | tvā | sam | idhīmahi ||8.023.16||

8.023.17a uśanā kāvyas tvā ni hotāram asādayat |
8.023.17c āyajiṁ tvā manave jātavedasam ||

uśanā | kāvyaḥ | tvā | ni | hotāram | asādayat |
ā-yajim | tvā | manave | jāta-vedasam ||8.023.17||

8.023.18a viśve hi tvā sajoṣaso devāso dūtam akrata |
8.023.18c śruṣṭī deva prathamo yajñiyo bhuvaḥ ||

viśve | hi | tvā | sa-joṣasaḥ | devāsaḥ | dūtam | akrata |
śruṣṭī | deva | prathamaḥ | yajñiyaḥ | bhuvaḥ ||8.023.18||

8.023.19a imaṁ ghā vīro amṛtaṁ dūtaṁ kṛṇvīta martyaḥ |
8.023.19c pāvakaṁ kṛṣṇavartaniṁ vihāyasam ||

imam | gha | vīraḥ | amṛtam | dūtam | kṛṇvīta | martyaḥ |
pāvakam | kṛṣṇa-vartanim | vi-hāyasam ||8.023.19||

8.023.20a taṁ huvema yatasrucaḥ subhāsaṁ śukraśociṣam |
8.023.20c viśām agnim ajaram pratnam īḍyam ||

tam | huvema | yata-srucaḥ | su-bhāsam | śukra-śociṣam |
viśām | agnim | ajaram | pratnam | īḍyam ||8.023.20||

8.023.21a yo asmai havyadātibhir āhutim marto 'vidhat |
8.023.21c bhūri poṣaṁ sa dhatte vīravad yaśaḥ ||

yaḥ | asmai | havyadāti-bhiḥ | ā-hutim | martaḥ | avidhat |
bhūri | poṣam | saḥ | dhatte | vīra-vat | yaśaḥ ||8.023.21||

8.023.22a prathamaṁ jātavedasam agniṁ yajñeṣu pūrvyam |
8.023.22c prati srug eti namasā haviṣmatī ||

prathamam | jāta-vedasam | agnim | yajñeṣu | pūrvyam |
prati | sruk | eti | namasā | haviṣmatī ||8.023.22||

8.023.23a ābhir vidhemāgnaye jyeṣṭhābhir vyaśvavat |
8.023.23c maṁhiṣṭhābhir matibhiḥ śukraśociṣe ||

ābhiḥ | vidhema | agnaye | jyeṣṭhābhiḥ | vyaśva-vat |
maṁhiṣṭhābhiḥ | mati-bhiḥ | śukra-śociṣe ||8.023.23||

8.023.24a nūnam arca vihāyase stomebhiḥ sthūrayūpavat |
8.023.24c ṛṣe vaiyaśva damyāyāgnaye ||

nūnam | arca | vi-hāyase | stomebhiḥ | sthūrayūpa-vat |
ṛṣe | vaiyaśva | damyāya | agnaye ||8.023.24||

8.023.25a atithim mānuṣāṇāṁ sūnuṁ vanaspatīnām |
8.023.25c viprā agnim avase pratnam īḻate ||

atithim | mānuṣāṇām | sūnum | vanaspatīnām |
viprāḥ | agnim | avase | pratnam | īḻate ||8.023.25||

8.023.26a maho viśvām̐ abhi ṣato 'bhi havyāni mānuṣā |
8.023.26c agne ni ṣatsi namasādhi barhiṣi ||

mahaḥ | viśvān | abhi | sataḥ | abhi | havyāni | mānuṣā |
agne | ni | satsi | namasā | adhi | barhiṣi ||8.023.26||

8.023.27a vaṁsvā no vāryā puru vaṁsva rāyaḥ puruspṛhaḥ |
8.023.27c suvīryasya prajāvato yaśasvataḥ ||

vaṁsva | naḥ | vāryā | puru | vaṁsva | rāyaḥ | puru-spṛhaḥ |
su-vīryasya | prajā-vataḥ | yaśasvataḥ ||8.023.27||

8.023.28a tvaṁ varo suṣāmṇe 'gne janāya codaya |
8.023.28c sadā vaso rātiṁ yaviṣṭha śaśvate ||

tvam | varo iti | su-ṣāmṇe | agne | janāya | codaya |
sadā | vaso iti | rātim | yaviṣṭha | śaśvate ||8.023.28||

8.023.29a tvaṁ hi supratūr asi tvaṁ no gomatīr iṣaḥ |
8.023.29c maho rāyaḥ sātim agne apā vṛdhi ||

tvam | hi | su-pratūḥ | asi | tvam | naḥ | go-matīḥ | iṣaḥ |
mahaḥ | rāyaḥ | sātim | agne | apa | vṛdhi ||8.023.29||

8.023.30a agne tvaṁ yaśā asy ā mitrāvaruṇā vaha |
8.023.30c ṛtāvānā samrājā pūtadakṣasā ||

agne | tvam | yaśāḥ | asi | ā | mitrāvaruṇā | vaha |
ṛta-vānā | sam-rājā | pūta-dakṣasā ||8.023.30||


8.024.01a sakhāya ā śiṣāmahi brahmendrāya vajriṇe |
8.024.01c stuṣa ū ṣu vo nṛtamāya dhṛṣṇave ||

sakhāyaḥ | ā | śiṣāmahi | brahma | indrāya | vajriṇe |
stuṣe | ūm̐ iti | su | vaḥ | nṛ-tamāya | dhṛṣṇave ||8.024.01||

8.024.02a śavasā hy asi śruto vṛtrahatyena vṛtrahā |
8.024.02c maghair maghono ati śūra dāśasi ||

śavasā | hi | asi | śrutaḥ | vṛtra-hatyena | vṛtra-hā |
maghaiḥ | maghonaḥ | ati | śūra | dāśasi ||8.024.02||

8.024.03a sa naḥ stavāna ā bhara rayiṁ citraśravastamam |
8.024.03c nireke cid yo harivo vasur dadiḥ ||

saḥ | naḥ | stavānaḥ | ā | bhara | rayim | citraśravaḥ-tamam |
nireke | cit | yaḥ | hari-vaḥ | vasuḥ | dadiḥ ||8.024.03||

8.024.04a ā nirekam uta priyam indra darṣi janānām |
8.024.04c dhṛṣatā dhṛṣṇo stavamāna ā bhara ||

ā | nirekam | uta | priyam | indra | darṣi | janānām |
dhṛṣatā | dhṛṣṇo iti | stavamānaḥ | ā | bhara ||8.024.04||

8.024.05a na te savyaṁ na dakṣiṇaṁ hastaṁ varanta āmuraḥ |
8.024.05c na paribādho harivo gaviṣṭiṣu ||

na | te | savyam | na | dakṣiṇam | hastam | varante | ā-muraḥ |
na | pari-bādhaḥ | hari-vaḥ | go-iṣṭiṣu ||8.024.05||

8.024.06a ā tvā gobhir iva vrajaṁ gīrbhir ṛṇomy adrivaḥ |
8.024.06c ā smā kāmaṁ jaritur ā manaḥ pṛṇa ||

ā | tvā | gobhiḥ-iva | vrajam | gīḥ-bhiḥ | ṛṇomi | adri-vaḥ |
ā | sma | kāmam | jarituḥ | ā | manaḥ | pṛṇa ||8.024.06||

8.024.07a viśvāni viśvamanaso dhiyā no vṛtrahantama |
8.024.07c ugra praṇetar adhi ṣū vaso gahi ||

viśvāni | viśva-manasaḥ | dhiyā | naḥ | vṛtrahan-tama |
ugra | pranetariti pra-netaḥ | adhi | su | vaso iti | gahi ||8.024.07||

8.024.08a vayaṁ te asya vṛtrahan vidyāma śūra navyasaḥ |
8.024.08c vasoḥ spārhasya puruhūta rādhasaḥ ||

vayam | te | asya | vṛtra-han | vidyāma | śūra | navyasaḥ |
vasoḥ | spārhasya | puru-hūta | rādhasaḥ ||8.024.08||

8.024.09a indra yathā hy asti te 'parītaṁ nṛto śavaḥ |
8.024.09c amṛktā rātiḥ puruhūta dāśuṣe ||

indra | yathā | hi | asti | te | apari-itam | nṛto iti | śavaḥ |
amṛktā | rātiḥ | puru-hūta | dāśuṣe ||8.024.09||

8.024.10a ā vṛṣasva mahāmaha mahe nṛtama rādhase |
8.024.10c dṛḻhaś cid dṛhya maghavan maghattaye ||

ā | vṛṣasva | mahā-maha | mahe | nṛ-tama | rādhase |
dṛḻhaḥ | cit | dṛhya | magha-van | maghattaye ||8.024.10||

8.024.11a nū anyatrā cid adrivas tvan no jagmur āśasaḥ |
8.024.11c maghavañ chagdhi tava tan na ūtibhiḥ ||

nu | anyatra | cit | adri-vaḥ | tvat | naḥ | jagmuḥ | ā-śasaḥ |
magha-van | śagdhi | tava | tat | naḥ | ūti-bhiḥ ||8.024.11||

8.024.12a nahy aṅga nṛto tvad anyaṁ vindāmi rādhase |
8.024.12c rāye dyumnāya śavase ca girvaṇaḥ ||

nahi | aṅga | nṛto iti | tvat | anyam | vindāmi | rādhase |
rāye | dyumnāya | śavase | ca | girvaṇaḥ ||8.024.12||

8.024.13a endum indrāya siñcata pibāti somyam madhu |
8.024.13c pra rādhasā codayāte mahitvanā ||

ā | indum | indrāya | siñcata | pibāti | somyam | madhu |
pra | rādhasā | codayāte | mahi-tvanā ||8.024.13||

8.024.14a upo harīṇām patiṁ dakṣam pṛñcantam abravam |
8.024.14c nūnaṁ śrudhi stuvato aśvyasya ||

upo iti | harīṇām | patim | dakṣam | pṛñcantam | abravam |
nūnam | śrudhi | stuvataḥ | aśvyasya ||8.024.14||

8.024.15a nahy aṅga purā cana jajñe vīrataras tvat |
8.024.15c nakī rāyā naivathā na bhandanā ||

nahi | aṅga | purā | cana | jajñe | vīra-taraḥ | tvat |
nakiḥ | rāyā | na | eva-thā | na | bhandanā ||8.024.15||

8.024.16a ed u madhvo madintaraṁ siñca vādhvaryo andhasaḥ |
8.024.16c evā hi vīraḥ stavate sadāvṛdhaḥ ||

ā | it | ūm̐ iti | madhvaḥ | madin-taram | siñca | vā | adhvaryo iti | andhasaḥ |
eva | hi | vīraḥ | stavate | sadā-vṛdhaḥ ||8.024.16||

8.024.17a indra sthātar harīṇāṁ nakiṣ ṭe pūrvyastutim |
8.024.17c ud ānaṁśa śavasā na bhandanā ||

indra | sthātaḥ | harīṇām | nakiḥ | te | pūrvya-stutim |
ut | ānaṁśa | śavasā | na | bhandanā ||8.024.17||

8.024.18a taṁ vo vājānām patim ahūmahi śravasyavaḥ |
8.024.18c aprāyubhir yajñebhir vāvṛdhenyam ||

tam | vaḥ | vājānām | patim | ahūmahi | śravasyavaḥ |
aprāyu-bhiḥ | yajñebhiḥ | vavṛdhenyam ||8.024.18||

8.024.19a eto nv indraṁ stavāma sakhāyaḥ stomyaṁ naram |
8.024.19c kṛṣṭīr yo viśvā abhy asty eka it ||

eto iti | nu | indram | stavāma | sakhāyaḥ | stomyam | naram |
kṛṣṭīḥ | yaḥ | viśvāḥ | abhi | asti | ekaḥ | it ||8.024.19||

8.024.20a agorudhāya gaviṣe dyukṣāya dasmyaṁ vacaḥ |
8.024.20c ghṛtāt svādīyo madhunaś ca vocata ||

ago-rudhāya | go-iṣe | dyukṣāya | dasmyam | vacaḥ |
ghṛtāt | svādīyaḥ | madhunaḥ | ca | vocata ||8.024.20||

8.024.21a yasyāmitāni vīryā na rādhaḥ paryetave |
8.024.21c jyotir na viśvam abhy asti dakṣiṇā ||

yasya | amitāni | vīryā | na | rādhaḥ | pari-etave |
jyotiḥ | na | viśvam | abhi | asti | dakṣiṇā ||8.024.21||

8.024.22a stuhīndraṁ vyaśvavad anūrmiṁ vājinaṁ yamam |
8.024.22c aryo gayam maṁhamānaṁ vi dāśuṣe ||

stuhi | indram | vyaśva-vat | anūrmim | vājinam | yamam |
aryaḥ | gayam | maṁhamānam | vi | dāśuṣe ||8.024.22||

8.024.23a evā nūnam upa stuhi vaiyaśva daśamaṁ navam |
8.024.23c suvidvāṁsaṁ carkṛtyaṁ caraṇīnām ||

eva | nūnam | upa | stuhi | vaiyaśva | daśamam | navam |
su-vidvāṁsam | carkṛtyam | caraṇīnām ||8.024.23||

8.024.24a vetthā hi nirṛtīnāṁ vajrahasta parivṛjam |
8.024.24c ahar-ahaḥ śundhyuḥ paripadām iva ||

vettha | hi | niḥ-ṛtīnām | vajra-hasta | pari-vṛjam |
ahaḥ-ahaḥ | śundhyuḥ | paripadām-iva ||8.024.24||

8.024.25a tad indrāva ā bhara yenā daṁsiṣṭha kṛtvane |
8.024.25c dvitā kutsāya śiśnatho ni codaya ||

tat | indra | avaḥ | ā | bhara | yena | daṁsiṣṭha | kṛtvane |
dvitā | kutsāya | śiśnathaḥ | ni | codaya ||8.024.25||

8.024.26a tam u tvā nūnam īmahe navyaṁ daṁsiṣṭha sanyase |
8.024.26c sa tvaṁ no viśvā abhimātīḥ sakṣaṇiḥ ||

tam | ūm̐ iti | tvā | nūnam | īmahe | navyam | daṁsiṣṭha | sanyase |
saḥ | tvam | naḥ | viśvāḥ | abhi-mātīḥ | sakṣaṇiḥ ||8.024.26||

8.024.27a ya ṛkṣād aṁhaso mucad yo vāryāt sapta sindhuṣu |
8.024.27c vadhar dāsasya tuvinṛmṇa nīnamaḥ ||

yaḥ | ṛkṣāt | aṁhasaḥ | mucat | yaḥ | vā | āryāt | sapta | sindhuṣu |
vadhaḥ | dāsasya | tuvi-nṛmṇa | nīnamaḥ ||8.024.27||

8.024.28a yathā varo suṣāmṇe sanibhya āvaho rayim |
8.024.28c vyaśvebhyaḥ subhage vājinīvati ||

yathā | varo iti | su-sāmṇe | sani-bhyaḥ | ā | avahaḥ | rayim |
vi-aśvebhyaḥ | su-bhage | vājinī-vati ||8.024.28||

8.024.29a ā nāryasya dakṣiṇā vyaśvām̐ etu sominaḥ |
8.024.29c sthūraṁ ca rādhaḥ śatavat sahasravat ||

ā | nāryasya | dakṣiṇā | vi-aśvān | etu | sominaḥ |
sthūram | ca | rādhaḥ | śata-vat | sahasra-vat ||8.024.29||

8.024.30a yat tvā pṛcchād ījānaḥ kuhayā kuhayākṛte |
8.024.30c eṣo apaśrito valo gomatīm ava tiṣṭhati ||

yat | tvā | pṛcchāt | ījānaḥ | kuhayā | kuhayā-kṛte |
eṣaḥ | apa-śritaḥ | valaḥ | go-matīm | ava | tiṣṭhati ||8.024.30||


8.025.01a tā vāṁ viśvasya gopā devā deveṣu yajñiyā |
8.025.01c ṛtāvānā yajase pūtadakṣasā ||

tā | vām | viśvasya | gopā | devā | deveṣu | yajñiyā |
ṛta-vānā | yajase | pūta-dakṣasā ||8.025.01||

8.025.02a mitrā tanā na rathyā varuṇo yaś ca sukratuḥ |
8.025.02c sanāt sujātā tanayā dhṛtavratā ||

mitrā | tanā | na | rathyā | varuṇaḥ | yaḥ | ca | su-kratuḥ |
sanāt | su-jātā | tanayā | dhṛta-vratā ||8.025.02||

8.025.03a tā mātā viśvavedasāsuryāya pramahasā |
8.025.03c mahī jajānāditir ṛtāvarī ||

tā | mātā | viśva-vedasā | asuryāya | pra-mahasā |
mahī | jajāna | aditiḥ | ṛta-varī ||8.025.03||

8.025.04a mahāntā mitrāvaruṇā samrājā devāv asurā |
8.025.04c ṛtāvānāv ṛtam ā ghoṣato bṛhat ||

mahāntā | mitrāvaruṇā | sam-rājā | devau | asurā |
ṛta-vānau | ṛtam | ā | ghoṣataḥ | bṛhat ||8.025.04||

8.025.05a napātā śavaso mahaḥ sūnū dakṣasya sukratū |
8.025.05c sṛpradānū iṣo vāstv adhi kṣitaḥ ||

napātā | śavasaḥ | mahaḥ | sūnū iti | dakṣasya | sukratū iti su-kratū |
sṛpradānū iti sṛpra-dānū | iṣaḥ | vāstu | adhi | kṣitaḥ ||8.025.05||

8.025.06a saṁ yā dānūni yemathur divyāḥ pārthivīr iṣaḥ |
8.025.06c nabhasvatīr ā vāṁ carantu vṛṣṭayaḥ ||

sam | yā | dānūni | yemathuḥ | divyāḥ | pārthivīḥ | iṣaḥ |
nabhasvatīḥ | ā | vām | carantu | vṛṣṭayaḥ ||8.025.06||

8.025.07a adhi yā bṛhato divo 'bhi yūtheva paśyataḥ |
8.025.07c ṛtāvānā samrājā namase hitā ||

adhi | yā | bṛhataḥ | divaḥ | abhi | yūthā-iva | paśyataḥ |
ṛta-vānā | sam-rājā | namase | hitā ||8.025.07||

8.025.08a ṛtāvānā ni ṣedatuḥ sāmrājyāya sukratū |
8.025.08c dhṛtavratā kṣatriyā kṣatram āśatuḥ ||

ṛta-vānā | ni | sedatuḥ | sām-rājyāya | sukratū iti su-kratū |
dhṛta-vratā | kṣatriyā | kṣatram | āśatuḥ ||8.025.08||

8.025.09a akṣṇaś cid gātuvittarānulbaṇena cakṣasā |
8.025.09c ni cin miṣantā nicirā ni cikyatuḥ ||

akṣṇaḥ | cit | gātuvit-tarā | anulbaṇena | cakṣasā |
ni | cit | miṣantā | ni-cirā | ni | cikyatuḥ ||8.025.09||

8.025.10a uta no devy aditir uruṣyatāṁ nāsatyā |
8.025.10c uruṣyantu maruto vṛddhaśavasaḥ ||

uta | naḥ | devī | aditiḥ | uruṣyatām | nāsatyā |
uruṣyantu | marutaḥ | vṛddha-śavasaḥ ||8.025.10||

8.025.11a te no nāvam uruṣyata divā naktaṁ sudānavaḥ |
8.025.11c ariṣyanto ni pāyubhiḥ sacemahi ||

te | naḥ | nāvam | uruṣyata | divā | naktam | su-dānavaḥ |
ariṣyantaḥ | ni | pāyu-bhiḥ | sacemahi ||8.025.11||

8.025.12a aghnate viṣṇave vayam ariṣyantaḥ sudānave |
8.025.12c śrudhi svayāvan sindho pūrvacittaye ||

aghnate | viṣṇave | vayam | ariṣyantaḥ | su-dānave |
śrudhi | sva-yāvan | sindho iti | pūrva-cittaye ||8.025.12||

8.025.13a tad vāryaṁ vṛṇīmahe variṣṭhaṁ gopayatyam |
8.025.13c mitro yat pānti varuṇo yad aryamā ||

tat | vāryam | vṛṇīmahe | variṣṭham | gopayatyam |
mitraḥ | yat | pānti | varuṇaḥ | yat | aryamā ||8.025.13||

8.025.14a uta naḥ sindhur apāṁ tan marutas tad aśvinā |
8.025.14c indro viṣṇur mīḍhvāṁsaḥ sajoṣasaḥ ||

uta | naḥ | sindhuḥ | apām | tat | marutaḥ | tat | aśvinā |
indraḥ | viṣṇuḥ | mīḍhvāṁsaḥ | sa-joṣasaḥ ||8.025.14||

8.025.15a te hi ṣmā vanuṣo naro 'bhimātiṁ kayasya cit |
8.025.15c tigmaṁ na kṣodaḥ pratighnanti bhūrṇayaḥ ||

te | hi | sma | vanuṣaḥ | naraḥ | abhi-mātim | kayasya | cit |
tigmam | na | kṣodaḥ | prati-ghnanti | bhūrṇayaḥ ||8.025.15||

8.025.16a ayam eka itthā purūru caṣṭe vi viśpatiḥ |
8.025.16c tasya vratāny anu vaś carāmasi ||

ayam | ekaḥ | itthā | puru | uru | caṣṭe | vi | viśpatiḥ |
tasya | vratāni | anu | vaḥ | carāmasi ||8.025.16||

8.025.17a anu pūrvāṇy okyā sāmrājyasya saścima |
8.025.17c mitrasya vratā varuṇasya dīrghaśrut ||

anu | pūrvāṇi | okyā | sām-rājyasya | saścima |
mitrasya | vratā | varuṇasya | dīrgha-śrut ||8.025.17||

8.025.18a pari yo raśminā divo 'ntān mame pṛthivyāḥ |
8.025.18c ubhe ā paprau rodasī mahitvā ||

pari | yaḥ | raśminā | divaḥ | antān | mame | pṛthivyāḥ |
ubhe iti | ā | paprau | rodasī iti | mahitvā ||8.025.18||

8.025.19a ud u ṣya śaraṇe divo jyotir ayaṁsta sūryaḥ |
8.025.19c agnir na śukraḥ samidhāna āhutaḥ ||

ut | ūm̐ iti | syaḥ | śaraṇe | divaḥ | jyotiḥ | ayaṁsta | sūryaḥ |
agniḥ | na | śukraḥ | sam-idhānaḥ | ā-hutaḥ ||8.025.19||

8.025.20a vaco dīrghaprasadmanīśe vājasya gomataḥ |
8.025.20c īśe hi pitvo 'viṣasya dāvane ||

vacaḥ | dīrgha-prasadmani | īśe | vājasya | go-mataḥ |
īśe | hi | pitvaḥ | aviṣasya | dāvane ||8.025.20||

8.025.21a tat sūryaṁ rodasī ubhe doṣā vastor upa bruve |
8.025.21c bhojeṣv asmām̐ abhy uc carā sadā ||

tat | sūryam | rodasī iti | ubhe iti | doṣā | vastoḥ | upa | bruve |
bhojeṣu | asmān | abhi | ut | cara | sadā ||8.025.21||

8.025.22a ṛjram ukṣaṇyāyane rajataṁ harayāṇe |
8.025.22c rathaṁ yuktam asanāma suṣāmaṇi ||

ṛjram | ukṣaṇyāyane | rajatam | harayāṇe |
ratham | yuktam | asanāma | su-sāmani ||8.025.22||

8.025.23a tā me aśvyānāṁ harīṇāṁ nitośanā |
8.025.23c uto nu kṛtvyānāṁ nṛvāhasā ||

tā | me | aśvyānām | harīṇām | ni-tośanā |
uto iti | nu | kṛtvyānām | nṛ-vāhasā ||8.025.23||

8.025.24a smadabhīśū kaśāvantā viprā naviṣṭhayā matī |
8.025.24c maho vājināv arvantā sacāsanam ||

smadabhīśū iti smat-abhīśū | kaśā-vantā | viprā | naviṣṭhayā | matī |
mahaḥ | vājinau | arvantā | sacā | asanam ||8.025.24||


8.026.01a yuvor u ṣū rathaṁ huve sadhastutyāya sūriṣu |
8.026.01c atūrtadakṣā vṛṣaṇā vṛṣaṇvasū ||

yuvoḥ | ūm̐ iti | su | ratham | huve | sadha-stutyāya | sūriṣu |
atūrta-dakṣā | vṛṣaṇā | vṛṣaṇvasū iti vṛṣaṇ-vasū ||8.026.01||

8.026.02a yuvaṁ varo suṣāmṇe mahe tane nāsatyā |
8.026.02c avobhir yātho vṛṣaṇā vṛṣaṇvasū ||

yuvam | varo iti | su-sāmṇe | mahe | tane | nāsatyā |
avaḥ-bhiḥ | yāthaḥ | vṛṣaṇā | vṛṣaṇvasū iti vṛṣaṇ-vasū ||8.026.02||

8.026.03a tā vām adya havāmahe havyebhir vājinīvasū |
8.026.03c pūrvīr iṣa iṣayantāv ati kṣapaḥ ||

tā | vām | adya | havāmahe | havyebhiḥ | vājinīvasū iti vājinī-vasū |
pūrvīḥ | iṣaḥ | iṣayantau | ati | kṣapaḥ ||8.026.03||

8.026.04a ā vāṁ vāhiṣṭho aśvinā ratho yātu śruto narā |
8.026.04c upa stomān turasya darśathaḥ śriye ||

ā | vām | vāhiṣṭhaḥ | aśvinā | rathaḥ | yātu | śrutaḥ | narā |
upa | stomān | turasya | darśathaḥ | śriye ||8.026.04||

8.026.05a juhurāṇā cid aśvinā manyethāṁ vṛṣaṇvasū |
8.026.05c yuvaṁ hi rudrā parṣatho ati dviṣaḥ ||

juhurāṇā | cit | aśvinā | ā | manyethām | vṛṣaṇvasū iti vṛṣaṇ-vasū |
yuvam | hi | rudrā | parṣathaḥ | ati | dviṣaḥ ||8.026.05||

8.026.06a dasrā hi viśvam ānuṣaṅ makṣūbhiḥ paridīyathaḥ |
8.026.06c dhiyaṁjinvā madhuvarṇā śubhas patī ||

dasrā | hi | viśvam | ānuṣak | makṣu-bhiḥ | pari-dīyathaḥ |
dhiyam-jinvā | madhu-varṇā | śubhaḥ | patī iti ||8.026.06||

8.026.07a upa no yātam aśvinā rāyā viśvapuṣā saha |
8.026.07c maghavānā suvīrāv anapacyutā ||

upa | naḥ | yātam | aśvinā | rāyā | viśva-puṣā | saha |
magha-vānā | su-vīrau | anapa-cyutā ||8.026.07||

8.026.08a ā me asya pratīvyam indranāsatyā gatam |
8.026.08c devā devebhir adya sacanastamā ||

ā | me | asya | pratīvyam | indranāsatyā | gatam |
devā | devebhiḥ | adya | sacanaḥ-tamā ||8.026.08||

8.026.09a vayaṁ hi vāṁ havāmaha ukṣaṇyanto vyaśvavat |
8.026.09c sumatibhir upa viprāv ihā gatam ||

vayam | hi | vām | havāmahe | ukṣaṇyantaḥ | vyaśva-vat |
sumati-bhiḥ | upa | viprau | iha | ā | gatam ||8.026.09||

8.026.10a aśvinā sv ṛṣe stuhi kuvit te śravato havam |
8.026.10c nedīyasaḥ kūḻayātaḥ paṇīm̐r uta ||

aśvinā | su | ṛṣe | stuhi | kuvit | te | śravataḥ | havam |
nedīyasaḥ | kūḻayātaḥ | paṇīn | uta ||8.026.10||

8.026.11a vaiyaśvasya śrutaṁ naroto me asya vedathaḥ |
8.026.11c sajoṣasā varuṇo mitro aryamā ||

vaiyaśvasya | śrutam | narā | uto iti | me | asya | vedathaḥ |
sa-joṣasā | varuṇaḥ | mitraḥ | aryamā ||8.026.11||

8.026.12a yuvādattasya dhiṣṇyā yuvānītasya sūribhiḥ |
8.026.12c ahar-ahar vṛṣaṇa mahyaṁ śikṣatam ||

yuvā-dattasya | dhiṣṇyā | yuvā-nītasya | sūri-bhiḥ |
ahaḥ-ahaḥ | vṛṣaṇā | mahyam | śikṣatam ||8.026.12||

8.026.13a yo vāṁ yajñebhir āvṛto 'dhivastrā vadhūr iva |
8.026.13c saparyantā śubhe cakrāte aśvinā ||

yaḥ | vām | yajñebhiḥ | ā-vṛtaḥ | adhi-vastrā | vadhūḥ-iva |
saparyantā | śubhe | cakrāte iti | aśvinā ||8.026.13||

8.026.14a yo vām uruvyacastamaṁ ciketati nṛpāyyam |
8.026.14c vartir aśvinā pari yātam asmayū ||

yaḥ | vām | uruvyacaḥ-tamam | ciketati | nṛ-pāyyam |
vartiḥ | aśvinā | pari | yātam | asmayū ityasma-yū ||8.026.14||

8.026.15a asmabhyaṁ su vṛṣaṇvasū yātaṁ vartir nṛpāyyam |
8.026.15c viṣudruheva yajñam ūhathur girā ||

asmabhyam | su | vṛṣaṇvasū iti vṛṣaṇ-vasū | yātam | vartiḥ | nṛ-pāyyam |
viṣudruhā-iva | yajñam | ūhathuḥ | girā ||8.026.15||

8.026.16a vāhiṣṭho vāṁ havānāṁ stomo dūto huvan narā |
8.026.16c yuvābhyām bhūtv aśvinā ||

vāhiṣṭhaḥ | vām | havānām | stomaḥ | dūtaḥ | huvat | narā |
yuvābhyām | bhūtu | aśvinā ||8.026.16||

8.026.17a yad ado divo arṇava iṣo vā madatho gṛhe |
8.026.17c śrutam in me amartyā ||

yat | adaḥ | divaḥ | arṇave | iṣaḥ | vā | madathaḥ | gṛhe |
śrutam | it | me | amartyā ||8.026.17||

8.026.18a uta syā śvetayāvarī vāhiṣṭhā vāṁ nadīnām |
8.026.18c sindhur hiraṇyavartaniḥ ||

uta | syā | śveta-yāvarī | vāhiṣṭhā | vām | nadīnām |
sindhuḥ | hiraṇya-vartaniḥ ||8.026.18||

8.026.19a smad etayā sukīrtyāśvinā śvetayā dhiyā |
8.026.19c vahethe śubhrayāvānā ||

smat | etayā | su-kīrtyā | aśvinā | śvetayā | dhiyā |
vahethe iti | śubhra-yāvānā ||8.026.19||

8.026.20a yukṣvā hi tvaṁ rathāsahā yuvasva poṣyā vaso |
8.026.20c ān no vāyo madhu pibāsmākaṁ savanā gahi ||

yukṣva | hi | tvam | ratha-sahā | yuvasva | poṣyā | vaso iti |
āt | naḥ | vāyo iti | madhu | piba | asmākam | savanā | ā | gahi ||8.026.20||

8.026.21a tava vāyav ṛtaspate tvaṣṭur jāmātar adbhuta |
8.026.21c avāṁsy ā vṛṇīmahe ||

tava | vāyo iti | ṛtaḥ-pate | tvaṣṭuḥ | jāmātaḥ | adbhuta |
avāṁsi | ā | vṛṇīmahe ||8.026.21||

8.026.22a tvaṣṭur jāmātaraṁ vayam īśānaṁ rāya īmahe |
8.026.22c sutāvanto vāyuṁ dyumnā janāsaḥ ||

tvaṣṭuḥ | jāmātaram | vayam | īśānam | rāyaḥ | īmahe |
suta-vantaḥ | vāyum | dyumnā | janāsaḥ ||8.026.22||

8.026.23a vāyo yāhi śivā divo vahasvā su svaśvyam |
8.026.23c vahasva mahaḥ pṛthupakṣasā rathe ||

vāyo iti | yāhi | śiva | ā | divaḥ | vahasva | su | su-aśvyam |
vahasva | mahaḥ | pṛthu-pakṣasā | rathe ||8.026.23||

8.026.24a tvāṁ hi supsarastamaṁ nṛṣadaneṣu hūmahe |
8.026.24c grāvāṇaṁ nāśvapṛṣṭham maṁhanā ||

tvām | hi | supsaraḥ-tamam | nṛ-sadaneṣu | hūmahe |
grāvāṇam | na | aśva-pṛṣṭham | maṁhanā ||8.026.24||

8.026.25a sa tvaṁ no deva manasā vāyo mandāno agriyaḥ |
8.026.25c kṛdhi vājām̐ apo dhiyaḥ ||

saḥ | tvam | naḥ | deva | manasā | vāyo iti | mandānaḥ | agriyaḥ |
kṛdhi | vājān | apaḥ | dhiyaḥ ||8.026.25||


8.027.01a agnir ukthe purohito grāvāṇo barhir adhvare |
8.027.01c ṛcā yāmi maruto brahmaṇas patiṁ devām̐ avo vareṇyam ||

agniḥ | ukthe | puraḥ-hitaḥ | grāvāṇaḥ | barhiḥ | adhvare |
ṛcā | yāmi | marutaḥ | brahmaṇaḥ | patim | devān | avaḥ | vareṇyam ||8.027.01||

8.027.02a ā paśuṁ gāsi pṛthivīṁ vanaspatīn uṣāsā naktam oṣadhīḥ |
8.027.02c viśve ca no vasavo viśvavedaso dhīnām bhūta prāvitāraḥ ||

ā | paśum | gāsi | pṛthivīm | vanaspatīn | uṣasā | naktam | oṣadhīḥ |
viśve | ca | naḥ | vasavaḥ | viśva-vedasaḥ | dhīnām | bhūta | pra-avitāraḥ ||8.027.02||

8.027.03a pra sū na etv adhvaro 'gnā deveṣu pūrvyaḥ |
8.027.03c ādityeṣu pra varuṇe dhṛtavrate marutsu viśvabhānuṣu ||

pra | su | naḥ | etu | adhvaraḥ | agnā | deveṣu | pūrvyaḥ |
ādityeṣu | pra | varuṇe | dhṛta-vrate | marut-su | viśva-bhānuṣu ||8.027.03||

8.027.04a viśve hi ṣmā manave viśvavedaso bhuvan vṛdhe riśādasaḥ |
8.027.04c ariṣṭebhiḥ pāyubhir viśvavedaso yantā no 'vṛkaṁ chardiḥ ||

viśve | hi | sma | manave | viśva-vedasaḥ | bhuvan | vṛdhe | riśādasaḥ |
ariṣṭebhiḥ | pāyu-bhiḥ | viśva-vedasaḥ | yanta | naḥ | avṛkam | chardiḥ ||8.027.04||

8.027.05a ā no adya samanaso gantā viśve sajoṣasaḥ |
8.027.05c ṛcā girā maruto devy adite sadane pastye mahi ||

ā | naḥ | adya | sa-manasaḥ | ganta | viśve | sa-joṣasaḥ |
ṛcā | girā | marutaḥ | devi | adite | sadane | pastye | mahi ||8.027.05||

8.027.06a abhi priyā maruto yā vo aśvyā havyā mitra prayāthana |
8.027.06c ā barhir indro varuṇas turā nara ādityāsaḥ sadantu naḥ ||

abhi | priyā | marutaḥ | yā | vaḥ | aśvyā | havyā | mitra | pra-yāthana |
ā | barhiḥ | indraḥ | varuṇaḥ | turāḥ | naraḥ | ādityāsaḥ | sadantu | naḥ ||8.027.06||

8.027.07a vayaṁ vo vṛktabarhiṣo hitaprayasa ānuṣak |
8.027.07c sutasomāso varuṇa havāmahe manuṣvad iddhāgnayaḥ ||

vayam | vaḥ | vṛkta-barhiṣaḥ | hita-prayasaḥ | ānuṣak |
suta-somāsaḥ | varuṇa | havāmahe | manuṣvat | iddha-agnayaḥ ||8.027.07||

8.027.08a ā pra yāta maruto viṣṇo aśvinā pūṣan mākīnayā dhiyā |
8.027.08c indra ā yātu prathamaḥ saniṣyubhir vṛṣā yo vṛtrahā gṛṇe ||

ā | pra | yāta | marutaḥ | viṣṇo iti | aśvinā | pūṣan | mākīnayā | dhiyā |
indraḥ | ā | yātu | prathamaḥ | saniṣyu-bhiḥ | vṛṣā | yaḥ | vṛtra-hā | gṛṇe ||8.027.08||

8.027.09a vi no devāso adruho 'cchidraṁ śarma yacchata |
8.027.09c na yad dūrād vasavo nū cid antito varūtham ādadharṣati ||

vi | naḥ | devāsaḥ | adruhaḥ | acchidram | śarma | yacchata |
na | yat | dūrāt | vasavaḥ | nu | cit | antitaḥ | varūtham | ā-dadharṣati ||8.027.09||

8.027.10a asti hi vaḥ sajātyaṁ riśādaso devāso asty āpyam |
8.027.10c pra ṇaḥ pūrvasmai suvitāya vocata makṣū sumnāya navyase ||

asti | hi | vaḥ | sajātyam | riśādasaḥ | devāsaḥ | asti | āpyam |
pra | naḥ | pūrvasmai | suvitāya | vocata | makṣu | sumnāya | navyase ||8.027.10||

8.027.11a idā hi va upastutim idā vāmasya bhaktaye |
8.027.11c upa vo viśvavedaso namasyur ām̐ asṛkṣy anyām iva ||

idā | hi | vaḥ | upa-stutim | idā | vāmasya | bhaktaye |
upa | vaḥ | viśva-vedasaḥ | namasyuḥ | ā | asṛkṣi | anyām-iva ||8.027.11||

8.027.12a ud u ṣya vaḥ savitā supraṇītayo 'sthād ūrdhvo vareṇyaḥ |
8.027.12c ni dvipādaś catuṣpādo arthino 'viśran patayiṣṇavaḥ ||

ut | ūm̐ iti | syaḥ | vaḥ | savitā | su-pranītayaḥ | asthāt | ūrdhvaḥ | vareṇyaḥ |
ni | dvi-pādaḥ | catuḥ-pādaḥ | arthinaḥ | aviśran | patayiṣṇavaḥ ||8.027.12||

8.027.13a devaṁ-devaṁ vo 'vase devaṁ-devam abhiṣṭaye |
8.027.13c devaṁ-devaṁ huvema vājasātaye gṛṇanto devyā dhiyā ||

devam-devam | vaḥ | avase | devam-devam | abhiṣṭaye |
devam-devam | huvema | vāja-sātaye | gṛṇantaḥ | devyā | dhiyā ||8.027.13||

8.027.14a devāso hi ṣmā manave samanyavo viśve sākaṁ sarātayaḥ |
8.027.14c te no adya te aparaṁ tuce tu no bhavantu varivovidaḥ ||

devāsaḥ | hi | sma | manave | sa-manyavaḥ | viśve | sākam | sa-rātayaḥ |
te | naḥ | adya | te | aparam | tuce | tu | naḥ | bhavantu | varivaḥ-vidaḥ ||8.027.14||

8.027.15a pra vaḥ śaṁsāmy adruhaḥ saṁstha upastutīnām |
8.027.15c na taṁ dhūrtir varuṇa mitra martyaṁ yo vo dhāmabhyo 'vidhat ||

pra | vaḥ | śaṁsāmi | adruhaḥ | sam-sthe | upa-stutīnām |
na | tam | dhūrtiḥ | varuṇa | mitra | martyam | yaḥ | vaḥ | dhāma-bhyaḥ | avidhat ||8.027.15||

8.027.16a pra sa kṣayaṁ tirate vi mahīr iṣo yo vo varāya dāśati |
8.027.16c pra prajābhir jāyate dharmaṇas pary ariṣṭaḥ sarva edhate ||

pra | saḥ | kṣayam | tirate | vi | mahīḥ | iṣaḥ | yaḥ | vaḥ | varāya | dāśati |
pra | pra-jābhiḥ | jāyate | dharmaṇaḥ | pari | ariṣṭaḥ | sarvaḥ | edhate ||8.027.16||

8.027.17a ṛte sa vindate yudhaḥ sugebhir yāty adhvanaḥ |
8.027.17c aryamā mitro varuṇaḥ sarātayo yaṁ trāyante sajoṣasaḥ ||

ṛte | saḥ | vindate | yudhaḥ | su-gebhiḥ | yāti | adhvanaḥ |
aryamā | mitraḥ | varuṇaḥ | sa-rātayaḥ | yam | trāyante | sa-joṣasaḥ ||8.027.17||

8.027.18a ajre cid asmai kṛṇuthā nyañcanaṁ durge cid ā susaraṇam |
8.027.18c eṣā cid asmād aśaniḥ paro nu sāsredhantī vi naśyatu ||

ajre | cit | asmai | kṛṇutha | ni-añcanam | duḥ-ge | cit | ā | su-saraṇam |
eṣā | cit | asmāt | aśaniḥ | paraḥ | nu | sā | asredhantī | vi | naśyatu ||8.027.18||

8.027.19a yad adya sūrya udyati priyakṣatrā ṛtaṁ dadha |
8.027.19c yan nimruci prabudhi viśvavedaso yad vā madhyaṁdine divaḥ ||

yat | adya | sūrye | ut-yati | priya-kṣatrāḥ | ṛtam | dadha |
yat | ni-mruci | pra-budhi | viśva-vedasaḥ | yat | vā | madhyandine | divaḥ ||8.027.19||

8.027.20a yad vābhipitve asurā ṛtaṁ yate chardir yema vi dāśuṣe |
8.027.20c vayaṁ tad vo vasavo viśvavedasa upa stheyāma madhya ā ||

yat | vā | abhi-pitve | asurāḥ | ṛtam | yate | chardiḥ | yema | vi | dāśuṣe |
vayam | tat | vaḥ | vasavaḥ | viśva-vedasaḥ | upa | stheyāma | madhye | ā ||8.027.20||

8.027.21a yad adya sūra udite yan madhyaṁdina ātuci |
8.027.21c vāmaṁ dhattha manave viśvavedaso juhvānāya pracetase ||

yat | adya | sūre | ut-ite | yat | madhyandine | ā-tuci |
vāmam | dhattha | manave | viśva-vedasaḥ | juhvānāya | pra-cetase ||8.027.21||

8.027.22a vayaṁ tad vaḥ samrāja ā vṛṇīmahe putro na bahupāyyam |
8.027.22c aśyāma tad ādityā juhvato havir yena vasyo 'naśāmahai ||

vayam | tat | vaḥ | sam-rājaḥ | ā | vṛṇīmahe | putraḥ | na | bahu-pāyyam |
aśyāma | tat | ādityāḥ | juhvataḥ | haviḥ | yena | vasyaḥ | anaśāmahai ||8.027.22||


8.028.01a ye triṁśati trayas paro devāso barhir āsadan |
8.028.01c vidann aha dvitāsanan ||

ye | triṁśati | trayaḥ | paraḥ | devāsaḥ | barhiḥ | ā | asadan |
vidan | aha | dvitā | asanam ||8.028.01||

8.028.02a varuṇo mitro aryamā smadrātiṣāco agnayaḥ |
8.028.02c patnīvanto vaṣaṭkṛtāḥ ||

varuṇaḥ | mitraḥ | aryamā | smadrāti-sācaḥ | agnayaḥ |
patnī-vantaḥ | vaṣaṭ-kṛṭāḥ ||8.028.02||

8.028.03a te no gopā apācyās ta udak ta itthā nyak |
8.028.03c purastāt sarvayā viśā ||

te | naḥ | gopāḥ | apācyāḥ | te | udak | te | itthā | nyak |
purastāt | sarvayā | viśā ||8.028.03||

8.028.04a yathā vaśanti devās tathed asat tad eṣāṁ nakir ā minat |
8.028.04c arāvā cana martyaḥ ||

yathā | vaśanti | devāḥ | tathā | it | asat | tat | eṣām | nakiḥ | ā | minat |
arāvā | cana | martyaḥ ||8.028.04||

8.028.05a saptānāṁ sapta ṛṣṭayaḥ sapta dyumnāny eṣām |
8.028.05c sapto adhi śriyo dhire ||

saptānām | sapta | ṛṣṭayaḥ | sapta | dyumnāni | eṣām |
sapto iti | adhi | śriyaḥ | dhire ||8.028.05||


8.029.01a babhrur eko viṣuṇaḥ sūnaro yuvāñjy aṅkte hiraṇyayam ||

babhruḥ | ekaḥ | viṣuṇaḥ | sūnaraḥ | yuvā | añji | aṅkte | hiraṇyayam ||8.029.01||

8.029.02a yonim eka ā sasāda dyotano 'ntar deveṣu medhiraḥ ||

yonim | ekaḥ | ā | sasāda | dyotanaḥ | antaḥ | deveṣu | medhiraḥ ||8.029.02||

8.029.03a vāśīm eko bibharti hasta āyasīm antar deveṣu nidhruviḥ ||

vāśīm | ekaḥ | bibharti | haste | āyasīm | antaḥ | deveṣu | ni-dhruviḥ ||8.029.03||

8.029.04a vajram eko bibharti hasta āhitaṁ tena vṛtrāṇi jighnate ||

vajram | ekaḥ | bibharti | haste | ā-hitam | tena | vṛtrāṇi | jighnate ||8.029.04||

8.029.05a tigmam eko bibharti hasta āyudhaṁ śucir ugro jalāṣabheṣajaḥ ||

tigmam | ekaḥ | bibharti | haste | āyudham | śuciḥ | ugraḥ | jalāṣa-bheṣajaḥ ||8.029.05||

8.029.06a patha ekaḥ pīpāya taskaro yathām̐ eṣa veda nidhīnām ||

pathaḥ | ekaḥ | pīpāya | taskaraḥ | yathā | eṣaḥ | veda | ni-dhīnām ||8.029.06||

8.029.07a trīṇy eka urugāyo vi cakrame yatra devāso madanti ||

trīṇi | ekaḥ | uru-gāyaḥ | vi | cakrame | yatra | devāsaḥ | madanti ||8.029.07||

8.029.08a vibhir dvā carata ekayā saha pra pravāseva vasataḥ ||

vi-bhiḥ | dvā | carataḥ | ekayā | saha | pra | pravāsā-iva | vasataḥ ||8.029.08||

8.029.09a sado dvā cakrāte upamā divi samrājā sarpirāsutī ||

sadaḥ | dvā | cakrāte iti | upa-mā | divi | sam-rājā | sarpir-āsutī iti sarpiḥ-āsutī ||8.029.09||

8.029.10a arcanta eke mahi sāma manvata tena sūryam arocayan ||

arcantaḥ | eke | mahi | sāma | manvata | tena | sūryam | arocayan ||8.029.10||


8.030.01a nahi vo asty arbhako devāso na kumārakaḥ |
8.030.01c viśve satomahānta it ||

nahi | vaḥ | asti | arbhakaḥ | devāsaḥ | na | kumārakaḥ |
viśve | sataḥ-mahāntaḥ | it ||8.030.01||

8.030.02a iti stutāso asathā riśādaso ye stha trayaś ca triṁśac ca |
8.030.02c manor devā yajñiyāsaḥ ||

iti | stutāsaḥ | asatha | riśādasaḥ | ye | stha | trayaḥ | ca | triṁśat | ca |
manoḥ | devāḥ | yajñiyāsaḥ ||8.030.02||

8.030.03a te nas trādhvaṁ te 'vata ta u no adhi vocata |
8.030.03c mā naḥ pathaḥ pitryān mānavād adhi dūraṁ naiṣṭa parāvataḥ ||

te | naḥ | trādhvam | te | avata | te | ūm̐ iti | naḥ | adhi | vocata |
mā | naḥ | pathaḥ | pitryāt | mānavāt | adhi | dūram | naiṣṭa | parā-vataḥ ||8.030.03||

8.030.04a ye devāsa iha sthana viśve vaiśvānarā uta |
8.030.04c asmabhyaṁ śarma sapratho gave 'śvāya yacchata ||

ye | devāsaḥ | iha | sthana | viśve | vaiśvānarāḥ | uta |
asmabhyam | śarma | sa-prathaḥ | gave | aśvāya | yacchata ||8.030.04||


8.031.01a yo yajāti yajāta it sunavac ca pacāti ca |
8.031.01c brahmed indrasya cākanat ||

yaḥ | yajāti | yajāte | it | sunavat | ca | pacāti | ca |
brahmā | it | indrasya | cākanat ||8.031.01||

8.031.02a puroḻāśaṁ yo asmai somaṁ rarata āśiram |
8.031.02c pād it taṁ śakro aṁhasaḥ ||

puroḻāśam | yaḥ | asmai | somam | rarate | ā-śiram |
pāt | it | tam | śakraḥ | aṁhasaḥ ||8.031.02||

8.031.03a tasya dyumām̐ asad ratho devajūtaḥ sa śūśuvat |
8.031.03c viśvā vanvann amitriyā ||

tasya | dyu-mām | asat | rathaḥ | deva-jūtaḥ | saḥ | śūśuvat |
viśvā | vanvan | amitriyā ||8.031.03||

8.031.04a asya prajāvatī gṛhe 'saścantī dive-dive |
8.031.04c iḻā dhenumatī duhe ||

asya | prajā-vatī | gṛhe | asaścantī | dive-dive |
iḻā | dhenu-matī | duhe ||8.031.04||

8.031.05a yā dampatī samanasā sunuta ā ca dhāvataḥ |
8.031.05c devāso nityayāśirā ||

yā | dampatī iti dam-patī | sa-manasā | sunutaḥ | ā | ca | dhāvataḥ |
devāsaḥ | nityayā | ā-śirā ||8.031.05||

8.031.06a prati prāśavyām̐ itaḥ samyañcā barhir āśāte |
8.031.06c na tā vājeṣu vāyataḥ ||

prati | prāśavyān | itaḥ | samyañcā | barhiḥ | āśāte iti |
na | tā | vājeṣu | vāyataḥ ||8.031.06||

8.031.07a na devānām api hnutaḥ sumatiṁ na jugukṣataḥ |
8.031.07c śravo bṛhad vivāsataḥ ||

na | devānām | api | hnutaḥ | su-matim | na | jugukṣataḥ |
śravaḥ | bṛhat | vivāsataḥ ||8.031.07||

8.031.08a putriṇā tā kumāriṇā viśvam āyur vy aśnutaḥ |
8.031.08c ubhā hiraṇyapeśasā ||

putriṇā | tā | kumāriṇā | viśvam | āyuḥ | vi | aśnutaḥ |
ubhā | hiraṇya-peśasā ||8.031.08||

8.031.09a vītihotrā kṛtadvasū daśasyantāmṛtāya kam |
8.031.09c sam ūdho romaśaṁ hato deveṣu kṛṇuto duvaḥ ||

vīti-hotrā | kṛtadvasū iti kṛtat-vasū | daśasyantā | amṛtāya | kam |
sam | ūdhaḥ | romaśam | hataḥ | deveṣu | kṛṇutaḥ | duvaḥ ||8.031.09||

8.031.10a ā śarma parvatānāṁ vṛṇīmahe nadīnām |
8.031.10c ā viṣṇoḥ sacābhuvaḥ ||

ā | śarma | parvatānām | vṛṇīmahe | nadīnām |
ā | viṣṇoḥ | sacā-bhuvaḥ ||8.031.10||

8.031.11a aitu pūṣā rayir bhagaḥ svasti sarvadhātamaḥ |
8.031.11c urur adhvā svastaye ||

ā | etu | pūṣā | rayiḥ | bhagaḥ | svasti | sarva-dhātamaḥ |
uruḥ | adhvā | svastaye ||8.031.11||

8.031.12a aramatir anarvaṇo viśvo devasya manasā |
8.031.12c ādityānām aneha it ||

aramatiḥ | anarvaṇaḥ | viśvaḥ | devasya | manasā |
ādityānām | anehaḥ | it ||8.031.12||

8.031.13a yathā no mitro aryamā varuṇaḥ santi gopāḥ |
8.031.13c sugā ṛtasya panthāḥ ||

yathā | naḥ | mitraḥ | aryamā | varuṇaḥ | santi | gopāḥ |
su-gāḥ | ṛtasya | panthāḥ ||8.031.13||

8.031.14a agniṁ vaḥ pūrvyaṁ girā devam īḻe vasūnām |
8.031.14c saparyantaḥ purupriyam mitraṁ na kṣetrasādhasam ||

agnim | vaḥ | pūrvyam | girā | devam | īḻe | vasūnām |
saparyantaḥ | puru-priyam | mitram | na | kṣetra-sādhasam ||8.031.14||

8.031.15a makṣū devavato rathaḥ śūro vā pṛtsu kāsu cit |
8.031.15c devānāṁ ya in mano yajamāna iyakṣaty abhīd ayajvano bhuvat ||

makṣu | deva-vataḥ | rathaḥ | śūraḥ | vā | pṛt-su | kāsu | cit |
devānām | yaḥ | it | manaḥ | yajamānaḥ | iyakṣati | abhi | it | ayajvanaḥ | bhuvat ||8.031.15||

8.031.16a na yajamāna riṣyasi na sunvāna na devayo |
8.031.16c devānāṁ ya in mano yajamāna iyakṣaty abhīd ayajvano bhuvat ||

na | yajamāna | riṣyasi | na | sunvāna | na | devayo iti deva-yo |
devānām | yaḥ | it | manaḥ | yajamānaḥ | iyakṣati | abhi | it | ayajvanaḥ | bhuvat ||8.031.16||

8.031.17a nakiṣ ṭaṁ karmaṇā naśan na pra yoṣan na yoṣati |
8.031.17c devānāṁ ya in mano yajamāna iyakṣaty abhīd ayajvano bhuvat ||

nakiḥ | tam | karmaṇā | naśat | na | pra | yoṣat | na | yoṣati |
devānām | yaḥ | it | manaḥ | yajamānaḥ | iyakṣati | abhi | it | ayajvanaḥ | bhuvat ||8.031.17||

8.031.18a asad atra suvīryam uta tyad āśvaśvyam |
8.031.18c devānāṁ ya in mano yajamāna iyakṣaty abhīd ayajvano bhuvat ||

asat | atra | su-vīryam | uta | tyat | āśu-aśvyam |
devānām | yaḥ | it | manaḥ | yajamānaḥ | iyakṣati | abhi | it | ayajvanaḥ | bhuvat ||8.031.18||


8.032.01a pra kṛtāny ṛjīṣiṇaḥ kaṇvā indrasya gāthayā |
8.032.01c made somasya vocata ||

pra | kṛtāni | ṛjīṣiṇaḥ | kaṇvāḥ | indrasya | gāthayā |
made | somasya | vocata ||8.032.01||

8.032.02a yaḥ sṛbindam anarśanim pipruṁ dāsam ahīśuvam |
8.032.02c vadhīd ugro riṇann apaḥ ||

yaḥ | sṛbindam | anarśanim | piprum | dāsam | ahīśuvam |
vadhīt | ugraḥ | riṇan | apaḥ ||8.032.02||

8.032.03a ny arbudasya viṣṭapaṁ varṣmāṇam bṛhatas tira |
8.032.03c kṛṣe tad indra pauṁsyam ||

ni | arbudasya | viṣṭapam | varṣmāṇam | bṛhataḥ | tira |
kṛṣe | tat | indra | pauṁsyam ||8.032.03||

8.032.04a prati śrutāya vo dhṛṣat tūrṇāśaṁ na girer adhi |
8.032.04c huve suśipram ūtaye ||

prati | śrutāya | vaḥ | dhṛṣat | tūrṇāśam | na | gireḥ | adhi |
huve | su-śipram | ūtaye ||8.032.04||

8.032.05a sa gor aśvasya vi vrajam mandānaḥ somyebhyaḥ |
8.032.05c puraṁ na śūra darṣasi ||

saḥ | goḥ | aśvasya | vi | vrajam | mandānaḥ | somyebhyaḥ |
puram | na | śūra | darṣasi ||8.032.05||

8.032.06a yadi me rāraṇaḥ suta ukthe vā dadhase canaḥ |
8.032.06c ārād upa svadhā gahi ||

yadi | me | raraṇaḥ | sute | ukthe | vā | dadhase | canaḥ |
ārāt | upa | svadhā | ā | gahi ||8.032.06||

8.032.07a vayaṁ ghā te api ṣmasi stotāra indra girvaṇaḥ |
8.032.07c tvaṁ no jinva somapāḥ ||

vayam | gha | te | api | smasi | stotāraḥ | indra | girvaṇaḥ |
tvam | naḥ | jinva | soma-pāḥ ||8.032.07||

8.032.08a uta naḥ pitum ā bhara saṁrarāṇo avikṣitam |
8.032.08c maghavan bhūri te vasu ||

uta | naḥ | pitum | ā | bhara | sam-rarāṇaḥ | avi-kṣitam |
magha-van | bhūri | te | vasu ||8.032.08||

8.032.09a uta no gomatas kṛdhi hiraṇyavato aśvinaḥ |
8.032.09c iḻābhiḥ saṁ rabhemahi ||

uta | naḥ | go-mataḥ | kṛdhi | hiraṇya-vataḥ | aśvinaḥ |
iḻābhiḥ | sam | rabhemahi ||8.032.09||

8.032.10a bṛbadukthaṁ havāmahe sṛprakarasnam ūtaye |
8.032.10c sādhu kṛṇvantam avase ||

bṛbat-uktham | havāmahe | sṛpra-karasnam | ūtaye |
sādhu | kṛṇvantam | avase ||8.032.10||

8.032.11a yaḥ saṁsthe cic chatakratur ād īṁ kṛṇoti vṛtrahā |
8.032.11c jaritṛbhyaḥ purūvasuḥ ||

yaḥ | sam-sthe | cit | śata-kratuḥ | āt | īm | kṛṇoti | vṛtra-hā |
jaritṛ-bhyaḥ | puru-vasuḥ ||8.032.11||

8.032.12a sa naḥ śakraś cid ā śakad dānavām̐ antarābharaḥ |
8.032.12c indro viśvābhir ūtibhiḥ ||

saḥ | naḥ | śakraḥ | cit | ā | śakat | dāna-vān | antara-ābharaḥ |
indraḥ | viśvābhiḥ | ūti-bhiḥ ||8.032.12||

8.032.13a yo rāyo 'vanir mahān supāraḥ sunvataḥ sakhā |
8.032.13c tam indram abhi gāyata ||

yaḥ | rāyaḥ | avaniḥ | mahān | su-pāraḥ | sunvataḥ | sakhā |
tam | indram | abhi | gāyata ||8.032.13||

8.032.14a āyantāram mahi sthiram pṛtanāsu śravojitam |
8.032.14c bhūrer īśānam ojasā ||

ā-yantāram | mahi | sthiram | pṛtanāsu | śravaḥ-jitam |
bhūreḥ | īśānam | ojasā ||8.032.14||

8.032.15a nakir asya śacīnāṁ niyantā sūnṛtānām |
8.032.15c nakir vaktā na dād iti ||

nakiḥ | asya | śacīnām | ni-yantā | sūnṛtānām |
nakiḥ | vaktā | na | dāt | iti ||8.032.15||

8.032.16a na nūnam brahmaṇām ṛṇam prāśūnām asti sunvatām |
8.032.16c na somo apratā pape ||

na | nūnam | brahmaṇām | ṛṇam | prāśūnām | asti | sunvatām |
na | somaḥ | apratā | pape ||8.032.16||

8.032.17a panya id upa gāyata panya ukthāni śaṁsata |
8.032.17c brahmā kṛṇota panya it ||

panye | it | upa | gāyata | panye | ukthāni | śaṁsata |
brahma | kṛṇota | panye | it ||8.032.17||

8.032.18a panya ā dardirac chatā sahasrā vājy avṛtaḥ |
8.032.18c indro yo yajvano vṛdhaḥ ||

panyaḥ | ā | dardirat | śatā | sahasrā | vājī | avṛtaḥ |
indraḥ | yaḥ | yajvanaḥ | vṛdhaḥ ||8.032.18||

8.032.19a vi ṣū cara svadhā anu kṛṣṭīnām anv āhuvaḥ |
8.032.19c indra piba sutānām ||

vi | su | cara | svadhāḥ | anu | kṛṣṭīnām | anu | ā-huvaḥ |
indra | piba | sutānām ||8.032.19||

8.032.20a piba svadhainavānām uta yas tugrye sacā |
8.032.20c utāyam indra yas tava ||

piba | sva-dhainavānām | uta | yaḥ | tugrye | sacā |
uta | ayam | indra | yaḥ | tava ||8.032.20||

8.032.21a atīhi manyuṣāviṇaṁ suṣuvāṁsam upāraṇe |
8.032.21c imaṁ rātaṁ sutam piba ||

ati | ihi | manyu-sāvinam | susu-vāṁsam | upa-araṇe |
imam | rātam | sutam | piba ||8.032.21||

8.032.22a ihi tisraḥ parāvata ihi pañca janām̐ ati |
8.032.22c dhenā indrāvacākaśat ||

ihi | tisraḥ | parāvataḥ | ihi | pañca | janān | ati |
dhenāḥ | indra | ava-cākaśat ||8.032.22||

8.032.23a sūryo raśmiṁ yathā sṛjā tvā yacchantu me giraḥ |
8.032.23c nimnam āpo na sadhryak ||

sūryaḥ | raśmim | yathā | sṛja | ā | tvā | yacchantu | me | giraḥ |
nimnam | āpaḥ | na | sadhryak ||8.032.23||

8.032.24a adhvaryav ā tu hi ṣiñca somaṁ vīrāya śipriṇe |
8.032.24c bharā sutasya pītaye ||

adhvaryo iti | ā | tu | hi | siñca | somam | vīrāya | śipriṇe |
bhara | sutasya | pītaye ||8.032.24||

8.032.25a ya udnaḥ phaligam bhinan nyak sindhūm̐r avāsṛjat |
8.032.25c yo goṣu pakvaṁ dhārayat ||

yaḥ | udnaḥ | phali-gam | bhinat | nyak | sindhūn | ava-asṛjat |
yaḥ | goṣu | pakvam | dhārayat ||8.032.25||

8.032.26a ahan vṛtram ṛcīṣama aurṇavābham ahīśuvam |
8.032.26c himenāvidhyad arbudam ||

ahan | vṛtram | ṛcīṣamaḥ | aurṇa-vābham | ahīśuvam |
himena | avidhyat | arbudam ||8.032.26||

8.032.27a pra va ugrāya niṣṭure 'ṣāḻhāya prasakṣiṇe |
8.032.27c devattam brahma gāyata ||

pra | vaḥ | ugrāya | niḥ-ture | aṣāḻhāya | pra-sakṣiṇe |
devattam | brahma | gāyata ||8.032.27||

8.032.28a yo viśvāny abhi vratā somasya made andhasaḥ |
8.032.28c indro deveṣu cetati ||

yaḥ | viśvāni | abhi | vratā | somasya | made | andhasaḥ |
indraḥ | deveṣu | cetati ||8.032.28||

8.032.29a iha tyā sadhamādyā harī hiraṇyakeśyā |
8.032.29c voḻhām abhi prayo hitam ||

iha | tyā | sadha-mādyā | harī iti | hiraṇya-keśyā |
voḻhām | abhi | prayaḥ | hitam ||8.032.29||

8.032.30a arvāñcaṁ tvā puruṣṭuta priyamedhastutā harī |
8.032.30c somapeyāya vakṣataḥ ||

arvāñcam | tvā | puru-stuta | priyamedha-stutā | harī iti |
soma-peyāya | vakṣataḥ ||8.032.30||


8.033.01a vayaṁ gha tvā sutāvanta āpo na vṛktabarhiṣaḥ |
8.033.01c pavitrasya prasravaṇeṣu vṛtrahan pari stotāra āsate ||

vayam | gha | tvā | suta-vantaḥ | āpaḥ | na | vṛkta-barhiṣaḥ |
pavitrasya | pra-sravaṇeṣu | vṛtra-han | pari | stotāraḥ | āsate ||8.033.01||

8.033.02a svaranti tvā sute naro vaso nireka ukthinaḥ |
8.033.02c kadā sutaṁ tṛṣāṇa oka ā gama indra svabdīva vaṁsagaḥ ||

svaranti | tvā | sute | naraḥ | vaso iti | nireke | ukthinaḥ |
kadā | sutam | tṛṣāṇaḥ | okaḥ | ā | gamaḥ | indra | svabdī-iva | vaṁsagaḥ ||8.033.02||

8.033.03a kaṇvebhir dhṛṣṇav ā dhṛṣad vājaṁ darṣi sahasriṇam |
8.033.03c piśaṅgarūpam maghavan vicarṣaṇe makṣū gomantam īmahe ||

kaṇvebhiḥ | dhṛṣṇo iti | ā | dhṛṣat | vājam | darṣi | sahasriṇam |
piśaṅga-rūpam | magha-van | vi-carṣaṇe | makṣu | go-mantam | īmahe ||8.033.03||

8.033.04a pāhi gāyāndhaso mada indrāya medhyātithe |
8.033.04c yaḥ sammiślo haryor yaḥ sute sacā vajrī ratho hiraṇyayaḥ ||

pāhi | gāya | andhasaḥ | made | indrāya | medhya-atithe |
yaḥ | sam-miślaḥ | haryoḥ | yaḥ | sute | sacā | vajrī | rathaḥ | hiraṇyayaḥ ||8.033.04||

8.033.05a yaḥ suṣavyaḥ sudakṣiṇa ino yaḥ sukratur gṛṇe |
8.033.05c ya ākaraḥ sahasrā yaḥ śatāmagha indro yaḥ pūrbhid āritaḥ ||

yaḥ | su-savyaḥ | su-dakṣiṇaḥ | inaḥ | yaḥ | su-kratuḥ | gṛṇe |
yaḥ | ā-karaḥ | sahasrā | yaḥ | śata-maghaḥ | indraḥ | yaḥ | pūḥ-bhit | āritaḥ ||8.033.05||

8.033.06a yo dhṛṣito yo 'vṛto yo asti śmaśruṣu śritaḥ |
8.033.06c vibhūtadyumnaś cyavanaḥ puruṣṭutaḥ kratvā gaur iva śākinaḥ ||

yaḥ | dhṛṣitaḥ | yaḥ | avṛtaḥ | yaḥ | asti | śmaśruṣu | śritaḥ |
vibhūta-dyumnaḥ | cyavanaḥ | puru-stutaḥ | kratvā | gauḥ-iva | śākinaḥ ||8.033.06||

8.033.07a ka īṁ veda sute sacā pibantaṁ kad vayo dadhe |
8.033.07c ayaṁ yaḥ puro vibhinatty ojasā mandānaḥ śipry andhasaḥ ||

kaḥ | īm | veda | sute | sacā | pibantam | kat | vayaḥ | dadhe |
ayam | yaḥ | puraḥ | vi-bhinatti | ojasā | mandānaḥ | śiprī | andhasaḥ ||8.033.07||

8.033.08a dānā mṛgo na vāraṇaḥ purutrā carathaṁ dadhe |
8.033.08c nakiṣ ṭvā ni yamad ā sute gamo mahām̐ś carasy ojasā ||

dānā | mṛgaḥ | na | vāraṇaḥ | puru-trā | caratham | dadhe |
nakiḥ | tvā | ni | yamat | ā | sute | gamaḥ | mahān | carasi | ojasā ||8.033.08||

8.033.09a ya ugraḥ sann aniṣṭṛtaḥ sthiro raṇāya saṁskṛtaḥ |
8.033.09c yadi stotur maghavā śṛṇavad dhavaṁ nendro yoṣaty ā gamat ||

yaḥ | ugraḥ | san | ani-stṛtaḥ | sthiraḥ | raṇāya | saṁskṛtaḥ |
yadi | stotuḥ | magha-vā | śṛṇavat | havam | na | indraḥ | yoṣati | ā | gamat ||8.033.09||

8.033.10a satyam itthā vṛṣed asi vṛṣajūtir no 'vṛtaḥ |
8.033.10c vṛṣā hy ugra śṛṇviṣe parāvati vṛṣo arvāvati śrutaḥ ||

satyam | itthā | vṛṣā | it | asi | vṛṣa-jūtiḥ | naḥ | avṛtaḥ |
vṛṣā | hi | ugra | śṛṇviṣe | parā-vati | vṛṣaḥ | arvā-vati | śrutaḥ ||8.033.10||

8.033.11a vṛṣaṇas te abhīśavo vṛṣā kaśā hiraṇyayī |
8.033.11c vṛṣā ratho maghavan vṛṣaṇā harī vṛṣā tvaṁ śatakrato ||

vṛṣaṇaḥ | te | abhīśavaḥ | vṛṣā | kaśā | hiraṇyayī |
vṛṣā | rathaḥ | magha-van | vṛṣaṇā | harī iti | vṛṣā | tvam | śatakrato iti śata-krato ||8.033.11||

8.033.12a vṛṣā sotā sunotu te vṛṣann ṛjīpinn ā bhara |
8.033.12c vṛṣā dadhanve vṛṣaṇaṁ nadīṣv ā tubhyaṁ sthātar harīṇām ||

vṛṣā | sotā | sunotu | te | vṛṣan | ṛjīpin | ā | bhara |
vṛṣā | dadhanve | vṛṣaṇam | nadīṣu | ā | tubhyam | sthātaḥ | harīṇām ||8.033.12||

8.033.13a endra yāhi pītaye madhu śaviṣṭha somyam |
8.033.13c nāyam acchā maghavā śṛṇavad giro brahmokthā ca sukratuḥ ||

ā | indra | yāhi | pītaye | madhu | śaviṣṭha | somyam |
na | ayam | accha | magha-vā | śṛṇavat | giraḥ | brahma | ukthā | ca | su-kratuḥ ||8.033.13||

8.033.14a vahantu tvā ratheṣṭhām ā harayo rathayujaḥ |
8.033.14c tiraś cid aryaṁ savanāni vṛtrahann anyeṣāṁ yā śatakrato ||

vahantu | tvā | rathesthām | ā | harayaḥ | ratha-yujaḥ |
tiraḥ | cit | aryam | savanāni | vṛtra-han | anyeṣām | yā | śatakrato iti śata-krato ||8.033.14||

8.033.15a asmākam adyāntamaṁ stomaṁ dhiṣva mahāmaha |
8.033.15c asmākaṁ te savanā santu śaṁtamā madāya dyukṣa somapāḥ ||

asmākam | adya | antamam | stomam | dhiṣva | mahā-maha |
asmākam | te | savanā | santu | śam-tamā | madāya | dyukṣa | soma-pāḥ ||8.033.15||

8.033.16a nahi ṣas tava no mama śāstre anyasya raṇyati |
8.033.16c yo asmān vīra ānayat ||

nahi | saḥ | tava | naḥ | mama | śāstre | anyasya | raṇyati |
yaḥ | asmān | vīraḥ | ā | anayat ||8.033.16||

8.033.17a indraś cid ghā tad abravīt striyā aśāsyam manaḥ |
8.033.17c uto aha kratuṁ raghum ||

indraḥ | cit | gha | tat | abravīt | striyāḥ | aśāsyam | manaḥ |
uto iti | aha | kratum | raghum ||8.033.17||

8.033.18a saptī cid ghā madacyutā mithunā vahato ratham |
8.033.18c eved dhūr vṛṣṇa uttarā ||

saptī iti | cit | gha | mada-cyutā | mithunā | vahataḥ | ratham |
eva | it | dhūḥ | vṛṣṇaḥ | ut-tarā ||8.033.18||

8.033.19a adhaḥ paśyasva mopari saṁtarām pādakau hara |
8.033.19c mā te kaśaplakau dṛśan strī hi brahmā babhūvitha ||

adhaḥ | paśyasva | mā | upari | sam-tarām | pādakau | hara |
mā | te | kaśa-plakau | dṛśan | strī | hi | brahmā | babhūvitha ||8.033.19||


8.034.01a endra yāhi haribhir upa kaṇvasya suṣṭutim |
8.034.01c divo amuṣya śāsato divaṁ yaya divāvaso ||

ā | indra | yāhi | hari-bhiḥ | upa | kaṇvasya | su-stutim |
divaḥ | amuṣya | śāsataḥ | divam | yaya | divāvaso iti divā-vaso ||8.034.01||

8.034.02a ā tvā grāvā vadann iha somī ghoṣeṇa yacchatu |
8.034.02c divo amuṣya śāsato divaṁ yaya divāvaso ||

ā | tvā | grāvā | vadan | iha | somī | ghoṣeṇa | yacchatu |
divaḥ | amuṣya | śāsataḥ | divam | yaya | divāvaso iti divā-vaso ||8.034.02||

8.034.03a atrā vi nemir eṣām urāṁ na dhūnute vṛkaḥ |
8.034.03c divo amuṣya śāsato divaṁ yaya divāvaso ||

atra | vi | nemiḥ | eṣām | urām | na | dhūnute | vṛkaḥ |
divaḥ | amuṣya | śāsataḥ | divam | yaya | divāvaso iti divā-vaso ||8.034.03||

8.034.04a ā tvā kaṇvā ihāvase havante vājasātaye |
8.034.04c divo amuṣya śāsato divaṁ yaya divāvaso ||

ā | tvā | kaṇvāḥ | iha | avase | havante | vāja-sātaye |
divaḥ | amuṣya | śāsataḥ | divam | yaya | divāvaso iti divā-vaso ||8.034.04||

8.034.05a dadhāmi te sutānāṁ vṛṣṇe na pūrvapāyyam |
8.034.05c divo amuṣya śāsato divaṁ yaya divāvaso ||

dadhāmi | te | sutānām | vṛṣṇe | na | pūrva-pāyyam |
divaḥ | amuṣya | śāsataḥ | divam | yaya | divāvaso iti divā-vaso ||8.034.05||

8.034.06a smatpuraṁdhir na ā gahi viśvatodhīr na ūtaye |
8.034.06c divo amuṣya śāsato divaṁ yaya divāvaso ||

smat-purandhiḥ | naḥ | ā | gahi | viśvataḥ-dhīḥ | naḥ | ūtaye |
divaḥ | amuṣya | śāsataḥ | divam | yaya | divāvaso iti divā-vaso ||8.034.06||

8.034.07a ā no yāhi mahemate sahasrote śatāmagha |
8.034.07c divo amuṣya śāsato divaṁ yaya divāvaso ||

ā | naḥ | yāhi | mahe-mate | sahasra-ūte | śata-magha |
divaḥ | amuṣya | śāsataḥ | divam | yaya | divāvaso iti divā-vaso ||8.034.07||

8.034.08a ā tvā hotā manurhito devatrā vakṣad īḍyaḥ |
8.034.08c divo amuṣya śāsato divaṁ yaya divāvaso ||

ā | tvā | hotā | manuḥ-hitaḥ | deva-trā | vakṣat | īḍyaḥ |
divaḥ | amuṣya | śāsataḥ | divam | yaya | divāvaso iti divā-vaso ||8.034.08||

8.034.09a ā tvā madacyutā harī śyenam pakṣeva vakṣataḥ |
8.034.09c divo amuṣya śāsato divaṁ yaya divāvaso ||

ā | tvā | mada-cyutā | harī iti | śyenam | pakṣā-iva | vakṣataḥ |
divaḥ | amuṣya | śāsataḥ | divam | yaya | divāvaso iti divā-vaso ||8.034.09||

8.034.10a ā yāhy arya ā pari svāhā somasya pītaye |
8.034.10c divo amuṣya śāsato divaṁ yaya divāvaso ||

ā | yāhi | aryaḥ | ā | pari | svāhā | somasya | pītaye |
divaḥ | amuṣya | śāsataḥ | divam | yaya | divāvaso iti divā-vaso ||8.034.10||

8.034.11a ā no yāhy upaśruty uktheṣu raṇayā iha |
8.034.11c divo amuṣya śāsato divaṁ yaya divāvaso ||

ā | naḥ | yāhi | upa-śruti | uktheṣu | raṇaya | iha |
divaḥ | amuṣya | śāsataḥ | divam | yaya | divāvaso iti divā-vaso ||8.034.11||

8.034.12a sarūpair ā su no gahi sambhṛtaiḥ sambhṛtāśvaḥ |
8.034.12c divo amuṣya śāsato divaṁ yaya divāvaso ||

sa-rūpaiḥ | ā | su | naḥ | gahi | sam-bhṛtaiḥ | sambhṛta-aśvaḥ |
divaḥ | amuṣya | śāsataḥ | divam | yaya | divāvaso iti divā-vaso ||8.034.12||

8.034.13a ā yāhi parvatebhyaḥ samudrasyādhi viṣṭapaḥ |
8.034.13c divo amuṣya śāsato divaṁ yaya divāvaso ||

ā | yāhi | parvatebhyaḥ | samudrasya | adhi | viṣṭapaḥ |
divaḥ | amuṣya | śāsataḥ | divam | yaya | divāvaso iti divā-vaso ||8.034.13||

8.034.14a ā no gavyāny aśvyā sahasrā śūra dardṛhi |
8.034.14c divo amuṣya śāsato divaṁ yaya divāvaso ||

ā | naḥ | gavyāni | aśvyā | sahasrā | śūra | dardṛhi |
divaḥ | amuṣya | śāsataḥ | divam | yaya | divāvaso iti divā-vaso ||8.034.14||

8.034.15a ā naḥ sahasraśo bharāyutāni śatāni ca |
8.034.15c divo amuṣya śāsato divaṁ yaya divāvaso ||

ā | naḥ | sahasra-śaḥ | bhara | ayutāni | śatāni | ca |
divaḥ | amuṣya | śāsataḥ | divam | yaya | divāvaso iti divā-vaso ||8.034.15||

8.034.16a ā yad indraś ca dadvahe sahasraṁ vasurociṣaḥ |
8.034.16c ojiṣṭham aśvyam paśum ||

ā | yat | indraḥ | ca | dadvahe iti | sahasram | vasu-rociṣaḥ |
ojiṣṭham | aśvyam | paśum ||8.034.16||

8.034.17a ya ṛjrā vātaraṁhaso 'ruṣāso raghuṣyadaḥ |
8.034.17c bhrājante sūryā iva ||

ye | ṛjrāḥ | vāta-raṁhasaḥ | aruṣāsaḥ | raghu-syadaḥ |
bhrājante | sūryāḥ-iva ||8.034.17||

8.034.18a pārāvatasya rātiṣu dravaccakreṣv āśuṣu |
8.034.18c tiṣṭhaṁ vanasya madhya ā ||

pārāvatasya | rātiṣu | dravat-cakreṣu | āśuṣu |
tiṣṭham | vanasya | madhye | ā ||8.034.18||


8.035.01a agninendreṇa varuṇena viṣṇunādityai rudrair vasubhiḥ sacābhuvā |
8.035.01c sajoṣasā uṣasā sūryeṇa ca somam pibatam aśvinā ||

agninā | indreṇa | varuṇena | viṣṇunā | ādityaiḥ | rudraiḥ | vasu-bhiḥ | sacā-bhuvā |
sa-joṣasau | uṣasā | sūryeṇa | ca | somam | pibatam | aśvinā ||8.035.01||

8.035.02a viśvābhir dhībhir bhuvanena vājinā divā pṛthivyādribhiḥ sacābhuvā |
8.035.02c sajoṣasā uṣasā sūryeṇa ca somam pibatam aśvinā ||

viśvābhiḥ | dhībhiḥ | bhuvanena | vājinā | divā | pṛthivyā | adri-bhiḥ | sacā-bhuvā |
sa-joṣasau | uṣasā | sūryeṇa | ca | somam | pibatam | aśvinā ||8.035.02||

8.035.03a viśvair devais tribhir ekādaśair ihādbhir marudbhir bhṛgubhiḥ sacābhuvā |
8.035.03c sajoṣasā uṣasā sūryeṇa ca somam pibatam aśvinā ||

viśvaiḥ | devaiḥ | tri-bhiḥ | ekādaśaiḥ | iha | at-bhiḥ | marut-bhiḥ | bhṛgu-bhiḥ | sacā-bhuvā |
sa-joṣasau | uṣasā | sūryeṇa | ca | somam | pibatam | aśvinā ||8.035.03||

8.035.04a juṣethāṁ yajñam bodhataṁ havasya me viśveha devau savanāva gacchatam |
8.035.04c sajoṣasā uṣasā sūryeṇa ceṣaṁ no voḻham aśvinā ||

juṣethām | yajñam | bodhatam | havasya | me | viśvā | iha | devau | savanā | ava | gacchatam |
sa-joṣasau | uṣasā | sūryeṇa | ca | ā | iṣam | naḥ | voḻham | aśvinā ||8.035.04||

8.035.05a stomaṁ juṣethāṁ yuvaśeva kanyanāṁ viśveha devau savanāva gacchatam |
8.035.05c sajoṣasā uṣasā sūryeṇa ceṣaṁ no voḻham aśvinā ||

stomam | juṣethām | yuvaśā-iva | kanyanām | viśvā | iha | devau | savanā | ava | gacchatam |
sa-joṣasau | uṣasā | sūryeṇa | ca | ā | iṣam | naḥ | voḻham | aśvinā ||8.035.05||

8.035.06a giro juṣethām adhvaraṁ juṣethāṁ viśveha devau savanāva gacchatam |
8.035.06c sajoṣasā uṣasā sūryeṇa ceṣaṁ no voḻham aśvinā ||

giraḥ | juṣethām | adhvaram | juṣethām | viśvā | iha | devau | savanā | ava | gacchatam |
sa-joṣasau | uṣasā | sūryeṇa | ca | ā | iṣam | naḥ | voḻham | aśvinā ||8.035.06||

8.035.07a hāridraveva patatho vaned upa somaṁ sutam mahiṣevāva gacchathaḥ |
8.035.07c sajoṣasā uṣasā sūryeṇa ca trir vartir yātam aśvinā ||

hāridravā-iva | patathaḥ | vanā | it | upa | somam | sutam | mahiṣā-iva | ava | gacchathaḥ |
sa-joṣasau | uṣasā | sūryeṇa | ca | triḥ | vartiḥ | yātam | aśvinā ||8.035.07||

8.035.08a haṁsāv iva patatho adhvagāv iva somaṁ sutam mahiṣevāva gacchathaḥ |
8.035.08c sajoṣasā uṣasā sūryeṇa ca trir vartir yātam aśvinā ||

haṁsau-iva | patathaḥ | adhvagau-iva | somam | sutam | mahiṣā-iva | ava | gacchathaḥ |
sa-joṣasau | uṣasā | sūryeṇa | ca | triḥ | vartiḥ | yātam | aśvinā ||8.035.08||

8.035.09a śyenāv iva patatho havyadātaye somaṁ sutam mahiṣevāva gacchathaḥ |
8.035.09c sajoṣasā uṣasā sūryeṇa ca trir vartir yātam aśvinā ||

śyenau-iva | patathaḥ | havya-dātaye | somam | sutam | mahiṣā-iva | ava | gacchathaḥ |
sa-joṣasau | uṣasā | sūryeṇa | ca | triḥ | vartiḥ | yātam | aśvinā ||8.035.09||

8.035.10a pibataṁ ca tṛpṇutaṁ cā ca gacchatam prajāṁ ca dhattaṁ draviṇaṁ ca dhattam |
8.035.10c sajoṣasā uṣasā sūryeṇa corjaṁ no dhattam aśvinā ||

pibatam | ca | tṛpṇutam | ca | ā | ca | gacchatam | pra-jām | ca | dhattam | draviṇam | ca | dhattam |
sa-joṣasau | uṣasā | sūryeṇa | ca | ūrjam | naḥ | dhattam | aśvinā ||8.035.10||

8.035.11a jayataṁ ca pra stutaṁ ca pra cāvatam prajāṁ ca dhattaṁ draviṇaṁ ca dhattam |
8.035.11c sajoṣasā uṣasā sūryeṇa corjaṁ no dhattam aśvinā ||

jayatam | ca | pra | stutam | ca | pra | ca | avatam | pra-jām | ca | dhattam | draviṇam | ca | dhattam |
sa-joṣasau | uṣasā | sūryeṇa | ca | ūrjam | naḥ | dhattam | aśvinā ||8.035.11||

8.035.12a hataṁ ca śatrūn yatataṁ ca mitriṇaḥ prajāṁ ca dhattaṁ draviṇaṁ ca dhattam |
8.035.12c sajoṣasā uṣasā sūryeṇa corjaṁ no dhattam aśvinā ||

hatam | ca | śatrūn | yatatam | ca | mitriṇaḥ | pra-jām | ca | dhattam | draviṇam | ca | dhattam |
sa-joṣasau | uṣasā | sūryeṇa | ca | ūrjam | naḥ | dhattam | aśvinā ||8.035.12||

8.035.13a mitrāvaruṇavantā uta dharmavantā marutvantā jaritur gacchatho havam |
8.035.13c sajoṣasā uṣasā sūryeṇa cādityair yātam aśvinā ||

mitrāvaruṇa-vantau | uta | dharma-vantā | marutvantā | jarituḥ | gacchathaḥ | havam |
sa-joṣasau | uṣasā | sūryeṇa | ca | ādityaiḥ | yātam | aśvinā ||8.035.13||

8.035.14a aṅgirasvantā uta viṣṇuvantā marutvantā jaritur gacchatho havam |
8.035.14c sajoṣasā uṣasā sūryeṇa cādityair yātam aśvinā ||

aṅgirasvantau | uta | viṣṇu-vantā | marutvantā | jarituḥ | gacchathaḥ | havam |
sa-joṣasau | uṣasā | sūryeṇa | ca | ādityaiḥ | yātam | aśvinā ||8.035.14||

8.035.15a ṛbhumantā vṛṣaṇā vājavantā marutvantā jaritur gacchatho havam |
8.035.15c sajoṣasā uṣasā sūryeṇa cādityair yātam aśvinā ||

ṛbhu-mantā | vṛṣaṇā | vāja-vantā | marutvantā | jarituḥ | gacchathaḥ | havam |
sa-joṣasau | uṣasā | sūryeṇa | ca | ādityaiḥ | yātam | aśvinā ||8.035.15||

8.035.16a brahma jinvatam uta jinvataṁ dhiyo hataṁ rakṣāṁsi sedhatam amīvāḥ |
8.035.16c sajoṣasā uṣasā sūryeṇa ca somaṁ sunvato aśvinā ||

brahma | jinvatam | uta | jinvatam | dhiyaḥ | hatam | rakṣāṁsi | sedhatam | amīvāḥ |
sa-joṣasau | uṣasā | sūryeṇa | ca | somam | sunvataḥ | aśvinā ||8.035.16||

8.035.17a kṣatraṁ jinvatam uta jinvataṁ nṝn hataṁ rakṣāṁsi sedhatam amīvāḥ |
8.035.17c sajoṣasā uṣasā sūryeṇa ca somaṁ sunvato aśvinā ||

kṣatram | jinvatam | uta | jinvatam | nṝn | hatam | rakṣāṁsi | sedhatam | amīvāḥ |
sa-joṣasau | uṣasā | sūryeṇa | ca | somam | sunvataḥ | aśvinā ||8.035.17||

8.035.18a dhenūr jinvatam uta jinvataṁ viśo hataṁ rakṣāṁsi sedhatam amīvāḥ |
8.035.18c sajoṣasā uṣasā sūryeṇa ca somaṁ sunvato aśvinā ||

dhenūḥ | jinvatam | uta | jinvatam | viśaḥ | hatam | rakṣāṁsi | sedhatam | amīvāḥ |
sa-joṣasau | uṣasā | sūryeṇa | ca | somam | sunvataḥ | aśvinā ||8.035.18||

8.035.19a atrer iva śṛṇutam pūrvyastutiṁ śyāvāśvasya sunvato madacyutā |
8.035.19c sajoṣasā uṣasā sūryeṇa cāśvinā tiroahnyam ||

atreḥ-iva | śṛṇutam | pūrvya-stutim | śyāva-aśvasya | sunvataḥ | mada-cyutā |
sa-joṣasau | uṣasā | sūryeṇa | ca | aśvinā | tiraḥ-ahnyam ||8.035.19||

8.035.20a sargām̐ iva sṛjataṁ suṣṭutīr upa śyāvāśvasya sunvato madacyutā |
8.035.20c sajoṣasā uṣasā sūryeṇa cāśvinā tiroahnyam ||

sargān-iva | sṛjatam | su-stutīḥ | upa | śyāva-aśvasya | sunvataḥ | mada-cyutā |
sa-joṣasau | uṣasā | sūryeṇa | ca | aśvinā | tiraḥ-ahnyam ||8.035.20||

8.035.21a raśmīm̐r iva yacchatam adhvarām̐ upa śyāvāśvasya sunvato madacyutā |
8.035.21c sajoṣasā uṣasā sūryeṇa cāśvinā tiroahnyam ||

raśmīn-iva | yacchatam | adhvarān | upa | śyāva-aśvasya | sunvataḥ | mada-cyutā |
sa-joṣasau | uṣasā | sūryeṇa | ca | aśvinā | tiraḥ-ahnyam ||8.035.21||

8.035.22a arvāg rathaṁ ni yacchatam pibataṁ somyam madhu |
8.035.22c ā yātam aśvinā gatam avasyur vām ahaṁ huve dhattaṁ ratnāni dāśuṣe ||

arvāk | ratham | ni | yacchatam | pibatam | somyam | madhu |
ā | yātam | aśvinā | ā | gatam | avasyuḥ | vām | aham | huve | dhattam | ratnāni | dāśuṣe ||8.035.22||

8.035.23a namovāke prasthite adhvare narā vivakṣaṇasya pītaye |
8.035.23c ā yātam aśvinā gatam avasyur vām ahaṁ huve dhattaṁ ratnāni dāśuṣe ||

namaḥ-vāke | pra-sthite | adhvare | narā | vivakṣaṇasya | pītaye |
ā | yātam | aśvinā | ā | gatam | avasyuḥ | vām | aham | huve | dhattam | ratnāni | dāśuṣe ||8.035.23||

8.035.24a svāhākṛtasya tṛmpataṁ sutasya devāv andhasaḥ |
8.035.24c ā yātam aśvinā gatam avasyur vām ahaṁ huve dhattaṁ ratnāni dāśuṣe ||

svāhā-kṛtasya | tṛmpatam | sutasya | devau | andhasaḥ |
ā | yātam | aśvinā | ā | gatam | avasyuḥ | vām | aham | huve | dhattam | ratnāni | dāśuṣe ||8.035.24||


8.036.01a avitāsi sunvato vṛktabarhiṣaḥ pibā somam madāya kaṁ śatakrato |
8.036.01c yaṁ te bhāgam adhārayan viśvāḥ sehānaḥ pṛtanā uru jrayaḥ sam apsujin marutvām̐ indra satpate ||

avitā | asi | sunvataḥ | vṛkta-barhiṣaḥ | piba | somam | madāya | kam | śatakrato iti śata-krato |
yam | te | bhāgam | adhārayan | viśvāḥ | sehānaḥ | pṛtanāḥ | uru | jrayaḥ | sam | apsu-jit | marutvān | indra | sat-pate ||8.036.01||

8.036.02a prāva stotāram maghavann ava tvām pibā somam madāya kaṁ śatakrato |
8.036.02c yaṁ te bhāgam adhārayan viśvāḥ sehānaḥ pṛtanā uru jrayaḥ sam apsujin marutvām̐ indra satpate ||

pra | ava | stotāram | magha-van | ava | tvām | piba | somam | madāya | kam | śatakrato iti śata-krato |
yam | te | bhāgam | adhārayan | viśvāḥ | sehānaḥ | pṛtanāḥ | uru | jrayaḥ | sam | apsu-jit | marutvān | indra | sat-pate ||8.036.02||

8.036.03a ūrjā devām̐ avasy ojasā tvām pibā somam madāya kaṁ śatakrato |
8.036.03c yaṁ te bhāgam adhārayan viśvāḥ sehānaḥ pṛtanā uru jrayaḥ sam apsujin marutvām̐ indra satpate ||

ūrjā | devān | avasi | ojasā | tvām | piba | somam | madāya | kam | śatakrato iti śata-krato |
yam | te | bhāgam | adhārayan | viśvāḥ | sehānaḥ | pṛtanāḥ | uru | jrayaḥ | sam | apsu-jit | marutvān | indra | sat-pate ||8.036.03||

8.036.04a janitā divo janitā pṛthivyāḥ pibā somam madāya kaṁ śatakrato |
8.036.04c yaṁ te bhāgam adhārayan viśvāḥ sehānaḥ pṛtanā uru jrayaḥ sam apsujin marutvām̐ indra satpate ||

janitā | divaḥ | janitā | pṛthivyāḥ | piba | somam | madāya | kam | śatakrato iti śata-krato |
yam | te | bhāgam | adhārayan | viśvāḥ | sehānaḥ | pṛtanāḥ | uru | jrayaḥ | sam | apsu-jit | marutvān | indra | sat-pate ||8.036.04||

8.036.05a janitāśvānāṁ janitā gavām asi pibā somam madāya kaṁ śatakrato |
8.036.05c yaṁ te bhāgam adhārayan viśvāḥ sehānaḥ pṛtanā uru jrayaḥ sam apsujin marutvām̐ indra satpate ||

janitā | aśvānām | janitā | gavām | asi | piba | somam | madāya | kam | śatakrato iti śata-krato |
yam | te | bhāgam | adhārayan | viśvāḥ | sehānaḥ | pṛtanāḥ | uru | jrayaḥ | sam | apsu-jit | marutvān | indra | sat-pate ||8.036.05||

8.036.06a atrīṇāṁ stomam adrivo mahas kṛdhi pibā somam madāya kaṁ śatakrato |
8.036.06c yaṁ te bhāgam adhārayan viśvāḥ sehānaḥ pṛtanā uru jrayaḥ sam apsujin marutvām̐ indra satpate ||

atrīṇām | stomam | adri-vaḥ | mahaḥ | kṛdhi | piba | somam | madāya | kam | śatakrato iti śata-krato |
yam | te | bhāgam | adhārayan | viśvāḥ | sehānaḥ | pṛtanāḥ | uru | jrayaḥ | sam | apsu-jit | marutvān | indra | sat-pate ||8.036.06||

8.036.07a śyāvāśvasya sunvatas tathā śṛṇu yathāśṛṇor atreḥ karmāṇi kṛṇvataḥ |
8.036.07c pra trasadasyum āvitha tvam eka in nṛṣāhya indra brahmāṇi vardhayan ||

śyāva-aśvasya | sunvataḥ | tathā | śṛṇu | yathā | aśṛṇoḥ | atreḥ | karmāṇi | kṛṇvataḥ |
pra | trasadasyum | āvitha | tvam | ekaḥ | it | nṛ-sahye | indra | brahmāṇi | vardhayan ||8.036.07||


8.037.01a predam brahma vṛtratūryeṣv āvitha pra sunvataḥ śacīpata indra viśvābhir ūtibhiḥ |
8.037.01d mādhyaṁdinasya savanasya vṛtrahann anedya pibā somasya vajrivaḥ ||

pra | idam | brahma | vṛtra-tūryeṣu | āvitha | pra | sunvataḥ | śacī-pate | indra | viśvābhiḥ | ūti-bhiḥ |
mādhyandinasya | savanasya | vṛtra-han | anedya | piba | somasya | vajri-vaḥ ||8.037.01||

8.037.02a sehāna ugra pṛtanā abhi druhaḥ śacīpata indra viśvābhir ūtibhiḥ |
8.037.02d mādhyaṁdinasya savanasya vṛtrahann anedya pibā somasya vajrivaḥ ||

sehānaḥ | ugra | pṛtanāḥ | abhi | druhaḥ | śacī-pate | indra | viśvābhiḥ | ūti-bhiḥ |
mādhyandinasya | savanasya | vṛtra-han | anedya | piba | somasya | vajri-vaḥ ||8.037.02||

8.037.03a ekarāḻ asya bhuvanasya rājasi śacīpata indra viśvābhir ūtibhiḥ |
8.037.03d mādhyaṁdinasya savanasya vṛtrahann anedya pibā somasya vajrivaḥ ||

eka-rāṭ | asya | bhuvanasya | rājasi | śacī-pate | indra | viśvābhiḥ | ūti-bhiḥ |
mādhyandinasya | savanasya | vṛtra-han | anedya | piba | somasya | vajri-vaḥ ||8.037.03||

8.037.04a sasthāvānā yavayasi tvam eka ic chacīpata indra viśvābhir ūtibhiḥ |
8.037.04d mādhyaṁdinasya savanasya vṛtrahann anedya pibā somasya vajrivaḥ ||

sa-sthāvānā | yavayasi | tvam | ekaḥ | it | śacī-pate | indra | viśvābhiḥ | ūti-bhiḥ |
mādhyandinasya | savanasya | vṛtra-han | anedya | piba | somasya | vajri-vaḥ ||8.037.04||

8.037.05a kṣemasya ca prayujaś ca tvam īśiṣe śacīpata indra viśvābhir ūtibhiḥ |
8.037.05d mādhyaṁdinasya savanasya vṛtrahann anedya pibā somasya vajrivaḥ ||

kṣemasya | ca | pra-yujaḥ | ca | tvam | īśiṣe | śacī-pate | indra | viśvābhiḥ | ūti-bhiḥ |
mādhyandinasya | savanasya | vṛtra-han | anedya | piba | somasya | vajri-vaḥ ||8.037.05||

8.037.06a kṣatrāya tvam avasi na tvam āvitha śacīpata indra viśvābhir ūtibhiḥ |
8.037.06d mādhyaṁdinasya savanasya vṛtrahann anedya pibā somasya vajrivaḥ ||

kṣatrāya | tvam | avasi | na | tvam | āvitha | śacī-pate | indra | viśvābhiḥ | ūti-bhiḥ |
mādhyandinasya | savanasya | vṛtra-han | anedya | piba | somasya | vajri-vaḥ ||8.037.06||

8.037.07a śyāvāśvasya rebhatas tathā śṛṇu yathāśṛṇor atreḥ karmāṇi kṛṇvataḥ |
8.037.07c pra trasadasyum āvitha tvam eka in nṛṣāhya indra kṣatrāṇi vardhayan ||

śyāva-aśvasya | rebhataḥ | tathā | śṛṇu | yathā | aśṛṇoḥ | atreḥ | karmāṇi | kṛṇvataḥ |
pra | trasadasyum | āvitha | tvam | ekaḥ | it | nṛ-sahye | indra | brahmāṇi | vardhayan ||8.037.07||


8.038.01a yajñasya hi stha ṛtvijā sasnī vājeṣu karmasu |
8.038.01c indrāgnī tasya bodhatam ||

yajñasya | hi | sthaḥ | ṛtvijā | sasnī iti | vājeṣu | karmasu |
indrāgnī iti | tasya | bodhatam ||8.038.01||

8.038.02a tośāsā rathayāvānā vṛtrahaṇāparājitā |
8.038.02c indrāgnī tasya bodhatam ||

toṣāsā | ratha-yāvānā | vṛtra-hanā | aparā-jitā |
indrāgnī iti | tasya | bodhatam ||8.038.02||

8.038.03a idaṁ vām madiram madhv adhukṣann adribhir naraḥ |
8.038.03c indrāgnī tasya bodhatam ||

idam | vām | madiram | madhu | adhukṣan | adri-bhiḥ | naraḥ |
indrāgnī iti | tasya | bodhatam ||8.038.03||

8.038.04a juṣethāṁ yajñam iṣṭaye sutaṁ somaṁ sadhastutī |
8.038.04c indrāgnī ā gataṁ narā ||

juṣethām | yajñam | iṣṭaye | sutam | somam | sadhastutī iti sadha-stutī |
indrāgnī iti | ā | gatam | narā ||8.038.04||

8.038.05a imā juṣethāṁ savanā yebhir havyāny ūhathuḥ |
8.038.05c indrāgnī ā gataṁ narā ||

imā | juṣethām | savanā | yebhiḥ | havyāni | ūhathuḥ |
indrāgnī iti | ā | gatam | narā ||8.038.05||

8.038.06a imāṁ gāyatravartaniṁ juṣethāṁ suṣṭutim mama |
8.038.06c indrāgnī ā gataṁ narā ||

imām | gāyatra-vartanim | juṣethām | su-stutim | mama |
indrāgnī iti | ā | gatam | narā ||8.038.06||

8.038.07a prātaryāvabhir ā gataṁ devebhir jenyāvasū |
8.038.07c indrāgnī somapītaye ||

prātaryāva-bhiḥ | ā | gatam | devebhiḥ | jenyāvasū iti |
indrāgnī iti | soma-pītaye ||8.038.07||

8.038.08a śyāvāśvasya sunvato 'trīṇāṁ śṛṇutaṁ havam |
8.038.08c indrāgnī somapītaye ||

śyāva-aśvasya | sunvataḥ | atrīṇām | śṛṇutam | havam |
indrāgnī iti | soma-pītaye ||8.038.08||

8.038.09a evā vām ahva ūtaye yathāhuvanta medhirāḥ |
8.038.09c indrāgnī somapītaye ||

eva | vām | ahve | ūtaye | yathā | ahuvanta | medhirāḥ |
indrāgnī iti | soma-pītaye ||8.038.09||

8.038.10a āhaṁ sarasvatīvator indrāgnyor avo vṛṇe |
8.038.10c yābhyāṁ gāyatram ṛcyate ||

ā | aham | sarasvatī-vatoḥ | indrāgnyoḥ | avaḥ | vṛṇe |
yābhyām | gāyatram | ṛcyate ||8.038.10||


8.039.01a agnim astoṣy ṛgmiyam agnim īḻā yajadhyai |
8.039.01c agnir devām̐ anaktu na ubhe hi vidathe kavir antaś carati dūtyaṁ nabhantām anyake same ||

agnim | astoṣi | ṛgmiyam | agnim | īḻā | yajadhyai |
agniḥ | devān | anaktu | naḥ | ubhe iti | hi | vidathe iti | kaviḥ | antariti | carati | dūtyam | nabhantām | anyake | same ||8.039.01||

8.039.02a ny agne navyasā vacas tanūṣu śaṁsam eṣām |
8.039.02c ny arātī rarāvṇāṁ viśvā aryo arātīr ito yucchantv āmuro nabhantām anyake same ||

ni | agne | navyasā | vacaḥ | tanūṣu | śaṁsam | eṣām |
ni | arātīḥ | rarāvṇām | viśvāḥ | aryaḥ | arātīḥ | itaḥ | yucchantu | ā-muraḥ | nabhantām | anyake | same ||8.039.02||

8.039.03a agne manmāni tubhyaṁ kaṁ ghṛtaṁ na juhva āsani |
8.039.03c sa deveṣu pra cikiddhi tvaṁ hy asi pūrvyaḥ śivo dūto vivasvato nabhantām anyake same ||

agne | manmāni | tubhyam | kam | ghṛtam | na | juhve | āsani |
saḥ | deveṣu | pra | cikiddhi | tvam | hi | asi | pūrvyaḥ | śivaḥ | dūtaḥ | vivasvataḥ | nabhantām | anyake | same ||8.039.03||

8.039.04a tat-tad agnir vayo dadhe yathā-yathā kṛpaṇyati |
8.039.04c ūrjāhutir vasūnāṁ śaṁ ca yoś ca mayo dadhe viśvasyai devahūtyai nabhantām anyake same ||

tat-tat | agniḥ | vayaḥ | dadhe | yathā-yathā | kṛpaṇyati |
ūrjā-āhutiḥ | vasūnām | śam | ca | yoḥ | ca | mayaḥ | dadhe | viśvasyai | devahūtyai | nabhantām | anyake | same ||8.039.04||

8.039.05a sa ciketa sahīyasāgniś citreṇa karmaṇā |
8.039.05c sa hotā śaśvatīnāṁ dakṣiṇābhir abhīvṛta inoti ca pratīvyaṁ nabhantām anyake same ||

saḥ | ciketa | sahīyasā | agniḥ | citreṇa | karmaṇā |
saḥ | hotā | śaśvatīnām | dakṣiṇābhiḥ | abhi-vṛtaḥ | inoti | ca | pratīvyam | nabhantām | anyake | same ||8.039.05||

8.039.06a agnir jātā devānām agnir veda martānām apīcyam |
8.039.06c agniḥ sa draviṇodā agnir dvārā vy ūrṇute svāhuto navīyasā nabhantām anyake same ||

agniḥ | jātā | devānām | agniḥ | veda | martānām | apīcyam |
agniḥ | saḥ | draviṇaḥ-dāḥ | agniḥ | dvārā | vi | ūrṇute | su-āhutaḥ | navīyasā | nabhantām | anyake | same ||8.039.06||

8.039.07a agnir deveṣu saṁvasuḥ sa vikṣu yajñiyāsv ā |
8.039.07c sa mudā kāvyā puru viśvam bhūmeva puṣyati devo deveṣu yajñiyo nabhantām anyake same ||

agniḥ | deveṣu | sam-vasuḥ | saḥ | vikṣu | yajñiyāsu | ā |
saḥ | mudā | kāvyā | puru | viśvam | bhūma-iva | puṣyati | devaḥ | deveṣu | yajñiyaḥ | nabhantām | anyake | same ||8.039.07||

8.039.08a yo agniḥ saptamānuṣaḥ śrito viśveṣu sindhuṣu |
8.039.08c tam āganma tripastyam mandhātur dasyuhantamam agniṁ yajñeṣu pūrvyaṁ nabhantām anyake same ||

yaḥ | agniḥ | sapta-mānuṣaḥ | śritaḥ | viśveṣu | sindhuṣu |
tam | ā | aganma | tri-pastyam | mandhātuḥ | dasyuhan-tamam | agnim | yajñeṣu | pūrvyam | nabhantām | anyake | same ||8.039.08||

8.039.09a agnis trīṇi tridhātūny ā kṣeti vidathā kaviḥ |
8.039.09c sa trīm̐r ekādaśām̐ iha yakṣac ca piprayac ca no vipro dūtaḥ pariṣkṛto nabhantām anyake same ||

agniḥ | trīṇi | tri-dhātūni | ā | kṣeti | vidathā | kaviḥ |
saḥ | trīn | ekādaśān | iha | yakṣat | ca | piprayat | ca | naḥ | vipraḥ | dūtaḥ | pari-kṛtaḥ | nabhantām | anyake | same ||8.039.09||

8.039.10a tvaṁ no agna āyuṣu tvaṁ deveṣu pūrvya vasva eka irajyasi |
8.039.10d tvām āpaḥ parisrutaḥ pari yanti svasetavo nabhantām anyake same ||

tvam | naḥ | agne | āyuṣu | tvam | deveṣu | pūrvya | vasvaḥ | ekaḥ | irajyasi |
tvām | āpaḥ | pari-srutaḥ | pari | yanti | sva-setavaḥ | nabhantām | anyake | same ||8.039.10||


8.040.01a indrāgnī yuvaṁ su naḥ sahantā dāsatho rayim |
8.040.01c yena dṛḻhā samatsv ā vīḻu cit sāhiṣīmahy agnir vaneva vāta in nabhantām anyake same ||

indrāgnī iti | yuvam | su | naḥ | sahantā | dāsathaḥ | rayim |
yena | dṛḻhā | samat-su | ā | vīḻu | cit | sahiṣīmahi | agniḥ | vanā-iva | vāte | it | nabhantām | anyake | same ||8.040.01||

8.040.02a nahi vāṁ vavrayāmahe 'thendram id yajāmahe śaviṣṭhaṁ nṛṇāṁ naram |
8.040.02d sa naḥ kadā cid arvatā gamad ā vājasātaye gamad ā medhasātaye nabhantām anyake same ||

nahi | vām | vavrayāmahe | atha | indram | it | yajāmahe | śaviṣṭham | nṛṇām | naram |
saḥ | naḥ | kadā | cit | arvatā | gamat | ā | vāja-sātaye | gamat | ā | medha-sātaye | nabhantām | anyake | same ||8.040.02||

8.040.03a tā hi madhyam bharāṇām indrāgnī adhikṣitaḥ |
8.040.03c tā u kavitvanā kavī pṛcchyamānā sakhīyate saṁ dhītam aśnutaṁ narā nabhantām anyake same ||

tā | hi | madhyam | bharāṇām | indrāgnī iti | adhi-kṣitaḥ |
tau | ūm̐ iti | kavi-tvanā | kavī iti | pṛcchyamānā | sakhī-yate | sam | dhītam | aśnutam | narā | nabhantām | anyake | same ||8.040.03||

8.040.04a abhy arca nabhākavad indrāgnī yajasā girā |
8.040.04c yayor viśvam idaṁ jagad iyaṁ dyauḥ pṛthivī mahy upasthe bibhṛto vasu nabhantām anyake same ||

abhi | arca | nabhāka-vat | indrāgnī iti | yajasā | girā |
yayoḥ | viśvam | idam | jagat | iyam | dyauḥ | pṛthivī | mahī | upa-sthe | bibhṛtaḥ | vasu | nabhantām | anyake | same ||8.040.04||

8.040.05a pra brahmāṇi nabhākavad indrāgnibhyām irajyata |
8.040.05c yā saptabudhnam arṇavaṁ jihmabāram aporṇuta indra īśāna ojasā nabhantām anyake same ||

pra | brahmāṇi | nabhāka-vat | indrāgni-bhyām | irajyata |
yā | sapta-budhnam | arṇavam | jihma-bāram | apa-ūrṇutaḥ | indraḥ | īśānaḥ | ojasā | nabhantām | anyake | same ||8.040.05||

8.040.06a api vṛśca purāṇavad vratater iva guṣpitam ojo dāsasya dambhaya |
8.040.06d vayaṁ tad asya sambhṛtaṁ vasv indreṇa vi bhajemahi nabhantām anyake same ||

api | vṛśca | purāṇa-vat | vratateḥ-iva | guṣpitam | ojaḥ | dāsasya | dambhaya |
vayam | tat | asya | sam-bhṛtam | vasu | indreṇa | vi | bhajemahi | nabhantām | anyake | same ||8.040.06||

8.040.07a yad indrāgnī janā ime vihvayante tanā girā |
8.040.07c asmākebhir nṛbhir vayaṁ sāsahyāma pṛtanyato vanuyāma vanuṣyato nabhantām anyake same ||

yat | indrāgnī iti | janāḥ | ime | vi-hvayante | tanā | girā |
asmākebhiḥ | nṛ-bhiḥ | vayam | sasahyāma | pṛtanyataḥ | vanuyāma | vanuṣyataḥ | nabhantām | anyake | same ||8.040.07||

8.040.08a yā nu śvetāv avo diva uccarāta upa dyubhiḥ |
8.040.08c indrāgnyor anu vratam uhānā yanti sindhavo yān sīm bandhād amuñcatāṁ nabhantām anyake same ||

yā | nu | śvetau | avaḥ | divaḥ | ut-carātaḥ | upa | dyu-bhiḥ |
indrāgnyoḥ | anu | vratam | uhānāḥ | yanti | sindhavaḥ | yān | sīm | bandhāt | amuñcatām | nabhantām | anyake | same ||8.040.08||

8.040.09a pūrvīṣ ṭa indropamātayaḥ pūrvīr uta praśastayaḥ sūno hinvasya harivaḥ |
8.040.09d vasvo vīrasyāpṛco yā nu sādhanta no dhiyo nabhantām anyake same ||

pūrvīḥ | te | indra | upa-mātayaḥ | pūrvīḥ | uta | pra-śastayaḥ | sūno iti | hinvasya | hari-vaḥ |
vasvaḥ | vīrasya | ā-pṛcaḥ | yāḥ | nu | sādhanta | naḥ | dhiyaḥ | nabhantām | anyake | same ||8.040.09||

8.040.10a taṁ śiśītā suvṛktibhis tveṣaṁ satvānam ṛgmiyam |
8.040.10c uto nu cid ya ojasā śuṣṇasyāṇḍāni bhedati jeṣat svarvatīr apo nabhantām anyake same ||

tam | śiśīta | suvṛkti-bhiḥ | tveṣam | satvānam | ṛgmiyam |
uto iti | nu | cit | yaḥ | ojasā | śuṣṇasya | āṇḍāni | bhedati | jeṣat | svaḥ-vatīḥ | apaḥ | nabhantām | anyake | same ||8.040.10||

8.040.11a taṁ śiśītā svadhvaraṁ satyaṁ satvānam ṛtviyam |
8.040.11c uto nu cid ya ohata āṇḍā śuṣṇasya bhedaty ajaiḥ svarvatīr apo nabhantām anyake same ||

tam | śiśīta | su-adhvaram | satyam | satvānam | ṛtviyam |
uto iti | nu | cit | yaḥ | ohate | āṇḍā | śuṣṇasya | bhedati | ajaiḥ | svaḥ-vatīḥ | apaḥ | nabhantām | anyake | same ||8.040.11||

8.040.12a evendrāgnibhyām pitṛvan navīyo mandhātṛvad aṅgirasvad avāci |
8.040.12c tridhātunā śarmaṇā pātam asmān vayaṁ syāma patayo rayīṇām ||

eva | indrāgni-bhyām | pitṛ-vat | navīyaḥ | mandhātṛ-vat | aṅgirasvat | avāci |
tri-dhātunā | śarmaṇā | pātam | asmān | vayam | syāma | patayaḥ | rayīṇām ||8.040.12||


8.041.01a asmā ū ṣu prabhūtaye varuṇāya marudbhyo 'rcā viduṣṭarebhyaḥ |
8.041.01d yo dhītā mānuṣāṇām paśvo gā iva rakṣati nabhantām anyake same ||

asmai | ūm̐ iti | su | pra-bhūtaye | varuṇāya | marut-bhyaḥ | arca | viduḥ-tarebhyaḥ |
yaḥ | dhītā | mānuṣāṇām | paśvaḥ | gāḥ-iva | rakṣati | nabhantām | anyake | same ||8.041.01||

8.041.02a tam ū ṣu samanā girā pitṝṇāṁ ca manmabhiḥ |
8.041.02c nābhākasya praśastibhir yaḥ sindhūnām upodaye saptasvasā sa madhyamo nabhantām anyake same ||

tam | ūm̐ iti | su | samanā | girā | pitṝṇām | ca | manma-bhiḥ |
nābhākasya | prasasti-bhiḥ | yaḥ | sindhūnām | upa | ut-aye | sapta-svasā | saḥ | madhyamaḥ | nabhantām | anyake | same ||8.041.02||

8.041.03a sa kṣapaḥ pari ṣasvaje ny usro māyayā dadhe sa viśvam pari darśataḥ |
8.041.03d tasya venīr anu vratam uṣas tisro avardhayan nabhantām anyake same ||

saḥ | kṣapaḥ | pari | sasvaje | ni | usraḥ | māyayā | dadhe | saḥ | viśvam | pari | darśataḥ |
tasya | venīḥ | anu | vratam | uṣaḥ | tisraḥ | avardhayan | nabhantām | anyake | same ||8.041.03||

8.041.04a yaḥ kakubho nidhārayaḥ pṛthivyām adhi darśataḥ |
8.041.04c sa mātā pūrvyam padaṁ tad varuṇasya saptyaṁ sa hi gopā iveryo nabhantām anyake same ||

yaḥ | kakubhaḥ | ni-dhārayaḥ | pṛthivyām | adhi | darśataḥ |
saḥ | mātā | pūrvyam | padam | tat | varuṇasya | saptyam | saḥ | hi | gopāḥ-iva | iryaḥ | nabhantām | anyake | same ||8.041.04||

8.041.05a yo dhartā bhuvanānāṁ ya usrāṇām apīcyā veda nāmāni guhyā |
8.041.05d sa kaviḥ kāvyā puru rūpaṁ dyaur iva puṣyati nabhantām anyake same ||

yaḥ | dhartā | bhuvanānām | yaḥ | usrāṇām | apīcyā | veda | nāmāni | guhyā |
saḥ | kaviḥ | kāvyā | puru | rūpam | dyauḥ-iva | puṣyati | nabhantām | anyake | same ||8.041.05||

8.041.06a yasmin viśvāni kāvyā cakre nābhir iva śritā |
8.041.06c tritaṁ jūtī saparyata vraje gāvo na saṁyuje yuje aśvām̐ ayukṣata nabhantām anyake same ||

yasmin | viśvāni | kāvyā | cakre | nābhiḥ-iva | śritā |
tritam | jūtī | saparyata | vraje | gāvaḥ | na | sam-yuje | yuje | aśvān | ayukṣata | nabhantām | anyake | same ||8.041.06||

8.041.07a ya āsv atka āśaye viśvā jātāny eṣām |
8.041.07c pari dhāmāni marmṛśad varuṇasya puro gaye viśve devā anu vrataṁ nabhantām anyake same ||

yaḥ | āsu | atkaḥ | ā-śaye | viśvā | jātāni | eṣām |
pari | dhāmāni | marmṛśat | varuṇasya | puraḥ | gayaḥ | viśve | devāḥ | anu | vratam | nabhantām | anyake | same ||8.041.07||

8.041.08a sa samudro apīcyas turo dyām iva rohati ni yad āsu yajur dadhe |
8.041.08d sa māyā arcinā padāstṛṇān nākam āruhan nabhantām anyake same ||

saḥ | samudraḥ | apīcyaḥ | turaḥ | dyām-iva | rohati | ni | yat | āsu | yajuḥ | dadhe |
saḥ | māyāḥ | arcinā | padā | astṛṇāt | nākam | ā | aruhat | nabhantām | anyake | same ||8.041.08||

8.041.09a yasya śvetā vicakṣaṇā tisro bhūmīr adhikṣitaḥ |
8.041.09c trir uttarāṇi papratur varuṇasya dhruvaṁ sadaḥ sa saptānām irajyati nabhantām anyake same ||

yasya | śvetā | vi-cakṣaṇā | tisraḥ | bhūmīḥ | adhi-kṣitaḥ |
triḥ | ut-tarāṇi | papratuḥ | varuṇasya | dhruvam | sadaḥ | saḥ | saptānām | irajyati | nabhantām | anyake | same ||8.041.09||

8.041.10a yaḥ śvetām̐ adhinirṇijaś cakre kṛṣṇām̐ anu vratā |
8.041.10c sa dhāma pūrvyam mame yaḥ skambhena vi rodasī ajo na dyām adhārayan nabhantām anyake same ||

yaḥ | śvetān | adhi-nirnijaḥ | cakre | kṛṣṇān | anu | vratā |
saḥ | dhāma | pūrvyam | mame | yaḥ | skambhena | vi | rodasī iti | ajaḥ | na | dyām | adhārayat | nabhantām | anyake | same ||8.041.10||


8.042.01a astabhnād dyām asuro viśvavedā amimīta varimāṇam pṛthivyāḥ |
8.042.01c āsīdad viśvā bhuvanāni samrāḍ viśvet tāni varuṇasya vratāni ||

astabhnāt | dyām | asuraḥ | viśva-vedāḥ | amimīta | varimāṇam | pṛthivyāḥ |
ā | asīdat | viśvā | bhuvanāni | sam-rāṭ | viśvā | it | tāni | varuṇasya | vratāni ||8.042.01||

8.042.02a evā vandasva varuṇam bṛhantaṁ namasyā dhīram amṛtasya gopām |
8.042.02c sa naḥ śarma trivarūthaṁ vi yaṁsat pātaṁ no dyāvāpṛthivī upasthe ||

eva | vandasva | varuṇam | bṛhantam | namasya | dhīram | amṛtasya | gopām |
saḥ | naḥ | śarma | tri-varūtham | vi | yaṁsat | patam | naḥ | dyāvāpṛthivī iti | upa-sthe ||8.042.02||

8.042.03a imāṁ dhiyaṁ śikṣamāṇasya deva kratuṁ dakṣaṁ varuṇa saṁ śiśādhi |
8.042.03c yayāti viśvā duritā tarema sutarmāṇam adhi nāvaṁ ruhema ||

imām | dhiyam | śikṣamāṇasya | deva | kratum | dakṣam | varuṇa | sam | śiśādhi |
yayā | ati | viśvā | duḥ-itā | tarema | su-tarmāṇam | adhi | nāvam | ruhema ||8.042.03||

8.042.04a ā vāṁ grāvāṇo aśvinā dhībhir viprā acucyavuḥ |
8.042.04c nāsatyā somapītaye nabhantām anyake same ||

ā | vām | grāvāṇaḥ | aśvinā | dhībhiḥ | viprāḥ | acucyavuḥ |
nāsatyā | soma-pītaye | nabhantām | anyake | same ||8.042.04||

8.042.05a yathā vām atrir aśvinā gīrbhir vipro ajohavīt |
8.042.05c nāsatyā somapītaye nabhantām anyake same ||

yathā | vām | atriḥ | aśvinā | gīḥ-bhiḥ | vipraḥ | ajohavīt |
nāsatyā | soma-pītaye | nabhantām | anyake | same ||8.042.05||

8.042.06a evā vām ahva ūtaye yathāhuvanta medhirāḥ |
8.042.06c nāsatyā somapītaye nabhantām anyake same ||

eva | vām | ahve | ūtaye | yathā | ahuvanta | medhirāḥ |
nāsatyā | soma-pītaye | nabhantām | anyake | same ||8.042.06||


8.043.01a ime viprasya vedhaso 'gner astṛtayajvanaḥ |
8.043.01c giraḥ stomāsa īrate ||

ime | viprasya | vedhasaḥ | agneḥ | astṛta-yajvanaḥ |
giraḥ | stomāsaḥ | īrate ||8.043.01||

8.043.02a asmai te pratiharyate jātavedo vicarṣaṇe |
8.043.02c agne janāmi suṣṭutim ||

asmai | te | prati-haryate | jāta-vedaḥ | vi-carṣaṇe |
agne | janāmi | su-stutim ||8.043.02||

8.043.03a ārokā iva ghed aha tigmā agne tava tviṣaḥ |
8.043.03c dadbhir vanāni bapsati ||

ārokāḥ-iva | gha | it | aha | tigmāḥ | agne | tava | tviṣaḥ |
dat-bhiḥ | vanāni | bapsati ||8.043.03||

8.043.04a harayo dhūmaketavo vātajūtā upa dyavi |
8.043.04c yatante vṛthag agnayaḥ ||

harayaḥ | dhūma-ketavaḥ | vāta-jūtāḥ | upa | dyavi |
yatante | vṛthak | agnayaḥ ||8.043.04||

8.043.05a ete tye vṛthag agnaya iddhāsaḥ sam adṛkṣata |
8.043.05c uṣasām iva ketavaḥ ||

ete | tye | vṛthak | agnayaḥ | iddhāsaḥ | sam | adṛkṣata |
uṣasām-iva | ketavaḥ ||8.043.05||

8.043.06a kṛṣṇā rajāṁsi patsutaḥ prayāṇe jātavedasaḥ |
8.043.06c agnir yad rodhati kṣami ||

kṛṣṇā | rajāṁsi | patsutaḥ | pra-yāṇe | jāta-vedasaḥ |
agniḥ | yat | rodhati | kṣami ||8.043.06||

8.043.07a dhāsiṁ kṛṇvāna oṣadhīr bapsad agnir na vāyati |
8.043.07c punar yan taruṇīr api ||

dhāsim | kṛṇvānaḥ | oṣadhīḥ | bapsat | agniḥ | na | vāyati |
punaḥ | yan | taruṇīḥ | api ||8.043.07||

8.043.08a jihvābhir aha nannamad arciṣā jañjaṇābhavan |
8.043.08c agnir vaneṣu rocate ||

jihvābhiḥ | aha | nannamat | arciṣā | jañjaṇā-bhavan |
agniḥ | vaneṣu | rocate ||8.043.08||

8.043.09a apsv agne sadhiṣ ṭava sauṣadhīr anu rudhyase |
8.043.09c garbhe sañ jāyase punaḥ ||

ap-su | agne | sadhiḥ | tava | saḥ | oṣadhīḥ | anu | rudhyase |
garbhe | san | jāyase | punariti ||8.043.09||

8.043.10a ud agne tava tad ghṛtād arcī rocata āhutam |
8.043.10c niṁsānaṁ juhvo mukhe ||

ut | agne | tava | tat | ghṛtāt | arciḥ | rocate | ā-hutam |
niṁsānam | juhvaḥ | mukhe ||8.043.10||

8.043.11a ukṣānnāya vaśānnāya somapṛṣṭhāya vedhase |
8.043.11c stomair vidhemāgnaye ||

ukṣa-annāya | vaśā-annāya | soma-pṛṣṭhāya | vedhase |
stomaiḥ | vidhema | agnaye ||8.043.11||

8.043.12a uta tvā namasā vayaṁ hotar vareṇyakrato |
8.043.12c agne samidbhir īmahe ||

uta | tvā | namasā | vayam | hotaḥ | vareṇyakrato iti vareṇya-krato |
agne | samit-bhiḥ | īmahe ||8.043.12||

8.043.13a uta tvā bhṛguvac chuce manuṣvad agna āhuta |
8.043.13c aṅgirasvad dhavāmahe ||

uta | tvā | bhṛgu-vat | śuce | manuṣvat | agne | ā-huta |
aṅgirasvat | havāmahe ||8.043.13||

8.043.14a tvaṁ hy agne agninā vipro vipreṇa san satā |
8.043.14c sakhā sakhyā samidhyase ||

tvam | hi | agne | agninā | vipraḥ | vipreṇa | san | satā |
sakhā | sakhyā | sam-idhyase ||8.043.14||

8.043.15a sa tvaṁ viprāya dāśuṣe rayiṁ dehi sahasriṇam |
8.043.15c agne vīravatīm iṣam ||

saḥ | tvam | viprāya | dāśuṣe | rayim | dehi | sahasriṇam |
agne | vīra-vatīm | iṣam ||8.043.15||

8.043.16a agne bhrātaḥ sahaskṛta rohidaśva śucivrata |
8.043.16c imaṁ stomaṁ juṣasva me ||

agne | bhrātariti | sahaḥ-kṛta | rohit-aśva | śuci-vrata |
imam | stomam | juṣasva | me ||8.043.16||

8.043.17a uta tvāgne mama stuto vāśrāya pratiharyate |
8.043.17c goṣṭhaṁ gāva ivāśata ||

uta | tvā | agne | mama | stutaḥ | vāśrāya | prati-haryate |
go-stham | gāvaḥ-iva | āśata ||8.043.17||

8.043.18a tubhyaṁ tā aṅgirastama viśvāḥ sukṣitayaḥ pṛthak |
8.043.18c agne kāmāya yemire ||

tubhyam | tāḥ | aṅgiraḥ-tama | viśvāḥ | su-kṣitayaḥ | pṛthak |
agne | kāmāya | yemire ||8.043.18||

8.043.19a agniṁ dhībhir manīṣiṇo medhirāso vipaścitaḥ |
8.043.19c admasadyāya hinvire ||

agnim | dhībhiḥ | manīṣiṇaḥ | medhirāsaḥ | vipaḥ-citaḥ |
adma-sadyāya | hinvire ||8.043.19||

8.043.20a taṁ tvām ajmeṣu vājinaṁ tanvānā agne adhvaram |
8.043.20c vahniṁ hotāram īḻate ||

tam | tvām | ajmeṣu | vājinam | tanvānāḥ | agne | adhvaram |
vahnim | hotāram | īḻate ||8.043.20||

8.043.21a purutrā hi sadṛṅṅ asi viśo viśvā anu prabhuḥ |
8.043.21c samatsu tvā havāmahe ||

puru-trā | hi | sadṛṅ | asi | viśaḥ | viśvāḥ | anu | pra-bhuḥ |
samat-su | tvā | havāmahe ||8.043.21||

8.043.22a tam īḻiṣva ya āhuto 'gnir vibhrājate ghṛtaiḥ |
8.043.22c imaṁ naḥ śṛṇavad dhavam ||

tam | īḻiṣva | yaḥ | ā-hutaḥ | agniḥ | vi-bhrājate | ghṛtaiḥ |
imam | naḥ | śṛṇavat | havam ||8.043.22||

8.043.23a taṁ tvā vayaṁ havāmahe śṛṇvantaṁ jātavedasam |
8.043.23c agne ghnantam apa dviṣaḥ ||

tam | tvā | vayam | havāmahe | śṛṇvantam | jāta-vedasam |
agne | ghnantam | apa | dviṣaḥ ||8.043.23||

8.043.24a viśāṁ rājānam adbhutam adhyakṣaṁ dharmaṇām imam |
8.043.24c agnim īḻe sa u śravat ||

viśām | rājānam | adbhutam | adhi-akṣam | dharmaṇām | imam |
agnim | īḻe | saḥ | ūm̐ iti | śravat ||8.043.24||

8.043.25a agniṁ viśvāyuvepasam maryaṁ na vājinaṁ hitam |
8.043.25c saptiṁ na vājayāmasi ||

agnim | viśvāyu-vepasam | maryam | na | vājinam | hitam |
saptim | na | vājayāmasi ||8.043.25||

8.043.26a ghnan mṛdhrāṇy apa dviṣo dahan rakṣāṁsi viśvahā |
8.043.26c agne tigmena dīdihi ||

ghnan | mṛdhrāṇi | apa | dviṣaḥ | dahan | rakṣāṁsi | viśvahā |
agne | tigmena | dīdihi ||8.043.26||

8.043.27a yaṁ tvā janāsa indhate manuṣvad aṅgirastama |
8.043.27c agne sa bodhi me vacaḥ ||

yam | tvā | janāsaḥ | indhate | manuṣvat | aṅgiraḥ-tama |
agne | saḥ | bodhi | me | vacaḥ ||8.043.27||

8.043.28a yad agne divijā asy apsujā vā sahaskṛta |
8.043.28c taṁ tvā gīrbhir havāmahe ||

yat | agne | divi-jāḥ | asi | apsu-jāḥ | vā | sahaḥ-kṛta |
tam | tvā | gīḥ-bhiḥ | havāmahe ||8.043.28||

8.043.29a tubhyaṁ ghet te janā ime viśvāḥ sukṣitayaḥ pṛthak |
8.043.29c dhāsiṁ hinvanty attave ||

tubhyam | gha | it | te | janāḥ | ime | viśvāḥ | su-kṣitayaḥ | pṛthak |
dhāsim | hinvanti | attave ||8.043.29||

8.043.30a te ghed agne svādhyo 'hā viśvā nṛcakṣasaḥ |
8.043.30c tarantaḥ syāma durgahā ||

te | gha | it | agne | su-ādhyaḥ | ahā | viśvā | nṛ-cakṣasaḥ |
tarantaḥ | syāma | duḥ-gahā ||8.043.30||

8.043.31a agnim mandram purupriyaṁ śīram pāvakaśociṣam |
8.043.31c hṛdbhir mandrebhir īmahe ||

agnim | mandram | puru-priyam | śīram | pāvaka-śociṣam |
hṛt-bhiḥ | mandrebhiḥ | īmahe ||8.043.31||

8.043.32a sa tvam agne vibhāvasuḥ sṛjan sūryo na raśmibhiḥ |
8.043.32c śardhan tamāṁsi jighnase ||

saḥ | tvam | agne | vibhā-vasuḥ | sṛjan | sūryaḥ | na | raśmi-bhiḥ |
śardhan | tamāṁsi | jighnase ||8.043.32||

8.043.33a tat te sahasva īmahe dātraṁ yan nopadasyati |
8.043.33c tvad agne vāryaṁ vasu ||

tat | te | sahasvaḥ | īmahe | dātram | yat | na | upa-dasyati |
tvat | agne | vāryam | vasu ||8.043.33||


8.044.01a samidhāgniṁ duvasyata ghṛtair bodhayatātithim |
8.044.01c āsmin havyā juhotana ||

sam-idhā | agnim | duvasyata | ghṛtaiḥ | bodhayata | atithim |
ā | asmin | havyā | juhotana ||8.044.01||

8.044.02a agne stomaṁ juṣasva me vardhasvānena manmanā |
8.044.02c prati sūktāni harya naḥ ||

agne | stomam | juṣasva | me | vardhasva | anena | manmanā |
prati | su-uktāni | harya | naḥ ||8.044.02||

8.044.03a agniṁ dūtam puro dadhe havyavāham upa bruve |
8.044.03c devām̐ ā sādayād iha ||

agnim | dūtam | puraḥ | dadhe | havya-vāham | upa | bruve |
devān | ā | sādayāt | iha ||8.044.03||

8.044.04a ut te bṛhanto arcayaḥ samidhānasya dīdivaḥ |
8.044.04c agne śukrāsa īrate ||

ut | te | bṛhantaḥ | arcayaḥ | sam-idhānasya | dīdi-vaḥ |
agne | śukrāsaḥ | īrate ||8.044.04||

8.044.05a upa tvā juhvo mama ghṛtācīr yantu haryata |
8.044.05c agne havyā juṣasva naḥ ||

upa | tvā | juhvaḥ | mama | ghṛtācīḥ | yantu | haryata |
agne | havyā | juṣasva | naḥ ||8.044.05||

8.044.06a mandraṁ hotāram ṛtvijaṁ citrabhānuṁ vibhāvasum |
8.044.06c agnim īḻe sa u śravat ||

mandram | hotāram | ṛtvijam | citra-bhānum | vibhā-vasum |
agnim | īḻe | saḥ | ūm̐ iti | śravat ||8.044.06||

8.044.07a pratnaṁ hotāram īḍyaṁ juṣṭam agniṁ kavikratum |
8.044.07c adhvarāṇām abhiśriyam ||

pratnam | hotāram | īḍyam | juṣṭam | agnim | kavi-kratum |
adhvarāṇām | abhi-śriyam ||8.044.07||

8.044.08a juṣāṇo aṅgirastamemā havyāny ānuṣak |
8.044.08c agne yajñaṁ naya ṛtuthā ||

juṣāṇaḥ | aṅgiraḥ-tama | imā | havyāni | ānuṣak |
agne | yajñam | naya | ṛtu-thā ||8.044.08||

8.044.09a samidhāna u santya śukraśoca ihā vaha |
8.044.09c cikitvān daivyaṁ janam ||

sam-idhānaḥ | ūm̐ iti | santya | śukra-śoce | iha | ā | vaha |
cikitvān | daivyam | janam ||8.044.09||

8.044.10a vipraṁ hotāram adruhaṁ dhūmaketuṁ vibhāvasum |
8.044.10c yajñānāṁ ketum īmahe ||

vipram | hotāram | adruham | dhūma-ketum | vibhā-vasum |
yajñānām | ketum | īmahe ||8.044.10||

8.044.11a agne ni pāhi nas tvam prati ṣma deva rīṣataḥ |
8.044.11c bhindhi dveṣaḥ sahaskṛta ||

agne | ni | pāhi | naḥ | tvam | prati | sma | deva | riṣataḥ |
bhindhi | dveṣaḥ | sahaḥ-kṛta ||8.044.11||

8.044.12a agniḥ pratnena manmanā śumbhānas tanvaṁ svām |
8.044.12c kavir vipreṇa vāvṛdhe ||

agniḥ | pratnena | manmanā | śumbhānaḥ | tanvam | svām |
kaviḥ | vipreṇa | vavṛdhe ||8.044.12||

8.044.13a ūrjo napātam ā huve 'gnim pāvakaśociṣam |
8.044.13c asmin yajñe svadhvare ||

ūrjaḥ | napātam | ā | huve | agnim | pāvaka-śociṣam |
asmin | yajñe | su-adhvare ||8.044.13||

8.044.14a sa no mitramahas tvam agne śukreṇa śociṣā |
8.044.14c devair ā satsi barhiṣi ||

saḥ | naḥ | mitra-mahaḥ | tvam | agne | śukreṇa | śociṣā |
devaiḥ | ā | satsi | barhiṣi ||8.044.14||

8.044.15a yo agniṁ tanvo dame devam martaḥ saparyati |
8.044.15c tasmā id dīdayad vasu ||

yaḥ | agnim | tanvaḥ | dame | devam | martaḥ | saparyati |
tasmai | it | dīdayat | vasu ||8.044.15||

8.044.16a agnir mūrdhā divaḥ kakut patiḥ pṛthivyā ayam |
8.044.16c apāṁ retāṁsi jinvati ||

agniḥ | mūrdhā | divaḥ | kakut | patiḥ | pṛthivyāḥ | ayam |
apām | retāṁsi | jinvati ||8.044.16||

8.044.17a ud agne śucayas tava śukrā bhrājanta īrate |
8.044.17c tava jyotīṁṣy arcayaḥ ||

ut | agne | śucayaḥ | tava | śukrāḥ | bhrājantaḥ | īrate |
tava | jyotīṁṣi | arcayaḥ ||8.044.17||

8.044.18a īśiṣe vāryasya hi dātrasyāgne svarpatiḥ |
8.044.18c stotā syāṁ tava śarmaṇi ||

īśiṣe | vāryasya | hi | dātrasya | agne | svaḥ-patiḥ |
stotā | syām | tava | śarmaṇi ||8.044.18||

8.044.19a tvām agne manīṣiṇas tvāṁ hinvanti cittibhiḥ |
8.044.19c tvāṁ vardhantu no giraḥ ||

tvām | agne | manīṣiṇaḥ | tvām | hinvanti | citti-bhiḥ |
tvām | vardhantu | naḥ | giraḥ ||8.044.19||

8.044.20a adabdhasya svadhāvato dūtasya rebhataḥ sadā |
8.044.20c agneḥ sakhyaṁ vṛṇīmahe ||

adabdhasya | svadhā-vataḥ | dūtasya | rebhataḥ | sadā |
agneḥ | sakhyam | vṛṇīmahe ||8.044.20||

8.044.21a agniḥ śucivratatamaḥ śucir vipraḥ śuciḥ kaviḥ |
8.044.21c śucī rocata āhutaḥ ||

agniḥ | śucivrata-tamaḥ | śuciḥ | vipraḥ | śuciḥ | kaviḥ |
śuciḥ | rocate | ā-hutaḥ ||8.044.21||

8.044.22a uta tvā dhītayo mama giro vardhantu viśvahā |
8.044.22c agne sakhyasya bodhi naḥ ||

uta | tvā | dhītayaḥ | mama | giraḥ | vṛdhantu | visvahā |
agne | sakhyasya | bodhi | naḥ ||8.044.22||

8.044.23a yad agne syām ahaṁ tvaṁ tvaṁ vā ghā syā aham |
8.044.23c syuṣ ṭe satyā ihāśiṣaḥ ||

yat | agne | syām | aham | tvam | tvam | vā | gha | syāḥ | aham |
syuḥ | te | satyāḥ | iha | ā-śiṣaḥ ||8.044.23||

8.044.24a vasur vasupatir hi kam asy agne vibhāvasuḥ |
8.044.24c syāma te sumatāv api ||

vasuḥ | vasu-patiḥ | hi | kam | asi | agne | vibhā-vasuḥ |
syāma | te | su-matau | api ||8.044.24||

8.044.25a agne dhṛtavratāya te samudrāyeva sindhavaḥ |
8.044.25c giro vāśrāsa īrate ||

agne | dhṛta-vratāya | te | samudrāya-iva | sindhavaḥ |
giraḥ | vāśrāsaḥ | īrate ||8.044.25||

8.044.26a yuvānaṁ viśpatiṁ kaviṁ viśvādam puruvepasam |
8.044.26c agniṁ śumbhāmi manmabhiḥ ||

yuvānam | viśpatim | kavim | viśva-adam | puru-vepasam |
agnim | śumbhāmi | manma-bhiḥ ||8.044.26||

8.044.27a yajñānāṁ rathye vayaṁ tigmajambhāya vīḻave |
8.044.27c stomair iṣemāgnaye ||

yajñānām | rathye | vayam | tigma-jambhāya | vīḻave |
stomaiḥ | iṣema | agnaye ||8.044.27||

8.044.28a ayam agne tve api jaritā bhūtu santya |
8.044.28c tasmai pāvaka mṛḻaya ||

ayam | agne | tve iti | api | jaritā | bhūtu | santya |
tasmai | pāvaka | mṛḻaya ||8.044.28||

8.044.29a dhīro hy asy admasad vipro na jāgṛviḥ sadā |
8.044.29c agne dīdayasi dyavi ||

dhīraḥ | hi | asi | adma-sat | vipraḥ | na | jāgṛviḥ | sadā |
agne | dīdayasi | dyavi ||8.044.29||

8.044.30a purāgne duritebhyaḥ purā mṛdhrebhyaḥ kave |
8.044.30c pra ṇa āyur vaso tira ||

purā | agne | duḥ-itebhyaḥ | purā | mṛdhrebhyaḥ | kave |
pra | naḥ | āyuḥ | vaso iti | tira ||8.044.30||


8.045.01a ā ghā ye agnim indhate stṛṇanti barhir ānuṣak |
8.045.01c yeṣām indro yuvā sakhā ||

ā | gha | ye | agnim | indhate | stṛṇanti | barhiḥ | ānuṣak |
yeṣām | indraḥ | yuvā | sakhā ||8.045.01||

8.045.02a bṛhann id idhma eṣām bhūri śastam pṛthuḥ svaruḥ |
8.045.02c yeṣām indro yuvā sakhā ||

bṛhan | it | idhmaḥ | eṣām | bhūri | śastam | pṛthu | svaruḥ |
yeṣām | indraḥ | yuvā | sakhā ||8.045.02||

8.045.03a ayuddha id yudhā vṛtaṁ śūra ājati satvabhiḥ |
8.045.03c yeṣām indro yuvā sakhā ||

ayuddhaḥ | it | yudhā | vṛtam | śūraḥ | ā | ajati | satva-bhiḥ |
yeṣām | indraḥ | yuvā | sakhā ||8.045.03||

8.045.04a ā bundaṁ vṛtrahā dade jātaḥ pṛcchad vi mātaram |
8.045.04c ka ugrāḥ ke ha śṛṇvire ||

ā | bundam | vṛtra-hā | dade | jātaḥ | pṛcchat | vi | mātaram |
ke | ugrāḥ | ke | ha | śṛṇvire ||8.045.04||

8.045.05a prati tvā śavasī vadad girāv apso na yodhiṣat |
8.045.05c yas te śatrutvam ācake ||

prati | tvā | śavasī | vadat | ghirau | apsaḥ | na | yodhiṣat |
yaḥ | te | śatru-tvam | ā-cake ||8.045.05||

8.045.06a uta tvam maghavañ chṛṇu yas te vaṣṭi vavakṣi tat |
8.045.06c yad vīḻayāsi vīḻu tat ||

uta | tvam | magha-van | śṛṇu | yaḥ | te | vaṣṭi | vavakṣi | tat |
yat | vīḻayāsi | vīḻu | tat ||8.045.06||

8.045.07a yad ājiṁ yāty ājikṛd indraḥ svaśvayur upa |
8.045.07c rathītamo rathīnām ||

yat | ājim | yāti | āji-kṛt | indraḥ | svaśva-yuḥ | upa |
rathi-tamaḥ | rathīnām ||8.045.07||

8.045.08a vi ṣu viśvā abhiyujo vajrin viṣvag yathā vṛha |
8.045.08c bhavā naḥ suśravastamaḥ ||

vi | su | viśvāḥ | abhi-yujaḥ | vajrin | viṣvak | yathā | vṛha |
bhava | naḥ | suśravaḥ-tamaḥ ||8.045.08||

8.045.09a asmākaṁ su ratham pura indraḥ kṛṇotu sātaye |
8.045.09c na yaṁ dhūrvanti dhūrtayaḥ ||

asmākam | su | ratham | puraḥ | indraḥ | kṛṇotu | sātaye |
na | yam | dhūrvanti | dhūrtayaḥ ||8.045.09||

8.045.10a vṛjyāma te pari dviṣo 'raṁ te śakra dāvane |
8.045.10c gamemed indra gomataḥ ||

vṛjyāma | te | pari | dviṣaḥ | aram | te | śakra | dāvane |
gamema | it | indra | go-mataḥ ||8.045.10||

8.045.11a śanaiś cid yanto adrivo 'śvāvantaḥ śatagvinaḥ |
8.045.11c vivakṣaṇā anehasaḥ ||

śanaiḥ | cit | yantaḥ | adri-vaḥ | aśva-vantaḥ | śata-gvinaḥ |
vivakṣaṇāḥ | anehasaḥ ||8.045.11||

8.045.12a ūrdhvā hi te dive-dive sahasrā sūnṛtā śatā |
8.045.12c jaritṛbhyo vimaṁhate ||

ūrdhvā | hi | te | dive-dive | sahasrā | sūnṛtā | śatā |
jaritṛ-bhyaḥ | vi-maṁhate ||8.045.12||

8.045.13a vidmā hi tvā dhanaṁjayam indra dṛḻhā cid ārujam |
8.045.13c ādāriṇaṁ yathā gayam ||

vidma | hi | tvā | dhanam-jayam | indra | dṛḻhā | cit | ā-rujam |
ādāriṇam | yathā | gayam ||8.045.13||

8.045.14a kakuhaṁ cit tvā kave mandantu dhṛṣṇav indavaḥ |
8.045.14c ā tvā paṇiṁ yad īmahe ||

kakuham | cit | tvā | kave | mandantu | dhṛṣṇo iti | indavaḥ |
ā | tvā | paṇim | yat | īmahe ||8.045.14||

8.045.15a yas te revām̐ adāśuriḥ pramamarṣa maghattaye |
8.045.15c tasya no veda ā bhara ||

yaḥ | te | revān | adāśuriḥ | pra-mamarṣa | maghattaye |
tasya | naḥ | vedaḥ | ā | bhara ||8.045.15||

8.045.16a ima u tvā vi cakṣate sakhāya indra sominaḥ |
8.045.16c puṣṭāvanto yathā paśum ||

ime | ūm̐ iti | tvā | vi | cakṣate | sakhāyaḥ | indra | sominaḥ |
puṣṭa-vantaḥ | yathā | paśum ||8.045.16||

8.045.17a uta tvābadhiraṁ vayaṁ śrutkarṇaṁ santam ūtaye |
8.045.17c dūrād iha havāmahe ||

uta | tvā | abadhiram | vayam | śrut-karṇam | santam | ūtaye |
dūrāt | iha | havāmahe ||8.045.17||

8.045.18a yac chuśrūyā imaṁ havaṁ durmarṣaṁ cakriyā uta |
8.045.18c bhaver āpir no antamaḥ ||

yat | śuśrūyāḥ | imam | havam | duḥ-marṣam | cakriyāḥ | uta |
bhaveḥ | āpiḥ | naḥ | antamaḥ ||8.045.18||

8.045.19a yac cid dhi te api vyathir jaganvāṁso amanmahi |
8.045.19c godā id indra bodhi naḥ ||

yat | cit | hi | te | api | vyathiḥ | jaganvāṁsaḥ | amanmahi |
go-dāḥ | it | indra | bodhi | naḥ ||8.045.19||

8.045.20a ā tvā rambhaṁ na jivrayo rarabhmā śavasas pate |
8.045.20c uśmasi tvā sadhastha ā ||

ā | tvā | rambham | na | jivrayaḥ | rarabhma | śavasaḥ | pate |
uśmasi | tvā | sadha-sthe | ā ||8.045.20||

8.045.21a stotram indrāya gāyata purunṛmṇāya satvane |
8.045.21c nakir yaṁ vṛṇvate yudhi ||

stotram | indrāya | gāyata | puru-nṛmṇāya | satvane |
nakiḥ | yam | vṛṇvate | yudhi ||8.045.21||

8.045.22a abhi tvā vṛṣabhā sute sutaṁ sṛjāmi pītaye |
8.045.22c tṛmpā vy aśnuhī madam ||

abhi | tvā | vṛṣabha | sute | sutam | sṛjāmi | pītaye |
tṛmpa | vi | aśnuhi | madam ||8.045.22||

8.045.23a mā tvā mūrā aviṣyavo mopahasvāna ā dabhan |
8.045.23c mākīm brahmadviṣo vanaḥ ||

mā | tvā | mūrāḥ | aviṣyavaḥ | mā | upa-hasvānaḥ | ā | dabhan |
mākīm | brahma-dviṣaḥ | vanaḥ ||8.045.23||

8.045.24a iha tvā goparīṇasā mahe mandantu rādhase |
8.045.24c saro gauro yathā piba ||

iha | tvā | go-parīṇasā | mahe | mandantu | rādhase |
saraḥ | gauraḥ | yathā | piba ||8.045.24||

8.045.25a yā vṛtrahā parāvati sanā navā ca cucyuve |
8.045.25c tā saṁsatsu pra vocata ||

yā | vṛtra-hā | parā-vati | sanā | navā | ca | cucyuve |
tā | saṁsat-su | pra | vocata ||8.045.25||

8.045.26a apibat kadruvaḥ sutam indraḥ sahasrabāhve |
8.045.26c atrādediṣṭa pauṁsyam ||

apibat | kadruvaḥ | sutam | indraḥ | sahasra-bāhve |
atra | adediṣṭa | pauṁsyam ||8.045.26||

8.045.27a satyaṁ tat turvaśe yadau vidāno ahnavāyyam |
8.045.27c vy ānaṭ turvaṇe śami ||

satyam | tat | turvaśe | yadau | vidānaḥ | ahnavāyyam |
vi | ānaṭ | turvaṇe | śami ||8.045.27||

8.045.28a taraṇiṁ vo janānāṁ tradaṁ vājasya gomataḥ |
8.045.28c samānam u pra śaṁsiṣam ||

taraṇim | vaḥ | janānām | tradam | vājasya | go-mataḥ |
samānam | ūm̐ iti | pra | śaṁsiṣam ||8.045.28||

8.045.29a ṛbhukṣaṇaṁ na vartava uktheṣu tugryāvṛdham |
8.045.29c indraṁ some sacā sute ||

ṛbhukṣaṇam | na | vartave | uktheṣu | tugrya-vṛdham |
indram | some | sacā | sute ||8.045.29||

8.045.30a yaḥ kṛntad id vi yonyaṁ triśokāya girim pṛthum |
8.045.30c gobhyo gātuṁ niretave ||

yaḥ | kṛntat | it | vi | yonyam | tri-śokāya | girim | pṛthum |
go-bhyaḥ | gātum | niḥ-etave ||8.045.30||

8.045.31a yad dadhiṣe manasyasi mandānaḥ pred iyakṣasi |
8.045.31c mā tat kar indra mṛḻaya ||

yat | dadhiṣe | manasyasi | mandānaḥ | pra | it | iyakṣasi |
mā | tat | kaḥ | indra | mṛḻaya ||8.045.31||

8.045.32a dabhraṁ cid dhi tvāvataḥ kṛtaṁ śṛṇve adhi kṣami |
8.045.32c jigātv indra te manaḥ ||

dabhram | cit | hi | tvāvataḥ | kṛtam | śṛṇve | adhi | kṣami |
jigātu | indra | te | manaḥ ||8.045.32||

8.045.33a taved u tāḥ sukīrtayo 'sann uta praśastayaḥ |
8.045.33c yad indra mṛḻayāsi naḥ ||

tava | it | ūm̐ iti | tāḥ | su-kīrtayaḥ | asan | uta | pra-śastayaḥ |
yat | indra | mṛḻayāsi | naḥ ||8.045.33||

8.045.34a mā na ekasminn āgasi mā dvayor uta triṣu |
8.045.34c vadhīr mā śūra bhūriṣu ||

mā | naḥ | ekasmin | āgasi | mā | dvayoḥ | uta | triṣu |
vadhīḥ | mā | śūra | bhūriṣu ||8.045.34||

8.045.35a bibhayā hi tvāvata ugrād abhiprabhaṅgiṇaḥ |
8.045.35c dasmād aham ṛtīṣahaḥ ||

bibhaya | hi | tvā-vataḥ | ugrāt | abhi-prabhaṅginaḥ |
dasmāt | aham | ṛti-sahaḥ ||8.045.35||

8.045.36a mā sakhyuḥ śūnam ā vide mā putrasya prabhūvaso |
8.045.36c āvṛtvad bhūtu te manaḥ ||

mā | sakhyuḥ | śūnam | ā | vide | mā | putrasya | prabhuvaso iti prabhu-vaso |
ā-vṛtvat | bhūtu | te | manaḥ ||8.045.36||

8.045.37a ko nu maryā amithitaḥ sakhā sakhāyam abravīt |
8.045.37c jahā ko asmad īṣate ||

kaḥ | nu | maryāḥ | amithitaḥ | sakhā | sakhāyam | abravīt |
jahā | kaḥ | asmat | īṣate ||8.045.37||

8.045.38a evāre vṛṣabhā sute 'sinvan bhūry āvayaḥ |
8.045.38c śvaghnīva nivatā caran ||

evāre | vṛṣabha | sute | asinvan | bhūri | āvayaḥ |
śvaghnī-iva | ni-vatā | caran ||8.045.38||

8.045.39a ā ta etā vacoyujā harī gṛbhṇe sumadrathā |
8.045.39c yad īm brahmabhya id dadaḥ ||

ā | te | etā | vacaḥ-yujā | harī iti | gṛbhṇe | samat-rathā |
yat | īm | brahma-bhyaḥ | it | dadaḥ ||8.045.39||

8.045.40a bhindhi viśvā apa dviṣaḥ pari bādho jahī mṛdhaḥ |
8.045.40c vasu spārhaṁ tad ā bhara ||

bhindhi | viśvāḥ | apa | dviṣaḥ | pari | bādhaḥ | jahi | mṛdhaḥ |
vasu | spārham | tat | ā | bhara ||8.045.40||

8.045.41a yad vīḻāv indra yat sthire yat parśāne parābhṛtam |
8.045.41c vasu spārhaṁ tad ā bhara ||

yat | vīḻau | indra | yat | sthire | yat | parśāne | parā-bhṛtam |
vasu | spārham | tat | ā | bhara ||8.045.41||

8.045.42a yasya te viśvamānuṣo bhūrer dattasya vedati |
8.045.42c vasu spārhaṁ tad ā bhara ||

yasya | te | viśva-mānuṣaḥ | bhūreḥ | dattasya | vedati |
vasu | spārham | tat | ā | bhara ||8.045.42||


8.046.01a tvāvataḥ purūvaso vayam indra praṇetaḥ |
8.046.01c smasi sthātar harīṇām ||

tvā-vataḥ | puruvaso iti puru-vaso | vayam | indra | pranetariti pra-netaḥ |
smasi | sthātaḥ | harīṇām ||8.046.01||

8.046.02a tvāṁ hi satyam adrivo vidma dātāram iṣām |
8.046.02c vidma dātāraṁ rayīṇām ||

tvām | hi | satyam | adri-vaḥ | vidma | dātāram | iṣām |
vidma | dātāram | rayīṇām ||8.046.02||

8.046.03a ā yasya te mahimānaṁ śatamūte śatakrato |
8.046.03c gīrbhir gṛṇanti kāravaḥ ||

ā | yasya | te | mahimānam | śatam-ūte | śatakrato iti śata-krato |
gīḥ-bhiḥ | gṛṇanti | kāravaḥ ||8.046.03||

8.046.04a sunītho ghā sa martyo yam maruto yam aryamā |
8.046.04c mitraḥ pānty adruhaḥ ||

su-nīthaḥ | gha | saḥ | martyaḥ | yam | marutaḥ | yam | aryamā |
mitraḥ | pānti | adruhaḥ ||8.046.04||

8.046.05a dadhāno gomad aśvavat suvīryam ādityajūta edhate |
8.046.05c sadā rāyā puruspṛhā ||

dadhānaḥ | go-mat | aśva-vat | su-vīryam | āditya-jūtaḥ | edhate |
sadā | rāyā | puru-spṛhā ||8.046.05||

8.046.06a tam indraṁ dānam īmahe śavasānam abhīrvam |
8.046.06c īśānaṁ rāya īmahe ||

tam | indram | dānam | īmahe | śavasānam | abhīrvam |
īśānam | rāyaḥ | īmahe ||8.046.06||

8.046.07a tasmin hi santy ūtayo viśvā abhīravaḥ sacā |
8.046.07c tam ā vahantu saptayaḥ purūvasum madāya harayaḥ sutam ||

tasmin | hi | santi | ūtayaḥ | viśvāḥ | abhīravaḥ | sacā |
tam | ā | vahantu | saptayaḥ | puru-vasum | madāya | harayaḥ | sutam ||8.046.07||

8.046.08a yas te mado vareṇyo ya indra vṛtrahantamaḥ |
8.046.08c ya ādadiḥ svar nṛbhir yaḥ pṛtanāsu duṣṭaraḥ ||

yaḥ | te | madaḥ | vareṇyaḥ | yaḥ | indra | vṛtrahan-tamaḥ |
yaḥ | ā-dadiḥ | svaḥ | nṛ-bhiḥ | yaḥ | pṛtanāsu | dustaraḥ ||8.046.08||

8.046.09a yo duṣṭaro viśvavāra śravāyyo vājeṣv asti tarutā |
8.046.09c sa naḥ śaviṣṭha savanā vaso gahi gamema gomati vraje ||

yaḥ | dustaraḥ | viśva-vāra | śravāyyaḥ | vājeṣu | asti | tarutā |
saḥ | naḥ | śaviṣṭha | savanā | ā | vaso iti | gahi | gamema | go-mati | vraje ||8.046.09||

8.046.10a gavyo ṣu ṇo yathā purāśvayota rathayā |
8.046.10c varivasya mahāmaha ||

gavyaḥ | su | naḥ | yathā | purā | aśva-yā | uta | ratha-yā |
varivasya | mahā-maha ||8.046.10||

8.046.11a nahi te śūra rādhaso 'ntaṁ vindāmi satrā |
8.046.11c daśasyā no maghavan nū cid adrivo dhiyo vājebhir āvitha ||

nahi | te | śūra | rādhasaḥ | antam | vindāmi | satrā |
daśasya | naḥ | magha-van | nu | cit | adri-vaḥ | dhiyaḥ | vājebhiḥ | āvitha ||8.046.11||

8.046.12a ya ṛṣvaḥ śrāvayatsakhā viśvet sa veda janimā puruṣṭutaḥ |
8.046.12c taṁ viśve mānuṣā yugendraṁ havante taviṣaṁ yatasrucaḥ ||

yaḥ | ṛṣvaḥ | śravayat-sakhā | viśvā | it | saḥ | veda | janima | puru-stutaḥ |
tam | viśve | mānuṣā | yugā | indram | havante | taviṣam | yata-srucaḥ ||8.046.12||

8.046.13a sa no vājeṣv avitā purūvasuḥ puraḥsthātā maghavā vṛtrahā bhuvat ||

saḥ | naḥ | vājeṣu | avitā | puru-vasuḥ | puraḥ-sthātā | magha-vā | vṛtra-hā | bhuvat ||8.046.13||

8.046.14a abhi vo vīram andhaso madeṣu gāya girā mahā vicetasam |
8.046.14c indraṁ nāma śrutyaṁ śākinaṁ vaco yathā ||

abhi | vaḥ | vīram | andhasaḥ | madeṣu | gāya | girā | mahā | vi-cetasam |
indram | nāma | śrutyam | śākinam | vacaḥ | yathā ||8.046.14||

8.046.15a dadī rekṇas tanve dadir vasu dadir vājeṣu puruhūta vājinam |
8.046.15c nūnam atha ||

dadiḥ | rekṇaḥ | tanve | dadiḥ | vasu | dadiḥ | vājeṣu | puru-hūta | vājinam |
nūnam | atha ||8.046.15||

8.046.16a viśveṣām irajyantaṁ vasūnāṁ sāsahvāṁsaṁ cid asya varpasaḥ |
8.046.16c kṛpayato nūnam aty atha ||

viśveṣām | irajyantam | vasūnām | sasahvāṁsam | cit | asya | varpasaḥ |
kṛpa-yataḥ | nūnam | ati | atha ||8.046.16||

8.046.17a mahaḥ su vo aram iṣe stavāmahe mīḻhuṣe araṁgamāya jagmaye |
8.046.17c yajñebhir gīrbhir viśvamanuṣām marutām iyakṣasi gāye tvā namasā girā ||

mahaḥ | su | vaḥ | aram | iṣe | stavāmahe | mīḻhuṣe | aram-gamāya | jagmaye |
yajñebhiḥ | gīḥ-bhiḥ | viśva-manuṣām | marutām | iyakṣasi | gāye | tvā | namasā | girā ||8.046.17||

8.046.18a ye pātayante ajmabhir girīṇāṁ snubhir eṣām |
8.046.18c yajñam mahiṣvaṇīnāṁ sumnaṁ tuviṣvaṇīnām prādhvare ||

ye | pātayante | ajma-bhiḥ | girīṇām | snu-bhiḥ | eṣām |
yajñam | mahi-svaṇīnām | sumnam | tuvi-svaṇīnām | pra | adhvare ||8.046.18||

8.046.19a prabhaṅgaṁ durmatīnām indra śaviṣṭhā bhara |
8.046.19c rayim asmabhyaṁ yujyaṁ codayanmate jyeṣṭhaṁ codayanmate ||

pra-bhaṅgam | duḥ-matīnām | indra | śaviṣṭha | ā | bhara |
rayim | asmabhyam | yujyam | codayat-mate | jyeṣṭham | codayat-mate ||8.046.19||

8.046.20a sanitaḥ susanitar ugra citra cetiṣṭha sūnṛta |
8.046.20c prāsahā samrāṭ sahuriṁ sahantam bhujyuṁ vājeṣu pūrvyam ||

sanitariti | su-sanitaḥ | ugra | citra | cetiṣṭha | sūnṛta |
pra-sahā | sam-rāṭ | sahurim | sahantam | bhujyum | vājeṣu | pūrvyam ||8.046.20||

8.046.21a ā sa etu ya īvad ām̐ adevaḥ pūrtam ādade |
8.046.21c yathā cid vaśo aśvyaḥ pṛthuśravasi kānīte 'syā vyuṣy ādade ||

ā | saḥ | etu | yaḥ | īvat | ā | adevaḥ | pūrtam | ā-dade |
yathā | cit | vaśaḥ | aśvyaḥ | pṛthu-śravasi | kānīte | asyāḥ | vi-uṣi | ā-dade ||8.046.21||

8.046.22a ṣaṣṭiṁ sahasrāśvyasyāyutāsanam uṣṭrānāṁ viṁśatiṁ śatā |
8.046.22c daśa śyāvīnāṁ śatā daśa tryaruṣīṇāṁ daśa gavāṁ sahasrā ||

ṣaṣṭim | sahasrā | aśvyasya | ayutā | asanam | uṣṭrānām | viṁśatim | śatā |
daśa | śyāvīnām | śatā | daśa | tri-aruṣīṇām | daśa | gavām | sahasrā ||8.046.22||

8.046.23a daśa śyāvā ṛdhadrayo vītavārāsa āśavaḥ |
8.046.23c mathrā nemiṁ ni vāvṛtuḥ ||

daśa | śyāvāḥ | ṛdhat-rayaḥ | vīta-vārāsaḥ | āśavaḥ |
mathrāḥ | nemim | ni | vavṛtuḥ ||8.046.23||

8.046.24a dānāsaḥ pṛthuśravasaḥ kānītasya surādhasaḥ |
8.046.24c rathaṁ hiraṇyayaṁ dadan maṁhiṣṭhaḥ sūrir abhūd varṣiṣṭham akṛta śravaḥ ||

dānāsaḥ | pṛthu-śravasaḥ | kānītasya | su-rādhasaḥ |
ratham | hiraṇyayam | dadat | maṁhiṣṭhaḥ | sūriḥ | abhūt | varṣiṣṭham | akṛta | śravaḥ ||8.046.24||

8.046.25a ā no vāyo mahe tane yāhi makhāya pājase |
8.046.25c vayaṁ hi te cakṛmā bhūri dāvane sadyaś cin mahi dāvane ||

ā | naḥ | vāyo iti | mahe | tane | yāhi | makhāya | pājase |
vayam | hi | te | cakṛma | bhūri | dāvane | sadyaḥ | cit | mahi | dāvane ||8.046.25||

8.046.26a yo aśvebhir vahate vasta usrās triḥ sapta saptatīnām |
8.046.26c ebhiḥ somebhiḥ somasudbhiḥ somapā dānāya śukrapūtapāḥ ||

yaḥ | aśvebhiḥ | vahate | vaste | usrāḥ | triḥ | sapta | saptatīnām |
ebhiḥ | somebhiḥ | somasut-bhiḥ | soma-pāḥ | dānāya | śukrapūta-pāḥ ||8.046.26||

8.046.27a yo ma imaṁ cid u tmanāmandac citraṁ dāvane |
8.046.27c araṭve akṣe nahuṣe sukṛtvani sukṛttarāya sukratuḥ ||

yaḥ | me | imam | cit | ūm̐ iti | tmanā | amandat | citram | dāvane |
araṭve | akṣe | nahuṣe | su-kṛtvani | sukṛt-tarāya | su-kratuḥ ||8.046.27||

8.046.28a ucathye vapuṣi yaḥ svarāḻ uta vāyo ghṛtasnāḥ |
8.046.28c aśveṣitaṁ rajeṣitaṁ śuneṣitam prājma tad idaṁ nu tat ||

ucathye | vapuṣi | yaḥ | sva-rāṭ | uta | vāyo iti | ghṛta-snāḥ |
aśva-iṣitam | rajaḥ-iṣitam | śunā-iṣitam | pra | ajma | tat | idam | nu | tat ||8.046.28||

8.046.29a adha priyam iṣirāya ṣaṣṭiṁ sahasrāsanam |
8.046.29c aśvānām in na vṛṣṇām ||

adha | priyam | iṣirāya | ṣaṣṭim | sahasrā | asanam |
aśvānām | it | na | vṛṣṇām ||8.046.29||

8.046.30a gāvo na yūtham upa yanti vadhraya upa mā yanti vadhrayaḥ ||

gāvaḥ | na | yūtham | upa | yanti | vadhrayaḥ | upa | mā | ā | yanti | vadhrayaḥ ||8.046.30||

8.046.31a adha yac cārathe gaṇe śatam uṣṭrām̐ acikradat |
8.046.31c adha śvitneṣu viṁśatiṁ śatā ||

adha | yat | cārathe | gaṇe | śatam | uṣṭrān | acikradat |
adha | śvitneṣu | viṁśatim | śatā ||8.046.31||

8.046.32a śataṁ dāse balbūthe vipras tarukṣa ā dade |
8.046.32c te te vāyav ime janā madantīndragopā madanti devagopāḥ ||

śatam | dāse | balbūthe | vipraḥ | tarukṣe | ā | dade |
te | te | vāyo iti | ime | janāḥ | madanti | indra-gopāḥ | madanti | deva-gopāḥ ||8.046.32||

8.046.33a adha syā yoṣaṇā mahī pratīcī vaśam aśvyam |
8.046.33c adhirukmā vi nīyate ||

adha | syā | yoṣaṇā | mahī | pratīcī | vaśam | aśvyam |
adhi-rukmā | vi | nīyate ||8.046.33||


8.047.01a mahi vo mahatām avo varuṇa mitra dāśuṣe |
8.047.01c yam ādityā abhi druho rakṣathā nem aghaṁ naśad anehaso va ūtayaḥ suūtayo va ūtayaḥ ||

mahi | vaḥ | mahatām | avaḥ | varuṇa | mitra | dāśuṣe |
yam | ādityāḥ | abhi | druhaḥ | rakṣatha | na | īm | agham | naśat | anehasaḥ | vaḥ | ūtayaḥ | su-ūtayaḥ | vaḥ | ūtayaḥ ||8.047.01||

8.047.02a vidā devā aghānām ādityāso apākṛtim |
8.047.02c pakṣā vayo yathopari vy asme śarma yacchatānehaso va ūtayaḥ suūtayo va ūtayaḥ ||

vida | devāḥ | aghānām | ādityāsaḥ | apa-ākṛtim |
pakṣā | vayaḥ | yathā | upari | vi | asme iti | śarma | yacchata | anehasaḥ | vaḥ | ūtayaḥ | su-ūtayaḥ | vaḥ | ūtayaḥ ||8.047.02||

8.047.03a vy asme adhi śarma tat pakṣā vayo na yantana |
8.047.03c viśvāni viśvavedaso varūthyā manāmahe 'nehaso va ūtayaḥ suūtayo va ūtayaḥ ||

vi | asme iti | adhi | śarma | tat | pakṣā | vayaḥ | na | yantana |
viśvāni | viśva-vedasaḥ | varūthyā | manāmahe | anehasaḥ | vaḥ | ūtayaḥ | su-ūtayaḥ | vaḥ | ūtayaḥ ||8.047.03||

8.047.04a yasmā arāsata kṣayaṁ jīvātuṁ ca pracetasaḥ |
8.047.04c manor viśvasya ghed ima ādityā rāya īśate 'nehaso va ūtayaḥ suūtayo va ūtayaḥ ||

yasmai | arāsata | kṣayam | jīvātum | ca | pra-cetasaḥ |
manoḥ | viśvasya | gha | it | ime | ādityāḥ | rāyaḥ | īśate | anehasaḥ | vaḥ | ūtayaḥ | su-ūtayaḥ | vaḥ | ūtayaḥ ||8.047.04||

8.047.05a pari ṇo vṛṇajann aghā durgāṇi rathyo yathā |
8.047.05c syāmed indrasya śarmaṇy ādityānām utāvasy anehaso va ūtayaḥ suūtayo va ūtayaḥ ||

pari | naḥ | vṛṇajan | aghā | duḥ-gāṇi | rathyaḥ | yathā |
syāma | it | indrasya | śarmaṇi | ādityānām | uta | avasi | anehasaḥ | vaḥ | ūtayaḥ | su-ūtayaḥ | vaḥ | ūtayaḥ ||8.047.05||

8.047.06a parihvṛted anā jano yuṣmādattasya vāyati |
8.047.06c devā adabhram āśa vo yam ādityā ahetanānehaso va ūtayaḥ suūtayo va ūtayaḥ ||

pari-hvṛtā | it | anā | janaḥ | yuṣmā-dattasya | vāyati |
devāḥ | adabhram | āśa | vaḥ | yam | ādityāḥ | ahetana | anehasaḥ | vaḥ | ūtayaḥ | su-ūtayaḥ | vaḥ | ūtayaḥ ||8.047.06||

8.047.07a na taṁ tigmaṁ cana tyajo na drāsad abhi taṁ guru |
8.047.07c yasmā u śarma sapratha ādityāso arādhvam anehaso va ūtayaḥ suūtayo va ūtayaḥ ||

na | tam | tigmam | cana | tyajaḥ | na | drāsat | abhi | tam | guru |
yasmai | ūm̐ iti | śarma | sa-prathaḥ | ādityāsaḥ | arādhvam | anehasaḥ | vaḥ | ūtayaḥ | su-ūtayaḥ | vaḥ | ūtayaḥ ||8.047.07||

8.047.08a yuṣme devā api ṣmasi yudhyanta iva varmasu |
8.047.08c yūyam maho na enaso yūyam arbhād uruṣyatānehaso va ūtayaḥ suūtayo va ūtayaḥ ||

yuṣme iti | devāḥ | api | smasi | yudhyantaḥ-iva | varmasu |
yūyam | mahaḥ | naḥ | enasaḥ | yūyam | arbhāt | uruṣyata | anehasaḥ | vaḥ | ūtayaḥ | su-ūtayaḥ | vaḥ | ūtayaḥ ||8.047.08||

8.047.09a aditir na uruṣyatv aditiḥ śarma yacchatu |
8.047.09c mātā mitrasya revato 'ryamṇo varuṇasya cānehaso va ūtayaḥ suūtayo va ūtayaḥ ||

aditiḥ | naḥ | uruṣyatu | aditiḥ | śarma | yacchatu |
mātā | mitrasya | revataḥ | aryamṇaḥ | varuṇasya | ca | anehasaḥ | vaḥ | ūtayaḥ | su-ūtayaḥ | vaḥ | ūtayaḥ ||8.047.09||

8.047.10a yad devāḥ śarma śaraṇaṁ yad bhadraṁ yad anāturam |
8.047.10c tridhātu yad varūthyaṁ tad asmāsu vi yantanānehaso va ūtayaḥ suūtayo va ūtayaḥ ||

yat | devāḥ | śarma | śaraṇam | yat | bhadram | yat | anāturam |
tri-dhātu | yat | varūthyam | tat | asmāsu | vi | yantana | anehasaḥ | vaḥ | ūtayaḥ | su-ūtayaḥ | vaḥ | ūtayaḥ ||8.047.10||

8.047.11a ādityā ava hi khyatādhi kūlād iva spaśaḥ |
8.047.11c sutīrtham arvato yathānu no neṣathā sugam anehaso va ūtayaḥ suūtayo va ūtayaḥ ||

ādityāḥ | ava | hi | khyata | adhi | kūlāt-iva | spaśaḥ |
su-tīrtham | arvataḥ | yathā | anu | naḥ | neṣatha | su-gam | anehasaḥ | vaḥ | ūtayaḥ | su-ūtayaḥ | vaḥ | ūtayaḥ ||8.047.11||

8.047.12a neha bhadraṁ rakṣasvine nāvayai nopayā uta |
8.047.12c gave ca bhadraṁ dhenave vīrāya ca śravasyate 'nehaso va ūtayaḥ suūtayo va ūtayaḥ ||

na | iha | bhadram | rakṣasvine | na | ava-yai | na | upa-yai | uta |
gave | ca | bhadram | dhenave | vīrāya | ca | śravasyate | anehasaḥ | vaḥ | ūtayaḥ | su-ūtayaḥ | vaḥ | ūtayaḥ ||8.047.12||

8.047.13a yad āvir yad apīcyaṁ devāso asti duṣkṛtam |
8.047.13c trite tad viśvam āptya āre asmad dadhātanānehaso va ūtayaḥ suūtayo va ūtayaḥ ||

yat | āviḥ | yat | apīcyam | devāsaḥ | asti | duḥ-kṛtam |
trite | tat | viśvam | āptye | āre | asmat | dadhātana | anehasaḥ | vaḥ | ūtayaḥ | su-ūtayaḥ | vaḥ | ūtayaḥ ||8.047.13||

8.047.14a yac ca goṣu duṣṣvapnyaṁ yac cāsme duhitar divaḥ |
8.047.14c tritāya tad vibhāvary āptyāya parā vahānehaso va ūtayaḥ suūtayo va ūtayaḥ ||

yat | ca | goṣu | duḥ-svapnyam | yat | ca | asme iti | duhitaḥ | divaḥ |
tritāya | tat | vibhā-vari | āptyāya | parā | vaha | anehasaḥ | vaḥ | ūtayaḥ | su-ūtayaḥ | vaḥ | ūtayaḥ ||8.047.14||

8.047.15a niṣkaṁ vā ghā kṛṇavate srajaṁ vā duhitar divaḥ |
8.047.15c trite duṣṣvapnyaṁ sarvam āptye pari dadmasy anehaso va ūtayaḥ suūtayo va ūtayaḥ ||

niṣkam | vā | gha | kṛṇavate | srajam | vā | duhitaḥ | divaḥ |
trite | duḥ-svapnyam | sarvam | āptye | pari | dadmasi | anehasaḥ | vaḥ | ūtayaḥ | su-ūtayaḥ | vaḥ | ūtayaḥ ||8.047.15||

8.047.16a tadannāya tadapase tam bhāgam upaseduṣe |
8.047.16c tritāya ca dvitāya coṣo duṣṣvapnyaṁ vahānehaso va ūtayaḥ suūtayo va ūtayaḥ ||

tat-annāya | tat-apase | tam | bhāgam | upa-seduṣe |
tritāya | ca | dvitāya | ca | uṣaḥ | duḥ-svapnyam | vaha | anehasaḥ | vaḥ | ūtayaḥ | su-ūtayaḥ | vaḥ | ūtayaḥ ||8.047.16||

8.047.17a yathā kalāṁ yathā śaphaṁ yatha ṛṇaṁ saṁnayāmasi |
8.047.17c evā duṣṣvapnyaṁ sarvam āptye saṁ nayāmasy anehaso va ūtayaḥ suūtayo va ūtayaḥ ||

yathā | kalām | yathā | śapham | yathā | ṛṇam | sam-nayāmasi |
eva | duḥ-svapnyam | sarvam | āptye | sam | nayāmasi | anehasaḥ | vaḥ | ūtayaḥ | su-ūtayaḥ | vaḥ | ūtayaḥ ||8.047.17||

8.047.18a ajaiṣmādyāsanāma cābhūmānāgaso vayam |
8.047.18c uṣo yasmād duṣṣvapnyād abhaiṣmāpa tad ucchatv anehaso va ūtayaḥ suūtayo va ūtayaḥ ||

ajaiṣma | adya | asanāma | ca | abhūma | anāgasaḥ | vayam |
uṣaḥ | yasmāt | duḥ-svapnyāt | abhaiṣma | apa | tat | ucchatu | anehasaḥ | vaḥ | ūtayaḥ | su-ūtayaḥ | vaḥ | ūtayaḥ ||8.047.18||


8.048.01a svādor abhakṣi vayasaḥ sumedhāḥ svādhyo varivovittarasya |
8.048.01c viśve yaṁ devā uta martyāso madhu bruvanto abhi saṁcaranti ||

svādoḥ | abhakṣi | vayasaḥ | su-medhāḥ | su-ādhyaḥ | varivovit-tarasya |
viśve | yam | devāḥ | uta | martyāsaḥ | madhu | bruvantaḥ | abhi | sam-caranti ||8.048.01||

8.048.02a antaś ca prāgā aditir bhavāsy avayātā haraso daivyasya |
8.048.02c indav indrasya sakhyaṁ juṣāṇaḥ śrauṣṭīva dhuram anu rāya ṛdhyāḥ ||

antariti | ca | pra | agāḥ | aditiḥ | bhavāsi | ava-yātā | harasaḥ | daivyasya |
indo iti | indrasya | sakhyam | juṣāṇaḥ | śrauṣṭī-iva | dhuram | anu | rāye | ṛdhyāḥ ||8.048.02||

8.048.03a apāma somam amṛtā abhūmāganma jyotir avidāma devān |
8.048.03c kiṁ nūnam asmān kṛṇavad arātiḥ kim u dhūrtir amṛta martyasya ||

apāma | somam | amṛtāḥ | abhūma | aganma | jyotiḥ | avidāma | devān |
kim | nūnam | asmān | kṛṇavat | arāti | kim | ūm̐ iti | dhūrtiḥ | amṛta | martyasya ||8.048.03||

8.048.04a śaṁ no bhava hṛda ā pīta indo piteva soma sūnave suśevaḥ |
8.048.04c sakheva sakhya uruśaṁsa dhīraḥ pra ṇa āyur jīvase soma tārīḥ ||

śam | naḥ | bhava | hṛde | ā | pītaḥ | indo iti | pitā-iva | soma | sūnave | su-śevaḥ |
sakhā-iva | sakhye | uru-śaṁsa | dhīraḥ | pra | naḥ | āyuḥ | jīvase | soma | tārīḥ ||8.048.04||

8.048.05a ime mā pītā yaśasa uruṣyavo rathaṁ na gāvaḥ sam anāha parvasu |
8.048.05c te mā rakṣantu visrasaś caritrād uta mā srāmād yavayantv indavaḥ ||

ime | mā | pītāḥ | yaśasaḥ | uruṣyavaḥ | ratham | na | gāvaḥ | sam | anāha | parva-su |
te | mā | rakṣantu | visrasaḥ | caritrāt | uta | mā | srāmāt | yavayantu | indavaḥ ||8.048.05||

8.048.06a agniṁ na mā mathitaṁ saṁ didīpaḥ pra cakṣaya kṛṇuhi vasyaso naḥ |
8.048.06c athā hi te mada ā soma manye revām̐ iva pra carā puṣṭim accha ||

agnim | na | mā | mathitam | sam | didīpaḥ | pra | cakṣaya | kṛṇuhi | vasyasaḥ | naḥ |
atha | hi | te | made | ā | soma | manye | revān-iva | pra | cara | puṣṭim | accha ||8.048.06||

8.048.07a iṣireṇa te manasā sutasya bhakṣīmahi pitryasyeva rāyaḥ |
8.048.07c soma rājan pra ṇa āyūṁṣi tārīr ahānīva sūryo vāsarāṇi ||

iṣireṇa | te | manasā | sutasya | bhakṣīmahi | pitryasya-iva | rāyaḥ |
soma | rājan | pra | naḥ | āyūṁṣi | tārīḥ | ahāni-iva | sūryaḥ | vāsarāṇi ||8.048.07||

8.048.08a soma rājan mṛḻayā naḥ svasti tava smasi vratyās tasya viddhi |
8.048.08c alarti dakṣa uta manyur indo mā no aryo anukāmam parā dāḥ ||

soma | rājan | mṛḻaya | naḥ | svasti | tava | smasi | vratyāḥ | tasya | viddhi |
alarti | dakṣaḥ | uta | manyuḥ | indo iti | mā | naḥ | aryaḥ | anu-kāmam | parā | dāḥ ||8.048.08||

8.048.09a tvaṁ hi nas tanvaḥ soma gopā gātre-gātre niṣasatthā nṛcakṣāḥ |
8.048.09c yat te vayam pramināma vratāni sa no mṛḻa suṣakhā deva vasyaḥ ||

tvam | hi | naḥ | tanvaḥ | soma | gopāḥ | gātre-gātre | ni-sasattha | nṛ-cakṣāḥ |
yat | te | vayam | pra-mināma | vratāni | saḥ | naḥ | mṛḻa | su-sakhā | deva | vasyaḥ ||8.048.09||

8.048.10a ṛdūdareṇa sakhyā saceya yo mā na riṣyed dharyaśva pītaḥ |
8.048.10c ayaṁ yaḥ somo ny adhāyy asme tasmā indram pratiram emy āyuḥ ||

ṛdūdareṇa | sakhyā | saceya | yaḥ | mā | na | riṣyet | hari-aśva | pītaḥ |
ayam | yaḥ | somaḥ | ni | adhāyi | asme iti | tasmai | indram | pra-tiram | emi | āyuḥ ||8.048.10||

8.048.11a apa tyā asthur anirā amīvā nir atrasan tamiṣīcīr abhaiṣuḥ |
8.048.11c ā somo asmām̐ aruhad vihāyā aganma yatra pratiranta āyuḥ ||

apa | tyāḥ | asthuḥ | anirāḥ | amīvāḥ | niḥ | atrasan | tamiṣīcīḥ | abhaiṣuḥ |
ā | somaḥ | asmān | aruhat | vi-hāyāḥ | aganma | yatra | pra-tirante | āyuḥ ||8.048.11||

8.048.12a yo na induḥ pitaro hṛtsu pīto 'martyo martyām̐ āviveśa |
8.048.12c tasmai somāya haviṣā vidhema mṛḻīke asya sumatau syāma ||

yaḥ | naḥ | induḥ | pitaraḥ | hṛt-su | pītaḥ | amartyaḥ | martyān | ā-viveśa |
tasmai | somāya | haviṣā | vidhema | mṛḻīke | asya | su-matau | syāma ||8.048.12||

8.048.13a tvaṁ soma pitṛbhiḥ saṁvidāno 'nu dyāvāpṛthivī ā tatantha |
8.048.13c tasmai ta indo haviṣā vidhema vayaṁ syāma patayo rayīṇām ||

tvam | soma | pitṛ-bhiḥ | sam-vidānaḥ | anu | dyāvāpṛthivī iti | ā | tatantha |
tasmai | te | indo iti | haviṣā | vidhema | vayam | syāma | patayaḥ | rayīṇām ||8.048.13||

8.048.14a trātāro devā adhi vocatā no mā no nidrā īśata mota jalpiḥ |
8.048.14c vayaṁ somasya viśvaha priyāsaḥ suvīrāso vidatham ā vadema ||

trātāraḥ | devāḥ | adhi | vocata | naḥ | mā | naḥ | ni-drā | īśata | mā | uta | jalpiḥ |
vayam | somasya | viśvaha | priyāsaḥ | su-vīrāsaḥ | vidatham | ā | vadema ||8.048.14||

8.048.15a tvaṁ naḥ soma viśvato vayodhās tvaṁ svarvid ā viśā nṛcakṣāḥ |
8.048.15c tvaṁ na inda ūtibhiḥ sajoṣāḥ pāhi paścātād uta vā purastāt ||

tvam | naḥ | soma | viśvataḥ | vayaḥ-dhāḥ | tvam | svaḥ-vit | ā | viśa | nṛ-cakṣāḥ |
tvam | naḥ | indo iti | ūti-bhiḥ | sa-joṣāḥ | pāhi | paścātāt | uta | vā | purastāt ||8.048.15||


8.049.01a abhi pra vaḥ surādhasam indram arca yathā vide |
8.049.01c yo jaritṛbhyo maghavā purūvasuḥ sahasreṇeva śikṣati ||

abhi | pra | vaḥ | su-rādhasam | indram | arca | yathā | vide |
yaḥ | jaritṛ-bhyaḥ | magha-vā | puru-vasuḥ | sahasreṇa-iva | śikṣati ||8.049.01||

8.049.02a śatānīkeva pra jigāti dhṛṣṇuyā hanti vṛtrāṇi dāśuṣe |
8.049.02c girer iva pra rasā asya pinvire datrāṇi purubhojasaḥ ||

śatānīkā-iva | pra | jigāti | dhṛṣṇu-yā | hanti | vṛtrāṇi | dāśuṣe |
gireḥ-iva | pra | rasāḥ | asya | pinvire | datrāṇi | puru-bhojasaḥ ||8.049.02||

8.049.03a ā tvā sutāsa indavo madā ya indra girvaṇaḥ |
8.049.03c āpo na vajrinn anv okyaṁ saraḥ pṛṇanti śūra rādhase ||

ā | tvā | sutāsaḥ | indavaḥ | madāḥ | ye | indra | girvaṇaḥ |
āpaḥ | na | vajrin | anu | okyam | saraḥ | pṛṇanti | śūra | rādhase ||8.049.03||

8.049.04a anehasam prataraṇaṁ vivakṣaṇam madhvaḥ svādiṣṭham īm piba |
8.049.04c ā yathā mandasānaḥ kirāsi naḥ pra kṣudreva tmanā dhṛṣat ||

anehasam | pra-taraṇam | vivakṣaṇam | madhvaḥ | svādiṣṭham | īm | piba |
ā | yathā | mandasānaḥ | kirāsi | naḥ | pra | kṣudrā-iva | tmanā | dhṛṣat ||8.049.04||

8.049.05a ā naḥ stomam upa dravad dhiyāno aśvo na sotṛbhiḥ |
8.049.05c yaṁ te svadhāvan svadayanti dhenava indra kaṇveṣu rātayaḥ ||

ā | naḥ | stomam | upa | dravat | hiyānaḥ | aśvaḥ | na | sotṛ-bhiḥ |
yam | te | svadhā-van | svadayanti | dhenavaḥ | indra | kaṇveṣu | rātayaḥ ||8.049.05||

8.049.06a ugraṁ na vīraṁ namasopa sedima vibhūtim akṣitāvasum |
8.049.06c udrīva vajrinn avato na siñcate kṣarantīndra dhītayaḥ ||

ugram | na | vīram | namasā | upa | sedima | vi-bhūtim | akṣita-vasum |
udrī-iva | vajrin | avataḥ | na | siñcate | kṣaranti | indra | dhītayaḥ ||8.049.06||

8.049.07a yad dha nūnaṁ yad vā yajñe yad vā pṛthivyām adhi |
8.049.07c ato no yajñam āśubhir mahemata ugra ugrebhir ā gahi ||

yat | ha | nūnam | yat | vā | yajñe | yat | vā | pṛthivyām | adhi |
ataḥ | naḥ | yajñam | āśu-bhiḥ | mahe-mate | ugraḥ | ugrebhiḥ | ā | gahi ||8.049.07||

8.049.08a ajirāso harayo ye ta āśavo vātā iva prasakṣiṇaḥ |
8.049.08c yebhir apatyam manuṣaḥ parīyase yebhir viśvaṁ svar dṛśe ||

ajirāsaḥ | harayaḥ | ye | te | āśavaḥ | vātāḥ-iva | pra-sakṣiṇaḥ |
yebhiḥ | apatyam | manuṣaḥ | pari-īyase | yebhiḥ | viśvam | svaḥ | dṛśe ||8.049.08||

8.049.09a etāvatas ta īmaha indra sumnasya gomataḥ |
8.049.09c yathā prāvo maghavan medhyātithiṁ yathā nīpātithiṁ dhane ||

etāvataḥ | te | īmahe | indra | sumnasya | go-mataḥ |
yathā | pra | āvaḥ | magha-van | medhya-atithim | yathā | nīpa-atithi | dhane ||8.049.09||

8.049.10a yathā kaṇve maghavan trasadasyavi yathā pakthe daśavraje |
8.049.10c yathā gośarye asanor ṛjiśvanīndra gomad dhiraṇyavat ||

yathā | kaṇve | magha-van | trasadasyavi | yathā | pakthe | daśa-vraje |
yathā | go-śarye | asanoḥ | ṛjiśvani | indra | go-mat | hiraṇya-vat ||8.049.10||


8.050.01a pra su śrutaṁ surādhasam arcā śakram abhiṣṭaye |
8.050.01c yaḥ sunvate stuvate kāmyaṁ vasu sahasreṇeva maṁhate ||

pra | su | śrutam | su-rādhasam | arca | śakram | abhiṣṭaye |
yaḥ | sunvate | stuvate | kāmyam | vasu | sahasreṇa-iva | maṁhate ||8.050.01||

8.050.02a śatānīkā hetayo asya duṣṭarā indrasya samiṣo mahīḥ |
8.050.02c girir na bhujmā maghavatsu pinvate yad īṁ sutā amandiṣuḥ ||

śata-anīkāḥ | hetayaḥ | asya | dustarāḥ | indrasya | sam-iṣaḥ | mahīḥ |
giriḥ | na | bhujmā | maghavat-su | pinvate | yat | īm | sutāḥ | amandiṣuḥ ||8.050.02||

8.050.03a yad īṁ sutāsa indavo 'bhi priyam amandiṣuḥ |
8.050.03c āpo na dhāyi savanam ma ā vaso dughā ivopa dāśuṣe ||

yat | īm | sutāsaḥ | indavaḥ | abhi | priyam | amandiṣuḥ |
āpaḥ | na | dhāyi | savanam | me | ā | vaso iti | dughā-iva | upa | dāśuṣe ||8.050.03||

8.050.04a anehasaṁ vo havamānam ūtaye madhvaḥ kṣaranti dhītayaḥ |
8.050.04c ā tvā vaso havamānāsa indava upa stotreṣu dadhire ||

anehasam | vaḥ | havamānam | ūtaye | madhvaḥ | kṣaranti | dhītayaḥ |
ā | tvā | vaso iti | havamānāsaḥ | indavaḥ | upa | stotreṣu | dadhire ||8.050.04||

8.050.05a ā naḥ some svadhvara iyāno atyo na tośate |
8.050.05c yaṁ te svadāvan svadanti gūrtayaḥ paure chandayase havam ||

ā | naḥ | some | su-adhvare | iyānaḥ | atyaḥ | na | tośate |
yam | te | svadā-van | svadanti | gūrtyaḥ | paure | chandayase | havam ||8.050.05||

8.050.06a pra vīram ugraṁ viviciṁ dhanaspṛtaṁ vibhūtiṁ rādhaso mahaḥ |
8.050.06c udrīva vajrinn avato vasutvanā sadā pīpetha dāśuṣe ||

pra | vīram | ugram | vivicim | dhana-spṛtam | vi-bhūtim | rādhasaḥ | mahaḥ |
udrī-iva | vajrin | avataḥ | vasu-tvanā | sadā | pīpetha | dāśuṣe ||8.050.06||

8.050.07a yad dha nūnam parāvati yad vā pṛthivyāṁ divi |
8.050.07c yujāna indra haribhir mahemata ṛṣva ṛṣvebhir ā gahi ||

yat | ha | nūnam | parā-vati | yat | vā | pṛthivyām | divi |
yujānaḥ | indra | hari-bhiḥ | mahe-mate | ṛṣvaḥ | ṛṣvebhiḥ | ā | gahi ||8.050.07||

8.050.08a rathirāso harayo ye te asridha ojo vātasya piprati |
8.050.08c yebhir ni dasyum manuṣo nighoṣayo yebhiḥ svaḥ parīyase ||

rathirāsaḥ | harayaḥ | ye | te | asridhaḥ | ojaḥ | vātasya | piprati |
yebhiḥ | ni | dasyum | manuṣaḥ | ni-ghoṣayaḥ | yebhiḥ | svariti svaḥ | pari-īyase ||8.050.08||

8.050.09a etāvatas te vaso vidyāma śūra navyasaḥ |
8.050.09c yathā prāva etaśaṁ kṛtvye dhane yathā vaśaṁ daśavraje ||

etāvataḥ | te | vaso iti | vidyāma | śūra | navyasaḥ |
yathā | pra | āvaḥ | etaśam | kṛtvye | dhane | yathā | vaśam | daśa-vraje ||8.050.09||

8.050.10a yathā kaṇve maghavan medhe adhvare dīrghanīthe damūnasi |
8.050.10c yathā gośarye asiṣāso adrivo mayi gotraṁ hariśriyam ||

yathā | kaṇve | magha-van | medhe | adhvare | dīrgha-nīthe | damūnasi |
yathā | go-śarye | asisāsaḥ | adri-vaḥ | mayi | gotram | hari-śriyam ||8.050.10||


8.051.01a yathā manau sāṁvaraṇau somam indrāpibaḥ sutam |
8.051.01c nīpātithau maghavan medhyātithau puṣṭigau śruṣṭigau sacā ||

yathā | manau | sām-varaṇau | somam | indra | apibaḥ | sutam |
nīpa-atithau | magha-van | medhya-atithau | puṣṭi-gau | śruṣṭi-gau | sacā ||8.051.01||

8.051.02a pārṣadvāṇaḥ praskaṇvaṁ sam asādayac chayānaṁ jivrim uddhitam |
8.051.02c sahasrāṇy asiṣāsad gavām ṛṣis tvoto dasyave vṛkaḥ ||

pārṣadvāṇaḥ | praskaṇvam | sam | asādayat | śayānam | jivrim | uddhitam |
sahasrāṇi | asisāsat | gavām | ṛṣiḥ | tvā-ūtaḥ | dasyave | vṛkaḥ ||8.051.02||

8.051.03a ya ukthebhir na vindhate cikid ya ṛṣicodanaḥ |
8.051.03c indraṁ tam acchā vada navyasyā maty ariṣyantaṁ na bhojase ||

yaḥ | ukthebhiḥ | na | vindhate | cikit | yaḥ | ṛṣi-codanaḥ |
indram | tam | accha | vada | navyasyā | matī | ariṣyantam | na | bhojase ||8.051.03||

8.051.04a yasmā arkaṁ saptaśīrṣāṇam ānṛcus tridhātum uttame pade |
8.051.04c sa tv imā viśvā bhuvanāni cikradad ād ij janiṣṭa pauṁsyam ||

yasmai | arkam | sapta-śīrṣāṇam | ānṛcuḥ | tri-dhātum | ut-tame | pade |
saḥ | tu | imā | viśvā | bhuvanāni | cikradat | āt | it | janiṣṭa | pauṁsyam ||8.051.04||

8.051.05a yo no dātā vasūnām indraṁ taṁ hūmahe vayam |
8.051.05c vidmā hy asya sumatiṁ navīyasīṁ gamema gomati vraje ||

yaḥ | naḥ | dātā | vasūnām | indram | tam | hūmahe | vayam |
vidma | hi | asya | su-matim | navīyasīm | ghamema | go-mati | vraje ||8.051.05||

8.051.06a yasmai tvaṁ vaso dānāya śikṣasi sa rāyas poṣam aśnute |
8.051.06c taṁ tvā vayam maghavann indra girvaṇaḥ sutāvanto havāmahe ||

yasmai | tvam | vaso iti | dānāya | śikṣasi | saḥ | rāyaḥ | poṣam | aśnute |
tam | tvā | vayam | magha-van | indra | girvaṇaḥ | suta-vantaḥ | havāmahe ||8.051.06||

8.051.07a kadā cana starīr asi nendra saścasi dāśuṣe |
8.051.07c upopen nu maghavan bhūya in nu te dānaṁ devasya pṛcyate ||

kadā | cana | starīḥ | asi | na | indra | saścasi | dāśuṣe |
upa-upa | it | nu | magha-van | bhūyaḥ | it | nu | te | dānam | devasya | pṛcyate ||8.051.07||

8.051.08a pra yo nanakṣe abhy ojasā kriviṁ vadhaiḥ śuṣṇaṁ nighoṣayan |
8.051.08c yaded astambhīt prathayann amūṁ divam ād ij janiṣṭa pārthivaḥ ||

pra | yaḥ | nanakṣe | abhi | ojasā | krivim | vadhaiḥ | śuṣṇam | ni-ghoṣayan |
yadā | it | astambhīt | prathayan | amūm | divam | āt | it | janiṣṭa | pārthivaḥ ||8.051.08||

8.051.09a yasyāyaṁ viśva āryo dāsaḥ śevadhipā ariḥ |
8.051.09c tiraś cid arye ruśame parīravi tubhyet so ajyate rayiḥ ||

yasya | ayam | viśvaḥ | āryaḥ | dāsaḥ | śevadhi-pāḥ | ariḥ |
tiraḥ | cit | arye | ruśame | pavīravi | tubhya | it | saḥ | ajyate | rayiḥ ||8.051.09||

8.051.10a turaṇyavo madhumantaṁ ghṛtaścutaṁ viprāso arkam ānṛcuḥ |
8.051.10c asme rayiḥ paprathe vṛṣṇyaṁ śavo 'sme suvānāsa indavaḥ ||

turaṇyavaḥ | madhu-mantam | ghṛta-ścutam | viprāsaḥ | arkam | ānṛcuḥ |
asme iti | rayiḥ | paprathe | vṛṣṇyam | śavaḥ | asme iti | suvānāsaḥ | indavaḥ ||8.051.10||


8.052.01a yathā manau vivasvati somaṁ śakrāpibaḥ sutam |
8.052.01c yathā trite chanda indra jujoṣasy āyau mādayase sacā ||

yathā | manau | vivasvati | somam | śakra | apibaḥ | sutam |
yathā | trite | chandaḥ | indra | jujoṣasi | āyau | mādayase | sacā ||8.052.01||

8.052.02a pṛṣadhre medhye mātariśvanīndra suvāne amandathāḥ |
8.052.02c yathā somaṁ daśaśipre daśoṇye syūmaraśmāv ṛjūnasi ||

pṛṣadhre | medhye | mātariśvani | indra | suvāne | amandathāḥ |
yathā | somam | daśa-śipre | daśa-oṇye | syūma-raśmau | ṛjūnasi ||8.052.02||

8.052.03a ya ukthā kevalā dadhe yaḥ somaṁ dhṛṣitāpibat |
8.052.03c yasmai viṣṇus trīṇi padā vicakrama upa mitrasya dharmabhiḥ ||

yaḥ | ukthā | kevalā | dadhe | yaḥ | somam | dhṛṣitā | apibat |
yasmai | viṣṇuḥ | trīṇi | padā | vi-cakrame | upa | mitrasya | dharma-bhiḥ ||8.052.03||

8.052.04a yasya tvam indra stomeṣu cākano vāje vājiñ chatakrato |
8.052.04c taṁ tvā vayaṁ sudughām iva goduho juhūmasi śravasyavaḥ ||

yasya | tvam | indra | stomeṣu | cākanaḥ | vāje | vājin | śatakrato iti śata-krato |
tam | tvā | vayam | sudughām-iva | go-duhaḥ | juhūmasi | śravasyavaḥ ||8.052.04||

8.052.05a yo no dātā sa naḥ pitā mahām̐ ugra īśānakṛt |
8.052.05c ayāmann ugro maghavā purūvasur gor aśvasya pra dātu naḥ ||

yaḥ | naḥ | dātā | saḥ | naḥ | pitā | mahān | ugraḥ | īśāna-kṛt |
ayāman | ugraḥ | magha-vā | puru-vasuḥ | goḥ | aśvasya | pra | dātu | naḥ ||8.052.05||

8.052.06a yasmai tvaṁ vaso dānāya maṁhase sa rāyas poṣam invati |
8.052.06c vasūyavo vasupatiṁ śatakratuṁ stomair indraṁ havāmahe ||

yasmai | tvam | vaso iti | dānāya | maṁhase | saḥ | rāyaḥ | poṣam | invati |
vasu-yavaḥ | vasu-patim | śata-kratum | stomaiḥ | indram | havāmahe ||8.052.06||

8.052.07a kadā cana pra yucchasy ubhe ni pāsi janmanī |
8.052.07c turīyāditya havanaṁ ta indriyam ā tasthāv amṛtaṁ divi ||

kadā | cana | pra | yucchasi | ubhe iti | ni | pāsi | janmanī iti |
turīya | āditya | havanam | te | indriyam | ā | tasthau | amṛtam | divi ||8.052.07||

8.052.08a yasmai tvam maghavann indra girvaṇaḥ śikṣo śikṣasi dāśuṣe |
8.052.08c asmākaṁ gira uta suṣṭutiṁ vaso kaṇvavac chṛṇudhī havam ||

yasmai | tvam | magha-van | indra | girvaṇaḥ | śikṣo iti | śikṣasi | dāśuṣe |
asmākam | giraḥ | uta | sustutim | vaso iti | kaṇva-vat | śṛṇudhi | havam ||8.052.08||

8.052.09a astāvi manma pūrvyam brahmendrāya vocata |
8.052.09c pūrvīr ṛtasya bṛhatīr anūṣata stotur medhā asṛkṣata ||

astāvi | manma | pūrvyam | brahma | indrāya | vocata |
pūrvīḥ | ṛtasya | bṛhatīḥ | anūṣata | stotuḥ | medhāḥ | asṛkṣata ||8.052.09||

8.052.10a sam indro rāyo bṛhatīr adhūnuta saṁ kṣoṇī sam u sūryam |
8.052.10c saṁ śukrāsaḥ śucayaḥ saṁ gavāśiraḥ somā indram amandiṣuḥ ||

sam | indraḥ | rāyaḥ | bṛhatīḥ | adhūnuta | sam | kṣoṇī iti | sam | ūm̐ iti | sūryam |
sam | śukrāsaḥ | śucayaḥ | sam | go-āśiraḥ | somāḥ | indram | amandiṣuḥ ||8.052.10||


8.053.01a upamaṁ tvā maghonāṁ jyeṣṭhaṁ ca vṛṣabhāṇām |
8.053.01c pūrbhittamam maghavann indra govidam īśānaṁ rāya īmahe ||

upa-mam | tvā | maghonām | jyeṣṭham | ca | vṛṣabhāṇām |
purbhit-tamam | magha-van | indra | go-vidam | īśānam | rāyaḥ | īmahe ||8.053.01||

8.053.02a ya āyuṁ kutsam atithigvam ardayo vāvṛdhāno dive-dive |
8.053.02c taṁ tvā vayaṁ haryaśvaṁ śatakratuṁ vājayanto havāmahe ||

yaḥ | āyum | kutsam | atithi-gvam | ardayaḥ | vavṛdhānaḥ | dive-dive |
tam | tvā | vayam | hari-aśvam | śata-kratum | vāja-yantaḥ | havāmahe ||8.053.02||

8.053.03a ā no viśveṣāṁ rasam madhvaḥ siñcantv adrayaḥ |
8.053.03c ye parāvati sunvire janeṣv ā ye arvāvatīndavaḥ ||

ā | naḥ | viśveṣām | rasam | madhvaḥ | siñcantu | adrayaḥ |
ye | parā-vati | sunvire | janeṣu | ā | ye | arvā-vati | indavaḥ ||8.053.03||

8.053.04a viśvā dveṣāṁsi jahi cāva cā kṛdhi viśve sanvantv ā vasu |
8.053.04c śīṣṭeṣu cit te madirāso aṁśavo yatrā somasya tṛmpasi ||

viśvā | dveṣāṁsi | jahi | ca | ava | ca | ā | kṛdhi | viśve | sanvantu | ā | vasu |
śīṣṭeṣu | cit | te | madirāsaḥ | aṁśavaḥ | yatra | somasya | tṛmpasi ||8.053.04||

8.053.05a indra nedīya ed ihi mitamedhābhir ūtibhiḥ |
8.053.05c ā śaṁtama śaṁtamābhir abhiṣṭibhir ā svāpe svāpibhiḥ ||

indra | nedīyaḥ | ā | it | ihi | mita-medhābhiḥ | ūti-bhiḥ |
ā | śam-tama | śam-tamābhiḥ | abhiṣṭi-bhiḥ | ā | su-āpe | svāpi-bhiḥ ||8.053.05||

8.053.06a ājituraṁ satpatiṁ viśvacarṣaṇiṁ kṛdhi prajāsv ābhagam |
8.053.06c pra sū tirā śacībhir ye ta ukthinaḥ kratum punata ānuṣak ||

āji-turam | sat-patim | viśva-carṣaṇim | kṛdhi | pra-jāsu | ā-bhagam |
pra | su | tira | śacībhiḥ | ye | te | ukthinaḥ | kratum | punate | ānuṣak ||8.053.06||

8.053.07a yas te sādhiṣṭho 'vase te syāma bhareṣu te |
8.053.07c vayaṁ hotrābhir uta devahūtibhiḥ sasavāṁso manāmahe ||

yaḥ | te | sādhiṣṭhaḥ | avase | te | syāma | bhareṣu | te |
vayam | hotrābhiḥ | uta | devahūti-bhiḥ | sasa-vāṁsaḥ | manāmahe ||8.053.07||

8.053.08a ahaṁ hi te harivo brahma vājayur ājiṁ yāmi sadotibhiḥ |
8.053.08c tvām id eva tam ame sam aśvayur gavyur agre mathīnām ||

aham | hi | te | hari-vaḥ | brahma | vāja-yuḥ | ājim | yāmi | sadā | ūti-bhiḥ |
tvām | it | eva | tam | ame | sam | aśva-yuḥ | gavyuḥ | agre | mathīnām ||8.053.08||


8.054.01a etat ta indra vīryaṁ gīrbhir gṛṇanti kāravaḥ |
8.054.01c te stobhanta ūrjam āvan ghṛtaścutam paurāso nakṣan dhītibhiḥ ||

etat | te | indra | vīryam | gīḥ-bhiḥ | gṛṇanti | kāravaḥ |
te | stobhantaḥ | ūrjam | āvan | ghṛta-ścutam | paurāsaḥ | nakṣan | dhīti-bhiḥ ||8.054.01||

8.054.02a nakṣanta indram avase sukṛtyayā yeṣāṁ suteṣu mandase |
8.054.02c yathā saṁvarte amado yathā kṛśa evāsme indra matsva ||

nakṣante | indram | avase | su-kṛtyayā | yeṣām | suteṣu | mandase |
yathā | sam-varte | amadaḥ | yathā | kṛśe | eva | asme iti | indra | matsva ||8.054.02||

8.054.03a ā no viśve sajoṣaso devāso gantanopa naḥ |
8.054.03c vasavo rudrā avase na ā gamañ chṛṇvantu maruto havam ||

ā | naḥ | viśve | sa-joṣasaḥ | devāsaḥ | gantana | upa | naḥ |
vasavaḥ | rudrāḥ | avase | naḥ | ā | gaman | śṛṇvantu | marutaḥ | havam ||8.054.03||

8.054.04a pūṣā viṣṇur havanam me sarasvaty avantu sapta sindhavaḥ |
8.054.04c āpo vātaḥ parvatāso vanaspatiḥ śṛṇotu pṛthivī havam ||

pūṣā | viṣṇuḥ | havanam | me | sarasvatī | avantu | sapta | sindhavaḥ |
āpaḥ | vātaḥ | parvatāsaḥ | vanaspatiḥ | śṛṇotu | pṛthivī | havam ||8.054.04||

8.054.05a yad indra rādho asti te māghonam maghavattama |
8.054.05c tena no bodhi sadhamādyo vṛdhe bhago dānāya vṛtrahan ||

yat | indra | rādhaḥ | asti | te | māghonam | maghavat-tama |
tena | naḥ | bodhi | sadha-mādyaḥ | vṛdhe | bhagaḥ | dānāya | vṛtra-han ||8.054.05||

8.054.06a ājipate nṛpate tvam id dhi no vāja ā vakṣi sukrato |
8.054.06c vītī hotrābhir uta devavītibhiḥ sasavāṁso vi śṛṇvire ||

āji-pate | nṛ-pate | tvam | it | hi | naḥ | vāje | ā | vakṣi | sukrato iti su-krato |
vītī | hotrābhiḥ | uta | devavīti-bhiḥ | sasa-vāṁsaḥ | vi | śṛṇvire ||8.054.06||

8.054.07a santi hy arya āśiṣa indra āyur janānām |
8.054.07c asmān nakṣasva maghavann upāvase dhukṣasva pipyuṣīm iṣam ||

santi | hi | arye | ā-śiṣaḥ | indre | āyuḥ | janānām |
asmān | nakṣasva | magha-van | upa | avase | dhukṣasva | pipyuṣīm | iṣam ||8.054.07||

8.054.08a vayaṁ ta indra stomebhir vidhema tvam asmākaṁ śatakrato |
8.054.08c mahi sthūraṁ śaśayaṁ rādho ahrayam praskaṇvāya ni tośaya ||

vayam | te | indra | stomebhiḥ | vidhema | tvam | asmākam | śatakrato iti śata-krato |
mahi | sthūram | śaśayam | rādhaḥ | ahrayam | praskaṇvāya | ni | tośaya ||8.054.08||


8.055.01a bhūrīd indrasya vīryaṁ vy akhyam abhy āyati |
8.055.01c rādhas te dasyave vṛka ||

bhūri | it | indrasya | vīryam | vi | akhyam | abhi | ā | ayati |
rādhaḥ | te | dasyave | vṛka ||8.055.01||

8.055.02a śataṁ śvetāsa ukṣaṇo divi tāro na rocante |
8.055.02c mahnā divaṁ na tastabhuḥ ||

śatam | śvetāsaḥ | ukṣaṇaḥ | divi | tāraḥ | na | rocante |
mahnā | divam | na | tastabhuḥ ||8.055.02||

8.055.03a śataṁ veṇūñ chataṁ śunaḥ śataṁ carmāṇi mlātāni |
8.055.03c śatam me balbajastukā aruṣīṇāṁ catuḥśatam ||

śatam | veṇūm | śatam | śunaḥ | śatam | carmāṇi | mlātāni |
śatam | me | balbaja-stukāḥ | aruṣīṇām | catuḥ-śatam ||8.055.03||

8.055.04a sudevāḥ stha kāṇvāyanā vayo-vayo vicarantaḥ |
8.055.04c aśvāso na caṅkramata ||

su-devāḥ | stha | kāṇvāyanāḥ | vayaḥ-vayaḥ | vi-carantaḥ |
aśvāsaḥ | na | caṅkramata ||8.055.04||

8.055.05a ād it sāptasya carkirann ānūnasya mahi śravaḥ |
8.055.05c śyāvīr atidhvasan pathaś cakṣuṣā cana saṁnaśe ||

āt | it | sāptasya | carkiran | na | anūnasya | mahi | śravaḥ |
śyāvīḥ | ati-dhvasan | pathaḥ | cakṣuṣā | cana | sam-naśe ||8.055.05||


8.056.01a prati te dasyave vṛka rādho adarśy ahrayam |
8.056.01c dyaur na prathinā śavaḥ ||

prati | te | dasyave | vṛka | rādhaḥ | adarśi | ahrayam |
dyauḥ | na | prathinā | śavaḥ ||8.056.01||

8.056.02a daśa mahyam pautakrataḥ sahasrā dasyave vṛkaḥ |
8.056.02c nityād rāyo amaṁhata ||

daśa | mahyam | pauta-krataḥ | sahasrā | dasyave | vṛkaḥ |
nityāt | rāyaḥ | amaṁhata ||8.056.02||

8.056.03a śatam me gardabhānāṁ śatam ūrṇāvatīnām |
8.056.03c śataṁ dāsām̐ ati srajaḥ ||

śatam | me | gardabhānām | śatam | ūrṇā-vatīnām |
śatam | dāsān | ati | srajaḥ ||8.056.03||

8.056.04a tatro api prāṇīyata pūtakratāyai vyaktā |
8.056.04c aśvānām in na yūthyām ||

tatro iti | api | pra | anīyata | pūta-kratāyai | vi-aktā |
aśvānām | it | na | yūthyām ||8.056.04||

8.056.05a acety agniś cikitur havyavāṭ sa sumadrathaḥ |
8.056.05c agniḥ śukreṇa śociṣā bṛhat sūro arocata divi sūryo arocata ||

aceti | agniḥ | cikituḥ | havya-vāṭ | saḥ | sumat-rathaḥ |
agniḥ | śukreṇa | śociṣā | bṛhat | sūraḥ | arocata | divi | sūryaḥ | arocata ||8.056.05||


8.057.01a yuvaṁ devā kratunā pūrvyeṇa yuktā rathena taviṣaṁ yajatrā |
8.057.01c āgacchataṁ nāsatyā śacībhir idaṁ tṛtīyaṁ savanam pibāthaḥ ||

yuvam | devā | kratunā | pūrvyeṇa | yuktā | rathena | taviṣam | yajatrā |
ā | agacchatam | nāsatyā | śacībhiḥ | idam | tṛtīyam | savanam | pibāthaḥ ||8.057.01||

8.057.02a yuvāṁ devās traya ekādaśāsaḥ satyāḥ satyasya dadṛśe purastāt |
8.057.02c asmākaṁ yajñaṁ savanaṁ juṣāṇā pātaṁ somam aśvinā dīdyagnī ||

yuvām | devāḥ | trayaḥ | ekādaśāsaḥ | satyāḥ | satyasya | dadṛśe | purastāt |
asmākam | yajñam | savanam | juṣāṇā | pātam | somam | aśvinā | dīdyagnī iti dīdi-agnī ||8.057.02||

8.057.03a panāyyaṁ tad aśvinā kṛtaṁ vāṁ vṛṣabho divo rajasaḥ pṛthivyāḥ |
8.057.03c sahasraṁ śaṁsā uta ye gaviṣṭau sarvām̐ it tām̐ upa yātā pibadhyai ||

panāyyam | tat | aśvinā | kṛtam | vām | vṛṣabhaḥ | divaḥ | rajasaḥ | pṛthivyāḥ |
sahasram | śaṁsāḥ | uta | ye | gaviṣṭau | sarvān | it | tān | upa | yāta | pibadhyai ||8.057.03||

8.057.04a ayaṁ vām bhāgo nihito yajatremā giro nāsatyopa yātam |
8.057.04c pibataṁ somam madhumantam asme pra dāśvāṁsam avataṁ śacībhiḥ ||

ayam | vām | bhāgaḥ | ni-hitaḥ | yajatrā | imāḥ | giraḥ | nāsatyā | upa | yātam |
pibatam | somam | madhu-mantam | asme iti | pra | dāśvāṁsam | avatam | śacībhiḥ ||8.057.04||


8.058.01a yam ṛtvijo bahudhā kalpayantaḥ sacetaso yajñam imaṁ vahanti |
8.058.01c yo anūcāno brāhmaṇo yukta āsīt kā svit tatra yajamānasya saṁvit ||

yam | ṛtvijaḥ | bahudhā | kalpayantaḥ | sa-cetasaḥ | yajñam | imam | vahanti |
yaḥ | anūcānaḥ | brāhmaṇaḥ | yuktaḥ | āsīt | kā | svit | tatra | yajamānasya | sam-vit ||8.058.01||

8.058.02a eka evāgnir bahudhā samiddha ekaḥ sūryo viśvam anu prabhūtaḥ |
8.058.02c ekaivoṣāḥ sarvam idaṁ vi bhāty ekaṁ vā idaṁ vi babhūva sarvam ||

ekaḥ | eva | agniḥ | bahudhā | sam-iddhaḥ | ekaḥ | sūryaḥ | viśvam | anu | pra-bhūtaḥ |
ekā | eva | uṣāḥ | sarvam | idam | vi | bhāti | ekam | vai | idam | vi | babhūva | sarvam ||8.058.02||

8.058.03a jyotiṣmantaṁ ketumantaṁ tricakraṁ sukhaṁ rathaṁ suṣadam bhūrivāram |
8.058.03c citrāmaghā yasya yoge 'dhijajñe taṁ vāṁ huve ati riktam pibadhyai ||

jyotiṣmantam | ketu-mantam | tri-cakram | su-kham | ratham | su-sadam | bhūri-vāram |
citra-maghā | yasya | yoge | adhi-jajñe | tam | vām | huve | ati | riktam | pibadhyai ||8.058.03||


8.059.01a imāni vām bhāgadheyāni sisrata indrāvaruṇā pra mahe suteṣu vām |
8.059.01c yajñe-yajñe ha savanā bhuraṇyatho yat sunvate yajamānāya śikṣathaḥ ||

imāni | vām | bhāga-dheyāni | sisrate | indrāvaruṇā | pra | mahe | suteṣu | vām |
yajñe-yajñe | ha | savanā | bhuraṇyathaḥ | yat | sunvate | yajamānāya | śikṣathaḥ ||8.059.01||

8.059.02a niṣṣidhvarīr oṣadhīr āpa āstām indrāvaruṇā mahimānam āśata |
8.059.02c yā sisratū rajasaḥ pāre adhvano yayoḥ śatrur nakir ādeva ohate ||

niḥ-sidhvarīḥ | oṣadhīḥ | āpaḥ | āstām | indrāvaruṇā | mahimānam | āśata |
yā | sisratuḥ | rajasaḥ | pāre | adhvanaḥ | yayoḥ | śatruḥ | nakiḥ | adevaḥ | ohate ||8.059.02||

8.059.03a satyaṁ tad indrāvaruṇā kṛśasya vām madhva ūrmiṁ duhate sapta vāṇīḥ |
8.059.03c tābhir dāśvāṁsam avataṁ śubhas patī yo vām adabdho abhi pāti cittibhiḥ ||

satyam | tat | indrāvaruṇā | kṛśasya | vām | madhvaḥ | ūrmim | duhate | sapta | vāṇīḥ |
tābhiḥ | dāśvāṁsam | avatam | śubhaḥ | patī iti | yaḥ | vām | adabdhaḥ | abhi | pāti | citti-bhiḥ ||8.059.03||

8.059.04a ghṛtapruṣaḥ saumyā jīradānavaḥ sapta svasāraḥ sadana ṛtasya |
8.059.04c yā ha vām indrāvaruṇā ghṛtaścutas tābhir dhattaṁ yajamānāya śikṣatam ||

ghṛta-pruṣaḥ | saumyāḥ | jīra-dānavaḥ | sapta | svasāraḥ | sadane | ṛtasya |
yāḥ | ha | vām | indrāvaruṇā | ghṛta-ścutaḥ | tābhiḥ | dhattam | yajamānāya | śikṣatam ||8.059.04||

8.059.05a avocāma mahate saubhagāya satyaṁ tveṣābhyām mahimānam indriyam |
8.059.05c asmān sv indrāvaruṇā ghṛtaścutas tribhiḥ sāptebhir avataṁ śubhas patī ||

avocāma | mahate | saubhagāya | satyam | tveṣābhyām | mahimānam | indriyam |
asmān | su | indrāvaruṇā | ghṛta-ścutaḥ | tri-bhiḥ | sāptebhiḥ | avatam | śubhaḥ | patī iti ||8.059.05||

8.059.06a indrāvaruṇā yad ṛṣibhyo manīṣāṁ vāco matiṁ śrutam adattam agre |
8.059.06c yāni sthānāny asṛjanta dhīrā yajñaṁ tanvānās tapasābhy apaśyam ||

indrāvaruṇā | yat | ṛṣi-bhyaḥ | manīṣām | vācaḥ | matim | śrutam | adattam | agre |
yāni | sthānāni | asṛjanta | dhīrāḥ | yajñam | tanvānāḥ | tapasā | abhi | apaśyam ||8.059.06||

8.059.07a indrāvaruṇā saumanasam adṛptaṁ rāyas poṣaṁ yajamāneṣu dhattam |
8.059.07c prajām puṣṭim bhūtim asmāsu dhattaṁ dīrghāyutvāya pra tirataṁ na āyuḥ ||

indrāvaruṇā | saumanasam | adṛptam | rāyaḥ | poṣam | yajamāneṣu | dhattam |
pra-jām | puṣṭim | bhūtim | asmāsu | dhattam | dīrghāyu-tvāya | pra | tiratam | naḥ | āyuḥ ||8.059.07||


8.060.01a agna ā yāhy agnibhir hotāraṁ tvā vṛṇīmahe |
8.060.01c ā tvām anaktu prayatā haviṣmatī yajiṣṭham barhir āsade ||

agne | ā | yāhi | agni-bhiḥ | hotāram | tvā | vṛṇīmahe |
ā | tvām | anaktu | pra-yatā | haviṣmatī | yajiṣṭham | barhiḥ | ā-sade ||8.060.01||

8.060.02a acchā hi tvā sahasaḥ sūno aṅgiraḥ srucaś caranty adhvare |
8.060.02c ūrjo napātaṁ ghṛtakeśam īmahe 'gniṁ yajñeṣu pūrvyam ||

accha | hi | tvā | sahasaḥ | sūno iti | aṅgiraḥ | srucaḥ | caranti | adhvare |
ūrjaḥ | napātam | ghṛta-keśam | īmahe | agnim | yajñeṣu | pūrvyam ||8.060.02||

8.060.03a agne kavir vedhā asi hotā pāvaka yakṣyaḥ |
8.060.03c mandro yajiṣṭho adhvareṣv īḍyo viprebhiḥ śukra manmabhiḥ ||

agne | kaviḥ | vedhāḥ | asi | hotā | pāvaka | yakṣyaḥ |
mandraḥ | yajiṣṭhaḥ | adhvareṣu | īḍyaḥ | viprebhiḥ | śukra | manma-bhiḥ ||8.060.03||

8.060.04a adrogham ā vahośato yaviṣṭhya devām̐ ajasra vītaye |
8.060.04c abhi prayāṁsi sudhitā vaso gahi mandasva dhītibhir hitaḥ ||

adrogham | ā | vaha | uśataḥ | yaviṣṭhya | devān | ajasra | vītaye |
abhi | prayāṁsi | su-dhitā | ā | vaso iti | gahi | mandasva | dhīti-bhiḥ | hitaḥ ||8.060.04||

8.060.05a tvam it saprathā asy agne trātar ṛtas kaviḥ |
8.060.05c tvāṁ viprāsaḥ samidhāna dīdiva ā vivāsanti vedhasaḥ ||

tvam | it | sa-prathāḥ | asi | agne | trātaḥ | ṛtaḥ | kaviḥ |
tvām | viprāsaḥ | sam-idhāna | dīdi-vaḥ | ā | vivāsanti | vedhasaḥ ||8.060.05||

8.060.06a śocā śociṣṭha dīdihi viśe mayo rāsva stotre mahām̐ asi |
8.060.06c devānāṁ śarman mama santu sūrayaḥ śatrūṣāhaḥ svagnayaḥ ||

śoca | śociṣṭha | dīdihi | viśe | mayaḥ | rāsva | stotre | mahān | asi |
devānām | śarman | mama | santu | sūrayaḥ | śatru-sahaḥ | su-agnayaḥ ||8.060.06||

8.060.07a yathā cid vṛddham atasam agne saṁjūrvasi kṣami |
8.060.07c evā daha mitramaho yo asmadhrug durmanmā kaś ca venati ||

yathā | cit | ṛddham | atasam | agne | sam-jūrvasi | kṣami |
eva | daha | mitra-mahaḥ | yaḥ | asma-dhruk | duḥ-manmā | kaḥ | ca | venati ||8.060.07||

8.060.08a mā no martāya ripave rakṣasvine māghaśaṁsāya rīradhaḥ |
8.060.08c asredhadbhis taraṇibhir yaviṣṭhya śivebhiḥ pāhi pāyubhiḥ ||

mā | naḥ | martāya | ripave | rakṣasvine | mā | agha-śaṁsāya | rīradhaḥ |
asredhat-bhiḥ | taraṇi-bhiḥ | yaviṣṭhya | śivebhiḥ | pāhi | pāyu-bhiḥ ||8.060.08||

8.060.09a pāhi no agna ekayā pāhy uta dvitīyayā |
8.060.09c pāhi gīrbhis tisṛbhir ūrjām pate pāhi catasṛbhir vaso ||

pāhi | naḥ | agne | ekayā | pāhi | uta | dvitīyayā |
pāhi | gīḥ-bhiḥ | tisṛ-bhiḥ | ūrjām | pate | pāhi | catasṛ-bhiḥ | vaso iti ||8.060.09||

8.060.10a pāhi viśvasmād rakṣaso arāvṇaḥ pra sma vājeṣu no 'va |
8.060.10c tvām id dhi nediṣṭhaṁ devatātaya āpiṁ nakṣāmahe vṛdhe ||

pāhi | viśvasmāt | rakṣasaḥ | arāvṇaḥ | pra | sma | vājeṣu | naḥ | ava |
tvām | it | hi | nediṣṭham | deva-tātaye | āpim | nakṣāmahe | vṛdhe ||8.060.10||

8.060.11a ā no agne vayovṛdhaṁ rayim pāvaka śaṁsyam |
8.060.11c rāsvā ca na upamāte puruspṛhaṁ sunītī svayaśastaram ||

ā | naḥ | agne | vayaḥ-vṛdham | rayim | pāvaka | śaṁsyam |
rāsva | ca | naḥ | upa-māte | puru-spṛham | su-nītī | svayaśaḥ-taram ||8.060.11||

8.060.12a yena vaṁsāma pṛtanāsu śardhatas taranto arya ādiśaḥ |
8.060.12c sa tvaṁ no vardha prayasā śacīvaso jinvā dhiyo vasuvidaḥ ||

yena | vaṁsāma | pṛtanāsu | śardhataḥ | tarantaḥ | aryaḥ | ā-diśaḥ |
saḥ | tvam | naḥ | vardha | pra-yasā | śacīvaso iti śacī-vaso | jinva | dhiyaḥ | vasu-vidaḥ ||8.060.12||

8.060.13a śiśāno vṛṣabho yathāgniḥ śṛṅge davidhvat |
8.060.13c tigmā asya hanavo na pratidhṛṣe sujambhaḥ sahaso yahuḥ ||

śiśānaḥ | vṛṣabhaḥ | yathā | agniḥ | śṛṅge | davidhvat |
tigmāḥ | asya | hanavaḥ | na | prati-dhṛṣe | su-jambhaḥ | sahasaḥ | yahuḥ ||8.060.13||

8.060.14a nahi te agne vṛṣabha pratidhṛṣe jambhāso yad vitiṣṭhase |
8.060.14c sa tvaṁ no hotaḥ suhutaṁ haviṣ kṛdhi vaṁsvā no vāryā puru ||

nahi | te | agne | vṛṣabha | prati-dhṛṣe | jambhāsaḥ | yat | vi-tiṣṭhase |
saḥ | tvam | naḥ | hotariti | su-hutam | haviḥ | kṛdhi | vaṁsva | naḥ | vāryā | puru ||8.060.14||

8.060.15a śeṣe vaneṣu mātroḥ saṁ tvā martāsa indhate |
8.060.15c atandro havyā vahasi haviṣkṛta ād id deveṣu rājasi ||

śeṣe | vaneṣu | mātroḥ | sam | tvā | martāsaḥ | indhate |
atandraḥ | havyā | vahasi | haviḥ-kṛtaḥ | āt | it | deveṣu | rājasi ||8.060.15||

8.060.16a sapta hotāras tam id īḻate tvāgne sutyajam ahrayam |
8.060.16c bhinatsy adriṁ tapasā vi śociṣā prāgne tiṣṭha janām̐ ati ||

sapta | hotāraḥ | tam | it | īḻate | tvā | agne | su-tyajam | ahrayam |
bhinatsi | adrim | tapasā | vi | śociṣā | pra | agne | tiṣṭha | janān | ati ||8.060.16||

8.060.17a agnim-agniṁ vo adhriguṁ huvema vṛktabarhiṣaḥ |
8.060.17c agniṁ hitaprayasaḥ śaśvatīṣv ā hotāraṁ carṣaṇīnām ||

agnim-agnim | vaḥ | adhri-gum | huvema | vṛkta-barhiṣaḥ |
agnim | hita-prayasaḥ | śaśvatīṣu | ā | hotāram | carṣaṇīnām ||8.060.17||

8.060.18a ketena śarman sacate suṣāmaṇy agne tubhyaṁ cikitvanā |
8.060.18c iṣaṇyayā naḥ pururūpam ā bhara vājaṁ nediṣṭham ūtaye ||

ketena | śarman | sacate | su-sāmani | agne | tubhyam | cikitvanā |
iṣaṇyayā | naḥ | puru-rūpam | ā | bhara | vājan | nediṣṭham | ūtaye ||8.060.18||

8.060.19a agne jaritar viśpatis tepāno deva rakṣasaḥ |
8.060.19c aproṣivān gṛhapatir mahām̐ asi divas pāyur duroṇayuḥ ||

agne | jaritaḥ | viśpatiḥ | tepānaḥ | deva | rakṣasaḥ |
aproṣi-vān | gṛha-patiḥ | mahān | asi | divaḥ | pāyuḥ | diroṇa-yuḥ ||8.060.19||

8.060.20a mā no rakṣa ā veśīd āghṛṇīvaso mā yātur yātumāvatām |
8.060.20c parogavyūty anirām apa kṣudham agne sedha rakṣasvinaḥ ||

mā | naḥ | rakṣaḥ | ā | veśīt | āghṛṇivaso ityāghṛṇi-vaso | mā | yātuḥ | yātu-māvatām |
paraḥ-gavyūti | anirām | apa | kṣudham | agne | sedha | rakṣasvinaḥ ||8.060.20||


8.061.01a ubhayaṁ śṛṇavac ca na indro arvāg idaṁ vacaḥ |
8.061.01c satrācyā maghavā somapītaye dhiyā śaviṣṭha ā gamat ||

ubhayam | śṛṇavat | ca | naḥ | indraḥ | arvāk | idam | vacaḥ |
satrācyā | magha-vā | soma-pītaye | dhiyā | śaviṣṭhaḥ | ā | gamat ||8.061.01||

8.061.02a taṁ hi svarājaṁ vṛṣabhaṁ tam ojase dhiṣaṇe niṣṭatakṣatuḥ |
8.061.02c utopamānām prathamo ni ṣīdasi somakāmaṁ hi te manaḥ ||

tam | hi | sva-rājam | vṛṣabham | tam | ojase | dhiṣaṇe | niḥ-tatakṣatuḥ |
uta | upa-mānām | prathamaḥ | ni | sīdasi | soma-kāmam | hi | te | manaḥ ||8.061.02||

8.061.03a ā vṛṣasva purūvaso sutasyendrāndhasaḥ |
8.061.03c vidmā hi tvā harivaḥ pṛtsu sāsahim adhṛṣṭaṁ cid dadhṛṣvaṇim ||

ā | vṛṣasva | puruvaso iti puru-vaso | sutasya | indra | andhasaḥ |
vidma | hi | tvā | hari-vaḥ | pṛt-su | sasahim | adhṛṣṭam | cit | dadhṛṣvaṇim ||8.061.03||

8.061.04a aprāmisatya maghavan tathed asad indra kratvā yathā vaśaḥ |
8.061.04c sanema vājaṁ tava śiprinn avasā makṣū cid yanto adrivaḥ ||

aprāmi-satya | magha-van | tathā | it | asat | indra | kratvā | yathā | vaśaḥ |
sanema | vājam | tava | śiprin | avasā | makṣu | cit | yantaḥ | adri-vaḥ ||8.061.04||

8.061.05a śagdhy ū ṣu śacīpata indra viśvābhir ūtibhiḥ |
8.061.05c bhagaṁ na hi tvā yaśasaṁ vasuvidam anu śūra carāmasi ||

śagdhi | ūm̐ iti | su | śacī-pate | indra | viśvābhiḥ | ūti-bhiḥ |
bhagam | na | hi | tvā | yaśasam | vasu-vidam | anu | śūra | carāmasi ||8.061.05||

8.061.06a pauro aśvasya purukṛd gavām asy utso deva hiraṇyayaḥ |
8.061.06c nakir hi dānam parimardhiṣat tve yad-yad yāmi tad ā bhara ||

pauraḥ | aśvasya | puru-kṛt | gavām | asi | utsaḥ | deva | hiraṇyayaḥ |
nakiḥ | hi | dānam | pari-mardhiṣat | tve iti | yat-yat | yāmi | tat | ā | bhara ||8.061.06||

8.061.07a tvaṁ hy ehi cerave vidā bhagaṁ vasuttaye |
8.061.07c ud vāvṛṣasva maghavan gaviṣṭaya ud indrāśvamiṣṭaye ||

tvam | hi | ā | ihi | cerave | vidāḥ | bhagam | vasuttaye |
ut | vavṛṣasva | magha-van | go-iṣṭaye | ut | indra | aśvam-iṣṭaye ||8.061.07||

8.061.08a tvam purū sahasrāṇi śatāni ca yūthā dānāya maṁhase |
8.061.08c ā puraṁdaraṁ cakṛma vipravacasa indraṁ gāyanto 'vase ||

tvam | puru | sahasrāṇi | śatāni | ca | yūthā | dānāya | maṁhase |
ā | puram-daram | cakṛma | vipra-vacasaḥ | indram | gāyantaḥ | avase ||8.061.08||

8.061.09a avipro vā yad avidhad vipro vendra te vacaḥ |
8.061.09c sa pra mamandat tvāyā śatakrato prācāmanyo ahaṁsana ||

avipraḥ | vā | yat | avidhat | vipraḥ | vā | indra | te | vacaḥ |
saḥ | pra | mamandat | tvā-yā | śatakrato iti śāta-krato | prācāmanyo iti prācā-manyo | aham-sana ||8.061.09||

8.061.10a ugrabāhur mrakṣakṛtvā puraṁdaro yadi me śṛṇavad dhavam |
8.061.10c vasūyavo vasupatiṁ śatakratuṁ stomair indraṁ havāmahe ||

ugra-bāhuḥ | mrakṣa-kṛtvā | puram-daraḥ | yadi | me | śṛṇavat | havam |
vasu-yavaḥ | vasu-patim | śata-kratum | stomaiḥ | indram | havāmahe ||8.061.10||

8.061.11a na pāpāso manāmahe nārāyāso na jaḻhavaḥ |
8.061.11c yad in nv indraṁ vṛṣaṇaṁ sacā sute sakhāyaṁ kṛṇavāmahai ||

na | pāpāsaḥ | manāmahe | na | arāyāsaḥ | na | jalhavaḥ |
yat | it | nu | indram | vṛṣaṇam | sacā | sute | sakhāyam | kṛṇavāmahai ||8.061.11||

8.061.12a ugraṁ yuyujma pṛtanāsu sāsahim ṛṇakātim adābhyam |
8.061.12c vedā bhṛmaṁ cit sanitā rathītamo vājinaṁ yam id ū naśat ||

ugram | yuyujma | pṛtanāsu | sasahim | ṛṇa-kātim | adābhyam |
veda | bhṛmam | cit | sanitā | rathi-tamaḥ | vājinam | yam | it | ūm̐ iti | naśat ||8.061.12||

8.061.13a yata indra bhayāmahe tato no abhayaṁ kṛdhi |
8.061.13c maghavañ chagdhi tava tan na ūtibhir vi dviṣo vi mṛdho jahi ||

yataḥ | indra | bhayāmahe | tataḥ | naḥ | abhayam | kṛdhi |
magha-van | śagdhi | tava | tam | naḥ | ūti-bhiḥ | vi | dviṣaḥ | vi | mṛdhaḥ | jahi ||8.061.13||

8.061.14a tvaṁ hi rādhaspate rādhaso mahaḥ kṣayasyāsi vidhataḥ |
8.061.14c taṁ tvā vayam maghavann indra girvaṇaḥ sutāvanto havāmahe ||

tvam | hi | rādhaḥ-pate | rādhasaḥ | mahaḥ | kṣayasya | asi | vidhataḥ |
tam | tvā | vayam | magha-van | indra | girvaṇaḥ | suta-vantaḥ | havāmahe ||8.061.14||

8.061.15a indraḥ spaḻ uta vṛtrahā paraspā no vareṇyaḥ |
8.061.15c sa no rakṣiṣac caramaṁ sa madhyamaṁ sa paścāt pātu naḥ puraḥ ||

indraḥ | spaṭ | uta | vṛtra-hā | paraḥ-pāḥ | naḥ | vareṇyaḥ |
saḥ | naḥ | rakṣiṣat | caramam | saḥ | madhyamam | saḥ | paścāt | pātu | naḥ | puraḥ ||8.061.15||

8.061.16a tvaṁ naḥ paścād adharād uttarāt pura indra ni pāhi viśvataḥ |
8.061.16c āre asmat kṛṇuhi daivyam bhayam āre hetīr adevīḥ ||

tvam | naḥ | paścāt | adharāt | uttarāt | puraḥ | indra | ni | pāhi | viśvataḥ |
āre | asmat | kṛṇuhi | daivyam | bhayam | āre | hetīḥ | adevīḥ ||8.061.16||

8.061.17a adyādyā śvaḥ-śva indra trāsva pare ca naḥ |
8.061.17c viśvā ca no jaritṝn satpate ahā divā naktaṁ ca rakṣiṣaḥ ||

adya-adya | śvaḥ-śvaḥ | indras | trāsva | pare | ca | naḥ |
viśvā | ca | naḥ | jaritṝn | sat-pate | ahā | divā | naktam | ca | rakṣiṣaḥ ||8.061.17||

8.061.18a prabhaṅgī śūro maghavā tuvīmaghaḥ sammiślo viryāya kam |
8.061.18c ubhā te bāhū vṛṣaṇā śatakrato ni yā vajram mimikṣatuḥ ||

pra-bhaṅgī | śūraḥ | magha-vā | tuvi-maghaḥ | sam-miślaḥ | vīryāya | kam |
ubhā | te | bāhū iti | vṛṣaṇā | śatakrato iti śata-krato | ni | yā | vajram | mimikṣatuḥ ||8.061.18||


8.062.01a pro asmā upastutim bharatā yaj jujoṣati |
8.062.01c ukthair indrasya māhinaṁ vayo vardhanti somino bhadrā indrasya rātayaḥ ||

pro iti | asmai | upa-stutim | bharata | yat | jujoṣati |
ukthaiḥ | indrasya | māhinam | vayaḥ | vardhanti | sominaḥ | bhadrāḥ | indrasya | rātayaḥ ||8.062.01||

8.062.02a ayujo asamo nṛbhir ekaḥ kṛṣṭīr ayāsyaḥ |
8.062.02c pūrvīr ati pra vāvṛdhe viśvā jātāny ojasā bhadrā indrasya rātayaḥ ||

ayujaḥ | asamaḥ | nṛ-bhiḥ | ekaḥ | kṛṣṭīḥ | ayāsyaḥ |
pūrvīḥ | ati | pra | vavṛdhe | viśvā | jātāni | ojasā | bhadrāḥ | indrasya | rātayaḥ ||8.062.02||

8.062.03a ahitena cid arvatā jīradānuḥ siṣāsati |
8.062.03c pravācyam indra tat tava vīryāṇi kariṣyato bhadrā indrasya rātayaḥ ||

ahitena | cit | arvatā | jīra-dānuḥ | siṣāsati |
pra-vācyam | indra | tat | tava | vīryāṇi | kariṣyataḥ | bhadrāḥ | indrasya | rātayaḥ ||8.062.03||

8.062.04a ā yāhi kṛṇavāma ta indra brahmāṇi vardhanā |
8.062.04c yebhiḥ śaviṣṭha cākano bhadram iha śravasyate bhadrā indrasya rātayaḥ ||

ā | yāhi | kṛṇavāma | te | indra | brahmāṇi | vardhanā |
yebhiḥ | śaviṣṭha | cākanaḥ | bhadram | iha | śravasyate | bhadrāḥ | indrasya | rātayaḥ ||8.062.04||

8.062.05a dhṛṣataś cid dhṛṣan manaḥ kṛṇoṣīndra yat tvam |
8.062.05c tīvraiḥ somaiḥ saparyato namobhiḥ pratibhūṣato bhadrā indrasya rātayaḥ ||

dhṛṣataḥ | cit | dhṛṣat | manaḥ | kṛṇoṣi | indra | yat | tvam |
tīvraiḥ | somaiḥ | saparyataḥ | namaḥ-bhiḥ | prati-bhūṣataḥ | bhadrāḥ | indrasya | rātayaḥ ||8.062.05||

8.062.06a ava caṣṭa ṛcīṣamo 'vatām̐ iva mānuṣaḥ |
8.062.06c juṣṭvī dakṣasya sominaḥ sakhāyaṁ kṛṇute yujam bhadrā indrasya rātayaḥ ||

ava | caṣṭe | ṛcīṣamaḥ | avatān-iva | mānuṣaḥ |
juṣṭvī | dakṣasya | sominaḥ | sakhāyam | kṛṇute | yujam | bhadrāḥ | indrasya | rātayaḥ ||8.062.06||

8.062.07a viśve ta indra vīryaṁ devā anu kratuṁ daduḥ |
8.062.07c bhuvo viśvasya gopatiḥ puruṣṭuta bhadrā indrasya rātayaḥ ||

viśve | te | indra | vīryam | devāḥ | anu | kratum | daduḥ |
bhuvaḥ | viśvasya | go-patiḥ | puru-stuta | bhadrāḥ | indrasya | rātayaḥ ||8.062.07||

8.062.08a gṛṇe tad indra te śava upamaṁ devatātaye |
8.062.08c yad dhaṁsi vṛtram ojasā śacīpate bhadrā indrasya rātayaḥ ||

gṛṇe | tat | indra | te | śavaḥ | upa-mam | deva-tātaye |
yat | haṁsi | vṛtram | ojasā | śacī-pate | bhadrāḥ | indrasya | rātayaḥ ||8.062.08||

8.062.09a samaneva vapuṣyataḥ kṛṇavan mānuṣā yugā |
8.062.09c vide tad indraś cetanam adha śruto bhadrā indrasya rātayaḥ ||

samanā-iva | vapuṣyataḥ | kṛṇavat | mānuṣā | yugā |
vide | tat | indraḥ | cetanam | adha | śrutaḥ | bhadrāḥ | indrasya | rātayaḥ ||8.062.09||

8.062.10a uj jātam indra te śava ut tvām ut tava kratum |
8.062.10c bhūrigo bhūri vāvṛdhur maghavan tava śarmaṇi bhadrā indrasya rātayaḥ ||

ut | jātam | indra | te | śavaḥ | ut | tvām | ut | tava | kratum |
bhūrigo iti bhūri-go | bhūri | vavṛdhuḥ | magha-van | tava | śarmaṇi | bhadrāḥ | indrasya | rātayaḥ ||8.062.10||

8.062.11a ahaṁ ca tvaṁ ca vṛtrahan saṁ yujyāva sanibhya ā |
8.062.11c arātīvā cid adrivo 'nu nau śūra maṁsate bhadrā indrasya rātayaḥ ||

aham | ca | tvam | ca | vṛtra-han | sam | yujyāva | sani-bhyaḥ | ā |
arāti-vā | cit | adri-vaḥ | anu | nau | śūra | maṁsate | bhadrāḥ | indrasya | rātayaḥ ||8.062.11||

8.062.12a satyam id vā u taṁ vayam indraṁ stavāma nānṛtam |
8.062.12c mahām̐ asunvato vadho bhūri jyotīṁṣi sunvato bhadrā indrasya rātayaḥ ||

satyam | ir | vai | ūm̐ iti | tam | vayam | indram | stavāma | na | anṛtam |
mahān | asunvataḥ | vadhaḥ | bhūri | jyotīṁṣi | sunvataḥ | bhadrāḥ | indrasya | rātayaḥ ||8.062.12||


8.063.01a sa pūrvyo mahānāṁ venaḥ kratubhir ānaje |
8.063.01c yasya dvārā manuṣ pitā deveṣu dhiya ānaje ||

saḥ | pūrvyaḥ | mahānām | venaḥ | kratu-bhiḥ | ānaje |
yasya | dvārā | manuḥ | pitā | deveṣu | dhiyaḥ | ānaje ||8.063.01||

8.063.02a divo mānaṁ not sadan somapṛṣṭhāso adrayaḥ |
8.063.02c ukthā brahma ca śaṁsyā ||

divaḥ | mānam | na | ut | sadan | soma-pṛṣṭhāsaḥ | adrayaḥ |
ukthā | brahma | ca | śaṁsyā ||8.063.02||

8.063.03a sa vidvām̐ aṅgirobhya indro gā avṛṇod apa |
8.063.03c stuṣe tad asya pauṁsyam ||

saḥ | vidvān | aṅgiraḥ-bhyaḥ | indraḥ | gāḥ | avṛṇot | apa |
stuṣe | tat | asya | pauṁsyam ||8.063.03||

8.063.04a sa pratnathā kavivṛdha indro vākasya vakṣaṇiḥ |
8.063.04c śivo arkasya homany asmatrā gantv avase ||

saḥ | pratna-thā | kavi-vṛdhaḥ | indraḥ | vākasya | vakṣaṇiḥ |
śivaḥ | arkasya | homani | asma-trā | gantu | avase ||8.063.04||

8.063.05a ād ū nu te anu kratuṁ svāhā varasya yajyavaḥ |
8.063.05c śvātram arkā anūṣatendra gotrasya dāvane ||

āt | ūm̐ iti | nu | te | anu | kratum | svāhā | varasya | yajyavaḥ |
śvātram | arkāḥ | anūṣata | indra | gotrasya | dāvane ||8.063.05||

8.063.06a indre viśvāni vīryā kṛtāni kartvāni ca |
8.063.06c yam arkā adhvaraṁ viduḥ ||

indre | viśvāni | vīryā | kṛtāni | kartvāni | ca |
yam | arkāḥ | adhvaram | viduḥ ||8.063.06||

8.063.07a yat pāñcajanyayā viśendre ghoṣā asṛkṣata |
8.063.07c astṛṇād barhaṇā vipo 'ryo mānasya sa kṣayaḥ ||

yat | pāñca-janyayā | viśā | indre | ghoṣāḥ | asṛkṣata |
astṛṇāt | barhaṇā | vipaḥ | aryaḥ | mānasya | saḥ | kṣayaḥ ||8.063.07||

8.063.08a iyam u te anuṣṭutiś cakṛṣe tāni pauṁsyā |
8.063.08c prāvaś cakrasya vartanim ||

iyam | ūm̐ iti | te | anu-stutiḥ | cakṛṣe | tāni | pauṁsyā |
pra | āvaḥ | cakrasya | vartanim ||8.063.08||

8.063.09a asya vṛṣṇo vyodana uru kramiṣṭa jīvase |
8.063.09c yavaṁ na paśva ā dade ||

asya | vṛṣṇaḥ | vi-odane | uru | kramiṣṭa | jīvase |
yavam | na | paśvaḥ | ā | dade ||8.063.09||

8.063.10a tad dadhānā avasyavo yuṣmābhir dakṣapitaraḥ |
8.063.10c syāma marutvato vṛdhe ||

tat | dadhānāḥ | avasyavaḥ | yuṣmābhiḥ | dakṣa-pitaraḥ |
syāma | marutvataḥ | vṛdhe ||8.063.10||

8.063.11a baḻ ṛtviyāya dhāmna ṛkvabhiḥ śūra nonumaḥ |
8.063.11c jeṣāmendra tvayā yujā ||

baṭ | ṛtviyāya | dhāmne | ṛkva-bhiḥ | śūra | nonumaḥ |
jeṣāma | indra | tvayā | yujā ||8.063.11||

8.063.12a asme rudrā mehanā parvatāso vṛtrahatye bharahūtau sajoṣāḥ |
8.063.12c yaḥ śaṁsate stuvate dhāyi pajra indrajyeṣṭhā asmām̐ avantu devāḥ ||

asme iti | rudrāḥ | mehanā | parvatāsaḥ | vṛtra-hatye | bhara-hūtau | sa-joṣāḥ |
yaḥ | śaṁsate | stuvate | dhāyi | pajraḥ | indra-jyeṣṭāḥ | asmān | avantu | devāḥ ||8.063.12||


8.064.01a ut tvā mandantu stomāḥ kṛṇuṣva rādho adrivaḥ |
8.064.01c ava brahmadviṣo jahi ||

ut | tvā | mandantu | stomāḥ | kṛṇuṣva | rādhaḥ | adri-vaḥ |
ava | brahma-dviṣaḥ | jahi ||8.064.01||

8.064.02a padā paṇīm̐r arādhaso ni bādhasva mahām̐ asi |
8.064.02c nahi tvā kaś cana prati ||

padā | paṇīn | arādhasaḥ | ni | bādhasva | mahān | asi |
nahi | tvā | kaḥ | cana | prati ||8.064.02||

8.064.03a tvam īśiṣe sutānām indra tvam asutānām |
8.064.03c tvaṁ rājā janānām ||

tvam | īśiṣe | sutānām | indra | tvam | asutānām |
tvam | rājā | janānām ||8.064.03||

8.064.04a ehi prehi kṣayo divy āghoṣañ carṣaṇīnām |
8.064.04c obhe pṛṇāsi rodasī ||

ā | ihi | pra | ihi | kṣayaḥ | divi | ā-ghoṣan | carṣaṇīṇām |
ā | ubhe iti | pṛṇāsi | rodasī iti ||8.064.04||

8.064.05a tyaṁ cit parvataṁ giriṁ śatavantaṁ sahasriṇam |
8.064.05c vi stotṛbhyo rurojitha ||

tyam | cit | parvatam | girim | śata-vantam | sahasriṇam |
vi | stotṛ-bhyaḥ | rurojitha ||8.064.05||

8.064.06a vayam u tvā divā sute vayaṁ naktaṁ havāmahe |
8.064.06c asmākaṁ kāmam ā pṛṇa ||

vayam | ūm̐ iti | tvā | divā | sute | vayam | naktam | havāmahe |
asmākam | kāmam | ā | pṛṇa ||8.064.06||

8.064.07a kva sya vṛṣabho yuvā tuvigrīvo anānataḥ |
8.064.07c brahmā kas taṁ saparyati ||

kva | syaḥ | vṛṣabhaḥ | yuvā | tuvi-grīvaḥ | anānataḥ |
brahmā | kaḥ | tam | saparyati ||8.064.07||

8.064.08a kasya svit savanaṁ vṛṣā jujuṣvām̐ ava gacchati |
8.064.08c indraṁ ka u svid ā cake ||

kasya | svit | savanam | vṛṣā | jujuṣvān | ava | gacchati |
indram | kaḥ | ūm̐ iti | svit | ā | cake ||8.064.08||

8.064.09a kaṁ te dānā asakṣata vṛtrahan kaṁ suvīryā |
8.064.09c ukthe ka u svid antamaḥ ||

kam | te | dānāḥ | asakṣata | vṛtra-han | kam | su-vīryā |
ukthe | kaḥ | ūm̐ iti | svit | antamaḥ ||8.064.09||

8.064.10a ayaṁ te mānuṣe jane somaḥ pūruṣu sūyate |
8.064.10c tasyehi pra dravā piba ||

ayam | te | mānuṣe | jane | somaḥ | pūruṣu | sūyate |
tasya | ā | ihi | pra | drava | piba ||8.064.10||

8.064.11a ayaṁ te śaryaṇāvati suṣomāyām adhi priyaḥ |
8.064.11c ārjīkīye madintamaḥ ||

ayam | te | śaryaṇā-vati | su-somāyām | adhi | priyaḥ |
ārjīkīye | madin-tamaḥ ||8.064.11||

8.064.12a tam adya rādhase mahe cārum madāya ghṛṣvaye |
8.064.12c ehīm indra dravā piba ||

tam | adya | rādhase | mahe | cārum | madāya | ghṛṣvaye |
ā | ihi | īm | indra | drava | piba ||8.064.12||


8.065.01a yad indra prāg apāg udaṅ nyag vā hūyase nṛbhiḥ |
8.065.01c ā yāhi tūyam āśubhiḥ ||

yat | indra | prāk | apāk | udak | nyak | vā | hūyase | nṛ-bhiḥ |
ā | yāhi | tūyam | āśu-bhiḥ ||8.065.01||

8.065.02a yad vā prasravaṇe divo mādayāse svarṇare |
8.065.02c yad vā samudre andhasaḥ ||

yat | vā | pra-sravaṇe | divaḥ | mādayāse | svaḥ-nare |
yat | vā | samudre | andhasaḥ ||8.065.02||

8.065.03a ā tvā gīrbhir mahām uruṁ huve gām iva bhojase |
8.065.03c indra somasya pītaye ||

ā | tvā | gīḥ-bhiḥ | mahām | urum | huve | gām-iva | bhojase |
indra | somasya | pītaye ||8.065.03||

8.065.04a ā ta indra mahimānaṁ harayo deva te mahaḥ |
8.065.04c rathe vahantu bibhrataḥ ||

ā | te | indra | mahimānam | harayaḥ | deva | te | mahaḥ |
rathe | vahantu | bibhrataḥ ||8.065.04||

8.065.05a indra gṛṇīṣa u stuṣe mahām̐ ugra īśānakṛt |
8.065.05c ehi naḥ sutam piba ||

indra | gṛṇīṣe | ūm̐ iti | stuṣe | mahān | ugraḥ | īśāna-kṛt |
ā | ihi | naḥ | sutam | piba ||8.065.05||

8.065.06a sutāvantas tvā vayam prayasvanto havāmahe |
8.065.06c idaṁ no barhir āsade ||

suta-vantaḥ | tvā | vayam | prayasvantaḥ | havāmahe |
idam | naḥ | barhiḥ | ā-sade ||8.065.06||

8.065.07a yac cid dhi śaśvatām asīndra sādhāraṇas tvam |
8.065.07c taṁ tvā vayaṁ havāmahe ||

yat | cit | hi | śaśvatām | asi | indra | sādhāraṇaḥ | tvam |
tam | tvā | vayam | havāmahe ||8.065.07||

8.065.08a idaṁ te somyam madhv adhukṣann adribhir naraḥ |
8.065.08c juṣāṇa indra tat piba ||

idam | te | somyam | madhu | adhukṣan | adri-bhiḥ | naraḥ |
juṣāṇaḥ | indra | tat | piba ||8.065.08||

8.065.09a viśvām̐ aryo vipaścito 'ti khyas tūyam ā gahi |
8.065.09c asme dhehi śravo bṛhat ||

viśvān | aryaḥ | vipaḥ-citaḥ | ati | khyaḥ | tūyam | ā | gahi |
asme iti | dhehi | śravaḥ | bṛhat ||8.065.09||

8.065.10a dātā me pṛṣatīnāṁ rājā hiraṇyavīnām |
8.065.10c mā devā maghavā riṣat ||

dātā | me | pṛṣatīnām | rājā | hiraṇya-vīnām |
mā | devāḥ | magha-vā | riṣat ||8.065.10||

8.065.11a sahasre pṛṣatīnām adhi ścandram bṛhat pṛthu |
8.065.11c śukraṁ hiraṇyam ā dade ||

sahasre | pṛṣatīnām | adhi | candram | bṛhat | pṛthu |
śukram | hiraṇyam | ā | dade ||8.065.11||

8.065.12a napāto durgahasya me sahasreṇa surādhasaḥ |
8.065.12c śravo deveṣv akrata ||

napātaḥ | duḥ-gahasya | me | sahasreṇa | su-rādhasaḥ |
śravaḥ | deveṣu | akrata ||8.065.12||


8.066.01a tarobhir vo vidadvasum indraṁ sabādha ūtaye |
8.066.01c bṛhad gāyantaḥ sutasome adhvare huve bharaṁ na kāriṇam ||

taraḥ-bhiḥ | vaḥ | vidat-vasum | indram | sa-bādhaḥ | ūtaye |
bṛhat | gāyantaḥ | suta-some | adhvare | huve | bharam | na | kāriṇam ||8.066.01||

8.066.02a na yaṁ dudhrā varante na sthirā muro made suśipram andhasaḥ |
8.066.02c ya ādṛtyā śaśamānāya sunvate dātā jaritra ukthyam ||

na | yam | dudhrāḥ | varante | na | sthirāḥ | muraḥ | made | su-śipram | andhasaḥ |
yaḥ | ā-dṛtya | śaśamānāya | sunvate | dātā | jaritre | ukthyam ||8.066.02||

8.066.03a yaḥ śakro mṛkṣo aśvyo yo vā kījo hiraṇyayaḥ |
8.066.03c sa ūrvasya rejayaty apāvṛtim indro gavyasya vṛtrahā ||

yaḥ | śakraḥ | mṛkṣaḥ | aśvyaḥ | yaḥ | vā | kījaḥ | hiraṇyayaḥ |
saḥ | ūrvasya | rejayati | apa-vṛtim | indraḥ | gavyasya | vṛtra-hā ||8.066.03||

8.066.04a nikhātaṁ cid yaḥ purusambhṛtaṁ vasūd id vapati dāśuṣe |
8.066.04c vajrī suśipro haryaśva it karad indraḥ kratvā yathā vaśat ||

nikhātam | cit | yaḥ | puru-sambhṛtam | vasu | ut | it | vapati | dāśuṣe |
vajrī | su-śipraḥ | hari-aśvaḥ | it | karat | indraḥ | kratvā | yathā | vaśat ||8.066.04||

8.066.05a yad vāvantha puruṣṭuta purā cic chūra nṛṇām |
8.066.05c vayaṁ tat ta indra sam bharāmasi yajñam ukthaṁ turaṁ vacaḥ ||

yat | vavantha | puru-stuta | purā | cit | śūra | nṛṇām |
vayam | tat | te | indra | sam | bharāmasi | yajñam | uktham | turam | vacaḥ ||8.066.05||

8.066.06a sacā someṣu puruhūta vajrivo madāya dyukṣa somapāḥ |
8.066.06c tvam id dhi brahmakṛte kāmyaṁ vasu deṣṭhaḥ sunvate bhuvaḥ ||

sacā | someṣu | puru-hūta | vajri-vaḥ | madāya | dyukṣa | soma-pāḥ |
tvam | it | hi | brahma-kṛte | kāmyam | vasu | deṣṭhaḥ | sunvate | bhuvaḥ ||8.066.06||

8.066.07a vayam enam idā hyo 'pīpemeha vajriṇam |
8.066.07c tasmā u adya samanā sutam bharā nūnam bhūṣata śrute ||

vayam | enam | idā | hyaḥ | apīpema | iha | vajriṇam |
tasmai | ūm̐ iti | adya | samanā | sutam | bhara | ā | nūnam | bhūṣata | śrute ||8.066.07||

8.066.08a vṛkaś cid asya vāraṇa urāmathir ā vayuneṣu bhūṣati |
8.066.08c semaṁ naḥ stomaṁ jujuṣāṇa ā gahīndra pra citrayā dhiyā ||

vṛkaḥ | cit | asya | vāraṇaḥ | urā-mathiḥ | ā | vayuneṣu | bhūṣati |
saḥ | imam | naḥ | stomam | jujuṣāṇaḥ | ā | gahi | indra | pra | citrayā | dhiyā ||8.066.08||

8.066.09a kad ū nv asyākṛtam indrasyāsti pauṁsyam |
8.066.09c keno nu kaṁ śromatena na śuśruve januṣaḥ pari vṛtrahā ||

kat | ūm̐ iti | nu | asya | akṛtam | indrasya | asti | pauṁsyam |
keno iti | nu | kam | śromatena | na | śiśruve | januṣaḥ | pari | vṛtra-hā ||8.066.09||

8.066.10a kad ū mahīr adhṛṣṭā asya taviṣīḥ kad u vṛtraghno astṛtam |
8.066.10c indro viśvān bekanāṭām̐ ahardṛśa uta kratvā paṇīm̐r abhi ||

kat | ūm̐ iti | mahīḥ | adhṛṣṭāḥ | asya | taviṣīḥ | kat | ūm̐ iti | vṛtra-ghnaḥ | astṛtam |
indraḥ | viśvān | beka-nāṭān | ahaḥ-dṛṣaḥ | uta | kratvā | paṇīn | abhi ||8.066.10||

8.066.11a vayaṁ ghā te apūrvyendra brahmāṇi vṛtrahan |
8.066.11c purūtamāsaḥ puruhūta vajrivo bhṛtiṁ na pra bharāmasi ||

vayam | gha | te | apūrvyā | indra | brahmāṇi | vṛtra-han |
puru-tamāsaḥ | puru-hūta | vajri-vaḥ | bhṛtim | na | pra | bharāmasi ||8.066.11||

8.066.12a pūrvīś cid dhi tve tuvikūrminn āśaso havanta indrotayaḥ |
8.066.12c tiraś cid aryaḥ savanā vaso gahi śaviṣṭha śrudhi me havam ||

pūrvīḥ | cit | hi | tve iti | tuvi-kūrmin | ā-śasaḥ | havante | indra | ūtayaḥ |
tiraḥ | cit | aryaḥ | savanā | ā | vaso iti | gahi | śaviṣṭha | śrudhi | me | havam ||8.066.12||

8.066.13a vayaṁ ghā te tve id v indra viprā api ṣmasi |
8.066.13c nahi tvad anyaḥ puruhūta kaś cana maghavann asti marḍitā ||

vayam | gha | te | tve iti | it | ūm̐ iti | indra | viprāḥ | api | smasi |
nahi | tvat | anyaḥ | puru-hūta | kaḥ | cana | magha-van | asti | marḍitā ||8.066.13||

8.066.14a tvaṁ no asyā amater uta kṣudho 'bhiśaster ava spṛdhi |
8.066.14c tvaṁ na ūtī tava citrayā dhiyā śikṣā śaciṣṭha gātuvit ||

tvam | naḥ | asyāḥ | amateḥ | uta | kṣudhaḥ | abhi-śasteḥ | ava | spṛdhi |
tvam | naḥ | ūtī | tava | citrayā | dhiyā | śikṣa | śaciṣṭha | gātu-vit ||8.066.14||

8.066.15a soma id vaḥ suto astu kalayo mā bibhītana |
8.066.15c aped eṣa dhvasmāyati svayaṁ ghaiṣo apāyati ||

somaḥ | it | vaḥ | sutaḥ | astu | kalayaḥ | mā | bibhītana |
apa | it | eṣaḥ | dhvasmā | ayati | svayam | gha | eṣaḥ | apa | ayati ||8.066.15||


8.067.01a tyān nu kṣatriyām̐ ava ādityān yāciṣāmahe |
8.067.01c sumṛḻīkām̐ abhiṣṭaye ||

tyān | nu | kṣatriyān | avaḥ | ādityān | yāciṣāmahe |
su-mṛḻīkān | abhiṣṭaye ||8.067.01||

8.067.02a mitro no aty aṁhatiṁ varuṇaḥ parṣad aryamā |
8.067.02c ādityāso yathā viduḥ ||

mitraḥ | naḥ | ati | aṁhatim | varuṇaḥ | parṣat | aryamā |
ādityāsaḥ | yathā | viduḥ ||8.067.02||

8.067.03a teṣāṁ hi citram ukthyaṁ varūtham asti dāśuṣe |
8.067.03c ādityānām araṁkṛte ||

teṣām | hi | citram | ukthyam | varūtham | asti | dāśuṣe |
ādityānām | aram-kṛte ||8.067.03||

8.067.04a mahi vo mahatām avo varuṇa mitrāryaman |
8.067.04c avāṁsy ā vṛṇīmahe ||

mahi | vaḥ | mahatām | avaḥ | varuṇa | mitra | aryaman |
avāṁsi | ā | vṛṇīmahe ||8.067.04||

8.067.05a jīvān no abhi dhetanādityāsaḥ purā hathāt |
8.067.05c kad dha stha havanaśrutaḥ ||

jīvān | naḥ | abhi | dhetana | ādityāsaḥ | purā | hathāt |
kat | ha | stha | havana-śrutaḥ ||8.067.05||

8.067.06a yad vaḥ śrāntāya sunvate varūtham asti yac chardiḥ |
8.067.06c tenā no adhi vocata ||

yat | vaḥ | śrāntāya | sunvate | varūtham | asti | yat | chardiḥ |
tena | naḥ | adhi | vocata ||8.067.06||

8.067.07a asti devā aṁhor urv asti ratnam anāgasaḥ |
8.067.07c ādityā adbhutainasaḥ ||

asti | devāḥ | aṁhoḥ | uru | asti | ratnam | anāgasaḥ |
ādityāḥ | adbhuta-enasaḥ ||8.067.07||

8.067.08a mā naḥ setuḥ siṣed ayam mahe vṛṇaktu nas pari |
8.067.08c indra id dhi śruto vaśī ||

mā | naḥ | setuḥ | siset | ayam | mahe | vṛṇaktu | naḥ | pari |
indraḥ | it | hi | śrutaḥ | vaśī ||8.067.08||

8.067.09a mā no mṛcā ripūṇāṁ vṛjinānām aviṣyavaḥ |
8.067.09c devā abhi pra mṛkṣata ||

mā | naḥ | mṛcā | ripūṇām | vṛjinānām | aviṣyavaḥ |
devāḥ | abhi | pra | mṛkṣata ||8.067.09||

8.067.10a uta tvām adite mahy ahaṁ devy upa bruve |
8.067.10c sumṛḻīkām abhiṣṭaye ||

uta | tvām | adite | mahi | aham | devi | upa | bruve |
su-mṛḻīkām | abhiṣṭaye ||8.067.10||

8.067.11a parṣi dīne gabhīra ām̐ ugraputre jighāṁsataḥ |
8.067.11c mākis tokasya no riṣat ||

parṣi | dīne | gabhīre | ā | ugra-putre | jighāṁsataḥ |
mākiḥ | tokasya | naḥ | riṣat ||8.067.11||

8.067.12a aneho na uruvraja urūci vi prasartave |
8.067.12c kṛdhi tokāya jīvase ||

anehaḥ | naḥ | uru-vraje | urūci | vi | pra-sartave |
kṛdhi | tokāya | jīvase ||8.067.12||

8.067.13a ye mūrdhānaḥ kṣitīnām adabdhāsaḥ svayaśasaḥ |
8.067.13c vratā rakṣante adruhaḥ ||

ye | mūrdhānaḥ | kṣitīnām | adabdhāsaḥ | sva-yaśasaḥ |
vratā | rakṣante | adruhaḥ ||8.067.13||

8.067.14a te na āsno vṛkāṇām ādityāso mumocata |
8.067.14c stenam baddham ivādite ||

te | naḥ | āsnaḥ | vṛkāṇām | ādityāsaḥ | mumocata |
stenam | baddham-iva | adite ||8.067.14||

8.067.15a apo ṣu ṇa iyaṁ śarur ādityā apa durmatiḥ |
8.067.15c asmad etv ajaghnuṣī ||

apo iti | su | naḥ | iyam | śaruḥ | ādityāḥ | apa | duḥ-matiḥ |
asmat | etu | ajaghnuṣī ||8.067.15||

8.067.16a śaśvad dhi vaḥ sudānava ādityā ūtibhir vayam |
8.067.16c purā nūnam bubhujmahe ||

śaśvat | hi | vaḥ | su-dānavaḥ | ādityāḥ | ūti-bhiḥ | vayam |
purā | nūnam | bubhujmahe ||8.067.16||

8.067.17a śaśvantaṁ hi pracetasaḥ pratiyantaṁ cid enasaḥ |
8.067.17c devāḥ kṛṇutha jīvase ||

śaśvantam | hi | pra-cetasaḥ | prati-yantam | cit | enasaḥ |
devāḥ | kṛṇutha | jīvase ||8.067.17||

8.067.18a tat su no navyaṁ sanyasa ādityā yan mumocati |
8.067.18c bandhād baddham ivādite ||

tat | su | naḥ | navyam | sanyase | ādityāḥ | yat | mumocati |
bandhāt | baddham-iva | adite ||8.067.18||

8.067.19a nāsmākam asti tat tara ādityāso atiṣkade |
8.067.19c yūyam asmabhyam mṛḻata ||

na | asmākam | asti | tat | taraḥ | ādityāsaḥ | ati-skade |
yūyam | asmabhyam | mṛḻata ||8.067.19||

8.067.20a mā no hetir vivasvata ādityāḥ kṛtrimā śaruḥ |
8.067.20c purā nu jaraso vadhīt ||

mā | naḥ | hetiḥ | vivasvataḥ | ādityāḥ | kṛtrimā | śaruḥ |
purā | nu | jarasaḥ | vadhīt ||8.067.20||

8.067.21a vi ṣu dveṣo vy aṁhatim ādityāso vi saṁhitam |
8.067.21c viṣvag vi vṛhatā rapaḥ ||

vi | su | dveṣaḥ | vi | aṁhatim | ādityāsaḥ | vi | sam-hitam |
viṣvak | vi | vṛhata | rapaḥ ||8.067.21||


8.068.01a ā tvā rathaṁ yathotaye sumnāya vartayāmasi |
8.068.01c tuvikūrmim ṛtīṣaham indra śaviṣṭha satpate ||

ā | tvā | ratham | yathā | ūtaye | sumnāya | vartayāmasi |
tuvi-kūrmim | ṛti-saham | indra | śaviṣṭha | sat-pate ||8.068.01||

8.068.02a tuviśuṣma tuvikrato śacīvo viśvayā mate |
8.068.02c ā paprātha mahitvanā ||

tuvi-śuṣma | tuvikrato iti tuvi-krato | śacī-vaḥ | viśvayā | mate |
ā | paprātha | mahi-tvanā ||8.068.02||

8.068.03a yasya te mahinā mahaḥ pari jmāyantam īyatuḥ |
8.068.03c hastā vajraṁ hiraṇyayam ||

yasya | te | mahinā | mahaḥ | pari | jmāyantam | īyatuḥ |
hastā | vajram | hiraṇyayam ||8.068.03||

8.068.04a viśvānarasya vas patim anānatasya śavasaḥ |
8.068.04c evaiś ca carṣaṇīnām ūtī huve rathānām ||

viśvānarasya | vaḥ | patim | anānatasya | śavasaḥ |
evaiḥ | ca | carṣaṇīnām | ūtī | huve | rathānām ||8.068.04||

8.068.05a abhiṣṭaye sadāvṛdhaṁ svarmīḻheṣu yaṁ naraḥ |
8.068.05c nānā havanta ūtaye ||

abhiṣṭaye | sadā-vṛdham | svaḥ-mīḻheṣu | yam | naraḥ |
nānā | havante | ūtaye ||8.068.05||

8.068.06a paromātram ṛcīṣamam indram ugraṁ surādhasam |
8.068.06c īśānaṁ cid vasūnām ||

paraḥ-mātram | ṛcīṣamam | indram | ugram | su-rādhasam |
īśānam | cit | vasūnām ||8.068.06||

8.068.07a taṁ-tam id rādhase maha indraṁ codāmi pītaye |
8.068.07c yaḥ pūrvyām anuṣṭutim īśe kṛṣṭīnāṁ nṛtuḥ ||

tam-tam | it | rādhase | mahe | indram | codāmi | pītaye |
yaḥ | pūrvyām | anu-stutim | īśe | kṛṣṭīnām | nṛtuḥ ||8.068.07||

8.068.08a na yasya te śavasāna sakhyam ānaṁśa martyaḥ |
8.068.08c nakiḥ śavāṁsi te naśat ||

na | yasya | te | śavasāna | sakhyam | ānaṁśa | martyaḥ |
nakiḥ | śavāṁsi | te | naśat ||8.068.08||

8.068.09a tvotāsas tvā yujāpsu sūrye mahad dhanam |
8.068.09c jayema pṛtsu vajrivaḥ ||

tvā-ūtāsaḥ | tvā | yujā | ap-su | sūrye | mahat | dhanam |
jayema | pṛt-su | vajri-vaḥ ||8.068.09||

8.068.10a taṁ tvā yajñebhir īmahe taṁ gīrbhir girvaṇastama |
8.068.10c indra yathā cid āvitha vājeṣu purumāyyam ||

tam | tvā | yajñebhiḥ | īmahe | tam | gīḥ-bhiḥ | girvaṇaḥ-tama |
indra | yathā | cit | āvitha | vājeṣu | puru-māyyam ||8.068.10||

8.068.11a yasya te svādu sakhyaṁ svādvī praṇītir adrivaḥ |
8.068.11c yajño vitantasāyyaḥ ||

yasya | te | svādu | sakhyam | svādvī | pra-nītiḥ | adri-vaḥ |
yajñaḥ | vitantasāyyaḥ ||8.068.11||

8.068.12a uru ṇas tanve tana uru kṣayāya nas kṛdhi |
8.068.12c uru ṇo yandhi jīvase ||

uru | naḥ | tanve | tane | uru | kṣayāya | naḥ | kṛdhi |
uru | naḥ | yandhi | jīvase ||8.068.12||

8.068.13a uruṁ nṛbhya uruṁ gava uruṁ rathāya panthām |
8.068.13c devavītim manāmahe ||

urum | nṛ-bhyaḥ | urum | gave | urum | rathāya | panthām |
deva-vītim | manāmahe ||8.068.13||

8.068.14a upa mā ṣaḍ dvā-dvā naraḥ somasya harṣyā |
8.068.14c tiṣṭhanti svādurātayaḥ ||

upa | mā | ṣaṭ | dvā-dvā | naraḥ | somasya | harṣyā |
tiṣṭhanti | svādu-rātayaḥ ||8.068.14||

8.068.15a ṛjrāv indrota ā dade harī ṛkṣasya sūnavi |
8.068.15c āśvamedhasya rohitā ||

ṛjrau | indrote | ā | dade | harī iti | ṛkṣasya | sūnavi |
āśva-medhasya | rohitā ||8.068.15||

8.068.16a surathām̐ ātithigve svabhīśūm̐r ārkṣe |
8.068.16c āśvamedhe supeśasaḥ ||

su-rathān | ātithi-gve | su-abhīśūn | ārkṣe |
āśva-medhe | su-peśasaḥ ||8.068.16||

8.068.17a ṣaḻ aśvām̐ ātithigva indrote vadhūmataḥ |
8.068.17c sacā pūtakratau sanam ||

ṣaṭ | aśvān | ātithi-gve | indrote | vadhū-mataḥ |
sacā | pūta-kratau | sanam ||8.068.17||

8.068.18a aiṣu cetad vṛṣaṇvaty antar ṛjreṣv aruṣī |
8.068.18c svabhīśuḥ kaśāvatī ||

ā | eṣu | cetat | vṛṣaṇ-vatī | antaḥ | ṛjreṣu | aruṣī |
su-abhīśuḥ | kaśā-vatī ||8.068.18||

8.068.19a na yuṣme vājabandhavo ninitsuś cana martyaḥ |
8.068.19c avadyam adhi dīdharat ||

na | yuṣme iti | vāja-bandhavaḥ | ninitsuḥ | cana | martyaḥ |
avadyam | adhi | dīdharat ||8.068.19||


8.069.01a pra-pra vas triṣṭubham iṣam mandadvīrāyendave |
8.069.01c dhiyā vo medhasātaye puraṁdhyā vivāsati ||

pra-pra | vaḥ | tri-stubham | iṣam | mandat-vīrāya | indave |
dhiyā | vaḥ | medha-sātaye | puram-dhyā | ā | vivāsati ||8.069.01||

8.069.02a nadaṁ va odatīnāṁ nadaṁ yoyuvatīnām |
8.069.02c patiṁ vo aghnyānāṁ dhenūnām iṣudhyasi ||

nadam | vaḥ | odatīnām | nadam | yoyuvatīnām |
patim | vaḥ | aghnyānām | dhenūnām | iṣudhyasi ||8.069.02||

8.069.03a tā asya sūdadohasaḥ somaṁ śrīṇanti pṛśnayaḥ |
8.069.03c janman devānāṁ viśas triṣv ā rocane divaḥ ||

tāḥ | asya | sūda-dohasaḥ | somam | śrīṇanti | pṛśnayaḥ |
janman | devānām | viśaḥ | triṣu | ā | rocane | divaḥ ||8.069.03||

8.069.04a abhi pra gopatiṁ girendram arca yathā vide |
8.069.04c sūnuṁ satyasya satpatim ||

abhi | pra | go-patim | girā | indram | arca | yathā | vide |
sūnum | satyasya | sat-patim ||8.069.04||

8.069.05a ā harayaḥ sasṛjrire 'ruṣīr adhi barhiṣi |
8.069.05c yatrābhi saṁnavāmahe ||

ā | harayaḥ | sasṛjrire | aruṣīḥ | adhi | barhiṣi |
yatra | abhi | sam-navāmahe ||8.069.05||

8.069.06a indrāya gāva āśiraṁ duduhre vajriṇe madhu |
8.069.06c yat sīm upahvare vidat ||

indrāya | gāvaḥ | ā-śiram | duduhre | vajriṇe | madhu |
yat | sīm | upa-hvare | vidat ||8.069.06||

8.069.07a ud yad bradhnasya viṣṭapaṁ gṛham indraś ca ganvahi |
8.069.07c madhvaḥ pītvā sacevahi triḥ sapta sakhyuḥ pade ||

ut | yat | bradhnasya | viṣṭapam | gṛham | indraḥ | ca | ganvahi |
madhvaḥ | pītvā | sacevahi | triḥ | sapta | sakhyuḥ | pade ||8.069.07||

8.069.08a arcata prārcata priyamedhāso arcata |
8.069.08c arcantu putrakā uta puraṁ na dhṛṣṇv arcata ||

arcata | pra | arcata | priya-medhāsaḥ | arcata |
arcantu | putrakāḥ | uta | puram | na | dhṛṣṇu | arcata ||8.069.08||

8.069.09a ava svarāti gargaro godhā pari saniṣvaṇat |
8.069.09c piṅgā pari caniṣkadad indrāya brahmodyatam ||

ava | svarāti | gargaraḥ | godhā | pari | sanisvanat |
piṅgā | pari | caniskadat | indrāya | brahma | ut-yatam ||8.069.09||

8.069.10a ā yat patanty enyaḥ sudughā anapasphuraḥ |
8.069.10c apasphuraṁ gṛbhāyata somam indrāya pātave ||

ā | yat | patanti | enyaḥ | su-dughāḥ | anapa-sphuraḥ |
apa-sphuram | gṛbhāyata | somam | indrāya | pātave ||8.069.10||

8.069.11a apād indro apād agnir viśve devā amatsata |
8.069.11c varuṇa id iha kṣayat tam āpo abhy anūṣata vatsaṁ saṁśiśvarīr iva ||

apāt | indraḥ | apāt | agniḥ | viśve | devāḥ | amatsata |
varuṇaḥ | it | iha | kṣayat | tam | āpaḥ | abhi | anūṣata | vatsam | saṁśiśvarīḥ-iva ||8.069.11||

8.069.12a sudevo asi varuṇa yasya te sapta sindhavaḥ |
8.069.12c anukṣaranti kākudaṁ sūrmyaṁ suṣirām iva ||

su-devaḥ | asi | varuṇa | yasya | te | sapta | sindhavaḥ |
anu-kṣaranti | kākudam | sūrmyam | suṣirām-iva ||8.069.12||

8.069.13a yo vyatīm̐r aphāṇayat suyuktām̐ upa dāśuṣe |
8.069.13c takvo netā tad id vapur upamā yo amucyata ||

yaḥ | vyatīn | aphāṇayat | su-yuktān | upa | dāśuṣe |
takvaḥ | netā | tat | it | vapuḥ | upa-mā | yaḥ | amucyata ||8.069.13||

8.069.14a atīd u śakra ohata indro viśvā ati dviṣaḥ |
8.069.14c bhinat kanīna odanam pacyamānam paro girā ||

ati | it | ūm̐ iti | śakraḥ | ohate | indraḥ | viśvāḥ | ati | dviṣaḥ |
bhinat | kanīnaḥ | odanam | pacyamānam | paraḥ | girā ||8.069.14||

8.069.15a arbhako na kumārako 'dhi tiṣṭhan navaṁ ratham |
8.069.15c sa pakṣan mahiṣam mṛgam pitre mātre vibhukratum ||

arbhakaḥ | na | kumārakaḥ | adhi | tiṣṭhat | navam | ratham |
saḥ | pakṣat | mahiṣam | mṛgam | pitre | mātre | vibhu-kratum ||8.069.15||

8.069.16a ā tū suśipra dampate rathaṁ tiṣṭhā hiraṇyayam |
8.069.16c adha dyukṣaṁ sacevahi sahasrapādam aruṣaṁ svastigām anehasam ||

ā | tu | su-śipra | dam-pate | ratham | tiṣṭha | hiraṇyayam |
adha | dyukṣam | sacevahi | sahasra-pādam | aruṣam | svasti-gām | anehasam ||8.069.16||

8.069.17a taṁ ghem itthā namasvina upa svarājam āsate |
8.069.17c arthaṁ cid asya sudhitaṁ yad etava āvartayanti dāvane ||

tam | gha | īm | itthā | namasvinaḥ | upa | sva-rājam | āsate |
artham | cit | asya | su-dhitam | yat | etave | ā-vartayanti | dāvane ||8.069.17||

8.069.18a anu pratnasyaukasaḥ priyamedhāsa eṣām |
8.069.18c pūrvām anu prayatiṁ vṛktabarhiṣo hitaprayasa āśata ||

anu | pratnasya | okasaḥ | priya-medhāsaḥ | eṣām |
pūrvām | anu | pra-yatim | vṛkta-barhiṣaḥ | hita-prayasaḥ | āśata ||8.069.18||


8.070.01a yo rājā carṣaṇīnāṁ yātā rathebhir adhriguḥ |
8.070.01c viśvāsāṁ tarutā pṛtanānāṁ jyeṣṭho yo vṛtrahā gṛṇe ||

yaḥ | rājā | carṣaṇīnām | yātā | rathebhiḥ | adhri-guḥ |
viśvāsām | tarutā | pṛtanānām | jyeṣṭhaḥ | yaḥ | vṛtra-hā | gṛṇe ||8.070.01||

8.070.02a indraṁ taṁ śumbha puruhanmann avase yasya dvitā vidhartari |
8.070.02c hastāya vajraḥ prati dhāyi darśato maho dive na sūryaḥ ||

indram | tam | śumbha | puru-hanman | avase | yasya | dvitā | vi-dhartari |
hastāya | vajraḥ | prati | dhāyi | darśataḥ | mahaḥ | dive | na | sūryaḥ ||8.070.02||

8.070.03a nakiṣ ṭaṁ karmaṇā naśad yaś cakāra sadāvṛdham |
8.070.03c indraṁ na yajñair viśvagūrtam ṛbhvasam adhṛṣṭaṁ dhṛṣṇvojasam ||

nakiḥ | tam | karmaṇā | naśat | yaḥ | cakāra | sadā-vṛdham |
indram | na | yajñaiḥ | viśva-gūrtam | ṛbhvasam | adhṛṣṭam | dhṛṣṇu-ojasam ||8.070.03||

8.070.04a aṣāḻham ugram pṛtanāsu sāsahiṁ yasmin mahīr urujrayaḥ |
8.070.04c saṁ dhenavo jāyamāne anonavur dyāvaḥ kṣāmo anonavuḥ ||

aṣāḻham | ugram | pṛtanāsu | sasahim | yasmin | mahīḥ | uru-jrayaḥ |
sam | dhenavaḥ | jāyamāne | anonavuḥ | dyāvaḥ | kṣāmaḥ | anonavuḥ ||8.070.04||

8.070.05a yad dyāva indra te śataṁ śatam bhūmīr uta syuḥ |
8.070.05c na tvā vajrin sahasraṁ sūryā anu na jātam aṣṭa rodasī ||

yat | dyāvaḥ | indra | te | śatam | śatam | bhūmīḥ | uta | syuriti syuḥ |
na | tvā | vajrin | sahasram | sūryāḥ | anu | na | jātam | aṣṭa | rodasī iti ||8.070.05||

8.070.06a ā paprātha mahinā vṛṣṇyā vṛṣan viśvā śaviṣṭha śavasā |
8.070.06c asmām̐ ava maghavan gomati vraje vajriñ citrābhir ūtibhiḥ ||

ā | paprātha | mahinā | vṛṣṇyā | vṛṣan | viśvā | śaviṣṭha | śavasā |
asmān | ava | magha-van | go-mati | vraje | vajrin | citrābhiḥ | ūti-bhiḥ ||8.070.06||

8.070.07a na sīm adeva āpad iṣaṁ dīrghāyo martyaḥ |
8.070.07c etagvā cid ya etaśā yuyojate harī indro yuyojate ||

na | sīm | adevaḥ | āpat | iṣam | dīrghāyo iti dīrgha-āyo | martyaḥ |
eta-gvā | cit | yaḥ | etaśā | yuyojate | harī iti | indraḥ | yuyojate ||8.070.07||

8.070.08a taṁ vo maho mahāyyam indraṁ dānāya sakṣaṇim |
8.070.08c yo gādheṣu ya āraṇeṣu havyo vājeṣv asti havyaḥ ||

tam | vaḥ | mahaḥ | mahāyyam | indram | dānāya | sakṣaṇim |
yaḥ | gādheṣu | yaḥ | ā-araṇeṣu | havyaḥ | vājeṣu | asti | havyaḥ ||8.070.08||

8.070.09a ud ū ṣu ṇo vaso mahe mṛśasva śūra rādhase |
8.070.09c ud ū ṣu mahyai maghavan maghattaya ud indra śravase mahe ||

ut | ūm̐ iti | su | naḥ | vaso iti | mahe | mṛśasva | śūra | rādhase |
ut | ūm̐ iti | su | mahyai | magha-van | maghattaye | ut | indra | śravase | mahe ||8.070.09||

8.070.10a tvaṁ na indra ṛtayus tvānido ni tṛmpasi |
8.070.10c madhye vasiṣva tuvinṛmṇorvor ni dāsaṁ śiśnatho hathaiḥ ||

tvam | naḥ | indra | ṛta-yuḥ | tvā-nidaḥ | ni | tṛmpasi |
madhye | vasiṣva | tuvi-nṛmṇa | ūrvoḥ | ni | dāsam | śiśnathaḥ | hathaiḥ ||8.070.10||

8.070.11a anyavratam amānuṣam ayajvānam adevayum |
8.070.11c ava svaḥ sakhā dudhuvīta parvataḥ sughnāya dasyum parvataḥ ||

anya-vratam | amānuṣam | ayajvānam | adeva-yum |
ava | svaḥ | sakhā | dudhuvīta | parvataḥ | su-ghnāya | dasyum | parvataḥ ||8.070.11||

8.070.12a tvaṁ na indrāsāṁ haste śaviṣṭha dāvane |
8.070.12c dhānānāṁ na saṁ gṛbhāyāsmayur dviḥ saṁ gṛbhāyāsmayuḥ ||

tvam | naḥ | indra | āsām | haste | śaviṣṭha | dāvane |
dhānānām | na | sam | gṛbhāya | asma-yuḥ | dviḥ | sam | gṛbhāya | asma-yuḥ ||8.070.12||

8.070.13a sakhāyaḥ kratum icchata kathā rādhāma śarasya |
8.070.13c upastutim bhojaḥ sūrir yo ahrayaḥ ||

sakhāyaḥ | kratum | icchata | kathā | rādhāma | śarasya |
upa-stutim | bhojaḥ | sūriḥ | yaḥ | ahrayaḥ ||8.070.13||

8.070.14a bhūribhiḥ samaha ṛṣibhir barhiṣmadbhiḥ staviṣyase |
8.070.14c yad ittham ekam-ekam ic chara vatsān parādadaḥ ||

bhūri-bhiḥ | samaha | ṛṣi-bhiḥ | barhiṣmat-bhiḥ | staviṣyase |
yat | ittham | ekam-ekam | it | śara | vatsān | parā-dadaḥ ||8.070.14||

8.070.15a karṇagṛhyā maghavā śauradevyo vatsaṁ nas tribhya ānayat |
8.070.15c ajāṁ sūrir na dhātave ||

karṇa-gṛhya | magha-vā | śaura-devyaḥ | vatsam | naḥ | tri-bhyaḥ | ā | anayat |
ajām | sūriḥ | na | dhātave ||8.070.15||


8.071.01a tvaṁ no agne mahobhiḥ pāhi viśvasyā arāteḥ |
8.071.01c uta dviṣo martyasya ||

tvam | naḥ | agne | mahaḥ-bhiḥ | pāhi | viśvasyāḥ | arāteḥ |
uta | dviṣaḥ | martyasya ||8.071.01||

8.071.02a nahi manyuḥ pauruṣeya īśe hi vaḥ priyajāta |
8.071.02c tvam id asi kṣapāvān ||

nahi | manyuḥ | pauruṣeyaḥ | īśe | hi | vaḥ | priya-jāta |
tvam | it | asi | kṣapā-vān ||8.071.02||

8.071.03a sa no viśvebhir devebhir ūrjo napād bhadraśoce |
8.071.03c rayiṁ dehi viśvavāram ||

saḥ | naḥ | viśvebhiḥ | devebhiḥ | ūrjaḥ | napāt | bhadra-śoce |
rayim | dehi | viśva-vāram ||8.071.03||

8.071.04a na tam agne arātayo martaṁ yuvanta rāyaḥ |
8.071.04c yaṁ trāyase dāśvāṁsam ||

na | tam | agne | arātayaḥ | martam | yuvanta | rāyaḥ |
yam | trāyase | dāśvāṁsam ||8.071.04||

8.071.05a yaṁ tvaṁ vipra medhasātāv agne hinoṣi dhanāya |
8.071.05c sa tavotī goṣu gantā ||

yam | tvam | vipra | medha-sātau | agne | hinoṣi | dhanāya |
saḥ | tava | ūtī | goṣu | gantā ||8.071.05||

8.071.06a tvaṁ rayim puruvīram agne dāśuṣe martāya |
8.071.06c pra ṇo naya vasyo accha ||

tvam | rayim | puru-vīram | agne | dāśuṣe | martāya |
pra | naḥ | naya | vasyaḥ | accha ||8.071.06||

8.071.07a uruṣyā ṇo mā parā dā aghāyate jātavedaḥ |
8.071.07c durādhye martāya ||

uruṣya | naḥ | mā | parā | dāḥ | agha-yate | jata-vedaḥ |
duḥ-ādhye | martāya ||8.071.07||

8.071.08a agne mākiṣ ṭe devasya rātim adevo yuyota |
8.071.08c tvam īśiṣe vasūnām ||

agne | mākiḥ | te | devasya | rātim | adevaḥ | yuyota |
tvam | īśiṣe | vasūnām ||8.071.08||

8.071.09a sa no vasva upa māsy ūrjo napān māhinasya |
8.071.09c sakhe vaso jaritṛbhyaḥ ||

saḥ | naḥ | vasvaḥ | upa | māsi | ūrjaḥ | napāt | māhinasya |
sakhe | vaso iti | jaritṛ-bhyaḥ ||8.071.09||

8.071.10a acchā naḥ śīraśociṣaṁ giro yantu darśatam |
8.071.10c acchā yajñāso namasā purūvasum purupraśastam ūtaye ||

accha | naḥ | śīra-śociṣam | giraḥ | yantu | darśatam |
accha | yajñāsaḥ | namasā | puru-vasum | puru-praśastam | ūtaye ||8.071.10||

8.071.11a agniṁ sūnuṁ sahaso jātavedasaṁ dānāya vāryāṇām |
8.071.11c dvitā yo bhūd amṛto martyeṣv ā hotā mandratamo viśi ||

agnim | sūnum | sahasaḥ | jāta-vedasam | dānāya | vāryāṇām |
dvitā | yaḥ | bhūt | amṛtaḥ | martyeṣu | ā | hotā | mandra-tamaḥ | viśi ||8.071.11||

8.071.12a agniṁ vo devayajyayāgnim prayaty adhvare |
8.071.12c agniṁ dhīṣu prathamam agnim arvaty agniṁ kṣaitrāya sādhase ||

agnim | vaḥ | deva-yajyayā | agnim | pra-yati | adhvare |
agnim | dhīṣu | prathamam | agnim | arvati | agnim | kṣaitrāya | sādhase ||8.071.12||

8.071.13a agnir iṣāṁ sakhye dadātu na īśe yo vāryāṇām |
8.071.13c agniṁ toke tanaye śaśvad īmahe vasuṁ santaṁ tanūpām ||

agniḥ | iṣām | sakhye | dadātu | naḥ | īśe | yaḥ | vāryāṇām |
agnim | toke | tanaye | śaśvat | īmahe | vasum | santam | tanū-pām ||8.071.13||

8.071.14a agnim īḻiṣvāvase gāthābhiḥ śīraśociṣam |
8.071.14c agniṁ rāye purumīḻha śrutaṁ naro 'gniṁ sudītaye chardiḥ ||

agnim | īḻiṣva | avase | gāthābhiḥ | śīra-śociṣam |
agnim | rāye | puru-mīḻha | śrutam | naraḥ | agnim | su-dītaye | chardhiḥ ||8.071.14||

8.071.15a agniṁ dveṣo yotavai no gṛṇīmasy agniṁ śaṁ yoś ca dātave |
8.071.15c viśvāsu vikṣv aviteva havyo bhuvad vastur ṛṣūṇām ||

agnim | dveṣaḥ | yotavai | naḥ | gṛṇīmasi | agnim | śam | yoḥ | ca | dātave |
viśvāsu | vikṣu | avitā-iva | havyaḥ | bhuvat | vastuḥ | ṛṣūṇām ||8.071.15||


8.072.01a haviṣ kṛṇudhvam ā gamad adhvaryur vanate punaḥ |
8.072.01c vidvām̐ asya praśāsanam ||

haviḥ | kṛṇudhvam | ā | gamat | adhvaryuḥ | vanate | punariti |
vidvān | asya | pra-śāsanam ||8.072.01||

8.072.02a ni tigmam abhy aṁśuṁ sīdad dhotā manāv adhi |
8.072.02c juṣāṇo asya sakhyam ||

ni | tigmam | abhi | aṁśum | sīdat | hotā | manau | adhi |
juṣāṇaḥ | asya | sakhyam ||8.072.02||

8.072.03a antar icchanti taṁ jane rudram paro manīṣayā |
8.072.03c gṛbhṇanti jihvayā sasam ||

antaḥ | icchanti | tam | jane | rudram | paraḥ | manīṣayā |
gṛbhṇanti | jihvayā | sasam ||8.072.03||

8.072.04a jāmy atītape dhanur vayodhā aruhad vanam |
8.072.04c dṛṣadaṁ jihvayāvadhīt ||

jāmi | atītape | dhanuḥ | vayaḥ-dhāḥ | aruhat | vanam |
dṛṣadam | jihvayā | ā | avadhīt ||8.072.04||

8.072.05a caran vatso ruśann iha nidātāraṁ na vindate |
8.072.05c veti stotava ambyam ||

caran | vatsaḥ | ruśan | iha | ni-dātāram | na | vindate |
veti | stotavr | ambyam ||8.072.05||

8.072.06a uto nv asya yan mahad aśvāvad yojanam bṛhad |
8.072.06c dāmā rathasya dadṛśe ||

uto iti | nu | asya | yat | mahat | aśva-vat | yojanam | bṛhat |
dāmā | rathasya | dadṛśe ||8.072.06||

8.072.07a duhanti saptaikām upa dvā pañca sṛjataḥ |
8.072.07c tīrthe sindhor adhi svare ||

duhanti | sapta | ekām | upa | dvā | pañca | sṛjataḥ |
tīrthe | sindhoḥ | adhi | svare ||8.072.07||

8.072.08a ā daśabhir vivasvata indraḥ kośam acucyavīt |
8.072.08c khedayā trivṛtā divaḥ ||

ā | daśa-bhiḥ | vivasvataḥ | indraḥ | kośam | acucyavīt |
khedayā | tri-vṛtā | divaḥ ||8.072.08||

8.072.09a pari tridhātur adhvaraṁ jūrṇir eti navīyasī |
8.072.09c madhvā hotāro añjate ||

pari | tri-dhātuḥ | adhvaram | jūrṇiḥ | eti | navīyasī |
madhvā | hotāraḥ | añjate ||8.072.09||

8.072.10a siñcanti namasāvatam uccācakram parijmānam |
8.072.10c nīcīnabāram akṣitam ||

siñcanti | namasā | avatam | uccā-cakram | pari-jmānam |
nīcīna-bāram | akṣitam ||8.072.10||

8.072.11a abhyāram id adrayo niṣiktam puṣkare madhu |
8.072.11c avatasya visarjane ||

abhi-āram | it | adrayaḥ | ni-siktam | puṣkare | madhu |
avatasya | vi-sarjane ||8.072.11||

8.072.12a gāva upāvatāvatam mahī yajñasya rapsudā |
8.072.12c ubhā karṇā hiraṇyayā ||

gāvaḥ | upa | avata | avatam | mahī iti | yajñasya | rapsudā |
ubhā | karṇā | hiraṇyayā ||8.072.12||

8.072.13a ā sute siñcata śriyaṁ rodasyor abhiśriyam |
8.072.13c rasā dadhīta vṛṣabham ||

ā | sute | siñcata | śriyam | rodasyoḥ | abhi-śriyam |
rasā | dadhīta | vṛṣabham ||8.072.13||

8.072.14a te jānata svam okyaṁ saṁ vatsāso na mātṛbhiḥ |
8.072.14c mitho nasanta jāmibhiḥ ||

te | jānata | svam | okyam | sam | vatsāsaḥ | na | mātṛ-bhiḥ |
mithaḥ | nasanta | jāmi-bhiḥ ||8.072.14||

8.072.15a upa srakveṣu bapsataḥ kṛṇvate dharuṇaṁ divi |
8.072.15c indre agnā namaḥ svaḥ ||

upa | srakveṣu | bapsataḥ | kṛṇvate | dharuṇam | divi |
indre | agnā | namaḥ | svaḥ ||8.072.15||

8.072.16a adhukṣat pipyuṣīm iṣam ūrjaṁ saptapadīm ariḥ |
8.072.16c sūryasya sapta raśmibhiḥ ||

adhukṣat | pipyuṣīm | iṣam | ūrjam | sapta-padīm | ariḥ |
sūryasya | sapta | raśmi-bhiḥ ||8.072.16||

8.072.17a somasya mitrāvaruṇoditā sūra ā dade |
8.072.17c tad āturasya bheṣajam ||

somasya | mitrāvaruṇā | ut-itā | sūre | ā | dade |
tat | āturasya | bheṣajam ||8.072.17||

8.072.18a uto nv asya yat padaṁ haryatasya nidhānyam |
8.072.18c pari dyāṁ jihvayātanat ||

uto iti | nu | asya | yat | padam | haryatasya | ni-dhānyam |
pari | dyām | jihvayā | atanat ||8.072.18||


8.073.01a ud īrāthām ṛtāyate yuñjāthām aśvinā ratham |
8.073.01c anti ṣad bhūtu vām avaḥ ||

ut | īrāthām | ṛta-yate | yuñjāthām | aśvinā | ratham |
anti | sat | bhūtu | vām | avaḥ ||8.073.01||

8.073.02a nimiṣaś cij javīyasā rathenā yātam aśvinā |
8.073.02c anti ṣad bhūtu vām avaḥ ||

nimiṣaḥ | cit | javīyasā | rathena | ā | yātam | aśvinā |
anti | sat | bhūtu | vām | avaḥ ||8.073.02||

8.073.03a upa stṛṇītam atraye himena gharmam aśvinā |
8.073.03c anti ṣad bhūtu vām avaḥ ||

upa | stṛṇītam | atraye | himena | gharmam | aśvinā |
anti | sat | bhūtu | vām | avaḥ ||8.073.03||

8.073.04a kuha sthaḥ kuha jagmathuḥ kuha śyeneva petathuḥ |
8.073.04c anti ṣad bhūtu vām avaḥ ||

kuha | sthaḥ | kuha | jagmathuḥ | kuha | śyenā-iva | petathuḥ |
anti | sat | bhūtu | vām | avaḥ ||8.073.04||

8.073.05a yad adya karhi karhi cic chuśrūyātam imaṁ havam |
8.073.05c anti ṣad bhūtu vām avaḥ ||

yat | adya | karhi | karhi | cit | śuśrūyātam | imam | havam |
anti | sat | bhūtu | vām | avaḥ ||8.073.05||

8.073.06a aśvinā yāmahūtamā nediṣṭhaṁ yāmy āpyam |
8.073.06c anti ṣad bhūtu vām avaḥ ||

aśvinā | yāma-hūtamā | nediṣṭham | yāmi | āpyam |
anti | sat | bhūtu | vām | avaḥ ||8.073.06||

8.073.07a avantam atraye gṛhaṁ kṛṇutaṁ yuvam aśvinā |
8.073.07c anti ṣad bhūtu vām avaḥ ||

avantam | atraye | gṛham | kṛṇutam | yuvam | aśvinā |
anti | sat | bhūtu | vām | avaḥ ||8.073.07||

8.073.08a varethe agnim ātapo vadate valgv atraye |
8.073.08c anti ṣad bhūtu vām avaḥ ||

varethe | agnim | ā-tapaḥ | vadate | valgu | atraye |
anti | sat | bhūtu | vām | avaḥ ||8.073.08||

8.073.09a pra saptavadhrir āśasā dhārām agner aśāyata |
8.073.09c anti ṣad bhūtu vām avaḥ ||

pra | sapta-vadhriḥ | ā-śasā | dhārām | agneḥ | aśāyata |
anti | sat | bhūtu | vām | avaḥ ||8.073.09||

8.073.10a ihā gataṁ vṛṣaṇvasū śṛṇutam ma imaṁ havam |
8.073.10c anti ṣad bhūtu vām avaḥ ||

iha | ā | gatam | vṛṣaṇ-vasū iti vṛṣaṇ-vasū | śṛṇutam | me | imam | havam |
anti | sat | bhūtu | vām | avaḥ ||8.073.10||

8.073.11a kim idaṁ vām purāṇavaj jarator iva śasyate |
8.073.11c anti ṣad bhūtu vām avaḥ ||

kim | idam | vām | purāṇa-vat | jaratoḥ-iva | śasyate |
anti | sat | bhūtu | vām | avaḥ ||8.073.11||

8.073.12a samānaṁ vāṁ sajātyaṁ samāno bandhur aśvinā |
8.073.12c anti ṣad bhūtu vām avaḥ ||

samānam | vām | sa-jātyam | samānaḥ | bandhuḥ | aśvinā |
anti | sat | bhūtu | vām | avaḥ ||8.073.12||

8.073.13a yo vāṁ rajāṁsy aśvinā ratho viyāti rodasī |
8.073.13c anti ṣad bhūtu vām avaḥ ||

yaḥ | vām | rajāṁsi | aśvinā | rathaḥ | vi-yāti | rodasī iti |
anti | sat | bhūtu | vām | avaḥ ||8.073.13||

8.073.14a ā no gavyebhir aśvyaiḥ sahasrair upa gacchatam |
8.073.14c anti ṣad bhūtu vām avaḥ ||

ā | naḥ | gavyebhiḥ | aśvyaiḥ | sahasraiḥ | upa | gacchatam |
anti | sat | bhūtu | vām | avaḥ ||8.073.14||

8.073.15a mā no gavyebhir aśvyaiḥ sahasrebhir ati khyatam |
8.073.15c anti ṣad bhūtu vām avaḥ ||

mā | naḥ | gavyebhiḥ | aśvyaiḥ | sahasrebhiḥ | ati | khyatam |
anti | sat | bhūtu | vām | avaḥ ||8.073.15||

8.073.16a aruṇapsur uṣā abhūd akar jyotir ṛtāvarī |
8.073.16c anti ṣad bhūtu vām avaḥ ||

aruṇa-psuḥ | uṣāḥ | abhūt | akaḥ | jyotiḥ | ṛta-varī |
anti | sat | bhūtu | vām | avaḥ ||8.073.16||

8.073.17a aśvinā su vicākaśad vṛkṣam paraśumām̐ iva |
8.073.17c anti ṣad bhūtu vām avaḥ ||

aśvinā | su | vi-cākaśat | vṛkṣam | paraśumān-iva |
anti | sat | bhūtu | vām | avaḥ ||8.073.17||

8.073.18a puraṁ na dhṛṣṇav ā ruja kṛṣṇayā bādhito viśā |
8.073.18c anti ṣad bhūtu vām avaḥ ||

puram | na | dhṛṣṇo iti | ā | ruja | kṛṣṇayā | bādhitaḥ | viśā |
anti | sat | bhūtu | vām | avaḥ ||8.073.18||


8.074.01a viśo-viśo vo atithiṁ vājayantaḥ purupriyam |
8.074.01c agniṁ vo duryaṁ vacaḥ stuṣe śūṣasya manmabhiḥ ||

viśaḥ-visaḥ | vaḥ | atithim | vāja-yantaḥ | puru-priyam |
agnim | vaḥ | duryam | vacaḥ | stuṣe | śūṣasya | manma-bhiḥ ||8.074.01||

8.074.02a yaṁ janāso haviṣmanto mitraṁ na sarpirāsutim |
8.074.02c praśaṁsanti praśastibhiḥ ||

yam | janāsaḥ | haviṣmantaḥ | mitram | na | sarpiḥ-āsutim |
pra-śaṁsanti | praśasti-bhiḥ ||8.074.02||

8.074.03a panyāṁsaṁ jātavedasaṁ yo devatāty udyatā |
8.074.03c havyāny airayad divi ||

panyāsam | jāta-vedasam | yaḥ | deva-tāti | ut-yatā |
havyāni | airayat | divi ||8.074.03||

8.074.04a āganma vṛtrahantamaṁ jyeṣṭham agnim ānavam |
8.074.04c yasya śrutarvā bṛhann ārkṣo anīka edhate ||

ā | aganma | vṛtrahan-tamam | jyeṣṭham | agnim | ānavam |
yasya | śrutarvā | bṛhan | ārkṣaḥ | anīke | edhate ||8.074.04||

8.074.05a amṛtaṁ jātavedasaṁ tiras tamāṁsi darśatam |
8.074.05c ghṛtāhavanam īḍyam ||

amṛtam | jāta-vedasam | tiraḥ | tamāṁsi | darśatam |
ghṛta-āhavanam | īḍyam ||8.074.05||

8.074.06a sabādho yaṁ janā ime 'gniṁ havyebhir īḻate |
8.074.06c juhvānāso yatasrucaḥ ||

sa-bādhaḥ | yam | janāḥ | ime | agnim | havyebhiḥ | īḻate |
juhvānāsaḥ | yata-srucaḥ ||8.074.06||

8.074.07a iyaṁ te navyasī matir agne adhāyy asmad ā |
8.074.07c mandra sujāta sukrato 'mūra dasmātithe ||

iyam | te | navyasī | matiḥ | agne | adhāyi | asmat | ā |
mandra | su-jāta | sukrato iti su-krato | amūra | dasma | atithe ||8.074.07||

8.074.08a sā te agne śaṁtamā caniṣṭhā bhavatu priyā |
8.074.08c tayā vardhasva suṣṭutaḥ ||

sā | te | agne | śam-tamā | caniṣṭhā | bhavatu | priyā |
tayā | vardhasva | su-stutaḥ ||8.074.08||

8.074.09a sā dyumnair dyumninī bṛhad upopa śravasi śravaḥ |
8.074.09c dadhīta vṛtratūrye ||

sā | dyumnaiḥ | dyumninī | bṛhat | upa-upa | śravasi | śravaḥ |
dadhīta | vṛtra-tūrye ||8.074.09||

8.074.10a aśvam id gāṁ rathaprāṁ tveṣam indraṁ na satpatim |
8.074.10c yasya śravāṁsi tūrvatha panyam-panyaṁ ca kṛṣṭayaḥ ||

aśvam | it | gām | ratha-prām | tveṣam | indram | na | sat-patim |
yasya | śravāṁsi | tūrvatha | panyam-panyam | ca | kṛṣṭayaḥ ||8.074.10||

8.074.11a yaṁ tvā gopavano girā caniṣṭhad agne aṅgiraḥ |
8.074.11c sa pāvaka śrudhī havam ||

yam | tvā | gopavanaḥ | girā | caniṣṭhat | agne | aṅgiraḥ |
saḥ | pāvaka | śrudhi | havam ||8.074.11||

8.074.12a yaṁ tvā janāsa īḻate sabādho vājasātaye |
8.074.12c sa bodhi vṛtratūrye ||

yam | tvā | janāsaḥ | īḻate | sa-bādhaḥ | vāja-sātaye |
saḥ | bodhi | vṛtra-tūrye ||8.074.12||

8.074.13a ahaṁ huvāna ārkṣe śrutarvaṇi madacyuti |
8.074.13c śardhāṁsīva stukāvinām mṛkṣā śīrṣā caturṇām ||

aham | huvānaḥ | ārkṣe | śrutarvaṇi | mada-cyuti |
śardhāṁsi-iva | stukā-vinām | mṛkṣā | śīrṣā | caturṇām ||8.074.13||

8.074.14a māṁ catvāra āśavaḥ śaviṣṭhasya dravitnavaḥ |
8.074.14c surathāso abhi prayo vakṣan vayo na tugryam ||

mām | catvāraḥ | āśavaḥ | śaviṣṭhasya | dravitnavaḥ |
su-rathāsaḥ | abhi | prayaḥ | vakṣan | vayaḥ | na | tugryam ||8.074.14||

8.074.15a satyam it tvā mahenadi paruṣṇy ava dediśam |
8.074.15c nem āpo aśvadātaraḥ śaviṣṭhād asti martyaḥ ||

satyam | it | tvā | mahe-nadi | paruṣṇi | ava | dediśam |
na | īm | āpaḥ | aśva-dātaraḥ | śaviṣṭhāt | asti | martyaḥ ||8.074.15||


8.075.01a yukṣvā hi devahūtamām̐ aśvām̐ agne rathīr iva |
8.075.01c ni hotā pūrvyaḥ sadaḥ ||

yukṣva | hi | deva-hūtamān | aśvān | agne | rathīḥ-iva |
ni | hotā | pūrvyaḥ | sadaḥ ||8.075.01||

8.075.02a uta no deva devām̐ acchā voco viduṣṭaraḥ |
8.075.02c śrad viśvā vāryā kṛdhi ||

uta | naḥ | deva | devān | accha | vocaḥ | viduḥ-taraḥ |
śrat | viśvā | vāryā | kṛdhi ||8.075.02||

8.075.03a tvaṁ ha yad yaviṣṭhya sahasaḥ sūnav āhuta |
8.075.03c ṛtāvā yajñiyo bhuvaḥ ||

tvam | ha | yat | yaviṣṭhya | sahasaḥ | sūno iti | ā-huta |
ṛta-vā | yajñiyaḥ | bhuvaḥ ||8.075.03||

8.075.04a ayam agniḥ sahasriṇo vājasya śatinas patiḥ |
8.075.04c mūrdhā kavī rayīṇām ||

ayam | agniḥ | sahasriṇaḥ | vājasya | śatinaḥ | patiḥ |
mūrdhā | kaviḥ | rayīṇām ||8.075.04||

8.075.05a taṁ nemim ṛbhavo yathā namasva sahūtibhiḥ |
8.075.05c nedīyo yajñam aṅgiraḥ ||

tam | nemim | ṛbhavaḥ | yathā | ā | namasva | sahūti-bhiḥ |
nedīyaḥ | yajñam | aṅgiraḥ ||8.075.05||

8.075.06a tasmai nūnam abhidyave vācā virūpa nityayā |
8.075.06c vṛṣṇe codasva suṣṭutim ||

tasmai | nūnam | abhi-dyave | vācā | vi-rūpa | nityayā |
vṛṣṇe | codasva | su-stutim ||8.075.06||

8.075.07a kam u ṣvid asya senayāgner apākacakṣasaḥ |
8.075.07c paṇiṁ goṣu starāmahe ||

kam | ūm̐ iti | svit | asya | senayā | agneḥ | apāka-cakṣasaḥ |
paṇim | goṣu | starāmahe ||8.075.07||

8.075.08a mā no devānāṁ viśaḥ prasnātīr ivosrāḥ |
8.075.08c kṛśaṁ na hāsur aghnyāḥ ||

mā | naḥ | devānām | viśaḥ | prasnātīḥ-iva | usrāḥ |
kṛśam | na | hāsuḥ | aghnyāḥ ||8.075.08||

8.075.09a mā naḥ samasya dūḍhyaḥ paridveṣaso aṁhatiḥ |
8.075.09c ūrmir na nāvam ā vadhīt ||

mā | naḥ | samasya | duḥ-dhyaḥ | pari-dveṣasaḥ | aṁhatiḥ |
ūrmiḥ | na | nāvam | ā | vadhīt ||8.075.09||

8.075.10a namas te agna ojase gṛṇanti deva kṛṣṭayaḥ |
8.075.10c amair amitram ardaya ||

namaḥ | te | agne | ojase | gṛṇanti | deva | kṛṣṭayaḥ |
amaiḥ | amitram | ardaya ||8.075.10||

8.075.11a kuvit su no gaviṣṭaye 'gne saṁveṣiṣo rayim |
8.075.11c urukṛd uru ṇas kṛdhi ||

kuvit | su | naḥ | go-iṣṭaye | agne | sam-veṣiṣaḥ | rayim |
uru-kṛt | uru | naḥ | kṛdhi ||8.075.11||

8.075.12a mā no asmin mahādhane parā varg bhārabhṛd yathā |
8.075.12c saṁvargaṁ saṁ rayiṁ jaya ||

mā | naḥ | asmin | mahā-dhane | parā | vark | bhāra-bhṛt | yathā |
sam-vargam | sam | rayim | jaya ||8.075.12||

8.075.13a anyam asmad bhiyā iyam agne siṣaktu ducchunā |
8.075.13c vardhā no amavac chavaḥ ||

anyam | asmat | bhiyai | iyam | agne | sisaktu | ducchunā |
vardha | naḥ | ama-vat | śavaḥ ||8.075.13||

8.075.14a yasyājuṣan namasvinaḥ śamīm adurmakhasya vā |
8.075.14c taṁ ghed agnir vṛdhāvati ||

yasya | ajuṣat | namasvinaḥ | śamīm | aduḥ-makhasya | vā |
tam | gha | it | agniḥ | vṛdhā | avati ||8.075.14||

8.075.15a parasyā adhi saṁvato 'varām̐ abhy ā tara |
8.075.15c yatrāham asmi tām̐ ava ||

parasyāḥ | adhi | sam-vataḥ | avarān | abhi | ā | tara |
yatra | aham | asmi | tān | ava ||8.075.15||

8.075.16a vidmā hi te purā vayam agne pitur yathāvasaḥ |
8.075.16c adhā te sumnam īmahe ||

vidma | hi | te | purā | vayam | agne | pituḥ | yathā | avasaḥ |
adha | te | sumnam | īmahe ||8.075.16||


8.076.01a imaṁ nu māyinaṁ huva indram īśānam ojasā |
8.076.01c marutvantaṁ na vṛñjase ||

imam | nu | māyinam | huve | indram | īśānam | ojasā |
marutvantam | na | vṛñjase ||8.076.01||

8.076.02a ayam indro marutsakhā vi vṛtrasyābhinac chiraḥ |
8.076.02c vajreṇa śataparvaṇā ||

ayam | indraḥ | marut-sakhā | vi | vṛtrasya | abhinat | śiraḥ |
vajreṇa | śata-parvaṇā ||8.076.02||

8.076.03a vāvṛdhāno marutsakhendro vi vṛtram airayat |
8.076.03c sṛjan samudriyā apaḥ ||

vavṛdhānaḥ | marut-sakhā | indraḥ | vi | vṛtram | airayat |
sṛjan | samudriyāḥ | apaḥ ||8.076.03||

8.076.04a ayaṁ ha yena vā idaṁ svar marutvatā jitam |
8.076.04c indreṇa somapītaye ||

ayam | ha | yena | vai | idam | svaḥ | marutvatā | jitam |
indreṇa | soma-pītaye ||8.076.04||

8.076.05a marutvantam ṛjīṣiṇam ojasvantaṁ virapśinam |
8.076.05c indraṁ gīrbhir havāmahe ||

marutvantam | ṛjīṣiṇam | ojasvantam | vi-rapśinam |
indram | gīḥ-bhiḥ | havāmahe ||8.076.05||

8.076.06a indram pratnena manmanā marutvantaṁ havāmahe |
8.076.06c asya somasya pītaye ||

indram | pratnena | manmanā | marutvantam | havāmahe |
asya | somasya | pītaye ||8.076.06||

8.076.07a marutvām̐ indra mīḍhvaḥ pibā somaṁ śatakrato |
8.076.07c asmin yajñe puruṣṭuta ||

marutvān | indra | mīḍhvaḥ | piba | somam | śatakrato iti śata-krato |
asmin | yajñe | puru-stuta ||8.076.07||

8.076.08a tubhyed indra marutvate sutāḥ somāso adrivaḥ |
8.076.08c hṛdā hūyanta ukthinaḥ ||

tubhya | it | indra | marutvate | sutāḥ | somāsaḥ | adri-vaḥ |
hṛdā | hūyante | ukthinaḥ ||8.076.08||

8.076.09a pibed indra marutsakhā sutaṁ somaṁ diviṣṭiṣu |
8.076.09c vajraṁ śiśāna ojasā ||

piba | it | indra | marut-sakhā | sutam | somam | diviṣṭiṣu |
vajram | śiśānaḥ | ojasā ||8.076.09||

8.076.10a uttiṣṭhann ojasā saha pītvī śipre avepayaḥ |
8.076.10c somam indra camū sutam ||

ut-tiṣṭhan | ojasā | saha | pītvī | śipre iti | avepayaḥ |
somam | indra | camū iti | sutam ||8.076.10||

8.076.11a anu tvā rodasī ubhe krakṣamāṇam akṛpetām |
8.076.11c indra yad dasyuhābhavaḥ ||

anu | tvā | rodasī iti | ubhe iti | krakṣamāṇam | akṛpetām |
indra | yat | dasyu-hā | abhavaḥ ||8.076.11||

8.076.12a vācam aṣṭāpadīm ahaṁ navasraktim ṛtaspṛśam |
8.076.12c indrāt pari tanvam mame ||

vācam | aṣṭā-padīm | aham | nava-sraktim | ṛta-spṛśam |
indrāt | pari | tanvam | mame ||8.076.12||


8.077.01a jajñāno nu śatakratur vi pṛcchad iti mātaram |
8.077.01c ka ugrāḥ ke ha śṛṇvire ||

jajñānaḥ | nu | śata-kratuḥ | vi | pṛcchat | iti | mātaram |
ke | ugrāḥ | ke | ha | śṛṇvire ||8.077.01||

8.077.02a ād īṁ śavasy abravīd aurṇavābham ahīśuvam |
8.077.02c te putra santu niṣṭuraḥ ||

āt | īm | śavasī | abravīt | aurṇa-vābham | ahīśuvam |
te | putra | santu | niḥ-turaḥ ||8.077.02||

8.077.03a sam it tān vṛtrahākhidat khe arām̐ iva khedayā |
8.077.03c pravṛddho dasyuhābhavat ||

sam | it | tān | vṛtra-hā | akhidat | khe | arān-iva | khedayā |
pra-vṛddhaḥ | dasyuhā | abhavat ||8.077.03||

8.077.04a ekayā pratidhāpibat sākaṁ sarāṁsi triṁśatam |
8.077.04c indraḥ somasya kāṇukā ||

ekayā | prati-dhā | apibat | sākam | sarāṁsi | triṁśatam |
indraḥ | somasya | kāṇukā ||8.077.04||

8.077.05a abhi gandharvam atṛṇad abudhneṣu rajassv ā |
8.077.05c indro brahmabhya id vṛdhe ||

abhi | gandharvam | atṛṇat | abudhneṣu | rajaḥ-su | ā |
indraḥ | brahma-bhyaḥ | it | vṛdhe ||8.077.05||

8.077.06a nir āvidhyad giribhya ā dhārayat pakvam odanam |
8.077.06c indro bundaṁ svātatam ||

niḥ | avidhyat | giri-bhyaḥ | ā | dhārayat | pakvam | odanam |
indraḥ | bundam | su-ātatam ||8.077.06||

8.077.07a śatabradhna iṣus tava sahasraparṇa eka it |
8.077.07c yam indra cakṛṣe yujam ||

śata-bradhnaḥ | iṣuḥ | tava | sahasra-parṇaḥ | ekaḥ | it |
yam | indra | cakṛṣe | yujam ||8.077.07||

8.077.08a tena stotṛbhya ā bhara nṛbhyo nāribhyo attave |
8.077.08c sadyo jāta ṛbhuṣṭhira ||

tena | stotṛ-bhyaḥ | ā | bhara | nṛ-bhyaḥ | nāri-bhyaḥ | attave |
sadyaḥ | jātaḥ | ṛbhu-sthira ||8.077.08||

8.077.09a etā cyautnāni te kṛtā varṣiṣṭhāni parīṇasā |
8.077.09c hṛdā vīḍv adhārayaḥ ||

etā | cyautnāni | te | kṛtā | varṣiṣṭhāni | parīṇasā |
hṛdā | vīḻu | adhārayaḥ ||8.077.09||

8.077.10a viśvet tā viṣṇur ābharad urukramas tveṣitaḥ |
8.077.10c śatam mahiṣān kṣīrapākam odanaṁ varāham indra emuṣam ||

viśvā | it | tā | viṣṇuḥ | ā | abharat | uru-kramaḥ | tvā-iṣitaḥ |
śatam | mahiṣān | kṣīra-pākam | odanam | varāham | indraḥ | emuṣam ||8.077.10||

8.077.11a tuvikṣaṁ te sukṛtaṁ sūmayaṁ dhanuḥ sādhur bundo hiraṇyayaḥ |
8.077.11c ubhā te bāhū raṇyā susaṁskṛta ṛdūpe cid ṛdūvṛdhā ||

tuvi-kṣam | te | su-kṛtam | su-mayam | dhanuḥ | sādhuḥ | bundaḥ | hiraṇyayaḥ |
ubhā | te | bāhū iti | raṇyā | su-saṁskṛtā | ṛdu-pe | cit | ṛdu-vṛdhā ||8.077.11||


8.078.01a puroḻāśaṁ no andhasa indra sahasram ā bhara |
8.078.01c śatā ca śūra gonām ||

puroḻāśam | naḥ | andhasaḥ | indra | sahasram | ā | bhara |
śatā | ca | śūra | gonām ||8.078.01||

8.078.02a ā no bhara vyañjanaṁ gām aśvam abhyañjanam |
8.078.02c sacā manā hiraṇyayā ||

ā | naḥ | bhara | vi-añjanam | gām | aśvam | abhi-añjanam |
sacā | manā | hiraṇyayā ||8.078.02||

8.078.03a uta naḥ karṇaśobhanā purūṇi dhṛṣṇav ā bhara |
8.078.03c tvaṁ hi śṛṇviṣe vaso ||

uta | naḥ | karṇa-śobhanā | purūṇi | dhṛṣṇo iti | ā | bhara |
tvam | hi | śṛṇviṣe | vaso iti ||8.078.03||

8.078.04a nakīṁ vṛdhīka indra te na suṣā na sudā uta |
8.078.04c nānyas tvac chūra vāghataḥ ||

nakīm | vṛdhīkaḥ | indra | te | na | su-sāḥ | na | su-dāḥ | uta |
na | anyaḥ | tvat | śūra | vāghataḥ ||8.078.04||

8.078.05a nakīm indro nikartave na śakraḥ pariśaktave |
8.078.05c viśvaṁ śṛṇoti paśyati ||

nakīm | indraḥ | ni-kartave | na | śakraḥ | pari-śaktave |
viśvam | śṛṇoti | paśyati ||8.078.05||

8.078.06a sa manyum martyānām adabdho ni cikīṣate |
8.078.06c purā nidaś cikīṣate ||

saḥ | manyum | martyānām | adabdhaḥ | ni | cikīṣate |
purā | nidaḥ | cikīṣate ||8.078.06||

8.078.07a kratva it pūrṇam udaraṁ turasyāsti vidhataḥ |
8.078.07c vṛtraghnaḥ somapāvnaḥ ||

kratvaḥ | it | pūrṇam | udaram | turasya | asti | vidhataḥ |
vṛtra-ghnaḥ | soma-pāvnaḥ ||8.078.07||

8.078.08a tve vasūni saṁgatā viśvā ca soma saubhagā |
8.078.08c sudātv aparihvṛtā ||

tve iti | vasūni | sam-gatā | viśvā | ca | soma | saubhagā |
su-dātu | apari-hvṛtā ||8.078.08||

8.078.09a tvām id yavayur mama kāmo gavyur hiraṇyayuḥ |
8.078.09c tvām aśvayur eṣate ||

tvām | it | yava-yuḥ | mama | kāmaḥ | gavyuḥ | hiraṇyayuḥ |
tvām | aśva-yuḥ | ā | īṣate ||8.078.09||

8.078.10a taved indrāham āśasā haste dātraṁ canā dade |
8.078.10c dinasya vā maghavan sambhṛtasya vā pūrdhi yavasya kāśinā ||

tava | it | indra | aham | ā-śasā | haste | dātram | cana | ā | dade |
dinasya | vā | magha-van | sam-bhṛtasya | vā | pūrdhi | yavasya | kāśinā ||8.078.10||


8.079.01a ayaṁ kṛtnur agṛbhīto viśvajid udbhid it somaḥ |
8.079.01c ṛṣir vipraḥ kāvyena ||

ayam | kṛtnuḥ | agṛbhītaḥ | viśva-jit | ut-bhit | it | somaḥ |
ṛṣiḥ | vipraḥ | kāvyena ||8.079.01||

8.079.02a abhy ūrṇoti yan nagnam bhiṣakti viśvaṁ yat turam |
8.079.02c prem andhaḥ khyan niḥ śroṇo bhūt ||

abhi | ūrṇoti | yat | nagnam | bhiṣakti | viśvam | yat | turam |
pra | īm | andhaḥ | khyat | niḥ | śroṇaḥ | bhūt ||8.079.02||

8.079.03a tvaṁ soma tanūkṛdbhyo dveṣobhyo 'nyakṛtebhyaḥ |
8.079.03c uru yantāsi varūtham ||

tvam | soma | tanūkṛt-bhyaḥ | dveṣaḥ-bhyaḥ | anya-kṛtebhyaḥ |
uru | yantā | asi | varūtham ||8.079.03||

8.079.04a tvaṁ cittī tava dakṣair diva ā pṛthivyā ṛjīṣin |
8.079.04c yāvīr aghasya cid dveṣaḥ ||

tvam | cittī | tava | dakṣaiḥ | divaḥ | ā | pṛthivyāḥ | ṛjīṣin |
yāvīḥ | aghasya | cit | dveṣaḥ ||8.079.04||

8.079.05a arthino yanti ced arthaṁ gacchān id daduṣo rātim |
8.079.05c vavṛjyus tṛṣyataḥ kāmam ||

arthinaḥ | yanti | ca | it | artham | gacchān | it | daduṣaḥ | rātim |
vavṛjyuḥ | tṛṣyataḥ | kāmam ||8.079.05||

8.079.06a vidad yat pūrvyaṁ naṣṭam ud īm ṛtāyum īrayat |
8.079.06c prem āyus tārīd atīrṇam ||

vidat | yat | pūrvyam | naṣṭam | ut | īm | ṛta-yum | īrayat |
pra | īm | āyuḥ | tārīt | atīrṇam ||8.079.06||

8.079.07a suśevo no mṛḻayākur adṛptakratur avātaḥ |
8.079.07c bhavā naḥ soma śaṁ hṛde ||

su-śevaḥ | naḥ | mṛḻayākuḥ | adṛpta-kratuḥ | avātaḥ |
bhava | naḥ | soma | śam | hṛde ||8.079.07||

8.079.08a mā naḥ soma saṁ vīvijo mā vi bībhiṣathā rājan |
8.079.08c mā no hārdi tviṣā vadhīḥ ||

mā | naḥ | soma | sam | vīvijaḥ | mā | vi | bībhiṣathā | rājan |
mā | naḥ | hārdi | tviṣā | vadhīḥ ||8.079.08||

8.079.09a ava yat sve sadhasthe devānāṁ durmatīr īkṣe |
8.079.09c rājann apa dviṣaḥ sedha mīḍhvo apa sridhaḥ sedha ||

ava | yat | sve | sadha-sthe | devānām | duḥ-matīḥ | īkṣe |
rājan | apa | dviṣaḥ | sedha | mīḍhvaḥ | apa | sridhaḥ | sedha ||8.079.09||


8.080.01a nahy anyam baḻākaram marḍitāraṁ śatakrato |
8.080.01c tvaṁ na indra mṛḻaya ||

nahi | anyam | balā | akaram | marḍitāram | śatakrato iti śata-krato |
tvam | naḥ | indra | mṛḻaya ||8.080.01||

8.080.02a yo naḥ śaśvat purāvithāmṛdhro vājasātaye |
8.080.02c sa tvaṁ na indra mṛḻaya ||

yaḥ | naḥ | śaśvat | purā | āvitha | amṛdhraḥ | vāja-sātaye |
saḥ | tvam | naḥ | indra | mṛḻaya ||8.080.02||

8.080.03a kim aṅga radhracodanaḥ sunvānasyāvited asi |
8.080.03c kuvit sv indra ṇaḥ śakaḥ ||

kim | aṅga | radhra-codanaḥ | sunvānasya | avitā | it | asi |
kuvit | su | indra | naḥ | śakaḥ ||8.080.03||

8.080.04a indra pra ṇo ratham ava paścāc cit santam adrivaḥ |
8.080.04c purastād enam me kṛdhi ||

indra | pra | naḥ | ratham | ava | paścāt | cit | santam | adri-vaḥ |
purastāt | enam | me | kṛdhi ||8.080.04||

8.080.05a hanto nu kim āsase prathamaṁ no rathaṁ kṛdhi |
8.080.05c upamaṁ vājayu śravaḥ ||

hanto iti | nu | kim | āsase | prathamam | naḥ | ratham | kṛdhi |
upa-mam | vāja-yu | śravaḥ ||8.080.05||

8.080.06a avā no vājayuṁ rathaṁ sukaraṁ te kim it pari |
8.080.06c asmān su jigyuṣas kṛdhi ||

ava | naḥ | vāja-yum | ratham | su-karam | te | kim | it | pari |
asmān | su | jigyuṣaḥ | kṛdhi ||8.080.06||

8.080.07a indra dṛhyasva pūr asi bhadrā ta eti niṣkṛtam |
8.080.07c iyaṁ dhīr ṛtviyāvatī ||

indra | dṛhyasva | pūḥ | asi | bhadrā | te | eti | niḥ-kṛtam |
iyam | dhīḥ | ṛtviya-vatī ||8.080.07||

8.080.08a mā sīm avadya ā bhāg urvī kāṣṭhā hitaṁ dhanam |
8.080.08c apāvṛktā aratnayaḥ ||

mā | sīm | avadye | ā | bhāk | urvī | kāṣṭhā | hitam | dhanam |
apa-āvṛktāḥ | aratnayaḥ ||8.080.08||

8.080.09a turīyaṁ nāma yajñiyaṁ yadā karas tad uśmasi |
8.080.09c ād it patir na ohase ||

turīyam | nāma | yajñiyam | yadā | karaḥ | tat | uśmasi |
āt | it | patiḥ | naḥ | ohase ||8.080.09||

8.080.10a avīvṛdhad vo amṛtā amandīd ekadyūr devā uta yāś ca devīḥ |
8.080.10c tasmā u rādhaḥ kṛṇuta praśastam prātar makṣū dhiyāvasur jagamyāt ||

avīvṛdhat | vaḥ | amṛtāḥ | amandīt | eka-dyūḥ | devāḥ | uta | yāḥ | ca | devīḥ |
tasmai | ūm̐ iti | rādhaḥ | kṛṇuta | pra-śastam | prātaḥ | makṣu | dhiyā-vasuḥ | jagamyāt ||8.080.10||


8.081.01a ā tū na indra kṣumantaṁ citraṁ grābhaṁ saṁ gṛbhāya |
8.081.01c mahāhastī dakṣiṇena ||

ā | tu | naḥ | indra | kṣu-mantam | citram | grābham | sam | gṛbhaya |
mahā-hastī | dakṣiṇena ||8.081.01||

8.081.02a vidmā hi tvā tuvikūrmiṁ tuvideṣṇaṁ tuvīmagham |
8.081.02c tuvimātram avobhiḥ ||

vidma | hi | tvā | tuvi-kūrmim | tuvi-deṣṇam | tuvī-magham |
tuvi-mātram | avaḥ-bhiḥ ||8.081.02||

8.081.03a nahi tvā śūra devā na martāso ditsantam |
8.081.03c bhīmaṁ na gāṁ vārayante ||

nahi | tvā | śūra | devāḥ | na | martāsaḥ | ditsantam |
bhīmam | na | gām | vārayante ||8.081.03||

8.081.04a eto nv indraṁ stavāmeśānaṁ vasvaḥ svarājam |
8.081.04c na rādhasā mardhiṣan naḥ ||

ā | ita | ūm̐ iti | nu | indram | stavāma | īśānam | vasvaḥ | sva-rājam |
na | rādhasā | mardhiṣat | naḥ ||8.081.04||

8.081.05a pra stoṣad upa gāsiṣac chravat sāma gīyamānam |
8.081.05c abhi rādhasā jugurat ||

pra | stoṣat | upa | gāsiṣat | śravat | sāma | gīyamānam |
abhi | rādhasā | jugurat ||8.081.05||

8.081.06a ā no bhara dakṣiṇenābhi savyena pra mṛśa |
8.081.06c indra mā no vasor nir bhāk ||

ā | naḥ | bhara | dakṣiṇena | abhi | savyena | pra | mṛśa |
indra | mā | naḥ | vasoḥ | niḥ | bhāk ||8.081.06||

8.081.07a upa kramasvā bhara dhṛṣatā dhṛṣṇo janānām |
8.081.07c adāśūṣṭarasya vedaḥ ||

upa | kramasva | ā | bhara | dhṛṣatā | dhṛṣṇo iti | janānām |
adāśūḥ-tarasya | vedaḥ ||8.081.07||

8.081.08a indra ya u nu te asti vājo viprebhiḥ sanitvaḥ |
8.081.08c asmābhiḥ su taṁ sanuhi ||

indra | yaḥ | ūm̐ iti | nu | te | asti | vājaḥ | viprebhiḥ | sanitvaḥ |
asmābhiḥ | su | tam | sanuhi ||8.081.08||

8.081.09a sadyojuvas te vājā asmabhyaṁ viśvaścandrāḥ |
8.081.09c vaśaiś ca makṣū jarante ||

sadyaḥ-juvaḥ | te | vājāḥ | asmabhyam | viśva-candrāḥ |
vaśaiḥ | ca | makṣu | jarante ||8.081.09||


8.082.01a ā pra drava parāvato 'rvāvataś ca vṛtrahan |
8.082.01c madhvaḥ prati prabharmaṇi ||

ā | pra | drava | parā-vataḥ | arvā-vataḥ | ca | vṛtra-han |
madhvaḥ | prati | pra-bharmaṇi ||8.082.01||

8.082.02a tīvrāḥ somāsa ā gahi sutāso mādayiṣṇavaḥ |
8.082.02c pibā dadhṛg yathociṣe ||

tīvrāḥ | somāsaḥ | ā | gahi | sutāsaḥ | mādayiṣṇavaḥ |
piba | dadhṛk | yathā | ociṣe ||8.082.02||

8.082.03a iṣā mandasvād u te 'raṁ varāya manyave |
8.082.03c bhuvat ta indra śaṁ hṛde ||

iṣā | mandasva | āt | ūm̐ iti | te | aram | varāya | manyave |
bhuvat | te | indra | śam | hṛde ||8.082.03||

8.082.04a ā tv aśatrav ā gahi ny ukthāni ca hūyase |
8.082.04c upame rocane divaḥ ||

ā | tu | asatro iti | ā | gahi | ni | ukthāni | ca | hūyase |
upa-me | rocane | divaḥ ||8.082.04||

8.082.05a tubhyāyam adribhiḥ suto gobhiḥ śrīto madāya kam |
8.082.05c pra soma indra hūyate ||

tubhya | ayam | adri-bhiḥ | sutaḥ | gobhiḥ | śrītaḥ | madāya | kam |
pra | somaḥ | indra | hūyate ||8.082.05||

8.082.06a indra śrudhi su me havam asme sutasya gomataḥ |
8.082.06c vi pītiṁ tṛptim aśnuhi ||

indra | śrudhi | su | me | havam | asme iti | sutasya | go-mataḥ |
vi | pītim | tṛptim | aśnuhi ||8.082.06||

8.082.07a ya indra camaseṣv ā somaś camūṣu te sutaḥ |
8.082.07c pibed asya tvam īśiṣe ||

yaḥ | indra | camaseṣu | ā | somaḥ | camūṣu | te | sutaḥ |
piba | it | asya | tvam | īśiṣe ||8.082.07||

8.082.08a yo apsu candramā iva somaś camūṣu dadṛśe |
8.082.08c pibed asya tvam īśiṣe ||

yaḥ | ap-su | candramāḥ-iva | somaḥ | camūṣu | dadṛśe |
piba | it | asya | tvam | īśiṣe ||8.082.08||

8.082.09a yaṁ te śyenaḥ padābharat tiro rajāṁsy aspṛtam |
8.082.09c pibed asya tvam īśiṣe ||

yam | te | śyenaḥ | padā | ā | abharat | tiraḥ | rajāṁsi | aspṛtam |
piba | it | asya | tvam | īśiṣe ||8.082.09||


8.083.01a devānām id avo mahat tad ā vṛṇīmahe vayam |
8.083.01c vṛṣṇām asmabhyam ūtaye ||

devānām | it | avaḥ | mahat | tat | ā | vṛṇīmahe | vayam |
vṛṣṇām | asmabhyam | ūtaye ||8.083.01||

8.083.02a te naḥ santu yujaḥ sadā varuṇo mitro aryamā |
8.083.02c vṛdhāsaś ca pracetasaḥ ||

te | naḥ | santu | yujaḥ | sadā | varuṇaḥ | mitraḥ | aryamā |
vṛdhāsaḥ | ca | pra-cetasaḥ ||8.083.02||

8.083.03a ati no viṣpitā puru naubhir apo na parṣatha |
8.083.03c yūyam ṛtasya rathyaḥ ||

ati | naḥ | viṣpitā | puru | naubhiḥ | apaḥ | na | parṣatha |
yūyam | ṛtasya | rathyśaḥ ||8.083.03||

8.083.04a vāmaṁ no astv aryaman vāmaṁ varuṇa śaṁsyam |
8.083.04c vāmaṁ hy āvṛṇīmahe ||

vāmam | naḥ | astu | aryaman | vāmam | varuṇa | śaṁsyam |
vāmam | hi | ā-vṛṇīmahe ||8.083.04||

8.083.05a vāmasya hi pracetasa īśānāśo riśādasaḥ |
8.083.05c nem ādityā aghasya yat ||

vāmasya | hi | pra-cetasaḥ | īśānāsaḥ | riśādasaḥ |
na | īm | ādityāḥ | aghasya | yat ||8.083.05||

8.083.06a vayam id vaḥ sudānavaḥ kṣiyanto yānto adhvann ā |
8.083.06c devā vṛdhāya hūmahe ||

vayam | it | vaḥ | su-dānavaḥ | kṣiyantaḥ | yāntaḥ | adhvan | ā |
devāḥ | vṛdhāya | hūmahe ||8.083.06||

8.083.07a adhi na indraiṣāṁ viṣṇo sajātyānām |
8.083.07c itā maruto aśvinā ||

adhi | naḥ | indra | eṣām | viṣṇo iti | sa-jātyānām |
ita | marutaḥ | aśvinā ||8.083.07||

8.083.08a pra bhrātṛtvaṁ sudānavo 'dha dvitā samānyā |
8.083.08c mātur garbhe bharāmahe ||

pra | bhrātṛt-vam | su-dānavaḥ | adha | dvitā | samānyā |
mātuḥ | garbhe | bharāmahe ||8.083.08||

8.083.09a yūyaṁ hi ṣṭhā sudānava indrajyeṣṭhā abhidyavaḥ |
8.083.09c adhā cid va uta bruve ||

yūyam | hi | stha | su-dānavaḥ | indra-jyeṣṭhāḥ | abhi-dyavaḥ |
adha | cit | vaḥ | uta | bruve ||8.083.09||


8.084.01a preṣṭhaṁ vo atithiṁ stuṣe mitram iva priyam |
8.084.01c agniṁ rathaṁ na vedyam ||

preṣṭham | vaḥ | atithim | stuṣe | mitram-iva | priyam |
agnim | ratham | na | vedyam ||8.084.01||

8.084.02a kavim iva pracetasaṁ yaṁ devāso adha dvitā |
8.084.02c ni martyeṣv ādadhuḥ ||

kavim-iva | pra-cetasam | yam | devāsaḥ | adha | dvitā |
ni | martyeṣu | ā-dadhuḥ ||8.084.02||

8.084.03a tvaṁ yaviṣṭha dāśuṣo nṝm̐ḥ pāhi śṛṇudhī giraḥ |
8.084.03c rakṣā tokam uta tmanā ||

tvam | yaviṣṭha | dāśuṣaḥ | nṝn | pāhi | śṛṇudhi | giraḥ |
rakṣa | tokam | uta | tmanā ||8.084.03||

8.084.04a kayā te agne aṅgira ūrjo napād upastutim |
8.084.04c varāya deva manyave ||

kayā | te | agne | aṅgiraḥ | ūrjaḥ | napāt | upa-stutim |
varāya | deva | manyave ||8.084.04||

8.084.05a dāśema kasya manasā yajñasya sahaso yaho |
8.084.05c kad u voca idaṁ namaḥ ||

dāśema | kasya | manasā | yajñasya | sahasaḥ | yaho iti |
kat | ūm̐ iti | voce | idam | namaḥ ||8.084.05||

8.084.06a adhā tvaṁ hi nas karo viśvā asmabhyaṁ sukṣitīḥ |
8.084.06c vājadraviṇaso giraḥ ||

adha | tvam | hi | naḥ | karaḥ | viśvāḥ | asmabhyam | su-kṣitīḥ |
vāja-draviṇasaḥ | giraḥ ||8.084.06||

8.084.07a kasya nūnam parīṇaso dhiyo jinvasi dampate |
8.084.07c goṣātā yasya te giraḥ ||

kasya | nūnam | parīṇasaḥ | dhiyaḥ | jinvasi | dam-pate |
go-sātā | yasya | te | giraḥ ||8.084.07||

8.084.08a tam marjayanta sukratum puroyāvānam ājiṣu |
8.084.08c sveṣu kṣayeṣu vājinam ||

tam | marjayanta | su-kratum | puraḥ-yāvānam | ājiṣu |
sveṣu | kṣayeṣu | vājinam ||8.084.08||

8.084.09a kṣeti kṣemebhiḥ sādhubhir nakir yaṁ ghnanti hanti yaḥ |
8.084.09c agne suvīra edhate ||

kṣeti | kṣemebhiḥ | sādhu-bhiḥ | nakiḥ | yam | ghnanti | hanti | yaḥ |
agne | su-vīraḥ | edhate ||8.084.09||


8.085.01a ā me havaṁ nāsatyāśvinā gacchataṁ yuvam |
8.085.01c madhvaḥ somasya pītaye ||

ā | me | havam | nāsatyā | aśvinā | gacchatam | yuvam |
madhvaḥ | somasya | pītaye ||8.085.01||

8.085.02a imam me stomam aśvinemam me śṛṇutaṁ havam |
8.085.02c madhvaḥ somasya pītaye ||

imam | me | stomam | aśvinā | imam | me | śṛṇutam | havam |
madhvaḥ | somasya | pītaye ||8.085.02||

8.085.03a ayaṁ vāṁ kṛṣṇo aśvinā havate vājinīvasū |
8.085.03c madhvaḥ somasya pītaye ||

ayam | vām | kṛṣṇaḥ | aśvinā | havate | vājinīvasū iti vājinī-vasū |
madhvaḥ | somasya | pītaye ||8.085.03||

8.085.04a śṛṇutaṁ jaritur havaṁ kṛṣṇasya stuvato narā |
8.085.04c madhvaḥ somasya pītaye ||

śṛṇutam | jarituḥ | havam | kṛṣṇasya | stuvataḥ | narā |
madhvaḥ | somasya | pītaye ||8.085.04||

8.085.05a chardir yantam adābhyaṁ viprāya stuvate narā |
8.085.05c madhvaḥ somasya pītaye ||

chardiḥ | yantam | adābhyam | viprāya | stuvate | narā |
madhvaḥ | somasya | pītaye ||8.085.05||

8.085.06a gacchataṁ dāśuṣo gṛham itthā stuvato aśvinā |
8.085.06c madhvaḥ somasya pītaye ||

gacchatam | dāśuṣaḥ | gṛham | itthā | stuvataḥ | aśvinā |
madhvaḥ | somasya | pītaye ||8.085.06||

8.085.07a yuñjāthāṁ rāsabhaṁ rathe vīḍvaṅge vṛṣaṇvasū |
8.085.07c madhvaḥ somasya pītaye ||

yuñjāthām | rāsabham | rathe | vīḻu-aṅge | vṛṣaṇvasū iti vṛṣaṇ-vasū |
madhvaḥ | somasya | pītaye ||8.085.07||

8.085.08a trivandhureṇa trivṛtā rathenā yātam aśvinā |
8.085.08c madhvaḥ somasya pītaye ||

tri-vandhureṇa | tri-vṛtā | rathena | ā | yātam | aśvinā |
madhvaḥ | somasya | pītaye ||8.085.08||

8.085.09a nū me giro nāsatyāśvinā prāvataṁ yuvam |
8.085.09c madhvaḥ somasya pītaye ||

nu | me | giraḥ | nāsatyā | aśvinā | pra | avatam | yuvam |
madhvaḥ | somasya | pītaye ||8.085.09||


8.086.01a ubhā hi dasrā bhiṣajā mayobhuvobhā dakṣasya vacaso babhūvathuḥ |
8.086.01c tā vāṁ viśvako havate tanūkṛthe mā no vi yauṣṭaṁ sakhyā mumocatam ||

ubhā | hi | dasrā | bhiṣajā | mayaḥ-bhuvā | ubhā | dakṣasya | vacasaḥ | babhūvathuḥ |
tā | vām | viśvakaḥ | havate | tanū-kṛthe | mā | naḥ | vi | yauṣṭam | sakhyā | mumocatam ||8.086.01||

8.086.02a kathā nūnaṁ vāṁ vimanā upa stavad yuvaṁ dhiyaṁ dadathur vasyaïṣṭaye |
8.086.02c tā vāṁ viśvako havate tanūkṛthe mā no vi yauṣṭaṁ sakhyā mumocatam ||

kathā | nūnam | vām | vi-manāḥ | upa | stavat | yuvam | dhiyam | dadathuḥ | vasyaḥ-iṣṭaye |
tā | vām | viśvakaḥ | havate | tanū-kṛthe | mā | naḥ | vi | yauṣṭam | sakhyā | mumocatam ||8.086.02||

8.086.03a yuvaṁ hi ṣmā purubhujemam edhatuṁ viṣṇāpve dadathur vasyaïṣṭaye |
8.086.03c tā vāṁ viśvako havate tanūkṛthe mā no vi yauṣṭaṁ sakhyā mumocatam ||

yuvam | hi | sma | puru-bhujā | imam | edhatum | viṣṇāpve | dadathuḥ | vasyaḥ-iṣṭaye |
tā | vām | viśvakaḥ | havate | tanū-kṛthe | mā | naḥ | vi | yauṣṭam | sakhyā | mumocatam ||8.086.03||

8.086.04a uta tyaṁ vīraṁ dhanasām ṛjīṣiṇaṁ dūre cit santam avase havāmahe |
8.086.04c yasya svādiṣṭhā sumatiḥ pitur yathā mā no vi yauṣṭaṁ sakhyā mumocatam ||

uta | tyam | vīram | dhana-sām | ṛjīṣiṇam | dūre | cit | santam | avase | havāmahe |
yasya | svādiṣṭhā | su-matiḥ | pituḥ | yathā | mā | naḥ | vi | yauṣṭam | sakhyā | mumocatam ||8.086.04||

8.086.05a ṛtena devaḥ savitā śamāyata ṛtasya śṛṅgam urviyā vi paprathe |
8.086.05c ṛtaṁ sāsāha mahi cit pṛtanyato mā no vi yauṣṭaṁ sakhyā mumocatam ||

ṛtena | devaḥ | savitā | śam-āyate | ṛtasya | śṛṅgam | urviyā | vi | paprathe |
ṛtam | sasāha | mahi | cit | pṛtanyataḥ | mā | naḥ | vi | yauṣṭam | sakhyā | mumocatam ||8.086.05||


8.087.01a dyumnī vāṁ stomo aśvinā krivir na seka ā gatam |
8.087.01c madhvaḥ sutasya sa divi priyo narā pātaṁ gaurāv iveriṇe ||

dyumnī | vām | stomaḥ | aśvinā | kriviḥ | na | seke | ā | gatam |
madhvaḥ | sutasya | saḥ | divi | priyaḥ | narā | pātam | gaurau-iva | iriṇe ||8.087.01||

8.087.02a pibataṁ gharmam madhumantam aśvinā barhiḥ sīdataṁ narā |
8.087.02c tā mandasānā manuṣo duroṇa ā ni pātaṁ vedasā vayaḥ ||

pibatam | gharmam | madhu-mantam | aśvinā | ā | barhiḥ | sīdatam | narā |
tā | mandasānā | manuṣaḥ | duroṇe | ā | ni | pācam | vedasā | vayaḥ ||8.087.02||

8.087.03a ā vāṁ viśvābhir ūtibhiḥ priyamedhā ahūṣata |
8.087.03c tā vartir yātam upa vṛktabarhiṣo juṣṭaṁ yajñaṁ diviṣṭiṣu ||

ā | vām | viśvābhiḥ | ūti-bhiḥ | priya-medhāḥ | ahūṣata |
tā | vartiḥ | yātam | upa | vṛkta-barhiṣaḥ | juṣṭam | yajñam | diviṣṭiṣu ||8.087.03||

8.087.04a pibataṁ somam madhumantam aśvinā barhiḥ sīdataṁ sumat |
8.087.04c tā vāvṛdhānā upa suṣṭutiṁ divo gantaṁ gaurāv iveriṇam ||

pibatam | somam | madhu-mantam | aśvinā | ā | barhiḥ | sīdatam | su-mat |
tā | vavṛdhānau | upa | su-stutim | divaḥ | gantam | gaurau-iva | iriṇam ||8.087.04||

8.087.05a ā nūnaṁ yātam aśvināśvebhiḥ pruṣitapsubhiḥ |
8.087.05c dasrā hiraṇyavartanī śubhas patī pātaṁ somam ṛtāvṛdhā ||

ā | nūnam | yātam | aśvinā | aśvebhiḥ | pruṣitapsu-bhiḥ |
dasrā | hiraṇyavartanī iti hiraṇya-vartanī | śubhaḥ | patī iti | pātam | somam | ṛta-vṛdhā ||8.087.05||

8.087.06a vayaṁ hi vāṁ havāmahe vipanyavo viprāso vājasātaye |
8.087.06c tā valgū dasrā purudaṁsasā dhiyāśvinā śruṣṭy ā gatam ||

vayam | hi | vām | havāmahe | vipanyavaḥ | viprāsaḥ | vāja-sātaye |
tā | valgū iti | dasrā | puru-daṁsasā | dhiyā | aśvinā | śruṣṭī | ā | gatam ||8.087.06||


8.088.01a taṁ vo dasmam ṛtīṣahaṁ vasor mandānam andhasaḥ |
8.088.01c abhi vatsaṁ na svasareṣu dhenava indraṁ gīrbhir navāmahe ||

tam | vaḥ | dasmam | ṛti-saham | vasoḥ | mandānam | andhasaḥ |
abhi | vatsam | na | svasareṣu | dhenavaḥ | indram | gīḥ-bhiḥ | navāmahe ||8.088.01||

8.088.02a dyukṣaṁ sudānuṁ taviṣībhir āvṛtaṁ giriṁ na purubhojasam |
8.088.02c kṣumantaṁ vājaṁ śatinaṁ sahasriṇam makṣū gomantam īmahe ||

dyukṣam | su-dānum | taviṣībhiḥ | ā-vṛtam | girim | na | puru-bhojasam |
kṣu-mantam | vājam | śatinam | sahasriṇam | makṣu | go-mantam | īmahe ||8.088.02||

8.088.03a na tvā bṛhanto adrayo varanta indra vīḻavaḥ |
8.088.03c yad ditsasi stuvate māvate vasu nakiṣ ṭad ā mināti te ||

na | tvā | bṛhantaḥ | adrayaḥ | varante | indra | vīḻavaḥ |
yat | ditsasi | stuvate | mā-vate | vasu | nakiḥ | tat | ā | mināti | te ||8.088.03||

8.088.04a yoddhāsi kratvā śavasota daṁsanā viśvā jātābhi majmanā |
8.088.04c ā tvāyam arka ūtaye vavartati yaṁ gotamā ajījanan ||

yoddhā | asi | kratvā | śavasā | uta | daṁsanā | viśvā | jātā | abhi | majmanā |
ā | tvā | ayam | arkaḥ | ūtaye | vavartati | yam | gotamāḥ | ajījanan ||8.088.04||

8.088.05a pra hi ririkṣa ojasā divo antebhyas pari |
8.088.05c na tvā vivyāca raja indra pārthivam anu svadhāṁ vavakṣitha ||

pra | hi | ririkṣe | ojasā | divaḥ | antebhyaḥ | pari |
na | tvā | vivyāca | rajaḥ | indra | pārthivam | anu | svadhām | vavakṣitha ||8.088.05||

8.088.06a nakiḥ pariṣṭir maghavan maghasya te yad dāśuṣe daśasyasi |
8.088.06c asmākam bodhy ucathasya coditā maṁhiṣṭho vājasātaye ||

nakiḥ | pariṣṭiḥ | magha-van | maghasya | te | yat | dāśuṣe | daśasyasi |
asmākam | bodhi | ucathasya | coditā | maṁhiṣṭhaḥ | vāja-sātaye ||8.088.06||


8.089.01a bṛhad indrāya gāyata maruto vṛtrahantamam |
8.089.01c yena jyotir ajanayann ṛtāvṛdho devaṁ devāya jāgṛvi ||

bṛhat | indrāya | gāyata | marutaḥ | vṛtraham-tamam |
yena | jyotiḥ | ajanayan | ṛta-vṛdhaḥ | devam | devāya | jāgṛvi ||8.089.01||

8.089.02a apādhamad abhiśastīr aśastihāthendro dyumny ābhavat |
8.089.02c devās ta indra sakhyāya yemire bṛhadbhāno marudgaṇa ||

apa | adhamat | abhi-śastīḥ | aśasti-hā | atha | indraḥ | dyumnī | ā | abhavat |
devāḥ | te | indra | sakhyāya | yemire | bṛhadbhāno iti bṛhat-bhāno | marut-gaṇa ||8.089.02||

8.089.03a pra va indrāya bṛhate maruto brahmārcata |
8.089.03c vṛtraṁ hanati vṛtrahā śatakratur vajreṇa śataparvaṇā ||

pra | vaḥ | indrāya | bṛhate | marutaḥ | brahma | arcata |
vṛtram | hanati | vṛtra-hā | śata-kratuḥ | vajreṇa | śata-parvaṇā ||8.089.03||

8.089.04a abhi pra bhara dhṛṣatā dhṛṣanmanaḥ śravaś cit te asad bṛhat |
8.089.04c arṣantv āpo javasā vi mātaro hano vṛtraṁ jayā svaḥ ||

abhi | pra | bhara | dhṛṣatā | dhṛṣat-manaḥ | śravaḥ | cit | te | asat | bṛhat |
arṣantu | āpaḥ | javasā | vi | mātaraḥ | hanaḥ | vṛtram | jaya | svaḥ ||8.089.04||

8.089.05a yaj jāyathā apūrvya maghavan vṛtrahatyāya |
8.089.05c tat pṛthivīm aprathayas tad astabhnā uta dyām ||

yat | jāyatha | apūrvya | magha-van | vṛtra-hatyāya |
tat | pṛthivīm | aprathayaḥ | tat | astabhnāḥ | uta | dyām ||8.089.05||

8.089.06a tat te yajño ajāyata tad arka uta haskṛtiḥ |
8.089.06c tad viśvam abhibhūr asi yaj jātaṁ yac ca jantvam ||

tat | te | yajñaḥ | ajāyata | tat | arkaḥ | uta | haskṛtiḥ |
tat | viśvam | abhi-bhūḥ | asi | yat | jātam | yat | ca | jantvam ||8.089.06||

8.089.07a āmāsu pakvam airaya ā sūryaṁ rohayo divi |
8.089.07c gharmaṁ na sāman tapatā suvṛktibhir juṣṭaṁ girvaṇase bṛhat ||

āmāsu | pakvam | airayaḥ | ā | sūryam | rohayaḥ | divi |
gharmam | na | sāman | tapata | suvṛkti-bhiḥ | juṣṭam | girvaṇase | bṛhat ||8.089.07||


8.090.01a ā no viśvāsu havya indraḥ samatsu bhūṣatu |
8.090.01c upa brahmāṇi savanāni vṛtrahā paramajyā ṛcīṣamaḥ ||

ā | naḥ | viśvāsu | havyaḥ | indraḥ | samat-su | bhūṣatu |
upa | brahmāṇi | savanāni | vṛtra-hā | parama-jyāḥ | ṛcīṣamaḥ ||8.090.01||

8.090.02a tvaṁ dātā prathamo rādhasām asy asi satya īśānakṛt |
8.090.02c tuvidyumnasya yujyā vṛṇīmahe putrasya śavaso mahaḥ ||

tvam | dātā | prathamaḥ | rādhasām | asi | asi | satyaḥ | īśāna-kṛt |
tuvi-dyumnasya | yujyā | ā | vṛṇīmahe | putrasya | śavasaḥ | mahaḥ ||8.090.02||

8.090.03a brahmā ta indra girvaṇaḥ kriyante anatidbhutā |
8.090.03c imā juṣasva haryaśva yojanendra yā te amanmahi ||

brahma | te | indra | girvaṇaḥ | kriyante | anatidbhutā |
imā | juṣasva | hari-aśva | yojanā | indra | yā | te | amanmahi ||8.090.03||

8.090.04a tvaṁ hi satyo maghavann anānato vṛtrā bhūri nyṛñjase |
8.090.04c sa tvaṁ śaviṣṭha vajrahasta dāśuṣe 'rvāñcaṁ rayim ā kṛdhi ||

tvam | hi | satyaḥ | magha-van | anānataḥ | vṛtrā | bhūri | ni-ṛñjase |
saḥ | tvam | śaviṣṭha | vajra-hasta | dāśuṣe | arvāñcam | rayim | ā | kṛdhi ||8.090.04||

8.090.05a tvam indra yaśā asy ṛjīṣī śavasas pate |
8.090.05c tvaṁ vṛtrāṇi haṁsy apratīny eka id anuttā carṣaṇīdhṛtā ||

tvam | indra | yaśāḥ | asi | ṛjīṣī | śavasaḥ | pate |
tvam | vṛtrāṇi | haṁsi | apratīni | ekaḥ | it | anuttā | carṣaṇi-dhṛtā ||8.090.05||

8.090.06a tam u tvā nūnam asura pracetasaṁ rādho bhāgam ivemahe |
8.090.06c mahīva kṛttiḥ śaraṇā ta indra pra te sumnā no aśnavan ||

tam | ūm̐ iti | tvā | nūnam | asura | pra-cetasam | rādhaḥ | bhāgam-iva | īmahe |
mahī-iva | kṛttiḥ | śaraṇā | te | indra | pra | te | sumnā | naḥ | aśnavat ||8.090.06||


8.091.01a kanyā vār avāyatī somam api srutāvidat |
8.091.01c astam bharanty abravīd indrāya sunavai tvā śakrāya sunavai tvā ||

kanyā | vāḥ | āva-yatī | somam | api | srutā | avidat |
astam | bharantī | abravīt | indrāya | sunavai | tvā | śakrāya | sunavai | tvā ||8.091.01||

8.091.02a asau ya eṣi vīrako gṛhaṁ-gṛhaṁ vicākaśad |
8.091.02c imaṁ jambhasutam piba dhānāvantaṁ karambhiṇam apūpavantam ukthinam ||

asau | yaḥ | eṣi | vīrakaḥ | gṛham-gṛham | vi-cākaśat |
imam | jambha-sutam | piba | dhānā-vantam | karambhiṇam | apūpa-vantam | ukthinam ||8.091.02||

8.091.03a ā cana tvā cikitsāmo 'dhi cana tvā nemasi |
8.091.03c śanair iva śanakair ivendrāyendo pari srava ||

ā | cana | tvā | cikitsāmaḥ | adhi | cana | tvā | na | imasi |
śanaiḥ-iva | śanakaiḥ-iva | indrāya | indo iti | pari | srava ||8.091.03||

8.091.04a kuvic chakat kuvit karat kuvin no vasyasas karat |
8.091.04c kuvit patidviṣo yatīr indreṇa saṁgamāmahai ||

kuvit | śakat | kuvit | karat | kuvit | naḥ | vasyasaḥ | karat |
kuvit | pati-dviṣaḥ | yatīḥ | indreṇa | sam-gamāmahai ||8.091.04||

8.091.05a imāni trīṇi viṣṭapā tānīndra vi rohaya |
8.091.05c śiras tatasyorvarām ād idam ma upodare ||

imāni | trīṇi | viṣṭapā | tāni | indra | vi | rohaya |
śiraḥ | tatasya | urvarām | āt | idam | me | upa | udare ||8.091.05||

8.091.06a asau ca yā na urvarād imāṁ tanvam mama |
8.091.06c atho tatasya yac chiraḥ sarvā tā romaśā kṛdhi ||

asau | ca | yā | naḥ | urvarā | āt | imām | tanvam | mama |
atho iti | tatasya | yat | śiraḥ | sarvā | tā | romaśā | kṛdhi ||8.091.06||

8.091.07a khe rathasya khe 'nasaḥ khe yugasya śatakrato |
8.091.07c apālām indra triṣ pūtvy akṛṇoḥ sūryatvacam ||

khe | rathasya | khe | anasaḥ | khe | yugasya | śatakrato iti śata-krato |
apālām | indra | triḥ | pūtvī | akṛṇoḥ | sūrya-tvacam ||8.091.07||


8.092.01a pāntam ā vo andhasa indram abhi pra gāyata |
8.092.01c viśvāsāhaṁ śatakratum maṁhiṣṭhaṁ carṣaṇīnām ||

pāntam | ā | vaḥ | andhasaḥ | indram | abhi | pra | gāyata |
viśva-saham | śata-kratum | maṁhiṣṭham | carṣaṇīnām ||8.092.01||

8.092.02a puruhūtam puruṣṭutaṁ gāthānyaṁ sanaśrutam |
8.092.02c indra iti bravītana ||

puru-hūtam | puru-stutam | gāthānyam | sana-śrutam |
indraḥ | iti | bravītana ||8.092.02||

8.092.03a indra in no mahānāṁ dātā vājānāṁ nṛtuḥ |
8.092.03c mahām̐ abhijñv ā yamat ||

indraḥ | it | naḥ | mahānām | datā | vājānām | nṛtuḥ |
mahān | abhi-jñu | ā | yamat ||8.092.03||

8.092.04a apād u śipry andhasaḥ sudakṣasya prahoṣiṇaḥ |
8.092.04c indor indro yavāśiraḥ ||

apāt | ūm̐ iti | śiprī | andhasaḥ | su-dakṣasya | pra-hoṣiṇaḥ |
indoḥ | indraḥ | yava-āśiraḥ ||8.092.04||

8.092.05a tam v abhi prārcatendraṁ somasya pītaye |
8.092.05c tad id dhy asya vardhanam ||

tam | ūm̐ iti | abhi | pra | arcata | indram | somasya | pītaye |
tat | it | hi | asya | vardhanam ||8.092.05||

8.092.06a asya pītvā madānāṁ devo devasyaujasā |
8.092.06c viśvābhi bhuvanā bhuvat ||

asya | pītvā | madānām | devaḥ | devasya | ojasā |
viśvā | abhi | bhuvanā | bhuvat ||8.092.06||

8.092.07a tyam u vaḥ satrāsāhaṁ viśvāsu gīrṣv āyatam |
8.092.07c ā cyāvayasy ūtaye ||

tyam | ūm̐ iti | vaḥ | satrā-saham | viśvāsu | gīrṣu | ā-yatam |
ā | cyavayasi | ūtaye ||8.092.07||

8.092.08a yudhmaṁ santam anarvāṇaṁ somapām anapacyutam |
8.092.08c naram avāryakratum ||

yudhmam | santam | anarvāṇam | soma-pām | anapa-cyutam |
naram | avārya-kratum ||8.092.08||

8.092.09a śikṣā ṇa indra rāya ā puru vidvām̐ ṛcīṣama |
8.092.09c avā naḥ pārye dhane ||

śikṣa | naḥ | indra | rāyaḥ | ā | puru | vidvān | ṛcīṣama |
ava | naḥ | pārye | dhane ||8.092.09||

8.092.10a ataś cid indra ṇa upā yāhi śatavājayā |
8.092.10c iṣā sahasravājayā ||

ataḥ | cit | indra | naḥ | upa | ā | yāhi | śata-vājayā |
iṣā | sahasra-vājayā ||8.092.10||

8.092.11a ayāma dhīvato dhiyo 'rvadbhiḥ śakra godare |
8.092.11c jayema pṛtsu vajrivaḥ ||

ayāma | dhī-vataḥ | dhiyaḥ | arvat-bhiḥ | śakra | go-dare |
jayema | pṛt-su | vajri-vaḥ ||8.092.11||

8.092.12a vayam u tvā śatakrato gāvo na yavaseṣv ā |
8.092.12c uktheṣu raṇayāmasi ||

vayam | ūm̐ iti | tvā | śatakrato iti śata-krato | gāvaḥ | na | yavaseṣu | ā |
uktheṣu | raṇayāmasi ||8.092.12||

8.092.13a viśvā hi martyatvanānukāmā śatakrato |
8.092.13c aganma vajrinn āśasaḥ ||

viśvā | hi | martya-tvanā | anu-kāmā | śatakrato iti śata-krato |
aganma | vajrin | ā-śasaḥ ||8.092.13||

8.092.14a tve su putra śavaso 'vṛtran kāmakātayaḥ |
8.092.14c na tvām indrāti ricyate ||

tve iti | su | putra | śavasaḥ | avṛtran | kāma-kātayaḥ |
na | tvām | indra | ati | ricyate ||8.092.14||

8.092.15a sa no vṛṣan saniṣṭhayā saṁ ghorayā dravitnvā |
8.092.15c dhiyāviḍḍhi puraṁdhyā ||

saḥ | naḥ | vṛṣan | saniṣṭhayā | sam | ghorayā | dravitnvā |
dhiyā | aviḍḍhi | puram-dhyā ||8.092.15||

8.092.16a yas te nūnaṁ śatakratav indra dyumnitamo madaḥ |
8.092.16c tena nūnam made madeḥ ||

yaḥ | te | nūnam | śatakrato iti śata-krato | indra | dyumni-tamaḥ | madaḥ |
tena | nūnam | made | madeḥ ||8.092.16||

8.092.17a yas te citraśravastamo ya indra vṛtrahantamaḥ |
8.092.17c ya ojodātamo madaḥ ||

yaḥ | te | citraśravaḥ-tamaḥ | yaḥ | indra | vṛtrahan-tamaḥ |
yaḥ | ojaḥ-dātamaḥ | madaḥ ||8.092.17||

8.092.18a vidmā hi yas te adrivas tvādattaḥ satya somapāḥ |
8.092.18c viśvāsu dasma kṛṣṭiṣu ||

vidma | hi | yaḥ | te | adri-vaḥ | tvā-dattaḥ | satya | soma-pāḥ |
viśvāsu | dasma | kṛṣṭiṣu ||8.092.18||

8.092.19a indrāya madvane sutam pari ṣṭobhantu no giraḥ |
8.092.19c arkam arcantu kāravaḥ ||

indrāya | madvane | sutam | pari | stobhantu | naḥ | giraḥ |
arkam | arcantu | kāravaḥ ||8.092.19||

8.092.20a yasmin viśvā adhi śriyo raṇanti sapta saṁsadaḥ |
8.092.20c indraṁ sute havāmahe ||

yasmin | viśvāḥ | adhi | śriyaḥ | raṇanti | sapta | sam-sadaḥ |
indram | sute | havāmahe ||8.092.20||

8.092.21a trikadrukeṣu cetanaṁ devāso yajñam atnata |
8.092.21c tam id vardhantu no giraḥ ||

tri-kadrukeṣu | cetanam | devāsaḥ | yajñam | atnata |
tam | it | vardhantu | naḥ | giraḥ ||8.092.21||

8.092.22a ā tvā viśantv indavaḥ samudram iva sindhavaḥ |
8.092.22c na tvām indrāti ricyate ||

ā | tvā | viśantu | indavaḥ | samudram-iva | sindhavaḥ |
na | tvām | indra | ati | ricyate ||8.092.22||

8.092.23a vivyaktha mahinā vṛṣan bhakṣaṁ somasya jāgṛve |
8.092.23c ya indra jaṭhareṣu te ||

vivyaktha | mahinā | vṛṣan | bhakṣam | somasya | jāgṛve |
yaḥ | indra | jaṭhareṣu | te ||8.092.23||

8.092.24a araṁ ta indra kukṣaye somo bhavatu vṛtrahan |
8.092.24c araṁ dhāmabhya indavaḥ ||

aram | te | indra | kukṣaye | somaḥ | bhavatu | vṛtra-han |
aram | dhāma-bhyaḥ | indavaḥ ||8.092.24||

8.092.25a aram aśvāya gāyati śrutakakṣo araṁ gave |
8.092.25c aram indrasya dhāmne ||

aram | aśvāya | gāyati | śruta-kakṣaḥ | aram | gave |
aram | indrasya | dhāmne ||8.092.25||

8.092.26a araṁ hi ṣma suteṣu ṇaḥ someṣv indra bhūṣasi |
8.092.26c araṁ te śakra dāvane ||

aram | hi | sma | suteṣu | naḥ | someṣu | indra | bhūṣasi |
aram | te | śakra | dāvane ||8.092.26||

8.092.27a parākāttāc cid adrivas tvāṁ nakṣanta no giraḥ |
8.092.27c araṁ gamāma te vayam ||

parākāttāt | cit | adri-vaḥ | tvām | nakṣanta | naḥ | giraḥ |
aram | gamāma | te | vayam ||8.092.27||

8.092.28a evā hy asi vīrayur evā śūra uta sthiraḥ |
8.092.28c evā te rādhyam manaḥ ||

eva | hi | asi | vīra-yuḥ | eva | śūraḥ | uta | sthiraḥ |
eva | te | rādhyam | manaḥ ||8.092.28||

8.092.29a evā rātis tuvīmagha viśvebhir dhāyi dhātṛbhiḥ |
8.092.29c adhā cid indra me sacā ||

eva | rātiḥ | tuvi-magha | viśvebhiḥ | dhāyi | dhātṛ-bhiḥ |
adha | cit | indra | me | sacā ||8.092.29||

8.092.30a mo ṣu brahmeva tandrayur bhuvo vājānām pate |
8.092.30c matsvā sutasya gomataḥ ||

mo iti | su | brahmā-iva | tandrayuḥ | bhuvaḥ | vājānām | pate |
matsva | sutasya | go-mataḥ ||8.092.30||

8.092.31a mā na indrābhy ādiśaḥ sūro aktuṣv ā yaman |
8.092.31c tvā yujā vanema tat ||

mā | naḥ | indra | abhi | ā-diśaḥ | sūraḥ | aktuṣu | ā | yaman |
tvā | yujā | vanema | tat ||8.092.31||

8.092.32a tvayed indra yujā vayam prati bruvīmahi spṛdhaḥ |
8.092.32c tvam asmākaṁ tava smasi ||

tvayā | it | indra | yujā | vayam | prati | bruvīmahi | spṛdhaḥ |
tvam | asmākam | tava | smasi ||8.092.32||

8.092.33a tvām id dhi tvāyavo 'nunonuvataś carān |
8.092.33c sakhāya indra kāravaḥ ||

tvām | it | hi | tvā-yavaḥ | anu-nonuvataḥ | carān |
sakhāyaḥ | indra | kāravaḥ ||8.092.33||


8.093.01a ud ghed abhi śrutāmaghaṁ vṛṣabhaṁ naryāpasam |
8.093.01c astāram eṣi sūrya ||

ut | gha | it | abhi | śruta-magham | vṛṣabham | narya-apasam |
astāram | eṣi | sūrya ||8.093.01||

8.093.02a nava yo navatim puro bibheda bāhvojasā |
8.093.02c ahiṁ ca vṛtrahāvadhīt ||

nava | yaḥ | navatim | puraḥ | bibheda | bāhu-ojasā |
ahim | ca | vṛtra-hā | avadhīt ||8.093.02||

8.093.03a sa na indraḥ śivaḥ sakhāśvāvad gomad yavamat |
8.093.03c urudhāreva dohate ||

saḥ | naḥ | indraḥ | śivaḥ | sakhā | aśva-vat | go-mat | yava-mat |
urudhārā-iva | dohate ||8.093.03||

8.093.04a yad adya kac ca vṛtrahann udagā abhi sūrya |
8.093.04c sarvaṁ tad indra te vaśe ||

yat | adya | kat | ca | vṛtra-han | ut-agāḥ | abhi | sūrya |
sarvam | tat | indra | te | vaśe ||8.093.04||

8.093.05a yad vā pravṛddha satpate na marā iti manyase |
8.093.05c uto tat satyam it tava ||

yat | vā | pra-vṛddha | sat-pate | na | marai | iti | manyase |
uto iti | tat | satyam | it | tava ||8.093.05||

8.093.06a ye somāsaḥ parāvati ye arvāvati sunvire |
8.093.06c sarvām̐s tām̐ indra gacchasi ||

ye | somāsaḥ | parā-vati | ye | arvā-vati | sunvire |
sarvān | tān | indra | gacchasi ||8.093.06||

8.093.07a tam indraṁ vājayāmasi mahe vṛtrāya hantave |
8.093.07c sa vṛṣā vṛṣabho bhuvat ||

tam | indram | vājayāmasi | mahe | vṛtrāya | hantave |
saḥ | vṛṣā | vṛṣabhaḥ | bhuvat ||8.093.07||

8.093.08a indraḥ sa dāmane kṛta ojiṣṭhaḥ sa made hitaḥ |
8.093.08c dyumnī ślokī sa somyaḥ ||

indraḥ | saḥ | dāmane | kṛtaḥ | ojiṣṭhaḥ | saḥ | made | hitaḥ |
dyumnī | ślokī | saḥ | somyaḥ ||8.093.08||

8.093.09a girā vajro na sambhṛtaḥ sabalo anapacyutaḥ |
8.093.09c vavakṣa ṛṣvo astṛtaḥ ||

girā | vajraḥ | na | sam-bhṛtaḥ | sa-balaḥ | anapa-cyutaḥ |
vavakṣe | ṛṣvaḥ | astṛtaḥ ||8.093.09||

8.093.10a durge cin naḥ sugaṁ kṛdhi gṛṇāna indra girvaṇaḥ |
8.093.10c tvaṁ ca maghavan vaśaḥ ||

duḥ-ge | cit | naḥ | su-gam | kṛdhi | gṛṇānaḥ | indra | girvaṇaḥ |
tvam | ca | magha-van | vaśaḥ ||8.093.10||

8.093.11a yasya te nū cid ādiśaṁ na minanti svarājyam |
8.093.11c na devo nādhrigur janaḥ ||

yasya | te | nu | cit | ā-diśam | na | minanti | sva-rājyam |
na | devaḥ | na | adhri-guḥ | janaḥ ||8.093.11||

8.093.12a adhā te apratiṣkutaṁ devī śuṣmaṁ saparyataḥ |
8.093.12c ubhe suśipra rodasī ||

adha | te | aprati-skutam | devī iti | śuṣmam | saparyataḥ |
ubhe iti | su-śipra | rodasī iti ||8.093.12||

8.093.13a tvam etad adhārayaḥ kṛṣṇāsu rohiṇīṣu ca |
8.093.13c paruṣṇīṣu ruśat payaḥ ||

tvam | etat | adhārayaḥ | kṛṣṇāsu | rohiṇīṣu | ca |
paruṣṇīṣu | ruśat | payaḥ ||8.093.13||

8.093.14a vi yad aher adha tviṣo viśve devāso akramuḥ |
8.093.14c vidan mṛgasya tām̐ amaḥ ||

vi | yat | ahe | adha | tviṣaḥ | viśve | devāsaḥ | akramuḥ |
vidat | mṛgasya | tān | amaḥ ||8.093.14||

8.093.15a ād u me nivaro bhuvad vṛtrahādiṣṭa pauṁsyam |
8.093.15c ajātaśatrur astṛtaḥ ||

āt | ūm̐ iti | me | ni-varaḥ | bhuvat | vṛtra-hā | adiṣṭa | pauṁsyam |
ajāta-śatruḥ | astṛtaḥ ||8.093.15||

8.093.16a śrutaṁ vo vṛtrahantamam pra śardhaṁ carṣaṇīnām |
8.093.16c ā śuṣe rādhase mahe ||

śrutam | vaḥ | vṛtrahan-tamam | pra | śardham | carṣaṇīnām |
ā | śuṣe | rādhase | mahe ||8.093.16||

8.093.17a ayā dhiyā ca gavyayā puruṇāman puruṣṭuta |
8.093.17c yat some-soma ābhavaḥ ||

ayā | dhiyā | ca | gavya-yā | puru-nāman | puru-stuta |
yat | some-some | ā | abhavaḥ ||8.093.17||

8.093.18a bodhinmanā id astu no vṛtrahā bhūryāsutiḥ |
8.093.18c śṛṇotu śakra āśiṣam ||

bodhit-manāḥ | it | astu | naḥ | vṛtra-hā | bhūri-āsutiḥ |
śṛṇotu | śukraḥ | ā-śiṣam ||8.093.18||

8.093.19a kayā tvaṁ na ūtyābhi pra mandase vṛṣan |
8.093.19c kayā stotṛbhya ā bhara ||

kayā | tvam | naḥ | ūtyā | abhi | pra | mandase | vṛṣan |
kayā | stotṛ-bhyaḥ | ā | bhara ||8.093.19||

8.093.20a kasya vṛṣā sute sacā niyutvān vṛṣabho raṇat |
8.093.20c vṛtrahā somapītaye ||

kasya | vṛṣā | sute | sacā | niyutvān | vṛṣabhaḥ | raṇat |
vṛtra-hā | soma-pītaye ||8.093.20||

8.093.21a abhī ṣu ṇas tvaṁ rayim mandasānaḥ sahasriṇam |
8.093.21c prayantā bodhi dāśuṣe ||

abhi | su | naḥ | tvam | rayim | mandasānaḥ | sahasriṇam |
pra-yantā | bodhi | dāśuṣe ||8.093.21||

8.093.22a patnīvantaḥ sutā ima uśanto yanti vītaye |
8.093.22c apāṁ jagmir nicumpuṇaḥ ||

patnī-vantaḥ | sutāḥ | ime | uśantaḥ | yanti | vītaye |
apām | jagmiḥ | ni-cumpuṇaḥ ||8.093.22||

8.093.23a iṣṭā hotrā asṛkṣatendraṁ vṛdhāso adhvare |
8.093.23c acchāvabhṛtham ojasā ||

iṣṭāḥ | hotrāḥ | asṛkṣata | indram | vṛdhāsaḥ | adhvare |
accha | ava-bhṛtham | ojasā ||8.093.23||

8.093.24a iha tyā sadhamādyā harī hiraṇyakeśyā |
8.093.24c voḻhām abhi prayo hitam ||

iha | tyā | sadha-mādyā | harī iti | hiraṇya-keśyā |
voḻhām | abhi | prayaḥ | hitam ||8.093.24||

8.093.25a tubhyaṁ somāḥ sutā ime stīrṇam barhir vibhāvaso |
8.093.25c stotṛbhya indram ā vaha ||

tubhyam | somāḥ | sutāḥ | ime | stīrṇam | barhiḥ | vibhāvaso iti vibhā-vaso |
stotṛ-bhyaḥ | indram | ā | vaha ||8.093.25||

8.093.26a ā te dakṣaṁ vi rocanā dadhad ratnā vi dāśuṣe |
8.093.26c stotṛbhya indram arcata ||

ā | te | dakṣam | vi | rocanā | dadhat | ratnā | vi | dāśuṣe |
stotṛ-bhyaḥ | indram | arcata ||8.093.26||

8.093.27a ā te dadhāmīndriyam ukthā viśvā śatakrato |
8.093.27c stotṛbhya indra mṛḻaya ||

ā | te | dadhāmi | indriyam | ukthā | viśvā | śatakrato iti śata-krato |
stotṛ-bhyaḥ | indra | mṛḻaya ||8.093.27||

8.093.28a bhadram-bhadraṁ na ā bhareṣam ūrjaṁ śatakrato |
8.093.28c yad indra mṛḻayāsi naḥ ||

bhadram-bhadram | naḥ | ā | bhara | iṣam | ūrjam | śatakrato iti śata-krato |
yat | indra | mṛḻayāsi | naḥ ||8.093.28||

8.093.29a sa no viśvāny ā bhara suvitāni śatakrato |
8.093.29c yad indra mṛḻayāsi naḥ ||

saḥ | naḥ | viśvāni | ā | bhara | suvitāni | śatakrato iti śata-krato |
yat | indra | mṛḻayāsi | naḥ ||8.093.29||

8.093.30a tvām id vṛtrahantama sutāvanto havāmahe |
8.093.30c yad indra mṛḻayāsi naḥ ||

tvām | it | vṛtrahan-tama | suta-vantaḥ | havāmahe |
yat | indra | mṛḻayāsi | naḥ ||8.093.30||

8.093.31a upa no haribhiḥ sutaṁ yāhi madānām pate |
8.093.31c upa no haribhiḥ sutam ||

upa | naḥ | hari-bhiḥ | sutam | yāhi | madānām | pate |
upa | naḥ | hari-bhiḥ | sutam ||8.093.31||

8.093.32a dvitā yo vṛtrahantamo vida indraḥ śatakratuḥ |
8.093.32c upa no haribhiḥ sutam ||

dvitā | yaḥ | vṛtrahan-tamaḥ | vide | indraḥ | śata-kratuḥ |
upa | naḥ | hari-bhiḥ | sutam ||8.093.32||

8.093.33a tvaṁ hi vṛtrahann eṣām pātā somānām asi |
8.093.33c upa no haribhiḥ sutam ||

tvam | hi | vṛtra-han | eṣām | pātā | somānām | asi |
upa | naḥ | hari-bhiḥ | sutam ||8.093.33||

8.093.34a indra iṣe dadātu na ṛbhukṣaṇam ṛbhuṁ rayim |
8.093.34c vājī dadātu vājinam ||

indraḥ | iṣe | dadātu | naḥ | ṛbhukṣaṇam | ṛbhum | rayim |
vājī | dadātu | vājinam ||8.093.34||


8.094.01a gaur dhayati marutāṁ śravasyur mātā maghonām |
8.094.01c yuktā vahnī rathānām ||

gauḥ | dhayati | marutām | śravasyuḥ | matā | maghonām |
yuktā | vahniḥ | rathānām ||8.094.01||

8.094.02a yasyā devā upasthe vratā viśve dhārayante |
8.094.02c sūryāmāsā dṛśe kam ||

yasyāḥ | devāḥ | upa-sthe | vratā | viśve | dhārayante |
sūryāmāsā | dṛśe | kam ||8.094.02||

8.094.03a tat su no viśve arya ā sadā gṛṇanti kāravaḥ |
8.094.03c marutaḥ somapītaye ||

tat | su | naḥ | viśve | aryaḥ | ā | sadā | gṛṇanti | kāravaḥ |
marutaḥ | soma-pītaye ||8.094.03||

8.094.04a asti somo ayaṁ sutaḥ pibanty asya marutaḥ |
8.094.04c uta svarājo aśvinā ||

asti | somaḥ | ayam | sutaḥ | pibanti | asya | marutaḥ |
uta | sva-rājaḥ | aśvinā ||8.094.04||

8.094.05a pibanti mitro aryamā tanā pūtasya varuṇaḥ |
8.094.05c triṣadhasthasya jāvataḥ ||

pibanti | mitraḥ | aryamā | tanā | pūtasya | varuṇaḥ |
tri-sadhasthasya | jāvataḥ ||8.094.05||

8.094.06a uto nv asya joṣam ām̐ indraḥ sutasya gomataḥ |
8.094.06c prātar hoteva matsati ||

uto iti | nu | asya | joṣam | ā | indraḥ | sutasya | go-mataḥ |
prātaḥ | hotā-iva | matsati ||8.094.06||

8.094.07a kad atviṣanta sūrayas tira āpa iva sridhaḥ |
8.094.07c arṣanti pūtadakṣasaḥ ||

kat | atviṣanta | sūrayaḥ | tiraḥ | āpaḥ-iva | sridhaḥ |
arṣanti | pūta-dakṣasaḥ ||8.094.07||

8.094.08a kad vo adya mahānāṁ devānām avo vṛṇe |
8.094.08c tmanā ca dasmavarcasām ||

kat | vaḥ | adya | mahānām | devānām | avaḥ | vṛṇe |
tmanā | ca | dasma-varcasām ||8.094.08||

8.094.09a ā ye viśvā pārthivāni paprathan rocanā divaḥ |
8.094.09c marutaḥ somapītaye ||

ā | ye | viśvā | pārthivāni | paprathan | rocanā | divaḥ |
marutaḥ | soma-pītaye ||8.094.09||

8.094.10a tyān nu pūtadakṣaso divo vo maruto huve |
8.094.10c asya somasya pītaye ||

tyān | nu | pūta-dakṣasaḥ | divaḥ | vaḥ | marutaḥ | huve |
asya | somasya | pītaye ||8.094.10||

8.094.11a tyān nu ye vi rodasī tastabhur maruto huve |
8.094.11c asya somasya pītaye ||

tyān | nu | ye | vi | rodasī iti | tastabhuḥ | marutaḥ | huve |
asya | somasya | pītaye ||8.094.11||

8.094.12a tyaṁ nu mārutaṁ gaṇaṁ giriṣṭhāṁ vṛṣaṇaṁ huve |
8.094.12c asya somasya pītaye ||

tyam | nu | mārutam | gaṇam | giri-sthām | vṛṣaṇam | huve |
asya | somasya | pītaye ||8.094.12||


8.095.01a ā tvā giro rathīr ivāsthuḥ suteṣu girvaṇaḥ |
8.095.01c abhi tvā sam anūṣatendra vatsaṁ na mātaraḥ ||

ā | tvā | giraḥ | rathīḥ-iva | asthuḥ | suteṣu | girvaṇaḥ |
abhi | tvā | sam | anūṣata | indra | vatsam | na | mātaraḥ ||8.095.01||

8.095.02a ā tvā śukrā acucyavuḥ sutāsa indra girvaṇaḥ |
8.095.02c pibā tv asyāndhasa indra viśvāsu te hitam ||

ā | tvā | śukrāḥ | acucyavuḥ | sutāsaḥ | indra | girvaṇaḥ |
piba | tu | asya | andhasaḥ | indra | viśvāsu | te | hitam ||8.095.02||

8.095.03a pibā somam madāya kam indra śyenābhṛtaṁ sutam |
8.095.03c tvaṁ hi śaśvatīnām patī rājā viśām asi ||

piba | somam | madāya | kam | indra | śyena-ābhṛtam | sutam |
tvam | hi | śaśvatīnām | patiḥ | rājā | viśām | asi ||8.095.03||

8.095.04a śrudhī havaṁ tiraścyā indra yas tvā saparyati |
8.095.04c suvīryasya gomato rāyas pūrdhi mahām̐ asi ||

śrudhi | havam | tiraścyāḥ | indra | yaḥ | tvā | saparyati |
su-vīryasya | go-mataḥ | rāyaḥ | pūrdhi | mahān | asi ||8.095.04||

8.095.05a indra yas te navīyasīṁ giram mandrām ajījanat |
8.095.05c cikitvinmanasaṁ dhiyam pratnām ṛtasya pipyuṣīm ||

indra | yaḥ | te | navīyasīm | giram | mandrām | ajījanat |
cikitvit-manasam | dhiyam | pratnām | ṛtasya | pipyuṣīm ||8.095.05||

8.095.06a tam u ṣṭavāma yaṁ gira indram ukthāni vāvṛdhuḥ |
8.095.06c purūṇy asya pauṁsyā siṣāsanto vanāmahe ||

tam | ūm̐ iti | stavāma | yam | giraḥ | indram | ukthāni | vavṛdhuḥ |
purūṇi | asya | pauṁsyā | sisāsantaḥ | vanāmahe ||8.095.06||

8.095.07a eto nv indraṁ stavāma śuddhaṁ śuddhena sāmnā |
8.095.07c śuddhair ukthair vāvṛdhvāṁsaṁ śuddha āśīrvān mamattu ||

eto iti | nu | indram | stavāma | śuddham | śuddhena | sāmnā |
śuddhaiḥ | ukthaiḥ | vavṛdhvāṁsam | śuddhaḥ | āśīḥ-vān | mamattu ||8.095.07||

8.095.08a indra śuddho na ā gahi śuddhaḥ śuddhābhir ūtibhiḥ |
8.095.08c śuddho rayiṁ ni dhāraya śuddho mamaddhi somyaḥ ||

indra | śuddhaḥ | naḥ | ā | gahi | śuddhaḥ | śuddhābhiḥ | ūti-bhiḥ |
śuddhaḥ | rayim | ni | dhāraya | śuddhaḥ | mamaddhi | somyaḥ ||8.095.08||

8.095.09a indra śuddho hi no rayiṁ śuddho ratnāni dāśuṣe |
8.095.09c śuddho vṛtrāṇi jighnase śuddho vājaṁ siṣāsasi ||

indra | śuddhaḥ | hi | naḥ | rayim | śuddhaḥ | ratnāni | dāśuṣe |
śuddhaḥ | vṛtrāṇi | jighnase | śuddhaḥ | vājam | sisāsasi ||8.095.09||


8.096.01a asmā uṣāsa ātiranta yāmam indrāya naktam ūrmyāḥ suvācaḥ |
8.096.01c asmā āpo mātaraḥ sapta tasthur nṛbhyas tarāya sindhavaḥ supārāḥ ||

asmai | uṣasaḥ | ā | atiranta | yāmam | indrāya | naktam | ūrmyāḥ | su-vācaḥ |
asmai | āpaḥ | mātaraḥ | sapta | tasthuḥ | nṛ-bhyaḥ | tarāya | sindhavaḥ | su-pārāḥ ||8.096.01||

8.096.02a atividdhā vithureṇā cid astrā triḥ sapta sānu saṁhitā girīṇām |
8.096.02c na tad devo na martyas tuturyād yāni pravṛddho vṛṣabhaś cakāra ||

ati-viddhā | vithureṇa | cit | asrā | triḥ | sapta | sānu | sam-hitā | girīṇām |
na | tat | devaḥ | na | martyaḥ | tuturyāt | yāni | pra-vṛddhaḥ | vṛṣabhaḥ | cakāra ||8.096.02||

8.096.03a indrasya vajra āyaso nimiśla indrasya bāhvor bhūyiṣṭham ojaḥ |
8.096.03c śīrṣann indrasya kratavo nireka āsann eṣanta śrutyā upāke ||

indrasya | vajraḥ | āyasaḥ | ni-miślaḥ | indrasya | bāhvoḥ | bhūyiṣṭham | ojaḥ |
śīrṣan | indrasya | kratavaḥ | nireke | āsan | ā | īṣanta | śrutyai | upāke ||8.096.03||

8.096.04a manye tvā yajñiyaṁ yajñiyānām manye tvā cyavanam acyutānām |
8.096.04c manye tvā satvanām indra ketum manye tvā vṛṣabhaṁ carṣaṇīnām ||

manye | tvā | yajñiyam | yajñiyānām | manye | tvā | cyavanam | acyutānām |
manye | tvā | satvanām | indra | ketum | manye | tvā | vṛṣabham | carṣaṇīnām ||8.096.04||

8.096.05a ā yad vajram bāhvor indra dhatse madacyutam ahaye hantavā u |
8.096.05c pra parvatā anavanta pra gāvaḥ pra brahmāṇo abhinakṣanta indram ||

ā | yat | vajram | bāhvoḥ | indra | dhatse | mada-cyutam | ahaye | hantavai | ūm̐ iti |
pra | parvatāḥ | anavanta | pra | gāvaḥ | pra | brahmāṇaḥ | abhi-nakṣantaḥ | indram ||8.096.05||

8.096.06a tam u ṣṭavāma ya imā jajāna viśvā jātāny avarāṇy asmāt |
8.096.06c indreṇa mitraṁ didhiṣema gīrbhir upo namobhir vṛṣabhaṁ viśema ||

tam | ūm̐ iti | stavāma | yaḥ | imā | jajāna | viśvā | jātāni | avarāṇi | asmāt |
indreṇa | mitram | didhiṣema | gīḥ-bhiḥ | upo iti | namaḥ-bhiḥ | vṛṣabham | viśema ||8.096.06||

8.096.07a vṛtrasya tvā śvasathād īṣamāṇā viśve devā ajahur ye sakhāyaḥ |
8.096.07c marudbhir indra sakhyaṁ te astv athemā viśvāḥ pṛtanā jayāsi ||

vṛtrasya | tvā | śvasathāt | īṣamāṇāḥ | viśve | devāḥ | ajahuḥ | ye | sakhāyaḥ |
marut-bhiḥ | indra | sakhyam | te | astu | atha | imāḥ | viśvāḥ | pṛtanāḥ | jayāsi ||8.096.07||

8.096.08a triḥ ṣaṣṭis tvā maruto vāvṛdhānā usrā iva rāśayo yajñiyāsaḥ |
8.096.08c upa tvemaḥ kṛdhi no bhāgadheyaṁ śuṣmaṁ ta enā haviṣā vidhema ||

triḥ | ṣaṣṭiḥ | tvā | marutaḥ | vavṛdhānāḥ | usrāḥ-iva | rāśayaḥ | yajñiyāsaḥ |
upa | tvā | ā | imaḥ | kṛdhi | naḥ | bhāga-dheyam | śuṣmam | te | enā | haviṣā | vidhema ||8.096.08||

8.096.09a tigmam āyudham marutām anīkaṁ kas ta indra prati vajraṁ dadharṣa |
8.096.09c anāyudhāso asurā adevāś cakreṇa tām̐ apa vapa ṛjīṣin ||

tigmam | āyudham | marutām | anīkam | kaḥ | te | indra | prati | vajram | dadharṣa |
anāyudhāsaḥ | asurāḥ | adevāḥ | cakreṇa | tān | apa | vapa | ṛjīṣin ||8.096.09||

8.096.10a maha ugrāya tavase suvṛktim preraya śivatamāya paśvaḥ |
8.096.10c girvāhase gira indrāya pūrvīr dhehi tanve kuvid aṅga vedat ||

mahe | ugrāya | tavase | su-vṛktim | pra | īraya | śiva-tamāya | paśvaḥ |
girvāhase | giraḥ | indrāya | pūrvīḥ | dhehi | tanve | kuvit | aṅga | vedat ||8.096.10||

8.096.11a ukthavāhase vibhve manīṣāṁ druṇā na pāram īrayā nadīnām |
8.096.11c ni spṛśa dhiyā tanvi śrutasya juṣṭatarasya kuvid aṅga vedat ||

uktha-vāhase | vi-bhve | manīṣām | druṇā | na | pāram | īraya | nadīnām |
ni | spṛśa | dhiyā | tanvi | śrutasya | juṣṭa-tarasya | kuvit | aṅga | vedat ||8.096.11||

8.096.12a tad viviḍḍhi yat ta indro jujoṣat stuhi suṣṭutiṁ namasā vivāsa |
8.096.12c upa bhūṣa jaritar mā ruvaṇyaḥ śrāvayā vācaṁ kuvid aṅga vedat ||

tat | viviḍḍhi | yat | te | indraḥ | jujoṣat | stuhi | su-stutim | namasā | ā | vivāsa |
upa | bhūṣa | jaritaḥ | mā | ruvaṇyaḥ | śrāvayā | vācam | kuvit | aṅga | vedat ||8.096.12||

8.096.13a ava drapso aṁśumatīm atiṣṭhad iyānaḥ kṛṣṇo daśabhiḥ sahasraiḥ |
8.096.13c āvat tam indraḥ śacyā dhamantam apa snehitīr nṛmaṇā adhatta ||

ava | drapsaḥ | aṁśu-matīm | atiṣṭhat | iyānaḥ | kṛṣṇaḥ | daśa-bhiḥ | sahasraiḥ |
āvat | tam | indraḥ | śacyā | dhamantam | apa | snehitīḥ | nṛ-manāḥ | adhatta ||8.096.13||

8.096.14a drapsam apaśyaṁ viṣuṇe carantam upahvare nadyo aṁśumatyāḥ |
8.096.14c nabho na kṛṣṇam avatasthivāṁsam iṣyāmi vo vṛṣaṇo yudhyatājau ||

drapsam | apaśyam | viṣuṇe | carantam | upa-hvare | nadyaḥ | aṁśu-matyāḥ |
nabhaḥ | na | kṛṣṇam | avatasthi-vāṁsam | iṣyāmi | vaḥ | vṛṣaṇaḥ | yudhyata | ājau ||8.096.14||

8.096.15a adha drapso aṁśumatyā upasthe 'dhārayat tanvaṁ titviṣāṇaḥ |
8.096.15c viśo adevīr abhy ācarantīr bṛhaspatinā yujendraḥ sasāhe ||

adha | drapsaḥ | aṁśu-matyāḥ | upa-sthe | adhārayat | tanvam | titviṣāṇaḥ |
viśaḥ | adevīḥ | abhi | ā-carantīḥ | bṛhaspatinā | yujā | indraḥ | sasahe ||8.096.15||

8.096.16a tvaṁ ha tyat saptabhyo jāyamāno 'śatrubhyo abhavaḥ śatrur indra |
8.096.16c gūḻhe dyāvāpṛthivī anv avindo vibhumadbhyo bhuvanebhyo raṇaṁ dhāḥ ||

tvam | ha | tyat | sapta-bhyaḥ | jāyamānaḥ | aśatru-bhyaḥ | abhavaḥ | śatruḥ | indra |
gūḻhe | dyāvāpṛthivī iti | anu | avindaḥ | vibhumat-bhyaḥ | bhuvanebhyaḥ | raṇam | dhāḥ ||8.096.16||

8.096.17a tvaṁ ha tyad apratimānam ojo vajreṇa vajrin dhṛṣito jaghantha |
8.096.17c tvaṁ śuṣṇasyāvātiro vadhatrais tvaṁ gā indra śacyed avindaḥ ||

tvam | ha | tyat | aprati-mānam | ojaḥ | vajreṇa | vajrin | dhṛṣitaḥ | jaghantha |
tvam | śuṣṇasya | ava | atiraḥ | vadhatraiḥ | tvam | gāḥ | indra | śacyā | it | avindaḥ ||8.096.17||

8.096.18a tvaṁ ha tyad vṛṣabha carṣaṇīnāṁ ghano vṛtrāṇāṁ taviṣo babhūtha |
8.096.18c tvaṁ sindhūm̐r asṛjas tastabhānān tvam apo ajayo dāsapatnīḥ ||

tvam | ha | tyat | vṛṣabha | carṣaṇīnām | ghanaḥ | vṛtrāṇām | taviṣaḥ | babhūtha |
tvam | sindhūn | asṛjaḥ | tastabhānān | tvam | apaḥ | ajayaḥ | dāsa-patnīḥ ||8.096.18||

8.096.19a sa sukratū raṇitā yaḥ suteṣv anuttamanyur yo aheva revān |
8.096.19c ya eka in nary apāṁsi kartā sa vṛtrahā pratīd anyam āhuḥ ||

saḥ | su-kratuḥ | raṇitā | yaḥ | suteṣu | anutta-manyuḥ | yaḥ | ahā-iva | revān |
yaḥ | ekaḥ | it | nari | apāṁsi | kartā | saḥ | vṛtra-hā | prati | it | anyam | āhuḥ ||8.096.19||

8.096.20a sa vṛtrahendraś carṣaṇīdhṛt taṁ suṣṭutyā havyaṁ huvema |
8.096.20c sa prāvitā maghavā no 'dhivaktā sa vājasya śravasyasya dātā ||

saḥ | vṛtra-hā | indraḥ | carṣaṇi-dhṛt | tam | su-stutyā | havyam | huvema |
saḥ | pra-avitā | magha-vā | naḥ | adhi-vaktā | saḥ | vājasya | śravasyasya | dātā ||8.096.20||

8.096.21a sa vṛtrahendra ṛbhukṣāḥ sadyo jajñāno havyo babhūva |
8.096.21c kṛṇvann apāṁsi naryā purūṇi somo na pīto havyaḥ sakhibhyaḥ ||

saḥ | vṛtra-hā | indraḥ | ṛbhukṣāḥ | sadyaḥ | jajñānaḥ | havyaḥ | babhūva |
kṛṇvan | apāṁsi | naryā | purūṇi | somaḥ | na | pītaḥ | havyaḥ | sakhi-bhyaḥ ||8.096.21||


8.097.01a yā indra bhuja ābharaḥ svarvām̐ asurebhyaḥ |
8.097.01c stotāram in maghavann asya vardhaya ye ca tve vṛktabarhiṣaḥ ||

yāḥ | indra | bhujaḥ | ā | abharaḥ | svaḥ-vān | asurebhyaḥ |
stotāram | it | magha-van | asya | vardhaya | ye | ca | tve iti | vṛkta-barhiṣaḥ ||8.097.01||

8.097.02a yam indra dadhiṣe tvam aśvaṁ gām bhāgam avyayam |
8.097.02c yajamāne sunvati dakṣiṇāvati tasmin taṁ dhehi mā paṇau ||

yam | indra | dadhiṣe | tvam | aśvam | gām | bhāgam | avyayam |
yajamāne | sunvati | dakṣiṇā-vati | tasmin | tam | dhehi | mā | paṇau ||8.097.02||

8.097.03a ya indra sasty avrato 'nuṣvāpam adevayuḥ |
8.097.03c svaiḥ ṣa evair mumurat poṣyaṁ rayiṁ sanutar dhehi taṁ tataḥ ||

yaḥ | indra | sasti | avrataḥ | anu-svāpam | adeva-yuḥ |
svaiḥ | saḥ | evaiḥ | mumurat | poṣyam | rayim | sanutaḥ | dhehi | tam | tataḥ ||8.097.03||

8.097.04a yac chakrāsi parāvati yad arvāvati vṛtrahan |
8.097.04c atas tvā gīrbhir dyugad indra keśibhiḥ sutāvām̐ ā vivāsati ||

yat | śakra | asi | parā-vati | yat | arvā-vati | vṛtra-han |
ataḥ | tvā | gīḥ-bhiḥ | dyu-gat | indra | keśi-bhiḥ | suta-vān | ā | vivāsati ||8.097.04||

8.097.05a yad vāsi rocane divaḥ samudrasyādhi viṣṭapi |
8.097.05c yat pārthive sadane vṛtrahantama yad antarikṣa ā gahi ||

yat | vā | asi | rocane | divaḥ | samudrasya | adhi | viṣṭapi |
yat | pārthive | sadane | vṛtrahan-tama | yat | antarikṣe | ā | gahi ||8.097.05||

8.097.06a sa naḥ someṣu somapāḥ suteṣu śavasas pate |
8.097.06c mādayasva rādhasā sūnṛtāvatendra rāyā parīṇasā ||

saḥ | naḥ | someṣu | soma-pāḥ | suteṣu | śavasaḥ | pate |
mādayasva | rādhasā | sūnṛtā-vatā | indra | rāyā | parīṇasā ||8.097.06||

8.097.07a mā na indra parā vṛṇag bhavā naḥ sadhamādyaḥ |
8.097.07c tvaṁ na ūtī tvam in na āpyam mā na indra parā vṛṇak ||

mā | naḥ | indra | parā | vṛṇak | bhava | naḥ | sadha-mādyaḥ |
tvam | naḥ | ūtī | tvam | it | naḥ | āpyam | mā | naḥ | indra | parā | vṛṇak ||8.097.07||

8.097.08a asme indra sacā sute ni ṣadā pītaye madhu |
8.097.08c kṛdhī jaritre maghavann avo mahad asme indra sacā sute ||

asme iti | indra | sacā | sute | ni | sada | pītaye | madhu |
kṛdhi | jaritre | magha-van | avaḥ | mahat | asme iti | indra | sacā | sute ||8.097.08||

8.097.09a na tvā devāsa āśata na martyāso adrivaḥ |
8.097.09c viśvā jātāni śavasābhibhūr asi na tvā devāsa āśata ||

na | tvā | devāsaḥ | āśata | na | martyāsaḥ | adri-vaḥ |
viśvā | jātāni | śavasā | abhi-bhūḥ | asi | na | tvā | devāsaḥ | āśata ||8.097.09||

8.097.10a viśvāḥ pṛtanā abhibhūtaraṁ naraṁ sajūs tatakṣur indraṁ jajanuś ca rājase |
8.097.10c kratvā variṣṭhaṁ vara āmurim utogram ojiṣṭhaṁ tavasaṁ tarasvinam ||

viśvāḥ | pṛtanāḥ | abhi-bhūtaram | naram | sa-jūḥ | tatakṣuḥ | indram | jajanuḥ | ca | rājase |
kratvā | variṣṭham | vare | ā-murim | uta | ugram | ojiṣṭham | tavasam | tarasvinam ||8.097.10||

8.097.11a sam īṁ rebhāso asvarann indraṁ somasya pītaye |
8.097.11c svarpatiṁ yad īṁ vṛdhe dhṛtavrato hy ojasā sam ūtibhiḥ ||

sam | īm | rebhāsaḥ | asvaran | indram | somasya | pītaye |
svaḥ-patim | yat | īm | vṛdhe | dhṛta-vrataḥ | hi | ojasā | sam | ūti-bhiḥ ||8.097.11||

8.097.12a nemiṁ namanti cakṣasā meṣaṁ viprā abhisvarā |
8.097.12c sudītayo vo adruho 'pi karṇe tarasvinaḥ sam ṛkvabhiḥ ||

nemim | namanti | cakṣasā | meṣam | viprāḥ | abhi-svarā |
su-dītayaḥ | vaḥ | adruhaḥ | api | karṇe | tarasvinaḥ | sam | ṛkva-bhiḥ ||8.097.12||

8.097.13a tam indraṁ johavīmi maghavānam ugraṁ satrā dadhānam apratiṣkutaṁ śavāṁsi |
8.097.13c maṁhiṣṭho gīrbhir ā ca yajñiyo vavartad rāye no viśvā supathā kṛṇotu vajrī ||

tam | indram | johavīmi | magha-vānam | ugram | satrā | dadhānam | aprati-skutam | śavāṁsi |
maṁhiṣṭhaḥ | gīḥ-bhiḥ | ā | ca | yajñiyaḥ | vavartat | rāye | naḥ | viśvā | su-pathā | kṛṇotu | vajrī ||8.097.13||

8.097.14a tvam pura indra cikid enā vy ojasā śaviṣṭha śakra nāśayadhyai |
8.097.14c tvad viśvāni bhuvanāni vajrin dyāvā rejete pṛthivī ca bhīṣā ||

tvam | puraḥ | indra | cikit | enāḥ | vi | ojasā | saviṣṭha | śakra | nāśayadhyai |
tvat | viśvāni | bhuvanāni | vajrin | dyāvā | rejete iti | pṛthivī iti | ca | bhīṣā ||8.097.14||

8.097.15a tan ma ṛtam indra śūra citra pātv apo na vajrin duritāti parṣi bhūri |
8.097.15c kadā na indra rāya ā daśasyer viśvapsnyasya spṛhayāyyasya rājan ||

tat | mā | ṛtam | indra | śūra | citra | pātu | apaḥ | na | vajrin | duḥ-itā | ati | parṣi | bhūri |
kadā | naḥ | indra | rāyaḥ | ā | daśasyeḥ | viśva-psnyasya | spṛhayāyyasya | rājan ||8.097.15||


8.098.01a indrāya sāma gāyata viprāya bṛhate bṛhat |
8.098.01c dharmakṛte vipaścite panasyave ||

indrāya | sāma | gāyata | viprāya | bṛhate | bṛhat |
dharma-kṛte | vipaḥ-cite | panasyave ||8.098.01||

8.098.02a tvam indrābhibhūr asi tvaṁ sūryam arocayaḥ |
8.098.02c viśvakarmā viśvadevo mahām̐ asi ||

tvam | indra | abhi-bhūḥ | asi | tvam | sūryam | arocayaḥ |
viśva-karmā | viśva-devaḥ | mahān | asi ||8.098.02||

8.098.03a vibhrājañ jyotiṣā svar agaccho rocanaṁ divaḥ |
8.098.03c devās ta indra sakhyāya yemire ||

vi-bhrājan | jyotiṣā | svaḥ | agacchaḥ | rocanam | divaḥ |
devāḥ | te | indra | sakhyāya | yemire ||8.098.03||

8.098.04a endra no gadhi priyaḥ satrājid agohyaḥ |
8.098.04c girir na viśvatas pṛthuḥ patir divaḥ ||

ā | indra | naḥ | gadhi | priyaḥ | satrā-jit | agohyaḥ |
giriḥ | na | viśvataḥ | pṛthuḥ | patiḥ | divaḥ ||8.098.04||

8.098.05a abhi hi satya somapā ubhe babhūtha rodasī |
8.098.05c indrāsi sunvato vṛdhaḥ patir divaḥ ||

abhi | hi | satya | soma-pāḥ | ubhe iti | babhūtha | rodasī iti |
indra | asi | sunvataḥ | vṛdhaḥ | patiḥ | divaḥ ||8.098.05||

8.098.06a tvaṁ hi śaśvatīnām indra dartā purām asi |
8.098.06c hantā dasyor manor vṛdhaḥ patir divaḥ ||

tvam | hi | śaśvatīnām | indra | dartā | purām | asi |
hantā | dasyoḥ | manoḥ | vṛdhaḥ | patiḥ | divaḥ ||8.098.06||

8.098.07a adhā hīndra girvaṇa upa tvā kāmān mahaḥ sasṛjmahe |
8.098.07c udeva yanta udabhiḥ ||

adha | hi | indra | girvaṇaḥ | upa | tvā | kāmān | mahaḥ | sasṛjmahe |
udā-iva | yantaḥ | uda-bhiḥ ||8.098.07||

8.098.08a vār ṇa tvā yavyābhir vardhanti śūra brahmāṇi |
8.098.08c vāvṛdhvāṁsaṁ cid adrivo dive-dive ||

vāḥ | na | tvā | yavyābhiḥ | vardhanti | śūra | brahmāṇi |
vavṛdhvāṁsam | cit | adri-vaḥ | dive-dive ||8.098.08||

8.098.09a yuñjanti harī iṣirasya gāthayorau ratha uruyuge |
8.098.09c indravāhā vacoyujā ||

yuñjanti | harī iti | iṣirasya | gāthayā | urau | rathe | uru-yuge |
indra-vāhā | vacaḥ-yujā ||8.098.09||

8.098.10a tvaṁ na indrā bharam̐ ojo nṛmṇaṁ śatakrato vicarṣaṇe |
8.098.10c ā vīram pṛtanāṣaham ||

tvam | naḥ | indra | ā | bhara | ojaḥ | nṛmṇam | śatakrato iti śata-krato | vi-carṣaṇe |
ā | vīram | pṛtanā-saham ||8.098.10||

8.098.11a tvaṁ hi naḥ pitā vaso tvam mātā śatakrato babhūvitha |
8.098.11c adhā te sumnam īmahe ||

tvam | hi | naḥ | pitā | vaso iti | tvam | matā | śatakrato iti śata-krato | babhūvitha |
adha | te | sumnam | īmahe ||8.098.11||

8.098.12a tvāṁ śuṣmin puruhūta vājayantam upa bruve śatakrato |
8.098.12c sa no rāsva suvīryam ||

tvām | śuṣmin | puru-hūta | vājayantam | upa | bruve | śatakrato iti śata-krato |
saḥ | naḥ | rāsva | su-vīryam ||8.098.12||


8.099.01a tvām idā hyo naro 'pīpyan vajrin bhūrṇayaḥ |
8.099.01c sa indra stomavāhasām iha śrudhy upa svasaram ā gahi ||

tvām | idā | hyaḥ | naraḥ | apīpyan | vajrin | bhūrṇayaḥ |
saḥ | indra | stoma-vāhasām | iha | śrudhi | upa | svasaram | ā | gahi ||8.099.01||

8.099.02a matsvā suśipra harivas tad īmahe tve ā bhūṣanti vedhasaḥ |
8.099.02c tava śravāṁsy upamāny ukthyā suteṣv indra girvaṇaḥ ||

matsva | su-śipra | hari-vaḥ | tat | īmahe | tve iti | ā | bhūṣanti | vedhasaḥ |
tava | śravāṁsi | upa-māni | ukthyā | suteṣu | indra | girvaṇaḥ ||8.099.02||

8.099.03a śrāyanta iva sūryaṁ viśved indrasya bhakṣata |
8.099.03c vasūni jāte janamāna ojasā prati bhāgaṁ na dīdhima ||

śrāyantaḥ-iva | sūryam | viśvā | it | indrasya | bhakṣata |
vasūni | jāte | janamāne | ojasā | prati | bhāgam | na | dīdhima ||8.099.03||

8.099.04a anarśarātiṁ vasudām upa stuhi bhadrā indrasya rātayaḥ |
8.099.04c so asya kāmaṁ vidhato na roṣati mano dānāya codayan ||

anarśa-rātim | vasu-dām | upa | stuhi | bhadrāḥ | indrasya | rātayaḥ |
saḥ | asya | kāmam | vidhataḥ | na | roṣati | manaḥ | dānāya | codayan ||8.099.04||

8.099.05a tvam indra pratūrtiṣv abhi viśvā asi spṛdhaḥ |
8.099.05c aśastihā janitā viśvatūr asi tvaṁ tūrya taruṣyataḥ ||

tvam | indra | pra-tūrtiṣu | abhi | viśvāḥ | asi | spṛdhaḥ |
aśasti-hā | janitā | viśva-tūḥ | asi | tvam | tūrya | taruṣyataḥ ||8.099.05||

8.099.06a anu te śuṣmaṁ turayantam īyatuḥ kṣoṇī śiśuṁ na mātarā |
8.099.06c viśvās te spṛdhaḥ śnathayanta manyave vṛtraṁ yad indra tūrvasi ||

anu | te | śuṣmam | turayantam | īyatuḥ | kṣoṇī iti | śiśum | na | mātarā |
viśvāḥ | te | spṛdhaḥ | śnathayanta | manyave | vṛtram | yat | indra | tūrvasi ||8.099.06||

8.099.07a ita ūtī vo ajaram prahetāram aprahitam |
8.099.07c āśuṁ jetāraṁ hetāraṁ rathītamam atūrtaṁ tugryāvṛdham ||

itaḥ | ūtī | vaḥ | ajaram | pra-hetāram | apra-hitam |
āśum | jetāram | hetāram | rathi-tamam | atūrtam | tugrya-vṛdham ||8.099.07||

8.099.08a iṣkartāram aniṣkṛtaṁ sahaskṛtaṁ śatamūtiṁ śatakratum |
8.099.08c samānam indram avase havāmahe vasavānaṁ vasūjuvam ||

iṣkartāram | aniḥ-kṛtam | sahaḥ-kṛtam | śatam-ūtim | śata-kratum |
samānam | indram | avase | havāmahe | vasavānam | vasu-juvam ||8.099.08||


8.100.01a ayaṁ ta emi tanvā purastād viśve devā abhi mā yanti paścāt |
8.100.01c yadā mahyaṁ dīdharo bhāgam indrād in mayā kṛṇavo vīryāṇi ||

ayam | te | emi | tanvā | purastāt | viśve | devāḥ | abhi | mā | yanti | paścāt |
yadā | mahyam | dīdharaḥ | bhāgam | indra | āt | it | mayā | kṛṇavaḥ | vīryāṇi ||8.100.01||

8.100.02a dadhāmi te madhuno bhakṣam agre hitas te bhāgaḥ suto astu somaḥ |
8.100.02c asaś ca tvaṁ dakṣiṇataḥ sakhā me 'dhā vṛtrāṇi jaṅghanāva bhūri ||

dadhāmi | te | madhunaḥ | bhakṣam | agre | hitaḥ | te | bhāgaḥ | sutaḥ | astu | somaḥ |
asaḥ | ca | tvam | dakṣiṇataḥ | sakhā | me | adha | vṛtrāṇi | jaṅghanāva | bhūri ||8.100.02||

8.100.03a pra su stomam bharata vājayanta indrāya satyaṁ yadi satyam asti |
8.100.03c nendro astīti nema u tva āha ka īṁ dadarśa kam abhi ṣṭavāma ||

pra | su | stomam | bharata | vāja-yantaḥ | indrāya | satyam | yadi | satyam | asti |
na | indraḥ | asti | iti | nemaḥ | ūm̐ iti | tvaḥ | āha | kaḥ | īm | dadarśa | kam | abhi | stavāma ||8.100.03||

8.100.04a ayam asmi jaritaḥ paśya meha viśvā jātāny abhy asmi mahnā |
8.100.04c ṛtasya mā pradiśo vardhayanty ādardiro bhuvanā dardarīmi ||

ayam | asti | jaritariti | paśya | mā | iha | viśvā | jātāni | abhi | asmi | mahnā |
ṛtasya | mā | pra-diśaḥ | vardhayanti | ā-dardiraḥ | bhuvanā | dardarīmi ||8.100.04||

8.100.05a ā yan mā venā aruhann ṛtasyam̐ ekam āsīnaṁ haryatasya pṛṣṭhe |
8.100.05c manaś cin me hṛda ā praty avocad acikradañ chiśumantaḥ sakhāyaḥ ||

ā | yat | mā | venāḥ | aruhan | ṛtasya | ekam | āsīnam | haryatasya | pṛṣṭhe |
manaḥ | cit | me | hṛde | ā | prati | avocat | acikradan | śiśu-mantaḥ | sakhāyaḥ ||8.100.05||

8.100.06a viśvet tā te savaneṣu pravācyā yā cakartha maghavann indra sunvate |
8.100.06c pārāvataṁ yat purusambhṛtaṁ vasv apāvṛṇoḥ śarabhāya ṛṣibandhave ||

viśvā | it | tā | te | savaneṣu | pra-vācyā | yā | cakartha | magha-van | indra | sunvate |
pārāvatam | yat | puru-sambhṛtam | vasu | apa-avṛṇoḥ | śarabhāyaḥ | ṛṣi-bandhave ||8.100.06||

8.100.07a pra nūnaṁ dhāvatā pṛthaṅ neha yo vo avāvarīt |
8.100.07c ni ṣīṁ vṛtrasya marmaṇi vajram indro apīpatat ||

pra | nūnam | dhāvata | pṛthak | na | iha | yaḥ | vaḥ | avāvarīt |
ni | sīm | vṛtrasya | marmaṇi | vajram | indraḥ | apīpatat ||8.100.07||

8.100.08a manojavā ayamāna āyasīm atarat puram |
8.100.08c divaṁ suparṇo gatvāya somaṁ vajriṇa ābharat ||

manaḥ-javāḥ | ayamānaḥ | āyasīm | atarat | puram |
divam | su-parṇaḥ | gatvāya | somam | vajriṇe | ā | abharat ||8.100.08||

8.100.09a samudre antaḥ śayata udnā vajro abhīvṛtaḥ |
8.100.09c bharanty asmai saṁyataḥ puraḥprasravaṇā balim ||

samudre | antariti | śayate | udnā | vajraḥ | abhi-vṛtaḥ |
bharanti | asmai | sam-yataḥ | puraḥ-prasravaṇāḥ | balim ||8.100.09||

8.100.10a yad vāg vadanty avicetanāni rāṣṭrī devānāṁ niṣasāda mandrā |
8.100.10c catasra ūrjaṁ duduhe payāṁsi kva svid asyāḥ paramaṁ jagāma ||

yat | vāk | vadantī | avi-cetanāni | rāṣṭrī | devānām | ni-sasāda | mandrā |
catasraḥ | ūrjam | duduhe | payāṁsi | kva | svit | asyāḥ | paramam | jagāma ||8.100.10||

8.100.11a devīṁ vācam ajanayanta devās tāṁ viśvarūpāḥ paśavo vadanti |
8.100.11c sā no mandreṣam ūrjaṁ duhānā dhenur vāg asmān upa suṣṭutaitu ||

devīm | vācam | ajanayanta | devāḥ | tām | viśva-rūpāḥ | paśavaḥ | vadanti |
sā | naḥ | mandrā | iṣam | ūrjam | duhānā | dhenuḥ | vāk | asmān | upa | su-stutā | ā | etu ||8.100.11||

8.100.12a sakhe viṣṇo vitaraṁ vi kramasva dyaur dehi lokaṁ vajrāya viṣkabhe |
8.100.12c hanāva vṛtraṁ riṇacāva sindhūn indrasya yantu prasave visṛṣṭāḥ ||

sakhe | viṣṇo iti | vi-taram | vi | kramasva | dyauḥ | dehi | lokam | vajrāya | vi-skabhe |
hanāva | vṛtram | riṇacāva | sindhūn | indrasya | yantu | pra-save | vi-sṛṣṭāḥ ||8.100.12||


8.101.01a ṛdhag itthā sa martyaḥ śaśame devatātaye |
8.101.01c yo nūnam mitrāvaruṇāv abhiṣṭaya ācakre havyadātaye ||

ṛdhak | itthā | saḥ | martyaḥ | śaśame | deva-tātaye |
yaḥ | nūnam | mitrāvaruṇau | abhiṣṭaye | ā-cakre | havya-dātaye ||8.101.01||

8.101.02a varṣiṣṭhakṣatrā urucakṣasā narā rājānā dīrghaśruttamā |
8.101.02c tā bāhutā na daṁsanā ratharyataḥ sākaṁ sūryasya raśmibhiḥ ||

varṣiṣṭha-kṣatrau | uru-cakṣasā | narā | rājānā | dīrghaśrut-tamā |
tā | bāhutā | na | daṁsanā | ratharyataḥ | sākam | sūryasya | raśmi-bhiḥ ||8.101.02||

8.101.03a pra yo vām mitrāvaruṇājiro dūto adravat |
8.101.03c ayaḥśīrṣā maderaghuḥ ||

pra | yaḥ | vām | mitrāvaruṇā | ajiraḥ | dūtaḥ | adravat |
ayaḥ-śīrṣā | made-raghuḥ ||8.101.03||

8.101.04a na yaḥ sampṛcche na punar havītave na saṁvādāya ramate |
8.101.04c tasmān no adya samṛter uruṣyatam bāhubhyāṁ na uruṣyatam ||

na | yaḥ | sam-pṛcche | na | punaḥ | havītave | na | sam-vādāya | ramate |
tasmāt | naḥ | adya | sam-ṛteḥ | uruṣyatam | bāhu-bhyām | naḥ | uruṣyatam ||8.101.04||

8.101.05a pra mitrāya prāryamṇe sacathyam ṛtāvaso |
8.101.05c varūthyaṁ varuṇe chandyaṁ vacaḥ stotraṁ rājasu gāyata ||

pra | mitrāya | pra | aryamṇe | sacathyam | ṛtavaso ityṛta-vaso |
varūthyam | varuṇe | chandyam | vacaḥ | stotram | rāja-su | gāyata ||8.101.05||

8.101.06a te hinvire aruṇaṁ jenyaṁ vasv ekam putraṁ tisṝṇām |
8.101.06c te dhāmāny amṛtā martyānām adabdhā abhi cakṣate ||

te | hinvire | aruṇam | jenyam | vasu | ekam | putram | tisṝṇām |
te | dhāmāni | amṛtāḥ | martyānām | adabdhāḥ | abhi | cakṣate ||8.101.06||

8.101.07a ā me vacāṁsy udyatā dyumattamāni kartvā |
8.101.07c ubhā yātaṁ nāsatyā sajoṣasā prati havyāni vītaye ||

ā | me | vacāṁsi | ut-yatā | dyumat-tamāni | kartvā |
ubhā | yātam | nāsatyā | sa-joṣasā | prati | havyāni | vītaye ||8.101.07||

8.101.08a rātiṁ yad vām arakṣasaṁ havāmahe yuvābhyāṁ vājinīvasū |
8.101.08c prācīṁ hotrām pratirantāv itaṁ narā gṛṇānā jamadagninā ||

rātim | yat | vām | arakṣasam | havāmahe | yuvābhyām | vājinīvasū iti vājinī-vasū |
prācīm | hotrām | pra-tirantau | itam | narā | gṛṇānā | jamat-agninā ||8.101.08||

8.101.09a ā no yajñaṁ divispṛśaṁ vāyo yāhi sumanmabhiḥ |
8.101.09c antaḥ pavitra upari śrīṇāno 'yaṁ śukro ayāmi te ||

ā | naḥ | yajñam | divi-spṛśam | vāyo iti | yāhi | sumanma-bhiḥ |
antariti | pavitre | upari | śrīṇānaḥ | ayam | śukraḥ | ayāmi | te ||8.101.09||

8.101.10a vety adhvaryuḥ pathibhī rajiṣṭhaiḥ prati havyāni vītaye |
8.101.10c adhā niyutva ubhayasya naḥ piba śuciṁ somaṁ gavāśiram ||

veti | adhvaryuḥ | pathi-bhiḥ | rajiṣṭhaiḥ | prati | havyāni | vītaye |
adha | niyutvaḥ | ubhyasya | naḥ | piba | śucim | somam | go-āśiram ||8.101.10||

8.101.11a baṇ mahām̐ asi sūrya baḻ āditya mahām̐ asi |
8.101.11c mahas te sato mahimā panasyate 'ddhā deva mahām̐ asi ||

baṭ | mahān | asi | sūrya | baṭ | āditya | mahān | asi |
mahaḥ | te | sataḥ | mahimā | panasyate | addhā | deva | mahān | asi ||8.101.11||

8.101.12a baṭ sūrya śravasā mahām̐ asi satrā deva mahām̐ asi |
8.101.12c mahnā devānām asuryaḥ purohito vibhu jyotir adābhyam ||

baṭ | sūrya | śravasā | mahān | asi | satrā | deva | mahān | asi |
mahnā | devānām | asuryaḥ | puraḥ-hitaḥ | vi-bhu | jyotiḥ | adābhyam ||8.101.12||

8.101.13a iyaṁ yā nīcy arkiṇī rūpā rohiṇyā kṛtā |
8.101.13c citreva praty adarśy āyaty antar daśasu bāhuṣu ||

iyam | yā | nīcī | arkiṇī | rūpā | rohiṇyā | kṛtā |
citrā-iva | prati | adarśi | ā-yatī | antaḥ | daśa-su | bāhuṣu ||8.101.13||

8.101.14a prajā ha tisro atyāyam īyur ny anyā arkam abhito viviśre |
8.101.14c bṛhad dha tasthau bhuvaneṣv antaḥ pavamāno harita ā viveśa ||

pra-jāḥ | ha | tisraḥ | ati-āyam | īyuḥ | ni | anyāḥ | arkam | abhitaḥ | viviśre |
bṛhat | ha | tasthau | bhuvaneṣu | antariti | pavamānaḥ | haritaḥ | ā | viveśa ||8.101.14||

8.101.15a mātā rudrāṇāṁ duhitā vasūnāṁ svasādityānām amṛtasya nābhiḥ |
8.101.15c pra nu vocaṁ cikituṣe janāya mā gām anāgām aditiṁ vadhiṣṭa ||

mātā | rudrāṇām | duhitā | vasūnām | svasā | ādityānām | amṛtasya | nābhiḥ |
pra | nu | vocam | cikituṣe | janāya | mā | gām | anāgām | aditim | vadhiṣṭa ||8.101.15||

8.101.16a vacovidaṁ vācam udīrayantīṁ viśvābhir dhībhir upatiṣṭhamānām |
8.101.16c devīṁ devebhyaḥ pary eyuṣīṁ gām ā māvṛkta martyo dabhracetāḥ ||

vacaḥ-vidam | vācam | ut-īrayantīm | viśvābhiḥ | dhībhiḥ | upa-tiṣṭhamānām |
devīm | devebhyaḥ | pari | ā-īyuṣīm | gām | ā | mā | avṛkta | martyaḥ | dabhra-cetāḥ ||8.101.16||


8.102.01a tvam agne bṛhad vayo dadhāsi deva dāśuṣe |
8.102.01c kavir gṛhapatir yuvā ||

tvam | agne | bṛhat | vayaḥ | dadhāsi | deva | dāśuṣe |
kaviḥ | gṛha-patiḥ | yuvā ||8.102.01||

8.102.02a sa na īḻānayā saha devām̐ agne duvasyuvā |
8.102.02c cikid vibhānav ā vaha ||

saḥ | naḥ | īḻānayā | saha | devān | agne | duvasyuvā |
cikit | vibhāno iti vi-bhāno | ā | vaha ||8.102.02||

8.102.03a tvayā ha svid yujā vayaṁ codiṣṭhena yaviṣṭhya |
8.102.03c abhi ṣmo vājasātaye ||

tvayā | ha | svit | yujā | vayam | codiṣṭhena | yaviṣṭhya |
abhi | smaḥ | vāja-sātaye ||8.102.03||

8.102.04a aurvabhṛguvac chucim apnavānavad ā huve |
8.102.04c agniṁ samudravāsasam ||

aurvabhṛgu-vat | śucim | apnavāna-vat | ā | huve |
agnim | samudra-vāsasam ||8.102.04||

8.102.05a huve vātasvanaṁ kavim parjanyakrandyaṁ sahaḥ |
8.102.05c agniṁ samudravāsasam ||

huve | vāta-svanam | kavim | parjanya-krandyam | sahaḥ |
agnim | samudra-vāsasam ||8.102.05||

8.102.06a ā savaṁ savitur yathā bhagasyeva bhujiṁ huve |
8.102.06c agniṁ samudravāsasam ||

ā | savam | savituḥ | yathā | bhagasya-iva | bhujim | huve |
agnim | samudra-vāsasam ||8.102.06||

8.102.07a agniṁ vo vṛdhantam adhvarāṇām purūtamam |
8.102.07c acchā naptre sahasvate ||

agnim | vaḥ | vṛdhantam | adhvarāṇām | puru-tamam |
accha | naptre | sahasvate ||8.102.07||

8.102.08a ayaṁ yathā na ābhuvat tvaṣṭā rūpeva takṣyā |
8.102.08c asya kratvā yaśasvataḥ ||

ayam | yathā | naḥ | ā-bhuvat | tvaṣṭā | rūpā-iva | takṣyā |
asya | kratvā | yaśasvataḥ ||8.102.08||

8.102.09a ayaṁ viśvā abhi śriyo 'gnir deveṣu patyate |
8.102.09c ā vājair upa no gamat ||

ayam | viśvāḥ | abhi | śriyaḥ | agniḥ | deveṣu | patyate |
ā | vājaiḥ | upa | naḥ | gamat ||8.102.09||

8.102.10a viśveṣām iha stuhi hotṝṇāṁ yaśastamam |
8.102.10c agniṁ yajñeṣu pūrvyam ||

viśveṣām | iha | stuhi | hotṝṇām | yaśaḥ-tamam |
agnim | yajñeṣu | pūrvyam ||8.102.10||

8.102.11a śīram pāvakaśociṣaṁ jyeṣṭho yo dameṣv ā |
8.102.11c dīdāya dīrghaśruttamaḥ ||

śīram | pāvaka-śociṣam | jyeṣṭhaḥ | yaḥ | dameṣu | ā |
dīdāya | dīrghaśrut-tamaḥ ||8.102.11||

8.102.12a tam arvantaṁ na sānasiṁ gṛṇīhi vipra śuṣmiṇam |
8.102.12c mitraṁ na yātayajjanam ||

tam | arvantam | na | sānasim | gṛṇīhi | vipra | śuṣmiṇam |
mitram | na | yātayat-janam ||8.102.12||

8.102.13a upa tvā jāmayo giro dediśatīr haviṣkṛtaḥ |
8.102.13c vāyor anīke asthiran ||

upa | tvā | jāmayaḥ | giraḥ | dediśatīḥ | haviḥ-kṛtaḥ |
vāyoḥ | anīke | asthiran ||8.102.13||

8.102.14a yasya tridhātv avṛtam barhis tasthāv asaṁdinam |
8.102.14c āpaś cin ni dadhā padam ||

yasya | tri-dhātu | avṛtam | barhiḥ | tasthau | asam-dinam |
āpaḥ | cit | ni | dadha | padam ||8.102.14||

8.102.15a padaṁ devasya mīḻhuṣo 'nādhṛṣṭābhir ūtibhiḥ |
8.102.15c bhadrā sūrya ivopadṛk ||

padam | devasya | mīḻhuṣaḥ | anādhṛṣṭābhiḥ | ūti-bhiḥ |
bhadrā | sūryaḥ-iva | upa-dṛk ||8.102.15||

8.102.16a agne ghṛtasya dhītibhis tepāno deva śociṣā |
8.102.16c ā devān vakṣi yakṣi ca ||

agne | ghṛtasya | dhīti-bhiḥ | tepānaḥ | deva | śociṣā |
ā | devān | vakṣi | yakṣi | ca ||8.102.16||

8.102.17a taṁ tvājananta mātaraḥ kaviṁ devāso aṅgiraḥ |
8.102.17c havyavāham amartyam ||

tam | tvā | ajananta | mātaraḥ | kavim | devāsaḥ | aṅgiraḥ |
havya-vāham | amartyam ||8.102.17||

8.102.18a pracetasaṁ tvā kave 'gne dūtaṁ vareṇyam |
8.102.18c havyavāhaṁ ni ṣedire ||

pra-cetasam | tvā | kave | agne | dūtam | vareṇyam |
havya-vāham | ni | sedire ||8.102.18||

8.102.19a nahi me asty aghnyā na svadhitir vananvati |
8.102.19c athaitādṛg bharāmi te ||

nahi | me | asti | aghnyā | na | sva-dhitiḥ | vanan-vati |
atha | etādṛk | bharāmi | te ||8.102.19||

8.102.20a yad agne kāni kāni cid ā te dārūṇi dadhmasi |
8.102.20c tā juṣasva yaviṣṭhya ||

yat | agne | kāni | kāni | cit | ā | te | dārūṇi | dadhmasi |
tā | juṣasva | yaviṣṭhya ||8.102.20||

8.102.21a yad atty upajihvikā yad vamro atisarpati |
8.102.21c sarvaṁ tad astu te ghṛtam ||

yat | atti | upa-jihvikā | yat | vamraḥ | ati-sarpati |
sarvam | tat | astu | te | ghṛtam ||8.102.21||

8.102.22a agnim indhāno manasā dhiyaṁ saceta martyaḥ |
8.102.22c agnim īdhe vivasvabhiḥ ||

agnim | indhānaḥ | manasā | dhiyam | saceta | martyaḥ |
agnim | īdhe | vivasva-bhiḥ ||8.102.22||


8.103.01a adarśi gātuvittamo yasmin vratāny ādadhuḥ |
8.103.01c upo ṣu jātam āryasya vardhanam agniṁ nakṣanta no giraḥ ||

adarśi | gātuvit-tamaḥ | yasmin | vratāni | ā-dadhuḥ |
upo iti | su | jātam | āryasya | vardhanam | agnim | nakṣanta | naḥ | giraḥ ||8.103.01||

8.103.02a pra daivodāso agnir devām̐ acchā na majmanā |
8.103.02c anu mātaram pṛthivīṁ vi vāvṛte tasthau nākasya sānavi ||

pra | daivaḥ-dāsaḥ | agniḥ | devān | accha | na | majmanā |
anu | mātaram | pṛthivīm | vi | vavṛte | tasthau | nākasya | sānavi ||8.103.02||

8.103.03a yasmād rejanta kṛṣṭayaś carkṛtyāni kṛṇvataḥ |
8.103.03c sahasrasām medhasātāv iva tmanāgniṁ dhībhiḥ saparyata ||

yasmāt | rejanta | kṛṣṭayaḥ | carkṛtyāni | kṛṇvataḥ |
sahasra-sām | medhasātau-iva | tmanā | agnim | dhībhiḥ | saparyata ||8.103.03||

8.103.04a pra yaṁ rāye ninīṣasi marto yas te vaso dāśat |
8.103.04c sa vīraṁ dhatte agna ukthaśaṁsinaṁ tmanā sahasrapoṣiṇam ||

pra | yam | rāye | ninīṣasi | martaḥ | yaḥ | te | vaso iti | dāśat |
saḥ | vīram | dhatte | agne | uktha-śaṁsinam | tmanā | sahasra-poṣiṇam ||8.103.04||

8.103.05a sa dṛḻhe cid abhi tṛṇatti vājam arvatā sa dhatte akṣiti śravaḥ |
8.103.05c tve devatrā sadā purūvaso viśvā vāmāni dhīmahi ||

saḥ | dṛḻhe | cit | abhi | tṛṇatti | vājam | arvatā | saḥ | dhatte | akṣiti | śravaḥ |
tve iti | deva-trā | sadā | puruvaso iti puru-vaso | viśvā | vāmāni | dhīmahi ||8.103.05||

8.103.06a yo viśvā dayate vasu hotā mandro janānām |
8.103.06c madhor na pātrā prathamāny asmai pra stomā yanty agnaye ||

yaḥ | viśvā | dayate | vasu | hotā | mandraḥ | janānām |
madhoḥ | na | pātrā | pra-thamāni | asmai | pra | stomāḥ | yanti | agnaye ||8.103.06||

8.103.07a aśvaṁ na gīrbhī rathyaṁ sudānavo marmṛjyante devayavaḥ |
8.103.07c ubhe toke tanaye dasma viśpate parṣi rādho maghonām ||

aśvam | na | gīḥ-bhiḥ | rathyam | su-dānavaḥ | marmṛjyante | deva-yavaḥ |
ubhe iti | toke iti | tanaye | dasma | viśpate | parṣi | rādhaḥ | maghonām ||8.103.07||

8.103.08a pra maṁhiṣṭhāya gāyata ṛtāvne bṛhate śukraśociṣe |
8.103.08c upastutāso agnaye ||

pra | maṁhiṣṭhāya | gāyata | ṛta-vne | bṛhate | śukra-śociṣe |
upa-stutāsaḥ | agnaye ||8.103.08||

8.103.09a ā vaṁsate maghavā vīravad yaśaḥ samiddho dyumny āhutaḥ |
8.103.09c kuvin no asya sumatir navīyasy acchā vājebhir āgamat ||

ā | vaṁsate | magha-vā | vīra-vat | yaśaḥ | sam-iddhaḥ | dyumnī | ā-hutaḥ |
kuvit | naḥ | asya | su-matiḥ | navīyasī | accha | vājebhiḥ | ā-gamat ||8.103.09||

8.103.10a preṣṭham u priyāṇāṁ stuhy āsāvātithim |
8.103.10c agniṁ rathānāṁ yamam ||

preṣṭham | ūm̐ iti | priyāṇām | stuhi | āsāva | atithim |
agnim | rathānām | yamam ||8.103.10||

8.103.11a uditā yo niditā veditā vasv ā yajñiyo vavartati |
8.103.11c duṣṭarā yasya pravaṇe normayo dhiyā vājaṁ siṣāsataḥ ||

ut-itā | yaḥ | ni-ditā | veditā | vasu | ā | yajñiyaḥ | vavartati |
dustarāḥ | yasya | pravaṇe | na | ūrmayaḥ | dhiyā | vājam | sisāsataḥ ||8.103.11||

8.103.12a mā no hṛṇītām atithir vasur agniḥ purupraśasta eṣaḥ |
8.103.12c yaḥ suhotā svadhvaraḥ ||

mā | naḥ | haṇītām | atithiḥ | vasuḥ | agniḥ | puru-praśastaḥ | eṣaḥ |
yaḥ | su-hotā | su-adhvaraḥ ||8.103.12||

8.103.13a mo te riṣan ye acchoktibhir vaso 'gne kebhiś cid evaiḥ |
8.103.13c kīriś cid dhi tvām īṭṭe dūtyāya rātahavyaḥ svadhvaraḥ ||

mo iti | te | riṣan | ye | acchokti-bhiḥ | vaso iti | agne | kebhiḥ | cit | evaiḥ |
kīriḥ | cit | hi | tvām | īṭṭe | dūtyāya | rāta-havyaḥ | su-adhvaraḥ ||8.103.13||

8.103.14a āgne yāhi marutsakhā rudrebhiḥ somapītaye |
8.103.14c sobharyā upa suṣṭutim mādayasva svarṇare ||

ā | agne | yāhi | marut-sakhā | rudrebhiḥ | soma-pītaye |
sobharyāḥ | upa | su-stutim | mādayasva | svaḥ-nare ||8.103.14||



Notes by Detlef Eichler : 1. Please note that this text is not for commercial use and released only for personal scholarly activity. This transliteration version of Rigveda-Saṁhitā is from an ITRANS file which I have created on the basis of The Aufrecht/van Nooten/Holland (Samhita) version of theRigveda. The revised Padapāṭha is based on the text entered by the members of the Sansknet project. 2. Font: times new roman / Unicode 3. Hiatus ai, au are shown as aï, aü 4. Transliteration:
a ā i ï ī ī3 u ü ū ṛ ṝ ḷ e ai o au ṁ ḥ m̐ ' | k kh g gh ṅ c ch j jh ñ ṭ ṭh ḍ ḍh ṇ t th d dh n p ph b bh m y r l v ś ṣ s h ḻ ḻh 5. Last update: 30 Oct 2016 (8.012.07a ketava uta)