Ṛgveda-Saṁhitā with Padapāṭha
Maṇḍala 6
Transliterated text with accents


6.001.01a tvaṁ hy a̍gne pratha̱mo ma̱notā̱syā dhi̱yo abha̍vo dasma̱ hotā̍ |
6.001.01c tvaṁ sī̍ṁ vṛṣann akṛṇor du̱ṣṭarī̍tu̱ saho̱ viśva̍smai̱ saha̍se̱ saha̍dhyai ||

tvam | hi | a̱gne̱ | pra̱tha̱maḥ | ma̱notā̍ | a̱syāḥ | dhi̱yaḥ | abha̍vaḥ | dasma̍ | hotā̍ |
tvam | sī̱m | vṛ̱ṣa̱n | a̱kṛta̱ṇo̱ḥ | du̱starī̍tu | saha̍ḥ | viśva̍smai | saha̍se | saha̍dhyai ||6.001.01||

6.001.02a adhā̱ hotā̱ ny a̍sīdo̱ yajī̍yān i̱ḻas pa̱da i̱ṣaya̱nn īḍya̱ḥ san |
6.001.02c taṁ tvā̱ nara̍ḥ pratha̱maṁ de̍va̱yanto̍ ma̱ho rā̱ye ci̱taya̍nto̱ anu̍ gman ||

adha̍ | hātā̍ | ni | a̱sī̱da̱ḥ | yajī̍yān | i̱ḻaḥ | pa̱de | i̱ṣaya̍n | īḍya̍ḥ | san |
tam | tvā̱ | nara̍ḥ | pra̱tha̱mam | de̱va̱-yanta̍ḥ | ma̱haḥ | rā̱ye | ci̱taya̍ntaḥ | anu̍ | gma̱n ||6.001.02||

6.001.03a vṛ̱teva̱ yanta̍m ba̱hubhi̍r vasa̱vyai̱3̱̍s tve ra̱yiṁ jā̍gṛ̱vāṁso̱ anu̍ gman |
6.001.03c ruśa̍ntam a̱gniṁ da̍rśa̱tam bṛ̱hanta̍ṁ va̱pāva̍ntaṁ vi̱śvahā̍ dīdi̱vāṁsa̍m ||

vṛ̱tā-i̍va | yanta̍m | ba̱hu-bhi̍ḥ | va̱sa̱vyai̍ḥ | tve iti̍ | ra̱yim | jā̱gṛ̱-vāṁsa̍ḥ | anu̍ | gma̱n |
ruśa̍ntam | a̱gnim | da̱rśa̱tam | bṛ̱hanta̍m | va̱pā-va̍ntam | vi̱śvahā̍ | dī̱di̱-vāṁsa̍m ||6.001.03||

6.001.04a pa̱daṁ de̱vasya̱ nama̍sā̱ vyanta̍ḥ śrava̱syava̱ḥ śrava̍ āpa̱nn amṛ̍ktam |
6.001.04c nāmā̍ni cid dadhire ya̱jñiyā̍ni bha̱drāyā̍ṁ te raṇayanta̱ saṁdṛ̍ṣṭau ||

pa̱dam | de̱vasya̍ | nama̍sā | vyanta̍ḥ | śra̱va̱syava̍ḥ | śrava̍ḥ | ā̱pa̱n | amṛ̍ktam |
nāmā̍ni | ci̱t | da̱dhi̱re̱ | ya̱jñiyā̍ni | bha̱drāyā̍m | te̱ | ra̱ṇa̱ya̱nta̱ | sam-dṛ̍ṣṭau ||6.001.04||

6.001.05a tvāṁ va̍rdhanti kṣi̱taya̍ḥ pṛthi̱vyāṁ tvāṁ rāya̍ u̱bhayā̍so̱ janā̍nām |
6.001.05c tvaṁ trā̱tā ta̍raṇe̱ cetyo̍ bhūḥ pi̱tā mā̱tā sada̱m in mānu̍ṣāṇām ||

tvām | va̱rdha̱nti̱ | kṣi̱taya̍ḥ | pṛ̱thi̱vyām | tvām | rāya̍ḥ | u̱bhayā̍saḥ | janā̍nām |
tvam | trā̱tā | ta̱ra̱ṇe̱ | cetya̍ḥ | bhū̱ḥ | pi̱tā | mā̱tā | sada̍m | it | mānu̍ṣāṇām ||6.001.05||

6.001.06a sa̱pa̱ryeṇya̱ḥ sa pri̱yo vi̱kṣv a1̱̍gnir hotā̍ ma̱ndro ni ṣa̍sādā̱ yajī̍yān |
6.001.06c taṁ tvā̍ va̱yaṁ dama̱ ā dī̍di̱vāṁsa̱m upa̍ jñu̱bādho̱ nama̍sā sadema ||

sa̱pa̱ryeṇya̍ḥ | saḥ | pri̱yaḥ | vi̱kṣu | a̱gniḥ | hotā̍ | ma̱ndraḥ | ni | si̱sā̱da̱ | yajī̍yān |
tam | tvā̱ | va̱yam | dame̍ | ā | dī̱di̱-vāṁsa̍m | upa̍ | jñu̱-bādha̍ḥ | nama̍sā | sa̱de̱ma̱ ||6.001.06||

6.001.07a taṁ tvā̍ va̱yaṁ su̱dhyo̱3̱̍ navya̍m agne sumnā̱yava̍ īmahe deva̱yanta̍ḥ |
6.001.07c tvaṁ viśo̍ anayo̱ dīdyā̍no di̱vo a̍gne bṛha̱tā ro̍ca̱nena̍ ||

tvam | tvā̱ | va̱yam | su̱-dhya̍ḥ | navya̍m | a̱gne̱ | su̱mna̱-yava̍ḥ | ī̱ma̱he̱ | de̱va̱-yanta̍ḥ |
tvam | viśa̍ḥ | a̱na̱ya̱ḥ | dīdyā̍naḥ | di̱vaḥ | a̱gne̱ | bṛ̱ha̱tā | ro̱ca̱nena̍ ||6.001.07||

6.001.08a vi̱śāṁ ka̱viṁ vi̱śpati̱ṁ śaśva̍tīnāṁ ni̱tośa̍naṁ vṛṣa̱bhaṁ ca̍rṣaṇī̱nām |
6.001.08c pretī̍ṣaṇim i̱ṣaya̍ntam pāva̱kaṁ rāja̍ntam a̱gniṁ ya̍ja̱taṁ ra̍yī̱ṇām ||

vi̱śām | ka̱vim | vi̱śpati̍m | śaśva̍tīnām | ni̱-tośa̍nam | vṛ̱ṣa̱bham | ca̱rṣa̱ṇī̱nām |
preti̍-iṣaṇim | i̱ṣaya̍ntam | pā̱va̱kam | rāja̍ntam | a̱gnim | ya̱ja̱tam | ra̱yī̱ṇām ||6.001.08||

6.001.09a so a̍gna īje śaśa̱me ca̱ marto̱ yas ta̱ āna̍ṭ sa̱midhā̍ ha̱vyadā̍tim |
6.001.09c ya āhu̍ti̱m pari̱ vedā̱ namo̍bhi̱r viśvet sa vā̱mā da̍dhate̱ tvota̍ḥ ||

saḥ | a̱gne̱ | ī̱je̱ | śa̱śa̱me | ca̱ | marta̍ḥ | yaḥ | te̱ | āna̍ṭ | sa̱m-idhā̍ | ha̱vya-dā̍tim |
yaḥ | ā-hu̍tim | pari̍ | veda̍ | nama̍ḥ-bhiḥ | viśvā̍ | it | saḥ | vā̱mā | da̱dha̱te̱ | tvā-ū̍taḥ ||6.001.09||

6.001.10a a̱smā u̍ te̱ mahi̍ ma̱he vi̍dhema̱ namo̍bhir agne sa̱midho̱ta ha̱vyaiḥ |
6.001.10c vedī̍ sūno sahaso gī̱rbhir u̱kthair ā te̍ bha̱drāyā̍ṁ suma̱tau ya̍tema ||

a̱smsi | ū̱m̐ iti̍ | te̱ | mahi̍ | ma̱he | vi̱dhe̱ma̱ | nama̍ḥ-bhiḥ | a̱gne̱ | sa̱m-idhā | u̱ta | ha̱vyaiḥ |
vedī̍ | sū̱no̱ iti̍ | sa̱ha̱sa̱ḥ | gī̱ḥ-bhiḥ | u̱kthaiḥ | ā | te̱ | bha̱drāyā̍m | su̱-ma̱tau | yā̱te̱ma̱ ||6.001.10||

6.001.11a ā yas ta̱tantha̱ roda̍sī̱ vi bhā̱sā śravo̍bhiś ca śrava̱sya1̱̍s taru̍traḥ |
6.001.11c bṛ̱hadbhi̱r vājai̱ḥ sthavi̍rebhir a̱sme re̱vadbhi̍r agne vita̱raṁ vi bhā̍hi ||

ā | yaḥ | ta̱tantha̍ | roda̍sī̱ iti̍ | vi | bhā̱sā | śrava̍ḥ-bhiḥ | ca̱ | śra̱va̱sya̍ḥ | taru̍traḥ |
bṛ̱hat-bhi̍ḥ | vājai̍ḥ | sthavi̍rebhiḥ | a̱sme iti̍ | re̱vat-bhi̍ḥ | a̱gne̱ | vi̱-ta̱ram | vi | bhā̱hi̱ ||6.001.11||

6.001.12a nṛ̱vad va̍so̱ sada̱m id dhe̍hy a̱sme bhūri̍ to̱kāya̱ tana̍yāya pa̱śvaḥ |
6.001.12c pū̱rvīr iṣo̍ bṛha̱tīr ā̱re-a̍ghā a̱sme bha̱drā sau̍śrava̱sāni̍ santu ||

nṛ̱-vat | va̱so̱ iti̍ | sada̍m | it | dhe̱hi̱ | a̱sme iti̍ | bhūri̍ | to̱kāya̍ | tana̍yāya | pa̱śvaḥ |
pū̱rvīḥ | iṣa̍ḥ | bṛ̱ha̱tīḥ | ā̱re-a̍ghāḥ | a̱sme iti̍ | bha̱drā | sau̱śra̱va̱sāni̍ | sa̱ntu̱ ||6.001.12||

6.001.13a pu̱rūṇy a̍gne puru̱dhā tvā̱yā vasū̍ni rājan va̱sutā̍ te aśyām |
6.001.13c pu̱rūṇi̱ hi tve pu̍ruvāra̱ santy agne̱ vasu̍ vidha̱te rāja̍ni̱ tve ||

pu̱rūṇi̍ | a̱gne̱ | pu̱ru̱dhā | tvā̱-yā | vasū̍ni | rā̱ja̱n | va̱sutā̍ | te̱ | a̱śyā̱m |
pu̱rūṇi | hi | tve iti̍ | pu̱ru̱-vā̱ra̱ | santi̍ | agne̍ | vasu̍ | vi̱dha̱te | rāja̍ni | tve iti̍ ||6.001.13||


6.002.01a tvaṁ hi kṣaita̍va̱d yaśo 'gne̍ mi̱tro na patya̍se |
6.002.01c tvaṁ vi̍carṣaṇe̱ śravo̱ vaso̍ pu̱ṣṭiṁ na pu̍ṣyasi ||

tvam | hi | kṣaita̍-vat | yaśa̍ḥ | agne̍ | mi̱traḥ | na | patya̍se |
tvam | vi̱-ca̱rṣa̱ṇe̱ | śrava̍ḥ | vaso̱ iti̍ | pu̱ṣṭim | na | pu̱ṣya̱si̱ ||6.002.01||

6.002.02a tvāṁ hi ṣmā̍ carṣa̱ṇayo̍ ya̱jñebhi̍r gī̱rbhir īḻa̍te |
6.002.02c tvāṁ vā̱jī yā̍ty avṛ̱ko ra̍ja̱stūr vi̱śvaca̍rṣaṇiḥ ||

tvām | hi | sma̱ | ca̱rṣa̱ṇaya̍ḥ | ya̱jñebhi̍ḥ | gī̱ḥ-bhiḥ | īḻa̍te |
tvām | vā̱jī | yā̱ti̱ | a̱vṛ̱kaḥ | ra̱ja̱ḥ-tūḥ | vi̱śva-ca̍rṣaṇiḥ ||6.002.02||

6.002.03a sa̱joṣa̍s tvā di̱vo naro̍ ya̱jñasya̍ ke̱tum i̍ndhate |
6.002.03c yad dha̱ sya mānu̍ṣo̱ jana̍ḥ sumnā̱yur ju̱hve a̍dhva̱re ||

sa̱-joṣa̍ḥ | tvā̱ | di̱vaḥ | nara̍ḥ | ya̱jñasya̍ | ke̱tum | i̱ndha̱te̱ |
yat | ha̱ | sya | mānu̍ṣaḥ | jana̍ḥ | su̱mna̱-yuḥ | ju̱hve | a̱dhva̱re ||6.002.03||

6.002.04a ṛdha̱d yas te̍ su̱dāna̍ve dhi̱yā marta̍ḥ śa̱śama̍te |
6.002.04c ū̱tī ṣa bṛ̍ha̱to di̱vo dvi̱ṣo aṁho̱ na ta̍rati ||

ṛdha̍t | yaḥ | te̱ | su̱-dāna̍ve | dhi̱yā | marta̍ḥ | śa̱śama̍te |
ū̱tī | saḥ | bṛ̱ha̱taḥ | di̱vaḥ | dvi̱ṣaḥ | aṁha̍ḥ | na | ta̱ra̱ti̱ ||6.002.04||

6.002.05a sa̱midhā̱ yas ta̱ āhu̍ti̱ṁ niśi̍ti̱m martyo̱ naśa̍t |
6.002.05c va̱yāva̍nta̱ṁ sa pu̍ṣyati̱ kṣaya̍m agne śa̱tāyu̍ṣam ||

sa̱m-idhā̍ | yaḥ | te̱ | ā-hu̍tim | ni-śi̍tim | martya̍ḥ | naśa̍t |
va̱yā-va̍ntam | saḥ | pu̱ṣya̱ti̱ | kṣaya̍m | a̱gne̱ | śa̱ta-ā̍yuṣam ||6.002.05||

6.002.06a tve̱ṣas te̍ dhū̱ma ṛ̍ṇvati di̱vi ṣañ chu̱kra āta̍taḥ |
6.002.06c sūro̱ na hi dyu̱tā tvaṁ kṛ̱pā pā̍vaka̱ roca̍se ||

tve̱ṣaḥ | te̱ | dhū̱maḥ | ṛ̱ṇva̱ti̱ | di̱vi | san | śu̱kraḥ | ā-ta̍taḥ |
sūra̍ḥ | na | hi | dyu̱tā | tvam | kṛ̱pā | pā̱va̱ka̱ | roca̍se ||6.002.06||

6.002.07a adhā̱ hi vi̱kṣv īḍyo 'si̍ pri̱yo no̱ ati̍thiḥ |
6.002.07c ra̱ṇvaḥ pu̱rī̍va̱ jūrya̍ḥ sū̱nur na tra̍ya̱yāyya̍ḥ ||

adha̍ | hi | vi̱kṣu | īḍya̍ḥ | asi̍ | pri̱yaḥ | na̱ḥ | ati̍thiḥ |
ra̱ṇvaḥ | pu̱ri-i̍va | jūrya̍ḥ | sū̱nuḥ | na | tra̱ya̱yāyya̍ḥ ||6.002.07||

6.002.08a kratvā̱ hi droṇe̍ a̱jyase 'gne̍ vā̱jī na kṛtvya̍ḥ |
6.002.08c pari̍jmeva sva̱dhā gayo 'tyo̱ na hvā̱ryaḥ śiśu̍ḥ ||

kratvā̍ | hi | droṇe̍ | a̱jyase̍ | agne̍ | vā̱jī | na | kṛtvya̍ḥ |
pari̍jmā-iva | sva̱dhā | gaya̍ḥ | atya̍ḥ | na | hvā̱ryaḥ | śiśu̍ḥ ||6.002.08||

6.002.09a tvaṁ tyā ci̱d acyu̱tāgne̍ pa̱śur na yava̍se |
6.002.09c dhāmā̍ ha̱ yat te̍ ajara̱ vanā̍ vṛ̱ścanti̱ śikva̍saḥ ||

tvam | tyā | ci̱t | acyu̍tā | agne̍ | pa̱śuḥ | na | yava̍se |
dhāma̍ | ha̱ | yat | te̱ | a̱ja̱ra̱ | vanā̍ | vṛ̱ścanti̍ | śikva̍saḥ ||6.002.09||

6.002.10a veṣi̱ hy a̍dhvarīya̱tām agne̱ hotā̱ dame̍ vi̱śām |
6.002.10c sa̱mṛdho̍ viśpate kṛṇu ju̱ṣasva̍ ha̱vyam a̍ṅgiraḥ ||

veṣi̍ | hi | a̱dhva̱ri̱-ya̱tām | agne̍ | hotā̍ | dame̍ | vi̱śām |
sa̱m-ṛdha̍ḥ | vi̱śpa̱te̱ | kṛ̱ṇu̱ | ju̱ṣasva̍ | ha̱vyam | a̱ṅgi̱ra̱ḥ ||6.002.10||

6.002.11a acchā̍ no mitramaho deva de̱vān agne̱ voca̍ḥ suma̱tiṁ roda̍syoḥ |
6.002.11c vī̱hi sva̱stiṁ su̍kṣi̱tiṁ di̱vo nṝn dvi̱ṣo aṁhā̍ṁsi duri̱tā ta̍rema̱ tā ta̍rema̱ tavāva̍sā tarema ||

accha̍ | na̱ḥ | mi̱tra̱-ma̱ha̱ḥ | de̱va̱ | de̱vān | agne̍ | voca̍ḥ | su̱-ma̱tim | roda̍syoḥ |
vī̱hi | sva̱stim | su̱-kṣi̱tim | di̱vaḥ | nṝn | dvi̱ṣaḥ | aṁhā̍ṁsi | du̱ḥ-i̱tā | ta̱re̱ma̱ | tā | ta̱re̱ma̱ | tava̍ | ava̍sā | ta̱re̱ma̱ ||6.002.11||


6.003.01a agne̱ sa kṣe̍ṣad ṛta̱pā ṛ̍te̱jā u̱ru jyoti̍r naśate deva̱yuṣ ṭe̍ |
6.003.01c yaṁ tvam mi̱treṇa̱ varu̍ṇaḥ sa̱joṣā̱ deva̱ pāsi̱ tyaja̍sā̱ marta̱m aṁha̍ḥ ||

agne̍ | saḥ | kṣe̱ṣa̱t | ṛ̱ta̱-pāḥ | ṛ̱te̱-jāḥ | u̱ru | jyoti̍ḥ | na̱śa̱te̱ | de̱va̱-yuḥ | te̱ |
yam | tvam | mi̱treṇa̍ | varu̍ṇaḥ | sa̱-joṣāḥ | deva̍ | pāsi̍ | tyaja̍sā | marta̍m | aṁha̍ḥ ||6.003.01||

6.003.02a ī̱je ya̱jñebhi̍ḥ śaśa̱me śamī̍bhir ṛ̱dhadvā̍rāyā̱gnaye̍ dadāśa |
6.003.02c e̱vā ca̱na taṁ ya̱śasā̱m aju̍ṣṭi̱r nāṁho̱ marta̍ṁ naśate̱ na pradṛ̍ptiḥ ||

ī̱je | ya̱jñebhi̍ḥ | śa̱śa̱me | śamī̍bhiḥ | ṛ̱dhat-vā̍rāya | a̱gnaye̍ | da̱dā̱śa̱ |
e̱va | ca̱na | tam | ya̱śasā̍m | aju̍ṣṭiḥ | na | aṁha̍ḥ | marta̍m | na̱śa̱te̱ | na | pra-dṛ̍ptiḥ ||6.003.02||

6.003.03a sūro̱ na yasya̍ dṛśa̱tir a̍re̱pā bhī̱mā yad eti̍ śuca̱tas ta̱ ā dhīḥ |
6.003.03c heṣa̍svataḥ śu̱rudho̱ nāyam a̱ktoḥ kutrā̍ cid ra̱ṇvo va̍sa̱tir va̍ne̱jāḥ ||

sūra̍ḥ | na | yasya̍ | dṛ̱śa̱tiḥ | a̱re̱pāḥ | bhī̱mā | yat | eti̍ | śu̱ca̱taḥ | te̱ | ā | dhīḥ |
heṣa̍svataḥ | śu̱rudha̍ḥ | na | a̱yam | a̱ktoḥ | kutrā̍a̍ | ci̱t | ra̱ṇvaḥ | va̱sa̱tiḥ | va̱ne̱-jāḥ ||6.003.03||

6.003.04a ti̱gmaṁ ci̱d ema̱ mahi̱ varpo̍ asya̱ bhasa̱d aśvo̱ na ya̍masā̱na ā̱sā |
6.003.04c vi̱jeha̍mānaḥ para̱śur na ji̱hvāṁ dra̱vir na drā̍vayati̱ dāru̱ dhakṣa̍t ||

ti̱gmam | ci̱t | ema̍ | mahi̍ | varpa̍ḥ | a̱sya̱ | bhasa̍t | aśva̍ḥ | na | ya̱ma̱sā̱na | ā̱sā |
vi̱-jeha̍mānaḥ | pa̱ra̱śuḥ | na | ji̱hvām | dra̱viḥ | na | dra̱va̱ya̱ti̱ | dāru̍ | dhakṣa̍t ||6.003.04||

6.003.05a sa id aste̍va̱ prati̍ dhād asi̱ṣyañ chiśī̍ta̱ tejo 'ya̍so̱ na dhārā̍m |
6.003.05c ci̱tradhra̍jatir ara̱tir yo a̱ktor ver na dru̱ṣadvā̍ raghu̱patma̍jaṁhāḥ ||

saḥ | it | astā̍-iva | prati̍ | dhā̱t | a̱si̱ṣyan | śiśī̍ta | teja̍ḥ | aya̍saḥ | na | dhārā̍m |
ci̱tra-dhra̍jatiḥ | a̱ra̱tiḥ | yaḥ | a̱ktoḥ | veḥ | na | dru̱-sadvā̍ | ra̱ghu̱patma̍-jaṁhāḥ ||6.003.05||

6.003.06a sa ī̍ṁ re̱bho na prati̍ vasta u̱srāḥ śo̱ciṣā̍ rārapīti mi̱trama̍hāḥ |
6.003.06c nakta̱ṁ ya ī̍m aru̱ṣo yo divā̱ nṝn ama̍rtyo aru̱ṣo yo divā̱ nṝn ||

saḥ | ī̱m | re̱bhaḥ | na | prati̍ | va̱ste̱ | u̱srāḥ | śo̱ciṣā̍ | ra̱ra̱pī̱ti̱ | mi̱tr-ama̍hāḥ |
nakta̍m | yaḥ | ī̱m | a̱ru̱ṣaḥ | yaḥ | divā̍ | nṝn | ama̍rtyaḥ | a̱ru̱ṣaḥ | yaḥ | divā̍ | nṝn ||6.003.06||

6.003.07a di̱vo na yasya̍ vidha̱to navī̍no̱d vṛṣā̍ ru̱kṣa oṣa̍dhīṣu nūnot |
6.003.07c ghṛṇā̱ na yo dhraja̍sā̱ patma̍nā̱ yann ā roda̍sī̱ vasu̍nā̱ daṁ su̱patnī̍ ||

di̱vaḥ | na | yasya̍ | vi̱dha̱taḥ | navī̍not | vṛṣā̍ | ru̱kṣaḥ | oṣa̍dhīṣu | nū̱no̱t |
ghṛṇā̍ | na | yaḥ | dhraja̍sā | patma̍nā | yan | ā | roda̍sī̱ iti̍ | vasu̍nā | dam | su̱patnī̱ iti̍ su̱-patnī̍ ||6.003.07||

6.003.08a dhāyo̍bhir vā̱ yo yujye̍bhir a̱rkair vi̱dyun na da̍vidyo̱t svebhi̱ḥ śuṣmai̍ḥ |
6.003.08c śardho̍ vā̱ yo ma̱rutā̍ṁ ta̱takṣa̍ ṛ̱bhur na tve̱ṣo ra̍bhasā̱no a̍dyaut ||

dhāya̍ḥ-bhiḥ | vā̱ | yaḥ | yujye̍bhiḥ | a̱rkaiḥ | vi̱dyut | na | da̱vi̱dyo̱t | svebhi̍ḥ | śuṣmai̍ḥ |
śardha̍ḥ | vā̱ | yaḥ | ma̱rutā̍m | ta̱takṣa̍ | ṛ̱bhuḥ | na | tve̱ṣaḥ | ra̱bha̱sā̱naḥ | a̱dyau̱t ||6.003.08||


6.004.01a yathā̍ hota̱r manu̍ṣo de̱vatā̍tā ya̱jñebhi̍ḥ sūno sahaso̱ yajā̍si |
6.004.01c e̱vā no̍ a̱dya sa̍ma̱nā sa̍mā̱nān u̱śann a̍gna uśa̱to ya̍kṣi de̱vān ||

yathā̍ | ho̱ta̱ḥ | manu̍ṣaḥ | de̱va-tā̍tā | ya̱jñebhi̍ḥ | sū̱no̱ iti̍ | sa̱ha̱sa̱ḥ | yajā̍si |
e̱va | na̱ḥ | a̱dya | sa̱ma̱nā | sa̱mā̱nān | u̱śan | a̱gne̱ | u̱śa̱saḥ | ya̱kṣi̱ | de̱vān ||6.004.01||

6.004.02a sa no̍ vi̱bhāvā̍ ca̱kṣaṇi̱r na vasto̍r a̱gnir va̱ndāru̱ vedya̱ś cano̍ dhāt |
6.004.02c vi̱śvāyu̱r yo a̱mṛto̱ martye̍ṣūṣa̱rbhud bhūd ati̍thir jā̱tave̍dāḥ ||

saḥ | na̱ḥ | vi̱bhā-vā̍ | ca̱kṣaṇi̍ḥ | na | vasto̍ḥ | a̱gniḥ | va̱ndāru̍ | vedya̍ḥ | cana̍ḥ | dhā̱t |
vi̱śva-ā̍yuḥ | yaḥ | a̱mṛta̍ḥ | martye̍ṣu | u̱ṣa̱ḥ-bhut | bhūt | ati̍thiḥ | jā̱ta-ve̍dāḥ ||6.004.02||

6.004.03a dyāvo̱ na yasya̍ pa̱naya̱nty abhva̱m bhāsā̍ṁsi vaste̱ sūryo̱ na śu̱kraḥ |
6.004.03c vi ya i̱noty a̱jara̍ḥ pāva̱ko 'śna̍sya cic chiśnathat pū̱rvyāṇi̍ ||

dyāva̍ḥ | na | yasya̍ | pa̱naya̍nti | abhva̍m | bhāsā̍ṁsi | va̱ste̱ | sūrya̍ḥ | na | śu̱kraḥ |
vi | yaḥ | i̱noti̍ | a̱jara̍ḥ | pā̱va̱kaḥ | aśna̍sya | ci̱t | śi̱śna̱tha̱t | pū̱rvyāṇi̍ ||6.004.03||

6.004.04a va̱dmā hi sū̍no̱ asy a̍dma̱sadvā̍ ca̱kre a̱gnir ja̱nuṣājmānna̍m |
6.004.04c sa tvaṁ na̍ ūrjasana̱ ūrja̍ṁ dhā̱ rāje̍va jer avṛ̱ke kṣe̍ṣy a̱ntaḥ ||

va̱dmā | hi | sū̱no̱ iti̍ | asi̍ | a̱dma̱-sadvā̍ | ca̱kre | a̱gniḥ | ja̱nuṣā̍ | ajma̍ | anna̍m |
saḥ | tvam | na̱ḥ | ū̱rja̱-sa̱ne̱ | ūrja̍m | dhā̱ḥ | rājā̍-iva | je̱ḥ | a̱vṛ̱ke | kṣe̱ṣi̱ | a̱ntariti̍ ||6.004.04||

6.004.05a niti̍kti̱ yo vā̍ra̱ṇam anna̱m atti̍ vā̱yur na rāṣṭry aty e̍ty a̱ktūn |
6.004.05c tu̱ryāma̱ yas ta̍ ā̱diśā̱m arā̍tī̱r atyo̱ na hruta̱ḥ pata̍taḥ pari̱hrut ||

ni-ti̍kti | yaḥ | vā̱ra̱nam | anna̍m | atti̍ | vā̱yuḥ | na | rāṣṭrī̍ | ati̍ | e̱ti̱ | a̱ktūn |
tu̱ryāma̍ḥ | yaḥ | te̱ | ā̱-diśā̍m | arā̍tīḥ | atya̍ḥ | na | hruta̍ḥ | pata̍taḥ | pa̱ri̱-hrut ||6.004.05||

6.004.06a ā sūryo̱ na bhā̍nu̱madbhi̍r a̱rkair agne̍ ta̱tantha̱ roda̍sī̱ vi bhā̱sā |
6.004.06c ci̱tro na̍ya̱t pari̱ tamā̍ṁsy a̱ktaḥ śo̱ciṣā̱ patma̍nn auśi̱jo na dīya̍n ||

ā | sūrya̍ḥ | na | bhā̱nu̱mat-bhi̍ḥ | a̱rkaiḥ | agne̍ | ta̱tantha̍ | roda̍sī̱ iti̍ | vi | bhā̱sā |
ci̱traḥ | na̱ya̱t | pari̍ | tamā̍ṁsi | a̱ktaḥ | śo̱ciṣā̍ | patma̍n | au̱śi̱jaḥ | na | dīya̍n ||6.004.06||

6.004.07a tvāṁ hi ma̱ndrata̍mam arkaśo̱kair va̍vṛ̱mahe̱ mahi̍ na̱ḥ śroṣy a̍gne |
6.004.07c indra̱ṁ na tvā̱ śava̍sā de̱vatā̍ vā̱yum pṛ̍ṇanti̱ rādha̍sā̱ nṛta̍māḥ ||

tvām | hi | ma̱ndra-ta̍mam | a̱rka̱-śo̱kaiḥ | va̱vṛ̱mahe̍ | mahi̍ | na̱ḥ | śroṣi̍ | a̱gne̱ |
indra̍m | na | tvā̱ | śava̍sā | de̱vatā̍ | vā̱yum | pṛ̱ṇa̱nti̱ | rādha̍sā | nṛ-ta̍māḥ ||6.004.07||

6.004.08a nū no̍ agne 'vṛ̱kebhi̍ḥ sva̱sti veṣi̍ rā̱yaḥ pa̱thibhi̱ḥ parṣy aṁha̍ḥ |
6.004.08c tā sū̱ribhyo̍ gṛṇa̱te rā̍si su̱mnam made̍ma śa̱tahi̍māḥ su̱vīrā̍ḥ ||

nu | na̱ḥ | a̱gne̱ | a̱vṛ̱kebhi̍ḥ | sva̱sti | veṣi̍ | rā̱yaḥ | pa̱thi-bhiḥ | parṣi̍ | aṁha̍ḥ |
tā | sūri-bhya̍ḥ | gṛ̱ṇa̱te | rā̱si̱ | su̱mnam | made̍ma | śa̱ta-hi̍māḥ | su̱-vīrā̍ḥ ||6.004.08||


6.005.01a hu̱ve va̍ḥ sū̱nuṁ saha̍so̱ yuvā̍na̱m adro̍ghavācam ma̱tibhi̱r yavi̍ṣṭham |
6.005.01c ya inva̍ti̱ dravi̍ṇāni̱ prace̍tā vi̱śvavā̍rāṇi puru̱vāro̍ a̱dhruk ||

hu̱ve | va̱ḥ | sū̱num | saha̍saḥ | yuvā̍nam | adro̍gha-vācam | ma̱ti-bhi̍ḥ | yavi̍ṣṭham |
yaḥ | inva̍ti | dravi̍ṇāni | pra-ce̍tāḥ | vi̱śva-vā̍rāṇi | pu̱ru̱-vāra̍ḥ | a̱dhruk ||6.005.01||

6.005.02a tve vasū̍ni purvaṇīka hotar do̱ṣā vasto̱r eri̍re ya̱jñiyā̍saḥ |
6.005.02c kṣāme̍va̱ viśvā̱ bhuva̍nāni̱ yasmi̱n saṁ saubha̍gāni dadhi̱re pā̍va̱ke ||

tve iti̍ | vasū̍ni | pu̱ru̱-a̱ṇī̱ka̱ | ho̱ta̱ḥ | do̱ṣā | vasto̍ḥ | ā | ī̱ri̱re̱ | ya̱jñiyā̍saḥ |
kṣāma̍-iva | viśvā̍ | bhuva̍nāni | yasmi̍n | sam | saubha̍gāni | da̱dhi̱re | pā̱va̱ke ||6.005.02||

6.005.03a tvaṁ vi̱kṣu pra̱diva̍ḥ sīda ā̱su kratvā̍ ra̱thīr a̍bhavo̱ vāryā̍ṇām |
6.005.03c ata̍ inoṣi vidha̱te ci̍kitvo̱ vy ā̍nu̱ṣag jā̍tavedo̱ vasū̍ni ||

tvam | vi̱kṣu | pra̱-diva̍ḥ | sī̱da̱ | ā̱su | kratvā̍ | ra̱thīḥ | a̱bha̱va̱ḥ | vāryā̍ṇām |
ata̍ḥ | i̱no̱ṣi̱ | vi̱dha̱te | ci̱ki̱tva̱ḥ | vi | ā̱nu̱ṣak | jā̱ta̱-ve̱da̱ḥ | vasū̍ni ||6.005.03||

6.005.04a yo na̱ḥ sanu̍tyo abhi̱dāsa̍d agne̱ yo anta̍ro mitramaho vanu̱ṣyāt |
6.005.04c tam a̱jare̍bhi̱r vṛṣa̍bhi̱s tava̱ svais tapā̍ tapiṣṭha̱ tapa̍sā̱ tapa̍svān ||

yaḥ | na̱ḥ | sanu̍tyaḥ | a̱bhi̱-dāsa̍t | a̱gne̱ | yaḥ | anta̍raḥ | mi̱tra̱-ma̱ha̱ḥ | va̱nu̱ṣyāt |
tam | a̱jare̍bhiḥ | vṛṣa̍-bhiḥ | tava̍ | svaiḥ | tapa̍ | ta̱pi̱ṣṭha̱ | tapa̍sā | tapa̍svān ||6.005.04||

6.005.05a yas te̍ ya̱jñena̍ sa̱midhā̱ ya u̱kthair a̱rkebhi̍ḥ sūno sahaso̱ dadā̍śat |
6.005.05c sa martye̍ṣv amṛta̱ prace̍tā rā̱yā dyu̱mnena̱ śrava̍sā̱ vi bhā̍ti ||

yaḥ | te̱ | ya̱jñena̍ | sa̱m-idhā̍ | yaḥ | u̱kthaiḥ | a̱rkebhi̍ḥ | sū̱no̱ iti̍ | sa̱ha̱sa̱ḥ | dadā̍śat |
saḥ | martye̍ṣu | a̱mṛ̱ta̱ | pra-ce̍tāḥ | rā̱yā | dyu̱mnena̍ | śrava̍sā | vi | bhā̱ti̱ ||6.005.05||

6.005.06a sa tat kṛ̍dhīṣi̱tas tūya̍m agne̱ spṛdho̍ bādhasva̱ saha̍sā̱ saha̍svān |
6.005.06c yac cha̱syase̱ dyubhi̍r a̱kto vaco̍bhi̱s taj ju̍ṣasva jari̱tur ghoṣi̱ manma̍ ||

saḥ | tat | kṛ̱dhi̱ | i̱ṣi̱taḥ | tūya̍m | a̱gne̱ | spṛdha̍ḥ | bā̱dha̱sva̱ | saha̍sā | saha̍svān |
yat | śa̱syase̍ | dyu-bhi̍ḥ | a̱ktaḥ | vaca̍ḥ-bhiḥ | tat | ju̱ṣa̱sva̱ | ja̱ri̱tuḥ | ghoṣi̍ | manma̍ ||6.005.06||

6.005.07a a̱śyāma̱ taṁ kāma̍m agne̱ tavo̱tī a̱śyāma̍ ra̱yiṁ ra̍yivaḥ su̱vīra̍m |
6.005.07c a̱śyāma̱ vāja̍m a̱bhi vā̱jaya̍nto̱ 'śyāma̍ dyu̱mnam a̍jarā̱jara̍ṁ te ||

a̱śyāma̍ | tam | kāma̍m | a̱gne̱ | tava̍ | ū̱tī | a̱śyāma̍ | ra̱yim | ra̱yi̱-va̱ḥ | su̱-vīra̍m |
a̱śyāma̍ | vāja̍m | a̱bhi | vā̱jaya̍nts | a̱śyāma̍ | dyu̱mnam | a̱ja̱ra̱ | a̱jara̍m | te̱ ||6.005.07||


6.006.01a pra navya̍sā̱ saha̍saḥ sū̱num acchā̍ ya̱jñena̍ gā̱tum ava̍ i̱cchamā̍naḥ |
6.006.01c vṛ̱ścadva̍naṁ kṛ̱ṣṇayā̍ma̱ṁ ruśa̍ntaṁ vī̱tī hotā̍raṁ di̱vyaṁ ji̍gāti ||

pra | navya̍sā | saha̍saḥ | sū̱num | accha̍ | ya̱jñena̍ | gā̱tum | ava̍ḥ | i̱cchamā̍naḥ |
vṛ̱ścat-va̍nam | kṛ̱ṣṇayā̍mam | ruśa̍ntam | vī̱tī | hotā̍ram | di̱vyam | ji̱gā̱ti̱ ||6.006.01||

6.006.02a sa śvi̍tā̱nas ta̍nya̱tū ro̍cana̱sthā a̱jare̍bhi̱r nāna̍dadbhi̱r yavi̍ṣṭhaḥ |
6.006.02c yaḥ pā̍va̱kaḥ pu̍ru̱tama̍ḥ pu̱rūṇi̍ pṛ̱thūny a̱gnir a̍nu̱yāti̱ bharva̍n ||

saḥ | śvi̱tā̱naḥ | tā̱nya̱tuḥ | ro̱ca̱na̱-sthāḥ | a̱jare̍bhiḥ | nāna̍dat-bhiḥ | yavi̍ṣṭhaḥ |
yaḥ | pā̱va̱kaḥ | pu̱ru̱-tama̍ḥ | pu̱rūṇi̍ | pṛ̱thūni̍ | a̱gniḥ | a̱nu̱-yāti̍ | bharva̍n ||6.006.02||

6.006.03a vi te̱ viṣva̱g vāta̍jūtāso agne̱ bhāmā̍saḥ śuce̱ śuca̍yaś caranti |
6.006.03c tu̱vi̱mra̱kṣāso̍ di̱vyā nava̍gvā̱ vanā̍ vananti dhṛṣa̱tā ru̱janta̍ḥ ||

vi | te̱ | viṣva̍k | vāta̍-jūtāsaḥ | a̱gne̱ | bhāmā̍saḥ | śu̱ce̱ | śuca̍yaḥ | ca̱ra̱nti̱ |
tu̱vi̱-mra̱kṣāsa̍ḥ | di̱vyāḥ | nava̍-gvāḥ | vanā̍ | va̱na̱nti̱ | dhṛ̱ṣa̱tā | ru̱janta̍ḥ ||6.006.03||

6.006.04a ye te̍ śu̱krāsa̱ḥ śuca̍yaḥ śuciṣma̱ḥ kṣāṁ vapa̍nti̱ viṣi̍tāso̱ aśvā̍ḥ |
6.006.04c adha̍ bhra̱mas ta̍ urvi̱yā vi bhā̍ti yā̱taya̍māno̱ adhi̱ sānu̱ pṛśne̍ḥ ||

ye | te̱ | śu̱krāsa̍ḥ | śuca̍yaḥ | śu̱ci̱ṣma̱ḥ | kṣām | vapa̍nti | vi-si̍tāsaḥ | aśvā̍ḥ |
adha̍ | bhra̱maḥ | te̱ | u̱rvi̱yā | vi | bhā̱ti̱ | yā̱taya̍mānaḥ | adhi̍ | sānu̍ | pṛśne̍ḥ ||6.006.04||

6.006.05a adha̍ ji̱hvā pā̍patīti̱ pra vṛṣṇo̍ goṣu̱yudho̱ nāśani̍ḥ sṛjā̱nā |
6.006.05c śūra̍syeva̱ prasi̍tiḥ kṣā̱tir a̱gner du̱rvartu̍r bhī̱mo da̍yate̱ vanā̍ni ||

adha̍ | ji̱hvā | pā̱pa̱tī̱ti̱ | pra | vṛṣṇa̍ḥ | go̱ṣu̱-yudha̍ḥ | na | a̱śani̍ḥ | sṛ̱jā̱nā |
śūra̍sya-iva | pra-si̍tiḥ | kṣā̱tiḥ | a̱gneḥ | du̱ḥ-vartu̍ḥ | bhī̱maḥ | da̱ya̱te̱ | vanā̍ni ||6.006.05||

6.006.06a ā bhā̱nunā̱ pārthi̍vāni̱ jrayā̍ṁsi ma̱has to̱dasya̍ dhṛṣa̱tā ta̍tantha |
6.006.06c sa bā̍dha̱svāpa̍ bha̱yā saho̍bhi̱ḥ spṛdho̍ vanu̱ṣyan va̱nuṣo̱ ni jū̍rva ||

ā | bhā̱nunā̍ | pārthi̍vāni | jrayā̍ṁsi | ma̱haḥ | to̱dasya̍ | dhṛ̱ṣa̱tā | ta̱ta̱ntha̱ |
saḥ | bā̱dha̱sva̱ | apa̍ | bha̱yā | saha̍ḥ-bhiḥ | spṛdha̍ḥ | va̱nu̱ṣyan | va̱nuṣa̍ḥ | ni | jū̱rva̱ ||6.006.06||

6.006.07a sa ci̍tra ci̱traṁ ci̱taya̍ntam a̱sme citra̍kṣatra ci̱trata̍maṁ vayo̱dhām |
6.006.07c ca̱ndraṁ ra̱yim pu̍ru̱vīra̍m bṛ̱hanta̱ṁ candra̍ ca̱ndrābhi̍r gṛṇa̱te yu̍vasva ||

saḥ | ci̱tra̱ | ci̱tram | ci̱taya̍ntam | a̱sme iti̍ | citra̍-kṣatra | ci̱tra-ta̍mam | va̱ya̱ḥ-dhām |
ca̱ndram | ra̱yim | pu̱ru̱-vīra̍m | bṛ̱hanta̍m | candra̍ | ca̱ndrābhi̍ḥ | gṛ̱ṇa̱te | yu̱va̱sva̱ ||6.006.07||


6.007.01a mū̱rdhāna̍ṁ di̱vo a̍ra̱tim pṛ̍thi̱vyā vai̍śvāna̱ram ṛ̱ta ā jā̱tam a̱gnim |
6.007.01c ka̱viṁ sa̱mrāja̱m ati̍thi̱ṁ janā̍nām ā̱sann ā pātra̍ṁ janayanta de̱vāḥ ||

mū̱rdhāna̍m | di̱vaḥ | a̱ra̱tim | pṛ̱thi̱vyāḥ | vai̱śvā̱na̱ram | ṛ̱te | ā | jā̱tam | a̱gnim |
ka̱vim | sa̱m-rājam | ati̍thim | janā̍nām | ā̱san | ā | pātra̍m | ja̱na̱ya̱nta̱ | de̱vāḥ ||6.007.01||

6.007.02a nābhi̍ṁ ya̱jñānā̱ṁ sada̍naṁ rayī̱ṇām ma̱hām ā̍hā̱vam a̱bhi saṁ na̍vanta |
6.007.02c vai̱śvā̱na̱raṁ ra̱thya̍m adhva̱rāṇā̍ṁ ya̱jñasya̍ ke̱tuṁ ja̍nayanta de̱vāḥ ||

nābhi̍m | ya̱jñānā̍m | sada̍nam | ra̱yī̱ṇām | ma̱hām | ā̱-hā̱vam | a̱bhi | sam | na̱va̱nta̱ |
vai̱śvā̱na̱ram | ra̱thya̍m | a̱dhva̱rāṇā̍m | ya̱jñasya̍ | ke̱tum | ja̱na̱ya̱nta̱ | de̱vāḥ ||6.007.02||

6.007.03a tvad vipro̍ jāyate vā̱jy a̍gne̱ tvad vī̱rāso̍ abhimāti̱ṣāha̍ḥ |
6.007.03c vaiśvā̍nara̱ tvam a̱smāsu̍ dhehi̱ vasū̍ni rājan spṛha̱yāyyā̍ṇi ||

tvat | vipra̍ḥ | jā̱ya̱te̱ | vā̱jī | a̱gne̱ | tvat | vī̱rāsa̍ḥ | a̱bhi̱mā̱ti̱-saha̍ḥ |
vaiśvā̍nara | tvam | a̱smāsu̍ | dhe̱hi̱ | vasū̍ni | rā̱ja̱n | spṛ̱ha̱yāyyā̍ṇi ||6.007.03||

6.007.04a tvāṁ viśve̍ amṛta̱ jāya̍māna̱ṁ śiśu̱ṁ na de̱vā a̱bhi saṁ na̍vante |
6.007.04c tava̱ kratu̍bhir amṛta̱tvam ā̍ya̱n vaiśvā̍nara̱ yat pi̱tror adī̍deḥ ||

tvām | viśve̍ | a̱mṛ̱ta̱ | jāya̍mānam | śiśu̍m | na | de̱vāḥ | a̱bhi | sam | na̱va̱nte̱ |
tava̍ | kratu̍-bhiḥ | a̱mṛ̱ta̱-tvam | ā̱ya̱n | vaiśvā̍nara | yat | pi̱troḥ | adī̍deḥ ||6.007.04||

6.007.05a vaiśvā̍nara̱ tava̱ tāni̍ vra̱tāni̍ ma̱hāny a̍gne̱ naki̱r ā da̍dharṣa |
6.007.05c yaj jāya̍mānaḥ pi̱tror u̱pasthe 'vi̍ndaḥ ke̱tuṁ va̱yune̱ṣv ahnā̍m ||

vaiśvā̍nara | tava̍ | tāni̍ | vra̱tāni̍ | ma̱hāni̍ | a̱gne̱ | naki̍ḥ | ā | da̱dha̱rṣa̱ |
yat | jā̍ya̍mānaḥ | pi̱troḥ | u̱pa-sthe̍ | avi̍ndaḥ | ke̱tum | va̱yune̍ṣu | ahnā̍m ||6.007.05||

6.007.06a vai̱śvā̱na̱rasya̱ vimi̍tāni̱ cakṣa̍sā̱ sānū̍ni di̱vo a̱mṛta̍sya ke̱tunā̍ |
6.007.06c tasyed u̱ viśvā̱ bhuva̱nādhi̍ mū̱rdhani̍ va̱yā i̍va ruruhuḥ sa̱pta vi̱sruha̍ḥ ||

vai̱śvā̱na̱rasya̍ | vi-mi̍tāni | cakṣa̍sā | sānū̍ni | di̱vaḥ | a̱mṛta̍sya | ke̱tunā̍ |
tasya̍ | it | ū̱m̐ iti̍ | viśvā̍ | bhuva̍nā | adhi̍ | mū̱rdhani̍ | va̱yāḥ-i̍va | ru̱ru̱hu̱ḥ | sa̱pta | vi̱-sruha̍ḥ ||6.007.06||

6.007.07a vi yo rajā̱ṁsy ami̍mīta su̱kratu̍r vaiśvāna̱ro vi di̱vo ro̍ca̱nā ka̱viḥ |
6.007.07c pari̱ yo viśvā̱ bhuva̍nāni papra̱the 'da̍bdho go̱pā a̱mṛta̍sya rakṣi̱tā ||

vi | yaḥ | rajā̱ṁsi | ami̍mīta | su̱-kratu̍ḥ | vai̱śvā̱na̱raḥ | vi | di̱vaḥ | ro̱ca̱nā | ka̱viḥ |
pari̍ | yaḥ | viśvā̍ | bhuva̍nāni | pa̱pra̱the | ada̍bdhaḥ | go̱pāḥ | a̱mṛta̍sya | ra̱kṣi̱tā ||6.007.07||


6.008.01a pṛ̱kṣasya̱ vṛṣṇo̍ aru̱ṣasya̱ nū saha̱ḥ pra nu vo̍caṁ vi̱dathā̍ jā̱tave̍dasaḥ |
6.008.01c vai̱śvā̱na̱rāya̍ ma̱tir navya̍sī̱ śuci̱ḥ soma̍ iva pavate̱ cāru̍r a̱gnaye̍ ||

pṛ̱kṣasya̍ | vṛṣṇa̍ḥ | a̱ru̱ṣasya̍ | nu | saha̍ḥ | pra | nu | vo̱ca̱m | vi̱dathā̍ | jā̱ta-ve̍dasaḥ |
vai̱śvā̱na̱rāya̍ | ma̱tiḥ | navya̍sī | śuci̍ḥ | soma̍ḥ-iva | pa̱va̱te̱ | cāru̍ḥ | a̱gnaye̍ ||6.008.01||

6.008.02a sa jāya̍mānaḥ para̱me vyo̍mani vra̱tāny a̱gnir vra̍ta̱pā a̍rakṣata |
6.008.02c vy a1̱̍ntari̍kṣam amimīta su̱kratu̍r vaiśvāna̱ro ma̍hi̱nā nāka̍m aspṛśat ||

saḥ | jāya̍mānaḥ | pa̱ra̱me | vi-o̍mani | vra̱tāni̍ | a̱gniḥ | vra̱ta̱-pāḥ | a̱ra̱kṣa̱ta̱ |
vi | a̱ntari̍kṣam | a̱mi̱mī̱ta̱ | su̱-kratu̍ḥ | vai̱śvā̱na̱raḥ | ma̱hi̱nā | nāka̍m | a̱spṛ̱śa̱t ||6.008.02||

6.008.03a vy a̍stabhnā̱d roda̍sī mi̱tro adbhu̍to 'nta̱rvāva̍d akṛṇo̱j jyoti̍ṣā̱ tama̍ḥ |
6.008.03c vi carma̍ṇīva dhi̱ṣaṇe̍ avartayad vaiśvāna̱ro viśva̍m adhatta̱ vṛṣṇya̍m ||

vi | a̱sta̱bhnā̱t | roda̍sī̱ iti̍ | mi̱traḥ | adbhu̍taḥ | a̱nta̱ḥ-vāva̍t | a̱kṛ̱ṇo̱t | jyoti̍ṣā | tama̍ḥ |
vi | carma̍ṇīi̱veti̱ carma̍ṇī-iva | dhi̱ṣaṇe̱ iti̍ | a̱va̱rta̱ya̱t | vai̱śvā̱na̱raḥ | viśva̍m | a̱dha̱tta̱ | vṛṣṇya̍m ||6.008.03||

6.008.04a a̱pām u̱pasthe̍ mahi̱ṣā a̍gṛbhṇata̱ viśo̱ rājā̍na̱m upa̍ tasthur ṛ̱gmiya̍m |
6.008.04c ā dū̱to a̱gnim a̍bharad vi̱vasva̍to vaiśvāna̱ram mā̍ta̱riśvā̍ parā̱vata̍ḥ ||

a̱pām | u̱pa-sthe̍ | ma̱hi̱ṣāḥ | a̱gṛ̱bhṇa̱ta̱ | viśa̍ḥ | rājā̍nam | upa̍ | ta̱sthu̱ḥ | ṛ̱gmiya̍m |
ā | dū̱taḥ | a̱gnim | a̱bha̱ra̱t | vi̱vasva̍taḥ | vai̱śvā̱na̱ram | mā̱ta̱riśvā̍ | pa̱rā̱-vata̍ḥ ||6.008.04||

6.008.05a yu̱ge-yu̍ge vida̱thya̍ṁ gṛ̱ṇadbhyo 'gne̍ ra̱yiṁ ya̱śasa̍ṁ dhehi̱ navya̍sīm |
6.008.05c pa̱vyeva̍ rājann a̱ghaśa̍ṁsam ajara nī̱cā ni vṛ̍śca va̱nina̱ṁ na teja̍sā ||

yu̱ge-yu̍ge | vi̱da̱thya̍m | gṛ̱ṇat-bhya̍ḥ | agne̍ | ra̱yim | ya̱śasa̍m | dhe̱hi̱ | navya̍sīm |
pa̱vyā̍-iva | rā̱ja̱n | a̱gha-śa̍ṁsam | a̱ja̱ra̱ | nī̱cā | ni | vṛ̱śca̱ | va̱nina̍m | na | teja̍sā ||6.008.05||

6.008.06a a̱smāka̍m agne ma̱ghava̍tsu dhāra̱yānā̍mi kṣa̱tram a̱jara̍ṁ su̱vīrya̍m |
6.008.06c va̱yaṁ ja̍yema śa̱tina̍ṁ saha̱sriṇa̱ṁ vaiśvā̍nara̱ vāja̍m agne̱ tavo̱tibhi̍ḥ ||

a̱smāka̍m | a̱gne̱ | ma̱ghava̍t-su | dhā̱ra̱ya̱ | anā̍mi | kṣa̱tram | a̱jara̍m | su̱-vīrya̍m |
va̱yam | ja̱ye̱ma̱ | śa̱tina̍m | sa̱ha̱sriṇa̍m | vaiśvā̍nara | vāja̍m | a̱gne̱ | tava̍ | ū̱ti-bhi̍ḥ ||6.008.06||

6.008.07a ada̍bdhebhi̱s tava̍ go̱pābhi̍r iṣṭe̱ 'smāka̍m pāhi triṣadhastha sū̱rīn |
6.008.07c rakṣā̍ ca no da̱duṣā̱ṁ śardho̍ agne̱ vaiśvā̍nara̱ pra ca̍ tārī̱ḥ stavā̍naḥ ||

ada̍bdhebhiḥ | tava̍ | go̱pābhi̍ḥ | i̱ṣṭe̱ | a̱smāka̍m | pā̱hi̱ | tri̱-sa̱da̱stha̱ | sū̱rīn |
rakṣa̍ | ca̱ | na̱ḥ | da̱duṣā̍m | śardha̍ḥ | a̱gne̱ | vaiśvā̍nara | pra | ca̱ | tā̱rī̱ḥ | stavā̍naḥ ||6.008.07||


6.009.01a aha̍ś ca kṛ̱ṣṇam aha̱r arju̍naṁ ca̱ vi va̍rtete̱ raja̍sī ve̱dyābhi̍ḥ |
6.009.01c vai̱śvā̱na̱ro jāya̍māno̱ na rājāvā̍tira̱j jyoti̍ṣā̱gnis tamā̍ṁsi ||

aha̍ḥ | ca̱ | kṛ̱ṣṇam | aha̍ḥ | arju̍nam | ca̱ | vi | va̱rte̱te̱ iti̍ | raja̍sī̱ iti̍ | ve̱dyābhi̍ḥ |
vai̱śvā̱na̱raḥ | jāya̍mānaḥ | na | rājā̍ | ava̍ | a̱ti̱ra̱t | jyoti̍ṣā | a̱gniḥ | tamā̍ṁsi ||6.009.01||

6.009.02a nāhaṁ tantu̱ṁ na vi jā̍nā̱my otu̱ṁ na yaṁ vaya̍nti sama̱re 'ta̍mānāḥ |
6.009.02c kasya̍ svit pu̱tra i̱ha vaktvā̍ni pa̱ro va̍dā̱ty ava̍reṇa pi̱trā ||

na | a̱ham | tantu̍m | na | vi | jā̱nā̱mi̱ | otu̍m | na | yam | vaya̍nti | sa̱m-a̱re | ata̍mānāḥ |
kasya̍ | svi̱t | pu̱traḥ | i̱ha | vaktvā̍ni | pa̱raḥ | va̱dā̱ti̱ | ava̍reṇa | pi̱trā ||6.009.02||

6.009.03a sa it tantu̱ṁ sa vi jā̍nā̱ty otu̱ṁ sa vaktvā̍ny ṛtu̱thā va̍dāti |
6.009.03c ya ī̱ṁ cike̍tad a̱mṛta̍sya go̱pā a̱vaś cara̍n pa̱ro a̱nyena̱ paśya̍n ||

saḥ | it | tantu̍m | saḥ | vi | jā̱nā̱ti̱ | otu̍m | saḥ | vaktvā̍ni | ṛ̱tu̱-thā | va̱dā̱ti̱ |
yaḥ | ī̱m | cike̍tat | a̱mṛta̍sya | go̱pāḥ | a̱vaḥ | cara̍n | pa̱raḥ | a̱nyena̍ | paśya̍n ||6.009.03||

6.009.04a a̱yaṁ hotā̍ pratha̱maḥ paśya̍te̱mam i̱daṁ jyoti̍r a̱mṛta̱m martye̍ṣu |
6.009.04c a̱yaṁ sa ja̍jñe dhru̱va ā niṣa̱tto 'ma̍rtyas ta̱nvā̱3̱̍ vardha̍mānaḥ ||

a̱yam | hotā̍ | pra̱tha̱maḥ | paśya̍ta | i̱mam | i̱dam | jyoti̍ḥ | a̱mṛta̍m | martye̍ṣu |
a̱yam | saḥ | ja̱jñe̱ | dhru̱vaḥ | ā | ni̱-sa̱ttaḥ | ama̍rtyaḥ | ta̱nvā̍ | vardha̍mānaḥ ||6.009.04||

6.009.05a dhru̱vaṁ jyoti̱r nihi̍taṁ dṛ̱śaye̱ kam mano̱ javi̍ṣṭham pa̱taya̍tsv a̱ntaḥ |
6.009.05c viśve̍ de̱vāḥ sama̍nasa̱ḥ sake̍tā̱ eka̱ṁ kratu̍m a̱bhi vi ya̍nti sā̱dhu ||

dhru̱vam | jyoti̍ḥ | ni-hi̍tam | dṛ̱śaye̍ | kam | mana̍ḥ | javi̍ṣṭham | pa̱taya̍t-su | a̱ntariti̍ |
viśve̍ | de̱vāḥ | sa-ma̍nasaḥ | sa-ke̍tāḥ | eka̍m | kratu̍m | a̱bhi | vi | yā̱nti̱ | sā̱dhu ||6.009.05||

6.009.06a vi me̱ karṇā̍ patayato̱ vi cakṣu̱r vī̱3̱̍daṁ jyoti̱r hṛda̍ya̱ āhi̍ta̱ṁ yat |
6.009.06c vi me̱ mana̍ś carati dū̱raā̍dhī̱ḥ kiṁ svi̍d va̱kṣyāmi̱ kim u̱ nū ma̍niṣye ||

vi | me̱ | karṇā̍ | pa̱ta̱ya̱ta̱ḥ | vi | cakṣu̍ḥ | vi | i̱dam | jyoti̍ḥ | hṛda̍ye | ā-hi̍tam | yat |
vi | me̱ | mana̍ḥ | ca̱ra̱ti̱ | dū̱re-ā̍dhīḥ | kim | svi̱t | va̱kṣyāmi̍ | kim | ū̱m̐ iti̍ | nu | ma̱ni̱ṣye̱ ||6.009.06||

6.009.07a viśve̍ de̱vā a̍namasyan bhiyā̱nās tvām a̍gne̱ tama̍si tasthi̱vāṁsa̍m |
6.009.07c vai̱śvā̱na̱ro̍ 'vatū̱taye̱ no 'ma̍rtyo 'vatū̱taye̍ naḥ ||

viśve̍ | de̱vāḥ | a̱na̱ma̱sya̱n | bhi̱yā̱nāḥ | tvām | a̱gne̱ | tama̍si | ta̱sthi̱-vāṁsa̍m |
vai̱śvā̱na̱raḥ | a̱va̱tu̱ | ū̱taye̍ | na̱ḥ | ama̍rtyaḥ | a̱va̱tu̱ | ū̱taye̍ | na̱ḥ ||6.009.07||


6.010.01a pu̱ro vo̍ ma̱ndraṁ di̱vyaṁ su̍vṛ̱ktim pra̍ya̱ti ya̱jñe a̱gnim a̍dhva̱re da̍dhidhvam |
6.010.01c pu̱ra u̱kthebhi̱ḥ sa hi no̍ vi̱bhāvā̍ svadhva̱rā ka̍rati jā̱tave̍dāḥ ||

pu̱raḥ | va̱ḥ | ma̱ndram | di̱vyam | su̱-vṛ̱ktim | pra̱-ya̱ti | ya̱jñe | a̱gnim | a̱dhva̱re | da̱dhi̱dhva̱m |
pu̱raḥ | u̱kthebhi̍ḥ | saḥ | hi | na̱ḥ | vi̱bhā-vā̍ | su̱-a̱dhva̱rā | kā̱ra̱ti̱ | jā̱ta-ve̍dāḥ ||6.010.01||

6.010.02a tam u̍ dyumaḥ purvaṇīka hota̱r agne̍ a̱gnibhi̱r manu̍ṣa idhā̱naḥ |
6.010.02c stoma̱ṁ yam a̍smai ma̱mate̍va śū̱ṣaṁ ghṛ̱taṁ na śuci̍ ma̱taya̍ḥ pavante ||

tam | ū̱m̐ iti̍ | dyu̱-ma̱ḥ | pu̱ru̱-a̱ṇī̱ka̱ | ho̱ta̱ḥ | agne̍ | a̱gni-bhi̍ḥ | manu̍ṣaḥ | i̱dhā̱naḥ |
stoma̍m | yam | a̱smai̱ | ma̱matā̍-iva | śū̱ṣam | ghṛ̱tam | na | śuci̍ | ma̱taya̍ḥ | pa̱va̱nte̱ ||6.010.02||

6.010.03a pī̱pāya̱ sa śrava̍sā̱ martye̍ṣu̱ yo a̱gnaye̍ da̱dāśa̱ vipra̍ u̱kthaiḥ |
6.010.03c ci̱trābhi̱s tam ū̱tibhi̍ś ci̱traśo̍cir vra̱jasya̍ sā̱tā goma̍to dadhāti ||

pī̱pāya̍ | saḥ | śrava̍sā | martye̍ṣu | yaḥ | a̱gnaye̍ | da̱dāśa̍ | vipra̍ḥ | u̱kthaiḥ |
ci̱trābhi̍ḥ | tam | ū̱ti-bhi̍ḥ | ci̱tra-śo̍ciḥ | vra̱jasya̍ | sā̱tā | go-ma̍taḥ | da̱dhā̱ti̱ ||6.010.03||

6.010.04a ā yaḥ pa̱prau jāya̍māna u̱rvī dū̍re̱dṛśā̍ bhā̱sā kṛ̱ṣṇādhvā̍ |
6.010.04c adha̍ ba̱hu ci̱t tama̱ ūrmyā̍yās ti̱raḥ śo̱ciṣā̍ dadṛśe pāva̱kaḥ ||

ā | yaḥ | pa̱prau | jāya̍mānaḥ | u̱rvī iti̍ | dū̱re̱-dṛśā̍ | bhā̱sā | kṛ̱ṣṇa-a̍dhvā |
adha̍ | ba̱hu | ci̱t | tama̍ḥ | ūrmyā̍yāḥ | ti̱raḥ | śo̱ciṣā̍ | da̱dṛ̱śe̱ | pā̱va̱kaḥ ||6.010.04||

6.010.05a nū na̍ś ci̱tram pu̍ru̱vājā̍bhir ū̱tī agne̍ ra̱yim ma̱ghava̍dbhyaś ca dhehi |
6.010.05c ye rādha̍sā̱ śrava̍sā̱ cāty a̱nyān su̱vīrye̍bhiś cā̱bhi santi̱ janā̍n ||

nu | na̱ḥ | ci̱tram | pu̱ru̱-vājā̍bhiḥ | ū̱tī | agne̍ | ra̱yim | ma̱ghava̍t-bhyaḥ | ca̱ | dhe̱hi̱ |
ye | rādha̍sā | śrava̍sā | ca̱ | ati̍ | a̱nyān | su̱-vīrye̍bhiḥ | ca̱ | a̱bhi | santi̍ | janā̍n ||6.010.05||

6.010.06a i̱maṁ ya̱jñaṁ cano̍ dhā agna u̱śan yaṁ ta̍ āsā̱no ju̍hu̱te ha̱viṣmā̍n |
6.010.06c bha̱radvā̍jeṣu dadhiṣe suvṛ̱ktim avī̱r vāja̍sya̱ gadhya̍sya sā̱tau ||

i̱mam | ya̱jñam | cana̍ḥ | dhā̱ḥ | a̱gne̱ | u̱śan | yam | te̱ | ā̱sā̱naḥ | ju̱hu̱te | ha̱viṣmā̍n |
bha̱rat-vā̍jeṣu | da̱dhi̱ṣe̱ | su̱-vṛ̱ktim | avī̍ḥ | vāja̍sya | gadhya̍sya | sā̱tau ||6.010.06||

6.010.07a vi dveṣā̍ṁsīnu̱hi va̱rdhayeḻā̱m made̍ma śa̱tahi̍māḥ su̱vīrā̍ḥ ||

vi | dveṣā̍ṁsi | i̱nu̱hi | va̱rdhaya̍ | iḻā̍m | made̍ma | śa̱ta-hi̍māḥ | su̱-vīrā̍ḥ ||6.010.07||


6.011.01a yaja̍sva hotar iṣi̱to yajī̍yā̱n agne̱ bādho̍ ma̱rutā̱ṁ na prayu̍kti |
6.011.01c ā no̍ mi̱trāvaru̍ṇā̱ nāsa̍tyā̱ dyāvā̍ ho̱trāya̍ pṛthi̱vī va̍vṛtyāḥ ||

yaja̍sva | ho̱ta̱ḥ | i̱ṣi̱taḥ | yajī̍yān | agne̍ | bādha̍ḥ | ma̱rutā̍m | na | pra-yu̍kti |
ā | na̱ḥ | mi̱trāvaru̍ṇā | nāsa̍tyā | dyāvā̍ | ho̱trāya̍ | pṛ̱thi̱vī iti̍ | va̱vṛ̱tyā̱ḥ ||6.011.01||

6.011.02a tvaṁ hotā̍ ma̱ndrata̍mo no a̱dhrug a̱ntar de̱vo vi̱dathā̱ martye̍ṣu |
6.011.02c pā̱va̱kayā̍ ju̱hvā̱3̱̍ vahni̍r ā̱sāgne̱ yaja̍sva ta̱nva1̱̍ṁ tava̱ svām ||

tvam | hotā̍ | ma̱ndra-ta̍maḥ | na̱ḥ | a̱dhruk | a̱ntaḥ | de̱vaḥ | vi̱dathā̍ | marte̍ṣu |
pā̱va̱kayā̍ | ju̱hvā̍ | vahni̍ḥ | ā̱sā | agne̍ | yaja̍sva | ta̱nva̍m | tava̍ | svām ||6.011.02||

6.011.03a dhanyā̍ ci̱d dhi tve dhi̱ṣaṇā̱ vaṣṭi̱ pra de̱vāñ janma̍ gṛṇa̱te yaja̍dhyai |
6.011.03c vepi̍ṣṭho̱ aṅgi̍rasā̱ṁ yad dha̱ vipro̱ madhu̍ ccha̱ndo bhana̍ti re̱bha i̱ṣṭau ||

dhanyā̍ | ci̱t | hi | tve iti̍ | dhi̱ṣaṇā̍ | vaṣṭi̍ | pra | de̱vān | janma̍ | gṛ̱ṇa̱te | yaja̍dhyai |
vepi̍ṣṭhaḥ | aṅgi̍rasām | yat | ha̱ | vipra̍ḥ | madhu̍ | cha̱ndaḥ | bhana̍ti | re̱bhaḥ | i̱ṣṭau ||6.011.03||

6.011.04a adi̍dyuta̱t sv apā̍ko vi̱bhāvāgne̱ yaja̍sva̱ roda̍sī urū̱cī |
6.011.04c ā̱yuṁ na yaṁ nama̍sā rā̱taha̍vyā a̱ñjanti̍ supra̱yasa̱m pañca̱ janā̍ḥ ||

adi̍dyutat | su | apā̍kaḥ | vi̱-bhāvā̍ | agne̍ | yaja̍sva | roda̍sī̱ iti̍ | u̱rū̱cī iti̍ |
ā̱yum | na | yam | nama̍sā | rā̱ta-ha̍vyāḥ | a̱ñjanti̍ | su̱-pra̱yasa̍m | pañca̍ | janā̍ḥ ||6.011.04||

6.011.05a vṛ̱ñje ha̱ yan nama̍sā ba̱rhir a̱gnāv ayā̍mi̱ srug ghṛ̱tava̍tī suvṛ̱ktiḥ |
6.011.05c amya̍kṣi̱ sadma̱ sada̍ne pṛthi̱vyā aśrā̍yi ya̱jñaḥ sūrye̱ na cakṣu̍ḥ ||

vṛ̱ñje | ha̱ | yat | nama̍sā | ba̱rhiḥ | a̱gnau | ayā̍mi | sruk | ghṛ̱ta-va̍tī | su̱-vṛ̱ktiḥ |
amya̍kṣi | sadma̍ | sada̍ne | pṛ̱thi̱vyāḥ | aśrā̍yi | ya̱jñaḥ | sūrye̍ | na | cakṣu̍ḥ ||6.011.05||

6.011.06a da̱śa̱syā na̍ḥ purvaṇīka hotar de̱vebhi̍r agne a̱gnibhi̍r idhā̱naḥ |
6.011.06c rā̱yaḥ sū̍no sahaso vāvasā̱nā ati̍ srasema vṛ̱jana̱ṁ nāṁha̍ḥ ||

dṛ̱śa̱sya | na̱ḥ | pu̱ru̱-a̱ṇī̱ka̱ | ho̱ta̱ḥ | de̱vebhi̍ḥ | a̱gne̱ | a̱gni-bhi̍ḥ | i̱dhā̱naḥ |
rā̱yaḥ | sū̱no̱ iti̍ | sa̱ha̱sa̱ḥ | va̱va̱sā̱nāḥ | ati̍ | sra̱se̱ma̱ | vṛ̱jana̍m | na | aṁha̍ḥ ||6.011.06||


6.012.01a madhye̱ hotā̍ duro̱ṇe ba̱rhiṣo̱ rāḻ a̱gnis to̱dasya̱ roda̍sī̱ yaja̍dhyai |
6.012.01c a̱yaṁ sa sū̱nuḥ saha̍sa ṛ̱tāvā̍ dū̱rāt sūryo̱ na śo̱ciṣā̍ tatāna ||

madhye̍ | hotā̍ | du̱ro̱ṇe | ba̱rhiṣa̍ḥ | rāṭ | a̱gniḥ | to̱dasya̍ | roda̍sī̱ iti̍ | yaja̍dhyai |
a̱yam | saḥ | sū̱nuḥ | saha̍saḥ | ṛ̱ta-vā̍ | dū̱rāt | sūrya̍ḥ | na | śo̱ciṣā̍ | ta̱tā̱na̱ ||6.012.01||

6.012.02a ā yasmi̱n tve sv apā̍ke yajatra̱ yakṣa̍d rājan sa̱rvatā̍teva̱ nu dyauḥ |
6.012.02c tri̱ṣa̱dhastha̍s tata̱ruṣo̱ na jaṁho̍ ha̱vyā ma̱ghāni̱ mānu̍ṣā̱ yaja̍dhyai ||

ā | yasmi̍n | tve iti̍ | su | apā̍ke | ya̱ja̱tra̱ | yakṣa̍t | rā̱ja̱n | sa̱rvatā̍tā-iva | nu | dyauḥ |
tri̱-sa̱dhastha̍ḥ | ta̱ta̱ruṣa̍ḥ | na | jaṁha̍ḥ | ha̱vyā | ma̱ghāni̍ | mānu̍ṣā | yaja̍dhyai ||6.012.02||

6.012.03a teji̍ṣṭhā̱ yasyā̍ra̱tir va̍ne̱rāṭ to̱do adhva̱n na vṛ̍dhasā̱no a̍dyaut |
6.012.03c a̱dro̱gho na dra̍vi̱tā ce̍tati̱ tmann ama̍rtyo 'va̱rtra oṣa̍dhīṣu ||

teji̍ṣṭhā | yasya̍ | a̱ra̱tiḥ | va̱ne̱-rāṭ | to̱daḥ | adhva̍n | na | vṛ̱dha̱sā̱naḥ | a̱dyau̱t |
a̱dro̱ghaḥ | na | dra̱vi̱tā | ce̱ta̱ti̱ | tman | ama̍rtyaḥ | a̱va̱rtraḥ | oṣa̍dhīṣu ||6.012.03||

6.012.04a sāsmāke̍bhir e̱tarī̱ na śū̱ṣair a̱gniḥ ṣṭa̍ve̱ dama̱ ā jā̱tave̍dāḥ |
6.012.04c drva̍nno va̱nvan kratvā̱ nārvo̱sraḥ pi̱teva̍ jāra̱yāyi̍ ya̱jñaiḥ ||

saḥ | a̱smāke̍bhiḥ | e̱tari̍ | na | śū̱ṣaiḥ | a̱gniḥ | sta̱ve̱ | dame̍ | ā | jā̱ta-ve̍dāḥ |
dru-a̍nnaḥ | va̱nvan | kratvā̍ | na | arvā̍ | u̱sraḥ | pi̱tā-i̍va | jā̱ra̱yāyi̍ | ya̱jñaiḥ ||6.012.04||

6.012.05a adha̍ smāsya panayanti̱ bhāso̱ vṛthā̱ yat takṣa̍d anu̱yāti̍ pṛ̱thvīm |
6.012.05c sa̱dyo yaḥ sya̱ndro viṣi̍to̱ dhavī̍yān ṛ̱ṇo na tā̱yur ati̱ dhanvā̍ rāṭ ||

adha̍ | sma̱ | a̱sya̱ | pa̱na̱ya̱nti̱ | bhāsa̍ḥ | vṛthā̍ | yat | takṣa̍t | a̱nu̱-yāti̍ | pṛ̱thvīm |
sa̱dyaḥ | yaḥ | spa̱ndraḥ | vi-si̍taḥ | dhavī̍yān | ṛ̱ṇaḥ | na | tā̱yuḥ | ati̍ | dhanva̍ | rāṭ ||6.012.05||

6.012.06a sa tvaṁ no̍ arva̱n nidā̍yā̱ viśve̍bhir agne a̱gnibhi̍r idhā̱naḥ |
6.012.06c veṣi̍ rā̱yo vi yā̍si du̱cchunā̱ made̍ma śa̱tahi̍māḥ su̱vīrā̍ḥ ||

saḥ | tvam | na̱ḥ | a̱rva̱n | nidā̍yāḥ | viśve̍bhiḥ | a̱gne̱ | a̱gni-bhi̍ḥ | i̱dhā̱naḥ |
veṣi̍ | rā̱yaḥ | vi | yā̱si̱ | du̱cchunā̍ḥ | made̍ma | śa̱ta-hi̍māḥ | su̱-vīrā̍ḥ ||6.012.06||


6.013.01a tvad viśvā̍ subhaga̱ saubha̍gā̱ny agne̱ vi ya̍nti va̱nino̱ na va̱yāḥ |
6.013.01c śru̱ṣṭī ra̱yir vājo̍ vṛtra̱tūrye̍ di̱vo vṛ̱ṣṭir īḍyo̍ rī̱tir a̱pām ||

tvat | viśvā̍ | su̱-bha̱ga̱ | saubha̍gāni | agne̍ | vi | yā̱nti̱ | va̱nina̍ḥ | na | va̱yāḥ |
śru̱ṣṭī | ra̱yiḥ | vāja̍ḥ | vṛ̱tra̱-tūrye̍ | di̱vaḥ | vṛ̱ṣṭiḥ | īḍya̍ḥ | rī̱tiḥ | a̱pām ||6.013.01||

6.013.02a tvam bhago̍ na̱ ā hi ratna̍m i̱ṣe pari̍jmeva kṣayasi da̱smava̍rcāḥ |
6.013.02c agne̍ mi̱tro na bṛ̍ha̱ta ṛ̱tasyāsi̍ kṣa̱ttā vā̱masya̍ deva̱ bhūre̍ḥ ||

tvam | bhaga̍ḥ | na̱ḥ | ā | hi | ratna̍m | i̱ṣe | pari̍jmā-iva | kṣa̱ya̱si̱ | da̱sma-va̍rcāḥ |
agne̍ | mi̱traḥ | na | bṛ̱ha̱taḥ | ṛ̱tasya | asi̍ | kṣa̱ttā | vā̱masya̍ | de̱va̱ | bhūre̍ḥ ||6.013.02||

6.013.03a sa satpa̍ti̱ḥ śava̍sā hanti vṛ̱tram agne̱ vipro̱ vi pa̱ṇer bha̍rti̱ vāja̍m |
6.013.03c yaṁ tvam pra̍ceta ṛtajāta rā̱yā sa̱joṣā̱ naptrā̱pāṁ hi̱noṣi̍ ||

saḥ | sat-pa̍tiḥ | śava̍sā | ha̱nti̱ | vṛ̱tram | a̱gne̱ | vipra̍ḥ | vi | pa̱ṇeḥ | bha̱rti̱ | vāja̍m |
yam | tvam | pra̱-ce̱ta̱ḥ | ṛ̱ta̱-jā̱ta̱ | rā̱yā | sa̱-joṣā̍ḥ | naptrā̍ | a̱pām | hi̱noṣi̍ ||6.013.03||

6.013.04a yas te̍ sūno sahaso gī̱rbhir u̱kthair ya̱jñair marto̱ niśi̍tiṁ ve̱dyāna̍ṭ |
6.013.04c viśva̱ṁ sa de̍va̱ prati̱ vāra̍m agne dha̱tte dhā̱nya1̱̍m patya̍te vasa̱vyai̍ḥ ||

yaḥ | te̱ | sū̱no̱ iti̍ | sa̱ha̱sa̱ḥ | gī̱ḥ-bhiḥ | u̱kthaiḥ | ya̱jñaiḥ | marta̍ḥ | ni-śi̍tam | ve̱dyā | āna̍ṭ |
viśva̍m | saḥ | de̱va̱ | prati̍ | vāra̍m | a̱gne̱ | dha̱tte | dhā̱nyam | patya̍te | va̱sa̱vyai̍ḥ ||6.013.04||

6.013.05a tā nṛbhya̱ ā sau̍śrava̱sā su̱vīrāgne̍ sūno sahasaḥ pu̱ṣyase̍ dhāḥ |
6.013.05c kṛ̱ṇoṣi̱ yac chava̍sā̱ bhūri̍ pa̱śvo vayo̱ vṛkā̍yā̱raye̱ jasu̍raye ||

tā | nṛ-bhya̍ḥ | ā | sau̱śra̱va̱sā | su̱-vīrā̍ | agne̍ | sū̱no̱ iti̍ | sa̱ha̱sa̱ḥ | pu̱ṣyase̍ | dhā̱ḥ |
kṛ̱ṇoṣi̍ | yat | śava̍sā | bhūri̍ | pa̱śvaḥ | vaya̍ḥ | vṛkā̍ya | a̱raye̍ | jasu̍raye ||6.013.05||

6.013.06a va̱dmā sū̍no sahaso no̱ vihā̍yā̱ agne̍ to̱kaṁ tana̍yaṁ vā̱ji no̍ dāḥ |
6.013.06c viśvā̍bhir gī̱rbhir a̱bhi pū̱rtim a̍śyā̱m made̍ma śa̱tahi̍māḥ su̱vīrā̍ḥ ||

va̱dmā | sū̱no̱ iti̍ | sa̱ha̱sa̱ḥ | na̱ḥ | vi-hā̍yāḥ | agne̍ | to̱kam | tana̍yam | vā̱ji | na̱ḥ | dā̱ḥ |
viśvā̍bhiḥ | gī̱ḥ-bhiḥ | a̱bhi | pū̱rtim | a̱śyā̱m | made̍ma | śa̱ta-hi̍māḥ | su̱-vīrā̍ḥ ||6.013.06||


6.014.01a a̱gnā yo martyo̱ duvo̱ dhiya̍ṁ ju̱joṣa̍ dhī̱tibhi̍ḥ |
6.014.01c bhasa̱n nu ṣa pra pū̱rvya iṣa̍ṁ vurī̱tāva̍se ||

a̱gnā | yaḥ | martya̍ḥ | duva̍ḥ | dhiya̍m | ju̱joṣa̍ | dhī̱ti-bhi̍ḥ |
bhasa̍t | nu | saḥ | pra | pū̱rvyaḥ | iṣa̍m | vu̱rī̱ta̱ | ava̍se ||6.014.01||

6.014.02a a̱gnir id dhi prace̍tā a̱gnir ve̱dhasta̍ma̱ ṛṣi̍ḥ |
6.014.02c a̱gniṁ hotā̍ram īḻate ya̱jñeṣu̱ manu̍ṣo̱ viśa̍ḥ ||

a̱gniḥ | it | hi | pra-ce̍rtāḥ | a̱gniḥ | ve̱dhaḥ-ta̍maḥ | ṛṣi̍ḥ |
a̱gnim | hotā̍ram | ī̱ḻa̱te̱ | ya̱jñeṣu̍ | manu̍ṣaḥ | viśa̍ḥ ||6.014.02||

6.014.03a nānā̱ hy a1̱̍gne 'va̍se̱ spardha̍nte̱ rāyo̍ a̱ryaḥ |
6.014.03c tūrva̍nto̱ dasyu̍m ā̱yavo̍ vra̱taiḥ sīkṣa̍nto avra̱tam ||

nānā̍ | hi | a̱gne̱ | ava̍se | spardha̍nte | rāyaḥ | a̱ryaḥ |
tūrva̍ntaḥ | dasyu̍m | ā̱yava̍ḥ | vra̱taiḥ | sīkṣa̍ntaḥ | a̱vra̱tam ||6.014.03||

6.014.04a a̱gnir a̱psām ṛ̍tī̱ṣaha̍ṁ vī̱raṁ da̍dāti̱ satpa̍tim |
6.014.04c yasya̱ trasa̍nti̱ śava̍saḥ sa̱ṁcakṣi̱ śatra̍vo bhi̱yā ||

a̱gniḥ | a̱psām | ṛ̱ti̱-saha̍m | vī̱ram | da̱dā̱ti̱ | sat-pa̍tim |
yasya̍ | trasa̍nti | śava̍saḥ | sa̱m-cakṣi̍ | śatra̍vaḥ | bhi̱yā ||6.014.04||

6.014.05a a̱gnir hi vi̱dmanā̍ ni̱do de̱vo marta̍m uru̱ṣyati̍ |
6.014.05c sa̱hāvā̱ yasyāvṛ̍to ra̱yir vāje̱ṣv avṛ̍taḥ ||

a̱gniḥ | hi | vi̱dmanā̍ | ni̱daḥ | de̱vaḥ | marta̍m | u̱ru̱ṣyati̍ |
sa̱ha-vā̍ | yasya̍ | avṛ̍taḥ | ra̱yiḥ | vāje̍ṣu | avṛ̍taḥ ||6.014.05||

6.014.06a acchā̍ no mitramaho deva de̱vān agne̱ voca̍ḥ suma̱tiṁ roda̍syoḥ |
6.014.06c vī̱hi sva̱stiṁ su̍kṣi̱tiṁ di̱vo nṝn dvi̱ṣo aṁhā̍ṁsi duri̱tā ta̍rema̱ tā ta̍rema̱ tavāva̍sā tarema ||

accha̍ | na̱ḥ | mi̱tra̱-ma̱ha̱ḥ | de̱va̱ | de̱vān | agne̍ | voca̍ḥ | su̱-ma̱tim | roda̍syoḥ |
vī̱hi | sva̱stim | su̱-kṣi̱tim | di̱vaḥ | nṝn | dvi̱ṣaḥ | aṁhā̍ṁsi | du̱ḥ-i̱tā | ta̱re̱ma̱ | tā | ta̱re̱ma̱ | tava̍ | ava̍sā | ta̱re̱ma̱ ||6.014.06||


6.015.01a i̱mam ū̱ ṣu vo̱ ati̍thim uṣa̱rbudha̱ṁ viśvā̍sāṁ vi̱śām pati̍m ṛñjase gi̱rā |
6.015.01c vetīd di̱vo ja̱nuṣā̱ kac ci̱d ā śuci̱r jyok ci̍d atti̱ garbho̱ yad acyu̍tam ||

i̱mam | ū̱m̐ iti̍ | su | va̱ḥ | ati̍thim | u̱ṣa̱ḥ-budha̍m | viśvā̍sām | vi̱śām | pati̍m | ṛ̱ñja̱se̱ | gi̱rā |
veti̍ | it | di̱vaḥ | ja̱nuṣā̍ | kat | ci̱t | ā | śuci̍ḥ | jyok | ci̱t | a̱tti̱ | garbha̍ḥ | yat | acyu̍tam ||6.015.01||

6.015.02a mi̱traṁ na yaṁ sudhi̍ta̱m bhṛga̍vo da̱dhur vana̱spatā̱v īḍya̍m ū̱rdhvaśo̍ciṣam |
6.015.02c sa tvaṁ suprī̍to vī̱taha̍vye adbhuta̱ praśa̍stibhir mahayase di̱ve-di̍ve ||

mi̱tram | na | yam | su̱-dhi̍tam | bhṛga̍vaḥ | da̱dhuḥ | vana̱spatau̍ | īḍya̍m | ū̱rdhva-śo̍ciṣam |
saḥ | tvam | su-prī̍taḥ | vī̱ta-ha̍vye | a̱dbhu̱ta̱ | praśa̍sti-bhiḥ | ma̱ha̱ya̱se̱ | di̱ve-di̍ve ||6.015.02||

6.015.03a sa tvaṁ dakṣa̍syāvṛ̱ko vṛ̱dho bhū̍r a̱ryaḥ para̱syānta̍rasya̱ taru̍ṣaḥ |
6.015.03c rā̱yaḥ sū̍no sahaso̱ martye̱ṣv ā cha̱rdir ya̍ccha vī̱taha̍vyāya sa̱pratho̍ bha̱radvā̍jāya sa̱pratha̍ḥ ||

saḥ | tvam | daka̍sya | a̱vṛ̱kaḥ | vṛ̱dhaḥ | bhū̱ḥ | a̱ryaḥ | para̍sya | anta̍rasya | taru̍ṣaḥ |
rā̱yaḥ | sū̱no̱ iti̍ | sa̱ha̱sa̱ḥ | martye̍ṣu | ā | cha̱rdiḥ | ya̱ccha̱ | vī̱ta-ha̍vyāya | sa̱-pratha̍ḥ | bha̱rat-vā̍jāya | sa̱-pratha̍ḥ ||6.015.03||

6.015.04a dyu̱tā̱naṁ vo̱ ati̍thi̱ṁ sva̍rṇaram a̱gniṁ hotā̍ra̱m manu̍ṣaḥ svadhva̱ram |
6.015.04c vipra̱ṁ na dyu̱kṣava̍casaṁ suvṛ̱ktibhi̍r havya̱vāha̍m ara̱tiṁ de̱vam ṛ̍ñjase ||

dyu̱tā̱nam | va̱ḥ | ati̍thim | sva̍ḥ-naram | a̱gnim | hotā̍ram | manu̍ṣaḥ | su̱-a̱dhva̱ram |
vipra̍m | na | dyu̱kṣa-va̍casam | su̱vṛ̱kti-bhi̍ḥ | ha̱vya̱-vāha̍m | a̱ra̱tim | de̱vam | ṛ̱ñja̱se̱ ||6.015.04||

6.015.05a pā̱va̱kayā̱ yaś ci̱taya̍ntyā kṛ̱pā kṣāma̍n ruru̱ca u̱ṣaso̱ na bhā̱nunā̍ |
6.015.05c tūrva̱n na yāma̱nn eta̍śasya̱ nū raṇa̱ ā yo ghṛ̱ṇe na ta̍tṛṣā̱ṇo a̱jara̍ḥ ||

pā̱va̱kayā̍ | yaḥ | ci̱taya̍ntyā | kṛ̱pā | kṣāma̍n | ru̱ru̱ce | u̱ṣasa̍ḥ | na | bhā̱nunā̍ |
tūrva̍n | na | yāma̍n | eta̍śasya | nu | raṇe̍ | ā | yaḥ | ghṛ̱ṇe | na | ta̱tṛṣā̱ṇaḥ | a̱jara̍ḥ ||6.015.05||

6.015.06a a̱gnim-a̍gniṁ vaḥ sa̱midhā̍ duvasyata pri̱yam-pri̍yaṁ vo̱ ati̍thiṁ gṛṇī̱ṣaṇi̍ |
6.015.06c upa̍ vo gī̱rbhir a̱mṛta̍ṁ vivāsata de̱vo de̱veṣu̱ vana̍te̱ hi vārya̍ṁ de̱vo de̱veṣu̱ vana̍te̱ hi no̱ duva̍ḥ ||

a̱gnim-a̍gnim | va̱ḥ | sa̱m-idhā̍ | du̱va̱sya̱ta̱ | pri̱yam-pri̍yam | va̱ḥ | ati̍thim | gṛ̱ṇī̱ṣaṇi̍ |
upa̍ | va̱ḥ | gī̱ḥ-bhiḥ | a̱mṛta̍m | vi̱vā̱sa̱ta̱ | de̱vaḥ | de̱veṣu̍ | vana̍te | hi | vārya̍m | de̱vaḥ | de̱veṣu̍ | vana̍te | hi | na̱ḥ | duva̍ḥ ||6.015.06||

6.015.07a sami̍ddham a̱gniṁ sa̱midhā̍ gi̱rā gṛ̍ṇe̱ śuci̍m pāva̱kam pu̱ro a̍dhva̱re dhru̱vam |
6.015.07c vipra̱ṁ hotā̍ram puru̱vāra̍m a̱druha̍ṁ ka̱viṁ su̱mnair ī̍mahe jā̱tave̍dasam ||

sam-i̍ddham | a̱gnim | sa̱m-idhā̍ | gi̱rā | gṛ̱ṇe̱ | śuci̍m | pā̱va̱kam | pu̱raḥ | a̱dhva̱re | dhru̱vam |
vipra̍m | hotā̍ram | pu̱ru̱-vāra̍m | a̱druha̍m | ka̱vim | su̱mnaiḥ | ī̱ma̱he̱ | jā̱ta-ve̍dasam ||6.015.07||

6.015.08a tvāṁ dū̱tam a̍gne a̱mṛta̍ṁ yu̱ge-yu̍ge havya̱vāha̍ṁ dadhire pā̱yum īḍya̍m |
6.015.08c de̱vāsa̍ś ca̱ martā̍saś ca̱ jāgṛ̍viṁ vi̱bhuṁ vi̱śpati̱ṁ nama̍sā̱ ni ṣe̍dire ||

tvām | dū̱tam | a̱gne̱ | a̱mṛta̍m | yu̱ge-yu̍ge | ha̱vya̱-vāha̍m | da̱dhi̱re̱ | pā̱yum | īḍya̍m |
de̱vāsa̍ḥ | ca̱ | martā̍saḥ | ca̱ | jāgṛ̍vim | vi̱-bhum | vi̱śpati̍m | nama̍sā | ni | se̱di̱re̱ ||6.015.08||

6.015.09a vi̱bhūṣa̍nn agna u̱bhayā̱m̐ anu̍ vra̱tā dū̱to de̱vānā̱ṁ raja̍sī̱ sam ī̍yase |
6.015.09c yat te̍ dhī̱tiṁ su̍ma̱tim ā̍vṛṇī̱mahe 'dha̍ smā nas tri̱varū̍thaḥ śi̱vo bha̍va ||

vi̱-bhūṣa̍n | a̱gne̱ | u̱bhayā̱n | anu̍ | vra̱tā | dū̱taḥ | de̱vānā̍m | raja̍sī̱ iti̍ | sam | ī̱ya̱se̱ |
yat | te̱ | dhī̱tim | su̱-ma̱tim | ā̱-vṛ̱ṇī̱mahe̍ | adha̍ | sma̱ | na̱ḥ | tri̱-varū̍thaḥ | śi̱vaḥ | bha̱va̱ ||6.015.09||

6.015.10a taṁ su̱pratī̍kaṁ su̱dṛśa̱ṁ svañca̱m avi̍dvāṁso vi̱duṣṭa̍raṁ sapema |
6.015.10c sa ya̍kṣa̱d viśvā̍ va̱yunā̍ni vi̱dvān pra ha̱vyam a̱gnir a̱mṛte̍ṣu vocat ||

tam | su̱-pratī̍kam | su̱-dṛśa̍m | su̱-añca̍m | avi̍dvāṁsaḥ | vi̱duḥ-ta̍ram | sa̱pe̱ma̱ |
saḥ | ya̱kṣa̱t | viśvā̍ | va̱yunā̍ni | vi̱dvān | pra | ha̱vyam | a̱gniḥ | a̱mṛte̍ṣu | vo̱ca̱t ||6.015.10||

6.015.11a tam a̍gne pāsy u̱ta tam pi̍parṣi̱ yas ta̱ āna̍ṭ ka̱vaye̍ śūra dhī̱tim |
6.015.11c ya̱jñasya̍ vā̱ niśi̍ti̱ṁ vodi̍tiṁ vā̱ tam it pṛ̍ṇakṣi̱ śava̍so̱ta rā̱yā ||

tam | a̱gne̱ | pā̱si̱ | u̱ta | tam | pi̱pa̱rṣi̱ | yaḥ | te̱ | āna̍ṭ | ka̱vaye̍ | śū̱ra̱ | dhī̱tim |
ya̱jñasya̍ | vā̱ | ni-śi̍tim | vā̱ | ut-i̍tim | vā̱ | tam | it | pṛ̱ṇa̱kṣi̱ | śava̍sā | u̱ta | rā̱yā ||6.015.11||

6.015.12a tvam a̍gne vanuṣya̱to ni pā̍hi̱ tvam u̍ naḥ sahasāvann ava̱dyāt |
6.015.12c saṁ tvā̍ dhvasma̱nvad a̱bhy e̍tu̱ pātha̱ḥ saṁ ra̱yiḥ spṛ̍ha̱yāyya̍ḥ saha̱srī ||

tvam | a̱gne̱ | va̱nu̱ṣya̱taḥ | ni | pā̱hi̱ | tvam | ū̱m̐ iti̍ | na̱ḥ | sa̱ha̱sā̱-va̱n | a̱va̱dyāt |
sam | tvā̱ | dhva̱sma̱n-vat | a̱bhi | e̱tu̱ | pātha̍ḥ | sam | ra̱yiḥ | spṛ̱ha̱yāyya̍ḥ | sa̱ha̱srī ||6.015.12||

6.015.13a a̱gnir hotā̍ gṛ̱hapa̍ti̱ḥ sa rājā̱ viśvā̍ veda̱ jani̍mā jā̱tave̍dāḥ |
6.015.13c de̱vānā̍m u̱ta yo martyā̍nā̱ṁ yaji̍ṣṭha̱ḥ sa pra ya̍jatām ṛ̱tāvā̍ ||

a̱gniḥ | hotā̍ | gṛ̱ha-pa̍tiḥ | saḥ | rājā̍ | viśvā̍ | ve̱da̱ | jani̍ma | jā̱ta-ve̍dāḥ |
de̱vānā̍m | u̱ta | yaḥ | martyā̍nām | yaji̍ṣṭhaḥ | saḥ | pra | ya̱ja̱tā̱m | ṛ̱ta-vā̍ ||6.015.13||

6.015.14a agne̱ yad a̱dya vi̱śo a̍dhvarasya hota̱ḥ pāva̍kaśoce̱ veṣ ṭvaṁ hi yajvā̍ |
6.015.14c ṛ̱tā ya̍jāsi mahi̱nā vi yad bhūr ha̱vyā va̍ha yaviṣṭha̱ yā te̍ a̱dya ||

agne̍ | yat | a̱dya | vi̱śaḥ | a̱dhva̱ra̱sya̱ | ho̱ta̱riti̍ | pāva̍ka-śoce | veḥ | tvam | hi | yajvā̍ |
ṛ̱tā | ya̱jā̱si̱ | ma̱hi̱nā | vi | yat | bhūḥ | ha̱vyā | va̱ha̱ | ya̱vi̱ṣṭha̱ | yā | te̱ | a̱dya ||6.015.14||

6.015.15a a̱bhi prayā̍ṁsi̱ sudhi̍tāni̱ hi khyo ni tvā̍ dadhīta̱ roda̍sī̱ yaja̍dhyai |
6.015.15c avā̍ no maghava̱n vāja̍sātā̱v agne̱ viśvā̍ni duri̱tā ta̍rema̱ tā ta̍rema̱ tavāva̍sā tarema ||

a̱bhi | prayā̍ṁsi | su-dhi̍tāni | hi | khyaḥ | ni | tvā̱ | da̱dhī̱ta̱ | roda̍sī̱ iti̍ | yaja̍dhyai |
ava̍ | na̱ḥ | ma̱gha̱-va̱n | vāja̍-sātau̍ | agne̍ | viśvā̍ni | du̱ḥ-i̱tā | ta̱re̱ma̱ | tā | ta̱re̱ma̱ | tava̍ | ava̍sā | ta̱re̱ma̱ ||6.015.15||

6.015.16a agne̱ viśve̍bhiḥ svanīka de̱vair ūrṇā̍vantam pratha̱maḥ sī̍da̱ yoni̍m |
6.015.16c ku̱lā̱yina̍ṁ ghṛ̱tava̍ntaṁ savi̱tre ya̱jñaṁ na̍ya̱ yaja̍mānāya sā̱dhu ||

agne̍ | viśve̍bhiḥ | su̱-a̱nī̱ka̱ | de̱vaiḥ | ūrṇā̍-vantam | pra̱tha̱maḥ | sī̱da̱ | yoni̍m |
ku̱lā̱yina̍m | ghṛ̱ta-va̍ntam | sa̱vi̱tre | ya̱jñam | na̱ya̱ | yaja̍mānāya | sā̱dhu ||6.015.16||

6.015.17a i̱mam u̱ tyam a̍tharva̱vad a̱gnim ma̍nthanti ve̱dhasa̍ḥ |
6.015.17c yam a̍ṅkū̱yanta̱m āna̍ya̱nn amū̍raṁ śyā̱vyā̍bhyaḥ ||

i̱mam | ū̱m̐ iti̍ | tyam | a̱tha̱rva̱-vat | a̱gnim | ma̱ntha̱nti̱ | ve̱dhasa̍ḥ |
yam | a̱ṅku̱-yanta̍m | ā | ana̍yan | amū̍ram | syā̱vyā̍bhyaḥ ||6.015.17||

6.015.18a jani̍ṣvā de̱vavī̍taye sa̱rvatā̍tā sva̱staye̍ |
6.015.18c ā de̱vān va̍kṣy a̱mṛtā̍m̐ ṛtā̱vṛdho̍ ya̱jñaṁ de̱veṣu̍ pispṛśaḥ ||

jani̍ṣva | de̱va-vī̍taye | sa̱rva-tā̍tā | sva̱staye̍ |
ā | de̱vān | va̱kṣi̱ | a̱mṛtā̍n | ṛ̱ta̱-vṛdha̍ḥ | ya̱jñam | de̱veṣu̍ | pi̱spṛ̱śa̱ḥ ||6.015.18||

6.015.19a va̱yam u̍ tvā gṛhapate janānā̱m agne̱ aka̍rma sa̱midhā̍ bṛ̱hanta̍m |
6.015.19c a̱sthū̱ri no̱ gārha̍patyāni santu ti̱gmena̍ na̱s teja̍sā̱ saṁ śi̍śādhi ||

va̱yam | ū̱m̐ iti̍ | tvā̱ | gṛ̱ha̱-pa̱te̱ | ja̱nā̱nā̱m | agne̍ | aka̍rma | sa̱m-idhā̍ | bṛ̱hanta̍m |
a̱sthū̱ri | na̱ḥ | gārha̍patyāni | sa̱ntu̱ | ti̱gmena̍ | na̱ḥ | teja̍sā | sam | si̱śā̱dhi̱ ||6.015.19||


6.016.01a tvam a̍gne ya̱jñānā̱ṁ hotā̱ viśve̍ṣāṁ hi̱taḥ |
6.016.01c de̱vebhi̱r mānu̍ṣe̱ jane̍ ||

tvam | a̱gne̱ | ya̱jñānā̍m | hotā̍ | viśve̍ṣām | hi̱taḥ |
de̱vebhi̍ḥ | mānu̍ṣe | jane̍ ||6.016.01||

6.016.02a sa no̍ ma̱ndrābhi̍r adhva̱re ji̱hvābhi̍r yajā ma̱haḥ |
6.016.02c ā de̱vān va̍kṣi̱ yakṣi̍ ca ||

saḥ | na̱ḥ | ma̱ndrābhi̍ḥ | a̱dhva̱re | ji̱hvābhi̍ḥ | ya̱ja̱ | ma̱haḥ |
ā | de̱vān | va̱kṣi̱ | yakṣi̍ | ca̱ ||6.016.02||

6.016.03a vetthā̱ hi ve̍dho̱ adhva̍naḥ pa̱thaś ca̍ de̱vāñja̍sā |
6.016.03c agne̍ ya̱jñeṣu̍ sukrato ||

vettha̍ | hi | ve̱dha̱ḥ | adhva̍naḥ | pa̱thaḥ | ce̱ | de̱va̱ | añja̍sā |
agne̍ | ya̱jñeṣu̍ | su̱kra̱to̱ iti̍ su-krato ||6.016.03||

6.016.04a tvām ī̍ḻe̱ adha̍ dvi̱tā bha̍ra̱to vā̱jibhi̍ḥ śu̱nam |
6.016.04c ī̱je ya̱jñeṣu̍ ya̱jñiya̍m ||

tvām | ī̱ḻe̱ | adha̍ | dvi̱tā | bha̱ra̱taḥ | vā̱ji-bhi̍ḥ | śu̱nam |
ī̱je | ya̱jñeṣu̍ | ya̱jñiya̍m ||6.016.04||

6.016.05a tvam i̱mā vāryā̍ pu̱ru divo̍dāsāya sunva̱te |
6.016.05c bha̱radvā̍jāya dā̱śuṣe̍ ||

tvam | i̱mā | vāryā̍ | pu̱ru | diva̍ḥ-dāsāya | su̱nva̱te |
bha̱rat-vā̍jāya | dā̱śuṣe̍ ||6.016.05||

6.016.06a tvaṁ dū̱to ama̍rtya̱ ā va̍hā̱ daivya̱ṁ jana̍m |
6.016.06c śṛ̱ṇvan vipra̍sya suṣṭu̱tim ||

tvam | dū̱taḥ | ama̍rtyaḥ | ā | va̱ha̱ | daivya̍m | jana̍m |
śṛ̱ṇvan | vipra̍sya | su̱-stu̱tim ||6.016.06||

6.016.07a tvām a̍gne svā̱dhyo̱3̱̍ martā̍so de̱vavī̍taye |
6.016.07c ya̱jñeṣu̍ de̱vam ī̍ḻate ||

tvām | a̱gne̱ | su̱-ā̱dhya̍ḥ | martā̍saḥ | de̱va-vī̍taye |
ya̱jñeṣu̍ | de̱vam | ī̱ḻa̱te̱ ||6.016.07||

6.016.08a tava̱ pra ya̍kṣi sa̱ṁdṛśa̍m u̱ta kratu̍ṁ su̱dāna̍vaḥ |
6.016.08c viśve̍ juṣanta kā̱mina̍ḥ ||

tava̍ | pra | ya̱kṣi̱ | sa̱m-dṛśa̍m | u̱ta | kratu̍m | su̱-dāna̍vaḥ |
viśve̍ | ju̱ṣa̱nta̱ | kā̱mina̍ḥ ||6.016.08||

6.016.09a tvaṁ hotā̱ manu̍rhito̱ vahni̍r ā̱sā vi̱duṣṭa̍raḥ |
6.016.09c agne̱ yakṣi̍ di̱vo viśa̍ḥ ||

tvam | hotā̍ | manu̍ḥ-hitaḥ | vahni̍ḥ | ā̱sā | vi̱duḥ-ta̍raḥ |
agne̍ | yakṣi̍ | di̱vaḥ | viśa̍ḥ ||6.016.09||

6.016.10a agna̱ ā yā̍hi vī̱taye̍ gṛṇā̱no ha̱vyadā̍taye |
6.016.10c ni hotā̍ satsi ba̱rhiṣi̍ ||

agne̍ | ā | yā̱hi̱ | vī̱taye̍ | gṛ̱ṇā̱naḥ | ha̱vya-dā̍taye |
ni | hotā̍ | sa̱tsi̱ | ba̱rhiṣi̍ ||6.016.10||

6.016.11a taṁ tvā̍ sa̱midbhi̍r aṅgiro ghṛ̱tena̍ vardhayāmasi |
6.016.11c bṛ̱hac cho̍cā yaviṣṭhya ||

tam | tvā̱ | sa̱mit-bhi̍ḥ | a̱ṅgi̱ra̱ḥ | ghṛ̱tena̍ | va̱rdha̱yā̱ma̱si̱ |
bṛ̱hat | śo̱ca̱ | ya̱vi̱ṣṭhya̱ ||6.016.11||

6.016.12a sa na̍ḥ pṛ̱thu śra̱vāyya̱m acchā̍ deva vivāsasi |
6.016.12c bṛ̱had a̍gne su̱vīrya̍m ||

saḥ | na̱ḥ | pṛ̱thu | śra̱vāyya̍m | accha̍ | de̱va̱ | vi̱vā̱sa̱si̱ |
bṛ̱hat | a̱gne̱ | su̱-vīrya̍m ||6.016.12||

6.016.13a tvām a̍gne̱ puṣka̍rā̱d adhy atha̍rvā̱ nir a̍manthata |
6.016.13c mū̱rdhno viśva̍sya vā̱ghata̍ḥ ||

tvām | a̱gne̱ | puṣka̍rāt | adhi̍ | atha̍rvā | niḥ | a̱ma̱ntha̱ta̱ |
mū̱rdhnaḥ | viśva̍sya | vā̱ghata̍ḥ ||6.016.13||

6.016.14a tam u̍ tvā da̱dhyaṅṅ ṛṣi̍ḥ pu̱tra ī̍dhe̱ atha̍rvaṇaḥ |
6.016.14c vṛ̱tra̱haṇa̍m puraṁda̱ram ||

tam | ū̱m̐ iti̍ | tvā̱ | da̱dhyaṅ | ṛṣi̍ḥ | pu̱traḥ | ī̱dhe̱ | atha̍rvaṇaḥ |
vṛ̱tra̱-hana̍m | pu̱ra̱m-da̱ram ||6.016.14||

6.016.15a tam u̍ tvā pā̱thyo vṛṣā̱ sam ī̍dhe dasyu̱hanta̍mam |
6.016.15c dha̱na̱ṁja̱yaṁ raṇe̍-raṇe ||

tam | ū̱m̐ iti̍ | tvā̱ | pā̱thyaḥ | vṛṣā̍ | sam | ī̱dhe̱ | da̱syu̱han-ta̍mam |
dha̱na̱m-ja̱yam | raṇe̍-raṇe ||6.016.15||

6.016.16a ehy ū̱ ṣu bravā̍ṇi̱ te 'gna̍ i̱ttheta̍rā̱ gira̍ḥ |
6.016.16c e̱bhir va̍rdhāsa̱ indu̍bhiḥ ||

ā | i̱hi̱ | ū̱m̐ iti̍ | su | bravā̍ṇi | te̱ | agne̍ | i̱tthā | ita̍rāḥ | gira̍ḥ |
e̱bhiḥ | va̱rdhā̱se̱ | indu̍-bhiḥ ||6.016.16||

6.016.17a yatra̱ kva̍ ca te̱ mano̱ dakṣa̍ṁ dadhasa̱ utta̍ram |
6.016.17c tatrā̱ sada̍ḥ kṛṇavase ||

yatra̍ | kva̍ | ca̱ | te̱ | mana̍ḥ | dakṣa̍m | da̱dha̱se̱ | ut-ta̍ram |
tatra̍ | sada̍ḥ | kṛ̱ṇa̱va̱se̱ ||6.016.17||

6.016.18a na̱hi te̍ pū̱rtam a̍kṣi̱pad bhuva̍n nemānāṁ vaso |
6.016.18c athā̱ duvo̍ vanavase ||

na̱hi | te̱ | pū̱ram | a̱kṣi̱-pat | bhuva̍t | ne̱mā̱nā̱m | va̱so̱ iti̍ |
atha̍ | duva̍ḥ | va̱na̱va̱se̱ ||6.016.18||

6.016.19a āgnir a̍gāmi̱ bhāra̍to vṛtra̱hā pu̍ru̱ceta̍naḥ |
6.016.19c divo̍dāsasya̱ satpa̍tiḥ ||

ā | a̱gniḥ | a̱gā̱mi̱ | bhāra̍taḥ | vṛ̱tra̱-hā | pu̱ru̱-ceta̍naḥ |
diva̍ḥ-dāsasya | sat-pa̍tiḥ ||6.016.19||

6.016.20a sa hi viśvāti̱ pārthi̍vā ra̱yiṁ dāśa̍n mahitva̱nā |
6.016.20c va̱nvann avā̍to̱ astṛ̍taḥ ||

saḥ | hi | viśvā̍ | ati̍ | pārthi̍vā | ra̱yim | dāśa̍t | ma̱hi̱-tva̱nā |
va̱nvan | avā̍taḥ | astṛ̍taḥ ||6.016.20||

6.016.21a sa pra̍tna̱van navī̍ya̱sāgne̍ dyu̱mnena̍ sa̱ṁyatā̍ |
6.016.21c bṛ̱hat ta̍tantha bhā̱nunā̍ ||

saḥ | pra̱tna̱-vat | navī̍yasā | agne̍ | dyu̱mnena̍ | sa̱m-yatā̍ |
bṛ̱hat | ta̱ta̱ntha̱ | bhā̱nunā̍ ||6.016.21||

6.016.22a pra va̍ḥ sakhāyo a̱gnaye̱ stoma̍ṁ ya̱jñaṁ ca̍ dhṛṣṇu̱yā |
6.016.22c arca̱ gāya̍ ca ve̱dhase̍ ||

pra | va̱ḥ | sa̱khā̱ya̱ḥ | a̱gnaye̍ | stoma̍m | ya̱jñam | ca̱ | dhṛ̱ṣṇu̱-yā |
arca̍ | gāya̍ | ca̱ | ve̱dhase̍ ||6.016.22||

6.016.23a sa hi yo mānu̍ṣā yu̱gā sīda̱d dhotā̍ ka̱vikra̍tuḥ |
6.016.23c dū̱taś ca̍ havya̱vāha̍naḥ ||

saḥ | hi | yaḥ | mānu̍ṣā | yu̱gā | sīda̍t | hotā̍ | ka̱vi-kra̍tuḥ |
dū̱taḥ | ca̱ | ha̱vya̱-vāha̍naḥ ||6.016.23||

6.016.24a tā rājā̍nā̱ śuci̍vratādi̱tyān māru̍taṁ ga̱ṇam |
6.016.24c vaso̱ yakṣī̱ha roda̍sī ||

tā | rājā̍nā | śuci̍-vratā | ā̱di̱tyān | māru̍tam | ga̱ṇam |
vaso̱ iti̍ | yakṣi̍ | i̱ha | roda̍sī̱ iti̍ ||6.016.24||

6.016.25a vasvī̍ te agne̱ saṁdṛ̍ṣṭir iṣaya̱te martyā̍ya |
6.016.25c ūrjo̍ napād a̱mṛta̍sya ||

vasvī̍ | te̱ | a̱gne̱ | sam-dṛ̍ṣṭiḥ | i̱ṣa̱-ya̱te | martyā̍ya |
ūrja̍ḥ | na̱pā̱t | a̱mṛta̍sya ||6.016.25||

6.016.26a kratvā̱ dā a̍stu̱ śreṣṭho̱ 'dya tvā̍ va̱nvan su̱rekṇā̍ḥ |
6.016.26c marta̍ ānāśa suvṛ̱ktim ||

kratvā̍ | dāḥ | a̱stu̱ | śreṣṭha̍ḥ | a̱dya | tvā̱ | va̱nvan | su̱-rekṇā̍ḥ |
marta̍ḥ | ā̱nā̱śa̱ | su̱-vṛ̱ktim ||6.016.26||

6.016.27a te te̍ agne̱ tvotā̍ i̱ṣaya̍nto̱ viśva̱m āyu̍ḥ |
6.016.27c tara̍nto a̱ryo arā̍tīr va̱nvanto̍ a̱ryo arā̍tīḥ ||

te | te̱ | a̱gne̱ | tvā-ū̍tāḥ | i̱ṣaya̍ntaḥ | viśva̍m | āyu̍ḥ |
tara̍ntaḥ | a̱ryaḥ | arā̍tīḥ | va̱nvanta̍ḥ | a̱ryaḥ | arā̍tīḥ ||6.016.27||

6.016.28a a̱gnis ti̱gmena̍ śo̱ciṣā̱ yāsa̱d viśva̱ṁ ny a1̱̍triṇa̍m |
6.016.28c a̱gnir no̍ vanate ra̱yim ||

a̱gniḥ | ti̱gmena̍ | śo̱ciṣā̍ | yāsa̍t | viśva̍m | ni | a̱triṇa̍m |
a̱gniḥ | na̱ḥ | va̱na̱te̱ | ra̱yim ||6.016.28||

6.016.29a su̱vīra̍ṁ ra̱yim ā bha̍ra̱ jāta̍vedo̱ vica̍rṣaṇe |
6.016.29c ja̱hi rakṣā̍ṁsi sukrato ||

su̱-vīra̍m | ra̱yim | ā | bha̱ra̱ | jāta̍-veda̍ḥ | vi-ca̍rṣaṇe |
ja̱hi | rakṣā̍ṁsi | su̱-kra̱to̱ iti̍ su-krato ||6.016.29||

6.016.30a tvaṁ na̍ḥ pā̱hy aṁha̍so̱ jāta̍vedo aghāya̱taḥ |
6.016.30c rakṣā̍ ṇo brahmaṇas kave ||

tvam | na̱ḥ | pā̱hi̱ | aṁha̍saḥ | jāta̍-vedaḥ | a̱gha̱-ya̱taḥ |
rakṣa̍ | na̱ḥ | bra̱hma̱ṇa̱ḥ | ka̱ve̱ ||6.016.30||

6.016.31a yo no̍ agne du̱reva̱ ā marto̍ va̱dhāya̱ dāśa̍ti |
6.016.31c tasmā̍n naḥ pā̱hy aṁha̍saḥ ||

yaḥ | na̱ḥ | a̱gne̱ | du̱ḥ-eva̍ḥ | ā | marta̍ḥ | va̱dhāya̍ | dāśa̍ti |
tasmā̍t | na̱ḥ | pā̱hi̱ | aṁha̍saḥ ||6.016.31||

6.016.32a tvaṁ taṁ de̍va ji̱hvayā̱ pari̍ bādhasva du̱ṣkṛta̍m |
6.016.32c marto̱ yo no̱ jighā̍ṁsati ||

tvam | tam | de̱va̱ | ji̱hvayā̍ | pari̍ | bā̱dha̱sva̱ | du̱ḥ-krta̍m |
marta̍ḥ | yaḥ | na̱ḥ | jighā̍ṁsati ||6.016.32||

6.016.33a bha̱radvā̍jāya sa̱pratha̱ḥ śarma̍ yaccha sahantya |
6.016.33c agne̱ vare̍ṇya̱ṁ vasu̍ ||

bha̱rat-vā̍jāya | sa̱-pratha̍ḥ | śarma̍ | ya̱ccha̱ | sa̱ha̱ntya̱ |
agne̍ | vare̍ṇyam | vasu̍ ||6.016.33||

6.016.34a a̱gnir vṛ̱trāṇi̍ jaṅghanad draviṇa̱syur vi̍pa̱nyayā̍ |
6.016.34c sami̍ddhaḥ śu̱kra āhu̍taḥ ||

a̱gniḥ | vṛ̱trāṇi̍ | ja̱ṅgha̱na̱t | dra̱vi̱ṇa̱syuḥ | vi̱pa̱nyayā̍ |
sam-i̍ddhaḥ | śu̱kraḥ | ā-hu̍taḥ ||6.016.34||

6.016.35a garbhe̍ mā̱tuḥ pi̱tuṣ pi̱tā vi̍didyutā̱no a̱kṣare̍ |
6.016.35c sīda̍nn ṛ̱tasya̱ yoni̱m ā ||

garbhe̍ | mā̱tuḥ | pi̱tuḥ | pi̱tā | vi̱-di̱dyu̱tā̱naḥ | a̱kṣare̍ |
sīda̍n | ṛ̱tasya̍ | yoni̍m | ā ||6.016.35||

6.016.36a brahma̍ pra̱jāva̱d ā bha̍ra̱ jāta̍vedo̱ vica̍rṣaṇe |
6.016.36c agne̱ yad dī̱daya̍d di̱vi ||

brahma̍ | pra̱jā-va̍t | ā | bha̱ra̱ | jāta̍-veda̍ḥ | vi-ca̍rṣaṇe |
agne̍ | yat | dī̱daya̍t | di̱vi ||6.016.36||

6.016.37a upa̍ tvā ra̱ṇvasa̍ṁdṛśa̱m praya̍svantaḥ sahaskṛta |
6.016.37c agne̍ sasṛ̱jmahe̱ gira̍ḥ ||

upa̍ | tvā̱ | ra̱ṇva-sa̍ndṛśam | praya̍svantaḥ | sa̱ha̱ḥ-kṛ̱ta̱ |
agne̍ | sa̱sṛ̱jmahe̍ | gira̍ḥ ||6.016.37||

6.016.38a upa̍ cchā̱yām i̍va̱ ghṛṇe̱r aga̍nma̱ śarma̍ te va̱yam |
6.016.38c agne̱ hira̍ṇyasaṁdṛśaḥ ||

upa̍ | chā̱yām-i̍va | ghṛṇe̍ḥ | aga̍nma | śarma̍ | te̱ | va̱yam |
agne̍ | hira̍ṇya-sandṛśaḥ ||6.016.38||

6.016.39a ya u̱gra i̍va śarya̱hā ti̱gmaśṛ̍ṅgo̱ na vaṁsa̍gaḥ |
6.016.39c agne̱ puro̍ ru̱roji̍tha ||

yaḥ | u̱graḥ-i̍va | śa̱rya̱-hā | ti̱gma-śṛ̍ṅgaḥ | na | vaṁsa̍-gaḥ |
agne̍ | pura̍ḥ | ru̱roji̍tha ||6.016.39||

6.016.40a ā yaṁ haste̱ na khā̱dina̱ṁ śiśu̍ṁ jā̱taṁ na bibhra̍ti |
6.016.40c vi̱śām a̱gniṁ sva̍dhva̱ram ||

ā | yam | haste̍ | na | khā̱dina̍m | śiśu̍m | jā̱tam | na | bibhra̍ti |
vi̱śām | a̱gnim | su̱-a̱dhva̱ram ||6.016.40||

6.016.41a pra de̱vaṁ de̱vavī̍taye̱ bhara̍tā vasu̱vitta̍mam |
6.016.41c ā sve yonau̱ ni ṣī̍datu ||

pra | de̱vam | de̱va-vī̍taye | bhara̍ta | va̱su̱vit-ta̍mam |
ā | sve | yonau̍ | ni | sī̱da̱tu̱ ||6.016.41||

6.016.42a ā jā̱taṁ jā̱tave̍dasi pri̱yaṁ śi̍śī̱tāti̍thim |
6.016.42c syo̱na ā gṛ̱hapa̍tim ||

ā | jā̱tam | jā̱ta-ve̍dasi | pri̱yam | śi̱śī̱ta̱ | ati̍thim |
syo̱ne | ā | gṛ̱ha-pa̍tim ||6.016.42||

6.016.43a agne̍ yu̱kṣvā hi ye tavāśvā̍so deva sā̱dhava̍ḥ |
6.016.43c ara̱ṁ vaha̍nti ma̱nyave̍ ||

agne̍ | yu̱kṣva | hi | ye | tava̍ | aśvā̍saḥ | de̱va̱ | sā̱dhava̍ḥ |
ara̍m | vaha̍nti | ma̱nyave̍ ||6.016.43||

6.016.44a acchā̍ no yā̱hy ā va̍hā̱bhi prayā̍ṁsi vī̱taye̍ |
6.016.44c ā de̱vān soma̍pītaye ||

accha̍ | na̱ḥ | yā̱hi̱ | ā | va̱ha̱ | a̱bhi | prayā̍ṁsi | vī̱taye̍ |
ā | de̱vān | soma̍-pītaye ||6.016.44||

6.016.45a ud a̍gne bhārata dyu̱mad aja̍sreṇa̱ davi̍dyutat |
6.016.45c śocā̱ vi bhā̍hy ajara ||

ū | a̱gne̱ | bhā̱ra̱ta̱ | dyu̱-mat | aja̍sreṇa | davi̍dyutat |
śoca̍ | vi | bhā̱hi̱ | a̱ja̱ra̱ ||6.016.45||

6.016.46a vī̱tī yo de̱vam marto̍ duva̱syed a̱gnim ī̍ḻītādhva̱re ha̱viṣmā̍n |
6.016.46c hotā̍raṁ satya̱yaja̱ṁ roda̍syor uttā̱naha̍sto̱ nama̱sā vi̍vāset ||

vī̱tī | yaḥ | de̱vam | marta̍ḥ | du̱va̱syet | a̱gnim | ī̱ḻī̱ta̱ | a̱dhva̱re | ha̱viṣmā̍n |
hotā̍ram | sa̱tya̱-yaja̍m | roda̍syoḥ | u̱ttā̱na-ha̍staḥ | nama̍sā | ā | vi̱vā̱se̱t ||6.016.46||

6.016.47a ā te̍ agna ṛ̱cā ha̱vir hṛ̱dā ta̱ṣṭam bha̍rāmasi |
6.016.47c te te̍ bhavantū̱kṣaṇa̍ ṛṣa̱bhāso̍ va̱śā u̱ta ||

ā | te̱ | a̱gne̱ | ṛ̱cā | ha̱viḥ | hṛ̱dā | ta̱ṣṭam | bha̱rā̱ma̱si̱ |
te | te̱ | bha̱va̱ntu̱ | u̱kṣaṇa̍ḥ | ṛ̱ṣa̱bhāsa̍ḥ | va̱śāḥ | u̱ta ||6.016.47||

6.016.48a a̱gniṁ de̱vāso̍ agri̱yam i̱ndhate̍ vṛtra̱hanta̍mam |
6.016.48c yenā̱ vasū̱ny ābhṛ̍tā tṛ̱ḻhā rakṣā̍ṁsi vā̱jinā̍ ||

a̱gnim | de̱vāsa̍ḥ | a̱gri̱yam | i̱ndhate̍ | vṛ̱tra̱han-ta̍mam |
yena̍ | vasū̍ni | ā-bhṛ̍tā | tṛ̱ḻhā | rakṣā̍ṁsi | vā̱jinā̍ ||6.016.48||


6.017.01a pibā̱ soma̍m a̱bhi yam u̍gra̱ tarda̍ ū̱rvaṁ gavya̱m mahi̍ gṛṇā̱na i̍ndra |
6.017.01c vi yo dhṛ̍ṣṇo̱ vadhi̍ṣo vajrahasta̱ viśvā̍ vṛ̱tram a̍mi̱triyā̱ śavo̍bhiḥ ||

piba̍ | soma̍m | a̱bhi | yam | u̱gra̱ | tarda̍ḥ | ū̱rvam | gavya̍m | mahi̍ | gṛ̱ṇā̱naḥ | i̱ndra̱ |
vi | yaḥ | dhṛ̱ṣṇo̱ iti̍ | vadhi̍ṣaḥ | va̱jra̱-ha̱sta̱ | viśvā̍ | vṛ̱tram | a̱mi̱triyā̍ | śava̍ḥ-bhiḥ ||6.017.01||

6.017.02a sa ī̍m pāhi̱ ya ṛ̍jī̱ṣī taru̍tro̱ yaḥ śipra̍vān vṛṣa̱bho yo ma̍tī̱nām |
6.017.02c yo go̍tra̱bhid va̍jra̱bhṛd yo ha̍ri̱ṣṭhāḥ sa i̍ndra ci̱trām̐ a̱bhi tṛ̍ndhi̱ vājā̍n ||

saḥ | ī̱m | pā̱hi̱ | yaḥ | ṛ̱jī̱ṣī | taru̍traḥ | yaḥ | śipra̍-vān | vṛ̱ṣa̱bhaḥ | yaḥ | ma̱tī̱nām |
yaḥ | go̱tra̱-bhit | va̱jra̱-bhṛt | yaḥ | ha̱ri̱-sthāḥ | saḥ | i̱ndra̱ | ci̱trān | a̱bhi | tṛ̱ndhi̱ | vājā̍n ||6.017.02||

6.017.03a e̱vā pā̍hi pra̱tnathā̱ manda̍tu tvā śru̱dhi brahma̍ vāvṛ̱dhasvo̱ta gī̱rbhiḥ |
6.017.03c ā̱viḥ sūrya̍ṁ kṛṇu̱hi pī̍pi̱hīṣo̍ ja̱hi śatrū̍m̐r a̱bhi gā i̍ndra tṛndhi ||

e̱va | pā̱hi̱ | pra̱tna-thā̍ | manda̍tu | tvā̱ | śru̱dhi | brahma̍ | va̱vṛ̱dhasva̍ | u̱ta | gī̱ḥ-bhiḥ |
ā̱viḥ | sūrya̍m | kṛ̱ṇu̱hi | pī̱pi̱hi | iṣa̍ḥ | ja̱hi | śatrū̍n | a̱bhi | gāḥ | i̱ndra̱ | tṛ̱ndhi̱ ||6.017.03||

6.017.04a te tvā̱ madā̍ bṛ̱had i̍ndra svadhāva i̱me pī̱tā u̍kṣayanta dyu̱manta̍m |
6.017.04c ma̱hām anū̍naṁ ta̱vasa̱ṁ vibhū̍tim matsa̱rāso̍ jarhṛṣanta pra̱sāha̍m ||

te | tvā̱ | madā̍ḥ | bṛ̱hat | i̱ndra̱ | sva̱dhā̱-va̱ḥ | i̱me | pī̱tāḥ | u̱kṣa̱ya̱nta̱ | dyu̱-manta̍m |
ma̱hām | anū̍nam | ta̱vasa̍m | vi-bhū̍tim | ma̱tsa̱rāsa̍ḥ | ja̱rhṛ̱ṣa̱nta̱ | pra̱-sāha̍m ||6.017.04||

6.017.05a yebhi̱ḥ sūrya̍m u̱ṣasa̍m mandasā̱no 'vā̍sa̱yo 'pa̍ dṛ̱ḻhāni̱ dardra̍t |
6.017.05c ma̱hām adri̱m pari̱ gā i̍ndra̱ santa̍ṁ nu̱tthā acyu̍ta̱ṁ sada̍sa̱s pari̱ svāt ||

yebhi̍ḥ | sūrya̍m | u̱ṣasa̍m | ma̱nda̱sā̱naḥ | avā̍sayaḥ | apa̍ | dṛ̱ḻhāni̍ | dardra̍t |
ma̱hām | adri̍m | pari̍ | gāḥ | i̱ndra̱ | santa̍m | nu̱tthāḥ | acyu̍tam | sada̍saḥ | pari̍ | svāt ||6.017.05||

6.017.06a tava̱ kratvā̱ tava̱ tad da̱ṁsanā̍bhir ā̱māsu̍ pa̱kvaṁ śacyā̱ ni dī̍dhaḥ |
6.017.06c aurṇo̱r dura̍ u̱sriyā̍bhyo̱ vi dṛ̱ḻhod ū̱rvād gā a̍sṛjo̱ aṅgi̍rasvān ||

tava̍ | kratvā̍ | tava̍ | tat | da̱ṁsanā̍bhiḥ | ā̱māsu̍ | pa̱kvam | śacyā̍ | ni | dī̱dha̱riti̍ dīdhaḥ |
aurṇo̍ḥ | dura̍ḥ | u̱sriyā̍bhyaḥ | vi | dṛ̱ḻhā | ut | ū̱rvāt | gāḥ | a̱sṛ̱ja̱ḥ | aṅgi̍rasvān ||6.017.06||

6.017.07a pa̱prātha̱ kṣām mahi̱ daṁso̱ vy u1̱̍rvīm upa̱ dyām ṛ̱ṣvo bṛ̱had i̍ndra stabhāyaḥ |
6.017.07c adhā̍rayo̱ roda̍sī de̱vapu̍tre pra̱tne mā̱tarā̍ ya̱hvī ṛ̱tasya̍ ||

pa̱prātha̍ | kṣām | mahi̍ | daṁsa̍ḥ | vi | u̱rvīm | upa̍ | dyām | ṛ̱ṣvaḥ | bṛ̱hat | i̱ndra̱ | sta̱bhā̱ya̱ḥ |
adhā̍rayaḥ | roda̍sī̱ iti̍ | de̱vapu̍tre̱ iti̍ de̱va-pu̍tre | pra̱tne iti̍ | mā̱tarā̍ | ya̱hvī iti̍ | ṛ̱tasya̍ ||6.017.07||

6.017.08a adha̍ tvā̱ viśve̍ pu̱ra i̍ndra de̱vā eka̍ṁ ta̱vasa̍ṁ dadhire̱ bharā̍ya |
6.017.08c ade̍vo̱ yad a̱bhy auhi̍ṣṭa de̱vān sva̍rṣātā vṛṇata̱ indra̱m atra̍ ||

adha̍ | tvā̱ | viśve̍ | pu̱raḥ | i̱ndra̱ | de̱vāḥ | eka̍m | ta̱vasa̍m | da̱dhi̱re̱ | bharā̍ya |
ade̍vaḥ | yat | a̱bhi | auhi̍ṣṭa | de̱vān | sva̍ḥ-sātā | vṛ̱ṇa̱te̱ | indra̍m | atra̍ ||6.017.08||

6.017.09a adha̱ dyauś ci̍t te̱ apa̱ sā nu vajrā̍d dvi̱tāna̍mad bhi̱yasā̱ svasya̍ ma̱nyoḥ |
6.017.09c ahi̱ṁ yad indro̍ a̱bhy oha̍sāna̱ṁ ni ci̍d vi̱śvāyu̍ḥ śa̱yathe̍ ja̱ghāna̍ ||

adha̍ | dyauḥ | ci̱t | te̱ | apa̍ | sā | nu | vajrā̍t | dvi̱tā | a̱na̱ma̱t | bhi̱yasā̍ | svasya̍ | ma̱nyoḥ |
ahi̍m | yat | indra̍ḥ | a̱bhi | oha̍sānam | ni | ci̱t | vi̱śva-ā̍yuḥ | śa̱yathe̍ | ja̱ghāna̍ ||6.017.09||

6.017.10a adha̱ tvaṣṭā̍ te ma̱ha u̍gra̱ vajra̍ṁ sa̱hasra̍bhṛṣṭiṁ vavṛtac cha̱tāśri̍m |
6.017.10c nikā̍mam a̱rama̍ṇasa̱ṁ yena̱ nava̍nta̱m ahi̱ṁ sam pi̍ṇag ṛjīṣin ||

adha̍ | tvaṣṭā̍ | te̱ | ma̱haḥ | u̱gra̱ | vajra̍m | sa̱hasra̍-bhṛṣṭim | va̱vṛ̱ta̱t | śa̱ta-a̍śrim |
ni-kā̍mam | a̱ra-ma̍nasam | yena̍ | nava̍ntam | ahi̍m | sam | pi̱ṇa̱k | ṛ̱jī̱ṣi̱n ||6.017.10||

6.017.11a vardhā̱n yaṁ viśve̍ ma̱ruta̍ḥ sa̱joṣā̱ḥ paca̍c cha̱tam ma̍hi̱ṣām̐ i̍ndra̱ tubhya̍m |
6.017.11c pū̱ṣā viṣṇu̱s trīṇi̱ sarā̍ṁsi dhāvan vṛtra̱haṇa̍m madi̱ram a̱ṁśum a̍smai ||

vardhā̍n | yam | viśve̍ | ma̱ruta̍ḥ | sa̱-joṣā̍ḥ | paca̍t | śa̱tam | ma̱hi̱ṣān | i̱ndra̱ | tubhya̍m |
pū̱ṣā | viṣṇu̍ḥ | trīṇi̍ | sarā̍ṁsi | dhā̱va̱n | vṛ̱tra̱-hana̍m | ma̱di̱ram | a̱ṁśum | a̱smai̱ ||6.017.11||

6.017.12a ā kṣodo̱ mahi̍ vṛ̱taṁ na̱dīnā̱m pari̍ṣṭhitam asṛja ū̱rmim a̱pām |
6.017.12c tāsā̱m anu̍ pra̱vata̍ indra̱ panthā̱m prārda̍yo̱ nīcī̍r a̱pasa̍ḥ samu̱dram ||

ā | kṣoda̍ḥ | mahi̍ | vṛ̱tam | na̱dīnā̍m | pari̍-sthitam | a̱sṛ̱ja̱ḥ | ū̱rmim | a̱pām |
tāsā̍m | anu̍ | pra̱-vata̍ḥ | i̱ndra̱ | panthā̍m | pra | ā̱rda̱ya̱ḥ | nīcī̍ḥ | a̱pasa̍ḥ | sa̱mu̱dram ||6.017.12||

6.017.13a e̱vā tā viśvā̍ cakṛ̱vāṁsa̱m indra̍m ma̱hām u̱gram a̍ju̱ryaṁ sa̍ho̱dām |
6.017.13c su̱vīra̍ṁ tvā svāyu̱dhaṁ su̱vajra̱m ā brahma̱ navya̱m ava̍se vavṛtyāt ||

e̱va | tā | viśvā̍ | ca̱kṛ̱-vāṁsa̍m | indra̍m | ma̱hām | u̱gram | a̱ju̱ryam | sa̱ha̱ḥ-dām |
su̱-vīra̍m | tvā̱ | su̱-ā̱yu̱dham | su̱-vajra̍m | ā | brahma̍ | navya̍m | ava̍se | va̱vṛ̱tyā̱t ||6.017.13||

6.017.14a sa no̱ vājā̍ya̱ śrava̍sa i̱ṣe ca̍ rā̱ye dhe̍hi dyu̱mata̍ indra̱ viprā̍n |
6.017.14c bha̱radvā̍je nṛ̱vata̍ indra sū̱rīn di̱vi ca̍ smaidhi̱ pārye̍ na indra ||

saḥ | na̱ḥ | vājā̍ya | śrava̍se | i̱ṣe | ca̱ | rā̱ye | dhe̱hi̱ | dyu̱-mata̍ḥ | i̱ndra̱ | viprā̍n |
bha̱rat-vā̍je | nṛ̱-vata̍ḥ | i̱ndra̱ | sū̱rīn | di̱vi | ca̱ | sma̱ | e̱dhi̱ | pārye̍ | na̱ḥ | i̱ndra̱ ||6.017.14||

6.017.15a a̱yā vāja̍ṁ de̱vahi̍taṁ sanema̱ made̍ma śa̱tahi̍māḥ su̱vīrā̍ḥ ||

a̱yā | vāja̍m | de̱va-hi̍tam | sa̱ne̱ma̱ | made̍ma | śa̱ta-hi̍māḥ | su̱-vīrā̍ḥ ||6.017.15||


6.018.01a tam u̍ ṣṭuhi̱ yo a̱bhibhū̍tyojā va̱nvann avā̍taḥ puruhū̱ta indra̍ḥ |
6.018.01c aṣā̍ḻham u̱graṁ saha̍mānam ā̱bhir gī̱rbhir va̍rdha vṛṣa̱bhaṁ ca̍rṣaṇī̱nām ||

tam | ū̱m̐ iti̍ | stu̱hi̱ | yaḥ | a̱bhibhū̍ti-ojāḥ | va̱nvan | avā̍taḥ | pu̱ru̱-hū̱taḥ | indra̍ḥ |
aṣā̍ḻham | u̱gram | saha̍mānam | ā̱bhiḥ | gī̱ḥ-bhiḥ | va̱rdha̱ | vṛ̱ṣa̱bham | ca̱rṣa̱ṇī̱nām ||6.018.01||

6.018.02a sa yu̱dhmaḥ satvā̍ khaja̱kṛt sa̱madvā̍ tuvimra̱kṣo na̍danu̱mām̐ ṛ̍jī̱ṣī |
6.018.02c bṛ̱hadre̍ṇu̱ś cyava̍no̱ mānu̍ṣīṇā̱m eka̍ḥ kṛṣṭī̱nām a̍bhavat sa̱hāvā̍ ||

saḥ | yu̱dhmaḥ | satvā̍ | kha̱ja̱-kṛt | sa̱mat-vā̍ | tu̱vi̱-mra̱kṣaḥ | na̱da̱nu̱-mān | ṛ̱jī̱ṣī |
bṛ̱hat-re̍ṇuḥ | cyava̍na̱ḥ | mānu̍ṣīṇām | eka̍ḥ | kṛ̱ṣṭī̱nām | a̱bha̱va̱t | sa̱ha-vā̍ ||6.018.02||

6.018.03a tvaṁ ha̱ nu tyad a̍damāyo̱ dasyū̱m̐r eka̍ḥ kṛ̱ṣṭīr a̍vano̱r āryā̍ya |
6.018.03c asti̍ svi̱n nu vī̱rya1̱̍ṁ tat ta̍ indra̱ na svi̍d asti̱ tad ṛ̍tu̱thā vi vo̍caḥ ||

tvam | ha̱ | nu | tyat | a̱da̱ma̱ya̱ḥ | dasyū̍n | eka̍ḥ | kṛ̱ṣṭīḥ | a̱va̱no̱ḥ | āryā̍ya |
asti̍ | svi̱t | nu | vī̱rya̍m | tat | te̱ | i̱ndra̱ | na | svi̍t | a̱sti̱ | tat | ṛ̱tu̱-thā | vi | vo̱ca̱ḥ ||6.018.03||

6.018.04a sad id dhi te̍ tuvijā̱tasya̱ manye̱ saha̍ḥ sahiṣṭha tura̱tas tu̱rasya̍ |
6.018.04c u̱gram u̱grasya̍ ta̱vasa̱s tavī̱yo 'ra̍dhrasya radhra̱turo̍ babhūva ||

sat | it | hi | te̱ | tu̱vi̱-jā̱tasya̍ | manye̍ | saha̍ḥ | sa̱hi̱ṣṭha̱ | tu̱ra̱taḥ | tu̱rasya̍ |
u̱gram | u̱grasya̍ | ta̱vasa̍ḥ | tavī̍yaḥ | ara̍dhrasya | ra̱dhra̱-tura̍ḥ | ba̱bhū̱va̱ ||6.018.04||

6.018.05a tan na̍ḥ pra̱tnaṁ sa̱khyam a̍stu yu̱ṣme i̱tthā vada̍dbhir va̱lam aṅgi̍robhiḥ |
6.018.05c hann a̍cyutacyud dasme̱ṣaya̍ntam ṛ̱ṇoḥ puro̱ vi duro̍ asya̱ viśvā̍ḥ ||

tat | na̱ḥ | pra̱tnam | sa̱khyam | a̱stu̱ | yu̱ṣme iti̍ | i̱tthā | vada̍t-bhiḥ | va̱lam | aṅgi̍raḥ-bhiḥ |
han | a̱cyu̱ta̱-cyu̱t | da̱sma̱ | i̱ṣaya̍ntam | ṛ̱ṇoḥ | pura̍ḥ | vi | dura̍ḥ | a̱sya̱ | viśvā̍ḥ ||6.018.05||

6.018.06a sa hi dhī̱bhir havyo̱ asty u̱gra ī̍śāna̱kṛn ma̍ha̱ti vṛ̍tra̱tūrye̍ |
6.018.06c sa to̱kasā̍tā̱ tana̍ye̱ sa va̱jrī vi̍tanta̱sāyyo̍ abhavat sa̱matsu̍ ||

saḥ | hi | dhī̱bhiḥ | havya̍ḥ | asti̍ | u̱graḥ | ī̱śā̱na̱-kṛt | ma̱ha̱ti | vṛ̱tra̱-tūrye̍ |
saḥ | to̱ka-sā̍tā | tana̍ye | saḥ | va̱jrī | vi̱ta̱nta̱sāyya̍ḥ | a̱bha̱va̱t | sa̱mat-su̍ ||6.018.06||

6.018.07a sa ma̱jmanā̱ jani̍ma̱ mānu̍ṣāṇā̱m ama̍rtyena̱ nāmnāti̱ pra sa̍rsre |
6.018.07c sa dyu̱mnena̱ sa śava̍so̱ta rā̱yā sa vī̱rye̍ṇa̱ nṛta̍ma̱ḥ samo̍kāḥ ||

saḥ | ma̱jmanā̍ | jani̍ma | mānu̍ṣāṇām | ama̍rtyena | nāmnā̍ | ati̍ | pra | sa̱rsre̱ |
saḥ | dyu̱mnena̍ | saḥ | śava̍sā | u̱ta | rā̱yā | saḥ | vī̱rye̍ṇa | nṛ-ta̍maḥ | sam-o̍kāḥ ||6.018.07||

6.018.08a sa yo na mu̱he na mithū̱ jano̱ bhūt su̱mantu̍nāmā̱ cumu̍ri̱ṁ dhuni̍ṁ ca |
6.018.08c vṛ̱ṇak pipru̱ṁ śamba̍ra̱ṁ śuṣṇa̱m indra̍ḥ pu̱rāṁ cyau̱tnāya̍ śa̱yathā̍ya̱ nū ci̍t ||

saḥ | yaḥ | na | mu̱he | na | mithu̍ | jana̍ḥ | bhūt | su̱mantu̍-nāmā | cumu̍rim | dhuni̍m | ca̱ |
vṛ̱ṇak | pipru̍m | śamba̍ram | śuṣṇa̍m | indra̍ḥ | pu̱rām | cyau̱tnāya̍ | śa̱yathā̍ya | nu | ci̱t ||6.018.08||

6.018.09a u̱dāva̍tā̱ tvakṣa̍sā̱ panya̍sā ca vṛtra̱hatyā̍ya̱ ratha̍m indra tiṣṭha |
6.018.09c dhi̱ṣva vajra̱ṁ hasta̱ ā da̍kṣiṇa̱trābhi pra ma̍nda purudatra mā̱yāḥ ||

u̱t-ava̍tā | tvakṣa̍sā | panya̍sā | ca̱ | vṛ̱tra̱-hatyā̍ya | ratha̍m | i̱ndra̱ | ti̱ṣṭha̱ |
dhi̱ṣva | vajra̍m | haste̍ | ā | da̱kṣi̱ṇa̱-trā | a̱bhi | pra | ma̱nda̱ | pu̱ru̱-da̱tra̱ | mā̱yāḥ ||6.018.09||

6.018.10a a̱gnir na śuṣka̱ṁ vana̍m indra he̱tī rakṣo̱ ni dha̍kṣy a̱śani̱r na bhī̱mā |
6.018.10c ga̱mbhī̱raya̍ ṛ̱ṣvayā̱ yo ru̱rojādhvā̍nayad duri̱tā da̱mbhaya̍c ca ||

a̱gniḥ | na | śuṣka̍m | vana̍m | i̱ndra̱ | he̱tī | rakṣa̍ḥ | ni | dha̱kṣi̱ | a̱śani̍ḥ | na | bhī̱mā |
ga̱mbhī̱rayā̍ | ṛ̱ṣvayā̍ | yaḥ | ru̱roja̍ | adhva̍nayat | du̱ḥ-i̱tā | da̱mbhaya̍t | ca̱ ||6.018.10||

6.018.11a ā sa̱hasra̍m pa̱thibhi̍r indra rā̱yā tuvi̍dyumna tuvi̱vāje̍bhir a̱rvāk |
6.018.11c yā̱hi sū̍no sahaso̱ yasya̱ nū ci̱d ade̍va̱ īśe̍ puruhūta̱ yoto̍ḥ ||

ā | sa̱hasra̍m | pa̱thi-bhi̍ḥ | i̱ndra̱ | rā̱yā | tuvi̍-dyumna | tu̱vi̱-vāje̍bhiḥ | a̱rvāk |
yā̱hi | sū̱no̱ iti̍ | sa̱ha̱sa̱ḥ | yasya̍ | nu | ci̱t | ade̍vaḥ | īśe̍ | pu̱ru̱-hū̱ta̱ | yoto̍ḥ ||6.018.11||

6.018.12a pra tu̍vidyu̱mnasya̱ sthavi̍rasya̱ ghṛṣve̍r di̱vo ra̍rapśe mahi̱mā pṛ̍thi̱vyāḥ |
6.018.12c nāsya̱ śatru̱r na pra̍ti̱māna̍m asti̱ na pra̍ti̱ṣṭhiḥ pu̍rumā̱yasya̱ sahyo̍ḥ ||

pra | tu̱vi̱-dyu̱mnasya̍ | sthavi̍rasya | ghṛṣve̍ḥ | di̱vaḥ | ra̱ra̱pśe̱ | ma̱hi̱mā | pṛ̱thi̱vyāḥ |
na | a̱sya̱ | śatru̍ḥ | na | pra̱ti̱-māna̍m | a̱sti̱ | na | pra̱ti̱-sthiḥ | pu̱ru̱-mā̱yasya̍ | sahyo̍ḥ ||6.018.12||

6.018.13a pra tat te̍ a̱dyā kara̍ṇaṁ kṛ̱tam bhū̱t kutsa̱ṁ yad ā̱yum a̍tithi̱gvam a̍smai |
6.018.13c pu̱rū sa̱hasrā̱ ni śi̍śā a̱bhi kṣām ut tūrva̍yāṇaṁ dhṛṣa̱tā ni̍netha ||

pra | tat | te̱ | a̱dya | kara̍ṇam | kṛ̱tam | bhū̱t | kutsa̍m | yat | ā̱yum | a̱ti̱thi̱-gvam | a̱smai̱ |
pu̱ru | sa̱hasrā̍ | ni | śi̱śā̱ḥ | a̱bhi | kṣām | ut | tūrva̍yāṇam | dhṛ̱ṣa̱tā | ni̱ne̱tha̱ ||6.018.13||

6.018.14a anu̱ tvāhi̍ghne̱ adha̍ deva de̱vā mada̱n viśve̍ ka̱vita̍maṁ kavī̱nām |
6.018.14c karo̱ yatra̱ vari̍vo bādhi̱tāya̍ di̱ve janā̍ya ta̱nve̍ gṛṇā̱naḥ ||

anu̍ | tvā̱ | ahi̍-ghne | adha̍ | de̱va̱ | de̱vāḥ | mada̍n | viśve̍ | ka̱vi-ta̍mam | ka̱vī̱nām |
kara̍ḥ | yatra̍ | vari̍vaḥ | bā̱dhi̱tāya̍ | di̱ve | janā̍ya | ta̱nve̍ | gṛ̱ṇā̱naḥ ||6.018.14||

6.018.15a anu̱ dyāvā̍pṛthi̱vī tat ta̱ ojo 'ma̍rtyā jihata indra de̱vāḥ |
6.018.15c kṛ̱ṣvā kṛ̍tno̱ akṛ̍ta̱ṁ yat te̱ asty u̱kthaṁ navī̍yo janayasva ya̱jñaiḥ ||

anu̍ | dyāvā̍pṛthi̱vī iti̍ | tat | te̱ | oja̍ḥ | ama̍rtyāḥ | ji̱ha̱te̱ | i̱ndra̱ | de̱vāḥ |
kṛ̱ṣva | kṛ̱tno̱ iti̍ | akṛ̍tam | yat | te̱ | asti̍ | u̱ktham | navī̍yaḥ | ja̱na̱ya̱sva̱ | ya̱jñaiḥ ||6.018.15||


6.019.01a ma̱hām̐ indro̍ nṛ̱vad ā ca̍rṣaṇi̱prā u̱ta dvi̱barhā̍ ami̱naḥ saho̍bhiḥ |
6.019.01c a̱sma̱drya̍g vāvṛdhe vī̱ryā̍yo̱ruḥ pṛ̱thuḥ sukṛ̍taḥ ka̱rtṛbhi̍r bhūt ||

ma̱hān | indra̍ḥ | nṛ̱-vat | ā | ca̱rṣa̱ṇi̱-prāḥ | u̱ta | dvi̱-barhā̍ḥ | a̱mi̱naḥ | saha̍ḥ-bhiḥ |
a̱sma̱drya̍k | va̱vṛ̱dhe̱ | vī̱ryā̍ya | u̱ruḥ | pṛ̱thuḥ | su-kṛ̍taḥ | ka̱rtṛ-bhi̍ḥ | bhū̱t ||6.019.01||

6.019.02a indra̍m e̱va dhi̱ṣaṇā̍ sā̱taye̍ dhād bṛ̱hanta̍m ṛ̱ṣvam a̱jara̱ṁ yuvā̍nam |
6.019.02c aṣā̍ḻhena̱ śava̍sā śūśu̱vāṁsa̍ṁ sa̱dyaś ci̱d yo vā̍vṛ̱dhe asā̍mi ||

indra̍m | e̱va | dhi̱ṣaṇā̍ | sā̱taye̍ | dhā̱t | bṛ̱hanta̍m | ṛ̱ṣvam | a̱jara̍m | yuvā̍nam |
aṣā̍ḻhena | śava̍sā | śū̱su̱-vāṁsa̍m | sa̱dyaḥ | ci̱t | yaḥ | va̱vṛ̱dhe | asā̍mi ||6.019.02||

6.019.03a pṛ̱thū ka̱rasnā̍ bahu̱lā gabha̍stī asma̱drya1̱̍k sam mi̍mīhi̱ śravā̍ṁsi |
6.019.03c yū̱theva̍ pa̱śvaḥ pa̍śu̱pā damū̍nā a̱smām̐ i̍ndrā̱bhy ā va̍vṛtsvā̱jau ||

pṛ̱thū iti̍ | ka̱rasnā̍ | ba̱hu̱lā | gabha̍stī̱ iti̍ | a̱sma̱drya̍k | sam | mi̱mī̱hi̱ | śravā̍ṁsi |
yū̱thā-i̍va | pa̱śvaḥ | pa̱śu̱-pāḥ | damū̍nāḥ | a̱smān | i̱ndra̱ | a̱bhi | ā | va̱vṛ̱tsva̱ | ā̱jau ||6.019.03||

6.019.04a taṁ va̱ indra̍ṁ ca̱tina̍m asya śā̱kair i̱ha nū̱naṁ vā̍ja̱yanto̍ huvema |
6.019.04c yathā̍ ci̱t pūrve̍ jari̱tāra̍ ā̱sur ane̍dyā anava̱dyā ari̍ṣṭāḥ ||

tam | va̱ḥ | indra̍m | ca̱tina̍m | a̱sya̱ | śā̱kaiḥ | i̱ha | nū̱nam | vā̱ja̱-yanta̍ḥ | hu̱ve̱ma̱ |
yathā̍ | ci̱t | pūrve̍ | ja̱ri̱tāra̍ḥ | ā̱suḥ | ane̍dyāḥ | a̱na̱va̱dyāḥ | ari̍ṣṭāḥ ||6.019.04||

6.019.05a dhṛ̱tavra̍to dhana̱dāḥ soma̍vṛddha̱ḥ sa hi vā̱masya̱ vasu̍naḥ puru̱kṣuḥ |
6.019.05c saṁ ja̍gmire pa̱thyā̱3̱̍ rāyo̍ asmin samu̱dre na sindha̍vo̱ yāda̍mānāḥ ||

dhṛ̱ta-vra̍taḥ | dha̱na̱-dāḥ | soma̍-vṛddhaḥ | saḥ | hi | vā̱masya̍ | vasu̍naḥ | pu̱ru̱-kṣuḥ |
sam | ja̱gmi̱re̱ | pa̱thyā̍ḥ | rāya̍ḥ | a̱smi̱n | sa̱mu̱dre | na | sindha̍vaḥ | yāda̍mānāḥ ||6.019.05||

6.019.06a śavi̍ṣṭhaṁ na̱ ā bha̍ra śūra̱ śava̱ oji̍ṣṭha̱m ojo̍ abhibhūta u̱gram |
6.019.06c viśvā̍ dyu̱mnā vṛṣṇyā̱ mānu̍ṣāṇām a̱smabhya̍ṁ dā harivo māda̱yadhyai̍ ||

śavi̍ṣṭham | na̱ḥ | ā | bha̱ra̱ | śū̱ra̱ | śava̍ḥ | oji̍ṣṭham | oja̍ḥ | a̱bhi̱-bhū̱te̱ | u̱gram |
viśvā̍ | dyu̱mnā | vṛṣṇyā̍ | mānu̍ṣāṇām | a̱smabhya̍m | dā̱ḥ | ha̱ri̱-va̱ḥ | mā̱da̱yadhyai̍ ||6.019.06||

6.019.07a yas te̱ mada̍ḥ pṛtanā̱ṣāḻ amṛ̍dhra̱ indra̱ taṁ na̱ ā bha̍ra śūśu̱vāṁsa̍m |
6.019.07c yena̍ to̱kasya̱ tana̍yasya sā̱tau ma̍ṁsī̱mahi̍ jigī̱vāṁsa̱s tvotā̍ḥ ||

yaḥ | te̱ | mada̍ḥ | pṛ̱ta̱nā̱ṣāṭ | amṛ̍dhraḥ | indra̍ | tam | na̱ḥ | ā | bha̱ra̱ | śū̱śu̱-vāṁsa̍m |
yena̍ | to̱kasya̍ | tana̍yasya | sā̱tau | ma̱ṁsī̱mahi̍ | ji̱gī̱vāṁsa̍ḥ | tvā-ū̍tāḥ ||6.019.07||

6.019.08a ā no̍ bhara̱ vṛṣa̍ṇa̱ṁ śuṣma̍m indra dhana̱spṛta̍ṁ śūśu̱vāṁsa̍ṁ su̱dakṣa̍m |
6.019.08c yena̱ vaṁsā̍ma̱ pṛta̍nāsu̱ śatrū̱n tavo̱tibhi̍r u̱ta jā̱mīm̐r ajā̍mīn ||

ā | na̱ḥ | bha̱ra̱ | vṛṣa̍ṇam | śuṣma̍m | i̱ndra̱ | dha̱na̱-spṛta̍m | śū̱śu̱-vāṁsa̍m | su̱-dakṣa̍m |
yena̍ | vaṁsā̍ma | pṛta̍nāsu | śatrū̍n | tava̍ | ū̱ti-bhi̍ḥ | u̱ta | jā̱mīn | ajā̍mīn ||6.019.08||

6.019.09a ā te̱ śuṣmo̍ vṛṣa̱bha e̍tu pa̱ścād otta̱rād a̍dha̱rād ā pu̱rastā̍t |
6.019.09c ā vi̱śvato̍ a̱bhi sam e̍tv a̱rvāṅ indra̍ dyu̱mnaṁ sva̍rvad dhehy a̱sme ||

ā | te̱ | śuṣma̍ḥ | vṛ̱ṣa̱bhaḥ | e̱tu̱ | pa̱ścāt | ā | u̱tta̱rāt | a̱dha̱rāt | ā | pu̱rastā̍t |
ā | vi̱śvata̍ḥ | a̱bhi | sam | e̱tu̱ | a̱rvāṅ | indra̍ | dyu̱mnam | sva̍ḥ-vat | dhe̱hi̱ | a̱sme iti̍ ||6.019.09||

6.019.10a nṛ̱vat ta̍ indra̱ nṛta̍mābhir ū̱tī va̍ṁsī̱mahi̍ vā̱maṁ śroma̍tebhiḥ |
6.019.10c īkṣe̱ hi vasva̍ u̱bhaya̍sya rāja̱n dhā ratna̱m mahi̍ sthū̱ram bṛ̱hanta̍m ||

nṛ̱-vat | te̱ | i̱ndra̱ | nṛ-ta̍mābhiḥ | ū̱tī | va̱ṁsī̱mahi̍ | vā̱mam | śroma̍tebhiḥ |
īkṣe̍ | hi | vasva̍ḥ | u̱bhaya̍sya | rā̱ja̱n | dhāḥ | ratna̍m | mahi̍ | sthū̱ram | bṛ̱hanta̍m ||6.019.10||

6.019.11a ma̱rutva̍ntaṁ vṛṣa̱bhaṁ vā̍vṛdhā̱nam aka̍vāriṁ di̱vyaṁ śā̱sam indra̍m |
6.019.11c vi̱śvā̱sāha̱m ava̍se̱ nūta̍nāyo̱graṁ sa̍ho̱dām i̱ha taṁ hu̍vema ||

ma̱rutva̍ntam | vṛ̱ṣa̱bham | va̱vṛ̱dhā̱nam | aka̍va-arim | di̱vyam | śā̱sam | indra̍m |
vi̱śva̱-saha̍m | ava̍se | nūta̍nāya | u̱gram | sa̱ha̱ḥ-dām | i̱ha | tam | hu̱ve̱ma̱ ||6.019.11||

6.019.12a jana̍ṁ vajri̱n mahi̍ ci̱n manya̍mānam e̱bhyo nṛbhyo̍ randhayā̱ yeṣv asmi̍ |
6.019.12c adhā̱ hi tvā̍ pṛthi̱vyāṁ śūra̍sātau̱ havā̍mahe̱ tana̍ye̱ goṣv a̱psu ||

jana̍m | va̱jri̱n | mahi̍ | ci̱t | manya̍mānam | e̱bhyaḥ | nṛ-bhya̍ḥ | ra̱ndha̱ya̱ | yeṣu̍ | asmi̍ |
adha̍ | hi | tvā̱ | pṛ̱thi̱vyām | śūra̍-sātau | havā̍mahe | tana̍ye | goṣu̍ | a̱p-su ||6.019.12||

6.019.13a va̱yaṁ ta̍ e̱bhiḥ pu̍ruhūta sa̱khyaiḥ śatro̍ḥ-śatro̱r utta̍ra̱ it syā̍ma |
6.019.13c ghnanto̍ vṛ̱trāṇy u̱bhayā̍ni śūra rā̱yā ma̍dema bṛha̱tā tvotā̍ḥ ||

va̱yam | te̱ | e̱bhiḥ | pu̱ru̱-hū̱ta̱ | sa̱khyaiḥ | śatro̍ḥ-śatroḥ | ut-ta̍re | it | syā̱ma̱ |
ghnanta̍ḥ | vṛ̱trāṇi̍ | u̱bhayā̍ni | śū̱ra̱ | rā̱yā | ma̱de̱ma̱ | bṛ̱ha̱tā | tvā-ū̍tāḥ ||6.019.13||


6.020.01a dyaur na ya i̍ndrā̱bhi bhūmā̱ryas ta̱sthau ra̱yiḥ śava̍sā pṛ̱tsu janā̍n |
6.020.01c taṁ na̍ḥ sa̱hasra̍bharam urvarā̱sāṁ da̱ddhi sū̍no sahaso vṛtra̱tura̍m ||

dyauḥ | na | yaḥ | i̱ndra̱ | a̱bhi | bhūma̍ | a̱ryaḥ | ta̱sthau | ra̱yiḥ | śava̍sā | pṛ̱t-su | janā̍n |
tam | na̱ḥ | sa̱hasra̍-bharam | u̱rva̱rā̱-sām | da̱ddhi | sū̱no̱ iti̍ | sa̱ha̱sa̱ḥ | vṛ̱tra̱-tura̍m ||6.020.01||

6.020.02a di̱vo na tubhya̱m anv i̍ndra sa̱trāsu̱rya̍ṁ de̱vebhi̍r dhāyi̱ viśva̍m |
6.020.02c ahi̱ṁ yad vṛ̱tram a̱po va̍vri̱vāṁsa̱ṁ hann ṛ̍jīṣi̱n viṣṇu̍nā sacā̱naḥ ||

di̱vaḥ | na | tubhya̍m | anu̍ | i̱ndra̱ | sa̱trā | a̱su̱rya̍m | de̱vebhi̍ḥ | dhā̱yi̱ | viśva̍m |
ahi̍m | yat | vṛ̱tram | a̱paḥ | va̱vri̱-vāṁsa̍m | han | ṛ̱jī̱ṣi̱n | viṣṇu̍nā | sa̱cā̱naḥ ||6.020.02||

6.020.03a tūrva̱nn ojī̍yān ta̱vasa̱s tavī̍yān kṛ̱tabra̱hmendro̍ vṛ̱ddhama̍hāḥ |
6.020.03c rājā̍bhava̱n madhu̍naḥ so̱myasya̱ viśvā̍sā̱ṁ yat pu̱rāṁ da̱rtnum āva̍t ||

tūrva̍n | ojī̍yān | ta̱vasa̍ḥ | tavī̍yān | kṛ̱ta-bra̍hmā | indra̍ḥ | vṛ̱ddha-ma̍hāḥ |
rājā̍ | a̱bha̱va̱t | madhu̍naḥ | so̱myasya̍ | viśvā̍sām | yat | pu̱rām | da̱rtnum | āva̍t ||6.020.03||

6.020.04a śa̱tair a̍padran pa̱ṇaya̍ i̱ndrātra̱ daśo̍ṇaye ka̱vaye̱ 'rkasā̍tau |
6.020.04c va̱dhaiḥ śuṣṇa̍syā̱śuṣa̍sya mā̱yāḥ pi̱tvo nāri̍recī̱t kiṁ ca̱na pra ||

śa̱taiḥ | a̱pa̱dra̱n | pa̱ṇaya̍ḥ | i̱ndra̱ | atra̍ | daśa̍-oṇaye | ka̱vaye̍ | a̱rka-sā̍tau |
va̱dhaiḥ | śuṣṇa̍sya | a̱śuṣa̍sya | mā̱yāḥ | pi̱tvaḥ | na | a̱ri̱re̱cī̱t | kim | ca̱na | pra ||6.020.04||

6.020.05a ma̱ho dru̱ho apa̍ vi̱śvāyu̍ dhāyi̱ vajra̍sya̱ yat pata̍ne̱ pādi̱ śuṣṇa̍ḥ |
6.020.05c u̱ru ṣa sa̱ratha̱ṁ sāra̍thaye ka̱r indra̱ḥ kutsā̍ya̱ sūrya̍sya sā̱tau ||

ma̱haḥ | dru̱haḥ | apa̍ | vi̱śva-ā̍yu | dhā̱yi̱ | vajra̍sya | yat | pata̍ne | pādi̍ | śuṣṇa̍ḥ |
u̱ru | saḥ | sa̱-ratha̍m | sāra̍thaye | ka̱ḥ | indra̍ḥ | kutsā̍ya | sūrya̍sya | sā̱tau ||6.020.05||

6.020.06a pra śye̱no na ma̍di̱ram a̱ṁśum a̍smai̱ śiro̍ dā̱sasya̱ namu̍cer mathā̱yan |
6.020.06c prāva̱n namī̍ṁ sā̱pyaṁ sa̱santa̍m pṛ̱ṇag rā̱yā sam i̱ṣā saṁ sva̱sti ||

pra | śye̱naḥ | na | ma̱di̱ram | a̱ṁśum | a̱smai̱ | śira̍ḥ | dā̱sasya̍ | namu̍ceḥ | ma̱thā̱yan |
pra | ā̱va̱t | namī̍m | sā̱pyam | sa̱santa̍m | pṛ̱ṇak | rā̱yā | sam | i̱ṣā | sam | sva̱sti ||6.020.06||

6.020.07a vi pipro̱r ahi̍māyasya dṛ̱ḻhāḥ puro̍ vajri̱ñ chava̍sā̱ na da̍rdaḥ |
6.020.07c sudā̍ma̱n tad rekṇo̍ apramṛ̱ṣyam ṛ̱jiśva̍ne dā̱traṁ dā̱śuṣe̍ dāḥ ||

vi | pipro̍ḥ | ahi̍-māyasya | dṛ̱ḻhāḥ | pura̍ḥ | va̱jri̱n | śava̍sā | na | da̱rda̱riti̍ dardaḥ |
su-dā̍man | tat | rekṇa̍ḥ | a̱pra̱-mṛ̱ṣyam | ṛ̱jiśva̍ne | dā̱tram | dā̱śuṣe̍ | dā̱ḥ ||6.020.07||

6.020.08a sa ve̍ta̱suṁ daśa̍māya̱ṁ daśo̍ṇi̱ṁ tūtu̍ji̱m indra̍ḥ svabhi̱ṣṭisu̍mnaḥ |
6.020.08c ā tugra̱ṁ śaśva̱d ibha̱ṁ dyota̍nāya mā̱tur na sī̱m upa̍ sṛjā i̱yadhyai̍ ||

saḥ | ve̱ta̱sum | daśa̍-māyam | daśa̍-oṇim | tūtu̍jim | indra̍ḥ | sva̱bhi̱ṣṭi-su̍mnaḥ |
ā | tugra̍m | śaśva̍t | ibha̍m | dyota̍nāya | mā̱tuḥ | na | sī̱m | upa̍ | sṛ̱ja̱ | i̱yadhyai̍ ||6.020.08||

6.020.09a sa ī̱ṁ spṛdho̍ vanate̱ apra̍tīto̱ bibhra̱d vajra̍ṁ vṛtra̱haṇa̱ṁ gabha̍stau |
6.020.09c tiṣṭha̱d dharī̱ adhy aste̍va̱ garte̍ vaco̱yujā̍ vahata̱ indra̍m ṛ̱ṣvam ||

saḥ | ī̱m | spṛdha̍ḥ | va̱na̱te̱ | apra̍ti-itaḥ | bibhra̍t | vajra̍m | vṛ̱tra̱-hana̍m | gabha̍stau |
tiṣṭha̍t | harī̱ iti̍ | adhi̍ | astā̍-iva | garte̍ | va̱ca̱ḥ-yujā̍ | va̱ha̱ta̱ḥ | indra̍m | ṛ̱ṣvam ||6.020.09||

6.020.10a sa̱nema̱ te 'va̍sā̱ navya̍ indra̱ pra pū̱rava̍ḥ stavanta e̱nā ya̱jñaiḥ |
6.020.10c sa̱pta yat pura̱ḥ śarma̱ śāra̍dī̱r dard dhan dāsī̍ḥ puru̱kutsā̍ya̱ śikṣa̍n ||

sa̱nema̍ | te | ava̍sā | navya̍ḥ | i̱ndra̱ | pra | pū̱rava̍ḥ | sta̱va̱nte̱ | e̱nā | ya̱jñaiḥ |
sa̱pta | yat | pura̍ḥ | śarma̍ | śāra̍dīḥ | dart | han | dāsī̍ḥ | pu̱ru̱-kutsā̍ya | śikṣa̍n ||6.020.10||

6.020.11a tvaṁ vṛ̱dha i̍ndra pū̱rvyo bhū̍r variva̱syann u̱śane̍ kā̱vyāya̍ |
6.020.11c parā̱ nava̍vāstvam anu̱deya̍m ma̱he pi̱tre da̍dātha̱ svaṁ napā̍tam ||

tvam | vṛ̱dhaḥ | i̱ndra̱ | pū̱rvya̍ḥ | bhū̱ḥ | va̱ri̱va̱syan | u̱śane̍ | kā̱vyāya̍ |
parā̍ | nava̍-vāstvam | a̱nu̱-deya̍m | ma̱he | pi̱tre | da̱dā̱tha̱ | svam | napā̍tam ||6.020.11||

6.020.12a tvaṁ dhuni̍r indra̱ dhuni̍matīr ṛ̱ṇor a̱paḥ sī̱rā na srava̍ntīḥ |
6.020.12c pra yat sa̍mu̱dram ati̍ śūra̱ parṣi̍ pā̱rayā̍ tu̱rvaśa̱ṁ yadu̍ṁ sva̱sti ||

tvam | dhuni̍ḥ | i̱ndra̱ | dhuni̍-matīḥ | ṛ̱ṇoḥ | a̱paḥ | sī̱rāḥ | na | srava̍ntīḥ |
pra | yat | sa̱mu̱dram | ati̍ | śū̱ra̱ | parṣi̍ | pā̱raya̍ | tu̱rvaśa̍m | yadu̍m | sva̱sti ||6.020.12||

6.020.13a tava̍ ha̱ tyad i̍ndra̱ viśva̍m ā̱jau sa̱sto dhunī̱cumu̍rī̱ yā ha̱ siṣva̍p |
6.020.13c dī̱daya̱d it tubhya̱ṁ some̍bhiḥ su̱nvan da̱bhīti̍r i̱dhmabhṛ̍tiḥ pa̱kthy a1̱̍rkaiḥ ||

tava̍ | ha̱ | tyat | i̱ndra̱ | viśva̍m | ā̱jau | sa̱staḥ | dhunī̱cumu̍rī̱ iti̍ | yā | ha̱ | sisva̍p |
dī̱daya̍t | it | tubhya̍m | some̍bhiḥ | su̱nvan | da̱bhīti̍ḥ | i̱dhma-bhṛ̍tiḥ | pa̱kthī | a̱rkaiḥ ||6.020.13||


6.021.01a i̱mā u̍ tvā puru̱tama̍sya kā̱ror havya̍ṁ vīra̱ havyā̍ havante |
6.021.01c dhiyo̍ rathe̱ṣṭhām a̱jara̱ṁ navī̍yo ra̱yir vibhū̍tir īyate vaca̱syā ||

i̱māḥ | ū̱m̐ iti̍ | tvā̱ | pu̱ru̱-tama̍sya | kā̱roḥ | havya̍m | vī̱ra̱ | havyā̍ḥ | ha̱va̱nte̱ |
dhiya̍ḥ | ra̱the̱-sthām | a̱jara̍m | navī̍yaḥ | ra̱yiḥ | vi-bhū̍tiḥ | ī̱ya̱te̱ | va̱ca̱syā ||6.021.01||

6.021.02a tam u̍ stuṣa̱ indra̱ṁ yo vidā̍no̱ girvā̍hasaṁ gī̱rbhir ya̱jñavṛ̍ddham |
6.021.02c yasya̱ diva̱m ati̍ ma̱hnā pṛ̍thi̱vyāḥ pu̍rumā̱yasya̍ riri̱ce ma̍hi̱tvam ||

tam | ū̱m̐ iti̍ | stu̱ṣe̱ | indra̍m | yaḥ | vidā̍naḥ | girvā̍hasam | gī̱ḥ-bhiḥ | ya̱jña-vṛ̍ddham |
yasya̍ | diva̍m | ati̍ | ma̱hnā | pṛ̱thi̱vyāḥ | pu̱ru̱-mā̱yasya̍ | ri̱ri̱ce | ma̱hi̱-tvam ||6.021.02||

6.021.03a sa it tamo̍ 'vayu̱naṁ ta̍ta̱nvat sūrye̍ṇa va̱yuna̍vac cakāra |
6.021.03c ka̱dā te̱ martā̍ a̱mṛta̍sya̱ dhāmeya̍kṣanto̱ na mi̍nanti svadhāvaḥ ||

saḥ | it | tama̍ḥ | a̱va̱yu̱nam | ta̱ta̱nvat | sūrye̍ṇa | va̱yuna̍-vat | ca̱kā̱ra̱ |
ka̱dā | te̱ | martā̍ḥ | a̱mṛta̍sya | dhāma̍ | iya̍kṣantaḥ | na | mi̱na̱nti̱ | sva̱dhā̱-va̱ḥ ||6.021.03||

6.021.04a yas tā ca̱kāra̱ sa kuha̍ svi̱d indra̱ḥ kam ā jana̍ṁ carati̱ kāsu̍ vi̱kṣu |
6.021.04c kas te̍ ya̱jño mana̍se̱ śaṁ varā̍ya̱ ko a̱rka i̍ndra kata̱maḥ sa hotā̍ ||

yaḥ | tā | ca̱kāra̍ | saḥ | kuha̍ | svi̱t | indra̍ḥ | kam | ā | jana̍m | ca̱ra̱ti̱ | kāsu̍ | vi̱kṣu |
kaḥ | te̱ | ya̱jñaḥ | mana̍se | śam | varā̍ya | kaḥ | a̱rkaḥ | i̱ndra̱ | ka̱ta̱maḥ | saḥ | hotā̍ ||6.021.04||

6.021.05a i̱dā hi te̱ vevi̍ṣataḥ purā̱jāḥ pra̱tnāsa̍ ā̱suḥ pu̍rukṛ̱t sakhā̍yaḥ |
6.021.05c ye ma̍dhya̱māsa̍ u̱ta nūta̍nāsa u̱tāva̱masya̍ puruhūta bodhi ||

i̱dā | hi | te̱ | vevi̍ṣataḥ | pu̱rā̱-jāḥ | pra̱tnāsa̍ḥ | ā̱suḥ | pu̱ru̱-kṛ̱t | sakhā̍yaḥ |
ye | ma̱dya̱māsa̍ḥ | u̱ta | nūta̍nāsaḥ | u̱ta | a̱va̱masya̍ | pu̱ru̱-hū̱ta̱ | bo̱dhi̱ ||6.021.05||

6.021.06a tam pṛ̱cchanto 'va̍rāsa̱ḥ parā̍ṇi pra̱tnā ta̍ indra̱ śrutyānu̍ yemuḥ |
6.021.06c arcā̍masi vīra brahmavāho̱ yād e̱va vi̱dma tāt tvā̍ ma̱hānta̍m ||

tam | pṛ̱cchanta̍ḥ | ava̍rāsaḥ | parā̍ṇi | pra̱tnā | te̱ | i̱ndra̱ | śrutyā̍ | anu̍ | ye̱mu̱ḥ |
arcā̍masi | vī̱ra̱ | bra̱hma̱-vāha̍ḥ | yāt | e̱va | vi̱dma | tāt | tvā̱ | ma̱hānta̍m ||6.021.06||

6.021.07a a̱bhi tvā̱ pājo̍ ra̱kṣaso̱ vi ta̍sthe̱ mahi̍ jajñā̱nam a̱bhi tat su ti̍ṣṭha |
6.021.07c tava̍ pra̱tnena̱ yujye̍na̱ sakhyā̱ vajre̍ṇa dhṛṣṇo̱ apa̱ tā nu̍dasva ||

a̱bhi | tvā̱ | pāja̍ḥ | ra̱kṣasa̍ḥ | vi | ta̱sthe̱ | mahi̍ | ja̱jñā̱nam | a̱bhi | tat | su | ti̱ṣṭha̱ |
tava̍ | pra̱tnena̍ | yujye̍na | sakhyā̍ | vajre̍ṇa | dhṛ̱ṣṇo̱ iti̍ | apa̍ | tā | nu̱da̱sva̱ ||6.021.07||

6.021.08a sa tu śru̍dhīndra̱ nūta̍nasya brahmaṇya̱to vī̍ra kārudhāyaḥ |
6.021.08c tvaṁ hy ā̱3̱̍piḥ pra̱divi̍ pitṝ̱ṇāṁ śaśva̍d ba̱bhūtha̍ su̱hava̱ eṣṭau̍ ||

saḥ | tu | śru̱dhi̱ | i̱ndra̱ | nūta̍nasya | bra̱hma̱ṇya̱taḥ | vī̱ra̱ | kā̱ru̱-dhā̱ya̱ḥ |
tvam | hi | ā̱piḥ | pra̱-divi̍ | pi̱tṝ̱ṇām | śaśva̍t | ba̱bhūtha̍ | su̱-hava̍ḥ | ā-i̍ṣṭau ||6.021.08||

6.021.09a protaye̱ varu̍ṇam mi̱tram indra̍m ma̱ruta̍ḥ kṛ̱ṣvāva̍se no a̱dya |
6.021.09c pra pū̱ṣaṇa̱ṁ viṣṇu̍m a̱gnim pura̍ṁdhiṁ savi̱tāra̱m oṣa̍dhī̱ḥ parva̍tām̐ś ca ||

pra | ū̱taye̍ | varu̍ṇam | mi̱tram | indra̍m | ma̱ruta̍ḥ | kṛ̱ṣva̱ | ava̍se | na̱ḥ | a̱dya |
pra | pū̱ṣaṇa̍m | viṣṇu̍m | a̱gnim | pura̍m-dhi̍m | sa̱vi̱tāra̍m | oṣa̍dhīḥ | parva̍tān | ca̱ ||6.021.09||

6.021.10a i̱ma u̍ tvā puruśāka prayajyo jari̱tāro̍ a̱bhy a̍rcanty a̱rkaiḥ |
6.021.10c śru̱dhī hava̱m ā hu̍va̱to hu̍vā̱no na tvāvā̍m̐ a̱nyo a̍mṛta̱ tvad a̍sti ||

i̱me | ū̱m̐ iti̍ | tvā̱ | pu̱ru̱-śā̱ka̱ | pra̱ya̱jyo̱ iti̍ pra-yajyo | ja̱ri̱tāra̍ḥ | a̱bhi | a̱rca̱nti̱ | a̱rkaiḥ |
śru̱dhi | hava̍m | ā | hu̱va̱taḥ | hu̱vā̱naḥ | na | tvā-vā̍n | a̱nyaḥ | a̱mṛ̱ta̱ | tvat | a̱sti̱ ||6.021.10||

6.021.11a nū ma̱ ā vāca̱m upa̍ yāhi vi̱dvān viśve̍bhiḥ sūno sahaso̱ yaja̍traiḥ |
6.021.11c ye a̍gniji̱hvā ṛ̍ta̱sāpa̍ ā̱sur ye manu̍ṁ ca̱krur upa̍ra̱ṁ dasā̍ya ||

nu | me̱ | ā | vāca̍m | upa̍ | yā̱hi̱ | vi̱dvān | viśve̍bhiḥ | sū̱no̱ iti̍ | sa̱ha̱sa̱ḥ | yaja̍traiḥ |
ye | a̱gni̱-ji̱hvāḥ | ṛ̱ta̱-sāpa̍ḥ | ā̱suḥ | ye | manu̍m | ca̱kruḥ | upa̍ram | dasā̍ya ||6.021.11||

6.021.12a sa no̍ bodhi purae̱tā su̱geṣū̱ta du̱rgeṣu̍ pathi̱kṛd vidā̍naḥ |
6.021.12c ye aśra̍māsa u̱ravo̱ vahi̍ṣṭhā̱s tebhi̍r na indrā̱bhi va̍kṣi̱ vāja̍m ||

saḥ | na̱ḥ | bo̱dhi̱ | pu̱ra̱ḥ-e̱tā | su̱-geṣu̍ | u̱ta | du̱ḥ-geṣu̍ | pa̱thi̱-kṛt | vidā̍naḥ |
ye | aśra̍māsaḥ | u̱rava̍ḥ | vahi̍ṣṭhāḥ | tebhi̍ḥ | na̱ḥ | i̱ndra̍ | a̱bhi | va̱kṣi̱ | vāja̍m ||6.021.12||


6.022.01a ya eka̱ id dhavya̍ś carṣaṇī̱nām indra̱ṁ taṁ gī̱rbhir a̱bhy a̍rca ā̱bhiḥ |
6.022.01c yaḥ patya̍te vṛṣa̱bho vṛṣṇyā̍vān sa̱tyaḥ satvā̍ purumā̱yaḥ saha̍svān ||

yaḥ | eka̍ḥ | it | havya̍ḥ | ca̱rṣa̱ṇī̱nām | indra̍m | tam | gī̱ḥ-bhiḥ | a̱bhi | a̱rce̱ | ā̱bhiḥ |
yaḥ | patya̍te | vṛ̱ṣa̱bhaḥ | vṛṣṇya̍-vān | sa̱tyaḥ | satvā̍ | pu̱ru̱-mā̱yaḥ | saha̍svān ||6.022.01||

6.022.02a tam u̍ na̱ḥ pūrve̍ pi̱taro̱ nava̍gvāḥ sa̱pta viprā̍so a̱bhi vā̱jaya̍ntaḥ |
6.022.02c na̱kṣa̱ddā̱bhaṁ tatu̍rim parvate̱ṣṭhām adro̍ghavācam ma̱tibhi̱ḥ śavi̍ṣṭham ||

tam | ū̱m̐ iti̍ | na̱ḥ | pūrve̍ | pi̱tara̍ḥ | nava̍-gvāḥ | sa̱pta | viprā̍saḥ | a̱bhi | vā̱jaya̍ntaḥ |
na̱kṣa̱t-dā̱bham | tatu̍rim | pa̱rva̱te̱-sthām | adro̍gha-vācam | ma̱ti-bhi̍ḥ | śavi̍ṣṭham ||6.022.02||

6.022.03a tam ī̍maha̱ indra̍m asya rā̱yaḥ pu̍ru̱vīra̍sya nṛ̱vata̍ḥ puru̱kṣoḥ |
6.022.03c yo askṛ̍dhoyur a̱jara̱ḥ sva̍rvā̱n tam ā bha̍ra harivo māda̱yadhyai̍ ||

tam | ī̱ma̱he̱ | indra̍m | a̱sya̱ | rā̱yaḥ | pu̱ru̱-vīra̍sya | nṛ̱-vata̍ḥ | pu̱ru̱-kṣoḥ |
yaḥ | askṛ̍dhoyuḥ | a̱jara̍ḥ | sva̍ḥ-vān | tam | ā | bha̱ra̱ | ha̱ri̱-va̱ḥ | mā̱da̱yadhyai̍ ||6.022.03||

6.022.04a tan no̱ vi vo̍co̱ yadi̍ te pu̱rā ci̍j jari̱tāra̍ āna̱śuḥ su̱mnam i̍ndra |
6.022.04c kas te̍ bhā̱gaḥ kiṁ vayo̍ dudhra khidva̱ḥ puru̍hūta purūvaso 'sura̱ghnaḥ ||

tat | na̱ḥ | vi | vo̱ca̱ḥ | yadi̍ | te̱ | pu̱rā | ci̱t | ja̱ri̱tāra̍ḥ | ā̱na̱śuḥ | su̱mnam | i̱ndra̱ |
kaḥ | te̱ | bhā̱gaḥ | kim | vaya̍ḥ | du̱dhra̱ | khi̱dva̱ḥ | puru̍-hūta | pu̱ru̱va̱so̱ iti̍ puru-vaso | a̱su̱ra̱-ghnaḥ ||6.022.04||

6.022.05a tam pṛ̱cchantī̱ vajra̍hastaṁ rathe̱ṣṭhām indra̱ṁ vepī̱ vakva̍rī̱ yasya̱ nū gīḥ |
6.022.05c tu̱vi̱grā̱bhaṁ tu̍vikū̱rmiṁ ra̍bho̱dāṁ gā̱tum i̍ṣe̱ nakṣa̍te̱ tumra̱m accha̍ ||

tam | pṛ̱cchantī̍ | vajra̍-hastam | ra̱the̱-sthām | indra̍m | vepī̍ | vakva̍rī | yasya̍ | nu | gīḥ |
tu̱vi̱-grā̱bham | tu̱vi̱-kū̱rmim | ra̱bha̱ḥ-dām | gā̱tum | i̱ṣe̱ | nakṣa̍te | tumra̍m | accha̍ ||6.022.05||

6.022.06a a̱yā ha̱ tyam mā̱yayā̍ vāvṛdhā̱nam ma̍no̱juvā̍ svatava̱ḥ parva̍tena |
6.022.06c acyu̍tā cid vīḻi̱tā svo̍jo ru̱jo vi dṛ̱ḻhā dhṛ̍ṣa̱tā vi̍rapśin ||

a̱yā | ha̱ | tyam | mā̱yayā̍ | va̱vṛ̱dhā̱nam | ma̱na̱ḥ-juvā̍ | sva̱-ta̱va̱ḥ | parva̍tena |
acyu̍tā | ci̱t | vī̱ḻi̱tā | su̱-o̱ja̱ḥ | ru̱jaḥ | vi | dṛ̱ḻhā | dhṛ̱ṣa̱tā | vi̱-ra̱pśi̱n ||6.022.06||

6.022.07a taṁ vo̍ dhi̱yā navya̍syā̱ śavi̍ṣṭham pra̱tnam pra̍tna̱vat pa̍ritaṁsa̱yadhyai̍ |
6.022.07c sa no̍ vakṣad animā̱naḥ su̱vahmendro̱ viśvā̱ny ati̍ du̱rgahā̍ṇi ||

tam | va̱ḥ | dhi̱yā | navya̍syā | śavi̍ṣṭham | pra̱tnam | pra̱tna̱-vat | pa̱ri̱-ta̱ṁsa̱yadhyai̍ |
saḥ | na̱ḥ | va̱kṣa̱t | a̱ni̱-mā̱naḥ | su̱-vahnā̍ | indra̍ḥ | viśvā̍ni | ati̍ | du̱ḥ-gahā̍ṇi ||6.022.07||

6.022.08a ā janā̍ya̱ druhva̍ṇe̱ pārthi̍vāni di̱vyāni̍ dīpayo̱ 'ntari̍kṣā |
6.022.08c tapā̍ vṛṣan vi̱śvata̍ḥ śo̱ciṣā̱ tān bra̍hma̱dviṣe̍ śocaya̱ kṣām a̱paś ca̍ ||

ā | janā̍ya | druhva̍ṇe | pārthi̍vāni | di̱vyāni̍ | dī̱pa̱ya̱ḥ | a̱ntari̍kṣā |
tapa̍ | vṛ̱ṣa̱n | vi̱śvata̍ḥ | śo̱ciṣā̍ | tān | bra̱hma̱-dviṣe̍ | śo̱ca̱ya̱ | kṣām | a̱paḥ | ca̱ ||6.022.08||

6.022.09a bhuvo̱ jana̍sya di̱vyasya̱ rājā̱ pārthi̍vasya̱ jaga̍tas tveṣasaṁdṛk |
6.022.09c dhi̱ṣva vajra̱ṁ dakṣi̍ṇa indra̱ haste̱ viśvā̍ ajurya dayase̱ vi mā̱yāḥ ||

bhuva̍ḥ | jana̍sya | di̱vyasya̍ | rājā̍ | pārthi̍vasya | jaga̍taḥ | tve̱ṣa̱-sa̱ndṛ̱k |
dhi̱ṣva | vajra̍m | dakṣi̍ṇe | i̱ndra̱ | haste̍ | viśvā̍ | a̱ju̱rya̱ | da̱ya̱se̱ | vi | mā̱yāḥ ||6.022.09||

6.022.10a ā sa̱ṁyata̍m indra ṇaḥ sva̱stiṁ śa̍tru̱tūryā̍ya bṛha̱tīm amṛ̍dhrām |
6.022.10c yayā̱ dāsā̱ny āryā̍ṇi vṛ̱trā karo̍ vajrin su̱tukā̱ nāhu̍ṣāṇi ||

ā | sa̱m-yata̍m | i̱ndra̱ | na̱ḥ | sva̱stim | śa̱tru̱-tūryā̍ya | bṛ̱ha̱tīm | amṛ̍dhrām |
yayā̍ | dāsā̍ni | āryā̍ṇi | vṛ̱trā | kara̍ḥ | va̱jri̱n | su̱-tukā̍ | nāhu̍ṣāṇi ||6.022.10||

6.022.11a sa no̍ ni̱yudbhi̍ḥ puruhūta vedho vi̱śvavā̍rābhi̱r ā ga̍hi prayajyo |
6.022.11c na yā ade̍vo̱ vara̍te̱ na de̱va ābhi̍r yāhi̱ tūya̱m ā ma̍drya̱drik ||

saḥ | na̱ḥ | ni̱yut-bhi̍ḥ | pu̱ru̱-hū̱ta̱ | ve̱dha̱ḥ | vi̱śva-vā̍rābhiḥ | ā | ga̱hi̱ | pra̱ya̱jyo̱ iti̍ pra-yajyo |
na | yāḥ | ade̍vaḥ | vara̍te | na | de̱vaḥ | ā | ā̱bhi̱ḥ | yā̱hi̱ | tūya̍m | ā | ma̱drya̱drik ||6.022.11||


6.023.01a su̱ta it tvaṁ nimi̍śla indra̱ some̱ stome̱ brahma̍ṇi śa̱syamā̍na u̱kthe |
6.023.01c yad vā̍ yu̱ktābhyā̍m maghava̱n hari̍bhyā̱m bibhra̱d vajra̍m bā̱hvor i̍ndra̱ yāsi̍ ||

su̱te | it | tvam | ni-mi̍ślaḥ | i̱ndra̱ | some̍ | stome̍ | brahma̍ṇi | śa̱syamā̍ne | u̱kthe |
yat | vā̱ | yu̱ktābhyā̍m | ma̱gha̱-va̱n | hari̍-bhyām | bibhra̍t | vajra̍m | bā̱hvoḥ | i̱ndra̱ | yāsi̍ ||6.023.01||

6.023.02a yad vā̍ di̱vi pārye̱ suṣvi̍m indra vṛtra̱hatye 'va̍si̱ śūra̍sātau |
6.023.02c yad vā̱ dakṣa̍sya bi̱bhyuṣo̱ abi̍bhya̱d ara̍ndhaya̱ḥ śardha̍ta indra̱ dasyū̍n ||

yat | vā̱ | di̱vi | pārye̍ | susvi̍m | i̱ndra̱ | vṛ̱tra̱-hatye̍ | va̍si | śūra̍-sātau |
yat | vā̱ | dakṣa̍sya | bi̱bhyuṣa̍ḥ | abi̍bhyat | ara̍ndhayaḥ | śardha̍taḥ | i̱ndra̱ | dasyū̍n ||6.023.02||

6.023.03a pātā̍ su̱tam indro̍ astu̱ soma̍m praṇe̱nīr u̱gro ja̍ri̱tāra̍m ū̱tī |
6.023.03c kartā̍ vī̱rāya̱ suṣva̍ya u lo̱kaṁ dātā̱ vasu̍ stuva̱te kī̱raye̍ cit ||

pātā̍ | su̱tam | indra̍ḥ | a̱stu̱ | soma̍m | pra̱-ne̱nīḥ | u̱graḥ | ja̱ri̱tāra̍m | ū̱tī |
kartā̍ | vī̱rāya̍ | susva̍ye | ū̱m̐ iti̍ | lo̱kam | dātā̍ | vasu̍ | stu̱va̱te | kī̱raye̍ | ci̱t ||6.023.03||

6.023.04a ganteyā̍nti̱ sava̍nā̱ hari̍bhyām ba̱bhrir vajra̍m pa̱piḥ soma̍ṁ da̱dir gāḥ |
6.023.04c kartā̍ vī̱raṁ narya̱ṁ sarva̍vīra̱ṁ śrotā̱ hava̍ṁ gṛṇa̱taḥ stoma̍vāhāḥ ||

gantā̍ | iya̍nti | sava̍nā | hari̍-bhyām | ba̱bhriḥ | vajra̍m | pa̱piḥ | soma̍m | da̱diḥ | gāḥ |
kartā̍ | vī̱ram | narya̍m | sarva̍-vīram | śrotā̍ | hava̍m | gṛ̱ṇa̱taḥ | stoma̍-vāhāḥ ||6.023.04||

6.023.05a asmai̍ va̱yaṁ yad vā̱vāna̱ tad vi̍viṣma̱ indrā̍ya̱ yo na̍ḥ pra̱divo̱ apa̱s kaḥ |
6.023.05c su̱te some̍ stu̱masi̱ śaṁsa̍d u̱kthendrā̍ya̱ brahma̱ vardha̍na̱ṁ yathāsa̍t ||

asmai̍ | va̱yam | yat | va̱vāna̍ | tat | vi̱vi̱ṣma̱ḥ | indrā̍ya | yaḥ | na̱ḥ | pra̱-divaḥ | apa̍ḥ | ka̱riti̍ kaḥ |
su̱te | some̍ | stu̱masi̍ | śaṁsa̍t | u̱kthā | indrā̍ya | brahma̍ | vardha̍nam | yathā̍ | asa̍t ||6.023.05||

6.023.06a brahmā̍ṇi̱ hi ca̍kṛ̱ṣe vardha̍nāni̱ tāva̍t ta indra ma̱tibhi̍r viviṣmaḥ |
6.023.06c su̱te some̍ sutapā̱ḥ śaṁta̍māni̱ rāṇḍyā̍ kriyāsma̱ vakṣa̍ṇāni ya̱jñaiḥ ||

brahmā̍ṇi | hi | ca̱kṛ̱ṣe | vardha̍nāni | tāva̍t | te̱ | i̱ndra̱ | ma̱ti-bhi̍ḥ | vi̱vi̱ṣma̱ḥ |
su̱te | some̍ | su̱ta̱-pā̱ḥ | śam-ta̍māni | rāndryā̍ | kri̱yā̱sma̱ | vakṣa̍ṇāni | ya̱jñaiḥ ||6.023.06||

6.023.07a sa no̍ bodhi puro̱ḻāśa̱ṁ rarā̍ṇa̱ḥ pibā̱ tu soma̱ṁ goṛ̍jīkam indra |
6.023.07c edam ba̱rhir yaja̍mānasya sīdo̱ruṁ kṛ̍dhi tvāya̱ta u̍ lo̱kam ||

saḥ | na̱ḥ | bo̱dhi̱ | pu̱ro̱ḻāśa̍m | rarā̍ṇaḥ | pi̱ba̱ | tu | soma̍m | go-ṛ̍jīkam | i̱ndra̱ |
ā | i̱dam | ba̱rhiḥ | yaja̍mānasya | sī̱da̱ | u̱rum | kṛ̱dhi̱ | tvā̱-ya̱taḥ | ū̱m̐ iti̍ | lo̱kam ||6.023.07||

6.023.08a sa ma̍ndasvā̱ hy anu̱ joṣa̍m ugra̱ pra tvā̍ ya̱jñāsa̍ i̱me a̍śnuvantu |
6.023.08c preme havā̍saḥ puruhū̱tam a̱sme ā tve̱yaṁ dhīr ava̍sa indra yamyāḥ ||

saḥ | ma̱nda̱sva̱ | hi | anu̍ | joṣa̍m | u̱gra̱ | pra | tvā̱ | ya̱jñāsa̍ḥ | i̱me | a̱śnu̱va̱ntu̱ |
pra | i̱me | havā̍saḥ | pu̱ru̱-hū̱tam | a̱sme iti̍ | ā | tvā̱ | i̱yam | dhīḥ | ava̍se | i̱ndra̱ | ya̱myā̱ḥ ||6.023.08||

6.023.09a taṁ va̍ḥ sakhāya̱ḥ saṁ yathā̍ su̱teṣu̱ some̍bhir īm pṛṇatā bho̱jam indra̍m |
6.023.09c ku̱vit tasmā̱ asa̍ti no̱ bharā̍ya̱ na suṣvi̱m indro 'va̍se mṛdhāti ||

tam | va̱ḥ | sa̱khā̱ya̱ḥ | sam | yathā̍ | su̱teṣu̍ | some̍bhiḥ | ī̱m | pṛ̱ṇa̱ta̱ | bho̱jam | indra̍m |
ku̱vit | tasmai̍ | asa̍ti | na̱ḥ | bharā̍ya | na | susvi̍m | indra̍ḥ | ava̍se | mṛ̱dhā̱ti̱ ||6.023.09||

6.023.10a e̱ved indra̍ḥ su̱te a̍stāvi̱ some̍ bha̱radvā̍jeṣu̱ kṣaya̱d in ma̱ghona̍ḥ |
6.023.10c asa̱d yathā̍ jari̱tra u̱ta sū̱rir indro̍ rā̱yo vi̱śvavā̍rasya dā̱tā ||

e̱va | it | indra̍ḥ | su̱te | a̱stā̱vi̱ | some̍ | bha̱rat-vā̍jeṣu | kṣaya̍t | it | ma̱ghona̍ḥ |
asa̍t | yathā̍ | ja̱ri̱tre | u̱ta | sū̱riḥ | indra̍ḥ | rā̱yaḥ | vi̱śva-vā̍rasya | dā̱tā ||6.023.10||


6.024.01a vṛṣā̱ mada̱ indre̱ śloka̍ u̱kthā sacā̱ some̍ṣu suta̱pā ṛ̍jī̱ṣī |
6.024.01c a̱rca̱tryo̍ ma̱ghavā̱ nṛbhya̍ u̱kthair dyu̱kṣo rājā̍ gi̱rām akṣi̍totiḥ ||

vṛṣā̍ | mada̍ḥ | indre̍ | śloka̍ḥ | u̱kthā | sacā̍ | some̍ṣu | su̱ta̱-pāḥ | ṛ̱jī̱ṣī |
a̱rca̱trya̍ḥ | ma̱gha-vā̍ | nṛ-bhya̍ḥ | u̱kthaiḥ | dyu̱kṣaḥ | rājā̍ | gi̱rām | akṣi̍ta-ūtiḥ ||6.024.01||

6.024.02a tatu̍rir vī̱ro naryo̱ vice̍tā̱ḥ śrotā̱ hava̍ṁ gṛṇa̱ta u̱rvyū̍tiḥ |
6.024.02c vasu̱ḥ śaṁso̍ na̱rāṁ kā̱rudhā̍yā vā̱jī stu̱to vi̱dathe̍ dāti̱ vāja̍m ||

tatu̍riḥ | vī̱raḥ | narya̍ḥ | vi-ce̍tāḥ | śrotā̍ | hava̍m | gṛ̱ṇa̱taḥ | u̱rvi-ū̍tiḥ |
vasu̍ḥ | śaṁsa̍ḥ | na̱rām | kā̱ru-dhā̍yāḥ | vā̱jī | stu̱taḥ | vi̱dathe̍ | dā̱ti̱ | vāja̍m ||6.024.02||

6.024.03a akṣo̱ na ca̱kryo̍ḥ śūra bṛ̱han pra te̍ ma̱hnā ri̍rice̱ roda̍syoḥ |
6.024.03c vṛ̱kṣasya̱ nu te̍ puruhūta va̱yā vy ū̱3̱̍tayo̍ ruruhur indra pū̱rvīḥ ||

akṣa̍ḥ | na | ca̱kryo̍ḥ | śū̱ra̱ | bṛ̱han | pra | te̱ | ma̱hnā | ri̱ri̱ce̱ | roda̍syoḥ |
vṛ̱kṣasya̍ | nu | te̱ | pu̱ru̱-hū̱ta̱ | va̱yāḥ | vi | ū̱taya̍ḥ | ru̱ru̱hu̱ḥ | i̱ndra̱ | pū̱rvīḥ ||6.024.03||

6.024.04a śacī̍vatas te puruśāka̱ śākā̱ gavā̍m iva sru̱taya̍ḥ sa̱ṁcara̍ṇīḥ |
6.024.04c va̱tsānā̱ṁ na ta̱ntaya̍s ta indra̱ dāma̍nvanto adā̱māna̍ḥ sudāman ||

śacī̍-vataḥ | te̱ | pu̱ru̱-śā̱ka̱ | śākā̍ḥ | gavā̍m-iva | sru̱taya̍ḥ | sa̱m-cara̍ṇīḥ |
va̱tsānā̍m | na | ta̱ntaya̍ḥ | te̱ | i̱ndra̱ | dāma̍n-vantaḥ | a̱dā̱māna̍ḥ | su̱-dā̱ma̱n ||6.024.04||

6.024.05a a̱nyad a̱dya karva̍ram a̱nyad u̱ śvo 'sa̍c ca̱ san muhu̍r āca̱krir indra̍ḥ |
6.024.05c mi̱tro no̱ atra̱ varu̍ṇaś ca pū̱ṣāryo vaśa̍sya parye̱tāsti̍ ||

a̱nyat | a̱dya | karva̍ram | a̱nyat | ū̱m̐ iti̍ | śvaḥ | asa̍t | ca̱ | sat | muhu̍ḥ | ā̱-ca̱kriḥ | indra̍ḥ |
mi̱traḥ | na̱ḥ | atra̍ | varu̍ṇaḥ | ca̱ | pū̱ṣā | a̱ryaḥ | vaśa̍sya | pa̱ri̱-e̱tā | a̱sti̱ ||6.024.05||

6.024.06a vi tvad āpo̱ na parva̍tasya pṛ̱ṣṭhād u̱kthebhi̍r indrānayanta ya̱jñaiḥ |
6.024.06c taṁ tvā̱bhiḥ su̍ṣṭu̱tibhi̍r vā̱jaya̍nta ā̱jiṁ na ja̍gmur girvāho̱ aśvā̍ḥ ||

vi | tvat | āpa̍ḥ | na | parva̍tasya | pṛ̱ṣṭhāt | u̱kthebhi̍ḥ | i̱ndra̱ | a̱na̱ya̱nta̱ | ya̱jñaiḥ |
tam | tvā̱ | ā̱bhiḥ | su̱stu̱ti-bhi̍ḥ | vā̱jaya̍ntaḥ | ā̱jim | na | ja̱gmu̱ḥ | gi̱rvā̱ha̱ḥ | aśvā̍ḥ ||6.024.06||

6.024.07a na yaṁ jara̍nti śa̱rado̱ na māsā̱ na dyāva̱ indra̍m avaka̱rśaya̍nti |
6.024.07c vṛ̱ddhasya̍ cid vardhatām asya ta̱nūḥ stome̍bhir u̱kthaiś ca̍ śa̱syamā̍nā ||

na | yam | jara̍nti | śa̱rada̍ḥ | na | māsā̍ḥ | na | dyāva̍ḥ | indra̍m | a̱va̱-ka̱rśaya̍nti |
vṛ̱ddhasya̍ | ci̱t | va̱rdha̱tā̱m | a̱sya̱ | ta̱nūḥ | stome̍bhiḥ | u̱kthaiḥ | ca̱ | śa̱syamā̍nā ||6.024.07||

6.024.08a na vī̱ḻave̱ nama̍te̱ na sthi̱rāya̱ na śardha̍te̱ dasyu̍jūtāya sta̱vān |
6.024.08c ajrā̱ indra̍sya gi̱raya̍ś cid ṛ̱ṣvā ga̍mbhī̱re ci̍d bhavati gā̱dham a̍smai ||

na | vī̱ḻave̍ | nama̍te | na | sthi̱rāya̍ | na | śardha̍te | dasyu̍-jūtāya | sta̱vān |
ajrā̍ḥ | indra̍sya | gi̱raya̍ḥ | cit | ṛ̱ṣvāḥ | ga̱mbhī̱re | ci̱t | bha̱va̱ti̱ | gā̱dham | a̱smai̱ ||6.024.08||

6.024.09a ga̱mbhī̱reṇa̍ na u̱ruṇā̍matri̱n preṣo ya̍ndhi sutapāva̱n vājā̍n |
6.024.09c sthā ū̱ ṣu ū̱rdhva ū̱tī ari̍ṣaṇyann a̱ktor vyu̍ṣṭau̱ pari̍takmyāyām ||

ga̱mbhī̱reṇa̍ | na̱ḥ | u̱ruṇā̍ | a̱ma̱tri̱n | pra | i̱ṣaḥ | ya̱ndhi̱ | su̱ta̱-pā̱va̱n | vājā̍n |
sthāḥ | ū̱m̐ iti̍ | su | ū̱rdhvaḥ | ū̱tī | ari̍ṣaṇyan | a̱ktoḥ | vi-u̍ṣṭau | pari̍-takmyāyām ||6.024.09||

6.024.10a saca̍sva nā̱yam ava̍se a̱bhīka̍ i̱to vā̱ tam i̍ndra pāhi ri̱ṣaḥ |
6.024.10c a̱mā cai̍na̱m ara̍ṇye pāhi ri̱ṣo made̍ma śa̱tahi̍māḥ su̱vīrā̍ḥ ||

saca̍sva | nā̱yam | ava̍se | a̱bhīke̍ | i̱taḥ | vā̱ | tam | i̱ndra̱ | pā̱hi̱ | ri̱ṣaḥ |
a̱mā | ca̱ | e̱na̱m | ara̍ṇye | pā̱hi̱ | ri̱ṣaḥ | made̍ma | śa̱ta-hi̍māḥ | su̱-vīrā̍ḥ ||6.024.10||


6.025.01a yā ta̍ ū̱tir a̍va̱mā yā pa̍ra̱mā yā ma̍dhya̱mendra̍ śuṣmi̱nn asti̍ |
6.025.01c tābhi̍r ū̱ ṣu vṛ̍tra̱hatye̍ 'vīr na e̱bhiś ca̱ vājai̍r ma̱hān na̍ ugra ||

yā | te̱ | ū̱tiḥ | a̱va̱mā | yā | pa̱ra̱mā | yā | ma̱dhya̱mā | i̱ndra̱ | śu̱ṣmi̱n | asti̍ |
tābhi̍ḥ | ū̱m̐ iti̍ | su | vṛ̱tra̱-hatye̍ | a̱vī̱ḥ | na̱ḥ | e̱bhiḥ | ca̱ | vājai̍ḥ | ma̱hān | na̱ḥ | u̱gra̱ ||6.025.01||

6.025.02a ābhi̱ḥ spṛdho̍ mitha̱tīr ari̍ṣaṇyann a̱mitra̍sya vyathayā ma̱nyum i̍ndra |
6.025.02c ābhi̱r viśvā̍ abhi̱yujo̱ viṣū̍cī̱r āryā̍ya̱ viśo 'va̍ tārī̱r dāsī̍ḥ ||

ābhi̍ḥ | spṛdha̍ḥ | mi̱tha̱tīḥ | ari̍ṣaṇyan | a̱mitra̍sya | vya̱tha̱ya̱ | ma̱nyum | i̱ndra̱ |
ābhi̍ḥ | viśvā̍ḥ | a̱bhi̱-yuja̍ḥ | viṣū̍cīḥ | āryā̍ya | viśa̍ḥ | ava̍ | tā̱rī̱ḥ | dāsī̍ḥ ||6.025.02||

6.025.03a indra̍ jā̱maya̍ u̱ta ye 'jā̍mayo 'rvācī̱nāso̍ va̱nuṣo̍ yuyu̱jre |
6.025.03c tvam e̍ṣāṁ vithu̱rā śavā̍ṁsi ja̱hi vṛṣṇyā̍ni kṛṇu̱hī parā̍caḥ ||

indra̍ | jā̱maya̍ḥ | u̱ta | ye | ajā̍mayaḥ | a̱rvā̱cī̱nāsa̍ḥ | va̱nuṣa̍ḥ | yu̱yu̱jre |
tvam | e̱ṣā̱m | vi̱thu̱rā | śavā̍ṁsi | ja̱hi | vṛṣṇyā̍ni | kṛ̱ṇu̱hi | parā̍caḥ ||6.025.03||

6.025.04a śūro̍ vā̱ śūra̍ṁ vanate̱ śarī̍rais tanū̱rucā̱ taru̍ṣi̱ yat kṛ̱ṇvaite̍ |
6.025.04c to̱ke vā̱ goṣu̱ tana̍ye̱ yad a̱psu vi kranda̍sī u̱rvarā̍su̱ bravai̍te ||

śūra̍ḥ | vā̱ | śūra̍m | va̱na̱te̱ | śarī̍raiḥ | ta̱nū̱-rucā̍ | taru̍ṣi | yat | kṛ̱ṇvaite̱ iti̍ |
to̱ke | vā̱ | goṣu̍ | tana̍ye | yat | a̱p-su | vi | kranda̍sī̱ iti̍ | u̱rvarā̍su | bravai̍te̱ iti̍ ||6.025.04||

6.025.05a na̱hi tvā̱ śūro̱ na tu̱ro na dhṛ̱ṣṇur na tvā̍ yo̱dho manya̍māno yu̱yodha̍ |
6.025.05c indra̱ naki̍ṣ ṭvā̱ praty a̍sty eṣā̱ṁ viśvā̍ jā̱tāny a̱bhy a̍si̱ tāni̍ ||

na̱hi | tvā̱ | śūra̍ḥ | na | tu̱raḥ | na | dhṛ̱ṣṇuḥ | na | tvā̱ | yo̱dhaḥ | manya̍mānaḥ | yu̱yodha̍ |
indra̍ | naki̍ḥ | tvā̱ | prati̍ | a̱sti̱ | e̱ṣā̱m | viśvā̍ | jā̱tāni̍ | a̱bhi | a̱si̱ | tāni̍ ||6.025.05||

6.025.06a sa pa̍tyata u̱bhayo̍r nṛ̱mṇam a̱yor yadī̍ ve̱dhasa̍ḥ sami̱the hava̍nte |
6.025.06c vṛ̱tre vā̍ ma̱ho nṛ̱vati̱ kṣaye̍ vā̱ vyaca̍svantā̱ yadi̍ vitanta̱saite̍ ||

saḥ | pa̱tya̱te̱ | u̱bhayo̍ḥ | nṛ̱mṇam | a̱yoḥ | yadi̍ | ve̱dhasa̍ḥ | sa̱m-i̱the | hava̍nte |
vṛ̱tre | vā̱ | ma̱haḥ | nṛ̱-vati̍ | kṣaye̍ | vā̱ | vyaca̍svantā | yadi̍ | vi̱ta̱nta̱saite̱ iti̍ ||6.025.06||

6.025.07a adha̍ smā te carṣa̱ṇayo̱ yad ejā̱n indra̍ trā̱tota bha̍vā varū̱tā |
6.025.07c a̱smākā̍so̱ ye nṛta̍māso a̱rya indra̍ sū̱rayo̍ dadhi̱re pu̱ro na̍ḥ ||

adha̍ | sma̱ | te̱ | ca̱rṣa̱ṇaya̍ḥ | yat | ejā̍n | indra̍ | trā̱tā | u̱ta | bha̱va̱ | va̱rū̱tā |
a̱smākā̍saḥ | ye | nṛ-ta̍māsaḥ | a̱ryaḥ | indra̍ | sū̱raya̍ḥ | da̱dhi̱re | pu̱raḥ | na̱ḥ ||6.025.07||

6.025.08a anu̍ te dāyi ma̱ha i̍ndri̱yāya̍ sa̱trā te̱ viśva̱m anu̍ vṛtra̱hatye̍ |
6.025.08c anu̍ kṣa̱tram anu̱ saho̍ yaja̱trendra̍ de̱vebhi̱r anu̍ te nṛ̱ṣahye̍ ||

anu̍ | te̱ | dā̱yi̱ | ma̱he | i̱ndri̱yāya̍ | sa̱trā | te̱ | viśva̍m | anu̍ | vṛ̱tra̱-hatye̍ |
anu̍ | kṣa̱tram | anu̍ | saha̍ḥ | ya̱ja̱tra̱ | indra̍ | de̱vebhi̍ḥ | anu̍ | te̱ | nṛ̱-sahye̍ ||6.025.08||

6.025.09a e̱vā na̱ḥ spṛdha̱ḥ sam a̍jā sa̱matsv indra̍ rāra̱ndhi mi̍tha̱tīr ade̍vīḥ |
6.025.09c vi̱dyāma̱ vasto̱r ava̍sā gṛ̱ṇanto̍ bha̱radvā̍jā u̱ta ta̍ indra nū̱nam ||

e̱va | na̱ḥ | spṛdha̍ḥ | sam | a̱ja̱ | sa̱mat-su̍ | indra̍ | ra̱ra̱ndhi | mi̱tha̱tīḥ | ade̍vīḥ |
vi̱dyāma̍ | vasto̍ḥ | ava̍sā | gṛ̱ṇanta̍ḥ | bha̱rat-vā̍jāḥ | u̱ta | te̱ | i̱ndra̱ | nū̱nam ||6.025.09||


6.026.01a śru̱dhī na̍ indra̱ hvayā̍masi tvā ma̱ho vāja̍sya sā̱tau vā̍vṛṣā̱ṇāḥ |
6.026.01c saṁ yad viśo 'ya̍nta̱ śūra̍sātā u̱graṁ no 'va̱ḥ pārye̱ aha̍n dāḥ ||

śru̱dhi | na̱ḥ | i̱ndra̱ | hvayā̍masi | tvā̱ | ma̱haḥ | vāja̍sya | sā̱tau | va̱vṛ̱ṣā̱ṇāḥ |
sam | yat | viśa̍ḥ | aya̍nta | śūra̍-sātau | u̱gram | na̱ḥ | ava̍ḥ | pārye̍ | aha̍n | dā̱ḥ ||6.026.01||

6.026.02a tvāṁ vā̱jī ha̍vate vājine̱yo ma̱ho vāja̍sya̱ gadhya̍sya sā̱tau |
6.026.02c tvāṁ vṛ̱treṣv i̍ndra̱ satpa̍ti̱ṁ taru̍tra̱ṁ tvāṁ ca̍ṣṭe muṣṭi̱hā goṣu̱ yudhya̍n ||

tvām | vā̱jī | ha̱va̱te̱ | vā̱ji̱ne̱yaḥ | ma̱haḥ | vāja̍sya | gadhya̍sya | sā̱tau |
tvām | vṛ̱treṣu̍ | i̱ndra̱ | sat-pa̍tim | taru̍tram | tvām | ca̱ṣṭe̱ | mu̱ṣṭi̱-hā | goṣu̍ | yudhya̍n ||6.026.02||

6.026.03a tvaṁ ka̱viṁ co̍dayo̱ 'rkasā̍tau̱ tvaṁ kutsā̍ya̱ śuṣṇa̍ṁ dā̱śuṣe̍ vark |
6.026.03c tvaṁ śiro̍ ama̱rmaṇa̱ḥ parā̍hann atithi̱gvāya̱ śaṁsya̍ṁ kari̱ṣyan ||

tvam | ka̱vim | co̱da̱ya̱ḥ | a̱rka-sā̍tau | tvam | kutsā̍ya | śuṣṇa̍m | dā̱śuṣe̍ | va̱rk |
tvam | śira̍ḥ | a̱ma̱rmaṇa̍ḥ | parā̍ | a̱ha̱n | a̱ti̱thi̱-gvāya̍ | śaṁsya̍m | ka̱ri̱ṣyan ||6.026.03||

6.026.04a tvaṁ ratha̱m pra bha̍ro yo̱dham ṛ̱ṣvam āvo̱ yudhya̍ntaṁ vṛṣa̱bhaṁ daśa̍dyum |
6.026.04c tvaṁ tugra̍ṁ veta̱save̱ sacā̍ha̱n tvaṁ tuji̍ṁ gṛ̱ṇanta̍m indra tūtoḥ ||

tvam | ratha̍m | pra | bha̱ra̱ḥ | yo̱dham | ṛ̱ṣvam | āva̍ḥ | yudhya̍ntam | vṛ̱ṣa̱bham | daśa̍-dyum |
tvam | tugra̍m | ve̱ta̱save̍ | sacā̍ | a̱ha̱n | tvam | tuji̍m | gṛ̱ṇanta̍m | i̱ndra̱ | tū̱to̱riti̍ tūtoḥ ||6.026.04||

6.026.05a tvaṁ tad u̱ktham i̍ndra ba̱rhaṇā̍ ka̱ḥ pra yac cha̱tā sa̱hasrā̍ śūra̱ darṣi̍ |
6.026.05c ava̍ gi̱rer dāsa̱ṁ śamba̍raṁ ha̱n prāvo̱ divo̍dāsaṁ ci̱trābhi̍r ū̱tī ||

tvam | tat | u̱ktham | i̱ndra̱ | ba̱rhaṇā̍ | ka̱riti̍ kaḥ | pra | ya̱t | śa̱tā | sa̱hasrā̍ | śū̱ra̱ | darṣi̍ |
ava̍ | gi̱reḥ | dāsa̍m | śamba̍ram | ha̱n | pra | ā̱va̱ḥ | diva̍ḥ-dāsam | ci̱trābhi̍ḥ | ū̱tī ||6.026.05||

6.026.06a tvaṁ śra̱ddhābhi̍r mandasā̱naḥ somai̍r da̱bhīta̍ye̱ cumu̍rim indra siṣvap |
6.026.06c tvaṁ ra̱jim piṭhī̍nase daśa̱syan ṣa̱ṣṭiṁ sa̱hasrā̱ śacyā̱ sacā̍han ||

tvam | śra̱ddhābhi̍ḥ | ma̱nda̱sā̱naḥ | somai̍ḥ | da̱bhīta̍ye | cumu̍rim | i̱ndra̱ | si̱sva̱p |
tvam | ra̱jim | pithī̍nase | da̱śa̱syan | ṣa̱ṣṭim | sa̱hasrā̍ | śacyā̍ | sacā̍ | a̱ha̱n ||6.026.06||

6.026.07a a̱haṁ ca̱na tat sū̱ribhi̍r ānaśyā̱ṁ tava̱ jyāya̍ indra su̱mnam oja̍ḥ |
6.026.07c tvayā̱ yat stava̍nte sadhavīra vī̱rās tri̱varū̍thena̱ nahu̍ṣā śaviṣṭha ||

a̱ham | ca̱na | tat | sū̱ri-bhi̍ḥ | ā̱na̱śyā̱n | tava̍ | jyāya̍ḥ | i̱ndra̱ | su̱mnam | oja̍ḥ |
tvayā̍ | yat | stava̍nte | sa̱dha̱-vī̱ra̱ | vī̱rāḥ | tri̱-varū̍thena | nahu̍ṣā | śa̱vi̱ṣṭha̱ ||6.026.07||

6.026.08a va̱yaṁ te̍ a̱syām i̍ndra dyu̱mnahū̍tau̱ sakhā̍yaḥ syāma mahina̱ preṣṭhā̍ḥ |
6.026.08c prāta̍rdaniḥ kṣatra̱śrīr a̍stu̱ śreṣṭho̍ gha̱ne vṛ̱trāṇā̍ṁ sa̱naye̱ dhanā̍nām ||

va̱yam | te̱ | a̱syām | i̱ndra̱ | dyu̱mna-hū̍tau | sakhā̍yaḥ | syā̱ma̱ | ma̱hi̱na̱ | preṣṭhā̍ḥ |
prāta̍rdaniḥ | kṣa̱tra̱-śrīḥ | a̱stu̱ | śreṣṭha̍ḥ | gha̱ne | vṛ̱trāṇā̍m | sa̱naye̍ | dhanā̍nām ||6.026.08||


6.027.01a kim a̍sya̱ made̱ kim v a̍sya pī̱tāv indra̱ḥ kim a̍sya sa̱khye ca̍kāra |
6.027.01c raṇā̍ vā̱ ye ni̱ṣadi̱ kiṁ te a̍sya pu̱rā vi̍vidre̱ kim u̱ nūta̍nāsaḥ ||

kim | a̱sya̱ | made̍ | kim | ū̱m̐ iti̍ | a̱sya̱ | pī̱tau | indra̍ḥ | kim | a̱sya̱ | sa̱khye | ca̱kā̱ra̱ |
raṇā̍ḥ | vā̱ | ye | ni̱-sadi̍ | kim | te | a̱sya̱ | pu̱rā | vi̱vi̱dre̱ | kim | ū̱m̐ iti̍ | nūta̍nāsaḥ ||6.027.01||

6.027.02a sad a̍sya̱ made̱ sad v a̍sya pī̱tāv indra̱ḥ sad a̍sya sa̱khye ca̍kāra |
6.027.02c raṇā̍ vā̱ ye ni̱ṣadi̱ sat te a̍sya pu̱rā vi̍vidre̱ sad u̱ nūta̍nāsaḥ ||

sat | a̱sya̱ | made̍ | sat | ū̱m̐ iti̍ | a̱sya̱ | pī̱tau | indra̍ḥ | sat | a̱sya̱ | sa̱khye | ca̱kā̱ra̱ |
raṇā̍ḥ | vā̱ | ye | ni̱-sadi̍ | sat | te | a̱sya̱ | pu̱rā | vi̱vi̱dre̱ | sat | ū̱m̐ iti̍ | nūta̍nāsaḥ ||6.027.02||

6.027.03a na̱hi nu te̍ mahi̱mana̍ḥ samasya̱ na ma̍ghavan maghava̱ttvasya̍ vi̱dma |
6.027.03c na rādha̍so-rādhaso̱ nūta̍na̱syendra̱ naki̍r dadṛśa indri̱yaṁ te̍ ||

na̱hi | nu | te̱ | ma̱hi̱mana̍ḥ | sa̱ma̱sya̱ | na | ma̱gha̱-va̱n | ma̱gha̱va̱t-tvasya̍ | vi̱dma |
na | rādha̍saḥ-rādhasaḥ | nūta̍nasya | indra̍ | naki̍ḥ | da̱dṛ̱śe̱ | i̱ndri̱yam | te̱ ||6.027.03||

6.027.04a e̱tat tyat ta̍ indri̱yam a̍ceti̱ yenāva̍dhīr va̱raśi̍khasya̱ śeṣa̍ḥ |
6.027.04c vajra̍sya̱ yat te̱ niha̍tasya̱ śuṣmā̍t sva̱nāc ci̍d indra para̱mo da̱dāra̍ ||

e̱tat | tyat | te̱ | i̱ndri̱yam | a̱ce̱ti̱ | yena̍ | ava̍dhīḥ | va̱ra-śi̍khasya | śeṣa̍ḥ |
vajra̍sya | yat | te̱ | ni-ha̍tasya | śuṣmā̍t | sva̱nāt | ci̱t | i̱ndra̱ | pa̱ra̱maḥ | da̱dāra̍ ||6.027.04||

6.027.05a vadhī̱d indro̍ va̱raśi̍khasya̱ śeṣo̍ 'bhyāva̱rtine̍ cāyamā̱nāya̱ śikṣa̍n |
6.027.05c vṛ̱cīva̍to̱ yad dha̍riyū̱pīyā̍yā̱ṁ han pūrve̱ ardhe̍ bhi̱yasāpa̍ro̱ dart ||

vadhī̍t | indra̍ḥ | va̱ra-śi̍khasya | śeṣa̍ḥ | a̱bhi̱-ā̱va̱rtine̍ | cā̱ya̱mā̱nāya̍ | śikṣa̍n |
vṛ̱cīva̍taḥ | yat | ha̱ri̱yū̱pīyā̍yām | han | pūrve̍ | ardhe̍ | bhi̱yasā̍ | apa̍raḥ | dart ||6.027.05||

6.027.06a tri̱ṁśaccha̍taṁ va̱rmiṇa̍ indra sā̱kaṁ ya̱vyāva̍tyām puruhūta śrava̱syā |
6.027.06c vṛ̱cīva̍nta̱ḥ śara̍ve̱ patya̍mānā̱ḥ pātrā̍ bhindā̱nā nya̱rthāny ā̍yan ||

tri̱ṁśat-śa̍tam | va̱rmiṇa̍ḥ | i̱ndra̱ | sā̱kam | ya̱vyā-va̍tyām | pu̱ru̱-hū̱ta̱ | śra̱va̱syā |
vṛ̱cīva̍ntaḥ | śara̍ve | patya̍mānāḥ | pātrā̍ | bhi̱ndā̱nāḥ | ni̱-a̱rthāni̍ | ā̱ya̱n ||6.027.06||

6.027.07a yasya̱ gāvā̍v aru̱ṣā sū̍yava̱syū a̱ntar ū̱ ṣu cara̍to̱ reri̍hāṇā |
6.027.07c sa sṛñja̍yāya tu̱rvaśa̱m parā̍dād vṛ̱cīva̍to daivavā̱tāya̱ śikṣa̍n ||

yasya̍ | gāvau̍ | a̱ru̱ṣā | su̱ya̱va̱syū iti̍ su̱-ya̱va̱syū | a̱ntaḥ | ū̱m̐ iti̍ | su | cara̍taḥ | reri̍hāṇā |
saḥ | sṛñja̍yāya | tu̱rvaśa̍m | parā̍ | a̱dā̱t | vṛ̱cīva̍taḥ | dai̱va̱-vā̱tāya̍ | śikṣa̍n ||6.027.07||

6.027.08a dva̱yām̐ a̍gne ra̱thino̍ viṁśa̱tiṁ gā va̱dhūma̍to ma̱ghavā̱ mahya̍ṁ sa̱mrāṭ |
6.027.08c a̱bhyā̱va̱rtī cā̍yamā̱no da̍dāti dū̱ṇāśe̱yaṁ dakṣi̍ṇā pārtha̱vānā̍m ||

dva̱yān | a̱gne̱ | ra̱thina̍ḥ | vi̱ṁśa̱tim | gāḥ | va̱dhū-ma̍taḥ | ma̱gha-vā̍ | mahya̍m | sa̱m-rāṭ |
a̱bhi̱-ā̱va̱rtī | cā̱ya̱mā̱naḥ | da̱dā̱ti̱ | du̱ḥ-nāśā̍ | i̱yam | dakṣi̍ṇā | pā̱rtha̱vānā̍m ||6.027.08||


6.028.01a ā gāvo̍ agmann u̱ta bha̱dram a̍kra̱n sīda̍ntu go̱ṣṭhe ra̱ṇaya̍ntv a̱sme |
6.028.01c pra̱jāva̍tīḥ puru̱rūpā̍ i̱ha syu̱r indrā̍ya pū̱rvīr u̱ṣaso̱ duhā̍nāḥ ||

ā | gāva̍ḥ | a̱gma̱n | u̱ta | bha̱dram | a̱kra̱n | sīda̍ntu | go̱-sthe | ra̱ṇaya̍ntu | a̱sme iti̍ |
pra̱jā-va̍tīḥ | pu̱ru̱-rūpā̍ḥ | i̱ha | syu̱ḥ | indrā̍ya | pū̱rvīḥ | u̱ṣasa̍ḥ | duhā̍nāḥ ||6.028.01||

6.028.02a indro̱ yajva̍ne pṛṇa̱te ca̍ śikṣa̱ty uped da̍dāti̱ na svam mu̍ṣāyati |
6.028.02c bhūyo̍-bhūyo ra̱yim id a̍sya va̱rdhaya̱nn abhi̍nne khi̱lye ni da̍dhāti deva̱yum ||

indra̍ḥ | yajva̍ne | pṛ̱ṇa̱te | ca̱ | śi̱kṣa̱ti̱ | upa̍ | it | da̱dā̱ti̱ | na | svam | mu̱ṣā̱ya̱ti̱ |
bhūya̍ḥ-bhūyaḥ | ra̱yim | it | a̱sya̱ | va̱rdhaya̍n | abhi̍nne | khi̱lye | ni | da̱dhā̱ti̱ | de̱va̱-yum ||6.028.02||

6.028.03a na tā na̍śanti̱ na da̍bhāti̱ taska̍ro̱ nāsā̍m āmi̱tro vyathi̱r ā da̍dharṣati |
6.028.03c de̱vām̐ś ca̱ yābhi̱r yaja̍te̱ dadā̍ti ca̱ jyog it tābhi̍ḥ sacate̱ gopa̍tiḥ sa̱ha ||

na | tāḥ | na̱śa̱nti̱ | na | da̱bhā̱ti̱ | taska̍raḥ | na | ā̱sā̱m | ā̱mi̱traḥ | vyathi̍ḥ | ā | da̱dha̱rṣa̱ti̱ |
de̱vān | ca̱ | yābhi̍ḥ | yaja̍te | dadā̍ti | ca̱ | jyok | it | tābhi̍ḥ | sa̱ca̱te̱ | go-pa̍tiḥ | sa̱ha ||6.028.03||

6.028.04a na tā arvā̍ re̱ṇuka̍kāṭo aśnute̱ na sa̍ṁskṛta̱tram upa̍ yanti̱ tā a̱bhi |
6.028.04c u̱ru̱gā̱yam abha̍ya̱ṁ tasya̱ tā anu̱ gāvo̱ marta̍sya̱ vi ca̍ranti̱ yajva̍naḥ ||

na | tāḥ | arvā̍ | re̱ṇu-ka̍kāṭaḥ | a̱śnu̱te̱ | na | sa̱ṁskṛ̱ta̱-tram | upa̍ | ya̱nti̱ | tāḥ | a̱bhi |
u̱ru̱-gā̱yam | abha̍yam | tasya̍ | tāḥ | anu̍ | gāva̍ḥ | marta̍sya | vi | ca̱ra̱nti̱ | yajva̍naḥ ||6.028.04||

6.028.05a gāvo̱ bhago̱ gāva̱ indro̍ me acchā̱n gāva̱ḥ soma̍sya pratha̱masya̍ bha̱kṣaḥ |
6.028.05c i̱mā yā gāva̱ḥ sa ja̍nāsa̱ indra̍ i̱cchāmīd dhṛ̱dā mana̍sā ci̱d indra̍m ||

gāva̍ḥ | bhaga̍ḥ | gāva̍ḥ | indra̍ḥ | me̱ | a̱cchā̱n | gāva̍ḥ | soma̍sya | pra̱tha̱masya̍ | bha̱kṣaḥ |
i̱māḥ | yāḥ | gāva̍ḥ | saḥ | ja̱nā̱sa̱ḥ | indra̍ḥ | i̱cchāmi̍ | it | hṛ̱dā | mana̍sā | ci̱t | indra̍m ||6.028.05||

6.028.06a yū̱yaṁ gā̍vo medayathā kṛ̱śaṁ ci̍d aśrī̱raṁ ci̍t kṛṇuthā su̱pratī̍kam |
6.028.06c bha̱draṁ gṛ̱haṁ kṛ̍ṇutha bhadravāco bṛ̱had vo̱ vaya̍ ucyate sa̱bhāsu̍ ||

yū̱yam | gā̱va̱ḥ | me̱da̱ya̱tha̱ | kṛ̱śam | ci̱t | a̱śrī̱ram | ci̱t | kṛ̱ṇu̱tha̱ | su̱-pratī̍kam |
bha̱dram | gṛ̱ham | kṛ̱ṇu̱tha̱ | bha̱dra̱-vā̱ca̱ḥ | bṛ̱hat | va̱ḥ | vaya̍ḥ | u̱cya̱te̱ | sa̱bhāsu̍ ||6.028.06||

6.028.07a pra̱jāva̍tīḥ sū̱yava̍saṁ ri̱śantī̍ḥ śu̱ddhā a̱paḥ su̍prapā̱ṇe piba̍ntīḥ |
6.028.07c mā va̍ḥ ste̱na ī̍śata̱ māghaśa̍ṁsa̱ḥ pari̍ vo he̱tī ru̱drasya̍ vṛjyāḥ ||

pra̱jā-va̍tīḥ | su̱-yava̍sam | ri̱śantī̍ḥ | śu̱ddhāḥ | a̱paḥ | su̱-pra̱pā̱ne | piba̍ntīḥ |
mā | va̱ḥ | ste̱naḥ | ī̱śa̱ta̱ | mā | a̱gha-śa̍ṁsaḥ | pari̍ | va̱ḥ | he̱tiḥ | ru̱drasya̍ | vṛ̱jyā̱ḥ ||6.028.07||

6.028.08a upe̱dam u̍pa̱parca̍nam ā̱su goṣūpa̍ pṛcyatām |
6.028.08c upa̍ ṛṣa̱bhasya̱ reta̱sy upe̍ndra̱ tava̍ vī̱rye̍ ||

upa̍ | i̱dam | u̱pa̱-parca̍nam | ā̱su | goṣu̍ | upa̍ | pṛ̱cya̱tā̱m |
upa̍ | ṛ̱ṣa̱bhasya̍ | reta̍si | upa̍ | i̱ndra̱ | tava̍ | vī̱rye̍ ||6.028.08||


6.029.01a indra̍ṁ vo̱ nara̍ḥ sa̱khyāya̍ sepur ma̱ho yanta̍ḥ suma̱taye̍ cakā̱nāḥ |
6.029.01c ma̱ho hi dā̱tā vajra̍hasto̱ asti̍ ma̱hām u̍ ra̱ṇvam ava̍se yajadhvam ||

indra̍m | va̱ḥ | nara̍ḥ | sa̱khyāya̍ | se̱pu̱ḥ | ma̱haḥ | yanta̍ḥ | su̱-ma̱taye̍ | ca̱kā̱nāḥ |
ma̱haḥ | hi | dā̱tā | vajra̍-hastaḥ | asti̍ | ma̱hām | ū̱m̐ iti̍ | ra̱ṇvam | ava̍se | ya̱ja̱dhva̱m ||6.029.01||

6.029.02a ā yasmi̱n haste̱ naryā̍ mimi̱kṣur ā rathe̍ hira̱ṇyaye̍ rathe̱ṣṭhāḥ |
6.029.02c ā ra̱śmayo̱ gabha̍styoḥ sthū̱rayo̱r ādhva̱nn aśvā̍so̱ vṛṣa̍ṇo yujā̱nāḥ ||

ā | yasmi̍n | haste̍ | naryā̍ḥ | mi̱mi̱kṣuḥ | ā | rathe̍ | hi̱ra̱ṇyaye̍ | ra̱the̱-sthāḥ |
ā | ra̱śmaya̍ḥ | gabha̍styoḥ | sthū̱rayo̍ḥ | ā | adhva̍n | aśvā̍saḥ | vṛṣa̍ṇaḥ | yu̱jā̱nāḥ ||6.029.02||

6.029.03a śri̱ye te̱ pādā̱ duva̱ ā mi̍mikṣur dhṛ̱ṣṇur va̱jrī śava̍sā̱ dakṣi̍ṇāvān |
6.029.03c vasā̍no̱ atka̍ṁ sura̱bhiṁ dṛ̱śe kaṁ sva1̱̍r ṇa nṛ̍tav iṣi̱ro ba̍bhūtha ||

śri̱ye | te̱ | pādā̍ | duva̍ḥ | ā | mi̱mi̱kṣu̱ḥ | dhṛ̱ṣṇuḥ | va̱jrī | śava̍sā | dakṣi̍ṇa-vān |
vasā̍naḥ | atka̍m | su̱ra̱bhim | dṛ̱śe | kam | sva̍ḥ | na | nṛ̱to̱ iti̍ | i̱ṣi̱raḥ | ba̱bhū̱tha̱ ||6.029.03||

6.029.04a sa soma̱ āmi̍ślatamaḥ su̱to bhū̱d yasmi̍n pa̱ktiḥ pa̱cyate̱ santi̍ dhā̱nāḥ |
6.029.04c indra̱ṁ nara̍ḥ stu̱vanto̍ brahmakā̱rā u̱kthā śaṁsa̍nto de̱vavā̍tatamāḥ ||

saḥ | soma̍ḥ | āmi̍śla-tamaḥ | su̱taḥ | bhū̱t | yasmi̍n | pa̱ktiḥ | pa̱cyate̍ | santi̍ | dhā̱nāḥ |
indra̍m | nara̍ḥ | stu̱vanta̍ḥ | bra̱hma̱-kā̱rāḥ | u̱kthā | śaṁsa̍ntaḥ | de̱vavā̍ta-tamāḥ ||6.029.04||

6.029.05a na te̱ anta̱ḥ śava̍so dhāyy a̱sya vi tu bā̍badhe̱ roda̍sī mahi̱tvā |
6.029.05c ā tā sū̱riḥ pṛ̍ṇati̱ tūtu̍jāno yū̱thevā̱psu sa̱mīja̍māna ū̱tī ||

na | te̱ | anta̍ḥ | śava̍saḥ | dhā̱yi̱ | a̱sya | vi | tu | bā̱ba̱dhe̱ | roda̍sī̱ iti̍ | ma̱hi̱-tvā |
ā | tā | sū̱riḥ | pṛ̱ṇa̱ti̱ | tūtu̍jānaḥ | yū̱thā-i̍va | a̱p-su | sa̱m-īja̍mānaḥ | ū̱tī ||6.029.05||

6.029.06a e̱ved indra̍ḥ su̱hava̍ ṛ̱ṣvo a̍stū̱tī anū̍tī hiriśi̱praḥ satvā̍ |
6.029.06c e̱vā hi jā̱to asa̍mātyojāḥ pu̱rū ca̍ vṛ̱trā ha̍nati̱ ni dasyū̍n ||

e̱va | it | indra̍ḥ | su̱-hava̍ḥ | ṛ̱ṣvaḥ | a̱stu̱ | ū̱tī | anū̍tī | hi̱ri̱-śi̱praḥ | satvā̍ |
e̱va | hi | jā̱taḥ | asa̍māti-ojāḥ | pu̱ru | ca̱ | vṛ̱trā | ha̱na̱ti̱ | ni | dasyū̍n ||6.029.06||


6.030.01a bhūya̱ id vā̍vṛdhe vī̱ryā̍ya̱m̐ eko̍ aju̱ryo da̍yate̱ vasū̍ni |
6.030.01c pra ri̍rice di̱va indra̍ḥ pṛthi̱vyā a̱rdham id a̍sya̱ prati̱ roda̍sī u̱bhe ||

bhūya̍ḥ | it | va̱vṛ̱dhe̱ | vī̱ryā̍ya | eka̍ḥ | a̱ju̱ryaḥ | da̱ya̱te̱ | vasū̍ni |
pra | ri̱ri̱ce̱ | di̱vaḥ | indra̍ḥ | pṛ̱thi̱vyāḥ | a̱rdham | it | a̱sya̱ | prati̍ | roda̍sī̱ iti̍ | u̱bhe iti̍ ||6.030.01||

6.030.02a adhā̍ manye bṛ̱had a̍su̱rya̍m asya̱ yāni̍ dā̱dhāra̱ naki̱r ā mi̍nāti |
6.030.02c di̱ve-di̍ve̱ sūryo̍ darśa̱to bhū̱d vi sadmā̍ny urvi̱yā su̱kratu̍r dhāt ||

adha̍ | ma̱nye̱ | bṛ̱hat | a̱su̱rya̍m | a̱sya̱ | yāni̍ | dā̱dhāra̍ | naki̍ḥ | ā | mi̱nā̱ti̱ |
di̱ve-di̍ve | sūrya̍ḥ | da̱rśa̱taḥ | bhū̱t | vi | sadmā̍ni | u̱rvi̱yā | su̱-kratu̍ḥ | dhā̱t ||6.030.02||

6.030.03a a̱dyā ci̱n nū ci̱t tad apo̍ na̱dīnā̱ṁ yad ā̍bhyo̱ ara̍do gā̱tum i̍ndra |
6.030.03c ni parva̍tā adma̱sado̱ na se̍du̱s tvayā̍ dṛ̱ḻhāni̍ sukrato̱ rajā̍ṁsi ||

a̱dya | ci̱t | nu | ci̱t | tat | apa̍ḥ | na̱dīnā̍m | yat | ā̱bhya̱ḥ | ara̍daḥ | gā̱tum | i̱ndra̱ |
ni | parva̍tāḥ | a̱dma̱-sada̍ḥ | na | se̱du̱ḥ | tvayā̍ | dṛ̱ḻhāni̍ | su̱kra̱to̱ iti̍ su-krato | rajā̍ṁsi ||6.030.03||

6.030.04a sa̱tyam it tan na tvāvā̍m̐ a̱nyo a̱stīndra̍ de̱vo na martyo̱ jyāyā̍n |
6.030.04c aha̱nn ahi̍m pari̱śayā̍na̱m arṇo 'vā̍sṛjo a̱po acchā̍ samu̱dram ||

sa̱tyam | it | tat | na | tvā-vā̍n | a̱nyaḥ | a̱sti̱ | indra̍ | de̱vaḥ | na | martya̍ḥ | jyāyā̍n |
aha̍n | ahi̍m | pa̱ri̱-śayā̍nam | arṇa̍ḥ | ava̍ | a̱sṛ̱ja̱ḥ | a̱paḥ | accha̍ | sa̱mu̱dram ||6.030.04||

6.030.05a tvam a̱po vi duro̱ viṣū̍cī̱r indra̍ dṛ̱ḻham a̍ruja̱ḥ parva̍tasya |
6.030.05c rājā̍bhavo̱ jaga̍taś carṣaṇī̱nāṁ sā̱kaṁ sūrya̍ṁ ja̱naya̱n dyām u̱ṣāsa̍m ||

tvam | a̱paḥ | vi | dura̍ḥ | viṣū̍cīḥ | indra̍ | dṛ̱ḻham | a̱ru̱ja̱ḥ | parva̍tasya |
rājā̍ | a̱bha̱va̱ḥ | jaga̍taḥ | ca̱rṣa̱ṇī̱nām | sā̱kam | sūrya̍m | ja̱naya̍n | dyām | u̱ṣasa̍m ||6.030.05||


6.031.01a abhū̱r eko̍ rayipate rayī̱ṇām ā hasta̍yor adhithā indra kṛ̱ṣṭīḥ |
6.031.01c vi to̱ke a̱psu tana̍ye ca̱ sūre 'vo̍canta carṣa̱ṇayo̱ vivā̍caḥ ||

abhū̍ḥ | eka̍ḥ | ra̱yi̱-pa̱te̱ | ra̱yī̱ṇām | ā | hasta̍yoḥ | a̱dhi̱thā̱ḥ | i̱ndra̱ | kṛ̱ṣṭīḥ |
vi | to̱ke | a̱p-su | tana̍ye | ca̱ | sūre̍ | avo̍canta | ca̱rṣa̱ṇaya̍ḥ | vivā̍caḥ ||6.031.01||

6.031.02a tvad bhi̱yendra̱ pārthi̍vāni̱ viśvācyu̍tā cic cyāvayante̱ rajā̍ṁsi |
6.031.02c dyāvā̱kṣāmā̱ parva̍tāso̱ vanā̍ni̱ viśva̍ṁ dṛ̱ḻham bha̍yate̱ ajma̱nn ā te̍ ||

tvat | bhi̱yā | i̱ndra̱ | pārthi̍vāni | viśvā̍ | acyu̍tā | ci̱t | cya̱va̱ya̱nte̱ | rajā̍ṁsi |
dyāvā̱kṣāmā̍ | parva̍tāsaḥ | vanā̍ni | viśva̍m | dṛ̱ḻham | bha̱ya̱te̱ | ajma̍n | ā | te̱ ||6.031.02||

6.031.03a tvaṁ kutse̍nā̱bhi śuṣṇa̍m indrā̱śuṣa̍ṁ yudhya̱ kuya̍va̱ṁ gavi̍ṣṭau |
6.031.03c daśa̍ prapi̱tve adha̱ sūrya̍sya muṣā̱yaś ca̱kram avi̍ve̱ rapā̍ṁsi ||

tvam | kutse̍na | a̱bhi | śuṣṇa̍m | i̱ndra̱ | a̱śuṣa̍m | yu̱dhya̱ | kuya̍vam | gavi̍ṣṭau |
daśa̍ | pra̱-pi̱tve | adha̍ | sūrya̍sya | mu̱ṣā̱yaḥ | ca̱kram | avi̍veḥ | rapā̍ṁsi ||6.031.03||

6.031.04a tvaṁ śa̱tāny ava̱ śamba̍rasya̱ puro̍ jaghanthāpra̱tīni̱ dasyo̍ḥ |
6.031.04c aśi̍kṣo̱ yatra̱ śacyā̍ śacīvo̱ divo̍dāsāya sunva̱te su̍takre bha̱radvā̍jāya gṛṇa̱te vasū̍ni ||

tvam | śa̱tāni̍ | ava̍ | śamba̍rasya | pura̍ḥ | ja̱gha̱ntha̱ | a̱pra̱tīni̍ | dasyo̍ḥ |
aśi̍kṣaḥ | yatra̍ | śacyā̍ | śa̱cī̱-va̱ḥ | diva̍ḥ-dāsāya | su̱nva̱te | su̱ta̱-kre̱ | bha̱rat-vā̍jāya | gṛ̱ṇa̱te | vasū̍ni ||6.031.04||

6.031.05a sa sa̍tyasatvan maha̱te raṇā̍ya̱ ratha̱m ā ti̍ṣṭha tuvinṛmṇa bhī̱mam |
6.031.05c yā̱hi pra̍pathi̱nn ava̱sopa̍ ma̱drik pra ca̍ śruta śrāvaya carṣa̱ṇibhya̍ḥ ||

saḥ | sa̱tya̱-sa̱tva̱n | ma̱ha̱te | raṇā̍ya | ratha̍m | ā | ti̱ṣṭha̱ | tu̱vi̱-nṛ̱mṇa̱ | bhī̱mam |
yā̱hi | pra̱-pa̱thi̱n | ava̍sā | upa̍ | ma̱drik | pra | ca̱ | śru̱ta̱ | śra̱va̱ya̱ | ca̱rṣa̱ṇi-bhya̍ḥ ||6.031.05||


6.032.01a apū̍rvyā puru̱tamā̍ny asmai ma̱he vī̱rāya̍ ta̱vase̍ tu̱rāya̍ |
6.032.01c vi̱ra̱pśine̍ va̱jriṇe̱ śaṁta̍māni̱ vacā̍ṁsy ā̱sā sthavi̍rāya takṣam ||

apū̍rvyā | pu̱ru̱-tamā̍ni | a̱smai̱ | ma̱he | vī̱rāya̍ | ta̱vase̍ | tu̱rāya̍ |
vi̱ra̱pśine̍ | va̱jriṇe̍ | śam-ta̍māni | vacā̍ṁsi | ā̱sā | sthavi̍rāya | ta̱kṣa̱m ||6.032.01||

6.032.02a sa mā̱tarā̱ sūrye̍ṇā kavī̱nām avā̍sayad ru̱jad adri̍ṁ gṛṇā̱naḥ |
6.032.02c svā̱dhībhi̱r ṛkva̍bhir vāvaśā̱na ud u̱sriyā̍ṇām asṛjan ni̱dāna̍m ||

saḥ | mā̱tarā̍ | sūrye̍ṇa | ka̱vī̱nām | avā̍sayat | ru̱jat | adri̍m | gṛ̱ṇā̱naḥ |
su̱-ā̱dhībhi̍ḥ | ṛkva̍-bhiḥ | vā̱va̱śā̱naḥ | ut | u̱sriyā̍ṇām | a̱sṛ̱ja̱t | ni̱-dāna̍m ||6.032.02||

6.032.03a sa vahni̍bhi̱r ṛkva̍bhi̱r goṣu̱ śaśva̍n mi̱tajñu̍bhiḥ puru̱kṛtvā̍ jigāya |
6.032.03c pura̍ḥ puro̱hā sakhi̍bhiḥ sakhī̱yan dṛ̱ḻhā ru̍roja ka̱vibhi̍ḥ ka̱viḥ san ||

saḥ | vahni̍-bhiḥ | ṛkva̍-bhiḥ | goṣu̍ | śaśva̍t | mi̱tajñu̍-bhiḥ | pu̱ru̱-kṛtvā̍ | ji̱gā̱ya̱ |
pura̍ḥ | pu̱ra̱ḥ-hā | sakhi̍-bhiḥ | sa̱khi̱-yan | dṛ̱ḻhāḥ | ru̱ro̱ja̱ | ka̱vi-bhi̍ḥ | ka̱viḥ | san ||6.032.03||

6.032.04a sa nī̱vyā̍bhir jari̱tāra̱m acchā̍ ma̱ho vāje̍bhir ma̱hadbhi̍ś ca̱ śuṣmai̍ḥ |
6.032.04c pu̱ru̱vīrā̍bhir vṛṣabha kṣitī̱nām ā gi̍rvaṇaḥ suvi̱tāya̱ pra yā̍hi ||

saḥ | nī̱vyā̍bhiḥ | ja̱ri̱tāra̍m | accha̍ | ma̱haḥ | vāje̍bhiḥ | ma̱hat-bhi̍ḥ | ca̱ | śuṣmai̍ḥ |
pu̱ru̱-vīrā̍bhiḥ | vṛ̱ṣa̱bha̱ | kṣi̱tī̱nām | ā | gi̱rva̱ṇa̱ḥ | su̱vi̱tāya̍ | pra | yā̱hi̱ ||6.032.04||

6.032.05a sa sarge̍ṇa̱ śava̍sā ta̱kto atyai̍r a̱pa indro̍ dakṣiṇa̱tas tu̍rā̱ṣāṭ |
6.032.05c i̱tthā sṛ̍jā̱nā ana̍pāvṛ̱d artha̍ṁ di̱ve-di̍ve viviṣur apramṛ̱ṣyam ||

saḥ | sarge̍ṇa | śava̍sā | ta̱ktaḥ | atyai̍ḥ | a̱paḥ | indra̍ḥ | da̱kṣi̱ṇa̱taḥ | tu̱rā̱ṣāṭ |
i̱tthā | sṛ̱jā̱nāḥ | ana̍pa-vṛt | artha̍m | di̱ve-di̍ve | vi̱vi̱ṣu̱ḥ | a̱pra̱-mṛ̱ṣyam ||6.032.05||


6.033.01a ya oji̍ṣṭha indra̱ taṁ su no̍ dā̱ mado̍ vṛṣan svabhi̱ṣṭir dāsvā̍n |
6.033.01c sauva̍śvya̱ṁ yo va̱nava̱t svaśvo̍ vṛ̱trā sa̱matsu̍ sā̱saha̍d a̱mitrā̍n ||

yaḥ | oji̍ṣṭhaḥ | i̱ndra̱ | tam | su | na̱ḥ | dā̱ḥ | mada̍ḥ | vṛ̱ṣa̱n | su̱-a̱bhi̱ṣṭiḥ | dāsvā̍n |
sauva̍śvyam | yaḥ | va̱na-va̍t | su̱-aśva̍ḥ | vṛ̱trā | sa̱mat-su̍ | sa̱saha̍t | a̱mitrā̍n ||6.033.01||

6.033.02a tvāṁ hī̱3̱̍ndrāva̍se̱ vivā̍co̱ hava̍nte carṣa̱ṇaya̱ḥ śūra̍sātau |
6.033.02c tvaṁ vipre̍bhi̱r vi pa̱ṇīm̐r a̍śāya̱s tvota̱ it sani̍tā̱ vāja̱m arvā̍ ||

tvām | hi | i̱ndra̱ | ava̍se | vivā̍caḥ | hava̍nte | ca̱rṣa̱ṇaya̍ḥ | śūra̍-sātau |
tvam | vipre̍bhiḥ | vi | pa̱ṇīn | a̱śā̱ya̱ḥ | tvā-ū̍taḥ | it | sani̍tā | vāja̍m | arvā̍ ||6.033.02||

6.033.03a tvaṁ tām̐ i̍ndro̱bhayā̍m̐ a̱mitrā̱n dāsā̍ vṛ̱trāṇy āryā̍ ca śūra |
6.033.03c vadhī̱r vane̍va̱ sudhi̍tebhi̱r atkai̱r ā pṛ̱tsu da̍rṣi nṛ̱ṇāṁ nṛ̍tama ||

tvam | tān | i̱ndra̱ | u̱bhayā̍n | a̱mitrā̍n | dāsā̍ | vṛ̱trāṇi̍ | āryā̍ | ca̱ | śū̱ra̱ |
vadhī̍ḥ | vanā̍-iva | su-dhi̍tebhiḥ | atkai̍ḥ | ā | pṛ̱t-su | da̱rṣi̱ | nṛ̱ṇām | nṛ̱-ta̱ma̱ ||6.033.03||

6.033.04a sa tvaṁ na̍ i̱ndrāka̍vābhir ū̱tī sakhā̍ vi̱śvāyu̍r avi̱tā vṛ̱dhe bhū̍ḥ |
6.033.04c sva̍rṣātā̱ yad dhvayā̍masi tvā̱ yudhya̍nto ne̱madhi̍tā pṛ̱tsu śū̍ra ||

saḥ | tvam | na̱ḥ | i̱ndra̱ | aka̍vābhiḥ | ū̱tī | sakhā̍ | vi̱śva-ā̍yuḥ | a̱vi̱tā | vṛ̱dhe | bhū̱ḥ |
sva̍ḥ-sātā | yat | hvayā̍masi | tvā̱ | yudhya̍ntaḥ | ne̱ma-dhi̍tā | pṛ̱t-su | śū̱ra̱ ||6.033.04||

6.033.05a nū̱naṁ na̍ indrāpa̱rāya̍ ca syā̱ bhavā̍ mṛḻī̱ka u̱ta no̍ a̱bhiṣṭau̍ |
6.033.05c i̱tthā gṛ̱ṇanto̍ ma̱hina̍sya̱ śarma̍n di̱vi ṣyā̍ma̱ pārye̍ go̱ṣata̍māḥ ||

nū̱nam | na̱ḥ | i̱ndra̱ | a̱pa̱rāya̍ | ca̱ | syā̱ḥ | bhava̍ | mṛ̱ḻī̱kaḥ | u̱ta | na̱ḥ | a̱bhiṣṭau̍ |
i̱tthā | gṛ̱ṇanta̍ḥ | ma̱hina̍sya | śarma̍n | di̱vi | syā̱ma̱ | pārye̍ | go̱sa-ta̍māḥ ||6.033.05||


6.034.01a saṁ ca̱ tve ja̱gmur gira̍ indra pū̱rvīr vi ca̱ tvad ya̍nti vi̱bhvo̍ manī̱ṣāḥ |
6.034.01c pu̱rā nū̱naṁ ca̍ stu̱taya̱ ṛṣī̍ṇām paspṛ̱dhra indre̱ adhy u̍kthā̱rkā ||

sam | ca̱ | tve iti̍ | ja̱gmuḥ | gira̍ḥ | i̱ndra̱ | pū̱rvīḥ | vi | ca̱ | tvat | ya̱nti̱ | vi̱-bhva̍ḥ | ma̱nī̱ṣāḥ |
pu̱rā | nū̱nam | ca̱ | stu̱taya̍ḥ | ṛṣī̍ṇām | pa̱spṛ̱dhre | indre̍ | adhi̍ | u̱ktha̱-a̱rkā ||6.034.01||

6.034.02a pu̱ru̱hū̱to yaḥ pu̍rugū̱rta ṛbhvā̱m̐ eka̍ḥ purupraśa̱sto asti̍ ya̱jñaiḥ |
6.034.02c ratho̱ na ma̱he śava̍se yujā̱no̱3̱̍ 'smābhi̱r indro̍ anu̱mādyo̍ bhūt ||

pu̱ru̱-hū̱taḥ | yaḥ | pu̱ru̱-gū̱rtaḥ | ṛbhvā̍ | eka̍ḥ | pu̱ru̱-pra̱śa̱staḥ | asti̍ | ya̱jñaiḥ |
ratha̍ḥ | na | ma̱he | śava̍se | yu̱jā̱naḥ | a̱smābhi̍ḥ | indra̍ḥ | a̱nu̱-mādya̍ḥ | bhū̱t ||6.034.02||

6.034.03a na yaṁ hiṁsa̍nti dhī̱tayo̱ na vāṇī̱r indra̱ṁ nakṣa̱ntīd a̱bhi va̱rdhaya̍ntīḥ |
6.034.03c yadi̍ sto̱tāra̍ḥ śa̱taṁ yat sa̱hasra̍ṁ gṛ̱ṇanti̱ girva̍ṇasa̱ṁ śaṁ tad a̍smai ||

na | yam | hiṁsa̍nti | dhī̱taya̍ḥ | na | vāṇī̍ḥ | indra̍m | nakṣa̍nti | it | a̱bhi | va̱rdhaya̍ntīḥ |
yadi̍ | sto̱tāra̍ḥ | śa̱tam | yat | sa̱hasra̍m | gṛ̱ṇanti̍ | girva̍ṇasam | śam | tat | a̱smai̱ ||6.034.03||

6.034.04a asmā̍ e̱tad di̱vy a1̱̍rceva̍ mā̱sā mi̍mi̱kṣa indre̱ ny a̍yāmi̱ soma̍ḥ |
6.034.04c jana̱ṁ na dhanva̍nn a̱bhi saṁ yad āpa̍ḥ sa̱trā vā̍vṛdhu̱r hava̍nāni ya̱jñaiḥ ||

asmai̍ | e̱tat | di̱vi | a̱rcā-i̍va | mā̱sā | mi̱mi̱kṣaḥ | indre̍ | ni | a̱yā̱mi̱ | soma̍ḥ |
jana̍m | na | dhanva̍n | a̱bhi | sam | yat | āpa̍ḥ | sa̱trā | va̱vṛ̱dhu̱ḥ | hava̍nāni | ya̱jñaiḥ ||6.034.04||

6.034.05a asmā̍ e̱tan mahy ā̍ṅgū̱ṣam a̍smā̱ indrā̍ya sto̱tram ma̱tibhi̍r avāci |
6.034.05c asa̱d yathā̍ maha̱ti vṛ̍tra̱tūrya̱ indro̍ vi̱śvāyu̍r avi̱tā vṛ̱dhaś ca̍ ||

asmai̍ | e̱tat | mahi̍ | ā̱ṅgū̱ṣam | a̱smai̱ | indrā̍ya | sto̱tram | ma̱ti-bhi̍ḥ | a̱vā̱ci̱ |
asa̍t | yathā̍ | ma̱ha̱ti | vṛ̱tra̱-tūrye̍ | indra̍ḥ | vi̱śva-ā̍yuḥ | a̱vi̱tā | vṛ̱dha̱ḥ | ca̱ ||6.034.05||


6.035.01a ka̱dā bhu̍va̱n ratha̍kṣayāṇi̱ brahma̍ ka̱dā sto̱tre sa̍hasrapo̱ṣya̍ṁ dāḥ |
6.035.01c ka̱dā stoma̍ṁ vāsayo 'sya rā̱yā ka̱dā dhiya̍ḥ karasi̱ vāja̍ratnāḥ ||

ka̱dā | bhu̱va̱n | ratha̍-kṣayāṇi | brahma̍ | ka̱dā | sto̱tre | sa̱ha̱sra̱-po̱ṣya̍m | dā̱ḥ |
ka̱dā | stoma̍m | vā̱sa̱ya̱ḥ | a̱sya̱ | rā̱yā | ka̱dā | dhiya̍ḥ | ka̱ra̱si̱ | vāja̍-ratnāḥ ||6.035.01||

6.035.02a karhi̍ svi̱t tad i̍ndra̱ yan nṛbhi̱r nṝn vī̱rair vī̱rān nī̱ḻayā̍se̱ jayā̱jīn |
6.035.02c tri̱dhātu̱ gā adhi̍ jayāsi̱ goṣv indra̍ dyu̱mnaṁ sva̍rvad dhehy a̱sme ||

karhi̍ | svi̱t | tat | i̱ndra̱ | yat | nṛ-bhi̍ḥ | nṝn | vī̱raiḥ | vī̱rān | nī̱ḻayā̍se | jaya̍ | ā̱jīn |
tri̱-dhātu̍ | gāḥ | adhi̍ | ja̱yā̱si̱ | goṣu̍ | indra̍ | dyu̱mnam | sva̱ḥ-vat | dhe̱hi̱ | a̱sme iti̍ ||6.035.02||

6.035.03a karhi̍ svi̱t tad i̍ndra̱ yaj ja̍ri̱tre vi̱śvapsu̱ brahma̍ kṛ̱ṇava̍ḥ śaviṣṭha |
6.035.03c ka̱dā dhiyo̱ na ni̱yuto̍ yuvāse ka̱dā goma̍ghā̱ hava̍nāni gacchāḥ ||

karhi̍ | svi̱t | tat | i̱ndra̱ | yat | ja̱ri̱tre | vi̱śva-psu̍ | brahma̍ | kṛ̱ṇava̍ḥ | śa̱vi̱ṣṭha̱ |
ka̱dā | dhiya̍ḥ | na | ni̱-yuta̍ḥ | yu̱vā̱se̱ | ka̱dā | go-ma̍ghā | hava̍nāni | ga̱cchā̱ḥ ||6.035.03||

6.035.04a sa goma̍ghā jari̱tre aśva̍ścandrā̱ vāja̍śravaso̱ adhi̍ dhehi̱ pṛkṣa̍ḥ |
6.035.04c pī̱pi̱hīṣa̍ḥ su̱dughā̍m indra dhe̱num bha̱radvā̍jeṣu su̱ruco̍ rurucyāḥ ||

saḥ | go-ma̍ghāḥ | ja̱ri̱tre | aśva̍-candrāḥ | vāja̍-śravasaḥ | adhi̍ | dhe̱hi̱ | pṛkṣa̍ḥ |
pī̱pi̱hi | iṣa̍ḥ | su̱-dughā̍m | i̱ndra̱ | dhe̱num | bha̱rat-vā̍jeṣu | su̱-ruca̍ḥ | ru̱ru̱cyā̱ḥ ||6.035.04||

6.035.05a tam ā nū̱naṁ vṛ̱jana̍m a̱nyathā̍ ci̱c chūro̱ yac cha̍kra̱ vi duro̍ gṛṇī̱ṣe |
6.035.05c mā nir a̍raṁ śukra̱dugha̍sya dhe̱nor ā̍ṅgira̱sān brahma̍ṇā vipra jinva ||

tam | ā | nū̱nam | vṛ̱jana̍m | a̱nyathā̍ | ci̱t | śūra̍ḥ | yat | śa̱kra̱ | vi | dura̍ḥ | gṛ̱ṇī̱ṣe |
mā | niḥ | a̱ra̱m | śu̱kra̱-dugha̍sya | dhe̱noḥ | ā̱ṅgi̱ra̱sān | brahma̍ṇā | vi̱pra̱ | ji̱nva̱ ||6.035.05||


6.036.01a sa̱trā madā̍sa̱s tava̍ vi̱śvaja̍nyāḥ sa̱trā rāyo 'dha̱ ye pārthi̍vāsaḥ |
6.036.01c sa̱trā vājā̍nām abhavo vibha̱ktā yad de̱veṣu̍ dhā̱raya̍thā asu̱rya̍m ||

sa̱trā | madā̍saḥ | tava̍ | vi̱śva-ja̍nyāḥ | sa̱trā | rāya̍ḥ | adha̍ | ye | pārthi̍vāsaḥ |
sa̱trā | vājā̍nām | a̱bha̱va̱ḥ | vi̱-bha̱ktā | yat | de̱veṣu̍ | dhā̱raya̍thāḥ | asu̱rya̍m ||6.036.01||

6.036.02a anu̱ pra ye̍je̱ jana̱ ojo̍ asya sa̱trā da̍dhire̱ anu̍ vī̱ryā̍ya |
6.036.02c syū̱ma̱gṛbhe̱ dudha̱ye 'rva̍te ca̱ kratu̍ṁ vṛñja̱nty api̍ vṛtra̱hatye̍ ||

anu̍ | pra | ye̱je̱ | jana̍ḥ | oja̍ḥ | a̱sya̱ | sa̱trā | da̱dhi̱re̱ | anu̍ | vī̱ryā̍ya |
syū̱ma̱-gṛbhe̍ | dudha̍ye | arva̍te | ca̱ | kratu̍m | vṛ̱ñja̱nti̱ | api̍ | vṛ̱tra̱-hatye̍ ||6.036.02||

6.036.03a taṁ sa̱dhrīcī̍r ū̱tayo̱ vṛṣṇyā̍ni̱ pauṁsyā̍ni ni̱yuta̍ḥ saścu̱r indra̍m |
6.036.03c sa̱mu̱draṁ na sindha̍va u̱kthaśu̍ṣmā uru̱vyaca̍sa̱ṁ gira̱ ā vi̍śanti ||

tam | sa̱dhrīcī̍ḥ | ū̱taya̍ḥ | vṛṣṇyā̍ni | pauṁsyā̍ni | ni̱-yuta̍ḥ | saścu̍ḥ | indra̍m |
sa̱mu̱dram | na | sindha̍vaḥ | u̱ktha-śu̍ṣmāḥ | u̱ru̱-vyaca̍sam | gira̍ḥ | ā | vi̱śa̱nti̱ ||6.036.03||

6.036.04a sa rā̱yas khām upa̍ sṛjā gṛṇā̱naḥ pu̍ruśca̱ndrasya̱ tvam i̍ndra̱ vasva̍ḥ |
6.036.04c pati̍r babhū̱thāsa̍mo̱ janā̍nā̱m eko̱ viśva̍sya̱ bhuva̍nasya̱ rājā̍ ||

saḥ | rā̱yaḥ | khām | upa̍ | sṛ̱ja̱ | gṛ̱ṇā̱naḥ | pu̱ru̱-ca̱ndrasya̍ | tvam | i̱ndra̱ | vasva̍ḥ |
pati̍ḥ | ba̱bhū̱tha̱ | asa̍maḥ | janā̍nām | eka̍ḥ | viśva̍sya | bhuva̍nasya | rājā̍ ||6.036.04||

6.036.05a sa tu śru̍dhi̱ śrutyā̱ yo du̍vo̱yur dyaur na bhūmā̱bhi rāyo̍ a̱ryaḥ |
6.036.05c aso̱ yathā̍ na̱ḥ śava̍sā cakā̱no yu̱ge-yu̍ge̱ vaya̍sā̱ ceki̍tānaḥ ||

saḥ | tu | śru̱dhi̱ | śrutyā̍ | yaḥ | du̱va̱ḥ-yuḥ | dyauḥ | na | bhūma̍ | a̱bhi | rāya̍ḥ | a̱ryaḥ |
asa̍ḥ | yathā̍ | na̱ḥ | śava̍sā | ca̱kā̱naḥ | yu̱ge-yu̍ge | vaya̍sā | ceki̍tānaḥ ||6.036.05||


6.037.01a a̱rvāg ratha̍ṁ vi̱śvavā̍raṁ ta u̱grendra̍ yu̱ktāso̱ hara̍yo vahantu |
6.037.01c kī̱riś ci̱d dhi tvā̱ hava̍te̱ sva̍rvān ṛdhī̱mahi̍ sadha̱māda̍s te a̱dya ||

a̱rvāk | ratha̍m | vi̱śva-vā̍ram | te̱ | u̱gra̱ | indra̍ | yu̱ktāsa̍ḥ | hara̍yaḥ | va̱ha̱ntu̱ |
kī̱riḥ | ci̱t | hi | tvā̱ | hava̍te | sva̍ḥ-vān | ṛ̱dhī̱mahi̍ | sa̱dha̱-māda̍ḥ | te̱ | a̱dya ||6.037.01||

6.037.02a pro droṇe̱ hara̍ya̱ḥ karmā̍gman punā̱nāsa̱ ṛjya̍nto abhūvan |
6.037.02c indro̍ no a̱sya pū̱rvyaḥ pa̍pīyād dyu̱kṣo mada̍sya so̱myasya̱ rājā̍ ||

pro iti̍ | droṇe̍ | hara̍yaḥ | karma̍ | a̱gma̱n | pu̱nā̱nāsa̍ḥ | ṛjya̍ntaḥ | a̱bhū̱va̱n |
indra̍ḥ | na̱ḥ | a̱sya | pū̱rvyaḥ | pā̱pī̱yā̱t | dyu̱kṣaḥ | mada̍sya | so̱myasya | rājā̍ ||6.037.02||

6.037.03a ā̱sa̱srā̱ṇāsa̍ḥ śavasā̱nam acchendra̍ṁ suca̱kre ra̱thyā̍so̱ aśvā̍ḥ |
6.037.03c a̱bhi śrava̱ ṛjya̍nto vaheyu̱r nū ci̱n nu vā̱yor a̱mṛta̱ṁ vi da̍syet ||

ā̱sa̱srā̱ṇāsa̍ḥ | śa̱va̱sā̱nam | accha̍ | indra̍m | su̱-ca̱kre | ra̱thyā̍saḥ | aśvā̍ḥ |
a̱bhi | śrava̍ḥ | ṛjya̍ntaḥ | va̱he̱yu̱ḥ | nu | ci̱t | nu | vā̱yoḥ | a̱mṛta̍m | vi | da̱sye̱t ||6.037.03||

6.037.04a vari̍ṣṭho asya̱ dakṣi̍ṇām iya̱rtīndro̍ ma̱ghonā̍ṁ tuvikū̱rmita̍maḥ |
6.037.04c yayā̍ vajrivaḥ pari̱yāsy aṁho̍ ma̱ghā ca̍ dhṛṣṇo̱ daya̍se̱ vi sū̱rīn ||

vari̍ṣṭhaḥ | a̱sya̱ | dakṣi̍ṇām | i̱ya̱rti̱ | indra̍ḥ | ma̱ghonā̍m | tu̱vi̱kū̱rmi-ta̍maḥ |
yayā̍ | va̱jri̱-va̱ḥ | pa̱ri̱-yāsi̍ | aṁha̍ḥ | ma̱ghā | ca̱ | dhṛ̱ṣṇo̱ iti̍ | daya̍se | vi | sū̱rīn ||6.037.04||

6.037.05a indro̱ vāja̍sya̱ sthavi̍rasya dā̱tendro̍ gī̱rbhir va̍rdhatāṁ vṛ̱ddhama̍hāḥ |
6.037.05c indro̍ vṛ̱traṁ hani̍ṣṭho astu̱ satvā tā sū̱riḥ pṛ̍ṇati̱ tūtu̍jānaḥ ||

indra̍ḥ | vāja̍sya | sthavi̍rasya | dā̱tā | indra̍ḥ | gī̱ḥ-bhiḥ | va̱rdha̱tā̱m | vṛ̱ddha-ma̍hāḥ |
indra̍ḥ | vṛ̱tram | hani̍ṣṭhaḥ | a̱stu̱ | satvā̍ | ā | tā | sū̱riḥ | pṛ̱ṇa̱ti̱ | tūtu̍jānaḥ ||6.037.05||


6.038.01a apā̍d i̱ta ud u̍ naś ci̱trata̍mo ma̱hīm bha̍rṣad dyu̱matī̱m indra̍hūtim |
6.038.01c panya̍sīṁ dhī̱tiṁ daivya̍sya̱ yāma̱ñ jana̍sya rā̱tiṁ va̍nate su̱dānu̍ḥ ||

apā̍t | i̱taḥ | ut | ū̱m̐ iti̍ | na̱ḥ | ci̱tra-ta̍maḥ | ma̱hīm | bha̱rṣa̱t | dyu̱-matī̍m | indra̍-hūtim |
panya̍sīm | dhī̱tim | daivya̍sya | yāma̍n | jana̍sya | rā̱tim | va̱na̱te̱ | su̱-dānu̍ḥ ||6.038.01||

6.038.02a dū̱rāc ci̱d ā va̍sato asya̱ karṇā̱ ghoṣā̱d indra̍sya tanyati bruvā̱ṇaḥ |
6.038.02c eyam e̍naṁ de̱vahū̍tir vavṛtyān ma̱drya1̱̍g indra̍m i̱yam ṛ̱cyamā̍nā ||

dū̱rāt | ci̱t | ā | va̱sa̱ta̱ḥ | a̱sya̱ | karṇā̍ | ghoṣā̍t | indra̍sya | ta̱nya̱ti̱ | bru̱vā̱ṇaḥ |
ā | i̱yam | e̱na̱m | de̱va-hū̍tiḥ | va̱vṛ̱tyā̱t | ma̱drya̍k | indra̍m | i̱yam | ṛ̱cyamā̍nā ||6.038.02||

6.038.03a taṁ vo̍ dhi̱yā pa̍ra̱mayā̍ purā̱jām a̱jara̱m indra̍m a̱bhy a̍nūṣy a̱rkaiḥ |
6.038.03c brahmā̍ ca̱ giro̍ dadhi̱re sam a̍smin ma̱hām̐ś ca̱ stomo̱ adhi̍ vardha̱d indre̍ ||

tam | va̱ḥ | dhi̱yā | pa̱ra̱mayā̍ | pu̱rā̱-jām | a̱jara̍m | indra̍m | a̱bhi | a̱nū̱ṣi̱ | a̱rkaiḥ |
brahma̍ | ca̱ | gira̍ḥ | da̱dhi̱re | sam | a̱smi̱n | ma̱hān | ca̱ | stoma̍ḥ | adhi̍ | va̱rdha̱t | indre̍ ||6.038.03||

6.038.04a vardhā̱d yaṁ ya̱jña u̱ta soma̱ indra̱ṁ vardhā̱d brahma̱ gira̍ u̱kthā ca̱ manma̍ |
6.038.04c vardhāhai̍nam u̱ṣaso̱ yāma̍nn a̱ktor vardhā̱n māsā̍ḥ śa̱rado̱ dyāva̱ indra̍m ||

vardhā̍t | yam | ya̱jñaḥ | u̱ta | soma̍ḥ | indra̍m | vardhā̍t | brahma̍ | gira̍ḥ | u̱kthā | ca̱ | manma̍ |
vardha̍ | aha̍ | e̱na̱m | u̱ṣasa̍ḥ | yāma̍n | a̱ktoḥ | vardhā̍n | māsā̍ḥ | śa̱rada̍ḥ | dyāva̍ḥ | indra̍m ||6.038.04||

6.038.05a e̱vā ja̍jñā̱naṁ saha̍se̱ asā̍mi vāvṛdhā̱naṁ rādha̍se ca śru̱tāya̍ |
6.038.05c ma̱hām u̱gram ava̍se vipra nū̱nam ā vi̍vāsema vṛtra̱tūrye̍ṣu ||

e̱va | ja̱jñā̱nam | saha̍se | asā̍mi | va̱vṛ̱dhā̱nam | rādha̍se | ca̱ | śru̱tāya̍ |
ma̱hām | u̱gram | ava̍se | vi̱pra̱ | nū̱nam | ā | vi̱vā̱se̱ma̱ | vṛ̱tra̱-tūrye̍ṣu ||6.038.05||


6.039.01a ma̱ndrasya̍ ka̱ver di̱vyasya̱ vahne̱r vipra̍manmano vaca̱nasya̱ madhva̍ḥ |
6.039.01c apā̍ na̱s tasya̍ saca̱nasya̍ de̱veṣo̍ yuvasva gṛṇa̱te goa̍grāḥ ||

ma̱ndrasya̍ | ka̱veḥ | di̱vyasya̍ | vahne̍ḥ | vipra̍-manmanaḥ | va̱ca̱nasya̍ | madhva̍ḥ |
apā̍ḥ | na̱ḥ | tasya̍ | sa̱ca̱nasya̍ | de̱va̱ | iṣa̍ḥ | yu̱va̱sva̱ | gṛ̱ṇa̱te | go-a̍grāḥ ||6.039.01||

6.039.02a a̱yam u̍śā̱naḥ pary adri̍m u̱srā ṛ̱tadhī̍tibhir ṛta̱yug yu̍jā̱naḥ |
6.039.02c ru̱jad aru̍gṇa̱ṁ vi va̱lasya̱ sānu̍m pa̱ṇīm̐r vaco̍bhir a̱bhi yo̍dha̱d indra̍ḥ ||

a̱yam | u̱śā̱naḥ | pari̍ | adri̍m | u̱srāḥ | ṛ̱tadhī̍ti-bhiḥ | ṛ̱ta̱-yuk | yu̱jā̱naḥ |
ru̱jat | aru̍gṇam | vi | va̱lasya̍ | sānu̍m | pa̱ṇīn | vaca̍ḥ-bhiḥ | a̱bhi | yo̱dha̱t | indra̍ḥ ||6.039.02||

6.039.03a a̱yaṁ dyo̍tayad a̱dyuto̱ vy a1̱̍ktūn do̱ṣā vasto̍ḥ śa̱rada̱ indu̍r indra |
6.039.03c i̱maṁ ke̱tum a̍dadhu̱r nū ci̱d ahnā̱ṁ śuci̍janmana u̱ṣasa̍ś cakāra ||

a̱yam | dyo̱ta̱ya̱t | a̱dyuta̍ḥ | vi | a̱ktūn | do̱ṣā | vasto̍ḥ | śa̱rada̍ḥ | indu̍ḥ | i̱ndra̱ |
i̱mam | ke̱tum | a̱da̱dhu̱ḥ | nu | ci̱t | ahnā̍m | śuci̍-janmanaḥ | u̱ṣasa̍ḥ | ca̱kā̱ra̱ ||6.039.03||

6.039.04a a̱yaṁ ro̍cayad a̱ruco̍ rucā̱no̱3̱̍ 'yaṁ vā̍saya̱d vy ṛ1̱̍tena̍ pū̱rvīḥ |
6.039.04c a̱yam ī̍yata ṛta̱yugbhi̱r aśvai̍ḥ sva̱rvidā̱ nābhi̍nā carṣaṇi̱prāḥ ||

a̱yam | ro̱ca̱ya̱t | a̱ruca̍ḥ | ru̱cā̱naḥ | a̱yam | vā̱sa̱ya̱t | vi | ṛ̱tena̍ | pū̱rvīḥ |
a̱yam | ī̱ya̱te̱ | ṛ̱ta̱yuk-bhi̍ḥ | aśvai̍ḥ | sva̱ḥ-vidā̍ | nābhi̍nā | ca̱rṣa̱ṇi̱-prāḥ ||6.039.04||

6.039.05a nū gṛ̍ṇā̱no gṛ̍ṇa̱te pra̍tna rāja̱nn iṣa̍ḥ pinva vasu̱deyā̍ya pū̱rvīḥ |
6.039.05c a̱pa oṣa̍dhīr avi̱ṣā vanā̍ni̱ gā arva̍to̱ nṝn ṛ̱case̍ rirīhi ||

nu | gṛ̱ṇā̱naḥ | gṛ̱ṇa̱te | pra̱tna̱ | rā̱ja̱n | iṣa̍ḥ | pi̱nva̱ | va̱su̱-deyā̍ya | pū̱rvīḥ |
a̱paḥ | oṣa̍dhīḥ | a̱vi̱ṣā | vanā̍ni | gāḥ | arva̍taḥ | nṝn | ṛ̱case̍ | ri̱rī̱hi̱ ||6.039.05||


6.040.01a indra̱ piba̱ tubhya̍ṁ su̱to madā̱yāva̍ sya̱ harī̱ vi mu̍cā̱ sakhā̍yā |
6.040.01c u̱ta pra gā̍ya ga̱ṇa ā ni̱ṣadyāthā̍ ya̱jñāya̍ gṛṇa̱te vayo̍ dhāḥ ||

indra̍ | piba̍ | tubhya̍m | su̱taḥ | madā̍ya | ava̍ | sya̱ | harī̱ iti̍ | vi | mu̱ca̱ | sakhā̍yā |
u̱ta | pra | gā̱ya̱ | ga̱ṇe | ā | ni̱-sadya | atha̍ | ya̱jñāya̍ | gṛ̱ṇa̱te | vaya̍ḥ | dhā̱ḥ ||6.040.01||

6.040.02a asya̍ piba̱ yasya̍ jajñā̱na i̍ndra̱ madā̍ya̱ kratve̱ api̍bo virapśin |
6.040.02c tam u̍ te̱ gāvo̱ nara̱ āpo̱ adri̱r indu̱ṁ sam a̍hyan pī̱taye̱ sam a̍smai ||

asya̍ | pi̱ba̱ | yasya̍ | ja̱jña̱naḥ | ndra̱ | madā̍ya | kratve̍ | api̍baḥ | vi̱-ra̱pśi̱n |
tam | ū̱m̐ iti̍ | te̱ | gāva̍ḥ | nara̍ḥ | āpa̍ḥ | adri̍ḥ | indu̍m | sam | a̱hya̱n | pī̱taye̍ | sam | a̱smai̱ ||6.040.02||

6.040.03a sami̍ddhe a̱gnau su̱ta i̍ndra̱ soma̱ ā tvā̍ vahantu̱ hara̍yo̱ vahi̍ṣṭhāḥ |
6.040.03c tvā̱ya̱tā mana̍sā johavī̱mīndrā yā̍hi suvi̱tāya̍ ma̱he na̍ḥ ||

sam-i̍ddhe | a̱gnau | su̱te | i̱ndra̱ | some̍ | ā | tvā̱ | va̱ha̱ntu̱ | hara̍yaḥ | vahi̍ṣṭhāḥ |
tvā̱-ya̱tā | mana̍sā | jo̱ha̱vī̱mi̱ | indra̍ | ā | yā̱hi̱ | su̱vi̱tāya̍ | ma̱he | na̍ḥ ||6.040.03||

6.040.04a ā yā̍hi̱ śaśva̍d uśa̱tā ya̍yā̱thendra̍ ma̱hā mana̍sā soma̱peya̍m |
6.040.04c upa̱ brahmā̍ṇi śṛṇava i̱mā no 'thā̍ te ya̱jñas ta̱nve̱3̱̍ vayo̍ dhāt ||

ā | yā̱hi̱ | śaśva̍t | u̱śa̱tā | ya̱yā̱tha̱ | indra̍ | ma̱hā | mana̍sā | so̱ma̱-peya̍m |
upa̍ | brahmā̍ṇi | śṛ̱ṇa̱va̱ḥ | i̱mā | na̱ḥ | atha̍ | te̱ | ya̱jñaḥ | ta̱nve̍ | vaya̍ḥ | dhā̱t ||6.040.04||

6.040.05a yad i̍ndra di̱vi pārye̱ yad ṛdha̱g yad vā̱ sve sada̍ne̱ yatra̱ vāsi̍ |
6.040.05c ato̍ no ya̱jñam ava̍se ni̱yutvā̍n sa̱joṣā̍ḥ pāhi girvaṇo ma̱rudbhi̍ḥ ||

yat | i̱ndra̱ | di̱vi | pārye̍ | yat | ṛdha̍k | yat | vā̱ | sve | sada̍ne | yatra̍ | vā̱ | asi̍ |
ata̍ḥ | na̱ḥ | ya̱jñam | ava̍se | ni̱yutvā̍n | sa̱-joṣā̍ḥ | pā̱hi̱ | gi̱rva̱ṇa̱ḥ | ma̱rut-bhi̍ḥ ||6.040.05||


6.041.01a ahe̍ḻamāna̱ upa̍ yāhi ya̱jñaṁ tubhya̍m pavanta̱ inda̍vaḥ su̱tāsa̍ḥ |
6.041.01c gāvo̱ na va̍jri̱n svam oko̱ acchendrā ga̍hi pratha̱mo ya̱jñiyā̍nām ||

ahe̍ḻamānaḥ | upa̍ | yā̱hi̱ | ya̱jñam | tubhya̍m | pa̱va̱nte̱ | inda̍vaḥ | su̱tāsa̍ḥ |
gāva̍ḥ | na | vā̱jri̱n | svam | oka̍ḥ | accha̍ | indra̍ | ā | ga̱hi̱ | pra̱tha̱maḥ | ya̱jñiyā̍nām ||6.041.01||

6.041.02a yā te̍ kā̱kut sukṛ̍tā̱ yā vari̍ṣṭhā̱ yayā̱ śaśva̱t piba̍si̱ madhva̍ ū̱rmim |
6.041.02c tayā̍ pāhi̱ pra te̍ adhva̱ryur a̍sthā̱t saṁ te̱ vajro̍ vartatām indra ga̱vyuḥ ||

yā | te̱ | kā̱kut | su-kṛ̍tā | yā | vari̍ṣṭhā | yayā̍ | śaśva̍t | piba̍si | madhva̍ḥ | ū̱rmim |
tayā̍ | pā̱hi̱ | pra | te̱ | a̱dhva̱ryuḥ | a̱sthā̱t | sam | te̱ | vajra̍ḥ | va̱rta̱tā̱m | i̱ndra̱ | ga̱vyuḥ ||6.041.02||

6.041.03a e̱ṣa dra̱pso vṛ̍ṣa̱bho vi̱śvarū̍pa̱ indrā̍ya̱ vṛṣṇe̱ sam a̍kāri̱ soma̍ḥ |
6.041.03c e̱tam pi̍ba harivaḥ sthātar ugra̱ yasyeśi̍ṣe pra̱divi̱ yas te̱ anna̍m ||

e̱ṣaḥ | dra̱psaḥ | vṛ̱ṣa̱bhaḥ | vi̱śva-rū̍paḥ | indrā̍ya | vṛṣṇe̍ | sam | a̱kā̱ri̱ | soma̍ḥ |
e̱tam | pi̱ba̱ | ha̱ri̱-va̱ḥ | sthā̱ta̱ḥ | u̱gra̱ | yasya̍ | īśi̍ṣe | pra̱-divi̍ | yaḥ | te̱ | anna̍m ||6.041.03||

6.041.04a su̱taḥ somo̱ asu̍tād indra̱ vasyā̍n a̱yaṁ śreyā̍ñ ciki̱tuṣe̱ raṇā̍ya |
6.041.04c e̱taṁ ti̍tirva̱ upa̍ yāhi ya̱jñaṁ tena̱ viśvā̱s tavi̍ṣī̱r ā pṛ̍ṇasva ||

su̱taḥ | soma̍ḥ | asu̍tāt | i̱ndra̱ | vasyā̍n | a̱yam | śreyā̍n | ci̱ki̱tuṣe̍ | raṇā̍ya |
e̱tam | ti̱ti̱rva̱ḥ | upa̍ | yā̱hi̱ | ya̱jñam | tena̍ | viśvā̍ḥ | tavi̍ṣīḥ | ā | pṛ̱ṇa̱sva̱ ||6.041.04||

6.041.05a hvayā̍masi̱ tvendra̍ yāhy a̱rvāṅ ara̍ṁ te̱ soma̍s ta̱nve̍ bhavāti |
6.041.05c śata̍krato mā̱daya̍svā su̱teṣu̱ prāsmām̐ a̍va̱ pṛta̍nāsu̱ pra vi̱kṣu ||

hvayā̍masi | tvā̱ | ā | i̱ndra̱ | yā̱hi̱ | a̱rvāṅ | ara̍m | te̱ | soma̍ḥ | ta̱nve̍ | bha̱vā̱ti̱ |
śata̍krato̱ iti̱ śata̍-krato | mā̱daya̍sva | su̱teṣu̍ | pra | a̱smān | a̱va̱ | pṛta̍nāsu | pra | vi̱kṣu ||6.041.05||


6.042.01a praty a̍smai̱ pipī̍ṣate̱ viśvā̍ni vi̱duṣe̍ bhara |
6.042.01c a̱ra̱ṁga̱māya̱ jagma̱ye 'pa̍ścāddaghvane̱ nare̍ ||

prati̍ | a̱smai̱ | pipī̍ṣate | viśvā̍ni | vi̱duṣe̍ | bha̱ra̱ |
a̱ra̱m-ga̱māya̍ | jagma̍ye | apa̍ścāt-daghvane | nare̍ ||6.042.01||

6.042.02a em e̍nam pra̱tyeta̍na̱ some̍bhiḥ soma̱pāta̍mam |
6.042.02c ama̍trebhir ṛjī̱ṣiṇa̱m indra̍ṁ su̱tebhi̱r indu̍bhiḥ ||

ā | ī̱m | e̱na̱m | pra̱ti̱-eta̍na | some̍bhiḥ | so̱ma̱-pāta̍nam |
ama̍trebhiḥ | ṛjī̱ṣiṇa̍m | indra̍m | su̱tebhi̍ḥ | indu̍-bhiḥ ||6.042.02||

6.042.03a yadī̍ su̱tebhi̱r indu̍bhi̱ḥ some̍bhiḥ prati̱bhūṣa̍tha |
6.042.03c vedā̱ viśva̍sya̱ medhi̍ro dhṛ̱ṣat taṁ-ta̱m id eṣa̍te ||

yadi̍ | su̱tebhi̍ḥ | indu̍-bhiḥ | some̍bhiḥ | pra̱ti̱-bhūṣa̍tha |
veda̍ | viśva̍sya | medhi̍raḥ | dhṛ̱ṣat | tam-ta̍m | it | ā | ī̱ṣa̱te̱ ||6.042.03||

6.042.04a a̱smā-a̍smā̱ id andha̱so 'dhva̍ryo̱ pra bha̍rā su̱tam |
6.042.04c ku̱vit sa̍masya̱ jenya̍sya̱ śardha̍to̱ 'bhiśa̍ster ava̱spara̍t ||

asmai-a̍smai | it | andha̍saḥ | adhva̍ryo̱ iti̍ | pra | bha̱ra̱ | su̱tam |
ku̱vit | sa̱ma̱sya̱ | jenya̍sya | śardha̍taḥ | a̱bhi-śa̍steḥ | a̱va̱-spara̍t ||6.042.04||


6.043.01a yasya̱ tyac chamba̍ra̱m made̱ divo̍dāsāya ra̱ndhaya̍ḥ |
6.043.01c a̱yaṁ sa soma̍ indra te su̱taḥ piba̍ ||

yasya̍ | tyat | śamba̍ram | made̍ | diva̍ḥ-dāsāya | ra̱ndhaya̍ḥ |
a̱yam | saḥ | soma̍ḥ | i̱ndra̱ | te̱ | su̱taḥ | piba̍ ||6.043.01||

6.043.02a yasya̍ tīvra̱suta̱m mada̱m madhya̱m anta̍ṁ ca̱ rakṣa̍se |
6.043.02c a̱yaṁ sa soma̍ indra te su̱taḥ piba̍ ||

yasya̍ | tī̱vra̱-suta̍m | mada̍m | madhya̍m | anta̍m | ca̱ | rakṣa̍se |
a̱yam | saḥ | soma̍ḥ | i̱ndra̱ | te̱ | su̱taḥ | piba̍ ||6.043.02||

6.043.03a yasya̱ gā a̱ntar aśma̍no̱ made̍ dṛ̱ḻhā a̱vāsṛ̍jaḥ |
6.043.03c a̱yaṁ sa soma̍ indra te su̱taḥ piba̍ ||

yasya̍ | gāḥ | a̱ntaḥ | aśma̍naḥ | made̍ | dṛ̱ḻhāḥ | a̱va̱-asṛ̍jaḥ |
a̱yam | saḥ | soma̍ḥ | i̱ndra̱ | te̱ | su̱taḥ | piba̍ ||6.043.03||

6.043.04a yasya̍ mandā̱no andha̍so̱ māgho̍naṁ dadhi̱ṣe śava̍ḥ |
6.043.04c a̱yaṁ sa soma̍ indra te su̱taḥ piba̍ ||

yasya̍ | ma̱ndā̱naḥ | andha̍saḥ | māgho̍nam | da̱dhi̱ṣe | śava̍ḥ |
a̱yam | saḥ | soma̍ḥ | i̱ndra̱ | te̱ | su̱taḥ | piba̍ ||6.043.04||


6.044.01a yo ra̍yivo ra̱yiṁta̍mo̱ yo dyu̱mnair dyu̱mnava̍ttamaḥ |
6.044.01c soma̍ḥ su̱taḥ sa i̍ndra̱ te 'sti̍ svadhāpate̱ mada̍ḥ ||

yaḥ | ra̱yi̱-va̱ḥ | ra̱yim-ta̍maḥ | yaḥ | dyu̱mnaiḥ | dyu̱mnava̍t-tamaḥ |
soma̍ḥ | su̱taḥ | saḥ | i̱ndra̱ | te̱ | asti̍ | sva̱dhā̱-pa̱te̱ | mada̍ḥ ||6.044.01||

6.044.02a yaḥ śa̱gmas tu̍viśagma te rā̱yo dā̱mā ma̍tī̱nām |
6.044.02c soma̍ḥ su̱taḥ sa i̍ndra̱ te 'sti̍ svadhāpate̱ mada̍ḥ ||

yaḥ | śa̱gmaḥ | tu̱vi̱-śa̱gma̱ | te̱ | rā̱yaḥ | dā̱mā | ma̱tī̱nām |
soma̍ḥ | su̱taḥ | saḥ | i̱ndra̱ | te̱ | asti̍ | sva̱dhā̱-pa̱te̱ | mada̍ḥ ||6.044.02||

6.044.03a yena̍ vṛ̱ddho na śava̍sā tu̱ro na svābhi̍r ū̱tibhi̍ḥ |
6.044.03c soma̍ḥ su̱taḥ sa i̍ndra̱ te 'sti̍ svadhāpate̱ mada̍ḥ ||

yena̍ | vṛ̱ddhaḥ | na | śava̍sā | tu̱raḥ | na | svābhi̍ḥ | ū̱ti-bhi̍ḥ |
soma̍ḥ | su̱taḥ | saḥ | i̱ndra̱ | te̱ | asti̍ | sva̱dhā̱-pa̱te̱ | mada̍ḥ ||6.044.03||

6.044.04a tyam u̍ vo̱ apra̍haṇaṁ gṛṇī̱ṣe śava̍sa̱s pati̍m |
6.044.04c indra̍ṁ viśvā̱sāha̱ṁ nara̱m maṁhi̍ṣṭhaṁ vi̱śvaca̍rṣaṇim ||

tyam | ū̱m̐ iti̍ | va̱ḥ | apra̍-hanam | gṛ̱ṇī̱ṣe | śava̍saḥ | pati̍m |
indra̍m | vi̱śva̱-saha̍m | nara̍m | maṁhi̍ṣṭham | vi̱śva-ca̍rṣaṇim ||6.044.04||

6.044.05a yaṁ va̱rdhaya̱ntīd gira̱ḥ pati̍ṁ tu̱rasya̱ rādha̍saḥ |
6.044.05c tam in nv a̍sya̱ roda̍sī de̱vī śuṣma̍ṁ saparyataḥ ||

yam | va̱rdhaya̍nti | it | gira̍ḥ | pati̍m | tu̱rasya̍ | rādha̍saḥ |
tam | it | nu | a̱sya̱ | roda̍sī̱ iti̍ | de̱vī iti̍ | śuṣma̍m | sa̱pa̱rya̱ta̱ḥ ||6.044.05||

6.044.06a tad va̍ u̱kthasya̍ ba̱rhaṇendrā̍yopastṛṇī̱ṣaṇi̍ |
6.044.06c vipo̱ na yasyo̱tayo̱ vi yad roha̍nti sa̱kṣita̍ḥ ||

tat | va̱ḥ | u̱kthasya̍ | ba̱rhaṇā̍ | indrā̍ya | u̱pa̱-stṛ̱ṇī̱ṣaṇi̍ |
vipa̍ḥ | na | yasya̍ | ū̱taya̍ḥ | vi | yat | roha̍nti | sa̱-kṣita̍ḥ ||6.044.06||

6.044.07a avi̍da̱d dakṣa̍m mi̱tro navī̍yān papā̱no de̱vebhyo̱ vasyo̍ acait |
6.044.07c sa̱sa̱vān stau̱lābhi̍r dhau̱tarī̍bhir uru̱ṣyā pā̱yur a̍bhava̱t sakhi̍bhyaḥ ||

avi̍dat | dakṣa̍m | mi̱traḥ | navī̍yān | pa̱pā̱naḥ | de̱vebhya̍ḥ | vasya̍ḥ | a̱cai̱t |
sa̱sa̱-vān | stau̱lābhi̍ḥ | dhau̱tarī̍bhiḥ | u̱ru̱ṣyā | pā̱yuḥ | a̱bha̱va̱t | sakhi̍-bhyaḥ ||6.044.07||

6.044.08a ṛ̱tasya̍ pa̱thi ve̱dhā a̍pāyi śri̱ye manā̍ṁsi de̱vāso̍ akran |
6.044.08c dadhā̍no̱ nāma̍ ma̱ho vaco̍bhi̱r vapu̍r dṛ̱śaye̍ ve̱nyo vy ā̍vaḥ ||

ṛ̱tasya̍ | pa̱thi | ve̱dhāḥ | a̱pā̱yi̱ | śri̱ye | manā̍ṁsi | de̱vāsa̍ḥ | a̱kra̱n |
dadhā̍naḥ | nāma̍ | ma̱haḥ | vaca̍ḥ-bhiḥ | vapu̍ḥ | dṛ̱śaye̍ | ve̱nyaḥ | vi | ā̱va̱rityā̍vaḥ ||6.044.08||

6.044.09a dyu̱matta̍ma̱ṁ dakṣa̍ṁ dhehy a̱sme sedhā̱ janā̍nām pū̱rvīr arā̍tīḥ |
6.044.09c varṣī̍yo̱ vaya̍ḥ kṛṇuhi̱ śacī̍bhi̱r dhana̍sya sā̱tāv a̱smām̐ a̍viḍḍhi ||

dyu̱mat-ta̍mam | dakṣa̍m | dhe̱hi̱ | a̱sme iti̍ | sedha̍ | janā̍nām | pū̱rvīḥ | arā̍tīḥ |
varṣī̍yaḥ | vaya̍ḥ | kṛ̱ṇu̱hi̱ | śacī̍bhiḥ | dhana̍sya | sā̱tau | a̱smān | a̱vi̱ḍḍhi̱ ||6.044.09||

6.044.10a indra̱ tubhya̱m in ma̍ghavann abhūma va̱yaṁ dā̱tre ha̍rivo̱ mā vi ve̍naḥ |
6.044.10c naki̍r ā̱pir da̍dṛśe martya̱trā kim a̱ṅga ra̍dhra̱coda̍naṁ tvāhuḥ ||

indra̍ | tubhya̍m | it | ma̱gha̱-va̱n | a̱bhū̱ma̱ | va̱yam | dā̱tre | ha̱ri̱-va̱ḥ | mā | vi | ve̱na̱ḥ |
naki̍ḥ | ā̱piḥ | da̱dṛ̱śe̱ | ma̱rtya̱-trā | kim | a̱ṅga | ra̱dhra̱-coda̍nam | tvā̱ | ā̱huḥ ||6.044.10||

6.044.11a mā jasva̍ne vṛṣabha no rarīthā̱ mā te̍ re̱vata̍ḥ sa̱khye ri̍ṣāma |
6.044.11c pū̱rvīṣ ṭa̍ indra ni̱ṣṣidho̱ jane̍ṣu ja̱hy asu̍ṣvī̱n pra vṛ̱hāpṛ̍ṇataḥ ||

mā | jasva̍ne | vṛ̱ṣa̱bha̱ | na̱ḥ | ra̱rī̱thā̱ḥ | mā | te̱ | re̱vata̍ḥ | sa̱khye | ri̱ṣā̱ma̱ |
pū̱rvīḥ | te̱ | i̱ndra̱ | ni̱ḥ-sidha̍ḥ | jane̍ṣu | ja̱hi | asu̍svīn | pra | vṛ̱ha̱ | apṛ̍ṇataḥ ||6.044.11||

6.044.12a ud a̱bhrāṇī̍va sta̱naya̍nn iya̱rtīndro̱ rādhā̱ṁsy aśvyā̍ni̱ gavyā̍ |
6.044.12c tvam a̍si pra̱diva̍ḥ kā̱rudhā̍yā̱ mā tvā̍dā̱māna̱ ā da̍bhan ma̱ghona̍ḥ ||

ut | a̱bhrāṇi̍-iva | sta̱naya̍n | i̱ya̱rti̱ | indra̍ḥ | rādhā̍ṁsi | aśvyā̍ni | gavyā̍ |
tvam | ā̱si̱ | pra̱-diva̍ḥ | kā̱ru-dhā̍yāḥ | mā | tvā̱ | a̱dā̱māna̍ḥ | ā | da̱bha̱n | ma̱ghona̍ḥ ||6.044.12||

6.044.13a adhva̍ryo vīra̱ pra ma̱he su̱tānā̱m indrā̍ya bhara̱ sa hy a̍sya̱ rājā̍ |
6.044.13c yaḥ pū̱rvyābhi̍r u̱ta nūta̍nābhir gī̱rbhir vā̍vṛ̱dhe gṛ̍ṇa̱tām ṛṣī̍ṇām ||

adhva̍ryo̱ iti̍ | vī̱ra̱ | pra | ma̱he | su̱tānā̍m | indrā̍ya | bha̱ra̱ | saḥ | hi | a̱sya̱ | rājā̍ |
yaḥ | pū̱rvyābhi̍ḥ | u̱ta | nūta̍nābhiḥ | gī̱ḥ-bhiḥ | va̱vṛ̱dhe | gṛ̱ṇa̱tām | ṛṣī̍ṇām ||6.044.13||

6.044.14a a̱sya made̍ pu̱ru varpā̍ṁsi vi̱dvān indro̍ vṛ̱trāṇy a̍pra̱tī ja̍ghāna |
6.044.14c tam u̱ pra ho̍ṣi̱ madhu̍mantam asmai̱ soma̍ṁ vī̱rāya̍ śi̱priṇe̱ piba̍dhyai ||

a̱sya | made̍ | pu̱ru | varpā̍ṁsi | vi̱dvān | indra̍ḥ | vṛ̱trāṇi̍ | a̱pra̱ti | ja̱ghā̱na̱ |
tam | ū̱m̐ iti̍ | pra | ho̱ṣi̱ | madhu̍-mantam | a̱smai̱ | soma̍m | vī̱rāya̍ | śi̱priṇe̍ | piba̍dhyai ||6.044.14||

6.044.15a pātā̍ su̱tam indro̍ astu̱ soma̱ṁ hantā̍ vṛ̱traṁ vajre̍ṇa mandasā̱naḥ |
6.044.15c gantā̍ ya̱jñam pa̍rā̱vata̍ś ci̱d acchā̱ vasu̍r dhī̱nām a̍vi̱tā kā̱rudhā̍yāḥ ||

pātā̍ | su̱tam | indra̍ḥ | a̱stu̱ | soma̍m | hantā̍ | vṛ̱tram | vajre̍ṇa | ma̱nda̱sā̱naḥ |
gantā̍ | ya̱jñam | pa̱rā̱-vata̍ḥ | ci̱t | accha̍ | vasu̍ḥ | dhī̱nām | a̱vi̱tā | kā̱ru-dhā̍yāḥ ||6.044.15||

6.044.16a i̱daṁ tyat pātra̍m indra̱pāna̱m indra̍sya pri̱yam a̱mṛta̍m apāyi |
6.044.16c matsa̱d yathā̍ saumana̱sāya̍ de̱vaṁ vy a1̱̍smad dveṣo̍ yu̱yava̱d vy aṁha̍ḥ ||

i̱dam | tyat | pātra̍m | i̱ndra̱-pāna̍m | indra̍sya | pri̱yam | a̱mṛta̍m | a̱pā̱yi̱ |
matsa̍t | yathā̍ | sau̱ma̱na̱sāya̍ | de̱vam | vi | a̱smat | dveṣa̍ḥ | yu̱yava̍t | vi | aṁha̍ḥ ||6.044.16||

6.044.17a e̱nā ma̍ndā̱no ja̱hi śū̍ra̱ śatrū̍ñ jā̱mim ajā̍mim maghavann a̱mitrā̍n |
6.044.17c a̱bhi̱ṣe̱ṇām̐ a̱bhy ā̱3̱̍dedi̍śānā̱n parā̍ca indra̱ pra mṛ̍ṇā ja̱hī ca̍ ||

e̱nā | ma̱ndā̱naḥ | ja̱hi | śū̱ra̱ | śatrū̍n | jā̱mim | ajā̍mim | ma̱gha̱-va̱n | a̱mitrā̍n |
a̱bhi̱-se̱nān | a̱bhi | ā̱-dedi̍śānān | parā̍caḥ | i̱ndra̱ | pra | mṛ̱ṇa̱ | ja̱hi | ca̱ ||6.044.17||

6.044.18a ā̱su ṣmā̍ ṇo maghavann indra pṛ̱tsv a1̱̍smabhya̱m mahi̱ vari̍vaḥ su̱gaṁ ka̍ḥ |
6.044.18c a̱pāṁ to̱kasya̱ tana̍yasya je̱ṣa indra̍ sū̱rīn kṛ̍ṇu̱hi smā̍ no a̱rdham ||

ā̱su | sma̱ | na̱ḥ | ma̱gha̱-va̱n | i̱ndra̱ | pṛ̱t-su | a̱smabhya̍m | mahi̍ | vari̍vaḥ | su̱-gam | ka̱riti̍ kaḥ |
a̱pām | to̱kasya̍ | tana̍yasya | je̱ṣe | indra̍ | sū̱rīn | kṛ̱ṇu̱hi | sma̱ | na̱ḥ | a̱rdham ||6.044.18||

6.044.19a ā tvā̱ hara̍yo̱ vṛṣa̍ṇo yujā̱nā vṛṣa̍rathāso̱ vṛṣa̍raśma̱yo 'tyā̍ḥ |
6.044.19c a̱sma̱trāñco̱ vṛṣa̍ṇo vajra̱vāho̱ vṛṣṇe̱ madā̍ya su̱yujo̍ vahantu ||

ā | tvā̱ | hara̍yaḥ | vṛṣa̍ṇaḥ | yu̱jā̱nāḥ | vṛṣa̍-rathāsaḥ | vṛṣa̍-raśmayaḥ | atyā̍ḥ |
a̱sma̱trāñca̍ḥ | vṛṣa̍ṇaḥ | va̱jra̱-vāha̍ḥ | vṛṣṇe̍ | madā̍ya | su̱-yuja̍ḥ | va̱ha̱ntu̱ ||6.044.19||

6.044.20a ā te̍ vṛṣa̱n vṛṣa̍ṇo̱ droṇa̍m asthur ghṛta̱pruṣo̱ normayo̱ mada̍ntaḥ |
6.044.20c indra̱ pra tubhya̱ṁ vṛṣa̍bhiḥ su̱tānā̱ṁ vṛṣṇe̍ bharanti vṛṣa̱bhāya̱ soma̍m ||

ā | te̱ | vṛ̱ṣa̱n | vṛṣa̍ṇaḥ | droṇa̍m | a̱sthu̱ḥ | ghṛ̱ta̱-pruṣa̍ḥ | na | ū̱rmaya̍ḥ | mada̍ntaḥ |
indra̍ | pra | tubhya̍m | vṛṣa̍-bhiḥ | su̱tānā̍m | vṛṣṇe̍ | bha̱ra̱nti̱ | vṛ̱ṣa̱bhāya̍ | soma̍m ||6.044.20||

6.044.21a vṛṣā̍si di̱vo vṛ̍ṣa̱bhaḥ pṛ̍thi̱vyā vṛṣā̱ sindhū̍nāṁ vṛṣa̱bhaḥ stiyā̍nām |
6.044.21c vṛṣṇe̍ ta̱ indu̍r vṛṣabha pīpāya svā̱dū raso̍ madhu̱peyo̱ varā̍ya ||

vṛṣā̍ | a̱si̱ | di̱vaḥ | vṛ̱ṣa̱bhaḥ | pṛ̱thi̱vyāḥ | vṛṣā̍ | sindhū̍nām | vṛ̱ṣa̱bhaḥ | stiyā̍nām |
vṛṣṇe̍ | te̱ | indu̍ḥ | vṛ̱ṣa̱bha̱ | pī̱pā̱ya̱ | svā̱duḥ | rasa̍ḥ | ma̱dhu̱-peya̍ḥ | varā̍ya ||6.044.21||

6.044.22a a̱yaṁ de̱vaḥ saha̍sā̱ jāya̍māna̱ indre̍ṇa yu̱jā pa̱ṇim a̍stabhāyat |
6.044.22c a̱yaṁ svasya̍ pi̱tur āyu̍dhā̱nīndu̍r amuṣṇā̱d aśi̍vasya mā̱yāḥ ||

a̱yam | de̱vaḥ | saha̍sā | jāya̍mānaḥ | indre̍ṇa | yu̱jā | pa̱ṇim | a̱sta̱bhā̱ya̱t |
a̱yam | svasya̍ | pi̱tuḥ | āyu̍dhāni | indu̍ḥ | a̱mu̱ṣṇā̱t | aśi̍vasya | mā̱yāḥ ||6.044.22||

6.044.23a a̱yam a̍kṛṇod u̱ṣasa̍ḥ su̱patnī̍r a̱yaṁ sūrye̍ adadhā̱j jyoti̍r a̱ntaḥ |
6.044.23c a̱yaṁ tri̱dhātu̍ di̱vi ro̍ca̱neṣu̍ tri̱teṣu̍ vindad a̱mṛta̱ṁ nigū̍ḻham ||

a̱yam | a̱kṛ̱ṇo̱t | u̱ṣasa̍ḥ | su̱-patnī̍ḥ | a̱yam | sūrye̍ | a̱da̱dhā̱t | jyoti̍ḥ | a̱ntariti̍ |
a̱yam | tri̱-dhātu̍ | di̱vi | ro̱ca̱neṣu̍ | tri̱teṣu̍ | vi̱nda̱t | a̱mṛta̍m | ni-gū̍ḻham ||6.044.23||

6.044.24a a̱yaṁ dyāvā̍pṛthi̱vī vi ṣka̍bhāyad a̱yaṁ ratha̍m ayunak sa̱ptara̍śmim |
6.044.24c a̱yaṁ goṣu̱ śacyā̍ pa̱kvam a̱ntaḥ somo̍ dādhāra̱ daśa̍yantra̱m utsa̍m ||

a̱yam | dyāvā̍pṛthi̱vī iti̍ | vi | ska̱bhā̱ya̱t | a̱yam | ratha̍m | a̱yu̱na̱k | sa̱pta-ra̍śmim |
a̱yam | goṣu̍ | śacyā̍ | pa̱kvam | a̱ntariti̍ | soma̍ḥ | dā̱dhā̱ra̱ | daśa̍-yantram | utsa̍m ||6.044.24||


6.045.01a ya āna̍yat parā̱vata̱ḥ sunī̍tī tu̱rvaśa̱ṁ yadu̍m |
6.045.01c indra̱ḥ sa no̱ yuvā̱ sakhā̍ ||

yaḥ | ā | ana̍yat | pa̱rā̱-vata̍ḥ | su-nī̍tī | tu̱rvaśa̍m | yadu̍m |
indra̍ḥ | saḥ | na̱ḥ | yuvā̍ | sakhā̍ ||6.045.01||

6.045.02a a̱vi̱pre ci̱d vayo̱ dadha̍d anā̱śunā̍ ci̱d arva̍tā |
6.045.02c indro̱ jetā̍ hi̱taṁ dhana̍m ||

a̱vi̱pre | ci̱t | vaya̍ḥ | dadha̍t | a̱nā̱śunā̍ | ci̱t | arva̍tā |
indra̍ḥ | jetā̍ | hi̱tam | dhana̍m ||6.045.02||

6.045.03a ma̱hīr a̍sya̱ praṇī̍tayaḥ pū̱rvīr u̱ta praśa̍stayaḥ |
6.045.03c nāsya̍ kṣīyanta ū̱taya̍ḥ ||

ma̱hīḥ | a̱sya̱ | pra-nī̍tayaḥ | pū̱rvīḥ | u̱ta | pra-śa̍stayaḥ |
na | a̱sya̱ | kṣī̱ya̱nte̱ | ū̱taya̍ḥ ||6.045.03||

6.045.04a sakhā̍yo̱ brahma̍vāha̱se 'rca̍ta̱ pra ca̍ gāyata |
6.045.04c sa hi na̱ḥ prama̍tir ma̱hī ||

sakhā̍yaḥ | brahma̍-vāhase | arca̍ta | pra | ca̱ | gā̱ya̱ta̱ |
saḥ | hi | na̱ḥ | pra-ma̍tiḥ | ma̱hī ||6.045.04||

6.045.05a tvam eka̍sya vṛtrahann avi̱tā dvayo̍r asi |
6.045.05c u̱tedṛśe̱ yathā̍ va̱yam ||

tvam | eka̍sya | vṛ̱tra̱-ha̱n | a̱vi̱tā | dvayo̍ḥ | a̱si̱ |
u̱ta | ī̱dṛśe̍ | yathā̍ | va̱yam ||6.045.05||

6.045.06a naya̱sīd v ati̱ dviṣa̍ḥ kṛ̱ṇoṣy u̍kthaśa̱ṁsina̍ḥ |
6.045.06c nṛbhi̍ḥ su̱vīra̍ ucyase ||

naya̍si | it | ū̱m̐ iti̍ | ati̍ | dviṣa̍ḥ | kṛ̱ṇoṣi̍ | u̱ktha̱-śa̱ṁsina̍ḥ |
nṛ-bhi̍ḥ | su̱-vīra̍ḥ | u̱cya̱se̱ ||6.045.06||

6.045.07a bra̱hmāṇa̱m brahma̍vāhasaṁ gī̱rbhiḥ sakhā̍yam ṛ̱gmiya̍m |
6.045.07c gāṁ na do̱hase̍ huve ||

bra̱hmāṇa̍m | brahma̍-vāhasam | gī̱ḥ-bhiḥ | sakhā̍yam | ṛ̱gmiya̍m |
gām | na | do̱hase̍ | hu̱ve̱ ||6.045.07||

6.045.08a yasya̱ viśvā̍ni̱ hasta̍yor ū̱cur vasū̍ni̱ ni dvi̱tā |
6.045.08c vī̱rasya̍ pṛtanā̱ṣaha̍ḥ ||

yasya̍ | viśvā̍ni | hasta̍yoḥ | ū̱cuḥ | vasū̍ni | ni | dvi̱tā |
vī̱rasya̍ | pṛ̱ta̱nā̱-saha̍ḥ ||6.045.08||

6.045.09a vi dṛ̱ḻhāni̍ cid adrivo̱ janā̍nāṁ śacīpate |
6.045.09c vṛ̱ha mā̱yā a̍nānata ||

vi | dṛ̱ḻhāni̍ | ci̱t | a̱dri̱-va̱ḥ | janā̍nām | śa̱cī̱-pa̱te̱ |
vṛ̱ha | mā̱yāḥ | a̱nā̱na̱ta̱ ||6.045.09||

6.045.10a tam u̍ tvā satya somapā̱ indra̍ vājānām pate |
6.045.10c ahū̍mahi śrava̱syava̍ḥ ||

tam | ū̱m̐ iti̍ | tvā̱ | sa̱tya̱ | so̱ma̱-pā̱ḥ | indra̍ | vā̱jā̱nā̱m | pa̱te̱ |
ahū̍mahi | śra̱va̱syava̍ḥ ||6.045.10||

6.045.11a tam u̍ tvā̱ yaḥ pu̱rāsi̍tha̱ yo vā̍ nū̱naṁ hi̱te dhane̍ |
6.045.11c havya̱ḥ sa śru̍dhī̱ hava̍m ||

tam | ū̱m̐ iti̍ | tvā̱ | yaḥ | pu̱rā | āsi̍tha | yaḥ | vā̱ | nū̱nam | hi̱te | dhane̍ |
havya̍ḥ | saḥ | śru̱dhi̱ | hava̍m ||6.045.11||

6.045.12a dhī̱bhir arva̍dbhi̱r arva̍to̱ vājā̍m̐ indra śra̱vāyyā̍n |
6.045.12c tvayā̍ jeṣma hi̱taṁ dhana̍m ||

dhī̱bhiḥ | arva̍t-bhiḥ | arva̍taḥ | vājā̍n | i̱ndra̱ | śra̱vāyyā̍n |
tvayā̍ | je̱ṣma̱ | hi̱tam | dhana̍m ||6.045.12||

6.045.13a abhū̍r u vīra girvaṇo ma̱hām̐ i̍ndra̱ dhane̍ hi̱te |
6.045.13c bhare̍ vitanta̱sāyya̍ḥ ||

abhū̍ḥ | ū̱m̐ iti̍ | vī̱ra̱ | gi̱rva̱ṇa̱ḥ | ma̱hān | i̱ndra̱ | dhane̍ | hi̱te |
bhare̍ | vi̱ta̱nta̱sāyya̍ḥ ||6.045.13||

6.045.14a yā ta̍ ū̱tir a̍mitrahan ma̱kṣūja̍vasta̱māsa̍ti |
6.045.14c tayā̍ no hinuhī̱ ratha̍m ||

yā | te̱ | ū̱tiḥ | a̱mi̱tra̱-ha̱n | ma̱kṣuja̍vaḥ-tamā | asa̍ti |
tayā̍ | na̱ḥ | hi̱nu̱hi̱ | ratha̍m ||6.045.14||

6.045.15a sa rathe̍na ra̱thīta̍mo̱ 'smāke̍nābhi̱yugva̍nā |
6.045.15c jeṣi̍ jiṣṇo hi̱taṁ dhana̍m ||

saḥ | rathe̍na | ra̱thi-ta̍maḥ | a̱smāke̍na | a̱bhi̱-yugva̍nā |
jeṣi̍ | ji̱ṣṇo̱ iti̍ | hi̱tam | dhana̍m ||6.045.15||

6.045.16a ya eka̱ it tam u̍ ṣṭuhi kṛṣṭī̱nāṁ vica̍rṣaṇiḥ |
6.045.16c pati̍r ja̱jñe vṛṣa̍kratuḥ ||

yaḥ | eka̍ḥ | it | tam | ū̱m̐ iti̍ | stu̱hi̱ | kṛ̱ṣṭī̱nām | vi-ca̍rṣaṇiḥ |
pati̍ḥ | ja̱jñe | vṛṣa̍-kratuḥ ||6.045.16||

6.045.17a yo gṛ̍ṇa̱tām id āsi̍thā̱pir ū̱tī śi̱vaḥ sakhā̍ |
6.045.17c sa tvaṁ na̍ indra mṛḻaya ||

yaḥ | gṛ̱ṇa̱tām | it | āsi̍tha | ā̱piḥ | ū̱tī | śi̱vaḥ | sakhā̍ |
saḥ | tvam | na̱ḥ | i̱ndra̱ | mṛ̱ḻa̱ya̱ ||6.045.17||

6.045.18a dhi̱ṣva vajra̱ṁ gabha̍styo rakṣo̱hatyā̍ya vajrivaḥ |
6.045.18c sā̱sa̱hī̱ṣṭhā a̱bhi spṛdha̍ḥ ||

dhi̱ṣva | vajra̍m | gabha̍styoḥ | ra̱kṣa̱ḥ-hatyā̍ya | va̱jri̱-va̱ḥ |
sa̱sa̱hī̱ṣṭhāḥ | a̱bhi | spṛdha̍ḥ ||6.045.18||

6.045.19a pra̱tnaṁ ra̍yī̱ṇāṁ yuja̱ṁ sakhā̍yaṁ kīri̱coda̍nam |
6.045.19c brahma̍vāhastamaṁ huve ||

pra̱tnam | ra̱yī̱ṇām | yuja̍m | sakhā̍yam | kī̱ri̱-coda̍nam |
brahma̍-vāhaḥ-tamam | hu̱ve̱ ||6.045.19||

6.045.20a sa hi viśvā̍ni̱ pārthi̍vā̱m̐ eko̱ vasū̍ni̱ patya̍te |
6.045.20c girva̍ṇastamo̱ adhri̍guḥ ||

saḥ | hi | viśvā̍ni | pārthi̍vā | eka̍ḥ | vasū̍ni | patya̍te |
girva̍ṇaḥ-tamaḥ | adhri̍-guḥ ||6.045.20||

6.045.21a sa no̍ ni̱yudbhi̱r ā pṛ̍ṇa̱ kāma̱ṁ vāje̍bhir a̱śvibhi̍ḥ |
6.045.21c goma̍dbhir gopate dhṛ̱ṣat ||

saḥ | na̱ḥ | ni̱yut-bhi̍ḥ | ā | pṛ̱ṇa̱ | kāma̍m | vāje̍-bhiḥ | a̱śvi-bhi̍ḥ |
goma̍t-bhiḥ | go̱-pa̱te̱ | dhṛ̱ṣat ||6.045.21||

6.045.22a tad vo̍ gāya su̱te sacā̍ puruhū̱tāya̱ satva̍ne |
6.045.22c śaṁ yad gave̱ na śā̱kine̍ ||

tat | va̱ḥ | gā̱ya̱ | su̱te | sacā̍ | pu̱ru̱-hū̱tāya̍ | satva̍ne |
śam | yat | gave̍ | na | śā̱kine̍ ||6.045.22||

6.045.23a na ghā̱ vasu̱r ni ya̍mate dā̱naṁ vāja̍sya̱ goma̍taḥ |
6.045.23c yat sī̱m upa̱ śrava̱d gira̍ḥ ||

na | gha̱ | vasu̍ḥ | ni | ya̱ma̱te̱ | dā̱nam | vāja̍sya | go-ma̍taḥ |
yat | sī̱m | upa̍ | śra̱va̱t | gira̍ḥ ||6.045.23||

6.045.24a ku̱vitsa̍sya̱ pra hi vra̱jaṁ goma̍ntaṁ dasyu̱hā gama̍t |
6.045.24c śacī̍bhi̱r apa̍ no varat ||

ku̱vit-sa̍sya | pra | hi | vra̱jam | go-ma̍ntam | da̱syu̱-hā | gama̍t |
śacī̍bhiḥ | apa̍ | na̱ḥ | va̱ra̱t ||6.045.24||

6.045.25a i̱mā u̍ tvā śatakrato̱ 'bhi pra ṇo̍nuvu̱r gira̍ḥ |
6.045.25c indra̍ va̱tsaṁ na mā̱tara̍ḥ ||

i̱māḥ | ū̱m̐ iti̍ | tvā̱ | śa̱ta̱kra̱to̱ iti̍ śata-krato | a̱bhi | pra | no̱nu̱vu̱ḥ | gira̍ḥ |
indra̍ | va̱tsam | na | mā̱tara̍ḥ ||6.045.25||

6.045.26a dū̱ṇāśa̍ṁ sa̱khyaṁ tava̱ gaur a̍si vīra gavya̱te |
6.045.26c aśvo̍ aśvāya̱te bha̍va ||

du̱ḥ-naśa̍m | sa̱khyam | tava̍ | gauḥ | a̱si̱ | vī̱ra̱ | ga̱vya̱te |
aśva̍ḥ | a̱śva̱-ya̱te | bha̱va̱ ||6.045.26||

6.045.27a sa ma̍ndasvā̱ hy andha̍so̱ rādha̍se ta̱nvā̍ ma̱he |
6.045.27c na sto̱tāra̍ṁ ni̱de ka̍raḥ ||

saḥ | ma̱nda̱sva̱ | hi | andha̍saḥ | rādha̍se | ta̱nvā̍ | ma̱he |
na | sto̱tāra̍m | ni̱de | ka̱ra̱ḥ ||6.045.27||

6.045.28a i̱mā u̍ tvā su̱te-su̍te̱ nakṣa̍nte girvaṇo̱ gira̍ḥ |
6.045.28c va̱tsaṁ gāvo̱ na dhe̱nava̍ḥ ||

i̱māḥ | ū̱m̐ iti̍ | tvā̱ | su̱te-su̍te | nakṣa̍nte | gi̱rva̱ṇa̱ḥ | gira̍ḥ |
va̱tsam | gāva̍ḥ | na | dhe̱nava̍ḥ ||6.045.28||

6.045.29a pu̱rū̱tama̍m purū̱ṇāṁ sto̍tṝ̱ṇāṁ vivā̍ci |
6.045.29c vāje̍bhir vājaya̱tām ||

pu̱ru̱-tama̍m | pu̱rū̱ṇām | sto̱tṝ̱ṇām | vi-vā̍ci |
vāje̍bhiḥ | vā̱ja̱-ya̱tām ||6.045.29||

6.045.30a a̱smāka̍m indra bhūtu te̱ stomo̱ vāhi̍ṣṭho̱ anta̍maḥ |
6.045.30c a̱smān rā̱ye ma̱he hi̍nu ||

a̱smāka̍m | i̱ndra̱ | bhū̱tu̱ | te̱ | stoma̍ḥ | vāhi̍ṣṭhaḥ | anta̍maḥ |
a̱smān | rā̱ye | ma̱he | hi̱nu̱ ||6.045.30||

6.045.31a adhi̍ bṛ̱buḥ pa̍ṇī̱nāṁ varṣi̍ṣṭhe mū̱rdhann a̍sthāt |
6.045.31c u̱ruḥ kakṣo̱ na gā̱ṅgyaḥ ||

adhi̍ | bṛ̱buḥ | pa̱ṇī̱nām | varṣi̍ṣṭhe | mū̱rdhan | a̱sthā̱t |
u̱ruḥ | kakṣa̍ḥ | na | gā̱ṅgyaḥ ||6.045.31||

6.045.32a yasya̍ vā̱yor i̍va dra̱vad bha̱drā rā̱tiḥ sa̍ha̱sriṇī̍ |
6.045.32c sa̱dyo dā̱nāya̱ maṁha̍te ||

yasya̍ | vā̱yoḥ-i̍va | dra̱vat | bha̱drā | rā̱tiḥ | sa̱ha̱sriṇī̍ |
sa̱dyaḥ | dā̱nāya̍ | maṁha̍te ||6.045.32||

6.045.33a tat su no̱ viśve̍ a̱rya ā sadā̍ gṛṇanti kā̱rava̍ḥ |
6.045.33c bṛ̱buṁ sa̍hasra̱dāta̍maṁ sū̱riṁ sa̍hasra̱sāta̍mam ||

tat | su | na̱ḥ | viśve̍ | a̱ryaḥ | ā | sadā̍ | gṛ̱ṇa̱nti̱ | kā̱rava̍ḥ |
bṛ̱bum | sa̱ha̱sra̱-dāta̍mam | sū̱rim | sa̱ha̱sra̱-sāta̍mam ||6.045.33||


6.046.01a tvām id dhi havā̍mahe sā̱tā vāja̍sya kā̱rava̍ḥ |
6.046.01c tvāṁ vṛ̱treṣv i̍ndra̱ satpa̍ti̱ṁ nara̱s tvāṁ kāṣṭhā̱sv arva̍taḥ ||

tvām | it | hi | havā̍mahe | sā̱tā | vāja̍sya | kā̱rava̍ḥ |
tvām | vṛ̱treṣu̍ | i̱ndra̱ | sat-pa̍tim | nara̍ḥ | tvām | kāṣṭhā̍su | arva̍taḥ ||6.046.01||

6.046.02a sa tvaṁ na̍ś citra vajrahasta dhṛṣṇu̱yā ma̱haḥ sta̍vā̱no a̍drivaḥ |
6.046.02c gām aśva̍ṁ ra̱thya̍m indra̱ saṁ ki̍ra sa̱trā vāja̱ṁ na ji̱gyuṣe̍ ||

saḥ | tvam | na̱ḥ | ci̱tra̱ | va̱jra̱-ha̱sta̱ | dhṛ̱ṣṇu̱-yā | ma̱haḥ | sta̱vā̱naḥ | a̱dri̱-va̱ḥ |
gām | aśva̍m | ra̱thya̍m | i̱ndra̱ | sam | ki̱ra̱ | sa̱trā | vāja̍m | na | ji̱gyuṣe̍ ||6.046.02||

6.046.03a yaḥ sa̍trā̱hā vica̍rṣaṇi̱r indra̱ṁ taṁ hū̍mahe va̱yam |
6.046.03c saha̍sramuṣka̱ tuvi̍nṛmṇa̱ satpa̍te̱ bhavā̍ sa̱matsu̍ no vṛ̱dhe ||

yaḥ | sa̱trā̱-hā | vi-ca̍rṣaṇiḥ | indra̍m | tam | hū̱ma̱he̱ | va̱yam |
saha̍sra-muṣka | tuvi̍-nṛmṇa | sat-pa̍te | bhava̍ | sa̱mat-su̍ | na̱ḥ | vṛ̱dhe ||6.046.03||

6.046.04a bādha̍se̱ janā̍n vṛṣa̱bheva̍ ma̱nyunā̱ ghṛṣau̍ mī̱ḻha ṛ̍cīṣama |
6.046.04c a̱smāka̍m bodhy avi̱tā ma̍hādha̱ne ta̱nūṣv a̱psu sūrye̍ ||

bādha̍se | janā̍n | vṛ̱ṣa̱bhā-i̍va | ma̱nyunā̍ | ghṛṣau̍ | mī̱ḻhe | ṛ̱cī̱ṣa̱ma̱ |
a̱smāka̍m | bo̱dhi̱ | a̱vi̱tā | ma̱hā̱-dha̱ne | ta̱nūṣu̍ | a̱p-su | sūrye̍ ||6.046.04||

6.046.05a indra̱ jyeṣṭha̍ṁ na̱ ā bha̍ra̱m̐ oji̍ṣṭha̱m papu̍ri̱ śrava̍ḥ |
6.046.05c yene̱me ci̍tra vajrahasta̱ roda̍sī̱ obhe su̍śipra̱ prāḥ ||

indra̍ | jyeṣṭha̍m | na̱ḥ | ā | bha̱ra̱ | oji̍ṣṭham | papu̍ri | śrava̍ḥ |
yena̍ | i̱me iti̍ | ci̱tra̱ | va̱jra̱-ha̱sta̱ | roda̍sī̱ iti̍ | ā | u̱bhe iti̍ | su̱śi̱pra̱ | prāḥ ||6.046.05||

6.046.06a tvām u̱gram ava̍se carṣaṇī̱saha̱ṁ rāja̍n de̱veṣu̍ hūmahe |
6.046.06c viśvā̱ su no̍ vithu̱rā pi̍bda̱nā va̍so̱ 'mitrā̍n su̱ṣahā̍n kṛdhi ||

tvām | u̱gram | ava̍se | ca̱rṣa̱ṇi̱-saha̍m | rāja̍n | de̱veṣu̍ | hū̱ma̱he̱ |
viśvā̍ | su | na̱ḥ | vi̱thu̱rā | pi̱bda̱nā | va̱so̱ iti̍ | a̱mitrā̍n | su̱-sahā̍n | kṛ̱dhi̱ ||6.046.06||

6.046.07a yad i̍ndra̱ nāhu̍ṣī̱ṣv ām̐ ojo̍ nṛ̱mṇaṁ ca̍ kṛ̱ṣṭiṣu̍ |
6.046.07c yad vā̱ pañca̍ kṣitī̱nāṁ dyu̱mnam ā bha̍ra sa̱trā viśvā̍ni̱ pauṁsyā̍ ||

yat | i̱ndra̱ | nāhu̍ṣīṣu | ā | oja̍ḥ | nṛ̱mṇam | ca̱ | kṛ̱ṣṭiṣu̍ |
yat | vā̱ | pañca̍ | kṣi̱tī̱nām | dyu̱mnam | ā | bha̱ra̱ | sa̱trā | viśvā̍ni | pauṁsyā̍ ||6.046.07||

6.046.08a yad vā̍ tṛ̱kṣau ma̍ghavan dru̱hyāv ā jane̱ yat pū̱rau kac ca̱ vṛṣṇya̍m |
6.046.08c a̱smabhya̱ṁ tad ri̍rīhi̱ saṁ nṛ̱ṣāhye̱ 'mitrā̍n pṛ̱tsu tu̱rvaṇe̍ ||

yat | vā̱ | tṛ̱kṣau | ma̱gha̱-va̱n | dru̱hyau | ā | jane̍ | yat | pū̱rau | kat | ca̱ | vṛṣṇya̍m |
a̱smabhya̍m | tat | ri̱rī̱hi̱ | sam | nṛ̱-sahye̍ | a̱mitrā̍n | pṛ̱t-su | tu̱rvaṇe̍ ||6.046.08||

6.046.09a indra̍ tri̱dhātu̍ śara̱ṇaṁ tri̱varū̍thaṁ svasti̱mat |
6.046.09c cha̱rdir ya̍ccha ma̱ghava̍dbhyaś ca̱ mahya̍ṁ ca yā̱vayā̍ di̱dyum e̍bhyaḥ ||

indra̍ | tri̱-dhātu̍ | śa̱ra̱ṇam | tri̱-varū̍tham | sva̱sti̱-mat |
cha̱rdiḥ | ya̱ccha̱ | ma̱ghava̍t-bhyaḥ | ca̱ | mahya̍m | ca̱ | ya̱vaya̍ | di̱dyum | e̱bhya̱ḥ ||6.046.09||

6.046.10a ye ga̍vya̱tā mana̍sā̱ śatru̍m āda̱bhur a̍bhipra̱ghnanti̍ dhṛṣṇu̱yā |
6.046.10c adha̍ smā no maghavann indra girvaṇas tanū̱pā anta̍mo bhava ||

ye | ga̱vya̱tā | mana̍sā | śatru̍m | ā̱-da̱bhuḥ | a̱bhi̱-pra̱ghnanti̍ | dhṛ̱ṣṇu̱-yā |
adha̍ | sma̱ | na̱ḥ | ma̱gha̱-va̱n | i̱ndra̱ | gi̱rva̱ṇa̱ḥ | ta̱nū̱-pāḥ | anta̍maḥ | bha̱va̱ ||6.046.10||

6.046.11a adha̍ smā no vṛ̱dhe bha̱vendra̍ nā̱yam a̍vā yu̱dhi |
6.046.11c yad a̱ntari̍kṣe pa̱taya̍nti pa̱rṇino̍ di̱dyava̍s ti̱gmamū̍rdhānaḥ ||

adha̍ | sma̱ | na̱ḥ | vṛ̱dhe | bha̱va̱ | indra̍ | nā̱yam | a̱va̱ | yu̱dhi |
yat | a̱ntari̍kṣe | pa̱taya̍nti | pa̱rṇina̍ḥ | di̱dyava̍ḥ | ti̱gma-mū̍rdhānaḥ ||6.046.11||

6.046.12a yatra̱ śūrā̍sas ta̱nvo̍ vitanva̱te pri̱yā śarma̍ pitṝ̱ṇām |
6.046.12c adha̍ smā yaccha ta̱nve̱3̱̍ tane̍ ca cha̱rdir a̱citta̍ṁ yā̱vaya̱ dveṣa̍ḥ ||

yatra̍ | śūrā̍saḥ | ta̱nva̍ḥ | vi̱-ta̱nva̱te | pri̱yā | śarma̍ | pi̱tṝ̱ṇām |
adha̍ | sma̱ | ya̱ccha̱ | ta̱nve̍ | tane̍ | ca̱ | cha̱rdhiḥ | a̱citta̍m | ya̱vaya̍ | dveṣa̍ḥ ||6.046.12||

6.046.13a yad i̍ndra̱ sarge̱ arva̍taś co̱dayā̍se mahādha̱ne |
6.046.13c a̱sa̱ma̱ne adhva̍ni vṛji̱ne pa̱thi śye̱nām̐ i̍va śravasya̱taḥ ||

yat | i̱ndra̱ | sarge̍ | arva̍taḥ | co̱dayā̍se | ma̱hā̱-dha̱ne |
a̱sa̱ma̱ne | adhva̍ni | vṛ̱ji̱ne | pa̱thi | śye̱nān-i̍va | śra̱va̱sya̱taḥ ||6.046.13||

6.046.14a sindhū̍m̐r iva prava̱ṇa ā̍śu̱yā ya̱to yadi̱ klośa̱m anu̱ ṣvaṇi̍ |
6.046.14c ā ye vayo̱ na varvṛ̍ta̱ty āmi̍ṣi gṛbhī̱tā bā̱hvor gavi̍ ||

sindhū̍n-iva | pra̱va̱ṇe | ā̱śu̱-yā | ya̱taḥ | yadi̍ | klośa̍m | anu̍ | svani̍ |
ā | ye | vaya̍ḥ | na | varvṛ̍ta̱ti | āmi̍ṣi | gṛ̱bhī̱tāḥ | bā̱hvoḥ | gavi̍ ||6.046.14||


6.047.01a svā̱duṣ kilā̱yam madhu̍mām̐ u̱tāyaṁ tī̱vraḥ kilā̱yaṁ rasa̍vām̐ u̱tāyam |
6.047.01c u̱to nv a1̱̍sya pa̍pi̱vāṁsa̱m indra̱ṁ na kaś ca̱na sa̍hata āha̱veṣu̍ ||

svā̱duḥ | kila̍ | a̱yam | madhu̍-mān | u̱ta | a̱yam | tī̱vraḥ | kila | a̱yam | rasa̍-vān | u̱ta | a̱yam |
u̱to iti̍ | nu | a̱sya | pa̱pi̱-vāṁsa̍m | indra̍m | na | kaḥ | ca̱na | sa̱ha̱te̱ | ā̱-ha̱veṣu̍ ||6.047.01||

6.047.02a a̱yaṁ svā̱dur i̱ha madi̍ṣṭha āsa̱ yasyendro̍ vṛtra̱hatye̍ ma̱māda̍ |
6.047.02c pu̱rūṇi̱ yaś cyau̱tnā śamba̍rasya̱ vi na̍va̱tiṁ nava̍ ca de̱hyo̱3̱̍ han ||

a̱yam | svā̱duḥ | i̱ha | madi̍ṣṭhaḥ | ā̱sa̱ | yasya̍ | indra̍ḥ | vṛ̱tra̱-hatye̍ | ma̱māda̍ |
pu̱rūṇi̍ | yaḥ | cyau̱tnā | śamba̍rasya | vi | na̱va̱tim | nava̍ | ca̱ | de̱hya̍ḥ | han ||6.047.02||

6.047.03a a̱yam me̍ pī̱ta ud i̍yarti̱ vāca̍m a̱yam ma̍nī̱ṣām u̍śa̱tīm a̍jīgaḥ |
6.047.03c a̱yaṁ ṣaḻ u̱rvīr a̍mimīta̱ dhīro̱ na yābhyo̱ bhuva̍na̱ṁ kac ca̱nāre ||

a̱yam | me̱ | pī̱taḥ | ut | i̱ya̱rti̱ | vāca̍m | a̱yam | ma̱nī̱ṣām | u̱śa̱tīm | a̱jī̱ga̱riti̍ |
a̱yam | ṣaṭ | u̱rvīḥ | a̱mi̱mī̱ta̱ | dhīra̍ḥ | na | yābhya̍ḥ | bhuva̍nam | kat | ca̱na | ā̱re ||6.047.03||

6.047.04a a̱yaṁ sa yo va̍ri̱māṇa̍m pṛthi̱vyā va̱rṣmāṇa̍ṁ di̱vo akṛ̍ṇod a̱yaṁ saḥ |
6.047.04c a̱yam pī̱yūṣa̍ṁ ti̱sṛṣu̍ pra̱vatsu̱ somo̍ dādhāro̱rv a1̱̍ntari̍kṣam ||

a̱yam | saḥ | yaḥ | va̱ri̱māṇa̍m | pṛ̱thi̱vyāḥ | va̱rṣmāṇa̍m | di̱vaḥ | akṛ̍ṇot | a̱yam | saḥ |
a̱yam | pī̱yūṣa̍m | ti̱sṛṣu̍ | pra̱vat-su̍ | soma̍ḥ | dā̱dhā̱ra̱ | u̱ru | a̱ntari̍kṣam ||6.047.04||

6.047.05a a̱yaṁ vi̍dac citra̱dṛśī̍ka̱m arṇa̍ḥ śu̱krasa̍dmanām u̱ṣasā̱m anī̍ke |
6.047.05c a̱yam ma̱hān ma̍ha̱tā skambha̍ne̱nod dyām a̍stabhnād vṛṣa̱bho ma̱rutvā̍n ||

a̱yam | vi̱da̱t | ci̱tra̱-dṛśī̍kam | arṇa̍ḥ | śu̱kra-sa̍dmanām | u̱ṣasā̍m | anī̍ke |
a̱yam | ma̱hān | ma̱ha̱tā | skambha̍nena | ut | dyām | a̱sta̱bhnā̱t | vṛ̱ṣa̱bhaḥ | ma̱rutvā̍n ||6.047.05||

6.047.06a dhṛ̱ṣat pi̍ba ka̱laśe̱ soma̍m indra vṛtra̱hā śū̍ra sama̱re vasū̍nām |
6.047.06c mādhya̍ṁdine̱ sava̍na̱ ā vṛ̍ṣasva rayi̱sthāno̍ ra̱yim a̱smāsu̍ dhehi ||

dhṛ̱ṣat | pi̱ba̱ | ka̱laśe̍ | soma̍m | i̱ndra̱ | vṛ̱tra̱-hā | śū̱ra̱ | sa̱m-a̱re | vasū̍nām |
mādhya̍ndine | sava̍ne | ā | vṛ̱ṣa̱sva̱ | ra̱yi̱-sthāna̍ḥ | ra̱yim | a̱smāsu̍ | dhe̱hi̱ ||6.047.06||

6.047.07a indra̱ pra ṇa̍ḥ purae̱teva̍ paśya̱ pra no̍ naya prata̱raṁ vasyo̱ accha̍ |
6.047.07c bhavā̍ supā̱ro a̍tipāra̱yo no̱ bhavā̱ sunī̍tir u̱ta vā̱manī̍tiḥ ||

indra̍ | pra | na̱ḥ | pu̱ra̱e̱tā-i̍va | paśya̍ | pra | na̱ḥ | na̱ya̱ | pra̱-ta̱ram | vasya̍ḥ | accha̍ |
bhava̍ | su̱-pā̱raḥ | a̱ti̱-pā̱ra̱yaḥ | na̱ḥ | bhava̍ | su-nī̍tiḥ | u̱ta | vā̱ma-nī̍tiḥ ||6.047.07||

6.047.08a u̱ruṁ no̍ lo̱kam anu̍ neṣi vi̱dvān sva̍rva̱j jyoti̱r abha̍yaṁ sva̱sti |
6.047.08c ṛ̱ṣvā ta̍ indra̱ sthavi̍rasya bā̱hū upa̍ stheyāma śara̱ṇā bṛ̱hantā̍ ||

u̱rum | na̱ḥ | lo̱kam | anu̍ | ne̱ṣi̱ | vi̱dvān | sva̍r-vat | jyoti̍ḥ | abha̍yam | sva̱sti |
ṛ̱ṣvā | te̱ | i̱ndra̱ | sthavi̍rasya | bā̱hū iti̍ | upa̍ | sthe̱yā̱ma̱ | śa̱ra̱ṇā | bṛ̱hantā̍ ||6.047.08||

6.047.09a vari̍ṣṭhe na indra va̱ndhure̍ dhā̱ vahi̍ṣṭhayoḥ śatāva̱nn aśva̍yo̱r ā |
6.047.09c iṣa̱m ā va̍kṣī̱ṣāṁ varṣi̍ṣṭhā̱m mā na̍s tārīn maghava̱n rāyo̍ a̱ryaḥ ||

vari̍ṣṭhe | na̱ḥ | i̱ndra̱ | va̱ndhure̍ | dhā̱ḥ | vahi̍ṣṭhayoḥ | śa̱ta̱-va̱n | aśva̍yoḥ | ā |
iṣa̍m | ā | va̱kṣi̱ | i̱ṣām | varṣi̍ṣṭhām | mā | na̱ḥ | tā̱rī̱t | ma̱gha̱-va̱n | rāya̍ḥ | a̱ryaḥ ||6.047.09||

6.047.10a indra̍ mṛ̱ḻa mahya̍ṁ jī̱vātu̍m iccha co̱daya̱ dhiya̱m aya̍so̱ na dhārā̍m |
6.047.10c yat kiṁ cā̱haṁ tvā̱yur i̱daṁ vadā̍mi̱ taj ju̍ṣasva kṛ̱dhi mā̍ de̱vava̍ntam ||

indra̍ | mṛ̱ḻa | mahya̍m | jī̱vātu̍m | i̱ccha̱ | co̱daya̍ | dhiya̍m | aya̍saḥ | na | dhārā̍m |
yat | kim | ca̱ | a̱ham | tvā̱-yuḥ | i̱dam | vadā̍mi | tat | ju̱ṣa̱sva̱ | kṛ̱dhi | mā̱ | de̱va-va̍ntam ||6.047.10||

6.047.11a trā̱tāra̱m indra̍m avi̱tāra̱m indra̱ṁ have̍-have su̱hava̱ṁ śūra̱m indra̍m |
6.047.11c hvayā̍mi śa̱kram pu̍ruhū̱tam indra̍ṁ sva̱sti no̍ ma̱ghavā̍ dhā̱tv indra̍ḥ ||

trā̱tāra̍m | indra̍m | a̱vi̱tāra̍m | indra̍m | have̍-have | su̱-hava̍m | śūra̍m | indra̍m |
hvayā̍mi | śa̱kram | pu̱ru̱-hū̱tam | indra̍m | sva̱sti | na̱ḥ | ma̱gha-vā̍ | dhā̱tu̱ | indra̍ḥ ||6.047.11||

6.047.12a indra̍ḥ su̱trāmā̱ svavā̱m̐ avo̍bhiḥ sumṛḻī̱ko bha̍vatu vi̱śvave̍dāḥ |
6.047.12c bādha̍tā̱ṁ dveṣo̱ abha̍yaṁ kṛṇotu su̱vīrya̍sya̱ pata̍yaḥ syāma ||

indra̍ḥ | su̱-trāmā̍ | sva-vā̍n | ava̍ḥ-bhiḥ | su̱-mṛ̱ḻī̱kaḥ | bha̱va̱tu̱ | vi̱śva-ve̍dāḥ |
bādha̍tām | dveṣa̍ḥ | abha̍yam | kṛ̱ṇo̱tu̱ | su̱-vīrya̍sya | pata̍yaḥ | syā̱ma̱ ||6.047.12||

6.047.13a tasya̍ va̱yaṁ su̍ma̱tau ya̱jñiya̱syāpi̍ bha̱dre sau̍mana̱se syā̍ma |
6.047.13c sa su̱trāmā̱ svavā̱m̐ indro̍ a̱sme ā̱rāc ci̱d dveṣa̍ḥ sanu̱tar yu̍yotu ||

tasya̍ | va̱yam | su̱-ma̱tau | ya̱jñiya̍sya | api̍ | bha̱dre | sau̱ma̱na̱se | syā̱ma̱ |
saḥ | su̱-trāmā̍ | sva-vā̍n | indra̍ḥ | a̱sme iti̍ | ā̱rāt | ci̱t | dveṣa̍ḥ | sa̱nu̱taḥ | yu̱yo̱tu̱ ||6.047.13||

6.047.14a ava̱ tve i̍ndra pra̱vato̱ normir giro̱ brahmā̍ṇi ni̱yuto̍ dhavante |
6.047.14c u̱rū na rādha̱ḥ sava̍nā pu̱rūṇy a̱po gā va̍jrin yuvase̱ sam indū̍n ||

ava̍ | tve iti̍ | i̱ndra̱ | pra̱-vata̍ḥ | na | ū̱rmiḥ | gira̍ḥ | brahmā̍ṇi | ni̱-yuta̍ḥ | dha̱va̱nte̱ |
u̱ru | na | rādha̍ḥ | sava̍nā | pu̱rūṇi̍ | a̱paḥ | gāḥ | va̱jri̱n | yu̱va̱se̱ | sam | indū̍n ||6.047.14||

6.047.15a ka ī̍ṁ stava̱t kaḥ pṛ̍ṇā̱t ko ya̍jāte̱ yad u̱gram in ma̱ghavā̍ vi̱śvahāve̍t |
6.047.15c pādā̍v iva pra̱hara̍nn a̱nyam-a̍nyaṁ kṛ̱ṇoti̱ pūrva̱m apa̍ra̱ṁ śacī̍bhiḥ ||

kaḥ | ī̱m | sta̱va̱t | kaḥ | pṛ̱ṇā̱t | kaḥ | ya̱jā̱te̱ | yat | u̱gram | it | ma̱gha-vā̍ | vi̱śvahā | ave̍t |
pādau̍-iva | pra̱-hara̍n | a̱nyam-a̍nyam | kṛ̱ṇoti̍ | pūrva̍m | apa̍ram | śacī̍bhiḥ ||6.047.15||

6.047.16a śṛ̱ṇve vī̱ra u̱gram-u̍graṁ damā̱yann a̱nyam-a̍nyam atinenī̱yamā̍naḥ |
6.047.16c e̱dha̱mā̱na̱dviḻ u̱bhaya̍sya̱ rājā̍ coṣkū̱yate̱ viśa̱ indro̍ manu̱ṣyā̍n ||

śṛ̱ṇve | vī̱raḥ | u̱gram-u̍gram | da̱ma̱-yan | a̱nyam-a̍nyam | a̱ti̱-ne̱nī̱yamā̍naḥ |
e̱dha̱mā̱na̱-dviṭ | u̱bhaya̍sya | rājā̍ | co̱ṣkū̱yate̍ | viśa̍ḥ | indra̍ḥ | ma̱nu̱ṣayā̍n ||6.047.16||

6.047.17a parā̱ pūrve̍ṣāṁ sa̱khyā vṛ̍ṇakti vi̱tartu̍rāṇo̱ apa̍rebhir eti |
6.047.17c anā̍nubhūtīr avadhūnvā̱naḥ pū̱rvīr indra̍ḥ śa̱rada̍s tartarīti ||

parā̍ | pūrve̍ṣām | sa̱khyā | vṛ̱ṇa̱kti̱ | vi̱-tartu̍rāṇaḥ | apa̍rebhiḥ | e̱ti̱ |
ana̍nu-bhūtīḥ | a̱va̱-dhū̱nvā̱naḥ | pū̱rvīḥ | indra̍ḥ | śa̱rada̍ḥ | ta̱rta̱rī̱ti̱ ||6.047.17||

6.047.18a rū̱paṁ-rū̍pa̱m prati̍rūpo babhūva̱ tad a̍sya rū̱pam pra̍ti̱cakṣa̍ṇāya |
6.047.18c indro̍ mā̱yābhi̍ḥ puru̱rūpa̍ īyate yu̱ktā hy a̍sya̱ hara̍yaḥ śa̱tā daśa̍ ||

rū̱pam-rū̍pam | prati̍-rūpaḥ | ba̱bhū̱va̱ | tat | a̱sya̱ | rū̱pam | pra̱ti̱-cakṣa̍ṇāya |
indra̍ḥ | mā̱yābhi̍ḥ | pu̱ru̱-rūpa̍ḥ | ī̱ya̱te̱ | yu̱ktāḥ | hi | a̱sya̱ | hara̍yaḥ | śa̱tā | daśa̍ ||6.047.18||

6.047.19a yu̱jā̱no ha̱ritā̱ rathe̱ bhūri̱ tvaṣṭe̱ha rā̍jati |
6.047.19c ko vi̱śvāhā̍ dviṣa̱taḥ pakṣa̍ āsata u̱tāsī̍neṣu sū̱riṣu̍ ||

yu̱jā̱naḥ | ha̱ritā̍ | rathe̍ | bhūri̍ | tvaṣṭā̍ | i̱ha | rā̱ja̱ti̱ |
kaḥ | vi̱śvāhā̍ | dvi̱ṣa̱taḥ | pakṣa̍ḥ | ā̱sa̱te̱ | u̱ta | āsī̍neṣu | sū̱riṣu̍ ||6.047.19||

6.047.20a a̱ga̱vyū̱ti kṣetra̱m āga̍nma devā u̱rvī sa̱tī bhūmi̍r aṁhūra̱ṇābhū̍t |
6.047.20c bṛha̍spate̱ pra ci̍kitsā̱ gavi̍ṣṭāv i̱tthā sa̱te ja̍ri̱tra i̍ndra̱ panthā̍m ||

a̱ga̱vyū̱ti | kṣetra̍m | ā | a̱ga̱nma̱ | de̱vā̱ḥ | u̱rvī | sa̱tī | bhūmi̍ḥ | a̱ṁhū̱ra̱ṇā | a̱bhū̱t |
bṛha̍spate | pra | ci̱ki̱tsa̱ | go-i̍ṣṭau | i̱tthā | sa̱te | ja̱ri̱tre | i̱ndra̱ | panthā̍m ||6.047.20||

6.047.21a di̱ve-di̍ve sa̱dṛśī̍r a̱nyam ardha̍ṁ kṛ̱ṣṇā a̍sedha̱d apa̱ sadma̍no̱ jāḥ |
6.047.21c aha̍n dā̱sā vṛ̍ṣa̱bho va̍sna̱yanto̱davra̍je va̱rcina̱ṁ śamba̍raṁ ca ||

di̱ve-di̍ve | sa̱-dṛśī̍ḥ | a̱nyam | ardha̍m | kṛ̱ṣṇāḥ | a̱se̱dha̱t | apa̍ | sadma̍naḥ | jāḥ |
aha̍n | dā̱sā | vṛ̱ṣa̱bhaḥ | va̱sna̱yantā̍ | u̱da-vra̍je | va̱rcina̍m | śamba̍ram | ca̱ ||6.047.21||

6.047.22a pra̱sto̱ka in nu rādha̍sas ta indra̱ daśa̱ kośa̍yī̱r daśa̍ vā̱jino̍ 'dāt |
6.047.22c divo̍dāsād atithi̱gvasya̱ rādha̍ḥ śāmba̱raṁ vasu̱ praty a̍grabhīṣma ||

pra̱sto̱kaḥ | it | nu | rādha̍saḥ | te̱ | i̱ndra̱ | daśa̍ | kośa̍yīḥ | daśa̍ | vā̱jina̍ḥ | a̱dā̱t |
diva̍ḥ-dāsāt | a̱ti̱thi̱-gvasya̍ | rādha̍ḥ | śā̱mba̱ram | vasu̍ | prati̍ | a̱gra̱bhī̱ṣma̱ ||6.047.22||

6.047.23a daśāśvā̱n daśa̱ kośā̱n daśa̱ vastrādhi̍bhojanā |
6.047.23c daśo̍ hiraṇyapi̱ṇḍān divo̍dāsād asāniṣam ||

daśa̍ | aśvā̍n | daśa̍ | kośā̍n | daśa̍ | vastrā̍ | adhi̍-bhojanā |
daso̱ iti̍ | hi̱ra̱ṇya̱-pi̱ṇḍān | diva̍ḥ-dāsāt | a̱sā̱ni̱ṣa̱m ||6.047.23||

6.047.24a daśa̱ rathā̱n praṣṭi̍mataḥ śa̱taṁ gā atha̍rvabhyaḥ |
6.047.24c a̱śva̱thaḥ pā̱yave̍ 'dāt ||

daśa̍ | rathā̍n | praṣṭi̍-mataḥ | śa̱tam | gāḥ | atha̍rva-bhyaḥ |
a̱śva̱thaḥ | pā̱yave̍ | a̱dā̱t ||6.047.24||

6.047.25a mahi̱ rādho̍ vi̱śvaja̍nya̱ṁ dadhā̍nān bha̱radvā̍jān sārñja̱yo a̱bhy a̍yaṣṭa ||

mahi̍ | rādha̍ḥ | vi̱śva-ja̍nyam | dadhā̍nān | bha̱rat-vā̍jān | sa̱rñja̱yaḥ | a̱bhi | a̱ya̱ṣṭa̱ ||6.047.25||

6.047.26a vana̍spate vī̱ḍva̍ṅgo̱ hi bhū̱yā a̱smatsa̍khā pra̱tara̍ṇaḥ su̱vīra̍ḥ |
6.047.26c gobhi̱ḥ saṁna̍ddho asi vī̱ḻaya̍svāsthā̱tā te̍ jayatu̱ jetvā̍ni ||

vana̍spate | vī̱ḻu-a̍ṅgaḥ | hi | bhū̱yāḥ | a̱smat-sa̍khā | pra̱-tara̍ṇaḥ | su̱-vīra̍ḥ |
gobhi̍ḥ | sam-na̍ddhaḥ | a̱si̱ | vī̱ḻaya̍sva | ā̱-sthā̱tā | te̱ | ja̱ya̱tu̱ | jetvā̍ni ||6.047.26||

6.047.27a di̱vas pṛ̍thi̱vyāḥ pary oja̱ udbhṛ̍ta̱ṁ vana̱spati̍bhya̱ḥ pary ābhṛ̍ta̱ṁ saha̍ḥ |
6.047.27c a̱pām o̱jmāna̱m pari̱ gobhi̱r āvṛ̍ta̱m indra̍sya̱ vajra̍ṁ ha̱viṣā̱ ratha̍ṁ yaja ||

di̱vaḥ | pṛ̱thi̱vyāḥ | pari̍ | oja̍ḥ | ut-bhṛ̍tam | va̱na̱spati̍-bhyaḥ | pari̍ | ā-bhṛ̍tam | saha̍ḥ |
a̱pām | o̱jmāna̍m | pari̍ | gobhi̍ḥ | ā-vṛ̍tam | indra̍sya | vajra̍m | ha̱viṣā̍ | ratha̍m | ya̱ja̱ ||6.047.27||

6.047.28a indra̍sya̱ vajro̍ ma̱rutā̱m anī̍kam mi̱trasya̱ garbho̱ varu̍ṇasya̱ nābhi̍ḥ |
6.047.28c semāṁ no̍ ha̱vyadā̍tiṁ juṣā̱ṇo deva̍ ratha̱ prati̍ ha̱vyā gṛ̍bhāya ||

indra̍sya | vajra̍ḥ | ma̱rutā̍m | anī̍kam | mi̱trasya̍ | garbha̍ḥ | varu̍ṇasya | nābhi̍ḥ |
saḥ | i̱mām | na̱ḥ | ha̱vyad-ā̍tim | ju̱ṣā̱ṇaḥ | deva̍ | ra̱tha̱ | prati̍ | ha̱vyā | gṛ̱bhā̱ya̱ ||6.047.28||

6.047.29a upa̍ śvāsaya pṛthi̱vīm u̱ta dyām pu̍ru̱trā te̍ manutā̱ṁ viṣṭhi̍ta̱ṁ jaga̍t |
6.047.29c sa du̍ndubhe sa̱jūr indre̍ṇa de̱vair dū̱rād davī̍yo̱ apa̍ sedha̱ śatrū̍n ||

upa̍ | śvā̱sa̱ya̱ | pṛ̱thi̱vīm | u̱ta | dyām | pu̱ru̱-trā | te̱ | ma̱nu̱tā̱m | vi-sthi̍tam | jaga̍t |
saḥ | du̱ndu̱bhe̱ | sa̱-jūḥ | indre̍ṇa | de̱vaiḥ | dū̱rāt | davī̍yaḥ | apa̍ | se̱dha̱ | śatrū̍n ||6.047.29||

6.047.30a ā kra̍ndaya̱ bala̱m ojo̍ na̱ ā dhā̱ niḥ ṣṭa̍nihi duri̱tā bādha̍mānaḥ |
6.047.30c apa̍ protha dundubhe du̱cchunā̍ i̱ta indra̍sya mu̱ṣṭir a̍si vī̱ḻaya̍sva ||

ā | kra̱nda̱ya̱ | bala̍m | oja̍ḥ | na̱ḥ | ā | dhā̱ḥ | niḥ | sta̱ni̱hi̱ | du̱ḥ-i̱tā | bādha̍mānaḥ |
apa̍ | pro̱tha̱ | du̱ndu̱bhe̱ | du̱cchunā̍ḥ | i̱taḥ | indra̍sya | mu̱ṣṭiḥ | a̱si̱ | vī̱ḻaya̍sva ||6.047.30||

6.047.31a āmūr a̍ja pra̱tyāva̍rtaye̱māḥ ke̍tu̱mad du̍ndu̱bhir vā̍vadīti |
6.047.31c sam aśva̍parṇā̱ś cara̍nti no̱ naro̱ 'smāka̍m indra ra̱thino̍ jayantu ||

ā | a̱mūḥ | a̱ja̱ | pra̱ti̱-āva̍rtaya | i̱māḥ | ke̱tu̱-mat | du̱ndu̱bhiḥ | vā̱va̱dī̱ti̱ |
sam | aśva̍-parṇāḥ | cara̍nti | na̱ḥ | nara̍ḥ | a̱smāka̍m | i̱ndra̱ | ra̱thina̍ḥ | ja̱ya̱ntu̱ ||6.047.31||


6.048.01a ya̱jñā-ya̍jñā vo a̱gnaye̍ gi̱rā-gi̍rā ca̱ dakṣa̍se |
6.048.01c pra-pra̍ va̱yam a̱mṛta̍ṁ jā̱tave̍dasam pri̱yam mi̱traṁ na śa̍ṁsiṣam ||

ya̱jñā-ya̍jñā | va̱ḥ | a̱gnaye̍ | gi̱rā-gi̍rā | ca̱ | dakṣa̍se |
pra-pra̍ | va̱yam | a̱mṛta̍m | jā̱ta-ve̍dasam | pri̱yam | mi̱tram | na | śa̱ṁsi̱ṣa̱m ||6.048.01||

6.048.02a ū̱rjo napā̍ta̱ṁ sa hi̱nāyam a̍sma̱yur dāśe̍ma ha̱vyadā̍taye |
6.048.02c bhuva̱d vāje̍ṣv avi̱tā bhuva̍d vṛ̱dha u̱ta trā̱tā ta̱nūnā̍m ||

ūrjaḥ | napā̍tam | saḥ | hi̱na | a̱yam | a̱sma̱-yuḥ | dāśe̍ma | ha̱vya-dā̍taye |
bhuva̍t | vāje̍ṣu | a̱vi̱tā | bhuva̍t | vṛ̱dhaḥ | u̱ta | trā̱tā | ta̱nūnā̍m ||6.048.02||

6.048.03a vṛṣā̱ hy a̍gne a̱jaro̍ ma̱hān vi̱bhāsy a̱rciṣā̍ |
6.048.03c aja̍sreṇa śo̱ciṣā̱ śośu̍cac chuce sudī̱tibhi̱ḥ su dī̍dihi ||

vṛṣā̍ | hi | a̱gne̱ | a̱jara̍ḥ | ma̱hān | vi̱-bhāsi̍ | a̱rciṣā̍ |
aja̍sreṇa | śo̱ciṣā̍ | śośu̍cat | śu̱ce̱ | su̱dī̱ti-bhi̍ḥ | su | dī̱di̱hi̱ ||6.048.03||

6.048.04a ma̱ho de̱vān yaja̍si̱ yakṣy ā̍nu̱ṣak tava̱ kratvo̱ta da̱ṁsanā̍ |
6.048.04c a̱rvāca̍ḥ sīṁ kṛṇuhy a̱gne 'va̍se̱ rāsva̱ vājo̱ta va̍ṁsva ||

ma̱haḥ | de̱vān | yaja̍si | yakṣi̍ | ā̱nu̱ṣak | tava̍ | kratvā̍ | u̱ta | da̱ṁsanā̍ |
a̱rvāca̍ḥ | sī̱m | kṛ̱ṇu̱hi̱ | a̱gne̱ | ava̍se | rāsva̍ | vājā̍ | u̱ta | va̱ṁsva̱ ||6.048.04||

6.048.05a yam āpo̱ adra̍yo̱ vanā̱ garbha̍m ṛ̱tasya̱ pipra̍ti |
6.048.05c saha̍sā̱ yo ma̍thi̱to jāya̍te̱ nṛbhi̍ḥ pṛthi̱vyā adhi̱ sāna̍vi ||

yam | āpa̍ḥ | adra̍yaḥ | vanā̍ | garbha̍m | ṛ̱tasya̍ | pipra̍ti |
saha̍sā | yaḥ | ma̱thi̱taḥ | jāya̍te | nṛ-bhi̍ḥ | pṛ̱thi̱vyāḥ | adhi̍ | sāna̍vi ||6.048.05||

6.048.06a ā yaḥ pa̱prau bhā̱nunā̱ roda̍sī u̱bhe dhū̱mena̍ dhāvate di̱vi |
6.048.06c ti̱ras tamo̍ dadṛśa̱ ūrmyā̱sv ā śyā̱vāsv a̍ru̱ṣo vṛṣā śyā̱vā a̍ru̱ṣo vṛṣā̍ ||

ā | yaḥ | pa̱prau | bhā̱nunā̍ | roda̍sī̱ iti̍ | u̱bhe iti̍ | dhū̱mena̍ | dhā̱va̱te̱ | di̱vi |
ti̱raḥ | tama̍ḥ | da̱dṛ̱śe̱ | ūrmyā̍su | ā | śyā̱vāsu̍ | a̱ru̱ṣaḥ | vṛṣā̍ | ā | śyā̱vāḥ | a̱ru̱ṣaḥ | vṛṣā̍ ||6.048.06||

6.048.07a bṛ̱hadbhi̍r agne a̱rcibhi̍ḥ śu̱kreṇa̍ deva śo̱ciṣā̍ |
6.048.07c bha̱radvā̍je samidhā̱no ya̍viṣṭhya re̱van na̍ḥ śukra dīdihi dyu̱mat pā̍vaka dīdihi ||

bṛ̱hat-bhi̍ḥ | a̱gne̱ | a̱rci-bhi̍ḥ | śu̱kreṇa̍ | de̱va̱ | śo̱ciṣā̍ |
bha̱rat-vā̍je | sa̱m-i̱dhā̱naḥ | ya̱vi̱ṣṭhya̱ | re̱vat | na̱ḥ | śu̱kra̱ | dī̱di̱hi̱ | dyu̱-mat | pā̱va̱ka̱ | dī̱di̱hi̱ ||6.048.07||

6.048.08a viśvā̍sāṁ gṛ̱hapa̍tir vi̱śām a̍si̱ tvam a̍gne̱ mānu̍ṣīṇām |
6.048.08c śa̱tam pū̱rbhir ya̍viṣṭha pā̱hy aṁha̍saḥ same̱ddhāra̍ṁ śa̱taṁ himā̍ḥ sto̱tṛbhyo̱ ye ca̱ dada̍ti ||

viśvā̍sām | gṛ̱ha-pa̍tiḥ | vi̱śām | a̱si̱ | tvam | a̱gne̱ | mānu̍ṣīṇām |
śa̱tam | pū̱ḥ-bhiḥ | ya̱vi̱ṣṭha̱ | pā̱hi̱ | aṁha̍saḥ | sa̱m-e̱ddhāra̍m | śa̱tam | himā̍ḥ | sto̱tṛ-bhya̍ḥ | ye | ca̱ | dada̍ti ||6.048.08||

6.048.09a tvaṁ na̍ś ci̱tra ū̱tyā vaso̱ rādhā̍ṁsi codaya |
6.048.09c a̱sya rā̱yas tvam a̍gne ra̱thīr a̍si vi̱dā gā̱dhaṁ tu̱ce tu na̍ḥ ||

tvam | na̱ḥ | ci̱traḥ | ū̱tyā | vaso̱ iti̍ | rādhā̍ṁsi | co̱da̱ya̱ |
a̱sya | rā̱yaḥ | tvam | a̱gne̱ | ra̱thīḥ | a̱si̱ | vi̱dāḥ | gā̱dham | tu̱ce | tu | na̱ḥ ||6.048.09||

6.048.10a parṣi̍ to̱kaṁ tana̍yam pa̱rtṛbhi̱ṣ ṭvam ada̍bdhai̱r apra̍yutvabhiḥ |
6.048.10c agne̱ heḻā̍ṁsi̱ daivyā̍ yuyodhi̱ no 'de̍vāni̱ hvarā̍ṁsi ca ||

parṣi̍ | to̱kam | tana̍yam | pa̱rtṛ-bhi̍ḥ | tvam | ada̍bdhaiḥ | apra̍yutva-bhiḥ |
agne̍ | helā̍ṁsi | daivyā̍ | yu̱yo̱dhi̱ | na̱ḥ | ade̍vāni | hvarā̍ṁsi | ca̱ ||6.048.10||

6.048.11a ā sa̍khāyaḥ saba̱rdughā̍ṁ dhe̱num a̍jadhva̱m upa̱ navya̍sā̱ vaca̍ḥ |
6.048.11c sṛ̱jadhva̱m ana̍pasphurām ||

ā | sa̱khā̱ya̱ḥ | sa̱ba̱ḥ-dughā̍m | dhe̱num | a̱ja̱dhva̱m | upa̍ | navya̍sā | vaca̍ḥ |
sṛ̱jadhva̍m | ana̍pa-sphurām ||6.048.11||

6.048.12a yā śardhā̍ya̱ māru̍tāya̱ svabhā̍nave̱ śravo 'mṛ̍tyu̱ dhukṣa̍ta |
6.048.12c yā mṛ̍ḻī̱ke ma̱rutā̍ṁ tu̱rāṇā̱ṁ yā su̱mnair e̍va̱yāva̍rī ||

yā | śardhā̍ya | māru̍tāya | sva-bhā̍nave | śrava̍ḥ | amṛ̍tyu | dhukṣa̍ta |
yā | mṛ̱ḻī̱ke | ma̱rutā̍m | tu̱rāṇā̍m | yā | su̱mnaiḥ | e̱va̱-yāva̍rī ||6.048.12||

6.048.13a bha̱radvā̍jā̱yāva̍ dhukṣata dvi̱tā |
6.048.13b dhe̱nuṁ ca̍ vi̱śvado̍hasa̱m iṣa̍ṁ ca vi̱śvabho̍jasam ||

bha̱rat-vā̍jāya | ava̍ | dhu̱kṣa̱ta̱ | dvi̱tā |
dhe̱num | ca̱ | vi̱śva-do̍hasam | iṣa̍m | ca̱ | vi̱śva-bho̍jasam ||6.048.13||

6.048.14a taṁ va̱ indra̱ṁ na su̱kratu̱ṁ varu̍ṇam iva mā̱yina̍m |
6.048.14c a̱rya̱maṇa̱ṁ na ma̱ndraṁ sṛ̱prabho̍jasa̱ṁ viṣṇu̱ṁ na stu̍ṣa ā̱diśe̍ ||

tam | va̱ḥ | indra̍m | na | su̱-kratu̍m | varu̍ṇam-iva | mā̱yina̍m |
a̱rya̱maṇa̍m | na | ma̱ndram | sṛ̱pra-bho̍jasam | viṣṇu̍m | na | stu̱ṣe̱ | ā̱-diśe̍ ||6.048.14||

6.048.15a tve̱ṣaṁ śardho̱ na māru̍taṁ tuvi̱ṣvaṇy a̍na̱rvāṇa̍m pū̱ṣaṇa̱ṁ saṁ yathā̍ śa̱tā |
6.048.15c saṁ sa̱hasrā̱ kāri̍ṣac carṣa̱ṇibhya̱ ām̐ ā̱vir gū̱ḻhā vasū̍ karat su̱vedā̍ no̱ vasū̍ karat ||

tve̱ṣam | śardha̍ḥ | na | māru̍tam | tu̱vi̱-svaṇi̍ | a̱na̱rvāṇa̍m | pū̱ṣaṇa̍m | sam | yathā̍ | śa̱tā |
sam | sa̱hasrā̍ | kāri̍ṣat | ca̱rṣa̱ṇi-bhya̍ḥ | ā | ā̱viḥ | gū̱ḻhā | vasu̍ | ka̱ra̱t | su̱-vedā̍ | na̱ḥ | vasu̍ | ka̱ra̱t ||6.048.15||

6.048.16a ā mā̍ pūṣa̱nn upa̍ drava̱ śaṁsi̍ṣa̱ṁ nu te̍ apika̱rṇa ā̍ghṛṇe |
6.048.16c a̱ghā a̱ryo arā̍tayaḥ ||

ā | mā̱ | pū̱ṣa̱n | upa̍ | dra̱va̱ | śaṁsi̍ṣam | nu | te̱ | a̱pi̱-ka̱rṇe | ā̱ghṛ̱ṇe̱ |
a̱ghāḥ | a̱ryaḥ | arā̍tayaḥ ||6.048.16||

6.048.17a mā kā̍ka̱mbīra̱m ud vṛ̍ho̱ vana̱spati̱m aśa̍stī̱r vi hi nīna̍śaḥ |
6.048.17c mota sūro̱ aha̍ e̱vā ca̱na grī̱vā ā̱dadha̍te̱ veḥ ||

mā | kā̱ka̱mbīra̍m | ut | vṛ̱ha̱ḥ | vana̱spati̍m | aśa̍stīḥ | vi | hi | nīna̍śaḥ |
mā | u̱ta | sūra̍ḥ | aha̱riti̍ | e̱va | ca̱na | grī̱vā | ā̱-dadha̍te | veḥ ||6.048.17||

6.048.18a dṛte̍r iva te 'vṛ̱kam a̍stu sa̱khyam |
6.048.18b acchi̍drasya dadha̱nvata̱ḥ supū̍rṇasya dadha̱nvata̍ḥ ||

dṛte̍ḥ-iva | te | a̱vṛ̱kam | a̱stu̱ | sa̱khyam |
acchi̍drasya | da̱dha̱n-vata̍ḥ | su-pū̍rṇasya | da̱dha̱n-vata̍ḥ ||6.048.18||

6.048.19a pa̱ro hi martyai̱r asi̍ sa̱mo de̱vair u̱ta śri̱yā |
6.048.19c a̱bhi khya̍ḥ pūṣa̱n pṛta̍nāsu na̱s tvam avā̍ nū̱naṁ yathā̍ pu̱rā ||

pa̱raḥ | hi | martyai̍ḥ | asi̍ | sa̱maḥ | de̱vaiḥ | u̱ta | śri̱yā |
a̱bhi | khya̱ḥ | pū̱ṣa̱n | pṛta̍nāsu | na̱ḥ | tvam | ava̍ | nū̱nam | yathā̍ | pu̱rā ||6.048.19||

6.048.20a vā̱mī vā̱masya̍ dhūtaya̱ḥ praṇī̍tir astu sū̱nṛtā̍ |
6.048.20c de̱vasya̍ vā maruto̱ martya̍sya vejā̱nasya̍ prayajyavaḥ ||

vā̱mī | vā̱masya̍ | dhū̱ta̱ya̱ḥ | pra-nī̍tiḥ | a̱stu̱ | sū̱nṛtā̍ |
de̱vasya̍ | vā̱ | ma̱ru̱ta̱ḥ | martya̍sya | vā̱ | ī̱jā̱nasya̍ | pra̱-ya̱jya̱va̱ḥ ||6.048.20||

6.048.21a sa̱dyaś ci̱d yasya̍ carkṛ̱tiḥ pari̱ dyāṁ de̱vo naiti̱ sūrya̍ḥ |
6.048.21c tve̱ṣaṁ śavo̍ dadhire̱ nāma̍ ya̱jñiya̍m ma̱ruto̍ vṛtra̱haṁ śavo̱ jyeṣṭha̍ṁ vṛtra̱haṁ śava̍ḥ ||

sa̱dyaḥ | ci̱t | yasya̍ | ca̱rkṛ̱tiḥ | pari̍ | dyām | de̱vaḥ | na | eti̍ | sūrya̍ḥ |
tve̱ṣam | śava̍ḥ | da̱dhi̱re̱ | nāma̍ | ya̱jñiya̍m | ma̱ruta̍ḥ | vṛ̱tra̱-ham | śava̍ḥ | jyeṣṭha̍m | vṛ̱tra̱-ham | śava̍ḥ ||6.048.21||

6.048.22a sa̱kṛd dha̱ dyaur a̍jāyata sa̱kṛd bhūmi̍r ajāyata |
6.048.22c pṛśnyā̍ du̱gdhaṁ sa̱kṛt paya̱s tad a̱nyo nānu̍ jāyate ||

sa̱kṛt | ha̱ | dyauḥ | a̱jā̱ya̱ta̱ | sa̱kṛt | bhūmi̍ḥ | a̱jā̱ya̱ta̱ |
pṛśnyā̍ḥ | du̱gdham | sa̱kṛt | paya̍ḥ | tat | a̱nyaḥ | na | anu̍ | jā̱ya̱te̱ ||6.048.22||


6.049.01a stu̱ṣe jana̍ṁ suvra̱taṁ navya̍sībhir gī̱rbhir mi̱trāvaru̍ṇā sumna̱yantā̍ |
6.049.01c ta ā ga̍mantu̱ ta i̱ha śru̍vantu sukṣa̱trāso̱ varu̍ṇo mi̱tro a̱gniḥ ||

stu̱ṣe | jana̍m | su̱-vra̱tam | navya̍sībhiḥ | gī̱ḥ-bhiḥ | mi̱trāvaru̍ṇā | su̱mna̱-yantā̍ |
te | ā | ga̱ma̱ntu̱ | te | i̱ha | śru̱va̱ntu̱ | su̱-kṣa̱trāsa̍ḥ | varu̍ṇaḥ | mi̱traḥ | a̱gniḥ ||6.049.01||

6.049.02a vi̱śo-vi̍śa̱ īḍya̍m adhva̱reṣv adṛ̍ptakratum ara̱tiṁ yu̍va̱tyoḥ |
6.049.02c di̱vaḥ śiśu̱ṁ saha̍saḥ sū̱num a̱gniṁ ya̱jñasya̍ ke̱tum a̍ru̱ṣaṁ yaja̍dhyai ||

vi̱śaḥ-vi̍śaḥ | ī̱ḍya̍m | a̱dhva̱reṣu̍ | adṛ̍pta-kratum | a̱ra̱tim | yu̱va̱tyoḥ |
di̱vaḥ | śiśu̍m | saha̍saḥ | śū̱num | a̱gnim | ya̱jñasya̍ | ke̱tum | a̱ru̱ṣam | yaja̍dhyai ||6.049.02||

6.049.03a a̱ru̱ṣasya̍ duhi̱tarā̱ virū̍pe̱ stṛbhi̍r a̱nyā pi̍pi̱śe sūro̍ a̱nyā |
6.049.03c mi̱tha̱sturā̍ vi̱cara̍ntī pāva̱ke manma̍ śru̱taṁ na̍kṣata ṛ̱cyamā̍ne ||

a̱ru̱ṣasya̍ | du̱hi̱tarā̍ | virū̍pe̱ iti̱ vi-rū̍pe | stṛ-bhi̍ḥ | a̱nyā | pi̱pi̱śe | sūra̍ḥ | a̱nyā |
mi̱tha̱ḥ-turā̍ | vi̱cara̍ntī̱ iti̍ vi̱-cara̍ntī | pā̱va̱ke iti̍ | manma̍ | śru̱tam | na̱kṣa̱ta̱ | ṛ̱cyamā̍ne̱ iti̍ ||6.049.03||

6.049.04a pra vā̱yum acchā̍ bṛha̱tī ma̍nī̱ṣā bṛ̱hadra̍yiṁ vi̱śvavā̍raṁ ratha̱prām |
6.049.04c dyu̱tadyā̍mā ni̱yuta̱ḥ patya̍mānaḥ ka̱viḥ ka̱vim i̍yakṣasi prayajyo ||

pra | vā̱yum | accha̍ | bṛ̱ha̱tī | ma̱nī̱ṣā | bṛ̱hat-ra̍yim | vi̱śva-vā̍ram | ra̱tha̱-prām |
dyu̱tad-yā̍mā | ni̱-yuta̍ḥ | patya̍mānaḥ | ka̱viḥ | ka̱vim | i̱ya̱kṣa̱si̱ | pra̱ya̱jyo̱ iti̍ pra-yajyo ||6.049.04||

6.049.05a sa me̱ vapu̍ś chadayad a̱śvino̱r yo ratho̍ vi̱rukmā̱n mana̍sā yujā̱naḥ |
6.049.05c yena̍ narā nāsatyeṣa̱yadhyai̍ va̱rtir yā̱thas tana̍yāya̱ tmane̍ ca ||

saḥ | me̱ | vapu̍ḥ | cha̱da̱ya̱t | a̱śvino̍ḥ | yaḥ | ratha̍ḥ | vi̱rukmā̍n | mana̍sā | yu̱jā̱naḥ |
yena̍ | na̱rā̱ | nā̱sa̱tyā̱ | i̱ṣa̱yadhyai̍ | va̱rtiḥ | yā̱thaḥ | tana̍yāya | tmane̍ | ca̱ ||6.049.05||

6.049.06a parja̍nyavātā vṛṣabhā pṛthi̱vyāḥ purī̍ṣāṇi jinvata̱m apyā̍ni |
6.049.06c satya̍śrutaḥ kavayo̱ yasya̍ gī̱rbhir jaga̍taḥ sthāta̱r jaga̱d ā kṛ̍ṇudhvam ||

parja̍nyavātā | vṛ̱ṣa̱bhā̱ | pṛ̱thi̱vyāḥ | purī̍ṣāṇi | ji̱nva̱ta̱m | apyā̍ni |
satya̍-śrutaḥ | ka̱va̱ya̱ḥ | yasya̍ | gī̱ḥ-bhiḥ | jaga̍taḥ | sthā̱ta̱ḥ | jaga̍t | ā | kṛ̱ṇu̱dhva̱m ||6.049.06||

6.049.07a pāvī̍ravī ka̱nyā̍ ci̱trāyu̱ḥ sara̍svatī vī̱rapa̍tnī̱ dhiya̍ṁ dhāt |
6.049.07c gnābhi̱r acchi̍draṁ śara̱ṇaṁ sa̱joṣā̍ durā̱dharṣa̍ṁ gṛṇa̱te śarma̍ yaṁsat ||

pāvī̍ravī | ka̱nyā̍ | ci̱tra-ā̍yuḥ | sara̍svatī | vī̱ra-pa̍tnī | dhiya̍m | dhā̱t |
gnābhi̍ḥ | acchi̍dram | śa̱ra̱ṇam | sa̱-joṣā̍ḥ | du̱ḥ-ā̱dharṣa̍m | gṛ̱ṇa̱te | śarma̍ | ya̱ṁsa̱t ||6.049.07||

6.049.08a pa̱thas-pa̍tha̱ḥ pari̍patiṁ vaca̱syā kāme̍na kṛ̱to a̱bhy ā̍naḻ a̱rkam |
6.049.08c sa no̍ rāsac chu̱rudha̍ś ca̱ndrāgrā̱ dhiya̍ṁ-dhiyaṁ sīṣadhāti̱ pra pū̱ṣā ||

pa̱thaḥ-pa̍thaḥ | pari̍-patim | va̱ca̱syā | kāme̍na | kṛ̱taḥ | a̱bhi | ā̱na̱ṭ | a̱rkam |
saḥ | na̱ḥ | rā̱sa̱t | śu̱rudha̍ḥ | ca̱ndra-a̍grāḥ | dhiya̍m-dhiyam | sī̱sa̱dhā̱ti̱ | pra | pū̱ṣā ||6.049.08||

6.049.09a pra̱tha̱ma̱bhāja̍ṁ ya̱śasa̍ṁ vayo̱dhāṁ su̍pā̱ṇiṁ de̱vaṁ su̱gabha̍sti̱m ṛbhva̍m |
6.049.09c hotā̍ yakṣad yaja̱tam pa̱styā̍nām a̱gnis tvaṣṭā̍raṁ su̱hava̍ṁ vi̱bhāvā̍ ||

pra̱tha̱ma̱-bhāja̍m | ya̱śasa̍m | va̱ya̱ḥ-dhām | su̱-pā̱ṇim | de̱vam | su̱-gabha̍stim | ṛbhva̍m |
hotā̍ | ya̱kṣa̱t | ya̱ja̱tam | pa̱styā̍nām | a̱gniḥ | tvaṣṭā̍ram | su̱-hava̍m | vi̱bhā-vā̍ ||6.049.09||

6.049.10a bhuva̍nasya pi̱tara̍ṁ gī̱rbhir ā̱bhī ru̱draṁ divā̍ va̱rdhayā̍ ru̱dram a̱ktau |
6.049.10c bṛ̱hanta̍m ṛ̱ṣvam a̱jara̍ṁ suṣu̱mnam ṛdha̍g ghuvema ka̱vine̍ṣi̱tāsa̍ḥ ||

bhuva̍nasya | pi̱tara̍m | gī̱ḥ-bhiḥ | ā̱bhiḥ | ru̱dram | divā̍ | va̱rdhaya̍ | ru̱dram | a̱ktau |
bṛ̱hanta̍m | ṛ̱ṣvam | a̱jara̍m | su̱-su̱mnam | ṛdha̍k | hu̱ve̱ma̱ | ka̱vinā̍ | i̱ṣi̱tāsa̍ḥ ||6.049.10||

6.049.11a ā yu̍vānaḥ kavayo yajñiyāso̱ maru̍to ga̱nta gṛ̍ṇa̱to va̍ra̱syām |
6.049.11c a̱ci̱traṁ ci̱d dhi jinva̍thā vṛ̱dhanta̍ i̱tthā nakṣa̍nto naro aṅgira̱svat ||

ā | yu̱vā̱na̱ḥ | ka̱va̱ya̱ḥ | ya̱jñi̱yā̱sa̱ḥ | maru̍taḥ | ga̱nta | gṛ̱ṇa̱taḥ | va̱ra̱syām |
a̱ci̱tram | ci̱t | hi | jinva̍tha | vṛ̱dhanta̍ḥ | i̱tthā | nakṣa̍ntaḥ | na̱ra̱ḥ | a̱ṅgi̱ra̱svat ||6.049.11||

6.049.12a pra vī̱rāya̱ pra ta̱vase̍ tu̱rāyājā̍ yū̱theva̍ paśu̱rakṣi̱r asta̍m |
6.049.12c sa pi̍spṛśati ta̱nvi̍ śru̱tasya̱ stṛbhi̱r na nāka̍ṁ vaca̱nasya̱ vipa̍ḥ ||

pra | vī̱rāya̍ | pra | ta̱vase̍ | tu̱rāya̍ | aja̍ | yū̱thā-i̍va | pa̱śu̱-rakṣi̍ḥ | asta̍m |
saḥ | pi̱spṛ̱śa̱ti̱ | ta̱nvi̍ | śru̱tasya̍ | stṛ-bhi̍ḥ | na | nāka̍m | va̱ca̱nasya̍ | vipa̍ḥ ||6.049.12||

6.049.13a yo rajā̍ṁsi vima̱me pārthi̍vāni̱ triś ci̱d viṣṇu̱r mana̍ve bādhi̱tāya̍ |
6.049.13c tasya̍ te̱ śarma̍nn upada̱dyamā̍ne rā̱yā ma̍dema ta̱nvā̱3̱̍ tanā̍ ca ||

yaḥ | rajā̍ṁsi | vi̱-ma̱me | pārthi̍vāni | triḥ | ci̱t | viṣṇu̍ḥ | mana̍ve | bā̱dhi̱tāya̍ |
tasya̍ | te̱ | śarma̍n | u̱pa̱-da̱dyamā̍ne | rā̱yā | ma̱de̱ma̱ | ta̱nvā̍ | tanā̍ | ca̱ ||6.049.13||

6.049.14a tan no 'hi̍r bu̱dhnyo̍ a̱dbhir a̱rkais tat parva̍ta̱s tat sa̍vi̱tā cano̍ dhāt |
6.049.14c tad oṣa̍dhībhir a̱bhi rā̍ti̱ṣāco̱ bhaga̱ḥ pura̍ṁdhir jinvatu̱ pra rā̱ye ||

tat | na̱ḥ | ahi̍ḥ | bu̱dhnya̍ḥ | a̱t-bhiḥ | a̱rkaiḥ | tat | parva̍taḥ | tat | sa̱vi̱tā | cana̍ḥ | dhā̱t |
tat | oṣa̍dhībhiḥ | a̱bhi | rā̱ti̱-sāca̍ḥ | bhaga̍ḥ | pura̍m-dhiḥ | ji̱nva̱tu̱ | pra | rā̱ye ||6.049.14||

6.049.15a nu no̍ ra̱yiṁ ra̱thya̍ṁ carṣaṇi̱prām pu̍ru̱vīra̍m ma̱ha ṛ̱tasya̍ go̱pām |
6.049.15c kṣaya̍ṁ dātā̱jara̱ṁ yena̱ janā̱n spṛdho̱ ade̍vīr a̱bhi ca̱ kramā̍ma̱ viśa̱ āde̍vīr a̱bhy a1̱̍śnavā̍ma ||

nu | na̱ḥ | ra̱yim | ra̱thya̍m | ca̱rṣa̱ṇi̱-prām | pu̱ru̱-vīra̍m | ma̱haḥ | ṛ̱tasya̍ | go̱pām |
kṣaya̍m | dā̱ta̱ | a̱jara̍m | yena̍ | janā̍n | spṛdha̍ḥ | ade̍vīḥ | a̱bhi | ca̱ | kramā̍ma | viśa̍ḥ | āde̍vīḥ a̱bhi | a̱śnavā̍ma ||6.049.15||


6.050.01a hu̱ve vo̍ de̱vīm adi̍ti̱ṁ namo̍bhir mṛḻī̱kāya̱ varu̍ṇam mi̱tram a̱gnim |
6.050.01c a̱bhi̱kṣa̱dām a̍rya̱maṇa̍ṁ su̱śeva̍ṁ trā̱tṝn de̱vān sa̍vi̱tāra̱m bhaga̍ṁ ca ||

hu̱ve | va̱ḥ | de̱vīm | adi̍tim | nama̍ḥ-bhiḥ | mṛ̱ḻī̱kāya̍ | varu̍ṇam | mi̱tram | a̱gnim |
a̱bhi̱-kṣa̱dām | a̱rya̱maṇa̍m | su̱-śeva̍m | trā̱tṝn | de̱vān | sa̱vi̱tāra̍m | bhaga̍m | ca̱ ||6.050.01||

6.050.02a su̱jyoti̍ṣaḥ sūrya̱ dakṣa̍pitṝn anāgā̱stve su̍maho vīhi de̱vān |
6.050.02c dvi̱janmā̍no̱ ya ṛ̍ta̱sāpa̍ḥ sa̱tyāḥ sva̍rvanto yaja̱tā a̍gniji̱hvāḥ ||

su̱-jyoti̍ṣaḥ | sū̱rya̱ | dakṣa̍-pitṝn | a̱nā̱gā̱ḥ-tve | su̱-ma̱ha̱ḥ | vī̱hi̱ | de̱vān |
dvi̱-janmā̍naḥ | ye | ṛ̱ta̱-sāpa̍ḥ | sa̱tyāḥ | sva̍ḥ-vantaḥ | ya̱ja̱tāḥ | a̱gni̱-ji̱hvāḥ ||6.050.02||

6.050.03a u̱ta dyā̍vāpṛthivī kṣa̱tram u̱ru bṛ̱had ro̍dasī śara̱ṇaṁ su̍ṣumne |
6.050.03c ma̱has ka̍ratho̱ vari̍vo̱ yathā̍ no̱ 'sme kṣayā̍ya dhiṣaṇe ane̱haḥ ||

u̱ta | dyā̱vā̱pṛ̱thi̱vī̱ iti̍ | kṣa̱tram | u̱ru | bṛ̱hat | ro̱da̱sī̱ iti̍ | śa̱ra̱ṇam | su̱su̱mne̱ iti̍ su-sumne |
ma̱haḥ | ka̱ra̱tha̱ḥ | vari̍vaḥ | yathā̍ | na̱ḥ | a̱sme iti̍ | kṣayā̍ya | dhi̱ṣa̱ṇe̱ iti̍ | a̱ne̱haḥ ||6.050.03||

6.050.04a ā no̍ ru̱drasya̍ sū̱navo̍ namantām a̱dyā hū̱tāso̱ vasa̱vo 'dhṛ̍ṣṭāḥ |
6.050.04c yad ī̱m arbhe̍ maha̱ti vā̍ hi̱tāso̍ bā̱dhe ma̱ruto̱ ahvā̍ma de̱vān ||

ā | na̱ḥ | ru̱drasya̍ | sū̱nava̍ḥ | na̱ma̱ntā̱m | a̱dya | hū̱tāsa̍ḥ | vasa̍vaḥ | adhṛ̍ṣṭāḥ |
yat | ī̱m | arbhe̍ | ma̱ha̱ti | vā̱ | hi̱tāsa̍ḥ | bā̱dhe | ma̱ruta̍ḥ | ahvā̍ma | de̱vān ||6.050.04||

6.050.05a mi̱myakṣa̱ yeṣu̍ roda̱sī nu de̱vī siṣa̍kti pū̱ṣā a̍bhyardha̱yajvā̍ |
6.050.05c śru̱tvā hava̍m maruto̱ yad dha̍ yā̱tha bhūmā̍ rejante̱ adhva̍ni̱ pravi̍kte ||

mi̱myakṣa̍ | yeṣu̍ | ro̱da̱sī | nu | de̱vī | sisa̍kti | pū̱ṣā | a̱bhya̱rdha̱-yajvā̍ |
śru̱tvā | hava̍m | ma̱ru̱ta̱ḥ | yat | ha̱ | yā̱tha | bhūma̍ | re̱ja̱nte̱ | adhva̍ni | pra-vi̍kte ||6.050.05||

6.050.06a a̱bhi tyaṁ vī̱raṁ girva̍ṇasam a̱rcendra̱m brahma̍ṇā jarita̱r nave̍na |
6.050.06c śrava̱d id dhava̱m upa̍ ca̱ stavā̍no̱ rāsa̱d vājā̱m̐ upa̍ ma̱ho gṛ̍ṇā̱naḥ ||

a̱bhi | tyam | vī̱ram | girva̍ṇasam | a̱rca̱ | indra̍m | brahma̍ṇā | ja̱ri̱ta̱ḥ | nave̍na |
śrava̍t | it | hava̍m | upa̍ | ca̱ | stavā̍naḥ | rāsa̍t | vājā̍n | upa̍ | ma̱haḥ | gṛ̱ṇā̱naḥ ||6.050.06||

6.050.07a o̱māna̍m āpo mānuṣī̱r amṛ̍kta̱ṁ dhāta̍ to̱kāya̱ tana̍yāya̱ śaṁ yoḥ |
6.050.07c yū̱yaṁ hi ṣṭhā bhi̱ṣajo̍ mā̱tṛta̍mā̱ viśva̍sya sthā̱tur jaga̍to̱ jani̍trīḥ ||

o̱māna̍m | āpaḥ | mā̱nu̱ṣī̱ḥ | amṛ̍ktam | dhāta̍ | to̱kāya̍ | tana̍yāya | śam | yoḥ |
yū̱yam | hi | stha | bhi̱ṣaja̍ḥ | mā̱tṛ-ta̍māḥ | viśva̍sya | sthā̱tuḥ | jaga̍taḥ | jani̍trīḥ ||6.050.07||

6.050.08a ā no̍ de̱vaḥ sa̍vi̱tā trāya̍māṇo̱ hira̍ṇyapāṇir yaja̱to ja̍gamyāt |
6.050.08c yo datra̍vām̐ u̱ṣaso̱ na pratī̍kaṁ vyūrṇu̱te dā̱śuṣe̱ vāryā̍ṇi ||

ā | na̱ḥ | de̱vaḥ | sa̱vi̱tā | trāya̍māṇaḥ | hira̍ṇya-pāṇiḥ | ya̱ja̱taḥ | ja̱ga̱myā̱t |
yaḥ | datra̍-vān | u̱ṣasa̍ḥ | na | pratī̍kam | vi̱-ū̱rṇu̱te | dā̱śuṣe̍ | vāryā̍ṇi ||6.050.08||

6.050.09a u̱ta tvaṁ sū̍no sahaso no a̱dyā de̱vām̐ a̱sminn a̍dhva̱re va̍vṛtyāḥ |
6.050.09c syām a̱haṁ te̱ sada̱m id rā̱tau tava̍ syām a̱gne 'va̍sā su̱vīra̍ḥ ||

u̱ta | tvam | sū̱no̱ iti̍ | sa̱ha̱sa̱ḥ | na̱ḥ | a̱dya | ā | de̱vān | a̱smin | a̱dhva̱re | va̱vṛ̱tyā̱ḥ |
syām | a̱ham | te̱ | sada̍m | i̱t | rā̱tau | tava̍ | syā̱m | a̱gne̱ | ava̍sā | su̱-vīra̍ḥ ||6.050.09||

6.050.10a u̱ta tyā me̱ hava̱m ā ja̍gmyāta̱ṁ nāsa̍tyā dhī̱bhir yu̱vam a̱ṅga vi̍prā |
6.050.10c atri̱ṁ na ma̱has tama̍so 'mumukta̱ṁ tūrva̍taṁ narā duri̱tād a̱bhīke̍ ||

u̱ta | tyā | me̱ | hava̍m | ā | ja̱gmyā̱ta̱m | nāsa̍tyā | dhī̱bhiḥ | yu̱vam | a̱ṅga | vi̱prā̱ |
atri̍m | na | ma̱haḥ | tama̍saḥ | a̱mu̱mu̱kta̱m | tūrva̍tam | na̱rā̱ | du̱ḥ-i̱tāt | a̱bhīke̍ ||6.050.10||

6.050.11a te no̍ rā̱yo dyu̱mato̱ vāja̍vato dā̱tāro̍ bhūta nṛ̱vata̍ḥ puru̱kṣoḥ |
6.050.11c da̱śa̱syanto̍ di̱vyāḥ pārthi̍vāso̱ gojā̍tā̱ apyā̍ mṛ̱ḻatā̍ ca devāḥ ||

te | na̱ḥ | rā̱yaḥ | dyu̱-mata̍ḥ | vāja̍-vataḥ | dā̱tāra̍ḥ | bhū̱ta̱ | nṛ̱-vata̍ḥ | pu̱ru̱-kṣoḥ |
da̱śa̱syanta̍ḥ | di̱vyāḥ | pārthi̍vāsaḥ | go-jā̍tāḥ | apyā̍ḥ | mṛ̱ḻata̍ | ca̱ | de̱vā̱ḥ ||6.050.11||

6.050.12a te no̍ ru̱draḥ sara̍svatī sa̱joṣā̍ mī̱ḻhuṣma̍nto̱ viṣṇu̍r mṛḻantu vā̱yuḥ |
6.050.12c ṛ̱bhu̱kṣā vājo̱ daivyo̍ vidhā̱tā pa̱rjanyā̱vātā̍ pipyatā̱m iṣa̍ṁ naḥ ||

te | na̱ḥ | ru̱draḥ | sara̍svatī | sa̱-joṣā̍ḥ | mī̱ḻhuṣma̍ntaḥ | viṣṇu̍ḥ | mṛ̱ḻa̱ntu̱ | vā̱yuḥ |
ṛ̱bhu̱kṣāḥ | vāja̍ḥ | daivya̍ḥ | vi̱-dhā̱tā | pa̱rjanyā̱vātā̍ | pi̱pya̱tā̱m | iṣa̍m | na̱ḥ ||6.050.12||

6.050.13a u̱ta sya de̱vaḥ sa̍vi̱tā bhago̍ no̱ 'pāṁ napā̍d avatu̱ dānu̱ papri̍ḥ |
6.050.13c tvaṣṭā̍ de̱vebhi̱r jani̍bhiḥ sa̱joṣā̱ dyaur de̱vebhi̍ḥ pṛthi̱vī sa̍mu̱draiḥ ||

u̱ta | syaḥ | de̱vaḥ | sa̱vi̱tā | bhaga̍ḥ | na̱ḥ | a̱pām | napā̍t | a̱va̱tu̱ | dānu̍ | papri̍ḥ |
tvaṣṭā̍ | de̱vebhi̍ḥ | jani̍-bhiḥ | sa̱-joṣā̍ḥ | dyauḥ | de̱vebhi̍ḥ | pṛ̱thi̱vī | sa̱mu̱draiḥ ||6.050.13||

6.050.14a u̱ta no 'hi̍r bu̱dhnya̍ḥ śṛṇotv a̱ja eka̍pāt pṛthi̱vī sa̍mu̱draḥ |
6.050.14c viśve̍ de̱vā ṛ̍tā̱vṛdho̍ huvā̱nāḥ stu̱tā mantrā̍ḥ kaviśa̱stā a̍vantu ||

u̱ta | na̱ḥ | ahi̍ḥ | bu̱dhnya̍ḥ | śṛ̱ṇo̱tu̱ | a̱jaḥ | eka̍-pāt | pṛ̱thi̱vī | sa̱mu̱draḥ |
viśve̍ | de̱vāḥ | ṛ̱ta̱-vṛdha̍ḥ | hu̱vā̱nāḥ | stu̱tāḥ | mantrā̍ḥ | ka̱vi̱-śa̱stāḥ | a̱va̱ntu̱ ||6.050.14||

6.050.15a e̱vā napā̍to̱ mama̱ tasya̍ dhī̱bhir bha̱radvā̍jā a̱bhy a̍rcanty a̱rkaiḥ |
6.050.15c gnā hu̱tāso̱ vasa̱vo 'dhṛ̍ṣṭā̱ viśve̍ stu̱tāso̍ bhūtā yajatrāḥ ||

e̱va | napā̍taḥ | mama̍ | tasya̍ | dhī̱bhiḥ | bha̱rat-vā̍jāḥ | a̱bhi | a̱rca̱nti̱ | a̱rkaiḥ |
gnāḥ | hu̱tāsa̍ḥ | vasa̍vaḥ | adhṛ̍ṣṭāḥ | viśve̍ | stu̱tāsa̍ḥ | bhū̱ta̱ | ya̱ja̱trā̱ḥ ||6.050.15||


6.051.01a ud u̱ tyac cakṣu̱r mahi̍ mi̱trayo̱r ām̐ eti̍ pri̱yaṁ varu̍ṇayo̱r ada̍bdham |
6.051.01c ṛ̱tasya̱ śuci̍ darśa̱tam anī̍kaṁ ru̱kmo na di̱va udi̍tā̱ vy a̍dyaut ||

ut | ū̱m̐ iti̍ | tyat | cakṣu̍ḥ | mahi̍ | mi̱trayo̍ḥ | ā | eti̍ | pri̱yam | varu̍ṇayoḥ | ada̍bdham |
ṛ̱tasya̍ | śuci̍ | da̱rśa̱tam | anī̍kam | ru̱kmaḥ | na | di̱vaḥ | ut-i̍tā̍ | vi | a̱dyau̱t ||6.051.01||

6.051.02a veda̱ yas trīṇi̍ vi̱dathā̍ny eṣāṁ de̱vānā̱ṁ janma̍ sanu̱tar ā ca̱ vipra̍ḥ |
6.051.02c ṛ̱ju marte̍ṣu vṛji̱nā ca̱ paśya̍nn a̱bhi ca̍ṣṭe̱ sūro̍ a̱rya evā̍n ||

veda̍ | yaḥ | trīṇi̍ | vi̱dathā̍ni | e̱ṣā̱m | de̱vānā̍m | janma̍ | sa̱nu̱taḥ | ā | ca̱ | vipra̍ḥ |
ṛ̱ju | marte̍ṣu | vṛ̱ji̱nā | ca̱ | paśya̍n | a̱bhi | ca̱ṣṭe̱ | sūra̍ḥ | a̱ryaḥ | evā̍n ||6.051.02||

6.051.03a stu̱ṣa u̍ vo ma̱ha ṛ̱tasya̍ go̱pān adi̍tim mi̱traṁ varu̍ṇaṁ sujā̱tān |
6.051.03c a̱rya̱maṇa̱m bhaga̱m ada̍bdhadhītī̱n acchā̍ voce sadha̱nya̍ḥ pāva̱kān ||

stu̱ṣe | ū̱m̐ iti̍ | va̱ḥ | ma̱haḥ | ṛ̱tasya̍ | go̱pān | adi̍tim | mi̱tram | varu̍ṇam | su̱-jā̱tān |
a̱rya̱maṇa̍m | bhaga̍m | ada̍bdha-dhītīn | accha̍ | vo̱ce̱ | sa̱-dha̱nya̍ḥ | pā̱va̱kān ||6.051.03||

6.051.04a ri̱śāda̍sa̱ḥ satpa̍tī̱m̐r ada̍bdhān ma̱ho rājña̍ḥ suvasa̱nasya̍ dā̱tṝn |
6.051.04c yūna̍ḥ sukṣa̱trān kṣaya̍to di̱vo nṝn ā̍di̱tyān yā̱my adi̍tiṁ duvo̱yu ||

ri̱śāda̍saḥ | sat-pa̍tīn | ada̍bdhān | ma̱haḥ | rājña̍ḥ | su̱-va̱sa̱nasya̍ | dā̱tṝn |
yūna̍ḥ | su̱-kṣa̱trān | kṣaya̍taḥ | di̱vaḥ | nṝn | ā̱di̱tyān | yā̱mi̱ | adi̍tim | du̱va̱ḥ-yu ||6.051.04||

6.051.05a dyau̱3̱̍ṣ pita̱ḥ pṛthi̍vi̱ māta̱r adhru̱g agne̍ bhrātar vasavo mṛ̱ḻatā̍ naḥ |
6.051.05c viśva̍ ādityā adite sa̱joṣā̍ a̱smabhya̱ṁ śarma̍ bahu̱laṁ vi ya̍nta ||

dyau̍ḥ | pita̍ḥ | pṛ̱thi̍vi | māta̍ḥ | adhru̍k | agne̍ | bhrā̱ta̱ḥ | va̱sa̱va̱ḥ | mṛ̱ḻata̍ | na̱ḥ |
viśve̍ | ā̱di̱tyā̱ḥ | a̱di̱te̱ | sa̱-joṣā̍ḥ | a̱smabhya̍m | śarma̍ | ba̱hu̱lam | vi | ya̱nta̱ ||6.051.05||

6.051.06a mā no̱ vṛkā̍ya vṛ̱kye̍ samasmā aghāya̱te rī̍radhatā yajatrāḥ |
6.051.06c yū̱yaṁ hi ṣṭhā ra̱thyo̍ nas ta̱nūnā̍ṁ yū̱yaṁ dakṣa̍sya̱ vaca̍so babhū̱va ||

mā | na̱ḥ | vṛkā̍ya | vṛ̱kye̍ | sa̱ma̱smai̱ | a̱gha̱-ya̱te | rī̱ra̱dha̱ta̱ | ya̱ja̱trā̱ḥ |
yū̱yam | hi | stha | ra̱thya̍ḥ | na̱ḥ | ta̱nūnā̍m | yū̱yam | dakṣa̍sya | vaca̍saḥ | ba̱bhū̱va ||6.051.06||

6.051.07a mā va̱ eno̍ a̱nyakṛ̍tam bhujema̱ mā tat ka̍rma vasavo̱ yac caya̍dhve |
6.051.07c viśva̍sya̱ hi kṣaya̍tha viśvadevāḥ sva̱yaṁ ri̱pus ta̱nva̍ṁ rīriṣīṣṭa ||

mā | va̱ḥ | ena̍ḥ | a̱nya-kṛ̍tam | bhu̱je̱ma̱ | mā | tat | ka̱rma̱ | va̱sa̱va̱ḥ | yat | caya̍dhve |
viśva̍sya | hi | kṣaya̍tha | vi̱śva̱-de̱vā̱ḥ | sva̱yam | ri̱puḥ | ta̱nva̍m | ri̱ri̱ṣī̱ṣṭa̱ ||6.051.07||

6.051.08a nama̱ id u̱graṁ nama̱ ā vi̍vāse̱ namo̍ dādhāra pṛthi̱vīm u̱ta dyām |
6.051.08c namo̍ de̱vebhyo̱ nama̍ īśa eṣāṁ kṛ̱taṁ ci̱d eno̱ nama̱sā vi̍vāse ||

nama̍ḥ | it | u̱gram | nama̍ḥ | ā | vi̱vā̱se̱ | nama̍ḥ | dā̱dhā̱ra̱ | pṛ̱thi̱vīm | u̱ta | dyām |
nama̍ḥ | de̱vebhya̍ḥ | nama̍ḥ | ī̱śe̱ | e̱ṣā̱m | kṛ̱tam | ci̱t | ena̍ḥ | nama̍sā | ā | vi̱vā̱se̱ ||6.051.08||

6.051.09a ṛ̱tasya̍ vo ra̱thya̍ḥ pū̱tada̍kṣān ṛ̱tasya̍ pastya̱sado̱ ada̍bdhān |
6.051.09c tām̐ ā namo̍bhir uru̱cakṣa̍so̱ nṝn viśvā̍n va̱ ā na̍me ma̱ho ya̍jatrāḥ ||

ṛ̱tasya̍ | va̱ḥ | ra̱thya̍ḥ | pū̱ta-da̍kṣān | ṛ̱tasya̍ | pa̱stya̱-sada̍ḥ | ada̍bdhān |
tān | ā | nama̍ḥ-bhiḥ | u̱ru̱-cakṣa̍saḥ | nṝn | viśvā̍n | va̱ḥ | ā | na̱me̱ | ma̱haḥ | ya̱ja̱trā̱ḥ ||6.051.09||

6.051.10a te hi śreṣṭha̍varcasa̱s ta u̍ nas ti̱ro viśvā̍ni duri̱tā naya̍nti |
6.051.10c su̱kṣa̱trāso̱ varu̍ṇo mi̱tro a̱gnir ṛ̱tadhī̍tayo vakma̱rāja̍satyāḥ ||

te | hi | śreṣṭha̍-varcasaḥ | te | ū̱m̐ iti̍ | na̱ḥ | ti̱raḥ | viśvā̍ni | du̱ḥ-i̱tā | naya̍nti |
su̱-kṣa̱trāsa̍ḥ | varu̍ṇaḥ | mi̱traḥ | a̱gniḥ | ṛ̱ta-dhī̍tayaḥ | va̱kma̱rāja̍-satyāḥ ||6.051.10||

6.051.11a te na̱ indra̍ḥ pṛthi̱vī kṣāma̍ vardhan pū̱ṣā bhago̱ adi̍ti̱ḥ pañca̱ janā̍ḥ |
6.051.11c su̱śarmā̍ṇa̱ḥ svava̍saḥ sunī̱thā bhava̍ntu naḥ sutrā̱trāsa̍ḥ sugo̱pāḥ ||

te | na̱ḥ | indra̍ḥ | pṛ̱thi̱vī | kṣāma̍ | va̱rdha̱n | pū̱ṣā | bhaga̍ḥ | adi̍tiḥ | pañca̍ | janā̍ḥ |
su̱-śarmā̍ṇaḥ | su̱-ava̍saḥ | su̱-nī̱thāḥ | bhava̍ntu | na̱ḥ | su̱-trā̱trāsa̍ḥ | su̱-go̱pāḥ ||6.051.11||

6.051.12a nū sa̱dmāna̍ṁ di̱vyaṁ naṁśi̍ devā̱ bhāra̍dvājaḥ suma̱tiṁ yā̍ti̱ hotā̍ |
6.051.12c ā̱sā̱nebhi̱r yaja̍māno mi̱yedhai̍r de̱vānā̱ṁ janma̍ vasū̱yur va̍vanda ||

nu | sa̱dmāna̍m | di̱vyam | naṁśi̍ | de̱vā̱ḥ | bhāra̍t-vājaḥ | su̱-ma̱tim | yā̱ti̱ | hotā̍ |
ā̱sā̱nebhi̍ḥ | yaja̍mānaḥ | mi̱yedhai̍ḥ | de̱vānā̍m | janma̍ | va̱su̱-yuḥ | va̱va̱nda̱ ||6.051.12||

6.051.13a apa̱ tyaṁ vṛ̍ji̱naṁ ri̱puṁ ste̱nam a̍gne durā̱dhya̍m |
6.051.13c da̱vi̱ṣṭham a̍sya satpate kṛ̱dhī su̱gam ||

apa̍ | tyam | vṛ̱ji̱nam | ri̱pum | ste̱nam | a̱gne̱ | du̱ḥ-ā̱dhya̍m |
da̱vi̱ṣṭham | a̱sya̱ | sa̱t-pa̱te̱ | kṛ̱dhi | su̱-gam ||6.051.13||

6.051.14a grāvā̍ṇaḥ soma no̱ hi ka̍ṁ sakhitva̱nāya̍ vāva̱śuḥ |
6.051.14c ja̱hī ny a1̱̍triṇa̍m pa̱ṇiṁ vṛko̱ hi ṣaḥ ||

grāvā̍ṇaḥ | so̱ma̱ | na̱ḥ | hi | ka̱m | sa̱khi̱-tva̱nāya̍ | vā̱va̱śuḥ |
ja̱hi | ni | a̱triṇa̍m | pa̱ṇim | vṛka̍ḥ | hi | saḥ ||6.051.14||

6.051.15a yū̱yaṁ hi ṣṭhā su̍dānava̱ indra̍jyeṣṭhā a̱bhidya̍vaḥ |
6.051.15c kartā̍ no̱ adhva̱nn ā su̱gaṁ go̱pā a̱mā ||

yū̱yam | hi | stha | su̱-dā̱na̱va̱ḥ | indra̍-jyeṣṭhāḥ | a̱bhi-dya̍vaḥ |
kartā̍ | na̱ḥ | adhva̍n | ā | su̱-gam | go̱pāḥ | a̱mā ||6.051.15||

6.051.16a api̱ panthā̍m aganmahi svasti̱gām a̍ne̱hasa̍m |
6.051.16c yena̱ viśvā̱ḥ pari̱ dviṣo̍ vṛ̱ṇakti̍ vi̱ndate̱ vasu̍ ||

api̍ | panthā̍m | a̱ga̱nma̱hi̱ | sva̱sti̱-gām | a̱ne̱hasa̍m |
yena̍ | viśvā̍ḥ | pari̍ | dviṣa̍ḥ | vṛ̱ṇakti̍ | vi̱ndate̍ | vasu̍ ||6.051.16||


6.052.01a na tad di̱vā na pṛ̍thi̱vyānu̍ manye̱ na ya̱jñena̱ nota śamī̍bhir ā̱bhiḥ |
6.052.01c u̱bjantu̱ taṁ su̱bhva1̱̍ḥ parva̍tāso̱ ni hī̍yatām atiyā̱jasya̍ ya̱ṣṭā ||

na | tat | di̱vā | na | pṛ̱thi̱vyā | anu̍ | ma̱nye̱ | na | ya̱jñena̍ | na | u̱ta | śamī̍bhiḥ | ā̱bhiḥ |
u̱bjantu̍ | tam | su̱-bhva̍ḥ | parva̍tāsaḥ | ni | hī̱ya̱tā̱m | a̱ti̱-yā̱jasya̍ | ya̱ṣṭā ||6.052.01||

6.052.02a ati̍ vā̱ yo ma̍ruto̱ manya̍te no̱ brahma̍ vā̱ yaḥ kri̱yamā̍ṇa̱ṁ nini̍tsāt |
6.052.02c tapū̍ṁṣi̱ tasmai̍ vṛji̱nāni̍ santu brahma̱dviṣa̍m a̱bhi taṁ śo̍catu̱ dyauḥ ||

ati̍ | vā̱ | yaḥ | ma̱ru̱ta̱ḥ | manya̍te | na̱ḥ | brahma̍ | vā̱ | yaḥ | kri̱yamā̍ṇam | nini̍tsāt |
tapū̍ṁṣi | tasmai̍ | vṛ̱ji̱nāni̍ | sa̱ntu̱ | bra̱hma̱-dviṣa̍m | a̱bhi | tam | śo̱ca̱tu̱ | dyauḥ ||6.052.02||

6.052.03a kim a̱ṅga tvā̱ brahma̍ṇaḥ soma go̱pāṁ kim a̱ṅga tvā̍hur abhiśasti̱pāṁ na̍ḥ |
6.052.03c kim a̱ṅga na̍ḥ paśyasi ni̱dyamā̍nān brahma̱dviṣe̱ tapu̍ṣiṁ he̱tim a̍sya ||

kim | a̱ṅga | tvā̱ | brahma̍ṇaḥ | so̱ma̱ | go̱pām | kim | a̱ṅga | tvā̱ | ā̱hu̱ḥ | a̱bhi̱śa̱sti̱-pām | na̱ḥ |
kim | a̱ṅga | na̱ḥ | pa̱śya̱si̱ | ni̱dyamā̍nān | bra̱hma̱-dviṣe̍ | tapu̍ṣim | he̱tim | a̱sya̱ ||6.052.03||

6.052.04a ava̍ntu̱ mām u̱ṣaso̱ jāya̍mānā̱ ava̍ntu mā̱ sindha̍va̱ḥ pinva̍mānāḥ |
6.052.04c ava̍ntu mā̱ parva̍tāso dhru̱vāso 'va̍ntu mā pi̱taro̍ de̱vahū̍tau ||

ava̍ntu | mām | u̱ṣasa̍ḥ | jāya̍mānāḥ | ava̍ntu | mā̱ | sindha̍vaḥ | pinva̍mānāḥ |
ava̍ntu | mā̱ | parva̍tāsaḥ | dhru̱vāsaḥ | ava̍ntu | mā̱ | pi̱tara̍ḥ | de̱va-hū̍tau ||6.052.04||

6.052.05a vi̱śva̱dānī̍ṁ su̱mana̍saḥ syāma̱ paśye̍ma̱ nu sūrya̍m u̱ccara̍ntam |
6.052.05c tathā̍ kara̱d vasu̍pati̱r vasū̍nāṁ de̱vām̐ ohā̱no 'va̱sāga̍miṣṭhaḥ ||

vi̱śva̱-dānī̍m | su̱-mana̍saḥ | syā̱ma̱ | paśye̍ma | nu | sūrya̍m | u̱ccara̍ntam |
tathā̍ | ka̱ra̱t | vasu̍-patiḥ | vasū̍nām | de̱vān | ohā̍naḥ | ava̍sā | ā-ga̍miṣṭhaḥ ||6.052.05||

6.052.06a indro̱ nedi̍ṣṭha̱m ava̱sāga̍miṣṭha̱ḥ sara̍svatī̱ sindhu̍bhi̱ḥ pinva̍mānā |
6.052.06c pa̱rjanyo̍ na̱ oṣa̍dhībhir mayo̱bhur a̱gniḥ su̱śaṁsa̍ḥ su̱hava̍ḥ pi̱teva̍ ||

indra̍ḥ | nedi̍ṣṭham | ava̍sā | ā-ga̍miṣṭhaḥ | sara̍svatī | sindhu̍-bhiḥ | pinva̍mānā |
pa̱rjanya̍ḥ | na̱ḥ | oṣa̍dhībhiḥ | ma̱ya̱ḥ-bhuḥ | a̱gniḥ | su̱-śaṁsa̍ḥ | su̱-hava̍ḥ | pi̱tā-i̍va ||6.052.06||

6.052.07a viśve̍ devāsa̱ ā ga̍ta śṛṇu̱tā ma̍ i̱maṁ hava̍m |
6.052.07c edam ba̱rhir ni ṣī̍data ||

viśve̍ | de̱vā̱sa̱ḥ | ā | ga̱ta̱ | śṛ̱ṇu̱ta | me̱ | i̱mam | hava̍m |
ā | i̱dam | ba̱rhiḥ | ni | sī̱da̱ta̱ ||6.052.07||

6.052.08a yo vo̍ devā ghṛ̱tasnu̍nā ha̱vyena̍ prati̱bhūṣa̍ti |
6.052.08c taṁ viśva̱ upa̍ gacchatha ||

yaḥ | va̱ḥ | de̱vā̱ḥ | ghṛ̱ta-snu̍nā | ha̱vyena̍ | pra̱ti̱-bhūṣa̍ti |
tam | viśve̍ | upa̍ | ga̱ccha̱tha̱ ||6.052.08||

6.052.09a upa̍ naḥ sū̱navo̱ gira̍ḥ śṛ̱ṇvantv a̱mṛta̍sya̱ ye |
6.052.09c su̱mṛ̱ḻī̱kā bha̍vantu naḥ ||

upa̍ | na̱ḥ | sū̱nava̍ḥ | gira̍ḥ | śṛ̱ṇvantu̍ | a̱mṛta̍sya | ye |
su̱-mṛ̱ḻī̱kāḥ | bha̱va̱ntu̱ | na̱ḥ ||6.052.09||

6.052.10a viśve̍ de̱vā ṛ̍tā̱vṛdha̍ ṛ̱tubhi̍r havana̱śruta̍ḥ |
6.052.10c ju̱ṣantā̱ṁ yujya̱m paya̍ḥ ||

viśve̍ | de̱vāḥ | ṛ̱ta̱-vṛdha̍ḥ | ṛ̱tu-bhi̍ḥ | ha̱va̱na̱-śruta̍ḥ |
ju̱ṣantā̍m | yujya̍m | paya̍ḥ ||6.052.10||

6.052.11a sto̱tram indro̍ ma̱rudga̍ṇa̱s tvaṣṭṛ̍mān mi̱tro a̍rya̱mā |
6.052.11c i̱mā ha̱vyā ju̍ṣanta naḥ ||

sto̱tram | indra̍ḥ | ma̱rut-ga̍ṇaḥ | tvaṣṭṛ̍-mān | mi̱traḥ | a̱rya̱mā |
i̱mā | ha̱vyā | ju̱ṣa̱nta̱ | na̱ḥ ||6.052.11||

6.052.12a i̱maṁ no̍ agne adhva̱raṁ hota̍r vayuna̱śo ya̍ja |
6.052.12c ci̱ki̱tvān daivya̱ṁ jana̍m ||

i̱mam | na̱ḥ | a̱gne̱ | a̱dhva̱ram | hota̍ḥ | va̱yu̱na̱-śaḥ | ya̱ja̱ |
ci̱ki̱tvān | daivya̍m | jana̍m ||6.052.12||

6.052.13a viśve̍ devāḥ śṛṇu̱temaṁ hava̍m me̱ ye a̱ntari̍kṣe̱ ya upa̱ dyavi̱ ṣṭha |
6.052.13c ye a̍gniji̱hvā u̱ta vā̱ yaja̍trā ā̱sadyā̱smin ba̱rhiṣi̍ mādayadhvam ||

viśve̍ | de̱vā̱ḥ | śṛ̱ṇu̱ta | i̱mam | hava̍m | me̱ | ye | a̱ntari̍kṣe | ye | upa̍ | dyavi̍ | stha |
ye | a̱gni̱-ji̱hvāḥ | u̱ta | vā̱ | yaja̍trāḥ | ā̱-sadya̍ | a̱smin | ba̱rhiṣi̍ | mā̱da̱ya̱dhva̱m ||6.052.13||

6.052.14a viśve̍ de̱vā mama̍ śṛṇvantu ya̱jñiyā̍ u̱bhe roda̍sī a̱pāṁ napā̍c ca̱ manma̍ |
6.052.14c mā vo̱ vacā̍ṁsi pari̱cakṣyā̍ṇi vocaṁ su̱mneṣv id vo̱ anta̍mā madema ||

viśve̍ | de̱vāḥ | mama̍ | śṛ̱ṇva̱ntu̱ | ya̱jñiyā̍ḥ | u̱bhe iti̍ | roda̍sī̱ iti̍ | a̱pām | napā̍t | ca̱ | manma̍ |
mā | va̱ḥ | vacā̍ṁsi | pa̱ri̱-cakṣyā̍ṇi | vo̱ca̱m | su̱mneṣu̍ | it | va̱ḥ | anta̍māḥ | ma̱de̱ma̱ ||6.052.14||

6.052.15a ye ke ca̱ jmā ma̱hino̱ ahi̍māyā di̱vo ja̍jñi̱re a̱pāṁ sa̱dhasthe̍ |
6.052.15c te a̱smabhya̍m i̱ṣaye̱ viśva̱m āyu̱ḥ kṣapa̍ u̱srā va̍rivasyantu de̱vāḥ ||

ye | ke | ca̱ | jmā | ma̱hina̍ḥ | ahi̍-māyāḥ | di̱vaḥ | ja̱jñi̱re | a̱pām | sa̱dha-sthe̍ |
te | a̱smabhya̍m | i̱ṣaye̍ | viśva̍m | āyu̍ḥ | kṣapa̍ḥ | u̱srāḥ | va̱ri̱va̱sya̱ntu̱ | de̱vāḥ ||6.052.15||

6.052.16a agnī̍parjanyā̱v ava̍ta̱ṁ dhiya̍m me̱ 'smin have̍ suhavā suṣṭu̱tiṁ na̍ḥ |
6.052.16c iḻā̍m a̱nyo ja̱naya̱d garbha̍m a̱nyaḥ pra̱jāva̍tī̱r iṣa̱ ā dha̍ttam a̱sme ||

agnī̍parjanyau | ava̍tam | dhiya̍m | me̱ | a̱smin | have̍ | su̱-ha̱vā̱ | su̱-stu̱tim | na̱ḥ |
iḻā̍m | a̱nyaḥ | ja̱naya̍t | garbha̍m | a̱nyaḥ | pra̱jā-va̍tīḥ | iṣa̍ḥ | ā | dha̱tta̱m | a̱sme iti̍ ||6.052.16||

6.052.17a stī̱rṇe ba̱rhiṣi̍ samidhā̱ne a̱gnau sū̱ktena̍ ma̱hā nama̱sā vi̍vāse |
6.052.17c a̱smin no̍ a̱dya vi̱dathe̍ yajatrā̱ viśve̍ devā ha̱viṣi̍ mādayadhvam ||

stī̱rṇe | ba̱rhiṣi̍ | sa̱m-i̱dhā̱ne | a̱gnau | su̱-u̱ktena̍ | ma̱hā | nama̍sā | ā | vi̱vā̱se̱ |
a̱smin | na̱ḥ | a̱dya | vi̱dathe̍ | ya̱ja̱trā̱ḥ | viśve̍ | de̱vā̱ḥ | ha̱viṣi̍ | mā̱da̱ya̱dhva̱m ||6.052.17||


6.053.01a va̱yam u̍ tvā pathas pate̱ ratha̱ṁ na vāja̍sātaye |
6.053.01c dhi̱ye pū̍ṣann ayujmahi ||

va̱yam | ū̱m̐ iti̍ | tvā̱ | pa̱tha̱ḥ | pa̱te̱ | ratha̍m | na | vāja̍-sātaye |
dhi̱ye | pū̱ṣa̱n | a̱yu̱jma̱hi̱ ||6.053.01||

6.053.02a a̱bhi no̱ narya̱ṁ vasu̍ vī̱ram praya̍tadakṣiṇam |
6.053.02c vā̱maṁ gṛ̱hapa̍tiṁ naya ||

a̱bhi | na̱ḥ | narya̍m | vasu̍ | vī̱ram | praya̍ta-dakṣiṇam |
vā̱mam | gṛ̱ha-pa̍tim | na̱ya̱ ||6.053.02||

6.053.03a adi̍tsantaṁ cid āghṛṇe̱ pūṣa̱n dānā̍ya codaya |
6.053.03c pa̱ṇeś ci̱d vi mra̍dā̱ mana̍ḥ ||

adi̍tsantam | ci̱t | ā̱ghṛ̱ṇe̱ | pūṣa̍n | dānā̍ya | co̱da̱ya̱ |
pa̱ṇeḥ | ci̱t | vi | mra̱da̱ | mana̍ḥ ||6.053.03||

6.053.04a vi pa̱tho vāja̍sātaye cinu̱hi vi mṛdho̍ jahi |
6.053.04c sādha̍ntām ugra no̱ dhiya̍ḥ ||

vi | pa̱thaḥ | vāja̍-sātaye | ci̱nu̱hi | vi | mṛdha̍ḥ | ja̱hi̱ |
sādha̍ntām | u̱gra̱ | na̱ḥ | dhiya̍ḥ ||6.053.04||

6.053.05a pari̍ tṛndhi paṇī̱nām āra̍yā̱ hṛda̍yā kave |
6.053.05c athe̍m a̱smabhya̍ṁ randhaya ||

pari̍ | tṛ̱ndhi̱ | pa̱ṇī̱nām | āra̍yā | hṛda̍yā | ka̱ve̱ |
atha̍ | ī̱m | a̱smabhya̍m | ra̱ndha̱ya̱ ||6.053.05||

6.053.06a vi pū̍ṣa̱nn āra̍yā tuda pa̱ṇer i̍ccha hṛ̱di pri̱yam |
6.053.06c athe̍m a̱smabhya̍ṁ randhaya ||

vi | pū̱ṣa̱n | āra̍yā | tu̱da̱ | pa̱ṇeḥ | i̱ccha̱ | hṛ̱di | pri̱yam |
atha̍ | ī̱m | a̱smabhya̍m | ra̱ndha̱ya̱ ||6.053.06||

6.053.07a ā ri̍kha kiki̱rā kṛ̍ṇu paṇī̱nāṁ hṛda̍yā kave |
6.053.07c athe̍m a̱smabhya̍ṁ randhaya ||

ā | ri̱kha̱ | ki̱ki̱rā | kṛ̱ṇu̱ | pa̱ṇī̱nām | hṛda̍yā | ka̱ve̱ |
atha̍ | ī̱m | a̱smabhya̍m | ra̱ndha̱ya̱ ||6.053.07||

6.053.08a yām pū̍ṣan brahma̱coda̍nī̱m ārā̱m bibha̍rṣy āghṛṇe |
6.053.08c tayā̍ samasya̱ hṛda̍ya̱m ā ri̍kha kiki̱rā kṛ̍ṇu ||

yām | pū̱ṣa̱n | bra̱hma̱-coda̍nīm | ārā̍m | bibha̍rṣi | ā̱ghṛ̱ṇe̱ |
tayā̍ | sa̱ma̱sya̱ | hṛda̍yam | ā | ri̱kha̱ | ki̱ki̱rā | kṛ̱ṇu̱ ||6.053.08||

6.053.09a yā te̱ aṣṭrā̱ goo̍pa̱śāghṛ̍ṇe paśu̱sādha̍nī |
6.053.09c tasyā̍s te su̱mnam ī̍mahe ||

yā | te̱ | aṣṭrā̍ | go-o̍paśā | āghṛ̍ṇe | pa̱śu̱-sādha̍nī |
tasyā̍ḥ | te̱ | su̱mnam | ī̱ma̱he̱ ||6.053.09||

6.053.10a u̱ta no̍ go̱ṣaṇi̱ṁ dhiya̍m aśva̱sāṁ vā̍ja̱sām u̱ta |
6.053.10c nṛ̱vat kṛ̍ṇuhi vī̱taye̍ ||

u̱ta | na̱ḥ | go̱-sani̍m | dhiya̍m | a̱śva̱sām | vā̱ja̱sām | u̱ta |
nṛ̱-vat | kṛ̱ṇu̱hi̱ | vī̱taye̍ ||6.053.10||


6.054.01a sam pū̍ṣan vi̱duṣā̍ naya̱ yo añja̍sānu̱śāsa̍ti |
6.054.01c ya e̱vedam iti̱ brava̍t ||

sam | pū̱ṣa̱n | vi̱duṣā̍ | na̱ya̱ | yaḥ | añja̍sā | a̱nu̱-śāsa̍ti |
yaḥ | e̱va | i̱dam | iti̍ | brava̍t ||6.054.01||

6.054.02a sam u̍ pū̱ṣṇā ga̍memahi̱ yo gṛ̱hām̐ a̍bhi̱śāsa̍ti |
6.054.02c i̱ma e̱veti̍ ca̱ brava̍t ||

sam | ū̱m̐ iti̍ | pū̱ṣṇā | ga̱me̱ma̱hi̱ | yaḥ | gṛ̱hān | a̱bhi̱-śāsa̍ti |
i̱me | e̱va | iti̍ | ca̱ | brava̍t ||6.054.02||

6.054.03a pū̱ṣṇaś ca̱kraṁ na ri̍ṣyati̱ na kośo 'va̍ padyate |
6.054.03c no a̍sya vyathate pa̱viḥ ||

pū̱ṣṇaḥ | ca̱kram | na | ri̱ṣya̱ti̱ | na | kośa̍ḥ | ava̍ | pa̱dya̱te̱ |
no iti̍ | a̱sya̱ | vya̱tha̱te̱ | pa̱viḥ ||6.054.03||

6.054.04a yo a̍smai ha̱viṣāvi̍dha̱n na tam pū̱ṣāpi̍ mṛṣyate |
6.054.04c pra̱tha̱mo vi̍ndate̱ vasu̍ ||

yaḥ | a̱smai̱ | ha̱viṣā | avi̍dhat | na | tam | pū̱ṣā | api̍ | mṛ̱ṣya̱te̱ |
pra̱tha̱maḥ | vi̱nda̱te̱ | vasu̍ ||6.054.04||

6.054.05a pū̱ṣā gā anv e̍tu naḥ pū̱ṣā ra̍kṣa̱tv arva̍taḥ |
6.054.05c pū̱ṣā vāja̍ṁ sanotu naḥ ||

pū̱ṣā | gāḥ | anu̍ | e̱tu̱ | na̱ḥ | pū̱ṣā | ra̱kṣa̱tu̱ | arva̍taḥ |
pū̱ṣā | vāja̍m | sa̱no̱tu̱ | na̱ḥ ||6.054.05||

6.054.06a pūṣa̱nn anu̱ pra gā i̍hi̱ yaja̍mānasya sunva̱taḥ |
6.054.06c a̱smāka̍ṁ stuva̱tām u̱ta ||

pūṣa̍n | anu̍ | pra | gāḥ | i̱hi̱ | yaja̍mānasya | su̱nva̱taḥ |
a̱smāka̍m | stu̱va̱tām | u̱ta ||6.054.06||

6.054.07a māki̍r neśa̱n mākī̍ṁ riṣa̱n mākī̱ṁ saṁ śā̍ri̱ keva̍ṭe |
6.054.07c athāri̍ṣṭābhi̱r ā ga̍hi ||

māki̍ḥ | neśa̍m | mākī̍m | riṣa̍n | mākī̍m | sam | śā̱ri̱ | keva̍ṭe |
atha̍ | ari̍ṣṭābhiḥ | ā | gā̱hi̱ ||6.054.07||

6.054.08a śṛ̱ṇvanta̍m pū̱ṣaṇa̍ṁ va̱yam irya̱m ana̍ṣṭavedasam |
6.054.08c īśā̍naṁ rā̱ya ī̍mahe ||

śṛ̱ṇvanta̍m | pū̱ṣaṇa̍m | va̱yam | irya̍m | ana̍ṣṭa-vedasam |
īśā̍nam | rā̱yaḥ | ī̱ma̱he̱ ||6.054.08||

6.054.09a pūṣa̱n tava̍ vra̱te va̱yaṁ na ri̍ṣyema̱ kadā̍ ca̱na |
6.054.09c sto̱tāra̍s ta i̱ha sma̍si ||

pūṣa̍n | tava̍ | vra̱te | va̱yam | na | ri̱ṣye̱ma̱ | kadā̍ | ca̱na |
sto̱tāra̍ḥ | te̱ | i̱ha | sma̱si̱ ||6.054.09||

6.054.10a pari̍ pū̱ṣā pa̱rastā̱d dhasta̍ṁ dadhātu̱ dakṣi̍ṇam |
6.054.10c puna̍r no na̱ṣṭam āja̍tu ||

pari̍ | pū̱ṣā | pa̱rastā̍t | hasta̍m | da̱dhā̱tu̱ | dakṣi̍ṇam |
puna̍ḥ | na̱ḥ | na̱ṣṭam | ā | a̱ja̱tu̱ ||6.054.10||


6.055.01a ehi̱ vāṁ vi̍muco napā̱d āghṛ̍ṇe̱ saṁ sa̍cāvahai |
6.055.01c ra̱thīr ṛ̱tasya̍ no bhava ||

ā | i̱hi̱ | vām | vi̱-mu̱ca̱ḥ | na̱pā̱t | āghṛ̍ṇe | sam | sa̱cā̱va̱hai̱ |
ra̱thīḥ | ṛ̱tasya̍ | na̱ḥ | bha̱va̱ ||6.055.01||

6.055.02a ra̱thīta̍maṁ kapa̱rdina̱m īśā̍na̱ṁ rādha̍so ma̱haḥ |
6.055.02c rā̱yaḥ sakhā̍yam īmahe ||

ra̱thi-ta̍mam | ka̱pa̱rdina̍m | īśā̍nam | rādha̍saḥ | ma̱haḥ |
rā̱yaḥ | sakhā̍yam | ī̱ma̱he̱ ||6.055.02||

6.055.03a rā̱yo dhārā̍sy āghṛṇe̱ vaso̍ rā̱śir a̍jāśva |
6.055.03c dhīva̍to-dhīvata̱ḥ sakhā̍ ||

rā̱yaḥ | dhārā̍ | a̱si̱ | ā̱ghṛ̱ṇe̱ | vaso̍ḥ | rā̱śiḥ | a̱ja̱-a̱śva̱ |
dhīva̍taḥ-dhīvataḥ | sakhā̍ ||6.055.03||

6.055.04a pū̱ṣaṇa̱ṁ nv a1̱̍jāśva̱m upa̍ stoṣāma vā̱jina̍m |
6.055.04c svasu̱r yo jā̱ra u̱cyate̍ ||

pū̱ṣaṇa̍m | nu | a̱ja-a̍śvam | upa̍ | sto̱ṣā̱ma̱ | vā̱jina̍m |
svasu̍ḥ | yaḥ | jā̱raḥ | u̱cyate̍ ||6.055.04||

6.055.05a mā̱tur di̍dhi̱ṣum a̍brava̱ṁ svasu̍r jā̱raḥ śṛ̍ṇotu naḥ |
6.055.05c bhrātendra̍sya̱ sakhā̱ mama̍ ||

mā̱tuḥ | di̱dhi̱ṣum | a̱bra̱va̱m | svasu̍ḥ | jā̱raḥ | śṛ̱ṇo̱tu̱ | na̱ḥ |
bhrātā̍ | indra̍sya | sakhā̍ | mama̍ ||6.055.05||

6.055.06a ājāsa̍ḥ pū̱ṣaṇa̱ṁ rathe̍ niśṛ̱mbhās te ja̍na̱śriya̍m |
6.055.06c de̱vaṁ va̍hantu̱ bibhra̍taḥ ||

ā | a̱jāsa̍ḥ | pū̱ṣaṇa̍m | rathe̍ | ni̱-śṛ̱mbhāḥ | te | ja̱na̱-śriya̍m |
de̱vam | va̱ha̱ntu̱ | bibhra̍taḥ ||6.055.06||


6.056.01a ya e̍nam ā̱dide̍śati kara̱mbhād iti̍ pū̱ṣaṇa̍m |
6.056.01c na tena̍ de̱va ā̱diśe̍ ||

yaḥ | e̱na̱m | ā̱-dide̍śati | ka̱ra̱mbha̱-at | iti̍ | pū̱ṣaṇa̍m |
na | tena̍ | de̱vaḥ | ā̱-diśe̍ ||6.056.01||

6.056.02a u̱ta ghā̱ sa ra̱thīta̍ma̱ḥ sakhyā̱ satpa̍tir yu̱jā |
6.056.02c indro̍ vṛ̱trāṇi̍ jighnate ||

u̱ta | gha̱ | saḥ | ra̱thi-ta̍maḥ | sakhyā̍ | sat-pa̍tiḥ | yu̱jā |
indra̍ḥ | vṛ̱trāṇi̍ | ji̱ghna̱te̱ ||6.056.02||

6.056.03a u̱tādaḥ pa̍ru̱ṣe gavi̱ sūra̍ś ca̱kraṁ hi̍ra̱ṇyaya̍m |
6.056.03c ny ai̍rayad ra̱thīta̍maḥ ||

u̱ta | a̱daḥ | pa̱ru̱ṣe | gavi̍ | sūra̍ḥ | ca̱kram | hi̱ra̱ṇyaya̍m |
ni | ai̱ra̱ya̱t | ra̱thi-ta̍maḥ ||6.056.03||

6.056.04a yad a̱dya tvā̍ puruṣṭuta̱ bravā̍ma dasra mantumaḥ |
6.056.04c tat su no̱ manma̍ sādhaya ||

yat | a̱dya | tvā̱ | pu̱ru̱-stu̱ta̱ | bravā̍ma | da̱sra̱ | ma̱ntu̱-ma̱ḥ |
tat | su | na̱ḥ | manma̍ | sā̱dha̱ya̱ ||6.056.04||

6.056.05a i̱maṁ ca̍ no ga̱veṣa̍ṇaṁ sā̱taye̍ sīṣadho ga̱ṇam |
6.056.05c ā̱rāt pū̍ṣann asi śru̱taḥ ||

i̱mam | ca̱ | na̱ḥ | go̱-eṣa̍ṇam | sā̱taye̍ | sī̱sa̱dha̱ḥ | ga̱ṇam |
ā̱rāt | pū̱ṣa̱n | a̱si̱ | śru̱taḥ ||6.056.05||

6.056.06a ā te̍ sva̱stim ī̍maha ā̱rea̍ghā̱m upā̍vasum |
6.056.06c a̱dyā ca̍ sa̱rvatā̍taye̱ śvaś ca̍ sa̱rvatā̍taye ||

ā | te̱ | sva̱stim | ī̱ma̱he̱ | ā̱re-a̍ghām | upa̍-vasum |
a̱dya | ca̱ | sa̱rva-tā̍taye | śvaḥ | ca̱ | sa̱rva-tā̍taye ||6.056.06||


6.057.01a indrā̱ nu pū̱ṣaṇā̍ va̱yaṁ sa̱khyāya̍ sva̱staye̍ |
6.057.01c hu̱vema̱ vāja̍sātaye ||

indrā̍ | nu | pū̱ṣaṇā̍ | va̱yam | sa̱khyāya̍ | sva̱staye̍ |
hu̱vema̍ | vāja̍-sātaye ||6.057.01||

6.057.02a soma̍m a̱nya upā̍sada̱t pāta̍ve ca̱mvo̍ḥ su̱tam |
6.057.02c ka̱ra̱mbham a̱nya i̍cchati ||

soma̍m | a̱nyaḥ | upa̍ | a̱sa̱da̱t | pāta̍ve | ca̱mvo̍ḥ | su̱tam |
ka̱ra̱mbham | a̱nyaḥ | i̱ccha̱ti̱ ||6.057.02||

6.057.03a a̱jā a̱nyasya̱ vahna̍yo̱ harī̍ a̱nyasya̱ sambhṛ̍tā |
6.057.03c tābhyā̍ṁ vṛ̱trāṇi̍ jighnate ||

a̱jāḥ | a̱nyasya̍ | vahna̍yaḥ | harī̱ iti̍ | a̱nyasya̍ | sam-bhṛ̍tā |
tābhyā̍m | vṛ̱trāṇi̍ | ji̱ghna̱te̱ ||6.057.03||

6.057.04a yad indro̱ ana̍ya̱d rito̍ ma̱hīr a̱po vṛṣa̍ntamaḥ |
6.057.04c tatra̍ pū̱ṣābha̍va̱t sacā̍ ||

yat | indra̍ḥ | ana̍yat | rita̍ḥ | ma̱hīḥ | a̱paḥ | vṛṣa̍n-tamaḥ |
tatra̍ | pū̱ṣā | a̱bha̱va̱t | sacā̍ ||6.057.04||

6.057.05a tām pū̱ṣṇaḥ su̍ma̱tiṁ va̱yaṁ vṛ̱kṣasya̱ pra va̱yām i̍va |
6.057.05c indra̍sya̱ cā ra̍bhāmahe ||

tām | pū̱ṣṇaḥ | su̱-ma̱tim | va̱yam | vṛ̱kṣasya̍ | pra | va̱yām-i̍va |
indra̍sya | ca̱ | ā | ra̱bhā̱ma̱he̱ ||6.057.05||

6.057.06a ut pū̱ṣaṇa̍ṁ yuvāmahe̱ 'bhīśū̍m̐r iva̱ sāra̍thiḥ |
6.057.06c ma̱hyā indra̍ṁ sva̱staye̍ ||

ut | pū̱ṣaṇa̍m | yu̱vā̱ma̱he̱ | a̱bhīśū̍n-iva | sāra̍thiḥ |
ma̱hyai | indra̍m | sva̱staye̍ ||6.057.06||


6.058.01a śu̱kraṁ te̍ a̱nyad ya̍ja̱taṁ te̍ a̱nyad viṣu̍rūpe̱ aha̍nī̱ dyaur i̍vāsi |
6.058.01c viśvā̱ hi mā̱yā ava̍si svadhāvo bha̱drā te̍ pūṣann i̱ha rā̱tir a̍stu ||

śu̱kram | te̱ | a̱nyat | ya̱ja̱tam | te̱ | a̱nyat | viṣu̍rūpe̱ iti̱ viṣu̍-rūpe | aha̍nī̱ iti̍ | dyauḥ-i̍va | a̱si̱ |
viśvā̍ḥ | hi | mā̱yāḥ | ava̍si | sva̱dhā̱-va̱ḥ | bha̱drā | te̱ | pū̱ṣa̱n | i̱ha | rā̱tiḥ | a̱stu̱ ||6.058.01||

6.058.02a a̱jāśva̍ḥ paśu̱pā vāja̍pastyo dhiyaṁji̱nvo bhuva̍ne̱ viśve̱ arpi̍taḥ |
6.058.02c aṣṭrā̍m pū̱ṣā śi̍thi̱rām u̱dvarī̍vṛjat sa̱ṁcakṣā̍ṇo̱ bhuva̍nā de̱va ī̍yate ||

a̱ja-a̍śvaḥ | pa̱śu̱-pāḥ | vāja̍-pastyaḥ | dhi̱ya̱m-ji̱nvaḥ | bhuva̍ne | viśve̍ | arpi̍taḥ |
aṣṭrā̍m | pū̱ṣā | śi̱thi̱rām | u̱t-varī̍vṛjat | sa̱m-cakṣā̍ṇaḥ | bhuva̍nā | de̱vaḥ | ī̱ya̱te̱ ||6.058.02||

6.058.03a yās te̍ pūṣa̱n nāvo̍ a̱ntaḥ sa̍mu̱dre hi̍ra̱ṇyayī̍r a̱ntari̍kṣe̱ cara̍nti |
6.058.03c tābhi̍r yāsi dū̱tyāṁ sūrya̍sya̱ kāme̍na kṛta̱ śrava̍ i̱cchamā̍naḥ ||

yāḥ | te̱ | pū̱ṣa̱n | nāva̍ḥ | a̱ntariti̍ | sa̱mu̱dre | hi̱ra̱ṇyayī̍ḥ | a̱ntari̍kṣe | cara̍nti |
tābhi̍ḥ | yā̱si̱ | dū̱tyām | sūrya̍sya | kāme̍na | kṛ̱ta̱ | śrava̍ḥ | i̱cchamā̍naḥ ||6.058.03||

6.058.04a pū̱ṣā su̱bandhu̍r di̱va ā pṛ̍thi̱vyā i̱ḻas pati̍r ma̱ghavā̍ da̱smava̍rcāḥ |
6.058.04c yaṁ de̱vāso̱ ada̍duḥ sū̱ryāyai̱ kāme̍na kṛ̱taṁ ta̱vasa̱ṁ svañca̍m ||

pū̱ṣā | su̱-bandhu̍ḥ | di̱vaḥ | ā | pṛ̱thi̱vyāḥ | i̱ḻaḥ | pati̍ḥ | ma̱gha-vā̍ | da̱sma-va̍rcāḥ |
yam | de̱vāsa̍ḥ | ada̍duḥ | sū̱ryāyai̍ | kāme̍na | kṛ̱tam | ta̱vasa̍m | su̱-añca̍m ||6.058.04||


6.059.01a pra nu vo̍cā su̱teṣu̍ vāṁ vī̱ryā̱3̱̍ yāni̍ ca̱krathu̍ḥ |
6.059.01c ha̱tāso̍ vām pi̱taro̍ de̱vaśa̍trava̱ indrā̍gnī̱ jīva̍tho yu̱vam ||

pra | nu | vo̱ca̱ | su̱teṣu̍ | vā̱m | vī̱ryā̍ | yāni̍ | ca̱krathu̍ḥ |
ha̱tāsa̍ḥ | vā̱m | pi̱tara̍ḥ | de̱va-śa̍travaḥ | indrā̍gnī̱ iti̍ | jīva̍thaḥ | yu̱vam ||6.059.01||

6.059.02a baḻ i̱tthā ma̍hi̱mā vā̱m indrā̍gnī̱ pani̍ṣṭha̱ ā |
6.059.02c sa̱mā̱no vā̍ṁ jani̱tā bhrāta̍rā yu̱vaṁ ya̱māv i̱heha̍mātarā ||

baṭ | i̱tthā | ma̱hi̱mā | vā̱m | indrā̍gnī̱ iti̍ | pani̍ṣṭhaḥ | ā |
sa̱mā̱naḥ | vā̱m | ja̱ni̱tā | bhrāta̍rā | yu̱vam | ya̱mau | i̱heha̍-mātarā ||6.059.02||

6.059.03a o̱ki̱vāṁsā̍ su̱te sacā̱m̐ aśvā̱ saptī̍ i̱vāda̍ne |
6.059.03c indrā̱ nv a1̱̍gnī ava̍se̱ha va̱jriṇā̍ va̱yaṁ de̱vā ha̍vāmahe ||

o̱ki̱-vāṁsā̍ | su̱te | sacā̍ | aśvā̍ | saptī̍i̱veti̱ saptī̍-iva | āda̍ne |
indrā̍ | nu | a̱gnī iti̍ | ava̍sā | i̱ha | va̱jriṇā̍ | va̱yam | de̱vā | ha̱vā̱ma̱he̱ ||6.059.03||

6.059.04a ya i̍ndrāgnī su̱teṣu̍ vā̱ṁ stava̱t teṣv ṛ̍tāvṛdhā |
6.059.04c jo̱ṣa̱vā̱kaṁ vada̍taḥ pajrahoṣiṇā̱ na de̍vā bha̱satha̍ś ca̱na ||

yaḥ | i̱ndrā̱gnī̱ iti̍ | su̱teṣu̍ | vā̱m | stava̍t | teṣu̍ | ṛ̱ta̱-vṛ̱dhā̱ |
jo̱ṣa̱-vā̱kam | vada̍taḥ | pa̱jra̱-ho̱ṣi̱ṇā̱ | na | de̱vā̱ | bha̱satha̍ḥ | ca̱na ||6.059.04||

6.059.05a indrā̍gnī̱ ko a̱sya vā̱ṁ devau̱ marta̍ś ciketati |
6.059.05c viṣū̍co̱ aśvā̍n yuyujā̱na ī̍yata̱ eka̍ḥ samā̱na ā rathe̍ ||

indrā̍gnī̱ iti̍ | kaḥ | a̱sya | vā̱m | devau̍ | marta̍ḥ | ci̱ke̱ta̱ti̱ |
viṣū̍caḥ | aśvā̍n | yu̱yu̱jā̱naḥ | ī̱ya̱te̱ | eka̍ḥ | sa̱mā̱ne | ā | rathe̍ ||6.059.05||

6.059.06a indrā̍gnī a̱pād i̱yam pūrvāgā̍t pa̱dvatī̍bhyaḥ |
6.059.06c hi̱tvī śiro̍ ji̱hvayā̱ vāva̍da̱c cara̍t tri̱ṁśat pa̱dā ny a̍kramīt ||

indrā̍gnī̱ iti̍ | a̱pāt | i̱yam | pūrvā̍ | ā | a̱gā̱t | pa̱t-vatī̍bhyaḥ |
hi̱tvī | śira̍ḥ | ji̱hvayā̍ | vāva̍dat | cara̍t | tri̱ṁśat | pa̱dā | ni | a̱kra̱mī̱t ||6.059.06||

6.059.07a indrā̍gnī̱ ā hi ta̍nva̱te naro̱ dhanvā̍ni bā̱hvoḥ |
6.059.07c mā no̍ a̱smin ma̍hādha̱ne parā̍ varkta̱ṁ gavi̍ṣṭiṣu ||

indrā̍gnī̱ iti̍ | ā | hi | ta̱nva̱te | nara̍ḥ | dhanvā̍ni | bā̱hvoḥ |
mā | na̱ḥ | a̱smin | ma̱hā-dha̱ne | parā̍ | va̱rkta̱m | go-i̍ṣṭiṣu ||6.059.07||

6.059.08a indrā̍gnī̱ tapa̍nti mā̱ghā a̱ryo arā̍tayaḥ |
6.059.08c apa̱ dveṣā̱ṁsy ā kṛ̍taṁ yuyu̱taṁ sūryā̱d adhi̍ ||

indrā̍gnī̱ iti̍ | tapa̍nti | mā̱ | a̱ghāḥ | a̱ryaḥ | arā̍tayaḥ |
apa̍ | dveṣā̍ṁsi | ā | kṛ̱ta̱m | yu̱yu̱tam | sūryā̍t | adhi̍ ||6.059.08||

6.059.09a indrā̍gnī yu̱vor api̱ vasu̍ di̱vyāni̱ pārthi̍vā |
6.059.09c ā na̍ i̱ha pra ya̍cchataṁ ra̱yiṁ vi̱śvāyu̍poṣasam ||

indrā̍gnī̱ iti̍ | yu̱voḥ | api̍ | vasu̍ | di̱vyāni̍ | pārthi̍vā |
ā | na̱ḥ | i̱ha | pra | ya̱ccha̱ta̱m | ra̱yim | vi̱śvāyu̍-poṣasam ||6.059.09||

6.059.10a indrā̍gnī ukthavāhasā̱ stome̍bhir havanaśrutā |
6.059.10c viśvā̍bhir gī̱rbhir ā ga̍tam a̱sya soma̍sya pī̱taye̍ ||

indrā̍gnī̱ iti̍ | u̱ktha̱-vā̱ha̱sā̱ | stome̍bhiḥ | ha̱va̱na̱-śru̱tā̱ |
viśvā̍bhiḥ | gī̱ḥ-bhiḥ | ā | ga̱ta̱m | a̱sya | soma̍sya | pī̱taye̍ ||6.059.10||


6.060.01a śnatha̍d vṛ̱tram u̱ta sa̍noti̱ vāja̱m indrā̱ yo a̱gnī sahu̍rī sapa̱ryāt |
6.060.01c i̱ra̱jyantā̍ vasa̱vya̍sya̱ bhūre̱ḥ saha̍stamā̱ saha̍sā vāja̱yantā̍ ||

śnatha̍t | vṛ̱tram | u̱ta | sa̱no̱ti̱ | vāja̍m | indrā̍ | yaḥ | a̱gnī iti̍ | sahu̍rī̱ iti̍ | sa̱pa̱ryāt |
i̱ra̱jyantā̍ | va̱sa̱vya̍sya | bhūre̱ḥ | saha̍ḥ-tamā̍ | saha̍sā | vā̱ja̱-yantā̍ ||6.060.01||

6.060.02a tā yo̍dhiṣṭam a̱bhi gā i̍ndra nū̱nam a̱paḥ sva̍r u̱ṣaso̍ agna ū̱ḻhāḥ |
6.060.02c diśa̱ḥ sva̍r u̱ṣasa̍ indra ci̱trā a̱po gā a̍gne yuvase ni̱yutvā̍n ||

tā | yo̱dhi̱ṣṭa̱m | a̱bhi | gāḥ | i̱ndra̱ | nū̱nam | a̱paḥ | sva̍ḥ | u̱ṣasa̍ḥ | a̱gne̱ | ū̱ḻhāḥ |
diśa̍ḥ | sva̍ḥ | u̱ṣasa̍ḥ | i̱ndra̱ | ci̱trāḥ | a̱paḥ | gāḥ | a̱gne̱ | yu̱va̱se̱ | ni̱yutvā̍n ||6.060.02||

6.060.03a ā vṛ̍trahaṇā vṛtra̱habhi̱ḥ śuṣmai̱r indra̍ yā̱taṁ namo̍bhir agne a̱rvāk |
6.060.03c yu̱vaṁ rādho̍bhi̱r aka̍vebhir i̱ndrāgne̍ a̱sme bha̍vatam utta̱mebhi̍ḥ ||

ā | vṛ̱tra̱-ha̱nā̱ | vṛ̱tra̱ha-bhi̍ḥ | śuṣmai̍ḥ | indra̍ | yā̱tam | nama̍ḥ-bhiḥ | a̱gne̱ | a̱rvāk |
yu̱vam | rādha̍ḥ-bhiḥ | aka̍vebhiḥ | i̱ndra̱ | agne̍ | a̱sme iti̍ | bha̱va̱ta̱m | u̱t-ta̱mebhi̍ḥ ||6.060.03||

6.060.04a tā hu̍ve̱ yayo̍r i̱dam pa̱pne viśva̍m pu̱rā kṛ̱tam |
6.060.04c i̱ndrā̱gnī na ma̍rdhataḥ ||

tā | hu̱ve̱ | yayo̍ḥ | i̱dam | pa̱pne | viśva̍m | pu̱rā | kṛ̱tam |
i̱ndrā̱gnī iti̍ | na | ma̱rdha̱ta̱ḥ ||6.060.04||

6.060.05a u̱grā vi̍gha̱ninā̱ mṛdha̍ indrā̱gnī ha̍vāmahe |
6.060.05c tā no̍ mṛḻāta ī̱dṛśe̍ ||

u̱grā | vi̱-gha̱ninā̍ | mṛdha̍ḥ | i̱ndrā̱gnī iti̍ | ha̱vā̱ma̱he̱ |
tā | na̱ḥ | mṛ̱ḻā̱ta̱ḥ | ī̱dṛśe̍ ||6.060.05||

6.060.06a ha̱to vṛ̱trāṇy āryā̍ ha̱to dāsā̍ni̱ satpa̍tī |
6.060.06c ha̱to viśvā̱ apa̱ dviṣa̍ḥ ||

ha̱taḥ | vṛ̱trāṇi̍ | āryā̍ | ha̱taḥ | dāsā̍ni | satpa̍tī̱ iti̱ sat-pa̍tī |
ha̱taḥ | viśvā̍ḥ | apa̍ | dviṣa̍ḥ ||6.060.06||

6.060.07a indrā̍gnī yu̱vām i̱me̱3̱̍ 'bhi stomā̍ anūṣata |
6.060.07c piba̍taṁ śambhuvā su̱tam ||

indrā̍gnī̱ iti̍ | yu̱vām | i̱me | a̱bhi | stomā̍ḥ | a̱nū̱ṣa̱ta̱ |
piba̍tam | śa̱m-bhu̱vā̱ | su̱tam ||6.060.07||

6.060.08a yā vā̱ṁ santi̍ puru̱spṛho̍ ni̱yuto̍ dā̱śuṣe̍ narā |
6.060.08c indrā̍gnī̱ tābhi̱r ā ga̍tam ||

yāḥ | vā̱m | santi̍ | pu̱ru̱-spṛha̍ḥ | ni̱-yuta̍ḥ | dā̱śuṣe̍ | na̱rā̱ |
indrā̍gnī̱ iti̍ | tābhi̍ḥ | ā | ga̱ta̱m ||6.060.08||

6.060.09a tābhi̱r ā ga̍cchataṁ na̱rope̱daṁ sava̍naṁ su̱tam |
6.060.09c indrā̍gnī̱ soma̍pītaye ||

tābhi̍ḥ | ā | ga̱ccha̱ta̱m | na̱rā̱ | upa̍ | i̱dam | sava̍nam | su̱tam |
indrā̍gnī̱ iti̍ | soma̍-pītaye ||6.060.09||

6.060.10a tam ī̍ḻiṣva̱ yo a̱rciṣā̱ vanā̱ viśvā̍ pari̱ṣvaja̍t |
6.060.10c kṛ̱ṣṇā kṛ̱ṇoti̍ ji̱hvayā̍ ||

tam | ī̱ḻi̱ṣva̱ | yaḥ | a̱rciṣā̍ | vanā̍ | viśvā̍ | pa̱ri̱-svaja̍t |
kṛ̱ṣṇā | kṛ̱ṇoti̍ | ji̱hvayā̍ ||6.060.10||

6.060.11a ya i̱ddha ā̱vivā̍sati su̱mnam indra̍sya̱ martya̍ḥ |
6.060.11c dyu̱mnāya̍ su̱tarā̍ a̱paḥ ||

yaḥ | i̱ddhe | ā̱-vivā̍sati | su̱mnam | indra̍sya | martya̍ḥ |
dyu̱mnāya̍ | su̱-tarā̍ḥ | a̱paḥ ||6.060.11||

6.060.12a tā no̱ vāja̍vatī̱r iṣa̍ ā̱śūn pi̍pṛta̱m arva̍taḥ |
6.060.12c indra̍m a̱gniṁ ca̱ voḻha̍ve ||

tā | na̱ḥ | vāja̍-vatīḥ | iṣa̍ḥ | ā̱śūn | pi̱pṛ̱ta̱m | arva̍taḥ |
indra̍m | a̱gnim | ca̱ | voḻha̍ve ||6.060.12||

6.060.13a u̱bhā vā̍m indrāgnī āhu̱vadhyā̍ u̱bhā rādha̍saḥ sa̱ha mā̍da̱yadhyai̍ |
6.060.13c u̱bhā dā̱tārā̍v i̱ṣāṁ ra̍yī̱ṇām u̱bhā vāja̍sya sā̱taye̍ huve vām ||

u̱bhā | vā̱m | i̱ndrā̱gnī̱ iti̍ | ā̱-hu̱vadhyai̍ | u̱bhā | rādha̍saḥ | sa̱ha | mā̱da̱yadhyai̍ |
u̱bhā | dā̱tārau̍ | i̱ṣām | ra̱yī̱ṇām | u̱bhā | vāja̍sya | sā̱taye̍ | hu̱ve̱ | vā̱m ||6.060.13||

6.060.14a ā no̱ gavye̍bhi̱r aśvyai̍r vasa̱vyai̱3̱̍r upa̍ gacchatam |
6.060.14c sakhā̍yau de̱vau sa̱khyāya̍ śa̱mbhuve̍ndrā̱gnī tā ha̍vāmahe ||

ā | na̱ḥ | gavye̍bhiḥ | aśvyai̍ḥ | va̱sa̱vyai̍ḥ | upa̍ | ga̱ccha̱ta̱m |
sakhā̍yau | de̱vau | sa̱khyāya̍ | śa̱m-bhuvā̍ | i̱ndrā̱gnī iti̍ | tā | ha̱vā̱ma̱he̱ ||6.060.14||

6.060.15a indrā̍gnī śṛṇu̱taṁ hava̱ṁ yaja̍mānasya sunva̱taḥ |
6.060.15c vī̱taṁ ha̱vyāny ā ga̍ta̱m piba̍taṁ so̱myam madhu̍ ||

indrā̍gnī̱ iti̍ | śṛ̱ṇu̱tam | hava̍m | yaja̍mānasya | su̱nva̱taḥ |
vī̱tam | ha̱vyāni̍ | ā | ga̱ta̱m | piba̍tam | so̱myam | madhu̍ ||6.060.15||


6.061.01a i̱yam a̍dadād rabha̱sam ṛ̍ṇa̱cyuta̱ṁ divo̍dāsaṁ vadhrya̱śvāya̍ dā̱śuṣe̍ |
6.061.01c yā śaśva̍ntam āca̱khādā̍va̱sam pa̱ṇiṁ tā te̍ dā̱trāṇi̍ tavi̱ṣā sa̍rasvati ||

i̱yam | a̱da̱dā̱t | ra̱bha̱sam | ṛ̱ṇa̱-cyuta̍m | diva̍ḥ-dāsam | va̱dhri̱-a̱śvāya̍ | dā̱śuṣe̍ |
yā | śaśva̍ntam | ā̱-ca̱khāda̍ | a̱va̱sam | pa̱ṇim | tā | te̱ | dā̱trāṇi̍ | ta̱vi̱ṣā | sa̱ra̱sva̱ti̱ ||6.061.01||

6.061.02a i̱yaṁ śuṣme̍bhir bisa̱khā i̍vāruja̱t sānu̍ girī̱ṇāṁ ta̍vi̱ṣebhi̍r ū̱rmibhi̍ḥ |
6.061.02c pā̱rā̱va̱ta̱ghnīm ava̍se suvṛ̱ktibhi̱ḥ sara̍svatī̱m ā vi̍vāsema dhī̱tibhi̍ḥ ||

i̱yam | śuṣme̍bhiḥ | bi̱sa̱khāḥ-i̍va | a̱ru̱ja̱t | sānu̍ | gi̱rī̱ṇām | ta̱vi̱ṣebhi̍ḥ | ū̱rmi-bhi̍ḥ |
pā̱rā̱va̱ta̱-ghnīm | ava̍se | su̱vṛ̱kti-bhi̍ḥ | sara̍svatīm | ā | vi̱vā̱se̱ma̱ | dhī̱ti-bhi̍ḥ ||6.061.02||

6.061.03a sara̍svati deva̱nido̱ ni ba̍rhaya pra̱jāṁ viśva̍sya̱ bṛsa̍yasya mā̱yina̍ḥ |
6.061.03c u̱ta kṣi̱tibhyo̱ 'vanī̍r avindo vi̱ṣam e̍bhyo asravo vājinīvati ||

sara̍svati | de̱va̱-nida̍ḥ | ni | ba̱rha̱ya̱ | pra̱-jām | viśva̍sya | bṛsa̍yasya | mā̱yina̍ḥ |
u̱ta | kṣi̱ti-bhya̍ḥ | a̱vanī̍ḥ | a̱vi̱nda̱ḥ | vi̱ṣam | e̱bhya̱ḥ | a̱sra̱va̱ḥ | vā̱ji̱nī̱-va̱ti̱ ||6.061.03||

6.061.04a pra ṇo̍ de̱vī sara̍svatī̱ vāje̍bhir vā̱jinī̍vatī |
6.061.04c dhī̱nām a̍vi̱try a̍vatu ||

pra | na̱ḥ | de̱vī | sara̍svatī | vāje̍bhiḥ | vā̱jinī̍-vatī |
dhī̱nām | a̱vi̱trī | a̱va̱tu̱ ||6.061.04||

6.061.05a yas tvā̍ devi sarasvaty upabrū̱te dhane̍ hi̱te |
6.061.05c indra̱ṁ na vṛ̍tra̱tūrye̍ ||

yaḥ | tvā̱ | de̱vi̱ | sa̱ra̱sva̱ti̱ | u̱pa̱-brū̱te | dhane̍ | hi̱te |
indra̍m | na | vṛ̱tra̱-tūrye̍ ||6.061.05||

6.061.06a tvaṁ de̍vi sarasva̱ty avā̱ vāje̍ṣu vājini |
6.061.06c radā̍ pū̱ṣeva̍ naḥ sa̱nim ||

tvam | de̱vi̱ | sa̱ra̱sva̱ti̱ | ava̍ | vāje̍ṣu | vā̱ji̱ni̱ |
rada̍ | pū̱ṣā-i̍va | na̱ḥ | sa̱nim ||6.061.06||

6.061.07a u̱ta syā na̱ḥ sara̍svatī gho̱rā hira̍ṇyavartaniḥ |
6.061.07c vṛ̱tra̱ghnī va̍ṣṭi suṣṭu̱tim ||

u̱ta | syā | na̱ḥ | sara̍svatī | gho̱rā | hira̍ṇya-vartaniḥ |
vṛ̱tra̱-ghnī | va̱ṣṭi̱ | su̱-stu̱tim ||6.061.07||

6.061.08a yasyā̍ ana̱nto ahru̍tas tve̱ṣaś ca̍ri̱ṣṇur a̍rṇa̱vaḥ |
6.061.08c ama̱ś cara̍ti̱ roru̍vat ||

yasyā̍ḥ | a̱na̱ntaḥ | ahu̍taḥ | tve̱ṣaḥ | ca̱ri̱ṣṇuḥ | a̱rṇa̱vaḥ |
ama̍ḥ | cara̍ti | roru̍vat ||6.061.08||

6.061.09a sā no̱ viśvā̱ ati̱ dviṣa̱ḥ svasṝ̍r a̱nyā ṛ̱tāva̍rī |
6.061.09c ata̱nn ahe̍va̱ sūrya̍ḥ ||

sā | na̱ḥ | viśvā̍ | ati̍ | dviṣa̍ḥ | svasṝ̍ḥ | a̱nyāḥ | ṛ̱ta-va̍rī |
ata̍n | ahā̍-iva | sūrya̍ḥ ||6.061.09||

6.061.10a u̱ta na̍ḥ pri̱yā pri̱yāsu̍ sa̱ptasva̍sā̱ suju̍ṣṭā |
6.061.10c sara̍svatī̱ stomyā̍ bhūt ||

u̱ta | na̱ḥ | pri̱yā | pri̱yāsu̍ | sa̱pta-sva̍sā | su-ju̍ṣṭā |
sara̍svatī | stomyā̍ | bhū̱t ||6.061.10||

6.061.11a ā̱pa̱pruṣī̱ pārthi̍vāny u̱ru rajo̍ a̱ntari̍kṣam |
6.061.11c sara̍svatī ni̱das pā̍tu ||

ā̱-pa̱pruṣī̍ | pārthi̍vāni | u̱ru | raja̍ḥ | a̱ntari̍kṣam |
sara̍svatī | ni̱daḥ | pā̱tu̱ ||6.061.11||

6.061.12a tri̱ṣa̱dhasthā̍ sa̱ptadhā̍tu̱ḥ pañca̍ jā̱tā va̱rdhaya̍ntī |
6.061.12c vāje̍-vāje̱ havyā̍ bhūt ||

tri̱-sa̱dhasthā̍ | sa̱pta-dhā̍tuḥ | pañca̍ | jā̱tā | va̱rdhaya̍ntī |
vāje̍-vāje | havyā̍ | bhū̱t ||6.061.12||

6.061.13a pra yā ma̍hi̱mnā ma̱hinā̍su̱ ceki̍te dyu̱mnebhi̍r a̱nyā a̱pasā̍m a̱pasta̍mā |
6.061.13c ratha̍ iva bṛha̱tī vi̱bhvane̍ kṛ̱topa̱stutyā̍ ciki̱tuṣā̱ sara̍svatī ||

pra | yā | ma̱hi̱mnā | ma̱hinā̍ | ā̱su̱ | ceki̍te | dyu̱mnebhi̍ḥ | a̱nyāḥ | a̱pasā̍m | a̱paḥ-ta̍mā |
ratha̍ḥ-iva | bṛ̱ha̱tī | vi̱-bhvane̍ | kṛ̱tā | u̱pa̱-stutyā̍ | ci̱ki̱tuṣā̍ | sara̍svatī ||6.061.13||

6.061.14a sara̍svaty a̱bhi no̍ neṣi̱ vasyo̱ māpa̍ spharī̱ḥ paya̍sā̱ mā na̱ ā dha̍k |
6.061.14c ju̱ṣasva̍ naḥ sa̱khyā ve̱śyā̍ ca̱ mā tvat kṣetrā̱ṇy ara̍ṇāni ganma ||

sara̍svati | a̱bhi | na̱ḥ | ne̱ṣi̱ | vasya̍ḥ | mā | apa̍ | spha̱rī̱ḥ | paya̍sā | mā | na̱ḥ | ā | dha̱k |
ju̱ṣasva̍ | na̱ḥ | sa̱khyā | ve̱śyā̍ | ca̱ | mā | tvat | kṣetrā̍ṇi | ara̍ṇāni | ga̱nma̱ ||6.061.14||


6.062.01a stu̱ṣe narā̍ di̱vo a̱sya pra̱santā̱śvinā̍ huve̱ jara̍māṇo a̱rkaiḥ |
6.062.01c yā sa̱dya u̱srā vyuṣi̱ jmo antā̱n yuyū̍ṣata̱ḥ pary u̱rū varā̍ṁsi ||

stu̱ṣe | narā̍ | di̱vaḥ | a̱sya | pra̱-santā̍ | a̱śvinā̍ | hu̱ve̱ | jara̍māṇaḥ | a̱rkaiḥ |
yā | sa̱dyaḥ | u̱srā | vi̱-uṣi̍ | jmaḥ | antā̍n | yuyū̍ṣataḥ | pari̍ | u̱ru | varā̍ṁsi ||6.062.01||

6.062.02a tā ya̱jñam ā śuci̍bhiś cakramā̱ṇā ratha̍sya bhā̱nuṁ ru̍rucū̱ rajo̍bhiḥ |
6.062.02c pu̱rū varā̱ṁsy ami̍tā̱ mimā̍nā̱po dhanvā̱ny ati̍ yātho̱ ajrā̍n ||

tā | ya̱jñam | ā | śuci̍-bhiḥ | ca̱kra̱mā̱ṇā | ratha̍sya | bhā̱num | ru̱ru̱cu̱ḥ | raja̍ḥ-bhiḥ |
pu̱ru | varā̱ṁsi | ami̍tā | mimā̍nā | a̱paḥ | dhanvā̍ni | ati̍ | yā̱tha̱ḥ | ajrā̍n ||6.062.02||

6.062.03a tā ha̱ tyad va̱rtir yad ara̍dhram ugre̱tthā dhiya̍ ūhathu̱ḥ śaśva̱d aśvai̍ḥ |
6.062.03c mano̍javebhir iṣi̱raiḥ śa̱yadhyai̱ pari̱ vyathi̍r dā̱śuṣo̱ martya̍sya ||

tā | ha̱ | tyat | va̱rtiḥ | yat | ara̍dhram | u̱grā̱ | i̱tthā | dhiya̍ḥ | ū̱ha̱thu̱ḥ | śaśva̍t | aśvai̍ḥ |
mana̍ḥ-javebhiḥ | i̱ṣi̱raiḥ | śa̱yadhyai̍ | pari̍ | vyarthi̍ḥ | dā̱śuṣa̍ḥ | martya̍sya ||6.062.03||

6.062.04a tā navya̍so̱ jara̍māṇasya̱ manmopa̍ bhūṣato yuyujā̱nasa̍ptī |
6.062.04c śubha̱m pṛkṣa̱m iṣa̱m ūrja̱ṁ vaha̍ntā̱ hotā̍ yakṣat pra̱tno a̱dhrug yuvā̍nā ||

tā | navya̍saḥ | jara̍māṇasya | manma̍ | upa̍ | bhū̱ṣa̱ta̱ḥ | yu̱yu̱jā̱nasa̍ptī̱ iti̍ yu̱yu̱jā̱na-sa̍ptī |
śubha̍m | pṛkṣa̍m | iṣa̍m | ūrja̍m | vaha̍ntā | hotā̍ | ya̱kṣa̱t | pra̱tnaḥ | a̱dhruk | yuvā̍nā ||6.062.04||

6.062.05a tā va̱lgū da̱srā pu̍ru̱śāka̍tamā pra̱tnā navya̍sā̱ vaca̱sā vi̍vāse |
6.062.05c yā śaṁsa̍te stuva̱te śambha̍viṣṭhā babhū̱vatu̍r gṛṇa̱te ci̱trarā̍tī ||

tā | va̱lgū | da̱srā | pu̱ru̱śāka̍-tamā | pra̱tnā | navya̍sā | vaca̍sā | ā | vi̱vā̱se̱ |
yā | śaṁsa̍te | stu̱va̱te | śam-bha̍viṣṭhā | ba̱bhū̱vatu̍ḥ | gṛ̱ṇa̱te | ci̱trarā̍tī̱ iti̍ ci̱tra-rā̍tī ||6.062.05||

6.062.06a tā bhu̱jyuṁ vibhi̍r a̱dbhyaḥ sa̍mu̱drāt tugra̍sya sū̱num ū̍hathū̱ rajo̍bhiḥ |
6.062.06c a̱re̱ṇubhi̱r yoja̍nebhir bhu̱jantā̍ pata̱tribhi̱r arṇa̍so̱ nir u̱pasthā̍t ||

tā | bhu̱jyum | vi-bhi̍ḥ | a̱t-bhyaḥ | sa̱mu̱drāt | tugra̍sya | sū̱num | ū̱ha̱thu̱ḥ | raja̍ḥ-bhiḥ |
a̱re̱ṇu-bhi̍ḥ | yoja̍nebhiḥ | bhu̱jantā̍ | pa̱ta̱tri-bhi̍ḥ | arṇa̍saḥ | niḥ | u̱pa-sthā̍t ||6.062.06||

6.062.07a vi ja̱yuṣā̍ rathyā yāta̱m adri̍ṁ śru̱taṁ hava̍ṁ vṛṣaṇā vadhrima̱tyāḥ |
6.062.07c da̱śa̱syantā̍ śa̱yave̍ pipyathu̱r gām iti̍ cyavānā suma̱tim bhu̍raṇyū ||

vi | ja̱yuṣā̍ | ra̱thyā̱ | yā̱ta̱m | adri̍m | śru̱tam | hava̍m | vṛ̱ṣa̱ṇā̱ | va̱dhri̱-ma̱tyāḥ |
da̱śa̱syantā̍ | śa̱yave̍ | pi̱pya̱thu̱ḥ | gām | iti̍ | cya̱vā̱nā̱ | su̱-ma̱tim | bhu̱ra̱ṇyū̱ iti̍ ||6.062.07||

6.062.08a yad ro̍dasī pra̱divo̱ asti̱ bhūmā̱ heḻo̍ de̱vānā̍m u̱ta ma̍rtya̱trā |
6.062.08c tad ā̍dityā vasavo rudriyāso rakṣo̱yuje̱ tapu̍r a̱ghaṁ da̍dhāta ||

yat | ro̱da̱sī̱ iti̍ | pra̱-diva̍ḥ | asti̍ | bhūmā̍ | heḻa̍ḥ | de̱vānā̍m | u̱ta | ma̱rtya̱-trā |
tat | ā̱di̱tyā̱ḥ | va̱sa̱va̱ḥ | ru̱dri̱yā̱sa̱ḥ | ra̱kṣa̱ḥ-yuje̍ | tapu̍ḥ | a̱gham | da̱dhā̱ta̱ ||6.062.08||

6.062.09a ya ī̱ṁ rājā̍nāv ṛtu̱thā vi̱dadha̱d raja̍so mi̱tro varu̍ṇa̱ś cike̍tat |
6.062.09c ga̱mbhī̱rāya̱ rakṣa̍se he̱tim a̍sya̱ droghā̍ya ci̱d vaca̍sa̱ āna̍vāya ||

yaḥ | ī̱m | rājā̍nau | ṛ̱tu̱-thā | vi̱-dadha̍t | raja̍saḥ | mi̱traḥ | varu̍ṇaḥ | cike̍tat |
ga̱mbhī̱rāya̍ | rakṣa̍se | he̱tim | a̱sya̱ | droghā̍ya | ci̱t | vaca̍se | āna̍vāya ||6.062.09||

6.062.10a anta̍raiś ca̱krais tana̍yāya va̱rtir dyu̱matā yā̍taṁ nṛ̱vatā̱ rathe̍na |
6.062.10c sanu̍tyena̱ tyaja̍sā̱ martya̍sya vanuṣya̱tām api̍ śī̱rṣā va̍vṛktam ||

anta̍raiḥ | ca̱kraiḥ | tana̍yāya | va̱rtiḥ | dyu̱-matā̍ | ā | yā̱ta̱m | nṛ̱-vatā̍ | rathe̍na |
sanu̍tyena | tyaja̍sā | martya̍sya | va̱nu̱ṣya̱tām | api̍ | śī̱rṣā | va̱vṛ̱kta̱m ||6.062.10||

6.062.11a ā pa̍ra̱mābhi̍r u̱ta ma̍dhya̱mābhi̍r ni̱yudbhi̍r yātam ava̱mābhi̍r a̱rvāk |
6.062.11c dṛ̱ḻhasya̍ ci̱d goma̍to̱ vi vra̱jasya̱ duro̍ vartaṁ gṛṇa̱te ci̍trarātī ||

ā | pa̱ra̱mābhi̍ḥ | u̱ta | ma̱dhya̱mābhi̍ḥ | ni̱yut-bhi̍ḥ | yā̱ta̱m | a̱va̱mābhi̍ḥ | a̱rvāk |
dṛ̱ḻhasya̍ | ci̱t | go-ma̍taḥ | vi | vra̱jasya̍ | dura̍ḥ | va̱rta̱m | gṛ̱ṇa̱te | ci̱tra̱rā̱tī̱ iti̍ citra-rātī ||6.062.11||


6.063.01a kva1̱̍ tyā va̱lgū pu̍ruhū̱tādya dū̱to na stomo̍ 'vida̱n nama̍svān |
6.063.01c ā yo a̱rvāṅ nāsa̍tyā va̱varta̱ preṣṭhā̱ hy asa̍tho asya̱ manma̍n ||

kva̍ | tyā | va̱lgū iti̍ | pu̱ru̱-hū̱tā | a̱dya | dū̱taḥ | na | stoma̍ḥ | a̱vi̱da̱t | nama̍svān |
ā | yaḥ | a̱rvāk | nāsa̍tyā | va̱varta̍ | preṣṭhā̍ | hi | asa̍thaḥ | a̱sya̱ | manma̍n ||6.063.01||

6.063.02a ara̍m me ganta̱ṁ hava̍nāyā̱smai gṛ̍ṇā̱nā yathā̱ pibā̍tho̱ andha̍ḥ |
6.063.02c pari̍ ha̱ tyad va̱rtir yā̍tho ri̱ṣo na yat paro̱ nānta̍ras tutu̱ryāt ||

ara̍m | me̱ | ganta̍m | hava̍nāya | a̱smai | gṛ̱ṇā̱nā | yathā̍ | pibā̍thaḥ | andha̍ḥ |
pari̍ | ha̱ | tyat | va̱rtiḥ | yā̱tha̱ḥ | ri̱ṣaḥ | na | yat | para̍ḥ | na | anta̍raḥ | tu̱tu̱ryāt ||6.063.02||

6.063.03a akā̍ri vā̱m andha̍so̱ varī̍ma̱nn astā̍ri ba̱rhiḥ su̍prāya̱ṇata̍mam |
6.063.03c u̱ttā̱naha̍sto yuva̱yur va̍va̱ndā vā̱ṁ nakṣa̍nto̱ adra̍ya āñjan ||

akā̍ri | vā̱m | andha̍saḥ | varī̍man | astā̍ri | ba̱rhiḥ | su̱pra̱-a̱ya̱nata̍mam |
u̱ttā̱na-ha̍staḥ | yu̱va̱yuḥ | va̱va̱nda̱ | ā | vā̱m | nakṣa̍ntaḥ | adra̍yaḥ | ā̱ñja̱n ||6.063.03||

6.063.04a ū̱rdhvo vā̍m a̱gnir a̍dhva̱reṣv a̍sthā̱t pra rā̱tir e̍ti jū̱rṇinī̍ ghṛ̱tācī̍ |
6.063.04c pra hotā̍ gū̱rtama̍nā urā̱ṇo 'yu̍kta̱ yo nāsa̍tyā̱ havī̍man ||

ū̱rdhvaḥ | vā̱m | a̱gniḥ | a̱dhva̱reṣu̍ | a̱sthā̱t | pra | rā̱tiḥ | e̱ti̱ | jū̱rṇinī̍ | ghṛ̱tācī̍ |
pra | hotā̍ | gū̱rta-ma̍nāḥ | u̱rā̱ṇaḥ | ayu̍kta | yaḥ | nāsa̍tyā | havī̍man ||6.063.04||

6.063.05a adhi̍ śri̱ye du̍hi̱tā sūrya̍sya̱ ratha̍ṁ tasthau purubhujā śa̱toti̍m |
6.063.05c pra mā̱yābhi̍r māyinā bhūta̱m atra̱ narā̍ nṛtū̱ jani̍man ya̱jñiyā̍nām ||

adhi̍ | śri̱ye | du̱hi̱tā | sūrya̍sya | ratha̍m | ta̱sthau̱ | pu̱ru̱-bhu̱jā̱ | śa̱ta-ū̍tim |
pra | mā̱yābhi̍ḥ | mā̱yi̱nā̱ | bhū̱ta̱m | atra̍ | narā̍ | nṛ̱tū̱ iti̍ | jani̍man | ya̱jñiyā̍nām ||6.063.05||

6.063.06a yu̱vaṁ śrī̱bhir da̍rśa̱tābhi̍r ā̱bhiḥ śu̱bhe pu̱ṣṭim ū̍hathuḥ sū̱ryāyā̍ḥ |
6.063.06c pra vā̱ṁ vayo̱ vapu̱ṣe 'nu̍ papta̱n nakṣa̱d vāṇī̱ suṣṭu̍tā dhiṣṇyā vām ||

yu̱vam | śrī̱bhiḥ | da̱rśa̱tābhi̍ḥ | ā̱bhiḥ | śu̱bhe | pu̱ṣṭim | ū̱ha̱thu̱ḥ | sū̱ryāyā̍ḥ |
pra | vā̱m | vaya̍ḥ | vapu̍ṣe | anu̍ | pa̱pta̱n | nakṣa̍t | vāṇī̍ | su-stu̍tā | dhi̱ṣṇyā̱ | vā̱m ||6.063.06||

6.063.07a ā vā̱ṁ vayo 'śvā̍so̱ vahi̍ṣṭhā a̱bhi prayo̍ nāsatyā vahantu |
6.063.07c pra vā̱ṁ ratho̱ mano̍javā asarjī̱ṣaḥ pṛ̱kṣa i̱ṣidho̱ anu̍ pū̱rvīḥ ||

ā | vā̱m | vaya̍ḥ | aśvā̍saḥ | vahi̍ṣṭhāḥ | a̱bhi | praya̍ḥ | nā̱sa̱tyā̱ | va̱ha̱ntu̱ |
pra | vā̱m | ratha̍ḥ | mana̍ḥ-javāḥ | a̱sa̱rji̱ | i̱ṣaḥ | pṛ̱kṣaḥ | i̱ṣidha̍ḥ | anu̍ | pū̱rvīḥ ||6.063.07||

6.063.08a pu̱ru hi vā̍m purubhujā de̱ṣṇaṁ dhe̱nuṁ na̱ iṣa̍m pinvata̱m asa̍krām |
6.063.08c stuta̍ś ca vām mādhvī suṣṭu̱tiś ca̱ rasā̍ś ca̱ ye vā̱m anu̍ rā̱tim agma̍n ||

pu̱ru | hi | vā̱m | pu̱ru̱-bhu̱jā̱ | de̱ṣṇam | dhe̱num | na̱ḥ | iṣa̍m | pi̱nva̱ta̱m | asa̍krām |
stuta̍ḥ | ca̱ | vā̱m | mā̱dhvī̱ iti̍ | su̱-stu̱tiḥ | ca̱ | rasā̍ḥ | ca̱ | ye | vā̱m | anu̍ | rā̱tim | agma̍n ||6.063.08||

6.063.09a u̱ta ma̍ ṛ̱jre pura̍yasya ra̱ghvī su̍mī̱ḻhe śa̱tam pe̍ru̱ke ca̍ pa̱kvā |
6.063.09c śā̱ṇḍo dā̍d dhira̱ṇina̱ḥ smaddi̍ṣṭī̱n daśa̍ va̱śāso̍ abhi̱ṣāca̍ ṛ̱ṣvān ||

u̱ta | me̱ | ṛ̱jre iti̍ | pura̍yasya | ra̱ghvī iti̍ | su̱-mī̱ḻhe | śa̱tam | pe̱ru̱ke | ca̱ | pa̱kvā |
śā̱ṇḍaḥ | dā̱t | hi̱ra̱ṇina̍ḥ | smat-di̍ṣṭīn | daśa̍ | va̱śāsa̍ḥ | a̱bhi̱-sāca̍ḥ | ṛ̱ṣvān ||6.063.09||

6.063.10a saṁ vā̍ṁ śa̱tā nā̍satyā sa̱hasrāśvā̍nām puru̱panthā̍ gi̱re dā̍t |
6.063.10c bha̱radvā̍jāya vīra̱ nū gi̱re dā̍d dha̱tā rakṣā̍ṁsi purudaṁsasā syuḥ ||

sam | vā̱m | śa̱tā | nā̱sa̱tyā̱ | sa̱hasrā̍ | aśvā̍nām | pu̱ru̱-panthā̍ḥ | gi̱re | dā̱t |
bha̱rat-vā̍jāya | vī̱ra̱ | nu | gi̱re | dā̱t | ha̱tā | rakṣā̍ṁsi | pu̱ru̱-da̱ṁsa̱sā̱ | syu̱riti̍ syuḥ ||6.063.10||

6.063.11a ā vā̍ṁ su̱mne vari̍man sū̱ribhi̍ḥ ṣyām ||

ā | vā̱m | su̱mne | vari̍man | sū̱ri-bhi̍ḥ | syā̱m ||6.063.11||


6.064.01a ud u̍ śri̱ya u̱ṣaso̱ roca̍mānā̱ asthu̍r a̱pāṁ normayo̱ ruśa̍ntaḥ |
6.064.01c kṛ̱ṇoti̱ viśvā̍ su̱pathā̍ su̱gāny abhū̍d u̱ vasvī̱ dakṣi̍ṇā ma̱ghonī̍ ||

ut | ū̱m̐ iti̍ | śri̱ye | u̱ṣasa̍ḥ | roca̍mānāḥ | asthu̍ḥ | a̱pām | na | ū̱rmaya̍ḥ | ruśa̍ntaḥ |
kṛ̱ṇoti̍ | viśvā̍ | su̱-pathā̍ | su̱-gāni̍ | abhū̍t | ū̱m̐ iti̍ | vasvī̍ | dakṣi̍ṇā | ma̱ghonī̍ ||6.064.01||

6.064.02a bha̱drā da̍dṛkṣa urvi̱yā vi bhā̱sy ut te̍ śo̱cir bhā̱navo̱ dyām a̍paptan |
6.064.02c ā̱vir vakṣa̍ḥ kṛṇuṣe śu̱mbhamā̱noṣo̍ devi̱ roca̍mānā̱ maho̍bhiḥ ||

bha̱drā | da̱dṛ̱kṣe̱ | u̱rvi̱yā | vi | bhā̱si̱ | ut | te̱ | śo̱ciḥ | bhā̱nava̍ḥ | dyām | a̱pa̱pta̱n |
ā̱viḥ | vakṣa̍ḥ | kṛ̱ṇu̱ṣe̱ | śu̱mbhamā̍nā | uṣa̍ḥ | de̱vi̱ | roca̍mānā | maha̍ḥ-bhiḥ ||6.064.02||

6.064.03a vaha̍nti sīm aru̱ṇāso̱ ruśa̍nto̱ gāva̍ḥ su̱bhagā̍m urvi̱yā pra̍thā̱nām |
6.064.03c ape̍jate̱ śūro̱ aste̍va̱ śatrū̱n bādha̍te̱ tamo̍ aji̱ro na voḻhā̍ ||

vaha̍nti | sī̱m | a̱ru̱ṇāsa̍ḥ | ruśa̍ntaḥ | gāva̍ḥ | su̱-bhagā̍m | u̱rvi̱yā | pra̱tha̱nām |
apa̍ | ī̱ja̱te̱ | śūra̍ḥ | astā̍-iva | śatrū̍n | bādha̍te | tama̍ḥ | a̱ji̱raḥ | na | voḻhā̍ ||6.064.03||

6.064.04a su̱gota te̍ su̱pathā̱ parva̍teṣv avā̱te a̱pas ta̍rasi svabhāno |
6.064.04c sā na̱ ā va̍ha pṛthuyāmann ṛṣve ra̱yiṁ di̍vo duhitar iṣa̱yadhyai̍ ||

su̱-gā | u̱ta | te̱ | su̱-pathā̍ | parva̍teṣu | a̱vā̱te | a̱paḥ | ta̱ra̱si̱ | sva̱bhā̱no̱ iti̍ sva-bhāno |
sā | na̱ḥ | ā | va̱ha̱ | pṛ̱thu̱-yā̱ma̱n | ṛ̱ṣve̱ | ra̱yim | di̱va̱ḥ | du̱hi̱ta̱ḥ | i̱ṣa̱yadhyai̍ ||6.064.04||

6.064.05a sā va̍ha̱ yokṣabhi̱r avā̱toṣo̱ vara̱ṁ vaha̍si̱ joṣa̱m anu̍ |
6.064.05c tvaṁ di̍vo duhita̱r yā ha̍ de̱vī pū̱rvahū̍tau ma̱ṁhanā̍ darśa̱tā bhū̍ḥ ||

sā | ā | va̱ha̱ | yā | u̱kṣa-bhi̍ḥ | avā̍tā | uṣa̍ḥ | vara̍m | vaha̍si | joṣa̍m | anu̍ |
tvam | di̱va̱ḥ | du̱hi̱ta̱ḥ | yā | ha̱ | de̱vī | pū̱rva-hū̍tau | ma̱ṁhanā̍ | da̱rśa̱tā | bhū̱ḥ ||6.064.05||

6.064.06a ut te̱ vaya̍ś cid vasa̱ter a̍papta̱n nara̍ś ca̱ ye pi̍tu̱bhājo̱ vyu̍ṣṭau |
6.064.06c a̱mā sa̱te va̍hasi̱ bhūri̍ vā̱mam uṣo̍ devi dā̱śuṣe̱ martyā̍ya ||

ut | te̱ | vaya̍ḥ | ci̱t | va̱sa̱teḥ | a̱pa̱pta̱n | nara̍ḥ | ca̱ | ye | pi̱tu̱-bhāja̍ḥ | vi-u̍ṣṭau |
a̱mā | sa̱te | va̱ha̱si̱ | bhūri̍ | vā̱mam | uṣa̍ḥ | de̱vi̱ | dā̱śuṣe̍ | martyā̍ya ||6.064.06||


6.065.01a e̱ṣā syā no̍ duhi̱tā di̍vo̱jāḥ kṣi̱tīr u̱cchantī̱ mānu̍ṣīr ajīgaḥ |
6.065.01c yā bhā̱nunā̱ ruśa̍tā rā̱myāsv ajñā̍yi ti̱ras tama̍saś cid a̱ktūn ||

e̱ṣā | syā | na̱ḥ | du̱hi̱tā | di̱va̱ḥ-jāḥ | kṣi̱tīḥ | u̱cchantī̍ | mānu̍ṣīḥ | a̱jī̱ga̱riti̍ |
yā | bhā̱nunā̍ | ruśa̍tā | rā̱myāsu̍ | ajñā̍yi | ti̱raḥ | tama̍saḥ | ci̱t | a̱ktūn ||6.065.01||

6.065.02a vi tad ya̍yur aruṇa̱yugbhi̱r aśvai̍ś ci̱tram bhā̍nty u̱ṣasa̍ś ca̱ndrara̍thāḥ |
6.065.02c agra̍ṁ ya̱jñasya̍ bṛha̱to naya̍ntī̱r vi tā bā̍dhante̱ tama̱ ūrmyā̍yāḥ ||

vi | tat | ya̱yu̱ḥ | a̱ru̱ṇa̱yuk-bhi̍ḥ | aśvai̍ḥ | ci̱tram | bhā̱nti̱ | u̱ṣasa̍ḥ | ca̱ndra-ra̍thāḥ |
agra̍m | ya̱jñasya̍ | bṛ̱ha̱taḥ | naya̍ntīḥ | vi | tāḥ | bā̱dha̱nte̱ | tama̍ḥ | ūrmyā̍yāḥ ||6.065.02||

6.065.03a śravo̱ vāja̱m iṣa̱m ūrja̱ṁ vaha̍ntī̱r ni dā̱śuṣa̍ uṣaso̱ martyā̍ya |
6.065.03c ma̱ghonī̍r vī̱rava̱t patya̍mānā̱ avo̍ dhāta vidha̱te ratna̍m a̱dya ||

śrava̍ḥ | vāja̍m | iṣa̍m | ūrja̍m | vaha̍ntīḥ | ni | dā̱śuṣe̍ | u̱ṣa̱sa̱ḥ | martyā̍ya |
ma̱ghonī̍ḥ | vī̱ra-va̍t | patya̍mānāḥ | ava̍ḥ | dhā̱ta̱ | vi̱dha̱te | ratna̍m | a̱dya ||6.065.03||

6.065.04a i̱dā hi vo̍ vidha̱te ratna̱m astī̱dā vī̱rāya̍ dā̱śuṣa̍ uṣāsaḥ |
6.065.04c i̱dā viprā̍ya̱ jara̍te̱ yad u̱kthā ni ṣma̱ māva̍te vahathā pu̱rā ci̍t ||

i̱dā | hi | va̱ḥ | vi̱dha̱te | ratna̍m | asti̍ | i̱dā | vī̱rāya̍ | dāśuṣe̍ | u̱ṣa̱sa̱ḥ |
i̱dā | viprā̍ya | jara̍te | yat | u̱kthā | ni | sma̱ | mā-va̍te | va̱ha̱tha̱ | pu̱rā | ci̱t ||6.065.04||

6.065.05a i̱dā hi ta̍ uṣo adrisāno go̱trā gavā̱m aṅgi̍raso gṛ̱ṇanti̍ |
6.065.05c vy a1̱̍rkeṇa̍ bibhidu̱r brahma̍ṇā ca sa̱tyā nṛ̱ṇām a̍bhavad de̱vahū̍tiḥ ||

i̱dā | hi | te̱ | u̱ṣa̱ḥ | a̱dri̱sā̱no̱ itya̍dri-sāno | go̱trā | gavā̍m | aṅgi̍rasaḥ | gṛ̱ṇanti̍ |
vi | a̱rkeṇa̍ | bi̱bhi̱du̱ḥ | brahma̍ṇā | ca̱ | sa̱tyā | nṛ̱ṇām | a̱bha̱va̱t | de̱va-hū̍tiḥ ||6.065.05||

6.065.06a u̱cchā di̍vo duhitaḥ pratna̱van no̍ bharadvāja̱vad vi̍dha̱te ma̍ghoni |
6.065.06c su̱vīra̍ṁ ra̱yiṁ gṛ̍ṇa̱te ri̍rīhy urugā̱yam adhi̍ dhehi̱ śravo̍ naḥ ||

u̱ccha | di̱va̱ḥ | du̱hi̱ta̱riti̍ | pra̱tna̱-vat | na̱ḥ | bha̱ra̱dvā̱ja̱-vat | vi̱dha̱te | ma̱gho̱ni̱ |
su̱-vīra̍m | ra̱yim | gṛ̱ṇa̱te | ri̱rī̱hi̱ | u̱ru̱-gā̱yam | adhi̍ | dhe̱hi̱ | śrava̍ḥ | na̱ḥ ||6.065.06||


6.066.01a vapu̱r nu tac ci̍ki̱tuṣe̍ cid astu samā̱naṁ nāma̍ dhe̱nu patya̍mānam |
6.066.01c marte̍ṣv a̱nyad do̱hase̍ pī̱pāya̍ sa̱kṛc chu̱kraṁ du̍duhe̱ pṛśni̱r ūdha̍ḥ ||

vapu̍ḥ | nu | tat | ci̱ki̱tuṣe̍ | ci̱t | a̱stu̱ | sa̱mā̱nam | nāma̍ | dhe̱nu | patya̍mānam |
marte̍ṣu | a̱nyat | do̱hase̍ | pī̱pāya̍ | sa̱kṛt | śu̱kram | du̱du̱he̱ | pṛśni̍ḥ | ūdha̍ḥ ||6.066.01||

6.066.02a ye a̱gnayo̱ na śośu̍cann idhā̱nā dvir yat trir ma̱ruto̍ vāvṛ̱dhanta̍ |
6.066.02c a̱re̱ṇavo̍ hira̱ṇyayā̍sa eṣāṁ sā̱kaṁ nṛ̱mṇaiḥ pauṁsye̍bhiś ca bhūvan ||

ye | a̱gnaya̍ḥ | na | śośu̍can | i̱dhā̱nāḥ | dviḥ | yat | triḥ | ma̱ruta̍ḥ | va̱vṛ̱dhanta̍ |
a̱re̱ṇava̍ḥ | hi̱ra̱ṇyayā̍saḥ | e̱ṣā̱m | sā̱kam | nṛ̱mṇaiḥ | pauṁsye̍bhiḥ | ca̱ | bhū̱va̱n ||6.066.02||

6.066.03a ru̱drasya̱ ye mī̱ḻhuṣa̱ḥ santi̍ pu̱trā yām̐ś co̱ nu dādhṛ̍vi̱r bhara̍dhyai |
6.066.03c vi̱de hi mā̱tā ma̱ho ma̱hī ṣā set pṛśni̍ḥ su̱bhve̱3̱̍ garbha̱m ādhā̍t ||

ru̱drasya̍ | ye | mī̱ḻhuṣa̍ḥ | santi̍ | pu̱trāḥ | yān | co̱ iti̍ | nu | dādhṛ̍viḥ | bhara̍dhyai |
vi̱de | hi | mā̱tā | ma̱haḥ | ma̱hī | sā | sā | it | pṛśni̍ḥ | su̱-bhve̍ | garbha̍m | ā | a̱dhā̱t ||6.066.03||

6.066.04a na ya īṣa̍nte ja̱nuṣo 'yā̱ nv a1̱̍ntaḥ santo̍ 'va̱dyāni̍ punā̱nāḥ |
6.066.04c nir yad du̱hre śuca̱yo 'nu̱ joṣa̱m anu̍ śri̱yā ta̱nva̍m u̱kṣamā̍ṇāḥ ||

na | ye | īṣa̍nte | ja̱nuṣa̍ḥ | ayā̍ | nu | a̱ntariti̍ | santa̍ḥ | a̱va̱dyāni̍ | pu̱nā̱nāḥ |
niḥ | yat | du̱hre | śuca̍yaḥ | anu̍ | joṣa̍m | anu̍ | śṛi̱yā | ta̱nva̍m | u̱kṣamā̍ṇāḥ ||6.066.04||

6.066.05a ma̱kṣū na yeṣu̍ do̱hase̍ cid a̱yā ā nāma̍ dhṛ̱ṣṇu māru̍ta̱ṁ dadhā̍nāḥ |
6.066.05c na ye stau̱nā a̱yāso̍ ma̱hnā nū ci̍t su̱dānu̱r ava̍ yāsad u̱grān ||

ma̱kṣu | na | yeṣu̍ | do̱hase̍ | ci̱t | a̱yāḥ | ā | nāma̍ | ghṛ̱ṣṇu | māru̍tam | dadhā̍nāḥ |
na | ye | stau̱nāḥ | a̱yāsa̍ḥ | ma̱hnā | nu | ci̱t | su̱-dānu̍ḥ | ava̍ | yā̱sa̱t | u̱grān ||6.066.05||

6.066.06a ta id u̱grāḥ śava̍sā dhṛ̱ṣṇuṣe̍ṇā u̱bhe yu̍janta̱ roda̍sī su̱meke̍ |
6.066.06c adha̍ smaiṣu roda̱sī svaśo̍ci̱r āma̍vatsu tasthau̱ na roka̍ḥ ||

te | it | u̱grāḥ | śava̍sā | dhṛ̱ṣṇu-se̍nāḥ | u̱bhe iti̍ | yu̱ja̱nta̱ | roda̍sī̱ iti̍ | su̱meke̱ iti̍ su̱-meke̍ |
adha̍ | sma̱ | e̱ṣu̱ | ro̱da̱sī | sva-śo̍ciḥ | ā | ama̍vat-su | ta̱sthau̱ | na | roka̍ḥ ||6.066.06||

6.066.07a a̱ne̱no vo̍ maruto̱ yāmo̍ astv ana̱śvaś ci̱d yam aja̱ty ara̍thīḥ |
6.066.07c a̱na̱va̱so a̍nabhī̱śū ra̍ja̱stūr vi roda̍sī pa̱thyā̍ yāti̱ sādha̍n ||

a̱ne̱naḥ | va̱ḥ | ma̱ru̱ta̱ḥ | yāma̍ḥ | a̱stu̱ | a̱na̱śvaḥ | ci̱t | yam | aja̍ti | ara̍thīḥ |
a̱na̱va̱saḥ | a̱na̱bhī̱śuḥ | ra̱ja̱ḥ-tūḥ | vi | roda̍sī̱ iti̍ | pa̱thyā̍ḥ | yā̱ti̱ | sādha̍n ||6.066.07||

6.066.08a nāsya̍ va̱rtā na ta̍ru̱tā nv a̍sti̱ maru̍to̱ yam ava̍tha̱ vāja̍sātau |
6.066.08c to̱ke vā̱ goṣu̱ tana̍ye̱ yam a̱psu sa vra̱jaṁ dartā̱ pārye̱ adha̱ dyoḥ ||

na | asya̍ | va̱rtā | na | ta̱ru̱tā | nu | a̱sti̱ | maru̍taḥ | yam | ava̍tha | vāja̍-sātau |
to̱ke | vā̱ | goṣu̍ | tana̍ye | yam | a̱p-su | saḥ | vra̱jam | dartā̍ | pārye̍ | adha̍ | dyoḥ ||6.066.08||

6.066.09a pra ci̱tram a̱rkaṁ gṛ̍ṇa̱te tu̱rāya̱ māru̍tāya̱ svata̍vase bharadhvam |
6.066.09c ye sahā̍ṁsi̱ saha̍sā̱ saha̍nte̱ reja̍te agne pṛthi̱vī ma̱khebhya̍ḥ ||

pra | ci̱tram | a̱rkam | gṛ̱ṇa̱te | tu̱rāya̍ | māru̍tāya | sva-ta̍vase | bha̱ra̱dhva̱m |
ye | sahā̍ṁsi | saha̍sā | saha̍nte | reja̍te | a̱gne̱ | pṛ̱thi̱vī | ma̱khebhya̍ḥ ||6.066.09||

6.066.10a tviṣī̍manto adhva̱rasye̍va di̱dyut tṛ̍ṣu̱cyava̍so ju̱hvo̱3̱̍ nāgneḥ |
6.066.10c a̱rcatra̍yo̱ dhuna̍yo̱ na vī̱rā bhrāja̍jjanmāno ma̱ruto̱ adhṛ̍ṣṭāḥ ||

tviṣi̍-mantaḥ | a̱dhva̱rasya̍-iva | di̱dyut | tṛ̱ṣu̱-cyava̍saḥ | ju̱hva̍ḥ | na | a̱gneḥ |
a̱rcatra̍yaḥ | dhuna̍yaḥ | na | vī̱rāḥ | bhrāja̍t-janmānaḥ | ma̱ruta̍ḥ | adhṛ̍ṣṭāḥ ||6.066.10||

6.066.11a taṁ vṛ̱dhanta̱m māru̍ta̱m bhrāja̍dṛṣṭiṁ ru̱drasya̍ sū̱nuṁ ha̱vasā vi̍vāse |
6.066.11c di̱vaḥ śardhā̍ya̱ śuca̍yo manī̱ṣā gi̱rayo̱ nāpa̍ u̱grā a̍spṛdhran ||

tam | vṛ̱dhanta̍m | māru̍tam | bhrāja̍t-ṛṣṭim | ru̱drasya̍ | sū̱num | ha̱vasā̍ | ā | vi̱vā̱se̱ |
di̱vaḥ | śardhā̍ya | śuca̍yaḥ | ma̱nī̱ṣāḥ | gi̱raya̍ḥ | na | āpa̍ḥ | u̱grāḥ | a̱spṛ̱dhra̱n ||6.066.11||


6.067.01a viśve̍ṣāṁ vaḥ sa̱tāṁ jyeṣṭha̍tamā gī̱rbhir mi̱trāvaru̍ṇā vāvṛ̱dhadhyai̍ |
6.067.01c saṁ yā ra̱śmeva̍ ya̱matu̱r yami̍ṣṭhā̱ dvā janā̱m̐ asa̍mā bā̱hubhi̱ḥ svaiḥ ||

viśve̍ṣām | va̱ḥ | sa̱tām | jyeṣṭha̍-tamā | gī̱ḥ-bhiḥ | mi̱trāvaru̍ṇā | va̱vṛ̱dhadhyai̍ |
sam | yā | ra̱śmā-i̍va | ya̱matu̍ḥ | yami̍ṣṭhā | dvā | janā̍n | asa̍mā | bā̱hu-bhi̍ḥ | svaiḥ ||6.067.01||

6.067.02a i̱yam mad vā̱m pra stṛ̍ṇīte manī̱ṣopa̍ pri̱yā nama̍sā ba̱rhir accha̍ |
6.067.02c ya̱ntaṁ no̍ mitrāvaruṇā̱v adhṛ̍ṣṭaṁ cha̱rdir yad vā̍ṁ varū̱thya̍ṁ sudānū ||

i̱yam | mat | vā̱m | pra | stṛ̱ṇī̱te̱ | ma̱nī̱ṣā | upa̍ | pri̱yā | nama̍sā | ba̱rhiḥ | accha̍ |
ya̱ntam | na̱ḥ | mi̱trā̱va̱ru̱ṇau̱ | adhṛ̍ṣṭam | cha̱rdiḥ | yat | vā̱m | va̱rū̱thya̍m | su̱dā̱nū̱ iti̍ su-dānū ||6.067.02||

6.067.03a ā yā̍tam mitrāvaruṇā suśa̱sty upa̍ pri̱yā nama̍sā hū̱yamā̍nā |
6.067.03c saṁ yāv a̍pna̱ḥstho a̱pase̍va̱ janā̍ñ chrudhīya̱taś ci̍d yatatho mahi̱tvā ||

ā | yā̱ta̱m | mi̱trā̱va̱ru̱ṇā̱ | su̱-śa̱sti | upa̍ | pri̱yā | nama̍sā | hū̱yamā̍nā |
sam | yau | a̱pna̱ḥ-sthaḥ | a̱pasā̍-iva | janā̍n | śru̱dhi̱-ya̱taḥ | ci̱t | ya̱ta̱tha̱ḥ | ma̱hi̱tvā ||6.067.03||

6.067.04a aśvā̱ na yā vā̱jinā̍ pū̱taba̍ndhū ṛ̱tā yad garbha̱m adi̍ti̱r bhara̍dhyai |
6.067.04c pra yā mahi̍ ma̱hāntā̱ jāya̍mānā gho̱rā martā̍ya ri̱pave̱ ni dī̍dhaḥ ||

aśvā̍ | na | yā | vā̱jinā̍ | pū̱taba̍ndhū̱ iti̍ pū̱ta-ba̍ndhū | ṛ̱tā | yat | garbha̍m | adi̍tiḥ | bhara̍dhyai |
pra | yā | mahi̍ | ma̱hāntā̍ | jāya̍mānā | gho̱rā | martā̍ya | ri̱pave̍ | ni | dī̱dha̱riti̍ dīdhaḥ ||6.067.04||

6.067.05a viśve̱ yad vā̍m ma̱ṁhanā̱ manda̍mānāḥ kṣa̱traṁ de̱vāso̱ ada̍dhuḥ sa̱joṣā̍ḥ |
6.067.05c pari̱ yad bhū̱tho roda̍sī cid u̱rvī santi̱ spaśo̱ ada̍bdhāso̱ amū̍rāḥ ||

viśve̍ | yat | vā̱m | ma̱ṁhanā̍ | manda̍mānāḥ | kṣa̱tram | de̱vāsa̍ḥ | ada̍dhuḥ | sa̱-joṣā̍ḥ |
pari̍ | yat | bhū̱thaḥ | roda̍sī̱ iti̍ | ci̱t | u̱rvī iti̍ | santi̍ | spaśa̍ḥ | ada̍bdhāsaḥ | amū̍rāḥ ||6.067.05||

6.067.06a tā hi kṣa̱traṁ dhā̱raye̍the̱ anu̱ dyūn dṛ̱ṁhethe̱ sānu̍m upa̱mād i̍va̱ dyoḥ |
6.067.06c dṛ̱ḻho nakṣa̍tra u̱ta vi̱śvade̍vo̱ bhūmi̱m ātā̱n dyāṁ dhā̱sinā̱yoḥ ||

tā | hi | kṣa̱tram | dhā̱raye̍the̱ iti̍ | anu̍ | dyūn | dṛ̱ṁhethe̱ iti̍ | sānu̍m | u̱pa̱māt-i̍va | dyoḥ |
dṛ̱ḻhaḥ | nakṣa̍traḥ | u̱ta | vi̱śva-de̍vaḥ | bhūmi̍m | ā | a̱tā̱n | dyām | dhā̱sinā̍ | ā̱yoḥ ||6.067.06||

6.067.07a tā vi̱graṁ dhai̍the ja̱ṭhara̍m pṛ̱ṇadhyā̱ ā yat sadma̱ sabhṛ̍tayaḥ pṛ̱ṇanti̍ |
6.067.07c na mṛ̍ṣyante yuva̱tayo 'vā̍tā̱ vi yat payo̍ viśvajinvā̱ bhara̍nte ||

tā | vi̱gram | dhai̱the̱ iti̍ | ja̱ṭhara̍m | pṛ̱ṇadhyai̍ | ā | yat | sadma̍ | sa-bhṛ̍tayaḥ | pṛ̱ṭṇanti̍ |
na | mṛ̱ṣya̱nte̱ | yu̱va̱taya̍ḥ | avā̍tāḥ | vi | yat | paya̍ḥ | vi̱śva̱-ji̱nvā̱ | bhara̍nte ||6.067.07||

6.067.08a tā ji̱hvayā̱ sada̱m edaṁ su̍me̱dhā ā yad vā̍ṁ sa̱tyo a̍ra̱tir ṛ̱te bhūt |
6.067.08c tad vā̍m mahi̱tvaṁ ghṛ̍tānnāv astu yu̱vaṁ dā̱śuṣe̱ vi ca̍yiṣṭa̱m aṁha̍ḥ ||

tā | ji̱hvayā̍ | sada̍m | ā | i̱dam | su̱-me̱dhāḥ | ā | yat | vā̱m | sa̱tyaḥ | a̱ra̱tiḥ | ṛ̱te | bhū̱t |
tat | vā̱m | ma̱hi̱-tvam | ghṛ̱ta̱-a̱nnau̱ | a̱stu̱ | yu̱vam | dā̱śuṣe̍ | vi | ca̱yi̱ṣṭa̱m | aṁha̍ḥ ||6.067.08||

6.067.09a pra yad vā̍m mitrāvaruṇā spū̱rdhan pri̱yā dhāma̍ yu̱vadhi̍tā mi̱nanti̍ |
6.067.09c na ye de̱vāsa̱ oha̍sā̱ na martā̱ aya̍jñasāco̱ apyo̱ na pu̱trāḥ ||

pra | yat | vā̱m | mi̱trā̱va̱ru̱ṇā̱ | spū̱rdhan | pri̱yā | dhāma̍ | yu̱va-dhi̍tā | mi̱nanti̍ |
na | ye | de̱vāsa̍ḥ | oha̍sā | na | martā̍ḥ | aya̍jña-sācaḥ | apya̍ḥ | na | pu̱trāḥ ||6.067.09||

6.067.10a vi yad vāca̍ṁ kī̱stāso̱ bhara̍nte̱ śaṁsa̍nti̱ ke ci̍n ni̱vido̍ manā̱nāḥ |
6.067.10c ād vā̍m bravāma sa̱tyāny u̱kthā naki̍r de̱vebhi̍r yatatho mahi̱tvā ||

vi | yat | vāca̍m | kī̱stāsa̍ḥ | bhara̍nte | śaṁsa̍nti | ke | ci̱t | ni̱-vida̍ḥ | ma̱nā̱nāḥ |
āt | vā̱m | bra̱vā̱ma̱ | sa̱tyāni̍ | u̱kthā | naki̍ḥ | de̱vebhi̍ḥ | ya̱ta̱tha̱ḥ | ma̱hi̱-tvā ||6.067.10||

6.067.11a a̱vor i̱tthā vā̍ṁ cha̱rdiṣo̍ a̱bhiṣṭau̍ yu̱vor mi̍trāvaruṇā̱v askṛ̍dhoyu |
6.067.11c anu̱ yad gāva̍ḥ sphu̱rān ṛ̍ji̱pyaṁ dhṛ̱ṣṇuṁ yad raṇe̱ vṛṣa̍ṇaṁ yu̱naja̍n ||

a̱voḥ | i̱tthā | vā̱m | cha̱rdiṣa̍ḥ | a̱bhiṣṭau̍ | yu̱voḥ | mi̱trā̱va̱ru̱ṇau | askṛ̍dhoyu |
anu̍ | yat | gāva̍ḥ | sphu̱rān | ṛ̱ji̱pyam | dhṛ̱ṣṇum | yat | raṇe̍ | vṛṣa̍ṇam | yu̱naja̍n ||6.067.11||


6.068.01a śru̱ṣṭī vā̍ṁ ya̱jña udya̍taḥ sa̱joṣā̍ manu̱ṣvad vṛ̱ktaba̍rhiṣo̱ yaja̍dhyai |
6.068.01c ā ya indrā̱varu̍ṇāv i̱ṣe a̱dya ma̱he su̱mnāya̍ ma̱ha ā̍va̱varta̍t ||

śru̱ṣṭī | vā̱m | ya̱jñaḥ | ut-ya̍taḥ | sa̱-joṣā̍ḥ | ma̱nu̱ṣvat | vṛ̱kta-ba̍rhiṣaḥ | yaja̍dhyai |
ā | yaḥ | indrā̱varu̍ṇau | i̱ṣe | a̱dya | ma̱he | su̱mnāya̍ | ma̱he | ā̍-va̱varta̍t ||6.068.01||

6.068.02a tā hi śreṣṭhā̍ de̱vatā̍tā tu̱jā śūrā̍ṇā̱ṁ śavi̍ṣṭhā̱ tā hi bhū̱tam |
6.068.02c ma̱ghonā̱m maṁhi̍ṣṭhā tuvi̱śuṣma̍ ṛ̱tena̍ vṛtra̱turā̱ sarva̍senā ||

tā | hi | śreṣṭhā̍ | de̱va-tā̍tā | tu̱jā | śūrā̍ṇām | śavi̍ṣṭhā | tā | hi | bhū̱tam |
ma̱ghonā̍m | maṁhi̍ṣṭhā | tu̱vi̱-śuṣmā̍ | ṛ̱tena̍ | vṛ̱tra̱-turā̍ | sarva̍-senā ||6.068.02||

6.068.03a tā gṛ̍ṇīhi nama̱sye̍bhiḥ śū̱ṣaiḥ su̱mnebhi̱r indrā̱varu̍ṇā cakā̱nā |
6.068.03c vajre̍ṇā̱nyaḥ śava̍sā̱ hanti̍ vṛ̱traṁ siṣa̍kty a̱nyo vṛ̱jane̍ṣu̱ vipra̍ḥ ||

tā | gṛ̱ṇī̱hi̱ | na̱ma̱sye̍bhiḥ | śū̱ṣaiḥ | su̱mnebhiḥ | indrā̱varu̍ṇā | ca̱kā̱nā |
vajre̍ṇa | a̱nyaḥ | śava̍sā | hanti̍ | vṛ̱tram | sisa̍kti | a̱nyaḥ | vṛ̱jane̍ṣu | vipra̍ḥ ||6.068.03||

6.068.04a gnāś ca̱ yan nara̍ś ca vāvṛ̱dhanta̱ viśve̍ de̱vāso̍ na̱rāṁ svagū̍rtāḥ |
6.068.04c praibhya̍ indrāvaruṇā mahi̱tvā dyauś ca̍ pṛthivi bhūtam u̱rvī ||

gnāḥ | ca̱ | yat | nara̍ḥ | ca̱ | va̱vṛ̱dhanta̍ | viśve̍ | de̱vāsa̍ḥ | na̱rām | sva-gū̍rtāḥ |
pra | e̱bhya̱ḥ | i̱ndrā̱va̱ru̱ṇā̱ | ma̱hi̱-tvā | dyauḥ | ca̱ | pṛ̱thi̱vi̱ | bhū̱ta̱m | u̱rvī iti̍ ||6.068.04||

6.068.05a sa it su̱dānu̱ḥ svavā̍m̐ ṛ̱tāvendrā̱ yo vā̍ṁ varuṇa̱ dāśa̍ti̱ tman |
6.068.05c i̱ṣā sa dvi̱ṣas ta̍re̱d dāsvā̱n vaṁsa̍d ra̱yiṁ ra̍yi̱vata̍ś ca̱ janā̍n ||

saḥ | it | su̱-dānu̍ḥ | sva-vā̍n | ṛ̱ta-vā̍ | indrā̍ | yaḥ | vā̱m | va̱ru̱ṇā̱ | dāśa̍ti | tman |
i̱ṣā | saḥ | dvi̱ṣaḥ | ta̱re̱t | dāsvā̍n | vaṁsa̍t | ra̱yim | ra̱yi̱-vata̍ḥ | ca̱ | janā̍n ||6.068.05||

6.068.06a yaṁ yu̱vaṁ dā̱śva̍dhvarāya devā ra̱yiṁ dha̱ttho vasu̍mantam puru̱kṣum |
6.068.06c a̱sme sa i̍ndrāvaruṇā̱v api̍ ṣyā̱t pra yo bha̱nakti̍ va̱nuṣā̱m aśa̍stīḥ ||

yam | yu̱vam | dā̱śu-a̍dhvarāya | de̱vā̱ | ra̱yim | dha̱tthaḥ | vasu̍-mantam | pu̱ru̱-kṣum |
a̱sme iti̍ | saḥ | i̱ndrā̱va̱ruṇau̱ | api̍ | syā̱t | pra | yaḥ | bha̱nakti̍ | va̱nuṣā̍m | aśa̍stīḥ ||6.068.06||

6.068.07a u̱ta na̍ḥ sutrā̱tro de̱vago̍pāḥ sū̱ribhya̍ indrāvaruṇā ra̱yiḥ ṣyā̍t |
6.068.07c yeṣā̱ṁ śuṣma̱ḥ pṛta̍nāsu sā̱hvān pra sa̱dyo dyu̱mnā ti̱rate̱ tatu̍riḥ ||

u̱ta | na̱ḥ | su̱-trā̱taḥ | de̱va-go̍pāḥ | sū̱ri-bhya̍ḥ | i̱ndrā̱va̱ru̱ṇā̱ | ra̱yiḥ | syā̱t |
yeṣā̍m | śuṣma̍ḥ | pṛta̍nāsu | sā̱hvān | pra | sa̱dyaḥ | dyu̱mnā | ti̱rate̍ | tatu̍riḥ ||6.068.07||

6.068.08a nū na̍ indrāvaruṇā gṛṇā̱nā pṛ̱ṅktaṁ ra̱yiṁ sau̍śrava̱sāya̍ devā |
6.068.08c i̱tthā gṛ̱ṇanto̍ ma̱hina̍sya̱ śardho̱ 'po na nā̱vā du̍ri̱tā ta̍rema ||

nu | na̱ḥ | i̱ndrā̱va̱ru̱ṇā̱ | gṛ̱ṇā̱nā | pṛ̱ṅktam | ra̱yim | sau̱śra̱va̱sāya̍ | de̱vā̱ |
i̱tthā | gṛ̱ṇanta̍ḥ | ma̱hina̍sya | śardha̍ḥ | a̱paḥ | na | nā̱vā | du̱ḥ-i̱tā | ta̱re̱ma̱ ||6.068.08||

6.068.09a pra sa̱mrāje̍ bṛha̱te manma̱ nu pri̱yam arca̍ de̱vāya̱ varu̍ṇāya sa̱pratha̍ḥ |
6.068.09c a̱yaṁ ya u̱rvī ma̍hi̱nā mahi̍vrata̱ḥ kratvā̍ vi̱bhāty a̱jaro̱ na śo̱ciṣā̍ ||

pra | sa̱m-rāje̍ | bṛ̱ha̱te | manma̍ | nu | pri̱yam | arca̍ | de̱vāya̍ | varu̍ṇāya | sa̱-pratha̍ḥ |
a̱yam | yaḥ | u̱rvī iti̍ | ma̱hi̱nā | mahi̍-vrataḥ | kratvā̍ | vi̱-bhāti̍ | a̱jara̍ḥ | na | śo̱ciṣā̍ ||6.068.09||

6.068.10a indrā̍varuṇā sutapāv i̱maṁ su̱taṁ soma̍m pibata̱m madya̍ṁ dhṛtavratā |
6.068.10c yu̱vo ratho̍ adhva̱raṁ de̱vavī̍taye̱ prati̱ svasa̍ra̱m upa̍ yāti pī̱taye̍ ||

indrā̍varuṇā | su̱ta̱-pau̱ | i̱mam | su̱tam | soma̍m | pi̱ba̱ta̱m | madya̍m | dhṛ̱ta̱-vra̱tā̱ |
yu̱voḥ | ratha̍ḥ | a̱dhva̱ram | de̱va-vī̍taye | prati̍ | svasa̍ram | upa̍ | yā̱ti̱ | pī̱taye̍ ||6.068.10||

6.068.11a indrā̍varuṇā̱ madhu̍mattamasya̱ vṛṣṇa̱ḥ soma̍sya vṛṣa̱ṇā vṛ̍ṣethām |
6.068.11c i̱daṁ vā̱m andha̱ḥ pari̍ṣiktam a̱sme ā̱sadyā̱smin ba̱rhiṣi̍ mādayethām ||

indrā̍varuṇā | madhu̍mat-tamasya | vṛṣṇa̍ḥ | soma̍sya | vṛ̱ṣa̱ṇā̱ | ā | vṛ̱ṣe̱thā̱m |
i̱dam | vā̱m | andha̍ḥ | pari̍-siktam | a̱sme iti̍ | ā̱-sadya | a̱smin | ba̱rhiṣi̍ | mā̱da̱ye̱thā̱m ||6.068.11||


6.069.01a saṁ vā̱ṁ karma̍ṇā̱ sam i̱ṣā hi̍no̱mīndrā̍viṣṇū̱ apa̍sas pā̱re a̱sya |
6.069.01c ju̱ṣethā̍ṁ ya̱jñaṁ dravi̍ṇaṁ ca dhatta̱m ari̍ṣṭair naḥ pa̱thibhi̍ḥ pā̱raya̍ntā ||

sam | vā̱m | karma̍ṇā | sam | i̱ṣā | hi̱no̱mi̱ | indrā̍viṣṇū̱ iti̍ | apa̍saḥ | pā̱re | a̱sya |
ju̱ṣethā̍m | ya̱jñam | dravi̍ṇam | ca̱ | dha̱tta̱m | ari̍ṣṭaiḥ | na̱ḥ | pa̱thi-bhi̍ḥ | pā̱raya̍ntā ||6.069.01||

6.069.02a yā viśvā̍sāṁ jani̱tārā̍ matī̱nām indrā̱viṣṇū̍ ka̱laśā̍ soma̱dhānā̍ |
6.069.02c pra vā̱ṁ gira̍ḥ śa̱syamā̍nā avantu̱ pra stomā̍so gī̱yamā̍nāso a̱rkaiḥ ||

yā | viśvā̍sām | ja̱ni̱tārā̍ | ma̱tī̱nām | indrā̱viṣṇū̱ iti̍ | ka̱laśā̍ | so̱ma̱-dhānā̍ |
pra | vā̱m | gira̍ḥ | śa̱syamā̍nāḥ | a̱va̱ntu̱ | pra | stomā̍saḥ | gī̱yamā̍nāsaḥ | a̱rkaiḥ ||6.069.02||

6.069.03a indrā̍viṣṇū madapatī madānā̱m ā soma̍ṁ yāta̱ṁ dravi̍ṇo̱ dadhā̍nā |
6.069.03c saṁ vā̍m añjantv a̱ktubhi̍r matī̱nāṁ saṁ stomā̍saḥ śa̱syamā̍nāsa u̱kthaiḥ ||

indrā̍viṣṇū̱ iti̍ | ma̱da̱pa̱tī̱ iti̍ mada-patī | ma̱dā̱nā̱m | ā | soma̍m | yā̱ta̱m | dravi̍ṇo̱ iti̍ | dadhā̍nā |
sam | vā̱m | a̱ñja̱ntu̱ | a̱ktu-bhi̍ḥ | ma̱tī̱nām | sam | stomā̍saḥ | śa̱syamā̍nāsaḥ | u̱kthaiḥ ||6.069.03||

6.069.04a ā vā̱m aśvā̍so abhimāti̱ṣāha̱ indrā̍viṣṇū sadha̱mādo̍ vahantu |
6.069.04c ju̱ṣethā̱ṁ viśvā̱ hava̍nā matī̱nām upa̱ brahmā̍ṇi śṛṇuta̱ṁ giro̍ me ||

ā | vā̱m | aśvā̍saḥ | a̱bhi̱mā̱ti̱-saha̍ḥ | indrā̍viṣṇū̱ iti̍ | sa̱dha̱-māda̍ḥ | va̱ha̱ntu̱ |
ju̱ṣethā̍m | viśvā̍ | hava̍nā | ma̱tī̱nām | upa̍ | brahmā̍ṇi | śṛ̱ṇu̱ta̱m | gira̍ḥ | me̱ ||6.069.04||

6.069.05a indrā̍viṣṇū̱ tat pa̍na̱yāyya̍ṁ vā̱ṁ soma̍sya̱ mada̍ u̱ru ca̍kramāthe |
6.069.05c akṛ̍ṇutam a̱ntari̍kṣa̱ṁ varī̱yo 'pra̍thataṁ jī̱vase̍ no̱ rajā̍ṁsi ||

indrā̍viṣṇū̱ iti̍ | tat | pa̱na̱yāyya̍m | vā̱m | soma̍sya | made̍ | u̱ru | ca̱kra̱mā̱the̱ iti̍ |
akṛ̍ṇutam | a̱ntari̍kṣam | varī̍yaḥ | apra̍thatam | jī̱vase̍ | na̱ḥ | rajā̍ṁsi ||6.069.05||

6.069.06a indrā̍viṣṇū ha̱viṣā̍ vāvṛdhā̱nāgrā̍dvānā̱ nama̍sā rātahavyā |
6.069.06c ghṛtā̍sutī̱ dravi̍ṇaṁ dhattam a̱sme sa̍mu̱draḥ stha̍ḥ ka̱laśa̍ḥ soma̱dhāna̍ḥ ||

indrā̍viṣṇū̱ iti̍ | ha̱viṣā̍ | va̱vṛ̱dhā̱nā | agra̍-advānā | nama̍sā | rā̱ta̱-ha̱vyā̱ |
ghṛtā̍sutī̱ iti̱ ghṛta̍-āsutī | dravi̍ṇam | dha̱tta̱m | a̱sme iti̍ | sa̱mu̱draḥ | stha̱ḥ | ka̱laśa̍ḥ | so̱ma̱-dhāna̍ḥ ||6.069.06||

6.069.07a indrā̍viṣṇū̱ piba̍ta̱m madhvo̍ a̱sya soma̍sya dasrā ja̱ṭhara̍m pṛṇethām |
6.069.07c ā vā̱m andhā̍ṁsi madi̱rāṇy a̍gma̱nn upa̱ brahmā̍ṇi śṛṇuta̱ṁ hava̍m me ||

indrā̍viṣṇū̱ iti̍ | piba̍tam | madhva̍ḥ | a̱sya | soma̍sya | da̱srā̱ | ja̱ṭhara̍m | pṛ̱ṇe̱thā̱m |
ā | vā̱m | andhā̍ṁsi | ma̱di̱rāṇi̍ | a̱gma̱n | upa̍ | brahmā̍ṇi | śṛ̱ṇu̱ta̱m | hava̍m | me̱ ||6.069.07||

6.069.08a u̱bhā ji̍gyathu̱r na parā̍ jayethe̱ na parā̍ jigye kata̱raś ca̱naino̍ḥ |
6.069.08c indra̍ś ca viṣṇo̱ yad apa̍spṛdhethāṁ tre̱dhā sa̱hasra̱ṁ vi tad ai̍rayethām ||

u̱bhā | ji̱gya̱thu̱ḥ | na | parā̍ | ja̱ye̱the̱ iti̍ | na | parā̍ | ji̱gye̱ | ka̱ta̱raḥ | ca̱na | e̱no̱ḥ |
indra̍ḥ | ca̱ | vi̱ṣṇo̱ iti̍ | yat | apa̍spṛdhethām | tre̱dhā | sa̱hasra̍m | vi | tat | ai̱ra̱ye̱thā̱m ||6.069.08||


6.070.01a ghṛ̱tava̍tī̱ bhuva̍nānām abhi̱śriyo̱rvī pṛ̱thvī ma̍dhu̱dughe̍ su̱peśa̍sā |
6.070.01c dyāvā̍pṛthi̱vī varu̍ṇasya̱ dharma̍ṇā̱ viṣka̍bhite a̱jare̱ bhūri̍retasā ||

ghṛ̱tava̍tī̱ iti̍ ghṛ̱ta-va̍tī | bhuva̍nānām | a̱bhi̱-śriyā̍ | u̱rvī | pṛ̱thvī iti̍ | ma̱dhu̱dughe̱ iti̍ ma̱dhu̱-dughe̍ | su̱-peśa̍sā |
dyāvā̍pṛthi̱vī iti̍ | varu̍ṇasya | dharma̍ṇā | viska̍bhite̱ iti̱ vi-ska̍bhite | a̱jare̱ iti̍ | bhūri̍-retasā ||6.070.01||

6.070.02a asa̍ścantī̱ bhūri̍dhāre̱ paya̍svatī ghṛ̱taṁ du̍hāte su̱kṛte̱ śuci̍vrate |
6.070.02c rāja̍ntī a̱sya bhuva̍nasya rodasī a̱sme reta̍ḥ siñcata̱ṁ yan manu̍rhitam ||

asa̍ścantī̱ iti̍ | bhūri̍dhāre̱ iti̱ bhūri̍-dhāre | paya̍svatī̱ iti̍ | ghṛ̱tam | du̱hā̱te̱ iti̍ | su̱-kṛte̍ | śuci̍vrate̱ iti̱ śuci̍-vrate |
rāja̍ntī̱ iti̍ | a̱sya | bhuva̍nasya | ro̱da̱sī̱ iti̍ | a̱sme iti̍ | reta̍ḥ | si̱ñca̱ta̱m | yat | manu̍ḥ-hitam ||6.070.02||

6.070.03a yo vā̍m ṛ̱jave̱ krama̍ṇāya rodasī̱ marto̍ da̱dāśa̍ dhiṣaṇe̱ sa sā̍dhati |
6.070.03c pra pra̱jābhi̍r jāyate̱ dharma̍ṇa̱s pari̍ yu̱voḥ si̱ktā viṣu̍rūpāṇi̱ savra̍tā ||

yaḥ | vā̱m | ṛ̱jave̍ | krama̍ṇāya | ro̱da̱sī̱ iti̍ | marta̍ḥ | da̱dāśa̍ | dhi̱ṣa̱ṇe̱ iti̍ | saḥ | sā̱dha̱ti̱ |
pra | pra̱-jābhi̍ḥ | jā̱ya̱te̱ | dharma̍ṇaḥ | pari̍ | yu̱voḥ | si̱ktā | viṣu̍-rūpāṇi | sa-vra̍tā ||6.070.03||

6.070.04a ghṛ̱tena̱ dyāvā̍pṛthi̱vī a̱bhīvṛ̍te ghṛta̱śriyā̍ ghṛta̱pṛcā̍ ghṛtā̱vṛdhā̍ |
6.070.04c u̱rvī pṛ̱thvī ho̍tṛ̱vūrye̍ pu̱rohi̍te̱ te id viprā̍ īḻate su̱mnam i̱ṣṭaye̍ ||

ghṛ̱tena̍ | dyāvā̍pṛthi̱vī iti̍ | a̱bhīvṛ̍te̱ itya̱bhi-vṛ̍te | ghṛ̱ta̱-śriyā̍ | ghṛ̱ta̱-pṛcā̍ | ghṛ̱ta̱-vṛdhā̍ |
u̱rvī iti̍ | pṛ̱thvī iti̍ | ho̱tṛ̱-vūrye̍ | pu̱rohi̍te̱ iti̍ pu̱raḥ-hi̍te | te iti̍ | it | viprā̍ḥ | ī̱ḻa̱te̱ | su̱mnam | i̱ṣṭaye̍ ||6.070.04||

6.070.05a madhu̍ no̱ dyāvā̍pṛthi̱vī mi̍mikṣatām madhu̱ścutā̍ madhu̱dughe̱ madhu̍vrate |
6.070.05c dadhā̍ne ya̱jñaṁ dravi̍ṇaṁ ca de̱vatā̱ mahi̱ śravo̱ vāja̍m a̱sme su̱vīrya̍m ||

madhu̍ | na̱ḥ | dyāvā̍pṛthi̱vī iti̍ | mi̱mi̱kṣa̱tā̱m | ma̱dhu̱-ścutā̍ | ma̱dhu̱dughe̱ iti̍ ma̱dhu̱-dughe̍ | madhu̍vrate̱ iti̱ madhu̍-vrate |
dadhā̍ne̱ iti̍ | ya̱jñam | dravi̍ṇam | ca̱ | de̱vatā̍ | mahi̍ | śrava̍ḥ | vāja̍m | a̱sme iti̍ | su̱-vīrya̍m ||6.070.05||

6.070.06a ūrja̍ṁ no̱ dyauś ca̍ pṛthi̱vī ca̍ pinvatām pi̱tā mā̱tā vi̍śva̱vidā̍ su̱daṁsa̍sā |
6.070.06c sa̱ṁra̱rā̱ṇe roda̍sī vi̱śvaśa̍mbhuvā sa̱niṁ vāja̍ṁ ra̱yim a̱sme sam i̍nvatām ||

ūrja̍m | na̱ḥ | dyauḥ | ca̱ | pṛ̱thi̱vī | ca̱ | pi̱nva̱tā̱m | pi̱tā | mā̱tā | vi̱śva̱-vidā̍ | su̱-daṁsa̍sā |
sa̱ṁra̱rā̱ṇe iti̍ sa̱m-ra̱rā̱ṇe | roda̍sī̱ iti̍ | vi̱śva-śa̍mbhuvā | sa̱nim | vāja̍m | ra̱yim | a̱sme iti̍ | sam | i̱nva̱tā̱m ||6.070.06||


6.071.01a ud u̱ ṣya de̱vaḥ sa̍vi̱tā hi̍ra̱ṇyayā̍ bā̱hū a̍yaṁsta̱ sava̍nāya su̱kratu̍ḥ |
6.071.01c ghṛ̱tena̍ pā̱ṇī a̱bhi pru̍ṣṇute ma̱kho yuvā̍ su̱dakṣo̱ raja̍so̱ vidha̍rmaṇi ||

ut | ū̱m̐ iti̍ | syaḥ | de̱vaḥ | sa̱vi̱tā | hi̱ra̱ṇyayā̍ | bā̱hū iti̍ | a̱ya̱ṁsta̱ | sava̍nāya | su̱-kratu̍ḥ |
ghṛ̱tena̍ | pā̱ṇī iti̍ | a̱bhi | pru̱ṣṇu̱te̱ | ma̱khaḥ | yuvā̍ | su̱-dakṣa̍ḥ | raja̍saḥ | vi-dha̍rmaṇi ||6.071.01||

6.071.02a de̱vasya̍ va̱yaṁ sa̍vi̱tuḥ savī̍mani̱ śreṣṭhe̍ syāma̱ vasu̍naś ca dā̱vane̍ |
6.071.02c yo viśva̍sya dvi̱pado̱ yaś catu̍ṣpado ni̱veśa̍ne prasa̱ve cāsi̱ bhūma̍naḥ ||

de̱vasya̍ | va̱yam | sa̱vi̱tuḥ | savī̍mani | śreṣṭhe̍ | syā̱ma̱ | vasu̍naḥ | ca̱ | dā̱vane̍ |
yaḥ | viśva̍sya | dvi̱-pada̍ḥ | yaḥ | catu̍ḥ-padaḥ | ni̱-veśa̍ne | pra̱-sa̱ve | ca̱ | asi̍ | bhūma̍naḥ ||6.071.02||

6.071.03a ada̍bdhebhiḥ savitaḥ pā̱yubhi̱ṣ ṭvaṁ śi̱vebhi̍r a̱dya pari̍ pāhi no̱ gaya̍m |
6.071.03c hira̍ṇyajihvaḥ suvi̱tāya̱ navya̍se̱ rakṣā̱ māki̍r no a̱ghaśa̍ṁsa īśata ||

ada̍bdhebhiḥ | sa̱vi̱ta̱riti̍ | pa̱yu-bhi̍ḥ | tvam | śi̱vebhi̍ḥ | a̱dya | pari̍ | pā̱hi̱ | na̱ḥ | gaya̍m |
hira̍ṇya-jihvaḥ | su̱vi̱tāya̍ | navya̍se | rakṣa̍ | māki̍ḥ | na̱ḥ | a̱gha-śa̍ṁsaḥ | ī̱śa̱ta̱ ||6.071.03||

6.071.04a ud u̱ ṣya de̱vaḥ sa̍vi̱tā damū̍nā̱ hira̍ṇyapāṇiḥ pratido̱ṣam a̍sthāt |
6.071.04c ayo̍hanur yaja̱to ma̱ndraji̍hva̱ ā dā̱śuṣe̍ suvati̱ bhūri̍ vā̱mam ||

ut | ū̱m̐ iti̍ | syaḥ | de̱vaḥ | sa̱vi̱tā | damū̍nāḥ | hira̍ṇya-pāṇiḥ | pra̱ti̱-do̱ṣam | a̱sthā̱t |
aya̍ḥ-hanuḥ | ya̱ja̱taḥ | ma̱ndra-ji̍hvaḥ | ā | dā̱śuṣe̍ | su̱va̱ti̱ | bhūri̍ | vā̱mam ||6.071.04||

6.071.05a ud ū̍ ayām̐ upava̱kteva̍ bā̱hū hi̍ra̱ṇyayā̍ savi̱tā su̱pratī̍kā |
6.071.05c di̱vo rohā̍ṁsy aruhat pṛthi̱vyā arī̍ramat pa̱taya̱t kac ci̱d abhva̍m ||

ut | ū̱m̐ iti̍ | a̱yā̱n | u̱pa̱va̱ktā-i̍va | bā̱hū iti̍ | hi̱ra̱nyayā̍ | sa̱vi̱tā | su̱-pratī̍kā |
di̱vaḥ | rohā̍ṁsi | a̱ru̱ha̱t | pṛ̱thi̱vyāḥ | arī̍ramat | pa̱taya̍t | kat | ci̱t | abhva̍m ||6.071.05||

6.071.06a vā̱mam a̱dya sa̍vitar vā̱mam u̱ śvo di̱ve-di̍ve vā̱mam a̱smabhya̍ṁ sāvīḥ |
6.071.06c vā̱masya̱ hi kṣaya̍sya deva̱ bhūre̍r a̱yā dhi̱yā vā̍ma̱bhāja̍ḥ syāma ||

vā̱mam | a̱dya | sa̱vi̱ta̱ḥ | vā̱mam | ū̱m̐ iti̍ | śvaḥ | di̱ve-di̍ve | vā̱mam | a̱smabhya̍m | sā̱vī̱ḥ |
vā̱masya̍ | hi | kṣaya̍sya | de̱va̱ | bhūre̍ḥ | a̱yā | dhi̱yā | vā̱ma̱-bhāja̍ḥ | syā̱ma̱ ||6.071.06||


6.072.01a indrā̍somā̱ mahi̱ tad vā̍m mahi̱tvaṁ yu̱vam ma̱hāni̍ pratha̱māni̍ cakrathuḥ |
6.072.01c yu̱vaṁ sūrya̍ṁ vivi̱dathu̍r yu̱vaṁ sva1̱̍r viśvā̱ tamā̍ṁsy ahataṁ ni̱daś ca̍ ||

indrā̍somā | mahi̍ | tat | vā̱m | ma̱hi̱-tvam | yu̱vam | ma̱hāni̍ | pra̱tha̱māni̍ | ca̱kra̱thu̱ḥ |
yu̱vam | sūrya̍m | vi̱vi̱dathu̍ḥ | yu̱vam | sva̍ḥ | viśvā̍ | tamā̍ṁsi | a̱ha̱ta̱m | ni̱daḥ | ca̱ ||6.072.01||

6.072.02a indrā̍somā vā̱saya̍tha u̱ṣāsa̱m ut sūrya̍ṁ nayatho̱ jyoti̍ṣā sa̱ha |
6.072.02c upa̱ dyāṁ ska̱mbhathu̱ḥ skambha̍ne̱nāpra̍thatam pṛthi̱vīm mā̱tara̱ṁ vi ||

indrā̍somā | vā̱saya̍thaḥ | u̱ṣasa̍m | ut | sūrya̍m | na̱ya̱tha̱ḥ | jyoti̍ṣā | sa̱ha |
upa̍ | dyām | ska̱mbhathu̍ḥ | skambha̍nena | apra̍thatam | pṛ̱thi̱vīm | mā̱tara̍m | vi ||6.072.02||

6.072.03a indrā̍somā̱v ahi̍m a̱paḥ pa̍ri̱ṣṭhāṁ ha̱tho vṛ̱tram anu̍ vā̱ṁ dyaur a̍manyata |
6.072.03c prārṇā̍ṁsy airayataṁ na̱dīnā̱m ā sa̍mu̱drāṇi̍ paprathuḥ pu̱rūṇi̍ ||

indrā̍somau | ahi̍m | a̱paḥ | pa̱ri̱-sthām | ha̱thaḥ | vṛ̱tram | anu̍ | vā̱m | dyauḥ | a̱ma̱nya̱ta̱ |
pra | arṇā̍ṁsi | ai̱ra̱ya̱ta̱m | na̱dīnā̍m | ā | sa̱mu̱drāṇi̍ | pa̱pra̱thu̱ḥ | pu̱rūṇi̍ ||6.072.03||

6.072.04a indrā̍somā pa̱kvam ā̱māsv a̱ntar ni gavā̱m id da̍dhathur va̱kṣaṇā̍su |
6.072.04c ja̱gṛ̱bhathu̱r ana̍pinaddham āsu̱ ruśa̍c ci̱trāsu̱ jaga̍tīṣv a̱ntaḥ ||

indrā̍somā | pa̱kvam | ā̱māsu̍ | a̱ntaḥ | ni | gavā̍m | it | da̱dha̱thu̱ḥ | va̱kṣaṇā̍su |
ja̱gṛ̱bhathu̍ḥ | ana̍pi-naddham | ā̱su̱ | ruśa̍t | ci̱trāsu̍ | jaga̍tīṣu | a̱ntariti̍ ||6.072.04||

6.072.05a indrā̍somā yu̱vam a̱ṅga taru̍tram apatya̱sāca̱ṁ śrutya̍ṁ rarāthe |
6.072.05c yu̱vaṁ śuṣma̱ṁ narya̍ṁ carṣa̱ṇibhya̱ḥ saṁ vi̍vyathuḥ pṛtanā̱ṣāha̍m ugrā ||

indrā̍somā | yu̱vam | a̱ṅga | taru̍tram | a̱pa̱tya̱-sāca̍m | śrutya̍m | ra̱rā̱the̱ iti̍ |
yu̱vam | śuṣma̍m | narya̍m | ca̱rṣa̱ṇi-bhya̍ḥ | sam | vi̱vya̱thu̱ḥ | pṛ̱ta̱nā̱-saha̍m | u̱grā̱ ||6.072.05||


6.073.01a yo a̍dri̱bhit pra̍thama̱jā ṛ̱tāvā̱ bṛha̱spati̍r āṅgira̱so ha̱viṣmā̍n |
6.073.01c dvi̱barha̍jmā prāgharma̱sat pi̱tā na̱ ā roda̍sī vṛṣa̱bho ro̍ravīti ||

yaḥ | a̱dri̱-bhit | pra̱tha̱ma̱-jāḥ | ṛ̱ta-vā̍ | bṛha̱spati̍ḥ | ā̱ṅgi̱ra̱saḥ | ha̱viṣmā̍n |
dvi̱barha̍-jmā | prā̱gha̱rma̱-sat | pi̱tā | na̱ḥ | ā | roda̍sī̱ iti̍ | vṛ̱ṣa̱bhaḥ | ro̱ra̱vī̱ti̱ ||6.073.01||

6.073.02a janā̍ya ci̱d ya īva̍ta u lo̱kam bṛha̱spati̍r de̱vahū̍tau ca̱kāra̍ |
6.073.02c ghnan vṛ̱trāṇi̱ vi puro̍ dardarīti̱ jaya̱ñ chatrū̍m̐r a̱mitrā̍n pṛ̱tsu sāha̍n ||

janā̍ya | ci̱t | yaḥ | īva̍te | ū̱m̐ iti̍ | lo̱kam | bṛha̱spati̍ḥ | de̱va-hū̍tau | ca̱kāra̍ |
ghnan | vṛ̱trāṇi̍ | vi | pura̍ḥ | da̱rda̱rī̱ti̱ | jaya̍n | śatrū̍n | a̱mitrā̍n | pṛ̱t-su | sāha̍n ||6.073.02||

6.073.03a bṛha̱spati̱ḥ sam a̍jaya̱d vasū̍ni ma̱ho vra̱jān goma̍to de̱va e̱ṣaḥ |
6.073.03c a̱paḥ siṣā̍sa̱n sva1̱̍r apra̍tīto̱ bṛha̱spati̱r hanty a̱mitra̍m a̱rkaiḥ ||

bṛha̱spati̍ḥ | sam | a̱ja̱ya̱t | vasū̍ni | ma̱haḥ | vra̱jān | go-ma̍taḥ | de̱vaḥ | e̱ṣaḥ |
a̱paḥ | sisā̍san | sva̍ḥ | apra̍ti-itaḥ | bṛha̱spati̍ḥ | hanti̍ | a̱mitra̍m | a̱rkaiḥ ||6.073.03||


6.074.01a somā̍rudrā dhā̱raye̍thām asu̱rya1̱̍m pra vā̍m i̱ṣṭayo 'ra̍m aśnuvantu |
6.074.01c dame̍-dame sa̱pta ratnā̱ dadhā̍nā̱ śaṁ no̍ bhūtaṁ dvi̱pade̱ śaṁ catu̍ṣpade ||

somā̍rudrā | dhā̱raye̍thām | asu̱rya̍m | pra | vā̱m | i̱ṣṭaya̍ḥ | ara̍m | a̱śnu̱va̱ntu̱ |
dame̍-dame | sa̱pta | ratnā̍ | dadhā̍nā | śam | na̱ḥ | bhū̱ta̱m | dvi̱-pade̍ | śam | catu̍ḥ-pade ||6.074.01||

6.074.02a somā̍rudrā̱ vi vṛ̍hata̱ṁ viṣū̍cī̱m amī̍vā̱ yā no̱ gaya̍m āvi̱veśa̍ |
6.074.02c ā̱re bā̍dhethā̱ṁ nirṛ̍tim parā̱cair a̱sme bha̱drā sau̍śrava̱sāni̍ santu ||

somā̍rudrā | vi | vṛ̱ha̱ta̱m | viṣū̍cīm | amī̍vā | yā | na̱ḥ | gaya̍m | ā̱-vi̱veśa̍ |
ā̱re | bā̱dhe̱thā̱m | niḥ-ṛ̍tim | pa̱rā̱caiḥ | a̱sme iti̍ | bha̱drā | sau̱śra̱va̱sāni̍ | sa̱ntu̱ ||6.074.02||

6.074.03a somā̍rudrā yu̱vam e̱tāny a̱sme viśvā̍ ta̱nūṣu̍ bheṣa̱jāni̍ dhattam |
6.074.03c ava̍ syatam mu̱ñcata̱ṁ yan no̱ asti̍ ta̱nūṣu̍ ba̱ddhaṁ kṛ̱tam eno̍ a̱smat ||

somā̍rudrā | yu̱vam | e̱tāni̍ | a̱sme iti̍ | viśvā̍ | ta̱nūṣu̍ | bhe̱ṣa̱jāni̍ | dha̱tta̱m |
ava̍ | sya̱ta̱m | mu̱ñcata̍m | yat | na̱ḥ | asti̍ | ta̱nūṣu̍ | ba̱ddham | kṛ̱tam | ena̍ḥ | a̱smat ||6.074.03||

6.074.04a ti̱gmāyu̍dhau ti̱gmahe̍tī su̱śevau̱ somā̍rudrāv i̱ha su mṛ̍ḻataṁ naḥ |
6.074.04c pra no̍ muñcata̱ṁ varu̍ṇasya̱ pāśā̍d gopā̱yata̍ṁ naḥ sumana̱syamā̍nā ||

ti̱gma-ā̍yudhau | ti̱gmahe̍tī̱ iti̍ ti̱gma-he̍tī | su̱-śevau̍ | somā̍rudrā | i̱ha | su | mṛ̱ḻa̱ta̱m | na̱ḥ |
pra | na̱ḥ | mu̱ñca̱ta̱m | varu̍ṇasya | pāśā̍t | go̱pā̱yata̍m | na̱ḥ | su̱-ma̱na̱syamā̍nā ||6.074.04||


6.075.01a jī̱mūta̍syeva bhavati̱ pratī̍ka̱ṁ yad va̱rmī yāti̍ sa̱madā̍m u̱pasthe̍ |
6.075.01c anā̍viddhayā ta̱nvā̍ jaya̱ tvaṁ sa tvā̱ varma̍ṇo mahi̱mā pi̍partu ||

jī̱mūta̍sya-iva | bha̱va̱ti̱ | pratī̍kam | yat | va̱rmī | yāti̍ | sa̱-madā̍m | u̱pa-sthe̍ |
anā̍viddhayā | ta̱nvā̍ | ja̱ya̱ | tvam | saḥ | tvā̱ | varma̍ṇaḥ | ma̱hi̱mā | pi̱pa̱rtu̱ ||6.075.01||

6.075.02a dhanva̍nā̱ gā dhanva̍nā̱jiṁ ja̍yema̱ dhanva̍nā tī̱vrāḥ sa̱mado̍ jayema |
6.075.02c dhanu̱ḥ śatro̍r apakā̱maṁ kṛ̍ṇoti̱ dhanva̍nā̱ sarvā̍ḥ pra̱diśo̍ jayema ||

dhanva̍nā | gāḥ | dhanva̍nā | ā̱jim | ja̱ye̱ma̱ | dhanva̍nā | tī̱vrāḥ | sa̱-mada̍ḥ | ja̱ye̱ma̱ |
dhanu̍ḥ | śatro̍ḥ | a̱pa̱-kā̱mam | kṛ̱ṇo̱ti̱ | dhanva̍nā | sarvā̍ḥ | pra̱-diśa̍ḥ | ja̱ye̱ma̱ ||6.075.02||

6.075.03a va̱kṣyantī̱ved ā ga̍nīganti̱ karṇa̍m pri̱yaṁ sakhā̍yam pariṣasvajā̱nā |
6.075.03c yoṣe̍va śiṅkte̱ vita̱tādhi̱ dhanva̱ñ jyā i̱yaṁ sama̍ne pā̱raya̍ntī ||

va̱kṣyantī̍-iva | it | ā | ga̱nī̱ga̱nti̱ | karṇa̍m | pri̱yam | sakhā̍yam | pa̱ri̱-sa̱sva̱jā̱nā |
yoṣā̍-iva | śi̱ṅkte̱ | vi-ta̍tā | adhi̍ | dhanva̍n | jyā | i̱yam | sama̍ne | pā̱raya̍ntī ||6.075.03||

6.075.04a te ā̱cara̍ntī̱ sama̍neva̱ yoṣā̍ mā̱teva̍ pu̱tram bi̍bhṛtām u̱pasthe̍ |
6.075.04c apa̱ śatrū̍n vidhyatāṁ saṁvidā̱ne ārtnī̍ i̱me vi̍ṣphu̱rantī̍ a̱mitrā̍n ||

te iti̍ | ā̱cara̍ntī̱ ityā̱-cara̍ntī | sama̍nā-iva | yoṣā̍ | mā̱tā-i̍va | pu̱tram | bi̱bhṛ̱tā̱m | u̱pa-sthe̍ |
apa̍ | śatrū̍n | vi̱dhya̱tā̱m | sa̱ṁvi̱dā̱ne iti̍ sa̱m-vi̱dā̱ne | ārtnī̍ iti̍ | i̱me iti̍ | vi̱sphu̱rantī̱ iti̍ vi̱-sphu̱rantī̍ | a̱mitrā̍n ||6.075.04||

6.075.05a ba̱hvī̱nām pi̱tā ba̱hur a̍sya pu̱traś ci̱ścā kṛ̍ṇoti̱ sama̍nāva̱gatya̍ |
6.075.05c i̱ṣu̱dhiḥ saṅkā̱ḥ pṛta̍nāś ca̱ sarvā̍ḥ pṛ̱ṣṭhe nina̍ddho jayati̱ prasū̍taḥ ||

ba̱hvī̱nām | pi̱tā | ba̱hura̍sya | pu̱traḥ | ci̱ścā | kṛ̱ṇo̱ti̱ | sama̍nā | a̱va̱-gatya̍ |
i̱ṣu̱-dhiḥ | saṅkā̍ḥ | pṛta̍nāḥ | ca̱ | sarvā̍ḥ | pṛ̱ṣṭhe | ni-na̍ddhaḥ | ja̱ya̱ti̱ | pra-sū̍taḥ ||6.075.05||

6.075.06a rathe̱ tiṣṭha̍n nayati vā̱jina̍ḥ pu̱ro yatra̍-yatra kā̱maya̍te suṣāra̱thiḥ |
6.075.06c a̱bhīśū̍nām mahi̱māna̍m panāyata̱ mana̍ḥ pa̱ścād anu̍ yacchanti ra̱śmaya̍ḥ ||

rathe̍ | tiṣṭha̍n | na̱ya̱ti̱ | vā̱jina̍ḥ | pu̱raḥ | yatra̍-yatra | kā̱maya̍te | su̱-sā̱ra̱thiḥ |
a̱bhīśū̍nām | ma̱hi̱māna̍m | pa̱nā̱ya̱ta̱ | mana̍ḥ | pa̱ścāt | anu̍ | ya̱ccha̱nti̱ | ra̱śmaya̍ḥ ||6.075.06||

6.075.07a tī̱vrān ghoṣā̍n kṛṇvate̱ vṛṣa̍pāṇa̱yo 'śvā̱ rathe̍bhiḥ sa̱ha vā̱jaya̍ntaḥ |
6.075.07c a̱va̱krāma̍nta̱ḥ prapa̍dair a̱mitrā̍n kṣi̱ṇanti̱ śatrū̱m̐r ana̍pavyayantaḥ ||

tī̱vrān | ghoṣā̍n | kṛ̱ṇva̱te̱ | vṛṣa̍-pāṇa̱yaḥ | aśvā̍ḥ | rathe̍bhiḥ | sa̱ha | vā̱jaya̍ntaḥ |
a̱va̱-krāma̍ntaḥ | pra-pa̍daiḥ | a̱mitrā̍n | kṣi̱ṇanti̍ | śatrū̍n | ana̍pa-vyayantaḥ ||6.075.07||

6.075.08a ra̱tha̱vāha̍naṁ ha̱vir a̍sya̱ nāma̱ yatrāyu̍dha̱ṁ nihi̍tam asya̱ varma̍ |
6.075.08c tatrā̱ ratha̱m upa̍ śa̱gmaṁ sa̍dema vi̱śvāhā̍ va̱yaṁ su̍mana̱syamā̍nāḥ ||

ra̱tha̱-vāha̍nam | ha̱viḥ | a̱sya̱ | nāma̍ | yatra̍ | āyu̍dham | ni-hi̍tam | a̱sya̱ | varma̍ |
tatra̍ | ratha̍m | upa̍ | śa̱gmam | sa̱de̱ma̱ | vi̱śvāhā̍ | va̱yam | su̱-ma̱na̱syamā̍nāḥ ||6.075.08||

6.075.09a svā̱du̱ṣa̱ṁsada̍ḥ pi̱taro̍ vayo̱dhāḥ kṛ̍cchre̱śrita̱ḥ śaktī̍vanto gabhī̱rāḥ |
6.075.09c ci̱trase̍nā̱ iṣu̍balā̱ amṛ̍dhrāḥ sa̱tovī̍rā u̱ravo̍ vrātasā̱hāḥ ||

svā̱du̱-sa̱ṁsada̍ḥ | pi̱tara̍ḥ | va̱ya̱ḥ-dhāḥ | kṛ̱cchra̱-śrita̍ḥ | śakti̍-vantaḥ | ga̱bhī̱rāḥ |
ci̱tra-se̍nāḥ | iṣu̍-balāḥ | amṛ̍dhrāḥ | sa̱taḥ-vī̍rāḥ | u̱rava̍ḥ | vrā̱ta̱-sa̱hāḥ ||6.075.09||

6.075.10a brāhma̍ṇāsa̱ḥ pita̍ra̱ḥ somyā̍saḥ śi̱ve no̱ dyāvā̍pṛthi̱vī a̍ne̱hasā̍ |
6.075.10c pū̱ṣā na̍ḥ pātu duri̱tād ṛ̍tāvṛdho̱ rakṣā̱ māki̍r no a̱ghaśa̍ṁsa īśata ||

brāhma̍ṇāsaḥ | pita̍raḥ | somyā̍saḥ | śi̱ve iti̍ | na̱ḥ | dyāvā̍pṛthi̱vī iti̍ | a̱ne̱hasā̍ |
pū̱ṣā | na̱ḥ | pā̱tu̱ | du̱ḥ-i̱tāt | ṛ̱ta̱-vṛ̱dha̱ḥ | rakṣa̍ | māki̍ḥ | na̱ḥ | a̱gha-śa̍ṁsaḥ | ī̱śa̱ta̱ ||6.075.10||

6.075.11a su̱pa̱rṇaṁ va̍ste mṛ̱go a̍syā̱ danto̱ gobhi̱ḥ saṁna̍ddhā patati̱ prasū̍tā |
6.075.11c yatrā̱ nara̱ḥ saṁ ca̱ vi ca̱ drava̍nti̱ tatrā̱smabhya̱m iṣa̍va̱ḥ śarma̍ yaṁsan ||

su̱-pa̱rṇam | va̱ste̱ | mṛ̱gaḥ | a̱syā̱ḥ | danta̍ḥ | gobhi̍ḥ | sam-na̍ddhā | pa̱ta̱ti̱ | pra-sū̍tā |
yatra̍ | nara̱ḥ | sam | ca̱ | vi | ca̱ | drava̍nti | tatra̍ | a̱smabhya̍m | iṣa̍vaḥ | śarma̍ | ya̱ṁsa̱n ||6.075.11||

6.075.12a ṛjī̍te̱ pari̍ vṛṅdhi̱ no 'śmā̍ bhavatu nas ta̱nūḥ |
6.075.12c somo̱ adhi̍ bravītu̱ no 'di̍ti̱ḥ śarma̍ yacchatu ||

ṛjī̍te | pari̍ | vṛ̱ṅdhi̱ | na̱ḥ | aśmā̍ | bha̱va̱tu̱ | na̱ḥ | ta̱nūḥ |
soma̍ḥ | adhi̍ | bra̱vī̱tu̱ | na̱ḥ | adi̍tiḥ | śarma̍ | ya̱ccha̱tu̱ ||6.075.12||

6.075.13a ā ja̍ṅghanti̱ sānv e̍ṣāṁ ja̱ghanā̱m̐ upa̍ jighnate |
6.075.13c aśvā̍jani̱ prace̍ta̱so 'śvā̍n sa̱matsu̍ codaya ||

ā | ja̱ṅgha̱nti̱ | sānu̍ | e̱ṣā̱m | ja̱ghanā̍n | upa̍ | ji̱ghna̱te̱ |
aśva̍-ajani | pra-ce̍tasaḥ | aśvā̍n | sa̱mat-su̍ | co̱da̱ya̱ ||6.075.13||

6.075.14a ahi̍r iva bho̱gaiḥ pary e̍ti bā̱huṁ jyāyā̍ he̱tim pa̍ri̱bādha̍mānaḥ |
6.075.14c ha̱sta̱ghno viśvā̍ va̱yunā̍ni vi̱dvān pumā̱n pumā̍ṁsa̱m pari̍ pātu vi̱śvata̍ḥ ||

ahi̍ḥ-iva | bho̱gaiḥ | pari̍ | e̱ti̱ | bā̱hum | jyāyā̍ḥ | he̱tim | pa̱ri̱-bādha̍mānaḥ |
ha̱sta̱-ghnaḥ | viśvā̍ | va̱yunā̍ni | vi̱dvān | pumā̍n | pumā̍ṁsam | pari̍ | pā̱tu̱ | vi̱śvata̍ḥ ||6.075.14||

6.075.15a ālā̍ktā̱ yā ruru̍śī̱rṣṇy atho̱ yasyā̱ ayo̱ mukha̍m |
6.075.15c i̱dam pa̱rjanya̍retasa̱ iṣvai̍ de̱vyai bṛ̱han nama̍ḥ ||

āla̍-aktā | yā | ruru̍-śīrṣṇī | atho̱ iti̍ | yasyā̍ḥ | aya̍ḥ | mukha̍m |
i̱dam | pa̱rjanya̍-retase | iṣvai̍ | de̱vyai | bṛ̱hat | nama̍ḥ ||6.075.15||

6.075.16a ava̍sṛṣṭā̱ parā̍ pata̱ śara̍vye̱ brahma̍saṁśite |
6.075.16c gacchā̱mitrā̱n pra pa̍dyasva̱ māmīṣā̱ṁ kaṁ ca̱noc chi̍ṣaḥ ||

ava̍-sṛṣṭā | parā̍ | pa̱ta̱ | śara̍vye | brahma̍-saṁśite |
gaccha̍ | a̱mitrā̍n | pra | pa̱dya̱sva̱ | mā | a̱mīṣā̍m | kam | ca̱na | ut | śi̱ṣa̱ḥ ||6.075.16||

6.075.17a yatra̍ bā̱ṇāḥ sa̱mpata̍nti kumā̱rā vi̍śi̱khā i̍va |
6.075.17c tatrā̍ no̱ brahma̍ṇa̱s pati̱r adi̍ti̱ḥ śarma̍ yacchatu vi̱śvāhā̱ śarma̍ yacchatu ||

yatra̍ | bā̱ṇāḥ | sa̱m-pata̍nti | ku̱mā̱rāḥ | vi̱śi̱khāḥ-i̍va |
tatra̍ | na̱ḥ | brahma̍ṇaḥ | pati̍ḥ | adi̍tiḥ | śarma̍ | ya̱ccha̱tu̱ | vi̱śvāhā̍ | śarma̍ | ya̱ccha̱tu̱ ||6.075.17||

6.075.18a marmā̍ṇi te̱ varma̍ṇā chādayāmi̱ soma̍s tvā̱ rājā̱mṛte̱nānu̍ vastām |
6.075.18c u̱ror varī̍yo̱ varu̍ṇas te kṛṇotu̱ jaya̍nta̱ṁ tvānu̍ de̱vā ma̍dantu ||

marmā̍ṇi | te̱ | varma̍ṇā | chā̱da̱yā̱mi̱ | soma̍ḥ | tvā̱ | rājā̍ | a̱mṛte̍na | anu̍ | va̱stā̱m |
u̱roḥ | varī̍yaḥ | varu̍ṇaḥ | te̱ | kṛ̱ṇo̱tu̱ | jaya̍ntam | tvā̱ | anu̍ | de̱vāḥ | ma̱da̱ntu̱ ||6.075.18||

6.075.19a yo na̱ḥ svo ara̍ṇo̱ yaś ca̱ niṣṭyo̱ jighā̍ṁsati |
6.075.19c de̱vās taṁ sarve̍ dhūrvantu̱ brahma̱ varma̱ mamānta̍ram ||

yaḥ | na̱ḥ | svaḥ | ara̍ṇaḥ | yaḥ | ca̱ | niṣṭya̍ḥ | jighā̍ṁsati |
de̱vāḥ | tam | sarve̍ | dhū̱rva̱ntu̱ | brahma̍ | varma̍ | mama̍ | anta̍ram ||6.075.19||


Notes by Detlef Eichler : 1. Please note that this text is not for commercial use and released only for personal scholarly activity. This transliteration version of Rigveda-Saṁhitā is from an ITRANS file which I have created on the basis of The Aufrecht/van Nooten/Holland (Samhita) version of theRigveda. The Padapāṭha is based on the text entered by the members of the Sansknet project. 2. Font: times new roman / Unicode 3. Hiatus ai, au are shown as aï, aü 4. Transliteration:
a ā i ï ī ī3 u ü ū ṛ ṝ ḷ e ai o au ṁ ḥ m̐ ' | a̱ a̍ ā̱ ā̍ i̱ i̍ ī̱ ī̍ u u̍ ü̍ ū̱ ū̍ ṛ̱ ṛ̍ ṝ̱ ṝ̍ ḷ̱ e̱ e̍ ai̱ ai̍ o̱ o̍ au̱ au̍ 1̱̍ 3̱̍ k kh g gh ṅ c ch j jh ñ ṭ ṭh ḍ ḍh ṇ t th d dh n p ph b bh m y r l v ś ṣ s h ḻ ḻh 5. Last updated 8 September 2016