Ṛgveda-Saṁhitā with Padapāṭha
Maṇḍala 5
Transliterated text with accents


5.001.01a abo̍dhy a̱gniḥ sa̱midhā̱ janā̍nā̱m prati̍ dhe̱num i̍vāya̱tīm u̱ṣāsa̍m |
5.001.01c ya̱hvā i̍va̱ pra va̱yām u̱jjihā̍nā̱ḥ pra bhā̱nava̍ḥ sisrate̱ nāka̱m accha̍ ||

abo̍dhi | a̱gniḥ | sa̱m-idhā̍ | janā̍nām | prati̍ | dhe̱num-i̍va | ā̱-ya̱tīm | u̱ṣasa̍m |
ya̱hvāḥ-i̍va | pra | va̱yām | u̱t-jihā̍nāḥ | pra | bhā̱nava̍ḥ | si̱sra̱te̱ | nāka̍m | accha̍ ||5.001.01||

5.001.02a abo̍dhi̱ hotā̍ ya̱jathā̍ya de̱vān ū̱rdhvo a̱gniḥ su̱manā̍ḥ prā̱tar a̍sthāt |
5.001.02c sami̍ddhasya̱ ruśa̍d adarśi̱ pājo̍ ma̱hān de̱vas tama̍so̱ nir a̍moci ||

abo̍dhi | hotā̍ | ya̱jathā̍ya | de̱vān | ū̱rdhvaḥ | a̱gniḥ | su̱-manā̍ḥ | prā̱taḥ | a̱sthā̱t |
sam-i̍ddhasya | ruśa̍t | a̱da̱rśi̱ | pāja̍ḥ | ma̱hān | de̱vaḥ | tama̍saḥ | niḥ | a̱mo̱ci̱ ||5.001.02||

5.001.03a yad ī̍ṁ ga̱ṇasya̍ raśa̱nām ajī̍ga̱ḥ śuci̍r aṅkte̱ śuci̍bhi̱r gobhi̍r a̱gniḥ |
5.001.03c ād dakṣi̍ṇā yujyate vāja̱yanty u̍ttā̱nām ū̱rdhvo a̍dhayaj ju̱hūbhi̍ḥ ||

yat | ī̱m | ga̱ṇasya̍ | ra̱śa̱nām | ajī̍ga̱riti̍ | śuci̍ḥ | a̱ṅkte̱ | śuci̍-bhiḥ | go-bhi̍ḥ | a̱gniḥ |
āt | dakṣi̍ṇā | yu̱jya̱te̱ | vā̱ja̱-yantī̍ | u̱ttā̱nām | ū̱rdhvaḥ | a̱dha̱ya̱t | ju̱hūbhi̍ḥ ||5.001.03||

5.001.04a a̱gnim acchā̍ devaya̱tām manā̍ṁsi̱ cakṣū̍ṁṣīva̱ sūrye̱ saṁ ca̍ranti |
5.001.04c yad ī̱ṁ suvā̍te u̱ṣasā̱ virū̍pe śve̱to vā̱jī jā̍yate̱ agre̱ ahnā̍m ||

a̱gnim | accha̍ | de̱va̱-ya̱tām | manā̍ṁsi | cakṣū̍ṁṣī-iva | sūrye̍ | sam | ca̱ra̱nti̱ |
yat | ī̱m | suvā̍te | u̱ṣasā̍ | virū̍pe̱ iti̱ vi-rū̍pe | śve̱taḥ | vā̱jī | jā̱ya̱te̱ | agre̍ | ahnā̍m ||5.001.04||

5.001.05a jani̍ṣṭa̱ hi jenyo̱ agre̱ ahnā̍ṁ hi̱to hi̱teṣv a̍ru̱ṣo vane̍ṣu |
5.001.05c dame̍-dame sa̱pta ratnā̱ dadhā̍no̱ 'gnir hotā̱ ni ṣa̍sādā̱ yajī̍yān ||

jani̍ṣṭa | hi | jenya̍ḥ | agre̍ | ahnā̍m | hi̱taḥ | hi̱teṣu | a̱ru̱ṣaḥ | vane̍ṣu |
dame̍-dame | sa̱pta | ratnā̍ | dadhā̍naḥ | a̱gniḥ | hotā̍ | ni | sa̱sā̱da̱ | yajī̍yān ||5.001.05||

5.001.06a a̱gnir hotā̱ ny a̍sīda̱d yajī̍yān u̱pasthe̍ mā̱tuḥ su̍ra̱bhā u̍ lo̱ke |
5.001.06c yuvā̍ ka̱viḥ pu̍runi̱ṣṭha ṛ̱tāvā̍ dha̱rtā kṛ̍ṣṭī̱nām u̱ta madhya̍ i̱ddhaḥ ||

a̱gniḥ | hotā̍ | ni | a̱sī̱da̱t | yajī̍yān | u̱pa-sthe̍ | mā̱tuḥ | su̱ra̱bhau | ū̱m̐ iti̍ | lo̱ke |
yuvā̍ | ka̱viḥ | pu̱ru̱ni̱ḥ-ṣṭhaḥ | ṛ̱ta-vā̍ | dha̱rtā | kṛ̱ṣṭī̱nām | u̱ta | madhye̍ | i̱ddhaḥ ||5.001.06||

5.001.07a pra ṇu tyaṁ vipra̍m adhva̱reṣu̍ sā̱dhum a̱gniṁ hotā̍ram īḻate̱ namo̍bhiḥ |
5.001.07c ā yas ta̱tāna̱ roda̍sī ṛ̱tena̱ nitya̍m mṛjanti vā̱jina̍ṁ ghṛ̱tena̍ ||

pra | nu | tyam | vipra̍m | a̱dhva̱reṣu̍ | sā̱dhum | a̱gnim | hotā̍ram | ī̱ḻate̍ | nama̍ḥ-bhiḥ |
ā | yaḥ | ta̱tāna̍ | roda̍sī̱ iti̍ | ṛ̱tena̍ | nitya̍m | mṛ̱ja̱nti̱ | vā̱jina̍m | ghṛ̱tena̍ ||5.001.07||

5.001.08a mā̱rjā̱lyo̍ mṛjyate̱ sve damū̍nāḥ kavipraśa̱sto ati̍thiḥ śi̱vo na̍ḥ |
5.001.08c sa̱hasra̍śṛṅgo vṛṣa̱bhas tado̍jā̱ viśvā̍m̐ agne̱ saha̍sā̱ prāsy a̱nyān ||

mā̱rjā̱lya̍ḥ | mṛ̱jya̱te̱ | sve | damū̍nāḥ | ka̱vi̱-pra̱śa̱staḥ | ati̍thiḥ | śi̱vaḥ | na̱ḥ |
sa̱hasra̍-śṛṅgaḥ | vṛ̱ṣa̱bhaḥ | tat-o̍jāḥ | viśvā̍n | a̱gne̱ | saha̍sā | pra | a̱si̱ | a̱nyān ||5.001.08||

5.001.09a pra sa̱dyo a̍gne̱ aty e̍ṣy a̱nyān ā̱vir yasmai̱ cāru̍tamo ba̱bhūtha̍ |
5.001.09c ī̱ḻenyo̍ vapu̱ṣyo̍ vi̱bhāvā̍ pri̱yo vi̱śām ati̍thi̱r mānu̍ṣīṇām ||

pra | sa̱dyaḥ | a̱gne̱ | ati̍ | e̱ṣi̱ | a̱nyān | ā̱viḥ | yasmai̍ | cāru̍-tamaḥ | ba̱bhūtha̍ |
ī̱ḻenya̍ḥ | va̱pu̱ṣya̍ḥ | vi̱bhā-vā̍ | pri̱yaḥ | vi̱śām | ati̍thiḥ | mānu̍ṣīṇām ||5.001.09||

5.001.10a tubhya̍m bharanti kṣi̱tayo̍ yaviṣṭha ba̱lim a̍gne̱ anti̍ta̱ ota dū̱rāt |
5.001.10c ā bhandi̍ṣṭhasya suma̱tiṁ ci̍kiddhi bṛ̱hat te̍ agne̱ mahi̱ śarma̍ bha̱dram ||

tubhya̍m | bha̱ra̱nti̱ | kṣi̱taya̍ḥ | ya̱vi̱ṣṭha̱ | ba̱lim | a̱gne̱ | anti̍taḥ | ā | u̱ta | dū̱rāt |
ā | bhandi̍ṣṭhasya | su̱-ma̱tim | ci̱ki̱ddhi̱ | bṛ̱hat | te̱ | a̱gne̱ | mahi̍ | śarma̍ | bha̱dram ||5.001.10||

5.001.11a ādya ratha̍m bhānumo bhānu̱manta̱m agne̱ tiṣṭha̍ yaja̱tebhi̱ḥ sama̍ntam |
5.001.11c vi̱dvān pa̍thī̱nām u̱rv a1̱̍ntari̍kṣa̱m eha de̱vān ha̍vi̱radyā̍ya vakṣi ||

ā | a̱dya | ratha̍m | bhā̱nu̱-ma̱ḥ | bhā̱nu̱-manta̍m | agne̍ | tiṣṭha̍ | ya̱ja̱tebhi̍ḥ | sam-a̍ntam |
vi̱dvān | pa̱thī̱nām | u̱ru | a̱ntari̍kṣam | ā | i̱ha | de̱vān | ha̱vi̱ḥ-adyā̍ya | va̱kṣi̱ ||5.001.11||

5.001.12a avo̍cāma ka̱vaye̱ medhyā̍ya̱ vaco̍ va̱ndāru̍ vṛṣa̱bhāya̱ vṛṣṇe̍ |
5.001.12c gavi̍ṣṭhiro̱ nama̍sā̱ stoma̍m a̱gnau di̱vī̍va ru̱kmam u̍ru̱vyañca̍m aśret ||

avo̍cāma | ka̱vaye̍ | medhyā̍ya | vaca̍ḥ | va̱ndāru̍ | vṛ̱ṣa̱bhāya̍ | vṛṣṇe̍ |
gavi̍ṣṭhiraḥ | nama̍sā | stoma̍m | a̱gnau | di̱vi-i̍va | ru̱kmam | u̱ru̱-vyañca̍m | a̱śre̱t ||5.001.12||


5.002.01a ku̱mā̱ram mā̱tā yu̍va̱tiḥ samu̍bdha̱ṁ guhā̍ bibharti̱ na da̍dāti pi̱tre |
5.002.01c anī̍kam asya̱ na mi̱naj janā̍saḥ pu̱raḥ pa̍śyanti̱ nihi̍tam ara̱tau ||

ku̱mā̱ram | mā̱tā | yu̱va̱tiḥ | sam-u̍bdham | guhā̍ | bi̱bha̱rti̱ | na | da̱dā̱ti̱ | pi̱tre |
anī̍kam | a̱sya̱ | na | mi̱nat | janā̍saḥ | pu̱raḥ | pa̱śya̱nti̱ | ni-hi̍tam | a̱ra̱tau ||5.002.01||

5.002.02a kam e̱taṁ tvaṁ yu̍vate kumā̱ram peṣī̍ bibharṣi̱ mahi̍ṣī jajāna |
5.002.02c pū̱rvīr hi garbha̍ḥ śa̱rado̍ va̱vardhāpa̍śyaṁ jā̱taṁ yad asū̍ta mā̱tā ||

kam | e̱tam | tvam | yu̱va̱te̱ | ku̱mā̱ram | peṣī̍ | bi̱bha̱rṣi̱ | mahi̍ṣī | ja̱jā̱na̱ |
pū̱rvīḥ | hi | garbha̍ḥ | śa̱rada̍ḥ | va̱vardha̍ | apa̍śyam | jā̱tam | yat | asū̍ta | mā̱tā ||5.002.02||

5.002.03a hira̍ṇyadanta̱ṁ śuci̍varṇam ā̱rāt kṣetrā̍d apaśya̱m āyu̍dhā̱ mimā̍nam |
5.002.03c da̱dā̱no a̍smā a̱mṛta̍ṁ vi̱pṛkva̱t kim mām a̍ni̱ndrāḥ kṛ̍ṇavann anu̱kthāḥ ||

hira̍ṇya-dantam | śuci̍-varṇam | ā̱rāt | kṣetrā̍t | a̱pa̱śya̱m | āyu̍dhā | mimā̍nam |
da̱dā̱naḥ | a̱smai̱ | a̱mṛta̍m | vi̱pṛkva̍t | kim | mām | a̱ni̱ndrāḥ | kṛ̱ṇa̱va̱n | a̱nu̱kthāḥ ||5.002.03||

5.002.04a kṣetrā̍d apaśyaṁ sanu̱taś cara̍ntaṁ su̱mad yū̱thaṁ na pu̱ru śobha̍mānam |
5.002.04c na tā a̍gṛbhra̱nn aja̍niṣṭa̱ hi ṣaḥ pali̍knī̱r id yu̍va̱tayo̍ bhavanti ||

kṣetrā̍t | a̱pa̱śya̱m | sa̱nu̱tariti̍ | cara̍ntam | su̱-mat | yū̱tham | na | pu̱ru | śobha̍mānam |
na | tāḥ | a̱gṛ̱bhra̱n | aja̍niṣṭa | hi | saḥ | pali̍knīḥ | it | yu̱va̱taya̍ḥ | bha̱va̱nti̱ ||5.002.04||

5.002.05a ke me̍ marya̱kaṁ vi ya̍vanta̱ gobhi̱r na yeṣā̍ṁ go̱pā ara̍ṇaś ci̱d āsa̍ |
5.002.05c ya ī̍ṁ jagṛ̱bhur ava̱ te sṛ̍ja̱ntv ājā̍ti pa̱śva upa̍ naś ciki̱tvān ||

ke | me̱ | ma̱rya̱kam | vi | ya̱va̱nta̱ | gobhi̍ḥ | na | yeṣā̍m | go̱pāḥ | ara̍ṇaḥ | ci̱t | āsa̍ |
ye | ī̱m | ja̱gṛ̱bhuḥ | ava̍ | te | sṛ̱ja̱ntu | ā | a̱jā̱ti̱ | pa̱śvaḥ | upa̍ | na̱ḥ | ci̱ki̱tvān ||5.002.05||

5.002.06a va̱sāṁ rājā̍naṁ vasa̱tiṁ janā̍nā̱m arā̍tayo̱ ni da̍dhu̱r martye̍ṣu |
5.002.06c brahmā̱ṇy atre̱r ava̱ taṁ sṛ̍jantu nindi̱tāro̱ nindyā̍so bhavantu ||

va̱sām | rājā̍nam | va̱sa̱tim | janā̍nām | arā̍tayaḥ | ni | da̱dhu̱ḥ | martye̍ṣu |
brahmā̍ṇi | atre̍ḥ | ava̍ | tam | sṛ̱ja̱ntu̱ | ni̱ndi̱tāra̍ḥ | nindyā̍saḥ | bha̱va̱ntu̱ ||5.002.06||

5.002.07a śuna̍ś ci̱c chepa̱ṁ nidi̍taṁ sa̱hasrā̱d yūpā̍d amuñco̱ aśa̍miṣṭa̱ hi ṣaḥ |
5.002.07c e̱vāsmad a̍gne̱ vi mu̍mugdhi̱ pāśā̱n hota̍ś cikitva i̱ha tū ni̱ṣadya̍ ||

śuna̱ḥ-śepa̍m | ci̱t | ni-di̍tam | sa̱hasrā̍t | yūpā̍t | a̱mu̱ñca̱ḥ | aśa̍miṣṭa | hi | saḥ |
e̱va | a̱smat | a̱gne̱ | vi | mu̱mu̱gdhi̱ | pāsā̍n | hota̱riti̍ | ci̱ki̱tva̱ḥ | i̱ha | tu | ni̱-sadya̍ ||5.002.07||

5.002.08a hṛ̱ṇī̱yamā̍no̱ apa̱ hi mad aiye̱ḥ pra me̍ de̱vānā̍ṁ vrata̱pā u̍vāca |
5.002.08c indro̍ vi̱dvām̐ anu̱ hi tvā̍ ca̱cakṣa̱ tenā̱ham a̍gne̱ anu̍śiṣṭa̱ āgā̍m ||

hṛ̱ṇī̱yamā̍naḥ | apa̍ | hi | mat | aiye̍ | pra | me̱ | de̱vānā̍m | vra̱ta̱-pāḥ | u̱vā̱ca̱ |
indra̍ḥ | vi̱dvān | anu̍ | hi | tvā̱ | ca̱cakṣa̍ | tena̍ | a̱ham | a̱gne̱ | anu̍-śiṣṭaḥ | ā | a̱gā̱m ||5.002.08||

5.002.09a vi jyoti̍ṣā bṛha̱tā bhā̍ty a̱gnir ā̱vir viśvā̍ni kṛṇute mahi̱tvā |
5.002.09c prāde̍vīr mā̱yāḥ sa̍hate du̱revā̱ḥ śiśī̍te̱ śṛṅge̱ rakṣa̍se vi̱nikṣe̍ ||

vi | jyoti̍ṣā | bṛ̱ha̱tā | bhā̱ti̱ | a̱gniḥ | ā̱viḥ | viśvā̍ni | kṛ̱ṇu̱te̱ | ma̱hi̱-tvā |
pra | ade̍vīḥ | mā̱yāḥ | sa̱ha̱te̱ | du̱ḥ-evā̍ḥ | śiśī̍te | śṛṅge̱ iti̍ | rakṣa̍se | vi̱-nikṣe̍ ||5.002.09||

5.002.10a u̱ta svā̱nāso̍ di̱vi ṣa̍ntv a̱gnes ti̱gmāyu̍dhā̱ rakṣa̍se̱ hanta̱vā u̍ |
5.002.10c made̍ cid asya̱ pra ru̍janti̱ bhāmā̱ na va̍rante pari̱bādho̱ ade̍vīḥ ||

u̱ta | khā̱nāsa̍ḥ | di̱vi | sa̱ntu̱ | a̱gneḥ | ti̱gma-ā̍yudhāḥ | rakṣa̍se | hanta̱vai | ū̱m̐ iti̍ |
made̍ | ci̱t | a̱sya̱ | pra | ru̱ja̱nti̱ | bhāmā̍ḥ | na | va̱ra̱nte̱ | pa̱ri̱-bādha̍ḥ | ade̍vīḥ ||5.002.10||

5.002.11a e̱taṁ te̱ stoma̍ṁ tuvijāta̱ vipro̱ ratha̱ṁ na dhīra̱ḥ svapā̍ atakṣam |
5.002.11c yadīd a̍gne̱ prati̱ tvaṁ de̍va̱ haryā̱ḥ sva̍rvatīr a̱pa e̍nā jayema ||

e̱tam | te̱ | stoma̍m | tu̱vi̱-jā̱ta̱ | vipra̍ḥ | ratha̍m | na | dhīra̍ḥ | su̱-apā̍ḥ | a̱ta̱kṣa̱m |
yadi̍ | it | a̱gne̱ | prati̍ | tvam | de̱va̱ | haryā̍ḥ | sva̍ḥ-vatīḥ | a̱paḥ | e̱na̱ | ja̱ye̱ma̱ ||5.002.11||

5.002.12a tu̱vi̱grīvo̍ vṛṣa̱bho vā̍vṛdhā̱no̍ 'śa̱trv a1̱̍ryaḥ sam a̍jāti̱ veda̍ḥ |
5.002.12c itī̱mam a̱gnim a̱mṛtā̍ avocan ba̱rhiṣma̍te̱ mana̍ve̱ śarma̍ yaṁsad dha̱viṣma̍te̱ mana̍ve̱ śarma̍ yaṁsat ||

tu̱vi̱-grīva̍ḥ | vṛ̱ṣa̱bhaḥ | va̱vṛ̱dhā̱naḥ | a̱śa̱tru | a̱ryaḥ | sam | a̱jā̱ti̱ | veda̍ḥ |
iti̍ | i̱mam | a̱gnim | a̱mṛtā̍ḥ | a̱vo̱ca̱n | ba̱rhiṣma̍te | mana̍ve | śarma̍ | ya̱ṁsa̱t | ha̱viṣma̍te | mana̍ve | śarma̍ | ya̱ṁsa̱t ||5.002.12||


5.003.01a tvam a̍gne̱ varu̍ṇo̱ jāya̍se̱ yat tvam mi̱tro bha̍vasi̱ yat sami̍ddhaḥ |
5.003.01c tve viśve̍ sahasas putra de̱vās tvam indro̍ dā̱śuṣe̱ martyā̍ya ||

tvam | a̱gne̱ | varu̍ṇaḥ | jāya̍se | yat | tvam | mi̱traḥ | bha̱va̱si̱ | yat | sam-i̍ddhaḥ |
tve | viśve̍ | sa̱ha̱sa̱ḥ | pu̱tra̱ | de̱vāḥ | tvam | indra̍ḥ | dā̱śuṣe̍ | martyā̍ya ||5.003.01||

5.003.02a tvam a̍rya̱mā bha̍vasi̱ yat ka̱nīnā̱ṁ nāma̍ svadhāva̱n guhya̍m bibharṣi |
5.003.02c a̱ñjanti̍ mi̱traṁ sudhi̍ta̱ṁ na gobhi̱r yad dampa̍tī̱ sama̍nasā kṛ̱ṇoṣi̍ ||

tvam | a̱rya̱mā | bha̱va̱si̱ | yat | ka̱nīnā̍m | nāma̍ | svadhā-va̍n | guhya̍m | bi̱bha̱rṣi̱ |
a̱ñjanti̍ | mi̱tram | su-dhi̍tam | na | gobhi̍ḥ | yat | dampa̍tī̱ iti̱ dam-pa̍tī | sa-ma̍nasā | kṛ̱ṇoṣi̍ ||5.003.02||

5.003.03a tava̍ śri̱ye ma̱ruto̍ marjayanta̱ rudra̱ yat te̱ jani̍ma̱ cāru̍ ci̱tram |
5.003.03c pa̱daṁ yad viṣṇo̍r upa̱maṁ ni̱dhāyi̱ tena̍ pāsi̱ guhya̱ṁ nāma̱ gonā̍m ||

tava̍ | śri̱ye | ma̱ruta̍ḥ | ma̱rja̱ya̱nta̱ | rudra̍ | yat | te̱ | jani̍ma | cāru̍ | ci̱tram |
pa̱dam | yat | viṣṇo̍ḥ | u̱pa̱-mam | ni̱-dhāyi̍ | tena̍ | pā̱si̱ | guhyam | nāma̍ | gonā̍m ||5.003.03||

5.003.04a tava̍ śri̱yā su̱dṛśo̍ deva de̱vāḥ pu̱rū dadhā̍nā a̱mṛta̍ṁ sapanta |
5.003.04c hotā̍ram a̱gnim manu̍ṣo̱ ni ṣe̍dur daśa̱syanta̍ u̱śija̱ḥ śaṁsa̍m ā̱yoḥ ||

tava̍ | śri̱yā | su̱-dṛśa̍ḥ | de̱va̱ | de̱vāḥ | pu̱ru | dadhā̍nāḥ | a̱mṛta̍m | sa̱pa̱nta̱ |
hotā̍ram | a̱gnim | manu̍ṣaḥ | ni | se̱du̱ḥ | da̱śa̱syanta̍ḥ | u̱śija̍ḥ | śaṁsa̍m | ā̱yoḥ ||5.003.04||

5.003.05a na tvad dhotā̱ pūrvo̍ agne̱ yajī̍yā̱n na kāvyai̍ḥ pa̱ro a̍sti svadhāvaḥ |
5.003.05c vi̱śaś ca̱ yasyā̱ ati̍thi̱r bhavā̍si̱ sa ya̱jñena̍ vanavad deva̱ martā̍n ||

na | tvat | hotā̍ | pūrva̍ḥ | a̱gne̱ | yajī̍yān | na | kāvyai̍ḥ | pa̱raḥ | a̱sti̱ | sva̱dhā̱-vaḥ |
vi̱śaḥ | ca̱ | yasyā̍ḥ | ati̍thiḥ | bhavā̍si | saḥ | ya̱jñena̍ | va̱na̱-va̱t | de̱va̱ | martā̍n ||5.003.05||

5.003.06a va̱yam a̍gne vanuyāma̱ tvotā̍ vasū̱yavo̍ ha̱viṣā̱ budhya̍mānāḥ |
5.003.06c va̱yaṁ sa̍ma̱rye vi̱dathe̱ṣv ahnā̍ṁ va̱yaṁ rā̱yā sa̍hasas putra̱ martā̍n ||

va̱yam | a̱gne̱ | va̱nu̱yā̱ma̱ | tvā-ū̍tāḥ | va̱su̱-yava̍ḥ | ha̱viṣā̍ | budhya̍mānāḥ |
va̱yam | sa̱-ma̱rye | vi̱dathe̍ṣu | ahnā̍m | va̱yam | rā̱yā | sa̱ha̱sa̱ḥ | pu̱tra̱ | martā̍n ||5.003.06||

5.003.07a yo na̱ āgo̍ a̱bhy eno̱ bharā̱ty adhīd a̱gham a̱ghaśa̍ṁse dadhāta |
5.003.07c ja̱hī ci̍kitvo a̱bhiśa̍stim e̱tām agne̱ yo no̍ ma̱rcaya̍ti dva̱yena̍ ||

yaḥ | na̱ḥ | āga̍ḥ | a̱bhi | ena̍ḥ | bharā̍ti | adhi̍ | it | a̱gham | a̱gha-śa̍ṁse | da̱dhā̱ta̱ |
ja̱hi | ci̱ki̱tva̱ḥ | a̱bhi-śa̍stim | e̱tām | a̱gne̱ | yaḥ | na̱ḥ | ma̱rcaya̍ti | dva̱yena̍ ||5.003.07||

5.003.08a tvām a̱syā vyuṣi̍ deva̱ pūrve̍ dū̱taṁ kṛ̍ṇvā̱nā a̍yajanta ha̱vyaiḥ |
5.003.08c sa̱ṁsthe yad a̍gna̱ īya̍se rayī̱ṇāṁ de̱vo martai̱r vasu̍bhir i̱dhyamā̍naḥ ||

tvām | a̱syāḥ | vi̱-uṣi̍ | de̱va̱ | pūrve̍ | dū̱tam | kṛ̱ṇvā̱nāḥ | a̱ya̱ja̱nta̱ | ha̱vyaiḥ |
sa̱m-sthe | yat | ā̱gne̱ | īya̍se | ra̱yī̱ṇām | de̱vaḥ | martai̍ḥ | vasu̍-bhiḥ | i̱dhyamā̍naḥ ||5.003.08||

5.003.09a ava̍ spṛdhi pi̱tara̱ṁ yodhi̍ vi̱dvān pu̱tro yas te̍ sahasaḥ sūna ū̱he |
5.003.09c ka̱dā ci̍kitvo a̱bhi ca̍kṣase̱ no 'gne̍ ka̱dām̐ ṛ̍ta̱cid yā̍tayāse ||

ava̍ | spṛ̱dhi̱ | pi̱tara̍m | yodhi̍ | vi̱dvān | pu̱traḥ | yaḥ | te̱ | sa̱ha̱sa̱ḥ | sū̱no̱ iti̍ | ū̱he |
ka̱dā | ci̱ki̱tva̱ḥ | a̱bhi | ca̱kṣa̱se̱ | na̱ḥ | a̱gne̱ | ka̱dā | ṛ̱ta̱-cit | yā̱ta̱yā̱se̱ ||5.003.09||

5.003.10a bhūri̱ nāma̱ vanda̍māno dadhāti pi̱tā va̍so̱ yadi̱ taj jo̱ṣayā̍se |
5.003.10c ku̱vid de̱vasya̱ saha̍sā cakā̱naḥ su̱mnam a̱gnir va̍nate vāvṛdhā̱naḥ ||

bhūri̍ | nāma̍ | vanda̍mānaḥ | da̱dhā̱ti̱ | pi̱tā | va̱so̱ iti̍ | yadi̍ | tat | jo̱ṣayā̍se |
ku̱vit | de̱vasya̍ | saha̍sā | ca̱kā̱naḥ | su̱mnam | a̱gniḥ | va̱na̱te̱ | va̱vṛ̱dhā̱naḥ ||5.003.10||

5.003.11a tvam a̱ṅga ja̍ri̱tāra̍ṁ yaviṣṭha̱ viśvā̍ny agne duri̱tāti̍ parṣi |
5.003.11c ste̱nā a̍dṛśran ri̱pavo̱ janā̱so 'jñā̍taketā vṛji̱nā a̍bhūvan ||

tvam | a̱ṅga | ja̱ri̱tāra̍m | ya̱vi̱ṣṭha̱ | viśvā̍ni | a̱gne̱ | du̱ḥ-i̱tā | ati̍ | pa̱rṣi |
ste̱nāḥ | a̱dṛ̱śra̱n | ri̱pava̍ḥ | janā̍saḥ | ajñā̍ta-ketāḥ | vṛ̱ji̱nāḥ | a̱bhū̱va̱n ||5.003.11||

5.003.12a i̱me yāmā̍sas tva̱drig a̍bhūva̱n vasa̍ve vā̱ tad id āgo̍ avāci |
5.003.12c nāhā̱yam a̱gnir a̱bhiśa̍staye no̱ na rīṣa̍te vāvṛdhā̱naḥ parā̍ dāt ||

i̱me | yāmā̍saḥ | tva̱drik | a̱bhū̱va̱n | vasa̍ve | vā̱ | tat | it | āga̍ḥ | a̱vā̱ci̱ |
na | aha̍ | a̱yam | a̱gniḥ | a̱bhi-śa̍staye | na̱ḥ | na | riṣa̍te | va̱vṛ̱dhā̱naḥ | parā̍ | dā̱t ||5.003.12||


5.004.01a tvām a̍gne̱ vasu̍pati̱ṁ vasū̍nām a̱bhi pra ma̍nde adhva̱reṣu̍ rājan |
5.004.01c tvayā̱ vāja̍ṁ vāja̱yanto̍ jayemā̱bhi ṣyā̍ma pṛtsu̱tīr martyā̍nām ||

tvām | a̱gne̱ | vasu̍-patim | vasū̍nām | a̱bhi | pra | ma̱nde̱ | a̱dhva̱reṣu̍ | rā̱ja̱n |
tvayā̍ | vāja̍m | vā̱ja̱-yanta̍ḥ | ja̱ye̱ma̱ | a̱bhi | syā̱ma̱ | pṛ̱tsu̱tīḥ | martyā̍nām ||5.004.01||

5.004.02a ha̱vya̱vāḻ a̱gnir a̱jara̍ḥ pi̱tā no̍ vi̱bhur vi̱bhāvā̍ su̱dṛśī̍ko a̱sme |
5.004.02c su̱gā̱rha̱pa̱tyāḥ sam iṣo̍ didīhy asma̱drya1̱̍k sam mi̍mīhi̱ śravā̍ṁsi ||

ha̱vya̱-vāṭ | a̱gniḥ | a̱jara̍ḥ | pi̱tā | na̱ḥ | vi̱-bhuḥ | vi̱bhā-vā̍ | su̱-dṛśī̍kaḥ | a̱sme iti̍ |
su̱-gā̱rha̱pa̱tyāḥ | sam | iṣa̍ḥ | di̱dī̱hi̱ | a̱sma̱drya̍k | sam | mi̱mī̱hi̱ | śravā̍ṁsi ||5.004.02||

5.004.03a vi̱śāṁ ka̱viṁ vi̱śpati̱m mānu̍ṣīṇā̱ṁ śuci̍m pāva̱kaṁ ghṛ̱tapṛ̍ṣṭham a̱gnim |
5.004.03c ni hotā̍raṁ viśva̱vida̍ṁ dadhidhve̱ sa de̱veṣu̍ vanate̱ vāryā̍ṇi ||

vi̱śām | ka̱vim | vi̱śpati̍m | mānu̍ṣīṇām | śuci̍m | pā̱va̱kam | ghṛ̱ta-pṛ̍ṣṭham | a̱gnim |
ni | hotā̍ram | vi̱śva̱-vida̍m | da̱dhi̱dhve̱ | saḥ | de̱veṣu̍ | va̱na̱te̱ | vāryā̍ṇi ||5.004.03||

5.004.04a ju̱ṣasvā̍gna̱ iḻa̍yā sa̱joṣā̱ yata̍māno ra̱śmibhi̱ḥ sūrya̍sya |
5.004.04c ju̱ṣasva̍ naḥ sa̱midha̍ṁ jātaveda̱ ā ca̍ de̱vān ha̍vi̱radyā̍ya vakṣi ||

ju̱ṣasva̍ | a̱gne̱ | iḻa̍yā | sa̱-joṣā̍ḥ | yata̍mānaḥ | ra̱śmi-bhi̍ḥ | sūrya̍sya |
ju̱ṣasva̍ | na̱ḥ | sa̱m-idha̍m | jā̱ta̱-ve̱da̱ḥ | ā | ca̱ | de̱vān | ha̱vi̱ḥ-adyā̍ya | va̱kṣi̱ ||5.004.04||

5.004.05a juṣṭo̱ damū̍nā̱ ati̍thir duro̱ṇa i̱maṁ no̍ ya̱jñam upa̍ yāhi vi̱dvān |
5.004.05c viśvā̍ agne abhi̱yujo̍ vi̱hatyā̍ śatrūya̱tām ā bha̍rā̱ bhoja̍nāni ||

juṣṭa̍ḥ | damū̍nāḥ | ati̍thiḥ | du̱ro̱ṇe | i̱mam | na̱ḥ | ya̱jñam | upa̍ | yā̱hi̱ | vi̱dvān |
viśvā̍ | a̱gne̱ | a̱bhi̱-yuja̍ḥ | vi̱-hatya̍ | śa̱tru̱-ya̱tām | ā | bha̱ra̱ | bhoja̍nāni ||5.004.05||

5.004.06a va̱dhena̱ dasyu̱m pra hi cā̱taya̍sva̱ vaya̍ḥ kṛṇvā̱nas ta̱nve̱3̱̍ svāyai̍ |
5.004.06c pipa̍rṣi̱ yat sa̍hasas putra de̱vānt so a̍gne pāhi nṛtama̱ vāje̍ a̱smān ||

ve̱dhena̍ | dasyu̍m | pra | hi | cā̱taya̍sva | vaya̍ḥ | kṛ̱ṇvā̱naḥ | ta̱nve̍ | svāyai̍ |
pipa̍rṣi | yat | sa̱ha̱sa̱ḥ | pu̱tra̱ | de̱vān | saḥ | a̱gne̱ | pā̱hi̱ | nṛ̱-ta̱ma̱ | vāje̍ | a̱smān ||5.004.06||

5.004.07a va̱yaṁ te̍ agna u̱kthair vi̍dhema va̱yaṁ ha̱vyaiḥ pā̍vaka bhadraśoce |
5.004.07c a̱sme ra̱yiṁ vi̱śvavā̍ra̱ṁ sam i̍nvā̱sme viśvā̍ni̱ dravi̍ṇāni dhehi ||

va̱yam | te̱ | a̱gne̱ | u̱kthaiḥ | vi̱dhe̱ma̱ | va̱yam | ha̱vyaiḥ | pā̱va̱ka̱ | bha̱dra̱-śo̱ce̱ |
a̱sme iti̍ | ra̱yim | vi̱śva-vā̍ram | sam | i̱nva̱ | a̱sme iti̍ | viśvā̍ni | dravi̍ṇāni | dhe̱hi̱ ||5.004.07||

5.004.08a a̱smāka̍m agne adhva̱raṁ ju̍ṣasva̱ saha̍saḥ sūno triṣadhastha ha̱vyam |
5.004.08c va̱yaṁ de̱veṣu̍ su̱kṛta̍ḥ syāma̱ śarma̍ṇā nas tri̱varū̍thena pāhi ||

a̱smāka̍m | a̱gne̱ | a̱dhva̱ram | ju̱ṣa̱sva̱ | saha̍saḥ | sū̱no̱ iti̍ | tri̱-sa̱dha̱stha̱ | ha̱vyam |
va̱yam | de̱veṣu̍ | su̱-kṛta̍ḥ | syā̱ma̱ | śarma̍ṇā | na̱ḥ | tri̱-varū̍thena | pā̱hi̱ ||5.004.08||

5.004.09a viśvā̍ni no du̱rgahā̍ jātaveda̱ḥ sindhu̱ṁ na nā̱vā du̍ri̱tāti̍ parṣi |
5.004.09c agne̍ atri̱van nama̍sā gṛṇā̱no̱3̱̍ 'smāka̍m bodhy avi̱tā ta̱nūnā̍m ||

viśvā̍ni | na̱ḥ | du̱ḥ-gahā̍ | jā̱ta̱-ve̱da̱ḥ | sindhu̍m | na | nā̱vā | du̱ḥ-i̱tā | ati̍ | pa̱rṣi̱ |
agne̍ | a̱tri̱-vat | nama̍sā | gṛ̱ṇā̱naḥ | a̱smāka̍m | bo̱dhi̱ | a̱vi̱tā | ta̱nūnā̍m ||5.004.09||

5.004.10a yas tvā̍ hṛ̱dā kī̱riṇā̱ manya̍mā̱no 'ma̍rtya̱m martyo̱ joha̍vīmi |
5.004.10c jāta̍vedo̱ yaśo̍ a̱smāsu̍ dhehi pra̱jābhi̍r agne amṛta̱tvam a̍śyām ||

yaḥ | tvā̱ | hṛ̱dā | kī̱riṇā̍ | manya̍mānaḥ | ama̍rtyam | martya̍ḥ | joha̍vīmi |
jāta̍-vedaḥ | yaśa̍ḥ | a̱smāsu̍ | dhe̱hi̱ | pra̱-jābhi̍ḥ | a̱gne̱ | a̱mṛ̱ta̱-tvam | a̱śyā̱m ||5.004.10||

5.004.11a yasmai̱ tvaṁ su̱kṛte̍ jātaveda u lo̱kam a̍gne kṛ̱ṇava̍ḥ syo̱nam |
5.004.11c a̱śvina̱ṁ sa pu̱triṇa̍ṁ vī̱rava̍nta̱ṁ goma̍ntaṁ ra̱yiṁ na̍śate sva̱sti ||

yasmai̍ | tvam | su̱-kṛte̍ | jā̱ta̱-ve̱da̱ḥ | ū̱m̐ iti̍ | lo̱kam | a̱gne̱ | kṛ̱ṇava̍ḥ | syo̱nam |
a̱śvina̍m | saḥ | pu̱triṇa̍m | vī̱ra-va̍ntam | go-ma̍ntam | ra̱yim | na̱śa̱te̱ | sva̱sti ||5.004.11||


5.005.01a susa̍middhāya śo̱ciṣe̍ ghṛ̱taṁ tī̱vraṁ ju̍hotana |
5.005.01c a̱gnaye̍ jā̱tave̍dase ||

su-sa̍middhāya | śo̱ciṣe̍ | ghṛ̱tam | tī̱vram | ju̱ho̱ta̱na̱ |
a̱gnaye̍ | jā̱ta-ve̍dase ||5.005.01||

5.005.02a narā̱śaṁsa̍ḥ suṣūdatī̱maṁ ya̱jñam adā̍bhyaḥ |
5.005.02c ka̱vir hi madhu̍hastyaḥ ||

narā̱śaṁsa̍ḥ | su̱sū̱da̱ti̱ | i̱mam | ya̱jñam | adā̍bhyaḥ |
ka̱viḥ | hi | madhu̍-hastyaḥ ||5.005.02||

5.005.03a ī̱ḻi̱to a̍gna̱ ā va̱hendra̍ṁ ci̱tram i̱ha pri̱yam |
5.005.03c su̱khai rathe̍bhir ū̱taye̍ ||

ī̱ḻi̱taḥ | a̱gne̱ | ā | va̱ha̱ | indra̍m | ci̱tram | i̱ha | pri̱yam |
su̱-khaiḥ | rathe̍bhiḥ | ū̱taye̍ ||5.005.03||

5.005.04a ūrṇa̍mradā̱ vi pra̍thasvā̱bhy a1̱̍rkā a̍nūṣata |
5.005.04c bhavā̍ naḥ śubhra sā̱taye̍ ||

ūrṇa̍-mradā̍ḥ | vi | pra̱tha̱sva̱ | a̱bhi | a̱rkāḥ | a̱nū̱ṣa̱ta̱ |
bhava̍ | na̱ḥ | śu̱bhra̱ | sā̱taye̍ ||5.005.04||

5.005.05a devī̍r dvāro̱ vi śra̍yadhvaṁ suprāya̱ṇā na̍ ū̱taye̍ |
5.005.05c pra-pra̍ ya̱jñam pṛ̍ṇītana ||

devī̍ḥ | dvāra̍ḥ | vi | śra̱ya̱dhva̱m | su̱pra̱-a̱ya̱nāḥ | na̱ḥ | ū̱taye̍ |
pra-pra̍ | ya̱jñam | pṛ̱ṇī̱ta̱na̱ ||5.005.05||

5.005.06a su̱pratī̍ke vayo̱vṛdhā̍ ya̱hvī ṛ̱tasya̍ mā̱tarā̍ |
5.005.06c do̱ṣām u̱ṣāsa̍m īmahe ||

su̱pratī̍ke̱ iti̍ su̱-pratī̍ke | va̱ya̱ḥ-vṛdhā̍ | ya̱hvī | ṛ̱tasya̍ | mā̱tarā̍ |
do̱ṣām | u̱ṣasa̍m | ī̱ma̱he̱ ||5.005.06||

5.005.07a vāta̍sya̱ patma̍nn īḻi̱tā daivyā̱ hotā̍rā̱ manu̍ṣaḥ |
5.005.07c i̱maṁ no̍ ya̱jñam ā ga̍tam ||

vāta̍sya | patma̍n | ī̱ḻi̱tā | daivyā̍ | hotā̍rā | manu̍ṣaḥ |
i̱mam | na̱ḥ | ya̱jñam | ā | ga̱ta̱m ||5.005.07||

5.005.08a iḻā̱ sara̍svatī ma̱hī ti̱sro de̱vīr ma̍yo̱bhuva̍ḥ |
5.005.08b ba̱rhiḥ sī̍dantv a̱sridha̍ḥ ||

iḻā̍ | sara̍svatī | ma̱hī | ti̱sraḥ | de̱vīḥ | ma̱ya̱ḥ-bhuva̍ḥ |
ba̱rhiḥ | sī̱da̱ntu̱ | a̱sridha̍h ||5.005.08||

5.005.09a śi̱vas tva̍ṣṭar i̱hā ga̍hi vi̱bhuḥ poṣa̍ u̱ta tmanā̍ |
5.005.09c ya̱jñe-ya̍jñe na̱ ud a̍va ||

śi̱vaḥ | tva̱ṣṭa̱ḥ | i̱ha | ā̱ | ga̱hi̱ | vi̱-bhuḥ | poṣe̍ | u̱ta | tmanā̍ |
ya̱jñe-ya̍jñe | na̱ḥ | ut | a̱va̱ ||5.005.09||

5.005.10a yatra̱ vettha̍ vanaspate de̱vānā̱ṁ guhyā̱ nāmā̍ni |
5.005.10c tatra̍ ha̱vyāni̍ gāmaya ||

yatra̍ | vettha̍ | va̱na̱spa̱te̱ | de̱vānā̍m | guhyā̍ | nāmā̍ni |
tatra̍ | ha̱vyāni̍ | ga̱ma̱ya̱ ||5.005.10||

5.005.11a svāhā̱gnaye̱ varu̍ṇāya̱ svāhendrā̍ya ma̱rudbhya̍ḥ |
5.005.11c svāhā̍ de̱vebhyo̍ ha̱viḥ ||

svāhā̍ | a̱gnaye̍ | varu̍ṇāya | svāhā̍ | indrā̍ya | ma̱rut-bhya̍ḥ |
svāhā̍ | de̱vebhya̍ḥ | ha̱viḥ ||5.005.11||


5.006.01a a̱gniṁ tam ma̍nye̱ yo vasu̱r asta̱ṁ yaṁ yanti̍ dhe̱nava̍ḥ |
5.006.01c asta̱m arva̍nta ā̱śavo 'sta̱ṁ nityā̍so vā̱jina̱ iṣa̍ṁ sto̱tṛbhya̱ ā bha̍ra ||

a̱gnim | tam | ma̱nye̱ | yaḥ | vasu̍ḥ | asta̍m | yam | yanti̍ | dhe̱nava̍ḥ |
asta̍m | arva̍ntaḥ | ā̱śava̍ḥ | asta̍m | nityā̍saḥ | vā̱jina̍ḥ | iṣa̍m | sto̱tṛ-bhya̍ḥ | ā | bha̱ra̱ ||5.006.01||

5.006.02a so a̱gnir yo vasu̍r gṛ̱ṇe saṁ yam ā̱yanti̍ dhe̱nava̍ḥ |
5.006.02c sam arva̍nto raghu̱druva̱ḥ saṁ su̍jā̱tāsa̍ḥ sū̱raya̱ iṣa̍ṁ sto̱tṛbhya̱ ā bha̍ra ||

saḥ | a̱gniḥ | yaḥ | vasu̍ḥ | gṛ̱ṇe | sam | yam | ā̱-yanti̍ | dhe̱nava̍ḥ |
sam | arva̍ntaḥ | ra̱ghu̱-druva̍ḥ | sam | su̱-jā̱tāsa̍ḥ | sū̱raya | iṣa̍m | sto̱tṛ-bhya̍ḥ | ā | bha̱ra̱ ||5.006.02||

5.006.03a a̱gnir hi vā̱jina̍ṁ vi̱śe dadā̍ti vi̱śvaca̍rṣaṇiḥ |
5.006.03c a̱gnī rā̱ye svā̱bhuva̱ṁ sa prī̱to yā̍ti̱ vārya̱m iṣa̍ṁ sto̱tṛbhya̱ ā bha̍ra ||

a̱gniḥ | hi | vā̱jina̍m | vi̱śe | dadā̍ti | vi̱śva-ca̍rṣaṇiḥ |
a̱gniḥ | rā̱ye | su̱-ā̱bhuva̍m | saḥ | prī̱taḥ | yā̱ti̱ | vārya̍m | iṣa̍m | sto̱tṛ-bhya̍ḥ | ā | bha̱ra̱ ||5.006.03||

5.006.04a ā te̍ agna idhīmahi dyu̱manta̍ṁ devā̱jara̍m |
5.006.04c yad dha̱ syā te̱ panī̍yasī sa̱mid dī̱daya̍ti̱ dyavīṣa̍ṁ sto̱tṛbhya̱ ā bha̍ra ||

ā | te̱ | a̱gne̱ | i̱dhī̱ma̱hi̱ | dyu̱-manta̍m | de̱va̱ | a̱jara̍m |
yat | ha̱ | syā | te̱ | panī̍yasī | sa̱m-it | dī̱daya̍ti | dyavi̍ | iṣa̍m | sto̱tṛ-bhya̍ḥ | ā | bha̱ra̱ ||5.006.04||

5.006.05a ā te̍ agna ṛ̱cā ha̱viḥ śukra̍sya śociṣas pate |
5.006.05c suśca̍ndra̱ dasma̱ viśpa̍te̱ havya̍vā̱ṭ tubhya̍ṁ hūyata̱ iṣa̍ṁ sto̱tṛbhya̱ ā bha̍ra ||

ā | te̱ | a̱gne̱ | ṛ̱cā | ha̱viḥ | śukra̍sya | śo̱ci̱ṣa̱ḥ | pa̱te̱ |
su-ca̍ndra | dasma̍ | viśpa̍te | havya̍-vāṭ | tubhya̍m | hū̱ya̱te̱ | iṣa̍m | sto̱tṛ-bhya̍ḥ | ā | bha̱ra̱ ||5.006.05||

5.006.06a pro tye a̱gnayo̱ 'gniṣu̱ viśva̍m puṣyanti̱ vārya̍m |
5.006.06c te hi̍nvire̱ ta i̍nvire̱ ta i̍ṣaṇyanty ānu̱ṣag iṣa̍ṁ sto̱tṛbhya̱ ā bha̍ra ||

pro iti̍ | tye | a̱gnaya̍ḥ | a̱gniṣu̍ | viśva̍m | pu̱ṣya̱nti̱ | vārya̍m |
te | hi̱nvi̱re̱ | te | i̱nvi̱re̱ | te | i̱ṣa̱ṇya̱nti̱ | ā̱nu̱ṣak | iṣa̍m | sto̱tṛ-bhya̍ḥ | ā | bha̱ra̱ ||5.006.06||

5.006.07a tava̱ tye a̍gne a̱rcayo̱ mahi̍ vrādhanta vā̱jina̍ḥ |
5.006.07c ye patva̍bhiḥ śa̱phānā̍ṁ vra̱jā bhu̱ranta̱ gonā̱m iṣa̍ṁ sto̱tṛbhya̱ ā bha̍ra ||

tava̍ | tye | a̱gne̱ | a̱rcaya̍ḥ | mahi̍ | vrā̱dha̱nta̱ | vā̱jina̍ḥ |
ye | patva̍-bhiḥ | śa̱phānā̍m | vra̱jā | bhu̱ranta̍ | gonā̍m | iṣa̍m | sto̱tṛ-bhya̍ḥ | ā | bha̱ra̱ ||5.006.07||

5.006.08a navā̍ no agna̱ ā bha̍ra sto̱tṛbhya̍ḥ sukṣi̱tīr iṣa̍ḥ |
5.006.08c te syā̍ma̱ ya ā̍nṛ̱cus tvādū̍tāso̱ dame̍-dama̱ iṣa̍ṁ sto̱tṛbhya̱ ā bha̍ra ||

navā̍ḥ | na̱ḥ | a̱gne̱ | ā | bha̱ra̱ | sto̱tṛ-bhya̍ḥ | su̱-kṣi̱tīḥ | iṣa̍ḥ |
te | syā̱ma̱ | ye | ā̱nṛ̱cuḥ | tvā-dū̍tāsaḥ | dame̍-dame | iṣa̍m | sto̱tṛ-bhya̍ḥ | ā | bha̱ra̱ ||5.006.08||

5.006.09a u̱bhe su̍ścandra sa̱rpiṣo̱ darvī̍ śrīṇīṣa ā̱sani̍ |
5.006.09c u̱to na̱ ut pu̍pūryā u̱ktheṣu̍ śavasas pata̱ iṣa̍ṁ sto̱tṛbhya̱ ā bha̍ra ||

u̱bhe | su̱-ca̱ndra̱ | sa̱rpiṣa̍ḥ | darvī̱ iti̍ | śrī̱ṇī̱ṣe̱ | ā̱sani̍ |
u̱to iti̍ | na̱ḥ | ut | pu̱pū̱ryā̱ḥ | u̱kthyeṣu̍ | śa̱va̱sa̱ḥ | pa̱te̱ | iṣa̍m | sto̱tṛ-bhya̍ḥ | ā | bha̱ra̱ ||5.006.09||

5.006.10a e̱vām̐ a̱gnim a̍juryamur gī̱rbhir ya̱jñebhi̍r ānu̱ṣak |
5.006.10c dadha̍d a̱sme su̱vīrya̍m u̱ta tyad ā̱śvaśvya̱m iṣa̍ṁ sto̱tṛbhya̱ ā bha̍ra ||

e̱va | a̱gnim | a̱ju̱rya̱mu̱ḥ | gī̱ḥ-bhiḥ | ya̱jñebhi̍ḥ | ā̱nu̱ṣak |
dadha̍t | a̱sme iti̍ | su̱-vīrya̍m | u̱ta | tyat | ā̱śu̱-aśvya̍m | iṣa̍m | sto̱tṛ-bhya̍ḥ | ā | bha̱ra̱ ||5.006.10||


5.007.01a sakhā̍ya̱ḥ saṁ va̍ḥ sa̱myañca̱m iṣa̱ṁ stoma̍ṁ cā̱gnaye̍ |
5.007.01c varṣi̍ṣṭhāya kṣitī̱nām ū̱rjo naptre̱ saha̍svate ||

sakhā̍yaḥ | sam | va̱ḥ | sa̱myañca̍m | iṣa̍m | stoma̍m | ca̱ | a̱gnaye̍ |
varṣi̍ṣṭhāya | kṣi̱tī̱nām | ū̱rjaḥ | naptre̍ | saha̍svate ||5.007.01||

5.007.02a kutrā̍ ci̱d yasya̱ samṛ̍tau ra̱ṇvā naro̍ nṛ̱ṣada̍ne |
5.007.02c arha̍ntaś ci̱d yam i̍ndha̱te sa̍ṁja̱naya̍nti ja̱ntava̍ḥ ||

kutra̍ | ci̱t | yasya̍ | sam-ṛ̍tau | ra̱ṇvāḥ | nara̍ḥ | nṛ̱-sada̍ne |
arha̍ntaḥ | ci̱t | yam | i̱ndha̱te | sa̱m-ja̱naya̍nti | ja̱ntava̍ḥ ||5.007.02||

5.007.03a saṁ yad i̱ṣo vanā̍mahe̱ saṁ ha̱vyā mānu̍ṣāṇām |
5.007.03c u̱ta dyu̱mnasya̱ śava̍sa ṛ̱tasya̍ ra̱śmim ā da̍de ||

sam | yat | i̱ṣaḥ | vanā̍mahe | sam | ha̱vyā | mānu̍ṣāṇām |
u̱ta | dyu̱mnasya̍ | śava̍sā | ṛ̱tasya̍ | ra̱śmim | ā | da̱de̱ ||5.007.03||

5.007.04a sa smā̍ kṛṇoti ke̱tum ā nakta̍ṁ cid dū̱ra ā sa̱te |
5.007.04c pā̱va̱ko yad vana̱spatī̱n pra smā̍ mi̱nāty a̱jara̍ḥ ||

saḥ | sma̱ | kṛ̱ṇo̱ti̱ | ke̱tum | ā | nakta̍m | ci̱t | dū̱re | ā | sa̱te |
pā̱va̱kaḥ | yat | vana̱spatī̍n | pra | sma̱ | mi̱nāti̍ | a̱jara̍ḥ ||5.007.04||

5.007.05a ava̍ sma̱ yasya̱ veṣa̍ṇe̱ sveda̍m pa̱thiṣu̱ juhva̍ti |
5.007.05c a̱bhīm aha̱ svaje̍nya̱m bhūmā̍ pṛ̱ṣṭheva̍ ruruhuḥ ||

ava̍ | sma̱ | yasya̍ | veṣa̍ṇe | sveda̍m | pa̱thiṣu̍ | juhva̍ti |
a̱bhi | ī̱m | aha̍ | sva-je̍nyam | bhūma̍ | pṛ̱ṣṭā-i̍va | ru̱ru̱hu̱ḥ ||5.007.05||

5.007.06a yam martya̍ḥ puru̱spṛha̍ṁ vi̱dad viśva̍sya̱ dhāya̍se |
5.007.06c pra svāda̍nam pitū̱nām asta̍tātiṁ cid ā̱yave̍ ||

yam | martya̍ḥ | pu̱ru̱-spṛha̍m | vi̱dat | viśva̍sya | dhāya̍se |
pra | svāda̍nam | pi̱tū̱nām | asta̍-tātim | ci̱t | ā̱yave̍ ||5.007.06||

5.007.07a sa hi ṣmā̱ dhanvākṣi̍ta̱ṁ dātā̱ na dāty ā pa̱śuḥ |
5.007.07c hiri̍śmaśru̱ḥ śuci̍dann ṛ̱bhur ani̍bhṛṣṭataviṣiḥ ||

saḥ | hi | sma̱ | dhanva̍ | ā-kṣi̍tam | dātā̍ | na | dāti̍ | ā | pa̱śuḥ |
hiri̍-śmaśruḥ | śuci̍-dan | ṛ̱bhuḥ | ani̍bhṛṣṭa-taviṣiḥ ||5.007.07||

5.007.08a śuci̍ḥ ṣma̱ yasmā̍ atri̱vat pra svadhi̍tīva̱ rīya̍te |
5.007.08c su̱ṣūr a̍sūta mā̱tā krā̱ṇā yad ā̍na̱śe bhaga̍m ||

śuci̍ḥ | sma̱ | yasmai̍ | a̱tri̱-vat | pra | svadhi̍tiḥ-iva | rīya̍te |
su̱-sūḥ | a̱sū̱ta̱ | mā̱tā | krā̱ṇā | yat | ā̱na̱śe | bhaga̍m ||5.007.08||

5.007.09a ā yas te̍ sarpirāsu̱te 'gne̱ śam asti̱ dhāya̍se |
5.007.09c aiṣu̍ dyu̱mnam u̱ta śrava̱ ā ci̱ttam martye̍ṣu dhāḥ ||

ā | yaḥ | te̱ | sa̱rpi̱ḥ-ā̱su̱te̱ | agne̍ | śam | asti̍ | dhāya̍se |
ā | e̱ṣu̱ | dyu̱mnam | u̱ta | śrava̍ḥ | ā | ci̱ttam | martye̍ṣu | dhā̱ḥ ||5.007.09||

5.007.10a iti̍ cin ma̱nyum a̱dhrija̱s tvādā̍ta̱m ā pa̱śuṁ da̍de |
5.007.10c ād a̍gne̱ apṛ̍ṇa̱to 'tri̍ḥ sāsahyā̱d dasyū̍n i̱ṣaḥ sā̍sahyā̱n nṝn ||

iti̍ | ci̱t | ma̱nyum | a̱dhrija̍ḥ | tvā-dā̍tam | ā | pa̱śum | da̱de̱ |
āt | a̱gne̱ | apṛ̍ṇataḥ | atri̍ḥ | sa̱sa̱hyā̱t | dasyū̍n | i̱ṣaḥ | sa̱sa̱hyā̱t | nṝn ||5.007.10||


5.008.01a tvām a̍gna ṛtā̱yava̱ḥ sam ī̍dhire pra̱tnam pra̱tnāsa̍ ū̱taye̍ sahaskṛta |
5.008.01c pu̱ru̱śca̱ndraṁ ya̍ja̱taṁ vi̱śvadhā̍yasa̱ṁ damū̍nasaṁ gṛ̱hapa̍ti̱ṁ vare̍ṇyam ||

tvām | a̱gne̱ | ṛ̱ta̱-yava̍ḥ | sam | ī̱dhi̱re̱ | pra̱tnam | pra̱tnāsa̍ḥ | ū̱taye̍ | sa̱ha̱ḥ-kṛ̱ta̱ |
pu̱ru̱-ca̱ndram | ya̱ja̱tam | vi̱śva-dhā̍yasam | damū̍nasam | gṛ̱ha-pa̍tim | vare̍ṇyam ||5.008.01||

5.008.02a tvām a̍gne̱ ati̍thim pū̱rvyaṁ viśa̍ḥ śo̱ciṣke̍śaṁ gṛ̱hapa̍ti̱ṁ ni ṣe̍dire |
5.008.02c bṛ̱hatke̍tum puru̱rūpa̍ṁ dhana̱spṛta̍ṁ su̱śarmā̍ṇa̱ṁ svava̍saṁ jara̱dviṣa̍m ||

tvām | a̱gne̱ | ati̍thim | pū̱rvyam | viśa̍ḥ | śo̱ciḥ-ke̍śam | gṛ̱ha-pa̍tim | ni | se̱di̱re̱ |
bṛ̱hat-ke̍tum | pu̱ru̱-rūpa̍m | dha̱na̱-spṛta̍m | su̱-śarmā̍ṇam | su̱-ava̍sam | ja̱ra̱t-viṣa̍m ||5.008.02||

5.008.03a tvām a̍gne̱ mānu̍ṣīr īḻate̱ viśo̍ hotrā̱vida̱ṁ vivi̍ciṁ ratna̱dhāta̍mam |
5.008.03c guhā̱ santa̍ṁ subhaga vi̱śvada̍rśataṁ tuviṣva̱ṇasa̍ṁ su̱yaja̍ṁ ghṛta̱śriya̍m ||

tvām | a̱gne̱ | mānu̍ṣīḥ | ī̱ḻa̱te̱ | viśa̍ḥ | ho̱trā̱-vida̍m | vivi̍cim | ra̱tna̱-dhāta̍mam |
guhā̍ | santa̍m | su̱-bha̱ga̱ | vi̱śva-da̍rśatam | tu̱vi̱-sva̱ṇasa̍m | su̱-yaja̍m | ghṛ̱ta̱-śriya̍m ||5.008.03||

5.008.04a tvām a̍gne dharṇa̱siṁ vi̱śvadhā̍ va̱yaṁ gī̱rbhir gṛ̱ṇanto̱ nama̱sopa̍ sedima |
5.008.04c sa no̍ juṣasva samidhā̱no a̍ṅgiro de̱vo marta̍sya ya̱śasā̍ sudī̱tibhi̍ḥ ||

tvām | a̱gne̱ | dha̱rṇa̱sim | vi̱śva-dhā̍ | va̱yam | gī̱ḥ-bhiḥ | gṛ̱ṇanta̍ḥ | nama̍sā | upa̍ | se̱di̱ma̱ |
saḥ | na̱ḥ | ju̱ṣa̱sva̱ | sa̱m-i̱dhā̱naḥ | a̱ṅgi̱ra̱ḥ | de̱vaḥ | marta̍sya | ya̱śasā̍ | su̱dī̱ti-bhi̍ḥ ||5.008.04||

5.008.05a tvam a̍gne puru̱rūpo̍ vi̱śe-vi̍śe̱ vayo̍ dadhāsi pra̱tnathā̍ puruṣṭuta |
5.008.05c pu̱rūṇy annā̱ saha̍sā̱ vi rā̍jasi̱ tviṣi̱ḥ sā te̍ titviṣā̱ṇasya̱ nādhṛṣe̍ ||

tvam | a̱gne̱ | pu̱ru̱-rūpa̍ḥ | vi̱śe-vi̍śe | vaya̍ḥ | da̱dhā̱si̱ | pra̱tna-thā̍ | pu̱ru̱stu̱ta̱ |
pu̱rūṇi̍ | annā̍ | saha̍sā | vi | rā̱ja̱si̱ | tviṣi̍ḥ | sā | te̱ | ti̱tvi̱ṣā̱ṇasya̍ | na | ā̱-dhṛṣe̍ ||5.008.05||

5.008.06a tvām a̍gne samidhā̱naṁ ya̍viṣṭhya de̱vā dū̱taṁ ca̍krire havya̱vāha̍nam |
5.008.06c u̱ru̱jraya̍saṁ ghṛ̱tayo̍ni̱m āhu̍taṁ tve̱ṣaṁ cakṣu̍r dadhire coda̱yanma̍ti ||

tvām | a̱gne̱ | sa̱m-i̱dhā̱nam | ya̱vi̱ṣṭhya̱ | de̱vāḥ | dū̱tam | ca̱kri̱re̱ | ha̱vya̱-vāha̍nam |
u̱ru̱-jraya̍sam | ghṛ̱ta-yo̍nim | ā-hu̍tam | tve̱ṣam | cakṣu̍ḥ | da̱dhi̱re̱ | co̱da̱yat-ma̍ti ||5.008.06||

5.008.07a tvām a̍gne pra̱diva̱ āhu̍taṁ ghṛ̱taiḥ su̍mnā̱yava̍ḥ suṣa̱midhā̱ sam ī̍dhire |
5.008.07c sa vā̍vṛdhā̱na oṣa̍dhībhir ukṣi̱to̱3̱̍ 'bhi jrayā̍ṁsi̱ pārthi̍vā̱ vi ti̍ṣṭhase ||

tvām | a̱gne̱ | pra̱-diva̍ḥ | ā-hu̍tam | ghṛ̱taiḥ | su̱mna̱-yava̍ḥ | su̱-sa̱midhā̍ | sam | ī̱dhi̱re̱ |
saḥ | va̱vṛ̱dhā̱naḥ | oṣa̍dhī-bhiḥ | u̱kṣi̱taḥ | a̱bhi | jrayā̍ṁsi | pārthi̍vā | vi | ti̱ṣṭha̱se̱ ||5.008.07||


5.009.01a tvām a̍gne ha̱viṣma̍nto de̱vam martā̍sa īḻate |
5.009.01c manye̍ tvā jā̱tave̍dasa̱ṁ sa ha̱vyā va̍kṣy ānu̱ṣak ||

tvām | a̱gne̱ | ha̱viṣma̍ntaḥ | de̱vam | martā̍saḥ | ī̱ḻa̱te̱ |
manye̍ | tvā̱ | jā̱ta-ve̍dasam | saḥ | ha̱vyā | va̱kṣi̱ | ā̱nu̱ṣak ||5.009.01||

5.009.02a a̱gnir hotā̱ dāsva̍ta̱ḥ kṣaya̍sya vṛ̱ktaba̍rhiṣaḥ |
5.009.02c saṁ ya̱jñāsa̱ś cara̍nti̱ yaṁ saṁ vājā̍saḥ śrava̱syava̍ḥ ||

a̱gniḥ | hotā̍ | dāsva̍taḥ | kṣaya̍sya | vṛ̱kta-ba̍rhiṣaḥ |
sam | ya̱jñāsa̍ḥ | cara̍nti | yam | sam | vājā̍saḥ | śra̱va̱syava̍ḥ ||5.009.02||

5.009.03a u̱ta sma̱ yaṁ śiśu̍ṁ yathā̱ nava̱ṁ jani̍ṣṭā̱raṇī̍ |
5.009.03c dha̱rtāra̱m mānu̍ṣīṇāṁ vi̱śām a̱gniṁ sva̍dhva̱ram ||

u̱ta | sma̱ | yam | śiśu̍m | yathā̍ | nava̍m | jani̍ṣṭa | a̱raṇī̱ iti̍ |
dha̱rtāra̍m | mānu̍ṣīṇām | vi̱śām | a̱gnim | su̱-a̱dhva̱ram ||5.009.03||

5.009.04a u̱ta sma̍ durgṛbhīyase pu̱tro na hvā̱ryāṇā̍m |
5.009.04c pu̱rū yo dagdhāsi̱ vanāgne̍ pa̱śur na yava̍se ||

u̱ta | sma̱ | du̱ḥ-gṛ̱bhī̱ya̱se̱ | pu̱traḥ | na | hvā̱ryāṇā̍m |
pu̱ru | yaḥ | dagdhā̍ | asi̍ | vanā̍ | agne̍ | pa̱śuḥ | na | yava̍se ||5.009.04||

5.009.05a adha̍ sma̱ yasyā̱rcaya̍ḥ sa̱myak sa̱ṁyanti̍ dhū̱mina̍ḥ |
5.009.05c yad ī̱m aha̍ tri̱to di̱vy upa̱ dhmāte̍va̱ dhama̍ti̱ śiśī̍te dhmā̱tarī̍ yathā ||

adha̍ | sma̱ | yasya̍ | a̱rcaya̍ḥ | sa̱myak | sa̱m-yanti̍ | dhū̱mina̍ḥ |
yat | ī̱m | aha̍ | tri̱taḥ | di̱vi | upa̍ | dhmātā̍-iva | dhama̍ti | śiśī̍te | dhmā̱tari̍ | ya̱thā̱ ||5.009.05||

5.009.06a tavā̱ham a̍gna ū̱tibhi̍r mi̱trasya̍ ca̱ praśa̍stibhiḥ |
5.009.06c dve̱ṣo̱yuto̱ na du̍ri̱tā tu̱ryāma̱ martyā̍nām ||

tava̍ | a̱ham | a̱gne̱ | ū̱ti-bhi̍ḥ | mi̱trasya̍ | ca̱ | praśa̍sti-bhiḥ |
dve̱ṣa̱ḥ-yuta̍ḥ | na | du̱ḥ-i̱tā | tu̱ryāma̍ | martyā̍nām ||5.009.06||

5.009.07a taṁ no̍ agne a̱bhī naro̍ ra̱yiṁ sa̍hasva̱ ā bha̍ra |
5.009.07c sa kṣe̍paya̱t sa po̍ṣaya̱d bhuva̱d vāja̍sya sā̱taya̍ u̱taidhi̍ pṛ̱tsu no̍ vṛ̱dhe ||

tat | na̱ḥ | a̱gne̱ | a̱bhi | nara̍ḥ | ra̱yim | sa̱ha̱sva̱ḥ | ā | bha̱ra̱ |
saḥ | kṣe̱pa̱ya̱t | saḥ | po̱ṣa̱ya̱t | bhuva̍t | vāja̍sya | sā̱taye̍ | u̱ta | e̱dhi̱ | pṛ̱tsu | na̱ḥ | vṛ̱dhe ||5.009.07||


5.010.01a agna̱ oji̍ṣṭha̱m ā bha̍ra dyu̱mnam a̱smabhya̍m adhrigo |
5.010.01c pra no̍ rā̱yā parī̍ṇasā̱ ratsi̱ vājā̍ya̱ panthā̍m ||

agne̍ | oji̍ṣṭham | ā | bha̱ra̱ | dyu̱mnam | a̱smabhya̍m | a̱dhri̱go̱ itya̍dhri-go |
pra | na̱ḥ | rā̱yā | parī̍ṇasā | ratsi̍ | vājā̍ya | panthā̍m ||5.010.01||

5.010.02a tvaṁ no̍ agne adbhuta̱ kratvā̱ dakṣa̍sya ma̱ṁhanā̍ |
5.010.02c tve a̍su̱rya1̱̍m āru̍hat krā̱ṇā mi̱tro na ya̱jñiya̍ḥ ||

tvam | na̱ḥ | a̱gne̱ | a̱dbhu̱ta̱ | kratvā̍ | dakṣa̍sya | ma̱ṁhanā̍ |
tve iti̍ | a̱su̱rya̍m | ā | a̱ru̱ha̱t | krā̱ṇā | mi̱traḥ | na | ya̱jñiya̍ḥ ||5.010.02||

5.010.03a tvaṁ no̍ agna eṣā̱ṁ gaya̍m pu̱ṣṭiṁ ca̍ vardhaya |
5.010.03c ye stome̍bhi̱ḥ pra sū̱rayo̱ naro̍ ma̱ghāny ā̍na̱śuḥ ||

tvam | na̱ḥ | a̱gne̱ | e̱ṣā̱m | gaya̍m | pu̱ṣṭim | ca̱ | va̱rdha̱ya̱ |
ye | stome̍bhiḥ | pra | sū̱raya̍ḥ | nara̍ḥ | ma̱ghāni̍ | ā̱na̱śuḥ ||5.010.03||

5.010.04a ye a̍gne candra te̱ gira̍ḥ śu̱mbhanty aśva̍rādhasaḥ |
5.010.04c śuṣme̍bhiḥ śu̱ṣmiṇo̱ naro̍ di̱vaś ci̱d yeṣā̍m bṛ̱hat su̍kī̱rtir bodha̍ti̱ tmanā̍ ||

ye | a̱gne̱ | ca̱ndra̱ | te̱ | gira̍ḥ | śu̱mbhanti̍ | aśva̍-rādhasaḥ |
śuṣme̍bhiḥ | śu̱ṣmiṇa̍ḥ | nara̍ḥ | di̱vaḥ | ci̱t | yeṣā̍m | bṛ̱hat | su̱-kī̱rtiḥ | bodha̍ti | tmanā̍ ||5.010.04||

5.010.05a tava̱ tye a̍gne a̱rcayo̱ bhrāja̍nto yanti dhṛṣṇu̱yā |
5.010.05c pari̍jmāno̱ na vi̱dyuta̍ḥ svā̱no ratho̱ na vā̍ja̱yuḥ ||

tava̍ | tye | a̱gne̱ | a̱rcaya̍ḥ | bhrāja̍ntaḥ | ya̱nti̱ | dhṛ̱ṣṇu̱-yā |
pari̍-jmānaḥ | na | vi̱-dyuta̍ḥ | svā̱naḥ | ratha̍ḥ | na | vā̱ja̱yuḥ ||5.010.05||

5.010.06a nū no̍ agna ū̱taye̍ sa̱bādha̍saś ca rā̱taye̍ |
5.010.06c a̱smākā̍saś ca sū̱rayo̱ viśvā̱ āśā̍s tarī̱ṣaṇi̍ ||

nu | na̱ḥ | a̱gne̱ | ū̱taye̍ | sa̱-bādha̍saḥ | ca̱ | rā̱taye̍ |
a̱smākā̍saḥ | ca̱ | sū̱raya̍ḥ | viśvā̍ḥ | āsā̍ḥ | ta̱rī̱ṣaṇi̍ ||5.010.06||

5.010.07a tvaṁ no̍ agne aṅgiraḥ stu̱taḥ stavā̍na̱ ā bha̍ra |
5.010.07c hota̍r vibhvā̱saha̍ṁ ra̱yiṁ sto̱tṛbhya̱ḥ stava̍se ca na u̱taidhi̍ pṛ̱tsu no̍ vṛ̱dhe ||

tvam | na̱ḥ | a̱gne̱ | a̱ṅgi̱ra̱ḥ | stu̱taḥ | stavā̍naḥ | ā | bha̱ra̱ |
hota̍ḥ | vi̱bhva̱-saha̍m | ra̱yim | sto̱tṛ-bhya̍ḥ | stava̍se | ca̱ | na̱ḥ | u̱ta | e̱dhi̱ | pṛ̱t-su | na̱ḥ | vṛ̱dhe ||5.010.07||


5.011.01a jana̍sya go̱pā a̍janiṣṭa̱ jāgṛ̍vir a̱gniḥ su̱dakṣa̍ḥ suvi̱tāya̱ navya̍se |
5.011.01c ghṛ̱tapra̍tīko bṛha̱tā di̍vi̱spṛśā̍ dyu̱mad vi bhā̍ti bhara̱tebhya̱ḥ śuci̍ḥ ||

jana̍sya | go̱pāḥ | a̱ja̱ni̱ṣṭa̱ | jāgṛ̍viḥ | a̱gniḥ | su̱-dakṣa̍ḥ | su̱vi̱tāya̍ | navya̍se |
ghṛ̱ta-pra̍tīkaḥ | bṛ̱ha̱tā | di̱vi̱-spṛśā̍ | dyu̱-mat | vi | bhā̱ti̱ | bha̱ra̱tebhya̍ḥ | śuci̍ḥ ||5.011.01||

5.011.02a ya̱jñasya̍ ke̱tum pra̍tha̱mam pu̱rohi̍tam a̱gniṁ nara̍s triṣadha̱sthe sam ī̍dhire |
5.011.02c indre̍ṇa de̱vaiḥ sa̱ratha̱ṁ sa ba̱rhiṣi̱ sīda̱n ni hotā̍ ya̱jathā̍ya su̱kratu̍ḥ ||

ya̱jñasya̍ | ke̱tum | pra̱tha̱mam | pu̱raḥ-hi̍tam | a̱gnim | nara̍ḥ | tri̱-sa̱dha̱sthe | sam | ī̱dhi̱re̱ |
indre̍ṇa | de̱vaiḥ | sa̱ratha̍m | saḥ | ba̱rhiṣi̍ | sīda̍t | ni | hotā̍ | ya̱jathā̍ya | su̱-kratu̍ḥ ||5.011.02||

5.011.03a asa̍mmṛṣṭo jāyase mā̱troḥ śuci̍r ma̱ndraḥ ka̱vir ud a̍tiṣṭho vi̱vasva̍taḥ |
5.011.03c ghṛ̱tena̍ tvāvardhayann agna āhuta dhū̱mas te̍ ke̱tur a̍bhavad di̱vi śri̱taḥ ||

asa̍m-mṛṣṭaḥ | jā̱ya̱se̱ | mā̱troḥ | śuci̍ḥ | ma̱ndraḥ | ka̱viḥ | ut | a̱ti̱ṣṭha̱ḥ | vi̱vasva̍taḥ |
ghṛ̱tena̍ | tvā̱ | a̱va̱rdha̱ya̱n | a̱gne̱ | ā̱-hu̱ta̱ | dhū̱maḥ | te̱ | ke̱tuḥ | a̱bha̱va̱t | di̱vi | śṛi̱taḥ ||5.011.03||

5.011.04a a̱gnir no̍ ya̱jñam upa̍ vetu sādhu̱yāgniṁ naro̱ vi bha̍rante gṛ̱he-gṛ̍he |
5.011.04c a̱gnir dū̱to a̍bhavad dhavya̱vāha̍no̱ 'gniṁ vṛ̍ṇā̱nā vṛ̍ṇate ka̱vikra̍tum ||

a̱gniḥ | na̱ḥ | ya̱jñam | upa̍ | ve̱tu̱ | sā̱dhu̱-yā | a̱gnim | nara̍ḥ | vi | bha̱ra̱nte̱ | gṛ̱he-gṛ̍he |
a̱gniḥ | dū̱taḥ | a̱bha̱va̱t | ha̱vya̱-vāha̍naḥ | a̱gnim | vṛ̱ṇā̱nāḥ | vṛ̱ṇa̱te̱ | ka̱vi-kra̍tum ||5.011.04||

5.011.05a tubhye̱dam a̍gne̱ madhu̍mattama̱ṁ vaca̱s tubhya̍m manī̱ṣā i̱yam a̍stu̱ śaṁ hṛ̱de |
5.011.05c tvāṁ gira̱ḥ sindhu̍m ivā̱vanī̍r ma̱hīr ā pṛ̍ṇanti̱ śava̍sā va̱rdhaya̍nti ca ||

tubhya̍ | i̱dam | a̱gne̱ | madhu̍mat-tamam | vaca̍ḥ | tubhya̍m | ma̱nī̱ṣā | i̱yam | a̱stu̱ | śam | hṛ̱de |
tvām | gira̍ḥ | sindhu̍m-iva | a̱vanī̍ḥ | ma̱hīḥ | ā | pṛ̱ṇa̱nti̱ | śava̍sā | va̱rdhaya̍nti | ca̱ ||5.011.05||

5.011.06a tvām a̍gne̱ aṅgi̍raso̱ guhā̍ hi̱tam anv a̍vindañ chiśriyā̱ṇaṁ vane̍-vane |
5.011.06c sa jā̍yase ma̱thyamā̍na̱ḥ saho̍ ma̱hat tvām ā̍hu̱ḥ saha̍sas pu̱tram a̍ṅgiraḥ ||

tvām | a̱gne̱ | aṅgi̍rasaḥ | guhā̍ | hi̱tam | anu̍ | a̱vi̱nda̱n | śi̱śri̱yā̱ṇam | vane̍-vane |
saḥ | jā̱ya̱se̱ | ma̱thyamā̍naḥ | saha̍ḥ | ma̱hat | tvām | ā̍hu̍ḥ | saha̍saḥ | pu̱tram | a̱ṅgi̱ra̱ḥ ||5.011.06||


5.012.01a prāgnaye̍ bṛha̱te ya̱jñiyā̍ya ṛ̱tasya̱ vṛṣṇe̱ asu̍rāya̱ manma̍ |
5.012.01c ghṛ̱taṁ na ya̱jña ā̱sye̱3̱̍ supū̍ta̱ṁ gira̍m bhare vṛṣa̱bhāya̍ pratī̱cīm ||

pra | a̱gnaye̍ | bṛ̱ha̱te | ya̱jñiyā̍ya | ṛ̱tasya̍ | vṛṣṇe̍ | asu̍rāya | manma̍ |
ghṛ̱tam | na | ya̱jñe | ā̱sye̍ | su-pū̍tam | gira̍m | bha̱re̱ | vṛ̱ṣa̱bhāya̍ | pra̱tī̱cīm ||5.012.01||

5.012.02a ṛ̱taṁ ci̍kitva ṛ̱tam ic ci̍kiddhy ṛ̱tasya̱ dhārā̱ anu̍ tṛndhi pū̱rvīḥ |
5.012.02c nāhaṁ yā̱tuṁ saha̍sā̱ na dva̱yena̍ ṛ̱taṁ sa̍pāmy aru̱ṣasya̱ vṛṣṇa̍ḥ ||

ṛ̱tam | ci̱ki̱tva̱ḥ | ṛ̱tam | it | ci̱ki̱ddhi̱ | ṛ̱tasya̍ | dhārā̍ḥ | anu̍ | tṛ̱ndhi̱ | pū̱rvīḥ |
na | a̱ham | yā̱tum | saha̍sā | na | dva̱yena̍ | ṛ̱tam | sa̱pā̱mi̱ | a̱ru̱ṣasya̍ | vṛṣṇa̍ḥ ||5.012.02||

5.012.03a kayā̍ no agna ṛ̱taya̍nn ṛ̱tena̱ bhuvo̱ nave̍dā u̱catha̍sya̱ navya̍ḥ |
5.012.03c vedā̍ me de̱va ṛ̍tu̱pā ṛ̍tū̱nāṁ nāham pati̍ṁ sani̱tur a̱sya rā̱yaḥ ||

kayā̍ | na̱ḥ | a̱gne̱ | ṛ̱taya̍n | ṛ̱tena̍ | bhuva̍ḥ | nave̍dāḥ | u̱catha̍sya | navya̍ḥ |
veda̍ | me̱ | de̱vaḥ | ṛ̱tu̱-pāḥ | ṛ̱tū̱nām | na | a̱ham | pati̍m | sa̱ni̱tu̱ḥ | a̱sya | rā̱yaḥ ||5.012.03||

5.012.04a ke te̍ agne ri̱pave̱ bandha̍nāsa̱ḥ ke pā̱yava̍ḥ saniṣanta dyu̱manta̍ḥ |
5.012.04c ke dhā̱sim a̍gne̱ anṛ̍tasya pānti̱ ka āsa̍to̱ vaca̍saḥ santi go̱pāḥ ||

ke | te̱ | a̱gne̱ | ri̱pave̍ | bandha̍nāsaḥ | ke | pā̱yava̍ḥ | sa̱ni̱ṣa̱nta̱ | dyu̱-manta̍ḥ |
ke | dhā̱sim | a̱gne̱ | anṛ̍tasya | pā̱nti̱ | ke | āsa̍taḥ | vaca̍saḥ | sa̱nti̱ | gopāḥ ||5.012.04||

5.012.05a sakhā̍yas te̱ viṣu̍ṇā agna e̱te śi̱vāsa̱ḥ santo̱ aśi̍vā abhūvan |
5.012.05c adhū̍rṣata sva̱yam e̱te vaco̍bhir ṛjūya̱te vṛ̍ji̱nāni̍ bru̱vanta̍ḥ ||

sakhā̍yaḥ | te̱ | viṣu̍ṇāḥ | a̱gne̱ | e̱te | śi̱vāsa̍ḥ | santa̍ḥ | aśi̍vāḥ | a̱bhū̱va̱n |
adhū̍rṣata | sva̱yam | e̱te | vaca̍ḥ-bhiḥ | ṛ̱ju̱-ya̱te | vṛ̱ji̱nāni̍ | bru̱vanta̍ḥ ||5.012.05||

5.012.06a yas te̍ agne̱ nama̍sā ya̱jñam īṭṭa̍ ṛ̱taṁ sa pā̍ty aru̱ṣasya̱ vṛṣṇa̍ḥ |
5.012.06c tasya̱ kṣaya̍ḥ pṛ̱thur ā sā̱dhur e̍tu pra̱sarsrā̍ṇasya̱ nahu̍ṣasya̱ śeṣa̍ḥ ||

yaḥ | te̱ | a̱gne̱ | nama̍sā | ya̱jñam | īṭṭe̍ | ṛ̱tam | saḥ | pā̱ti̱ | a̱ru̱ṣasya̍ | vṛṣṇa̍ḥ |
tasya̍ | kṣaya̍ḥ | pṛ̱thuḥ | ā | sā̱dhuḥ | e̱tu̱ | pra̱-sarsrā̍ṇasya | nahu̍ṣasya | śeṣa̍ḥ ||5.012.06||


5.013.01a arca̍ntas tvā havāma̱he 'rca̍nta̱ḥ sam i̍dhīmahi |
5.013.01c agne̱ arca̍nta ū̱taye̍ ||

arca̍ntaḥ | tvā̱ | ha̱vā̱ma̱he̱ | arca̍ntaḥ | sam | i̱dhī̱ma̱hi̱ |
agne̍ | arca̍ntaḥ | ū̱taye ||5.013.01||

5.013.02a a̱gneḥ stoma̍m manāmahe si̱dhram a̱dya di̍vi̱spṛśa̍ḥ |
5.013.02c de̱vasya̍ draviṇa̱syava̍ḥ ||

a̱gneḥ | stoma̍m | ma̱nā̱ma̱he̱ | si̱dhram | a̱dya | di̱vi̱-spṛśa̍ḥ |
de̱vasya̍ | dra̱vi̱ṇa̱syava̍ḥ ||5.013.02||

5.013.03a a̱gnir ju̍ṣata no̱ giro̱ hotā̱ yo mānu̍ṣe̱ṣv ā |
5.013.03c sa ya̍kṣa̱d daivya̱ṁ jana̍m ||

a̱gniḥ | ju̱ṣa̱ta̱ | na̱ḥ | gira̍ḥ | hotā̍ | yaḥ | mānu̍ṣeṣu | ā |
saḥ | ya̱kṣa̱t | daivya̍m | jana̍m ||5.013.03||

5.013.04a tvam a̍gne sa̱prathā̍ asi̱ juṣṭo̱ hotā̱ vare̍ṇyaḥ |
5.013.04c tvayā̍ ya̱jñaṁ vi ta̍nvate ||

tvam | a̱gne̱ | sa̱-prathā̍ḥ | a̱si̱ | juṣṭa̍ḥ | hotā̍ | vare̍ṇyaḥ |
tvayā̍ | ya̱jñam | vi | ta̱nva̱te̱ ||5.013.04||

5.013.05a tvām a̍gne vāja̱sāta̍ma̱ṁ viprā̍ vardhanti̱ suṣṭu̍tam |
5.013.05c sa no̍ rāsva su̱vīrya̍m ||

tvām | a̱gne̱ | vā̱ja̱-sāta̍mam | viprā̍ḥ | va̱rdha̱nti̱ | su-stu̍tam |
saḥ | na̱ḥ | rā̱sva̱ | su̱-vīrya̍m ||5.013.05||

5.013.06a agne̍ ne̱mir a̱rām̐ i̍va de̱vām̐s tvam pa̍ri̱bhūr a̍si |
5.013.06c ā rādha̍ś ci̱tram ṛ̍ñjase ||

agne̍ | ne̱miḥ | a̱rān-i̍va | de̱vān | tvam | pa̱ri̱-bhūḥ | a̱si̱ |
ā | rādha̍ḥ | ci̱tram | ṛ̱ñja̱se̱ ||5.013.06||


5.014.01a a̱gniṁ stome̍na bodhaya samidhā̱no ama̍rtyam |
5.014.01c ha̱vyā de̱veṣu̍ no dadhat ||

a̱gnim | stome̍na | bo̱dha̱ya̱ | sa̱m-i̱dhā̱naḥ | ama̍rtyam |
ha̱vyā | de̱veṣu̍ | na̱ḥ | da̱dha̱t ||5.014.01||

5.014.02a tam a̍dhva̱reṣv ī̍ḻate de̱vam martā̱ ama̍rtyam |
5.014.02c yaji̍ṣṭha̱m mānu̍ṣe̱ jane̍ ||

tam | a̱dhva̱reṣu̍ | ī̱ḻa̱te̱ | de̱vam | martā̍ḥ | ama̍rtyam |
yaji̍ṣṭham | mānu̍ṣe | jane̍ ||5.014.02||

5.014.03a taṁ hi śaśva̍nta̱ īḻa̍te sru̱cā de̱vaṁ ghṛ̍ta̱ścutā̍ |
5.014.03c a̱gniṁ ha̱vyāya̱ voḻha̍ve ||

tam | hi | śaśva̍ntaḥ | īḻa̍te | sru̱cā | de̱vam | ghṛ̱ta̱-ścutā̍ |
a̱gnim | ha̱vyāya̍ | voḻha̍ve ||5.014.03||

5.014.04a a̱gnir jā̱to a̍rocata̱ ghnan dasyū̱ñ jyoti̍ṣā̱ tama̍ḥ |
5.014.04c avi̍nda̱d gā a̱paḥ sva̍ḥ ||

a̱gniḥ | jā̱taḥ | a̱ro̱ca̱ta̱ | ghnan | dasyū̍n | jyoti̍ṣā | tama̍ḥ |
avi̍ndat | gāḥ | a̱paḥ | sva̍ḥ ||5.014.04||

5.014.05a a̱gnim ī̱ḻenya̍ṁ ka̱viṁ ghṛ̱tapṛ̍ṣṭhaṁ saparyata |
5.014.05c vetu̍ me śṛ̱ṇava̱d dhava̍m ||

a̱gnim | ī̱ḻenya̍m | ka̱vim | ghṛ̱ta-pṛ̍ṣṭham | sa̱pa̱rya̱ta̱ |
vetu̍ | me̱ | śṛ̱ṇava̍t | hava̍m ||5.014.05||

5.014.06a a̱gniṁ ghṛ̱tena̍ vāvṛdhu̱ḥ stome̍bhir vi̱śvaca̍rṣaṇim |
5.014.06c svā̱dhībhi̍r vaca̱syubhi̍ḥ ||

a̱gnim | ghṛ̱tena̍ | va̱vṛ̱dhu̱ḥ | stome̍bhiḥ | vi̱śva-ca̍rṣaṇim |
su̱-ā̱dhībhi̍ḥ | va̱ca̱syu-bhi̍ḥ ||5.014.06||


5.015.01a pra ve̱dhase̍ ka̱vaye̱ vedyā̍ya̱ gira̍m bhare ya̱śase̍ pū̱rvyāya̍ |
5.015.01c ghṛ̱tapra̍satto̱ asu̍raḥ su̱śevo̍ rā̱yo dha̱rtā dha̱ruṇo̱ vasvo̍ a̱gniḥ ||

pra | ve̱dhase̍ | ka̱vaye̍ | vedyā̍ya | gira̍m | bha̱re̱ | ya̱śase̍ | pū̱rvyāya̍ |
ghṛ̱ta-pra̍sattaḥ | asu̍raḥ | su̱-śeva̍ḥ | rā̱yaḥ | dha̱rtā | dha̱ruṇa̍ḥ | vasva̍ḥ | a̱gniḥ ||5.015.01||

5.015.02a ṛ̱tena̍ ṛ̱taṁ dha̱ruṇa̍ṁ dhārayanta ya̱jñasya̍ śā̱ke pa̍ra̱me vyo̍man |
5.015.02c di̱vo dharma̍n dha̱ruṇe̍ se̱duṣo̱ nṝñ jā̱tair ajā̍tām̐ a̱bhi ye na̍na̱kṣuḥ ||

ṛ̱tena̍ | ṛ̱tam | dha̱ruṇa̍m | dhā̱ra̱ya̱nta̱ | ya̱jñasya̍ | śo̱ke | pa̱ra̱me | vi-o̍man |
di̱vaḥ | dharma̍n | dha̱ruṇe̍ | se̱duṣa̍ḥ | nṝn | jā̱taiḥ | ajā̍tān | a̱bhi | ye | na̱na̱kṣuḥ ||5.015.02||

5.015.03a a̱ṅho̱yuva̍s ta̱nva̍s tanvate̱ vi vayo̍ ma̱had du̱ṣṭara̍m pū̱rvyāya̍ |
5.015.03c sa sa̱ṁvato̱ nava̍jātas tuturyāt si̱ṅhaṁ na kru̱ddham a̱bhita̱ḥ pari̍ ṣṭhuḥ ||

a̱ṁha̱ḥ-yuva̍ḥ | ta̱nva̍ḥ | ta̱nva̱te̱ | vi | vaya̍ḥ | ma̱hat | du̱stara̍m | pū̱rvyāya̍ |
saḥ | sa̱m-vata̍ḥ | nava̍-jātaḥ | tu̱tu̱ryā̱t | si̱ṁham | na | kru̱ddham | a̱bhita̍ḥ | pari̍ | sthuḥ ||5.015.03||

5.015.04a mā̱teva̱ yad bhara̍se paprathā̱no jana̍ṁ-jana̱ṁ dhāya̍se̱ cakṣa̍se ca |
5.015.04c vayo̍-vayo jarase̱ yad dadhā̍na̱ḥ pari̱ tmanā̱ viṣu̍rūpo jigāsi ||

mā̱tā-i̍va | yat | bhara̍se | pa̱pra̱thā̱naḥ | jana̍m-janam | dhāya̍se | cakṣa̍se | ca̱ |
vaya̍ḥ-vayaḥ | ja̱ra̱se̱ | yat | dadhā̍naḥ | pari̍ | tmanā̍ | viṣu̍-rūpaḥ | ji̱gā̱si̱ ||5.015.04||

5.015.05a vājo̱ nu te̱ śava̍sas pā̱tv anta̍m u̱ruṁ dogha̍ṁ dha̱ruṇa̍ṁ deva rā̱yaḥ |
5.015.05c pa̱daṁ na tā̱yur guhā̱ dadhā̍no ma̱ho rā̱ye ci̱taya̱nn atri̍m aspaḥ ||

vāja̍ḥ | nu | te̱ | śava̍saḥ | pā̱tu̱ | anta̍m | u̱rum | dogha̍m | dha̱ruṇa̍m | de̱va̱ | rā̱yaḥ |
pa̱dam | na | tā̱yuḥ | guhā̍ | dadhā̍naḥ | ma̱haḥ | rā̱ye | ci̱taya̍n | atri̍m | a̱spa̱ritya̍spaḥ ||5.015.05||


5.016.01a bṛ̱had vayo̱ hi bhā̱nave 'rcā̍ de̱vāyā̱gnaye̍ |
5.016.01c yam mi̱traṁ na praśa̍stibhi̱r martā̍so dadhi̱re pu̱raḥ ||

bṛ̱hat | vaya̍ḥ | hi | bhā̱nave̍ | arca̍ | de̱vāya̍ | a̱gnaye̍ |
yam | mi̱tram | na | praśa̍sti-bhiḥ | martā̍saḥ | da̱dhi̱re | pu̱raḥ ||5.016.01||

5.016.02a sa hi dyubhi̱r janā̍nā̱ṁ hotā̱ dakṣa̍sya bā̱hvoḥ |
5.016.02c vi ha̱vyam a̱gnir ā̍nu̱ṣag bhago̱ na vāra̍m ṛṇvati ||

saḥ | hi | dyu-bhi̍ḥ | janā̍nām | hotā̍ | dakṣa̍sya | bā̱hvoḥ |
vi | ha̱vyam | a̱gniḥ | ā̱nu̱ṣak | bhaga̍ḥ | na | vāra̍m | ṛ̱ṇva̱ti̱ ||5.016.02||

5.016.03a a̱sya stome̍ ma̱ghona̍ḥ sa̱khye vṛ̱ddhaśo̍ciṣaḥ |
5.016.03c viśvā̱ yasmi̍n tuvi̱ṣvaṇi̱ sam a̱rye śuṣma̍m āda̱dhuḥ ||

a̱sya | stome̍ | ma̱ghona̍ḥ | sa̱khye | vṛ̱ddha-śo̍ciṣaḥ |
viśvā̍ | yasmi̍n | tu̱vi̱-svaṇi̍ | sam | a̱rye | śuṣma̍m | ā̱-da̱dhuḥ ||5.016.03||

5.016.04a adhā̱ hy a̍gna eṣāṁ su̱vīrya̍sya ma̱ṁhanā̍ |
5.016.04c tam id ya̱hvaṁ na roda̍sī̱ pari̱ śravo̍ babhūvatuḥ ||

adha̍ | hi | a̱gne̱ | e̱ṣā̱m | su̱-vīrya̍sya | ma̱ṁhanā̍ |
tam | it | ya̱hvam | na | roda̍sī̱ iti̍ | pari̍ | śrava̍ḥ | ba̱bhū̱va̱tu̱ḥ ||5.016.04||

5.016.05a nū na̱ ehi̱ vārya̱m agne̍ gṛṇā̱na ā bha̍ra |
5.016.05c ye va̱yaṁ ye ca̍ sū̱raya̍ḥ sva̱sti dhāma̍he̱ saco̱taidhi̍ pṛ̱tsu no̍ vṛ̱dhe ||

nu | na̱ḥ | ā | i̱hi̱ | vārya̍m | agne̍ | gṛ̱ṇā̱naḥ | ā | bha̱ra̱ |
ye | va̱yam | ye | ca̱ | sū̱raya̍ḥ | sva̱sti | dhāma̍he | sacā̍ | u̱ta | e̱dhi̱ | pṛ̱t-su | na̱ḥ | vṛ̱dhe ||5.016.05||


5.017.01a ā ya̱jñair de̍va̱ martya̍ i̱tthā tavyā̍ṁsam ū̱taye̍ |
5.017.01c a̱gniṁ kṛ̱te sva̍dhva̱re pū̱rur ī̍ḻī̱tāva̍se ||

ā | ya̱jñaiḥ | de̱va̱ | martya̍ḥ | i̱tthā | tavyā̍ṁsam | ū̱taye̍ |
a̱gnim | kṛ̱te | su̱-a̱dhva̱re | pū̱ruḥ | ī̱ḻī̱ta̱ | ava̍se ||5.017.01||

5.017.02a asya̱ hi svaya̍śastara ā̱sā vi̍dharma̱n manya̍se |
5.017.02c taṁ nāka̍ṁ ci̱traśo̍ciṣam ma̱ndram pa̱ro ma̍nī̱ṣayā̍ ||

asya̍ | hi | svaya̍śaḥ-taraḥ | ā̱sā | vi̱-dha̱rma̱n | manya̍se |
tam | nāka̍m | ci̱tra-śo̍ciṣam | ma̱ndram | pa̱raḥ | ma̱nī̱ṣayā̍ ||5.017.02||

5.017.03a a̱sya vāsā u̍ a̱rciṣā̱ ya āyu̍kta tu̱jā gi̱rā |
5.017.03c di̱vo na yasya̱ reta̍sā bṛ̱hac choca̍nty a̱rcaya̍ḥ ||

a̱sya | vai | a̱sau | ū̱m̐ iti̍ | a̱rciṣā̍ | yaḥ | ayu̍kta | tu̱jā | gi̱rā |
di̱vaḥ | na | yasya̍ | reta̍sā | bṛ̱hat | śoca̍nti | a̱rcaya̍ḥ ||5.017.03||

5.017.04a a̱sya kratvā̱ vice̍taso da̱smasya̱ vasu̱ ratha̱ ā |
5.017.04c adhā̱ viśvā̍su̱ havyo̱ 'gnir vi̱kṣu pra śa̍syate ||

a̱sya | kratvā̍ | vi-ce̍tasaḥ | da̱smasya̍ | vasu̍ | rathe̍ | ā |
adha̍ | viśvā̍su | havya̍ḥ | a̱gniḥ | vi̱kṣu | pra | śa̱sya̱te̱ ||5.017.04||

5.017.05a nū na̱ id dhi vārya̍m ā̱sā sa̍canta sū̱raya̍ḥ |
5.017.05c ūrjo̍ napād a̱bhiṣṭa̍ye pā̱hi śa̱gdhi sva̱staya̍ u̱taidhi̍ pṛ̱tsu no̍ vṛ̱dhe ||

nu | na̱ḥ | it | hi | vārya̍m | ā̱sā | sa̱ca̱nta̱ | sū̱raya̍ḥ |
ūrja̍ḥ | na̱pā̱t | a̱bhiṣṭa̍ye | pā̱hi | śa̱gdhi | sva̱staye̍ | u̱ta | e̱dhi̱ | pṛ̱t-su | na̱ḥ | vṛ̱dhe ||5.017.05||


5.018.01a prā̱tar a̱gniḥ pu̍rupri̱yo vi̱śaḥ sta̍ve̱tāti̍thiḥ |
5.018.01c viśvā̍ni̱ yo ama̍rtyo ha̱vyā marte̍ṣu̱ raṇya̍ti ||

prā̱taḥ | a̱gniḥ | pu̱ru̱-pri̱yaḥ | vi̱śaḥ | sta̱ve̱ta̱ | ati̍thiḥ |
viśvā̍ni | yaḥ | ama̍rtyaḥ | ha̱vyā | marte̍ṣu | raṇya̍ti ||5.018.01||

5.018.02a dvi̱tāya̍ mṛ̱ktavā̍hase̱ svasya̱ dakṣa̍sya ma̱ṁhanā̍ |
5.018.02c indu̱ṁ sa dha̍tta ānu̱ṣak sto̱tā ci̍t te amartya ||

dvi̱tāya̍ | mṛ̱kta-vā̍hase | svasya̍ | dakṣa̍sya | ma̱ṁhanā̍ |
indu̱m | saḥ | dha̱tte̱ | ā̱nu̱ṣak | sto̱tā | ci̱t | te̱ | a̱ma̱rtya̱ ||5.018.02||

5.018.03a taṁ vo̍ dī̱rghāyu̍śociṣaṁ gi̱rā hu̍ve ma̱ghonā̍m |
5.018.03c ari̍ṣṭo̱ yeṣā̱ṁ ratho̱ vy a̍śvadāva̱nn īya̍te ||

tam | va̱ḥ | dī̱rghāyu̍-śociṣam | gi̱rā | hu̱ve̱ | ma̱ghonā̍m |
ari̍ṣṭaḥ | yeṣā̍m | ratha̍ḥ | vi | a̱śva̱-dā̱va̱n | īya̍te ||5.018.03||

5.018.04a ci̱trā vā̱ yeṣu̱ dīdhi̍tir ā̱sann u̱kthā pānti̱ ye |
5.018.04b stī̱rṇam ba̱rhiḥ sva̍rṇare̱ śravā̍ṁsi dadhire̱ pari̍ ||

ci̱trā | vā̱ | yeṣu̍ | dīdhi̍tiḥ | ā̱san | u̱kthā | pānti̍ | ye |
stī̱rṇam | ba̱rhiḥ | sva̍ḥ-nare | śravā̍ṁsi | da̱dhi̱re̱ | pari̍ ||5.018.04||

5.018.05a ye me̍ pañcā̱śata̍ṁ da̱dur aśvā̍nāṁ sa̱dhastu̍ti |
5.018.05b dyu̱mad a̍gne̱ mahi̱ śravo̍ bṛ̱hat kṛ̍dhi ma̱ghonā̍ṁ nṛ̱vad a̍mṛta nṛ̱ṇām ||

ye | me̱ | pa̱ñcā̱śata̍m | da̱duḥ | aśvā̍nām | sa̱dha-stu̍ti |
dyu̱-mat | a̱gne̱ | mahi̍ | śrava̍ḥ | bṛ̱hat | kṛ̱dhi̱ | ma̱ghonā̍m | nṛ̱-vat | a̱mṛ̱ta̱ | nṛ̱ṇām ||5.018.05||


5.019.01a a̱bhy a̍va̱sthāḥ pra jā̍yante̱ pra va̱vrer va̱vriś ci̍keta |
5.019.01c u̱pasthe̍ mā̱tur vi ca̍ṣṭe ||

a̱bhi | a̱va̱-sthāḥ | pra | jā̱ya̱nte̱ | pra | va̱vreḥ | va̱vriḥ | ci̱ke̱ta̱ |
u̱pa-sthe̍ | mā̱tuḥ | vi | ca̱ṣṭe̱ ||5.019.01||

5.019.02a ju̱hu̱re vi ci̱taya̱nto 'ni̍miṣaṁ nṛ̱mṇam pā̍nti |
5.019.02c ā dṛ̱ḻhām pura̍ṁ viviśuḥ ||

ju̱hu̱re | vi | ci̱taya̍ntaḥ | ani̍-miṣam | nṛ̱mṇam | pā̱nti̱ |
ā | dṛ̱ḻhām | pura̍m | vi̱vi̱śu̱ḥ ||5.019.02||

5.019.03a ā śvai̍tre̱yasya̍ ja̱ntavo̍ dyu̱mad va̍rdhanta kṛ̱ṣṭaya̍ḥ |
5.019.03b ni̱ṣkagrī̍vo bṛ̱hadu̍ktha e̱nā madhvā̱ na vā̍ja̱yuḥ ||

ā | śvai̱tre̱yasya̍ | ja̱ntava̍ḥ | dyu̱-mat | va̱rdha̱nta̱ | kṛ̱ṣṭaya̍ḥ |
ni̱ṣka-grī̍vaḥ | bṛ̱hat-u̍kthaḥ | e̱nā | madhvā̍ | na | vā̱ja̱-yuḥ ||5.019.03||

5.019.04a pri̱yaṁ du̱gdhaṁ na kāmya̱m ajā̍mi jā̱myoḥ sacā̍ |
5.019.04c gha̱rmo na vāja̍jaṭha̱ro 'da̍bdha̱ḥ śaśva̍to̱ dabha̍ḥ ||

pri̱yam | du̱gdham | na | kāmya̍m | ajā̍mi | jā̱myoḥ | sacā̍ |
gha̱rmaḥ | na | vāja̍-jaṭharaḥ | ada̍bdhaḥ | śaśva̍taḥ | dabha̍ḥ ||5.019.04||

5.019.05a krīḻa̍n no raśma̱ ā bhu̍va̱ḥ sam bhasma̍nā vā̱yunā̱ vevi̍dānaḥ |
5.019.05b tā a̍sya san dhṛ̱ṣajo̱ na ti̱gmāḥ susa̍ṁśitā va̱kṣyo̍ vakṣaṇe̱sthāḥ ||

krīḻa̍n | na̱ḥ | ra̱śme̱ | ā | bhu̱va̱ḥ | sam | bhasma̍nā | vā̱yunā̍ | vevi̍dānaḥ |
tāḥ | a̱sya̱ | san | dhṛ̱ṣaja̍ḥ | na | ti̱gmāḥ | su-sa̍ṁśitāḥ | va̱kṣya̍ḥ | va̱kṣa̱ṇe̱-sthāḥ ||5.019.05||


5.020.01a yam a̍gne vājasātama̱ tvaṁ ci̱n manya̍se ra̱yim |
5.020.01c taṁ no̍ gī̱rbhiḥ śra̱vāyya̍ṁ deva̱trā pa̍nayā̱ yuja̍m ||

yam | a̱gne̱ | vā̱ja̱-sā̱ta̱ma̱ | tvam | ci̱t | manya̍se | ra̱yim |
tam | na̱ḥ | gī̱ḥ-bhiḥ | śra̱vāyya̍m | de̱va̱-trā | pa̱na̱ya̱ | yuja̍m ||5.020.01||

5.020.02a ye a̍gne̱ neraya̍nti te vṛ̱ddhā u̱grasya̱ śava̍saḥ |
5.020.02b apa̱ dveṣo̱ apa̱ hvaro̱ 'nyavra̍tasya saścire ||

ye | a̱gne̱ | na | ī̱raya̍nti | te | vṛ̱ddhāḥ | u̱grasya̍ | śava̍saḥ |
apa̍ | dveṣa̍ḥ | apa̍ | hvara̍ḥ | a̱nya-vra̍tasya | sa̱ści̱re̱ ||5.020.02||

5.020.03a hotā̍raṁ tvā vṛṇīma̱he 'gne̱ dakṣa̍sya̱ sādha̍nam |
5.020.03b ya̱jñeṣu̍ pū̱rvyaṁ gi̱rā praya̍svanto havāmahe ||

hotā̍ram | tvā̱ | vṛ̱ṇī̱ma̱he̱ | agne̍ | dakṣa̍sya | sādha̍nam |
ya̱jñeṣu̍ | pū̱rvyam | gi̱rā | praya̍svantaḥ | ha̱vā̱ma̱he̱ ||5.020.03||

5.020.04a i̱tthā yathā̍ ta ū̱taye̱ saha̍sāvan di̱ve-di̍ve |
5.020.04b rā̱ya ṛ̱tāya̍ sukrato̱ gobhi̍ḥ ṣyāma sadha̱mādo̍ vī̱raiḥ syā̍ma sadha̱māda̍ḥ ||

i̱tthā | yathā̍ | te̱ | ū̱taye̍ | saha̍sā-van | di̱ve-di̍ve |
rā̱ye | ṛ̱tāya̍ | su̱kra̱to̱ iti̍ su-krato | gobhi̍ḥ | syā̱ma̱ | sa̱dha̱-māda̍ḥ | vī̱raiḥ | syā̱ma̱ | sa̱dha̱-māda̍ḥ ||5.020.04||


5.021.01a ma̱nu̱ṣvat tvā̱ ni dhī̍mahi manu̱ṣvat sam i̍dhīmahi |
5.021.01c agne̍ manu̱ṣvad a̍ṅgiro de̱vān de̍vaya̱te ya̍ja ||

ma̱nu̱ṣvat | tvā̱ | ni | dhī̱ma̱hi̱ | ma̱nu̱ṣvat | sam | i̱dhī̱ma̱hi̱ |
agne̍ | ma̱nu̱ṣvat | a̱ṅgi̱ra̱ḥ | de̱vān | de̱va̱-ya̱te | ya̱ja̱ ||5.021.01||

5.021.02a tvaṁ hi mānu̍ṣe̱ jane 'gne̱ suprī̍ta i̱dhyase̍ |
5.021.02c sruca̍s tvā yanty ānu̱ṣak sujā̍ta̱ sarpi̍rāsute ||

tvam | hi | mānu̍ṣe | jane̍ | agne̍ | su-prī̍taḥ | i̱dhyase̍ |
sruca̍ḥ | tvā̱ | ya̱nti̱ | ā̱nu̱ṣak | su-jā̍ta | sarpi̍ḥ-āsute ||5.021.02||

5.021.03a tvāṁ viśve̍ sa̱joṣa̍so de̱vāso̍ dū̱tam a̍krata |
5.021.03b sa̱pa̱ryanta̍s tvā kave ya̱jñeṣu̍ de̱vam ī̍ḻate ||

tvām | viśve̍ | sa̱joṣa̍saḥ | de̱vāsa̍ḥ | dū̱tam | a̱kra̱ta̱ |
sa̱pa̱ryanta̍ḥ | tvā̱ | ka̱ve̱ | ya̱jñeṣu̍ | de̱vam | ī̱ḻa̱te̱ ||5.021.03||

5.021.04a de̱vaṁ vo̍ devaya̱jyayā̱gnim ī̍ḻīta̱ martya̍ḥ |
5.021.04b sami̍ddhaḥ śukra dīdihy ṛ̱tasya̱ yoni̱m āsa̍daḥ sa̱sasya̱ yoni̱m āsa̍daḥ ||

de̱vam | va̱ḥ | de̱va̱-ya̱jyayā̍ | a̱gnim | ī̱ḻī̱ta̱ | martya̍ḥ |
sam-i̍ddhaḥ | śu̱kra̱ | dī̱di̱hi̱ | ṛ̱tasya̍ | yoni̍m | ā | a̱sa̱da̱ḥ | sa̱sasya̍ | yoni̍m | ā | a̱sa̱da̱ḥ ||5.021.04||


5.022.01a pra vi̍śvasāmann atri̱vad arcā̍ pāva̱kaśo̍ciṣe |
5.022.01c yo a̍dhva̱reṣv īḍyo̱ hotā̍ ma̱ndrata̍mo vi̱śi ||

pra | vi̱śva̱-sā̱ma̱n | a̱tri̱-vat | arca̍ | pā̱va̱ka-śo̍ciṣe |
yaḥ | a̱dhva̱reṣu̍ | īḍya̍ḥ | hotā̍ | ma̱ndra-ta̍maḥ | vi̱śi ||5.022.01||

5.022.02a ny a1̱̍gniṁ jā̱tave̍dasa̱ṁ dadhā̍tā de̱vam ṛ̱tvija̍m |
5.022.02c pra ya̱jña e̍tv ānu̱ṣag a̱dyā de̱vavya̍castamaḥ ||

ni | a̱gnim | jā̱ta-ve̍dasam | dadhā̍ta | de̱vam | ṛ̱tvija̍m |
pra | ya̱jñaḥ | e̱tu̱ | ā̱nu̱ṣak | a̱dya | de̱vavya̍caḥ-tamaḥ ||5.022.02||

5.022.03a ci̱ki̱tvinma̍nasaṁ tvā de̱vam martā̍sa ū̱taye̍ |
5.022.03c vare̍ṇyasya̱ te 'va̍sa iyā̱nāso̍ amanmahi ||

ci̱ki̱tvit-ma̍nasam | tvā̱ | de̱vam | martā̍saḥ | ū̱taye̍ |
vare̍ṇyasya | te̱ | ava̍saḥ | i̱yā̱nāsa̍ḥ | a̱ma̱nma̱hi̱ ||5.022.03||

5.022.04a agne̍ ciki̱ddhy a1̱̍sya na̍ i̱daṁ vaca̍ḥ sahasya |
5.022.04c taṁ tvā̍ suśipra dampate̱ stomai̍r vardha̱nty atra̍yo gī̱rbhiḥ śu̍mbha̱nty atra̍yaḥ ||

agne̍ | ci̱ki̱ddhi | a̱sya | na̱ḥ | i̱dam | vaca̍ḥ | sa̱ha̱sya̱ |
tam | tvā̱ | su̱-śi̱pra̱ | da̱m-pa̱te̱ | stomai̍ḥ | va̱rdha̱nti̱ | atra̍yaḥ | gī̱ḥ-bhiḥ | śu̱mbha̱nti̱ | atra̍yaḥ ||5.022.04||


5.023.01a agne̱ saha̍nta̱m ā bha̍ra dyu̱mnasya̍ prā̱sahā̍ ra̱yim |
5.023.01c viśvā̱ yaś ca̍rṣa̱ṇīr a̱bhy ā̱3̱̍sā vāje̍ṣu sā̱saha̍t ||

agne̍ | saha̍ntam | ā | bha̱ra̱ | dyu̱mnasya̍ | pra̱-sahā̍ | ra̱yim |
viśvā̍ḥ | yaḥ | ca̱rṣa̱ṇīḥ | a̱bhi | ā̱sā | vāje̍ṣu | sa̱saha̍t ||5.023.01||

5.023.02a tam a̍gne pṛtanā̱ṣaha̍ṁ ra̱yiṁ sa̍hasva̱ ā bha̍ra |
5.023.02b tvaṁ hi sa̱tyo adbhu̍to dā̱tā vāja̍sya̱ goma̍taḥ ||

tam | a̱gne̱ | pṛ̱ta̱nā̱-saha̍m | ra̱yim | sa̱ha̱sva̱ḥ | ā | bha̱ra̱ |
tvam | hi | sa̱tyaḥ | adbhu̍taḥ | dā̱tā | vāja̍sya | go-ma̍taḥ ||5.023.02||

5.023.03a viśve̱ hi tvā̍ sa̱joṣa̍so̱ janā̍so vṛ̱ktaba̍rhiṣaḥ |
5.023.03c hotā̍ra̱ṁ sadma̍su pri̱yaṁ vyanti̱ vāryā̍ pu̱ru ||

viśve̍ | hi | tvā̱ | sa̱-joṣa̍saḥ | janā̍saḥ | vṛ̱kta-ba̍rhiṣaḥ |
hotā̍ram | sadma̍-su | pri̱yam | vyanti̍ | vāryā̍ | pu̱ru ||5.023.03||

5.023.04a sa hi ṣmā̍ vi̱śvaca̍rṣaṇir a̱bhimā̍ti̱ saho̍ da̱dhe |
5.023.04b agna̍ e̱ṣu kṣaye̱ṣv ā re̱van na̍ḥ śukra dīdihi dyu̱mat pā̍vaka dīdihi ||

saḥ | hi | sma̱ | vi̱śva-ca̍rṣaṇiḥ | a̱bhi-mā̍ti | saha̍ḥ | da̱dhe |
agne̍ | e̱ṣu | kṣaye̍ṣu | ā | re̱vat | na̱ḥ | śu̱kra̱ | dī̱di̱hi̱ | dyu̱-mat | pā̱va̱ka̱ | dī̱di̱hi̱ ||5.023.04||


5.024.01a agne̱ tvaṁ no̱ anta̍ma u̱ta trā̱tā śi̱vo bha̍vā varū̱thya̍ḥ ||

agne̍ | tvam | na̱ḥ | anta̍maḥ | u̱ta | trā̱tā | śi̱vaḥ | bha̱va̱ | va̱rū̱thya̍ḥ ||5.024.01||

5.024.02a vasu̍r a̱gnir vasu̍śravā̱ acchā̍ nakṣi dyu̱matta̍maṁ ra̱yiṁ dā̍ḥ ||

vasu̍ḥ | a̱gniḥ | vasu̍-śravā̍ḥ | accha̍ | na̱kṣi̱ | dyu̱mat-ta̍mam | ra̱yim | dā̱ḥ ||5.024.02||

5.024.03a sa no̍ bodhi śru̱dhī hava̍m uru̱ṣyā ṇo̍ aghāya̱taḥ sa̍masmāt ||

saḥ | na̱ḥ | bo̱dhi̱ | śru̱dhi | hava̍m | u̱ru̱ṣya | na̱ḥ | a̱gha̱-ya̱taḥ | sa̱ma̱smā̱t ||5.024.03||

5.024.04a taṁ tvā̍ śociṣṭha dīdivaḥ su̱mnāya̍ nū̱nam ī̍mahe̱ sakhi̍bhyaḥ ||

tam | tvā̱ | śo̱ci̱ṣṭha̱ | dī̱di̱-va̱ḥ | su̱mnāya̍ | nū̱nam | ī̱ma̱he̱ | sakhi̍-bhyaḥ ||5.024.04||


5.025.01a acchā̍ vo a̱gnim ava̍se de̱vaṁ gā̍si̱ sa no̱ vasu̍ḥ |
5.025.01c rāsa̍t pu̱tra ṛ̍ṣū̱ṇām ṛ̱tāvā̍ parṣati dvi̱ṣaḥ ||

accha̍ | va̱ḥ | a̱gnim | ava̍se | de̱vam | gā̱si̱ | saḥ | na̱ḥ | vasu̍ḥ |
rāsa̍t | pu̱traḥ | ṛ̱ṣū̱ṇām | ṛ̱ta-vā̍ | pa̱rṣa̱ti̱ | dvi̱ṣaḥ ||5.025.01||

5.025.02a sa hi sa̱tyo yam pūrve̍ cid de̱vāsa̍ś ci̱d yam ī̍dhi̱re |
5.025.02c hotā̍ram ma̱ndraji̍hva̱m it su̍dī̱tibhi̍r vi̱bhāva̍sum ||

saḥ | hi | sa̱tyaḥ | yam | pūrve̍ | cit | de̱vāsa̍ḥ | ci̱t | yam | ī̱dhi̱re |
hotā̍ram | ma̱ndra-ji̍hvam | it | su̱dī̱ti-bhi̍ḥ | vi̱bhā-va̍sum ||5.025.02||

5.025.03a sa no̍ dhī̱tī vari̍ṣṭhayā̱ śreṣṭha̍yā ca suma̱tyā |
5.025.03c agne̍ rā̱yo di̍dīhi naḥ suvṛ̱ktibhi̍r vareṇya ||

saḥ | na̱ḥ | dhī̱tī | vari̍ṣṭhayā | śreṣṭha̍yā | ca̱ | su-ma̱tyā |
agne̍ | rā̱yaḥ | di̱dī̱hi̱ | na̱ḥ | su̱vṛ̱kti-bhi̍ḥ | va̱re̱ṇya̱ ||5.025.03||

5.025.04a a̱gnir de̱veṣu̍ rājaty a̱gnir marte̍ṣv āvi̱śan |
5.025.04c a̱gnir no̍ havya̱vāha̍no̱ 'gniṁ dhī̱bhiḥ sa̍paryata ||

a̱gniḥ | de̱veṣu̍ | rā̱ja̱ti̱ | a̱gniḥ | marte̍ṣu | ā̱-vi̱śan |
a̱gniḥ | na̱ḥ | ha̱vya̱-vāha̍na̍ḥ | a̱gnim | dhī̱bhiḥ | sa̱pa̱rya̱ta̱ ||5.025.04||

5.025.05a a̱gnis tu̱viśra̍vastamaṁ tu̱vibra̍hmāṇam utta̱mam |
5.025.05c a̱tūrta̍ṁ śrāva̱yatpa̍tim pu̱traṁ da̍dāti dā̱śuṣe̍ ||

a̱gniḥ | tu̱viśra̍vaḥ-tamam | tu̱vi-bra̍hmāṇam | u̱t-ta̱mam |
a̱tūrta̍m | śra̱va̱yat-pa̍tim | pu̱tran | da̱dā̱ti̱ | dā̱śuṣe̍ ||5.025.05||

5.025.06a a̱gnir da̍dāti̱ satpa̍tiṁ sā̱sāha̱ yo yu̱dhā nṛbhi̍ḥ |
5.025.06c a̱gnir atya̍ṁ raghu̱ṣyada̱ṁ jetā̍ra̱m apa̍rājitam ||

a̱gniḥ | da̱dā̱ti̱ | sat-pa̍tim | sa̱sāha̍ | yaḥ | yu̱dhā | nṛ-bhi̍ḥ |
a̱gniḥ | atya̍m | ra̱ghu̱-syada̍m | jetā̍ram | apa̍rā-jitam ||5.025.06||

5.025.07a yad vāhi̍ṣṭha̱ṁ tad a̱gnaye̍ bṛ̱had a̍rca vibhāvaso |
5.025.07c mahi̍ṣīva̱ tvad ra̱yis tvad vājā̱ ud ī̍rate ||

yat | vāhi̍ṣṭham | tat | a̱gnaye̍ | bṛ̱hat | a̱rca̱ | vi̱bhā̱va̱so̱ iti̍ vibhā-vaso |
mahi̍ṣī-iva | tvat | ra̱yiḥ | tvat | vājā̍ḥ | ut | ī̱rate ||5.025.07||

5.025.08a tava̍ dyu̱manto̍ a̱rcayo̱ grāve̍vocyate bṛ̱hat |
5.025.08c u̱to te̍ tanya̱tur ya̍thā svā̱no a̍rta̱ tmanā̍ di̱vaḥ ||

tava̍ | dyu̱-manta̍ḥ | a̱rcaya̍ḥ | grāvā̍-iva | u̱cya̱te̱ | bṛ̱hat |
u̱to iti̍ | te̱ | ta̱nya̱tuḥ | ya̱thā̱ | svā̱naḥ | a̱rta̱ | tmanā̍ | di̱vaḥ ||5.025.08||

5.025.09a e̱vām̐ a̱gniṁ va̍sū̱yava̍ḥ sahasā̱naṁ va̍vandima |
5.025.09c sa no̱ viśvā̱ ati̱ dviṣa̱ḥ parṣa̍n nā̱veva̍ su̱kratu̍ḥ ||

e̱va | a̱gnim | va̱su̱-yava̍ḥ | sa̱ha̱sā̱nam | va̱va̱ndi̱ma̱ |
saḥ | na̱ḥ | viśvā̍ | ati̍ | dviṣa̍ḥ | parṣa̍t | nā̱vā-i̍va | su̱-kratu̍ḥ ||5.025.09||


5.026.01a agne̍ pāvaka ro̱ciṣā̍ ma̱ndrayā̍ deva ji̱hvayā̍ |
5.026.01c ā de̱vān va̍kṣi̱ yakṣi̍ ca ||

agne̍ | pā̱va̱ka̱ | ro̱ciṣā̍ | ma̱ndrayā̍ | de̱va̱ | ji̱hvayā̍ |
ā | de̱vān | va̱kṣi̱ | yakṣi̍ | ca̱ ||5.026.01||

5.026.02a taṁ tvā̍ ghṛtasnav īmahe̱ citra̍bhāno sva̱rdṛśa̍m |
5.026.02c de̱vām̐ ā vī̱taye̍ vaha ||

tam | tvā̱ | ghṛ̱ta̱sno̱ iti̍ ghṛta-sno | ī̱ma̱he̱ | citra̍bhāno̱ iti̱ citra̍-bhāno | sva̱ḥ-dṛśa̍m |
de̱vān | ā | vī̱taye̍ | va̱ha̱ ||5.026.02||

5.026.03a vī̱tiho̍traṁ tvā kave dyu̱manta̱ṁ sam i̍dhīmahi |
5.026.03c agne̍ bṛ̱hanta̍m adhva̱re ||

vī̱ti-ho̍tram | tvā̱ | ka̱ve̱ | dyu̱-manta̍m | sam | i̱dhī̱ma̱hi̱ |
agne̍ | bṛ̱hanta̍m | a̱dhva̱re ||5.026.03||

5.026.04a agne̱ viśve̍bhi̱r ā ga̍hi de̱vebhi̍r ha̱vyadā̍taye |
5.026.04b hotā̍raṁ tvā vṛṇīmahe ||

agne̍ | viśve̍-bhiḥ | ā | ga̱hi̱ | de̱ve-bhi̍ḥ | ha̱vya-dā̍taye |
hotā̍ram | tvā̱ | vṛ̱ṇī̱ma̱he̱ ||5.026.04||

5.026.05a yaja̍mānāya sunva̱ta āgne̍ su̱vīrya̍ṁ vaha |
5.026.05c de̱vair ā sa̍tsi ba̱rhiṣi̍ ||

yaja̍mānāya | su̱nva̱te | ā | a̱gne̱ | su̱-vīrya̍ | va̱ha̱ |
de̱vaiḥ | ā | sa̱tsi̱ | ba̱rhiṣi̍ ||5.026.05||

5.026.06a sa̱mi̱dhā̱naḥ sa̍hasraji̱d agne̱ dharmā̍ṇi puṣyasi |
5.026.06c de̱vānā̍ṁ dū̱ta u̱kthya̍ḥ ||

sa̱m-i̱dha̱naḥ | sa̱ha̱sra̱-ji̱t | agne̍ | dharmā̍ṇi | pu̱ṣya̱si̱ |
de̱vānā̍m | dū̱taḥ | u̱kthya̍ḥ ||5.026.06||

5.026.07a ny a1̱̍gniṁ jā̱tave̍dasaṁ hotra̱vāha̱ṁ yavi̍ṣṭhyam |
5.026.07c dadhā̍tā de̱vam ṛ̱tvija̍m ||

ni | a̱gnim | jā̱ta-ve̍dasam | ho̱tra̱-vāham | yavi̍ṣṭhyam |
dadhā̍ta | de̱vam | ṛ̱tvija̍m ||5.026.07||

5.026.08a pra ya̱jña e̍tv ānu̱ṣag a̱dyā de̱vavya̍castamaḥ |
5.026.08c stṛ̱ṇī̱ta ba̱rhir ā̱sade̍ ||

pra | ya̱jñaḥ | e̱tu̱ | ā̱nu̱ṣak | a̱dya | de̱vavya̍caḥ-tamaḥ |
stṛ̱ṇī̱ta | ba̱rhiḥ | ā̱-sade̍ ||5.026.08||

5.026.09a edam ma̱ruto̍ a̱śvinā̍ mi̱traḥ sī̍dantu̱ varu̍ṇaḥ |
5.026.09c de̱vāsa̱ḥ sarva̍yā vi̱śā ||

ā | i̱dam | ma̱ruta̍ḥ | a̱śvinā̍ | mi̱traḥ | sī̱da̱ntu̱ | varu̍ṇaḥ |
de̱vāsa̍ḥ | sarva̍yā | vi̱śā ||5.026.09||


5.027.01a ana̍svantā̱ satpa̍tir māmahe me̱ gāvā̱ ceti̍ṣṭho̱ asu̍ro ma̱ghona̍ḥ |
5.027.01c trai̱vṛ̱ṣṇo a̍gne da̱śabhi̍ḥ sa̱hasrai̱r vaiśvā̍nara̱ trya̍ruṇaś ciketa ||

ana̍svantā | sat-pa̍tiḥ | ma̱ma̱he̱ | me̱ | gāvā̍ | ceti̍ṣṭhaḥ | asu̍raḥ | ma̱ghona̍ḥ |
trai̱vṛ̱ṣṇaḥ | a̱gne̱ | da̱śa-bhi̍ḥ | sa̱hasrai̍ḥ | vaiśvā̍nara | tri-a̍ruṇaḥ | ci̱ke̱ta̱ ||5.027.01||

5.027.02a yo me̍ śa̱tā ca̍ viṁśa̱tiṁ ca̱ gonā̱ṁ harī̍ ca yu̱ktā su̱dhurā̱ dadā̍ti |
5.027.02c vaiśvā̍nara̱ suṣṭu̍to vāvṛdhā̱no 'gne̱ yaccha̱ trya̍ruṇāya̱ śarma̍ ||

yaḥ | me̱ | śa̱tā | ca̱ | vi̱ṁśa̱tim | ca̱ | gonā̍m | harī̱ iti̍ | ca̱ | yu̱ktā | su̱-dhurā̍ | dadā̍ti |
vaiśvā̍nara | su-stu̍taḥ | va̱vṛ̱dhā̱naḥ | agne̍ | yaccha̍ | tri-a̍ruṇāya | śarma̍ ||5.027.02||

5.027.03a e̱vā te̍ agne suma̱tiṁ ca̍kā̱no navi̍ṣṭhāya nava̱maṁ tra̱sada̍syuḥ |
5.027.03c yo me̱ gira̍s tuvijā̱tasya̍ pū̱rvīr yu̱ktenā̱bhi trya̍ruṇo gṛ̱ṇāti̍ ||

e̱va | te̱ | a̱gne̱ | su̱-ma̱tim | ca̱kā̱naḥ | navi̍ṣṭhāya | na̱va̱mam | tra̱sada̍syuḥ |
yaḥ | me̱ | gira̍ḥ | tu̱vi̱jā̱tasya̍ | pū̱rvīḥ | yu̱ktena̍ | a̱bhi | tri-a̍ruṇaḥ | gṛ̱ṇāti̍ ||5.027.03||

5.027.04a yo ma̱ iti̍ pra̱voca̱ty aśva̍medhāya sū̱raye̍ |
5.027.04b dada̍d ṛ̱cā sa̱niṁ ya̱te dada̍n me̱dhām ṛ̍tāya̱te ||

yaḥ | me̱ | iti̍ | pra̱-voca̍ti | aśva̍-medhāya | sū̱raye̍ |
dada̍t | ṛ̱cā | sa̱nim | ya̱te | dada̍t | me̱dhām | ṛ̱ta̱-ya̱te ||5.027.04||

5.027.05a yasya̍ mā paru̱ṣāḥ śa̱tam u̍ddha̱rṣaya̍nty u̱kṣaṇa̍ḥ |
5.027.05c aśva̍medhasya̱ dānā̱ḥ somā̍ iva̱ tryā̍śiraḥ ||

yasya̍ | mā̱ | pa̱ru̱ṣāḥ | śa̱tam | u̱t-ha̱rṣaya̍nti | u̱kṣaṇa̍ḥ |
aśva̍-medhasya | dānā̍ḥ | somā̍ḥ-iva | tri-ā̍śiraḥ ||5.027.05||

5.027.06a indrā̍gnī śata̱dāvny aśva̍medhe su̱vīrya̍m |
5.027.06c kṣa̱traṁ dhā̍rayatam bṛ̱had di̱vi sūrya̍m ivā̱jara̍m ||

indrā̍gnī̱ iti̍ | śa̱ta̱-dāvni̍ | aśva̍-medhe | su̱-vīrya̍m |
kṣa̱tram | dhā̱ra̱ya̱ta̱m | bṛ̱hat | di̱vi | sūrya̍m-iva | a̱jara̍m ||5.027.06||


5.028.01a sami̍ddho a̱gnir di̱vi śo̱cir a̍śret pra̱tyaṅṅ u̱ṣasa̍m urvi̱yā vi bhā̍ti |
5.028.01c eti̱ prācī̍ vi̱śvavā̍rā̱ namo̍bhir de̱vām̐ īḻā̍nā ha̱viṣā̍ ghṛ̱tācī̍ ||

sam-i̍ddhaḥ | a̱gniḥ | di̱vi | śo̱ciḥ | a̱śre̱t | pra̱tyaṅ | u̱ṣasa̍m | u̱rvi̱yā | vi | bhā̱ti̱ |
eti̍ | prācī̍ | vi̱śva-vā̍rā | nama̍ḥ-bhiḥ | de̱vān | īḻā̍nā | ha̱viṣā̍ | ghṛ̱tācī̍ ||5.028.01||

5.028.02a sa̱mi̱dhyamā̍no a̱mṛta̍sya rājasi ha̱viṣ kṛ̱ṇvanta̍ṁ sacase sva̱staye̍ |
5.028.02c viśva̱ṁ sa dha̍tte̱ dravi̍ṇa̱ṁ yam inva̍sy āti̱thyam a̍gne̱ ni ca̍ dhatta̱ it pu̱raḥ ||

sa̱m-i̱dhyamā̍naḥ | a̱mṛta̍sya | rā̱ja̱si̱ | ha̱viḥ | kṛ̱ṇvanta̍m | sa̱ca̱se̱ | sva̱staye̍ |
viśva̍m | saḥ | dha̱tte̱ | dravi̍ṇam | yam | inva̍si | ā̱ti̱thyam | a̱gne̱ | ni | ca̱ | dha̱tte̱ | it | pu̱raḥ ||5.028.02||

5.028.03a agne̱ śardha̍ maha̱te saubha̍gāya̱ tava̍ dyu̱mnāny u̍tta̱māni̍ santu |
5.028.03c saṁ jā̍spa̱tyaṁ su̱yama̱m ā kṛ̍ṇuṣva śatrūya̱tām a̱bhi ti̍ṣṭhā̱ mahā̍ṁsi ||

agne̍ | śardha̍ | ma̱ha̱te | saubha̍gāya | tava̍ | dyu̱mnāni̍ | u̱t-ta̱māni̍ | sa̱ntu̱ |
sam | ja̱ḥ-pa̱tyam | su̱-yama̍m | ā | kṛ̱ṇu̱ṣva̱ | śa̱tru̱-ya̱tām | a̱bhi | ti̱ṣṭha̱ | mahā̍ṁsi ||5.028.03||

5.028.04a sami̍ddhasya̱ prama̍ha̱so 'gne̱ vande̱ tava̱ śriya̍m |
5.028.04c vṛ̱ṣa̱bho dyu̱mnavā̍m̐ asi̱ sam a̍dhva̱reṣv i̍dhyase ||

sam-i̍ddhasya | pra-ma̍hasaḥ | a̱gne̱ | vande̍ | tava̍ | śriya̍m |
vṛ̱ṣa̱bhaḥ | dyu̱mna-vā̍n | a̱si̱ | sam | a̱dhva̱reṣu̍ | i̱dhya̱se̱ ||5.028.04||

5.028.05a sami̍ddho agna āhuta de̱vān ya̍kṣi svadhvara |
5.028.05c tvaṁ hi ha̍vya̱vāḻ asi̍ ||

sam-i̍ddhaḥ | a̱gne̱ | ā̱-hu̱ta̱ | de̱vān | ya̱kṣi̱ | su̱-a̱dhva̱ra̱ |
tvam | hi | ha̱vya̱-vāṭ | asi̍ ||5.028.05||

5.028.06a ā ju̍hotā duva̱syatā̱gnim pra̍ya̱ty a̍dhva̱re |
5.028.06c vṛ̱ṇī̱dhvaṁ ha̍vya̱vāha̍nam ||

ā | ju̱ho̱ta̱ | du̱va̱syata | a̱gnim | pra̱-ya̱ti | a̱dhva̱re |
vṛ̱ṇī̱dhvam | ha̱vya̱-vāha̍nam ||5.028.06||


5.029.01a try a̍rya̱mā manu̍ṣo de̱vatā̍tā̱ trī ro̍ca̱nā di̱vyā dhā̍rayanta |
5.029.01c arca̍nti tvā ma̱ruta̍ḥ pū̱tada̍kṣā̱s tvam e̍ṣā̱m ṛṣi̍r indrāsi̱ dhīra̍ḥ ||

trī | a̱rya̱mā | manu̍ṣaḥ | de̱va-tā̍tā | trī | ro̱ca̱nā | di̱vyā | dhā̱ra̱ya̱nta̱ |
arca̍nti | tvā̱ | ma̱ruta̍ḥ | pū̱ta-da̍kṣāḥ | tvam | e̱ṣā̱m | ṛṣi̍ḥ | i̱ndra̱ | a̱si̱ | dhīra̍ḥ ||5.029.01||

5.029.02a anu̱ yad ī̍m ma̱ruto̍ mandasā̱nam ārca̱nn indra̍m papi̱vāṁsa̍ṁ su̱tasya̍ |
5.029.02c āda̍tta̱ vajra̍m a̱bhi yad ahi̱ṁ hann a̱po ya̱hvīr a̍sṛja̱t sarta̱vā u̍ ||

anu̍ | yat | ī̱m | ma̱ruta̍ḥ | ma̱nda̱sā̱nam | ārca̍n | indra̍m | pa̱pi̱-vāṁsa̍m | su̱tasya̍ |
ā | a̱da̱tta̱ | vajra̍m | a̱bhi | yat | ahi̍m | han | a̱paḥ | ya̱hvīḥ | a̱sṛ̱ja̱t | sarta̱vai | ū̱m̐ iti̍ ||5.029.02||

5.029.03a u̱ta bra̍hmāṇo maruto me a̱syendra̱ḥ soma̍sya̱ suṣu̍tasya peyāḥ |
5.029.03c tad dhi ha̱vyam manu̍ṣe̱ gā avi̍nda̱d aha̱nn ahi̍m papi̱vām̐ indro̍ asya ||

u̱ta | bra̱hmā̱ṇa̱ḥ | ma̱ru̱ta̱ḥ | me̱ | a̱sya | indra̍ḥ | soma̍sya | su-su̍tasya | pe̱yā̱ḥ |
tat | hi | ha̱vyam | manu̍ṣe | gāḥ | avi̍ndat | aha̍n | ahi̍m | pa̱pi̱-vān | indra̍ḥ | a̱sya̱ ||5.029.03||

5.029.04a ād roda̍sī vita̱raṁ vi ṣka̍bhāyat saṁvivyā̱naś ci̍d bhi̱yase̍ mṛ̱gaṁ ka̍ḥ |
5.029.04c jiga̍rti̱m indro̍ apa̱jargu̍rāṇa̱ḥ prati̍ śva̱santa̱m ava̍ dāna̱vaṁ ha̍n ||

āt | roda̍sī̱ iti̍ | vi̱-ta̱ram | vi | ska̱bhā̱ya̱t | sa̱m-vi̱vyā̱naḥ | ci̱t | bha̱yase̍ | mṛ̱gam | ka̱riti̍ kaḥ |
jiga̍rti̱m | indra̍ḥ | a̱pa̱-jargu̍rāṇaḥ | prati̍ | śva̱santa̍m | ava̍ | dā̱na̱vam | ha̱nniti̍ han ||5.029.04||

5.029.05a adha̱ kratvā̍ maghava̱n tubhya̍ṁ de̱vā anu̱ viśve̍ adaduḥ soma̱peya̍m |
5.029.05c yat sūrya̍sya ha̱rita̱ḥ pata̍ntīḥ pu̱raḥ sa̱tīr upa̍rā̱ eta̍śe̱ kaḥ ||

adha̍ | kratvā̍ | ma̱gha̱-va̱n | tubhya̍m | de̱vāḥ | anu̍ | viśve̍ | a̱da̱du̱ḥ | so̱ma̱-peya̍m |
yat | sūrya̍sya | ha̱rita̍ḥ | pata̍ntīḥ | pu̱raḥ | sa̱tīḥ | upa̍rāḥ | eta̍śe | kariti̱ kaḥ ||5.029.05||

5.029.06a nava̱ yad a̍sya nava̱tiṁ ca̍ bho̱gān sā̱kaṁ vajre̍ṇa ma̱ghavā̍ vivṛ̱ścat |
5.029.06c arca̱ntīndra̍m ma̱ruta̍ḥ sa̱dhasthe̱ traiṣṭu̍bhena̱ vaca̍sā bādhata̱ dyām ||

nava̍ | yat | a̱sya̱ | na̱va̱tim | ca̱ | bho̱gān | sā̱kam | vajre̍ṇa | ma̱gha-vā̍ | vi̱vṛ̱ścat |
arca̍nti | indra̍m | ma̱ruta̍ḥ | sa̱dha-sthe̍ | traistu̍bhena | vaca̍sā | bā̱dha̱ta̱ | dyām ||5.029.06||

5.029.07a sakhā̱ sakhye̍ apaca̱t tūya̍m a̱gnir a̱sya kratvā̍ mahi̱ṣā trī śa̱tāni̍ |
5.029.07c trī sā̱kam indro̱ manu̍ṣa̱ḥ sarā̍ṁsi su̱tam pi̍bad vṛtra̱hatyā̍ya̱ soma̍m ||

sakhā̍ | sakhye̍ | a̱pa̱ca̱t | tūya̍m | a̱gniḥ | a̱sya | kratvā̍ | ma̱hi̱ṣā | trī | śa̱tāni̍ |
trī | sā̱kam | indra̍ḥ | manu̍ṣaḥ | sarā̍ṁsi | su̱tam | pi̱ba̱t | vṛ̱tra̱-hatyā̍ya | soma̍m ||5.029.07||

5.029.08a trī yac cha̱tā ma̍hi̱ṣāṇā̱m agho̱ mās trī sarā̍ṁsi ma̱ghavā̍ so̱myāpā̍ḥ |
5.029.08c kā̱raṁ na viśve̍ ahvanta de̱vā bhara̱m indrā̍ya̱ yad ahi̍ṁ ja̱ghāna̍ ||

trī | yat | śa̱tā | ma̱hi̱ṣāṇā̍m | agha̍ḥ | māḥ | trī | sarā̍ṁsi | ma̱gha-vā̍ | so̱myā | apā̍ḥ |
kā̱ram | na | viśve̍ | a̱hva̱nta̱ | de̱vāḥ | bhara̍m | indrā̍ya | yat | ahi̍m | ja̱ghāna̍ ||5.029.08||

5.029.09a u̱śanā̱ yat sa̍ha̱syai̱3̱̍r ayā̍taṁ gṛ̱ham i̍ndra jūjuvā̱nebhi̱r aśvai̍ḥ |
5.029.09c va̱nvā̱no atra̍ sa̱ratha̍ṁ yayātha̱ kutse̍na de̱vair ava̍nor ha̱ śuṣṇa̍m ||

u̱śanā̍ | yat | sa̱ha̱syai̍ḥ | ayā̍tam | gṛ̱ham | i̱ndra̱ | jū̱ju̱vā̱nebhi̍ḥ | aśvai̍ḥ |
va̱nvā̱naḥ | atra̍ | sa̱ratha̍m | ya̱yā̱tha̱ | kutse̍na | de̱vaiḥ | ava̍noḥ | ha̱ | śuṣṇa̍m ||5.029.09||

5.029.10a prānyac ca̱kram a̍vṛha̱ḥ sūrya̍sya̱ kutsā̍yā̱nyad vari̍vo̱ yāta̍ve 'kaḥ |
5.029.10c a̱nāso̱ dasyū̍m̐r amṛṇo va̱dhena̱ ni du̍ryo̱ṇa ā̍vṛṇaṅ mṛ̱dhravā̍caḥ ||

pra | a̱nyat | ca̱kram | a̱vṛ̱ha̱ḥ | sūrya̍sya | kutsā̍ya | a̱nyat | vari̍vaḥ | yāta̍ve | a̱ka̱ritya̍kaḥ |
a̱nāsa̍ḥ | dasyū̍n | a̱mṛ̱ṇa̱ḥ | va̱dhena̍ | ni | du̱ryo̱ṇe | a̱vṛ̱ṇa̱k | mṛ̱dhra-vā̍caḥ ||5.029.10||

5.029.11a stomā̍sas tvā̱ gauri̍vīter avardha̱nn ara̍ndhayo vaidathi̱nāya̱ pipru̍m |
5.029.11c ā tvām ṛ̱jiśvā̍ sa̱khyāya̍ cakre̱ paca̍n pa̱ktīr api̍ba̱ḥ soma̍m asya ||

stomā̍saḥ | tvā̱ | gauri̍-vīteḥ | a̱va̱rdha̱n | ara̍ndhayaḥ | vai̱da̱thi̱nāya̍ | pipru̍m |
ā | tvām | ṛ̱jiśvā̍ | sa̱khyāya̍ | ca̱kre̱ | paca̍n | pa̱ktīḥ | api̍baḥ | soma̍m | a̱sya̱ ||5.029.11||

5.029.12a nava̍gvāsaḥ su̱taso̍māsa̱ indra̱ṁ daśa̍gvāso a̱bhy a̍rcanty a̱rkaiḥ |
5.029.12c gavya̍ṁ cid ū̱rvam a̍pi̱dhāna̍vanta̱ṁ taṁ ci̱n nara̍ḥ śaśamā̱nā apa̍ vran ||

nava̍-gvāsaḥ | su̱ta-so̍māsaḥ | indra̍m | daśa̍-gvāsaḥ | a̱bhi | a̱rca̱nti̱ | a̱rkaiḥ |
gavya̍m | ci̱t | ū̱rvam | a̱pi̱dhāna̍-vantam | tam | ci̱t | nara̍ḥ | śa̱śa̱mā̱nāḥ | apa̍ | vra̱n ||5.029.12||

5.029.13a ka̱tho nu te̱ pari̍ carāṇi vi̱dvān vī̱ryā̍ maghava̱n yā ca̱kartha̍ |
5.029.13c yā co̱ nu navyā̍ kṛ̱ṇava̍ḥ śaviṣṭha̱ pred u̱ tā te̍ vi̱dathe̍ṣu bravāma ||

ka̱tho iti̍ | nu | te̱ | pari̍ | ca̱rā̱ṇi̱ | vi̱dvān | vī̱ryā̍ | ma̱gha̱-va̱n | yā | ca̱kartha̍ |
yā | co̱ iti̍ | nu | navyā̍ | kṛ̱ṇava̍ḥ | śa̱vi̱ṣṭha̱ | pra | it | ū̱m̐ iti̍ | tā | te̱ | vi̱dathe̍ṣu | bra̱vā̱ma̱ ||5.029.13||

5.029.14a e̱tā viśvā̍ cakṛ̱vām̐ i̍ndra̱ bhūry apa̍rīto ja̱nuṣā̍ vī̱rye̍ṇa |
5.029.14c yā ci̱n nu va̍jrin kṛ̱ṇavo̍ dadhṛ̱ṣvān na te̍ va̱rtā tavi̍ṣyā asti̱ tasyā̍ḥ ||

e̱tā | viśvā̍ | ca̱kṛ̱-vān | i̱ndra̱ | bhūri̍ | apa̍ri-itaḥ | ja̱nuṣā̍ | vī̱rye̍ṇa |
yā | ci̱t | nu | va̱jri̱n | kṛ̱ṇava̍ḥ | da̱dhṛ̱ṣvān | na | te̱ | va̱rtā | tavi̍ṣyāḥ | a̱sti̱ | tasyā̍ḥ ||5.029.14||

5.029.15a indra̱ brahma̍ kri̱yamā̍ṇā juṣasva̱ yā te̍ śaviṣṭha̱ navyā̱ aka̍rma |
5.029.15c vastre̍va bha̱drā sukṛ̍tā vasū̱yū ratha̱ṁ na dhīra̱ḥ svapā̍ atakṣam ||

indra̍ | brahma̍ | kri̱yamā̍ṇā | ju̱ṣa̱sva̱ | yā | te̱ | śa̱vi̱ṣṭha̱ | navyā̍ḥ | aka̍rma |
vastrā̍-iva | bha̱drā | su-kṛ̍tā | va̱su̱-yuḥ | ratha̍m | na | dhīra̍ḥ | su̱-apā̍ḥ | a̱ta̱kṣa̱m ||5.029.15||


5.030.01a kva1̱̍ sya vī̱raḥ ko a̍paśya̱d indra̍ṁ su̱khara̍tha̱m īya̍māna̱ṁ hari̍bhyām |
5.030.01c yo rā̱yā va̱jrī su̱taso̍mam i̱cchan tad oko̱ gantā̍ puruhū̱ta ū̱tī ||

kva̍ | syaḥ | vī̱raḥ | kaḥ | a̱pa̱śya̱t | indra̍m | su̱kha-ra̍tham | īya̍mānam | hari̍-bhyām |
yaḥ | rā̱yā | va̱jrī | su̱ta-so̍mam | i̱cchan | tat | oka̍ḥ | gantā̍ | pu̱ru̱-hū̱taḥ | ū̱tī ||5.030.01||

5.030.02a avā̍cacakṣam pa̱dam a̍sya sa̱svar u̱graṁ ni̍dhā̱tur anv ā̍yam i̱cchan |
5.030.02c apṛ̍ccham a̱nyām̐ u̱ta te ma̍ āhu̱r indra̱ṁ naro̍ bubudhā̱nā a̍śema ||

ava̍ | a̱ca̱ca̱kṣa̱m | pa̱dam | a̱sya̱ | sa̱svaḥ | u̱gram | ni̱-dhā̱tuḥ | anu̍ | ā̱ya̱m | i̱cchan |
apṛ̍ccham | a̱nyān | u̱ta | te | me̱ | ā̱hu̱ḥ | indra̍m | nara̍ḥ | bu̱bu̱dhā̱nāḥ | a̱śe̱ma̱ ||5.030.02||

5.030.03a pra nu va̱yaṁ su̱te yā te̍ kṛ̱tānīndra̱ bravā̍ma̱ yāni̍ no̱ jujo̍ṣaḥ |
5.030.03b veda̱d avi̍dvāñ chṛ̱ṇava̍c ca vi̱dvān vaha̍te̱ 'yam ma̱ghavā̱ sarva̍senaḥ ||

pra | nu | va̱yam | su̱te | yā | te̱ | kṛ̱tāni̍ | indra̍ | bravā̍ma | yāni̍ | na̱ḥ | jujo̍ṣaḥ |
veda̍t | avi̍dvān | śṛ̱ṇava̍t | ca̱ | vi̱dvān | vaha̍te | a̱yam | ma̱gha-vā̍ | sarva̍-senaḥ ||5.030.03||

5.030.04a sthi̱ram mana̍ś cakṛṣe jā̱ta i̍ndra̱ veṣīd eko̍ yu̱dhaye̱ bhūya̍saś cit |
5.030.04b aśmā̍naṁ ci̱c chava̍sā didyuto̱ vi vi̱do gavā̍m ū̱rvam u̱sriyā̍ṇām ||

sthi̱ram | mana̍ḥ | ca̱kṛ̱ṣe̱ | jā̱taḥ | i̱ndra̱ | veṣi̍ | it | eka̍ḥ | yu̱dhaye̍ | bhūya̍saḥ | cit |
aśmā̍nam | ci̱t | śava̍sā | di̱dyu̱ta̱ḥ | vi | vi̱daḥ | gavā̍m | ū̱rvam | u̱sriyā̍ṇām ||5.030.04||

5.030.05a pa̱ro yat tvam pa̍ra̱ma ā̱jani̍ṣṭhāḥ parā̱vati̱ śrutya̱ṁ nāma̱ bibhra̍t |
5.030.05c ata̍ś ci̱d indrā̍d abhayanta de̱vā viśvā̍ a̱po a̍jayad dā̱sapa̍tnīḥ ||

pa̱raḥ | yat | tvam | pa̱ra̱maḥ | ā̱-jani̍ṣṭhāḥ | pa̱rā̱-vati̍ | śrutya̍m | nāma̍ | bibhra̍t |
ata̍ḥ | ci̱t | indrā̍t | a̱bha̱ya̱nta̱ | de̱vāḥ | viśvā̍ḥ | a̱paḥ | a̱ja̱ya̱t | dā̱sa-pa̍tnīḥ ||5.030.05||

5.030.06a tubhyed e̱te ma̱ruta̍ḥ su̱śevā̱ arca̍nty a̱rkaṁ su̱nvanty andha̍ḥ |
5.030.06c ahi̍m ohā̱nam a̱pa ā̱śayā̍na̱m pra mā̱yābhi̍r mā̱yina̍ṁ sakṣa̱d indra̍ḥ ||

tubhya̍ | it | e̱te | ma̱ruta̍ḥ | su̱-śevā̍ḥ | arca̍nti | a̱rkam | su̱nvanti̍ | andha̍ḥ |
ahi̍m | o̱hā̱nam | a̱paḥ | ā̱-śayā̍nam | pra | mā̱yā-bhi̍ḥ | mā̱yina̍m | sa̱kṣa̱t | indra̍ḥ ||5.030.06||

5.030.07a vi ṣū mṛdho̍ ja̱nuṣā̱ dāna̱m inva̱nn aha̱n gavā̍ maghavan saṁcakā̱naḥ |
5.030.07c atrā̍ dā̱sasya̱ namu̍ce̱ḥ śiro̱ yad ava̍rtayo̱ mana̍ve gā̱tum i̱cchan ||

vi | su | mṛdha̍ḥ | ja̱nuṣā̍ | dāna̍m | inva̍n | aha̍n | gavā̍ | ma̱gha̱-va̱n | sam̱-ca̱kā̱naḥ |
atra̍ | dā̱sasya̍ | namu̍ceḥ | śira̍ḥ | yat | ava̍rtayaḥ | mana̍ve | gā̱tum | i̱cchan ||5.030.07||

5.030.08a yuja̱ṁ hi mām akṛ̍thā̱ ād id i̍ndra̱ śiro̍ dā̱sasya̱ namu̍cer mathā̱yan |
5.030.08c aśmā̍naṁ cit sva̱rya1̱̍ṁ varta̍māna̱m pra ca̱kriye̍va̱ roda̍sī ma̱rudbhya̍ḥ ||

yuja̍m | hi | mām | akṛ̍thāḥ | āt | it | i̱ndra̱ | śira̍ḥ | dā̱sasya̍ | namu̍ceḥ | ma̱thā̱yan |
aśmā̍nam | cit | sva̱rya̍m | varta̍mānam | pra | ca̱kriyā̍-iva | roda̍sī̱ iti̍ | ma̱rut-bhya̍ḥ ||5.030.08||

5.030.09a striyo̱ hi dā̱sa āyu̍dhāni ca̱kre kim mā̍ karann aba̱lā a̍sya̱ senā̍ḥ |
5.030.09c a̱ntar hy akhya̍d u̱bhe a̍sya̱ dhene̱ athopa̱ praid yu̱dhaye̱ dasyu̱m indra̍ḥ ||

striya̍ḥ | hi | dā̱saḥ | āyu̍dhāni | ca̱kre | kim | mā̱ | ka̱ra̱n | a̱ba̱lāḥ | a̱sya̱ | senā̍ḥ |
a̱ntaḥ | hi | akhya̍t | u̱bhe iti̍ | a̱sya̱ | dhene̱ iti̍ | atha̍ | upa̍ | pra | ai̱t | yu̱dhaye̍ | dasyu̍m | indra̍ḥ ||5.030.09||

5.030.10a sam atra̱ gāvo̱ 'bhito̍ 'navante̱heha̍ va̱tsair viyu̍tā̱ yad āsa̍n |
5.030.10c saṁ tā indro̍ asṛjad asya śā̱kair yad ī̱ṁ somā̍sa̱ḥ suṣu̍tā̱ ama̍ndan ||

sam | atra̍ | gāva̍ḥ | a̱bhita̍ḥ | a̱na̱va̱nta̱ | i̱ha-i̍ha | va̱tsaiḥ | vi-yu̍tāḥ | yat | āsa̍n |
sam | tāḥ | indra̍ḥ | a̱sṛ̱ja̱t | a̱sya̱ | śā̱kaiḥ | yat | ī̱m | somā̍saḥ | su-su̍tāḥ | ama̍ndan ||5.030.10||

5.030.11a yad ī̱ṁ somā̍ ba̱bhrudhū̍tā̱ ama̍nda̱nn aro̍ravīd vṛṣa̱bhaḥ sāda̍neṣu |
5.030.11c pu̱ra̱ṁda̱raḥ pa̍pi̱vām̐ indro̍ asya̱ puna̱r gavā̍m adadād u̱sriyā̍ṇām ||

yat | ī̱m | somā̍ḥ | ba̱bhru-dhū̍tāḥ | ama̍ndan | aro̍ravīt | vṛ̱ṣa̱bhaḥ | sāda̍neṣu |
pu̱ra̱m-da̱raḥ | pa̱pi̱-vān | indra̍ḥ | a̱sya̱ | puna̍ḥ | gavā̍m | a̱da̱dā̱t | u̱sriyā̍ṇām ||5.030.11||

5.030.12a bha̱dram i̱daṁ ru̱śamā̍ agne akra̱n gavā̍ṁ ca̱tvāri̱ dada̍taḥ sa̱hasrā̍ |
5.030.12c ṛ̱ṇa̱ṁca̱yasya̱ praya̍tā ma̱ghāni̱ praty a̍grabhīṣma̱ nṛta̍masya nṛ̱ṇām ||

bha̱dram | i̱dam | ru̱śamāḥ | a̱gne̱ | a̱kra̱n | gavā̍m | ca̱tvāri̍ | dada̍taḥ | sa̱hasrā̍ |
ṛ̱ṇa̱m-ca̱yasya̍ | pra-ya̍tā | ma̱ghāni̍ | prati̍ | a̱gra̱bhī̱ṣma̱ | nṛ-ta̍masya | nṛ̱ṇām ||5.030.12||

5.030.13a su̱peśa̍sa̱m māva̍ sṛja̱nty asta̱ṁ gavā̍ṁ sa̱hasrai̍ ru̱śamā̍so agne |
5.030.13c tī̱vrā indra̍m amamanduḥ su̱tāso̱ 'ktor vyu̍ṣṭau̱ pari̍takmyāyāḥ ||

su̱-peśa̍sam | mā̱ | ava̍ | sṛ̱ja̱nti̱ | asta̍m | gavā̍m | sa̱hasrai̍ḥ | ru̱śamā̍saḥ | a̱gne̱ |
tī̱vrāḥ | indra̍m | a̱ma̱ma̱ndu̱ḥ | su̱tāsa̍ḥ | a̱ktoḥ | vi-u̍ṣṭau | pari̍-takmyāyāḥ ||5.030.13||

5.030.14a auccha̱t sā rātrī̱ pari̍takmyā̱ yām̐ ṛ̍ṇaṁca̱ye rāja̍ni ru̱śamā̍nām |
5.030.14c atyo̱ na vā̱jī ra̱ghur a̱jyamā̍no ba̱bhruś ca̱tvāry a̍sanat sa̱hasrā̍ ||

auccha̍t | sā | rātrī̍ | pari̍-takmyā | yā | ṛ̱ṇa̱m-ca̱ye | rāja̍ni | ru̱śamā̍nām |
atya̍ḥ | na | vā̱jī | ra̱ghuḥ | a̱jyamā̍naḥ | ba̱bhruḥ | ca̱tvāri̍ | a̱sa̱na̱t | sa̱hasrā̍ ||5.030.14||

5.030.15a catu̍ḥsahasra̱ṁ gavya̍sya pa̱śvaḥ praty a̍grabhīṣma ru̱śame̍ṣv agne |
5.030.15c gha̱rmaś ci̍t ta̱ptaḥ pra̱vṛje̱ ya āsī̍d aya̱smaya̱s tam v ādā̍ma̱ viprā̍ḥ ||

catu̍ḥ-sahasram | gavya̍sya | pa̱śvaḥ | prati̍ | a̱gra̱bhī̱ṣma̱ | ru̱śame̍ṣu | a̱gne̱ |
gha̱rmaḥ | ci̱t | ta̱ptaḥ | pra̱-vṛje̍ | yaḥ | āsī̍t | a̱ya̱smaya̍ḥ | tam | ū̱m̐ iti̍ | ādā̍ma | viprā̍ḥ ||5.030.15||


5.031.01a indro̱ rathā̍ya pra̱vata̍ṁ kṛṇoti̱ yam a̱dhyasthā̍n ma̱ghavā̍ vāja̱yanta̍m |
5.031.01c yū̱theva̍ pa̱śvo vy u̍noti go̱pā ari̍ṣṭo yāti pratha̱maḥ siṣā̍san ||

indra̍ḥ | rathā̍ya | pra̱-vata̍m | kṛ̱ṇo̱ti̱ | yam | a̱dhi̱-asthā̍t | ma̱gha-vā̍ | vja̱-yanta̍m |
yū̱thā-i̍va | pa̱śvaḥ | vi | u̱no̱ti̱ | go̱pāḥ | ari̍ṣṭaḥ | yā̱ti̱ | pra̱tha̱maḥ | sisā̍san ||5.031.01||

5.031.02a ā pra dra̍va harivo̱ mā vi ve̍na̱ḥ piśa̍ṅgarāte a̱bhi na̍ḥ sacasva |
5.031.02c na̱hi tvad i̍ndra̱ vasyo̍ a̱nyad asty a̍me̱nām̐ś ci̱j jani̍vataś cakartha ||

ā | pra | dra̱va̱ | ha̱ri̱-va̱ḥ | mā | vi | ve̱na̱ḥ | piśa̍ṅga-rāte | a̱bhi | na̱ḥ | sa̱ca̱sva̱ |
na̱hi | tvat | i̱ndra̱ | vasya̍ḥ | a̱nyat | asti̍ | a̱me̱mān | ci̱t | jani̍-vataḥ | ca̱ka̱rtha̱ ||5.031.02||

5.031.03a ud yat saha̱ḥ saha̍sa̱ āja̍niṣṭa̱ dedi̍ṣṭa̱ indra̍ indri̱yāṇi̱ viśvā̍ |
5.031.03c prāco̍dayat su̱dughā̍ va̱vre a̱ntar vi jyoti̍ṣā saṁvavṛ̱tvat tamo̍ 'vaḥ ||

ut | yat | saha̍ḥ | saha̍saḥ | ā | aja̍niṣṭa | dedi̍ṣṭe | indra̍ḥ | i̱ndri̱yāṇi̍ | viśvā̍ |
pra | a̱co̱da̱ya̱t | su̱-dughā̍ḥ | va̱vre | a̱ntaḥ | vi | jyoti̍ṣā | sa̱m-va̱vṛ̱tvat | tama̍ḥ | a̱va̱ritya̍vaḥ ||5.031.03||

5.031.04a ana̍vas te̱ ratha̱m aśvā̍ya takṣa̱n tvaṣṭā̱ vajra̍m puruhūta dyu̱manta̍m |
5.031.04c bra̱hmāṇa̱ indra̍m ma̱haya̍nto a̱rkair ava̍rdhaya̱nn aha̍ye̱ hanta̱vā u̍ ||

ana̍vaḥ | te̱ | ratha̍m | aśvā̍ya | ta̱kṣa̱n | tvaṣṭā̍ | vajra̍m | pu̱ru̱-hū̱ta̱ | dyu̱-manta̍m |
bra̱hmāṇa̍ḥ | indra̍m | ma̱haya̍ntaḥ | a̱rkaiḥ | ava̍rdhayan | aha̍ye | hanta̱vai | ū̱m̐ iti̍ ||5.031.04||

5.031.05a vṛṣṇe̱ yat te̱ vṛṣa̍ṇo a̱rkam arcā̱n indra̱ grāvā̍ṇo̱ adi̍tiḥ sa̱joṣā̍ḥ |
5.031.05c a̱na̱śvāso̱ ye pa̱vayo̍ 'ra̱thā indre̍ṣitā a̱bhy ava̍rtanta̱ dasyū̍n ||

vṛṣṇe̍ | yat | te̱ | vṛṣa̍ṇaḥ | a̱rkam | arcā̍n | indra̍ | grāvā̍ṇaḥ | adi̍tiḥ | sa̱-joṣā̍ḥ |
a̱na̱śvāsa̍ḥ | ye | pa̱vaya̍ḥ | a̱ra̱thāḥ | indra̍-iṣitāḥ | a̱bhi | ava̍rtanta | dasyū̍n ||5.031.05||

5.031.06a pra te̱ pūrvā̍ṇi̱ kara̍ṇāni voca̱m pra nūta̍nā maghava̱n yā ca̱kartha̍ |
5.031.06c śaktī̍vo̱ yad vi̱bharā̱ roda̍sī u̱bhe jaya̍nn a̱po mana̍ve̱ dānu̍citrāḥ ||

pra | te̱ | pūrvā̍ṇi | kara̍ṇāni | vo̱ca̱m | pra | nūta̍nā | ma̱gha̱-va̱n | yā | ca̱kartha̍ |
śakti̍-vaḥ | yat | vi̱-bharā̍ḥ | roda̍sī̱ iti̍ | u̱bhe iti̍ | jaya̍n | a̱paḥ | mana̍ve | dānu̍-citrāḥ ||5.031.06||

5.031.07a tad in nu te̱ kara̍ṇaṁ dasma vi̱prāhi̱ṁ yad ghnann ojo̱ atrāmi̍mīthāḥ |
5.031.07c śuṣṇa̍sya ci̱t pari̍ mā̱yā a̍gṛbhṇāḥ prapi̱tvaṁ yann apa̱ dasyū̍m̐r asedhaḥ ||

tat | it | nu | te̱ | kara̍ṇam | da̱sma̱ | vi̱pra̱ | ahi̍m | yat | ghnan | oja̍ḥ | atra̍ | ami̍mīthāḥ |
śuṣṇa̍sya | ci̱t | pari̍ | mā̱yāḥ | a̱gṛ̱bhṇā̱ḥ | pra̱-pi̱tvam | yan | apa̍ | dasyū̍n | a̱se̱dha̱ḥ ||5.031.07||

5.031.08a tvam a̱po yada̍ve tu̱rvaśā̱yāra̍mayaḥ su̱dughā̍ḥ pā̱ra i̍ndra |
5.031.08c u̱gram a̍yāta̱m ava̍ho ha̱ kutsa̱ṁ saṁ ha̱ yad vā̍m u̱śanāra̍nta de̱vāḥ ||

tvam | a̱paḥ | yada̍ve | tu̱rvaśā̱ya | ara̍mayaḥ | su̱-dughā̍ḥ | pā̱raḥ | i̱ndra̱ |
u̱gram | a̱yā̱ta̱m | ava̍haḥ | ha̱ | kutsa̍m | sam | ha̱ | yat | vā̱m | u̱śanā̍ | ara̍nta | de̱vāḥ ||5.031.08||

5.031.09a indrā̍kutsā̱ vaha̍mānā̱ rathe̱nā vā̱m atyā̱ api̱ karṇe̍ vahantu |
5.031.09c niḥ ṣī̍m a̱dbhyo dhama̍tho̱ niḥ ṣa̱dhasthā̍n ma̱ghono̍ hṛ̱do va̍ratha̱s tamā̍ṁsi ||

indrā̍kutsā | vaha̍mānā | rathe̍na | ā | vā̱m | atyā̍ḥ | api̍ | karṇe̍ | va̱ha̱ntu̱ |
niḥ | sī̱m | a̱t-bhyaḥ | dhama̍thaḥ | niḥ | sa̱dha-sthā̍t | ma̱ghona̍ḥ | hṛ̱daḥ | va̱ra̱tha̱ḥ | tamā̍ṁsi ||5.031.09||

5.031.10a vāta̍sya yu̱ktān su̱yuja̍ś ci̱d aśvā̍n ka̱viś ci̍d e̱ṣo a̍jagann ava̱syuḥ |
5.031.10c viśve̍ te̱ atra̍ ma̱ruta̱ḥ sakhā̍ya̱ indra̱ brahmā̍ṇi̱ tavi̍ṣīm avardhan ||

vāta̍sya | yu̱ktān | su̱-yuja̍ḥ | ci̱t | aśvā̍n | ka̱viḥ | ci̱t | e̱ṣaḥ | a̱ja̱ga̱n | a̱va̱syuḥ |
viśve̍ | te̱ | atra̍ | ma̱ruta̍ḥ | sakhā̍yaḥ | indra̍ | brahmā̍ṇi | tavi̍ṣīm | a̱va̱rdha̱n ||5.031.10||

5.031.11a sūra̍ś ci̱d ratha̱m pari̍takmyāyā̱m pūrva̍ṁ kara̱d upa̍raṁ jūju̱vāṁsa̍m |
5.031.11c bhara̍c ca̱kram eta̍śa̱ḥ saṁ ri̍ṇāti pu̱ro dadha̍t saniṣyati̱ kratu̍ṁ naḥ ||

sūra̍ḥ | ci̱t | ratha̍m | pari̍-takmyāyām | pūrva̍m | ka̱ra̱t | upa̍ram | jū̱ju̱-vāṁsa̍m |
bhara̍t | ca̱kram | eta̍śaḥ | sam | ri̱ṇā̱ti̱ | pu̱raḥ | dadha̍t | sa̱ni̱ṣya̱ti̱ | kratu̍m | na̱ḥ ||5.031.11||

5.031.12a āyaṁ ja̍nā abhi̱cakṣe̍ jagā̱mendra̱ḥ sakhā̍yaṁ su̱taso̍mam i̱cchan |
5.031.12c vada̱n grāvāva̱ vedi̍m bhriyāte̱ yasya̍ jī̱ram a̍dhva̱ryava̱ś cara̍nti ||

ā | a̱yam | ja̱nā̱ḥ | a̱bhi̱-cakṣe̍ | ja̱gā̱ma̱ | indra̍ḥ | sakhā̍yam | su̱ta-so̍mam | i̱cchan |
vada̍n | grāvā̍ | ava̍ | vedi̍m | bhri̱yā̱te̱ | yasya̍ | jī̱ram | a̱dhva̱ryava̍ḥ | cara̍nti ||5.031.12||

5.031.13a ye cā̱kana̍nta cā̱kana̍nta̱ nū te martā̍ amṛta̱ mo te aṁha̱ āra̍n |
5.031.13c vā̱va̱ndhi yajyū̍m̐r u̱ta teṣu̍ dhe̱hy ojo̱ jane̍ṣu̱ yeṣu̍ te̱ syāma̍ ||

ye | cā̱kana̍nta | cā̱kana̍nta | nu | te | martā̍ḥ | a̱mṛ̱ta̱ | mo iti̍ | te | aṁha̍ḥ | ā | a̱ra̱n |
va̱va̱ndhi | yajyū̍n | u̱ta | teṣu̍ | dhe̱hi̱ | oja̍ḥ | jane̍ṣu | yeṣu̍ | te̱ | syāma̍ ||5.031.13||


5.032.01a ada̍rda̱r utsa̱m asṛ̍jo̱ vi khāni̱ tvam a̍rṇa̱vān ba̍dbadhā̱nām̐ a̍ramṇāḥ |
5.032.01c ma̱hānta̍m indra̱ parva̍ta̱ṁ vi yad vaḥ sṛ̱jo vi dhārā̱ ava̍ dāna̱vaṁ ha̍n ||

ada̍rdaḥ | utsa̍m | asṛ̍jaḥ | vi | khāni̍ | tvam | a̱rṇa̱vān | ba̱dba̱dhā̱nān | ara̍mṇāḥ |
ma̱hānta̍m | i̱ndra̱ | parva̍tam | vi | yat | variti̱ vaḥ | sṛ̱jaḥ | vi | dhārā̍ḥ | ava̍ | dā̱na̱vam | ha̱nniti̍ han ||5.032.01||

5.032.02a tvam utsā̍m̐ ṛ̱tubhi̍r badbadhā̱nām̐ ara̍ṁha̱ ūdha̱ḥ parva̍tasya vajrin |
5.032.02c ahi̍ṁ cid ugra̱ prayu̍ta̱ṁ śayā̍naṁ jagha̱nvām̐ i̍ndra̱ tavi̍ṣīm adhatthāḥ ||

tvam | utsā̍n | ṛ̱tu-bhi̍ḥ | ba̱dba̱dhā̱nān | ara̍ṁhaḥ | ūdha̍ḥ | parva̍tasya | va̱jri̱n |
ahi̍m | ci̱t | u̱gra̱ | pra-yu̍tam | śayā̍nam | ja̱gha̱nvān | i̱ndra̱ | tavi̍ṣīm | a̱dha̱tthā̱ḥ ||5.032.02||

5.032.03a tyasya̍ cin maha̱to nir mṛ̱gasya̱ vadha̍r jaghāna̱ tavi̍ṣībhi̱r indra̍ḥ |
5.032.03c ya eka̱ id a̍pra̱tir manya̍māna̱ ād a̍smād a̱nyo a̍janiṣṭa̱ tavyā̍n ||

tyasya̍ | ci̱t | ma̱ha̱taḥ | niḥ | mṛ̱gasya̍ | vadha̍ḥ | ja̱ghā̱na̱ | tavi̍ṣībhiḥ | indra̍ḥ |
yaḥ | eka̍ḥ | it | a̱pra̱tiḥ | manya̍mānaḥ | āt | a̱smā̱t | a̱nyaḥ | a̱ja̱ni̱ṣṭa̱ | tavyā̍n ||5.032.03||

5.032.04a tyaṁ ci̍d eṣāṁ sva̱dhayā̱ mada̍ntam mi̱ho napā̍taṁ su̱vṛdha̍ṁ tamo̱gām |
5.032.04c vṛṣa̍prabharmā dāna̱vasya̱ bhāma̱ṁ vajre̍ṇa va̱jrī ni ja̍ghāna̱ śuṣṇa̍m ||

tyam | ci̱t | e̱ṣā̱m | sva̱dhayā̍ | mada̍ntam | mi̱haḥ | napā̍tam | su̱-vṛdha̍m | ta̱ma̱ḥ-gām |
vṛṣa̍-prabharmā | dā̱na̱vasya̍ | bhāma̍m | vajre̍ṇa | va̱jrī | ni | ja̱ghā̱na̱ | śuṣṇa̍m ||5.032.04||

5.032.05a tyaṁ ci̍d asya̱ kratu̍bhi̱r niṣa̍ttam ama̱rmaṇo̍ vi̱dad id a̍sya̱ marma̍ |
5.032.05c yad ī̍ṁ sukṣatra̱ prabhṛ̍tā̱ mada̍sya̱ yuyu̍tsanta̱ṁ tama̍si ha̱rmye dhāḥ ||

tyam | ci̱t | asya̍ | kratu̍-bhiḥ | ni-sa̍ttam | a̱ma̱rmaṇa̍ḥ | vi̱dat | it | a̱sya̱ | marma̍ |
yat | ī̱m | su̱-kṣa̱tra̱ | pra-bhṛ̍tā | mada̍sya | yuyu̍tsantam | tama̍si | ha̱rmye | dhāḥ ||5.032.05||

5.032.06a tyaṁ ci̍d i̱tthā ka̍tpa̱yaṁ śayā̍nam asū̱rye tama̍si vāvṛdhā̱nam |
5.032.06c taṁ ci̍n mandā̱no vṛ̍ṣa̱bhaḥ su̱tasyo̱ccair indro̍ apa̱gūryā̍ jaghāna ||

tyam | ci̱t | i̱tthā | ka̱tpa̱yam | śayā̍nam | a̱sū̱rye | tama̍si | va̱vṛ̱dhā̱nam |
tam | ci̱t | ma̱ndā̱naḥ | vṛ̱ṣa̱bhaḥ | su̱tasya̍ | u̱ccaiḥ | indra̍ḥ | a̱pa̱-gūrya̍ | ja̱ghā̱na̱ ||5.032.06||

5.032.07a ud yad indro̍ maha̱te dā̍na̱vāya̱ vadha̱r yami̍ṣṭa̱ saho̱ apra̍tītam |
5.032.07c yad ī̱ṁ vajra̍sya̱ prabhṛ̍tau da̱dābha̱ viśva̍sya ja̱ntor a̍dha̱maṁ ca̍kāra ||

ut | yat | indra̍ḥ | ma̱ha̱te | dā̱na̱vāya̍ | va̱dha̱ḥ | yami̍ṣṭa | saha̍ḥ | apra̍ti-itam |
yat | ī̱m | vajra̍sya | pra-bhṛ̍tau | da̱dābha̍ | viśva̍sya | ja̱ntoḥ | a̱dha̱mam | ca̱kā̱ra̱ ||5.032.07||

5.032.08a tyaṁ ci̱d arṇa̍m madhu̱paṁ śayā̍nam asi̱nvaṁ va̱vram mahy āda̍d u̱graḥ |
5.032.08c a̱pāda̍m a̱tram ma̍ha̱tā va̱dhena̱ ni du̍ryo̱ṇa ā̍vṛṇaṅ mṛ̱dhravā̍cam ||

tyam | ci̱t | arṇa̍m | ma̱dhu̱-pam | śayā̍nam | a̱si̱nvam | va̱vram | mahi̍ | āda̍t | u̱graḥ |
a̱pāda̍m | a̱tram | ma̱ha̱tā | va̱dhena̍ | ni | du̱ryo̱ṇe | a̱vṛ̱ṇa̱k | mṛ̱dhra-vā̍cam ||5.032.08||

5.032.09a ko a̍sya̱ śuṣma̱ṁ tavi̍ṣīṁ varāta̱ eko̱ dhanā̍ bharate̱ apra̍tītaḥ |
5.032.09c i̱me ci̍d asya̱ jraya̍so̱ nu de̱vī indra̱syauja̍so bhi̱yasā̍ jihāte ||

kaḥ | a̱sya̱ | śuṣma̍m | tavi̍ṣīm | va̱rā̱te̱ | eka̍ḥ | dhanā̍ | bha̱ra̱te̱ | apra̍ti-itaḥ |
i̱me | ci̱t | a̱sya̱ | jraya̍saḥ | nu | de̱vī iti̍ | indra̍sya | oja̍saḥ | bhi̱yasā̍ | ji̱hā̱te̱ iti̍ ||5.032.09||

5.032.10a ny a̍smai de̱vī svadhi̍tir jihīta̱ indrā̍ya gā̱tur u̍śa̱tīva̍ yeme |
5.032.10c saṁ yad ojo̍ yu̱vate̱ viśva̍m ābhi̱r anu̍ sva̱dhāvne̍ kṣi̱tayo̍ namanta ||

ni | a̱smai̱ | de̱vī | sva-dhi̍tiḥ | ji̱hī̱te̱ | indrā̍ya | gā̱tuḥ | u̱śa̱tī-i̍va | ye̱me̱ |
sam | yat | oja̍ḥ | yu̱vate̍ | viśva̍m | ā̱bhi̱ḥ | anu̍ | sva̱dhā-vne̍ | kṣi̱taya̍ḥ | na̱ma̱nta̱ ||5.032.10||

5.032.11a eka̱ṁ nu tvā̱ satpa̍ti̱m pāñca̍janyaṁ jā̱taṁ śṛ̍ṇomi ya̱śasa̱ṁ jane̍ṣu |
5.032.11c tam me̍ jagṛbhra ā̱śaso̱ navi̍ṣṭhaṁ do̱ṣā vasto̱r hava̍mānāsa̱ indra̍m ||

eka̱m | nu | tvā̱ | sat-pa̍tim | pāñca̍-janyam | jā̱tam | śṛ̱ṇo̱mi̱ | ya̱śasa̍m | jane̍ṣu |
tam | me̱ | ja̱gṛ̱bhre̱ | ā̱-śasa̍ḥ | navi̍ṣṭham | do̱ṣā | vasto̍ḥ | hava̍mānāsaḥ | indra̍m ||5.032.11||

5.032.12a e̱vā hi tvām ṛ̍tu̱thā yā̱taya̍ntam ma̱ghā vipre̍bhyo̱ dada̍taṁ śṛ̱ṇomi̍ |
5.032.12c kiṁ te̍ bra̱hmāṇo̍ gṛhate̱ sakhā̍yo̱ ye tvā̱yā ni̍da̱dhuḥ kāma̍m indra ||

e̱va | hi | tvām | ṛ̱tu̱-thā | yā̱taya̍ntam | ma̱ghā | vipre̍bhya̍ḥ | dada̍tam | śṛ̱ṇomi̍ |
kim | te̱ | bra̱hmāṇa̍ḥ | gṛ̱ha̱te̱ | sakhā̍yaḥ | ye | tvā̱-yā | ni̱-da̱dhuḥ | kāma̍m | i̱ndra̱ ||5.032.12||


5.033.01a mahi̍ ma̱he ta̱vase̍ dīdhye̱ nṝn indrā̍ye̱tthā ta̱vase̱ ata̍vyān |
5.033.01c yo a̍smai suma̱tiṁ vāja̍sātau stu̱to jane̍ sama̱rya̍ś ci̱keta̍ ||

mahi̍ | ma̱he | ta̱vase̍ | dī̱dhye̱ | nṝn | indrā̍ya | i̱tthā | ta̱vase̍ | ata̍vyān |
yaḥ | a̱smai̱ | su̱-ma̱tim | vāja̍-sātau | stu̱taḥ | jane̍ | sa̱-ma̱rya̍ḥ | ci̱keta̍ ||5.033.01||

5.033.02a sa tvaṁ na̍ indra dhiyasā̱no a̱rkair harī̍ṇāṁ vṛṣa̱n yoktra̍m aśreḥ |
5.033.02c yā i̱tthā ma̍ghava̱nn anu̱ joṣa̱ṁ vakṣo̍ a̱bhi prāryaḥ sa̍kṣi̱ janā̍n ||

saḥ | tvam | na̱ḥ | i̱ndra̱ | dhi̱ya̱sā̱naḥ | a̱rkaiḥ | harī̍ṇām | vṛ̱ṣa̱n | yoktra̍m | a̱śre̱ḥ |
yāḥ | i̱tthā | ma̱gha̱-va̱n | anu̍ | joṣa̍m | vakṣa̍ḥ | a̱bhi | pra | a̱ryaḥ | sa̱kṣi̱ | janā̍n ||5.033.02||

5.033.03a na te ta̍ indrā̱bhy a1̱̍smad ṛ̱ṣvāyu̍ktāso abra̱hmatā̱ yad asa̍n |
5.033.03c tiṣṭhā̱ ratha̱m adhi̱ taṁ va̍jraha̱stā ra̱śmiṁ de̍va yamase̱ svaśva̍ḥ ||

na | te | te̱ | i̱ndra̱ | a̱bhi | a̱smat | ṛ̱ṣva̱ | ayu̍ktāsaḥ | a̱bra̱hmatā̍ | yat | asa̍n |
tiṣṭha̍ | ratha̍m | adhi̍ | tam | va̱jra̱-ha̱sta̱ | ā | ra̱śmim | de̱va̱ | ya̱ma̱se̱ | su̱-aśva̍ḥ ||5.033.03||

5.033.04a pu̱rū yat ta̍ indra̱ santy u̱kthā gave̍ ca̱kartho̱rvarā̍su̱ yudhya̍n |
5.033.04c ta̱ta̱kṣe sūryā̍ya ci̱d oka̍si̱ sve vṛṣā̍ sa̱matsu̍ dā̱sasya̱ nāma̍ cit ||

pu̱ru | yat | te̱ | i̱ndra̱ | santi̍ | u̱kthā | gave̍ | ca̱kartha̍ | u̱rvarā̍su | yudhya̍n |
ta̱ta̱kṣe | sūryā̍ya | ci̱t | oka̍si | sve | vṛṣā̍ | sa̱mat-su̍ | dā̱sasya̍ | nāma̍ | ci̱t ||5.033.04||

5.033.05a va̱yaṁ te ta̍ indra̱ ye ca̱ nara̱ḥ śardho̍ jajñā̱nā yā̱tāś ca̱ rathā̍ḥ |
5.033.05c āsmāñ ja̍gamyād ahiśuṣma̱ satvā̱ bhago̱ na havya̍ḥ prabhṛ̱theṣu̱ cāru̍ḥ ||

va̱yam | te | te̱ | i̱ndra̱ | ye | ca̱ | nara̍ḥ | śardha̍ḥ | ja̱jñā̱nāḥ | yā̱tāḥ | ca̱ | rathā̍ḥ |
ā | a̱smān | ja̱ga̱myā̱t | a̱hi̱-śu̱ṣma̱ | satvā̍ | bhaga̍ḥ | na | havya̍ḥ | pra̱-bhṛ̱theṣu̍ | cāru̍ḥ ||5.033.05||

5.033.06a pa̱pṛ̱kṣeṇya̍m indra̱ tve hy ojo̍ nṛ̱mṇāni̍ ca nṛ̱tamā̍no̱ ama̍rtaḥ |
5.033.06c sa na̱ enī̍ṁ vasavāno ra̱yiṁ dā̱ḥ prāryaḥ stu̍ṣe tuvima̱ghasya̱ dāna̍m ||

pa̱pṛ̱kṣeṇya̍m | i̱ndra̱ | tve iti̍ | hi | oja̍ḥ | nṛ̱mṇāni̍ | ca̱ | nṛ̱tamā̍naḥ | ama̍rtaḥ |
saḥ | na̱ḥ | enī̍m | va̱sa̱vā̱na̱ḥ | ra̱yim | dā̱ḥ | pra | a̱ryaḥ | stu̱ṣe̱ | tu̱vi̱-ma̱ghasya̍ | dāna̍m ||5.033.06||

5.033.07a e̱vā na̍ indro̱tibhi̍r ava pā̱hi gṛ̍ṇa̱taḥ śū̍ra kā̱rūn |
5.033.07c u̱ta tvaca̱ṁ dada̍to̱ vāja̍sātau piprī̱hi madhva̱ḥ suṣu̍tasya̱ cāro̍ḥ ||

e̱va | na̱ḥ | i̱ndra̱ | ū̱ti-bhi̍ḥ | a̱va̱ | pā̱hi | gṛ̱ṇa̱taḥ | śū̱ra̱ | ka̱rūn |
u̱ta | tvaca̍m | dada̍taḥ | vāja̍-sātau | pi̱prī̱hi | madhva̍ḥ | su-su̍tasya | cāro̍ḥ ||5.033.07||

5.033.08a u̱ta tye mā̍ pauruku̱tsyasya̍ sū̱res tra̱sada̍syor hira̱ṇino̱ rarā̍ṇāḥ |
5.033.08c vaha̍ntu mā̱ daśa̱ śyetā̍so asya gairikṣi̱tasya̱ kratu̍bhi̱r nu sa̍śce ||

u̱ta | tye | mā̱ | pau̱ru̱-ku̱tasyasya̍ | sū̱reḥ | tra̱sada̍syoḥ | hi̱ra̱ṇina̍ḥ | rarā̍ṇāḥ |
vaha̍ntu | mā̱ | daśa̍ | śyetā̍saḥ | a̱sya̱ | gai̱ri̱-kṣi̱tasya̍ | kratu̍-bhiḥ | nu | sa̱śce̱ ||5.033.08||

5.033.09a u̱ta tye mā̍ māru̱tāśva̍sya̱ śoṇā̱ḥ kratvā̍maghāso vi̱datha̍sya rā̱tau |
5.033.09c sa̱hasrā̍ me̱ cyava̍tāno̱ dadā̍na ānū̱kam a̱ryo vapu̍ṣe̱ nārca̍t ||

u̱ta | tye | mā̱ | mā̱ru̱ta-a̍śvasya | śoṇā̍ḥ | kratvā̍-maghāsaḥ | vi̱datha̍sya | rā̱tau |
sa̱hasrā̍ | me̱ | cyava̍tānaḥ | dadā̍naḥ | ā̱nū̱kam | a̱ryaḥ | vapu̍ṣe | na | ā̱rca̱t ||5.033.09||

5.033.10a u̱ta tye mā̍ dhva̱nya̍sya̱ juṣṭā̍ lakṣma̱ṇya̍sya su̱ruco̱ yatā̍nāḥ |
5.033.10c ma̱hnā rā̱yaḥ sa̱ṁvara̍ṇasya̱ ṛṣe̍r vra̱jaṁ na gāva̱ḥ praya̍tā̱ api̍ gman ||

u̱ta | tye | mā̱ | dhva̱nya̍sya | juṣṭā̍ḥ | la̱kṣma̱ṇya̍sya | su̱-ruca̍ḥ | yatā̍nāḥ |
ma̱hnā | rā̱yaḥ | sa̱m-vara̍ṇasya | ṛṣe̍ḥ | vra̱jam | na | gāva̍ḥ | pra-ya̍tāḥ | api̍ | gma̱n ||5.033.10||


5.034.01a ajā̍taśatrum a̱jarā̱ sva̍rva̱ty anu̍ sva̱dhāmi̍tā da̱smam ī̍yate |
5.034.01c su̱nota̍na̱ paca̍ta̱ brahma̍vāhase puruṣṭu̱tāya̍ prata̱raṁ da̍dhātana ||

ajā̍ta-śatrum | a̱jarā̍ | sva̍ḥ-vatī | anu̍ | sva̱dhā | ami̍tā | da̱smam | ī̱ya̱te̱ |
su̱nota̍na | paca̍ta | brahma̍-vāhase | pu̱ru̱-stu̱tāya̍ | pra̱-ta̱ram | da̱dhā̱ta̱na̱ ||5.034.01||

5.034.02a ā yaḥ some̍na ja̱ṭhara̱m api̍pra̱tāma̍ndata ma̱ghavā̱ madhvo̱ andha̍saḥ |
5.034.02c yad ī̍m mṛ̱gāya̱ hanta̍ve ma̱hāva̍dhaḥ sa̱hasra̍bhṛṣṭim u̱śanā̍ va̱dhaṁ yama̍t ||

ā | yaḥ | some̍na | ja̱ṭhara̍m | api̍prata | ama̍ndata | ma̱gha-vā̍ | madhva̍ḥ | andha̍saḥ |
yat | ī̱m | mṛ̱gāya̍ | hanta̍ve | ma̱hā-va̍dhaḥ | sa̱hasra̍-bhṛṣṭim | u̱śanā̍ | va̱dham | yama̍t ||5.034.02||

5.034.03a yo a̍smai ghra̱ṁsa u̱ta vā̱ ya ūdha̍ni̱ soma̍ṁ su̱noti̱ bhava̍ti dyu̱mām̐ aha̍ |
5.034.03c apā̍pa śa̱kras ta̍ta̱nuṣṭi̍m ūhati ta̱nūśu̍bhram ma̱ghavā̱ yaḥ ka̍vāsa̱khaḥ ||

yaḥ | a̱smai̱ | ghra̱ṁse | u̱ta | vā̱ | yaḥ | ūdha̍ni | soma̍m | su̱noti̍ | bhava̍ti | dyu̱-mān | aha̍ |
apa̍-apa | sa̱kraḥ | ta̱ta̱nuṣṭi̍m | ū̱ha̱ti̱ | ta̱nū-śu̍bhram | ma̱gha-vā̍ | yaḥ | ka̱va̱-sa̱khaḥ ||5.034.03||

5.034.04a yasyāva̍dhīt pi̱tara̱ṁ yasya̍ mā̱tara̱ṁ yasya̍ śa̱kro bhrāta̍ra̱ṁ nāta̍ īṣate |
5.034.04c vetīd v a̍sya̱ praya̍tā yataṁka̱ro na kilbi̍ṣād īṣate̱ vasva̍ āka̱raḥ ||

yasya̍ | ava̍dhīt | pi̱tara̍m | yasya̍ | mā̱tara̍m | yasya̍ | śa̱kraḥ | bhrāta̍ram | na | ata̍ḥ | ī̱ṣa̱te̱ |
veti̍ | it | ū̱m̐ iti̍ | a̱sya̱ | pra-ya̍tā | ya̱ta̱m-ka̱raḥ | na | kilbi̍ṣāt | ī̱ṣa̱te̱ | vasva̍ḥ | ā̱-ka̱raḥ ||5.034.04||

5.034.05a na pa̱ñcabhi̍r da̱śabhi̍r vaṣṭy ā̱rabha̱ṁ nāsu̍nvatā sacate̱ puṣya̍tā ca̱na |
5.034.05c ji̱nāti̱ ved a̍mu̱yā hanti̍ vā̱ dhuni̱r ā de̍va̱yum bha̍jati̱ goma̍ti vra̱je ||

na | pa̱ñca-bhi̍ḥ | da̱śa-bhi̍ḥ | va̱ṣṭi̱ | ā̱-rabha̍m | na | asu̍nvatā | sa̱ca̱te̱ | puṣya̍tā | ca̱na |
ji̱nāti̍ | vā̱ | it | a̱mu̱yā | hanti̍ | vā̱ | dhuni̍ḥ | ā | de̱va̱-yum | bha̱ja̱ti̱ | go-ma̍ti | vra̱je ||5.034.05||

5.034.06a vi̱tvakṣa̍ṇa̱ḥ samṛ̍tau cakramāsa̱jo 'su̍nvato̱ viṣu̍ṇaḥ sunva̱to vṛ̱dhaḥ |
5.034.06c indro̱ viśva̍sya dami̱tā vi̱bhīṣa̍ṇo yathāva̱śaṁ na̍yati̱ dāsa̱m ārya̍ḥ ||

vi̱-tvakṣa̍ṇaḥ | sam-ṛ̍tau | ca̱kra̱m-ā̱sa̱jaḥ | asu̍nvataḥ | viṣu̍ṇaḥ | su̱nva̱taḥ | vṛ̱dhaḥ |
indra̍ḥ | viśva̍sya | da̱mi̱tā | vi̱-bhīṣa̍ṇaḥ | ya̱thā̱-va̱śam | na̱ya̱ti̱ | dāsa̍m | ārya̍ḥ ||5.034.06||

5.034.07a sam ī̍m pa̱ṇer a̍jati̱ bhoja̍nam mu̱ṣe vi dā̱śuṣe̍ bhajati sū̱nara̱ṁ vasu̍ |
5.034.07c du̱rge ca̱na dhri̍yate̱ viśva̱ ā pu̱ru jano̱ yo a̍sya̱ tavi̍ṣī̱m acu̍krudhat ||

sam | ī̱m | pa̱ṇeḥ | a̱ja̱ti̱ | bhoja̍nam | mu̱ṣe | vi | dā̱śuṣe̍ | bha̱ja̱ti̱ | sū̱nara̍m | vasu̍ |
du̱ḥ-ge | ca̱na | dhri̱ya̱te̱ | viśva̍ḥ | ā | pu̱ru | jana̍ḥ | yaḥ | a̱sya̱ | tavi̍ṣīm | acu̍krudhat ||5.034.07||

5.034.08a saṁ yaj janau̍ su̱dhanau̍ vi̱śvaśa̍rdhasā̱v ave̱d indro̍ ma̱ghavā̱ goṣu̍ śu̱bhriṣu̍ |
5.034.08c yuja̱ṁ hy a1̱̍nyam akṛ̍ta pravepa̱ny ud ī̱ṁ gavya̍ṁ sṛjate̱ satva̍bhi̱r dhuni̍ḥ ||

sam | yat | janau̍ | su̱-dhanau̍ | vi̱śva-śa̍rdhasau | ave̍t | indra̍ḥ | ma̱gha-vā̍ | goṣu̍ | śu̱bhriṣu̍ |
yuja̍m | hi | a̱nyam | akṛ̍ta | pra̱-ve̱pa̱nī | ut | ī̱m | gavya̍m | sṛ̱ja̱te̱ | satva̍-bhiḥ | dhuni̍ḥ ||5.034.08||

5.034.09a sa̱ha̱sra̱sām āgni̍veśiṁ gṛṇīṣe̱ śatri̍m agna upa̱māṁ ke̱tum a̱ryaḥ |
5.034.09c tasmā̱ āpa̍ḥ sa̱ṁyata̍ḥ pīpayanta̱ tasmi̍n kṣa̱tram ama̍vat tve̱ṣam a̍stu ||

sa̱ha̱sra̱-sām | āgni̍-veśim | gṛ̱ṇī̱ṣe̱ | śatri̍m | a̱gne̱ | u̱pa̱-mām | ke̱tum | a̱ryaḥ |
tasmai̍ | āpa̍ḥ | sa̱m-yata̍ḥ | pī̱pa̱ya̱nta̱ | tasmi̍n | kṣa̱tram | ama̍-vat | tve̱ṣam | a̱stu̱ ||5.034.09||


5.035.01a yas te̱ sādhi̱ṣṭho 'va̍sa̱ indra̱ kratu̱ṣ ṭam ā bha̍ra |
5.035.01c a̱smabhya̍ṁ carṣaṇī̱saha̱ṁ sasni̱ṁ vāje̍ṣu du̱ṣṭara̍m ||

yaḥ | te̱ | sādhi̍ṣṭhaḥ | ava̍se | indra̍ | kratu̍ḥ | tam | ā | bha̱ra̱ |
a̱smabhya̍m | ca̱rṣa̱ṇi̱-saha̍m | sasni̍m | vāje̍ṣu | du̱stara̍m ||5.035.01||

5.035.02a yad i̍ndra te̱ cata̍sro̱ yac chū̍ra̱ santi̍ ti̱sraḥ |
5.035.02c yad vā̱ pañca̍ kṣitī̱nām ava̱s tat su na̱ ā bha̍ra ||

yat | i̱ndra̱ | te̱ | cata̍sraḥ | yat | śū̱ra̱ | santi̍ | ti̱sraḥ |
yat | vā̱ | pañca̍ | kṣi̱tī̱nām | ava̍ḥ | tat | su | na̱ḥ | ā | bha̱ra̱ ||5.035.02||

5.035.03a ā te 'vo̱ vare̍ṇya̱ṁ vṛṣa̍ntamasya hūmahe |
5.035.03c vṛṣa̍jūti̱r hi ja̍jñi̱ṣa ā̱bhūbhi̍r indra tu̱rvaṇi̍ḥ ||

ā | te̱ | ava̍ḥ | vare̍ṇyam | vṛṣa̍n-tamasya | hū̱ma̱he̱ |
vṛṣa̍-jūtiḥ | hi | ja̱jñi̱ṣe | ā̱-bhūbhi̍ḥ | i̱ndra̱ | tu̱rvaṇi̍ḥ ||5.035.03||

5.035.04a vṛṣā̱ hy asi̱ rādha̍se jajñi̱ṣe vṛṣṇi̍ te̱ śava̍ḥ |
5.035.04c svakṣa̍traṁ te dhṛ̱ṣan mana̍ḥ satrā̱ham i̍ndra̱ pauṁsya̍m ||

vṛṣā̍ | hi | asi̍ | rādha̍se | ja̱jñi̱ṣe | vṛṣṇi̍ | te̱ | śava̍ḥ |
sva-kṣa̍tram | te̱ | dhṛ̱ṣam | mana̍ḥ | sa̱trā̱-ham | i̱ndra̱ | pauṁsya̍m ||5.035.04||

5.035.05a tvaṁ tam i̍ndra̱ martya̍m amitra̱yanta̍m adrivaḥ |
5.035.05c sa̱rva̱ra̱thā śa̍takrato̱ ni yā̍hi śavasas pate ||

tvam | tam | i̱ndra̱ | martya̍m | a̱mi̱tra̱-yanta̍m | a̱dri̱-va̱ḥ |
sa̱rva̱-ra̱thā | śa̱ta̱kra̱to̱ iti̍ śata-krato | ni | yā̱hi̱ | śa̱va̱sa̱ḥ | pa̱te̱ ||5.035.05||

5.035.06a tvām id vṛ̍trahantama̱ janā̍so vṛ̱ktaba̍rhiṣaḥ |
5.035.06c u̱gram pū̱rvīṣu̍ pū̱rvyaṁ hava̍nte̱ vāja̍sātaye ||

tvām | it | vṛ̱tra̱ha̱n-ta̱ma̱ | janā̍saḥ | vṛ̱kta-ba̍rhiṣaḥ |
u̱gram | pū̱rvīṣu̍ | pū̱rvyam | hava̍nte | vāja̍-sātaye ||5.035.06||

5.035.07a a̱smāka̍m indra du̱ṣṭara̍m puro̱yāvā̍nam ā̱jiṣu̍ |
5.035.07c sa̱yāvā̍na̱ṁ dhane̍-dhane vāja̱yanta̍m avā̱ ratha̍m ||

a̱smāka̍m | i̱ndra̱ | du̱stara̍m | pu̱ra̱ḥ-yāvā̍nam | ā̱jiṣu̍ |
sa̱-yāvā̍nam | dhane̍-dhane | vā̱ja̱-yanta̍m | a̱va̱ | ratha̍m ||5.035.07||

5.035.08a a̱smāka̍m i̱ndrehi̍ no̱ ratha̍m avā̱ pura̍ṁdhyā |
5.035.08c va̱yaṁ śa̍viṣṭha̱ vārya̍ṁ di̱vi śravo̍ dadhīmahi di̱vi stoma̍m manāmahe ||

a̱smāka̍m | i̱ndra̱ | ā | i̱hi̱ | na̱ḥ | ratha̍m | a̱va̱ | pura̍m-dhyā |
va̱yam | śa̱vi̱ṣṭha̱ | vārya̍m | di̱vi | śrava̍ḥ | da̱dhī̱ma̱hi̱ | di̱vi | stoma̍m | ma̱nā̱ma̱he̱ ||5.035.08||


5.036.01a sa ā ga̍ma̱d indro̱ yo vasū̍nā̱ṁ cike̍ta̱d dātu̱ṁ dāma̍no rayī̱ṇām |
5.036.01c dha̱nva̱ca̱ro na vaṁsa̍gas tṛṣā̱ṇaś ca̍kamā̱naḥ pi̍batu du̱gdham a̱ṁśum ||

saḥ | ā | ga̱ma̱t | indra̍ḥ | yaḥ | vasū̍nām | cike̍tat | dātu̍m | dāma̍naḥ | ra̱yī̱ṇām |
dha̱nva̱-ca̱raḥ | na | vaṁsa̍-gaḥ | tṛ̱ṣā̱ṇaḥ | ca̱ka̱mā̱naḥ | pi̱ba̱tu̱ | du̱gdham | a̱ṁśum ||5.036.01||

5.036.02a ā te̱ hanū̍ harivaḥ śūra̱ śipre̱ ruha̱t somo̱ na parva̍tasya pṛ̱ṣṭhe |
5.036.02c anu̍ tvā rāja̱nn arva̍to̱ na hi̱nvan gī̱rbhir ma̍dema puruhūta̱ viśve̍ ||

ā | te̱ | hanū̱ iti̍ | ha̱ri̱-va̱ḥ | śū̱ra̱ | śipre̱ iti̍ | ruha̍t | soma̍ḥ | na | parva̍tasya | pṛ̱ṣṭhe |
anu̍ | tvā̱ | rā̱ja̱n | arva̍taḥ | na | hi̱nvan | gī̱ḥ-bhiḥ | ma̱de̱ma̱ | pu̱ru̱-hū̱ta̱ | viśve̍ ||5.036.02||

5.036.03a ca̱kraṁ na vṛ̱ttam pu̍ruhūta vepate̱ mano̍ bhi̱yā me̱ ama̍te̱r id a̍drivaḥ |
5.036.03c rathā̱d adhi̍ tvā jari̱tā sa̍dāvṛdha ku̱vin nu sto̍ṣan maghavan purū̱vasu̍ḥ ||

ca̱kram | na | vṛ̱ttam | pu̱ru̱-hū̱ta̱ | ve̱pa̱te̱ | mana̍ḥ | bhi̱yā | me̱ | ama̍teḥ | it | a̱dri̱-va̱ḥ |
rathā̍t | adhi̍ | tvā̱ | ja̱ri̱tā | sa̱dā̱-vṛ̱dha̱ | ku̱vit | nu | sto̱ṣa̱m | ma̱gha̱-va̱n | pu̱ru̱-vasu̍ḥ ||5.036.03||

5.036.04a e̱ṣa grāve̍va jari̱tā ta̍ i̱ndreya̍rti̱ vāca̍m bṛ̱had ā̍śuṣā̱ṇaḥ |
5.036.04c pra sa̱vyena̍ maghava̱n yaṁsi̍ rā̱yaḥ pra da̍kṣi̱ṇid dha̍rivo̱ mā vi ve̍naḥ ||

e̱ṣaḥ | grāvā̍-iva | ja̱ri̱tā | te̱ | i̱ndra̱ | iya̍rti | vāca̍m | bṛ̱hat | ā̱śu̱ṣā̱ṇaḥ |
pra | se̱vyena̍ | ma̱gha̱-va̱n | yaṁsi̍ | rā̱yaḥ | pra | da̱kṣi̱ṇit | ha̱ri̱-va̱ḥ | mā | vi | ve̱na̱ḥ ||5.036.04||

5.036.05a vṛṣā̍ tvā̱ vṛṣa̍ṇaṁ vardhatu̱ dyaur vṛṣā̱ vṛṣa̍bhyāṁ vahase̱ hari̍bhyām |
5.036.05c sa no̱ vṛṣā̱ vṛṣa̍rathaḥ suśipra̱ vṛṣa̍krato̱ vṛṣā̍ vajri̱n bhare̍ dhāḥ ||

vṛṣā̍ | tvā̱ | vṛṣa̍ṇam | va̱rdha̱tu̱ | dyauḥ | vṛṣā̍ | vṛṣa̍-bhyām | va̱ha̱se̱ | hari̍-bhyām |
saḥ | na̱ḥ | vṛṣā̍ | vṛṣa̍-rathaḥ | su̱-śi̱pra̱ | vṛṣa̍krato̱ iti̱ vṛṣa̍-krato | vṛṣā̍ | vajri̱n | bhare̍ | dhā̱ḥ ||5.036.05||

5.036.06a yo rohi̍tau vā̱jinau̍ vā̱jinī̍vān tri̱bhiḥ śa̱taiḥ saca̍mānā̱v adi̍ṣṭa |
5.036.06c yūne̱ sam a̍smai kṣi̱tayo̍ namantāṁ śru̱tara̍thāya maruto duvo̱yā ||

yaḥ | rohi̍tau | vā̱jinau̍ | vā̱jinī̍-vān | tri̱-bhiḥ | śa̱taiḥ | saca̍mānau | adi̍ṣṭa |
yūne̍ | sam | a̱smai̱ | kṣi̱taya̍ḥ | na̱ma̱ntā̱m | śru̱ta-ra̍thāya | ma̱ru̱ta̱ḥ | du̱va̱ḥ-yā ||5.036.06||


5.037.01a sam bhā̱nunā̍ yatate̱ sūrya̍syā̱juhvā̍no ghṛ̱tapṛ̍ṣṭha̱ḥ svañcā̍ḥ |
5.037.01c tasmā̱ amṛ̍dhrā u̱ṣaso̱ vy u̍cchā̱n ya indrā̍ya su̱navā̱mety āha̍ ||

sam | bhā̱nunā̍ | ya̱ta̱te̱ | sūrya̍sya | ā̱-juhvā̍naḥ | ghṛ̱ta-pṛ̍ṣṭhaḥ | su̱-añcā̍ḥ |
tasmai̍ | amṛ̍dhrāḥ | u̱ṣasa̍ḥ | vi | u̱cchā̱n | yaḥ | indrā̍ya | su̱navā̍ma | iti̍ | āha̍ ||5.037.01||

5.037.02a sami̍ddhāgnir vanavat stī̱rṇaba̍rhir yu̱ktagrā̍vā su̱taso̍mo jarāte |
5.037.02c grāvā̍ṇo̱ yasye̍ṣi̱raṁ vada̱nty aya̍d adhva̱ryur ha̱viṣāva̱ sindhu̍m ||

sami̍ddha-agniḥ | va̱na̱va̱t | stī̱rṇa-ba̍rhiḥ | yu̱kta-grā̍vā | su̱ta-so̍maḥ | ja̱rā̱te̱ |
grāvā̍ṇaḥ | yasya̍ | i̱ṣi̱ram | vada̍nti | aya̍t | a̱dhva̱ryuḥ | ha̱viṣā̍ | ava̍ | sindhu̍m ||5.037.02||

5.037.03a va̱dhūr i̱yam pati̍m i̱cchanty e̍ti̱ ya ī̱ṁ vahā̍te̱ mahi̍ṣīm iṣi̱rām |
5.037.03c āsya̍ śravasyā̱d ratha̱ ā ca̍ ghoṣāt pu̱rū sa̱hasrā̱ pari̍ vartayāte ||

va̱dhūḥ | i̱yam | pati̍m | i̱cchantī̍ | e̱ti̱ | yaḥ | ī̱m | vahā̍te | mahi̍ṣīm | i̱ṣi̱rām |
ā | a̱sya̱ | śra̱va̱syā̱t | ratha̍ḥ | ā | ca̱ | gho̱ṣā̱t | pu̱ru | sa̱hasrā̍ | pari̍ | va̱rta̱yā̱te̱ ||5.037.03||

5.037.04a na sa rājā̍ vyathate̱ yasmi̱nn indra̍s tī̱vraṁ soma̱m piba̍ti̱ gosa̍khāyam |
5.037.04c ā sa̍tva̱nair aja̍ti̱ hanti̍ vṛ̱traṁ kṣeti̍ kṣi̱tīḥ su̱bhago̱ nāma̱ puṣya̍n ||

na | saḥ | rājā̍ | vya̱tha̱te̱ | yasmi̍n | indra̍ḥ | tī̱vram | soma̍m | piba̍ti | go-sa̍khāyam |
ā | sa̱tva̱naiḥ | aja̍ti | hanti̍ | vṛ̱tram | kṣeti̍ | kṣi̱tīḥ | su̱-bhaga̍ḥ | nāma̍ | puṣya̍n ||5.037.04||

5.037.05a puṣyā̱t kṣeme̍ a̱bhi yoge̍ bhavāty u̱bhe vṛtau̍ saṁya̱tī saṁ ja̍yāti |
5.037.05c pri̱yaḥ sūrye̍ pri̱yo a̱gnā bha̍vāti̱ ya indrā̍ya su̱taso̍mo̱ dadā̍śat ||

puṣyā̍t | kṣeme̍ | a̱bhi | yoge̍ | bha̱vā̱ti̱ | u̱bhe iti̍ | vṛtau̍ | sa̱ṁya̱tī iti̍ sa̱m-ya̱tī | sam | ja̱yā̱ti̱ |
pri̱yaḥ | sūrye̍ | pri̱yaḥ | a̱gnā | bha̱vā̱ti̱ | yaḥ | indrā̍ya | su̱ta-so̍maḥ | dadā̍śat ||5.037.05||


5.038.01a u̱roṣ ṭa̍ indra̱ rādha̍so vi̱bhvī rā̱tiḥ śa̍takrato |
5.038.01c adhā̍ no viśvacarṣaṇe dyu̱mnā su̍kṣatra maṁhaya ||

u̱roḥ | te̱ | i̱ndra̱ | rādha̍saḥ | vi̱-bhvī | rā̱tiḥ | śa̱ta̱kra̱to̱ iti̍ śata-krato |
adha̍ | na̱ḥ | vi̱śva̱-ca̱rṣa̱ṇe̱ | dyu̱mnā | su̱-kṣa̱tra̱ | ma̱ṁha̱ya̱ ||5.038.01||

5.038.02a yad ī̍m indra śra̱vāyya̱m iṣa̍ṁ śaviṣṭha dadhi̱ṣe |
5.038.02c pa̱pra̱the dī̍rgha̱śrutta̍ma̱ṁ hira̍ṇyavarṇa du̱ṣṭara̍m ||

yat | ī̱m | i̱ndra̱ | śra̱vāyya̍m | iṣa̍m | śa̱vi̱ṣṭha̱ | da̱dhi̱ṣe |
pa̱pra̱the | dī̱rgha̱śrut-ta̍mam | hira̍ṇya-varṇa | du̱stara̍m ||5.038.02||

5.038.03a śuṣmā̍so̱ ye te̍ adrivo me̱hanā̍ keta̱sāpa̍ḥ |
5.038.03c u̱bhā de̱vāv a̱bhiṣṭa̍ye di̱vaś ca̱ gmaś ca̍ rājathaḥ ||

śuṣmā̍saḥ | ye | te̱ | a̱dri̱-va̱ḥ | me̱hanā̍ | ke̱ta̱-sāpa̍ḥ |
u̱bhā | de̱vau | a̱bhiṣṭa̍ye | di̱vaḥ | ca̱ | gmaḥ | ca̱ | rā̱ja̱tha̱ḥ ||5.038.03||

5.038.04a u̱to no̍ a̱sya kasya̍ ci̱d dakṣa̍sya̱ tava̍ vṛtrahan |
5.038.04c a̱smabhya̍ṁ nṛ̱mṇam ā bha̍rā̱smabhya̍ṁ nṛmaṇasyase ||

u̱to iti̍ | na̱ḥ | a̱sya | kasya̍ | ci̱t | dakṣa̍sya | tava̍ | vṛ̱tra̱-ha̱n |
a̱smabhya̍m | nṛ̱mṇam | ā | bhā̱ra̱ | a̱smabhya̍m | nṛ̱-ma̱na̱sya̱se̱ ||5.038.04||

5.038.05a nū ta̍ ā̱bhir a̱bhiṣṭi̍bhi̱s tava̱ śarma̍ñ chatakrato |
5.038.05c indra̱ syāma̍ sugo̱pāḥ śūra̱ syāma̍ sugo̱pāḥ ||

nu | te̱ | ā̱bhiḥ | a̱bhiṣṭi̍-bhiḥ | tava̍ | śarma̍n | śa̱ta̱kra̱to̱ iti̍ śata-krato |
indra̍ | syāma̍ | su̱-go̱pāḥ | śūra̍ | syāma̍ | su̱-go̱pāḥ ||5.038.05||


5.039.01a yad i̍ndra citra me̱hanāsti̱ tvādā̍tam adrivaḥ |
5.039.01c rādha̱s tan no̍ vidadvasa ubhayāha̱sty ā bha̍ra ||

yat | i̱ndra̱ | ci̱tra̱ | me̱hanā̍ | asti̍ | tvā-dā̍tam | a̱dri̱-va̱ḥ |
rādha̍ḥ | tat | na̱ḥ | vi̱da̱dva̱so̱ iti̍ vidat-vaso | u̱bha̱yā̱ha̱sti | ā | bha̱ra̱ ||5.039.01||

5.039.02a yan manya̍se̱ vare̍ṇya̱m indra̍ dyu̱kṣaṁ tad ā bha̍ra |
5.039.02c vi̱dyāma̱ tasya̍ te va̱yam akū̍pārasya dā̱vane̍ ||

yat | manya̍se | vare̍ṇyam | indra̍ | dyu̱kṣam | tat | ā | bha̱ra̱ |
vi̱dyāma̍ | tasya̍ | te̱ | va̱yam | akū̍pārasya | dā̱vane̍ ||5.039.02||

5.039.03a yat te̍ di̱tsu pra̱rādhya̱m mano̱ asti̍ śru̱tam bṛ̱hat |
5.039.03c tena̍ dṛ̱ḻhā ci̍d adriva̱ ā vāja̍ṁ darṣi sā̱taye̍ ||

yat | te̱ | di̱tsu | pra̱-rādhya̍m | mana̍ḥ | asti̍ | śru̱tam | bṛ̱hat |
tena̍ | dṛ̱ḻhā | ci̱t | a̱dri̱-va̱ḥ | ā | vāja̍m | da̱rṣi̱ | sā̱taye̍ ||5.039.03||

5.039.04a maṁhi̍ṣṭhaṁ vo ma̱ghonā̱ṁ rājā̍naṁ carṣaṇī̱nām |
5.039.04c indra̱m upa̱ praśa̍staye pū̱rvībhi̍r jujuṣe̱ gira̍ḥ ||

maṁhi̍ṣṭham | va̱ḥ | ma̱ghonā̍m | rājā̍nam | ca̱rṣa̱ṇī̱nām |
indra̍m | upa̍ | pra-śa̍staye | pū̱rvībhi̍ḥ | ju̱ju̱ṣe̱ | gira̍ḥ ||5.039.04||

5.039.05a asmā̱ it kāvya̱ṁ vaca̍ u̱ktham indrā̍ya̱ śaṁsya̍m |
5.039.05c tasmā̍ u̱ brahma̍vāhase̱ giro̍ vardha̱nty atra̍yo̱ gira̍ḥ śumbha̱nty atra̍yaḥ ||

asmai̍ | it | kāvya̍m | vaca̍ḥ | u̱ktham | indrā̍ya | śaṁsya̍m |
tasmai̍ | ū̱m̐ iti̍ | brahma̍-vāhase | gira̍ḥ | va̱rdha̱nti̱ | atra̍yaḥ | gira̍ḥ | śu̱mbha̱nti̱ | atra̍yaḥ ||5.039.05||


5.040.01a ā yā̱hy adri̍bhiḥ su̱taṁ soma̍ṁ somapate piba |
5.040.01c vṛṣa̍nn indra̱ vṛṣa̍bhir vṛtrahantama ||

ā | yā̱hi̱ | adri̍-bhiḥ | su̱tam | soma̍m | so̱ma̱-pa̱te̱ | pi̱ba̱ |
vṛṣa̍n | i̱ndra̱ | vṛṣa̍-bhiḥ | vṛ̱tra̱ha̱n-ta̱ma̱ ||5.040.01||

5.040.02a vṛṣā̱ grāvā̱ vṛṣā̱ mado̱ vṛṣā̱ somo̍ a̱yaṁ su̱taḥ |
5.040.02c vṛṣa̍nn indra̱ vṛṣa̍bhir vṛtrahantama ||

vṛṣā̍ | grāvā̍ | vṛṣā̍ | mada̍ḥ | vṛṣā̍ | soma̍ḥ | a̱yam | su̱taḥ |
vṛṣa̍n | i̱ndra̱ | vṛṣa̍-bhiḥ | vṛ̱tra̱ha̱n-ta̱ma̱ ||5.040.02||

5.040.03a vṛṣā̍ tvā̱ vṛṣa̍ṇaṁ huve̱ vajri̍ñ ci̱trābhi̍r ū̱tibhi̍ḥ |
5.040.03c vṛṣa̍nn indra̱ vṛṣa̍bhir vṛtrahantama ||

vṛṣā̍ | tvā̱ | vṛṣa̍ṇam | hu̱ve̱ | vajri̍n | ci̱trābhi̍ḥ | ū̱ti-bhi̍ḥ |
vṛṣa̍n | i̱ndra̱ | vṛṣa̍-bhiḥ | vṛ̱tra̱ha̱n-ta̱ma̱ ||5.040.03||

5.040.04a ṛ̱jī̱ṣī va̱jrī vṛ̍ṣa̱bhas tu̍rā̱ṣāṭ chu̱ṣmī rājā̍ vṛtra̱hā so̍ma̱pāvā̍ |
5.040.04c yu̱ktvā hari̍bhyā̱m upa̍ yāsad a̱rvāṅ mādhya̍ṁdine̱ sava̍ne matsa̱d indra̍ḥ ||

ṛ̱jī̱ṣī | va̱jrī | vṛ̱ṣa̱bhaḥ | tu̱rā̱ṣāṭ | śu̱ṣmī | rājā̍ | vṛ̱tra̱-hā | sa̱ma̱-pāvā̍ |
yu̱ktvā | hari̍-bhyām | upa̍ | yā̱sa̱t | a̱rvāṅ | mādhya̍ndine | sava̍ne | ma̱tsa̱t | indra̍ḥ ||5.040.04||

5.040.05a yat tvā̍ sūrya̱ sva̍rbhānu̱s tama̱sāvi̍dhyad āsu̱raḥ |
5.040.05c akṣe̍travi̱d yathā̍ mu̱gdho bhuva̍nāny adīdhayuḥ ||

yat | tvā̱ | sū̱rya̱ | sva̍ḥ-bhānuḥ | tama̍sā | avi̍dhyat | ā̱su̱raḥ |
akṣe̍tra-vit | yathā̍ | mu̱gdhaḥ | bhuva̍nāni | a̱dī̱dha̱yu̱ḥ ||5.040.05||

5.040.06a sva̍rbhāno̱r adha̱ yad i̍ndra mā̱yā a̱vo di̱vo varta̍mānā a̱vāha̍n |
5.040.06c gū̱ḻhaṁ sūrya̱ṁ tama̱sāpa̍vratena tu̱rīye̍ṇa̱ brahma̍ṇāvinda̱d atri̍ḥ ||

sva̍ḥ-bhānoḥ | adha̍ | yat | i̱ndra̱ | mā̱yā | a̱vaḥ | di̱vaḥ | varta̍mānāḥ | a̱va̱-aha̍n |
gū̱ḻham | sūrya̍m | tama̍sā | apa̍-vratena | tu̱rīye̍ṇa | brahma̍ṇā | a̱vi̱nda̱t | atri̍ḥ ||5.040.06||

5.040.07a mā mām i̱maṁ tava̱ santa̍m atra ira̱syā dru̱gdho bhi̱yasā̱ ni gā̍rīt |
5.040.07c tvam mi̱tro a̍si sa̱tyarā̍dhā̱s tau me̱hāva̍ta̱ṁ varu̍ṇaś ca̱ rājā̍ ||

mā | mām | i̱mam | tava̍ | santa̍m | a̱tre̱ | i̱ra̱syā | dru̱gdhaḥ | bhi̱yasā̍ | ni | gā̱rī̱t |
tvam | mi̱traḥ | a̱si̱ | sa̱tya-rā̍dhāḥ | tau | mā̱ | i̱ha | a̱va̱ta̱m | varu̍ṇaḥ | ca̱ | rājā̍ ||5.040.07||

5.040.08a grāvṇo̍ bra̱hmā yu̍yujā̱naḥ sa̍pa̱ryan kī̱riṇā̍ de̱vān nama̍sopa̱śikṣa̍n |
5.040.08c atri̱ḥ sūrya̍sya di̱vi cakṣu̱r ādhā̱t sva̍rbhāno̱r apa̍ mā̱yā a̍ghukṣat ||

grāvṇa̍ḥ | bra̱hmā | yu̱yu̱jā̱naḥ | sa̱pa̱ryan | kī̱riṇā̍ | de̱vān | nama̍sā | u̱pa̱-śikṣa̍n |
atri̍ḥ | sūrya̍sya | di̱vi | cakṣu̍ḥ | ā | a̱dhā̱t | sva̍ḥ-bhānoḥ | apa̍ | mā̱yāḥ | a̱ghu̱kṣa̱t ||5.040.08||

5.040.09a yaṁ vai sūrya̱ṁ sva̍rbhānu̱s tama̱sāvi̍dhyad āsu̱raḥ |
5.040.09c atra̍ya̱s tam anv a̍vindan na̱hy a1̱̍nye aśa̍knuvan ||

yam | vai | sūrya̍m | sva̍ḥ-bhānuḥ | tama̍sā | avi̍dhyat | ā̱su̱raḥ |
atra̍yaḥ | tam | anu̍ | a̱vi̱nda̱n | na̱hi | a̱nye | aśa̍knuvan ||5.040.09||


5.041.01a ko nu vā̍m mitrāvaruṇāv ṛtā̱yan di̱vo vā̍ ma̱haḥ pārthi̍vasya vā̱ de |
5.041.01c ṛ̱tasya̍ vā̱ sada̍si̱ trāsī̍thāṁ no yajñāya̱te vā̍ paśu̱ṣo na vājā̍n ||

kaḥ | nu | vā̱m | mi̱trā̱va̱ru̱ṇau̱ | ṛ̱ta̱-yan | di̱vaḥ | vā̱ | ma̱haḥ | pārthi̍vasya | vā̱ | de |
ṛ̱tasya̍ | vā̱ | sada̍si | trāsī̍thām | na̱ḥ | ya̱jña̱-ya̱te | vā̱ | pa̱śu̱-saḥ | na | vājā̍n ||5.041.01||

5.041.02a te no̍ mi̱tro varu̍ṇo arya̱māyur indra̍ ṛbhu̱kṣā ma̱ruto̍ juṣanta |
5.041.02c namo̍bhir vā̱ ye dadha̍te suvṛ̱ktiṁ stoma̍ṁ ru̱drāya̍ mī̱ḻhuṣe̍ sa̱joṣā̍ḥ ||

te | na̱ḥ | mi̱traḥ | varu̍ṇaḥ | a̱rya̱mā | ā̱yuḥ | indra̍ḥ | ṛ̱bhu̱kṣāḥ | ma̱ruta̍ḥ | ju̱ṣa̱nta̱ |
nama̍ḥ-bhiḥ | vā̱ | ye | dadha̍te | su̱-vṛ̱ktim | stoma̍m | ru̱drāya̍ | mī̱ḻhuṣe̍ | sa̱-joṣā̍ḥ ||5.041.02||

5.041.03a ā vā̱ṁ yeṣṭhā̍śvinā hu̱vadhyai̱ vāta̍sya̱ patma̱n rathya̍sya pu̱ṣṭau |
5.041.03c u̱ta vā̍ di̱vo asu̍rāya̱ manma̱ prāndhā̍ṁsīva̱ yajya̍ve bharadhvam ||

ā | vā̱m | yeṣṭhā̍ | a̱śvi̱nā̱ | hu̱vadhyai̍ | vāta̍sya | patma̍n | rathya̍sya | pu̱ṣṭau |
u̱ta | vā̱ | di̱vaḥ | asu̍rāya | manma̍ | pra | andhā̍ṁsi-iva | yajya̍ve | bha̱ra̱dhva̱m ||5.041.03||

5.041.04a pra sa̱kṣaṇo̍ di̱vyaḥ kaṇva̍hotā tri̱to di̱vaḥ sa̱joṣā̱ vāto̍ a̱gniḥ |
5.041.04c pū̱ṣā bhaga̍ḥ prabhṛ̱the vi̱śvabho̍jā ā̱jiṁ na ja̍gmur ā̱śva̍śvatamāḥ ||

pra | sa̱kṣaṇa̍ḥ | di̱vyaḥ | kaṇva̍-hotā | tri̱taḥ | di̱vaḥ | sa̱-joṣā̍ḥ | vāta̍ḥ | a̱gniḥ |
pū̱ṣā | bhaga̍ḥ | pra̱-bhṛ̱the | vi̱śva-bho̍jāḥ | ā̱jim | na | ja̱gmu̱ḥ | ā̱śva̍śva-tamāḥ ||5.041.04||

5.041.05a pra vo̍ ra̱yiṁ yu̱ktāśva̍m bharadhvaṁ rā̱ya eṣe 'va̍se dadhīta̱ dhīḥ |
5.041.05c su̱śeva̱ evai̍r auśi̱jasya̱ hotā̱ ye va̱ evā̍ marutas tu̱rāṇā̍m ||

pra | va̱ḥ | ra̱yim | yu̱kta-a̍śvam | bha̱ra̱dhva̱m | rā̱yaḥ | eṣe̍ | ava̍se | da̱dhī̱ta̱ | dhīḥ |
su̱-śeva̍ḥ | evai̍ḥ | au̱śi̱jasya̍ | hotā̍ | ye | va̱ḥ | evā̍ḥ | ma̱ru̱ta̱ḥ | tu̱rāṇā̍m ||5.041.05||

5.041.06a pra vo̍ vā̱yuṁ ra̍tha̱yuja̍ṁ kṛṇudhva̱m pra de̱vaṁ vipra̍m pani̱tāra̍m a̱rkaiḥ |
5.041.06c i̱ṣu̱dhyava̍ ṛta̱sāpa̱ḥ pura̍ṁdhī̱r vasvī̍r no̱ atra̱ patnī̱r ā dhi̱ye dhu̍ḥ ||

pra | va̱ḥ | vā̱yum | ra̱tha̱-yuja̍m | kṛ̱ṇu̱dhva̱m | pra | de̱vam | vipra̍m | pa̱ni̱tāra̍m | a̱rkaiḥ |
i̱ṣu̱dhyava̍ḥ | ṛ̱ta̱-sāpa̍ḥ | pura̍m-dhīḥ | vasvī̍ḥ | na̱ḥ | atra̍ | patnī̍ḥ | ā | dhi̱ye | dhu̱riti̍ dhuḥ ||5.041.06||

5.041.07a upa̍ va̱ eṣe̱ vandye̍bhiḥ śū̱ṣaiḥ pra ya̱hvī di̱vaś ci̱taya̍dbhir a̱rkaiḥ |
5.041.07c u̱ṣāsā̱naktā̍ vi̱duṣī̍va̱ viśva̱m ā hā̍ vahato̱ martyā̍ya ya̱jñam ||

upa̍ | va̱ḥ | eṣe̍ | vandye̍bhiḥ | śū̱ṣaiḥ | pra | ya̱hvī iti̍ | di̱vaḥ | ci̱taya̍t-bhiḥ | a̱rkaiḥ |
u̱ṣasā̱naktā̍ | vi̱duṣī̍i̱veti̍ vi̱duṣī̍-iva | viśva̍m | ā | ha̱ | va̱ha̱ta̱ḥ | martyā̍ya | ya̱jñam ||5.041.07||

5.041.08a a̱bhi vo̍ arce po̱ṣyāva̍to̱ nṝn vāsto̱ṣ pati̱ṁ tvaṣṭā̍ra̱ṁ rarā̍ṇaḥ |
5.041.08c dhanyā̍ sa̱joṣā̍ dhi̱ṣaṇā̱ namo̍bhi̱r vana̱spatī̱m̐r oṣa̍dhī rā̱ya eṣe̍ ||

a̱bhi | va̱ḥ | a̱rce̱ | po̱ṣyā-va̍taḥ | nṝn | vāsto̍ḥ | pati̍m | tvaṣṭā̍ram | rarā̍ṇaḥ |
dhanyā̍ | sa̱-joṣā̍ḥ | dhi̱ṣaṇā̍ | nama̍ḥ-bhiḥ | vana̱spatī̍n | oṣa̍dhīḥ | rā̱yaḥ | eṣe̍ ||5.041.08||

5.041.09a tu̱je na̱s tane̱ parva̍tāḥ santu̱ svaita̍vo̱ ye vasa̍vo̱ na vī̱rāḥ |
5.041.09c pa̱ni̱ta ā̱ptyo ya̍ja̱taḥ sadā̍ no̱ vardhā̍n na̱ḥ śaṁsa̱ṁ naryo̍ a̱bhiṣṭau̍ ||

tu̱je | na̱ḥ | tane̍ | parva̍tāḥ | sa̱ntu̱ | sva-e̍tavaḥ | ye | vasa̍vaḥ | na | vī̱rāḥ |
pa̱ni̱taḥ | ā̱ptyaḥ | ya̱ja̱taḥ | sadā̍ | na̱ḥ | vardhā̍t | na̱ḥ | śaṁsa̍m | narya̍ḥ | a̱bhiṣṭau̍ ||5.041.09||

5.041.10a vṛṣṇo̍ astoṣi bhū̱myasya̱ garbha̍ṁ tri̱to napā̍tam a̱pāṁ su̍vṛ̱kti |
5.041.10c gṛ̱ṇī̱te a̱gnir e̱tarī̱ na śū̱ṣaiḥ śo̱ciṣke̍śo̱ ni ri̍ṇāti̱ vanā̍ ||

vṛṣṇa̍ḥ | a̱sto̱ṣi̱ | bhū̱myasya̍ | garbha̍m | tri̱taḥ | napā̍tam | a̱pām | su̱-vṛ̱kti |
gṛ̱ṇī̱te | a̱gniḥ | e̱tari̍ | na | śū̱ṣaiḥ | śo̱ciḥ-ke̍śaḥ | ni | ri̱ṇā̱ti̱ | vanā̍ ||5.041.10||

5.041.11a ka̱thā ma̱he ru̱driyā̍ya bravāma̱ kad rā̱ye ci̍ki̱tuṣe̱ bhagā̍ya |
5.041.11c āpa̱ oṣa̍dhīr u̱ta no̍ 'vantu̱ dyaur vanā̍ gi̱rayo̍ vṛ̱kṣake̍śāḥ ||

ka̱thā | ma̱he | ru̱driyā̍ya | bra̱vā̱ma̱ | kat | rā̱ye | ci̱ki̱tuṣe̍ | bhagā̍ya |
āpa̍ḥ | oṣa̍dhīḥ | u̱ta | na̱ḥ | a̱va̱ntu̱ | dyauḥ | vanā̍ | gi̱raya̍ḥ | vṛ̱kṣa-ke̍śāḥ ||5.041.11||

5.041.12a śṛ̱ṇotu̍ na ū̱rjām pati̱r gira̱ḥ sa nabha̱s tarī̍yām̐ iṣi̱raḥ pari̍jmā |
5.041.12c śṛ̱ṇvantv āpa̱ḥ puro̱ na śu̱bhrāḥ pari̱ sruco̍ babṛhā̱ṇasyādre̍ḥ ||

śṛ̱ṇotu̍ | na̱ḥ | ū̱rjām | pati̍ḥ | gira̍ḥ | saḥ | nabha̍ḥ | tarī̍yān | i̱ṣi̱raḥ | pari̍-jmā |
śṛ̱ṇvantu̍ | āpa̍ḥ | pura̍ḥ | na | śu̱bhrāḥ | pari̍ | sruca̍ḥ | ba̱bṛ̱hā̱ṇasya̍ | adre̍ḥ ||5.041.12||

5.041.13a vi̱dā ci̱n nu ma̍hānto̱ ye va̱ evā̱ bravā̍ma dasmā̱ vārya̱ṁ dadhā̍nāḥ |
5.041.13c vaya̍ś ca̱na su̱bhva1̱̍ āva̍ yanti kṣu̱bhā marta̱m anu̍yataṁ vadha̱snaiḥ ||

vi̱da | ci̱t | nu | ma̱hā̱nta̱ḥ | ye | va̱ḥ | evā̍ḥ | bravā̍ma | da̱smā̱ḥ | vārya̍m | dadhā̍nāḥ |
vaya̍ḥ | ca̱na | su̱-bhva̍ḥ | ā | ava̍ | ya̱nti̱ | kṣu̱bhā | marta̍m | anu̍-yatam | va̱dha̱-snaiḥ ||5.041.13||

5.041.14a ā daivyā̍ni̱ pārthi̍vāni̱ janmā̱paś cācchā̱ suma̍khāya vocam |
5.041.14c vardha̍ntā̱ṁ dyāvo̱ gira̍ś ca̱ndrāgrā̍ u̱dā va̍rdhantām a̱bhiṣā̍tā̱ arṇā̍ḥ ||

ā | daivyā̍ni | pārthi̍vāni | janma̍ | a̱paḥ | ca̱ | accha̍ | su-ma̍khāya | vo̱ca̱m |
vardha̍ntām | dyāva̍ḥ | gira̍ḥ | ca̱ndra-a̍grāḥ | u̱dā | va̱rdha̱ntā̱m | a̱bhi-sā̍tāḥ | arṇā̍ḥ ||5.041.14||

5.041.15a pa̱de-pa̍de me jari̱mā ni dhā̍yi̱ varū̍trī vā śa̱krā yā pā̱yubhi̍ś ca |
5.041.15c siṣa̍ktu mā̱tā ma̱hī ra̱sā na̱ḥ smat sū̱ribhi̍r ṛju̱hasta̍ ṛju̱vani̍ḥ ||

pa̱de-pa̍de | me̱ | ja̱ri̱mā | ni | dhā̱yi̱ | varū̍trī | vā̱ | śa̱krā | yā | pā̱yu-bhi̍ḥ | ca̱ |
sisa̍ktu | mā̱tā | ma̱hī | ra̱sā | na̱ḥ | smat | sū̱ri-bhi̍ḥ | ṛ̱ju̱-hastā̍ | ṛ̱ju̱-vani̍ḥ ||5.041.15||

5.041.16a ka̱thā dā̍śema̱ nama̍sā su̱dānū̍n eva̱yā ma̱ruto̱ accho̍ktau̱ praśra̍vaso ma̱ruto̱ accho̍ktau |
5.041.16c mā no 'hi̍r bu̱dhnyo̍ ri̱ṣe dhā̍d a̱smāka̍m bhūd upamāti̱vani̍ḥ ||

ka̱thā | dā̱śe̱ma̱ | nama̍sā | su̱-dānū̍n | e̱va̱-yā | ma̱ruta̍ḥ | accha̍-uktau | pra-śra̍vasaḥ | ma̱ruta̍ḥ | accha̍-uktau |
mā | na̱ḥ | ahi̍ḥ | bu̱dhnya̍ḥ | ri̱ṣe | dhā̱t | a̱smāka̍m | bhū̱t | u̱pa̱mā̱ti̱-vani̍ḥ ||5.041.16||

5.041.17a iti̍ ci̱n nu pra̱jāyai̍ paśu̱matyai̱ devā̍so̱ vana̍te̱ martyo̍ va̱ ā de̍vāso vanate̱ martyo̍ vaḥ |
5.041.17c atrā̍ śi̱vāṁ ta̱nvo̍ dhā̱sim a̱syā ja̱rāṁ ci̍n me̱ nirṛ̍tir jagrasīta ||

iti̍ | ci̱t | nu | pra̱-jāyai̍ | pa̱śu̱-matyai̍ | devā̍saḥ | vana̍te | martya̍ḥ | va̱ḥ | ā | de̱vā̱sa̱ḥ | va̱na̱te̱ | martya̍ḥ | va̱ḥ |
atra̍ | śi̱vām | ta̱nva̍ḥ | dhā̱sim | a̱syāḥ | ja̱rām | ci̱t | me̱ | niḥ-ṛ̍tiḥ | ja̱gra̱sī̱ta̱ ||5.041.17||

5.041.18a tāṁ vo̍ devāḥ suma̱tim ū̱rjaya̍ntī̱m iṣa̍m aśyāma vasava̱ḥ śasā̱ goḥ |
5.041.18c sā na̍ḥ su̱dānu̍r mṛ̱ḻaya̍ntī de̱vī prati̱ drava̍ntī suvi̱tāya̍ gamyāḥ ||

tām | va̱ḥ | de̱vā̱ḥ | su̱-ma̱tim | ū̱rjaya̍ntīm | iṣa̍m | a̱śyā̱ma̱ | va̱sa̱va̱ḥ | śasā̍ | goḥ |
sā | na̱ḥ | su̱-dānu̍ḥ | mṛ̱ḻaya̍ntī | de̱vī | prati̍ | drava̍ntī | su̱vi̱tāya̍ | ga̱myā̱ḥ ||5.041.18||

5.041.19a a̱bhi na̱ iḻā̍ yū̱thasya̍ mā̱tā sman na̱dībhi̍r u̱rvaśī̍ vā gṛṇātu |
5.041.19c u̱rvaśī̍ vā bṛhaddi̱vā gṛ̍ṇā̱nābhyū̍rṇvā̱nā pra̍bhṛ̱thasyā̱yoḥ ||

a̱bhi | na̱ḥ | iḻā̍ | yū̱thasya̍ | mā̱tā | smat | na̱dībhi̍ḥ | u̱rvaśī̍ | vā̱ | gṛ̱ṇā̱tu̱ |
u̱rvaśī̍ | vā̱ | bṛ̱ha̱t-di̱vā | gṛ̱ṇa̱nā | a̱bhi̱-ū̱rṇvā̱nā | pra̱-bhṛ̱thasya̍ | ā̱yoḥ ||5.041.19||

5.041.20a siṣa̍ktu na ūrja̱vya̍sya pu̱ṣṭeḥ ||

sisa̍ktu | na̱ḥ | ū̱rja̱vya̍sya | pu̱ṣṭeḥ ||5.041.20||


5.042.01a pra śaṁta̍mā̱ varu̍ṇa̱ṁ dīdhi̍tī̱ gīr mi̱tram bhaga̱m adi̍tiṁ nū̱nam a̍śyāḥ |
5.042.01c pṛṣa̍dyoni̱ḥ pañca̍hotā śṛṇo̱tv atū̍rtapanthā̱ asu̍ro mayo̱bhuḥ ||

pra | śam-ta̍mā | varu̍ṇam | dīdhi̍tī | gīḥ | mi̱tram | bhaga̍m | adi̍tim | nū̱nam | a̱śyā̱ḥ |
pṛṣa̍t-yoniḥ | pañca̍-hotā | śṛ̱ṇo̱tu̱ | atū̍rta-panthāḥ | asu̍raḥ | ma̱ya̱ḥ-bhuḥ ||5.042.01||

5.042.02a prati̍ me̱ stoma̱m adi̍tir jagṛbhyāt sū̱nuṁ na mā̱tā hṛdya̍ṁ su̱śeva̍m |
5.042.02c brahma̍ pri̱yaṁ de̱vahi̍ta̱ṁ yad asty a̱ham mi̱tre varu̍ṇe̱ yan ma̍yo̱bhu ||

prati̍ | me̱ | stoma̍m | adi̍tiḥ | ja̱gṛ̱bhyā̱t | sū̱num | na | mā̱tā | hṛdya̍m | su̱-śeva̍m |
brahma̍ | pri̱yam | de̱va-hi̍tam | yat | asti̍ | a̱ham | mi̱tre | varu̍ṇe | yat | ma̱ya̱ḥ-bhuḥ ||5.042.02||

5.042.03a ud ī̍raya ka̱vita̍maṁ kavī̱nām u̱nattai̍nam a̱bhi madhvā̍ ghṛ̱tena̍ |
5.042.03c sa no̱ vasū̍ni̱ praya̍tā hi̱tāni̍ ca̱ndrāṇi̍ de̱vaḥ sa̍vi̱tā su̍vāti ||

ut | ī̱ra̱ya̱ | ka̱vi-ta̍mam | ka̱vī̱nām | u̱natta̍ | e̱na̱m | a̱bhi | madhvā̍ | ghṛ̱tena̍ |
saḥ | na̱ḥ | vasū̍ni | pra-ya̍tā | hi̱tāni̍ | ca̱ndrāṇi̍ | de̱vaḥ | sa̱vi̱tā | su̱vā̱ti̱ ||5.042.03||

5.042.04a sam i̍ndra ṇo̱ mana̍sā neṣi̱ gobhi̱ḥ saṁ sū̱ribhi̍r hariva̱ḥ saṁ sva̱sti |
5.042.04c sam brahma̍ṇā de̱vahi̍ta̱ṁ yad asti̱ saṁ de̱vānā̍ṁ suma̱tyā ya̱jñiyā̍nām ||

sam | i̱ndra̱ | na̱ḥ | mana̍sā | ne̱ṣi̱ | gobhi̍ḥ | sam | sū̱ri-bhi̍ḥ | ha̱ri̱-va̱ḥ | sam | sva̱sti |
sam | brahma̍ṇā | de̱va-hi̍ta̱m | yat | asti̍ | sam | de̱vānā̍m | su̱-ma̱tyā | ya̱jñiyā̍nām ||5.042.04||

5.042.05a de̱vo bhaga̍ḥ savi̱tā rā̱yo aṁśa̱ indro̍ vṛ̱trasya̍ sa̱ṁjito̱ dhanā̍nām |
5.042.05c ṛ̱bhu̱kṣā vāja̍ u̱ta vā̱ pura̍ṁdhi̱r ava̍ntu no a̱mṛtā̍sas tu̱rāsa̍ḥ ||

de̱vaḥ | bhaga̍ḥ | sa̱vi̱tā | rā̱yaḥ | aṁśa̍ḥ | indra̍ḥ | vṛ̱trasya̍ | sa̱m-jita̍ḥ | dhanā̍nām |
ṛ̱bhu̱kṣāḥ | vāja̍ḥ | u̱ta | vā̱ | pura̍m-dhiḥ | ava̍ntu | na̱ḥ | a̱mṛtā̍saḥ | tu̱rāsa̍ḥ ||5.042.05||

5.042.06a ma̱rutva̍to̱ apra̍tītasya ji̱ṣṇor ajū̍ryata̱ḥ pra bra̍vāmā kṛ̱tāni̍ |
5.042.06c na te̱ pūrve̍ maghava̱n nāpa̍rāso̱ na vī̱rya1̱̍ṁ nūta̍na̱ḥ kaś ca̱nāpa̍ ||

ma̱rutva̍taḥ | apra̍ti-itasya | ji̱ṣṇoḥ | ajū̍ryataḥ | pra | bra̱vā̱ma̱ | kṛ̱tāni̍ |
na | te̱ | pūrve̍ | ma̱gha̱-va̱n | na | apa̍rāsaḥ | na | vī̱rya̍m | nūta̍naḥ | kaḥ | ca̱na | ā̱pa̱ ||5.042.06||

5.042.07a upa̍ stuhi pratha̱maṁ ra̍tna̱dheya̱m bṛha̱spati̍ṁ sani̱tāra̱ṁ dhanā̍nām |
5.042.07c yaḥ śaṁsa̍te stuva̱te śambha̍viṣṭhaḥ purū̱vasu̍r ā̱gama̱j johu̍vānam ||

upa̍ | stu̱hi̱ | pra̱tha̱mam | ra̱tna̱-dheya̍m | bṛha̱spati̍m | sa̱ni̱tāra̍m | dhanā̍nām |
yaḥ | śaṁsa̍te | stu̱va̱te | śam-bha̍viṣṭhaḥ | pu̱ru̱-vasu̍ḥ | ā̱-gama̍t | johu̍vānam ||5.042.07||

5.042.08a tavo̱tibhi̱ḥ saca̍mānā̱ ari̍ṣṭā̱ bṛha̍spate ma̱ghavā̍naḥ su̱vīrā̍ḥ |
5.042.08c ye a̍śva̱dā u̱ta vā̱ santi̍ go̱dā ye va̍stra̱dāḥ su̱bhagā̱s teṣu̱ rāya̍ḥ ||

tava̍ | ū̱ti-bhi̍ḥ | saca̍mānāḥ | ari̍ṣṭāḥ | bṛha̍spate | ma̱gha-vā̍naḥ | su̱-vīrā̍ḥ |
ye | a̱śva̱-dāḥ | u̱ta | vā̱ | santi̍ | go̱-dāḥ | ye | va̱stra̱-dāḥ | su̱-bhagā̍ḥ | teṣu̍ | rāya̍ḥ ||5.042.08||

5.042.09a vi̱sa̱rmāṇa̍ṁ kṛṇuhi vi̱ttam e̍ṣā̱ṁ ye bhu̱ñjate̱ apṛ̍ṇanto na u̱kthaiḥ |
5.042.09c apa̍vratān prasa̱ve vā̍vṛdhā̱nān bra̍hma̱dviṣa̱ḥ sūryā̍d yāvayasva ||

vi̱-sa̱rmāṇa̍m | kṛ̱ṇu̱hi̱ | vi̱ttam | e̱ṣā̱m | ye | bhu̱ñjate̍ | apṛ̍ṇantaḥ | na̱ḥ | u̱kthaiḥ |
apa̍-vratān | pra̱-sa̱ve | va̱vṛ̱dhā̱nān | bra̱hma̱-dviṣa̍ḥ | sūryā̍t | ya̱va̱ya̱sva̱ ||5.042.09||

5.042.10a ya oha̍te ra̱kṣaso̍ de̱vavī̍tāv aca̱krebhi̱s tam ma̍ruto̱ ni yā̍ta |
5.042.10c yo va̱ḥ śamī̍ṁ śaśamā̱nasya̱ nindā̍t tu̱cchyān kāmā̍n karate siṣvidā̱naḥ ||

yaḥ | oha̍te | ra̱kṣasa̍ḥ | de̱va-vī̍tau | a̱ca̱krebhi̍ḥ | tam | ma̱ru̱ta̱ḥ | ni | yā̱ta̱ |
yaḥ | va̱ḥ | samī̍m | śa̱śa̱mā̱nasya̍ | nindā̍t | tu̱cchyān | kāmā̍n | ka̱ra̱te̱ | si̱svi̱dā̱naḥ ||5.042.10||

5.042.11a tam u̍ ṣṭuhi̱ yaḥ svi̱ṣuḥ su̱dhanvā̱ yo viśva̍sya̱ kṣaya̍ti bheṣa̱jasya̍ |
5.042.11c yakṣvā̍ ma̱he sau̍mana̱sāya̍ ru̱draṁ namo̍bhir de̱vam asu̍raṁ duvasya ||

tam | ū̱m̐ iti̍ | stu̱hi̱ | yaḥ | su̱-i̱ṣuḥ | su̱-dhanvā̍ | yaḥ | viśva̍sya | kṣaya̍ti | bhe̱ṣa̱jasya̍ |
yakṣva̍ | ma̱he | sau̱ma̱na̱sāya̍ | ru̱dram | nama̍ḥ-bhiḥ | de̱vam | asu̍ram | du̱va̱sya̱ ||5.042.11||

5.042.12a damū̍naso a̱paso̱ ye su̱hastā̱ vṛṣṇa̱ḥ patnī̍r na̱dyo̍ vibhvata̱ṣṭāḥ |
5.042.12c sara̍svatī bṛhaddi̱vota rā̱kā da̍śa̱syantī̍r varivasyantu śu̱bhrāḥ ||

damū̍nasaḥ | a̱pasa̍ḥ | ye | su̱-hastā̍ḥ | vṛṣṇa̍ḥ | patnī̍ḥ | na̱dya̍ḥ | vi̱bhva̱-ta̱ṣṭāḥ |
sara̍svatī | bṛ̱ha̱t-di̱vā | u̱ta | rā̱kā | da̱śa̱syantī̍ḥ | va̱ri̱va̱sya̱ntu̱ | śu̱bhrāḥ ||5.042.12||

5.042.13a pra sū ma̱he su̍śara̱ṇāya̍ me̱dhāṁ gira̍m bhare̱ navya̍sī̱ṁ jāya̍mānām |
5.042.13c ya ā̍ha̱nā du̍hi̱tur va̱kṣaṇā̍su rū̱pā mi̍nā̱no akṛ̍ṇod i̱daṁ na̍ḥ ||

pra | su | ma̱he | su̱śa̱ra̱ṇāya̍ | me̱dhām | gira̍m | bha̱re̱ | navya̍sīm | jāya̍mānām |
yaḥ | ā̱ha̱nāḥ | du̱hi̱tuḥ | va̱kṣaṇā̍su | rū̱pā | mi̱nā̱naḥ | akṛ̍ṇot | i̱dam | na̱ḥ ||5.042.13||

5.042.14a pra su̍ṣṭu̱tiḥ sta̱naya̍ntaṁ ru̱vanta̍m i̱ḻas pati̍ṁ jaritar nū̱nam a̍śyāḥ |
5.042.14c yo a̍bdi̱mām̐ u̍dani̱mām̐ iya̍rti̱ pra vi̱dyutā̱ roda̍sī u̱kṣamā̍ṇaḥ ||

pra | su̱-stu̱tiḥ | sta̱naya̍ntam | ru̱vanta̍m | i̱ḻaḥ | pati̍m | ja̱ri̱ta̱ḥ | nū̱nam | a̱śyā̱ḥ |
yaḥ | a̱bdi̱-mān | u̱da̱ni̱-mān | iya̍rti | pra | vi̱-dyutā̍ | roda̍sī̱ iti̍ | u̱kṣamā̍ṇaḥ ||5.042.14||

5.042.15a e̱ṣa stomo̱ māru̍ta̱ṁ śardho̱ acchā̍ ru̱drasya̍ sū̱nūm̐r yu̍va̱nyūm̐r ud a̍śyāḥ |
5.042.15c kāmo̍ rā̱ye ha̍vate mā sva̱sty upa̍ stuhi̱ pṛṣa̍daśvām̐ a̱yāsa̍ḥ ||

e̱ṣaḥ | stoma̍ḥ | māru̍tam | śardha̍ḥ | accha̍ | ru̱drasya̍ | sū̱nūn | yu̱va̱nyūn | ut | a̱śyā̱ḥ |
kāma̍ḥ | rā̱ye | ha̱va̱te̱ | mā̱ | sva̱sti | upa̍ | stu̱hi̱ | pṛṣa̍t-aśvān | a̱yāsa̍ḥ ||5.042.15||

5.042.16a praiṣa stoma̍ḥ pṛthi̱vīm a̱ntari̍kṣa̱ṁ vana̱spatī̱m̐r oṣa̍dhī rā̱ye a̍śyāḥ |
5.042.16c de̱vo-de̍vaḥ su̱havo̍ bhūtu̱ mahya̱m mā no̍ mā̱tā pṛ̍thi̱vī du̍rma̱tau dhā̍t ||

pra | e̱ṣaḥ | stoma̍ḥ | pṛ̱thi̱vīm | a̱ntari̍kṣam | vana̱spatī̍n | oṣa̍dhīḥ | rā̱ye | a̱śyā̱ḥ |
de̱vaḥ-de̍vaḥ | su̱-hava̍ḥ | bhū̱tu̱ | mahya̍m | mā | na̱ḥ | mā̱tā | pṛ̱thi̱vī | du̱ḥ-ma̱tau | dhā̱t ||5.042.16||

5.042.17a u̱rau de̍vā anibā̱dhe syā̍ma ||

u̱rau | de̱vā̱ḥ | a̱ni̱-bā̱dhe | syā̱ma̱ ||5.042.17||

5.042.18a sam a̱śvino̱r ava̍sā̱ nūta̍nena mayo̱bhuvā̍ su̱praṇī̍tī gamema |
5.042.18c ā no̍ ra̱yiṁ va̍hata̱m ota vī̱rān ā viśvā̍ny amṛtā̱ saubha̍gāni ||

sam | a̱śvino̍ḥ | ava̍sā | nūta̍nena | ma̱ya̱ḥ-bhuvā̍ | su̱-pranī̍tī | ga̱me̱ma̱ |
ā | na̱ḥ | ra̱yim | va̱ha̱ta̱m | ā | u̱ta | vī̱rān | ā | viśvā̍ni | a̱mṛ̱tā̱ | saubha̍gāni ||5.042.18||


5.043.01a ā dhe̱nava̱ḥ paya̍sā̱ tūrṇya̍rthā̱ ama̍rdhantī̱r upa̍ no yantu̱ madhvā̍ |
5.043.01c ma̱ho rā̱ye bṛ̍ha̱tīḥ sa̱pta vipro̍ mayo̱bhuvo̍ jari̱tā jo̍havīti ||

ā | dhe̱nava̍ḥ | paya̍sā | tūrṇi̍-arthāḥ | ama̍rdhantīḥ | upa̍ | na̱ḥ | ya̱ntu̱ | madhvā̍ |
ma̱haḥ | rā̱ye | bṛ̱ha̱tīḥ | sa̱pta | vipra̍ḥ | ma̱ya̱ḥ-bhuva̍ḥ | ja̱ri̱tā | jo̱ha̱vī̱ti̱ ||5.043.01||

5.043.02a ā su̍ṣṭu̱tī nama̍sā varta̱yadhyai̱ dyāvā̱ vājā̍ya pṛthi̱vī amṛ̍dhre |
5.043.02c pi̱tā mā̱tā madhu̍vacāḥ su̱hastā̱ bhare̍-bhare no ya̱śasā̍v aviṣṭām ||

ā | su̱-stu̱tī | nama̍sā | va̱rta̱yadhyai̍ | dyāvā̍ | vājā̍ya | pṛ̱thi̱vī iti̍ | amṛ̍dhre̱ iti̍ |
pi̱tā | mā̱tā | madhu̍-vacāḥ | su̱-hastā̍ | bhare̍-bhare | na̱ḥ | ya̱śasau̍ | a̱vi̱ṣṭā̱m ||5.043.02||

5.043.03a adhva̍ryavaś cakṛ̱vāṁso̱ madhū̍ni̱ pra vā̱yave̍ bharata̱ cāru̍ śu̱kram |
5.043.03c hote̍va naḥ pratha̱maḥ pā̍hy a̱sya deva̱ madhvo̍ rari̱mā te̱ madā̍ya ||

adhva̍ryavaḥ | ca̱kṛ̱-vāṁsa̍ḥ | madhū̍ni | pra | vā̱yave̍ | bha̱ra̱ta̱ | cāru̍ | śu̱kram |
hotā̍-iva | na̱ḥ | pra̱tha̱maḥ | pā̱hi̱ | a̱sya | deva̍ | madhva̍ḥ | ra̱ri̱ma | te̱ | madā̍ya ||5.043.03||

5.043.04a daśa̱ kṣipo̍ yuñjate bā̱hū adri̱ṁ soma̍sya̱ yā śa̍mi̱tārā̍ su̱hastā̍ |
5.043.04c madhvo̱ rasa̍ṁ su̱gabha̍stir giri̱ṣṭhāṁ cani̍ścadad duduhe śu̱kram a̱ṁśuḥ ||

daśa̍ | kṣipa̍ḥ | yu̱ñja̱te̱ | bā̱hū iti̍ | adri̍m | soma̍sya | yā | śa̱mi̱tārā̍ | su̱-hastā̍ |
madhva̍ḥ | rasa̍m | su̱-gabha̍stiḥ | gi̱ri̱-sthām | cani̍ścadat | du̱du̱he̱ | śu̱kram | a̱ṁśuḥ ||5.043.04||

5.043.05a asā̍vi te jujuṣā̱ṇāya̱ soma̱ḥ kratve̱ dakṣā̍ya bṛha̱te madā̍ya |
5.043.05c harī̱ rathe̍ su̱dhurā̱ yoge̍ a̱rvāg indra̍ pri̱yā kṛ̍ṇuhi hū̱yamā̍naḥ ||

asā̍vi | te̱ | ju̱ju̱ṣā̱ṇāya̍ | soma̍ḥ | kratve̍ | dakṣā̍ya | bṛ̱ha̱te | madā̍ya |
harī̱ iti̍ | rathe̍ | su̱-dhurā̍ | yoge̍ | a̱rvāk | indra̍ | pri̱yā | kṛ̱ṇu̱hi̱ | hū̱yamā̍naḥ ||5.043.05||

5.043.06a ā no̍ ma̱hīm a̱rama̍tiṁ sa̱joṣā̱ gnāṁ de̱vīṁ nama̍sā rā̱taha̍vyām |
5.043.06c madho̱r madā̍ya bṛha̱tīm ṛ̍ta̱jñām āgne̍ vaha pa̱thibhi̍r deva̱yānai̍ḥ ||

ā | na̱ḥ | ma̱hīm | a̱rama̍tim | sa̱-joṣā̍ḥ | gnām | de̱vīm | nama̍sā | rā̱ta-ha̍vyām |
madho̍ḥ | madā̍ya | bṛ̱ha̱tīm | ṛ̱ta̱-jñām | ā | a̱gne̱ | va̱ha̱ | pa̱thi-bhi̍ḥ | de̱va̱-yānai̍ḥ ||5.043.06||

5.043.07a a̱ñjanti̱ yam pra̱thaya̍nto̱ na viprā̍ va̱pāva̍nta̱ṁ nāgninā̱ tapa̍ntaḥ |
5.043.07c pi̱tur na pu̱tra u̱pasi̱ preṣṭha̱ ā gha̱rmo a̱gnim ṛ̱taya̍nn asādi ||

a̱ñjanti̍ | yam | pra̱thaya̍ntaḥ | na | viprā̍ḥ | va̱pā-va̍ntam | na | a̱gninā̍ | tapa̍ntaḥ |
pi̱tuḥ | na | pu̱traḥ | u̱pasi̍ | preṣṭha̍ḥ | ā | gha̱rmaḥ | a̱gnim | ṛ̱taya̍n | a̱sā̱di̱ ||5.043.07||

5.043.08a acchā̍ ma̱hī bṛ̍ha̱tī śaṁta̍mā̱ gīr dū̱to na ga̍ntv a̱śvinā̍ hu̱vadhyai̍ |
5.043.08c ma̱yo̱bhuvā̍ sa̱rathā yā̍tam a̱rvāg ga̱ntaṁ ni̱dhiṁ dhura̍m ā̱ṇir na nābhi̍m ||

accha̍ | ma̱hī | bṛ̱ha̱tī | śam-ta̍mā | gīḥ | dū̱taḥ | na | ga̱ntu̱ | a̱śvinā̍ | hu̱vadhyai̍ |
ma̱ya̱ḥ-bhuvā̍ | sa̱rathā̍ | ā | yā̱ta̱m | a̱rvāk | ga̱ntam | ni̱-dhim | dhura̍m | ā̱ṇiḥ | na | nābhi̍m ||5.043.08||

5.043.09a pra tavya̍so̱ nama̍uktiṁ tu̱rasyā̱ham pū̱ṣṇa u̱ta vā̱yor a̍dikṣi |
5.043.09c yā rādha̍sā codi̱tārā̍ matī̱nāṁ yā vāja̍sya draviṇo̱dā u̱ta tman ||

pra | tavya̍saḥ | nama̍ḥ-uktim | tu̱rasya̍ | a̱ham | pū̱ṣṇaḥ | u̱ta | vā̱yoḥ | a̱di̱kṣi̱ |
yā | rādha̍sā | co̱di̱tārā̍ | ma̱tī̱nām | yā | vāja̍sya | dra̱vi̱ṇa̱ḥ-dau | u̱ta | tman ||5.043.09||

5.043.10a ā nāma̍bhir ma̱ruto̍ vakṣi̱ viśvā̱n ā rū̱pebhi̍r jātavedo huvā̱naḥ |
5.043.10c ya̱jñaṁ giro̍ jari̱tuḥ su̍ṣṭu̱tiṁ ca̱ viśve̍ ganta maruto̱ viśva̍ ū̱tī ||

ā | nāma̍-bhiḥ | ma̱ruta̍ḥ | va̱kṣi̱ | viśvā̍n | ā | rū̱pebhi̍ḥ | jā̱ta̱-ve̱da̱ḥ | hu̱vā̱naḥ |
ya̱jñam | gira̍ḥ | ja̱ri̱tuḥ | su̱-stu̱tim | ca̱ | viśve̍ | ga̱nta̱ | ma̱ru̱ta̱ḥ | viśve̍ | ū̱tī ||5.043.10||

5.043.11a ā no̍ di̱vo bṛ̍ha̱taḥ parva̍tā̱d ā sara̍svatī yaja̱tā ga̍ntu ya̱jñam |
5.043.11c hava̍ṁ de̱vī ju̍juṣā̱ṇā ghṛ̱tācī̍ śa̱gmāṁ no̱ vāca̍m uśa̱tī śṛ̍ṇotu ||

ā | na̱ḥ | di̱vaḥ | bṛ̱ha̱taḥ | parva̍tāt | ā | sara̍svatī | ya̱ja̱tā | ga̱ntu̱ | ya̱jñam |
hava̍m | de̱vī | ju̱ju̱ṣā̱ṇā | ghṛ̱tācī̍ | śa̱gmām | na̱ḥ | vāca̍m | u̱śa̱tī | śṛ̱ṇo̱tu̱ ||5.043.11||

5.043.12a ā ve̱dhasa̱ṁ nīla̍pṛṣṭham bṛ̱hanta̱m bṛha̱spati̱ṁ sada̍ne sādayadhvam |
5.043.12c sā̱dadyo̍ni̱ṁ dama̱ ā dī̍di̱vāṁsa̱ṁ hira̍ṇyavarṇam aru̱ṣaṁ sa̍pema ||

ā | ve̱dhasa̍m | nīla̍-pṛṣṭham | bṛ̱hanta̍m | bṛha̱spati̍m | sada̍ne | sā̱da̱ya̱dhva̱m |
sā̱dat-yo̍nim | dame̍ | ā | dī̱di̱-vāṁsam | hira̍ṇya-varṇam | a̱ru̱ṣam | sa̱pe̱ma̱ ||5.043.12||

5.043.13a ā dha̍rṇa̱sir bṛ̱haddi̍vo̱ rarā̍ṇo̱ viśve̍bhir ga̱ntv oma̍bhir huvā̱naḥ |
5.043.13c gnā vasā̍na̱ oṣa̍dhī̱r amṛ̍dhras tri̱dhātu̍śṛṅgo vṛṣa̱bho va̍yo̱dhāḥ ||

ā | dha̱rṇa̱si̱ḥ | bṛ̱hat-di̍vaḥ | rarā̍ṇaḥ | viśve̍bhiḥ | ga̱ntu̱ | oma̍-bhiḥ | hu̱vā̱naḥ |
gnāḥ | vasā̍naḥ | oṣa̍dhīḥ | amṛ̍dhraḥ | tri̱dhātu̍-śṛṅgaḥ | vṛ̱ṣa̱bhaḥ | va̱ya̱ḥ-dhāḥ ||5.043.13||

5.043.14a mā̱tuṣ pa̱de pa̍ra̱me śu̱kra ā̱yor vi̍pa̱nyavo̍ rāspi̱rāso̍ agman |
5.043.14c su̱śevya̱ṁ nama̍sā rā̱taha̍vyā̱ḥ śiśu̍m mṛjanty ā̱yavo̱ na vā̱se ||

mā̱tuḥ | pa̱de | pa̱ra̱me | śu̱kre | ā̱yoḥ | vi̱pa̱nyava̍ḥ | rā̱spi̱rāsa̍ḥ | a̱gma̱n |
su̱-śevya̍m | nama̍sā | rā̱ta-ha̍vyāḥ | śiśu̍m | mṛ̱ja̱nti̱ | ā̱yava̍ḥ | na | vā̱se ||5.043.14||

5.043.15a bṛ̱had vayo̍ bṛha̱te tubhya̍m agne dhiyā̱juro̍ mithu̱nāsa̍ḥ sacanta |
5.043.15c de̱vo-de̍vaḥ su̱havo̍ bhūtu̱ mahya̱m mā no̍ mā̱tā pṛ̍thi̱vī du̍rma̱tau dhā̍t ||

bṛ̱hat | vaya̍ḥ | bṛ̱ha̱te | tubhya̍m | a̱gne̱ | dhi̱yā̱-jura̍ḥ | mi̱thu̱nāsa̍ḥ | sa̱ca̱nta̱ |
de̱vaḥ-de̍vaḥ | su̱-hava̍ḥ | bhū̱tu̱ | mahya̍m | mā | na̱ḥ | mā̱tā | pṛ̱thi̱vī | du̱ḥ-ma̱tau | dhā̱t ||5.043.15||

5.043.16a u̱rau de̍vā anibā̱dhe syā̍ma ||

u̱rau | de̱vā̱ḥ | a̱ni̱-bā̱dhe | syā̱ma̱ ||5.043.16||

5.043.17a sam a̱śvino̱r ava̍sā̱ nūta̍nena mayo̱bhuvā̍ su̱praṇī̍tī gamema |
5.043.17c ā no̍ ra̱yiṁ va̍hata̱m ota vī̱rān ā viśvā̍ny amṛtā̱ saubha̍gāni ||

sam | a̱śvino̍ḥ | ava̍sā | nūta̍nena | ma̱ya̱ḥ-bhuvā̍ | su̱-pranī̍tī | ga̱me̱ma̱ |
ā | na̱ḥ | ra̱yim | va̱ha̱ta̱m | ā | u̱ta | vī̱rān | ā | viśvā̍ni | a̱mṛ̱tā̱ | saubha̍gāni ||5.043.17||


5.044.01a tam pra̱tnathā̍ pū̱rvathā̍ vi̱śvathe̱mathā̍ jye̱ṣṭhatā̍tim barhi̱ṣada̍ṁ sva̱rvida̍m |
5.044.01c pra̱tī̱cī̱naṁ vṛ̱jana̍ṁ dohase gi̱rāśuṁ jaya̍nta̱m anu̱ yāsu̱ vardha̍se ||

tam | pra̱tna-thā̍ | pū̱rva-thā̍ | vi̱śva-thā̍ | i̱m-athā̍ | jye̱ṣṭha-tā̍tim | ba̱rhi̱-sada̍m | sva̱ḥ-vida̍m |
pra̱tī̱cī̱nam | vṛ̱jana̍m | do̱ha̱se̱ | gi̱rā | ā̱śum | jaya̍ntam | anu̍ | yāsu̍ | vardha̍se ||5.044.01||

5.044.02a śri̱ye su̱dṛśī̱r upa̍rasya̱ yāḥ sva̍r vi̱roca̍mānaḥ ka̱kubhā̍m aco̱date̍ |
5.044.02c su̱go̱pā a̍si̱ na dabhā̍ya sukrato pa̱ro mā̱yābhi̍r ṛ̱ta ā̍sa̱ nāma̍ te ||

śri̱ye | su̱-dṛśī̍ḥ | upa̍rasya | yāḥ | sva̍ḥ | vi̱-roca̍mānaḥ | ka̱kubhā̍m | a̱co̱date̍ |
su̱-go̱pāḥ | a̱si̱ | na | dabhā̍ya | su̱kra̱to̱ iti̍ su-krato | pa̱raḥ | mā̱yābhi̍ḥ | ṛ̱te | ā̱sa̱ | nāma̍ | te̱ ||5.044.02||

5.044.03a atya̍ṁ ha̱viḥ sa̍cate̱ sac ca̱ dhātu̱ cāri̍ṣṭagātu̱ḥ sa hotā̍ saho̱bhari̍ḥ |
5.044.03c pra̱sarsrā̍ṇo̱ anu̍ ba̱rhir vṛṣā̱ śiśu̱r madhye̱ yuvā̱jaro̍ vi̱sruhā̍ hi̱taḥ ||

atya̍m | ha̱viḥ | sa̱ca̱te̱ | sat | ca̱ | dhātu̍ | ca̱ | ari̍ṣṭa-gātuḥ | saḥ | hotā̍ | sa̱ha̱ḥ-bhari̍ḥ |
pra̱-sarsrā̍ṇaḥ | anu̍ | ba̱rhiḥ | vṛṣā̍ | śiśu̍ḥ | madhye̍ | yuvā̍ | a̱jara̍ḥ | vi̱-sruhā̍ | hi̱taḥ ||5.044.03||

5.044.04a pra va̍ e̱te su̱yujo̱ yāma̍nn i̱ṣṭaye̱ nīcī̍r a̱muṣmai̍ ya̱mya̍ ṛtā̱vṛdha̍ḥ |
5.044.04c su̱yantu̍bhiḥ sarvaśā̱sair a̱bhīśu̍bhi̱ḥ krivi̱r nāmā̍ni prava̱ṇe mu̍ṣāyati ||

pra | va̱ḥ | e̱te | su̱-yuja̍ḥ | yāma̍n | i̱ṣṭaye̍ | nīcī̍ḥ | a̱muṣmai̍ | ya̱mya̍ḥ | ṛ̱ta̱-vṛdha̍ḥ |
su̱yantu̍-bhiḥ | sa̱rva̱-śā̱saiḥ | a̱bhīśu̍-bhiḥ | krivi̍ḥ | nāmā̍ni | pra̱va̱ṇe | mu̱ṣā̱ya̱ti̱ ||5.044.04||

5.044.05a sa̱ṁjarbhu̍rāṇa̱s taru̍bhiḥ sute̱gṛbha̍ṁ vayā̱kina̍ṁ ci̱ttaga̍rbhāsu su̱svaru̍ḥ |
5.044.05c dhā̱ra̱vā̱keṣv ṛ̍jugātha śobhase̱ vardha̍sva̱ patnī̍r a̱bhi jī̱vo a̍dhva̱re ||

sa̱m-jarbhu̍rāṇaḥ | taru̍-bhiḥ | su̱te̱-gṛbha̍m | va̱yā̱kina̍m | ci̱tta-ga̍rbhāsu | su̱-svaru̍ḥ |
dhā̱ra̱-vā̱keṣu̍ | ṛ̱ju̱-gā̱tha̱ | śo̱bha̱se̱ | vardha̍sva | patnī̍ḥ | a̱bhi | jī̱vaḥ | a̱dhva̱re ||5.044.05||

5.044.06a yā̱dṛg e̱va dadṛ̍śe tā̱dṛg u̍cyate̱ saṁ chā̱yayā̍ dadhire si̱dhrayā̱psv ā |
5.044.06c ma̱hīm a̱smabhya̍m uru̱ṣām u̱ru jrayo̍ bṛ̱hat su̱vīra̱m ana̍pacyuta̱ṁ saha̍ḥ ||

yā̱dṛk | e̱va | dadṛ̍śe | tā̱dṛk | u̱cya̱te̱ | sam | chā̱yayā̍ | da̱dhi̱re̱ | si̱dhrayā̍ | a̱p-su | ā |
ma̱hīm | a̱smabhya̍m | u̱ru̱-sām | u̱ru | jraya̍ḥ | bṛ̱hat | su̱-vīra̍m | ana̍pa-cyutam | saha̍ḥ ||5.044.06||

5.044.07a vety agru̱r jani̍vā̱n vā ati̱ spṛdha̍ḥ samarya̱tā mana̍sā̱ sūrya̍ḥ ka̱viḥ |
5.044.07c ghra̱ṁsaṁ rakṣa̍nta̱m pari̍ vi̱śvato̱ gaya̍m a̱smāka̱ṁ śarma̍ vanava̱t svāva̍suḥ ||

veti̍ | agru̍ḥ | jani̍-vān | vai | ati̍ | spṛdha̍ḥ | sa̱-ma̱rya̱tā | mana̍sā | sūrya̍ḥ | ka̱viḥ |
ghra̱ṁsam | rakṣa̍ntam | pari̍ | vi̱śvata̍ḥ | gaya̍m | a̱smāka̍m | śarma̍ | va̱na̱va̱t | sva-va̍suḥ ||5.044.07||

5.044.08a jyāyā̍ṁsam a̱sya ya̱tuna̍sya ke̱tuna̍ ṛṣisva̱raṁ ca̍rati̱ yāsu̱ nāma̍ te |
5.044.08c yā̱dṛśmi̱n dhāyi̱ tam a̍pa̱syayā̍ vida̱d ya u̍ sva̱yaṁ vaha̍te̱ so ara̍ṁ karat ||

jyāyā̍ṁsam | a̱sya | ya̱tuna̍sya | ke̱tunā̍ | ṛ̱ṣi̱-sva̱ram | ca̱ra̱ti̱ | yāsu̍ | nāma̍ | te̱ |
yā̱dṛśmi̍n | dhā̱yi̱ | tam | a̱pa̱syayā̍ | vi̱da̱t | yaḥ | ū̱m̐ iti̍ | sva̱yam | vaha̍te | saḥ | ara̍m | ka̱ra̱t ||5.044.08||

5.044.09a sa̱mu̱dram ā̍sā̱m ava̍ tasthe agri̱mā na ri̍ṣyati̱ sava̍na̱ṁ yasmi̱nn āya̍tā |
5.044.09c atrā̱ na hārdi̍ krava̱ṇasya̍ rejate̱ yatrā̍ ma̱tir vi̱dyate̍ pūta̱bandha̍nī ||

sa̱mu̱dram | ā̱sā̱m | ava̍ | ta̱sthe̱ | a̱gri̱mā | na | ri̱ṣya̱ti̱ | sava̍nam | yasmi̍n | ā-ya̍tā |
atra̍ | na | hārdi̍ | kra̱va̱ṇasya̍ | re̱ja̱te̱ | yatra̍ | ma̱tiḥ | vi̱dyate̍ | pū̱ta̱-bandha̍nī ||5.044.09||

5.044.10a sa hi kṣa̱trasya̍ mana̱sasya̱ citti̍bhir evāva̱dasya̍ yaja̱tasya̱ sadhre̍ḥ |
5.044.10c a̱va̱tsā̱rasya̍ spṛṇavāma̱ raṇva̍bhi̱ḥ śavi̍ṣṭha̱ṁ vāja̍ṁ vi̱duṣā̍ ci̱d ardhya̍m ||

saḥ | hi | kṣa̱trasya̍ | ma̱na̱sasya̍ | citti̍-bhiḥ | e̱va̱-va̱dasya̍ | ya̱ja̱tasya̍ | sadhre̍ḥ |
a̱va̱-tsā̱rasya̍ | spṛ̱ṇa̱vā̱ma̱ | raṇva̍-bhiḥ | śavi̍ṣṭham | vāja̍m | vi̱duṣā̍ | ci̱t | ardhya̍m ||5.044.10||

5.044.11a śye̱na ā̍sā̱m adi̍tiḥ ka̱kṣyo̱3̱̍ mado̍ vi̱śvavā̍rasya yaja̱tasya̍ mā̱yina̍ḥ |
5.044.11c sam a̱nyam-a̍nyam arthaya̱nty eta̍ve vi̱dur vi̱ṣāṇa̍m pari̱pāna̱m anti̱ te ||

śye̱naḥ | ā̱sā̱m | adi̍tiḥ | ka̱kṣya̍ḥ | mada̍ḥ | vi̱śva-vā̍rasya | ya̱ja̱tasya̍ | mā̱yina̍ḥ |
sam | a̱nyam-a̍nyam | a̱rtha̱ya̱nti̱ | eta̍ve | vi̱duḥ | vi̱-sāṇa̍m | pa̱ri̱-pāna̍m | anti̍ | te̱ ||5.044.11||

5.044.12a sa̱dā̱pṛ̱ṇo ya̍ja̱to vi dviṣo̍ vadhīd bāhuvṛ̱ktaḥ śru̍ta̱vit taryo̍ va̱ḥ sacā̍ |
5.044.12c u̱bhā sa varā̱ praty e̍ti̱ bhāti̍ ca̱ yad ī̍ṁ ga̱ṇam bhaja̍te supra̱yāva̍bhiḥ ||

sa̱dā̱-pṛ̱ṇaḥ | ya̱ja̱taḥ | vi | dviṣa̍ḥ | va̱dhī̱t | bā̱hu̱-vṛ̱ktaḥ | śru̱ta̱-vit | tarya̍ḥ | va̱ḥ | sacā̍ |
u̱bhā | saḥ | varā̍ | prati̍ | e̱ti̱ | bhāti̍ | ca̱ | yat | ī̱m | ga̱ṇam | bhaja̍te | su̱pra̱yāva̍-bhiḥ ||5.044.12||

5.044.13a su̱ta̱mbha̱ro yaja̍mānasya̱ satpa̍ti̱r viśvā̍sā̱m ūdha̱ḥ sa dhi̱yām u̱dañca̍naḥ |
5.044.13c bhara̍d dhe̱nū rasa̍vac chiśriye̱ payo̍ 'nubruvā̱ṇo adhy e̍ti̱ na sva̱pan ||

su̱ta̱m-bha̱raḥ | yaja̍mānasya | sat-pa̍tiḥ | viśvā̍sām | ūdha̍ḥ | saḥ | dhi̱yām | u̱t-añca̍naḥ |
bhara̍t | dhe̱nuḥ | rasa̍-vat | śi̱śri̱ye̱ | paya̍ḥ | a̱nu̱-bru̱vā̱ṇaḥ | adhi̍ | e̱ti̱ | na | sva̱pan ||5.044.13||

5.044.14a yo jā̱gāra̱ tam ṛca̍ḥ kāmayante̱ yo jā̱gāra̱ tam u̱ sāmā̍ni yanti |
5.044.14c yo jā̱gāra̱ tam a̱yaṁ soma̍ āha̱ tavā̱ham a̍smi sa̱khye nyo̍kāḥ ||

yaḥ | jā̱gāra̍ | tam | ṛca̍ḥ | kā̱ma̱ya̱nte̱ | yaḥ | jā̱gāra̍ | tam | ū̱m̐ iti̍ | sāmā̍ni | ya̱nti̱ |
yaḥ | jā̱gāra̍ | tam | a̱yam | soma̍ḥ | ā̱ha̱ | tava̍ | a̱ham | a̱smi̱ | sa̱khye | ni-o̍kāḥ ||5.044.14||

5.044.15a a̱gnir jā̍gāra̱ tam ṛca̍ḥ kāmayante̱ 'gnir jā̍gāra̱ tam u̱ sāmā̍ni yanti |
5.044.15c a̱gnir jā̍gāra̱ tam a̱yaṁ soma̍ āha̱ tavā̱ham a̍smi sa̱khye nyo̍kāḥ ||

a̱gniḥ | jā̱gā̱ra̱ | tam | ṛca̍ḥ | kā̱ma̱ya̱nte̱ | a̱gniḥ | jā̱gā̱ra̱ | tam | ū̱m̐ iti̍ | sāmā̍ni | ya̱nti̱ |
a̱gniḥ | jā̱gā̱ra̱ | tam | a̱yam | soma̍ḥ | ā̱ha̱ | tava̍ | a̱ham | a̱smi̱ | sa̱khye | ni-o̍kāḥ ||5.044.15||


5.045.01a vi̱dā di̱vo vi̱ṣyann adri̍m u̱kthair ā̍ya̱tyā u̱ṣaso̍ a̱rcino̍ guḥ |
5.045.01c apā̍vṛta vra̱jinī̱r ut sva̍r gā̱d vi duro̱ mānu̍ṣīr de̱va ā̍vaḥ ||

vi̱dāḥ | di̱vaḥ | vi̱-syan | adri̍m | u̱kthaiḥ | ā̱-ya̱tyāḥ | u̱ṣasa̍ḥ | a̱rcina̍ḥ | gu̱ḥ |
apa̍ | a̱vṛ̱ta̱ | vra̱jinī̍ḥ | ut | sva̍ḥ | gā̱t | vi | dura̍ḥ | mānu̍ṣīḥ | de̱vaḥ | ā̱va̱rityā̍vaḥ ||5.045.01||

5.045.02a vi sūryo̍ a̱mati̱ṁ na śriya̍ṁ sā̱d orvād gavā̍m mā̱tā jā̍na̱tī gā̍t |
5.045.02c dhanva̍rṇaso na̱dya1̱̍ḥ khādo̍arṇā̱ḥ sthūṇe̍va̱ sumi̍tā dṛṁhata̱ dyauḥ ||

vi | sūrya̍ḥ | a̱mati̍m | na | śriya̍m | sā̱t | ā | ū̱rvāt | gavā̍m | mā̱tā | jā̱na̱tī | gā̱t |
dhanva̍-arṇasaḥ | na̱dya̍ḥ | khāda̍ḥ-arṇāḥ | sthūṇā̍-iva | su-mi̍tā | dṛ̱ṁha̱ta̱ | dyauḥ ||5.045.02||

5.045.03a a̱smā u̱kthāya̱ parva̍tasya̱ garbho̍ ma̱hīnā̍ṁ ja̱nuṣe̍ pū̱rvyāya̍ |
5.045.03c vi parva̍to̱ jihī̍ta̱ sādha̍ta̱ dyaur ā̱vivā̍santo dasayanta̱ bhūma̍ ||

a̱smai | u̱kthāya̍ | parva̍tasya | garbha̍ḥ | ma̱hīnā̍m | ja̱nuṣe̍ | pū̱rvyāya̍ |
vi | parva̍taḥ | jihī̍ta | sādha̍ta | dyauḥ | ā̱-vivā̍santaḥ | da̱sa̱ya̱nta̱ | bhūma̍ ||5.045.03||

5.045.04a sū̱ktebhi̍r vo̱ vaco̍bhir de̱vaju̍ṣṭai̱r indrā̱ nv a1̱̍gnī ava̍se hu̱vadhyai̍ |
5.045.04c u̱kthebhi̱r hi ṣmā̍ ka̱vaya̍ḥ suya̱jñā ā̱vivā̍santo ma̱ruto̱ yaja̍nti ||

su̱-u̱ktebhi̍ḥ | va̱ḥ | vaca̍ḥ-bhiḥ | de̱va-ju̍ṣṭaiḥ | indrā̍ | nu | a̱gnī iti̍ | ava̍se | hu̱vadhyai̍ |
u̱kthebhiḥ | hi | sma̱ | ka̱vaya̍ḥ | su̱-ya̱jñāḥ | ā̱-vivā̍santaḥ | ma̱ruta̍ḥ | yaja̍nti ||5.045.04||

5.045.05a eto̱ nv a1̱̍dya su̱dhyo̱3̱̍ bhavā̍ma̱ pra du̱cchunā̍ minavāmā̱ varī̍yaḥ |
5.045.05c ā̱re dveṣā̍ṁsi sanu̱tar da̍dhā̱māyā̍ma̱ prāñco̱ yaja̍māna̱m accha̍ ||

eto̱ iti̍ | nu | a̱dya | su̱-dhya̍ḥ | bhavā̍ma | pra | du̱cchunā̍ḥ | mi̱na̱vā̱ma̱ | varī̍yaḥ |
ā̱re | dveṣā̍ṁsi | sa̱nu̱taḥ | da̱dhā̱ma̱ | ayā̍ma | prāñca̍ḥ | yaja̍mānam | accha̍ ||5.045.05||

5.045.06a etā̱ dhiya̍ṁ kṛ̱ṇavā̍mā sakhā̱yo 'pa̱ yā mā̱tām̐ ṛ̍ṇu̱ta vra̱jaṁ goḥ |
5.045.06c yayā̱ manu̍r viśiśi̱praṁ ji̱gāya̱ yayā̍ va̱ṇig va̱ṅkur āpā̱ purī̍ṣam ||

ā | i̱ta̱ | dhiya̍m | kṛ̱ṇavā̍ma | sa̱khā̱ya̱ḥ | apa̍ | yā | mā̱tā | ṛ̱ṇu̱ta | vra̱jam | goḥ |
yayā̍ | manu̍ḥ | vi̱śi̱-śi̱pram | ji̱gāya̍ | yayā̍ | va̱ṇik | va̱ṅkuḥ | āpa̍ | purī̍ṣam ||5.045.06||

5.045.07a anū̍no̱d atra̱ hasta̍yato̱ adri̱r ārca̱n yena̱ daśa̍ mā̱so nava̍gvāḥ |
5.045.07c ṛ̱taṁ ya̱tī sa̱ramā̱ gā a̍vinda̱d viśvā̍ni sa̱tyāṅgi̍rāś cakāra ||

anū̍not | atra̍ | hasta̍-yataḥ | adri̍ḥ | ārca̍n | yena̍ | daśa̍ | mā̱saḥ | nava̍-gvāḥ |
ṛ̱tam | ya̱tī | sa̱ramā̍ | gāḥ | a̱vi̱nda̱t | viśvā̍ni | sa̱tyā | aṅgi̍rāḥ | ca̱kā̱ra̱ ||5.045.07||

5.045.08a viśve̍ a̱syā vyuṣi̱ māhi̍nāyā̱ḥ saṁ yad gobhi̱r aṅgi̍raso̱ nava̍nta |
5.045.08c utsa̍ āsām para̱me sa̱dhastha̍ ṛ̱tasya̍ pa̱thā sa̱ramā̍ vida̱d gāḥ ||

viśve̍ | a̱syāḥ | vi̱-uṣi̍ | māhi̍nāyāḥ | sam | yat | gobhi̍ḥ | aṅgi̍rasaḥ | nava̍nta |
utsa̍ḥ | ā̱sā̱m | pa̱ra̱me | sa̱dha-sthe̍ | ṛ̱tasya̍ | pa̱thā | sa̱ramā̍ | vi̱da̱t | gāḥ ||5.045.08||

5.045.09a ā sūryo̍ yātu sa̱ptāśva̱ḥ kṣetra̱ṁ yad a̍syorvi̱yā dī̍rghayā̱the |
5.045.09c ra̱ghuḥ śye̱naḥ pa̍taya̱d andho̱ acchā̱ yuvā̍ ka̱vir dī̍daya̱d goṣu̱ gaccha̍n ||

ā | sūrya̍ḥ | yā̱tu̱ | sa̱pta-a̍śvaḥ | kṣetra̍m | yat | a̱sya̱ | u̱rvi̱yā | dī̱rgha̱-yā̱the |
ra̱ghuḥ | śye̱naḥ | pa̱ta̱ya̱t | andha̍ḥ | accha̍ | yuvā̍ | ka̱viḥ | dī̱da̱ya̱t | goṣu̍ | gaccha̍n ||5.045.09||

5.045.10a ā sūryo̍ aruhac chu̱kram arṇo 'yu̍kta̱ yad dha̱rito̍ vī̱tapṛ̍ṣṭhāḥ |
5.045.10c u̱dnā na nāva̍m anayanta̱ dhīrā̍ āśṛṇva̱tīr āpo̍ a̱rvāg a̍tiṣṭhan ||

ā | sūrya̍ḥ | a̱ru̱ha̱t | śu̱kram | arṇa̍ḥ | ayu̍kta | yat | ha̱rita̍ḥ | vī̱ta-pṛ̍ṣṭhāḥ |
u̱dnā | na | nāva̍m | a̱na̱ya̱nta̱ | dhīrā̍ḥ | ā̱-śṛ̱ṇva̱tīḥ | āpa̍ḥ | a̱rvāk | a̱ti̱ṣṭha̱n ||5.045.10||

5.045.11a dhiya̍ṁ vo a̱psu da̍dhiṣe sva̱rṣāṁ yayāta̍ra̱n daśa̍ mā̱so nava̍gvāḥ |
5.045.11c a̱yā dhi̱yā syā̍ma de̱vago̍pā a̱yā dhi̱yā tu̍turyā̱māty aṁha̍ḥ ||

dhiya̍m | va̱ḥ | a̱p-su | da̱dhi̱ṣe̱ | sva̱ḥ-sām | yayā̍ | ata̍ran | daśa̍ | mā̱saḥ | nava̍-gvāḥ |
a̱yā | dhi̱yā | syā̱ma̱ | de̱va-go̍pāḥ | a̱yā | dhi̱yā | tu̱tu̱ryā̱ma̱ | ati̍ | aṁha̍ḥ ||5.045.11||


5.046.01a hayo̱ na vi̱dvām̐ a̍yuji sva̱yaṁ dhu̱ri tāṁ va̍hāmi pra̱tara̍ṇīm ava̱syuva̍m |
5.046.01c nāsyā̍ vaśmi vi̱muca̱ṁ nāvṛta̱m puna̍r vi̱dvān pa̱thaḥ pu̍rae̱ta ṛ̱ju ne̍ṣati ||

haya̍ḥ | na | vi̱dvān | a̱yu̱ji̱ | sva̱yam | dhu̱ri | tām | va̱hā̱mi̱ | pra̱tara̍ṇīm | a̱va̱syuva̍m |
na | a̱syā̱ḥ | va̱śmi̱ | vi̱-muca̍m | na | ā̱-vṛta̍m | puna̍ḥ | vi̱dvān | pa̱thaḥ | pu̱ra̱ḥ-e̱tā | ṛ̱ju | ne̱ṣa̱ti̱ ||5.046.01||

5.046.02a agna̱ indra̱ varu̍ṇa̱ mitra̱ devā̱ḥ śardha̱ḥ pra ya̍nta̱ māru̍to̱ta vi̍ṣṇo |
5.046.02c u̱bhā nāsa̍tyā ru̱dro adha̱ gnāḥ pū̱ṣā bhaga̱ḥ sara̍svatī juṣanta ||

agne̍ | indra̍ | varu̍ṇa | mitra̍ | devā̍ḥ | śardha̍ḥ | pra | ya̱nta̱ | māru̍ta | u̱ta | vi̱ṣṇo̱ iti̍ |
u̱bhā | nāsa̍tyā | ru̱draḥ | adha̍ | gnāḥ | pū̱ṣā | bhaga̍ḥ | sara̍svatī | ju̱ṣa̱nta̱ ||5.046.02||

5.046.03a i̱ndrā̱gnī mi̱trāvaru̱ṇādi̍ti̱ṁ sva̍ḥ pṛthi̱vīṁ dyām ma̱ruta̱ḥ parva̍tām̐ a̱paḥ |
5.046.03c hu̱ve viṣṇu̍m pū̱ṣaṇa̱m brahma̍ṇa̱s pati̱m bhaga̱ṁ nu śaṁsa̍ṁ savi̱tāra̍m ū̱taye̍ ||

i̱ndrā̱gnī iti̍ | mi̱trāvaru̱ṇā | adi̍tim | sva1̱̍riti̱ sva̍ḥ | pṛ̱thi̱vīm | dyām | ma̱ruta̍ḥ | parva̍tān | a̱paḥ |
hu̱ve | viṣṇu̍m | pū̱ṣaṇa̍m | brahma̍ṇaḥ | pati̍m | bhaga̍m | nu | śaṁsa̍m | sa̱vi̱tāra̍m | ū̱taye̍ ||5.046.03||

5.046.04a u̱ta no̱ viṣṇu̍r u̱ta vāto̍ a̱sridho̍ draviṇo̱dā u̱ta somo̱ maya̍s karat |
5.046.04c u̱ta ṛ̱bhava̍ u̱ta rā̱ye no̍ a̱śvino̱ta tvaṣṭo̱ta vibhvānu̍ maṁsate ||

u̱ta | na̱ḥ | viṣṇu̍ḥ | u̱ta | vāta̍ḥ | a̱sridha̍ḥ | dra̱vi̱ṇa̱ḥ-dā | u̱ta | soma̍ḥ | maya̍ḥ | ka̱ra̱t |
u̱ta | ṛ̱bhava̍ḥ | u̱ta | rā̱ye | na̱ḥ | a̱śvinā̍ | u̱ta | tvaṣṭā̍ | u̱ta | vibhvā̍ | anu̍ | ma̱ṁsa̱te̱ ||5.046.04||

5.046.05a u̱ta tyan no̱ māru̍ta̱ṁ śardha̱ ā ga̍mad divikṣa̱yaṁ ya̍ja̱tam ba̱rhir ā̱sade̍ |
5.046.05c bṛha̱spati̱ḥ śarma̍ pū̱ṣota no̍ yamad varū̱thya1̱̍ṁ varu̍ṇo mi̱tro a̍rya̱mā ||

u̱ta | tyam | na̱ḥ | māru̍tam | śardha̍ḥ | ā | ga̱ma̱t | di̱vi̱-kṣa̱yam | ya̱ja̱tam | ba̱rhiḥ | ā̱-sade̍ |
bṛha̱spati̍ḥ | śarma̍ | pū̱ṣā | u̱ta | na̱ḥ | ya̱ma̱t | va̱rū̱thya̍m | varu̍ṇaḥ | mi̱traḥ | a̱rya̱mā ||5.046.05||

5.046.06a u̱ta tye na̱ḥ parva̍tāsaḥ suśa̱staya̍ḥ sudī̱tayo̍ na̱dya1̱̍s trāma̍ṇe bhuvan |
5.046.06c bhago̍ vibha̱ktā śava̱sāva̱sā ga̍mad uru̱vyacā̱ adi̍tiḥ śrotu me̱ hava̍m ||

u̱ta | tye | na̱ḥ | parva̍tāsaḥ | su̱-śa̱staya̍ḥ | su̱-dī̱taya̍ḥ | na̱dya̍ḥ | trāma̍ṇe | bhu̱va̱n |
bhaga̍ḥ | vi̱-bha̱ktā | śava̍sā | ava̍sā | ā | ga̱ma̱t | u̱ru̱-vyacā̍ḥ | adi̍tiḥ | śro̱tu̱ | me̱ | hava̍m ||5.046.06||

5.046.07a de̱vānā̱m patnī̍r uśa̱tīr a̍vantu na̱ḥ prāva̍ntu nas tu̱jaye̱ vāja̍sātaye |
5.046.07c yāḥ pārthi̍vāso̱ yā a̱pām api̍ vra̱te tā no̍ devīḥ suhavā̱ḥ śarma̍ yacchata ||

de̱vānā̍m | patnī̍ḥ | u̱śa̱tīḥ | a̱va̱ntu̱ | na̱ḥ | pra | a̱va̱ntu | na̱ḥ | tu̱jaye̍ | vāja̍-sātaye |
yāḥ | pārthi̍vāsaḥ | yāḥ | a̱pām | api̍ | vra̱te | tāḥ | na̱ḥ | de̱vī̱ḥ | su̱-ha̱vā̱ḥ | śarma̍ | ya̱ccha̱ta̱ ||5.046.07||

5.046.08a u̱ta gnā vya̍ntu de̱vapa̍tnīr indrā̱ṇy a1̱̍gnāyy a̱śvinī̱ rāṭ |
5.046.08c ā roda̍sī varuṇā̱nī śṛ̍ṇotu̱ vyantu̍ de̱vīr ya ṛ̱tur janī̍nām ||

u̱ta | gnāḥ | vya̱ntu̱ | de̱va-pa̍tnīḥ | i̱ndrā̱ṇī | a̱gnāyī̍ | a̱śvinī̍ | rāṭ |
ā | roda̍sī̱ iti̍ | va̱ru̱ṇā̱nī | śṛ̱ṇo̱tu̱ | vyantu̍ | de̱vīḥ | yaḥ | ṛ̱tuḥ | janī̍nām ||5.046.08||


5.047.01a pra̱yu̱ñja̱tī di̱va e̍ti bruvā̱ṇā ma̱hī mā̱tā du̍hi̱tur bo̱dhaya̍ntī |
5.047.01c ā̱vivā̍santī yuva̱tir ma̍nī̱ṣā pi̱tṛbhya̱ ā sada̍ne̱ johu̍vānā ||

pra̱yu̱ñja̱tī | di̱vaḥ | e̱ti̱ | bru̱vā̱ṇā | ma̱hī | mā̱tā | du̱hi̱tuḥ | bo̱dhaya̍ntī |
ā̱-vivā̍santī | yu̱va̱tiḥ | ma̱nī̱ṣā | pi̱tṛ-bhyaḥ | ā | sada̍ne | johu̍vānā ||5.047.01||

5.047.02a a̱ji̱rāsa̱s tada̍pa̱ īya̍mānā ātasthi̱vāṁso̍ a̱mṛta̍sya̱ nābhi̍m |
5.047.02c a̱na̱ntāsa̍ u̱ravo̍ vi̱śvata̍ḥ sī̱m pari̱ dyāvā̍pṛthi̱vī ya̍nti̱ panthā̍ḥ ||

a̱ji̱rāsa̍ḥ | tat-a̍paḥ | īya̍mānāḥ | ā̱ta̱sthi̱-vāṁsa̍ḥ | a̱mṛta̍sya | nābhi̍m |
a̱na̱ntāsa̍ḥ | u̱rava̍ḥ | vi̱śvata̍ḥ | sī̱m | pari̍ | dyāvā̍pṛthi̱vī iti̍ | ya̱nti̱ | panthā̍ḥ ||5.047.02||

5.047.03a u̱kṣā sa̍mu̱dro a̍ru̱ṣaḥ su̍pa̱rṇaḥ pūrva̍sya̱ yoni̍m pi̱tur ā vi̍veśa |
5.047.03c madhye̍ di̱vo nihi̍ta̱ḥ pṛśni̱r aśmā̱ vi ca̍krame̱ raja̍sas pā̱ty antau̍ ||

u̱kṣā | sa̱mu̱draḥ | a̱ru̱ṣaḥ | su̱-pa̱rṇaḥ | pūrva̍sya | yoni̍m | pi̱tuḥ | ā | vi̱ve̱śa̱ |
madhye̍ | di̱vaḥ | ni-hi̍taḥ | pṛśni̍ḥ | aśmā̍ | vi | ca̱kra̱me̱ | raja̍saḥ | pā̱ti̱ | antau̍ ||5.047.03||

5.047.04a ca̱tvāra̍ īm bibhrati kṣema̱yanto̱ daśa̱ garbha̍ṁ ca̱rase̍ dhāpayante |
5.047.04c tri̱dhāta̍vaḥ para̱mā a̍sya̱ gāvo̍ di̱vaś ca̍ranti̱ pari̍ sa̱dyo antā̍n ||

ca̱tvāra̍ḥ | ī̱m | bi̱bhra̱ti̱ | kṣe̱ma̱-yanta̍ḥ | daśa̍ | garbha̍m | ca̱rase̍ | dhā̱pa̱ya̱nte̱ |
tri̱-dhāta̍vaḥ | pa̱ra̱māḥ | a̱sya̱ | gāva̍ḥ | di̱vaḥ | ca̱ra̱nti̱ | pari̍ | sa̱dyaḥ | antā̍n ||5.047.04||

5.047.05a i̱daṁ vapu̍r ni̱vaca̍naṁ janāsa̱ś cara̍nti̱ yan na̱dya̍s ta̱sthur āpa̍ḥ |
5.047.05c dve yad ī̍m bibhṛ̱to mā̱tur a̱nye i̱heha̍ jā̱te ya̱myā̱3̱̍ saba̍ndhū ||

i̱dam | vapu̍ḥ | ni̱-vaca̍nam | janāsa̍ḥ | cara̍nti | yat | na̱dya̍ḥ | ta̱sthuḥ | āpa̍ḥ |
dve iti̍ | yat | ī̱m | bi̱bhṛ̱taḥ | mā̱tuḥ | a̱nye | i̱ha-i̍ha | jā̱te iti̍ | ya̱myā̍ | saba̍ndhū̱ iti̱ sa-ba̍ndhū ||5.047.05||

5.047.06a vi ta̍nvate̱ dhiyo̍ asmā̱ apā̍ṁsi̱ vastrā̍ pu̱trāya̍ mā̱taro̍ vayanti |
5.047.06c u̱pa̱pra̱kṣe vṛṣa̍ṇo̱ moda̍mānā di̱vas pa̱thā va̱dhvo̍ ya̱nty accha̍ ||

vi | ta̱nva̱te̱ | dhiya̍ḥ | a̱smai̱ | apā̍ṁsi | vastrā̍ | pu̱trāya̍ | mā̱tara̍ḥ | va̱ya̱nti̱ |
u̱pa̱-pra̱kṣe | vṛṣa̍ṇaḥ | moda̍mānāḥ | di̱vaḥ | pa̱thā | va̱dhva̍ḥ | ya̱nti̱ | accha̍ ||5.047.06||

5.047.07a tad a̍stu mitrāvaruṇā̱ tad a̍gne̱ śaṁ yor a̱smabhya̍m i̱dam a̍stu śa̱stam |
5.047.07c a̱śī̱mahi̍ gā̱dham u̱ta pra̍ti̱ṣṭhāṁ namo̍ di̱ve bṛ̍ha̱te sāda̍nāya ||

tat | a̱stu̱ | mi̱trā̱va̱ru̱ṇā̱ | tat | a̱gne̱ | śam | yoḥ | a̱smabhya̍m | i̱dam | a̱stu̱ | śa̱stam |
a̱śī̱mahi̍ | gā̱dham | u̱ta | pra̱ti̱-sthām | nama̍ḥ | di̱ve | bṛ̱ha̱te | sāda̍nāya ||5.047.07||


5.048.01a kad u̍ pri̱yāya̱ dhāmne̍ manāmahe̱ svakṣa̍trāya̱ svaya̍śase ma̱he va̱yam |
5.048.01c ā̱me̱nyasya̱ raja̍so̱ yad a̱bhra ām̐ a̱po vṛ̍ṇā̱nā vi̍ta̱noti̍ mā̱yinī̍ ||

kat | ū̱m̐ iti̍ | pri̱yāya̍ | dhāmne̍ | ma̱nā̱ma̱he̱ | sva-kṣa̍trāya | sva-ya̍śase | ma̱he | va̱yam |
ā̱-me̱nyasya̍ | raja̍saḥ | yat | a̱bhre | ā | a̱paḥ | vṛ̱ṇā̱nā | vi̱-ta̱noti̍ | mā̱yinī̍ ||5.048.01||

5.048.02a tā a̍tnata va̱yuna̍ṁ vī̱rava̍kṣaṇaṁ samā̱nyā vṛ̱tayā̱ viśva̱m ā raja̍ḥ |
5.048.02c apo̱ apā̍cī̱r apa̍rā̱ ape̍jate̱ pra pūrvā̍bhis tirate deva̱yur jana̍ḥ ||

tāḥ | a̱tna̱ta̱ | va̱yuna̍m | vī̱ra-va̍kṣaṇam | sa̱mā̱nyā | vṛ̱tayā̍ | viśva̍m | ā | raja̍ḥ |
apo̱ iti̍ | apā̍cīḥ | apa̍rāḥ | apa̍ | ī̱ja̱te̱ | pra | pūrvā̍bhiḥ | ti̱ra̱te̱ | de̱va̱-yuḥ | jana̍ḥ ||5.048.02||

5.048.03a ā grāva̍bhir aha̱nye̍bhir a̱ktubhi̱r vari̍ṣṭha̱ṁ vajra̱m ā ji̍gharti mā̱yini̍ |
5.048.03c śa̱taṁ vā̱ yasya̍ pra̱cara̱n sve dame̍ saṁva̱rtaya̍nto̱ vi ca̍ vartaya̱nn ahā̍ ||

ā | grāva̍-bhiḥ | a̱ha̱nye̍bhiḥ | a̱ktu-bhi̍ḥ | vari̍ṣṭham | vajra̍m | ā | ji̱gha̱rti̱ | mā̱yini̍ |
śa̱tam | vā̱ | yasya̍ | pra̱-cara̍n | sve | dame̍ | sa̱m-va̱rtaya̍ntaḥ | vi | ca̱ | va̱rta̱ya̱n | ahā̍ ||5.048.03||

5.048.04a tām a̍sya rī̱tim pa̍ra̱śor i̍va̱ praty anī̍kam akhyam bhu̱je a̍sya̱ varpa̍saḥ |
5.048.04c sacā̱ yadi̍ pitu̱manta̍m iva̱ kṣaya̱ṁ ratna̱ṁ dadhā̍ti̱ bhara̍hūtaye vi̱śe ||

tām | a̱sya̱ | rī̱tim | pa̱ra̱śoḥ-i̍va | prati̍ | anī̍kam | a̱khya̱m | bhu̱je | a̱sya̱ | varpa̍saḥ |
sacā̍ | yadi̍ | pi̱tu̱manta̍m-iva | kṣaya̍m | ratna̍m | dadhā̍ti | bhara̍-hūtaye | vi̱śe ||5.048.04||

5.048.05a sa ji̱hvayā̱ catu̍ranīka ṛñjate̱ cāru̱ vasā̍no̱ varu̍ṇo̱ yata̍nn a̱rim |
5.048.05c na tasya̍ vidma puruṣa̱tvatā̍ va̱yaṁ yato̱ bhaga̍ḥ savi̱tā dāti̱ vārya̍m ||

saḥ | ji̱hvayā̍ | catu̍ḥ-anīkaḥ | ṛ̱ñja̱te̱ | cāru̍ | vasā̍naḥ | varu̍ṇaḥ | yata̍n | a̱rim |
na | tasya̍ | vi̱dma̱ | pu̱ru̱ṣa̱-tvatā̍ | va̱yam | yata̍ḥ | bhaga̍ḥ | sa̱vi̱tā | dāti̍ | vārya̍m ||5.048.05||


5.049.01a de̱vaṁ vo̍ a̱dya sa̍vi̱tāra̱m eṣe̱ bhaga̍ṁ ca̱ ratna̍ṁ vi̱bhaja̍ntam ā̱yoḥ |
5.049.01c ā vā̍ṁ narā purubhujā vavṛtyāṁ di̱ve-di̍ve cid aśvinā sakhī̱yan ||

de̱vam | va̱ḥ | a̱dya | sa̱vi̱tāra̍m | ā | ī̱ṣe̱ | bhaga̍m | ca̱ | ratna̍m | vi̱-bhaja̍ntam | ā̱yoḥ |
ā | vā̱m | na̱rā̱ | pu̱ru̱-bhu̱jā̱ | va̱vṛ̱tyā̱m | di̱ve-di̍ve | ci̱t | a̱śvi̱nā̱ | sa̱khi̱-yan ||5.049.01||

5.049.02a prati̍ pra̱yāṇa̱m asu̍rasya vi̱dvān sū̱ktair de̱vaṁ sa̍vi̱tāra̍ṁ duvasya |
5.049.02c upa̍ bruvīta̱ nama̍sā vijā̱nañ jyeṣṭha̍ṁ ca̱ ratna̍ṁ vi̱bhaja̍ntam ā̱yoḥ ||

prati̍ | pra̱-yāna̍m | asu̍rasya | vi̱dvān | su̱-u̱ktaiḥ | de̱vam | sa̱vi̱tāra̍m | du̱va̱sya̱ |
upa̍ | bru̱vī̱ta̱ | nama̍sā | vi̱-jā̱nan | jyeṣṭha̍m | ca̱ | ratna̍m | vi̱-bhaja̍ntam | ā̱yoḥ ||5.049.02||

5.049.03a a̱da̱tra̱yā da̍yate̱ vāryā̍ṇi pū̱ṣā bhago̱ adi̍ti̱r vasta̍ u̱sraḥ |
5.049.03c indro̱ viṣṇu̱r varu̍ṇo mi̱tro a̱gnir ahā̍ni bha̱drā ja̍nayanta da̱smāḥ ||

a̱da̱tra̱-yā | da̱ya̱te̱ | vāryā̍ṇi | pū̱ṣā | bhaga̍ḥ | adi̍tiḥ | vaste̍ | u̱sraḥ |
indra̍ḥ | viṣṇu̍ḥ | varu̍ṇaḥ | mi̱traḥ | a̱gniḥ | ahā̍ni | bha̱drā | ja̱na̱ya̱nta̱ | da̱smāḥ ||5.049.03||

5.049.04a tan no̍ ana̱rvā sa̍vi̱tā varū̍tha̱ṁ tat sindha̍va i̱ṣaya̍nto̱ anu̍ gman |
5.049.04c upa̱ yad voce̍ adhva̱rasya̱ hotā̍ rā̱yaḥ syā̍ma̱ pata̍yo̱ vāja̍ratnāḥ ||

tat | na̱ḥ | a̱na̱rvā | sa̱vi̱tā | varū̍tham | tat | sindha̍vaḥ | i̱ṣaya̍ntaḥ | anu̍ | gma̱n |
upa̍ | yat | voce̍ | a̱dhva̱rasya̍ | hotā̍ | rā̱yaḥ | syā̱ma̱ | pata̍yaḥ | vāja̍-ratnāḥ ||5.049.04||

5.049.05a pra ye vasu̍bhya̱ īva̱d ā namo̱ dur ye mi̱tre varu̍ṇe sū̱ktavā̍caḥ |
5.049.05c avai̱tv abhva̍ṁ kṛṇu̱tā varī̍yo di̱vaspṛ̍thi̱vyor ava̍sā madema ||

pra | ye | vasu̍-bhyaḥ | īva̍t | ā | nama̍ḥ | duḥ | ye | mi̱tre | varu̍ṇe | sū̱kta-vā̍caḥ |
ava̍ | e̱tu̱ | abhva̍m | kṛ̱ṇu̱ta | varī̍yaḥ | di̱vaḥpṛ̍thi̱vyoḥ | ava̍sā | ma̱de̱ma̱ ||5.049.05||


5.050.01a viśvo̍ de̱vasya̍ ne̱tur marto̍ vurīta sa̱khyam |
5.050.01c viśvo̍ rā̱ya i̍ṣudhyati dyu̱mnaṁ vṛ̍ṇīta pu̱ṣyase̍ ||

viśva̍ḥ | de̱vasya̍ | ne̱tuḥ | marta̍ḥ | vu̱rī̱ta̱ | sa̱khyam |
viśva̍ḥ | rā̱ye | i̱ṣu̱dhya̱ti̱ | dyu̱mnam | vṛ̱ṇī̱ta̱ | pu̱ṣyase̍ ||5.050.01||

5.050.02a te te̍ deva neta̱r ye ce̱mām̐ a̍nu̱śase̍ |
5.050.02c te rā̱yā te hy ā̱3̱̍pṛce̱ sace̍mahi saca̱thyai̍ḥ ||

te | te̱ | de̱va̱ | ne̱ta̱ḥ | ye | ca̱ | i̱mān | a̱nu̱-śase̍ |
te | rā̱yā | te | hi | ā̱-pṛce̍ | sace̍mahi | sa̱ca̱thyai̍ḥ ||5.050.02||

5.050.03a ato̍ na̱ ā nṝn ati̍thī̱n ata̱ḥ patnī̍r daśasyata |
5.050.03c ā̱re viśva̍m pathe̱ṣṭhāṁ dvi̱ṣo yu̍yotu̱ yūyu̍viḥ ||

ata̍ḥ | na̱ḥ | ā | nṝn | ati̍thīn | ata̍ḥ | patnī̍ḥ | da̱śa̱sya̱ta̱ |
ā̱re | viśva̍m | pa̱the̱-sthām | dvi̱ṣaḥ | yu̱yo̱tu̱ | yūyu̍viḥ ||5.050.03||

5.050.04a yatra̱ vahni̍r a̱bhihi̍to du̱drava̱d droṇya̍ḥ pa̱śuḥ |
5.050.04c nṛ̱maṇā̍ vī̱rapa̱styo 'rṇā̱ dhīre̍va̱ sani̍tā ||

yatra̍ | vahni̍ḥ | a̱bhi-hi̍taḥ | du̱drava̍t | droṇya̍ḥ | pa̱śuḥ |
nṛ̱-manā̍ḥ | vī̱ra-pa̍styaḥ | arṇā̍ | dhīrā̍-iva | sani̍tā ||5.050.04||

5.050.05a e̱ṣa te̍ deva netā̱ ratha̱spati̱ḥ śaṁ ra̱yiḥ |
5.050.05c śaṁ rā̱ye śaṁ sva̱staya̍ iṣa̱ḥstuto̍ manāmahe deva̱stuto̍ manāmahe ||

e̱ṣaḥ | te̱ | de̱va̱ | ne̱ta̱riti̍ | ratha̱ḥpati̍ḥ | śam | ra̱yiḥ |
śam | rā̱ye | śam | sva̱staye̍ | i̱ṣa̱ḥ-stuta̍ḥ | ma̱nā̱ma̱he̱ | de̱va̱-stuta̍ḥ | ma̱nā̱ma̱he̱ ||5.050.05||


5.051.01a agne̍ su̱tasya̍ pī̱taye̱ viśvai̱r ūme̍bhi̱r ā ga̍hi |
5.051.01c de̱vebhi̍r ha̱vyadā̍taye ||

agne̍ | su̱tasya̍ | pī̱taye̍ | viśvai̍ḥ | ūme̍bhiḥ | ā | ga̱hi̱ |
de̱vebhi̍ḥ | ha̱vya-dā̍taye ||5.051.01||

5.051.02a ṛta̍dhītaya̱ ā ga̍ta̱ satya̍dharmāṇo adhva̱ram |
5.051.02c a̱gneḥ pi̍bata ji̱hvayā̍ ||

ṛta̍-dhītayaḥ | ā | ga̱ta̱ | satya̍-dharmāṇaḥ | a̱dhva̱ram |
a̱gneḥ | pi̱ba̱ta̱ | ji̱hvayā̍ ||5.051.02||

5.051.03a vipre̍bhir vipra santya prāta̱ryāva̍bhi̱r ā ga̍hi |
5.051.03c de̱vebhi̱ḥ soma̍pītaye ||

vipre̍bhiḥ | vi̱pra̱ | sa̱ntya̱ | prā̱ta̱ryāva̍-bhiḥ | ā | ga̱hi̱ |
de̱vebhi̍ḥ | soma̍-pītaye ||5.051.03||

5.051.04a a̱yaṁ soma̍ś ca̱mū su̱to 'ma̍tre̱ pari̍ ṣicyate |
5.051.04c pri̱ya indrā̍ya vā̱yave̍ ||

ayam | soma̍ḥ | ca̱mū iti̍ | su̱taḥ | ama̍tre | pari̍ | si̱cya̱te̱ |
pri̱yaḥ | indrā̍ya | vā̱yave̍ ||5.051.04||

5.051.05a vāya̱v ā yā̍hi vī̱taye̍ juṣā̱ṇo ha̱vyadā̍taye |
5.051.05c pibā̍ su̱tasyāndha̍so a̱bhi praya̍ḥ ||

vāyo̱ iti̍ | ā | yā̱hi̱ | vī̱taye̍ | ju̱ṣā̱ṇaḥ | ha̱vya-dā̍taye |
piba̍ | su̱tasya̍ | andha̍saḥ | a̱bhi | praya̍ḥ ||5.051.05||

5.051.06a indra̍ś ca vāyav eṣāṁ su̱tānā̍m pī̱tim a̍rhathaḥ |
5.051.06c tāñ ju̍ṣethām are̱pasā̍v a̱bhi praya̍ḥ ||

indra̍ḥ | ca̱ | vā̱yo̱ iti̍ | e̱ṣā̱m | su̱tānā̍m | pī̱tim | a̱rha̱tha̱ḥ |
tān | ju̱ṣe̱thā̱m | a̱re̱pasau | a̱bhi | praya̍ḥ ||5.051.06||

5.051.07a su̱tā indrā̍ya vā̱yave̱ somā̍so̱ dadhyā̍śiraḥ |
5.051.07c ni̱mnaṁ na ya̍nti̱ sindha̍vo̱ 'bhi praya̍ḥ ||

su̱tāḥ | indrā̍ya | vā̱yave̍ | somā̍saḥ | dadhi̍-āśiraḥ |
ni̱mnam | na | ya̱nti̱ | sindha̍vaḥ | a̱bhi | praya̍ḥ ||5.051.07||

5.051.08a sa̱jūr viśve̍bhir de̱vebhi̍r a̱śvibhyā̍m u̱ṣasā̍ sa̱jūḥ |
5.051.08c ā yā̍hy agne atri̱vat su̱te ra̍ṇa ||

sa̱-jūḥ | viśve̍bhiḥ | de̱vebhi̍ḥ | a̱śvi-bhyā̍m | u̱ṣasā̍ | sa̱-jūḥ |
ā | yā̱hi̱ | a̱gne̱ | a̱tri̱-vat | su̱te | raṇa̱ ||5.051.08||

5.051.09a sa̱jūr mi̱trāvaru̍ṇābhyāṁ sa̱jūḥ some̍na̱ viṣṇu̍nā |
5.051.09c ā yā̍hy agne atri̱vat su̱te ra̍ṇa ||

sa̱-jūḥ | mi̱trāvaru̍ṇābhyām | sa̱-jūḥ | some̍na | viṣṇu̍nā |
ā | yā̱hi̱ | a̱gne̱ | a̱tri̱-vat | su̱te | raṇa̱ ||5.051.09||

5.051.10a sa̱jūr ā̍di̱tyair vasu̍bhiḥ sa̱jūr indre̍ṇa vā̱yunā̍ |
5.051.10c ā yā̍hy agne atri̱vat su̱te ra̍ṇa ||

sa̱-jūḥ | ā̱di̱tyaiḥ | vasu̍-bhiḥ | sa̱-jūḥ | indre̍ṇa | vā̱yunā̍ |
ā | yā̱hi̱ | a̱gne̱ | a̱tri̱-vat | su̱te | raṇa̱ ||5.051.10||

5.051.11a sva̱sti no̍ mimītām a̱śvinā̱ bhaga̍ḥ sva̱sti de̱vy adi̍tir ana̱rvaṇa̍ḥ |
5.051.11c sva̱sti pū̱ṣā asu̍ro dadhātu naḥ sva̱sti dyāvā̍pṛthi̱vī su̍ce̱tunā̍ ||

sva̱sti | na̱ḥ | mi̱mī̱tā̱m | a̱śvinā̍ | bhaga̍ḥ | sva̱sti | de̱vī | adi̍tiḥ | a̱na̱rvaṇa̍ḥ |
sva̱sti | pū̱ṣā | asu̍raḥ | da̱dhā̱tu̱ | na̱ḥ | sva̱sti | dyāvā̍pṛthi̱vī iti̍ | su̱-ce̱tunā̍ ||5.051.11||

5.051.12a sva̱staye̍ vā̱yum upa̍ bravāmahai̱ soma̍ṁ sva̱sti bhuva̍nasya̱ yas pati̍ḥ |
5.051.12c bṛha̱spati̱ṁ sarva̍gaṇaṁ sva̱staye̍ sva̱staya̍ ādi̱tyāso̍ bhavantu naḥ ||

sva̱staye̍ | va̱yum | upa̍ | bra̱vā̱ma̱hai̱ | soma̍m | sva̱sti | bhuva̍nasya | yaḥ | pati̍ḥ |
bṛha̱spati̍m | sarva̍-gaṇam | sva̱staye̍ | sva̱staye̍ | ā̱di̱tyāsa̍ḥ | bha̱va̱ntu̱ | na̱ḥ ||5.051.12||

5.051.13a viśve̍ de̱vā no̍ a̱dyā sva̱staye̍ vaiśvāna̱ro vasu̍r a̱gniḥ sva̱staye̍ |
5.051.13c de̱vā a̍vantv ṛ̱bhava̍ḥ sva̱staye̍ sva̱sti no̍ ru̱draḥ pā̱tv aṁha̍saḥ ||

viśve̍ | de̱vāḥ | na̱ḥ | a̱dya | sva̱staye̍ | vai̱śvā̱na̱raḥ | vasu̍ḥ | a̱gniḥ | sva̱staye̍ |
de̱vāḥ | a̱va̱ntu̱ | ṛ̱bhava̍ḥ | sva̱staye̍ | sva̱sti | na̱ḥ | ru̱draḥ | pā̱tu̱ | aṁha̍saḥ ||5.051.13||

5.051.14a sva̱sti mi̍trāvaruṇā sva̱sti pa̍thye revati |
5.051.14c sva̱sti na̱ indra̍ś cā̱gniś ca̍ sva̱sti no̍ adite kṛdhi ||

sva̱sti | mi̱trā̱va̱ru̱ṇā̱ | sva̱sti | pa̱thye̱ | re̱va̱ti̱ |
sva̱sti | na̱ḥ | indra̍ḥ | ca̱ | a̱gniḥ | ca̱ | sva̱sti | na̱ḥ | a̱di̱te̱ | kṛ̱dhi̱ ||5.051.14||

5.051.15a sva̱sti panthā̱m anu̍ carema sūryācandra̱masā̍v iva |
5.051.15c puna̱r dada̱tāghna̍tā jāna̱tā saṁ ga̍memahi ||

sva̱sti | panthā̍m | anu̍ | ca̱re̱ma̱ | sū̱ryā̱ca̱ndra̱masau̍-iva |
puna̍ḥ | dada̍tā | aghna̍tā | jā̱na̱tā | sam | ga̱me̱ma̱hi̱ ||5.051.15||


5.052.01a pra śyā̍vāśva dhṛṣṇu̱yārcā̍ ma̱rudbhi̱r ṛkva̍bhiḥ |
5.052.01c ye a̍dro̱gham a̍nuṣva̱dhaṁ śravo̱ mada̍nti ya̱jñiyā̍ḥ ||

pra | śyā̱va̱-a̱śva̱ | dhṛ̱ṣṇu̱-yā | arca̍ | ma̱rut-bhiḥ | ṛkva̍-bhiḥ |
ye | a̱dro̱gham | a̱nu̱-sva̱dham | śrava̍ḥ | mada̍nti | ya̱jñiyā̍ḥ ||5.052.01||

5.052.02a te hi sthi̱rasya̱ śava̍sa̱ḥ sakhā̍ya̱ḥ santi̍ dhṛṣṇu̱yā |
5.052.02c te yāma̱nn ā dhṛ̍ṣa̱dvina̱s tmanā̍ pānti̱ śaśva̍taḥ ||

te | hi | sthi̱rasya̍ | śava̍saḥ | sakhā̍yaḥ | santi̍ | dhṛ̱ṣṇu̱-yā |
te | yāma̍n | ā | dhṛ̱ṣa̱t-vina̍ḥ | tmanā̍ | pā̱nti̱ | śaśva̍taḥ ||5.052.02||

5.052.03a te sya̱ndrāso̱ nokṣaṇo 'ti̍ ṣkandanti̱ śarva̍rīḥ |
5.052.03c ma̱rutā̱m adhā̱ maho̍ di̱vi kṣa̱mā ca̍ manmahe ||

te | spa̱ndrāsa̍ḥ | na | u̱kṣaṇa̍ḥ | ati̍ | ska̱nda̱nti̱ | śarva̍rīḥ |
ma̱rutā̍m | adha̍ | maha̍ḥ | di̱vi | kṣa̱mā | ca̱ | ma̱nma̱he̱ ||5.052.03||

5.052.04a ma̱rutsu̍ vo dadhīmahi̱ stoma̍ṁ ya̱jñaṁ ca̍ dhṛṣṇu̱yā |
5.052.04c viśve̱ ye mānu̍ṣā yu̱gā pānti̱ martya̍ṁ ri̱ṣaḥ ||

ma̱rut-su̍ | va̱ḥ | da̱dhī̱ma̱hi̱ | stoma̍m | ya̱jñam | ca̱ | dhṛ̱ṣṇu̱-yā |
viśve̍ | ye | mānu̍ṣā | yu̱gā | pānti̍ | martya̍m | ri̱ṣaḥ ||5.052.04||

5.052.05a arha̍nto̱ ye su̱dāna̍vo̱ naro̱ asā̍miśavasaḥ |
5.052.05c pra ya̱jñaṁ ya̱jñiye̍bhyo di̱vo a̍rcā ma̱rudbhya̍ḥ ||

arha̍ntaḥ | ye | su̱-dāna̍vaḥ | nara̍ḥ | asā̍mi-śavasaḥ |
pra | ya̱jñam | ya̱jñiye̍bhyaḥ | di̱vaḥ | a̱rca̱ | ma̱rut-bhya̍ḥ ||5.052.05||

5.052.06a ā ru̱kmair ā yu̱dhā nara̍ ṛ̱ṣvā ṛ̱ṣṭīr a̍sṛkṣata |
5.052.06c anv e̍nā̱m̐ aha̍ vi̱dyuto̍ ma̱ruto̱ jajjha̍tīr iva bhā̱nur a̍rta̱ tmanā̍ di̱vaḥ ||

ā | ru̱kmaiḥ | ā | yu̱dhā | nara̍ḥ | ṛ̱ṣvāḥ | ṛ̱ṣṭīḥ | a̱sṛ̱kṣa̱ta̱ |
anu̍ | e̱nā̱n | aha̍ | vi̱-dyuta̍ḥ | ma̱ruta̍ḥ | jajjha̍tīḥ-iva | bhā̱nuḥ | a̱rta̱ | tmanā̍ | di̱vaḥ ||5.052.06||

5.052.07a ye vā̍vṛ̱dhanta̱ pārthi̍vā̱ ya u̱rāv a̱ntari̍kṣa̱ ā |
5.052.07c vṛ̱jane̍ vā na̱dīnā̍ṁ sa̱dhasthe̍ vā ma̱ho di̱vaḥ ||

ye | va̱vṛ̱dhanta̍ | pārthi̍vāḥ | ye | u̱rau | a̱ntari̍kṣe | ā |
vṛ̱jane̍ | vā̱ | na̱dīnā̍m | sa̱dha-sthe̍ | vā̱ | ma̱haḥ | di̱vaḥ ||5.052.07||

5.052.08a śardho̱ māru̍ta̱m uc cha̍ṁsa sa̱tyaśa̍vasa̱m ṛbhva̍sam |
5.052.08c u̱ta sma̱ te śu̱bhe nara̱ḥ pra sya̱ndrā yu̍jata̱ tmanā̍ ||

śardha̍ḥ | māru̍tam | ut | śa̱ṁsa̱ | sa̱tya-śa̍vasam | ṛbhva̍sam |
u̱ta | sma̱ | te | śu̱bhe | nara̍ḥ | pra | spa̱ndrāḥ | yu̱ja̱ta̱ | tmanā̍ ||5.052.08||

5.052.09a u̱ta sma̱ te paru̍ṣṇyā̱m ūrṇā̍ vasata śu̱ndhyava̍ḥ |
5.052.09c u̱ta pa̱vyā rathā̍nā̱m adri̍m bhinda̱nty oja̍sā ||

u̱ta | sma̱ | te | paru̍ṣṇyām | ūrṇā̍ḥ | va̱sa̱ta̱ | śu̱ndhyava̍ḥ |
u̱ta | pa̱vyā | rathā̍nām | adri̍m | bhi̱nda̱nti̱ | oja̍sā ||5.052.09||

5.052.10a āpa̍thayo̱ vipa̍tha̱yo 'nta̍spathā̱ anu̍pathāḥ |
5.052.10c e̱tebhi̱r mahya̱ṁ nāma̍bhir ya̱jñaṁ vi̍ṣṭā̱ra o̍hate ||

āpa̍thayaḥ | vi-pa̍thayaḥ | anta̍ḥ-pathāḥ | anu̍-pathāḥ |
e̱tebhiḥ | mahya̍m | nāma̍-bhiḥ | ya̱jñam | vi̱-stā̱raḥ | o̱ha̱te̱ ||5.052.10||

5.052.11a adhā̱ naro̱ ny o̍ha̱te 'dhā̍ ni̱yuta̍ ohate |
5.052.11c adhā̱ pārā̍vatā̱ iti̍ ci̱trā rū̱pāṇi̱ darśyā̍ ||

adha̍ | nara̍ḥ | ni | o̱ha̱te̱ | adha̍ | ni̱-yuta̍ḥ | o̱ha̱te̱ |
adha̍ | pārā̍vatāḥ | iti̍ | ci̱trā | rū̱pāṇi̍ | darśyā̍ ||5.052.11||

5.052.12a cha̱nda̱ḥstubha̍ḥ kubha̱nyava̱ utsa̱m ā kī̱riṇo̍ nṛtuḥ |
5.052.12c te me̱ ke ci̱n na tā̱yava̱ ūmā̍ āsan dṛ̱śi tvi̱ṣe ||

cha̱nda̱ḥ-stubha̍ḥ | ku̱bha̱nyava̍ḥ | utsa̍m | ā | kī̱riṇa̍ḥ | nṛ̱tu̱ḥ |
te | me̱ | ke | ci̱t | na | tā̱yava̍ḥ | ūmā̍ḥ | ā̱sa̱n | dṛ̱śi | tvi̱ṣe ||5.052.12||

5.052.13a ya ṛ̱ṣvā ṛ̱ṣṭivi̍dyutaḥ ka̱vaya̱ḥ santi̍ ve̱dhasa̍ḥ |
5.052.13c tam ṛ̍ṣe̱ māru̍taṁ ga̱ṇaṁ na̍ma̱syā ra̱mayā̍ gi̱rā ||

ye | ṛ̱ṣvāḥ | ṛ̱ṣṭi-vi̍dyutaḥ | ka̱vaya̍ḥ | santi̍ | ve̱dhasa̍ḥ |
tam | ṛ̱ṣe̱ | māru̍tam | ga̱ṇam | na̱ma̱sya | ra̱maya̍ | gi̱rā ||5.052.13||

5.052.14a accha̍ ṛṣe̱ māru̍taṁ ga̱ṇaṁ dā̱nā mi̱traṁ na yo̱ṣaṇā̍ |
5.052.14c di̱vo vā̍ dhṛṣṇava̱ oja̍sā stu̱tā dhī̱bhir i̍ṣaṇyata ||

accha̍ | ṛ̱ṣe̱ | māru̍tam | ga̱ṇam | dā̱nā | mi̱tram | na | yo̱ṣaṇā̍ |
di̱vaḥ | vā̱ | dhṛ̱ṣṇa̱va̱ḥ | oja̍sā | stu̱tāḥ | dhī̱bhiḥ | i̱ṣa̱ṇya̱ta̱ ||5.052.14||

5.052.15a nū ma̍nvā̱na e̍ṣāṁ de̱vām̐ acchā̱ na va̱kṣaṇā̍ |
5.052.15c dā̱nā sa̍ceta sū̱ribhi̱r yāma̍śrutebhir a̱ñjibhi̍ḥ ||

nu | ma̱nvā̱naḥ | e̱ṣā̱m | de̱vān | accha̍ | na | va̱kṣaṇā̍ |
dā̱nā | sa̱ce̱ta̱ | sū̱ri-bhi̍ḥ | yāma̍-śrutebhiḥ | a̱ñji-bhi̍ḥ ||5.052.15||

5.052.16a pra ye me̍ bandhve̱ṣe gāṁ voca̍nta sū̱raya̱ḥ pṛśni̍ṁ vocanta mā̱tara̍m |
5.052.16c adhā̍ pi̱tara̍m i̱ṣmiṇa̍ṁ ru̱draṁ vo̍canta̱ śikva̍saḥ ||

pra | ye | me̱ | ba̱ndhu̱-e̱ṣe | gām | voca̍nta | sū̱raya̍ḥ | pṛśni̍m | vo̱ca̱nta̱ | mā̱tara̍m |
adha̍ | pi̱tara̍m | i̱ṣmiṇa̍m | ru̱dram | vo̱ca̱nta̱ | śikva̍saḥ ||5.052.16||

5.052.17a sa̱pta me̍ sa̱pta śā̱kina̱ eka̍m-ekā śa̱tā da̍duḥ |
5.052.17c ya̱munā̍yā̱m adhi̍ śru̱tam ud rādho̱ gavya̍m mṛje̱ ni rādho̱ aśvya̍m mṛje ||

sa̱pta | me̱ | sa̱pta | śā̱kina̍ḥ | eka̍m-ekā | śa̱tā | da̱du̱ḥ |
ya̱munā̍yām | adhi̍ | śṛu̱tam | ut | rādha̍ḥ | gavya̍m | mṛ̱je̱ | ni | rādha̍ḥ | aśvya̍m | mṛ̱je̱ ||5.052.17||


5.053.01a ko ve̍da̱ jāna̍m eṣā̱ṁ ko vā̍ pu̱rā su̱mneṣv ā̍sa ma̱rutā̍m |
5.053.01c yad yu̍yu̱jre ki̍lā̱sya̍ḥ ||

kaḥ | ve̱da̱ | jāna̍m | e̱ṣā̱m | kaḥ | vā̱ | pu̱rā | su̱mneṣu̍ | ā̱sa̱ | ma̱rutā̍m |
yat | yu̱yu̱jre | ki̱lā̱sya̍ḥ ||5.053.01||

5.053.02a aitān rathe̍ṣu ta̱sthuṣa̱ḥ kaḥ śu̍śrāva ka̱thā ya̍yuḥ |
5.053.02c kasmai̍ sasruḥ su̱dāse̱ anv ā̱paya̱ iḻā̍bhir vṛ̱ṣṭaya̍ḥ sa̱ha ||

ā | e̱tān | rathe̍ṣu | ta̱sthuṣa̍ḥ | kaḥ | śu̱śrā̱va̱ | ka̱thā | ya̱yu̱ḥ |
kasmai̍ | sa̱sru̱ḥ | su̱-dāse̍ | anu̍ | ā̱paya̍ḥ | iḻā̍bhiḥ | vṛ̱ṣṭaya̍ḥ | sa̱ha ||5.053.02||

5.053.03a te ma̍ āhu̱r ya ā̍ya̱yur upa̱ dyubhi̱r vibhi̱r made̍ |
5.053.03c naro̱ maryā̍ are̱pasa̍ i̱mān paśya̱nn iti̍ ṣṭuhi ||

te | me̱ | āhu̍ḥ | ye | ā̱-ya̱yuḥ | upa̍ | dyu-bhi̍ḥ | vi-bhi̍ḥ | made̍ |
nara̍ḥ | maryā̍ḥ | a̱re̱pasa̍ḥ | i̱mān | paśya̍n | iti̍ | stu̱hi̱ ||5.053.03||

5.053.04a ye a̱ñjiṣu̱ ye vāśī̍ṣu̱ svabhā̍navaḥ sra̱kṣu ru̱kmeṣu̍ khā̱diṣu̍ |
5.053.04c śrā̱yā rathe̍ṣu̱ dhanva̍su ||

ye | a̱ñjiṣu̍ | ye | vāśī̍ṣu | sva-bhā̍navaḥ | sra̱kṣu | ru̱kmeṣu̍ | khā̱diṣu̍ |
śrā̱yāḥ | rathe̍ṣu | dhanva̍-su ||5.053.04||

5.053.05a yu̱ṣmāka̍ṁ smā̱ rathā̱m̐ anu̍ mu̱de da̍dhe maruto jīradānavaḥ |
5.053.05c vṛ̱ṣṭī dyāvo̍ ya̱tīr i̍va ||

yu̱ṣmāka̍m | sma̱ | rathā̍n | anu̍ | mu̱de | da̱dhe̱ | ma̱ru̱ta̱ḥ | jī̱ra̱-dā̱na̱va̱ḥ |
vṛ̱ṣṭī | dyāva̍ḥ | ya̱tīḥ-i̍va ||5.053.05||

5.053.06a ā yaṁ nara̍ḥ su̱dāna̍vo dadā̱śuṣe̍ di̱vaḥ kośa̱m acu̍cyavuḥ |
5.053.06c vi pa̱rjanya̍ṁ sṛjanti̱ roda̍sī̱ anu̱ dhanva̍nā yanti vṛ̱ṣṭaya̍ḥ ||

ā | yam | nara̍ḥ | su̱-dāna̍vaḥ | da̱dā̱śuṣe̍ | di̱vaḥ | kośa̍m | acu̍cyavuḥ |
vi | pa̱rjanya̍m | sṛ̱ja̱nti̱ | roda̍sī̱ iti̍ | anu̍ | dhanva̍nā | ya̱nti̱ | vṛ̱ṣṭaya̍ḥ ||5.053.06||

5.053.07a ta̱tṛ̱dā̱nāḥ sindha̍va̱ḥ kṣoda̍sā̱ raja̱ḥ pra sa̍srur dhe̱navo̍ yathā |
5.053.07c sya̱nnā aśvā̍ i̱vādhva̍no vi̱moca̍ne̱ vi yad varta̍nta e̱nya̍ḥ ||

ta̱tṛ̱dā̱nāḥ | sindha̍vaḥ | kṣoda̍sā | raja̍ḥ | pra | sa̱sru̱ḥ | dhe̱nava̍ḥ | ya̱thā̱ |
sya̱nnāḥ | aśvā̍ḥ-iva | adhva̍naḥ | vi̱-moca̍ne | vi | yat | varta̍nte | e̱nya̍ḥ ||5.053.07||

5.053.08a ā yā̍ta maruto di̱va āntari̍kṣād a̱mād u̱ta |
5.053.08c māva̍ sthāta parā̱vata̍ḥ ||

ā | yā̱ta̱ | ma̱ru̱ta̱ḥ | di̱vaḥ | ā | a̱ntari̍kṣāt | a̱māt | u̱ta |
mā | ava̍ | sthā̱ta̱ | pa̱rā̱-vata̍ḥ ||5.053.08||

5.053.09a mā vo̍ ra̱sāni̍tabhā̱ kubhā̱ krumu̱r mā va̱ḥ sindhu̱r ni rī̍ramat |
5.053.09c mā va̱ḥ pari̍ ṣṭhāt sa̱rayu̍ḥ purī̱ṣiṇy a̱sme it su̱mnam a̍stu vaḥ ||

mā | va̱ḥ | ra̱sā | ani̍tabhā | kubhā̍ | krumu̍ḥ | mā | va̱ḥ | sindhu̍ḥ | ni | rī̱ra̱ma̱t |
mā | va̱ḥ | pari̍ | sthā̱t | sa̱rayu̍ḥ | pu̱rī̱ṣiṇī̍ | a̱sme iti̍ | it | su̱mnam | a̱stu̱ | va̱ḥ ||5.053.09||

5.053.10a taṁ va̱ḥ śardha̱ṁ rathā̍nāṁ tve̱ṣaṁ ga̱ṇam māru̍ta̱ṁ navya̍sīnām |
5.053.10c anu̱ pra ya̍nti vṛ̱ṣṭaya̍ḥ ||

tam | va̱ḥ | śardha̍m | rathā̍nām | tve̱ṣam | ga̱ṇam | māru̍tam | navya̍sīnām |
anu̍ | pra | ya̱nti̱ | vṛ̱ṣṭaya̍ḥ ||5.053.10||

5.053.11a śardha̍ṁ-śardhaṁ va eṣā̱ṁ vrāta̍ṁ-vrātaṁ ga̱ṇaṁ-ga̍ṇaṁ suśa̱stibhi̍ḥ |
5.053.11c anu̍ krāmema dhī̱tibhi̍ḥ ||

śardha̍m-śardham | va̱ḥ | e̱ṣā̱m | vrāta̍m-vrātam | ga̱ṇam-ga̍ṇam | su̱śa̱sti-bhi̍ḥ |
anu̍ | krā̱me̱ma̱ | dhī̱ti-bhi̍ḥ ||5.053.11||

5.053.12a kasmā̍ a̱dya sujā̍tāya rā̱taha̍vyāya̱ pra ya̍yuḥ |
5.053.12c e̱nā yāme̍na ma̱ruta̍ḥ ||

kasmai̍ | a̱dya | su-jā̍tāya | rā̱ta-ha̍vyāya | pra | ya̱yu̱ḥ |
e̱nā | yāme̍na | ma̱ruta̍ḥ ||5.053.12||

5.053.13a yena̍ to̱kāya̱ tana̍yāya dhā̱nya1̱̍m bīja̱ṁ vaha̍dhve̱ akṣi̍tam |
5.053.13c a̱smabhya̱ṁ tad dha̍ttana̱ yad va̱ īma̍he̱ rādho̍ vi̱śvāyu̱ saubha̍gam ||

yena̍ | to̱kāya̍ | tana̍yāya | dhā̱nya̍m | bīja̍m | vaha̍dhve | akṣi̍tam |
a̱smabhya̍m | tat | dha̱tta̱na̱ | yat | va̱ḥ | īma̍he | rādha̍ḥ | vi̱śva-āyu | saubha̍gam ||5.053.13||

5.053.14a atī̍yāma ni̱das ti̱raḥ sva̱stibhi̍r hi̱tvāva̱dyam arā̍tīḥ |
5.053.14c vṛ̱ṣṭvī śaṁ yor āpa̍ u̱sri bhe̍ṣa̱jaṁ syāma̍ marutaḥ sa̱ha ||

ati̍ | i̱yā̱ma̱ | ni̱daḥ | ti̱raḥ | sva̱sti-bhi̍ḥ | hi̱tvā | a̱va̱dyam | arā̍tīḥ |
vṛ̱ṣṭvī | sam | yoḥ | āpa̍ḥ | u̱sri | bhe̱ṣa̱jam | syāma̍ | ma̱ru̱ta̱ḥ | sa̱ha ||5.053.14||

5.053.15a su̱de̱vaḥ sa̍mahāsati su̱vīro̍ naro maruta̱ḥ sa martya̍ḥ |
5.053.15c yaṁ trāya̍dhve̱ syāma̱ te ||

su̱-de̱vaḥ | sa̱ma̱ha̱ | a̱sa̱ti̱ | su̱-vīra̍ḥ | na̱ra̱ḥ | ma̱ru̱ta̱ḥ | saḥ | martya̍ḥ |
yam | trāya̍dhve | syāma̍ | te ||5.053.15||

5.053.16a stu̱hi bho̱jān stu̍va̱to a̍sya̱ yāma̍ni̱ raṇa̱n gāvo̱ na yava̍se |
5.053.16c ya̱taḥ pūrvā̍m̐ iva̱ sakhī̱m̐r anu̍ hvaya gi̱rā gṛ̍ṇīhi kā̱mina̍ḥ ||

stu̱hi | bho̱jān | stu̱va̱taḥ | a̱sya̱ | yāma̍ni | raṇa̍m | gāva̍ḥ | na | yava̍se |
ya̱taḥ | pūrvā̍n-iva | sakhī̍n | anu̍ | hva̱ya̱ | gi̱rā | gṛ̱ṇī̱hi̱ | kā̱mina̍ḥ ||5.053.16||


5.054.01a pra śardhā̍ya̱ māru̍tāya̱ svabhā̍nava i̱māṁ vāca̍m anajā parvata̱cyute̍ |
5.054.01c gha̱rma̱stubhe̍ di̱va ā pṛ̍ṣṭha̱yajva̍ne dyu̱mnaśra̍vase̱ mahi̍ nṛ̱mṇam a̍rcata ||

pra | śardhā̍ya | māru̍tāya | sva-bhā̍nave | i̱mām | vāca̍m | a̱na̱ja̱ | pa̱rva̱ta̱-cyute̍ |
gha̱rma̱-stubhe̍ | di̱vaḥ | ā | pṛ̱ṣṭha̱-yajva̍ne | dyu̱mna-śra̍vase | mahi̍ | nṛ̱mṇam | a̱rca̱ta̱ ||5.054.01||

5.054.02a pra vo̍ marutas tavi̱ṣā u̍da̱nyavo̍ vayo̱vṛdho̍ aśva̱yuja̱ḥ pari̍jrayaḥ |
5.054.02c saṁ vi̱dyutā̱ dadha̍ti̱ vāśa̍ti tri̱taḥ svara̱nty āpo̱ 'vanā̱ pari̍jrayaḥ ||

pra | va̱ḥ | ma̱ru̱ta̱ḥ | ta̱vi̱ṣāḥ | u̱da̱nyava̍ḥ | va̱ya̱ḥ-vṛdha̍ḥ | a̱śva̱-yuja̍ḥ | pari̍-jrayaḥ |
sam | vi̱-dyutā̍ | dadha̍ti | vāśa̍ti | tri̱taḥ | svara̍nti | āpa̍ḥ | a̱vanā̍ | pari̍-jrayaḥ ||5.054.02||

5.054.03a vi̱dyunma̍haso̱ naro̱ aśma̍didyavo̱ vāta̍tviṣo ma̱ruta̍ḥ parvata̱cyuta̍ḥ |
5.054.03c a̱bda̱yā ci̱n muhu̱r ā hrā̍dunī̱vṛta̍ḥ sta̱naya̍damā rabha̱sā udo̍jasaḥ ||

vi̱dyut-ma̍hasaḥ | nara̍ḥ | aśma̍-didyavaḥ | vāta̍-tviṣaḥ | ma̱ruta̍ḥ | pa̱rva̱ta̱-cyuta̍ḥ |
a̱bda̱-yā | ci̱t | muhu̍ḥ | ā | hrā̱du̱ni̱-vṛta̍ḥ | sta̱naya̍t-amāḥ | ra̱bha̱sāḥ | ut-o̍jasaḥ ||5.054.03||

5.054.04a vy a1̱̍ktūn ru̍drā̱ vy ahā̍ni śikvaso̱ vy a1̱̍ntari̍kṣa̱ṁ vi rajā̍ṁsi dhūtayaḥ |
5.054.04c vi yad ajrā̱m̐ aja̍tha̱ nāva̍ īṁ yathā̱ vi du̱rgāṇi̍ maruto̱ nāha̍ riṣyatha ||

vi | a̱ktūn | ru̱drā̱ḥ | vi | ahā̍ni | śi̱kva̱sa̱ḥ | vi | a̱ntari̍kṣam | vi | rajā̍ṁsi | dhū̱ta̱ya̱ḥ |
vi | yat | ajrā̍n | aja̍tha | nāva̍ḥ | ī̱m | ya̱thā̱ | vi | du̱ḥ-gāni̍ | ma̱ru̱ta̱ḥ | na | aha̍ | ri̱ṣya̱tha̱ ||5.054.04||

5.054.05a tad vī̱rya̍ṁ vo maruto mahitva̱naṁ dī̱rghaṁ ta̍tāna̱ sūryo̱ na yoja̍nam |
5.054.05c etā̱ na yāme̱ agṛ̍bhītaśoci̱ṣo 'na̍śvadā̱ṁ yan ny ayā̍tanā gi̱rim ||

tat | vī̱rya̍m | va̱ḥ | ma̱ru̱ta̱ḥ | ma̱hi̱-tva̱nam | dī̱rgham | ta̱tā̱na̱ | sūrya̍ḥ | na | yoja̍nam |
etā̍ḥ | na | yāme̍ | agṛ̍bhīta-śociṣaḥ | ana̍śva-dām | yat | ni | ayā̍tana | gi̱rim ||5.054.05||

5.054.06a abhrā̍ji̱ śardho̍ maruto̱ yad a̍rṇa̱sam moṣa̍thā vṛ̱kṣaṁ ka̍pa̱neva̍ vedhasaḥ |
5.054.06c adha̍ smā no a̱rama̍tiṁ sajoṣasa̱ś cakṣu̍r iva̱ yanta̱m anu̍ neṣathā su̱gam ||

abhrā̍ji | śardha̍ḥ | ma̱ru̱ta̱ḥ | yat | a̱rṇa̱sam | moṣa̍tha | vṛ̱kṣam | ka̱pa̱nā-i̍va | ve̱dha̱sa̱ḥ |
adha̍ | sma̱ | na̱ḥ | a̱rama̍tim | sa̱-jo̱ṣa̱sa̱ḥ | cakṣu̍ḥ-iva | yanta̍m | anu̍ | ne̱ṣa̱tha̱ | su̱-gam ||5.054.06||

5.054.07a na sa jī̍yate maruto̱ na ha̍nyate̱ na sre̍dhati̱ na vya̍thate̱ na ri̍ṣyati |
5.054.07c nāsya̱ rāya̱ upa̍ dasyanti̱ notaya̱ ṛṣi̍ṁ vā̱ yaṁ rājā̍naṁ vā̱ suṣū̍datha ||

na | saḥ | jī̱ya̱te̱ | ma̱ru̱ta̱ḥ | na | ha̱nya̱te̱ | na | sre̱dha̱ti̱ | na | vya̱tha̱te̱ | na | ri̱ṣya̱ti̱ |
na | a̱sya̱ | rāya̍ḥ | upa̍ | da̱sya̱nti̱ | na | ū̱taya̍ḥ | rṣi̍m | vā̱ | yam | rājā̍nam | vā̱ | susū̍datha ||5.054.07||

5.054.08a ni̱yutva̍nto grāma̱jito̱ yathā̱ naro̍ 'rya̱maṇo̱ na ma̱ruta̍ḥ kaba̱ndhina̍ḥ |
5.054.08c pinva̱nty utsa̱ṁ yad i̱nāso̱ asva̍ra̱n vy u̍ndanti pṛthi̱vīm madhvo̱ andha̍sā ||

ni̱yutva̍ntaḥ | grā̱ma̱-jita̍ḥ | yathā̍ | nara̍ḥ | a̱rya̱maṇa̍ḥ | na | ma̱ruta̍ḥ | ka̱va̱ndhina̍ḥ |
pinva̍nti | utsa̍m | yat | i̱nāsa̍ḥ | asva̍ran | vi | u̱nda̱nti̱ | pṛ̱thi̱vīm | madhva̍ḥ | andha̍sā ||5.054.08||

5.054.09a pra̱vatva̍tī̱yam pṛ̍thi̱vī ma̱rudbhya̍ḥ pra̱vatva̍tī̱ dyaur bha̍vati pra̱yadbhya̍ḥ |
5.054.09c pra̱vatva̍tīḥ pa̱thyā̍ a̱ntari̍kṣyāḥ pra̱vatva̍nta̱ḥ parva̍tā jī̱radā̍navaḥ ||

pra̱vatva̍tī | i̱yam | pṛ̱thi̱vī | ma̱rut-bhya̍ḥ | pra̱vatva̍tī | dyauḥ | bha̱va̱ti̱ | pra̱yat-bhya̍ḥ |
pra̱vatva̍tīḥ | pa̱thyā̍ḥ | a̱ntari̍kṣyāḥ | pra̱vatva̍ntaḥ | parva̍tāḥ | jī̱ra-dā̍navaḥ ||5.054.09||

5.054.10a yan ma̍rutaḥ sabharasaḥ svarṇara̱ḥ sūrya̱ udi̍te̱ mada̍thā divo naraḥ |
5.054.10c na vo 'śvā̍ḥ śrathaya̱ntāha̱ sisra̍taḥ sa̱dyo a̱syādhva̍naḥ pā̱ram a̍śnutha ||

yat | ma̱ru̱ta̱ḥ | sa̱-bha̱ra̱sa̱ḥ | sva̱ḥ-na̱ra̱ḥ | sūrye̍ | ut-i̍te | mada̍tha | di̱va̱ḥ | na̱ra̱ḥ |
na | va̱ḥ | aśvā̍ḥ | śra̱tha̱ya̱nta̱ | aha̍ | sisra̍taḥ | sa̱dyaḥ | a̱sya | adhva̍naḥ | pā̱ram | a̱śnu̱tha̱ ||5.054.10||

5.054.11a aṁse̍ṣu va ṛ̱ṣṭaya̍ḥ pa̱tsu khā̱dayo̱ vakṣa̍ssu ru̱kmā ma̍ruto̱ rathe̱ śubha̍ḥ |
5.054.11c a̱gnibhrā̍jaso vi̱dyuto̱ gabha̍styo̱ḥ śiprā̍ḥ śī̱rṣasu̱ vita̍tā hira̱ṇyayī̍ḥ ||

aṁse̍ṣu | va̱ḥ | ṛ̱ṣṭaya̍ḥ | pa̱t-su | khā̱daya̍ḥ | vakṣa̍ḥ-su | ru̱kmāḥ | ma̱ru̱ta̱ḥ | rathe̍ | śubha̍ḥ |
a̱gni-bhrā̍jasaḥ | vi̱-dyuta̍ḥ | gabha̍styoḥ | śiprā̍ḥ | śī̱ṛṣa-su̱ | vi-ta̍tāḥ | hi̱ra̱ṇyayī̍ḥ ||5.054.11||

5.054.12a taṁ nāka̍m a̱ryo agṛ̍bhītaśociṣa̱ṁ ruśa̱t pippa̍lam maruto̱ vi dhū̍nutha |
5.054.12c sam a̍cyanta vṛ̱janāti̍tviṣanta̱ yat svara̍nti̱ ghoṣa̱ṁ vita̍tam ṛtā̱yava̍ḥ ||

tam | nāka̍m | a̱ryaḥ | agṛ̍bhīta-śociṣam | ruśa̍t | pippa̍lam | ma̱ru̱ta̱ḥ | vi | dhū̱nu̱tha̱ |
sam | a̱cya̱nta̱ | vṛ̱janā̍ | ati̍tviṣanta | yat | svara̍nti | ghoṣa̍m | vi-ta̍tam | ṛ̱ta̱-yava̍ḥ ||5.054.12||

5.054.13a yu̱ṣmāda̍ttasya maruto vicetaso rā̱yaḥ syā̍ma ra̱thyo̱3̱̍ vaya̍svataḥ |
5.054.13c na yo yuccha̍ti ti̱ṣyo̱3̱̍ yathā̍ di̱vo̱3̱̍ 'sme rā̍ranta marutaḥ saha̱sriṇa̍m ||

yu̱ṣmā-da̍ttasya | ma̱ru̱ta̱ḥ | vi̱-ce̱ta̱sa̱ḥ | rā̱yaḥ | syā̱ma̱ | ra̱thya̍ḥ | vaya̍svataḥ |
na | yaḥ | yuccha̍ti | ti̱ṣya̍ḥ | yathā̍ | di̱vaḥ | a̱sme iti̍ | ro̱ra̱nta̱ | ma̱ru̱ta̱ḥ | sa̱ha̱sriṇa̍m ||5.054.13||

5.054.14a yū̱yaṁ ra̱yim ma̍rutaḥ spā̱rhavī̍raṁ yū̱yam ṛṣi̍m avatha̱ sāma̍vipram |
5.054.14c yū̱yam arva̍ntam bhara̱tāya̱ vāja̍ṁ yū̱yaṁ dha̍ttha̱ rājā̍naṁ śruṣṭi̱manta̍m ||

yū̱yam | ra̱yim | ma̱ru̱ta̱ḥ | spā̱rha-vī̍ram | yū̱yam | ṛṣi̍m | a̱va̱tha̱ | sāma̍-vipram |
yū̱yam | arva̍ntam | bha̱ra̱tāya̍ | vāja̍m | yū̱yam | dha̱ttha̱ | rājā̍nam | śru̱ṣṭi̱-manta̍m ||5.054.14||

5.054.15a tad vo̍ yāmi̱ dravi̍ṇaṁ sadyaūtayo̱ yenā̱ sva1̱̍r ṇa ta̱tanā̍ma̱ nṝm̐r a̱bhi |
5.054.15c i̱daṁ su me̍ maruto haryatā̱ vaco̱ yasya̱ tare̍ma̱ tara̍sā śa̱taṁ himā̍ḥ ||

tat | va̱ḥ | yā̱mi̱ | dravi̍ṇam | sa̱dya̱ḥ-ū̱ta̱ya̱ḥ | yena̍ | sva̍ḥ | na | ta̱tanā̍ma | nṝn | a̱bhi |
i̱dam | su | me̱ | ma̱ru̱ta̱ḥ | ha̱rya̱ta̱ | vaca̍ḥ | yasya̍ | tare̍ma | tara̍sā | śa̱tam | himā̍ḥ ||5.054.15||


5.055.01a praya̍jyavo ma̱ruto̱ bhrāja̍dṛṣṭayo bṛ̱had vayo̍ dadhire ru̱kmava̍kṣasaḥ |
5.055.01c īya̍nte̱ aśvai̍ḥ su̱yame̍bhir ā̱śubhi̱ḥ śubha̍ṁ yā̱tām anu̱ rathā̍ avṛtsata ||

pra-ya̍jyavaḥ | ma̱ruta̍ḥ | bhrāja̍t-ṛṣṭayaḥ | bṛ̱hat | vaya̍ḥ | da̱dhi̱re̱ | ru̱kma-va̍kṣasaḥ |
īya̍nte | aśvai̍ḥ | su̱-yame̍bhiḥ | ā̱śu-bhi̍ḥ | śubha̍m | yā̱tām | anu̍ | rathā̍ḥ | a̱vṛ̱tsa̱ta̱ ||5.055.01||

5.055.02a sva̱yaṁ da̍dhidhve̱ tavi̍ṣī̱ṁ yathā̍ vi̱da bṛ̱han ma̍hānta urvi̱yā vi rā̍jatha |
5.055.02c u̱tāntari̍kṣam mamire̱ vy oja̍sā̱ śubha̍ṁ yā̱tām anu̱ rathā̍ avṛtsata ||

sva̱yam | da̱dhi̱dhve̱ | tavi̍ṣīm | yathā̍ | vi̱da | bṛ̱hat | ma̱hā̱nta̱ḥ | u̱rvi̱yā | vi | rā̱ja̱tha̱ |
u̱ta | a̱ntari̍kṣam | ma̱mi̱re̱ | vi | oja̍sā | śubha̍m | yā̱tām | anu̍ | rathā̍ḥ | a̱vṛ̱tsa̱ta̱ ||5.055.02||

5.055.03a sā̱kaṁ jā̱tāḥ su̱bhva̍ḥ sā̱kam u̍kṣi̱tāḥ śri̱ye ci̱d ā pra̍ta̱raṁ vā̍vṛdhu̱r nara̍ḥ |
5.055.03c vi̱ro̱kiṇa̱ḥ sūrya̍syeva ra̱śmaya̱ḥ śubha̍ṁ yā̱tām anu̱ rathā̍ avṛtsata ||

sā̱kam | jā̱tāḥ | su̱-bhva̍ḥ | sā̱kam | u̱kṣi̱tāḥ | śri̱ye | ci̱t | ā | pra̱-ta̱ram | va̱vṛ̱dhu̱ḥ | nara̍ḥ |
vi̱-ro̱kiṇa̍ḥ | sūrya̍sya-iva | ra̱śmaya̍ḥ | śubha̍m | yā̱tām | anu̍ | rathā̍ḥ | a̱vṛ̱tsa̱ta̱ ||5.055.03||

5.055.04a ā̱bhū̱ṣeṇya̍ṁ vo maruto mahitva̱naṁ di̍dṛ̱kṣeṇya̱ṁ sūrya̍syeva̱ cakṣa̍ṇam |
5.055.04c u̱to a̱smām̐ a̍mṛta̱tve da̍dhātana̱ śubha̍ṁ yā̱tām anu̱ rathā̍ avṛtsata ||

ā̱-bhū̱ṣeṇya̍m | va̱ḥ | ma̱ru̱ta̱ḥ | ma̱hi̱-tva̱nam | di̱dṛ̱kṣeṇya̍m | sūrya̍sya-iva | cakṣa̍ṇam |
u̱to iti̍ | a̱smān | a̱mṛ̱ta̱-tve | da̱dhā̱ta̱na̱ | śubha̍m | yā̱tām | anu̍ | rathā̍ḥ | a̱vṛ̱tsa̱ta̱ ||5.055.04||

5.055.05a ud ī̍rayathā marutaḥ samudra̱to yū̱yaṁ vṛ̱ṣṭiṁ va̍rṣayathā purīṣiṇaḥ |
5.055.05c na vo̍ dasrā̱ upa̍ dasyanti dhe̱nava̱ḥ śubha̍ṁ yā̱tām anu̱ rathā̍ avṛtsata ||

ut | ī̱ra̱ya̱tha̱ | ma̱ru̱ta̱ḥ | sa̱mu̱dra̱taḥ | yū̱yam | vṛ̱ṣṭim | va̱rṣa̱ya̱tha̱ | pu̱rī̱ṣi̱ṇa̱ḥ |
na | va̱ḥ | da̱srā̱ | upa̍ | da̱sya̱nti̱ | dhe̱nava̍ḥ | śubha̍m | yā̱tām | anu̍ | rathā̍ḥ | a̱vṛ̱tsa̱ta̱ ||5.055.05||

5.055.06a yad aśvā̍n dhū̱rṣu pṛṣa̍tī̱r ayu̍gdhvaṁ hira̱ṇyayā̱n praty atkā̱m̐ amu̍gdhvam |
5.055.06c viśvā̱ it spṛdho̍ maruto̱ vy a̍syatha̱ śubha̍ṁ yā̱tām anu̱ rathā̍ avṛtsata ||

yat | aśvā̍n | dhū̱ḥ-su | pṛṣa̍tīḥ | ayu̍gdhvam | hi̱ra̱ṇyayā̍n | prati̍ | atkā̍n | amu̍gdhvam |
viśvā̍ḥ | it | spṛdha̍ḥ | ma̱ru̱ta̱ḥ | vi | a̱sya̱tha̱ | śubha̍m | yā̱tām | anu̍ | rathā̍ḥ | a̱vṛ̱tsa̱ta̱ ||5.055.06||

5.055.07a na parva̍tā̱ na na̱dyo̍ varanta vo̱ yatrāci̍dhvam maruto̱ gaccha̱thed u̱ tat |
5.055.07c u̱ta dyāvā̍pṛthi̱vī yā̍thanā̱ pari̱ śubha̍ṁ yā̱tām anu̱ rathā̍ avṛtsata ||

na | parva̍tāḥ | na | na̱dya̍ḥ | va̱ra̱nta̱ | va̱ḥ | yatra̍ | aci̍dhvam | ma̱ru̱ta̱ḥ | gaccha̍tha | it | ū̱m̐ iti̍ | tat |
u̱ta | dyāvā̍pṛthi̱vī iti̍ | yā̱tha̱na̱ | pari̍ | śubha̍m | yā̱tām | anu̍ | rathā̍ḥ | a̱vṛ̱tsa̱ta̱ ||5.055.07||

5.055.08a yat pū̱rvyam ma̍ruto̱ yac ca̱ nūta̍na̱ṁ yad u̱dyate̍ vasavo̱ yac ca̍ śa̱syate̍ |
5.055.08c viśva̍sya̱ tasya̍ bhavathā̱ nave̍dasa̱ḥ śubha̍ṁ yā̱tām anu̱ rathā̍ avṛtsata ||

yat | pū̱rvyam | ma̱ru̱ta̱ḥ | yat | ca̱ | nūta̍nam | yat | u̱dyate̍ | va̱sa̱va̱ḥ | yat | ca̱ | śa̱syate̍ |
viśva̍sya | tasya̍ | bha̱va̱tha̱ | nave̍dasaḥ | śubha̍m | yā̱tām | anu̍ | rathā̍ḥ | a̱vṛ̱tsa̱ta̱ ||5.055.08||

5.055.09a mṛ̱ḻata̍ no maruto̱ mā va̍dhiṣṭanā̱smabhya̱ṁ śarma̍ bahu̱laṁ vi ya̍ntana |
5.055.09c adhi̍ sto̱trasya̍ sa̱khyasya̍ gātana̱ śubha̍ṁ yā̱tām anu̱ rathā̍ avṛtsata ||

mṛ̱ḻata̍ | na̱ḥ | ma̱ru̱ta̱ḥ | mā | va̱dhi̱ṣṭa̱na̱ | a̱smabhya̍m | śarma̍ | ba̱hu̱lam | vi | ya̱nta̱na̱ |
adhi̍ | sto̱trasya̍ | sa̱khyasya̍ | gā̱ta̱na̱ | śubha̍m | yā̱tām | anu̍ | rathā̍ḥ | a̱vṛ̱tsa̱ta̱ ||5.055.09||

5.055.10a yū̱yam a̱smān na̍yata̱ vasyo̱ acchā̱ nir a̍ṁha̱tibhyo̍ maruto gṛṇā̱nāḥ |
5.055.10c ju̱ṣadhva̍ṁ no ha̱vyadā̍tiṁ yajatrā va̱yaṁ syā̍ma̱ pata̍yo rayī̱ṇām ||

yū̱yam | a̱smān | na̱ya̱ta̱ | vasya̍ḥ | accha̍ | niḥ | a̱ṁha̱ti-bhya̍ḥ | ma̱ru̱ta̱ḥ | gṛ̱ṇā̱nāḥ |
ju̱ṣadhva̍m | na̱ḥ | ha̱vya-dā̍tim | ya̱ja̱trā̱ḥ | va̱yam | syā̱ma̱ | pata̍yaḥ | ra̱yī̱ṇām ||5.055.10||


5.056.01a agne̱ śardha̍nta̱m ā ga̱ṇam pi̱ṣṭaṁ ru̱kmebhi̍r a̱ñjibhi̍ḥ |
5.056.01c viśo̍ a̱dya ma̱rutā̱m ava̍ hvaye di̱vaś ci̍d roca̱nād adhi̍ ||

agne̍ | śardha̍ntam | ā | ga̱ṇam | pi̱ṣṭam | ru̱kmebhi̍ḥ | a̱ñji-bhi̍ḥ |
viśa̍ḥ | a̱dya | ma̱rutā̍m | ava̍ | hva̱ye̱ | di̱vaḥ | ci̱t | ro̱ca̱nāt | adhi̍ ||5.056.01||

5.056.02a yathā̍ ci̱n manya̍se hṛ̱dā tad in me̍ jagmur ā̱śasa̍ḥ |
5.056.02c ye te̱ nedi̍ṣṭha̱ṁ hava̍nāny ā̱gama̱n tān va̍rdha bhī̱masa̍ṁdṛśaḥ ||

yathā̍ | ci̱t | manya̍se | hṛ̱dā | tat | it | me̱ | ja̱gmu̱ḥ | ā̱-śasa̍ḥ |
ye | te̱ | nedi̍ṣṭham | hava̍nāni | ā̱-gama̍n | tān | va̱rdha̱ | bhī̱ma-sa̍ndṛśaḥ ||5.056.02||

5.056.03a mī̱ḻhuṣma̍tīva pṛthi̱vī parā̍hatā̱ mada̍nty ety a̱smad ā |
5.056.03c ṛkṣo̱ na vo̍ maruta̱ḥ śimī̍vā̱m̐ amo̍ du̱dhro gaur i̍va bhīma̱yuḥ ||

mī̱ḻhuṣma̍tī-iva | pṛ̱thi̱vī | parā̍-hatā | mada̍ntī | e̱ti̱ | a̱smat | ā |
ṛkṣa̍ḥ | na | va̱ḥ | ma̱ru̱ta̱ḥ | śimī̍-vān | ama̍ḥ | du̱dhraḥ | gauḥ-i̍va | bhī̱ma̱-yuḥ ||5.056.03||

5.056.04a ni ye ri̱ṇanty oja̍sā̱ vṛthā̱ gāvo̱ na du̱rdhura̍ḥ |
5.056.04c aśmā̍naṁ cit sva̱rya1̱̍m parva̍taṁ gi̱rim pra cyā̍vayanti̱ yāma̍bhiḥ ||

ni | ye | ri̱ṇanti̍ | oja̍sā | vṛthā̍ | gāva̍ḥ | na | du̱ḥ-dhura̍ḥ |
aśmā̍nam | ci̱t | sva̱rya̍m | parva̍tam | gi̱rim | pra | cya̱va̱ya̱nti̱ | yāma̍-bhiḥ ||5.056.04||

5.056.05a ut ti̍ṣṭha nū̱nam e̍ṣā̱ṁ stomai̱ḥ samu̍kṣitānām |
5.056.05c ma̱rutā̍m puru̱tama̱m apū̍rvya̱ṁ gavā̱ṁ sarga̍m iva hvaye ||

ut | ti̱ṣṭha̱ | nū̱nam | e̱ṣā̱m | stomai̍ḥ | sam-u̍kṣitānām |
ma̱rutā̍m | pu̱ru̱-tama̍m | apū̍rvyam | gavā̍m | sarga̍m-iva | hvaye ||5.056.05||

5.056.06a yu̱ṅgdhvaṁ hy aru̍ṣī̱ rathe̍ yu̱ṅgdhvaṁ rathe̍ṣu ro̱hita̍ḥ |
5.056.06c yu̱ṅgdhvaṁ harī̍ aji̱rā dhu̱ri voḻha̍ve̱ vahi̍ṣṭhā dhu̱ri voḻha̍ve ||

yu̱ṅgdhvam | hi | aru̍ṣīḥ | rathe̍ | yu̱ṅgdhvam | rathe̍ṣu | ro̱hita̍ḥ |
yu̱ṅgdhvam | harī̱ iti̍ | a̱ji̱rā | dhu̱ri | voḻha̍ve | vahi̍ṣṭhā | dhu̱ri | voḻha̍ve ||5.056.06||

5.056.07a u̱ta sya vā̱jy a̍ru̱ṣas tu̍vi̱ṣvaṇi̍r i̱ha sma̍ dhāyi darśa̱taḥ |
5.056.07c mā vo̱ yāme̍ṣu marutaś ci̱raṁ ka̍ra̱t pra taṁ rathe̍ṣu codata ||

u̱ta | syaḥ | vā̱jī | a̱ru̱ṣaḥ | tu̱vi̱-svaṇi̍ḥ | i̱ha | sma̱ | dhā̱yi̱ | da̱rśa̱taḥ |
mā | va̱ḥ | yāme̍ṣu | ma̱ru̱ta̱ḥ | ci̱ram | ka̱ra̱t | pra | tam | rathe̍ṣu | co̱da̱ta̱ ||5.056.07||

5.056.08a ratha̱ṁ nu māru̍taṁ va̱yaṁ śra̍va̱syum ā hu̍vāmahe |
5.056.08c ā yasmi̍n ta̱sthau su̱raṇā̍ni̱ bibhra̍tī̱ sacā̍ ma̱rutsu̍ roda̱sī ||

ratha̍m | nu | māru̍tam | va̱yam | śra̱va̱syum | ā | hu̱vā̱ma̱he̱ |
ā | yasmi̍n | ta̱sthau | su̱raṇā̍ni | bibhra̍tī | sacā̍ | ma̱rut-su̍ | ro̱da̱sī ||5.056.08||

5.056.09a taṁ va̱ḥ śardha̍ṁ rathe̱śubha̍ṁ tve̱ṣam pa̍na̱syum ā hu̍ve |
5.056.09c yasmi̱n sujā̍tā su̱bhagā̍ mahī̱yate̱ sacā̍ ma̱rutsu̍ mīḻhu̱ṣī ||

tam | va̱ḥ | śardha̍m | ra̱the̱-śubha̍m | tve̱ṣam | pa̱na̱syum | ā | hu̱ve̱ |
yasmi̍n | su-jā̍tā | su̱-bhagā̍ | ma̱hī̱yate̍ | sacā̍ | ma̱rut-su̍ | mī̱ḻhu̱ṣī ||5.056.09||


5.057.01a ā ru̍drāsa̱ indra̍vantaḥ sa̱joṣa̍so̱ hira̍ṇyarathāḥ suvi̱tāya̍ gantana |
5.057.01c i̱yaṁ vo̍ a̱smat prati̍ haryate ma̱tis tṛ̱ṣṇaje̱ na di̱va utsā̍ uda̱nyave̍ ||

ā | ru̱drā̱sa̱ḥ | indra̍-vantaḥ | sa̱-joṣa̍saḥ | hira̍ṇya-rathāḥ | su̱vi̱tāya̍ | ga̱nta̱na̱ |
i̱yam | va̱ḥ | a̱smat | prati̍ | ha̱rya̱te̱ | ma̱tiḥ | tṛ̱ṣṇa-je̍ | na | di̱vaḥ | utsā̍ḥ | u̱da̱nyave̍ ||5.057.01||

5.057.02a vāśī̍manta ṛṣṭi̱manto̍ manī̱ṣiṇa̍ḥ su̱dhanvā̍na̱ iṣu̍manto niṣa̱ṅgiṇa̍ḥ |
5.057.02c svaśvā̍ḥ stha su̱rathā̍ḥ pṛśnimātaraḥ svāyu̱dhā ma̍ruto yāthanā̱ śubha̍m ||

vāśī̍-mantaḥ | ṛ̱ṣṭi̱-manta̍ḥ | ma̱nī̱ṣiṇa̍ḥ | su̱-dhanvā̍naḥ | iṣu̍-mantaḥ | ni̱ṣa̱ṅgiṇa̍ḥ |
su̱-aśvā̍ḥ | stha̱ | su̱-rathā̍ḥ | pṛ̱śni̱-mā̱ta̱ra̱ḥ | su̱-ā̱yu̱dhāḥ | ma̱ru̱ta̱ḥ | yā̱tha̱na̱ | śubha̍m ||5.057.02||

5.057.03a dhū̱nu̱tha dyām parva̍tān dā̱śuṣe̱ vasu̱ ni vo̱ vanā̍ jihate̱ yāma̍no bhi̱yā |
5.057.03c ko̱paya̍tha pṛthi̱vīm pṛ̍śnimātaraḥ śu̱bhe yad u̍grā̱ḥ pṛṣa̍tī̱r ayu̍gdhvam ||

dhū̱nu̱tha | dyām | parva̍tām | dā̱śuṣe̍ | vasu̍ | ni | va̱ḥ | vanā̍ | ji̱ha̱te̱ | yāma̍naḥ | bhi̱yā |
ko̱paya̍tha | pṛ̱thi̱vīm | pṛ̱śni̱-mā̱ta̱ra̱ḥ | śu̱bhe | yat | u̱grā̱ḥ | pṛṣa̍tīḥ | ayu̍gdhvam ||5.057.03||

5.057.04a vāta̍tviṣo ma̱ruto̍ va̱rṣani̍rṇijo ya̱mā i̍va̱ susa̍dṛśaḥ su̱peśa̍saḥ |
5.057.04c pi̱śaṅgā̍śvā aru̱ṇāśvā̍ are̱pasa̱ḥ pratva̍kṣaso mahi̱nā dyaur i̍vo̱rava̍ḥ ||

vāta̍-tviṣaḥ | ma̱ruta̍ḥ | va̱rṣa-ni̍rnijaḥ | ya̱māḥ-i̍va | su-sa̍dṛśaḥ | su̱-peśa̍saḥ |
pi̱śaṅga̍-aśvāḥ | a̱ru̱ṇa-a̍svāḥ | a̱re̱pasa̍ḥ | pra-tva̍kṣasaḥ | ma̱hi̱nā | dyauḥ-i̍va | u̱rava̍ḥ ||5.057.04||

5.057.05a pu̱ru̱dra̱psā a̍ñji̱manta̍ḥ su̱dāna̍vas tve̱ṣasa̍ṁdṛśo anava̱bhrarā̍dhasaḥ |
5.057.05c su̱jā̱tāso̍ ja̱nuṣā̍ ru̱kmava̍kṣaso di̱vo a̱rkā a̱mṛta̱ṁ nāma̍ bhejire ||

pu̱ru̱-dra̱psāḥ | a̱ñji̱-manta̍ḥ | su̱-dāna̍vaḥ | tve̱ṣa-sa̍ndṛśaḥ | a̱na̱va̱bhra-rā̍dhasaḥ |
su̱jā̱tāsa̍ḥ | ja̱nuṣā̍ | ru̱kma-va̍kṣasaḥ | di̱vaḥ | a̱rkāḥ | a̱mṛta̍m | nāma̍ | bhe̱ji̱re̱ ||5.057.05||

5.057.06a ṛ̱ṣṭayo̍ vo maruto̱ aṁsa̍yo̱r adhi̱ saha̱ ojo̍ bā̱hvor vo̱ bala̍ṁ hi̱tam |
5.057.06c nṛ̱mṇā śī̱rṣasv āyu̍dhā̱ rathe̍ṣu vo̱ viśvā̍ va̱ḥ śrīr adhi̍ ta̱nūṣu̍ pipiśe ||

ṛ̱ṣṭaya̍ḥ | va̱ḥ | ma̱ru̱ta̱ḥ | aṁsa̍yoḥ | adhi̍ | saha̍ḥ | oja̍ḥ | bā̱hvoḥ | va̱ḥ | bala̍m | hi̱tam |
nṛ̱mṇā | śī̱rṣa-su̍ | āyu̍dhā | rathe̍ṣu | va̱ḥ | viśvā̍ | va̱ḥ | śrīḥ | adhi̍ | ta̱nūṣu̍ | pi̱pi̱śe̱ ||5.057.06||

5.057.07a goma̱d aśvā̍va̱d ratha̍vat su̱vīra̍ṁ ca̱ndrava̱d rādho̍ maruto dadā naḥ |
5.057.07c praśa̍stiṁ naḥ kṛṇuta rudriyāso bhakṣī̱ya vo 'va̍so̱ daivya̍sya ||

go-ma̍t | aśva̍-vat | ratha̍-vat | su̱-vīra̍m | ca̱ndra-va̍t | rādha̍ḥ | ma̱ru̱ta̱ḥ | da̱da̱ | na̱ḥ |
pra-śa̍stim | na̱ḥ | kṛ̱ṇu̱ta̱ | ru̱dri̱yā̱sa̱ḥ | bha̱kṣī̱ya | va̱ḥ | ava̍saḥ | daivya̍sya ||5.057.07||

5.057.08a ha̱ye naro̱ maru̍to mṛ̱ḻatā̍ na̱s tuvī̍maghāso̱ amṛ̍tā̱ ṛta̍jñāḥ |
5.057.08c satya̍śruta̱ḥ kava̍yo̱ yuvā̍no̱ bṛha̍dgirayo bṛ̱had u̱kṣamā̍ṇāḥ ||

ha̱ye | nara̍ḥ | maru̍taḥ | mṛ̱ḻata̍ | na̱ḥ | tuvi̍-maghāsaḥ | amṛ̍tāḥ | ṛta̍-jñāḥ |
satya̍-śrutaḥ | kava̍yaḥ | yuvā̍naḥ | bṛha̍t-girayaḥ | bṛ̱hat | u̱kṣamā̍ṇāḥ ||5.057.08||


5.058.01a tam u̍ nū̱naṁ tavi̍ṣīmantam eṣāṁ stu̱ṣe ga̱ṇam māru̍ta̱ṁ navya̍sīnām |
5.058.01c ya ā̱śva̍śvā̱ ama̍va̱d vaha̍nta u̱teśi̍re a̱mṛta̍sya sva̱rāja̍ḥ ||

tam | ū̱m̐ iti̍ | nū̱nam | tavi̍ṣī-mantam | e̱ṣā̱m | stu̱ṣe | ga̱ṇam | māru̍tam | navya̍sīnām |
ye | ā̱śu-a̍śvāḥ | ama̍-vat | vaha̍nte | u̱ta | ī̱śi̱re̱ | a̱mṛta̍sya | sva̱-rāja̍ḥ ||5.058.01||

5.058.02a tve̱ṣaṁ ga̱ṇaṁ ta̱vasa̱ṁ khādi̍hasta̱ṁ dhuni̍vratam mā̱yina̱ṁ dāti̍vāram |
5.058.02c ma̱yo̱bhuvo̱ ye ami̍tā mahi̱tvā vanda̍sva vipra tuvi̱rādha̍so̱ nṝn ||

tve̱ṣam | ga̱ṇam | ta̱vasa̍m | khādi̍-hastam | dhuni̍-vratam | mā̱yina̍m | dāti̍-vāram |
ma̱ya̱ḥ-bhuva̍ḥ | ye | ami̍tāḥ | ma̱hi̱-tvā | vanda̍sva | vi̱pra̱ | tu̱vi̱-rādha̍saḥ | nṝn ||5.058.02||

5.058.03a ā vo̍ yantūdavā̱hāso̍ a̱dya vṛ̱ṣṭiṁ ye viśve̍ ma̱ruto̍ ju̱nanti̍ |
5.058.03c a̱yaṁ yo a̱gnir ma̍ruta̱ḥ sami̍ddha e̱taṁ ju̍ṣadhvaṁ kavayo yuvānaḥ ||

ā | va̱ḥ | ya̱ntu̱ | uda̱-vā̱hāsa̍ḥ | a̱dya | vṛ̱ṣṭim | ye | viśve̍ | ma̱ruta̍ḥ | ju̱nanti̍ |
a̱yam | yaḥ | a̱gniḥ | ma̱ru̱ta̱ḥ | sam-i̍ddhaḥ | e̱tam | ju̱ṣa̱dhva̱m | ka̱va̱ya̱ḥ | yu̱vā̱na̱ḥ ||5.058.03||

5.058.04a yū̱yaṁ rājā̍na̱m irya̱ṁ janā̍ya vibhvata̱ṣṭaṁ ja̍nayathā yajatrāḥ |
5.058.04c yu̱ṣmad e̍ti muṣṭi̱hā bā̱hujū̍to yu̱ṣmat sada̍śvo marutaḥ su̱vīra̍ḥ ||

yū̱yam | rājā̍nam | irya̍m | janā̍ya | vi̱bhva̱-ta̱ṣṭam | ja̱na̱ya̱tha̱ | ya̱ja̱trā̱ḥ |
yu̱ṣmat | e̱ti̱ | mu̱ṣṭi̱-hā | bā̱hu-jū̍taḥ | yu̱ṣmat | sat-a̍śvaḥ | ma̱ru̱ta̱ḥ | su̱-vīra̍ḥ ||5.058.04||

5.058.05a a̱rā i̱ved aca̍ramā̱ ahe̍va̱ pra-pra̍ jāyante̱ aka̍vā̱ maho̍bhiḥ |
5.058.05c pṛśne̍ḥ pu̱trā u̍pa̱māso̱ rabhi̍ṣṭhā̱ḥ svayā̍ ma̱tyā ma̱ruta̱ḥ sam mi̍mikṣuḥ ||

a̱rāḥ-i̍va | it | aca̍ramāḥ | ahā̍-iva | pra-pra̍ | jā̱ya̱nte̱ | aka̍vāḥ | maha̍ḥ-bhiḥ |
pṛśne̍ḥ | pu̱trāḥ | u̱pa̱-māsa̍ḥ | rabhi̍ṣṭhāḥ | svayā̍ | ma̱tyā | ma̱ruta̍ḥ | sam | mi̱mi̱kṣu̱ḥ ||5.058.05||

5.058.06a yat prāyā̍siṣṭa̱ pṛṣa̍tībhi̱r aśvai̍r vīḻupa̱vibhi̍r maruto̱ rathe̍bhiḥ |
5.058.06c kṣoda̍nta̱ āpo̍ riṇa̱te vanā̱ny avo̱sriyo̍ vṛṣa̱bhaḥ kra̍ndatu̱ dyauḥ ||

yat | pra | ayā̍siṣṭa | pṛṣa̍tībhiḥ | aśvai̍ḥ | vī̱ḻu̱pa̱vi-bhi̍ḥ | ma̱ru̱ta̱ḥ | rathe̍bhiḥ |
kṣoda̍nte | āpa̍ḥ | ri̱ṇa̱te | vanā̍ni | ava̍ | u̱sriya̍ḥ | vṛ̱ṣa̱bhaḥ | kra̱nda̱tu̱ | dyauḥ ||5.058.06||

5.058.07a prathi̍ṣṭa̱ yāma̍n pṛthi̱vī ci̍d eṣā̱m bharte̍va̱ garbha̱ṁ svam ic chavo̍ dhuḥ |
5.058.07c vātā̱n hy aśvā̍n dhu̱ry ā̍yuyu̱jre va̱rṣaṁ sveda̍ṁ cakrire ru̱driyā̍saḥ ||

prathi̍ṣṭa | yāma̍n | pṛ̱thi̱vī | ci̱t | e̱ṣā̱m | bhartā̍-iva | garbha̍m | svam | it | śava̍ḥ | dhuḥ |
vātā̍n | hi | aśvā̍n | dhu̱ri | ā̱-yu̱yu̱jre | va̱rṣam | sveda̍m | ca̱kri̱re̱ | ru̱driyā̍saḥ ||5.058.07||

5.058.08a ha̱ye naro̱ maru̍to mṛ̱ḻatā̍ na̱s tuvī̍maghāso̱ amṛ̍tā̱ ṛta̍jñāḥ |
5.058.08c satya̍śruta̱ḥ kava̍yo̱ yuvā̍no̱ bṛha̍dgirayo bṛ̱had u̱kṣamā̍ṇāḥ ||

ha̱ye | nara̍ḥ | maru̍taḥ | mṛ̱ḻata̍ | na̱ḥ | tuvi̍-maghāsaḥ | amṛ̍tāḥ | ṛta̍-jñāḥ |
satya̍-śrutaḥ | kava̍yaḥ | yuvā̍naḥ | bṛha̍t-girayaḥ | bṛ̱hat | u̱kṣamā̍ṇāḥ ||5.058.08||


5.059.01a pra va̱ḥ spaḻ a̍kran suvi̱tāya̍ dā̱vane 'rcā̍ di̱ve pra pṛ̍thi̱vyā ṛ̱tam bha̍re |
5.059.01c u̱kṣante̱ aśvā̱n taru̍ṣanta̱ ā rajo 'nu̱ svam bhā̱nuṁ śra̍thayante arṇa̱vaiḥ ||

pra | va̱ḥ | spaṭ | a̱kra̱n | su̱vi̱tāya̍ | dā̱vane̍ | arca̍ | di̱ve | pra | pṛ̱thi̱vyai | ṛ̱tam | bha̱re̱ |
u̱kṣante̍ | aśvā̍n | taru̍ṣante | ā | raja̍ḥ | anu̍ | svam | bhā̱num | śra̱tha̱ya̱nte̱ | a̱rṇa̱vaiḥ ||5.059.01||

5.059.02a amā̍d eṣām bhi̱yasā̱ bhūmi̍r ejati̱ naur na pū̱rṇā kṣa̍rati̱ vyathi̍r ya̱tī |
5.059.02c dū̱re̱dṛśo̱ ye ci̱taya̍nta̱ ema̍bhir a̱ntar ma̱he vi̱dathe̍ yetire̱ nara̍ḥ ||

amā̍t | e̱ṣā̱m | bhi̱yasā̍ | bhūmi̍ḥ | e̱ja̱ti̱ | nauḥ | na | pū̱rṇā | kṣa̱ra̱ti̱ | vyathi̍ḥ | ya̱tī |
dū̱re̱-dṛśa̍ḥ | ye | ci̱taya̍nte | ema̍-bhiḥ | a̱ntaḥ | ma̱he | vi̱dathe̍ | ye̱ti̱re̱ | nara̍ḥ ||5.059.02||

5.059.03a gavā̍m iva śri̱yase̱ śṛṅga̍m utta̱maṁ sūryo̱ na cakṣū̱ raja̍so vi̱sarja̍ne |
5.059.03c atyā̍ iva su̱bhva1̱̍ś cāra̍vaḥ sthana̱ maryā̍ iva śri̱yase̍ cetathā naraḥ ||

gavā̍m-iva | śri̱yase̍ | śṛṅga̍m | u̱tta̱mam | sūrya̍ḥ | na | cakṣu̍ḥ | raja̍saḥ | vi̱-sarja̍ne |
atyā̍ḥ-iva | su̱-bhva̍ḥ | cāra̍vaḥ | stha̱na̱ | maryā̍ḥ-iva | śri̱yase̍ | ce̱ta̱tha̱ | na̱ra̱ḥ ||5.059.03||

5.059.04a ko vo̍ ma̱hānti̍ maha̱tām ud a̍śnava̱t kas kāvyā̍ maruta̱ḥ ko ha̱ pauṁsyā̍ |
5.059.04c yū̱yaṁ ha̱ bhūmi̍ṁ ki̱raṇa̱ṁ na re̍jatha̱ pra yad bhara̍dhve suvi̱tāya̍ dā̱vane̍ ||

kaḥ | va̱ḥ | ma̱hānti̍ | ma̱ha̱tām | ut | a̱śna̱va̱t | kaḥ | kāvyā̍ | ma̱ru̱ta̱ḥ | kaḥ | ha̱ | pauṁsyā̍ |
yū̱yam | ha̱ | bhūmi̍m | ki̱raṇa̍m | na | re̱ja̱tha̱ | pra | yat | bhara̍dhve | su̱vi̱tāya̍ | dā̱vane̍ ||5.059.04||

5.059.05a aśvā̍ i̱ved a̍ru̱ṣāsa̱ḥ saba̍ndhava̱ḥ śūrā̍ iva pra̱yudha̱ḥ prota yu̍yudhuḥ |
5.059.05c maryā̍ iva su̱vṛdho̍ vāvṛdhu̱r nara̱ḥ sūrya̍sya̱ cakṣu̱ḥ pra mi̍nanti vṛ̱ṣṭibhi̍ḥ ||

aśvā̍ḥ-iva | it | a̱ru̱ṣāsa̍ḥ | sa-ba̍ndhavaḥ | śūrā̍ḥ-iva | pra̱-yudha̍ḥ | pra | u̱ta | yu̱yu̱dhu̱ḥ |
maryā̍ḥ-iva | su̱-vṛdha̍ḥ | va̱vṛ̱dhu̱ḥ | nara̍ḥ | sūrya̍sya | cakṣu̍ḥ | pra | mi̱na̱nti̱ | vṛ̱ṣṭi-bhi̍ḥ ||5.059.05||

5.059.06a te a̍jye̱ṣṭhā aka̍niṣṭhāsa u̱dbhido 'ma̍dhyamāso̱ maha̍sā̱ vi vā̍vṛdhuḥ |
5.059.06c su̱jā̱tāso̍ ja̱nuṣā̱ pṛśni̍mātaro di̱vo maryā̱ ā no̱ acchā̍ jigātana ||

te | a̱jye̱ṣṭhāḥ | aka̍niṣṭhāsaḥ | u̱t-bhida̍ḥ | ama̍dhyamāsaḥ | maha̍sā | vi | va̱vṛ̱dhu̱ḥ |
su̱-jā̱tāsa̍ḥ | ja̱nuṣā̍ | pṛśni̍-mātaraḥ | di̱vaḥ | maryā̍ḥ | ā | na̱ḥ | accha̍ | ji̱gā̱ta̱na̱ ||5.059.06||

5.059.07a vayo̱ na ye śreṇī̍ḥ pa̱ptur oja̱sāntā̍n di̱vo bṛ̍ha̱taḥ sānu̍na̱s pari̍ |
5.059.07c aśvā̍sa eṣām u̱bhaye̱ yathā̍ vi̱duḥ pra parva̍tasya nabha̱nūm̐r a̍cucyavuḥ ||

vaya̍ḥ | na | ye | śreṇī̍ḥ | pa̱ptuḥ | oja̍sā | antā̍n | di̱vaḥ | bṛ̱ha̱taḥ | sānu̍naḥ | pari̍ |
aśvā̍saḥ | e̱ṣā̱m | u̱bhaye̍ | yathā̍ | vi̱duḥ | pra | parva̍tasya | na̱bha̱nūn | a̱cu̱cya̱vu̱ḥ ||5.059.07||

5.059.08a mimā̍tu̱ dyaur adi̍tir vī̱taye̍ na̱ḥ saṁ dānu̍citrā u̱ṣaso̍ yatantām |
5.059.08c ācu̍cyavur di̱vyaṁ kośa̍m e̱ta ṛṣe̍ ru̱drasya̍ ma̱ruto̍ gṛṇā̱nāḥ ||

mimā̍tu | dyauḥ | adi̍tiḥ | vī̱taye̍ | na̱ḥ | sam | dānu̍-citrāḥ | u̱ṣasa̍ḥ | ya̱ta̱ntā̱m |
ā | a̱cu̱cya̱vu̱ḥ | di̱vyam | kośa̍m | e̱te | ṛṣe̍ | ru̱drasya̍ | ma̱ruta̍ḥ | gṛ̱ṇā̱nāḥ ||5.059.08||


5.060.01a īḻe̍ a̱gniṁ svava̍sa̱ṁ namo̍bhir i̱ha pra̍sa̱tto vi ca̍yat kṛ̱taṁ na̍ḥ |
5.060.01c rathai̍r iva̱ pra bha̍re vāja̱yadbhi̍ḥ pradakṣi̱ṇin ma̱rutā̱ṁ stoma̍m ṛdhyām ||

iḻe̍ | a̱gnim | su̱-ava̍sam | nama̍ḥ-bhiḥ | i̱ha | pra̱-sa̱ttaḥ | vi | ca̱ya̱t | kṛ̱tam | na̱ḥ |
rathai̍ḥ-iva | pra | bha̱re̱ | vā̱ja̱yat-bhi̍ḥ | pra̱-da̱kṣi̱ṇit | ma̱rutā̍m | stoma̍m | ṛ̱dhyā̱m ||5.060.01||

5.060.02a ā ye ta̱sthuḥ pṛṣa̍tīṣu śru̱tāsu̍ su̱kheṣu̍ ru̱drā ma̱ruto̱ rathe̍ṣu |
5.060.02c vanā̍ cid ugrā jihate̱ ni vo̍ bhi̱yā pṛ̍thi̱vī ci̍d rejate̱ parva̍taś cit ||

ā | ye | ta̱sthuḥ | pṛṣa̍tīṣu | śru̱tāsu̍ | su̱-kheṣu̍ | ru̱drāḥ | ma̱ruta̍ḥ | rathe̍ṣu |
vanā̍ | ci̱t | u̱grā̱ḥ | ji̱ha̱te̱ | ni | va̍ḥ | bhi̱yā | pṛ̱thi̱vī | ci̱t | re̱ja̱te̱ | parva̍taḥ | ci̱t ||5.060.02||

5.060.03a parva̍taś ci̱n mahi̍ vṛ̱ddho bi̍bhāya di̱vaś ci̱t sānu̍ rejata sva̱ne va̍ḥ |
5.060.03c yat krīḻa̍tha maruta ṛṣṭi̱manta̱ āpa̍ iva sa̱dhrya̍ñco dhavadhve ||

parva̍taḥ | ci̱t | mahi̍ | vṛ̱ddhaḥ | bi̱bhā̱ya̱ | di̱vaḥ | ci̱t | sānu̍ | re̱ja̱ta̱ | sva̱ne | va̱ḥ |
yat | krīḻa̍tha | ma̱ru̱ta̱ḥ | ṛ̱ṣṭi̱-manta̍ḥ | āpa̍ḥ-iva | sa̱dhrya̍ñcaḥ | dha̱va̱dhve̱ ||5.060.03||

5.060.04a va̱rā i̱ved rai̍va̱tāso̱ hira̍ṇyair a̱bhi sva̱dhābhi̍s ta̱nva̍ḥ pipiśre |
5.060.04c śri̱ye śreyā̍ṁsas ta̱vaso̱ rathe̍ṣu sa̱trā mahā̍ṁsi cakrire ta̱nūṣu̍ ||

va̱rāḥ-i̍va | it | rai̱va̱tāsa̍ḥ | hira̍ṇyaiḥ | a̱bhi | sva̱dhābhi̍ḥ | ta̱nva̍ḥ | pi̱pi̱śre̱ |
śri̱ye | śreyā̍ṁsaḥ | ta̱vasa̍ḥ | rathe̍ṣu | sa̱trā | mahā̍ṁsi | ca̱kri̱re̱ | ta̱nūṣu̍ ||5.060.04||

5.060.05a a̱jye̱ṣṭhāso̱ aka̍niṣṭhāsa e̱te sam bhrāta̍ro vāvṛdhu̱ḥ saubha̍gāya |
5.060.05c yuvā̍ pi̱tā svapā̍ ru̱dra e̍ṣāṁ su̱dughā̱ pṛśni̍ḥ su̱dinā̍ ma̱rudbhya̍ḥ ||

a̱jye̱ṣṭhāsa̍ḥ | aka̍niṣṭhāsaḥ | e̱te | sam | bhrāta̍raḥ | va̱vṛ̱dhu̱ḥ | saubha̍gāya |
yuvā̍ | pi̱tā | svapā̍ | ru̱draḥ | e̱ṣā̱m | su̱-dughā̍ | pṛśni̍ḥ | su̱-dinā̍ | ma̱rut-bhya̍ḥ ||5.060.05||

5.060.06a yad u̍tta̱me ma̍ruto madhya̱me vā̱ yad vā̍va̱me su̍bhagāso di̱vi ṣṭha |
5.060.06c ato̍ no rudrā u̱ta vā̱ nv a1̱̍syāgne̍ vi̱ttād dha̱viṣo̱ yad yajā̍ma ||

yat | u̱t-ta̱me | ma̱ru̱ta̱ḥ | ma̱dhya̱me | vā̱ | yat | vā̱ | a̱va̱me | su̱-bha̱gā̱sa̱ḥ | di̱vi | stha |
ata̍ḥ | na̱ḥ | ru̱drā̱ḥ | u̱ta | vā̱ | nu | a̱sya̱ | agne̍ | vi̱ttāt | ha̱viṣa̍ḥ | yat | yajā̍ma ||5.060.06||

5.060.07a a̱gniś ca̱ yan ma̍ruto viśvavedaso di̱vo vaha̍dhva̱ utta̍rā̱d adhi̱ ṣṇubhi̍ḥ |
5.060.07c te ma̍ndasā̱nā dhuna̍yo riśādaso vā̱maṁ dha̍tta̱ yaja̍mānāya sunva̱te ||

a̱gniḥ | ca̱ | yat | ma̱ru̱ta̱ḥ | vi̱śva̱-ve̱da̱sa̱ḥ | di̱vaḥ | vaha̍dhve | ut-ta̍rāt | adhi̍ | snu-bhi̍ḥ |
te | ma̱nda̱sā̱nāḥ | dhuna̍yaḥ | ri̱śā̱da̱sa̱ḥ | vā̱mam | dha̱tta̱ | yaja̍mānāya | su̱nva̱te ||5.060.07||

5.060.08a agne̍ ma̱rudbhi̍ḥ śu̱bhaya̍dbhi̱r ṛkva̍bhi̱ḥ soma̍m piba mandasā̱no ga̍ṇa̱śribhi̍ḥ |
5.060.08c pā̱va̱kebhi̍r viśvami̱nvebhi̍r ā̱yubhi̱r vaiśvā̍nara pra̱divā̍ ke̱tunā̍ sa̱jūḥ ||

agne̍ | ma̱rut-bhi̍ḥ | śu̱bhaya̍t-bhiḥ | ṛkva̍-bhiḥ | soma̍m | pi̱ba̱ | ma̱nda̱sā̱naḥ | ga̱ṇa̱śri-bhi̍ḥ |
pā̱va̱kebhi̍ḥ | vi̱śva̱m-i̱nvebhi̍ḥ | ā̱yu-bhi̍ḥ | vaiśvā̍nara | pra̱-divā̍ | ke̱tunā̍ | sa̱-jūḥ ||5.060.08||


5.061.01a ke ṣṭhā̍ nara̱ḥ śreṣṭha̍tamā̱ ya eka̍-eka āya̱ya |
5.061.01c pa̱ra̱masyā̍ḥ parā̱vata̍ḥ ||

ke | stha̱ | na̱ra̱ḥ | śreṣṭha̍-tamāḥ | ye | eka̍ḥ-ekaḥ | ā̱-ya̱ya |
pa̱ra̱masyā̍ḥ | pa̱rā̱-vata̍ḥ ||5.061.01||

5.061.02a kva1̱̍ vo 'śvā̱ḥ kvā̱3̱̍bhīśa̍vaḥ ka̱thaṁ śe̍ka ka̱thā ya̍ya |
5.061.02c pṛ̱ṣṭhe sado̍ na̱sor yama̍ḥ ||

kva̍ | va̱ḥ | aśvā̍ḥ | kva̍ | a̱bhīśa̍vaḥ | ka̱tham | śe̱ka̱ | ka̱thā | ya̱ya̱ |
pṛ̱ṣṭhe | sada̍ḥ | na̱soḥ | yama̍ḥ ||5.061.02||

5.061.03a ja̱ghane̱ coda̍ eṣā̱ṁ vi sa̱kthāni̱ naro̍ yamuḥ |
5.061.03c pu̱tra̱kṛ̱the na jana̍yaḥ ||

ja̱ghane̍ | coda̍ḥ | e̱ṣā̱m | vi | sa̱kthāni̍ | nara̍ḥ | ya̱mu̱ḥ |
pu̱tra̱-kṛ̱the | na | jana̍yaḥ ||5.061.03||

5.061.04a parā̍ vīrāsa etana̱ maryā̍so̱ bhadra̍jānayaḥ |
5.061.04c a̱gni̱tapo̱ yathāsa̍tha ||

parā̍ | vī̱rā̱sa̱ḥ | i̱ta̱na̱ | maryā̍saḥ | bhadra̍-jānayaḥ |
a̱gni̱-tapa̍ḥ | yathā̍ | asa̍tha ||5.061.04||

5.061.05a sana̱t sāśvya̍m pa̱śum u̱ta gavya̍ṁ śa̱tāva̍yam |
5.061.05c śyā̱vāśva̍stutāya̱ yā dor vī̱rāyo̍pa̱barbṛ̍hat ||

sana̍t | sā | aśvya̍m | pa̱śum | u̱ta | gavya̍m | śa̱ta-a̍vayam |
śyā̱vāśva̍-stutāya | yā | doḥ | vī̱rāya̍ | u̱pa̱-barbṛ̍hat ||5.061.05||

5.061.06a u̱ta tvā̱ strī śaśī̍yasī pu̱ṁso bha̍vati̱ vasya̍sī |
5.061.06c ade̍vatrād arā̱dhasa̍ḥ ||

u̱ta | tvā̱ | strī | śaśī̍yasī | pu̱ṁsaḥ | bha̱va̱ti̱ | vasya̍sī |
ade̍va-trāt | a̱rā̱dhasa̍ḥ ||5.061.06||

5.061.07a vi yā jā̱nāti̱ jasu̍ri̱ṁ vi tṛṣya̍nta̱ṁ vi kā̱mina̍m |
5.061.07c de̱va̱trā kṛ̍ṇu̱te mana̍ḥ ||

vi | yā | jā̱nāti̍ | jasu̍rim | vi | tṛṣya̍ntam | vi | kā̱mina̍m |
de̱va̱-trā | kṛ̱ṇu̱te | mana̍ḥ ||5.061.07||

5.061.08a u̱ta ghā̱ nemo̱ astu̍ta̱ḥ pumā̱m̐ iti̍ bruve pa̱ṇiḥ |
5.061.08c sa vaira̍deya̱ it sa̱maḥ ||

u̱ta | gha̱ | nema̍ḥ | astu̍taḥ | pumā̍n | iti̍ | bru̱ve̱ | pa̱ṇiḥ |
saḥ | vaira̍-deye | it | sa̱maḥ ||5.061.08||

5.061.09a u̱ta me̍ 'rapad yuva̱tir ma̍ma̱nduṣī̱ prati̍ śyā̱vāya̍ varta̱nim |
5.061.09c vi rohi̍tā purumī̱ḻhāya̍ yematu̱r viprā̍ya dī̱rghaya̍śase ||

u̱ta | me̱ | a̱ra̱pa̱t | yu̱va̱tiḥ | ma̱ma̱nduṣī̍ | prati̍ | śyā̱vāya̍ | va̱rta̱nim |
vi | rohi̍tā | pu̱ru̱-mī̱ḻhāya̍ | ye̱ma̱tu̱ḥ | viprā̍ya | dī̱rgha-ya̍śase ||5.061.09||

5.061.10a yo me̍ dhenū̱nāṁ śa̱taṁ vaida̍daśvi̱r yathā̱ dada̍t |
5.061.10c ta̱ra̱nta i̍va ma̱ṁhanā̍ ||

yaḥ | me̱ | dhe̱nū̱nām | śa̱tam | vaida̍t-aśviḥ | yathā̍ | dada̍t |
ta̱ra̱ntaḥ-i̍va | ma̱ṁhanā̍ ||5.061.10||

5.061.11a ya ī̱ṁ vaha̍nta ā̱śubhi̱ḥ piba̍nto madi̱ram madhu̍ |
5.061.11c atra̱ śravā̍ṁsi dadhire ||

ye | ī̱m | vaha̍nte | ā̱śu-bhi̍ḥ | piba̍ntaḥ | ma̱di̱ram | madhu̍ |
atra̍ | śravā̍ṁsi | da̱dhi̱re̱ ||5.061.11||

5.061.12a yeṣā̍ṁ śri̱yādhi̱ roda̍sī vi̱bhrāja̍nte̱ rathe̱ṣv ā |
5.061.12c di̱vi ru̱kma i̍vo̱pari̍ ||

yeṣā̍m | śri̱yā | adhi̍ | roda̍sī̱ iti̍ | vi̱-bhrāja̍nte | rathe̍ṣu | ā |
di̱vi | ru̱kmaḥ-i̍va | u̱pari̍ ||5.061.12||

5.061.13a yuvā̱ sa māru̍to ga̱ṇas tve̱ṣara̍tho̱ ane̍dyaḥ |
5.061.13c śu̱bha̱ṁyāvāpra̍tiṣkutaḥ ||

yuvā̍ | saḥ | māru̍taḥ | ga̱ṇaḥ | tve̱ṣa-ra̍thaḥ | ane̍dyaḥ |
śu̱bha̱m-yāvā̍ | apra̍ti-skutaḥ ||5.061.13||

5.061.14a ko ve̍da nū̱nam e̍ṣā̱ṁ yatrā̱ mada̍nti̱ dhūta̍yaḥ |
5.061.14c ṛ̱tajā̍tā are̱pasa̍ḥ ||

kaḥ | ve̱da̱ | nū̱nam | e̱ṣā̱m | yatra̍ | mada̍nti | dhūta̍yaḥ |
ṛ̱ta-jā̍tāḥ | a̱re̱pasa̍ḥ ||5.061.14||

5.061.15a yū̱yam marta̍ṁ vipanyavaḥ praṇe̱tāra̍ i̱tthā dhi̱yā |
5.061.15c śrotā̍ro̱ yāma̍hūtiṣu ||

yū̱yam | marta̍m | vi̱pa̱nya̱va̱ḥ | pra̱-ne̱tāra̍ḥ | i̱tthā | dhi̱yā |
śrotā̍raḥ | yāma̍-hūtiṣu ||5.061.15||

5.061.16a te no̱ vasū̍ni̱ kāmyā̍ puruśca̱ndrā ri̍śādasaḥ |
5.061.16c ā ya̍jñiyāso vavṛttana ||

te | na̱ḥ | vasū̍ni | kāmyā̍ | pu̱ru̱-ca̱ndrāḥ | ri̱śā̱da̱sa̱ḥ |
ā | ya̱jñi̱yā̱sa̱ḥ | va̱vṛ̱tta̱na̱ ||5.061.16||

5.061.17a e̱tam me̱ stoma̍m ūrmye dā̱rbhyāya̱ parā̍ vaha |
5.061.17c giro̍ devi ra̱thīr i̍va ||

e̱tam | me̱ | stoma̍m | ū̱rmye | dā̱rbhyāya̍ | parā̍ | va̱ha̱ |
gira̍ḥ | de̱vi̱ | ra̱thīḥ-i̍va ||5.061.17||

5.061.18a u̱ta me̍ vocatā̱d iti̍ su̱taso̍me̱ ratha̍vītau |
5.061.18c na kāmo̱ apa̍ veti me ||

u̱ta | me̱ | vo̱ca̱tā̱t | iti̍ | su̱ta-so̍me | ratha̍-vītau |
na | kāma̍ḥ | apa̍ | ve̱ti̱ | me̱ ||5.061.18||

5.061.19a e̱ṣa kṣe̍ti̱ ratha̍vītir ma̱ghavā̱ goma̍tī̱r anu̍ |
5.061.19c parva̍te̱ṣv apa̍śritaḥ ||

e̱ṣaḥ | kṣe̱ti̱ | ratha̍-vītiḥ | ma̱gha-vā̍ | go-ma̍tīḥ | anu̍ |
parva̍teṣu | apa̍-śritaḥ ||5.061.19||


5.062.01a ṛ̱tena̍ ṛ̱tam api̍hitaṁ dhru̱vaṁ vā̱ṁ sūrya̍sya̱ yatra̍ vimu̱canty aśvā̍n |
5.062.01c daśa̍ śa̱tā sa̱ha ta̍sthu̱s tad eka̍ṁ de̱vānā̱ṁ śreṣṭha̱ṁ vapu̍ṣām apaśyam ||

ṛ̱tena̍ | ṛ̱tam | api̍-hitam | dhru̱vam | vā̱m | sūrya̍sya | yatra̍ | vi̱-mu̱canti̍ | aśvā̍n |
daśa̍ | śa̱tā | sa̱ha | ta̱sthu̱ḥ | tat | eka̍m | de̱vānā̍m | śreṣṭha̍m | vapu̍ṣām | a̱pa̱śya̱m ||5.062.01||

5.062.02a tat su vā̍m mitrāvaruṇā mahi̱tvam ī̱rmā ta̱sthuṣī̱r aha̍bhir duduhre |
5.062.02c viśvā̍ḥ pinvatha̱ḥ svasa̍rasya̱ dhenā̱ anu̍ vā̱m eka̍ḥ pa̱vir ā va̍varta ||

tat | su | vā̱m | mi̱trā̱va̱ru̱ṇā̱ | ma̱hi̱-tvam | ī̱rmā | ta̱sthuṣī̍ḥ | aha̍-bhiḥ | du̱du̱hre̱ |
viśvā̍ḥ | pi̱nva̱tha̱ḥ | svasa̍rasya | dhenā̍ḥ | anu̍ | vā̱m | eka̍ḥ | pa̱viḥ | ā | va̱va̱rta̱ ||5.062.02||

5.062.03a adhā̍rayatam pṛthi̱vīm u̱ta dyām mitra̍rājānā varuṇā̱ maho̍bhiḥ |
5.062.03c va̱rdhaya̍ta̱m oṣa̍dhī̱ḥ pinva̍ta̱ṁ gā ava̍ vṛ̱ṣṭiṁ sṛ̍jataṁ jīradānū ||

adhā̍rayatam | pṛ̱thi̱vīm | u̱ta | dyām | mitra̍-rājānā | va̱ru̱ṇā̱ | maha̍ḥ-bhiḥ |
va̱rdhaya̍tam | oṣa̍dhīḥ | pinva̍tam | gāḥ | ava̍ | vṛ̱ṣṭi̍m | sṛ̱ja̱ta̱m | jī̱ra̱dā̱nū̱ iti̍ jīra-dānū ||5.062.03||

5.062.04a ā vā̱m aśvā̍saḥ su̱yujo̍ vahantu ya̱tara̍śmaya̱ upa̍ yantv a̱rvāk |
5.062.04c ghṛ̱tasya̍ ni̱rṇig anu̍ vartate vā̱m upa̱ sindha̍vaḥ pra̱divi̍ kṣaranti ||

ā | vā̱m | aśvā̍saḥ | su̱-yuja̍ḥ | va̱ha̱ntu̱ | ya̱ta-ra̍śmayaḥ | upa̍ | ya̱ntu̱ | a̱rvāk |
ghṛ̱tasya̍ | ni̱ḥ-nik | anu̍ | va̱rta̱te̱ | vā̱m | upa̍ | sindha̍vaḥ | pra̱-divi̍ | kṣa̱ra̱nti̱ ||5.062.04||

5.062.05a anu̍ śru̱tām a̱mati̱ṁ vardha̍d u̱rvīm ba̱rhir i̍va̱ yaju̍ṣā̱ rakṣa̍māṇā |
5.062.05c nama̍svantā dhṛtada̱kṣādhi̱ garte̱ mitrāsā̍the varu̱ṇeḻā̍sv a̱ntaḥ ||

anu̍ | śru̱tām | a̱mati̍m | vardha̍t | u̱rvīm | ba̱rhiḥ-i̍va | yaju̍ṣā | rakṣa̍māṇā |
nama̍svantā | dhṛ̱ta̱-da̱kṣā̱ | adhi̍ | garte̍ | mitra̍ | āsā̍the̱ iti̍ | va̱ru̱ṇa̱ | iḻā̍su | a̱ntariti̍ ||5.062.05||

5.062.06a akra̍vihastā su̱kṛte̍ para̱spā yaṁ trāsā̍the varu̱ṇeḻā̍sv a̱ntaḥ |
5.062.06c rājā̍nā kṣa̱tram ahṛ̍ṇīyamānā sa̱hasra̍sthūṇam bibhṛthaḥ sa̱ha dvau ||

akra̍vi-hastā | su̱-kṛte̍ | pa̱ra̱ḥ-pā | yam | trāsā̍the | va̱ru̱ṇā̱ | ilā̍su | a̱ntariti̍ |
rājā̍nā | kṣa̱tram | ahṛ̍ṇīyamānā | sa̱hasra̍-sthūṇam | bi̱bhṛ̱tha̱ḥ | sa̱ha | dvau ||5.062.06||

5.062.07a hira̍ṇyanirṇi̱g ayo̍ asya̱ sthūṇā̱ vi bhrā̍jate di̱vy a1̱̍śvāja̍nīva |
5.062.07c bha̱dre kṣetre̱ nimi̍tā̱ tilvi̍le vā sa̱nema̱ madhvo̱ adhi̍gartyasya ||

hira̍ṇya-nirnik | aya̍ḥ | a̱sya̱ | sthūṇā̍ | vi | bhrā̱ja̱te̱ | di̱vi | a̱śvāja̍nī-iva |
bha̱dre | kṣetre̍ | ni-mi̍tā | talvi̍le | vā̱ | sa̱nema̍ | madhva̍ḥ | adhi̍-gartyasya ||5.062.07||

5.062.08a hira̍ṇyarūpam u̱ṣaso̱ vyu̍ṣṭā̱v aya̍ḥsthūṇa̱m udi̍tā̱ sūrya̍sya |
5.062.08c ā ro̍hatho varuṇa mitra̱ garta̱m ata̍ś cakṣāthe̱ adi̍ti̱ṁ diti̍ṁ ca ||

hira̍ṇya-rūpam | u̱ṣasa̍ḥ | vi-u̍ṣṭau | aya̍ḥ-sthūṇam | ut-i̍tā | sūrya̍sya |
ā | ro̱ha̱tha̱ḥ | va̱ru̱ṇa̱ | mi̱tra̱ | garta̍m | ata̍ḥ | ca̱kṣā̱the̱ iti̍ | adi̍tim | diti̍m | ca̱ ||5.062.08||

5.062.09a yad baṁhi̍ṣṭha̱ṁ nāti̱vidhe̍ sudānū̱ acchi̍dra̱ṁ śarma̍ bhuvanasya gopā |
5.062.09c tena̍ no mitrāvaruṇāv aviṣṭa̱ṁ siṣā̍santo jigī̱vāṁsa̍ḥ syāma ||

yat | baṁhi̍ṣṭham | na | a̱ti̱-vidhe̍ | su̱dā̱nū̱ iti̍ su-dānū | acchi̍dram | śarma̍ | bhu̱va̱na̱sya̱ | go̱pā̱ |
tena̍ | na̱ḥ | mi̱trā̱va̱ru̱ṇau̱ | a̱vi̱ṣṭa̱m | sisā̍santaḥ | ji̱gī̱vāṁsa̍ḥ | syā̱ma̱ ||5.062.09||


5.063.01a ṛta̍sya gopā̱v adhi̍ tiṣṭhatho̱ ratha̱ṁ satya̍dharmāṇā para̱me vyo̍mani |
5.063.01c yam atra̍ mitrāvaru̱ṇāva̍tho yu̱vaṁ tasmai̍ vṛ̱ṣṭir madhu̍mat pinvate di̱vaḥ ||

ṛta̍sya | go̱pau̱ | adhi̍ | ti̱ṣṭha̱tha̱ḥ | ratha̍m | satya̍-dharmāṇā | pa̱ra̱me | vi-o̍mani |
yam | atra̍ | mi̱trā̱va̱ru̱ṇā̱ | ava̍thaḥ | yu̱vam | tasmai̍ | vṛ̱ṣṭiḥ | madhu̍-mat | pi̱nva̱te̱ | di̱vaḥ ||5.063.01||

5.063.02a sa̱mrājā̍v a̱sya bhuva̍nasya rājatho̱ mitrā̍varuṇā vi̱dathe̍ sva̱rdṛśā̍ |
5.063.02c vṛ̱ṣṭiṁ vā̱ṁ rādho̍ amṛta̱tvam ī̍mahe̱ dyāvā̍pṛthi̱vī vi ca̍ranti ta̱nyava̍ḥ ||

sa̱m-rājau̍ | a̱sya | bhuva̍nasya | rā̱ja̱tha̱ḥ | mitrā̍varuṇā | vi̱dathe̍ | sva̱ḥ-dṛśā̍ |
vṛ̱ṣṭim | vā̱m | rādha̍ḥ | a̱mṛ̱ta̱-tvam | ī̱ma̱he̱ | dyāvā̍pṛthi̱vī iti̍ | vi | ca̱ra̱nti̱ | ta̱nyava̍ḥ ||5.063.02||

5.063.03a sa̱mrājā̍ u̱grā vṛ̍ṣa̱bhā di̱vas patī̍ pṛthi̱vyā mi̱trāvaru̍ṇā̱ vica̍rṣaṇī |
5.063.03c ci̱trebhi̍r a̱bhrair upa̍ tiṣṭhatho̱ rava̱ṁ dyāṁ va̍rṣayatho̱ asu̍rasya mā̱yayā̍ ||

sa̱m-rājau̍ | u̱grā | vṛ̱ṣa̱bhā | di̱vaḥ | patī̍ iti̍ | pṛ̱thi̱vyāḥ | mi̱trāvaru̍ṇā | vica̍rṣaṇī̱ iti̱ vi-ca̍rṣaṇī |
ci̱trebhi̍ḥ | a̱bhraiḥ | upa̍ | ti̱ṣṭha̱tha̱ḥ | rava̍m | dyām | va̱rṣa̱ya̱tha̱ḥ | asu̍rasya | mā̱yayā̍ ||5.063.03||

5.063.04a mā̱yā vā̍m mitrāvaruṇā di̱vi śri̱tā sūryo̱ jyoti̍ś carati ci̱tram āyu̍dham |
5.063.04c tam a̱bhreṇa̍ vṛ̱ṣṭyā gū̍hatho di̱vi parja̍nya dra̱psā madhu̍manta īrate ||

mā̱yā | vā̱m | mi̱trā̱va̱ru̱ṇā̱ | di̱vi | śri̱tā | sūrya̍ḥ | jyoti̍ḥ | ca̱ra̱ti̱ | ci̱tram | āyu̍dham |
tam | a̱bhreṇa̍ | vṛ̱ṣṭyā | gū̱ha̱tha̱ḥ | di̱vi | parja̍nya | dra̱psāḥ | madhu̍-mantaḥ | ī̱ra̱te̱ ||5.063.04||

5.063.05a ratha̍ṁ yuñjate ma̱ruta̍ḥ śu̱bhe su̱khaṁ śūro̱ na mi̍trāvaruṇā̱ gavi̍ṣṭiṣu |
5.063.05c rajā̍ṁsi ci̱trā vi ca̍ranti ta̱nyavo̍ di̱vaḥ sa̍mrājā̱ paya̍sā na ukṣatam ||

ratha̍m | yu̱ñja̱te̱ | ma̱ruta̍ḥ | śu̱bhe | su̱kham | śūra̍ḥ | na | mi̱trā̱va̱ru̱ṇā̱ | go-i̍ṣṭiṣu |
rajā̍ṁsi | ci̱trā | vi | ca̱ra̱nti̱ | ta̱nyava̍ḥ | di̱vaḥ | sa̱m-rā̱jā̱ | paya̍sā | na̱ḥ | u̱kṣa̱ta̱m ||5.063.05||

5.063.06a vāca̱ṁ su mi̍trāvaruṇā̱v irā̍vatīm pa̱rjanya̍ś ci̱trāṁ va̍dati̱ tviṣī̍matīm |
5.063.06c a̱bhrā va̍sata ma̱ruta̱ḥ su mā̱yayā̱ dyāṁ va̍rṣayatam aru̱ṇām a̍re̱pasa̍m ||

vāca̍m | su | mi̱trā̱va̱ru̱ṇau̱ | irā̍-vatīm | pa̱rjanya̍ḥ | ci̱trām | va̱da̱ti̱ | tviṣi̍-matīm |
a̱bhrā | va̱sa̱ta̱ | ma̱ruta̍ḥ | su | mā̱yayā̍ | dyām | va̱rṣa̱ya̱ta̱m | a̱ru̱ṇām | a̱re̱pasa̍m ||5.063.06||

5.063.07a dharma̍ṇā mitrāvaruṇā vipaścitā vra̱tā ra̍kṣethe̱ asu̍rasya mā̱yayā̍ |
5.063.07c ṛ̱tena̱ viśva̱m bhuva̍na̱ṁ vi rā̍jatha̱ḥ sūrya̱m ā dha̍ttho di̱vi citrya̱ṁ ratha̍m ||

dharma̍ṇā | mi̱trā̱va̱ru̱ṇā̱ | vi̱pa̱ḥ-ci̱tā̱ | vra̱tā | ra̱kṣe̱the̱ iti̍ | asu̍rasya | mā̱yayā̍ |
ṛ̱tena̍ | viśva̍m | bhuva̍nam | vi | rā̱ja̱tha̱ḥ | sūrya̍m | ā | dha̱ttha̱ḥ | di̱vi | citrya̍m | ratha̍m ||5.063.07||


5.064.01a varu̍ṇaṁ vo ri̱śāda̍sam ṛ̱cā mi̱traṁ ha̍vāmahe |
5.064.01c pari̍ vra̱jeva̍ bā̱hvor ja̍ga̱nvāṁsā̱ sva̍rṇaram ||

varu̍ṇam | va̱ḥ | ri̱śāda̍sam | ṛ̱cā | mi̱tram | ha̱vā̱ma̱he̱ |
pari̍ | vra̱jā̍-i̍va | bā̱hvoḥ | ja̱ga̱nvāṁsā̍ | sva̍ḥ-naram ||5.064.01||

5.064.02a tā bā̱havā̍ suce̱tunā̱ pra ya̍ntam asmā̱ arca̍te |
5.064.02c śeva̱ṁ hi jā̱rya̍ṁ vā̱ṁ viśvā̍su̱ kṣāsu̱ jogu̍ve ||

tā | bā̱havā̍ | su̱-ce̱tunā̍ | pra | ya̱nta̱m | a̱smai̱ | arca̍te |
śeva̍m | hi | jā̱rya̍m | vā̱m | viśvā̍su | kṣāsu̍ | jogu̍ve ||5.064.02||

5.064.03a yan nū̱nam a̱śyāṁ gati̍m mi̱trasya̍ yāyām pa̱thā |
5.064.03c asya̍ pri̱yasya̱ śarma̱ṇy ahi̍ṁsānasya saścire ||

yat | nū̱nam | a̱śyām | gati̍m | mi̱trasya̍ | yā̱yā̱m | pa̱thā |
asya̍ | pri̱yasya̍ | śarma̍ṇi | ahi̍ṁsānasya | sa̱ści̱re̱ ||5.064.03||

5.064.04a yu̱vābhyā̍m mitrāvaruṇopa̱maṁ dhe̍yām ṛ̱cā |
5.064.04c yad dha̱ kṣaye̍ ma̱ghonā̍ṁ stotṝ̱ṇāṁ ca̍ spū̱rdhase̍ ||

yu̱vābhyā̍m | mi̱trā̱va̱ru̱ṇā̱ | u̱pa̱-mam | dhe̱yā̱m | ṛ̱cā |
yat | ha̱ | kṣaye̍ | ma̱ghonā̍m | sto̱tṝ̱ṇām | ca̱ | spū̱rdhase̍ ||5.064.04||

5.064.05a ā no̍ mitra sudī̱tibhi̱r varu̍ṇaś ca sa̱dhastha̱ ā |
5.064.05c sve kṣaye̍ ma̱ghonā̱ṁ sakhī̍nāṁ ca vṛ̱dhase̍ ||

ā | na̱ḥ | mi̱tra̱ | su̱dī̱ti-bhi̍ḥ | varu̍ṇaḥ | ca̱ | sa̱dha-sthe̍ | ā |
sve | kṣaye̍ | ma̱ghonā̍m | sakhī̍nām | ca̱ | vṛ̱dhase̍ ||5.064.05||

5.064.06a yu̱vaṁ no̱ yeṣu̍ varuṇa kṣa̱tram bṛ̱hac ca̍ bibhṛ̱thaḥ |
5.064.06c u̱ru ṇo̱ vāja̍sātaye kṛ̱taṁ rā̱ye sva̱staye̍ ||

yu̱vam | na̱ḥ | yeṣu̍ | va̱ru̱ṇā̱ | kṣa̱tram | bṛ̱hat | ca̱ | bi̱bhṛ̱thaḥ |
u̱ru | na̱ḥ | vāja̍-sātaye | kṛ̱tam | rā̱ye | sva̱staye̍ ||5.064.06||

5.064.07a u̱cchantyā̍m me yaja̱tā de̱vakṣa̍tre̱ ruśa̍dgavi |
5.064.07c su̱taṁ soma̱ṁ na ha̱stibhi̱r ā pa̱ḍbhir dhā̍vataṁ narā̱ bibhra̍tāv arca̱nāna̍sam ||

u̱cchantyā̍m | me̱ | ya̱ja̱tā | de̱va-kṣa̍tre | ruśa̍t-gavi |
su̱tam | soma̍m | na | ha̱sti-bhi̍ḥ | ā | pa̱ṭ-bhiḥ | dhā̱va̱ta̱m | na̱rā̱ | bibhra̍tau | a̱rca̱nāna̍sam ||5.064.07||


5.065.01a yaś ci̱keta̱ sa su̱kratu̍r deva̱trā sa bra̍vītu naḥ |
5.065.01c varu̍ṇo̱ yasya̍ darśa̱to mi̱tro vā̱ vana̍te̱ gira̍ḥ ||

yaḥ | ci̱keta̍ | saḥ | su̱-kratu̍ḥ | de̱va̱-trā | saḥ | bra̱vī̱tu̱ | na̱ḥ |
varu̍ṇaḥ | yasya̍ | da̱rśa̱taḥ | mi̱traḥ | vā̱ | vana̍te | gira̍ḥ ||5.065.01||

5.065.02a tā hi śreṣṭha̍varcasā̱ rājā̍nā dīrgha̱śrutta̍mā |
5.065.02c tā satpa̍tī ṛtā̱vṛdha̍ ṛ̱tāvā̍nā̱ jane̍-jane ||

tā | hi | śreṣṭha̍-varcasā | rājā̍nā | dī̱rgha̱śrut-ta̍mā |
tā | satpa̍tī̱ iti̱ sat-pa̍tī | ṛ̱ta̱-vṛdhā̍ | ṛ̱ta-vā̍nā | jane̍-jane ||5.065.02||

5.065.03a tā vā̍m iyā̱no 'va̍se̱ pūrvā̱ upa̍ bruve̱ sacā̍ |
5.065.03c svaśvā̍sa̱ḥ su ce̱tunā̱ vājā̍m̐ a̱bhi pra dā̱vane̍ ||

tā | vā̱m | i̱yā̱naḥ | ava̍se | pūrvau̍ | upa̍ | bruve̍ | sacā̍ |
su̱-aśvā̍saḥ | su | ce̱tunā̍ | vājā̍n | a̱bhi | pra | dā̱vane̍ ||5.065.03||

5.065.04a mi̱tro a̱ṁhoś ci̱d ād u̱ru kṣayā̍ya gā̱tuṁ va̍nate |
5.065.04c mi̱trasya̱ hi pra̱tūrva̍taḥ suma̱tir asti̍ vidha̱taḥ ||

mi̱traḥ | a̱ṁhoḥ | ci̱t | āt | u̱ru | kṣayā̍ya | gā̱tum | va̱na̱te̱ |
mi̱trasya̍ | hi | pra̱-tūrva̍taḥ | su̱-ma̱tiḥ | asti̍ | vi̱dha̱taḥ ||5.065.04||

5.065.05a va̱yam mi̱trasyāva̍si̱ syāma̍ sa̱pratha̍stame |
5.065.05c a̱ne̱hasa̱s tvota̍yaḥ sa̱trā varu̍ṇaśeṣasaḥ ||

va̱yam | mi̱trasya̍ | ava̍si | syāma̍ | sa̱pratha̍ḥ-tame |
a̱ne̱hasa̍ḥ | tvā-ū̍tayaḥ | sa̱trā | varu̍ṇa-śeṣasaḥ ||5.065.05||

5.065.06a yu̱vam mi̍tre̱maṁ jana̱ṁ yata̍tha̱ḥ saṁ ca̍ nayathaḥ |
5.065.06c mā ma̱ghona̱ḥ pari̍ khyata̱m mo a̱smāka̱m ṛṣī̍ṇāṁ gopī̱the na̍ uruṣyatam ||

yu̱vam | mi̱trā̱ | i̱mam | jana̍m | yata̍thaḥ | sam | ca̱ | na̱ya̱tha̱ḥ |
mā | ma̱ghona̍ḥ | pari̍ | khya̱ta̱m | mo iti̍ | a̱smāka̍m | ṛṣī̍ṇām | go̱-pī̱the | na̱ḥ | u̱ru̱ṣya̱ta̱m ||5.065.06||


5.066.01a ā ci̍kitāna su̱kratū̍ de̱vau ma̍rta ri̱śāda̍sā |
5.066.01c varu̍ṇāya ṛ̱tape̍śase dadhī̱ta praya̍se ma̱he ||

ā | ci̱ki̱tā̱na̱ | su̱kratū̱ iti̍ su̱-kratū̍ | de̱vau | ma̱rta̱ | ri̱śāda̍sā |
varu̍ṇāya | ṛ̱ta-pe̍śase | da̱dhī̱ta | praya̍se | ma̱he ||5.066.01||

5.066.02a tā hi kṣa̱tram avi̍hrutaṁ sa̱myag a̍su̱rya1̱̍m āśā̍te |
5.066.02c adha̍ vra̱teva̱ mānu̍ṣa̱ṁ sva1̱̍r ṇa dhā̍yi darśa̱tam ||

tā | hi | kṣa̱tram | avi̍-hrutam | sa̱myak | a̱su̱rya̍m | āśā̍te̱ iti̍ |
adha̍ | vra̱tā-i̍va | mānu̍ṣam | sva̍ḥ | na | dhā̱yi̱ | da̱rśa̱tam ||5.066.02||

5.066.03a tā vā̱m eṣe̱ rathā̍nām u̱rvīṁ gavyū̍tim eṣām |
5.066.03c rā̱taha̍vyasya suṣṭu̱tiṁ da̱dhṛk stomai̍r manāmahe ||

tā | vā̱m | eṣe̍ | rathā̍nām | u̱rvīm | gavyū̍tim | e̱ṣā̱m |
rā̱ta-ha̍vyasya | su̱-stu̱tim | da̱dhṛk | stomai̍ḥ | ma̱nā̱ma̱he̱ ||5.066.03||

5.066.04a adhā̱ hi kāvyā̍ yu̱vaṁ dakṣa̍sya pū̱rbhir a̍dbhutā |
5.066.04c ni ke̱tunā̱ janā̍nāṁ ci̱kethe̍ pūtadakṣasā ||

adha̍ | hi | kāvyā̍ | yu̱vam | dakṣa̍sya | pū̱ḥ-bhiḥ | a̱dbhu̱tā̱ |
ni | ke̱tunā̍ | janā̍nām | ci̱kethe̱ iti̍ | pū̱ta̱-da̱kṣa̱sā̱ ||5.066.04||

5.066.05a tad ṛ̱tam pṛ̍thivi bṛ̱hac chra̍vae̱ṣa ṛṣī̍ṇām |
5.066.05c jra̱ya̱sā̱nāv ara̍m pṛ̱thv ati̍ kṣaranti̱ yāma̍bhiḥ ||

tat | ṛ̱tam | pṛ̱thi̱vi̱ | bṛ̱hat | śra̱va̱ḥ-e̱ṣe | ṛṣī̍ṇām |
jra̱ya̱sā̱nau | ara̍m | pṛ̱thu | ati̍ | kṣa̱ra̱nti̱ | yāma̍-bhiḥ ||5.066.05||

5.066.06a ā yad vā̍m īyacakṣasā̱ mitra̍ va̱yaṁ ca̍ sū̱raya̍ḥ |
5.066.06c vyaci̍ṣṭhe bahu̱pāyye̱ yate̍mahi sva̱rājye̍ ||

ā | yat | vā̱m | ī̱ya̱-ca̱kṣa̱sā̱ | mitrā̍ | va̱yam | ca̱ | sū̱raya̍ḥ |
vyaci̍ṣṭhe | ba̱hu̱-pāyye̍ | yate̍mahi | sva̱-rājye̍ ||5.066.06||


5.067.01a baḻ i̱tthā de̍va niṣkṛ̱tam ādi̍tyā yaja̱tam bṛ̱hat |
5.067.01c varu̍ṇa̱ mitrārya̍ma̱n varṣi̍ṣṭhaṁ kṣa̱tram ā̍śāthe ||

baṭ | i̱tthā | de̱va̱ | ni̱ḥ-kṛ̱tam | ādi̍tyā | ya̱ja̱tam | bṛ̱hat |
varu̍ṇa | mitra̍ | arya̍man | varṣi̍ṣṭham | kṣa̱tram | ā̱śā̱the̱ iti̍ ||5.067.01||

5.067.02a ā yad yoni̍ṁ hira̱ṇyaya̱ṁ varu̍ṇa̱ mitra̱ sada̍thaḥ |
5.067.02c dha̱rtārā̍ carṣaṇī̱nāṁ ya̱ntaṁ su̱mnaṁ ri̍śādasā ||

ā | yat | yoni̍m | hi̱ra̱ṇyaya̍m | varu̍ṇa | mitra̍ | sada̍thaḥ |
dha̱rtārā̍ | ca̱rṣa̱ṇī̱nām | ya̱ntam | su̱mnam | ri̱śā̱da̱sā̱ ||5.067.02||

5.067.03a viśve̱ hi vi̱śvave̍daso̱ varu̍ṇo mi̱tro a̍rya̱mā |
5.067.03c vra̱tā pa̱deva̍ saścire̱ pānti̱ martya̍ṁ ri̱ṣaḥ ||

viśve̍ | hi | vi̱śva-ve̍dasaḥ | varu̍ṇaḥ | mi̱traḥ | a̱rya̱mā |
vra̱tā | pa̱dā-i̍va | sa̱ści̱re̱ | pānti̍ | martya̍m | ri̱ṣaḥ ||5.067.03||

5.067.04a te hi sa̱tyā ṛ̍ta̱spṛśa̍ ṛ̱tāvā̍no̱ jane̍-jane |
5.067.04c su̱nī̱thāsa̍ḥ su̱dāna̍vo̱ 'ṁhoś ci̍d uru̱cakra̍yaḥ ||

te | hi | sa̱tyāḥ | ṛ̱ta̱-spṛśa̍ḥ | ṛ̱ta-vā̍naḥ | jane̍-jane |
su̱-nī̱thāsa̍ḥ | su̱-dāna̍vaḥ | a̱ṁhoḥ | ci̱t | u̱ru̱-cakra̍yaḥ ||5.067.04||

5.067.05a ko nu vā̍m mi̱trāstu̍to̱ varu̍ṇo vā ta̱nūnā̍m |
5.067.05c tat su vā̱m eṣa̍te ma̱tir atri̍bhya̱ eṣa̍te ma̱tiḥ ||

kaḥ | nu | vā̱m | mi̱tra̱ | astu̍taḥ | varu̍ṇaḥ | vā̱ | ta̱nūnā̍m |
tat | su | vā̱m | ā | ī̱ṣa̱te̱ | ma̱tiḥ | atri̍-bhyaḥ | ā | ī̱ṣa̱te̱ | ma̱tiḥ ||5.067.05||


5.068.01a pra vo̍ mi̱trāya̍ gāyata̱ varu̍ṇāya vi̱pā gi̱rā |
5.068.01c mahi̍kṣatrāv ṛ̱tam bṛ̱hat ||

pra | va̱ḥ | mi̱trāya̍ | gā̱ya̱ta̱ | varu̍ṇāya | vi̱pā | gi̱rā |
mahi̍-kṣatrau | ṛ̱tam | bṛ̱hat ||5.068.01||

5.068.02a sa̱mrājā̱ yā ghṛ̱tayo̍nī mi̱traś co̱bhā varu̍ṇaś ca |
5.068.02c de̱vā de̱veṣu̍ praśa̱stā ||

sa̱m-rājā̍ | yā | ghṛ̱tayo̍nī̱ iti̍ ghṛ̱ta-yo̍nī | mi̱traḥ | ca̱ | u̱bhā | varu̍ṇaḥ | ca̱ |
de̱vā | de̱veṣu̍ | pra̱-śa̱stā ||5.068.02||

5.068.03a tā na̍ḥ śakta̱m pārthi̍vasya ma̱ho rā̱yo di̱vyasya̍ |
5.068.03c mahi̍ vāṁ kṣa̱traṁ de̱veṣu̍ ||

tā | na̱ḥ | śakta̍m | pārthi̍vasya | ma̱haḥ | rā̱yaḥ | di̱vyasya̍ |
mahi̍ | vā̱m | kṣa̱tram | de̱veṣu̍ ||5.068.03||

5.068.04a ṛ̱tam ṛ̱tena̱ sapa̍nteṣi̱raṁ dakṣa̍m āśāte |
5.068.04c a̱druhā̍ de̱vau va̍rdhete ||

ṛ̱tam | ṛ̱tena̍ | sapa̍ntā | i̱ṣi̱ram | dakṣa̍m | ā̱śā̱te̱ iti̍ |
a̱druhā̍ | de̱vau | va̱rdhe̱te̱ iti̍ ||5.068.04||

5.068.05a vṛ̱ṣṭidyā̍vā rī̱tyā̍pe̱ṣas patī̱ dānu̍matyāḥ |
5.068.05c bṛ̱hanta̱ṁ garta̍m āśāte ||

vṛ̱ṣṭi-dyā̍vā | rī̱ti-ā̍pā | i̱ṣaḥ | patī̱ iti̍ | dānu̍-matyāḥ |
bṛ̱hanta̍m | garta̍m | ā̱śā̱te̱ iti̍ ||5.068.05||


5.069.01a trī ro̍ca̱nā va̍ruṇa̱ trīm̐r u̱ta dyūn trīṇi̍ mitra dhārayatho̱ rajā̍ṁsi |
5.069.01c vā̱vṛ̱dhā̱nāv a̱mati̍ṁ kṣa̱triya̱syānu̍ vra̱taṁ rakṣa̍māṇāv aju̱ryam ||

trī | ro̱ca̱nā | va̱ru̱ṇa̱ | trīn | u̱ta | dyūn | trīṇi̍ | mi̱tra̱ | dhā̱ra̱ya̱tha̱ḥ | rajā̍ṁsi |
va̱vṛ̱dhā̱nau | a̱mati̍m | kṣa̱triya̍sya | anu̍ | vra̱tam | rakṣa̍māṇau | a̱ju̱ryam ||5.069.01||

5.069.02a irā̍vatīr varuṇa dhe̱navo̍ vā̱m madhu̍mad vā̱ṁ sindha̍vo mitra duhre |
5.069.02c traya̍s tasthur vṛṣa̱bhāsa̍s tisṛ̱ṇāṁ dhi̱ṣaṇā̍nāṁ reto̱dhā vi dyu̱manta̍ḥ ||

irā̍-vatīḥ | va̱ru̱ṇa̱ | dhe̱nava̍ḥ | vā̱m | madhu̍-mat | vā̱m | sindha̍vaḥ | mi̱tra̱ | du̱hre̱ |
traya̍ḥ | ta̱sthu̱ḥ | vṛ̱ṣa̱bhāsa̍ḥ | ti̱sṝ̱ṇām | dhi̱ṣaṇā̍nām | re̱ta̱ḥ-dhāḥ | vi | dyu̱-manta̍ḥ ||5.069.02||

5.069.03a prā̱tar de̱vīm adi̍tiṁ johavīmi ma̱dhyaṁdi̍na̱ udi̍tā̱ sūrya̍sya |
5.069.03c rā̱ye mi̍trāvaruṇā sa̱rvatā̱teḻe̍ to̱kāya̱ tana̍yāya̱ śaṁ yoḥ ||

prā̱taḥ | de̱vīm | adi̍tim | jo̱ha̱vī̱mi̱ | ma̱dhyandi̍ne | ut-i̍tā | sūrya̍sya |
rā̱ye | mi̱trā̱va̱ru̱ṇā̱ | sa̱rva-tā̍tā | īḻe̍ | to̱kāya̍ | tana̍yāya | śam | yoḥ ||5.069.03||

5.069.04a yā dha̱rtārā̱ raja̍so roca̱nasyo̱tādi̱tyā di̱vyā pārthi̍vasya |
5.069.04c na vā̍ṁ de̱vā a̱mṛtā̱ ā mi̍nanti vra̱tāni̍ mitrāvaruṇā dhru̱vāṇi̍ ||

yā | dha̱rtārā̍ | raja̍saḥ | ro̱ca̱nasya̍ | u̱ta | ā̱di̱tyā | di̱vyā | pārthi̍vasya |
na | vā̱m | de̱vāḥ | a̱mṛtā̍ḥ | ā | mi̱na̱nti̱ | vra̱tāni̍ | mi̱trā̱va̱ru̱ṇā̱ | dhru̱vāṇi̍ ||5.069.04||


5.070.01a pu̱rū̱ruṇā̍ ci̱d dhy asty avo̍ nū̱naṁ vā̍ṁ varuṇa |
5.070.01c mitra̱ vaṁsi̍ vāṁ suma̱tim ||

pu̱ru̱-u̱ruṇā̍ | ci̱t | hi | asti̍ | ava̍ḥ | nū̱nam | vā̱m | va̱ru̱ṇa̱ |
mitra̍ | vaṁsi̍ | vā̱m | su̱-ma̱tim ||5.070.01||

5.070.02a tā vā̍ṁ sa̱myag a̍druhvā̱ṇeṣa̍m aśyāma̱ dhāya̍se |
5.070.02c va̱yaṁ te ru̍drā syāma ||

tā | vā̱m | sa̱myak | a̱dru̱hvā̱ṇā̱ | iṣa̍m | a̱śyā̱ma̱ | dhāya̍se |
va̱yam | te | ru̱drā̱ | syā̱ma̱ ||5.070.02||

5.070.03a pā̱taṁ no̍ rudrā pā̱yubhi̍r u̱ta trā̍yethāṁ sutrā̱trā |
5.070.03c tu̱ryāma̱ dasyū̍n ta̱nūbhi̍ḥ ||

pā̱tam | na̱ḥ | ru̱drā̱ | pā̱yu-bhi̍ḥ | u̱ta | trā̱ye̱thā̱m | su̱-trā̱trā |
tu̱ryāma̍ | dasyū̍n | ta̱nū-bhi̍ḥ ||5.070.03||

5.070.04a mā kasyā̍dbhutakratū ya̱kṣam bhu̍jemā ta̱nūbhi̍ḥ |
5.070.04c mā śeṣa̍sā̱ mā tana̍sā ||

mā | kasya̍ | a̱dbhu̱ta̱kra̱tū̱ itya̍dbhuta-kratū | ya̱kṣam | bhu̱je̱ma̱ | ta̱nūbhi̍ḥ |
mā | śeṣa̍sā | mā | tana̍sā ||5.070.04||


5.071.01a ā no̍ gantaṁ riśādasā̱ varu̍ṇa̱ mitra̍ ba̱rhaṇā̍ |
5.071.01c upe̱maṁ cāru̍m adhva̱ram ||

ā | na̱ḥ | ga̱nta̱m | ri̱śā̱da̱sā̱ | varu̍ṇa | mitra̍ | ba̱rhaṇā̍ |
upa̍ | i̱mam | cāru̍m | a̱dhva̱ram ||5.071.01||

5.071.02a viśva̍sya̱ hi pra̍cetasā̱ varu̍ṇa̱ mitra̱ rāja̍thaḥ |
5.071.02c ī̱śā̱nā pi̍pyata̱ṁ dhiya̍ḥ ||

viśva̍sya | hi | pra̱-ce̱ta̱sā̱ | varu̍ṇa | mitra̍ | rāja̍thaḥ |
ī̱śā̱nā | pi̱pya̱ta̱m | dhiya̍ḥ ||5.071.02||

5.071.03a upa̍ naḥ su̱tam ā ga̍ta̱ṁ varu̍ṇa̱ mitra̍ dā̱śuṣa̍ḥ |
5.071.03c a̱sya soma̍sya pī̱taye̍ ||

upa̍ | na̱ḥ | su̱tam | ā | ga̱ta̱m | varu̍ṇa | mitra̍ | dā̱śuṣa̍ḥ |
a̱sya | soma̍sya | pī̱taye̍ ||5.071.03||


5.072.01a ā mi̱tre varu̍ṇe va̱yaṁ gī̱rbhir ju̍humo atri̱vat |
5.072.01c ni ba̱rhiṣi̍ sadata̱ṁ soma̍pītaye ||

ā | mi̱tre | varu̍ṇe | va̱yam | gī̱ḥ-bhiḥ | ju̱hu̱ma̱ḥ | a̱tri̱-vat |
ni | ba̱rhiṣi̍ | sa̱da̱ta̱m | soma̍-pītaye ||5.072.01||

5.072.02a vra̱tena̍ stho dhru̱vakṣe̍mā̱ dharma̍ṇā yāta̱yajja̍nā |
5.072.02c ni ba̱rhiṣi̍ sadata̱ṁ soma̍pītaye ||

vra̱tena̍ | stha̱ḥ | dhru̱va-kṣe̍mā | dharma̍ṇā | yā̱ta̱yat-ja̍nā |
ni | ba̱rhiṣi̍ | sa̱da̱ta̱m | soma̍-pītaye ||5.072.02||

5.072.03a mi̱traś ca̍ no̱ varu̍ṇaś ca ju̱ṣetā̍ṁ ya̱jñam i̱ṣṭaye̍ |
5.072.03c ni ba̱rhiṣi̍ sadatā̱ṁ soma̍pītaye ||

mi̱traḥ | ca̱ | na̱ḥ | varu̍ṇaḥ | ca̱ | ju̱ṣetā̍m | ya̱jñam | i̱ṣṭaye̍ |
ni | ba̱rhiṣi̍ | sa̱da̱ta̱m | soma̍-pītaye ||5.072.03||


5.073.01a yad a̱dya sthaḥ pa̍rā̱vati̱ yad a̍rvā̱vaty a̍śvinā |
5.073.01c yad vā̍ pu̱rū pu̍rubhujā̱ yad a̱ntari̍kṣa̱ ā ga̍tam ||

yat | a̱dya | stha̱ḥ | pā̱rā̱-vati̍ | yat | ā̱rvā̱-vati̍ | a̱śvi̱nā̱ |
yat | vā̱ | pu̱ru | pu̱ru̱-bhu̱jā̱ | yat | a̱ntari̍kṣe | ā | ga̱ta̱m ||5.073.01||

5.073.02a i̱ha tyā pu̍ru̱bhūta̍mā pu̱rū daṁsā̍ṁsi̱ bibhra̍tā |
5.073.02c va̱ra̱syā yā̱my adhri̍gū hu̱ve tu̱viṣṭa̍mā bhu̱je ||

i̱ha | tyā | pu̱ru̱-bhūta̍mā | pu̱ru | daṁsā̍ṁsi | bibhra̍tā |
va̱ra̱syā | yā̱mi̱ | adhri̍gū̱ ityadhri̍-gū | hu̱ve | tu̱viḥ-ta̍mā | bhu̱je ||5.073.02||

5.073.03a ī̱rmānyad vapu̍ṣe̱ vapu̍ś ca̱kraṁ ratha̍sya yemathuḥ |
5.073.03c pary a̱nyā nāhu̍ṣā yu̱gā ma̱hnā rajā̍ṁsi dīyathaḥ ||

ī̱rmā | a̱nyat | vapu̍ṣe | vapu̍ḥ | ca̱kram | ratha̍sya | ye̱ma̱thu̱ḥ |
pari̍ | a̱nyā | nāhu̍ṣā | yu̱gā | ma̱hnā | rajā̍ṁsi | dī̱ya̱tha̱ḥ ||5.073.03||

5.073.04a tad ū̱ ṣu vā̍m e̱nā kṛ̱taṁ viśvā̱ yad vā̱m anu̱ ṣṭave̍ |
5.073.04c nānā̍ jā̱tāv a̍re̱pasā̱ sam a̱sme bandhu̱m eya̍thuḥ ||

tat | ū̱m̐ iti̍ | su | vā̱m | e̱nā | kṛ̱tam | viśvā̍ | yat | vā̱m | anu̍ | stave̍ |
nānā̍ | jā̱tau | a̱re̱pasā̍ | sam | a̱sme iti̍ | bandhu̍m | ā | ī̱ya̱thu̱ḥ ||5.073.04||

5.073.05a ā yad vā̍ṁ sū̱ryā ratha̱ṁ tiṣṭha̍d raghu̱ṣyada̱ṁ sadā̍ |
5.073.05c pari̍ vām aru̱ṣā vayo̍ ghṛ̱ṇā va̍ranta ā̱tapa̍ḥ ||

ā | yat | vā̱m | sū̱ryā | ratha̍m | tiṣṭha̍t | ra̱ghu̱-syada̍m | sadā̍ |
pari̍ | vā̱m | a̱ru̱ṣāḥ | vaya̍ḥ | ghṛ̱ṇā | va̱ra̱nte̱ | ā̱tapa̍ḥ ||5.073.05||

5.073.06a yu̱vor atri̍ś ciketati̱ narā̍ su̱mnena̱ ceta̍sā |
5.073.06c gha̱rmaṁ yad vā̍m are̱pasa̱ṁ nāsa̍tyā̱snā bhu̍ra̱ṇyati̍ ||

yu̱voḥ | atri̍ḥ | ci̱ke̱ta̱ti̱ | narā̍ | su̱mnena̍ | ceta̍sā |
gha̱rmam | yat | vā̱m | a̱re̱pasa̍m | nāsa̍tyā | ā̱snā | bhu̱ra̱ṇyati̍ ||5.073.06||

5.073.07a u̱gro vā̍ṁ kaku̱ho ya̱yiḥ śṛ̱ṇve yāme̍ṣu saṁta̱niḥ |
5.073.07c yad vā̱ṁ daṁso̍bhir aśvi̱nātri̍r narāva̱varta̍ti ||

u̱graḥ | vā̱m | ka̱ku̱haḥ | ya̱yiḥ | śṛ̱ṇve | yāme̍ṣu | sa̱m-ta̱niḥ |
yat | vā̱m | daṁsa̍ḥ-bhiḥ | a̱śvi̱nā̱ | atri̍ḥ | na̱rā̱ | ā̱-va̱varta̍ti ||5.073.07||

5.073.08a madhva̍ ū̱ ṣu ma̍dhūyuvā̱ rudrā̱ siṣa̍kti pi̱pyuṣī̍ |
5.073.08c yat sa̍mu̱drāti̱ parṣa̍thaḥ pa̱kvāḥ pṛkṣo̍ bharanta vām ||

madhva̍ḥ | ū̱m̐ iti̍ | su | ma̱dhu̱-yu̱vā̱ | rudrā̍ | sisa̍kti | pi̱pyuṣī̍ |
yat | sa̱mu̱drā | ati̍ | parṣa̍thaḥ | pa̱kvāḥ | pṛkṣa̍ḥ | bha̱ra̱nta̱ | vā̱m ||5.073.08||

5.073.09a sa̱tyam id vā u̍ aśvinā yu̱vām ā̍hur mayo̱bhuvā̍ |
5.073.09c tā yāma̍n yāma̱hūta̍mā̱ yāma̱nn ā mṛ̍ḻa̱yatta̍mā ||

sa̱tyam | it | vai | ū̱m̐ iti̍ | a̱śvi̱nā̱ | yu̱vām | ā̱hu̱ḥ | ma̱ya̱ḥ-bhuvā̍ |
tā | yāma̍n | yā̱ma̱-hūta̍mā | yāma̍n | ā | mṛ̱ḻa̱yat-ta̍mā ||5.073.09||

5.073.10a i̱mā brahmā̍ṇi̱ vardha̍nā̱śvibhyā̍ṁ santu̱ śaṁta̍mā |
5.073.10c yā takṣā̍ma̱ rathā̍m̐ i̱vāvo̍cāma bṛ̱han nama̍ḥ ||

i̱mā | brahmā̍ṇi | vardha̍nā | a̱śvi-bhyā̍m | sa̱ntu̱ | śam-ta̍mā |
yā | takṣā̍ma | rathā̍n-iva | avo̍cāma | bṛ̱hat | nama̍ḥ ||5.073.10||


5.074.01a kūṣṭho̍ devāv aśvinā̱dyā di̱vo ma̍nāvasū |
5.074.01c tac chra̍vatho vṛṣaṇvasū̱ atri̍r vā̱m ā vi̍vāsati ||

kū-stha̍ḥ | de̱vau̱ | a̱śvi̱nā̱ | a̱dya | di̱vaḥ | ma̱nā̱va̱sū̱ iti̍ |
tat | śra̱va̱tha̱ḥ | vṛ̱ṣa̱ṇva̱sū̱ iti̍ vṛṣaṇ-vasū | atri̍ḥ | vā̱m | ā | vi̱vā̱sa̱ti̱ ||5.074.01||

5.074.02a kuha̱ tyā kuha̱ nu śru̱tā di̱vi de̱vā nāsa̍tyā |
5.074.02c kasmi̱nn ā ya̍tatho̱ jane̱ ko vā̍ṁ na̱dīnā̱ṁ sacā̍ ||

kuha̍ | tyā | kuha̍ | nu | śru̱tā | di̱vi | de̱vā | nāsa̍tyā |
kasmi̍n | ā | ya̱ta̱tha̱ḥ | jane̍ | kaḥ | vā̱m | na̱dīnā̍m | sacā̍ ||5.074.02||

5.074.03a kaṁ yā̍tha̱ḥ kaṁ ha̍ gacchatha̱ḥ kam acchā̍ yuñjāthe̱ ratha̍m |
5.074.03c kasya̱ brahmā̍ṇi raṇyatho va̱yaṁ vā̍m uśmasī̱ṣṭaye̍ ||

kam | yā̱tha̱ḥ | kam | ha̱ | ga̱ccha̱tha̱ḥ | kam | accha̍ | yu̱ñjā̱the̱ iti̍ | ratha̍m |
kasya̍ | brahmā̍ṇi | ra̱ṇya̱tha̱ḥ | va̱yam | vā̱m | u̱śma̱si̱ | i̱ṣṭaye̍ ||5.074.03||

5.074.04a pau̱raṁ ci̱d dhy u̍da̱pruta̱m paura̍ pau̱rāya̱ jinva̍thaḥ |
5.074.04c yad ī̍ṁ gṛbhī̱tatā̍taye si̱ṁham i̍va dru̱has pa̱de ||

pau̱ram | ci̱t | hi | u̱da̱-pruta̍m | paura̍ | pau̱rāya̍ | jinva̍thaḥ |
yat | ī̱m | gṛ̱bhī̱ta-tā̍taye | si̱ṁham-i̍va | dru̱haḥ | pa̱de ||5.074.04||

5.074.05a pra cyavā̍nāj juju̱ruṣo̍ va̱vrim atka̱ṁ na mu̍ñcathaḥ |
5.074.05c yuvā̱ yadī̍ kṛ̱thaḥ puna̱r ā kāma̍m ṛṇve va̱dhva̍ḥ ||

pra | cyavā̍nāt | ju̱ju̱ruṣa̍ḥ | va̱vrim | atka̍m | na | mu̱ñca̱tha̱ḥ |
yuvā̍ | yadi̍ | kṛ̱thaḥ | puna̍ḥ | ā | kāma̍m | ṛ̱ṇve̱ | va̱dhva̍ḥ ||5.074.05||

5.074.06a asti̱ hi vā̍m i̱ha sto̱tā smasi̍ vāṁ sa̱ṁdṛśi̍ śri̱ye |
5.074.06c nū śru̱tam ma̱ ā ga̍ta̱m avo̍bhir vājinīvasū ||

asti̍ | hi | vā̱m | i̱ha | sto̱tā | smasi̍ | vā̱m | sa̱m-dṛśi̍ | śri̱ye |
nu | śru̱tam | me̱ | ā | ga̱ta̱m | ava̍ḥ-bhiḥ | vā̱ji̱nī̱va̱sū̱ iti̍ vājinī-vasū ||5.074.06||

5.074.07a ko vā̍m a̱dya pu̍rū̱ṇām ā va̍vne̱ martyā̍nām |
5.074.07c ko vipro̍ vipravāhasā̱ ko ya̱jñair vā̍jinīvasū ||

kaḥ | vā̱m | a̱dya | pu̱rū̱ṇām | ā | va̱vne̱ | martyā̍nām |
kaḥ | vipra̍ḥ | vi̱pra̱-vā̱ha̱sā̱ | kaḥ | ya̱jñaiḥ | vā̱ji̱nī̱va̱sū̱ iti̍ vājinī-vasū ||5.074.07||

5.074.08a ā vā̱ṁ ratho̱ rathā̍nā̱ṁ yeṣṭho̍ yātv aśvinā |
5.074.08c pu̱rū ci̍d asma̱yus ti̱ra ā̍ṅgū̱ṣo martye̱ṣv ā ||

ā | vā̱m | ratha̍ḥ | rathā̍nām | yeṣṭha̍ḥ | yā̱tu̱ | a̱śvi̱nā̱ |
pu̱ru | ci̱t | a̱sma̱-yuḥ | ti̱raḥ | ā̱ṅgū̱ṣaḥ | martye̍ṣu | ā ||5.074.08||

5.074.09a śam ū̱ ṣu vā̍m madhūyuvā̱smāka̍m astu carkṛ̱tiḥ |
5.074.09c a̱rvā̱cī̱nā vi̍cetasā̱ vibhi̍ḥ śye̱neva̍ dīyatam ||

śam | ū̱m̐ iti̍ | su | vā̱m | ma̱dhu̱-yu̱vā̱ | a̱smāka̍m | a̱stu̱ | ca̱rkṛ̱tiḥ |
a̱rvā̱cī̱nā | vi̱-ce̱ta̱sā̱ | vi-bhi̍ḥ | śye̱nā-i̍va | dī̱ya̱ta̱m ||5.074.09||

5.074.10a aśvi̍nā̱ yad dha̱ karhi̍ cic chuśrū̱yāta̍m i̱maṁ hava̍m |
5.074.10c vasvī̍r ū̱ ṣu vā̱m bhuja̍ḥ pṛ̱ñcanti̱ su vā̱m pṛca̍ḥ ||

aśvi̍nā | yat | ha̱ | karhi̍ | ci̱t | śu̱śru̱yāta̍m | i̱mam | hava̍m |
vasvī̍ḥ | ū̱m̐ iti̍ | su | vā̱m | bhuja̍ḥ | pṛ̱ñcanti̍ | su | vā̱m | pṛca̍ḥ ||5.074.10||


5.075.01a prati̍ pri̱yata̍ma̱ṁ ratha̱ṁ vṛṣa̍ṇaṁ vasu̱vāha̍nam |
5.075.01c sto̱tā vā̍m aśvinā̱v ṛṣi̱ḥ stome̍na̱ prati̍ bhūṣati̱ mādhvī̱ mama̍ śruta̱ṁ hava̍m ||

prati̍ | pri̱ya-ta̍mam | ratha̍m | vṛṣa̍ṇam | va̱su̱-vāha̍nam |
sto̱tā | vā̱m | a̱śvi̱nau̱ | ṛṣi̍ḥ | stome̍na | prati̍ | bhū̱ṣa̱ti̱ | mādhvī̱ iti̍ | mama̍ | śruta̍m | hava̍m ||5.075.01||

5.075.02a a̱tyāyā̍tam aśvinā ti̱ro viśvā̍ a̱haṁ sanā̍ |
5.075.02c dasrā̱ hira̍ṇyavartanī̱ suṣu̍mnā̱ sindhu̍vāhasā̱ mādhvī̱ mama̍ śruta̱ṁ hava̍m ||

a̱ti̱-āyā̍tam | a̱śvi̱nā̱ | ti̱raḥ | viśvā̍ḥ | a̱ham | sanā̍ |
dasrā̍ | hira̍ṇya-vartanī̱ iti̱ hira̍ṇya-vartanī | su-su̍mnā | sindhu̍-vāhasā | mādhvī̱ iti̍ | mama̍ | śruta̍m | hava̍m ||5.075.02||

5.075.03a ā no̱ ratnā̍ni̱ bibhra̍tā̱v aśvi̍nā̱ gaccha̍taṁ yu̱vam |
5.075.03c rudrā̱ hira̍ṇyavartanī juṣā̱ṇā vā̍jinīvasū̱ mādhvī̱ mama̍ śruta̱ṁ hava̍m ||

ā | na̱ḥ | ratnā̍ni | bibhra̍tau | aśvi̍nā | gaccha̍tam | yu̱vam |
rudrā̍ | hira̍ṇya-vartanī̱ iti̱ hira̍ṇya-vartanī | ju̱ṣā̱ṇā | vā̱ji̱nī̱va̱sū̱ iti̍ vājinī-vasū | mādhvī̱ iti̍ | mama̍ | śruta̍m | hava̍m ||5.075.03||

5.075.04a su̱ṣṭubho̍ vāṁ vṛṣaṇvasū̱ rathe̱ vāṇī̱cy āhi̍tā |
5.075.04c u̱ta vā̍ṁ kaku̱ho mṛ̱gaḥ pṛkṣa̍ḥ kṛṇoti vāpu̱ṣo mādhvī̱ mama̍ śruta̱ṁ hava̍m ||

su̱-stubha̍ḥ | vā̱m | vṛ̱ṣa̱ṇva̱sū̱ iti̍ vṛṣaṇ-vasū | rathe̍ | vāṇī̍cī | āhi̍tā |
u̱ta | vā̱m | ka̱ku̱haḥ | mṛ̱gaḥ | pṛkṣa̍ḥ | kṛ̱ṇo̱ti̱ | vā̱pu̱ṣaḥ | mādhvī̱ iti̍ | mama̍ | śruta̍m | hava̍m ||5.075.04||

5.075.05a bo̱dhinma̍nasā ra̱thye̍ṣi̱rā ha̍vana̱śrutā̍ |
5.075.05c vibhi̱ś cyavā̍nam aśvinā̱ ni yā̍tho̱ adva̍yāvina̱m mādhvī̱ mama̍ śruta̱ṁ hava̍m ||

bo̱dhit-ma̍nasā | ra̱thyā̍ | i̱ṣi̱rā | ha̱va̱na̱-śrutā̍ |
vi-bhi̍ḥ | cyavā̍nam | a̱śvi̱nā̱ | ni | yā̱tha̱ḥ | adva̍yāvinam | mādhvī̱ iti̍ | mama̍ | śruta̍m | hava̍m ||5.075.05||

5.075.06a ā vā̍ṁ narā mano̱yujo 'śvā̍saḥ pruṣi̱tapsa̍vaḥ |
5.075.06c vayo̍ vahantu pī̱taye̍ sa̱ha su̱mnebhi̍r aśvinā̱ mādhvī̱ mama̍ śruta̱ṁ hava̍m ||

ā | vā̱m | na̱rā̱ | ma̱na̱ḥ-yuja̍ḥ | aśvā̍saḥ | pru̱ṣi̱ta-psa̍vaḥ |
vaya̍ḥ | va̱ha̱ntu̱ | pī̱taye̍ | sa̱ha | su̱mnebhi̍ḥ | a̱śvi̱nā̱ | mādhvī̱ iti̍ | mama̍ | śruta̍m | hava̍m ||5.075.06||

5.075.07a aśvi̍nā̱v eha ga̍cchata̱ṁ nāsa̍tyā̱ mā vi ve̍natam |
5.075.07c ti̱raś ci̍d arya̱yā pari̍ va̱rtir yā̍tam adābhyā̱ mādhvī̱ mama̍ śruta̱ṁ hava̍m ||

aśvi̍nau | ā | i̱ha | ga̱ccha̱ta̱m | nāsa̍tyā | mā | vi | ve̱na̱ta̱m |
ti̱raḥ | ci̱t | a̱rya̱-yā | pari̍ | va̱rtiḥ | yā̱ta̱m | a̱dā̱bhyā̱ | mādhvī̱ iti̍ | mama̍ | śruta̍m | hava̍m ||5.075.07||

5.075.08a a̱smin ya̱jñe a̍dābhyā jari̱tāra̍ṁ śubhas patī |
5.075.08c a̱va̱syum a̍śvinā yu̱vaṁ gṛ̱ṇanta̱m upa̍ bhūṣatho̱ mādhvī̱ mama̍ śruta̱ṁ hava̍m ||

a̱smin | ya̱jñe | a̱dā̱bhyā̱ | ja̱ri̱tāra̍m | śu̱bha̱ḥ | pa̱tī̱ iti̍ |
a̱va̱syum | a̱śvi̱nā̱ | yu̱vam | gṛ̱ṇanta̍m | upa̍ | bhū̱ṣa̱tha̱ḥ | mādhvī̱ iti̍ | mama̍ | śruta̍m | hava̍m ||5.075.08||

5.075.09a abhū̍d u̱ṣā ruśa̍tpaśu̱r āgnir a̍dhāyy ṛ̱tviya̍ḥ |
5.075.09c ayo̍ji vāṁ vṛṣaṇvasū̱ ratho̍ dasrā̱v ama̍rtyo̱ mādhvī̱ mama̍ śruta̱ṁ hava̍m ||

abhū̍t | u̱ṣāḥ | ruśa̍t-paśuḥ | ā | a̱gniḥ | a̱dhā̱yi̱ | ṛ̱tviya̍ḥ |
ayo̍ji | vā̱m | vṛ̱ṣa̱ṇva̱sū̱ iti̍ vṛṣaṇ-vasū | ratha̍ḥ | da̱srau̱ | ama̍rtyaḥ | mādhvī̱ iti̍ | mama̍ | śruta̍m | hava̍m ||5.075.09||


5.076.01a ā bhā̍ty a̱gnir u̱ṣasā̱m anī̍ka̱m ud viprā̍ṇāṁ deva̱yā vāco̍ asthuḥ |
5.076.01c a̱rvāñcā̍ nū̱naṁ ra̍thye̱ha yā̍tam pīpi̱vāṁsa̍m aśvinā gha̱rmam accha̍ ||

ā | bhā̱ti̱ | a̱gniḥ | u̱ṣasā̍m | anī̍kam | ut | viprā̍ṇām | de̱va̱-yāḥ | vāca̍ḥ | a̱sthu̱ḥ |
a̱rvāñcā̍ | nū̱nam | ra̱thyā̱ | i̱ha | yā̱ta̱m | pī̱pi̱-vāṁsa̍m | a̱śvi̱nā̱ | gha̱rmam | accha̍ ||5.076.01||

5.076.02a na sa̍ṁskṛ̱tam pra mi̍mīto̱ gami̱ṣṭhānti̍ nū̱nam a̱śvinopa̍stute̱ha |
5.076.02c divā̍bhipi̱tve 'va̱sāga̍miṣṭhā̱ praty ava̍rtiṁ dā̱śuṣe̱ śambha̍viṣṭhā ||

na | sa̱ṁskṛ̱tam | pra | mi̱mī̱ta̱ḥ | gami̍ṣṭhā | anti̍ | nū̱nam | a̱śvinā̍ | upa̍-stutā | i̱ha |
di̱vā̍ | a̱bhi̱-pi̱tve | ava̍sā | ā-ga̍miṣṭhā | prati̍ | ava̍rtim | dā̱śuṣe̍ | śam-bha̍viṣṭhā ||5.076.02||

5.076.03a u̱tā yā̍taṁ saṁga̱ve prā̱tar ahno̍ ma̱dhyaṁdi̍na̱ udi̍tā̱ sūrya̍sya |
5.076.03c divā̱ nakta̱m ava̍sā̱ śaṁta̍mena̱ nedānī̍m pī̱tir a̱śvinā ta̍tāna ||

u̱ta | ā | yā̱ta̱m | sa̱m-ga̱ve | prā̱taḥ | ahna̍ḥ | ma̱dhyandi̍ne | ut-i̍tā | sūrya̍sya |
divā̍ | nakta̍m | ava̍sā | śam-ta̍mena | na | i̱dānī̍m | pī̱tiḥ | a̱śvinā̍ | ā | ta̱tā̱na̱ ||5.076.03||

5.076.04a i̱daṁ hi vā̍m pra̱divi̱ sthāna̱m oka̍ i̱me gṛ̱hā a̍śvine̱daṁ du̍ro̱ṇam |
5.076.04c ā no̍ di̱vo bṛ̍ha̱taḥ parva̍tā̱d ādbhyo yā̍ta̱m iṣa̱m ūrja̱ṁ vaha̍ntā ||

i̱dam | hi | vā̱m | pra̱-divi̍ | sthāna̍m | oka̍ḥ | i̱me | gṛ̱hāḥ | a̱śvi̱nā̱ | i̱dam | du̍ro̱ṇam |
ā | na̱ḥ | di̱vaḥ | bṛ̱ha̱taḥ | parva̍tāt | ā | a̱t-bhyaḥ | yā̱ta̱m | iṣa̍m | ūrja̍m | vaha̍ntā ||5.076.04||

5.076.05a sam a̱śvino̱r ava̍sā̱ nūta̍nena mayo̱bhuvā̍ su̱praṇī̍tī gamema |
5.076.05c ā no̍ ra̱yiṁ va̍hata̱m ota vī̱rān ā viśvā̍ny amṛtā̱ saubha̍gāni ||

sam | a̱śvino̍ḥ | ava̍sā | nūta̍nena | ma̱ya̱ḥ-bhuvā̍ | su̱-pranī̍tī | ga̱me̱ma̱ |
ā | na̱ḥ | ra̱yim | va̱ha̱ta̱m | ā | u̱ta | vī̱rān | ā | viśvā̍ni | a̱mṛ̱tā̱ | saubha̍gāni ||5.076.05||


5.077.01a prā̱ta̱ryāvā̍ṇā pratha̱mā ya̍jadhvam pu̱rā gṛdhrā̱d ara̍ruṣaḥ pibātaḥ |
5.077.01c prā̱tar hi ya̱jñam a̱śvinā̍ da̱dhāte̱ pra śa̍ṁsanti ka̱vaya̍ḥ pūrva̱bhāja̍ḥ ||

prā̱ta̱ḥ-yāvā̍nā | pra̱tha̱mā | ya̱ja̱dhva̱m | pu̱rā | gṛdhrā̍t | ara̍ruṣaḥ | pi̱bā̱ta̱ḥ |
prā̱taḥ | hi | ya̱jñam | a̱śvinā̍ | da̱dhāte̱ iti̍ | pra | śa̱ṁsa̱nti̱ | ka̱vaya̍ḥ | pū̱rva̱-bhāja̍ḥ ||5.077.01||

5.077.02a prā̱tar ya̍jadhvam a̱śvinā̍ hinota̱ na sā̱yam a̍sti deva̱yā aju̍ṣṭam |
5.077.02c u̱tānyo a̱smad ya̍jate̱ vi cāva̱ḥ pūrva̍ḥ-pūrvo̱ yaja̍māno̱ vanī̍yān ||

prā̱taḥ | ya̱ja̱dhva̱m | a̱śvinā̍ | hi̱no̱ta̱ | na | sā̱yam | a̱sti̱ | de̱va̱-yāḥ | aju̍ṣṭam |
u̱ta | a̱nyaḥ | a̱smat | ya̱ja̱te̱ | vi | ca̱ | āva̱ḥ | pūrva̍ḥ-pūrvaḥ | yaja̍mānaḥ | vanī̍yān ||5.077.02||

5.077.03a hira̍ṇyatva̱ṅ madhu̍varṇo ghṛ̱tasnu̱ḥ pṛkṣo̱ vaha̱nn ā ratho̍ vartate vām |
5.077.03c mano̍javā aśvinā̱ vāta̍raṁhā̱ yenā̍tiyā̱tho du̍ri̱tāni̱ viśvā̍ ||

hira̍ṇya-tvak | madhu̍-varṇaḥ | ghṛ̱ta-snuḥ | pṛkṣa̍ḥ | vaha̍n | ā | ratha̍ḥ | va̱rta̱te̱ | vā̱m |
mana̍ḥ-javāḥ | a̱śvi̱nā̱ | vāta̍-raṁhāḥ | yena̍ | a̱ti̱-yā̱thaḥ | du̱ḥ-ri̱tāni̍ | viśvā̍ ||5.077.03||

5.077.04a yo bhūyi̍ṣṭha̱ṁ nāsa̍tyābhyāṁ vi̱veṣa̱ cani̍ṣṭham pi̱tvo rara̍te vibhā̱ge |
5.077.04c sa to̱kam a̍sya pīpara̱c chamī̍bhi̱r anū̍rdhvabhāsa̱ḥ sada̱m it tu̍turyāt ||

yaḥ | bhūyi̍ṣṭham | nāsa̍tyābhyām | vi̱veṣa̍ | cani̍ṣṭham | pi̱tvaḥ | rara̍te | vi̱-bhā̱ge |
saḥ | to̱kam | a̱sya̱ | pī̱pa̱ra̱t | śamī̍bhiḥ | anū̍rdhva-bhāsaḥ | sada̍m | it | tu̱tu̱ryā̱t ||5.077.04||

5.077.05a sam a̱śvino̱r ava̍sā̱ nūta̍nena mayo̱bhuvā̍ su̱praṇī̍tī gamema |
5.077.05c ā no̍ ra̱yiṁ va̍hata̱m ota vī̱rān ā viśvā̍ny amṛtā̱ saubha̍gāni ||

sam | a̱śvino̍ḥ | ava̍sā | nūta̍nena | ma̱ya̱ḥ-bhuvā̍ | su̱-pranī̍tī | ga̱me̱ma̱ |
ā | na̱ḥ | ra̱yim | va̱ha̱ta̱m | ā | u̱ta | vī̱rān | ā | viśvā̍ni | a̱mṛ̱tā̱ | saubha̍gāni ||5.077.05||


5.078.01a aśvi̍nā̱v eha ga̍cchata̱ṁ nāsa̍tyā̱ mā vi ve̍natam |
5.078.01c ha̱ṁsāv i̍va patata̱m ā su̱tām̐ upa̍ ||

aśvi̍nau | ā | i̱ha | ga̱ccha̱ta̱m | nāsa̍tyā | mā | vi | ve̱na̱ta̱m |
ha̱ṁsau-i̍va | pa̱ta̱ta̱m | ā | su̱tān | upa̍ ||5.078.01||

5.078.02a aśvi̍nā hari̱ṇāv i̍va gau̱rāv i̱vānu̱ yava̍sam |
5.078.02c ha̱ṁsāv i̍va patata̱m ā su̱tām̐ upa̍ ||

aśvi̍nā | ha̱ri̱ṇau-i̍va | gau̱rau-i̍va | anu̍ | yava̍sam |
ha̱ṁsau-i̍va | pa̱ta̱ta̱m | ā | su̱tān | upa̍ ||5.078.02||

5.078.03a aśvi̍nā vājinīvasū ju̱ṣethā̍ṁ ya̱jñam i̱ṣṭaye̍ |
5.078.03c ha̱ṁsāv i̍va patata̱m ā su̱tām̐ upa̍ ||

aśvi̍nā | vā̱ji̱nī̱va̱sū̱ iti̍ vājinī-vasū | ju̱ṣethā̍m | ya̱jñam | i̱ṣṭaye̍ |
ha̱ṁsau-i̍va | pa̱ta̱ta̱m | ā | su̱tān | upa̍ ||5.078.03||

5.078.04a atri̱r yad vā̍m ava̱roha̍nn ṛ̱bīsa̱m ajo̍havī̱n nādha̍māneva̱ yoṣā̍ |
5.078.04c śye̱nasya̍ ci̱j java̍sā̱ nūta̍ne̱nāga̍cchatam aśvinā̱ śaṁta̍mena ||

atri̍ḥ | yat | vā̱m | a̱va̱-roha̍n | ṛ̱bīsa̍m | ajo̍havīt | nādha̍mānā-iva | yoṣā̍ |
śye̱nasya̍ | ci̱t | java̍sā | nūta̍nena | ā | a̱ga̱ccha̱ta̱m | a̱śvi̱nā̱ | śam-ta̍mena ||5.078.04||

5.078.05a vi ji̍hīṣva vanaspate̱ yoni̱ḥ sūṣya̍ntyā iva |
5.078.05c śru̱tam me̍ aśvinā̱ hava̍ṁ sa̱ptava̍dhriṁ ca muñcatam ||

vi | ji̱hī̱ṣva̱ | va̱na̱spa̱te̱ | yoni̍ḥ | sūṣya̍ntyāḥ-iva |
śru̱tam | me̱ | a̱śvi̱nā̱ | hava̍m | sa̱pta-va̍dhrim | ca̱ | mu̱ñca̱ta̱m ||5.078.05||

5.078.06a bhī̱tāya̱ nādha̍mānāya̱ ṛṣa̍ye sa̱ptava̍dhraye |
5.078.06c mā̱yābhi̍r aśvinā yu̱vaṁ vṛ̱kṣaṁ saṁ ca̱ vi cā̍cathaḥ ||

bhī̱tāya̍ | nādha̍mānāya | ṛṣa̍ye | sa̱pta-va̍dhraye |
mā̱yābhi̍ḥ | a̱śvi̱nā̱ | yu̱vam | vṛ̱kṣam | sam | ca̱ | vi | ca̱ | a̱ca̱tha̱ḥ ||5.078.06||

5.078.07a yathā̱ vāta̍ḥ puṣka̱riṇī̍ṁ sami̱ṅgaya̍ti sa̱rvata̍ḥ |
5.078.07c e̱vā te̱ garbha̍ ejatu ni̱raitu̱ daśa̍māsyaḥ ||

yathā̍ | vāta̍ḥ | pu̱ṣka̱riṇī̍m | sa̱m-i̱ṅgaya̍ti | sa̱rvata̍ḥ |
e̱va | te̱ | garbha̍ḥ | e̱ja̱tu̱ | ni̱ḥ-aitu̍ | daśa̍-māsyaḥ ||5.078.07||

5.078.08a yathā̱ vāto̱ yathā̱ vana̱ṁ yathā̍ samu̱dra eja̍ti |
5.078.08c e̱vā tvaṁ da̍śamāsya sa̱hāve̍hi ja̱rāyu̍ṇā ||

yathā̍ | vāta̍ḥ | yathā̍ | vana̍m | yathā̍ | sa̱mu̱draḥ | eja̍ti |
e̱va | tvam | da̱śa̱-mā̱sya̱ | sa̱ha | ava̍ | i̱hi̱ | ja̱rāyu̍ṇā ||5.078.08||

5.078.09a daśa̱ māsā̍ñ chaśayā̱naḥ ku̍mā̱ro adhi̍ mā̱tari̍ |
5.078.09c ni̱raitu̍ jī̱vo akṣa̍to jī̱vo jīva̍ntyā̱ adhi̍ ||

daśa̍ | māsā̍n | śa̱śa̱yā̱naḥ | ku̱mā̱raḥ | adhi̍ | mā̱tari̍ |
ni̱ḥ-aitu̍ | jī̱vaḥ | akṣa̍taḥ | jī̱vaḥ | jīva̍ntyā | adhi̍ ||5.078.09||


5.079.01a ma̱he no̍ a̱dya bo̍dha̱yoṣo̍ rā̱ye di̱vitma̍tī |
5.079.01c yathā̍ cin no̱ abo̍dhayaḥ sa̱tyaśra̍vasi vā̱yye sujā̍te̱ aśva̍sūnṛte ||

ma̱he | na̱ḥ | a̱dya | bo̱dha̱ya̱ | uṣa̍ḥ | rā̱ye | di̱vitma̍tī |
yathā̍ | ci̱t | na̱ḥ | abo̍dhayaḥ | sa̱tya-śra̍vasi | vā̱yye | su-jā̍te | aśva̍-sūnṛte ||5.079.01||

5.079.02a yā su̍nī̱the śau̍cadra̱the vy auccho̍ duhitar divaḥ |
5.079.02c sā vy u̍ccha̱ sahī̍yasi sa̱tyaśra̍vasi vā̱yye sujā̍te̱ aśva̍sūnṛte ||

yā | su̱-nī̱the | śau̱ca̱t-ra̱the | vi | auccha̍ḥ | du̱hi̱ta̱ḥ | di̱va̱ḥ |
sā | vi | u̱ccha̱ | sahī̍yasi | sa̱tya-śra̍vasi | vā̱yye | su-jā̍te | aśva̍-sūnṛte ||5.079.02||

5.079.03a sā no̍ a̱dyābha̱radva̍su̱r vy u̍cchā duhitar divaḥ |
5.079.03c yo vy auccha̱ḥ sahī̍yasi sa̱tyaśra̍vasi vā̱yye sujā̍te̱ aśva̍sūnṛte ||

sā | na̱ḥ | a̱dya | ā̱bha̱rat-va̍suḥ | vi | u̱ccha̱ | du̱hi̱ta̱ḥ | di̱va̱ḥ |
yo iti̍ | vi | auccha̍ḥ | sahī̍yasi | sa̱tya-śra̍vasi | vā̱yye | su-jā̍te | aśva̍-sūnṛte ||5.079.03||

5.079.04a a̱bhi ye tvā̍ vibhāvari̱ stomai̍r gṛ̱ṇanti̱ vahna̍yaḥ |
5.079.04c ma̱ghair ma̍ghoni su̱śriyo̱ dāma̍nvantaḥ surā̱taya̱ḥ sujā̍te̱ aśva̍sūnṛte ||

a̱bhi | ye | tvā̱ | vi̱bhā̱-va̱ri̱ | stomai̍ḥ | gṛ̱ṇanti̍ | vahna̍yaḥ |
ma̱ghaiḥ | ma̱gho̱ni̱ | su̱-śriya̍ḥ | dāma̍n-vantaḥ | su̱-rā̱taya̍ḥ | su-jā̍te | aśva̍-sūnṛte ||5.079.04||

5.079.05a yac ci̱d dhi te̍ ga̱ṇā i̱me cha̱daya̍nti ma̱ghatta̍ye |
5.079.05c pari̍ ci̱d vaṣṭa̍yo dadhu̱r dada̍to̱ rādho̱ ahra̍ya̱ṁ sujā̍te̱ aśva̍sūnṛte ||

yat | ci̱t | hi | te̱ | ga̱ṇāḥ | i̱me | cha̱daya̍nti | ma̱ghatta̍ye |
pari̍ | ci̱t | vaṣṭa̍yaḥ | da̱dhu̱ḥ | dada̍taḥ | rādha̍ḥ | ahra̍yam | su-jā̍te | aśva̍-sūnṛte ||5.079.05||

5.079.06a aiṣu̍ dhā vī̱rava̱d yaśa̱ uṣo̍ maghoni sū̱riṣu̍ |
5.079.06c ye no̱ rādhā̱ṁsy ahra̍yā ma̱ghavā̍no̱ arā̍sata̱ sujā̍te̱ aśva̍sūnṛte ||

ā | e̱ṣu̱ | dhā̱ḥ | vī̱ra-va̍t | yaśa̍ḥ | uṣa̍ḥ | ma̱gho̱ni̱ | sū̱riṣu̍ |
ye | na̱ḥ | rādhā̍ṁsi | ahra̍yā | ma̱gha-vā̍naḥ | arā̍sata | su-jā̍te | aśva̍-sūnṛte ||5.079.06||

5.079.07a tebhyo̍ dyu̱mnam bṛ̱had yaśa̱ uṣo̍ magho̱ny ā va̍ha |
5.079.07c ye no̱ rādhā̱ṁsy aśvyā̍ ga̱vyā bhaja̍nta sū̱raya̱ḥ sujā̍te̱ aśva̍sūnṛte ||

tebhya̍ḥ | dyu̱mnam | bṛ̱hat | yaśa̍ḥ | uṣa̍ḥ | ma̱gho̱ni̱ | ā | va̱ha̱ |
ye | na̱ḥ | rādhā̍ṁsi | aśvyā̍ | ga̱vyā | bhaja̍nta | sū̱raya̍ḥ | su-jā̍te | aśva̍-sūnṛte ||5.079.07||

5.079.08a u̱ta no̱ goma̍tī̱r iṣa̱ ā va̍hā duhitar divaḥ |
5.079.08c sā̱kaṁ sūrya̍sya ra̱śmibhi̍ḥ śu̱kraiḥ śoca̍dbhir a̱rcibhi̱ḥ sujā̍te̱ aśva̍sūnṛte ||

u̱ta | na̱ḥ | go-ma̍tīḥ | iṣa̍ḥ | ā | va̱ha̱ | du̱hi̱ta̱ḥ | di̱va̱ḥ |
sā̱kam | sūrya̍sya | ra̱śmi-bhi̍ḥ | śu̱kraiḥ | śoca̍t-bhiḥ | a̱rci-bhi̍ḥ | su-jā̍te | aśva̍-sūnṛte ||5.079.08||

5.079.09a vy u̍cchā duhitar divo̱ mā ci̱raṁ ta̍nuthā̱ apa̍ḥ |
5.079.09c net tvā̍ ste̱naṁ yathā̍ ri̱puṁ tapā̍ti̱ sūro̍ a̱rciṣā̱ sujā̍te̱ aśva̍sūnṛte ||

vi | u̱ccha̱ | du̱hi̱ta̱ḥ | di̱va̱ḥ | mā | ci̱ram | ta̱nu̱thā̱ḥ | apa̍ḥ |
na | it | tvā̱ | ste̱nam | yathā̍ | ri̱pum | tapā̍ti | sūra̍ḥ | a̱rciṣā̍ | su-jā̍te | aśva̍-sūnṛte ||5.079.09||

5.079.10a e̱tāva̱d ved u̍ṣa̱s tvam bhūyo̍ vā̱ dātu̍m arhasi |
5.079.10c yā sto̱tṛbhyo̍ vibhāvary u̱cchantī̱ na pra̱mīya̍se̱ sujā̍te̱ aśva̍sūnṛte ||

e̱tāva̍t | vā̱ | it | u̱ṣa̱ḥ | tvam | bhūya̍ḥ | vā̱ | dātu̍m | a̱rha̱si̱ |
yā | sto̱tṛ-bhya̍ḥ | vi̱bhā̱-va̱ri̱ | u̱cchantī̍ | na | pra̱-mīya̍se | su-jā̍te | aśva̍-sūnṛte ||5.079.10||


5.080.01a dyu̱tadyā̍mānam bṛha̱tīm ṛ̱tena̍ ṛ̱tāva̍rīm aru̱ṇapsu̍ṁ vibhā̱tīm |
5.080.01c de̱vīm u̱ṣasa̱ṁ sva̍r ā̱vaha̍ntī̱m prati̱ viprā̍so ma̱tibhi̍r jarante ||

dyu̱ta-dyā̍mānam | bṛ̱ha̱tīm | ṛ̱tena̍ | ṛ̱ta-va̍rīm | a̱ru̱ṇa-psu̍m | vi̱-bhā̱tīm |
de̱vīm | u̱ṣasa̍m | sva̍ḥ | ā̱-vaha̍ntīm | prati̍ | viprā̍saḥ | ma̱ti-bhi̍ḥ | ja̱ra̱nte̱ ||5.080.01||

5.080.02a e̱ṣā jana̍ṁ darśa̱tā bo̱dhaya̍ntī su̱gān pa̱thaḥ kṛ̍ṇva̱tī yā̱ty agre̍ |
5.080.02c bṛ̱ha̱dra̱thā bṛ̍ha̱tī vi̍śvami̱nvoṣā jyoti̍r yaccha̱ty agre̱ ahnā̍m ||

e̱ṣā | jana̍m | da̱rśa̱tā | bo̱dhaya̍ntī | su̱-mān | pa̱thaḥ | kṛ̱ṇva̱tī | yā̱ti̱ | agre̍ |
bṛ̱ha̱t-ra̱thā | bṛ̱ha̱tī | vi̱śva̱m-i̱nvā | u̱ṣāḥ | jyoti̍ḥ | ya̱ccha̱ti̱ | agre̍ | ahnā̍m ||5.080.02||

5.080.03a e̱ṣā gobhi̍r aru̱ṇebhi̍r yujā̱nāsre̍dhantī ra̱yim aprā̍yu cakre |
5.080.03c pa̱tho rada̍ntī suvi̱tāya̍ de̱vī pu̍ruṣṭu̱tā vi̱śvavā̍rā̱ vi bhā̍ti ||

eṣā | gobhi̍ḥ | a̱ru̱ṇebhi̍ḥ | yu̱jā̱nā | asre̍dhantī | ra̱yim | apra̍-āyu | ca̱kre̱ |
pa̱thaḥ | rada̍ntī | su̱vi̱tāya̍ | de̱vī | pu̱ru̱-stu̱tā | vi̱śva-vā̍rā | vi | bhā̱ti̱ ||5.080.03||

5.080.04a e̱ṣā vye̍nī bhavati dvi̱barhā̍ āviṣkṛṇvā̱nā ta̱nva̍m pu̱rastā̍t |
5.080.04c ṛ̱tasya̱ panthā̱m anv e̍ti sā̱dhu pra̍jāna̱tīva̱ na diśo̍ mināti ||

e̱ṣā | vi-e̍nī | bha̱va̱ti̱ | dvi̱-barhā̍ḥ | ā̱vi̱ḥ-kṛ̱ṇvā̱nā | ta̱nva̍m | pu̱rastā̍t |
ṛ̱tasya̍ | panthā̍m | anu̍ | e̱ti̱ | sā̱dhu | pra̱-jā̱na̱tī-i̍va | na | diśa̍ḥ | mi̱nā̱ti̱ ||5.080.04||

5.080.05a e̱ṣā śu̱bhrā na ta̱nvo̍ vidā̱nordhveva̍ snā̱tī dṛ̱śaye̍ no asthāt |
5.080.05c apa̱ dveṣo̱ bādha̍mānā̱ tamā̍ṁsy u̱ṣā di̱vo du̍hi̱tā jyoti̱ṣāgā̍t ||

e̱ṣā | śu̱bhrā | na | ta̱nva̍ḥ | vi̱dā̱nā | ū̱rdhvā-i̍va | snā̱tī | dṛ̱śaye̍ | na̱ḥ | a̱sthā̱t |
apa̍ | dveṣa̍ḥ | bādha̍mānā | tamā̍ṁsi | u̱ṣāḥ | di̱vaḥ | du̱hi̱tā | jyoti̍ṣā | ā | a̱gā̱t ||5.080.05||

5.080.06a e̱ṣā pra̍tī̱cī du̍hi̱tā di̱vo nṝn yoṣe̍va bha̱drā ni ri̍ṇīte̱ apsa̍ḥ |
5.080.06c vyū̱rṇva̱tī dā̱śuṣe̱ vāryā̍ṇi̱ puna̱r jyoti̍r yuva̱tiḥ pū̱rvathā̍kaḥ ||

e̱ṣā | pra̱tī̱cī | du̱hi̱tā | di̱vaḥ | nṝn | yoṣā̍-iva | bha̱drā | ni | ri̱ṇī̱te̱ | apsa̍ḥ |
vi̱-ū̱rṇva̱tī | dā̱śuṣe̍ | vāryā̍ṇi | puna̍ḥ | jyoti̍ḥ | yu̱va̱tiḥ | pū̱rva-thā̍ | a̱ka̱ritya̍kaḥ ||5.080.06||


5.081.01a yu̱ñjate̱ mana̍ u̱ta yu̍ñjate̱ dhiyo̱ viprā̱ vipra̍sya bṛha̱to vi̍pa̱ścita̍ḥ |
5.081.01c vi hotrā̍ dadhe vayunā̱vid eka̱ in ma̱hī de̱vasya̍ savi̱tuḥ pari̍ṣṭutiḥ ||

yu̱ñjate̍ | mana̍ḥ | u̱ta | yu̱ñjate̍ | dhiya̍ḥ | viprā̍ḥ | vipra̍sya | bṛ̱ha̱taḥ | vi̱pa̱ḥ-cita̍ḥ |
vi | hotrā̍ḥ | da̱dhe̱ | va̱yu̱na̱-vit | eka̍ḥ | it | ma̱hī | de̱vasya̍ | sa̱vi̱tuḥ | pari̍-stutiḥ ||5.081.01||

5.081.02a viśvā̍ rū̱pāṇi̱ prati̍ muñcate ka̱viḥ prāsā̍vīd bha̱draṁ dvi̱pade̱ catu̍ṣpade |
5.081.02c vi nāka̍m akhyat savi̱tā vare̱ṇyo 'nu̍ pra̱yāṇa̍m u̱ṣaso̱ vi rā̍jati ||

viśvā̍ | rū̱pāṇi̍ | prati̍ | mu̱ñca̱te̱ | ka̱viḥ | pra | a̱sā̱vī̱t | bha̱dram | dvi̱-pade̍ | catu̍ḥ-pade |
vi | nāka̍m | a̱khya̱t | sa̱vi̱tā | vare̍ṇyaḥ | anu̍ | pra̱-yāna̍m | u̱ṣasa̍ḥ | vi | rā̱ja̱ti̱ ||5.081.02||

5.081.03a yasya̍ pra̱yāṇa̱m anv a̱nya id ya̱yur de̱vā de̱vasya̍ mahi̱māna̱m oja̍sā |
5.081.03c yaḥ pārthi̍vāni vima̱me sa eta̍śo̱ rajā̍ṁsi de̱vaḥ sa̍vi̱tā ma̍hitva̱nā ||

yasya̍ | pra̱-yāma̍m | anu̍ | a̱nye | it | ya̱yuḥ | de̱vāḥ | de̱vasya̍ | ma̱hi̱māna̍m | oja̍sā |
yaḥ | pārthi̍vāni | vi̱-ma̱me | saḥ | eta̍śaḥ | rajā̍ṁsi | de̱vaḥ | sa̱vi̱tā | ma̱hi̱-tva̱nā ||5.081.03||

5.081.04a u̱ta yā̍si savita̱s trīṇi̍ roca̱nota sūrya̍sya ra̱śmibhi̱ḥ sam u̍cyasi |
5.081.04c u̱ta rātrī̍m ubha̱yata̱ḥ parī̍yasa u̱ta mi̱tro bha̍vasi deva̱ dharma̍bhiḥ ||

u̱ta | yā̱si̱ | sa̱vi̱ta̱riti̍ | trīṇi̍ | ro̱ca̱nā | u̱ta | sūrya̍sya | ra̱śmi-bhi̍ḥ | sam | u̱cya̱si̱ |
u̱ta | rātrī̍m | u̱bha̱yata̍ḥ | pari̍ | ī̱ya̱se̱ | u̱ta | mi̱traḥ | bha̱va̱si̱ | de̱va̱ | dharma̍-bhiḥ ||5.081.04||

5.081.05a u̱teśi̍ṣe prasa̱vasya̱ tvam eka̱ id u̱ta pū̱ṣā bha̍vasi deva̱ yāma̍bhiḥ |
5.081.05c u̱tedaṁ viśva̱m bhuva̍na̱ṁ vi rā̍jasi śyā̱vāśva̍s te savita̱ stoma̍m ānaśe ||

u̱ta | ī̱śi̱ṣe̱ | pra̱-sa̱vasya̍ | tvam | eka̍ḥ | it | u̱ta | pū̱ṣā | bha̱va̱si̱ | de̱va̱ | yāma̍-bhiḥ |
u̱ta | i̱dam | viśva̍m | bhuva̍nam | vi | rā̱ja̱si̱ | śyā̱va-a̍śvaḥ | te̱ | sa̱vi̱ta̱riti̍ | stoma̍m | ā̱na̱śe̱ ||5.081.05||


5.082.01a tat sa̍vi̱tur vṛ̍ṇīmahe va̱yaṁ de̱vasya̱ bhoja̍nam |
5.082.01c śreṣṭha̍ṁ sarva̱dhāta̍ma̱ṁ tura̱m bhaga̍sya dhīmahi ||

tat | sa̱vi̱tuḥ | vṛ̱ṇī̱ma̱he̱ | va̱yam | de̱vasya̍ | bhoja̍nam |
śreṣṭha̍m | sa̱rva̱-dhāta̍mam | tura̍m | bhaga̍sya | dhī̱ma̱hi̱ ||5.082.01||

5.082.02a asya̱ hi svaya̍śastaraṁ savi̱tuḥ kac ca̱na pri̱yam |
5.082.02c na mi̱nanti̍ sva̱rājya̍m ||

asya̍ | hi | svaya̍śaḥ-taram | sa̱vi̱tuḥ | kat | ca̱na | pri̱yam |
na | mi̱nanti̍ | sva̱-rājya̍m ||5.082.02||

5.082.03a sa hi ratnā̍ni dā̱śuṣe̍ su̱vāti̍ savi̱tā bhaga̍ḥ |
5.082.03c tam bhā̱gaṁ ci̱tram ī̍mahe ||

saḥ | hi | ratnā̍ni | dā̱śuṣe̍ | su̱vāti̍ | sa̱vi̱tā | bhaga̍ḥ |
tam | bhā̱gam | ci̱tram | ī̱ma̱he̱ ||5.082.03||

5.082.04a a̱dyā no̍ deva savitaḥ pra̱jāva̍t sāvī̱ḥ saubha̍gam |
5.082.04c parā̍ du̱ṣṣvapnya̍ṁ suva ||

a̱dya | na̱ḥ | de̱va̱ | sa̱vi̱ta̱riti̍ | pra̱jā-va̍t | sā̱vī̱ḥ | saubha̍gam |
parā̍ | du̱ḥ-svapnya̍m | su̱va̱ ||5.082.04||

5.082.05a viśvā̍ni deva savitar duri̱tāni̱ parā̍ suva |
5.082.05c yad bha̱draṁ tan na̱ ā su̍va ||

viśvā̍ni | de̱va̱ | sa̱vi̱ta̱ḥ | du̱ḥ-i̱tāni̍ | parā̍ | su̱va̱ |
yat | bha̱dram | tat | na̱ḥ | ā | su̱va̱ ||5.082.05||

5.082.06a anā̍gaso̱ adi̍taye de̱vasya̍ savi̱tuḥ sa̱ve |
5.082.06c viśvā̍ vā̱māni̍ dhīmahi ||

anā̍gasaḥ | adi̍taye | de̱vasya̍ | sa̱vi̱tuḥ | sa̱ve |
viśvā̍ | vā̱māni̍ | dhī̱ma̱hi̱ ||5.082.06||

5.082.07a ā vi̱śvade̍va̱ṁ satpa̍tiṁ sū̱ktair a̱dyā vṛ̍ṇīmahe |
5.082.07c sa̱tyasa̍vaṁ savi̱tāra̍m ||

ā | vi̱śva-de̍vam | sat-pa̍tim | su̱-u̱ktaiḥ | a̱dya | vṛ̱ṇī̱ma̱he̱ |
sa̱tya-sa̍vam | sa̱vi̱tāra̍m ||5.082.07||

5.082.08a ya i̱me u̱bhe aha̍nī pu̱ra ety apra̍yucchan |
5.082.08c svā̱dhīr de̱vaḥ sa̍vi̱tā ||

yaḥ | i̱me iti̍ | u̱bhe iti̍ | aha̍nī̱ iti̍ | pu̱raḥ | eti̍ | apra̍-yucchan |
su̱-ā̱dhīḥ | de̱vaḥ | sa̱vi̱tā ||5.082.08||

5.082.09a ya i̱mā viśvā̍ jā̱tāny ā̍śrā̱vaya̍ti̱ śloke̍na |
5.082.09c pra ca̍ su̱vāti̍ savi̱tā ||

yaḥ | i̱mā | viśvā̍ | jā̱tāni̍ | ā̱-śrā̱vaya̍ti | śloke̍na |
pra | ca̱ | su̱vāti̍ | sa̱vi̱tā ||5.082.09||


5.083.01a acchā̍ vada ta̱vasa̍ṁ gī̱rbhir ā̱bhiḥ stu̱hi pa̱rjanya̱ṁ nama̱sā vi̍vāsa |
5.083.01c kani̍kradad vṛṣa̱bho jī̱radā̍nū̱ reto̍ dadhā̱ty oṣa̍dhīṣu̱ garbha̍m ||

accha̍ | va̱da̱ | ta̱vasa̍m | gī̱ḥ-bhiḥ | ā̱bhiḥ | stu̱hi | pa̱rjanya̍m | nama̍sā | ā |vi̱vā̱sa̱ |
kani̍kradat | vṛ̱ṣa̱bhaḥ | jī̱ra-dā̍nuḥ | reta̍ḥ | da̱dhā̱ti̍ | oṣa̍dhīṣu | garbha̍m ||5.083.01||

5.083.02a vi vṛ̱kṣān ha̍nty u̱ta ha̍nti ra̱kṣaso̱ viśva̍m bibhāya̱ bhuva̍nam ma̱hāva̍dhāt |
5.083.02c u̱tānā̍gā īṣate̱ vṛṣṇyā̍vato̱ yat pa̱rjanya̍ḥ sta̱naya̱n hanti̍ du̱ṣkṛta̍ḥ ||

vi | vṛ̱kṣān | ha̱nti̱ | u̱ta | ha̱nti̱ | ra̱kṣasa̍ḥ | viśva̍m | bi̱bhā̱ya̱ | bhuva̍nam | ma̱hā-va̍dhāt |
u̱ta | anā̍gāḥ | ī̱ṣa̱te̱ | vṛṣṇya̍-vataḥ | yat | pa̱rjanya̍ḥ | sta̱naya̍n | hanti̍ | du̱ḥ-kṛta̍ḥ ||5.083.02||

5.083.03a ra̱thīva̱ kaśa̱yāśvā̍m̐ abhikṣi̱pann ā̱vir dū̱tān kṛ̍ṇute va̱rṣyā̱3̱̍m̐ aha̍ |
5.083.03c dū̱rāt si̱ṁhasya̍ sta̱nathā̱ ud ī̍rate̱ yat pa̱rjanya̍ḥ kṛṇu̱te va̱rṣya1̱̍ṁ nabha̍ḥ ||

ra̱thī-i̍va | kaśa̍yā | aśvā̍n | a̱bhi̱-kṣi̱pan | ā̱viḥ | dū̱tān | kṛ̱ṇu̱te̱ | va̱rṣyā̍n | aha̍ |
dū̱rāt | si̱ṁhasya̍ | sta̱nathā̍ḥ | ut | ī̱ra̱te̱ | yat | pa̱rjanya̍ḥ | kṛ̱ṇu̱te | va̱rṣya̍m | nabha̍ḥ ||5.083.03||

5.083.04a pra vātā̱ vānti̍ pa̱taya̍nti vi̱dyuta̱ ud oṣa̍dhī̱r jiha̍te̱ pinva̍te̱ sva̍ḥ |
5.083.04c irā̱ viśva̍smai̱ bhuva̍nāya jāyate̱ yat pa̱rjanya̍ḥ pṛthi̱vīṁ reta̱sāva̍ti ||

pra | vātā̍ḥ | vānti̍ | pa̱taya̍nti | vi̱-dyuta̍ḥ | ut | oṣa̍dhīḥ | jiha̍te | pinva̍te | sva̍ḥ |
irā̍ | viśva̍smai | bhuva̍nāya | jā̱ya̱te̱ | yat | pa̱rjanya̍ḥ | pṛ̱thi̱vīm | reta̍sā | ava̍ti ||5.083.04||

5.083.05a yasya̍ vra̱te pṛ̍thi̱vī nanna̍mīti̱ yasya̍ vra̱te śa̱phava̱j jarbhu̍rīti |
5.083.05c yasya̍ vra̱ta oṣa̍dhīr vi̱śvarū̍pā̱ḥ sa na̍ḥ parjanya̱ mahi̱ śarma̍ yaccha ||

yasya̍ | vra̱te | pṛ̱thi̱vī | nanna̍mīti | yasya̍ | vra̱te | śa̱pha-vat | jarbhu̍rīti |
yasya̍ | vra̱te | oṣa̍dhīḥ | vi̱śva-rū̍pāḥ | saḥ | na̱ḥ | pa̱rja̱nya̱ | mahi̍ | śarma̍ | ya̱ccha̱ ||5.083.05||

5.083.06a di̱vo no̍ vṛ̱ṣṭim ma̍ruto rarīdhva̱m pra pi̍nvata̱ vṛṣṇo̱ aśva̍sya̱ dhārā̍ḥ |
5.083.06c a̱rvāṅ e̱tena̍ stanayi̱tnunehy a̱po ni̍ṣi̱ñcann asu̍raḥ pi̱tā na̍ḥ ||

di̱vaḥ | na̱ḥ | vṛ̱ṣṭim | ma̱ru̱ta̱ḥ | ra̱rī̱dhva̱m | pra | pi̱nva̱ta̱ | vṛṣṇa̍ḥ | aśva̍sya | dhārā̍ḥ |
a̱rvāṅ | e̱tena̍ | sta̱na̱yi̱tnunā̍ | ā | i̱hi̱ | a̱paḥ | ni̱-si̱ñcan | asu̍raḥ | pi̱tā | nā̱ḥ ||5.083.06||

5.083.07a a̱bhi kra̍nda sta̱naya̱ garbha̱m ā dhā̍ uda̱nvatā̱ pari̍ dīyā̱ rathe̍na |
5.083.07c dṛti̱ṁ su ka̍rṣa̱ viṣi̍ta̱ṁ nya̍ñcaṁ sa̱mā bha̍vantū̱dvato̍ nipā̱dāḥ ||

a̱bhi | kra̱nda̱ | sta̱naya̍ | garbha̍m | ā | dhā̱ḥ | u̱da̱n-vatā̍ | pari̍ | dī̱ya̱ | rathe̍na |
dṛti̍m | su | ka̱rṣa̱ | vi-si̍tam | nya̍ñcam | sa̱māḥ | bha̱va̱ntu̱ | u̱t-vata̍ḥ | ni̱-pā̱dāḥ ||5.083.07||

5.083.08a ma̱hānta̱ṁ kośa̱m ud a̍cā̱ ni ṣi̍ñca̱ syanda̍ntāṁ ku̱lyā viṣi̍tāḥ pu̱rastā̍t |
5.083.08c ghṛ̱tena̱ dyāvā̍pṛthi̱vī vy u̍ndhi suprapā̱ṇam bha̍vatv a̱ghnyābhya̍ḥ ||

ma̱hānta̍m | kośa̍m | ut | a̱ca̱ | ni | si̱ñca̱ | syanda̍ntām | ku̱lyāḥ | vi-si̍tāḥ | pu̱rastā̍t |
ghṛ̱tena̍ | dyāvā̍pṛthi̱vī iti̍ | vi | u̱ndhi̱ | su̱-pra̱pā̱nam | bha̱va̱tu̱ | a̱ghnyābhya̍ḥ ||5.083.08||

5.083.09a yat pa̍rjanya̱ kani̍kradat sta̱naya̱n haṁsi̍ du̱ṣkṛta̍ḥ |
5.083.09c pratī̱daṁ viśva̍m modate̱ yat kiṁ ca̍ pṛthi̱vyām adhi̍ ||

yat | pa̱rja̱nya̱ | kani̍kradat | sta̱naya̍n | haṁsi̍ | du̱ḥ-kṛta̍ḥ |
prati̍ | i̱dam | viśva̍m | mo̱da̱te̱ | yat | kim | ca̱ | pṛ̱thi̱vyām | adhi̍ ||5.083.09||

5.083.10a ava̍rṣīr va̱rṣam ud u̱ ṣū gṛ̍bhā̱yāka̱r dhanvā̱ny atye̍ta̱vā u̍ |
5.083.10c ajī̍jana̱ oṣa̍dhī̱r bhoja̍nāya̱ kam u̱ta pra̱jābhyo̍ 'vido manī̱ṣām ||

ava̍rṣīḥ | va̱rṣam | ut | ū̱m̐ iti̍ | su | gṛ̱bhā̱ya̱ | aka̍ḥ | dhanvā̍ni | ati̍-e̱ta̱vai | ū̱m̐ iti̍ |
ajī̍janaḥ | oṣa̍dhīḥ | bhoja̍nāya | kam | u̱ta | pra̱-jābhya̍ḥ | a̱vi̱da̱ḥ | ma̱nī̱ṣām ||5.083.10||


5.084.01a baḻ i̱tthā parva̍tānāṁ khi̱dram bi̍bharṣi pṛthivi |
5.084.01c pra yā bhūmi̍m pravatvati ma̱hnā ji̱noṣi̍ mahini ||

baṭ | i̱tthā | parva̍tānām | khi̱dram | bi̱bha̱rṣi̱ | pṛ̱thi̱vi̱ |
pra | yā | bhūmi̍m | pra̱va̱tva̱ti̱ | ma̱hnā | ji̱noṣi̍ | ma̱hi̱ni̱ ||5.084.01||

5.084.02a stomā̍sas tvā vicāriṇi̱ prati̍ ṣṭobhanty a̱ktubhi̍ḥ |
5.084.02c pra yā vāja̱ṁ na heṣa̍ntam pe̱rum asya̍sy arjuni ||

stomā̍saḥ | tvā̱ | vi̱-cā̱ri̱ṇi̱ | prati̍ | sto̱bha̱nti̱ | a̱ktu-bhi̍ḥ |
pra | yā | vāja̍m | na | heṣa̍ntam | pe̱rum | asya̍si | a̱rju̱ni̱ ||5.084.02||

5.084.03a dṛ̱ḻhā ci̱d yā vana̱spatī̍n kṣma̱yā dardha̱rṣy oja̍sā |
5.084.03c yat te̍ a̱bhrasya̍ vi̱dyuto̍ di̱vo varṣa̍nti vṛ̱ṣṭaya̍ḥ ||

dṛ̱ḻhā | ci̱t | yā | vana̱spatī̍n | kṣma̱yā | dardha̍rṣi | oja̍sā |
yat | te̱ | a̱bhrasya̍ | vi̱-dyuta̍ḥ | di̱vaḥ | varṣa̍nti | vṛ̱ṣṭaya̍ḥ ||5.084.03||


5.085.01a pra sa̱mrāje̍ bṛ̱had a̍rcā gabhī̱ram brahma̍ pri̱yaṁ varu̍ṇāya śru̱tāya̍ |
5.085.01c vi yo ja̱ghāna̍ śami̱teva̱ carmo̍pa̱stire̍ pṛthi̱vīṁ sūryā̍ya ||

pra | sa̱m-rāje̍ | bṛ̱hat | a̱rca̱ | ga̱bhī̱ram | brahma̍ | pri̱yam | varu̍ṇāya | śru̱tāya̍ |
vi | yaḥ | ja̱ghāna̍ | śa̱mi̱tā-i̍va | carma̍ | u̱pa̱-stire̍ | pṛ̱thi̱vīm | sūryā̍ya ||5.085.01||

5.085.02a vane̍ṣu̱ vy a1̱̍ntari̍kṣaṁ tatāna̱ vāja̱m arva̍tsu̱ paya̍ u̱sriyā̍su |
5.085.02c hṛ̱tsu kratu̱ṁ varu̍ṇo a̱psv a1̱̍gniṁ di̱vi sūrya̍m adadhā̱t soma̱m adrau̍ ||

vane̍ṣu | vi | a̱ntari̍kṣam | ta̱tā̱na̱ | vāja̍m | arva̍t-su | paya̍ḥ | u̱sriyā̍su |
hṛ̱t-su | kratu̍m | varu̍ṇaḥ | a̱p-su | a̱gnim | di̱vi | sūrya̍m | a̱da̱dhā̱t | soma̍m | adrau̍ ||5.085.02||

5.085.03a nī̱cīna̍bāra̱ṁ varu̍ṇa̱ḥ kava̍ndha̱m pra sa̍sarja̱ roda̍sī a̱ntari̍kṣam |
5.085.03c tena̱ viśva̍sya̱ bhuva̍nasya̱ rājā̱ yava̱ṁ na vṛ̱ṣṭir vy u̍natti̱ bhūma̍ ||

nī̱cīna̍-bāram | varu̍ṇaḥ | kava̍ndham | pra | sa̱sa̱rja̱ | roda̍sī̱ iti̍ | a̱ntari̍kṣam |
tena̍ | viśva̍sya | bhuva̍nasya | rājā̍ | yava̍m | na | vṛ̱ṣṭiḥ | vi | u̱na̱tti̱ | bhūma̍ ||5.085.03||

5.085.04a u̱natti̱ bhūmi̍m pṛthi̱vīm u̱ta dyāṁ ya̱dā du̱gdhaṁ varu̍ṇo̱ vaṣṭy ād it |
5.085.04c sam a̱bhreṇa̍ vasata̱ parva̍tāsas taviṣī̱yanta̍ḥ śrathayanta vī̱rāḥ ||

u̱natti̍ | bhūmi̍m | pṛ̱thi̱vīm | u̱ta | dyām | ya̱dā | du̱gdham | varu̍ṇaḥ | va̱ṣṭi̱ | āt | it |
sam | a̱bhreṇa̍ | va̱sa̱ta̱ | parva̍tāsaḥ | ta̱vi̱ṣī̱-yanta̍ḥ | śra̱tha̱ya̱nta̱ | vī̱rāḥ ||5.085.04||

5.085.05a i̱mām ū̱ ṣv ā̍su̱rasya̍ śru̱tasya̍ ma̱hīm mā̱yāṁ varu̍ṇasya̱ pra vo̍cam |
5.085.05c māne̍neva tasthi̱vām̐ a̱ntari̍kṣe̱ vi yo ma̱me pṛ̍thi̱vīṁ sūrye̍ṇa ||

imām | ū̱m̐ iti̍ | su | ā̱su̱rasya̍ | śru̱tasya̍ | ma̱hīm | mā̱yām | varu̍ṇasya̍ | pra | vo̱ca̱m |
māne̍na-iva | ta̱sthi̱-vān | a̱ntari̍kṣe | vi | yaḥ | ma̱me | pṛ̱thi̱vīm | sūrye̍ṇa ||5.085.05||

5.085.06a i̱mām ū̱ nu ka̱vita̍masya mā̱yām ma̱hīṁ de̱vasya̱ naki̱r ā da̍dharṣa |
5.085.06c eka̱ṁ yad u̱dnā na pṛ̱ṇanty enī̍r āsi̱ñcantī̍r a̱vana̍yaḥ samu̱dram ||

i̱mām | ū̱m̐ iti̍ | nu | ka̱vi-ta̍masya | mā̱yām | ma̱hīm | de̱vasya̍ | naki̍ḥ | ā | da̱dha̱rṣa̱ |
eka̍m | yat | u̱dnā | na | pṛ̱ṇanti̍ | enī̍ḥ | ā̱-si̱ñcantī̍ḥ | a̱vana̍yaḥ | sa̱mu̱dram ||5.085.06||

5.085.07a a̱rya̱mya̍ṁ varuṇa mi̱trya̍ṁ vā̱ sakhā̍yaṁ vā̱ sada̱m id bhrāta̍raṁ vā |
5.085.07c ve̱śaṁ vā̱ nitya̍ṁ varu̱ṇāra̍ṇaṁ vā̱ yat sī̱m āga̍ś cakṛ̱mā śi̱śratha̱s tat ||

a̱rya̱mya̍m | va̱ru̱ṇa̱ | mi̱trya̍m | vā̱ | sakhā̍yam | vā̱ | sada̍m | it | bhrāta̍ram | vā̱ |
ve̱śam | vā̱ | nitya̍m | va̱ru̱ṇa̱ | ara̍ṇam | vā̱ | yat | sī̱m | āga̍ḥ | ca̱kṛ̱ma | śi̱śratha̍ḥ | tat ||5.085.07||

5.085.08a ki̱ta̱vāso̱ yad ri̍ri̱pur na dī̱vi yad vā̍ ghā sa̱tyam u̱ta yan na vi̱dma |
5.085.08c sarvā̱ tā vi ṣya̍ śithi̱reva̍ de̱vādhā̍ te syāma varuṇa pri̱yāsa̍ḥ ||

ki̱ta̱vāsa̍ḥ | yat | ri̱ri̱puḥ | na | dī̱vi | yat | vā̱ | gha̱ | sa̱tyam | u̱ta | yat | na | vi̱dma |
sarvā̍ | tā | vi | sya̱ | śi̱thi̱rā-i̍va | de̱va̱ | adha̍ | te̱ | syā̱ma̱ | va̱ru̱ṇa̱ | pri̱yāsa̍ḥ ||5.085.08||


5.086.01a indrā̍gnī̱ yam ava̍tha u̱bhā vāje̍ṣu̱ martya̍m |
5.086.01c dṛ̱ḻhā ci̱t sa pra bhe̍dati dyu̱mnā vāṇī̍r iva tri̱taḥ ||

indrā̍gnī̱ iti̍ | yam | ava̍thaḥ | u̱bhā | vāje̍ṣu | martya̍m |
dṛ̱ḻhā | ci̱t | saḥ | pra | bhe̱da̱ti̱ | dyu̱mnā | vāṇī̍ḥ-iva | tri̱taḥ ||5.086.01||

5.086.02a yā pṛta̍nāsu du̱ṣṭarā̱ yā vāje̍ṣu śra̱vāyyā̍ |
5.086.02c yā pañca̍ carṣa̱ṇīr a̱bhī̍ndrā̱gnī tā ha̍vāmahe ||

yā | pṛta̍nāsu | du̱starā̍ | yā | vāje̍ṣu | śra̱vāyyā̍ |
yā | pañca̍ | ca̱rṣa̱ṇīḥ | a̱bhi | i̱ndrā̱gnī iti̍ | tā | ha̱vā̱ma̱he̱ ||5.086.02||

5.086.03a tayo̱r id ama̍va̱c chava̍s ti̱gmā di̱dyun ma̱ghono̍ḥ |
5.086.03c prati̱ druṇā̱ gabha̍styo̱r gavā̍ṁ vṛtra̱ghna eṣa̍te ||

tayo̍ḥ | it | ama̍-vat | śava̍ḥ | ti̱gmā | di̱dyut | ma̱ghono̍ḥ |
prati̍ | druṇā̍ | gabha̍styoḥ | gavā̍m | vṛ̱tra̱-ghne | ā | ī̱ṣa̱te̱ ||5.086.03||

5.086.04a tā vā̱m eṣe̱ rathā̍nām indrā̱gnī ha̍vāmahe |
5.086.04c patī̍ tu̱rasya̱ rādha̍so vi̱dvāṁsā̱ girva̍ṇastamā ||

ā | vā̱m | eṣe̍ | rathā̍nām | i̱ndrā̱gnī iti̍ | ha̱vā̱ma̱he̱ |
patī̱ iti̍ | tu̱rasya̍ | rādha̍saḥ | vi̱dvāṁsā̍ | girva̍ṇaḥ-tamā ||5.086.04||

5.086.05a tā vṛ̱dhantā̱v anu̱ dyūn martā̍ya de̱vāv a̱dabhā̍ |
5.086.05c arha̍ntā cit pu̱ro da̱dhe 'ṁśe̍va de̱vāv arva̍te ||

tā | vṛ̱dhantau̍ | anu̍ | dyūn | martā̍ya | de̱vau | a̱dabhā̍ |
arha̍ntā | ci̱t | pu̱raḥ | da̱dhe̱ | aṁśā̍-iva | de̱vau | arva̍te ||5.086.05||

5.086.06a e̱vendrā̱gnibhyā̱m ahā̍vi ha̱vyaṁ śū̱ṣya̍ṁ ghṛ̱taṁ na pū̱tam adri̍bhiḥ |
5.086.06c tā sū̱riṣu̱ śravo̍ bṛ̱had ra̱yiṁ gṛ̱ṇatsu̍ didhṛta̱m iṣa̍ṁ gṛ̱ṇatsu̍ didhṛtam ||

e̱va | i̱ndrā̱gni-bhyā̍m | ahā̍vi | ha̱vyam | sū̱ṣya̍m | ghṛ̱tam | na | pū̱tam | adri̍-bhiḥ |
tā | sū̱riṣu̍ | śrava̍ḥ | bṛ̱hat | ra̱yim | gṛ̱ṇat-su̍ | di̱dhṛ̱ta̱m | iṣa̍m | gṛ̱ṇat-su̍ | di̱dhṛ̱ta̱m ||5.086.06||


5.087.01a pra vo̍ ma̱he ma̱tayo̍ yantu̱ viṣṇa̍ve ma̱rutva̍te giri̱jā e̍va̱yāma̍rut |
5.087.01c pra śardhā̍ya̱ praya̍jyave sukhā̱daye̍ ta̱vase̍ bha̱ndadi̍ṣṭaye̱ dhuni̍vratāya̱ śava̍se ||

pra | va̱ḥ | ma̱he | ma̱taya̍ḥ | ya̱ntu̱ | viṣṇa̍ve | ma̱rutva̍te | gi̱ri̱-jāḥ | e̱va̱yāma̍rut |
pra | śardhā̍ya | pra-ya̍jyave | su̱-khā̱daye̍ | ta̱vase̍ | bha̱ndat-i̍ṣṭaye | dhuni̍-vratāya | śava̍se ||5.087.01||

5.087.02a pra ye jā̱tā ma̍hi̱nā ye ca̱ nu sva̱yam pra vi̱dmanā̍ bru̱vata̍ eva̱yāma̍rut |
5.087.02c kratvā̱ tad vo̍ maruto̱ nādhṛṣe̱ śavo̍ dā̱nā ma̱hnā tad e̍ṣā̱m adhṛ̍ṣṭāso̱ nādra̍yaḥ ||

pra | ye | jā̱tāḥ | ma̱hi̱nā | ye | ca̱ | nu | sva̱yam | pra | vi̱dmanā̍ | bru̱vate̍ | e̱va̱yāma̍rut |
kratvā̍ | tat | va̱ḥ | ma̱ru̱ta̱ḥ | na | ā̱-dhṛṣe̍ | śava̍ḥ | dā̱nā | ma̱hnā | tat | e̱ṣā̱m | adhṛ̍ṣṭāsaḥ | na | adra̍yaḥ ||5.087.02||

5.087.03a pra ye di̱vo bṛ̍ha̱taḥ śṛ̍ṇvi̱re gi̱rā su̱śukvā̍naḥ su̱bhva̍ eva̱yāma̍rut |
5.087.03c na yeṣā̱m irī̍ sa̱dhastha̱ īṣṭa̱ ām̐ a̱gnayo̱ na svavi̍dyuta̱ḥ pra sya̱ndrāso̱ dhunī̍nām ||

pra | ye | di̱vaḥ | bṛ̱ha̱taḥ | śṛ̱ṇvi̱re | gi̱rā | su̱-śukvā̍naḥ | su̱-bhva̍ḥ | e̱va̱yāma̍rut |
na | yeṣā̍m | irī̍ | sa̱dha-sthe̍ | īṣṭe̍ | ā | a̱gnaya̍ḥ | na | sva-vi̍dyutaḥ | pra | spa̱ndrāsa̍ḥ | dhunī̍nām ||5.087.03||

5.087.04a sa ca̍krame maha̱to nir u̍rukra̱maḥ sa̍mā̱nasmā̱t sada̍sa eva̱yāma̍rut |
5.087.04c ya̱dāyu̍kta̱ tmanā̱ svād adhi̱ ṣṇubhi̱r viṣpa̍rdhaso̱ vima̍haso̱ jigā̍ti̱ śevṛ̍dho̱ nṛbhi̍ḥ ||

saḥ | ca̱kra̱me̱ | ma̱ha̱taḥ | niḥ | u̱ru̱-kṛa̱maḥ | sa̱mā̱nasmā̍t | sada̍saḥ | e̱va̱yāma̍rut |
ya̱dā | ayu̍kta | tmanā̍ | svāt | adhi̍ | snu-bhi̍ḥ | vi-spa̍rdhasaḥ | vi-ma̍hasaḥ | jigā̍ti | śe-vṛ̍dhaḥ | nṛ-bhi̍ḥ ||5.087.04||

5.087.05a sva̱no na vo 'ma̍vān rejaya̱d vṛṣā̍ tve̱ṣo ya̱yis ta̍vi̱ṣa e̍va̱yāma̍rut |
5.087.05c yenā̱ saha̍nta ṛ̱ñjata̱ svaro̍ciṣa̱ḥ sthāra̍śmāno hira̱ṇyayā̍ḥ svāyu̱dhāsa̍ i̱ṣmiṇa̍ḥ ||

sva̱naḥ | na | va̱ḥ | ama̍-vān | re̱ja̱ya̱t | vṛṣā̍ | tve̱ṣaḥ | ya̱yiḥ | ta̱vi̱ṣaḥ | e̱va̱yāma̍rut |
yena̍ | saha̍ntaḥ | ṛ̱ñjata̍ | sva-ro̍ciṣaḥ | sthāḥ-ra̍śmānaḥ | hi̱ra̱ṇyayā̍ḥ | su̱-ā̱yu̱dhāsa̍ḥ | i̱ṣmiṇa̍ḥ ||5.087.05||

5.087.06a a̱pā̱ro vo̍ mahi̱mā vṛ̍ddhaśavasas tve̱ṣaṁ śavo̍ 'vatv eva̱yāma̍rut |
5.087.06c sthātā̍ro̱ hi prasi̍tau sa̱ṁdṛśi̱ sthana̱ te na̍ uruṣyatā ni̱daḥ śu̍śu̱kvāṁso̱ nāgnaya̍ḥ ||

a̱pā̱raḥ | va̱ḥ | ma̱hi̱mā | vṛ̱ddha̱-śa̱va̱sa̱ḥ | tve̱ṣam | śava̍ḥ | a̱va̱tu̱ | e̱va̱yāma̍rut |
sthātā̍raḥ | hi | pra-si̍tau | sa̱m-dṛśi̍ | sthana̍ | te | na̱ḥ | u̱ru̱ṣya̱ta̱ | ni̱daḥ | śu̱śu̱kvāṁsa̍ḥ | na | a̱gnaya̍ḥ ||5.087.06||

5.087.07a te ru̱drāsa̱ḥ suma̍khā a̱gnayo̍ yathā tuvidyu̱mnā a̍vantv eva̱yāma̍rut |
5.087.07c dī̱rgham pṛ̱thu pa̍prathe̱ sadma̱ pārthi̍va̱ṁ yeṣā̱m ajme̱ṣv ā ma̱haḥ śardhā̱ṁsy adbhu̍tainasām ||

te | ru̱drāsa̍ḥ | su-ma̍khāḥ | a̱gnaya̍ḥ | ya̱thā̱ | tu̱vi̱-dyu̱mnāḥ | a̱va̱ntu̱ | e̱va̱yāma̍rut |
dī̱rgham | pṛ̱thu | pa̱pra̱the̱ | sadma̍ | pārthi̍vam | yeṣā̍m | ajme̍ṣu | ā | ma̱haḥ | śardhā̍ṁsi | adbhu̍ta-enasām ||5.087.07||

5.087.08a a̱dve̱ṣo no̍ maruto gā̱tum eta̍na̱ śrotā̱ hava̍ṁ jari̱tur e̍va̱yāma̍rut |
5.087.08c viṣṇo̍r ma̱haḥ sa̍manyavo yuyotana̱ smad ra̱thyo̱3̱̍ na da̱ṁsanāpa̱ dveṣā̍ṁsi sanu̱taḥ ||

a̱dve̱ṣaḥ | na̱ḥ | ma̱ru̱ta̱ḥ | gā̱tum | ā | i̱ta̱na̱ | śrota̍ | hava̍m | ja̱ri̱tuḥ | e̱va̱yāma̍rut |
viṣṇo̍ḥ | ma̱haḥ | sa̱-ma̱nya̱va̱ḥ | yu̱yo̱ta̱na̱ | smat | ra̱thya̍ḥ | na | da̱ṁsanā̍ | apa̍ | dveṣā̍ṁsi | sa̱nu̱tariti̍ ||5.087.08||

5.087.09a gantā̍ no ya̱jñaṁ ya̍jñiyāḥ su̱śami̱ śrotā̱ hava̍m ara̱kṣa e̍va̱yāma̍rut |
5.087.09c jyeṣṭhā̍so̱ na parva̍tāso̱ vyo̍mani yū̱yaṁ tasya̍ pracetasa̱ḥ syāta̍ du̱rdharta̍vo ni̱daḥ ||

ganta̍ | na̱ḥ | ya̱jñam | ya̱jñi̱yā̱ḥ | su̱-śami̍ | śrota̍ | hava̍m | a̱ra̱kṣaḥ | e̱va̱yāma̍rut |
jyeṣṭhā̍saḥ | na | parva̍tāsaḥ | vi-o̍mani | yū̱yam | tasya̍ | pra̱-ce̱ta̱sa̱ḥ | syāta̍ | du̱ḥ-dharta̍vaḥ | ni̱daḥ ||5.087.09||


Notes by Detlef Eichler : 1. Please note that this text is not for commercial use and released only for personal scholarly activity. This transliteration version of Rigveda-Saṁhitā is from an ITRANS file which I have created on the basis of The Aufrecht/van Nooten/Holland (Samhita) version of theRigveda. The Padapāṭha is based on the text entered by the members of the Sansknet project. 2. Font: times new roman / Unicode 3. Hiatus ai, au are shown as aï, aü 4. Transliteration:
a ā i ï ī ī3 u ü ū ṛ ṝ ḷ e ai o au ṁ ḥ m̐ ' | a̱ a̍ ā̱ ā̍ i̱ i̍ ī̱ ī̍ u u̍ ü̍ ū̱ ū̍ ṛ̱ ṛ̍ ṝ̱ ṝ̍ ḷ̱ e̱ e̍ ai̱ ai̍ o̱ o̍ au̱ au̍ 1̱̍ 3̱̍ k kh g gh ṅ c ch j jh ñ ṭ ṭh ḍ ḍh ṇ t th d dh n p ph b bh m y r l v ś ṣ s h ḻ ḻh 5. Last update: 30 Oct 2016 (Padapāṭha 5.029.10)