Ṛgveda-Saṁhitā with Padapāṭha
Maṇḍala 4
Transliterated text with accents


4.001.01a tvāṁ hy a̍gne̱ sada̱m it sa̍ma̱nyavo̍ de̱vāso̍ de̱vam a̍ra̱tiṁ nye̍ri̱ra iti̱ kratvā̍ nyeri̱re |
4.001.01c ama̍rtyaṁ yajata̱ martye̱ṣv ā de̱vam āde̍vaṁ janata̱ prace̍tasa̱ṁ viśva̱m āde̍vaṁ janata̱ prace̍tasam ||

tvām | hi | a̱gne̱ | sada̍m | it | sa̱-ma̱nyava̍ḥ | de̱vāsa̍ḥ | de̱vam | a̱ra̱tim | ni̱-e̱ri̱re | iti̍ | kratvā̍ | ni̱-e̱ri̱re |
ama̍rtyam | ya̱ja̱ta̱ | martye̍ṣu | ā | de̱vam | ā-de̍vam | ja̱na̱ta̱ | pra-ce̍tasam | viśva̍m | ā-de̍vam | ja̱na̱ta̱ | pra-ce̍tasam ||4.001.01||

4.001.02a sa bhrāta̍ra̱ṁ varu̍ṇam agna̱ ā va̍vṛtsva de̱vām̐ acchā̍ suma̱tī ya̱jñava̍nasa̱ṁ jyeṣṭha̍ṁ ya̱jñava̍nasam |
4.001.02c ṛ̱tāvā̍nam ādi̱tyaṁ ca̍rṣaṇī̱dhṛta̱ṁ rājā̍naṁ carṣaṇī̱dhṛta̍m ||

saḥ | bhrāta̍ram | varu̍ṇam | a̱gne̱ | ā | va̱vṛ̱tsva̱ | de̱vān | accha̍ | su̱-ma̱tī | ya̱jña-va̍nasam | jyeṣṭha̍m | ya̱jña-va̍nasam |
ṛ̱ta-vā̍nam | ā̱di̱tyam | ca̱rṣa̱ṇi̱-dhṛta̍m | rājā̍nam | ca̱rṣa̱ṇi̱-dhṛta̍m ||4.001.02||

4.001.03a sakhe̱ sakhā̍yam a̱bhy ā va̍vṛtsvā̱śuṁ na ca̱kraṁ rathye̍va̱ raṁhyā̱smabhya̍ṁ dasma̱ raṁhyā̍ |
4.001.03c agne̍ mṛḻī̱kaṁ varu̍ṇe̱ sacā̍ vido ma̱rutsu̍ vi̱śvabhā̍nuṣu |
4.001.03d to̱kāya̍ tu̱je śu̍śucāna̱ śaṁ kṛ̍dhy a̱smabhya̍ṁ dasma̱ śaṁ kṛ̍dhi ||

sakhe̍ | sakhā̍yam | a̱bhi | ā | va̱vṛ̱tsva̱ | ā̱śum | na | ca̱kram | rathyā̍-iva | raṁhyā̍ | a̱smabhya̍m | da̱sma̱ | raṁhyā̍ |
agne̍ | mṛ̱ḻī̱kam | varu̍ṇe | sacā̍ | vi̱da̱ḥ | ma̱rut-su̍ | vi̱śva-bhā̍nuṣu |
to̱kāya̍ | tu̱je | śu̱śu̱cā̱na̱ | śam | kṛ̱dhi̱ | a̱smabhya̍m | da̱sma̱ | śam | kṛ̱dhi̱ ||4.001.03||

4.001.04a tvaṁ no̍ agne̱ varu̍ṇasya vi̱dvān de̱vasya̱ heḻo 'va̍ yāsisīṣṭhāḥ |
4.001.04c yaji̍ṣṭho̱ vahni̍tama̱ḥ śośu̍cāno̱ viśvā̱ dveṣā̍ṁsi̱ pra mu̍mugdhy a̱smat ||

tvam | na̱ḥ | a̱gne̱ | varu̍ṇasya | vi̱dvān | de̱vasya̍ | heḻa̍ḥ | ava̍ | yā̱si̱sī̱ṣṭhā̱ḥ |
yaji̍ṣṭhaḥ | vahni̍-tamaḥ | śośu̍cānaḥ | viśvā̍ | dveṣā̍ṁsi | pra | mu̱mu̱gdhi̱ | a̱smat ||4.001.04||

4.001.05a sa tvaṁ no̍ agne 'va̱mo bha̍vo̱tī nedi̍ṣṭho a̱syā u̱ṣaso̱ vyu̍ṣṭau |
4.001.05c ava̍ yakṣva no̱ varu̍ṇa̱ṁ rarā̍ṇo vī̱hi mṛ̍ḻī̱kaṁ su̱havo̍ na edhi ||

saḥ | tvam | na̱ḥ | a̱gne̱ | a̱va̱maḥ | bha̱va̱ | ū̱tī | nedi̍ṣṭhaḥ | a̱syāḥ | u̱ṣasa̍ḥ | vi-u̍ṣṭau |
ava̍ | ya̱kṣva̱ | na̱ḥ | varu̍ṇam | rarā̍ṇaḥ | vī̱hi | mṛ̱ḻī̱kam | su̱-hava̍ḥ | na̱ḥ | e̱dhi̱ ||4.001.05||

4.001.06a a̱sya śreṣṭhā̍ su̱bhaga̍sya sa̱ṁdṛg de̱vasya̍ ci̱trata̍mā̱ martye̍ṣu |
4.001.06c śuci̍ ghṛ̱taṁ na ta̱ptam aghnyā̍yāḥ spā̱rhā de̱vasya̍ ma̱ṁhane̍va dhe̱noḥ ||

a̱sya | śreṣṭhā̍ | su̱-bhaga̍sya | sa̱m-dṛk | de̱vasya̍ | ci̱tra-ta̍mā | martye̍ṣu |
śuci̍ | ghṛ̱tam | na | ta̱ptam | aghnyā̍yāḥ | spā̱rhā | de̱vasya̍ | ma̱ṁhanā̍-iva | dhe̱noḥ ||4.001.06||

4.001.07a trir a̍sya̱ tā pa̍ra̱mā sa̍nti sa̱tyā spā̱rhā de̱vasya̱ jani̍māny a̱gneḥ |
4.001.07c a̱na̱nte a̱ntaḥ pari̍vīta̱ āgā̱c chuci̍ḥ śu̱kro a̱ryo roru̍cānaḥ ||

triḥ | a̱sya̱ | tā | pa̱ra̱mā | sa̱nti̱ | sa̱tyā | spā̱rhā | de̱vasya̍ | jani̍māni | a̱gneḥ |
a̱na̱nte | a̱ntariti̍ | pari̍-vītaḥ | ā | a̱gā̱t | śuci̍ḥ | śu̱kraḥ | a̱ryaḥ | roru̍cānaḥ ||4.001.07||

4.001.08a sa dū̱to viśved a̱bhi va̍ṣṭi̱ sadmā̱ hotā̱ hira̍ṇyaratho̱ raṁsu̍jihvaḥ |
4.001.08c ro̱hida̍śvo vapu̱ṣyo̍ vi̱bhāvā̱ sadā̍ ra̱ṇvaḥ pi̍tu̱matī̍va sa̱ṁsat ||

saḥ | dū̱taḥ | viśvā̍ | it | a̱bhi | va̱ṣṭi̱ | sadma̍ | hotā̍ | hira̍ṇya-rathaḥ | ram-su̍jihvaḥ |
ro̱hit-a̍śvaḥ | va̱pu̱ṣya̍ḥ | vi̱bhā-vā̍ | sadā̍ | ra̱ṇvaḥ | pi̱tu̱matī̍-iva | sa̱ṁsat ||4.001.08||

4.001.09a sa ce̍taya̱n manu̍ṣo ya̱jñaba̍ndhu̱ḥ pra tam ma̱hyā ra̍śa̱nayā̍ nayanti |
4.001.09c sa kṣe̍ty asya̱ duryā̍su̱ sādha̍n de̱vo marta̍sya sadhani̱tvam ā̍pa ||

saḥ | ce̱ta̱ya̱t | manu̍ṣaḥ | ya̱jña-ba̍ndhuḥ | pra | tam | ma̱hyā | ra̱śa̱nayā̍ | na̱ya̱nti̱ |
saḥ | kṣe̱ti̱ | a̱sya̱ | duryā̍su | sādha̍n | de̱vaḥ | marta̍sya | sa̱dha̱ni̱-tvam | ā̱pa̱ ||4.001.09||

4.001.10a sa tū no̍ a̱gnir na̍yatu prajā̱nann acchā̱ ratna̍ṁ de̱vabha̍kta̱ṁ yad a̍sya |
4.001.10c dhi̱yā yad viśve̍ a̱mṛtā̱ akṛ̍ṇva̱n dyauṣ pi̱tā ja̍ni̱tā sa̱tyam u̍kṣan ||

saḥ | tu | na̱ḥ | a̱gniḥ | na̱ya̱tu̱ | pra̱-jā̱nan | accha̍ | ratna̍m | de̱va-bha̍ktam | yat | a̱sya̱ |
dhi̱yā | yat | viśve̍ | a̱mṛtā̍ḥ | akṛ̍ṇvan | dyauḥ | pi̱tā | ja̱ni̱tā | sa̱tyam | u̱kṣa̱n ||4.001.10||

4.001.11a sa jā̍yata pratha̱maḥ pa̱styā̍su ma̱ho bu̱dhne raja̍so a̱sya yonau̍ |
4.001.11b a̱pād a̍śī̱rṣā gu̱hamā̍no̱ antā̱yoyu̍vāno vṛṣa̱bhasya̍ nī̱ḻe ||

saḥ | jā̱ya̱ta̱ | pra̱tha̱maḥ | pa̱styā̍su | ma̱haḥ | bu̱dhne | raja̍saḥ | a̱sya | yonau̍ |
a̱pāt | a̱śī̱rṣā | gu̱hamā̍naḥ | antā̍ | ā̱-yoyu̍vānaḥ | vṛ̱ṣa̱bhasya̍ | nī̱ḻe ||4.001.11||

4.001.12a pra śardha̍ ārta pratha̱maṁ vi̍pa̱nyām̐ ṛ̱tasya̱ yonā̍ vṛṣa̱bhasya̍ nī̱ḻe |
4.001.12c spā̱rho yuvā̍ vapu̱ṣyo̍ vi̱bhāvā̍ sa̱pta pri̱yāso̍ 'janayanta̱ vṛṣṇe̍ ||

pra | śardha̍ḥ | ā̱rta̱ | pra̱tha̱mam | vi̱-pa̱nyā | ṛ̱tasya̍ | yonā̍ | vṛ̱ṣa̱bhasya̍ | nī̱ḻe |
spā̱rhaḥ | yuvā̍ | va̱pu̱ṣya̍ḥ | vi̱bhā-vā̍ | sa̱pta | pri̱yāsa̍ḥ | a̱ja̱na̱ya̱nta̱ | vṛṣṇe̍ ||4.001.12||

4.001.13a a̱smāka̱m atra̍ pi̱taro̍ manu̱ṣyā̍ a̱bhi pra se̍dur ṛ̱tam ā̍śuṣā̱ṇāḥ |
4.001.13c aśma̍vrajāḥ su̱dughā̍ va̱vre a̱ntar ud u̱srā ā̍jann u̱ṣaso̍ huvā̱nāḥ ||

a̱smāka̍m | atra̍ | pi̱tara̍ḥ | ma̱nu̱ṣyā̍ḥ | a̱bhi | pra | se̱du̱ḥ | ṛ̱tam | ā̱śu̱ṣā̱ṇāḥ |
aśma̍-vrajāḥ | su̱-dughā̍ḥ | va̱vre | a̱ntaḥ | ut | u̱srāḥ | ā̱ja̱n | u̱ṣasa̍ḥ | hu̱vā̱nāḥ ||4.001.13||

4.001.14a te ma̍rmṛjata dadṛ̱vāṁso̱ adri̱ṁ tad e̍ṣām a̱nye a̱bhito̱ vi vo̍can |
4.001.14c pa̱śvaya̍ntrāso a̱bhi kā̱ram a̍rcan vi̱danta̱ jyoti̍ś cakṛ̱panta̍ dhī̱bhiḥ ||

te | ma̱rmṛ̱ja̱ta̱ | da̱dṛ̱-vāṁsa̍ḥ | adri̍m | tat | e̱ṣā̱m | a̱nye | a̱bhita̍ḥ | vi | vo̱ca̱n |
pa̱śva-ya̍ntrāsaḥ | a̱bhi | kā̱ram | a̱rca̱n | vi̱danta̍ | jyoti̍ḥ | ca̱kṛ̱panta̍ | dhī̱bhiḥ ||4.001.14||

4.001.15a te ga̍vya̱tā mana̍sā dṛ̱dhram u̱bdhaṁ gā ye̍mā̱nam pari̱ ṣanta̱m adri̍m |
4.001.15c dṛ̱ḻhaṁ naro̱ vaca̍sā̱ daivye̍na vra̱jaṁ goma̍ntam u̱śijo̱ vi va̍vruḥ ||

te | ga̱vya̱tā | mana̍sā | dṛ̱dhram | u̱bdham | gāḥ | ye̱mā̱nam | pari̍ | santa̍m | adri̍m |
dṛ̱ḻham | nara̍ḥ | vaca̍sā | daivye̍na | vra̱jam | go-ma̍ntam | u̱śija̍ḥ | vi | va̱vru̱ḥ ||4.001.15||

4.001.16a te ma̍nvata pratha̱maṁ nāma̍ dhe̱nos triḥ sa̱pta mā̱tuḥ pa̍ra̱māṇi̍ vindan |
4.001.16c taj jā̍na̱tīr a̱bhy a̍nūṣata̱ vrā ā̱vir bhu̍vad aru̱ṇīr ya̱śasā̱ goḥ ||

te | ma̱nva̱ta̱ | pra̱tha̱mam | nāma̍ | dhe̱noḥ | triḥ | sa̱pta | mā̱tuḥ | pa̱ra̱māṇi̍ | vi̱nda̱n |
tat | jā̱na̱tīḥ | a̱bhi | a̱nū̱ṣa̱ta̱ | vrāḥ | ā̱viḥ | bhu̱va̱t | a̱ru̱ṇīḥ | ya̱śasā̍ | goḥ ||4.001.16||

4.001.17a neśa̱t tamo̱ dudhi̍ta̱ṁ roca̍ta̱ dyaur ud de̱vyā u̱ṣaso̍ bhā̱nur a̍rta |
4.001.17c ā sūryo̍ bṛha̱tas ti̍ṣṭha̱d ajrā̍m̐ ṛ̱ju marte̍ṣu vṛji̱nā ca̱ paśya̍n ||

neśa̍t | tama̍ḥ | dudhi̍tam | roca̍ta | dyauḥ | ut | de̱vyāḥ | u̱ṣasa̍ḥ | bhā̱nuḥ | a̱rta̱ |
ā | sūrya̍ḥ | bṛ̱ha̱taḥ | ti̱ṣṭha̱t | ajrā̍n | ṛ̱ju | marte̍ṣu | vṛ̱ji̱nā | ca̱ | paśya̍n ||4.001.17||

4.001.18a ād it pa̱ścā bu̍budhā̱nā vy a̍khya̱nn ād id ratna̍ṁ dhārayanta̱ dyubha̍ktam |
4.001.18c viśve̱ viśvā̍su̱ duryā̍su de̱vā mitra̍ dhi̱ye va̍ruṇa sa̱tyam a̍stu ||

āt | it | pa̱ścā | bu̱bu̱dhā̱nāḥ | vi | a̱khya̱n | āt | it | ratna̍m | dhā̱ra̱ya̱nta̱ | dyu-bha̍ktam |
viśve̍ | viśvā̍su | duryā̍su | de̱vāḥ | mitra̍ | dhi̱ye | va̱ru̱ṇa̱ | sa̱tyam | a̱stu̱ ||4.001.18||

4.001.19a acchā̍ voceya śuśucā̱nam a̱gniṁ hotā̍raṁ vi̱śvabha̍rasa̱ṁ yaji̍ṣṭham |
4.001.19c śucy ūdho̍ atṛṇa̱n na gavā̱m andho̱ na pū̱tam pari̍ṣiktam a̱ṁśoḥ ||

accha̍ | vo̱ce̱ya̱ | śu̱śu̱cā̱nam | a̱gnim | hotā̍ram | vi̱śva-bha̍rasam | yaji̍ṣṭham |
śuci̍ | ūdha̍ḥ | a̱tṛ̱ṇa̱t | na | gavā̍m | andha̍ḥ | na | pū̱tam | pari̍-siktam | a̱ṁśoḥ ||4.001.19||

4.001.20a viśve̍ṣā̱m adi̍tir ya̱jñiyā̍nā̱ṁ viśve̍ṣā̱m ati̍thi̱r mānu̍ṣāṇām |
4.001.20c a̱gnir de̱vānā̱m ava̍ āvṛṇā̱naḥ su̍mṛḻī̱ko bha̍vatu jā̱tave̍dāḥ ||

viśve̍ṣām | adi̍tiḥ | ya̱jñiyānām | viśve̍ṣām | ati̍thiḥ | mānu̍ṣāṇām |
a̱gniḥ | de̱vānā̍m | ava̍ḥ | ā̱-vṛ̱ṇā̱naḥ | su̱-mṛ̱ḻī̱kaḥ | bha̱va̱tu̱ | jā̱ta-ve̍dāḥ ||4.001.20||


4.002.01a yo martye̍ṣv a̱mṛta̍ ṛ̱tāvā̍ de̱vo de̱veṣv a̍ra̱tir ni̱dhāyi̍ |
4.002.01c hotā̱ yaji̍ṣṭho ma̱hnā śu̱cadhyai̍ ha̱vyair a̱gnir manu̍ṣa īra̱yadhyai̍ ||

yaḥ | martye̍ṣu | a̱mṛta̍ḥ | ṛ̱ta-vā̍ | de̱vaḥ | de̱veṣu | a̱ra̱tiḥ | ni̱-dhāyi̍ |
hotā̍ | yaji̍ṣṭhaḥ | ma̱hnā | śu̱cadhyai̍ | ha̱vyaiḥ | a̱gniḥ | manu̍ṣaḥ | ī̱ra̱yadhyai̍ ||4.002.01||

4.002.02a i̱ha tvaṁ sū̍no sahaso no a̱dya jā̱to jā̱tām̐ u̱bhayā̍m̐ a̱ntar a̍gne |
4.002.02c dū̱ta ī̍yase yuyujā̱na ṛ̍ṣva ṛjumu̱ṣkān vṛṣa̍ṇaḥ śu̱krām̐ś ca̍ ||

i̱ha | tvam | sū̱no̱ iti̍ | sa̱ha̱sa̱ḥ | na̱ḥ | a̱dya | jā̱taḥ | jā̱tān | u̱bhayā̍n | a̱ntaḥ | a̱gne̱ |
dū̱taḥ | ī̱ya̱se̱ | yu̱yu̱jā̱naḥ | ṛ̱ṣva̱ | ṛ̱ju̱-mu̱ṣkān | vṛṣa̍ṇaḥ | śu̱krān | ca̱ ||4.002.02||

4.002.03a atyā̍ vṛdha̱snū rohi̍tā ghṛ̱tasnū̍ ṛ̱tasya̍ manye̱ mana̍sā̱ javi̍ṣṭhā |
4.002.03c a̱ntar ī̍yase aru̱ṣā yu̍jā̱no yu̱ṣmām̐ś ca̍ de̱vān viśa̱ ā ca̱ martā̍n ||

atyā̍ | vṛ̱dha̱snū iti̍ vṛ̱dha̱-snū | rohi̍tā | ghṛ̱tasnū̱ iti̍ ghṛ̱ta-snū̍ | ṛ̱tasya̍ | ma̱nye̱ | mana̍sā | javi̍ṣṭhā |
a̱ntaḥ | ī̱ya̱se̱ | a̱ru̱ṣā | yu̱jā̱naḥ | yu̱ṣmān | ca̱ | de̱vān | viśa̍ḥ | ā | ca̱ | martā̍n ||4.002.03||

4.002.04a a̱rya̱maṇa̱ṁ varu̍ṇam mi̱tram e̍ṣā̱m indrā̱viṣṇū̍ ma̱ruto̍ a̱śvino̱ta |
4.002.04c svaśvo̍ agne su̱ratha̍ḥ su̱rādhā̱ ed u̍ vaha suha̱viṣe̱ janā̍ya ||

a̱rya̱maṇa̍m | varu̍ṇam | mi̱tram | e̱ṣā̱m | indrā̱viṣṇū̱ iti̍ | ma̱ruta̍ḥ | a̱śvinā̍ | u̱ta |
su̱-aśva̍ḥ | a̱gne̱ | su̱-ratha̍ḥ | su̱-rādhā̍ḥ | ā | it | ū̱m̐ iti̍ | va̱ha̱ | su̱-ha̱viṣe̍ | janā̍ya ||4.002.04||

4.002.05a gomā̍m̐ a̱gne 'vi̍mām̐ a̱śvī ya̱jño nṛ̱vatsa̍khā̱ sada̱m id a̍pramṛ̱ṣyaḥ |
4.002.05c iḻā̍vām̐ e̱ṣo a̍sura pra̱jāvā̍n dī̱rgho ra̱yiḥ pṛ̍thubu̱dhnaḥ sa̱bhāvā̍n ||

go-mā̍n | a̱gne̱ | avi̍-mān | a̱śvī | ya̱jñaḥ | nṛ̱vat-sa̍khā | sada̍m | it | a̱pra̱-mṛ̱ṣyaḥ |
iḻā̍-vān | e̱ṣaḥ | a̱su̱ra̱ | pra̱jā-vā̍n | dī̱rghaḥ | ra̱yiḥ | pṛ̱thu̱-bu̱dhnaḥ | sa̱bhā-vā̍n ||4.002.05||

4.002.06a yas ta̍ i̱dhmaṁ ja̱bhara̍t siṣvidā̱no mū̱rdhāna̍ṁ vā ta̱tapa̍te tvā̱yā |
4.002.06c bhuva̱s tasya̱ svata̍vām̐ḥ pā̱yur a̍gne̱ viśva̍smāt sīm aghāya̱ta u̍ruṣya ||

yaḥ | te̱ | i̱dhmam | ja̱bhara̍t | si̱ṣvi̱dā̱naḥ | mū̱rdhāna̍m | vā | ta̱tapa̍te | tvā̱-yā |
bhuva̍ḥ | tasya̍ | sva-ta̍vān | pā̱yuḥ | a̱gne̱ | viśva̍smāt | sī̱m | a̱gha̱-ya̱taḥ | u̱ru̱ṣya̱ ||4.002.06||

4.002.07a yas te̱ bharā̱d anni̍yate ci̱d anna̍ṁ ni̱śiṣa̍n ma̱ndram ati̍thim u̱dīra̍t |
4.002.07c ā de̍va̱yur i̱nadha̍te duro̱ṇe tasmi̍n ra̱yir dhru̱vo a̍stu̱ dāsvā̍n ||

yaḥ | te̱ | bharā̍t | anni̍-yate | ci̱t | anna̍m | ni̱-śiṣa̍t | ma̱ndram | ati̍thim | u̱t-īra̍t |
ā | de̱va̱-yuḥ | i̱nadha̍te | du̱ro̱ṇe | tasmi̍n | ra̱yiḥ | dhru̱vaḥ | a̱stu̱ | dāsvā̍n ||4.002.07||

4.002.08a yas tvā̍ do̱ṣā ya u̱ṣasi̍ pra̱śaṁsā̍t pri̱yaṁ vā̍ tvā kṛ̱ṇava̍te ha̱viṣmā̍n |
4.002.08c aśvo̱ na sve dama̱ ā he̱myāvā̱n tam aṁha̍saḥ pīparo dā̱śvāṁsa̍m ||

yaḥ | tvā̱ | do̱ṣā | yaḥ | u̱ṣasi̍ | pra̱-śaṁsā̍t | pri̱yam | vā̱ | tvā̱ | kṛ̱ṇava̍te | ha̱viṣmā̍n |
aśva̍ḥ | na | sve | dame̍ | ā | he̱myā-vā̍n | tam | aṁha̍saḥ | pī̱pa̱ra̱ḥ | dā̱śvāṁsa̍m ||4.002.08||

4.002.09a yas tubhya̍m agne a̱mṛtā̍ya̱ dāśa̱d duva̱s tve kṛ̱ṇava̍te ya̱tasru̍k |
4.002.09c na sa rā̱yā śa̍śamā̱no vi yo̍ṣa̱n naina̱m aṁha̱ḥ pari̍ varad aghā̱yoḥ ||

yaḥ | tubhya̍m | a̱gne̱ | a̱mṛtā̍ya | dāśa̍t | duva̍ḥ | tve iti̍ | kṛ̱ṇava̍te | ya̱ta-sru̍k |
na | saḥ | rā̱yā | śa̱śa̱mā̱naḥ | vi | yo̱ṣa̱t | na | e̱na̱m | aṁha̍ḥ | pari̍ | va̱ra̱t | a̱gha̱-yoḥ ||4.002.09||

4.002.10a yasya̱ tvam a̍gne adhva̱raṁ jujo̍ṣo de̱vo marta̍sya̱ sudhi̍ta̱ṁ rarā̍ṇaḥ |
4.002.10c prī̱ted a̍sa̱d dhotrā̱ sā ya̍vi̱ṣṭhāsā̍ma̱ yasya̍ vidha̱to vṛ̱dhāsa̍ḥ ||

yasya̍ | tvam | a̱gne̱ | a̱dhva̱ram | jujo̍ṣaḥ | de̱vaḥ | marta̍sya | su̱-dhi̍tam | rarā̍ṇaḥ |
prī̱tā | it | a̱sa̱t | hotrā̍ | sā | ya̱vi̱ṣṭha̱ | asā̍ma | yasya̍ | vi̱dha̱taḥ | vṛ̱dhāsa̍ḥ ||4.002.10||

4.002.11a citti̱m aci̍ttiṁ cinava̱d vi vi̱dvān pṛ̱ṣṭheva̍ vī̱tā vṛ̍ji̱nā ca̱ martā̍n |
4.002.11c rā̱ye ca̍ naḥ svapa̱tyāya̍ deva̱ diti̍ṁ ca̱ rāsvādi̍tim uruṣya ||

citti̍m | aci̍ttim | ci̱na̱va̱t | vi | vi̱dvān | pṛ̱ṣṭā-i̍va | vī̱tā | vṛ̱ji̱nā | ca̱ | martā̍n |
rā̱ye | ca̱ | na̱ḥ | su̱-a̱pa̱tyāya̍ | de̱va̱ | diti̍m | ca̱ | rāsva̍ | adi̍tim | u̱ru̱ṣya̱ ||4.002.11||

4.002.12a ka̱viṁ śa̍śāsuḥ ka̱vayo 'da̍bdhā nidhā̱raya̍nto̱ duryā̍sv ā̱yoḥ |
4.002.12c ata̱s tvaṁ dṛśyā̍m̐ agna e̱tān pa̱ḍbhiḥ pa̍śye̱r adbhu̍tām̐ a̱rya evai̍ḥ ||

ka̱vim | śa̱śā̱su̱ḥ | ka̱vaya̍ḥ | ada̍bdhāḥ | ni̱-dhā̱raya̍ntaḥ | duryā̍su | ā̱yoḥ |
ata̍ḥ | tvam | dṛśyā̍n | a̱gne̱ | e̱tān | pa̱ṭ-bhiḥ | pa̱śye̱ḥ | adbhu̍tān | a̱ryaḥ | evai̍ḥ ||4.002.12||

4.002.13a tvam a̍gne vā̱ghate̍ su̱praṇī̍tiḥ su̱taso̍māya vidha̱te ya̍viṣṭha |
4.002.13c ratna̍m bhara śaśamā̱nāya̍ ghṛṣve pṛ̱thu śca̱ndram ava̍se carṣaṇi̱prāḥ ||

tvam | a̱gne̱ | vā̱ghate̍ | su̱-pranī̍tiḥ | su̱ta-so̍māya | vi̱dha̱te | ya̱vi̱ṣṭha̱ |
ratna̍m | bha̱ra̱ | śa̱śa̱mā̱nāya̍ | ghṛ̱ṣve̱ | pṛ̱thu | ca̱ndram | ava̍se | ca̱rṣa̱ṇi̱-prāḥ ||4.002.13||

4.002.14a adhā̍ ha̱ yad va̱yam a̍gne tvā̱yā pa̱ḍbhir haste̍bhiś cakṛ̱mā ta̱nūbhi̍ḥ |
4.002.14c ratha̱ṁ na kranto̱ apa̍sā bhu̱rijo̍r ṛ̱taṁ ye̍muḥ su̱dhya̍ āśuṣā̱ṇāḥ ||

adha̍ | ha̱ | yat | va̱yam | a̱gne̱ | tvā̱-yā | pa̱ṭ-bhiḥ | haste̍bhiḥ | ca̱kṛ̱ma | ta̱nūbhi̍ḥ |
ratha̍m | na | kranta̍ḥ | apa̍sā | bhu̱rijo̍ḥ | ṛ̱tam | ye̱mu̱ḥ | su̱-dhya̍ḥ | ā̱śu̱ṣā̱ṇāḥ ||4.002.14||

4.002.15a adhā̍ mā̱tur u̱ṣasa̍ḥ sa̱pta viprā̱ jāye̍mahi pratha̱mā ve̱dhaso̱ nṝn |
4.002.15c di̱vas pu̱trā aṅgi̍raso bhave̱mādri̍ṁ rujema dha̱nina̍ṁ śu̱canta̍ḥ ||

adha̍ | mā̱tuḥ | u̱ṣasa̍ḥ | sa̱pta | viprā̍ḥ | jāye̍mahi | pra̱tha̱māḥ | ve̱dhasa̍ḥ | nṝn |
di̱vaḥ | pu̱trāḥ | aṅgi̍rasaḥ | bha̱ve̱ma̱ | adri̍m | ru̱je̱ma̱ | dha̱nina̍m | śu̱canta̍ḥ ||4.002.15||

4.002.16a adhā̱ yathā̍ naḥ pi̱tara̱ḥ parā̍saḥ pra̱tnāso̍ agna ṛ̱tam ā̍śuṣā̱ṇāḥ |
4.002.16c śucīd a̍ya̱n dīdhi̍tim uktha̱śāsa̱ḥ kṣāmā̍ bhi̱ndanto̍ aru̱ṇīr apa̍ vran ||

adha̍ | yathā̍ | na̱ḥ | pi̱tara̍ḥ | parā̍saḥ | pra̱tnāsa̍ḥ | a̱gne̱ | ṛ̱tam | ā̱śu̱ṣā̱ṇāḥ |
śuci̍ | it | a̱ya̱n | dīdhi̍tim | u̱ktha̱-śāsaḥ | kṣāmā̍ | bhi̱ndanta̍ḥ | a̱ru̱ṇīḥ | apa̍ | vra̱n ||4.002.16||

4.002.17a su̱karmā̍ṇaḥ su̱ruco̍ deva̱yanto 'yo̱ na de̱vā jani̍mā̱ dhama̍ntaḥ |
4.002.17c śu̱canto̍ a̱gniṁ va̍vṛ̱dhanta̱ indra̍m ū̱rvaṁ gavya̍m pari̱ṣada̍nto agman ||

su̱-karmā̍ṇaḥ | su̱-ruca̍ḥ | de̱va̱-yanta̍ḥ | aya̍ḥ | na | de̱vāḥ | jani̍ma | dhama̍ntaḥ |
śu̱canta̍ḥ | a̱gnim | va̱vṛ̱dhanta̍ḥ | indra̍m | ū̱rvam | gavya̍m | pa̱ri̱-sada̍ntaḥ | a̱gma̱n ||4.002.17||

4.002.18a ā yū̱theva̍ kṣu̱mati̍ pa̱śvo a̍khyad de̱vānā̱ṁ yaj jani̱mānty u̍gra |
4.002.18c martā̍nāṁ cid u̱rvaśī̍r akṛpran vṛ̱dhe ci̍d a̱rya upa̍rasyā̱yoḥ ||

ā | yū̱thā-i̍va | kṣu̱-mati̍ | pa̱śvaḥ | a̱khya̱t | de̱vānā̍m | yat | ja̱ni̱ma | anti̍ | u̱gra̱ |
martā̍nām | ci̱t | u̱rvaśī̍ḥ | a̱kṛ̱pra̱n | vṛ̱dhe | ci̱t | a̱ryaḥ | upa̍rasya | ā̱yoḥ ||4.002.18||

4.002.19a aka̍rma te̱ svapa̍so abhūma ṛ̱tam a̍vasrann u̱ṣaso̍ vibhā̱tīḥ |
4.002.19c anū̍nam a̱gnim pu̍ru̱dhā su̍śca̱ndraṁ de̱vasya̱ marmṛ̍jata̱ś cāru̱ cakṣu̍ḥ ||

aka̍rma | te̱ | si̱-apa̍saḥ | a̱bhū̱ma̱ | ṛ̱tam | a̱va̱sra̱n | u̱ṣasa̍ḥ | vi̱-bhā̱tīḥ |
anū̍nam | a̱gnim | pu̱ru̱dhā | su̱-ca̱ndram | de̱vasya̍ | marmṛ̍jataḥ | cāru̍ | cakṣu̍ḥ ||4.002.19||

4.002.20a e̱tā te̍ agna u̱cathā̍ni ve̱dho 'vo̍cāma ka̱vaye̱ tā ju̍ṣasva |
4.002.20c uc cho̍casva kṛṇu̱hi vasya̍so no ma̱ho rā̱yaḥ pu̍ruvāra̱ pra ya̍ndhi ||

e̱tā | te̱ | a̱gne̱ | u̱cathā̍ni | ve̱dhaḥ | avo̍cāma | ka̱vaye̍ | tā | ju̱ṣa̱sva̱ |
ut | śo̱ca̱sva̱ | kṛ̱ṇu̱hi | vasya̍saḥ | na̱ḥ | ma̱haḥ | rā̱yaḥ | pu̱ru̱-vā̱ra̱ | pra | ya̱ndhi̱ ||4.002.20||


4.003.01a ā vo̱ rājā̍nam adhva̱rasya̍ ru̱draṁ hotā̍raṁ satya̱yaja̱ṁ roda̍syoḥ |
4.003.01c a̱gnim pu̱rā ta̍nayi̱tnor a̱cittā̱d dhira̍ṇyarūpa̱m ava̍se kṛṇudhvam ||

ā | va̱ḥ | rājā̍nam | a̱dhva̱rasya̍ | ru̱dram | hotā̍ram | sa̱tya̱-yaja̱m | roda̍syoḥ |
a̱gnim | pu̱rā | ta̱na̱yi̱tnoḥ | a̱cittā̍t | hira̍ṇya-rūpam | ava̍se | kṛ̱ṇu̱dhva̱m ||4.003.01||

4.003.02a a̱yaṁ yoni̍ś cakṛ̱mā yaṁ va̱yaṁ te̍ jā̱yeva̱ patya̍ uśa̱tī su̱vāsā̍ḥ |
4.003.02c a̱rvā̱cī̱naḥ pari̍vīto̱ ni ṣī̍de̱mā u̍ te svapāka pratī̱cīḥ ||

a̱yam | yoni̍ḥ | ca̱kṛ̱ma | yam | va̱yam | te̱ | jā̱yā-i̍va | patye̍ | u̱śa̱tī | su̱-vāsā̍ḥ |
a̱rvā̱cī̱naḥ | pari̍-vītaḥ | ni | sī̱da̱ | i̱māḥ | ū̱m̐ iti̍ | te̱ | su̱-a̱pā̱ka̱ | pra̱tī̱cīḥ ||4.003.02||

4.003.03a ā̱śṛ̱ṇva̱te adṛ̍pitāya̱ manma̍ nṛ̱cakṣa̍se sumṛḻī̱kāya̍ vedhaḥ |
4.003.03c de̱vāya̍ śa̱stim a̱mṛtā̍ya śaṁsa̱ grāve̍va̱ sotā̍ madhu̱ṣud yam ī̱ḻe ||

ā̱śṛ̱ṇva̱te | adṛ̍pitāya | manma̍ | nṛ̱-cakṣa̍se | su̱-mṛ̱ḻī̱kāya̍ | ve̱dha̱ḥ |
de̱vāya̍ | śa̱stim | a̱mṛtā̍ya | śa̱ṁsa̱ | grāvā̍-iva | sotā̍ | ma̱dhu̱-sut | yam | ī̱ḻe ||4.003.03||

4.003.04a tvaṁ ci̍n na̱ḥ śamyā̍ agne a̱syā ṛ̱tasya̍ bodhy ṛtacit svā̱dhīḥ |
4.003.04c ka̱dā ta̍ u̱kthā sa̍dha̱mādyā̍ni ka̱dā bha̍vanti sa̱khyā gṛ̱he te̍ ||

tvam | ci̱t | na̱ḥ | śamyai̍ | a̱gne̱ | a̱syāḥ | ṛ̱tasya̍ | bo̱dhi̱ | ṛ̱ta̱-ci̱t | su̱-ā̱dhīḥ |
ka̱dā | te̱ | u̱kthā | sa̱dha̱-mādyā̍ni | ka̱dā | bha̱va̱nti̱ | sa̱khyā | gṛ̱he | te̱ ||4.003.04||

4.003.05a ka̱thā ha̱ tad varu̍ṇāya̱ tvam a̍gne ka̱thā di̱ve ga̍rhase̱ kan na̱ āga̍ḥ |
4.003.05c ka̱thā mi̱trāya̍ mī̱ḻhuṣe̍ pṛthi̱vyai brava̱ḥ kad a̍rya̱mṇe kad bhagā̍ya ||

ka̱thā | ha̱ | tat | varu̍ṇāya | tvam | a̱gne̱ | ka̱thā | di̱ve | ga̱rha̱se̱ | kat | na̱ḥ | āga̍ḥ |
ka̱thā | mi̱trāya | mī̱ḻhuṣe̍ | pṛ̱thi̱vyai | brava̍ḥ | kat | a̱rya̱mṇe | kat | bhagā̍ya ||4.003.05||

4.003.06a kad dhiṣṇyā̍su vṛdhasā̱no a̍gne̱ kad vātā̍ya̱ prata̍vase śubha̱ṁye |
4.003.06c pari̍jmane̱ nāsa̍tyāya̱ kṣe brava̱ḥ kad a̍gne ru̱drāya̍ nṛ̱ghne ||

kat | dhiṣṇyā̍su | vṛ̱dha̱sā̱naḥ | a̱gne̱ | kat | vātā̍ya | pra-ta̍vase | śu̱bha̱m̐mye |
pari̍-jmane | nāsa̍tyāya | kṣe | brava̍ḥ | kat | a̱gne̱ | ru̱drāya̍ | nṛ̱-ghne ||4.003.06||

4.003.07a ka̱thā ma̱he pu̍ṣṭimbha̱rāya̍ pū̱ṣṇe kad ru̱drāya̱ suma̍khāya havi̱rde |
4.003.07c kad viṣṇa̍va urugā̱yāya̱ reto̱ brava̱ḥ kad a̍gne̱ śara̍ve bṛha̱tyai ||

ka̱thā | ma̱he | pu̱ṣṭi̱m-bha̱rāya̍ | pū̱ṣṇe | kat | ru̱drāya̍ | su-ma̍khāya | ha̱vi̱ḥ-de |
kat | viṣṇa̍ve | u̱ru̱-gā̱yāya̍ | reta̍ḥ | brava̍ḥ | kat | a̱gne̱ | śara̍ve | bṛ̱ha̱tyai ||4.003.07||

4.003.08a ka̱thā śardhā̍ya ma̱rutā̍m ṛ̱tāya̍ ka̱thā sū̱re bṛ̍ha̱te pṛ̱cchyamā̍naḥ |
4.003.08c prati̍ bra̱vo 'di̍taye tu̱rāya̱ sādhā̍ di̱vo jā̍tavedaś ciki̱tvān ||

ka̱thā | śardhā̍ya | ma̱rutā̍m | ṛ̱tāya̍ | ka̱thā | sū̱re | bṛ̱ha̱te | pṛ̱cchyamā̍naḥ |
prati̍ | bra̱va̱ḥ | adi̍taye | tu̱rāya̍ | sādha̍ | di̱vaḥ | jā̱ta̱-ve̱da̱ḥ | ci̱ki̱tvān ||4.003.08||

4.003.09a ṛ̱tena̍ ṛ̱taṁ niya̍tam īḻa̱ ā gor ā̱mā sacā̱ madhu̍mat pa̱kvam a̍gne |
4.003.09c kṛ̱ṣṇā sa̱tī ruśa̍tā dhā̱sinai̱ṣā jāma̍ryeṇa̱ paya̍sā pīpāya ||

ṛ̱tena̍ | ṛ̱tam | ni-ya̍tam | ī̱ḻe̱ | ā | goḥ | ā̱mā | sacā̍ | madhu̍-mat | pa̱kvam | a̱gne̱ |
kṛ̱ṣṇā | sa̱tī | ruśa̍tā | dhā̱sinā̍ | e̱ṣā | jāma̍ryeṇa | paya̍sā | pī̱pā̱ya̱ ||4.003.09||

4.003.10a ṛ̱tena̱ hi ṣmā̍ vṛṣa̱bhaś ci̍d a̱ktaḥ pumā̍m̐ a̱gniḥ paya̍sā pṛ̱ṣṭhye̍na |
4.003.10c aspa̍ndamāno acarad vayo̱dhā vṛṣā̍ śu̱kraṁ du̍duhe̱ pṛśni̱r ūdha̍ḥ ||

ṛ̱tena̍ḥ | hi | sma̱ | vṛ̱ṣa̱bhaḥ | ci̱t | a̱ktaḥ | pumā̍n | a̱gniḥ | paya̍sā | pṛ̱ṣṭye̍na |
aspa̍ndamānaḥ | a̱ca̱ra̱t | va̱ya̱ḥ-dhāḥ | vṛṣā̍ | śu̱kram | du̱du̱he̱ | pṛśni̍ḥ | ūdha̍ḥ ||4.003.10||

4.003.11a ṛ̱tenādri̱ṁ vy a̍san bhi̱danta̱ḥ sam aṅgi̍raso navanta̱ gobhi̍ḥ |
4.003.11c śu̱naṁ nara̱ḥ pari̍ ṣadann u̱ṣāsa̍m ā̱viḥ sva̍r abhavaj jā̱te a̱gnau ||

ṛtena̍ | adri̍m | vi | a̱sa̱n | bhi̱danta̍ḥ | sam | aṅgi̍rasaḥ | na̱va̱nta̱ | go-bhi̍ḥ |
śu̱nam | nara̍ḥ | pari̍ | sa̱da̱n | u̱ṣasa̍m | ā̱viḥ | sva̍ḥ | a̱bha̱va̱t | jā̱te | a̱gnau ||4.003.11||

4.003.12a ṛ̱tena̍ de̱vīr a̱mṛtā̱ amṛ̍ktā̱ arṇo̍bhi̱r āpo̱ madhu̍madbhir agne |
4.003.12c vā̱jī na sarge̍ṣu prastubhā̱naḥ pra sada̱m it sravi̍tave dadhanyuḥ ||

ṛ̱tena̍ | de̱vīḥ | a̱mṛtā̍ḥ | amṛ̍ktāḥ | arṇa̍ḥ-bhiḥ | āpa̍ḥ | madhu̍mat-bhiḥ | a̱gne̱ |
vā̱jī | na | sarge̍ṣu | pra̱-stu̱bhā̱naḥ | pra | sada̍m | it | sravi̍tave | da̱dha̱nyu̱h ||4.003.12||

4.003.13a mā kasya̍ ya̱kṣaṁ sada̱m id dhu̱ro gā̱ mā ve̱śasya̍ pramina̱to māpeḥ |
4.003.13c mā bhrātu̍r agne̱ anṛ̍jor ṛ̱ṇaṁ ve̱r mā sakhyu̱r dakṣa̍ṁ ri̱por bhu̍jema ||

mā | kasya̍ | ya̱kṣam | sada̍m | it | hu̱raḥ | gā̱ḥ | mā | ve̱śasya̍ | pra̱-mi̱na̱taḥ | mā | ā̱peḥ |
mā | bhrātu̍ḥ | a̱gne̱ | anṛ̍joḥ | ṛ̱ṇam | ve̱ḥ | mā | sakhyu̍ḥ | dakṣa̍m | ri̱poḥ | bhu̱je̱ma̱ ||4.003.13||

4.003.14a rakṣā̍ ṇo agne̱ tava̱ rakṣa̍ṇebhī rārakṣā̱ṇaḥ su̍makha prīṇā̱naḥ |
4.003.14c prati̍ ṣphura̱ vi ru̍ja vī̱ḍv aṁho̍ ja̱hi rakṣo̱ mahi̍ cid vāvṛdhā̱nam ||

rakṣa̍ | na̱ḥ | a̱gne̱ | tava̍ | rakṣa̍ṇebhiḥ | ra̱ra̱kṣā̱ṇaḥ | su̱-ma̱kha̱ | prī̱ṇā̱naḥ |
prati̍ | sphu̱ra̱ | vi | ru̱ja̱ | vī̱ḻu | aṁha̍ḥ | ja̱hi | rakṣa̍ḥ | mahi̍ | cit | va̱vṛ̱dhā̱nam ||4.003.14||

4.003.15a e̱bhir bha̍va su̱manā̍ agne a̱rkair i̱mān spṛ̍śa̱ manma̍bhiḥ śūra̱ vājā̍n |
4.003.15c u̱ta brahmā̍ṇy aṅgiro juṣasva̱ saṁ te̍ śa̱stir de̱vavā̍tā jareta ||

e̱bhiḥ | bha̱va̱ | su̱-manā̍ḥ | a̱gne̱ | a̱rkaiḥ | i̱mān | spṛ̱śa̱ | manma̍-bhiḥ | śū̱ra̱ | vājā̍n |
u̱ta | brahmā̍ṇi | a̱ṅgi̱ra̱ḥ | ju̱ṣa̱sva̱ | sam | te̱ | śa̱stiḥ | de̱va-vā̍tā | ja̱re̱ta̱ ||4.003.15||

4.003.16a e̱tā viśvā̍ vi̱duṣe̱ tubhya̍ṁ vedho nī̱thāny a̍gne ni̱ṇyā vacā̍ṁsi |
4.003.16c ni̱vaca̍nā ka̱vaye̱ kāvyā̱ny aśa̍ṁsiṣam ma̱tibhi̱r vipra̍ u̱kthaiḥ ||

e̱tā | viśvā̍ | vi̱duṣe̍ | tubhya̍m | ve̱dha̱ḥ | nī̱thāni̍ | a̱gne̱ | ni̱ṇyā | vacā̍ṁsi |
ni̱-vaca̍nā | ka̱vaye̍ | kāvyā̍ni | aśa̍ṁsiṣam | ma̱ti-bhi̍ḥ | vipra̍ḥ | u̱kthaiḥ ||4.003.16||


4.004.01a kṛ̱ṇu̱ṣva pāja̱ḥ prasi̍ti̱ṁ na pṛ̱thvīṁ yā̱hi rāje̱vāma̍vā̱m̐ ibhe̍na |
4.004.01c tṛ̱ṣvīm anu̱ prasi̍tiṁ drūṇā̱no 'stā̍si̱ vidhya̍ ra̱kṣasa̱s tapi̍ṣṭhaiḥ ||

kṛ̱ṇu̱ṣva | pāja̍ḥ | pra-si̍tim | na | pṛ̱thvīm | yā̱hi | rājā̍-iva | ama̍-vān | ibhe̍na |
tṛ̱ṣvīm | anu̍ | pra-si̍tim | drū̱ṇā̱naḥ | astā̍ | a̱si̱ | vidhya̍ | ra̱kṣasa̍ḥ | tapi̍ṣṭhaiḥ ||4.004.01||

4.004.02a tava̍ bhra̱māsa̍ āśu̱yā pa̍ta̱nty anu̍ spṛśa dhṛṣa̱tā śośu̍cānaḥ |
4.004.02c tapū̍ṁṣy agne ju̱hvā̍ pata̱ṁgān asa̍ṁdito̱ vi sṛ̍ja̱ viṣva̍g u̱lkāḥ ||

tava̍ | bhra̱māsa̍ḥ | ā̱śu̱-yā | pa̱ta̱nti̱ | anu̍ | spṛ̱śa̱ | dhṛ̱ṣa̱tā | śośu̍cānaḥ |
tapū̍ṁṣi | a̱gne̱ | ju̱hvā̍ | pa̱ta̱ṅgān | asa̍m-ditaḥ | vi | sṛ̱ja̱ | viṣva̍k | u̱lkāḥ ||4.004.02||

4.004.03a prati̱ spaśo̱ vi sṛ̍ja̱ tūrṇi̍tamo̱ bhavā̍ pā̱yur vi̱śo a̱syā ada̍bdhaḥ |
4.004.03c yo no̍ dū̱re a̱ghaśa̍ṁso̱ yo anty agne̱ māki̍ṣ ṭe̱ vyathi̱r ā da̍dharṣīt ||

prati̍ | spaśa̍ḥ | vi | sṛ̱ja̱ | tūrṇi̍-tamaḥ | bhava̍ | pā̱yuḥ | vi̱śaḥ | a̱syāḥ | ada̍bdhaḥ |
yaḥ | na̱ḥ | dū̱re | a̱gha-śa̍ṁsaḥ | yaḥ | anti̍ | agne̍ | māki̍ḥ | te̱ | vyathi̍ḥ | ā | da̱dha̱rṣī̱t ||4.004.03||

4.004.04a ud a̍gne tiṣṭha̱ praty ā ta̍nuṣva̱ ny a1̱̍mitrā̍m̐ oṣatāt tigmahete |
4.004.04c yo no̱ arā̍tiṁ samidhāna ca̱kre nī̱cā taṁ dha̍kṣy ata̱saṁ na śuṣka̍m ||

ut | a̱gne̱ | ti̱ṣṭha̱ | prati̍ | ā | ta̱nu̱ṣva̱ | ni | a̱mitrā̍n | o̱ṣa̱tā̱t | ti̱gma̱-he̱te̱ |
yaḥ | na̱ḥ | arā̍tim | sa̱m-i̱dhā̱na̱ | ca̱kre | nī̱cā | tam | dha̱kṣi̱ | a̱ta̱sam | na | śuṣka̍m ||4.004.04||

4.004.05a ū̱rdhvo bha̍va̱ prati̍ vi̱dhyādhy a̱smad ā̱viṣ kṛ̍ṇuṣva̱ daivyā̍ny agne |
4.004.05c ava̍ sthi̱rā ta̍nuhi yātu̱jūnā̍ṁ jā̱mim ajā̍mi̱m pra mṛ̍ṇīhi̱ śatrū̍n ||

ū̱rdhvaḥ | bha̱va̱ | prati̍ | vi̱dhya̱ | adhi̍ | a̱smat | ā̱viḥ | kṛ̱ṇu̱ṣva̱ | daivyā̍ni | a̱gne̱ |
ava̍ | sthi̱rā | ta̱nu̱hi̱ | yā̱tu̱-jūnā̍m | jā̱mim | ajā̍mim | pra | mṛ̱ṇī̱hi̱ | śatrū̍n ||4.004.05||

4.004.06a sa te̍ jānāti suma̱tiṁ ya̍viṣṭha̱ ya īva̍te̱ brahma̍ṇe gā̱tum aira̍t |
4.004.06c viśvā̍ny asmai su̱dinā̍ni rā̱yo dyu̱mnāny a̱ryo vi duro̍ a̱bhi dyau̍t ||

saḥ | te̱ | jā̱nā̱ti̱ | su̱-ma̱tim | ya̱vi̱ṣṭha̱ | yaḥ | īva̍te | brahma̍ṇe | gā̱tum | aira̍t |
viśvā̍ni | a̱smai̱ | su̱-dinā̍ni | rā̱yaḥ | dyu̱mnāni̍ | a̱ryaḥ | vi | dura̍ḥ | a̱bhi | dyau̍t ||4.004.06||

4.004.07a sed a̍gne astu su̱bhaga̍ḥ su̱dānu̱r yas tvā̱ nitye̍na ha̱viṣā̱ ya u̱kthaiḥ |
4.004.07c piprī̍ṣati̱ sva āyu̍ṣi duro̱ṇe viśved a̍smai su̱dinā̱ sāsa̍d i̱ṣṭiḥ ||

saḥ | it | a̱gne̱ | a̱stu̱ | su̱-bhaga̍ḥ | su̱-dānu̍ḥ | yaḥ | tvā̱ | nitye̍na | ha̱viṣā̍ | yaḥ | u̱kthaiḥ |
piprī̍ṣati | sve | āyu̍ṣi | du̱ro̱ṇe | viśvā̍ | it | a̱smai̱ | su̱-dinā̍ | sā | a̱sa̱t | i̱ṣṭiḥ ||4.004.07||

4.004.08a arcā̍mi te suma̱tiṁ ghoṣy a̱rvāk saṁ te̍ vā̱vātā̍ jaratām i̱yaṁ gīḥ |
4.004.08c svaśvā̍s tvā su̱rathā̍ marjayemā̱sme kṣa̱trāṇi̍ dhāraye̱r anu̱ dyūn ||

arcā̍mi | te̱ | su̱-ma̱tim | ghoṣi̍ | a̱rvāk | sam | te̱ | va̱vātā̍ | ja̱ra̱tā̱m | i̱yam | gīḥ |
su̱-aśvā̍ḥ | tvā̱ | su̱-rathā̍ḥ | ma̱rja̱ye̱ma̱ | a̱sme iti̍ | kṣa̱trāṇi̍ | dhā̱ra̱ye̱ḥ | anu̍ | dyūn ||4.004.08||

4.004.09a i̱ha tvā̱ bhūry ā ca̍re̱d upa̱ tman doṣā̍vastar dīdi̱vāṁsa̱m anu̱ dyūn |
4.004.09c krīḻa̍ntas tvā su̱mana̍saḥ sapemā̱bhi dyu̱mnā ta̍sthi̱vāṁso̱ janā̍nām ||

i̱ha | tvā̱ | bhūri̍ | ā | ca̱re̱t | upa̍ | tman | doṣā̍-vastaḥ | dī̱di̱vāṁsa̍m | anu̍ | dyūn |
krīḻa̍ntaḥ | tvā̱ | su̱-mana̍saḥ | sa̱pe̱ma̱ | a̱bhi | dyu̱mnā | ta̱sthi̱vāṁsa̍ḥ | janā̍nām ||4.004.09||

4.004.10a yas tvā̱ svaśva̍ḥ suhira̱ṇyo a̍gna upa̱yāti̱ vasu̍matā̱ rathe̍na |
4.004.10c tasya̍ trā̱tā bha̍vasi̱ tasya̱ sakhā̱ yas ta̍ āti̱thyam ā̍nu̱ṣag jujo̍ṣat ||

yaḥ | tvā̱ | su̱-aśva̍ḥ | su̱-hi̱ra̱ṇyaḥ | a̱gne̱ | u̱pa̱-yāti̍ | vasu̍-matā | rathe̍na |
tasya̍ | trā̱tā | bha̱va̱si̱ | tasya̍ | sakhā̍ | yaḥ | te̱ | ā̱ti̱thyam | ā̱nu̱ṣak | jujo̍ṣat ||4.004.10||

4.004.11a ma̱ho ru̍jāmi ba̱ndhutā̱ vaco̍bhi̱s tan mā̍ pi̱tur gota̍mā̱d anv i̍yāya |
4.004.11c tvaṁ no̍ a̱sya vaca̍saś cikiddhi̱ hota̍r yaviṣṭha sukrato̱ damū̍nāḥ ||

ma̱haḥ | ru̱jā̱mi̱ | ba̱ndhutā̍ | vaca̍ḥ-bhiḥ | tat | mā̱ | pi̱tuḥ | gota̍māt | anu̍ | i̱yā̱ya̱ |
tvam | na̱ḥ | a̱sya | vaca̍saḥ | ci̱ki̱ddhi̱ | hota̍ḥ | ya̱vi̱ṣṭha̱ | su̱kra̱to̱ iti̍ su-krato | damū̍nāḥ ||4.004.11||

4.004.12a asva̍pnajas ta̱raṇa̍yaḥ su̱śevā̱ ata̍ndrāso 'vṛ̱kā aśra̍miṣṭhāḥ |
4.004.12c te pā̱yava̍ḥ sa̱dhrya̍ñco ni̱ṣadyāgne̱ tava̍ naḥ pāntv amūra ||

asva̍pna-jaḥ | ta̱raṇa̍yaḥ | su̱-śevā̍ḥ | ata̍ndrāsaḥ | a̱vṛ̱kāḥ | aśra̍miṣṭhāḥ |
te | pā̱yava̍ḥ | sa̱dhrya̍ñcaḥ | ni̱-sadya̍ | a̱gne̱ | tava̍ | na̱ḥ | pā̱ntu̱ | a̱mū̱ra̱ ||4.004.12||

4.004.13a ye pā̱yavo̍ māmate̱yaṁ te̍ agne̱ paśya̍nto a̱ndhaṁ du̍ri̱tād ara̍kṣan |
4.004.13c ra̱rakṣa̱ tān su̱kṛto̍ vi̱śvave̍dā̱ dipsa̍nta̱ id ri̱pavo̱ nāha̍ debhuḥ ||

ye | pā̱yava̍ḥ | mā̱ma̱te̱yam | te̱ | a̱gne̱ | paśya̍ntaḥ | a̱ndham | du̱ḥ-i̱tāt | ara̍kṣan |
ra̱rakṣa̍ | tān | su̱-kṛta̍ḥ | vi̱śva-ve̍dāḥ | dipsa̍ntaḥ | it | ri̱pava̍ḥ | na | aha̍ | de̱bhu̱ḥ ||4.004.13||

4.004.14a tvayā̍ va̱yaṁ sa̍dha̱nya1̱̍s tvotā̱s tava̱ praṇī̍ty aśyāma̱ vājā̍n |
4.004.14c u̱bhā śaṁsā̍ sūdaya satyatāte 'nuṣṭhu̱yā kṛ̍ṇuhy ahrayāṇa ||

tvayā̍ | va̱yam | sa̱dha̱nya̍ḥ | tvā-ū̍tāḥ | tava̍ | pra-nī̍tī | a̱śyā̱ma̱ | vājā̍n |
u̱bhā | śaṁsā̍ | sū̱da̱ya̱ | sa̱tya̱-tā̱te̱ | a̱nu̱ṣṭhu̱yā | kṛ̱ṇu̱hi̱ | a̱hra̱yā̱ṇa̱ ||4.004.14||

4.004.15a a̱yā te̍ agne sa̱midhā̍ vidhema̱ prati̱ stoma̍ṁ śa̱syamā̍naṁ gṛbhāya |
4.004.15c dahā̱śaso̍ ra̱kṣasa̍ḥ pā̱hy a1̱̍smān dru̱ho ni̱do mi̍tramaho ava̱dyāt ||

a̱yā | te̱ | a̱gne̱ | sa̱m-idhā̍ | vi̱dhe̱ma̱ | prati̍ | stoma̍m | śa̱syamā̍nam | gṛ̱bhā̱ya̱ |
daha̍ | a̱śasa̍ḥ | ra̱kṣasa̍ḥ | pā̱hi | a̱smān | dru̱haḥ | ni̱daḥ | mi̱tra̱-ma̱ha̱ḥ | a̱va̱dyāt ||4.004.15||


4.005.01a vai̱śvā̱na̱rāya̍ mī̱ḻhuṣe̍ sa̱joṣā̍ḥ ka̱thā dā̍śemā̱gnaye̍ bṛ̱had bhāḥ |
4.005.01c anū̍nena bṛha̱tā va̱kṣathe̱nopa̍ stabhāyad upa̱min na rodha̍ḥ ||

vai̱śvā̱na̱rāya̍ | mī̱ḻhuṣe̍ | sa̱-joṣā̍ḥ | ka̱thā | dā̱śe̱ma̱ | a̱gnaye̍ | bṛ̱hat | bhāḥ |
anū̍nena | bṛ̱ha̱tā | va̱kṣathe̍na | upa̍ | sta̱bhā̱ya̱t | u̱pa̱-mit | na | rodha̍ḥ ||4.005.01||

4.005.02a mā ni̍ndata̱ ya i̱mām mahya̍ṁ rā̱tiṁ de̱vo da̱dau martyā̍ya sva̱dhāvā̍n |
4.005.02c pākā̍ya̱ gṛtso̍ a̱mṛto̱ vice̍tā vaiśvāna̱ro nṛta̍mo ya̱hvo a̱gniḥ ||

mā | ni̱nda̱ta̱ | yaḥ | i̱mām | mahya̍m | rā̱tim | de̱vaḥ | da̱dau | maryā̍ya | sva̱-dhāvā̍n |
pākā̍ya | gṛtsa̍ḥ | a̱mṛta̍ḥ | vi-ce̍tāḥ | vai̱śvā̱na̱raḥ | nṛ-ta̍maḥ | ya̱hvaḥ | a̱gniḥ ||4.005.02||

4.005.03a sāma̍ dvi̱barhā̱ mahi̍ ti̱gmabhṛ̍ṣṭiḥ sa̱hasra̍retā vṛṣa̱bhas tuvi̍ṣmān |
4.005.03c pa̱daṁ na gor apa̍gūḻhaṁ vivi̱dvān a̱gnir mahya̱m pred u̍ vocan manī̱ṣām ||

sāma̍ | dvi̱-barhā̍ḥ | mahi̍ | ti̱gma-bhṛ̍ṣṭiḥ | sa̱hasra̍-retāḥ | vṛ̱ṣa̱bhaḥ | tuvi̍ṣmān |
pa̱dam | na | goḥ | apa̍-gūḻham | vi̱vi̱dvān | a̱gniḥ | mahya̍m | pra | it | ū̱m̐ iti̍ | vo̱ca̱t | ma̱nī̱ṣām ||4.005.03||

4.005.04a pra tām̐ a̱gnir ba̍bhasat ti̱gmaja̍mbha̱s tapi̍ṣṭhena śo̱ciṣā̱ yaḥ su̱rādhā̍ḥ |
4.005.04c pra ye mi̱nanti̱ varu̍ṇasya̱ dhāma̍ pri̱yā mi̱trasya̱ ceta̍to dhru̱vāṇi̍ ||

pra | tān | a̱gniḥ | ba̱bha̱sa̱t | ti̱gma-ja̍mbhaḥ | tapi̍ṣṭhena | śo̱ciṣā̍ | yaḥ | su̱-rādhā̍ḥ |
pra | ye | mi̱nanti̍ | varu̍ṇasya | dhāma̍ | pri̱yā | mi̱trasya̍ | ceta̍taḥ | dhru̱vāṇi̍ ||4.005.04||

4.005.05a a̱bhrā̱taro̱ na yoṣa̍ṇo̱ vyanta̍ḥ pati̱ripo̱ na jana̍yo du̱revā̍ḥ |
4.005.05c pā̱pāsa̱ḥ santo̍ anṛ̱tā a̍sa̱tyā i̱dam pa̱dam a̍janatā gabhī̱ram ||

a̱bhrā̱tara̍ḥ | na | yoṣa̍ṇaḥ | vyanta̍ḥ | pa̱ti̱-ripa̍ḥ | na | jana̍yaḥ | du̱ḥ-evā̍ḥ |
pā̱pāsa̍ḥ | santa̍ḥ | a̱nṛ̱tāḥ | a̱sa̱tyāḥ | i̱dam | pa̱dam | a̱ja̱na̱ta̱ | ga̱bhī̱ram ||4.005.05||

4.005.06a i̱dam me̍ agne̱ kiya̍te pāva̱kāmi̍nate gu̱rum bhā̱raṁ na manma̍ |
4.005.06c bṛ̱had da̍dhātha dhṛṣa̱tā ga̍bhī̱raṁ ya̱hvam pṛ̱ṣṭham praya̍sā sa̱ptadhā̍tu ||

i̱dam | me̱ | a̱gne̱ | kiya̍te | pā̱va̱ka̱ | ami̍nate | gu̱rum | bhā̱ram | na | manma̍ |
bṛ̱hat | da̱dhā̱tha̱ | dhṛ̱ṣa̱tā | ga̱bhī̱ram | ya̱hvam | pṛ̱ṣṭham | praya̍sā | sa̱pta-dhā̍tu ||4.005.06||

4.005.07a tam in nv e̱3̱̍va sa̍ma̱nā sa̍mā̱nam a̱bhi kratvā̍ puna̱tī dhī̱tir a̍śyāḥ |
4.005.07c sa̱sasya̱ carma̱nn adhi̱ cāru̱ pṛśne̱r agre̍ ru̱pa āru̍pita̱ṁ jabā̍ru ||

tam | it | nu | e̱va | sa̱ma̱nā | sa̱mā̱nam | a̱bhi | kratvā̍ | pu̱na̱tī | dhī̱tiḥ | a̱śyā̱ḥ |
sa̱sasya̍ | carma̍n | adhi̍ | cāru̍ | pṛśne̍ḥ | agne̍ | ru̱paḥ | aru̍pitam | jabā̍ru ||4.005.07||

4.005.08a pra̱vācya̱ṁ vaca̍sa̱ḥ kim me̍ a̱sya guhā̍ hi̱tam upa̍ ni̱ṇig va̍danti |
4.005.08c yad u̱sriyā̍ṇā̱m apa̱ vār i̍va̱ vran pāti̍ pri̱yaṁ ru̱po agra̍m pa̱daṁ veḥ ||

pra̱-vācya̍m | vaca̍saḥ | kim | me̱ | a̱sya | guhā̍ | hi̱tam | upa̍ | ni̱ṇik | va̱da̱nti̱ |
yat | u̱sriyā̍ṇām | apa̍ | vāḥ-i̍va | vran | pāti̍ | pri̱yam | ru̱paḥ | agra̍m | pa̱dam | veḥ ||4.005.08||

4.005.09a i̱dam u̱ tyan mahi̍ ma̱hām anī̍ka̱ṁ yad u̱sriyā̱ saca̍ta pū̱rvyaṁ gauḥ |
4.005.09c ṛ̱tasya̍ pa̱de adhi̱ dīdyā̍na̱ṁ guhā̍ raghu̱ṣyad ra̍ghu̱yad vi̍veda ||

i̱dam | ū̱m̐ iti̍ | tyat | mahi̍ | ma̱hām | anī̍kam | yat | u̱sriyā̍ | saca̍ta | pū̱rvyam | gauḥ |
ṛ̱tasya̍ | pa̱de | adhi̍ | dīdyā̍nam | guhā̍ | ra̱ghu̱-syat | ra̱ghu̱-yat | vi̱ve̱da̱ ||4.005.09||

4.005.10a adha̍ dyutā̱naḥ pi̱troḥ sacā̱sāma̍nuta̱ guhya̱ṁ cāru̱ pṛśne̍ḥ |
4.005.10c mā̱tuṣ pa̱de pa̍ra̱me anti̱ ṣad gor vṛṣṇa̍ḥ śo̱ciṣa̱ḥ praya̍tasya ji̱hvā ||

adha̍ | dyu̱tā̱naḥ | pi̱troḥ | sacā̍ | ā̱sā | ama̍nuta | guhya̍m | cāru | pṛśne̍ḥ |
mā̱tuḥ | pa̱de | pa̱ra̱me | anti̍ | sat | goḥ | vṛṣṇa̍ḥ | śo̱ciṣa̍ḥ | pra-ya̍tasya | ji̱hvā ||4.005.10||

4.005.11a ṛ̱taṁ vo̍ce̱ nama̍sā pṛ̱cchyamā̍na̱s tavā̱śasā̍ jātavedo̱ yadī̱dam |
4.005.11c tvam a̱sya kṣa̍yasi̱ yad dha̱ viśva̍ṁ di̱vi yad u̱ dravi̍ṇa̱ṁ yat pṛ̍thi̱vyām ||

ṛ̱tam | vo̱ce̱ | nama̍sā | pṛ̱cchyamā̍naḥ | tava̍ | ā̱-śasā̍ | jā̱ta̱-ve̱da̱ḥ | yadi̍ | i̱dam |
tvam | a̱sya | kṣa̱ya̱si̱ | yat | ha̱ | viśva̍m | di̱vi | Yat | ū̱m̐ iti̍ | dravi̍ṇam | yat | pṛ̱thi̱vyām ||4.005.11||

4.005.12a kiṁ no̍ a̱sya dravi̍ṇa̱ṁ kad dha̱ ratna̱ṁ vi no̍ voco jātavedaś ciki̱tvān |
4.005.12c guhādhva̍naḥ para̱maṁ yan no̍ a̱sya reku̍ pa̱daṁ na ni̍dā̱nā aga̍nma ||

kim | na̱ḥ | a̱sya | dravi̍ṇam | kat | ha̱ | ratna̍m | vi | na̱ḥ | vo̱ca̱ḥ | jā̱ta̱-ve̱da̱ḥ | ci̱ki̱tvān |
guhā̍ | adhva̍naḥ | pa̱ra̱mam | yat | na̱ḥ | a̱sya | reku̍ | pa̱dam | na | ni̱-dā̱nāḥ | aga̍nma ||4.005.12||

4.005.13a kā ma̱ryādā̍ va̱yunā̱ kad dha̍ vā̱mam acchā̍ gamema ra̱ghavo̱ na vāja̍m |
4.005.13c ka̱dā no̍ de̱vīr a̱mṛta̍sya̱ patnī̱ḥ sūro̱ varṇe̍na tatanann u̱ṣāsa̍ḥ ||

kā | ma̱ryādā̍ | va̱yunā̍ | kat | ha̱ | vā̱mam | accha̍ | ga̱me̱ma̱ | ra̱ghava̍ḥ | na | vāja̍m |
ka̱dā | na̱ḥ | de̱vīḥ | a̱mṛta̍sya | patnī̍ḥ | sūra̍ḥ | varṇe̍na | ta̱ta̱na̱n | u̱ṣasa̍ḥ ||4.005.13||

4.005.14a a̱ni̱reṇa̱ vaca̍sā pha̱lgve̍na pra̱tītye̍na kṛ̱dhunā̍tṛ̱pāsa̍ḥ |
4.005.14c adhā̱ te a̍gne̱ kim i̱hā va̍danty anāyu̱dhāsa̱ āsa̍tā sacantām ||

a̱ni̱reṇa̍ | vaca̍sā | pha̱lgve̍na | pra̱tītye̍na | kṛ̱dhunā̍ | a̱tṛ̱pāsa̍ḥ |
adha̍ | te | a̱gne̱ | kim | i̱ha | va̱da̱nti̱ | a̱nā̱yu̱dhāsa̍ḥ | āsa̍tā | sa̱ca̱ntā̱m ||4.005.14||

4.005.15a a̱sya śri̱ye sa̍midhā̱nasya̱ vṛṣṇo̱ vaso̱r anī̍ka̱ṁ dama̱ ā ru̍roca |
4.005.15c ruśa̱d vasā̍naḥ su̱dṛśī̍karūpaḥ kṣi̱tir na rā̱yā pu̍ru̱vāro̍ adyaut ||

a̱sya | śri̱ye | sa̱m-i̱dhā̱nasya̍ | vṛṣṇa̍ḥ | vaso̍ḥ | anī̍kam | dame̍ | ā | ru̱ro̱ca̱ |
ruśa̍t | vasā̍naḥ | su̱dṛśī̍ka-rūpaḥ | kṣi̱tiḥ | na | rā̱yā | pu̱ru̱-vāra̍ḥ | a̱dyau̱t ||4.005.15||


4.006.01a ū̱rdhva ū̱ ṣu ṇo̍ adhvarasya hota̱r agne̱ tiṣṭha̍ de̱vatā̍tā̱ yajī̍yān |
4.006.01c tvaṁ hi viśva̍m a̱bhy asi̱ manma̱ pra ve̱dhasa̍ś cit tirasi manī̱ṣām ||

ū̱rdhvaḥ | ū̱m̐ iti̍ | su | na̱ḥ | a̱dhva̱ra̱sya̱ | ho̱ta̱ḥ | agne̍ | tiṣṭha̍ | de̱va-tā̍tā | yajī̍yān |
tvam | hi | viśva̍m | a̱bhi | asi̍ | manma̍ | pra | ve̱dhasa̍ḥ | ci̱t | ti̱ra̱si̱ | ma̱nī̱ṣām ||4.006.01||

4.006.02a amū̍ro̱ hotā̱ ny a̍sādi vi̱kṣv a1̱̍gnir ma̱ndro vi̱dathe̍ṣu̱ prace̍tāḥ |
4.006.02c ū̱rdhvam bhā̱nuṁ sa̍vi̱tevā̍śre̱n mete̍va dhū̱maṁ sta̍bhāya̱d upa̱ dyām ||

amū̍raḥ | hotā̍ | ni | a̱sā̱di̱ | vi̱kṣu | a̱gniḥ | ma̱ndraḥ | vi̱dathe̍ṣu | pra-ce̍tāḥ |
ū̱rdhvam | bhā̱num | sa̱vi̱tā-i̍va | a̱śre̱t | metā̍-iva | dhū̱mam | sta̱bhā̱ya̱t | upa̍ | dyām ||4.006.02||

4.006.03a ya̱tā su̍jū̱rṇī rā̱tinī̍ ghṛ̱tācī̍ pradakṣi̱ṇid de̱vatā̍tim urā̱ṇaḥ |
4.006.03c ud u̱ svaru̍r nava̱jā nākraḥ pa̱śvo a̍nakti̱ sudhi̍taḥ su̱meka̍ḥ ||

ya̱tā | su̱-jū̱rṇiḥ | rā̱tinī̍ | ghṛ̱tācī̍ | pra̱-da̱kṣi̱ṇit | de̱va-tā̍tim | u̱rā̱ṇaḥ |
ut | ū̱m̐ iti̍ | svaru̍ḥ | na̱va̱-jāḥ | na | a̱kraḥ | pa̱śvaḥ | a̱na̱kti̱ | su-dhi̍taḥ | su̱-meka̍ḥ ||4.006.03||

4.006.04a stī̱rṇe ba̱rhiṣi̍ samidhā̱ne a̱gnā ū̱rdhvo a̍dhva̱ryur ju̍juṣā̱ṇo a̍sthāt |
4.006.04c pary a̱gniḥ pa̍śu̱pā na hotā̍ trivi̱ṣṭy e̍ti pra̱diva̍ urā̱ṇaḥ ||

stī̱rṇe | ba̱rhiṣi̍ | sa̱m-i̱dhā̱ne | a̱gnau | ū̱rdhvaḥ | a̱dhva̱ryuḥ | ju̱ju̱ṣā̱ṇaḥ | a̱sthā̱t |
pari̍ | a̱gniḥ | pa̱śu̱-pāḥ | na | hotā̍ | tri̱-vi̱ṣṭi | e̱ti̱ | pra̱-diva̍ḥ | u̱rā̱ṇaḥ ||4.006.04||

4.006.05a pari̱ tmanā̍ mi̱tadru̍r eti̱ hotā̱gnir ma̱ndro madhu̍vacā ṛ̱tāvā̍ |
4.006.05c drava̍nty asya vā̱jino̱ na śokā̱ bhaya̍nte̱ viśvā̱ bhuva̍nā̱ yad abhrā̍ṭ ||

pari̍ | tmanā̍ | mi̱ta-dru̍ḥ | e̱ti̱ | hotā̍ | a̱gniḥ | ma̱ndraḥ | madhu̍-vacāḥ | ṛ̱ta-vā̍ |
drava̍nti | a̱sya̱ | vā̱jina̍ḥ | na | śokā̍ḥ | bhaya̍nte | viśvā̍ | bhuva̍nā | yat | abhrā̍ṭ ||4.006.05||

4.006.06a bha̱drā te̍ agne svanīka sa̱ṁdṛg gho̱rasya̍ sa̱to viṣu̍ṇasya̱ cāru̍ḥ |
4.006.06c na yat te̍ śo̱cis tama̍sā̱ vara̍nta̱ na dhva̱smāna̍s ta̱nvī̱3̱̍ repa̱ ā dhu̍ḥ ||

bha̱drā | te̱ | a̱gne̱ | su̱-a̱nī̱ka̱ | sa̱m-dṛk | gho̱rasya̍ | sa̱taḥ | viṣu̍ṇasya | cāru̍ḥ |
na | yat | te̱ | śo̱ciḥ | tama̍sā | vara̍nta | na | dhva̱smāna̍ḥ | ta̱nvi̍ | repa̍ḥ | ā | dhu̱riti̍ ||4.006.06||

4.006.07a na yasya̱ sātu̱r jani̍to̱r avā̍ri̱ na mā̱tarā̍pi̱tarā̱ nū ci̍d i̱ṣṭau |
4.006.07c adhā̍ mi̱tro na sudhi̍taḥ pāva̱ko̱3̱̍ 'gnir dī̍dāya̱ mānu̍ṣīṣu vi̱kṣu ||

na | yasya̍ | sātu̍ḥ | jani̍toḥ | avā̍ri | na | mā̱tarā̍pi̱tarā̍ | nu | ci̱t | i̱ṣṭau |
adha̍ | mi̱traḥ | na | su-dhi̍taḥ | pā̱va̱kaḥ | a̱gniḥ | dī̱dā̱ya̱ | mānu̍ṣīṣu | vi̱kṣu ||4.006.07||

4.006.08a dvir yam pañca̱ jīja̍nan sa̱ṁvasā̍nā̱ḥ svasā̍ro a̱gnim mānu̍ṣīṣu vi̱kṣu |
4.006.08c u̱ṣa̱rbudha̍m atha̱ryo̱3̱̍ na danta̍ṁ śu̱kraṁ svāsa̍m para̱śuṁ na ti̱gmam ||

dviḥ | yam | pañca̍ | jīja̍nan | sa̱m-vasā̍nāḥ | svasā̍raḥ | a̱gnim | mānu̍ṣīṣu | vi̱kṣu |
u̱ṣa̱ḥ-budha̍m | a̱tha̱rya̍ḥ | na | danta̍m | śu̱kram | su̱-āsa̍m | pa̱ra̱śum | na | ti̱gmam ||4.006.08||

4.006.09a tava̱ tye a̍gne ha̱rito̍ ghṛta̱snā rohi̍tāsa ṛ̱jvañca̱ḥ svañca̍ḥ |
4.006.09c a̱ru̱ṣāso̱ vṛṣa̍ṇa ṛjumu̱ṣkā ā de̱vatā̍tim ahvanta da̱smāḥ ||

tava̍ | tye | a̱gne̱ | ha̱rita̍ḥ | ghṛ̱ta̱-snāḥ | rohi̍tāsaḥ | ṛ̱ju̱-añca̍ḥ | su̱-añca̍ḥ |
a̱ru̱ṣāsa̍ḥ | vṛṣa̍ṇaḥ | ṛ̱ju̱-mu̱ṣkāḥ | ā | de̱va-tā̍tim | a̱hva̱nta̱ | da̱smāḥ ||4.006.09||

4.006.10a ye ha̱ tye te̱ saha̍mānā a̱yāsa̍s tve̱ṣāso̍ agne a̱rcaya̱ś cara̍nti |
4.006.10c śye̱nāso̱ na du̍vasa̱nāso̱ artha̍ṁ tuviṣva̱ṇaso̱ māru̍ta̱ṁ na śardha̍ḥ ||

ye | ha̱ | tye | te̱ | saha̍mānāḥ | a̱yāsa̍ḥ | tve̱ṣāsa̍ḥ | a̱gne̱ | a̱rcaya̍ḥ | cara̍nti |
śye̱nāsa̍ḥ | na | du̱va̱sa̱nāsa̍ḥ | artha̍m | tu̱vi̱-sva̱ṇasa̍ḥ | māru̍tam | na | śardha̍ḥ ||4.006.10||

4.006.11a akā̍ri̱ brahma̍ samidhāna̱ tubhya̱ṁ śaṁsā̍ty u̱kthaṁ yaja̍te̱ vy ū̍ dhāḥ |
4.006.11c hotā̍ram a̱gnim manu̍ṣo̱ ni ṣe̍dur nama̱syanta̍ u̱śija̱ḥ śaṁsa̍m ā̱yoḥ ||

akā̍ri | brahma̍ | sa̱m-i̱dhā̱na̱ | tubhya̍m | śaṁsā̍ti | u̱ktham | yaja̍te | vi | ū̱m̐ iti̍ | dhā̱ḥ |
hotā̍ram | a̱gnim | manu̍ṣaḥ | ni | se̱du̱ḥ | na̱ma̱syanta̍ḥ | u̱śija̍ḥ | śaṁsa̍m | ā̱yoḥ ||4.006.11||


4.007.01a a̱yam i̱ha pra̍tha̱mo dhā̍yi dhā̱tṛbhi̱r hotā̱ yaji̍ṣṭho adhva̱reṣv īḍya̍ḥ |
4.007.01c yam apna̍vāno̱ bhṛga̍vo viruru̱cur vane̍ṣu ci̱traṁ vi̱bhva̍ṁ vi̱śe-vi̍śe ||

a̱yam | i̱ha | pra̱tha̱maḥ | dhā̱yi̱ | dhā̱tṛ-bhi̍ḥ | hotā̍ | yaji̍ṣṭhaḥ | a̱dhva̱reṣu̍ | īḍya̍ḥ |
yam | apna̍vānaḥ | bhṛga̍vaḥ | vi̱-ru̱ru̱cuḥ | vane̍ṣu | ci̱tram | vi̱-bhva̍m | vi̱śe-vi̍śe ||4.007.01||

4.007.02a agne̍ ka̱dā ta̍ ānu̱ṣag bhuva̍d de̱vasya̱ ceta̍nam |
4.007.02c adhā̱ hi tvā̍ jagṛbhri̱re martā̍so vi̱kṣv īḍya̍m ||

agne̍ | ka̱dā | te̱ | ā̱nu̱ṣak | bhuva̍t | de̱vasya̍ | ceta̍nam |
adha̍ | hi | tvā̱ | ja̱gṛ̱bhri̱re | martā̍saḥ | vi̱kṣu | īḍya̍m ||4.007.02||

4.007.03a ṛ̱tāvā̍na̱ṁ vice̍tasa̱m paśya̍nto̱ dyām i̍va̱ stṛbhi̍ḥ |
4.007.03c viśve̍ṣām adhva̱rāṇā̍ṁ haska̱rtāra̱ṁ dame̍-dame ||

ṛ̱ta-vā̍nam | vi-ce̍tasam | paśya̍ntaḥ | dyām-i̍va | stṛ-bhi̍ḥ |
viśve̍ṣām | a̱dhva̱rāṇā̍m | ha̱ska̱rtāra̍m | dame̍-dame ||4.007.03||

4.007.04a ā̱śuṁ dū̱taṁ vi̱vasva̍to̱ viśvā̱ yaś ca̍rṣa̱ṇīr a̱bhi |
4.007.04c ā ja̍bhruḥ ke̱tum ā̱yavo̱ bhṛga̍vāṇaṁ vi̱śe-vi̍śe ||

ā̱śum | dū̱tam | vi̱vasva̍taḥ | viśvā̍ḥ | yaḥ | ca̱rṣa̱ṇīḥ | a̱bhi |
ā | ja̱bhru̱ḥ | ke̱tum | ā̱yava̍ḥ | bhṛga̍vāṇam | vi̱śe-vi̍śe ||4.007.04||

4.007.05a tam ī̱ṁ hotā̍ram ānu̱ṣak ci̍ki̱tvāṁsa̱ṁ ni ṣe̍dire |
4.007.05c ra̱ṇvam pā̍va̱kaśo̍ciṣa̱ṁ yaji̍ṣṭhaṁ sa̱pta dhāma̍bhiḥ ||

tam | ī̱m | hotā̍ram | ā̱nu̱ṣak | ci̱ki̱tvāṁsa̍m | ni | se̱di̱re̱ |
ra̱ṇvam | pā̱va̱ka-śo̍ciṣam | yaji̍ṣṭham | sa̱pta | dhāma̍-bhiḥ ||4.007.05||

4.007.06a taṁ śaśva̍tīṣu mā̱tṛṣu̱ vana̱ ā vī̱tam aśri̍tam |
4.007.06c ci̱traṁ santa̱ṁ guhā̍ hi̱taṁ su̱veda̍ṁ kūcida̱rthina̍m ||

tam | śaśva̍tīṣu | mā̱tṛṣu̍ | vane̍ | ā | vī̱tam | aśri̍tam |
ci̱tram | santa̍m | guhā̍ | hi̱tam | su̱-veda̍m | kū̱ci̱t-a̱rthina̍m ||4.007.06||

4.007.07a sa̱sasya̱ yad viyu̍tā̱ sasmi̱nn ūdha̍nn ṛ̱tasya̱ dhāma̍n ra̱ṇaya̍nta de̱vāḥ |
4.007.07c ma̱hām̐ a̱gnir nama̍sā rā̱taha̍vyo̱ ver a̍dhva̱rāya̱ sada̱m id ṛ̱tāvā̍ ||

sa̱sasya̍ | yat | vi-yu̍tā | sasmi̍n | ūdha̍n | ṛ̱tasya̍ | dhāma̍n | ra̱ṇaya̍nta | de̱vāḥ |
ma̱hān | a̱gniḥ | nama̍sā | rā̱ta-ha̍vyaḥ | veḥ | a̱dhva̱rāya̍ | sada̍m | it | ṛ̱ta-vā̍ ||4.007.07||

4.007.08a ver a̍dhva̱rasya̍ dū̱tyā̍ni vi̱dvān u̱bhe a̱ntā roda̍sī saṁciki̱tvān |
4.007.08c dū̱ta ī̍yase pra̱diva̍ urā̱ṇo vi̱duṣṭa̍ro di̱va ā̱rodha̍nāni ||

veḥ | a̱dhva̱rasya̍ | dū̱tyā̍ni | vi̱dvān | u̱bhe iti̍ | a̱ntariti̍ | roda̍sī̱ iti̍ | sa̱m-ci̱ki̱tvān |
dū̱taḥ | ī̱ya̱se̱ | pra̱-diva̍ḥ | u̱rā̱ṇaḥ | vi̱duḥ-ta̍raḥ | di̱vaḥ | ā̱-rodha̍nāni ||4.007.08||

4.007.09a kṛ̱ṣṇaṁ ta̱ ema̱ ruśa̍taḥ pu̱ro bhāś ca̍ri̱ṣṇv a1̱̍rcir vapu̍ṣā̱m id eka̍m |
4.007.09c yad apra̍vītā̱ dadha̍te ha̱ garbha̍ṁ sa̱dyaś ci̍j jā̱to bhava̱sīd u̍ dū̱taḥ ||

kṛ̱ṣṇam | te̱ | ema̍ | ruśa̍taḥ | pu̱raḥ | bhāḥ | ca̱ri̱ṣṇu | a̱rciḥ | vapu̍ṣām | it | eka̍m |
yat | apra̍-vītā | dadha̍te | ha̱ | garbha̍m | sa̱dyaḥ | ci̱t | jā̱taḥ | bhava̍si | it | ū̱m̐ iti̍ | dū̱taḥ ||4.007.09||

4.007.10a sa̱dyo jā̱tasya̱ dadṛ̍śāna̱m ojo̱ yad a̍sya̱ vāto̍ anu̱vāti̍ śo̱ciḥ |
4.007.10c vṛ̱ṇakti̍ ti̱gmām a̍ta̱seṣu̍ ji̱hvāṁ sthi̱rā ci̱d annā̍ dayate̱ vi jambhai̍ḥ ||

sa̱dyaḥ | jā̱tasya̍ | dadṛ̍śānam | oja̍ḥ | yat | a̱sya̱ | vāta̍ḥ | a̱nu̱-vāti̍ | śo̱ciḥ |
vṛ̱ṇakti̍ | ti̱gmām | a̱ta̱seṣu̍ | ji̱hvām | sthi̱rā | ci̱t | annā̍ | da̱ya̱te̱ | vi | jambhai̍ḥ ||4.007.10||

4.007.11a tṛ̱ṣu yad annā̍ tṛ̱ṣuṇā̍ va̱vakṣa̍ tṛ̱ṣuṁ dū̱taṁ kṛ̍ṇute ya̱hvo a̱gniḥ |
4.007.11c vāta̍sya me̱ḻiṁ sa̍cate ni̱jūrva̍nn ā̱śuṁ na vā̍jayate hi̱nve arvā̍ ||

tṛ̱ṣu | yat | annā̍ | tṛ̱ṣuṇā̍ | va̱vakṣa̍ | tṛ̱ṣum | dū̱tam | kṛ̱ṇu̱te̱ | ya̱hvaḥ | a̱gniḥ |
vāta̍sya | me̱ḻim | sa̱ca̱te̱ | ni̱-jūrva̍n | ā̱śum | na | vā̱ja̱ya̱te̱ | hi̱nve | arvā̍ ||4.007.11||


4.008.01a dū̱taṁ vo̍ vi̱śvave̍dasaṁ havya̱vāha̱m ama̍rtyam |
4.008.01c yaji̍ṣṭham ṛñjase gi̱rā ||

dū̱tam | va̱ḥ | vi̱śva-ve̍dasam | ha̱vya̱-vāha̍m | ama̍rtyam |
yaji̍ṣṭham | ṛ̱ñja̱se̱ | gi̱rā ||4.008.01||

4.008.02a sa hi vedā̱ vasu̍dhitim ma̱hām̐ ā̱rodha̍naṁ di̱vaḥ |
4.008.02c sa de̱vām̐ eha va̍kṣati ||

saḥ | hi | veda̍ | vasu̍-dhitim | ma̱hān | ā̱-rodha̍nam | di̱vaḥ |
saḥ | de̱vān | ā | i̱ha | va̱kṣa̱ti̱ ||4.008.02||

4.008.03a sa ve̍da de̱va ā̱nama̍ṁ de̱vām̐ ṛ̍tāya̱te dame̍ |
4.008.03c dāti̍ pri̱yāṇi̍ ci̱d vasu̍ ||

saḥ | ve̱da̱ | de̱vaḥ | ā̱-nama̍m | de̱vān | ṛ̱ta̱-ya̱te | dame̍ |
dāti̍ | pri̱yāṇi̍ | ci̱t | vasu̍ ||4.008.03||

4.008.04a sa hotā̱ sed u̍ dū̱tya̍ṁ ciki̱tvām̐ a̱ntar ī̍yate |
4.008.04c vi̱dvām̐ ā̱rodha̍naṁ di̱vaḥ ||

saḥ | hotā̍ | saḥ | it | ū̱m̐ iti̍ | dū̱tya̍m | ci̱ki̱tvān | a̱ntaḥ | ī̱ya̱te̱ |
vi̱dvān | ā̱-rodha̍nam | di̱vaḥ ||4.008.04||

4.008.05a te syā̍ma̱ ye a̱gnaye̍ dadā̱śur ha̱vyadā̍tibhiḥ |
4.008.05c ya ī̱m puṣya̍nta indha̱te ||

te | syā̱ma̱ | ye | a̱gnaye̍ | da̱dā̱śuḥ | ha̱vya-dā̍tibhiḥ |
ye | ī̱m | puṣya̍ntaḥ | i̱ndha̱te ||4.008.05||

4.008.06a te rā̱yā te su̱vīryai̍ḥ sasa̱vāṁso̱ vi śṛ̍ṇvire |
4.008.06c ye a̱gnā da̍dhi̱re duva̍ḥ ||

te | rā̱yā | te | su̱-vīryai̍ḥ | sa̱sa̱-vāṁsa̍ḥ | vi | śṛ̱ṇvi̱re̱ |
ye | a̱gnā | da̱dhi̱re | duva̍ḥ ||4.008.06||

4.008.07a a̱sme rāyo̍ di̱ve-di̍ve̱ saṁ ca̍rantu puru̱spṛha̍ḥ |
4.008.07c a̱sme vājā̍sa īratām ||

a̱sme iti̍ | rāya̍ḥ | di̱ve-di̍ve | sam | ca̱ra̱ntu̱ | pu̱ru̱-spṛha̍ḥ |
a̱sme iti̍ | vājā̍saḥ | ī̱ra̱tā̱m ||4.008.07||

4.008.08a sa vipra̍ś carṣaṇī̱nāṁ śava̍sā̱ mānu̍ṣāṇām |
4.008.08c ati̍ kṣi̱preva̍ vidhyati ||

saḥ | vipra̍ḥ | ca̱rṣa̱ṇī̱nām | śava̍sā | mānu̍ṣāṇām |
ati̍ | kṣi̱prā-i̍va | vi̱dhya̱ti̱ ||4.008.08||


4.009.01a agne̍ mṛ̱ḻa ma̱hām̐ a̍si̱ ya ī̱m ā de̍va̱yuṁ jana̍m |
4.009.01c i̱yetha̍ ba̱rhir ā̱sada̍m ||

agne̍ | mṛ̱ḻa | ma̱hān | a̱si̱ | yaḥ | ī̱m | ā | de̱va̱-yum | jana̍m |
i̱yetha̍ | ba̱rhiḥ | ā̱-sada̍m ||4.009.01||

4.009.02a sa mānu̍ṣīṣu dū̱ḻabho̍ vi̱kṣu prā̱vīr ama̍rtyaḥ |
4.009.02c dū̱to viśve̍ṣām bhuvat ||

saḥ | mānu̍ṣīṣu | du̱ḥ-dabha̍ḥ | vi̱kṣu | pra̱-a̱vīḥ | ama̍rtyaḥ |
dū̱taḥ | viśve̍ṣām | bhu̱va̱t ||4.009.02||

4.009.03a sa sadma̱ pari̍ ṇīyate̱ hotā̍ ma̱ndro divi̍ṣṭiṣu |
4.009.03c u̱ta potā̱ ni ṣī̍dati ||

saḥ | sadma̍ | pari̍ | nī̱ya̱te̱ | hotā̍ | ma̱ndraḥ | divi̍ṣṭiṣu |
u̱ta | potā̍ | ni | sī̱da̱ti̱ ||4.009.03||

4.009.04a u̱ta gnā a̱gnir a̍dhva̱ra u̱to gṛ̱hapa̍ti̱r dame̍ |
4.009.04c u̱ta bra̱hmā ni ṣī̍dati ||

u̱ta | gnāḥ | a̱gniḥ | a̱dhva̱re | u̱to iti̍ | gṛ̱ha-pa̍tiḥ | dame̍ |
u̱ta | bra̱hmā | ni | sī̱da̱ti̱ ||4.009.04||

4.009.05a veṣi̱ hy a̍dhvarīya̱tām u̍pava̱ktā janā̍nām |
4.009.05b ha̱vyā ca̱ mānu̍ṣāṇām ||

veṣi̍ | hi | a̱dhva̱ri̱-ya̱tām | u̱pa̱-va̱ktā | janā̍nām |
ha̱vyā | ca̱ | mānu̍ṣāṇām ||4.009.05||

4.009.06a veṣīd v a̍sya dū̱tya1̱̍ṁ yasya̱ jujo̍ṣo adhva̱ram |
4.009.06b ha̱vyam marta̍sya̱ voḻha̍ve ||

veṣi̍ | it | ū̱m̐ iti̍ | a̱sya̱ | dū̱tya̍m | yasya̍ | jujo̍ṣaḥ | a̱dhva̱ram |
ha̱vyam | marta̍sya | voḻha̍ve ||4.009.06||

4.009.07a a̱smāka̍ṁ joṣy adhva̱ram a̱smāka̍ṁ ya̱jñam a̍ṅgiraḥ |
4.009.07c a̱smāka̍ṁ śṛṇudhī̱ hava̍m ||

a̱smāka̍m | jo̱ṣi̱ | a̱dhva̱ram | a̱smāka̍m | ya̱jñam | a̱ṅgi̱ra̱ḥ |
a̱smāka̍m | śṛ̱ṇu̱dhi̱ | hava̍m ||4.009.07||

4.009.08a pari̍ te dū̱ḻabho̱ ratho̱ 'smām̐ a̍śnotu vi̱śvata̍ḥ |
4.009.08c yena̱ rakṣa̍si dā̱śuṣa̍ḥ ||

pari̍ | te̱ | du̱ḥ-dabha̍ḥ | ratha̍ḥ | a̱smān | a̱śno̱tu̱ | vi̱śvata̍ḥ |
yena̍ | rakṣa̍si | dā̱śuṣa̍ḥ ||4.009.08||


4.010.01a agne̱ tam a̱dyāśva̱ṁ na stomai̱ḥ kratu̱ṁ na bha̱draṁ hṛ̍di̱spṛśa̍m |
4.010.01c ṛ̱dhyāmā̍ ta̱ ohai̍ḥ ||

agne̍ | tam | a̱dya | aśva̍m | na | stomai̍ḥ | kratu̍m | na | bha̱dram | hṛ̱di̱-spṛśa̍m |
ṛ̱dhyāma̍ | te̱ | ohai̍ḥ ||4.010.01||

4.010.02a adhā̱ hy a̍gne̱ krato̍r bha̱drasya̱ dakṣa̍sya sā̱dhoḥ |
4.010.02c ra̱thīr ṛ̱tasya̍ bṛha̱to ba̱bhūtha̍ ||

adha̍ | hi | a̱gne̱ | krato̍ḥ | bha̱drasya̍ | dakṣa̍sya | sā̱dhoḥ |
ra̱thīḥ | ṛ̱tasya̍ | bṛ̱ha̱taḥ | ba̱bhūtha̍ ||4.010.02||

4.010.03a e̱bhir no̍ a̱rkair bhavā̍ no a̱rvāṅ sva1̱̍r ṇa jyoti̍ḥ |
4.010.03c agne̱ viśve̍bhiḥ su̱manā̱ anī̍kaiḥ ||

e̱bhiḥ | na̱ḥ | a̱rkaiḥ | bhava̍ | na̱ḥ | a̱rvāṅ | sva̍ḥ | na | jyoti̍ḥ |
agne̍ | viśve̍bhiḥ | su̱-manā̍ḥ | anī̍kaiḥ ||4.010.03||

4.010.04a ā̱bhiṣ ṭe̍ a̱dya gī̱rbhir gṛ̱ṇanto 'gne̱ dāśe̍ma |
4.010.04c pra te̍ di̱vo na sta̍nayanti̱ śuṣmā̍ḥ ||

ā̱bhiḥ | te̱ | a̱dya | gī̱ḥ-bhiḥ | gṛ̱ṇanta̍ḥ | agne̍ | dāśe̍ma |
pra | te̱ | di̱vaḥ | na | sta̱na̱ya̱nti̱ | śuṣmā̍ḥ ||4.010.04||

4.010.05a tava̱ svādi̱ṣṭhāgne̱ saṁdṛ̍ṣṭir i̱dā ci̱d ahna̍ i̱dā ci̍d a̱ktoḥ |
4.010.05c śri̱ye ru̱kmo na ro̍cata upā̱ke ||

tava̍ | svādi̍ṣṭhā | agne̍ | sam-dṛ̍ṣṭiḥ | i̱dā | ci̱t | ahna̍ḥ | i̱dā | ci̱t | a̱ktoḥ |
śri̱ye | ru̱kmaḥ | na | ro̱ca̱te̱ | u̱pā̱ke ||4.010.05||

4.010.06a ghṛ̱taṁ na pū̱taṁ ta̱nūr a̍re̱pāḥ śuci̱ hira̍ṇyam |
4.010.06c tat te̍ ru̱kmo na ro̍cata svadhāvaḥ ||

ghṛ̱tam | na | pū̱tam | ta̱nūḥ | a̱re̱pāḥ | śuci̍ | hira̍ṇyam |
tat | te̱ | ru̱kmaḥ | na | ro̱ca̱ta̱ | sva̱dhā̱-va̱ḥ ||4.010.06||

4.010.07a kṛ̱taṁ ci̱d dhi ṣmā̱ sane̍mi̱ dveṣo 'gna̍ i̱noṣi̱ martā̍t |
4.010.07c i̱tthā yaja̍mānād ṛtāvaḥ ||

kṛ̱tam | ci̱t | hi | sma̱ | sane̍mi | dveṣa̍ḥ | agne̍ | i̱noṣi̍ | martā̍t |
i̱tthā | yaja̍mānāt | ṛ̱ta̱-va̱ḥ ||4.010.07||

4.010.08a śi̱vā na̍ḥ sa̱khyā santu̍ bhrā̱trāgne̍ de̱veṣu̍ yu̱ṣme |
4.010.08c sā no̱ nābhi̱ḥ sada̍ne̱ sasmi̱nn ūdha̍n ||

śi̱vā | na̱ḥ | sa̱khyā | santu̍ | bhrā̱trā | agne̍ | de̱veṣu̍ | yu̱ṣme iti̍ |
sā | na̱ḥ | nābhi̍ḥ | sada̍ne | sasmi̍n | ūdha̍m ||4.010.08||


4.011.01a bha̱draṁ te̍ agne sahasi̱nn anī̍kam upā̱ka ā ro̍cate̱ sūrya̍sya |
4.011.01c ruśa̍d dṛ̱śe da̍dṛśe nakta̱yā ci̱d arū̍kṣitaṁ dṛ̱śa ā rū̱pe anna̍m ||

bha̱dram | te̱ | a̱gne̱ | sa̱ha̱si̱n | anī̍kam | u̱pā̱ke | ā | ro̱ca̱te̱ | sūrya̍sya |
ruśa̍t | dṛ̱śe | da̱dṛ̱śe̱ | na̱kta̱-yā | ci̱t | arū̍kṣitam | dṛ̱śe | ā | rū̱pe | anna̍m ||4.011.01||

4.011.02a vi ṣā̍hy agne gṛṇa̱te ma̍nī̱ṣāṁ khaṁ vepa̍sā tuvijāta̱ stavā̍naḥ |
4.011.02c viśve̍bhi̱r yad vā̱vana̍ḥ śukra de̱vais tan no̍ rāsva sumaho̱ bhūri̱ manma̍ ||

vi | sā̱hi̱ | a̱gne̱ | gṛ̱ṇa̱te | ma̱nī̱ṣām | kham | vepa̍sā | tu̱vi̱-jā̱ta̱ | stavā̍naḥ |
viśve̍bhiḥ | yat | va̱vana̍ḥ | śu̱kra̱ | de̱vaiḥ | tat | na̱ḥ | rā̱sva̱ | su̱-ma̱ha̱ḥ | bhūri̍ | manma̍ ||4.011.02||

4.011.03a tvad a̍gne̱ kāvyā̱ tvan ma̍nī̱ṣās tvad u̱kthā jā̍yante̱ rādhyā̍ni |
4.011.03c tvad e̍ti̱ dravi̍ṇaṁ vī̱rape̍śā i̱tthādhi̍ye dā̱śuṣe̱ martyā̍ya ||

tvat | a̱gne̱ | kāvyā̍ | tvam | ma̱nī̱ṣāḥ | tvat | u̱kthā | jā̱ya̱nte̱ | rādhyā̍ni |
tvat | e̱ti̱ | dravi̍ṇam | vī̱ra-pe̍śāḥ | i̱tthā-dhi̍ye | dā̱śuṣe̍ | martyā̍ya ||4.011.03||

4.011.04a tvad vā̱jī vā̍jambha̱ro vihā̍yā abhiṣṭi̱kṛj jā̍yate sa̱tyaśu̍ṣmaḥ |
4.011.04c tvad ra̱yir de̱vajū̍to mayo̱bhus tvad ā̱śur jū̍ju̱vām̐ a̍gne̱ arvā̍ ||

tvat | vā̱jī | vā̱ja̱m-bha̱raḥ | vi-hā̍yāḥ | a̱bhi̱ṣṭi̱-kṛt | jā̱ya̱te̱ | sa̱tya-śu̍ṣmaḥ |
tvat | ra̱yiḥ | de̱va-jū̍taḥ | ma̱ya̱ḥ-bhuḥ | tvat | ā̱śuḥ | jū̱ju̱-vān | a̱gne̱ | arvā̍ ||4.011.04||

4.011.05a tvām a̍gne pratha̱maṁ de̍va̱yanto̍ de̱vam martā̍ amṛta ma̱ndraji̍hvam |
4.011.05c dve̱ṣo̱yuta̱m ā vi̍vāsanti dhī̱bhir damū̍nasaṁ gṛ̱hapa̍ti̱m amū̍ram ||

tvām | a̱gne̱ | pra̱tha̱mam | de̱va̱-yanta̍ḥ | de̱vam | bhartā̍ | a̱mṛ̱ta̱ | ma̱ndra-ji̍hvam |
dve̱ṣa̱ḥ-yuta̍m | ā | vi̱vā̱sa̱nti̱ | dhī̱bhiḥ | damū̍nasam | gṛ̱ha-pa̍tim | amū̍ram ||4.011.05||

4.011.06a ā̱re a̱smad ama̍tim ā̱re aṁha̍ ā̱re viśvā̍ṁ durma̱tiṁ yan ni̱pāsi̍ |
4.011.06c do̱ṣā śi̱vaḥ sa̍hasaḥ sūno agne̱ yaṁ de̱va ā ci̱t saca̍se sva̱sti ||

ā̱re | a̱smat | ama̍tim | ā̱re | aṁha̍ḥ | ā̱re | viśvā̍m | du̱ḥ-ma̱tim | yat | ni̱-pāsi̍ |
do̱ṣā | śi̱vaḥ | sa̱ha̱sa̱ḥ | sū̱no̱ iti̍ | a̱gne̱ | yam | de̱vaḥ | ā | ci̱t | saca̍se | sva̱sti ||4.011.06||


4.012.01a yas tvām a̍gna i̱nadha̍te ya̱tasru̱k tris te̱ anna̍ṁ kṛ̱ṇava̱t sasmi̱nn aha̍n |
4.012.01c sa su dyu̱mnair a̱bhy a̍stu pra̱sakṣa̱t tava̱ kratvā̍ jātavedaś ciki̱tvān ||

yaḥ | tvām | a̱gne̱ | i̱nadha̍te | ya̱ta-sru̍k | triḥ | te̱ | anna̍m | kṛ̱ṇava̍t | sasmi̍n | aha̍n |
saḥ | su | dyu̱mnaiḥ | a̱bhi | a̱stu̱ | pra̱-sakṣa̍t | tava̍ | kratvā̍ | jā̱ta̱-ve̱da̱ḥ | ci̱ki̱tvān ||4.012.01||

4.012.02a i̱dhmaṁ yas te̍ ja̱bhara̍c chaśramā̱ṇo ma̱ho a̍gne̱ anī̍ka̱m ā sa̍pa̱ryan |
4.012.02c sa i̍dhā̱naḥ prati̍ do̱ṣām u̱ṣāsa̱m puṣya̍n ra̱yiṁ sa̍cate̱ ghnann a̱mitrā̍n ||

i̱dhmam | yaḥ | te̱ | ja̱bhara̍t | śa̱śra̱mā̱ṇaḥ | ma̱haḥ | a̱gne̱ | anī̍kam | ā | sa̱pa̱ryan |
saḥ | i̱dhā̱naḥ | prati̍ | do̱ṣām | u̱ṣasa̍m | puṣya̍n | ra̱yim | sa̱ca̱te̱ | ghnan | a̱mitrā̍n ||4.012.02||

4.012.03a a̱gnir ī̍śe bṛha̱taḥ kṣa̱triya̍syā̱gnir vāja̍sya para̱masya̍ rā̱yaḥ |
4.012.03c dadhā̍ti̱ ratna̍ṁ vidha̱te yavi̍ṣṭho̱ vy ā̍nu̱ṣaṅ martyā̍ya sva̱dhāvā̍n ||

a̱gniḥ | ī̱śe̱ | bṛ̱ha̱taḥ | kṣa̱triya̍sya | a̱gniḥ | vāja̍sya | pa̱ra̱masya̍ | rā̱yaḥ |
dadhā̍ti | ratna̍m | vi̱dha̱te | yavi̍ṣṭhaḥ | vi | ā̱nu̱ṣak | martyā̍ya | sva̱dhā-vā̍n ||4.012.03||

4.012.04a yac ci̱d dhi te̍ puruṣa̱trā ya̍vi̱ṣṭhāci̍ttibhiś cakṛ̱mā kac ci̱d āga̍ḥ |
4.012.04c kṛ̱dhī ṣv a1̱̍smām̐ adi̍te̱r anā̍gā̱n vy enā̍ṁsi śiśratho̱ viṣva̍g agne ||

yat | ci̱t | hi | te̱ | pu̱ru̱ṣa̱-trā | ya̱vi̱ṣṭha̱ | aci̍tti-bhiḥ | ca̱kṛ̱ma | kat | ci̱t | āga̍ḥ |
kṛ̱dhi | su | a̱smān | adi̍teḥ | anā̍gān | vi | enā̍ṁsi | śi̱śra̱tha̱ḥ | viṣva̍k | a̱gne̱ ||4.012.04||

4.012.05a ma̱haś ci̍d agna̱ ena̍so a̱bhīka̍ ū̱rvād de̱vānā̍m u̱ta martyā̍nām |
4.012.05c mā te̱ sakhā̍ya̱ḥ sada̱m id ri̍ṣāma̱ yacchā̍ to̱kāya̱ tana̍yāya̱ śaṁ yoḥ ||

ma̱haḥ | ci̱t | a̱gne̱ | ena̍saḥ | a̱bhīke̍ | ū̱rvāt | de̱vānā̍m | u̱ta | martyā̍nām |
mā | te̱ | sakhā̍yaḥ | sada̍m | it | ri̱ṣā̱ma̱ | yaccha̍ | to̱kāya̍ | tana̍yāya | śam | yoḥ ||4.012.05||

4.012.06a yathā̍ ha̱ tyad va̍savo gau̱rya̍ṁ cit pa̱di ṣi̱tām amu̍ñcatā yajatrāḥ |
4.012.06c e̱vo ṣv a1̱̍sman mu̍ñcatā̱ vy aṁha̱ḥ pra tā̍ry agne prata̱raṁ na̱ āyu̍ḥ ||

yathā̍ | ha̱ | tyat | va̱sa̱va̱ḥ | gau̱rya̍m | ci̱t | pa̱di | si̱tām | amu̍ñcata | ya̱ja̱trā̱ḥ |
e̱vo iti̍ | su | a̱smat | mu̱ñca̱ta̱ | vi | aṁha̍ḥ | pra | tā̱ri̱ | a̱gne̱ | pra̱-ta̱ram | na̱ḥ | āyu̍ḥ ||4.012.06||


4.013.01a praty a̱gnir u̱ṣasā̱m agra̍m akhyad vibhātī̱nāṁ su̱manā̍ ratna̱dheya̍m |
4.013.01c yā̱tam a̍śvinā su̱kṛto̍ duro̱ṇam ut sūryo̱ jyoti̍ṣā de̱va e̍ti ||

prati̍ | a̱gniḥ | u̱ṣasā̍m | agra̍m | a̱khya̱t | vi̱-bhā̱tī̱nām | su̱-manā̍ḥ | ra̱tna̱-dheya̍m |
yā̱tam | a̱śvi̱nā̱ | su̱-kṛta̍ḥ | du̱ro̱ṇam | ut | sūrya̍ḥ | jyoti̍ṣā | de̱vaḥ | e̱ti̱ ||4.013.01||

4.013.02a ū̱rdhvam bhā̱nuṁ sa̍vi̱tā de̱vo a̍śred dra̱psaṁ davi̍dhvad gavi̱ṣo na satvā̍ |
4.013.02c anu̍ vra̱taṁ varu̍ṇo yanti mi̱tro yat sūrya̍ṁ di̱vy ā̍ro̱haya̍nti ||

ū̱rdhvam | bhā̱num | sa̱vi̱tā | de̱vaḥ | a̱śre̱t | dra̱psam | davi̍dhvat | go̱-i̱ṣaḥ | na | satvā̍ |
anu̍ | vra̱tam | varu̍ṇaḥ | ya̱nti̱ | mi̱traḥ | yat | sūrya̍m | di̱vi | ā̱-ro̱haya̍nti ||4.013.02||

4.013.03a yaṁ sī̱m akṛ̍ṇva̱n tama̍se vi̱pṛce̍ dhru̱vakṣe̍mā̱ ana̍vasyanto̱ artha̍m |
4.013.03c taṁ sūrya̍ṁ ha̱rita̍ḥ sa̱pta ya̱hvīḥ spaśa̱ṁ viśva̍sya̱ jaga̍to vahanti ||

yam | sī̱m | akṛ̍ṇvan | tama̍se | vi̱-pṛce̍ | dhru̱va-kṣe̍māḥ | ana̍va-syantaḥ | artha̍m |
tam | sūrya̍m | ha̱rita̍ḥ | sa̱pta | ya̱hvīḥ | spaśa̍m | viśva̍sya | jaga̍taḥ | va̱ha̱nti̱ ||4.013.03||

4.013.04a vahi̍ṣṭhebhir vi̱hara̍n yāsi̱ tantu̍m ava̱vyaya̱nn asi̍taṁ deva̱ vasma̍ |
4.013.04c davi̍dhvato ra̱śmaya̱ḥ sūrya̍sya̱ carme̱vāvā̍dhu̱s tamo̍ a̱psv a1̱̍ntaḥ ||

vahi̍ṣṭebhiḥ | vi̱-hara̍n | yā̱si̱ | tantu̍m | a̱va̱-vyaya̍n | asi̍tam | de̱va̱ | vasma̍ |
davi̍dhvataḥ | ra̱śmaya̍ḥ | sūrya̍sya | carma̍-iva | ava̍ | a̱dhu̱ḥ | tama̍ḥ | a̱p-su | a̱ntariti̍ ||4.013.04||

4.013.05a anā̍yato̱ ani̍baddhaḥ ka̱thāyaṁ nya̍ṅṅ uttā̱no 'va̍ padyate̱ na |
4.013.05c kayā̍ yāti sva̱dhayā̱ ko da̍darśa di̱vaḥ ska̱mbhaḥ samṛ̍taḥ pāti̱ nāka̍m ||

anā̍yataḥ | ani̍-baddhaḥ | ka̱thā | a̱yam | nya̍ṅ | u̱ttā̱naḥ | ava̍ | pa̱dya̱te̱ | na |
kayā̍ | yā̱ti̱ | sva̱dhayā̍ | kaḥ | da̱da̱rśa̱ | di̱vaḥ | ska̱mbhaḥ | sam-ṛ̍taḥ | pā̱ti̱ | nāka̍m ||4.013.05||


4.014.01a praty a̱gnir u̱ṣaso̍ jā̱tave̍dā̱ akhya̍d de̱vo roca̍mānā̱ maho̍bhiḥ |
4.014.01c ā nā̍satyorugā̱yā rathe̍ne̱maṁ ya̱jñam upa̍ no yāta̱m accha̍ ||

prati̍ | a̱gniḥ | u̱ṣasa̍ḥ | jā̱ta-ve̍dāḥ | akhya̍t | de̱vaḥ | roca̍mānāḥ | maha̍ḥ-bhiḥ |
ā | nā̱sa̱tyā̱ | u̱ru̱-gā̱yā | rathe̍na | i̱mam | ya̱jñam | upa̍ | na̱ḥ | yā̱ta̱m | accha̍ ||4.014.01||

4.014.02a ū̱rdhvaṁ ke̱tuṁ sa̍vi̱tā de̱vo a̍śre̱j jyoti̱r viśva̍smai̱ bhuva̍nāya kṛ̱ṇvan |
4.014.02c āprā̱ dyāvā̍pṛthi̱vī a̱ntari̍kṣa̱ṁ vi sūryo̍ ra̱śmibhi̱ś ceki̍tānaḥ ||

ū̱rdhvam | ke̱tum | sa̱vi̱tā | de̱vaḥ | a̱śre̱t | jyoti̍ḥ | viśva̍smai | bhuva̍nāya | kṛ̱ṇvan |
ā | a̱prā̱ḥ | dyāvā̍pṛthi̱vī iti̍ | a̱ntari̍kṣam | vi | sūrya̍ḥ | ra̱śmi-bhi̍ḥ | ceki̍tānaḥ ||4.014.02||

4.014.03a ā̱vaha̍nty aru̱ṇīr jyoti̱ṣāgā̍n ma̱hī ci̱trā ra̱śmibhi̱ś ceki̍tānā |
4.014.03c pra̱bo̱dhaya̍ntī suvi̱tāya̍ de̱vy u1̱̍ṣā ī̍yate su̱yujā̱ rathe̍na ||

ā̱-vaha̍ntī | a̱ru̱ṇīḥ | jyoti̱ṣā | ā | a̱gā̱t | ma̱hī | ci̱trā | ra̱śmi-bhi̍ḥ | ceki̍tānā |
pra̱-bo̱dhaya̍ntī | su̱-vi̱tāya̍ | de̱vī | u̱ṣāḥ | ī̱ya̱te̱ | su̱-yujā̍ | rathe̍na ||4.014.03||

4.014.04a ā vā̱ṁ vahi̍ṣṭhā i̱ha te va̍hantu̱ rathā̱ aśvā̍sa u̱ṣaso̱ vyu̍ṣṭau |
4.014.04c i̱me hi vā̍m madhu̱peyā̍ya̱ somā̍ a̱smin ya̱jñe vṛ̍ṣaṇā mādayethām ||

ā | vā̱m | vahi̍ṣṭhāḥ | i̱ha | te | va̱ha̱ntu̱ | rathā̍ḥ | aśvā̍saḥ | u̱ṣasa̍ḥ | vi-u̍ṣṭau |
i̱me | hi | vā̱m | ma̱dhu̱-peyā̍ya | somā̍ḥ | a̱smin | ya̱jñe | vṛ̱ṣa̱ṇā̱ | mā̱da̱ye̱thā̱m ||4.014.04||

4.014.05a anā̍yato̱ ani̍baddhaḥ ka̱thāyaṁ nya̍ṅṅ uttā̱no 'va̍ padyate̱ na |
4.014.05c kayā̍ yāti sva̱dhayā̱ ko da̍darśa di̱vaḥ ska̱mbhaḥ samṛ̍taḥ pāti̱ nāka̍m ||

anā̍yataḥ | ani̍-baddhaḥ | ka̱thā | a̱yam | nya̍ṅ | u̱ttā̱naḥ | ava̍ | pa̱dya̱te̱ | na |
kayā̍ | yā̱ti̱ | sva̱dhayā̍ | kaḥ | da̱da̱rśa̱ | di̱vaḥ | ska̱mbhaḥ | sam-ṛ̍taḥ | pā̱ti̱ | nāka̍m ||4.014.05||


4.015.01a a̱gnir hotā̍ no adhva̱re vā̱jī san pari̍ ṇīyate |
4.015.01c de̱vo de̱veṣu̍ ya̱jñiya̍ḥ ||

a̱gniḥ | hotā̍ | na̱ḥ | a̱dhva̱re | vā̱jī | san | pari̍ | nī̱ya̱te̱ |
de̱vaḥ | de̱veṣu̍ | ya̱jñiya̍ḥ ||4.015.01||

4.015.02a pari̍ trivi̱ṣṭy a̍dhva̱raṁ yāty a̱gnī ra̱thīr i̍va |
4.015.02c ā de̱veṣu̱ prayo̱ dadha̍t ||

pari̍ | tri̱-vi̱ṣṭi | a̱dhva̱ram | yāti̍ | a̱gniḥ | ra̱thīḥ-i̍va |
ā | de̱veṣu | praya̍ḥ | dadha̍t ||4.015.02||

4.015.03a pari̱ vāja̍patiḥ ka̱vir a̱gnir ha̱vyāny a̍kramīt |
4.015.03c dadha̱d ratnā̍ni dā̱śuṣe̍ ||

pari̍ | vāja̍-patiḥ | ka̱viḥ | a̱gniḥ | ha̱vyāni̍ | a̱kra̱mī̱t |
dadha̍t | ratnā̍ni | dā̱śuṣe̍ ||4.015.03||

4.015.04a a̱yaṁ yaḥ sṛñja̍ye pu̱ro dai̍vavā̱te sa̍mi̱dhyate̍ |
4.015.04c dyu̱mām̐ a̍mitra̱dambha̍naḥ ||

a̱yam | yaḥ | sṛñja̍ye | pu̱raḥ | dai̱va̱-vā̱te | sa̱m-i̱dhyate̍ |
dyu̱-mān | a̱mi̱tra̱-dambha̍naḥ ||4.015.04||

4.015.05a asya̍ ghā vī̱ra īva̍to̱ 'gner ī̍śīta̱ martya̍ḥ |
4.015.05c ti̱gmaja̍mbhasya mī̱ḻhuṣa̍ḥ ||

asya̍ | gha̱ | vī̱raḥ | īva̍taḥ | a̱gneḥ | ī̱śī̱ta̱ | martya̍ḥ |
ti̱gma-ja̍mbhasya | mī̱ḻhuṣa̍ḥ ||4.015.05||

4.015.06a tam arva̍nta̱ṁ na sā̍na̱sim a̍ru̱ṣaṁ na di̱vaḥ śiśu̍m |
4.015.06c ma̱rmṛ̱jyante̍ di̱ve-di̍ve ||

tam | arva̍ntam | na | sā̱na̱sim | a̱ru̱ṣam | na | di̱vaḥ | śiśu̍m |
ma̱rmṛ̱jyante̍ | di̱ve-di̍ve ||4.015.06||

4.015.07a bodha̱d yan mā̱ hari̍bhyāṁ kumā̱raḥ sā̍hade̱vyaḥ |
4.015.07c acchā̱ na hū̱ta ud a̍ram ||

bodha̍t | yat | mā̱ | hari̍-bhyām | ku̱mā̱raḥ | sā̱ha̱-de̱vyaḥ |
accha̍ | na | hū̱taḥ | ut | a̱ra̱m ||4.015.07||

4.015.08a u̱ta tyā ya̍ja̱tā harī̍ kumā̱rāt sā̍hade̱vyāt |
4.015.08c praya̍tā sa̱dya ā da̍de ||

u̱ta | tyā | ya̱ja̱tā | harī̱ iti̍ | ku̱mā̱rāt | sā̱ha̱de̱vyāt |
pra-ya̍tā | sa̱dyaḥ | ā | da̱de̱ ||4.015.08||

4.015.09a e̱ṣa vā̍ṁ devāv aśvinā kumā̱raḥ sā̍hade̱vyaḥ |
4.015.09c dī̱rghāyu̍r astu̱ soma̍kaḥ ||

e̱ṣaḥ | vā̱m | de̱vau̱ | a̱śvi̱nā̱ | ku̱mā̱raḥ | sā̱ha̱-de̱vyaḥ |
dī̱rgha-ā̍yuḥ | a̱stu̱ | soma̍kaḥ ||4.015.09||

4.015.10a taṁ yu̱vaṁ de̍vāv aśvinā kumā̱raṁ sā̍hade̱vyam |
4.015.10c dī̱rghāyu̍ṣaṁ kṛṇotana ||

tam | yu̱vam | de̱vau̱ | a̱śvi̱nā̱ | ku̱mā̱ram | sā̱ha̱-de̱vyam |
dī̱rgha-ā̍yuṣam | kṛ̱ṇo̱ta̱na̱ ||4.015.10||


4.016.01a ā sa̱tyo yā̍tu ma̱ghavā̍m̐ ṛjī̱ṣī drava̍ntv asya̱ hara̍ya̱ upa̍ naḥ |
4.016.01c tasmā̱ id andha̍ḥ suṣumā su̱dakṣa̍m i̱hābhi̍pi̱tvaṁ ka̍rate gṛṇā̱naḥ ||

ā | sa̱tyaḥ | yā̱tu̱ | ma̱gha-vā̍n | ṛ̱jī̱ṣī | drava̍ntu | a̱sya̱ | hara̍yaḥ | upa̍ | na̱ḥ |
tasmai̍ | it | andha̍ḥ | su̱su̱ma̱ | su̱-dakṣa̍m | i̱ha | a̱bhi̱-pi̱tvam | ka̱ra̱te̱ | gṛ̱ṇā̱naḥ ||4.016.01||

4.016.02a ava̍ sya śū̱rādhva̍no̱ nānte̱ 'smin no̍ a̱dya sava̍ne ma̱ndadhyai̍ |
4.016.02c śaṁsā̍ty u̱ktham u̱śane̍va ve̱dhāś ci̍ki̱tuṣe̍ asu̱ryā̍ya̱ manma̍ ||

ava̍ | sya̱ | śū̱ra̱ | adhva̍naḥ | na | ante̍ | a̱smin | na̱ḥ | a̱dya | sava̍ne | ma̱ndadhyai̍ |
śaṁsā̍ti | u̱ktham | u̱śanā̍-iva | ve̱dhāḥ | ci̱ki̱tuṣe̍ | a̱su̱ryā̍ya | manma̍ ||4.016.02||

4.016.03a ka̱vir na ni̱ṇyaṁ vi̱dathā̍ni̱ sādha̱n vṛṣā̱ yat seka̍ṁ vipipā̱no arcā̍t |
4.016.03c di̱va i̱tthā jī̍janat sa̱pta kā̱rūn ahnā̍ cic cakrur va̱yunā̍ gṛ̱ṇanta̍ḥ ||

ka̱viḥ | na | ni̱ṇyam | vi̱dathā̍ni | sādha̍n | vṛṣā̍ | yat | seka̍m | vi̱-pi̱pā̱naḥ | arcā̍t |
di̱vaḥ | i̱tthā | jī̱ja̱na̱t | sa̱pta | kā̱rūn | ahnā̍ | ci̱t | ca̱kru̱ḥ | va̱yunā̍ | gṛ̱ṇanta̍ḥ ||4.016.03||

4.016.04a sva1̱̍r yad vedi̍ su̱dṛśī̍kam a̱rkair mahi̱ jyotī̍ rurucu̱r yad dha̱ vasto̍ḥ |
4.016.04c a̱ndhā tamā̍ṁsi̱ dudhi̍tā vi̱cakṣe̱ nṛbhya̍ś cakāra̱ nṛta̍mo a̱bhiṣṭau̍ ||

sva̍ḥ | yat | vedi̍ | su̱-dṛśī̍kam | a̱rkaiḥ | mahi̍ | jyoti̍ḥ | ru̱ru̱cu̱ḥ | yat | ha̱ | vasto̍ḥ |
a̱ndhā | tamā̍ṁsi | dudhi̍tā | vi̱-cakṣe̍ | nṛ-bhya̍ḥ | ca̱kā̱ra̱ | nṛ-ta̍maḥ | a̱bhiṣṭau̍ ||4.016.04||

4.016.05a va̱va̱kṣa indro̱ ami̍tam ṛjī̱ṣy u1̱̍bhe ā pa̍prau̱ roda̍sī mahi̱tvā |
4.016.05c ata̍ś cid asya mahi̱mā vi re̍cy a̱bhi yo viśvā̱ bhuva̍nā ba̱bhūva̍ ||

va̱va̱kṣe | indra̍ḥ | ami̍tam | ṛ̱jī̱ṣī | u̱bhe iti̍ | ā | pa̱prau̱ | roda̍sī̱ iti̍ | ma̱hi̱-tvā |
ata̍ḥ | ci̱t | a̱sya̱ | ma̱hi̱mā | vi | re̱ci̱ | a̱bhi | yaḥ | viśvā̍ | bhuva̍nā | ba̱bhūva̍ ||4.016.05||

4.016.06a viśvā̍ni śa̱kro naryā̍ṇi vi̱dvān a̱po ri̍reca̱ sakhi̍bhi̱r nikā̍maiḥ |
4.016.06c aśmā̍naṁ ci̱d ye bi̍bhi̱dur vaco̍bhir vra̱jaṁ goma̍ntam u̱śijo̱ vi va̍vruḥ ||

viśvā̍ni | śa̱kraḥ | naryā̍ṇi | vi̱dvān | a̱paḥ | ri̱re̱ca̱ | sakhi̍-bhiḥ | ni-kā̍maiḥ |
aśmā̍nam | ci̱t | ye | bi̱bhi̱duḥ | vaca̍ḥ-bhiḥ | vra̱jam | go-ma̍ntam | u̱śija̍ḥ | vi | va̱vru̱riti̍ vavruḥ ||4.016.06||

4.016.07a a̱po vṛ̱traṁ va̍vri̱vāṁsa̱m parā̍ha̱n prāva̍t te̱ vajra̍m pṛthi̱vī sace̍tāḥ |
4.016.07c prārṇā̍ṁsi samu̱driyā̍ṇy aino̱ḥ pati̱r bhava̱ñ chava̍sā śūra dhṛṣṇo ||

a̱paḥ | vṛ̱tram | va̱vri̱-vāṁsa̍m | parā̍ | a̱ha̱n | pra | ā̱va̱t | te̱ | vajra̍m | pṛ̱thi̱vī | sa-ce̍tāḥ |
pra | arṇā̍ṁsi | sa̱mu̱driyā̍ṇi | ai̱no̱ḥ | pati̍ḥ | bhava̍n | śava̍sā | śū̱ra̱ | dhṛ̱ṣṇo̱ iti̍ ||4.016.07||

4.016.08a a̱po yad adri̍m puruhūta̱ darda̍r ā̱vir bhu̍vat sa̱ramā̍ pū̱rvyaṁ te̍ |
4.016.08c sa no̍ ne̱tā vāja̱m ā da̍rṣi̱ bhūri̍ṁ go̱trā ru̱jann aṅgi̍robhir gṛṇā̱naḥ ||

a̱paḥ | yat | adri̍m | pu̱ru̱-hū̱ta̱ | darda̍ḥ | ā̱viḥ | bhu̱va̱t | sa̱ramā̍ | pū̱rvya̍m | te̱ |
saḥ | na̱ḥ | ne̱tā | vāja̍m | ā | da̱rṣi̱ | bhūri̍m | go̱trā | ru̱jan | aṅgi̍raḥ-bhiḥ | gṛ̱ṇā̱naḥ ||4.016.08||

4.016.09a acchā̍ ka̱viṁ nṛ̍maṇo gā a̱bhiṣṭau̱ sva̍rṣātā maghava̱n nādha̍mānam |
4.016.09c ū̱tibhi̱s tam i̍ṣaṇo dyu̱mnahū̍tau̱ ni mā̱yāvā̱n abra̍hmā̱ dasyu̍r arta ||

accha̍ | ka̱vim | nṛ̱-ma̱na̱ḥ | gā̱ḥ | a̱bhiṣṭau̍ | sva̍ḥ-sātā | ma̱gha̱-va̱n | nāda̍mānam |
ū̱ti-bhi̍ḥ | tam | i̱ṣa̱ṇa̱ḥ | dyu̱mna-hū̍tau | ni | mā̱yā-vā̍n | abra̍hmā | dasyu̍ḥ | a̱rta̱ ||4.016.09||

4.016.10a ā da̍syu̱ghnā mana̍sā yā̱hy asta̱m bhuva̍t te̱ kutsa̍ḥ sa̱khye nikā̍maḥ |
4.016.10c sve yonau̱ ni ṣa̍data̱ṁ sarū̍pā̱ vi vā̍ṁ cikitsad ṛta̱cid dha̱ nārī̍ ||

ā | da̱syu̱-ghnā | mana̍sā | yā̱hi̱ | asta̍m | bhuva̍t | te̱ | kutsa̍ḥ | sa̱khye | ni-kā̍maḥ |
sve | yonau̍ | ni | sa̱da̱ta̱m | sa-rū̍pā | vi | vā̱m | ci̱ki̱tsa̱t | ṛ̱ta̱-cit | ha̱ | nārī̍ ||4.016.10||

4.016.11a yāsi̱ kutse̍na sa̱ratha̍m ava̱syus to̱do vāta̍sya̱ haryo̱r īśā̍naḥ |
4.016.11c ṛ̱jrā vāja̱ṁ na gadhya̱ṁ yuyū̍ṣan ka̱vir yad aha̱n pāryā̍ya̱ bhūṣā̍t ||

yāsi̍ | kutse̍na | sa̱-ratha̍m | a̱va̱syuḥ | to̱daḥ | vāta̍sya | haryo̍ḥ | īśā̍naḥ |
ṛ̱jrā | vāja̍m | na | gadhya̍m | yuyū̍ṣan | ka̱viḥ | yat | aha̍n | pāryā̍ya | bhūṣā̍t ||4.016.11||

4.016.12a kutsā̍ya̱ śuṣṇa̍m a̱śuṣa̱ṁ ni ba̍rhīḥ prapi̱tve ahna̱ḥ kuya̍vaṁ sa̱hasrā̍ |
4.016.12c sa̱dyo dasyū̱n pra mṛ̍ṇa ku̱tsyena̱ pra sūra̍ś ca̱kraṁ vṛ̍hatād a̱bhīke̍ ||

kutsā̍ya | śuṣṇa̍m | a̱śuṣa̍m | ni | ba̱rhī̱ḥ | pra̱-pi̱tve | ahna̍ḥ | kuya̍vam | sa̱hasrā̍ |
sa̱dyaḥ | dasyū̍n | pra | mṛ̱ṇa̱ | ku̱tsyena̍ | pra | sūra̍ḥ | ca̱kram | vṛ̱ha̱tā̱t | a̱bhīke̍ ||4.016.12||

4.016.13a tvam pipru̱m mṛga̍yaṁ śūśu̱vāṁsa̍m ṛ̱jiśva̍ne vaidathi̱nāya̍ randhīḥ |
4.016.13c pa̱ñcā̱śat kṛ̱ṣṇā ni va̍paḥ sa̱hasrātka̱ṁ na puro̍ jari̱mā vi da̍rdaḥ ||

tvam | pipru̍m | mṛga̍yam | śū̱śu̱-vāṁsa̍m | ṛ̱jiśva̍ne | vai̱da̱thi̱nāya̍ | ra̱ndhī̱ḥ |
pa̱ñcā̱śat | kṛ̱ṣṇā | ni | va̱pa̱ḥ | sa̱hasrā̍ | atka̍m | na | pura̍ḥ | ja̱ri̱mā | vi | da̱rda̱ḥ ||4.016.13||

4.016.14a sūra̍ upā̱ke ta̱nva1̱̍ṁ dadhā̍no̱ vi yat te̱ cety a̱mṛta̍sya̱ varpa̍ḥ |
4.016.14c mṛ̱go na ha̱stī tavi̍ṣīm uṣā̱ṇaḥ si̱ṁho na bhī̱ma āyu̍dhāni̱ bibhra̍t ||

sūra̍ḥ | u̱pā̱ke | ta̱nva̍m | dadhā̍naḥ | vi | yat | te̱ | ceti̍ | a̱mṛta̍sya | varpa̍ḥ |
mṛ̱gaḥ | na | ha̱stī | tavi̍ṣīm | u̱ṣā̱ṇaḥ | si̱ṁhaḥ | na | bhī̱maḥ | āyu̍dhāni | babhra̍t ||4.016.14||

4.016.15a indra̱ṁ kāmā̍ vasū̱yanto̍ agma̱n sva̍rmīḻhe̱ na sava̍ne cakā̱nāḥ |
4.016.15c śra̱va̱syava̍ḥ śaśamā̱nāsa̍ u̱kthair oko̱ na ra̱ṇvā su̱dṛśī̍va pu̱ṣṭiḥ ||

indra̍m | kāmā̍ḥ | va̱su̱-yanta̍ḥ | a̱gma̱n | sva̍ḥ-mīḻhe | na | sava̍ne | ca̱kā̱nāḥ |
śra̱va̱syava̍ḥ | śa̱śa̱mā̱nāsa̍ḥ | u̱kthaiḥ | oka̍ḥ | na | ra̱ṇvā | su̱dṛśī̍-iva | pu̱ṣṭiḥ ||4.016.15||

4.016.16a tam id va̱ indra̍ṁ su̱hava̍ṁ huvema̱ yas tā ca̱kāra̱ naryā̍ pu̱rūṇi̍ |
4.016.16c yo māva̍te jari̱tre gadhya̍ṁ cin ma̱kṣū vāja̱m bhara̍ti spā̱rharā̍dhāḥ ||

tam | it | va̱ḥ | indra̍m | su̱-hava̍m | hu̱ve̱ma̱ | yaḥ | tā | ca̱kāra̍ | naryā̍ | pu̱rūṇi̍ |
yaḥ | mā-va̍te | ja̱ri̱tre | gadhya̍m | ci̱t | ma̱kṣu | vāja̍m | bhara̍ti | spā̱rha-rā̍dhāḥ ||4.016.16||

4.016.17a ti̱gmā yad a̱ntar a̱śani̱ḥ patā̍ti̱ kasmi̍ñ cic chūra muhu̱ke janā̍nām |
4.016.17c gho̱rā yad a̍rya̱ samṛ̍ti̱r bhavā̱ty adha̍ smā nas ta̱nvo̍ bodhi go̱pāḥ ||

ti̱gmā | yat | a̱ntaḥ | a̱śani̍ḥ | patā̍ti | kasmi̍n | ci̱t | śū̱ra̱ | mu̱hu̱ke | janā̍nām |
gho̱rā | yat | a̱rya̱ | sam-ṛ̍tiḥ | bhavā̍ti | adha̍ | sma̱ | na̱ḥ | ta̱nva̍ḥ | bo̱dhi̱ | go̱pāḥ ||4.016.17||

4.016.18a bhuvo̍ 'vi̱tā vā̱made̍vasya dhī̱nām bhuva̱ḥ sakhā̍vṛ̱ko vāja̍sātau |
4.016.18c tvām anu̱ prama̍ti̱m ā ja̍ganmoru̱śaṁso̍ jari̱tre vi̱śvadha̍ syāḥ ||

bhuva̍ḥ | a̱vi̱tā | vā̱ma-de̍vasya | dhī̱nām | bhuva̍ḥ | sakhā̍ | a̱vṛ̱kaḥ | vāja̍-sātau |
tvām | anu̍ | pra-ma̍tim | ā | ja̱ga̱nma̱ | u̱ru̱-śaṁsa̍ḥ | ja̱ri̱tre | vi̱śvadha̍ | syā̱ḥ ||4.016.18||

4.016.19a e̱bhir nṛbhi̍r indra tvā̱yubhi̍ṣ ṭvā ma̱ghava̍dbhir maghava̱n viśva̍ ā̱jau |
4.016.19c dyāvo̱ na dyu̱mnair a̱bhi santo̍ a̱ryaḥ kṣa̱po ma̍dema śa̱rada̍ś ca pū̱rvīḥ ||

e̱bhiḥ | nṛ-bhi̍ḥ | i̱ndra̱ | tvā̱yu-bhi̍ḥ | tvā̱ | ma̱ghava̍t-bhiḥ | ma̱gha̱-va̱n | viśve̍ | ā̱jau |
dyāva̍ḥ | na | dyu̱mnaiḥ | a̱bhi | santa̍ḥ | a̱ryaḥ | kṣa̱paḥ | ma̱de̱ma̱ | śa̱rada̍ḥ | ca̱ | pū̱rvīḥ ||4.016.19||

4.016.20a e̱ved indrā̍ya vṛṣa̱bhāya̱ vṛṣṇe̱ brahmā̍karma̱ bhṛga̍vo̱ na ratha̍m |
4.016.20c nū ci̱d yathā̍ naḥ sa̱khyā vi̱yoṣa̱d asa̍n na u̱gro̍ 'vi̱tā ta̍nū̱pāḥ ||

e̱va | it | indrā̍ya | vṛ̱ṣa̱bhāya̍ | vṛṣṇe̍ | brahma̍ | a̱ka̱rma̱ | bhṛga̍vaḥ | na | ratha̍m |
nu | ci̱t | yathā̍ | na̱ḥ | sa̱khyā | vi̱-yoṣa̍t | asa̍t | na̱ḥ | u̱graḥ | a̱vi̱tā | ta̱nū̱-pāḥ ||4.016.20||

4.016.21a nū ṣṭu̱ta i̍ndra̱ nū gṛ̍ṇā̱na iṣa̍ṁ jari̱tre na̱dyo̱3̱̍ na pī̍peḥ |
4.016.21c akā̍ri te harivo̱ brahma̱ navya̍ṁ dhi̱yā syā̍ma ra̱thya̍ḥ sadā̱sāḥ ||

nu | stu̱taḥ | i̱ndra̱ | nu | gṛ̱ṇā̱naḥ | iṣa̍m | ja̱ri̱tre | na̱dya̍ḥ | na | pī̱pe̱riti̍ pīpeḥ |
akā̍ri | te̱ | ha̱ri̱-va̱ḥ | brahma̍ | navya̍m | dhi̱yā | syā̱ma̱ | ra̱thya̍ḥ | sa̱dā̱-sāḥ ||4.016.21||


4.017.01a tvam ma̱hām̐ i̍ndra̱ tubhya̍ṁ ha̱ kṣā anu̍ kṣa̱tram ma̱ṁhanā̍ manyata̱ dyauḥ |
4.017.01c tvaṁ vṛ̱traṁ śava̍sā jagha̱nvān sṛ̱jaḥ sindhū̱m̐r ahi̍nā jagrasā̱nān ||

tvam | ma̱hān | i̱ndra̱ | tubhya̍m | ha̱ | kṣāḥ | anu̍ | kṣa̱tram | ma̱ṁhanā̍ | ma̱nya̱ta̱ | dyauḥ |
tvam | vṛ̱tram | śava̍sā | ja̱gha̱nvān | sṛ̱jaḥ | sindhū̍n | ahi̍nā | ja̱gra̱sā̱nān ||4.017.01||

4.017.02a tava̍ tvi̱ṣo jani̍man rejata̱ dyau reja̱d bhūmi̍r bhi̱yasā̱ svasya̍ ma̱nyoḥ |
4.017.02c ṛ̱ghā̱yanta̍ su̱bhva1̱̍ḥ parva̍tāsa̱ ārda̱n dhanvā̍ni sa̱raya̍nta̱ āpa̍ḥ ||

tava̍ | tvi̱ṣaḥ | jani̍man | re̱ja̱ta̱ | dyauḥ | reja̍t | bhūmi̍ḥ | bhi̱yasā̍ | svasya̍ | ma̱nyoḥ |
ṛ̱ghā̱yanta̍ | su̱-bhva̍ḥ | parva̍tāsaḥ | ārda̍n | dhanvā̍ni | sa̱raya̍nte | āpa̍ḥ ||4.017.02||

4.017.03a bhi̱nad gi̱riṁ śava̍sā̱ vajra̍m i̱ṣṇann ā̍viṣkṛṇvā̱naḥ sa̍hasā̱na oja̍ḥ |
4.017.03c vadhī̍d vṛ̱traṁ vajre̍ṇa mandasā̱naḥ sara̱nn āpo̱ java̍sā ha̱tavṛ̍ṣṇīḥ ||

bhi̱nat | gi̱rim | śava̍sā | vajra̍m | i̱ṣṇan | ā̱vi̱ḥ-kṛ̱ṇvā̱naḥ | sa̱ha̱sā̱naḥ | oja̍ḥ |
vadhī̍t | vṛ̱tram | vajre̍ṇa | ma̱nda̱sā̱naḥ | sara̍n | āpa̍ḥ | java̍sā | ha̱ta-vṛ̍ṣṇīḥ ||4.017.03||

4.017.04a su̱vīra̍s te jani̱tā ma̍nyata̱ dyaur indra̍sya ka̱rtā svapa̍stamo bhūt |
4.017.04c ya ī̍ṁ ja̱jāna̍ sva̱rya̍ṁ su̱vajra̱m ana̍pacyuta̱ṁ sada̍so̱ na bhūma̍ ||

su̱-vīra̍ḥ | te̱ | ja̱ni̱tā | ma̱nya̱ta̱ | dyauḥ | indra̍sya | ka̱rtā | svapa̍ḥ-tamaḥ | bhū̱t |
yaḥ | ī̱m | ja̱jāna̍ | sva̱rya̍m | su̱-vajra̍m | ana̍pa-cyutam | sada̍saḥ | na | bhūma̍ ||4.017.04||

4.017.05a ya eka̍ ic cyā̱vaya̍ti̱ pra bhūmā̱ rājā̍ kṛṣṭī̱nām pu̍ruhū̱ta indra̍ḥ |
4.017.05c sa̱tyam e̍na̱m anu̱ viśve̍ madanti rā̱tiṁ de̱vasya̍ gṛṇa̱to ma̱ghona̍ḥ ||

yaḥ | eka̍ḥ | it | cyā̱vaya̍ti | pra | bhūmā̍ | rājā̍ | kṛ̱ṣṭī̱nām | pu̱ru̱-hū̱taḥ | indra̍ḥ |
sa̱tyam | e̱na̱m | anu̍ | viśve̍ | ma̱da̱nti̱ | rā̱tim | de̱vasya̍ | gṛṇa̱taḥ | ma̱ghona̍ḥ ||4.017.05||

4.017.06a sa̱trā somā̍ abhavann asya̱ viśve̍ sa̱trā madā̍so bṛha̱to madi̍ṣṭhāḥ |
4.017.06c sa̱trābha̍vo̱ vasu̍pati̱r vasū̍nā̱ṁ datre̱ viśvā̍ adhithā indra kṛ̱ṣṭīḥ ||

sa̱trā | somā̍ḥ | a̱bha̱va̱n | a̱sya̱ | viśve̍ | sa̱trā | madā̍saḥ | bṛ̱ha̱taḥ | madi̍ṣṭhāḥ |
sa̱trā | a̱bha̱va̱ḥ | vasu̍-patiḥ | vasū̍nām | datre̍ | viśvā̍ḥ | a̱dhi̱thā̱ḥ | i̱ndra̱ | kṛ̱ṣṭīḥ ||4.017.06||

4.017.07a tvam adha̍ pratha̱maṁ jāya̍mā̱no 'me̱ viśvā̍ adhithā indra kṛ̱ṣṭīḥ |
4.017.07c tvam prati̍ pra̱vata̍ ā̱śayā̍na̱m ahi̱ṁ vajre̍ṇa maghava̱n vi vṛ̍ścaḥ ||

tvam | adha̍ | pra̱tha̱mam | jāya̍mānaḥ | ame̍ | viśvā̍ḥ | a̱dhi̱thā̱ḥ | i̱ndra̱ | kṛ̱ṣṭīḥ |
tvam | prati̍ | pra̱-vata̍ḥ | ā̱-śayā̍nam | ahi̍m | vajre̍ṇa | ma̱gha̱-va̱n | vi | vṛ̱śca̱ḥ ||4.017.07||

4.017.08a sa̱trā̱haṇa̱ṁ dādhṛ̍ṣi̱ṁ tumra̱m indra̍m ma̱hām a̍pā̱raṁ vṛ̍ṣa̱bhaṁ su̱vajra̍m |
4.017.08c hantā̱ yo vṛ̱traṁ sani̍to̱ta vāja̱ṁ dātā̍ ma̱ghāni̍ ma̱ghavā̍ su̱rādhā̍ḥ ||

sa̱trā̱-hana̍n | dadhṛ̍ṣim | tumra̍m | indra̍m | ma̱hām | a̱pā̱ram | vṛ̱ṣa̱bham | su̱-vajra̍m |
hantā̍ | yaḥ | vṛ̱tram | sani̍tā | u̱ta | vāja̍m | dātā̍ | ma̱ghāni̍ | ma̱gha-vā̍ | su̱-rādhā̍ḥ ||4.017.08||

4.017.09a a̱yaṁ vṛta̍ś cātayate samī̱cīr ya ā̱jiṣu̍ ma̱ghavā̍ śṛ̱ṇva eka̍ḥ |
4.017.09c a̱yaṁ vāja̍m bharati̱ yaṁ sa̱noty a̱sya pri̱yāsa̍ḥ sa̱khye syā̍ma ||

a̱yam | vṛta̍ḥ | cā̱ta̱ya̱te̱ | sa̱m-ī̱cīḥ | yaḥ | ā̱jiṣu̍ | ma̱gha-vā̍ | śṛ̱ṇve | eka̍ḥ |
a̱yam | vāja̍m | bha̱ra̱ti̱ | yam | sa̱noti̍ | a̱sya | pri̱yāsa̍ḥ | sa̱khye | syā̱ma̱ ||4.017.09||

4.017.10a a̱yaṁ śṛ̍ṇve̱ adha̱ jaya̍nn u̱ta ghnann a̱yam u̱ta pra kṛ̍ṇute yu̱dhā gāḥ |
4.017.10c ya̱dā sa̱tyaṁ kṛ̍ṇu̱te ma̱nyum indro̱ viśva̍ṁ dṛ̱ḻham bha̍yata̱ eja̍d asmāt ||

a̱yam | śṛ̱ṇve̱ | adha̍ | jaya̍n | u̱ta | ghnan | a̱yam | u̱ta | pra | kṛ̱ṇu̱te̱ | yu̱dhā | gāḥ |
ya̱dā | sa̱tyam | kṛ̱ṇu̱te | ma̱nyum | indra̍ḥ | viśva̍m | dṛ̱ḻham | bha̱ya̱te̱ | eja̍t | a̱smā̱t ||4.017.10||

4.017.11a sam indro̱ gā a̍jaya̱t saṁ hira̍ṇyā̱ sam a̍śvi̱yā ma̱ghavā̱ yo ha̍ pū̱rvīḥ |
4.017.11c e̱bhir nṛbhi̱r nṛta̍mo asya śā̱kai rā̱yo vi̍bha̱ktā sa̍mbha̱raś ca̱ vasva̍ḥ ||

sam | indra̍ḥ | gāḥ | a̱ja̱ya̱t | sam | hira̍ṇyā | sam | a̱śvi̱yā | ma̱gha-vā̍ | yaḥ | ha̱ | pū̱rvīḥ |
e̱bhiḥ | nṛ-bhi̍ḥ | nṛ-ta̍maḥ | a̱sya̱ | śā̱kaiḥ | rā̱yaḥ | vi̱-bha̱ktā | sa̱m-bha̱raḥ | ca̱ | vasva̍ḥ ||4.017.11||

4.017.12a kiya̍t svi̱d indro̱ adhy e̍ti mā̱tuḥ kiya̍t pi̱tur ja̍ni̱tur yo ja̱jāna̍ |
4.017.12c yo a̍sya̱ śuṣma̍m muhu̱kair iya̍rti̱ vāto̱ na jū̱taḥ sta̱naya̍dbhir a̱bhraiḥ ||

kiya̍t | svi̱t | indra̍ḥ | adhi̍ | e̱ti̱ | mā̱tuḥ | kiya̍t | pi̱tuḥ | ja̱ni̱tuḥ | yaḥ | ja̱jāna̍ |
yaḥ | a̱sya̱ | śuṣma̍m | mu̱hu̱kaiḥ | iya̍rti | vāta̍ḥ | na | jū̱taḥ | sta̱naya̍t-bhiḥ | a̱bhraiḥ ||4.017.12||

4.017.13a kṣi̱yanta̍ṁ tva̱m akṣi̍yantaṁ kṛṇo̱tīya̍rti re̱ṇum ma̱ghavā̍ sa̱moha̍m |
4.017.13c vi̱bha̱ñja̱nur a̱śani̍mām̐ iva̱ dyaur u̱ta sto̱tāra̍m ma̱ghavā̱ vasau̍ dhāt ||

kṣi̱yanta̍m | tva̱m | akṣi̍yantam | kṛ̱ṇo̱ti̱ | iya̍rti | re̱ṇum | ma̱gha-vā̍ | sa̱m-oha̍m |
vi̱-bha̱ñja̱nuḥ | a̱śani̍mān-iva | dyauḥ | u̱ta | sto̱tāra̍m | ma̱gha-vā̍ | vasau̍ | dhāt ||4.017.13||

4.017.14a a̱yaṁ ca̱kram i̍ṣaṇa̱t sūrya̍sya̱ ny eta̍śaṁ rīramat sasṛmā̱ṇam |
4.017.14b ā kṛ̱ṣṇa ī̍ṁ juhurā̱ṇo ji̍gharti tva̱co bu̱dhne raja̍so a̱sya yonau̍ ||

a̱yam | ca̱kram | i̱ṣa̱ṇa̱t | sūrya̍sya | ni | eta̍śam | rī̱ra̱ma̱t | sa̱sṛ̱mā̱ṇam |
ā | kṛ̱ṣṇaḥ | ī̱m | ju̱hu̱rā̱ṇaḥ | ji̱gha̱rti̱ | tva̱caḥ | bu̱dhne | raja̍saḥ | a̱sya | yonau̍ ||4.017.14||

4.017.15a asi̍knyā̱ṁ yaja̍māno̱ na hotā̍ ||

asi̍knyām | yaja̍mānaḥ | na | hotā̍ ||4.017.15||

4.017.16a ga̱vyanta̱ indra̍ṁ sa̱khyāya̱ viprā̍ aśvā̱yanto̱ vṛṣa̍ṇaṁ vā̱jaya̍ntaḥ |
4.017.16c ja̱nī̱yanto̍ jani̱dām akṣi̍toti̱m ā cyā̍vayāmo 'va̱te na kośa̍m ||

ga̱vyanta̍ḥ | indra̍m | sa̱khyāya̍ | viprā̍ḥ | a̱śva̱-yantaḥ | vṛṣa̍ṇam | vā̱jaya̍ntaḥ |
ja̱ni̱-yanta̍ḥ | ja̱ni̱-dām | akṣi̍ta-ūtim | ā | cya̱va̱yā̱ma̱ḥ | a̱va̱te | na | kośa̍m ||4.017.16||

4.017.17a trā̱tā no̍ bodhi̱ dadṛ̍śāna ā̱pir a̍bhikhyā̱tā ma̍rḍi̱tā so̱myānā̍m |
4.017.17c sakhā̍ pi̱tā pi̱tṛta̍maḥ pitṝ̱ṇāṁ karte̍m u lo̱kam u̍śa̱te va̍yo̱dhāḥ ||

trā̱tā | na̱ḥ | bo̱dhi̱ | dadṛ̍śānaḥ | ā̱piḥ | a̱bhi̱-khyā̱tā | ma̱rḍi̱tā | so̱myānā̍m |
sakhā̍ | pi̱tā | pi̱tṛ-ta̍maḥ | pi̱tṝ̱ṇām | kartā̍ | ī̱m | ū̱m̐ iti̍ | lo̱kam | u̱śa̱te | va̱ya̱ḥ-dhāḥ ||4.017.17||

4.017.18a sa̱khī̱ya̱tām a̍vi̱tā bo̍dhi̱ sakhā̍ gṛṇā̱na i̍ndra stuva̱te vayo̍ dhāḥ |
4.017.18c va̱yaṁ hy ā te̍ cakṛ̱mā sa̱bādha̍ ā̱bhiḥ śamī̍bhir ma̱haya̍nta indra ||

sa̱khi̱-ya̱tām | a̱vi̱tā | bo̱dhi̱ | sakhā̍ | gṛ̱ṇā̱naḥ | i̱ndra̱ | stu̱va̱te | vaya̍ḥ | dhā̱ḥ |
va̱yam | hi | ā | te̱ | ca̱kṛ̱ma | sa̱-bādha̍ḥ | ā̱bhiḥ | śamī̍bhiḥ | ma̱haya̍ntaḥ | i̱ndra̱ ||4.017.18||

4.017.19a stu̱ta indro̍ ma̱ghavā̱ yad dha̍ vṛ̱trā bhūrī̱ṇy eko̍ apra̱tīni̍ hanti |
4.017.19c a̱sya pri̱yo ja̍ri̱tā yasya̱ śarma̱n naki̍r de̱vā vā̱raya̍nte̱ na martā̍ḥ ||

stu̱taḥ | indra̍ḥ | ma̱gha-vā̍ | yat | ha̱ | vṛ̱trā | bhūrī̍ṇi | eka̍ḥ | a̱pra̱tīni̍ | ha̱nti̱ |
a̱sya | pri̱yaḥ | ja̱ri̱tā | yasya̍ | śarma̍n | naki̍ḥ | de̱vāḥ | vā̱raya̍nte | na | martā̍ḥ ||4.017.19||

4.017.20a e̱vā na̱ indro̍ ma̱ghavā̍ vira̱pśī kara̍t sa̱tyā ca̍rṣaṇī̱dhṛd a̍na̱rvā |
4.017.20c tvaṁ rājā̍ ja̱nuṣā̍ṁ dhehy a̱sme adhi̱ śravo̱ māhi̍na̱ṁ yaj ja̍ri̱tre ||

e̱va | na̱ḥ | indra̍ḥ | ma̱gha-vā̍ | vi̱-ra̱pśī | kara̍t | sa̱tyā | ca̱rṣa̱ṇi̱-dhṛt | a̱na̱rvā |
tvam | rājā̍ | ja̱nuṣā̍m | dhe̱hi̱ | a̱sme iti̍ | adhi̍ | śrava̍ḥ | māhi̍nam | yat | ja̱ri̱tre ||4.017.20||

4.017.21a nū ṣṭu̱ta i̍ndra̱ nū gṛ̍ṇā̱na iṣa̍ṁ jari̱tre na̱dyo̱3̱̍ na pī̍peḥ |
4.017.21c akā̍ri te harivo̱ brahma̱ navya̍ṁ dhi̱yā syā̍ma ra̱thya̍ḥ sadā̱sāḥ ||

nu | stu̱taḥ | i̱ndra̱ | nu | gṛ̱ṇā̱naḥ | iṣa̍m | ja̱ri̱tre | na̱dya̍ḥ | na | pī̱pe̱riti̍ pīpeḥ |
akā̍ri | te̱ | ha̱ri̱-va̱ḥ | brahma̍ | navya̍m | dhi̱yā | syā̱ma̱ | ra̱thya̍ḥ | sa̱dā̱-sāḥ ||4.017.21||


4.018.01a a̱yam panthā̱ anu̍vittaḥ purā̱ṇo yato̍ de̱vā u̱dajā̍yanta̱ viśve̍ |
4.018.01c ata̍ś ci̱d ā ja̍niṣīṣṭa̱ pravṛ̍ddho̱ mā mā̱tara̍m amu̱yā patta̍ve kaḥ ||

a̱yam | panthā̍ḥ | anu̍-vittaḥ | pu̱rā̱ṇaḥ | yata̍ḥ | de̱vāḥ | u̱t-ajā̍yanta | viśve̍ |
ata̍ḥ | ci̱t | ā | ja̱ni̱ṣī̱ṣṭa̱ | pra-vṛ̍ddhaḥ | mā | mā̱tara̍m | a̱mu̱yā | patta̍ve | ka̱riti̍ kaḥ ||4.018.01||

4.018.02a nāham ato̱ nir a̍yā du̱rgahai̱tat ti̍ra̱ścatā̍ pā̱rśvān nir ga̍māṇi |
4.018.02c ba̱hūni̍ me̱ akṛ̍tā̱ kartvā̍ni̱ yudhyai̍ tvena̱ saṁ tve̍na pṛcchai ||

na | a̱ham | ata̍ḥ | niḥ | a̱ya̱ | du̱ḥ-gahā̍ | e̱tat | ti̱ra̱ścatā̍ | pā̱rśvāt | niḥ | ga̱mā̱ni̱ |
ba̱hūni̍ | me̱ | akṛ̍tā | kartvā̍ni | yudhyai̍ | tve̱na̱ | sam | tve̱na̱ | pṛ̱cchai̱ ||4.018.02||

4.018.03a pa̱rā̱ya̱tīm mā̱tara̱m anv a̍caṣṭa̱ na nānu̍ gā̱ny anu̱ nū ga̍māni |
4.018.03c tvaṣṭu̍r gṛ̱he a̍piba̱t soma̱m indra̍ḥ śatadha̱nya̍ṁ ca̱mvo̍ḥ su̱tasya̍ ||

pa̱rā̱-ya̱tīm | mā̱tara̍m | anu̍ | a̱ca̱ṣṭa̱ | na | na | anu̍ | gā̱ni̱ | anu̍ | nu | ga̱mā̱ni̱ |
tvaṣṭu̍ḥ | gṛ̱he | a̱pi̱ba̱t | soma̍m | indra̍ḥ | śa̱ta̱-dha̱nya̍m | ca̱mvo̍ḥ | su̱tasya̍ ||4.018.03||

4.018.04a kiṁ sa ṛdha̍k kṛṇava̱d yaṁ sa̱hasra̍m mā̱so ja̱bhāra̍ śa̱rada̍ś ca pū̱rvīḥ |
4.018.04c na̱hī nv a̍sya prati̱māna̱m asty a̱ntar jā̱teṣū̱ta ye jani̍tvāḥ ||

kim | saḥ | ṛdha̍k | kṛ̱ṇa̱va̱t | yam | sa̱hasra̍m | mā̱saḥ | ja̱bhāra̍ | śa̱rada̍ḥ | ca̱ | pū̱rvīḥ |
na̱hī | nu | ā̱sya̱ | pra̱ti̱-māna̍m | asti̍ | a̱ntaḥ | ja̱teṣu̍ | u̱ta | ye | jani̍-tvāḥ ||4.018.04||

4.018.05a a̱va̱dyam i̍va̱ manya̍mānā̱ guhā̍ka̱r indra̍m mā̱tā vī̱rye̍ṇā̱ nyṛ̍ṣṭam |
4.018.05c athod a̍sthāt sva̱yam atka̱ṁ vasā̍na̱ ā roda̍sī apṛṇā̱j jāya̍mānaḥ ||

a̱va̱dyam-i̍va | manya̍mānā | guhā̍ | a̱ka̱ḥ | indra̍m | mā̱tā | vī̱rye̍ṇa | ni-ṛ̍ṣṭam |
atha̍ | ut | a̱sthā̱t | sva̱yam | atka̍m | vasā̍naḥ | ā | roda̍sī̱ iti̍ | a̱pṛ̱ṇā̱t | jāya̍mānaḥ ||4.018.05||

4.018.06a e̱tā a̍rṣanty alalā̱bhava̍ntīr ṛ̱tāva̍rīr iva sa̱ṁkrośa̍mānāḥ |
4.018.06c e̱tā vi pṛ̍ccha̱ kim i̱dam bha̍nanti̱ kam āpo̱ adri̍m pari̱dhiṁ ru̍janti ||

e̱tāḥ | a̱rṣa̱nti̱ | a̱la̱lā̱-bhava̍ntīḥ | ṛ̱tava̍rīḥ-iva | sa̱m-krośa̍mānāḥ |
e̱tāḥ | vi | pṛ̱ccha̱ | kim | i̱dam | bha̱na̱nti̱ | kam | āpa̍ḥ | adri̍m | pa̱ri̱-dhim | ru̱ja̱nti̱ ||4.018.06||

4.018.07a kim u̍ ṣvid asmai ni̱vido̍ bhana̱ntendra̍syāva̱dyaṁ di̍dhiṣanta̱ āpa̍ḥ |
4.018.07c mamai̱tān pu̱tro ma̍ha̱tā va̱dhena̍ vṛ̱traṁ ja̍gha̱nvām̐ a̍sṛja̱d vi sindhū̍n ||

kim | ū̱m̐ iti̍ | svi̱t | a̱smai̱ | ni̱-vida̍ḥ | bha̱na̱nta̱ | indra̍sya | a̱va̱dyam | di̱dhi̱ṣa̱nte̱ | āpa̍ḥ |
mama̍ | e̱tān | pu̱traḥ | ma̱ha̱tā | va̱dhena̍ | vṛ̱tram | ja̱gha̱nvān | a̱sṛ̱ja̱t | vi | sindhū̍n ||4.018.07||

4.018.08a mama̍c ca̱na tvā̍ yuva̱tiḥ pa̱rāsa̱ mama̍c ca̱na tvā̍ ku̱ṣavā̍ ja̱gāra̍ |
4.018.08c mama̍c ci̱d āpa̱ḥ śiśa̍ve mamṛḍyu̱r mama̍c ci̱d indra̱ḥ saha̱sod a̍tiṣṭhat ||

mama̍t | ca̱na | tvā̱ | yu̱va̱tiḥ | pa̱rā̱-āsa̍ | mama̍t | ca̱na | tvā̱ | ku̱ṣavā̍ | ja̱gāra̍ |
mama̍t | ci̱t | āpa̍ḥ | śiśa̍ve | ma̱mṛ̱ḍyu̱ḥ | mama̍t | ci̱t | indra̍ḥ | saha̍sā | ut | a̱ti̱ṣṭha̱t ||4.018.08||

4.018.09a mama̍c ca̱na te̍ maghava̱n vya̍ṁso nivivi̱dhvām̐ apa̱ hanū̍ ja̱ghāna̍ |
4.018.09c adhā̱ nivi̍ddha̱ utta̍ro babhū̱vāñ chiro̍ dā̱sasya̱ sam pi̍ṇag va̱dhena̍ ||

mama̍t | ca̱na | te̱ | ma̱gha̱-va̱n | vi-a̍ṁsaḥ | ni̱-vi̱vi̱dhvān | apa̍ | hanū̱ iti̍ | ja̱ghāna̍ |
adha̍ | ni-vi̍ddhaḥ | ut-ta̍raḥ | ba̱bhū̱vān | śira̍ḥ | dā̱sasya̍ | sam | pi̱ṇa̱k | va̱dhena̍ ||4.018.09||

4.018.10a gṛ̱ṣṭiḥ sa̍sūva̱ sthavi̍raṁ tavā̱gām a̍nādhṛ̱ṣyaṁ vṛ̍ṣa̱bhaṁ tumra̱m indra̍m |
4.018.10c arī̍ḻhaṁ va̱tsaṁ ca̱rathā̍ya mā̱tā sva̱yaṁ gā̱tuṁ ta̱nva̍ i̱cchamā̍nam ||

gṛ̱ṣṭiḥ | sā̱sū̱va̱ | sthavi̍ram | ta̱vā̱gām | a̱nā̱dhṛ̱ṣyam | vṛ̱ṣa̱bham | tumra̍m | indra̍m |
arī̍ḻham | va̱tsam | ca̱rathā̍ya | mā̱tā | sva̱yam | gā̱tum | ta̱nve̍ | i̱cchamā̍nam ||4.018.10||

4.018.11a u̱ta mā̱tā ma̍hi̱ṣam anv a̍venad a̱mī tvā̍ jahati putra de̱vāḥ |
4.018.11c athā̍bravīd vṛ̱tram indro̍ hani̱ṣyan sakhe̍ viṣṇo vita̱raṁ vi kra̍masva ||

u̱ta | mā̱tā | ma̱hi̱ṣam | anu̍ | a̱ve̱na̱t | a̱mī iti̍ | tvā̱ | ja̱ha̱ti̱ | pu̱tra̱ | de̱vāḥ |
atha̍ | a̱bra̱vī̱t | vṛ̱tram | indra̍ḥ | ha̱ni̱ṣyan | sakhe̍ | vi̱ṣṇo̱ iti̍ | vi̱-ta̱ram | vi | kra̱ma̱sva̱ ||4.018.11||

4.018.12a kas te̍ mā̱tara̍ṁ vi̱dhavā̍m acakrac cha̱yuṁ kas tvām a̍jighāṁsa̱c cara̍ntam |
4.018.12c kas te̍ de̱vo adhi̍ mārḍī̱ka ā̍sī̱d yat prākṣi̍ṇāḥ pi̱tara̍m pāda̱gṛhya̍ ||

kaḥ | te̱ | mā̱tara̍m | vi̱dhavā̍m | a̱ca̱kra̱t | śa̱yum | kaḥ | tvām | a̱ji̱ghā̱ṁsa̱t | cara̍ntam |
kaḥ | te̱ | de̱vaḥ | adhi̍ | mā̱rḍī̱ke | ā̱sī̱t | yat | pra | akṣi̍ṇāḥ | pi̱tara̍m | pā̱da̱-gṛhya̍ ||4.018.12||

4.018.13a ava̍rtyā̱ śuna̍ ā̱ntrāṇi̍ pece̱ na de̱veṣu̍ vivide marḍi̱tāra̍m |
4.018.13c apa̍śyaṁ jā̱yām ama̍hīyamānā̱m adhā̍ me śye̱no madhv ā ja̍bhāra ||

ava̍rtyā | śuna̍ḥ | ā̱ntrāṇi̍ | pe̱ce̱ | na | de̱veṣu̍ | vi̱vi̱de̱ | ma̱rḍi̱tāra̍m |
apa̍śyam | jā̱yām | ama̍hīyamānām | adha̍ | me̱ | śye̱naḥ | madhu̍ | ā | ja̱bhā̱ra̱ ||4.018.13||


4.019.01a e̱vā tvām i̍ndra vajri̱nn atra̱ viśve̍ de̱vāsa̍ḥ su̱havā̍sa̱ ūmā̍ḥ |
4.019.01c ma̱hām u̱bhe roda̍sī vṛ̱ddham ṛ̱ṣvaṁ nir eka̱m id vṛ̍ṇate vṛtra̱hatye̍ ||

e̱va | tvām | i̱ndra̱ | va̱jri̱n | atra̍ | viśve̍ | de̱vāsa̍ḥ | su̱-havā̍saḥ | ūmā̍ḥ |
ma̱hām | u̱bhe iti̍ | roda̍sī̱ iti̍ | vṛ̱ddham | ṛ̱ṣvam | niḥ | eka̍m | it | gṛ̱ṇa̱te̱ | vṛ̱tra̱-hatye̍ ||4.019.01||

4.019.02a avā̍sṛjanta̱ jivra̍yo̱ na de̱vā bhuva̍ḥ sa̱mrāḻ i̍ndra sa̱tyayo̍niḥ |
4.019.02c aha̱nn ahi̍m pari̱śayā̍na̱m arṇa̱ḥ pra va̍rta̱nīr a̍rado vi̱śvadhe̍nāḥ ||

ava̍ | a̱sṛ̱ja̱nta̱ | jivra̍yaḥ | na | de̱vāḥ | bhuva̍ḥ | sa̱m-rāṭ | i̱ndra̱ | sa̱tya-yo̍niḥ |
aha̍n | ahi̍m | pa̱ri̱-śayā̍nam | arṇa̍ḥ | pra | va̱rta̱nīḥ | a̱ra̱da̱ḥ | vi̱śva-dhe̍nāḥ ||4.019.02||

4.019.03a atṛ̍pṇuvanta̱ṁ viya̍tam abu̱dhyam abu̍dhyamānaṁ suṣupā̱ṇam i̍ndra |
4.019.03c sa̱pta prati̍ pra̱vata̍ ā̱śayā̍na̱m ahi̱ṁ vajre̍ṇa̱ vi ri̍ṇā apa̱rvan ||

atṛ̍pṇuvantam | vi-ya̍tam | a̱bu̱dhyam | abu̍dhyamānam | su̱su̱pā̱ṇam | i̱ndra̱ |
sa̱pta | prati̍ | pra̱-vata̍ḥ | ā̱śayā̍nam | ahi̍m | vajre̍ṇa | vi | ri̱ṇā̱ḥ | a̱pa̱rvan ||4.019.03||

4.019.04a akṣo̍daya̱c chava̍sā̱ kṣāma̍ bu̱dhnaṁ vār ṇa vāta̱s tavi̍ṣībhi̱r indra̍ḥ |
4.019.04c dṛ̱ḻhāny au̍bhnād u̱śamā̍na̱ ojo 'vā̍bhinat ka̱kubha̱ḥ parva̍tānām ||

akṣo̍dayat | śava̍sā | kṣāma̍ | bu̱dhnam | vāḥ | na | vāta̍ḥ | tavi̍ṣībhiḥ | indra̍ḥ |
dṛ̱ḻhāni̍ | au̱bhnā̱t | u̱śamā̍naḥ | oja̍ḥ | ava̍ | a̱bhi̱na̱t | ka̱kubha̍ḥ | parva̍tānām ||4.019.04||

4.019.05a a̱bhi pra da̍dru̱r jana̍yo̱ na garbha̱ṁ rathā̍ iva̱ pra ya̍yuḥ sā̱kam adra̍yaḥ |
4.019.05c ata̍rpayo vi̱sṛta̍ u̱bja ū̱rmīn tvaṁ vṛ̱tām̐ a̍riṇā indra̱ sindhū̍n ||

a̱bhi | pra | da̱dru̱ḥ | jana̍yaḥ | na | garbha̍m | rathā̍ḥ-iva | pra | ya̱yu̱ḥ | sā̱kam | adra̍yaḥ |
ata̍rpayaḥ | vi̱-sṛta̍ḥ | u̱bjaḥ | ū̱rmīn | tvam | vṛ̱tān | a̱ri̱ṇā̱ḥ | i̱ndra̱ | sindhū̍n ||4.019.05||

4.019.06a tvam ma̱hīm a̱vani̍ṁ vi̱śvadhe̍nāṁ tu̱rvīta̍ye va̱yyā̍ya̱ kṣara̍ntīm |
4.019.06c ara̍mayo̱ nama̱saija̱d arṇa̍ḥ sutara̱ṇām̐ a̍kṛṇor indra̱ sindhū̍n ||

tvam | ma̱hīm | a̱vani̍m | vi̱śva-dhe̍nām | tu̱rvīta̍ye | va̱yyā̍ya | kṣara̍ntīm |
ara̍mayaḥ | nama̍sā | eja̍t | arṇa̍ḥ | su̱-ta̱ra̱ṇān | a̱kṛ̱ṇo̱ḥ | i̱ndra̱ | sindhū̍n ||4.019.06||

4.019.07a prāgruvo̍ nabha̱nvo̱3̱̍ na vakvā̍ dhva̱srā a̍pinvad yuva̱tīr ṛ̍ta̱jñāḥ |
4.019.07c dhanvā̱ny ajrā̍m̐ apṛṇak tṛṣā̱ṇām̐ adho̱g indra̍ḥ sta̱ryo̱3̱̍ daṁsu̍patnīḥ ||

pra | a̱gruva̍ḥ | na̱bha̱nva̍ḥ | na | vakvā̍ḥ | dhva̱srāḥ | a̱pi̱nva̱t | yu̱va̱tīḥ | ṛ̱ta̱-jñāḥ |
dhanvā̍ni | ajrā̍n | a̱pṛ̱ṇa̱k | tṛ̱ṣā̱ṇān | adho̍k | indra̍ḥ | sta̱rya̍ḥ | dam-su̍patnīḥ ||4.019.07||

4.019.08a pū̱rvīr u̱ṣasa̍ḥ śa̱rada̍ś ca gū̱rtā vṛ̱traṁ ja̍gha̱nvām̐ a̍sṛja̱d vi sindhū̍n |
4.019.08c pari̍ṣṭhitā atṛṇad badbadhā̱nāḥ sī̱rā indra̱ḥ sravi̍tave pṛthi̱vyā ||

pū̱rvīḥ | u̱ṣasa̍ḥ | śa̱rada̍ḥ | ca̱ | gū̱rtāḥ | vṛ̱tram | ja̱gha̱nvān | a̱sṛ̱ja̱t | vi | sindhū̍n |
pari̍-sthitāḥ | a̱tṛ̱ṇa̱t | ba̱dba̱dhā̱nāḥ | sī̱rāḥ | indra̍ḥ | sravi̍tave | pṛ̱thi̱vyā ||4.019.08||

4.019.09a va̱mrībhi̍ḥ pu̱tram a̱gruvo̍ adā̱naṁ ni̱veśa̍nād dhariva̱ ā ja̍bhartha |
4.019.09c vy a1̱̍ndho a̍khya̱d ahi̍m ādadā̱no nir bhū̍d ukha̱cchit sam a̍ranta̱ parva̍ ||

va̱mrībhi̍ḥ | pu̱tram | a̱gruva̍ḥ | a̱dā̱nam | ni̱-veśa̍nāt | ha̱ri̱-va̱ḥ | ā | ja̱bha̱rtha̱ |
vi | a̱ndhaḥ | a̱khya̱t | ahi̍m | ā̱-da̱dā̱naḥ | niḥ | bhū̱t | u̱kha̱-chit | sam | a̱ra̱nta̱ | parva̍ ||4.019.09||

4.019.10a pra te̱ pūrvā̍ṇi̱ kara̍ṇāni viprāvi̱dvām̐ ā̍ha vi̱duṣe̱ karā̍ṁsi |
4.019.10c yathā̍-yathā̱ vṛṣṇyā̍ni̱ svagū̱rtāpā̍ṁsi rāja̱n naryāvi̍veṣīḥ ||

pra | te̱ | pūrvā̍ṇi | kara̍ṇāni | vi̱pra̱ | ā̱-vi̱dvān | ā̱ha̱ | vi̱duṣe̍ | karā̍ṁsi |
yathā̍-yathā | vṛṣṇyā̍ni | sva-gū̱rtā | apā̍ṁsi | rā̱ja̱n | naryā̍ | avi̍veṣīḥ ||4.019.10||

4.019.11a nū ṣṭu̱ta i̍ndra̱ nū gṛ̍ṇā̱na iṣa̍ṁ jari̱tre na̱dyo̱3̱̍ na pī̍peḥ |
4.019.11c akā̍ri te harivo̱ brahma̱ navya̍ṁ dhi̱yā syā̍ma ra̱thya̍ḥ sadā̱sāḥ ||

nu | stu̱taḥ | i̱ndra̱ | nu | gṛ̱ṇā̱naḥ | iṣa̍m | ja̱ri̱tre | na̱dya̍ḥ | na | pī̱pe̱riti̍ pīpeḥ |
akā̍ri | te̱ | ha̱ri̱-va̱ḥ | brahma̍ | navya̍m | dhi̱yā | syā̱ma̱ | ra̱thya̍ḥ | sa̱dā̱-sāḥ ||4.019.11||


4.020.01a ā na̱ indro̍ dū̱rād ā na̍ ā̱sād a̍bhiṣṭi̱kṛd ava̍se yāsad u̱graḥ |
4.020.01c oji̍ṣṭhebhir nṛ̱pati̱r vajra̍bāhuḥ sa̱ṁge sa̱matsu̍ tu̱rvaṇi̍ḥ pṛta̱nyūn ||

ā | na̱ḥ | indra̍ḥ | dū̱rāt | ā | na̱ḥ | ā̱sāt | a̱bhi̱ṣṭi̱-kṛt | ava̍se | yā̱sa̱t | u̱graḥ |
oji̍ṣṭhebhiḥ | nṛ̱-pati̍ḥ | vajra̍-bāhuḥ | sa̱m-ge | sa̱mat-su̍ | tu̱rvaṇi̍ḥ | pṛ̱ta̱nyūn ||4.020.01||

4.020.02a ā na̱ indro̱ hari̍bhir yā̱tv acchā̍rvācī̱no 'va̍se̱ rādha̍se ca |
4.020.02c tiṣṭhā̍ti va̱jrī ma̱ghavā̍ vira̱pśīmaṁ ya̱jñam anu̍ no̱ vāja̍sātau ||

ā | na̱ḥ | indra̍ḥ | hari̍-bhiḥ | yā̱tu̱ | accha̍ | a̱rvā̱cī̱naḥ | ava̍se | rādha̍se | ca̱ |
tiṣṭhā̍ti | va̱jrī | ma̱gha-vā̍ | vi̱-ra̱pśī | i̱mam | ya̱jñam | anu̍ | na̱ḥ | vāja̍-sātau ||4.020.02||

4.020.03a i̱maṁ ya̱jñaṁ tvam a̱smāka̍m indra pu̱ro dadha̍t saniṣyasi̱ kratu̍ṁ naḥ |
4.020.03c śva̱ghnīva̍ vajrin sa̱naye̱ dhanā̍nā̱ṁ tvayā̍ va̱yam a̱rya ā̱jiṁ ja̍yema ||

i̱mam | ya̱jñam | tvam | a̱smāka̍m | i̱ndra̱ | pu̱raḥ | dadha̍t | sa̱ni̱ṣya̱si̱ | kratu̍m | na̱ḥ |
śva̱ghnī-i̍va | va̱jri̱n | sa̱naye̍ | dhanā̍nām | tvayā̍ | va̱yam | a̱ryaḥ | ā̱jim | ja̱ye̱ma̱ ||4.020.03||

4.020.04a u̱śann u̱ ṣu ṇa̍ḥ su̱manā̍ upā̱ke soma̍sya̱ nu suṣu̍tasya svadhāvaḥ |
4.020.04c pā i̍ndra̱ prati̍bhṛtasya̱ madhva̱ḥ sam andha̍sā mamadaḥ pṛ̱ṣṭhye̍na ||

u̱śan | ū̱m̐ iti̍ | su | na̱ḥ | su̱-manā̍ḥ | u̱pā̱ke | soma̍sya | nu | su-su̍tasya | sva̱dhā̱-va̱ḥ |
pāḥ | i̱ndra̱ | prati̍-bhṛtasya | madhva̍ḥ | sam | andha̍sā | ma̱ma̱da̱ḥ | pṛ̱ṣṭhye̍na ||4.020.04||

4.020.05a vi yo ra̍ra̱pśa ṛṣi̍bhi̱r nave̍bhir vṛ̱kṣo na pa̱kvaḥ sṛṇyo̱ na jetā̍ |
4.020.05c maryo̱ na yoṣā̍m a̱bhi manya̍mā̱no 'cchā̍ vivakmi puruhū̱tam indra̍m ||

vi | yaḥ | ra̱rapśe | ṛṣi̍-bhiḥ | nave̍bhiḥ | vṛ̱kṣaḥ | na | pa̱kvaḥ | sṛṇya̍ḥ | na | jetā̍ |
marya̍ḥ | na | yoṣā̍m | a̱bhi | manya̍mānaḥ | accha̍ | vi̱va̱kmi̱ | pu̱ru̱-hū̱tam | indra̍m ||4.020.05||

4.020.06a gi̱rir na yaḥ svata̍vām̐ ṛ̱ṣva indra̍ḥ sa̱nād e̱va saha̍se jā̱ta u̱graḥ |
4.020.06c āda̍rtā̱ vajra̱ṁ sthavi̍ra̱ṁ na bhī̱ma u̱dneva̱ kośa̱ṁ vasu̍nā̱ nyṛ̍ṣṭam ||

gi̱riḥ | na | yaḥ | sva-ta̍vān | ṛ̱ṣvaḥ | indra̍ḥ | sa̱nāt | e̱va | saha̍se | jā̱taḥ | u̱graḥ |
ā-da̍rtā | vajra̍m | sthavi̍ram | na | bhī̱maḥ | u̱dnā-i̍va | kośa̍m | vasu̍nā | ni-ṛ̍ṣṭam ||4.020.06||

4.020.07a na yasya̍ va̱rtā ja̱nuṣā̱ nv asti̱ na rādha̍sa āmarī̱tā ma̱ghasya̍ |
4.020.07c u̱dvā̱vṛ̱ṣā̱ṇas ta̍viṣīva ugrā̱smabhya̍ṁ daddhi puruhūta rā̱yaḥ ||

na | yasya̍ | va̱rtā | ja̱nuṣā̍ | nu | asti̍ | na | rādha̍saḥ | ā̱-ma̱rī̱tā | ma̱ghasya̍ |
u̱t-va̱vṛ̱ṣā̱ṇaḥ | ta̱vi̱ṣī̱-va̱ḥ | u̱gra̱ | a̱smabhya̍m | da̱ddhi̱ | pu̱ru̱-hū̱ta̱ | rā̱yaḥ ||4.020.07||

4.020.08a īkṣe̍ rā̱yaḥ kṣaya̍sya carṣaṇī̱nām u̱ta vra̱jam a̍pava̱rtāsi̱ gonā̍m |
4.020.08c śi̱kṣā̱na̱raḥ sa̍mi̱theṣu̍ pra̱hāvā̱n vasvo̍ rā̱śim a̍bhine̱tāsi̱ bhūri̍m ||

īkṣe̍ | rā̱yaḥ | kṣaya̍sya | ca̱rṣa̱ṇī̱nām | u̱ta | vra̱jam | a̱pa̱-va̱rtā | a̱si̱ | gonā̍m |
śi̱kṣā̱-na̱raḥ | sa̱m-i̱theṣu̍ | pra̱hā-vā̱n | vasva̍ḥ | rā̱śim | a̱bhi̱-ne̱tā | a̱si̱ | bhūri̍m ||4.020.08||

4.020.09a kayā̱ tac chṛ̍ṇve̱ śacyā̱ śaci̍ṣṭho̱ yayā̍ kṛ̱ṇoti̱ muhu̱ kā ci̍d ṛ̱ṣvaḥ |
4.020.09c pu̱ru dā̱śuṣe̱ vica̍yiṣṭho̱ aṁho 'thā̍ dadhāti̱ dravi̍ṇaṁ jari̱tre ||

kayā̍ | tat | śṛ̱ṇve̱ | śacyā̍ | śaci̍ṣṭhaḥ | yayā̍ | kṛ̱ṇoti̍ | muhu̍ | kā | ci̱t | dṛ̱ṣvaḥ |
pu̱ru | dā̱śuṣe̍ | vi-ca̍yiṣṭhaḥ | aṁha̍ḥ | atha̍ | da̱dhā̱ti̱ | dravi̍ṇam | ja̱ri̱tre ||4.020.09||

4.020.10a mā no̍ mardhī̱r ā bha̍rā da̱ddhi tan na̱ḥ pra dā̱śuṣe̱ dāta̍ve̱ bhūri̱ yat te̍ |
4.020.10c navye̍ de̱ṣṇe śa̱ste a̱smin ta̍ u̱kthe pra bra̍vāma va̱yam i̍ndra stu̱vanta̍ḥ ||

mā | na̱ḥ | ma̱rdhī̱ḥ | ā | bha̱ra̱ | da̱ddhi | tat | na̱ḥ | pra | dā̱śuṣe̍ | dāta̍ve | bhūri̍ | yat | te̱ |
navye̍ | de̱ṣṇe | śa̱ste | a̱smin | te̱ | u̱kthe | pra | bra̱vā̱ma̱ | va̱yam | i̱ndra̱ | stu̱vanta̍ḥ ||4.020.10||

4.020.11a nū ṣṭu̱ta i̍ndra̱ nū gṛ̍ṇā̱na iṣa̍ṁ jari̱tre na̱dyo̱3̱̍ na pī̍peḥ |
4.020.11c akā̍ri te harivo̱ brahma̱ navya̍ṁ dhi̱yā syā̍ma ra̱thya̍ḥ sadā̱sāḥ ||

nu | stu̱taḥ | i̱ndra̱ | nu | gṛ̱ṇā̱naḥ | iṣa̍m | ja̱ri̱tre | na̱dya̍ḥ | na | pī̱pe̱riti̍ pīpeḥ |
akā̍ri | te̱ | ha̱ri̱-va̱ḥ | brahma̍ | navya̍m | dhi̱yā | syā̱ma̱ | ra̱thya̍ḥ | sadā̱-sāḥ ||4.020.11||


4.021.01a ā yā̱tv indro 'va̍sa̱ upa̍ na i̱ha stu̱taḥ sa̍dha̱mād a̍stu̱ śūra̍ḥ |
4.021.01c vā̱vṛ̱dhā̱nas tavi̍ṣī̱r yasya̍ pū̱rvīr dyaur na kṣa̱tram a̱bhibhū̍ti̱ puṣyā̍t ||

ā | yā̱tu̱ | indra̍ḥ | ava̍se | upa̍ | na̱ḥ | i̱ha | stu̱taḥ | sa̱dha̱-māt | a̱stu̱ | śūra̍ḥ |
va̱vṛ̱dhā̱naḥ | tavi̍ṣīḥ | yasya̍ | pū̱rvīḥ | dyauḥ | na | kṣa̱tram | a̱bhi-bhū̍ti | puṣyā̍t ||4.021.01||

4.021.02a tasyed i̱ha sta̍vatha̱ vṛṣṇyā̍ni tuvidyu̱mnasya̍ tuvi̱rādha̍so̱ nṝn |
4.021.02c yasya̱ kratu̍r vida̱thyo̱3̱̍ na sa̱mrāṭ sā̱hvān taru̍tro a̱bhy asti̍ kṛ̱ṣṭīḥ ||

tasya̍ | it | i̱ha | sta̱va̱tha̱ | vṛṣṇyā̍ni | tu̱vi̱-dyu̱mnasya̍ | tu̱vi̱-rādha̍saḥ | nṝn |
yasya̍ | kratu̍ḥ | vi̱da̱thya̍ḥ | na | sa̱m-rāṭ | sa̱hvān | taru̍traḥ | a̱bhi | asti̍ | kṛ̱ṣṭīḥ ||4.021.02||

4.021.03a ā yā̱tv indro̍ di̱va ā pṛ̍thi̱vyā ma̱kṣū sa̍mu̱drād u̱ta vā̱ purī̍ṣāt |
4.021.03c sva̍rṇarā̱d ava̍se no ma̱rutvā̍n parā̱vato̍ vā̱ sada̍nād ṛ̱tasya̍ ||

ā | yā̱tu̱ | indra̍ḥ | di̱vaḥ | ā | pṛ̱thi̱vyāḥ | ma̱kṣu | sa̱mu̱drāt | u̱ta | vā̱ | purī̍ṣāt |
sva̍ḥ-narāt | ava̍se | na̱ḥ | ma̱rutvā̍n | pa̱rā̱-vata̍ḥ | vā̱ | sada̍nāt | ṛ̱tasya̍ ||4.021.03||

4.021.04a sthū̱rasya̍ rā̱yo bṛ̍ha̱to ya īśe̱ tam u̍ ṣṭavāma vi̱dathe̱ṣv indra̍m |
4.021.04c yo vā̱yunā̱ jaya̍ti̱ goma̍tīṣu̱ pra dhṛ̍ṣṇu̱yā naya̍ti̱ vasyo̱ accha̍ ||

sthū̱rasya̍ | rā̱yaḥ | bṛ̱ha̱taḥ | yaḥ | īśe̍ | tam | ū̱m̐ iti̍ | sta̱vā̱ma̱ | vi̱dathe̍ṣu | indra̍m |
yaḥ | vā̱yunā̍ | jaya̍ti | go-ma̍tīṣu | pra | dhṛ̱ṣṇu̱-yā | naya̍ti | vasya̍ḥ | accha̍ ||4.021.04||

4.021.05a upa̱ yo namo̱ nama̍si stabhā̱yann iya̍rti̱ vāca̍ṁ ja̱naya̱n yaja̍dhyai |
4.021.05c ṛ̱ñja̱sā̱naḥ pu̍ru̱vāra̍ u̱kthair endra̍ṁ kṛṇvīta̱ sada̍neṣu̱ hotā̍ ||

upa̍ | yaḥ | nama̍ḥ | nama̍si | sta̱bhā̱yan | iya̍rti | vāca̍m | ja̱naya̍n | yaja̍dhyai |
ṛ̱ñja̱sā̱naḥ | pu̱ru̱-vāra̍ḥ | u̱kthaiḥ | ā | indra̍m | kṛ̱ṇvī̱ta̱ | sada̍neṣu | hotā̍ ||4.021.05||

4.021.06a dhi̱ṣā yadi̍ dhiṣa̱ṇyanta̍ḥ sara̱ṇyān sada̍nto̱ adri̍m auśi̱jasya̱ gohe̍ |
4.021.06c ā du̱roṣā̍ḥ pā̱styasya̱ hotā̱ yo no̍ ma̱hān sa̱ṁvara̍ṇeṣu̱ vahni̍ḥ ||

dhi̱ṣā | yadi̍ | dhi̱ṣa̱ṇyanta̍ḥ | sa̱ra̱ṇyān | sada̍ntaḥ | adri̍m | au̱śi̱jasya̍ | gohe̍ |
ā | du̱roṣā̍ḥ | pā̱styasya̍ | hotā̍ | yaḥ | na̱ḥ | ma̱hān | sa̱m-vara̍ṇeṣu | vahni̍ḥ ||4.021.06||

4.021.07a sa̱trā yad ī̍m bhārva̱rasya̱ vṛṣṇa̱ḥ siṣa̍kti̱ śuṣma̍ḥ stuva̱te bharā̍ya |
4.021.07c guhā̱ yad ī̍m auśi̱jasya̱ gohe̱ pra yad dhi̱ye prāya̍se̱ madā̍ya ||

sa̱trā | yat | i̱m | bhā̱rva̱rasya̍ | vṛṣṇa̍ḥ | sisa̍kti | śuṣma̍ḥ | stu̱va̱te | bharā̍ya |
guhā̍ | yat | ī̱m | au̱śi̱jasya̍ | gohe̍ | pra | yat | dhi̱ye | pra | aya̍se | madā̍ya ||4.021.07||

4.021.08a vi yad varā̍ṁsi̱ parva̍tasya vṛ̱ṇve payo̍bhir ji̱nve a̱pāṁ javā̍ṁsi |
4.021.08c vi̱dad gau̱rasya̍ gava̱yasya̱ gohe̱ yadī̱ vājā̍ya su̱dhyo̱3̱̍ vaha̍nti ||

vi | yat | varā̍ṁsi | parva̍tasya | vṛ̱ṇve | paya̍ḥ-bhiḥ | ji̱nve | a̱pām | javā̍ṁsi |
vi̱dat | gau̱rasya̍ | ga̱va̱yasya̍ | gohe̍ | yadi̍ | vājā̍ya | su̱-dhya̍ḥ | vaha̍nti ||4.021.08||

4.021.09a bha̱drā te̱ hastā̱ sukṛ̍to̱ta pā̱ṇī pra̍ya̱ntārā̍ stuva̱te rādha̍ indra |
4.021.09c kā te̱ niṣa̍tti̱ḥ kim u̱ no ma̍matsi̱ kiṁ nod-u̍d u harṣase̱ dāta̱vā u̍ ||

bha̱drā | te̱ | hastā̍ | su-kṛ̍tā | u̱ta | pā̱ṇī iti̍ | pra̱-ya̱ntārā̍ | stu̱va̱te | rādha̍ḥ | i̱ndra̱ |
kā | te̱ | ni-sa̍ttiḥ | kim | ū̱m̐ iti̍ | na̱ḥ | ma̱ma̱tsi̱ | kim | na | ut-u̍t | ū̱m̐ iti̍ | ha̱rṣa̱se̱ | dāta̱vai | ū̱m̐ iti̍ ||4.021.09||

4.021.10a e̱vā vasva̱ indra̍ḥ sa̱tyaḥ sa̱mrāḍ ḍhantā̍ vṛ̱traṁ vari̍vaḥ pū̱rave̍ kaḥ |
4.021.10c puru̍ṣṭuta̱ kratvā̍ naḥ śagdhi rā̱yo bha̍kṣī̱ya te 'va̍so̱ daivya̍sya ||

e̱va | vasva̍ḥ | indra̍ḥ | sa̱tyaḥ | sa̱m-rāṭ | hantā̍ | vṛ̱tram | vari̍vaḥ | pū̱rave̍ | ka̱riti̍ kaḥ |
puru̍-stuta | kratvā̍ | na̱ḥ | śa̱gdhi̱ | rā̱yaḥ | bha̱kṣī̱ya | te | ava̍saḥ | daivya̍sya ||4.021.10||

4.021.11a nū ṣṭu̱ta i̍ndra̱ nū gṛ̍ṇā̱na iṣa̍ṁ jari̱tre na̱dyo̱3̱̍ na pī̍peḥ |
4.021.11c akā̍ri te harivo̱ brahma̱ navya̍ṁ dhi̱yā syā̍ma ra̱thya̍ḥ sadā̱sāḥ ||

nu | stu̱taḥ | i̱ndra̱ | nu | gṛ̱ṇā̱naḥ | iṣa̍m | ja̱ri̱tre | na̱dya̍ḥ | na | pī̱pe̱riti̍ pīpeḥ |
akā̍ri | te̱ | ha̱ri̱-va̱ḥ | brahma̍ | navya̍m | dhi̱yā | syā̱ma̱ | ra̱thya̍ḥ | sadā̱-sāḥ ||4.021.11||


4.022.01a yan na̱ indro̍ juju̱ṣe yac ca̱ vaṣṭi̱ tan no̍ ma̱hān ka̍rati śu̱ṣmy ā ci̍t |
4.022.01c brahma̱ stoma̍m ma̱ghavā̱ soma̍m u̱kthā yo aśmā̍na̱ṁ śava̍sā̱ bibhra̱d eti̍ ||

yat | na̱ḥ | indra̍ḥ | ju̱ju̱ṣe | yat | ca̱ | va̱ṣṭi̱ | tat | na̱ḥ | ma̱hān | ka̱ra̱ti̱ | śu̱ṣmī | ā | ci̱t |
brahma̍ | stoma̍m | ma̱gha-vā̍ | soma̍m | u̱kthā | yaḥ | aśmā̍nam | śava̍sā | bibhra̍t | eti̍ ||4.022.01||

4.022.02a vṛṣā̱ vṛṣa̍ndhi̱ṁ catu̍raśri̱m asya̍nn u̱gro bā̱hubhyā̱ṁ nṛta̍ma̱ḥ śacī̍vān |
4.022.02c śri̱ye paru̍ṣṇīm u̱ṣamā̍ṇa̱ ūrṇā̱ṁ yasyā̱ḥ parvā̍ṇi sa̱khyāya̍ vi̱vye ||

vṛṣā̍ | vṛṣa̍ndhim | catu̍ḥ-aśrim | asya̍n | u̱graḥ | bā̱hu-bhyā̍m | nṛ-ta̍maḥ | śacī̍-vān |
śri̱ye | paru̍ṣṇīm | u̱ṣamā̍ṇaḥ | ūrṇā̍m | yasyā̍ḥ | parvā̍ṇi | sa̱khyāya̍ | vi̱vye ||4.022.02||

4.022.03a yo de̱vo de̱vata̍mo̱ jāya̍māno ma̱ho vāje̍bhir ma̱hadbhi̍ś ca̱ śuṣmai̍ḥ |
4.022.03c dadhā̍no̱ vajra̍m bā̱hvor u̱śanta̱ṁ dyām ame̍na rejaya̱t pra bhūma̍ ||

yaḥ | de̱vaḥ | de̱va-ta̍maḥ | jāya̍mānaḥ | ma̱haḥ | vāje̍bhiḥ | ma̱hat-bhi̍ḥ | ca̱ | śuṣmai̍ḥ |
dadhā̍naḥ | vajra̍m | bā̱hvoḥ | u̱śanta̍m | dyām | ame̍na | re̱ja̱ya̱t | pra | bhūma̍ ||4.022.03||

4.022.04a viśvā̱ rodhā̍ṁsi pra̱vata̍ś ca pū̱rvīr dyaur ṛ̱ṣvāj jani̍man rejata̱ kṣāḥ |
4.022.04c ā mā̱tarā̱ bhara̍ti śu̱ṣmy ā gor nṛ̱vat pari̍jman nonuvanta̱ vātā̍ḥ ||

viśvā̍ | rodhā̍ṁsi | pra̱-vata̍ḥ | ca̱ | pū̱rvīḥ | dyauḥ | ṛ̱ṣvāt | jani̍man | re̱ja̱ta̱ | kṣāḥ |
ā | mā̱tarā̍ | bhara̍ti | śu̱ṣmī | ā | goḥ | nṛ̱-vat | pari̍-jman | no̱nu̱va̱nta̱ | vātā̍ḥ ||4.022.04||

4.022.05a tā tū ta̍ indra maha̱to ma̱hāni̱ viśve̱ṣv it sava̍neṣu pra̱vācyā̍ |
4.022.05c yac chū̍ra dhṛṣṇo dhṛṣa̱tā da̍dhṛ̱ṣvān ahi̱ṁ vajre̍ṇa̱ śava̱sāvi̍veṣīḥ ||

tā | tu | te̱ | i̱ndra̱ | ma̱ha̱taḥ | ma̱hāni̍ | viśve̍ṣu | it | sava̍neṣu | pra̱-vācyā̍ |
yat | śū̱ra̱ | dhṛ̱ṣṇo̱ iti̍ | dhṛ̱ṣa̱tā | da̱dhṛ̱ṣvān | ahi̍m | vajre̍ṇa | śava̍sā | avi̍veṣīḥ ||4.022.05||

4.022.06a tā tū te̍ sa̱tyā tu̍vinṛmṇa̱ viśvā̱ pra dhe̱nava̍ḥ sisrate̱ vṛṣṇa̱ ūdhna̍ḥ |
4.022.06c adhā̍ ha̱ tvad vṛ̍ṣamaṇo bhiyā̱nāḥ pra sindha̍vo̱ java̍sā cakramanta ||

tā | tu | te̱ | sa̱tyā | tu̱vi̱-nṛ̱mṇa̱ | viśvā̍ | pra | dhe̱nava̍ḥ | si̱sra̱te̱ | vṛṣṇa̍ḥ | ūdhna̍ḥ |
adha̍ | ha̱ | tvat | vṛ̱ṣa̱-ma̱na̱ḥ | bhi̱yā̱nāḥ | pra | sindha̍vaḥ | java̍sā | ca̱kra̱ma̱nta̱ ||4.022.06||

4.022.07a atrāha̍ te hariva̱s tā u̍ de̱vīr avo̍bhir indra stavanta̱ svasā̍raḥ |
4.022.07c yat sī̱m anu̱ pra mu̱co ba̍dbadhā̱nā dī̱rghām anu̱ prasi̍tiṁ syanda̱yadhyai̍ ||

atra̍ | aha̍ | te̱ | ha̱ri̱-va̱ḥ | tāḥ | ū̱m̐ iti̍ | de̱vīḥ | ava̍ḥ-bhiḥ | i̱ndra̱ | sta̱va̱nta̱ | svasā̍raḥ |
yat | sī̱m | anu̍ | pra | mu̱caḥ | ba̱dba̱dhā̱nāḥ | dī̱rghām | anu̍ | pra-si̍tim | sya̱nda̱yadhyai̍ ||4.022.07||

4.022.08a pi̱pī̱ḻe a̱ṁśur madyo̱ na sindhu̱r ā tvā̱ śamī̍ śaśamā̱nasya̍ śa̱ktiḥ |
4.022.08c a̱sma̱drya̍k chuśucā̱nasya̍ yamyā ā̱śur na ra̱śmiṁ tu̱vyoja̍sa̱ṁ goḥ ||

pi̱pī̱ḻe | a̱ṁśuḥ | madya̍ḥ | na | sindhu̍ḥ | ā | tvā̱ | śamī̍ | śa̱śa̱mā̱nasya̍ | śa̱ktiḥ |
a̱sma̱drya̍k | śu̱śu̱mā̱nasya̍ | ya̱myā̱ḥ | ā̱śuḥ | na | ra̱śmim | tu̱vi̱-oja̍sam | goḥ ||4.022.08||

4.022.09a a̱sme varṣi̍ṣṭhā kṛṇuhi̱ jyeṣṭhā̍ nṛ̱mṇāni̍ sa̱trā sa̍hure̱ sahā̍ṁsi |
4.022.09c a̱smabhya̍ṁ vṛ̱trā su̱hanā̍ni randhi ja̱hi vadha̍r va̱nuṣo̱ martya̍sya ||

a̱sme iti̍ | varṣi̍ṣṭhā | kṛ̱ṇu̱hi̱ | jyeṣṭhā̍ | nṛ̱mṇāni̍ | sa̱trā | sa̱hu̱re̱ | sahā̍ṁsi |
a̱smabhya̍m | vṛ̱trā | su̱-hanā̍ni | ra̱ndhi̱ | ja̱hi | vadha̍ḥ | va̱nuṣa̍ḥ | martya̍sya ||4.022.09||

4.022.10a a̱smāka̱m it su śṛ̍ṇuhi̱ tvam i̍ndrā̱smabhya̍ṁ ci̱trām̐ upa̍ māhi̱ vājā̍n |
4.022.10c a̱smabhya̱ṁ viśvā̍ iṣaṇa̱ḥ pura̍ṁdhīr a̱smāka̱ṁ su ma̍ghavan bodhi go̱dāḥ ||

a̱smākam | it | su | śṛ̱ṇu̱hi̱ | tvam | i̱ndra̱ | a̱smabhya̍m | ci̱trān | upa̍ | mā̱hi̱ | vājā̍n |
a̱smabhya̍m | viśvā̍ḥ | i̱ṣa̱ṇa̱ḥ | pura̍m-dhīḥ | a̱smāka̍m | su | ma̱gha̱-va̱n | bo̱dhi̱ | go̱dāḥ ||4.022.10||

4.022.11a nū ṣṭu̱ta i̍ndra̱ nū gṛ̍ṇā̱na iṣa̍ṁ jari̱tre na̱dyo̱3̱̍ na pī̍peḥ |
4.022.11c akā̍ri te harivo̱ brahma̱ navya̍ṁ dhi̱yā syā̍ma ra̱thya̍ḥ sadā̱sāḥ ||

nu | stu̱taḥ | i̱ndra̱ | nu | gṛ̱ṇā̱naḥ | iṣa̍m | ja̱ri̱tre | na̱dya̍ḥ | na | pī̱pe̱riti̍ pīpeḥ |
akā̍ri | te̱ | ha̱ri̱-va̱ḥ | brahma̍ | navya̍m | dhi̱yā | syā̱ma̱ | ra̱thya̍ḥ | sadā̱-sāḥ ||4.022.11||


4.023.01a ka̱thā ma̱hām a̍vṛdha̱t kasya̱ hotu̍r ya̱jñaṁ ju̍ṣā̱ṇo a̱bhi soma̱m ūdha̍ḥ |
4.023.01c piba̍nn uśā̱no ju̱ṣamā̍ṇo̱ andho̍ vava̱kṣa ṛ̱ṣvaḥ śu̍ca̱te dhanā̍ya ||

ka̱thā | ma̱hām | a̱vṛ̱dha̱t | kasya̍ | hotu̍ḥ | ya̱jñam | ju̱ṣā̱ṇaḥ | a̱bhi | soma̍m | ūdha̍ḥ |
piba̍n | u̱śā̱naḥ | ju̱ṣamā̍ṇaḥ | andha̍ḥ | va̱va̱kṣe | ṛ̱ṣvaḥ | śu̱ca̱te | dhanā̍ya ||4.023.01||

4.023.02a ko a̍sya vī̱raḥ sa̍dha̱māda̍m āpa̱ sam ā̍naṁśa suma̱tibhi̱ḥ ko a̍sya |
4.023.02c kad a̍sya ci̱traṁ ci̍kite̱ kad ū̱tī vṛ̱dhe bhu̍vac chaśamā̱nasya̱ yajyo̍ḥ ||

kaḥ | a̱sya̱ | vī̱raḥ | sa̱dha̱-māda̍m | ā̱pa̱ | sam | ā̱na̱ṁśa̱ | su̱ma̱ti-bhi̍ḥ | kaḥ | a̱sya̱ |
kat | a̱sya̱ | ci̱tram | ci̱ki̱te̱ | kat | ū̱tī | vṛ̱dhe | bhu̱va̱t | śa̱śa̱mā̱nasya̍ | yajyo̍ḥ ||4.023.02||

4.023.03a ka̱thā śṛ̍ṇoti hū̱yamā̍na̱m indra̍ḥ ka̱thā śṛ̱ṇvann ava̍sām asya veda |
4.023.03c kā a̍sya pū̱rvīr upa̍mātayo ha ka̱thaina̍m āhu̱ḥ papu̍riṁ jari̱tre ||

ka̱thā | śṛ̱ṇo̱ti̱ | hū̱yamā̍nam | indra̍ḥ | ka̱thā | śṛ̱ṇvan | ava̍sām | a̱sya̱ | ve̱da̱ |
kāḥ | a̱sya̱ | pū̱rvīḥ | upa̍-mātayaḥ | ha̱ | ka̱thā | e̱na̱m | āhu̍ḥ | papu̍rim | ja̱ri̱tre ||4.023.03||

4.023.04a ka̱thā sa̱bādha̍ḥ śaśamā̱no a̍sya̱ naśa̍d a̱bhi dravi̍ṇa̱ṁ dīdhyā̍naḥ |
4.023.04c de̱vo bhu̍va̱n nave̍dā ma ṛ̱tānā̱ṁ namo̍ jagṛ̱bhvām̐ a̱bhi yaj jujo̍ṣat ||

ka̱thā | sa̱-bādha̍ḥ | śa̱śa̱mā̱naḥ | a̱sya̱ | naśa̍t | a̱bhi | dravi̍ṇam | dīdhyā̍naḥ |
de̱vaḥ | bha̱va̱t | nave̍dāḥ | me̱ | ṛ̱tānā̍m | nama̍ḥ | ja̱gṛ̱bhvān | a̱bhi | yat | jujo̍ṣat ||4.023.04||

4.023.05a ka̱thā kad a̱syā u̱ṣaso̱ vyu̍ṣṭau de̱vo marta̍sya sa̱khyaṁ ju̍joṣa |
4.023.05c ka̱thā kad a̍sya sa̱khyaṁ sakhi̍bhyo̱ ye a̍smi̱n kāma̍ṁ su̱yuja̍ṁ tata̱sre ||

ka̱thā | kat | a̱syāḥ | u̱ṣasa̍ḥ | vi-u̍ṣṭau | de̱vaḥ | marta̍sya | sa̱khyam | ju̱jo̱ṣa̱ |
ka̱thā | kat | a̱sya̱ | sa̱khyam | sakhi̍-bhyaḥ | ye | a̱smi̱n | kāma̍m | su̱-yuja̍m | ta̱ta̱sre ||4.023.05||

4.023.06a kim ād ama̍traṁ sa̱khyaṁ sakhi̍bhyaḥ ka̱dā nu te̍ bhrā̱tram pra bra̍vāma |
4.023.06c śri̱ye su̱dṛśo̱ vapu̍r asya̱ sargā̱ḥ sva1̱̍r ṇa ci̱trata̍mam iṣa̱ ā goḥ ||

kim | āt | ama̍tram | sa̱khyam | sakhi̍-bhyaḥ | ka̱dā | nu | te̱ | bhrā̱tram | pra | bra̱vā̱ma̱ |
śri̱ye | su̱-dṛśa̍ḥ | vapu̍ḥ | a̱sya̱ | sargā̍ḥ | sva̍ḥ | na | ci̱tra-ta̍mam | i̱ṣe̱ | ā | goḥ ||4.023.06||

4.023.07a druha̱ṁ jighā̍ṁsan dhva̱rasa̍m ani̱ndrāṁ teti̍kte ti̱gmā tu̱jase̱ anī̍kā |
4.023.07c ṛ̱ṇā ci̱d yatra̍ ṛṇa̱yā na̍ u̱gro dū̱re ajñā̍tā u̱ṣaso̍ babā̱dhe ||

duha̍m | jighā̍ṁsam | dhva̱rasa̍m | a̱ni̱ndrām | teti̍kte | ti̱gmā | tu̱jase̍ | anī̍kā |
ṛ̱ṇā | ci̱t | yatra̍ | ṛ̱ṇa̱-yāḥ | na̱ḥ | u̱graḥ | dū̱re | ajñā̍tāḥ | u̱ṣasa̍ḥ | ba̱bā̱dhe ||4.023.07||

4.023.08a ṛ̱tasya̱ hi śu̱rudha̱ḥ santi̍ pū̱rvīr ṛ̱tasya̍ dhī̱tir vṛ̍ji̱nāni̍ hanti |
4.023.08c ṛ̱tasya̱ śloko̍ badhi̱rā ta̍tarda̱ karṇā̍ budhā̱naḥ śu̱camā̍na ā̱yoḥ ||

ṛ̱tasya̍ | hi | śu̱ru-dha̍ḥ | santi̍ | pū̱rvīḥ | ṛ̱tasya̍ | dhī̱tiḥ | vṛ̱ji̱nāni̍ | ha̱nti̱ |
ṛ̱tasya̍ | śloka̍ḥ | ba̱dhi̱rā | ta̱ta̱rda̱ | karṇā̍ | bu̱dhā̱naḥ | śu̱camā̍naḥ | ā̱yoḥ ||4.023.08||

4.023.09a ṛ̱tasya̍ dṛ̱ḻhā dha̱ruṇā̍ni santi pu̱rūṇi̍ ca̱ndrā vapu̍ṣe̱ vapū̍ṁṣi |
4.023.09c ṛ̱tena̍ dī̱rgham i̍ṣaṇanta̱ pṛkṣa̍ ṛ̱tena̱ gāva̍ ṛ̱tam ā vi̍veśuḥ ||

ṛ̱tasya̍ | dṛ̱ḻhā | dha̱ruṇā̍ni | sa̱nti̱ | pu̱rūṇi̍ | ca̱ndrā | vapu̍ṣe | vapū̍ṁṣi |
ṛ̱tena̍ | dī̱rgham | i̱ṣa̱ṇa̱nta̱ | pṛkṣa̍ḥ | ṛ̱tena̍ | gāva̍ḥ | ṛ̱tam | ā | vi̱ve̱śu̱ḥ ||4.023.09||

4.023.10a ṛ̱taṁ ye̍mā̱na ṛ̱tam id va̍noty ṛ̱tasya̱ śuṣma̍s tura̱yā u̍ ga̱vyuḥ |
4.023.10c ṛ̱tāya̍ pṛ̱thvī ba̍hu̱le ga̍bhī̱re ṛ̱tāya̍ dhe̱nū pa̍ra̱me du̍hāte ||

ṛ̱tam | ye̱mā̱naḥ | ṛ̱tam | it | va̱no̱ti̱ | ṛ̱tasya̍ | śuṣma̍ḥ | tu̱ra̱-yāḥ | ū̱m̐ iti̍ | ga̱vyuḥ |
ṛ̱tāya̍ | pṛ̱thvī iti̍ | ba̱hu̱le iti̍ | ga̱bhī̱re iti̍ | ṛ̱tāya̍ | dhe̱nū iti̍ | pa̱ra̱me iti̍ | du̱hā̱te̱ iti̍ ||4.023.10||

4.023.11a nū ṣṭu̱ta i̍ndra̱ nū gṛ̍ṇā̱na iṣa̍ṁ jari̱tre na̱dyo̱3̱̍ na pī̍peḥ |
4.023.11c akā̍ri te harivo̱ brahma̱ navya̍ṁ dhi̱yā syā̍ma ra̱thya̍ḥ sadā̱sāḥ ||

nu | stu̱taḥ | i̱ndra̱ | nu | gṛ̱ṇā̱naḥ | iṣa̍m | ja̱ri̱tre | na̱dya̍ḥ | na | pī̱pe̱riti̍ pīpeḥ |
akā̍ri | te̱ | ha̱ri̱-va̱ḥ | brahma̍ | navya̍m | dhi̱yā | syā̱ma̱ | ra̱thya̍ḥ | sadā̱-sāḥ ||4.023.11||


4.024.01a kā su̍ṣṭu̱tiḥ śava̍saḥ sū̱num indra̍m arvācī̱naṁ rādha̍sa̱ ā va̍vartat |
4.024.01c da̱dir hi vī̱ro gṛ̍ṇa̱te vasū̍ni̱ sa gopa̍tir ni̱ṣṣidhā̍ṁ no janāsaḥ ||

kā | su̱-stu̱tiḥ | śava̍saḥ | sū̱num | indra̍m | a̱rvā̱cī̱nam | rādha̍se | ā | va̱va̱rta̱t |
da̱diḥ | hi | vī̱raḥ | gṛ̱ṇa̱te | vasū̍ni | saḥ | go-pa̍tiḥ | ni̱ḥ-sidhā̍m | na̱ḥ | ja̱nā̱sa̱ḥ ||4.024.01||

4.024.02a sa vṛ̍tra̱hatye̱ havya̱ḥ sa īḍya̱ḥ sa suṣṭu̍ta̱ indra̍ḥ sa̱tyarā̍dhāḥ |
4.024.02c sa yāma̱nn ā ma̱ghavā̱ martyā̍ya brahmaṇya̱te suṣva̍ye̱ vari̍vo dhāt ||

saḥ | vṛ̱tra̱-hatye̍ | havya̍ḥ | saḥ | īḍya̍ḥ | saḥ | su-stu̍taḥ | indra̍ḥ | sa̱tya-rā̍dhāḥ |
saḥ | yāma̍n | ā | ma̱gha-vā̍ | martyā̍ya | bra̱hma̱ṇya̱te | suṣva̍ye | vari̍vaḥ | dhā̱t ||4.024.02||

4.024.03a tam in naro̱ vi hva̍yante samī̱ke ri̍ri̱kvāṁsa̍s ta̱nva̍ḥ kṛṇvata̱ trām |
4.024.03c mi̱tho yat tyā̱gam u̱bhayā̍so̱ agma̱n nara̍s to̱kasya̱ tana̍yasya sā̱tau ||

tam | it | nara̍ḥ | vi | hva̱ya̱nte̱ | sa̱m-ī̱ke | ri̱ri̱kvāṁsa̍ḥ | ta̱nva̍ḥ | kṛ̱ṇva̱ta̱ | trām |
mi̱thaḥ | yat | tyā̱gam | u̱bhyā̍saḥ | agma̍n | nara̍ḥ | to̱kasya̍ | tana̍yasya | sā̱tau ||4.024.03||

4.024.04a kra̱tū̱yanti̍ kṣi̱tayo̱ yoga̍ ugrāśuṣā̱ṇāso̍ mi̱tho arṇa̍sātau |
4.024.04c saṁ yad viśo 'va̍vṛtranta yu̱dhmā ād in nema̍ indrayante a̱bhīke̍ ||

kra̱tu̱anti̍ | kṣi̱taya̍ḥ | yoge̍ | u̱gra̱ | ā̱śu̱ṣā̱ṇāsa̍ḥ | mi̱thaḥ | arṇa̍-sātau |
sam | yat | viśa̍ḥ | ava̍vṛtranta | yu̱dhmāḥ | āt | it | neme̍ | i̱ndra̱ya̱nte̱ | a̱bhīke̍ ||4.024.04||

4.024.05a ād id dha̱ nema̍ indri̱yaṁ ya̍janta̱ ād it pa̱ktiḥ pu̍ro̱ḻāśa̍ṁ riricyāt |
4.024.05c ād it somo̱ vi pa̍pṛcyā̱d asu̍ṣvī̱n ād ij ju̍joṣa vṛṣa̱bhaṁ yaja̍dhyai ||

āt | it | ha̱ | neme̍ | i̱ndri̱yam | ya̱ja̱nte̱ | āt | it | pa̱ktiḥ | pu̱ro̱ḻāśa̍m | ri̱ri̱cyā̱t |
āt | i̱t | soma̍ḥ | vi | pa̱pṛ̱cyā̱t | asu̍svīn | āt | it | ju̱jo̱ṣa̱ | vṛ̱ṣa̱bham | yaja̍dhyai ||4.024.05||

4.024.06a kṛ̱ṇoty a̍smai̱ vari̍vo̱ ya i̱tthendrā̍ya̱ soma̍m uśa̱te su̱noti̍ |
4.024.06c sa̱dhrī̱cīne̍na̱ mana̱sāvi̍vena̱n tam it sakhā̍yaṁ kṛṇute sa̱matsu̍ ||

kṛ̱ṇoti̍ | a̱smai̱ | vari̍va̍ḥ | yaḥ | i̱tthā | indrā̍ya | soma̍m | u̱śa̱te | su̱noti̍ |
sa̱dhrī̱cīne̍na | mana̍sā | avi̍-venam | tam | it | sakhā̍yam | kṛ̱ṇu̱te̱ | sa̱mat-su̍ ||4.024.06||

4.024.07a ya indrā̍ya su̱nava̱t soma̍m a̱dya pacā̍t pa̱ktīr u̱ta bhṛ̱jjāti̍ dhā̱nāḥ |
4.024.07c prati̍ manā̱yor u̱cathā̍ni̱ harya̱n tasmi̍n dadha̱d vṛṣa̍ṇa̱ṁ śuṣma̱m indra̍ḥ ||

yaḥ | indrā̍ya | su̱nava̍t | soma̍m | a̱dya | pacā̍t | pa̱ktīḥ | u̱ta | bhṛ̱jjāti̍ | dhā̱nāḥ |
prati̍ | ma̱nā̱yoḥ | u̱cathā̍ni | harya̍n | tasmi̍n | dadha̍t | vṛṣa̍ṇam | śuṣma̍m | indra̍ḥ ||4.024.07||

4.024.08a ya̱dā sa̍ma̱ryaṁ vy ace̱d ṛghā̍vā dī̱rghaṁ yad ā̱jim a̱bhy akhya̍d a̱ryaḥ |
4.024.08c aci̍krada̱d vṛṣa̍ṇa̱m patny acchā̍ duro̱ṇa ā niśi̍taṁ soma̱sudbhi̍ḥ ||

ya̱dā | sa̱-ma̱ryam | vi | ace̍t | ṛghā̍vā | dī̱rgham | yat | ā̱jim | a̱bhi | akhya̍t | a̱ryaḥ |
aci̍kradat | vṛṣa̍ṇam | patnī̍ | accha̍ | du̱ro̱ṇe | ā | ni-śi̍tam | so̱ma̱sut-bhi̍ḥ ||4.024.08||

4.024.09a bhūya̍sā va̱snam a̍cara̱t kanī̱yo 'vi̍krīto akāniṣa̱m puna̱r yan |
4.024.09c sa bhūya̍sā̱ kanī̍yo̱ nāri̍recīd dī̱nā dakṣā̱ vi du̍hanti̱ pra vā̱ṇam ||

bhūya̍sā | va̱snam | a̱ca̱ra̱t | ka̱nī̱yaḥ | avi̍-krītaḥ | a̱kā̱ni̱ṣa̱m | puna̍ḥ | yan |
saḥ | bhūya̍sā | kanī̍yaḥ | na | a̱ri̱re̱cī̱t | dī̱nāḥ | dakṣā̍ḥ | vi | du̱ha̱nti̱ | pra | vā̱ṇam ||4.024.09||

4.024.10a ka i̱maṁ da̱śabhi̱r mamendra̍ṁ krīṇāti dhe̱nubhi̍ḥ |
4.024.10c ya̱dā vṛ̱trāṇi̱ jaṅgha̍na̱d athai̍nam me̱ puna̍r dadat ||

kaḥ | i̱mam | da̱śa-bhi̍ḥ | mama̍ | indra̍m | krī̱ṇā̱ti̱ | dhe̱nu-bhi̍ḥ |
ya̱dā | vṛ̱trāṇi̍ | jaṅgha̍nat | atha̍ | e̱na̱m | me̱ | puna̍ḥ | da̱da̱t ||4.024.10||

4.024.11a nū ṣṭu̱ta i̍ndra̱ nū gṛ̍ṇā̱na iṣa̍ṁ jari̱tre na̱dyo̱3̱̍ na pī̍peḥ |
4.024.11c akā̍ri te harivo̱ brahma̱ navya̍ṁ dhi̱yā syā̍ma ra̱thya̍ḥ sadā̱sāḥ ||

nu | stu̱taḥ | i̱ndra̱ | nu | gṛ̱ṇā̱naḥ | iṣa̍m | ja̱ri̱tre | na̱dya̍ḥ | na | pī̱pe̱riti̍ pīpeḥ |
akā̍ri | te̱ | ha̱ri̱-va̱ḥ | brahma̍ | navya̍m | dhi̱yā | syā̱ma̱ | ra̱thya̍ḥ | sadā̱-sāḥ ||4.024.11||


4.025.01a ko a̱dya naryo̍ de̱vakā̍ma u̱śann indra̍sya sa̱khyaṁ ju̍joṣa |
4.025.01c ko vā̍ ma̱he 'va̍se̱ pāryā̍ya̱ sami̍ddhe a̱gnau su̱taso̍ma īṭṭe ||

kaḥ | a̱dya | narya̍ḥ | de̱va-kā̍maḥ | u̱śan | indra̍sya | sa̱khyam | ju̱jo̱ṣa̱ |
kaḥ | vā̱ | ma̱he | ava̍se | pāryā̍ya | sam-i̍ddhe | a̱gnau | su̱ta-so̍maḥ | ī̱ṭṭe̱ ||4.025.01||

4.025.02a ko nā̍nāma̱ vaca̍sā so̱myāya̍ manā̱yur vā̍ bhavati̱ vasta̍ u̱srāḥ |
4.025.02c ka indra̍sya̱ yujya̱ṁ kaḥ sa̍khi̱tvaṁ ko bhrā̱traṁ va̍ṣṭi ka̱vaye̱ ka ū̱tī ||

kaḥ | na̱nā̱ma̱ | vaca̍sā | so̱myāya̍ | ma̱nā̱yuḥ | vā̱ | bha̱va̱ti̱ | vaste̍ | u̱srāḥ |
kaḥ | indra̍sya | yujya̍m | kaḥ | sa̱khi̱-tvam | kaḥ | bhrā̱tram | va̱ṣṭi̱ | ka̱vaye̍ | kaḥ | ū̱tī ||4.025.02||

4.025.03a ko de̱vānā̱m avo̍ a̱dyā vṛ̍ṇīte̱ ka ā̍di̱tyām̐ adi̍ti̱ṁ jyoti̍r īṭṭe |
4.025.03c kasyā̱śvinā̱v indro̍ a̱gniḥ su̱tasyā̱ṁśoḥ pi̍banti̱ mana̱sāvi̍venam ||

kaḥ | de̱vānā̍m | ava̍ḥ | a̱dya | vṛ̱ṇī̱te̱ | kaḥ | ā̱di̱tyān | adi̍tim | jyoti̍ḥ | ī̱ṭṭe̱ |
kasya̍ | a̱śvinau̍ | indra̍ḥ | a̱gniḥ | su̱tasya̍ | a̱ṁśoḥ | pi̱ba̱nti̱ | mana̍sā | avi̍-venam ||4.025.03||

4.025.04a tasmā̍ a̱gnir bhāra̍ta̱ḥ śarma̍ yaṁsa̱j jyok pa̍śyā̱t sūrya̍m u̱ccara̍ntam |
4.025.04c ya indrā̍ya su̱navā̱mety āha̱ nare̱ naryā̍ya̱ nṛta̍māya nṛ̱ṇām ||

tasmai̍ | a̱gniḥ | bhāra̍taḥ | śarma̍ | ya̱ṁsa̱t | jyok | pa̱śyā̱t | sūrya̍m | u̱t-cara̍ntam |
yaḥ | indrā̍ya | su̱navā̍ma | iti̍ | āha̍ | nare̍ | naryā̍ya | nṛ-ta̍māya | nṛ̱ṇām ||4.025.04||

4.025.05a na taṁ ji̍nanti ba̱havo̱ na da̱bhrā u̱rv a̍smā̱ adi̍ti̱ḥ śarma̍ yaṁsat |
4.025.05c pri̱yaḥ su̱kṛt pri̱ya indre̍ manā̱yuḥ pri̱yaḥ su̍prā̱vīḥ pri̱yo a̍sya so̱mī ||

na | tam | ji̱na̱nti̱ | ba̱hava̍ḥ | na | da̱bhrāḥ | u̱ru | a̱smai̱ | adi̍tiḥ | śarma̍ | ya̱ṁsa̱t |
pri̱yaḥ | su̱-kṛt | pri̱yaḥ | indre̍ | ma̱nā̱yuḥ | pri̱yaḥ | su̱pra̱-a̱vīḥ | pri̱yaḥ | a̱sya̱ | so̱mī ||4.025.05||

4.025.06a su̱prā̱vya̍ḥ prāśu̱ṣāḻ e̱ṣa vī̱raḥ suṣve̍ḥ pa̱ktiṁ kṛ̍ṇute̱ keva̱lendra̍ḥ |
4.025.06c nāsu̍ṣver ā̱pir na sakhā̱ na jā̱mir du̍ṣprā̱vyo̍ 'vaha̱nted avā̍caḥ ||

su̱pra̱-a̱vya̍ḥ | prā̱śu̱ṣāṭ | e̱ṣaḥ | vī̱raḥ | susve̍ḥ | pa̱ktim | kṛ̱ṇu̱te̱ | keva̍lā | indra̍ḥ |
na | asu̍sveḥ | ā̱piḥ | na | sakhā̍ | na | jā̱miḥ | du̱ḥpra̱-a̱vya̍ḥ | a̱va̱-ha̱ntā | it | avā̍caḥ ||4.025.06||

4.025.07a na re̱vatā̍ pa̱ṇinā̍ sa̱khyam indro 'su̍nvatā suta̱pāḥ saṁ gṛ̍ṇīte |
4.025.07c āsya̱ veda̍ḥ khi̱dati̱ hanti̍ na̱gnaṁ vi suṣva̍ye pa̱ktaye̱ keva̍lo bhūt ||

na | re̱vatā̍ | pa̱ṇinā̍ | sa̱khyam | indra̍ḥ | asu̍nvatā | su̱ta̱-pāḥ | sam | gṛ̱ṇī̱te̱ |
ā | a̱sya̱ | veda̍ḥ | khi̱dati̍ | hanti̍ | na̱gnam | vi | susva̍ye | pa̱ktaye̍ | keva̍laḥ | bhūt ||4.025.07||

4.025.08a indra̱m pare 'va̍re madhya̱māsa̱ indra̱ṁ yānto 'va̍sitāsa̱ indra̍m |
4.025.08c indra̍ṁ kṣi̱yanta̍ u̱ta yudhya̍mānā̱ indra̱ṁ naro̍ vāja̱yanto̍ havante ||

indra̍m | pare̍ | ava̍re | ma̱dhya̱māsa̍ḥ | indra̍m | yānta̍ḥ | ava̍-sitāsaḥ | indra̍m |
indra̍m | kṣi̱yanta̍ḥ | u̱ta | yudhya̍mānāḥ | indra̍m | nara̍ḥ | vā̱ja̱yanta̍ḥ | ha̱va̱nte̱ ||4.025.08||


4.026.01a a̱ham manu̍r abhava̱ṁ sūrya̍ś cā̱haṁ ka̱kṣīvā̱m̐ ṛṣi̍r asmi̱ vipra̍ḥ |
4.026.01c a̱haṁ kutsa̍m ārjune̱yaṁ ny ṛ̍ñje̱ 'haṁ ka̱vir u̱śanā̱ paśya̍tā mā ||

a̱ham | manu̍ḥ | a̱bha̱va̱m | sūrya̍ḥ | ca̱ | a̱ham | ka̱kṣīvā̍n | ṛṣi̍ḥ | a̱smi̱ | vipra̍ḥ |
a̱ham | kutsa̍m | ā̱rju̱ne̱yam | ni | ṛ̱ñje̱ | a̱ham | ka̱viḥ | u̱śanā̍ | paśya̍ta | mā̱ ||4.026.01||

4.026.02a a̱ham bhūmi̍m adadā̱m āryā̍yā̱haṁ vṛ̱ṣṭiṁ dā̱śuṣe̱ martyā̍ya |
4.026.02c a̱ham a̱po a̍nayaṁ vāvaśā̱nā mama̍ de̱vāso̱ anu̱ keta̍m āyan ||

a̱ham | bhūmi̍m | a̱da̱dā̱m | āryā̍ya | a̱ham | vṛ̱ṣṭim | dā̱śuṣe̍ | martyā̍ya |
a̱ham | a̱paḥ | a̱na̱ya̱m | vā̱va̱śā̱nāḥ | mama̍ | de̱vāsa̍ḥ | anu̍ | keta̍m | ā̱ya̱n ||4.026.02||

4.026.03a a̱ham puro̍ mandasā̱no vy ai̍ra̱ṁ nava̍ sā̱kaṁ na̍va̱tīḥ śamba̍rasya |
4.026.03c śa̱ta̱ta̱maṁ ve̱śya̍ṁ sa̱rvatā̍tā̱ divo̍dāsam atithi̱gvaṁ yad āva̍m ||

a̱ham | pura̍ḥ | ma̱nda̱sā̱naḥ | vi | ai̱ra̱m | nava̍ | sā̱kam | na̱va̱tīḥ | śamba̍rasya |
śa̱ta̱-ta̱mam | ve̱śya̍m | sa̱rva-tā̍tā | diva̍ḥ-dāsam | a̱ti̱thi̱-gvam | yat | āva̍m ||4.026.03||

4.026.04a pra su ṣa vibhyo̍ maruto̱ vir a̍stu̱ pra śye̱naḥ śye̱nebhya̍ āśu̱patvā̍ |
4.026.04c a̱ca̱krayā̱ yat sva̱dhayā̍ supa̱rṇo ha̱vyam bhara̱n mana̍ve de̱vaju̍ṣṭam ||

pra | su | saḥ | vi-bhya̍ḥ | ma̱ru̱ta̱ḥ | viḥ | a̱stu̱ | pra | śye̱naḥ | śye̱nebhya̍ḥ | ā̱śu̱-patvā̍ |
a̱ca̱krayā̍ | yat | sva̱dhayā̍ | su̱-pa̱rṇaḥ | ha̱vyam | bhara̍t | mana̍ve | de̱va-ju̍ṣṭam ||4.026.04||

4.026.05a bhara̱d yadi̱ vir ato̱ vevi̍jānaḥ pa̱thoruṇā̱ mano̍javā asarji |
4.026.05c tūya̍ṁ yayau̱ madhu̍nā so̱myeno̱ta śravo̍ vivide śye̱no atra̍ ||

bhara̍t | yadi̍ | viḥ | ata̍ḥ | vevi̍jānaḥ | pa̱thā | u̱ruṇā̍ | mana̍ḥ-javāḥ | a̱sa̱rji̱ |
tūya̍m | ya̱yau̱ | madhu̍nā | so̱myena̍ | u̱ta | śrava̍ḥ | vi̱vi̱de̱ | śye̱naḥ | atra̍ ||4.026.05||

4.026.06a ṛ̱jī̱pī śye̱no dada̍māno a̱ṁśum pa̍rā̱vata̍ḥ śaku̱no ma̱ndram mada̍m |
4.026.06c soma̍m bharad dādṛhā̱ṇo de̱vāvā̍n di̱vo a̱muṣmā̱d utta̍rād ā̱dāya̍ ||

ṛ̱jī̱pī | śye̱naḥ | dada̍mānaḥ | a̱ṁśum | pa̱rā̱-vata̍ḥ | śa̱ku̱naḥ | ma̱ndram | mada̍m |
soma̍m | bha̱ra̱t | da̱dṛ̱hā̱ṇaḥ | de̱va-vā̍n | di̱vaḥ | a̱muṣmā̍t | ut-tā̍rāt | ā̱-dāya̍ ||4.026.06||

4.026.07a ā̱dāya̍ śye̱no a̍bhara̱t soma̍ṁ sa̱hasra̍ṁ sa̱vām̐ a̱yuta̍ṁ ca sā̱kam |
4.026.07c atrā̱ pura̍ṁdhir ajahā̱d arā̍tī̱r made̱ soma̍sya mū̱rā amū̍raḥ ||

ā̱-dāya̍ | śye̱naḥ | a̱bha̱ra̱t | soma̍m | sa̱hasra̍m | sa̱vān | a̱yuta̍m | ca̱ | sā̱kam |
atra̍ | pura̍m-dhiḥ | a̱ja̱hā̱t | arā̍tīḥ | made̍ | soma̍sya | mū̱rāḥ | amū̍raḥ ||4.026.07||


4.027.01a garbhe̱ nu sann anv e̍ṣām avedam a̱haṁ de̱vānā̱ṁ jani̍māni̱ viśvā̍ |
4.027.01c śa̱tam mā̱ pura̱ āya̍sīr arakṣa̱nn adha̍ śye̱no ja̱vasā̱ nir a̍dīyam ||

garbhe̍ | nu | san | anu̍ | e̱ṣā̱m | a̱ve̱da̱m | a̱ham | de̱vānā̍m | jani̍māni | viśvā̍ |
śa̱tam | mā̱ | pura̍ḥ | āya̍sīḥ | a̱ra̱kṣa̱n | adha̍ | śye̱naḥ | ja̱vasā̍ | niḥ | a̱dī̱ya̱m ||4.027.01||

4.027.02a na ghā̱ sa mām apa̱ joṣa̍ṁ jabhārā̱bhīm ā̍sa̱ tvakṣa̍sā vī̱rye̍ṇa |
4.027.02c ī̱rmā pura̍ṁdhir ajahā̱d arā̍tīr u̱ta vātā̍m̐ atara̱c chūśu̍vānaḥ ||

na | gha̱ | saḥ | mām | apa̍ | joṣa̍m | ja̱bhā̱ra̱ | a̱bhi | ī̱m | ā̱sa̱ | tvakṣa̍sā | vī̱rye̍ṇa |
ī̱rmā | pura̍m-dhiḥ | a̱ja̱hā̱t | arā̍tīḥ | u̱ta | vātā̍n | a̱ta̱ra̱t | śūśu̍vānaḥ ||4.027.02||

4.027.03a ava̱ yac chye̱no asva̍nī̱d adha̱ dyor vi yad yadi̱ vāta̍ ū̱huḥ pura̍ṁdhim |
4.027.03c sṛ̱jad yad a̍smā̱ ava̍ ha kṣi̱paj jyāṁ kṛ̱śānu̱r astā̱ mana̍sā bhura̱ṇyan ||

ava̍ | yat | śye̱naḥ | asva̍nīt | adha̍ | dyoḥ | vi | yat | yadi̍ | vā̱ | ata̍ḥ | ū̱huḥ | pura̍m-dhim |
sṛ̱jat | yat | a̱smai̱ | ava̍ | ha̱ | kṣi̱pat | jyām | kṛ̱śānu̍ḥ | astā̍ | mana̍sā | bhu̱ra̱ṇyan ||4.027.03||

4.027.04a ṛ̱ji̱pya ī̱m indrā̍vato̱ na bhu̱jyuṁ śye̱no ja̍bhāra bṛha̱to adhi̱ ṣṇoḥ |
4.027.04c a̱ntaḥ pa̍tat pata̱try a̍sya pa̱rṇam adha̱ yāma̍ni̱ prasi̍tasya̱ tad veḥ ||

ṛ̱ji̱pyaḥ | ī̱m | indra̍-vataḥ | na | bhu̱jyum | śye̱naḥ | ja̱bhā̱ra̱ | bṛ̱ha̱taḥ | adhi̍ | snoḥ |
a̱ntariti̍ | pa̱ta̱t | pa̱ta̱tri | a̱sya̱ | pa̱rṇam | adha̍ | yāma̍ni | pra-si̍tasya | tat | veḥ ||4.027.04||

4.027.05a adha̍ śve̱taṁ ka̱laśa̱ṁ gobhi̍r a̱ktam ā̍pipyā̱nam ma̱ghavā̍ śu̱kram andha̍ḥ |
4.027.05c a̱dhva̱ryubhi̱ḥ praya̍ta̱m madhvo̱ agra̱m indro̱ madā̍ya̱ prati̍ dha̱t piba̍dhyai̱ śūro̱ madā̍ya̱ prati̍ dha̱t piba̍dhyai ||

adha̍ | śve̱tam | ka̱laśa̍m | gobhi̍ḥ | a̱ktam | ā̱-pi̱pyā̱nam | ma̱gha-vā̍ | śu̱kram | andha̍ḥ |
a̱dhva̱ryu-bhi̍ḥ | pra-ya̍tam | madhva̍ḥ | agra̍m | indra̍ḥ | madā̍ya | prati̍ | dha̱t | piba̍dhyai | śūra̍ḥ | madā̍ya | prati̍ | dha̱t | piba̍dhyai ||4.027.05||


4.028.01a tvā yu̱jā tava̱ tat so̍ma sa̱khya indro̍ a̱po mana̍ve sa̱sruta̍s kaḥ |
4.028.01c aha̱nn ahi̱m ari̍ṇāt sa̱pta sindhū̱n apā̍vṛṇo̱d api̍hiteva̱ khāni̍ ||

tvā | yu̱jā | tava̍ | tat | so̱ma̱ | sa̱khye | indra̍ḥ | a̱paḥ | mana̍ve | sa̱-sruta̍ḥ | ka̱riti̍ kaḥ |
aha̱n | ahi̍m | ari̍ṇāt | sa̱pta | sindhū̍n | apa̍ | a̱vṛ̱ṇo̱t | api̍hitā-iva | khāni̍ ||4.028.01||

4.028.02a tvā yu̱jā ni khi̍da̱t sūrya̱syendra̍ś ca̱kraṁ saha̍sā sa̱dya i̍ndo |
4.028.02c adhi̱ ṣṇunā̍ bṛha̱tā varta̍mānam ma̱ho dru̱ho apa̍ vi̱śvāyu̍ dhāyi ||

tvā | yu̱jā | ni | khi̱da̱t | sūrya̍sya | indra̍ḥ | ca̱kram | saha̍sā | sa̱dyaḥ | i̱ndo̱ iti̍ |
adhi̍ | snunā̍ | bṛ̱ha̱tā | varta̍mānam | ma̱haḥ | dru̱haḥ | apa̍ | vi̱śva-ā̍yu | dhā̱yi̱ ||4.028.02||

4.028.03a aha̱nn indro̱ ada̍had a̱gnir i̍ndo pu̱rā dasyū̍n ma̱dhyaṁdi̍nād a̱bhīke̍ |
4.028.03c du̱rge du̍ro̱ṇe kratvā̱ na yā̱tām pu̱rū sa̱hasrā̱ śarvā̱ ni ba̍rhīt ||

aha̍n | indra̍ḥ | ada̍hat | a̱gniḥ | i̱ndo̱ iti̍ | pu̱rā | damyū̍n | ma̱dhyandi̍nāt | a̱bhīke̍ |
du̱ḥ-ge | du̱ro̱ṇe | kratvā̍ | na | yā̱tām | pu̱ru | sa̱hasrā̍ | śarvā̍ | ni | ba̱rhī̱t ||4.028.03||

4.028.04a viśva̍smāt sīm adha̱mām̐ i̍ndra̱ dasyū̱n viśo̱ dāsī̍r akṛṇor apraśa̱stāḥ |
4.028.04c abā̍dhethā̱m amṛ̍ṇata̱ṁ ni śatrū̱n avi̍ndethā̱m apa̍citi̱ṁ vadha̍traiḥ ||

viśva̍smāt | sī̱m | a̱dha̱mān | i̱ndra̱ | dasyū̍n | viśa̍ḥ | dāsī̍ḥ | a̱kṛ̱ṇo̱ḥ | a̱pra̱-śa̱stāḥ |
abā̍dhethām | amṛ̍ṇatam | ni | śatrū̍n | avi̍ndethām | apa̍-citim | vadha̍traiḥ ||4.028.04||

4.028.05a e̱vā sa̱tyam ma̍ghavānā yu̱vaṁ tad indra̍ś ca somo̱rvam aśvya̱ṁ goḥ |
4.028.05c āda̍rdṛta̱m api̍hitā̱ny aśnā̍ riri̱cathu̱ḥ kṣāś ci̍t tatṛdā̱nā ||

e̱va | sa̱tyam | ma̱gha̱vā̱nā̱ | yu̱vam | tat | indra̍ḥ | ca̱ | so̱ma̱ | ū̱rvam | aśvya̍m | goḥ |
ā | a̱da̱rdṛ̱ta̱m | api̍-hitāni | aśnā̍ | ri̱ri̱cathu̍ḥ | kṣāḥ | ci̱t | ta̱tṛ̱dā̱nā ||4.028.05||


4.029.01a ā na̍ḥ stu̱ta upa̱ vāje̍bhir ū̱tī indra̍ yā̱hi hari̍bhir mandasā̱naḥ |
4.029.01c ti̱raś ci̍d a̱ryaḥ sava̍nā pu̱rūṇy ā̍ṅgū̱ṣebhi̍r gṛṇā̱naḥ sa̱tyarā̍dhāḥ ||

ā | na̱ḥ | stu̱taḥ | upa̍ | vāje̍bhiḥ | ū̱tī | indra̍ | yā̱hi | hari̍-bhiḥ | ma̱nda̱sā̱naḥ |
ti̱raḥ | ci̱t | a̱ryaḥ | sava̍nā | pu̱rūṇi | ā̱ṅgū̱ṣebhi̍ḥ | gṛ̱ṇā̱naḥ | sa̱tya-rā̍dhāḥ ||4.029.01||

4.029.02a ā hi ṣmā̱ yāti̱ narya̍ś ciki̱tvān hū̱yamā̍naḥ so̱tṛbhi̱r upa̍ ya̱jñam |
4.029.02c svaśvo̱ yo abhī̍ru̱r manya̍mānaḥ suṣvā̱ṇebhi̱r mada̍ti̱ saṁ ha̍ vī̱raiḥ ||

ā | hi | sma̱ | yāti̍ | narya̍ḥ | ci̱ki̱tvān | hū̱yamā̍naḥ | so̱tṛ-bhi̍ḥ | upa̍ | ya̱jñam |
su̱-aśva̍ḥ | yaḥ | abhī̍ruḥ | manya̍mānaḥ | su̱-svā̱ṇebhi̍ḥ | mada̍ti | sam | ha̱ | vī̱raiḥ ||4.029.02||

4.029.03a śrā̱vayed a̍sya̱ karṇā̍ vāja̱yadhyai̱ juṣṭā̱m anu̱ pra diśa̍m manda̱yadhyai̍ |
4.029.03c u̱dvā̱vṛ̱ṣā̱ṇo rādha̍se̱ tuvi̍ṣmā̱n kara̍n na̱ indra̍ḥ sutī̱rthābha̍yaṁ ca ||

śrā̱vaya̍ | it | a̱sya̱ | karṇā̍ | vā̱ja̱yadhyai̍ | juṣṭā̍m | anu̍ | pra | diśa̍m | ma̱nda̱yadhyai̍ |
u̱t-va̱vṛ̱ṣā̱ṇaḥ | rādha̍se | tuvi̍ṣmān | kara̍t | na̱ḥ | indra̍ḥ | su̱-tī̱rthā | abha̍yam | ca̱ ||4.029.03||

4.029.04a acchā̱ yo gantā̱ nādha̍mānam ū̱tī i̱tthā vipra̱ṁ hava̍mānaṁ gṛ̱ṇanta̍m |
4.029.04c upa̱ tmani̱ dadhā̍no dhu̱ry ā̱3̱̍śūn sa̱hasrā̍ṇi śa̱tāni̱ vajra̍bāhuḥ ||

accha̍ | yaḥ | gantā̍ | nādha̍mānam | ū̱tī | i̱tthā | vipra̍m | hava̍mānam | gṛ̱ṇanta̍m |
upa̍ | tmani̍ | dadhā̍naḥ | dhu̱ri | ā̱śūn | sa̱hasrā̍ṇi | śa̱tāni̍ | vajra̍-bāhuḥ ||4.029.04||

4.029.05a tvotā̍so maghavann indra̱ viprā̍ va̱yaṁ te̍ syāma sū̱rayo̍ gṛ̱ṇanta̍ḥ |
4.029.05c bhe̱jā̱nāso̍ bṛ̱haddi̍vasya rā̱ya ā̍kā̱yya̍sya dā̱vane̍ puru̱kṣoḥ ||

tvā-ū̍tāsaḥ | ma̱gha̱-va̱n | i̱ndra̱ | viprā̍ḥ | va̱yam | te̱ | syā̱ma̱ | sū̱raya̍ḥ | gṛ̱ṇanta̍ḥ |
bhe̱jā̱nāsa̍ḥ | bṛ̱hat-di̍vasya | rā̱yaḥ | ā̱-kā̱yya̍sya | dā̱vane̍ | pu̱ru̱-kṣoḥ ||4.029.05||


4.030.01a naki̍r indra̱ tvad utta̍ro̱ na jyāyā̍m̐ asti vṛtrahan |
4.030.01c naki̍r e̱vā yathā̱ tvam ||

naki̍ḥ | i̱ndra̱ | tvat | ut-ta̍raḥ | na | jyāyā̍n | a̱sti̱ | vṛ̱tra̱-ha̱n |
naki̍ḥ | e̱va | yathā̍ | tvam ||4.030.01||

4.030.02a sa̱trā te̱ anu̍ kṛ̱ṣṭayo̱ viśvā̍ ca̱kreva̍ vāvṛtuḥ |
4.030.02c sa̱trā ma̱hām̐ a̍si śru̱taḥ ||

sa̱trā | te̱ | anu̍ | kṛ̱ṣṭaya̍ḥ | viśvā̍ | ca̱krā-i̍va | va̱vṛ̱tu̱ḥ |
sa̱trā | ma̱hān | a̱si̱ | śru̱taḥ ||4.030.02||

4.030.03a viśve̍ ca̱ned a̱nā tvā̍ de̱vāsa̍ indra yuyudhuḥ |
4.030.03c yad ahā̱ nakta̱m āti̍raḥ ||

viśve̍ | ca̱na | it | a̱nā | tvā̱ | de̱vāsa̍ḥ | i̱ndra̱ | yu̱yu̱dhu̱ḥ |
yat | ahā̍ | nakta̍m | ā | ati̍raḥ ||4.030.03||

4.030.04a yatro̱ta bā̍dhi̱tebhya̍ś ca̱kraṁ kutsā̍ya̱ yudhya̍te |
4.030.04c mu̱ṣā̱ya i̍ndra̱ sūrya̍m ||

yatra̍ | u̱ta | bā̱dhi̱tebhya̍ḥ | ca̱kram | kutsā̍ya | yudhya̍te |
mu̱ṣā̱yaḥ | i̱ndra̱ | sūrya̍m ||4.030.04||

4.030.05a yatra̍ de̱vām̐ ṛ̍ghāya̱to viśvā̱m̐ ayu̍dhya̱ eka̱ it |
4.030.05c tvam i̍ndra va̱nūm̐r aha̍n ||

yatra̍ | de̱vān | ṛ̱ghā̱ya̱taḥ | viśvā̍n | ayu̍dhyaḥ | eka̍ḥ | it |
tvam | i̱ndra̱ | va̱nūn | aha̍n ||4.030.05||

4.030.06a yatro̱ta martyā̍ya̱ kam ari̍ṇā indra̱ sūrya̍m |
4.030.06c prāva̱ḥ śacī̍bhi̱r eta̍śam ||

yatra̍ | u̱ta | martyā̍ya | kam | ari̍ṇāḥ | i̱ndra̱ | sūrya̍m |
pra | ā̱va̱ḥ | śacī̍bhiḥ | eta̍śam ||4.030.06||

4.030.07a kim ād u̱tāsi̍ vṛtraha̱n magha̍van manyu̱matta̍maḥ |
4.030.07c atrāha̱ dānu̱m āti̍raḥ ||

kim | āt | u̱ta | a̱si̱ | vṛ̱tra̱-ha̱n | magha̍-van | ma̱nyu̱mat-ta̍maḥ |
atra̍ | aha̍ | dānu̍m | ā | a̱ti̱ra̱ḥ ||4.030.07||

4.030.08a e̱tad ghed u̱ta vī̱rya1̱̍m indra̍ ca̱kartha̱ pauṁsya̍m |
4.030.08c striya̱ṁ yad du̍rhaṇā̱yuva̱ṁ vadhī̍r duhi̱tara̍ṁ di̱vaḥ ||

e̱tat | gha̱ | it | u̱ta | vī̱rya̍m | indra̍ | ca̱kartha̍ | pauṁsya̍m |
striya̍m | yat | du̱ḥ-ha̱nā̱yuva̍m | vadhī̍ḥ | du̱hi̱tara̍m | di̱vaḥ ||4.030.08||

4.030.09a di̱vaś ci̍d ghā duhi̱tara̍m ma̱hān ma̍hī̱yamā̍nām |
4.030.09c u̱ṣāsa̍m indra̱ sam pi̍ṇak ||

di̱vaḥ | ci̱t | gha̱ | du̱hi̱tara̍m | ma̱hān | ma̱hī̱yamā̍nām |
u̱ṣasa̍m | i̱ndra̱ | sam | pi̱ṇa̱k ||4.030.09||

4.030.10a apo̱ṣā ana̍saḥ sara̱t sampi̍ṣṭā̱d aha̍ bi̱bhyuṣī̍ |
4.030.10c ni yat sī̍ṁ śi̱śnatha̱d vṛṣā̍ ||

apa̍ | u̱ṣāḥ | ana̍saḥ | sara̍t | sam-pi̍ṣṭāt | aha̍ | bi̱bhyuṣī̍ |
ni | yat | sī̱m | śi̱śnatha̍t | vṛṣā̍ ||4.030.10||

4.030.11a e̱tad a̍syā̱ ana̍ḥ śaye̱ susa̍mpiṣṭa̱ṁ vipā̱śy ā |
4.030.11c sa̱sāra̍ sīm parā̱vata̍ḥ ||

e̱tat | a̱syā̱ḥ | ana̍ḥ | śa̱ye̱ | su-sa̍mpiṣṭam | vi-pā̍śi | ā |
sa̱sāra̍ | sī̱m | pa̱rā̱-vata̍ḥ ||4.030.11||

4.030.12a u̱ta sindhu̍ṁ vibā̱lya̍ṁ vitasthā̱nām adhi̱ kṣami̍ |
4.030.12c pari̍ ṣṭhā indra mā̱yayā̍ ||

u̱ta | sindhu̍m | vi̱-bā̱lya̍m | vi̱-ta̱sthā̱nām | adhi̍ | kṣami̍ |
pari̍ | sthāḥ | i̱ndra̱ | mā̱yayā̍ ||4.030.12||

4.030.13a u̱ta śuṣṇa̍sya dhṛṣṇu̱yā pra mṛ̍kṣo a̱bhi veda̍nam |
4.030.13c puro̱ yad a̍sya sampi̱ṇak ||

u̱ta | śuṣṇa̍sya | dhṛ̱ṣṇu̱-yā | pra | mṛ̱kṣa̱ḥ | a̱bhi | veda̍nam |
pura̍ḥ | yat | a̱sya̱ | sa̱m-pi̱ṇak ||4.030.13||

4.030.14a u̱ta dā̱saṁ kau̍lita̱ram bṛ̍ha̱taḥ parva̍tā̱d adhi̍ |
4.030.14c avā̍hann indra̱ śamba̍ram ||

u̱ta | dā̱sam | kau̱li̱-ta̱ram | bṛ̱ha̱taḥ | parva̍tāt | adhi̍ |
ava̍ | a̱ha̱n | i̱ndra̱ | śamba̍ram ||4.030.14||

4.030.15a u̱ta dā̱sasya̍ va̱rcina̍ḥ sa̱hasrā̍ṇi śa̱tāva̍dhīḥ |
4.030.15c adhi̱ pañca̍ pra̱dhīm̐r i̍va ||

u̱ta | dā̱sasya̍ | va̱rcina̍ḥ | sa̱hasrā̍ṇi | śa̱tā | a̱va̱dhī̱ḥ |
adhi̍ | pañca̍ | pra̱dhīn-i̍va ||4.030.15||

4.030.16a u̱ta tyam pu̱tram a̱gruva̱ḥ parā̍vṛktaṁ śa̱takra̍tuḥ |
4.030.16c u̱ktheṣv indra̱ ābha̍jat ||

u̱ta | tyam | pu̱tram | a̱gruva̍ḥ | parā̍-vṛktam | śa̱ta-kra̍tuḥ |
u̱ktheṣu̍ | indra̍ḥ | ā | a̱bha̱ja̱t ||4.030.16||

4.030.17a u̱ta tyā tu̱rvaśā̱yadū̍ asnā̱tārā̱ śacī̱pati̍ḥ |
4.030.17c indro̍ vi̱dvām̐ a̍pārayat ||

u̱ta | tyā | tu̱rvaśā̱yadū̱ iti̍ | a̱snā̱tārā̍ | śacī̱-pati̍ḥ |
indra̍ḥ | vi̱dvān | a̱pā̱ra̱ya̱t ||4.030.17||

4.030.18a u̱ta tyā sa̱dya āryā̍ sa̱rayo̍r indra pā̱rata̍ḥ |
4.030.18c arṇā̍ci̱trara̍thāvadhīḥ ||

u̱ta | tyā | sa̱dyaḥ | āryā̍ | sa̱rayo̍ḥ | i̱ndra̱ | pā̱rata̍ḥ |
arṇā̍ci̱trara̍thā | a̱va̱dhī̱ḥ ||4.030.18||

4.030.19a anu̱ dvā ja̍hi̱tā na̍yo̱ 'ndhaṁ śro̱ṇaṁ ca̍ vṛtrahan |
4.030.19c na tat te̍ su̱mnam aṣṭa̍ve ||

anu̍ | dvā | ja̱hi̱tā | na̱ya̱ḥ | a̱ndham | śro̱ṇam | ca̱ | vṛ̱tra̱-ha̱n |
na | tat | te̱ | su̱mnam | aṣṭa̍ve ||4.030.19||

4.030.20a śa̱tam a̍śma̱nmayī̍nām pu̱rām indro̱ vy ā̍syat |
4.030.20c divo̍dāsāya dā̱śuṣe̍ ||

śa̱tam | a̱śma̱n-mayī̍nām | pu̱rām | indra̍ḥ | vi | ā̱sya̱t |
diva̍ḥ-dāsāya | dā̱śuṣe̍ ||4.030.20||

4.030.21a asvā̍payad da̱bhīta̍ye sa̱hasrā̍ tri̱ṁśata̱ṁ hathai̍ḥ |
4.030.21c dā̱sānā̱m indro̍ mā̱yayā̍ ||

asvā̍payat | da̱bhīta̍ye | sa̱hasrā̍ | tri̱ṁśata̍m | hathai̍ḥ |
dā̱sānā̍m | indra̍ḥ | mā̱yayā̍ ||4.030.21||

4.030.22a sa ghed u̱tāsi̍ vṛtrahan samā̱na i̍ndra̱ gopa̍tiḥ |
4.030.22c yas tā viśvā̍ni cicyu̱ṣe ||

saḥ | gha̱ | it | u̱ta | a̱si̱ | vṛ̱tra̱-ha̱n | sa̱mā̱naḥ | i̱ndra̱ | go-pa̍tiḥ |
yaḥ | tā | viśvā̍ni | ci̱cyu̱ṣe ||4.030.22||

4.030.23a u̱ta nū̱naṁ yad i̍ndri̱yaṁ ka̍ri̱ṣyā i̍ndra̱ pauṁsya̍m |
4.030.23c a̱dyā naki̱ṣ ṭad ā mi̍nat ||

u̱ta | nū̱nam | yat | i̱ndri̱yam | ka̱ri̱ṣyāḥ | i̱ndra̱ | pauṁsya̍m |
a̱dya | naki̍ḥ | tat | ā | mi̱na̱t ||4.030.23||

4.030.24a vā̱maṁ-vā̍maṁ ta ādure de̱vo da̍dātv arya̱mā |
4.030.24c vā̱mam pū̱ṣā vā̱mam bhago̍ vā̱maṁ de̱vaḥ karū̍ḻatī ||

vā̱mam-vā̍mam | te̱ | ā̱-du̱re̱ | de̱vaḥ | da̱dā̱tu̱ | a̱rya̱mā |
vā̱mam | pū̱ṣā | vā̱mam | bhaga̍ḥ | vā̱mam | de̱vaḥ | karū̍ḻatī ||4.030.24||


4.031.01a kayā̍ naś ci̱tra ā bhu̍vad ū̱tī sa̱dāvṛ̍dha̱ḥ sakhā̍ |
4.031.01c kayā̱ śaci̍ṣṭhayā vṛ̱tā ||

kayā̍ | na̱ḥ | ci̱traḥ | ā | bhu̱va̱t | ū̱tī | sa̱dā-vṛ̍dhaḥ | sakhā̍ |
kayā̍ | śaci̍ṣṭhayā | vṛ̱tā ||4.031.01||

4.031.02a kas tvā̍ sa̱tyo madā̍nā̱m maṁhi̍ṣṭho matsa̱d andha̍saḥ |
4.031.02c dṛ̱ḻhā ci̍d ā̱ruje̱ vasu̍ ||

kaḥ | tvā̱ | sa̱tyaḥ | madā̍nām | maṁhi̍ṣṭhaḥ | ma̱tsa̱t | andha̍saḥ |
dṛ̱ḻhā | ci̱t | ā̱-ruje̍ | vasu̍ ||4.031.02||

4.031.03a a̱bhī ṣu ṇa̱ḥ sakhī̍nām avi̱tā ja̍ritṝ̱ṇām |
4.031.03c śa̱tam bha̍vāsy ū̱tibhi̍ḥ ||

a̱bhi | su | na̱ḥ | sakhī̍nām | a̱vi̱tā | ja̱ri̱tṝ̱ṇām |
śa̱tam | bha̱vā̱si̱ | ū̱ti-bhi̍ḥ ||4.031.03||

4.031.04a a̱bhī na̱ ā va̍vṛtsva ca̱kraṁ na vṛ̱ttam arva̍taḥ |
4.031.04c ni̱yudbhi̍ś carṣaṇī̱nām ||

a̱bhi | na̱ḥ | ā | va̱vṛ̱tsva̱ | ca̱kram | na | vṛ̱ttam | arva̍taḥ |
ni̱yut-bhi̍ḥ | ca̱rṣa̱ṇī̱nām ||4.031.04||

4.031.05a pra̱vatā̱ hi kratū̍nā̱m ā hā̍ pa̱deva̱ gaccha̍si |
4.031.05c abha̍kṣi̱ sūrye̱ sacā̍ ||

pra̱-vatā̍ | hi | kratū̍nām | ā | ha̱ | pa̱dā-i̍va | gaccha̍si |
abha̍kṣi | sūrye̍ | sacā̍ ||4.031.05||

4.031.06a saṁ yat ta̍ indra ma̱nyava̱ḥ saṁ ca̱krāṇi̍ dadhanvi̱re |
4.031.06c adha̱ tve adha̱ sūrye̍ ||

sam | yat | te̱ | i̱ndra̱ | ma̱nyava̍ḥ | sam | ca̱krāṇi̍ | da̱dha̱nvi̱re |
adha̍ | tve iti̍ | adha̍ | sūrye̍ ||4.031.06||

4.031.07a u̱ta smā̱ hi tvām ā̱hur in ma̱ghavā̍naṁ śacīpate |
4.031.07c dātā̍ra̱m avi̍dīdhayum ||

u̱ta | sma̱ | hi | tvām | ā̱huḥ | it | ma̱gha-vā̍nam | śa̱cī̱-pa̱te̱ |
dātā̍ram | avi̍-dīdhayum ||4.031.07||

4.031.08a u̱ta smā̍ sa̱dya it pari̍ śaśamā̱nāya̍ sunva̱te |
4.031.08c pu̱rū ci̍n maṁhase̱ vasu̍ ||

u̱ta | sma̱ | sa̱dyaḥ | it | pari̍ | śa̱śa̱mā̱nāya̍ | su̱nva̱te |
pu̱ru | ci̱t | ma̱ṁha̱se̱ | vasu̍ ||4.031.08||

4.031.09a na̱hi ṣmā̍ te śa̱taṁ ca̱na rādho̱ vara̍nta ā̱mura̍ḥ |
4.031.09c na cyau̱tnāni̍ kariṣya̱taḥ ||

na̱hi | sma̱ | te̱ | śa̱tam | ca̱na | rādha̍ḥ | vara̍nte | ā̱-mura̍ḥ |
na | cyau̱tnāni̍ | ka̱ri̱ṣya̱taḥ ||4.031.09||

4.031.10a a̱smām̐ a̍vantu te śa̱tam a̱smān sa̱hasra̍m ū̱taya̍ḥ |
4.031.10c a̱smān viśvā̍ a̱bhiṣṭa̍yaḥ ||

a̱smān | a̱va̱ntu̱ | te̱ | śa̱tam | a̱smān | sa̱hasra̍m | ū̱taya̍ḥ |
a̱smān | viśvā̍ḥ | a̱bhiṣṭa̍yaḥ ||4.031.10||

4.031.11a a̱smām̐ i̱hā vṛ̍ṇīṣva sa̱khyāya̍ sva̱staye̍ |
4.031.11c ma̱ho rā̱ye di̱vitma̍te ||

a̱smān | i̱ha | vṛ̱ṇī̱ṣva̱ | sa̱khyāya̍ | sva̱staye̍ |
ma̱haḥ | rā̱ye | di̱vitma̍te ||4.031.11||

4.031.12a a̱smām̐ a̍viḍḍhi vi̱śvahendra̍ rā̱yā parī̍ṇasā |
4.031.12c a̱smān viśvā̍bhir ū̱tibhi̍ḥ ||

a̱smān | a̱vi̱ḍḍhi̱ | vi̱śva-hā̍ | indra̍ | rā̱yā | parī̍ṇasā |
a̱smān | viśvā̍bhiḥ | ū̱ti-bhi̍ḥ ||4.031.12||

4.031.13a a̱smabhya̱ṁ tām̐ apā̍ vṛdhi vra̱jām̐ aste̍va̱ goma̍taḥ |
4.031.13c navā̍bhir indro̱tibhi̍ḥ ||

a̱smabhya̍m | tān | apa̍ | vṛ̱dhi̱ | vra̱jān | astā̍-iva | go-ma̍taḥ |
navā̍bhiḥ | i̱ndra̱ | ū̱ti-bhi̍ḥ ||4.031.13||

4.031.14a a̱smāka̍ṁ dhṛṣṇu̱yā ratho̍ dyu̱mām̐ i̱ndrāna̍pacyutaḥ |
4.031.14c ga̱vyur a̍śva̱yur ī̍yate ||

a̱smāka̍m | dhṛ̱ṣṇu̱-yā | ratha̍ḥ | dyu̱-mān | i̱ndra̱ | ana̍pa-cyutaḥ |
ga̱vyuḥ | a̱śva̱yuḥ | ī̱ya̱te̱ ||4.031.14||

4.031.15a a̱smāka̍m utta̱maṁ kṛ̍dhi̱ śravo̍ de̱veṣu̍ sūrya |
4.031.15c varṣi̍ṣṭha̱ṁ dyām i̍vo̱pari̍ ||

a̱smāka̍m | u̱t-ta̱mam | kṛ̱dhi̱ | śrava̍ḥ | de̱veṣu̍ | sū̱rya̱ |
varṣi̍ṣṭham | dyām-i̍va | u̱pari̍ ||4.031.15||


4.032.01a ā tū na̍ indra vṛtrahann a̱smāka̍m a̱rdham ā ga̍hi |
4.032.01c ma̱hān ma̱hībhi̍r ū̱tibhi̍ḥ ||

ā | tu | na̱ḥ | i̱ndra̱ | vṛ̱tra̱-ha̱n | a̱smāka̍m | a̱rdham | ā | ga̱hi̱ |
ma̱hān | ma̱hībhi̍ḥ | ū̱ti-bhi̍ḥ ||4.032.01||

4.032.02a bhṛmi̍ś cid ghāsi̱ tūtu̍ji̱r ā ci̍tra ci̱triṇī̱ṣv ā |
4.032.02c ci̱traṁ kṛ̍ṇoṣy ū̱taye̍ ||

bhṛmi̍ḥ | ci̱t | gha̱ | a̱si̱ | tūtu̍jiḥ | ā | ci̱tra̱ | ci̱triṇī̍ṣu | ā |
ci̱tram | kṛ̱ṇo̱ṣi̱ | ū̱taye̍ ||4.032.02||

4.032.03a da̱bhrebhi̍ś ci̱c chaśī̍yāṁsa̱ṁ haṁsi̱ vrādha̍nta̱m oja̍sā |
4.032.03c sakhi̍bhi̱r ye tve sacā̍ ||

da̱bhrebhi̍ḥ | ci̱t | śaśī̍yāṁsam | haṁsi̍ | vrādha̍ntam | oja̍sā |
sakhi̍-bhiḥ | ye | tve iti̍ | sacā̍ ||4.032.03||

4.032.04a va̱yam i̍ndra̱ tve sacā̍ va̱yaṁ tvā̱bhi no̍numaḥ |
4.032.04c a̱smām̐-a̍smā̱m̐ id ud a̍va ||

va̱yam | i̱ndra̱ | tve iti̍ | sacā̍ | va̱yam | tvā̱ | a̱bhi | no̱nu̱ma̱ḥ |
a̱smān-a̍smān | it | ut | a̱va̱ ||4.032.04||

4.032.05a sa na̍ś ci̱trābhi̍r adrivo 'nava̱dyābhi̍r ū̱tibhi̍ḥ |
4.032.05c anā̍dhṛṣṭābhi̱r ā ga̍hi ||

saḥ | na̱ḥ | ci̱trābhi̍ḥ | a̱dri̱-va̱ḥ | a̱na̱va̱dyābhi̍ḥ | ū̱ti-bhi̍ḥ |
anā̍dhṛṣṭābhiḥ | ā | ga̱hi̱ ||4.032.05||

4.032.06a bhū̱yāmo̱ ṣu tvāva̍ta̱ḥ sakhā̍ya indra̱ goma̍taḥ |
4.032.06c yujo̱ vājā̍ya̱ ghṛṣva̍ye ||

bhū̱yāmo̱ iti̍ | su | tvā-va̍taḥ | sakhā̍yaḥ | i̱ndra̱ | go-ma̍taḥ |
yuja̍ḥ | vājā̍ya | ghṛṣva̍ye ||4.032.06||

4.032.07a tvaṁ hy eka̱ īśi̍ṣa̱ indra̱ vāja̍sya̱ goma̍taḥ |
4.032.07c sa no̍ yandhi ma̱hīm iṣa̍m ||

tvam | hi | eka̍ḥ | īśi̍ṣe | indra̍ | vāja̍sya | go-ma̍taḥ |
saḥ | na̱ḥ | ya̱ndhi̱ | ma̱hīm | iṣa̍m ||4.032.07||

4.032.08a na tvā̍ varante a̱nyathā̱ yad ditsa̍si stu̱to ma̱gham |
4.032.08c sto̱tṛbhya̍ indra girvaṇaḥ ||

na | tvā̱ | va̱ra̱nte̱ | a̱nyathā̍ | yat | ditsa̍si | stu̱taḥ | ma̱gham |
sto̱tṛ-bhya̍ḥ | i̱ndra̱ | gi̱rva̱ṇa̱ḥ ||4.032.08||

4.032.09a a̱bhi tvā̱ gota̍mā gi̱rānū̍ṣata̱ pra dā̱vane̍ |
4.032.09c indra̱ vājā̍ya̱ ghṛṣva̍ye ||

a̱bhi | tvā̱ | gota̍māḥ | gi̱rā | anū̍ṣata | pra | dā̱vane̍ |
indra̍ | vājā̍ya | ghṛṣva̍ye ||4.032.09||

4.032.10a pra te̍ vocāma vī̱ryā̱3̱̍ yā ma̍ndasā̱na āru̍jaḥ |
4.032.10c puro̱ dāsī̍r a̱bhītya̍ ||

pra | te̱ | vo̱cā̱ma̱ | vī̱ryā̍ | yāḥ | ma̱nda̱sa̱naḥ | ā | aru̍jaḥ |
pura̍ḥ | dāsī̍ḥ | a̱bhi̱-itya̍ ||4.032.10||

4.032.11a tā te̍ gṛṇanti ve̱dhaso̱ yāni̍ ca̱kartha̱ pauṁsyā̍ |
4.032.11c su̱teṣv i̍ndra girvaṇaḥ ||

tā | te̱ | gṛ̱ṇa̱nti̱ | ve̱dhasa̍ḥ | yāni̍ | ca̱kartha̍ | pauṁsyā̍ |
su̱teṣu̍ | i̱ndra̱ | gi̱rva̱ṇa̱ḥ ||4.032.11||

4.032.12a avī̍vṛdhanta̱ gota̍mā̱ indra̱ tve stoma̍vāhasaḥ |
4.032.12c aiṣu̍ dhā vī̱rava̱d yaśa̍ḥ ||

avī̍vṛdhanta | gota̍māḥ | indra̍ | tve iti̍ | stoma̍-vāhasaḥ |
ā | e̱ṣu̱ | dhā̱ḥ | vī̱ra-va̍t | yaśa̍ḥ ||4.032.12||

4.032.13a yac ci̱d dhi śaśva̍tā̱m asīndra̱ sādhā̍raṇa̱s tvam |
4.032.13c taṁ tvā̍ va̱yaṁ ha̍vāmahe ||

yat | ci̱t | hi | śaśva̍tām | asi̍ | indra̍ | sādhā̍raṇaḥ | tvam |
tam | tvā̱ | va̱yam | hā̱vā̱ma̱he̱ ||4.032.13||

4.032.14a a̱rvā̱cī̱no va̍so bhavā̱sme su ma̱tsvāndha̍saḥ |
4.032.14c somā̍nām indra somapāḥ ||

a̱rvā̱cī̱naḥ | va̱so̱ iti̍ | bha̱va̱ | a̱sme iti̍ | su | ma̱tsva̱ | andha̍saḥ |
somā̍nām | i̱ndra̱ | so̱ma̱-pā̱ḥ ||4.032.14||

4.032.15a a̱smāka̍ṁ tvā matī̱nām ā stoma̍ indra yacchatu |
4.032.15c a̱rvāg ā va̍rtayā̱ harī̍ ||

a̱smāka̍m | tvā̱ | ma̱tī̱nām | ā | stoma̍ḥ | i̱ndra̱ | ya̱ccha̱tu̱ |
a̱rvāk | ā | va̱rta̱ya̱ | harī̱ iti̍ ||4.032.15||

4.032.16a pu̱ro̱ḻāśa̍ṁ ca no̱ ghaso̍ jo̱ṣayā̍se̱ gira̍ś ca naḥ |
4.032.16c va̱dhū̱yur i̍va̱ yoṣa̍ṇām ||

pu̱ro̱ḻāsa̍m | ca̱ | na̱ḥ | ghasa̍ḥ | jo̱ṣayā̍se | gira̍ḥ | ca̱ | na̱ḥ |
va̱dhū̱yuḥ-i̍va | yoṣa̍ṇām ||4.032.16||

4.032.17a sa̱hasra̱ṁ vyatī̍nāṁ yu̱ktānā̱m indra̍m īmahe |
4.032.17c śa̱taṁ soma̍sya khā̱rya̍ḥ ||

sa̱hasra̍m | vyatī̍nām | yu̱ktānā̍m | indra̍m | ī̱ma̱he̱ |
śa̱tam | soma̍sya | khā̱rya̍ḥ ||4.032.17||

4.032.18a sa̱hasrā̍ te śa̱tā va̱yaṁ gavā̱m ā cyā̍vayāmasi |
4.032.18c a̱sma̱trā rādha̍ etu te ||

sa̱hasrā̍ | te̱ | śa̱tā | va̱yam | gavā̍m | ā | cyā̱va̱yā̱ma̱si̱ |
a̱sma̱-trā | rādha̍ḥ | e̱tu̱ | te̱ ||4.032.18||

4.032.19a daśa̍ te ka̱laśā̍nā̱ṁ hira̍ṇyānām adhīmahi |
4.032.19c bhū̱ri̱dā a̍si vṛtrahan ||

daśa̍ | te̱ | ka̱laśā̍nām | hira̍ṇyānām | a̱dhī̱ma̱hi̱ |
bhū̱ri̱-dāḥ | a̱si̱ | vṛ̱tra̱-ha̱n ||4.032.19||

4.032.20a bhūri̍dā̱ bhūri̍ dehi no̱ mā da̱bhram bhūry ā bha̍ra |
4.032.20c bhūri̱ ghed i̍ndra ditsasi ||

bhūri̍-dāḥ | bhūri̍ | de̱hi̱ | na̱ḥ | mā | da̱bhram | bhūri̍ | ā | bha̱ra̱ |
bhūri̍ | gha̱ | it | i̱ndra̱ | di̱tsa̱si̱ ||4.032.20||

4.032.21a bhū̱ri̱dā hy asi̍ śru̱taḥ pu̍ru̱trā śū̍ra vṛtrahan |
4.032.21c ā no̍ bhajasva̱ rādha̍si ||

bhū̱ri̱-dāḥ | hi | asi̍ | śru̱taḥ | pu̱ru̱-trā | śū̱ra̱ | vṛ̱tra̱-ha̱n |
ā | na̱ḥ | bha̱ja̱sva̱ | rādha̍si ||4.032.21||

4.032.22a pra te̍ ba̱bhrū vi̍cakṣaṇa̱ śaṁsā̍mi goṣaṇo napāt |
4.032.22c mābhyā̱ṁ gā anu̍ śiśrathaḥ ||

pra | te̱ | ba̱bhrū iti̍ | vi̱-ca̱kṣa̱ṇa̱ | śaṁsā̍mi | go̱-sa̱ṇa̱ḥ | na̱pā̱t |
mā | ā̱bhyā̱m | gāḥ | anu̍ | śi̱śra̱tha̱ḥ ||4.032.22||

4.032.23a ka̱nī̱na̱keva̍ vidra̱dhe nave̍ drupa̱de a̍rbha̱ke |
4.032.23c ba̱bhrū yāme̍ṣu śobhete ||

ka̱nī̱na̱kā-i̍va | vi̱dra̱dhe | nave̍ | dru̱-pa̱de | a̱rbha̱ke |
ba̱bhrū iti̍ | yāme̍ṣu | śo̱bhe̱te̱ iti̍ ||4.032.23||

4.032.24a ara̍m ma u̱srayā̱mṇe 'ra̱m anu̍srayāmṇe |
4.032.24c ba̱bhrū yāme̍ṣv a̱sridhā̍ ||

ara̍m | me̱ | u̱sra-yā̍mṇe | ara̍m | anu̍sra-yāmne |
ba̱bhrū iti̍ | yāme̍ṣu | a̱sridhā̍ ||4.032.24||


4.033.01a pra ṛ̱bhubhyo̍ dū̱tam i̍va̱ vāca̍m iṣya upa̱stire̱ śvaita̍rīṁ dhe̱num ī̍ḻe |
4.033.01c ye vāta̍jūtās ta̱raṇi̍bhi̱r evai̱ḥ pari̱ dyāṁ sa̱dyo a̱paso̍ babhū̱vuḥ ||

pra | ṛ̱bhu-bhya̍ḥ | dū̱tam-i̍va | vāca̍m | i̱ṣye̱ | u̱pa̱-stire̍ | śvaita̍rīm | dhe̱num | ī̱ḻe̱ |
ye | vāta̍-jūtāḥ | ta̱raṇi̍-bhiḥ | evai̍ḥ | pari̍ | dyām | sa̱dyaḥ | a̱pasa̍ḥ | ba̱bhū̱vuḥ ||4.033.01||

4.033.02a ya̱dāra̱m akra̍nn ṛ̱bhava̍ḥ pi̱tṛbhyā̱m pari̍viṣṭī ve̱ṣaṇā̍ da̱ṁsanā̍bhiḥ |
4.033.02c ād id de̱vānā̱m upa̍ sa̱khyam ā̍ya̱n dhīrā̍saḥ pu̱ṣṭim a̍vahan ma̱nāyai̍ ||

ya̱dā | ara̍m | akra̍n | ṛ̱bhava̍ḥ | pi̱tṛ-bhyā̍m | pari̍-viṣṭī | ve̱ṣaṇā̍ | da̱ṁsanā̍bhiḥ |
āt | it | de̱vānā̍m | upa̍ | sa̱khyam | ā̱ya̱n | dhīrā̍saḥ | pu̱ṣṭim | a̱va̱ha̱n | ma̱nāyai̍ ||4.033.02||

4.033.03a puna̱r ye ca̱kruḥ pi̱tarā̱ yuvā̍nā̱ sanā̱ yūpe̍va jara̱ṇā śayā̍nā |
4.033.03c te vājo̱ vibhvā̍m̐ ṛ̱bhur indra̍vanto̱ madhu̍psaraso no 'vantu ya̱jñam ||

puna̍ḥ | ye | ca̱kruḥ | pi̱tarā̍ | yuvā̍nā | sanā̍ | yūpā̍-iva | ja̱ra̱ṇā | śayā̍nā |
te | vāja̍ḥ | vi-bhvā̍ | ṛ̱bhuḥ | indra̍vanta̍ḥ | madhu̍-psarasaḥ | na̱ḥ | a̱va̱ntu̱ | ya̱jñam ||4.033.03||

4.033.04a yat sa̱ṁvatsa̍m ṛ̱bhavo̱ gām ara̍kṣa̱n yat sa̱ṁvatsa̍m ṛ̱bhavo̱ mā api̍ṁśan |
4.033.04c yat sa̱ṁvatsa̱m abha̍ra̱n bhāso̍ asyā̱s tābhi̱ḥ śamī̍bhir amṛta̱tvam ā̍śuḥ ||

yat | sa̱m-vatsa̍m | ṛ̱bhava̍ḥ | gām | ara̍kṣan | yat | sa̱m-vatsa̍m | ṛ̱bhava̍ḥ | māḥ | api̍ṁśan |
yat | sa̱m-vatsa̍m | a̱bha̍ran | bhāsa̍ḥ | a̱syā̱ḥ | tābhi̍ḥ | śamī̍bhiḥ | a̱mṛ̱ta̱-tvam | ā̱śu̱ḥ ||4.033.04||

4.033.05a jye̱ṣṭha ā̍ha cama̱sā dvā ka̱reti̱ kanī̍yā̱n trīn kṛ̍ṇavā̱mety ā̍ha |
4.033.05c ka̱ni̱ṣṭha ā̍ha ca̱tura̍s ka̱reti̱ tvaṣṭa̍ ṛbhava̱s tat pa̍naya̱d vaco̍ vaḥ ||

jye̱ṣṭhaḥ | ā̱ha̱ | ca̱ma̱sā | dvā | ka̱ra̱ | iti̍ | kanī̍yān | trīn | kṛ̱ṇa̱vā̱ma̱ | iti̍ | ā̱ha̱ |
ka̱ni̱ṣṭhaḥ | ā̱ha̱ | ca̱tura̍ḥ | ka̱ra̱ | iti̍ | tvaṣṭā̍ | ṛ̱bha̱va̱ḥ | tat | pa̱na̱ya̱t | vaca̍ḥ | va̱ḥ ||4.033.05||

4.033.06a sa̱tyam ū̍cu̱r nara̍ e̱vā hi ca̱krur anu̍ sva̱dhām ṛ̱bhavo̍ jagmur e̱tām |
4.033.06c vi̱bhrāja̍mānām̐ś cama̱sām̐ ahe̱vāve̍na̱t tvaṣṭā̍ ca̱turo̍ dadṛ̱śvān ||

sa̱tyam | ū̱cu̱ḥ | nara̍ḥ | e̱va | hi | ca̱kruḥ | anu̍ | sva̱dhām | ṛ̱bhava̍ḥ | ja̱gmu̱ḥ | e̱tām |
vi̱-bhrāja̍mānān | ca̱ma̱sān | ahā̍-iva | ave̍nat | tvaṣṭā̍ | ca̱tura̍ḥ | da̱dṛ̱śvān ||4.033.06||

4.033.07a dvāda̍śa̱ dyūn yad ago̍hyasyāti̱thye raṇa̍nn ṛ̱bhava̍ḥ sa̱santa̍ḥ |
4.033.07c su̱kṣetrā̍kṛṇva̱nn ana̍yanta̱ sindhū̱n dhanvāti̍ṣṭha̱nn oṣa̍dhīr ni̱mnam āpa̍ḥ ||

dvāda̍śa | dyūn | yat | ago̍hyasya | ā̱ti̱thye | raṇa̍n | ṛ̱bhava̍ḥ | sa̱santa̍ḥ |
su̱-kṣetrā̍ | a̱kṛ̱ṇva̱n | ana̍yanta | sindhū̍n | dhanva̍ | ā | a̱ti̱ṣṭha̱n | oṣa̍dhīḥ | ni̱mnam | āpa̍ḥ ||4.033.07||

4.033.08a ratha̱ṁ ye ca̱kruḥ su̱vṛta̍ṁ nare̱ṣṭhāṁ ye dhe̱nuṁ vi̍śva̱juva̍ṁ vi̱śvarū̍pām |
4.033.08c ta ā ta̍kṣantv ṛ̱bhavo̍ ra̱yiṁ na̱ḥ svava̍sa̱ḥ svapa̍saḥ su̱hastā̍ḥ ||

ratha̍m | ye | ca̱kruḥ | su̱-vṛta̍m | na̱re̱-sthām | ye | dhe̱num | vi̱śva̱-juva̍m | vi̱śva-rū̍pām |
te | ā | ta̱kṣa̱ntu̱ | ṛ̱bhava̍ḥ | ra̱yim | na̱ḥ | su̱-ava̍saḥ | su̱-apa̍saḥ | su̱-hastā̍ḥ ||4.033.08||

4.033.09a apo̱ hy e̍ṣā̱m aju̍ṣanta de̱vā a̱bhi kratvā̱ mana̍sā̱ dīdhyā̍nāḥ |
4.033.09c vājo̍ de̱vānā̍m abhavat su̱karmendra̍sya ṛbhu̱kṣā varu̍ṇasya̱ vibhvā̍ ||

apa̍ḥ | hi | e̱ṣā̱m | aju̍ṣanta | de̱vāḥ | a̱bhi | kratvā̍ | mana̍sā | dīdhyā̍nāḥ |
vāja̍ḥ | de̱vānā̍m | a̱bha̱va̱t | su̱-karmā̍ | indra̍sya | ṛ̱bhu̱kṣāḥ | varu̍ṇasya | vi-bhvā̍ ||4.033.09||

4.033.10a ye harī̍ me̱dhayo̱kthā mada̍nta̱ indrā̍ya ca̱kruḥ su̱yujā̱ ye aśvā̍ |
4.033.10c te rā̱yas poṣa̱ṁ dravi̍ṇāny a̱sme dha̱tta ṛ̍bhavaḥ kṣema̱yanto̱ na mi̱tram ||

ye | harī̱ iti̍ | me̱dhayā̍ | u̱kthā | mada̍ntaḥ | indrā̍ya | ca̱kruḥ | su̱-yujā̍ | ye | aśvā̍ |
te | rā̱yaḥ | poṣa̍m | dravi̍ṇāni | a̱sme iti̍ | dha̱tta | ṛ̱bha̱va̱ḥ | kṣe̱ma̱-yanta̍ḥ | na | mi̱tram ||4.033.10||

4.033.11a i̱dāhna̍ḥ pī̱tim u̱ta vo̱ mada̍ṁ dhu̱r na ṛ̱te śrā̱ntasya̍ sa̱khyāya̍ de̱vāḥ |
4.033.11c te nū̱nam a̱sme ṛ̍bhavo̱ vasū̍ni tṛ̱tīye̍ a̱smin sava̍ne dadhāta ||

i̱dā | ahna̍ḥ | pī̱tim | u̱ta | va̱ḥ | mada̍m | dhu̱ḥ | na | ṛ̱te | śrā̱ntasya̍ | sa̱khyāya̍ | de̱vāḥ |
te | nū̱nam | a̱sme iti̍ | ṛ̱bha̱va̱ḥ | vasū̍ni | tṛ̱tīye̍ | a̱smin | sava̍ne | da̱dhā̱ta̱ ||4.033.11||


4.034.01a ṛ̱bhur vibhvā̱ vāja̱ indro̍ no̱ acche̱maṁ ya̱jñaṁ ra̍tna̱dheyopa̍ yāta |
4.034.01c i̱dā hi vo̍ dhi̱ṣaṇā̍ de̱vy ahnā̱m adhā̍t pī̱tiṁ sam madā̍ agmatā vaḥ ||

ṛ̱bhuḥ | vi-bhvā̍ | vāja̍ḥ | indra̍ḥ | na̱ḥ | accha̍ | i̱mam | ya̱jñam | ra̱tna̱-dheyā̍ | upa̍ | yāta |
i̱dā | hi | va̱ḥ | dhi̱ṣaṇā̍ | de̱vī | ahvā̍m | adhā̍t | pī̱tim | sam | madā̍ḥ | a̱gma̱ta̱ | va̱ḥ ||4.034.01||

4.034.02a vi̱dā̱nāso̱ janma̍no vājaratnā u̱ta ṛ̱tubhi̍r ṛbhavo mādayadhvam |
4.034.02c saṁ vo̱ madā̱ agma̍ta̱ sam pura̍ṁdhiḥ su̱vīrā̍m a̱sme ra̱yim era̍yadhvam ||

vi̱dā̱nāsa̍ḥ | janma̍naḥ | vā̱ja̱-ra̱tnā̱ḥ | u̱ta | ṛ̱tu-bhi̍ḥ | ṛ̱bha̱va̱ḥ | mā̱da̱ya̱dhva̱m |
sam | va̱ḥ | madā̍ḥ | agma̍ta | sam | pura̍m-dhiḥ | su̱-vīrā̍m | a̱sme iti̍ | ra̱yim | ā | ī̱ra̱ya̱dhva̱m ||4.034.02||

4.034.03a a̱yaṁ vo̍ ya̱jña ṛ̍bhavo 'kāri̱ yam ā ma̍nu̱ṣvat pra̱divo̍ dadhi̱dhve |
4.034.03c pra vo 'cchā̍ jujuṣā̱ṇāso̍ asthu̱r abhū̍ta̱ viśve̍ agri̱yota vā̍jāḥ ||

a̱yam | va̱ḥ | ya̱jñaḥ | ṛ̱bha̱va̱ḥ | a̱kā̱ri̱ | yam | ā | ma̱nu̱ṣvat | pra̱-diva̍ḥ | da̱dhi̱dhve |
pra | va̱ḥ | accha̍ | ju̱ju̱ṣā̱ṇāsa̍ḥ | a̱sthu̱ḥ | abhū̍ta | viśve̍ | a̱gri̱yā | u̱ta | vā̱jā̱ḥ ||4.034.03||

4.034.04a abhū̍d u vo vidha̱te ra̍tna̱dheya̍m i̱dā na̍ro dā̱śuṣe̱ martyā̍ya |
4.034.04c piba̍ta vājā ṛbhavo da̱de vo̱ mahi̍ tṛ̱tīya̱ṁ sava̍na̱m madā̍ya ||

abhū̍t | ū̱m̐ iti̍ | va̱ḥ | vi̱dha̱te | ra̱tna̱-dheya̍m | i̱dā | na̱ra̱ḥ | dā̱śuṣe̍ | martyā̍ya |
piba̍ta | vā̱jā̱ḥ | ṛ̱bha̱va̱ḥ | da̱de | va̱ḥ | mahi̍ | tṛ̱tīya̍m | sava̍nam | madā̍ya ||4.034.04||

4.034.05a ā vā̍jā yā̱topa̍ na ṛbhukṣā ma̱ho na̍ro̱ dravi̍ṇaso gṛṇā̱nāḥ |
4.034.05c ā va̍ḥ pī̱tayo̍ 'bhipi̱tve ahnā̍m i̱mā asta̍ṁ nava̱sva̍ iva gman ||

ā | vā̱jā̱ḥ | yā̱ta̱ | upa̍ | na̱ḥ | ṛ̱bhu̱kṣā̱ḥ | ma̱haḥ | na̱ra̱ḥ | dravi̍ṇasaḥ | gṛ̱ṇā̱nāḥ |
ā | va̱ḥ | pī̱taya̍ḥ | a̱bhi̱-pi̱tve | ahnā̍m | i̱māḥ | asta̍m | na̱va̱sva̍ḥ-iva | gma̱n ||4.034.05||

4.034.06a ā na̍pātaḥ śavaso yāta̱nope̱maṁ ya̱jñaṁ nama̍sā hū̱yamā̍nāḥ |
4.034.06c sa̱joṣa̍saḥ sūrayo̱ yasya̍ ca̱ stha madhva̍ḥ pāta ratna̱dhā indra̍vantaḥ ||

ā | na̱pā̱ta̱ḥ | śa̱va̱sa̱ḥ | yā̱ta̱na̱ | upa̍ | i̱mam | ya̱jñam | nama̍sā | hū̱yamā̍nāḥ |
sa̱-joṣa̍saḥ | sū̱ra̱ya̱ḥ | yasya̍ | ca̱ | stha | madhva̍ḥ | pā̱ta̱ | ra̱tna̱-dhāḥ | indra̍-vantaḥ ||4.034.06||

4.034.07a sa̱joṣā̍ indra̱ varu̍ṇena̱ soma̍ṁ sa̱joṣā̍ḥ pāhi girvaṇo ma̱rudbhi̍ḥ |
4.034.07c a̱gre̱pābhi̍r ṛtu̱pābhi̍ḥ sa̱joṣā̱ gnāspatnī̍bhī ratna̱dhābhi̍ḥ sa̱joṣā̍ḥ ||

sa̱-joṣā̍ḥ | i̱ndra̱ | varu̍ṇena | soma̍m | sa̱-joṣā̍ḥ | pā̱hi̱ | gi̱rva̱ṇa̱ḥ | ma̱rut-bhi̍ḥ |
a̱gre̱-pābhi̍ḥ | ṛ̱tu̱-pābhi̍ḥ | sa̱-joṣā̍ḥ | gnāḥpatnī̍bhiḥ | ra̱tna̱-dhābhi̍ḥ | sa̱-joṣā̍ḥ ||4.034.07||

4.034.08a sa̱joṣa̍sa ādi̱tyair mā̍dayadhvaṁ sa̱joṣa̍sa ṛbhava̱ḥ parva̍tebhiḥ |
4.034.08c sa̱joṣa̍so̱ daivye̍nā savi̱trā sa̱joṣa̍sa̱ḥ sindhu̍bhī ratna̱dhebhi̍ḥ ||

sa̱-joṣa̍saḥ | ā̱di̱tyaiḥ | mā̱da̱ya̱dhva̱m | sa̱-joṣa̍saḥ | ṛ̱bha̱va̱ḥ | parva̍tebhiḥ |
sa̱-joṣa̍saḥ | daivye̍na | sa̱vi̱trā | sa̱-joṣa̍saḥ | sindhu̍-bhiḥ | ra̱tna̱-dhebhi̍ḥ ||4.034.08||

4.034.09a ye a̱śvinā̱ ye pi̱tarā̱ ya ū̱tī dhe̱nuṁ ta̍ta̱kṣur ṛ̱bhavo̱ ye aśvā̍ |
4.034.09c ye aṁsa̍trā̱ ya ṛdha̱g roda̍sī̱ ye vibhvo̱ nara̍ḥ svapa̱tyāni̍ ca̱kruḥ ||

ye | a̱svinā̍ | ye | pi̱tarā̍ | ye | ū̱tī | dhe̱num | ta̱ta̱kṣuḥ | ṛ̱bhava̍ḥ | ye | aśvā̍ |
ye | aṁsa̍trā | ye | ṛdha̍k | roda̍sī̱ iti̍ | ye | vi-bhva̍ḥ | nara̍ḥ | su̱-a̱pa̱tyāni̍ | ca̱kruḥ ||4.034.09||

4.034.10a ye goma̍nta̱ṁ vāja̍vantaṁ su̱vīra̍ṁ ra̱yiṁ dha̱ttha vasu̍mantam puru̱kṣum |
4.034.10c te a̍gre̱pā ṛ̍bhavo mandasā̱nā a̱sme dha̍tta̱ ye ca̍ rā̱tiṁ gṛ̱ṇanti̍ ||

ye | go-ma̍ntam | vāja̍-vantam | su̱-vīra̍m | ra̱yim | dha̱ttha | vasu̍-mantam | pu̱ru̱-kṣum |
te | a̱gre̱-pāḥ | ṛ̱bha̱va̱ḥ | ma̱nda̱sā̱nāḥ | a̱sme iti̍ | dha̱tta̱ | ye | ca̱ | rā̱tim | gṛ̱ṇanti̍ ||4.034.10||

4.034.11a nāpā̍bhūta̱ na vo̍ 'tītṛṣā̱māni̍ḥśastā ṛbhavo ya̱jñe a̱smin |
4.034.11c sam indre̍ṇa̱ mada̍tha̱ sam ma̱rudbhi̱ḥ saṁ rāja̍bhī ratna̱dheyā̍ya devāḥ ||

na | apa̍ | a̱bhū̱ta̱ | na | va̱ḥ | a̱tī̱tṛ̱ṣā̱ma̱ | ani̍ḥ-śastāḥ | ṛ̱bha̱va̱ḥ | ya̱jñe | a̱smin |
sam | indre̍ṇa | mada̍tha | sam | ma̱rut-bhi̍ḥ | sam | rāja̍-bhiḥ | ra̱tna̱-dheyā̍ya | de̱vā̱ḥ ||4.034.11||


4.035.01a i̱hopa̍ yāta śavaso napāta̱ḥ saudha̍nvanā ṛbhavo̱ māpa̍ bhūta |
4.035.01c a̱smin hi va̱ḥ sava̍ne ratna̱dheya̱ṁ gama̱ntv indra̱m anu̍ vo̱ madā̍saḥ ||

i̱ha | upa̍ | yā̱ta̱ | śa̱va̱sa̱ḥ | na̱pā̱ta̱ḥ | saudha̍nvanāḥ | ṛ̱bha̱va̱ḥ | mā | apa̍ | bhū̱ta̱ |
a̱smin | hi | va̱ḥ | sava̍ne | ra̱tna̱-dheya̍m | gama̍ntu | indra̍m | anu̍ | va̱ḥ | madā̍saḥ ||4.035.01||

4.035.02a āga̍nn ṛbhū̱ṇām i̱ha ra̍tna̱dheya̱m abhū̱t soma̍sya̱ suṣu̍tasya pī̱tiḥ |
4.035.02c su̱kṛ̱tyayā̱ yat sva̍pa̱syayā̍ ca̱m̐ eka̍ṁ vica̱kra ca̍ma̱saṁ ca̍tu̱rdhā ||

ā | a̱ga̱n | ṛ̱bhū̱ṇām | i̱ha | ra̱tna̱-dheya̍m | abhū̍t | soma̍sya | su-su̍tasya | pī̱tiḥ |
su̱-kṛ̱tyayā̍ | yat | su̱-a̱pa̱syayā̍ | ca̱ | eka̍m | vi̱-ca̱kra | ca̱ma̱sam | ca̱tu̱ḥ-dhā ||4.035.02||

4.035.03a vy a̍kṛṇota cama̱saṁ ca̍tu̱rdhā sakhe̱ vi śi̱kṣety a̍bravīta |
4.035.03c athai̍ta vājā a̱mṛta̍sya̱ panthā̍ṁ ga̱ṇaṁ de̱vānā̍m ṛbhavaḥ suhastāḥ ||

vi | a̱kṛ̱ṇo̱ta̱ | ca̱ma̱sam | ca̱tu̱ḥ-dhā | sakhe̍ | vi | śi̱kṣa̱ | iti̍ | a̱bra̱vī̱ta̱ |
atha̍ | ai̱ta̱ | vā̱jā̱ḥ | a̱mṛta̍sya | panthā̍m | ga̱ṇam | de̱vānā̍m | ṛ̱bha̱va̱ḥ | su̱-ha̱stā̱ḥ ||4.035.03||

4.035.04a ki̱mmaya̍ḥ svic cama̱sa e̱ṣa ā̍sa̱ yaṁ kāvye̍na ca̱turo̍ vica̱kra |
4.035.04c athā̍ sunudhva̱ṁ sava̍na̱m madā̍ya pā̱ta ṛ̍bhavo̱ madhu̍naḥ so̱myasya̍ ||

ki̱m-maya̍ḥ | svi̱t | ca̱ma̱saḥ | e̱ṣaḥ | ā̱sa̱ | yam | kāvye̍na | ca̱tura̍ḥ | vi̱-ca̱kra |
atha̍ | su̱nu̱dhva̱m | sava̍nam | madā̍ya | pā̱ta | ṛ̱bha̱va̱ḥ | madhu̍naḥ | so̱myasya̍ ||4.035.04||

4.035.05a śacyā̍karta pi̱tarā̱ yuvā̍nā̱ śacyā̍karta cama̱saṁ de̍va̱pāna̍m |
4.035.05c śacyā̱ harī̱ dhanu̍tarāv ataṣṭendra̱vāhā̍v ṛbhavo vājaratnāḥ ||

śacyā̍ | a̱ka̱rta̱ | pi̱tarā̍ | yuvā̍nā | śacyā̍ | a̱ka̱rta̱ | ca̱ma̱sam | de̱va̱-pāna̍m |
śacyā̍ | harī̱ iti̍ | dhanu̍-tarau | a̱ta̱ṣṭa̱ | i̱ndra̱-vāhau̍ | ṛ̱bha̱va̱ḥ | vā̱ja̱-ra̱tnā̱ḥ ||4.035.05||

4.035.06a yo va̍ḥ su̱noty a̍bhipi̱tve ahnā̍ṁ tī̱vraṁ vā̍jāsa̱ḥ sava̍na̱m madā̍ya |
4.035.06c tasmai̍ ra̱yim ṛ̍bhava̱ḥ sarva̍vīra̱m ā ta̍kṣata vṛṣaṇo mandasā̱nāḥ ||

yaḥ | va̱ḥ | su̱noti̍ | a̱bhi̱-pi̱tve | ahnā̍m | tī̱vram | vā̱jā̱sa̱ḥ | sava̍nam | madā̍ya |
tasmai̍ | ra̱yim | ṛ̱bha̱va̱ḥ | sarva̍-vīram | ā | tā̱kṣa̱ta̱ | vṛ̱ṣa̱ṇa̱ḥ | ma̱nda̱sā̱nāḥ ||4.035.06||

4.035.07a prā̱taḥ su̱tam a̍pibo haryaśva̱ mādhya̍ṁdina̱ṁ sava̍na̱ṁ keva̍laṁ te |
4.035.07c sam ṛ̱bhubhi̍ḥ pibasva ratna̱dhebhi̱ḥ sakhī̱m̐r yām̐ i̍ndra cakṛ̱ṣe su̍kṛ̱tyā ||

prā̱tariti̍ | su̱tam | a̱pi̱ba̱ḥ | ha̱ri̱-a̱śva̱ | mādhya̍ndinam | sava̍nam | keva̍lam | te̱ |
sam | ṛ̱bhu-bhi̍ḥ | pi̱ba̱sva̱ | ra̱tna̱-dhebhi̍ḥ | sakhī̍n | yān | i̱ndra̱ | ca̱kṛ̱ṣe | su̱-kṛ̱tyā ||4.035.07||

4.035.08a ye de̱vāso̱ abha̍vatā sukṛ̱tyā śye̱nā i̱ved adhi̍ di̱vi ni̍ṣe̱da |
4.035.08c te ratna̍ṁ dhāta śavaso napāta̱ḥ saudha̍nvanā̱ abha̍vatā̱mṛtā̍saḥ ||

ye | de̱vāsa̍ḥ | abha̍vata | su̱-kṛ̱tyā | śye̱nāḥ-i̍va | it | adhi̍ | di̱vi | ni̱-se̱da |
te | ratna̍m | dhā̱ta̱ | śa̱va̱sa̱ḥ | na̱pā̱ta̱ḥ | saudha̍nvanāḥ | abha̍vata | a̱mṛtā̍saḥ ||4.035.08||

4.035.09a yat tṛ̱tīya̱ṁ sava̍naṁ ratna̱dheya̱m akṛ̍ṇudhvaṁ svapa̱syā su̍hastāḥ |
4.035.09c tad ṛ̍bhava̱ḥ pari̍ṣiktaṁ va e̱tat sam made̍bhir indri̱yebhi̍ḥ pibadhvam ||

yat | tṛ̱tīya̍m | sava̍nam | ra̱tna̱-dheya̍m | akṛ̍ṇudhvam | su̱-a̱pa̱syā | su̱-ha̱stā̱ḥ |
tat | ṛ̱bha̱va̱ḥ | pari̍-siktam | va̱ḥ | e̱tat | sam | made̍bhiḥ | i̱ndri̱yebhi̍ḥ | pi̱ba̱dhva̱m ||4.035.09||


4.036.01a a̱na̱śvo jā̱to a̍nabhī̱śur u̱kthyo̱3̱̍ ratha̍s trica̱kraḥ pari̍ vartate̱ raja̍ḥ |
4.036.01c ma̱hat tad vo̍ de̱vya̍sya pra̱vāca̍na̱ṁ dyām ṛ̍bhavaḥ pṛthi̱vīṁ yac ca̱ puṣya̍tha ||

a̱na̱śvaḥ | jā̱taḥ | a̱na̱bhī̱śuḥ | u̱kthya̍ḥ | ratha̍ḥ | tri̱-ca̱kraḥ | pari̍ | va̱rta̱te̱ | raja̍ḥ |
ma̱hat | tat | va̱ḥ | de̱vya̍sya | pra̱-vāca̍nam | dyām | ṛ̱bha̱va̱ḥ | pṛ̱thi̱vīm | yat | ca̱ | puṣya̍tha ||4.036.01||

4.036.02a ratha̱ṁ ye ca̱kruḥ su̱vṛta̍ṁ su̱ceta̱so 'vi̍hvaranta̱m mana̍sa̱s pari̱ dhyayā̍ |
4.036.02c tām̐ ū̱ nv a1̱̍sya sava̍nasya pī̱taya̱ ā vo̍ vājā ṛbhavo vedayāmasi ||

ratha̍m | ye | ca̱kruḥ | su̱-vṛta̍m | su̱-ceta̍saḥ | avi̍-hvarantam | mana̍saḥ | pari̍ | dhyayā̍ |
tān | ū̱m̐ iti̍ | nu | a̱sya | sava̍nasya | pī̱taye̍ | ā | va̱ḥ | vā̱jā̱ḥ | ṛ̱bha̱va̱ḥ | ve̱da̱yā̱ma̱si̱ ||4.036.02||

4.036.03a tad vo̍ vājā ṛbhavaḥ supravāca̱naṁ de̱veṣu̍ vibhvo abhavan mahitva̱nam |
4.036.03c jivrī̱ yat santā̍ pi̱tarā̍ sanā̱jurā̱ puna̱r yuvā̍nā ca̱rathā̍ya̱ takṣa̍tha ||

tat | va̱ḥ | vā̱jā̱ḥ | ṛ̱bha̱va̱ḥ | su̱-pra̱vā̱ca̱nam | de̱veṣu̍ | vi̱-bhva̱ḥ | a̱bha̱va̱t | ma̱hi̱-tva̱nam |
jivrī̱ iti̍ | yat | santā̍ | pi̱tarā̍ | sa̱nā̱-jurā̍ | puna̍ḥ | yuvā̍nā | ca̱rathā̍ya | takṣa̍tha ||4.036.03||

4.036.04a eka̱ṁ vi ca̍kra cama̱saṁ catu̍rvaya̱ṁ niś carma̍ṇo̱ gām a̍riṇīta dhī̱tibhi̍ḥ |
4.036.04c athā̍ de̱veṣv a̍mṛta̱tvam ā̍naśa śru̱ṣṭī vā̍jā ṛbhava̱s tad va̍ u̱kthya̍m ||

eka̱m | vi | ca̱kra̱ | ca̱ma̱sam | catu̍ḥ-vayam | niḥ | carma̍ṇaḥ | gām | a̱ri̱ṇī̱ta̱ | dhī̱ti-bhi̍ḥ |
atha̍ | de̱veṣu̍ | a̱mṛ̱ta̱-tvam | ā̱na̱śa̱ | śru̱śṭī | vā̱jā̱ḥ | ṛ̱bha̱va̱ḥ | tat | va̱ḥ | u̱kthya̍m ||4.036.04||

4.036.05a ṛ̱bhu̱to ra̱yiḥ pra̍tha̱maśra̍vastamo̱ vāja̍śrutāso̱ yam ajī̍jana̱n nara̍ḥ |
4.036.05c vi̱bhva̱ta̱ṣṭo vi̱dathe̍ṣu pra̱vācyo̱ yaṁ de̍vā̱so 'va̍thā̱ sa vica̍rṣaṇiḥ ||

ṛ̱bhu̱taḥ | ra̱yiḥ | pra̱tha̱maśra̍vaḥ-tamaḥ | vāja̍-śrutāsaḥ | yam | ajī̍janan | nara̍ḥ |
vi̱bhva̱-ta̱ṣṭaḥ | vi̱dathe̍ṣu | pra̱-vācya̍ḥ | yam | de̱vā̱saḥ | ava̍tha | saḥ | vi-ca̍rṣaṇiḥ ||4.036.05||

4.036.06a sa vā̱jy arvā̱ sa ṛṣi̍r vaca̱syayā̱ sa śūro̱ astā̱ pṛta̍nāsu du̱ṣṭara̍ḥ |
4.036.06c sa rā̱yas poṣa̱ṁ sa su̱vīrya̍ṁ dadhe̱ yaṁ vājo̱ vibhvā̍m̐ ṛ̱bhavo̱ yam āvi̍ṣuḥ ||

saḥ | vā̱jī | arvā̍ | saḥ | ṛṣi̍ḥ | va̱ca̱syayā̍ | saḥ | śūra̍ḥ | astā̍ | pṛta̍nāsu | du̱stara̍ḥ |
saḥ | rā̱yaḥ | poṣa̍m | saḥ | su̱-vīrya̍m | dadhe̍ | yam | vāja̍ḥ | vi-bhvā̍ | ṛ̱bhava̍ḥ | yam | āvi̍ṣuḥ ||4.036.06||

4.036.07a śreṣṭha̍ṁ va̱ḥ peśo̱ adhi̍ dhāyi darśa̱taṁ stomo̍ vājā ṛbhava̱s taṁ ju̍juṣṭana |
4.036.07c dhīrā̍so̱ hi ṣṭhā ka̱vayo̍ vipa̱ścita̱s tān va̍ e̱nā brahma̱ṇā ve̍dayāmasi ||

śreṣṭha̍m | va̱ḥ | peśa̍ḥ | adhi̍ | dhā̱yi̱ | da̱rśa̱tam | stoma̍ḥ | vā̱jā̱ḥ | ṛ̱bha̱va̱ḥ | tam | ju̱ju̱ṣṭa̱na̱ |
dhīrā̍saḥ | hi | stha | ka̱vaya̍ḥ | vi̱pa̱ḥ-cita̍ḥ | tān | va̱ḥ | e̱nā | brahma̍ṇā | ā | ve̱da̱yā̱ma̱si̱ ||4.036.07||

4.036.08a yū̱yam a̱smabhya̍ṁ dhi̱ṣaṇā̍bhya̱s pari̍ vi̱dvāṁso̱ viśvā̱ naryā̍ṇi̱ bhoja̍nā |
4.036.08c dyu̱manta̱ṁ vāja̱ṁ vṛṣa̍śuṣmam utta̱mam ā no̍ ra̱yim ṛ̍bhavas takṣa̱tā vaya̍ḥ ||

yū̱yam | a̱smabhya̍m | dhi̱ṣaṇā̍bhyaḥ | pari̍ | vi̱dvāṁsa̍ḥ | viśvā̍ | naryā̍ṇi | bhoja̍nā |
dyu̱-manta̍m | vāja̍m | vṛṣa̍-śuṣmam | u̱t-ta̱mam | ā | na̱ḥ | ra̱yim | ṛ̱bha̱va̱ḥ | ta̱kṣa̱ta̱ | ā | vaya̍ḥ ||4.036.08||

4.036.09a i̱ha pra̱jām i̱ha ra̱yiṁ rarā̍ṇā i̱ha śravo̍ vī̱rava̍t takṣatā naḥ |
4.036.09c yena̍ va̱yaṁ ci̱taye̱māty a̱nyān taṁ vāja̍ṁ ci̱tram ṛ̍bhavo dadā naḥ ||

i̱ha | pra̱-jām | i̱ha | ra̱yim | rarā̍ṇāḥ | i̱ha | śrava̍ḥ | vī̱ra-va̍t | ta̱kṣa̱ta̱ | na̱ḥ |
yena̍ | va̱yam | ci̱taye̍ma | ati̍ | a̱nyān | tam | vāja̍m | ci̱tram | ṛ̱bha̱va̱ḥ | da̱da̱ | na̱ḥ ||4.036.09||


4.037.01a upa̍ no vājā adhva̱ram ṛ̍bhukṣā̱ devā̍ yā̱ta pa̱thibhi̍r deva̱yānai̍ḥ |
4.037.01c yathā̍ ya̱jñam manu̍ṣo vi̱kṣv ā̱3̱̍su da̍dhi̱dhve ra̍ṇvāḥ su̱dine̱ṣv ahnā̍m ||

upa̍ | na̱ḥ | vā̱jā̱ḥ | a̱dhva̱ram | ṛ̱bhu̱kṣā̱ḥ | devā̍ḥ | yā̱ta | pa̱thi-bhi̍ḥ | de̱va̱-yānai̍ḥ |
yathā̍ | ya̱jñam | manu̍ṣaḥ | vi̱kṣu | ā̱su | da̱dhi̱dhve | ra̱ṇvā̱ḥ | su̱-dine̍ṣu | ahnā̍m ||4.037.01||

4.037.02a te vo̍ hṛ̱de mana̍se santu ya̱jñā juṣṭā̍so a̱dya ghṛ̱tani̍rṇijo guḥ |
4.037.02c pra va̍ḥ su̱tāso̍ harayanta pū̱rṇāḥ kratve̱ dakṣā̍ya harṣayanta pī̱tāḥ ||

te | va̱ḥ | hra̱de | mana̍se | sa̱ntu̱ | ya̱jñāḥ | juṣṭā̍saḥ | a̱dya | ghṛ̱ta-ni̍rnijaḥ | gu̱ḥ |
pra | va̱ḥ | su̱tāsa̍ḥ | ha̱ra̱ya̱nta̱ | pū̱rṇāḥ | kratve̍ | dakṣā̍ya | ha̱rṣa̱ya̱nta̱ | pī̱tāḥ ||4.037.02||

4.037.03a tryu̱dā̱yaṁ de̱vahi̍ta̱ṁ yathā̍ va̱ḥ stomo̍ vājā ṛbhukṣaṇo da̱de va̍ḥ |
4.037.03c ju̱hve ma̍nu̱ṣvad upa̍rāsu vi̱kṣu yu̱ṣme sacā̍ bṛ̱haddi̍veṣu̱ soma̍m ||

tri̱-u̱dā̱yam | de̱va-hi̍tam | yathā̍ | va̱ḥ | stoma̍ḥ | vā̱jā̱ḥ | ṛ̱bhu̱kṣa̱ṇa̱ḥ | da̱de | va̱ḥ |
ju̱hve | ma̱nu̱ṣvat | upa̍rāsu | vi̱kṣu | yu̱ṣme iti̍ | sacā̍ | bṛ̱hat-di̍veṣu | soma̍m ||4.037.03||

4.037.04a pīvo̍aśvāḥ śu̱cadra̍thā̱ hi bhū̱tāya̍ḥśiprā vājinaḥ suni̱ṣkāḥ |
4.037.04c indra̍sya sūno śavaso napā̱to 'nu̍ vaś cety agri̱yam madā̍ya ||

pīva̍ḥ-aśvāḥ | śu̱cat-ra̍thāḥ | hi | bhū̱ta | āya̍ḥ-śiprāḥ | vā̱ji̱na̱ḥ | su̱-ni̱ṣkāḥ |
indra̍sya | sū̱na̱ḥ | śa̱va̱sa̱ḥ | na̱pā̱ta̱ḥ | anu̍ | va̱ḥ | ce̱ti̱ | a̱gri̱yam | madā̍ya ||4.037.04||

4.037.05a ṛ̱bhum ṛ̍bhukṣaṇo ra̱yiṁ vāje̍ vā̱jinta̍ma̱ṁ yuja̍m |
4.037.05c indra̍svantaṁ havāmahe sadā̱sāta̍mam a̱śvina̍m ||

ṛ̱bhum | ṛ̱bhu̱kṣa̱ṇa̱ḥ | ra̱yim | vāje̍ | vā̱jin-ta̍mam | yuja̍m |
indra̍svantam | ha̱vā̱ma̱he̱ | sa̱dā̱-sāta̍mam | a̱śvina̍m ||4.037.05||

4.037.06a sed ṛ̍bhavo̱ yam ava̍tha yū̱yam indra̍ś ca̱ martya̍m |
4.037.06c sa dhī̱bhir a̍stu̱ sani̍tā me̱dhasā̍tā̱ so arva̍tā ||

saḥ | it | ṛ̱bha̱va̱ḥ | yam | ava̍tha | yū̱yam | indra̍ḥ | ca̱ | martya̍m |
saḥ | dhī̱bhiḥ | a̱stu̱ | sani̍tā | me̱dha-sā̍tā | saḥ | arva̍tā ||4.037.06||

4.037.07a vi no̍ vājā ṛbhukṣaṇaḥ pa̱thaś ci̍tana̱ yaṣṭa̍ve |
4.037.07c a̱smabhya̍ṁ sūrayaḥ stu̱tā viśvā̱ āśā̍s tarī̱ṣaṇi̍ ||

vi | na̱ḥ | vā̱jā̱ḥ | ṛ̱bhu̱kṣa̱ṇa̱ḥ | pa̱thaḥ | ci̱ta̱na̱ | yaṣṭa̍ve |
a̱smabhya̍m | sū̱ra̱ya̱ḥ | stu̱tāḥ | viśvā̍ḥ | āśā̍ḥ | ta̱rī̱ṣaṇi̍ ||4.037.07||

4.037.08a taṁ no̍ vājā ṛbhukṣaṇa̱ indra̱ nāsa̍tyā ra̱yim |
4.037.08c sam aśva̍ṁ carṣa̱ṇibhya̱ ā pu̱ru śa̍sta ma̱ghatta̍ye ||

tam | na̱ḥ | vā̱jā̱ḥ | ṛ̱bhu̱kṣa̱ṇa̱ḥ | indra̍ | nāsa̍tyā | ra̱yim |
sam | aśva̍m | ca̱rṣa̱ṇi-bhya̍ḥ | ā | pu̱ru | śa̱sta̱ | ma̱ghatta̍ye ||4.037.08||


4.038.01a u̱to hi vā̍ṁ dā̱trā santi̱ pūrvā̱ yā pū̱rubhya̍s tra̱sada̍syur nito̱śe |
4.038.01c kṣe̱trā̱sāṁ da̍dathur urvarā̱sāṁ gha̱naṁ dasyu̍bhyo a̱bhibhū̍tim u̱gram ||

u̱to iti̍ | hi | vā̱m | dā̱trā | santi̍ | pūrvā̍ | yā | pū̱ru-bhya̍ḥ | tra̱sada̍syuḥ | ni̱-to̱śe |
kṣe̱tra̱-sām | dā̱da̱thu̱ḥ | u̱rva̱rā̱-sām | gha̱nam | dasyu̍-bhyaḥ | a̱bhi-bhū̍tim | u̱gram ||4.038.01||

4.038.02a u̱ta vā̱jina̍m puruni̱ṣṣidhvā̍naṁ dadhi̱krām u̍ dadathur vi̱śvakṛ̍ṣṭim |
4.038.02c ṛ̱ji̱pyaṁ śye̱nam pru̍ṣi̱tapsu̍m ā̱śuṁ ca̱rkṛtya̍m a̱ryo nṛ̱pati̱ṁ na śūra̍m ||

u̱ta | vā̱jina̍m | pu̱ru̱ni̱ḥ-sidhvā̍nam | da̱dhi̱-krām | ū̱m̐ iti̍ | da̱da̱thu̱ḥ | vi̱śva-kṛ̍ṣṭim |
ṛ̱ji̱pyam | śye̱nam | pru̱ṣi̱ta-psu̍m | ā̱śum | ca̱rkṛtya̍m | a̱ryaḥ | nṛ̱-pati̍m | na | śūra̍m ||4.038.02||

4.038.03a yaṁ sī̱m anu̍ pra̱vate̍va̱ drava̍nta̱ṁ viśva̍ḥ pū̱rur mada̍ti̱ harṣa̍māṇaḥ |
4.038.03c pa̱ḍbhir gṛdhya̍ntam medha̱yuṁ na śūra̍ṁ ratha̱tura̱ṁ vāta̍m iva̱ dhraja̍ntam ||

yam | sī̱m | anu̍ | pra̱vatā̍-iva | drava̍ntam | viśva̍ḥ | pū̱ruḥ | mada̍ti | harṣa̍māṇaḥ |
pa̱ṭ-bhiḥ | gṛdhya̍ntam | me̱dha̱-yum | na | śūra̍m | ra̱tha̱-tura̍m | vāta̍m-iva | dhraja̍ntam ||4.038.03||

4.038.04a yaḥ smā̍rundhā̱no gadhyā̍ sa̱matsu̱ sanu̍tara̱ś cara̍ti̱ goṣu̱ gaccha̍n |
4.038.04c ā̱virṛ̍jīko vi̱dathā̍ ni̱cikya̍t ti̱ro a̍ra̱tim pary āpa̍ ā̱yoḥ ||

yaḥ | sma̱ | ā̱-ru̱ndhā̱naḥ | gadhyā̍ | sa̱mat-su̍ | sanu̍-taraḥ | cara̍ti | goṣu̍ | gaccha̍n |
ā̱viḥ-ṛ̍jīkaḥ | vi̱dathā̍ | ni̱-cikya̍t | ti̱raḥ | a̱ra̱tim | pari̍ | āpa̍ḥ | ā̱yoḥ ||4.038.04||

4.038.05a u̱ta smai̍naṁ vastra̱mathi̱ṁ na tā̱yum anu̍ krośanti kṣi̱tayo̱ bhare̍ṣu |
4.038.05c nī̱cāya̍māna̱ṁ jasu̍ri̱ṁ na śye̱naṁ śrava̱ś cācchā̍ paśu̱mac ca̍ yū̱tham ||

u̱ta | sma̱ | e̱na̱m | va̱stra̱-mathi̍m | na | tā̱yum | anu̍ | kro̱śa̱nti̱ | kṣi̱taya̍ḥ | bhare̍ṣu |
nī̱cā | aya̍mānam | jasu̍rim | na | śye̱nam | śrava̍ḥ | ca̱ | accha̍ | pa̱śu̱-mat | ca̱ | yū̱tham ||4.038.05||

4.038.06a u̱ta smā̍su pratha̱maḥ sa̍ri̱ṣyan ni ve̍veti̱ śreṇi̍bhī̱ rathā̍nām |
4.038.06c sraja̍ṁ kṛṇvā̱no janyo̱ na śubhvā̍ re̱ṇuṁ reri̍hat ki̱raṇa̍ṁ dada̱śvān ||

u̱ta | sma̱ | ā̱su | pra̱tha̱maḥ | sa̱ri̱ṣyan | ni | ve̱ve̱ti̱ | śreṇi̍-bhiḥ | rathā̍nām |
sraja̍m | kṛ̱ṇvā̱naḥ | janya̍ḥ | na | śubhvā̍ | re̱ṇum | reri̍hat | ki̱raṇa̍m | da̱da̱śvān ||4.038.06||

4.038.07a u̱ta sya vā̱jī sahu̍rir ṛ̱tāvā̱ śuśrū̍ṣamāṇas ta̱nvā̍ sama̱rye |
4.038.07c tura̍ṁ ya̱tīṣu̍ tu̱raya̍nn ṛji̱pyo 'dhi̍ bhru̱voḥ ki̍rate re̱ṇum ṛ̱ñjan ||

u̱ta | syaḥ | vā̱jī | sahu̍riḥ | ṛ̱ta-vā̍ | śuśrū̍ṣamāṇaḥ | ta̱nvā̍ | sa̱-ma̱rye |
tura̍m | ya̱tīṣu̍ | tu̱raya̍n | ṛ̱ji̱pyaḥ | adhi̍ | bhru̱voḥ | ki̱ra̱te̱ | re̱ṇum | ṛ̱ñjan ||4.038.07||

4.038.08a u̱ta smā̍sya tanya̱tor i̍va̱ dyor ṛ̍ghāya̱to a̍bhi̱yujo̍ bhayante |
4.038.08c ya̱dā sa̱hasra̍m a̱bhi ṣī̱m ayo̍dhīd du̱rvartu̍ḥ smā bhavati bhī̱ma ṛ̱ñjan ||

u̱ta | sma̱ | a̱sya̱ | ta̱nya̱toḥ-i̍va | dyoḥ | ṛ̱ghā̱ya̱taḥ | a̱bhi̱-yuja̍ḥ | bha̱ya̱nte̱ |
ya̱dā | sa̱hasra̍m | a̱bhi | sī̱m | ayo̍dhīt | du̱ḥ-vartu̍ḥ | sma̱ | bha̱va̱ti̱ | bhī̱maḥ | ṛ̱ñjan ||4.038.08||

4.038.09a u̱ta smā̍sya panayanti̱ janā̍ jū̱tiṁ kṛ̍ṣṭi̱pro a̱bhibhū̍tim ā̱śoḥ |
4.038.09c u̱taina̍m āhuḥ sami̱the vi̱yanta̱ḥ parā̍ dadhi̱krā a̍sarat sa̱hasrai̍ḥ ||

u̱ta | sma̱ | a̱sya̱ | pa̱na̱ya̱nti̱ | janā̍ḥ | jū̱tim | kṛ̱ṣṭi̱-praḥ | a̱bhi-bhū̍tim | ā̱śoḥ |
u̱ta | e̱na̱m | ā̱hu̱ḥ | sa̱m-i̱the | vi̱-yanta̍ḥ | parā̍ | da̱dhi̱-krāḥ | a̱sa̱ra̱t | sa̱hasrai̍ḥ ||4.038.09||

4.038.10a ā da̍dhi̱krāḥ śava̍sā̱ pañca̍ kṛ̱ṣṭīḥ sūrya̍ iva̱ jyoti̍ṣā̱pas ta̍tāna |
4.038.10c sa̱ha̱sra̱sāḥ śa̍ta̱sā vā̱jy arvā̍ pṛ̱ṇaktu̱ madhvā̱ sam i̱mā vacā̍ṁsi ||

ā | da̱dhi̱-krāḥ | śava̍sā | pañca̍ | kṛ̱ṣṭīḥ | sūrya̍ḥ-iva | jyoti̍ṣā | a̱paḥ | ta̱tā̱na̱ |
sa̱ha̱sra̱-sāḥ | śa̱ta̱-sāḥ | vā̱jī | arvā̍ | pṛ̱ṇaktu̍ | madhvā̍ | sam | i̱mā | vacā̍ṁsi ||4.038.10||


4.039.01a ā̱śuṁ da̍dhi̱krāṁ tam u̱ nu ṣṭa̍vāma di̱vas pṛ̍thi̱vyā u̱ta ca̍rkirāma |
4.039.01c u̱cchantī̱r mām u̱ṣasa̍ḥ sūdaya̱ntv ati̱ viśvā̍ni duri̱tāni̍ parṣan ||

ā̱śum | da̱dhi̱-krām | tam | ū̱m̐ iti̍ | nu | sta̱vā̱ma̱ | di̱vaḥ | pṛ̱thi̱vyāḥ | u̱ta | ca̱rki̱rā̱ma̱ |
u̱cchantī̍ḥ | mām | u̱ṣasa̍ḥ | sū̱da̱ya̱ntu̱ | ati̍ | viśvā̍ni | du̱ḥ-i̱tāni̍ | pa̱rṣa̱n ||4.039.01||

4.039.02a ma̱haś ca̍rka̱rmy arva̍taḥ kratu̱prā da̍dhi̱krāvṇa̍ḥ puru̱vāra̍sya̱ vṛṣṇa̍ḥ |
4.039.02c yam pū̱rubhyo̍ dīdi̱vāṁsa̱ṁ nāgniṁ da̱dathu̍r mitrāvaruṇā̱ tatu̍rim ||

ma̱haḥ | ca̱rka̱rmi̱ | arva̍taḥ | kra̱tu̱-prāḥ | da̱dhi̱-krāvṇa̍ḥ | pu̱ru̱-vāra̍sya | vṛṣṇa̍ḥ |
yam | pū̱ru-bhya̍ḥ | dī̱di̱-vāṁsam | na | a̱gnim | da̱dathu̍ḥ | mi̱trā̱va̱ru̱ṇā̱ | tatu̍rim ||4.039.02||

4.039.03a yo aśva̍sya dadhi̱krāvṇo̱ akā̍rī̱t sami̍ddhe a̱gnā u̱ṣaso̱ vyu̍ṣṭau |
4.039.03c anā̍gasa̱ṁ tam adi̍tiḥ kṛṇotu̱ sa mi̱treṇa̱ varu̍ṇenā sa̱joṣā̍ḥ ||

yaḥ | aśva̍sya | da̱dhi̱-krāvṇa̍ḥ | akā̍rīt | sam-i̍ddhe | a̱gnau | u̱ṣasa̍ḥ | vi-u̍ṣṭau |
anā̍gasam | tam | adi̍tiḥ | kṛ̱ṇo̱tu̱ | saḥ | mi̱treṇa̍ | varu̍ṇena | sa̱-joṣā̍ḥ ||4.039.03||

4.039.04a da̱dhi̱krāvṇa̍ i̱ṣa ū̱rjo ma̱ho yad ama̍nmahi ma̱rutā̱ṁ nāma̍ bha̱dram |
4.039.04c sva̱staye̱ varu̍ṇam mi̱tram a̱gniṁ havā̍maha̱ indra̱ṁ vajra̍bāhum ||

da̱dhi̱-krāvṇa̍ḥ | i̱ṣaḥ | ū̱rjaḥ | ma̱haḥ | yat | ama̍nmahi | ma̱rutā̍m | nāma̍ | bha̱dram |
sva̱staye̍ | varu̍ṇam | mi̱tram | a̱gnim | havā̍mahe | indra̍m | vajra̍-bāhum ||4.039.04||

4.039.05a indra̍m i̱ved u̱bhaye̱ vi hva̍yanta u̱dīrā̍ṇā ya̱jñam u̍papra̱yanta̍ḥ |
4.039.05c da̱dhi̱krām u̱ sūda̍na̱m martyā̍ya da̱dathu̍r mitrāvaruṇā no̱ aśva̍m ||

indra̍m-iva | it | u̱bhaye̍ | vi | hva̱ya̱nte̱ | u̱t-īrā̍ṇāḥ | ya̱jñam | u̱pa̱-pra̱yanta̍ḥ |
da̱dhi̱-krām | ū̱m̐ iti̍ | sūda̍nam | martyā̍ya | da̱dathu̍ḥ | mi̱trā̱va̱ru̱ṇā̱ | na̱ḥ | aśva̍m ||4.039.05||

4.039.06a da̱dhi̱krāvṇo̍ akāriṣaṁ ji̱ṣṇor aśva̍sya vā̱jina̍ḥ |
4.039.06c su̱ra̱bhi no̱ mukhā̍ kara̱t pra ṇa̱ āyū̍ṁṣi tāriṣat ||

da̱dhi̱-krāvṇa̍ḥ | a̱kā̱ri̱ṣa̱m | ji̱ṣṇoḥ | aśva̍sya | vā̱jina̍ḥ |
su̱ra̱bhi | na̱ḥ | mukhā̍ | ka̱ra̱t | pra | na̱ḥ | āyū̍ṁṣi | tā̱ri̱ṣa̱t ||4.039.06||


4.040.01a da̱dhi̱krāvṇa̱ id u̱ nu ca̍rkirāma̱ viśvā̱ in mām u̱ṣasa̍ḥ sūdayantu |
4.040.01c a̱pām a̱gner u̱ṣasa̱ḥ sūrya̍sya̱ bṛha̱spate̍r āṅgira̱sasya̍ ji̱ṣṇoḥ ||

da̱dhi̱-krāvṇa̍ḥ | it | ū̱m̐ iti̍ | nu | cā̱rki̱rā̱ma̱ | viśvā̍ | it | mām | u̱ṣasa̍ḥ | sū̱da̱ya̱ntu̱ |
a̱pām | a̱gneḥ | u̱ṣasa̍ḥ | sūrya̍sya | bṛha̱spate̍ḥ | ā̱ṅgi̱ra̱sasya̍ | ji̱ṣṇoḥ ||4.040.01||

4.040.02a satvā̍ bhari̱ṣo ga̍vi̱ṣo du̍vanya̱sac chra̍va̱syād i̱ṣa u̱ṣasa̍s turaṇya̱sat |
4.040.02c sa̱tyo dra̱vo dra̍va̱raḥ pa̍taṁga̱ro da̍dhi̱krāveṣa̱m ūrja̱ṁ sva̍r janat ||

satvā̍ | bha̱ri̱ṣaḥ | go̱-i̱ṣaḥ | du̱va̱nya̱-sat | śra̱va̱syāt | i̱ṣaḥ | u̱ṣasa̍ḥ | tu̱ra̱ṇya̱-sat |
sa̱tyaḥ | dra̱vaḥ | dra̱va̱raḥ | pa̱ta̱ṅga̱raḥ | da̱dhi̱-krāvā̍ | iṣa̍m | ūrja̍m | sva̍ḥ | ja̱na̱t ||4.040.02||

4.040.03a u̱ta smā̍sya̱ drava̍tas turaṇya̱taḥ pa̱rṇaṁ na ver anu̍ vāti praga̱rdhina̍ḥ |
4.040.03c śye̱nasye̍va̱ dhraja̍to aṅka̱sam pari̍ dadhi̱krāvṇa̍ḥ sa̱horjā tari̍trataḥ ||

u̱ta | sma̱ | a̱sya̱ | drava̍taḥ | tu̱ra̱ṇya̱taḥ | pa̱rṇam | na | veḥ | anu̍ | vā̱ti̱ | pra̱-ga̱rdhina̍ḥ |
śye̱nasya̍-iva | dhraja̍taḥ | a̱ṅka̱sam | pari̍ | da̱dhi̱-krāvṇa̍ḥ | sa̱ha | ū̱rjā | tari̍trataḥ ||4.040.03||

4.040.04a u̱ta sya vā̱jī kṣi̍pa̱ṇiṁ tu̍raṇyati grī̱vāyā̍m ba̱ddho a̍pika̱kṣa ā̱sani̍ |
4.040.04c kratu̍ṁ dadhi̱krā anu̍ sa̱ṁtavī̍tvat pa̱thām aṅkā̱ṁsy anv ā̱panī̍phaṇat ||

u̱ta | syaḥ | vā̱jī | kṣi̱pa̱ṇim | tu̱ra̱ṇya̱ti̱ | grī̱vāyā̍m | ba̱ddhaḥ | a̱pi̱-ka̱kṣe | ā̱sani̍ |
kratu̍m | da̱dhi̱-krāḥ | anu̍ | sa̱m-tavī̍tvat | pa̱thām | aṅkā̍ṁsi | anu̍ | ā̱-panī̍phaṇat ||4.040.04||

4.040.05a ha̱ṁsaḥ śu̍ci̱ṣad vasu̍r antarikṣa̱sad dhotā̍ vedi̱ṣad ati̍thir duroṇa̱sat |
4.040.05c nṛ̱ṣad va̍ra̱sad ṛ̍ta̱sad vyo̍ma̱sad a̱bjā go̱jā ṛ̍ta̱jā a̍dri̱jā ṛ̱tam ||

ha̱ṁsaḥ | śu̱ci̱-sat | vasu̍ḥ | a̱nta̱ri̱kṣa̱-sat | hotā̍ | ve̱di̱-sat | ati̍thiḥ | du̱ro̱ṇa̱-sat |
nṛ̱-sat | va̱ra̱-sat | ṛ̱ta̱-sat | vyo̱ma̱-sat | a̱p-jāḥ | go̱-jāḥ | ṛ̱ta̱-jāḥ | a̱dri̱-jāḥ | ṛ̱tam ||4.040.05||


4.041.01a indrā̱ ko vā̍ṁ varuṇā su̱mnam ā̍pa̱ stomo̍ ha̱viṣmā̍m̐ a̱mṛto̱ na hotā̍ |
4.041.01c yo vā̍ṁ hṛ̱di kratu̍mām̐ a̱smad u̱ktaḥ pa̱sparśa̍d indrāvaruṇā̱ nama̍svān ||

indrā̍ | kaḥ | vā̱m | va̱ru̱ṇā̱ | su̱mnam | ā̱pa̱ | stoma̍ḥ | ha̱viṣmā̍n | a̱mṛta̍ḥ | na | hotā̍ |
yaḥ | vā̱m | hṛ̱di | kratu̍-mān | a̱smat | u̱ktaḥ | pa̱sparśa̍t | i̱ndrā̱va̱ru̱ṇā̱ | nama̍svān ||4.041.01||

4.041.02a indrā̍ ha̱ yo varu̍ṇā ca̱kra ā̱pī de̱vau marta̍ḥ sa̱khyāya̱ praya̍svān |
4.041.02c sa ha̍nti vṛ̱trā sa̍mi̱theṣu̱ śatrū̱n avo̍bhir vā ma̱hadbhi̱ḥ sa pra śṛ̍ṇve ||

indrā̍ | ha̱ | yaḥ | varu̍ṇā | ca̱kre | ā̱pī iti̍ | de̱vau | marta̍ḥ | sa̱khyāya̍ | praya̍svān |
saḥ | ha̱nti̱ | vṛ̱trā | sa̱m-i̱theṣu̍ | śatrū̍n | ava̍ḥ-bhiḥ | vā̱ | ma̱hat-bhi̍ḥ | saḥ | pra | śṛ̱ṇve̱ ||4.041.02||

4.041.03a indrā̍ ha̱ ratna̱ṁ varu̍ṇā̱ dheṣṭhe̱tthā nṛbhya̍ḥ śaśamā̱nebhya̱s tā |
4.041.03c yadī̱ sakhā̍yā sa̱khyāya̱ somai̍ḥ su̱tebhi̍ḥ supra̱yasā̍ mā̱dayai̍te ||

indrā̍ | ha̱ | ratna̍m | varu̍ṇā | dheṣṭhā̍ | i̱tthā | nṛ-bhya̍ḥ | śa̱śa̱mā̱nebhya̍ḥ | tā |
yadi̍ | sakhā̍yā | sa̱khyāya̍ | somai̍ḥ | su̱tebhi̍ḥ | su̱-pra̱yasā̍ | mā̱dayai̍te̱ iti̍ ||4.041.03||

4.041.04a indrā̍ yu̱vaṁ va̍ruṇā di̱dyum a̍smi̱nn oji̍ṣṭham ugrā̱ ni va̍dhiṣṭa̱ṁ vajra̍m |
4.041.04c yo no̍ du̱revo̍ vṛ̱kati̍r da̱bhīti̱s tasmi̍n mimāthām a̱bhibhū̱ty oja̍ḥ ||

indrā̍ | yu̱vam | va̱ru̱ṇā̱ | di̱dyum | a̱smi̱n | oji̍ṣṭham | u̱grā̱ | ni | va̱dhi̱ṣṭa̱m | vajra̍m |
yaḥ | na̱ḥ | du̱ḥ-eva̍ḥ | vṛ̱kati̍ḥ | da̱bhīti̍ḥ | tasmi̍n | mi̱mā̱thā̱m | a̱bhi-bhū̍ti | oja̍ḥ ||4.041.04||

4.041.05a indrā̍ yu̱vaṁ va̍ruṇā bhū̱tam a̱syā dhi̱yaḥ pre̱tārā̍ vṛṣa̱bheva̍ dhe̱noḥ |
4.041.05c sā no̍ duhīya̱d yava̍seva ga̱tvī sa̱hasra̍dhārā̱ paya̍sā ma̱hī gauḥ ||

indrā̍ | yu̱vam | va̱ru̱ṇā̱ | bhū̱tam | a̱syāḥ | dhi̱yaḥ | pre̱tārā̍ | vṛ̱ṣa̱bhā-i̍va | dhe̱noḥ |
sā | na̱ḥ | du̱hī̱ya̱t | yava̍sā-iva | ga̱tvī | sa̱hasra̍-dhārā | paya̍sā | ma̱hī | gauḥ ||4.041.05||

4.041.06a to̱ke hi̱te tana̍ya u̱rvarā̍su̱ sūro̱ dṛśī̍ke̱ vṛṣa̍ṇaś ca̱ pauṁsye̍ |
4.041.06c indrā̍ no̱ atra̱ varu̍ṇā syātā̱m avo̍bhir da̱smā pari̍takmyāyām ||

to̱ke | hi̱te | tana̍ye | u̱rvarā̍su | sūra̍ḥ | dṛśī̍ke | vṛṣa̍ṇaḥ | ca̱ | pauṁsye̍ |
indrā̍ | na̱ḥ | atra̍ | varu̍ṇā | syā̱tā̱m | ava̍ḥ-bhiḥ | da̱smā | pari̍-takmyāyām ||4.041.06||

4.041.07a yu̱vām id dhy ava̍se pū̱rvyāya̱ pari̱ prabhū̍tī ga̱viṣa̍ḥ svāpī |
4.041.07c vṛ̱ṇī̱mahe̍ sa̱khyāya̍ pri̱yāya̱ śūrā̱ maṁhi̍ṣṭhā pi̱tare̍va śa̱mbhū ||

yu̱vām | it | hi | ava̍se | pū̱rvyāya̍ | pari̍ | prabhū̍tī̱ iti̱ pra-bhū̍tī | go̱-iṣa̍ḥ | svā̱pī̱ iti̍ su-āpī |
vṛ̱ṇī̱mahe̍ | sa̱khyāya̍ | pri̱yāya̍ | śūrā̍ | maṁhi̍ṣṭhā | pi̱tarā̍-iva | śa̱mbhū iti̍ śa̱m-bhū ||4.041.07||

4.041.08a tā vā̱ṁ dhiyo 'va̍se vāja̱yantī̍r ā̱jiṁ na ja̍gmur yuva̱yūḥ su̍dānū |
4.041.08c śri̱ye na gāva̱ upa̱ soma̍m asthu̱r indra̱ṁ giro̱ varu̍ṇam me manī̱ṣāḥ ||

tāḥ | vā̱m | dhiya̍ḥ | ava̍se | vā̱ja̱-yantī̍ḥ | ā̱jim | na | ja̱mu̱ḥ | yu̱va̱-yūḥ | su̱dā̱nū̱ iti̍ su-dānū |
śri̱ye | na | gāva̍ḥ | upa̍ | soma̍m | a̱sthu̱ḥ | indra̍m | gira̍ḥ | varu̍ṇam | me̱ | ma̱nī̱ṣāḥ ||4.041.08||

4.041.09a i̱mā indra̱ṁ varu̍ṇam me manī̱ṣā agma̱nn upa̱ dravi̍ṇam i̱cchamā̍nāḥ |
4.041.09c upe̍m asthur jo̱ṣṭāra̍ iva̱ vasvo̍ ra̱ghvīr i̍va̱ śrava̍so̱ bhikṣa̍māṇāḥ ||

i̱māḥ | indra̍m | varu̍ṇam | me̱ | ma̱nī̱ṣāḥ | agma̍n | upa̍ | dravi̍ṇam | i̱cchamā̍nāḥ |
upa̍ | ī̱m | a̱sthu̱ḥ | jo̱ṣṭāra̍ḥ-iva | vasva̍ḥ | ra̱ghvīḥ-i̍va | śrava̍saḥ | bhikṣa̍māṇāḥ ||4.041.09||

4.041.10a aśvya̍sya̱ tmanā̱ rathya̍sya pu̱ṣṭer nitya̍sya rā̱yaḥ pata̍yaḥ syāma |
4.041.10c tā ca̍krā̱ṇā ū̱tibhi̱r navya̍sībhir asma̱trā rāyo̍ ni̱yuta̍ḥ sacantām ||

aśvya̍sya | tmanā̍ | rathya̍sya | pu̱ṣṭeḥ | nitya̍sya | rā̱yaḥ | pata̍yaḥ | syā̱ma̱ |
tā | ca̱krā̱ṇau | ū̱ti-bhi̍ḥ | navya̍sībhiḥ | a̱sma̱-trā | rāya̍ḥ | ni̱-yuta̍ḥ | sa̱ca̱ntā̱m ||4.041.10||

4.041.11a ā no̍ bṛhantā bṛha̱tībhi̍r ū̱tī indra̍ yā̱taṁ va̍ruṇa̱ vāja̍sātau |
4.041.11c yad di̱dyava̱ḥ pṛta̍nāsu pra̱krīḻā̱n tasya̍ vāṁ syāma sani̱tāra̍ ā̱jeḥ ||

ā | na̱ḥ | bṛ̱ha̱ntā̱ | bṛ̱ha̱tībhi̍ḥ | ū̱tī | indra̍ | yā̱tam | va̱ru̱ṇa̱ | vāja̍-sātau |
yat | di̱dyava̍ḥ | pṛta̍nāsu | pra̱-krīḻā̍n | tasya̍ | vām | syā̱ma̱ | sa̱ni̱tāra̍ḥ | o̱jaḥ ||4.041.11||


4.042.01a mama̍ dvi̱tā rā̱ṣṭraṁ kṣa̱triya̍sya vi̱śvāyo̱r viśve̍ a̱mṛtā̱ yathā̍ naḥ |
4.042.01c kratu̍ṁ sacante̱ varu̍ṇasya de̱vā rājā̍mi kṛ̱ṣṭer u̍pa̱masya̍ va̱vreḥ ||

mama̍ | dvi̱tā | rā̱ṣṭram | kṣa̱triya̍sya | vi̱śva-ā̍yoḥ | viśve̍ | a̱mṛtā̍ḥ | yathā̍ | na̱ḥ |
kratu̍m | sa̱ca̱nte̱ | varu̍ṇasya | de̱vāḥ | rājā̍mi | kṛ̱ṣṭeḥ | u̱pa̱masya̍ | va̱vreḥ ||4.042.01||

4.042.02a a̱haṁ rājā̱ varu̍ṇo̱ mahya̱ṁ tāny a̍su̱ryā̍ṇi pratha̱mā dhā̍rayanta |
4.042.02c kratu̍ṁ sacante̱ varu̍ṇasya de̱vā rājā̍mi kṛ̱ṣṭer u̍pa̱masya̍ va̱vreḥ ||

a̱ham | rājā̍ | varu̍ṇaḥ | mahya̍m | tāni̍ | a̱su̱ryā̍ṇi | pra̱tha̱mā | dhā̱ra̱ya̱nta̱ |
kratu̍m | sa̱ca̱nte̱ | varu̍ṇasya | de̱vāḥ | rājā̍mi | kṛ̱ṣṭeḥ | u̱pa̱masya̍ | va̱vreḥ ||4.042.02||

4.042.03a a̱ham indro̱ varu̍ṇa̱s te ma̍hi̱tvorvī ga̍bhī̱re raja̍sī su̱meke̍ |
4.042.03c tvaṣṭe̍va̱ viśvā̱ bhuva̍nāni vi̱dvān sam ai̍raya̱ṁ roda̍sī dhā̱raya̍ṁ ca ||

aham | indra̍ḥ | varu̍ṇaḥ | te iti̍ | ma̱hi̱-tvā | u̱rvī iti̍ | ga̱bhī̱re | raja̍sī̱ iti̍ | su̱meke̱ iti̍ su̱-meke̍ |
tvaṣṭā̍-iva | viśvā̍ | bhuva̍nāni | vi̱dvān | sam | ai̱ra̱ya̱m | roda̍sī̱ iti̍ | dhā̱raya̍m | ca̱ ||4.042.03||

4.042.04a a̱ham a̱po a̍pinvam u̱kṣamā̍ṇā dhā̱raya̱ṁ diva̱ṁ sada̍na ṛ̱tasya̍ |
4.042.04c ṛ̱tena̍ pu̱tro adi̍ter ṛ̱tāvo̱ta tri̱dhātu̍ prathaya̱d vi bhūma̍ ||

a̱ham | a̱paḥ | a̱pi̱nva̱m | u̱kṣamā̍ṇāḥ | dha̱raya̍m | diva̍m | sada̍ne | ṛ̱tasya̍ |
ṛ̱tena̍ | pu̱traḥ | adi̍teḥ | ṛ̱ta-vā̍ | u̱ta | tri̱-dhātu̍ | pra̱tha̱ya̱t | vi | bhūma̍ ||4.042.04||

4.042.05a māṁ nara̱ḥ svaśvā̍ vā̱jaya̍nto̱ māṁ vṛ̱tāḥ sa̱mara̍ṇe havante |
4.042.05c kṛ̱ṇomy ā̱jim ma̱ghavā̱ham indra̱ iya̍rmi re̱ṇum a̱bhibhū̍tyojāḥ ||

mām | nara̍ḥ | su̱-aśvā̍ḥ | vā̱ja-ya̍ntaḥ | mām | vṛ̱tāḥ | sa̱m-ara̍ṇe | ha̱va̱nte̱ |
kṛ̱ṇomi̍ | ā̱jim | ma̱gha-vā̍ | a̱ham | indra̍ḥ | iya̍rmi | re̱ṇum | a̱bhibhū̍ti-ojāḥ ||4.042.05||

4.042.06a a̱haṁ tā viśvā̍ cakara̱ṁ naki̍r mā̱ daivya̱ṁ saho̍ varate̱ apra̍tītam |
4.042.06c yan mā̱ somā̍so ma̱mada̱n yad u̱kthobhe bha̍yete̱ raja̍sī apā̱re ||

a̱ham | tā | viśvā̍ | ca̱ka̱ra̱m | naki̍ḥ | mā̱ | daivya̍m | saha̍ḥ | va̱ra̱te̱ | apra̍ti-itam |
yat | mā̱ | somā̍saḥ | ma̱mada̍n | yat | u̱kthā | u̱bhe iti̍ | bha̱ye̱te̱ iti̍ | raja̍sī̱ iti̍ | a̱pā̱re iti̍ ||4.042.06||

4.042.07a vi̱duṣ ṭe̱ viśvā̱ bhuva̍nāni̱ tasya̱ tā pra bra̍vīṣi̱ varu̍ṇāya vedhaḥ |
4.042.07c tvaṁ vṛ̱trāṇi̍ śṛṇviṣe jagha̱nvān tvaṁ vṛ̱tām̐ a̍riṇā indra̱ sindhū̍n ||

vi̱duḥ | te̱ | viśvā̍ | bhuva̍nāni | tasya̍ | tā | pra | bra̱vī̱ṣi̱ | varu̍ṇāya | ve̱dha̱ḥ |
tvam | vṛ̱trāṇi̍ | śṛ̱ṇvi̱ṣe̱ | ja̱gha̱nvān | tvam | vṛ̱tām | a̱ri̱ṇā̱ḥ | i̱ndra̱ | sindhū̍n ||4.042.07||

4.042.08a a̱smāka̱m atra̍ pi̱tara̱s ta ā̍san sa̱pta ṛṣa̍yo daurga̱he ba̱dhyamā̍ne |
4.042.08c ta āya̍janta tra̱sada̍syum asyā̱ indra̱ṁ na vṛ̍tra̱tura̍m ardhade̱vam ||

a̱smāka̍m | atra̍ | pi̱tara̍ḥ | te | ā̱sa̱n | sa̱pta | ṛṣa̍yaḥ | dau̱ḥ-ga̱he | ba̱dhyamā̍ne |
te | ā | a̱ya̱ja̱nta̱ | tra̱sada̍syum | a̱syā̱ḥ | indra̍m | na | vṛ̱tra̱-tura̍m | a̱rdha̱-de̱vam ||4.042.08||

4.042.09a pu̱ru̱kutsā̍nī̱ hi vā̱m adā̍śad dha̱vyebhi̍r indrāvaruṇā̱ namo̍bhiḥ |
4.042.09c athā̱ rājā̍naṁ tra̱sada̍syum asyā vṛtra̱haṇa̍ṁ dadathur ardhade̱vam ||

pu̱ru̱-kutsā̍nī | hi | vā̱m | adā̍śat | ha̱vyebhi̍ḥ | i̱ndrā̱va̱ru̱ṇā̱ | nama̍ḥ-bhiḥ |
atha̍ | rājā̍nam | tra̱sada̍syum | a̱syā̱ḥ | vṛ̱tra̱-hana̍m | da̱da̱thu̱ḥ | a̱rdha̱-de̱vam ||4.042.09||

4.042.10a rā̱yā va̱yaṁ sa̍sa̱vāṁso̍ madema ha̱vyena̍ de̱vā yava̍sena̱ gāva̍ḥ |
4.042.10c tāṁ dhe̱num i̍ndrāvaruṇā yu̱vaṁ no̍ vi̱śvāhā̍ dhatta̱m ana̍pasphurantīm ||

rā̱yāḥ | va̱yam | sa̱sa̱-vāṁsa̍ḥ | ma̱de̱ma̱ | ha̱vyena̍ | de̱vāḥ | yava̍sena | gāva̍ḥ |
tām | dhe̱num | i̱ndrā̱va̱ru̱ṇā̱ | yu̱vam | na̱ḥ | vi̱śvāhā̍ | dha̱tta̱m | ana̍pa-sphurantīm ||4.042.10||


4.043.01a ka u̍ śravat kata̱mo ya̱jñiyā̍nāṁ va̱ndāru̍ de̱vaḥ ka̍ta̱mo ju̍ṣāte |
4.043.01c kasye̱māṁ de̱vīm a̱mṛte̍ṣu̱ preṣṭhā̍ṁ hṛ̱di śre̍ṣāma suṣṭu̱tiṁ su̍ha̱vyām ||

kaḥ | ū̱m̐ iti̍ | śra̱va̱t | ka̱ta̱maḥ | ya̱jñiyā̍nām | va̱ndāru̍ | de̱vaḥ | ka̱ta̱maḥ | ju̱ṣā̱te̱ |
kasya̍ | i̱mām | de̱vīm | a̱mṛte̍ṣu | preṣṭhā̍m | hṛ̱di | śre̱ṣā̱ma̱ | su̱-stu̱tim | su̱-ha̱vyām ||4.043.01||

4.043.02a ko mṛ̍ḻāti kata̱ma āga̍miṣṭho de̱vānā̍m u kata̱maḥ śambha̍viṣṭhaḥ |
4.043.02c ratha̱ṁ kam ā̍hur dra̱vada̍śvam ā̱śuṁ yaṁ sūrya̍sya duhi̱tāvṛ̍ṇīta ||

kaḥ | mṛ̱ḻā̱ti̱ | ka̱ta̱maḥ | ā-ga̍miṣṭhaḥ | de̱vānā̍m | ū̱m̐ iti̍ | ka̱ta̱maḥ | śam-bha̍viṣṭhaḥ |
ratha̍m | kam | ā̱hu̱ḥ | dra̱vat-a̍śvam | ā̱śum | yam | sūrya̍sya | du̱hi̱tā | avṛ̍ṇīta ||4.043.02||

4.043.03a ma̱kṣū hi ṣmā̱ gaccha̍tha̱ īva̍to̱ dyūn indro̱ na śa̱ktim pari̍takmyāyām |
4.043.03c di̱va ājā̍tā di̱vyā su̍pa̱rṇā kayā̱ śacī̍nām bhavatha̱ḥ śaci̍ṣṭhā ||

ma̱kṣu | hi | sma̱ | gaccha̍thaḥ | īva̍taḥ | dyūn | indra̍ḥ | na | śa̱ktim | pari̍-takmyāyām |
di̱vaḥ | ā-jā̍tā | di̱vyā | su̱-pa̱rṇā | kayā̍ | śacī̍nām | bha̱va̱tha̱ḥ | śaci̍ṣṭhā ||4.043.03||

4.043.04a kā vā̍m bhū̱d upa̍māti̱ḥ kayā̍ na̱ āśvi̍nā gamatho hū̱yamā̍nā |
4.043.04c ko vā̍m ma̱haś ci̱t tyaja̍so a̱bhīka̍ uru̱ṣyata̍m mādhvī dasrā na ū̱tī ||

kā | vā̱m | bhū̱t | upa̍-mātiḥ | kayā̍ | na̱ḥ | ā | a̱śvi̱nā̱ | ga̱ma̱tha̱ḥ | hū̱yamā̍nā |
kaḥ | vā̱m | ma̱haḥ | ci̱t | tyaja̍saḥ | a̱bhīke̍ | u̱ru̱ṣyata̍m | mā̱dhvī̱ iti̍ | da̱srā̱ | na̱ḥ | ū̱tī ||4.043.04||

4.043.05a u̱ru vā̱ṁ ratha̱ḥ pari̍ nakṣati̱ dyām ā yat sa̍mu̱drād a̱bhi varta̍te vām |
4.043.05c madhvā̍ mādhvī̱ madhu̍ vām pruṣāya̱n yat sī̍ṁ vā̱m pṛkṣo̍ bhu̱raja̍nta pa̱kvāḥ ||

u̱ru | vā̱m | ratha̍ḥ | pari̍ | na̱kṣa̱ti̱ | dyām | ā | yat | sa̱mu̱drāt | a̱bhi | vara̍te | vā̱m |
madhvā̍ | mā̱dhvī̱ iti̍ | madhu̍ | vā̱m | pra\uṣā̱ya̱n | yat | sī̱m | vā̱m | pṛkṣa̍ḥ | bhu̱raja̍nta | pa̱kvāḥ ||4.043.05||

4.043.06a sindhu̍r ha vāṁ ra̱sayā̍ siñca̱d aśvā̍n ghṛ̱ṇā vayo̍ 'ru̱ṣāsa̱ḥ pari̍ gman |
4.043.06c tad ū̱ ṣu vā̍m aji̱raṁ ce̍ti̱ yāna̱ṁ yena̱ patī̱ bhava̍thaḥ sū̱ryāyā̍ḥ ||

sindhu̍ḥ | ha̱ | vā̱m | ra̱sayā̍ | si̱ñca̱t | aśvā̍n | ghṛ̱ṇā | vaya̍ḥ | a̱ru̱ṣāsa̍ḥ | pari̍ | gma̱n |
tat | ū̱m̐ iti̍ | su | vā̱m | a̱ji̱ram | ce̱ti̱ | yāna̍m | yena̍ | patī̱ iti̍ | bhava̍thaḥ | sū̱ryāyā̍ḥ ||4.043.06||

4.043.07a i̱heha̱ yad vā̍ṁ sama̱nā pa̍pṛ̱kṣe seyam a̱sme su̍ma̱tir vā̍jaratnā |
4.043.07c u̱ru̱ṣyata̍ṁ jari̱tāra̍ṁ yu̱vaṁ ha̍ śri̱taḥ kāmo̍ nāsatyā yuva̱drik ||

i̱ha-i̍ha | yat | vā̱m | sa̱ma̱nā | pa̱pṛ̱kṣe | sā | i̱yam | a̱sme iti̍ | su̱-ma̱tiḥ | vā̱ja̱-ra̱tnā̱ |
u̱ru̱ṣyata̍m | ja̱ri̱tāra̍m | yu̱vam | ha̱ | śri̱taḥ | kāma̍ḥ | nā̱sa̱tyā̱ | yu̱va̱drik ||4.043.07||


4.044.01a taṁ vā̱ṁ ratha̍ṁ va̱yam a̱dyā hu̍vema pṛthu̱jraya̍m aśvinā̱ saṁga̍ti̱ṁ goḥ |
4.044.01c yaḥ sū̱ryāṁ vaha̍ti vandhurā̱yur girvā̍hasam puru̱tama̍ṁ vasū̱yum ||

tam | vā̱m | ratha̍m | va̱yam | a̱dya | hu̱ve̱ma̱ | pṛ̱thu̱-jraya̍m | a̱śvi̱nā̱ | sam-ga̍tim | goḥ |
yaḥ | sū̱ryām | vaha̍ti | va̱ndhu̱ra̱-yuḥ | girvā̍hasam | pu̱ru̱-tama̍m | va̱su̱-yum ||4.044.01||

4.044.02a yu̱vaṁ śriya̍m aśvinā de̱vatā̱ tāṁ divo̍ napātā vanatha̱ḥ śacī̍bhiḥ |
4.044.02c yu̱vor vapu̍r a̱bhi pṛkṣa̍ḥ sacante̱ vaha̍nti̱ yat ka̍ku̱hāso̱ rathe̍ vām ||

yu̱vam | śriya̍m | a̱śvi̱nā̱ | de̱vatā̍ | tān | diva̍ḥ | na̱pā̱tā̱ | va̱na̱tha̱ḥ | śacī̍bhiḥ |
yu̱voḥ | vapu̍ḥ | a̱bhi | pṛkṣa̍ḥ | sa̱ca̱nte̱ | vaha̍nti | yat | ka̱ku̱hāsa̍ḥ | rathe̍ | vā̱m ||4.044.02||

4.044.03a ko vā̍m a̱dyā ka̍rate rā̱taha̍vya ū̱taye̍ vā suta̱peyā̍ya vā̱rkaiḥ |
4.044.03c ṛ̱tasya̍ vā va̱nuṣe̍ pū̱rvyāya̱ namo̍ yemā̱no a̍śvi̱nā va̍vartat ||

kaḥ | vā̱m | a̱dya | kā̱ra̱te̱ | rā̱ta-ha̍vyaḥ | ū̱taye̍ | vā̱ | su̱ta̱-peyā̍ya | vā̱ | a̱rkaiḥ |
ṛ̱tasya̍ | vā̱ | va̱nuṣe̍ | pū̱rvyāya̍ | nama̍ḥ | ye̱mā̱naḥ | a̱śvi̱nā̱ | ā | va̱va̱rta̱t ||4.044.03||

4.044.04a hi̱ra̱ṇyaye̍na purubhū̱ rathe̍ne̱maṁ ya̱jñaṁ nā̍sa̱tyopa̍ yātam |
4.044.04c pibā̍tha̱ in madhu̍naḥ so̱myasya̱ dadha̍tho̱ ratna̍ṁ vidha̱te janā̍ya ||

hi̱ra̱ṇyaye̍na | pu̱ru̱bhū̱ iti̍ puru-bhū | rathe̍na | i̱mam | ya̱jñam | nā̱sa̱tyā̱ | upa̍ | yā̱ta̱m |
pibā̍thaḥ | it | madhu̍naḥ | so̱myasya̍ | dadha̍thaḥ | ratna̍m | vi̱dha̱te | janā̍ya ||4.044.04||

4.044.05a ā no̍ yātaṁ di̱vo acchā̍ pṛthi̱vyā hi̍ra̱ṇyaye̍na su̱vṛtā̱ rathe̍na |
4.044.05c mā vā̍m a̱nye ni ya̍man deva̱yanta̱ḥ saṁ yad da̱de nābhi̍ḥ pū̱rvyā vā̍m ||

ā | na̱ḥ | yā̱ta̱m | di̱vaḥ | accha̍ | pṛ̱thi̱vyāḥ | hi̱ra̱ṇyaye̍na | su̱-vṛtā̍ | rathe̍na |
mā | vā̱m | a̱nye | ni | ya̱ma̱n | de̱va̱-yanta̍ḥ | sam | yat | da̱de | nābhi̍ḥ | pū̱rvyā | vā̱m ||4.044.05||

4.044.06a nū no̍ ra̱yim pu̍ru̱vīra̍m bṛ̱hanta̱ṁ dasrā̱ mimā̍thām u̱bhaye̍ṣv a̱sme |
4.044.06c naro̱ yad vā̍m aśvinā̱ stoma̱m āva̍n sa̱dhastu̍tim ājamī̱ḻhāso̍ agman ||

nu | na̱ḥ | ra̱yim | pu̱ru̱-vīra̍m | bṛ̱hanta̍m | da̱srā̱ | mimā̍thām | u̱bhaye̍ṣu | a̱sme iti̍ |
nara̍ḥ | yat | vā̱m | a̱śvi̱nā̱ | stoma̍m | āva̍n | sa̱dha-stu̍tim | ā̱ja̱-mī̱ḻhāsa̍ḥ | a̱gma̱n ||4.044.06||

4.044.07a i̱heha̱ yad vā̍ṁ sama̱nā pa̍pṛ̱kṣe seyam a̱sme su̍ma̱tir vā̍jaratnā |
4.044.07c u̱ru̱ṣyata̍ṁ jari̱tāra̍ṁ yu̱vaṁ ha̍ śri̱taḥ kāmo̍ nāsatyā yuva̱drik ||

i̱ha-i̍ha | yat | vā̱m | sa̱ma̱nā | pa̱pṛ̱kṣe | sā | i̱yam | a̱sme iti̍ | su̱-ma̱tiḥ | vā̱ja̱-ra̱tnā̱ |
u̱ru̱ṣyata̍m | ja̱ri̱tāra̍m | yu̱vam | ha̱ | śri̱taḥ | kāma̍ḥ | nā̱sa̱tyā̱ | yu̱va̱drik ||4.044.07||


4.045.01a e̱ṣa sya bhā̱nur ud i̍yarti yu̱jyate̱ ratha̱ḥ pari̍jmā di̱vo a̱sya sāna̍vi |
4.045.01c pṛ̱kṣāso̍ asmin mithu̱nā adhi̱ trayo̱ dṛti̍s tu̱rīyo̱ madhu̍no̱ vi ra̍pśate ||

e̱ṣaḥ | syaḥ | bhā̱nuḥ | ut | i̱ya̱rti̱ | yu̱jyate̍ | ratha̍ḥ | pari̍-jmā | di̱vaḥ | a̱sya | sāna̍vi |
pṛ̱kṣāsa̍ḥ | a̱smi̱n | mi̱thu̱nāḥ | adhi̍ | traya̍ḥ | dṛti̍ḥ | tu̱rīya̍ḥ | madhu̍naḥ | vi | ra̱pśa̱te̱ ||4.045.01||

4.045.02a ud vā̍m pṛ̱kṣāso̱ madhu̍manta īrate̱ rathā̱ aśvā̍sa u̱ṣaso̱ vyu̍ṣṭiṣu |
4.045.02c a̱po̱rṇu̱vanta̱s tama̱ ā parī̍vṛta̱ṁ sva1̱̍r ṇa śu̱kraṁ ta̱nvanta̱ ā raja̍ḥ ||

ut | vā̱m | pṛ̱kṣāsa̍ḥ | madhu̍-mantaḥ | ī̱ra̱te̱ | rathā̍ḥ | aśvā̍saḥ | u̱ṣasa̍ḥ | vi-u̍ṣṭiṣu |
a̱pa̱-ū̱rṇu̱vanta̍ḥ | tanma̍ḥ | ā | pari̍-vṛtam | sva̍ḥ | na | śu̱kram | ta̱nvanta̍ḥ | ā | raja̍ḥ ||4.045.02||

4.045.03a madhva̍ḥ pibatam madhu̱pebhi̍r ā̱sabhi̍r u̱ta pri̱yam madhu̍ne yuñjāthā̱ṁ ratha̍m |
4.045.03c ā va̍rta̱nim madhu̍nā jinvathas pa̱tho dṛti̍ṁ vahethe̱ madhu̍mantam aśvinā ||

madhva̍ḥ | pi̱ba̱ta̱m | ma̱dhu̱-pebhi̍ḥ | ā̱sa-bhi̍ḥ | u̱ta | pri̱yam | madhu̍ne | yu̱ñjā̱thā̱m | ratha̍m |
ā | va̱ra̱nim | madhu̍nā | ji̱nva̱tha̱ḥ | pa̱thaḥ | dṛti̍m | va̱he̱the̱ iti̍ | madhu̍-mantam | a̱śvi̱nā̱ ||4.045.03||

4.045.04a ha̱ṁsāso̱ ye vā̱m madhu̍manto a̱sridho̱ hira̍ṇyaparṇā u̱huva̍ uṣa̱rbudha̍ḥ |
4.045.04c u̱da̱pruto̍ ma̱ndino̍ mandini̱spṛśo̱ madhvo̱ na makṣa̱ḥ sava̍nāni gacchathaḥ ||

ha̱ṁsāsa̍ḥ | ye | vā̱m | madhu̍-manta̍ḥ | a̱sridha̍ḥ | hira̍ṇya-parṇāḥ | u̱huva̍ḥ | u̱ṣa̱ḥ-budha̍ḥ |
u̱da̱-pruta̍ḥ | ma̱ndina̍ḥ | ma̱ndi̱-ni̱spṛśa̍ḥ | madhva̍ḥ | na | makṣa̍ḥ | sava̍nāni | ga̱ccha̱tha̱ḥ ||4.045.04||

4.045.05a sva̱dhva̱rāso̱ madhu̍manto a̱gnaya̍ u̱srā ja̍rante̱ prati̱ vasto̍r a̱śvinā̍ |
4.045.05c yan ni̱ktaha̍stas ta̱raṇi̍r vicakṣa̱ṇaḥ soma̍ṁ su̱ṣāva̱ madhu̍manta̱m adri̍bhiḥ ||

su̱-a̱dha̱rāsa̍ḥ | madhu̍-mantaḥ | a̱gnaya̍ḥ | u̱srā | ja̱ra̱nte̱ | prati̍ | vasto̍ḥ | a̱śvinā̍ |
yat | ni̱kta-ha̍staḥ | ta̱raṇi̍ḥ | vi̱-ca̱kṣa̱ṇaḥ | soma̍m | su̱sāva̍ | madhu̍-mantam | adri̍-bhiḥ ||4.045.05||

4.045.06a ā̱ke̱ni̱pāso̱ aha̍bhi̱r davi̍dhvata̱ḥ sva1̱̍r ṇa śu̱kraṁ ta̱nvanta̱ ā raja̍ḥ |
4.045.06c sūra̍ś ci̱d aśvā̍n yuyujā̱na ī̍yate̱ viśvā̱m̐ anu̍ sva̱dhayā̍ cetathas pa̱thaḥ ||

ā̱ke̱-ni̱pāsa̍ḥ | aha̍-bhiḥ | davi̍dhvataḥ | sva̍ḥ | na | śu̱kram | ta̱nvanta̍ḥ | ā | raja̍ḥ |
sūra̍ḥ | ci̱t | aśvā̍n | yu̱yu̱jā̱naḥ | ī̱ya̱te̱ | viśvā̍n | anu̍ | sva̱dhayā̍ | ce̱ta̱tha̱ḥ | pa̱thaḥ ||4.045.06||

4.045.07a pra vā̍m avocam aśvinā dhiya̱ṁdhā ratha̱ḥ svaśvo̍ a̱jaro̱ yo asti̍ |
4.045.07c yena̍ sa̱dyaḥ pari̱ rajā̍ṁsi yā̱tho ha̱viṣma̍ntaṁ ta̱raṇi̍m bho̱jam accha̍ ||

pra | vā̱m | a̱vo̱ca̱m | a̱śvi̱nā̱ | dhi̱ya̱m-dhāḥ | ratha̍ḥ | su̱-aśva̍ḥ | a̱jara̍ḥ | yaḥ | asti̍ |
yena̍ | sa̱dyaḥ | pari̍ | rajā̍ṁsi | yā̱thaḥ | ha̱viṣma̍ntam | ta̱raṇi̍m | bho̱jam | accha̍ ||4.045.07||


4.046.01a agra̍m pibā̱ madhū̍nāṁ su̱taṁ vā̍yo̱ divi̍ṣṭiṣu |
4.046.01c tvaṁ hi pū̍rva̱pā asi̍ ||

agra̍m | pi̱ba̱ | madhū̍nām | su̱tam | va̱yo̱ iti̍ | divi̍ṣṭiṣu |
tvam | hi | pū̱rva̱-pāḥ | asi̍ ||4.046.01||

4.046.02a śa̱tenā̍ no a̱bhiṣṭi̍bhir ni̱yutvā̱m̐ indra̍sārathiḥ |
4.046.02c vāyo̍ su̱tasya̍ tṛmpatam ||

śa̱tena̍ | na̱ḥ | a̱bhiṣṭi̍-bhiḥ | ni̱yutvā̍n | indra̍-sārathiḥ |
vāyo̱ iti̍ | su̱tasya̍ | tṛ̱mpa̱ta̱m ||4.046.02||

4.046.03a ā vā̍ṁ sa̱hasra̱ṁ hara̍ya̱ indra̍vāyū a̱bhi praya̍ḥ |
4.046.03c vaha̍ntu̱ soma̍pītaye ||

ā | vā̱m | sa̱hasra̍m | hara̍yaḥ | indra̍vāyū̱ iti̍ | a̱bhi | praya̍ḥ |
vaha̍ntu | soma̍-pītaye ||4.046.03||

4.046.04a ratha̱ṁ hira̍ṇyavandhura̱m indra̍vāyū svadhva̱ram |
4.046.04c ā hi sthātho̍ divi̱spṛśa̍m ||

ratha̍m | hira̍ṇya-vandhuram | indra̍vāyū̱ iti̍ | su̱-a̱dhva̱ram |
ā | hi | sthātha̍ḥ | di̱vi̱-spṛśa̍m ||4.046.04||

4.046.05a rathe̍na pṛthu̱pāja̍sā dā̱śvāṁsa̱m upa̍ gacchatam |
4.046.05c indra̍vāyū i̱hā ga̍tam ||

rathe̍na | pṛ̱thu̱-pāja̍sā | dā̱śvāṁsa̍m | upa̍ | ga̱ccha̱ta̱m |
indra̍vāyū̱ iti̍ | i̱ha | ā | ga̱ta̱m ||4.046.05||

4.046.06a indra̍vāyū a̱yaṁ su̱tas taṁ de̱vebhi̍ḥ sa̱joṣa̍sā |
4.046.06c piba̍taṁ dā̱śuṣo̍ gṛ̱he ||

indra̍vāyū̱ iti̍ | a̱yam | su̱taḥ | tam | de̱vebhi̍ḥ | sa̱-joṣa̍sā |
piba̍tam | dā̱śuṣa̍ḥ | gṛ̱he ||4.046.06||

4.046.07a i̱ha pra̱yāṇa̍m astu vā̱m indra̍vāyū vi̱moca̍nam |
4.046.07c i̱ha vā̱ṁ soma̍pītaye ||

i̱ha | pra̱-yāna̍m | a̱stu̱ | vā̱m | indra̍vāyū̱ iti̍ | vi̱-moca̍nam |
i̱ha | vā̱m | soma̍-pītaye ||4.046.07||


4.047.01a vāyo̍ śu̱kro a̍yāmi te̱ madhvo̱ agra̱ṁ divi̍ṣṭiṣu |
4.047.01c ā yā̍hi̱ soma̍pītaye spā̱rho de̍va ni̱yutva̍tā ||

vāyo̱ iti̍ | śu̱kraḥ | a̱yā̱mi̱ | te̱ | madhva̍ḥ | agra̍m | divi̍ṣṭiṣu |
ā | yā̱hi̱ | soma̍-pītaye | spā̱rhaḥ | de̱va̱ | ni̱yutva̍tā ||4.047.01||

4.047.02a indra̍ś ca vāyav eṣā̱ṁ somā̍nām pī̱tim a̍rhathaḥ |
4.047.02c yu̱vāṁ hi yantīnda̍vo ni̱mnam āpo̱ na sa̱dhrya̍k ||

indra̍ḥ | ca̱ | vā̱yo̱ iti̍ | e̱ṣā̱m | somā̍nām | pī̱tim | a̱rha̱tha̱ḥ |
yu̱vām | hi | yanti̍ | inda̍vaḥ | ni̱mnam | āpa̍ḥ | na | sa̱dhrya̍k ||4.047.02||

4.047.03a vāya̱v indra̍ś ca śu̱ṣmiṇā̍ sa̱ratha̍ṁ śavasas patī |
4.047.03c ni̱yutva̍ntā na ū̱taya̱ ā yā̍ta̱ṁ soma̍pītaye ||

vāyo̱ iti̍ | indra̍ḥ | ca̱ | śu̱ṣmiṇā̍ | sa̱-ratha̍m | śa̱va̱sa̱ḥ | pa̱tī̱ iti̍ |
ni̱yutva̍ntā | na̱ḥ | ū̱taye̍ | ā | yā̱ta̱m | soma̍-pītaye ||4.047.03||

4.047.04a yā vā̱ṁ santi̍ puru̱spṛho̍ ni̱yuto̍ dā̱śuṣe̍ narā |
4.047.04c a̱sme tā ya̍jñavāha̱sendra̍vāyū̱ ni ya̍cchatam ||

yāḥ | vā̱m | santi̍ | pu̱ru̱-spṛha̍ḥ | ni̱-yuta̍ḥ | dā̱śuṣe̍ | na̱rā̱ |
a̱sme iti̍ | tāḥ | ya̱jña̱-vā̱ha̱sā̱ | indra̍vāyū̱ iti̍ | ni | ya̱ccha̱ta̱m ||4.047.04||


4.048.01a vi̱hi hotrā̱ avī̍tā̱ vipo̱ na rāyo̍ a̱ryaḥ |
4.048.01c vāya̱v ā ca̱ndreṇa̱ rathe̍na yā̱hi su̱tasya̍ pī̱taye̍ ||

vi̱hi | hotrā̍ | avī̍tāḥ | vipa̍ḥ | na | rāya̍ḥ | a̱ryaḥ |
vāyo̱ iti̍ | ā | ca̱ndreṇe̍ | rathe̍na | yā̱hi | su̱tasya̍ | pī̱taye̍ ||4.048.01||

4.048.02a ni̱ryu̱vā̱ṇo aśa̍stīr ni̱yutvā̱m̐ indra̍sārathiḥ |
4.048.02c vāya̱v ā ca̱ndreṇa̱ rathe̍na yā̱hi su̱tasya̍ pī̱taye̍ ||

ni̱ḥ-yu̱vā̱naḥ | aśa̍stīḥ | ni̱yutvā̍n | indra̍-sārathiḥ |
vāyo̱ iti̍ | ā | ca̱ndreṇe̍ | rathe̍na | yā̱hi | su̱tasya̍ | pī̱taye̍ ||4.048.02||

4.048.03a anu̍ kṛ̱ṣṇe vasu̍dhitī ye̱māte̍ vi̱śvape̍śasā |
4.048.03c vāya̱v ā ca̱ndreṇa̱ rathe̍na yā̱hi su̱tasya̍ pī̱taye̍ ||

anu̍ | kṛ̱ṣṇe | vasu̍dhitī̱ iti̱ vasu̍-dhitī | ye̱māte̱ iti̍ | vi̱śva-pe̍śasā |
vāyo̱ iti̍ | ā | ca̱ndreṇe̍ | rathe̍na | yā̱hi | su̱tasya̍ | pī̱taye̍ ||4.048.03||

4.048.04a vaha̍ntu tvā mano̱yujo̍ yu̱ktāso̍ nava̱tir nava̍ |
4.048.04c vāya̱v ā ca̱ndreṇa̱ rathe̍na yā̱hi su̱tasya̍ pī̱taye̍ ||

vaha̍ntu | tvā̱ | ma̱na̱ḥ-yuja̍ḥ | yu̱ktāsa̍ḥ | na̱va̱tiḥ | nava̍ |
vāyo̱ iti̍ | ā | ca̱ndreṇe̍ | rathe̍na | yā̱hi | su̱tasya̍ | pī̱taye̍ ||4.048.04||

4.048.05a vāyo̍ śa̱taṁ harī̍ṇāṁ yu̱vasva̱ poṣyā̍ṇām |
4.048.05c u̱ta vā̍ te saha̱sriṇo̱ ratha̱ ā yā̍tu̱ pāja̍sā ||

vāyo̱ iti̍ | śa̱tam | harī̍ṇām | yu̱vasva̍ | poṣyā̍ṇām |
u̱ta | vā̱ | te̱ | sa̱ha̱sriṇa̍ḥ | ratha̍ḥ | ā | yā̱tu̱ | pāja̍sā ||4.048.05||


4.049.01a i̱daṁ vā̍m ā̱sye̍ ha̱viḥ pri̱yam i̍ndrābṛhaspatī |
4.049.01c u̱ktham mada̍ś ca śasyate ||

i̱dam | vā̱m | ā̱sye̍ | ha̱viḥ | pri̱yam | i̱ndrā̱bṛ̱ha̱spa̱tī̱ iti̍ |
u̱ktham | mada̍ḥ | ca̱ | śa̱sya̱te̱ ||4.049.01||

4.049.02a a̱yaṁ vā̱m pari̍ ṣicyate̱ soma̍ indrābṛhaspatī |
4.049.02c cāru̱r madā̍ya pī̱taye̍ ||

a̱yam | vā̱m | pari̍ | si̱cya̱te̱ | soma̍ḥ | i̱ndrā̱bṛ̱ha̱spa̱tī̱ iti̍ |
cāru̱ḥ | madā̍ya | pī̱taye̍ ||4.049.02||

4.049.03a ā na̍ indrābṛhaspatī gṛ̱ham indra̍ś ca gacchatam |
4.049.03c so̱ma̱pā soma̍pītaye ||

ā | na̱ḥ | i̱ndrā̱bṛ̱ha̱spa̱tī̱ iti̍ | gṛ̱ham | indra̍ḥ | ca̱ | ga̱ccha̱ta̱m |
so̱ma̱-pā | soma̍-pītaye ||4.049.03||

4.049.04a a̱sme i̍ndrābṛhaspatī ra̱yiṁ dha̍ttaṁ śata̱gvina̍m |
4.049.04c aśvā̍vantaṁ saha̱sriṇa̍m ||

a̱sme iti̍ | i̱ndrā̱bṛ̱ha̱spa̱tī̱ iti̍ | ra̱yim | dha̱tta̱m | śa̱ta̱-gvina̍m |
aśva̍-vantam | sa̱ha̱sriṇa̍m ||4.049.04||

4.049.05a indrā̱bṛha̱spatī̍ va̱yaṁ su̱te gī̱rbhir ha̍vāmahe |
4.049.05c a̱sya soma̍sya pī̱taye̍ ||

indrā̱bṛha̱spatī̱ iti̍ | va̱yam | su̱te | gī̱ḥ-bhiḥ | ha̱vā̱ma̱he̱ |
a̱sya | soma̍sya | pī̱taye̍ ||4.049.05||

4.049.06a soma̍m indrābṛhaspatī̱ piba̍taṁ dā̱śuṣo̍ gṛ̱he |
4.049.06c mā̱daye̍thā̱ṁ tado̍kasā ||

soma̍m | i̱ndrā̱bṛ̱ha̱spa̱tī̱ iti̍ | piba̍tam | dā̱śuṣa̍ḥ | gṛ̱he |
mā̱daye̍thām | tat-o̍kasā ||4.049.06||


4.050.01a yas ta̱stambha̱ saha̍sā̱ vi jmo antā̱n bṛha̱spati̍s triṣadha̱stho rave̍ṇa |
4.050.01c tam pra̱tnāsa̱ ṛṣa̍yo̱ dīdhyā̍nāḥ pu̱ro viprā̍ dadhire ma̱ndraji̍hvam ||

yaḥ | ta̱stambha̍ | saha̍sā | vi | jmaḥ | antā̍n | bṛha̱spati̍ḥ | tri̱-sa̱dha̱sthaḥ | rave̍ṇa |
tam | pra̱tnāsa̍ḥ | ṛṣa̍yaḥ | dīdhyā̍nāḥ | pu̱raḥ | viprā̍ḥ | da̱dhi̱re̱ | ma̱ndra-ji̍hvam ||4.050.01||

4.050.02a dhu̱neta̍yaḥ suprake̱tam mada̍nto̱ bṛha̍spate a̱bhi ye na̍s tata̱sre |
4.050.02c pṛṣa̍ntaṁ sṛ̱pram ada̍bdham ū̱rvam bṛha̍spate̱ rakṣa̍tād asya̱ yoni̍m ||

dhu̱na-i̍tayaḥ | su̱-pra̱ke̱tam | mada̍ntaḥ | bṛha̍spate | a̱bhi | ye | na̱ḥ | ta̱ta̱sre |
pṛṣa̍ntam | sṛ̱pram | ada̍bdham | ū̱rvam | bṛha̍spate | rakṣa̍tāt | a̱sya̱ | yoni̍m ||4.050.02||

4.050.03a bṛha̍spate̱ yā pa̍ra̱mā pa̍rā̱vad ata̱ ā ta̍ ṛta̱spṛśo̱ ni ṣe̍duḥ |
4.050.03c tubhya̍ṁ khā̱tā a̍va̱tā adri̍dugdhā̱ madhva̍ḥ ścotanty a̱bhito̍ vira̱pśam ||

bṛha̍spate | yā | pa̱ra̱mā | pa̱rā̱-vat | ata̍ḥ | ā | te̱ | ṛ̱ta̱-spṛśa̍ḥ | ni | se̱du̱ḥ |
tubhya̍m | khā̱tāḥ | a̱va̱tāḥ | adri̍-dugdhāḥ | madhva̍ḥ | śco̱ta̱nti̱ | a̱bhita̍ḥ | vi̱-ra̱pśam ||4.050.03||

4.050.04a bṛha̱spati̍ḥ pratha̱maṁ jāya̍māno ma̱ho jyoti̍ṣaḥ para̱me vyo̍man |
4.050.04c sa̱ptāsya̍s tuvijā̱to rave̍ṇa̱ vi sa̱ptara̍śmir adhama̱t tamā̍ṁsi ||

bṛha̱spati̍ḥ | pra̱tha̱mam | jāya̍mānaḥ | ma̱haḥ | jyoti̍ṣaḥ | pa̱ra̱me | vi-o̍man |
sa̱pta-ā̍syaḥ | tu̱vi̱-jā̱taḥ | rave̍ṇa | vi | sa̱pta-ra̍śmiḥ | a̱dha̱ma̱t | tamā̍ṁsi ||4.050.04||

4.050.05a sa su̱ṣṭubhā̱ sa ṛkva̍tā ga̱ṇena̍ va̱laṁ ru̍roja phali̱gaṁ rave̍ṇa |
4.050.05c bṛha̱spati̍r u̱sriyā̍ havya̱sūda̱ḥ kani̍krada̱d vāva̍śatī̱r ud ā̍jat ||

saḥ | su̱-stubhā | saḥ | ṛkva̍tā | ga̱ṇena̍ | va̱lam | ru̱ro̱ja̱ | pha̱li̱-gam | rave̍ṇa |
bṛha̱spati̍ḥ | u̱sriyā̍ḥ | ha̱vya̱-sūda̍ḥ | kani̍kradat | vāva̍śatīḥ | ut | ā̱ja̱t ||4.050.05||

4.050.06a e̱vā pi̱tre vi̱śvade̍vāya̱ vṛṣṇe̍ ya̱jñair vi̍dhema̱ nama̍sā ha̱virbhi̍ḥ |
4.050.06c bṛha̍spate supra̱jā vī̱rava̍nto va̱yaṁ syā̍ma̱ pata̍yo rayī̱ṇām ||

e̱va | pi̱tre | vi̱śva-de̍vāya | vṛṣṇe̍ | ya̱jñaiḥ | vi̱dhe̱ma̱ | nama̍sā | ha̱viḥ-bhi̍ḥ |
bṛha̍spate | su̱-pra̱jāḥ | vī̱ra-va̍ntaḥ | va̱yam | syā̱ma̱ | pata̍yaḥ | ra̱yī̱ṇām ||4.050.06||

4.050.07a sa id rājā̱ prati̍janyāni̱ viśvā̱ śuṣme̍ṇa tasthāv a̱bhi vī̱rye̍ṇa |
4.050.07c bṛha̱spati̱ṁ yaḥ subhṛ̍tam bi̱bharti̍ valgū̱yati̱ vanda̍te pūrva̱bhāja̍m ||

saḥ | it | rājā̍ | prati̍-janyāni | viśvā̍ | śuṣme̍ṇa | ta̱sthau̱ | a̱bhi | vī̱rye̍ṇa |
bṛha̱spati̍m | yaḥ | su-bhṛ̍tam | bi̱bharti̍ | va̱lgu̱-yati̍ | vanda̍te | pū̱rva̱-bhāja̍m ||4.050.07||

4.050.08a sa it kṣe̍ti̱ sudhi̍ta̱ oka̍si̱ sve tasmā̱ iḻā̍ pinvate viśva̱dānī̍m |
4.050.08c tasmai̱ viśa̍ḥ sva̱yam e̱vā na̍mante̱ yasmi̍n bra̱hmā rāja̍ni̱ pūrva̱ eti̍ ||

saḥ | it | kṣe̱ti̱ | su-dhi̍taḥ | oka̍si | sve | tasmai̍ | iḻā̍ | pi̱nva̱te̱ | vi̱śva̱-dānī̍m |
tasmai̍ | viśa̍ḥ | sva̱yam | e̱va | na̱ma̱nte̱ | yasmi̍n | bra̱hmā | rāja̍ni | pūrva̍ḥ | eti̍ ||4.050.08||

4.050.09a apra̍tīto jayati̱ saṁ dhanā̍ni̱ prati̍janyāny u̱ta yā saja̍nyā |
4.050.09c a̱va̱syave̱ yo vari̍vaḥ kṛ̱ṇoti̍ bra̱hmaṇe̱ rājā̱ tam a̍vanti de̱vāḥ ||

apra̍ti-itaḥ | ja̱ya̱ti̱ | sam | dhanā̍ni | prati̍-janyāni | u̱ta | yā | sa-ja̍nyā |
a̱va̱syave̍ | yaḥ | vari̍vaḥ | kṛ̱ṇoti̍ | bra̱hmaṇe̍ | rājā̍ | tam | a̱va̱nti̱ | de̱vāḥ ||4.050.09||

4.050.10a indra̍ś ca̱ soma̍m pibatam bṛhaspate̱ 'smin ya̱jñe ma̍ndasā̱nā vṛ̍ṣaṇvasū |
4.050.10c ā vā̍ṁ viśa̱ntv inda̍vaḥ svā̱bhuvo̱ 'sme ra̱yiṁ sarva̍vīra̱ṁ ni ya̍cchatam ||

indra̍ḥ | ca̱ | soma̍m | pi̱ba̱ta̱m | bṛ̱ha̱spa̱te̱ | a̱smin | ya̱jñe | ma̱nda̱sā̱nā | vṛ̱ṣa̱ṇva̱sū̱ iti̍ vṛṣaṇ-vasū |
ā | vā̱m | vi̱śa̱ntu̱ | inda̍vaḥ | su̱-ā̱bhuva̍ḥ | a̱sme iti̍ | ra̱yim | sarva̍-vīram | ni | ya̱ccha̱ta̱m ||4.050.10||

4.050.11a bṛha̍spata indra̱ vardha̍taṁ na̱ḥ sacā̱ sā vā̍ṁ suma̱tir bhū̍tv a̱sme |
4.050.11c a̱vi̱ṣṭaṁ dhiyo̍ jigṛ̱tam pura̍ṁdhīr jaja̱stam a̱ryo va̱nuṣā̱m arā̍tīḥ ||

bṛha̍spate | i̱ndra̱ | vardha̍tam | na̱ḥ | sacā̍ | sā | vā̱m | su̱-ma̱tiḥ | bhū̱tu̱ | a̱sme iti̍ |
a̱vi̱ṣṭam | dhiya̍ḥ | ji̱gṛ̱tam | pura̍m-dhīḥ | ja̱ja̱stam | a̱ryaḥ | va̱nuṣā̍m | arā̍tīḥ ||4.050.11||


4.051.01a i̱dam u̱ tyat pu̍ru̱tama̍m pu̱rastā̱j jyoti̱s tama̍so va̱yunā̍vad asthāt |
4.051.01c nū̱naṁ di̱vo du̍hi̱taro̍ vibhā̱tīr gā̱tuṁ kṛ̍ṇavann u̱ṣaso̱ janā̍ya ||

i̱dam | ū̱m̐ iti̍ | tyat | pu̱ru̱-tama̍m | pu̱rastā̍t | jyoti̍ḥ | tama̍saḥ | va̱yuna̍-vat | a̱sthā̱t |
nū̱nam | di̱vaḥ | du̱hi̱tara̍ḥ | vi̱-bhā̱tīḥ | gā̱tum | kṛ̱ṇa̱va̱n | u̱ṣasa̍ḥ | janā̍ya ||4.051.01||

4.051.02a asthu̍r u ci̱trā u̱ṣasa̍ḥ pu̱rastā̍n mi̱tā i̍va̱ svara̍vo 'dhva̱reṣu̍ |
4.051.02c vy ū̍ vra̱jasya̱ tama̍so̱ dvāro̱cchantī̍r avra̱ñ chuca̍yaḥ pāva̱kāḥ ||

asthu̍ḥ | ū̱m̐ iti̍ | ci̱trāḥ | u̱ṣasa̍ḥ | pu̱rastā̍t | mi̱tāḥ-i̍va | svara̍vaḥ | a̱dhva̱reṣu̍ |
vi | ū̱m̐ iti̍ | vra̱jasya̍ | tama̍saḥ | dvārā̍ | u̱cchantī̍ḥ | a̱vra̱n | śuca̍yaḥ | pāva̱kāḥ ||4.051.02||

4.051.03a u̱cchantī̍r a̱dya ci̍tayanta bho̱jān rā̍dho̱deyā̍yo̱ṣaso̍ ma̱ghonī̍ḥ |
4.051.03c a̱ci̱tre a̱ntaḥ pa̱ṇaya̍ḥ sasa̱ntv abu̍dhyamānā̱s tama̍so̱ vima̍dhye ||

u̱cchantī̍ḥ | a̱dya | ci̱ta̱ya̱nta̱ | bho̱jān | rā̱dha̱ḥ-deyā̍ya | u̱ṣasa̍ḥ | ma̱ghonī̍ḥ |
a̱ci̱tre | a̱ntariti̍ | pa̱ṇaya̍ḥ | sa̱sa̱ntu̱ | abu̍dhyamānāḥ | tama̍saḥ | vi-ma̍dhye ||4.051.03||

4.051.04a ku̱vit sa de̍vīḥ sa̱nayo̱ navo̍ vā̱ yāmo̍ babhū̱yād u̍ṣaso vo a̱dya |
4.051.04c yenā̱ nava̍gve̱ aṅgi̍re̱ daśa̍gve sa̱ptāsye̍ revatī re̱vad ū̱ṣa ||

ku̱vit | saḥ | de̱vī̱ḥ | sa̱naya̍ḥ | nava̍ḥ | vā̱ | yāma̍ḥ | ba̱bhū̱yāt | u̱ṣa̱sa̱ḥ | va̱ḥ | a̱dya |
yena̍ | nava̍-gve | aṅgi̍re | daśa̍-gve | sa̱pta-ā̍sye | re̱va̱tī̱ḥ | re̱vat | ū̱ṣa ||4.051.04||

4.051.05a yū̱yaṁ hi de̍vīr ṛta̱yugbhi̱r aśvai̍ḥ pariprayā̱tha bhuva̍nāni sa̱dyaḥ |
4.051.05c pra̱bo̱dhaya̍ntīr uṣasaḥ sa̱santa̍ṁ dvi̱pāc catu̍ṣpāc ca̱rathā̍ya jī̱vam ||

yū̱yam | hi | de̱vī̱ḥ | ṛ̱ta̱yuk-bhi̍ḥ | aśvai̍ḥ | pa̱ri̱-pra̱yā̱tha | bhuva̍nāni | sa̱dyaḥ |
pra̱-bo̱dhaya̍ntīḥ | u̱ṣa̱sa̱ḥ | sa̱santa̍m | dvi̱-pāt | catu̍ḥ-pāt | ca̱rathā̍ya | jī̱vam ||4.051.05||

4.051.06a kva̍ svid āsāṁ kata̱mā pu̍rā̱ṇī yayā̍ vi̱dhānā̍ vida̱dhur ṛ̍bhū̱ṇām |
4.051.06c śubha̱ṁ yac chu̱bhrā u̱ṣasa̱ś cara̍nti̱ na vi jñā̍yante sa̱dṛśī̍r aju̱ryāḥ ||

kva̍ | svit | ā̱sā̱m | ka̱ta̱mā | pu̱rā̱ṇī | yayā̍ | vi̱-dhānā̍ | vi̱-da̱dhuḥ | ṛ̱bhū̱ṇām |
śubha̍m | yat | śu̱bhrāḥ | u̱ṣasa̍ḥ | cara̍nti | na | vi | jñā̱ya̱nte̱ | sa̱-dṛśī̍ḥ | a̱ju̱ryāḥ ||4.051.06||

4.051.07a tā ghā̱ tā bha̱drā u̱ṣasa̍ḥ pu̱rāsu̍r abhi̱ṣṭidyu̍mnā ṛ̱tajā̍tasatyāḥ |
4.051.07c yāsv ī̍jā̱naḥ śa̍śamā̱na u̱kthaiḥ stu̱vañ chaṁsa̱n dravi̍ṇaṁ sa̱dya āpa̍ ||

tāḥ | gha̱ | tāḥ | bha̱drāḥ | u̱ṣasa̍ḥ | pu̱rā | ā̱su̱ḥ | a̱bhi̱ṣṭi-dyu̍mnāḥ | ṛ̱tajā̍ta-satyāḥ |
yāsu̍ | ī̱jā̱naḥ | śa̱śa̱mā̱naḥ | u̱kthaiḥ | stu̱van | śaṁsa̍n | dravi̍ṇam | sa̱dyaḥ | āpa̍ ||4.051.07||

4.051.08a tā ā ca̍ranti sama̱nā pu̱rastā̍t samā̱nata̍ḥ sama̱nā pa̍prathā̱nāḥ |
4.051.08c ṛ̱tasya̍ de̱vīḥ sada̍so budhā̱nā gavā̱ṁ na sargā̍ u̱ṣaso̍ jarante ||

tāḥ | ā | ca̱ra̱nti̱ | sa̱ma̱nā | pu̱rastā̍t | sa̱mā̱nata̍ḥ | sa̱ma̱nā | pa̱pra̱thā̱nāḥ |
ṛ̱tasya̍ | de̱vīḥ | sada̍saḥ | bu̱dhā̱nāḥ | gavā̍m | na | sargā̍ḥ | u̱ṣasa̍ḥ | ja̱ra̱nte̱ ||4.051.08||

4.051.09a tā in nv e̱3̱̍va sa̍ma̱nā sa̍mā̱nīr amī̍tavarṇā u̱ṣasa̍ś caranti |
4.051.09c gūha̍ntī̱r abhva̱m asi̍ta̱ṁ ruśa̍dbhiḥ śu̱krās ta̱nūbhi̱ḥ śuca̍yo rucā̱nāḥ ||

tāḥ | it | nu | e̱va | sa̱ma̱nā | sa̱mā̱nīḥ | amī̍ta-varṇāḥ | u̱ṣasa̍ḥ | ca̱ra̱nti̱ |
gūha̍ntīḥ | abhva̍m | asi̍tam | ruśa̍t-bhiḥ | śu̱krāḥ | ta̱nūbhi̍ḥ | śuca̍yaḥ | ru̱cā̱nāḥ ||4.051.09||

4.051.10a ra̱yiṁ di̍vo duhitaro vibhā̱tīḥ pra̱jāva̍ntaṁ yacchatā̱smāsu̍ devīḥ |
4.051.10c syo̱nād ā va̍ḥ prati̱budhya̍mānāḥ su̱vīrya̍sya̱ pata̍yaḥ syāma ||

ra̱yim | di̱va̱ḥ | du̱hi̱ta̱ra̱ḥ | vi̱-bhā̱tīḥ | pra̱jā-va̍ntam | ya̱ccha̱ta̱ | a̱smāsu̍ | de̱vī̱ḥ |
syo̱nāt | ā | va̱ḥ | pra̱ti̱-budhya̍mānāḥ | su̱-vīrya̍sya | pata̍yaḥ | syā̱ma̱ ||4.051.10||

4.051.11a tad vo̍ divo duhitaro vibhā̱tīr upa̍ bruva uṣaso ya̱jñake̍tuḥ |
4.051.11c va̱yaṁ syā̍ma ya̱śaso̱ jane̍ṣu̱ tad dyauś ca̍ dha̱ttām pṛ̍thi̱vī ca̍ de̱vī ||

tat | va̱ḥ | di̱va̱ḥ | du̱hi̱ta̱ra̱ḥ | vi̱-bhā̱tīḥ | upa̍ | bru̱ve̱ | u̱ṣa̱sa̱ḥ | ya̱jña-ke̍tuḥ |
va̱yam | syā̱ma̱ | ya̱śasa̍ḥ | jane̍ṣu | tat | dyauḥ | ca̱ | dha̱ttām | pṛ̱thi̱vī | ca̱ | de̱vī ||4.051.11||


4.052.01a prati̱ ṣyā sū̱narī̱ janī̍ vyu̱cchantī̱ pari̱ svasu̍ḥ |
4.052.01c di̱vo a̍darśi duhi̱tā ||

prati̍ | syā | sū̱narī̍ | janī̍ | vi̱-u̱cchantī̍ | pari̍ | svasu̍ḥ |
di̱vaḥ | a̱da̱rśi̱ | du̱hi̱tā ||4.052.01||

4.052.02a aśve̍va ci̱trāru̍ṣī mā̱tā gavā̍m ṛ̱tāva̍rī |
4.052.02c sakhā̍bhūd a̱śvino̍r u̱ṣāḥ ||

aśvā̍-iva | ci̱trā | aru̍ṣī | mā̱tā | gavā̍m | ṛ̱ta-va̍rī |
sakhā̍ | a̱bhū̱t | a̱śvino̍ḥ | u̱ṣāḥ ||4.052.02||

4.052.03a u̱ta sakhā̍sy a̱śvino̍r u̱ta mā̱tā gavā̍m asi |
4.052.03c u̱toṣo̱ vasva̍ īśiṣe ||

u̱ta | sakhā̍ | a̱si̱ | a̱śvino̍ḥ | u̱ta | mā̱tā | gavā̍m | a̱si̱ |
u̱ta | u̱ṣa̱ḥ | vasva̍ḥ | ī̱śi̱ṣe̱ ||4.052.03||

4.052.04a yā̱va̱yaddve̍ṣasaṁ tvā ciki̱tvit sū̍nṛtāvari |
4.052.04c prati̱ stomai̍r abhutsmahi ||

yā̱va̱yat-dve̍ṣasam | tvā̱ | ci̱ki̱tvit | sū̱nṛ̱tā̱-va̱ri̱ |
prati̍ | stomai̍ḥ | a̱bhu̱tsma̱hi̱ ||4.052.04||

4.052.05a prati̍ bha̱drā a̍dṛkṣata̱ gavā̱ṁ sargā̱ na ra̱śmaya̍ḥ |
4.052.05c oṣā a̍prā u̱ru jraya̍ḥ ||

prati̍ | bha̱drāḥ | a̱dṛ̱kṣa̱ta̱ | gavā̍m | sargā̍ḥ | na | ra̱śmaya̍ḥ |
ā | u̱ṣāḥ | a̱prā̱ḥ | u̱ru | jraya̍ḥ ||4.052.05||

4.052.06a ā̱pa̱pruṣī̍ vibhāvari̱ vy ā̍va̱r jyoti̍ṣā̱ tama̍ḥ |
4.052.06c uṣo̱ anu̍ sva̱dhām a̍va ||

ā̱pa̱pruṣī̍ | vi̱bhā̱-va̱ri̱ | vi | ā̱va̱ḥ | jyoti̍ṣā | tama̍ḥ |
uṣa̍ḥ | anu̍ | sva̱dhām | a̱va̱ ||4.052.06||

4.052.07a ā dyāṁ ta̍noṣi ra̱śmibhi̱r āntari̍kṣam u̱ru pri̱yam |
4.052.07c uṣa̍ḥ śu̱kreṇa̍ śo̱ciṣā̍ ||

ā | dyām | ta̱no̱ṣi̱ | ra̱śmi-bhi̍ḥ | ā | a̱ntari̍kṣam | u̱ru | pri̱yam |
uṣa̍ḥ | śu̱kreṇa̍ | śo̱ciṣā̍ ||4.052.07||


4.053.01a tad de̱vasya̍ savi̱tur vārya̍m ma̱had vṛ̍ṇī̱mahe̱ asu̍rasya̱ prace̍tasaḥ |
4.053.01c cha̱rdir yena̍ dā̱śuṣe̱ yaccha̍ti̱ tmanā̱ tan no̍ ma̱hām̐ ud a̍yān de̱vo a̱ktubhi̍ḥ ||

tat | de̱vasya̍ | sa̱vi̱tuḥ | vārya̍m | ma̱hat | vṛ̱ṇī̱mahe̍ | asu̍rasya | prace̍tasaḥ |
cha̱rdiḥ | yena̍ | dā̱śuṣe̍ | yaccha̍ti | tmanā̍ | tat | na̱ḥ | ma̱hān | ut | a̱yā̱n | de̱vaḥ | a̱ktu-bhi̍ḥ ||4.053.01||

4.053.02a di̱vo dha̱rtā bhuva̍nasya pra̱jāpa̍tiḥ pi̱śaṅga̍ṁ drā̱pim prati̍ muñcate ka̱viḥ |
4.053.02c vi̱ca̱kṣa̱ṇaḥ pra̱thaya̍nn āpṛ̱ṇann u̱rv ajī̍janat savi̱tā su̱mnam u̱kthya̍m ||

di̱vaḥ | dha̱rtā | bhuva̍nasya | pra̱jā-pa̍tiḥ | pi̱śaṅga̍m | drā̱pim | prati̍ | mu̱ñca̱te̱ | ka̱viḥ |
vi̱-ca̱kṣa̱ṇaḥ | pra̱thaya̍n | ā̱-pṛ̱ṇan | u̱ru | ajī̍janat | sa̱vi̱tā | su̱mnam | u̱kthya̍m ||4.053.02||

4.053.03a āprā̱ rajā̍ṁsi di̱vyāni̱ pārthi̍vā̱ śloka̍ṁ de̱vaḥ kṛ̍ṇute̱ svāya̱ dharma̍ṇe |
4.053.03c pra bā̱hū a̍srāk savi̱tā savī̍mani nive̱śaya̍n prasu̱vann a̱ktubhi̱r jaga̍t ||

ā | a̱prā̱ḥ | rajā̍ṁsi | di̱vyāni̍ | pārthi̍vā | śloka̍m | de̱vaḥ | kṛ̱ṇu̱te̱ | svāya̍ | dharma̍ṇe |
pra | bā̱hū iti̍ | a̱srā̱k | sa̱vi̱tā | savī̍mani | ni̱-ve̱śaya̍n | pra̱-su̱van | a̱ktu-bhi̍ḥ | jaga̍t ||4.053.03||

4.053.04a adā̍bhyo̱ bhuva̍nāni pra̱cāka̍śad vra̱tāni̍ de̱vaḥ sa̍vi̱tābhi ra̍kṣate |
4.053.04c prāsrā̍g bā̱hū bhuva̍nasya pra̱jābhyo̍ dhṛ̱tavra̍to ma̱ho ajma̍sya rājati ||

adā̍bhyaḥ | bhuva̍nāni | pra̱-cāka̍śat | vra̱tāni̍ | de̱vaḥ | sa̱vi̱tā | a̱bhi | ra̱kṣa̱te̱ |
pra | a̱srā̱k | bā̱hū iti̍ | bhuva̍nasya | pra̱-jābhya̍ḥ | dhṛ̱ta-vra̍taḥ | ma̱haḥ | ajma̍sya | rā̱ja̱ti̱ ||4.053.04||

4.053.05a trir a̱ntari̍kṣaṁ savi̱tā ma̍hitva̱nā trī rajā̍ṁsi pari̱bhus trīṇi̍ roca̱nā |
4.053.05c ti̱sro diva̍ḥ pṛthi̱vīs ti̱sra i̍nvati tri̱bhir vra̱tair a̱bhi no̍ rakṣati̱ tmanā̍ ||

triḥ | a̱ntari̍kṣam | sa̱vi̱tā | ma̱hi̱-tva̱nā | trī | rajā̍ṁsi | pa̱ri̱-bhūḥ | trīṇi̍ | ro̱ca̱nā |
ti̱sraḥ | diva̍ḥ | pṛ̱thi̱vīḥ | ti̱sraḥ | i̱nva̱ti̱ | tri̱-bhiḥ | vra̱taiḥ | a̱bhi | na̱ḥ | ra̱kṣa̱ti̱ | tmanā̍ ||4.053.05||

4.053.06a bṛ̱hatsu̍mnaḥ prasavī̱tā ni̱veśa̍no̱ jaga̍taḥ sthā̱tur u̱bhaya̍sya̱ yo va̱śī |
4.053.06c sa no̍ de̱vaḥ sa̍vi̱tā śarma̍ yacchatv a̱sme kṣayā̍ya tri̱varū̍tha̱m aṁha̍saḥ ||

bṛ̱hat-su̍mnaḥ | pra̱-sa̱vi̱tā | ni̱-veśa̍naḥ | jaga̍taḥ | sthā̱tuḥ | u̱bhaya̍sya | yaḥ | va̱śī |
saḥ | na̱ḥ | de̱vaḥ | sa̱vi̱tā | śarma̍ | ya̱ccha̱tu̱ | a̱sme iti̍ | kṣayā̍ya | tri̱-varū̍tham | aṁha̍saḥ ||4.053.06||

4.053.07a āga̍n de̱va ṛ̱tubhi̱r vardha̍tu̱ kṣaya̱ṁ dadhā̍tu naḥ savi̱tā su̍pra̱jām iṣa̍m |
4.053.07c sa na̍ḥ kṣa̱pābhi̱r aha̍bhiś ca jinvatu pra̱jāva̍ntaṁ ra̱yim a̱sme sam i̍nvatu ||

ā | a̱ga̱n | de̱vaḥ | ṛ̱tu-bhi̍ḥ | vardha̍tu | kṣaya̍m | dadhā̍tu | na̱ḥ | sa̱vi̱tā | su̱-pra̱jām | iṣa̍m |
saḥ | na̱ḥ | kṣa̱pābhi̍ḥ | aha̍-bhiḥ | ca̱ | ji̱nva̱tu̱ | pra̱jā-va̍ntam | ra̱yim | a̱sme iti̍ | sam | i̱nva̱tu̱ ||4.053.07||


4.054.01a abhū̍d de̱vaḥ sa̍vi̱tā vandyo̱ nu na̍ i̱dānī̱m ahna̍ upa̱vācyo̱ nṛbhi̍ḥ |
4.054.01c vi yo ratnā̱ bhaja̍ti māna̱vebhya̱ḥ śreṣṭha̍ṁ no̱ atra̱ dravi̍ṇa̱ṁ yathā̱ dadha̍t ||

abhū̍t | de̱vaḥ | sa̱vi̱tā | vandya̍ḥ | nu | na̱ḥ | i̱dānī̍m | ahna̍ḥ | u̱pa̱-vācya̍ḥ | nṛ-bhi̍ḥ |
vi | yaḥ | ratnā̍ | bhaja̍ti | mā̱na̱vebhya̍ḥ | śreṣṭha̍m | na̱ḥ | atra̍ | dravi̍ṇam | yathā̍ | dadha̍t ||4.054.01||

4.054.02a de̱vebhyo̱ hi pra̍tha̱maṁ ya̱jñiye̍bhyo 'mṛta̱tvaṁ su̱vasi̍ bhā̱gam u̍tta̱mam |
4.054.02c ād id dā̱māna̍ṁ savita̱r vy ū̍rṇuṣe 'nūcī̱nā jī̍vi̱tā mānu̍ṣebhyaḥ ||

de̱vebhya̍ḥ | hi | pra̱tha̱mam | ya̱jñiye̍bhyaḥ | a̱mṛ̱ta̱-tvam | su̱vasi̍ | bhā̱gam | u̱t-ta̱mam |
āt | it | dā̱māna̍m | sa̱vi̱ta̱ḥ | vi | ū̱rṇu̱ṣe̱ | a̱nū̱cī̱nā | jī̱vi̱tā | mānu̍ṣebhyaḥ ||4.054.02||

4.054.03a aci̍ttī̱ yac ca̍kṛ̱mā daivye̱ jane̍ dī̱nair dakṣai̱ḥ prabhū̍tī pūruṣa̱tvatā̍ |
4.054.03c de̱veṣu̍ ca savita̱r mānu̍ṣeṣu ca̱ tvaṁ no̱ atra̍ suvatā̱d anā̍gasaḥ ||

aci̍ttī | yat | ca̱kṛ̱ma | daivye̍ | jane̍ | dī̱naiḥ | dakṣa̍ḥ | pra-bhū̍tī | pu̱ru̱ṣa̱tvatā̍ |
de̱veṣu̍ | ca̱ | sa̱vi̱ta̱ḥ | mānu̍ṣeṣu | ca̱ | tvam | na̱ḥ | atra̍ | su̱va̱tā̱t | anā̍gasaḥ ||4.054.03||

4.054.04a na pra̱miye̍ savi̱tur daivya̍sya̱ tad yathā̱ viśva̱m bhuva̍naṁ dhārayi̱ṣyati̍ |
4.054.04c yat pṛ̍thi̱vyā vari̍ma̱nn ā sva̍ṅgu̱rir varṣma̍n di̱vaḥ su̱vati̍ sa̱tyam a̍sya̱ tat ||

na | pra̱-miye̍ | sa̱vi̱tuḥ | daivya̍sya | tat | yathā̍ | viśva̍m | bhuva̍nam | dhā̱ra̱yi̱ṣyati̍ |
yat | pṛ̱thi̱vyāḥ | vari̍man | ā | su̱-a̱ṅgu̱riḥ | varṣma̍n | di̱vaḥ | su̱vati̍ | sa̱tyam | a̱sya̱ | tat ||4.054.04||

4.054.05a indra̍jyeṣṭhān bṛ̱hadbhya̱ḥ parva̍tebhya̱ḥ kṣayā̍m̐ ebhyaḥ suvasi pa̱styā̍vataḥ |
4.054.05c yathā̍-yathā pa̱taya̍nto viyemi̱ra e̱vaiva ta̍sthuḥ savitaḥ sa̱vāya̍ te ||

indra̍-jyeṣṭhān | bṛ̱hat-bhya̍ḥ | parva̍tebhya̍ḥ | kṣayā̍n | e̱bhya̱ḥ | su̱va̱si̱ | pa̱stya̍-vataḥ |
yathā̍-yathā | pa̱taya̍ntaḥ | vi̱-ye̱mi̱re | e̱va | e̱va | ta̱sthu̱ḥ | sa̱vi̱ta̱riti̍ | sa̱vāya̍ | te̱ ||4.054.05||

4.054.06a ye te̱ trir aha̍n savitaḥ sa̱vāso̍ di̱ve-di̍ve̱ saubha̍gam āsu̱vanti̍ |
4.054.06c indro̱ dyāvā̍pṛthi̱vī sindhu̍r a̱dbhir ā̍di̱tyair no̱ adi̍ti̱ḥ śarma̍ yaṁsat ||

ye | te̱ | triḥ | aha̍n | sa̱vi̱ta̱riti̍ | sa̱vāsa̍ḥ | di̱ve-di̍ve | saubha̍gam | ā̱-su̱vanti̍ |
indra̍ḥ | dyāvā̍pṛthi̱vī iti̍ | sindhu̍ḥ | a̱t-bhiḥ | ā̱di̱tyaiḥ | na̱ḥ | adi̍tiḥ | śarma̍ | ya̱ṁsa̱t ||4.054.06||


4.055.01a ko va̍s trā̱tā va̍sava̱ḥ ko va̍rū̱tā dyāvā̍bhūmī adite̱ trāsī̍thāṁ naḥ |
4.055.01c sahī̍yaso varuṇa mitra̱ martā̱t ko vo̍ 'dhva̱re vari̍vo dhāti devāḥ ||

kaḥ | va̱ḥ | trā̱tā | va̱sa̱va̱ḥ | kaḥ | va̱rū̱tā | dyāvā̍bhūmī̱ iti̍ | a̱di̱te̱ | trāsī̍thām | na̱ḥ |
sahī̍yasaḥ | va̱ru̱ṇa̱ | mi̱tra̱ | martā̍t | kaḥ | va̱ḥ | a̱dhva̱re | vari̍vaḥ | dhā̱ti̱ | de̱vā̱ḥ ||4.055.01||

4.055.02a pra ye dhāmā̍ni pū̱rvyāṇy arcā̱n vi yad u̱cchān vi̍yo̱tāro̱ amū̍rāḥ |
4.055.02c vi̱dhā̱tāro̱ vi te da̍dhu̱r aja̍srā ṛ̱tadhī̍tayo rurucanta da̱smāḥ ||

pra | ye | dhāmā̍ni | pū̱rvyāṇi̍ | arcā̍n | vi | yat | u̱cchān | vi̱-yo̱tāra̍ḥ | amū̍rāḥ |
vi̱-dhā̱tāra̍ḥ | vi | te | da̱dhu̱ḥ | aja̍srāḥ | ṛ̱ta-dhī̍tayaḥ | ru̱ru̱ca̱nta̱ | da̱smāḥ ||4.055.02||

4.055.03a pra pa̱styā̱3̱̍m adi̍ti̱ṁ sindhu̍m a̱rkaiḥ sva̱stim ī̍ḻe sa̱khyāya̍ de̱vīm |
4.055.03c u̱bhe yathā̍ no̱ aha̍nī ni̱pāta̍ u̱ṣāsā̱naktā̍ karatā̱m ada̍bdhe ||

pra | pa̱styā̍m | adi̍tim | sindhu̍m | a̱rkaiḥ | sva̱stim | ī̱ḻe̱ | sa̱khyāya̍ | de̱vīm |
u̱bhe iti̍ | yathā̍ | na̱ḥ | aha̍nī̱ iti̍ | ni̱-pāta̍ḥ | u̱ṣasā̱naktā̍ | ka̱ra̱tā̱m | ada̍bdhe̱ iti̍ ||4.055.03||

4.055.04a vy a̍rya̱mā varu̍ṇaś ceti̱ panthā̍m i̱ṣas pati̍ḥ suvi̱taṁ gā̱tum a̱gniḥ |
4.055.04c indrā̍viṣṇū nṛ̱vad u̱ ṣu stavā̍nā̱ śarma̍ no yanta̱m ama̍va̱d varū̍tham ||

vi | a̱rya̱mā | varu̍ṇaḥ | ce̱ti̱ | panthā̍m | i̱ṣaḥ | pati̍ḥ | su̱vi̱tam | gā̱tum | a̱gniḥ |
indrā̍viṣṇū̱ iti̍ | nṛ̱-vat | ū̱m̐ iti̍ | su | stavā̍nā | śarma̍ | na̱ḥ | ya̱nta̱m | ama̍-vat | varū̍tham ||4.055.04||

4.055.05a ā parva̍tasya ma̱rutā̱m avā̍ṁsi de̱vasya̍ trā̱tur a̍vri̱ bhaga̍sya |
4.055.05c pāt pati̱r janyā̱d aṁha̍so no mi̱tro mi̱triyā̍d u̱ta na̍ uruṣyet ||

ā | parva̍tasya | ma̱rutā̍m | avā̍ṁsi | de̱vasya̍ | trā̱tuḥ | a̱vri̱ | bhaga̍sya |
pāt | pati̍ḥ | janyā̍t | aṁha̍saḥ | na̱ḥ | mi̱traḥ | mi̱triyā̍t | u̱ta | na̱ḥ | u̱ru̱ṣye̱t ||4.055.05||

4.055.06a nū ro̍dasī̱ ahi̍nā bu̱dhnye̍na stuvī̱ta de̍vī̱ apye̍bhir i̱ṣṭaiḥ |
4.055.06c sa̱mu̱draṁ na sa̱ṁcara̍ṇe sani̱ṣyavo̍ gha̱rmasva̍raso na̱dyo̱3̱̍ apa̍ vran ||

nu | ro̱da̱sī̱ iti̍ | ahi̍nā | bu̱dhnye̍na | stu̱vī̱ta | de̱vī̱ iti̍ | apye̍bhiḥ | i̱ṣṭaiḥ |
sa̱mu̱dram | na | sa̱m-cara̍ṇe | sa̱ni̱ṣyava̍ḥ | gha̱rma-sva̍rasaḥ | na̱dya̍ḥ | apa̍ | vra̱n ||4.055.06||

4.055.07a de̱vair no̍ de̱vy adi̍ti̱r ni pā̍tu de̱vas trā̱tā trā̍yatā̱m apra̍yucchan |
4.055.07c na̱hi mi̱trasya̱ varu̍ṇasya dhā̱sim arhā̍masi pra̱miya̱ṁ sānv a̱gneḥ ||

de̱vaiḥ | na̱ḥ | de̱vī | adi̍tiḥ | ni | pā̱tu̱ | de̱vaḥ | trā̱tā | trā̱ya̱tā̱m | apra̍-yucchan |
na̱hi | mi̱trasya̍ | varu̍ṇasya | dhā̱sim | arhā̍masi | pra̱-miya̍m | sānu̍ | a̱gneḥ ||4.055.07||

4.055.08a a̱gnir ī̍śe vasa̱vya̍syā̱gnir ma̱haḥ saubha̍gasya |
4.055.08c tāny a̱smabhya̍ṁ rāsate ||

a̱gniḥ | ī̱śe̱ | va̱sa̱vya̍sya | a̱gniḥ | ma̱haḥ | saubha̍gasya |
tāni̍ | a̱smabhya̍m | rā̱sa̱te̱ ||4.055.08||

4.055.09a uṣo̍ magho̱ny ā va̍ha̱ sūnṛ̍te̱ vāryā̍ pu̱ru |
4.055.09c a̱smabhya̍ṁ vājinīvati ||

uṣa̍ḥ | ma̱gho̱ni̱ | ā | va̱ha̱ | sūnṛ̍te | vāryā̍ | pu̱ru |
a̱smabhya̍m | vā̱ji̱nī̱-va̱ti̱ ||4.055.09||

4.055.10a tat su na̍ḥ savi̱tā bhago̱ varu̍ṇo mi̱tro a̍rya̱mā |
4.055.10c indro̍ no̱ rādha̱sā ga̍mat ||

tat | su | na̱ḥ | sa̱vi̱tā | bhaga̍ḥ | varu̍ṇaḥ | mi̱traḥ | a̱rya̱mā |
indra̍ḥ | na̱ḥ | rādha̍sā | ā | ga̱ma̱t ||4.055.10||


4.056.01a ma̱hī dyāvā̍pṛthi̱vī i̱ha jyeṣṭhe̍ ru̱cā bha̍vatāṁ śu̱caya̍dbhir a̱rkaiḥ |
4.056.01c yat sī̱ṁ vari̍ṣṭhe bṛha̱tī vi̍mi̱nvan ru̱vad dho̱kṣā pa̍prathā̱nebhi̱r evai̍ḥ ||

ma̱hī | dyāvā̍pṛthi̱vī iti̍ | i̱ha | jyeṣṭhe̱ iti̍ | ru̱cā | bha̱va̱tā̱m | śu̱caya̍t-bhiḥ | a̱rkaiḥ |
yat | sī̱m | vari̍ṣṭhe̱ iti̍ | bṛ̱ha̱tī iti̍ | vi̱-mi̱nvan | ru̱vat | ha̱ | u̱kṣā | pa̱pra̱thā̱nebhi̍ḥ | evai̍ḥ ||4.056.01||

4.056.02a de̱vī de̱vebhi̍r yaja̱te yaja̍trai̱r ami̍natī tasthatur u̱kṣamā̍ṇe |
4.056.02c ṛ̱tāva̍rī a̱druhā̍ de̱vapu̍tre ya̱jñasya̍ ne̱trī śu̱caya̍dbhir a̱rkaiḥ ||

de̱vī iti̍ | de̱vebhi̍ḥ | ya̱ja̱te iti̍ | yaja̍traiḥ | ami̍natī̱ iti̍ | ta̱stha̱tu̱ḥ | u̱kṣamā̍ṇe̱ iti̍ |
ṛ̱tava̍rī̱ ityṛ̱ta-va̍rī | a̱druhā̍ | de̱vapu̍tre̱ iti̍ de̱va-pu̍tre | ya̱jñasya̍ | ne̱trī iti̍ | śu̱caya̍t-bhiḥ | a̱rkaiḥ ||4.056.02||

4.056.03a sa it svapā̱ bhuva̍neṣv āsa̱ ya i̱me dyāvā̍pṛthi̱vī ja̱jāna̍ |
4.056.03c u̱rvī ga̍bhī̱re raja̍sī su̱meke̍ ava̱ṁśe dhīra̱ḥ śacyā̱ sam ai̍rat ||

saḥ | it | su̱-apā̍ḥ | bhuva̍neṣu | ā̱sa̱ | yaḥ | i̱me iti̍ | dyāvā̍pṛthi̱vī iti̍ | ja̱jāna̍ |
u̱rvī iti̍ | ga̱bhī̱re iti̍ | raja̍sī̱ iti̍ | su̱meke̱ iti̍ su̱-meke̍ | a̱va̱ṁśe | dhīra̍ḥ | śacyā̍ | sam | ai̱ra̱t ||4.056.03||

4.056.04a nū ro̍dasī bṛ̱hadbhi̍r no̱ varū̍thai̱ḥ patnī̍vadbhir i̱ṣaya̍ntī sa̱joṣā̍ḥ |
4.056.04c u̱rū̱cī viśve̍ yaja̱te ni pā̍taṁ dhi̱yā syā̍ma ra̱thya̍ḥ sadā̱sāḥ ||

nu | ro̱da̱sī̱ iti̍ | bṛ̱hat-bhi̍ḥ | na̱ḥ | varū̍thaiḥ | patnī̍vat-bhiḥ | i̱ṣaya̍ntī̱ iti̍ | sa̱-joṣā̍ḥ |
u̱rū̱cī iti̍ | viśve̱ iti̍ | yā̱ja̱te iti̍ | ni | pā̱ta̱m | dhi̱yā | syā̱ma̱ | ra̱thya̍ḥ | sa̱dā̱-sāḥ ||4.056.04||

4.056.05a pra vā̱m mahi̱ dyavī̍ a̱bhy upa̍stutim bharāmahe |
4.056.05c śucī̱ upa̱ praśa̍staye ||

pra | vā̱m | mahi̍ | dyavī̱ iti̍ | a̱bhi | upa̍-stutim | bha̱rā̱ma̱he̱ |
śucī̱ iti̍ | upa̍ | pra-śa̍staye ||4.056.05||

4.056.06a pu̱nā̱ne ta̱nvā̍ mi̱thaḥ svena̱ dakṣe̍ṇa rājathaḥ |
4.056.06c ū̱hyāthe̍ sa̱nād ṛ̱tam ||

pu̱nā̱ne iti̍ | ta̱nvā̍ | mi̱thaḥ | svena̍ | dakṣe̍ṇa | rā̱ja̱tha̱ḥ |
ū̱hyāthe̱ iti̍ | sa̱nāt | ṛ̱tam ||4.056.06||

4.056.07a ma̱hī mi̱trasya̍ sādhatha̱s tara̍ntī̱ pipra̍tī ṛ̱tam |
4.056.07c pari̍ ya̱jñaṁ ni ṣe̍dathuḥ ||

ma̱hī iti̍ | mi̱trasya̍ | sā̱dha̱tha̱ḥ | tara̍ntī̱ iti̍ | pipra̍tī̱ iti̍ | ṛ̱tam |
pari̍ | ya̱jñam | ni | se̱da̱thu̱ḥ ||4.056.07||


4.057.01a kṣetra̍sya̱ pati̍nā va̱yaṁ hi̱tene̍va jayāmasi |
4.057.01c gām aśva̍m poṣayi̱tnv ā sa no̍ mṛḻātī̱dṛśe̍ ||

kṣetra̍sya | pati̍nā | va̱yam | hi̱tena̍-iva | ja̱yā̱ma̱si̱ |
gām | asva̍m | po̱ṣa̱yi̱tnu | ā | saḥ | na̱ḥ | mṛ̱ḻā̱ti̱ | ī̱dṛśe̍ ||4.057.01||

4.057.02a kṣetra̍sya pate̱ madhu̍mantam ū̱rmiṁ dhe̱nur i̍va̱ payo̍ a̱smāsu̍ dhukṣva |
4.057.02c ma̱dhu̱ścuta̍ṁ ghṛ̱tam i̍va̱ supū̍tam ṛ̱tasya̍ na̱ḥ pata̍yo mṛḻayantu ||

kṣetra̍sya | pa̱te̱ | madhu̍-mantam | ū̱rmim | dhe̱nuḥ-i̍va | paya̍ḥ | a̱smāsu̍ | dhu̱kṣva̱ |
ma̱dhu̱-ścuta̍m | ghṛ̱tam-i̍va | su-pū̍tam | ṛ̱tasya̍ | na̱ḥ | pata̍yaḥ | mṛ̱ḻa̱ya̱ntu̱ ||4.057.02||

4.057.03a madhu̍matī̱r oṣa̍dhī̱r dyāva̱ āpo̱ madhu̍man no bhavatv a̱ntari̍kṣam |
4.057.03c kṣetra̍sya̱ pati̱r madhu̍mān no a̱stv ari̍ṣyanto̱ anv e̍naṁ carema ||

madhu̍-matīḥ | oṣa̍dhīḥ | dyāva̍ḥ | āpa̍ḥ | madhu̍-mat | na̱ḥ | bha̱va̱tu̱ | a̱ntari̍kṣam |
kṣetra̍sya | pati̍ḥ | madhu̍-mān | na̱ḥ | a̱stu̱ | ari̍ṣyanta̍ḥ | anu̍ | e̱na̱m | ca̱re̱ma̱ ||4.057.03||

4.057.04a śu̱naṁ vā̱hāḥ śu̱naṁ nara̍ḥ śu̱naṁ kṛ̍ṣatu̱ lāṅga̍lam |
4.057.04c śu̱naṁ va̍ra̱trā ba̍dhyantāṁ śu̱nam aṣṭrā̱m ud i̍ṅgaya ||

śu̱nam | vā̱hāḥ | śu̱nam | nara̍ḥ | śu̱nam | kṛ̱ṣa̱tu̱ | lāṅga̍lam |
śu̱nam | va̱ra̱trāḥ | ba̱dhya̱ntā̱m | śu̱nam | aṣṭrā̍m | ut | i̱ṅga̱ya̱ ||4.057.04||

4.057.05a śunā̍sīrāv i̱māṁ vāca̍ṁ juṣethā̱ṁ yad di̱vi ca̱krathu̱ḥ paya̍ḥ |
4.057.05c tene̱mām upa̍ siñcatam ||

śunā̍sīrau | i̱mām | vāca̍m | ju̱ṣe̱thā̱m | yat | di̱vi | ca̱krathu̍ḥ | paya̍ḥ |
tena̍ | i̱mām | upa̍ | si̱ñca̱ta̱m ||4.057.05||

4.057.06a a̱rvācī̍ subhage bhava̱ sīte̱ vandā̍mahe tvā |
4.057.06c yathā̍ naḥ su̱bhagāsa̍si̱ yathā̍ naḥ su̱phalāsa̍si ||

a̱rvācī̍ | su̱-bha̱ge̱ | bha̱va̱ | sīte̍ | vandā̍mahe | tvā̱ |
yathā̍ | na̱ḥ | su̱-bhagā̍ | asa̍si | yathā̍ | na̱ḥ | su̱phalā̍ | asa̍si ||4.057.06||

4.057.07a indra̱ḥ sītā̱ṁ ni gṛ̍hṇātu̱ tām pū̱ṣānu̍ yacchatu |
4.057.07c sā na̱ḥ paya̍svatī duhā̱m utta̍rām-uttarā̱ṁ samā̍m ||

indra̍ḥ | sītā̍m | ni | gṛ̱hṇā̱tu̱ | tām | pū̱ṣā | anu̍ | ya̱ccha̱tu̱ |
sā | na̱ḥ | paya̍svatī | du̱hā̱m | utta̍rām-uttarām | samā̍m ||4.057.07||

4.057.08a śu̱naṁ na̱ḥ phālā̱ vi kṛ̍ṣantu̱ bhūmi̍ṁ śu̱naṁ kī̱nāśā̍ a̱bhi ya̍ntu vā̱haiḥ |
4.057.08c śu̱nam pa̱rjanyo̱ madhu̍nā̱ payo̍bhi̱ḥ śunā̍sīrā śu̱nam a̱smāsu̍ dhattam ||

śu̱nam | na̱ḥ | phālā̍ḥ | vi | kṛ̱ṣa̱ntu̱ | bhūmi̍m | śu̱nam | kī̱nāśā̍ḥ | a̱bhi | ya̱ntu̱ | vā̱haiḥ |
śu̱nam | pa̱rjanya̍ḥ | madhu̍nā | paya̍ḥ-bhiḥ | śunā̍sīrā | śu̱nam | a̱smāsu̍ | dha̱tta̱m ||4.057.08||


4.058.01a sa̱mu̱drād ū̱rmir madhu̍mā̱m̐ ud ā̍ra̱d upā̱ṁśunā̱ sam a̍mṛta̱tvam ā̍naṭ |
4.058.01c ghṛ̱tasya̱ nāma̱ guhya̱ṁ yad asti̍ ji̱hvā de̱vānā̍m a̱mṛta̍sya̱ nābhi̍ḥ ||

sa̱mu̱drāt | ū̱rmiḥ | madhu̍-mān | ut | ā̱ra̱t | upa̍ | a̱ṁśunā̍ | sam | a̱mṛ̱ta̱-tvam | ā̱na̱ṭ |
ghṛ̱tasya̍ | nāma̍ | guhya̍m | yat | asti̍ | ji̱hvā | de̱vānā̍m | a̱mṛta̍sya | nābhi̍ḥ ||4.058.01||

4.058.02a va̱yaṁ nāma̱ pra bra̍vāmā ghṛ̱tasyā̱smin ya̱jñe dhā̍rayāmā̱ namo̍bhiḥ |
4.058.02c upa̍ bra̱hmā śṛ̍ṇavac cha̱syamā̍na̱ṁ catu̍ḥśṛṅgo 'vamīd gau̱ra e̱tat ||

va̱yam | nāma̍ | pra | bra̱vā̱ma̱ | ghṛ̱tasya̍ | a̱smin | ya̱jñe | dhā̱ra̱yā̱ma̱ | nama̍ḥ-bhiḥ |
upa̍ | bra̱hmā | śṛ̱ṇa̱va̱t | śa̱syamā̍nam | catu̍ḥ-śṛṅgaḥ | a̱va̱mī̱t | gau̱raḥ | e̱tat ||4.058.02||

4.058.03a ca̱tvāri̱ śṛṅgā̱ trayo̍ asya̱ pādā̱ dve śī̱rṣe sa̱pta hastā̍so asya |
4.058.03c tridhā̍ ba̱ddho vṛ̍ṣa̱bho ro̍ravīti ma̱ho de̱vo martyā̱m̐ ā vi̍veśa ||

ca̱tvāri̍ | śṛṅgā̍ | traya̍ḥ | a̱sya̱ | pādā̍ḥ | dve iti̍ | śī̱rṣe iti̍ | sa̱pta | hastā̍saḥ | a̱sya̱ |
tridhā̍ | ba̱ddhaḥ | vṛ̱ṣa̱bhaḥ | ro̱ra̱vī̱ti̱ | ma̱haḥ | de̱vaḥ | martyā̍n | ā | vi̱ve̱śa̱ ||4.058.03||

4.058.04a tridhā̍ hi̱tam pa̱ṇibhi̍r gu̱hyamā̍na̱ṁ gavi̍ de̱vāso̍ ghṛ̱tam anv a̍vindan |
4.058.04c indra̱ eka̱ṁ sūrya̱ eka̍ṁ jajāna ve̱nād eka̍ṁ sva̱dhayā̱ niṣ ṭa̍takṣuḥ ||

tridhā̍ | hi̱tam | pa̱ṇi-bhi̍ḥ | gu̱hyamā̍nam | gavi̍ | de̱vāsa̍ḥ | ghṛ̱tam | anu̍ | a̱vi̱nda̱n |
indra̍ḥ | eka̍m | sūrya̍ḥ | eka̍m | ja̱jā̱na̱ | ve̱nāt | eka̍m | sva̱dhayā̍ | niḥ | ta̱ta̱kṣu̱ḥ ||4.058.04||

4.058.05a e̱tā a̍rṣanti̱ hṛdyā̍t samu̱drāc cha̱tavra̍jā ri̱puṇā̱ nāva̱cakṣe̍ |
4.058.05c ghṛ̱tasya̱ dhārā̍ a̱bhi cā̍kaśīmi hira̱ṇyayo̍ veta̱so madhya̍ āsām ||

e̱tāḥ | a̱rṣa̱nti̱ | hṛdyā̍t | sa̱mu̱drāt | śa̱ta-vra̍jāḥ | ri̱puṇā̍ | na | a̱va̱-cakṣe̍ |
ghṛ̱tasya̍ | dhārā̍ḥ | a̱bhi | cā̱ka̱sī̱mi̱ | hi̱ra̱ṇyaya̍ḥ | ve̱ta̱saḥ | madhye̍ | ā̱sā̱m ||4.058.05||

4.058.06a sa̱myak sra̍vanti sa̱rito̱ na dhenā̍ a̱ntar hṛ̱dā mana̍sā pū̱yamā̍nāḥ |
4.058.06c e̱te a̍rṣanty ū̱rmayo̍ ghṛ̱tasya̍ mṛ̱gā i̍va kṣipa̱ṇor īṣa̍māṇāḥ ||

sa̱myak | sra̱va̱nti̱ | sa̱rita̍ḥ | na | dhenā̍ḥ | a̱ntaḥ | hṛ̱dā | mana̍sā | pū̱yamā̍nāḥ |
e̱te | a̱rṣa̱nti̱ | ū̱rmaya̍ḥ | ghṛ̱tasya̍ | mṛ̱gāḥ-i̍va | kṣi̱pa̱ṇoḥ | īṣa̍māṇāḥ ||4.058.06||

4.058.07a sindho̍r iva prādhva̱ne śū̍gha̱nāso̱ vāta̍pramiyaḥ patayanti ya̱hvāḥ |
4.058.07c ghṛ̱tasya̱ dhārā̍ aru̱ṣo na vā̱jī kāṣṭhā̍ bhi̱ndann ū̱rmibhi̱ḥ pinva̍mānaḥ ||

sindho̍ḥ-iva | pra̱-a̱dhva̱ne | śū̱gha̱nāsa̍ḥ | vāta̍-pramiyaḥ | pa̱ta̱ya̱nti̱ | ya̱hvāḥ |
ghṛ̱tasya̍ | dhārā̍ḥ | a̱ru̱ṣaḥ | na | vā̱jī | kāṣṭhā̍ḥ | bhi̱ndan | ū̱rmibhi̍ḥ | pinva̍mānaḥ ||4.058.07||

4.058.08a a̱bhi pra̍vanta̱ sama̍neva̱ yoṣā̍ḥ kalyā̱ṇya1̱̍ḥ smaya̍mānāso a̱gnim |
4.058.08c ghṛ̱tasya̱ dhārā̍ḥ sa̱midho̍ nasanta̱ tā ju̍ṣā̱ṇo ha̍ryati jā̱tave̍dāḥ ||

a̱bhi | pra̱va̱nta̱ | sama̍nā-iva | yoṣā̍ḥ | ka̱lyā̱ṇya̍ḥ | smaya̍mānāsaḥ | a̱gnim |
ghṛ̱tasya̍ | dhārā̍ḥ | sa̱m-idha̍ḥ | na̱sa̱nta̱ | tāḥ | ju̱ṣā̱ṇaḥ | ha̱rya̱ti̱ | jā̱ta-ve̍dāḥ ||4.058.08||

4.058.09a ka̱nyā̍ iva vaha̱tum eta̱vā u̍ a̱ñjy a̍ñjā̱nā a̱bhi cā̍kaśīmi |
4.058.09c yatra̱ soma̍ḥ sū̱yate̱ yatra̍ ya̱jño ghṛ̱tasya̱ dhārā̍ a̱bhi tat pa̍vante ||

ka̱nyā̍ḥ-iva | va̱ha̱tum | eta̱vai | ū̱m̐ iti̍ | a̱ñji | a̱ñjā̱nāḥ | a̱bhi | cā̱ka̱śī̱mi̱ |
yatra̍ | soma̍ḥ | sū̱yate̍ | yatra̍ | ya̱jñaḥ | ghṛ̱tasya̍ | dhārā̍ḥ | a̱bhi | tat | pa̱va̱nte̱ ||4.058.09||

4.058.10a a̱bhy a̍rṣata suṣṭu̱tiṁ gavya̍m ā̱jim a̱smāsu̍ bha̱drā dravi̍ṇāni dhatta |
4.058.10c i̱maṁ ya̱jñaṁ na̍yata de̱vatā̍ no ghṛ̱tasya̱ dhārā̱ madhu̍mat pavante ||

a̱bhi | a̱rṣa̱ta̱ | su̱-stu̱tim | gavya̍m | ā̱jim | a̱smāsu̍ | bha̱drā | dravi̍ṇāni | dha̱tta̱ |
i̱mam | ya̱jñam | na̱ya̱ta̱ | de̱vatā̍ | na̱ḥ | ghṛ̱tasya̍ | dhārā̍ḥ | madhu̍-mat | pa̱va̱nte̱ ||4.058.10||

4.058.11a dhāma̍n te̱ viśva̱m bhuva̍na̱m adhi̍ śri̱tam a̱ntaḥ sa̍mu̱dre hṛ̱dy a1̱̍ntar āyu̍ṣi |
4.058.11c a̱pām anī̍ke sami̱the ya ābhṛ̍ta̱s tam a̍śyāma̱ madhu̍mantaṁ ta ū̱rmim ||

dhāma̍n | te̱ | viśva̍m | bhuva̍nam | adhi̍ | śri̱tam | a̱ntariti̍ | sa̱mu̱dre | hṛ̱di | a̱ntaḥ | āyu̍ṣi |
a̱pām | anī̍ke | sa̱m-i̱the | yaḥ | ā-bhṛ̍taḥ | tam | a̱śyā̱ma̱ | madhu̍-mantam | te̱ | ū̱rmim ||4.058.11||


Notes by Detlef Eichler : 1. Please note that this text is not for commercial use and released only for personal scholarly activity. This transliteration version of Rigveda-Saṁhitā is from an ITRANS file which I have created on the basis of The Aufrecht/van Nooten/Holland (Samhita) version of theRigveda. The Padapāṭha is based on the text entered by the members of the Sansknet project. 2. Font: times new roman / Unicode 3. Hiatus ai, au are shown as aï, aü 4. Transliteration:
a ā i ï ī ī3 u ü ū ṛ ṝ ḷ e ai o au ṁ ḥ m̐ ' | a̱ a̍ ā̱ ā̍ i̱ i̍ ī̱ ī̍ u u̍ ü̍ ū̱ ū̍ ṛ̱ ṛ̍ ṝ̱ ṝ̍ ḷ̱ e̱ e̍ ai̱ ai̍ o̱ o̍ au̱ au̍ 1̱̍ 3̱̍ k kh g gh ṅ c ch j jh ñ ṭ ṭh ḍ ḍh ṇ t th d dh n p ph b bh m y r l v ś ṣ s h ḻ ḻh 5. Last updated 8 September 2016