Ṛgveda-Saṁhitā with Padapāṭha
Maṇḍala 3
Transliterated text with accents


3.001.01a soma̍sya mā ta̱vasa̱ṁ vakṣy a̍gne̱ vahni̍ṁ cakartha vi̱dathe̱ yaja̍dhyai |
3.001.01c de̱vām̐ acchā̱ dīdya̍d yu̱ñje adri̍ṁ śamā̱ye a̍gne ta̱nva̍ṁ juṣasva ||

soma̍sya | mā̱ | ta̱vasam | vakṣi̍ | a̱gne̱ | vahni̍m | ca̱ka̱rtha̱ | vi̱dathe̍ | yaja̍dhyai |
de̱vān | accha̍ | dīdya̍t | yu̱ñje | adri̍m | śa̱m-ā̱ye | a̱gne̱ | ta̱nva̍m | ju̱ṣa̱sva̱ ||3.001.01||

3.001.02a prāñca̍ṁ ya̱jñaṁ ca̍kṛma̱ vardha̍tā̱ṁ gīḥ sa̱midbhi̍r a̱gniṁ nama̍sā duvasyan |
3.001.02c di̱vaḥ śa̍śāsur vi̱dathā̍ kavī̱nāṁ gṛtsā̍ya cit ta̱vase̍ gā̱tum ī̍ṣuḥ ||

prāñca̍m | ya̱jñam | ca̱kṛ̱ma̱ | vardha̍tām | gīḥ | sa̱mit-bhi̍ḥ | a̱gnim | nama̍sā | du̱va̱sya̱n |
di̱vaḥ | śa̱śā̱su̱ḥ | vi̱dathā̍ | ka̱vī̱nām | gṛsā̍ya | ci̱t | ta̱vase̍ | gā̱tum | ī̱ṣu̱ḥ ||3.001.02||

3.001.03a mayo̍ dadhe̱ medhi̍raḥ pū̱tada̍kṣo di̱vaḥ su̱bandhu̍r ja̱nuṣā̍ pṛthi̱vyāḥ |
3.001.03c avi̍ndann u darśa̱tam a̱psv a1̱̍ntar de̱vāso̍ a̱gnim a̱pasi̱ svasṝ̍ṇām ||

maya̍ḥ | da̱dhe̱ | medhi̍raḥ | pū̱ta-da̍kṣaḥ | di̱vaḥ | su̱-bandhu̍ḥ | ja̱nuṣā̍ | pṛ̱thi̱vyāḥ |
avi̍ndan | ū̱m̐ iti̍ | da̱rśa̱tam | a̱p-su | a̱ntaḥ | de̱vāsa̍ḥ | a̱gnim | a̱pasi̍ | svasṝ̍ṇām ||3.001.03||

3.001.04a ava̍rdhayan su̱bhaga̍ṁ sa̱pta ya̱hvīḥ śve̱taṁ ja̍jñā̱nam a̍ru̱ṣam ma̍hi̱tvā |
3.001.04c śiśu̱ṁ na jā̱tam a̱bhy ā̍ru̱r aśvā̍ de̱vāso̍ a̱gniṁ jani̍man vapuṣyan ||

ava̍rdhayan | su̱-bhaga̍m | sa̱pta | ya̱hvīḥ | śve̱tam | ja̱jñā̱nam | a̱ru̱ṣam | ma̱hi̱-tvā |
śiśu̍m | na | jā̱tam | a̱bhi | ā̱ru̱ḥ | aśvā̍ḥ | de̱vāsa̍ḥ | a̱gnim | jani̍man | va̱pu̱ṣya̱n ||3.001.04||

3.001.05a śu̱krebhi̱r aṅgai̱ raja̍ ātata̱nvān kratu̍m punā̱naḥ ka̱vibhi̍ḥ pa̱vitrai̍ḥ |
3.001.05c śo̱cir vasā̍na̱ḥ pary āyu̍r a̱pāṁ śriyo̍ mimīte bṛha̱tīr anū̍nāḥ ||

śu̱krebhi̍ḥ | aṅgai̍ḥ | raja̍ḥ | ā̱-ta̱ta̱nvān | kratu̍m | pu̱nā̱naḥ | ka̱vi-bhi̍ḥ | pa̱vitrai̍ḥ |
śo̱ciḥ | vasā̍naḥ | pari̍ | āyu̍ḥ | a̱pām | śriya̍ḥ | mi̱mī̱te̱ | bṛ̱ha̱tīḥ | anū̍nāḥ ||3.001.05||

3.001.06a va̱vrājā̍ sī̱m ana̍datī̱r ada̍bdhā di̱vo ya̱hvīr ava̍sānā̱ ana̍gnāḥ |
3.001.06c sanā̱ atra̍ yuva̱taya̱ḥ sayo̍nī̱r eka̱ṁ garbha̍ṁ dadhire sa̱pta vāṇī̍ḥ ||

va̱vrāja̍ | sī̱m | ana̍datīḥ | ada̍bdhāḥ | di̱vaḥ | ya̱hvīḥ | ava̍sānāḥ | ana̍gnāḥ |
sanā̍ḥ | atra̍ | yu̱va̱taya̍ḥ | sa-yo̍nīḥ | eka̍m | garbha̍m | da̱dhi̱re̱ | sa̱pta | vāṇī̍ḥ ||3.001.06||

3.001.07a stī̱rṇā a̍sya sa̱ṁhato̍ vi̱śvarū̍pā ghṛ̱tasya̱ yonau̍ sra̱vathe̱ madhū̍nām |
3.001.07c asthu̱r atra̍ dhe̱nava̱ḥ pinva̍mānā ma̱hī da̱smasya̍ mā̱tarā̍ samī̱cī ||

stī̱rṇāḥ | a̱sya̱ | sa̱m-hata̍ḥ | vi̱śva-rū̍pāḥ | ghṛ̱tasya̍ | yonau̍ | sra̱vathe̍ | madhū̍nām |
asthu̍ḥ | atra̍ | dhe̱nava̍ḥ | pinva̍mānāḥ | ma̱hī iti̍ | da̱smasya̍ | mā̱tarā̍ | sa̱mī̱cī iti̍ sa̱m-ī̱cī ||3.001.07||

3.001.08a ba̱bhrā̱ṇaḥ sū̍no sahaso̱ vy a̍dyau̱d dadhā̍naḥ śu̱krā ra̍bha̱sā vapū̍ṁṣi |
3.001.08c ścota̍nti̱ dhārā̱ madhu̍no ghṛ̱tasya̱ vṛṣā̱ yatra̍ vāvṛ̱dhe kāvye̍na ||

ba̱bhrā̱ṇaḥ | sū̱no̱ iti̍ | sa̱ha̱sa̱ḥ | vi | a̱dyau̱t | dadhā̍naḥ | śu̱krā | ra̱bha̱sā | vapū̍ṁṣi |
ścota̍nti | dhārā̍ḥ | madhu̍naḥ | ghṛ̱tasya̍ | vṛṣā̍ | yatra̍ | va̱vṛ̱dhe | kāvye̍na ||3.001.08||

3.001.09a pi̱tuś ci̱d ūdha̍r ja̱nuṣā̍ viveda̱ vy a̍sya̱ dhārā̍ asṛja̱d vi dhenā̍ḥ |
3.001.09c guhā̱ cara̍nta̱ṁ sakhi̍bhiḥ śi̱vebhi̍r di̱vo ya̱hvībhi̱r na guhā̍ babhūva ||

pi̱tuḥ | ci̱t | ūdha̍ḥ | ja̱nuṣā̍ | vi̱ve̱da̱ | vi | a̱sya̱ | dhārā̍ḥ | a̱sṛ̱ja̱t | vi | dhenā̍ḥ |
guhā̍ | cara̍ntam | sakhi̍-bhiḥ | śi̱vebhi̍ḥ | di̱vaḥ | ya̱hvībhi̍ḥ | na | guhā̍ | ba̱bhū̱va̱ ||3.001.09||

3.001.10a pi̱tuś ca̱ garbha̍ṁ jani̱tuś ca̍ babhre pū̱rvīr eko̍ adhaya̱t pīpyā̍nāḥ |
3.001.10c vṛṣṇe̍ sa̱patnī̱ śuca̍ye̱ saba̍ndhū u̱bhe a̍smai manu̱ṣye̱3̱̍ ni pā̍hi ||

pi̱tuḥ | ca̱ | garbha̍m | ja̱ni̱tuḥ | ca̱ | ba̱bhre̱ | pū̱rvīḥ | eka̍ḥ | a̱dha̱ya̱t | pīpyā̍nāḥ |
vṛṣṇe̍ | sa̱patnī̱ iti̍ sa̱patnī̍ | śuca̍ye | saba̍ndhū iti̍ sa-ba̍ndhū | u̱bhe iti̍ | a̱smai̱ | ma̱nu̱ṣye̱ iti̍ | ni | pā̱hi̱ ||3.001.10||

3.001.11a u̱rau ma̱hām̐ a̍nibā̱dhe va̍va̱rdhāpo̍ a̱gniṁ ya̱śasa̱ḥ saṁ hi pū̱rvīḥ |
3.001.11c ṛ̱tasya̱ yonā̍v aśaya̱d damū̍nā jāmī̱nām a̱gnir a̱pasi̱ svasṝ̍ṇām ||

u̱rau | ma̱hān | a̱ni̱-bā̱dhe | va̱va̱rdha̱ | āpa̍ḥ | a̱gnim | ya̱śasa̍ḥ | sam | hi | pū̱rvīḥ |
ṛ̱tasya̍ | yonau̍ | a̱śa̱ya̱t | damū̍nāḥ | jā̱mī̱nām | a̱gniḥ | a̱pasi̍ | svasṛ̍ṇām ||3.001.11||

3.001.12a a̱kro na ba̱bhriḥ sa̍mi̱the ma̱hīnā̍ṁ didṛ̱kṣeya̍ḥ sū̱nave̱ bhāṛ̍jīkaḥ |
3.001.12c ud u̱sriyā̱ jani̍tā̱ yo ja̱jānā̱pāṁ garbho̱ nṛta̍mo ya̱hvo a̱gniḥ ||

a̱kraḥ | na | ba̱bhriḥ | sa̱m-i̱the | ma̱hīnā̍m | di̱dṛ̱kṣeya̍ḥ | sū̱nave̍ | bhāḥ-ṛ̍jīkaḥ |
ut | u̱sriyā̍ḥ | jani̍tā | yaḥ | ja̱jāna̍ | a̱pām | garbha̍ḥ | nṛ-ta̍maḥ | ya̱hvaḥ | a̱gniḥ ||3.001.12||

3.001.13a a̱pāṁ garbha̍ṁ darśa̱tam oṣa̍dhīnā̱ṁ vanā̍ jajāna su̱bhagā̱ virū̍pam |
3.001.13c de̱vāsa̍ś ci̱n mana̍sā̱ saṁ hi ja̱gmuḥ pani̍ṣṭhaṁ jā̱taṁ ta̱vasa̍ṁ duvasyan ||

a̱pām | garbha̍m | da̱rśa̱tam | oṣa̍dhīnām | vanā̍ | ja̱jā̱na̱ | su̱-bhagā̍ | vi-rū̍pam |
de̱vāsa̍ḥ | ci̱t | mana̍sā | sam | hi | ja̱gmuḥ | pani̍ṣṭham | jā̱tam | ta̱vasa̍m | du̱va̱sya̱n ||3.001.13||

3.001.14a bṛ̱hanta̱ id bhā̱navo̱ bhāṛ̍jīkam a̱gniṁ sa̍canta vi̱dyuto̱ na śu̱krāḥ |
3.001.14c guhe̍va vṛ̱ddhaṁ sada̍si̱ sve a̱ntar a̍pā̱ra ū̱rve a̱mṛta̱ṁ duhā̍nāḥ ||

bṛ̱hanta̍ḥ | it | bhā̱nava̍ḥ | bhāḥ-ṛ̍jīkam | a̱gnim | sa̱ca̱nta̱ | vi̱-dyuta̍ḥ | na | śu̱krāḥ |
guhā̍-iva | vṛ̱ddham | sada̍si | sve | a̱ntaḥ | a̱pā̱re | ū̱rve | a̱mṛtam | duhā̍nāḥ ||3.001.14||

3.001.15a īḻe̍ ca tvā̱ yaja̍māno ha̱virbhi̱r īḻe̍ sakhi̱tvaṁ su̍ma̱tiṁ nikā̍maḥ |
3.001.15c de̱vair avo̍ mimīhi̱ saṁ ja̍ri̱tre rakṣā̍ ca no̱ damye̍bhi̱r anī̍kaiḥ ||

īḻe̍ | ca̱ | tvā̱ | yaja̍mānaḥ | ha̱viḥ-bhi̍ḥ | īḻe̍ | sa̱khi̱-tvam | su̱-ma̱tim | ni-kā̍maḥ |
de̱vaiḥ | ava̍ḥ | mi̱mī̱hi̱ | sam | ja̱ri̱tre | rakṣa̍ | ca̱ | na̱ḥ | damye̍-bhiḥ | anī̍kaiḥ ||3.001.15||

3.001.16a u̱pa̱kṣe̱tāra̱s tava̍ supraṇī̱te 'gne̱ viśvā̍ni̱ dhanyā̱ dadhā̍nāḥ |
3.001.16c su̱reta̍sā̱ śrava̍sā̱ tuñja̍mānā a̱bhi ṣyā̍ma pṛtanā̱yūm̐r ade̍vān ||

u̱pa̱-kṣe̱tāra̍ḥ | tava̍ | su̱-pra̱nī̱te̱ | a̱gne̱ | viśvā̍ni | dhanyā̍ | dadhā̍nāḥ |
su̱-reta̍sā | śrava̍sā | tuñja̍mānāḥ | a̱bhi | syā̱ma̱ | pṛ̱ta̱nā̱-yūn | ade̍vān ||3.001.16||

3.001.17a ā de̱vānā̍m abhavaḥ ke̱tur a̍gne ma̱ndro viśvā̍ni̱ kāvyā̍ni vi̱dvān |
3.001.17c prati̱ martā̍m̐ avāsayo̱ damū̍nā̱ anu̍ de̱vān ra̍thi̱ro yā̍si̱ sādha̍n ||

ā | de̱vānā̍m | a̱bha̱va̱ḥ | ke̱tuḥ | a̱gne̱ | ma̱ndraḥ | viśvā̍ni | kāvyā̍ni | vi̱dvān |
prati̍ | martā̍n | a̱vā̱sa̱ya̱ḥ | damū̍nāḥ | anu̍ | de̱vān | ra̱thi̱raḥ | yā̱si̱ | sādha̍n ||3.001.17||

3.001.18a ni du̍ro̱ṇe a̱mṛto̱ martyā̍nā̱ṁ rājā̍ sasāda vi̱dathā̍ni̱ sādha̍n |
3.001.18c ghṛ̱tapra̍tīka urvi̱yā vy a̍dyaud a̱gnir viśvā̍ni̱ kāvyā̍ni vi̱dvān ||

ni | du̱ro̱ṇe | a̱mṛta̍ḥ | martyā̍nām | rājā̍ | sa̱sā̱da̱ | vi̱dathā̍ni | sādha̍n |
ghṛ̱ta-pra̍tīkaḥ | u̱rvi̱yā | vi | a̱dyau̱t | a̱gniḥ | viśvā̍ni | kāvyā̍ni | vi̱dvān ||3.001.18||

3.001.19a ā no̍ gahi sa̱khyebhi̍ḥ śi̱vebhi̍r ma̱hān ma̱hībhi̍r ū̱tibhi̍ḥ sara̱ṇyan |
3.001.19c a̱sme ra̱yim ba̍hu̱laṁ saṁta̍rutraṁ su̱vāca̍m bhā̱gaṁ ya̱śasa̍ṁ kṛdhī naḥ ||

ā | na̱ḥ | ga̱hi̱ | sa̱khyebhi̍ḥ | śi̱vebhi̍ḥ | ma̱hān | ma̱hībhi̍ḥ | ū̱ti-bhi̍ḥ | sa̱ra̱ṇyan |
a̱sme iti̍ | ra̱yim | ba̱hu̱lam | sam-ta̍rutram | su̱-vāca̍m | bhā̱gam | ya̱śasa̍m | kṛ̱dhi̱ | na̱ḥ ||3.001.19||

3.001.20a e̱tā te̍ agne̱ jani̍mā̱ sanā̍ni̱ pra pū̱rvyāya̱ nūta̍nāni vocam |
3.001.20c ma̱hānti̱ vṛṣṇe̱ sava̍nā kṛ̱temā janma̍ñ-janma̱n nihi̍to jā̱tave̍dāḥ ||

e̱tā | te̱ | a̱gne̱ | jani̍ma | sanā̍ni | pra | pū̱rvyāya̍ | nūta̍nāni | vo̱ca̱m |
ma̱hānti̍ | vṛṣṇe̍ | sava̍nā | kṛ̱tā | i̱mā | janma̍n-janman | ni-hi̍taḥ | jā̱ta-ve̍dāḥ ||3.001.20||

3.001.21a janma̍ñ-janma̱n nihi̍to jā̱tave̍dā vi̱śvāmi̍trebhir idhyate̱ aja̍sraḥ |
3.001.21c tasya̍ va̱yaṁ su̍ma̱tau ya̱jñiya̱syāpi̍ bha̱dre sau̍mana̱se syā̍ma ||

janma̍n-janman | ni-hi̍taḥ | jā̱ta-ve̍dāḥ | vi̱śvāmi̍trebhiḥ | i̱dhya̱te̱ | aja̍sraḥ |
tasya̍ | va̱yam | su̱-ma̱tau | ya̱jñiya̍sya | api̍ | bha̱dre | sau̱ma̱na̱se | syā̱ma̱ ||3.001.21||

3.001.22a i̱maṁ ya̱jñaṁ sa̍hasāva̱n tvaṁ no̍ deva̱trā dhe̍hi sukrato̱ rarā̍ṇaḥ |
3.001.22c pra ya̍ṁsi hotar bṛha̱tīr iṣo̱ no 'gne̱ mahi̱ dravi̍ṇa̱m ā ya̍jasva ||

i̱mam | ya̱jñam | sa̱ha̱sā̱-va̱n | tvam | na̱ḥ | de̱va̱-trā | dhe̱hi̱ | su̱-kra̱to̱ iti̍ su-krato | rarā̍ṇaḥ |
pra | ya̱ṁsi̱ | ho̱ta̱ḥ | bṛ̱ha̱tīḥ | iṣa̍ḥ | na̱ḥ | a̱gne̱ | mahi̍ | dravi̍ṇam | ā | ya̱ja̱sva̱ ||3.001.22||

3.001.23a iḻā̍m agne puru̱daṁsa̍ṁ sa̱niṁ goḥ śa̍śvatta̱maṁ hava̍mānāya sādha |
3.001.23c syān na̍ḥ sū̱nus tana̍yo vi̱jāvāgne̱ sā te̍ suma̱tir bhū̍tv a̱sme ||

iḻā̍m | a̱gne̱ | pu̱ru̱-daṁsa̍m | sa̱nim | goḥ | śa̱śva̱t-ta̱mam | hava̍mānāya | sā̱dha̱ |
syāt | na̱ḥ | sū̱nuḥ | tana̍yaḥ | vi̱jā-vā̍ | a̱gne̱ | sā | te̱ | su̱-ma̱tiḥ | bhū̱tu̱ | a̱sme iti̍ ||3.001.23||


3.002.01a vai̱śvā̱na̱rāya̍ dhi̱ṣaṇā̍m ṛtā̱vṛdhe̍ ghṛ̱taṁ na pū̱tam a̱gnaye̍ janāmasi |
3.002.01c dvi̱tā hotā̍ra̱m manu̍ṣaś ca vā̱ghato̍ dhi̱yā ratha̱ṁ na kuli̍śa̱ḥ sam ṛ̍ṇvati ||

vai̱śvā̱na̱rāya̍ | dhi̱ṣaṇā̍m | ṛ̱ta̱-vṛdhe̍ | ghṛ̱tam | na | pū̱tam | a̱gnaye̍ | ja̱nā̱ma̱si̱ |
dvi̱tā | hotā̍ram | manu̍ṣaḥ | ca̱ | vā̱ghata̍ḥ | dhi̱yā | ratha̍m | na | kuli̍śaḥ | sam | ṛ̱ṇva̱ti̱ ||3.002.01||

3.002.02a sa ro̍cayaj ja̱nuṣā̱ roda̍sī u̱bhe sa mā̱tror a̍bhavat pu̱tra īḍya̍ḥ |
3.002.02c ha̱vya̱vāḻ a̱gnir a̱jara̱ś cano̍hito dū̱ḻabho̍ vi̱śām ati̍thir vi̱bhāva̍suḥ ||

saḥ | ro̱ca̱ya̱t | ja̱nuṣā̍ | roda̍sī̱ iti̍ | u̱bhe iti̍ | saḥ | mā̱troḥ | a̱bha̱va̱t | pu̱traḥ | īḍya̍ḥ |
ha̱vya̱-vāṭ | a̱gniḥ | a̱jara̍ḥ | cana̍ḥ-hitaḥ | du̱ḥ-dabha̍ḥ | vi̱śām | ati̍thiḥ | vi̱bhā-va̍suḥ ||3.002.02||

3.002.03a kratvā̱ dakṣa̍sya̱ taru̍ṣo̱ vidha̍rmaṇi de̱vāso̍ a̱gniṁ ja̍nayanta̱ citti̍bhiḥ |
3.002.03c ru̱ru̱cā̱nam bhā̱nunā̱ jyoti̍ṣā ma̱hām atya̱ṁ na vāja̍ṁ sani̱ṣyann upa̍ bruve ||

kratvā̍ | dakṣa̍sya | taru̍ṣaḥ | vi-dha̍rmaṇi | de̱vāsa̍ḥ | a̱gnim | ja̱na̱ya̱nta̱ | citti̍-bhiḥ |
ru̱ru̱cā̱nam | bhā̱nunā̍ | jyoti̍ṣā | ma̱hām | atya̍m | na | vāja̍m | sa̱ni̱ṣyan | upa̍ | bru̱ve̱ ||3.002.03||

3.002.04a ā ma̱ndrasya̍ sani̱ṣyanto̱ vare̍ṇyaṁ vṛṇī̱mahe̱ ahra̍ya̱ṁ vāja̍m ṛ̱gmiya̍m |
3.002.04c rā̱tim bhṛgū̍ṇām u̱śija̍ṁ ka̱vikra̍tum a̱gniṁ rāja̍ntaṁ di̱vyena̍ śo̱ciṣā̍ ||

ā | ma̱ndrasya̍ | sa̱ni̱ṣyanta̍ḥ | vare̍ṇyam | vṛ̱ṇī̱mahe̍ | ahra̍yam | vāja̍m | ṛ̱gmiya̍m |
rā̱tim | bhṛgū̍ṇām | u̱śija̍m | ka̱vi-kra̍tum | a̱gnim | rāja̍ntam | di̱vyena̍ | śo̱ciṣā̍ ||3.002.04||

3.002.05a a̱gniṁ su̱mnāya̍ dadhire pu̱ro janā̱ vāja̍śravasam i̱ha vṛ̱ktaba̍rhiṣaḥ |
3.002.05c ya̱tasru̍caḥ su̱ruca̍ṁ vi̱śvade̍vyaṁ ru̱draṁ ya̱jñānā̱ṁ sādha̍diṣṭim a̱pasā̍m ||

a̱gnim | su̱mnāya̍ | da̱dhi̱re̱ | pu̱raḥ | janā̍ḥ | vāja̍-śravasam | i̱ha | vṛ̱kta-ba̍rhiṣaḥ |
ya̱ta-sru̍caḥ | su̱-ruca̍m | vi̱śva-de̍vyam | ru̱dram | ya̱jñānā̍m | sādha̍t-iṣṭim | a̱pasā̍m ||3.002.05||

3.002.06a pāva̍kaśoce̱ tava̱ hi kṣaya̱m pari̱ hota̍r ya̱jñeṣu̍ vṛ̱ktaba̍rhiṣo̱ nara̍ḥ |
3.002.06c agne̱ duva̍ i̱cchamā̍nāsa̱ āpya̱m upā̍sate̱ dravi̍ṇaṁ dhehi̱ tebhya̍ḥ ||

pāva̍ka-śoce | tava̍ | hi | kṣaya̍m | pari̍ | hota̍ḥ | ya̱jñeṣu̍ | vṛ̱kta-ba̍rhiṣaḥ | nara̍ḥ |
agne̍ | duva̍ḥ | i̱cchamā̍nāsaḥ | āpya̍m | upa̍ | ā̱sa̱te̱ | dravi̍ṇam | dhe̱hi̱ | tebhya̍ḥ ||3.002.06||

3.002.07a ā roda̍sī apṛṇa̱d ā sva̍r ma̱haj jā̱taṁ yad e̍nam a̱paso̱ adhā̍rayan |
3.002.07c so a̍dhva̱rāya̱ pari̍ ṇīyate ka̱vir atyo̱ na vāja̍sātaye̱ cano̍hitaḥ ||

ā | roda̍sī̱ iti̍ | a̱pṛ̱ṇa̱t | ā | sva̍ḥ | ma̱hat | jā̱tam | yat | e̱na̱m | a̱pasa̍ḥ | adhā̍rayan |
saḥ | a̱dhva̱rāya̍ | pari̍ | nī̱ya̱te̱ | ka̱viḥ | atya̍ḥ | na | vāja̍-sātaye | cana̍ḥ-hitaḥ ||3.002.07||

3.002.08a na̱ma̱syata̍ ha̱vyadā̍tiṁ svadhva̱raṁ du̍va̱syata̱ damya̍ṁ jā̱tave̍dasam |
3.002.08c ra̱thīr ṛ̱tasya̍ bṛha̱to vica̍rṣaṇir a̱gnir de̱vānā̍m abhavat pu̱rohi̍taḥ ||

na̱ma̱syata̍ | ha̱vya-dā̍tim | su̱-a̱dhva̱ram | du̱va̱syata̍ | dabhya̍m | jā̱ta-ve̍dasam |
ra̱thīḥ | ṛ̱tasya̍ | bṛ̱ha̱taḥ | vi-ca̍rṣaṇiḥ | a̱gniḥ | de̱vānā̍m | a̱bha̱va̱t | pu̱raḥ-hi̍taḥ ||3.002.08||

3.002.09a ti̱sro ya̱hvasya̍ sa̱midha̱ḥ pari̍jmano̱ 'gner a̍punann u̱śijo̱ amṛ̍tyavaḥ |
3.002.09c tāsā̱m ekā̱m ada̍dhu̱r martye̱ bhuja̍m u lo̱kam u̱ dve upa̍ jā̱mim ī̍yatuḥ ||

ti̱sraḥ | ya̱hvasya̍ | sa̱m-idha̍ḥ | pari̍-jmanaḥ | a̱gneḥ | a̱pu̱na̱n | u̱śija̍ḥ | amṛ̍tyavaḥ |
tāsā̍m | ekā̍m | ada̍dhuḥ | martye̍ | bhuja̍m | ū̱m̐ iti̍ | lo̱kam | ū̱m̐ iti̍ | dve iti̍ | upa̍ | jā̱mim | ī̱ya̱tu̱ḥ ||3.002.09||

3.002.10a vi̱śāṁ ka̱viṁ vi̱śpati̱m mānu̍ṣī̱r iṣa̱ḥ saṁ sī̍m akṛṇva̱n svadhi̍ti̱ṁ na teja̍se |
3.002.10c sa u̱dvato̍ ni̱vato̍ yāti̱ vevi̍ṣa̱t sa garbha̍m e̱ṣu bhuva̍neṣu dīdharat ||

vi̱śām | ka̱vim | vi̱śpati̍m | mānu̍ṣīḥ | iṣa̍ḥ | sam | sī̱m | a̱kṛ̱ṇva̱n | sva-dhi̍tim | na | teja̍se |
saḥ | u̱t-vata̍ḥ | ni̱-vata̍ḥ | yā̱ti̱ | vevi̍ṣat | saḥ | garbha̍m | e̱ṣu | bhuva̍neṣu | dī̱dha̱ra̱t ||3.002.10||

3.002.11a sa ji̍nvate ja̱ṭhare̍ṣu prajajñi̱vān vṛṣā̍ ci̱treṣu̱ nāna̍da̱n na si̱ṁhaḥ |
3.002.11c vai̱śvā̱na̱raḥ pṛ̍thu̱pājā̱ ama̍rtyo̱ vasu̱ ratnā̱ daya̍māno̱ vi dā̱śuṣe̍ ||

saḥ | ji̱nva̱te̱ | ja̱ṭhare̍ṣu | pra̱ja̱jñi̱-vān | vṛṣā̍ | ci̱treṣu̍ | nāna̍dat | na | si̱ṁhaḥ |
vai̱śvā̱na̱raḥ | pṛ̱thu̱-pājā̍ḥ | ama̍rtyaḥ | vasu̍ | ratnā̍ | daya̍mānaḥ | vi | dā̱śuṣe̍ ||3.002.11||

3.002.12a vai̱śvā̱na̱raḥ pra̱tnathā̱ nāka̱m āru̍had di̱vas pṛ̱ṣṭham bhanda̍mānaḥ su̱manma̍bhiḥ |
3.002.12c sa pū̍rva̱vaj ja̱naya̍ñ ja̱ntave̱ dhana̍ṁ samā̱nam ajma̱m pary e̍ti̱ jāgṛ̍viḥ ||

vai̱śvā̱na̱raḥ | pra̱tna-thā̍ | nāka̍m | ā | a̱ru̱ha̱t | di̱vaḥ | pṛ̱ṣṭham | bhanda̍mānaḥ | su̱manma̍-bhiḥ |
saḥ | pū̱rva̱-vat | ja̱naya̍n | ja̱ntave̍ | dhana̍m | sa̱mā̱nam | ajma̍m | pari̍ | e̱ti̱ | jāgṛ̍viḥ ||3.002.12||

3.002.13a ṛ̱tāvā̍naṁ ya̱jñiya̱ṁ vipra̍m u̱kthya1̱̍m ā yaṁ da̱dhe mā̍ta̱riśvā̍ di̱vi kṣaya̍m |
3.002.13c taṁ ci̱trayā̍ma̱ṁ hari̍keśam īmahe sudī̱tim a̱gniṁ su̍vi̱tāya̱ navya̍se ||

ṛ̱ta-vā̍nam | ya̱jñiya̍m | vipra̍m | u̱kthya̍m | ā | yam | da̱dhe | mā̱ta̱riśvā̍ | di̱vi | kṣaya̍m |
tam | ci̱tra-yā̍mam | hari̍-keśam | ī̱ma̱he̱ | su̱-dī̱tim | a̱gnim | su̱vi̱tāya̍ | navya̍se ||3.002.13||

3.002.14a śuci̱ṁ na yāma̍nn iṣi̱raṁ sva̱rdṛśa̍ṁ ke̱tuṁ di̱vo ro̍cana̱sthām u̍ṣa̱rbudha̍m |
3.002.14c a̱gnim mū̱rdhāna̍ṁ di̱vo apra̍tiṣkuta̱ṁ tam ī̍mahe̱ nama̍sā vā̱jina̍m bṛ̱hat ||

śuci̍m | na | yāma̍n | i̱ṣi̱ram | sva̱ḥ-dṛśa̍m | ke̱tum | di̱vaḥ | ro̱ca̱na̱-sthām | u̱ṣa̱ḥ-budha̍m |
a̱gnim | mū̱rdhāna̍m | di̱vaḥ | apra̍ti-skutam | tam | ī̱ma̱he̱ | nama̍sā | vā̱jina̍m | bṛ̱hat ||3.002.14||

3.002.15a ma̱ndraṁ hotā̍ra̱ṁ śuci̱m adva̍yāvina̱ṁ damū̍nasam u̱kthya̍ṁ vi̱śvaca̍rṣaṇim |
3.002.15c ratha̱ṁ na ci̱traṁ vapu̍ṣāya darśa̱tam manu̍rhita̱ṁ sada̱m id rā̱ya ī̍mahe ||

ma̱ndram | hotā̍ram | śuci̍m | adva̍yāvinam | damū̍nasam | u̱kthya̍m | vi̱śva-ca̍rṣaṇim |
ratha̍m | na | ci̱tram | vapu̍ṣāya | da̱rśa̱tam | manu̍ḥ-hitam | sada̍m | it | rā̱yaḥ | ī̱ma̱he̱ ||3.002.15||


3.003.01a vai̱śvā̱na̱rāya̍ pṛthu̱pāja̍se̱ vipo̱ ratnā̍ vidhanta dha̱ruṇe̍ṣu̱ gāta̍ve |
3.003.01c a̱gnir hi de̱vām̐ a̱mṛto̍ duva̱syaty athā̱ dharmā̍ṇi sa̱natā̱ na dū̍duṣat ||

vai̱śvā̱na̱rāya̍ | pṛ̱thu̱-pāja̍se | vipa̍ḥ | ratnā̍ | vi̱dha̱nta̱ | dha̱ruṇe̍ṣu | gāta̍ve |
a̱gniḥ | hi | de̱vān | a̱mṛta̍ḥ | du̱va̱syati̍ | atha̍ | dharmā̍ṇi | sa̱natā̍ | na | dū̱du̱ṣa̱t ||3.003.01||

3.003.02a a̱ntar dū̱to roda̍sī da̱sma ī̍yate̱ hotā̱ niṣa̍tto̱ manu̍ṣaḥ pu̱rohi̍taḥ |
3.003.02c kṣaya̍m bṛ̱hanta̱m pari̍ bhūṣati̱ dyubhi̍r de̱vebhi̍r a̱gnir i̍ṣi̱to dhi̱yāva̍suḥ ||

a̱ntaḥ | dū̱taḥ | roda̍sī̱ iti̍ | da̱smaḥ | ī̱ya̱te̱ | hotā̍ | ni-sa̍ttaḥ | manu̍ṣaḥ | pu̱raḥ-hi̍taḥ |
kṣaya̍m | bṛ̱hanta̍m | pari̍ | bhū̱ṣa̱ti̱ | dyu-bhi̍ḥ | de̱vebhi̍ḥ | a̱gniḥ | i̱ṣi̱taḥ | dhi̱yā-va̍suḥ ||3.003.02||

3.003.03a ke̱tuṁ ya̱jñānā̍ṁ vi̱datha̍sya̱ sādha̍na̱ṁ viprā̍so a̱gnim ma̍hayanta̱ citti̍bhiḥ |
3.003.03c apā̍ṁsi̱ yasmi̱nn adhi̍ saṁda̱dhur gira̱s tasmi̍n su̱mnāni̱ yaja̍māna̱ ā ca̍ke ||

ke̱tum | ya̱jñānā̍m | vi̱datha̍sya | sādha̍nam | viprā̍saḥ | a̱gnim | ma̱ha̱ya̱nta̱ | citti̍-bhiḥ |
apā̍ṁsi | yasmi̍n | adhi̍ | sa̱m-da̱dhuḥ | gira̍ḥ | tasmi̍n | su̱mnāni̍ | yaja̍mānaḥ | ā | ca̱ke̱ ||3.003.03||

3.003.04a pi̱tā ya̱jñānā̱m asu̍ro vipa̱ścitā̍ṁ vi̱māna̍m a̱gnir va̱yuna̍ṁ ca vā̱ghatā̍m |
3.003.04c ā vi̍veśa̱ roda̍sī̱ bhūri̍varpasā purupri̱yo bha̍ndate̱ dhāma̍bhiḥ ka̱viḥ ||

pi̱tā | ya̱jñānā̍m | asu̍raḥ | vi̱pa̱ḥ-citā̍m | vi̱-māna̍m | a̱gniḥ | va̱yuna̍m | ca̱ | vā̱ghatā̍m |
ā | vi̱ve̱śa̱ | roda̍sī̱ iti̍ | bhūri̍-varpasā | pu̱ru̱-pri̱yaḥ | bha̱nda̱te̱ | dhāma̍-bhiḥ | ka̱viḥ ||3.003.04||

3.003.05a ca̱ndram a̱gniṁ ca̱ndrara̍tha̱ṁ hari̍vrataṁ vaiśvāna̱ram a̍psu̱ṣada̍ṁ sva̱rvida̍m |
3.003.05c vi̱gā̱haṁ tūrṇi̱ṁ tavi̍ṣībhi̱r āvṛ̍ta̱m bhūrṇi̍ṁ de̱vāsa̍ i̱ha su̱śriya̍ṁ dadhuḥ ||

ca̱ndram | a̱gnim | ca̱ndra-ra̍tham | hari̍-vratam | vai̱śvā̱na̱ram | a̱psu̱-sada̍m | sva̱ḥ-vida̍m |
vi̱-gā̱ham | tūrṇi̍m | tavi̍ṣībhiḥ | ā-vṛ̍tam | bhūrṇi̍m | de̱vāsa̍ḥ | i̱ha | su̱-śriya̍m | da̱dhu̱ḥ ||3.003.05||

3.003.06a a̱gnir de̱vebhi̱r manu̍ṣaś ca ja̱ntubhi̍s tanvā̱no ya̱jñam pu̍ru̱peśa̍saṁ dhi̱yā |
3.003.06c ra̱thīr a̱ntar ī̍yate̱ sādha̍diṣṭibhir jī̱ro damū̍nā abhiśasti̱cāta̍naḥ ||

a̱gniḥ | de̱vebhi̍ḥ | manu̍ṣaḥ | ca̱ | ja̱ntu-bhi̍ḥ | ta̱nvā̱naḥ | ya̱jñam | pu̱ru̱-peśa̍sam | dhi̱yā |
ra̱thīḥ | a̱ntaḥ | ī̱ya̱te̱ | sādha̍diṣṭi-bhiḥ | jī̱raḥ | damū̍nāḥ | a̱bhi̱śa̱sti̱-cāta̍naḥ ||3.003.06||

3.003.07a agne̱ jara̍sva svapa̱tya āyu̍ny ū̱rjā pi̍nvasva̱ sam iṣo̍ didīhi naḥ |
3.003.07c vayā̍ṁsi jinva bṛha̱taś ca̍ jāgṛva u̱śig de̱vānā̱m asi̍ su̱kratu̍r vi̱pām ||

agne̍ | jara̍sva | su̱-a̱pa̱tye | āyu̍ni | ū̱rjā | pi̱nva̱sva̱ | sam | iṣa̍ḥ | di̱dī̱hi̱ | na̱ḥ |
vayā̍ṁsi | ji̱nva̱ | bṛ̱ha̱taḥ | ca̱ | jā̱gṛ̱ve̱ | u̱śik | de̱vānā̍m | asi̍ | su̱-kratu̍ḥ | vi̱pām ||3.003.07||

3.003.08a vi̱śpati̍ṁ ya̱hvam ati̍thi̱ṁ nara̱ḥ sadā̍ ya̱ntāra̍ṁ dhī̱nām u̱śija̍ṁ ca vā̱ghatā̍m |
3.003.08c a̱dhva̱rāṇā̱ṁ ceta̍naṁ jā̱tave̍dasa̱m pra śa̍ṁsanti̱ nama̍sā jū̱tibhi̍r vṛ̱dhe ||

vi̱śpati̍m | ya̱hvam | ati̍thim | nara̍ḥ | sadā̍ | ya̱ntāra̍m | dhī̱nām | u̱śija̍m | ca̱ | vā̱ghatā̍m |
a̱dhva̱rāṇā̍m | ceta̍nam | jā̱ta-ve̍dasa̍m | pra | śa̱ṁsa̱nti̱ | nama̍sā | jū̱ti-bhi̍ḥ | vṛ̱dhe ||3.003.08||

3.003.09a vi̱bhāvā̍ de̱vaḥ su̱raṇa̱ḥ pari̍ kṣi̱tīr a̱gnir ba̍bhūva̱ śava̍sā su̱madra̍thaḥ |
3.003.09c tasya̍ vra̱tāni̍ bhūripo̱ṣiṇo̍ va̱yam upa̍ bhūṣema̱ dama̱ ā su̍vṛ̱ktibhi̍ḥ ||

vi̱bhā-vā̍ | de̱vaḥ | su̱-raṇaḥ | pari̍ | kṣi̱tīḥ | a̱gniḥ | ba̱bhū̱va̱ | śava̍sā | su̱mat-ra̍thaḥ |
tasya̍ | vra̱tāni̍ | bhū̱ri̱-po̱ṣiṇa̍ḥ | va̱yam | upa̍ | bhū̱ṣe̱ma̱ | dame̍ | ā | su̱vṛ̱kti-bhi̍ḥ ||3.003.09||

3.003.10a vaiśvā̍nara̱ tava̱ dhāmā̱ny ā ca̍ke̱ yebhi̍ḥ sva̱rvid abha̍vo vicakṣaṇa |
3.003.10c jā̱ta āpṛ̍ṇo̱ bhuva̍nāni̱ roda̍sī̱ agne̱ tā viśvā̍ pari̱bhūr a̍si̱ tmanā̍ ||

vaiśvā̍nara | tava̍ | dhāmā̍ni | ā | ca̱kre̱ | yebhi̍ḥ | sva̱ḥ-vit | abha̍vaḥ | vi̱-ca̱kṣa̱ṇa̱ |
jā̱taḥ | ā | a̱pṛ̱ṇa̱ḥ | bhuva̍nāni | roda̍sī̱ iti̍ | agne̍ | tā | viśvā̍ | pa̱ri̱-bhūḥ | a̱si̱ | tmanā̍ ||3.003.10||

3.003.11a vai̱śvā̱na̱rasya̍ da̱ṁsanā̍bhyo bṛ̱had ari̍ṇā̱d eka̍ḥ svapa̱syayā̍ ka̱viḥ |
3.003.11c u̱bhā pi̱tarā̍ ma̱haya̍nn ajāyatā̱gnir dyāvā̍pṛthi̱vī bhūri̍retasā ||

vai̱śvā̱na̱rasya̍ | da̱ṁsanā̍bhyaḥ | bṛ̱hat | ari̍ṇāt | eka̍ḥ | su̱-a̱pa̱syayā̍ | ka̱viḥ |
u̱bhā | pi̱tarā̍ | ma̱haya̍n | a̱jā̱ya̱ta̱ | a̱gniḥ | dyāvā̍pṛthi̱vī iti̍ | bhūri̍-retasā ||3.003.11||


3.004.01a sa̱mit-sa̍mit su̱manā̍ bodhy a̱sme śu̱cā-śu̍cā suma̱tiṁ rā̍si̱ vasva̍ḥ |
3.004.01c ā de̍va de̱vān ya̱jathā̍ya vakṣi̱ sakhā̱ sakhī̍n su̱manā̍ yakṣy agne ||

sa̱mit-sa̍mit | su̱-manā̍ḥ | bo̱dhi̱ | a̱sme iti̍ | śu̱cā-śu̍cā | su̱-ma̱tim | rā̱si̱ | vasva̍ḥ |
ā | de̱va̱ | de̱vān | ya̱jathā̍ya | va̱kṣi̱ | sakhā̍ | sakhī̍n | su̱-manā̍ḥ | ya̱kṣi̱ | a̱gne̱ ||3.004.01||

3.004.02a yaṁ de̱vāsa̱s trir aha̍nn ā̱yaja̍nte di̱ve-di̍ve̱ varu̍ṇo mi̱tro a̱gniḥ |
3.004.02c semaṁ ya̱jñam madhu̍mantaṁ kṛdhī na̱s tanū̍napād ghṛ̱tayo̍niṁ vi̱dhanta̍m ||

yam | de̱vāsa̍ḥ | triḥ | aha̍n | ā̱-yaja̍nte | di̱ve-di̍ve | varu̍ṇaḥ | mi̱traḥ | a̱gniḥ |
saḥ | i̱mam | ya̱jñam | madhu̍-mantam | kṛ̱dhi̱ | na̱ḥ | tanū̍-napāt | ghṛ̱ta-yo̍nim | vi̱dhanta̍m ||3.004.02||

3.004.03a pra dīdhi̍tir vi̱śvavā̍rā jigāti̱ hotā̍ram i̱ḻaḥ pra̍tha̱maṁ yaja̍dhyai |
3.004.03c acchā̱ namo̍bhir vṛṣa̱bhaṁ va̱ndadhyai̱ sa de̱vān ya̍kṣad iṣi̱to yajī̍yān ||

pra | dīdhi̍tiḥ | vi̱śva-vā̍rā | ji̱gā̱ti̱ | hotā̍ram | i̱ḻaḥ | pra̱tha̱mam | yaja̍dhyai |
accha̍ | nama̍ḥ-bhiḥ | vṛ̱ṣa̱bham | va̱ndadhyai̍ | saḥ | de̱vān | ya̱kṣa̱t | i̱ṣi̱taḥ | yajī̍yān ||3.004.03||

3.004.04a ū̱rdhvo vā̍ṁ gā̱tur a̍dhva̱re a̍kāry ū̱rdhvā śo̱cīṁṣi̱ prasthi̍tā̱ rajā̍ṁsi |
3.004.04c di̱vo vā̱ nābhā̱ ny a̍sādi̱ hotā̍ stṛṇī̱mahi̍ de̱vavya̍cā̱ vi ba̱rhiḥ ||

ū̱rdhvaḥ | vā̱m | gā̱tuḥ | a̱dhva̱re | a̱kā̱ri̱ | ū̱rdhvā | śo̱cīṁṣi̍ | prasthi̍tā | rajā̍ṁsi |
di̱vaḥ | vā̱ | nābhā̍ | ni | a̱sā̱di̱ | hotā̍ | stṛ̱ṇī̱mahi̍ | de̱va-vya̍cāḥ | vi | ba̱rhiḥ ||3.004.04||

3.004.05a sa̱pta ho̱trāṇi̱ mana̍sā vṛṇā̱nā inva̍nto̱ viśva̱m prati̍ yann ṛ̱tena̍ |
3.004.05c nṛ̱peśa̍so vi̱dathe̍ṣu̱ pra jā̱tā a̱bhī̱3̱̍maṁ ya̱jñaṁ vi ca̍ranta pū̱rvīḥ ||

sa̱pta | ho̱trāṇi̍ | mana̍sā | vṛ̱ṇā̱nāḥ | inva̍ntaḥ | viśva̍m | prati̍ | ya̱n | ṛ̱tena̍ |
nṛ̱-peśa̍saḥ | vi̱dathe̍ṣu | pra | jā̱tāḥ | a̱bhi | i̱mam | ya̱jñam | vi | ca̱ra̱nta̱ | pū̱rvīḥ ||3.004.05||

3.004.06a ā bhanda̍māne u̱ṣasā̱ upā̍ke u̱ta sma̍yete ta̱nvā̱3̱̍ virū̍pe |
3.004.06c yathā̍ no mi̱tro varu̍ṇo̱ jujo̍ṣa̱d indro̍ ma̱rutvā̍m̐ u̱ta vā̱ maho̍bhiḥ ||

ā | bhanda̍māne̱ iti̍ | u̱ṣasau̍ | upā̍ke̱ iti̍ | u̱ta | sma̱ye̱te̱ iti̍ | ta̱nvā̍ | virū̍pe̱ iti̱ vi-rū̍pe |
yathā̍ | na̱ḥ | mi̱traḥ | varu̍ṇaḥ | jujo̍ṣat | indra̍ḥ | ma̱rutvā̍n | u̱ta | vā̱ | maha̍ḥ-bhiḥ ||3.004.06||

3.004.07a daivyā̱ hotā̍rā pratha̱mā ny ṛ̍ñje sa̱pta pṛ̱kṣāsa̍ḥ sva̱dhayā̍ madanti |
3.004.07c ṛ̱taṁ śaṁsa̍nta ṛ̱tam it ta ā̍hu̱r anu̍ vra̱taṁ vra̍ta̱pā dīdhyā̍nāḥ ||

daivyā̍ | hotā̍rā | pra̱tha̱mā | ni | ṛ̱ñje̱ | sa̱pta | pṛ̱kṣāsa̍ḥ | sva̱dhayā̍ | ma̱da̱nti̱ |
ṛ̱tam | śaṁsa̍ntaḥ | ṛ̱tam | it | te | ā̱hu̱ḥ | anu̍ | vra̱tam | vra̱ta̱-pāḥ | dīdhyā̍nāḥ ||3.004.07||

3.004.08a ā bhāra̍tī̱ bhāra̍tībhiḥ sa̱joṣā̱ iḻā̍ de̱vair ma̍nu̱ṣye̍bhir a̱gniḥ |
3.004.08c sara̍svatī sārasva̱tebhi̍r a̱rvāk ti̱sro de̱vīr ba̱rhir edaṁ sa̍dantu ||

ā | bhāra̍tī | bhāra̍tībhiḥ | sa̱-joṣā̍ḥ | iḻā̍ḥ | de̱vaiḥ | ma̱nu̱ṣye̍bhiḥ | a̱gniḥ |
sara̍svatī | sā̱ra̱sva̱tebhi̍ḥ | a̱rvāk | ti̱sraḥ | de̱vīḥ | ba̱rhiḥ | ā | i̱dam | sa̱da̱ntu̱ ||3.004.08||

3.004.09a tan na̍s tu̱rīpa̱m adha̍ poṣayi̱tnu deva̍ tvaṣṭa̱r vi ra̍rā̱ṇaḥ sya̍sva |
3.004.09c yato̍ vī̱raḥ ka̍rma̱ṇya̍ḥ su̱dakṣo̍ yu̱ktagrā̍vā̱ jāya̍te de̱vakā̍maḥ ||

tat | na̱ḥ | tu̱rīpa̍m | adha̍ | po̱ṣa̱yi̱tnu | deva̍ | tva̱ṣṭa̱ḥ | vi | ra̱rā̱ṇaḥ | sya̱sveti̍ syasva |
yata̍ḥ | vī̱raḥ | ka̱rma̱ṇya̍ḥ | su̱-dakṣa̍ḥ | yu̱kta-grā̍vā | jāya̍te | de̱va-kā̍maḥ ||3.004.09||

3.004.10a vana̍spa̱te 'va̍ sṛ̱jopa̍ de̱vān a̱gnir ha̱viḥ śa̍mi̱tā sū̍dayāti |
3.004.10c sed u̱ hotā̍ sa̱tyata̍ro yajāti̱ yathā̍ de̱vānā̱ṁ jani̍māni̱ veda̍ ||

vana̍spate | ava̍ | sṛ̱ja̱ | upa̍ | de̱vān | a̱gniḥ | ha̱viḥ | śa̱mi̱tā | sū̱da̱yā̱ti̱ |
saḥ | it | ū̱m̐ iti̍ | hotā̍ | sa̱tya-ta̍raḥ | ya̱jā̱ti̱ | yathā̍ | de̱vānā̍m | jani̍māni | veda̍ ||3.004.10||

3.004.11a ā yā̍hy agne samidhā̱no a̱rvāṅ indre̍ṇa de̱vaiḥ sa̱ratha̍ṁ tu̱rebhi̍ḥ |
3.004.11c ba̱rhir na̍ āstā̱m adi̍tiḥ supu̱trā svāhā̍ de̱vā a̱mṛtā̍ mādayantām ||

ā | yā̱hi̱ | a̱gne̱ | sa̱m-i̱dhā̱naḥ | a̱rvāṅ | indre̍ṇa | de̱vaiḥ | sa̱-ratha̍m | tu̱rebhi̍ḥ |
ba̱rhiḥ | na̱ḥ | āstā̍m | adi̍tiḥ | su̱-pu̱trā | svāhā̍ | de̱vāḥ | a̱mṛtā̍ḥ | mā̱da̱ya̱ntā̱m ||3.004.11||


3.005.01a praty a̱gnir u̱ṣasa̱ś ceki̍tā̱no 'bo̍dhi̱ vipra̍ḥ pada̱vīḥ ka̍vī̱nām |
3.005.01c pṛ̱thu̱pājā̍ deva̱yadbhi̱ḥ sami̱ddho 'pa̱ dvārā̱ tama̍so̱ vahni̍r āvaḥ ||

prati̍ | a̱gniḥ | u̱ṣasa̍ḥ | ceki̍tānaḥ | abo̍dhi | vipra̍ḥ | pa̱da̱-vīḥ | ka̱vī̱nām |
pṛ̱thu̱-pājā̍ḥ | de̱va̱yat-bhi̍ḥ | sami̍ddhaḥ | apa̍ | dvārā̍ | tama̍saḥ | vahni̍ḥ | ā̱va̱rityā̍vaḥ ||3.005.01||

3.005.02a pred v a̱gnir vā̍vṛdhe̱ stome̍bhir gī̱rbhiḥ sto̍tṝ̱ṇāṁ na̍ma̱sya̍ u̱kthaiḥ |
3.005.02c pū̱rvīr ṛ̱tasya̍ sa̱ṁdṛśa̍ś cakā̱naḥ saṁ dū̱to a̍dyaud u̱ṣaso̍ viro̱ke ||

pra | it | ū̱m̐ iti̍ | a̱gniḥ | va̱vṛ̱dhe̱ | stome̍bhiḥ | gī̱ḥ-bhiḥ | sto̱tṝ̱ṇām | na̱ma̱sya̍ḥ | u̱kthaiḥ |
pū̱rvīḥ | ṛ̱tasya̍ | sa̱m-dṛśa̍ḥ | ca̱kā̱naḥ | sam | dū̱taḥ | a̱dyau̱t | u̱ṣasa̍ḥ | vi̱-ro̱ke ||3.005.02||

3.005.03a adhā̍yy a̱gnir mānu̍ṣīṣu vi̱kṣv a1̱̍pāṁ garbho̍ mi̱tra ṛ̱tena̱ sādha̍n |
3.005.03c ā ha̍rya̱to ya̍ja̱taḥ sānv a̍sthā̱d abhū̍d u̱ vipro̱ havyo̍ matī̱nām ||

adhā̍yi | a̱gniḥ | mānu̍ṣīṣu | vi̱kṣu | a̱pām | garbha̍ḥ | mi̱traḥ | ṛ̱tena̍ | sādha̍n |
ā | hi̱rya̱taḥ | ya̱ja̱taḥ | sānu̍ | a̱sthā̱t | abhū̍t | ū̱m̐ iti̍ | vipra̍ḥ | havya̍ḥ | ma̱tī̱nām ||3.005.03||

3.005.04a mi̱tro a̱gnir bha̍vati̱ yat sami̍ddho mi̱tro hotā̱ varu̍ṇo jā̱tave̍dāḥ |
3.005.04c mi̱tro a̍dhva̱ryur i̍ṣi̱ro damū̍nā mi̱traḥ sindhū̍nām u̱ta parva̍tānām ||

mi̱traḥ | a̱gniḥ | bha̱va̱ti̱ | yat | sam-i̍ddhaḥ | mi̱traḥ | hotā̍ | varu̍ṇaḥ | ja̱ta-ve̍dāḥ |
mi̱traḥ | a̱dhva̱ryuḥ | i̱ṣi̱raḥ | damū̍nāḥ | mi̱traḥ | sindhū̍nām | u̱ta | parva̍tānām ||3.005.04||

3.005.05a pāti̍ pri̱yaṁ ri̱po agra̍m pa̱daṁ veḥ pāti̍ ya̱hvaś cara̍ṇa̱ṁ sūrya̍sya |
3.005.05c pāti̱ nābhā̍ sa̱ptaśī̍rṣāṇam a̱gniḥ pāti̍ de̱vānā̍m upa̱māda̍m ṛ̱ṣvaḥ ||

pāti̍ | pri̱yam | ri̱paḥ | agra̍m | pa̱dam | veḥ | pāti̍ | ya̱hvaḥ | cara̍ṇam | sūrya̍sya |
pāti̍ | nābhā̍ | sa̱pta-śī̍rṣāṇām | a̱gniḥ | pāti̍ | de̱vānā̍m | u̱pa̱-māda̍m | ṛ̱ṣvaḥ ||3.005.05||

3.005.06a ṛ̱bhuś ca̍kra̱ īḍya̱ṁ cāru̱ nāma̱ viśvā̍ni de̱vo va̱yunā̍ni vi̱dvān |
3.005.06c sa̱sasya̱ carma̍ ghṛ̱tava̍t pa̱daṁ ves tad id a̱gnī ra̍kṣa̱ty apra̍yucchan ||

ṛ̱bhuḥ | ca̱kre̱ | īḍya̍m | cāru̍ | nāma̍ | viśvā̍ni | de̱vaḥ | va̱yunā̍ni | vi̱dvān |
sa̱sasya̍ | carma̍ | ghṛ̱ta-va̍t | pa̱dam | veḥ | tat | it | a̱gniḥ | ra̱kṣa̱ti̱ | apra̍-yucchan ||3.005.06||

3.005.07a ā yoni̍m a̱gnir ghṛ̱tava̍ntam asthāt pṛ̱thupra̍gāṇam u̱śanta̍m uśā̱naḥ |
3.005.07c dīdyā̍na̱ḥ śuci̍r ṛ̱ṣvaḥ pā̍va̱kaḥ puna̍ḥ-punar mā̱tarā̱ navya̍sī kaḥ ||

ā | yoni̍m | a̱gniḥ | ghṛ̱ta-va̍ntam | a̱sthā̱t | pṛ̱thu-pra̍gānam | u̱śanta̍m | uśā̱naḥ |
dīdyā̍naḥ | śuci̍ḥ | ṛ̱ṣvaḥ | pā̱va̱kaḥ | puna̍ḥ-punaḥ | mā̱tarā̍ | navya̍sī̱ iti̍ | ka̱riti̍ kaḥ ||3.005.07||

3.005.08a sa̱dyo jā̱ta oṣa̍dhībhir vavakṣe̱ yadī̱ vardha̍nti pra̱svo̍ ghṛ̱tena̍ |
3.005.08c āpa̍ iva pra̱vatā̱ śumbha̍mānā uru̱ṣyad a̱gniḥ pi̱tror u̱pasthe̍ ||

sa̱dyaḥ | jā̱taḥ | oṣa̍dhībhiḥ | va̱va̱kṣe̱ | yadi̍ | vardha̍nti | pra̱-sva̍ḥ | ghṛ̱tena̍ |
āpa̍ḥ-iva | pra̱-vatā̍ | śumbha̍mānāḥ | u̱ru̱ṣyat | a̱gniḥ | pi̱troḥ | u̱pa-sthe̍ ||3.005.08||

3.005.09a ud u̍ ṣṭu̱taḥ sa̱midhā̍ ya̱hvo a̍dyau̱d varṣma̍n di̱vo adhi̱ nābhā̍ pṛthi̱vyāḥ |
3.005.09c mi̱tro a̱gnir īḍyo̍ māta̱riśvā dū̱to va̍kṣad ya̱jathā̍ya de̱vān ||

ut | ū̱ā̍m iti̍ | stu̱taḥ | sa̱m-idhā̍ | ya̱hvaḥ | a̱dyau̱t | varṣma̍n | di̱vaḥ | adhi̍ | nābhā̍ | pṛ̱thi̱vyāḥ |
mi̱traḥ | a̱gniḥ | īḍya̍ḥ | mā̱ta̱riśvā̍ | ā | dū̱taḥ | va̱kṣa̱t | ya̱jathā̍ya | de̱vān ||3.005.09||

3.005.10a ud a̍stambhīt sa̱midhā̱ nāka̍m ṛ̱ṣvo̱3̱̍ 'gnir bhava̍nn utta̱mo ro̍ca̱nānā̍m |
3.005.10c yadī̱ bhṛgu̍bhya̱ḥ pari̍ māta̱riśvā̱ guhā̱ santa̍ṁ havya̱vāha̍ṁ samī̱dhe ||

ut | a̱sta̱mbhī̱t | sa̱m-idhā̍ | nāka̍m | ṛ̱ṣvaḥ | a̱gniḥ | bhava̍n | u̱t-ta̱maḥ | ro̱ca̱nānā̍m |
yadi̍ | bhṛgu̍-bhya̍ḥ | pari̍ | mā̱ta̱riśvā̍ | guhā̍ | santa̍m | ha̱vya̱-vāha̍m | sa̱m-ī̱dhe ||3.005.10||

3.005.11a iḻā̍m agne puru̱daṁsa̍ṁ sa̱niṁ goḥ śa̍śvatta̱maṁ hava̍mānāya sādha |
3.005.11c syān na̍ḥ sū̱nus tana̍yo vi̱jāvāgne̱ sā te̍ suma̱tir bhū̍tv a̱sme ||

iḻā̍m | a̱gne̱ | pu̱ru̱-daṁsa̍m | sa̱nim | goḥ | śa̱śva̱t-ta̱mam | hava̍mānāya | sā̱dha̱ |
syāt | na̱ḥ | sū̱nuḥ | tana̍yaḥ | vi̱jā-vā̍ | a̱gne̱ | sā | te̱ | su̱-ma̱tiḥ | bhū̱tu̱ | a̱sme iti̍ ||3.005.11||


3.006.01a pra kā̍ravo mana̱nā va̱cyamā̍nā deva̱drīcī̍ṁ nayata deva̱yanta̍ḥ |
3.006.01c da̱kṣi̱ṇā̱vāḍ vā̱jinī̱ prācy e̍ti ha̱vir bhara̍nty a̱gnaye̍ ghṛ̱tācī̍ ||

pra | kā̱ra̱va̱ḥ | ma̱na̱nā | va̱cyamā̍nāḥ | de̱va̱drīcī̍n | na̱ya̱ta̱ | de̱va̱-yanta̍ḥ |
da̱kṣi̱ṇā̱-vāṭ | vā̱jinī̍ | prācī̍ | e̱ti̱ | ha̱viḥ | bhara̍ntī | a̱gnaye̍ | ghṛ̱tācī̍ ||3.006.01||

3.006.02a ā roda̍sī apṛṇā̱ jāya̍māna u̱ta pra ri̍kthā̱ adha̱ nu pra̍yajyo |
3.006.02c di̱vaś ci̍d agne mahi̱nā pṛ̍thi̱vyā va̱cyantā̍ṁ te̱ vahna̍yaḥ sa̱ptaji̍hvāḥ ||

ā | roda̍sī̱ iti̍ | a̱pṛ̱ṇā̱ḥ | jāya̍mānaḥ | u̱ta | pra | ri̱kthā̱ḥ | adha̍ | nu | pra̱ya̱jyo̱ iti̍ pra-yajyo |
de̱vaḥ | ci̱t | a̱gne̱ | ma̱hi̱nā | pṛ̱thi̱vyāḥ | va̱cyantā̍m | te̱ | vahna̍yaḥ | sa̱pta-ji̍hvāḥ ||3.006.02||

3.006.03a dyauś ca̍ tvā pṛthi̱vī ya̱jñiyā̍so̱ ni hotā̍raṁ sādayante̱ damā̍ya |
3.006.03c yadī̱ viśo̱ mānu̍ṣīr deva̱yantī̱ḥ praya̍svatī̱r īḻa̍te śu̱kram a̱rciḥ ||

dyauḥ | ca̱ | tvā̱ | pṛ̱thi̱vī | ya̱jñiyā̍saḥ | ni | hotā̍ram | sā̱da̱ya̱nte̱ | damā̍ya |
yadi̍ | viśa̍ḥ | mānu̍ṣīḥ | de̱va̱-yantī̍ḥ | praya̍svatīḥ | īḻa̍te | śu̱kram | a̱rciḥ ||3.006.03||

3.006.04a ma̱hān sa̱dhasthe̍ dhru̱va ā niṣa̍tto̱ 'ntar dyāvā̱ māhi̍ne̱ harya̍māṇaḥ |
3.006.04c āskre̍ sa̱patnī̍ a̱jare̱ amṛ̍kte saba̱rdughe̍ urugā̱yasya̍ dhe̱nū ||

ma̱hān | sa̱dha-sthe̍ | dhru̱vaḥ | ā | ni-sa̍ttaḥ | a̱ntaḥ | dyāvā̍ | māhi̍ne̱ iti̍ | harya̍māṇaḥ |
āskre̱ iti̍ | sa̱patnī̱ iti̍ sa̱-patnī̍ | a̱jare̱ iti̍ | amṛ̍kte̱ iti̍ | sa̱ba̱rdughe̱ iti̍ sa̱ba̱ḥ-dughe̍ | u̱ru̱-gā̱yasya̍ | dhe̱nū iti̍ ||3.006.04||

3.006.05a vra̱tā te̍ agne maha̱to ma̱hāni̱ tava̱ kratvā̱ roda̍sī̱ ā ta̍tantha |
3.006.05c tvaṁ dū̱to a̍bhavo̱ jāya̍māna̱s tvaṁ ne̱tā vṛ̍ṣabha carṣaṇī̱nām ||

vra̱tā | te̱ | a̱gne̱ | ma̱ha̱taḥ | ma̱hāni̍ | tava̍ | kratvā̍ | roda̍sī̱ iti̍ | ā | ta̱ta̱ntha̱ |
tvam | dū̱taḥ | a̱bha̱va̱ḥ | jāya̍mānaḥ | tvam | ne̱tā | vṛ̱ṣa̱bha̱ | ca̱rṣa̱ṇī̱nām ||3.006.05||

3.006.06a ṛ̱tasya̍ vā ke̱śinā̍ yo̱gyābhi̍r ghṛta̱snuvā̱ rohi̍tā dhu̱ri dhi̍ṣva |
3.006.06c athā va̍ha de̱vān de̍va̱ viśvā̍n svadhva̱rā kṛ̍ṇuhi jātavedaḥ ||

ṛ̱tasya̍ | vā̱ | ke̱śinā̍ | yo̱gyābhi̍ḥ | ghṛ̱ta̱-snuvā̍ | rohi̍tā | dhu̱ri | dhi̱ṣva̱ |
atha̍ | ā | va̱ha | de̱vān | de̱va̱ | viśvā̍n | su̱-a̱dhva̱rā | kṛ̱ṇu̱hi̱ | jā̱ta̱-ve̱da̱ḥ ||3.006.06||

3.006.07a di̱vaś ci̱d ā te̍ rucayanta ro̱kā u̱ṣo vi̍bhā̱tīr anu̍ bhāsi pū̱rvīḥ |
3.006.07c a̱po yad a̍gna u̱śadha̱g vane̍ṣu̱ hotu̍r ma̱ndrasya̍ pa̱naya̍nta de̱vāḥ ||

di̱vaḥ | ci̱t | ā | te̱ | ru̱ca̱ya̱nta̱ | ro̱kāḥ | u̱ṣaḥ | vi̱-bhā̱tīḥ | anu̍ | bhā̱si̱ | pū̱rvīḥ |
a̱paḥ | yat | a̱gne̱ | u̱śadha̍k | vane̍ṣu | hotu̍ḥ | ma̱ndrasya̍ | pa̱naya̍nta | de̱vāḥ ||3.006.07||

3.006.08a u̱rau vā̱ ye a̱ntari̍kṣe̱ mada̍nti di̱vo vā̱ ye ro̍ca̱ne santi̍ de̱vāḥ |
3.006.08c ūmā̍ vā̱ ye su̱havā̍so̱ yaja̍trā āyemi̱re ra̱thyo̍ agne̱ aśvā̍ḥ ||

u̱rau | vā̱ | ye | a̱ntari̍kṣe | mada̍nti | di̱vaḥ | vā̱ | ye | ro̱ca̱ne | santi̍ | de̱vāḥ |
ūmā̍ḥ | vā̱ | ye | su̱-havā̍saḥ | yaja̍trāḥ | ā̱-ye̱mi̱re | ra̱thya̍ḥ | a̱gne̱ | aśvā̍ḥ ||3.006.08||

3.006.09a aibhi̍r agne sa̱ratha̍ṁ yāhy a̱rvāṅ nā̍nāra̱thaṁ vā̍ vi̱bhavo̱ hy aśvā̍ḥ |
3.006.09c patnī̍vatas tri̱ṁśata̱ṁ trīm̐ś ca̍ de̱vān a̍nuṣva̱dham ā va̍ha mā̱daya̍sva ||

ā | e̱bhi̱ḥ | a̱gne̱ | sa̱-ratha̍m | yā̱hi̱ | a̱rvāṅ | nā̱nā-ra̱tham | vā̱ | vi̱-bhava̍ḥ | hi | aśvā̍ḥ |
patnī̍-vataḥ | tri̱ṁśata̍m | trīn | ca̱ | de̱vān | a̱nu̱-sva̱dham | ā | va̱ha̱ | mā̱daya̍sva ||3.006.09||

3.006.10a sa hotā̱ yasya̱ roda̍sī cid u̱rvī ya̱jñaṁ-ya̍jñam a̱bhi vṛ̱dhe gṛ̍ṇī̱taḥ |
3.006.10c prācī̍ adhva̱reva̍ tasthatuḥ su̱meke̍ ṛ̱tāva̍rī ṛ̱tajā̍tasya sa̱tye ||

saḥ | hotā̍ | yasya̍ | roda̍sī̱ iti̍ | ci̱t | u̱rvī iti̍ | ya̱jñam-ya̍jñam | a̱bhi | vṛ̱dhe | gṛ̱ṇī̱taḥ |
prācī̱ iti̍ | a̱dhva̱rā-i̍va | ta̱stha̱tuḥ | su̱meke̱ iti̍ su̱-meke̍ | ṛ̱tava̍rī̱ ityṛ̱ta-va̍rī | ṛ̱ta-jā̍tasya | sa̱tye iti̍ ||3.006.10||

3.006.11a iḻā̍m agne puru̱daṁsa̍ṁ sa̱niṁ goḥ śa̍śvatta̱maṁ hava̍mānāya sādha |
3.006.11c syān na̍ḥ sū̱nus tana̍yo vi̱jāvāgne̱ sā te̍ suma̱tir bhū̍tv a̱sme ||

iḻā̍m | a̱gne̱ | pu̱ru̱-daṁsa̍m | sa̱nim | goḥ | śa̱śva̱t-ta̱mam | hava̍mānāya | sā̱dha̱ |
syāt | na̱ḥ | sū̱nuḥ | tana̍yaḥ | vi̱jā-vā̍ | a̱gne̱ | sā | te̱ | su̱-ma̱tiḥ | bhū̱tu̱ | a̱sme iti̍ ||3.006.11||


3.007.01a pra ya ā̱ruḥ śi̍tipṛ̱ṣṭhasya̍ dhā̱ser ā mā̱tarā̍ viviśuḥ sa̱pta vāṇī̍ḥ |
3.007.01c pa̱ri̱kṣitā̍ pi̱tarā̱ saṁ ca̍rete̱ pra sa̍rsrāte dī̱rgham āyu̍ḥ pra̱yakṣe̍ ||

pra | ye | ā̱ruḥ | śi̱ti̱-pṛ̱ṣṭhasya̍ | dhā̱seḥ | ā | mā̱tarā̍ | vi̱vi̱śu̱ḥ | sa̱pta | vāṇī̍ḥ |
pa̱ri̱-kṣitā̍ḥ | pi̱tarā̍ | sam | ca̱re̱te̱ | pra | sa̱rsrā̱te̱ iti̍ | dī̱rgham | āyu̍ḥ | pra̱-yakṣe̍ ||3.007.01||

3.007.02a di̱vakṣa̍so dhe̱navo̱ vṛṣṇo̱ aśvā̍ de̱vīr ā ta̍sthau̱ madhu̍ma̱d vaha̍ntīḥ |
3.007.02c ṛ̱tasya̍ tvā̱ sada̍si kṣema̱yanta̱m pary ekā̍ carati varta̱niṁ gauḥ ||

di̱vakṣa̍saḥ | dhe̱nava̍ḥ | vṛṣṇa̍ḥ | aśvā̍ḥ | de̱vīḥ | ā | ta̱sthau̱ | madhu̍-mat | vaha̍ntīḥ |
ṛ̱tasya̍ | tvā̱ | sada̍si | kṣe̱ma̱-yanta̍m | pari̍ | ekā̍ | ca̱ra̱ti̱ | va̱rta̱nim | gauḥ ||3.007.02||

3.007.03a ā sī̍m arohat su̱yamā̱ bhava̍ntī̱ḥ pati̍ś ciki̱tvān ra̍yi̱vid ra̍yī̱ṇām |
3.007.03c pra nīla̍pṛṣṭho ata̱sasya̍ dhā̱ses tā a̍vāsayat puru̱dhapra̍tīkaḥ ||

ā | sī̱m | a̱ro̱ha̱t | su̱-yamā̍ḥ | bhava̍ntīḥ | pati̍ḥ | ci̱ki̱tvān | ra̱yi̱-vit | ra̱yī̱ṇām |
pra | nīla̍-pṛṣṭhaḥ | a̱ta̱sasya̍ | dhā̱seḥ | tāḥ | a̱vā̱sa̱ya̱t | pu̱ru̱dha-pra̍tīkaḥ ||3.007.03||

3.007.04a mahi̍ tvā̱ṣṭram ū̱rjaya̍ntīr aju̱ryaṁ sta̍bhū̱yamā̍naṁ va̱hato̍ vahanti |
3.007.04c vy aṅge̍bhir didyutā̱naḥ sa̱dhastha̱ ekā̍m iva̱ roda̍sī̱ ā vi̍veśa ||

mahi̍ | tvā̱ṣṭram | ū̱rjaya̍ntīḥ | a̱ju̱ryam | sta̱bhu̱-yamā̍nam | va̱hata̍ḥ | va̱ha̱nti̱ |
vi | aṅge̍bhiḥ | di̱dyu̱tā̱naḥ | sa̱dha-sthe̍ | ekā̍m-iva | roda̍sī̱ iti̍ | ā | vi̱ve̱śa̱ ||3.007.04||

3.007.05a jā̱nanti̱ vṛṣṇo̍ aru̱ṣasya̱ śeva̍m u̱ta bra̱dhnasya̱ śāsa̍ne raṇanti |
3.007.05c di̱vo̱ruca̍ḥ su̱ruco̱ roca̍mānā̱ iḻā̱ yeṣā̱ṁ gaṇyā̱ māhi̍nā̱ gīḥ ||

jā̱nanti̍ | vṛṣṇa̍ḥ | a̱ru̱ṣasya̍ | śeva̍m | u̱ta | bra̱dhnasya̍ | śāsa̍ne | ra̱ṇa̱nti̱ |
di̱va̱ḥ-ruca̍ḥ | su̱-ruca̍ḥ | roca̍mānāḥ | iḻā̍ | yeṣā̍m | gaṇyā̍ | māhi̍nā | gīḥ ||3.007.05||

3.007.06a u̱to pi̱tṛbhyā̍m pra̱vidānu̱ ghoṣa̍m ma̱ho ma̱hadbhyā̍m anayanta śū̱ṣam |
3.007.06c u̱kṣā ha̱ yatra̱ pari̱ dhāna̍m a̱ktor anu̱ svaṁ dhāma̍ jari̱tur va̱vakṣa̍ ||

u̱to iti̍ | pi̱tṛ-bhyā̍m | pra̱-vidā̍ | anu̍ | ghoṣa̍m | ma̱haḥ | ma̱hat-bhyā̍m | a̱na̱ya̱nta̱ | śū̱ṣam |
u̱kṣā | ha̱ | yatra̍ | pari̍ | dhāna̍m | a̱ktoḥ | anu̍ | svam | dhāma̍ | ja̱ri̱tuḥ | va̱vakṣa̍ ||3.007.06||

3.007.07a a̱dhva̱ryubhi̍ḥ pa̱ñcabhi̍ḥ sa̱pta viprā̍ḥ pri̱yaṁ ra̍kṣante̱ nihi̍tam pa̱daṁ veḥ |
3.007.07c prāñco̍ madanty u̱kṣaṇo̍ aju̱ryā de̱vā de̱vānā̱m anu̱ hi vra̱tā guḥ ||

a̱dhva̱ryu-bhi̍ḥ | pa̱ñca-bhi̍ḥ | sa̱pta | viprā̍ḥ | pri̱yam | ra̱kṣa̱nte̱ | ni-hi̍tam | pa̱dam | veḥ |
prāñca̍ḥ | ma̱da̱nti̱ | u̱kṣaṇa̍ḥ | a̱ju̱ryāḥ | de̱vāḥ | de̱vānā̍m | anu̍ | hi | vra̱tā | guriti̱ guḥ ||3.007.07||

3.007.08a daivyā̱ hotā̍rā pratha̱mā ny ṛ̍ñje sa̱pta pṛ̱kṣāsa̍ḥ sva̱dhayā̍ madanti |
3.007.08c ṛ̱taṁ śaṁsa̍nta ṛ̱tam it ta ā̍hu̱r anu̍ vra̱taṁ vra̍ta̱pā dīdhyā̍nāḥ ||

daivyā̍ | hotā̍rā | pra̱tha̱mā | ni | ṛ̱ñje̱ | sa̱pta | pṛ̱kṣāsa̍ḥ | sva̱dhayā̍ | ma̱da̱nti̱ |
ṛ̱tam | śaṁsa̍ntaḥ | ṛ̱tam | it | te | ā̱hu̱ḥ | anu̍ | vra̱tam | vra̱ta̱-pāḥ | dīdhyā̍nāḥ ||3.007.08||

3.007.09a vṛ̱ṣā̱yante̍ ma̱he atyā̍ya pū̱rvīr vṛṣṇe̍ ci̱trāya̍ ra̱śmaya̍ḥ suyā̱māḥ |
3.007.09c deva̍ hotar ma̱ndrata̍raś ciki̱tvān ma̱ho de̱vān roda̍sī̱ eha va̍kṣi ||

vṛ̱ṣā̱-yante̍ | ma̱he | atyā̍ya | pū̱rvīḥ | vṛṣṇe̍ | ci̱trāya̍ | ra̱śmaya̍ḥ | su̱-yā̱māḥ |
deva̍ | ho̱ta̱ḥ | ma̱ndra-ta̍raḥ | ci̱ki̱tvān | ma̱haḥ | de̱vān | roda̍sī̱ iti̍ | ā | i̱ha | va̱kṣi̱ ||3.007.09||

3.007.10a pṛ̱kṣapra̍yajo draviṇaḥ su̱vāca̍ḥ suke̱tava̍ u̱ṣaso̍ re̱vad ū̍ṣuḥ |
3.007.10c u̱to ci̍d agne mahi̱nā pṛ̍thi̱vyāḥ kṛ̱taṁ ci̱d ena̱ḥ sam ma̱he da̍śasya ||

pṛ̱kṣa-pra̍yajaḥ | dra̱vi̱ṇa̱ḥ | su̱-vāca̍ḥ | su̱-ke̱tava̍ḥ | u̱ṣasa̍ḥ | re̱vat | ū̱ṣu̱ḥ |
u̱to iti̍ | ci̱t | a̱gne̱ | ma̱hi̱nā | pṛ̱thi̱vyāḥ | kṛ̱tam | ci̱t | ena̍ḥ | sam | ma̱he | da̱śa̱sya̱ ||3.007.10||

3.007.11a iḻā̍m agne puru̱daṁsa̍ṁ sa̱niṁ goḥ śa̍śvatta̱maṁ hava̍mānāya sādha |
3.007.11c syān na̍ḥ sū̱nus tana̍yo vi̱jāvāgne̱ sā te̍ suma̱tir bhū̍tv a̱sme ||

iḻā̍m | a̱gne̱ | pu̱ru̱-daṁsa̍m | sa̱nim | goḥ | śa̱śva̱t-ta̱mam | hava̍mānāya | sā̱dha̱ |
syāt | na̱ḥ | sū̱nuḥ | tana̍yaḥ | vi̱jā-vā̍ | a̱gne̱ | sā | te̱ | su̱-ma̱tiḥ | bhū̱tu̱ | a̱sme iti̍ ||3.007.11||


3.008.01a a̱ñjanti̱ tvām a̍dhva̱re de̍va̱yanto̱ vana̍spate̱ madhu̍nā̱ daivye̍na |
3.008.01c yad ū̱rdhvas tiṣṭhā̱ dravi̍ṇe̱ha dha̍ttā̱d yad vā̱ kṣayo̍ mā̱tur a̱syā u̱pasthe̍ ||

a̱ñjanti̍ | tvām | a̱dhva̱re | de̱va̱-yanta̍ḥ | vana̍spate | madhu̍nā | daivye̍na |
yat | ū̱rdhvaḥ | ti̱ṣṭhā̍ḥ | dravi̍nā | i̱ha | dha̱ttā̱t | yat | vā̱ | kṣaya̍ḥ | mā̱tuḥ | a̱syāḥ | u̱pa-sthe̍ ||3.008.01||

3.008.02a sami̍ddhasya̱ śraya̍māṇaḥ pu̱rastā̱d brahma̍ vanvā̱no a̱jara̍ṁ su̱vīra̍m |
3.008.02c ā̱re a̱smad ama̍ti̱m bādha̍māna̱ uc chra̍yasva maha̱te saubha̍gāya ||

sam-i̍ddhasya | śraya̍māṇaḥ | pu̱rastā̍t | brahma̍ | va̱nvā̱naḥ | a̱jara̍m | su̱-vīra̍m |
ā̱re | a̱smat | ama̍tim | bādha̍mānaḥ | ut | śra̱ya̱sva̱ | ma̱ha̱te | saubha̍gāya ||3.008.02||

3.008.03a uc chra̍yasva vanaspate̱ varṣma̍n pṛthi̱vyā adhi̍ |
3.008.03c sumi̍tī mī̱yamā̍no̱ varco̍ dhā ya̱jñavā̍hase ||

ut | śra̱ya̱sva̱ | va̱na̱spa̱te̱ | varṣma̍n | pṛ̱thi̱vyāḥ | adhi̍ |
su-mi̍tī | mī̱yamā̍naḥ | varca̍ḥ | dhā̱ḥ | ya̱jña-vā̍hase ||3.008.03||

3.008.04a yuvā̍ su̱vāsā̱ḥ pari̍vīta̱ āgā̱t sa u̱ śreyā̍n bhavati̱ jāya̍mānaḥ |
3.008.04c taṁ dhīrā̍saḥ ka̱vaya̱ un na̍yanti svā̱dhyo̱3̱̍ mana̍sā deva̱yanta̍ḥ ||

yuvā̍ | su̱-vāsā̍ḥ | pari̍-vītaḥ | ā | a̱gā̱t | saḥ | ū̱m̐ iti̍ | śreyā̍n | bha̱va̱ti̱ | jāya̍mānaḥ |
tam | dhīrā̍saḥ | ka̱vaya̍ḥ | ut | na̱ya̱nti̱ | su̱-ā̱dhya̍ḥ | mana̍sā | de̱va̱-yanta̍ḥ ||3.008.04||

3.008.05a jā̱to jā̍yate sudina̱tve ahnā̍ṁ sama̱rya ā vi̱dathe̱ vardha̍mānaḥ |
3.008.05c pu̱nanti̱ dhīrā̍ a̱paso̍ manī̱ṣā de̍va̱yā vipra̱ ud i̍yarti̱ vāca̍m ||

jā̱taḥ | jā̱ya̱te̱ | su̱di̱na̱-tve | ahnā̍m | sa̱-ma̱rye | ā | vi̱dathe̍ | vardha̍mānaḥ |
pu̱nanti̍ | dhīrā̍ḥ | a̱pasa̍ḥ | ma̱nī̱ṣā | de̱va̱-yāḥ | vipra̍ḥ | ut | i̱ya̱rti̱ | vāca̍m ||3.008.05||

3.008.06a yān vo̱ naro̍ deva̱yanto̍ nimi̱myur vana̍spate̱ svadhi̍tir vā ta̱takṣa̍ |
3.008.06c te de̱vāsa̱ḥ svara̍vas tasthi̱vāṁsa̍ḥ pra̱jāva̍d a̱sme di̍dhiṣantu̱ ratna̍m ||

yān | va̱ḥ | nara̍ḥ | de̱va̱-yanta̍ḥ | ni̱-mi̱myuḥ | vana̍spate | sva-dhi̍tiḥ | vā̱ | ta̱takṣa̍ |
te | de̱vāsa̍ḥ | svara̍vaḥ | ta̱sthi̱-vāṁsa̍ḥ | pra̱jā-va̍t | a̱sme iti̍ | di̱dhi̱ṣa̱ntu̱ | ratna̍m ||3.008.06||

3.008.07a ye vṛ̱kṇāso̱ adhi̱ kṣami̱ nimi̍tāso ya̱tasru̍caḥ |
3.008.07c te no̍ vyantu̱ vārya̍ṁ deva̱trā kṣe̍tra̱sādha̍saḥ ||

ye | vṛ̱kṇāsa̍ḥ | adhi̍ | kṣami̍ | ni-mi̍tāsaḥ | ya̱ta-sru̍caḥ |
te | na̱ḥ | vya̱ntu̱ | vārya̍m | de̱va̱-trā | kṣe̱tra̱-sādha̍saḥ ||3.008.07||

3.008.08a ā̱di̱tyā ru̱drā vasa̍vaḥ sunī̱thā dyāvā̱kṣāmā̍ pṛthi̱vī a̱ntari̍kṣam |
3.008.08c sa̱joṣa̍so ya̱jñam a̍vantu de̱vā ū̱rdhvaṁ kṛ̍ṇvantv adhva̱rasya̍ ke̱tum ||

ā̱di̱tyāḥ | ru̱drāḥ | vasa̍vaḥ | su̱-nī̱thāḥ | dyāvā̱-kṣāmā̍ | pṛ̱thi̱vī | a̱ntari̍kṣam |
sa̱-joṣa̍saḥ | ya̱jñam | a̱va̱ntu̱ | de̱vāḥ | ū̱rdhvam | kṛ̱ṇva̱ntu̱ | a̱dhva̱rasya̍ | ke̱tum ||3.008.08||

3.008.09a ha̱ṁsā i̍va śreṇi̱śo yatā̍nāḥ śu̱krā vasā̍nā̱ḥ svara̍vo na̱ āgu̍ḥ |
3.008.09c u̱nnī̱yamā̍nāḥ ka̱vibhi̍ḥ pu̱rastā̍d de̱vā de̱vānā̱m api̍ yanti̱ pātha̍ḥ ||

ha̱ṁsāḥ-i̍va | śre̱ṇi̱śaḥ | yatā̍nāḥ | śu̱krā | vasā̍nāḥ | svara̍vaḥ | na̱ḥ | ā | a̱gu̱ḥ |
u̱t-nī̱yamā̍nāḥ | ka̱vi-bhi̍ḥ | pu̱rastā̍t | de̱vāḥ | de̱vānā̍m | api̍ | ya̱nti̱ | pātha̍ḥ ||3.008.09||

3.008.10a śṛṅgā̍ṇī̱vec chṛ̱ṅgiṇā̱ṁ saṁ da̍dṛśre ca̱ṣāla̍vanta̱ḥ svara̍vaḥ pṛthi̱vyām |
3.008.10c vā̱ghadbhi̍r vā viha̱ve śroṣa̍māṇā a̱smām̐ a̍vantu pṛta̱nājye̍ṣu ||

śṛṅgā̍ṇi-iva | it | śṛ̱ṅgiṇā̱m | sam | da̱dṛ̱śre̱ | ca̱ṣāla̍-vantaḥ | svara̍vaḥ | pṛ̱thi̱vyām |
vā̱ghat-bhi̍ḥ | vā̱ | vi̱-ha̱ve | śroṣa̍māṇāḥ | a̱smān | a̱va̱ntu̱ | pṛ̱ta̱nājye̍ṣu ||3.008.10||

3.008.11a vana̍spate śa̱tava̍lśo̱ vi ro̍ha sa̱hasra̍valśā̱ vi va̱yaṁ ru̍hema |
3.008.11c yaṁ tvām a̱yaṁ svadhi̍ti̱s teja̍mānaḥ praṇi̱nāya̍ maha̱te saubha̍gāya ||

vana̍spate | śa̱ta-va̍lśaḥ | vi | ro̱ha̱ | sa̱hasra̍-valśāḥ | vi | va̱yam | ru̱he̱ma̱ |
yam | tvām | a̱yam | sva-dhi̍tiḥ | teja̍mānaḥ | pra̱-ni̱nāya̍ | ma̱ha̱te | saubha̍gāya ||3.008.11||


3.009.01a sakhā̍yas tvā vavṛmahe de̱vam martā̍sa ū̱taye̍ |
3.009.01c a̱pāṁ napā̍taṁ su̱bhaga̍ṁ su̱dīdi̍tiṁ su̱pratū̍rtim ane̱hasa̍m ||

sakhā̍yaḥ | tvā̱ | va̱vṛ̱ma̱he̱ | de̱vam | martā̍saḥ | ū̱taye̍ |
a̱pām | napā̍tam | su̱-bhaga̍m | su̱-dīdi̍tim | su̱-pratū̍rtim | a̱ne̱hasa̍m ||3.009.01||

3.009.02a kāya̍māno va̱nā tvaṁ yan mā̱tṝr aja̍gann a̱paḥ |
3.009.02c na tat te̍ agne pra̱mṛṣe̍ ni̱varta̍na̱ṁ yad dū̱re sann i̱hābha̍vaḥ ||

kāya̍mānaḥ | va̱nā | tvam | yat | mā̱tṝḥ | aja̍gan | a̱paḥ |
na | tat | te̱ | a̱gne̱ | pra̱-mṛṣe̍ | ni̱-varta̍nam | yat | dū̱re | san | i̱ha | abha̍vaḥ ||3.009.02||

3.009.03a ati̍ tṛ̱ṣṭaṁ va̍vakṣi̱thāthai̱va su̱manā̍ asi |
3.009.03c pra-prā̱nye yanti̱ pary a̱nya ā̍sate̱ yeṣā̍ṁ sa̱khye asi̍ śri̱taḥ ||

ati̍ | tṛ̱ṣṭam | va̱va̱kṣi̱tha̱ | atha̍ | e̱va | su̱-manā̍ḥ | a̱si̱ |
pra-pra̍ | a̱nye | yanti̍ | pari̍ | a̱nye | ā̱sa̱te̱ | yeṣā̍m | sa̱khye | asi̍ | śri̱taḥ ||3.009.03||

3.009.04a ī̱yi̱vāṁsa̱m ati̱ sridha̱ḥ śaśva̍tī̱r ati̍ sa̱ścata̍ḥ |
3.009.04c anv ī̍m avindan nici̱rāso̍ a̱druho̱ 'psu si̱ṁham i̍va śri̱tam ||

ī̱yi̱-vāṁsa̍m | ati̍ | sridha̍ḥ | śaśva̍tīḥ | ati̍ | sa̱ścata̍ḥ |
anu̍ | ī̱m | a̱vi̱nda̱n | ni̱-ci̱rāsa̍ḥ | a̱druha̍ḥ | a̱p-su | si̱ṁham-i̍va | śri̱tam ||3.009.04||

3.009.05a sa̱sṛ̱vāṁsa̍m iva̱ tmanā̱gnim i̱tthā ti̱rohi̍tam |
3.009.05c aina̍ṁ nayan māta̱riśvā̍ parā̱vato̍ de̱vebhyo̍ mathi̱tam pari̍ ||

sa̱sṛ̱vāṁsa̍m-iva | tmanā̍ | a̱gnim | i̱tthā | ti̱raḥ-hi̍tam |
ā | e̱na̱m | na̱ya̱t | mā̱ta̱riśvā̍ | pa̱rā̱-vata̍ḥ | de̱vebhya̍ḥ | ma̱thi̱tam | pari̍ ||3.009.05||

3.009.06a taṁ tvā̱ martā̍ agṛbhṇata de̱vebhyo̍ havyavāhana |
3.009.06c viśvā̱n yad ya̱jñām̐ a̍bhi̱pāsi̍ mānuṣa̱ tava̱ kratvā̍ yaviṣṭhya ||

tam | tvā̱ | martā̍ḥ | a̱gṛ̱bhṇa̱ta̱ | de̱vebhya̍ḥ | ha̱vya̱-vā̱ha̱na̱ |
viśvā̍n | yat | ya̱jñān | a̱bhi̱-pāsi̍ | mā̱nu̱ṣa̱ | tava̍ | kratvā̍ | ya̱vi̱ṣṭhya̱ ||3.009.06||

3.009.07a tad bha̱draṁ tava̍ da̱ṁsanā̱ pākā̍ya cic chadayati |
3.009.07c tvāṁ yad a̍gne pa̱śava̍ḥ sa̱māsa̍te̱ sami̍ddham apiśarva̱re ||

tat | bha̱dram | tava̍ | da̱ṁsanā̍ | pākā̍ya | ci̱t | cha̱da̱ya̱ti̱ |
tvām | yat | a̱gne̱ | pa̱śava̍ḥ | sa̱m-āsa̍te | sam-i̍ddham | a̱pi̱-śa̱rva̱re ||3.009.07||

3.009.08a ā ju̍hotā svadhva̱raṁ śī̱ram pā̍va̱kaśo̍ciṣam |
3.009.08c ā̱śuṁ dū̱tam a̍ji̱ram pra̱tnam īḍya̍ṁ śru̱ṣṭī de̱vaṁ sa̍paryata ||

ā | ju̱ho̱ta̱ | su̱-a̱dhva̱ram | śī̱ram | pā̱va̱ka-śo̍ciṣam |
ā̱śum | dū̱tam | a̱ji̱ram | pra̱tnam | īḍya̍m | śru̱ṣṭī | de̱vam | sa̱pa̱rya̱ta̱ ||3.009.08||

3.009.09a trīṇi̍ śa̱tā trī sa̱hasrā̍ṇy a̱gniṁ tri̱ṁśac ca̍ de̱vā nava̍ cāsaparyan |
3.009.09c aukṣa̍n ghṛ̱tair astṛ̍ṇan ba̱rhir a̍smā̱ ād id dhotā̍ra̱ṁ ny a̍sādayanta ||

trīṇi̍ | śa̱tā | trī | sa̱hasrā̍ṇi | a̱gnim | tri̱ṁśat | ca̱ | de̱vāḥ | nava̍ | ca̱ | a̱sa̱pa̱rya̱n |
aukṣa̍n | ghṛ̱taiḥ | astṛ̍ṇan | ba̱rhiḥ | a̱smai̱ | āt | it | hotā̍ram | ni | a̱sā̱da̱ya̱nta̱ ||3.009.09||


3.010.01a tvām a̍gne manī̱ṣiṇa̍ḥ sa̱mrāja̍ṁ carṣaṇī̱nām |
3.010.01c de̱vam martā̍sa indhate̱ sam a̍dhva̱re ||

tvām | a̱gne̱ | ma̱nī̱ṣiṇa̍ḥ | sa̱m-rāja̍m | ca̱rṣa̱ṇī̱nām |
de̱vam | martā̍saḥ | i̱ndha̱te̱ | sam | a̱dhva̱re ||3.010.01||

3.010.02a tvāṁ ya̱jñeṣv ṛ̱tvija̱m agne̱ hotā̍ram īḻate |
3.010.02c go̱pā ṛ̱tasya̍ dīdihi̱ sve dame̍ ||

tvām | ya̱jñeṣu̍ | ṛ̱tvija̍m | agne̍ | hotā̍ram | ī̱ḻa̱te̱ |
go̱pāḥ | ṛ̱tasya̍ | dī̱di̱hi̱ | sve | dame̍ ||3.010.02||

3.010.03a sa ghā̱ yas te̱ dadā̍śati sa̱midhā̍ jā̱tave̍dase |
3.010.03c so a̍gne dhatte su̱vīrya̱ṁ sa pu̍ṣyati ||

saḥ | gha̱ | yaḥ | te̱ | dadā̍śati | sa̱midhā̍ | jā̱ta-ve̍dase |
saḥ | a̱gne̱ | dha̱tte̱ | su̱-vīrya̍m | saḥ | pu̱ṣya̱ti̱ ||3.010.03||

3.010.04a sa ke̱tur a̍dhva̱rāṇā̍m a̱gnir de̱vebhi̱r ā ga̍mat |
3.010.04c a̱ñjā̱naḥ sa̱pta hotṛ̍bhir ha̱viṣma̍te ||

saḥ | ke̱tuḥ | a̱dhva̱rāṇā̍m | a̱gniḥ | de̱vebhi̍ḥ | ā | ga̱ma̱t |
a̱ñjā̱naḥ | sa̱pta | hotṛ̍-bhiḥ | ha̱viṣma̍te ||3.010.04||

3.010.05a pra hotre̍ pū̱rvyaṁ vaco̱ 'gnaye̍ bharatā bṛ̱hat |
3.010.05c vi̱pāṁ jyotī̍ṁṣi̱ bibhra̍te̱ na ve̱dhase̍ ||

pra | hotre̍ | pū̱rvyam | vaca̍ḥ | a̱gnaye̍ | bha̱ra̱ta̱ | bṛ̱hat |
vi̱pām | jyotī̍ṁṣi | bibhra̍te | na | ve̱dhase̍ ||3.010.05||

3.010.06a a̱gniṁ va̍rdhantu no̱ giro̱ yato̱ jāya̍ta u̱kthya̍ḥ |
3.010.06c ma̱he vājā̍ya̱ dravi̍ṇāya darśa̱taḥ ||

a̱gnim | va̱rdha̱ntu̱ | na̱ḥ | gira̍ḥ | yata̍ḥ | jāya̍te | u̱kthya̍ḥ |
ma̱he | vājā̍ya | dravi̍ṇāya | da̱rśa̱taḥ ||3.010.06||

3.010.07a agne̱ yaji̍ṣṭho adhva̱re de̱vān de̍vaya̱te ya̍ja |
3.010.07c hotā̍ ma̱ndro vi rā̍ja̱sy ati̱ sridha̍ḥ ||

agne̍ | yaji̍ṣṭhaḥ | a̱dhva̱re | de̱vān | de̱va̱-ya̱te | ya̱ja̱ |
hotā̍ | ma̱ndraḥ | vi | rā̱ja̱si̱ | ati̍ | sridha̍ḥ ||3.010.07||

3.010.08a sa na̍ḥ pāvaka dīdihi dyu̱mad a̱sme su̱vīrya̍m |
3.010.08c bhavā̍ sto̱tṛbhyo̱ anta̍maḥ sva̱staye̍ ||

saḥ | na̱ḥ | pā̱va̱ka̱ | dī̱di̱hi̱ | dyu̱-mat | a̱sme iti̍ | su̱-vīrya̍m |
bhava̍ | sto̱tṛ-bhya̍ḥ | anta̍maḥ | sva̱staye̍ ||3.010.08||

3.010.09a taṁ tvā̱ viprā̍ vipa̱nyavo̍ jāgṛ̱vāṁsa̱ḥ sam i̍ndhate |
3.010.09c ha̱vya̱vāha̱m ama̍rtyaṁ saho̱vṛdha̍m ||

tam | tvā̱ | viprā̍ḥ | vi̱pa̱nyava̍ḥ | jā̱gṛ̱-vāṁsa̍ḥ | sam | i̱ndha̱te̱ |
ha̱vya̱-vāha̍m | ama̍rtyam | sa̱ha̱ḥ-vṛdha̍m ||3.010.09||


3.011.01a a̱gnir hotā̍ pu̱rohi̍to 'dhva̱rasya̱ vica̍rṣaṇiḥ |
3.011.01c sa ve̍da ya̱jñam ā̍nu̱ṣak ||

a̱gniḥ | hotā̍ | pu̱raḥ-hi̍taḥ | a̱dhva̱rasya̍ | vi-ca̍rṣaṇiḥ |
saḥ | ve̱da̱ | ya̱jñam | ā̱nu̱ṣak ||3.011.01||

3.011.02a sa ha̍vya̱vāḻ ama̍rtya u̱śig dū̱taś cano̍hitaḥ |
3.011.02c a̱gnir dhi̱yā sam ṛ̍ṇvati ||

saḥ | ha̱vya̱-vāṭ | ama̍rtyaḥ | u̱śik | dū̱taḥ | cana̍ḥ-hitaḥ |
a̱gniḥ | dhi̱yā | sam | ṛ̱ṇva̱ti̱ ||3.011.02||

3.011.03a a̱gnir dhi̱yā sa ce̍tati ke̱tur ya̱jñasya̍ pū̱rvyaḥ |
3.011.03c artha̱ṁ hy a̍sya ta̱raṇi̍ ||

a̱gniḥ | dhi̱yā | saḥ | ce̱ta̱ti̱ | ke̱tuḥ | ya̱jñasya̍ | pū̱rvyaḥ |
artha̍m | hi | a̱sya̱ | ta̱raṇi̍ ||3.011.03||

3.011.04a a̱gniṁ sū̱nuṁ sana̍śruta̱ṁ saha̍so jā̱tave̍dasam |
3.011.04c vahni̍ṁ de̱vā a̍kṛṇvata ||

a̱gnim | sū̱num | sana̍-śrutam | saha̍saḥ | jā̱ta-ve̍dasam |
vahni̍m | de̱vāḥ | a̱kṛ̱ṇva̱ta̱ ||3.011.04||

3.011.05a adā̍bhyaḥ purae̱tā vi̱śām a̱gnir mānu̍ṣīṇām |
3.011.05c tūrṇī̱ ratha̱ḥ sadā̱ nava̍ḥ ||

adā̍bhyaḥ | pu̱ra̱ḥ-e̱tā | vi̱śām | a̱gniḥ | mānu̍ṣīṇām |
tūrṇi̍ḥ | ratha̍ḥ | sadā̍ | nava̍ḥ ||3.011.05||

3.011.06a sā̱hvān viśvā̍ abhi̱yuja̱ḥ kratu̍r de̱vānā̱m amṛ̍ktaḥ |
3.011.06c a̱gnis tu̱viśra̍vastamaḥ ||

sā̱hvān | viśvā̍ḥ | a̱bhi̱-yuja̍ḥ | kratu̍ḥ | de̱vānā̍m | amṛ̍ktaḥ |
a̱gniḥ | tu̱viśra̍vaḥ-tamaḥ ||3.011.06||

3.011.07a a̱bhi prayā̍ṁsi̱ vāha̍sā dā̱śvām̐ a̍śnoti̱ martya̍ḥ |
3.011.07c kṣaya̍m pāva̱kaśo̍ciṣaḥ ||

a̱bhi | prayā̍ṁsi | vāha̍sā | dā̱śvān | a̱śno̱ti̱ | martya̍ḥ |
kṣaya̍m | pā̱va̱ka-śo̍ciṣaḥ ||3.011.07||

3.011.08a pari̱ viśvā̍ni̱ sudhi̍tā̱gner a̍śyāma̱ manma̍bhiḥ |
3.011.08c viprā̍so jā̱tave̍dasaḥ ||

pari̍ | viśvā̍ni | su-dhi̍tā | a̱gneḥ | a̱śyā̱ma̱ | manma̍-bhiḥ |
viprā̍saḥ | jā̱ta-ve̍dasaḥ ||3.011.08||

3.011.09a agne̱ viśvā̍ni̱ vāryā̱ vāje̍ṣu saniṣāmahe |
3.011.09c tve de̱vāsa̱ eri̍re ||

agne̍ | viśvā̍ni | vāryā̍ | vāje̍ṣu | sa̱ni̱ṣā̱ma̱he̱ |
tve iti̍ | de̱vāsaḥ | ā | ī̱ri̱re̱ ||3.011.09||


3.012.01a indrā̍gnī̱ ā ga̍taṁ su̱taṁ gī̱rbhir nabho̱ vare̍ṇyam |
3.012.01c a̱sya pā̍taṁ dhi̱yeṣi̱tā ||

indrā̍gnī̱ iti̍ | ā | ga̍tam | su̱tam | gī̱ḥ-bhiḥ | nabha̍ḥ | vare̍ṇyam |
a̱sya | pā̱ta̱m | dhi̱yā | i̱ṣi̱tā ||3.012.01||

3.012.02a indrā̍gnī jari̱tuḥ sacā̍ ya̱jño ji̍gāti̱ ceta̍naḥ |
3.012.02c a̱yā pā̍tam i̱maṁ su̱tam ||

indrā̍gnī̱ iti̍ | ja̱ri̱tuḥ | sacā̍ | ya̱jñaḥ | ji̱gā̱ti̱ | ceta̍naḥ |
a̱yā | pā̱ta̱m | i̱mam | su̱tam ||3.012.02||

3.012.03a indra̍m a̱gniṁ ka̍vi̱cchadā̍ ya̱jñasya̍ jū̱tyā vṛ̍ṇe |
3.012.03c tā soma̍sye̱ha tṛ̍mpatām ||

indra̍m | a̱gnim | ka̱vi̱-chadā̍ | ya̱jñasya̍ | jū̱tyā | vṛ̱ṇe̱ |
tā | soma̍sya | i̱ha | tṛ̱mpa̱tā̱m ||3.012.03||

3.012.04a to̱śā vṛ̍tra̱haṇā̍ huve sa̱jitvā̱nāpa̍rājitā |
3.012.04c i̱ndrā̱gnī vā̍ja̱sāta̍mā ||

to̱śā | vṛ̱tra̱-hanā̍ | hu̱ve̱ | sa̱-jityvā̍nā | apa̍rā-jitā |
i̱ndrā̱gnī iti̍ | vā̱ja̱-sāta̍mā ||3.012.04||

3.012.05a pra vā̍m arcanty u̱kthino̍ nīthā̱vido̍ jari̱tāra̍ḥ |
3.012.05c indrā̍gnī̱ iṣa̱ ā vṛ̍ṇe ||

pra | vā̱m | a̱rca̱nti̱ | u̱kthina̍ḥ | nī̱tha̱-vida̍ḥ | ja̱ri̱tāra̍ḥ |
indrā̍gnī̱ iti̍ | iṣa̍ḥ | ā | vṛ̱ṇe̱ ||3.012.05||

3.012.06a indrā̍gnī nava̱tim puro̍ dā̱sapa̍tnīr adhūnutam |
3.012.06c sā̱kam eke̍na̱ karma̍ṇā ||

indrā̍gnī̱ iti̍ | na̱va̱tim | pura̍ḥ | dā̱sa-pa̍tnīḥ | a̱dhū̱nu̱ta̱m |
sā̱kam | eke̍na | karma̍ṇā ||3.012.06||

3.012.07a indrā̍gnī̱ apa̍sa̱s pary upa̱ pra ya̍nti dhī̱taya̍ḥ |
3.012.07c ṛ̱tasya̍ pa̱thyā̱3̱̍ anu̍ ||

indrā̍gnī̱ iti̍ | apa̍saḥ | pari̍ | upa̍ | pra | ya̱nti̱ | dhī̱taya̍ḥ |
ṛ̱tasya̍ | pa̱thyā̍ḥ | anu̍ ||3.012.07||

3.012.08a indrā̍gnī tavi̱ṣāṇi̍ vāṁ sa̱dhasthā̍ni̱ prayā̍ṁsi ca |
3.012.08c yu̱vor a̱ptūrya̍ṁ hi̱tam ||

indrā̍gnī̱ iti̍ | ta̱vi̱ṣāṇi̍ | vā̱m | sa̱dha-sthā̍ni | prayā̍ṁsi | ca̱ |
yu̱voḥ | a̱p-tūrya̍m | hi̱tam ||3.012.08||

3.012.09a indrā̍gnī roca̱nā di̱vaḥ pari̱ vāje̍ṣu bhūṣathaḥ |
3.012.09c tad vā̍ṁ ceti̱ pra vī̱rya̍m ||

indrā̍gnī̱ iti̍ | ro̱ca̱nā | di̱vaḥ | pari̍ | vāje̍ṣu | bhū̱ṣa̱tha̱ḥ |
tat | vā̱m | ce̱ti̱ | pra | vī̱rya̍m ||3.012.09||


3.013.01a pra vo̍ de̱vāyā̱gnaye̱ barhi̍ṣṭham arcāsmai |
3.013.01c gama̍d de̱vebhi̱r ā sa no̱ yaji̍ṣṭho ba̱rhir ā sa̍dat ||

pra | va̱ḥ | de̱vāya̍ | a̱gnaye̍ | barhi̍ṣṭham | a̱rca̱ | a̱smai̱ |
gama̍t | de̱vebhi̍ḥ | ā | saḥ | na̱ḥ | yaji̍ṣṭhaḥ | ba̱rhiḥ | ā | sa̱da̱t ||3.013.01||

3.013.02a ṛ̱tāvā̱ yasya̱ roda̍sī̱ dakṣa̱ṁ saca̍nta ū̱taya̍ḥ |
3.013.02c ha̱viṣma̍nta̱s tam ī̍ḻate̱ taṁ sa̍ni̱ṣyanto 'va̍se ||

ṛ̱ta-vā̍ | yasya̍ | roda̍sī̱ iti̍ | dakṣa̍m | saca̍nte | ū̱taya̍ḥ |
ha̱viṣma̍ntaḥ | tam | ī̱ḻa̱te̱ | tam | sa̱ni̱ṣyanta̍ḥ | ava̍se ||3.013.02||

3.013.03a sa ya̱ntā vipra̍ eṣā̱ṁ sa ya̱jñānā̱m athā̱ hi ṣaḥ |
3.013.03c a̱gniṁ taṁ vo̍ duvasyata̱ dātā̱ yo vani̍tā ma̱gham ||

saḥ | ya̱ntā | vipra̍ḥ | e̱ṣā̱m | saḥ | ya̱jñānā̍m | atha̍ | hi | saḥ |
a̱gnim | tam | va̱ḥ | du̱va̱sya̱ta̱ | dātā̍ | yaḥ | vani̍tā | ma̱gham ||3.013.03||

3.013.04a sa na̱ḥ śarmā̍ṇi vī̱taye̱ 'gnir ya̍cchatu̱ śaṁta̍mā |
3.013.04c yato̍ naḥ pru̱ṣṇava̱d vasu̍ di̱vi kṣi̱tibhyo̍ a̱psv ā ||

saḥ | na̱ḥ | śarmā̍ṇi | vī̱taye̍ | a̱gniḥ | ya̱ccha̱tu̱ | śam-ta̍mā |
yata̍ḥ | na̱ḥ | pru̱ṣṇava̍t | vasu̍ | di̱vi | kṣi̱ti-bhya̍ḥ | a̱p-su | ā ||3.013.04||

3.013.05a dī̱di̱vāṁsa̱m apū̍rvya̱ṁ vasvī̍bhir asya dhī̱tibhi̍ḥ |
3.013.05c ṛkvā̍ṇo a̱gnim i̍ndhate̱ hotā̍raṁ vi̱śpati̍ṁ vi̱śām ||

dī̱di̱-vāṁsa̍m | apū̍rvyam | vasvī̍bhiḥ | a̱sya̱ | dhī̱ti-bhi̍ḥ |
ṛkvā̍ṇaḥ | a̱gnim | i̱ndha̱te̱ | hotā̍ram | vi̱śpati̍m | vi̱śām ||3.013.05||

3.013.06a u̱ta no̱ brahma̍nn aviṣa u̱ktheṣu̍ deva̱hūta̍maḥ |
3.013.06c śaṁ na̍ḥ śocā ma̱rudvṛ̱dho 'gne̍ sahasra̱sāta̍maḥ ||

u̱ta | na̱ḥ | brahma̍n | a̱vi̱ṣa̱ḥ | u̱ktheṣu̍ | de̱va̱-hūta̍maḥ |
śam | na̱ḥ | śo̱ca̱ | ma̱rut-vṛ̍dhaḥ | agne̍ | sa̱ha̱sra̱-sāta̍maḥ ||3.013.06||

3.013.07a nū no̍ rāsva sa̱hasra̍vat to̱kava̍t puṣṭi̱mad vasu̍ |
3.013.07c dyu̱mad a̍gne su̱vīrya̱ṁ varṣi̍ṣṭha̱m anu̍pakṣitam ||

nu | na̱ḥ | rā̱sva̱ | sa̱hasra̍-vat | to̱ka-va̍t | pu̱ṣṭi̱-mat | vasu̍ |
dyu̱mat | a̱gne̱ | su̱-vīrya̍m | varṣi̍ṣṭham | anu̍pa-kṣitam ||3.013.07||


3.014.01a ā hotā̍ ma̱ndro vi̱dathā̍ny asthāt sa̱tyo yajvā̍ ka̱vita̍ma̱ḥ sa ve̱dhāḥ |
3.014.01c vi̱dyudra̍tha̱ḥ saha̍sas pu̱tro a̱gniḥ śo̱ciṣke̍śaḥ pṛthi̱vyām pājo̍ aśret ||

ā | hotā̍ | ma̱ndraḥ | va̱dathā̍ni | a̱sthā̱t | sa̱tyaḥ | yajvā̍ | ka̱vi-ta̍maḥ | saḥ | ve̱dhāḥ |
vi̱dyut-ra̍thaḥ | saha̍saḥ | pu̱traḥ | a̱gniḥ | śo̱ciḥ-ke̍śaḥ | pṛ̱thi̱vyām | pāja̍ḥ | a̱śre̱t ||3.014.01||

3.014.02a ayā̍mi te̱ nama̍uktiṁ juṣasva̱ ṛtā̍va̱s tubhya̱ṁ ceta̍te sahasvaḥ |
3.014.02c vi̱dvām̐ ā va̍kṣi vi̱duṣo̱ ni ṣa̍tsi̱ madhya̱ ā ba̱rhir ū̱taye̍ yajatra ||

ayā̍mi | te̱ | nama̍ḥ-ukti̍m | ju̱ṣa̱sva̱ | ṛta̍-vaḥ | tubhya̍m | ceta̍te | sa̱ha̱sva̱ḥ |
vi̱dvān | ā | va̱kṣi̱ | vi̱duṣa̍ḥ | ni | sa̱tsi̱ | madhye̍ | ā | ba̱rhiḥ | ū̱taye̍ | ya̱ja̱tra̱ ||3.014.02||

3.014.03a drava̍tāṁ ta u̱ṣasā̍ vā̱jaya̍ntī̱ agne̱ vāta̍sya pa̱thyā̍bhi̱r accha̍ |
3.014.03c yat sī̍m a̱ñjanti̍ pū̱rvyaṁ ha̱virbhi̱r ā va̱ndhure̍va tasthatur duro̱ṇe ||

drava̍tām | te̱ | u̱ṣasā̍ | vā̱jaya̍ntī̱ iti̍ | a̱gne̱ | vāta̍sya | pa̱thyā̍bhiḥ | accha̍ |
yat | sī̱m | a̱ñjanti̍ | pū̱rvyam | ha̱viḥ-bhi̍ḥ | ā | va̱ndhurā̍-iva | ta̱stha̱tu̱ḥ | du̱ro̱ṇe ||3.014.03||

3.014.04a mi̱traś ca̱ tubhya̱ṁ varu̍ṇaḥ saha̱svo 'gne̱ viśve̍ ma̱ruta̍ḥ su̱mnam a̍rcan |
3.014.04c yac cho̱ciṣā̍ sahasas putra̱ tiṣṭhā̍ a̱bhi kṣi̱tīḥ pra̱thaya̱n sūryo̱ nṝn ||

mi̱traḥ | ca̱ | tubhya̍m | varu̍ṇaḥ | sa̱ha̱sva̱ḥ | agne̍ | viśve̍ | ma̱ruta̍ḥ | su̱mnam | a̱rca̱n |
yat | śo̱ciṣā̍ | sa̱ha̱sa̱ḥ | pu̱tra̱ | tiṣṭhā̍ḥ | a̱bhi | kṣi̱tīḥ | pra̱thaya̍n | sūrya̍ḥ | nṝn ||3.014.04||

3.014.05a va̱yaṁ te̍ a̱dya ra̍ri̱mā hi kāma̍m uttā̱naha̍stā̱ nama̍sopa̱sadya̍ |
3.014.05c yaji̍ṣṭhena̱ mana̍sā yakṣi de̱vān asre̍dhatā̱ manma̍nā̱ vipro̍ agne ||

va̱yam | te̱ | a̱dya | ra̱ri̱ma̱ | hi | kāma̍m | u̱ttā̱na-ha̍stāḥ | nama̍sā | u̱pa̱-sadya̍ |
yaji̍ṣṭhena | mana̍sā | ya̱kṣi̱ | de̱vān | asre̍dhatā | manma̍nā | vipra̍ḥ | a̱gne̱ ||3.014.05||

3.014.06a tvad dhi pu̍tra sahaso̱ vi pū̱rvīr de̱vasya̱ yanty ū̱tayo̱ vi vājā̍ḥ |
3.014.06c tvaṁ de̍hi saha̱sriṇa̍ṁ ra̱yiṁ no̍ 'dro̱gheṇa̱ vaca̍sā sa̱tyam a̍gne ||

tvat | hi | pu̱tra̱ | sa̱ha̱sa̱ḥ | vi | pū̱rvīḥ | de̱vasya̍ | yanti̍ | ū̱taya̍ḥ | vi | vājā̍ḥ |
tvam | de̱hi̱ | sa̱ha̱sriṇa̍m | ra̱yim | na̱ḥ | a̱dro̱gheṇa̍ | vaca̍sā | sa̱tyam | a̱gne̱ ||3.014.06||

3.014.07a tubhya̍ṁ dakṣa kavikrato̱ yānī̱mā deva̱ martā̍so adhva̱re aka̍rma |
3.014.07c tvaṁ viśva̍sya su̱ratha̍sya bodhi̱ sarva̱ṁ tad a̍gne amṛta svade̱ha ||

tubhya̍m | da̱kṣa̱ | ka̱vi̱kra̱to̱ iti̍ kavi-krato | yāni̍ | i̱mā | deva̍ | martā̍saḥ | a̱dhva̱re | aka̍rma |
tvam | viśva̍sya | su̱-ratha̍sya | bo̱dhi̱ | sarva̍m | tat | a̱gne̱ | a̱mṛ̱ta̱ | sva̱da̱ | i̱ha ||3.014.07||


3.015.01a vi pāja̍sā pṛ̱thunā̱ śośu̍cāno̱ bādha̍sva dvi̱ṣo ra̱kṣaso̱ amī̍vāḥ |
3.015.01c su̱śarma̍ṇo bṛha̱taḥ śarma̍ṇi syām a̱gner a̱haṁ su̱hava̍sya̱ praṇī̍tau ||

vi | pāja̍sā | pṛ̱thunā̍ | śośu̍cānaḥ | bādha̍sva | dvi̱ṣaḥ | ra̱kṣasa̍ḥ | amī̍vāḥ |
su̱-śarma̍ṇaḥ | bṛ̱ha̱taḥ | śarma̍ṇi | syā̱m | a̱gneḥ | a̱ham | su̱-hava̍sya | pra-nī̍tau ||3.015.01||

3.015.02a tvaṁ no̍ a̱syā u̱ṣaso̱ vyu̍ṣṭau̱ tvaṁ sūra̱ udi̍te bodhi go̱pāḥ |
3.015.02c janme̍va̱ nitya̱ṁ tana̍yaṁ juṣasva̱ stoma̍m me agne ta̱nvā̍ sujāta ||

tvam | na̱ḥ | a̱syāḥ | u̱ṣasa̍ḥ | vi-u̍ṣṭau | tvam | sūre̍ | ut-i̍te | bo̱dhi̱ | go̱pāḥ |
janma̍-iva | nitya̍m | tana̍yam | ju̱ṣa̱sva̱ | stoma̍m | me̱ | a̱gne̱ | ta̱nvā̍ | su̱-jā̱ta̱ ||3.015.02||

3.015.03a tvaṁ nṛ̱cakṣā̍ vṛṣa̱bhānu̍ pū̱rvīḥ kṛ̱ṣṇāsv a̍gne aru̱ṣo vi bhā̍hi |
3.015.03c vaso̱ neṣi̍ ca̱ parṣi̱ cāty aṁha̍ḥ kṛ̱dhī no̍ rā̱ya u̱śijo̍ yaviṣṭha ||

tvam | nṛ̱-cakṣā̍ḥ | vṛ̱ṣa̱bha̱ | anu̍ | pū̱rvīḥ | kṛ̱ṣṇāsu̍ | a̱gne̱ | a̱ru̱ṣaḥ | vi | bhā̱hi̱ |
vaso̱ iti̍ | neṣi̍ | ca̱ | parṣi̍ | ca̱ | ati̍ | aṁha̍ḥ | kṛ̱dhi | na̱ḥ | rā̱ye | u̱śija̍ḥ | ya̱vi̱ṣṭha̱ ||3.015.03||

3.015.04a aṣā̍ḻho agne vṛṣa̱bho di̍dīhi̱ puro̱ viśvā̱ḥ saubha̍gā saṁjigī̱vān |
3.015.04c ya̱jñasya̍ ne̱tā pra̍tha̱masya̍ pā̱yor jāta̍vedo bṛha̱taḥ su̍praṇīte ||

aṣā̍ḻhaḥ | a̱gne̱ | vṛ̱ṣa̱bhaḥ | di̱dī̱hi̱ | pura̍ḥ | viśvā̍ḥ | saubha̍gā | sa̱m-ji̱gī̱vān |
ya̱jñasya̍ | ne̱tā | pra̱tha̱masya̍ | pā̱yoḥ | jāta̍-vedaḥ | bṛ̱ha̱taḥ | su̱-pra̱nī̱te̱ ||3.015.04||

3.015.05a acchi̍drā̱ śarma̍ jaritaḥ pu̱rūṇi̍ de̱vām̐ acchā̱ dīdyā̍naḥ sume̱dhāḥ |
3.015.05c ratho̱ na sasni̍r a̱bhi va̍kṣi̱ vāja̱m agne̱ tvaṁ roda̍sī naḥ su̱meke̍ ||

acchi̍drā | śarma̍ | ja̱ri̱ta̱riti̍ | pu̱rūṇi̍ | de̱vān | accha̍ | dīdyā̍naḥ | su̱-me̱dhāḥ |
ratha̍ḥ | na | sasni̍ḥ | a̱bhi | va̱kṣi̱ | vāja̍m | a̱gne̱ | tvam | roda̍sī̱ iti̍ | na̱ḥ | su̱meke̱ iti̍ su̱-meke̍ ||3.015.05||

3.015.06a pra pī̍paya vṛṣabha̱ jinva̱ vājā̱n agne̱ tvaṁ roda̍sī naḥ su̱doghe̍ |
3.015.06c de̱vebhi̍r deva su̱rucā̍ rucā̱no mā no̱ marta̍sya durma̱tiḥ pari̍ ṣṭhāt ||

pra | pī̱pa̱ya̱ | vṛ̱ṣa̱bha̱ | jinva̍ | vājā̍n | agne̍ | tvam | roda̍sī̱ iti̍ | na̱ḥ | su̱doghe̱ iti̍ su̱-doghe̍ |
de̱vebhi̍ḥ | de̱va̱ | su̱-rucā̍ | ru̱cā̱naḥ | mā | na̱ḥ | marta̍sya | du̱ḥ-ma̱tiḥ | pari̍ | sthā̱t ||3.015.06||

3.015.07a iḻā̍m agne puru̱daṁsa̍ṁ sa̱niṁ goḥ śa̍śvatta̱maṁ hava̍mānāya sādha |
3.015.07c syān na̍ḥ sū̱nus tana̍yo vi̱jāvāgne̱ sā te̍ suma̱tir bhū̍tv a̱sme ||

iḻā̍m | a̱gne̱ | pu̱ru̱-daṁsa̍m | sa̱nim | goḥ | śa̱śva̱t-ta̱mam | hava̍mānāya | sā̱dha̱ |
syāt | na̱ḥ | sū̱nuḥ | tana̍yaḥ | vi̱jā-vā̍ | a̱gne̱ | sā | te̱ | su̱-ma̱tiḥ | bhū̱tu̱ | a̱sme iti̍ ||3.015.07||


3.016.01a a̱yam a̱gniḥ su̱vīrya̱syeśe̍ ma̱haḥ saubha̍gasya |
3.016.01c rā̱ya ī̍śe svapa̱tyasya̱ goma̍ta̱ īśe̍ vṛtra̱hathā̍nām ||

a̱yam | a̱gniḥ | su̱-vīrya̍sya | īśe̍ | ma̱haḥ | saubha̍gasya |
rā̱yaḥ | ī̱śe̱ | su̱-a̱apa̱tyasya̍ | go-ma̍taḥ | īśe̍ | vṛ̱tra̱-hathā̍nām ||3.016.01||

3.016.02a i̱maṁ na̍ro marutaḥ saścatā̱ vṛdha̱ṁ yasmi̱n rāya̱ḥ śevṛ̍dhāsaḥ |
3.016.02c a̱bhi ye santi̱ pṛta̍nāsu dū̱ḍhyo̍ vi̱śvāhā̱ śatru̍m āda̱bhuḥ ||

i̱mam | na̱ra̱ḥ | ma̱ru̱ta̱ḥ | sa̱śca̱ta̱ | vṛdha̍m | yasmi̍n | rāya̍ḥ | śe-vṛ̍dhāsaḥ |
a̱bhi | ye | santi̍ | pṛta̍nāsu | du̱ḥ-dhya̍ḥ | vi̱śvāhā̍ | śatru̍m | ā̱-da̱bhuḥ ||3.016.02||

3.016.03a sa tvaṁ no̍ rā̱yaḥ śi̍śīhi̱ mīḍhvo̍ agne su̱vīrya̍sya |
3.016.03c tuvi̍dyumna̱ varṣi̍ṣṭhasya pra̱jāva̍to 'namī̱vasya̍ śu̱ṣmiṇa̍ḥ ||

saḥ | tvam | na̱ḥ | rā̱yaḥ | śi̱śī̱hi̱ | mīḍhva̍ḥ | a̱gne̱ | su̱-vīrya̍sya |
tuvi̍-dyumna | varṣi̍ṣṭhasya | pra̱jā-va̍taḥ | a̱na̱mī̱vasya̍ | śu̱ṣmiṇa̍ḥ ||3.016.03||

3.016.04a cakri̱r yo viśvā̱ bhuva̍nā̱bhi sā̍sa̱hiś cakri̍r de̱veṣv ā duva̍ḥ |
3.016.04c ā de̱veṣu̱ yata̍ta̱ ā su̱vīrya̱ ā śaṁsa̍ u̱ta nṛ̱ṇām ||

cakri̍ḥ | yaḥ | viśvā̍ | bhuva̍nā | a̱bhi | sa̱sa̱hiḥ | cakri̍ḥ | de̱veṣu̍ | ā | duva̍ḥ |
ā | de̱veṣu̍ | yata̍te | ā | su̱-vīrye̍ | ā | śaṁse̍ | u̱ta | nṛ̱ṇām ||3.016.04||

3.016.05a mā no̍ a̱gne 'ma̍taye̱ māvīra̍tāyai rīradhaḥ |
3.016.05c māgotā̍yai sahasas putra̱ mā ni̱de 'pa̱ dveṣā̱ṁsy ā kṛ̍dhi ||

mā | na̱ḥ | a̱gne̱ | ama̍taye | mā | a̱vīra̍tāyai | rī̱ra̱dha̱ḥ |
mā | a̱gotā̍yai | sa̱ha̱sa̱ḥ | pu̱tra̱ | mā | ni̱de | apa̍ | dveṣā̍ṁsi | ā | kṛ̱dhi̱ ||3.016.05||

3.016.06a śa̱gdhi vāja̍sya subhaga pra̱jāva̱to 'gne̍ bṛha̱to a̍dhva̱re |
3.016.06c saṁ rā̱yā bhūya̍sā sṛja mayo̱bhunā̱ tuvi̍dyumna̱ yaśa̍svatā ||

śa̱gdhi | vāja̍sya | su̱-bha̱ga̱ | pra̱jā-va̍taḥ | agne̍ | bṛ̱ha̱taḥ | a̱dhva̱re |
sam | rā̱yā | bhūya̍sā | sṛ̱ja̱ | ma̱ya̱ḥ-bhunā̍ | tuvi̍-dyumna | yaśa̍svatā ||3.016.06||


3.017.01a sa̱mi̱dhyamā̍naḥ pratha̱mānu̱ dharmā̱ sam a̱ktubhi̍r ajyate vi̱śvavā̍raḥ |
3.017.01c śo̱ciṣke̍śo ghṛ̱tani̍rṇik pāva̱kaḥ su̍ya̱jño a̱gnir ya̱jathā̍ya de̱vān ||

sa̱m-i̱dhyamā̍naḥ | pra̱tha̱mā | anu̍ | dharma̍ | sam | a̱ktu-bhi̍ḥ | a̱jya̱te̱ | vi̱śva-vā̍raḥ |
śo̱ciḥ-ke̍śaḥ | ghṛ̱ta-ni̍rnik | pā̱va̱kaḥ | su̱-ya̱jñaḥ | a̱gniḥ | ya̱jathā̍ya | de̱vān ||3.017.01||

3.017.02a yathāya̍jo ho̱tram a̍gne pṛthi̱vyā yathā̍ di̱vo jā̍tavedaś ciki̱tvān |
3.017.02c e̱vānena̍ ha̱viṣā̍ yakṣi de̱vān ma̍nu̱ṣvad ya̱jñam pra ti̍re̱mam a̱dya ||

yathā̍ | aya̍jaḥ | ho̱tram | a̱gne̱ | pṛ̱thi̱vyāḥ | yathā̍ | di̱vaḥ | jā̱ta̱-ve̱da̱ḥ | ci̱ki̱tvān |
e̱va | a̱nena̍ | ha̱viṣā̍ | ya̱kṣi̱ | de̱vān | ma̱nu̱ṣvat | ya̱jñam | pra | ti̱ra̱ | i̱mam | a̱dya ||3.017.02||

3.017.03a trīṇy āyū̍ṁṣi̱ tava̍ jātavedas ti̱sra ā̱jānī̍r u̱ṣasa̍s te agne |
3.017.03c tābhi̍r de̱vānā̱m avo̍ yakṣi vi̱dvān athā̍ bhava̱ yaja̍mānāya̱ śaṁ yoḥ ||

trīṇi̍ | āyū̍ṁṣi | tava̍ | jā̱ta̱-ve̱da̱ḥ | ti̱sraḥ | ā̱-jānī̍ḥ | u̱ṣasa̍ḥ | te̱ | a̱gne̱ |
tābhi̍ḥ | de̱vānā̍m | ava̍ḥ | ya̱kṣi̱ | vi̱dvān | atha̍ | bha̱va̱ | yaja̍mānāya | śam | yoḥ ||3.017.03||

3.017.04a a̱gniṁ su̍dī̱tiṁ su̱dṛśa̍ṁ gṛ̱ṇanto̍ nama̱syāma̱s tveḍya̍ṁ jātavedaḥ |
3.017.04c tvāṁ dū̱tam a̍ra̱tiṁ ha̍vya̱vāha̍ṁ de̱vā a̍kṛṇvann a̱mṛta̍sya̱ nābhi̍m ||

a̱gnim | su̱-dī̱tim | su̱-dṛśa̍m | gṛ̱ṇanta̍ḥ | na̱ma̱syāma̍ḥ | tvā̱ | īḍya̍m | jā̱ta̱-ve̱da̱ḥ |
tvām | dū̱tam | a̱ra̱tim | ha̱vya̱-vāha̍m | de̱vāḥ | a̱kṛ̱ṇva̱n | a̱mṛta̍sya | nābhi̍m ||3.017.04||

3.017.05a yas tvad dhotā̱ pūrvo̍ agne̱ yajī̍yān dvi̱tā ca̱ sattā̍ sva̱dhayā̍ ca śa̱mbhuḥ |
3.017.05c tasyānu̱ dharma̱ pra ya̍jā ciki̱tvo 'tha̍ no dhā adhva̱raṁ de̱vavī̍tau ||

yaḥ | tvat | hotā̍ | pūrva̍ḥ | a̱gne̱ | yajī̍yān | dvi̱tā | ca̱ | sattā̍ | sva̱dhayā̍ | ca̱ | śa̱m-bhuḥ |
tasya̍ | anu̍ | dharma̍ | pra | ya̱ja̱ | ci̱ki̱tva̱ḥ | atha̍ | na̱ḥ | dhā̱ḥ | a̱dhva̱ram | de̱va-vī̍tau ||3.017.05||


3.018.01a bhavā̍ no agne su̱manā̱ upe̍tau̱ sakhe̍va̱ sakhye̍ pi̱tare̍va sā̱dhuḥ |
3.018.01c pu̱ru̱druho̱ hi kṣi̱tayo̱ janā̍nā̱m prati̍ pratī̱cīr da̍hatā̱d arā̍tīḥ ||

bhava̍ | na̱ḥ | a̱gne̱ | su̱-manā̍ḥ | upa̍-itau | sakhā̍-iva | sakhye̍ | pi̱tarā-iva | sā̱dhuḥ |
pu̱ru̱-druha̍ḥ | hi | kṣi̱taya̍ḥ | janā̍nām | prati̍ | pra̱tī̱cīḥ | da̱ha̱tā̱t | arā̍tīḥ ||3.018.01||

3.018.02a tapo̱ ṣv a̍gne̱ anta̍rām̐ a̱mitrā̱n tapā̱ śaṁsa̱m ara̍ruṣa̱ḥ para̍sya |
3.018.02c tapo̍ vaso cikitā̱no a̱cittā̱n vi te̍ tiṣṭhantām a̱jarā̍ a̱yāsa̍ḥ ||

tapo̱ iti̍ | su | a̱gne̱ | anta̍rān | a̱mitrā̍n | tapa̍ | śaṁsa̍m | ara̍ruṣaḥ | para̍sya |
tapo̱ iti̍ | va̱so̱ iti̍ | ci̱ki̱tā̱naḥ | a̱cittā̍n | vi | te̱ | ti̱ṣṭha̱ntā̱m | a̱jarā̍ḥ | a̱yāsa̍ḥ ||3.018.02||

3.018.03a i̱dhmenā̍gna i̱cchamā̍no ghṛ̱tena̍ ju̱homi̍ ha̱vyaṁ tara̍se̱ balā̍ya |
3.018.03c yāva̱d īśe̱ brahma̍ṇā̱ vanda̍māna i̱māṁ dhiya̍ṁ śata̱seyā̍ya de̱vīm ||

i̱dhmena̍ | a̱gne̱ | i̱cchamā̍naḥ | ghṛ̱tena̍ | ju̱homi̍ | ha̱vyam | tara̍se | balā̍ya |
yāva̍t | īśe̍ | brahma̍ṇā | vanda̍mānaḥ | i̱mām | dhiya̍m | śa̱ta̱-seyā̍ya | de̱vīm ||3.018.03||

3.018.04a uc cho̱ciṣā̍ sahasas putra stu̱to bṛ̱had vaya̍ḥ śaśamā̱neṣu̍ dhehi |
3.018.04c re̱vad a̍gne vi̱śvāmi̍treṣu̱ śaṁ yor ma̍rmṛ̱jmā te̍ ta̱nva1̱̍m bhūri̱ kṛtva̍ḥ ||

ut | śo̱ciṣā̍ | sa̱ha̱sa̱ḥ | pu̱tra̱ | stu̱taḥ | bṛ̱hat | vaya̍ḥ | śa̱śa̱mā̱neṣu̍ | dhe̱hi̱ |
re̱vat | a̱gne̱ | vi̱śvāmi̍treṣu | śam | yoḥ | ma̱rmṛ̱jma | te̱ | ta̱nva̍m | bhūri̍ | kṛtva̍ḥ ||3.018.04||

3.018.05a kṛ̱dhi ratna̍ṁ susanita̱r dhanā̍nā̱ṁ sa ghed a̍gne bhavasi̱ yat sami̍ddhaḥ |
3.018.05c sto̱tur du̍ro̱ṇe su̱bhaga̍sya re̱vat sṛ̱prā ka̱rasnā̍ dadhiṣe̱ vapū̍ṁṣi ||

kṛ̱dhi | ratna̍m | su̱-sa̱ni̱ta̱ḥ | dhanā̍nām | saḥ | gha̱ | it | a̱gne̱ | bha̱va̱si̱ | yat | sami̍ddhaḥ |
sto̱tuḥ | du̱ro̱ṇe | su̱-bhaga̍sya | re̱vat | sṛ̱prā | ka̱rasnā̍ | da̱dhi̱ṣe̱ | vapū̍ṁṣi ||3.018.05||


3.019.01a a̱gniṁ hotā̍ra̱m pra vṛ̍ṇe mi̱yedhe̱ gṛtsa̍ṁ ka̱viṁ vi̍śva̱vida̱m amū̍ram |
3.019.01c sa no̍ yakṣad de̱vatā̍tā̱ yajī̍yān rā̱ye vājā̍ya vanate ma̱ghāni̍ ||

a̱gnim | hotā̍ram | pra | vṛ̱ṇe̱ | mi̱yedhe̍ | gṛtsa̍m | ka̱vim | vi̱śva̱-vida̍m | amū̍ram |
saḥ | na̱ḥ | ya̱kṣa̱t | de̱va-tā̍tā | yajī̍yān | rā̱ye | vājā̍ya | va̱na̱te̱ | ma̱ghāni̍ ||3.019.01||

3.019.02a pra te̍ agne ha̱viṣma̍tīm iya̱rmy acchā̍ sudyu̱mnāṁ rā̱tinī̍ṁ ghṛ̱tācī̍m |
3.019.02c pra̱da̱kṣi̱ṇid de̱vatā̍tim urā̱ṇaḥ saṁ rā̱tibhi̱r vasu̍bhir ya̱jñam a̍śret ||

pra | te̱ | a̱gne̱ | ha̱viṣma̍tīm | i̱ya̱rmi̱ | accha̍ | su̱-dyu̱mnām | rā̱tinī̍m | ghṛ̱tācī̍m |
pra̱-da̱kṣi̱ṇit | de̱vatā̍tim | u̱rā̱ṇaḥ | sam | rā̱ti-bhi̍ḥ | vasu̍-bhiḥ | ya̱jñam | a̱śre̱t ||3.019.02||

3.019.03a sa tejī̍yasā̱ mana̍sā̱ tvota̍ u̱ta śi̍kṣa svapa̱tyasya̍ śi̱kṣoḥ |
3.019.03c agne̍ rā̱yo nṛta̍masya̱ prabhū̍tau bhū̱yāma̍ te suṣṭu̱taya̍ś ca̱ vasva̍ḥ ||

saḥ | tejī̍yasā | mana̍sā | tvā-ū̍taḥ | u̱ta | śi̱kṣa̱ | su̱-a̱pa̱tyasya̍ | śi̱kṣoḥ |
agne̍ | rā̱yaḥ | nṛ-ta̍masya | pra-bhū̍tau | bhū̱yāma̍ | te̱ | su̱-stu̱taya̍ḥ | ca̱ | vasva̍ḥ ||3.019.03||

3.019.04a bhūrī̍ṇi̱ hi tve da̍dhi̱re anī̱kāgne̍ de̱vasya̱ yajya̍vo̱ janā̍saḥ |
3.019.04c sa ā va̍ha de̱vatā̍tiṁ yaviṣṭha̱ śardho̱ yad a̱dya di̱vyaṁ yajā̍si ||

bhūtī̍ni | hi | tve iti̍ | da̱dhi̱re | anī̍kā | agne̍ | de̱vasya̍ | yajya̍vaḥ | janā̍saḥ |
saḥ | ā | va̱ha̱ | de̱vatā̍tim | ya̱vi̱ṣṭha̱ | śardha̍ḥ | yat | a̱dya | di̱vyam | yajā̍si ||3.019.04||

3.019.05a yat tvā̱ hotā̍ram a̱naja̍n mi̱yedhe̍ niṣā̱daya̍nto ya̱jathā̍ya de̱vāḥ |
3.019.05c sa tvaṁ no̍ agne 'vi̱teha bo̱dhy adhi̱ śravā̍ṁsi dhehi nas ta̱nūṣu̍ ||

yat | tvā̱ | hotā̍ram | a̱naja̍n | mi̱yedhe̍ | ni̱-ṣā̱daya̍ntaḥ | ya̱jathā̍ya | de̱vāḥ |
saḥ | tvam | na̱ḥ | a̱gne̱ | a̱vi̱tā | i̱ha | bo̱dhi̱ | adhi̍ | śravā̍ṁsi | dhe̱hi̱ | na̱ḥ | ta̱nūṣu̍ ||3.019.05||


3.020.01a a̱gnim u̱ṣasa̍m a̱śvinā̍ dadhi̱krāṁ vyu̍ṣṭiṣu havate̱ vahni̍r u̱kthaiḥ |
3.020.01c su̱jyoti̍ṣo naḥ śṛṇvantu de̱vāḥ sa̱joṣa̍so adhva̱raṁ vā̍vaśā̱nāḥ ||

a̱gnim | u̱ṣasa̍m | a̱śvinā̍ | da̱dhi̱-krām | vi-u̍ṣṭiṣu | ha̱va̱te̱ | vahni̍ḥ | u̱kthaiḥ |
su̱-jyoti̍ṣaḥ | na̱ḥ | śṛ̱ṇva̱ntu̱ | de̱vāḥ | sa̱-joṣa̍saḥ | a̱dhva̱ram | vā̱va̱śā̱nāḥ ||3.020.01||

3.020.02a agne̱ trī te̱ vāji̍nā̱ trī ṣa̱dhasthā̍ ti̱sras te̍ ji̱hvā ṛ̍tajāta pū̱rvīḥ |
3.020.02c ti̱sra u̍ te ta̱nvo̍ de̱vavā̍tā̱s tābhi̍r naḥ pāhi̱ giro̱ apra̍yucchan ||

agne̍ | trī | te̱ | vā̱ji̍nā̍ | trī | sa̱dha-sthā̍ | ti̱sraḥ | te̱ | ji̱hvāḥ | ṛ̱ta̱-jā̱ta̱ | pū̱rvīḥ |
ti̱sraḥ | ū̱m̐ iti̍ | te̱ | ta̱nva̍ḥ | de̱va-vā̍tāḥ | tābhi̍ḥ | na̱ḥ | pā̱hi̱ | gira̍ḥ | apra̍-yucchan ||3.020.02||

3.020.03a agne̱ bhūrī̍ṇi̱ tava̍ jātavedo̱ deva̍ svadhāvo̱ 'mṛta̍sya̱ nāma̍ |
3.020.03c yāś ca̍ mā̱yā mā̱yinā̍ṁ viśvaminva̱ tve pū̱rvīḥ sa̍ṁda̱dhuḥ pṛ̍ṣṭabandho ||

agne̍ | bhūrī̍ṇi | tava̍ | jā̱ta̱-ve̱da̱ḥ | deva̍ | sva̱dhā̱-va̱ḥ | a̱mṛta̍sya | nāma̍ |
yāḥ | ca̱ | mā̱yā | mā̱yinā̍m | vi̱śva̱m-i̱nva̱ | tve iti̍ | pū̱rvīḥ | sa̱m-da̱dhuḥ | pṛ̱ṣṭa̱ba̱ndho̱ iti̍ pṛṣṭa-bandho ||3.020.03||

3.020.04a a̱gnir ne̱tā bhaga̍ iva kṣitī̱nāṁ daivī̍nāṁ de̱va ṛ̍tu̱pā ṛ̱tāvā̍ |
3.020.04c sa vṛ̍tra̱hā sa̱nayo̍ vi̱śvave̍dā̱ḥ parṣa̱d viśvāti̍ duri̱tā gṛ̱ṇanta̍m ||

a̱gniḥ | ne̱tā | bhaga̍ḥ-iva | kṣi̱tī̱nām | daivī̍nām | de̱vaḥ | ṛ̱tu̱-pāḥ | ṛ̱ta-vā̍ |
saḥ | vṛ̱tra̱-hā | sa̱naya̍ḥ | vi̱śva-ve̍dāḥ | parṣa̍t | viśvā̍ | ati̍ | du̱ḥ-i̱tā | gṛ̱ṇanta̍m ||3.020.04||

3.020.05a da̱dhi̱krām a̱gnim u̱ṣasa̍ṁ ca de̱vīm bṛha̱spati̍ṁ savi̱tāra̍ṁ ca de̱vam |
3.020.05c a̱śvinā̍ mi̱trāvaru̍ṇā̱ bhaga̍ṁ ca̱ vasū̍n ru̱drām̐ ā̍di̱tyām̐ i̱ha hu̍ve ||

da̱dhi̱-krām | a̱gnim | u̱ṣasa̍m | ca̱ | de̱vīm | bṛha̱spati̍m | sa̱vi̱tāra̍m | ca̱ | de̱vam |
a̱śvinā̍ | mi̱trāvaru̍ṇā | bhaga̍m | ca̱ | vasū̍n | ru̱drā̍n | ā̱di̱tyā̍n | i̱ha | hu̱ve̱ ||3.020.05||


3.021.01a i̱maṁ no̍ ya̱jñam a̱mṛte̍ṣu dhehī̱mā ha̱vyā jā̍tavedo juṣasva |
3.021.01c sto̱kānā̍m agne̱ meda̍so ghṛ̱tasya̱ hota̱ḥ prāśā̍na pratha̱mo ni̱ṣadya̍ ||

i̱mam | na̱ḥ | ya̱jñam | a̱mṛte̍ṣu | dhe̱hi̱ | ī̱mā | ha̱vyā | jā̱ta̱-ve̱da̱ḥ | ju̱ṣa̱sva̱ |
sto̱kānā̍m | a̱gne̱ | meda̍saḥ | ghṛ̱tasya̍ | hota̱riti̍ | pra | a̱śā̱na̱ | pra̱tha̱maḥ | ni̱-sadya̍ ||3.021.01||

3.021.02a ghṛ̱tava̍ntaḥ pāvaka te sto̱kāḥ śco̍tanti̱ meda̍saḥ |
3.021.02c svadha̍rman de̱vavī̍taye̱ śreṣṭha̍ṁ no dhehi̱ vārya̍m ||

ghṛ̱ta-va̍ntaḥ | pā̱va̱ka̱ | te̱ | sto̱kāḥ | śco̱ta̱nti̱ | meda̍saḥ |
sva-dha̍rman | de̱va-vī̍taye | śreṣṭha̍m | na̱ḥ | dhe̱hi̱ | vārya̍m ||3.021.02||

3.021.03a tubhya̍ṁ sto̱kā ghṛ̍ta̱ścuto 'gne̱ viprā̍ya santya |
3.021.03c ṛṣi̱ḥ śreṣṭha̱ḥ sam i̍dhyase ya̱jñasya̍ prāvi̱tā bha̍va ||

tubhya̍m | sto̱kāḥ | ghṛ̱ta̱-ścuta̍ḥ | agne̍ | viprā̍ya | sa̱ntya̱ |
ṛṣi̍ḥ | śreṣṭha̍ḥ | sam | i̱dhya̱se̱ | ya̱jñasya̍ | pra̱-a̱vi̱tā | bha̱va̱ ||3.021.03||

3.021.04a tubhya̍ṁ ścotanty adhrigo śacīvaḥ sto̱kāso̍ agne̱ meda̍so ghṛ̱tasya̍ |
3.021.04c ka̱vi̱śa̱sto bṛ̍ha̱tā bhā̱nunāgā̍ ha̱vyā ju̍ṣasva medhira ||

tubhya̍m | śco̱ta̱nti̱ | a̱dhri̱go̱ itya̍dhri-go | śa̱cī̱-va̱ḥ | sto̱kāsa̍ḥ | a̱gne̱ | meda̍saḥ | ghṛ̱tasya̍ |
ka̱vi̱-śa̱staḥ | bṛ̱ha̱tā | bhā̱nunā̍ | ā | a̱gā̱ḥ | ha̱vyā | ju̱ṣa̱sva̱ | me̱dhi̱ra̱ ||3.021.04||

3.021.05a oji̍ṣṭhaṁ te madhya̱to meda̱ udbhṛ̍ta̱m pra te̍ va̱yaṁ da̍dāmahe |
3.021.05c ścota̍nti te vaso sto̱kā adhi̍ tva̱ci prati̱ tān de̍va̱śo vi̍hi ||

oji̍ṣṭham | te̱ | ma̱dhya̱taḥ | meda̍ḥ | ut-bhṛ̍tam | pra | te̱ | va̱yam | da̱dā̱ma̱he̱ |
ścota̍nti | te̱ | vs iti̍ | sto̱kāḥ | adhi̍ | tva̱ci | prati̍ | tān | de̱va̱-śaḥ | vi̱hi̱ ||3.021.05||


3.022.01a a̱yaṁ so a̱gnir yasmi̱n soma̱m indra̍ḥ su̱taṁ da̱dhe ja̱ṭhare̍ vāvaśā̱naḥ |
3.022.01c sa̱ha̱sriṇa̱ṁ vāja̱m atya̱ṁ na sapti̍ṁ sasa̱vān san stū̍yase jātavedaḥ ||

a̱yam | saḥ | a̱gniḥ | yasmi̍n | soma̍m | indra̍ḥ | su̱tam | da̱dhe | ja̱ṭhare̍ | vā̱va̱śā̱naḥ |
sa̱ha̱sriṇa̍m | vāja̍m | atya̍m | na | sapti̍m | sa̱sa̱vān | san | stū̱ya̱se̱ | jā̱ta̱-ve̱da̱ḥ ||3.022.01||

3.022.02a agne̱ yat te̍ di̱vi varca̍ḥ pṛthi̱vyāṁ yad oṣa̍dhīṣv a̱psv ā ya̍jatra |
3.022.02c yenā̱ntari̍kṣam u̱rv ā̍ta̱tantha̍ tve̱ṣaḥ sa bhā̱nur a̍rṇa̱vo nṛ̱cakṣā̍ḥ ||

agne̍ | yat | te̱ | di̱vi | varca̍ḥ | pṛ̱thi̱vyām | yat | oṣa̍dhīṣu | a̱p-su | ā | ya̱ja̱tra̱ |
yena̍ | a̱ntari̍kṣam | u̱ru | ā̱-ta̱tantha̍ | tve̱ṣaḥ | saḥ | bhā̱nuḥ | a̱rṇa̱vaḥ | nṛ̱-cakṣā̍ḥ ||3.022.02||

3.022.03a agne̍ di̱vo arṇa̱m acchā̍ jigā̱sy acchā̍ de̱vām̐ ū̍ciṣe̱ dhiṣṇyā̱ ye |
3.022.03c yā ro̍ca̱ne pa̱rastā̱t sūrya̍sya̱ yāś cā̱vastā̍d upa̱tiṣṭha̍nta̱ āpa̍ḥ ||

agne̍ | di̱vaḥ | arṇa̍m | accha̍ | ji̱gā̱si̱ | accha̍ | de̱vān | ū̱ci̱ṣe̱ | dhiṣṇyā̍ḥ | ye |
yāḥ | ro̱ca̱ne | pa̱rastā̍t | sūrya̍sya | yāḥ | ca̱ | a̱vastā̍t | u̱pa̱-tiṣṭha̍nte | āpa̍ḥ ||3.022.03||

3.022.04a pu̱rī̱ṣyā̍so a̱gnaya̍ḥ prāva̱ṇebhi̍ḥ sa̱joṣa̍saḥ |
3.022.04c ju̱ṣantā̍ṁ ya̱jñam a̱druho̍ 'namī̱vā iṣo̍ ma̱hīḥ ||

pu̱rī̱ṣyā̍saḥ | a̱gnaya̍ḥ | pra̱va̱ṇebhi̍ḥ | sa̱-joṣa̍saḥ |
ju̱ṣantā̍m | ya̱jñam | a̱druha̍ḥ | a̱na̱mī̱vāḥ | iṣa̍ḥ | ma̱hīḥ ||3.022.04||

3.022.05a iḻā̍m agne puru̱daṁsa̍ṁ sa̱niṁ goḥ śa̍śvatta̱maṁ hava̍mānāya sādha |
3.022.05c syān na̍ḥ sū̱nus tana̍yo vi̱jāvāgne̱ sā te̍ suma̱tir bhū̍tv a̱sme ||

iḻā̍m | a̱gne̱ | pu̱ru̱-daṁsa̍m | sa̱nim | goḥ | śa̱śva̱t-ta̱mam | hava̍mānāya | sā̱dha̱ |
syāt | na̱ḥ | sū̱nuḥ | tana̍yaḥ | vi̱jā-vā̍ | a̱gne̱ | sā | te̱ | su̱-ma̱tiḥ | bhū̱tu̱ | a̱sme iti̍ ||3.022.05||


3.023.01a nirma̍thita̱ḥ sudhi̍ta̱ ā sa̱dhasthe̱ yuvā̍ ka̱vir a̍dhva̱rasya̍ praṇe̱tā |
3.023.01c jūrya̍tsv a̱gnir a̱jaro̱ vane̱ṣv atrā̍ dadhe a̱mṛta̍ṁ jā̱tave̍dāḥ ||

niḥ-ma̍thitaḥ | su-dhi̍taḥ | ā | sa̱dha-sthe̍ | yuvā̍ | ka̱viḥ | a̱dhva̱rasya̍ | pra̱-ne̱tā |
jūrya̍t-su | a̱gniḥ | a̱jara̍ḥ | vane̍ṣu | atra̍ | da̱dhe̱ | a̱mṛta̍m | jā̱ta-ve̍dāḥ ||3.023.01||

3.023.02a ama̍nthiṣṭā̱m bhāra̍tā re̱vad a̱gniṁ de̱vaśra̍vā de̱vavā̍taḥ su̱dakṣa̍m |
3.023.02c agne̱ vi pa̍śya bṛha̱tābhi rā̱yeṣāṁ no̍ ne̱tā bha̍vatā̱d anu̱ dyūn ||

ama̍nthiṣṭām | bhāra̍tā | re̱vat | a̱gnim | de̱va-śra̍vāḥ | de̱va-vā̍taḥ | su̱-dakṣa̍m |
agne̍ | vi | pa̱śya̱ | bṛ̱ha̱tā | a̱bhi | rā̱yā | i̱ṣām | na̱ḥ | ne̱tā | bha̱va̱tā̱t | anu̍ | dyūn ||3.023.02||

3.023.03a daśa̱ kṣipa̍ḥ pū̱rvyaṁ sī̍m ajījana̱n sujā̍tam mā̱tṛṣu̍ pri̱yam |
3.023.03c a̱gniṁ stu̍hi daivavā̱taṁ de̍vaśravo̱ yo janā̍nā̱m asa̍d va̱śī ||

daśa̍ | kṣipa̍ḥ | pū̱rvyam | sī̱m | a̱jī̱ja̱na̱n | su-jā̍tam | mā̱tṛṣu̍ | pri̱yam |
a̱gnim | stu̱hi̱ | dai̱va̱-vā̱tam | de̱va̱-śra̱va̱ḥ | yaḥ | janā̍nām | asa̍t | va̱śī ||3.023.03||

3.023.04a ni tvā̍ dadhe̱ vara̱ ā pṛ̍thi̱vyā iḻā̍yās pa̱de su̍dina̱tve ahnā̍m |
3.023.04c dṛ̱ṣadva̍tyā̱m mānu̍ṣa āpa̱yāyā̱ṁ sara̍svatyāṁ re̱vad a̍gne didīhi ||

ni | tvā̱ | da̱dhe̱ | vare̍ | ā | pṛ̱thi̱vyāḥ | iḻā̍yāḥ | pa̱de | su̱-di̱na̱-tve | ahnā̍m |
dṛ̱ṣat-va̍tyām | mānu̍ṣe | ā̱pa̱yāyā̍m | sara̍svatyām | re̱vat | a̱gne̱ | di̱dī̱hi̱ ||3.023.04||

3.023.05a iḻā̍m agne puru̱daṁsa̍ṁ sa̱niṁ goḥ śa̍śvatta̱maṁ hava̍mānāya sādha |
3.023.05c syān na̍ḥ sū̱nus tana̍yo vi̱jāvāgne̱ sā te̍ suma̱tir bhū̍tv a̱sme ||

iḻā̍m | a̱gne̱ | pu̱ru̱-daṁsa̍m | sa̱nim | goḥ | śa̱śva̱t-ta̱mam | hava̍mānāya | sā̱dha̱ |
syāt | na̱ḥ | sū̱nuḥ | tana̍yaḥ | vi̱jā-vā̍ | a̱gne̱ | sā | te̱ | su̱-ma̱tiḥ | bhū̱tu̱ | a̱sme iti̍ ||3.023.05||


3.024.01a agne̱ saha̍sva̱ pṛta̍nā a̱bhimā̍tī̱r apā̍sya |
3.024.01c du̱ṣṭara̱s tara̱nn arā̍tī̱r varco̍ dhā ya̱jñavā̍hase ||

agne̍ | saha̍sva | pṛta̍nāḥ | a̱bhi-mā̍tīḥ | apa̍ | a̱sya̱ |
du̱stara̍ḥ | tara̍n | arā̍tīḥ | varca̍ḥ | dhā̱ḥ | ya̱jña-vā̍hase ||3.024.01||

3.024.02a agna̍ i̱ḻā sam i̍dhyase vī̱tiho̍tro̱ ama̍rtyaḥ |
3.024.02c ju̱ṣasva̱ sū no̍ adhva̱ram ||

agne̍ | i̱ḻā | sam | i̱dhya̱se̱ | vī̱ti-ho̍traḥ | ama̍rtyaḥ |
ju̱ṣasva̍ | su | na̱ḥ | a̱dhva̱ram ||3.024.02||

3.024.03a agne̍ dyu̱mnena̍ jāgṛve̱ saha̍saḥ sūnav āhuta |
3.024.03c edam ba̱rhiḥ sa̍do̱ mama̍ ||

agne̍ | dyu̱mnena̍ | jā̱gṛ̱ve̱ | saha̍saḥ | sū̱no̱ iti̍ | ā̱-hu̱ta̱ |
ā | i̱dam | ba̱rhiḥ | sa̱da̱ḥ | mama̍ ||3.024.03||

3.024.04a agne̱ viśve̍bhir a̱gnibhi̍r de̱vebhi̍r mahayā̱ gira̍ḥ |
3.024.04c ya̱jñeṣu̱ ya u̍ cā̱yava̍ḥ ||

agne̍ | viśve̍bhiḥ | a̱gni-bhi̍ḥ | de̱vebhi̍ḥ | ma̱ha̱ya̱ | gira̍ḥ |
ya̱jñeṣu̍ | ye | ū̱m̐ iti̍ | cā̱yava̍ḥ ||3.024.04||

3.024.05a agne̱ dā dā̱śuṣe̍ ra̱yiṁ vī̱rava̍nta̱m parī̍ṇasam |
3.024.05c śi̱śī̱hi na̍ḥ sūnu̱mata̍ḥ ||

agne̍ | dāḥ | dā̱śuṣe̍ | ra̱yim | vī̱ra-va̍ntam | parī̍ṇasam |
śi̱śī̱hi | na̱ḥ | sū̱nu̱-mata̍ḥ ||3.024.05||


3.025.01a agne̍ di̱vaḥ sū̱nur a̍si̱ prace̍tā̱s tanā̍ pṛthi̱vyā u̱ta vi̱śvave̍dāḥ |
3.025.01c ṛdha̍g de̱vām̐ i̱ha ya̍jā cikitvaḥ ||

agne̍ | di̱vaḥ | sū̱nuḥ | a̱si̱ | pra-ce̍tāḥ | tanā̍ | pṛ̱thi̱vyāḥ | u̱ta | vi̱śva-ve̍dāḥ |
ṛdha̍k | de̱vān | i̱ha | ya̱ja̱ | ci̱ki̱tva̱ḥ ||3.025.01||

3.025.02a a̱gniḥ sa̍noti vī̱ryā̍ṇi vi̱dvān sa̱noti̱ vāja̍m a̱mṛtā̍ya̱ bhūṣa̍n |
3.025.02c sa no̍ de̱vām̐ eha va̍hā purukṣo ||

a̱gniḥ | sa̱no̱ti̱ | vī̱ryā̍ṇi | vi̱dvān | sa̱noti̍ | vāja̍m | a̱mṛtā̍ya | bhūṣa̍n |
saḥ | na̱ḥ | de̱vān | ā | i̱ha | va̱ha̱ | pu̱ru̱kṣo̱ iti̍ puru-kṣo ||3.025.02||

3.025.03a a̱gnir dyāvā̍pṛthi̱vī vi̱śvaja̍nye̱ ā bhā̍ti de̱vī a̱mṛte̱ amū̍raḥ |
3.025.03c kṣaya̱n vājai̍ḥ puruśca̱ndro namo̍bhiḥ ||

a̱gniḥ | dyāvā̍pṛthi̱vī iti̍ | vi̱śvaja̍nye̱ iti̍ vi̱śva-ja̍nye | ā | bhā̱ti̱ | de̱vī iti̍ | a̱mṛte̱ iti̍ | amū̍raḥ |
kṣaya̍n | vājai̍ḥ | pu̱ru̱-ca̱ndraḥ | nama̍ḥ-bhiḥ ||3.025.03||

3.025.04a agna̱ indra̍ś ca dā̱śuṣo̍ duro̱ṇe su̱tāva̍to ya̱jñam i̱hopa̍ yātam |
3.025.04c ama̍rdhantā soma̱peyā̍ya devā ||

agne̍ | indra̍ḥ | ca̱ | dā̱śuṣa̍ḥ | du̱ro̱ṇe | su̱ta-va̍taḥ | ya̱jñam | i̱ha | upa̍ | yā̱ta̱m |
ama̍rdhantā | so̱ma̱-peyā̍ya | de̱vā̱ ||3.025.04||

3.025.05a agne̍ a̱pāṁ sam i̍dhyase duro̱ṇe nitya̍ḥ sūno sahaso jātavedaḥ |
3.025.05c sa̱dhasthā̍ni ma̱haya̍māna ū̱tī ||

agne̍ | a̱pām | sam | i̱dhya̱se̱ | du̱ro̱ṇe | nitya̍ḥ | sū̱no̱ iti̍ | sa̱ha̱sa̱ḥ | jā̱ta̱-ve̱da̱ḥ |
sa̱dha-sthā̍ni | ma̱haya̍mānaḥ | ū̱tī ||3.025.05||


3.026.01a vai̱śvā̱na̱ram mana̍sā̱gniṁ ni̱cāyyā̍ ha̱viṣma̍nto anuṣa̱tyaṁ sva̱rvida̍m |
3.026.01c su̱dānu̍ṁ de̱vaṁ ra̍thi̱raṁ va̍sū̱yavo̍ gī̱rbhī ra̱ṇvaṁ ku̍śi̱kāso̍ havāmahe ||

vai̱śvā̱na̱ram | mana̍sā | a̱gnim | ni̱-cāyya̍ | ha̱viṣma̍ntaḥ | a̱nu̱-sa̱tyam | sva̱ḥ-vida̍m |
su̱-dānu̍m | de̱vam | ra̱thi̱ram | va̱su̱-yava̍ḥ | gī̱ḥ-bhiḥ | ra̱ṇvam | ku̱śi̱kāsa̍ḥ | ha̱vā̱ma̱he̱ ||3.026.01||

3.026.02a taṁ śu̱bhram a̱gnim ava̍se havāmahe vaiśvāna̱ram mā̍ta̱riśvā̍nam u̱kthya̍m |
3.026.02c bṛha̱spati̱m manu̍ṣo de̱vatā̍taye̱ vipra̱ṁ śrotā̍ra̱m ati̍thiṁ raghu̱ṣyada̍m ||

tam | śu̱bhram | a̱gnim | ava̍se | ha̱vā̱ma̱he̱ | vai̱śvā̱na̱ram | mā̱ta̱riśvā̍nam | u̱kthya̍m |
bṛha̱spati̍m | manu̍ṣaḥ | de̱va-tā̍taye | vipra̍m | śrotā̍ram | ati̍thim | ra̱ghu̱-syada̍m ||3.026.02||

3.026.03a aśvo̱ na kranda̱ñ jani̍bhi̱ḥ sam i̍dhyate vaiśvāna̱raḥ ku̍śi̱kebhi̍r yu̱ge-yu̍ge |
3.026.03c sa no̍ a̱gniḥ su̱vīrya̱ṁ svaśvya̱ṁ dadhā̍tu̱ ratna̍m a̱mṛte̍ṣu̱ jāgṛ̍viḥ ||

aśva̍ḥ | na | kranda̍n | jani̍-bhiḥ | sam | i̱dhya̱te̱ | vai̱śvā̱na̱raḥ | ku̱śi̱kebhi̍ḥ | yu̱ge-yu̍ge |
saḥ | na̱ḥ | a̱gniḥ | su̱-vīrya̍m | su̱-aśvyam | dadhā̍tu | ratna̍m | a̱mṛte̍ṣu̍ | jāgṛ̍viḥ ||3.026.03||

3.026.04a pra ya̍ntu̱ vājā̱s tavi̍ṣībhir a̱gnaya̍ḥ śu̱bhe sammi̍ślā̱ḥ pṛṣa̍tīr ayukṣata |
3.026.04c bṛ̱ha̱dukṣo̍ ma̱ruto̍ vi̱śvave̍dasa̱ḥ pra ve̍payanti̱ parva̍tā̱m̐ adā̍bhyāḥ ||

pra | ya̱ntu̱ | vājā̍ḥ | tavi̍ṣībhiḥ | a̱gnaya̍ḥ | śu̱bhe | sam-mi̍ślāḥ | pṛṣa̍tīḥ | a̱yu̱kṣa̱ta̱ |
bṛ̱ha̱t-ukṣa̍ḥ | ma̱ruta̍ḥ | vi̱śva-ve̍dasaḥ | pra | ve̱pa̱ya̱nti̱ | parva̍tān | adā̍bhyāḥ ||3.026.04||

3.026.05a a̱gni̱śriyo̍ ma̱ruto̍ vi̱śvakṛ̍ṣṭaya̱ ā tve̱ṣam u̱gram ava̍ īmahe va̱yam |
3.026.05c te svā̱nino̍ ru̱driyā̍ va̱rṣani̍rṇijaḥ si̱ṁhā na he̱ṣakra̍tavaḥ su̱dāna̍vaḥ ||

a̱gni̱-śriya̍ḥ | ma̱ruta̍ḥ | vi̱śva-kṛ̍ṣṭayaḥ | ā | tve̱ṣam | u̱gram | ava̍ḥ | ī̱ma̱he̱ | va̱yam |
te | svā̱nina̍ḥ | ru̱driyā̍ḥ | va̱rṣa-ni̍rnijaḥ | si̱ṁhāḥ | na | he̱ṣa-kra̍tavaḥ | su̱-dāna̍vaḥ ||3.026.05||

3.026.06a vrāta̍ṁ-vrātaṁ ga̱ṇaṁ-ga̍ṇaṁ suśa̱stibhi̍r a̱gner bhāma̍m ma̱rutā̱m oja̍ īmahe |
3.026.06c pṛṣa̍daśvāso anava̱bhrarā̍dhaso̱ gantā̍ro ya̱jñaṁ vi̱dathe̍ṣu̱ dhīrā̍ḥ ||

vrāta̍m-vrātam | ga̱ṇam-ga̍ṇam | su̱śa̱sti-bhi̍ḥ | a̱gneḥ | bhāma̍m | ma̱rutā̍m | oja̍ḥ | ī̱ma̱he̱ |
pṛṣa̍t-aśvāsaḥ | a̱na̱va̱bhra-rā̍dhasaḥ | gantā̍raḥ | ya̱jñam | vi̱dathe̍ṣu | dhīrā̍ḥ ||3.026.06||

3.026.07a a̱gnir a̍smi̱ janma̍nā jā̱tave̍dā ghṛ̱tam me̱ cakṣu̍r a̱mṛta̍m ma ā̱san |
3.026.07c a̱rkas tri̱dhātū̱ raja̍so vi̱māno 'ja̍sro gha̱rmo ha̱vir a̍smi̱ nāma̍ ||

a̱gniḥ | a̱smi̱ | janma̍nā | jā̱ta-ve̍dāḥ | ghṛ̱tam | me̱ | cakṣu̍ḥ | a̱mṛta̍m | me̱ | ā̱san |
a̱rkaḥ | tri̱-dhātu̍ḥ | raja̍saḥ | vi̱-māna̍ḥ | aja̍sraḥ | gha̱rmaḥ | ha̱viḥ | a̱smi̱ | nāma̍ ||3.026.07||

3.026.08a tri̱bhiḥ pa̱vitrai̱r apu̍po̱d dhy a1̱̍rkaṁ hṛ̱dā ma̱tiṁ jyoti̱r anu̍ prajā̱nan |
3.026.08c varṣi̍ṣṭha̱ṁ ratna̍m akṛta sva̱dhābhi̱r ād id dyāvā̍pṛthi̱vī pary a̍paśyat ||

tri̱-bhiḥ | pa̱vitrai̍ḥ | apu̍pot | hi | a̱rkam | hṛ̱dā | ma̱tim | jyoti̍ḥ | anu̍ | pra̱-jā̱nan |
varṣi̍ṣṭham | ratna̍m | a̱kṛ̱ta̱ | sva̱dhābhi̍ḥ | āt | it | dyāvā̍pṛthi̱vī iti̍ | pari̍ | a̱pa̱śya̱t ||3.026.08||

3.026.09a śa̱tadhā̍ra̱m utsa̱m akṣī̍yamāṇaṁ vipa̱ścita̍m pi̱tara̱ṁ vaktvā̍nām |
3.026.09c me̱ḻim mada̍ntam pi̱tror u̱pasthe̱ taṁ ro̍dasī pipṛtaṁ satya̱vāca̍m ||

śa̱ta-dhā̍ram | utsa̍m | akṣī̍yamāṇam | vi̱pa̱ḥ-cita̍m | pi̱tara̍m | vaktvā̍nām |
me̱ḻim | mada̍ntam | pi̱troḥ | u̱pa-sthe̍ | tam | ro̱da̱sī̱ iti̍ | pi̱pṛ̱ta̱m | sa̱tya̱-vāca̍m ||3.026.09||


3.027.01a pra vo̱ vājā̍ a̱bhidya̍vo ha̱viṣma̍nto ghṛ̱tācyā̍ |
3.027.01c de̱vāñ ji̍gāti sumna̱yuḥ ||

pra | va̱ḥ | vājā̍ḥ | a̱bhi-dya̍vaḥ | ha̱viṣma̍ntaḥ | ghṛ̱tācyā̍ |
de̱vān | ji̱gā̱ti̱ | su̱mna̱yuḥ ||3.027.01||

3.027.02a īḻe̍ a̱gniṁ vi̍pa̱ścita̍ṁ gi̱rā ya̱jñasya̱ sādha̍nam |
3.027.02c śru̱ṣṭī̱vāna̍ṁ dhi̱tāvā̍nam ||

īḻe̍ | a̱gnim | vi̱pa̱ḥ-cita̍m | gi̱rā | ya̱jñasya̍ | sādha̍nam |
śru̱ṣṭī̱-vāna̍m | dhi̱ta-vā̍nam ||3.027.02||

3.027.03a agne̍ śa̱kema̍ te va̱yaṁ yama̍ṁ de̱vasya̍ vā̱jina̍ḥ |
3.027.03c ati̱ dveṣā̍ṁsi tarema ||

agne̍ | śa̱kema̍ | te̱ | va̱yam | yama̍m | de̱vasya̍ | vā̱jina̍ḥ |
ati̍ | dveṣā̍ṁsi | ta̱re̱ma̱ ||3.027.03||

3.027.04a sa̱mi̱dhyamā̍no adhva̱re̱3̱̍ 'gniḥ pā̍va̱ka īḍya̍ḥ |
3.027.04c śo̱ciṣke̍śa̱s tam ī̍mahe ||

sa̱m-i̱dhyamā̍naḥ | a̱dhva̱re | a̱gniḥ | pā̱va̱kaḥ | īḍya̍ḥ |
śo̱ciḥ-ke̍śaḥ | tam | ī̱ma̱he̱ ||3.027.04||

3.027.05a pṛ̱thu̱pājā̱ ama̍rtyo ghṛ̱tani̍rṇi̱k svā̍hutaḥ |
3.027.05c a̱gnir ya̱jñasya̍ havya̱vāṭ ||

pṛ̱thu̱-pājā̍ḥ | ama̍rtyaḥ | ghṛ̱ta-ni̍rnik | su-ā̍hutaḥ |
a̱gniḥ | ya̱jñasya̍ | ha̱vya̱-vāṭ ||3.027.05||

3.027.06a taṁ sa̱bādho̍ ya̱tasru̍ca i̱tthā dhi̱yā ya̱jñava̍ntaḥ |
3.027.06c ā ca̍krur a̱gnim ū̱taye̍ ||

tam | sa̱-bādha̍ḥ | ya̱ta-sru̍caḥ | i̱tthā | dhi̱yā | ya̱jña-va̍ntaḥ |
ā | ca̱kru̱ḥ | a̱gnim | ū̱taye̍ ||3.027.06||

3.027.07a hotā̍ de̱vo ama̍rtyaḥ pu̱rastā̍d eti mā̱yayā̍ |
3.027.07c vi̱dathā̍ni praco̱daya̍n ||

hotā̍ | de̱vaḥ | ama̍rtyaḥ | pu̱rastā̍t | e̱ti̱ | mā̱yayā̍ |
vi̱dathā̍ni | pra̱-co̱daya̍n ||3.027.07||

3.027.08a vā̱jī vāje̍ṣu dhīyate 'dhva̱reṣu̱ pra ṇī̍yate |
3.027.08c vipro̍ ya̱jñasya̱ sādha̍naḥ ||

vā̱jī | vāje̍ṣu | dhī̱ya̱te̱ | a̱dhva̱reṣu̍ | pra | nī̱ya̱te̱ |
vipra̍ḥ | ya̱jñasya̍ | sādha̍naḥ ||3.027.08||

3.027.09a dhi̱yā ca̍kre̱ vare̍ṇyo bhū̱tānā̱ṁ garbha̱m ā da̍dhe |
3.027.09c dakṣa̍sya pi̱tara̱ṁ tanā̍ ||

dhi̱yā | ca̱kre̱ | vare̍ṇyaḥ | bhū̱tānā̍m | garbha̍m | ā | da̱dhe̱ |
dakṣa̍sya | pi̱tara̍m | tanā̍ ||3.027.09||

3.027.10a ni tvā̍ dadhe̱ vare̍ṇya̱ṁ dakṣa̍sye̱ḻā sa̍haskṛta |
3.027.10c agne̍ sudī̱tim u̱śija̍m ||

ni | tvā̱ | da̱dhe̱ | vare̍ṇyam | dakṣa̍sya | i̱ḻā | sa̱ha̱ḥ-kṛ̱ta̱ |
agne̍ | su̱-dī̱tim | u̱śija̍m ||3.027.10||

3.027.11a a̱gniṁ ya̱ntura̍m a̱ptura̍m ṛ̱tasya̱ yoge̍ va̱nuṣa̍ḥ |
3.027.11c viprā̱ vājai̱ḥ sam i̍ndhate ||

a̱gnim | ya̱ntura̍m | a̱p-tura̍m | ṛ̱tasya̍ | yoge̍ | va̱nuṣa̍ḥ |
viprā̍ḥ | vājai̍ḥ | sam | i̱ndha̱te̱ ||3.027.11||

3.027.12a ū̱rjo napā̍tam adhva̱re dī̍di̱vāṁsa̱m upa̱ dyavi̍ |
3.027.12c a̱gnim ī̍ḻe ka̱vikra̍tum ||

ū̱rjaḥ | napā̍tam | a̱dhva̱re | dī̱di̱-vāṁsa̍m | upa̍ | dyavi̍ |
a̱gnim | ī̱ḻe̱ | ka̱vi-kra̍tum ||3.027.12||

3.027.13a ī̱ḻenyo̍ nama̱sya̍s ti̱ras tamā̍ṁsi darśa̱taḥ |
3.027.13c sam a̱gnir i̍dhyate̱ vṛṣā̍ ||

ī̱ḻenya̍ḥ | na̱ma̱sya̍ḥ | ti̱raḥ | tamā̍ṁsi | da̱rśa̱taḥ |
sam | a̱gniḥ | i̱dhya̱te̱ | vṛṣā̍ ||3.027.13||

3.027.14a vṛṣo̍ a̱gniḥ sam i̍dhya̱te 'śvo̱ na de̍va̱vāha̍naḥ |
3.027.14c taṁ ha̱viṣma̍nta īḻate ||

vṛṣo̱ iti̍ | a̱gniḥ | sam | i̱dhya̱te̱ | aśva̍ḥ | na | de̱va̱-vāha̍naḥ |
tam | ha̱viṣma̍ntaḥ | ī̱ḻa̱te̱ ||3.027.14||

3.027.15a vṛṣa̍ṇaṁ tvā va̱yaṁ vṛ̍ṣa̱n vṛṣa̍ṇa̱ḥ sam i̍dhīmahi |
3.027.15c agne̱ dīdya̍tam bṛ̱hat ||

vṛṣa̍ṇam | tvā̱ | va̱yam | vṛ̱ṣa̱n | vṛṣa̍ṇaḥ | sam | i̱dhī̱ma̱hi̱ |
agne̍ | dīdya̍tam | bṛ̱hat ||3.027.15||


3.028.01a agne̍ ju̱ṣasva̍ no ha̱viḥ pu̍ro̱ḻāśa̍ṁ jātavedaḥ |
3.028.01c prā̱ta̱ḥsā̱ve dhi̍yāvaso ||

agne̍ | ju̱ṣasva̍ | na̱ḥ | ha̱viḥ | pu̱ro̱ḻāśa̍m | jā̱ta̱-ve̱da̱ḥ |
prā̱ta̱ḥ-sā̱ve | dhi̱yā̱va̱so̱ iti̍ dhiyā-vaso ||3.028.01||

3.028.02a pu̱ro̱ḻā a̍gne paca̱tas tubhya̍ṁ vā ghā̱ pari̍ṣkṛtaḥ |
3.028.02c taṁ ju̍ṣasva yaviṣṭhya ||

pu̱ro̱ḻāḥ | a̱gne̱ | pa̱ca̱taḥ | tubhya̍m | vā̱ | gha̱ | pari̍-kṛtaḥ |
tam | ju̱ṣa̱sva̱ | ya̱vi̱ṣṭhya̱ ||3.028.02||

3.028.03a agne̍ vī̱hi pu̍ro̱ḻāśa̱m āhu̍taṁ ti̱roa̍hnyam |
3.028.03c saha̍saḥ sū̱nur a̍sy adhva̱re hi̱taḥ ||

agne̍ | vī̱hi | pu̱ro̱ḻāśa̍m | ā-hu̍tam | ti̱raḥ-a̍hnyam |
saha̍saḥ | sū̱nuḥ | a̱si̱ | a̱dhva̱re | hi̱taḥ ||3.028.03||

3.028.04a mādhya̍ṁdine̱ sava̍ne jātavedaḥ puro̱ḻāśa̍m i̱ha ka̍ve juṣasva |
3.028.04c agne̍ ya̱hvasya̱ tava̍ bhāga̱dheya̱ṁ na pra mi̍nanti vi̱dathe̍ṣu̱ dhīrā̍ḥ ||

mādhya̍ndine | sava̍ne | jā̱ta̱-ve̱da̱ḥ | pu̱ro̱ḻāśa̍m | i̱ha | ka̱ve̱ | ju̱ṣa̱sva̱ |
agne̍ | ya̱hvasya̍ | tava̍ | bhā̱ga̱-dheya̍m | na | pra | mi̱na̱nti̱ | vi̱dathe̍ṣu | dhīrā̍ḥ ||3.028.04||

3.028.05a agne̍ tṛ̱tīye̱ sava̍ne̱ hi kāni̍ṣaḥ puro̱ḻāśa̍ṁ sahasaḥ sūna̱v āhu̍tam |
3.028.05c athā̍ de̱veṣv a̍dhva̱raṁ vi̍pa̱nyayā̱ dhā ratna̍vantam a̱mṛte̍ṣu̱ jāgṛ̍vim ||

agne̍ | tṛ̱tīye̍ | sava̍ne | hi | kāni̍ṣaḥ | puro̱ḻāśa̍m | sa̱ha̱sa̱ḥ | sū̱no̱ iti̍ | ā-hu̍tam |
atha̍ | de̱veṣu̍ | a̱dhva̱ram | vi̱pa̱nyayā̍ | dhāḥ | ratna̍-vantam | a̱mṛte̍ṣu | jāgṛ̍vim ||3.028.05||

3.028.06a agne̍ vṛdhā̱na āhu̍tim puro̱ḻāśa̍ṁ jātavedaḥ |
3.028.06c ju̱ṣasva̍ ti̱roa̍hnyam ||

agne̍ | vṛ̱dhā̱naḥ | ā-hu̍tim | pu̱ro̱ḻāśa̍m | jā̱ta̱-ve̱da̱ḥ |
ju̱ṣasva̍ | ti̱raḥ-a̍hnyam ||3.028.06||


3.029.01a astī̱dam a̍dhi̱mantha̍na̱m asti̍ pra̱jana̍naṁ kṛ̱tam |
3.029.01c e̱tāṁ vi̱śpatnī̱m ā bha̍rā̱gnim ma̍nthāma pū̱rvathā̍ ||

asti̍ | i̱dam | a̱dhi̱-mantha̍nam | asti̍ | pra̱-jana̍nam | kṛ̱tam |
e̱tām | vi̱śpatnī̍m | ā | bha̱ra̱ | a̱gnim | ma̱nthā̱ma̱ | pū̱rva-thā̍ ||3.029.01||

3.029.02a a̱raṇyo̱r nihi̍to jā̱tave̍dā̱ garbha̍ iva̱ sudhi̍to ga̱rbhiṇī̍ṣu |
3.029.02c di̱ve-di̍va̱ īḍyo̍ jāgṛ̱vadbhi̍r ha̱viṣma̍dbhir manu̱ṣye̍bhir a̱gniḥ ||

a̱raṇyo̍ḥ | ni-hi̍taḥ | jā̱ta-ve̍dāḥ | garbha̍ḥ-iva | su-dhi̍taḥ | ga̱rbhiṇī̍ṣu |
di̱ve-di̍ve | īḍya̍ḥ | jā̱gṛ̱vat-bhi̍ḥ | ha̱viṣma̍t-bhiḥ | ma̱nu̱ṣye̍bhiḥ | a̱gniḥ ||3.029.02||

3.029.03a u̱ttā̱nāyā̱m ava̍ bharā ciki̱tvān sa̱dyaḥ pravī̍tā̱ vṛṣa̍ṇaṁ jajāna |
3.029.03c a̱ru̱ṣastū̍po̱ ruśa̍d asya̱ pāja̱ iḻā̍yās pu̱tro va̱yune̍ 'janiṣṭa ||

u̱ttā̱nāyā̱m | ava̍ | bha̱ra̱ | ci̱ki̱tvān | sa̱dyaḥ | pra-vī̍tā | vṛṣa̍ṇam | ja̱jā̱na̱ |
a̱ru̱ṣa-stū̍paḥ | ruśa̍t | a̱sya̱ | pāja̍ḥ | iḻā̍yāḥ | pu̱traḥ | va̱yune̍ | a̱ja̱ni̱ṣṭa̱ ||3.029.03||

3.029.04a iḻā̍yās tvā pa̱de va̱yaṁ nābhā̍ pṛthi̱vyā adhi̍ |
3.029.04c jāta̍vedo̱ ni dhī̍ma̱hy agne̍ ha̱vyāya̱ voḻha̍ve ||

iḻā̍yāḥ | tvā̱ | pa̱de | va̱yam | nābhā̍ | pṛ̱thi̱vyāḥ | adhi̍ |
jāta̍-vedaḥ | ni | dhī̱ma̱hi̱ | agne̍ | ha̱vyāya̍ | voḻha̍ve ||3.029.04||

3.029.05a mantha̍tā naraḥ ka̱vim adva̍yanta̱m prace̍tasam a̱mṛta̍ṁ su̱pratī̍kam |
3.029.05c ya̱jñasya̍ ke̱tum pra̍tha̱mam pu̱rastā̍d a̱gniṁ na̍ro janayatā su̱śeva̍m ||

mantha̍ta | na̱ra̱ḥ | ka̱vim | adva̍yantam | pra-ce̍tasam | a̱mṛta̍m | su̱-pratī̍kam |
ya̱jñasya̍ | ke̱tum | pra̱tha̱mam | pu̱rastā̍t | a̱gnim | na̱ra̱ḥ | ja̱na̱ya̱ta̱ | su̱-śeva̍m ||3.029.05||

3.029.06a yadī̱ mantha̍nti bā̱hubhi̱r vi ro̍ca̱te 'śvo̱ na vā̱jy a̍ru̱ṣo vane̱ṣv ā |
3.029.06c ci̱tro na yāma̍nn a̱śvino̱r ani̍vṛta̱ḥ pari̍ vṛṇa̱kty aśma̍na̱s tṛṇā̱ daha̍n ||

yadi̍ | mantha̍nti | bā̱hu-bhi̍ḥ | vi | ro̱ca̱te̱ | aśva̍ḥ | na | vā̱jī | a̱ru̱ṣaḥ | vane̍ṣu | ā |
ci̱traḥ | na | yāma̍n | a̱śvino̍ḥ | ani̍-vṛtaḥ | pari̍ | vṛ̱ṇa̱kti̱ | aśma̍naḥ | tṛṇā̍ | daha̍n ||3.029.06||

3.029.07a jā̱to a̱gnī ro̍cate̱ ceki̍tāno vā̱jī vipra̍ḥ kaviśa̱staḥ su̱dānu̍ḥ |
3.029.07c yaṁ de̱vāsa̱ īḍya̍ṁ viśva̱vida̍ṁ havya̱vāha̱m ada̍dhur adhva̱reṣu̍ ||

jā̱taḥ | a̱gniḥ | ro̱ca̱te̱ | ceki̍tānaḥ | vā̱jī | vipra̍ḥ | ka̱vi̱-śa̱staḥ | su̱-dānu̍ḥ |
yam | de̱vāsa̍ḥ | īḍya̍m | vi̱śva̱-vida̍m | ha̱vya̱-vāha̍m | ada̍dhuḥ | a̱dhva̱reṣu̍ ||3.029.07||

3.029.08a sīda̍ hota̱ḥ sva u̍ lo̱ke ci̍ki̱tvān sā̱dayā̍ ya̱jñaṁ su̍kṛ̱tasya̱ yonau̍ |
3.029.08c de̱vā̱vīr de̱vān ha̱viṣā̍ yajā̱sy agne̍ bṛ̱had yaja̍māne̱ vayo̍ dhāḥ ||

sīda̍ | ho̱ta̱riti̍ | sve | ū̱m̐ iti̍ | lo̱ke | ci̱ki̱tvān | sā̱daya̍ | ya̱jñam | su̱-kṛ̱tasya̍ | yonau̍ |
de̱va̱-a̱vīḥ | de̱vān | ha̱viṣā̍ | ya̱jā̱si̱ | agne̍ | bṛ̱hat | yaja̍māne | vaya̍ḥ | dhā̱ḥ ||3.029.08||

3.029.09a kṛ̱ṇota̍ dhū̱maṁ vṛṣa̍ṇaṁ sakhā̱yo 'sre̍dhanta itana̱ vāja̱m accha̍ |
3.029.09c a̱yam a̱gniḥ pṛ̍tanā̱ṣāṭ su̱vīro̱ yena̍ de̱vāso̱ asa̍hanta̱ dasyū̍n ||

kṛ̱ṇota̍ | dhū̱ma̍m | vṛṣa̍ṇam | sa̱khā̱ya̱ḥ | asre̍dhantaḥ | i̱ta̱na̱ | vāja̍m | accha̍ |
a̱yam | a̱gniḥ | pṛ̱ta̱nā̱ṣāṭ | su̱-vīra̍ḥ | yena̍ | de̱vāsa̍ḥ | asa̍hanta | dasyū̍n ||3.029.09||

3.029.10a a̱yaṁ te̱ yoni̍r ṛ̱tviyo̱ yato̍ jā̱to aro̍cathāḥ |
3.029.10c taṁ jā̱nann a̍gna̱ ā sī̱dāthā̍ no vardhayā̱ gira̍ḥ ||

a̱yam | te̱ | yoni̍ḥ | ṛ̱tviya̍ḥ | yata̍ḥ | jā̱taḥ | aro̍cathāḥ |
tam | jā̱nan | a̱gne̱ | ā | sī̱da̱ | atha̍ | na̱ḥ | va̱rdha̱ya̱ | gira̍ḥ ||3.029.10||

3.029.11a tanū̱napā̍d ucyate̱ garbha̍ āsu̱ro narā̱śaṁso̍ bhavati̱ yad vi̱jāya̍te |
3.029.11c mā̱ta̱riśvā̱ yad ami̍mīta mā̱tari̱ vāta̍sya̱ sargo̍ abhava̱t sarī̍maṇi ||

tanū̱-napā̍t | u̱cya̱te̱ | garbha̍ḥ | ā̱su̱raḥ | narā̱śaṁsa̍ḥ | bha̱va̱ti̱ | yat | vi̱-jāya̍te |
mā̱ta̱riśvā̍ | yat | ami̍mīta | mā̱tari̍ | vāta̍sya | sarga̍ḥ | a̱bha̱va̱t | sarī̍maṇi ||3.029.11||

3.029.12a su̱ni̱rmathā̱ nirma̍thitaḥ suni̱dhā nihi̍taḥ ka̱viḥ |
3.029.12c agne̍ svadhva̱rā kṛ̍ṇu de̱vān de̍vaya̱te ya̍ja ||

su̱ni̱ḥ-mathā̍ | niḥ-ma̍thitaḥ | su̱-ni̱dhā | ni-hi̍taḥ | ka̱viḥ |
agne̍ | su̱-a̱dhva̱rā | kṛ̱ṇu̱ | de̱vān | de̱va̱-ya̱te | ya̱ja̱ ||3.029.12||

3.029.13a ajī̍janann a̱mṛta̱m martyā̍so 'sre̱māṇa̍ṁ ta̱raṇi̍ṁ vī̱ḻuja̍mbham |
3.029.13c daśa̱ svasā̍ro a̱gruva̍ḥ samī̱cīḥ pumā̍ṁsaṁ jā̱tam a̱bhi saṁ ra̍bhante ||

ajī̍janan | a̱mṛta̍m | martyā̍saḥ | a̱sre̱māṇa̍m | ta̱raṇi̍m | vī̱ḻu-ja̍mbham |
daśa̍ | svasā̍raḥ | a̱gruva̍ḥ | sa̱mī̱cīḥ | pumā̍ṁsam | jā̱tam | a̱bhi | sam | ra̱bha̱nte̱ ||3.029.13||

3.029.14a pra sa̱ptaho̍tā sana̱kād a̍rocata mā̱tur u̱pasthe̱ yad aśo̍ca̱d ūdha̍ni |
3.029.14c na ni mi̍ṣati su̱raṇo̍ di̱ve-di̍ve̱ yad asu̍rasya ja̱ṭharā̱d ajā̍yata ||

pra | sa̱pta-ho̍tā | sa̱na̱kāt | a̱ro̱ca̱ta̱ | mā̱tuḥ | u̱pa-sthe̍ | yat | aśo̍cat | ūdha̍ni |
na | ni | mi̱ṣa̱ti̱ | su̱-raṇa̍ḥ | di̱ve-di̍ve | yat | asu̍rasya | ja̱ṭharā̍t | ajā̍yata ||3.029.14||

3.029.15a a̱mi̱trā̱yudho̍ ma̱rutā̍m iva pra̱yāḥ pra̍thama̱jā brahma̍ṇo̱ viśva̱m id vi̍duḥ |
3.029.15c dyu̱mnava̱d brahma̍ kuśi̱kāsa̱ eri̍ra̱ eka̍-eko̱ dame̍ a̱gniṁ sam ī̍dhire ||

a̱mi̱tra̱-yudha̍ḥ | ma̱rutā̍m-iva | pra̱-yāḥ | pra̱tha̱ma̱-jāḥ | brahma̍ṇaḥ | viśva̍m | it | vi̱du̱ḥ |
dyu̱mna-va̍t | brahma̍ | ku̱śi̱kāsa̍ḥ | ā | ī̱ri̱re̱ | eka̍ḥ-ekaḥ | dame̍ | a̱gnim | sam | ī̱dhi̱re̱ ||3.029.15||

3.029.16a yad a̱dya tvā̍ praya̱ti ya̱jñe a̱smin hota̍ś ciki̱tvo 'vṛ̍ṇīmahī̱ha |
3.029.16c dhru̱vam a̍yā dhru̱vam u̱tāśa̍miṣṭhāḥ prajā̱nan vi̱dvām̐ upa̍ yāhi̱ soma̍m ||

yat | a̱dya | tvā̱ | pra̱-ya̱ti | ya̱jñe | a̱smin | hota̱riti̍ | ci̱ki̱tva̱ḥ | avṛ̍ṇīmahi | iha̱ |
dhru̱vam | a̱yā̱ḥ | dhru̱vam | u̱ta | a̱śa̱mi̱ṣṭhā̱ḥ | pra̱-jā̱nan | vi̱dvān | upa̍ | yā̱hi̱ | soma̍m ||3.029.16||


3.030.01a i̱cchanti̍ tvā so̱myāsa̱ḥ sakhā̍yaḥ su̱nvanti̱ soma̱ṁ dadha̍ti̱ prayā̍ṁsi |
3.030.01c titi̍kṣante a̱bhiśa̍sti̱ṁ janā̍nā̱m indra̱ tvad ā kaś ca̱na hi pra̍ke̱taḥ ||

i̱cchanti̍ | tvā̱ | so̱myāsa̍ḥ | sakhā̍yaḥ | su̱nvanti̍ | soma̍m | dadha̍ti | prayā̍ṁsi |
tati̍kṣante | a̱bhi-śa̍stim | janā̍nām | indra̍ | tvat | ā | kaḥ | ca̱na | hi | pra̱-ke̱taḥ ||3.030.01||

3.030.02a na te̍ dū̱re pa̍ra̱mā ci̱d rajā̱ṁsy ā tu pra yā̍hi harivo̱ hari̍bhyām |
3.030.02c sthi̱rāya̱ vṛṣṇe̱ sava̍nā kṛ̱temā yu̱ktā grāvā̍ṇaḥ samidhā̱ne a̱gnau ||

na | te̱ | dū̱re | pa̱ra̱mā | ci̱t | rajā̍ṁsi | ā | tu | pra | yā̱hi̱ | ha̱ri̱-va̱ḥ | hari̍-bhyām |
sthi̱rāya̍ | vṛṣṇe̍ | sava̍nā | kṛ̱tā | i̱mā | yu̱ktāḥ | grāvā̍ṇaḥ | sa̱m-i̱dhā̱ne | a̱gnau ||3.030.02||

3.030.03a indra̍ḥ su̱śipro̍ ma̱ghavā̱ taru̍tro ma̱hāvrā̍tas tuvikū̱rmir ṛghā̍vān |
3.030.03c yad u̱gro dhā bā̍dhi̱to martye̍ṣu̱ kva1̱̍ tyā te̍ vṛṣabha vī̱ryā̍ṇi ||

indra̍ḥ | su̱-śipra̍ḥ | ma̱gha-vā̍ | taru̍traḥ | ma̱hā-vrā̍taḥ | tu̱vi̱-kū̱rmiḥ | ṛghā̍vān |
yat | u̱graḥ | dhāḥ | bā̱dhi̱taḥ | martye̍ṣu | kva̍ | tyā | te̱ | vṛ̱ṣa̱bha̱ | vī̱ryā̍ṇi ||3.030.03||

3.030.04a tvaṁ hi ṣmā̍ cyā̱vaya̱nn acyu̍tā̱ny eko̍ vṛ̱trā cara̍si̱ jighna̍mānaḥ |
3.030.04c tava̱ dyāvā̍pṛthi̱vī parva̍tā̱so 'nu̍ vra̱tāya̱ nimi̍teva tasthuḥ ||

tvam | hi | sma̱ | cyā̱vaya̍n | acyu̍tāni | eka̍ḥ | vṛ̱trā | cara̍si | jighna̍mānaḥ |
tava̍ | dyāvā̍pṛthi̱vī iti̍ | parva̍tā̱saḥ | anu̍ | vra̱tāya̍ | nimi̍tā-iva | ta̱sthu̱ḥ ||3.030.04||

3.030.05a u̱tābha̍ye puruhūta̱ śravo̍bhi̱r eko̍ dṛ̱ḻham a̍vado vṛtra̱hā san |
3.030.05c i̱me ci̍d indra̱ roda̍sī apā̱re yat sa̍ṁgṛ̱bhṇā ma̍ghavan kā̱śir it te̍ ||

u̱ta | abha̍ye | pu̱ru̱-hū̱ta̱ | śrava̍ḥ-bhiḥ | eka̍ḥ | dṛ̱ḻham | a̱va̱da̱ḥ | vṛ̱tra̱-hā | san |
i̱me | ci̱t | i̱ndra̱ | roda̍sī̱ iti̍ | a̱pā̱re iti̍ | yat | sa̱m-gṛ̱bhṇāḥ | ma̱gha̱va̱n | kā̱śiḥ | it | te̱ ||3.030.05||

3.030.06a pra sū ta̍ indra pra̱vatā̱ hari̍bhyā̱m pra te̱ vajra̍ḥ pramṛ̱ṇann e̍tu̱ śatrū̍n |
3.030.06c ja̱hi pra̍tī̱co a̍nū̱caḥ parā̍co̱ viśva̍ṁ sa̱tyaṁ kṛ̍ṇuhi vi̱ṣṭam a̍stu ||

pra | su | te̱ | i̱ndra̱ | pra̱-vatā̍ | hari̍-bhyām | pra | te̱ | vajra̍ḥ | pra̱-mṛ̱ṇan | e̱tu̱ | śatrū̍n |
ja̱hi | pra̱tī̱caḥ | a̱nū̱caḥ | parā̍caḥ | viśva̍m | sa̱tyam | kṛ̱ṇu̱hi̱ | vi̱ṣṭam | a̱stu̱ ||3.030.06||

3.030.07a yasmai̱ dhāyu̱r ada̍dhā̱ martyā̱yābha̍ktaṁ cid bhajate ge̱hya1̱̍ṁ saḥ |
3.030.07c bha̱drā ta̍ indra suma̱tir ghṛ̱tācī̍ sa̱hasra̍dānā puruhūta rā̱tiḥ ||

yasmai̍ | dhāyu̍ḥ | ada̍dhāḥ | martyā̍ya | abha̍ktam | ci̱t | bha̱ja̱te̱ | ge̱hya̍m | saḥ |
bha̱drā | te̱ | i̱ndra̱ | su̱-ma̱tiḥ | ghṛ̱tācī̍ | sa̱hasra̍-dānā | pu̱ru̱-hū̱ta̱ | rā̱tiḥ ||3.030.07||

3.030.08a sa̱hadā̍num puruhūta kṣi̱yanta̍m aha̱stam i̍ndra̱ sam pi̍ṇa̱k kuṇā̍rum |
3.030.08c a̱bhi vṛ̱traṁ vardha̍māna̱m piyā̍rum a̱pāda̍m indra ta̱vasā̍ jaghantha ||

sa̱ha-dā̍num | pu̱ru̱-hū̱ta̱ | kṣi̱yanta̍m | a̱ha̱stam | i̱ndra̱ | sam | pi̱ṇa̱k | kuṇā̍rum |
a̱bhi | vṛ̱tram | vardha̍mānam | piyā̍rum | a̱pāda̍m | i̱ndra̱ | ta̱vasā̍ | ja̱gha̱ntha̱ ||3.030.08||

3.030.09a ni sā̍ma̱nām i̍ṣi̱rām i̍ndra̱ bhūmi̍m ma̱hīm a̍pā̱rāṁ sada̍ne sasattha |
3.030.09c asta̍bhnā̱d dyāṁ vṛ̍ṣa̱bho a̱ntari̍kṣa̱m arṣa̱ntv āpa̱s tvaye̱ha prasū̍tāḥ ||

ni | sā̱ma̱nām | i̱ṣi̱rām | i̱ndra̱ | bhūmi̍m | ma̱hīm | a̱pā̱rām | sada̍ne | sa̱sa̱ttha̱ |
asta̍bhnāt | dyām | vṛ̱ṣa̱bhaḥ | a̱ntari̍kṣam | arṣa̍ntu | āpa̍ḥ | tvayā̍ | i̱ha | pra-sū̍tāḥ ||3.030.09||

3.030.10a a̱lā̱tṛ̱ṇo va̱la i̍ndra vra̱jo goḥ pu̱rā hanto̱r bhaya̍māno̱ vy ā̍ra |
3.030.10c su̱gān pa̱tho a̍kṛṇon ni̱raje̱ gāḥ prāva̱n vāṇī̍ḥ puruhū̱taṁ dhama̍ntīḥ ||

a̱lā̱tṛ̱ṇaḥ | va̱laḥ | i̱ndra̱ | vra̱jaḥ | goḥ | pu̱rā | hanto̍ḥ | bhaya̍mānaḥ | vi | ā̱ra̱ |
su̱-gān | pa̱thaḥ | a̱kṛ̱ṇo̱t | ni̱ḥ-aje̍ | gāḥ | pra | ā̱va̱n | vāṇī̍ḥ | pu̱ru̱-hū̱tam | dhama̍ntīḥ ||3.030.10||

3.030.11a eko̱ dve vasu̍matī samī̱cī indra̱ ā pa̍prau pṛthi̱vīm u̱ta dyām |
3.030.11c u̱tāntari̍kṣād a̱bhi na̍ḥ samī̱ka i̱ṣo ra̱thīḥ sa̱yuja̍ḥ śūra̱ vājā̍n ||

eka̍ḥ | dve iti̍ | vasu̍matī̱ iti̱ vasu̍-matī | sa̱mī̱cī iti̍ sa̱m-ī̱cī | indra̍ḥ | ā | pa̱prau̱ | pṛ̱thi̱vīm | u̱ta | dyām |
u̱ta | a̱ntari̍kṣāt | a̱bhi | na̱ḥ | sa̱m-ī̱ke | i̱ṣaḥ | ra̱thīḥ | sa̱-yuja̍ḥ | śū̱ra̱ | vājā̍n ||3.030.11||

3.030.12a diśa̱ḥ sūryo̱ na mi̍nāti̱ pradi̍ṣṭā di̱ve-di̍ve̱ harya̍śvaprasūtāḥ |
3.030.12c saṁ yad āna̱ḻ adhva̍na̱ ād id aśvai̍r vi̱moca̍naṁ kṛṇute̱ tat tv a̍sya ||

diśa̍ḥ | sūrya̍ḥ | na | mi̱nā̱ti̱ | pra-di̍ṣṭāḥ | di̱ve-di̍ve | harya̍śva-prasūtāḥ |
sam | yat | āna̍ṭ | adhva̍naḥ | āt | it | aśvai̍ḥ | vi̱-moca̍nam | kṛ̱ṇu̱te̱ | tat | tu | a̱sya̱ ||3.030.12||

3.030.13a didṛ̍kṣanta u̱ṣaso̱ yāma̍nn a̱ktor vi̱vasva̍tyā̱ mahi̍ ci̱tram anī̍kam |
3.030.13c viśve̍ jānanti mahi̱nā yad āgā̱d indra̍sya̱ karma̱ sukṛ̍tā pu̱rūṇi̍ ||

didṛ̍kṣante | u̱ṣasa̍ḥ | yāma̍n | a̱ktoḥ | vi̱vasva̍tyāḥ | mahi̍ | ci̱tram | anī̍kam |
viśve̍ | jā̱na̱nti̱ | ma̱hi̱nā | yat | ā | agā̍t | indra̍sya | karma̍ | su-kṛ̍tā | pu̱rūṇi̍ ||3.030.13||

3.030.14a mahi̱ jyoti̱r nihi̍taṁ va̱kṣaṇā̍sv ā̱mā pa̱kvaṁ ca̍rati̱ bibhra̍tī̱ gauḥ |
3.030.14c viśva̱ṁ svādma̱ sambhṛ̍tam u̱sriyā̍yā̱ṁ yat sī̱m indro̱ ada̍dhā̱d bhoja̍nāya ||

mahi̍ | jyoti̍ḥ | ni-hi̍tam | va̱kṣaṇā̍su | ā̱mā | pa̱kvam | ca̱ra̱ti̱ | bibhra̍tī | gauḥ |
viśva̍m | svādma̍ | sam-bhṛ̍tam | u̱sriyā̍yām | yat | sī̱m | indra̍ḥ | ada̍dhāt | bhoja̍nāya ||3.030.14||

3.030.15a indra̱ dṛhya̍ yāmako̱śā a̍bhūvan ya̱jñāya̍ śikṣa gṛṇa̱te sakhi̍bhyaḥ |
3.030.15c du̱rmā̱yavo̍ du̱revā̱ martyā̍so niṣa̱ṅgiṇo̍ ri̱pavo̱ hantvā̍saḥ ||

indra̍ | dṛhya̍ | yā̱ma̱-ko̱śāḥ | a̱bhū̱va̱n | ya̱jñāya̍ | śi̱kṣa̱ | gṛ̱ṇa̱te | sakhi̍-bhyaḥ |
du̱ḥ-mā̱yava̍ḥ | du̱ḥ-evā̍ḥ | martyā̍saḥ | ni̱ṣa̱ṅgiṇa̍ḥ | ri̱pava̍ḥ | hantvā̍saḥ ||3.030.15||

3.030.16a saṁ ghoṣa̍ḥ śṛṇve 'va̱mair a̱mitrai̍r ja̱hī ny e̍ṣv a̱śani̱ṁ tapi̍ṣṭhām |
3.030.16c vṛ̱ścem a̱dhastā̱d vi ru̍jā̱ saha̍sva ja̱hi rakṣo̍ maghavan ra̱ndhaya̍sva ||

sam | ghoṣa̍ḥ | śṛ̱ṇve̱ | a̱va̱maiḥ | a̱mitrai̍ḥ | ja̱hi | ni | e̱ṣu̱ | a̱śani̍m | tapi̍ṣṭhām |
vṛ̱śca | ī̱m | a̱dhastā̍t | vi | ru̱ja̱ | saha̍sva | ja̱hi | rakṣa̍ḥ | ma̱gha̱-va̱n | ra̱ndhaya̍sva ||3.030.16||

3.030.17a ud vṛ̍ha̱ rakṣa̍ḥ sa̱hamū̍lam indra vṛ̱ścā madhya̱m praty agra̍ṁ śṛṇīhi |
3.030.17c ā kīva̍taḥ sala̱lūka̍ṁ cakartha brahma̱dviṣe̱ tapu̍ṣiṁ he̱tim a̍sya ||

ut | vṛ̱ha̱ | rakṣa̍ḥ | sa̱ha-mū̍lam | i̱ndra̱ | vṛ̱śca | madhya̍m | prati̍ | agra̍m | śṛ̱ṇī̱hi̱ |
ā | kīva̍taḥ | sa̱la̱lūka̍m | ca̱ka̱rtha̱ | bra̱hma̱-dviṣe̍ | tapu̍ṣim | he̱tim | a̱sya̱ ||3.030.17||

3.030.18a sva̱staye̍ vā̱jibhi̍ś ca praṇeta̱ḥ saṁ yan ma̱hīr iṣa̍ ā̱satsi̍ pū̱rvīḥ |
3.030.18c rā̱yo va̱ntāro̍ bṛha̱taḥ syā̍mā̱sme a̍stu̱ bhaga̍ indra pra̱jāvā̍n ||

sva̱staye̍ | vā̱ji-bhi̍ḥ | ca̱ | pra̱ne̱ta̱riti̍ pra-netaḥ | sam | yat | ma̱hīḥ | iṣa̍ḥ | ā̱-satsi̍ | pū̱rvīḥ |
rā̱yaḥ | va̱ntāra̍ḥ | bṛ̱ha̱taḥ | syā̱ma̱ | a̱sme iti̍ | a̱stu̱ | bhaga̍ḥ | i̱ndra̱ | pra̱jā-vā̍n ||3.030.18||

3.030.19a ā no̍ bhara̱ bhaga̍m indra dyu̱manta̱ṁ ni te̍ de̱ṣṇasya̍ dhīmahi prare̱ke |
3.030.19c ū̱rva i̍va paprathe̱ kāmo̍ a̱sme tam ā pṛ̍ṇa vasupate̱ vasū̍nām ||

ā | na̱ḥ | bha̱ra̱ | bhaga̍m | i̱ndra̱ | dyu̱-manta̍m | ni | te̱ | de̱ṣṇasya̍ | dhī̱ma̱hi̱ | pra̱-re̱ke |
ū̱rvaḥ-i̍va | pa̱pra̱the̱ | kāma̍ḥ | a̱sme iti̍ | tam | ā | pṛ̱ṇa̱ | va̱su̱-pa̱te̱ | vasū̍nām ||3.030.19||

3.030.20a i̱maṁ kāma̍m mandayā̱ gobhi̱r aśvai̍ś ca̱ndrava̍tā̱ rādha̍sā pa̱pratha̍ś ca |
3.030.20c sva̱ryavo̍ ma̱tibhi̱s tubhya̱ṁ viprā̱ indrā̍ya̱ vāha̍ḥ kuśi̱kāso̍ akran ||

i̱mam | kāma̍m | ma̱nda̱ya̱ | go-bhi̍ḥ | aśvai̍ḥ | ca̱ndra-va̍tā | rādha̍sā | pa̱pratha̍ḥ | ca̱ |
sva̱ḥ-yavaḥ | ma̱ti-bhi̍ḥ | tubhya̍m | viprā̍ḥ | indrā̍ya | vāha̍ḥ | ku̱śi̱kāsa̍ḥ | a̱kra̱n ||3.030.20||

3.030.21a ā no̍ go̱trā da̍rdṛhi gopate̱ gāḥ sam a̱smabhya̍ṁ sa̱nayo̍ yantu̱ vājā̍ḥ |
3.030.21c di̱vakṣā̍ asi vṛṣabha sa̱tyaśu̍ṣmo̱ 'smabhya̱ṁ su ma̍ghavan bodhi go̱dāḥ ||

ā | na̱ḥ | go̱trā | da̱rdṛ̱hi̱ | go̱-pa̱te̱ | gāḥ | sam | a̱smabhya̍m | sa̱naya̍ḥ | ya̱ntu̱ | vājā̍ḥ |
di̱vakṣā̍ḥ | a̱si̱ | vṛ̱ṣa̱bha̱ | sa̱tya-śu̍ṣmaḥ | a̱smabhya̍m | su | ma̱gha̱-va̱n | bo̱dhi̱ | go̱-dāḥ ||3.030.21||

3.030.22a śu̱naṁ hu̍vema ma̱ghavā̍na̱m indra̍m a̱smin bhare̱ nṛta̍ma̱ṁ vāja̍sātau |
3.030.22c śṛ̱ṇvanta̍m u̱gram ū̱taye̍ sa̱matsu̱ ghnanta̍ṁ vṛ̱trāṇi̍ sa̱ṁjita̱ṁ dhanā̍nām ||

śu̱nam | hu̱ve̱ma̱ | ma̱ghavā̍nam | indra̍m | a̱smin | bhare̍ | nṛ-ta̍mam | vāja̍-sātau |
śṛ̱ṇvanta̍m | u̱gram | ū̱taye̍ | sa̱mat-su̍ | ghnanta̍m | vṛ̱trāṇi̍ | sa̱m-jita̍m | dhanā̍nām ||3.030.22||


3.031.01a śāsa̱d vahni̍r duhi̱tur na̱ptya̍ṁ gād vi̱dvām̐ ṛ̱tasya̱ dīdhi̍tiṁ sapa̱ryan |
3.031.01c pi̱tā yatra̍ duhi̱tuḥ seka̍m ṛ̱ñjan saṁ śa̱gmye̍na̱ mana̍sā dadha̱nve ||

śāsa̍t | vahni̍ḥ | du̱hi̱tuḥ | na̱ptya̍m | gā̱t | vi̱dvān | ṛ̱tasya̍ | dīdhi̍tim | sa̱pa̱ryan |
pi̱tā | yatra̍ | du̱hi̱tuḥ | seka̍m | ṛ̱ñjan | sam | śa̱gmye̍na | mana̍sā | da̱dha̱nve ||3.031.01||

3.031.02a na jā̱maye̱ tānvo̍ ri̱ktham ā̍raik ca̱kāra̱ garbha̍ṁ sani̱tur ni̱dhāna̍m |
3.031.02c yadī̍ mā̱taro̍ ja̱naya̍nta̱ vahni̍m a̱nyaḥ ka̱rtā su̱kṛto̍r a̱nya ṛ̱ndhan ||

na | jā̱maye̍ | tānva̍ḥ | ri̱ktham | a̱rai̱k | ca̱kāra̍ | garbha̍m | sa̱ni̱tuḥ | ni̱-dhāna̍m |
yadi̍ | mā̱tara̍ḥ | ja̱naya̍nta | vahni̍m | a̱nyaḥ | ka̱rtā | su̱-kṛto̍ḥ | a̱nyaḥ | ṛ̱ndhan ||3.031.02||

3.031.03a a̱gnir ja̍jñe ju̱hvā̱3̱̍ reja̍māno ma̱has pu̱trām̐ a̍ru̱ṣasya̍ pra̱yakṣe̍ |
3.031.03c ma̱hān garbho̱ mahy ā jā̱tam e̍ṣām ma̱hī pra̱vṛd dharya̍śvasya ya̱jñaiḥ ||

a̱gniḥ | ja̱jñe̱ | ju̱hvā̍ | reja̍mānaḥ | ma̱haḥ | pu̱trān | a̱ru̱ṣasya̍ | pra̱-yakṣe̍ |
ma̱hān | garbha̍ḥ | mahi̍ | ā | jā̱tam | e̱ṣā̱m | ma̱hī | pra̱-vṛt | hari̍-aśvasya | ya̱jñaiḥ ||3.031.03||

3.031.04a a̱bhi jaitrī̍r asacanta spṛdhā̱nam mahi̱ jyoti̱s tama̍so̱ nir a̍jānan |
3.031.04c taṁ jā̍na̱tīḥ praty ud ā̍yann u̱ṣāsa̱ḥ pati̱r gavā̍m abhava̱d eka̱ indra̍ḥ ||

a̱bhi | jaitrī̍ḥ | a̱sa̱ca̱nta̱ | spṛ̱dhā̱nam | mahi̍ | jyoti̍ḥ | tama̍saḥ | niḥ | a̱jā̱na̱n |
tam | jā̱na̱tīḥ | prati̍ | ut | ā̱ya̱n | u̱ṣasa̍ḥ | pati̍ḥ | gavā̍m | a̱bha̱va̱t | eka̍ḥ | indra̍ḥ ||3.031.04||

3.031.05a vī̱ḻau sa̱tīr a̱bhi dhīrā̍ atṛndan prā̱cāhi̍nva̱n mana̍sā sa̱pta viprā̍ḥ |
3.031.05c viśvā̍m avindan pa̱thyā̍m ṛ̱tasya̍ prajā̱nann it tā nama̱sā vi̍veśa ||

vī̱ḻau | sa̱tīḥ | a̱bhi | dhīrā̍ḥ | a̱tṛ̱nda̱n | prā̱cā | a̱hi̱nva̱n | mana̍sā | sa̱pta | viprā̍ḥ |
viśvā̍m | a̱vi̱nda̱n | pa̱thyā̍m | ṛ̱tasya̍ | pra̱-jā̱nan | it | tā | nama̍sā | ā | vi̱ve̱śa̱ ||3.031.05||

3.031.06a vi̱dad yadī̍ sa̱ramā̍ ru̱gṇam adre̱r mahi̱ pātha̍ḥ pū̱rvyaṁ sa̱dhrya̍k kaḥ |
3.031.06c agra̍ṁ nayat su̱pady akṣa̍rāṇā̱m acchā̱ rava̍m pratha̱mā jā̍na̱tī gā̍t ||

vi̱dat | yadi̍ | sa̱ramā̍ | ru̱gṇam | adre̍ḥ | mahi̍ | pātha̍ḥ | pū̱rvyam | sa̱dhrya̍k | ka̱riti̍ kaḥ |
agra̍m | na̱ya̱t | su̱-padī̍ | akṣa̍rāṇām | accha̍ | rava̍m | pra̱tha̱mā | jā̱na̱tī | gā̱t ||3.031.06||

3.031.07a aga̍cchad u̱ vipra̍tamaḥ sakhī̱yann asū̍dayat su̱kṛte̱ garbha̱m adri̍ḥ |
3.031.07c sa̱sāna̱ maryo̱ yuva̍bhir makha̱syann athā̍bhava̱d aṅgi̍rāḥ sa̱dyo arca̍n ||

aga̍cchat | ū̱m̐ iti̍ | vipra̍-tamaḥ | sa̱khi̱-yan | asū̍dayat | su̱-kṛte̍ | garbha̍m | adri̍ḥ |
sa̱sāna̍ | marya̍ḥ | yuva̍-bhiḥ | ma̱kha̱syan | atha̍ | a̱bha̱va̱t | aṅgi̍rāḥ | sa̱dyaḥ | arca̍n ||3.031.07||

3.031.08a sa̱taḥ-sa̍taḥ prati̱māna̍m puro̱bhūr viśvā̍ veda̱ jani̍mā̱ hanti̱ śuṣṇa̍m |
3.031.08c pra ṇo̍ di̱vaḥ pa̍da̱vīr ga̱vyur arca̱n sakhā̱ sakhī̍m̐r amuñca̱n nir a̍va̱dyāt ||

sa̱taḥ-sa̍taḥ | pra̱ti̱-māna̍m | pu̱ra̱ḥ-bhūḥ | viśvā̍ | ve̱da̱ | jani̍ma | hanti̍ | śuṣṇa̍m |
pra | na̱ḥ | di̱vaḥ | pa̱da̱-vīḥ | ga̱vyuḥ | arca̍n | sakhā̍ | sakhī̍n | a̱mu̱ñca̱t | niḥ | a̱va̱dyāt ||3.031.08||

3.031.09a ni ga̍vya̱tā mana̍sā sedur a̱rkaiḥ kṛ̍ṇvā̱nāso̍ amṛta̱tvāya̍ gā̱tum |
3.031.09c i̱daṁ ci̱n nu sada̍na̱m bhūry e̍ṣā̱ṁ yena̱ māsā̱m̐ asi̍ṣāsann ṛ̱tena̍ ||

ni | ga̱vya̱tā | mana̍sā | se̱du̱ḥ | a̱rkaiḥ | kṛ̱ṇvā̱nāsa̍ḥ | a̱mṛ̱ta̱-tvāya̍ | gā̱tum |
i̱dam | ci̱t | nu | sada̍nam | bhūri̍ | e̱ṣā̱m | yena̍ | māsā̍n | asi̍sāsan | ṛ̱tena̍ ||3.031.09||

3.031.10a sa̱mpaśya̍mānā amadann a̱bhi svam paya̍ḥ pra̱tnasya̱ reta̍so̱ dughā̍nāḥ |
3.031.10c vi roda̍sī atapa̱d ghoṣa̍ eṣāṁ jā̱te ni̱ṣṭhām ada̍dhu̱r goṣu̍ vī̱rān ||

sa̱m-paśya̍mānāḥ | a̱ma̱da̱n | a̱bhi | svam | paya̍ḥ | pra̱tnasya̍ | reta̍saḥ | dughā̍nāḥ |
vi | roda̍sī̱ iti̍ | a̱ta̱pa̱t | ghoṣa̍ḥ | e̱ṣā̱m | jā̱te | ni̱ḥ-sthām | ada̍dhuḥ | goṣu̍ | vī̱rān ||3.031.10||

3.031.11a sa jā̱tebhi̍r vṛtra̱hā sed u̍ ha̱vyair ud u̱sriyā̍ asṛja̱d indro̍ a̱rkaiḥ |
3.031.11c u̱rū̱cy a̍smai ghṛ̱tava̱d bhara̍ntī̱ madhu̱ svādma̍ duduhe̱ jenyā̱ gauḥ ||

saḥ | jā̱tebhi̍ḥ | vṛ̱tra̱-hā | saḥ | it | ū̱m̐ iti̍ | ha̱vyaiḥ | ut | u̱sriyā̍ḥ | a̱sṛ̱ja̱t | indra̍ḥ | a̱rkaiḥ |
u̱rū̱cī | a̱smai̱ | ghṛ̱ta-va̍t | bhara̍ntī | madhu̍ | svādma̍ | du̱du̱he̱ | jenyā̍ | gauḥ ||3.031.11||

3.031.12a pi̱tre ci̍c cakru̱ḥ sada̍na̱ṁ sam a̍smai̱ mahi̱ tviṣī̍mat su̱kṛto̱ vi hi khyan |
3.031.12c vi̱ṣka̱bhnanta̱ḥ skambha̍nenā̱ jani̍trī̱ āsī̍nā ū̱rdhvaṁ ra̍bha̱saṁ vi mi̍nvan ||

pi̱tre | ci̱t | ca̱kru̱ḥ | sada̍nam | sam | a̱smai̱ | mahi̍ | tviṣi̍-mat | su̱-kṛta̍ḥ | vi | hi | khyan |
vi̱-ska̱bhnanta̍ḥ | skambha̍nena | jani̍trī̱ iti̍ | āsī̍nāḥ | ū̱rdhvam | ra̱bha̱sam | vi | mi̱nva̱n ||3.031.12||

3.031.13a ma̱hī yadi̍ dhi̱ṣaṇā̍ śi̱śnathe̱ dhāt sa̍dyo̱vṛdha̍ṁ vi̱bhva1̱̍ṁ roda̍syoḥ |
3.031.13c giro̱ yasmi̍nn anava̱dyāḥ sa̍mī̱cīr viśvā̱ indrā̍ya̱ tavi̍ṣī̱r anu̍ttāḥ ||

ma̱hī | yadi̍ | dhi̱ṣaṇā̍ | śi̱śnathe̍ | dhāt | sa̱dya̱ḥ-vṛdha̍m | vi̱-bhva̍m | roda̍syoḥ |
gira̍ḥ | yasmi̍n | a̱na̱va̱dyāḥ | sa̱m-ī̱cīḥ | viśvā̍ḥ | indrā̍ya | tavi̍ṣīḥ | anu̍ttāḥ ||3.031.13||

3.031.14a mahy ā te̍ sa̱khyaṁ va̍śmi śa̱ktīr ā vṛ̍tra̱ghne ni̱yuto̍ yanti pū̱rvīḥ |
3.031.14c mahi̍ sto̱tram ava̱ āga̍nma sū̱rer a̱smāka̱ṁ su ma̍ghavan bodhi go̱pāḥ ||

mahi̍ | ā | te̱ | sa̱khyam | va̱śmi̱ | śa̱ktīḥ | ā | vṛ̱tra̱-ghne | ni̱-yuta̍ḥ | ya̱nti̱ | pū̱rvīḥ |
mahi̍ | sto̱tram | ava̍ḥ | ā | a̱ga̱nma̱ | sū̱reḥ | a̱smāka̍m | su | ma̱gha̱va̱n | bo̱dhi̱ | go̱pāḥ ||3.031.14||

3.031.15a mahi̱ kṣetra̍m pu̱ru śca̱ndraṁ vi̍vi̱dvān ād it sakhi̍bhyaś ca̱ratha̱ṁ sam ai̍rat |
3.031.15c indro̱ nṛbhi̍r ajana̱d dīdyā̍naḥ sā̱kaṁ sūrya̍m u̱ṣasa̍ṁ gā̱tum a̱gnim ||

mahi̍ | kṣetra̍m | pu̱ru | ca̱ndram | vi̱vi̱dvān | āt | it | sakhi̍-bhyaḥ | ca̱ratha̍m | sam | ai̱rat |
indra̍ḥ | nṛ-bhi̍ḥ | a̱ja̱na̱t | dīdyā̍naḥ | sā̱kam | sūrya̍m | u̱ṣasa̍m | gā̱tum | a̱gnim ||3.031.15||

3.031.16a a̱paś ci̍d e̱ṣa vi̱bhvo̱3̱̍ damū̍nā̱ḥ pra sa̱dhrīcī̍r asṛjad vi̱śvaśca̍ndrāḥ |
3.031.16c madhva̍ḥ punā̱nāḥ ka̱vibhi̍ḥ pa̱vitrai̱r dyubhi̍r hinvanty a̱ktubhi̱r dhanu̍trīḥ ||

a̱paḥ | ci̱t | e̱ṣaḥ | vi̱-bhva̍ḥ | damū̍nāḥ | pra | sa̱dhrīcī̍ḥ | a̱sṛ̱ja̱t | vi̱śva-ca̍ndrāḥ |
madhva̍ḥ | pu̱nā̱nāḥ | ka̱vi-bhi̍ḥ | pa̱vitrai̍ḥ | dyu-bhi̍ḥ | hi̱nva̱nti̱ | a̱ktu-bhi̍ḥ | dhanu̍trīḥ ||3.031.16||

3.031.17a anu̍ kṛ̱ṣṇe vasu̍dhitī jihāte u̱bhe sūrya̍sya ma̱ṁhanā̱ yaja̍tre |
3.031.17c pari̱ yat te̍ mahi̱māna̍ṁ vṛ̱jadhyai̱ sakhā̍ya indra̱ kāmyā̍ ṛji̱pyāḥ ||

anu̍ | kṛ̱ṣṇe iti̍ | vasu̍dhitī̱ iti̱ vasu̍-dhitī | ji̱hā̱te̱ iti̍ | u̱bhe iti̍ | sūrya̍sya | ma̱ṁhanā̍ | yaja̍tre |
pari̍ | yat | te̱ | ma̱hi̱māna̍m | vṛ̱jadhyai̍ | sakhā̍yaḥ | i̱ndra̱ | kāmyā̍ḥ | ṛ̱ji̱pyāḥ ||3.031.17||

3.031.18a pati̍r bhava vṛtrahan sū̱nṛtā̍nāṁ gi̱rāṁ vi̱śvāyu̍r vṛṣa̱bho va̍yo̱dhāḥ |
3.031.18c ā no̍ gahi sa̱khyebhi̍ḥ śi̱vebhi̍r ma̱hān ma̱hībhi̍r ū̱tibhi̍ḥ sara̱ṇyan ||

pati̍ḥ | bha̱va̱ | vṛ̱tra̱-ha̱n | sū̱nṛtā̍nām | gi̱rām | vi̱śva-ā̍yuḥ | vṛ̱ṣa̱bhaḥ | va̱ya̱ḥ-dhāḥ |
ā | na̱ḥ | ga̱hi̱ | sa̱khyebhi̍ḥ | śi̱vebhi̍ḥ | ma̱hān | ma̱hībhi̍ḥ | ū̱ti-bhi̍ḥ | sa̱ra̱ṇyan ||3.031.18||

3.031.19a tam a̍ṅgira̱svan nama̍sā sapa̱ryan navya̍ṁ kṛṇomi̱ sanya̍se purā̱jām |
3.031.19c druho̱ vi yā̍hi bahu̱lā ade̍vī̱ḥ sva̍ś ca no maghavan sā̱taye̍ dhāḥ ||

tam | a̱ṅgi̱ra̱svat | nama̍sā | sa̱pa̱ryan | navya̍m | kṛ̱ṇo̱mi̱ | sanya̍se | pu̱rā̱-jām |
druha̍ḥ | vi | yā̱hi̱ | ba̱hu̱lāḥ | ade̍vīḥ | sva1̱̍riti̱ sva̍ḥ | ca̱ | na̱ḥ | ma̱gha̱-va̱n | sā̱taye̍ | dhā̱ḥ ||3.031.19||

3.031.20a miha̍ḥ pāva̱kāḥ prata̍tā abhūvan sva̱sti na̍ḥ pipṛhi pā̱ram ā̍sām |
3.031.20c indra̱ tvaṁ ra̍thi̱raḥ pā̍hi no ri̱ṣo ma̱kṣū-ma̍kṣū kṛṇuhi go̱jito̍ naḥ ||

miha̍ḥ | pā̱va̱kāḥ | pra-ta̍tāḥ | a̱bhū̱va̱n | sva̱sti | na̱ḥ | pi̱pṛ̱hi̱ | pā̱ram | ā̱sā̱m |
indra̍ | tvam | ra̱thi̱raḥ | pā̱hi̱ | na̱ḥ | ri̱ṣaḥ | ma̱kṣu-ma̍kṣu | kṛ̱ṇu̱hi̱ | go̱-jita̍ḥ | na̱ḥ ||3.031.20||

3.031.21a ade̍diṣṭa vṛtra̱hā gopa̍ti̱r gā a̱ntaḥ kṛ̱ṣṇām̐ a̍ru̱ṣair dhāma̍bhir gāt |
3.031.21c pra sū̱nṛtā̍ di̱śamā̍na ṛ̱tena̱ dura̍ś ca̱ viśvā̍ avṛṇo̱d apa̱ svāḥ ||

ade̍diṣṭa | vṛ̱tra̱-hā | go-pa̍tiḥ | gāḥ | a̱ntariti̍ | kṛ̱ṣṇān | a̱ru̱ṣaiḥ | dhāma̍-bhiḥ | gā̱t |
pra | sū̱nṛtā̍ḥ | di̱śamā̍naḥ | ṛ̱tena̍ | dura̍ḥ | ca̱ | viśvā̍ḥ | a̱vṛ̱ṇo̱t | apa̍ | svāḥ ||3.031.21||

3.031.22a śu̱naṁ hu̍vema ma̱ghavā̍na̱m indra̍m a̱smin bhare̱ nṛta̍ma̱ṁ vāja̍sātau |
3.031.22c śṛ̱ṇvanta̍m u̱gram ū̱taye̍ sa̱matsu̱ ghnanta̍ṁ vṛ̱trāṇi̍ sa̱ṁjita̱ṁ dhanā̍nām ||

śu̱nam | hu̱ve̱ma̱ | ma̱ghavā̍nam | indra̍m | a̱smin | bhare̍ | nṛ-ta̍mam | vāja̍-sātau |
śṛ̱ṇvanta̍m | u̱gram | ū̱taye̍ | sa̱mat-su̍ | ghnanta̍m | vṛ̱trāṇi̍ | sa̱m-jita̍m | dhanā̍nām ||3.031.22||


3.032.01a indra̱ soma̍ṁ somapate̱ pibe̱mam mādhya̍ṁdina̱ṁ sava̍na̱ṁ cāru̱ yat te̍ |
3.032.01c pra̱pruthyā̱ śipre̍ maghavann ṛjīṣin vi̱mucyā̱ harī̍ i̱ha mā̍dayasva ||

indra̍ | soma̍m | so̱ma̱-pa̱te̱ | piba̍ | i̱mam | mādhya̍ndinam | sava̍nam | cāru̍ | yat | te̱ |
pra̱-pruthya̍ | śipre̱ iti̍ | ma̱gha̱-van | ṛ̱jī̱ṣi̱n | vi̱-mucya̍ | harī̱ iti̍ | i̱ha | mā̱da̱ya̱sva̱ ||3.032.01||

3.032.02a gavā̍śiram ma̱nthina̍m indra śu̱kram pibā̱ soma̍ṁ rari̱mā te̱ madā̍ya |
3.032.02c bra̱hma̱kṛtā̱ māru̍tenā ga̱ṇena̍ sa̱joṣā̍ ru̱drais tṛ̱pad ā vṛ̍ṣasva ||

go-ā̍śiram | ma̱nthina̍m | i̱ndra̱ | śu̱kram | piba̍ | soma̍m | ra̱ri̱ma | te̱ | madā̍ya |
bra̱hma̱-kṛtā̍ | māru̍tena | ga̱ṇena̍ | sa̱-joṣā̍ḥ | ru̱draiḥ | tṛ̱pat | ā | vṛ̱ṣa̱sva̱ ||3.032.02||

3.032.03a ye te̱ śuṣma̱ṁ ye tavi̍ṣī̱m ava̍rdha̱nn arca̍nta indra ma̱ruta̍s ta̱ oja̍ḥ |
3.032.03c mādhya̍ṁdine̱ sava̍ne vajrahasta̱ pibā̍ ru̱drebhi̱ḥ saga̍ṇaḥ suśipra ||

ye | te̱ | śuṣma̍m | ye | tavi̍ṣīm | ava̍rdhan | arca̍ntaḥ | i̱ndra̱ | ma̱ruta̍ḥ | te̱ | oja̍ḥ |
mādhya̍ndine | sava̍ne | va̱jra̱-ha̱sta̱ | piba̍ | ru̱drebhi̍ḥ | sa-ga̍ṇaḥ | su̱-śi̱pra̱ ||3.032.03||

3.032.04a ta in nv a̍sya̱ madhu̍mad vivipra̱ indra̍sya̱ śardho̍ ma̱ruto̱ ya āsa̍n |
3.032.04c yebhi̍r vṛ̱trasye̍ṣi̱to vi̱vedā̍ma̱rmaṇo̱ manya̍mānasya̱ marma̍ ||

te | it | nu | a̱sya̱ | madhu̍-mat | vi̱vi̱pre̱ | indra̍sya | śardha̍ḥ | ma̱ruta̍ḥ | ye | āsa̍n |
yebhi̍ḥ | vṛ̱trasya̍ | i̱ṣi̱taḥ | vi̱veda̍ | a̱ma̱rmaṇa̍ḥ | manya̍mānasya | marma̍ ||3.032.04||

3.032.05a ma̱nu̱ṣvad i̍ndra̱ sava̍naṁ juṣā̱ṇaḥ pibā̱ soma̱ṁ śaśva̍te vī̱ryā̍ya |
3.032.05c sa ā va̍vṛtsva haryaśva ya̱jñaiḥ sa̍ra̱ṇyubhi̍r a̱po arṇā̍ sisarṣi ||

ma̱nu̱ṣvat | i̱ndra̱ | sava̍nam | ju̱ṣā̱ṇaḥ | piba̍ | soma̍m | śaśva̍te | vī̱ryā̍ya |
saḥ | ā | va̱vṛ̱tsva̱ | ha̱ri̱-a̱śva̱ | ya̱jñaiḥ | sa̱ra̱ṇyu-bhi̍ḥ | a̱paḥ | arṇā̍ | si̱sa̱rṣi̱ ||3.032.05||

3.032.06a tvam a̱po yad dha̍ vṛ̱traṁ ja̍gha̱nvām̐ atyā̍m̐ iva̱ prāsṛ̍ja̱ḥ sarta̱vājau |
3.032.06c śayā̍nam indra̱ cara̍tā va̱dhena̍ vavri̱vāṁsa̱m pari̍ de̱vīr ade̍vam ||

tvam | a̱paḥ | yat | ha̱ | vṛ̱tram | ja̱gha̱nvān | atyā̍n-iva | pra | asṛ̍jaḥ | sarta̱vai | ā̱jau |
śayā̍nam | i̱ndra̱ | cara̍tā | va̱dhena̍ | va̱vri̱-vāṁsa̍m | pari̍ | de̱vīḥ | ade̍vam ||3.032.06||

3.032.07a yajā̍ma̱ in nama̍sā vṛ̱ddham indra̍m bṛ̱hanta̍m ṛ̱ṣvam a̱jara̱ṁ yuvā̍nam |
3.032.07c yasya̍ pri̱ye ma̱matu̍r ya̱jñiya̍sya̱ na roda̍sī mahi̱māna̍m ma̱māte̍ ||

yajā̍maḥ | it | nama̍sā | vṛ̱ddham | indra̍m | bṛ̱hanta̍m | ṛ̱ṣvam | a̱jara̍m | yuvā̍nam |
yasya̍ | pri̱ye | ma̱matu̍ḥ | ya̱jñiya̍sya | na | roda̍sī̱ iti̍ | ma̱hi̱māna̍m | ma̱māte̱ iti̍ ||3.032.07||

3.032.08a indra̍sya̱ karma̱ sukṛ̍tā pu̱rūṇi̍ vra̱tāni̍ de̱vā na mi̍nanti̱ viśve̍ |
3.032.08c dā̱dhāra̱ yaḥ pṛ̍thi̱vīṁ dyām u̱temāṁ ja̱jāna̱ sūrya̍m u̱ṣasa̍ṁ su̱daṁsā̍ḥ ||

indra̍sya | karma̍ | su-kṛ̍tā | pu̱rūṇi̍ | vra̱tāni̍ | de̱vāḥ | na | mi̱na̱nti̱ | viśve̍ |
dā̱dhāra̍ | yaḥ | pṛ̱thi̱vīm | dyām | u̱ta | i̱mām | ja̱jāna̍ | sūrya̍m | u̱ṣasa̍m | su̱-daṁsā̍ḥ ||3.032.08||

3.032.09a adro̍gha sa̱tyaṁ tava̱ tan ma̍hi̱tvaṁ sa̱dyo yaj jā̱to api̍bo ha̱ soma̍m |
3.032.09c na dyāva̍ indra ta̱vasa̍s ta̱ ojo̱ nāhā̱ na māsā̍ḥ śa̱rado̍ varanta ||

adro̍gha | sa̱tyam | tava̍ | tat | ma̱hi̱-tvam | sa̱dyaḥ | yat | jā̱taḥ | api̍baḥ | ha̱ | soma̍m |
na | dyāva̍ḥ | i̱ndra̱ | ta̱vasa̍ḥ | te̱ | oja̍ḥ | na | ahā̍ | na | māsā̍ḥ | śa̱rada̍ḥ | va̱ra̱nta̱ ||3.032.09||

3.032.10a tvaṁ sa̱dyo a̍pibo jā̱ta i̍ndra̱ madā̍ya̱ soma̍m para̱me vyo̍man |
3.032.10c yad dha̱ dyāvā̍pṛthi̱vī āvi̍veśī̱r athā̍bhavaḥ pū̱rvyaḥ kā̱rudhā̍yāḥ ||

tvam | sa̱dyaḥ | a̱pi̱ba̱ḥ | ja̱taḥ | i̱ndra̱ | madā̍ya | soma̍m | pa̱ra̱me | vi-o̍man |
yat | ha̱ | dyāvā̍pṛthi̱vī iti̍ | ā | avi̍veśīḥ | atha̍ | a̱bha̱va̱ḥ | pū̱rvyaḥ | kā̱ru-dhā̍yāḥ ||3.032.10||

3.032.11a aha̱nn ahi̍m pari̱śayā̍na̱m arṇa̍ ojā̱yamā̍naṁ tuvijāta̱ tavyā̍n |
3.032.11c na te̍ mahi̱tvam anu̍ bhū̱d adha̱ dyaur yad a̱nyayā̍ sphi̱gyā̱3̱̍ kṣām ava̍sthāḥ ||

aha̱n | ahi̍m | pa̱ri̱-śayā̍nam | arṇa̍ḥ | o̱jā̱yamā̍nam | tu̱vi̱-jā̱ta̱ | tavyā̍n |
na | te̱ | ma̱hi̱-tvam | anu̍ | bhū̱t | adha̍ | dyauḥ | yat | a̱nyayā̍ | sphi̱gyā̍ | kṣām | ava̍sthāḥ ||3.032.11||

3.032.12a ya̱jño hi ta̍ indra̱ vardha̍no̱ bhūd u̱ta pri̱yaḥ su̱taso̍mo mi̱yedha̍ḥ |
3.032.12c ya̱jñena̍ ya̱jñam a̍va ya̱jñiya̱ḥ san ya̱jñas te̱ vajra̍m ahi̱hatya̍ āvat ||

ya̱jñaḥ | hi | te̱ | i̱ndra̱ | vardha̍naḥ | bhūt | u̱ta | pri̱yaḥ | su̱ta-so̍maḥ | mi̱yedha̍ḥ |
ya̱jñena̍ | ya̱jñam | a̱va̱ | ya̱jñiya̍ḥ | san | ya̱jñaḥ | te̱ | vajra̍m | a̱hi̱-hatye̍ | ā̱va̱t ||3.032.12||

3.032.13a ya̱jñenendra̱m ava̱sā ca̍kre a̱rvāg aina̍ṁ su̱mnāya̱ navya̍se vavṛtyām |
3.032.13c yaḥ stome̍bhir vāvṛ̱dhe pū̱rvyebhi̱r yo ma̍dhya̱mebhi̍r u̱ta nūta̍nebhiḥ ||

ya̱jñena̍ | indra̍m | ava̍sā | ā | ca̱kre̱ | a̱rvāk | ā | e̱na̱m | su̱mnāya̍ | navya̍se | va̱vṛ̱tyā̱m |
yaḥ | stome̍bhiḥ | va̱vṛ̱dhe | pū̱rvyebhi̍ḥ | yaḥ | ma̱dhya̱mebhi̍ḥ | u̱ta | nūta̍nebhiḥ ||3.032.13||

3.032.14a vi̱veṣa̱ yan mā̍ dhi̱ṣaṇā̍ ja̱jāna̱ stavai̍ pu̱rā pāryā̱d indra̱m ahna̍ḥ |
3.032.14c aṁha̍so̱ yatra̍ pī̱para̱d yathā̍ no nā̱veva̱ yānta̍m u̱bhaye̍ havante ||

vi̱veṣa̍ | yat | mā̱ | dhi̱ṣaṇā̍ | ja̱jāna̍ | stavai̍ | pu̱rā | pāryā̍t | indra̍m | ahna̍ḥ |
aṁha̍saḥ | yatra̍ | pī̱para̍t | yathā̍ | na̱ḥ | nā̱vā-i̍va | yānta̍m | u̱bhaye̍ | ha̱va̱nte̱ ||3.032.14||

3.032.15a āpū̍rṇo asya ka̱laśa̱ḥ svāhā̱ sekte̍va̱ kośa̍ṁ sisice̱ piba̍dhyai |
3.032.15c sam u̍ pri̱yā āva̍vṛtra̱n madā̍ya pradakṣi̱ṇid a̱bhi somā̍sa̱ indra̍m ||

āpū̍rṇaḥ | a̱sya̱ | ka̱laśa̍ḥ | svāhā̍ | sektā̍-iva | kośa̍m | si̱si̱ce̱ | piba̍dhyai |
sam | ū̱m̐ iti̍ | pri̱yāḥ | ā | a̱va̱vṛ̱tra̱m | madā̍ya | pra̱-da̱kṣi̱ṇit | a̱bhi | somā̍saḥ | indra̍m ||3.032.15||

3.032.16a na tvā̍ gabhī̱raḥ pu̍ruhūta̱ sindhu̱r nādra̍ya̱ḥ pari̱ ṣanto̍ varanta |
3.032.16c i̱tthā sakhi̍bhya iṣi̱to yad i̱ndrā dṛ̱ḻhaṁ ci̱d aru̍jo̱ gavya̍m ū̱rvam ||

na | tvā̱ | ga̱bhī̱raḥ | pu̱ru̱-hū̱ta̱ | sindhu̍ḥ | na | adra̍yaḥ | pari̍ | santa̍ḥ | va̱ra̱nta̱ |
i̱tthā | sakhi̍-bhyaḥ | i̱ṣi̱taḥ | yat | i̱ndra̱ | ā | dṛ̱ḻham | ci̱t | aru̍jaḥ | gavya̍m | ū̱rvam ||3.032.16||

3.032.17a śu̱naṁ hu̍vema ma̱ghavā̍na̱m indra̍m a̱smin bhare̱ nṛta̍ma̱ṁ vāja̍sātau |
3.032.17c śṛ̱ṇvanta̍m u̱gram ū̱taye̍ sa̱matsu̱ ghnanta̍ṁ vṛ̱trāṇi̍ sa̱ṁjita̱ṁ dhanā̍nām ||

śu̱nam | hu̱ve̱ma̱ | ma̱ghavā̍nam | indra̍m | a̱smin | bhare̍ | nṛ-ta̍mam | vāja̍-sātau |
śṛ̱ṇvanta̍m | u̱gram | ū̱taye̍ | sa̱mat-su̍ | ghnanta̍m | vṛ̱trāṇi̍ | sa̱m-jita̍m | dhanā̍nām ||3.032.17||


3.033.01a pra parva̍tānām uśa̱tī u̱pasthā̱d aśve̍ iva̱ viṣi̍te̱ hāsa̍māne |
3.033.01c gāve̍va śu̱bhre mā̱tarā̍ rihā̱ṇe vipā̍ṭ chutu̱drī paya̍sā javete ||

pra | parva̍tānām | u̱śa̱tī iti̍ | u̱pa-sthā̍t | aśve̍i̱vetyaśve̍-iva | visi̍te̱ iti̱ vi-si̍te | hāsa̍māne̱ iti̍ |
gāvā̍-iva | śu̱bhre iti̍ | mā̱tarā̍ | ri̱hā̱ṇe iti̍ | vi-pā̍ṭ | śu̱tu̱drī | paya̍sā | ja̱ve̱te̱ iti̍ ||3.033.01||

3.033.02a indre̍ṣite prasa̱vam bhikṣa̍māṇe̱ acchā̍ samu̱draṁ ra̱thye̍va yāthaḥ |
3.033.02c sa̱mā̱rā̱ṇe ū̱rmibhi̱ḥ pinva̍māne a̱nyā vā̍m a̱nyām apy e̍ti śubhre ||

indre̍ṣite̱ itīndra̍-iṣite | pra̱-sa̱vam | bhikṣa̍māṇe̱ iti̍ | accha̍ | sa̱mu̱dram | ra̱thyā̍-iva | yā̱tha̱ḥ |
sa̱mā̱rā̱ṇe iti̍ sa̱m-ā̱rā̱ṇe | ū̱rmi-bhi̍ḥ | pinva̍māne̱ iti̍ | a̱nyā | vā̱m | a̱nyām | api̍ | e̱ti̱ | śu̱bhre̱ iti̍ ||3.033.02||

3.033.03a acchā̱ sindhu̍m mā̱tṛta̍mām ayāsa̱ṁ vipā̍śam u̱rvīṁ su̱bhagā̍m aganma |
3.033.03c va̱tsam i̍va mā̱tarā̍ saṁrihā̱ṇe sa̍mā̱naṁ yoni̱m anu̍ sa̱ṁcara̍ntī ||

accha̍ | sindhu̍m | mā̱tṛ-ta̍mām | a̱yā̱sa̱m | vipā̍śam | u̱rvīm | su̱-bhagā̍m | a̱ga̱nma̱ |
va̱tsam-i̍va | mā̱tarā̍ | sa̱ṁri̱hā̱ṇe iti̍ sa̱m-ri̱hā̱ṇe | sa̱mā̱nam | yoni̍m | anu̍ | sa̱m-cara̍ntī ||3.033.03||

3.033.04a e̱nā va̱yam paya̍sā̱ pinva̍mānā̱ anu̱ yoni̍ṁ de̱vakṛ̍ta̱ṁ cara̍ntīḥ |
3.033.04c na varta̍ve prasa̱vaḥ sarga̍taktaḥ ki̱ṁyur vipro̍ na̱dyo̍ johavīti ||

e̱nā | va̱yam | paya̍sā | pinva̍mānāḥ | anu̍ | yoni̍m | de̱va-kṛ̍tam | cara̍ntīḥ |
na | varta̍ve | pra̱-sa̱vaḥ | sarga̍-taktaḥ | ki̱m-yuḥ | vipra̍ḥ | na̱dya̍ḥ | jo̱ha̱vī̱ti̱ ||3.033.04||

3.033.05a rama̍dhvam me̱ vaca̍se so̱myāya̱ ṛtā̍varī̱r upa̍ muhū̱rtam evai̍ḥ |
3.033.05c pra sindhu̱m acchā̍ bṛha̱tī ma̍nī̱ṣāva̱syur a̍hve kuśi̱kasya̍ sū̱nuḥ ||

rama̍dhvam | me̱ | vaca̍se | so̱myāya̍ | ṛta̍-varīḥ | upa̍ | mu̱hū̱rtam | evai̍ḥ |
pra | sindhu̍m | accha̍ | bṛ̱ha̱tī | ma̱nī̱ṣā | a̱va̱syuḥ | a̱hne̱ | ku̱śi̱kasya̍ | sū̱nuḥ ||3.033.05||

3.033.06a indro̍ a̱smām̐ a̍rada̱d vajra̍bāhu̱r apā̍han vṛ̱tram pa̍ri̱dhiṁ na̱dīnā̍m |
3.033.06c de̱vo̍ 'nayat savi̱tā su̍pā̱ṇis tasya̍ va̱yam pra̍sa̱ve yā̍ma u̱rvīḥ ||

indra̍ḥ | a̱smān | a̱ra̱da̱t | vajra̍-bāhuḥ | apa̍ | a̱ha̱n | vṛ̱tram | pa̱ri̱-dhim | na̱dīnā̍m |
de̱va̍ḥ | a̱na̱ya̱t | sa̱vi̱tā | su̱-pā̱ṇiḥ | tasya̍ | va̱yam | pra̱-sa̱ve | yā̱ma̱ḥ | u̱rvīḥ ||3.033.06||

3.033.07a pra̱vācya̍ṁ śaśva̱dhā vī̱rya1̱̍ṁ tad indra̍sya̱ karma̱ yad ahi̍ṁ vivṛ̱ścat |
3.033.07c vi vajre̍ṇa pari̱ṣado̍ jaghā̱nāya̱nn āpo 'ya̍nam i̱cchamā̍nāḥ ||

pra̱-vācya̍m | śa̱śva̱dhā | vī̱rya̍m | tat | indra̍sya | karma̍ | yat | ahi̍m | vi̱-vṛ̱ścat |
vi | vajre̍ṇa | pa̱ri̱-ṣada̍ḥ | ja̱ghā̱na̱ | āya̍n | āpa̍ḥ | aya̍nam | i̱cchamā̍nāḥ ||3.033.07||

3.033.08a e̱tad vaco̍ jarita̱r māpi̍ mṛṣṭhā̱ ā yat te̱ ghoṣā̱n utta̍rā yu̱gāni̍ |
3.033.08c u̱ktheṣu̍ kāro̱ prati̍ no juṣasva̱ mā no̱ ni ka̍ḥ puruṣa̱trā nama̍s te ||

e̱tat | vaca̍ḥ | ja̱ri̱ta̱ḥ | mā | api̍ | mṛ̱ṣṭhā̱ḥ | ā | yat | te̱ | ghoṣā̍n | ut-ta̍rā | yu̱gāni̍ |
u̱ktheṣu̍ | kā̱ro̱ iti̍ | prati̍ | na̱ḥ | ju̱ṣa̱sva̱ | mā | na̱ḥ | ni | ka̱riti̍ kaḥ | pu̱ru̱ṣa̱-trā | nama̍ḥ | te̱ ||3.033.08||

3.033.09a o ṣu sva̍sāraḥ kā̱rave̍ śṛṇota ya̱yau vo̍ dū̱rād ana̍sā̱ rathe̍na |
3.033.09c ni ṣū na̍madhva̱m bhava̍tā supā̱rā a̍dhoa̱kṣāḥ si̍ndhavaḥ sro̱tyābhi̍ḥ ||

o iti̍ | su | sva̱sā̱ra̱ḥ | kā̱rave̍ | śṛ̱ṇo̱ta̱ | ya̱yau | va̱ḥ | dū̱rāt | ana̍sā | rathe̍na |
ni | su | na̱ma̱dhva̱m | bhava̍ta | su̱-pā̱rāḥ | a̱dha̱ḥ-a̱kṣāḥ | si̱ndha̱va̱ḥ | sro̱tyābhi̍ḥ ||3.033.09||

3.033.10a ā te̍ kāro śṛṇavāmā̱ vacā̍ṁsi ya̱yātha̍ dū̱rād ana̍sā̱ rathe̍na |
3.033.10c ni te̍ naṁsai pīpyā̱neva̱ yoṣā̱ maryā̍yeva ka̱nyā̍ śaśva̱cai te̍ ||

ā | te̱ | kā̱ro̱ iti̍ | śṛ̱ṇa̱vā̱ma̱ | vacā̍ṁsi | ya̱yātha̍ | dū̱rāt | ana̍sā | rathe̍na |
ni | te̱ | na̱ṁsai̱ | pī̱pyā̱nā-i̍va | yoṣā̍ | maryā̍ya-iva | ka̱nyā̍ | śa̱śva̱cai | ta̱ iti̍ te ||3.033.10||

3.033.11a yad a̱ṅga tvā̍ bhara̱tāḥ sa̱ṁtare̍yur ga̱vyan grāma̍ iṣi̱ta indra̍jūtaḥ |
3.033.11c arṣā̱d aha̍ prasa̱vaḥ sarga̍takta̱ ā vo̍ vṛṇe suma̱tiṁ ya̱jñiyā̍nām ||

yat | a̱ṅga | tvā̱ | bha̱ra̱tāḥ | sa̱m-tare̍yuḥ | ga̱vyan | grāma̍ḥ | i̱ṣi̱taḥ | indra̍-jūtaḥ |
arṣā̍t | aha̍ | pra̱-sa̱vaḥ | sarga̍-taktaḥ | ā | va̱ḥ | vṛ̱ṇe̱ | su̱-ma̱tim | ya̱jñiyā̍nām ||3.033.11||

3.033.12a atā̍riṣur bhara̱tā ga̱vyava̱ḥ sam abha̍kta̱ vipra̍ḥ suma̱tiṁ na̱dīnā̍m |
3.033.12c pra pi̍nvadhvam i̱ṣaya̍ntīḥ su̱rādhā̱ ā va̱kṣaṇā̍ḥ pṛ̱ṇadhva̍ṁ yā̱ta śībha̍m ||

atā̍riṣuḥ | bha̱ra̱tāḥ | ga̱vyava̍ḥ | sam | abha̍kta | vipra̍ḥ | su̱-ma̱tim | na̱dīnā̍m |
pra | pi̱nva̱dhva̱m | i̱ṣaya̍ntīḥ | su̱-rādhā̍ | ā | va̱kṣaṇā̍ḥ | pṛ̱ṇadhva̍m | yā̱ta | śībha̍m ||3.033.12||

3.033.13a ud va̍ ū̱rmiḥ śamyā̍ ha̱ntv āpo̱ yoktrā̍ṇi muñcata |
3.033.13c mādu̍ṣkṛtau̱ vye̍nasā̱ghnyau śūna̱m āra̍tām ||

ut | va̱ḥ | ū̱rmiḥ | śamyā̍ḥ | ha̱ntu̱ | āpa̍ḥ | yoktrā̍ṇi | mu̱ñca̱ta̱ |
mā | adu̍ḥ-kṛtau | vi-e̍nasā | a̱ghnyau | śūna̍m | ā | a̱ra̱tā̱m ||3.033.13||


3.034.01a indra̍ḥ pū̱rbhid āti̍ra̱d dāsa̍m a̱rkair vi̱dadva̍su̱r daya̍māno̱ vi śatrū̍n |
3.034.01c brahma̍jūtas ta̱nvā̍ vāvṛdhā̱no bhūri̍dātra̱ āpṛ̍ṇa̱d roda̍sī u̱bhe ||

indra̍ḥ | pū̱ḥ-bhit | ā | a̱ti̱ra̱t | dāsa̍m | a̱rkaiḥ | vi̱dat-va̍suḥ | daya̍mānaḥ | vi | śatrū̍n |
brahma̍-jūtaḥ | ta̱nvā̍ | va̱vṛ̱dhā̱naḥ | bhūri̍-dātraḥ | ā | a̱pṛ̱ṇa̱t | roda̍sī̱ iti̍ | u̱bhe iti̍ ||3.034.01||

3.034.02a ma̱khasya̍ te tavi̱ṣasya̱ pra jū̱tim iya̍rmi̱ vāca̍m a̱mṛtā̍ya̱ bhūṣa̍n |
3.034.02c indra̍ kṣitī̱nām a̍si̱ mānu̍ṣīṇāṁ vi̱śāṁ daivī̍nām u̱ta pū̍rva̱yāvā̍ ||

ma̱khasya̍ | te̱ | ta̱vi̱ṣasya̍ | pra | jū̱tim | iya̍rmi | vāca̍m | a̱mṛtā̍ya | bhūṣa̍n |
indra̍ | kṣi̱tī̱nām | a̱si̱ | mānu̍ṣīṇām | vi̱śām | daivī̍nām | u̱ta | pū̱rva̱-yāvā̍ ||3.034.02||

3.034.03a indro̍ vṛ̱tram a̍vṛṇo̱c chardha̍nīti̱ḥ pra mā̱yinā̍m aminā̱d varpa̍ṇītiḥ |
3.034.03c aha̱n vya̍ṁsam u̱śadha̱g vane̍ṣv ā̱vir dhenā̍ akṛṇod rā̱myāṇā̍m ||

indra̍ḥ | vṛ̱tram | a̱vṛ̱ṇo̱t | śardha̍-nītiḥ | pra | mā̱yinā̍m | a̱mi̱nā̱t | varpa̍-nītiḥ |
aha̱n | vi-a̍ṁsam | u̱śadha̍k | vane̍ṣu | ā̱viḥ | dhenā̍ḥ | a̱kṛ̱ṇo̱t | rā̱myāṇā̍m ||3.034.03||

3.034.04a indra̍ḥ sva̱rṣā ja̱naya̱nn ahā̍ni ji̱gāyo̱śigbhi̱ḥ pṛta̍nā abhi̱ṣṭiḥ |
3.034.04c prāro̍caya̱n mana̍ve ke̱tum ahnā̱m avi̍nda̱j jyoti̍r bṛha̱te raṇā̍ya ||

indra̍ḥ | sva̱ḥ-sāḥ | ja̱naya̍n | ahā̍ni | ji̱gāya̍ | u̱śik-bhi̍ḥ | pṛta̍nāḥ | a̱bhi̱ṣṭiḥ |
pra | a̱ro̱ca̱ya̱t | mana̍ve | ke̱tum | ahnā̍m | avi̍ndat | jyoti̍ḥ | bṛ̱ha̱te | raṇā̍ya ||3.034.04||

3.034.05a indra̱s tujo̍ ba̱rhaṇā̱ ā vi̍veśa nṛ̱vad dadhā̍no̱ naryā̍ pu̱rūṇi̍ |
3.034.05c ace̍taya̱d dhiya̍ i̱mā ja̍ri̱tre premaṁ varṇa̍m atirac chu̱kram ā̍sām ||

indra̍ḥ | tuja̍ḥ | ba̱rhaṇā̍ḥ | ā | vi̱ve̱śa̱ | nṛ̱-vat | dadhā̍naḥ | naryā̍ | pu̱rūṇi̍ |
ace̍tayat | dhiya̍ḥ | i̱māḥ | ja̱ri̱tre | pra | i̱mam | varṇa̍m | a̱ti̱ra̱t | śu̱kram | ā̱sā̱m ||3.034.05||

3.034.06a ma̱ho ma̱hāni̍ panayanty a̱syendra̍sya̱ karma̱ sukṛ̍tā pu̱rūṇi̍ |
3.034.06c vṛ̱jane̍na vṛji̱nān sam pi̍peṣa mā̱yābhi̱r dasyū̍m̐r a̱bhibhū̍tyojāḥ ||

ma̱haḥ | ma̱hāni̍ | pa̱na̱ya̱nti̱ | a̱sya̱ | indra̍sya | karma̍ | su-kṛ̍tā | pu̱rūṇi̍ |
vṛ̱jane̍na | vṛ̱ji̱nān | sam | pi̱pe̱ṣa̱ | mā̱yābhi̍ḥ | dasyū̍m̐n | a̱bhibhū̍ti-ojāḥ ||3.034.06||

3.034.07a yu̱dhendro̍ ma̱hnā vari̍vaś cakāra de̱vebhya̱ḥ satpa̍tiś carṣaṇi̱prāḥ |
3.034.07c vi̱vasva̍ta̱ḥ sada̍ne asya̱ tāni̱ viprā̍ u̱kthebhi̍ḥ ka̱vayo̍ gṛṇanti ||

yu̱dhā | indra̍ḥ | ma̱hnā | vari̍vaḥ | ca̱kā̱ra̱ | de̱vebhya̍ḥ | sat-pa̍tiḥ | ca̱rṣa̱ṇi̱-prāḥ |
vi̱vasva̍taḥ | sada̍ne | a̱sya̱ | tāni̍ | viprā̍ḥ | u̱kthebhi̍ḥ | ka̱vaya̍ḥ | gṛ̱ṇa̱nti̱ ||3.034.07||

3.034.08a sa̱trā̱sāha̱ṁ vare̍ṇyaṁ saho̱dāṁ sa̍sa̱vāṁsa̱ṁ sva̍r a̱paś ca̍ de̱vīḥ |
3.034.08c sa̱sāna̱ yaḥ pṛ̍thi̱vīṁ dyām u̱temām indra̍m mada̱nty anu̱ dhīra̍ṇāsaḥ ||

sa̱trā̱-saham | vare̍ṇyam | sa̱ha̱ḥ-dām | sa̱sa̱vāṁsa̍m | sva̍ḥ | a̱paḥ | ca̱ | de̱vīḥ |
sa̱sāna̍ | yaḥ | pṛ̱thi̱vīm | dyām | u̱ta | i̱mām | indra̍m | ma̱da̱nti̱ | anu̍ | dhī-ra̍ṇāsaḥ ||3.034.08||

3.034.09a sa̱sānātyā̍m̐ u̱ta sūrya̍ṁ sasā̱nendra̍ḥ sasāna puru̱bhoja̍sa̱ṁ gām |
3.034.09c hi̱ra̱ṇyaya̍m u̱ta bhoga̍ṁ sasāna ha̱tvī dasyū̱n prārya̱ṁ varṇa̍m āvat ||

sa̱sāna̍ | atyā̍n | u̱ta | sūrya̍m | sa̱sā̱na̱ | indra̍ḥ | sa̱sā̱na̱ | pu̱ru̱-bhoja̍sam | gām |
hi̱ra̱ṇyaya̍m | u̱ta | bhoga̍m | sa̱sā̱na̱ | ha̱tvī | dasyū̍n | pra | aya̍m | varṇa̍m | ā̱va̱t ||3.034.09||

3.034.10a indra̱ oṣa̍dhīr asano̱d ahā̍ni̱ vana̱spatī̍m̐r asanod a̱ntari̍kṣam |
3.034.10c bi̱bheda̍ va̱laṁ nu̍nu̱de vivā̱co 'thā̍bhavad dami̱tābhikra̍tūnām ||

indra̍ḥ | oṣa̍dhīḥ | a̱sa̱no̱t | ahā̍ni | va̱na̱spatī̍n | a̱sa̱no̱t | a̱ntari̍kṣam |
bi̱bheda̍ | va̱lam | nu̱nu̱de | vi-vā̍caḥ | atha̍ | a̱bha̱va̱t | da̱mi̱tā | a̱bhi-kra̍tūnām ||3.034.10||

3.034.11a śu̱naṁ hu̍vema ma̱ghavā̍na̱m indra̍m a̱smin bhare̱ nṛta̍ma̱ṁ vāja̍sātau |
3.034.11c śṛ̱ṇvanta̍m u̱gram ū̱taye̍ sa̱matsu̱ ghnanta̍ṁ vṛ̱trāṇi̍ sa̱ṁjita̱ṁ dhanā̍nām ||

śu̱nam | hu̱ve̱ma̱ | ma̱ghavā̍nam | indra̍m | a̱smin | bhare̍ | nṛ-ta̍mam | vāja̍-sātau |
śṛ̱ṇvanta̍m | u̱gram | ū̱taye̍ | sa̱mat-su̍ | ghnanta̍m | vṛ̱trāṇi̍ | sa̱m-jita̍m | dhanā̍nām ||3.034.11||


3.035.01a tiṣṭhā̱ harī̱ ratha̱ ā yu̱jyamā̍nā yā̱hi vā̱yur na ni̱yuto̍ no̱ accha̍ |
3.035.01c pibā̱sy andho̍ a̱bhisṛ̍ṣṭo a̱sme indra̱ svāhā̍ rari̱mā te̱ madā̍ya ||

tiṣṭha̍ | harī̱ iti̍ | rathe̍ | ā | yu̱jyamā̍nā | yā̱hi | vā̱yuḥ | na | ni̱-yuta̍ḥ | na̱ḥ | accha̍ |
pibā̍si | andha̍ḥ | a̱bhi-sṛ̍ṣṭaḥ | a̱sme iti̍ | indra̍ | svāhā̍ | ra̱ri̱ma | te̱ | madā̍ya ||3.035.01||

3.035.02a upā̍ji̱rā pu̍ruhū̱tāya̱ saptī̱ harī̱ ratha̍sya dhū̱rṣv ā yu̍najmi |
3.035.02c dra̱vad yathā̱ sambhṛ̍taṁ vi̱śvata̍ś ci̱d upe̱maṁ ya̱jñam ā va̍hāta̱ indra̍m ||

upa̍ | a̱ji̱rā | pu̱ru̱-hū̱tāya̍ | saptī̱ iti̍ | harī̱ iti̍ | ratha̍sya | dhū̱ḥ-su | ā | yu̱na̱jmi̱ |
dra̱vat | yathā̍ | sam-bhṛ̍tam | vi̱śvata̍ḥ | ci̱t | upa̍ | i̱mam | ya̱jñam | ā | va̱hā̱ta̱ḥ | indra̍m ||3.035.02||

3.035.03a upo̍ nayasva̱ vṛṣa̍ṇā tapu̱ṣpotem a̍va̱ tvaṁ vṛ̍ṣabha svadhāvaḥ |
3.035.03c grase̍tā̱m aśvā̱ vi mu̍ce̱ha śoṇā̍ di̱ve-di̍ve sa̱dṛśī̍r addhi dhā̱nāḥ ||

upo̱ iti̍ | na̱ya̱sva̱ | vṛṣa̍ṇā | ta̱pu̱ḥ-pā | u̱ta | ī̱m | a̱va̱ | tvam | vṛ̱ṣa̱bha̱ | sva̱dhā̱-va̱ḥ |
grase̍tām | aśvā̍ | vi | mu̱ca̱ | i̱ha | śoṇā̍ | di̱ve-di̍ve | sa̱-dṛśī̍ḥ | a̱ddhi̱ | dhā̱nāḥ ||3.035.03||

3.035.04a brahma̍ṇā te brahma̱yujā̍ yunajmi̱ harī̱ sakhā̍yā sadha̱māda̍ ā̱śū |
3.035.04c sthi̱raṁ ratha̍ṁ su̱kham i̍ndrādhi̱tiṣṭha̍n prajā̱nan vi̱dvām̐ upa̍ yāhi̱ soma̍m ||

brahma̍ṇā | te̱ | bra̱hma̱-yujā̍ | yu̱na̱jmi̱ | harī̱ iti̍ | sakhā̍yā | sa̱dha̱-māde̍ | ā̱śū iti̍ |
sthi̱ram | ratha̍m | su̱kham | i̱ndra̱ | a̱dhi̱-tiṣṭha̍n | pra̱-jā̱nan | vi̱dvām | upa̍ | yā̱hi̱ | soma̍m ||3.035.04||

3.035.05a mā te̱ harī̱ vṛṣa̍ṇā vī̱tapṛ̍ṣṭhā̱ ni rī̍rama̱n yaja̍mānāso a̱nye |
3.035.05c a̱tyāyā̍hi̱ śaśva̍to va̱yaṁ te 'ra̍ṁ su̱tebhi̍ḥ kṛṇavāma̱ somai̍ḥ ||

mā | te̱ | harī̱ iti̍ | vṛṣa̍ṇā | vī̱ta-pṛ̍ṣṭhā | ni | rī̱ra̱ma̱n | yaja̍mānāsaḥ | a̱nye |
a̱ti̱-āyā̍hi | śaśva̍taḥ | va̱yam | te | ara̍m | su̱tebhi̍ḥ | kṛ̱ṇa̱vā̱ma̱ | somai̍ḥ ||3.035.05||

3.035.06a tavā̱yaṁ soma̱s tvam ehy a̱rvāṅ cha̍śvatta̱maṁ su̱manā̍ a̱sya pā̍hi |
3.035.06c a̱smin ya̱jñe ba̱rhiṣy ā ni̱ṣadyā̍ dadhi̱ṣvemaṁ ja̱ṭhara̱ indu̍m indra ||

tava̍ | a̱yam | soma̍ḥ | tvam | ā | i̱hi̱ | a̱rvāṅ | śa̱śva̱t-ta̱mam | su̱-manā̍ḥ | a̱sya | pā̱hi̱ |
a̱smin | ya̱jñe | ba̱rhiṣi | ā | ni̱-sadya̍ | da̱dhi̱ṣva | i̱mam | ja̱ṭhare̍ | indu̍m | i̱ndra̱ ||3.035.06||

3.035.07a stī̱rṇaṁ te̍ ba̱rhiḥ su̱ta i̍ndra̱ soma̍ḥ kṛ̱tā dhā̱nā atta̍ve te̱ hari̍bhyām |
3.035.07c tado̍kase puru̱śākā̍ya̱ vṛṣṇe̍ ma̱rutva̍te̱ tubhya̍ṁ rā̱tā ha̱vīṁṣi̍ ||

stī̱rṇam | te̱ | ba̱rhiḥ | su̱taḥ | i̱ndra̱ | soma̍ḥ | kṛ̱tāḥ | dhā̱nāḥ | atta̍ve | te̱ | hari̍-bhyām |
tat-o̍kase | pu̱ru̱-śākā̍ya | vṛṣṇe̍ | ma̱rutva̍te | tubhya̍m | rā̱tā | ha̱vīṁṣi̍ ||3.035.07||

3.035.08a i̱maṁ nara̱ḥ parva̍tā̱s tubhya̱m āpa̱ḥ sam i̍ndra̱ gobhi̱r madhu̍mantam akran |
3.035.08c tasyā̱gatyā̍ su̱manā̍ ṛṣva pāhi prajā̱nan vi̱dvān pa̱thyā̱3̱̍ anu̱ svāḥ ||

i̱mam | nara̍ḥ | parva̍tāḥ | tubhya̍m | āpa̍ḥ | sam | i̱ndra̱ | gobhi̍ḥ | madhu̍-mantam | a̱kra̱n |
tasya̍ | ā̱-gatya̍ | su̱-manā̍ḥ | ṛ̱ṣva̱ | pā̱hi̱ | pra̱-jā̱nan | vi̱dvān | pa̱thyā̍ḥ | anu̍ | svāḥ ||3.035.08||

3.035.09a yām̐ ābha̍jo ma̱ruta̍ indra̱ some̱ ye tvām ava̍rdha̱nn abha̍van ga̱ṇas te̍ |
3.035.09c tebhi̍r e̱taṁ sa̱joṣā̍ vāvaśā̱no̱3̱̍ 'gneḥ pi̍ba ji̱hvayā̱ soma̍m indra ||

yān | ā | abha̍jaḥ | ma̱ruta̍ḥ | i̱ndra̱ | some̍ | ye | tvām | ava̍rdhan | abha̍van | ga̱ṇaḥ | te̱ |
tebhi̍ḥ | e̱tam | sa̱-joṣā̍ḥ | vā̱va̱śā̱naḥ | a̱gneḥ | pi̱ba̱ | ji̱hvayā̍ | soma̍m | i̱ndra̱ ||3.035.09||

3.035.10a indra̱ piba̍ sva̱dhayā̍ cit su̱tasyā̱gner vā̍ pāhi ji̱hvayā̍ yajatra |
3.035.10c a̱dhva̱ryor vā̱ praya̍taṁ śakra̱ hastā̱d dhotu̍r vā ya̱jñaṁ ha̱viṣo̍ juṣasva ||

indra̍ | piba̍ | sva̱dhayā̍ | ci̱t | su̱tasya̍ | a̱gneḥ | vā̱ | pā̱hi̱ | ji̱hvayā̍ | ya̱ja̱tra̱ |
a̱dhva̱ryoḥ | vā̱ | pra-ya̍tam | śa̱kra̱ | hastā̍t | hotu̍ḥ | vā̱ | ya̱jñam | ha̱viṣa̍ḥ | ju̱ṣa̱sva̱ ||3.035.10||

3.035.11a śu̱naṁ hu̍vema ma̱ghavā̍na̱m indra̍m a̱smin bhare̱ nṛta̍ma̱ṁ vāja̍sātau |
3.035.11c śṛ̱ṇvanta̍m u̱gram ū̱taye̍ sa̱matsu̱ ghnanta̍ṁ vṛ̱trāṇi̍ sa̱ṁjita̱ṁ dhanā̍nām ||

śu̱nam | hu̱ve̱ma̱ | ma̱ghavā̍nam | indra̍m | a̱smin | bhare̍ | nṛ-ta̍mam | vāja̍-sātau |
śṛ̱ṇvanta̍m | u̱gram | ū̱taye̍ | sa̱mat-su̍ | ghnanta̍m | vṛ̱trāṇi̍ | sa̱m-jita̍m | dhanā̍nām ||3.035.11||


3.036.01a i̱mām ū̱ ṣu prabhṛ̍tiṁ sā̱taye̍ dhā̱ḥ śaśva̍c-chaśvad ū̱tibhi̱r yāda̍mānaḥ |
3.036.01c su̱te-su̍te vāvṛdhe̱ vardha̍nebhi̱r yaḥ karma̍bhir ma̱hadbhi̱ḥ suśru̍to̱ bhūt ||

imām | ū̱m̐ iti̍ | su | pra-bhṛ̍tim | sā̱taye̍ | dhā̱ḥ | śaśva̍t-śaśvat | ū̱ti-bhi̍ḥ | yāda̍mānaḥ |
su̱te-su̍te | va̱vṛ̱dhe̱ | vardha̍nebhiḥ | yaḥ | karma̍-bhiḥ | ma̱hat-bhi̍ḥ | su-śru̍taḥ | bhūt ||3.036.01||

3.036.02a indrā̍ya̱ somā̍ḥ pra̱divo̱ vidā̍nā ṛ̱bhur yebhi̱r vṛṣa̍parvā̱ vihā̍yāḥ |
3.036.02c pra̱ya̱myamā̍nā̱n prati̱ ṣū gṛ̍bhā̱yendra̱ piba̱ vṛṣa̍dhūtasya̱ vṛṣṇa̍ḥ ||

indrā̍ya | somā̍ḥ | pra̱-diva̍ḥ | vidā̍nāḥ | ṛ̱bhuḥ | yebhi̍ḥ | vṛṣa̍-parvā | vi-hā̍yāḥ |
pra̱-ya̱myamā̍nān | prati̍ | su | gṛ̱bhā̱ya̱ | indra̍ | piba̍ | vṛṣa̍-dhūtasya | vṛṣṇa̍ḥ ||3.036.02||

3.036.03a pibā̱ vardha̍sva̱ tava̍ ghā su̱tāsa̱ indra̱ somā̍saḥ pratha̱mā u̱teme |
3.036.03c yathāpi̍baḥ pū̱rvyām̐ i̍ndra̱ somā̍m̐ e̱vā pā̍hi̱ panyo̍ a̱dyā navī̍yān ||

piba̍ | vardha̍sva | tava̍ | gha̱ | su̱tāsa̍ḥ | indra̍ | somā̍saḥ | pra̱tha̱māḥ | u̱ta | i̱me |
yathā̍ | api̍baḥ | pū̱rvyān | i̱ndra̱ | somā̍n | e̱va | pā̱hi̱ | panya̍ḥ | a̱dya | navī̍yān ||3.036.03||

3.036.04a ma̱hām̐ ama̍tro vṛ̱jane̍ vira̱pśy u1̱̍graṁ śava̍ḥ patyate dhṛ̱ṣṇv oja̍ḥ |
3.036.04c nāha̍ vivyāca pṛthi̱vī ca̱naina̱ṁ yat somā̍so̱ harya̍śva̱m ama̍ndan ||

ma̱hān | ama̍traḥ | vṛ̱jane̍ | vi̱-ra̱pśī | u̱gram | śava̍ḥ | pa̱tya̱te̱ | dhṛ̱ṣṇu | oja̍ḥ |
na | aha̍ | vi̱vyā̱ca̱ | pṛ̱thi̱vī | ca̱na | ena̍m | yat | somā̍saḥ | hari̍-aśvam | ama̍ndan ||3.036.04||

3.036.05a ma̱hām̐ u̱gro vā̍vṛdhe vī̱ryā̍ya sa̱māca̍kre vṛṣa̱bhaḥ kāvye̍na |
3.036.05c indro̱ bhago̍ vāja̱dā a̍sya̱ gāva̱ḥ pra jā̍yante̱ dakṣi̍ṇā asya pū̱rvīḥ ||

ma̱hān | u̱graḥ | va̱vṛ̱dhe̱ | vī̱ryā̍ya | sa̱m-āca̍kre | vṛ̱ṣa̱bhaḥ | kāvye̍na |
indra̍ḥ | bhaga̍ḥ | vā̱ja̱-dāḥ | a̱sya̱ | gāva̍ḥ | pra | ja̱ya̱nte̱ | dakṣi̍ṇāḥ | a̱sya̱ | pū̱rvīḥ ||3.036.05||

3.036.06a pra yat sindha̍vaḥ prasa̱vaṁ yathāya̱nn āpa̍ḥ samu̱draṁ ra̱thye̍va jagmuḥ |
3.036.06c ata̍ś ci̱d indra̱ḥ sada̍so̱ varī̍yā̱n yad ī̱ṁ soma̍ḥ pṛ̱ṇati̍ du̱gdho a̱ṁśuḥ ||

pra | yat | sindha̍vaḥ | pra̱-sa̱vam | yathā̍ | āya̍n | āpa̍ḥ | sa̱mu̱dram | ra̱thyā̍-iva | ja̱gmu̱ḥ |
ata̍ḥ | ci̱t | indra̍ḥ | sada̍saḥ | varī̍yān | yat | ī̱m | soma̍ḥ | pṛ̱ṇati̍ | du̱gdhaḥ | a̱ṁśuḥ ||3.036.06||

3.036.07a sa̱mu̱dreṇa̱ sindha̍vo̱ yāda̍mānā̱ indrā̍ya̱ soma̱ṁ suṣu̍ta̱m bhara̍ntaḥ |
3.036.07c a̱ṁśuṁ du̍hanti ha̱stino̍ bha̱ritrai̱r madhva̍ḥ punanti̱ dhāra̍yā pa̱vitrai̍ḥ ||

sa̱mu̱dreṇa̍ | sindha̍vaḥ | yāda̍mānāḥ | indrā̍ya | soma̍m | suṣu̍tam | bhara̍ntaḥ |
a̱ṁśum | du̱ha̱nti̱ | ha̱stina̍ḥ | bha̱ritrai̍ḥ | madhva̍ḥ | pu̱na̱nti̱ | dhāra̍yā | pa̱vitrai̍ḥ ||3.036.07||

3.036.08a hra̱dā i̍va ku̱kṣaya̍ḥ soma̱dhānā̱ḥ sam ī̍ vivyāca̱ sava̍nā pu̱rūṇi̍ |
3.036.08c annā̱ yad indra̍ḥ pratha̱mā vy āśa̍ vṛ̱traṁ ja̍gha̱nvām̐ a̍vṛṇīta̱ soma̍m ||

hra̱dāḥ-i̍va | ku̱kṣaya̍ḥ | so̱ma̱-dhānā̍ḥ | sam | ī̱m iti̍ | vi̱vyā̱ca̱ | sava̍nā | pu̱rūṇi̍ |
annā̍ | yat | indra̍ḥ | pra̱tha̱mā | vi | āśa̍ | vṛ̱tram | ja̱gha̱nvān | a̱vṛ̱ṇī̱ta̱ | soma̍m ||3.036.08||

3.036.09a ā tū bha̍ra̱ māki̍r e̱tat pari̍ ṣṭhād vi̱dmā hi tvā̱ vasu̍pati̱ṁ vasū̍nām |
3.036.09c indra̱ yat te̱ māhi̍na̱ṁ datra̱m asty a̱smabhya̱ṁ tad dha̍ryaśva̱ pra ya̍ndhi ||

ā | tu | bha̱ra̱ | māki̍ḥ | e̱tat | pari̍ | sthā̱t | vi̱dma | hi | tvā̱ | vasu̍-patim | vasū̍nām |
indra̍ | yat | te̱ | māhi̍nam | datra̍m | asti̍ | a̱smabhya̍m | tat | ha̱ri̱-a̱śva̱ | pra | ya̱ndhi̱ ||3.036.09||

3.036.10a a̱sme pra ya̍ndhi maghavann ṛjīṣi̱nn indra̍ rā̱yo vi̱śvavā̍rasya̱ bhūre̍ḥ |
3.036.10c a̱sme śa̱taṁ śa̱rado̍ jī̱vase̍ dhā a̱sme vī̱rāñ chaśva̍ta indra śiprin ||

a̱sme iti̍ | pra | ya̱ndhi̱ | ma̱gha̱-va̱n | ṛ̱jī̱ṣi̱n | indra̍ | rā̱yaḥ | vi̱śva-vā̍rasya | bhūre̍ḥ |
a̱sme iti̍ | śa̱tam | śa̱rada̍ḥ | jī̱vase̍ | dhā̱ḥ | a̱sme iti̍ | vī̱rān | śaśva̍taḥ | i̱ndra̱ | śi̱pri̱n ||3.036.10||

3.036.11a śu̱naṁ hu̍vema ma̱ghavā̍na̱m indra̍m a̱smin bhare̱ nṛta̍ma̱ṁ vāja̍sātau |
3.036.11c śṛ̱ṇvanta̍m u̱gram ū̱taye̍ sa̱matsu̱ ghnanta̍ṁ vṛ̱trāṇi̍ sa̱ṁjita̱ṁ dhanā̍nām ||

śu̱nam | hu̱ve̱ma̱ | ma̱ghavā̍nam | indra̍m | a̱smin | bhare̍ | nṛ-ta̍mam | vāja̍-sātau |
śṛ̱ṇvanta̍m | u̱gram | ū̱taye̍ | sa̱mat-su̍ | ghnanta̍m | vṛ̱trāṇi̍ | sa̱m-jita̍m | dhanā̍nām ||3.036.11||


3.037.01a vārtra̍hatyāya̱ śava̍se pṛtanā̱ṣāhyā̍ya ca |
3.037.01c indra̱ tvā va̍rtayāmasi ||

vārtra̍-hatyāya | śava̍se | pṛ̱ta̱nā̱-sahyā̍ya | ca̱ |
indra̍ | tvā̱ | ā | va̱rta̱yā̱ma̱si̱ ||3.037.01||

3.037.02a a̱rvā̱cīna̱ṁ su te̱ mana̍ u̱ta cakṣu̍ḥ śatakrato |
3.037.02c indra̍ kṛ̱ṇvantu̍ vā̱ghata̍ḥ ||

a̱rvā̱cīna̍m | su | te̱ | mana̍ḥ | u̱ta | cakṣu̍ḥ | śa̱ta̱kra̱to̱ iti̍ śata-krato |
indra̍ | kṛ̱ṇvantu̍ | vā̱ghata̍ḥ ||3.037.02||

3.037.03a nāmā̍ni te śatakrato̱ viśvā̍bhir gī̱rbhir ī̍mahe |
3.037.03c indrā̍bhimāti̱ṣāhye̍ ||

nāmā̍ni | te̱ | śa̱ta̱kra̱to̱ iti̍ śata-krato | viśvā̍bhiḥ | gī̱ḥ-bhiḥ | ī̱ma̱he̱ |
indra̍ | a̱bhi̱mā̱ti̱-sahye̍ ||3.037.03||

3.037.04a pu̱ru̱ṣṭu̱tasya̱ dhāma̍bhiḥ śa̱tena̍ mahayāmasi |
3.037.04c indra̍sya carṣaṇī̱dhṛta̍ḥ ||

pu̱ru̱-stu̱tasya̍ | dhāma̍-bhiḥ | śa̱tena̍ | ma̱ha̱yā̱ma̱si̱ |
indra̍sya | ca̱rṣa̱ṇi̱-dhṛta̍ḥ ||3.037.04||

3.037.05a indra̍ṁ vṛ̱trāya̱ hanta̍ve puruhū̱tam upa̍ bruve |
3.037.05c bhare̍ṣu̱ vāja̍sātaye ||

indra̍m | vṛ̱trāya̍ | hanta̍ve | pu̱ru̱-hū̱tam | upa̍ | bru̱ve̱ |
bhare̍ṣu | vāja̍-sātaye ||3.037.05||

3.037.06a vāje̍ṣu sāsa̱hir bha̍va̱ tvām ī̍mahe śatakrato |
3.037.06c indra̍ vṛ̱trāya̱ hanta̍ve ||

vāje̍ṣu | sa̱sa̱hiḥ | bha̱va̱ | tvām | ī̱ma̱he̱ | śa̱ta̱kra̱to̱ iti̍ śata-krato |
indra̍ | vṛ̱trāya̍ | hanta̍ve ||3.037.06||

3.037.07a dyu̱mneṣu̍ pṛta̱nājye̍ pṛtsu̱tūrṣu̱ śrava̍ssu ca |
3.037.07c indra̱ sākṣvā̱bhimā̍tiṣu ||

dyu̱mneṣu̍ | pṛ̱ta̱nājye̍ | pṛ̱tsu̱tūrṣu̍ | śrava̍ḥ-su | ca̱ |
indra̍ | sākṣva̍ | a̱bhi-mā̍tiṣu ||3.037.07||

3.037.08a śu̱ṣminta̍maṁ na ū̱taye̍ dyu̱mnina̍m pāhi̱ jāgṛ̍vim |
3.037.08c indra̱ soma̍ṁ śatakrato ||

śu̱ṣmin-ta̍mam | na | ū̱taye̍ | dyu̱mnina̍m | pā̱hi̱ | jāgṛ̍vim |
indra̍ | soma̍m | śa̱ta̱kra̱to̱ iti̍ śata-krato ||3.037.08||

3.037.09a i̱ndri̱yāṇi̍ śatakrato̱ yā te̱ jane̍ṣu pa̱ñcasu̍ |
3.037.09c indra̱ tāni̍ ta̱ ā vṛ̍ṇe ||

i̱ndri̱yāṇi̍ | śa̱ta̱kra̱to̱ iti̍ śata-krato | yā | te̱ | jane̍ṣu | pa̱ñca-su̍ |
indra̍ | tāni̍ | te̱ | ā | vṛ̱ṇe̱ ||3.037.09||

3.037.10a aga̍nn indra̱ śravo̍ bṛ̱had dyu̱mnaṁ da̍dhiṣva du̱ṣṭara̍m |
3.037.10c ut te̱ śuṣma̍ṁ tirāmasi ||

aga̍n | i̱ndra̱ | śrava̍ḥ | bṛ̱hat | dyu̱mnam | da̱dhi̱ṣva̱ | du̱stara̍m |
ut | te̱ | śuṣma̍m | ti̱rā̱ma̱si̱ ||3.037.10||

3.037.11a a̱rvā̱vato̍ na̱ ā ga̱hy atho̍ śakra parā̱vata̍ḥ |
3.037.11c u̱ lo̱ko yas te̍ adriva̱ indre̱ha tata̱ ā ga̍hi ||

a̱rvā̱-vata̍ḥ | na̱ḥ | ā | ga̱hi̱ | atho̱ iti̍ | śa̱kra̱ | pa̱rā̱-vata̍ḥ |
ū̱m̐ iti̍ | lo̱kaḥ | yaḥ | te̱ | a̱dri̱-va̱ḥ | indra̍ | i̱ha | tata̍ḥ | ā | ga̱hi̱ ||3.037.11||


3.038.01a a̱bhi taṣṭe̍va dīdhayā manī̱ṣām atyo̱ na vā̱jī su̱dhuro̱ jihā̍naḥ |
3.038.01c a̱bhi pri̱yāṇi̱ marmṛ̍śa̱t parā̍ṇi ka̱vīm̐r i̍cchāmi sa̱ṁdṛśe̍ sume̱dhāḥ ||

a̱bhi | taṣṭā̍-iva | dī̱dha̱ya̱ | ma̱nī̱ṣām | atya̍ḥ | na | vā̱jī | su̱-dhura̍ḥ | jihā̍naḥ |
a̱bhi | pri̱yāṇi̍ | marmṛ̍śat | parā̍ṇi | ka̱vīn | i̱cchā̱mi̱ | sa̱m-dṛśe̍ | su̱-me̱dhāḥ ||3.038.01||

3.038.02a i̱nota pṛ̍ccha̱ jani̍mā kavī̱nām ma̍no̱dhṛta̍ḥ su̱kṛta̍s takṣata̱ dyām |
3.038.02c i̱mā u̍ te pra̱ṇyo̱3̱̍ vardha̍mānā̱ mano̍vātā̱ adha̱ nu dharma̍ṇi gman ||

i̱nā | u̱ta | pṛ̱ccha̱ | jani̍ma | ka̱vī̱nām | ma̱na̱ḥ-dhṛta̍ḥ | su̱-kṛta̍ḥ | ta̱kṣa̱ta̱ | dyām |
i̱māḥ | ū̱m̐ iti̍ | te̱ | pra̱-nya̍ḥ | vardha̍mānāḥ | mana̍ḥ-vātāḥ | adha̍ | nu | dharma̍ṇi | gma̱n ||3.038.02||

3.038.03a ni ṣī̱m id atra̱ guhyā̱ dadhā̍nā u̱ta kṣa̱trāya̱ roda̍sī̱ sam a̍ñjan |
3.038.03c sam mātrā̍bhir mami̱re ye̱mur u̱rvī a̱ntar ma̱hī samṛ̍te̱ dhāya̍se dhuḥ ||

ni | sī̱m | it | atra̍ | guhyā̍ | dadhā̍nāḥ | u̱ta | kṣa̱trāya̍ | roda̍sī̱ iti̍ | sam | a̱ñja̱n |
sam | mātrā̍bhiḥ | ma̱mi̱re | ye̱muḥ | u̱rvī iti̍ | a̱ntaḥ | ma̱hī | samṛ̍te̱ iti̱ sam-ṛ̍te | dhāya̍se | dhuḥ ||3.038.03||

3.038.04a ā̱tiṣṭha̍nta̱m pari̱ viśve̍ abhūṣa̱ñ chriyo̱ vasā̍naś carati̱ svaro̍ciḥ |
3.038.04c ma̱hat tad vṛṣṇo̱ asu̍rasya̱ nāmā vi̱śvarū̍po a̱mṛtā̍ni tasthau ||

ā̱-tiṣṭha̍ntam | pari̍ | viśve̍ | a̱bhū̱ṣa̱n | śriya̍ḥ | vasā̍naḥ | ca̱ra̱ti̱ | sva-ro̍ciḥ |
ma̱hat | tat | vṛṣṇa̍ḥ | asu̍rasya | nāma̍ | ā | vi̱śva-rū̍paḥ | a̱mṛtā̍ni | ta̱sthau̱ ||3.038.04||

3.038.05a asū̍ta̱ pūrvo̍ vṛṣa̱bho jyāyā̍n i̱mā a̍sya śu̱rudha̍ḥ santi pū̱rvīḥ |
3.038.05c divo̍ napātā vi̱datha̍sya dhī̱bhiḥ kṣa̱traṁ rā̍jānā pra̱divo̍ dadhāthe ||

asū̍ta | pūrva̍ḥ | vṛ̱ṣa̱bhaḥ | jyāyā̍n | i̱māḥ | a̱sya̱ | śu̱rudha̍ḥ | sa̱nti̱ | pū̱rvīḥ |
diva̍ḥ | na̱pā̱tā̱ | vi̱datha̍sya | dhī̱bhiḥ | kṣa̱tram | rā̱jā̱nā̱ | pra̱-diva̍ḥ | da̱dhā̱the̱ iti̍ ||3.038.05||

3.038.06a trīṇi̍ rājānā vi̱dathe̍ pu̱rūṇi̱ pari̱ viśvā̍ni bhūṣatha̱ḥ sadā̍ṁsi |
3.038.06c apa̍śya̱m atra̱ mana̍sā jaga̱nvān vra̱te ga̍ndha̱rvām̐ api̍ vā̱yuke̍śān ||

trīṇi̍ | rā̱jā̱nā̱ | vi̱dathe̍ | pu̱rūṇi̍ | pari̍ | viśvā̍ni | bhū̱ṣa̱tha̱ḥ | sadā̍ṁsi |
apa̍śyam | atra̍ | mana̍sā | ja̱ga̱nvān | vra̱te | ga̱ndha̱rvān | api̍ | vā̱yu-ke̍śān ||3.038.06||

3.038.07a tad in nv a̍sya vṛṣa̱bhasya̍ dhe̱nor ā nāma̍bhir mamire̱ sakmya̱ṁ goḥ |
3.038.07c a̱nyad-a̍nyad asu̱rya1̱̍ṁ vasā̍nā̱ ni mā̱yino̍ mamire rū̱pam a̍smin ||

tat | it | nu | a̱sya̱ | vṛ̱ṣa̱bhasya̍ | dhe̱noḥ | ā | nāma̍-bhiḥ | ma̱mi̱re̱ | sakmya̍m | goḥ |
a̱nyat-a̍nyat | a̱su̱rya̍m | vasā̍nāḥ | ni | mā̱yina̍ḥ | ma̱mi̱re̱ | rū̱pam | a̱smi̱n ||3.038.07||

3.038.08a tad in nv a̍sya savi̱tur naki̍r me hira̱ṇyayī̍m a̱mati̱ṁ yām aśi̍śret |
3.038.08c ā su̍ṣṭu̱tī roda̍sī viśvami̱nve apī̍va̱ yoṣā̱ jani̍māni vavre ||

tat | it | nu | a̱sya̱ | sa̱vi̱tuḥ | naki̍ḥ | me̱ | hi̱ra̱ṇyayī̍m | a̱mati̍m | yām | aśi̍śret |
ā | su̱-stu̱tī | roda̍sī̱ iti̍ | vi̱śva̱mi̱nve iti̍ vi̱śva̱m-i̱nve | api̍-iva | yoṣā̍ | jani̍māni | va̱vre̱ ||3.038.08||

3.038.09a yu̱vam pra̱tnasya̍ sādhatho ma̱ho yad daivī̍ sva̱stiḥ pari̍ ṇaḥ syātam |
3.038.09c go̱pāji̍hvasya ta̱sthuṣo̱ virū̍pā̱ viśve̍ paśyanti mā̱yina̍ḥ kṛ̱tāni̍ ||

yu̱vam | pra̱tnasya̍ | sā̱dha̱tha̱ḥ | ma̱haḥ | yat | daivī̍ | sva̱stiḥ | pari̍ | na̱ḥ | syā̱ta̱m |
go̱pāji̍hvasya | ta̱sthuṣa̍ḥ | vi-rū̍pā | viśve̍ | pa̱śya̱nti̱ | mā̱yina̍ḥ | kṛ̱tāni̍ ||3.038.09||

3.038.10a śu̱naṁ hu̍vema ma̱ghavā̍na̱m indra̍m a̱smin bhare̱ nṛta̍ma̱ṁ vāja̍sātau |
3.038.10c śṛ̱ṇvanta̍m u̱gram ū̱taye̍ sa̱matsu̱ ghnanta̍ṁ vṛ̱trāṇi̍ sa̱ṁjita̱ṁ dhanā̍nām ||

śu̱nam | hu̱ve̱ma̱ | ma̱ghavā̍nam | indra̍m | a̱smin | bhare̍ | nṛ-ta̍mam | vāja̍-sātau |
śṛ̱ṇvanta̍m | u̱gram | ū̱taye̍ | sa̱mat-su̍ | ghnanta̍m | vṛ̱trāṇi̍ | sa̱m-jita̍m | dhanā̍nām ||3.038.10||


3.039.01a indra̍m ma̱tir hṛ̱da ā va̱cyamā̱nācchā̱ pati̱ṁ stoma̍taṣṭā jigāti |
3.039.01c yā jāgṛ̍vir vi̱dathe̍ śa̱syamā̱nendra̱ yat te̱ jāya̍te vi̱ddhi tasya̍ ||

indra̍m | ma̱tiḥ | hṛ̱daḥ | ā | va̱cyamā̍nā | accha̍ | pati̍m | stoma̍-taṣṭā | ji̱gā̱ti̱ |
yā | jāgṛ̍viḥ | vi̱dathe̍ | śa̱syamā̍nā | indra̍ | yat | te̱ | jāya̍te | vi̱ddhi | tasya̍ ||3.039.01||

3.039.02a di̱vaś ci̱d ā pū̱rvyā jāya̍mānā̱ vi jāgṛ̍vir vi̱dathe̍ śa̱syamā̍nā |
3.039.02c bha̱drā vastrā̱ṇy arju̍nā̱ vasā̍nā̱ seyam a̱sme sa̍na̱jā pitryā̱ dhīḥ ||

di̱vaḥ | ci̱t | ā | pū̱rvyā | jāya̍mānā | vi | jāgṛ̍viḥ | vi̱dathe̍ | śasyamā̍nā |
bha̱drā | va̱strā̱ṇi | arju̍nā | vasā̍nā | sā | i̱yam | a̱sme iti̍ | sa̱na̱-jā | pitryā̍ | dhīḥ ||3.039.02||

3.039.03a ya̱mā ci̱d atra̍ yama̱sūr a̍sūta ji̱hvāyā̱ agra̱m pata̱d ā hy asthā̍t |
3.039.03c vapū̍ṁṣi jā̱tā mi̍thu̱nā sa̍cete tamo̱hanā̱ tapu̍ṣo bu̱dhna etā̍ ||

ya̱mā | ci̱t | atra̍ | yama̱-sūḥ | a̱sū̱ta̱ | ji̱hvāyā̍ | agra̍m | pata̍t | ā | hi | asthā̍t |
vapū̍ṁṣi | jā̱tā | mi̱thu̱nā | sa̱ce̱te̱ iti̍ | ta̱ma̱ḥ-hanā̍ | tapu̍ṣaḥ | bu̱dhne | ā-i̍tā ||3.039.03||

3.039.04a naki̍r eṣāṁ nindi̱tā martye̍ṣu̱ ye a̱smāka̍m pi̱taro̱ goṣu̍ yo̱dhāḥ |
3.039.04c indra̍ eṣāṁ dṛṁhi̱tā māhi̍nāvā̱n ud go̱trāṇi̍ sasṛje da̱ṁsanā̍vān ||

naki̍ḥ | e̱ṣā̱m | ni̱ndi̱tā | martye̍ṣu | ye | a̱smāka̍m | pi̱tara̍ḥ | goṣu̍ | yo̱dhāḥ |
indra̍ḥ | e̱ṣā̱m | dṛ̱ṁhi̱tā | māhi̍na-vān | ut | go̱trāṇi̍ | sa̱sṛ̱je̱ | da̱ṁsanā̍-vān ||3.039.04||

3.039.05a sakhā̍ ha̱ yatra̱ sakhi̍bhi̱r nava̍gvair abhi̱jñv ā satva̍bhi̱r gā a̍nu̱gman |
3.039.05c sa̱tyaṁ tad indro̍ da̱śabhi̱r daśa̍gvai̱ḥ sūrya̍ṁ viveda̱ tama̍si kṣi̱yanta̍m ||

sakhā̍ | ha̱ | yatra̍ | sakhi̍-bhiḥ | nava̍-gvaiḥ | a̱bhi̱-jñu | ā | satva̍-bhiḥ | gāḥ | a̱nu̱-gman |
sa̱tyam | tat | indra̍ḥ | da̱śa-bhi̍ḥ | daśa̍-gvaiḥ | sūrya̍m | vi̱ve̱da̱ | tama̍si | kṣi̱yanta̍m ||3.039.05||

3.039.06a indro̱ madhu̱ sambhṛ̍tam u̱sriyā̍yām pa̱dvad vi̍veda śa̱phava̱n name̱ goḥ |
3.039.06c guhā̍ hi̱taṁ guhya̍ṁ gū̱ḻham a̱psu haste̍ dadhe̱ dakṣi̍ṇe̱ dakṣi̍ṇāvān ||

indra̍ḥ | madhu̍ | sam-bhṛ̍tam | u̱sriyā̍yām | pa̱t-vat | vi̱ve̱da̱ | śa̱pha-va̍t | name̍ | goḥ |
guhā̍ | hi̱tam | guhya̍m | gū̱ḻham | a̱p-su | haste̍ | da̱dhe̱ | dakṣi̍ṇe | dakṣi̍ṇa-vān ||3.039.06||

3.039.07a jyoti̍r vṛṇīta̱ tama̍so vijā̱nann ā̱re syā̍ma duri̱tād a̱bhīke̍ |
3.039.07c i̱mā gira̍ḥ somapāḥ somavṛddha ju̱ṣasve̍ndra puru̱tama̍sya kā̱roḥ ||

jyoti̍ḥ | vṛ̱ṇī̱ta̱ | tama̍saḥ | vi̱-jā̱nan | ā̱re | sya̱ma̱ | du̱ḥ-i̱tāt | a̱bhīke̍ |
i̱māḥ | gira̍ḥ | so̱ma̱-pā̱ḥ | so̱ma̱-vṛ̱ddha̱ | ju̱ṣasva̍ | i̱ndra̱ | pu̱ru̱-tama̍sya | kā̱roḥ ||3.039.07||

3.039.08a jyoti̍r ya̱jñāya̱ roda̍sī̱ anu̍ ṣyād ā̱re syā̍ma duri̱tasya̱ bhūre̍ḥ |
3.039.08c bhūri̍ ci̱d dhi tu̍ja̱to martya̍sya supā̱rāso̍ vasavo ba̱rhaṇā̍vat ||

jyoti̍ḥ | ya̱jñāya̍ | roda̍sī̱ iti̍ | anu̍ | syā̱t | ā̱re | syā̱ma̱ | du̱ḥ-i̱tasya̍ | bhūre̍ḥ |
bhūri̍ | ci̱t | hi | tu̱ja̱taḥ | martya̍sya | su̱-pā̱rāsa̍ḥ | va̱sa̱va̱ḥ | ba̱rhaṇā̍-vat ||3.039.08||

3.039.09a śu̱naṁ hu̍vema ma̱ghavā̍na̱m indra̍m a̱smin bhare̱ nṛta̍ma̱ṁ vāja̍sātau |
3.039.09c śṛ̱ṇvanta̍m u̱gram ū̱taye̍ sa̱matsu̱ ghnanta̍ṁ vṛ̱trāṇi̍ sa̱ṁjita̱ṁ dhanā̍nām ||

śu̱nam | hu̱ve̱ma̱ | ma̱ghavā̍nam | indra̍m | a̱smin | bhare̍ | nṛ-ta̍mam | vāja̍-sātau |
śṛ̱ṇvanta̍m | u̱gram | ū̱taye̍ | sa̱mat-su̍ | ghnanta̍m | vṛ̱trāṇi̍ | sa̱m-jita̍m | dhanā̍nām ||3.039.09||


3.040.01a indra̍ tvā vṛṣa̱bhaṁ va̱yaṁ su̱te some̍ havāmahe |
3.040.01c sa pā̍hi̱ madhvo̱ andha̍saḥ ||

indra̍ | tvā̱ | vṛ̱ṣa̱bham | va̱yam | su̱te | some̍ | ha̱vā̱ma̱he̱ |
saḥ | pā̱hi̱ | madhva̍ḥ | andha̍saḥ ||3.040.01||

3.040.02a indra̍ kratu̱vida̍ṁ su̱taṁ soma̍ṁ harya puruṣṭuta |
3.040.02c pibā vṛ̍ṣasva̱ tātṛ̍pim ||

indra̍ | kra̱tu̱-vida̍m | su̱tam | soma̍m | ha̱rya̱ | pu̱ru̱-stu̱ta̱ |
piba̍ | ā | vṛ̱ṣa̱sva̱ | tatṛ̍pim ||3.040.02||

3.040.03a indra̱ pra ṇo̍ dhi̱tāvā̍naṁ ya̱jñaṁ viśve̍bhir de̱vebhi̍ḥ |
3.040.03c ti̱ra sta̍vāna viśpate ||

indra̍ | pra | na̱ḥ | dhi̱ta-vā̍nam | ya̱jñam | viśve̍bhiḥ | de̱vebhi̍ḥ |
ti̱ra | sta̱vā̱na̱ | vi̱śpa̱te̱ ||3.040.03||

3.040.04a indra̱ somā̍ḥ su̱tā i̱me tava̱ pra ya̍nti satpate |
3.040.04c kṣaya̍ṁ ca̱ndrāsa̱ inda̍vaḥ ||

indra̍ | somā̍ḥ | su̱tāḥ | i̱me | tava̍ | pra | ya̱nti̱ | sa̱t-pa̱te̱ |
kṣaya̍m | ca̱ndrāsa̍ḥ | inda̍vaḥ ||3.040.04||

3.040.05a da̱dhi̱ṣvā ja̱ṭhare̍ su̱taṁ soma̍m indra̱ vare̍ṇyam |
3.040.05c tava̍ dyu̱kṣāsa̱ inda̍vaḥ ||

da̱dhi̱ṣva | ja̱ṭhare̍ | su̱tam | soma̍m | i̱ndra̱ | vare̍ṇyam |
tava̍ | dyu̱kṣāsa̍ḥ | inda̍vaḥ ||3.040.05||

3.040.06a girva̍ṇaḥ pā̱hi na̍ḥ su̱tam madho̱r dhārā̍bhir ajyase |
3.040.06c indra̱ tvādā̍ta̱m id yaśa̍ḥ ||

girva̍ṇaḥ | pā̱hi | na̱ḥ | su̱tam | madho̍ḥ | dhārā̍bhiḥ | a̱jya̱se̱ |
indra̍ | tvā-dā̍tam | it | yaśa̍ḥ ||3.040.06||

3.040.07a a̱bhi dyu̱mnāni̍ va̱nina̱ indra̍ṁ sacante̱ akṣi̍tā |
3.040.07c pī̱tvī soma̍sya vāvṛdhe ||

a̱bhi | dyu̱mnāni̍ | va̱nina̍ḥ | indra̍m | sa̱ca̱nte̱ | akṣi̍tā |
pī̱tvī | soma̍sya | va̱vṛ̱dhe̱ ||3.040.07||

3.040.08a a̱rvā̱vato̍ na̱ ā ga̍hi parā̱vata̍ś ca vṛtrahan |
3.040.08c i̱mā ju̍ṣasva no̱ gira̍ḥ ||

a̱rvā̱-vata̍ḥ | na̱ḥ | ā | ga̱hi̱ | pa̱rā̱-vata̍ḥ | ca̱ | vṛ̱tra̱ha̱n |
i̱māḥ | ju̱ṣa̱sva̱ | na̱ḥ | gira̍ḥ ||3.040.08||

3.040.09a yad a̍nta̱rā pa̍rā̱vata̍m arvā̱vata̍ṁ ca hū̱yase̍ |
3.040.09c indre̱ha tata̱ ā ga̍hi ||

yat | a̱nta̱rā | pa̱rā̱vata̍m | a̱rvā̱vata̍m | ca̱ | hū̱yase̍ |
indra̍ | i̱ha | tata̍ḥ | ā | ga̱hi̱ ||3.040.09||


3.041.01a ā tū na̍ indra ma̱drya̍g ghuvā̱naḥ soma̍pītaye |
3.041.01c hari̍bhyāṁ yāhy adrivaḥ ||

ā | tu | na̱ḥ | i̱ndra̱ | ma̱drya̍k | hu̱vā̱naḥ | soma̍-pītaye |
hari̍-bhyām | yā̱hi̱ | a̱dri̱-va̱ḥ ||3.041.01||

3.041.02a sa̱tto hotā̍ na ṛ̱tviya̍s tisti̱re ba̱rhir ā̍nu̱ṣak |
3.041.02c ayu̍jran prā̱tar adra̍yaḥ ||

sa̱ttaḥ | hotā̍ | na̱ḥ | ṛ̱tviya̍ḥ | ti̱sti̱re | ba̱rhiḥ | ā̱nu̱ṣak |
ayu̍jran | prā̱taḥ | adra̍yaḥ ||3.041.02||

3.041.03a i̱mā brahma̍ brahmavāhaḥ kri̱yanta̱ ā ba̱rhiḥ sī̍da |
3.041.03c vī̱hi śū̍ra puro̱ḻāśa̍m ||

i̱mā | brahma̍ | bra̱hma̱-vā̱ha̱ḥ | kri̱yante̍ | ā | ba̱rhiḥ | sī̱da̱ |
vī̱hi | śū̱ra̱ | pu̱ro̱ḻāśa̍m ||3.041.03||

3.041.04a rā̱ra̱ndhi sava̍neṣu ṇa e̱ṣu stome̍ṣu vṛtrahan |
3.041.04c u̱ktheṣv i̍ndra girvaṇaḥ ||

ra̱ra̱ndhi | sava̍neṣu | na̱ḥ | e̱ṣu | stome̍ṣu | vṛ̱tra̱ha̱n |
u̱ktheṣu̍ | i̱ndra̱ | gi̱rva̱ṇa̱ḥ ||3.041.04||

3.041.05a ma̱taya̍ḥ soma̱pām u̱ruṁ ri̱hanti̱ śava̍sa̱s pati̍m |
3.041.05c indra̍ṁ va̱tsaṁ na mā̱tara̍ḥ ||

ma̱taya̍ḥ | so̱ma̱-pām | u̱rum | ri̱hanti̍ | śava̍saḥ | pati̍m |
indra̍m | va̱tsam | na | mā̱tara̍ḥ ||3.041.05||

3.041.06a sa ma̍ndasvā̱ hy andha̍so̱ rādha̍se ta̱nvā̍ ma̱he |
3.041.06c na sto̱tāra̍ṁ ni̱de ka̍raḥ ||

saḥ | ma̱nda̱sva̱ | hi | andha̍saḥ | rādha̍se | ta̱nvā̍ | ma̱he |
na | sto̱tāra̍m | ni̱de | ka̱ra̱ḥ ||3.041.06||

3.041.07a va̱yam i̍ndra tvā̱yavo̍ ha̱viṣma̍nto jarāmahe |
3.041.07c u̱ta tvam a̍sma̱yur va̍so ||

va̱yam | i̱ndra̱ | tvā̱-yava̍ḥ | ha̱viṣma̍ntaḥ | ja̱rā̱ma̱he̱ |
u̱ta | tvam | a̱sma̱-yuḥ | va̱so̱ iti̍ ||3.041.07||

3.041.08a māre a̱smad vi mu̍muco̱ hari̍priyā̱rvāṅ yā̍hi |
3.041.08c indra̍ svadhāvo̱ matsve̱ha ||

mā | ā̱re | a̱smat | vi | mu̱mu̱ca̱ḥ | hari̍-priya | ā̱rvāṅ | yā̱hi̱ |
indra̍ | sva̱dhā̱-va̱ḥ | matsva̍ | i̱ha ||3.041.08||

3.041.09a a̱rvāñca̍ṁ tvā su̱khe rathe̱ vaha̍tām indra ke̱śinā̍ |
3.041.09c ghṛ̱tasnū̍ ba̱rhir ā̱sade̍ ||

arvāñca̍m | tvā̱ | su̱-khe | rathe̍ | vaha̍tām | i̱ndra̱ | ke̱śinā̍ |
ghṛ̱tasnū̱ iti̍ ghṛ̱ta-snū̍ | ba̱rhiḥ | ā̱-sade̍ ||3.041.09||


3.042.01a upa̍ naḥ su̱tam ā ga̍hi̱ soma̍m indra̱ gavā̍śiram |
3.042.01c hari̍bhyā̱ṁ yas te̍ asma̱yuḥ ||

upa̍ | na̱ḥ | su̱tam | ā | ga̱hi̱ | soma̍m | i̱ndra̱ | go-ā̍śiram |
hari̍-bhyām | yaḥ | te̱ | a̱sma̱-yuḥ ||3.042.01||

3.042.02a tam i̍ndra̱ mada̱m ā ga̍hi barhi̱ḥṣṭhāṁ grāva̍bhiḥ su̱tam |
3.042.02c ku̱vin nv a̍sya tṛ̱pṇava̍ḥ ||

tam | i̱ndra̱ | mada̍m | ā | ga̱ẖ | ba̱rhi̱ḥ-sthām | grāva̍-bhiḥ | su̱tam |
ku̱vit | nu | a̱sya̱ | tṛ̱ṣṇava̍ḥ ||3.042.02||

3.042.03a indra̍m i̱tthā giro̱ mamācchā̍gur iṣi̱tā i̱taḥ |
3.042.03c ā̱vṛte̱ soma̍pītaye ||

indra̍m | i̱tthā | gira̍ḥ | mama̍ | accha̍ | a̱gu̱ḥ | i̱ṣi̱tāḥ | i̱taḥ |
ā̱-vṛte̍ | soma̍-pītaye ||3.042.03||

3.042.04a indra̱ṁ soma̍sya pī̱taye̱ stomai̍r i̱ha ha̍vāmahe |
3.042.04c u̱kthebhi̍ḥ ku̱vid ā̱gama̍t ||

indra̍m | soma̍sya | pī̱taye̍ | stomai̍ḥ | i̱ha | ha̱vā̱ma̱he̱ |
u̱kthebhi̍ḥ | ku̱vit | ā̱-gama̍t ||3.042.04||

3.042.05a indra̱ somā̍ḥ su̱tā i̱me tān da̍dhiṣva śatakrato |
3.042.05c ja̱ṭhare̍ vājinīvaso ||

indra̍ | somā̍ḥ | su̱tāḥ | i̱me | tān | da̱dhi̱ṣva̱ | śa̱ta̱kra̱to̱ iti̍ śata-krato |
ja̱ṭhare̍ | vā̱ji̱nī̱va̱so̱ iti̍ vājinī-vaso ||3.042.05||

3.042.06a vi̱dmā hi tvā̍ dhanaṁja̱yaṁ vāje̍ṣu dadhṛ̱ṣaṁ ka̍ve |
3.042.06c adhā̍ te su̱mnam ī̍mahe ||

vi̱dma | hi | tvā̱ | dha̱na̱m-ja̱yam | vāje̍ṣu | da̱dhṛ̱ṣam | ka̱ve̱ |
adha̍ | te̱ | su̱mnam | ī̱ma̱he̱ ||3.042.06||

3.042.07a i̱mam i̍ndra̱ gavā̍śira̱ṁ yavā̍śiraṁ ca naḥ piba |
3.042.07c ā̱gatyā̱ vṛṣa̍bhiḥ su̱tam ||

i̱mam | i̱ndra̱ | go-ā̍śiram | yava̍-āśiram | ca̱ | na̱ḥ | pi̱ba̱ |
ā̱-gatya̍ | vṛṣa̍-bhiḥ | su̱tam ||3.042.07||

3.042.08a tubhyed i̍ndra̱ sva o̱kye̱3̱̍ soma̍ṁ codāmi pī̱taye̍ |
3.042.08c e̱ṣa rā̍rantu te hṛ̱di ||

tubhya̍ | it | i̱ndra̱ | sve | o̱kye̍ | soma̍m | co̱dā̱mi̱ | pī̱taye̍ |
e̱ṣaḥ | ra̱ra̱ntu̱ | te̱ | hṛ̱di ||3.042.08||

3.042.09a tvāṁ su̱tasya̍ pī̱taye̍ pra̱tnam i̍ndra havāmahe |
3.042.09c ku̱śi̱kāso̍ ava̱syava̍ḥ ||

tvām | su̱tasya̍ | pī̱taye̍ | pra̱tnam | i̱ndra̱ | ha̱vā̱ma̱he̱ |
ku̱śi̱kāsa̍ḥ | a̱va̱syava̍ḥ ||3.042.09||


3.043.01a ā yā̍hy a̱rvāṅ upa̍ vandhure̱ṣṭhās taved anu̍ pra̱diva̍ḥ soma̱peya̍m |
3.043.01c pri̱yā sakhā̍yā̱ vi mu̱copa̍ ba̱rhis tvām i̱me ha̍vya̱vāho̍ havante ||

ā | yā̱hi̱ | a̱rvāṅ | upa̍ | va̱ndhu̱re̱-sthāḥ | tava̍ | it | anu̍ | pra̱-diva̍ḥ | so̱ma̱-peya̍m |
pri̱yā | sakhā̍yā | vi | mu̱ca̱ | upa̍ | ba̱rhiḥ | tvām | i̱me | ha̱vya̱-vāha̍ḥ | ha̱va̱nte̱ ||3.043.01||

3.043.02a ā yā̍hi pū̱rvīr ati̍ carṣa̱ṇīr ām̐ a̱rya ā̱śiṣa̱ upa̍ no̱ hari̍bhyām |
3.043.02c i̱mā hi tvā̍ ma̱taya̱ḥ stoma̍taṣṭā̱ indra̱ hava̍nte sa̱khyaṁ ju̍ṣā̱ṇāḥ ||

ā | yā̱hi̱ | pū̱rvīḥ | ati̍ | ca̱rṣa̱ṇīḥ | ā | a̱ryaḥ | ā̱-śiṣa̍ḥ | upa̍ | na̱ḥ | hari̍-bhyām |
i̱māḥ | hi | tvā̱ | ma̱taya̍ḥ | stoma̍-taṣṭāḥ | indra̍ | hava̍nte | sa̱khyam | ju̱ṣā̱ṇāḥ ||3.043.02||

3.043.03a ā no̍ ya̱jñaṁ na̍mo̱vṛdha̍ṁ sa̱joṣā̱ indra̍ deva̱ hari̍bhir yāhi̱ tūya̍m |
3.043.03c a̱haṁ hi tvā̍ ma̱tibhi̱r joha̍vīmi ghṛ̱tapra̍yāḥ sadha̱māde̱ madhū̍nām ||

ā | na̱ḥ | ya̱jñam | na̱ma̱ḥ-vṛdha̍m | sa̱-joṣā̍ḥ | indra̍ | de̱va̱ | hari̍-bhiḥ | yā̱hi̱ | tūya̍m |
a̱ham | hi | tvā̱ | ma̱ti-bhi̍ḥ | joha̍vīmi | ghṛ̱ta-pra̍yāḥ | sa̱dha̱-māde̍ | madhū̍nām ||3.043.03||

3.043.04a ā ca̱ tvām e̱tā vṛṣa̍ṇā̱ vahā̍to̱ harī̱ sakhā̍yā su̱dhurā̱ svaṅgā̍ |
3.043.04c dhā̱nāva̱d indra̱ḥ sava̍naṁ juṣā̱ṇaḥ sakhā̱ sakhyu̍ḥ śṛṇava̱d vanda̍nāni ||

ā | ca̱ | tvām | e̱tā | vṛṣa̍ṇā | vahā̍taḥ | harī̱ iti̍ | sakhā̍yā | su̱-dhurā̍ | su̱-aṅgā̍ |
dhā̱nā-va̍t | indra̍ḥ | sava̍nam | ju̱ṣā̱ṇaḥ | sakhā̍ | sakhyu̍ḥ | śṛ̱ṇa̱va̱t | vanda̍nāni ||3.043.04||

3.043.05a ku̱vin mā̍ go̱pāṁ kara̍se̱ jana̍sya ku̱vid rājā̍nam maghavann ṛjīṣin |
3.043.05c ku̱vin ma̱ ṛṣi̍m papi̱vāṁsa̍ṁ su̱tasya̍ ku̱vin me̱ vasvo̍ a̱mṛta̍sya̱ śikṣā̍ḥ ||

ku̱vit | mā̱ | go̱pām | kara̍se | jana̍sya | ku̱vit | rājā̍nam | ma̱gha̱-va̱n | ṛ̱jī̱ṣi̱n |
ku̱vit | mā̱ | ṛṣi̍m | pa̱pi̱-vāṁsa̍m | su̱tasya̍ | ku̱vit | me̱ | vasva̍ḥ | a̱mṛta̍sya | śikṣā̍ḥ ||3.043.05||

3.043.06a ā tvā̍ bṛ̱hanto̱ hara̍yo yujā̱nā a̱rvāg i̍ndra sadha̱mādo̍ vahantu |
3.043.06c pra ye dvi̱tā di̱va ṛ̱ñjanty ātā̱ḥ susa̍mmṛṣṭāso vṛṣa̱bhasya̍ mū̱rāḥ ||

ā | tvā̱ | bṛ̱hanta̍ḥ | hara̍yaḥ | yu̱jā̱nāḥ | a̱rvāk | i̱ndra̱ | sa̱dha̱-māda̍ḥ | va̱ha̱ntu̱ |
pra | ye | dvi̱tā | di̱vaḥ | ṛ̱ñjanti̍ | ātā̍ḥ | su-sa̍mmṛṣṭāsaḥ | vṛ̱ṣa̱bhasya̍ | mū̱rāḥ ||3.043.06||

3.043.07a indra̱ piba̱ vṛṣa̍dhūtasya̱ vṛṣṇa̱ ā yaṁ te̍ śye̱na u̍śa̱te ja̱bhāra̍ |
3.043.07c yasya̱ made̍ cyā̱vaya̍si̱ pra kṛ̱ṣṭīr yasya̱ made̱ apa̍ go̱trā va̱vartha̍ ||

indra̍ | piba̍ | vṛṣa̍-dhūtasya | vṛṣṇa̍ḥ | ā | yam | te̱ | śye̱naḥ | u̱śa̱te | ja̱bhāra̍ |
yasya̍ | made̍ | cyā̱vaya̍si | pra | kṛ̱ṣṭīḥ | yasya̍ | made̍ | apa̍ | go̱trā | va̱vartha̍ ||3.043.07||

3.043.08a śu̱naṁ hu̍vema ma̱ghavā̍na̱m indra̍m a̱smin bhare̱ nṛta̍ma̱ṁ vāja̍sātau |
3.043.08c śṛ̱ṇvanta̍m u̱gram ū̱taye̍ sa̱matsu̱ ghnanta̍ṁ vṛ̱trāṇi̍ sa̱ṁjita̱ṁ dhanā̍nām ||

śu̱nam | hu̱ve̱ma̱ | ma̱ghavā̍nam | indra̍m | a̱smin | bhare̍ | nṛ-ta̍mam | vāja̍-sātau |
śṛ̱ṇvanta̍m | u̱gram | ū̱taye̍ | sa̱mat-su̍ | ghnanta̍m | vṛ̱trāṇi̍ | sa̱m-jita̍m | dhanā̍nām ||3.043.08||


3.044.01a a̱yaṁ te̍ astu harya̱taḥ soma̱ ā hari̍bhiḥ su̱taḥ |
3.044.01c ju̱ṣā̱ṇa i̍ndra̱ hari̍bhir na̱ ā ga̱hy ā ti̍ṣṭha̱ hari̍ta̱ṁ ratha̍m ||

a̱yam | te̱ | a̱stu̱ | ha̱rya̱taḥ | soma̍ḥ | ā | hari̍-bhiḥ | su̱taḥ |
ju̱ṣā̱ṇaḥ | i̱ndra̱ | hari̍-bhiḥ | na̱ḥ | ā | ga̱hi̱ | ā | ti̱ṣṭha̱ | hari̍tam | ratha̍m ||3.044.01||

3.044.02a ha̱ryann u̱ṣasa̍m arcaya̱ḥ sūrya̍ṁ ha̱ryann a̍rocayaḥ |
3.044.02c vi̱dvām̐ś ci̍ki̱tvān ha̍ryaśva vardhasa̱ indra̱ viśvā̍ a̱bhi śriya̍ḥ ||

ha̱ryan | u̱ṣasa̍m | a̱rca̱ya̱ḥ | sūrya̍m | ha̱ryan | a̱ro̱ca̱ya̱ḥ |
vi̱dvān | ci̱ki̱tvān | ha̱ri̱-a̱śva̱ | va̱rdha̱se̱ | indra̍ | viśvā̍ | a̱bhi | śriya̍ḥ ||3.044.02||

3.044.03a dyām indro̱ hari̍dhāyasam pṛthi̱vīṁ hari̍varpasam |
3.044.03c adhā̍rayad dha̱rito̱r bhūri̱ bhoja̍na̱ṁ yayo̍r a̱ntar hari̱ś cara̍t ||

dyām | indra̍ḥ | hari̍-dhāyasam | pṛ̱thi̱vīm | hari̍-varpasam |
adhā̍rayat | ha̱rito̍ḥ | bhūri̍ | bhoja̍nam | yayo̍ḥ | a̱ntaḥ | hari̱ḥ | cara̍t ||3.044.03||

3.044.04a ja̱jñā̱no hari̍to̱ vṛṣā̱ viśva̱m ā bhā̍ti roca̱nam |
3.044.04c harya̍śvo̱ hari̍taṁ dhatta̱ āyu̍dha̱m ā vajra̍m bā̱hvor hari̍m ||

ja̱jñā̱naḥ | hari̍taḥ | vṛṣā̍ | viśva̍m | ā | bhā̱ti̱ | ro̱ca̱nam |
hari̍-aśvaḥ | hari̍tam | dha̱tte̱ | āyu̍dham | ā | vajra̍m | bā̱hvoḥ | hari̍m ||3.044.04||

3.044.05a indro̍ ha̱ryanta̱m arju̍na̱ṁ vajra̍ṁ śu̱krair a̱bhīvṛ̍tam |
3.044.05c apā̍vṛṇo̱d dhari̍bhi̱r adri̍bhiḥ su̱tam ud gā hari̍bhir ājata ||

indra̍ḥ | ha̱ryanta̍m | arju̍nam | vajra̍m | śu̱kraiḥ | a̱bhi-vṛ̍tam |
apa̍ | a̱vṛ̱ṇo̱t | hari̍-bhiḥ | adri̍-bhiḥ | su̱tam | ut | gāḥ | hari̍-bhiḥ | ā̱ja̱ta̱ ||3.044.05||


3.045.01a ā ma̱ndrair i̍ndra̱ hari̍bhir yā̱hi ma̱yūra̍romabhiḥ |
3.045.01c mā tvā̱ ke ci̱n ni ya̍ma̱n viṁ na pā̱śino 'ti̱ dhanve̍va̱ tām̐ i̍hi ||

ā | ma̱ndraiḥ | i̱ndra̱ | hari̍-bhiḥ | yā̱hi | ma̱yūra̍roma-bhiḥ |
mā | tvā̱ | ke | ci̱t | ni | ya̱ma̱n | vim | na | pā̱śina̍ḥ | ati̍ | dhanva̍-iva | tān | i̱hi̱ ||3.045.01||

3.045.02a vṛ̱tra̱khā̱do va̍laṁru̱jaḥ pu̱rāṁ da̱rmo a̱pām a̱jaḥ |
3.045.02c sthātā̱ ratha̍sya̱ haryo̍r abhisva̱ra indro̍ dṛ̱ḻhā ci̍d āru̱jaḥ ||

vṛ̱tra̱-khā̱daḥ | va̱la̱m-ru̱jaḥ | pu̱rām | da̱rmaḥ | a̱pām | a̱jaḥ |
sthātā̍ | ratha̍sya | haryo̍ḥ | a̱bhi̱-sva̱re | indra̍ḥ | dṛ̱ḻhā | ci̱t | ā̱-ru̱jaḥ ||3.045.02||

3.045.03a ga̱mbhī̱rām̐ u̍da̱dhīm̐r i̍va̱ kratu̍m puṣyasi̱ gā i̍va |
3.045.03c pra su̍go̱pā yava̍saṁ dhe̱navo̍ yathā hra̱daṁ ku̱lyā i̍vāśata ||

ga̱mbhī̱rān | u̱da̱dhīn-i̍va | kratu̍m | pu̱ṣya̱si̱ | gāḥ-i̍va |
pra | su̱-go̱pāḥ | yava̍sam | dhe̱nava̍ḥ | ya̱thā̱ | hra̱dam | ku̱lyāḥ-i̍va | ā̱śa̱ta̱ ||3.045.03||

3.045.04a ā na̱s tuja̍ṁ ra̱yim bha̱rāṁśa̱ṁ na pra̍tijāna̱te |
3.045.04c vṛ̱kṣam pa̱kvam phala̍m a̱ṅkīva̍ dhūnu̱hīndra̍ sa̱mpāra̍ṇa̱ṁ vasu̍ ||

ā | na̱ḥ | tuja̍m | ra̱yim | bha̱ra̱ | aṁśa̍m | na | pra̱ti̱-jā̱na̱te |
vṛ̱kṣam | pa̱kvam | phala̍m | a̱ṅkī-i̍va | dhū̱nu̱hi̱ | indra̍ | sa̱m-pāra̍ṇam | vasu̍ ||3.045.04||

3.045.05a sva̱yur i̍ndra sva̱rāḻ a̍si̱ smaddi̍ṣṭi̱ḥ svaya̍śastaraḥ |
3.045.05c sa vā̍vṛdhā̱na oja̍sā puruṣṭuta̱ bhavā̍ naḥ su̱śrava̍stamaḥ ||

sva̱-yuḥ | i̱ndra̱ | sva̱-rāṭ | a̱si̱ | smat-di̍ṣṭiḥ | svaya̍śaḥ-taraḥ |
saḥ | va̱vṛ̱dhā̱naḥ | oja̍sā | pu̱ru̱-stu̱ta̱ | bhava̍ | na̱ḥ | su̱śrava̍ḥ-tamaḥ ||3.045.05||


3.046.01a yu̱dhmasya̍ te vṛṣa̱bhasya̍ sva̱rāja̍ u̱grasya̱ yūna̱ḥ sthavi̍rasya̱ ghṛṣve̍ḥ |
3.046.01c ajū̍ryato va̱jriṇo̍ vī̱ryā̱3̱̍ṇīndra̍ śru̱tasya̍ maha̱to ma̱hāni̍ ||

yu̱dhmasya̍ | te̱ | vṛ̱ṣa̱bhasya̍ | sva̱-rāja̍ḥ | u̱grasya̍ | yūna̍ḥ | sthavi̍rasya | ghṛṣve̍ḥ |
ajū̍ryataḥ | va̱jriṇa̍ḥ | vī̱ryā̍ṇi | indra̍ | śru̱tasya̍ | ma̱ha̱taḥ | ma̱hāni̍ ||3.046.01||

3.046.02a ma̱hām̐ a̍si mahiṣa̱ vṛṣṇye̍bhir dhana̱spṛd u̍gra̱ saha̍māno a̱nyān |
3.046.02c eko̱ viśva̍sya̱ bhuva̍nasya̱ rājā̱ sa yo̱dhayā̍ ca kṣa̱yayā̍ ca̱ janā̍n ||

ma̱hān | a̱si̱ | ma̱hi̱ṣa̱ | vṛṣṇye̍bhiḥ | dha̱na̱-spṛt | u̱gra̱ | saha̍mānaḥ | a̱nyān |
eka̍ḥ | viśva̍sya | bhuva̍nasya | rājā̍ | saḥ | yo̱dhayā̍ | ca̱ | kṣa̱yayā̍ | ca̱ | janā̍n ||3.046.02||

3.046.03a pra mātrā̍bhī ririce̱ roca̍māna̱ḥ pra de̱vebhi̍r vi̱śvato̱ apra̍tītaḥ |
3.046.03c pra ma̱jmanā̍ di̱va indra̍ḥ pṛthi̱vyāḥ proror ma̱ho a̱ntari̍kṣād ṛjī̱ṣī ||

pra | mātrā̍bhiḥ | ri̱ri̱ce̱ | roca̍mānaḥ | pra | de̱vebhi̍ḥ | vi̱śvataḥ | apra̍ti-itaḥ |
pra | ma̱jmanā̍ | di̱vaḥ | indra̍ḥ | pṛ̱thi̱vyāḥ | pra | u̱roḥ | ma̱haḥ | a̱ntari̍kṣāt | ṛ̱jī̱ṣī ||3.046.03||

3.046.04a u̱ruṁ ga̍bhī̱raṁ ja̱nuṣā̱bhy u1̱̍graṁ vi̱śvavya̍casam ava̱tam ma̍tī̱nām |
3.046.04c indra̱ṁ somā̍saḥ pra̱divi̍ su̱tāsa̍ḥ samu̱draṁ na sra̱vata̱ ā vi̍śanti ||

u̱rum | ga̱bhī̱ram | ja̱nuṣā̍ | a̱bhi | u̱gram | vi̱śva-vya̍casam | a̱va̱tam | ma̱tī̱nām |
indra̍m | somā̍saḥ | pra̱-divi̍ | su̱tāsa̍ḥ | sa̱mu̱dram | na | sra̱vata̍ḥ | ā | vi̱śa̱nti̱ ||3.046.04||

3.046.05a yaṁ soma̍m indra pṛthi̱vīdyāvā̱ garbha̱ṁ na mā̱tā bi̍bhṛ̱tas tvā̱yā |
3.046.05c taṁ te̍ hinvanti̱ tam u̍ te mṛjanty adhva̱ryavo̍ vṛṣabha̱ pāta̱vā u̍ ||

yam | soma̍m | i̱ndra̱ | pṛ̱thi̱vīdyāvā̍ | garbha̍m | na | mā̱tā | bi̱bhṛ̱taḥ | tvā̱-yā |
tam | te̱ | hi̱nva̱nti̱ | tam | ū̱m̐ iti̍ | te̱ | mṛ̱ja̱nti̱ | a̱dhva̱ryava̍ḥ | vṛ̱ṣa̱bha̱ | pāta̱vai | ū̱m̐ iti̍ ||3.046.05||


3.047.01a ma̱rutvā̍m̐ indra vṛṣa̱bho raṇā̍ya̱ pibā̱ soma̍m anuṣva̱dham madā̍ya |
3.047.01c ā si̍ñcasva ja̱ṭhare̱ madhva̍ ū̱rmiṁ tvaṁ rājā̍si pra̱diva̍ḥ su̱tānā̍m ||

ma̱rutvā̍n | i̱ndra̱ | vṛ̱ṣa̱bhaḥ | raṇā̍ya | piba̍ | soma̍m | a̱nu̱-sva̱dham | madā̍ya |
ā | si̱ñca̱sva̱ | ja̱ṭhare̍ | madhva̍ḥ | ū̱rmim | tvam | rājā̍ | a̱si̱ | pra̱-diva̍ḥ | su̱tānā̍m ||3.047.01||

3.047.02a sa̱joṣā̍ indra̱ saga̍ṇo ma̱rudbhi̱ḥ soma̍m piba vṛtra̱hā śū̍ra vi̱dvān |
3.047.02c ja̱hi śatrū̱m̐r apa̱ mṛdho̍ nuda̱svāthābha̍yaṁ kṛṇuhi vi̱śvato̍ naḥ ||

sa̱-joṣā̍ḥ | i̱ndra̱ | sa-ga̍ṇaḥ | ma̱rut-bhi̍ḥ | soma̍m | pi̱ba̱ | vṛ̱tra̱-hā | śū̱ra̱ | vi̱dvān |
ja̱hi | śatrū̍n | apa̍ | mṛdha̍ḥ | nu̱da̱sva̱ | atha̍ | abha̍yam | kṛ̱ṇu̱hi̱ | vi̱śvata̍ḥ | na̱ḥ ||3.047.02||

3.047.03a u̱ta ṛ̱tubhi̍r ṛtupāḥ pāhi̱ soma̱m indra̍ de̱vebhi̱ḥ sakhi̍bhiḥ su̱taṁ na̍ḥ |
3.047.03c yām̐ ābha̍jo ma̱ruto̱ ye tvānv aha̍n vṛ̱tram ada̍dhu̱s tubhya̱m oja̍ḥ ||

u̱ta | ṛ̱tu-bhi̍ḥ | ṛ̱tu̱-pāḥ | pā̱hi̱ | soma̍m | indra̍ | de̱vebhi̍ḥ | sakhi̍-bhiḥ | su̱tam | na̱ḥ |
yān | ā | abha̍jaḥ | ma̱ruta̍ḥ | ye | tvā | anu̍ | aha̍n | vṛ̱tram | ada̍dhuḥ | tubhya̍m | oja̍ḥ ||3.047.03||

3.047.04a ye tvā̍hi̱hatye̍ maghava̱nn ava̍rdha̱n ye śā̍mba̱re ha̍rivo̱ ye gavi̍ṣṭau |
3.047.04c ye tvā̍ nū̱nam a̍nu̱mada̍nti̱ viprā̱ḥ pibe̍ndra̱ soma̱ṁ saga̍ṇo ma̱rudbhi̍ḥ ||

ye | tvā̱ | a̱hi̱-hatye̍ | ma̱gha̱-va̱n | ava̍rdhan | ye | śā̱mba̱re | ha̱ri̱va̱ḥ | ye | go-i̍ṣṭau |
ye | tvā̱ | nna̱m | a̱nu̱-mada̍nti | viprā̍ḥ | piba̍ | i̱ndra̱ | soma̍m | sa-ga̍ṇaḥ | ma̱rut-bhi̍ḥ ||3.047.04||

3.047.05a ma̱rutva̍ntaṁ vṛṣa̱bhaṁ vā̍vṛdhā̱nam aka̍vāriṁ di̱vyaṁ śā̱sam indra̍m |
3.047.05c vi̱śvā̱sāha̱m ava̍se̱ nūta̍nāyo̱graṁ sa̍ho̱dām i̱ha taṁ hu̍vema ||

ma̱rutva̍ntam | vṛṣa̱bham | va̱vṛ̱dhā̱nam | aka̍va-arim | di̱vyam | śā̱sam | indra̍m |
vi̱śvā̱-saham | ava̍se | nūta̍nāya | u̱gram | sa̱ha̱ḥ-dām | i̱ha | tam | hu̱ve̱ma̱ ||3.047.05||


3.048.01a sa̱dyo ha̍ jā̱to vṛ̍ṣa̱bhaḥ ka̱nīna̱ḥ prabha̍rtum āva̱d andha̍saḥ su̱tasya̍ |
3.048.01c sā̱dhoḥ pi̍ba pratikā̱maṁ yathā̍ te̱ rasā̍śiraḥ pratha̱maṁ so̱myasya̍ ||

sa̱dyaḥ | ha̱ | ja̱taḥ | vṛ̱ṣa̱bhaḥ | ka̱nīna̍ḥ | pra-bha̍rtum | ā̱va̱t | andha̍saḥ | su̱tasya̍ |
sā̱dhoḥ | pi̱ba̱ | pra̱ti̱-kā̱mam | yathā̍ | te̱ | rasa̍-āśiraḥ | pra̱tha̱mam | so̱myasya̍ ||3.048.01||

3.048.02a yaj jāya̍thā̱s tad aha̍r asya̱ kāme̱ 'ṁśoḥ pī̱yūṣa̍m apibo giri̱ṣṭhām |
3.048.02c taṁ te̍ mā̱tā pari̱ yoṣā̱ jani̍trī ma̱haḥ pi̱tur dama̱ āsi̍ñca̱d agre̍ ||

yat | jāya̍thāḥ | tat | aha̍ḥ | a̱sya̱ | kāme̍ | a̱ṁśoḥ | pī̱yūṣa̍m | a̱pi̱ba̱ḥ | gi̱ri̱-sthām |
tam | te̱ | mā̱tā | pari̍ | yoṣā̍ | jani̍trī | ma̱haḥ | pi̱tuḥ | dame̍ | ā | a̱si̱ñca̱t | agre̍ ||3.048.02||

3.048.03a u̱pa̱sthāya̍ mā̱tara̱m anna̍m aiṭṭa ti̱gmam a̍paśyad a̱bhi soma̱m ūdha̍ḥ |
3.048.03c pra̱yā̱vaya̍nn acara̱d gṛtso̍ a̱nyān ma̱hāni̍ cakre puru̱dhapra̍tīkaḥ ||

u̱pa̱-sthāya̍ | mā̱tara̍m | anna̍m | ai̱ṭṭa̱ | ti̱gmam | a̱pa̱śya̱t | a̱bhi | soma̍m | ūdha̍ḥ |
pra̱-ya̱vaya̍n | a̱ca̱ra̱t | gṛtsa̍ḥ | a̱nyān | ma̱hāni̍ | ca̱kre̱ | pu̱ru̱dha-pra̍tīkaḥ ||3.048.03||

3.048.04a u̱gras tu̍rā̱ṣāḻ a̱bhibhū̍tyojā yathāva̱śaṁ ta̱nva̍ṁ cakra e̱ṣaḥ |
3.048.04c tvaṣṭā̍ra̱m indro̍ ja̱nuṣā̍bhi̱bhūyā̱muṣyā̱ soma̍m apibac ca̱mūṣu̍ ||

u̱graḥ | tu̱rā̱ṣāṭ | a̱bhibhū̍ti-ojāḥ | ya̱thā̱-va̱śam | ta̱nva̍m | ca̱kre̱ | e̱ṣaḥ |
tvaṣṭā̍ram | indra̍ḥ | ja̱nuṣā̍ | a̱bhi̱-bhūya̍ | ā̱-muṣya̍ | soma̍m | a̱pi̱ba̱t | ca̱mūṣu̍ ||3.048.04||

3.048.05a śu̱naṁ hu̍vema ma̱ghavā̍na̱m indra̍m a̱smin bhare̱ nṛta̍ma̱ṁ vāja̍sātau |
3.048.05c śṛ̱ṇvanta̍m u̱gram ū̱taye̍ sa̱matsu̱ ghnanta̍ṁ vṛ̱trāṇi̍ sa̱ṁjita̱ṁ dhanā̍nām ||

śu̱nam | hu̱ve̱ma̱ | ma̱ghavā̍nam | indra̍m | a̱smin | bhare̍ | nṛ-ta̍mam | vāja̍-sātau |
śṛ̱ṇvanta̍m | u̱gram | ū̱taye̍ | sa̱mat-su̍ | ghnanta̍m | vṛ̱trāṇi̍ | sa̱m-jita̍m | dhanā̍nām ||3.048.05||


3.049.01a śaṁsā̍ ma̱hām indra̱ṁ yasmi̱n viśvā̱ ā kṛ̱ṣṭaya̍ḥ soma̱pāḥ kāma̱m avya̍n |
3.049.01c yaṁ su̱kratu̍ṁ dhi̱ṣaṇe̍ vibhvata̱ṣṭaṁ gha̱naṁ vṛ̱trāṇā̍ṁ ja̱naya̍nta de̱vāḥ ||

śaṁsā̍ | ma̱hām | indra̍m | yasmi̍n | viśvā̍ḥ | ā | kṛ̱ṣṭaya̍ḥ | so̱ma̱-pāḥ | kāma̍m | avya̍n |
yam | su̱-kratu̍m | dhi̱ṣaṇe̍ | vi̱bhva̱-ta̱ṣṭam | gha̱nam | vṛ̱trāṇā̍m | ja̱naya̍nta | de̱vāḥ ||3.049.01||

3.049.02a yaṁ nu naki̱ḥ pṛta̍nāsu sva̱rāja̍ṁ dvi̱tā tara̍ti̱ nṛta̍maṁ hari̱ṣṭhām |
3.049.02c i̱nata̍ma̱ḥ satva̍bhi̱r yo ha̍ śū̱ṣaiḥ pṛ̍thu̱jrayā̍ aminā̱d āyu̱r dasyo̍ḥ ||

yam | nu | naki̍ḥ | pṛta̍nāsu | sva̱-rāja̍m | dvi̱tā | tara̍ti | nṛ-ta̍mam | ha̱ri̱-sthām |
i̱na-ta̍maḥ | satva̍-bhiḥ | yaḥ | ha̱ | śū̱ṣaiḥ | pṛ̱thu̱-jrayā̍ḥ | a̱mi̱nā̱t | āyu̍ḥ | dasyo̍ḥ ||3.049.02||

3.049.03a sa̱hāvā̍ pṛ̱tsu ta̱raṇi̱r nārvā̍ vyāna̱śī roda̍sī me̱hanā̍vān |
3.049.03c bhago̱ na kā̱re havyo̍ matī̱nām pi̱teva̱ cāru̍ḥ su̱havo̍ vayo̱dhāḥ ||

sa̱ha-vā̍ | pṛ̱t-su | ta̱raṇi̍ḥ | na | arvā̍ | vi̱-ā̱na̱śī̱ iti̍ | roda̍sī̱ iti̍ | me̱hanā̍-vān |
bhaga̍ḥ | na | kā̱re | havya̍ḥ | ma̱tī̱nām | pi̱tā-i̍va | cāru̍ḥ | su̱-hava̍ḥ | va̱ya̱ḥ-dhāḥ ||3.049.03||

3.049.04a dha̱rtā di̱vo raja̍sas pṛ̱ṣṭa ū̱rdhvo ratho̱ na vā̱yur vasu̍bhir ni̱yutvā̍n |
3.049.04c kṣa̱pāṁ va̱stā ja̍ni̱tā sūrya̍sya̱ vibha̍ktā bhā̱gaṁ dhi̱ṣaṇe̍va̱ vāja̍m ||

dha̱rtā | di̱vaḥ | raja̍saḥ | pṛ̱ṣṭaḥ | ū̱rdhvaḥ | ratha̍ḥ | na | vā̱yuḥ | vasu̍-bhiḥ | ni̱yutvā̍n |
kṣa̱pām | va̱stā | ja̱ni̱tā | sūrya̍sya | vi-bha̍ktā | bhā̱gam | dhi̱ṣaṇā̍-iva | vāja̍m ||3.049.04||

3.049.05a śu̱naṁ hu̍vema ma̱ghavā̍na̱m indra̍m a̱smin bhare̱ nṛta̍ma̱ṁ vāja̍sātau |
3.049.05c śṛ̱ṇvanta̍m u̱gram ū̱taye̍ sa̱matsu̱ ghnanta̍ṁ vṛ̱trāṇi̍ sa̱ṁjita̱ṁ dhanā̍nām ||

śu̱nam | hu̱ve̱ma̱ | ma̱ghavā̍nam | indra̍m | a̱smin | bhare̍ | nṛ-ta̍mam | vāja̍-sātau |
śṛ̱ṇvanta̍m | u̱gram | ū̱taye̍ | sa̱mat-su̍ | ghnanta̍m | vṛ̱trāṇi̍ | sa̱m-jita̍m | dhanā̍nām ||3.049.05||


3.050.01a indra̱ḥ svāhā̍ pibatu̱ yasya̱ soma̍ ā̱gatyā̱ tumro̍ vṛṣa̱bho ma̱rutvā̍n |
3.050.01c oru̱vyacā̍ḥ pṛṇatām e̱bhir annai̱r āsya̍ ha̱vis ta̱nva1̱̍ḥ kāma̍m ṛdhyāḥ ||

indra̍ḥ | svāhā̍ | pi̱ba̱tu̱ | yasya̍ | soma̍ḥ | ā̱-gatya̍ | tumra̍ḥ | vṛ̱ṣa̱bhaḥ | ma̱rutvā̍n |
ā | u̱ru̱-vyacā̍ḥ | pṛ̱ṇa̱tā̱m | e̱bhiḥ | annai̍ḥ | ā | a̱sya̱ | ha̱viḥ | ta̱nva̍ḥ | kāma̍m | ṛ̱dhyā̱ḥ ||3.050.01||

3.050.02a ā te̍ sapa̱ryū ja̱vase̍ yunajmi̱ yayo̱r anu̍ pra̱diva̍ḥ śru̱ṣṭim āva̍ḥ |
3.050.02c i̱ha tvā̍ dheyu̱r hara̍yaḥ suśipra̱ pibā̱ tv a1̱̍sya suṣu̍tasya̱ cāro̍ḥ ||

ā | te̱ | sa̱pa̱ryū iti̍ | ja̱vase̍ | yu̱na̱jmi̱ | yayo̍ḥ | anu̍ | pra̱-diva̍ḥ | śru̱ṣṭim | āva̍ḥ |
i̱ha | tvā̱ | dhe̱yu̱ḥ | hara̍yaḥ | su̱-śi̱pra̱ | piba̍ | tu | a̱sya | su-su̍tasya | cāro̍ḥ ||3.050.02||

3.050.03a gobhi̍r mimi̱kṣuṁ da̍dhire supā̱ram indra̱ṁ jyaiṣṭhyā̍ya̱ dhāya̍se gṛṇā̱nāḥ |
3.050.03c ma̱ndā̱naḥ soma̍m papi̱vām̐ ṛ̍jīṣi̱n sam a̱smabhya̍m puru̱dhā gā i̍ṣaṇya ||

gobhi̍ḥ | mi̱mi̱kṣum | da̱dhi̱re̱ | su̱-pā̱ram | indra̍m | jyaiṣṭhyā̍ya | dhāya̍se | gṛ̱ṇā̱nāḥ |
ma̱ndā̱naḥ | soma̍m | pa̱pi̱-vān | ṛ̱jī̱ṣi̱n | sam | a̱smabhya̍m | pu̱ru̱dhā | gāḥ | i̱ṣa̱ṇya̱ ||3.050.03||

3.050.04a i̱maṁ kāma̍m mandayā̱ gobhi̱r aśvai̍ś ca̱ndrava̍tā̱ rādha̍sā pa̱pratha̍ś ca |
3.050.04c sva̱ryavo̍ ma̱tibhi̱s tubhya̱ṁ viprā̱ indrā̍ya̱ vāha̍ḥ kuśi̱kāso̍ akran ||

i̱mam | kāma̍m | ma̱nda̱ya̱ | gobhi̍ḥ | aśvai̍ḥ | ca̱ndra-va̍tā | rādha̍sā | pa̱pratha̍ḥ | ca̱ |
sva̱ḥ-yava̍ḥ | ma̱ti-bhi̍ḥ | tubhya̍m | viprā̍ḥ | indrā̍ya | vāha̍ḥ | ku̱śi̱kāsa̍ḥ | a̱kra̱n ||3.050.04||

3.050.05a śu̱naṁ hu̍vema ma̱ghavā̍na̱m indra̍m a̱smin bhare̱ nṛta̍ma̱ṁ vāja̍sātau |
3.050.05c śṛ̱ṇvanta̍m u̱gram ū̱taye̍ sa̱matsu̱ ghnanta̍ṁ vṛ̱trāṇi̍ sa̱ṁjita̱ṁ dhanā̍nām ||

śu̱nam | hu̱ve̱ma̱ | ma̱ghavā̍nam | indra̍m | a̱smin | bhare̍ | nṛ-ta̍mam | vāja̍-sātau |
śṛ̱ṇvanta̍m | u̱gram | ū̱taye̍ | sa̱mat-su̍ | ghnanta̍m | vṛ̱trāṇi̍ | sa̱m-jita̍m | dhanā̍nām ||3.050.05||


3.051.01a ca̱rṣa̱ṇī̱dhṛta̍m ma̱ghavā̍nam u̱kthya1̱̍m indra̱ṁ giro̍ bṛha̱tīr a̱bhy a̍nūṣata |
3.051.01c vā̱vṛ̱dhā̱nam pu̍ruhū̱taṁ su̍vṛ̱ktibhi̱r ama̍rtya̱ṁ jara̍māṇaṁ di̱ve-di̍ve ||

ca̱rṣa̱ṇi̱-dhṛta̍m | ma̱gha-vā̍nam | u̱kthya̍m | indra̍m | gira̍ḥ | bṛ̱ha̱tīḥ | a̱bhi | a̱nū̱ṣa̱ta̱ |
va̱vṛ̱dha̱nam | pu̱ru̱-hū̱tam | su̱vṛ̱kti-bhi̍ḥ | ama̍rtyam | jara̍māṇam | di̱ve-di̍ve ||3.051.01||

3.051.02a śa̱takra̍tum arṇa̱vaṁ śā̱kina̱ṁ nara̱ṁ giro̍ ma̱ indra̱m upa̍ yanti vi̱śvata̍ḥ |
3.051.02c vā̱ja̱sani̍m pū̱rbhida̱ṁ tūrṇi̍m a̱ptura̍ṁ dhāma̱sāca̍m abhi̱ṣāca̍ṁ sva̱rvida̍m ||

śa̱ta-kra̍tum | a̱rṇa̱vam | śā̱kina̍m | nara̍m | gira̍ḥ | me̱ | indra̍m | upa̍ | ya̱nti̱ | vi̱śvata̍ḥ |
vā̱ja̱-sani̍m | pū̱ḥ-bhida̍m | tūrṇi̍m | a̱p-tura̍m | dhā̱ma̱-sāca̍m | a̱bhi̱-sāca̍m | sva̱ḥ-vida̍m ||3.051.02||

3.051.03a ā̱ka̱re vaso̍r jari̱tā pa̍nasyate 'ne̱hasa̱ḥ stubha̱ indro̍ duvasyati |
3.051.03c vi̱vasva̍ta̱ḥ sada̍na̱ ā hi pi̍pri̱ye sa̍trā̱sāha̍m abhimāti̱hana̍ṁ stuhi ||

ā̱-ka̱re | vaso̍ḥ | ja̱ri̱tā | pa̱na̱sya̱te̱ | a̱ne̱hasa̍ḥ | stubha̍ḥ | indra̍ḥ | du̱va̱sya̱ti̱ |
vi̱vasva̍taḥ | sada̍ne | ā | hi | pi̱pri̱ye | sa̱trā̱-saha̍m | a̱bhi̱mā̱ti̱-hana̍m | stu̱hi̱ ||3.051.03||

3.051.04a nṛ̱ṇām u̍ tvā̱ nṛta̍maṁ gī̱rbhir u̱kthair a̱bhi pra vī̱ram a̍rcatā sa̱bādha̍ḥ |
3.051.04c saṁ saha̍se purumā̱yo ji̍hīte̱ namo̍ asya pra̱diva̱ eka̍ īśe ||

nṛ̱ṇām | ū̱m̐ iti̍ | tvā̱ | nṛ-ta̍mam | gī̱ḥ-bhiḥ | u̱kthaiḥ | a̱bhi | pra | vī̱ram | a̱rca̱ta̱ | sa̱-bādha̍ḥ |
sam | saha̍se | pu̱ru̱-mā̱yaḥ | ji̱hī̱te̱ | nama̍ḥ | a̱sya̱ | pra̱-diva̍ḥ | eka̍ḥ | ī̱śe̱ ||3.051.04||

3.051.05a pū̱rvīr a̍sya ni̱ṣṣidho̱ martye̍ṣu pu̱rū vasū̍ni pṛthi̱vī bi̍bharti |
3.051.05c indrā̍ya̱ dyāva̱ oṣa̍dhīr u̱tāpo̍ ra̱yiṁ ra̍kṣanti jī̱rayo̱ vanā̍ni ||

pū̱rvīḥ | a̱sya̱ | ni̱ḥ-si̍dha̍ḥ | martye̍ṣu | pu̱ru | vasū̍ni | pṛ̱thi̱vī | bi̱bha̱rti̱ |
indrā̍ya | dyāva̍ḥ | oṣa̍dhīḥ | u̱ta | āpa̍ḥ | ra̱yim | ra̱kṣa̱nti̱ | jī̱raya̍ḥ | vanā̍ni ||3.051.05||

3.051.06a tubhya̱m brahmā̍ṇi̱ gira̍ indra̱ tubhya̍ṁ sa̱trā da̍dhire harivo ju̱ṣasva̍ |
3.051.06c bo̱dhy ā̱3̱̍pir ava̍so̱ nūta̍nasya̱ sakhe̍ vaso jari̱tṛbhyo̱ vayo̍ dhāḥ ||

tubhya̍m | brahmā̍ṇi | gira̍ḥ | i̱ndra̱ | tubhya̍m | sa̱trā | da̱dhi̱re̱ | ha̱ri̱-va̱ḥ | ju̱ṣasva̍ |
bo̱dhi | ā̱piḥ | ava̍saḥ | nūta̍nasya | sakhe̍ | va̱so̱ iti̍ | ja̱ri̱tṛ-bhya̍ḥ | vaya̍ḥ | dhā̱ḥ ||3.051.06||

3.051.07a indra̍ marutva i̱ha pā̍hi̱ soma̱ṁ yathā̍ śāryā̱te api̍baḥ su̱tasya̍ |
3.051.07c tava̱ praṇī̍tī̱ tava̍ śūra̱ śarma̱nn ā vi̍vāsanti ka̱vaya̍ḥ suya̱jñāḥ ||

indra̍ | ma̱ru̱tva̱ḥ | i̱ha | pā̱hi̱ | soma̍m | yathā̍ | śā̱ryā̱te | api̍baḥ | su̱tasya̍ |
tava̍ | pra-nī̍tī | tava̍ | śū̱ra̱ | śarma̍n | ā | vi̱vā̱sa̱nti̱ | ka̱vaya̍ḥ | su̱-ya̱jñāḥ ||3.051.07||

3.051.08a sa vā̍vaśā̱na i̱ha pā̍hi̱ soma̍m ma̱rudbhi̍r indra̱ sakhi̍bhiḥ su̱taṁ na̍ḥ |
3.051.08c jā̱taṁ yat tvā̱ pari̍ de̱vā abhū̍ṣan ma̱he bharā̍ya puruhūta̱ viśve̍ ||

saḥ | vā̱va̱śā̱naḥ | i̱ha | pā̱hi̱ | soma̍m | ma̱rut-bhi̍ḥ | i̱ndra̱ | sakhi̍-bhiḥ | su̱tam | na̱ḥ |
jā̱tam | yat | tvā̱ | pari̍ | de̱vāḥ | abhū̍ṣan | ma̱he | bharā̍ya | pu̱ru̱-hū̱ta̱ | viśve̍ ||3.051.08||

3.051.09a a̱ptūrye̍ maruta ā̱pir e̱ṣo 'ma̍nda̱nn indra̱m anu̱ dāti̍vārāḥ |
3.051.09c tebhi̍ḥ sā̱kam pi̍batu vṛtrakhā̱daḥ su̱taṁ soma̍ṁ dā̱śuṣa̱ḥ sve sa̱dhasthe̍ ||

a̱p-tūrye̍ | ma̱ru̱ta̱ḥ | ā̱piḥ | e̱ṣaḥ | ama̍ndan | indra̍m | anu̍ | dāti̍-vārāḥ |
tebhi̍ḥ | sā̱kam | pi̱ba̱tu̱ | vṛ̱tra̱-khā̱daḥ | su̱tam | soma̍m | dā̱śuṣa̍ḥ | sve | sa̱dha-sthe̍ ||3.051.09||

3.051.10a i̱daṁ hy anv oja̍sā su̱taṁ rā̍dhānām pate |
3.051.10c pibā̱ tv a1̱̍sya gi̍rvaṇaḥ ||

i̱dam | hi | anu̍ | oja̍sā | su̱tam | rā̱dhā̱nā̱m | pa̱te̱ |
piba̍ | tu | a̱sya | gi̱rva̱ṇa̱ḥ ||3.051.10||

3.051.11a yas te̱ anu̍ sva̱dhām asa̍t su̱te ni ya̍ccha ta̱nva̍m |
3.051.11c sa tvā̍ mamattu so̱myam ||

yaḥ | te̱ | anu̍ | sva̱dhām | asa̍t | su̱te | ni | ya̱ccha̱ | ta̱nva̍m |
saḥ | tvā̱ | ma̱ma̱ttu̱ | so̱myam ||3.051.11||

3.051.12a pra te̍ aśnotu ku̱kṣyoḥ prendra̱ brahma̍ṇā̱ śira̍ḥ |
3.051.12c pra bā̱hū śū̍ra̱ rādha̍se ||

pra | te̱ | a̱śno̱tu̱ | ku̱kṣyoḥ | pra | i̱ndra̱ | brahma̍ṇā | śira̍ḥ |
pra | bā̱hū iti̍ | śū̱ra̱ | rādha̍se ||3.051.12||


3.052.01a dhā̱nāva̍ntaṁ kara̱mbhiṇa̍m apū̱pava̍ntam u̱kthina̍m |
3.052.01c indra̍ prā̱tar ju̍ṣasva naḥ ||

dhā̱nā-va̍ntam | ka̱ra̱mbhiṇa̍m | a̱pū̱pa-va̍ntam | u̱kthina̍m |
indra̍ | prā̱taḥ | ju̱ṣa̱sva̱ | na̱ḥ ||3.052.01||

3.052.02a pu̱ro̱ḻāśa̍m paca̱tya̍ṁ ju̱ṣasve̱ndrā gu̍rasva ca |
3.052.02c tubhya̍ṁ ha̱vyāni̍ sisrate ||

pu̱ro̱ḻāsa̍m | pa̱ca̱tya̍m | ju̱ṣasva̍ | i̱ndra̱ | ā | gu̱ra̱sva̱ | ca̱ |
tubhya̍m | ha̱vyāni̍ | si̱sra̱te̱ ||3.052.02||

3.052.03a pu̱ro̱ḻāśa̍ṁ ca no̱ ghaso̍ jo̱ṣayā̍se̱ gira̍ś ca naḥ |
3.052.03c va̱dhū̱yur i̍va̱ yoṣa̍ṇām ||

pu̱ro̱ḻāsa̍m | ca̱ | na̱ḥ | ghasa̍ḥ | jo̱ṣayā̍se | gira̍ḥ | ca̱ | na̱ḥ |
va̱dhū̱yuḥ-i̍va | yoṣa̍ṇām ||3.052.03||

3.052.04a pu̱ro̱ḻāśa̍ṁ sanaśruta prātaḥsā̱ve ju̍ṣasva naḥ |
3.052.04c indra̱ kratu̱r hi te̍ bṛ̱han ||

pu̱ro̱ḻāsa̍m | sa̱na̱-śru̱ta̱ | prā̱ta̱ḥ-sā̱ve | ju̱ṣa̱sva̱ | na̱ḥ |
indra̍ | kratu̍ḥ | hi | te̱ | bṛ̱han ||3.052.04||

3.052.05a mādhya̍ṁdinasya̱ sava̍nasya dhā̱nāḥ pu̍ro̱ḻāśa̍m indra kṛṣve̱ha cāru̍m |
3.052.05c pra yat sto̱tā ja̍ri̱tā tūrṇya̍rtho vṛṣā̱yamā̍ṇa̱ upa̍ gī̱rbhir īṭṭe̍ ||

mādhya̍ndinasya | sava̍nasya | dhā̱nāḥ | pu̱ro̱ḻāsa̍m | i̱ndra̱ | kṛ̱ṣva̱ | i̱ha | cāru̍m |
pra | yat | sto̱tā | ja̱ri̱tā | tūrṇi̍-arthaḥ | vṛ̱ṣa̱-yamā̍ṇaḥ | upa̍ | gī̱ḥ-bhiḥ | īṭṭe̍ ||3.052.05||

3.052.06a tṛ̱tīye̍ dhā̱nāḥ sava̍ne puruṣṭuta puro̱ḻāśa̱m āhu̍tam māmahasva naḥ |
3.052.06c ṛ̱bhu̱manta̱ṁ vāja̍vantaṁ tvā kave̱ praya̍svanta̱ upa̍ śikṣema dhī̱tibhi̍ḥ ||

tṛ̱tīye̍ | dhā̱nāḥ | sava̍ne | pu̱ru̱-stu̱ta̱ | pu̱ro̱ḻāśa̍m | ā-hu̍tam | ma̱ma̱ha̱sva̱ | na̱ḥ |
ṛ̱bhu̱-manta̍m | vāja̍-vantam | tvā̱ | ka̱ve̱ | praya̍svantaḥ | upa̍ | śi̱kṣe̱ma̱ | dhī̱ti-bhi̍ḥ ||3.052.06||

3.052.07a pū̱ṣa̱ṇvate̍ te cakṛmā kara̱mbhaṁ hari̍vate̱ harya̍śvāya dhā̱nāḥ |
3.052.07c a̱pū̱pam a̍ddhi̱ saga̍ṇo ma̱rudbhi̱ḥ soma̍m piba vṛtra̱hā śū̍ra vi̱dvān ||

pū̱ṣa̱ṇ-vate̍ | te̱ | ca̱kṛ̱ma̱ | ka̱ra̱mbham | hari̍-vate | hari̍-aśvāya | dhā̱nāḥ |
a̱pū̱pam | a̱ddhi̱ | sa-ga̍ṇaḥ | ma̱rut-bhi̍ḥ | soma̍m | pi̱ba̱ | vṛ̱tra̱-hā | śū̱ra̱ | vi̱dvān ||3.052.07||

3.052.08a prati̍ dhā̱nā bha̍rata̱ tūya̍m asmai puro̱ḻāśa̍ṁ vī̱rata̍māya nṛ̱ṇām |
3.052.08c di̱ve-di̍ve sa̱dṛśī̍r indra̱ tubhya̱ṁ vardha̍ntu tvā soma̱peyā̍ya dhṛṣṇo ||

prati̍ | dhā̱nāḥ | bha̱ra̱ta̱ | tūya̍m | a̱smai̱ | pu̱ro̱ḻāśa̍m | vī̱ra-ta̍māya | nṛ̱ṇām |
di̱ve-di̍ve | sa̱-dṛśī̍ḥ | i̱ndra̱ | tubhya̍m | vardha̍ntu | tvā̱ | so̱ma̱-peyā̍ya | dhṛ̱ṣṇo̱ iti̍ ||3.052.08||


3.053.01a indrā̍parvatā bṛha̱tā rathe̍na vā̱mīr iṣa̱ ā va̍hataṁ su̱vīrā̍ḥ |
3.053.01c vī̱taṁ ha̱vyāny a̍dhva̱reṣu̍ devā̱ vardhe̍thāṁ gī̱rbhir iḻa̍yā̱ mada̍ntā ||

indrā̍parvatā | bṛ̱ha̱tā | rathe̍na | vā̱mīḥ | iṣa̍ḥ | ā | va̱ha̱ta̱m | su̱-vīrā̍ḥ |
vī̱tam | ha̱vyāni̍ | a̱dhva̱reṣu̍ | de̱vā̱ | vardhe̍thām | gī̱ḥ-bhiḥ | iḻi̍yā | mada̍ntā ||3.053.01||

3.053.02a tiṣṭhā̱ su ka̍m maghava̱n mā parā̍ gā̱ḥ soma̍sya̱ nu tvā̱ suṣu̍tasya yakṣi |
3.053.02c pi̱tur na pu̱traḥ sica̱m ā ra̍bhe ta̱ indra̱ svādi̍ṣṭhayā gi̱rā śa̍cīvaḥ ||

tiṣṭha̍ | su | ka̱m | ma̱gha̱-va̱n | mā | parā̍ | gā̱ḥ | soma̍sya | nu | tvā̱ | su-su̍tasya | ya̱kṣi̱ |
pi̱tuḥ | na | pu̱traḥ | sica̍m | ā | ra̱bhe̱ | te̱ | indra̍ | svādi̍ṣṭhayā | gi̱rā | śa̱cī̱-va̱ḥ ||3.053.02||

3.053.03a śaṁsā̍vādhvaryo̱ prati̍ me gṛṇī̱hīndrā̍ya̱ vāha̍ḥ kṛṇavāva̱ juṣṭa̍m |
3.053.03c edam ba̱rhir yaja̍mānasya sī̱dāthā̍ ca bhūd u̱ktham indrā̍ya śa̱stam ||

śaṁsā̍va | a̱dhva̱ryo̱ iti̍ | prati̍ | me̱ | gṛ̱ṇī̱hi̱ | indrā̍ya | vāha̍ḥ | kṛ̱ṇa̱vā̱va̱ | juṣṭa̍m |
ā | i̱dam | ba̱rhiḥ | yaja̍mānasya | sī̱da̱ | atha̍ | ca̱ | bhū̱t | u̱ktham | indrā̍ya | śa̱stam ||3.053.03||

3.053.04a jā̱yed asta̍m maghava̱n sed u̱ yoni̱s tad it tvā̍ yu̱ktā hara̍yo vahantu |
3.053.04c ya̱dā ka̱dā ca̍ su̱navā̍ma̱ soma̍m a̱gniṣ ṭvā̍ dū̱to dha̍nvā̱ty accha̍ ||

jā̱yā | it | asta̍m | ma̱gha̱-va̱n | sā | it | ū̱m̐ iti̍ | yoni̍ḥ | tat | it | tvā̱ | yu̱ktāḥ | hara̍yaḥ | va̱ha̱ntu̱ |
ya̱dā | ka̱dā | ca̱ | su̱navā̍ma | soma̍m | a̱gniḥ | tvā̱ | dū̱taḥ | dha̱nvā̱ti̱ | accha̍ ||3.053.04||

3.053.05a parā̍ yāhi maghava̱nn ā ca̍ yā̱hīndra̍ bhrātar ubha̱yatrā̍ te̱ artha̍m |
3.053.05c yatrā̱ ratha̍sya bṛha̱to ni̱dhāna̍ṁ vi̱moca̍naṁ vā̱jino̱ rāsa̍bhasya ||

parā̍ | yā̱hi̱ | ma̱gha̱-va̱n | ā | ca̱ | yā̱hi̱ | indra̍ | bhrā̱ta̱ḥ | u̱bha̱yatra̍ | te̱ | artha̍m |
yatra̍ | ratha̍sya | bṛ̱ha̱taḥ | ni̱-dhāna̍m | vi̱-moca̍nam | vā̱jina̍ḥ | rāsa̍bhasya ||3.053.05||

3.053.06a apā̱ḥ soma̱m asta̍m indra̱ pra yā̍hi kalyā̱ṇīr jā̱yā su̱raṇa̍ṁ gṛ̱he te̍ |
3.053.06c yatrā̱ ratha̍sya bṛha̱to ni̱dhāna̍ṁ vi̱moca̍naṁ vā̱jino̱ dakṣi̍ṇāvat ||

apā̍ḥ | soma̍m | asta̍m | i̱ndra̱ | pra | yā̱hi̱ | ka̱lyā̱ṇīḥ | jā̱yā | su̱-raṇa̍m | gṛ̱he | te̱ |
yatra̍ | ratha̍sya | bṛ̱ha̱taḥ | ni̱-dhāna̍m | vi̱-moca̍nam | vā̱jina̍ḥ | dakṣi̍ṇā-vat ||3.053.06||

3.053.07a i̱me bho̱jā aṅgi̍raso̱ virū̍pā di̱vas pu̱trāso̱ asu̍rasya vī̱rāḥ |
3.053.07c vi̱śvāmi̍trāya̱ dada̍to ma̱ghāni̍ sahasrasā̱ve pra ti̍ranta̱ āyu̍ḥ ||

i̱me | bho̱jāḥ | aṅgi̍rasaḥ | vi-rū̍pāḥ | di̱vaḥ | pu̱trāsa̍ḥ | asu̍rasya | vī̱rāḥ |
vi̱śvāmi̍trāya | dada̍taḥ | ma̱ghāni̍ | sa̱ha̱sra̱-sā̱ve | pra | ti̱ra̱nte̱ | āyu̍ḥ ||3.053.07||

3.053.08a rū̱paṁ-rū̍pam ma̱ghavā̍ bobhavīti mā̱yāḥ kṛ̍ṇvā̱nas ta̱nva1̱̍m pari̱ svām |
3.053.08c trir yad di̱vaḥ pari̍ muhū̱rtam āgā̱t svair mantrai̱r anṛ̍tupā ṛ̱tāvā̍ ||

rū̱pam-rū̍pam | ma̱gha-vā̍ | bo̱bha̱vī̱ti̱ | mā̱yāḥ | kṛ̱ṇvā̱naḥ | ta̱nva̍m | pari̍ | svām |
triḥ | yat | di̱vaḥ | pari̍ | mu̱hū̱rtam | ā | agā̍t | svaiḥ | mantrai̍ḥ | anṛ̍tu-pāḥ | ṛ̱ta-vā̍ ||3.053.08||

3.053.09a ma̱hām̐ ṛṣi̍r deva̱jā de̱vajū̱to 'sta̍bhnā̱t sindhu̍m arṇa̱vaṁ nṛ̱cakṣā̍ḥ |
3.053.09c vi̱śvāmi̍tro̱ yad ava̍hat su̱dāsa̱m apri̍yāyata kuśi̱kebhi̱r indra̍ḥ ||

ma̱hān | ṛṣi̍ḥ | de̱va̱-jāḥ | de̱va-jū̍taḥ | asta̍bhnāt | sindhu̍m | a̱rṇa̱vam | nṛ̱-cakṣā̍ḥ |
vi̱śvāmi̍traḥ | yat | ava̍hat | su̱-dāsa̍m | apri̍yāyata | ku̱śi̱kebhi̍ḥ | indra̍ḥ ||3.053.09||

3.053.10a ha̱ṁsā i̍va kṛṇutha̱ śloka̱m adri̍bhi̱r mada̍nto gī̱rbhir a̍dhva̱re su̱te sacā̍ |
3.053.10c de̱vebhi̍r viprā ṛṣayo nṛcakṣaso̱ vi pi̍badhvaṁ kuśikāḥ so̱myam madhu̍ ||

ha̱ṁsāḥ-i̍va | kṛ̱ṇu̱tha̱ | śloka̍m | adri̍-bhiḥ | mada̍ntaḥ | gī̱ḥ-bhiḥ | a̱dhva̱re | su̱te | sacā̍ |
de̱vebhi̍ḥ | vi̱prā̱ḥ | ṛ̱ṣa̱ya̱ḥ | nṛ̱-ca̱kṣa̱sa̱ḥ | vi | pi̱ba̱dhva̱m | ku̱śi̱kā̱ḥ | so̱myam | madhu̍ ||3.053.10||

3.053.11a upa̱ preta̍ kuśikāś ce̱taya̍dhva̱m aśva̍ṁ rā̱ye pra mu̍ñcatā su̱dāsa̍ḥ |
3.053.11c rājā̍ vṛ̱traṁ ja̍ṅghana̱t prāg apā̱g uda̱g athā̍ yajāte̱ vara̱ ā pṛ̍thi̱vyāḥ ||

upa̍ | pra | i̱ta̱ | ku̱śi̱kā̱ḥ | ce̱taya̍dhvam | aśva̍m | rā̱ye | pra | mu̱ñca̱ta̱ | su̱-dāsa̍ḥ |
rājā̍ | vṛ̱tram | ja̱ṅgha̱na̱t | prāk | apā̍k | uda̍k | atha̍ | ya̱jā̱te̱ | vare̍ | ā | pṛ̱thi̱vyāḥ ||3.053.11||

3.053.12a ya i̱me roda̍sī u̱bhe a̱ham indra̱m atu̍ṣṭavam |
3.053.12c vi̱śvāmi̍trasya rakṣati̱ brahme̱dam bhāra̍ta̱ṁ jana̍m ||

yaḥ | i̱me iti̍ | roda̍sī̱ iti̍ | u̱bhe iti̍ | a̱ham | indra̍m | atu̍stavam |
vi̱śvāmi̍trasya | ra̱kṣa̱ti̱ | brahma̍ | i̱dam | bhāra̍tam | jana̍m ||3.053.12||

3.053.13a vi̱śvāmi̍trā arāsata̱ brahmendrā̍ya va̱jriṇe̍ |
3.053.13c kara̱d in na̍ḥ su̱rādha̍saḥ ||

vi̱śvāmi̍trāḥ | a̱rā̱sa̱ta̱ | brahma̍ | indrā̍ya | va̱jriṇe̍ |
kara̍t | it | na̱ḥ | su̱-rādha̍saḥ ||3.053.13||

3.053.14a kiṁ te̍ kṛṇvanti̱ kīka̍ṭeṣu̱ gāvo̱ nāśira̍ṁ du̱hre na ta̍panti gha̱rmam |
3.053.14c ā no̍ bhara̱ prama̍gandasya̱ vedo̍ naicāśā̱kham ma̍ghavan randhayā naḥ ||

kim | te̱ | kṛ̱ṇva̱nti̱ | kīka̍ṭeṣu | gāva̍ḥ | na | ā̱-śira̍n | du̱hre | na | ta̱pa̱nti̱ | gha̱rmam |
ā | na̱ḥ | bha̱ra̱ | pra-ma̍gandasya | veda̍ḥ | nai̱cā̱-śā̱kham | ma̱gha̱-va̱n | ra̱ndha̱ya̱ | na̱ḥ ||3.053.14||

3.053.15a sa̱sa̱rpa̱rīr ama̍ti̱m bādha̍mānā bṛ̱han mi̍māya ja̱mada̍gnidattā |
3.053.15c ā sūrya̍sya duhi̱tā ta̍tāna̱ śravo̍ de̱veṣv a̱mṛta̍m aju̱ryam ||

sa̱sa̱rpa̱rīḥ | ama̍tim | bādha̍mānā | bṛ̱hat | mi̱mā̱ya̱ | ja̱mada̍gni-dattā |
ā | sūrya̍sya | du̱hi̱tā | ta̱tā̱na̱ | śrava̍ḥ | de̱veṣu̍ | a̱mṛta̍m | a̱ju̱ryam ||3.053.15||

3.053.16a sa̱sa̱rpa̱rīr a̍bhara̱t tūya̍m e̱bhyo 'dhi̱ śrava̱ḥ pāñca̍janyāsu kṛ̱ṣṭiṣu̍ |
3.053.16c sā pa̱kṣyā̱3̱̍ navya̱m āyu̱r dadhā̍nā̱ yām me̍ palastijamada̱gnayo̍ da̱duḥ ||

sa̱sa̱rpa̱rīḥ | a̱bha̱ra̱t | tūya̍m | e̱bhya̱ḥ | adhi̍ | śrava̍ḥ | pāñca̍-janyāsu | kṛ̱ṣṭiṣu̍ |
sā | pa̱kṣyā̍ | navya̍m | āyu̍ḥ | dadhā̍nā | yām | me̱ | pa̱la̱sti-ja̱ma̱da̱gnaya̍ḥ | da̱duḥ ||3.053.16||

3.053.17a sthi̱rau gāvau̍ bhavatāṁ vī̱ḻur akṣo̱ meṣā vi va̍rhi̱ mā yu̱gaṁ vi śā̍ri |
3.053.17c indra̍ḥ pāta̱lye̍ dadatā̱ṁ śarī̍to̱r ari̍ṣṭaneme a̱bhi na̍ḥ sacasva ||

sthi̱rau | gāvau̍ | bha̱va̱tā̱m | vī̱ḻuḥ | akṣa̍ḥ | mā | ī̱ṣā | vi | va̱rhi̱ | mā | yu̱gam | vi | śā̱ri̱ |
indra̍ḥ | pā̱ta̱lye̱ iti̍ | da̱da̱tā̱m | śarī̍toḥ | ari̍ṣṭa-neme | a̱bhi | na̱ḥ | sa̱ca̱sva̱ ||3.053.17||

3.053.18a bala̍ṁ dhehi ta̱nūṣu̍ no̱ bala̍m indrāna̱ḻutsu̍ naḥ |
3.053.18c bala̍ṁ to̱kāya̱ tana̍yāya jī̱vase̱ tvaṁ hi ba̍la̱dā asi̍ ||

bala̍m | dhe̱hi̱ | ta̱nūṣu̍ | na̱ḥ | bala̍m | i̱ndra̱ | a̱na̱ḻut-su̍ | na̱ḥ |
bala̍m | to̱kāya̍ | tana̍yāya | jī̱vase | tvam | hi | ba̱la̱-dāḥ | asi̍ ||3.053.18||

3.053.19a a̱bhi vya̍yasva khadi̱rasya̱ sāra̱m ojo̍ dhehi spanda̱ne śi̱ṁśapā̍yām |
3.053.19c akṣa̍ vīḻo vīḻita vī̱ḻaya̍sva̱ mā yāmā̍d a̱smād ava̍ jīhipo naḥ ||

a̱bhi | vya̱ya̱sva̱ | kha̱di̱rasya̍ | sāra̍m | oja̍ḥ | dhe̱hi̱ | spa̱nda̱ne | śi̱ṁśapā̍yām |
akṣa̍ | vī̱ḻo̱ iti̍ | vī̱ḻi̱ta̱ | vī̱ḻaya̍sva | mā | yāmā̍t | a̱smāt | ava̍ | jī̱hi̱pa̱ḥ | na̱ḥ ||3.053.19||

3.053.20a a̱yam a̱smān vana̱spati̱r mā ca̱ hā mā ca̍ rīriṣat |
3.053.20c sva̱sty ā gṛ̱hebhya̱ āva̱sā ā vi̱moca̍nāt ||

a̱yam | a̱smān | vana̱spati̍ḥ | mā | ca̱ | hāḥ | mā | ca̱ | ri̱ri̱ṣa̱t |
sva̱sti | ā | gṛ̱hebhya̍ḥ | ā | a̱va̱sai | ā | vi̱-moca̍nāt ||3.053.20||

3.053.21a indro̱tibhi̍r bahu̱lābhi̍r no a̱dya yā̍cchre̱ṣṭhābhi̍r maghavañ chūra jinva |
3.053.21c yo no̱ dveṣṭy adha̍ra̱ḥ sas pa̍dīṣṭa̱ yam u̍ dvi̱ṣmas tam u̍ prā̱ṇo ja̍hātu ||

indra̍ | ū̱ti-bhi̍ḥ | ba̱hu̱lābhi̍ḥ | na̱ḥ | a̱dya | yā̱t-śre̱ṣṭhābhi̍ḥ | ma̱gha̱-va̱n | śū̱ra̱ | ji̱nva̱ |
yaḥ | na̱ḥ | dveṣṭi̍ | adha̍raḥ | saḥ | pa̱dī̱ṣṭa̱ | yam | ū̱m̐ iti̍ | dvi̱ṣmaḥ | tam | ū̱m̐ iti̍ | prā̱ṇaḥ | ja̱hā̱tu̱ ||3.053.21||

3.053.22a pa̱ra̱śuṁ ci̱d vi ta̍pati śimba̱laṁ ci̱d vi vṛ̍ścati |
3.053.22c u̱khā ci̍d indra̱ yeṣa̍ntī̱ praya̍stā̱ phena̍m asyati ||

pa̱ra̱śum | ci̱t | vi | ta̱pa̱ti̱ | śi̱mba̱lam | ci̱t | vi | vṛ̱śca̱ti̱ |
u̱khā | ci̱t | i̱ndra̱ | yeṣa̍ntī | pra-ya̍stā | phena̍m | a̱sya̱ti̱ ||3.053.22||

3.053.23a na sāya̍kasya cikite janāso lo̱dhaṁ na̍yanti̱ paśu̱ manya̍mānāḥ |
3.053.23c nāvā̍jinaṁ vā̱jinā̍ hāsayanti̱ na ga̍rda̱bham pu̱ro aśvā̍n nayanti ||

na | sāya̍kasya | ci̱ki̱te̱ | ja̱nā̱sa̱ḥ | lo̱dham | na̱ya̱nti̱ | paśu̍ | manya̍mānāḥ |
na | avā̍jinam | vā̱jinā̍ | hā̱sa̱ya̱nti̱ | na | ga̱rda̱bham | pu̱raḥ | aśvā̍t | na̱ya̱nti̱ ||3.053.23||

3.053.24a i̱ma i̍ndra bhara̱tasya̍ pu̱trā a̍papi̱tvaṁ ci̍kitu̱r na pra̍pi̱tvam |
3.053.24c hi̱nvanty aśva̱m ara̍ṇa̱ṁ na nitya̱ṁ jyā̍vāja̱m pari̍ ṇayanty ā̱jau ||

i̱me | i̱ndra̱ | bha̱ra̱tasya̍ | pu̱trāḥ | a̱pa̱-pi̱tvam | ci̱ki̱tu̱ḥ | na | pra̱-pi̱tvam |
hi̱nvanti̍ | aśva̍m | ara̍ṇam | na | nitya̍m | jyā̱-vāja̍m | pari̍ | na̱ya̱nti̱ | ā̱jau ||3.053.24||


3.054.01a i̱mam ma̱he vi̍da̱thyā̍ya śū̱ṣaṁ śaśva̱t kṛtva̱ īḍyā̍ya̱ pra ja̍bhruḥ |
3.054.01c śṛ̱ṇotu̍ no̱ damye̍bhi̱r anī̍kaiḥ śṛ̱ṇotv a̱gnir di̱vyair aja̍sraḥ ||

i̱mam | ma̱he | vi̱da̱thyā̍ya | śū̱ṣam | śaśva̍t | kṛtva̍ḥ | īḍyā̍ya | pra | ja̱bhru̱ḥ |
śṛ̱ṇotu̍ | na̱ḥ | damye̍bhiḥ | anī̍kaiḥ | śṛ̱ṇotu̍ | a̱gniḥ | di̱vyaiḥ | aja̍sraḥ ||3.054.01||

3.054.02a mahi̍ ma̱he di̱ve a̍rcā pṛthi̱vyai kāmo̍ ma i̱cchañ ca̍rati prajā̱nan |
3.054.02c yayo̍r ha̱ stome̍ vi̱dathe̍ṣu de̱vāḥ sa̍pa̱ryavo̍ mā̱daya̍nte̱ sacā̱yoḥ ||

mahi̍ | ma̱he | di̱ve | a̱rca̱ | pṛ̱thi̱vyai | kāma̍ḥ | me̱ | i̱cchan | ca̱ra̱ti̱ | pra̱-jā̱nan |
yayo̍ḥ | ha̱ | stome̍ | vi̱dathe̍ṣu | de̱vāḥ | sa̱pa̱ryava̍ḥ | mā̱daya̍nte | sacā̍ | ā̱yoḥ ||3.054.02||

3.054.03a yu̱vor ṛ̱taṁ ro̍dasī sa̱tyam a̍stu ma̱he ṣu ṇa̍ḥ suvi̱tāya̱ pra bhū̍tam |
3.054.03c i̱daṁ di̱ve namo̍ agne pṛthi̱vyai sa̍pa̱ryāmi̱ praya̍sā̱ yāmi̱ ratna̍m ||

yu̱voḥ | ṛ̱tam | ro̱da̱sī̱ iti̍ | sa̱tyam | a̱stu̱ | ma̱he | su | na̱ḥ | su̱-vi̱tāya̍ | pra | bhū̱ta̱m |
i̱dam | di̱ve | nama̍ḥ | a̱gne̱ | pṛ̱thi̱vyai | sa̱pa̱ryāmi̍ | praya̍sā | yāmi̍ | ratna̍m ||3.054.03||

3.054.04a u̱to hi vā̍m pū̱rvyā ā̍vivi̱dra ṛtā̍varī rodasī satya̱vāca̍ḥ |
3.054.04c nara̍ś cid vāṁ sami̱the śūra̍sātau vavandi̱re pṛ̍thivi̱ vevi̍dānāḥ ||

u̱to iti̍ | hi | vā̱m | pū̱rvyāḥ | ā̱-vi̱vi̱dre | ṛta̍varī̱ ityṛta̍-varī | ro̱da̱sī̱ iti̍ | sa̱tya̱-vāca̍ḥ |
nara̍ḥ | ci̱t | vā̱m | sa̱m-i̱the | śūra̍-sātau | va̱va̱ndi̱re | pṛ̱thi̱vi̱ | vevi̍dānāḥ ||3.054.04||

3.054.05a ko a̱ddhā ve̍da̱ ka i̱ha pra vo̍cad de̱vām̐ acchā̍ pa̱thyā̱3̱̍ kā sam e̍ti |
3.054.05c dadṛ̍śra eṣām ava̱mā sadā̍ṁsi̱ pare̍ṣu̱ yā guhye̍ṣu vra̱teṣu̍ ||

kaḥ | a̱ddhā | ve̱da̱ | kaḥ | i̱ha | pra | vo̱ca̱t | de̱vān | accha̍ | pa̱thyā̍ | kā | sam | e̱ti̱ |
dadṛ̍śre | e̱ṣā̱m | a̱va̱mā | sadā̍ṁsi | pare̍ṣu | yā | guhye̍ṣu | vra̱teṣu̍ ||3.054.05||

3.054.06a ka̱vir nṛ̱cakṣā̍ a̱bhi ṣī̍m acaṣṭa ṛ̱tasya̱ yonā̱ vighṛ̍te̱ mada̍ntī |
3.054.06c nānā̍ cakrāte̱ sada̍na̱ṁ yathā̱ veḥ sa̍mā̱nena̱ kratu̍nā saṁvidā̱ne ||

ka̱viḥ | nṛ̱-cakṣā̍ | a̱bhi | sī̱m | a̱ca̱ṣṭa̱ | ṛ̱tasya̍ | yonā̍ | vighṛ̍te̱ iti̱ vi-ghṛ̍te | mada̍ntī̱ iti̍ |
nānā̍ | ca̱krā̱te̱ iti̍ | sada̍nam | yathā̍ | veḥ | sa̱mā̱nena̍ | kratu̍nā | sa̱ṁvi̱dā̱ne iti̍ sa̱m-vi̱dā̱ne ||3.054.06||

3.054.07a sa̱mā̱nyā viyu̍te dū̱rea̍nte dhru̱ve pa̱de ta̍sthatur jāga̱rūke̍ |
3.054.07c u̱ta svasā̍rā yuva̱tī bhava̍ntī̱ ād u̍ bruvāte mithu̱nāni̱ nāma̍ ||

sa̱mā̱nyā | viyu̍te̱ iti̱ vi-yu̍te | dū̱rea̍nte̱ iti̍ dū̱re-a̍nte | dhru̱ve | pa̱de | ta̱stha̱tu̱ḥ | jā̱ga̱rūke̍ |
u̱ta | svasā̍rā | yu̱va̱tī iti̍ | bhava̍ntī̱ iti̍ | āt | ū̱m̐ iti̍ | bru̱vā̱te̱ iti̍ | mi̱thu̱nāni̍ | nāma̍ ||3.054.07||

3.054.08a viśved e̱te jani̍mā̱ saṁ vi̍vikto ma̱ho de̱vān bibhra̍tī̱ na vya̍thete |
3.054.08c eja̍d dhru̱vam pa̍tyate̱ viśva̱m eka̱ṁ cara̍t pata̱tri viṣu̍ṇa̱ṁ vi jā̱tam ||

viśvā̍ | it | e̱te iti̍ | jani̍ma | sam | vi̱vi̱kta̱ḥ | ma̱haḥ | de̱vān | bibhra̍tī̱ iti̍ | na | vya̱the̱te̱ iti̍ |
eja̍t | dhru̱vam | pa̱tya̱te̱ | viśva̍m | eka̍m | cara̍t | pa̱ta̱tri | viṣu̍ṇam | vi | jā̱tam ||3.054.08||

3.054.09a sanā̍ purā̱ṇam adhy e̍my ā̱rān ma̱haḥ pi̱tur ja̍ni̱tur jā̱mi tan na̍ḥ |
3.054.09c de̱vāso̱ yatra̍ pani̱tāra̱ evai̍r u̱rau pa̱thi vyu̍te ta̱sthur a̱ntaḥ ||

sanā̍ | pu̱rā̱ṇam | adhi̍ | e̱mi̱ | ā̱rāt | ma̱haḥ | pi̱tuḥ | ja̱ni̱tuḥ | jā̱mi | tat | na̱ḥ |
de̱vāsa̍ḥ | yatra̍ | pa̱ni̱tāra̍ḥ | evai̍ḥ | u̱rau | pa̱thi | vi-u̍te | ta̱sthuḥ | a̱ntariti̍ ||3.054.09||

3.054.10a i̱maṁ stoma̍ṁ rodasī̱ pra bra̍vīmy ṛdū̱darā̍ḥ śṛṇavann agniji̱hvāḥ |
3.054.10c mi̱traḥ sa̱mrājo̱ varu̍ṇo̱ yuvā̍na ādi̱tyāsa̍ḥ ka̱vaya̍ḥ paprathā̱nāḥ ||

i̱mam | stoma̍m | ro̱da̱sī̱ iti̍ | pra | bra̱vī̱mi̱ | ṛ̱dū̱darā̍ḥ | śṛ̱ṇa̱va̱n | a̱gni̱-ji̱hvāḥ |
mi̱traḥ | sa̱m-rāja̍ḥ | varu̍ṇaḥ | yuvā̍naḥ | ā̱di̱tyāsa̍ḥ | ka̱vaya̍ḥ | pa̱pra̱thā̱nāḥ ||3.054.10||

3.054.11a hira̍ṇyapāṇiḥ savi̱tā su̍ji̱hvas trir ā di̱vo vi̱dathe̱ patya̍mānaḥ |
3.054.11c de̱veṣu̍ ca savita̱ḥ śloka̱m aśre̱r ād a̱smabhya̱m ā su̍va sa̱rvatā̍tim ||

hira̍ṇya-pāṇi̍ḥ | sa̱vi̱tā | su̱-ji̱hvaḥ | triḥ | ā | di̱vaḥ | vi̱dathe̍ | patya̍mānaḥ |
de̱veṣu̍ | ca̱ | sa̱vi̱ta̱riti̍ | śloka̍m | aśre̍ḥ | āt | a̱smabhya̍m | ā | su̱va̱ | sa̱rva-tā̍tim ||3.054.11||

3.054.12a su̱kṛt su̍pā̱ṇiḥ svavā̍m̐ ṛ̱tāvā̍ de̱vas tvaṣṭāva̍se̱ tāni̍ no dhāt |
3.054.12c pū̱ṣa̱ṇvanta̍ ṛbhavo mādayadhvam ū̱rdhvagrā̍vāṇo adhva̱ram a̍taṣṭa ||

su̱-kṛt | su̱-pā̱ṇiḥ | sva-vā̍n | ṛ̱ta-vā̍ | de̱vaḥ | tvaṣṭā̍ | ava̍se | tāni̍ | na̱ḥ | dhā̱t |
pū̱ṣa̱ṇ-vanta̍ḥ | ṛ̱bha̱va̱ḥ | mā̱da̱ya̱dhva̱m | ū̱rdhva-grā̍vāṇaḥ | a̱dhva̱ram | a̱ta̱ṣṭa̱ ||3.054.12||

3.054.13a vi̱dyudra̍thā ma̱ruta̍ ṛṣṭi̱manto̍ di̱vo maryā̍ ṛ̱tajā̍tā a̱yāsa̍ḥ |
3.054.13c sara̍svatī śṛṇavan ya̱jñiyā̍so̱ dhātā̍ ra̱yiṁ sa̱havī̍raṁ turāsaḥ ||

vi̱dyut-ra̍thāḥ | ma̱ruta̍ḥ | ṛ̱ṣṭi̱-manta̍ḥ | di̱vaḥ | maryā̍ḥ | ṛ̱ta-jā̍tāḥ | a̱yāsa̍ḥ |
sara̍svatī | śṛ̱ṇa̱va̱n | ya̱jñiyā̍saḥ | dhāta̍ | ra̱yim | sa̱ha-vī̍ram | tu̱rā̱sa̱ḥ ||3.054.13||

3.054.14a viṣṇu̱ṁ stomā̍saḥ puruda̱smam a̱rkā bhaga̍syeva kā̱riṇo̱ yāma̍ni gman |
3.054.14c u̱ru̱kra̱maḥ ka̍ku̱ho yasya̍ pū̱rvīr na ma̍rdhanti yuva̱tayo̱ jani̍trīḥ ||

viṣṇu̍m | stomā̍saḥ | pu̱ru̱-da̱smam | a̱rkāḥ | bhaga̍sya-iva | kā̱riṇa̍ḥ | yāma̍ni | gma̱n |
u̱ru̱-kra̱maḥ | ka̱ku̱haḥ | yasya̍ | pū̱rvīḥ | na | ma̱rdha̱nti̱ | yu̱va̱taya̍ḥ | jani̍trīḥ ||3.054.14||

3.054.15a indro̱ viśvai̍r vī̱ryai̱3̱̍ḥ patya̍māna u̱bhe ā pa̍prau̱ roda̍sī mahi̱tvā |
3.054.15c pu̱ra̱ṁda̱ro vṛ̍tra̱hā dhṛ̱ṣṇuṣe̍ṇaḥ sa̱ṁgṛbhyā̍ na̱ ā bha̍rā̱ bhūri̍ pa̱śvaḥ ||

indra̍ḥ | viśvai̍ḥ | vī̱ryai̍ḥ | patya̍mānaḥ | u̱bhe iti̍ | ā | pa̱prau̱ | roda̍sī̱ iti̍ | ma̱hi̱-tvā |
pu̱ra̱m-da̱raḥ | vṛ̱tra̱-hā | dhṛ̱ṣṇu-se̍ṇaḥ | sa̱m-gṛbhya̍ | na̱ḥ | ā | bha̱ra̱ | bhūri̍ | pa̱śvaḥ ||3.054.15||

3.054.16a nāsa̍tyā me pi̱tarā̍ bandhu̱pṛcchā̍ sajā̱tya̍m a̱śvino̱ś cāru̱ nāma̍ |
3.054.16c yu̱vaṁ hi stho ra̍yi̱dau no̍ rayī̱ṇāṁ dā̱traṁ ra̍kṣethe̱ aka̍vai̱r ada̍bdhā ||

nāsa̍tyā | me̱ | pi̱tarā̍ | ba̱ndhu̱-pṛcchā̍ | sa̱-jā̱tya̍m | a̱śvino̍ḥ | cāru̍ | nāma̍ |
yu̱vam | hi | sthaḥ | ra̱yi̱-dau | na̱ḥ | ra̱yī̱ṇām | dā̱tram | ra̱kṣe̱the̱ iti̍ | aka̍vaiḥ | ada̍bdhā ||3.054.16||

3.054.17a ma̱hat tad va̍ḥ kavaya̱ś cāru̱ nāma̱ yad dha̍ devā̱ bhava̍tha̱ viśva̱ indre̍ |
3.054.17c sakha̍ ṛ̱bhubhi̍ḥ puruhūta pri̱yebhi̍r i̱māṁ dhiya̍ṁ sā̱taye̍ takṣatā naḥ ||

ma̱hat | tat | va̱ḥ | ka̱va̱ya̱ḥ | cāru̍ | nāma̍ | yat | ha̱ | de̱vā̱ḥ | bhava̍tha | viśve̍ | indre̍ |
sakhā̍ | ṛ̱bhu-bhi̍ḥ | pu̱ru̱-hū̱ta̱ | pri̱yebhi̍ḥ | i̱mām | dhiya̍m | sā̱taye̍ | ta̱kṣa̱ta̱ | na̱ḥ ||3.054.17||

3.054.18a a̱rya̱mā ṇo̱ adi̍tir ya̱jñiyā̱so 'da̍bdhāni̱ varu̍ṇasya vra̱tāni̍ |
3.054.18c yu̱yota̍ no anapa̱tyāni̱ ganto̍ḥ pra̱jāvā̍n naḥ paśu̱mām̐ a̍stu gā̱tuḥ ||

a̱rya̱mā | na̱ḥ | adi̍tiḥ | ya̱jñiyā̍saḥ | ada̍bdhāni | varu̍ṇasya | vra̱tāni̍ |
yu̱yota̍ | na̱ḥ | a̱na̱pa̱tyāni̍ | ganto̍ḥ | pra̱jā-vā̍n | na̱ḥ | pa̱śu̱-mān | a̱stu̱ | gā̱tuḥ ||3.054.18||

3.054.19a de̱vānā̍ṁ dū̱taḥ pu̍ru̱dha prasū̱to 'nā̍gān no vocatu sa̱rvatā̍tā |
3.054.19c śṛ̱ṇotu̍ naḥ pṛthi̱vī dyaur u̱tāpa̱ḥ sūryo̱ nakṣa̍trair u̱rv a1̱̍ntari̍kṣam ||

de̱vānā̍m | dū̱taḥ | pu̱ru̱dha | pra-sū̍taḥ | anā̍gān | na̱ḥ | vo̱ca̱tu̱ | sa̱rva-tā̍tā |
śṛ̱ṇotu̍ | na̱ḥ | pṛ̱thi̱vī | dyauḥ | u̱ta | āpa̍ḥ | sūrya̍ḥ | nakṣa̍traiḥ | u̱ru | a̱ntari̍kṣam ||3.054.19||

3.054.20a śṛ̱ṇvantu̍ no̱ vṛṣa̍ṇa̱ḥ parva̍tāso dhru̱vakṣe̍māsa̱ iḻa̍yā̱ mada̍ntaḥ |
3.054.20c ā̱di̱tyair no̱ adi̍tiḥ śṛṇotu̱ yaccha̍ntu no ma̱ruta̱ḥ śarma̍ bha̱dram ||

śṛ̱ṇvantu̍ | na̱ḥ | vṛṣa̍ṇaḥ | parva̍tāsaḥ | dhru̱va-kṣe̍māsaḥ | iḻa̍yā | mada̍ntaḥ |
ā̱di̱tyaiḥ | na̱ḥ | adi̍tiḥ | śṛ̱ṇo̱tu̱ | yaccha̍ntu | na̱ḥ | ma̱ruta̍ḥ | śarma̍ | bha̱dram ||3.054.20||

3.054.21a sadā̍ su̱gaḥ pi̍tu̱mām̐ a̍stu̱ panthā̱ madhvā̍ devā̱ oṣa̍dhī̱ḥ sam pi̍pṛkta |
3.054.21c bhago̍ me agne sa̱khye na mṛ̍dhyā̱ ud rā̱yo a̍śyā̱ṁ sada̍nam puru̱kṣoḥ ||

sadā̍ | su̱-gaḥ | pi̱tu̱-mān | a̱stu̱ | panthā̍ | madhvā̍ | de̱vā̱ḥ | oṣa̍dhīḥ | sam | pi̱pṛ̱kta̱ |
bhaga̍ḥ | me̱ | a̱gne̱ | sa̱khye | na | mṛ̱dhyā̍ḥ | ut | rā̱yaḥ | a̱śyā̱m | sada̍nam | pu̱ru̱-kṣoḥ ||3.054.21||

3.054.22a svada̍sva ha̱vyā sam iṣo̍ didīhy asma̱drya1̱̍k sam mi̍mīhi̱ śravā̍ṁsi |
3.054.22c viśvā̍m̐ agne pṛ̱tsu tāñ je̍ṣi̱ śatrū̱n ahā̱ viśvā̍ su̱manā̍ dīdihī naḥ ||

svada̍sva | ha̱vyā | sam | iṣa̍ḥ | di̱dī̱hi̱ | a̱sma̱drya̍k | sam | mi̱mī̱hi̱ | śravā̍ṁsi |
viśvā̍n | a̱gne̱ | pṛ̱t-su | tān | je̱ṣi̱ | śatrū̍n | ahā̍ | viśvā̍ | su̱-manā̍ḥ | dī̱di̱hi̱ | na̱ḥ ||3.054.22||


3.055.01a u̱ṣasa̱ḥ pūrvā̱ adha̱ yad vyū̱ṣur ma̱had vi ja̍jñe a̱kṣara̍m pa̱de goḥ |
3.055.01c vra̱tā de̱vānā̱m upa̱ nu pra̱bhūṣa̍n ma̱had de̱vānā̍m asura̱tvam eka̍m ||

u̱ṣasa̍ḥ | pūrvā̍ḥ | adha̍ | yat | vi̱-ū̱ṣuḥ | ma̱hat | vi | ja̱jñe̱ | a̱kṣara̍m | pa̱de | goḥ |
vra̱tā | de̱vānā̍m | upa̍ | nu | pra̱-bhūṣa̍n | ma̱hat | de̱vānā̍m | a̱su̱ra̱-tvam | eka̍m ||3.055.01||

3.055.02a mo ṣū ṇo̱ atra̍ juhuranta de̱vā mā pūrve̍ agne pi̱tara̍ḥ pada̱jñāḥ |
3.055.02c pu̱rā̱ṇyoḥ sadma̍noḥ ke̱tur a̱ntar ma̱had de̱vānā̍m asura̱tvam eka̍m ||

mo iti̍ | su | na̱ḥ | atra̍ | ju̱hu̱ra̱nta̱ | de̱vāḥ | mā | pūrve̍ | a̱gne̱ | pi̱tara̍ḥ | pa̱da̱-jñāḥ |
pu̱rā̱ṇyoḥ | sadma̍noḥ | ke̱tuḥ | a̱ntaḥ | ma̱hat | de̱vānā̍m | a̱su̱ra̱-tvam | eka̍m ||3.055.02||

3.055.03a vi me̍ puru̱trā pa̍tayanti̱ kāmā̱ḥ śamy acchā̍ dīdye pū̱rvyāṇi̍ |
3.055.03c sami̍ddhe a̱gnāv ṛ̱tam id va̍dema ma̱had de̱vānā̍m asura̱tvam eka̍m ||

vi | me̱ | pu̱ru̱-trā | pa̱ta̱ya̱nti̱ | kāmā̍ḥ | śami̍ | accha̍ | dī̱dye̱ | pū̱rvyā̍ṇi̍ |
sam-i̍ddhe | a̱gnau | ṛ̱tam | it | va̱de̱ma̱ | ma̱hat | de̱vānā̍m | a̱su̱ra̱-tvam | eka̍m ||3.055.03||

3.055.04a sa̱mā̱no rājā̱ vibhṛ̍taḥ puru̱trā śaye̍ śa̱yāsu̱ prayu̍to̱ vanānu̍ |
3.055.04c a̱nyā va̱tsam bhara̍ti̱ kṣeti̍ mā̱tā ma̱had de̱vānā̍m asura̱tvam eka̍m ||

sa̱mā̱naḥ | rājā̍ | vi-bhṛ̍taḥ | pu̱ru̱-trā | śaye̍ | śa̱yāsu̍ | pra-yu̍taḥ | vanā̍ | anu̍ |
a̱nyā | va̱tsam | bhara̍ti | kṣeti̍ | mā̱tā | ma̱hat | de̱vānā̍m | a̱su̱ra̱-tvam | eka̍m ||3.055.04||

3.055.05a ā̱kṣit pūrvā̱sv apa̍rā anū̱rut sa̱dyo jā̱tāsu̱ taru̍ṇīṣv a̱ntaḥ |
3.055.05c a̱ntarva̍tīḥ suvate̱ apra̍vītā ma̱had de̱vānā̍m asura̱tvam eka̍m ||

ā̱-kṣit | pūrvā̍su | apa̍rāḥ | a̱nū̱rut | sa̱dyaḥ | jā̱tāsu̍ | taru̍ṇīṣu | a̱ntariti̍ |
a̱ntaḥ-va̍tīḥ | su̱va̱te̱ | apra̍-vītāḥ | ma̱hat | de̱vānā̍m | a̱su̱ra̱-tvam | eka̍m ||3.055.05||

3.055.06a śa̱yuḥ pa̱rastā̱d adha̱ nu dvi̍mā̱tāba̍ndha̱naś ca̍rati va̱tsa eka̍ḥ |
3.055.06c mi̱trasya̱ tā varu̍ṇasya vra̱tāni̍ ma̱had de̱vānā̍m asura̱tvam eka̍m ||

śa̱yuḥ | pa̱rastā̍t | adha̍ | nu | dvi-mā̱tā | a̱ba̱ndha̱naḥ | ca̱ra̱ti̱ | va̱tsaḥ | eka̍ḥ |
mi̱trasya̍ | tā | varu̍ṇasya | vra̱tāni̍ | ma̱hat | de̱vānā̍m | a̱su̱ra̱-tvam | eka̍m ||3.055.06||

3.055.07a dvi̱mā̱tā hotā̍ vi̱dathe̍ṣu sa̱mrāḻ anv agra̱ṁ cara̍ti̱ kṣeti̍ bu̱dhnaḥ |
3.055.07c pra raṇyā̍ni raṇya̱vāco̍ bharante ma̱had de̱vānā̍m asura̱tvam eka̍m ||

dvi̱-mā̱tā | hotā̍ | vi̱dathe̍ṣu | sa̱m-rāṭ | anu̍ | agra̍m | cara̍ti | kṣeti̍ | bu̱dhnaḥ |
pra | raṇyā̍ni | ra̱ṇya̱-vāca̍ḥ | bha̱ra̱nte̱ | ma̱hat | de̱vānā̍m | a̱su̱ra̱-tvam | eka̍m ||3.055.07||

3.055.08a śūra̍syeva̱ yudhya̍to anta̱masya̍ pratī̱cīna̍ṁ dadṛśe̱ viśva̍m ā̱yat |
3.055.08c a̱ntar ma̱tiś ca̍rati ni̱ṣṣidha̱ṁ gor ma̱had de̱vānā̍m asura̱tvam eka̍m ||

śūra̍sya-iva | yudhya̍taḥ | a̱nta̱masya̍ | pra̱tī̱cīna̍m | da̱dṛ̱śe̱ | viśva̍m | ā̱-yat |
a̱ntaḥ | ma̱tiḥ | ca̱ra̱ti̱ | ni̱ḥ-sidha̍m | goḥ | ma̱hat | de̱vānā̍m | a̱su̱ra̱-tvam | eka̍m ||3.055.08||

3.055.09a ni ve̍veti pali̱to dū̱ta ā̍sv a̱ntar ma̱hām̐ś ca̍rati roca̱nena̍ |
3.055.09c vapū̍ṁṣi̱ bibhra̍d a̱bhi no̱ vi ca̍ṣṭe ma̱had de̱vānā̍m asura̱tvam eka̍m ||

ni | ve̱ve̱ti̱ | pa̱li̱taḥ | dū̱taḥ | ā̱su̱ | a̱ntaḥ | ma̱hān | ca̱ra̱ti̱ | ro̱ca̱nena̍ |
vapū̍ṁṣi | bibhra̍t | a̱bhi | na̱ḥ | vi | ca̱ṣṭe̱ | ma̱hat | de̱vānā̍m | a̱su̱ra̱-tvam | eka̍m ||3.055.09||

3.055.10a viṣṇu̍r go̱pāḥ pa̍ra̱mam pā̍ti̱ pātha̍ḥ pri̱yā dhāmā̍ny a̱mṛtā̱ dadhā̍naḥ |
3.055.10c a̱gniṣ ṭā viśvā̱ bhuva̍nāni veda ma̱had de̱vānā̍m asura̱tvam eka̍m ||

viṣṇu̍ḥ | go̱pāḥ | pa̱ra̱mam | pā̱ti̱ | pātha̍ḥ | pri̱yā | dhāmā̍ni | a̱mṛtā̍ | dadhā̍naḥ |
a̱gniḥ | tā | viśvā̍ | bhuva̍nāni | ve̱da̱ | ma̱hat | de̱vānā̍m | a̱su̱ra̱-tvam | eka̍m ||3.055.10||

3.055.11a nānā̍ cakrāte ya̱myā̱3̱̍ vapū̍ṁṣi̱ tayo̍r a̱nyad roca̍te kṛ̱ṣṇam a̱nyat |
3.055.11c śyāvī̍ ca̱ yad aru̍ṣī ca̱ svasā̍rau ma̱had de̱vānā̍m asura̱tvam eka̍m ||

nānā̍ | ca̱krā̱te̱ iti̍ | ya̱myā̍ | vapū̍ṁṣi | tayo̍ḥ | a̱nyat | roca̍te | kṛ̱ṣṇam | a̱nyat |
śyāvī̍ | ca̱ | yat | aru̍ṣī | ca̱ | svasā̍rau | ma̱hat | de̱vānā̍m | a̱su̱ra̱-tvam | eka̍m ||3.055.11||

3.055.12a mā̱tā ca̱ yatra̍ duhi̱tā ca̍ dhe̱nū sa̍ba̱rdughe̍ dhā̱paye̍te samī̱cī |
3.055.12c ṛ̱tasya̱ te sada̍sīḻe a̱ntar ma̱had de̱vānā̍m asura̱tvam eka̍m ||

mā̱tā | ca̱ | yatra̍ | du̱hi̱tā | ca̱ | dhe̱nū iti̍ | sa̱ba̱rdughe̱ iti̍ sa̱ba̱ḥ-dughe̍ | dhā̱paye̍te̱ iti̍ | sa̱mī̱cī iti̍ sa̱m-ī̱cī |
ṛ̱tasya̍ | te̱ | sada̍si | ī̱ḻe̱ | a̱ntaḥ | ma̱hat | de̱vānā̍m | a̱su̱ra̱-tvam | eka̍m ||3.055.12||

3.055.13a a̱nyasyā̍ va̱tsaṁ ri̍ha̱tī mi̍māya̱ kayā̍ bhu̱vā ni da̍dhe dhe̱nur ūdha̍ḥ |
3.055.13c ṛ̱tasya̱ sā paya̍sāpinva̱teḻā̍ ma̱had de̱vānā̍m asura̱tvam eka̍m ||

a̱nyasyā̍ḥ | ri̱ha̱tī | va̱tsam | mi̱mā̱ya̱ | kayā̍ | bhu̱vā | ni | da̱dhe̱ | dhe̱nuḥ | ūdha̍ḥ |
ṛ̱tasya̍ | sā | paya̍sā | a̱pi̱nva̱ta̱ | iḻā̍ | ma̱hat | de̱vānā̍m | a̱su̱ra̱-tvam | eka̍m ||3.055.13||

3.055.14a padyā̍ vaste puru̱rūpā̱ vapū̍ṁṣy ū̱rdhvā ta̍sthau̱ tryavi̱ṁ reri̍hāṇā |
3.055.14c ṛ̱tasya̱ sadma̱ vi ca̍rāmi vi̱dvān ma̱had de̱vānā̍m asura̱tvam eka̍m ||

padyā̍ | va̱ste̱ | pu̱ru̱-rūpā̍ | vapū̍ṁṣi | ū̱rdhvā | ta̱sthau̱ | tri̱-avi̍m | reri̍hāṇā |
ṛ̱tasya̍ | sadma̍ | vi | ca̱rā̱mi̱ | vi̱dvān | ma̱hat | de̱vānā̍m | a̱su̱ra̱-tvam | eka̍m ||3.055.14||

3.055.15a pa̱de i̍va̱ nihi̍te da̱sme a̱ntas tayo̍r a̱nyad guhya̍m ā̱vir a̱nyat |
3.055.15c sa̱dhrī̱cī̱nā pa̱thyā̱3̱̍ sā viṣū̍cī ma̱had de̱vānā̍m asura̱tvam eka̍m ||

pa̱dei̱veti̍ pa̱de-i̍va | nihi̍te̱ iti̱ ni-hi̍te | da̱sme | a̱ntariti̍ | tayo̍ḥ | a̱nyat | guhya̍m | ā̱viḥ | a̱nyat |
sa̱dhrī̱cī̱nā | pa̱thyā̍ | sā | viṣū̍cī | ma̱hat | de̱vānā̍m | a̱su̱ra̱-tvam | eka̍m ||3.055.15||

3.055.16a ā dhe̱navo̍ dhunayantā̱m aśi̍śvīḥ saba̱rdughā̍ḥ śaśa̱yā apra̍dugdhāḥ |
3.055.16c navyā̍-navyā yuva̱tayo̱ bhava̍ntīr ma̱had de̱vānā̍m asura̱tvam eka̍m ||

ā | dhe̱nava̍ḥ | dhu̱na̱ya̱ntā̱m | aśi̍śvīḥ | sa̱ba̱ḥ-dughā̍ḥ | śa̱śa̱yāḥ | apra̍-dugdhāḥ |
navyā̍ḥ-navyāḥ | yu̱va̱taya̍ḥ | bhava̍ntīḥ | ma̱hat | de̱vānā̍m | a̱su̱ra̱-tvam | eka̍m ||3.055.16||

3.055.17a yad a̱nyāsu̍ vṛṣa̱bho rora̍vīti̱ so a̱nyasmi̍n yū̱the ni da̍dhāti̱ reta̍ḥ |
3.055.17c sa hi kṣapā̍vā̱n sa bhaga̱ḥ sa rājā̍ ma̱had de̱vānā̍m asura̱tvam eka̍m ||

yat | a̱nyāsu̍ | vṛ̱ṣa̱bhaḥ | rora̍vīti | saḥ | a̱nyasmi̍n | yū̱the | ni | da̱dhā̱ti̱ | reta̍ḥ |
saḥ | hi | kṣapā̍-vān | saḥ | bhaga̍ḥ | saḥ | rājā̍ | ma̱hat | de̱vānā̍m | a̱su̱ra̱-tvam | eka̍m ||3.055.17||

3.055.18a vī̱rasya̱ nu svaśvya̍ṁ janāsa̱ḥ pra nu vo̍cāma vi̱dur a̍sya de̱vāḥ |
3.055.18c ṣo̱ḻhā yu̱ktāḥ pañca̍-pa̱ñcā va̍hanti ma̱had de̱vānā̍m asura̱tvam eka̍m ||

vī̱rasya̍ | nu | su̱-aśvya̍m | ja̱nā̱sa̱ḥ | pra | nu | vo̱cā̱ma̱ | vi̱duḥ | a̱sya̱ | de̱vāḥ |
ṣo̱ḻhā | yu̱ktāḥ | pañca̍-pañca | ā | va̱ha̱nti̱ | ma̱hat | de̱vānā̍m | a̱su̱ra̱-tvam | eka̍m ||3.055.18||

3.055.19a de̱vas tvaṣṭā̍ savi̱tā vi̱śvarū̍paḥ pu̱poṣa̍ pra̱jāḥ pu̍ru̱dhā ja̍jāna |
3.055.19c i̱mā ca̱ viśvā̱ bhuva̍nāny asya ma̱had de̱vānā̍m asura̱tvam eka̍m ||

de̱vaḥ | tvaṣṭā̍ | sa̱vi̱tā | vi̱śva-rū̍paḥ | pu̱poṣa̍ | pra̱-jāḥ | pu̱ru̱dhā | ja̱jā̱na̱ |
i̱mā | ca̱ | viśvā̍ | bhuva̍nāni | a̱sya̱ | ma̱hat | de̱vānā̍m | a̱su̱ra̱-tvam | eka̍m ||3.055.19||

3.055.20a ma̱hī sam ai̍rac ca̱mvā̍ samī̱cī u̱bhe te a̍sya̱ vasu̍nā̱ nyṛ̍ṣṭe |
3.055.20c śṛ̱ṇve vī̱ro vi̱ndamā̍no̱ vasū̍ni ma̱had de̱vānā̍m asura̱tvam eka̍m ||

ma̱hī | sam | ai̱ra̱t | ca̱mvā̍ | sa̱mī̱cī iti̍ sa̱m-ī̱cī | u̱bhe | te | a̱sya̱ | vasu̍nā | nyṛ̍ṣṭe̱ iti̱ ni-ṛ̍ṣṭe |
śṛ̱ṇve | vī̱raḥ | vi̱ndamā̍naḥ | vasū̍ni | ma̱hat | de̱vānā̍m | a̱su̱ra̱-tvam | eka̍m ||3.055.20||

3.055.21a i̱māṁ ca̍ naḥ pṛthi̱vīṁ vi̱śvadhā̍yā̱ upa̍ kṣeti hi̱tami̍tro̱ na rājā̍ |
3.055.21c pu̱ra̱ḥsada̍ḥ śarma̱sado̱ na vī̱rā ma̱had de̱vānā̍m asura̱tvam eka̍m ||

i̱mām | ca̱ | na̱ḥ | pṛ̱thi̱vīm | vi̱śva-dhā̍yāḥ | upa̍ | kṣe̱ti̱ | hi̱ta-mi̍traḥ | na | rājā̍ |
pu̱ra̱ḥ-sada̍ḥ | śa̱rma̱-sada̍ḥ | na | vī̱rāḥ | ma̱hat | de̱vānā̍m | a̱su̱ra̱-tvam | eka̍m ||3.055.21||

3.055.22a ni̱ṣṣidhva̍rīs ta̱ oṣa̍dhīr u̱tāpo̍ ra̱yiṁ ta̍ indra pṛthi̱vī bi̍bharti |
3.055.22c sakhā̍yas te vāma̱bhāja̍ḥ syāma ma̱had de̱vānā̍m asura̱tvam eka̍m ||

ni̱ḥ-sidhva̍rīḥ | te̱ | oṣa̍dhīḥ | u̱ta | āpa̍ḥ | ra̱yim | te̱ | i̱ndra̱ | pṛ̱thi̱vī | bi̱bha̱rti̱ |
sakhā̍yaḥ | te̱ | vā̱ma̱-bhāja̍ḥ | syā̱ma̱ | ma̱hat | de̱vānā̍m | a̱su̱ra̱-tvam | eka̍m ||3.055.22||


3.056.01a na tā mi̍nanti mā̱yino̱ na dhīrā̍ vra̱tā de̱vānā̍m pratha̱mā dhru̱vāṇi̍ |
3.056.01c na roda̍sī a̱druhā̍ ve̱dyābhi̱r na parva̍tā ni̱name̍ tasthi̱vāṁsa̍ḥ ||

na | tā | mi̱na̱nti̱ | mā̱yina̍ḥ | na | dhīrā̍ḥ | vra̱tā | de̱vānā̍m | pra̱tha̱mā | dhru̱vāṇi̍ |
na | roda̍sī̱ iti̍ | a̱druhā̍ | ve̱dyābhi̍ḥ | na | parva̍tāḥ | ni̱-name̍ | ta̱sthi̱-vāṁsa̍ḥ ||3.056.01||

3.056.02a ṣaḍ bhā̱rām̐ eko̱ aca̍ran bibharty ṛ̱taṁ varṣi̍ṣṭha̱m upa̱ gāva̱ āgu̍ḥ |
3.056.02c ti̱sro ma̱hīr upa̍rās tasthu̱r atyā̱ guhā̱ dve nihi̍te̱ darśy ekā̍ ||

ṣaṭ | bhā̱rān | eka̍ḥ | aca̍ran | bi̱bha̱rti̱ | ṛ̱tam | varṣi̍ṣṭham | upa̍ | gāva̍ḥ | ā | a̱gu̱ḥ |
ti̱sraḥ | ma̱hīḥ | upa̍rāḥ | ta̱sthu̱ḥ | atyā̍ḥ | guhā̍ | dve iti̍ | nihi̍te̱ iti̱ ni-hi̍te | darśi̍ | ekā̍ ||3.056.02||

3.056.03a tri̱pā̱ja̱syo vṛ̍ṣa̱bho vi̱śvarū̍pa u̱ta tryu̱dhā pu̍ru̱dha pra̱jāvā̍n |
3.056.03c trya̱nī̱kaḥ pa̍tyate̱ māhi̍nāvā̱n sa re̍to̱dhā vṛ̍ṣa̱bhaḥ śaśva̍tīnām ||

tri̱-pā̱ja̱syaḥ | vṛ̱ṣa̱bhaḥ | vi̱śva-rū̍paḥ | u̱ta | tri̱-u̱dhā | pu̱ru̱dha | pra̱jā-vā̍n |
tri̱-a̱nī̱kaḥ | pa̱tya̱te̱ | māhi̍na-vā̱n | saḥ | re̱ta̱ḥ-dhāḥ | vṛ̱ṣa̱bhaḥ | śaśva̍tīnām ||3.056.03||

3.056.04a a̱bhīka̍ āsām pada̱vīr a̍bodhy ādi̱tyānā̍m ahve̱ cāru̱ nāma̍ |
3.056.04c āpa̍ś cid asmā aramanta de̱vīḥ pṛtha̱g vraja̍ntī̱ḥ pari̍ ṣīm avṛñjan ||

a̱bhīke̍ | ā̱sā̱m | pa̱da̱-vīḥ | a̱bo̱dhi̱ | ā̱di̱tyānā̍m | a̱hve̱ | cāru̍ | nāma̍ |
āpa̍ḥ | ci̱t | a̱smai̱ | a̱ra̱ma̱nta̱ | de̱vīḥ | pṛtha̍k | vraja̍ntīḥ | pari̍ | sī̱m | a̱vṛ̱ñja̱n ||3.056.04||

3.056.05a trī ṣa̱dhasthā̍ sindhava̱s triḥ ka̍vī̱nām u̱ta tri̍mā̱tā vi̱dathe̍ṣu sa̱mrāṭ |
3.056.05c ṛ̱tāva̍rī̱r yoṣa̍ṇās ti̱sro apyā̱s trir ā di̱vo vi̱dathe̱ patya̍mānāḥ ||

trī | sa̱dha-sthā̍ | si̱ndha̱va̱ḥ | triḥ | ka̱vī̱nām | u̱ta | tri̱-mā̱tā | vi̱dathe̍ṣu | sa̱m-rāṭ |
ṛ̱ta-va̍rīḥ | yoṣa̍ṇāḥ | ti̱sraḥ | apyā̍ḥ | triḥ | ā | di̱vaḥ | vi̱dathe̍ | patya̍mānāḥ ||3.056.05||

3.056.06a trir ā di̱vaḥ sa̍vita̱r vāryā̍ṇi di̱ve-di̍va̱ ā su̍va̱ trir no̱ ahna̍ḥ |
3.056.06c tri̱dhātu̍ rā̱ya ā su̍vā̱ vasū̍ni̱ bhaga̍ trātar dhiṣaṇe sā̱taye̍ dhāḥ ||

triḥ | ā | di̱vaḥ | sa̱vi̱ta̱ḥ | vāryā̍ṇi | di̱ve-di̍ve | ā | su̱va̱ | triḥ | na̱ḥ | ahna̍ḥ |
tri̱-dhātu̍ | rā̱yaḥ | ā | su̱va̱ | vasū̍ni | bhaga̍ | trā̱ta̱ḥ | dhi̱ṣa̱ṇe̱ | sā̱taye̍ | dhā̱ḥ ||3.056.06||

3.056.07a trir ā di̱vaḥ sa̍vi̱tā so̍ṣavīti̱ rājā̍nā mi̱trāvaru̍ṇā supā̱ṇī |
3.056.07c āpa̍ś cid asya̱ roda̍sī cid u̱rvī ratna̍m bhikṣanta savi̱tuḥ sa̱vāya̍ ||

triḥ | ā | di̱vaḥ | sa̱vi̱tā | so̱ṣa̱vī̱ti̱ | rājā̍nā | mi̱trāvaru̍ṇā | su̱pā̱ṇī iti̍ su̱-pā̱ṇī |
āpa̍ḥ | ci̱t | a̱sya̱ | roda̍sī̱ iti̍ | ci̱t | u̱rvī iti̍ | ratna̍m | bhi̱kṣa̱nta̱ | sa̱vi̱tuḥ | sa̱vāya̍ ||3.056.07||

3.056.08a trir u̍tta̱mā dū̱ṇaśā̍ roca̱nāni̱ trayo̍ rāja̱nty asu̍rasya vī̱rāḥ |
3.056.08c ṛ̱tāvā̍na iṣi̱rā dū̱ḻabhā̍sa̱s trir ā di̱vo vi̱dathe̍ santu de̱vāḥ ||

triḥ | u̱t-ta̱mā | du̱ḥ-naśā̍ | ro̱ca̱nāni̍ | traya̍ḥ | rā̱ja̱nti̱ | asu̍rasya | vī̱rāḥ |
ṛ̱ta-vā̍naḥ | i̱ṣi̱rāḥ | du̱ḥ-dabhā̍saḥ | triḥ | ā | di̱vaḥ | vi̱dathe̍ | sa̱ntu̱ | de̱vāḥ ||3.056.08||


3.057.01a pra me̍ vivi̱kvām̐ a̍vidan manī̱ṣāṁ dhe̱nuṁ cara̍ntī̱m prayu̍tā̱m ago̍pām |
3.057.01c sa̱dyaś ci̱d yā du̍du̱he bhūri̍ dhā̱ser indra̱s tad a̱gniḥ pa̍ni̱tāro̍ asyāḥ ||

pra | me̱ | vi̱vi̱kvān | a̱vi̱da̱t | ma̱nī̱ṣām | dhe̱num | cara̍ntīm | pra-yu̍tām | ago̍pām |
sa̱dyaḥ | ci̱t | yā | du̱du̱he | bhūri̍ | dhā̱seḥ | indra̍ḥ | tat | a̱gniḥ | pa̱ni̱tāra̍ḥ | a̱syā̱ḥ ||3.057.01||

3.057.02a indra̱ḥ su pū̱ṣā vṛṣa̍ṇā su̱hastā̍ di̱vo na prī̱tāḥ śa̍śa̱yaṁ du̍duhre |
3.057.02c viśve̱ yad a̍syāṁ ra̱ṇaya̍nta de̱vāḥ pra vo 'tra̍ vasavaḥ su̱mnam a̍śyām ||

indra̍ḥ | su | pū̱ṣā | vṛṣa̍ṇā | su̱-hastā̍ | di̱vaḥ | na | prī̱tāḥ | śa̱śa̱yam | du̱du̱hre̱ |
viśve̍ | yat | a̱syā̱m | ra̱ṇaya̍nta | de̱vāḥ | pra | va̱ḥ | atra̍ | va̱sa̱va̱ḥ | su̱mnam | a̱śyā̱m ||3.057.02||

3.057.03a yā jā̱mayo̱ vṛṣṇa̍ i̱cchanti̍ śa̱ktiṁ na̍ma̱syantī̍r jānate̱ garbha̍m asmin |
3.057.03c acchā̍ pu̱traṁ dhe̱navo̍ vāvaśā̱nā ma̱haś ca̍ranti̱ bibhra̍ta̱ṁ vapū̍ṁṣi ||

yāḥ | jā̱maya̍ḥ | vṛṣṇe̍ | i̱cchanti̍ | śa̱ktim | na̱ma̱syantī̍ḥ | jā̱na̱te̱ | garbha̍m | a̱smi̱n |
accha̍ | pu̱tram | dhe̱nava̍ḥ | vā̱va̱śā̱nāḥ | ma̱haḥ | ca̱ra̱nti̱ | bibhra̍tam | vapū̍ṁṣi ||3.057.03||

3.057.04a acchā̍ vivakmi̱ roda̍sī su̱meke̱ grāvṇo̍ yujā̱no a̍dhva̱re ma̍nī̱ṣā |
3.057.04c i̱mā u̍ te̱ mana̍ve̱ bhūri̍vārā ū̱rdhvā bha̍vanti darśa̱tā yaja̍trāḥ ||

accha̍ | vi̱va̱kmi̱ | roda̍sī̱ iti̍ | su̱meke̱ iti̍ su̱-meke̍ | grāvṇa̍ḥ | yu̱jā̱naḥ | a̱dhva̱re | ma̱nī̱ṣā |
i̱māḥ | ū̱m̐ iti̍ | te̱ | mana̍ve | bhūri̍-vārāḥ | ū̱rdhvāḥ | bha̱va̱nti̱ | da̱rśa̱tāḥ | yaja̍trāḥ ||3.057.04||

3.057.05a yā te̍ ji̱hvā madhu̍matī sume̱dhā agne̍ de̱veṣū̱cyata̍ urū̱cī |
3.057.05c taye̱ha viśvā̱m̐ ava̍se̱ yaja̍trā̱n ā sā̍daya pā̱yayā̍ cā̱ madhū̍ni ||

yā | te̱ | ji̱hvā | madhu̍-matī | su̱-me̱dhāḥ | agne̍ | de̱veṣu̍ | u̱cyate̍ | u̱rū̱cī |
tayā̍ | i̱ha | viśvā̱n | ava̍se | yaja̍trān | ā | sā̱da̱ya̱ | pā̱yayā̍ | ca̱ | madhū̍ni ||3.057.05||

3.057.06a yā te̍ agne̱ parva̍tasyeva̱ dhārāsa̍ścantī pī̱paya̍d deva ci̱trā |
3.057.06c tām a̱smabhya̱m prama̍tiṁ jātavedo̱ vaso̱ rāsva̍ suma̱tiṁ vi̱śvaja̍nyām ||

yā | te̱ | a̱gne̱ | parva̍tasya-iva | dhārā̍ | asa̍ścantī | pī̱paya̍t | de̱va̱ | ci̱trā |
tām | a̱smabhya̍m | pra-ma̍tim | jā̱ta̱-ve̱da̱ḥ | vaso̱ iti̍ | rāsva̍ | su̱-ma̱tim | vi̱śva-ja̍nyām ||3.057.06||


3.058.01a dhe̱nuḥ pra̱tnasya̱ kāmya̱ṁ duhā̍nā̱ntaḥ pu̱traś ca̍rati̱ dakṣi̍ṇāyāḥ |
3.058.01c ā dyo̍ta̱niṁ va̍hati śu̱bhrayā̍mo̱ṣasa̱ḥ stomo̍ a̱śvinā̍v ajīgaḥ ||

dhe̱nuḥ | pra̱tnasya̍ | kāmya̍m | duhā̍nā | a̱ntariti̍ | pu̱traḥ | ca̱ra̱ti̱ | dakṣi̍ṇāyāḥ |
ā | dyo̱ta̱nim | va̱ha̱ti̱ | śu̱bhra-yā̍mā | u̱ṣasa̍ḥ | stoma̍ḥ | a̱śvinau̍ | a̱jī̱ga̱riti̍ ||3.058.01||

3.058.02a su̱yug va̍hanti̱ prati̍ vām ṛ̱teno̱rdhvā bha̍vanti pi̱tare̍va̱ medhā̍ḥ |
3.058.02c jare̍thām a̱smad vi pa̱ṇer ma̍nī̱ṣāṁ yu̱vor ava̍ś cakṛ̱mā yā̍tam a̱rvāk ||

su̱-yuk | va̱ha̱nti̱ | prati̍ | vā̱m | ṛ̱tena̍ | ū̱rdhvāḥ | bha̱va̱nti̱ | pi̱tarā̍-iva | medhā̍ḥ |
jare̍thām | a̱smat | vi | pa̱ṇeḥ | ma̱nī̱ṣām | yu̱voḥ | ava̍ḥ | ca̱kṛ̱ma̱ | ā | yā̱ta̱m | a̱rvāk ||3.058.02||

3.058.03a su̱yugbhi̱r aśvai̍ḥ su̱vṛtā̱ rathe̍na̱ dasrā̍v i̱maṁ śṛ̍ṇuta̱ṁ śloka̱m adre̍ḥ |
3.058.03c kim a̱ṅga vā̱m praty ava̍rti̱ṁ gami̍ṣṭhā̱hur viprā̍so aśvinā purā̱jāḥ ||

su̱yuk-bhi̍ḥ | aśvai̍ḥ | su̱-vṛtā̍ | rathe̍na | dasrau̍ | i̱mam | śṛ̱ṇu̱ta̱m | śloka̍m | adre̍ḥ |
kim | a̱ṅga | vā̱m | prati̍ | ava̍rtim | gami̍ṣṭhā | ā̱huḥ | viprā̍saḥ | a̱śvi̱nā̱ | pu̱rā̱-jāḥ ||3.058.03||

3.058.04a ā ma̍nyethā̱m ā ga̍ta̱ṁ kac ci̱d evai̱r viśve̱ janā̍so a̱śvinā̍ havante |
3.058.04c i̱mā hi vā̱ṁ goṛ̍jīkā̱ madhū̍ni̱ pra mi̱trāso̱ na da̱dur u̱sro agre̍ ||

ā | ma̱nye̱thā̱m | ā | ga̱ta̱m | kat | ci̱t | evai̍ḥ | viśve̍ | janā̍saḥ | a̱śvinā̍ | ha̱va̱nte̱ |
i̱mā | hi | vā̱m | go-ṛ̍jīkā | madhū̍ni | pra | mi̱trāsa̍ḥ | na | da̱duḥ | u̱sraḥ | agre̍ ||3.058.04||

3.058.05a ti̱raḥ pu̱rū ci̍d aśvinā̱ rajā̍ṁsy āṅgū̱ṣo vā̍m maghavānā̱ jane̍ṣu |
3.058.05c eha yā̍tam pa̱thibhi̍r deva̱yānai̱r dasrā̍v i̱me vā̍ṁ ni̱dhayo̱ madhū̍nām ||

ti̱raḥ | pu̱ru | ci̱t | a̱śvi̱nā̱ | rajā̍ṁsi | ā̱ṅgū̱ṣaḥ | vā̱m | ma̱gha̱-vā̱nā̱ | jane̍ṣu |
ā | i̱ha | yā̱ta̱m | pa̱thi-bhi̍ḥ | de̱va̱-yānai̍ḥ | dasrau̍ | i̱me | vā̱m | ni̱-dhaya̍ḥ | madhū̍nām ||3.058.05||

3.058.06a pu̱rā̱ṇam oka̍ḥ sa̱khyaṁ śi̱vaṁ vā̍ṁ yu̱vor na̍rā̱ dravi̍ṇaṁ ja̱hnāvyā̍m |
3.058.06c puna̍ḥ kṛṇvā̱nāḥ sa̱khyā śi̱vāni̱ madhvā̍ madema sa̱ha nū sa̍mā̱nāḥ ||

pu̱rā̱ṇam | oka̍ḥ | sa̱khyam | śi̱vam | vā̱m | yu̱voḥ | na̱rā̱ | dravi̍ṇam | ja̱hnāvyā̍m |
puna̱riti̍ | kṛ̱ṇvā̱nāḥ | sa̱khyā | śi̱vāni̍ | madhvā̍ | ma̱de̱ma̱ | sa̱ha | nu | sa̱mā̱nāḥ ||3.058.06||

3.058.07a aśvi̍nā vā̱yunā̍ yu̱vaṁ su̍dakṣā ni̱yudbhi̍ṣ ca sa̱joṣa̍sā yuvānā |
3.058.07c nāsa̍tyā ti̱roa̍hnyaṁ juṣā̱ṇā soma̍m pibatam a̱sridhā̍ sudānū ||

aśvi̍nā | vā̱yunā̍ | yu̱vam | su̱-da̱kṣā̱ | ni̱yut-bhi̍ḥ | ca̱ | sa̱-joṣa̍sā | yu̱vā̱nā̱ |
nāsa̍tyā | ti̱raḥ-a̍hnyam | ju̱ṣā̱ṇā | soma̍m | pi̱ba̱ta̱m | a̱sridhā̍ | su̱dā̱nū̱ iti̍ su-dānū ||3.058.07||

3.058.08a aśvi̍nā̱ pari̍ vā̱m iṣa̍ḥ purū̱cīr ī̱yur gī̱rbhir yata̍mānā̱ amṛ̍dhrāḥ |
3.058.08c ratho̍ ha vām ṛta̱jā adri̍jūta̱ḥ pari̱ dyāvā̍pṛthi̱vī yā̍ti sa̱dyaḥ ||

aśvi̍nā | pari̍ | vā̱m | iṣa̍ḥ | pu̱rū̱cīḥ | ī̱yuḥ | gī̱ḥ-bhiḥ | yata̍mānāḥ | amṛ̍dhrāḥ |
ratha̍ḥ | ha̱ | vā̱m | ṛ̱ta̱-jāḥ | adri̍-jūtaḥ | pari̍ | dyāvā̍pṛthi̱vī iti̍ | yā̱ti̱ | sa̱dyaḥ ||3.058.08||

3.058.09a aśvi̍nā madhu̱ṣutta̍mo yu̱vāku̱ḥ soma̱s tam pā̍ta̱m ā ga̍taṁ duro̱ṇe |
3.058.09c ratho̍ ha vā̱m bhūri̱ varpa̱ḥ kari̍krat su̱tāva̍to niṣkṛ̱tam āga̍miṣṭhaḥ ||

aśvi̍nā | ma̱dhu̱sut-ta̍maḥ | yu̱vāku̍ḥ | soma̍ḥ | tam | pā̱ta̱m | ā | ga̱ta̱m | du̱ro̱ṇe |
ratha̍ḥ | ha̱ | vā̱m | bhūri̍ | varpa̍ḥ | kari̍krat | su̱ta-va̍taḥ | ni̱ḥ-kṛ̱tam | ā-ga̍miṣṭhaḥ ||3.058.09||


3.059.01a mi̱tro janā̍n yātayati bruvā̱ṇo mi̱tro dā̍dhāra pṛthi̱vīm u̱ta dyām |
3.059.01c mi̱traḥ kṛ̱ṣṭīr ani̍miṣā̱bhi ca̍ṣṭe mi̱trāya̍ ha̱vyaṁ ghṛ̱tava̍j juhota ||

mi̱traḥ | janā̍n | yā̱ta̱ya̱ti̱ | bru̱vā̱ṇaḥ | mi̱traḥ | dā̱dhā̱ra̱ | pṛ̱thi̱vīm | u̱ta | dyām |
mi̱traḥ | kṛ̱ṣṭīḥ | ani̍-miṣā | a̱bhi | ca̱ṣṭe̱ | mi̱trāya̍ | ha̱vyam | ghṛ̱ta-va̍t | ju̱ho̱ta̱ ||3.059.01||

3.059.02a pra sa mi̍tra̱ marto̍ astu̱ praya̍svā̱n yas ta̍ āditya̱ śikṣa̍ti vra̱tena̍ |
3.059.02c na ha̍nyate̱ na jī̍yate̱ tvoto̱ naina̱m aṁho̍ aśno̱ty anti̍to̱ na dū̱rāt ||

pra | saḥ | mi̱tra̱ | marta̍ḥ | a̱stu̱ | praya̍svān | yaḥ | te̱ | ā̱di̱tya̱ | śikṣa̍ti | vra̱tena̍ |
na | ha̱nya̱te̱ | na | jī̱ya̱te̱ | tvā-ū̍taḥ | na | e̱na̱m | aṁha̍ḥ | a̱śno̱ti̱ | anti̍taḥ | na | dū̱rāt ||3.059.02||

3.059.03a a̱na̱mī̱vāsa̱ iḻa̍yā̱ mada̍nto mi̱tajña̍vo̱ vari̍ma̱nn ā pṛ̍thi̱vyāḥ |
3.059.03c ā̱di̱tyasya̍ vra̱tam u̍pakṣi̱yanto̍ va̱yam mi̱trasya̍ suma̱tau syā̍ma ||

a̱na̱mī̱vāsa̍ḥ | iḻa̍yā | mada̍ntaḥ | mi̱ta-jña̍vaḥ | vari̍man | ā | pṛ̱thi̱vyāḥ |
ā̱di̱tyasya̍ | vra̱tam | u̱pa̱-kṣi̱yanta̍ḥ | va̱yam | mi̱trasya̍ | su̱-ma̱tau | syā̱ma̱ ||3.059.03||

3.059.04a a̱yam mi̱tro na̍ma̱sya̍ḥ su̱śevo̱ rājā̍ sukṣa̱tro a̍janiṣṭa ve̱dhāḥ |
3.059.04c tasya̍ va̱yaṁ su̍ma̱tau ya̱jñiya̱syāpi̍ bha̱dre sau̍mana̱se syā̍ma ||

a̱yam | mi̱traḥ | na̱ma̱sya̍ḥ | su̱-śeva̍ḥ | rājā̍ | su̱-kṣa̱traḥ | a̱ja̱ni̱ṣṭa̱ | ve̱dhāḥ |
tasya̍ | va̱yam | su̱-ma̱tau | ya̱jñiya̍sya | api̍ | bha̱dre | sau̱ma̱na̱se | syā̱ma̱ ||3.059.04||

3.059.05a ma̱hām̐ ā̍di̱tyo nama̍sopa̱sadyo̍ yāta̱yajja̍no gṛṇa̱te su̱śeva̍ḥ |
3.059.05c tasmā̍ e̱tat panya̍tamāya̱ juṣṭa̍m a̱gnau mi̱trāya̍ ha̱vir ā ju̍hota ||

ma̱hān | ā̱di̱tyaḥ | nama̍sā | u̱pa̱-sadya̍ḥ | yā̱ta̱yat-ja̍naḥ | gṛ̱ṇa̱te | su̱-śeva̍ḥ |
tasmai̍ | e̱tat | panya̍-tamāya | juṣṭa̍m | a̱gnau | mi̱trāya̍ | ha̱viḥ | ā | ju̱ho̱ta̱ ||3.059.05||

3.059.06a mi̱trasya̍ carṣaṇī̱dhṛto 'vo̍ de̱vasya̍ sāna̱si |
3.059.06c dyu̱mnaṁ ci̱traśra̍vastamam ||

mi̱trasya̍ | ca̱rṣa̱ṇi̱-dhṛta̍ḥ | ava̍ḥ | de̱vasya̍ | sā̱na̱si |
dyu̱mnam | ci̱traśra̍vaḥ-tamam ||3.059.06||

3.059.07a a̱bhi yo ma̍hi̱nā diva̍m mi̱tro ba̱bhūva̍ sa̱prathā̍ḥ |
3.059.07c a̱bhi śravo̍bhiḥ pṛthi̱vīm ||

a̱bhi | yaḥ | ma̱hi̱nā | diva̍m | mi̱traḥ | ba̱bhūva̍ | sa̱-prathā̍ḥ |
a̱bhi | śrava̍ḥ-bhiḥ | pṛ̱thi̱vīm ||3.059.07||

3.059.08a mi̱trāya̱ pañca̍ yemire̱ janā̍ a̱bhiṣṭi̍śavase |
3.059.08c sa de̱vān viśvā̍n bibharti ||

mi̱trāya | pañca̍ | ye̱mi̱re̱ | janā̍ḥ | a̱bhiṣṭi̍-śavase |
saḥ | de̱vān | viśvā̍n | bi̱bha̱rti̱ ||3.059.08||

3.059.09a mi̱tro de̱veṣv ā̱yuṣu̱ janā̍ya vṛ̱ktaba̍rhiṣe |
3.059.09c iṣa̍ i̱ṣṭavra̍tā akaḥ ||

mi̱traḥ | de̱veṣu̍ | ā̱yuṣu̍ | janā̍ya | vṛ̱kta-ba̍rhiṣe |
iṣa̍ḥ | i̱ṣṭa-vra̍tāḥ | a̱ka̱ritya̍kaḥ ||3.059.09||


3.060.01a i̱heha̍ vo̱ mana̍sā ba̱ndhutā̍ nara u̱śijo̍ jagmur a̱bhi tāni̱ veda̍sā |
3.060.01c yābhi̍r mā̱yābhi̱ḥ prati̍jūtivarpasa̱ḥ saudha̍nvanā ya̱jñiya̍m bhā̱gam ā̍na̱śa ||

i̱ha-i̍ha | va̱ḥ | mana̍sā | ba̱ndhutā̍ | na̱ra̱ḥ | u̱śija̍ḥ | ja̱gmu̱ḥ | a̱bhi | tāni̍ | veda̍sā |
yābhi̍ḥ | mā̱yābhiḥ | prati̍jūti-varpasaḥ | saudha̍nvanāḥ | ya̱jñiya̍m | bha̱gam | ā̱na̱śa ||3.060.01||

3.060.02a yābhi̱ḥ śacī̍bhiś cama̱sām̐ api̍ṁśata̱ yayā̍ dhi̱yā gām ari̍ṇīta̱ carma̍ṇaḥ |
3.060.02c yena̱ harī̱ mana̍sā ni̱rata̍kṣata̱ tena̍ deva̱tvam ṛ̍bhava̱ḥ sam ā̍naśa ||

yābhi̍ḥ | śacī̍bhiḥ | ca̱ma̱sām | api̍ṁśata | yayā̍ | dhi̱yā | gām | ari̍ṇīta | carma̍ṇaḥ |
yena̍ | harī̱ iti̍ | mana̍sā | ni̱ḥ-ata̍kṣata | tena̍ | de̱va̱-tvam | ṛ̱bha̱va̱ḥ | sam | ā̱naśa ||3.060.02||

3.060.03a indra̍sya sa̱khyam ṛ̱bhava̱ḥ sam ā̍naśu̱r mano̱r napā̍to a̱paso̍ dadhanvire |
3.060.03c sau̱dha̱nva̱nāso̍ amṛta̱tvam eri̍re vi̱ṣṭvī śamī̍bhiḥ su̱kṛta̍ḥ sukṛ̱tyayā̍ ||

indra̍sya | sa̱khyam | ṛ̱bhava̍ḥ | sam | ā̱na̱śu̱ḥ | mano̍ḥ | napā̍taḥ | a̱pasa̍ḥ | da̱dha̱nvi̱re̱ |
sau̱dha̱nva̱nāsa̍ḥ | a̱mṛ̱ta̱-tvam | ā | ī̱ri̱re̱ | vi̱ṣṭvī | śamī̍bhiḥ | su̱-kṛta̍ḥ | su̱-kṛ̱tyayā̍ ||3.060.03||

3.060.04a indre̍ṇa yātha sa̱ratha̍ṁ su̱te sacā̱m̐ atho̱ vaśā̍nām bhavathā sa̱ha śri̱yā |
3.060.04c na va̍ḥ prati̱mai su̍kṛ̱tāni̍ vāghata̱ḥ saudha̍nvanā ṛbhavo vī̱ryā̍ṇi ca ||

indre̍ṇa | yā̱tha̱ | sa̱-ratha̍m | su̱te | sacā̍ | atho̱ iti̍ | vaśā̍nām | bha̱va̱tha̱ | sa̱ha | śri̱yā |
na | va̱ḥ | pra̱ti̱-mai | su̱-kṛ̱tāni̍ | vā̱gha̱ta̱ḥ | saudha̍nvanāḥ | ṛ̱bha̱va̱ḥ | vī̱ryā̍ṇi | ca ||3.060.04||

3.060.05a indra̍ ṛ̱bhubhi̱r vāja̍vadbhi̱ḥ samu̍kṣitaṁ su̱taṁ soma̱m ā vṛ̍ṣasvā̱ gabha̍styoḥ |
3.060.05c dhi̱yeṣi̱to ma̍ghavan dā̱śuṣo̍ gṛ̱he sau̍dhanva̱nebhi̍ḥ sa̱ha ma̍tsvā̱ nṛbhi̍ḥ ||

indra̍ | ṛ̱bhu-bhi̍ḥ | vāja̍vat-bhiḥ | sam-u̍kṣitam | su̱tam | soma̍m | ā | vṛ̱ṣa̱sva̱ | gabha̍styoḥ |
dhi̱yā | i̱ṣi̱taḥ | ma̱gha̱va̱n | dā̱śuṣa̍ḥ | gṛ̱he | sau̱dha̱nva̱nebhi̍ḥ | sa̱ha | ma̱tsva̱ | nṛ-bhi̍ḥ ||3.060.05||

3.060.06a indra̍ ṛbhu̱mān vāja̍vān matsve̱ha no̱ 'smin sava̍ne̱ śacyā̍ puruṣṭuta |
3.060.06c i̱māni̱ tubhya̱ṁ svasa̍rāṇi yemire vra̱tā de̱vānā̱m manu̍ṣaś ca̱ dharma̍bhiḥ ||

indra̍ | ṛ̱bhu̱-mān | vāja̍-vān | ma̱tsva̱ | i̱ha | na̱ḥ | a̱smin | sava̍ne | śacyā̍ | pu̱ru̱-stu̱ta̱ |
i̱māni̍ | tubhya̍m | svasa̍rāṇi | ye̱mi̱re̱ | vra̱tā | de̱vānā̍m | manu̍ṣaḥ | ca̱ | dharma̍-bhiḥ ||3.060.06||

3.060.07a indra̍ ṛ̱bhubhi̍r vā̱jibhi̍r vā̱jaya̍nn i̱ha stoma̍ṁ jari̱tur upa̍ yāhi ya̱jñiya̍m |
3.060.07c śa̱taṁ kete̍bhir iṣi̱rebhi̍r ā̱yave̍ sa̱hasra̍ṇītho adhva̱rasya̱ homa̍ni ||

indra̍ | ṛ̱bhu-bhi̍ḥ | vā̱ji-bhi̍ḥ | vā̱jaya̍n | i̱ha | stoma̍m | ja̱ri̱tuḥ | upa̍ | yā̱hi̱ | ya̱jñiya̍m |
śa̱tam | kete̍bhiḥ | i̱ṣi̱rebhi̍ḥ | ā̱yave̍ | sa̱hasra̍-nīthaḥ | a̱dhva̱rasya̍ | homa̍ni ||3.060.07||


3.061.01a uṣo̱ vāje̍na vājini̱ prace̍tā̱ḥ stoma̍ṁ juṣasva gṛṇa̱to ma̍ghoni |
3.061.01c pu̱rā̱ṇī de̍vi yuva̱tiḥ pura̍ṁdhi̱r anu̍ vra̱taṁ ca̍rasi viśvavāre ||

uṣa̍ḥ | vāje̍na | vā̱ji̱ni̱ | pra-ce̍tāḥ | stoma̍m | ju̱ṣa̱sva̱ | gṛ̱ṇa̱taḥ | ma̱gho̱ni̱ |
pu̱rā̱ṇī | de̱vi̱ | yu̱va̱tiḥ | pura̍m-dhiḥ | anu̍ | vra̱tam | ca̱ra̱si̱ | vi̱śva̱-vā̱re̱ ||3.061.01||

3.061.02a uṣo̍ de̱vy ama̍rtyā̱ vi bhā̍hi ca̱ndrara̍thā sū̱nṛtā̍ ī̱raya̍ntī |
3.061.02c ā tvā̍ vahantu su̱yamā̍so̱ aśvā̱ hira̍ṇyavarṇām pṛthu̱pāja̍so̱ ye ||

uṣa̍ḥ | de̱vi̱ | ama̍rtyā | vi | bhā̱hi̱ | ca̱ndra-ra̍thā | sū̱nṛtā̍ḥ | ī̱raya̍ntī |
ā | tvā̱ | va̱ha̱ntu̱ | su̱-yamā̍saḥ | aśvā̍ḥ | hira̍ṇya-varṇām | pṛ̱thu̱-pāja̍saḥ | ye ||3.061.02||

3.061.03a uṣa̍ḥ pratī̱cī bhuva̍nāni̱ viśvo̱rdhvā ti̍ṣṭhasy a̱mṛta̍sya ke̱tuḥ |
3.061.03c sa̱mā̱nam artha̍ṁ caraṇī̱yamā̍nā ca̱kram i̍va navya̱sy ā va̍vṛtsva ||

uṣa̍ḥ | pra̱tī̱cī | bhuva̍nāni | viśvā̍ | ū̱rdhvā | ti̱ṣṭha̱si̱ | a̱mṛta̍sya | ke̱tuḥ |
sa̱mā̱nam | artha̍m | ca̱ra̱ṇī̱yamā̍nā | ca̱kram-i̍va | na̱vya̱si̱ | ā | va̱vṛ̱tsva̱ ||3.061.03||

3.061.04a ava̱ syūme̍va cinva̱tī ma̱ghony u̱ṣā yā̍ti̱ svasa̍rasya̱ patnī̍ |
3.061.04c sva1̱̍r jana̍ntī su̱bhagā̍ su̱daṁsā̱ āntā̍d di̱vaḥ pa̍pratha̱ ā pṛ̍thi̱vyāḥ ||

ava̍ | syūma̍-iva | ci̱nva̱tī | ma̱ghonī̍ | u̱ṣāḥ | yā̱ti̱ | svasa̍rasya | patnī̍ |
sva̍ḥ | jana̍ntī | su̱-bhagā̍ | su̱-daṁsā̍ḥ | ā | antā̍t | di̱vaḥ | pa̱pra̱the̱ | ā | pṛ̱thi̱vyāḥ ||3.061.04||

3.061.05a acchā̍ vo de̱vīm u̱ṣasa̍ṁ vibhā̱tīm pra vo̍ bharadhva̱ṁ nama̍sā suvṛ̱ktim |
3.061.05c ū̱rdhvam ma̍dhu̱dhā di̱vi pājo̍ aśre̱t pra ro̍ca̱nā ru̍ruce ra̱ṇvasa̍ṁdṛk ||

accha̍ | va̱ḥ | de̱vīm | u̱ṣasa̍m | vi̱-bhā̱tīm | pra | va̱ḥ | bha̱ra̱dhva̱m | nama̍sā | su̱-vṛ̱ktim |
ū̱rdhvam | ma̱dhu̱dhā | di̱vi | pāja̍ḥ | a̱śre̱t | pra | ro̱ca̱nā | ru̱ru̱ce̱ | ra̱ṇva-sa̍ndṛk ||3.061.05||

3.061.06a ṛ̱tāva̍rī di̱vo a̱rkair a̍bo̱dhy ā re̱vatī̱ roda̍sī ci̱tram a̍sthāt |
3.061.06c ā̱ya̱tīm a̍gna u̱ṣasa̍ṁ vibhā̱tīṁ vā̱mam e̍ṣi̱ dravi̍ṇa̱m bhikṣa̍māṇaḥ ||

ṛ̱ta-va̍rī | di̱vaḥ | a̱rkaiḥ | a̱bo̱dhi̱ | ā | re̱vatī̍ | roda̍sī̱ iti̍ | ci̱tram | ā̱sthā̱t |
ā̱ya̱tīm | a̱gne̱ | u̱ṣasa̍m | vi̱-bhā̱tīm | vā̱mam | e̱ṣi̱ | dravi̍ṇam | bhikṣa̍māṇaḥ ||3.061.06||

3.061.07a ṛ̱tasya̍ bu̱dhna u̱ṣasā̍m iṣa̱ṇyan vṛṣā̍ ma̱hī roda̍sī̱ ā vi̍veśa |
3.061.07c ma̱hī mi̱trasya̱ varu̍ṇasya mā̱yā ca̱ndreva̍ bhā̱nuṁ vi da̍dhe puru̱trā ||

ṛ̱tasya̍ | bu̱dhne | u̱ṣasā̍m | i̱ṣa̱ṇyan | vṛṣā̍ | ma̱hī iti̍ | roda̍sī̱ iti̍ | ā | vi̱ve̱śa̱ |
ma̱hī | mi̱trasya̍ | varu̍ṇasya | mā̱yā | ca̱ndrā-i̍va | bhā̱num | vi | da̱dhe̱ | pu̱ru̱-trā ||3.061.07||


3.062.01a i̱mā u̍ vām bhṛ̱mayo̱ manya̍mānā yu̱vāva̍te̱ na tujyā̍ abhūvan |
3.062.01c kva1̱̍ tyad i̍ndrāvaruṇā̱ yaśo̍ vā̱ṁ yena̍ smā̱ sina̱m bhara̍tha̱ḥ sakhi̍bhyaḥ ||

i̱māḥ | ū̱m̐ iti̍ | vā̱m | bhṛ̱maya̍ḥ | manya̍mānāḥ | yu̱vā-va̍te | na | tujyā̍ḥ | a̱bhū̱va̱n |
kva̍ | tyat | i̱ndrā̱va̱ru̱ṇā̱ | yaśa̍ḥ | vā̱m | yena̍ | sma̱ | sina̍m | bhara̍thaḥ | sakhi̍-bhyaḥ ||3.062.01||

3.062.02a a̱yam u̍ vām puru̱tamo̍ rayī̱yañ cha̍śvatta̱mam ava̍se johavīti |
3.062.02c sa̱joṣā̍v indrāvaruṇā ma̱rudbhi̍r di̱vā pṛ̍thi̱vyā śṛ̍ṇuta̱ṁ hava̍m me ||

a̱yam | ū̱m̐ iti̍ | vā̱m | pu̱ru̱-tama̍ḥ | ra̱yi̱-yan | śa̱śva̱t-ta̱mam | ava̍se | jo̱ha̱vī̱ti̱ |
sa̱-joṣau̍ | i̱ndrā̱va̱ru̱ṇā̱ | ma̱rut-bhi̍ḥ | di̱vā | pṛ̱thi̱vyā | śṛ̱ṇu̱ta̱m | hava̍m | me̱ ||3.062.02||

3.062.03a a̱sme tad i̍ndrāvaruṇā̱ vasu̍ ṣyād a̱sme ra̱yir ma̍ruta̱ḥ sarva̍vīraḥ |
3.062.03c a̱smān varū̍trīḥ śara̱ṇair a̍vantv a̱smān hotrā̱ bhāra̍tī̱ dakṣi̍ṇābhiḥ ||

a̱sme iti̍ | tat | i̱ndrā̱va̱ru̱ṇā̱ | vasu̍ | syā̱t | a̱sme iti̍ | ra̱yiḥ | ma̱ru̱ta̱ḥ | sarva̍-vīraḥ |
a̱smān | varū̍trīḥ | śa̱ra̱ṇaiḥ | a̱va̱ntu̱ | a̱smān | hotrā̍ | bhāra̍tī | dakṣi̍ṇābhiḥ ||3.062.03||

3.062.04a bṛha̍spate ju̱ṣasva̍ no ha̱vyāni̍ viśvadevya |
3.062.04c rāsva̱ ratnā̍ni dā̱śuṣe̍ ||

bṛha̍spate | ju̱ṣasva̍ | na̱ḥ | ha̱vyāni̍ | vi̱śva̱-de̱vya̱ |
rāsva̍ | ratnā̍ni | dā̱śuṣe̍ ||3.062.04||

3.062.05a śuci̍m a̱rkair bṛha̱spati̍m adhva̱reṣu̍ namasyata |
3.062.05c anā̱my oja̱ ā ca̍ke ||

śuci̍m | a̱rkaiḥ | bṛha̱spati̍m | a̱dhva̱reṣu̍ | na̱ma̱sya̱ta̱ |
anā̍mi | oja̍ḥ | ā | ca̱ke̱ ||3.062.05||

3.062.06a vṛ̱ṣa̱bhaṁ ca̍rṣaṇī̱nāṁ vi̱śvarū̍pa̱m adā̍bhyam |
3.062.06c bṛha̱spati̱ṁ vare̍ṇyam ||

vṛ̱ṣa̱bham | ca̱rṣa̱ṇī̱nām | vi̱śva-rū̍pam | adā̍bhyam |
bṛha̱spati̍m | vare̍ṇyam ||3.062.06||

3.062.07a i̱yaṁ te̍ pūṣann āghṛṇe suṣṭu̱tir de̍va̱ navya̍sī |
3.062.07c a̱smābhi̱s tubhya̍ṁ śasyate ||

i̱yam | te̱ | pū̱ṣa̱n | ā̱ghṛ̱ṇe̱ | su̱-stu̱tiḥ | de̱va̱ | navya̍sī |
a̱smābhi̍ḥ | tubhya̍m | śa̱sya̱te̱ ||3.062.07||

3.062.08a tāṁ ju̍ṣasva̱ gira̱m mama̍ vāja̱yantī̍m avā̱ dhiya̍m |
3.062.08c va̱dhū̱yur i̍va̱ yoṣa̍ṇām ||

tām | ju̱ṣa̱sva̱ | gira̍m | mama̍ | vā̱ja̱-yantī̍m | a̱va̱ | dhiya̍m |
va̱dhū̱yuḥ-i̍va | yoṣa̍ṇām ||3.062.08||

3.062.09a yo viśvā̱bhi vi̱paśya̍ti̱ bhuva̍nā̱ saṁ ca̱ paśya̍ti |
3.062.09c sa na̍ḥ pū̱ṣāvi̱tā bhu̍vat ||

yaḥ | viśvā̍ | a̱bhi | vi̱-paśya̍ti | bhuva̍nā | sam | ca̱ | paśya̍ti |
saḥ | na̱ḥ | pū̱ṣā | a̱vi̱tā | bhu̱va̱t ||3.062.09||

3.062.10a tat sa̍vi̱tur vare̍ṇya̱m bhargo̍ de̱vasya̍ dhīmahi |
3.062.10c dhiyo̱ yo na̍ḥ praco̱dayā̍t ||

tat | sa̱vi̱tuḥ | vare̍ṇyam | bharga̍ḥ | de̱vasya̍ | dhī̱ma̱hi̱ |
dhiya̍ḥ | yaḥ | na̱ḥ | pra̱-co̱dayā̍t ||3.062.10||

3.062.11a de̱vasya̍ savi̱tur va̱yaṁ vā̍ja̱yanta̱ḥ pura̍ṁdhyā |
3.062.11c bhaga̍sya rā̱tim ī̍mahe ||

de̱vasya̍ | sa̱vi̱tuḥ | va̱yam | vā̱ja̱-yanta̍ḥ | pura̍m-dhyā |
bhaga̍sya | rā̱tim | ī̱ma̱he̱ ||3.062.11||

3.062.12a de̱vaṁ nara̍ḥ savi̱tāra̱ṁ viprā̍ ya̱jñaiḥ su̍vṛ̱ktibhi̍ḥ |
3.062.12c na̱ma̱syanti̍ dhi̱yeṣi̱tāḥ ||

de̱vam | nara̍ḥ | sa̱vi̱tāra̍m | viprā̍ḥ | ya̱jñaiḥ | su̱vṛ̱kti-bhi̍ḥ |
na̱ma̱syanti̍ | dhi̱yā | i̱ṣi̱tāḥ ||3.062.12||

3.062.13a somo̍ jigāti gātu̱vid de̱vānā̍m eti niṣkṛ̱tam |
3.062.13c ṛ̱tasya̱ yoni̍m ā̱sada̍m ||

soma̍ḥ | ji̱gā̱ti̱ | gā̱tu̱-vit | de̱vānā̍m | e̱ti̱ | ni̱ḥ-kṛ̱tam |
ṛ̱tasya̍ | yoni̍m | ā̱-sada̍m ||3.062.13||

3.062.14a somo̍ a̱smabhya̍ṁ dvi̱pade̱ catu̍ṣpade ca pa̱śave̍ |
3.062.14c a̱na̱mī̱vā iṣa̍s karat ||

soma̍ḥ | a̱smabhya̍m | dvi̱-pade̍ | catu̍ḥ-pade | ca̱ | pa̱śave̍ |
a̱na̱mī̱vāḥ | iṣa̍ḥ | ka̱ra̱t ||3.062.14||

3.062.15a a̱smāka̱m āyu̍r va̱rdhaya̍nn a̱bhimā̍tī̱ḥ saha̍mānaḥ |
3.062.15c soma̍ḥ sa̱dhastha̱m āsa̍dat ||

a̱smāka̍m | āyu̍ḥ | va̱rdhaya̍n | a̱bhi-mā̍tīḥ | saha̍mānaḥ |
soma̍ḥ | sa̱dha-stha̍m | ā | a̱sa̱da̱t ||3.062.15||

3.062.16a ā no̍ mitrāvaruṇā ghṛ̱tair gavyū̍tim ukṣatam |
3.062.16c madhvā̱ rajā̍ṁsi sukratū ||

ā | na̱ḥ | mi̱trā̱va̱ru̱ṇā̱ | ghṛ̱taiḥ | gavyū̍tim | u̱kṣa̱ta̱m |
madhvā̍ | rajā̍ṁsi | su̱kra̱tū̱ iti̍ su-kratū ||3.062.16||

3.062.17a u̱ru̱śaṁsā̍ namo̱vṛdhā̍ ma̱hnā dakṣa̍sya rājathaḥ |
3.062.17c drāghi̍ṣṭhābhiḥ śucivratā ||

u̱ru̱-śaṁsā̍ | na̱ma̱ḥ-vṛdhā̍ | ma̱hnā | dakṣa̍sya | rā̱ja̱tha̱ḥ |
drāghi̍ṣṭhābhiḥ | śu̱ci̱-vra̱tā̱ ||3.062.17||

3.062.18a gṛ̱ṇā̱nā ja̱mada̍gninā̱ yonā̍v ṛ̱tasya̍ sīdatam |
3.062.18c pā̱taṁ soma̍m ṛtāvṛdhā ||

gṛ̱ṇā̱nā | ja̱mat-a̍gninā | yonau̍ | ṛ̱tasya̍ | sī̱da̱ta̱m |
pā̱tam | soma̍m | ṛ̱ta̱-vṛ̱dhā̱ ||3.062.18||


Notes by Detlef Eichler : 1. Please note that this text is not for commercial use and released only for personal scholarly activity. This transliteration version of Rigveda-Saṁhitā is from an ITRANS file which I have created on the basis of The Aufrecht/van Nooten/Holland (Samhita) version of theRigveda. The Padapāṭha is based on the text entered by the members of the Sansknet project. 2. Font: times new roman / Unicode 3. Hiatus ai, au are shown as aï, aü 4. Transliteration:
a ā i ï ī ī3 u ü ū ṛ ṝ ḷ e ai o au ṁ ḥ m̐ ' | a̱ a̍ ā̱ ā̍ i̱ i̍ ī̱ ī̍ u u̍ ü̍ ū̱ ū̍ ṛ̱ ṛ̍ ṝ̱ ṝ̍ ḷ̱ e̱ e̍ ai̱ ai̍ o̱ o̍ au̱ au̍ 1̱̍ 3̱̍ k kh g gh ṅ c ch j jh ñ ṭ ṭh ḍ ḍh ṇ t th d dh n p ph b bh m y r l v ś ṣ s h ḻ ḻh 5. Last updated 8 September 2016