Ṛgveda-Saṁhitā with Padapāṭha
Maṇḍala 2
Transliterated text without accents


2.001.01a tvam agne dyubhis tvam āśuśukṣaṇis tvam adbhyas tvam aśmanas pari |
2.001.01c tvaṁ vanebhyas tvam oṣadhībhyas tvaṁ nṛṇāṁ nṛpate jāyase śuciḥ ||

tvam | agne | dyu-bhiḥ | tvam | āśuśukṣaṇiḥ | tvam | at-bhyaḥ | tvam | aśmanaḥ | pari |
tvam | vanebhyaḥ | tvam | oṣadhībhyaḥ | tvam | nṛṇām | nṛ-pate | jāyase | śuciḥ ||2.001.01||

2.001.02a tavāgne hotraṁ tava potram ṛtviyaṁ tava neṣṭraṁ tvam agnid ṛtāyataḥ |
2.001.02c tava praśāstraṁ tvam adhvarīyasi brahmā cāsi gṛhapatiś ca no dame ||

tava | agne | hotram | tava | potram | ṛtviyam | tava | neṣṭram | tvam | agnit | ṛta-yataḥ |
tava | pra-śāstram | tvam | adhvari-yasi | brahmā | ca | asi | gṛṭha-patiḥ | ca | naḥ | dame ||2.001.02||

2.001.03a tvam agna indro vṛṣabhaḥ satām asi tvaṁ viṣṇur urugāyo namasyaḥ |
2.001.03c tvam brahmā rayivid brahmaṇas pate tvaṁ vidhartaḥ sacase puraṁdhyā ||

tvam | agne | indraḥ | vṛṣabhaḥ | satām | asi | tvam | viṣṇuḥ | uru-gāyaḥ | namasyaḥ |
tvam | brahmā | rayi-vit | brahmaṇaḥ | pate | tvam | vidhartariti vi-dhartaḥ | sacase | puram-dhyā ||2.001.03||

2.001.04a tvam agne rājā varuṇo dhṛtavratas tvam mitro bhavasi dasma īḍyaḥ |
2.001.04c tvam aryamā satpatir yasya sambhujaṁ tvam aṁśo vidathe deva bhājayuḥ ||

tvam | agne | rājā | varuṇaḥ | dhṛta-vrataḥ | tvam | mitraḥ | bhavasi | dasmaḥ | īḍyaḥ |
tvam | aryamā | sat-patiḥ | yasya | sam-bhujam | tvam | aṁśaḥ | vidathe | deva | bhājayuḥ ||2.001.04||

2.001.05a tvam agne tvaṣṭā vidhate suvīryaṁ tava gnāvo mitramahaḥ sajātyam |
2.001.05c tvam āśuhemā rariṣe svaśvyaṁ tvaṁ narāṁ śardho asi purūvasuḥ ||

tvam | agne | tvaṣṭā | vidhate | su-vīryam | tava | gnāvaḥ | mitra-mahaḥ | sa-jātyam |
tvam | āśu-hemā | rariṣe | su-aśvyam | tvam | narām | śardhaḥ | asi | puru-vasuḥ ||2.001.05||

2.001.06a tvam agne rudro asuro maho divas tvaṁ śardho mārutam pṛkṣa īśiṣe |
2.001.06c tvaṁ vātair aruṇair yāsi śaṁgayas tvam pūṣā vidhataḥ pāsi nu tmanā ||

tvam | agne | rudraḥ | asuraḥ | mahaḥ | divaḥ | tvam | śardhaḥ | mārutam | pṛkṣaḥ | īśiṣe |
tvam | vātaiḥ | aruṇaiḥ | yāsi | śam-gayaḥ | tvam | pūṣā | vidhataḥ | pāsi | nu | tmanā ||2.001.06||

2.001.07a tvam agne draviṇodā araṁkṛte tvaṁ devaḥ savitā ratnadhā asi |
2.001.07c tvam bhago nṛpate vasva īśiṣe tvam pāyur dame yas te 'vidhat ||

tvam | agne | draviṇaḥ-dāḥ | aram-kṛte | tvam | devaḥ | savitā | ratna-dhāḥ | asi |
tvam | bhagaḥ | nṛ-pate | vasvaḥ | īśiṣe | tvam | pāyuḥ | dame | yaḥ | te | avidhat ||2.001.07||

2.001.08a tvām agne dama ā viśpatiṁ viśas tvāṁ rājānaṁ suvidatram ṛñjate |
2.001.08c tvaṁ viśvāni svanīka patyase tvaṁ sahasrāṇi śatā daśa prati ||

tvām | agne | dame | ā | viśpatim | viśaḥ | tvām | rājānam | su-vidatram | ṛñjate |
tvam | viśvāni | su-anīka | patyase | tvam | sahasrāṇi | śatā | daśa | prati ||2.001.08||

2.001.09a tvām agne pitaram iṣṭibhir naras tvām bhrātrāya śamyā tanūrucam |
2.001.09c tvam putro bhavasi yas te 'vidhat tvaṁ sakhā suśevaḥ pāsy ādhṛṣaḥ ||

tvām | agne | pitaram | iṣṭi-bhiḥ | naraḥ | tvām | bhrātrāya | śamyā | tanū-rucam |
tvam | putraḥ | bhavasi | yaḥ | te | avidhat | tvam | sakhā | su-śevaḥ | pāsi | ā-dhṛṣaḥ ||2.001.09||

2.001.10a tvam agna ṛbhur āke namasyas tvaṁ vājasya kṣumato rāya īśiṣe |
2.001.10c tvaṁ vi bhāsy anu dakṣi dāvane tvaṁ viśikṣur asi yajñam ātaniḥ ||

tvam | agne | ṛbhuḥ | āke | namasyaḥ | tvam | vājasya | kṣu-mataḥ | rāyaḥ | īśiṣe |
tvam | vi | bhāsi | anu | dhakṣi | dāvane | tvam | vi-śikṣuḥ | asi | yajñam | ā-taniḥ ||2.001.10||

2.001.11a tvam agne aditir deva dāśuṣe tvaṁ hotrā bhāratī vardhase girā |
2.001.11c tvam iḻā śatahimāsi dakṣase tvaṁ vṛtrahā vasupate sarasvatī ||

tvam | agne | aditiḥ | deva | dāśuṣe | tvam | hotrā | bhāratī | vardhase | girā |
tvam | iḻā | śata-himā | asi | dakṣase | tvam | vṛtra-hā | vasu-pate | sarasvatī ||2.001.11||

2.001.12a tvam agne subhṛta uttamaṁ vayas tava spārhe varṇa ā saṁdṛśi śriyaḥ |
2.001.12c tvaṁ vājaḥ prataraṇo bṛhann asi tvaṁ rayir bahulo viśvatas pṛthuḥ ||

tvam | agne | su-bhṛtaḥ | ut-tamam | vayaḥ | tava | spārhe | varṇe | ā | sam-dṛśi | śriyaḥ |
tvam | vājaḥ | pra-taraṇaḥ | bṛhan | asi | tvam | rayiḥ | bahulaḥ | viśvataḥ | pṛthuḥ ||2.001.12||

2.001.13a tvām agna ādityāsa āsyaṁ tvāṁ jihvāṁ śucayaś cakrire kave |
2.001.13c tvāṁ rātiṣāco adhvareṣu saścire tve devā havir adanty āhutam ||

tvām | agne | ādityāsaḥ | āsyam | tvām | jihvām | śucayaḥ | cakrire | kave |
tvām | rāti-sācaḥ | adhvareṣu | saścire | tve iti | devāḥ | haviḥ | adanti | ā-hutam ||2.001.13||

2.001.14a tve agne viśve amṛtāso adruha āsā devā havir adanty āhutam |
2.001.14c tvayā martāsaḥ svadanta āsutiṁ tvaṁ garbho vīrudhāṁ jajñiṣe śuciḥ ||

tve iti | agne | viśve | amṛtāsaḥ | adruhaḥ | āsā | devāḥ | haviḥ | adanti | ā-hutam |
tvayā | martāsaḥ | svadante | ā-sutim | tvam | garbhaḥ | vīrudhām | jajñiṣe | śuciḥ ||2.001.14||

2.001.15a tvaṁ tān saṁ ca prati cāsi majmanāgne sujāta pra ca deva ricyase |
2.001.15c pṛkṣo yad atra mahinā vi te bhuvad anu dyāvāpṛthivī rodasī ubhe ||

tvam | tān | sam | ca | prati | ca | asi | majmanā | agne | su-jāta | pra | ca | deva | ricyase |
pṛkṣaḥ | yat | atra | mahinā | vi | te | bhuvat | anu | dyāvāpṛthivī iti | rodasī iti | ubhe iti ||2.001.15||

2.001.16a ye stotṛbhyo goagrām aśvapeśasam agne rātim upasṛjanti sūrayaḥ |
2.001.16c asmāñ ca tām̐ś ca pra hi neṣi vasya ā bṛhad vadema vidathe suvīrāḥ ||

ye | stotṛ-bhyaḥ | go-agrām | aśva-peśasam | agne | rātim | upa-sṛjanti | sūrayaḥ |
asmān | ca | tān | ca | pra | hi | neṣi | vasyaḥ | ā | bṛhat | vadema | vidathe | su-vīrāḥ ||2.001.16||


2.002.01a yajñena vardhata jātavedasam agniṁ yajadhvaṁ haviṣā tanā girā |
2.002.01c samidhānaṁ suprayasaṁ svarṇaraṁ dyukṣaṁ hotāraṁ vṛjaneṣu dhūrṣadam ||

yajñena | vardhata | jāta-vedasam | agnim | yajadhvam | haviṣā | tanā | girā |
sam-idhānam | su-prayasam | svaḥ-naram | dyukṣam | hotāram | vṛjaneṣu | dhūḥ-sadam ||2.002.01||

2.002.02a abhi tvā naktīr uṣaso vavāśire 'gne vatsaṁ na svasareṣu dhenavaḥ |
2.002.02c diva ived aratir mānuṣā yugā kṣapo bhāsi puruvāra saṁyataḥ ||

abhi | tvā | naktīḥ | uṣasaḥ | vavāśire | agne | vatsam | na | svasareṣu | dhenavaḥ |
divaḥ-iva | it | aratiḥ | mānuṣā | yugā | ā | kṣapaḥ | bhāsi | puru-vāra | sam-yataḥ ||2.002.02||

2.002.03a taṁ devā budhne rajasaḥ sudaṁsasaṁ divaspṛthivyor aratiṁ ny erire |
2.002.03c ratham iva vedyaṁ śukraśociṣam agnim mitraṁ na kṣitiṣu praśaṁsyam ||

taṁ | devāḥ | budhne | rajasaḥ | su-daṁsasam | divaḥpṛthivyoḥ | aratim | ni | erire |
ratham-iva | vedyam | śukra-śociṣam | agnim | mitram | na | kṣitiṣu | pra-śaṁsyam ||2.002.03||

2.002.04a tam ukṣamāṇaṁ rajasi sva ā dame candram iva surucaṁ hvāra ā dadhuḥ |
2.002.04c pṛśnyāḥ pataraṁ citayantam akṣabhiḥ pātho na pāyuṁ janasī ubhe anu ||

tam | ukṣamāṇam | rajasi | sve | ā | dame | candram-iva | su-rucam | hvāre | ā | dadhuḥ |
pṛśnyāḥ | pataram | citayantam | akṣa-bhiḥ | pāthaḥ | na | pāyum | janasī iti | ubhe iti | anu ||2.002.04||

2.002.05a sa hotā viśvam pari bhūtv adhvaraṁ tam u havyair manuṣa ṛñjate girā |
2.002.05c hiriśipro vṛdhasānāsu jarbhurad dyaur na stṛbhiś citayad rodasī anu ||

saḥ | hotā | viśvam | pari | bhūtu | adhvaram | tam | ūm̐ iti | havyaiḥ | manuṣaḥ | ṛñjate | girā |
hiri-śipraḥ | vṛdhasānāsu | jarbhurat | dyauḥ | na | stṛ-bhiḥ | citayat | rodasī iti | anu ||2.002.05||

2.002.06a sa no revat samidhānaḥ svastaye saṁdadasvān rayim asmāsu dīdihi |
2.002.06c ā naḥ kṛṇuṣva suvitāya rodasī agne havyā manuṣo deva vītaye ||

saḥ | naḥ | revat | sam-idhānaḥ | svastaye | sam-dadasvān | rayim | asmāsu | dīdihi |
ā | naḥ | kṛṇuṣva | suvitāya | rodasī iti | agne | havyā | manuṣaḥ | deva | vītaye ||2.002.06||

2.002.07a dā no agne bṛhato dāḥ sahasriṇo duro na vājaṁ śrutyā apā vṛdhi |
2.002.07c prācī dyāvāpṛthivī brahmaṇā kṛdhi svar ṇa śukram uṣaso vi didyutaḥ ||

dāḥ | naḥ | agne | bṛhataḥ | dāḥ | sahasriṇaḥ | duraḥ | na | vājam | śrutyai | apa | vṛdhi |
prācī iti | dyāvāpṛthivī iti | brahmaṇā | kṛdhi | svaḥ | na | śukram | uṣasaḥ | vi | didyutuḥ ||2.002.07||

2.002.08a sa idhāna uṣaso rāmyā anu svar ṇa dīded aruṣeṇa bhānunā |
2.002.08c hotrābhir agnir manuṣaḥ svadhvaro rājā viśām atithiś cārur āyave ||

saḥ | idhānaḥ | uṣasaḥ | rāmyāḥ | anu | svaḥ | na | dīdet | aruṣeṇa | bhānunā |
hotrābhiḥ | agniḥ | manuṣaḥ | su-adhvaraḥ | rājā | viśām | atithiḥ | cāruḥ | āyave ||2.002.08||

2.002.09a evā no agne amṛteṣu pūrvya dhīṣ pīpāya bṛhaddiveṣu mānuṣā |
2.002.09c duhānā dhenur vṛjaneṣu kārave tmanā śatinam pururūpam iṣaṇi ||

eva | naḥ | agne | amṛteṣu | pūrvya | dhīḥ | pīpāya | bṛhat-diveṣu | mānuṣā |
duhānā | dhenuḥ | vṛjaneṣu | kārave | tmanā | śatinam | puru-rūpam | iṣaṇi ||2.002.09||

2.002.10a vayam agne arvatā vā suvīryam brahmaṇā vā citayemā janām̐ ati |
2.002.10c asmākaṁ dyumnam adhi pañca kṛṣṭiṣūccā svar ṇa śuśucīta duṣṭaram ||

vayam | agne | arvatā | vā | su-vīryam | brahmaṇā | vā | citayema | janān | ati |
asmākam | dyumnam | adhi | pañca | kṛṣṭiṣu | uccā | svaḥ | na | śuśucīta | dustaram ||2.002.10||

2.002.11a sa no bodhi sahasya praśaṁsyo yasmin sujātā iṣayanta sūrayaḥ |
2.002.11c yam agne yajñam upayanti vājino nitye toke dīdivāṁsaṁ sve dame ||

saḥ | naḥ | bodhi | sahasya | pra-śaṁsyaḥ | yasmin | su-jātāḥ | iṣayanta | sūrayaḥ |
yam | agne | yajñam | upa-yanti | vājinaḥ | nitye | toke | dīdi-vāṁsam | sve | dame ||2.002.11||

2.002.12a ubhayāso jātavedaḥ syāma te stotāro agne sūrayaś ca śarmaṇi |
2.002.12c vasvo rāyaḥ puruścandrasya bhūyasaḥ prajāvataḥ svapatyasya śagdhi naḥ ||

ubhayāsaḥ | jāta-vedaḥ | syāma | te | stotāraḥ | agne | sūrayaḥ | ca | śarmaṇi |
vasvo | rāyaḥ | puru-candrasya | bhūyasaḥ | prajā-vataḥ | su-apatyasya | śagdhi | naḥ ||2.002.12||

2.002.13a ye stotṛbhyo goagrām aśvapeśasam agne rātim upasṛjanti sūrayaḥ |
2.002.13c asmāñ ca tām̐ś ca pra hi neṣi vasya ā bṛhad vadema vidathe suvīrāḥ ||

ye | stotṛ-bhyaḥ | go-agrām | aśva-peśasam | agne | rātim | upa-sṛjanti | sūrayaḥ |
asmān | ca | tān | ca | pra | hi | neṣi | vasyaḥ | ā | bṛhat | vadema | vidathe | su-vīrāḥ ||2.002.13||


2.003.01a samiddho agnir nihitaḥ pṛthivyām pratyaṅ viśvāni bhuvanāny asthāt |
2.003.01c hotā pāvakaḥ pradivaḥ sumedhā devo devān yajatv agnir arhan ||

sam-iddhaḥ | agniḥ | ni-hitaḥ | pṛthivyām | pratyaṅ | viśvāni | bhuvanāni | asthāt |
hotā | pāvakaḥ | pra-divaḥ | su-medhāḥ | devaḥ | devān | yajatu | agniḥ | arhan ||2.003.01||

2.003.02a narāśaṁsaḥ prati dhāmāny añjan tisro divaḥ prati mahnā svarciḥ |
2.003.02c ghṛtapruṣā manasā havyam undan mūrdhan yajñasya sam anaktu devān ||

narāśaṁsaḥ | prati | dhāmāni | añjan | tisraḥ | divaḥ | prati | mahnā | su-arciḥ |
ghṛta-pruṣā | manasā | havyam | undan | mūrdhan | yajñasya | sam | anaktu | devān ||2.003.02||

2.003.03a īḻito agne manasā no arhan devān yakṣi mānuṣāt pūrvo adya |
2.003.03c sa ā vaha marutāṁ śardho acyutam indraṁ naro barhiṣadaṁ yajadhvam ||

īḻitaḥ | agne | manasā | naḥ | arhan | devān | yakṣi | mānuṣāt | pūrvaḥ | adya |
saḥ | ā | vaha | marutām | śardhaḥ | acyutam | indram | naraḥ | barhi-sadam | yajadhvam ||2.003.03||

2.003.04a deva barhir vardhamānaṁ suvīraṁ stīrṇaṁ rāye subharaṁ vedy asyām |
2.003.04c ghṛtenāktaṁ vasavaḥ sīdatedaṁ viśve devā ādityā yajñiyāsaḥ ||

deva | barhiḥ | vardhamānam | su-vīram | stīrṇam | rāye | su-bharam | vedī iti | asyām |
ghṛtena | aktam | vasavaḥ | sīdata | idam | viśve | devāḥ | ādityāḥ | yajñiyāsaḥ ||2.003.04||

2.003.05a vi śrayantām urviyā hūyamānā dvāro devīḥ suprāyaṇā namobhiḥ |
2.003.05c vyacasvatīr vi prathantām ajuryā varṇam punānā yaśasaṁ suvīram ||

vi | śrayantām | urviyā | hūyamānāḥ | dvāraḥ | devīḥ | supra-ayanāḥ | namaḥ-bhiḥ |
vyacasvatīḥ | vi | prathantām | ajuryāḥ | varṇam | punānāḥ | yaśasam | su-vīram ||2.003.05||

2.003.06a sādhv apāṁsi sanatā na ukṣite uṣāsānaktā vayyeva raṇvite |
2.003.06c tantuṁ tataṁ saṁvayantī samīcī yajñasya peśaḥ sudughe payasvatī ||

sādhu | apāṁsi | sanatā | naḥ | ukṣite iti | uṣasānaktā | vayyā-iva | raṇvite iti |
tantum | tatam | saṁvayantī iti sam-vayantī | samīcī iti sam-īcī | yajñasya | peśaḥ | sudughe iti su-dughe | payasvatī iti ||2.003.06||

2.003.07a daivyā hotārā prathamā viduṣṭara ṛju yakṣataḥ sam ṛcā vapuṣṭarā |
2.003.07c devān yajantāv ṛtuthā sam añjato nābhā pṛthivyā adhi sānuṣu triṣu ||

daivyā | hotārā | prathamā | viduḥ-tarā | ṛju | yakṣataḥ | sam | ṛcā | vapuḥ-tarā |
devān | yajantau | ṛtu-thā | sam | añjataḥ | nābhā | pṛthivyāḥ | adhi | sānuṣu | triṣu ||2.003.07||

2.003.08a sarasvatī sādhayantī dhiyaṁ na iḻā devī bhāratī viśvatūrtiḥ |
2.003.08c tisro devīḥ svadhayā barhir edam acchidram pāntu śaraṇaṁ niṣadya ||

sarasvatī | sādhayantī | dhiyam | naḥ | iḻā | devī | bhāratī | viśva-tūrtiḥ |
tisraḥ | devīḥ | svadhayā | barhiḥ | ā | idam | acchidram | pāntu | śaraṇam | ni-sadya ||2.003.08||

2.003.09a piśaṅgarūpaḥ subharo vayodhāḥ śruṣṭī vīro jāyate devakāmaḥ |
2.003.09c prajāṁ tvaṣṭā vi ṣyatu nābhim asme athā devānām apy etu pāthaḥ ||

piśaṅga-rūpaḥ | su-bharaḥ | vayaḥ-dhāḥ | śruṣṭī | vīraḥ | jāyate | deva-kāmaḥ |
pra-jām | tvaṣṭā | vi | syatu | nābhim | asme iti | atha | devānām | api | etu | pāthaḥ ||2.003.09||

2.003.10a vanaspatir avasṛjann upa sthād agnir haviḥ sūdayāti pra dhībhiḥ |
2.003.10c tridhā samaktaṁ nayatu prajānan devebhyo daivyaḥ śamitopa havyam ||

vanaspatiḥ | ava-sṛjan | upa | sthāt | agniḥ | haviḥ | sūdayāti | pra | dhībhiḥ |
tridhā | sam-aktam | nayatu | pra-jānan | devebhyaḥ | daivyaḥ | śamitā | upa | havyam ||2.003.10||

2.003.11a ghṛtam mimikṣe ghṛtam asya yonir ghṛte śrito ghṛtam v asya dhāma |
2.003.11c anuṣvadham ā vaha mādayasva svāhākṛtaṁ vṛṣabha vakṣi havyam ||

ghṛtam | mimikṣe | ghṛtam | asya | yoniḥ | ghṛte | śritaḥ | ghṛtam | ūm̐ iti | asya | dhāma |
anu-svadham | ā | vaha | mādayasva | svāhā-kṛtam | vṛṣabha | vakṣi | havyam ||2.003.11||


2.004.01a huve vaḥ sudyotmānaṁ suvṛktiṁ viśām agnim atithiṁ suprayasam |
2.004.01c mitra iva yo didhiṣāyyo bhūd deva ādeve jane jātavedāḥ ||

huve | vaḥ | su-dyotmānam | su-vṛktim | viśām | agnim | atithim | su-prayasam |
mitraḥ-iva | yaḥ | didhiṣāyyaḥ | bhūt | devaḥ | ā-deve | jane | jāta-vedāḥ ||2.004.01||

2.004.02a imaṁ vidhanto apāṁ sadhasthe dvitādadhur bhṛgavo vikṣv āyoḥ |
2.004.02c eṣa viśvāny abhy astu bhūmā devānām agnir aratir jīrāśvaḥ ||

imam | vidhantaḥ | apām | sadha-sthe | dvitā | adadhuḥ | bhṛgavaḥ | vikṣu | āyoḥ |
eṣaḥ | viśvāni | abhi | astu | bhūma | devānām | agniḥ | aratiḥ | jīra-aśvaḥ ||2.004.02||

2.004.03a agniṁ devāso mānuṣīṣu vikṣu priyaṁ dhuḥ kṣeṣyanto na mitram |
2.004.03c sa dīdayad uśatīr ūrmyā ā dakṣāyyo yo dāsvate dama ā ||

agnim | devāsaḥ | mānuṣīṣu | vikṣu | priyam | dhuḥ | kṣeṣyantaḥ | na | mitram |
saḥ | dīdayat | uśatīḥ | ūrmyāḥ | ā | dakṣāyyaḥ | yaḥ | dāsvate | dame | ā ||2.004.03||

2.004.04a asya raṇvā svasyeva puṣṭiḥ saṁdṛṣṭir asya hiyānasya dakṣoḥ |
2.004.04c vi yo bharibhrad oṣadhīṣu jihvām atyo na rathyo dodhavīti vārān ||

asya | raṇvā | svasya-iva | puṣṭiḥ | sam-dṛṣṭiḥ | asya | hiyānasya | dhakṣoḥ |
vi | yaḥ | bharibhrat | oṣadhīṣu | jihvām | atyaḥ | na | rathyaḥ | dodhavīti | vārān ||2.004.04||

2.004.05a ā yan me abhvaṁ vanadaḥ panantośigbhyo nāmimīta varṇam |
2.004.05c sa citreṇa cikite raṁsu bhāsā jujurvām̐ yo muhur ā yuvā bhūt ||

ā | yat | me | abhvam | vanadaḥ | pananta | uśik-bhyaḥ | na | amimīta | varṇam |
saḥ | citreṇa | cikite | ram-su | bhāsā | jujurvān | yaḥ | muhuḥ | ā | yuvā | bhūt ||2.004.05||

2.004.06a ā yo vanā tātṛṣāṇo na bhāti vār ṇa pathā rathyeva svānīt |
2.004.06c kṛṣṇādhvā tapū raṇvaś ciketa dyaur iva smayamāno nabhobhiḥ ||

ā | yaḥ | vanā | tatṛṣāṇaḥ | na | bhāti | vāḥ | na | pathā | rathyā-iva | svānīt |
kṛṣṇa-adhvā | tapuḥ | raṇvaḥ | ciketa | dyauḥ-iva | smayamānaḥ | nabhaḥ-bhiḥ ||2.004.06||

2.004.07a sa yo vy asthād abhi dakṣad urvīm paśur naiti svayur agopāḥ |
2.004.07c agniḥ śociṣmām̐ atasāny uṣṇan kṛṣṇavyathir asvadayan na bhūma ||

saḥ | yaḥ | vi | asthāt | abhi | dhakṣat | urvīṁ | paśuḥ | na | eti | sva-yuḥ | agopāḥ |
agniḥ | śociṣmān | atasāni | uṣṇan | kṛṣṇa-vyathiḥ | asvadayat | na | bhūma ||2.004.07||

2.004.08a nū te pūrvasyāvaso adhītau tṛtīye vidathe manma śaṁsi |
2.004.08c asme agne saṁyadvīram bṛhantaṁ kṣumantaṁ vājaṁ svapatyaṁ rayiṁ dāḥ ||

nu | te | pūrvasya | avasaḥ | adhi-itau | tṛtīye | vidathe | manma | śaṁsi |
asme iti | agne | saṁyat-vīram | bṛhantam | kṣu-mantam | vājam | su-apatyam | rayim | dāḥ ||2.004.08||

2.004.09a tvayā yathā gṛtsamadāso agne guhā vanvanta uparām̐ abhi ṣyuḥ |
2.004.09c suvīrāso abhimātiṣāhaḥ smat sūribhyo gṛṇate tad vayo dhāḥ ||

tvayā | yathā | gṛtsa-madāsaḥ | agne | guhā | vanvantaḥ | uparān | abhi | syuriti syuḥ |
su-vīrāsaḥ | abhimāti-sahaḥ | smat | sūri-bhyaḥ | gṛṇate | tat | vayaḥ | dhāḥ ||2.004.09||


2.005.01a hotājaniṣṭa cetanaḥ pitā pitṛbhya ūtaye |
2.005.01c prayakṣañ jenyaṁ vasu śakema vājino yamam ||

hotā | ajaniṣṭa | cetanaḥ | pitā | pitṛ-bhyaḥ | ūtaye |
pra-yakṣan | jenyam | vasu | śakema | vājinaḥ | yamam ||2.005.01||

2.005.02a ā yasmin sapta raśmayas tatā yajñasya netari |
2.005.02c manuṣvad daivyam aṣṭamam potā viśvaṁ tad invati ||

ā | yasmin | sapta | raśmayaḥ | tatāḥ | yajñasya | netari |
manuṣvat | daivyam | aṣṭamam | potā | viśvam | tat | invati ||2.005.02||

2.005.03a dadhanve vā yad īm anu vocad brahmāṇi ver u tat |
2.005.03c pari viśvāni kāvyā nemiś cakram ivābhavat ||

dadhanve | vā | yat | īm | anu | vocat | brahmāṇi | veḥ | ūm̐ iti | tat |
pari | viśvāni | kāvyā | nemiḥ | cakram-iva | abhavat ||2.005.03||

2.005.04a sākaṁ hi śucinā śuciḥ praśāstā kratunājani |
2.005.04c vidvām̐ asya vratā dhruvā vayā ivānu rohate ||

sākam | hi | śucinā | śuciḥ | pra-śāstā | kratunā | ajani |
vidvān | asya | vratā | dhruvā | vayāḥ-iva | anu | rohate ||2.005.04||

2.005.05a tā asya varṇam āyuvo neṣṭuḥ sacanta dhenavaḥ |
2.005.05c kuvit tisṛbhya ā varaṁ svasāro yā idaṁ yayuḥ ||

tāḥ | asya | varṇam | āyuvaḥ | neṣṭuḥ | sacanta | dhenavaḥ |
kuvit | tisṛ-bhyaḥ | ā | varam | svasāraḥ | yāḥ | idam | yayuḥ ||2.005.05||

2.005.06a yadī mātur upa svasā ghṛtam bharanty asthita |
2.005.06c tāsām adhvaryur āgatau yavo vṛṣṭīva modate ||

yadi | mātuḥ | upa | svasā | ghṛtam | bharantī | asthita |
tāsām | adhvaryuḥ | ā-gatau | yavaḥ | vṛṣṭī-iva | modate ||2.005.06||

2.005.07a svaḥ svāya dhāyase kṛṇutām ṛtvig ṛtvijam |
2.005.07c stomaṁ yajñaṁ cād araṁ vanemā rarimā vayam ||

svaḥ | svāya | dhāyase | kṛṇutām | ṛtvik | ṛtvijam |
stomam | yajñam | ca | āt | aram | vanema | rarima | vayam ||2.005.07||

2.005.08a yathā vidvām̐ araṁ karad viśvebhyo yajatebhyaḥ |
2.005.08c ayam agne tve api yaṁ yajñaṁ cakṛmā vayam ||

yathā | vidvān | aram | karat | viśvebhyaḥ | yajatebhyaḥ |
ayam | agne | tve iti | api | yam | yajñam | cakṛma | vayam ||2.005.08||


2.006.01a imām me agne samidham imām upasadaṁ vaneḥ |
2.006.01c imā u ṣu śrudhī giraḥ ||

imām | me | agne | sam-idham | imām | upa-sadam | vaneriti vaneḥ |
imāḥ | ūm̐ iti | su | śrudhi | giraḥ ||2.006.01||

2.006.02a ayā te agne vidhemorjo napād aśvamiṣṭe |
2.006.02c enā sūktena sujāta ||

ayā | te | agne | vidhema | ūrjaḥ | napāt | aśvam-iṣṭe |
enā | su-uktena | su-jāta ||2.006.02||

2.006.03a taṁ tvā gīrbhir girvaṇasaṁ draviṇasyuṁ draviṇodaḥ |
2.006.03c saparyema saparyavaḥ ||

tam | tvā | gīḥ-bhiḥ | girvaṇasam | draviṇasyum | draviṇaḥ-daḥ |
saparyema | saparyavaḥ ||2.006.03||

2.006.04a sa bodhi sūrir maghavā vasupate vasudāvan |
2.006.04c yuyodhy asmad dveṣāṁsi ||

saḥ | bodhi | sūriḥ | maghavā | vasu-pate | vasu-dāvan |
yuyodhi | asmat | dveṣāṁsi ||2.006.04||

2.006.05a sa no vṛṣṭiṁ divas pari sa no vājam anarvāṇam |
2.006.05c sa naḥ sahasriṇīr iṣaḥ ||

saḥ | naḥ | vṛṣṭim | divaḥ | pari | saḥ | naḥ | vājam | anarvāṇam |
saḥ | naḥ | sahasriṇīḥ | iṣaḥ ||2.006.05||

2.006.06a īḻānāyāvasyave yaviṣṭha dūta no girā |
2.006.06c yajiṣṭha hotar ā gahi ||

īḻānāya | avasyave | yaviṣṭha | dūta | naḥ | girā |
yajiṣṭha | hotaḥ | ā | gahi ||2.006.06||

2.006.07a antar hy agna īyase vidvāñ janmobhayā kave |
2.006.07c dūto janyeva mitryaḥ ||

antaḥ | hi | agne | īyase | vidvān | janma | ubhayā | kave |
dūtaḥ | janyā-iva | mitryaḥ ||2.006.07||

2.006.08a sa vidvām̐ ā ca piprayo yakṣi cikitva ānuṣak |
2.006.08c ā cāsmin satsi barhiṣi ||

saḥ | vidvān | ā | ca | piprayaḥ | yakṣi | cikitvaḥ | ānuṣak |
ā | ca | asmin | satsi | barhiṣi ||2.006.08||


2.007.01a śreṣṭhaṁ yaviṣṭha bhāratāgne dyumantam ā bhara |
2.007.01c vaso puruspṛhaṁ rayim ||

śreṣṭham | yaviṣṭha | bhārata | agne | dyu-mantam | ā | bhara |
vaso iti | puru-spṛham | rayim ||2.007.01||

2.007.02a mā no arātir īśata devasya martyasya ca |
2.007.02c parṣi tasyā uta dviṣaḥ ||

mā | naḥ | arātiḥ | īśata | devasya | martyasya | ca |
parṣi | tasyāḥ | uta | dviṣaḥ ||2.007.02||

2.007.03a viśvā uta tvayā vayaṁ dhārā udanyā iva |
2.007.03c ati gāhemahi dviṣaḥ ||

viśvāḥ | uta | tvayā | vayam | dhārāḥ | udanyāḥ-iva |
ati | gāhemahi | dviṣaḥ ||2.007.03||

2.007.04a śuciḥ pāvaka vandyo 'gne bṛhad vi rocase |
2.007.04c tvaṁ ghṛtebhir āhutaḥ ||

śuciḥ | pāvaka | vandyaḥ | agne | bṛhat | vi | rocase |
tvam | ghṛtebhiḥ | ā-hutaḥ ||2.007.04||

2.007.05a tvaṁ no asi bhāratāgne vaśābhir ukṣabhiḥ |
2.007.05c aṣṭāpadībhir āhutaḥ ||

tvam | naḥ | asi | bhārata | agne | vaśābhiḥ | ukṣa-bhiḥ |
aṣṭā-padībhiḥ | ā-hutaḥ ||2.007.05||

2.007.06a drvannaḥ sarpirāsutiḥ pratno hotā vareṇyaḥ |
2.007.06c sahasas putro adbhutaḥ ||

dru-annaḥ | sarpiḥ-āsutiḥ | pratnaḥ | hotā | vareṇyaḥ |
sahasaḥ | putraḥ | adbhutaḥ ||2.007.06||


2.008.01a vājayann iva nū rathān yogām̐ agner upa stuhi |
2.008.01c yaśastamasya mīḻhuṣaḥ ||

vājayan-iva | nu | rathān | yogān | agneḥ | upa | stuhi |
yaśaḥ-tamasya | mīḻhuṣaḥ ||2.008.01||

2.008.02a yaḥ sunītho dadāśuṣe 'juryo jarayann arim |
2.008.02c cārupratīka āhutaḥ ||

yaḥ | su-nīthaḥ | dadāśuṣe | ajuryaḥ | jarayan | arim |
cāru-pratīkaḥ | ā-hutaḥ ||2.008.02||

2.008.03a ya u śriyā dameṣv ā doṣoṣasi praśasyate |
2.008.03c yasya vrataṁ na mīyate ||

yaḥ | ūm̐ iti | śriyā | dameṣu | ā | doṣā | uṣasi | pra-śasyate |
yasya | vratam | na | mīyate ||2.008.03||

2.008.04a ā yaḥ svar ṇa bhānunā citro vibhāty arciṣā |
2.008.04c añjāno ajarair abhi ||

ā | yaḥ | svaḥ | na | bhānunā | citraḥ | vi-bhāti | arciṣā |
añjānaḥ | ajaraiḥ | abhi ||2.008.04||

2.008.05a atrim anu svarājyam agnim ukthāni vāvṛdhuḥ |
2.008.05c viśvā adhi śriyo dadhe ||

atrim | anu | sva-rājyam | agnim | ukthāni | vavṛdhuḥ |
viśvāḥ | adhi | śriyaḥ | dadhe ||2.008.05||

2.008.06a agner indrasya somasya devānām ūtibhir vayam |
2.008.06c ariṣyantaḥ sacemahy abhi ṣyāma pṛtanyataḥ ||

agneḥ | indrasya | somasya | devānām | ūti-bhiḥ | vayam |
ariṣyantaḥ | sacemahi | abhi | syāma | pṛtanyataḥ ||2.008.06||


2.009.01a ni hotā hotṛṣadane vidānas tveṣo dīdivām̐ asadat sudakṣaḥ |
2.009.01c adabdhavratapramatir vasiṣṭhaḥ sahasrambharaḥ śucijihvo agniḥ ||

ni | hotā | hotṛ-sadane | vidānaḥ | tveṣaḥ | dīdi-vān | asadat | su-dakṣaḥ |
adabdha-vratapramatiḥ | vasiṣṭhaḥ | sahasram-bharaḥ | śuci-jihvaḥ | agniḥ ||2.009.01||

2.009.02a tvaṁ dūtas tvam u naḥ paraspās tvaṁ vasya ā vṛṣabha praṇetā |
2.009.02c agne tokasya nas tane tanūnām aprayucchan dīdyad bodhi gopāḥ ||

tvam | dūtaḥ | tvam | ūm̐ iti | naḥ | paraḥ-pāḥ | tvam | vasyaḥ | ā | vṛṣabha | pra-netā |
agne | tokasya | naḥ | tane | tanūnām | apra-yucchan | dīdyat | bodhi | gopāḥ ||2.009.02||

2.009.03a vidhema te parame janmann agne vidhema stomair avare sadhasthe |
2.009.03c yasmād yoner udārithā yaje tam pra tve havīṁṣi juhure samiddhe ||

vidhema | te | parame | janman | agne | vidhema | stomaiḥ | avare | sadha-sthe |
yasmāt | yoneḥ | ut-āritha | yaje | tam | pra | tve iti | havīṁṣi | juhure | sam-iddhe ||2.009.03||

2.009.04a agne yajasva haviṣā yajīyāñ chruṣṭī deṣṇam abhi gṛṇīhi rādhaḥ |
2.009.04c tvaṁ hy asi rayipatī rayīṇāṁ tvaṁ śukrasya vacaso manotā ||

agne | yajasva | haviṣā | yajīyān | śruṣṭī | deṣṇam | abhi | gṛṇīhi | rādhaḥ |
tvam | hi | asi | rayi-patiḥ | rayīṇām | tvam | śukrasya | vacasaḥ | manotā ||2.009.04||

2.009.05a ubhayaṁ te na kṣīyate vasavyaṁ dive-dive jāyamānasya dasma |
2.009.05c kṛdhi kṣumantaṁ jaritāram agne kṛdhi patiṁ svapatyasya rāyaḥ ||

ubhayam | te | na | kṣīyate | vasavyam | dive-dive | jāyamānasya | dasma |
kṛdhi | kṣu-mantam | jaritāram | agne | kṛdhi | patim | su-apatyasya | rāyaḥ ||2.009.05||

2.009.06a sainānīkena suvidatro asme yaṣṭā devām̐ āyajiṣṭhaḥ svasti |
2.009.06c adabdho gopā uta naḥ paraspā agne dyumad uta revad didīhi ||

saḥ | enā | anīkena | su-vidatraḥ | asme iti | yaṣṭā | devān | ā-yajiṣṭhaḥ | svasti |
adabdhaḥ | gopāḥ | uta | naḥ | paraḥ-pāḥ | agne | dyu-mat | uta | revat | didīhi ||2.009.06||


2.010.01a johūtro agniḥ prathamaḥ piteveḻas pade manuṣā yat samiddhaḥ |
2.010.01c śriyaṁ vasāno amṛto vicetā marmṛjenyaḥ śravasyaḥ sa vājī ||

johūtraḥ | agniḥ | prathamaḥ | pitā-iva | iḻaḥ | pade | manuṣā | yat | sam-iddhaḥ |
śriyam | vasānaḥ | amṛtaḥ | vi-cetāḥ | marmṛjenyaḥ | śravasyaḥ | saḥ | vājī ||2.010.01||

2.010.02a śrūyā agniś citrabhānur havam me viśvābhir gīrbhir amṛto vicetāḥ |
2.010.02c śyāvā rathaṁ vahato rohitā votāruṣāha cakre vibhṛtraḥ ||

śruyāḥ | agniḥ | citra-bhānuḥ | havam | me | viśvābhiḥ | gīḥ-bhiḥ | amṛtaḥ | vi-cetāḥ |
śyāvā | ratham | vahataḥ | rohitā | vā | uta | aruṣā | aha | cakre | vi-bhṛtraḥ ||2.010.02||

2.010.03a uttānāyām ajanayan suṣūtam bhuvad agniḥ purupeśāsu garbhaḥ |
2.010.03c śiriṇāyāṁ cid aktunā mahobhir aparīvṛto vasati pracetāḥ ||

uttānāyām | ajanayan | su-sūtam | bhuvat | agniḥ | puru-peśāsu | garbhaḥ |
śiriṇāyām | cit | aktunā | mahaḥ-bhiḥ | apari-vṛtaḥ | vasati | pra-cetāḥ ||2.010.03||

2.010.04a jigharmy agniṁ haviṣā ghṛtena pratikṣiyantam bhuvanāni viśvā |
2.010.04c pṛthuṁ tiraścā vayasā bṛhantaṁ vyaciṣṭham annai rabhasaṁ dṛśānam ||

jigharmi | agnim | haviṣā | ghṛtena | prati-kṣiyantam | bhuvanāni | viśvā |
pṛthum | tiraścā | vayasā | bṛhantam | vyaciṣṭham | annaiḥ | rabhasam | dṛśānam ||2.010.04||

2.010.05a ā viśvataḥ pratyañcaṁ jigharmy arakṣasā manasā taj juṣeta |
2.010.05c maryaśrīḥ spṛhayadvarṇo agnir nābhimṛśe tanvā jarbhurāṇaḥ ||

ā | viśvataḥ | pratyañcam | jigharmi | arakṣasā | manasā | tat | juṣeta |
marya-śrīḥ | spṛhayat-varṇaḥ | agniḥ | na | abhi-mṛśe | tanvā | jarbhurāṇaḥ ||2.010.05||

2.010.06a jñeyā bhāgaṁ sahasāno vareṇa tvādūtāso manuvad vadema |
2.010.06c anūnam agniṁ juhvā vacasyā madhupṛcaṁ dhanasā johavīmi ||

jñeyāḥ | bhāgam | sahasānaḥ | vareṇa | tvā-dūtāsaḥ | manu-vat | vadema |
anūnam | agnim | juhvā | vacasyā | madhu-pṛcam | dhana-sāḥ | johavīmi ||2.010.06||


2.011.01a śrudhī havam indra mā riṣaṇyaḥ syāma te dāvane vasūnām |
2.011.01c imā hi tvām ūrjo vardhayanti vasūyavaḥ sindhavo na kṣarantaḥ ||

śrudhi | havam | indra | mā | riṣaṇyaḥ | syāma | te | dāvane | vasūnām |
imāḥ | hi | tvām | ūrjaḥ | vardhayanti | vasu-yavaḥ | sindhavaḥ | na | kṣarantaḥ ||2.011.01||

2.011.02a sṛjo mahīr indra yā apinvaḥ pariṣṭhitā ahinā śūra pūrvīḥ |
2.011.02c amartyaṁ cid dāsam manyamānam avābhinad ukthair vāvṛdhānaḥ ||

sṛjaḥ | mahīḥ | indra | yāḥ | apinvaḥ | pari-sthitāḥ | ahinā | śūra | pūrvīḥ |
amartyam | cit | dāsam | manyamānam | ava | abhinat | ukthaiḥ | vavṛdhānaḥ ||2.011.02||

2.011.03a uktheṣv in nu śūra yeṣu cākan stomeṣv indra rudriyeṣu ca |
2.011.03c tubhyed etā yāsu mandasānaḥ pra vāyave sisrate na śubhrāḥ ||

uktheṣu | it | nu | śūra | yeṣu | cākan | stomeṣu | indra | rudriyeṣu | ca |
tubhya | it | etāḥ | yāsu | mandasānaḥ | pra | vāyave | sisrate | na | śubhrāḥ ||2.011.03||

2.011.04a śubhraṁ nu te śuṣmaṁ vardhayantaḥ śubhraṁ vajram bāhvor dadhānāḥ |
2.011.04c śubhras tvam indra vāvṛdhāno asme dāsīr viśaḥ sūryeṇa sahyāḥ ||

śubhram | nu | te | śuṣmam | vardhayantaḥ | śubhram | vajram | bāhvoḥ | dadhānāḥ |
śubhraḥ | tvam | indra | vavṛdhānaḥ | asme iti | dāsīḥ | viśaḥ | sūryeṇa | sahyāḥ ||2.011.04||

2.011.05a guhā hitaṁ guhyaṁ gūḻham apsv apīvṛtam māyinaṁ kṣiyantam |
2.011.05c uto apo dyāṁ tastabhvāṁsam ahann ahiṁ śūra vīryeṇa ||

guhā | hitam | guhyam | gūḻham | apsu | api-vṛtam | māyinam | kṣiyantam |
uto iti | apaḥ | dyām | tastabhvāṁsam | ahan | ahim | śūra | vīryeṇa ||2.011.05||

2.011.06a stavā nu ta indra pūrvyā mahāny uta stavāma nūtanā kṛtāni |
2.011.06c stavā vajram bāhvor uśantaṁ stavā harī sūryasya ketū ||

stava | nu | te | indra | pūrvyā | mahāni | uta | stavāma | nūtanā | kṛtāni |
stava | vajram | bāhvoḥ | uśantam | stava | harī iti | sūryasya | ketū iti ||2.011.06||

2.011.07a harī nu ta indra vājayantā ghṛtaścutaṁ svāram asvārṣṭām |
2.011.07c vi samanā bhūmir aprathiṣṭāraṁsta parvataś cit sariṣyan ||

harī iti | nu | te | indra | vājayantā | ghṛta-ścutam | svāram | asvārṣṭām |
vi | samanā | bhūmiḥ | aprathiṣṭa | araṁsta | parvataḥ | cit | sariṣyan ||2.011.07||

2.011.08a ni parvataḥ sādy aprayucchan sam mātṛbhir vāvaśāno akrān |
2.011.08c dūre pāre vāṇīṁ vardhayanta indreṣitāṁ dhamanim paprathan ni ||

ni | parvataḥ | sādi | apra-yucchan | sam | mātṛ-bhiḥ | vāvaśānaḥ | akrān |
dūre | pāre | vāṇīm | vardhayantaḥ | indra-iṣitām | dhamanim | paprathan | ni ||2.011.08||

2.011.09a indro mahāṁ sindhum āśayānam māyāvinaṁ vṛtram asphuran niḥ |
2.011.09c arejetāṁ rodasī bhiyāne kanikradato vṛṣṇo asya vajrāt ||

indraḥ | mahām | sindhum | ā-śayānam | māyā-vinam | vṛtram | asphurat | niḥ |
arejetām | rodasī iti | bhiyāne iti | kanikradataḥ | vṛṣṇaḥ | asya | vajrāt ||2.011.09||

2.011.10a aroravīd vṛṣṇo asya vajro 'mānuṣaṁ yan mānuṣo nijūrvāt |
2.011.10c ni māyino dānavasya māyā apādayat papivān sutasya ||

aroravīt | vṛṣṇaḥ | asya | vajraḥ | amānuṣam | yat | mānuṣaḥ | ni-jūrvāt |
ni | māyinaḥ | dānavasya | māyāḥ | apādayat | papi-vān | sutasya ||2.011.10||

2.011.11a pibā-pibed indra śūra somam mandantu tvā mandinaḥ sutāsaḥ |
2.011.11c pṛṇantas te kukṣī vardhayantv itthā sutaḥ paura indram āva ||

piba-piba | it | indra | śūra | somam | mandantu | tvā | mandinaḥ | sutāsaḥ |
pṛṇantaḥ | te | kukṣī iti | vardhayantu | itthā | sutaḥ | pauraḥ | indram | āva ||2.011.11||

2.011.12a tve indrāpy abhūma viprā dhiyaṁ vanema ṛtayā sapantaḥ |
2.011.12c avasyavo dhīmahi praśastiṁ sadyas te rāyo dāvane syāma ||

tve iti | indra | api | abhūma | viprāḥ | dhiyam | vanema | ṛta-yā | sapantaḥ |
avasyavaḥ | dhīmahi | pra-śastim | sadyaḥ | te | rāyaḥ | dāvane | syāma ||2.011.12||

2.011.13a syāma te ta indra ye ta ūtī avasyava ūrjaṁ vardhayantaḥ |
2.011.13c śuṣmintamaṁ yaṁ cākanāma devāsme rayiṁ rāsi vīravantam ||

syāma | te | te | indra | ye | te | ūtī | avasyavaḥ | ūrjam | vardhayantaḥ |
śuṣmin-tamam | yam | cākanāma | deva | asme iti | rayim | rāsi | vīra-vantam ||2.011.13||

2.011.14a rāsi kṣayaṁ rāsi mitram asme rāsi śardha indra mārutaṁ naḥ |
2.011.14c sajoṣaso ye ca mandasānāḥ pra vāyavaḥ pānty agraṇītim ||

rāsi | kṣayam | rāsi | mitram | asme iti | rāsi | śardhaḥ | indra | mārutam | naḥ |
sa-joṣasaḥ | ye | ca | mandasānāḥ | pra | vāyavaḥ | pānti | agra-nītim ||2.011.14||

2.011.15a vyantv in nu yeṣu mandasānas tṛpat somam pāhi drahyad indra |
2.011.15c asmān su pṛtsv ā tarutrāvardhayo dyām bṛhadbhir arkaiḥ ||

vyantu | it | nu | yeṣu | mandasānaḥ | tṛpat | somam | pāhi | drahyat | indra |
asmān | su | pṛt-su | ā | tarutra | avardhayaḥ | dyām | bṛhat-bhiḥ | arkaiḥ ||2.011.15||

2.011.16a bṛhanta in nu ye te tarutrokthebhir vā sumnam āvivāsān |
2.011.16c stṛṇānāso barhiḥ pastyāvat tvotā id indra vājam agman ||

bṛhantaḥ | it | nu | ye | te | tarutra | ukthebhiḥ | vā | sumnam | ā-vivāsān |
stṛṇānāsaḥ | barhiḥ | pastya-vat | tvā-ūtāḥ | it | indra | vājam | agman ||2.011.16||

2.011.17a ugreṣv in nu śūra mandasānas trikadrukeṣu pāhi somam indra |
2.011.17c pradodhuvac chmaśruṣu prīṇāno yāhi haribhyāṁ sutasya pītim ||

ugreṣu | it | nu | śūra | mandasānaḥ | tri-kadrukeṣu | pāhi | somam | indra |
pra-dodhuvat | śmaśruṣu | prīṇānaḥ | yāhi | hari-bhyām | sutasya | pītim ||2.011.17||

2.011.18a dhiṣvā śavaḥ śūra yena vṛtram avābhinad dānum aurṇavābham |
2.011.18c apāvṛṇor jyotir āryāya ni savyataḥ sādi dasyur indra ||

dhiṣva | śavaḥ | śūra | yena | vṛtram | ava-abhinat | dānum | aurṇa-vābham |
apa | avṛṇoḥ | jyotiḥ | āryāya | ni | savyataḥ | sādi | dasyuḥ | indra ||2.011.18||

2.011.19a sanema ye ta ūtibhis taranto viśvāḥ spṛdha āryeṇa dasyūn |
2.011.19c asmabhyaṁ tat tvāṣṭraṁ viśvarūpam arandhayaḥ sākhyasya tritāya ||

sanema | ye | te | ūti-bhiḥ | tarantaḥ | viśvāḥ | spṛdhaḥ | āryeṇa | dasyūn |
asmabhyam | tat | tvāṣṭram | viśva-rūpam | arandhayaḥ | sākhyasya | tritāya ||2.011.19||

2.011.20a asya suvānasya mandinas tritasya ny arbudaṁ vāvṛdhāno astaḥ |
2.011.20c avartayat sūryo na cakram bhinad valam indro aṅgirasvān ||

asya | suvānasya | mandinaḥ | tritasya | ni | arbudam | vavṛdhānaḥ | astarityastaḥ |
avartayat | sūryaḥ | na | cakram | bhinat | valam | indraḥ | aṅgirasvān ||2.011.20||

2.011.21a nūnaṁ sā te prati varaṁ jaritre duhīyad indra dakṣiṇā maghonī |
2.011.21c śikṣā stotṛbhyo māti dhag bhago no bṛhad vadema vidathe suvīrāḥ ||

nūnam | sā | te | prati | varam | jaritre | duhīyat | indra | dakṣiṇā | maghonī |
śikṣa | stotṛ-bhyaḥ | mā | ati | dhak | bhagaḥ | naḥ | bṛhat | vadema | vidathe | su-vīrāḥ ||2.011.21||


2.012.01a yo jāta eva prathamo manasvān devo devān kratunā paryabhūṣat |
2.012.01c yasya śuṣmād rodasī abhyasetāṁ nṛmṇasya mahnā sa janāsa indraḥ ||

yaḥ | jātaḥ | eva | prathamaḥ | manasvān | devaḥ | devān | kratunā | pari-abhūṣat |
yasya | śuṣmāt | rodasī iti | abhyasetām | nṛmṇasya | mahnā | saḥ | janāsaḥ | indraḥ ||2.012.01||

2.012.02a yaḥ pṛthivīṁ vyathamānām adṛṁhad yaḥ parvatān prakupitām̐ aramṇāt |
2.012.02c yo antarikṣaṁ vimame varīyo yo dyām astabhnāt sa janāsa indraḥ ||

yaḥ | pṛthivīm | vyathamānām | adṛṁhat | yaḥ | parvatān | pra-kupitān | aramṇāt |
yaḥ | antarikṣam | vi-mame | varīyaḥ | yaḥ | dyām | astabhnāt | saḥ | janāsaḥ | indraḥ ||2.012.02||

2.012.03a yo hatvāhim ariṇāt sapta sindhūn yo gā udājad apadhā valasya |
2.012.03c yo aśmanor antar agniṁ jajāna saṁvṛk samatsu sa janāsa indraḥ ||

yaḥ | hatvā | ahim | ariṇāt | sapta | sindhūn | yaḥ | gāḥ | ut-ājat | apa-dhā | valasya |
yaḥ | aśmanoḥ | antaḥ | agnim | jajāna | sam-vṛk | samat-su | saḥ | janāsaḥ | indraḥ ||2.012.03||

2.012.04a yenemā viśvā cyavanā kṛtāni yo dāsaṁ varṇam adharaṁ guhākaḥ |
2.012.04c śvaghnīva yo jigīvām̐l lakṣam ādad aryaḥ puṣṭāni sa janāsa indraḥ ||

yena | imā | viśvā | cyavanā | kṛtāni | yaḥ | dāsam | varṇam | adharam | guhā | akarityakaḥ |
śvaghnī-iva | yaḥ | jigīvān | lakṣam | ādat | aryaḥ | puṣṭāni | saḥ | janāsaḥ | indraḥ ||2.012.04||

2.012.05a yaṁ smā pṛcchanti kuha seti ghoram utem āhur naiṣo astīty enam |
2.012.05c so aryaḥ puṣṭīr vija ivā mināti śrad asmai dhatta sa janāsa indraḥ ||

yam | sma | pṛcchanti | kuha | saḥ | iti | ghoram | uta | īm | āhuḥ | na | eṣaḥ | asti | iti | enam |
saḥ | aryaḥ | puṣṭīḥ | vijaḥ-iva | ā | mināti | śrat | asmai | dhatta | saḥ | janāsaḥ | indraḥ ||2.012.05||

2.012.06a yo radhrasya coditā yaḥ kṛśasya yo brahmaṇo nādhamānasya kīreḥ |
2.012.06c yuktagrāvṇo yo 'vitā suśipraḥ sutasomasya sa janāsa indraḥ ||

yaḥ | radhrasya | coditā | yaḥ | kṛśasya | yaḥ | brahmaṇaḥ | nādhamānasya | kīreḥ |
yukta-grāvṇaḥ | yaḥ | avitā | su-śipraḥ | suta-somasya | saḥ | janāsaḥ | indraḥ ||2.012.06||

2.012.07a yasyāśvāsaḥ pradiśi yasya gāvo yasya grāmā yasya viśve rathāsaḥ |
2.012.07c yaḥ sūryaṁ ya uṣasaṁ jajāna yo apāṁ netā sa janāsa indraḥ ||

yasya | aśvāsaḥ | pra-diśi | yasya | gāvaḥ | yasya | grāmāḥ | yasya | viśve | rathāsaḥ |
yaḥ | sūryam | yaḥ | uṣasam | jajāna | yaḥ | apām | netā | saḥ | janāsaḥ | indraḥ ||2.012.07||

2.012.08a yaṁ krandasī saṁyatī vihvayete pare 'vara ubhayā amitrāḥ |
2.012.08c samānaṁ cid ratham ātasthivāṁsā nānā havete sa janāsa indraḥ ||

yam | krandasī iti | saṁyatī iti sam-yatī | vihvayete iti vi-hvayete | pare | avare | ubhayāḥ | amitrāḥ |
samānam | cit | ratham | ātasthi-vāṁsā | nānā | havete iti | saḥ | janāsaḥ | indraḥ ||2.012.08||

2.012.09a yasmān na ṛte vijayante janāso yaṁ yudhyamānā avase havante |
2.012.09c yo viśvasya pratimānam babhūva yo acyutacyut sa janāsa indraḥ ||

yasmāt | na | ṛte | vi-jayante | janāsaḥ | yam | yudhyamānāḥ | avase | havante |
yaḥ | viśvasya | prati-mānam | babhūva | yaḥ | acyuta-cyut | saḥ | janāsaḥ | indraḥ ||2.012.09||

2.012.10a yaḥ śaśvato mahy eno dadhānān amanyamānāñ charvā jaghāna |
2.012.10c yaḥ śardhate nānudadāti śṛdhyāṁ yo dasyor hantā sa janāsa indraḥ ||

yaḥ | śaśvataḥ | mahi | enaḥ | dadhānān | amanyamānān | śarvā | jaghāna |
yaḥ | śardhate | na | anu-dadāti | śṛdhyām | yaḥ | dasyoḥ | hantā | saḥ | janāsaḥ | indraḥ ||2.012.10||

2.012.11a yaḥ śambaram parvateṣu kṣiyantaṁ catvāriṁśyāṁ śarady anvavindat |
2.012.11c ojāyamānaṁ yo ahiṁ jaghāna dānuṁ śayānaṁ sa janāsa indraḥ ||

yaḥ | śambaram | parvateṣu | kṣiyantam | catvāriṁśyām | śaradi | anu-avindat |
ojāyamānam | yaḥ | ahim | jaghāna | dānum | śayānam | saḥ | janāsaḥ | indraḥ ||2.012.11||

2.012.12a yaḥ saptaraśmir vṛṣabhas tuviṣmān avāsṛjat sartave sapta sindhūn |
2.012.12c yo rauhiṇam asphurad vajrabāhur dyām ārohantaṁ sa janāsa indraḥ ||

yaḥ | sapta-raśmiḥ | vṛṣabhaḥ | tuviṣmān | ava-asṛjat | sartave | sapta | sindhūn |
yaḥ | rauhiṇam | asphurat | vajra-bāhuḥ | dyām | ā-rohantam | saḥ | janāsaḥ | indraḥ ||2.012.12||

2.012.13a dyāvā cid asmai pṛthivī namete śuṣmāc cid asya parvatā bhayante |
2.012.13c yaḥ somapā nicito vajrabāhur yo vajrahastaḥ sa janāsa indraḥ ||

dyāvā | cit | asmai | pṛthivī iti | namete iti | śuṣmāt | cit | asya | parvatāḥ | bhayante |
yaḥ | soma-pāḥ | ni-citaḥ | vajra-bāhuḥ | yaḥ | vajra-hastaḥ | saḥ | janāsaḥ | indraḥ ||2.012.13||

2.012.14a yaḥ sunvantam avati yaḥ pacantaṁ yaḥ śaṁsantaṁ yaḥ śaśamānam ūtī |
2.012.14c yasya brahma vardhanaṁ yasya somo yasyedaṁ rādhaḥ sa janāsa indraḥ ||

yaḥ | sunvantam | avati | yaḥ | pacantam | yaḥ | śaṁsantam | yaḥ | śaśamānam | ūtī |
yasya | brahma | vardhanam | yasya | somaḥ | yasya | idam | rādhaḥ | saḥ | janāsaḥ | indraḥ ||2.012.14||

2.012.15a yaḥ sunvate pacate dudhra ā cid vājaṁ dardarṣi sa kilāsi satyaḥ |
2.012.15c vayaṁ ta indra viśvaha priyāsaḥ suvīrāso vidatham ā vadema ||

yaḥ | sunvate | pacate | dudhraḥ | ā | cit | vājam | dardarṣi | saḥ | kila | asi | satyaḥ |
vayam | te | indra | viśvaha | priyāsaḥ | su-vīrāsaḥ | vidatham | ā | vadema ||2.012.15||


2.013.01a ṛtur janitrī tasyā apas pari makṣū jāta āviśad yāsu vardhate |
2.013.01c tad āhanā abhavat pipyuṣī payo 'ṁśoḥ pīyūṣam prathamaṁ tad ukthyam ||

ṛtuḥ | janitrī | tasyāḥ | apaḥ | pari | makṣu | jātaḥ | ā | aviśat | yāsu | vardhate |
tat | āhanāḥ | abhavat | pipyuṣī | payaḥ | aṁśoḥ | pīyūṣam | prathamam | tat | ukthyam ||2.013.01||

2.013.02a sadhrīm ā yanti pari bibhratīḥ payo viśvapsnyāya pra bharanta bhojanam |
2.013.02c samāno adhvā pravatām anuṣyade yas tākṛṇoḥ prathamaṁ sāsy ukthyaḥ ||

sadhrī | īm | ā | yanti | pari | bibhratīḥ | payaḥ | viśva-psnyāya | pra | bharanta | bhojanam |
samānaḥ | adhvā | pra-vatām | anu-syade | yaḥ | tā | akṛṇoḥ | prathamam | saḥ | asi | ukthyaḥ ||2.013.02||

2.013.03a anv eko vadati yad dadāti tad rūpā minan tadapā eka īyate |
2.013.03c viśvā ekasya vinudas titikṣate yas tākṛṇoḥ prathamaṁ sāsy ukthyaḥ ||

anu | ekaḥ | vadati | yat | dadāti | tat | rūpā | minan | tat-apāḥ | ekaḥ | īyate |
viśvāḥ | ekasya | vi-nudaḥ | titikṣate | yaḥ | tā | akṛṇoḥ | prathamam | saḥ | asi | ukthyaḥ ||2.013.03||

2.013.04a prajābhyaḥ puṣṭiṁ vibhajanta āsate rayim iva pṛṣṭham prabhavantam āyate |
2.013.04c asinvan daṁṣṭraiḥ pitur atti bhojanaṁ yas tākṛṇoḥ prathamaṁ sāsy ukthyaḥ ||

pra-jābhyaḥ | puṣṭim | vi-bhajantaḥ | āsate | rayim-iva | pṛṣṭham | pra-bhavantam | ā-yate |
asinvan | daṁṣṭraiḥ | pituḥ | atti | bhojanam | yaḥ | tā | akṛṇoḥ | prathamam | saḥ | asi | ukthyaḥ ||2.013.04||

2.013.05a adhākṛṇoḥ pṛthivīṁ saṁdṛśe dive yo dhautīnām ahihann āriṇak pathaḥ |
2.013.05c taṁ tvā stomebhir udabhir na vājinaṁ devaṁ devā ajanan sāsy ukthyaḥ ||

adha | akṛṇoḥ | pṛthivīm | sam-dṛśe | dive | yaḥ | dhautīnām | ahi-han | ariṇak | pathaḥ |
tam | tvā | stomebhiḥ | uda-bhiḥ | na | vājinam | devam | devāḥ | ajanan | saḥ | asi | ukthyaḥ ||2.013.05||

2.013.06a yo bhojanaṁ ca dayase ca vardhanam ārdrād ā śuṣkam madhumad dudohitha |
2.013.06c sa śevadhiṁ ni dadhiṣe vivasvati viśvasyaika īśiṣe sāsy ukthyaḥ ||

yaḥ | bhojanam | ca | dayase | ca | vardhanam | ārdrāt | ā | śuṣkam | madhu-mat | dudohitha |
saḥ | śevadhim | ni | dadhiṣe | vivasvati | viśvasya | ekaḥ | īśiṣe | saḥ | asi | ukthyaḥ ||2.013.06||

2.013.07a yaḥ puṣpiṇīś ca prasvaś ca dharmaṇādhi dāne vy avanīr adhārayaḥ |
2.013.07c yaś cāsamā ajano didyuto diva urur ūrvām̐ abhitaḥ sāsy ukthyaḥ ||

yaḥ | puṣpiṇīḥ | ca | pra-svaḥ | ca | dharmaṇā | adhi | dāne | vi | avanīḥ | adhārayaḥ |
yaḥ | ca | asamāḥ | ajanaḥ | didyutaḥ | divaḥ | uruḥ | ūrvān | abhitaḥ | saḥ | asi | ukthyaḥ ||2.013.07||

2.013.08a yo nārmaraṁ sahavasuṁ nihantave pṛkṣāya ca dāsaveśāya cāvahaḥ |
2.013.08c ūrjayantyā apariviṣṭam āsyam utaivādya purukṛt sāsy ukthyaḥ ||

yaḥ | nārmaram | saha-vasum | ni-hantave | pṛkṣāya | ca | dāsa-veśāya | ca | avahaḥ |
ūrjayantyāḥ | apari-viṣṭam | āsyam | uta | eva | adya | puru-kṛt | saḥ | asi | ukthyaḥ ||2.013.08||

2.013.09a śataṁ vā yasya daśa sākam ādya ekasya śruṣṭau yad dha codam āvitha |
2.013.09c arajjau dasyūn sam unab dabhītaye suprāvyo abhavaḥ sāsy ukthyaḥ ||

śatam | vā | yasya | daśa | sākam | ā | adyaḥ | ekasya | śruṣṭau | yat | ha | codam | āvitha |
arajjau | dasyūn | sam | unap | dabhītaye | supra-avyaḥ | abhavaḥ | saḥ | asi | ukthyaḥ ||2.013.09||

2.013.10a viśved anu rodhanā asya pauṁsyaṁ dadur asmai dadhire kṛtnave dhanam |
2.013.10c ṣaḻ astabhnā viṣṭiraḥ pañca saṁdṛśaḥ pari paro abhavaḥ sāsy ukthyaḥ ||

viśvā | it | anu | rodhanāḥ | asya | pauṁsyam | daduḥ | asmai | dadhire | kṛtnave | dhanam |
ṣaṭ | astabhnāḥ | vi-stiraḥ | pañca | sam-dṛśaḥ | pari | paraḥ | abhavaḥ | saḥ | asi | ukthyaḥ ||2.013.10||

2.013.11a supravācanaṁ tava vīra vīryaṁ yad ekena kratunā vindase vasu |
2.013.11c jātūṣṭhirasya pra vayaḥ sahasvato yā cakartha sendra viśvāsy ukthyaḥ ||

su-pravācanam | tava | vīra | vīryam | yat | ekena | kratunā | vindase | vasu |
jātū-sthirasya | pra | vayaḥ | sahasvataḥ | yā | cakartha | saḥ | indra | viśvā | asi | ukthyaḥ ||2.013.11||

2.013.12a aramayaḥ sarapasas tarāya kaṁ turvītaye ca vayyāya ca srutim |
2.013.12c nīcā santam ud anayaḥ parāvṛjam prāndhaṁ śroṇaṁ śravayan sāsy ukthyaḥ ||

aramayaḥ | sara-apasaḥ | tarāya | kam | turvītaye | ca | vayyāya | ca | srutim |
nīcā | santam | ut | anayaḥ | parā-vṛjam | pra | andham | śroṇam | śravayan | saḥ | asi | ukthyaḥ ||2.013.12||

2.013.13a asmabhyaṁ tad vaso dānāya rādhaḥ sam arthayasva bahu te vasavyam |
2.013.13c indra yac citraṁ śravasyā anu dyūn bṛhad vadema vidathe suvīrāḥ ||

asmabhyam | tat | vaso iti | dānāya | rādhaḥ | sam | arthayasva | bahu | te | vasavyam |
indra | yat | citram | śravasyāḥ | anu | dyūn | bṛhat | vadema | vidathe | su-vīrāḥ ||2.013.13||


2.014.01a adhvaryavo bharatendrāya somam āmatrebhiḥ siñcatā madyam andhaḥ |
2.014.01c kāmī hi vīraḥ sadam asya pītiṁ juhota vṛṣṇe tad id eṣa vaṣṭi ||

adhvaryavaḥ | bharata | indrāya | somam | ā | amatrebhiḥ | siñcata | madyam | andhaḥ |
kāmī | hi | vīraḥ | sadam | asya | pītim | juhota | vṛṣṇe | tat | it | eṣaḥ | vaṣṭi ||2.014.01||

2.014.02a adhvaryavo yo apo vavrivāṁsaṁ vṛtraṁ jaghānāśanyeva vṛkṣam |
2.014.02c tasmā etam bharata tadvaśāyam̐ eṣa indro arhati pītim asya ||

adhvaryavaḥ | yaḥ | apaḥ | vavrivāṁsam | vṛtram | jaghāna | aśanyā-iva | vṛkṣam |
tasmai | etam | bharata | tat-vaśāya | eṣaḥ | indraḥ | arhati | pītim | asya ||2.014.02||

2.014.03a adhvaryavo yo dṛbhīkaṁ jaghāna yo gā udājad apa hi valaṁ vaḥ |
2.014.03c tasmā etam antarikṣe na vātam indraṁ somair orṇuta jūr na vastraiḥ ||

adhvaryavaḥ | yaḥ | dṛbhīkam | jaghāna | yaḥ | gāḥ | ut-ājat | apa | hi | valam | variti vaḥ |
tasmai | etam | antarikṣe | na | vātam | indram | somaiḥ | ā | ūrṇuta | jūḥ | na | vastraiḥ ||2.014.03||

2.014.04a adhvaryavo ya uraṇaṁ jaghāna nava cakhvāṁsaṁ navatiṁ ca bāhūn |
2.014.04c yo arbudam ava nīcā babādhe tam indraṁ somasya bhṛthe hinota ||

adhvaryavaḥ | yaḥ | uraṇam | jaghāna | nava | cakhvāṁsam | navatim | ca | bāhūn |
yaḥ | arbudam | ava | nīcā | babādhe | tam | indram | somasya | bhṛthe | hinota ||2.014.04||

2.014.05a adhvaryavo yaḥ sv aśnaṁ jaghāna yaḥ śuṣṇam aśuṣaṁ yo vyaṁsam |
2.014.05c yaḥ pipruṁ namuciṁ yo rudhikrāṁ tasmā indrāyāndhaso juhota ||

adhvaryavaḥ | yaḥ | su | aśnam | jaghāna | yaḥ | śuṣṇam | aśuṣam | yaḥ | vi-aṁsam |
yaḥ | piprum | namucim | yaḥ | rudhi-krām | tasmai | indrāya | andhasaḥ | juhota ||2.014.05||

2.014.06a adhvaryavo yaḥ śataṁ śambarasya puro bibhedāśmaneva pūrvīḥ |
2.014.06c yo varcinaḥ śatam indraḥ sahasram apāvapad bharatā somam asmai ||

adhvaryavaḥ | yaḥ | śatam | śambarasya | puraḥ | bibheda | aśmanā-iva | pūrvīḥ |
yaḥ | varcinaḥ | śatam | indraḥ | sahasram | apa-avapat | bharata | somam | asmai ||2.014.06||

2.014.07a adhvaryavo yaḥ śatam ā sahasram bhūmyā upasthe 'vapaj jaghanvān |
2.014.07c kutsasyāyor atithigvasya vīrān ny āvṛṇag bharatā somam asmai ||

adhvaryavaḥ | yaḥ | śatam | ā | sahasram | bhūmyāḥ | upa-sthe | avapat | jaghanvān |
kutsasya | āyoḥ | atithi-gvasya | vīrān | ni | avṛṇak | bharata | somam | asmai ||2.014.07||

2.014.08a adhvaryavo yan naraḥ kāmayādhve śruṣṭī vahanto naśathā tad indre |
2.014.08c gabhastipūtam bharata śrutāyendrāya somaṁ yajyavo juhota ||

adhvaryavaḥ | yat | naraḥ | kāmayādhve | śruṣṭī | vahantaḥ | naśatha | tat | indre |
gabhasti-pūtam | bharata | śrutāya | indrāya | somam | yajyavaḥ | juhota ||2.014.08||

2.014.09a adhvaryavaḥ kartanā śruṣṭim asmai vane nipūtaṁ vana un nayadhvam |
2.014.09c juṣāṇo hastyam abhi vāvaśe va indrāya somam madiraṁ juhota ||

adhvaryavaḥ | kartana | śruṣṭim | asmai | vane | ni-pūtam | vane | ut | nayadhvam |
juṣāṇaḥ | hastyam | abhi | vāvaśe | vaḥ | indrāya | somam | madiram | juhota ||2.014.09||

2.014.10a adhvaryavaḥ payasodhar yathā goḥ somebhir īm pṛṇatā bhojam indram |
2.014.10c vedāham asya nibhṛtam ma etad ditsantam bhūyo yajataś ciketa ||

adhvaryavaḥ | payasā | ūdhaḥ | yathā | goḥ | somebhiḥ | īm | pṛṇata | bhojam | indram |
veda | aham | asya | ni-bhṛtam | me | etat | ditsantam | bhūyaḥ | yajataḥ | ciketa ||2.014.10||

2.014.11a adhvaryavo yo divyasya vasvo yaḥ pārthivasya kṣamyasya rājā |
2.014.11c tam ūrdaraṁ na pṛṇatā yavenendraṁ somebhis tad apo vo astu ||

adhvaryavaḥ | yaḥ | divyasya | vasvaḥ | yaḥ | pārthivasya | kṣamyasya | rājā |
tam | ūrdaram | na | pṛṇata | yavena | indram | somebhiḥ | tat | apaḥ | vaḥ | astu ||2.014.11||

2.014.12a asmabhyaṁ tad vaso dānāya rādhaḥ sam arthayasva bahu te vasavyam |
2.014.12c indra yac citraṁ śravasyā anu dyūn bṛhad vadema vidathe suvīrāḥ ||

asmabhyam | tat | vaso iti | dānāya | rādhaḥ | sam | arthayasva | bahu | te | vasavyam |
indra | yat | citram | śravasyāḥ | anu | dyūn | bṛhat | vadema | vidathe | su-vīrāḥ ||2.014.12||


2.015.01a pra ghā nv asya mahato mahāni satyā satyasya karaṇāni vocam |
2.015.01c trikadrukeṣv apibat sutasyāsya made ahim indro jaghāna ||

pra | gha | nu | asya | mahataḥ | mahāni | satyā | satyasya | karaṇāni | vocam |
tri-kadrukeṣu | apibat | sutasya | asya | made | ahim | indraḥ | jaghāna ||2.015.01||

2.015.02a avaṁśe dyām astabhāyad bṛhantam ā rodasī apṛṇad antarikṣam |
2.015.02c sa dhārayat pṛthivīm paprathac ca somasya tā mada indraś cakāra ||

avaṁśe | dyām | astabhāyat | bṛhantam | ā | rodasī iti | apṛṇat | antarikṣam |
saḥ | dhārayat | pṛthivīm | paprathat | ca | somasya | tā | made | indraḥ | cakāra ||2.015.02||

2.015.03a sadmeva prāco vi mimāya mānair vajreṇa khāny atṛṇan nadīnām |
2.015.03c vṛthāsṛjat pathibhir dīrghayāthaiḥ somasya tā mada indraś cakāra ||

sadma-iva | prācaḥ | vi | mimāya | mānaiḥ | vajreṇa | khāni | atṛṇat | nadīnām |
vṛthā | asṛjat | pathi-bhiḥ | dīrgha-yāthaiḥ | somasya | tā | made | indraḥ | cakāra ||2.015.03||

2.015.04a sa pravoḻhṝn parigatyā dabhīter viśvam adhāg āyudham iddhe agnau |
2.015.04c saṁ gobhir aśvair asṛjad rathebhiḥ somasya tā mada indraś cakāra ||

saḥ | pra-voḻhṝn | pari-gatya | dabhīteḥ | viśvam | adhāk | āyudham | iddhe | agnau |
sam | gobhiḥ | aśvaiḥ | asṛjat | rathebhiḥ | somasya | tā | made | indraḥ | cakāra ||2.015.04||

2.015.05a sa īm mahīṁ dhunim etor aramṇāt so asnātṝn apārayat svasti |
2.015.05c ta utsnāya rayim abhi pra tasthuḥ somasya tā mada indraś cakāra ||

saḥ | īm | mahīm | dhunim | etoḥ | aramṇāt | saḥ | asnātṝn | apārayat | svasti |
te | ut-snāya | rayim | abhi | pra | tasthuḥ | somasya | tā | made | indraḥ | cakāra ||2.015.05||

2.015.06a sodañcaṁ sindhum ariṇān mahitvā vajreṇāna uṣasaḥ sam pipeṣa |
2.015.06c ajavaso javinībhir vivṛścan somasya tā mada indraś cakāra ||

saḥ | udañcam | sindhum | ariṇāt | mahitvā | vajreṇa | anaḥ | uṣasaḥ | sam | pipeṣa |
ajavasaḥ | javinībhiḥ | vi-vṛścan | somasya | tā | made | indraḥ | cakāra ||2.015.06||

2.015.07a sa vidvām̐ apagohaṁ kanīnām āvir bhavann ud atiṣṭhat parāvṛk |
2.015.07c prati śroṇaḥ sthād vy anag acaṣṭa somasya tā mada indraś cakāra ||

saḥ | vidvān | apa-goham | kanīnām | āviḥ | bhavan | ut | atiṣṭhat | parā-vṛk |
prati | śroṇaḥ | sthāt | vi | anak | acaṣṭa | somasya | tā | made | indraḥ | cakāra ||2.015.07||

2.015.08a bhinad valam aṅgirobhir gṛṇāno vi parvatasya dṛṁhitāny airat |
2.015.08c riṇag rodhāṁsi kṛtrimāṇy eṣāṁ somasya tā mada indraś cakāra ||

bhinat | valam | aṅgiraḥ-bhiḥ | gṛṇānaḥ | vi | parvatasya | dṛṁhitāni | airat |
riṇak | rodhāṁsi | kṛtrimāṇi | eṣām | somasya | tā | made | indraḥ | cakāra ||2.015.08||

2.015.09a svapnenābhyupyā cumuriṁ dhuniṁ ca jaghantha dasyum pra dabhītim āvaḥ |
2.015.09c rambhī cid atra vivide hiraṇyaṁ somasya tā mada indraś cakāra ||

svapnena | abhi-upya | cumurim | dhunim | ca | jaghantha | dasyum | pra | dabhītim | āvaḥ |
rambhī | cit | atra | vivide | hiraṇyam | somasya | tā | made | indraḥ | cakāra ||2.015.09||

2.015.10a nūnaṁ sā te prati varaṁ jaritre duhīyad indra dakṣiṇā maghonī |
2.015.10c śikṣā stotṛbhyo māti dhag bhago no bṛhad vadema vidathe suvīrāḥ ||

nūnam | sā | te | prati | varam | jaritre | duhīyat | indra | dakṣiṇā | maghonī |
śikṣa | stotṛ-bhyaḥ | mā | ati | dhak | bhagaḥ | naḥ | bṛhat | vadema | vidathe | su-vīrāḥ ||2.015.10||


2.016.01a pra vaḥ satāṁ jyeṣṭhatamāya suṣṭutim agnāv iva samidhāne havir bhare |
2.016.01c indram ajuryaṁ jarayantam ukṣitaṁ sanād yuvānam avase havāmahe ||

pra | vaḥ | satām | jyeṣṭhatamāya | su-stutim | agnau-iva | sam-idhāne | haviḥ | bhare |
indram | ajuryam | jarayantam | ukṣitam | sanāt | yuvānam | avase | havāmahe ||2.016.01||

2.016.02a yasmād indrād bṛhataḥ kiṁ canem ṛte viśvāny asmin sambhṛtādhi vīryā |
2.016.02c jaṭhare somaṁ tanvī saho maho haste vajram bharati śīrṣaṇi kratum ||

yasmāt | indrāt | bṛhataḥ | kim | cana | īm | ṛte | viśvāni | asmin | sam-bhṛtā | adhi | vīryā |
jaṭhare | somam | tanvi | sahaḥ | mahaḥ | haste | vajram | bharati | śīrṣaṇi | kratum ||2.016.02||

2.016.03a na kṣoṇībhyām paribhve ta indriyaṁ na samudraiḥ parvatair indra te rathaḥ |
2.016.03c na te vajram anv aśnoti kaś cana yad āśubhiḥ patasi yojanā puru ||

na | kṣoṇībhyām | pari-bhve | te | indriyam | na | samudraiḥ | parvataiḥ | indra | te | rathaḥ |
na | te | vajram | anu | aśnoti | kaḥ | cana | yat | āśu-bhiḥ | patasi | yojanā | puru ||2.016.03||

2.016.04a viśve hy asmai yajatāya dhṛṣṇave kratum bharanti vṛṣabhāya saścate |
2.016.04c vṛṣā yajasva haviṣā viduṣṭaraḥ pibendra somaṁ vṛṣabheṇa bhānunā ||

viśve | hi | asmai | yajatāya | dhṛṣṇave | kratum | bharanti | vṛṣabhāya | saścate |
vṛṣā | yajasva | haviṣā | viduḥ-taraḥ | piba | indra | somam | vṛṣabheṇa | bhānunā ||2.016.04||

2.016.05a vṛṣṇaḥ kośaḥ pavate madhva ūrmir vṛṣabhānnāya vṛṣabhāya pātave |
2.016.05c vṛṣaṇādhvaryū vṛṣabhāso adrayo vṛṣaṇaṁ somaṁ vṛṣabhāya suṣvati ||

vṛṣṇaḥ | kośaḥ | pavate | madhvaḥ | ūrmiḥ | vṛṣabha-annāya | vṛṣabhāya | pātave |
vṛṣaṇā | adhvaryū iti | vṛṣabhāsaḥ | adrayaḥ | vṛṣaṇam | somam | vṛṣabhāya | susvati ||2.016.05||

2.016.06a vṛṣā te vajra uta te vṛṣā ratho vṛṣaṇā harī vṛṣabhāṇy āyudhā |
2.016.06c vṛṣṇo madasya vṛṣabha tvam īśiṣa indra somasya vṛṣabhasya tṛpṇuhi ||

vṛṣā | te | vajraḥ | uta | te | vṛṣā | rathaḥ | vṛṣaṇā | harī iti | vṛṣabhāṇi | āyudhā |
vṛṣṇaḥ | madasya | vṛṣabha | tvam | īśiṣe | indra | somasya | vṛṣabhasya | tṛpṇuhi ||2.016.06||

2.016.07a pra te nāvaṁ na samane vacasyuvam brahmaṇā yāmi savaneṣu dādhṛṣiḥ |
2.016.07c kuvin no asya vacaso nibodhiṣad indram utsaṁ na vasunaḥ sicāmahe ||

pra | te | nāvam | na | samane | vacasyuvam | brahmaṇā | yāmi | savaneṣu | dadhṛṣiḥ |
kuvit | naḥ | asya | vacasaḥ | ni-bodhiṣat | indram | utsam | na | vasunaḥ | sicāmahe ||2.016.07||

2.016.08a purā sambādhād abhy ā vavṛtsva no dhenur na vatsaṁ yavasasya pipyuṣī |
2.016.08c sakṛt su te sumatibhiḥ śatakrato sam patnībhir na vṛṣaṇo nasīmahi ||

purā | sam-bādhāt | abhi | ā | vavṛtsva | naḥ | dhenuḥ | na | vatsam | yavasasya | pipyuṣī |
sakṛt | su | te | sumati-bhiḥ | śatakrato iti śata-krato | sam | patnībhiḥ | na | vṛṣaṇaḥ | nasīmahi ||2.016.08||

2.016.09a nūnaṁ sā te prati varaṁ jaritre duhīyad indra dakṣiṇā maghonī |
2.016.09c śikṣā stotṛbhyo māti dhag bhago no bṛhad vadema vidathe suvīrāḥ ||

nūnam | sā | te | prati | varam | jaritre | duhīyat | indra | dakṣiṇā | maghonī |
śikṣa | stotṛ-bhyaḥ | mā | ati | dhak | bhagaḥ | naḥ | bṛhat | vadema | vidathe | su-vīrāḥ ||2.016.09||


2.017.01a tad asmai navyam aṅgirasvad arcata śuṣmā yad asya pratnathodīrate |
2.017.01c viśvā yad gotrā sahasā parīvṛtā made somasya dṛṁhitāny airayat ||

tat | asmai | navyam | aṅgirasvat | arcata | śuṣmāḥ | yat | asya | pratna-thā | ut-īrate |
viśvā | yat | gotrā | sahasā | pari-vṛtā | made | somasya | dṛṁhitāni | airayat ||2.017.01||

2.017.02a sa bhūtu yo ha prathamāya dhāyasa ojo mimāno mahimānam ātirat |
2.017.02c śūro yo yutsu tanvam parivyata śīrṣaṇi dyām mahinā praty amuñcata ||

saḥ | bhūtu | yaḥ | ha | prathamāya | dhāyase | ojaḥ | mimānaḥ | mahimānam | ā | atirat |
śūraḥ | yaḥ | yut-su | tanvam | pari-vyata | śīrṣaṇi | dyām | mahinā | prati | amuñcata ||2.017.02||

2.017.03a adhākṛṇoḥ prathamaṁ vīryam mahad yad asyāgre brahmaṇā śuṣmam airayaḥ |
2.017.03c ratheṣṭhena haryaśvena vicyutāḥ pra jīrayaḥ sisrate sadhryak pṛthak ||

adha | akṛṇoḥ | prathamam | vīryam | mahat | yat | asya | agre | brahmaṇā | śuṣmam | airayaḥ |
rathe-sthena | hari-aśvena | vi-cyutāḥ | pra | jīrayaḥ | sisrate | sadhryak | pṛthak ||2.017.03||

2.017.04a adhā yo viśvā bhuvanābhi majmaneśānakṛt pravayā abhy avardhata |
2.017.04c ād rodasī jyotiṣā vahnir ātanot sīvyan tamāṁsi dudhitā sam avyayat ||

adha | yaḥ | viśvā | bhuvanā | abhi | majmanā | īśāna-kṛt | pra-vayāḥ | abhi | avardhata |
āt | rodasī iti | jyotiṣā | vahniḥ | ā | atanot | sīvyan | tamāṁsi | dudhitā | sam | avyayat ||2.017.04||

2.017.05a sa prācīnān parvatān dṛṁhad ojasādharācīnam akṛṇod apām apaḥ |
2.017.05c adhārayat pṛthivīṁ viśvadhāyasam astabhnān māyayā dyām avasrasaḥ ||

saḥ | prācīnān | parvatān | dṛṁhat | ojasā | adharācīnam | akṛṇot | apām | apaḥ |
adhārayat | pṛthivīm | viśva-dhāyasam | astabhnāt | māyayā | dyām | ava-srasaḥ ||2.017.05||

2.017.06a sāsmā aram bāhubhyāṁ yam pitākṛṇod viśvasmād ā januṣo vedasas pari |
2.017.06c yenā pṛthivyāṁ ni kriviṁ śayadhyai vajreṇa hatvy avṛṇak tuviṣvaṇiḥ ||

saḥ | asmai | aram | bāhu-bhyām | yam | pitā | akṛṇot | viśvasmāt | ā | januṣaḥ | vedasaḥ | pari |
yena | pṛthivyām | ni | krivim | śayadhyai | vajreṇa | hatvī | avṛṇak | tuvi-svaniḥ ||2.017.06||

2.017.07a amājūr iva pitroḥ sacā satī samānād ā sadasas tvām iye bhagam |
2.017.07c kṛdhi praketam upa māsy ā bhara daddhi bhāgaṁ tanvo yena māmahaḥ ||

amājūḥ-iva | pitroḥ | sacā | satī | samānāt | ā | sadasaḥ | tvām | iye | bhagam |
kṛdhi | pra-ketam | upa | māsi | ā | bhara | daddhi | bhāgam | tanvaḥ | yena | mamahaḥ ||2.017.07||

2.017.08a bhojaṁ tvām indra vayaṁ huvema dadiṣ ṭvam indrāpāṁsi vājān |
2.017.08c aviḍḍhīndra citrayā na ūtī kṛdhi vṛṣann indra vasyaso naḥ ||

bhojam | tvām | indra | vayam | huvema | dadiḥ | tvam | indra | apāṁsi | vājān |
aviḍḍhi | indra | citrayā | naḥ | ūtī | kṛdhi | vṛṣan | indra | vasyasaḥ | naḥ ||2.017.08||

2.017.09a nūnaṁ sā te prati varaṁ jaritre duhīyad indra dakṣiṇā maghonī |
2.017.09c śikṣā stotṛbhyo māti dhag bhago no bṛhad vadema vidathe suvīrāḥ ||

nūnam | sā | te | prati | varam | jaritre | duhīyat | indra | dakṣiṇā | maghonī |
śikṣa | stotṛ-bhyaḥ | mā | ati | dhak | bhagaḥ | naḥ | bṛhat | vadema | vidathe | su-vīrāḥ ||2.017.09||


2.018.01a prātā ratho navo yoji sasniś caturyugas trikaśaḥ saptaraśmiḥ |
2.018.01c daśāritro manuṣyaḥ svarṣāḥ sa iṣṭibhir matibhī raṁhyo bhūt ||

prātariti | rathaḥ | navaḥ | yoji | sasniḥ | catuḥ-yugaḥ | tri-kaśaḥ | sapta-raśmiḥ |
daśa-aritraḥ | manuṣyaḥ | svaḥ-sāḥ | saḥ | iṣṭi-bhiḥ | mati-bhiḥ | raṁhyaḥ | bhūt ||2.018.01||

2.018.02a sāsmā aram prathamaṁ sa dvitīyam uto tṛtīyam manuṣaḥ sa hotā |
2.018.02c anyasyā garbham anya ū jananta so anyebhiḥ sacate jenyo vṛṣā ||

saḥ | asmai | aram | prathamam | saḥ | dvitīyam | uto iti | tṛtīyam | manuṣaḥ | saḥ | hotā |
anyasyāḥ | garbham | anye | ūm̐ iti | jananta | saḥ | anyebhiḥ | sacate | jenyaḥ | vṛṣā ||2.018.02||

2.018.03a harī nu kaṁ ratha indrasya yojam āyai sūktena vacasā navena |
2.018.03c mo ṣu tvām atra bahavo hi viprā ni rīraman yajamānāso anye ||

harī iti | nu | kam | rathe | indrasya | yojam | ā-yai | sūktena | vacasā | navena |
mo iti | su | tvām | atra | bahavaḥ | hi | viprāḥ | ni | rīraman | yajamānāsaḥ | anye ||2.018.03||

2.018.04a ā dvābhyāṁ haribhyām indra yāhy ā caturbhir ā ṣaḍbhir hūyamānaḥ |
2.018.04c āṣṭābhir daśabhiḥ somapeyam ayaṁ sutaḥ sumakha mā mṛdhas kaḥ ||

ā | dvābhyām | hari-bhyām | indra | yāhi | ā | catuḥ-bhiḥ | ā | ṣaṭ-bhiḥ | hūyamānaḥ |
ā | aṣṭābhiḥ | daśa-bhiḥ | soma-peyam | ayam | sutaḥ | su-makha | mā | mṛdhaḥ | kariti kaḥ ||2.018.04||

2.018.05a ā viṁśatyā triṁśatā yāhy arvāṅ ā catvāriṁśatā haribhir yujānaḥ |
2.018.05c ā pañcāśatā surathebhir indrā ṣaṣṭyā saptatyā somapeyam ||

ā | viṁśatyā | triṁśatā | yāhi | arvāṅ | ā | catvāriṁśatā | hari-bhiḥ | yujānaḥ |
ā | pañcāśatā | su-rathebhiḥ | indra | ā | ṣaṣṭyā | saptatyā | soma-peyam ||2.018.05||

2.018.06a āśītyā navatyā yāhy arvāṅ ā śatena haribhir uhyamānaḥ |
2.018.06c ayaṁ hi te śunahotreṣu soma indra tvāyā pariṣikto madāya ||

ā | aśītyā | navatyā | yāhi | arvāṅ | ā | śatena | hari-bhiḥ | uhyamānaḥ |
ayam | hi | te | śuna-hotreṣu | somaḥ | indra | tvā-yā | pari-siktaḥ | madāya ||2.018.06||

2.018.07a mama brahmendra yāhy acchā viśvā harī dhuri dhiṣvā rathasya |
2.018.07c purutrā hi vihavyo babhūthāsmiñ chūra savane mādayasva ||

mama | brahma | indra | yāhi | accha | viśvā | harī iti | dhuri | dhiṣva | rathasya |
puru-trā | hi | vi-havyaḥ | babhūtha | asmin | śūra | savane | mādayasva ||2.018.07||

2.018.08a na ma indreṇa sakhyaṁ vi yoṣad asmabhyam asya dakṣiṇā duhīta |
2.018.08c upa jyeṣṭhe varūthe gabhastau prāye-prāye jigīvāṁsaḥ syāma ||

na | me | indreṇa | sakhyam | vi | yoṣat | asmabhyam | asya | dakṣiṇā | duhīta |
upa | jyeṣṭhe | varūthe | gabhastau | prāye-prāye | jigīvāṁsaḥ | syāma ||2.018.08||

2.018.09a nūnaṁ sā te prati varaṁ jaritre duhīyad indra dakṣiṇā maghonī |
2.018.09c śikṣā stotṛbhyo māti dhag bhago no bṛhad vadema vidathe suvīrāḥ ||

nūnam | sā | te | prati | varam | jaritre | duhīyat | indra | dakṣiṇā | maghonī |
śikṣa | stotṛ-bhyaḥ | mā | ati | dhak | bhagaḥ | naḥ | bṛhat | vadema | vidathe | su-vīrāḥ ||2.018.09||


2.019.01a apāyy asyāndhaso madāya manīṣiṇaḥ suvānasya prayasaḥ |
2.019.01c yasminn indraḥ pradivi vāvṛdhāna oko dadhe brahmaṇyantaś ca naraḥ ||

apāyi | asya | andhasaḥ | madāya | manīṣiṇaḥ | suvānasya | prayasaḥ |
yasmin | indraḥ | pra-divi | vavṛdhānaḥ | okaḥ | dadhe | brahmaṇyantaḥ | ca | naraḥ ||2.019.01||

2.019.02a asya mandāno madhvo vajrahasto 'him indro arṇovṛtaṁ vi vṛścat |
2.019.02c pra yad vayo na svasarāṇy acchā prayāṁsi ca nadīnāṁ cakramanta ||

asya | mandānaḥ | madhvaḥ | vajra-hastaḥ | ahim | indraḥ | arṇaḥ-vṛtam | vi | vṛścat |
pra | yat | vayaḥ | na | svasarāṇi | accha | prayāṁsi | ca | nadīnām | cakramanta ||2.019.02||

2.019.03a sa māhina indro arṇo apām prairayad ahihācchā samudram |
2.019.03c ajanayat sūryaṁ vidad gā aktunāhnāṁ vayunāni sādhat ||

saḥ | māhinaḥ | indraḥ | arṇaḥ | apām | pra | airayat | ahi-hā | accha | samudram |
ajanayat | sūryam | vidat | gāḥ | aktunā | ahnām | vayunāni | sādhat ||2.019.03||

2.019.04a so apratīni manave purūṇīndro dāśad dāśuṣe hanti vṛtram |
2.019.04c sadyo yo nṛbhyo atasāyyo bhūt paspṛdhānebhyaḥ sūryasya sātau ||

saḥ | apratīni | manave | purūṇi | indraḥ | dāśat | dāśuṣe | hanti | vṛtram |
sadyaḥ | yaḥ | nṛ-bhyaḥ | atasāyyaḥ | bhūt | paspṛdhānebhyaḥ | sūryasya | sātau ||2.019.04||

2.019.05a sa sunvata indraḥ sūryam ā devo riṇaṅ martyāya stavān |
2.019.05c ā yad rayiṁ guhadavadyam asmai bharad aṁśaṁ naitaśo daśasyan ||

saḥ | sunvate | indraḥ | sūryam | ā | devaḥ | riṇak | martyāya | stavān |
ā | yat | rayim | ghat-avadyam | asmai | bharat | aṁśam | na | etaśaḥ | daśasyan ||2.019.05||

2.019.06a sa randhayat sadivaḥ sārathaye śuṣṇam aśuṣaṁ kuyavaṁ kutsāya |
2.019.06c divodāsāya navatiṁ ca navendraḥ puro vy airac chambarasya ||

saḥ | randhayat | sa-divaḥ | sārathaye | śuṣṇam | aśuṣam | kuyavam | kutsāya |
divaḥ-dāsāya | navatim | ca | nava | indraḥ | puraḥ | vi | airat | śambarasya ||2.019.06||

2.019.07a evā ta indrocatham ahema śravasyā na tmanā vājayantaḥ |
2.019.07c aśyāma tat sāptam āśuṣāṇā nanamo vadhar adevasya pīyoḥ ||

eva | te | indra | ucatham | ahema | śravasyā | na | tmanā | vājayantaḥ |
aśyāma | tat | sāptam | āśuṣāṇāḥ | nanamaḥ | vadhaḥ | adevasya | pīyoḥ ||2.019.07||

2.019.08a evā te gṛtsamadāḥ śūra manmāvasyavo na vayunāni takṣuḥ |
2.019.08c brahmaṇyanta indra te navīya iṣam ūrjaṁ sukṣitiṁ sumnam aśyuḥ ||

eva | te | gṛtsa-madāḥ | śūra | manma | avasyavaḥ | na | vayunāni | takṣuḥ |
brahmaṇyantaḥ | indra | te | navīyaḥ | iṣam | ūrjam | su-kṣitim | sumnam | aśyuḥ ||2.019.08||

2.019.09a nūnaṁ sā te prati varaṁ jaritre duhīyad indra dakṣiṇā maghonī |
2.019.09c śikṣā stotṛbhyo māti dhag bhago no bṛhad vadema vidathe suvīrāḥ ||

nūnam | sā | te | prati | varam | jaritre | duhīyat | indra | dakṣiṇā | maghonī |
śikṣa | stotṛ-bhyaḥ | mā | ati | dhak | bhagaḥ | naḥ | bṛhat | vadema | vidathe | su-vīrāḥ ||2.019.09||


2.020.01a vayaṁ te vaya indra viddhi ṣu ṇaḥ pra bharāmahe vājayur na ratham |
2.020.01c vipanyavo dīdhyato manīṣā sumnam iyakṣantas tvāvato nṝn ||

vayam | te | vayaḥ | indra | viddhi | su | naḥ | pra | bharāmahe | vāja-yuḥ | na | ratham |
vipanyavaḥ | dīdhyataḥ | manīṣā | sumnam | iyakṣantaḥ | tvā-vataḥ | nṝn ||2.020.01||

2.020.02a tvaṁ na indra tvābhir ūtī tvāyato abhiṣṭipāsi janān |
2.020.02c tvam ino dāśuṣo varūtetthādhīr abhi yo nakṣati tvā ||

tvam | naḥ | indra | tvābhiḥ | ūtī | tvā-yataḥ | abhiṣṭi-pā | asi | janān |
tvam | inaḥ | dāśuṣaḥ | varūtā | itthā-dhīḥ | abhi | yaḥ | nakṣati | tvā ||2.020.02||

2.020.03a sa no yuvendro johūtraḥ sakhā śivo narām astu pātā |
2.020.03c yaḥ śaṁsantaṁ yaḥ śaśamānam ūtī pacantaṁ ca stuvantaṁ ca praṇeṣat ||

saḥ | naḥ | yuvā | indraḥ | johūtraḥ | sakhā | śivaḥ | narām | astu | pātā |
yaḥ | śaṁsantam | yaḥ | śaśamānam | ūtī | pacantam | ca | stuvantam | ca | pra-neṣat ||2.020.03||

2.020.04a tam u stuṣa indraṁ taṁ gṛṇīṣe yasmin purā vāvṛdhuḥ śāśaduś ca |
2.020.04c sa vasvaḥ kāmam pīparad iyāno brahmaṇyato nūtanasyāyoḥ ||

tam | ūm̐ iti | stuṣe | indram | tam | gṛṇīṣe | yasmin | purā | vavṛdhuḥ | śāśaduḥ | ca |
saḥ | vasvaḥ | kāmam | pīparat | iyānaḥ | brahmaṇyataḥ | nūtanasya | āyoḥ ||2.020.04||

2.020.05a so aṅgirasām ucathā jujuṣvān brahmā tūtod indro gātum iṣṇan |
2.020.05c muṣṇann uṣasaḥ sūryeṇa stavān aśnasya cic chiśnathat pūrvyāṇi ||

saḥ | aṅgirasām | ucathā | jujuṣvān | brahmā | tūtot | indraḥ | gātum | iṣṇan |
muṣṇan | uṣasaḥ | sūryeṇa | stavān | aśnasya | cit | śiśnathat | pūrvyāṇi ||2.020.05||

2.020.06a sa ha śruta indro nāma deva ūrdhvo bhuvan manuṣe dasmatamaḥ |
2.020.06c ava priyam arśasānasya sāhvāñ chiro bharad dāsasya svadhāvān ||

saḥ | ha | śṛutaḥ | indraḥ | nāma | devaḥ | ūrdhvaḥ | bhuvan | manuṣe | dasma-tamaḥ |
ava | priyam | arśasānasya | śāhvān | śiraḥ | bharat | dāsasya | svadhā-vān ||2.020.06||

2.020.07a sa vṛtrahendraḥ kṛṣṇayonīḥ puraṁdaro dāsīr airayad vi |
2.020.07c ajanayan manave kṣām apaś ca satrā śaṁsaṁ yajamānasya tūtot ||

saḥ | vṛtra-hā | indraḥ | kṛṣṇa-yonīḥ | puram-daraḥ | dāsīḥ | airayat | vi |
ajanayat | manave | kṣām | apaḥ | ca | satrā | śaṁsam | yajamānasya | tūtot ||2.020.07||

2.020.08a tasmai tavasyam anu dāyi satrendrāya devebhir arṇasātau |
2.020.08c prati yad asya vajram bāhvor dhur hatvī dasyūn pura āyasīr ni tārīt ||

tasmai | tavasyam | anu | dāyi | satrā | indrāya | devebhiḥ | arṇa-sātau |
prati | yat | asya | vajram | bāhvoḥ | dhuḥ | hatvī | dasyūn | puraḥ | āyasīḥ | ni | tārīt ||2.020.08||

2.020.09a nūnaṁ sā te prati varaṁ jaritre duhīyad indra dakṣiṇā maghonī |
2.020.09c śikṣā stotṛbhyo māti dhag bhago no bṛhad vadema vidathe suvīrāḥ ||

nūnam | sā | te | prati | varam | jaritre | duhīyat | indra | dakṣiṇā | maghonī |
śikṣa | stotṛ-bhyaḥ | mā | ati | dhak | bhagaḥ | naḥ | bṛhat | vadema | vidathe | su-vīrāḥ ||2.020.09||


2.021.01a viśvajite dhanajite svarjite satrājite nṛjita urvarājite |
2.021.01c aśvajite gojite abjite bharendrāya somaṁ yajatāya haryatam ||

viśva-jite | dhana-jite | svaḥ-jite | satrā-jite | nṛ-jite | urvarā-jite |
aśva-jite | go-jite | ap-jite | bhara | indrāya | somam | yajatāya | haryatam ||2.021.01||

2.021.02a abhibhuve 'bhibhaṅgāya vanvate 'ṣāḻhāya sahamānāya vedhase |
2.021.02c tuvigraye vahnaye duṣṭarītave satrāsāhe nama indrāya vocata ||

abhi-bhuve | abhi-bhaṅgāya | vanvate | aṣāḻhāya | sahamānāya | vedhase |
tuvi-graye | vahnaye | dustarītave | satrā-sahe | namaḥ | indrāya | vocata ||2.021.02||

2.021.03a satrāsāho janabhakṣo janaṁsahaś cyavano yudhmo anu joṣam ukṣitaḥ |
2.021.03c vṛtaṁcayaḥ sahurir vikṣv ārita indrasya vocam pra kṛtāni vīryā ||

satrā-sahaḥ | jana-bhakṣaḥ | janam-sahaḥ | cyavanaḥ | yudhmaḥ | anu | joṣam | kṣitaḥ |
vṛtam-cayaḥ | sahuriḥ | vikṣu | āritaḥ | indrasya | vocam | pra | kṛtāni | vīryā ||2.021.03||

2.021.04a anānudo vṛṣabho dodhato vadho gambhīra ṛṣvo asamaṣṭakāvyaḥ |
2.021.04c radhracodaḥ śnathano vīḻitas pṛthur indraḥ suyajña uṣasaḥ svar janat ||

ananu-daḥ | vṛṣabhaḥ | dodhataḥ | vadhaḥ | gambhīraḥ | ṛṣvaḥ | asamaṣṭa-kāvyaḥ |
radhra-codaḥ | śnathanaḥ | vīḻitaḥ | pṛthuḥ | indraḥ | su-yajñaḥ | uṣasaḥ | svaḥ | janat ||2.021.04||

2.021.05a yajñena gātum apturo vividrire dhiyo hinvānā uśijo manīṣiṇaḥ |
2.021.05c abhisvarā niṣadā gā avasyava indre hinvānā draviṇāny āśata ||

yajñena | gātum | ap-turaḥ | vividrire | dhiyaḥ | hinvānāḥ | uśijaḥ | manīṣiṇaḥ |
abhi-svarā | ni-sadā | gāḥ | avasyavaḥ | indre | hinvānāḥ | draviṇāni | āśata ||2.021.05||

2.021.06a indra śreṣṭhāni draviṇāni dhehi cittiṁ dakṣasya subhagatvam asme |
2.021.06c poṣaṁ rayīṇām ariṣṭiṁ tanūnāṁ svādmānaṁ vācaḥ sudinatvam ahnām ||

indra | śreṣṭhāni | draviṇāni | dhehi | cittim | dakṣasya | su-bhagatvam | asme iti |
poṣam | rayīṇām | ariṣṭim | tanūnām | svādmānam | vācaḥ | sudina-tvam | ahnām ||2.021.06||


2.022.01a trikadrukeṣu mahiṣo yavāśiraṁ tuviśuṣmas tṛpat somam apibad viṣṇunā sutaṁ yathāvaśat |
2.022.01e sa īm mamāda mahi karma kartave mahām uruṁ sainaṁ saścad devo devaṁ satyam indraṁ satya induḥ ||

tri-kadrukeṣu | mahiṣaḥ | yava-āśiram | tuvi-śuṣmaḥ | tṛpat | somam | apibat | viṣṇunā | sutam | yathā | avaśat |
saḥ | īm | mamāda | mahi | karma | kartave | mahām | urum | saḥ | enam | saścat | devaḥ | devam | satyam | indram | satyaḥ | induḥ ||2.022.01||

2.022.02a adha tviṣīmām̐ abhy ojasā kriviṁ yudhābhavad ā rodasī apṛṇad asya majmanā pra vāvṛdhe |
2.022.02e adhattānyaṁ jaṭhare prem aricyata sainaṁ saścad devo devaṁ satyam indraṁ satya induḥ ||

adha | tviṣi-mān | abhi | ojasā | krivim | yudhā | abhavat | ā | rodasī iti | apṛṇat | asya | majmanā | pra | vavṛdhe |
adhatta | anyam | jaṭhare | pra | īm | aricyata | saḥ | enam | saścat | devaḥ | devam | satyam | indram | satyaḥ | induḥ ||2.022.02||

2.022.03a sākaṁ jātaḥ kratunā sākam ojasā vavakṣitha sākaṁ vṛddho vīryaiḥ sāsahir mṛdho vicarṣaṇiḥ |
2.022.03e dātā rādhaḥ stuvate kāmyaṁ vasu sainaṁ saścad devo devaṁ satyam indraṁ satya induḥ ||

sākam | jātaḥ | kratunā | sākam | ojasā | vavakṣitha | sākam | vṛddhaḥ | vīryaiḥ | sasahiḥ | mṛdhaḥ | vicarṣaṇiḥ |
dātā | rādhaḥ | stuvate | kāmyam | vasu | saḥ | enam | saścat | devaḥ | devam | satyam | indram | satyaḥ | induḥ ||2.022.03||

2.022.04a tava tyan naryaṁ nṛto 'pa indra prathamam pūrvyaṁ divi pravācyaṁ kṛtam |
2.022.04c yad devasya śavasā prāriṇā asuṁ riṇann apaḥ |
2.022.04e bhuvad viśvam abhy ādevam ojasā vidād ūrjaṁ śatakratur vidād iṣam ||

tava | tyat | naryam | nṛto iti | apaḥ | indra | prathamam | pūrvyam | divi | pra-vācyam | kṛtam |
yat | devasya | śavasā | pra | ariṇā | asum | riṇan | apaḥ |
bhuvat | viśvam | abhi | adevam | ojasā | vidāt | ūrjam | śata-kratuḥ | vidāt | iṣam ||2.022.04||


2.023.01a gaṇānāṁ tvā gaṇapatiṁ havāmahe kaviṁ kavīnām upamaśravastamam |
2.023.01c jyeṣṭharājam brahmaṇām brahmaṇas pata ā naḥ śṛṇvann ūtibhiḥ sīda sādanam ||

gaṇānām | tvā | gaṇa-patim | havāmahe | kavim | kavīnām | upamaśravaḥ-tamam |
jyeṣṭha-rājam | brahmaṇām | brahmaṇaḥ | pate | ā | naḥ | śṛṇvan | ūti-bhiḥ | sīda | sādanam ||2.023.01||

2.023.02a devāś cit te asurya pracetaso bṛhaspate yajñiyam bhāgam ānaśuḥ |
2.023.02c usrā iva sūryo jyotiṣā maho viśveṣām ij janitā brahmaṇām asi ||

devāḥ | cit | te | asurya | pra-cetasaḥ | bṛhaspate | yajñiyam | bhāgam | ānaśuḥ |
usrāḥ-iva | sūryaḥ | jyotiṣā | mahaḥ | viśveṣām | it | janitā | brahmaṇām | asi ||2.023.02||

2.023.03a ā vibādhyā parirāpas tamāṁsi ca jyotiṣmantaṁ ratham ṛtasya tiṣṭhasi |
2.023.03c bṛhaspate bhīmam amitradambhanaṁ rakṣohaṇaṁ gotrabhidaṁ svarvidam ||

ā | vi-bādhya | pari-rapaḥ | tamāṁsi | ca | jyotiṣmantam | ratham | ṛtasya | tiṣṭhasi |
bṛhaspate | bhīmam | amitra-dambhanam | rakṣaḥ-hanam | gotra-bhidam | svaḥ-vidam ||2.023.03||

2.023.04a sunītibhir nayasi trāyase janaṁ yas tubhyaṁ dāśān na tam aṁho aśnavat |
2.023.04c brahmadviṣas tapano manyumīr asi bṛhaspate mahi tat te mahitvanam ||

sunīti-bhiḥ | nayasi | trāyase | janam | yaḥ | tubhyam | dāśāt | na | tam | aṁhaḥ | aśnavat |
brahma-dviṣaḥ | tapanaḥ | manyu-mīḥ | asi | bṛhaspate | mahi | tat | te | mahi-tvanam ||2.023.04||

2.023.05a na tam aṁho na duritaṁ kutaś cana nārātayas titirur na dvayāvinaḥ |
2.023.05c viśvā id asmād dhvaraso vi bādhase yaṁ sugopā rakṣasi brahmaṇas pate ||

na | tam | aṁhaḥ | na | duḥ-itam | kutaḥ | cana | na | arātayaḥ | titiruḥ | na | dvayāvinaḥ |
viśvāḥ | it | asmāt | dhvarasaḥ | vi | bādhase | yam | su-gopāḥ | rakṣasi | brahmaṇaḥ | pate ||2.023.05||

2.023.06a tvaṁ no gopāḥ pathikṛd vicakṣaṇas tava vratāya matibhir jarāmahe |
2.023.06c bṛhaspate yo no abhi hvaro dadhe svā tam marmartu ducchunā harasvatī ||

tvam | naḥ | go-pāḥ | pathi-kṛt | vi-cakṣaṇaḥ | tava | vratāya | mati-bhiḥ | jarāmahe |
bṛhaspate | yaḥ | naḥ | abhi | hvaraḥ | dadhe | svā | tam | marmartu | ducchunā | harasvatī ||2.023.06||

2.023.07a uta vā yo no marcayād anāgaso 'rātīvā martaḥ sānuko vṛkaḥ |
2.023.07c bṛhaspate apa taṁ vartayā pathaḥ sugaṁ no asyai devavītaye kṛdhi ||

uta | vā | yaḥ | naḥ | marcayāt | anāgasaḥ | arātī-vā | martaḥ | sānukaḥ | vṛkaḥ |
bṛhaspate | apa | tam | vartaya | pathaḥ | su-gam | naḥ | asyai | deva-vītaye | kṛdhi ||2.023.07||

2.023.08a trātāraṁ tvā tanūnāṁ havāmahe 'vaspartar adhivaktāram asmayum |
2.023.08c bṛhaspate devanido ni barhaya mā durevā uttaraṁ sumnam un naśan ||

trātāram | tvā | tanūnām | havāmahe | ava-spartaḥ | adhi-vaktāram | asmayum |
bṛhaspate | deva-nidaḥ | ni | barhaya | mā | duḥ-evāḥ | ut-taram | sumnam | ut | naśan ||2.023.08||

2.023.09a tvayā vayaṁ suvṛdhā brahmaṇas pate spārhā vasu manuṣyā dadīmahi |
2.023.09c yā no dūre taḻito yā arātayo 'bhi santi jambhayā tā anapnasaḥ ||

tvayā | vayam | su-vṛdhā | brahmaṇaḥ | pate | spārhā | vasu | manuṣyā | ā | dadīmahi |
yāḥ | naḥ | dūre | taḻitaḥ | yāḥ | arātayaḥ | abhi | santi | jambhaya | tāḥ | anapnasaḥ ||2.023.09||

2.023.10a tvayā vayam uttamaṁ dhīmahe vayo bṛhaspate papriṇā sasninā yujā |
2.023.10c mā no duḥśaṁso abhidipsur īśata pra suśaṁsā matibhis tāriṣīmahi ||

tvayā | vayam | ut-tamam | dhīmahe | vayaḥ | bṛhaspate | papriṇā | sasninā | yujā |
mā | naḥ | duḥ-śaṁsaḥ | abhi-dipsuḥ | īśata | pra | su-śaṁsāḥ | mati-bhiḥ | tāriṣīmahi ||2.023.10||

2.023.11a anānudo vṛṣabho jagmir āhavaṁ niṣṭaptā śatrum pṛtanāsu sāsahiḥ |
2.023.11c asi satya ṛṇayā brahmaṇas pata ugrasya cid damitā vīḻuharṣiṇaḥ ||

ananu-daḥ | vṛṣabhaḥ | jagmiḥ | ā-havam | niḥ-taptā | śatrum | pṛtanāsu | sasahiḥ |
asi | satyaḥ | ṛṇa-yāḥ | brahmaṇaḥ | pate | ugrasya | cit | damitā | vīḻu-harṣiṇaḥ ||2.023.11||

2.023.12a adevena manasā yo riṣaṇyati śāsām ugro manyamāno jighāṁsati |
2.023.12c bṛhaspate mā praṇak tasya no vadho ni karma manyuṁ durevasya śardhataḥ ||

adeveva | manasā | yaḥ | riṣaṇyati | śāsām | ugraḥ | mayamānaḥ | jighāṁsati |
bṛhaspate | mā | praṇak | tasya | naḥ | vadhaḥ | ni | karma | manyum | duḥ-evasya | śardhataḥ ||2.023.12||

2.023.13a bhareṣu havyo namasopasadyo gantā vājeṣu sanitā dhanaṁ-dhanam |
2.023.13c viśvā id aryo abhidipsvo mṛdho bṛhaspatir vi vavarhā rathām̐ iva ||

bhareṣu | havya | namasā | upa-sadyaḥ | gantā | vājeṣu | sanitā | dhanam-dhanam |
viśvāḥ | it | aryaḥ | abhi-dipsvaḥ | mṛdhaḥ | bṛhaspatiḥ | vi | vavarha | rathān-iva ||2.023.13||

2.023.14a tejiṣṭhayā tapanī rakṣasas tapa ye tvā nide dadhire dṛṣṭavīryam |
2.023.14c āvis tat kṛṣva yad asat ta ukthyam bṛhaspate vi parirāpo ardaya ||

tejiṣṭhayā | tapanī | rakṣasaḥ | tapa | ye | tvā | nide | dadhire | dṛṣṭa-vīryam |
āviḥ | tat | kṛṣva | yat | asat | te | ukthyam | bṛhaspate | vi | pari-rapaḥ | ardaya ||2.023.14||

2.023.15a bṛhaspate ati yad aryo arhād dyumad vibhāti kratumaj janeṣu |
2.023.15c yad dīdayac chavasa ṛtaprajāta tad asmāsu draviṇaṁ dhehi citram ||

bṛhaspate | ati | yat | aryaḥ | arhāt | dyu-mat | vi-bhāti | kratu-mat | janeṣu |
yat | dīdayat | śavasā | ṛta-prajāta | tat | asmāsu | draviṇam | dhehi | citram ||2.023.15||

2.023.16a mā naḥ stenebhyo ye abhi druhas pade nirāmiṇo ripavo 'nneṣu jāgṛdhuḥ |
2.023.16c ā devānām ohate vi vrayo hṛdi bṛhaspate na paraḥ sāmno viduḥ ||

mā | naḥ | stenebhyaḥ | ye | abhi | druhaḥ | pade | nirāmiṇaḥ | ripavaḥ | anneṣu | jagṛdhuḥ |
ā | devānām | ohate | vi | vrayaḥ | hṛdi | bṛhaspate | na | paraḥ | sāmnaḥ | viduḥ ||2.023.16||

2.023.17a viśvebhyo hi tvā bhuvanebhyas pari tvaṣṭājanat sāmnaḥ-sāmnaḥ kaviḥ |
2.023.17c sa ṛṇacid ṛṇayā brahmaṇas patir druho hantā maha ṛtasya dhartari ||

viśvebhyaḥ | hi | tvā | bhuvanebhyaḥ | pari | tvaṣṭā | ajanat | sāmnaḥ-sāmnaḥ | kaviḥ |
saḥ | ṛṇa-cit | ṛṇa-yāḥ | brahmaṇaḥ | patiḥ | druhaḥ | hantā | mahaḥ | ṛtasya | dhartari ||2.023.17||

2.023.18a tava śriye vy ajihīta parvato gavāṁ gotram udasṛjo yad aṅgiraḥ |
2.023.18c indreṇa yujā tamasā parīvṛtam bṛhaspate nir apām aubjo arṇavam ||

tava | śriye | vi | ajihīta | parvataḥ | gavām | gotram | ut-asṛjaḥ | yat | aṅgiraḥ |
indreṇa | yujā | tamasā | pari-vṛtam | bṛhaspate | niḥ | apām | aubjaḥ | arṇavam ||2.023.18||

2.023.19a brahmaṇas pate tvam asya yantā sūktasya bodhi tanayaṁ ca jinva |
2.023.19c viśvaṁ tad bhadraṁ yad avanti devā bṛhad vadema vidathe suvīrāḥ ||

brahmaṇaḥ | pate | tvam | asya | yantā | su-uktasya | bodhi | tanayam | ca | jinva |
viśvam | tat | bhadram | yat | avanti | devāḥ | bṛhat | vadema | vidathe | su-vīrāḥ ||2.023.19||


2.024.01a semām aviḍḍhi prabhṛtiṁ ya īśiṣe 'yā vidhema navayā mahā girā |
2.024.01c yathā no mīḍhvān stavate sakhā tava bṛhaspate sīṣadhaḥ sota no matim ||

saḥ | imām | aviḍḍhi | pra-bhṛtim | yaḥ | īśiṣe | ayā | vidhema | navayā | mahā | girā |
yathā | naḥ | mīḍhvān | stavate | sakhā | tava | bṛhaspate | sīsadhaḥ | saḥ | uta | naḥ | matim ||2.024.01||

2.024.02a yo nantvāny anaman ny ojasotādardar manyunā śambarāṇi vi |
2.024.02c prācyāvayad acyutā brahmaṇas patir ā cāviśad vasumantaṁ vi parvatam ||

yaḥ | nantvāni | anamat | ni | ojasā | uta | adardaḥ | manyunā | śambarāṇi | vi |
pra | acyavayat | acyutā | brahmaṇaḥ | patiḥ | ā | ca | aviśat | vasu-mantam | vi | parvatam ||2.024.02||

2.024.03a tad devānāṁ devatamāya kartvam aśrathnan dṛḻhāvradanta vīḻitā |
2.024.03c ud gā ājad abhinad brahmaṇā valam agūhat tamo vy acakṣayat svaḥ ||

tat | devānām | deva-tamāya | kartvam | aśrathnan | dṛḻhā | avradanta | vīḻitā |
ut | gāḥ | ājat | abhinat | brahmaṇā | valam | agūhat | tamaḥ | vi | acakṣayat | svariti svaḥ ||2.024.03||

2.024.04a aśmāsyam avatam brahmaṇas patir madhudhāram abhi yam ojasātṛṇat |
2.024.04c tam eva viśve papire svardṛśo bahu sākaṁ sisicur utsam udriṇam ||

aśma-āsyam | avatam | brahmaṇaḥ | patiḥ | madhu-dhāram | abhi | yam | ojasā | atṛṇat |
tam | eva | viśve | papire | svaḥ-dṛśaḥ | bahu | sākam | sisicuḥ | utsam | udriṇam ||2.024.04||

2.024.05a sanā tā kā cid bhuvanā bhavītvā mādbhiḥ śaradbhir duro varanta vaḥ |
2.024.05c ayatantā carato anyad-anyad id yā cakāra vayunā brahmaṇas patiḥ ||

sanā | tā | kā | cit | bhuvanā | bhavītvā | māt-bhiḥ | śarat-bhiḥ | duraḥ | varanta | vaḥ |
ayatantā | carataḥ | anyat-anyat | it | yā | cakāra | vayunā | brahmaṇaḥ | patiḥ ||2.024.05||

2.024.06a abhinakṣanto abhi ye tam ānaśur nidhim paṇīnām paramaṁ guhā hitam |
2.024.06c te vidvāṁsaḥ praticakṣyānṛtā punar yata u āyan tad ud īyur āviśam ||

abhi-nakṣantaḥ | abhi | ye | tam | ānaśuḥ | nidhim | paṇīnām | paramam | guhā | hitam |
te | vidvāṁsaḥ | prati-cakṣya | anṛtā | punaḥ | yataḥ | ūm̐ iti | āyan | tat | ut | īyuḥ | ā-viśam ||2.024.06||

2.024.07a ṛtāvānaḥ praticakṣyānṛtā punar āta ā tasthuḥ kavayo mahas pathaḥ |
2.024.07c te bāhubhyāṁ dhamitam agnim aśmani nakiḥ ṣo asty araṇo jahur hi tam ||

ṛta-vānaḥ | prati-cakṣya | anṛtā | punaḥ | ā | ataḥ | ā | tasthuḥ | kavayaḥ | mahaḥ | pathaḥ |
te | bāhu-bhyām | dhamitam | agnim | asmani | nakiḥ | saḥ | asti | araṇaḥ | juhuḥ | hi | tam ||2.024.07||

2.024.08a ṛtajyena kṣipreṇa brahmaṇas patir yatra vaṣṭi pra tad aśnoti dhanvanā |
2.024.08c tasya sādhvīr iṣavo yābhir asyati nṛcakṣaso dṛśaye karṇayonayaḥ ||

ṛta-jyena | kṣipreṇa | brahmaṇaḥ | patiḥ | yatra | vaṣṭi | pra | tar | aśnoti | dhanvanā |
tasya | sādhvīḥ | iṣavaḥ | yābhiḥ | asyati | nṛ-cakṣasaḥ | dṛśaye | karṇa-yonayaḥ ||2.024.08||

2.024.09a sa saṁnayaḥ sa vinayaḥ purohitaḥ sa suṣṭutaḥ sa yudhi brahmaṇas patiḥ |
2.024.09c cākṣmo yad vājam bharate matī dhanād it sūryas tapati tapyatur vṛthā ||

saḥ | sam-nayaḥ | saḥ | vi-nayaḥ | puraḥ-hitaḥ | saḥ | su-stutaḥ | saḥ | yudhi | brahmaṇaḥ | patiḥ |
cākṣmaḥ | yat | vājam | bharate | matī | dhanā | āt | it | sūryaḥ | tapati | tapyatuḥ | vṛthā ||2.024.09||

2.024.10a vibhu prabhu prathamam mehanāvato bṛhaspateḥ suvidatrāṇi rādhyā |
2.024.10c imā sātāni venyasya vājino yena janā ubhaye bhuñjate viśaḥ ||

vi-bhu | pra-bhu | prathamam | mehanā-vataḥ | bṛhaspateḥ | su-vidatrāṇi | rādhyā |
imā | sātāni | venyasya | vājinaḥ | yena | janāḥ | ubhaye | bhuñjate | viśaḥ ||2.024.10||

2.024.11a yo 'vare vṛjane viśvathā vibhur mahām u raṇvaḥ śavasā vavakṣitha |
2.024.11c sa devo devān prati paprathe pṛthu viśved u tā paribhūr brahmaṇas patiḥ ||

yaḥ | avare | vṛjane | viśva-thā | vi-bhuḥ | mahām | ūm̐ iti | raṇvaḥ | śavasā | vavakṣitha |
saḥ | devaḥ | devān | prati | paprathe | pṛthu | viśvā | it | ūm̐ iti | tā | pari-bhūḥ | brahmaṇaḥ | patiḥ ||2.024.11||

2.024.12a viśvaṁ satyam maghavānā yuvor id āpaś cana pra minanti vrataṁ vām |
2.024.12c acchendrābrahmaṇaspatī havir no 'nnaṁ yujeva vājinā jigātam ||

viśvam | satyam | magha-vānā | yuvoḥ | it | āpaḥ | cana | pra | minanti | vratam | vām |
accha | indrābrahmaṇaspatī iti | haviḥ | naḥ | annam | yujā-iva | vājinā | jigātam ||2.024.12||

2.024.13a utāśiṣṭhā anu śṛṇvanti vahnayaḥ sabheyo vipro bharate matī dhanā |
2.024.13c vīḻudveṣā anu vaśa ṛṇam ādadiḥ sa ha vājī samithe brahmaṇas patiḥ ||

uta | āśiṣṭhāḥ | anu | śṛṇvanti | vahnayaḥ | sabheyaḥ | vipraḥ | bharate | matī | dhanā |
vīḻu-dveṣāḥ | anu | vaśā | ṛṇam | ā-dadiḥ | saḥ | ha | vājī | sam-ithe | brahmaṇaḥ | patiḥ ||2.024.13||

2.024.14a brahmaṇas pater abhavad yathāvaśaṁ satyo manyur mahi karmā kariṣyataḥ |
2.024.14c yo gā udājat sa dive vi cābhajan mahīva rītiḥ śavasāsarat pṛthak ||

brahmaṇaḥ | pateḥ | abhavat | yathā-vaśam | satyaḥ | manyuḥ | mahi | karma | kariṣyataḥ |
yaḥ | gāḥ | ut-ājat | saḥ | dive | vi | ca | abhajat | mahī-iva | rītiḥ | śavasā | asarat | pṛthak ||2.024.14||

2.024.15a brahmaṇas pate suyamasya viśvahā rāyaḥ syāma rathyo vayasvataḥ |
2.024.15c vīreṣu vīrām̐ upa pṛṅdhi nas tvaṁ yad īśāno brahmaṇā veṣi me havam ||

brahmaṇaḥ | pate | su-yamasya | viśvahā | rāyaḥ | syāma | rathyaḥ | vayasvataḥ |
vīreṣu | vīrān | upa | pṛṅdhi | naḥ | tvam | yat | īśānaḥ | brahmaṇā | veṣi | me | havam ||2.024.15||

2.024.16a brahmaṇas pate tvam asya yantā sūktasya bodhi tanayaṁ ca jinva |
2.024.16c viśvaṁ tad bhadraṁ yad avanti devā bṛhad vadema vidathe suvīrāḥ ||

brahmaṇaḥ | pate | tvam | asya | yantā | su-uktasya | bodhi | tanayam | ca | jinva |
viśvam | tat | bhadram | yat | avanti | devāḥ | bṛhat | vadema | vidathe | su-vīrāḥ ||2.024.16||


2.025.01a indhāno agniṁ vanavad vanuṣyataḥ kṛtabrahmā śūśuvad rātahavya it |
2.025.01c jātena jātam ati sa pra sarsṛte yaṁ-yaṁ yujaṁ kṛṇute brahmaṇas patiḥ ||

indhānaḥ | agnim | vanavat | vanuṣyataḥ | kṛta-brahmā | śūśuvat | rāta-havyaḥ | it |
jātena | jātam | ati | saḥ | pra | sarsṛte | yam-yam | yujam | kṛṇute | brahmaṇaḥ | patiḥ ||2.025.01||

2.025.02a vīrebhir vīrān vanavad vanuṣyato gobhī rayim paprathad bodhati tmanā |
2.025.02c tokaṁ ca tasya tanayaṁ ca vardhate yaṁ-yaṁ yujaṁ kṛṇute brahmaṇas patiḥ ||

vīrebhiḥ | vīrān | vanavat | vanuṣyataḥ | gobhiḥ | rayim | paprathat | bodhati | tmanā |
tokam | ca | tasya | tanayam | ca | vardhate | yam-yam | yujam | kṛṇute | brahmaṇaḥ | patiḥ ||2.025.02||

2.025.03a sindhur na kṣodaḥ śimīvām̐ ṛghāyato vṛṣeva vadhrīm̐r abhi vaṣṭy ojasā |
2.025.03c agner iva prasitir nāha vartave yaṁ-yaṁ yujaṁ kṛṇute brahmaṇas patiḥ ||

sindhuḥ | na | kṣodaḥ | śimī-vān | ṛghāyataḥ | vṛṣā-iva | vadhrīn | abhi | vaṣṭi | ojasā |
agneḥ-iva | pra-sitiḥ | na | aha | vartave | yam-yam | yujam | kṛṇute | brahmaṇaḥ | patiḥ ||2.025.03||

2.025.04a tasmā arṣanti divyā asaścataḥ sa satvabhiḥ prathamo goṣu gacchati |
2.025.04c anibhṛṣṭataviṣir hanty ojasā yaṁ-yaṁ yujaṁ kṛṇute brahmaṇas patiḥ ||

tasmai | arṣanti | divyāḥ | asaścataḥ | saḥ | satva-bhiḥ | prathamaḥ | goṣu | gacchati |
anibhṛṣṭa-taviṣiḥ | hanti | ojasā | yam-yam | yujam | kṛṇute | brahmaṇaḥ | patiḥ ||2.025.04||

2.025.05a tasmā id viśve dhunayanta sindhavo 'cchidrā śarma dadhire purūṇi |
2.025.05c devānāṁ sumne subhagaḥ sa edhate yaṁ-yaṁ yujaṁ kṛṇute brahmaṇas patiḥ ||

tasmai | it | viśve | dhunayanta | sindhavaḥ | acchidrā | śarma | dadhire | purūṇi |
devānām | sumne | su-bhagaḥ | saḥ | edhate | yam-yam | yujam | kṛṇute | brahmaṇaḥ | patiḥ ||2.025.05||


2.026.01a ṛjur ic chaṁso vanavad vanuṣyato devayann id adevayantam abhy asat |
2.026.01c suprāvīr id vanavat pṛtsu duṣṭaraṁ yajved ayajyor vi bhajāti bhojanam ||

ṛjuḥ | it | śaṁsaḥ | vanavat | vanuṣyataḥ | devayan | it | adeva-yantam | abhi | asat |
supra-avīḥ | it | vanavat | pṛt-su | dustaram | yajvā | it | ayajyoḥ | vi | bhajāti | bhojanam ||2.026.01||

2.026.02a yajasva vīra pra vihi manāyato bhadram manaḥ kṛṇuṣva vṛtratūrye |
2.026.02c haviṣ kṛṇuṣva subhago yathāsasi brahmaṇas pater ava ā vṛṇīmahe ||

yajasva | vīra | pra | vihi | manāyataḥ | bhadram | manaḥ | kṛṇuṣva | vṛtra-tūrye |
haviḥ | kṛṇuṣva | su-bhagaḥ | yathā | asasi | brahmaṇaḥ | pateḥ | avaḥ | ā | vṛṇīmahe ||2.026.02||

2.026.03a sa ij janena sa viśā sa janmanā sa putrair vājam bharate dhanā nṛbhiḥ |
2.026.03c devānāṁ yaḥ pitaram āvivāsati śraddhāmanā haviṣā brahmaṇas patim ||

saḥ | it | janena | saḥ | viśā | saḥ | janmanā | saḥ | putraiḥ | vājam | bharate | dhanā | nṛ-bhiḥ |
devānām | yaḥ | pitaram | ā-vivāsati | śraddhā-manāḥ | haviṣā | brahmaṇaḥ | patim ||2.026.03||

2.026.04a yo asmai havyair ghṛtavadbhir avidhat pra tam prācā nayati brahmaṇas patiḥ |
2.026.04c uruṣyatīm aṁhaso rakṣatī riṣo 'ṁhoś cid asmā urucakrir adbhutaḥ ||

yaḥ | asmai | havyaiḥ | ghṛtavat-bhiḥ | avidhat | pra | tam | prācā | nayati | brahmaṇaḥ | patiḥ |
uruṣyati | īm | aṁhasaḥ | rakṣati | riṣaḥ | aṁhoḥ | cit | asmai | uru-cakriḥ | adbhutaḥ ||2.026.04||


2.027.01a imā gira ādityebhyo ghṛtasnūḥ sanād rājabhyo juhvā juhomi |
2.027.01c śṛṇotu mitro aryamā bhago nas tuvijāto varuṇo dakṣo aṁśaḥ ||

imāḥ | giraḥ | ādityebhyaḥ | ghṛta-snūḥ | sanāt | rāja-bhyaḥ | juhvā | juhomi |
śṛṇotu | mitraḥ | aryamā | bhagaḥ | naḥ | tuvi-jātaḥ | varuṇaḥ | dakṣaḥ | aṁśaḥ ||2.027.01||

2.027.02a imaṁ stomaṁ sakratavo me adya mitro aryamā varuṇo juṣanta |
2.027.02c ādityāsaḥ śucayo dhārapūtā avṛjinā anavadyā ariṣṭāḥ ||

imam | stomam | sa-kratavaḥ | me | adya | mitraḥ | aryamā | varuṇaḥ | juṣanta |
ādityāsaḥ | śucayaḥ | dhāra-pūtāḥ | avṛjināḥ | anavadyāḥ | ariṣṭāḥ ||2.027.02||

2.027.03a ta ādityāsa uravo gabhīrā adabdhāso dipsanto bhūryakṣāḥ |
2.027.03c antaḥ paśyanti vṛjinota sādhu sarvaṁ rājabhyaḥ paramā cid anti ||

te | ādityāsaḥ | uravaḥ | gabhīrāḥ | adabdhāsaḥ | dipsantaḥ | bhūri-akṣāḥ |
antariti | paśyanti | vṛjinā | uta | sādhu | sarvam | rāja-bhyaḥ | paramā | cit | anti ||2.027.03||

2.027.04a dhārayanta ādityāso jagat sthā devā viśvasya bhuvanasya gopāḥ |
2.027.04c dīrghādhiyo rakṣamāṇā asuryam ṛtāvānaś cayamānā ṛṇāni ||

dhārayantaḥ | ādityāsaḥ | jagat | sthāḥ | devāḥ | viśvasya | bhuvanasya | gopāḥ |
dīrgha-dhiyaḥ | rakṣamāṇāḥ | asuryam | ṛta-vānaḥ | cayamānāḥ | ṛṇāni ||2.027.04||

2.027.05a vidyām ādityā avaso vo asya yad aryaman bhaya ā cin mayobhu |
2.027.05c yuṣmākam mitrāvaruṇā praṇītau pari śvabhreva duritāni vṛjyām ||

vidyām | ādityāḥ | avasaḥ | vaḥ | asya | yat | aryaman | bhaye | ā | cit | mayaḥ-bhu |
yuṣmākam | mitrāvaruṇā | pra-nītau | pari | śvabhrā-iva | duḥ-itāni | vṛjyām ||2.027.05||

2.027.06a sugo hi vo aryaman mitra panthā anṛkṣaro varuṇa sādhur asti |
2.027.06c tenādityā adhi vocatā no yacchatā no duṣparihantu śarma ||

su-gaḥ | hi | vaḥ | aryaman | mitra | panthāḥ | anṛkṣaraḥ | varuṇa | sādhuḥ | asti |
tena | ādityāḥ | adhi | vocata | naḥ | yacchata | naḥ | duḥ-parihantu | śarma ||2.027.06||

2.027.07a pipartu no aditī rājaputrāti dveṣāṁsy aryamā sugebhiḥ |
2.027.07c bṛhan mitrasya varuṇasya śarmopa syāma puruvīrā ariṣṭāḥ ||

pipartu | naḥ | aditiḥ | rāja-putrā | ati | dveṣāṁsi | aryamā | su-gebhiḥ |
bṛhat | mitrasya | varuṇasya | śarma | upa | syāma | puru-vīrāḥ | ariṣṭāḥ ||2.027.07||

2.027.08a tisro bhūmīr dhārayan trīm̐r uta dyūn trīṇi vratā vidathe antar eṣām |
2.027.08c ṛtenādityā mahi vo mahitvaṁ tad aryaman varuṇa mitra cāru ||

tisraḥ | bhūmīḥ | dhārayan | trīn | uta | dyūn | trīṇi | vratā | vidathe | antaḥ | eṣām |
ṛtena | ādityāḥ | mahi | vaḥ | mahi-tvam | tat | aryaman | varuṇa | mitra | cāru ||2.027.08||

2.027.09a trī rocanā divyā dhārayanta hiraṇyayāḥ śucayo dhārapūtāḥ |
2.027.09c asvapnajo animiṣā adabdhā uruśaṁsā ṛjave martyāya ||

trī | rocanā | divyā | dhārayanta | hiraṇyayāḥ | śucayaḥ | dhāra-pūtāḥ |
asvapn-ajaḥ | ani-miṣāḥ | adabdhāḥ | uru-śaṁsāḥ | ṛjave | martyāya ||2.027.09||

2.027.10a tvaṁ viśveṣāṁ varuṇāsi rājā ye ca devā asura ye ca martāḥ |
2.027.10c śataṁ no rāsva śarado vicakṣe 'śyāmāyūṁṣi sudhitāni pūrvā ||

tvam | viśveṣām | varuṇa | asi | rājā | ye | ca | devāḥ | asura | ye | ca | martāḥ |
śatam | naḥ | rāsva | śaradaḥ | vi-cakṣe | aśyāma | āyūṁṣi | sudhitāni | pūrvā ||2.027.10||

2.027.11a na dakṣiṇā vi cikite na savyā na prācīnam ādityā nota paścā |
2.027.11c pākyā cid vasavo dhīryā cid yuṣmānīto abhayaṁ jyotir aśyām ||

na | dakṣiṇā | vi | cikite | na | savyā | na | prācīnam | ādityāḥ | na | uta | paścā |
pākyā | cit | vasavaḥ | dhīryā | cit | yuṣmā-nītaḥ | abhayam | jyotiḥ | aśyām ||2.027.11||

2.027.12a yo rājabhya ṛtanibhyo dadāśa yaṁ vardhayanti puṣṭayaś ca nityāḥ |
2.027.12c sa revān yāti prathamo rathena vasudāvā vidatheṣu praśastaḥ ||

yaḥ | rāja-bhyaḥ | ṛtani-bhyaḥ | dadāśa | yam | vardhayanti | puṣṭayaḥ | ca | nityāḥ |
saḥ | revān | yāti | prathamaḥ | rathena | vasu-dāvā | vidatheṣu | pra-śastaḥ ||2.027.12||

2.027.13a śucir apaḥ sūyavasā adabdha upa kṣeti vṛddhavayāḥ suvīraḥ |
2.027.13c nakiṣ ṭaṁ ghnanty antito na dūrād ya ādityānām bhavati praṇītau ||

śuciḥ | apaḥ | su-yavasāḥ | adabdhaḥ | upa | kṣeti | vṛddha-vayāḥ | su-vīraḥ |
nakiḥ | tam | ghnanti | antitaḥ | na | dūrāt | yaḥ | ādityānām | bhavati | pra-nītau ||2.027.13||

2.027.14a adite mitra varuṇota mṛḻa yad vo vayaṁ cakṛmā kac cid āgaḥ |
2.027.14c urv aśyām abhayaṁ jyotir indra mā no dīrghā abhi naśan tamisrāḥ ||

adite | mitra | varuṇa | uta | mṛḻa | yat | vaḥ | vayam | cakṛma | kat | cit | āgaḥ |
uru | aśyām | abhayam | jyotiḥ | indra | mā | naḥ | dīrghāḥ | abhi | naśan | tamisrāḥ ||2.027.14||

2.027.15a ubhe asmai pīpayataḥ samīcī divo vṛṣṭiṁ subhago nāma puṣyan |
2.027.15c ubhā kṣayāv ājayan yāti pṛtsūbhāv ardhau bhavataḥ sādhū asmai ||

ubhe iti | asmai | pīpayataḥ | samīcī iti sam-īcī | divaḥ | vṛṣṭim | su-bhagaḥ | nāma | puṣyan |
ubhā | kṣayau | ā-jayan | yāti | pṛt-su | ubhau | ardhau | bhavataḥ | sādhū iti | asmai ||2.027.15||

2.027.16a yā vo māyā abhidruhe yajatrāḥ pāśā ādityā ripave vicṛttāḥ |
2.027.16c aśvīva tām̐ ati yeṣaṁ rathenāriṣṭā urāv ā śarman syāma ||

yāḥ | vaḥ | māyāḥ | abhi-druhe | yajatrāḥ | pāśāḥ | ādityāḥ | ripave | vi-cṛttāḥ |
aśvī-iva | tān | ati | yeṣam | rathena | ariṣṭāḥ | urau | ā | śarman | syāma ||2.027.16||

2.027.17a māham maghono varuṇa priyasya bhūridāvna ā vidaṁ śūnam āpeḥ |
2.027.17c mā rāyo rājan suyamād ava sthām bṛhad vadema vidathe suvīrāḥ ||

mā | aham | maghonaḥ | varuṇa | priyasya | bhūri-dāvnaḥ | ā | vidam | śūnam | āpeḥ |
mā | rāyaḥ | rājan | su-yamāt | ava | sthām | bṛhat | vadema | vidathe | su-vīrāḥ ||2.027.17||


2.028.01a idaṁ kaver ādityasya svarājo viśvāni sānty abhy astu mahnā |
2.028.01c ati yo mandro yajathāya devaḥ sukīrtim bhikṣe varuṇasya bhūreḥ ||

idam | kaveḥ | ādityasya | sva-rājaḥ | viśvāni | santi | abhi | astu | mahnā |
ati | yaḥ | mandraḥ | yajathāya | devaḥ | su-kīrtim | bhikṣe | varuṇasya | bhūreḥ ||2.028.01||

2.028.02a tava vrate subhagāsaḥ syāma svādhyo varuṇa tuṣṭuvāṁsaḥ |
2.028.02c upāyana uṣasāṁ gomatīnām agnayo na jaramāṇā anu dyūn ||

tava | vrate | su-bhagāsaḥ | syāma | su-ādhyaḥ | varuṇa | tustu-vāṁsaḥ |
upa-ayane | uṣasām | go-matīnām | agnayaḥ | na | jaramāṇāḥ | anu | dyūn ||2.028.02||

2.028.03a tava syāma puruvīrasya śarmann uruśaṁsasya varuṇa praṇetaḥ |
2.028.03c yūyaṁ naḥ putrā aditer adabdhā abhi kṣamadhvaṁ yujyāya devāḥ ||

ava | syāma | puru-vīrasya | śarman | uru-śaṁsasya | varuṇa | pranetariti pra-netaḥ |
yūyam | naḥ | putrāḥ | aditeḥ | adabdhāḥ | abhi | kṣamadhvam | yujyāya | devāḥ ||2.028.03||

2.028.04a pra sīm ādityo asṛjad vidhartām̐ ṛtaṁ sindhavo varuṇasya yanti |
2.028.04c na śrāmyanti na vi mucanty ete vayo na paptū raghuyā parijman ||

pra | sīm | ādityaḥ | asṛjat | vi-dhartā | ṛtam | sindhavaḥ | varuṇasya | yanti |
na | śrāmyanti | na | vi | mucanti | ete | vayaḥ | na | paptuḥ | raghu-yā | pari-jman ||2.028.04||

2.028.05a vi mac chrathāya raśanām ivāga ṛdhyāma te varuṇa khām ṛtasya |
2.028.05c mā tantuś chedi vayato dhiyam me mā mātrā śāry apasaḥ pura ṛtoḥ ||

vi | mat | śrathaya | raśanām-iva | āgaḥ | ṛdhyāma | te | varuṇa | khām | ṛtasya |
mā | tantuḥ | chedi | vayataḥ | dhiyam | me | mā | mātrā | śāri | apasaḥ | purā | ṛtoḥ ||2.028.05||

2.028.06a apo su myakṣa varuṇa bhiyasam mat samrāḻ ṛtāvo 'nu mā gṛbhāya |
2.028.06c dāmeva vatsād vi mumugdhy aṁho nahi tvad āre nimiṣaś caneśe ||

apo iti | su | myakṣa | varuṇa | bhiyasam | mat | sam-rāṭ | ṛta-vaḥ | anu | mā | gṛbhāya |
dāma-iva | vatsāt | vi | mumugdhi | aṁhaḥ | nahi | tvat | ārte | ni-miṣaḥ | cana | īśe ||2.028.06||

2.028.07a mā no vadhair varuṇa ye ta iṣṭāv enaḥ kṛṇvantam asura bhrīṇanti |
2.028.07c mā jyotiṣaḥ pravasathāni ganma vi ṣū mṛdhaḥ śiśratho jīvase naḥ ||

mā | naḥ | vadhaiḥ | varuṇa | ye | te | iṣṭau | enaḥ | kṛṇvantam | asura | bhrīṇanti |
mā | jyotiṣaḥ | pra-vasathāni | ganma | vi | su | mṛdhaḥ | śiśrathaḥ | jīvase | naḥ ||2.028.07||

2.028.08a namaḥ purā te varuṇota nūnam utāparaṁ tuvijāta bravāma |
2.028.08c tve hi kam parvate na śritāny apracyutāni dūḻabha vratāni ||

namaḥ | purā | te | varuṇa | uta | nūnam | uta | aparam | tuvi-jāta | bravāma |
tve iti | hi | kam | parvate | na | śritāni | apra-cyutāni | duḥ-dabha | vratāni ||2.028.08||

2.028.09a para ṛṇā sāvīr adha matkṛtāni māhaṁ rājann anyakṛtena bhojam |
2.028.09c avyuṣṭā in nu bhūyasīr uṣāsa ā no jīvān varuṇa tāsu śādhi ||

parā | ṛṇā | sāvīḥ | adha | mat-kṛtāni | mā | aham | rājan | anya-kṛtena | bhojam |
avi-uṣṭāḥ | it | nu | bhūyasīḥ | uṣasaḥ | ā | naḥ | jīvān | varuṇa | tāsu | śādhi ||2.028.09||

2.028.10a yo me rājan yujyo vā sakhā vā svapne bhayam bhīrave mahyam āha |
2.028.10c steno vā yo dipsati no vṛko vā tvaṁ tasmād varuṇa pāhy asmān ||

yaḥ | me | rājan | yujyaḥ | vā | sakhā | vā | svapne | bhayam | bhīrave | mahyam | āha |
stenaḥ | vā | yaḥ | dipsati | naḥ | vṛkaḥ | vā | tvam | tasmāt | varuṇa | pāhi | asmān ||2.028.10||

2.028.11a māham maghono varuṇa priyasya bhūridāvna ā vidaṁ śūnam āpeḥ |
2.028.11c mā rāyo rājan suyamād ava sthām bṛhad vadema vidathe suvīrāḥ ||

mā | aham | maghonaḥ | varuṇa | priyasya | bhūri-dāvnaḥ | ā | vidam | śūnam | āpeḥ |
mā | rāyaḥ | rājan | su-yamāt | ava | sthām | bṛhat | vadema | vidathe | su-vīrāḥ ||2.028.11||


2.029.01a dhṛtavratā ādityā iṣirā āre mat karta rahasūr ivāgaḥ |
2.029.01c śṛṇvato vo varuṇa mitra devā bhadrasya vidvām̐ avase huve vaḥ ||

dhṛta-vratāḥ | ādityāḥ | iṣirāḥ | āre | mat | karta | rahasūḥ-iva | āgaḥ |
śṛṇvataḥ | vaḥ | varuṇa | mitra | devāḥ | bhadrasya | vidvān | avase | huve | vaḥ ||2.029.01||

2.029.02a yūyaṁ devāḥ pramatir yūyam ojo yūyaṁ dveṣāṁsi sanutar yuyota |
2.029.02c abhikṣattāro abhi ca kṣamadhvam adyā ca no mṛḻayatāparaṁ ca ||

yūyam | devāḥ | pra-matiḥ | yūyam | ojaḥ | yūyam | dveṣāṁsi | sanutaḥ | yuyota |
abhi-kṣattāraḥ | abhi | ca | kṣamadhvam | adya | ca | naḥ | mṛḻayata | aparam | ca ||2.029.02||

2.029.03a kim ū nu vaḥ kṛṇavāmāpareṇa kiṁ sanena vasava āpyena |
2.029.03c yūyaṁ no mitrāvaruṇādite ca svastim indrāmaruto dadhāta ||

kim | ūm̐ iti | nu | vaḥ | kṛṇavāma | apareṇa | kim | sanena | vasavaḥ | āpyena |
yūyam | naḥ | mitrāvaruṇā | adite | ca | svastim | indrāmarutaḥ | dadhāta ||2.029.03||

2.029.04a haye devā yūyam id āpayaḥ stha te mṛḻata nādhamānāya mahyam |
2.029.04c mā vo ratho madhyamavāḻ ṛte bhūn mā yuṣmāvatsv āpiṣu śramiṣma ||

haye | devāḥ | yūyam | it | āpayaḥ | stha | te | mṛḻata | nādhamānāya | mahyam |
mā | vaḥ | rathaḥ | madhyama-vāṭ | ṛte | bhūt | mā | yuṣmāvat-su | āpiṣu | śramiṣma ||2.029.04||

2.029.05a pra va eko mimaya bhūry āgo yan mā piteva kitavaṁ śaśāsa |
2.029.05c āre pāśā āre aghāni devā mā mādhi putre vim iva grabhīṣṭa ||

pra | vaḥ | ekaḥ | mimaya | bhūri | āgaḥ | yat | mā | pitā-iva | kitavam | śaśāsa |
āre | pāśāḥ | āre | aghāni | devāḥ | mā | mā | adhi | putre | vim-iva | grabhīṣṭa ||2.029.05||

2.029.06a arvāñco adyā bhavatā yajatrā ā vo hārdi bhayamāno vyayeyam |
2.029.06c trādhvaṁ no devā nijuro vṛkasya trādhvaṁ kartād avapado yajatrāḥ ||

arvāñcaḥ | adya | bhavatā | yajatrāḥ | ā | vaḥ | hārdi | bhayamānaḥ | vyayeyam |
trādhvam | naḥ | devāḥ | ni-juraḥ | vṛkasya | trādhvam | kartāt | ava-padaḥ | yajatrāḥ ||2.029.06||

2.029.07a māham maghono varuṇa priyasya bhūridāvna ā vidaṁ śūnam āpeḥ |
2.029.07c mā rāyo rājan suyamād ava sthām bṛhad vadema vidathe suvīrāḥ ||

mā | aham | maghonaḥ | varuṇa | priyasya | bhūri-dāvnaḥ | ā | vidam | śūnam | āpeḥ |
mā | rāyaḥ | rājan | su-yamāt | ava | sthām | bṛhat | vadema | vidathe | su-vīrāḥ ||2.029.07||


2.030.01a ṛtaṁ devāya kṛṇvate savitra indrāyāhighne na ramanta āpaḥ |
2.030.01c ahar-ahar yāty aktur apāṁ kiyāty ā prathamaḥ sarga āsām ||

ṛtam | devāya | kṛṇvate | savitre | indrāya | ahi-ghne | na | ramante | āpaḥ |
ahaḥ-ahaḥ | yāti | aktuḥ | apām | kiyati | ā | prathamaḥ | sargaḥ | āsām ||2.030.01||

2.030.02a yo vṛtrāya sinam atrābhariṣyat pra taṁ janitrī viduṣa uvāca |
2.030.02c patho radantīr anu joṣam asmai dive-dive dhunayo yanty artham ||

yaḥ | vṛtrāya | sinam | atra | abhariṣyat | pra | tam | janitrī | viduṣe | uvāca |
pathaḥ | radantīḥ | anu | joṣam | asmai | dive-dive | dhunayaḥ | yanti | artham ||2.030.02||

2.030.03a ūrdhvo hy asthād adhy antarikṣe 'dhā vṛtrāya pra vadhaṁ jabhāra |
2.030.03c mihaṁ vasāna upa hīm adudrot tigmāyudho ajayac chatrum indraḥ ||

ūrdhvaḥ | hi | asthāt | adhi | antarikṣe | adha | vṛtrāya | pra | vadham | jabhāra |
miham | vasānaḥ | upa | hi | īm | adudrot | tigma-āyudhaḥ | ajayat | śatrum | indraḥ ||2.030.03||

2.030.04a bṛhaspate tapuṣāśneva vidhya vṛkadvaraso asurasya vīrān |
2.030.04c yathā jaghantha dhṛṣatā purā cid evā jahi śatrum asmākam indra ||

bṛhaspate | tapuṣā | aśnā-iva | vidhya | vṛka-dvarasaḥ | asurasya | vīrān |
yathā | jaghantha | dhṛṣatā | purā | cit | eva | jahi | śatrum | asmākam | indra ||2.030.04||

2.030.05a ava kṣipa divo aśmānam uccā yena śatrum mandasāno nijūrvāḥ |
2.030.05c tokasya sātau tanayasya bhūrer asmām̐ ardhaṁ kṛṇutād indra gonām ||

ava | kṣipa | divaḥ | aśmānam | uccā | yena | śatrum | mandasānaḥ | ni-jūrvāḥ |
tokasya | sātau | tanayasya | bhūreḥ | asmān | ardham | kṛṇutāt | indra | gonām ||2.030.05||

2.030.06a pra hi kratuṁ vṛhatho yaṁ vanutho radhrasya stho yajamānasya codau |
2.030.06c indrāsomā yuvam asmām̐ aviṣṭam asmin bhayasthe kṛṇutam u lokam ||

pra | hi | kratum | vṛhathaḥ | yam | vanuthaḥ | radhrasya | sthaḥ | yajamānasya | codau |
indrāsomā | yuvam | asmān | aviṣṭam | asmin | bhaya-sthe | kṛṇutam | ūm̐ iti | lokam ||2.030.06||

2.030.07a na mā taman na śraman nota tandran na vocāma mā sunoteti somam |
2.030.07c yo me pṛṇād yo dadad yo nibodhād yo mā sunvantam upa gobhir āyat ||

na | mā | tamat | na | śramat | na | uta | tandrat | na | vocāma | mā | sunota | iti | somam |
yaḥ | me | pṛṇāt | yaḥ | dadat | yaḥ | ni-bodhāt | yaḥ | mā | sunvantam | upa | gobhiḥ | ā | ayat ||2.030.07||

2.030.08a sarasvati tvam asmām̐ aviḍḍhi marutvatī dhṛṣatī jeṣi śatrūn |
2.030.08c tyaṁ cic chardhantaṁ taviṣīyamāṇam indro hanti vṛṣabhaṁ śaṇḍikānām ||

sarasvati | tvam | asmān | aviḍḍhi | marutvatī | dhṛṣatī | jeṣi | śatrūn |
tyam | cit | śardhantam | taviṣī-yamāṇam | indraḥ | hanti | vṛṣabham | śaṇḍikānām ||2.030.08||

2.030.09a yo naḥ sanutya uta vā jighatnur abhikhyāya taṁ tigitena vidhya |
2.030.09c bṛhaspata āyudhair jeṣi śatrūn druhe rīṣantam pari dhehi rājan ||

yaḥ | naḥ | sanutyaḥ | uta | vā | jighatnuḥ | abhi-khyāya | tam | tigitena | vidhya |
bṛhaspate | āyudhaiḥ | jeṣi | śatrūn | duhe | riṣantam | pari | dhehi | rājan ||2.030.09||

2.030.10a asmākebhiḥ satvabhiḥ śūra śūrair vīryā kṛdhi yāni te kartvāni |
2.030.10c jyog abhūvann anudhūpitāso hatvī teṣām ā bharā no vasūni ||

asmākebhiḥ | satva-bhiḥ | śūra | śūraiḥ | vīryā | kṛdhi | yāni | te | kartvāni |
jyok | abhūvan | anu-dhūpitāsaḥ | hatvī | teṣām | ā | bhara | naḥ | vasūni ||2.030.10||

2.030.11a taṁ vaḥ śardham mārutaṁ sumnayur giropa bruve namasā daivyaṁ janam |
2.030.11c yathā rayiṁ sarvavīraṁ naśāmahā apatyasācaṁ śrutyaṁ dive-dive ||

tam | vaḥ | śardham | mārutam | sumna-yuḥ | girā | upa | bruve | namasā | daivyam | janam |
yathā | rayim | sarva-vīram | naśāmahai | apatya-sācam | śrutyam | dive-dive ||2.030.11||


2.031.01a asmākam mitrāvaruṇāvataṁ ratham ādityai rudrair vasubhiḥ sacābhuvā |
2.031.01c pra yad vayo na paptan vasmanas pari śravasyavo hṛṣīvanto vanarṣadaḥ ||

asmākam | mitrāvaruṇā | avatam | ratham | ādityaiḥ | rudraiḥ | vasu-bhiḥ | sacā-bhuvā |
pra | yat | vayaḥ | na | paptan | vasmanaḥ | pari | śravasyavaḥ | hṛṣīvantaḥ | vana-sadaḥ ||2.031.01||

2.031.02a adha smā na ud avatā sajoṣaso rathaṁ devāso abhi vikṣu vājayum |
2.031.02c yad āśavaḥ padyābhis titrato rajaḥ pṛthivyāḥ sānau jaṅghananta pāṇibhiḥ ||

adha | sma | naḥ | ut | avata | sa-joṣasaḥ | ratham | devāsaḥ | abhi | vikṣu | vāja-yum |
yat | āśavaḥ | padyābhiḥ | titrataḥ | rajaḥ | pṛthivyāḥ | sānau | jaṅghananta | pāṇi-bhiḥ ||2.031.02||

2.031.03a uta sya na indro viśvacarṣaṇir divaḥ śardhena mārutena sukratuḥ |
2.031.03c anu nu sthāty avṛkābhir ūtibhī ratham mahe sanaye vājasātaye ||

uta | syaḥ | naḥ | indraḥ | viśva-carṣaṇiḥ | divaḥ | śardhena | mārutena | su-kratuḥ |
anu | nu | sthāti | avṛkābhiḥ | ūti-bhiḥ | ratham | mahe | sanaye | vāja-sātaye ||2.031.03||

2.031.04a uta sya devo bhuvanasya sakṣaṇis tvaṣṭā gnābhiḥ sajoṣā jūjuvad ratham |
2.031.04c iḻā bhago bṛhaddivota rodasī pūṣā puraṁdhir aśvināv adhā patī ||

uta | syaḥ | devaḥ | bhuvanasya | sakṣaṇiḥ | tvaṣṭā | gnābhiḥ | sa-joṣāḥ | jūjuvat | ratham |
iḻā | bhagaḥ | bṛhat-divā | uta | rodasī iti | pūṣā | puram-dhiḥ | aśvinau | adha | patī iti ||2.031.04||

2.031.05a uta tye devī subhage mithūdṛśoṣāsānaktā jagatām apījuvā |
2.031.05c stuṣe yad vām pṛthivi navyasā vacaḥ sthātuś ca vayas trivayā upastire ||

uta | tye | devī iti | subhage iti su-bhage | mithu-dṛśā | uṣasānaktā | jagatām | api-juvā |
stuṣe | yat | vām | pṛthivi | navyasā | vacaḥ | sthātuḥ | ca | vayaḥ | tri-vayāḥ | upa-stire ||2.031.05||

2.031.06a uta vaḥ śaṁsam uśijām iva śmasy ahir budhnyo 'ja ekapād uta |
2.031.06c trita ṛbhukṣāḥ savitā cano dadhe 'pāṁ napād āśuhemā dhiyā śami ||

uta | vaḥ | śaṁsam | uśijām-iva | śmasi | ahiḥ | budhnyaḥ | ajaḥ | eka-pāt | uta |
tritaḥ | ṛbhu-kṣāḥ | savitā | canaḥ | dadhe | apām | napāt | āśu-hemā | dhiyā | śami ||2.031.06||

2.031.07a etā vo vaśmy udyatā yajatrā atakṣann āyavo navyase sam |
2.031.07c śravasyavo vājaṁ cakānāḥ saptir na rathyo aha dhītim aśyāḥ ||

etā | vaḥ | vaśmi | ut-yatā | yajatrāḥ | atakṣan | āyavaḥ | navyase | sam |
śravasyavaḥ | vājam | cakānāḥ | saptiḥ | na | rathyaḥ | aha | dhītim | aśyāḥ ||2.031.07||


2.032.01a asya me dyāvāpṛthivī ṛtāyato bhūtam avitrī vacasaḥ siṣāsataḥ |
2.032.01c yayor āyuḥ prataraṁ te idam pura upastute vasūyur vām maho dadhe ||

asya | me | dyāvāpṛthivī iti | ṛta-yataḥ | bhūtam | avitrī iti | vacasaḥ | sisāsataḥ |
yayoḥ | āyuḥ | pra-taram | te iti | idam | puraḥ | upastute ityupa-stute | vasu-yuḥ | vā | mahaḥ | dadhe ||2.032.01||

2.032.02a mā no guhyā ripa āyor ahan dabhan mā na ābhyo rīradho ducchunābhyaḥ |
2.032.02c mā no vi yauḥ sakhyā viddhi tasya naḥ sumnāyatā manasā tat tvemahe ||

mā | naḥ | guhyāḥ | ripaḥ | āyoḥ | ahan | dabhan | mā | naḥ | ābhyaḥ | rīradhaḥ | ducchunābhyaḥ |
mā | naḥ | vi | yauḥ | sakhyā | viddhi | tasya | naḥ | sumna-yatā | manasā | tat | tvā | īmahe ||2.032.02||

2.032.03a aheḻatā manasā śruṣṭim ā vaha duhānāṁ dhenum pipyuṣīm asaścatam |
2.032.03c padyābhir āśuṁ vacasā ca vājinaṁ tvāṁ hinomi puruhūta viśvahā ||

aheḻatā | manasā | śruṣṭim | ā | vaha | duhānām | dhenum | pipyuṣīm | asaścatam |
padyābhiḥ | āśum | vacasā | ca | vājinam | tvām | hinomi | puru-hūta | viśvahā ||2.032.03||

2.032.04a rākām ahaṁ suhavāṁ suṣṭutī huve śṛṇotu naḥ subhagā bodhatu tmanā |
2.032.04c sīvyatv apaḥ sūcyācchidyamānayā dadātu vīraṁ śatadāyam ukthyam ||

rākām | aham | su-havām | su-stutī | huve | śṛṇotu | naḥ | su-bhagā | bodhatu | tmanā |
sīvyatu | apaḥ | sūcyā | acchidyamānayā | dadātu | vīram | śata-dāyam | ukthyam ||2.032.04||

2.032.05a yās te rāke sumatayaḥ supeśaso yābhir dadāsi dāśuṣe vasūni |
2.032.05c tābhir no adya sumanā upāgahi sahasrapoṣaṁ subhage rarāṇā ||

yāḥ | te | rāke | su-matayaḥ | su-peśasaḥ | yābhiḥ | dadāsi | dāśuṣe | vasūni |
tābhiḥ | naḥ | adya | su-manāḥ | upa-āgahi | sahasra-poṣam | su-bhage | rarāṇā ||2.032.05||

2.032.06a sinīvāli pṛthuṣṭuke yā devānām asi svasā |
2.032.06c juṣasva havyam āhutam prajāṁ devi didiḍḍhi naḥ ||

sinīvāli | pṛthu-stuke | yā | devānām | asi | svasā |
juṣasva | havyam | ā-hutam | pra-jām | devi | didiḍḍhi | naḥ ||2.032.06||

2.032.07a yā subāhuḥ svaṅguriḥ suṣūmā bahusūvarī |
2.032.07c tasyai viśpatnyai haviḥ sinīvālyai juhotana ||

yā | su-bāhuḥ | su-aṅguriḥ | su-sūmā | bahu-sūvarī |
tasyai | viśpatnyai | haviḥ | sinīvālyai | juhotana ||2.032.07||

2.032.08a yā guṅgūr yā sinīvālī yā rākā yā sarasvatī |
2.032.08c indrāṇīm ahva ūtaye varuṇānīṁ svastaye ||

yā | guṅgūḥ | yā | sinīvālī | yā | rākā | yā | sarasvatī |
indrāṇīm | ahve | ūtaye | varuṇānīm | svastaye ||2.032.08||


2.033.01a ā te pitar marutāṁ sumnam etu mā naḥ sūryasya saṁdṛśo yuyothāḥ |
2.033.01c abhi no vīro arvati kṣameta pra jāyemahi rudra prajābhiḥ ||

ā | te | pitaḥ | marutām | sumnam | etu | mā | naḥ | sūryasya | sam-dṛśaḥ | yuyothāḥ |
abhi | naḥ | vīraḥ | arvati | kṣameta | pra | jāyemahi | rudra | pra-jābhiḥ ||2.033.01||

2.033.02a tvādattebhī rudra śaṁtamebhiḥ śataṁ himā aśīya bheṣajebhiḥ |
2.033.02c vy asmad dveṣo vitaraṁ vy aṁho vy amīvāś cātayasvā viṣūcīḥ ||

tvā-dattebhiḥ | rudra | śam-tamebhiḥ | śatam | himāḥ | aśīya | bheṣajebhiḥ |
vi | asmat | dveṣaḥ | vi-taram | vi | aṁhaḥ | vi | amīvāḥ | cātayasva | viṣūcīḥ ||2.033.02||

2.033.03a śreṣṭho jātasya rudra śriyāsi tavastamas tavasāṁ vajrabāho |
2.033.03c parṣi ṇaḥ pāram aṁhasaḥ svasti viśvā abhītī rapaso yuyodhi ||

śreṣṭhaḥ | jātasya | rudra | śriyā | asi | tavaḥ-tamaḥ | tavasām | vajrabāho iti vajra-bāho |
parṣi | naḥ | pāram | aṁhasaḥ | svasti | viśvāḥ | abhi-itīḥ | rapasaḥ | yuyodhi ||2.033.03||

2.033.04a mā tvā rudra cukrudhāmā namobhir mā duṣṭutī vṛṣabha mā sahūtī |
2.033.04c un no vīrām̐ arpaya bheṣajebhir bhiṣaktamaṁ tvā bhiṣajāṁ śṛṇomi ||

mā | tvā | rudra | cukrudhāma | namaḥ-bhiḥ | mā | duḥ-stutī | vṛṣabha | mā | sa-hūtī |
ut | naḥ | vīrān | arpaya | bheṣajebhiḥ | bhiṣak-tamam | tvā | bhiṣajām | śṛṇomi ||2.033.04||

2.033.05a havīmabhir havate yo havirbhir ava stomebhī rudraṁ diṣīya |
2.033.05c ṛdūdaraḥ suhavo mā no asyai babhruḥ suśipro rīradhan manāyai ||

havīma-bhiḥ | havate | yaḥ | haviḥ-bhiḥ | ava | stomebhiḥ | rudram | diṣīya |
ṛdūdaraḥ | su-havaḥ | mā | naḥ | asyai | babhruḥ | su-śipraḥ | rīradhat | manāyai ||2.033.05||

2.033.06a un mā mamanda vṛṣabho marutvān tvakṣīyasā vayasā nādhamānam |
2.033.06c ghṛṇīva cchāyām arapā aśīyā vivāseyaṁ rudrasya sumnam ||

ut | mā | mamanda | vṛṣabhaḥ | marutvān | tvakṣīyasā | vayasā | nādhamānam |
ghṛṇi-iva | chāyām | arapāḥ | aśīya | ā | vivāseyam | rudrasya | sumnam ||2.033.06||

2.033.07a kva sya te rudra mṛḻayākur hasto yo asti bheṣajo jalāṣaḥ |
2.033.07c apabhartā rapaso daivyasyābhī nu mā vṛṣabha cakṣamīthāḥ ||

kva | syaḥ | te | rudra | mṛḻayākuḥ | hastaḥ | yaḥ | asti | bheṣajaḥ | jalāṣaḥ |
apa-bhartā | rapasaḥ | daivyasya | abhi | nu | mā | vṛṣabha | cakṣamīthāḥ ||2.033.07||

2.033.08a pra babhrave vṛṣabhāya śvitīce maho mahīṁ suṣṭutim īrayāmi |
2.033.08c namasyā kalmalīkinaṁ namobhir gṛṇīmasi tveṣaṁ rudrasya nāma ||

pra | babhrave | vṛṣabhāya | śvitīce | mahaḥ | mahīm | su-stutim | īrayāmi |
namasya | kalmalīkinam | namaḥ-bhiḥ | gṛṇīmasi | tveṣam | rudrasya | nāma ||2.033.08||

2.033.09a sthirebhir aṅgaiḥ pururūpa ugro babhruḥ śukrebhiḥ pipiśe hiraṇyaiḥ |
2.033.09c īśānād asya bhuvanasya bhūrer na vā u yoṣad rudrād asuryam ||

sthirebhiḥ | aṅgaiḥ | puru-rūpaḥ | ugraḥ | babhruḥ | śukrebhiḥ | pipiśe | hiraṇyaiḥ |
īśānāt | asya | bhuvanasya | bhūreḥ | na | vai | ūm̐ iti | yoṣat | rudrāt | asuryam ||2.033.09||

2.033.10a arhan bibharṣi sāyakāni dhanvārhan niṣkaṁ yajataṁ viśvarūpam |
2.033.10c arhann idaṁ dayase viśvam abhvaṁ na vā ojīyo rudra tvad asti ||

arhan | bibharṣi | sāyakāni | dhanva | arhan | niṣkam | yajatam | viśva-rūpam |
arhan | idam | dayase | viśvam | abhvam | na | vai | ojīyaḥ | rudra | tvat | asti ||2.033.10||

2.033.11a stuhi śrutaṁ gartasadaṁ yuvānam mṛgaṁ na bhīmam upahatnum ugram |
2.033.11c mṛḻā jaritre rudra stavāno 'nyaṁ te asman ni vapantu senāḥ ||

stuhi | śrutam | garta-sadam | yuvānam | mṛgam | na | bhīmam | upa-hatnum | ugram |
mṛḻa | jaritre | rudra | stavānaḥ | anyam | te | asmat | ni | vapantu | senāḥ ||2.033.11||

2.033.12a kumāraś cit pitaraṁ vandamānam prati nānāma rudropayantam |
2.033.12c bhūrer dātāraṁ satpatiṁ gṛṇīṣe stutas tvam bheṣajā rāsy asme ||

kumāraḥ | cit | pitaram | vandamānam | prati | nanāma | rudra | upa-yantam |
bhūreḥ | dātāram | sat-patim | gṛṇīṣe | stutaḥ | tvam | bheṣajā | rāsi | asme iti ||2.033.12||

2.033.13a yā vo bheṣajā marutaḥ śucīni yā śaṁtamā vṛṣaṇo yā mayobhu |
2.033.13c yāni manur avṛṇītā pitā nas tā śaṁ ca yoś ca rudrasya vaśmi ||

yā | vaḥ | bheṣajā | marutaḥ | śucīni | yā | śam-tamā | vṛṣaṇaḥ | yā | mayaḥ-bhu |
yāni | manuḥ | avṛṇīta | pitā | naḥ | tā | śam | ca | yoḥ | ca | rudrasya | vaśmi ||2.033.13||

2.033.14a pari ṇo hetī rudrasya vṛjyāḥ pari tveṣasya durmatir mahī gāt |
2.033.14c ava sthirā maghavadbhyas tanuṣva mīḍhvas tokāya tanayāya mṛḻa ||

pari | naḥ | hetiḥ | rudrasya | vṛjyāḥ | pari | tveṣasya | duḥ-matiḥ | mahī | gāt |
ava | sthirā | maghavat-bhyaḥ | tanuṣva | mīḍhvaḥ | tokāya | tanayāya | mṛḻa ||2.033.14||

2.033.15a evā babhro vṛṣabha cekitāna yathā deva na hṛṇīṣe na haṁsi |
2.033.15c havanaśrun no rudreha bodhi bṛhad vadema vidathe suvīrāḥ ||

eva | babhro iti | vṛṣabha | cekitāna | yathā | deva | na | hṛṇīṣe | na | haṁsi |
havana-śrut | naḥ | rudra | iha | bodhi | bṛhat | vadema | vidathe | su-vīrāḥ ||2.033.15||


2.034.01a dhārāvarā maruto dhṛṣṇvojaso mṛgā na bhīmās taviṣībhir arcinaḥ |
2.034.01c agnayo na śuśucānā ṛjīṣiṇo bhṛmiṁ dhamanto apa gā avṛṇvata ||

dhārāvarāḥ | marutaḥ | ghṛṣṇu-ojasaḥ | mṛgāḥ | na | bhīmāḥ | taviṣībhiḥ | arcinaḥ |
agnayaḥ | na | śuśucānāḥ | ṛjīṣiṇaḥ | bhṛmim | dhamantaḥ | apa | gāḥ | avṛṇvata ||2.034.01||

2.034.02a dyāvo na stṛbhiś citayanta khādino vy abhriyā na dyutayanta vṛṣṭayaḥ |
2.034.02c rudro yad vo maruto rukmavakṣaso vṛṣājani pṛśnyāḥ śukra ūdhani ||

dyāvaḥ | na | stṛ-bhiḥ | citayanta | khādinaḥ | vi | abhriyāḥ | na | dyutayanta | vṛṣṭayaḥ |
rudraḥ | yat | vaḥ | marutaḥ | rukma-vakṣasaḥ | vṛṣā | ajani | pṛśnyāḥ | śukre | ūdhani ||2.034.02||

2.034.03a ukṣante aśvām̐ atyām̐ ivājiṣu nadasya karṇais turayanta āśubhiḥ |
2.034.03c hiraṇyaśiprā maruto davidhvataḥ pṛkṣaṁ yātha pṛṣatībhiḥ samanyavaḥ ||

ukṣante | aśvān | atyān-iva | ājiṣu | nadasya | karṇaiḥ | turayante | āśu-bhiḥ |
hiraṇya-śiprāḥ | marutaḥ | davidhvataḥ | pṛkṣam | yātha | pṛṣatībhiḥ | sa-manyavaḥ ||2.034.03||

2.034.04a pṛkṣe tā viśvā bhuvanā vavakṣire mitrāya vā sadam ā jīradānavaḥ |
2.034.04c pṛṣadaśvāso anavabhrarādhasa ṛjipyāso na vayuneṣu dhūrṣadaḥ ||

pṛkṣe | tā | viśvā | bhuvanā | vavakṣire | mitrāya | vā | sadam | ā | jīra-dānavaḥ |
pṛṣat-aśvāsaḥ | anavabhra-rādhasaḥ | ṛjipyāsaḥ | na | vayuneṣu | dhūḥ-sadaḥ ||2.034.04||

2.034.05a indhanvabhir dhenubhī rapśadūdhabhir adhvasmabhiḥ pathibhir bhrājadṛṣṭayaḥ |
2.034.05c ā haṁsāso na svasarāṇi gantana madhor madāya marutaḥ samanyavaḥ ||

indhanva-bhiḥ | dhenu-bhiḥ | rapśadūdha-bhiḥ | adhvasma-bhiḥ | pathi-bhiḥ | bhrājat-ṛṣṭayaḥ |
ā | haṁsāsaḥ | na | svasarāṇi | gantana | madhoḥ | madāya | marutaḥ | sa-manyavaḥ ||2.034.05||

2.034.06a ā no brahmāṇi marutaḥ samanyavo narāṁ na śaṁsaḥ savanāni gantana |
2.034.06c aśvām iva pipyata dhenum ūdhani kartā dhiyaṁ jaritre vājapeśasam ||

ā | naḥ | brahmāṇi | marutaḥ | sa-manyavaḥ | narām | na | śaṁsaḥ | savanāni | gantana |
aśvām-iva | pipyata | dhenum | ūdhani | kartā | dhiyam | jaritre | vāja-peśasam ||2.034.06||

2.034.07a taṁ no dāta maruto vājinaṁ ratha āpānam brahma citayad dive-dive |
2.034.07c iṣaṁ stotṛbhyo vṛjaneṣu kārave sanim medhām ariṣṭaṁ duṣṭaraṁ sahaḥ ||

tam | naḥ | dāta | marutaḥ | vājinam | rathe | āpānam | brahma | citayat | dive-dive |
iṣam | stotṛ-bhyaḥ | vṛjaneṣu | kārave | sanim | medhām | ariṣṭam | dustaram | sahaḥ ||2.034.07||

2.034.08a yad yuñjate maruto rukmavakṣaso 'śvān ratheṣu bhaga ā sudānavaḥ |
2.034.08c dhenur na śiśve svasareṣu pinvate janāya rātahaviṣe mahīm iṣam ||

yat | yuñjate | marutaḥ | rukma-vakṣasaḥ | aśvān | ratheṣu | bhage | ā | su-dānavaḥ |
dhenuḥ | na | śiśve | svasareṣu | pinvate | janāya | rāta-haviṣe | mahīm | iṣam ||2.034.08||

2.034.09a yo no maruto vṛkatāti martyo ripur dadhe vasavo rakṣatā riṣaḥ |
2.034.09c vartayata tapuṣā cakriyābhi tam ava rudrā aśaso hantanā vadhaḥ ||

yaḥ | naḥ | marutaḥ | vṛka-tāti | martyaḥ | ripuḥ | dadhe | vasavaḥ | rakṣata | riṣaḥ |
vartayata | vapuṣā | cakriyā | abhi | tam | ava | rudrāḥ | aśasaḥ | hantana | vadhariti ||2.034.09||

2.034.10a citraṁ tad vo maruto yāma cekite pṛśnyā yad ūdhar apy āpayo duhuḥ |
2.034.10c yad vā nide navamānasya rudriyās tritaṁ jarāya juratām adābhyāḥ ||

citram | tat | vaḥ | marutaḥ | yāma | cekite | pṛśnyāḥ | yat | ūdhaḥ | api | āpayaḥ | duhuḥ |
yat | vā | nide | navamānasya | rudriyāḥ | tritam | jarāya | juratām | adābhyāḥ ||2.034.10||

2.034.11a tān vo maho maruta evayāvno viṣṇor eṣasya prabhṛthe havāmahe |
2.034.11c hiraṇyavarṇān kakuhān yatasruco brahmaṇyantaḥ śaṁsyaṁ rādha īmahe ||

tān | vaḥ | mahaḥ | marutaḥ | eva-yāvnaḥ | viṣṇoḥ | eṣasya | pra-bhṛthe | havāmahe |
hiraṇya-varṇān | kakuhān | yata-srucaḥ | brahmaṇyantaḥ | śaṁsyam | rādhaḥ | īmahe ||2.034.11||

2.034.12a te daśagvāḥ prathamā yajñam ūhire te no hinvantūṣaso vyuṣṭiṣu |
2.034.12c uṣā na rāmīr aruṇair aporṇute maho jyotiṣā śucatā goarṇasā ||

te | daśa-gvāḥ | prathamāḥ | yajñam | ūhire | te | naḥ | hinvantu | uṣasaḥ | vi-uṣṭiṣu |
uṣāḥ | na | rāmīḥ | aruṇaiḥ | apa | ūrṇute | mahaḥ | jyotiṣā | śucatā | go-arṇasā ||2.034.12||

2.034.13a te kṣoṇībhir aruṇebhir nāñjibhī rudrā ṛtasya sadaneṣu vāvṛdhuḥ |
2.034.13c nimeghamānā atyena pājasā suścandraṁ varṇaṁ dadhire supeśasam ||

te | kṣoṇībhiḥ | aruṇebhiḥ | na | añji-bhiḥ | rudrāḥ | ṛtasya | sadaneṣu | vavṛdhuḥ |
ni-meghamānāḥ | atyena | pājasā | su-candram | varṇam | dadhire | su-peśasam ||2.034.13||

2.034.14a tām̐ iyāno mahi varūtham ūtaya upa ghed enā namasā gṛṇīmasi |
2.034.14c trito na yān pañca hotṝn abhiṣṭaya āvavartad avarāñ cakriyāvase ||

tān | iyānaḥ | mahi | varūtham | ūtaye | upa | gha | it | enā | namasā | gṛṇīmasi |
tritaḥ | na | yān | pañca | hotṝn | abhiṣṭaye | ā-vavartat | avarān | cakriyā | avase ||2.034.14||

2.034.15a yayā radhram pārayathāty aṁho yayā nido muñcatha vanditāram |
2.034.15c arvācī sā maruto yā va ūtir o ṣu vāśreva sumatir jigātu ||

yayā | radhram | pārayatha | ati | aṁhaḥ | yayā | nidaḥ | muñcatha | vanditāram |
arvācī | sā | marutaḥ | yā | vaḥ | ūtiḥ | o iti | su | vāśrā-iva | su-matiḥ | jigātu ||2.034.15||


2.035.01a upem asṛkṣi vājayur vacasyāṁ cano dadhīta nādyo giro me |
2.035.01c apāṁ napād āśuhemā kuvit sa supeśasas karati joṣiṣad dhi ||

upa | īm | asṛkṣi | vāja-yuḥ | vacasyām | canaḥ | dadhīta | nādyaḥ | giraḥ | me |
apām | napāt | āśu-hemā | kuvit | saḥ | su-peśasaḥ | karati | joṣiṣat | hi ||2.035.01||

2.035.02a imaṁ sv asmai hṛda ā sutaṣṭam mantraṁ vocema kuvid asya vedat |
2.035.02c apāṁ napād asuryasya mahnā viśvāny aryo bhuvanā jajāna ||

imam | su | asmai | hṛdaḥ | ā | su-taṣṭam | mantram | vocema | kuvit | asya | vedat |
apām | napāt | asuryasya | mahnā | viśvāni | aryaḥ | bhuvanā | jajāna ||2.035.02||

2.035.03a sam anyā yanty upa yanty anyāḥ samānam ūrvaṁ nadyaḥ pṛṇanti |
2.035.03c tam ū śuciṁ śucayo dīdivāṁsam apāṁ napātam pari tasthur āpaḥ ||

sam | anyāḥ | yanti | upa | yanti | anyāḥ | samānam | ūrvam | nadyaḥ | pṛṇanti |
tam | ūm̐ iti | śucim | śucayaḥ | dīdi-vāṁsam | apām | napātam | pari | tasthuḥ | āpaḥ ||2.035.03||

2.035.04a tam asmerā yuvatayo yuvānam marmṛjyamānāḥ pari yanty āpaḥ |
2.035.04c sa śukrebhiḥ śikvabhī revad asme dīdāyānidhmo ghṛtanirṇig apsu ||

tam | asmerāḥ | yuvatayaḥ | yuvānam | marmṛjyamānāḥ | pari | yanti | āpaḥ |
saḥ | śukrebhiḥ | śikva-bhiḥ | revat | asme iti | dīdāya | anidhmaḥ | ghṛta-nirnik | ap-su ||2.035.04||

2.035.05a asmai tisro avyathyāya nārīr devāya devīr didhiṣanty annam |
2.035.05c kṛtā ivopa hi prasarsre apsu sa pīyūṣaṁ dhayati pūrvasūnām ||

asmai | tisraḥ | avyathyāya | nārīḥ | devāya | devīḥ | didhiṣanti | annam |
kṛtā-iva | upa | hi | pra-sarsre | ap-su | saḥ | pīyūṣam | dhayati | pūrva-sūnām ||2.035.05||

2.035.06a aśvasyātra janimāsya ca svar druho riṣaḥ sampṛcaḥ pāhi sūrīn |
2.035.06c āmāsu pūrṣu paro apramṛṣyaṁ nārātayo vi naśan nānṛtāni ||

aśvasya | atra | janima | asya | ca | svaḥ | druhaḥ | riṣaḥ | sam-pṛcaḥ | pāhi | sūrīn |
āmāsu | pūrṣu | paraḥ | apra-mṛṣyam | na | arātayaḥ | vi | naśan | na | anṛtāni ||2.035.06||

2.035.07a sva ā dame sudughā yasya dhenuḥ svadhām pīpāya subhv annam atti |
2.035.07c so apāṁ napād ūrjayann apsv antar vasudeyāya vidhate vi bhāti ||

sve | ā | dame | su-dughā | yasya | dhenuḥ | svadhām | pīpāya | su-bhu | annam | atti |
saḥ | apām | napāt | ūrjayan | ap-su | antaḥ | vasu-deyāya | vidhate | vi | bhāti ||2.035.07||

2.035.08a yo apsv ā śucinā daivyena ṛtāvājasra urviyā vibhāti |
2.035.08c vayā id anyā bhuvanāny asya pra jāyante vīrudhaś ca prajābhiḥ ||

yaḥ | ap-su | ā | śucinā | daivyena | ṛta-vā | ajasraḥ | urviyā | vi-bhāti |
vayāḥ | it | anyā | bhuvanāni | asya | pra | jāyante | vīrudhaḥ | ca | pra-jābhiḥ ||2.035.08||

2.035.09a apāṁ napād ā hy asthād upasthaṁ jihmānām ūrdhvo vidyutaṁ vasānaḥ |
2.035.09c tasya jyeṣṭham mahimānaṁ vahantīr hiraṇyavarṇāḥ pari yanti yahvīḥ ||

apām | napāt | ā | hi | asthāt | upa-stham | jihmānām | ūrdhvaḥ | vidyutam | vasānaḥ |
tasya | jyeṣṭham | mhimānam | vahantīḥ | hiraṇya-varṇāḥ | pari | yanti | yahvīḥ ||2.035.09||

2.035.10a hiraṇyarūpaḥ sa hiraṇyasaṁdṛg apāṁ napāt sed u hiraṇyavarṇaḥ |
2.035.10c hiraṇyayāt pari yoner niṣadyā hiraṇyadā dadaty annam asmai ||

hiraṇya-rūpaḥ | saḥ | hiraṇya-sandṛk | apām | napāt | saḥ | it | ūm̐ iti | hiraṇya-varṇaḥ |
hiraṇyayāt | pari | yoneḥ | ni-sadya | hiraṇya-dāḥ | dadati | annam | asmai ||2.035.10||

2.035.11a tad asyānīkam uta cāru nāmāpīcyaṁ vardhate naptur apām |
2.035.11c yam indhate yuvatayaḥ sam itthā hiraṇyavarṇaṁ ghṛtam annam asya ||

tat | asya | anīkam | uta | cāru | nāma | apīcyam | vardhate | naptuḥ | apām |
yam | indhate | yuvatayaḥ | sam | itthā | hiraṇya-varṇam | ghṛtam | annam | asya ||2.035.11||

2.035.12a asmai bahūnām avamāya sakhye yajñair vidhema namasā havirbhiḥ |
2.035.12c saṁ sānu mārjmi didhiṣāmi bilmair dadhāmy annaiḥ pari vanda ṛgbhiḥ ||

asmai | bahūnām | avamāya | sakhye | yajñaiḥ | vidhema | namasā | haviḥ-bhiḥ |
sam | sānu | mārjmi | didhiṣāmi | bilmaiḥ | dadhāmi | annaiḥ | pari | vande | ṛk-bhiḥ ||2.035.12||

2.035.13a sa īṁ vṛṣājanayat tāsu garbhaṁ sa īṁ śiśur dhayati taṁ rihanti |
2.035.13c so apāṁ napād anabhimlātavarṇo 'nyasyeveha tanvā viveṣa ||

saḥ | īm | vṛṣā | ajanayat | tāsu | garbham | saḥ | īm | śiśuḥ | dhayati | tam | rihanti |
saḥ | apām | napāt | anabhimlāta-varṇaḥ | anyasya-iva | iha | tanvā | viveṣa ||2.035.13||

2.035.14a asmin pade parame tasthivāṁsam adhvasmabhir viśvahā dīdivāṁsam |
2.035.14c āpo naptre ghṛtam annaṁ vahantīḥ svayam atkaiḥ pari dīyanti yahvīḥ ||

asmin | pade | parame | tasthi-vāṁsam | adhvasma-bhiḥ | viśvahā | dīdi-vāṁsam |
āpaḥ | naptre | ghṛtam | annam | vahantīḥ | svayam | atkaiḥ | pari | dīyanti | yahvīḥ ||2.035.14||

2.035.15a ayāṁsam agne sukṣitiṁ janāyāyāṁsam u maghavadbhyaḥ suvṛktim |
2.035.15c viśvaṁ tad bhadraṁ yad avanti devā bṛhad vadema vidathe suvīrāḥ ||

ayāṁsam | agne | su-kṣitim | janāya | ayāṁsam | ūm̐ iti | maghavat-bhyaḥ | su-vṛktim |
viśvam | tat | bhadram | yat | avanti | devāḥ | bṛhat | vadema | vidathe | su-vīrāḥ ||2.035.15||


2.036.01a tubhyaṁ hinvāno vasiṣṭa gā apo 'dhukṣan sīm avibhir adribhir naraḥ |
2.036.01c pibendra svāhā prahutaṁ vaṣaṭkṛtaṁ hotrād ā somam prathamo ya īśiṣe ||

tubhyam | hinvānaḥ | vasiṣṭa | gāḥ | apaḥ | adhukṣan | sīm | avi-bhiḥ | adri-bhiḥ | naraḥ |
piba | indra | svāhā | pra-hutam | vaṣaṭ-kṛtam | hotrāt | ā | somam | prathamaḥ | yaḥ | īśiṣe ||2.036.01||

2.036.02a yajñaiḥ sammiślāḥ pṛṣatībhir ṛṣṭibhir yāmañ chubhrāso añjiṣu priyā uta |
2.036.02c āsadyā barhir bharatasya sūnavaḥ potrād ā somam pibatā divo naraḥ ||

yajñaiḥ | sam-miślāḥ | pṛṣatībhiḥ | ṛṣṭi-bhiḥ | yāman | śubhrāsaḥ | añjiṣu | priyāḥ | uta |
ā-sadya | barhiḥ | bharatasya | sūnavaḥ | potrāt | ā | somam | pibata | divaḥ | naraḥ ||2.036.02||

2.036.03a ameva naḥ suhavā ā hi gantana ni barhiṣi sadatanā raṇiṣṭana |
2.036.03c athā mandasva jujuṣāṇo andhasas tvaṣṭar devebhir janibhiḥ sumadgaṇaḥ ||

amā-iva | naḥ | su-havāḥ | ā | hi | gantana | ni | barhiṣi | sadatana | raṇiṣṭana |
atha | mandasva | jujuṣāṇaḥ | andhasaḥ | tvaṣṭaḥ | devebhiḥ | jani-bhiḥ | sumat-gaṇaḥ ||2.036.03||

2.036.04a ā vakṣi devām̐ iha vipra yakṣi cośan hotar ni ṣadā yoniṣu triṣu |
2.036.04c prati vīhi prasthitaṁ somyam madhu pibāgnīdhrāt tava bhāgasya tṛpṇuhi ||

ā | vakṣi | devān | iha | vipra | yakṣi | ca | uśan | hotaḥ | ni | sada | yoniṣu | triṣu |
prati | vīhi | pra-sthitam | somyam | madhu | piba | āgnīdhrāt | tava | bhāgasya | tṛpṇuhi ||2.036.04||

2.036.05a eṣa sya te tanvo nṛmṇavardhanaḥ saha ojaḥ pradivi bāhvor hitaḥ |
2.036.05c tubhyaṁ suto maghavan tubhyam ābhṛtas tvam asya brāhmaṇād ā tṛpat piba ||

eṣaḥ | syaḥ | te | tanvaḥ | nṛmṇa-vardhanaḥ | sahaḥ | ojaḥ | pra-divi | bāhvoḥ | hitaḥ |
tubhyam | sutaḥ | maghavan | tubhyam | ā-bhṛtaḥ | tvam | asya | brāhmaṇāt | ā | tṛpat | piba ||2.036.05||

2.036.06a juṣethāṁ yajñam bodhataṁ havasya me satto hotā nividaḥ pūrvyā anu |
2.036.06c acchā rājānā nama ety āvṛtam praśāstrād ā pibataṁ somyam madhu ||

juṣethām | yajñam | bodhatam | havasya | me | sattaḥ | hotā | ni-vidaḥ | pūrvyāḥ | anu |
accha | rājānā | namaḥ | eti | ā-vṛtam | pra-śāstrāt | ā | pibatam | somyam | madhu ||2.036.06||


2.037.01a mandasva hotrād anu joṣam andhaso 'dhvaryavaḥ sa pūrṇāṁ vaṣṭy āsicam |
2.037.01c tasmā etam bharata tadvaśo dadir hotrāt somaṁ draviṇodaḥ piba ṛtubhiḥ ||

mandasva | hotrāt | anu | joṣam | andhasaḥ | adhvaryavaḥ | saḥ | pūrṇām | vaṣṭi | ā-sicam |
tasmai | etam | bharata | tat-vaśaḥ | dadiḥ | hotrāt | somam | draviṇaḥ-daḥ | piba | ṛtu-bhiḥ ||2.037.01||

2.037.02a yam u pūrvam ahuve tam idaṁ huve sed u havyo dadir yo nāma patyate |
2.037.02c adhvaryubhiḥ prasthitaṁ somyam madhu potrāt somaṁ draviṇodaḥ piba ṛtubhiḥ ||

yam | ūm̐ iti | pūrvam | ahuve | tam | idam | huve | saḥ | it | ūm̐ iti | havyaḥ | dadiḥ | yaḥ | nāma | patyate |
adhvaryu-bhiḥ | pra-sthitam | somyam | madhu | potrāt | somam | draviṇaḥ-daḥ | piba | ṛtu-bhiḥ ||2.037.02||

2.037.03a medyantu te vahnayo yebhir īyase 'riṣaṇyan vīḻayasvā vanaspate |
2.037.03c āyūyā dhṛṣṇo abhigūryā tvaṁ neṣṭrāt somaṁ draviṇodaḥ piba ṛtubhiḥ ||

medyantu | te | vahnayaḥ | yebhiḥ | īyase | ariṣaṇyan | vīḻayasva | vanaspate |
ā-yūya | dhṛṣṇo iti | abhi-gūrya | tvam | neṣṭrāt | somam | draviṇaḥ-daḥ | piba | ṛtu-bhiḥ ||2.037.03||

2.037.04a apād dhotrād uta potrād amattota neṣṭrād ajuṣata prayo hitam |
2.037.04c turīyam pātram amṛktam amartyaṁ draviṇodāḥ pibatu drāviṇodasaḥ ||

apāt | hotrāt | uta | potrāt | amatta | uta | neṣṭrāt | ajuṣata | prayaḥ | hitam |
turīyam | pātram | amṛktam | amartyam | draviṇaḥ-dāḥ | pibatu | drāviṇodasaḥ ||2.037.04||

2.037.05a arvāñcam adya yayyaṁ nṛvāhaṇaṁ rathaṁ yuñjāthām iha vāṁ vimocanam |
2.037.05c pṛṅktaṁ havīṁṣi madhunā hi kaṁ gatam athā somam pibataṁ vājinīvasū ||

arvāñcam | adya | yayyam | nṛ-vāhanam | ratham | yuñjāthām | iha | vām | vi-mocanam |
pṛṅktam | havīṁṣi | madhunā | ā | hi | kam | gatam | atha | somam | pibatam | vājinīvasū iti vājinī-vasū ||2.037.05||

2.037.06a joṣy agne samidhaṁ joṣy āhutiṁ joṣi brahma janyaṁ joṣi suṣṭutim |
2.037.06c viśvebhir viśvām̐ ṛtunā vaso maha uśan devām̐ uśataḥ pāyayā haviḥ ||

joṣi | agne | sam-idham | joṣi | ā-hutim | joṣi | brahma | janyam | joṣi | su-stutim |
viśvebhiḥ | viśvān | ṛtunā | vaso iti | mahaḥ | uśan | devān | uśataḥ | pāyaya | haviḥ ||2.037.06||


2.038.01a ud u ṣya devaḥ savitā savāya śaśvattamaṁ tadapā vahnir asthāt |
2.038.01c nūnaṁ devebhyo vi hi dhāti ratnam athābhajad vītihotraṁ svastau ||

ut | ūm̐ iti | syaḥ | devaḥ | savitā | savāya | śaśvat-tamam | tat-apāḥ | vahniḥ | asthāt |
nūnam | devebhyaḥ | vi | hi | dhāti | ratnam | atha | ā | abhajat | vīti-hotram | svastau ||2.038.01||

2.038.02a viśvasya hi śruṣṭaye deva ūrdhvaḥ pra bāhavā pṛthupāṇiḥ sisarti |
2.038.02c āpaś cid asya vrata ā nimṛgrā ayaṁ cid vāto ramate parijman ||

viśvasya | hi | śruṣṭaye | devaḥ | ūrdhvaḥ | pra | bāhavā | pṛthu-pāṇiḥ | sisarti |
āpaḥ | cit | asya | vrate | ā | ni-mṛgrāḥ | ayam | cit | vātaḥ | ramate | pari-jman ||2.038.02||

2.038.03a āśubhiś cid yān vi mucāti nūnam arīramad atamānaṁ cid etoḥ |
2.038.03c ahyarṣūṇāṁ cin ny ayām̐ aviṣyām anu vrataṁ savitur moky āgāt ||

āśu-bhiḥ | cit | yān | vi | mucāti | nūnam | arīramat | atamānam | cit | etoḥ |
ahyarṣūṇām | cit | ni | ayān | aviṣyām | anu | vratam | savituḥ | mokī | ā | agāt ||2.038.03||

2.038.04a punaḥ sam avyad vitataṁ vayantī madhyā kartor ny adhāc chakma dhīraḥ |
2.038.04c ut saṁhāyāsthād vy ṛtūm̐r adardhar aramatiḥ savitā deva āgāt ||

punariti | sam | avyat | vi-tatam | vayantī | madhyā | kartoḥ | ni | adhāt | śakma | dhīraḥ |
ut | sam-hāya | asthāt | vi | ṛtūn | adardhaḥ | aramatiḥ | savitā | devaḥ | ā | agāt ||2.038.04||

2.038.05a nānaukāṁsi duryo viśvam āyur vi tiṣṭhate prabhavaḥ śoko agneḥ |
2.038.05c jyeṣṭham mātā sūnave bhāgam ādhād anv asya ketam iṣitaṁ savitrā ||

nānā | okāṁsi | duryaḥ | viśvam | āyuḥ | vi | tiṣṭhate | pra-bhavaḥ | śokaḥ | agneḥ |
jyeṣṭham | mātā | sūnave | bhāgam | ā | adhāt | anu | asya | ketam | iṣitam | savitrā ||2.038.05||

2.038.06a samāvavarti viṣṭhito jigīṣur viśveṣāṁ kāmaś caratām amābhūt |
2.038.06c śaśvām̐ apo vikṛtaṁ hitvy āgād anu vrataṁ savitur daivyasya ||

sam-āvavarti | vi-sthitaḥ | jigīṣuḥ | viśveṣām | kāmaḥ | caratām | amā | abhūt |
śaśvān | apaḥ | vi-kṛtam | hitvī | ā | agāt | anu | vratam | savituḥ | daivyasya ||2.038.06||

2.038.07a tvayā hitam apyam apsu bhāgaṁ dhanvānv ā mṛgayaso vi tasthuḥ |
2.038.07c vanāni vibhyo nakir asya tāni vratā devasya savitur minanti ||

tvayā | hitam | apyam | ap-su | bhāgam | dhanva | anu | ā | mṛgayasaḥ | vi | tasthuḥ |
vanāni | vi-bhyaḥ | nakiḥ | asya | tāni | vratā | devasya | savituḥ | minanti ||2.038.07||

2.038.08a yādrādhyaṁ varuṇo yonim apyam aniśitaṁ nimiṣi jarbhurāṇaḥ |
2.038.08c viśvo mārtāṇḍo vrajam ā paśur gāt sthaśo janmāni savitā vy ākaḥ ||

yāt-rādhyam | varuṇaḥ | yonim | apyam | ani-śitam | ni-miṣi | jarbhurāṇaḥ |
viśvaḥ | mārtāṇḍaḥ | vrajam | ā | paśuḥ | gāt | stha-śaḥ | janmāni | savitā | vi | ā | akarityakaḥ ||2.038.08||

2.038.09a na yasyendro varuṇo na mitro vratam aryamā na minanti rudraḥ |
2.038.09c nārātayas tam idaṁ svasti huve devaṁ savitāraṁ namobhiḥ ||

na | yasya | indraḥ | varuṇaḥ | na | mitraḥ | vratam | aryamā | na | minanti | rudraḥ |
na | arātayaḥ | tam | idam | svasti | huve | devam | savitāram | namaḥ-bhiḥ ||2.038.09||

2.038.10a bhagaṁ dhiyaṁ vājayantaḥ puraṁdhiṁ narāśaṁso gnāspatir no avyāḥ |
2.038.10c āye vāmasya saṁgathe rayīṇām priyā devasya savituḥ syāma ||

bhagam | dhiyam | vājayantaḥ | puram-dhim | narāśaṁsaḥ | gnāḥpatiḥ | naḥ | avyāḥ |
ā-aye | vāmasya | sam-gathe | rayīṇām | priyāḥ | devasya | savituḥ | syāma ||2.038.10||

2.038.11a asmabhyaṁ tad divo adbhyaḥ pṛthivyās tvayā dattaṁ kāmyaṁ rādha ā gāt |
2.038.11c śaṁ yat stotṛbhya āpaye bhavāty uruśaṁsāya savitar jaritre ||

asmabhyam | tat | divaḥ | at-bhyaḥ | pṛthivyāḥ | tvayā | dattam | kāmyam | rādhaḥ | ā | gāt |
śam | yat | stotṛ-bhyaḥ | āpaye | bhavāti | uru-śaṁsāya | savitaḥ | jaritre ||2.038.11||


2.039.01a grāvāṇeva tad id arthaṁ jarethe gṛdhreva vṛkṣaṁ nidhimantam accha |
2.039.01c brahmāṇeva vidatha ukthaśāsā dūteva havyā janyā purutrā ||

grāvāṇā-iva | tat | it | artham | jarethe iti | gṛdhrā-iva | vṛkṣam | nidhi-mantam | accha |
brahmāṇā-iva | vidathe | uktha-śasā | dūtā-iva | havyā | janyā | puru-trā ||2.039.01||

2.039.02a prātaryāvāṇā rathyeva vīrājeva yamā varam ā sacethe |
2.039.02c mene iva tanvā śumbhamāne dampatīva kratuvidā janeṣu ||

prātaḥ-yāvānā | rathyā-iva | vīrā | ajā-iva | yamā | varam | ā | sacethe iti |
mene iveti mene-iva | tanvā | śumbhamāne iti | dampatī iveti dampatī-iva | kratu-vidā | janeṣu ||2.039.02||

2.039.03a śṛṅgeva naḥ prathamā gantam arvāk chaphāv iva jarbhurāṇā tarobhiḥ |
2.039.03c cakravākeva prati vastor usrārvāñcā yātaṁ rathyeva śakrā ||

śṛṇgā-iva | naḥ | prathamā | gantam | arvāk | śaphau-iva | jarbhurāṇā | taraḥ-bhiḥ |
cakravākā-iva | prati | vastoḥ | usrā | arvāñcā | yātam | rathyā-iva | śakrā ||2.039.03||

2.039.04a nāveva naḥ pārayataṁ yugeva nabhyeva na upadhīva pradhīva |
2.039.04c śvāneva no ariṣaṇyā tanūnāṁ khṛgaleva visrasaḥ pātam asmān ||

nāvā-iva | naḥ | pārayatam | yugā-iva | nabhyā-iva | naḥ | upadhī ivetyupadhī-iva | pradhī iveti pradhī-iva |
śvānā-iva | naḥ | ariṣaṇyā | tanūnām | khṛgalā-iva | vi-srasaḥ | pātam | asmān ||2.039.04||

2.039.05a vātevājuryā nadyeva rītir akṣī iva cakṣuṣā yātam arvāk |
2.039.05c hastāv iva tanve śambhaviṣṭhā pādeva no nayataṁ vasyo accha ||

vātā-iva | ajuryā | nadyā-iva | rītiḥ | akṣī ivetyakṣī-iva | cakṣuṣā | ā | yātam | arvāk |
hastau-iva | tanve | śam-bhaviṣṭhā | pādā-iva | naḥ | nayatam | vasyaḥ | accha ||2.039.05||

2.039.06a oṣṭhāv iva madhv āsne vadantā stanāv iva pipyataṁ jīvase naḥ |
2.039.06c nāseva nas tanvo rakṣitārā karṇāv iva suśrutā bhūtam asme ||

oṣṭhau-iva | madhu | āsne | vadantā | stanau-iva | pipyatam | jīvase | naḥ |
nāsā-iva | naḥ | tanvaḥ | rakṣitārā | karṇau-iva | su-śrutā | bhūtam | asme iti ||2.039.06||

2.039.07a hasteva śaktim abhi saṁdadī naḥ kṣāmeva naḥ sam ajataṁ rajāṁsi |
2.039.07c imā giro aśvinā yuṣmayantīḥ kṣṇotreṇeva svadhitiṁ saṁ śiśītam ||

hastā-iva | śaktim | abhi | sandadī iti sam-dadī | naḥ | kṣāmā-iva | naḥ | sam | ajatam | rajāṁsi |
imāḥ | giraḥ | aśvinā | yuṣma-yantīḥ | kṣṇotreṇa-iva | sva-dhitim | sam | śiśītam ||2.039.07||

2.039.08a etāni vām aśvinā vardhanāni brahma stomaṁ gṛtsamadāso akran |
2.039.08c tāni narā jujuṣāṇopa yātam bṛhad vadema vidathe suvīrāḥ ||

etāni | vām | aśvinā | vardhanāni | brahma | stomam | gṛtsa-madāsaḥ | akran |
tāni | narā | jujuṣāṇā | upa | yātam | bṛhat | vadema | vidathe | su-vīrāḥ ||2.039.08||


2.040.01a somāpūṣaṇā jananā rayīṇāṁ jananā divo jananā pṛthivyāḥ |
2.040.01c jātau viśvasya bhuvanasya gopau devā akṛṇvann amṛtasya nābhim ||

somāpūṣaṇā | jananā | rayīṇām | jananā | divaḥ | jananā | pṛthivyāḥ |
jātau | viśvasya | bhuvanasya | gopau | devāḥ | akṛṇvan | amṛtasya | nābhim ||2.040.01||

2.040.02a imau devau jāyamānau juṣantemau tamāṁsi gūhatām ajuṣṭā |
2.040.02c ābhyām indraḥ pakvam āmāsv antaḥ somāpūṣabhyāṁ janad usriyāsu ||

imau | devau | jāyamānau | juṣanta | imau | tamāṁsi | gūhatām | ajuṣṭā |
ābhyām | indraḥ | pakvam | āmāsu | antariti | somāpūṣa-bhyām | janat | usriyāsu ||2.040.02||

2.040.03a somāpūṣaṇā rajaso vimānaṁ saptacakraṁ ratham aviśvaminvam |
2.040.03c viṣūvṛtam manasā yujyamānaṁ taṁ jinvatho vṛṣaṇā pañcaraśmim ||

somāpūṣaṇā | rajasaḥ | vi-mānam | sapta-cakram | ratham | aviśva-minvam |
viṣu-vṛtam | manasā | yujyamānam | tam | jinvathaḥ | vṛṣaṇā | pañca-raśmim ||2.040.03||

2.040.04a divy anyaḥ sadanaṁ cakra uccā pṛthivyām anyo adhy antarikṣe |
2.040.04c tāv asmabhyam puruvāram purukṣuṁ rāyas poṣaṁ vi ṣyatāṁ nābhim asme ||

divi | anyaḥ | sadanam | cakre | uccā | pṛthivyām | anyaḥ | adhi | antarikṣe |
tau | asmabhyam | puru-vāram | puru-kṣum | rāyaḥ | poṣam | vi | syatām | nābhim | asme iti ||2.040.04||

2.040.05a viśvāny anyo bhuvanā jajāna viśvam anyo abhicakṣāṇa eti |
2.040.05c somāpūṣaṇāv avataṁ dhiyam me yuvābhyāṁ viśvāḥ pṛtanā jayema ||

viśvāni | anyaḥ | bhuvanā | jajāna | viśvam | anyaḥ | abhi-cakṣāṇaḥ | eti |
somāpūṣaṇau | avatam | dhiyam | me | yuvābhyām | viśvāḥ | pṛtanāḥ | jayema ||2.040.05||

2.040.06a dhiyam pūṣā jinvatu viśvaminvo rayiṁ somo rayipatir dadhātu |
2.040.06c avatu devy aditir anarvā bṛhad vadema vidathe suvīrāḥ ||

dhiyam | pūṣā | jinvatu | viśvam-invaḥ | rayim | somaḥ | rayi-patiḥ | dadhātu |
avatu | devī | aditiḥ | anarvā | bṛhat | vadema | vidathe | su-vīrāḥ ||2.040.06||


2.041.01a vāyo ye te sahasriṇo rathāsas tebhir ā gahi |
2.041.01c niyutvān somapītaye ||

vāyo iti | ye | te | sahasriṇaḥ | rathāsaḥ | tebhiḥ | ā | gahi |
niyutvān | soma-pītaye ||2.041.01||

2.041.02a niyutvān vāyav ā gahy ayaṁ śukro ayāmi te |
2.041.02c gantāsi sunvato gṛham ||

niyutvān | vāyo iti | ā | gahi | ayam | śukraḥ | ayāmi | te |
gantā | asi | sunvataḥ | gṛham ||2.041.02||

2.041.03a śukrasyādya gavāśira indravāyū niyutvataḥ |
2.041.03c ā yātam pibataṁ narā ||

śukrasya | adya | go-āśiraḥ | indravāyū iti | niyutvataḥ |
ā | yātam | pibatam | narā ||2.041.03||

2.041.04a ayaṁ vām mitrāvaruṇā sutaḥ soma ṛtāvṛdhā |
2.041.04c mamed iha śrutaṁ havam ||

ayam | vām | mitrāvaruṇā | sutaḥ | somaḥ | ṛta-vṛdhā |
mama | it | iha | śratam | havam ||2.041.04||

2.041.05a rājānāv anabhidruhā dhruve sadasy uttame |
2.041.05c sahasrasthūṇa āsāte ||

rājānau | anabhi-druhā | dhruve | sadasi | ut-tame |
sahasra-sthūṇe | āsāte iti ||2.041.05||

2.041.06a tā samrājā ghṛtāsutī ādityā dānunas patī |
2.041.06c sacete anavahvaram ||

tā | sam-rājā | gṛtāsutī iti ghṛta-āsutī | ādityā | dānunaḥ | patī |
sacete iti | anava-hvaram ||2.041.06||

2.041.07a gomad ū ṣu nāsatyāśvāvad yātam aśvinā |
2.041.07c vartī rudrā nṛpāyyam ||

go-mat | ūm̐ iti | su | nāsatyā | asva-vat | yātam | aśvinā |
vartiḥ | rudrā | nṛ-pāyyam ||2.041.07||

2.041.08a na yat paro nāntara ādadharṣad vṛṣaṇvasū |
2.041.08c duḥśaṁso martyo ripuḥ ||

na | yat | paraḥ | na | antaraḥ | ā-dadharṣat | vṛṣaṇvasū iti vṛṣaṇ-vasū |
duḥ-śaṁsaḥ | martyaḥ | ripuḥ ||2.041.08||

2.041.09a tā na ā voḻham aśvinā rayim piśaṅgasaṁdṛśam |
2.041.09c dhiṣṇyā varivovidam ||

tā | naḥ | ā | voḻham | aśvinā | rayim | piśaṅga-sandṛśam |
dhiṣṇyā | varivaḥ-vidam ||2.041.09||

2.041.10a indro aṅga mahad bhayam abhī ṣad apa cucyavat |
2.041.10c sa hi sthiro vicarṣaṇiḥ ||

indraḥ | aṅga | mahat | bhayam | abhi | sat | apa | cucyavat |
saḥ | hi | sthiraḥ | vi-carṣaṇiḥ ||2.041.10||

2.041.11a indraś ca mṛḻayāti no na naḥ paścād aghaṁ naśat |
2.041.11c bhadram bhavāti naḥ puraḥ ||

indraḥ | ca | mṛḻayāti | naḥ | na | naḥ | paścāt | agham | naśat |
bhadram | bhavāti | naḥ | puraḥ ||2.041.11||

2.041.12a indra āśābhyas pari sarvābhyo abhayaṁ karat |
2.041.12c jetā śatrūn vicarṣaṇiḥ ||

indraḥ | āśābhyaḥ | pari | sarvābhyaḥ | abhayam | karat |
jetā | śatrūn | vi-carṣaṇiḥ ||2.041.12||

2.041.13a viśve devāsa ā gata śṛṇutā ma imaṁ havam |
2.041.13c edam barhir ni ṣīdata ||

viśve | devāsaḥ | ā | gata | śṛṇuta | me | imam | havam |
ā | idam | barhiḥ | ni | sīdata ||2.041.13||

2.041.14a tīvro vo madhumām̐ ayaṁ śunahotreṣu matsaraḥ |
2.041.14c etam pibata kāmyam ||

tīvraḥ | vaḥ | madhu-mān | ayam | śuna-hotreṣu | matsaraḥ |
etam | pibata | kāmyam ||2.041.14||

2.041.15a indrajyeṣṭhā marudgaṇā devāsaḥ pūṣarātayaḥ |
2.041.15c viśve mama śrutā havam ||

indra-jyeṣṭhāḥ | marut-gaṇāḥ | devāsaḥ | pūṣa-rātayaḥ |
viśve | mama | śruta | havam ||2.041.15||

2.041.16a ambitame nadītame devitame sarasvati |
2.041.16c apraśastā iva smasi praśastim amba nas kṛdhi ||

ambi-tame | nadī-tame | devi-tame | sarasvati |
apraśastāḥ-iva | smasi | pra-śastim | amba | naḥ | kṛdhi ||2.041.16||

2.041.17a tve viśvā sarasvati śritāyūṁṣi devyām |
2.041.17c śunahotreṣu matsva prajāṁ devi didiḍḍhi naḥ ||

tve | viśvā | sarasvati | śritā | āyūṁṣi | devyām |
śuna-hotreṣu | matsva | pra-jām | devi | didiḍḍhi | naḥ ||2.041.17||

2.041.18a imā brahma sarasvati juṣasva vājinīvati |
2.041.18c yā te manma gṛtsamadā ṛtāvari priyā deveṣu juhvati ||

imā | brahma | sarasvati | juṣasva | vājinīvati |
yā | te | manma | gṛtsa-madāḥ | ṛta-vari | priyā | deveṣu | juhvati ||2.041.18||

2.041.19a pretāṁ yajñasya śambhuvā yuvām id ā vṛṇīmahe |
2.041.19c agniṁ ca havyavāhanam ||

pra | itām | yajñasya | śam-bhuvā | yuvām | it | ā | vṛṇīmahe |
agnim | ca | havya-vāhanam ||2.041.19||

2.041.20a dyāvā naḥ pṛthivī imaṁ sidhram adya divispṛśam |
2.041.20c yajñaṁ deveṣu yacchatām ||

dyāvā | naḥ | pṛthivī iti | imam | sidhram | adya | divi-spṛśam |
yajñam | deveṣu | yacchatām ||2.041.20||

2.041.21a ā vām upastham adruhā devāḥ sīdantu yajñiyāḥ |
2.041.21c ihādya somapītaye ||

ā | vām | upa-stham | adruhā | devāḥ | sīdantu | yajñiyāḥ |
iha | adya | soma-pītaye ||2.041.21||


2.042.01a kanikradaj januṣam prabruvāṇa iyarti vācam ariteva nāvam |
2.042.01c sumaṅgalaś ca śakune bhavāsi mā tvā kā cid abhibhā viśvyā vidat ||

kanikradat | januṣam | pra-bruvāṇaḥ | iyarti | vācam | aritā-iva | nāvam |
su-maṅgalaḥ | ca | śakune | bhavāsi | mā | tvā | kā | cit | abhi-bhā | viśvyā | vidat ||2.042.01||

2.042.02a mā tvā śyena ud vadhīn mā suparṇo mā tvā vidad iṣumān vīro astā |
2.042.02c pitryām anu pradiśaṁ kanikradat sumaṅgalo bhadravādī vadeha ||

mā | tvā | śyenaḥ | ut | vadhīt | mā | su-parṇaḥ | mā | tvā | vidat | iṣu-mān | vīraḥ | astā |
pitryām | anu | pra-diśam | kanikradat | su-maṅgalaḥ | bhadra-vādī | vada | iha ||2.042.02||

2.042.03a ava kranda dakṣiṇato gṛhāṇāṁ sumaṅgalo bhadravādī śakunte |
2.042.03c mā naḥ stena īśata māghaśaṁso bṛhad vadema vidathe suvīrāḥ ||

ava | kranda | dakṣiṇataḥ | gṛhāṇām | su-maṅgalaḥ | bhadra-vādī | śakunte |
mā | naḥ | stenaḥ | īśata | mā | agha-śaṁsaḥ | bṛhat | vadema | vidathe | su-vīrāḥ ||2.042.03||


2.043.01a pradakṣiṇid abhi gṛṇanti kāravo vayo vadanta ṛtuthā śakuntayaḥ |
2.043.01c ubhe vācau vadati sāmagā iva gāyatraṁ ca traiṣṭubhaṁ cānu rājati ||

pra-dakṣiṇit | abhi | gṛṇanti | kāravaḥ | vayaḥ | vadantaḥ | ṛtu-thā | śakuntayaḥ |
ubhe iti | vācau | vadati | sāma-gāḥ-iva | gāyatram | ca | traistubham | ca | anu | rājati ||2.043.01||

2.043.02a udgāteva śakune sāma gāyasi brahmaputra iva savaneṣu śaṁsasi |
2.043.02c vṛṣeva vājī śiśumatīr apītyā sarvato naḥ śakune bhadram ā vada viśvato naḥ śakune puṇyam ā vada ||

udgātā-iva | śakune | sāma | gāyasi | brahmaputraḥ-iva | savaneṣu | śaṁsasi |
vṛṣā-iva | vājī | śiśu-matīḥ | api-itya | sarvataḥ | naḥ | śakune | bhadram | ā | vada | viśvataḥ | naḥ | śakune | puṇyam | ā | vada ||2.043.02||

2.043.03a āvadam̐s tvaṁ śakune bhadram ā vada tūṣṇīm āsīnaḥ sumatiṁ cikiddhi naḥ |
2.043.03c yad utpatan vadasi karkarir yathā bṛhad vadema vidathe suvīrāḥ ||

ā-vadan | tvam | sakune | bhadram | ā | vada | tūṣṇīm | āsīnaḥ | su-matim | cikiddhi | naḥ |
yat | ut-patan | vadasi | karkariḥ | yathā | bṛhat | vadema | vidathe | suvīrāḥ ||2.043.03||



Notes by Detlef Eichler : 1. Please note that this text is not for commercial use and released only for personal scholarly activity. This transliteration version of Rigveda-Saṁhitā is from an ITRANS file which I have created on the basis of The Aufrecht/van Nooten/Holland (Samhita) version of theRigveda. The revised Padapāṭha is based on the text entered by the members of the Sansknet project. 2. Font: times new roman / Unicode 3. Hiatus ai, au are shown as aï, aü 4. Transliteration:
a ā i ï ī ī3 u ü ū ṛ ṝ ḷ e ai o au ṁ ḥ m̐ ' | k kh g gh ṅ c ch j jh ñ ṭ ṭh ḍ ḍh ṇ t th d dh n p ph b bh m y r l v ś ṣ s h ḻ ḻh 5. Last updated 8 September 2016